།།རྒྱ་གར་སྐད་དུ། ཤྲཱི་གུ་ཧྱ་བཛྲ་པཱ་ཎི་ཨ་བྷི་དེ་ཤ་ཏནྟྲ་ནཱ་མ། བོད་སྐད་དུ། དཔལ་ཕྱག་ན་རྡོ་རྗེ་གསང་བ་ 520b བསྟན་པའི་རྒྱུད་།དཔལ་གསང་བའི་བདག་པོ་ལ་ཕྱག་འཚ་ལོ། །འདི་སྐད་བདག་གིས་ཐོས་བ་དུས་གཅིག་ན། འོག་མིན་གྱི་གནས་ལྕང་ལོ་ཅན་གྱི་ཕོ་བྲང་ན། བཅོམ་ལྡན་འདས་དཔལ་ཆེན་པོ་ལ། རིག་སྔགས་ཀྱི་ལྷ་ཚོགས་ཀྱིས་བསྐོར་ཏེ་བཞུགས་སོ། །དེ་ནས་དཔའ་མོའི་དབང་ཕྱུག་མས་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་བའི་བདག་པོ་འདི་སྒྲུབ་པའི་རྣལ་འབྱོར་པ་ཇི་ལྟ་བུ་ཅིག་ལགས། བཅོམ་ལྡན་འདས་ཀྱིས་བཀའ་སྩལ་པ། སྙིང་རྗེར་ལྡན་ཞིང་ཤེས་རབ་ཆེ། །བཟོད་དང་ལྡན་ཞིང་བརྩོན་འགྲུས་ཆེ། །ཕྱི་ནང་གསང་བའི་དབང་ཐོབ་ཅིང ། །བསླབ་པ་གསུམ་ལ་རབ་ཏུ་གནས། །དེས་ནི་དཔའ་བོ་ཡང་དག་འགྲུབ། །གསང་བ་བསྟན་པའི་རྒྱུད་ལས་སྒྲུབ་པ་པོ་གང་ཟག་བསྟན་པའི་ལེའུ་སྟེ་དང་པོའོ།། །། ཡང་དཔའ་མོས་གསོལ་པ། བཅོམ་ལྡན་འདས་དཔའ་བོ་འདི་བསྒྲུབ་པའི་གནས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དབེན་པ་ཉམས་དགའ་ཡིད་འོང་བ། ། བཀྲ་ཤིས་དཔལ་འཕེལ་དབང་ཡང་འཛིན། །དུར་ཁྲོད་ཆེན་པོ་འཇིགས་གནས་པ། །རི་གསུམ་རྩེའམ་བྲག་རི་སྔོ། །ཁྲོ་བོའི་ཆ་བྱད་འདྲ་བའི་གནས། །དེ་ནི་དཔའ་བོ་བསྒྲུབ་ལ་ཤིས།། གསང་བ་བསྟན་པའི་རྒྱུད་ལས་བསྒྲུབ་པའི་གནས་བསྟན་པའི་ལེའུ་སྟེ་གཉིས་པའོ།། །།ཡང་དཔའ་མོས་གསོལ་པ། བཅོམ་ལྡན་འདས་དཔའ་བོ་འདི་བསྐྱེ་ 521a ༄#། །པའི་དམིགས་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དང་པོ་སྟོང་ཞིང་བདག་མེད་དོ། །སྣང་ཞིང་སྲིད་པའི་ཆོས་རྣམས་ཀུན། །ངོ་བོ་ཉིད་ཀྱིས་རྣམ་པར་དག་།དེ་ལྟ་བུ་ཡི་ཆོས་ཉིད་ལ། །སངས་རྒྱས་སེམས་ཅན་གཉིས་མེད་པས། །མི་སྒོམ་མི་རྟོག་སྣང་ལ་གསལ། །མཐའ་བྲལ་མཁའ་མཉམ་དབུ་མའི་དོན། །སེམས་ཀྱི་རང་བཞིན་དེ་ལྟ་བུ། །དེ་ལྟར་མ་རྟོགས་སེམས་ཅན་ལ། །སྡུག་བསྔལ་ཀུན་དང