rKTs


H426

(e-text produced by ACIP)

see text in transliteration
234b
།།རྒྱ་གར་སྐད་དུ། ཤྲཱི་བཛྲ་ཙཎྜ་ཙཏྟ་གུ་ཧྱ་ཏནྟྲ་ཨུཏྟ་ར། བོད་སྐད་དུ། དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ། དཔལ་རྡོ་རྗེ་གཏུམ་པོ་ལ་ཕྱག་འཚལ་ལོ། །དེ་ནས་བརྒྱ་བྱིན་ལྷའི་དབང་པོས་གསོལ་པ། ཀྱཻ། བཅོམ་ལྡན་འདས་ཉིད་ཀྱི་སྐུ་གསུང་ཐུགས་ཀྱི་གསང་བའི་བསྟན་པ་དམ་པའི་དབང་ཇི་ལྟ་བའི་གསང་བ་དམ་པ་མཛད་དུ་གསོལ། དེ་སྐད་ཅེས་གསོལ་བ་དང ། ཆོས་ཀྱི་དབྱིངས་རྣམ་པར་དག་པའི་ངང་ལས་མ་ཧཱ་ཙཎྜ་ཀྲོ་
235a
༄#། །དྷི་ཧཱུཾ།་ཞེས་གསུངས་པས། གཡོན་དུ་ཁྲོ་མོ་གཏུམ་ཆེན་མོ། །མཐིང་ནག་ཆེན་མོ་འཇིགས་ཚུལ་ཅན། །དབུ་སྐྲ་ཁམ་པ་གྱེན་བརྫེས་མ། །སྤྱན་དམར་སྡང་མིག་བགྲད་པའི་ཚུལ། །མཆེ་གཙིགས་ཁྲོ་གཉེར་སྤྱན་གསུམ་མ། །ཕྱག་གཡས་དྲིལ་འཛིན་གཙོ་ལ་འཁྱུད། །གཡོན་པ་ཐོད་ཁྲག་གཙོ་ལ་སྟོབ། །ཞབས་གཉིས་གཙོལ་དགྱེས་ཚུལ་འཁྲིལ། །ཧི་ཧི་དགྱེས་དང་ཧ་ལའི་སྒྲས། །ཐམས་ཅད་གཡོ་ཞིང་བརླག་པར་བྱེད། །དུར་ཁྲོད་རྒྱན་ལྡན་མེ་དཔུང་ནང ། །སྐུ་ལ་འཁྲིལ་བའི་ཚུལ་དུ་བཞུགས། །དེ་ནས་བཅོམ་ལྡན་དགྱེས་ཆེན་པོ། །དགྱེས་པའི་ཏིང་འཛིན་ལ་གནས་པས། །ཉིད་ཀྱི་མཁའ་ལ་ཧཱུཾ་ཨོཾ་ལྡན། །ནོར་བུ་དང་ནི་རྡོ་རྗེར་ལྡན། །རྡོ་རྗེའི་རྩེ་མོའི་སྦུབས་མར་ཕཊ། །ཡུམ་གྱི་གསང་བར་པ་ཏྲ་ལྡན། །པདྨ་དང་ནི་ཟེ་འབྲུར་ལྡན། །མ་ལས་ཉི་མའི་དཀྱིལ་འཁོར་ལོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། ཡུམ་རྣམ་པར་འཕྲུལ་བ་དང ། མཁའ་གསང་རབ་ཏུ་ལྡན་པའི་ལེའུ་སྟེ་དང་པོའོ།། །།དེ་ནས་ལྷའི་དབང་པོས་གསོལ་པ། བཅོམ་ལྡན་འདས། བདེ་རྫོགས་གངས་ལགས་བཤད་དུ་གསོལ་ཞེས་ཞུས་པས། བཅོམ་ལྡན་འདས་བདེ་རྫོགས་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ནས་འཁོར་ལོ་བདེ་རྫོགས་ཞེས་བྱ་བ་བཀའ་སྩལ་པ། ཉོན་ཅིག་ལྷ་ཡི་དབང་པོ་མཆོག་།བདེ་སྐྱོང་འཁོར་ལོ་སུམ་ཅུ་
235b
གཉིས། །དུང་དང་ཀུན་ད་ལྟ་བུར་གནས། །མི་ཤིགས་ཧཱུཾ་ནི་ཁ་འོག་བལྟས། །མགྲིན་ཆེན་ལོངས་སྤྱོད་འདབ་བཅུ་དྲུག་།དབུས་ན་གསེར་ཞུན་ལྟ་བུ་མཾ། །ཡ་བ་ར་ལ་ཁ་དོག་བཞི། ། ཕྱོགས་བཞི་འདབ་མ་བཞི་ན་གནས། །ཆོས་ཀྱི་འཁོར་ལོ་འདབ་བརྒྱད་དེ། །ཧཱུཾ་མུཾ་དབུས་ཏེ་ཕྱོགས་མཚམས་ན། །ོཾ་ཀྲོ་དྷི་ཧ་མཾ་ལཾ་པཾ་ཏཾ། །སྤྲུལ་པའི་འཁོར་ལོ་དྲུག་ཅུ་བཞི། །དབུས་ན་ཨོཾ་དཀར་དེ་བཞིན་དུའོ། །མེ་ཡི་འཁོར་ལོ་གྲུ་གསུམ་རཾ། །རླུང་ནི་གཞུ་འདྲ་བ་དན་ཅན། །ཛ་ཉ་ཕཊ་དང་རཾ་ལྡན་པའོ། །དབབ་དང་བསྐྱིལ་བའི་སྦྱོར་བ་ཡིས། །ཤིན་ཏུ་སྣོད་ལྡན་དམ་པ་ལ། །སྲིན་མཐེབ་ལྕེས་བླང་དབུགས་ཀྱིས་དྲང ། །བྱིན་རླབས་བྱས་པའི་ཤེས་རབ་མ། །རང་ལུས་ཐབས་ལྡན་གཏད་པ་དང ། །བདེ་བ་དང་ནི་བདེ་བ་ཆེ། །ཤིན་ཏུ་བདེ་ཆེན་བདེ་མཆོག་ཡིན། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། །འཁོར་ལོ་བདེ་རྫོགས་ཀྱི་ལེའུ་སྟེ་གཉིས་པའོ།། །།དེ་ནས་ལྷའི་དབང་པོས་གསོལ་པ། བཅོམ་ལྡན་འདས།་སེམས་ཅན་དོན་དུ་བྱིན་རླབས་མཐུ། །སྔགས་ཀྱི་མཐུ་རྣམས་བཀའ་སྩོལ་ཅིག་།ཅེས་གསོལ་པ། ཉོན་ཅིག་ལྷའི་དབང་པོ། སྔོན་ཆད་ཟྔ་ལ་དེ་བཞིན་གཤེགས་པ་ཐམས་ཅད་ཀྱིས་གསང་བའི་མཛོད་འཛིན་པར་དབང་བསྐུར་ཏེ། ད་ལྟར་ངས་ཁྱོད་ལ་བཤད་པར་བྱའོ། །འདི་ནི། ཀླུ་ཐམས་ཅད་འཇོམས་པར་བྱེད་པའོ། །ཉི་མ་ས་སླ་ལ་ནཾ། ནཱ་ག་ཀུན་ཞི།
