rKTs


H384

(e-text produced by ACIP)

see text in transliteration
76a
།རྒྱ་གར་སྐད་དུ་།ཏནྟྲ་རཱ་ཛ་ཤྲཱི་ལ་གྷུ་ས་ཝ་ར་ནཱ་མ། བོད་སྐད་དུ། རྒྱུད་ཀྱི་རྒྱལ་པོ་དཔལ་བདེ་མཆོག་ཉུང་ངུ་ཞེས་བྱ་བ། བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་ནས་གསང་བ་བཤད་པར་བྱ། །མདོར་བསྡུས་པ་སྟེ་རྒྱས་པར་མིན། །དཔལ་ཧེ་རུ་ཀ་ཡང་དག་སྦྱོར། །འདོད་པའི་དོན་ཀུན་སྒྲུབ་བྱེད་ཡིན། །བླ་མ་ལས་ཀྱང་བླ་མ་སྟེ། །མཁའ་འགྲོ་མ་ཡི་དྲ་བ་སྡོམ། །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །མཁའ་འགྲོ་ཀུན་དངོས་སེམས་དཔའ་ནི། །རྡོ་རྗེ་སེམས་དཔའ་བདེ་བའི་མཆོག་།འདི་ནི་རང་བྱུང་བཅོམ་ལྡན་དཔའ། ། མཁའ་འགྲོ་དྲ་བའི་སྡོམ་པ་ཡིན། །སྒྲ་ཡི་ཚུལ་ལས་ངེས་འབྱུང་རྣམས། །དམ་ཚིག་སྤྱོད་བའི་སྤྱོད་ཡུལ་ཡིན། །འཇིག་རྟེན་གསུམ་དུ་རྙེད་དཀའ་བ། །ཐོག་མ་དབུས་མཐར་ཡང་དག་གནས། །བསྲུབ་བྱ་སྲུབ་བྱེད་ཡང་དག་སྦྱར། །ཇི་ལྟ་བ་ནི་དེ་བཞིན་དུ། །སྔགས་བཟླས་བསམ་གཏན་ལ་སོགས་ལྡན། །སྦྱོར་ཉིད་ཆོ་གའི་ཡེ་ཤེས་ནི། །རྣལ་འབྱོར་བླ་ན་མེད་པ་ཡི། །
76b
རྒྱུད་ལས་གསུངས་པ་མཉན་པར་གྱིས། །དབུགས་འབྱིན་བར་མ་མཆོག་དག་དང ། །དྲི་ཡི་ཆུ་དང་བཅས་པས་ཀྱང ། །རྣལ་འབྱོར་པས་དུས་ཁྱད་པར་དུ། །རིགས་ལྡན་རྟག་ཏུ་མཆོད་པར་བྱ། །ཕོ་ཉ་ལྷན་ཅིག་སྐྱེས་གྲུབ་མ། །མཆོག་དང་འབྲིང་དང་ཐ་མ་སྟེ། །ཡིད་ནི་ནང་དུ་ཆུད་པ་ཡིས། །འདོད་པ་ཡི་ནི་དངོས་གྲུབ་བྱ། །རང་རྫས་ཐིག་ལེས་སངས་རྒྱས་དང ། །བྱང་ཆུབ་སེམས་དཔའ་མཆོད་པར་བྱ། །མཐོང་བ་དང་ནི་རེག་པ་དང ། །ཐོས་པ་འམ་ནི་དྲན་པ་ཡིས། །སྡིག་པ་ཀུན་ལས་གྲོལ་འགྱུར་བ། །དེ་ལྟ་ཉིད་དུ་ཐེ་ཚོམ། མེད། །རྣལ་འབྱོར་པ་ཉིད་བསོད་ནམས་མཆོག་།དག་བྱེད་སྡིག་པ་འཇོམས་བྱེད་པ། །གསང་སྔགས་བཟླས་དང་བསམ་གཏན་དང ། །བདེ་བས་ཀྱང་ནི་འགྲུབ་པར་འགྱུར། ། དམ་ཚིག་རྟག་ཏུ་བསྐྱང་བར་བྱ། །ཤིན་ཏུ་མཉམ་བཞག་སྒྲུབ་པ་པོས། །དམ་ཚིག་ཉམས་པས་དཀྱིལ་འཁོར་དུ། །དབང་བསྐུར་དངོས་གྲུབ་ཐོབ་མི་འགྱུར། །སྦྲང་རྩི་མར་དང་ག་པུར་བཅས། །ཙནྡན་དམར་པོ་དང་སྤྱར་བ། །ཚོགས་ཀྱི་ནང་དུ་བཞག་བ་ནི། །ཐམས་ཅད་རྡོར་མཚན་མཚན་མ་འཛིན། །མིང་མེད་མཐེ་བོང་རྩེ་སྦྱར་བས། །རྣལ་འབྱོར་རིག་པས་རྟག་ཏུ་སྤྱད། །མྱངས་པས་ཞི་བའི་བཏུང་བ་བཞིན། །དངོས་གྲུབ་རྟག་པ་ཐོབ་པར་འགྱུར། །འདི་ནི་མི་འཆི་བཅུ་ཕྱེད་འགྱུར། །དངོས་གྲུབ་ཐམས་ཅད་འཇུག་བྱེད་ཡིན། །
77a
༄#། །མཆོད་བཞི་དཔའ་བོ་ཆེན་པོ་ནི། །ཡིད་ལ་འདོད་པ་བྱེད་པ་སྟེ། །དབང་གཉིས་སྙོམས་པར་འཇུག་པ་ཡི། །སྙོམས་པར་ཞུགས་པའང་དེ་ཉིད་འཛིན། །ལྷ་དང་མི་ཡི་བདེ་བ་ནི། །བསྡུས་བྱས་རྡོ་རྗེ་འཛིན་པ་ཡིས། །དེ་ལྟ་བུར་ནི་བྱེད་པ་ཡི། །བཅུ་དྲུག་ཆར་ནི་མི་ཕོད་དོ། །རི་བོ་ཚང་ཚིང་སྨན་ལྗོངས་སམ། །ཆུ་བོ་ཆེ་རྣམས་ངོགས་དག་དང ། །གདོད་ནས་གྲུབ་པའི་དུར་ཁྲོད་དུ། །དེར་ནི་དཀྱིལ་འཁོར་བྲི་བར་བྱ། །དཔལ་ཧེ་རུ་ཀའི་ངེས་པར་བརྗོད་པ་ལས། དཀྱིལ་འཁོར་དུ་འཇུག་པའི་ལེའུ་སྟེ་དང་པོའོ།། །།དེར་ནི་ལྕི་བ་མ་ལྷུང་བས། །དཀྱིལ་འཁོར་ས་ནི་ཉེ་བར་བྱུག་།དུར་ཁྲོད་ཐལ་བར་ལྡན་པ་དང ། །བདུད་རྩི་ལྔ་དང་བཅས་པ་ཡིས། །དཀྱིལ་འཁོར་ས་ནི་ཉེར་བྱུགས་ཏེ། །དེར་ནི་དཀྱིལ་འཁོར་ཡང་དག་བརྩམ། །གནས་དེ་རུ་ནི་བསྒོམས་པ་ཡིས། །དུར་ཁྲོད་དུ་ནི་ཀུན་ཏུ་བརྟག་།རོ་བསྲེགས་སོལ་བའི་ཕྱེ་མ་དང ། །དུར་ཁྲོད་སོ་ཕག་ལྡན་པ་ཡི། །དཀྱིལ་འཁོར་བཟང་པོ་བྲི་བར་བྱ། །སློབ་དཔོན་དགེ་བའི་མཚན་ཉིད་ཅན། །ཡང་དག་ཤོས་ཤིང་རྒྱུད་ཤེས་པ། །དཔལ་ལྡན་ཁྲག་འཐུང་གསང་སྔགས་ཤེས། །ཁྲོ་མེད་གཙང་ཞིང་མཁས་པ་དང ། །སྦྱོར་ཤེས་ཡེ་ཤེས་ཕ་རོལ་འགྲོ། །ཐོད་པས་སྤྱི་བོར་
77b
བརྒྱན་བྱས་ཤིང ། །ཡན་ལག་བྲལ་བས་བྱུགས་པ་དང ། །གུག་སྐྱེད་དག་གིས་ལུས་བརྒྱན་ཅིང ། །རུས་པའི་ཕྲེང་ལ་སོགས་པས་བརྒྱན། །དུམ་གཅིག་སྤྱི་བོར་བརྒྱན་པ་དང་།། རུས་པའི་ཕྲེང་བ་རྣམ་པར་འཕྱང ། །ཁ་ཊྭཱཾ་ག་ནི་ལག་ན་གནས། །བདག་ཉིད་ཁྲག་འཐུང་དཔལ་བྱས་ནས། །དེ་འོག་ཁྲག་འཐུང་དཔལ་དྲན་བྱ། །འཁོར་ལོ་འདི་ནི་སྙིང་གར་དགོད། །བདག་ཉིད་དེ་ལྟར་གོ་བགོས་ནས། །ར་བ་རྣམས་ནི་ཕྱོགས་སུ་དགོད། །དེ་ལྟར་བདག་ཉིད་གོ་བགོས་ནས། །འོག་ཏུ་ཡང་ནི་མཚོན་ཆ་དགོད། །འཁོར་ལོ་མཚོན་ཆའི་ཕྲེང་བ་དག་།སྟེང་དུ་མདའ་ཡི་དྲ་བ་ཉིད། །སླར་ཡང་བདག་ཉིད་མཁའ་སྤྱོད་དུ། །གུར་བྱས་དེ་ནི་གོ་ཆར་འགྱུར། །དེ་ལྟར་གོ་ཆ་དེ་བགོས་ན། །སུམ་ཅུ་པས་ཀྱང་མི་ཕྱེད་དོ།། དེ་ལྟར་བདག་ཉིད་རབ་བསྲུངས་ཤིང ། །སྔགས་དང་ཕྱག་རྒྱས་རྣམ་བརྒྱན་ནས། །དངོས་གྲུབ་ཆེན་པོ་རབ་སྟེར་བའི། །དཀྱིལ་འཁོར་འཇིགས་པ་བྲི་བར་བྱ། །དེ་ནས་སེམས་མེད་སྲད་བུ་འམ། །རུ་དྷི་ར་ནི་ཆེན་པོས་བརླན། །ཧེ་རུ་ཀ་དཔལ་གྲོང་ཁྱེར་མཆོག་།དཀྱིལ་འཁོར་འཇིགས་པ་ཐིག་གདབ་བྱ། །ཁྲུ་གང་ཁྲུ་བཞིའམ་ཁྲུ་བརྒྱད་པ། །སྒོ་བཞི་ཀུན་ནས་ཟུར་བཞི་པ། །རྟ་བབས་བཞི་ཡིས་རྣམ་པར་བརྒྱན། །སྔགས་པས་ཉིས་འགྱུར་རྣམ་པར་སྤྱད། །མཁའ་འགྲོ་དྲ་བའི་བདེ་མཆོག་མཆོད། །དེ་ཡི་དབུས་སུ་པདྨ་ནི། །འདབ་བཅས་
78a
༄#། །ལྟེ་བར་འབར་དང་བཅས། །གེ་སར་ཡང་དག་ལྡན་པར་གཞག་།ལྟེ་བར་དགོད་བྱ་དཔའ་བོ་ནི། །འཇིགས་བྱེད་ཀྱང་ནི་འཇིགས་པར་མཛད། །མདངས་དང་ལྡན་ཞིང་རབ་ཏུ་འབར། །ཧ་ཧ་ཞེས་པའི་སྒྲ་ཆེར་བཞད། །ཐོད་པའི་ཕྲེང་བའི་རྒྱན་དང་ལྡན། །བཟང་པོ་སྤྱན་གསུམ་ཞལ་བཞི་མངའ། །གླང་པོའི་ཕགས་པ་རྣམ་པར་བགོས། །སྨིན་མ་བཟང་པོ་རྡོ་རྗེ་དབྱེས། །ཕྱག་ན་ཁ་ཊྭཱཾ་མི་ཐོད་བསྣམས། །བརྒྱ་ཕྱེད་ཕྲེང་བས་རྣམ་པར་བརྒྱན། །དེ་མདུན་གནས་པའི་ལྷ་མོ་ནི། །རྡོ་རྗེ་ཕག་མོ་རབ་འཇིགས་མ། །ཧེ་རུ་ཀ་དཔལ་ཆེ་ལ་ཕྱོགས། །སྤྱན་གསུམ་དྲག་པོའི་གཟུགས་ཅན་ཡིན། །ཀ་པཱ་ལ་ནི་ཨནྟྭ་ས་བཀང ། །ཁ་ནས་རུ་དྷི་ར་འཛག་ཅིང ། །ལྷ་དང་ལྷ་མིན་མིར་བཅས་པ།། ཕྱོགས་ཀུན་ཏུ་ནི་སྡིགས་མཛུབ་བྱེད། །མཁའ་མགྲོ་མ་ནི་ཉི་ཤུ་བཞི། །ཕག་མོ་ཡི་ནི་རིགས་ལས་བྱུང ། །ཕྱོགས་དང་ཕྱོགས་ཀྱི་མཚམས་རྣམས་དང ། །འཁོར་ལོའི་དབུས་སུ་མཆོད་པར་བྱ། །དེ་བཞིན་འདིར་ནི་དཔའ་བོ་ཡང ། །འཁོར་ལོར་ཡང་དག་གནས་པ་མཆོད། །སྒྲུབ་པོ་གལ་ཏེ་དངོས་གྲུབ་འདོད། །གཉིས་མེད་དཔའ་བོ་མཆོད་པར་བྱ། །དེ་ནས་བུམ་པ་བྱ་བ་ནི། །རྩ་པ་ནག་པོ་ལ་སོགས་མེད། །མུ་ཏིག་གསེར་དང་རིན་ཆེན་དང ། །བྱི་རུ་དངུལ་དང་ཟངས་མ་སྟེ། །བཟའ་བ་ཀུན་གྱིས་ལེགས་བཀང་བའི།།
78b
སྣོད་ནི་སྟེང་དུ་གཞག་པར་བྱ། །མགྲིན་པ་སླད་བུས་དཀྲི་བ་དང ། །ཁ་ནི་འདབ་མས་བརྒྱན་པར་བྱ། །གོས་ཟུང་གིས་ནི་ལེགས་དཀྲིས་པ། །བརྒྱད་ནི་སྒོ་རུ་རྣམ་པར་དགོད། །གོས་ཟུང་གིས་ནི་ལེགས་དཀྲིས་པའི། །བུམ་པ་དགུ་པ་དབུས་སུ་གཞག་།གསེར་རམ་དངུལ་ལམ་རིན་ཆེན་ནམ། །མུ་ཏིག་རྣམས་ཀྱིས་མཛེས་པར་བྱ། །དཀྱིལ་འཁོར་ཀུན་ཏུ་རིན་ཆེན་དང ། །གསེར་གྱིས་མཛེས་པར་སྤྲས་པར་བྱ། །གྲོང་མཆོག་ཡིད་འོང་མཆོད་པ་ནི། །གྲུབ་པ་ཉིད་དུ་ཐེ་ཚོམ་མེད། །བདག་ཉིད་ཀུན་ནས་ཞལ་ལ་ནི། །དྲི་ཡི་ཆུ་ཡིས་ལེགས་པར་གདབ། །གལ་ཏེ་དངོས་གྲུབ་མཆོག་འདོད་ན། །མར་མེ་བརྒྱ་ནི་དབུལ་བར་བྱ། །ནམ་མཁའི་མཁའ་འགྲོ་མ་རྣམས་ནི། །ཡིད་ཀྱིས་ཐམས་ཅད་སྟེང་དུ་དགོད། །ས་སྟེང་མཁའ་འགྲོ་མ་གང་ཡིན། །དཀྱིལ་འཁོར་ཀུན་ཏུ་དགོད་པར་བྱ། །གང་ཡང་ས་འོག་མཁའ་འགྲོ་མ། །དེ་ནི་ས་འོག་རྣམས་སུ་དགོད། །མ་མོ་ཐམས་ཅད་ཕྱོགས་དང་ནི། །ཕྱོགས་མཚམས་རྣམས་སུ་དགོད་པར་བྱ། །གལ་ཏེ་དངོས་གྲུབ་མཆོག་འདོད་ན། །དྲི་དང་མེ་ཏོག་དེ་བཞིན་སྤོས། །ཆོ་ག་བཞིན་དུ་དེ་བཞིན་མཆོད། །མར་མེ་བརྒྱ་ཡང་དབུལ་བྱ་ཞིང ། །དཔལ་ཧེ་རུ་ཀའི་དཀྱིལ་འཁོར་གནས། །དཔའ་བོ་རྣལ་འབྱོར་མ་རྣམས་མཆོད། །རྒྱལ་མཚན་དམར་དང་དེ་བཞིན་སེར། །དཀར་དང་ནག་དང་སེར་སྐྱ་དང ། །མེ་ཏོག་ཕྲེང་བ་དུ་མ་དང ། །དེ་བཞིན་
79a
༄#། །གོས་ནི་སྣ་ཚོགས་དང ། །བླ་རེ་དང་ནི་ཡོལ་བ་དག་།མཛེས་པ་ཇི་ལྟ་དེ་བཞིན་ཏེ། །དེ་བཞིན་བཟའ་བཅའ་བཏུང་བ་ཡིས། །རབ་མཉམ་བཞག་སྟེ་མཆོད་པར་བྱ། །དཔལ་ཧེ་རུ་ཀའི་ངེས་པར་བརྗོད་པ་ལས། འཁོར་ལོ་མཆོད་པའི་ཆོ་གའི་ལེའུ་སྟེ་གཉིས་པའོ།། །།དེ་ནས་སྒྲུབ་པོས་དངོས་ཀུན་གྱིས། །དང་པོར་སློབ་དཔོན་མཉེས་པར་བྱ། །གྲུབ་འདོད་ཤིན་དུ་མཉམ་བཞག་པས། །ཅི་ནུས་པས་ནི་བླ་མ་མཆོད། །དྲིལ་བུ་སྒྲ་ལྡན་དབྱངས་པ་དང ། །མེ་ཏོག་སྤོས་རྣམས་ཀྱིས་བརྒྱན་ཅིང ། །ཤིན་ཏུ་སྒྲ་སྙན་དྲིལ་པུ་དཀྲོལ། །སྒྲུབ་པ་པོ་ཡིས་རྔ་བརྡུང་ཞིང ། །ཧ་ཧ་ཞེས་ནི་བརྗོད་པར་བྱ། །དེ་ལྟར་ཆོ་ག་བཞིན་དཀྱིལ་འཁོར། །འདོད་པ་ཀུན་ལྡན་མཆོད་ནས་ནི། །བུ་སྡུག་དེ་དག་གདོང་པ་ལ། །དར་རས་ལེགས་པར་བཀབ་ནས་སུ། །ཐལ་མོ་མེ་ཏོག་གིས་བཀང་སྟེ། །ཡང་དག་པར་ནི་ཞུགས་པ་དག་།སྒྲུབ་པོ་ཤིན་ཏུ་མཉམ་བཞག་པས། །དེ་ནས་བསྐོར་བ་བྱས་ནས་ནི། །བློ་བཟང་ཡིད་ནི་མཉམ་བཞག་པ། །ཕོ་བྲང་ཉམས་དགར་གཞུག་པར་བྱ། །ལྷོ་ཡི་ཕྱོགས་སུ་ལུས་བསྟན་ལ། ། ཐལ་མོའི་མེ་ཏོག་དེ་ནས་དོར། །དཀྱིལ་འཁོར་སྟེང་དུ་དོར་བར་བྱ། །གང་དུ་མེ་ཏོག་དེ་ལྟུང་བ། །ཤྲཱི་ཧེ་རུ་ཀའི་གནས་སོགས་བསྟན། །དེ་ཡི་རིགས་ནི་རྣམ་བསྟན་ཏེ། །དེ་ནི་རིགས་
79b
དེའི་མིང་འགྱུར་བ། །སློབ་དཔོན་གྱིས་ནི་མིང་བསྟན་ཏོ། །དེ་ནས་སློབ་དཔོན་ལེགས་པར་ནི། །མཉམ་པར་བཞག་སྟེ་ཕྱག་རྒྱ་མཆོད། །དེ་ནས་སློབ་མ་ཕྱི་དེ་ཉོན། །ལས་ནི་ཡང་དག་སྤྱད་པར་བྱ། །མཚལ་ཆེན་ལན་གསུམ་བཟླས་པ་ཡིས། །དེ་རྣམས་སུ་ནི་ཐིག་ལེ་བྱ། །སློབ་མ་ཡི་ནི་གདོང་ཕྱེ་ལ། །དེ་ནས་དཀྱིལ་འཁོར་བསྟན་པར་བྱ། །ལྷ་གང་གི་ནི་གནས་གང་ཡིན། །དེར་ནི་ཡང་དག་བསྟན་པར་བྱ། །སློབ་དཔོན་དང་བཅས་ཕོ་བྲང་ལ། །དེ་ནས་སློབ་མས་རབ་བཏུད་ནས། །ཕྱིར་ཡང་གཡོན་ནས་བརྩམས་པ་ཡིས། །དེ་ནས་བསྐོར་བ་བྱས་ནས་ནི། །དཀྱིལ་འཁོར་དང་ནི་བླ་མ་ལ། །ཇི་བཞིན་ཆོ་གས་ཕྱག་བྱ་འོ། །དེ་ནས་བླ་མ་དག་ལ་ཡོན། །དེ་བཞིན་གཤེགས་པས་གསུངས་པ་དབུལ། །གསེར་ནི་བརྒྱ་སྟོང་དབུལ་བ་དང ། །རིན་ཆེན་རྣམ་པ་སྣ་ཚོགས་དང ། །རས་ནི་ཟུང་གྱུར་བརྒྱ་ཉིད་དང ། །གླང་པོ་རྟ་དང་ཡུལ་འཁོར་དང ། །རྣ་རྒྱན་འམ་ནི་གདུ་བུ་དང ། །མགུལ་གདུབ་སོར་གདུབ་དམ་པ་དང་།། གསེར་ལས་བྱས་པའི་མཆོད་ཕྱིར་ཐོགས། །ཆུང་མ་བཟང་དང་བུ་མོ་ཉིད། །བྲན་ཕོ་བྲན་མོ་སྲིང་མོ་རྣམས། །ཕྱག་བཙལ་ནས་ནི་དབུལ་བར་བྱ། །ཇི་སྐད་གསུངས་བཞིན་སློབ་མ་ནི། །བློ་དང་ལྡན་པས་བླ་མ་ལ། །དངོས་པོ་ཀུན་གྱིས་བདག་ཉིད་ནི། །དེ་བཞིན་དུ་ནི་དབུལ་བར་བྱ། །དེང་ནས་བརྩམས་ཏེ་བྲན་དུ་བདག་།ཁྱེད་ལ་བདག་གིས་ཕུལ་བ་ལགས།།
80a
༄#། །དེ་ནས་སྒྲུབ་པོས་རབ་ངེས་པར། །དེ་ལྟར་ཆོ་ག་བྱས་ནས་ནི། །དེ་ནས་དེ་ལ་མཁའ་འགྲོ་མ། །རྣལ་འབྱོར་མ་མོ་རྣམས་མཉེས་འགྱུར། །མཁའ་འགྲོ་མ་དང་ལཱ་མཱ་དང ། །ཁཎྜ་རོ་ཧི་གཟུགས་ཅན་མ། །སྒྲུབ་པོ་མཁའ་འགྲོ་མ་ལྷན་ཅིག་།དེ་དང་རྣམ་སྤྱོད་ཀུན་ཏུ་འགྲོ། །ཐམས་ཅད་སྒྲུབ་པོ་དེ་ཡི་ནི། །ཅི་བགྱི་བྱེད་པར་ཐེ་ཚོམ་མེད། །རྣལ་འབྱོར་འདི་ནི་སྒྲུབ་འགྱུར་ན། །འཇིག་རྟེན་གསུམ་དུ་མི་ལྡོག་ཅིང ། །མི་སྣང་ཕུག་དང་ནམ་མཁར་རྒྱུ། །རྐང་མགྱོགས་དེ་བཞིན་བཅུད་ཀྱིས་ལེན། །སྒྲུབ་པ་པོ་ཡི་འདོད་ཙམ་གྱིས། །རྟག་པར་རྒྱུན་དུ་བསྐྱེད་པར་འགྱུར། །གཟུགས་ནི་དུ་མ་བྱེད་པ་དང ། །ནམ་མཁའ་ལ་ནི་འགྲོ་བར་འགྱུར། །མཁའ་འགྲོ་རྣམས་ཀྱང་ཁྱད་པར་དུ།། སྐད་ཅིག་དེ་ལ་སྦྱོར་བསྐྱེད་དེ། །འགྲོ་བ་རྣམས་ཀྱང་ངེས་པར་གནོན། །ལྷན་ཅིག་བལྟས་པས་རྣལ་འབྱོར་པས། །སྔགས་པ་དཀྱིལ་འཁོར་མ་མཐོང་བར། །གང་ཞིག་རྣལ་འབྱོར་པ་ཉིད་འདོད། །མཁའ་ལ་ཁུ་ཚུར་གྱིས་བརྡེག་དང ། །སྨིག་རྒྱུའི་ཆུ་ནི་འཐུང་དང་མཚུངས། །རྣལ་འབྱོར་འདི་ནི་མཆོག་རབ་དང ། །སྦྱོར་བ་ཀུན་གྱི་དམ་པ་ཡིན། །གང་ཞིག་རྟག་ཏུ་འདོད་གྱུར་པ། །ལྷ་དང་ལྷ་མིན་མི་རྣམས་ཏེ། །འདི་དག་ཟིལ་གྱིས་གནོན་པར་འགྱུར། །རྒྱུད་འདི་རུ་ནི་དབང་བསྐུར་བས། །ཐམས་ཅད་ཀྱི་ནི་སྒྲུབ་པ་
80b
པོ། །དགོད་དང་ལྟ་དང་ལག་འཛིན་གྱིས། །འཁྱུད་དང་གཉིས་སྤྲད་ལ་སོགས་ལ། །དབང་བསྐུར་བར་ནི་གྱུར་པ་ཡིན། །ཐམས་ཅད་རྒྱུད་ལས་དམ་པ་འོ། །འདི་ནི་ལྷ་མི་ཟིལ་གནོན་འགྲོ། །དེ་ཉིད་བསྡུས་པའམ་སྡོམ་པའམ། །གསང་བའམ་རྡོ་རྗེ་འཇིགས་བྱེད་ལས། །དཀྱིལ་འཁོར་རྣམས་ཀྱི་རྒྱལ་པོ་འདི། །མ་བྱུང་འབྱུང་བར་མི་འགྱུར་རོ། །བཤད་དང་མ་བཤད་གང་ཅིའང་རུང ། །དེ་ཀུན་ཧེ་རུ་ཀ་ལ་གནས། །དཔལ་ཧེ་རུ་ཀའི་ངེས་པར་བརྗོད་པ་ལས། ཡོན་ཏན་དང་བཅས་པའི་དབང་བསྐུར་བའི་ཆོ་གའི་ལེའུ་སྟེ་གསུམ་པའོ།། །།དེ་ནས་མཁའ་འགྲོ་མ་རྣམས་ནི། །གནས་ན་རྣམ་པར་འགྱིང་བ་སྟེ། །བརྩོན་ཆེན་འཁོར་ལོས་བསྒྱུར་མ་དང ། །སྟོབས་ཆེན་མ་དང་རབ་དཔའ་མོ། །འཁོར་ལོའི་གོ་ཆ་ཆང་ཚོང་མ། །ཁཎྜ་རོ་ཧི་འཁོར་ལོའི་ཤུགས། །བྱ་གདོང་མ་དང་རྟ་རྣ་མོ། །ཤིན་ཏུ་བཟང་མོ་ལྗང་ལྷ་མོ། །ཆང་འཐུང་མ་དང་རླུང་ཤུགས་མ། །དེ་བཞིན་འཇིག་བྱེད་ཆེན་མོ་དང ། །ས་སྲུང་མ་དང་ཤིང་གྲིབ་མ། །ལངྐའི་དབང་ཕྱུག་མིའུ་ཐུང་མ། །དཔའ་བོའི་བློ་མ་སྣ་ཆེན་མ། །འོད་ལྡན་མ་དང་གཏུམ་མིག་མ། །རབ་གཏུམ་མ་སྟེ་སྒྲུབ་བྱེད་པའི། །མཁའ་འགྲོ་མ་ནི་ཉི་ཤུ་བཞི། །འདི་དག་སྔོན་ཉིད་སྒྲུབ་པ་ཡིན། །སྐུ་གསུང་ཐུགས་ཀྱི་དབུས་སུ་ནི། །ཇི་ལྟར་ཕྱི་རོལ་ནང་དེ་བཞིན། །རང་མིང་བརྗོད་པའི་སྔགས་ལ་ནི། །མཐར་ནི་ཧཱུཾ་ཧཱུཾ་ཕཊ་སྦྱར་ཏེ། །རྣལ་འབྱོར་རམ་མཆོ་
81a
༄#། །འདི་མཐོང་ན། །མེ་སྟེ་གཞན་དག་སོག་མར་མཚུངས། །ོཾ་ནི་ཀུན་ལ་གསལ་བྱེད་དེ། །གྲུབ་སྩོལ་འདོད་པ་ཐམས་ཅད་བྱེད། །དཔའ་བོ་ཉིད་འགྱུར་གྲུབ་པ་ནི། །ཁྱིམ་དུ་དཀྱིལ་འཁོར་མཐོང་བ་ཡིན། །དེ་ནས་དེ་རྟག་བསྒོམ་པར་བྱ། །དངོས་གྲུབ་དེ་བཞིན་གཤེགས་གསུངས་བཞིན། །དཔལ་ཧེ་རུ་ཀའི་ངེས་པར་བརྗོད་པ་ལས།་དཔའ་བོ་དང་རྣལ་འབྱོར་མ་གཉིས་སུ་མེད་པར་དགོས་པའི་ལེའུ་སྟེ་བཞི་པའོ།། །།དེ་ནས་ཐམས་ཅད་ཆོས་འབྱུང་བར། །སྣ་ཚོགས་ལྟེ་བར་མི་ཤིགས་དགེ་།སྔགས་པས་ཆོ་ག་བཞིན་དུ་བྲི། །ཆོས་ཀུན་གཅིག་ཏུ་བསྡུ་བར་བྱ། །འདིར་སྔགས་ཚིག་ནི་འདི་ཡིན་ཏེ། །ཱ་ལི་ཀཱ་ལི་མཉམ་བྱས་ནས། །སྡེ་ཚན་ལ་ནི་ཡོངས་བསྡོམས་པ། །བཞི་བཞི་རུ་ནི་ཤེས་བྱས་ལ། །ཐུབ་པ་མཆོག་གི་རེ་མིག་ལ། །དེར་གནས་དཔའ་བོ་བཏུ་བར་བྱ། །འདོད་དོན་ཐམས་ཅད་སྒྲུབ་བྱེད་པའོ། །བཞི་པའི་ལྔ་པ་གང་ཡིན་དང ། །ལྔ་པ་ཡི་ཡང་ལྔ་པ་དང ། །ལྔ་པ་ཡི་ནི་བཞི་པ་དང ། །དང་པོའི་གསུམ་པ་གང་ཡིན་དང ། །དེ་བཞིན་ཉི་ཤུ་རྩ་དགུ་པ། །བཞི་པའི་དང་པོ་གང་ཡིན་དང ། །མཐར་གནས་པ་ཡི་བཞི་པ་དང ། །དེ་ཉིད་ཀྱི་ནི་གཉིས་པ་དང ། །སུམ་ཅུ་པ་ནི་ཡང་དག་བླང ། །དེ་བཞིན་ཉི་ཤུ་དྲུག་པ་ཉིད། །དེ་དག་ཐམས་ཅད་ལེགས་བསྡུས་
81b
ལ། །དེ་བཞིན་བརྒྱ་ཡི་ཕྱེད་ཕྱེད་ཀྱང ། །དེ་ནས་སུམ་ཅུ་རྩ་གསུམ་གཟུང ། །དང་པོའི་དང་པོ་ཉིད་དག་དང ། །མཐར་གནས་པ་ཡི་གསུམ་པ་དང ། །དང་པོ་ཡི་ནི་གསུམ་པ་དང ། །སུམ་ཅུ་རྩ་གཉིས་ཉིད་དག་དང ། །བཞི་པ་ཡི་ནི་ལྔ་པ་དང ། །ལྔ་པ་ཡི་ཡང་བཞི་པ་དང ། །མཐར་གནས་པ་ཡི་དང་པོ་དང ། །གཉིས་པ་ཡི་ནི་གསུམ་པ་དང ། །གསུམ་པའི་དང་པོ་གང་ཡིན་དང ། །ལྔ་པ་ཡི་ཡང་ལྔ་པ་དང ། །དང་པོ་ཡི་ཡང་དང་པོ་དང ། །དེ་བཞིན་བཅུ་གཅིག་པ་ཉིད་དང ། །དེ་བཞིན་མཁས་པས་བཅུ་དྲུག་པ། །གསུམ་པའི་དང་པོ་གང་ཡིན་དང ། །དེ་བཞིན་ཉི་ཤུ་རྩ་དྲུག་པ། །བཞི་པའི་གསུམ་པ་གང་ཡིན་དང ། །ུཥྨ་ཥ་ཡི་གཉིས་པ་ཉིད། །དང་པོའི་དང་པོ་གང་ཡིན་དང ། །དེ་བཞིན་ཉི་ཤུ་རྩ་བདུན་པ། །ཉི་ཤུ་རྩ་བརྒྱད་པ་ཡང་ངོ་།། དང་པོ་ཡི་ནི་གསུམ་པ་དང ། །ལྔ་པ་ཡི་ཡང་བཞི་པ་དང ། །དེ་བཞིན་སུམ་ཅུ་རྩ་གཅིག་བླང ། །བཅོ་ལྔ་པ་ནི་ཉིད་དག་དང ། །དེ་བཞིན་ཉི་ཤུ་རྩ་ལྔ་པ། །དང་པོའི་གཉིས་པ་གང་ཡིན་དང ། །དེ་བཞིན་ཉི་ཤུ་རྩ་དྲུག་པ། །ཡི་གེ་སུམ་ཅུ་རྩ་གཉིས་དང ། །ུཥྨ་ཥ་ཡི་ཐ་མ་ཉིད། །སུམ་ཅུ་རྩ་གཉིས་པ་ཉིད་དང ། །ལྔ་པ་ཡི་ནི་བཞི་པ་དང ། །གཉིས་པ་ཡི་ནི་གསུམ་པ་དང ། །ལྔ་པ་ཡི་ནི་བཞི་པ་དང ། །ུཥྨ་ཥ་ཡི་གསུམ་པ་དང ། །གཞན་ཡང་ཉི་ཤུ་རྩ་བདུན་པ། །ནྟསྠ་ཡི་དང་པོ་དང ། །དེ་བཞིན་ཉི་ཤུ་རྩ་གཅིག་པ། །ནྟསྠ་ཡི་གཉིས་པ་དང་།།
82a
༄#། །དེ་བཞིན་ཡང་ནི་སུམ་ཅུ་པ། །ལྔ་པ་ཡི་ནི་དང་པོ་དང ། །ུཥྨ་ཥ་ཡི་དང་པོ་ཉིད། །དེ་བཞིན་ཡི་གེ་དྱ་ཉིད་དང ། །བཞི་པའི་དང་པོ་གང་ཡིན་དང ། ུཥྨའི་དང་པོ་གང་ཡིན་དང ། །དེ་བཞིན་ཉི་ཤུ་རྩ་བརྒྱད་པ། །དང་པོའི་གཉིས་པ་གང་ཡིན་དང ། །གསུམ་པའི་དང་པོ་ཉིད་དག་དང ། །དང་པོའི་གསུམ་པ་གང་ཡིན་དང་།། བཞི་པའི་བཞི་པ་གང་ཡིན་དང ། །ནྟསྠ་ཡི་གཉིས་པ་དང ། །གསུམ་པ་ཡི་ཡང་ལྔ་པ་དང ། །ཡི་གེ་བྱ་ནི་དེ་ནས་བླང ། །དང་པོ་ཡི་ནི་བཞི་པ་དང ། །དེ་ནས་བརྒྱད་པ་ཉིད་དག་དང ། །བཞི་པའི་ལྔ་པ་ཉིད་དག་ཡིན། །ལྔ་པ་ཡི་ཡང་ལྔ་པ་དང ། །དེ་བཞིན་ཉི་ཤུ་རྩ་བདུན་པ། །བཞི་པ་ཡི་ནི་བཞི་པ་དང ། །སླར་ཡང་ཉེ་ཤུ་རྩ་བདུན་པ། ། དེ་བཞིན་ཉི་ཤུ་རྩ་དྲུག་པ། །ཉི་ཤུ་རྩ་ལྔ་ཡང་དག་བླང ། །སུམ་ཅུ་རྩ་གསུམ་ཉིད་དག་དང ། །བཞི་པ་ཡི་ནི་བཞི་པ་དང ། །ལྔ་པ་ཡི་ནི་ལྔ་པ་དང ། །བཞི་པ་ཡི་ཡང་ལྔ་པ་དང ། །དང་པོའི་དང་པོ་ཉིད་དག་དང ། །དེ་བཞིན་ཉི་ཤུ་རྩ་བདུན་པ། །ནྟསྠ་ཡི་བཞི་པ་དང ། །དེ་བཞིན་ཉི་ཤུ་རྩ་གཅིག་པ། །ུཥྨ་ཥ་ཡི་གཉིས་པ་ཉིད། །དེ་བཞིན་ཉི་ཤུ་རྩ་དྲུག་པའོ། །དང་པོའི་དང་པོ་ཉིད་དང་ནི། །མཐར་གནས་པ་ཡི་གཉིས་པ་ཉིད། །གཉིས་པ་ཡི་ནི་དང་པོ་ཉིད། །དྲུག་པ་ཡི་ཡང་གཉིས་པའོ། །དང་པོ་ཡི་ནི་དང་པོ་
82b
དང ། །མཐར་གནས་གཉིས་པ་དེ་བཞིན་ཏེ། །གཉིས་པ་ཡི་ནི་དང་པོ་དང ། །བདུན་པ་ཡི་ནི་གཉིས་པ་དང ། །དྲུག་པ་ཡི་ཡང་གསུམ་པ་དང ། །བཞི་པ་ཡི་ཡང་ལྔ་པ་ལ། ། བཞི་པ་ཡིས་ནི་སྦྱར་བར་བྱ། །མཐར་གནས་པ་ཡི་བཞི་པ་དང ། །ལྔ་པ་ཡི་ཡང་ལྔ་པ་ལ། །བཞི་པ་ཡིས་ནི་གདན་དུ་བྱ། །ལྔ་པ་ཡི་ནི་དང་པོ་ལ། །འོག་ཏུ་མེ་ཡིག་གདན་དང་ལྡན། །ུཥྨ་ཥ་ཡི་གསུམ་དེ་བཞིན། །མཐར་གནས་པ་ཡི་དང་པོ་ཡང ། །བཞི་པ་ཡི་ནི་དང་པོ་ཉིད། །མེ་ཡིས་གདན་དུ་བྱས་པའོ། །བདུན་པ་ཡི་ནི་གསུམ་པ་དང ། །དྲུག་པ་ཡི་ཡང་དང་པོ་གང ། །ཀ་ཥར་གྲགས་པའི་དང་པོ་གཟུང ། །ལྔ་པ་ཡི་ནི་བཞི་པ་དང ། །མཐར་གནས་པ་ཡི་དང་པོ་གང ། །དེ་བཞིན་ཡང་ནི་རིལ་པོ་ཉིད། །ལྔ་པ་ཡི་ནི་བཞི་པ་དང ། །བདུན་པ་ཡི་ཡང་དང་པོ་དང ། །ུཥྨ་ཥ་ཡི་བཞི་པ་གཟུང ། །བདུན་པ་ཡི་ནི་བཞི་པ་ལ། །རྡོ་རྗེ་སེམས་དཔའ་ཕྱེ་བ་དག་།ུཥྨ་ཥ་ཡི་བཞི་པ་ཉིད། །འོད་བྱེད་གདན་དུ་བྱས་པའོ། །བདུན་པ་ཡི་ནི་བཞི་པ་ལ། །འོག་ཏུ་ཡང་ནི་མེ་ཡི་གདན། །ཚེག་དྲག་དང་ནི་ཡང་དག་ལྡན། །ལྔ་པ་ཡི་ནི་གཉིས་པ་དང ། །དེ་བཞིན་ཉི་ཤུ་གཉིས་པ་ཉིད། ། དྲུག་པ་ཡི་ནི་གཉིས་ཉིད་དང ། །དེ་བཞིན་བཅུ་གཅིག་པར་ནི་ངེས། །སླར་ཡང་ཉི་ཤུ་རྩ་གཉིས་གཟུང ། །གསུམ་པ་ཡི་ནི་དང་པོ་དང ། །བཞི་པ་ཡི་ནི་གསུམ་པ་དང ། །ུཥྨ་ཥ་
83a