་བྲལ་བ་ཡི། །ཐུགས་རྗེ་ཕྱོགས་མེད་བསྒོམ་པར་བྱ། །སངས་རྒྱས་ཐམས་ཅད་འབྱུང་བའི་རྒྱུ། །རང་གིས་སེམས་ནི་ཡི་གེ་ཧཱུཾ། །ཡི་གེ་ཧཱུཾ་གི་འཕྲོ་འདུ་ལས། །གཞལ་ཡས་ཁང་དང་ལྷ་ཡི་གདན། །ལྷ་ཡི་ས་བོན་ཡི་གེ་ལས། །གོ་རིམས་བཞིན་དུ་བསྐྱེད་པར་བྱ། །གསང་བ་བསྟན་པའི་རྒྱུད་ལས་བསྐྱེད་པའི་དམིགས་པ་བསྟན་པའི་ལེའུ་སྟེ་གསུམ་པའོ།། །།ཡང་དཔའ་མོས་གསོལ་པ། བཅོམ་ལྡན་འདས་རིག་སྔགས་ཀྱི་བདག་པོ་འདིའི་བསམ་གྱིས་མི་ཁྱབ་པའི་དམིགས་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། བསྐྱེད་པའི་དམིགས་པ་ཐོབ་ནས་ནི། །སྙིང་གར་ཡེ་ཤེས་སེམས་དཔའ་བསྒོམ། །ཡེ་ཤེས་སེམས་དཔའི་ཐུགས་ཀར་ནི། །པདྨ་འདབ་བཞི་རྒྱ་སྲན་ཙམ། །དབུས་སུ་ཉི་ཟླའི་གཞལ་ཡས་ཁང ། །གཞལ་ཡས་ཁང་གི་ནང་དུ་ནི། ། ཤད་མར་མེའི་རྩེ་ལྟར་སྒོམ། །དེ་ལ་དམིགས་ 521b པ་ཐོབ་ནས་ནི། །ཅི་ཡང་བསམ་པར་མི་བྱ་སྟེ། །བསམ་གྱིས་མི་ཁྱབ་དེ་བསམས་པས། །དེ་ལ་ཡེ་ཤེས་ཐོབ་པར་འགྱུར། །གསལ་ལ་རྟོག་མེད་རིག་པའི་སྐུ། །ཡེ་ཤེས་ཞེས་ནི་དེ་ལ་བྱའོ། ། གསང་བ་བསྟན་པའི་རྒྱུད་ལས་བསམ་གྱིས་མི་ཁྱབ་པའི་དམིགས་པ་བསྟན་པའི་ལེའུ་སྟེ་བཞི་པའོ།། །།ཡང་དཔའ་མོས་གསོལ་པ། བཅོམ་ལྡན་འདས་གསང་བའི་བདག་པོ་འདིའི་འཁོར་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དཔའ་བོ་ཆེན་པོ་འདིའི་འཁོར་ནི། །ཐུགས་ཀྱི་འཁོར་ནི་བཞིའོ། །གསུང་གི་འཁོར་ནི་བརྒྱད་དོ། །སྐུའི་འཁོར་ལྔ་བརྒྱར་ངེས་སོ། །གསང་བ་བསྟན་པའི་རྒྱུད་ལས་འཁོར་བསྟན་པའི་ལེའུ་སྟེ་ལྔ་བའོ།། །།ཡང་དཔའ་མོས་གསོལ་པ། བཅོམ་ལྡན་འདས་དཔལ་ཆེན་པོ་འདིའི་རིག་པ་ཇི་ལྟ་བུ་ལགས། །བཅོམ་ལྡན་འདས་ཀྱིས་བཀའ་སྩལ་པ། ཨོཾ་བཛྲ་པཱ་ཎི་ཧཱུཾ་ཧཱུཾ་ཕཊ་ཕཊ་སཝཱཧཱ། ཨོཾ་བཛྲ་ཀྲོ་དྷ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ་ཧཱུཾ་ཕཊ་ཕཊ་སཝཱཧཱ། ཨོཾ་བཛྲ་པཱ་ཎི་གྲོ་དྷ་མ་ཧཱ་ཙཎྜ་རོ་ཥ་ཎ་ཧཱུཾ་ཧཱུཾ་ཕཊ་ཕཊ་སཝཱཧཱ། འཁོར་བཞིའི་རིག་པ་ཕུལ་བ་ནི། །ོཾ་བཛྲ་ཀྲོ་དྷ་མཧཱ་ཀཱ་ལཱ་ཡ་ཧཱུཾ་ཧཱུཾ་ཕཊ་ཕཊ་ཙིཏྟ་ཀྲོ་ཙི་དུན་ཛ། ཨོཾ་བཛྲ་ཀྲོ་དྷ་ཏྲི་ལོ་ཀྱ་བི་ཛ་ཡ་ཧཱུཾ་ཧཱུཾ་ཕཊ་ཕཊ། བཾ་མཱ་ར་ཡ་ཙིཏྟ་རྦད་རྦད། ཨོཾ་བཛྲ་ཀྲོ་དྷ་ནཱ་ག་སྦུ་ག་ཧཱུཾ་ཧཱུཾ་ཕཊ་ཕཊ། མཱ་ར་ཡ་རཀྟ་རྡུབས་རྡུབས་རྦད། ཨོཾ་བཛྲ་ཀྲོ་དྷ་ཀུ་བར་ཧཱུཾ་ཧཱུཾ་ཕཊ་ཕཊ། མཱ་ར་ཡ་ཀེ་ཆོཾ་ཆོཾ་རྦད། དཔའ་བོའི་འཁོར་ལྷ་སྲིན་སྡེ་ 522a ༄#། །བརྒྱད་ཀྱི་རིག་པ་ཕུལ་བ། མཧཱ་དེ་བ་མཱ་ར་ཡ་སོད་སོད། མཧཱ་ན་ག་མཱ་ར་ཡ་སོད་སོད་ཛ་ཛཿ མཧཱ་དེ་ཝི་མཱ་ར་ཡ། ཧ་ན་ཧ་ན། མཧཱ་མ་ནི་མཱ་ར་ཡ་གཏུབས་གཏུབས། མྷཱ་སིདྡྷ་མཱ་ར་ཡ་ཏིཥྛ་ཏིཥྛ། མཧཱ་ཡཀྵ་མཱ་ར་ཡ་བྷིནྡ་བྷིནྡ། མ་ཧཱ་ཏྲི་ཛ་མཱ་ར་ཡ་ཁོས་ཁོས། མ་ཧཱ་མ་ནི་བིནྡྷ་མཱ་ར་ཡ་ནན་ནན། མ་ཧཱ་བཛྲ་ཧཱུཾ་ཕཊ། འཁོར་གོས་སྔོན་ཅན་ལྔ་བརྒྱའི་རིག་པ་ཕུལ་བ། མཱ་ར་ཡ་རུ་དྷ་རུ་དྷ་ཧཱུཾ་ཧཱུཾ་ཕཊ་ཕཊ། གསང་བ་བསྟན་པའི་རྒྱུད་ལས་རིག་པ་ཕུལ་བའི་ལེའུ་སྟེ་དྲུག་པའོ།། །།ཡང་དཔའ་མོས་གསོལ་པ། བཅོམ་ལྡན་འདས་དཔའ་བོ་འདིའི་ཕྲིན་ལས་མཇུག་སྦྱིན་སྲེག་གིས་བསྡུ་འཚལ་ལམ་མི་འཚལ་ཅེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྦྱིན་སྲེག་ནི་རྣམ་པ་གསུམ་སྟེ། ཕྱི་དང་ནང་དང་གསང་བ་གསུམ། རེ་རེ་ལ་ནི་བཞི་བཞིར་བསྟན། །ཞི་བ་དང་ནི་རྒྱས་པར་བསྟན། །དབང་དང་དྲག་པོའི་སྦྱིན་སྲེག་གོ་།གསང་བ་བསྟན་པའི་རྒྱུད་ལས་སྦྱིན་སྲེག་གི་ལེའུ་སྟེ་བདུན་པའོ།། །།བཅོམ་ལྡན་འདས་དཔལ་ཆེན་པོས། དེ་སྐད་ཅེས་བཀའ་སྩལ་པ་དང ། དཔའ་མོའི་དབང་ཕྱུག་མ་དང ། རིགས་ཀྱི་ལྷ་ཚོགས་རྣམས་དགའ་མགུ་ཡི་རངས་ཏེ། དཔལ་ཆེན་པོས་གསུངས་པ་ལ་མངོན་པར་བསྟོད་དོ།། །།དཔལ་ཕྱག་ན་རྡོ་རྗེ་གཏུམ་པོ་གསང་བ་བསྟན་པའི་རྒྱུད་རྫོགས་ 522b སོ།། །།རྒྱ་གར་གྱི་པཎྜི་ཏ་ཝ་ལ་ཙནྡྲ་དང ། ལོ་ཙཱ་བ་གླན་ཆུང་དར་མ་ཚུལ་ཁྲིམས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། |