236a
༄#། །ཙིཏྟ་མུ་ལིང་ནཾ། བཟློག་བྱེར། ནཱ་ག་ཤིག་།ནཱ་ག་བཟློག་།ནཱ་ག་བྱེར། ནཱ་ག་ད་ཧ་ད་ཧ་མཱ་ར་ཡ་ཕཊ། ནཱ་ག་ཧ་ན་ཧ་ན། མཱ་ར་ཡ་ཕཊ། གསང་བ་གསང་བའི་མཛོད་འཛིན་པའི། །སྔགས་དེས་ཀླུ་རྣམས་བརླག་པར་བྱེད། །རྫས་སུ་བསྟན་པ་འདི་ལྟ་སྟེ། །རྩ་བ་དང་ནི་སྐྱབས་སུ་བཅས། །ལྕེ་པོག་ནག་པོ་རྒྱ་ཚིལ་དང ། །མགོ་གཉིས་པའི་དྲ་མ་གྷ་དྷ། ། ས་ཡི་དྲི་དང་རྣམ་ལྔའོ། །གདུག་པ་ཐམས་ཅད་འཇིལ་བར་བྱེད། །ཤུ་དག་ཚིལ་ཆེན་རཝ་གཞོབ་དང ། །དྲི་ཆེན་དྲི་ཆུ་རྨ་བྱའི་མདོངས། །བྱུག་དང་བདུག་པར་བྱ་བའོ། །མུ་ཟི་གླ་རྩི་དྲི་ཆེན་དང ། །ཞུན་ཆེན་དྲི་ཆུ་སྦྱར་བ་རྣམས། །ལྟོར་བཏང་གདོན་རྣམས་རང་ཞིར་འགྱུར། །འདིས་ནི་རང་ཉིད་སྲུང་བར་བྱེད། །ནཱ་ག་ཤ་ཏི་དུ་ན་ཛིབས། ནཱ་ག་ཙི་ཏ་ནཾ། ནཱ་ག་ནི་ར་རྦུད་ཤཱནྟིཾ་ཤ་དུ་རྩུབས། ནཱ་ག་ཨཱ་རོ་ལི་ཀ་ཤམས། ནཱ་ག་དུན་དུན། གྱེན་གྱེན། ནཱ་ག་ཤ་ཏི། ཡ་ཡ། ཚུབས་ཚུབས་དུ་ཤ་རྦུད། དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། ཀླུ་ཐམས་ཅད་བརླག་པར་བྱེད་པའི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་འཇིག་རྟེན་གསུམ་རྣམ་པར་འཆིང་བར་བྱེད་པའི་ཏིང་ངེ་འཛིན་ལ་སྙོམས་པར་ཞུགས་ནས་འཇིག་རྟེན་འཆིང་བྱེད་ཀྱི་སྔགས་གསུངས་པ། ཨོཾ་ཨེ་ཀ་ཡ་མ། ཧེ་ཀ་ཡ་མ། ཧྲི་མ་ཡ་མ། སརྩ་ཙིཏྟ་གཟེར་ཐུན་བིགྷྣཱཾ་ཞེས་གསུངས་མ་ཐག་ཏུ་སྲིད་པའི་རྩེ་མོ་ནས་
236b
མནར་མེད་པ་ལ་ཐུག་པ་ཡན་ཆད་སེམས་རྣམ་པར་མྱོགས་ཏེ་ལུས་རི་མོ་བཞིན་གཡོ་བ་མེད་པར་བཅིངས་པར་གྱུར་ཏོ། །དེ་ནས་དཔུང་རྣམ་པར་ཟློག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་དཔུང་ཟློག་བྱེད་ཀྱི་གསང་སྔགས་གསུངས་པ། ཨོཾ་ཨེ་ཀ་ཡ་མ་ཧེ་དུ་ན་རཀྵ་ཧེ་དུན། ཧཱུཾ་ཛ་ཧཱུཾ། ཡ་མ་ཙིཏྟ་ཤ་མ། ཤ་ཏྲུཾ་སྟམྦྷ་ཡ་ནཾ་དྷརྀ་ཀ་རྦད་ཅེས་གསུངས་པས་འཇིག་རྟེན་གྱི་ཁམས་ཐམས་ཅད་འཁྲུགས་ཤིང་དྲེགས་པ་ཅན་ཐམས་ཅད་རྫ་མཁན་གྱི་འཁོར་ལོ་བསྐོར་བ་བཞིན་གྱུར་ཏེ་མྱོས་པར་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། འཇིག་རྟེན་བཅིང་ཟློག་གི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་ཁྱུང་རྣམ་པར་སྤྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཁྱུང་ལས་ལ་གཟུད་པ་ཞེས་བྱ་བའི་གསང་སྔགས་གསུངས་པ། གྲང་ཏི་ཏིག་ཏིག་།གྲ་ཏ་བྲག་ཤི་ཏ་ཏ་ལེ་ཧེ་དུ་ཧཱུཾ་ཕཊ། དེ་ནས་ཡང་ཤ་ཏྲཱུཾ་འབའ་ཞིག་བ་བསད་པ་ཐུན་མོང་མ་ཡིན་པའི་ཏིང་ངེ་འཛིན་ལ་སྙོམས་པར་ཞུགས་ཏེ་རྡོ་རྗེ་དྲག་པོ་ཐོག་འབབ་ཅེས་བྱ་བའི་སྔགས་གསུངས་པ། ཨོཾ་མཱ་ར་ཎ་སོད་སོད། མཱ་ར་ཎ་བྱིང་བྱིང ། མཱ་ར་ཎ་རྨུགས་རྨུགས། མཱ་ར་ཎ་ཧ་ལ་ཧ་ལ། མཱ་ར་ཎ་དུན་དུན། མྱོགས་མྱོགས། བྱིང་བྱིང་ཐུམ་རི་ལི་ལི་རྦད་ཛ་ཛ། ནཱ་ག་ལ་སོགས་ཤ་ཏྲཱུཾ་སྦྱར། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། བསད་པ་