༄#། །ཡི་བཞི་པ་ཉིད། །ལྔ་པ་ཡི་ནི་གསུམ་པ་དང ། །བདུན་པ་ཡི་ནི་བཞི་པ་དང ། །ཉི་ཤུ་གཅིག་པ་དེ་ནས་བཏུ། །གཉིས་པ་ཡི་ནི་དང་པོ་དང ། །ལྔ་པ་ཡི་ནི་དང་པོར་ངེས། །གཉིས་ལས་དྲུག་པའི་ཡི་གེའོ། །ལྔ་པ་ཡི་ནི་བཞི་པ་དང ། །དེ་བཞིན་ཀ་ཥར་གྲགས་ཉིད་དང ། །ཉི་ཤུ་བཞི་པ་དེ་ནས་བཏུ། །སླར་ཡང་རིལ་པོ་ཇི་བཞིན་དང ། །ལྔ་པ་ཡི་ནི་གསུམ་པ་དང ། །ུཥྨ་ཥ་ཡི་གསུམ་པ་དང ། །མཐར་གནས་པ་ཡི་གཉིས་པ་ཉིད། །ལྔ་པ་ཡི་ནི་བཞི་པ་དང ། །སླར་ཡང་འོད་བྱེད་སྦྱིན་པར་བྱ། ། ཡི་གེ་ཉི་ཤུ་འོག་ཏུ་ནི། །བཅུ་དྲུག་པ་ནི་གདན་དུ་བྱ། །འོག་ཏུ་མེ་ཡིས་གསལ་བྱས་ལ། །ལྔ་པ་ཡི་ནི་ལྔ་པ་དང ། །མཐར་གནས་པ་ཡི་གསུམ་པ་དང ། །ལྔ་པ་ཡི་ནི་གསུམ་པ་དང ། །དྲུག་པ་ཡི་ཡང་གསུམ་པ་དང ། །མཐར་གནས་པ་ཡི་བཞི་པ་དང ། །ཉི་ཤུ་ལྔ་པས་ཁྱད་པར་དབྱེ། །བཞི་པ་ཡི་ནི་ལྔ་པ་དང ། །གཉིས་པ་ཡི་ནི་གསུམ་པ་ལ། །ཉི་མའི་བུ་ཡིས་ཁྱད་པར་དབྱེ། །ུཥྨ་ཥ་ཡི་བཞི་པ་དང ། །འོག་ཏུ་བཅོ་ལྔ་པ་ཡི་གདན། །དང་པོ་ཡི་ཡང་གསུམ་པ་དང ། །དེ་ནས་མེ་ཡིས་གདན་དུ་བྱ། །བདུན་པ་ཡི་ནི་བཞི་པ་དང ། །འོག་ཏུ་བཅོ་ལྔ་པ་ཡི་གདན། །ུཥྨ་ཥ་ཡི་གསུམ་པ་ཉིད། །ལྔ་པ་ཡི་ནི་དང་པོ་ལ། །བཅུ་དྲུག་པ་ཡིས་གདན་དུའོ། །དེ་ནས་ཉི་ཤུ་
83b
གཅིག་པ་བླང ། །བཞི་པ་ཡི་ནི་དང་པོ་དང ། །མཐར་གནས་པ་ཡི་གསུམ་པ་དང ། །གཉིས་པ་ཡི་ནི་གསུམ་པ་དང ། །བཞི་པ་ཡི་ནི་དང་པོ་དང ། །ལྔ་པ་ཡི་ནི་བཞི་པ་དང ། །གསུམ་པ་ཡི་ནི་གསུམ་པ་དང ། །དང་པོ་ཡི་ནི་གསུམ་པ་དང ། །ུཥྨ་ཥ་ཡི་གསུམ་པ་ཉིད། །དེ་བཞིན་ཉི་ཤུ་རྩ་གཅིག་པ། །འོད་བྱེད་མཉམ་པར་མནན་པའོ། །ལྔ་པ་ཡི་ནི་གསུམ་པ་དང ། །བཞི་པ་ཡི་ནི་དང་པོ་དང ། །གསུམ་པ་ཡི་ནི་གསུམ་པ་ལ། །མེ་ཡིས་སྟེང་ནས་གསལ་བར་བྱ། །མཐར་གནས་པ་ཡི་དང་པོར་གསུངས། །དེ་ནས་ཡི་གེ་བཅུ་དྲུག་འོག། གསུམ་པ་ཡི་ནི་གསུམ་པ་དང ། །སྤྱི་བོར་མེ་ཡི་ཡི་གེས་མཚན། །དེ་བཞིན་ཉི་ཤུ་རྩ་དྲུག་ཉིད། །དང་པོ་ཡི་ནི་དང་པོ་དང ། །གཉིས་པ་ཡི་ནི་དང་པོ་དང ། །གསུམ་པ་ཡི་ནི་བཞི་པ་ལ། །བཅུ་གསུམ་པ་ཡིས་མནན་པའོ། །དང་པོའི་དང་པོ་དེ་བཞིན་ཏེ། །གཉིས་པ་ཡི་ནི་དང་པོ་དང ། །གསུམ་པ་ཡི་ནི་བཞི་པ་ཡི། །སྟེང་དུ་བཅུ་གསུམ་པ་ཉིད་དང ། ། ཨུཥྨ་ཥ་ཡི་བཞི་པ་ལ། །ཉི་ཤུ་བདུན་པས་གདན་དུ་བྱ། །ཡ་ཡིག་བརྒྱད་པའི་ས་བོན་ལ། །འོད་བྱེད་ཀྱིས་ནི་གསལ་བྱས་པ། །གཉིས་པ་ཡི་ནི་གསུམ་པ་ལ། །བཅོ་ལྔ་པ་ཡིས་གདན་དུ་བྱ། །གཉིས་པ་ཡི་ནི་གསུམ་པ་ལ། །གསུམ་པའི་ལྔ་པ་ལ་ནི་བསྐྱོན། །ཀ་ཥའི་ས་བོན་བཏུས་ནས་ནི། །ཉི་ཤུ་ལྔ་པས་གདན་དུ་བྱ། །རིལ་པོ་མཛེས་པ་བཏུས་ནས་ནི། །ཡི་
84a
༄#། །གེ་མ་ཡིས་གདན་དུ་བྱ། །ུཥྨ་ཥ་ཡི་བཞི་པ་ཉིད། །བདུན་པ་ཡི་ནི་བཞི་པ་དང ། །ཡ་ཚོགས་བརྒྱད་པའི་ས་བོན་དང ། །དེ་བཞིན་སུམ་ཅུ་གསུམ་པར་ངེས། །ལྔ་པའི་བདག་ཉིད་ཡོངས་བཏུས་ལ། །ཡང་ནི་དེ་ལ་གཉིས་པར་ངེས། །གཉིས་པ་ཡི་ནི་དང་པོ་དང ། །མཐར་གནས་པ་ཡི་གསུམ་པ་དང ། །དེ་བཞིན་སུམ་ཅུ་རྩ་གཉིས་པ། །དྲུག་པ་ཡི་ནི་གསུམ་པ་དང ། །བདུན་པ་ཡི་ནི་བཞི་པ་དང ། །དྲུག་པའི་གསུམ་པ་དེ་བཞིན་ཏེ། །ལྔ་པ་ཡི་ནི་བཞི་པ་དང ། །དྲུག་པ་ཡི་ནི་གསུམ་པ་སྟེ། །གཉིས་གཉིས་རྐང་པ་བཞི་ཡིན་ནོ། །རིག་པའི་རྒྱལ་པོའི་གསང་སྔགས་ཏེ། །བྱ་བ་ཐམས་ཅད་རབ་སྒྲུབ་པའོ། །འདི་ལས་ཤིན་ཏུ་མཆོག་གྱུར་པ། །འཇིག་རྟེན་གསུམ་ན་ཡོད་མིན་ཏེ། ། ཧེ་རུ་ཀ་དཔལ་སྔགས་ཤེས་ན། །མེ་སྟེ་གཞན་དག་སོག་མ་འདྲ། །རྩ་བའི་སྔགས་སུ་རབ་ཏུ་གྲགས། །དཔལ་ཧེ་རུ་ཀའི་ངེས་པར་བརྗོད་པ་ལས། །རྩ་བའི་སྔགས་ཡི་གེ་བཏུ་བའི་ཆོ་གའི་ལེའུ་སྟེ་ལྔ་པའོ།། །།གཞན་ཡང་ཡི་གེ་ཉི་ཤུ་གཉིས། །སྙིང་པོ་ཉེ་སྙིང་ཡི་གེ་བདུན། །ཡ་ཚོགས་བརྒྱད་པའི་ས་བོན་དང ། །དེ་བཞིན་གུག་སྐྱེད་བཅུ་གཉིས་ཀྱི། །ཡི་གེ་བར་མ་དོར་བྱས་ལ། །ཡན་ལག་དྲུག་ནི་ཧེ་རུ་ཀ་།དཔའ་བོ་དྲུག་དང་མཉམ་སྦྱོར་བ། །ཡི་གེ་རེ་རེར་ཡང་དག་གནས། །ོཾ་ན་མཿ སཝཱཧཱ་
84b
བཽ་ཥཊ། །ཧཱུཾ་ཧཱུཾ་ཕཊ་དང་ཡང་དག་ལྡན། །སྒྲུབ་པོས་སྙིང་པོར་ཤེས་པར་བྱ། །དང་པོ་སྙིང་ག་ཉིད་དུ་སྟེ། །གཉིས་པ་སྤྱི་བོར་ཤེས་པར་བྱ། །གསུམ་པ་སྤྱི་གཙུག་དག་ཏུ་སྦྱར། །བཞི་པ་གོ་ཆ་ཉིད་དུ་ཡིན། །ལྔ་པ་མིག་ཏུ་གྱུར་པ་སྟེ། །དྲུག་པ་མཚོན་ཆ་ཞེས་བྱར་འདོད། །དཔལ་ཧེ་རུ་ཀའི་ངེས་པར་བརྗོད་པ་ལས། །དཔའ་བོ་དྲུག་གི་གོ་ཆ་བཏུ་བའི་ལེའུ་སྟེ་དྲུག་པའོ།། །།དེ་ནས་དབྱངས་ཡིག་བཅུ་གསུམ་ཉིད། །ཡི་གེ་གཉིས་པ་དག་དང་སྦྱར། །དབྱངས་ཡིག་བཅུ་གཅིག་ཡང་དག་ལྡན། །ཡི་གེ་དྲུག་པར་བརྒྱན་པར་བྱ། །དབྱངས་ཀྱི་བཞི་པ་ཉིད་ཀྱང་ནི། །ཡི་གེ་བདུན་པ་ཉིད་དང་སྦྱར། །དབྱངས་ཡིག་བཅུ་གཅིག་པ་ཉིད་ནི། །མཁས་པས་ཡི་གེ་བརྒྱད་དང་སྦྱར། །དབྱངས་ཡིག་གཉིས་པ་དང་ལྡན་པར། །ཡི་གེ་དགུ་པས་བརྒྱན་པར་བྱ། །དབྱངས་ཀྱི་ཡི་གེ་གཉིས་པ་ཉིད། །ཡི་གེ་བཅུ་གཉིས་པ་དང་སྦྱར། །དབྱངས་ཡིག་གཉིས་པར་ལྡན་པ་ནི། །ཡི་གེ་ཉི་ཤུ་གཅིག་པར་གཟུང ། །མཁས་པས་ཡི་གེ་བཅུ་བཞི་པ། །ཡི་གེ་ཉི་ཤུ་བ་དང་སྦྱར། །དབྱངས་ཀྱི་གསུམ་པ་ཉིད་དག་ནི། །ཡི་གེ་བཅོ་ལྔ་པ་དང་སྦྱར། །དབྱངས་ཡིག་བཅོ་ལྔར་ཡང་དག་ལྡན། །ཡི་གེ་བཅུ་དྲུག་པ་མཛེས་བྱ། །དབྱངས་ཡིག་གསུམ་དང་ལྡན་པ་ཡི། །ཡི་གེ་བཅུ་བདུན་པ་རུ་འདོད། །དབྱངས་ཀྱི་གཉིས་པ་ཉིད་དག་ནི། །ཡི་གེ་བཅོ་བརྒྱད་པ་རུ་
85a
༄#། །སྦྱར། །དབྱངས་ཡིག་གི་ནི་གཉིས་པ་ཉིད། །ཡི་གེ་ཉི་ཤུ་གཅིག་པར་སྦྱར། །དབྱངས་ཡིག་ལྔ་པ་ཉིད་དང་ནི། །ཡི་གེ་ཉི་ཤུ་གསུམ་པར་སྦྱར། ། དབྱངས་ཡིག་བཅུ་གསུམ་པ་ཉིད་ནི། །ཡི་གེ་ཉི་ཤུ་བཞི་པར་སྦྱར། །སྡེ་ཚན་དང་པོ་བླངས་ནས་ནི། །ཡི་གེ་ཉི་ཤུ་ལྔ་པར་སྦྱར། །དབྱངས་ཡིག་གཉིས་པ་དང་ལྡན་པ། །ཡི་གེ་ཉི་ཤུ་རྩ་དྲུག་འགྱུར། །ཉི་ཤུ་བརྒྱད་པ་ཉིད་དག་ནི། །དབྱངས་ཡིག་བཅོ་ལྔ་པ་དང་སྦྱར། །གསུམ་པའི་དང་པོ་ཡང་དག་ལྡན། །འོག་མའི་ཆ་ནི་མེ་དང་བཅས། །དེ་བཞིན་དབྱངས་ཡིག་གཉིས་པར་སྦྱར། །ཡི་གེ་ཉི་ཤུ་རྩ་དགུ་པའོ། །ཡི་གེ་སུམ་ཅུ་རྩ་གཅིག་པ། །དབྱངས་ཡིག་གཉིས་པ་དག་དང་སྦྱར། །ཡི་གེ་སུམ་ཅུ་རྩ་གཉིས་པ། །དབྱངས་ཡིག་བཅུ་གསུམ་པ་དང་སྦྱར། །ཡི་གེ་སུམ་ཅུ་རྩ་གསུམ་པ། །ཉི་མར་ཡང་དག་ལྡན་པར་བྱ། །དབྱངས་ཡིག་བཞི་པ་ཉིད་དང་ནི། །ཡི་གེ་སུམ་ཅུ་བཞིར་ལྡན་པ། །འདོད་པའི་དོན་ཀུན་སྒྲུབ་བྱེད་ཡིན། །དབྱངས་ཡིག་ལྔ་པ་ཉིད་དག་ནི། །སུམ་ཅུ་བདུན་པར་ཡང་དག་ལྡན། །མཁའ་འགྲོ་མ་རྣམས་སྒྲུབ་བྱེད་ཡིན། །སུམ་ཅུ་བརྒྱད་པ་འདི་དག་ནི། །དབྱངས་ཡིག་གཉིས་པ་དང་སྦྱར་བ། །ལྷ་རྣམས་ཐམས་ཅད་སྒྲུབ་པ་ནི། །འདི་ཉིད་ཡིན་པར་ཐེ་ཚོམ་མེད། །བཞི་བཅུ་རྩ་གཉིས་པ་ཉིད་ལ། །འོག་གི་ཆར་ནི་སྒྲུབ་པ་པོ། །མེ་དང་སྦྱར་
85b
བ་བྱས་པ་ཉིད། །བཞི་བཅུ་གཉིས་པ་ཉིད་དག་ནི། །དབྱངས་ཡིག་ལྔ་པ་ཉིད་དང་སྦྱར། །ཡི་གེ་བཞི་བཅུ་ལྔ་པ་ནི། །དབྱངས་ཀྱི་ཡི་གེ་གཉིས་པར་སྦྱར། །དབྱངས་ཡིག་ལྔ་པ་ཉིད་དག་ཀྱང ། །བཞི་བཅུ་རྩ་དྲུག་པ་ལྡན་པ། །དཔའ་བོ་ཐམས་ཅད་རབ་མཆོད་ཡིན། །བཞི་བཅུ་རྩ་བདུན་པ་ཉིད་ནི། །དབྱངས་ཡིག་གཉིས་པ་དང་སྦྱར་བ། །འདི་ནི་རྡོ་རྗེ་སེམས་དཔའ་མཆོག་།དེ་བཞིན་ལྔ་བཅུ་རྩ་གཅིག་པ། །དབྱངས་ཡིག་ལྔ་པ་ཉིད་དག་གིས། །མཛེས་པ་མཆོག་ནི་ཡིན་པར་འདོད། །ལྔ་བཅུ་རྩ་གཉིས་པ་ཉིད་ནི། །དབྱངས་ཡིག་གཉིས་པ་དང་སྦྱར་བ། །ལྷ་རྣམས་ཐམས་ཅད་སྒྲུབ་བྱེད་ནི། །འདི་ཉིད་ཡིན་པར་ཐེ་ཚོམ་མེད། །དེ་བཞིན་ལྔ་བཅུ་རྩ་གསུམ་པ། །དབྱངས་ཡིག་བཅུ་གསུམ་པ་དང་སྦྱར། །ཡི་གེ་ལྔ་བཅུ་རྩ་དྲུག་པ། །དབྱངས་ཡིག་དྲུག་པ་དང་ཡང་སྦྱར། །དགྲ་རྣམས་ངེས་པར་གསོད་བྱེད་ཡིན། །ནྟསྠ་ཡི་བཞི་པ་དང ། །དབྱངས་ཡིག་གཉིས་པར་སྦྱར་བར་བྱ། །དེ་བཞིན་བཅོ་ལྔ་པ་དང་སྦྱར། །དངོས་གྲུབ་ཐམས་ཅད་གྲུབ་པ་ཡིན། །ཡི་གེ་ལྔ་བཅུ་རྩ་དགུར་འགྱུར། །ཡི་གེ་དྲུག་ཅུ་རྩ་གཅིག་ཉིད། །དབྱངས་ཡིག་གཉིས་པ་དག་དང་སྦྱར། །འདི་ཉིད་མཆོག་ནི་ཡིན་པར་བཤད། །དེ་བཞིན་དྲུག་ཅུ་རྩ་གཉིས་པ། །དབྱངས་ཡིག་གསུམ་པར་སྦྱར་བ་ནི། །མཁའ་འགྲོ་མ་ཡི་མཆོག་ཏུ་འདོད། །ཡི་གེ་དྲུག་ཅུ་རྩ་གསུམ་ཉིད། །དབྱངས་ཡིག་
86a
༄#། །བཅུ་གཅིག་ཡང་དག་ལྡན། །མཛེས་པའི་ཡི་གེ་ཀུན་མཆོད་ཉིད། །དེ་བཞིན་དྲུག་ཅུ་རྩ་ལྔ་པ། །རྡོ་རྗེ་སེམས་དཔས་ཕྱེ་བ་དག་།ས་བོན་འདི་ནི་ལྷ་རྫས་མཆོག་།སྒྲུབ་སྦྱིན་ཐར་པ་སྦྱིན་ཆེན་པོ། །ཡི་གེ་དྲུག་ཅུ་རྩ་དྲུག་པ། །དབྱངས་ཡིག་གསུམ་པ་དང་ཡང་སྦྱར། །བྱ་བ་ཀུན་ལ་སྒྲུབ་སྦྱིན་པར། །དེ་ལྟར་དེ་བཞིན་གཤེགས་པས་གསུངས། །ཡི་གེ་དྲུག་ཅུ་རྩ་བདུན་པ། །དབྱངས་ཡིག་གཉིས་པར་ཡང་དག་ལྡན། །རྣལ་འབྱོར་མ་ཡི་བྱ་བ་ཀུན། །འདི་ཉིད་ཡིན་པར་ཐེ་ཚོམ་མེད། །དྲུག་ཅུ་བརྒྱད་པ་ཉིད་ལ་ཡང ། །དེར་ནི་ཡི་གེ་པ་སྦྱར་བ། །ས་བོན་ཡི་གེ་འདི་ཡི་ནི། །འོག་གི་ཆར་ནི་བརྟག་པར་བྱ། །ཡི་གེ་བདུན་ཅུ་རྩ་གཅིག་པ། །དབྱངས་ཡིག་གཉིས་པར་ཡང་དག་སྦྱར།། ཡི་གེ་ཀུན་ལ་མཛེས་པ་ནི། །འདི་ཉིད་ཡིན་པར་ཐེ་ཚོམ་མེད། །བདུན་ཅུ་རྩ་བཞི་པ་ཉིད་ནི། །དབྱངས་ཡིག་གཉིས་པར་སྦྱར་བ་དག་།གདོད་ནས་གྲུབ་པ་ཡིན་པར་ནི། །དེ་བཞིན་གཤེགས་པའི་ཞལ་ནས་གསུངས། །ཡི་གེ་བདུན་ཅུ་ལྔ་པ་ཉིད། །མ་མོ་དྲུག་པ་དང་ལྡན་པ། །འདི་ནི་རྣལ་འབྱོར་རབ་མཆོག་སྟེ། །བྱ་བ་ཀུན་ལ་དམ་པ་ཡིན། ། བདུན་ཅུ་རྩ་དྲུག་པ་ཉིད་ནི། །དབྱངས་ཡིག་གཉིས་པ་དང་ལྡན་ཞིང ། །ཉི་མ་ཡིས་ནི་དབྱེ་བྱ་སྟེ། །ཡི་གེ་པ་ནི་དེར་སྦྱར་བྱ། །མཆོག་ཏུ་མཛེས་པ་གཞན་ཡོད་མིན། །ཡི་གེ་བདུན་
86b
ཅུ་རྩ་བདུན་པ། །དེར་ནི་དྷ་དང་སྦྱར་བར་བྱ། །ས་བོན་འདི་ནི་རྫས་ཀྱི་མཆོག་།མཁའ་འགྲོ་མ་ཡི་མཛེས་པར་འདོད། །བདུན་ཅུ་རྩ་བརྒྱད་པ་ཉིད་ནི། །དབྱངས་ཡིག་གཉིས་པ་དང་ལྡན་ཞིང་།། ས་བོན་འདི་ནི་མཆོག་བཟང་པོ། །རྒྱུ་ཡི་མཆོག་ནི་ཡིན་པར་འདོད། །ཡི་གེ་བརྒྱད་ཅུ་རྩ་གཅིག་པ། །བཞི་པའི་མཐའ་ཡི་ཁྱད་པར་གྱིས། །གདོད་ནས་གྲུབ་བྱེད་འདི་ཡིན་ཏེ། །དངོས་གྲུབ་ཀུན་ལ་འཇུག་བྱེད་པའོ། །ཡི་གེ་བརྒྱད་ཅུ་རྩ་གཉིས་པ། །དབྱངས་ཡིག་གཉིས་པ་དང་སྦྱར་བྱ། །མ་མོ་རྣམས་ལས་ལྔ་པ་ཉིད། །དེ་བཞིན་ཡི་གེ་བརྒྱད་ཅུ་བརྒྱད། །མ་མོ་དག་ལས་ལྔ་པ་ཉིད། །ཡི་གེ་བརྒྱད་ཅུ་རྩ་དགུ་པ། །མ་མོ་རྣམས་ལས་ལྔ་པ་ཉིད། །དེ་བཞིན་ཡི་གེ་དགུ་བཅུ་པ། །མ་མོ་དག་ལས་ལྔ་པ་དང ། །ཡི་གེ་དགུ་ཅུ་རྩ་གཅིག་པ། །མ་མོ་རྣམས་ལས་གཉིས་པ་ཉིད། །ཡི་གེ་དགུ་བཅུ་རྩ་དྲུག་པ། །དབྱངས་དག་ལས་ནི་གཉིས་པ་དང ། །ཡི་གེ་དགུ་བཅུ་རྩ་དགུ་པ། །གདུག་པ་རྣམས་ནི་སྐྲག་བྱེད་ཅིང ། །སྔགས་པ་རྣམས་ལ་བདེ་འབྱུང་བྱེད། །དབྱངས་\?\་རྣམས་ཀྱི་ནི་བཅུ་གསུམ་པ། །ཡི་གེ་གཉིས་པར་ཡང་དག་ལྡན། །དབྱངས་ལས་བཅུ་གསུམ་པ་ཉིད་དང ། །ཡི་གེ་ལྔ་པར་ཡང་དག་ལྡན།། གདུག་པ་རྣམས་ནི་ཟད་བྱེད་ཅིང ། །མཁའ་འགྲོ་རྣམས་ཀྱི་བདེ་འབབ་པའོ། །དབྱངས་རྣམས་ལས་ནི་བཅུ་བཞི་ཉིད། །ཡི་གེ་བརྒྱད་པར་ཡང་དག་ལྡན། །བཅོ་ལྔ་པ་ཡི་གདན་དུ་
87a
༄#། །བྱ། །དབྱངས་དག་ལས་ནི་བཅུ་བཞི་པ། །ཡི་གེ་དགུ་པར་ཡང་དག་ལྡན། །སྤྱི་བོར་ཐིག་ལེས་མཚན་པའོ། །སྒྲུབ་པོ་མཁའ་འགྲོ་མ་རྣམས་ནི། །ཁྱད་པར་དུ་ནི་དགའ་བྱེད་པའོ། །དབྱངས་རྣམས་ལས་ནི་བཅུ་གཅིག་པ། །བཅུ་གཉིས་པ་ཡི་ཡང་དག་ལྡན། །སྤྱི་བོར་ཐིག་ལེས་མཚན་པའོ། །འབྱུང་པོ་ཐམས་ཅད་སྐྲག་བྱེད་ཅིང ། །སྒྲུབ་པོ་རྣམས་ལ་ཕན་འབྱུང་བའོ། །བཅུ་གཅིག་པར་ནི་ཡང་དག་ལྡན། །ཡི་གེ་བཅུ་གསུམ་པ་ཉིད་ལ། །ཐིག་ལེས་རྣམ་པར་བརྒྱན་པའོ། ། འབྱུང་པོ་ཐམས་ཅད་སྐྲག་བྱེད་ཅིང ། །སྒྲུབ་པོ་རྣམས་ལ་ཕན་འབྱུང་བའོ། །དབྱངས་རྣམས་ལས་ནི་\?\་པ་ཉིད། །ཡི་གེ་སུམ་ཅུ་གཉིས་པར་ལྡན། །དབྱངས་རྣམས་ལས་ནི་གསུམ་པ་དང ། །ཡི་གེ་སུམ་ཅུ་གསུམ་པར་ལྡན། །དབྱངས་ཀྱི་གཉིས་པ་ཉིད་དང་ནི། །ཡི་གེ་སུམ་ཅུ་བཞི་པར་ལྡན། །དབྱངས་རྣམས་ལས་ནི་གཉིས་པ་ཉིད། ། ཡི་གེ་སུམ་ཅུ་དྲུག་པར་ལྡན། །ཐོག་མའི་གཉིས་པར་ཡང་དག་ལྡན། །ཡི་གེ་སུམ་ཅུ་རྩ་བདུན་པ། །དབྱངས་ལས་གསུམ་པར་ཡང་དག་ལྡན། །ཡི་གེ་བཞི་བཅུ་པ་ལའོ། །མ་མོའི་བཅུ་གཅིག་ཡང་དག་ལྡན། །ཡི་གེ་བཞི་བཅུ་རྩ་གཅིག་པ། །དབྱངས་དག་ལས་ནི་གསུམ་པ་ཉིད། །ཡི་གེ་བཞི་བཅུ་གཉིས་པར་ལྡན། །དབྱངས་དག་ལས་ནི་གསུམ་པ་
87b
ཉིད། །ཡི་གེ་བཞི་བཅུ་བཞི་པར་ལྡན། །མ་མོ་ལས་ནི་གཉིས་པ་ཉིད། །ཡི་གེ་བཞི་བཅུ་བརྒྱད་པར་ལྡན། །དབྱངས་དག་ལས་ནི་གཉིས་པ་ཉིད། །ཡི་གེ་བཞི་བཅུ་དགུ་པར་ལྡན། །མ་མོ་ལས་ནི་ལྔ་པ་ཉིད། །ཡི་གེ་ལྔ་བཅུ་གསུམ་པར་ལྡན། །ཡི་གེ་ལྔ་བཅུ་རྩ་བཞི་པ། །ཐིག་ལེས་ཀྱང་ནི་རྣམ་བརྒྱན་པའོ། །ཡི་གེ་ལྔ་བཅུ་རྩ་ལྔ་པ། །སྤྱི་བོར་ཐིག་ལེས་མཚན་པ་ལ།། དབྱངས་ཀྱི་གཉིས་པར་སྦྱར་བ་འོ། །ཡི་གེ་ལྔ་བཅུ་རྩ་བདུན་པ། །སྤྱི་བོར་ཐིག་ལེས་མནན་པ་འོ། །དབྱངས་རྣམས་ལས་ནི་གཉིས་པ་ཉིད། །ཡི་གེ་ལྔ་བཅུ་རྩ་བརྒྱད་པ། །མ་མོ་ལས་ནི་གཉིས་པ་ཉིད། །ཡི་གེ་དྲུག་ཅུ་ལྔ་པ་ལའོ། །མ་མོ་ལས་ནི་གཉིས་པ་ཉིད། །ཡི་གེ་དྲུག་ཅུ་བརྒྱད་པར་ལྡན། །དངོས་གྲུབ་ཐམས་ཅད་འགུགས་བྱེད་ཅིང ། །སྒྲུབ་པོ་རྣམས་ལ་དཔལ་སྦྱིན་པའོ། །མ་མོ་ལས་ནི་བཞི་པ་ཉིད། །ཡི་གེ་བདུན་ཅུ་གཅིག་པར་ལྡན། །ཐིག་ལེས་ཀྱང་ནི་རྣམ་པར་བརྒྱན། །མ་མོ་ལས་ནི་བཞི་པ་ཉིད། །ཡི་གེ་བདུན་ཅུ་གཉིས་པར་ལྡན། །སེམས་ཅན་ཐམས་ཅད་དབང་བྱེད་པ། །ཐིག་ལེ་ཡིས་ནི་མཉམ་པར་མནན། །དབྱངས་ཀྱི་བཅུ་བཞི་པར་ངེས་ལྡན། །ཡི་གེ་བདུན་ཅུ་རྩ་གསུམ་པའོ།། མ་མོ་ལས་ནི་བཅུ་བཞི་པ། །ཡི་གེ་བདུན་ཅུ་བཞི་པར་ལྡན། །དེ་བཞིན་ཐིག་ལེས་རྣམ་བརྒྱན་པའོ། །དབྱངས་རྣམས་ལས་ནི་གཉིས་པ་ཉིད། །ཡི་གེ་བདུན་ཅུ་ལྔ་པར་ལྡན། །མ་མོ་
88a
༄#། །ལས་ནི་གཉིས་པ་ཉིད། །ཡི་གེ་བདུན་ཅུ་བརྒྱད་པར་ལྡན། །སྟེང་དུ་ཐིག་ལེས་མཚན་པའོ། །མ་མོ་ལས་ནི་བཞི་པ་དང ། །ཡི་གེ་བདུན་ཅུ་རྩ་དགུ་པ། །སྤྱི་བོར་ཐིག་ལེས་མནན་པའོ། །དབྱངས་རྣམས་ལས་ནི་དྲུག་པ་ཉིད། །རྟ་ཡི་རྒྱལ་པོ་བསྐྱེད་པ་ལ། །ཐིག་ལེ་ནཱ་དས་རྣམ་བརྒྱན་པ། །དབྱངས་རྣམས་ལས་ནི་གསུམ་པ་ཉིད། །ཡི་གེ་བཅུ་དྲུག་ལྡན་པའོ། །ཡི་གེའི་གྲངས་ནི་བརྒྱ་ཡི་སྟེང ། །དགུ་བཅུ་དང་ནི་རྩ་བརྒྱད་དོ། །འདི་ནི་རེ་མིག་ལས་བཏུས་པ། །ཧེ་རུ་ཀ་དཔལ་མགོན་པོ་ཡི། །རྩ་བའི་སྔགས་མཆོག་ཏུ་ཤེས་བྱ། །དངོས་གྲུབ་ཀུན་གྱི་གནས་ཡིན་ཞིང ། །མཁའ་འགྲོའི་སྙིང་ནི་འཇོམས་པ་ཡིན། །དཔལ་ལྡན་ཁྲག་འཐུང་ལྷ་རིག་རྒྱལ། །བ་ཀླགས་པས་གྲུབ་པ་དོན་ཡོད་པ། །ཡི་གེ་ཨོཾ་ནི་དང་པོ་སྟེ། །ཧཱུཾ་ཧཱུཾ་ཕཊ་ནི་མཐའ་མར་སྦྱར། །རྩ་བའི་སྔགས་ཏེ་སྔགས་འདི་ནི། །སྒྲུབ་པ་ཐམས་ཅད་སྦྱིན་བྱེད་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། སྔགས་བཏུ་བའི་ཆོ་གའི་ལེའུ་སྟེ་བདུན་པའོ།། །།དེ་ནས་རང་གི་བདག་ཉིད་ཀྱི། །དཔའ་བོ་ཐམས་ཅད་མཉམ་སྦྱོར་བ། །མཁའ་འགྲོ་མ་ཡི་དྲ་བ་ཡི། །འཁོར་ལོ་བདེ་མཆོག་ཡིན་པར་འདོད། །ཧཱ་སཝཱ་རཾ་\?\་སཾ་ལ་ཛཱ་ནི་ཀི་ཌཱ་ཕཊ་ཧཱུཾ་ཧཱུཾ་ཀཾ་རུ་རུ་ཧེ་ཧེ་བཛྲ་ཤྲཱི་ཨོཾ། །རིག་པའི་རྒྱལ་པོའི་སྙིང་པོ་ནི། །མ་བྱུང་འབྱུང་བར་མི་
88b
འགྱུར་རོ། །ཊ་ཕ་ཧཱུཾ་ཧྲིཾ་ཧྲིཾ་ཧཾཿ ་ཨོཾ། །ཡི་གེ་བཾ་དང་ཡོཾ་དང་ནི། །ཡི་གེ་མཾ་དང་ཧྲཱིཾ་ཉིད་དང ། །ཧཱུཾ་དང་ཕཊ་ཅེས་བཤད་པ་ནི། །རྣལ་འབྱོར་མ་ནི་དྲུག་ཏུ་བཤད། །ོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སཝཱཧཱ། མཁའ་འགྲོ་མ་ཡི་རིག་པ་ཆེ། །མ་བྱུང་འབྱུང་བར་མི་འགྱུར་རོ། །ས་སྟེང་ན་ནི་རིན་ཆེན་བཞི། །ཕྲེང་བའི་སྔགས་ནི་དམ་པ་ཡིན། །མཁའ་འགྲོ་མ་ཡི་རིག་པ་ཆེ། །རིག་པའི་རྒྱལ་པོ་ཧེ་རུ་ཀ་།དཔལ་ཧེ་རུ་ཀའི་ངེས་པར་བརྗོད་པ་ལས། གོ་ཟློག་པའི་སྙིང་པོ་དང་རྣལ་འབྱོར་མ་དྲུག་གི་སྔགས་བཏུ་བའི་ཆོ་གའི་ལེའུ་སྟེ་བརྒྱད་པའོ།། །།དེ་ནས་རྩ་བའི་གསང་སྔགས་ཀྱི། །ལས་མཆོག་གོ་རིམ་ཇི་བཞིན་དུ། །དེ་ནི་རྣམ་པར་བཤད་པར་བྱ། །འཇིག་རྟེན་གསུམ་གང་ཅི་ཡོད་རྣམས། །ཐམས་ཅད་སྐད་ཅིག་གིས་གྲུབ་པར། །ལས་རྣམས་ཐམས་ཅད་བྱེད་པ་འོ། །ལྷ་ཐམས་ཅད་དང ། ཀླུ་ཐམས་ཅད་དང ། གནོད་སྦྱིན་ཐམས་ཅད་དང ། དྲི་ཟ་ཐམས་ཅད་ཀྱི་སྐྱེ་གནས་ཐམས་ཅད་དྲན་པ་ཙམ་གྱིས་གསོད་པར་བྱེད་དོ། །སྤྲིན་ཐམས་ཅད་འཐོར་བ་དང ། ཆར་འབེབས་པར་བྱེད་པ་དང ། ཟློག་པར་བྱེད་པའོ། །རྒྱ་མཚོ་སྐེམ་པར་བྱེད་དོ། །ཆུ་བོ་རྒྱུན་ཕྱོགས་ལས་ལྡོག་སྟེ་འབང་པར་སྟོན་ཏོ། །དབང་པོ་ཟློག་པར་བྱེད་དོ། །གསང་སྔགས་འདི་བཟླས་བརྗོད་འབུམ་བྱས་པས་ས་གཡོ་བར་བྱེད་པ་དང ། ཤིང་ལ་འཛེགས་ཏེ་གང་དུ་འདོད་པ་དེར་འགྲོ་བར་བྱེད་དོ། །
89a
༄#། །སྔགས་ཐམས་ཅད་འཕྲོག་པར་བྱེད་པ་དང ། དངོས་གྲུབ་ཐམས་ཅད་འཕྲོག་པར་བྱེད་དོ། །ཁྲག་འདྲེན་པར་བྱེད་པ་དང ། །སླར་ཡང་གཏོང་བར་བྱེད་དོ། །གཟུགས་བརྒྱ་སྟོང་ཕྲག་དུ་མར་བྱེད་དོ། །འདོད་ན་སྣང་བར་བྱེད་ཅིང་འདོད་ན་མི་སྣང་བར་བྱེད་དོ། །ཁང་བཟང་དང་ཤིང་གི་རྩེ་མོ་ལ་སོགས་པ་ཕྱེ་མར་བྱེད་དོ། ། དུག་བདུད་རྩིར་བྱེད་པ་དང ། བདུད་རྩི་ཡང་དུག་ཏུ་བྱེད་དོ། །ཟླ་བ་ཆུར་བྱེད་པ་དང་ཆུ་ཟླ་བར་བྱེད་དོ། །དྲི་ཐམས་ཅད་འཕྲོག་པར་བྱེད་དོ། །གང་དུ་འདོད་པ་དེར་འཕོ་བར་བྱེད་དོ། །ནམ་མཁའ་ལྡིང་གི་གདོང་དང ། འགྲོ་བ་འབྱིན་པར་བྱས་པ་ཞི་བ་འདུས་པའི་ལྷ་མོ་དང་གང་ཞིག་ཀུན་ཏུ་སྤྱོད་པའི་མིའི་མཆོག་དེའི་ལག་མཐིལ་ན་ཡོད་པའི་དཔལ་གང་གིས་ཀྱང་མི་འཕྲོག་པར་འགྱུར་རོ། །རྣམ་པ་དེ་ལྟ་བུའི་ཆོ་ག་དང་ལྡན་པའི་དངོས་གྲུབ་ཀྱི་འབྲས་བུ་ཐམས་ཅད་སྐལ་པར་འགྱུར་རོ། །དྲན་པ་ཙམ་གྱིས་གསོད་པར་བྱེད་པ་དང ། མི་སྐྱེད་པར་བྱེད་དོ། །ས་འོག་རྣམ་པར་གཤེགས་པར་བྱེད་པ་དང་།སེར་བ་འབེབས་པ་དང་ཡང་ཟློག་པར་བྱེད་དེ། །དྲན་པ་ཙམ་གྱིས་གློག་སྐྱེད་པར་བྱེད་དོ། །ལྷ་ཐམས་ཅད་ཀྱི་གཟུགས་བརྙན་གར་བྱེད་དུ་འཇུག་གོ་།གང་གིས་བསྒྲུབ་པའི་ཕྱིར་མིང་ནས་བཟུང་སྟེ་ལན་གཅིག་བཟླས་ན་དེའི་མོད་ལ་འཆི་བར་འགྱུར་རོ། །ས་
89b
མ་ལུས་པ་རྣམས་ལ་ལོངས་སྤྱོད་པར་འགྱུར་རོ། །འདོད་ན་སྡུད་པར་འགྱུར་རོ། །བཅོམ་ལྡན་འདས། འདི་ལ་ནི། བརྟུལ་ཞུགས་མི་དགོས། སྤྱོད་པ་དང་སྨྱུང་བ་མི་དགོས་ཏེ། །རྟོག་པའི་བྱ་བ་ཆོ་ག་འདིས་ཅི་འདོད་པའི་ལས་རྣམས་བྱའོ། །གལ་ཏེ་ཁྲོས་པས་ལན་གཅིག་བཟླས་ན། བྱེ་བ་གསོད་པར་འགྱུར་རོ། །ཞི་བས་བཟླས་ན། འཚོ་བར་བྱེད་དོ། །དུར་ཁྲོད་ཀྱི་སོལ་བ་ལ་ལན་གཅིག་བཟླས་པས་གང་ལ་བསྣུན་པ་དེའི་མོད་ལ་ལྟུང་བར་བྱེད་དོ། །ཐལ་བ་ལ་ཡོངས་སུ་བཟླས་ཏེ་གང་ལ་བསྣུན་ན། དེའི་མོད་ལ་ཤ་ཟས་བཟུང་བར་འགྱུར་རོ། །དུར་ཁྲོད་ཀྱི་སོལ་བ་ལ་ལན་ཅིག་བཟླས་ནས་སྤང་ལེབ་ལ་སོགས་པ་ལ་མཚན་མ་གང་གི་མིང་བྲིས་པ་དེ་གདོན་ཆེན་པོས་བཟུང་བར་འགྱུར་རོ། ། ཏི་མུགྟའི་ལྕུག་མ་ལ་ལན་གཅིག་བཟླས་ནས་གང་ལ་བསྣུན་པ་དེ་དེའི་མོད་ལ་རླུང་གི་ཤུགས་ཀྱིས་འོང་བར་འགྱུར་རོ། །བསེག་མ་ལ་ལན་གཅིག་བཟླས་ཏེ་གང་ལ་བརྡེགས་པ་དེ་རེངས་པར་འགྱུར་རོ། །གང་དུ་འདོད་པ་དེར་འགྲོ་བར་འགྱུར་རོ། །\?\་གྱི་བདུག་པ་ལ་ལན་གཅིག་བཟླས་ཏེ་སྤོས་སུ་སྦྱར་ན། སེམས་ཅན་ཐམས་ཅད་འབེབས་པར་འགྱུར་རོ།། ལག་པ་ལ་ལན་གཅིག་བཟླས་\?\་བཀབ་ན་ནག་པོས་ཟིན་པ་\?\་དུག་སོས་པར་བྱེད་དོ། །མཁའ་འགྲོས་རྒྱས་བཏབ་པ་ལ་ལན་གཅིག་བཟླས་པའི་ཆུས་དེ་གཏོང་བར་བྱེད་དོ། །ཀཱ་ར་བཱི་
90a
༄#། །རའི་ལྕུག་མ་ལ་ལན་གཅིག་བཟླས་པས་མངལ་གང་དུ་འདོད་པ་དེར་འཕོ་བར་འགྱུར་རོ། །ཧེ་རུ་ཀ་དཔལ་ཡེ་ཤེས་ནི། །མི་ཤེས་དངོས་གྲུབ་མངོན་འདོད་པ། །དེ་ནི་ཕུབ་མ་བརྡུང་བ་སྟེ། །གསང་སྔགས་འདི་ནི་མེད་པ་རུ། །དངོས་གྲུབ་དང་ནི་བདེ་བ་དག་།མི་ཡིས་ཐོབ་པར་མི་འགྱུར་རོ། །གསང་སྔགས་འདི་ནི་མི་ཤེས་པར། ། རྣལ་འབྱོར་པ་ནི་མངོན་འདོད་པ། །དེ་ཡི་ངལ་བ་དོན་མེད་དེ། །འབྲས་བུ་ཐོབ་པར་མི་འགྱུར་རོ། །གསང་སྔགས་འདི་ནི་འདོད་སྤྱོད་པའི། །དངོས་གྲུབ་ཐམས་ཅད་སྦྱིན་བྱེད་ཡིན། །སྒྲུབ་པོ་སྔགས་དང་ཕྱག་རྒྱ་དག་།བདེར་གཤེགས་གསུངས་པ་འདི་ཤེས་པ། །བཟའ་བཏུང་ལ་སོགས་ཙ་རུ་ཡི། །བཟའ་དང་བཏུང་བའི་རོ་སོགས་པ། །དངོས་གྲུབ་ཐམས་ཅད་སྒྲུབ་བྱེད་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། །རྩ་བའི་སྔགས་ཀྱི་ལས་ཀྱི་ཆོ་གའི་ལེའུ་སྟེ་དགུ་པའོ།། །།དེ་ནས་སྐུ་གསུམ་བཤད་པར་བྱ། །ཁྲག་འཐུང་དཔལ་གཉིས་མེད་སྦྱོར་བས། །གང་གིས་ཤེས་པ་ཙམ་གྱིས་ནི། །འདིར་ནི་གྲུབ་པར་ཐེ་ཚོམ་མེད། །སྐུ་གསུམ་པོ་ནི་བཤད་པར་བྱ། །ཆོས་ཀྱི་སྐུ་ཡི་ལུས་ཅན་དུ། །གང་ཚེ་སྒྲུབ་པ་པོ་འགྱུར་བ། །དེ་ལྟར་ལེགས་སེམས་གྱུར་པ་ལ། །དེ་ཚེ་ཡེ་ཤེས་ང་སྨྲ་འོ། །ལོངས་སྤྱོད་རྫོགས་པའི་ལུས་ཅན་
90b
དུ། །གང་ཚེ་སྒྲུབ་པ་པོ་འགྱུར་བ། །དེ་ནས་མཉམ་པར་བཞག་པ་ལ། །ལོངས་སྤྱོད་རྫོགས་པར་ང་རབ་སྨྲ། །སྤྲུལ་པའི་སྐུ་ཡི་ལུས་ཅན་དུ། །གང་ཚེ་སྒྲུབ་པ་པོ་འགྱུར་བ། །དེ་ཚེ་སེམས་དེ་རྩེ་གཅིག་ལ། །སྤྲུལ་པའི་སྐུར་ཡང་ང་སྨྲ་སྟེ། །ཡེ་ཤེས་ལོངས་སྤྱོད་རྫོགས་དང་སྤྲུལ། །ཡང་དག་ཐོབ་པར་གདོན་མི་ཟ། །བདག་ཉིད་ཤྲཱི་ཧེ་རུ་ཀར་ནི། །འགྲུབ་འགྱུར་འདི་ལ་ཐེ་ཚོམ་མེད། །གསང་སྔགས་འདི་ཡི་སྙིང་པོ་ནི། །གསང་བ་བཤད་ཀྱི་སྒྲུབ་པོ་ཉོན། །སྙིང་པོ་བཟླས་པས་དཔག་ཚད་བྱེ་བ་འཕགས་པ་འགྱུར་ཞིང་འགྲོ་དང་འོང་བར་འགྱུར་རོ། ། གཟུགས་སྟོང་ཕྲག་དུ་མར་བྱེད་དོ། །ཁང་བཟང་དང་ཤིང་དང་ཁྱིམ་ལ་འཛེགས་ཏེ་མཁའ་འགྲོ་མ་རྣམས་དང་ལྷན་ཅིག་དཔག་ཚད་བྱེ་བའི་བར་དུ་འགྲོ་བར་འགྱུར་རོ། །ནམ་མཁའ་ལ་འགྲོ་ཞིང་འོང་བ་ལས་གཞན་དུ་མི་འགྱུར་རོ། །འདོད་ན་སྣང་བར་འགྱུར་ཞིང་འདོད་ན་མི་སྣང་བར་འགྱུར་རོ། །འདོད་ན་བྱིས་པ་དང ། རྒན་པོ་དང ། དར་ལ་བབ་པའི་གཟུགས་འཛིན་པར་འགྱུར་རོ། །འདོད་ན་གླང་པོ་ཆེ་དང ། མ་ཧེ་དང ། བ་མེན་དང ། སྟག་དང ། སེངྒེ་དང ། ཁྱུ་མཆོག་དང ། བྱི་ལ་དང ། རི་བོང་དང ། རྔ་མོ་འི་གཟུགས་འཛིན་པར་འགྱུར་བ་དང ། འདོད་ན་རྨ་བྱ་དང ། ཁྱིམ་བྱ་དང ། ངང་པ་དང ། ངུར་བ་དང ། ཆུ་སྐྱར་དང ། འུག་པ་དང ། ཁྲ་དང ། བྱ་རྒོད་དང ། བྱ་རྒོད་གི་གཟུགས་འཛིན་པར་
91a
༄#། །འགྱུར་རོ། །གང་འདོད་པ་དེའི་གཟུགས་སུ་བྱེད་དོ། །ཚིག་འཕྲོག་པ་དང ། མཐོང་བ་འཕྲོག་པ་དང ། ཉན་པ་འཕྲོག་པ་དང ། སྣ་འཕྲོག་པ་དང ། ལྕེ་འཕྲོག་པར་བྱེད་དོ། །གང་གི་འདོད་པ་དེའི་ཁྲག་འདྲེན་པར་བྱེད་པའམ། རེངས་པར་བྱེད་དོ། །དཔལ་ཧེ་རུ་ཀའི་ངེས་པར་བརྗོད་པ་ལས། སྐུ་གསུམ་གྲུབ་པའི་སྙིང་པོའི་སྔགས་ཀྱི་ལས་ཀྱི་ཆོ་གའི་ལེའུ་སྟེ་བཅུ་པའོ།། །།དེ་ནས་གཞན་ཡང་སྒྲུབ་པ་པོས། །སྐྱེ་བ་བདུན་པའི་བར་འབྱུང་བ། །གང་གིས་བསྟེན་པ་ཙམ་གྱིས་ནི། །མྱུར་དུ་དངོས་གྲུབ་ལ་འཇུག་པའོ། །དངོས་གྲུབ་ཐོབ་འགྱུར་བཤད་པར་བྱ། །སྐྱེས་བུ་གང་ཞིག་རྡུལ་གྱི་དྲི་ཞིམ་པར་གྱུར་པ་དང ། བདེན་པར་སྨྲ་བ་དང ། ཡུན་རིང་པོར་མིག་མི་འཛུམ་པ་དང་།ཁྲོ་བ་མེད་པར་འགྱུར་བ་དང ། ཁ་ནས་དབུགས་དྲི་ཞིམ་པར་འབྱུང་བ་དེ་ནི། །སྐྱེ་བ་བདུན་དུ་མིའི་སྐྱེ་བར་གྱུར་པ་ཡིན་ནོ། །གྲིབ་མ་བདུན་པ་བྱ་དང་པའི་འགྲོས་ཅན་སྙིང་རྗེ་དང་ཡང་དག་པར་ལྡན་པ་དེ་བསྟན་ན། །དེའི་སྙིང་ག་ན་རོ་ཙན་ཡོད་དེ། །དེ་བླངས་ལ་དཔལ་ཧེ་རུ་ཀའི་སྙིང་པོའི་སྔགས་བརྒྱ་རྩ་བརྒྱད་བཟླས་ནས་ཐིག་ལེ་བྱས་ན་སྟེང་དུ་ལྡིང་བར་འགྱུར་ཞིང་དཔག་ཚད་བྱེ་བར་འགྲོ་བར་འགྱུར་རོ། །དེ་བསྟན་པ་ཙམ་གྱིས་འཇིག་རྟེན་གསུམ་གྱི་ཡེ་ཤེས་ཅན་དུ་འགྱུར་རོ། །དཔག་ཚད་བྱེ་བ་
91b
ལྔ་བཅུར་ཉིན་ཞག་གཅིག་གིས་འགྲོ་ཞིང་འོང་བར་འགྱུར་རོ། །ལྷའི་ལུས་ཀྱང་ཐོབ་པར་འགྱུར་རོ། །དཔལ་ཧེ་རུ་ཀའི་སྙིང་པོ་གང་ཞིག་ཤེས་པ་དེ་གང་དང་གང་འདོད་པ་དེ་དང་དེ་སྟེར་བར་འགྱུར་རོ། །དཔལ་ཧེ་རུ་ཀའི་ངེས་པར་བརྗོད་པ་ལས། སྐྱེ་བ་བདུན་པའི་མཚན་ཉིད་ཀྱི་ཆོ་གའི་ལེའུ་སྟེ་བཅུ་གཅིག་པའོ།། །།དེ་ནས་ཉེ་བའི་སྙིང་པོ་ནི། །དངོས་གྲུབ་ཐམས་ཅད་འཇུག་བྱེད་ཅིང ། །འཇིག་རྟེན་གསུམ་འགྱུར་གང་ཅུང་ཟད། །དེ་ཀུན་སྐད་ཅིག་གིས་འགྲུབ་བཤད། །ཊཕ་ཧཱུཾ་ཧཱུཾ་ཧ་ཧ་ཧྲཱིཿ ་ཨོཾ། །འདི་ནི་སྙིང་པོའི་ཉེ་བའི་སྙིང་པའོ། །གསང་སྔགས་འདི་འབུམ་བཟླས་པས་འཇིག་རྟེན་གསུམ་ཡང་གཡོ་བར་བྱེད་དོ། །ལྷ་དང ། ལྷ་མ་ཡིན་དང ། གནོད་སྦྱིན་དང ། སྲིན་པོ་དང ། ཀླུ་དང ། དྲི་ཟ་དང ། མི་འམ་ཅི་རྣམས་འགུགས་པར་བྱེད་དོ། །རྒྱ་མཚོ་དང ། འབབ་ཆུ་དང ། མཚེའུ་ལ་སོགས་པ་སྐེམ་པའམ། གནོན་པར་བྱེད་དོ། །གང་དུ་བཟླས་པའི་གནས་དེར་མཁའ་འགྲོ་མ་ཐམས་ཅད་སྒྲུབ་པ་པོའི་མངག་གཞུག་བྱེད་པར་འགྱུར་རོ། །འདིས་ཆུ་ལ་ཡོངས་སུ་བཟླས་ཏེ་བདག་ཉིད་ཀྱི་མིག་བཀྲུས་ན། སྐྱེ་བ་བདུན་པའི་མི་ཤེས་པར་འགྱུར་རོ། །ཚེ་ཟད་པ་ཡང་འཆི་བ་བཞིན་དུ་སྣང་བ་དང ། ཚེ་རིང་བ་གསོན་བར་སྣང་བར་འགྱུར་རོ། །མིག་ལ་མངོན་པར་བསྔགས་ནས་གང་ལ་བལྟས་པ་དེ་
92a
༄#། །གནོན་པར་འགྱུར་རོ། །དཔའ་བོ་ཤི་བའི་རྐང་མཐིལ་གྱི་པགས་པ་བླངས་ཏེ། མིའི་ཁྲག་དང་བཏགས་ཏེ་རྣ་བའི་མིག་སྨན་དང་ཐོད་པར་བཅུག་ལ་ལྡོང་རོས་དང ། གིའུ་ཝང་དང ། གུར་གུམ་དང ། ཁྲག་དང་བསྣོལ་ཏེ་གྲིབ་མ་ལ་བསྐམས་ལ་ལྕགས་གསུམ་གྱིས་དཀྲིས་པར་བྱ་སྟེ། ཡང་དེ་ལྷག་པར་གནས་པ་སྐར་མ་རྒྱལ་ལ་བྱ་བ་ཡང་དཔལ་ཧེ་རུ་ཀའི་ཞལ་དུ་བཅུག་ལ་ལག་པ་གཡོན་པས་ཁ་བཀབ་སྟེ་ཡང་བརྒྱ་རྩ་བརྒྱད་བཟླས་ན། དེ་དེའི་མོད་ལ་མི་སྣང་བར་འགྱུར་ཞིང་གྲིབ་མ་མེད་པར་འགྱུར་ཏེ། ལྷ་རྣམས་ཀྱིས་ཀྱང་མཐོང་བར་མི་འགྱུར་ན། ས་སྟེང་གི་མི་རྣམས་ཀྱིས་ལྟ་སྨོས་ཀྱང་ཅི་དགོས། །དེ་བཞིན་དུ་ཁ་ལས་བཏོན་ན་ནི། སྣང་པར་འགྱུར་རོ། །རྒྱུད་འདིར་མཁའ་སྤྱོད་གྲུབ་པའི་རིལ་བུ་འདི་ནི། དཔའ་བོ་རང་ཉིད་ཀྱིས་གསུངས་པ་ཡིན་ནོ། །དཔལ་ཧེ་རུ་ཀའི་སྙིང་པོའི་ཉེ་བའི་སྙིང་བོའི་སྔགས་འདིས་མཛུབ་མོའི་རྩེས་མགོའི་ཐོད་པའི་ཤ་མེད་པར་བྱས་ལ་མཉེས་ན། དེའི་ཕྲག་འདྲེན་པར་བྱེད་དོ། །གཡོན་པས་ཡང་དང་ཡང་དུ་མཉེས་པས་ནི། འཇུག་པར་འགྱུར་རོ། །མངོན་པར་བཟླས་ཏེ་མགོའི་ཐོད་པར་ཁུ་ཚུར་བསྣུན་ན། གང་གི་\?\་སྨོས་ཏེ་བྱས་པ་དེའི་ཀླད་པ་འགས་པར་འགྱུར་རོ། །གསང་སྔགས་རྗེས་སུ་དྲན་
92b
ལ་ཐོད་པ་འོ་མས་བཀང་ན། ཉེ་བར་ཞི་བར་འགྱུར་རོ། །གིའུ་ཝང་ལ་བཟླས་ཏེ་ཐིག་ལེ་བྱས་ན་གང་ལ་བལྟས་པ་དེ་རྒྱས་བཏབ་པར་འགྱུར་རོ། །མཛུབ་མོ་ལ་ཡོངས་སུ་བཟླས་ཏེ་གང་ལ་བསྡིགས་མཛུབ་བྱས་པ་དེ་དེའི་མོད་ལ་ལྟུང་བར་འགྱུར་རོ། །སྔགས་བཟླས་ནས་རྐང་པ་ས་ལ་བསྣུན་ན། གང་གི་མིང་ནས་སྨོས་པ་དེ་དེའི་མོད་ལ་འཆི་བར་འགྱུར་རོ། །ཆུ་ལ་བཟླས་ཏེ་ས་ལ་གཏོར་ན་སླར་འཚོ་བར་འགྱུར་རོ། །གསང་སྔགས་བཟླས་པའི་མཛུབ་མོའི་རྩེ་མོས་སྟོང་ལ་ཡང་སྡིགས་མཛུབ་བྱས་ན། བལྟས་པ་དེ་ཐམས་ཅད་གནོན་པར་འགྱུར་རོ། ། ཚིག་གིས་ནི། གྲོལ་བར་འགྱུར་རོ། །རྨེ་ཤ་ཅན་གྱི་ཐལ་བ་ལ་བཟླས་བརྗོད་བརྒྱ་བྱས་ཏེ་སེམས་ཅན་གང་རྗེས་སུ་དྲན་པ་དེ་ལ་བསྣུན་པ་དེའི་གཟུགས་འཛིན་པར་འགྱུར་རོ། །སྦྱིན་སྲེག་གི་མེའི་ཐལ་བ་ལ་བཟླས་བརྗོད་བརྒྱ་བྱས་ཏེ་གང་ལ་བསྣུན་པ་དེ་ལྷ་ཉིད་ཀྱིས་མི་མཐོང་ངོ ། །ཆུ་ལ་བཟླས་པས་གཏོར་ན་སླར་སྣང་བར་འགྱུར་རོ། །ཐོད་པའི་ཕྱག་རྒྱ་ཁ་སྦྱར་བཅིངས་ལ་དབུགས་མི་འཕྱིན་པར་གང་གི་མིང་ནས་བཟླས་པ་དེ་སྨྱོ་བར་འགྱུར་རོ། །སྐྱེ་བོ་སྟོང་ཡང་སྨྱོ་བར་འགྱུར་རོ། །ཡིད་ཀྱིས་གྲོལ་བར་འགྱུར་རོ། །གང་གི་མིང་ནས་སྨོས་ཏེ་གཙུག་ཕུད་ལ་ལན་བཅུ་བཟླས་ཏེ་མདུད་ན། མཁའ་འགྲོ་མ་ཐམས་ཅད་འགྲོ་བར་འགྱུར་རོ། །ཁང་སྟོང་དུ་སོང་སྟེ་ལན་བརྒྱ་བཟླས་ནས་སྤྱི་བོར་བཅིངས་ལ་མིག་བགྲད་དེ་ཇི་སྲིད་
93a
༄#། །དུ་བཟླས་པ་དེ་སྲིད་མི་སྣང་བར་འགྱུར་རོ། །དཀྲོལ་ན་སྣང་བར་འགྱུར་རོ། །གསེག་མ་ལ་མངོན་པར་བཟླས་ཏེ་སྟེང་དང་འོག་དང་ཕྱོགས་མཚམས་རྣམས་སུ་གཏོར་ན། ལྷ་དང ། ལྷ་མ་ཡིན་དང ། གནོད་སྦྱིན་དང ། སྲིན་པོ་དང ། དྲི་ཟ་དང་མི་འམ་ཅི་དང ། ལྟོ་འཕྱེ་ཆེན་པོ་ཐམས་ཅད་ཀྱང་འཆིང་བར་འགྱུར་རོ། །མཁའ་འགྲོ་མའི་སྦྱོར་བ་ཐམས་ཅད་ཀྱང་འཕྲོག་པར་འགྱུར་རོ། །སྟན་དང་མལ་ཁྲི་ལ་སྐྱེས་པ་དང་བུད་མེད་འདུ་བ་ལ་བལྟས་ཏེ་སྔགས་བརྒྱ་རྩ་བརྒྱད་བཟླས་ན། འབྱར་བར་འགྱུར་རོ། །ཡིད་ཀྱིས་ནི། གྲོལ་བར་འགྱུར་རོ། །གྱོ་མོག་དང་བཅས་པ་ལ་ཡོངས་སུ་བཟླས་ཏེ་ཆུ་བོར་བཅུག་ནས་བོར་ན། ཕྱོགས་ལས་ལྡོག་སྟེ་འབབ་པར་འགྱུར་རོ། །གྱོ་མོག་དང་བཅས་པ་དེ་ཉིད་ཀྱིས་དབའ་རླབས་གནོན་པར་འགྱུར་རོ། །ཡིད་ཀྱིས་ནི། བཟློག་པར་འགྱུར་རོ། །སྔགས་བཟླས་ཏེ་སྟེང་དུ་བལྟས་བཞིན་དུ་སྟོང་བཟླས་ན། ཆར་ཆེན་པོ་གཅོད་པར་འགྱུར་རོ། །གཞན་གྱི་དཔུང་མངོན་དུ་ཕྱོགས་ན་བཟླས་བརྗོད་སྟོང་བྱས་ཏེ་གཡུལ་དུ་ཞུགས་པ་ན་མཚོན་ཆ་བརྒྱས་བསྣུན་ཀྱང་གནོད་པའི་ཚོར་བ་འབྱུང་བར་མི་འགྱུར་ཞིང་མཚོན་གྱིས་ཀྱང་ཆོད་པར་མི་འགྱུར་རོ། །རྡོ་རྗེའི་ལུས་ཅན་དུ་འགྱུར་རོ། །དཔལ་ཧེ་རུ་ཀའི་ངེས་པར་བརྗོད་པ་ལས།
93b
ཉེ་བའི་སྙིང་པོའི་ལས་ཀྱི་ཆོ་གའི་ལེའུ་སྟེ་བཅུ་གཉིས་པའོ།། །།དེ་ནས་གོ་ཆའི་ལས་རྣམས་ནི། །འཇིག་རྟེན་གསུམ་ན་གང་ཡོད་པ། །ཡིད་ལ་འདོད་པ་དེ་དག་ཀུན། །གོ་རིམ་བཞིན་དུ་བཤད་པར་བྱ། །དེ་ལ་གོ་ཆ་ཟློས་བཞིན་དུ་ཡང་ལམ་དུ་བཞུགས་ན། རྐུན་མ་དང་སྟག་གིས་འཇིགས་པར་མི་འགྱུར་བའམ། མི་སྣང་བར་འགྱུར་རོ། །གོ་ཆ་ཟློས་བཞིན་དུ་རྒྱལ་པོའི་ཕོ་བྲང་གི་བུད་མེད་ཀྱི་གནས་སུ་ཞུགས་ན་ཡང་མི་སྣང་བར་འགྱུར་ཏེ། གང་འདོད་པ་དེ་བླངས་ཏེ་འགྲོ་བར་འགྱུར་རོ། །ལྷ་རྣམས་ཀྱིས་ཀྱང་མི་མཐོང་ངོ་།། གོ་ཆའི་སྔགས་བརྒྱ་ཟློས་པའི་ལག་པས་གང་ལ་རེག་པ་དེ་མདུང་བཞིན་དུ་རེངས་པར་འགྱུར་རོ། །སུམ་ཅུ་རྩ་གསུམ་པས་ཀྱང་མི་གཡོའོ། །སྔགས་ཟློས་པའི་རྐང་པས་བསྣུན་ན། ཐར་པར་འགྱུར་རོ། །རང་གི་ཁྲག་ལ་ལན་གསུམ་བཟླས་ནས་ཐིག་ལེ་བྱས་ལ་གང་དང་ལྷན་ཅིག་སྨྲ་བ་དང ། གང་གིས་མཐོང་ཞིང་གང་མཐོང་བ་དེ་ཐམས་ཅད་ཀྱི་ཁྲག་འདྲེན་པར་བྱེད་དོ། །གང་གི་ཁྱིམ་དུ་ཁྲོ་བ་དང་བཅས་པས་ལན་སྟོང་བཟླས་ན། ཐམས་ཅད་ལ་རིམས་ཀྱིས་འདེབས་པར་འགྱུར་རོ། །ཆུ་ལ་ལན་ལྔ་བཟླས་ཏེ་གཏོར་ན། སླར་འཚོ་བར་འགྱུར་རོ། །གང་གི་གདོང་ལ་བལྟས་ཏེ་བཟླས་པ་དེའི་ཚིག་འཕྲོག་པར་འགྱུར་རོ། །འབབ་ཆུའི་འགྲོ་མ་དང་ལྟེང་ཀར་གནས་ཏེ་སྟོང་བཟླས་ན། ཆུའི་སྟེང་དུ་གནས་ཏེ་ཐང་
94a
༄#། །ལ་ཇི་ལྟ་བ་དེ་བཞིན་དུ་ཆུ་ལ་ཡང་དེ་བཞིན་དུ་འགྲོའི། །ཆུ་ལ་ཞུགས་ན་ཆུ་བོའམ་རྒྱ་མཚོ་ཡང་གནས་སོ། །ལག་པ་གཉིས་དྲིལ་ཕྱིས་བྱས་ལ་ལན་སྟོང་བཟླས་ན། རྣལ་འབྱོར་མ་རྣམས་དབང་དུ་འགྱུར་རོ། །རྣལ་འབྱོར་མ་ནི་སྣ་ཚོགས་གཟུགས། །མཁའ་འགྲོ་དེ་བཞིན་ལཱ་མ་དང ། །ཁཎྜ་རོ་ཧི་དེ་བཞིན་ཏེ། །གཟུགས་ཅན་མ་རུ་རབ་གྲགས་པ། །དེ་ལ་སོགས་པའི་རྣལ་འབྱོར་མ། །དེ་ཀུན་དེ་ཡི་དབང་དུ་འགྱུར། །སྐར་མ་རྒྱལ་གྱི་སྦྱོར་བས་རས་བྱས་ལ། །དེ་གྱོན་པའི་ལུས་ཀྱིས་རྣལ་འབྱོར་མ་མཉམ་པར་བཞག་པས་སྟོང་ཕྲག་བཅུ་བཟླས་ན། དེའི་འོག་ཏུ་འགྲུབ་པར་འགྱུར་རོ། །དེ་གྱོན་པའི་ལུས་ཀྱིས་དཔག་ཚད་སྟོང་གི་བར་དུ་ནམ་མཁར་མི་སྣང་བར་འགྱུར་རོ། །གང་དུ་འདོད་པ་དེར་འགྲོ་བར་འགྱུར་རོ། །དེའི་རྒྱ་མཚོའི་མཐར་ཐུག་པའི་ས་རྣམས་སུ་འགྲོ་བར་འགྱུར་རོ། །སྟེང་གི་རྒྱུད་དུ་འགྲོ་བར་འགྱུར་རོ། །དབང་པོ་གང་དང་གང་ལམ་གྱུར། །དེ་དང་དེ་ཡི་རང་བཞིན་འགྲོ། །མཆོག་ཏུ་མཉམ་བཞག་སྦྱོར་པ་ཡིས། །ཐམས་ཅད་སངས་རྒྱས་རང་བཞིན་འགྱུར། །ཤིང་ཡོངས་འདུའི་ཁུ་བཅུད་བླངས་ལ་བཟླས་བརྗོད་སྟོང་བྱས་ཏེ་གང་ཐིག་ལེ་བྱས་པ་དེ་ཤིང་དུ་འགྱུར་རོ། །ཆུ་ལ་ལན་བདུན་བཟླས་པས་གཏོར་ན། འདི་ནི། སླར་འཚོ་བར་འགྱུར་རོ། །གླང་པོ་ཆེའི་
94b
རྐང་མཐིལ་དང་བསྒྲུབ་བྱའི་རྡུལ་བླངས་ཏེ་བཟླས་བརྗོད་སྟོང་བཟླས་ནས་གང་ལ་བསྣུན་ན། དེ་གླང་པོ་ཆེར་འགྱུར་རོ། །དཔལ་ཧེ་རུ་ཀའི་ངེས་པར་བརྗོད་པ་ལས། གོ་ཆའི་སྔགས་གྱི་ལས་ཀྱི་ཆོ་གའི་ལེའུ་སྟེ་བཅུ་གསུམ་པའོ།། །།བོང་བུའི་རྣམ་པའི་རྣལ་འབྱོར་བདག་།ཡིད་ཀྱི་ཤུགས་ནི་བཟློག་བྱའི་ཕྱིར། །གང་གིས་སྒྲུབ་པོ་འགྲུབ་པ་ཡི། །སྒྲུབ་པ་དེ་ནི་བཤད་པར་བྱ། །མཁའ་འགྲོ་དེ་བཞིན་ལཱ་མ་དང ། །ཁཎྜ་རོ་ཧི་འདོད་གཟུགས་ཅན། བོང་བུའི་རྣམ་པ་ཁྲག་འཇིག་ཞལ། །མཁའ་འགྲོ་རྩེ་གསུམ་ལག་ན་ཐོགས། །བསྒྲུབས་ན་ནོ་ཟད་པ་དང་ནི། །ཚེ་རིང་བ་ཡང་སྣང་བ་ཡིན། །འདིར་ནི་བོང་བུའི་རྣལ་འབྱོར་བདག་།དེ་བཞིན་བོང་བུར་མཐོང་བ་ཡིན། །གླང་པོ་ཉིད་དུ་སྔོན་དུ་ཡང ། ། མཐོང་སྟེ་གླང་པོའི་གཟུགས་ཅན་ཡིན། །གང་དང་གང་གི་སྐྱེ་བ་གང ། །སྔོན་གྱི་སྐྱེ་བར་གྱུར་བ་དག་།དེ་དང་དེ་ཡི་གཟུགས་སྣང་བར། །རྣལ་འབྱོར་པས་ནི་འདིར་མཐོང་འགྱུར། །སྔོན་ནས་སྐྱེ་བ་བདུན་དུ་ནི། །གྲུབ་པ་སྟེར་བ་ཡོད་གྱུར་ན། །དེ་ཡིས་གཏོར་མའི་བྱ་བ་དག་།བྱས་ནས་སྒྲུབ་པས་འགྲུབ་པར་འགྱུར། །དེ་བཞིན་དཔག་ཚད་བརྒྱ་ཕྲག་ནི། །སྟེང་གི་སྟེང་དུ་སྐད་ཅིག་འགྲོ་།འདི་ནི་རྣལ་འབྱོར་སྔགས་མཆོག་གཙོ། །མཁའ་འགྲོ་མ་ཡི་སྦྱོར་གྲུབ་བྱེད། །རྣལ་འབྱོར་མཚན་མས་གང་ཟློས་པ། །ཟླ་བ་གཅིག་གིས་
95a
༄#། །འགྲུབ་པར་འགྱུར། །དེ་ནི་གསང་བའི་རྒྱུད་འདི་ཡི། །སྔགས་ཀྱི་སྙིང་པོ་དགེ་བ་ཡིན། །དེ་ཉིད་མཆོག་ཤེས་གང་དེ་འདིར། །རྣལ་འབྱོར་བ་རུ་ཐེ་ཚོམ་མེད། །མཁའ་འགྲོ་དྲ་བའི་སྡོམ་པར་ནི། །དེ་དག་ཐམས་ཅད་བརྗོད་པ་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། དཔལ་ཧེ་རུ་ཀ་བོང་བུའི་རྣམ་པར་མཛད་པའི་ཆོ་གའི་ལེའུ་སྟེ་བཅུ་བཞི་པའོ།། །།དེ་ནས་སྡོམ་པ་རྣམས་ལ་ནི། །གང་ཞིག་བརྡར་གྱུར་ཤེས་པ་དག་།དེ་ཉིད་ཀྱིས་དེ་གྲུབ་པ་ཡིན། །ཐེ་ཚོམ་མེད་པར་བཤད་པར་བྱ། །ཌ་ཞེས་བྱ་བ་སྐྱེས་བུར་བཤད། །ཌཱི་ཞས་བྱ་བ་བུད་མེད་ཡིན། །བཱུ་ཞེས་བྱ་བ་གནོན་པ་ཡིན། །སུ་ཞེས་བྱ་བ་ཟ་བ་ཡིན། །མ་ཞེས་བྱ་བ་མ་རུ་བཤད།། ཡཱ་ཞེས་བྱ་བ་ཆུང་མ་ཡིན། །བྷཱི་ཞེས་སྲིང་མོ་དེ་བཞིན་ཏེ། བཱི་ཞེས་བྱ་བ་མཛའ་མོར་བཤད། །ལུ་ཞེས་བྱ་བ་བུ་མོ་ཡིན། །ཤྲཱི་ཞེས་ཁྲག་ཏུ་ཤེས་པར་བྱ། །སོ་ཞེས་ཞི་པའི་བཏུང་བ་ཡིན། །བེ་ཞེས་དེ་བཞིན་བཏུང་བ་སྟེ། །ཧེ་ཞེས་བྱ་བ་དེ་བཞིན་ཤ། །བྷ་ཞེས་བྱ་བ་ཟ་བ་ཡིན། །བྷུ་ཞེས་བྱ་བ་འདྲེས་པ་ཡིན། །པཱི་ཞེས་དུར་ཁྲོད་དེ་བཞིན་ཏེ། །དྷུ་ཞེས་བྱ་བ་རོ་རུ་ཤེས། །དྷི་ཞེས་རྣལ་འབྱོར་མ་རུ་བཤད། །གང་ཞེས་དེ་བཞིན་ལཱ་མ་ཡིན། །སྟི་ཞེས་བྱ་བ་གཟུགས་ཅན་མ། །ཀུ་ཞེས་དེ་བཞིན་མཁའ་འགྲོ་མ། །ཧ་ནི་
95b
བཎྚ་རོ་ཧི་ཉིད། །ཛ་ཞེས་བྱ་བ་བྱིན་པ་གཉིས། །ཀ་ཞེས་བྱ་བ་དཔུང་པར་གཟུང ། །བྷ་ཞེས་བྱ་བ་གསོང་པོར་སྨྲ། །སཝ་ཞེས་ལེགས་འོངས་བྱ་བ་ཡིན། །མི་ཞེས་བྱ་བ་ཉ་ཡིན་ལ། །བ་ཞེས་བྱ་བ་ཟ་བ་ཡིན། །པ་ཞེས་བྱ་བ་བཏུང་བ་བཏུང ། །གྷ་ནི་བགྲོད་དང་བགྲོད་མིན་ཡིན། །ཀ་ཞེས་བྱ་བ་འདོད་པ་ཡིན། །ས་ཞེས་བྱ་བ་གཞན་མི་འགྲོ་།ར་ཞེས་བྱ་བ་ཁྱོ་མེད་མོ། །དུ་ཞེས་བྱ་བ་སྤྱོད་ངན་མོ། །སུ་ཞེས་བྱ་བ་སྐལ་བཟང་མ། །ན་ཞེས་བྱ་བ་སྐལ་ངན་མ། །ས་ཞེས་བྱ་བ་དམ་ཚིག་ཅན། ། ཞས་བྱ་བ་དམ་ཚིག་མེད། ། ཞེས་བྱ་བ་འོངས་པ་ཡིན། །ན་ཞེས་བྱ་བ་མ་འོངས་ཡིན། །སོ་ཞེས་བྱ་བ་ཆགས་པ་ཡིན། །འདི་དག་ནི། ཡི་གེ་རེ་རེའི་བརྡ་ཡིན་ཏེ། །དཔའ་བོ་དང་སྲིང་མོར་འདུ་ཤེས་པར་བྱེད་པ། གུས་པ་དང་མི་གུས་པ་ལ་སྦྱིན་པར་བྱ་བ་དམ་ཚིག་གི་མཆོག་ཡིད་དུ་འོང་བ་ཕན་འདོགས་པར་བྱེད་པ་སྟེ། གུས་པ་ལ་སྦྱིན་པར་བྱའོ། །དཔལ་ཧེ་རུ་ཀའི་ངེས་པར་བརྗོད་པ་ལས།་ཡི་གེའི་བརྡའི་ཆོ་གའི་ལེའུ་སྟེ་བཅོ་ལྔ་པའོ།། །།དེ་ནས་སྐལ་ལྡན་སྐལ་ལྡན་མིན། །མདོར་བསྡུས་ནས་ནི་རབ་བཤད་བྱ། །དམ་ཚིག་མདོག་ལ་གནས་པ་སྟེ། །སྐལ་ལྡན་ཡིད་འོང་ཕན་འདོགས་བྱེད། །གུས་པ་ཉིད་ལ་རབ་སྦྱིན་བྱ། །དེ་ནས་རིགས་ཀྱི་དབྱེ་བཟུང་ན། །དཔའ་དང་གཉིས་མེད་རྣལ་འབྱོར་མ། །
96a
༄#། །གང་གིས་ཤེས་པ་ཙམ་གྱིས་ནི། །སྒྲུབ་པོ་དངོས་གྲུབ་ཐོབ་འགྱུར་བའོ། །བུད་མེད་པད་རྩ་ལྟར་དཀར་གང ། །པདྨའི་འདབ་ལྟར་དཀྱུས་རིང་མིག ། རྟག་ཏུ་གོས་ནི་དཀར་ལ་དགའ། །ཙནྡན་གསར་བའི་དྲི་དང་ལྡན། །བདེ་གཤེགས་པ་འདུས་ཉིད་ལ་དགའ། །དེ་རིགས་རུས་བྱུང་ཤེས་པ་བྱ། །ཕུད་གང་བཙོ་མའི་གསེར་འདྲ་ཞིང ། །དམར་དང་སེར་བའི་གོས་ལ་དགའ། །ཛའ་ཏི་ཙམ་པའི་དྲི་དང་ལྡན། །དེ་ནི་དཔའ་བོའི་རྗེས་འགྲོར་འགྱུར། །གང་ཞིག་ཨུཏྤལ་ལྟར་སྔོ་བསངས། །གོས་ནི་སྔོན་པོ་འཛིན་ལ་དགའ། །ུཏྤལ་སྔོན་པོར་སྣང་བའི་དྲི། །དེ་ནི་དཔའ་བོ་དྲན་རྗེས་འགྲོ། །བུད་མེད་གང་ཞིག་མཛེས་མ་སྟེ། །པགས་པ་པད་དཀར་འདབ་འདྲ་མ། །རྟག་ཏུ་པདྨའི་རྩ་བའི་དྲི། །དེ་ནི་དེ་བཞིན་དཔའ་བོའི་བློ། །དམར་ཞིང་དཀར་བའི་བུད་མེད་གང ། །གཟུགས་བཟང་ཁ་ནི་དམར་བ་དང ། །མ་ལི་ཀ་དང་ཨུཏྤལ་དྲི། །དེ་ནི་རྡོ་རྗེའི་རིགས་བྱུང་ཡིན། །སེར་ཞིང་ལྗང་བའི་བུད་མེད་གང ། །གོས་ནི་དཀར་པོ་འཆང་བར་དགའ། །མགོ་ལ་མེ་ཏོག་དྲི་དང་ལྡན། །དེ་བཞིན་གཤེགས་རིགས་རྗེས་འགྲོ་ཡིན། །བུད་མེད་གང་ཞིག་ཁ་དོག་དམར། །དེ་ཡི་མདོག་གི་གོས་འཆང་ཞིང ། །རྟག་ཏུ་ག་བུར་དྲི་དང་ལྡན། །རྣམ་སྣང་རིགས་ཀྱི་རྗེས་འགྲོ་ཡིན། །རྣལ་འབྱོར་མ་ཡི་རིགས་རྣམས་ནི། །དེ་ལྟར་བདུན་
96b
པོ་ངས་བཤད་པ། །གཡོན་པའི་ཀུན་སྤྱོད་ལ་རྟག་དགའ། །འདི་དག་རང་རྒྱའི་མདོག་གིས་ཁྱབ། །རིགས་ཀྱི་རིག་པའི་ཡི་གེ་ཡང ། །རིགས་ཀྱི་རྗེས་སུ་འདིར་འགྱུར་བ། །འདི་ལ་ཁ་དོག་དྲུག་ཏུ་འགྱུར། །རང་གི་ཕྱག་རྒྱ་འཆིང་བ་དང ། །རང་རིགས་ལས་བྱུང་ཚིག་ཏུ་སྨྲ། །གཡོན་ནས་འགྲོ་བའི་བུད་མེད་གང ། །རྣལ་འབྱོར་མ་ལའང་གཡོན་ལ་བརྟག་།སྐད་ནི་ཆེན་པོར་རབ་སྨྲ་བ། །གཡོན་ནས་བལྟ་བས་རྣམ་པར་ལྟ། །བུད་མེད་རྣམས་མཐོང་རབ་སྨྲ་བ། །དེ་ནི་དམ་ཚིག་ལྡན་པར་བཤད། །བུད་མེད་རྣམས་གང་གསོལ་གདབ་བྱེད། །རིགས་ཀྱི་ས་བོན་རབ་ཏུ་སྨྲ། །རིགས་ཀྱི་བྱ་བ་མི་འདོར་ཞིང ། །རང་གི་བསྟན་བཅོས་གསུང་པ་སྐྱོང ། །རང་གི་རིགས་ཀྱི་རིག་པ་ཟློས། །དེ་ནི་དམ་ཚིག་ལྡན་པར་བརྗོད། །ཕྱག་འཚལ་བ་ནི་གང་འཆིང་བ། །གཡོན་པའི་ལུས་ཀྱིས་རྟག་ཏུ་འདུད། །ལྷ་མོ་རྣམས་དང་ཀུན་སྨྲ་བ། །དེ་ནི་ངེས་པར་བདེན་པར་འགྲོ། །མཐེ་བོང་གཡོན་པས་ས་ལ་ནི། །རྐང་པས་རི་མོ་འབྲི་བྱེད་ཅིང ། །མགོ་ནི་དཀྲུག་པར་བྱེད་པ་སྟེ། །ཟུར་གྱིས་ལྟ་ཞིང་ལག་གཡོན་གྱིས། །སྒྲུབ་པ་པོ་ལ་ཁྱད་པར་དུ། །དེ་ཡི་རང་རིག་དྲན་པའོ། །མཁུར་བའམ་ཀོས་ཀོ་དྲག་དང་ནི། །སྣ་དག་ཏུ་ནི་སོར་མོ་སྟོན། །ཟུར་གྱིས་ལྟ་ཞིང་ལན་གཅིག་སྔགས། །བཟླས་ནས་རིག་ལ་རྣམ་པར་ལྟ། །བདེན་པར་འགྲོ་བའི་རྣམ་འབྱོར་མ། །ངེས་པ་དམ་ཚིག་ཅན།
97a