237a
༄#། །སྔགས་ཀྱི་ལེའུ་སྟེ་ལྔ་པའོ།། །།དེ་ནས་ཡང་ལྷའི་དབང་པོས་གསོལ་པ། གདུག་པ་ཅན་ཚར་གཅད་པའི་ལས་ཁྱད་པར་ཅན་བཀའ་སྩལ་དུ་གསོལ་ཞེས་གསོལ་པས། བཅོམ་ལྡན་འདས་ཁྱུང་སྒྲོལ་བྱེད་གསང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རབ་ཏུ་གསང་སྔགས་བཀའ་སྩལ་བ། ཨོཾ་ཏདྱ་ཐཱ། ཨོཾ་ཊ་ཀི་ཙ་ཏི། གུརྱ་ལ། གྷྱུ་ལི། མི་ལི་ཤ་ཤ་གྷྱུ་གྷྱུ། ཤ་ད་ཏི་པི་རི་ཏི། ཧཱུཾ་ཡ་ཧཱུཾ་ཡ། ཧཱུཾ་ཏུ་ཏི་སཝཱཧཱ། འབྲས་དང་སོ་བ་ནས་ནག་དང ། ། རུ་ར་རྣམས་ཞིབ་བཏགས་ཏེ། །དགུ་དང་བཅུ་གཅིག་བསྒྲུབ་པར་བྱ། །མཁའ་ལྡིང་སྒོ་ང་སྔགས་ཀྱིས་བསྐོར། །འགྲམ་དུ་བཞག་ལ་བསྒྲུབ་པར་བྱ། །མཱ་ར་ཎ་སོད། མཱ་ར་ཎ་བྱིང་བྱིང ། མཱ་ར་ཎ་མུགས་མུགས། མཱ་ར་ཎ་ཧ་ན་ཧ་ན། མཱ་ར་ཎ་དུ་ན་དུ་ན། ཧ་ལ་ཧ་ལ། མྱོས་མྱོས། བྱིང་བྱིང ། ཐུམ་རི་ལི་ལི་ཛ་ཛ། དེ་ནས་གཏོར་མ་དབུལ་བར་བྱ། །བ་ལིཾ་ཏ་ཁཱ་ཧི་ཁཱ་ཧི། གྲྀཧྞ་གྲྀཧྞ། མཧཱ་རག་སི་པ་ཏོ། །ས་མ་ཡ་སཝཱཧཱ། གསོལ་བ་གདབ་ཅིང་འཕྲིན་ལས་བཅོལ། །གླ་རྩི་ཤིང་ཀུན་ཤ་ཆེན་དང ། །ལྕེ་པོག་ནག་པོ་ཤ་རི་ར། །བྱི་ཀུ་སྟག་གི་སྡེར་མོ་རྣམས། །རས་སུ་བཏུམ་ནས་ལུས་ལ་བཅང ། །ོཾ་ཉི་མ་ས་སླ་ལ་ནཾ། གྷུ་ནི་ཞི་ཙི་ཏ་གྷུ་ལི་ནཱཾ། ཙིཏྟ་མུ་དྲ་ཟློག་བྱེར། ཙིཏྟ་གུ་ལི་ནཱཾ། ཡ་ཁྲ་ནཱ་ག་ཟློག་།ནཱ་ག་ཤིག་།ནཱ་ག་མགོ་ལ་ནཱཾ། ཧ་པ་ས་ཁྲེ། རྟག་ཏུ་སྟོམ་ཆངས་གཏོར་མས་མཆོད། །ཞི་བས་
237b
དུག་དབྱུང་བྱད་ཀྱང་དགྲོལ། །རྩ་བའི་དཀྱིལ་འཁོར་ཕྱོགས་བཞི་རུ། །ནཱ་གའི་གཟུགས་བྲིས་དུག་ཅན་བཞག་།ཚོན་སྐུད་སྤྲུལ་བསྒོམས་བཅིངས་བ་དེ། །སྤུ་གྲི་འབར་བས་གཏུབས་ཤིང་དབྱེ། །རི་རབ་ཆེན་པོའི་ཕྱོགས་བཞི་ན། །དུག་བཞི་ལས་སྐྱེས་རིགས་བཞིའི་ཀླུ། །ས་ཆུ་མེ་རླུང་དུག་བཞིའི་བདག་།བཅིངས་པ་དགྲོལ་ཅིང་དུག་དབྱུང་ཕྱིར། །དུག་ཐུབ་སྒྲོ་ལ་ཁྱུང་བསམ་ཕྱིར། དུག་བྱ་བ་རང་རང་གནས་སུ་གཏང ། །བདེན་པ་བདར་ཞིང་ཏིང་འཛིན་གསལ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། རབ་ཏུ་གསང་བའི་ལེའུ་སྟེ་དྲུག་པའོ།། །།དེ་ནས་བཅོམ་ལྡན་འདས་བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བདུད་རྩི་མཆོག་བཀའ་སྩལ་བ། རིན་ཆེན་བུམ་པ་ཚད་ལྡན་ལ། །དྲི་ཡི་རྒྱལ་པོ་ལ་སོགས་ལྔས། ། ཕྱུགས་ལ་པོག་ནག་དུད་པས་བདུག་།རྩི་ལྡན་འོ་མ་འབྲས་དང་ནས། །ཏིལ་དཀར་དང་ནི་ཨ་རུ་ར། །བ་རུ་ར་དང་སྐྱུ་རུ་ར། །མངར་གསུམ་ཀླུ་སྨན་སྣ་ཚོགས་དང ། །ཙནྡན་ལ་སོགས་དྲིར་སྦྱར་བའི། །ཆུ་དཀར་ལྕུག་མ་འོ་མ་ཅན། །ཁ་རྒྱན་བྱས་ཏེ་མགུལ་བ་ཡང ། །དར་རས་སྔོན་པོས་བཅིངས་བྱས་ལ། །མཎྜལ་གཙང་མའི་སྟེང་དུ་བཞག་།ལྷ་ཡི་ང་རྒྱལ་ལྡན་པ་ཡིས། ། དྲི་ལྕག་སྦུ་གུར་མཆུ་བཅུགས་ཏེ། །དབུགས་མ་ཤོར་བར་རབ་ཏུ་བསྣག་།སེང་ལྡེང་ཕུར་པ་སོར་བརྒྱད་དང ། །སྔགས་ཀྱི་མདའ་མཆོག་ལ་ཡང་བསྣག་།བུམ་པ་ལ་སྔགས་འབུམ་
238a
༄#། །ཚར་རེ། །བཏོན་ནས་སྙིང་རྗེའི་ཡུལ་ལ་བཀྲུ། །ཁོང་དུ་བཏང་ན་གྲོལ་བར་འགྱུར། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། བདུད་རྩི་བུམ་ཁྲུས་ཀྱི་ལེའུ་སྟེ་བདུན་པའོ།། །།དེ་ནས་ཡང་བདུད་རྩི་བུམ་པ་ཁྲོལ་བུ་ལ་སྒྲུབ་པ་གསུངས་པ། ཉོན་ཅིག་ལྷ་ཡི་དབང་པོ་གཙོ། །ཏིང་འཛིན་གསང་བར་སྒྲུབ་པ་ནི། །ཛཱ་ཏི་ཕ་ལ་ནས་སྔོན་མོ། །འབྲས་དང་སོ་བ་མ་གི་ཏ། །ཏིང་འཛིན་བཞུ་བཏུལ་བྱས་ཏེ་བསྒྲུབ། །དེ་ལ་བརྟགས་བྱུང་ཕྱེ་མར་བསྒྲུབ། །བྱུགས་ནས་དྲི་ཆུས་སྐྱོ་མར་སྦྱར། །ཞུན་ཆེན་སྦྱར་ཏེ་ཁོང་དུ་བཏང ། །བུམ་པའི་ཆུ་ལ་ལྕགས་སྤུག་བསྔགས། །མཆོད་དང་ཏིང་འཛིན་བརྩོན་པར་བྱ། །བུམ་ཆུས་ཁྲུས་བྱ་ལྡེ་གུས་བྱུག་།སྐྱོ་མ་ཞུ་ཆེན་ཁོང་དུ་གཏང ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་བུམ་པ་ཁྲོལ་བུ་ཕྱེ་མ་དང ། ལྡེ་གུ་དང ། ཁོང་དུ་གཏང་བའི་ལེའུ་སྟེ་བརྒྱད་པའོ།། །།དེ་ནས་ལྷའི་དབང་པོ་ལ་བཀའ་སྩལ་པ། ཉོན་ཅིག་ལྷ་ཡི་དབང་པོ་དག་།གདུག་པའི་དུག་ལ་རྣམ་མང་ཡང ། །བསྡུས་ན་རྣམ་པ་གཉིས་ཡོད་དེ། །མངོན་སུམ་དུག་དང་རྐུ་དུག་སྟེ། །རྐུན་ཐབས་དུག་ནི་བཟློག་པར་དཀའ། །གདུག་ཅན་ཉོན་མོངས་གསུམ་ལྡན་ཏེ། །གཏི་མུག་ཆེ་བས་བྱོལ་ཟོང་རིགས། །འདོད་ཆགས་ཆེ་བས་དབྲལ་བར་དཀའ། །ཤིན་ཏུ་ཞེ་སྡང་ཆེ་བས་ཀྱང ། །དུག་ནི་རྐུན་ཐབས་དག་ཏུ་གཏོང ། །དེ་ཕྱིར་སླར་ཡང་ལྡོག་པར་བྱེད། །ཕྲག་དོག་ཆེ་བས་རང་རྟེན་ལ། །གཞན་གྱིས་
238b
གཅེས་ན་གཞན་ལ་གནོད། །རྐུན་ཐབས་དུག་གི་མཚན་ཉིད་ཀྱང ། །ཐབས་ཤིང་གདུག་པའི་དུག་གློད་ཀྱང ། །བར་བར་སྐབས་སུ་ལྡང་བར་བྱེད། །དེ་ཟློག་ཐབས་ནི་ཤིན་ཏུའང་དཀའ། །དེ་ཡི་ཟློག་ཐབས་དམ་པ་འདི། །ངས་བསྟན་པ་ལ་ཐེ་ཚོམ་དུ། །གང་ཞིག་བྱེད་པར་གྱུར་བ་དེ། །ནམ་ཡང་འགྲུབ་པར་མི་འགྱུར་ཏེ། །གྲུབ་ཀྱང་ཡལ་བར་འགྱུར་བ་ཡིན། །དེ་ནས་ལྷ་ཡི་དབང་པོ་དག་།ཐེ་ཚོམ་མེད་པར་ངེས་པར་བྱོས། །ཙནྡན་དམར་པོས་གཙོར་བྱས་ཏེ། །ནཱ་ག་གེ་གསར་མ་གྷི་ཏ། །རྒྱ་ཚིལ་རྒྱ་མཚོའི་ཝུ་བ་དང ། །ཕག་རྒོད་དག་གི་ཤ་དག་སྟེ། །ཡང་ན་རྒྱ་ཚིལ་མ་གི་ཏ། །ཕག་རྒོད་ཤ་དང་སྦྱར་བྱས་ཏེ། ། ལྕགས་སྣོད་ནང་དུ་ལྕགས་ཀྱིས་ཕུར། །འབུམ་ཕྲག་གསུམ་དུ་བསྙེན་བྱས་ནས། །སྒྲུབ་པས་དཀར་གསུམ་གཞན་མི་རྟེན། །འོ་མ་སོ་ལ་ཆུས་ལུས་བཀྲུས་ཏེ། །ཉ་ལ་གནས་དྲུག་ཐིག་ལེ་བྱ། །མཁུར་ཚོས་གཉིས་དང་དཔྲལ་བ་དང ། །སྙིང་ག་ལྐོག་མ་ལག་མཐིལ་གཉིས། །ཐིག་ལེ་ཚོན་གང་བ་རེ་བྱ། །ལྟེ་བ་པུས་མོ་གསང་གནས་སུ། །མ་གྷི་ཏ་ཉིད་འབའ་ཞིག་བྱུག་།ཐིག་ལེ་རེ་ལ་ཉི་ཤུ་གཅིག་།དེ་ལྟར་ལོ་གཅིག་བར་དུ་བྱ། །གངས་རི་ལ་ནི་ཉི་མ་བཞིན། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། རྐུན་ཐབས་ཀྱི་དུག་ཟློག་པའི་ལེའུ་སྟེ་དགུ་པའོ།། །།དེ་ནས་ལྷའི་དབང་པོས་གསོལ་བ། ཀྱེ་མ་ཁྲོ་བདག་རྡོ་རྗེ་འཛིན། །གདུག་པའི་དུག་གི་མཚན་ཉིད་གང ། །བཟློག་དང་མི་བཟློག་ཇི་ལྟ་བུ། །ཁྲོ་བདག་ཆེན་པོས་བཤད་དུ་གསོལ། །ཞེས་གསོལ་བས། བཅོམ་ལྡན་འདས་
239a