༄#། །ཡིན་ནོ། །དཔལ་ཧེ་རུ་ཀའི་ངེས་པར་བརྗོད་པ་ལས། །རྣལ་འབྱོར་མའི་མཚན་ཉིད་ངེས་པར་བརྟག་པའི་ལེའུ་སྟེ་བཅུ་དྲུག་པའོ།། །། དེ་ནས་རྙེད་དཀའ་རྣལ་འབྱོར་མ། །དེ་བཞིན་མཁའ་འགྲོ་མ་རྣམས་ཀྱི། །བདུད་རྩི་རྣམས་ལ་ཡང་དག་འབྱུང ། །ཡ་མི་ནཱི་དང་སྐྲག་བྱེད་མ། །ནགས་ཚལ་མ་དང་དེ་བཞིན་འཇིགས། །གཟུགས་ཀུན་སྤྱོད་མ་མཛེས་མ་དག་།བྷ་སུ་ར་མཁའ་འགྲོ་རྣམས་བདུན། །བསྡུས་མ་རང་མཚན་ཉིད་འདིར་བཤད། །གཟུགས་ཅན་མ་དང་ཙུམ་བི་ཀ། ལཱ་མ་ཡོངས་གྱུར་བྱིས་བཅས་མོ། །མི་ལྡོག་ཨེ་ཧི་ཀ་ལྷ་མོ། །མཁའ་འགྲོ་མ་རྣམས་བདུན་དུ་བཤད། །མངོན་པར་ཞེན་པས་ལྟ་བ་དང ། །སྨིན་མ་འདེགས་པར་གར་བྱེད་ཅིང ། །སྔོན་གྱི་གཟུགས་ནི་སྡུད་བྱེད་གང ། །ཕྱིས་ནི་འཇིག་པར་བྱེད་པ་ཡིན། །དེ་ནི་གཟུགས་ཅན་མར་ཤེས་བྱ། །དཔའ་བོ་གཉིས་མེད་བསྟན་པར་བྱ། །གྲུང་པ་འམ་ཡང་ན་མི་གྲུང་པ། །བྱིས་པ་འཁྱུད་ཅིང་ཙུམ་པན། །དེ་ནི་ཙུམྦི་ཀིར་ཞེས་བྱ། །མཁའ་འགྲོ་སྡིག་པ་འཇོམས་མ་ཡིན། །ཟུར་ལྟ་གདོང་ལ་ཁྲོ་གཉེར་ལྡན། །སྨིན་མ་སྒྱུར་ཞིང་སྡིགས་མཛུབ་དང ། །དབུགས་འབྱིན་འཇིགས་པར་བྱེད་གང་ཡིན། །འདི་ན་གཞན་ཡང་དབུགས་མི་འབྱིན། །འཇིགས་པར་བྱེད་པ་གང་ཡིན་པ། །དེ་ནི་
97b
ལཱ་མ་ཡིན་པར་བསྟན། །ཕག་དང་དྲེད་དང་བྱི་ལ་དང ། །ལྕེ་སྦྱང་ར་དང་རྟ་དག་དང ། །ཐམས་ཅད་དེར་ནི་འཇིགས་བྱེད་པ། །ཡོངས་སུ་གྱུར་པར་དེ་བཤད་དོ། །ཤིན་ཏུ་དགའ་བས་དགོད་པ་དང ། །སོང་ནས་སླར་ཡང་མི་ལྡོག་པ། །རྗེས་སུ་ཆགས་པས་གསོལ་བར་འདོད། །ཁཎྜ་རོ་ཧིར་དེ་བཤད་དོ། །ཡིད་ནི་བྱུང་བས་ལག་པ་འམ། །བོང་བ་འམ་ནི་རྐང་པས་སམ། །གོས་མཐའ་མ་ཡང་ན་ཤིང་དག་གིས། །དེས་རེག་པ་ནི་འཚོ་མི་འགྱུར། །མི་ལྡོག་པར་ནི་ཤེས་བྱ་སྟེ། །བསྒྲུབ་བྱ་མིན་པར་དེ་ལ་བརྗོད། །དགོད་སྨྲ་རྒྱུ་མེད་པ་རུ་ནི། །དུ་ཞིང་རབ་ཏུ་ཁྲོས་པ་སྟེ། །དེ་ནི་ཨེ་ར་\?\་དྲན་བྱ། །ལྷ་མོ་གསོང་པོར་སྨྲ་བ་ཡིན། །སངས་རྒྱས་པ་དང་རྟག་ཏུ་སྲྨ། །དེ་ཉིད་རྡོ་རྗེའི་རིགས་ལས་བྱུང ། །མཁའ་འགྲོ་མ་ཡི་རིགས་ཕྱག་རྒྱ། །དཔའ་བོས་བསྟེན་ཕྱིར་མཚན་པར་བྱ། །ཐོད་པ་དགྲ་སྟ་མཆེ་བ་དང ། །འཁོར་ལོ་རྡོ་རྗེ་རྒྱལ་མཚན་དང ། །རལ་གྲི་ཀུན་ཏུ་སྐྲག་བྱེད་ཉིད། །དུང་དང་བརྒྱད་དུ་ཤེས་པར་བྱ། །རིགས་ཀྱི་ཕྱག་རྒྱ་ཡིན་པར་བཤད། །དཔལ་ཧེ་རུ་ཀའི་ངེས་པར་བརྗོད་པ་ལས། །རྣལ་འབྱོར་མ་ཐམས་ཅད་ཀྱི་གཟུགས་ཡོངས་སུ་བརྗེ་བ་དང་ཕྱག་མཚན་དང་ཕྱག་རྒྱ་བསྟན་པའི་ཆོ་གའི་ལེའུ་སྟེ་བཅུ་བདུན་པའོ།། །།དེ་ནས་གཞན་ཡང་བཤད་བྱ་བ། །མཁའ་འགྲོ་མཆོག་གི་གོ་འཕང་ནི། །གང་གིས་ཡང་དག་ཤེས་
98a
༄#། །པ་ཡིས། །མཁའ་འགྲོའི་དམ་ཚིག་ལ་གནས་པའོ། །དམར་ཞིང་སེར་བའི་བུད་མེད་གང ། །པདྨའི་དྲི་ནི་རྣམ་པར་གཏོར། །ལྟ་སྟངས་རང་བཞིན་ཞི་བ་དང ། །ཞེན་པར་ལྟ་བའི་རྗེས་འགྲོ་བ། །བུད་མེད་གང་ཞིག་སེར་མོ་དམར། །དེ་བཞིན་སྐྱེ་བོ་ཀུན་ལ་བརྩེ། །ཁྱིམ་དུ་པདྨ་འབྲི་བ་ནི། །པདྨ་གར་དབང་རིགས་བྱུང་ཡིན། ། སྨིན་མའི་དབུས་ན་རྩེ་གསུམ་ཡོད། །ལུས་ཀྱི་མདོག་ནི་སྐྱ་བསངས་དང ། །རྟག་ཏུ་རྡོ་རྗེ་རིགས་སྒོམ་པ། །གང་གི་ཁྱིམ་དུ་རྡོ་རྗེ་འབྲི། །རྟག་པར་མཆོད་པ་བྱེད་པ་ཡི། །མཁའ་འགྲོ་མ་དེ་དཔལ་ལྡན་ནི། །ཧེ་རུ་ཀ་ཡི་རིགས་བྱུང་ཡིན། །གང་གི་དཔལ་བར་རྩེ་གསུམ་ནི། །མདུང་ཐུང་དག་ཀྱང་སྣང་གྱུར་ཅིང ། །མིག་དམར་མདོག་ནི་དམར་སེར་ཡང་།། དེ་བཞིན་རྐང་པ་ལག་པ་དམར། །ར་སྐྱེས་ཁྱིམ་བྱ་དག་ལ་ཡང ། །རྟག་ཏུ་ཡོད་ན་དགར་གྱུར་ཅིང ། །དེ་ཡི་ཁྱིམ་དུ་རྡོ་རྗེའི་མཚན། །རྟག་ཏུ་གང་ཞིག་མཆོད་བྱེད་པ། །ཤྲཱི་ཧེ་རུ་ཀའི་གཟུགས་ལས་བྱུང ། །མཁའ་འགྲོ་ཡིན་པར་གདོན་མི་ཟ། །འཁོར་ལོ་གང་གི་དཔྲལ་བ་འམ། །ལག་པར་ཡང་ནི་སྣང་གྱུར་པ། །སྦྲིན་སྔོན་དག་དང་འདྲ་པ་སྟེ། ། རྟག་ཏུ་དབྲལ་བར་དར་འཆིང་བ། །སྐལ་པ་ཆེན་པོར་ཀུན་ཚོགས་ཤིང ། །མཆོག་ཏུ་བདེ་བ་གང་ཡིན་དང ། །ཁྱིམ་དུ་འཁོར་ལོ་འབྲི་བྱེད་ཅིང ། །རྟག་ཏུ་དེ་ལ་མཆོད་བྱེད་པ།།
98b
རྡོ་རྗེ་བག་མོའི་རིགས་བྱུང་བའི། །མཁའ་འགྲོ་མ་ཡི་སྟོབས་ཀྱིས་དྲེགས། །གང་ཞིག་སྨིན་མ་སྣག་འདྲ་ཞིང ། །སོ་ནི་དཀར་ཞིང་མཐོ་བ་དང ། །གཡོན་པ་རྟག་ཏུ་མ་རུངས་པ། །སྙིང་སྟོབས་ལྡན་པར་གྱུར་པ་དང ། །རྟག་ཏུ་ཁྲུས་ལ་དགའ་བ་དང ། །མང་དུ་སྨྲ་བར་མི་བྱེད་ཅིང ། །ཁྱིམ་དུ་རྡོ་རྗེ་འབྲི་བ་དང ། །རྟག་ཏུ་དགེ་བས་མཆོད་བྱེད་པ། །རྡོ་རྗེ་ཕག་མོའི་རིགས་བྱུང་བ། ། སྟོང་ཕྲག་བཅུ་དང་ལྡན་པ་ཡིན། །སེར་ཞིང་སེར་གྱི་མདོག་འདྲར་སྣང ། །མིག་མི་གཡོ་ཞིང་ཁ་སྤུ་སེར། །རྡོ་རྗེ་གང་གི་དབྲལ་བ་འམ། །ལག་པར་ཡང་ནི་སྣང་གྱུར་པ། །རྟག་ཏུ་རྒྱལ་སྲིད་དག་ལ་གནས། །སྙེམས་ཤིང་བདེན་པར་སྨྲ་བ་དང ། །མཱ་ལི་ཀ་ཡི་དྲི་བྱུང་ཞིང ། །གང་གི་ཁྱིམ་དུ་རྡོ་རྗེ་ནི། །རྟག་ཏུ་འབྲི་ཞིང་ཆེར་མཆོད་པ། །ཁཎྜ་རོ་ཧིའི་རིགས་ལས་བྱུང ། །རྣལ་འབྱོར་མ་ཡི་དབང་ཕྱག་མཆོག་།གང་ཞིག་རྟག་པར་ཤ་ལ་དགའ། །སྐེམ་ཞིང་སྨིན་མ་ནག་པོའི་མདོག་།དཔྲལ་བར་མདུང་རྩེ་ལྟ་བུ་ཡོད། །གན་གཞིག་གདུག་པའི་ལས་ལ་དགའ། །རྟག་ཏུ་དུར་ཁྲོད་དག་ཏུ་འགྲོ། །འཇིགས་པ་མེད་ཅིང་རྟོག་མེད་དེ། །གང་གི་དཔྲལ་བར་ཐིག་ལེ་དང ། །ཁྱིམ་དུ་ཐད་པ་འབྲི་ཞིང་མཆོད། །དཔལ་ལྡན་ཧེ་རུ་ཀ་དེ་ཡི། །མཁའ་འགྲོའི་རིགས་ལས་བྱུང་བ་ཡིན། །སྲིན་གྱི་མདོག་འདྲའི་བུད་མེད་གང ། །སོ་ནི་མི་མཉམ་པར་གནས་ཤིང ། །རྟག་ཏུ་གདུག་པའི་ལས་ལ་
99a
༄#། །དགའ། །གཡོན་གྱི་མཆེ་བ་གཙིགས་པ་དག་།དེ་ཡི་ཁྱིམ་དུ་དགྲ་སྟ་ནི། །འབྲི་ཞིང་རྟ་ཏུ་མཆོད་བྱེད་པ། །རྣམ་པར་འདྲེན་པའི་རིགས་བྱུང་བའི། །མཁའ་འགྲོ་ཡིན་པར་ཐེ་ཚོམ་མེད། །མཁའ་འགྲོ་མ་ནི་ཚོགས་འདི་དག། །ཤྲཱི་ཧེ་རུ་ཀའི་རིགས་ལས་བྱུང ། །སྒྲུབ་པ་པོ་ལ་ཕན་པའི་ཕྱིར། །གསང་བའི་མཚན་ཉིད་སྤྲུལ་པ་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། རྣལ་འབྱོར་མ་ཐམས་ཅད་ཀྱི་ཁ་དོག་གི་མཚན་ཉིད་དང ། མཚན་མའི་ངེས་པའི་ཆོ་གའི་ལེའུ་སྟེ་བཅོ་བརྒྱད་པའོ།། །།དེ་ནས་ཡང་དག་བཤད་བྱ་བ། །ལཱ་མ་ཡི་ནི་ཁྱད་པར་དུ། །སྒྲུབ་པོ་གང་གིས་ཡན་ལག་གི་།ཆ་ཤས་ཡང་དག་པར་ཤེས་པའོ། །གང་གི་བཞིན་ནི་ཡོངས་རྒྱས་པར། །ཀུན་ནས་ཟླུམ་པོར་སྣང་གྱུར་ཅིང ། །ཁ་ཡི་སྨ་ར་རྟག་པར་ཡོད། །སྤུ་དང་སྨིན་མ་རིང་བ་དང ། །གོས་བཟང་གཙང་ཞིང་ཞི་བ་དང། །མི་གཡོ་བདེན་པར་སྨྲ་བ་དང ། །རྟག་ཏུ་དམ་པའི་ཆོས་ལ་དགའ། །དེ་ནི་དཔའ་བོའི་སྲིང་མོར་བཤད། །པདྨའི་ཕྱག་རྒྱ་སྦྱིན་བྱ་བ། །ཡང་ན་རུས་སྦལ་ཕྱག་རྒྱ་བྱ།། པགས་པ་རིལ་བ་སྤྱི་བླུགས་ཉིད། །ཕྱག་རྒྱའི་ལན་དུ་བརྗོད་པ་ཡིན། །དེ་ནི་ཚེས་བཅུའི་དུས་ཚིགས་ལ། །ཁྱིམ་དུ་པདྨ་འདྲི་བར་འགྱུར། །ལཱ་མའི་བུད་མེད་རྣམས་ཀྱི་ནི།།
99b
མཚན་ཉིད་གྱུར་པ་འདི་དག་ཡིན། །མཆུ་གཉིས་རློ་ཞིང་མིག་དཀྱུས་རིང ། མིག་ནི་དམར་ཞིང་སེར་སྐྱར་གནས། །ཕྱུག་ཅིང་སྐལ་བཟང་ཕན་ཡོན་ཅན། །དཀར་ཞིང་ཙམ་པ་ལྟ་བུར་སྣང ། །ཤིན་ཏུ་རིང་མིན་ཐུང་བའང་མིན། །སྣ་ཚོགས་པ་ཡི་གོས་ལ་དགའ། །དཔྲལ་བར་རི་མོ་གསུམ་ཡོད་ཅིང ། །མཚམས་ན་གྱེན་དུ་བསྟེན་པ་ལས། །དགོད་ཅིང་དགའ་བ་ཉིད་དག་དང ། །ལམ་ནི་རྣམ་པར་གནོན་ཅིང་གནས། །གཡུལ་དུ་འཆི་བ་རྣམས་ཀྱི་ནི། །གཏམ་དག་ལ་ནི་རྟག་ཏུ་དགའ། །དེ་ལྟར་རབ་དྲེགས་མཐོང་ནས་ནི། །མདུང་གི་ཕྱག་རྒྱ་བསྟན་པར་བྱ། །རྐང་པ་གཡོན་པ་བསྐུམ་པ་ཡི། །གར་ཉིད་ཀྱང་ནི་བསྟན་པར་བྱ། །གཡོན་པ་དག་ནས་ཡོངས་བཟློག་པ། །ཕྱག་རྒྱའི་ལན་ནི་ཡིན་པར་བཤད། །བཅུ་བཞི་དང་ནི་ཚེས་བརྒྱད་ནི། །དེ་ཡི་དུས་ཚིགས་ཡིན་པར་བཤད། །ཁྱིམ་དུ་མདུང་རྩེ་གསུམ་པ་ཡང ། །བྲིས་ནས་དེ་ནི་རྟག་ཏུ་མཆོག་།འཇིག་རྟེན་དབང་ཕྱུག་ལ་མ་ཡི། མཚན་ཉིད་གྱུར་པ་འདི་དག་ཡིན། །གང་གིས་མཁུར་ཚོས་དག་ཏུ་ནི། །ཁུང་བུར་སྣང་བའང་གནས་གྱུར་ཅིང ། །དེ་བཞིན་རྟག་ཏུ་དམར་ཞིང་སེར། །མིག་ནི་ལྗང་སེར་དག་ཏུ་སྣང ། །སྐྲ་ནི་དེ་བཞིན་འཁྱིལ་པ་དང ། །མགོ་དང་དཔྲལ་བར་དར་བཅིངས་སྣང ། །རི་མོ་གཅིག་པར་རབ་ཏུ་གནས། །དེ་བཞིན་མགྲིན་པ་རིང་བ་དང ། །རྟག་ཏུ་གོས་དམར་ལ་དགའ་ཞིང ། །དགོད་
100a
༄#། །ཅིང་གླུ་ནི་ལེན་པ་ཉིད། །གློ་བུར་དུ་ནི་ཁྲོ་བ་དང ། །སེམས་ནི་རྣམ་པར་གཡོ་བ་དང ། །རྩོད་པ་ལ་ནི་དགའ་བ་སྟེ། །འདི་འདྲའི་རབ་དྲེགས་མཐོང་ནས་ནི། ། མདུང་གི་ཕྱག་རྒྱ་རབ་སྦྱིན་བྱ། །གཉིས་པ་ཉིད་ནི་འབད་པ་ཡིས། །དྲིལ་བུའི་ཕྱག་རྒྱ་རབ་སྦྱིན་བྱ། །གཡོན་གྱི་ཕྱོགས་སུ་བཟློག་པ་ཡིན། །ཕྱག་རྒྱའི་ལན་ནི་ཡིན་པར་བཤད། །ཐུང་ཞིང་བྱིན་པ་སྦོམ་པ་དང ། །རྟག་ཏུ་གོས་སེར་ལ་དགའ་ཞིང ། །ཕྲག་པ་དག་ནས་གོས་ཀྱང་འཕྱང ། །དེ་འདྲའི་བུད་མེད་མཐོང་ནས་ནི། །འཁོར་ལོའི་ཕྱག་རྒྱ་བསྟན་བྱ་ཞིང ། །འབད་པ་ཡིས་ནི་གཉིས་པ་ཡང ། །དུང་གི་ཕྱག་རྒྱ་བསྟན་པར་བྱ། །གཡོན་ནས་ཡོངས་སུ་བཟློག་པ་ནི། །ཕྱག་རྒྱའི་ལན་ནི་ཡིན་པར་བཤད། །བཅུ་བཞི་དེ་ཡི་དུས་ཡིན་ཏེ། །དེ་ཡི་ཁྱིམ་དུ་རྡོ་རྗེ་འབྲི། །ཤྲཱི་ཧེ་རུ་ཀ་ལཱ་མ་ཡི། །མཚན་ཉིད་གྱུར་པ་འདི་དག་ཡིན། །ལུས་ཀུན་ལ་ནི་བ་སྤུ་ཡོད། །མིག་ནི་ནག་ཅིང་སེར་བ་དང ། །སྤོམ་ཞིང་རྣམ་འགྱུར་མི་བཟད་པ། །བཞིན་འཕེལ་ཆེ་ཞིང་ཁ་ཆེ་ལ། །གསུས་པ་རློ་ཞིང་ཁ་དོག་ནག་།མིག་ཟླུམ་སྣ་ནི་ཉམས་པ་དང ། །རྟག་ཏུ་གླུ་ལ་མཁས་པ་དང ། །སྤྲིན་གྱི་མདོག་ཅན་ཡིད་འཕྲོག་པ། འདི་འདྲའི་རབ་དྲེགས་མཐོང་ནས་ནི། །གླུ་ཡི་ཕྱག་རྒྱ་བསྟན་པར་བྱ། །གཉིས་པ་ཡང་ནི་འབད་པ་ཡིས། །མདུང་གི་ཕྱག་རྒྱ་བསྟན་པར་བྱ། །གཡོན་ནས་ཡོངས་
100b
སུ་བཟློག་པ་ནི། །ཕྱག་རྒྱའི་ལན་ནི་ཡིན་པར་བཤད། །དེ་ཡི་དུས་ཚིགས་བཅུ་གཅིག་སྟེ། །ཁྱིམ་དུ་མཆེ་བ་འབྲི་བར་བྱེད། །རྡོ་རྗེ་ཕག་མོ་ལཱ་མ་ཡི། །མཚན་ཉིད་གྱུར་པ་འདི་དག་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། །རྣལ་འབྱོར་མ་ཐམས་ཅད་ཀྱི་ཕྱག་རྒྱ་དང་ཕྱག་རྒྱའི་ལན་བསྟན་པའི་ལེའུ་སྟེ་བཅུ་དགུ་པའོ།། །། དེ་ནས་གཞན་ཡང་བཤད་བྱ་བ། །ལག་པ་གཡོན་གྱི་བརྡ་རྣམས་ནི། །གང་གིས་ཤེས་པས་ཡང་དག་པར། །མིང་སྲིང་དུ་ནི་དེ་བཞིན་འགྱུར། །གང་གིས་ལག་གཡོན་སྟོན་པ་ནི། །གསོང་པོར་སྨྲ་ཞེས་སྟོན་པ་ཡིན། །གང་ཞིག་སྲིན་ལག་སྟོན་པ་ནི། །གསོང་པོར་སྨྲ་བའི་ལན་འགྱུར་ཡིན། །གང་ཞིག་ལྟོ་བ་རྡེབ་པ་ནི། །བདག་ཉིད་བཀྲེས་པར་སྟོན་པ་ཡིན། །གང་ཞིག་དཔྲལ་པ་སྟོན་པ་ནི། །ནམ་མཁའ་ལས་ནི་འོངས་ཞེས་པའོ། །གང་ཞིག་ཁར་ནི་སོར་མོ་འཇུག་།ཟོས་ཟིན་ཞེས་ནི་སྨྲ་བ་ཡིན། །གང་ཞིག་ལྕེ་ནི་བསྐྱོད་པ་དག་།ཟའོ་ཞེས་ནི་སྨྲ་བ་ཡིན། །གང་ཞིག་པུས་མོ་ལ་རེག་པ། །ངལ་ལོ་ཞེས་ནི་སྟོན་པ་ནི།། གན་ཞིག་སོར་མོའི་རྩལ་རེག་།ངལ་སོགས་ཞེས་ནི་སྨྲ་བ་ཡིན། །གན་ཞིག་སོ་ནི་འཆའ་ཕྱེད་པ། །བཟའ་ཡིས་ཞེས་ནི་སྟོན་པ་ཡིན། །གང་ཞིག་པ་ཏི་ས་སྟོན་པ། །དེ་ལྟར་གྱིས་ཞེས་སྟོན་པ་ཡིན། །གང་ཞིག་ཁྲོ་གཉེར་སྟོན་པ་ནི། །བཅིངས་སོ་ཞེས་ནི་སྟོན་པ་ཡིན། །གང་ཞིག་
101a
༄#། །མཁའ་ལྡིང་སྟོན་པ་ནི། །གྲོལ་ལོ་ཞེས་ནི་སྟོན་པ་ཡིན། །གང་ཞིག་ཁུ་ཚུར་སྟོན་པ་ནི། །དེ་ལ་བ་ཏིའི་སོ་བསྟན་བྱ། །རྣམ་པར་འགྱུར་བ་བལྟས་ནས་ནི། །གང་ཞིག་སྒྲ་ནི་སྟོན་པ་ཡི། །ཁ་ཊྭཱཾ་ག་ནི་དེ་ལ་བསྟན། །གང་ཞིག་ཡན་ལག་བསྐྱོད་པ་དང ། །དེ་ལ་མཆེ་བ་གཉིས་བསྟན་བྱ། །གང་ཞིག་ལག་པས་ལག་པ་སྟོན། །གཏོར་མ་ཟ་ཞེས་སྨྲ་བ་ཡིན། །གང་ཞིག་ལག་པ་གཡས་པ་སྟོན། །དེ་ལྟར་གྱིས་ཞེས་སྨྲ་བ་ཡིན། །གང་ཞིག་རྣ་བ་ལ་རེག་པ། །གནས་པར་བྱ་ཞེས་སྟོན་པ་ཡིན།། གང་ཞིག་སེན་མོས་སེན་མོ་རེག་།ཤི་ཡི་ཁྱེར་ཅེས་སྨྲ་བ་ཡིན། །གང་ཞིག་ས་འདི་དཀྱིལ་འཁོར་དུ། །དེ་རིང་འཇུག་ཅེས་སྨྲ་བ་ཡིན། །གང་ཞིག་ནུ་མ་ལ་རེག་པ། །བདག་གི་བུ་ནི་སྲུང་ཞེས་བྱ། །གང་ཞིག་གཡོན་མཐེབ་ས་ལ་འབྲི། །བླ་མའི་སྐྱེ་བོས་ང་སྲུངས་སྨྲ། །གང་ཞིག་མིག་ནི་རྣམ་འཛུམ་བྱེད། །དེ་ལྟར་བྱོས་ཞེས་སྨྲ་བ་ཡིན། །གང་ཞིག་ཚིགས་ལ་རེག་པ་ནི། །བདེ་བར་ཉལ་ཞེས་སྨྲ་བ་ཡིན། །ཕོ་ཉ་མོ་ནི་གང་ཡང་རུང ། །དེ་དག་ཀུན་གྱིས་ཡང་དག་སྤྱད། །དཔལ་ཧེ་རུ་ཀའི་ངེས་པར་བརྗོད་པ་ལས། རྣལ་འབྱོར་མ་ཐམས་ཅད་ཀྱི་ལག་པའི་ཕྱག་རྒྱའི་བརྡའི་ཆོ་གའི་ལེའུ་སྟེ་ཉི་ཤུ་བའོ།། །།དེ་ནས་གསང་བ་ཆེན་པོ་ཡི། །ལྟ་བ་ང་ཡིས་བཤད་
101b
པར་བྱ། །བུད་མེད་སྤྱི་གཙུག་རེག་བྱེད་པ། །མགོ་བོ་དེ་ལ་བསྟན་པར་བྱ། །གང་ཞིག་དཔྲལ་པ་སྟོན་པ་ནི། །དེ་ལ་མཁུར་ཚོས་བསྟན་པར་བྱ། །གང་ཞིག་སོ་ནི་སྟོན་པ་ན། །དེ་ལ་ལྕེ་ནི་བསྟན་པར་བྱ། །གང་ཞིག་མཆུ་ནི་སྟོན་བྱེད་པ། །དེ་ལ་ཀོས་ཀོ་བསྟན་པར་བྱ། །གང་ཞིག་མགྲིན་པ་སྟོན་བྱེད་པ། །ལྟོ་ནི་དེ་ལ་བསྟན་པར་བྱ། །གང་ཞིག་ལག་པ་སྟོན་བྱེད་པ། །དེ་ལ་དཔུང་པ་བསྟན་པར་བྱ། །གང་ཞིག་སུམ་རྐེད་སྟོན་བྱེད་པ། །དེ་ལ་རྒྱབ་ནི་བསྟན་པར་བྱ། །གང་ཞིག་ནུ་མ་སྟོན་བྱེད་པ། །དེ་ལ་ཀོས་ཀོ་བསྟན་པར་བྱ། །གང་ཞིག་ལྟོ་བ་སྟོན་བྱེད་པ། །དེ་ལ་ལྟེ་བ་བསྟན་པར་བྱ། །གང་ཞིག་གསང་བ་སྟོན་བྱེད་པ། །དེ་ལ་ལིངྒ་བསྟན་པར་བྱ། །གང་ཞིག་བརླ་ནི་སྟོན་བྱེད་པ། །དེ་ལ་འཕོངས་ནི་བསྟན་པར་བྱ། །གང་ཞིག་པུས་མོ་སྟོན་བྱེད་པ། །དེ་ལ་བྱིན་པ་བསྟན་པར་བྱ། །གང་ཞིག་རྐང་པ་སྟོན་བྱེད་པ། །དེ་ལ་རྐང་མཐིལ་བསྟན་པར་བྱ། །གང་ཞིག་སོར་ཚིགས་སྟོན་བྱེད་པ། །དེ་ལ་སོར་མོ་བསྟན་པར་བྱ། །གང་ཞིག་ས་ནི་སྟོན་པ་ན། །དེ་ལ་ནམ་མཁའ་བསྟན་པར་བྱ། །གང་ཞིག་ནམ་མཁའ་སྟོན་བྱེད་པ། །དེ་ལ་ཉི་མ་བསྟན་པར་བྱ། །གང་ཞིག་འབབ་ཆུ་སྟོན་བྱེད་པ། །དེ་ལ་རྒྱ་མཚོ་བསྟན་པར་བྱ། །འདི་དག་མཁའ་འགྲོ་མ་ཡི་ནི། །ལུས་ཀྱི་ཕྱག་རྒྱ་ཐེ་ཚོམ་མེད། །འདི་དག་རྟག་བསྟན་གསང་
102a
༄#། །བ་སྟེ། །ཡང་དག་སྟོན་པར་འགྲོ་བར་འགྱུར། །དཔལ་ཧེ་རུ་ཀའི་ངེས་པར་བརྗོད་པ་ལས། །ཡན་ལག་གི་མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་གཞན་ཡང་བཤད་པར་བྱ། །ཡན་ལག་ཕྱག་རྒྱའི་ཆོ་ག་བཞིན། །གང་ཞིག་ཤེས་པས་མིང་པོའམ། །སྲིད་མོར་ཐེ་ཚོམ་མེད་འགྱུར་བའོ། །སོར་མོ་གཅིག་ནི་སྟོན་པ་ཡིས། །ལེགས་པར་འོངས་ཞེས་སྨྲ་བ་ཡིན། །སོར་མོ་གཉིས་ནི་བསྟན་པ་ཡིས། །ལེགས་འོངས་ལན་ནི་སྨྲ་བ་ཡིན། །འདི་ནི་རྣལ་འབྱོར་མ་ཀུན་གྱི། །ཡན་ལག་ཕྱག་རྒྱར་རབ་ཏུ་བཤད། །གཡོན་གྱི་གུང་མོ་བརྐྱང་བ་ལ། །ཅུང་ཟད་མཛུབ་མོ་བསྐུམ་པ་ནི། །མིག་གི་ཕྱག་རྒྱར་ཤེས་པར་བྱ། །སྔགས་པས་དེ་ལ་དེ་བསྟན་ཏེ། །དོ་མོད་ཇི་སྲིད་འཚོ་བའི་བར། །དབང་དུ་འགྱུར་བར་ཐེ་ཚོམ་མེད། །གང་ཞིག་གུང་མོ་སྟོན་བྱེད་པ། །དེ་ལ་མཛུབ་མོ་བསྟན་པར་བྱ། །གང་ཞིག་སྲིན་ལག་སྟོན་བྱེད་པ། །དེ་ལ་ལྕེ་ནི་བསྟན་པར་བྱ། །གང་ཞིག་པ་ཏིའི་ས་སྟོན་པ། །དེ་ལ་མདུན་ནི་བསྟན་པར་བྱ། །གང་ཞིག་སྤྱི་པོ་སྟོན་བྱེད་པ། །དེ་ལ་མཚམས་ཀྱི་མཐའ་བསྟན་བྱ། །གང་ཞིག་ས་ནི་སྟོན་བྱེད་པ། །དེ་ལ་མཁའ་ནི་བསྟན་པར་བྱ། །གང་ཞིག་ཁྲོ་གཉེར་སྟོན་བྱེད་པ། །དེ་ལ་མཚམས་
102b
ཀྱི་མཐའ་བསྟན་བྱ། །གང་ཞིག་སོ་ནི་སྟོན་བྱེད་པ། །དེ་ལ་མཆུ་ནི་བསྟན་པར་བྱ། །གང་ཞིག་མགྲིན་པ་སྟོན་བྱེད་པ། །དེ་ལ་ཁ་ནི་བསྟན་པར་བྱ། །གང་ཞིག་དཔྲལ་བ་སྟོན་བྱེད་པ། །དེ་ལ་མིག་ནི་བསྟན་པར་བྱ། །འདི་ནི་རྣལ་འབྱོར་མ་ཀུན་གྱི། །རིམ་བཞིན་ཡན་ལག་ཕྱག་རྒྱ་ཡིན། །འདི་དག་རྟག་བསྟན་གསང་བ་པ། །ཡང་དག་ལྟ་བར་འགྲོ་བར་འགྱུར། །དཔལ་ཧེ་རུ་ཀའི་ངེས་པར་བརྗོད་པ་ལས། །ཁྱད་པར་གྱི་ཕྱག་རྒྱའི་མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་གཉིས་པའོ།། །།དེ་ནས་ཡང་དག་བཤད་བྱ་བ། །མཁའ་འགྲོ་མ་ཡི་རྣམ་རོལ་པ། །གང་གིས་རིག་ནས་རིང་ནས་ཀྱང ། །དཔའ་བོ་དཔའ་མོའི་སྲིང་མོ་རུའོ། །དམ་ཚིག་ཅན་གང་རྗེས་ཆགས་པ། །དཔའ་བོའི་ལོངས་སྤྱོད་ས་གཞི་ཡིན། །གཞི་ནི་ས་གཞིར་བྱས་ནས་སུ། །རྣལ་འབྱོར་པ་ཡི་སྡོམ་པ་མཆོད། །འདི་དག་རྣལ་འབྱོར་མ་རྣམས་ཀྱི། །གོ་ལྡོག་པ་ཡིས་ལྟ་བ་ནི། །བཞིན་ནི་རྣམ་པར་འགྱུར་བ་ཉིད། །བདེ་བ་རྟག་པ་སྨིན་མ་གཡོ། །སྣ་ཚོགས་མྱུར་དུ་ཤེས་བྱ་བ། །དེ་བཞིན་མཁའ་འགྲོ་ལས་བྱུང་བའོ། །རྣམ་འགྱུར་བསྐོར་བར་ཤེས་བྱ་སྟེ། །རི་མོ་གསུམ་པ་ཡོངས་སུ་ཟླུམ། །མཁའ་འགྲོ་མ་རྣམས་ངེས་འགྲོ་བའི། །དེ་ཡི་མཚན་མ་ཀུན་ཤེས་བྱ། །གློ་བུར་རྣམ་པར་ལྡོག་འགྱུར་ཏེ། །སྔར་
103a
༄#། །བཞིན་གདོང་ནི་འཇིག་གྱུར་པ། །རྣམ་པ་དེ་ལྟ་དེ་ཡི་ནི། །གང་གི་རྡོ་རྗེ་ལྟ་བུར་གསལ། །སྒྲ་ནི་ཁུ་བྱུག་སྐད་ལྟ་བུར། །མཆོག་ཏུ་གསལ་བར་དེའི་དེ་ཉིད། །འདི་ཡི་མཚན་མ་ཁྱིམ་དུ་ནི། །རྡོ་རྗེ་ལྟ་བུར་མེ་ལོང་བཅས། །གཉིས་པར་ཡང་ནི་གྱུར་པ་ཡང ། །རལ་གྲི་འདྲ་བར་མེ་ལོང་བཅས། །རྒྱལ་མཚན་མདུང་འདྲར་རྟག་ཏུ་འབྱུང ། །མེ་ལོང་ཁ་སྦྱར་བར་ཤེས་བྱ། །མཚན་མར་བྱས་པའི་གཟུགས་རྣམས་ནི། །མདོར་བསྡུས་རྣམ་པར་ཤེས་བྱ་སྟེ། །མཚན་ཉིད་འདི་དག་དང་ལྡན་པ། །མཁའ་འགྲོ་མ་མཆོག་ཡིན་ཞེས་བྱ། །དཔལ་ཧེ་རུ་ཀའི་ངེས་པར་བརྗོད་པ་ལས། །མཁའ་འགྲོ་མའི་ཁྱད་པར་གྱི་མཚན་མའི་ཕྱག་རྒྱའི་མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་གཞན་སྐད་བརྡ་རྣམས་ནི། །སྒྲུབ་པོ་ལ་འདིར་བཤད་བྱ་བ། །གང་གིས་མིང་པོའམ་མ་སྲིང་མོ་ནི། །ཐེ་ཚོམ་མེད་པར་ཤེས་འགྱུར་བའོ། །པོ་ཏིངྒ་ཞེས་བྱ་བ་ནི། །གསོང་པོར་སྨྲ་བའོ། །པྲ་ཏི་པོ་ཏིངྒ་ཞེས་བྱ་བ་ནི། །གསོང་པོར་སྨྲ་བའི་ལན་ནོ། །ག་མུ་ཞེས་བྱ་བ་ནི། འགྲོའོ་ཞེས་སྨྲ་བ་ཡིན་ནོ། །ལུམ་པ་ཞེས་བྱ་བ་ནི། །འོང་ངོ་ཞེས་བརྗོད་པ་ཡིན་ནོ། །དེ་ཧཾ་ཞེས་བྱ་བ་ནི། གྲོང་ཁྱེར་ཞེས་སྨྲ་བའི་ལན་ནོ། །ཙ་ཏུ་ཀ་ཞེས་བྱ་བ་ནི། ཟུངས་
103b
ཅིག་ཅེས་སྨྲ་བ་ཡིན་ནོ། །བཱི་རཱ་ཎ་ཞེས་བྱ་བ་ནི། སྙིང་ཉིད་དོ། །མཱ་ར་ཎ་ཞེས་བྱ་བ་ནི། སྨྲ་ངན་ནོ། །ཀརྞི་ཀ་ནི། དྲིལ་བུའོ། །ཀ་ར་ཎཾ་ནི། །ཕག་པའི་ཟ་བའོ། །ཤྲ་བ་ཎ་ནི། རྣ་བའོ། །་མྲྀ་ཏ་ནཾ་ནི། བདུད་རྩིའི་གནས་སོ། །ས་མཱ་ག་མཱ་ནི། མིའོ། །ཏཱ་ལི་ཀ་ནི། མཁའ་འགྲོ་མའོ། །ན་ར་ཀཾ་ནི། དཀྱིལ་འཁོར་རོ། ། མུ་ཀཾ་ནི། དུར་ཁྲོད་དོ། །ཀཱ་ཁི་ལ་ནི། སྒོའོ། །ཤཝ་ས་ནཾ་ནི། བྲམ་ཟེའི་རིགས་སོ། །པ་རི་དི་ནི། རྒྱལ་རིགས་སོ། །བི་ར་ཏ་ནི། རྗེ་རིགས་སོ། །ཀྲུ་ར་ནི། །དམངས་རིགས་སོ། །ནྟསྠ་ནི། སྨེ་ཤ་ཅན་ནོ།། པ་ཤུ་ལི་ཀ་ནི། ཁྱིམ་མོ། །བྷ་གི་ནི། མཁའ་འགྲོ་མའོ། །མེ་ད་ཀ་ནི། ཆུའོ། །གྲྀ་ཧ་དེ་ནི། ཕྱག་རྒྱས་འདེབས་པའོ། །ལྕེ་སོ་ལ་རེག་པ་ནི། བདག་ཅག་ལྟོགས་སོ།། ཞེས་སྟོན་པའོ། །གནྜ་པ་སི་ནི། སྲེད་པའོ། །ཀུན་ཏ་ནི། གནས་ཆེ་གེ་མོ་ནས་འོངས་སོ་ཞེས་བྱའོ། །ཀི་ར་ཎ་ནི། མེ་ཏོག་གོ་།ཏུ་ལཾ་པ་ནི། དགོད་པའོ། །ད་རོ་ནི། སོའོ།། ནི་རོདྷ་ནི། ཆར་འབབ་བཟློག་པའོ། །ཏྲི་པ་ཏི་ནི། ཞུ་བའོ། །དྷཱུ་ར་ཡུ་ནི། ཕྱི་རོལ་ལོ། །དྷཱུ་པ་ཏྲི་ཡ་ནི། སྤྲིན་ནོ། །སཱ་ནུ་ནི། རི་བོའོ། །ས་རི་ཏ་ནི། འབབ་ཆུའོ།། ཨངྒུ་ལི་ནི། ཡན་ལག་གོ་།བ་ད་ན་ནི། གདོང་ངོ ། །རཱ་ཛཱ་ཀ་ནི། ལྕེའོ། ། ད་ན་ནི། །སོའོ། །པཀྟི་ནི། རྒྱལ་མཚན་ནོ། །ཚནྡྲོ་ནི། ཕྲེང་བའོ། །ཙ་ལ་ནི། རླུང་ངོ ། །པྲ་བ་
104a
༄#། །ཧ་ནི།་གྲུའོ། །པ་ཤུ་ནི། རི་དྭགས་སོ། །ཡ་ཏི་ནི། དཀྱིལ་འཁོར་རོ། །སོ་ས་ནི། བཞི་མདོའོ། །ཕལ་གུ་ཤཾ་ནི། སྐྱེ་བའོ། །མ་ཧཱ་ཀྵ་རཾ་ནི། ཕྱུགས་ཆེན་པོའོ། །ག་ནི། ར་སྐྱེས་སོ། །ནཱ་ཞེས་བྱ་བ་ནི། མིའོ། །གོ་ཞེས་བྱ་བ་ནི། ཁྱུ་མཆོག་གོ་།མ་ཞེས་བྱ་བ་ནི། མ་ཧེའོ། །བྷ་ནི། ཟ་བའོ། །ཧ་རྣམ་གྲངས་སོ། ། པྤ་ཀ་ནི།་རྒྱལ་པོའི་སྐྱེས་བུའོ། །བྲང་ལ་རེག་པ་ནི། ནགས་ན་གནས་པའོ། ཁ་ལ་རེག་པ་ནི། ཟོས་སོ་ཞེས་པའོ། །སོ་ལ་རེག་པ་ནི། ངོམས་སོ་ཞེས་པའོ། །ཧོ་ཞེས་པ་ནི། རྣམ་གྲངས་ཏེ། ཁ་ཅིག་ཏུའོ། །ཧྲི་ནི། ངོ་ཚའོ། །སྟོང་པ་ལ་རེག་པ་ནི། མེད་དོ་ཞེས་པའོ། །བརླ་ལ་རེག་པ་ནི། མི་ཐུན་གྱིས་ཤིག་པའོ། །སྟེང་ཉིད་ནི། །དེ་བཞིན་ནོ་ཞེས་པའོ། །ེ་བ་ཞེས་བྱ་བ་ནི། འོག་ན་མེད་པའོ། །ཕྱག་རྒྱ་དང་ཕྱག་རྒྱའི་ལན་གསང་བའི་བརྡ་ཉིད་དེ་དཔའ་བོས་གསུངས་པ་སྡེ་བཞིའི་མཚན་ཉིད་དོ། །དཔལ་ཧེ་རུ་ཀའི་ངེས་པར་བརྗོད་པ་ལས། སྡེ་བཞིའི་མཚན་ཉིད་ཐམས་ཅད་ཀྱི་བརྡའི་ཚིག་གི་བརྡར་བཏགས་པའི་ཆོ་གའི་ལེའུ་སྟེ་ཉི་ཤུ་རྩ་བཞི་པའོ།། །།དེ་ནས་དོན་ཀུན་འདོད་པ་ཡི། །སྦས་པ་བརྒྱད་མཐར་སྦྱར་བ་སྟེ། །མོས་པ་དམན་པའི་སེམས་ཅན་དག་།རྨོངས་ཤིང་མི་ཤེས་སེམས་ལྡན་ལའོ། །དེ་ལ་དཔའ་བོ་དང་རྣལ་འབྱོར་
104b
མ་རྣམས་ཀྱི་གསལ་བར་གསུངས་པའི་གསང་སྔགས་ནི། འདི་ཡིན་ཏེ། ཨོཾ་ན་མོ་བྷ་ག་ཝ་ཏེ་ཝཱི་རེ་ཤཱ་ཡ། མ་ཧཱ་ཀལྤ་ཨགྣི་སཾ་ནི་དབཱ་ཡ། ཛ་ཊཱ་མ་ཀུ་ཊོཏྐ་ཊཱ་ཡ། དཾཥྚ་ཀ་རཱ་ལོགྲ་བྷཱི་ཥ་ཎ་མུ་ཁཱ་ཡ། །ས་ཧ་སྲ་བྷུ་ཛ་བྷཱ་སུ་རཱ་ཡ། པ་ར་ཤུ་པཱ་ཤོ་དྱ་ཏ་ཤཱུ་ལ་ཁ་ཊྭཱཾ་ག་དྷ་རི་ཎེ། བྱཱ་གྷཱ་ཛི་ནཱ་མྦ་ར་དྷ་རཱ་ཡ། མ་ཧཱ་དྷུ་མྦྲཱནྡྷ་ཀཱ་ར་ཝ་པུཥཱ་ཡ། ཀ་ར་ཀ་ར། ཀུ་རུ་ཀུ་རུ། བནྡྷ་བནྡྷ། ཏྲ་ས་ཡ་ཏྲ་ས་ཡ། ཀྵོ་བྷ་ཡ་ཀྵོ་བྷ་ཡ། ཧྲཽཾ་ཧྲཽཾ། ཧྲཿ ཧྲཿ ཕཻཾ་ཕཻཾ། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷ་ཀྵ་བྷ་ཀྵ། བ་ས་རུ་དྷི་རཱ་ནྟྲ་མཱ་ལཱ་བ་ལམྦི་ནེ། གྲྀཧྣ་གྲྀཧྣ། སཔྟ་པཱ་ཏཱ་ལ་ག་ཏ་བྷུཾ་ཛ་ག་།སརྦ་མྦཱ་ཏརྫྫ་ཡ། ཏརྫྫ་ཡ། ཨཱ་ཀཌྜྷྱ་ཨཱཀྜྜྷྱ། ཧྲཱིཾ་ཧྲཱིཾ། ཛྞཽཾ་ཛྞཽཾ། ཀྵྨཱཾ་ཀྵྨཱཾ། ཧཱཾ་ཧཱཾ། ཧཱིཾ་ཧཱིཾ། ཧཱུཾ་ཧཱུཾ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། དྷི་ལི་དྷི་ལི།་ཧཱུཾ་ཧཱུཾ། ཕཊ་ཕཊ། དཔལ་ཧེ་རུ་ཀའི་ངེས་པར་བརྗོད་པ་ལས། རྩ་བའི་སྔགས་ཀྱི་གསང་བའི་ཆོ་གའི་ལེའུ་སྟེ་ཉི་ཤུ་རྩ་ལྔ་པའོ།། །།དེ་ནས་གཞན་ཡང་འཇིག་རྟེན་ནི། །གསུམ་པོ་དག་ན་ཡོད་མིན་པའི། །ཤྲཱི་ཧེ་རུ་ཀའི་སྔགས་ཤེས་ན། །གསང་སྔགས་ཐམས་ཅད་ཡོངས་འདོར་བའོ། །ལུགས་འབྱུང་ལུགས་ལས་ལྡོག་པ་ཡིས། །ཕོ་ཉ་རྣམས་ནི་ཡང་དག་གནས། །འོག་དང་སྟེང་གི་དངོས་གྲུབ་སྟེར། །བདག་གི་ཕོ་ཉ་མོ་ཀུན་འགྲོ། །ཕོ་ཉ་མོ་དེ་དོན་ཀུན་སྟེང ། །མཐོང་དང་དེ་
105a
༄#། །བཞིན་རེག་པ་དང ། །ཙུཾ་པ་ན་དང་རྟག་པར་འཁྱུད། །རྣལ་འབྱོར་གནས་ཀྱི་ཁྱད་པར་ཉིད། །ཇི་སྙེད་རྣལ་འབྱོར་ཚོགས་རྣམས་ནི། །ཐམས་ཅད་དངོས་གྲུབ་བྱེད་པར་བཤད། །བདེན་དངོས་ཐམས་ཅད་སྦྱིན་བྱ་སྟེ། །གཞན་དུ་ནམ་ཡང་མ་ཡིན་ནོ། །མ་དང་སྲིང་མོ་བུ་མོ་དང ། །ཆུང་མ་ཕོ་ཉ་མོ་གནས་ལ། ། གང་ལ་རྟག་ཏུ་སྔགས་སྦྱིན་པ། །དེ་ཡི་དེ་ཉིད་ཆོ་ག་བཤད། །དེ་ནས་རྣལ་འབྱོར་རྒྱུད་དུ་ནི། །རྙེད་དཀའི་དམ་ཚིག་ང་ཡིས་བཤད། །སྐྱེས་པ་བུད་མེད་གཡོན་ནས་འགྲོ། །འདོད་པའི་དངོས་གྲུབ་སྟེར་བར་བྱེད། །ཁྱིམ་དང་ཞིང་དུ་རྣམ་གནས་པ། །ཤིན་ཏུ་རིང་ཡང་ཤེས་པར་འགྱུར། །ཧེ་རུ་ཀ་དཔལ་རྣལ་འབྱོར་མཆོག་།སློབ་དཔོན་རྣལ་འབྱོར་མ་ཉིད་ཡིན། །རྒྱུད་འདི་རུ་ནི་སྒྲུབ་པ་པོ། །ལེགས་པར་གྱུར་པ་ཉིད་ཡིན་ཏེ། །བརྙས་མི་བྱ་ཞིང་སྤང་མི་བྱ། །ནུས་པ་ཡིས་ནི་མཆོད་པར་བྱ། །ཀཱ་ཀའི་གདོང་སོགས་བརྒྱད་པོ་ནི། །གྲོལ་དང་དད་པ་འཕེལ་བྱེད་པ། །རྟག་པར་དངོས་གྲུབ་རྣམས་ཀྱི་རྒྱུ། །དམ་ཚིག་རྣམས་ཀྱང་སྐྱོང་བར་བྱེད། །ལྷ་མོ་གཞན་ཡང་ཀུན་སྦྱོར་བ། །རྣམ་པར་རྨོངས་པས་འདོད་པ་མིན། །གཉིས་སུ་མེད་དང་ཐོགས་མེད་མིན། །དམ་ཚིག་སྤྱད་པ་སྤྱད་བྱ་བ། །བུད་མེད་དབང་ཕྱུག་ལེགས་པར་སྦྱོར། །ཚངས་སྤྱོད་དེ་
105b
བཞིན་བསམ་གཏན་དེ། །ཁྲོ་མེད་སྦུབས་སུ་ཀུན་ཏུ་སྤྱོད། །འདི་བརྒྱུད་དམ་ཚིག་ཀུན་སྤྱོད་ཡིན། །སྒྲུབ་པ་ལ་ནི་གནས་པ་ཡི། །སྒྲུབ་པ་པོས་ནི་རྟག་ཤེས་བྱ། །རྒྱུད་རྣམས་ཐམས་ཅད་ཐུན་མོང་སྟེ། །རྒྱུ་མེད་པར་ནི་གཞོམ་མི་བྱ། །དད་པ་ཉིད་ཀྱིས་བླང་བྱ་ཡི། །མིག་དང་ལག་པས་མ་ཡིན་ནོ། །གསང་པ་འདི་ནི་མི་བསྟན་ཅིང ། །རབ་ཏུ་འབད་དེ་བསྟན་པར་བྱ། །བློ་ལྡན་མཐེའུ་ཆུང་བསྐྱོད་པ་ནི། །ཕོ་ཉ་མོ་རྣམས་ཡང་དག་གནས། །ངག་དང་མ་དག་འདྲེས་པ་སྟེ། །སྒྲུབ་པ་པོ་ནི་གསུམ་དུ་གནས། །མཉེས་བྱེད་རྣམ་པར་དག་པ་དང ། །གསོལ་བྱེད་ཡོན་ཏན་ལྡན་པའི་མི། །དཔལ་ཧེ་རུ་ཀའི་ངེས་པར་བརྗོད་པ་ལས། །སློབ་མ་ཡོངས་སུ་བརྟག་པ་དང་སྡོམ་པའི་ཆོ་གའི་ལེའུ་སྟེ་ཉི་ཤུ་རྩ་དྲུག་པའོ།། །།དེ་ནས་དཔའ་བོའི་སྤྱོད་བརྟུལ་ཞུགས། །རྣལ་འབྱོར་མ་ཀུན་རབ་སྒྲུབ་པ། །མཚན་ཉིད་དབྱེ་བ་ཤེས་བྱས་ནས། །དངོས་སྒྲུབ་མྱུར་དུ་འཇུག་བྱེད་ནི། །གྲོང་དང་གྲོང་དུ་དེ་སོང་ནས། །ཕོ་ཉའི་གཟུགས་ནི་མཚོན་པར་བྱ། །ཕོ་ཉ་རལ་གྲིའི་སོ་འདྲ་ཞིང ། །དག་བྱེད་བསོད་ནམས་འཕེལ་བྱེད་ཡིན། །དེ་བཞིན་ཕོ་ཉ་ལེགས་འགྲོགས་པས། །སྒྲུབ་པ་པོ་ཡིས་དངོས་གྲུབ་འཐོབ། །བཟླས་བརྗོད་བསམ་གཏན་མཆོད་མེད་པར། །མྱུར་པ་ཉིད་དུ་འགྲུབ་པར་འགྱུར། །སྔགས་དང་ཕྱག་རྒྱས་སྒྲུབ་
106a
༄#། །པ་པོ། །མཆོད་པ་ཉིད་ལ་རབ་ཏུ་འཇུག་།འདི་ལས་གཞན་པའི་མཆོད་མེད་དེ། །དེ་ལྟར་བསྟན་བཅོས་ངེས་པ་ཡིན། །ཕོ་ཉའི་ལམ་ལ་དགའ་རྣམས་ཀྱི། །སྒྲུབ་པ་པོ་ནི་དངོས་གྲུབ་བརྩོན། །རིག་སྔགས་ཕྱག་རྒྱར་ཡང་དག་ལྡན། །ཙ་རུ་རྟག་ཏུ་བཟའ་བར་བྱ། །སྒྲུབ་པོ་ཤིན་ཏུ་མཉམ་བཞག་པས། །རིགས་རྣམས་ཀུན་ལ་སྤྱད་པར་བྱ། །བཟའ་མིན་པར་ནི་མི་བརྟག་གོ་།དེ་ཉིད་དབྱེར་མེད་དེ་ཡིས་ནི། །ཕོ་ཉ་མོ་ནི་གཉིས་བསྒྲུབ་བྱ། །དངོས་གྲུབ་ཆོ་ག་ལ་སྤྱད་ཚེ། །ཕོ་ཉ་གཅིག་པུ་ཁོ་ན་ཡིན། །རང་དགའ་ཉིད་དང་དངོས་གྲུབ་ནི། །སྒྲུབ་པ་དག་དང་ཉེ་བ་སྟེ། །བླ་མ་བརྒྱུད་རིམ་གྱིས་ཐོབ་པའི། །དབང་བསྐུར་བས་ནི་སྔགས་ལེགས་ལྡན། །ཕོ་ཉ་རྣམས་སུ་ཡང་དག་བཤད། །ཕྱག་རྒྱར་ལེགས་སྦྱོར་ངང་ཚུལ་ཅན། །ལེགས་རྫོགས་ཡེ་ཤེས་རྒྱུ་སྐྱེས་པའོ། །ནང་བར་སྔར་ལངས་སེམས་བདག་ཉིད། །ལུས་ལ་ཐམས་ཅད་བྱས་ནས་ནི། །ཡན་ལག་ལས་འདས་མཚོན་ཆ་རྣམས། །ལུས་ལ་གནས་པ་ཀུན་ཏུ་སྤྱད། །ལུས་ནི་དག་བྱེད་བྱས་ནས་སུ། །རྟག་ཏུ་སྔགས་ནི་བརྗོད་ནས་སུ། །རྣལ་འབྱོར་གནས་རྣམས་ངེས་བསྟན་ཅིང ། །མཚོན་ཆ་རྣམས་ནི་བསྒོམ་མི་བྱ། །དམ་ཚིག་ཅན་ལ་ཁྲོ་མི་བྱ། །མངོན་པར་བརྩོན་ལས་འདའ་མི་བྱ། །དེ་དང་ལྷན་ཅིག་བདེ་བར་བྱ། །གྲོལ་བའི་དོན་དང་བདེ་དོན་དུ། །དམ་ཚིག་སྤྱོད་པ་ཉིད་དུ་བྱ། །རྣམ་འཕྲུལ་སེམས་པ་ལས་གྲོལ་ཞིང ། །མཚན་མོ་
106b
རྟག་པར་གཅེར་བུ་སྟེ། །ནག་དང་དམར་བར་རྟག་ཏུ་འགྱུར། །སྲོག་ཆགས་ཡན་ལག་ན་བཟར་གྱོན། །མགུལ་རྒྱན་གདུ་བུ་དཔུང་རྒྱན་དང ། །རྣ་ཆ་ཚངས་པའི་སྐུད་པ་དང ། །མགོ་བོའི་ཕྲེང་བས་མགུལ་དུ་བརྒྱན། སྐྱེ་རག་སིལ་སིལ་སྒྲ་སྒྲོག་ཅིང ། །རལ་པའི་ཅོད་པན་དར་གྱིས་བཅིངས། །བཅོས་མའི་སྐྲ་ལ་སོགས་པས་བརྒྱན། །རྡོ་རྗེ་ཐོད་པ་ཁ་ཊྭཱཾ་བཅས། །ཌ་མ་རུ་རྡུང་ཧཱུཾ་སྒྲ་སྒྲོག། །དཔའ་བོ་དཔའ་མོ་ཐམས་ཅད་ནི། །གོ་ཆ་གསུམ་གྱིས་བརྒྱན་པ་ཡིན། །བདེ་བ་འདོད་པས་བདེ་བསྐྱོད་བྱ། །མཆོད་ཕྱིར་ཐོགས་ནི་ཡོངས་སྤངས་ལ། །གཙང་སྦྲ་ཤྲཱི་ཧེ་རུ་ཀར་གནས། །ཕྱག་རྒྱ་ལྔ་དང་ཡང་དག་ལྡན། །སྒྲུབ་པ་པོ་ཡིས་དངོས་གྲུབ་བརྩོན། ། མགུལ་རྒྱན་གདུ་བུ་རྣ་རྒྱན་དང ། །སྤྱི་བོར་ནོར་བུས་རྣམ་པར་བརྒྱན། །མཆོད་ཕྱིར་ཐོགས་དང་ཐལ་བ་དང ། །དུས་ཀུན་ཏུ་ནི་རྣམ་པར་གནས། །མཚན་མོ་རྟག་པར་གསལ་བྱ་ཞིང ། །ཉིན་པར་གསང་བ་ཉིད་དུ་བྱ། །དབྱེ་བའི་ཡེ་ཤེས་ཤིན་ཏུ་སླས། །རབ་ཏུ་ཞི་ཞིང་ངལ་བ་ཐུལ། །གཙང་སྒྲ་གསུམ་དུ་ཤེས་བྱ་ཞིང ། །རང་གི་རྒྱུན་བཞིན་རྣམ་པར་གནས། །རིགས་དང་རིགས་མིན་ངོར་མི་བལྟ། །སྤྱི་གཙུག་ལ་སོགས་བཅིངས་པ་སྤངས། །ཕོ་ཉ་གཙང་སྦྲ་དྲང་པོ་ཡིན། །གཉིས་པ་ཞི་བ་ལན་པར་འདོད། །ཟས་གཅིག་ཏུ་ནི་ཟ་བ་དང ། །གཙང་སྦྲ་གསུམ་པ་ཡིན་པར་བཤད། །རྣལ་འབྱོར་པ་ཡིས་རྟག་པར་རུ། །གཙང་སྦྲ་འདི་དག་རྟག་ཏུ་བསྐྱང ། །གཙང་མ་དག་པའི་རིམ་ཐོབ་ན། །དངོས་གྲུབ་གང་ལ་འབྱུང་བར་འགྱུར། །དེ་ཉིད་བསྡུས་ལས་གང་གསུངས་དང ། །དེ་བཞིན་བདེ་
107a
༄#། །མཆོག་ལས་གང་གསུངས། །གསང་བའི་རྒྱུད་ལས་ཡང་དག་བཤད། །དེ་བཞིན་དཔལ་མཆོག་དང་པོ་དང ། །རྡོ་རྗེ་འཇིགས་བྱེད་རྒྱུད་དུ་ནི། ། བཟླས་དང་བརྟུལ་ཞུགས་སོགས་འགྲུབ་སྟེ། །དེ་འདིར་བསམ་གཏན་ཙམ་གྱིས་ནི། །སྔགས་པས་སྐད་ཅིག་གིས་འགྲུབ་འགྱུར། །རྣལ་འབྱོར་ལམ་ལ་དགའ་རྣམས་ཀྱིས། །འདི་ནི་གཙང་སྦྲའི་སྦྱོད་པར་བཤད། །གཙང་སྦྲའི་བསོད་ནམས་གང་གྱུར་པ། །སྨྲ་བར་ནུས་པར་འོས་མ་ཡིན། །སྒྲུབ་པོའི་ཡོན་ཏན་རྒྱ་ཆེན་པོ། །ཁ་ཅིག་གིས་ནི་སྨྲ་བ་འམ། །གདོང་གཅིག་གཅིག་གིས་བརྗོད་དེ་ཅི། །སྟོང་ཕྲག་བརྒྱ་ཡི་གདོང་གྱུར་མིན། །ཧེ་རུ་ཀ་དཔལ་ཡེ་ཤེས་ཆེ། །རྣམ་པར་དག་པའི་མཚན་ཉིད་ཀུན། །སྒྲུབ་པ་པོ་ཡི་བདེ་བའི་ཆུ། །གཉིས་མེད་གཉིས་སུ་མེད་པ་ཉིད། །གཉིས་མེད་སྦྱོར་བས་རེག་པ་ནི། །དག་བྱེད་སྡིག་པ་འཇོམས་བྱེད་པ། །རེག་པ་དང་ནི་སྨྲ་བས་ཀྱང ། །སྡིག་པ་ཀུན་ལས་རྣམ་གྲོལ་འགྱུར། །ལུས་དག་པ་ལ་སྐྱོན་མེད་པའི། །མི་མཆོག་ཀུན་ནས་སྤྱོད་བྱེད་པ། །སྡིག་པ་ཐམས་ཅད་རྣམ་དག་སྟེ། །དེ་བཞིན་གཤེགས་པའི་ས་ཐོབ་པོ། །སྡིག་པ་ཐམས་ཅད་རྣམ་དག་པ། །དེ་བཞིན་གཤེགས་པའི་རིགས་སྐྱེ་ཞིང ། །ཆོས་དང་ལྡན་པའི་རྒྱལ་པོར་འགྱུར། །དེ་ལྟར་རྟག་ཏུ་མཆོད་བྱས་ནས། །གུས་པ་ཡིས་ནི་གཏོར་མ་
107b
སྦྱིན། །རང་འདོད་ལས་ལ་རྣལ་འབྱོར་པས། །ཆོག་ཇི་བཞིན་སྦྱིན་པར་བྱ། །མར་གྱི་ངོ་ཡི་ཚེས་བཅུ་དང ། །ཟླ་བ་ཡར་ངོའི་གང་གྱུར་ལ། །མྱུར་དུ་འབད་པས་མཆོད་བྱ་སྟེ། །རྡོ་རྗེ་ཕག་མོ་མྱོས་བྱེད་ཤ་རྣམས་ཀྱིས། །སྐྱེ་བོ་གུས་པས་དེ་རྣམས་མཆོད་བྱས་པས། །ཧེ་རུ་ཀ་དཔལ་མངོན་དགར་གྱུར་པ་ལ། །མགུ་བའི་ཐུགས་ཀྱིས་མཆོག་ནི་སྩོལ་འགྱུར་ཏེ། །དེ་རྣམས་ལག་གནས་མཆོག་རྣམས་སོ། །མཚན་མོ་བརྟུལ་ཞུགས་ཅན་གཏོར་མ། །སྐྲ་གྲོལ་གཅེར་བུར་གྱུར་པས་སྦྱིན། །ཤྲི་ཧེ་རུ་ཀའི་བདག་ཉིད་དུ། །སྦྱོར་དེས་མ་མོ་རྣམས་མཉེས་འགྱུར། །དཔལ་ཧེ་རུ་ཀའི་ངེས་པར་བརྗོད་པ་ལས། །སྤྱོད་པ་དང ། །བརྟུལ་ཞུགས་དང ། མཆོད་པ་དང ། གཏོར་མའི་ཆོ་གའི་ལེའུ་སྟེ་ཉི་ཤུ་རྩ་བདུན་པའོ།། །།གང་ཡང་ལེགས་མཆོད་རྣམ་དག་དངོས། །མྱ་ངན་འདས་འབྱུང་དཔའ་བོ་སྟེ། །བདག་ཉིད་མཆོད་པ་དེ་ཡིས་ནི། །སངས་རྒྱས་སོགས་ཀུན་མཆོད་པ་ཡིན། །དཔའ་བོ་ཀུན་དང་རྣལ་འབྱོར་མ། །བརྟན་པ་སྔོན་འགྲོའི་གཡོ་བ་སྟེ། །ཞི་བའི་འདུས་པས་ལེགས་གནས་པའི། །སྤུན་དང་དཔའ་བོ་མཆོད་པར་བྱ། །སྤུན་དང་བུ་དང་ལྷན་ཅིག་ཏུ། །བདེ་དང་སྡུག་བསྔལ་ཀུན་འབྱུང་བྱ། །སྔགས་དང་ཕྱག་རྒྱ་ཉིད་དག་དང ། །ཡེ་ཤེས་དེ་ནི་བསྟན་མི་བྱ། །དག་བྱེད་ཟས་ལ་བཟའ་བར་བྱ། །རྟག་ཏུ་དམ་ཚིག་
108a
༄#། །སྤྱོད་བྱས་པ། །གསང་སྔགས་སུ་ལའང་སྦྱིན་མི་བྱ། །མན་ངག་ཉམས་པར་སྦྱིན་མི་བྱ། །དམ་ཚིག་གནས་ལ་དོན་ཇི་བཞིན། །མན་ངག་གནས་ཀྱང་སྦྱིན་པར་བྱ། །ཕོ་ཉ་མ་གཏོགས་གཞན་དག་ལ། །འདོད་ལ་རྨོངས་པས་འགྲོ་མི་བྱེད། །ཕོ་ཉ་ལ་རྟག་ཞེན་ཐར་པ། །འདའ་བ་ཡིས་ཀྱང་ལོངས་སྤྱོད་བྱ། །སྐྱེ་གནས་དམན་དང་གཅིག་ཤོས་ལའང ། །བསྙེན་བཀུར་ཉིད་ནི་བྱ་བ་མིན། །མ་དང་སྲིང་མོ་བུ་མོ་དང ། །ཆུང་མ་ཕོ་ཉ་མོ་ཉིད་གནས། །དཀའ་ཐུབ་ངེས་པར་ཟད་པར་འགྱུར། །འཁོར་ལོའམ་དེ་བཞིན་གྲུབ་པ་ལ། །མཆོད་ལ་ལྷན་ཅིག་དགུག་པར་བྱ། །དེ་ལྟར་རྫས་ནི་རྣམ་ངེས་ཡིན། །འཇིག་རྟེན་ལ་རྟག་གཡོན་ནས་སྤྱོད། །རྐང་པ་གཡོན་པ་སྔོན་དུ་འདོར། །ལག་པ་གཡོན་པ་ཡོངས་སུ་བསྒྱུར། །གཡོན་གྱི་སྤྱོད་པས་རབ་མཆོད་བྱེད། །གཡོན་པས་འཁྱུད་པ་ཙམ་དང་ནི། །གཡོན་པ་ཡིས་ནི་མཆོད་ཅིང་ཟ། །བརྟུལ་ཞུགས་མ་ཉམས་བརྟུལ་ཞུགས་རྫོགས། །སྒྲུབ་པ་པོ་ནི་བྱ་བ་བརྩོན། །དམ་ཚིག་རིགས་ལ་སྤྱོད་པ་དང ། །གཅིག་ཏུ་ཟས་ལ་སྤྱོད་པར་བྱེད། །རིགས་ལྔ་ལ་ནི་ཀུན་སྤྱོད་པ། །རིགས་བཞིར་རབ་ཏུ་བརྟག་པར་བྱ། །རིགས་གཅིག་ལ་ནི་ཀུན་སྤྱོད་པ། །རྣལ་འབྱོར་གྲུབ་པ་རབ་ཏུ་མཆོད། །བ་ལང་ཤ་དང་རྟ་ཤ་དང ། །ཁྱི་ཤ་དག་དང་བྱ་དག་གིས། །དཀྱིལ་འཁོར་གྲུ་གསུམ་བྱས་ནས་ནི། །
108b
སངས་རྒྱས་དག་ཀྱང་ངེས་པར་འཇིག་།ཕྱག་རྒྱ་སྔགས་དང་ཡང་དག་ལྡན། །དཔའ་བོ་རྣམས་ཀྱི་ཟས་དེ་བཞིན། །ཤྲཱི་ཧེ་རུ་ཀའི་སྤྲུལ་པ་སྟེ། །ཉེས་སྤྱོད་བསྟན་བཅོས་ཀུན་རྣམས་སྤངས། །རྟག་པ་ཉིད་དུ་འཛིན་པ་ནི། །ལས་རྣམས་ཀུན་ལ་སྲུང་བ་དང ། །བགེགས་མེད་ཇི་བཞིན་དེ་སྒྲུབ་པ། །འདིར་ནི་འགར་ཡང་འགྲུབ་མ་ཡིན། །དེ་ཡི་ཕོ་ཉ་མ་མཆོག་བཟང ། །ལྷན་ཅིག་བརྩོན་པར་ལྡན་པ་ཡིན། །ཀུན་ནས་ཆགས་དགའི་ལེགས་སྦྱོར་བས། །རྣལ་འབྱོར་རྫས་ཀྱི་རྣམ་འབྱེད་ཉིད། །བླ་མའི་མན་དག་ལ་ཆགས་པ། །དེ་ནི་དོན་ནོར་སྦྱིན་དང་མཚུངས། །དཔལ་ཧེ་རུ་ཀའི་ངེས་པར་བརྗོད་པ་ལས། །ནང་གི་སྦྱིན་སྲེག་དང ། །རིགས་གཅིག་དང་ལྡན་པའི་ཆོ་གའི་ལེའུ་སྟེ་ཉི་ཤུ་རྩ་བརྒྱད་པའོ།། །།དེ་ནས་གཞན་ཡང་བསྟན་པ་ནི། །ཕོ་ཉའི་མཚན་ཉིད་ཤེས་བྱ་བ། །གང་གིས་ཡང་དག་ཤེས་འགྱུར་བ། །མཁའ་འགྲོའི་དམ་ཚིག་ལ་གནས་པའོ། །མིང་པོ་དང་ནི་ཕ་ངང་ཡང ། །བདག་པོ་ཉིད་དུ་སྐད་ཅིག་བཤད། །ལྕེ་སྦོམ་མིག་ནི་དམར་སེར་ལ། །རྩུབ་ཅིང་སྤུ་ནི་དམར་སེར་ཡིན། །ཐུན་མོང་དངོས་གྲུབ་ཐམས་ཅད་དང ། །བཟླས་དང་བརྟུལ་ཞུགས་ལ་རྟག་དགའ། །དྲན་པ་དང་ནི་ཡང་དག་ལྡན། །ཕོ་ཉ་མོ་སོགས་གོ་འཕང་བཅས། །མཁའ་འགྲོ་མ་མཆོག་ཉི་ཤུ་བཞི། །སྤྱོད་དང་གྲོལ་བའི་འབྲས་རབ་སྟེར། །རྩ་བའི་སྔགས་ནི་རྟག་ཏུ་ཟློས། །འདོད་པའི་
109a
༄#། །དོན་ཀུན་སྒྲུབ་བྱེད་པ། །བདུད་ཀུན་རབ་ཏུ་ཞི་བར་བྱེད། །རྒྱུ་དང་མི་རྒྱུའི་འཇིག་རྟེན་གསུམ། །རྣལ་འབྱོར་རོལ་པའི་འབྲས་རབ་སྟེར། །གསང་སྔགས་འདི་ལས་འབྱུང་བ་ཡིན། །སྔགས་དང་ཕྱག་རྒྱར་ཡང་དག་ལྡན། །སྒྲུབ་པ་པོ་ནི་དངོས་གྲུབ་བརྩོན། །ཕྱག་རྒྱ་དང་བྲལ་གསང་སྤགས་ཏེ། །ལུས་ཅན་རྣམས་ལ་འགྲུབ་མི་འགྱུར། །ཇི་སྲིད་དྲོ་བའི་བྱ་བ་དག། །མངོན་པར་བརྩོན་པར་རྟོགས་པར་བྱ། །འདོད་པའི་དོན་ཀུན་སྒྲུབ་བྱེད་པའི། །རྣལ་འབྱོར་ཆེ་ལ་གང་ཞིག་སྡང ། །ཁྱི་ཡི་སྐྱེ་གནས་བརྒྱར་སྐྱེས་ཏེ། །རྨེ་ཤ་ཅན་དུ་སྐྱེ་བར་འགྱུར། །དཔེར་ན་ལ་ལ་མར་འདོད་པས། །འབད་པས་ཆུ་ནི་བསྲུབས་གྱུར་ཀྱང ། །མར་གསར་འབྱུང་བར་མི་འགྱུར་གྱི། །ལུས་ཉོན་མོངས་པ་ཁོ་ནར་ཟད། །འཛིན་ཅིང་མཆོད་པར་བྱེད་པ་ནི། །འཚོ་བའི་ཐབས་ཀྱི་རྒྱུར་གྱུར་པའི། །རྣལ་འབྱོར་གཞན་ལ་བསྟེན་པ་ནི། །གཞན་དུ་དེ་བཞིན་དོན་མེད་འགྱུར།། རྣལ་འབྱོར་ཆེ་མཆོག་དཔའ་བོ་ནི། །ཡུལ་ཕྱོགས་གང་ན་གནས་གྱུར་པ། །རིགས་ངན་ཀླ་ཀློ་ཡིན་ན་ཡང ། །ཡུལ་དེ་ཡོངས་སུ་བརྟགས་པ་སྟེ། །སེམས་ཅན་ཡོངས་སུ་གཟུང་བའི་རྒྱུར། །དེ་རུ་ང་ནི་བརྟག་པར་གནས། །དཔལ་ཧེ་རུ་ཀའི་ངེས་པར་བརྗོད་པ་ལས། ཕོ་ཉའི་མཚན་ཉིད་དང ། ནུས་པའི་གནས་སྐབས་ཀྱི་ཆོ་གའི་ལེའུ་སྟེ་ཉི་ཤུ་རྩ་
109b
དགུ་པའོ།། །།དེ་ནས་གཞན་ཡང་བཤད་བྱ་བ། །ཤིན་ཏུ་རྙེད་དཀའི་དགོད་པ་སྟེ། །གང་གིས་ཤེས་པ་ཙམ་གྱིས་ནི། །མྱུར་དུ་དངོས་གྲུབ་སྒྲུབ་བྱེད་པའོ། །ས་ཡི་ཆ་ནི་མཉམ་ཡིད་འོང ། །ཙནྡན་གྱིས་ནི་ཉེ་བར་བྱུག་།དྲི་བཟང་དྲི་ལྡན་ས་ལ་ནི། །མེ་ཏོག་སིལ་མ་གཅལ་བཀྲམ་ཞིང ། །མར་མེའི་ཕྲེང་བ་ཡང་དག་དཀྲིགས། །སྤོས་ཀྱི་དྲི་ཡིས་ཉམས་དགའ་བར། །བདག་གིས་ཐམས་ཅད་བྱས་ནས་ནི། །ཕྱོགས་བཅིང་པ་ནི་བྱས་ནས་སུ། །དེ་ནས་རྫ་རྔ་བཅིང་བྱ་སྟེ། །རི་མོ་དགུ་པ་ཡོངས་སུ་ཟླུམ། །ཡི་གེ་ཕྱི་མོ་མཉམ་བྲིས་ལ། །ཤིན་ཏུ་མཉམ་གཞག་དགོད་པར་བྱ། །དེར་གནས་པ་ལས་དཔའ་བོ་ནི། །འདོད་པའི་དོན་ཀུན་སྒྲུབ་བྱེད་བཏུ། །ལུགས་སུ་འབྱུང་དང་ལྡོག་པ་ཡི། །དབྱངས་དང་ཡི་གེ་སྒྲུབ་པ་པོས། །གྲངས་དེ་དག་ནི་ནང་ཆུད་པར། །དགེ་བ་ཐུབ་པས་བྱས་ནས་ནི། །རེ་མིག་སུམ་ཅུ་གཉིས་པ་བླང ། །ལྔ་པ་ཡིས་ནི་ཁྱད་པར་བྱ། །བརྒྱ་ཕྱེད་ཕྱེད་པ་ཡང་དག་བླང ། །ཉི་ཤུ་རྩ་བཞི་པ་ཡིས་ཕྱེ། །རེ་མིག་གསུམ་ཅུ་དྲུག་པ་བླང ། །གསུམ་པ་ཡིས་ནི་ཁྱད་པར་དབྱ། །དེ་ནས་སུམ་ཅུ་གཉིས་པ་བླང ། །ལྔ་པ་ཡིས་ནི་ཁྱད་པར་བྱ། །དེ་ནས་ཉི་ཤུ་ལྔ་པ་གཟུང ། །ཉི་ཤུ་བཞི་པ་དག་དང་སྦྱར། །སུམ་ཅུ་གསུམ་པ་ཡང་དག་བླང ། །རེ་མིག་བཅོ་ལྔ་པ་ཡིར་ལྡན། །ལྔ་པ་དག་དང་ཡང་དག་བཅས། །མཛེས་པའི་མཆོག་ནི་ཡིན་པར་འདོད། །ཉི་ཤུ་རྩ་གཉིས་པ་དང་ལྡན། །བཅུ་གཅིག་པ་ཡིས་མཚན་པའོ། །ཚིག་གི་དང་པོ་ཡིན་པར་འདོད། །རེ་མིག་བཅུ་དགུ་པ་
110a
༄#། །གཟུང་བྱ། །མེ་ཡི་བུ་དང་ཡང་དག་ལྡན། །རེ་མིག་གསུམ་པས་ཕྱེ་བའོ། །ཡ་ཚོགས་བརྒྱད་པའི་ས་བོན་ལ། །རེ་མིག་སུམ་ཅུ་དྲུག་པ་དང ། །ཡང་དག་ལྡན་པའི་ཡི་གེར་གྱུར། །སླར་ཡང་ཚིག་ནི་དེ་དག་ཉིད། །འདོད་པའི་དོན་ཀུན་སྒྲུབ་བྱེད་ཡིན། །དེ་ནས་རང་བྱུང་བླངས་ནས་ནི། །རེ་མིག་ལས་ནི་ལྔ་པར་སྦྱར། །སྤྱི་བོར་ནཱ་ད་ཐིག་ལེར་སྦྱར། །དོན་ཀུན་སྒྲུབ་ཅེས་བྱ་བ་ཡི། །ཚིག་ནི་གཉིས་པ་ཡིན་པར་བཤད། །རེ་མིག་བཅུ་དགུ་པ་ཉིད་ལ། །ཉི་ཤུ་རྩ་བདུན་པ་ཡིས་ཕྱེ། །གསུམ་པ་དག་དང་ཡང་དག་ལྡན། །སུམ་ཅུ་གསུམ་པ་ལེགས་བླངས་ཏེ། །རེ་མིག་གི་ནི་གཉིས་པར་སྦྱར། །ཉི་ཤུ་པ་དང་ཡང་དག་ལྡན། །མཛེས་པའི་མཆོག་ནི་ཡིན་པར་འདོད། །དེ་བཞིན་ཉི་ཤུ་གཅིག་པ་ཉིད། །དེ་བཞིན་ཉི་ཤུ་དྲུག་པ་ཡིན། །ལན་གཉིས་བཟླས་པའི་ཚིག་ཏུ་ནི། །ཤིན་ཏུ་མཉམ་པར་བཞག་སྟེ་བཏུ། །དེ་ནས་གོ་རིམ་ལྡོག་པས་གཟུང ། །རེ་མིག་ལས་ནི་དང་པོ་ཉིད། །བཞི་པའི་མཐའ་དང་ཡང་དག་ལྡན། །དེ་བཞིན་བཅོ་ལྔ་བ་དང་བཅས། །ཆོས་དོན་འདོད་དང་ཐར་པ་ཡི། །ཚིག་ནི་གསུམ་པ་ཡིན་པར་བཤད། །རེ་མིག་གཉིས་པའི་ས་བོན་དང ། །རེ་མིག་སུམ་ཅུ་དྲུག་པ་ཉིད། །དེ་བཞིན་ཉི་ཤུ་དྲུག་པ་ཡང ། །སུམ་ཅུ་གསུམ་པ་ཡང་དག་བླང ། །རེ་མིག་བཅུ་གསུམ་པ་ཡིར་ལྡན། །རེ་མིག་
110b
ལས་ནི་བཅུ་པ་ཉིད། །གོ་རིམ་ལྡོག་པས་སྒྲུབ་པོས་བླང ། །རེ་མིག་ལས་ནི་བཅུ་དགུ་པ། །རེ་མིག་ཉི་ཤུ་གསུམ་པ་ལ། །རེ་མིག་གཉིས་པར་ཡང་དག་ལྡན། །སྟེང་དུ་ཐིག་ལེས་རྣམ་པར་བརྒྱན། །དེ་ནས་ཆུ་ཡིས་ས་བོན་གཟུང ། །བརྒྱད་པ་ཡང་ནི་དེ་བཞིན་ཏེ། །མེ་ཡི་བུ་ཡིས་ཁྱད་པར་དབྱེ། །ཡི་གེ་ཧཱུཾ་གིས་མཐའ་རུ་སྦྱར། །འདི་ནི་ཁམས་གསུམ་རྒྱལ་ཞེས་བྱའི། །སྔགས་ཚིག་བཞི་ཡིས་རྣམ་བརྒྱན་པའི། །ོཾ་ནི་ཀུན་ལ་གསལ་བྱེད་ཡིན། །ཧཱུཾ་དང་ཕཊ་ནི་མཐར་རུ་སྦྱར། །རིག་རྒྱལ་འཁོར་ལོས་བསྒྱུར་བའི་སྔགས། །འདི་ནི་མ་བྱུང་འབྱུང་མི་འགྱུར། །དེ་ཉིད་བསྡུས་དང་དཔལ་མཆོག་དང ། །བདེ་མཆོག་རྡོ་རྗེ་འཇིགས་བྱེད་པ། །ཁྲོ་བོ་བཞི་དང་ཡང་དག་ལྡན། །སྐད་ཅིག་གིས་ནི་སྐུ་བརྒྱད་འགྱུར། །བདེ་བའི་དཀྱིལ་འཁོར་བསྲུང་དོན་དུ། །གདུག་པ་ཐམས་ཅད་ཁྱད་པར་གྱིས། །འདི་ནི་རྙེད་པ་ཙམ་གྱིས་ཀྱང ། །བརྟག་མི་དགོས་པར་འཆི་བར་འགྱུར། །འཁོར་ལོའི་སྦྱོར་བདག་ཉིད་ཀྱིས་བཟླ། །དངོས་གྲུབ་ཀུན་གྱི་འབྲས་སྐྱེད་པའོ། །ོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྣ་གྲྀ་ཧྣ་ཧཱུཾ་ཧཱུཾ་ཕཊ། གྲྀཧྣ་པ་ཡ་གྲྀཧྣ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ། །བྷ་ག་ཝཱན་བདྱཱི་རཱ་ཛ་ཧཱུཾ་ཧཱུཾ་ཕཊ། དཔལ་ཧེ་རུ་ཀའི་ངེས་པར་བརྗོད་པ་ལས། །རྫ་རྔ་བཅིང་པའི་སྔགས་བཏུ་བའི་ལེའུ་སྟེ་སུམ་ཅུ་པའོ།། །དེ་ནས་ཤ་ཆེན་ཐམས་ཅད་