༄#། །ཀྱིས་བཀའ་སྩལ་པ། དགའ་བས་ཉོན་ཅིག་ལྷ་ཡི་དབང་པོ་ཁྱོད། །བསྙེན་དང་སྒྲུབ་བརྟགས་དང་གནོད་པ་རྟོགས། །ལྕགས་ཟངས་མི་དང་གཅེར་བུ་བུམ་པ་ཐོགས། ། བ་གླང་ཉ་ལྕི་བས་ཟས་སུ་ཟ་བ་དང ། །མི་ཆེན་འབར་དང་ཟབ་པ་འཛུགས་པ་དང ། །བསྐྱེད་ཤིང་འཛུགས་དང་ཉི་མ་ཤར་བ་དང ། །བཟང་བ་ཡི་ནི་རྟགས་སུ་ཤེས་པར་བྱ། །ཉི་མ་ནུབ་དང་ནམ་སྲོས་ཐུར་ལ་བབས། །བཙོན་དུ་བཟུང་ནས་མི་ཐིག་ཁུར་བསྐུར་དང ། །སྒྲུབ་པོ་གཞན་ཡུལ་འགྲོ་བ་ངན་པའི་རྟགས། །ལུང་པ་དང་ནི་བསྐམས་ནས་ཆུ་བྱུང་དང ། །ཉ་སྤྲུལ་ས་རླུང་གསོད་དང་འཚོད་པ་དང ། །རིད་དང་སྐེམ་པ་དེ་དག་ཁྲི་ལ་འདུག་།གཅེར་བུ་སྤྱི་བཅིངས་ཚོགས་ཀྱིས་སེམས་ཅན་གསོད་པ་མཐོང ། །འཇིགས་པའི་ཆུ་མིག་བསྐམས་དང་རྟག་ཏུ་ནོར་བུ་རྒྱུ། །སྦལ་སྦྲུལ་ཟས་སུ་ཟ་དང་ཁྱི་སྤྱང་གསོད་ལ་སོགས། །བཟང་བ་ཡི་ནི་ལྟས་སུ་ཡང་དག་ཤེས་པར་བྱ། །ཆུ་ནང་ཆུད་དང་སྤལ་སྦྲུལ་ལུས་ལ་འཇུག་།དེ་དག་ཕྱི་བཞིན་དུ་ནི་འབྲང་བྱེད་ཞིང ། །སྦྲང་བུ་མཆུ་རིང་ལ་སོགས་ལུས་ལ་ཟ། །བ་གླང་མ་ཧེའི་ཚོགས་ཀྱིས་གདུང་ནས་འདེད་པ་དང ། །ཁྱི་སྤྱང་ཚོགས་ཀྱིས་གཟུགས་དང་འདམ་དུ་ཚུད། །འཕག་སེང་བུ་ཆུང་ལ་སོགས་སྟོན་པ་ངན། །གནོད་པའི་རྟགས་སུ་གཏིང་རིང་གྲོག་པོ་རུ། །མི་ཤོང་བཞིན་དུ་ཕྱིན་དང་སླར་མི་ཐར། །རི་བྲག་དོག་མོ་ལུང་དང་ཕུ་རྡུགས་དང ། །ལྷ་ཁང་གནས་ཁང་ཧྲུལ་པོར་མི་ཤོང་བཞིན། །སྒོ་ལ་འཛུལ་ནས་སླར་ཡང་
239b
ཡང་མི་འཐོན་དང ། །ཆུ་ངན་མཚོ་དང་ལུ་མ་ཉ་སྤྲུལ་སོགས། །ཕག་པ་བ་གླང་མ་ཧེ་ལ་སོགས་ཏེ། །ཤིན་ཏུ་ཡིད་དུ་མི་འོང་གཟུགས་མང་སྟོན། །རི་གཟར་མི་ཐར་ལྕེ་སྤྱང་ཚོགས་ཀྱིས་འདེད། །དེ་དག་གནོད་རྟགས་ལུས་ཀྱིས་ཉམས་མྱོང་ཡང ། །ནུལ་བ་དང་ནི་གླུ་དང་ཆང་ལ་དགའ། །ནད་དང་ཉམས་ལྕི་ཡན་ལག་ན་བ་དང ། །ཤ་ནི་འགུལ་འཕྲིག་ཤུ་གཡན་ཤ་བཀྲ་དང ། ངོ་ལྷོག་ཤ་རོ་སྐབས་སུ་ཟུག་གཟེར་ཆེ། །དེ་དག་གནོད་པའི་རྟགས་སུ་ཤེས་པར་བྱ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། བསྙེན་སྒྲུབ་ཀྱི་ལྟས་དང ། གནོད་རྟགས་བསྟན་པའི་ལེའུ་སྟེ་བཅུ་པའོ།། །།དེ་ནས་ལྷའི་དབང་པོས་གསོལ་པ། ཀྱེ་བཅོམ་ལྡན་འདས། སེམས་ཅན་གྱི་ལུས་ལ་གདུག་པའི་དུག་ལུས་ལ་སླེབ་པའི་མཚན་ཉིད་བཤད་དུ་གསོལ། །དེ་སྐད་ཅེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། ཤ་མཐངས་བར་དུ་སླེབ་པའི་དུག་།རྟག་ཏུ་སྙིང་ཡང་མི་དགའ་ཞིང ། །ཤ་རྩ་ཟ་ཞིང་འགུལ་དང་འཕྲིག་།རྟག་ཏུ་འཕྲུག་སྙིང་འབོད་པ་དང ། ། ཤ་ཡང་འོ་མའི་སྤྲིས་མ་བཞིན། །ཤ་མདོག་མེ་ལྕེ་འདྲ་བའོ། །སྐབས་སུ་ཤ་མཐངས་བར་དག་ན། །ཆུ་གྲང་བླུགས་པ་སྙམ་བྱེད་དང ། །ཤུ་བ་བལ་བལྡགས་ཤ་བཀྲའོ། །གདུག་པ་དུག་གིས་ཤ་ལ་སླེབ་པ་ནི། །འཕྲིག་འགུལ་ཟ་སྤྲིད་བེར་བ་ལྟར། །ཤ་ནི་ནག་ཅིང་དམར་ལ་བེམ། །དུ་བ་མིག་ཏུ་སོང་བ་བཞིན། །མིག་གི་མཐའ་མཆུ་ཡིས་གང ། །མིག་ཀྱང་ཟླུམ་ལ་སྨིན་མ་གྲུགས། །སྨིན་མ་བྱི་
240a
༄#། །ཞིང་མིག་ཀྱང་འགུལ། །སོར་མོ་རྣམས་ནི་བྱི་མཇུག་འདྲ། །རྩ་དང་ཆུ་ལ་ཞུགས་པ་ནི། །ལུས་ལ་དྲི་མ་ང་བ་འབྱུང ། །ཆུ་བུར་དང་ནི་ཆུ་རྒངས་དང ། །དེ་ནི་རྩ་ཡི་མེ་ཏོག་ཡིན། ། ཆུ་སེར་མདོག་ནི་དུང་ཁུ་འདྲ། །ཆུ་སེར་སྐོ་རུལ་མནན་པ་དང ། །ཀོ་བ་རུལ་བའི་དྲི་མནམ་པའི། །ཆུ་སེར་དག་ནི་འབྱུང་བ་ཡིན། །རོ་སྟོད་མི་བདེ་བློ་ཡང་འདེགས། །སྤྱི་ཡི་མཚན་ཉིད་འདི་དག་དང་།། འབྱུང་བར་འགྱུར་བ་དག་ཀྱང་ཡོད། །མེ་འོད་ཚ་བ་འདྲ་བ་འོང ། །ཚེར་མ་ཟུག་པ་འདྲ་བ་འོང ། །ལུས་པོ་ཆེ་ལ་འབྲུམ་པ་འོང ། །ཀོར་ཚེ་ཤུ་བ་འབྱུང་བ་དང ། །རྨ་དང་སེར་ཀ་མི་འཚོ་བ། །ཀོ་ར་ཚེ་ཚོར་བ་མེད་པ་འབྱུང ། །ན་ཚ་མེད་པའི་ཤུ་བ་འབྱུང ། །ཚ་ལ་འཁུམས་པ་འབྱུང་བ་ཡོད། །ལུས་ཀྱི་ཉམས་སྟོབས་ཆུང་བ་འབྱུང ། །གླང་ཤུ་བ་དང་ཤ་བཀྲ་འབྱུང ། །ཤ་རོ་སྤལ་མིག་འདྲ་བ་འབྱུང ། ། ཤ་སུལ་ཐམས་ཅད་འགུལ་འཕྲིག་འབྱུང ། །དུག་གིས་རུས་པར་སླེབ་གྱུར་ན། །ཕྱི་ཡི་ཤ་རྣམས་ཀུན་བསྐམས་ཏེ། །མདོག་ནི་སྔོ་སྐྱ་ཤ་མདངས་འཚོར། །གོས་ཀྱི་མདངས་ཀྱང་འཆོར་བ་སྟེ། དེ་ནི་ཐར་བར་མི་འགྱུར་ཡང ། །སྔགས་དང་རྫས་དང་ཏིང་འཛིན་གྱིས། །ཚེ་རིང་སྐད་གསང་ལུས་ཀྱང་བདེ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། གདུག་པའི་དུག་རུས་པ་ལ་སླེབ་པའི་མཚན་ཉིད་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་ལྷའི་དབང་བོས་གསོལ་བ། ཀྱེ་མ་བཅོམ་ལྡན་འདས། སླད་མའི་དུས་ཀྱི་འགྲོ་བ་ལ་ཕན་
240b
གདགས་པའི་ཕྱིར་རྫས་ཀྱི་ཁྱད་པར་བཀའ་སྩལ་དུ་གསོལ་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་བ། ཉོན་ཅིག་ལྷ་ཡི་དབང་པོ་གཙོ། །ཕྱི་མའི་དུས་ཀྱི་སེམས་ཅན་རྣམས། ། གདུག་པའི་དུག་གིས་ཉེན་པ་ན། །ཕན་པའི་སྦྱོར་བ་འདི་ལྟ་བུ། །ཀུན་ཀྱང་སྔགས་ཀྱིས་བསྒྲུབ་པར་བྱ། །མེ་འོད་འདྲ་ན་སྤྱང་དུག་གཏང ། །ཚེར་མ་ཟུག་པ་ལྟ་བུ་ལ། །ར་དུག་དང་ནི་རེ་ལྕག་གོ་།ཆ་ལ་འབྲུམ་པ་འབྱུང་བ་ནི། །བཙོད་དང་སྤང་སྤོས་གཏང་བར་བྱ། །ཤ་ནི་ཀོར་ཚེ་ཤུ་བ་ལ། །ར་ཐུག་སྲེད་དང་ལོང་རྟོལ་གཏང ། །རྨ་དང་སེར་ཀ་མི་འཚོན། །ཁོང་དུ་སྒྲུབ་པའི་མ་གྷི་ཏ། །དེ་ཉིད་དྲག་པོའི་སྔགས་ཀྱིས་གདུལ། །ཀོར་ཚེ་ཚོར་བ་མེད་པ་ལ། །སྟག་ཤ་གསེར་གྱི་མེ་ཏོག་དང ། །རྒྱ་ཚ་སྦྱར་ཏེ་གཏང་བར་བྱ། །ཤ་པུ་ཐལ་བ་བདུད་རྩིས་གསོ། །མུ་ཟི་བ་བླ་ལྡོང་རོས་དང ། །དྲི་ཆུ་སྦྱར་ཏེ་བསྐུ་བར་བྱ། །ན་ཚ་མེད་པའི་ཤུ་བ་ལ། །བོང་རིལ་ཏི་ཚ་མར་དཀར་བསྐུ། །ཚ་འཁུམས་ལྕེ་པོག་རཝ་རུ་གཞོག་།ཚ་དང་ཞུན་ཆེན་སྦྱར་བར་བྱ། །ལུས་ཀྱི་ཉམས་སྟོབས་ཆུང་བ་ན། །བུམ་པའི་ཆུ་དང་མ་གྷི་ཏ། །སྦྱར་ཏེ་བཀྲུ་ཞིང་བཏུང་བར་བྱ། །དྲི་ཆུ་ཞུན་ཆེན་གཏང་བར་བྱ། །ཤ་བཀྲ་གུར་གུམ་ཕག་ཚིལ་ལོ། །གླ་ཤུ་འདྲ་བ་བྱུང་བ་ནི། །གསེར་གྱི་མེ་ཏོག་མུ་ཟི་དང ། །སྔགས་ཀྱི་བྱ་བ་འབད་པར་བྱ། །ཤ་རོ་སྦལ་མིག་འབྱུང་བ་དང ། །ཤ་ཡི་སུལ་རྣམས་འགུལ་བ་ལ། །གླ་བ་མུ་ཟི་ལྕེ་མདོག་ནག། ཤ་མཐངས་བར་གྱི་དུག་རྣམས་ལ། །ས་ཡི་དྲི་དང་མ་གྷི་ཏ། །ཤུ་དག་ལྕེ་བོག་རུ་རྟ་དང ། །གུ་གུལ་ནག་པོ་
241a
༄#། །དྲི་མ་དང ། །རོ་ཡི་རོ་དང་བཙན་དུག་དང ། །བྱི་གུ་གཅིག་སྐྱེས་མི་ཕག་བཅུད། །ཡང་ན་བཙན་དུག་ལྕེ་པོ་ག་དང ། །ལྡོང་རོས་དང་ནི་ས་ཡི་དྲི། །ཞུན་ཆེན་དྲི་ཆུས་བསྡུས་ཏེ་བསྐུ། །གུ་གུལ་ཤུ་དག་ཤིང་ཀུན་དང ། །གླ་རྩི་བཙན་དུག་རོ་ཡི་རོ། །རུས་ཚན་བཏགས་ཏེ་ཞུན་གྱིས་བསྡུ། །རིལ་བུ་བྱས་ཏེ་བསྲེགས་ནས་ཀྱང ། །ཡང་དང་ཡང་དུ་སྣ་བུག་གདུག་།དུག་ཆེན་ཀླུ་དང་དེ་ལས་གྲམ་པའི་གདོན། །སྐྱེ་རྒུ་འཚེ་བྱེད་གདོན་རྣམས་གང་ཡིན་ཡང ། །བདུག་པ་ཆེན་པོའི་དྲི་འོད་ཚོར་བ་ཡིས། །བདུག་པ་ཅན་རྣམས་ཀླད་པ་རབ་ཏུ་འགས། །ཉི་མའི་འོད་ཀྱིས་མུན་པ་ཇི་བཞིན་ནོ། །ཤ་ལ་ཞུགས་པའི་གདུག་པའི་དུག་རྣམས་ལ། །བྱུང་བའི་རྫས་རྣམས་ཕྱི་ནས་བྱུག་།གདུག་པ་ཅན་གྱིས་རྟག་ཏུ་བདུག་།མ་གཞི་ཏ་དང་དྲི་ཆུ་གྲང་མོར་སྦྱར། །བཀྲ་ཞིང་ཁོང་དུ་གཏན་དུ་གཏང་བར་བྱ། །ནད་རྣམས་འབྱང་ཞིང་སྦུ་སོགས་བྱི་བ་སྐྱེ། །རྩ་དང་ཆུ་དག་གནས་པའི་དུག་།བྱུག་པ་གདུག་པ་ཆུ་བོའི་གཞུང་བཞིན་དུ། །ཁོང་དུ་གཏང་བའི་རྫས་ནི་འདི་ལྟ་སྟེ། །མ་གཞི་ཏ་ནི་དྲི་ཡི་ཆུས་སྦྱངས་ཏེ། ། རུ་ར་དང་སྦྱར་བ་རྒྱུན་མི་གཅད། །རྩ་ཡི་གནས་སུ་ནད་རྣམས་དྭངས་སྙིངས་འབྱེད། །དྭངས་སྙིགས་ཕྱེད་པའི་ནད་ནི་ཕྱི་རུ་འབྱུང ། །གངས་ཀྱི་རིལ་ཉི་མ་ལྟ་བུའོ། །དུག་རྣམས་རུས་པ་དག་ལ་རྒྱས། །ཁོང་དུ་གཏང་བའི་རྫས་ནི་རྒྱུན་དུ་གཏང ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། གདུག་པའི་དུག་རྫས་ཀྱིས་འདུལ་བའི་ལེའུ་སྟེ་བཅུ་གཉིས་
241b
པའོ།། །།དེ་ནས་ཡང་ལྷའི་དབང་པོས་གསོལ་པ། ཀྱེ་བཅོམ་ལྡན་འདས། གདུག་པ་ཅན་ཤིན་ཏུ་ཡང་ཚར་གཅོད་པའི་ཐབས་བཀའ་སྩལ་དུ་གསོལ་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་དབང་པོ་ཆེན་པོའི་ལྷ། །གདུག་པ་ཤིན་ཏུ་ཚར་གཅད་ན། །སྲེག་པའི་ལས་ལ་ཤིན་ཏུ་བརྩོན་པར་བྱ། །ཐབ་ཁུང་གྲུ་གསུམ་སོར་བརྒྱད་པ། །ཁྲག་དང་དུར་ཁྲོད་སོལ་བས་བྱུག་།དཀྱིལ་དུ་རྡོ་རྗེ་རྩེ་གསུམ་བྲི། །ཟུར་དུ་མཆོད་རྟེན་གསུམ་བཞག་སྟེ། །དེ་སྟེང་དྲག་པོའི་སྣོད་བཞག་ལ། །ནང་དུ་གྲུ་གསུམ་རྩེ་མོ་ལྷའོ། །གདུག་པའི་ཤིང་ཡང་ཟུར་གསུམ་བརྩིག། དཀྱིལ་འཁོར་ཆེན་པོའི་ཤར་ལྷོར་བྱ། །ཤིང་ཤུན་དག་ལ་ཤ་ཏྲཱུཾ་ཡང ། །བརྒྱ་རྩ་བརྒྱད་བྱ་དུག་སྣ་དང ། །ཚ་བ་གསུམ་དང་བོང་བུའི་ཆུ། །རྔ་མོ་བྱ་རོག་བྲུན་ཡང་བསགས། །ལྷ་ཡི་ཏིང་འཛིན་མཆོད་སྔགས་ཀྱིས། །ཏིང་འཛིན་གསལ་ཏེ་ལྷ་ལ་དབུལ། །སྲེག་པའི་སྔགས་ནི་འདིས་བྱའོ། །སརྦ་བིགྷྣན་མཱ་ར་ཡ་ཛྭ་ལ་རཾ། སྟོང་རྩ་བརྒྱད་དང་བརྒྱ་རྩ་བརྒྱད། །ལན་གྲངས་མང་དུ་བྱས་པ་ཡི། །ཐལ་བ་ཆུ་ཆེན་གཞུང་ལ་བོར། །ཐབས་ཁུང་འོག་མའི་ཐལ་བ་ཡང ། །ཁྱི་ཡི་དྲི་ཆེན་ཚ་བ་གསུམ། །བསྲེས་ཏེ་ཤ་ཏྲཱུཾ་གཟུགས་བྱས་ལ། །ནཱ་ག་སྟཾ་བྷ་ནན་ཞེས་རྒྱ་གྲམ་དཀྱིལ་དུ་མནན་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། དྲེགས་པ་ཅན་ཤིན་ཏུ་ཚར་གཅད་པ་སྲེག་པ་དྲག་པོའི་ལེའུ་སྟེ་བཅུ་གསུམ་པའོ།། །།དེ་ནས་ཡང་ལྷའི་དབང་པོས་གསོལ་པ། ཀྱེ་
242a
༄#། །བཅོམ་ལྡན་འདས། མནན་པའི་ལས་ནི་བགྱི་པ་ཡིས། །ཤིན་ཏུ་ཚར་གཅོད་ཇི་ལྟར་བགྱི། །ཞེས་གསོལ་པས། །བཅོམ་ལྡན་འདས་ཀྱིས་བཀའ་སྩལ་པ། ལྷ་ཡི་དབང་པོ་ཆེན་པོ་ཉོན། །རུས་སྤལ་ཁོག་པ་ཁ་སྦྱར་དུ། །རྒྱ་མཚོ་སྦུ་བ་ཁྲེ་རྒོད་དང ། །ནཱ་ག་གསར་ཅུ་གང་དང ། །དཀར་གསུམ་ཤ་ཆེན་ཤ་རི་ར། །མ་གྷི་ཏ་ཡིས་གཙོ་བྱས་ཏེ། །རུ་རྟ་དང་སྦྱར་རོ་ཉེའི་ཤུབས། །རེ་བས་བཏུམས་ཏེ་སྔོན་དམར་དཀྲི། །སྔགས་ཀྱིས་མདའ་ལ་སུམ་སྟོང་བསྔགས། །ནཱ་ག་སྟྭཾ་བྷ་ནན། །བརྒྱད་གསུམ་དབུས་མའི་ཟླ་ཟེར་ལ། །ནུབ་ཀྱི་རྒྱ་གྲམ་སུམ་མདོའམ། །ཡང་ན་གནོད་པའི་ས་ཕྱོགས་སུ། །ཤུག་པའི་ཕུར་པས་ཁྲུ་གང་བརྐོ། །དེར་བཅུག་གཡམ་པ་རྒྱ་གྲམ་ཅན། །དེ་སྟེང་མནན་པའི་རི་རབ་གཞག་།དེ་དག་བྱེད་ཚེ་དམན་ཟས་སྤང ། །ཁ་ཟས་དཀར་གསུམ་མངར་གྱིས་བྱ། །ཤ་རུལ་ཁྲག་རུལ་རྒྱ་ཚོལ་དང ། །སྔགས་མདའ་སྔགས་དང་ལྡན་པ་ཡིས། །རང་གནས་བརྟེན་པའི་བར་དུ་གཅད། །ཐོག་དྲག་ལྟ་བུར་སྔགས་ལས་བྱ། །རྩ་གཅིག་བར་དུ་གནོད་མི་འགྱུར། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། ཕྱིར་མི་ལྡོག་པའི་མནན་པའི་ལེའུ་སྟེ་བཅུ་བཞི་པའོ།། །།དེ་ནས་ལྷའི་དབང་པོས་ཡང་གསོལ་པ། །ཀྱེ་བཅོམ་ལྡན་འདས། གདུག་པ་ཅན་དེ་དག་དེ་ཉིད་ཁོ་ནར་འགྲོ་བ་ལ་རྣམ་པར་འཚེ་འམ། དེ་དག་གཞན་དང་གཞན་དག་གི་མཐུ་ཡང་གནོན་པར་འགྱུར། གལ་ཏེ་གཞན་དག་གི་མཐུས་ཀྱང་འགྲོ་བ་མ་རུངས་
242b
པར་བྱེད་ན། དེ་ཇི་ལྟར་ཡོངས་སུ་བསལ་བར་བགྱི། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་དབང་པོ་ཆེན་པོ་ལྷ། །ཕྱི་མའི་དུས་ཀྱི་སེམས་ཅན་ལ། །གདུག་པའི་དུ་གཅིག་ཞུགས་གྱུར་ན། །ཕོ་ཉ་ཚོགས་ཀྱིས་མ་རུངས་བྱེད། །བཙན་དང་རྒྱལ་པོ་འགོད་པོ་དང ། །དངོས་གྲུབ་འཚེ་བ་བྱེད་ཀུན་དུ། །དེ་དག་དེ་ཉིད་ཤེས་གྱུར་ན། །དེ་དག་རང་གཤེད་རང་གིས་བྱེད། །རཱ་ཛ་ཙིཏྟ་རྦད་ནན། ཙ་ཧུ་ར་ཐུམས་ཛ་མཱ་ར་ཡ་རྦད་ནན། །ོཾ་ཏྲི་ཙིཏྟ་རྦད་ནན། ཏྲི་ཙིཏྟ་རྦད་ནན། ཧབ་ཤཾ་ཏྲི་ཙིཏྟ་རྦད་ནན། །རུ་ཏྲི་ཙིཏྟ་རྦད་ནན། །རཱ་ཛཱ་ཏྲི་ག་ནན། ཙ་ཧུར་ཐུཾ་ཛ་མཱ་ར་ཡ་རྦད། སྡེ་བརྒྱད་སྤྱིར་འདུལ་བ་ནི། ཨོཾ་ཨཱཿ ཧཱུཾ་བཛྲ་སརྦ་དུཥྚཾ། ཏྲིག་ནན། ཨེ་ཧུར་ཐུཾ་ཛ་མཱ་ར་ཡ་རྦད། གལ་ཏེ་རྒྱལ་པོ་གདུག་པ་དག། ཤིན་ཏུ་ཆེ་བར་འགྱུར་བ་ན། །ཀུ་ཤ་རྩཝ་ལ་བརྒྱ་བྱིན་གཟུགས། །མཛེ་མོའི་སོགས་པ་གཡས་པ་ལ། །ཁྲག་ཆེན་གྱིས་བྲི་སྙིང་གར་རྩལ། །ཏྲི་བཛྲ་ཨཾ་ཀུ་ཤ་ཛཿ ། ལྕེ་པོག་གིས་གདུག་སྔོན་དམར་བཅིངས། །རྩ་བའི་དཀྱིལ་འཁོར་དབུས་དག་ཏུ། །གྲུ་གསུམ་ནག་པོར་བཅུག་བྱས་ལ། །ཅལགྶ་ཀྱུ་ཕྱག་རྒྱ་བཅས་ལ་དགུག། ཏྲི་བཛྲ་ཏྲི་བཛྲ། ཡཀྵ་དུཥྚཱན་བཛྲ་ཨཾ་ཀུ་ཤ་ཛ་ཀྲོ་དྷིཾ་ཀྲོལ་ཤ། རཱ་ཛ་ཐ་མ་ནཾ། རཱ་ཛ་ཤ་ཏྲཱུཾ་མཱ་ར་ཎ་ཕཊ། རཱ་ཛ་ཨ་མུ་ཀཾ་།བྷཀྵ་ཎི་གྲྀཧྞ་གྲྀཧྞ། གྲྀཧྞ་མཱ་ར་ཡ་ཕཊ། ཕུར་པ་གདབ་ཅིང་ལྕག་གིས་བྲབ། །དེ་ནས་བསྐོར་བའི་འཁོར་ལོ་བཅའ། །རྩ་བའི་འཁོར་ལོའི་ལྟེ་བ་ལ། །ཀུ་ཤའི་གཟུགས་བཞག་ཕྱི་རྩིབས་ལ། །རེ་མིག་བཅུ་བཞི་ལྡན་པ་ལ། །རྩིབས་ལ་གཟུགས་བྲིས་བོང་ཁྲག་
243a
༄#། །སྦྱར། །རེ་མིག་ཆ་ལ་བསྐོར་སྔགས་འགོད། །དུ་ཏྲི་པ་ཏྲི་དཀོར་བ་ཁཾ་རྦད། ཡ་ཏྲི་དཀོར་བ་ཁཾ་རྦད། ཡུངས་ཀར་ཁྲག་སྣ་དུག་སྣས་བྲབ། །ཡང་ན་ཆུ་བོའི་གཞུང་ལ་བསྐུར། །ཡང་ན་ཕུགས་རྡུགས་གྲོག་པོར་མནན། །དེའི་ཚེ་ཞིང་ལྕགས་དྲག་ཏུ་བསྣུན།། །།དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས། དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་རྫོགས་སོ།། །།རྒྱ་གར་གྱི་སློབ་དཔོན་ཨ་བ་ཡུ་ག་ཏི་ལ་དང ། བོད་ཀྱི་ལོཙྪ་བ་བླ་བན་ཆོས་ཀྱི་བརྩོན་འགྲུས་ཀྱིས་ཞུས་ཏེ་བསྒྱུར་ཅིང་གཏན་ལ་ཕབ་པའོ།། །།