111a
༄#། །ཀྱི། །འཛིན་བྱེད་རྡོ་རྗེ་སྐྱེས་ཡིན་བཤད། །འདི་ནི་གདུག་པ་ཐམས་ཅད་ཀྱི། །འཇིགས་བྱེད་མི་བཟད་པར་བཤད་དོ། །འདི་ལྟར་ཁྱི་དང་ཕག་གི་ཤ། །ཟངས་ཀྱི་གཙུག་ཕུད་ཅན་དེ་བཞིན། །མངོན་སྤྱོད་ཀྱི་ནི་བྱ་བ་ལ། །བཟའ་དང་སྦྱིན་སྲེག་གཏོར་མ་བྱ། །བྱ་བ་རྣམ་སྤྱོད་མེད་པར་བྱ། །མ་ལུས་ལུས་པ་མེད་གྲུབ་ཅིང་།། རྒྱལ་སྲིད་ཐམས་ཅད་རབ་གྲུབ་འགྱུར། །དུང་དང་ཉ་ཕྱིས་མུ་ཏིག་གི། །རྒྱུ་མཚན་གསུམ་པོ་འབྱུང་བ་ཡིས། །ཆོས་ཀྱི་སྐུ་ཡི་ལུས་ཅན་གྱི། །ཐོད་པ་ལ་ནི་སུ་ཞིག་སྨོད། ། དཔའ་བོ་ཐོད་པའི་ཕྲེང་བ་ཅན། །ཟླ་བ་ཕྱེད་པས་རྒྱན་དུ་བྱས། །རྣམ་པ་དེ་ལྟར་གྱུར་པ་ཉིད། །དཔའ་བོའི་དབང་ཕྱུག་ཡིན་པར་བཤད། །བརྡ་ནི་ལྔ་པོ་བསྟན་པ་དག་།སྒྲུབ་པ་པོ་ཡི་ལག་གཡོན་གྱིས། །འདི་ནི་དཔའ་བོའི་གནས་ཡིན་ཏེ། །བརྡ་རྣམས་ཀྱི་ནི་རབ་འཇུག་པ་འོ། །ཁམས་གསུམ་རྒྱུ་དང་མི་རྒྱུ་དང ། །འགྲོ་ཀུན་གཡོན་ལས་བྱུང་བ་ཡིན། ། རྡོ་རྗེ་སེམས་དཔའ་མཐེ་པོར་བཞུགས། །ལྕུག་མར་དེ་བཞིན་རྣམ་སྣང་མཛད། །གོ་ཆའི་རྣམ་པ་དེ་ལྟ་བུར། །གཙོ་བོར་པདྨ་གར་མཛད་དེ། །བརྟན་པར་དངོས་གྲུབ་ཐམས་ཅད་ནི། །རབ་སྩལ་པ་ཡི་དཔའ་བོ་བཞུགས། །མཐེའུ་ཆུང་ལ་ནི་མཁའ་སྙིང་པོ། །མི་ཟད་སྐུ་དང་ལྡན་པ་ཉིད། །སེན་མོའི་ངོས་ནི་རྟ་མགྲིན་གྱི། །གནས་སུ་གྱུར་པར་
111b
བཤད་པ་ཡིན། །འདི་དག་ཐམས་ཅད་དཔའ་བོ་ནི། །གཡོན་པ་ལས་ཟུང་རྒྱུ་ཡིན་ནོ། །ལག་མཐིལ་ཤྲཱི་ཧེ་རུ་ཀ་ཡི། །ཕག་མོའི་འདས་པ་དགའ་བྱེད་ཡིན། །རྒྱབ་ཏུ་ཤིན་ཏུ་ངེས་བྱས་ནས། །བདག་ཉིད་ལྔ་པོ་བསྟན་པར་བྱ། །འདི་དག་ལག་ཏུ་དགོད་པ་སྟེ། །མཛའ་བ་ཐམས་ཅད་འདུས་པ་ཡིན། །རྣམ་པ་དེ་ལྟའི་ཆོ་ག་ཡིས། །དཔའ་བོ་དམ་པ་མཆོད་པར་བྱ། ། ས་ནི་སྤྱན་ཞེས་བྱ་བར་བཤད། །ཆུ་ཁམས་མཱ་མ་ཀཱི་རུ་བརྗོད། །མེ་ནི་གོས་དཀར་མོར་བཤད་དེ། །རླུང་ནི་སྒྲོལ་མར་རབ་ཏུ་བརྗོད། །ཙུམ་པི་ཀ་ནི་སྟོང་པ་སྟེ། །དེ་བཞིན་ཕ་རོལ་ཕྱིན་པ་ཡིན། །དབུས་སུ་དཔའ་བོ་ཀུན་གྱི་གནས། །མཁས་པས་རྒྱབ་ཏུ་གཤེགས་སུ་གསོལ། །གསང་བ་འདི་ནི་མི་བཤད་ཅིང ། །རབ་ཏུ་འབད་དེ་སྤ་བར་བྱ། །དེ་ལྟར་བརྡ་བྱ་དཔའ་བོ་རྣམས། །གཅིག་ཏུ་ཟས་ལ་བརྩམ་པར་བྱ། །དཔའ་བོ་ཐམས་ཅད་མཉམ་སྦྱོར་བ། །མཁའ་འགྲོ་དྲ་བའི་བདེ་མཆོག་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས།་བཟའ་བ་དང་སྤྱིན་སྲེག་དང་གཏོར་མའི་བྱ་བ་ལ་ལག་པའི་བརྡའི་ཆོ་གའི་ལེའུ་སྟེ་སུམ་ཅུ་རྩ་གཅིག་པའོ།། །།དེ་ནས་གཞན་ཡང་བཤད་བྱ་བ།། བཟའ་དང་སྟོན་མོ་འདུས་པ་སྟེ། །ཡང་དག་ཆོ་ག་གང་གིས་ནི། །དངོས་གྲུབ་མྱུར་དུ་རབ་འཇུག་པའོ། །ཕྱུགས་རྣམས་ཀྱི་ནི་དགུག་པ་ཉིད། །སྒྲུབ་པོས་སྔར་བསྟན་རིམ་པ་
112a
༄#། །འདིས། །ཕྱུགས་རྣམས་དང་ནི་དེ་བཞིན་ལྔ། །བོང་བུ་རུས་སྦལ་མི་རྔ་མོ། །ལྕེ་སྤྱང་རྟ་ལ་སོགས་རྣམས་ཀྱིས། །དངོས་གྲུབ་སྒྲུབ་པའི་དཀྱིལ་འཁོར་དུ། །ཕྱུགས་འདི་དག་ནི་སྒྲུབ་ཡན་ལག་།རིགས་རྣམས་ལས་ནི་རིགས་མཆོག་ཕྱུགས། །རྐང་བཞི་རྣམས་ལས་གླང་པོར་བརྗོད། །འདབ་ཆགས་རྣམས་ལས་དང་པ་ཉིད། །དུད་འགྲོ་རྣམས་ལས་དུད་འགྲོ་ཕྱུག། །ལྷ་རྣམས་ལས་ནི་མཆུ་གཡོ་བ། །རྣམ་པ་དེ་ལྟར་བརྗོད་པ་སྟེ། །དངོས་གྲུབ་སྒྲུབ་པའི་དཀྱིལ་འཁོར་དུ། །ཕྱུགས་དེ་དག་ནི་རྣམ་པར་བཤད། །ཁཝ་དང་ཆུ་སྐྱར་ལྕེ་སྤྱང་དང ། །སྐྱེ་གཉིས་བློན་པོ་ཆེན་པོ་དང ། །ཁྲུང་ཁྲུང་བཞད་དང་ཀ་དམ་པ། །བཟའ་དང་སྦྱིན་སྲེག་གཏོར་བྱ་བས། །འདོད་པ་དག་ནི་འགྲུབ་པར་འགྱུར། །ཁྱི་ནག་པོ་ཡི་འོ་ཐུག་ནི། །མ་ཤའི་འབྲས་ནི་ནག་པོར་ལྡན། །འདོད་པས་དོགས་པ་མེད་པ་རུ། །ཇི་སྲིད་བརྒྱ་རྩ་བརྒྱད་ཀྱི་བར། །རོ་ཡི་ཁར་ནི་སྦྱིན་སྲེག་བྱ། །དེ་ནས་ཡི་དྭགས་ལངས་ནས་ནི། །སྒྲུབ་པོ་དེ་ལ་འདི་བྱེད་དེ། །ཅི་བགྱི་ཞེས་ནི་སྨྲ་འགྱུར་ཞིང ། །ས་འོག་ལས་སམ་རལ་གྲི་འམ། །ཚར་གཅོད་ཕན་འདོགས་ཉིད་དག་དང ། །རིལ་བུ་མིག་སྨན་གཏེར་རྣམས་སམ། །རྐང་མགྱོགས་དག་གམ་བཅུད་ཀྱིས་ལེན། །དངོས་འདི་དེ་བཞིན་གཅིག་བྱིན་ནས། །འགྲོ་བར་འགྱུར་གྱི་གཞན་དུ་མིན། །སྟེང་
112b
དུ་འོག་ཏུ་ཕོ་ཉ་འགྲུབ། །རྒྱུད་འདིར་ཐེ་ཚོམ་མེད་པ་ཡིན། །བ་ལང་གནས་དང་ལྡིང་པ་ཉིད། །ལྷག་མ་སྐམ་པོ་རྩ་དེ་ནས། །བདེ་བ་ཆེན་པོའི་ངོ་བོར་བྱ། །ཡང་ན་རུས་སྦལ་དག་གི་འོ། །འདི་དེ་དངོས་གྲུབ་སྦྱིན་འགྱུར་ཞིང ། །ཕྱག་བཞི་པ་དང་ཞལ་བཞི་པ། །ཇི་སྲིད་ཕྱག་ནི་འབུམ་གྱི་བར། །སྐུ་ནི་དཀར་བའི་ཁྲོ་བོ་ཆེ། །དེ་ནས་དྲག་ཤུལ་གཟུགས་འཆང་བ། །རྡོ་རྗེ་ཕག་མོ་ལ་གཟིགས་པ། །དེ་ཡི་སྐུ་མདོག་མཚོན་ཆ་འཆང ། །དཔའ་བོ་ཐོད་པའི་ཕྲེང་བ་ཅན། །སྐུ་ལ་ཐལ་བས་ཉེ་བར་བྱུགས། །རལ་པའི་ཅོད་པན་མདུང་དང་ལྡན། །ཕྱག་རྒྱ་ཡིས་ནི་སྐུ་ལ་བརྒྱན། །ཞལ་གྱི་མཆེ་བ་ཅུང་ཟད་གཙིགས། །ཡི་དྭགས་ཆེན་པོ་གདན་དུ་བྱ། །སྒྲུབ་པ་པོ་ཡིས་དུས་རྟག་ཏུ། །སྔགས་དེ་ཤེས་ནས་བསྒོམ་པར་བྱ། །དེ་ལྟའི་ཡོན་ཏན་ཁྱད་འཕགས་པས། །འདོད་པ་ཡི་ནི་དངོས་གྲུབ་འགྱུར། །དཔལ་ཧེ་རུ་ཀའི་ངེས་པར་བརྗོད་པ་ལས། །དུད་འགྲོ་ཕྱུགས་དང་རོ་ལངས་སྒྲུབ་པ་དང ། །བསྐྱེད་པའི་རིམ་པའི་ཆོ་གའི་ལེའུ་སྟེ་སུམ་ཅུ་རྩ་གཉིས་པའོ།། །།དེ་ནས་སྒྲུབ་པོའི་མཆོག་ཀུན་ནི། །སྦྱོར་བ་ཀུན་ལ་མེད་པའོ། །བཟའ་དང་བཅའ་དང་ཉ་ཤ་སོགས། །ནུས་པ་ཇི་བཞིན་བྱ་བ་སྟེ། ། མེད་པར་གྱུར་ཀྱང་བཟའ་བ་ནི། །ལྔ་པོ་ཉིད་དུ་བྱ་བ་ཡིན། །བཟའ་དང་བཅའ་པ་རྒྱ་ཆེ་བ། །རྟག་ཏུ་མཚན་མོ་ཉིད་དུ་བྱ། །དེ་ནས་ཕོ་ཉ་རབ་སྦྱིན་ཞིང ། །ཁྱད་པར་དུ་ནི་སྒྲུབ་པ་པོ། །རང་
113a
༄#། །གི་བང་དུ་མགོ་བཞག་ལ། །དཔའ་བོ་གཉིས་མེད་རབ་ཏུ་མཆོད། །མ་འམ་ཡང་ན་སྲིང་མོ་འམ། །ནུ་མོའམ་ཡང་ན་ཆུང་མ་གཉེན། །རྣམ་པ་འདི་ལྟའི་ཆོ་ག་ཡིས། །བཅིངས་པ་ལས་ནི་རབ་གྲོལ་བྱ། །དེ་ནས་སྔགས་འདི་འགྲུབ་འགྱུར་ཏེ། །ཇི་སྲིད་འབྱུང་བ་ཡོད་བར་དུའོ། །སློབ་དཔོན་ལུས་སུ་ལེགས་གནས་ཏེ། །སྒྲུབ་པ་པོ་ལས་མཆོད་པ་ལེན། །དཔའ་བོ་རྣམས་ཀྱི་སྟན་དག་དང ། །ཕྱག་རྒྱ་ཉིད་དུ་ཐེ་ཚོམ་མེད། །སྒྲུབ་པོ་ཤིན་ཏུ་མཉམ་བཞག་པས། །གླུ་དང་གར་ལ་སོགས་པ་བྱ། །ཇི་སྲིད་ལུས་ཅན་ཐམས་ཅད་ཀྱང ། །རྣལ་འབྱོར་ཡེ་ཤེས་ཞེན་མ་གྱུར། །དེ་སྲིད་འཁོར་བར་འཁོར་འགྱུར་ཞིང ། །སྡུག་བསྔལ་མྱ་ངན་གྱིས་གཡེངས་འགྱུར། ། དངོས་པོ་ཀུན་གྱིས་སྒྲུབ་པ་པོས། །དེ་ནས་ཕྱག་རྒྱ་མཆོད་པར་བྱ། །མཆོད་པས་མཆོད་པར་འདོད་པ་སྟེ། །བརྙས་པ་ཡིས་ནི་ངེས་པར་སྲེག་།རྣལ་འབྱོར་རྒྱུད་དུ་མི་རྣམས་ཀྱི། །ཕྱག་རྒྱ་ཆེན་པོ་དང་པོ་འགྲུབ། །རབ་ཏུ་འབད་པས་མཆོད་པར་བྱ། །ཕྱི་ནས་དཔའ་བོ་རྣམས་ཀྱིས་ནི། །དཔའ་བོ་ཉིད་ལ་སྤྱད་པར་བྱ། །དེ་ལྟར་མཆོད་བྱས་དེ་ནས་ནི།། ས་འོག་སྒྲུབ་པོ་ལངས་པ་དང ། །ཞི་བ་ཉིད་དང་རྒྱས་པ་དང ། །དཔའ་དང་དགུག་པ་དག་དང་ནི། །བསད་དང་བསྐྲད་པ་ལ་སོགས་དང ། །རྨུགས་དང་རེངས་བ་དེ་བཞིན་ཏེ། །
113b
དབྱེ་བ་ཉིད་དང་ཚར་གཅད་དང ། །ལས་ཀྱི་དངོས་སྒྲུབ་མཆོད་པར་བྱ། །གང་ཅིའང་རུང་པའི་ལས་གྱུར་ལ། །ཉོན་མི་རྨོངས་པར་འགྲུབ་འགྱུར་ཏེ། །ཐེ་ཚོམ་མེད་པར་སྒྲུབ་པ་པོའི། ། དངོས་གྲུབ་ཐམས་ཅད་འགྲུབ་པར་འགྱུར། །དཔལ་ཧེ་རུ་ཀའི་ངེས་པར་བརྗོད་པ་ལས། །གསང་བའི་མཆོད་པ་དང་བསྙེན་བཀུར་གྱི་མཆོད་པའི་ལེའུ་སྟེ་སུམ་ཅུ་རྩ་གསུམ་པའོ།། །།དེ་ནས་མཁའ་འགྲོ་མ་དྲ་བའི། །འཁོར་ལོ་ཞེས་པའི་ཆོ་ག་རྒྱས། །ལས་གང་ཅི་ཡང་དེ་མྱུར་བར། །སྒྲུབ་པ་པོ་ནི་ཐེ་ཚོམ་མེད། །དཔའ་བོ་ཀུན་དང་རྣལ་འབྱོར་མ། །པདྨའི་ལྟེ་བར་ངེས་པར་སྦྱར། །སྨིན་མའི་དབུས་སུ་གཞུག་པར་བྱ། ། བ་དྷཱུ་ཏིའི་གནས་དེ་བཞིན། །དཔའ་བོའི་འཆོལ་བར་བྱས་ཆགས་པར། །བཟའ་བ་ཡང་ནི་དེ་ནས་སྲེག་།གོ་མཱཾ་དང་རུ་དྷི་ར། །འབད་པས་བསྲེག་བྱ་ལྔ་དག་བྱ། །དེ་ནས་འབར་བའི་བྱིན་ས་ལ། །སྲེག་བླུགས་དགུ་ནི་སྦྱིན་པར་བྱ། །འབར་ཕྲེང་རྒྱ་མཚོ་བལྟ་བར་བྱ། །ཀུན་ནས་སྒོ་ཡི་འཁོར་ལོ་ཉིད། །དཔའ་བོའི་དབང་པོ་ཞལ་བཞི་པ། །དཔའ་བོ་དཔའ་མོའི་གནས་དེ་བཞིན། །འདབ་ལ་ཕོ་ཉ་མོ་བཞི་ཡིན། །དཔའ་བོ་ཀུན་དང་གཉིས་མེད་བདེ། །ཆོ་ག་ཇི་བཞིན་རྣམ་པ་ཡིས། །ཁཎྚ་རོ་ཧི་ཕྱི་རོལ་ནི། །རང་གི་གཟུགས་སུ་རྣམ་ཞུགས་པ། །འཁོར་ལོའི་དབུས་སུ་བལྟ་བར་བྱ། །འཁོར་ལོ་འདི་དག་
114a
༄#། །གསལ་བར་ནི། །རིམ་པ་ཇི་ལྟ་བ་བཞིན་བྱ། །རིག་པའི་རྒྱ་མཚོའི་ལས་དེ་བཞིན། །མདོར་བསྡུས་ནས་ནི་གསུངས་པ་ཡིན། །ཕོ་ཉ་གཉིས་མེད་སྦྱོར་བའི་བདག་།འགྲུབ་འགྱུར་འདི་ལ་ཐེ་ཚོམ་མེད། །དཔལ་ཧེ་རུ་ཀའི་ངེས་པར་བརྗོད་པ་ལས། ཕོ་ཉ་མོའི་སྦྱིན་སྲེག་དང་ལས་ཀྱི་ཆོ་གའི་ལེའུ་སྟེ་སུམ་ཅུ་རྩ་བཞི་པའོ།། །། དེ་ནས་ལས་ཀྱི་རབ་མཆོག་ནི། །ཇི་བཞིན་རིམ་གྱིས་མཚོན་པ་སྟེ། །མཆོད་པ་གཉིས་མེད་སྦྱོར་བའི་བདག་།ལས་ནི་སོ་སོར་སྦྱར་བར་བྱ། །གང་དག་རབ་གྲུབ་བྱེད་པའི་སྔགས།། དེ་ཡི་དབྱེ་བ་རིམ་བཞིན་བཤད། །ཁ་དོག་ཕོ་ཉ་སོགས་སྔགས་གང ། །མདའ་ཡི་ཤུགས་ཀྱིས་ཡོངས་སུ་འཁོར། །ཕན་ཚུན་མདུད་རྒྱུད་དཔའ་བོ་ནི། །ཡུལ་ཉིད་ཀྱིས་ནི་ཕྱེ་བའོ། །ས་བོན་ཕྲེང་བས་དེ་ནས་བཟུང ། །ཧཱུཾ་ནི་མཐར་དུ་\?\་གནས་པ་ཡིན། །བསྒྲུབ་བྱ་འགོག་པར་གྱུར་པ་ནི། །གོམ་པ་གཅིག་ཀྱང་མི་འགྲོའོ། །ཁ་སྦྱར་སྦྱར་བར་གྱུར་པ་དང ། །རྡོ་རྗེའི་ལུ་གུ་རྒྱུད་བཅིངས་པས། །རྡོ་རྗེ་དབྱ་བ་ཉིད་དང་\?\། །དེ་བཞིན་བུད་བ་ལྟར་འཁོར་བྱ། །ལྕགས་ཀྱུ་ཉིད་ཀྱིས་དགུག་པ་དང ། །གཏུན་ཤིང་གིས་བསྐྱོད་དེ་བཞིན་ཏེ། །རྡོ་རྗེ་ཉིད་ཀྱིས་འདབས་པར་བཤད། །དབུག་ལ་མདས་ནི་སྦྱར་བྱ་སྟེ། །དུས་མིན་འཆི་བ་བླུ་བ་ལ། །ཡན་ལག་ཁ་ཊྭཱཾ་ག་དང་སྦྱར། །ཐོད་པའི་མཆོད་ཡོན་སྣོད་དུ་ནི། །ཞལ་དུ་མཚོན་ཆ་
114b
ངེས་པར་སྦྱར། །དཔལ་ཧེ་རུ་ཀའི་ངེས་པར་བརྗོད་པ་ལས། གཉིས་སུ་མེད་པའི་ལས་དང་དུས་མ་ཡིན་པར་འཆི་བ་བླུ་བའི་ཆོ་གའི་ལེའུ་སྟེ་སུམ་ཅུ་རྩ་ལྔ་པའོ།། །། དེ་ནས་ཕྱག་རྒྱའི་མཆོད་ཆེན་དང ། །སྔགས་ཀྱི་དགོད་པ་རབ་ཏུ་གྲགས། །མྱུར་དུ་དངོས་གྲུབ་བྱེད་པར་ནི། །ཕྱག་རྒྱའི་མཆོད་འདི་ཐེ་ཚོམ་མེད། །མཚན་མ་གཉིས་ལ་སྔགས་སྦྱར་ཏེ།། མཁའ་འགྲོ་དཔའ་བོ་གཉིས་མེད་པ། །སྙིང་པོ་རྣམས་ཀྱིས་དེ་བཞིན་དུ། །སྔགས་པས་མཁའ་འགྲོ་མ་ལ་སྦྱར། །བློ་ལྡན་མཁའ་འགྲོ་མ་བསྲུབ་བྱ། །དག་པའི་ལུས་ནི་རང་འདོད་པ། །དཔའ་བོ་མཆོད་པ་རྣམས་བྱས་ནས། །ལས་ནི་འབད་པ་ཉིད་ཀྱིས་བྱ། །རྣམ་དབྱེ་རང་དགས་སྔགས་པ་ནི། །ཕྱིན་ཅི་ལོག་ཏུ་ངེས་པར་སྦྱར། །ཚར་གཅོད་ཕན་འདོགས་དོན་རྣམས་ལ། །ལས་ཀྱི་དངོས་པོར་རྣམ་པར་སྒོམ། །དེ་ཉིད་དབྱེ་བར་ཕྱེ་ནས་ནི། །རྩ་ཡི་ལམ་དུ་སྦྱར་བར་བྱ། །རབ་ཏུ་སྒྲུབ་པའི་སྦྱོར་དོན་ལ། །ཕྱི་རོལ་ཇི་བཞིན་ནང་དེ་བཞིན། །འདི་ཡིས་མྱུར་དུ་ལྷ་དང་ནི། །ལྷ་མིན་མིར་བཅས་བསྒྲུབ་པར་བྱ། །དཔལ་ཧེ་རུ་ཀའི་ངེས་པར་བརྗོད་པ་ལས། །དེ་ཁོ་ན་ཉིད་ཀྱི་མཆོད་པ་དང་ལས་ཀྱི་ཆོ་གའི་ལེའུ་སྟེ་སུམ་ཅུ་རྩ་དྲུག་པའོ།། །།དེ་ནས་གཞན་ཡང་བཤད་བྱ་བ། །གཟུགས་ནི་གནོན་པའི་ཆོ་ག་སྟེ། །ཕན་ཚུན་སྦྱར་བའི་གསང་སྔགས་ནི། །མཁའ་འགྲོ་མ་དང་གཅིག་ཏུ་སྦྱར། །བཟའ་བ་ཟོས་མིང་དེ་ནས་ནི། །བཟླས་པའི་མཐར་ནི་སྐྱུག་པར་བྱ། །མཚན་
115a
༄#། །མོ་བདུན་ནི་རྫོགས་པ་དང ། །བཟའ་དང་བཏུང་བ་དག་ལ་སྦྱར། །འདི་ཡིས་ཇི་སྲིད་འཚོ་ཡི་བར། །དབང་དུ་འགྲོ་བར་ཐེ་ཚོམ་མེད། །སེར་སྐྱའི་མར་ནི་འཐུངས་ནས་སུ། །བཟླས་པའི་མཐར་ནི་སྐྱུག་པར་བྱ། །དེ་ཡིས་རང་གི་གདོང་བསྐུས་ནས། །གལ་ཏེ་རྟག་ཏུ་ཁྲོས་གྱུར་པ། །མཐོང་བ་ཙམ་གྱིས་དབང་དུ་འགྱུར། ། ཏིལ་མར་སཱ་ལུ་བཏགས་པ་དང ། །ལྡན་པས་ལུས་ནི་བསྐུས་གྱུར་ཅིང ། །སྣུམ་ཁུར་སྔགས་པས་བྱས་ནས་ནི། །བཟའ་བ་ལ་ནི་རབ་ཏུ་སྦྱར། །གལ་ཏེ་ལས་འདི་མ་བཏང་ན། །ཇི་སྲིད་འཚོ་བར་རྟག་དབང་འགྱུར། །ཏིལ་ནག་དག་ནི་ཟོས་ནས་སུ། །སྐེ་ཚེར་བཅས་པ་སྐྱུགས་པ་དང ། །རུ་རྟ་བཤང་བ་དང་ལྡན་པ། །ལས་སྐྱེས་ལྟོ་བའི་སྲིན་བུ་ནི། །རང་གི་ཁྲག་དང་བཏགས་ནས་ནི། །རང་གི་ཁུ་བ་ཉིད་དང་སྦྱར། །བཟའ་བཏུང་མིག་སྨན་གོས་ལ་ནི། །བྱུག་པ་ཉིད་དུ་རབ་ཏུ་སྦྱར། །འདི་ཡིས་ཇི་སྲིད་འཚོ་ཡི་བར། །དབང་དུ་འགྱུར་བར་གདོན་མི་ཟ། །བ་ལང་ཤ་སྲེག་སྦྱིན་སྲེག་ནི། །ཁྲག་གིས་བསྐུས་ན་ལྷ་རྣམས་ནི། །དེ་མོད་དབང་དུ་འགྱུར་བ་འམ། །གལ་ཏེ་མ་འོངས་འཆི་བར་འགྱུར། །བདག་ཉིད་དེ་ཡི་མདུན་དུ་ནི། །བསྒོམས་ནས་མཁས་པས་སྦྱིན་སྲེག་བྱ། །སྦྱིན་སྲེག་མཐར་ནི་གཏོར་མ་བྱ། །ཁམས་གསུམ་སྐད་ཅིག་གིས་
115b
འགུགས་པ། །མཚན་བདུན་གྱིས་ནི་འགྲུབ་པར་འགྱུར། །འཇིག་རྟེན་གསུམ་ན་རྙེད་དཀའ་བའི། །དམ་ཚིག་སྤྱོད་པའི་མཚན་ཉིད་ནི། །རྟག་ཏུ་རང་སྔགས་སྦས་པ་ཡིས། །རབ་ཏུ་འབད་དེ་གསང་བར་བྱ། །སྦས་དོན་རྙེད་པར་མི་འགྱུར་ཞིང ། །སྐལ་བ་དམན་པས་འགྲུབ་མི་འགྱུར། །བསོད་ནམས་ཆུང་བའི་སྒྲུབ་པོས་ཀྱང ། །ང་མཉེས་བྱས་པས་རྙེད་པར་འགྱུར། །དཔལ་ཧེ་རུ་ཀའི་ངེས་པར་བརྗོད་པ་ལས། །ནང་གི་བདག་ཉིད་ཀྱི་དབང་དུ་བའི་ཆོ་གའི་ལེའུ་སྟེ་སུམ་ཅུ་རྩ་བདུན་པའོ།། །།དེ་ནས་བརྡ་ནི་མཁའ་འགྲོ་མའི། །ལུས་ཀྱི་མཚན་ཉིད་གང་ཡིན་དང ། །དབང་པོའི་ཡན་ལག་དབྱེ་བ་ནི། གྲུབ་\?\པར་གྱུར་པ་དེ་གྲུབ་འགྱུར། །དཔའ་བོའི་དབང་ཕྱུག་མི་བྲི་ཞིང ། །རྣམ་པ་ཀུན་ཏུ་སྦ་བར་བྱ། །གང་གི་ཐད་དུའང་མི་གདོན་ཏེ། །གཡོན་པའི་ཀུན་སྤྱོད་སྒྲུབ་པ་པོས། །གསང་བའི་མཚན་ཉིད་མཁའ་འགྲོ་ཡི། །སྔགས་རྣམས་བག་མེད་པས་འདོད་ན། །དེ་ལ་ང་ནི་མི་བལྟ་སྟེ། །མཁའ་འགྲོ་སྟོང་ཕྲག་དུ་མ་ཡིས། །དན་པའི་བདག་ཉིད་ཅན་དེ་ཟ། །དམ་ཚིག་འཇོམས་ཤིང་ངན་སྤྱོད་དེ། །བྲམ་ཟེ་གསོད་པར་ཐེ་ཚོམ་མེད། །སྡིག་སྤྱོད་རྨོངས་པའི་བདག་ཉིད་ཅན། །ལུས་གྱུར་ངན་བའི་བདག་ཉིད་དེ། །མཁའ་འགྲོ་མ་ཡིས་ཟོས་དུང་\?\་ཀྱང ། །དེ་ལར་ནི་སྐྱོབ་མི་བྱེད། །གསད་བ་\?\་ནང་ན་ནི། །སྒྲུབ་པོ་དེ་ནི་ཕྱུགས་དང་འདྲ། །བླ་མ་དམ་ཚིག་ལ་འཁུ་བ། །སངས་
116a
༄#། །རྒྱས་འཇིག་རྟེན་དེ་ལས་ལྷུང ། །ཧེ་རུ་ཀ་དཔལ་བལྟ་དཀའི་རྒྱུད། །གང་ཞིག་སྲུང་བར་བྱེད་པ་ནི། །མཁའ་འགྲོ་མར་བཅས་དགེ་སྡོང་ཞེས། །དེ་ལ་ང་ནི་རྗེས་སུ་འཛིན། །བླ་མ་ལ་ནི་བསྙེན་བཀུར་བྱེད། །གསོང་པོར་བྱེད་པའི་སྒྲུབ་པ་པོ། །མཁའ་འགྲོ་མ་ལ་རྟག་དགའ་བ། །དེ་ལ་དངོས་གྲུབ་འབྱུང་བར་འགྱུར། །སྒྲུབ་པ་པོ་ནི་དཔའ་ཉིད་འགྱུར། །ཁམས་གསུམ་མཁའ་ལ་རྒྱུ་བའི་བདག་།སྒྲུབ་པོ་དཔའ་བོ་ཉིད་འདོད་པ། །ཐམས་ཅད་དུ་ནི་མཆོད་པར་འགྱུར། །དེ་ནི་རྣལ་འབྱོར་ལ་རབ་འཇུག་།ཡང་དག་སྦྱིན་པའང་རིག་པར་འགྱུར། །ཧེ་རུ་ཀ་ཡི་བརྟུལ་ཞུགས་འཛིན། །སློབ་དཔོན་དཔའ་བོ་མཐོང་གྱུར་ན། །མཐོང་ཞིང་མཐོང་ཞིང་ཀུན་ཏུ་དགའ། །སྒྲུབ་པ་པོས་ནི་སྔགས་འདི་ཡིས། །དཔའ་བོའི་རྩ་བའི་གསང་སྔགས་མཆོག་།ལན་བདུན་དུ་ནི་བརྗོད་པར་བྱ། །རབ་སྔགས་ཧཱུཾ་ལ་སོགས་པས་ཕྱེ། །དེ་རྣམས་འབད་དེ་ཕྱག་བྱས་ན། །སངས་རྒྱས་ལ་སོགས་ཐམས་ཅད་མཆོད། །རྟག་པ་ཉིད་དུ་དཔའ་ཆེན་དང ། །རོལ་པར་ལྡན་པ་ཐེ་ཚོམ་མེད། །དེ་ཡི་ཐུགས་ཀར་གནས་ཕག་མོ། །ང་དང་དཔའ་བོ་རྣལ་འབྱོར་མ། །ཕོ་ཉ་རྣམས་དང་ལྷན་ཅིག་བཅས། །དེ་དང་གང་ཞིག་ལེགས་སྐྱེས་པ། །སྲོག་ཆགས་བསོད་ནམས་མཐོང་བ་ཡིན། །འབབ་ཆུའི་འགྲམ་\?\དང་རྒྱ་མཚོ་དང ། །རི་བོ་དང་ནི་བཞི་མདོ་དང ། །ལྟེང་ཀ་དང་མི་ཁྲོན་པ་མཚེའུ། །ཁང་སྟོང་དང་ནི་ལམ་སྲང་དག་།ཐམས་ཅད་དུ་ནི་མཁའ་འགྲོ་མ། །ཀུན་ཏུ་ཞེན་བར་ལྟ་ལ་གནས་\?\། །འཇིགས་པ་ཆེན་པོ་དུར་ཁྲོད་དུ། །མཁའ་སྤྱོད་དེ་བཞིན་ས་འོག་དང །
116b
རོ་ལངས་ཀྱང་ནི་དུ་མ་ཞིག་།འཇིགས་པའི་གཟུགས་དང་སྟོབས་ཆེན་པོས། །དེ་དག་ལྷན་ཅིག་དཔའ་བོ་ཆེ། །ཅི་བདེ་བར་ནི་རོལ་པར་མཛད། །རི་སུལ་ཚང་ཚིང་གསང་བ་དང ། །རྣལ་འབྱོར་མ་དང་གསང་བའི་མི། །ཕྱོགས་ནི་དེ་དང་དེ་དག་ཏུ། །སྒྲུབ་པ་པོ་དང་ས་སྟེང་རོལ། །དཔལ་ཧེ་རུ་ཀའི་ངེས་པར་བརྗོད་པ་ལས། རྣལ་འབྱོར་མའི་སྒྲུབ་པའི་ས་དང་གསང་བའི་དཔའ་བོའི་གནས་ཀྱི་ཆོ་གའི་ལེའུ་སྟེ་སུམ་ཅུ་རྩ་བརྒྱད་པའོ།། །།དེ་ནས་སྒྲུབ་པའི་རྣལ་འབྱོར་ཆེ། །སྔགས་ཀྱི་རྣམ་པ་བརྒྱད་ཀྱིས་དགོད། །དེ་ནས་འདི་ལ་ཡང་དག་མཐོང ། །གསོལ་བར་འགྱུར་བར་གདོན་མི་ཟ། །འཇིགས་པའི་སྒྲ་ནི་རྣམ་མང་པོ། །མི་བཟད་མཁའ་འགྲོ་འཇིགས་བྱེད་པ། །དཔའ་བོ་འཇིགས་པར་གྱུར་ན་ནི། །སྐྲག་ཅིང་རྣམ་པར་འབྱེད་པར་བྱེད། །གལ་ཏེ་དཔའ་བོ་མི་འཇིགས་ན། །ལག་པ་གཡོན་པས་བཟུང་ནས་ནི། །རང་གི་གནས་སུ་ཁྱེར་ནས་སུ། །མཁའ་འགྲོ་མ་ནི་དེ་དག་དང ། །རྟག་ཏུ་མངོན་པར་རྩེ་བྱེད་དེ། །བདེ་བ་ཅན་གྱི་གནས་འགྲོ་འགྱུར། །ཧེ་རུ་ཀ་དཔལ་གུས་འདོད་པས། །མཁའ་ལ་འགྲོ་བའི་གནས་སུ་ཁྱེར། །སྒྲུབ་པ་པོ་ནི་སྔགས་ལུས་ཅན། །འཁོར་བར་འཆི་དང་རྒ་བ་མེད། །དཔལ་ཧེ་རུ་ཀའི་ངེས་པར་བརྗོད་པ་ལས། བལྟ་བ་དང་ཧ་ཧར་དགོད་པའི་ཆོ་གའི་ལེའུ་སྟེ་སུམ་ཅུ་རྩ་དགུ་པའོ།། །།ད་ནི་རབ་ཏུ་བཤད་བྱ་བ།།
117a
༄#། །གང་གིས་ས་སྟེང་དབང་དུ་འགྱུར། །དཔའ་བོའི་སྔགས་ཀྱི་ཟླ་བ་ཡིས། །རྣལ་འབྱོར་ཆོ་ག་གནས་པས་འགྲུབ། །སྒྲོན་མ་མྱོས་བྱེད་བཅས་པ་དང་།། ཉ་ཡི་ཤ་དང་ལྡན་པར་ནི། །དཔའ་དབང་གནས་སྐབས་ཐམས་ཅད་དུ། །ཉི་མ་བདུན་གྱིས་སྒྲུབ་པ་བེའི། །མཚན་མོའི་སྦྱིན་སྲེག་བྱེད་ལ་གཞོལ། །དངོས་གྲུབ་རྒྱ་ཆེན་གསོལ་བར་འགྱུར། །བརྒྱ་དང་རྩ་བརྒྱད་ལྡན་ཉིད་ཀྱིས། །ཐུན་གསུམ་དུ་ནི་སྒྲུབ་བྱེད་ན། །རྒྱལ་པོ་དཔུང་དང་བཅས་པར་ནི། །ཉིན་བདུན་གྱིས་ནི་དབང་དུ་འགྱུར། །བྱེད་ཀྱིས་དཔའ་བོ་བློན་པོ་སྟེ། །དེ་ཡི་ཕྱེད་ཀྱིས་བློན་པོ་ཡི། །རྒྱལ་ཕྲན་ལ་ནི་སུམ་ཅུ་གཉིས། །སྲེག་པའི་རིམ་གྱིས་སྦྱིན་སྲེག་བྱ། །ཉི་ཤུས་བྲམ་ཟེ་ཉིད་ལ་ནི། །ཉི་མ་བདུན་གྱིས་སྦྱིན་སྲེག་བྱ། །དེ་བཞིན་རྒྱལ་རིགས་དག་ལ་བདུན། །སྦྱིན་སྲེག་ལྔ་པོ་རྗེ་རིགས་ལ། །དམངས་རིགས་ལ་ནི་སྦྱིན་སྲེག་གསུམ། །ཐ་མ་ལ་ནི་སྦྱིན་སྲེག་གཅིག་།དེ་ལྟར་དཔའ་བོས་རིགས་རིམ་གྱིས། །ཟླ་བ་གཅིག་ནི་ཡང་དག་སྤྱད། །སྔགས་ཀྱི་ནུས་པ་སྒྲུབ་པ་པོས། །འགྲོ་བ་ཐམས་ཅད་དགུག་པར་བྱ། །དཔའ་བོས་ཆོ་ག་སྔ་མ་ཡིས། །འདོད་པས་བསྟེན་ན་ཐོབ་བར་འགྱུར། །ས་སྟེང་འདོད་པའི་དབང་ཕྱུག་བཞིན། །དཔལ་ལྡན་སྐལ་བ་བཟང་པོར་འགྱུར། །སྒྲུབ་པོ་མཁའ་འགྲོ་མ་རྣམས་ཀྱི། །ཡིད་འོང་འགྱུར་བར་གདོན་མི་ཟ། །དཔལ་ཧེ་རུ་
117b
ཀའི་ངེས་པར་བརྗོད་པ་ལས། རིགས་ལྔ་པོ་དབང་དུ་བྱ་བ་དང་ཕྱག་རྒྱ་ཆེན་པོ་བསྟེན་པའི་ཆོ་གའི་ལེའུ་སྟེ་བཞི་བཅུ་པའོ།། །།དེ་ནས་ལས་ཀྱི་མཆོག་རབ་ནི། ། གང་གིས་ཤེས་ན་སྒྲུབ་པ་པོས། །དབང་དང་དགུག་དང་དབྱེ་བ་དང ། །བསད་དང་བསྐྲད་པ་ལ་སོགས་དང ། །རྨུགས་དང་རེངས་པར་བྱ་བ་དང ། །རྨོངས་དང་དེ་བཞིན་ཕུར་བུས་གདབ། ། ཚིག་འཕྲོག་ལྐུགས་པར་འགྱུར་བ་དང ། །འོན་དང་དེ་བཞིན་ལོང་བ་དང ། །མ་ནིང་ཉིད་དུ་བྱ་བ་དང ། །གཟུགས་ནི་ཡོངས་སུ་འགྱུར་བ་སྟེ། །ལས་ཆེན་བཅུ་གཉིས་འདི་དག་ནི། །རྟག་ཏུ་སྒྲུབ་པ་པོ་ཡིས་བསྒྲུབས། །དངོས་གྲུབ་སྒྲུབ་པ་པོ་ལ་ནི། །དྲན་པ་འགྲུབ་འགྱུར་གདོན་མི་ཟ། །ཐམས་ཅད་བླ་མའི་གནས་ལ་སོགས། །མཁའ་འགྲོ་མས་ནི་ཐམས་ཅད་ཁྱབ། ། ཡེ་ཤེས་ལྡན་པའི་རང་སྐྱེ་གནས། །ཡུལ་དང་ཡུལ་དུ་མངོན་པར་སྐྱེ། །རྡོ་རྗེ་དཀྱིལ་འཁོར་གཙོ་མོ་ཡིན། །དེ་རྣམས་མཁའ་འགྲོ་མ་རུ་བཤད། །ཀུ་ལུ་ཏ་དང་དགོན་པ་དང ། །སིནྡྷུའི་ཡུལ་དང་གྲོང་ཁྱེར་དབང ། །གསར་གྱི་གླིང་དང་སོ་རཥྚ། །དེ་བཞིན་ལྷ་ཡི་ཁྱིམ་དང་ནི། །ཡི་དྭགས་གྲོང་དང་ཁ་བའི་གནས། །ཀཱཉྩིའམ་ལཱཾ་པ་ཀ་ཡི་ཡུལ། །ཀ་ལིངྐ་དང་ཀོ་ས་ལ།། ཏྲི་ཤ་ཀུ་ནེ་ཨོ་ཏྲེ་དང ། །ཀཱ་མ་རུ་པ་མཱ་ལ་ཝ། །ལྷ་མོའི་མཁར་དང་རཱ་མའི་དབང ། །གོད་བ་རི་ཨརྦུ་ཏ། །ཽ་ཌྱན་ཛཱ་ལནྡྷ་ར་དང ། །པུ་ལི་ར་མ་ལ་ཡ་སོགས། །ཡུལ་འདི་དག་གི་བུ་མོ་
118a
༄#། །གང ། །དཔའ་བོ་གཉིས་མེད་རྣལ་འབྱོར་མ། །དེ་ཀུན་འདོད་པའི་གཟུགས་ཅན་ཏེ། །ཡིད་ཀྱི་ཤུགས་ཀྱིས་འཇུག་པ་ཡིན། །རྣལ་འབྱོར་མ་དྲུག་ཀུ་ལུ་ཏར། །མྱ་ངན་ཡུལ་ན་མ་མོ་རྣམས། །སིནྡྷུའི་ཡུལ་ན་ལཱ་མ་སྟེ། །རིགས་ཀྱི་གཙོ་མོ་ན་ག་རར། །ལཱཾ་པ་ཀ་དང་སཽཥྚར། །རིགས་ཀྱི་ལྷ་མོ་རྣམས་ཡིན་ནོ། །ཡི་དྭགས་གྲོང་དང་ནགས་ཆེན་པོར། །མཁའ་འགྲོ་རུ་པི་ཀ་རུ་བཅས། །ཁ་བ་རི་དང་ཀཱཉྩིར་ནི། །བྱིས་བཅས་མ་རུ་བཤད་པ་སྟེ། །པཱཉྩ་ལ་ཡི་ཡུལ་དག་ན། །ཁྱིམ་གྱི་ལྷ་མོ་ཀ་ལིངྐར། །བརྟུལ་ཞུགས་འཛིན་པ་རྣམས་ཡིན་ནོ། །ཀོ་ས་ལར་ནི་ཤ་ཟ་བ། །ཡི་དྭགས་གྲོང་དུ་དེ་བཞིན་དུ། །རྡོ་རྗེ་མཁའ་འགྲོ་སྦོམ་དབང་ཕྱུག་།ཏྲི་ཤ་ཀུ་ནེར་དུམ་སྐྱེས་མ། །པུ་ལིར་མ་ལ་ཡ་དེ་བཞིན། །གསེར་རིར་སྨེ་ཤ་ཅན་རིགས་སྐྱེས། །བུད་མེད་སྟོང་ཕྲག་ཉི་ཤུ་གཅིག་།ལྷག་མ་གཞན་དག་ཇི་སྲིད་པ། །དཔལ་ལྡན་ཧེ་རུཀ་ཡི་ནི། །འཁོར་ལོའི་རྣལ་འབྱོར་མ་ཡིན་ནོ། །ཧེ་རུ་ཀ་དཔལ་སྦྱོར་བ་ཆེ། །དེ་ཡི་དཀྱིལ་འཁོར་གཙོ་མོ་ཡིན། །མཁའ་འགྲོ་ཉི་ཤུ་རྩ་བཞི་འདིས། །རྒྱུ་དང་མི་རྒྱུ་འཇིག་རྟེན་གསུམ། །འགྲོ་བ་ཀུན་ནི་འདི་ཡིས་ཁྱབ། །མཁའ་འགྲོ་མ་ཡི་དམ་ཚིག་འདི། །སྤྲུལ་པ་སྒོམ་པ་ཉིད་ཡིན་ཏེ། །བསམ་གཏན་ལ་སོགས་དང་ཅིའང་རུང ། །ས་སྟེང་ན་ནི་རྫོགས་འགྱུར་བའོ། །གཡོན་གྱི་སྤྱོད་པ་
118b
གཅེར་བུ་ཡིན། །མཚན་མོ་རྟག་ཏུ་མཉམ་བཞག་པས། །སྐྱེས་པའམ་གལ་ཏེ་གཡོན་པ་ཀུན། །རྣལ་འབྱོར་མ་ཀུན་དཔའ་བོ་འགྲོ། །ཕྱག་རྒྱ་གར་གྱི་མཆོད་པ་ཡིས། །རང་བྱུང་རྟག་ཏུ་མཆོད་ན་ནི། །མ་ལུས་ལུས་པ་མེད་གྲུབ་ཅིང ། །གཡོན་པའི་མཆོད་པ་ལ་རབ་འཇུག་།དཔལ་ཧེ་རུ་ཀའི་ངེས་པར་བརྗོད་པ་ལས། ཡི་གེ་ཉི་ཤུ་རྩ་བཞིའི་དཀྱིལ་འཁོར་དགོད་པའི་ཆོ་གའི་ལེའུ་སྟེ་བཞི་བཅུ་རྩ་གཅིག་པའོ།། །།དེ་ནས་དཔའ་བོ་མེ་ཏོག་ཆུ། །འཐུངས་ནས་སྔགས་འདི་རྗེས་དྲན་བྱ། །རྟག་ཏུ་འདི་ལྟར་བྱ་བ་ཉིད། །ཕྱག་རྒྱ་ལྷན་ཅིག་སྒྲུབ་པ་པོས། །མཚན་མོ་རྟག་ཏུ་ཤ་བཟའ་བ། །སྔགས་འདི་ཉིད་ཀྱིས་ལན་གསུམ་བསྔགས། །མྱུར་དུ་བདེ་བ་ཐོབ་པར་འགྱུར། །འཐུངས་དང་དེ་བཞིན་བྱིན་པ་དང ། །རེག་ནས་བཞག་ན་གཙོ་མོ་ཆེ། །བདེན་པས་ཚངས་པར་སྤྱོད་པ་དང ། །ཐོག་མར་བཞད་པའི་ཕྱག་རྒྱ་ཡིས། །བལྟ་བའི་བསྙེམས་པ་གྲགས་ལྡན་པ། ། མཚན་མོའང་དེ་བཞིན་ཉིན་མོ་ནི། །འདིས་ནི་བཞད་པ་དག་ཏུ་བྱ། །གཟུགས་དང་ལས་ཀྱི་གསང་བ་གང ། །ཇི་ལྟར་གནས་པ་དཔའ་བོ་ཉོན། །རྟག་ཏུ་དེ་ཡི་མཆི་མ་འབྱུང ། ། དད་པས་དེ་ཡི་སྤུ་ཡང་ལྡང ། །རྡོ་རྗེ་ལ་ནི་འགོམ་མི་བྱེད། །དེ་བཞིན་གཅེར་བུས་མཆོད་པ་སྟེ། །འདོད་པའི་དབང་ཕྱུག་ཐམས་ཅད་ཀྱི། །ཕྱག་རྒྱའི་ཚོགས་ཀྱི་རིམ་པ་ཉིད། །དབུགས་
119a
༄#། །འབྱིན་བསྐུལ་དང་དགོད་པ་དང ། །སྒེག་པའི་གར་ནི་ངོ་མཚར་བས། །སྣ་ཚོགས་གང་དག་མདུན་བྱེད་ཅིང ། །ཕྱག་རྒྱ་སྔགས་ནི་རྗེས་དྲན་བྱ། ། ཧ་ཧ་ཧེ་ཧེ་རྣམ་བརྒྱད་བཞད། །སྣ་ཚོགས་དབང་ཕྱུག་མཆོག་ཏུ་དགའ། །ཧཱ་ཧཱ་ཞེས་བྱ་འདི་ཉེ་བར། །རྟག་ཏུ་མཆི་མ་འབྱུང་བ་དང ། །དེ་ཉིད་ཀྱིས་དེ་དགར་འགྱུར་ཞིང ། །བསམ་གཏན་གྱི་སྔགས་ལེགས་པར་སྦྱོར། །གཙོ་མོ་རྣམས་དང་དཔའ་བོ་ནི། །སྤུ་ལྡང་བ་དང་ལྷན་ཅིག་བདེ། །རྡོ་རྗེ་འགོམ་པར་མི་བྱ་བ། །གཡོན་པས་ཡོངས་སུ་བརྟགས་པ་ཡིན། ། དཔལ་ཧེ་རུ་ཀའི་ངེས་པར་བརྗོད་པ་ལས། བཞད་པའི་སྔགས་དང་མཁའ་འགྲོ་མའི་གཟུགས་ཀྱི་སྒྱུ་མའི་ཆོ་གའི་ལེའུ་སྟེ་བཞི་བཅུ་རྩ་གཉིས་པའོ།། །།དེ་ནས་སྤྱན་རས་གཟིགས་བཤད་དེ། །དཔའ་བོ་དང་ནི་གཉིས་མེད་མི། །གནས་ཀྱི་དབྱེ་བ་ཆོག་ཤེས། །སྒོམ་ལ་རྟག་ཏུ་མངོན་དགའ་བའོ། །ལམ་གྱི་བཞི་མདོའམ་ཁྱིམ་བདག་གམ། །དཔའ་བོའི་གནས་དང་རི་བོར་ནི། །མཁའ་འགྲོ་མ་ཡིས་དམ་ཚིག་གནས། །རིང་པོ་ནས་ཀྱང་གཟིགས་པར་འགྱུར། །ཕྱག་རྒྱས་གཅེར་བུ་མཆོད་པ་ཡི། །ལག་པས་གོ་འཕང་དམ་པ་སྟེ། །གོས་ཉིད་ཀྱིས་ནི་བཀབ་པའམ་གཞན། །འདོད་པ་རྣམས་ཀྱིས་གོས་མི་འགྱུར། །དེ་བཞིན་སྒྲ་གྲོལ་གཙོར་གྱུར་པས། །ལས་རྣམས་ཐམས་ཅད་བརྩམ་
119b
པར་བྱ། །རྩ་བའི་སྔགས་དང་དེ་བཞིན་གཞན། །ཕྱོགས་བཅིང་བར་ནི་འཇུག་པ་ཡིས། །ལྷ་དང་ལྷ་ཡི་ཚོགས་ཀྱིས་ཀྱང ། །མ་མཐོང་བར་ནི་མཆོད་པར་བགྱི། །སྙིམ་པ་མེ་ཏོག་གིས་བཀང་སྟེ། །མཁའ་ལ་སྤྱོད་ལ་གྱེན་དུ་འཐོར། །མེ་ཏོག་དེ་དག་མ་ལྷུང་ཞིང ། །མེ་ཏོག་ས་ལ་མ་མཐོང་ན། །གནས་ཀྱི་ཁྱད་པར་ལ་གནས་དང ། །མཁའ་ལ་འགྲོ་བ་སྟོང་ཕྲག་གི་།གནས་ལ་དབང་ནི་བྱེད་པར་འགྱུར། །ངག་གི་དབང་ཕྱུག་མ་རྣམས་དང ། །ངག་གི་དབང་ཕྱུག་འགུགས་པར་འགྱུར། །ལྷ་དང་ལྷ་ཡི་གཏམ་ཤེས་ཤིང ། །རིམ་པ་ཇི་ལྟ་བཞིན་དུ་འོ། །སྐར་མའི་རྒྱུ་བ་ཤེས་པར་འགྱུར། །གྲོང་དང་གྲོང་རྡལ་དེ་བཞིན་དགོན། །གྲོང་ཁྱེར་དང་ནི་བཞི་མདོ་དང ། །ཤིང་གཅིག་དང་ནི་དཔའ་བོའི་ཁྱིམ། །རི་རྩེ་དང་ནི་མཚན་དྲུང་དུ། །སྙིང་པོའི་ཉེ་སྙིང་རྟག་དན་ན། །ལྷ་དང་མི་ཡིས་མཐོང་མི་འགྱུར། །དེ་བས་ཡུལ་ཕྱོགས་འདི་དག་ཏུ། །སྒྲུབ་པ་པོ་ནི་རྟག་ཏུ་གནས། །ཡི་གེ་བདུན་གྱི་བདག་ཉིད་ཅན། །ཤིང་རྩེར་ཁ་དོག་དམར་བསམས་ནས། །མྱུར་དུ་ལྷུང་བ་མི་ཕྱེད་པར། །ས་རྣམས་ཀྱང་ནི་གཞན་དུ་མིན། །བདག་གི་ལུས་ལ་རྣམ་བཀོད་དེ། །ས་ལ་ཀུ་ཤའི་སྟན་དུ་ཉལ། ། ཡི་གེ་བདུན་གྱི་བདག་ཉིད་སྔགས། །བརྒྱ་རྩ་བརྒྱད་ནི་ཉིད་དུ་བཟླ། །རྨི་ལམ་དུ་ནི་བྱ་བ་ཀུན། །ཡིད་ལ་འདོད་པ་སྟོན་པར་འགྱུར། །དུས་མིན་འཆི་དང་བཅོམ་དང་ཉམས། །བྱ་བ་
120a
༄#། །ཀུན་ཏུ་གང་གྱུར་དང ། །རྣམ་པ་སྣ་ཚོགས་གཞན་དག་ཀྱང ། །ཐམས་ཅད་རྨི་ལམ་དག་ཏུ་སྟོན། །དེ་བཞིན་སྔགས་བཟླས་རལ་གྲི་ཆུ། །མཐེ་བོང་མར་མེ་མེ་ལོང་ལ། །སྔགས་པ་བདག་ཉིད་རྟག་རྣལ་འབྱོར། །པྲ་སེ་ན་ནི་འབེབས་པར་བྱེད། །བསྒོམས་ནས་ལན་བདུན་བཟླས་བརྗོད་པས། །དགེ་དང་མི་དགེ་སྟོན་པར་འགྱུར། ། དེ་ནས་དཔའ་བོའི་ཡི་གེ་བདུན། །སྔགས་དགོད་དབྱེ་བ་ཉིད་ཀྱིས་ཏེ། །ཉི་མའི་དབུས་སུ་བསམས་ནས་ནི། །སྟོང་གི་བར་དུ་བཟླ་བར་བྱ། །ཤེལ་གྱི་རྣམ་པ་ལྟ་བུར་ནི། །ནད་ཀྱིས་གདུངས་ལ་བསྟན་པར་བྱ། །མཐོང་བ་ཙམ་གྱི་མོད་ལ་ནི། །ནད་ཀུན་འཇིགས་པར་ཐེ་ཚོམ་མེད། །ནད་ལས་རྣམ་པར་གྲོལ་འགྱུར་ན། །སྟོན་ཁའི་དུས་ཀྱི་ཟླ་བ་འདྲ། ། ཟླ་བའི་དབུས་སུ་རྣམ་བཀོད་ཅིང ། །ལག་པ་གཡོན་པར་འཁོར་ལོ་ཉིད། །ཡི་གེ་ཤེལ་གྱི་མདོག་ལྟར་སྣང ། །ནད་རྣམས་ཀུན་ལ་དགོད་པར་བྱ། །རིམས་དང་གདོན་སོགས་བརྗོད་བྱེད་དང ། །གཟེར་སོགས་ཀུན་དང་མཛེ་ཅན་དང ། །དུག་གིས་ཟིན་སོགས་ནད་རྣམས་དང ། །ནད་ཀུན་ཐེ་ཚོམ་མེད་པར་ནི། །ཟླ་གཟུགས་ཡི་གེ་བསམས་ནས་ནི། །ཕྱོགས་བཅུར་རྣམ་པར་འབྱེར་བར་འགྱུར། །མཚན་མོ་གསང་བ་ལ་གནས་ཏེ། །གོ་མཱཾ་ས་ནི་མངར་གསུམ་བཏགས། །ཡིག་བདུན་གསང་སྔགས་ཤེས་པ་དང ། །སྟོང་
120b
ཕྲག་བརྒྱད་དུ་སྦྱིན་སྲེག་བྱས། །སྔགས་པ་ནང་པར་དུས་སུ་ནི། །གསེར་སྲང་སྟོང་ནི་རྙེད་པར་འགྱུར། །སྦྱིན་སྲེག་སྟོང་ཕྲག་བཅུ་ཡིས་ནི། །ཡུལ་འཁོར་དམ་པ་རྙེད་པར་འགྱུར། ། ཡང་ན་གསང་སྔགས་རྒྱལ་པོ་ནི། །གནས་ནི་གང་དུ་བསམ་པ་དང ། །དེ་དང་དེར་ནི་དེ་ཡི་ཚེ། །སྐྱེ་བར་འགྱུར་བར་གདོན་མི་ཟ། །དཀར་པོ་ཡིས་ནི་ཞི་བར་འགྱུར། །ནག་པོས་སྐད་ཅིག་དག་གིས་གསོད། །དམར་པོས་དབང་དུ་འགྱུར་བ་སྟེ། །འཕྲལ་དུ་ངེས་པར་འགུགས་པར་འགྱུར། །སེར་པོས་ཐམས་ཅད་གནོན་འགྱུར་ཏེ། །འདི་ནི་བསྟན་བཅོས་ངེས་པ་ཡིན། །སེར་པོས་དཔུང་ནི་གནོན་པ་དང ། །གྲུ་དང་འཁྲུལ་འཁོར་གླང་པོ་གནོན། །དཀར་པོ་བསམ་པ་ཙམ་གྱིས་ནི། །འཆི་བ་ངེས་པར་གྲོལ་བར་འགྱུར། །སྤྲུལ་ཆེན་བརྒྱ་ཡིས་ཟིན་པ་ནི། །དེ་ཡང་མྱུར་དུ་སློང་བར་བྱེད། །དུག་གིས་བརྒྱལ་བ་རྣམས་མཐོང་ནས། །རབ་ཏུ་སད་པས་སད་པར་འགྱུར། །རིམས་དང་གདོན་དང་བརྗེད་བྱེད་ནི། །ལག་པ་མཐོང་བས་འཇིགས་པར་འགྱུར། །གཡུལ་གྱི་དུས་སུ་ཁུ་ཚུར་བཅིངས། །ཡིད་ལ་རྟག་ཏུ་ཟློས་བྱེད་ན་\?\། །ཁུ་ཚུར་མ་བཀྲོལ་དེ་སྲིད་དུ། །བྱ་བ་ཐམས་ཅད་འགྲུབ་པར་འགྱུར། །དགྲ་བོ་གལ་ཏེ་ལག་ན་ནི། །མཚོན་ཆ་འཕྱར་\?\་བར་\?\་བྱེད་པ་ཡང ། །ཇི་སྲིད་ཁུ་ཚུར་མ་བཀྲོལ་པར། །མཚོན་ཆ་གཏོང་བར་\?\་མི་ནུས་སོ། །གཞན་ཡང་བྱ་བ་ཐམས་ཅད་ནི། །དེ་བཞིན་
121a
༄#། །ཉིད་དུ་སྒྲུབ་པར་བྱེད། །འབྲས་བུ་མེ་ཏོག་འདབ་མ་དང ། །སོ་རྩི་དེ་བཞིན་ཟས་རྣམས་ལ། །ལུས་ཀྱི་སྦྱོར་བ་དང་པོ་སྟེ། །དེ་བཞིན་གཉིས་པ་ནུས་པ་ཡིན། །གསུམ་པ་དག་ནི་ངག་ཉིད་དོ། །བཞི་པ་དམིགས་པར་མི་འགྱུར་ཏེ། །སྔགས་ཀྱི་རྒྱལ་པོས་འགྲུབ་པར་འགྱུར། །ས་བཞི་ཤིང་དང་བཅས་པ་དང ། ། རྒྱ་མཚོ་སྐེ་རགས་བཏགས་དེ་ལ། །འདིར་ནི་འགྲུབ་པར་ཐེ་ཚོམ་མེད། །ཁམས་གསུམ་རྒྱུ་དང་མི་རྒྱུའི་བར། །དམོད་འདེབས་ཕན་འདོགས་ནུས་པ་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། །ཉེ་བའི་སྙིང་པོའི་ལས་སྒྲུབ་པའི་ཆོ་གའི་ལེའུ་སྟེ་བཞི་བཅུ་རྩ་གསུམ་པའོ།། །།དེ་ནས་ཕོ་ཉ་ལ་བསྟེན་ཏེ། །ཡི་གེ་བདུན་པ་དང་ལྡན་པ། །གང་དུ་ལས་ལ་ཡང་དག་བརྩམས། །དེ་ཡི་མོད་ལ་མྱུར་དུ་འགྲུབ། །ཡི་གེ་བདུན་པའི་ཆོ་ག་ཡིས། །རྣལ་འབྱོར་མ་དྲུག་རྣམ་པར་དགོད། །འཁོར་ལོར་ལེགས་པར་གནས་པ་དྲུག་།རྣམ་པ་དེ་ལྟའི་ཆོ་ག་ཡིས། །གཡོན་པ་ཉིད་དུ་བསྐུལ་དང་བཅས། །གང་གིས་གཟུང་འཛིན་བསམས་ནས་ནི། །ཁ་ནས་གསང་སྔགས་རྒྱལ་པོ་ཟློས། །གང་ལ་ལག་པ་དེ་བསྟན་པ། །དེ་ནི་ངེས་པར་འགུགས་པར་འགྱུར། །ཙནྡན་དམར་པོའི་རྡུལ་དང་ནི། །དེ་བཞིན་སྐེ་
121b
ཚེ་ལན་ཚཝ་དང ། །བསྒྲུབ་པར་བྱ་བའི་རྐང་རྗེས་ལ། །གཅིག་ཏུ་བྱས་ནས་བརྟག་པར་བྱ། །ལག་པ་གཉིས་ཀྱིས་མཉེས་ནས་ནི། །རྣལ་འབྱོར་མ་ལ་སྦྱིན་སྲེག་བྱ། །མཚན་མོ་མེ་ཤ་ཅན་མེ་འམ། །དུར་ཁྲོད་མེ་ལ་ཕྱེ་མ་བསྲེག་།བསྒྲུབ་པར་བྱ་ལ་མངོན་ཕྱོགས་ཏེ། །སྦྱོར་བ་འདི་ནི་བརྩམ་པར་བྱ། །ཇི་སྲིད་བརྒྱ་ཡི་བར་དུ་བཟླས། །དེས་ནི་ངེས་པར་འགུགས་པར་འགྱུར། །བསྒྲུབ་པར་བྱ་བའི་བདག་ཉིད་དང ། །ནོར་དང་སྐྱེ་བོ་དབང་དུ་འགྱུར། །སྦྱོར་བ་འདི་ནི་གྲུབ་པ་སྟེ། །གཞན་དུ་ན་ནི་ང་མི་སྨྲ། །རྡུལ་དེ་ཉིད་ནི་བླངས་ནས་སུ། །ལྕགས་ཕྱེ་དང་ནི་རྣམ་པར་བསྲེས། །དུར་ཁྲོད་རས་ལ་བཏུམས་ནས་ནི། །ལན་བདུན་བཟླས་ལ་བཞི་མདོ་རུ། །སོར་བརྒྱད་ཙམ་དུ་ས་བརྐོས་ནས། །དགྲ་ཡི་མིང་དང་བཅས་པར་ནི། །གང་གི་མིང་སྨོས་སྦས་གྱུར་པ། །དེ་ནི་མྱུར་དུ་གནོན་པར་འགྱུར། །ཕྱེ་མ་དེ་ཉིད་བཟླས་ནས་སུ། །འབད་དེ་བ་ཡི་འོ་མ་ཡིས། །དེ་ནི་སླར་ཡང་གསོས་གྱུར་ན། །འགྲུབ་པ་ཉིད་དུ་ཐེ་ཚོམ་མེད། །ཕྱེ་མ་དེ་ནི་བླངས་ནས་ནི། །མྱོས་བྱེད་ལྔ་དང་ལྡན་པ་རུ། །དེ་ནི་དུར་ཁྲོད་རས་ཀྱིས་བཅིངས། །དགྲ་ཡི་མིང་ཡང་བྲི་བར་བྱ། །བཟླས་བརྗོད་ལན་བརྒྱ་བྱས་ནས་ནི། །དུར་ཁྲོད་དུ་ནི་ངེས་སྦས་ན། །བསྒྲུབ་བྱ་སྨྱོ་བ་ཉིད་དུ་འགྱུར། །བཏོན་པ་ཉིད་ཀྱིས་ཐར་པར་འགྱུར། །བཏོན་ནས་བ་ཡི་འོ་མ་ཡིས། །འབད་
122a
༄#། །པས་དེ་བཞིན་བཀྲུ་བར་བྱ། །སླར་ཡང་གསོ་བ་དེ་དག་ནི། །འགྲུབ་པ་ཉིད་དུ་ཐེ་ཚོམ་མེད། །དཔལ་ཧེ་རུ་ཀའི་ངེས་པར་བརྗོད་པ་ལས། རྣལ་འབྱོར་མ་དྲུག་གི་ཡི་གེ་བདུན་གྱི་ལས་ཀྱི་ཆོ་གའི་ལེའུ་སྟེ་བཞི་བཅུ་རྩ་བཞི་པའོ།། །།དེ་ནས་ལས་ཀྱི་རབ་མཆོག་ནི། །ངག་གི་དངོས་གྲུབ་བྱེད་པའོ། །ཀཱ་ར་བཱི་རའི་མེ་ཏོག་དམར། །བརྒྱ་རྩ་བརྒྱད་ནི་བླངས་ནས་སུ། །འབད་དེ་བ་ཡི་འོ་མ་དང ། །བཟླས་བརྗོད་བརྒྱ་ཡང་བྱ་བ་ཡིན། །ལན་རེ་བཟླས་པའི་མེ་ཏོག་གིས། །ལིངྒའི་སྤྱི་བོར་བསྣུན་པར་བྱ། །དེ་ལྟར་ཤིན་ཏུ་མཉམ་བཞག་པས། །ཉི་མ་བདུན་དུ་བྱ་བ་ཡིན། །དེ་ནས་ཉིན་ཞག་བཅུ་གཅིག་པར། །མེ་ཏོག་དག་ནི་བླངས་ནས་སུ། །ཆུ་བོ་ཆེན་པོར་སོང་ནས་ནི། །རེ་རེ་ནས་ནི་ཆུ་ལ་དོར། །དེ་དག་ཐམས་ཅད་རིམ་བཞིན་དུ། །ལན་རེ་བཟླས་ནས་རབ་ཏུ་བྱ། །ཆུ་བོར་མེ་ཏོག་ཐ་མ་ནི། །རྒྱུན་ལས་ལྡོག་སྟེ་རབ་འབབ་ན། །ཆུ་དང་བཅས་པར་བླངས་ནས་ནི། །སོས་མ་རེག་པར་དེ་འཐུངས་ན། །གསང་བའི་རྒྱུད་ལས་བྱུང་བ་ཡི། །སྒྲུབ་པོའི་ཚིག་ནི་འགྲུབ་པར་འགྱུར། །དེ་ནས་སྐྱེ་གནས་རྒྱ་བཅིངས་ལ། །བརྒྱ་རྩ་བརྒྱད་དུ་བཟླས་ནས་ནི། །སྔགས་པ་བསྒྲུབ་བྱར་མངོན་ཕྱོགས་ན། །བསྒྲུབ་པར་བྱ་བའི་ལྟོ་བར་གནས། །དེ་ལ་ཡིད་ཀྱི་གནས་
122b
བཞིན་དུ། །བློ་ལྡན་ཐུན་གསུམ་མཐེའུ་ཆུང་བསྐྱོད། །བྲམ་ཟེ་གསོད་པ་དག་གིས་ཀྱང ། །ཞག་བདུན་བརྒྱ་བྱིན་སོགས་ངེས་འགུགས། །ཙནྡན་དམར་པོའི་རྡུལ་ལས་ནི། །བསྒྲུབ་པར་བྱ་བའི་གཟུགས་བྱས་ལ། །ཚ་བ་གསུམ་གྱིས་ལུས་ལ་བསྐུ། །སྤྲ་ཚིལ་གྱིས་ཀྱང་རབ་ཏུ་བྱུག་།སྒྲུབ་པ་པོ་ཡི་གསང་གནས་སུ། །ཟངས་མའི་ཁབ་ཀྱིས་ཕུག་ནས་ནི། །སེང་ལྡེང་མདག་མེ་དུ་མེད་ལ། །མཁས་པས་ཉི་མ་བདུན་དུ་བསྲོ། །ལན་བརྒྱ་བཟླས་ཏེ་བཟླས་པའི་མཐར། །མི་ཡི་བདག་པོ་མདུན་ན་འདོན། །བཙུན་མོའི་འཁོར་དང་བཅས་པ་ནི། །ངེས་པར་འགུགས་པར་བྱེད་པ་ཡིན། །མི་ཡི་བདག་པོ་འཁོར་བཅས་པ། །གྲོ་གའི་འདབ་མར་བྲི་བྱ་བ། །གི་ཝང་དག་གིས་བྲིས་ནས་ནི། །མིང་དང་སྤེལ་ནས་གང་ལ་ནི། །མངོན་པར་ཕྱོགས་ཏེ་བརྒྱ་བཟླས་ནས། །སེང་ལྡེང་མེ་ལ་དེ་གདུངས་ཤིང ། །དུར་ཁྲོད་མེ་སྟེང་བསྒྲུབ་ཕྱིར་བཤད། །ཇི་སྲིད་སྤྲ་ཚིལ་མ་ཞུ་བར། །བསྲོས་པར་གྱུར་ན་རྒྱལ་པོ་ནི། །འཁོར་ལོས་བསྒྱུར་དང་བཅས་པར་ཡང ། །ངེས་པར་འགུགས་པར་འགྱུར་པ་ཡིན། །བསྒྲུབ་པར་བྱ་བའི་རྐང་རྗེས་ལས། །ཙནྡན་དམར་པོ་ཉིད་དང་ནི། །དུར་ཁྲོད་ལྷག་མ་ཐལ་བས་སྤྱོད། །སྒྲུབ་པ་པོ་ཡིས་གཅིག་བསྡུས་ལ། །སེང་ལྡེང་མེ་ནི་དུ་མེད་ལ། །རབ་ཏུ་འབད་པས་བསྲོ་བར་བྱ། །རྡུལ་དེ་ལག་
123a
༄#། །པ་གཉིས་ཀྱིས་ནི། །མཉེས་ནས་སྦྱིན་སྲེག་བྱས་ནས་ནི། །ཇི་སྲིད་དུ་ནི་བསྲེགས་པས་འགྲུབ། །རྡུལ་དེ་བླངས་ནས་མ་ཡེངས་པར། །དབུགས་མི་འབྱིན་པར་སྦས་ན་ནི། །བརྒྱལ་ཞིང་སེམས་དང་བྲལ་འདྲ་ལ། །མྱོས་ཤིང་སྨྱོན་རྨོངས་པ་ཉིད་དང ། །རླུང་གི་ཤུགས་ཀྱིས་འོངས་ནས་ནི། །སྒྲུབ་པ་པོ་ཡི་སྟེང་དུ་ལྷུང ། ། ཕྱུགས་སམ་ཡང་ན་ཕོ་ཉ་མོ། །མཁས་པ་ཡིས་ནི་དབྱེ་བ་ཡིན། །དེ་ནས་ལས་ཀྱི་ཕོ་ཉ་མོར། །བྱ་བ་འདི་ནི་འཛིན་པ་ཉིད། །ཀཱ་ར་བཱི་རའི་ལྕུག་མ་ནི། །རླན་བཅས་དཔུང་པའི་ཚད་མཉམ་བླངས། །འབར་འགྱུར་རོ་བསྲེགས་མེ་ལ་དོར། །ཇི་སྲིད་དེ་ནི་མ་ཚིག་པ། །མྱུར་དུ་སོང་སྟེ་དེ་བླངས་ལ། །རིག་པ་ལན་བདུན་བཟླས་ནས་ནི། །གང་ཞིག་བཟླས་ཏེ་བསྐོར་ན་ནི། །དེ་ནི་དེ་ཡི་སྐད་ཅིག་ལ། །སྐྱེས་པ་འམ་བུད་མེད་རང་གཟུགས་ཅན། །རླུང་གི་ཤུགས་ཀྱིས་འོངས་པར་འགྱུར། །ཀཱ་ར་བཱི་རའི་མེ་ཏོག་དམར། །བརྒྱ་བཟླས་རྒྱལ་གྱིས་སྦྱོར་པ་ལས། །སྒྲུབ་པོས་གི་ཝང་གིས་བྱུགས་ལ། །མེ་ཏོག་ཆུ་ལ་གནས་པ་ལ། །ཆུ་བོ་ཆེན་པོར་ཞུགས་ནས་ནི། །ལྟེ་བ་མན་ཆོད་ཆུར་བཅུག་སྟེ། །ལག་པ་སྦྱར་བའི་དབུས་གནས་ལ། །རིག་པ་སྟོང་དུ་བཟླས་ནས་ནི། །ལག་པ་གཉིས་ཀྱིས་ཕྱེར་བླངས་ཏེ། །ཆུ་དང་བཅས་པར་བཏུང་བར་བྱ། །དེ་ནས་སྒྲུབ་
123b
པ་བོ་དེ་ཡིས། །ཚིག་གི་དངོས་གྲུབ་ཐོབ་པར་འགྱུར། །རྒྱལ་པོའམ་རྒྱལ་པོའི་ཆུང་མ་ནི། །ཡིད་ཀྱིས་ངེས་པར་འགུགས་པར་འགྱུར། །ལྷར་བཅས་ལྷ་མིན་མི་རྣམས་ནི། །མྱུར་དུ་དབང་དུ་བྱེད་པར་འགྱུར། །ཁྲོས་པས་ཚིག་གིས་གསོད་འགྱུར་ཞིང ། །དབྱེ་དང་བསྐྲད་པ་ཉིད་ཀྱང་བྱེད། །སྒྲུབ་པ་པོ་ཡི་ཚིག་ཉིད་ཀྱིས། །ཚར་གཅོད་པར་ནི་བྱེད་པར་འགྱུར། །ཚིག་ཙམ་གྱིས་ནི་ཆུ་བོ་དང ། །ཤིང་རྟ་འཁྲུལ་འཁོར་རྒྱ་མཚོ་དང ། །གླང་པོ་རྟ་དང་དེ་བཞིན་སྤྲིན། །སྐྱེས་བུའམ་ཡང་ན་བྱ་ཡང་གནོན། །ཡིད་ཀྱིས་ཡིད་ལ་གང་འདོད་པ། །ཚིག་གིས་ཐམས་ཅད་བྱེད་པར་འགྱུར། །དགུག་པ་ཡི་ནི་སྦྱོར་བ་དག་།བུད་མེད་ཐམས་ཅད་རྨོངས་བྱེད་པ། །ཀཱ་ར་བཱི་རའི་མེ་ཏོག་ནི། །དམར་པོ་ཡང་དག་བླངས་ནས་སུ། །རིག་པ་ལན་བརྒྱ་བཟླས་པ་དག་།སྐྱེ་གནས་དབུས་སུ་གཞུག་པར་བྱ། །མེ་ཏོག་དེ་ནི་ཁ་སྦྱར་བྱས། །གསང་བའི་གནས་སུ་ངེས་པར་སྦྱར། །གཉིས་མེད་ཡེ་ཤེས་རྣལ་འབྱོར་ལྡན། །སྔགས་པས་བརྒྱ་ཕྲག་གཅིག་ཏུ་བཟླས། །སྐྱེ་གནས་དབུས་ཀྱི་མེ་ཏོག་དང ། །སྒྲུབ་པ་པོ་ཡིས་གཅིག་བླངས་ལ། །མེ་ཏོག་གིས་ནི་གང་བསྣུན་པ། །དེ་ནི་མདོ་ལ་དབང་དུ་འགྱུར། །བརྒྱལ་ཞིང་སེམས་དང་བྲལ་བ་ཡང ། །ཡན་ལག་ཚིགས་ཀུན་གཞན་དབང་སྟེ། །མངོན་འགྱུར་སེམས་ནི་ལྡོག་པ་རུ། །སྐད་ཅིག་
124a
༄#། །གིས་ནི་དབང་དུ་བྱེད། །འདི་ནི་ཡིད་ཆེས་དངོས་གྲུབ་སྟེ། །དོན་ཡོད་དབང་དུ་བྱེད་པ་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། རྣལ་འབྱོར་མ་དྲུག་དང་ཚིག་གི་དངོས་གྲུབ་ལུང་བསྟན་པའི་ཆོ་གའི་ལེའུ་སྟེ་བཞི་བཅུ་རྩ་ལྔ་པའོ།། །།དེ་ནས་ཡི་གེ་ཧ་ལྔ་ནི། །ལས་རྣམས་ཐམས་ཅད་སྒྲུབ་བྱེད་པ། །གང་ཞིག་ཤེས་པ་ཙམ་གྱིས་ནི། །མྱུར་དུ་དངོས་གྲུབ་རབ་འཇུག་པའོ། །ཧཾ་ཧཽ་ཧོ་ཧེ་ཧ། ཡི་གེ་ཧ་ལྔ་ལག་པ་ཡིས། །བསྐུལ་དང་ལྡན་པས་མཉེས་ནས་ནི། །ཁ་ནས་ཀྱང་ནི་ཁྲག་འཛག་ཅིང ། །དགྲ་བོ་དེ་ཡི་མོད་ལ་འཆི། །རང་གི་ཁྲག་ནི་ཐོད་གནས་པ། །སྲིན་ལག་གིས་ཁྲག་མཉེ་བར་བྱ། །ཇི་སྲིད་བསྐམས་ཀྱི་བར་དུ་སྟེ། །དེས་ནི་བསྒྲུབ་བྱ་རྣམ་པར་འཇིག་།གལ་ཏེ་ཁྲོ་བ་འབར་བ་དང ། །མིག་དམར་བ་ཡིས་བཟླས་ན་ནི། །དཔུང་ཚོགས་བཞོན་པར་བཅས་པ་ཡིས། །རྒྱལ་པོ་མྱུར་དུ་འཆི་བར་བྱེད། ། བྱི་ལ་དང་ནི་ནེའུ་ལེ་དང ། །ཁཝ་དང་ཝ་དང་ཆུ་སྐྱར་ནི། །མཁའ་འགྲོ་མ་ལ་སྟོབས་ཅན་སྦྱར། །འདི་དག་མྱུར་དུ་གྲུབ་ཡིན་པར། །རྒྱུད་འདི་ལ་ནི་ཐེ་ཚོམ་མེད། །རི་བོང་ལ་སོགས་སྤུ་ལས་ནི། །སྲད་བུ་བྱས་ཏེ་ལན་སྟོང་བཟླས། །གང་གིས་མགུལ་དུ་བཅིངས་གྱུར་པ། །དེ་ནི་དེ་དང་འདྲ་བར་འགྱུར། །ལག་པར་བཟླས་བརྗོད་སྟོང་བྱས་ཏེ། །ཀཱ་ར་བཱི་རའི་མེ་
124b
ཏོག་དང ། །ཡི་གེ་རེ་རེ་མངོན་བཟླས་ལ། །སྤྲུམ་མ་ལ་ནི་རེག་གྱུར་ན། །མངལ་ནི་རྣམ་པར་འཕོ་འགྱུར་ཏེ། །བཏང་ན་ཐར་བར་འགྱུར་བ་ཡིན། །གང་ལ་སྡིགས་མཛུབ་བྱས་ཏེ་འཆི། །སླར་ཡང་འཚོ་བར་བྱེད་པ་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། ཡི་གེ་ཧ་ལྔའི་ལས་ཀྱི་ཆོ་གའི་ལེའུ་སྟེ་བཞི་བཅུ་རྩ་དྲུག་པའོ།། །། དེ་ནས་ཡང་དག་བཤད་བྱ་བ། །མཁའ་འགྲོ་ཀུན་གྱི་སྙིང་པོ་སྟེ། །འདི་ནི་བརྗོད་པ་ཙམ་གྱིས་ཀྱང ། །དངོས་གྲུབ་ཐམས་ཅད་སྐྱེད་བྱེད་ཡིན། །དེ་ནས་མཁའ་འགྲོ་མའི་རིག་པ་ཆེན་པོ་བཟླས་ན། རིགས་ཐམས་ཅད་དབང་དུ་བྱེད་པར་འགྱུར་རོ། །རྟག་ཏུ་བཟླས་བརྗོད་བྱས་པས་ནི། དཔལ་ཆེན་པོ་བསྐྱེད་པར་འགྱུར་རོ། །མི་རུས་ཀྱི་རྒྱུ་ལ་ཕུར་བུ་སོར་དྲུག་པ་བྱས་ལ་བརྒྱ་རྩ་བརྒྱད་མངོན་པར་བཟླས་ནས་གང་གི་སྒོར་སྦས་པ་དེའི་རིགས་རྒྱུད་རྣམས་གཅོད་པར་འགྱུར་རོ། །ཞིང་དང ། ར་བ་དང ། མ་ཧེ་དང ། གླང་པོ་ཆེ་དང ། རྟའི་གནས་སུ་བརྐོས་ཏེ་སྦས་ན། །ཐམས་ཅད་བརླག་པར་འགྱུར་རོ། །དེ་ནས་རྒྱལ་པོའམ་རྒྱལ་པོའི་བློན་པོ་དབང་དུ་བྱ་བར་འདོད་ན། །རྒྱལ་པོའི་སྒོར་ས་ལས་བྱས་པའི་གཟུགས་བརྙན་སོར་བརྒྱད་པ་བྱས་ལ། མཁས་པས་བཞག་ནས་ཉིན་ཞག་དང་བོ་ལ་མ་ཏུ་ལུང་ཀའི་མེ་ཏོག་དང་འབྲས་བུ་རྣམས་དང་ཀུ་སུ་མ་བསྲེས་པས་
125a
༄#། །སྦྱིན་སྲེག་བརྒྱ་སྟོང་བྱས་ན། །དེ་དབང་དུ་འགྱུར་རོ། །སྔགས་འདི་ཉིད་ཀྱིས་དགུག་པ་དང ། གནོན་པ་དང་།སྐེམ་པ་དང ། རྨོངས་པ་དང ། རྨུགས་པ་དང ། ཚིག་འཕྲོག་པ་དང ། ལོང་བར་བྱེད་པ་དང ། དིག་པ་ཉིད་དང ། སླར་གཏོང་བར་བྱེད་དོ། །དེ་ནས་སྐྱེས་པ་བུད་མེད་དུ་བྱ་བར་འདོད་ན། སྐྱེས་པའི་རོའི་མེ་ཏོག་དང ། ཀ་ག་ཨནྡི་ཀའི་འབྲས་བུ་དང ། ཁཝའི་སེན་མོ་དང ། རྐང་པའི་འོག་གི་པགས་པ་ཆ་མཉམ་པར་བྱས་ལ་རི་བོང་གི་ཁྲག་དང་བཏགས་ཏེ་རིལ་བུ་བཅུ་གཅིག་བྱས་ལ་གྲིབ་མ་ལ་སྐམ་མོ་\?\། །དེ་བཞིན་དུ་ཞག་བཟང་པོ་ལ་ལག་པ་ལ་བཅིངས་ཏེ་ཉི་མ་གཉིས་པ་ལ་གང་གི་སྤྱི་བོར་ཕྱེ་མ་བཞག་པ་དེ་བུད་མེད་དུ་འགྱུར་རོ། །དེ་ནས་སྐྱེས་པ་ཁྱིར་བྱ་བར་འདོད་ན། གནམ་ལྕགས་ནེའུ་ལེའི་མགོ་བོར་བཞག་ལ་མཚན་མོ་བདུན་གྱི་བར་དུ་བརྒྱ་སྟོང་སྦྱིན་སྲེག་བྱས་ལ་ཉིན་ཞག་བརྒྱད་པ་ལ་གུར་གུམ་དང་མཉམ་པོར་སྦྱར་ཏེ་ལན་བརྒྱ་རྩ་བརྒྱད་མངོན་པར་བཟླས་ནས་ཕྱེ་མའི་སྦྱིན་སྲེག་བྱས་ལ་དེའི་ཐལ་བ་གང་གི་སྤྱི་བོར་བཞག་པ་དེ་ཁྱིར་འགྱུར་རོ། །སླར་གསོ་བ་ནི། མཚན་མོའི་དུས་སུ་མཁའ་འགྲོ་མ་རྣམས་ལ་མཆོད་པ་ཆེན་པོ་བྱས་ཏེ་གཏོར་མ་བྱིན་ན། དེའི་འོག་ཏུ་རྣལ་མར་འགྱུར་རོ། །རྫས་རྫས་མ་ཡིན་པར་བྱ་བར་འདོད་ན། །གསེར་ཤིང་གི་འབྲས་བུ་སྦྱིན་སྲེག་བརྒྱ་རྩ་བརྒྱད་
125b
བྱས་ན།་རྫས་མ་ཡིན་པར་འགྱུར་རོ། ། རུ་རའི་སྦྱིན་སྲེག་བྱས་ན། རྣལ་མར་འགྱུར་རོ། །དེ་ནས་སྨྱོ་བར་བྱ་བར་འདོད་ན། བྱ་ཆེན་པོའི་གནས་ཀྱི་སྦྱིན་སྲེག་བྱས་ན། ཉི་མ་བདུན་པ་ལ་སྨྱོ་བར་འགྱུར་རོ། །སླར་ཟློག་པ་ནི། འབྲས་ཀྱི་ཕུབ་མའི་སྦྱིན་སྲེག་བྱས་ན། ཞི་བར་འགྱུར་རོ། །བྱི་ལའི་སྤུ་ཟླ་བ་གཟས་ཟིན་པའི་ཚེ་བསྡུས་ལ་གང་གི་མིང་ནས་སྨོས་ནས་སྔགས་ཀྱི་སྦྱིན་སྲེག་བྱས་ནས་ཐལ་བ་དེ་གང་གི་སྤྱི་བོར་བཞག་པ་དེ་བྱི་ལར་འགྱུར་རོ། །སླར་བཟླས་ན། རྣམ་པར་ཞི་བར་འགྱུར་རོ། །བྱ་རོག་གི་རྒྱུས་པ་ལ་སྲད་བུ་བྱས་པ་བཟུང་ལ་མངོན་པར་བཟླས་ཏེ་གང་གི་མགུལ་དུ་བཅིངས་པ་དེ་བྱ་རོག་ཏུ་འགྱུར་རོ། །གང་དང་གང་གི་རྒྱུས་པས་སྲད་བུ་བྱས་པ་ལ་མངོན་པར་བཟླས་ཏེ་མགུལ་དུ་བཅིངས་པ་དེ་དེ་དང་འདྲ་བར་འགྱུར་རོ། །དེ་བཞིན་དུ་ཁཝ་དང ། ཐི་བ་དང ། རྨ་བྱ་དང ། ཆུ་སྐྱར་དང ། འུག་པ་དང ། ཁྲ་དང ། བྱ་རྒོད་ཀྱི་གཟུགས་འཛིན་པར་འགྱུར་རོ། །བ་ལང་གི་སྤུ་ལ་སྲད་བུ་བྱས་ལ་ལན་བརྒྱད་བརྒྱ་བཟླས་བརྗོད་བྱས་ཏེ་མགུལ་དུ་བཅིངས་ན། དེ་བ་ལང་དུ་འགྱུར་རོ། །རྐང་བཞི་པ་ལ་སོགས་པ་གང་དང་གང་གི་སྤུ་ལས་སྲད་བུ་བྱས་ལ་མངོན་པར་བཟླས་ཏེ་མགུལ་དུ་བཏགས་ན། དེ་དེའི་གཟུགས་འཛིན་པར་འགྱུར་རོ། །བཀྲོལ་ན། ཐར་པར་འགྱུར་རོ། །འབྲས་སོ་བ་ལ་བཟླས་
126a
༄#། །ལ་ནོར་གྱི་བདག་པོ་ཆེན་པོའི་ཁྱིམ་དུ་བཅུག་ལ་ལྷག་མས་བདག་ཉིད་དང་དབང་བསྐུར་ན། མཚན་བདུན་གྱིས་སོ་བ་ཐམས་ཅད་འགུགས་པར་འགྱུར་རོ། །དཔལ་ཧེ་རུ་ཀའི་ངེས་པར་བརྗོད་པ་ལས། སངས་རྒྱས་ཐམས་ཅད་ཀྱི་མཁའ་འགྲོ་མའི་སྔགས་ཀྱི་ལས་ཐམས་ཅད་ཀྱི་ཆོ་གའི་ལེའུ་སྟེ་བཞི་བཅུ་རྩ་བདུན་པའོ།། །།དེ་ནས་གཞན་ཡང་བཤད་བྱ་བ། །མཁའ་འགྲོ་ཀུན་གྱི་དགེ་གང་བའི། །སྙིང་པོ་རྣལ་འབྱོར་མ་ཀུན་གྱི། །འདོད་དོན་ཐམས་ཅད་སྒྲུབ་བྱེད་པའོ། །གང་ཞིག་དྲན་པ་ཙམ་གྱིས་ནི། །འཇིག་རྟེན་གསུམ་པོ་གཡོ་བྱེད་ཅིང ། །རྗེས་སུ་དྲན་པ་ཙམ་གྱིས་ཀྱང ། །ཡང་དག་དངོས་གྲུབ་རིམ་གྱིས་སོ། །ཧཱསཝཱ་ཏ་ཕ་ཧཱུཾ་ཧུཾ་ཡེ་ནི་རྞྞཝ་ཛྲབ་ཡེ་ནཱི་ཀི་ཌཱ་དྡྷ་པུ་བྲས་ཨོཾ། །སྔགས་འདི་བཀླགས་པས་གྲུབ་པ་སྟེ། །ལས་རྣམས་ཀུན་བྱེད་དགེ་བ་ཡིན། །མཁའ་འགྲོ་རྣལ་འབྱོར་མ་རྣམས་དང ། །ཁནྜ་རོ་ཧི་ལཱ་མ་སོགས། །མཁའ་འགྲོ་མ་ནི་ཐམས་ཅད་ཀྱི། །སྔགས་ནི་འདི་ཉིད་ཡིན་པར་གྲགས། །ས་འོག་ཡང་ན་མཐོ་རིས་སམ། །དེ་བཞིན་མི་ཡུལ་དག་ཏུ་ཡང ། །ལས་ནི་གང་དག་ཡོད་པ་དག་།སྔགས་ཀྱིས་དེ་དག་ཐམས་ཅད་སྒྲུབ། །དངོས་གྲུབ་ཀུན་བྱེད་དགེ་བ་ཡིན། །དངོས་གྲུབ་ཐམས་ཅད་རབ་སྩོལ་བ། །འདི་ལས་ཤིན་ཏུ་མཆོག་གྱུར་མེད། །འཇིག་
126b
རྟེན་གསུམ་ན་ཅི་ཡང་མེད། །གང་ཕྱིར་འདི་ནི་བླ་མེད་དེ། །ལས་རྣམས་ཐམས་ཅད་སྒྲུབ་བྱེད་ཡིན། །མཁའ་འགྲོ་མ་ནི་ཀུན་གྱི་གནས། །མདོར་བཤད་རྒྱས་པར་མ་ཡིན་ནོ། །མེ་ཏོག་འབྲས་བུ་སྣ་ཚོགས་ཀྱི། །རི་བོ་བཟང་པོ་བྲི་བྱ་ཞིང ། །དེ་ཡི་སྟེང་དུ་རྟག་སྒོམ་པ། །མཁའ་འགྲོ་དེ་བཞིན་ལཱ་མ་དང ། །ཁཎྜ་རོ་ཧི་རྣལ་འབྱོར་མ། །དཔའ་བོ་རྣམས་ཀྱི་དཔའ་བོ་ཉིད། །ཧ་ཧ་ཧེ་ཧེ་ཞེས་བྱ་བ། །དཔའ་བོ་ཉི་ཤུ་རྩ་བཞི་ཡི། །མཁའ་འགྲོ་དྲ་བའི་བདེ་མཆོག་ཡིན། །རྡོ་རྗེ་སེམས་དཔའ་རྣམ་སྣང་མཛད། །དེ་བཞིན་པདྨ་གར་དབང་དང ། ། ཤྲཱི་ཧེ་རུ་ཀ་ཉིད་དང ། །མཁའ་སྙིང་དང་ནི་རྟ་མགྲིན་ཉིད། །རིན་ཆེན་རྡོ་རྗེ་སྟོབས་པོ་ཆེ། །མིག་མི་བཟང་དང་འཇིགས་བྱེད་དང ། །རྡོ་རྗེ་བཟང་དང་རབ་བཟང་དང ། །རྡོ་རྗེ་ཧཱུཾ་མཛད་དཔའ་ཆེན་པོ། །དེ་བཞིན་རྡོ་རྗེ་རལ་པ་ཅན། །མྱུ་གུ་ཅན་དང་རྡོ་རྗེའི་ལུས། །རྡོ་རྗེ་འོད་ནི་ཉིད་དག་དང ། །འོད་དཔག་མེད་དང་ལྷ་ཡི་དགྲ། །དེ་བཞིན་མཆེ་བ་རྣམ་གཙིགས་དང ། །ཀེང་རུས་ཀེང་རུས་ཆེན་པོ་དང ། །ཐོད་པའི་དུམ་བུ་ལ་སོགས་པ། །དཔའ་བོ་ཉི་ཤུ་རྩ་བཞི་ཡིས། །འགྲོ་བ་འདི་དག་ཐམས་ཅད་ཁྱབ། །དཔའ་བོ་རྣམས་དང་མཁའ་འགྲོ་ཉིད། །རྣལ་འབྱོར་མ་ནི་རབ་གཏུམ་སོགས། །བྱ་བ་ཀུན་ལ་སྒྲུབ་པ་བོས། །འཁོར་ལོར་བཞུགས་པར་བལྟ་བར་བྱ། །གྲུབ་འདོད་ཤིན་ཏུ་མཉམ་
127a
༄#། །བཞག་པས། །འཁོར་ལོའི་བདག་ཉིད་རྟག་ཏུ་བསྒོམ། །སྔར་བཤད་པ་ཡི་ཆོ་ག་ཡིས། །མཁའ་འགྲོ་དྲ་བའི་བདེ་མཆོག་བརྗོད། །འཁོར་ལོ་ཆེན་པོ་གྲུབ་ཀུན་གནས། །དེ་བཞིན་དངོས་གྲུབ་ཀུན་གྱི་བཞི། །འདི་ནི་སངས་རྒྱས་བྱེ་བ་དང ། །དཔའ་བོ་བྱེ་བས་ལེགས་པར་གསུངས། །མཁའ་འགྲོ་མ་ནི་རེ་རེ་ཡི། ། འཁོར་ནི་བྱེ་བ་དག་ཏུ་འགྱུར། །རྣལ་འབྱོར་མ་ནི་མཁའ་འགྲོ་ཉིད། །གཟུགས་ཅན་མ་དང་དུམ་སྐྱེས་མ། །དེ་བཞིན་ལཱ་མ་ལ་སོགས་ནི། །དངོས་གྲུབ་ཀུན་བྱེད་དགེ་བ་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། །དཔའ་བོ་དང་མཁའ་འགྲོ་མ་ཐམས་ཅད་ཀྱི་གནས་གསང་བའི་དཀྱིལ་འཁོར་གྱི་ཆོ་གའི་ལེའུ་སྟེ་བཞི་བཅུ་རྩ་བརྒྱད་པའོ།། །།དེ་ནས་གཞན་ཡང་བཤད་བྱ་བ། །ཇི་བཞིན་ཆོ་གས་ཕྱུགས་བསྒྲུབ་བྱ། །གང་གིས་ཤེས་པ་ཙམ་གྱིས་ནི། །མྱུར་དུ་དངོས་གྲུབ་ཐོབ་འགྱུར་བའོ། །སྔགས་པས་འབྲས་ཀྱི་ཕྱེ་མ་ལས། །རིམ་བཞིན་དུ་ནི་ཕྱུགས་གཟུགས་བྱ། །མི་དང་རུས་སྦལ་རྔ་མོ་དང ། །བོང་བུ་སྤྱང་ཀི་རྟ་ལ་སོགས། །དེ་ལྟར་སྣ་ཚོགས་ཕག་དག་སྟེ། །ཕྱུགས་འདི་དག་ཏུ་ཤེས་པར་བྱ། །མཚན་ཉིད་ཇི་ལྟར་གྱུར་པ་དང ། །འདི་རྣམས་ལས་ནི་བཤད་པར་བྱ། །སྐྱེ་བ་
127b
གཅིག་དང་སྐྱེ་བ་གཉིས། །གསུམ་མམ་བཞི་འམ་ལྔ་ཉིད་དམ། །སྐྱེ་བ་དྲུག་དང་བདུན་གྱུར་པ། །ཕྱུགས་རྣམས་སུ་ནི་གདོན་མི་ཟ། །གང་གིས་ཁ་ཡི་དྲི་ཞིམ་ཞིང ། །མིག་མེ་འཛུམ་པར་རྣམ་པར་བལྟ། །བདེན་པར་སྨྲ་ཞིང་མཐོང་ན་དགའ། །རྟག་ཏུ་དམ་ཆོས་དགར་འགྱུར་ཞིང ། །རང་གི་སྐྱེ་བ་ཤེས་པ་དང ། །ལུས་ཀྱི་དྲི་ནི་རྟག་ཏུ་ཞིམ། །མཚན་ཉིད་འདི་དག་ལྡན་པར་ནི། །སྐྱེ་བ་བདུན་དུ་འབྱུང་བ་ཡིན། །དེ་ནི་ཟོས་བ་ཙམ་གྱིས་ནི། །ལྷ་ཡི་གཟུགས་ནི་འཛིན་པར་འགྱུར། །བསྣམས་པའམ་རེག་པ་ཙམ་གྱིས་སམ། །གང་གིས་ཐིག་ལེ་བྱེད་པ་སྟེ། །མོད་ལ་འགྲུབ་པར་འགྱུར་བསྟེ། །འདི་ནི་རང་དགའི་གཟུགས་འཆང་འགྱུར། །དེ་ཡི་སྙིང་གའི་རོ་ཙ་ན། །མཁས་པ་ཡིས་ནི་བླངས་ནས་ནི། །སྙིང་བོའི་སྔགས་ནི་བཟླས་ནས་སུ། །དེ་ཡི་ཐིག་ལེ་བྱ་བ་ཡིན། །སེམས་ཅན་གང་དང་གང་གི་ནི། །གཟུགས་སུ་བྱེད་པར་འདོད་པ་ན། །དེ་དང་དེ་ཡི་གཟུགས་སུ་ནི། །ཐིག་ལེས་འགྱུར་བར་ཐེ་ཚོམ་མེད། །མཁས་པས་ཤིང་ལ་ཁུ་བ་ནི། །རོ་ཙ་དར་བཅས་བླངས་ནས་སུ། །དཔྲལ་བར་ཐིག་ལེ་བྱས་ནས་ནི། །དེ་གཟུགས་འགྱུར་བ་ཐེ་ཚོམ་མེད། །ཕྱུགས་ཉིད་ཀྱི་ནི་བ་སྤུ་ཡིས། །ལག་པ་སྤྱི་བོར་བཅིང་བར་བྱ། །དེ་ཡི་ཡན་ལག་ལྡར་ལྡན་ཞིང ། །དེ་ཡི་སྤུ་དང་རྣམ་བསྲེས་ལ། །ལག་པ་སྤྱི་བོར་བཅིངས་ན་ནི། །དེ་ཡི་གཟུགས་འགྱུར་
128a
༄#། །ཐེ་ཚོམ་མེད། །རྣལ་འབྱོར་པ་ནི་བསྒོམས་ཤིང་ཟློས། །མི་རྣམས་ནུས་པ་ལྡན་ཡིན་ཡང ། །དཀའ་ཞིང་ཉོན་མོངས་ལ་དགའ་བ། །དངོས་གྲུབ་ལམ་ནི་འགོག་པ་ཡིན། །གླང་པོ་རྟ་དང་བོང་བུ་དང ། །རུས་སྦལ་རྔ་མོ་ཕག་དང་ཝ། །ཁཝ་དང་འུག་སོགས་བྱ་རྒོད་དང ། །ཁྲུང་ཁྲུང་ཁྲ་དང་ས་ར་ལ། །གཟུགས་བཟང་བ་དང་གཟུགས་ངན་དང ། །ལྷ་ཡི་གཟུགས་སུ་དེ་འགྱུར་རོ། །རྣལ་འབྱོར་དཔའ་ཆེན་རང་དགའི་གཟུགས། །སྐྱེ་འགྱུར་འདི་ལ་ཐེ་ཚོམ་མེད། །འདི་བས་ཤིན་ཏུ་མཆོག་གྲུབ་པ། །འཇིག་རྟེན་གསུམ་ན་ཡོད་མ་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། །སྐྱེ་བ་བདུན་པའི་བསྒྲུབ་པར་བྱ་བའི་གཟུགས་ཡོངས་སུ་བརྗེ་བའི་ཆོ་གའི་ལེའུ་སྟེ་བཞི་བཅུ་རྩ་དགུ་པའོ།། །།དེ་ནས་སྦྱིན་སྲེག་ཆོ་ག་ནི། །ངེས་པར་དབང་དུ་བྱེད་འགྱུར་བ། །ཡང་དག་ཆོ་ག་གང་གིས་ནི། །མྱུར་དུ་དངོས་གྲུབ་ཐོབ་འགྱུར་བཤད། །གོ་མཱཾ་ས་ནི་མྱོས་བྱེད་བསྲེ། །ལག་པ་གཡོན་པས་སྦྱིན་སྲེག་བྱས། །སངས་རྒྱས་ཀྱང་ནི་དབང་འགྱུར་ན། །ཕྲན་ཚེགས་མི་ནི་སྨོས་ཅི་དགོས།། ཁ་ཆུ་སོ་ཤིང་དག་དང་ནི། །དེ་བཞིན་རང་གི་ལུས་མཉེས་པ། །མྱོས་བྱེད་མི་དང་བཅས་པ་ཡིས། །ཁམས་གསུམ་པོ་ནི་དབང་དུ་འགྱུར། །ཟླ་མཚན་གྱི་ནི་ཁྲག་དང་ནི། །ཟོས་
128b
ནས་རློན་པའི་ཟས་དག་དང ། །མི་ཡི་སྐྲ་དང་ལྡན་པ་ཡིས། །མདོ་ལ་འགུགས་པར་འགྱུར་པ་ཡིན། །རང་གི་ལུས་ལས་སྐྱུགས་པ་འམ། །མཁས་པས་རང་སྐྲས་སྦྱིན་སྲེག་བྱ། །ནི་\?\་མ་པའི་ཤིང་ལ་རབ་སྦྱར་ནས། །མོད་ལ་དབྱེ་བར་འགྱུར་པ་ཡིན། །མཉམ་པར་བཞག་པས་དྷ་དུར་མེ། །ཉུངས་མར་མཚན་དེར་བསྒྲེས་པ་ཡི། །བྱ་རོག་གཤོག་པས་སྦྱིན་སྲེག་བྱས། །འཕྲལ་དུ་འཆི་བའམ་སྐྲོད་པར་འགྱུར། །ཉལ་དང་མ་ཉལ་འདུག་པ་འམ། །ཟས་དང་སྦྱོར་བ་སོགས་རྣམས་ལའང ། །མཁས་པས་རྟག་ཏུ་ཟློ་བྱེད་ན། །དེ་ལ་བགེགས་ནི་ཡོད་མ་ཡིན། །ཝ་ཡི་ཤ་ཡིས་བསྲེག་བླུགས་བརྒྱས། །ཡང་དག་བསྲེག་བླུགས་བྱེད་པའི་མི། །དེ་ནི་ཟླ་བ་གསུམ་རྗེས་ལ། །རིགས་ཀྱི་དབུལ་བ་འཇིག་པར་འགྱུར། །ཤ་ཆེན་དག་གིས་ལ་ལ་ཞིག་།མྱོས་བྱེད་ལྡན་པས་སྦྱིན་སྲེག་བྱེད། །བརྒྱ་རྩ་བརྒྱད་ཀྱི་བར་དུ་ནི། །སྒྲུབ་པ་པོ་ནི་ཐུན་གསུམ་བྱེད། །མ་ལུས་ས་རྣམས་སྤྱོད་པ་དང ། །ཟླ་བ་དྲུག་གིས་དབང་དུ་འགྱུར། །ཚིམ་འགྱུར་མཁའ་འགྲོ་མ་དེ་ལ། །རྒྱལ་སྲིད་སྟེར་བར་གདོན་མི་ཟ། །ལྷ་རྣམས་ཐམས་ཅད་བསྒོམས་ནས་ནི། །ཐུན་གཉིས་བར་དུ་སྦྱིན་སྲེག་བྱས། །རང་གི་ལུས་ནི་དེ་ཉིད་ཀྱིས། །མཁའ་ལ་འགྲོ་བ་ཉིད་ཐོབ་འགྱུར། །གོ་ཡུ་བ་ཡི་ཤ་ཆང་གིས། །ཕྱི་དང་ནང་གི་སྦྱིན་སྲེག་བྱ། །མྱུར་དུ་དེ་
129a
༄#། །ཡི་ལག་ཏུ་འགྱུར། །དངོས་གྲུབ་ཐམས་ཅད་རབ་ཏུ་འཇུག་།སྔགས་ཀྱི་བཟླས་བརྗོད་མཚན་མ་བཟླས། །ཡུལ་འཁོར་ཡང་ནི་འགུགས་པར་བྱེད། །དེ་ལྟར་ཉན་རེ་བྱས་ན་ནི། །རྒྱལ་པོ་ཉིད་དུ་དེ་བྱེད་འགྱུར། །འདི་ལས་རབ་མཆོག་གཞན་དག་ནི། །འཇིག་རྟེན་གསུམ་ན་ཡོད་མ་ཡིན། །རྣལ་འབྱོར་ཆེན་པོ་རང་དགས་འཆི། །སྣ་ཚོགས་གཟུགས་ནི་འཛིན་ཅིང་རོལ། །བིལ་བ་དེ་བཞིན་བ་ལ་ཤ་།ུ་དུམ་ཝ་ར་ཉིད་དག་ནི། །སྦྱིན་སྲེག་འབུམ་བྱས་མྱུར་དུ་ནི། །ནོར་གྱི་བདག་པོ་ཆེན་པོར་འགྱུར། །གོ་མཱཾ་ས་དད་མྱོས་བྱེད་བསྲེ། །རྒྱལ་སྲིད་འདོད་པས་སྦྱིན་སྲེག་བྱ། །རྣལ་འབྱོར་དབང་ཕྱུག་མཉེས་བྱས་ན། །དབུལ་པོ་ཉིད་དུ་ག་ལ་འགྱུར། །གོ་མ་ཡུ་ནི་བསྲེགས་བྱས་པས། །ཅི་བདེ་བར་ནི་འགྲུབ་པར་འགྱུར། །གོ་མ་ཡུ་ཡི་སྦྱིན་སྲེག་གིས། །མྱུར་དུ་ནོར་བདག་མཉམ་པར་འགྱུར། །བརྟུལ་ཞུགས་གཙང་སྦྲ་མེད་ན་ཡང ། །བསྟན་པའི་དངོས་གྲུབ་ཐོབ་པར་འགྱུར། །ལྷག་པའི་ཚེ་དང་ཀུཥྨཎྜཾ། །མུད་ག་མ་ཥ་ཙ་ན་ཀ་།སྦྲང་རྩི་གཙིགས་མ་སྐེ་ཚེ་དང ། །ཁྱིམ་གྱི་ཏ་མ་ལ་འདབ་བླངས།། ཁ་བཅིངས་པར་ནི་འགྱུར་བ་ཡིན། །ཅི་རུང་སྤྱོད་པའི་རྣལ་འབྱོར་པ། །གང་དུ་དགའ་བ་དེར་གནས་སོ། །དེ་ནས་གཞན་ཡང་བཤད་བྱ་བ། །རྣལ་འབྱོར་མ་ཡིས་དང་གནས། །
129b
ཧེ་རུ་ཀ་དཔལ་རྒྱུ་ཡན་ལག་།ཐམས་ཅད་བརྟན་གཡོའི་བདག་ཉིད་ཅན། །གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་འདིར་འོད་བྱེད་ཤེས་པར་བྱ། ། ཉེ་བའི་ཞིང་ནི་འོད་འཕྲོ་བ། །ཚནྡོ་ཧ་ནི་མངོན་འགྱུར་ཞིང ། །ཉེ་བའི་ཚནྡོ་སྤྱད་དཀའ་བ། །འདུས་པ་རིང་དུ་སོང་བ་ཡིན། །ཉེ་བར་འདུས་པ་མི་གཡོ་བ། །དུར་ཁྲོད་ལེགས་པའི་བློ་གྲོས་ཉིད། །ཉེ་བའི་དུར་ཁྲོད་ཆོས་ཀྱི་སྤྲིན། །ཤྲཱི་ཧེ་རུ་ཀ་གཞུང་སྤྱོད་པའི། །འདི་ནི་ནང་གི་བདག་ཉིད་ས། །ཕ་རོལ་ཕྱིན་བཅུ་ས་རྣམས་ནི། །རྣལ་འབྱོར་མ་ཡི་བརྡ་ཡི་སྐད། །མཐོ་རིས་ས་སྟེང་ས་འོག་ཏུ། །དཔའ་བོའི་ཡན་ལག་བརྟན་གཡོའི་བདག་།པུ་ལཱིར་ལ་སོགས་གང་བསྟན་པ། །ཕྱི་ནང་བདག་ཉིད་ཅན་དུ་གནས། །དཔལ་ལྡན་ཁྲག་འཐུང་རྒྱལ་པོ་ཆེ། །འདོད་པ་ཀུན་གྱི་དབང་ཕྱུག་གཙོ། །ཀུན་ཏུ་ཕྱག་དང་ཞབས་ལྡན་ཞིང ། །ཐམས་ཅད་དུ་ནི་སྤྱན་ཞལ་དབུ། །ཀུན་ཏུ་ཐོས་ལྡན་འཇིག་རྟེན་ན། །ཐམས་ཅད་གཡོགས་ཏེ་རྣམ་པར་བཞུགས། ། དེ་ནས་དངོས་གྲུབ་བསྒྲུབ་བྱ་བ། །བསམ་གཏན་ལྡན་པའི་སེམས་ཀྱིས་ཏེ། །སྒྲུབ་པ་པོ་ལ་ཕན་པའི་ཕྱིར། །གསང་བ་འདི་ཉིད་གསུངས་པ་ཡིན། །དཔལ་ཧེ་རུ་ཀའི་ངེས་པར་བརྗོད་པ་ལས། །དབང་གི་སྦྱིན་སྲེག་དང་གནས་ལ་སོགས་པའི་ས་བསྟན་པའི་ཆོ་གའི་ལེའུ་སྟེ་ལྔ་བཅུ་པའོ།། །།དེ་ནས་གཞན་ཡང་བཤད་བྱ་བ། །མན་
130a
༄#། །ངག་ཤིན་ཏུ་རྙེད་དཀའ་སྟེ། །དཔའ་བོའི་བརྡ་ཡི་སྐད་དུ་ནི། །ང་ཡིས་རྒྱུད་དུ་སྦས་པ་ཡིན། །གོས་དང་ཕྱག་རྒྱ་ལྔ་ལ་སོགས། །ཤེས་རབ་ཡན་ལག་ཕུར་བུ་དྲ། །ཱ་ལི་ཀཱ་ལི་ཞེས་བརྗོད་པ། །རྒྱུ་ལ་སོགས་སྟོང་སྔོན་འགྲོ་བ། །འཇུག་པ་སྒྲ་ལ་སོགས་པ་ནས། །ཇི་སྲིད་བསྡུས་པའི་སྦྱོར་ལྡན་པ། །བདུད་རྩི་ཚིམ་བྱེད་མྱ་ངན་འདས། །ལག་པའི་མཆོད་པའི་དབང་བསྐུར་བ། །གོ་ཆ་ཆེན་པོས་ཡང་དག་སྲུང ། །སྔགས་རྣམས་ཀུན་གྱིས་མཆོད་པར་བྱ། །དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན། །མི་མཆོག་གང་ཞིག་ཀུན་སྤྱོད་པ། །སྡིག་པ་ཐམས་ཅད་རྣམ་དག་བདག་།དེ་བཞིན་གཤེགས་པའི་ས་འཐོབ་ཅིང ། །སྐྱེ་དང་སྐྱེ་བར་བདེ་གཤེགས་ཀྱི། །རིགས་སྐྱེས་རྒྱལ་པོ་ཆོས་ལྡན་འགྱུར། །ཇི་ལྟར་སྔོན་བསགས་སྡིག་པ་ཡི། །མཚན་ཉིད་ཐམས་ཅད་དམན་པ་སྟེ། །གང་ཞིག་འདི་ནི་རྟག་སྒོམ་པ། །ས་ལ་འདོད་པ་ཀུན་དབང་ཕྱུག་།དཔེར་ན་མར་གྱིས་གང་བའི་སྣོད། །མེ་ཡི་དབུས་སུ་བཞག་ན་ནི། །མར་གསར་སྟེང་དུ་ཞུ་འགྱུར་ཞིང ། །སྣོད་ཀྱི་དྲི་མ་འཇིག་པར་འགྱུར། །དེ་བཞིན་ཤྲཱི་ཧེ་རུ་ཀ་ཡི། །མཆན་གྱིས་སྡིག་པ་འཇིག་པར་འགྱུར། །བསམ་གཏན་སེམས་པ་ཙམ་གྱིས་སམ། །ཀློ་ག་ཅིང་ཁ་ཏོན་བྲིས་པ་ཡིས། །མཐོ་རིས་ལོངས་སྤྱོད་ཐོབ་འགྱུར་བ། །
130b
ཡང་ན་འཁོར་ལོས་བསྒྱུར་བ་འཐོབ། །རྣལ་འབྱོར་པ་རྣམས་འཕོ་བའི་ཚེ། །ཁྲག་འཐུང་དཔལ་སོགས་རྣལ་འབྱོར་མ། །ལག་ན་མེ་ཏོག་སྣ་ཚོགས་ཐོགས། རྒྱལ་མཚན་བ་དན་སྣ་ཚོགས་དང ། །རོལ་མོའི་སྒྲ་ནི་སྣ་ཚོགས་དང ། །སྣ་ཚོགས་གླུ་ཡི་མཆོད་པ་ཡིས། །འཆི་བ་ཞེས་བྱ་རྣམ་རྟོག་འདི། །མཁའ་སྤྱོད་གནས་སུ་འཁྲིད་བར་བྱེད། །དེ་འདྲའི་དཔའ་ཆེན་རྣལ་འབྱོར་མ། །ས་སྟེང་ན་ན་རྙེད་པར་དཀའ། །དཔལ་ལྡན་ཧེ་རུ་ཀའི་རྒྱུད་ཆེན། །གང་ཞིག་ཤེས་ནས་མ་དད་པ། །དབུལ་པོ་སྡུག་བསྔལ་གྱིས་གདུངས་པར། །དེ་ལ་རྟག་ཏུ་འབྱུང་བར་འགྱུར། །མགུལ་རྒྱན་གདུ་བུ་དཔུང་རྒྱན་དང ། །རྣ་རྒྱན་ཚངས་པའི་སྐུད་པ་དང ། །དོ་ཤལ་མགོ་ཡི་ཕྲེང་བ་དང ། །སྐ་རགས་སིལ་སིལ་སྒྲ་སྒྲོག་པ། །རི་སྟེང་སྣ་ཚོགས་པདྨ་ཡི། །ལྟེ་བར་ཨཱ་ལི་ཀཱ་ལི་སྐྱེས། །དཀར་མོ་བདག་པོ་རྣམ་གནོན་ཅིང ། །རྡོ་རྗེ་དྲིལ་བུས་སྐུ་ལ་འཁྱུད། །ཉི་ཤུ་རྩ་བཞིའི་ཕྱེད་ལྡན་པའི། །དཔའ་བོ་རྣལ་འབྱོར་མ་ཚོགས་དང ། །ཧེ་རུ་ཀ་དཔལ་རྒྱལ་པོ་ཆེའི། །གོ་འཕང་མཆོག་ནི་བསྒོམ་པར་བྱ། །དཔའ་བོ་ཀུན་དང་རྣལ་འབྱོར་མའི། །འཁོར་བཅས་དབུས་སུ་སྦྱོར་ལྡན་པ། །ཐམས་ཅད་དགྱེས་ཤིང་གཉིས་མེད་གྱུར། །འབྱིན་དང་སྡུད་པར་མཛད་པ་ཡིན། །མོས་པ་དུ་མའི་སེམས་ཅན་ལ། །སྤྱོད་པ་སྣ་ཚོགས་སྟོན་མཛད་དེ། །སྣ་ཚོགས་ཚུལ་གྱིས་གདུལ་བྱ་བ། །ཐབས་ནི་སྣ་ཚོགས་
131a
༄#། །སྟོན་པ་ཡིན། །ཟབ་མོའི་ཆོས་ནི་སྟོན་པ་ལ། །གལ་ཏེ་མོས་པར་མ་གྱུར་ཀྱུང ། །སྨོད་པ་དག་ཏུ་མི་བྱ་སྟེ། །ཆོས་ཉིད་བསམ་མི་ཁྱབ་དྲན་བྱ། །་གང་གིས་འདིར་བདག་ཡུལ་མིན་པ། །གང་གིས་ཆོས་ཉིད་མི་ཤེས་ཡིན། །རྫོགས་སངས་རྒྱས་དང་དེའི་སྲས་ནི། །བདག་ཉིད་ཆེན་པོ་རྣམས་ཀྱིས་མཁྱེན། །སངས་རྒྱས་རྣམས་ནི་བྱུང་གྱུར་ཏམ། །མ་བྱུང་ན་ཡང་རྣམ་ཀུན་ཏུ། །བསམ་མི་ཁྱབ་པའི་ཆོས་ཉིད་ནི། །འཕེལ་འགྲིབ་སྤངས་པས་གནས་པ་ཡིན། །དེ་ལྟར་རྣམ་པར་བཞག་ནས་ཀྱང ། །འཇིག་རྟེན་པ་ཀུན་ཡོང་མི་སྨད། །དེ་ཡི་བགྲོད་པ་བསམ་ཡས་ཤིང ། །སངས་རྒྱས་རོལ་བ་བསམ་མི་ཁྱབ། །མདོ་སྡེ་བྱ་བ་སྤྱོད་པ་རྣམས། །རྣལ་འབྱོར་གསང་མཐའི་དབྱེ་བ་ཉིད། །སེམས་ཅན་མོས་པ་འཇུག་པ་རྣམས། །དེ་དང་དེ་ལ་དགའ་བ་བཞིན། དཔལ་ཧེ་རུ་ཀའི་ངེས་པར་བརྗོད་པ་འབུམ་པའི་ནང་ནས་ཕྱུང་བ་གྲུབ་པའི་རྟོག་པ་རྨད་དུ་བྱུང་བ། ངོ་མཚར་དང་བཅས་པ་བྱེད་པ། བསྟན་བཅོས་ཐམས་ཅད་ཀྱི་རྒྱལ་པོ། །དཔལ་ཧེ་རུ་ཀ་དཔའ་བོ་ཆེན་པོ་བཀླགས་པས་འགྲུབ་པ། གཞན་ཐམས་ཅད་ཀྱིས་མི་ཐུབ་པ། གདོད་ནས་གྲུབ་པའི་བླ་མ་ཡིན་ནོ། །དཔལ་ཧེ་རུ་ཀའི་ངེས་པར་བརྗོད་པ་ཞེས་བྱ་བ་རྣལ་འབྱོར་མ་ཆེན་མོའི་རྒྱུད་ཀྱི་རྒྱལ་པོ་ལས། ལེའུ་
131b
ལྔ་བཅུ་གཅིག་པ་རྫོགས་སོ།། །།གྲགས་པ་ཡིད་འོང་རྒྱལ་མཚན་མཐོ་ལྡན་པའི། །རིན་ཆེན་དང་མཚུངས་རིན་ཆེན་བཟང་པོ་ཡིས། །མཁས་པ་པདྨ་ཀ་རའི་ཞལ་སྔར་ནི། །རིག་པའི་འབྱུང་གནས་ཁ་ཆེའི་དཔེ་ལས་བསྒྱུར། །ལྷག་པའི་ཚུལ་ཁྲིམས་དྲི་ཡིས་བསྒོས་གྱུར་ཅིང ། །དྲི་མེད་བཀའ་དོན་འཐད་པ་དང་བཅས་པར། །རྟོགས་པ་དང་ལྡན་གྲགས་པའི་ཞལ་སྔར་ནི། །སྒྲ་སྒྱུར་དགེ་སློང་པྲ་ཛྙཱ་ཀཱི་རྟི་དང ། །མར་པ་སྒྲ་སྒྱུར་ཆོས་ཀྱི་དབང་ཕྱུག་གིས། །མཁས་པའི་འབྱུང་གནས་ཡུལ་དབུས་དཔེ་དང་གཏུགས།