།།རྒྱ་གར་སྐད་དུ། ཨཱརྱ་བཛྲ་པཱ་ཎི་ནཱི་ལཱམྦ་ར་དྷ་ར་བཛྲ་པཱ་ཏཱ་ལཱ་ནཱ་མ་ཏནྟྲ།་བོད་སྐད་དུ། འཕགས་པ་ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་ས་འོག་ཅེས་བྱ་བའི་རྒྱུད། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་ 354b གཅིག་ན། བཅོམ་ལྡན་འདས་ས་འོག་རིམ་པ་བདུན་ཀླུའི་རྒྱལ་པོའི་གནས་ན་རིན་པོ་ཆེའི་ཁྲི་ལ་བཞུགས་ཏེ། ཀླུའི་རྒྱལ་པོ་དགའ་བོ་དང ། ཉེ་དགའ་བོ་དང ། རིགས་ལྡན་ལ་སོགས་ཏེ་ཀླུ་རྣམས་དང ། བྱང་ཆུབ་སེམས་དཔའ་ལག་ན་རྡོ་རྗེ་ལ་སོགས་པ་རྣམས་དང་ཐབས་ཅིག་སྟེ། དེ་ནས་བཅོམ་ལྡན་འདས་ཀྱི་ཞབས་གཡས་པ་ནས་འོད་ཟེར་བརྒྱ་སྟོང་དུ་མ་བཀྱེ་བས་འཇིག་རྟེན་དུ་འགྱུར་བ་དང ། ལྟས་བྱུང་བས་འཇིག་རྟེན་པ་རྣམས་འཇིགས་ཤིང་སྐྲག་ནས་བརྒྱལ་བར་གྱུར་ཏེ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ལ་གསོལ་པ། འོད་ཟེར་འདི་འགྱུར་བ་དང ། ལྟས་བྱུང་བའི་རྒྱུ་དང་རྐྱེན་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། འདི་ནི། བསོད་ནམས་ཀྱི་ཚོགས་ཚད་མེད་པ་ལས་གྲུབ་པས་འབྲས་བུ་ཡང་ཚད་མེད་ཀྱི། བྱང་ཆུབ་སེམས་དཔའ་བརྒྱལ་བ་ལས་བསླང་དུ་གསོལ། དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེའི་ཐུགས་ཀ་ནས་འོད་ཟེར་བརྒྱ་སྟོང་དུ་མ་བཀྱེ་སྟེ།་འོད་ཀྱིས་རེག་པ་ཙམ་གྱིས་བརྒྱལ་བ་ལས་བསླངས་སོ། །དེ་ནས་འཇིག་རྟེན་པ་རྣམས་ཀྱིས་ཆེད་དུ་བརྗོད་པ། ཨེ་མ་ཐབས་ཆེན་ཐུགས་རྗེ་ཡིས། །འཇིག་རྟེན་ཐམས་ཅད་བརྒྱལ་གྱུར་ན། །ཐུགས་རྗེ་ཆེན་པོའི་འོད་ཟེར་གྱིས། །བརྒྱལ་བ་ཐམས་ཅད་བསླངས་པར་གྱུར། །དེ་ནས་འཇིག་རྟེན་བ་རྣམས་ས་འོག་རིམ་པ་བདུན་གྱི་ཀླུའི་རྒྱལ་པོའི་གནས་སུ་འདུས་པར་ 355a ༄#། །གྱུར་ནས་གསོལ་བ་བཏབ་པ། སྐུ་གསུང་ཐུགས་ཀྱི་འཕྲིན་ལས་ཅན། །སྟོན་པ་བཅོམ་ལྡན་རྡོ་རྗེ་འཛིན། །འཇིག་རྟེན་རྣམས་ལ་ཕན་གདགས་ཕྱིར། ། རྡུལ་བྲལ་ཆོས་རྣམས་བཤད་དུ་གསོལ། དེ་ནས་བཅོམ་ལྡན་འདས་ཀྱིས། བཛྲ་ཨ་བྷི་ཥཱིཉྩ་བཛྲ་པཱ་ཎི་ཧཱུཾ། ཞེས་གསུངས་བས་སྣོད་དང་ལྡན་པར་བྱས་སོ། །དེ་ནས་ཀླུ་རྒྱལ་པོ་རྣམས་འཁྲུགས་སོ། །ཤིན་ཏུ་ཡིད་འཁྲུགས་ནས་ཁ་གཡབ་ཅིང་བྲང་བརྡུངས་ཏེ། ཀྱེ་མ་ཀྱི་ཧུད་བདག་ཀླུའི་གནས་དང ། སྟོན་པ་ནི། འཇིག་རྟེན་པས་འཕྲོག་པས་འཇིག་རྟེན་པ་རྣམས་བརླག་པར་བྱའོ་ཞེས་ཟེར་ནས་ཀླུའི་ཁའི་རླངས་པས་འཇིག་རྟེན་པ་རྣམས་ལ་མཛེའི་ནད་བཏང་ངོ ། །དེ་ནས་བཅོམ་ལྡན་འདས་ཀྱིས་ནད་སེལ་བ་ཞེས་བྱ་བའི་ཏིང་འཛིན་ལ་སྙོམས་པར་ཞུགས་ནས་ཐུགས་ཀའི་དཔལ་བེའུ་ལས་ནད་སེལ་བའི་འོད། ཞལ་ནས་ཀྱང་བཛྲ་ད་ཡ་ཞེས་བྱ་བའི་སྔགས་དང་བཅས་ཏེ་བྱུང་བ་མེ་ལོང་ལ་ཧས་བཏབ་པ་བཞིན་དུ་སོང་ངོ ། །དེ་ནས་ཀླུའི་རྒྱལ་པོ་རྣམས་ཀྱིས་ཀླུ་བྲན་རྣམས་བསྐུལ་ནས་ལ་ལ་ཚུ་\?\་ན་\?\་ས་ཞུགས་སོ། །ལ་ལ་དབང་པོའི་སྒོ་ནས་ཞུགས་སོ། །ལ་ལ་རུས་པ་ནས་ཞུགས་པ་ལ་བཅོམ་ལྡན་འདས་ཀྱིས་དབུགས་མེ་ལྕེ་ལྟར་འབར་བའི་ཏིང་ངེ་འཛིན་ལ་སྙོམས་པར་ཞུགས་པ་ལ་དབུགས་ཀྱིས་བསྲེགས་སོ། །དབང་པོ་ལ་ཞུགས་པ་དང ། རུས་པ་ལ་ཞུགས་པ་སྲེག་པའི་ 355b འཁོར་ལོས་བཅོམ་མོ། །དེ་ནས་ཀླུའི་རྒྱལ་པོ་རྣམས་ཆེར་འཁྲུགས་ནས་བཅོམ་ལྡན་འདས་ཉིད་ལ་སྣང་བ་རེ་རེ་ཆད་ནས་ལུས་ལ་དཀྲི་བས་བྱང་ཆུབ་ཀྱི་སེམས་དང་ལྡན་ཏེ་རྒྱན་དུ་སོང་ངོ ། །དེ་ནས་ཀླུའི་རྒྱལ་པོ་རྣམས་ཀྱིས་བསྟོད་པ། འཇིག་རྟེན་འདི་ན་ཀླུ་རྒྱལ་མཐུ་ཆེན་ཡང ། །བཅོམ་ལྡན་བརྒྱ་ཡི་བ་སྤུའི་ཆར་མི་ཕོད། །དེ་ན་བཅོམ་ལྡན་འགྲོ་བ་སྐྱོབ་པ་ལ། །ཀླུ་ཡི་རྒྱལ་པོ་རྣམས་ཀྱིས་རྟག་ཏུ་བསྟོད། །རྡོ་རྗེ་ས་འོག་གི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་རྡོ་རྗེ་འཆང་ལ་ཡང་དང་ཡང་དུ་ཕྱག་འཚལ་ནས་གསོལ་བ་བཏབ་པ། སེར་སྣའི་དབང་གིས་དབུལ་གྱུར་པ། །ནོར་རྣམས་ཇི་ལྟར་བསྒྲུབ་པར་བགྱི། །མདུན་གྱི་ཕྱག་ན་རྡོ་རྗེ་ཡི། །ཡེ་ཤེས་སེམས་དཔའི་ཕྱག་གཡས་པར། ། ཛམྦྷ་ལ་ནི་བསྒོམ་པར་བྱ། །བདག་ཉིད་སྔགས་ཀྱི་རྒྱལ་པོ་ཟློས། །སྙིང་གར་འོད་ཟེར་དག་གིས་ནི། །ཡེ་ཤེས་སེམས་དཔའ་བསྐུལ་བར་བྱ། །ཡེ་ཤེས་སེམས་དཔས་ཛམྦྷ་ལའི། །སྔགས་ནི་ཟླས་པ་ཉིད་དུ་བསྒོམ། །ཡེ་ཤེས་སེམས་དཔའི་ཐུགས་ཀ་ནས། །འོད་བྱུང་ཛམྦྷ་ལ་བསྐུལ་ལོ། །ནོར་གྱིས་རྒྱ་མཚོ་གང་བར་འགྱུར། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་རྡོ་རྗེ་འཛིན་ལ་གསོལ་བ་བཏབ་པ། ཉེས་པ་ཤིན་ཏུ་ཕྲ་མོ་ལ། །གྲགས་དང་རྙེད་པའི་དོན་དུ་ནི། །འཇིག་རྟེན་གནོད་བྱེད་སྒྲུབ་བྱེད་པ། །ཐོག་སེར་ཟློག་པ་བཤད་དུ་གསོལ། །ཐོག་མར་མཆོད་ 356a ༄#། །རྟེན་སྔོན་པོ་བརྩིག་།རབ་གནས་གཞུང་དང་མཐུན་པར་བྱ། །དེ་ཡི་འོག་ཏུ་འཁོར་ལོ་ནི། །རྩིབས་བརྒྱད་ལྟེ་བར་བཅས་པ་བྲི། །རྩིབས་ལ་ལྷ་སྲིན་སྙིང་པོ་བྲི། །ཁཱཾ་དྷ། ཏསྷཱ་དྷ། ཚྷཱ་དྷ། ཤྷ་དྷ། ཨོཾཧ་དྷ། མྷོ་དྷ། ཐོཾ་དྷ། སྠ་དྷ། དབུས་སུ་སྔགས་མཁན་བྲི་བར་བྱ། །དེ་ནས་ཐོད་པའི་ནང་དུ་གཞུག་།ཐོད་པ་མཆོད་རྟེན་འོག་ཏུ་མནན། །སྙིང་པོའི་འོད་ཀྱིས་སྔགས་མཁན་དང ། །ལྷ་སྲིན་འཁོར་དང་བཅས་པ་དགུག་།དེ་ལ་ཐུན་གྱིས་བྲབ་པར་བྱ། །འབྱུང་པོ་འཁྲུགས་པའི་དུས་སུ་ནི། །སྟོན་པའི་ང་རྒྱལ་ལྡན་པ་ལ། །མཐེ་བོང་དང་ནི་མཐེ་ཆུང་ལ། །ཧཱུཾ་ལས་ཕྱག་ན་རྡོ་རྗེ་བསྐྱེད། །མཐེ་ཆུང་ཕྱག་ན་རྡོ་རྗེ་ཡི། །ཐུགས་ནས་ཕྱག་ན་རྡོ་རྗེ་ནི། །ཞགས་པ་ལྕགས་ཀྱུ་ཐོགས་པ་སྤྲོ། །སྙིང་གི་ལྕགས་ཀྱུས་དགུག་པ་དང་།། མགྲིན་པ་ཞགས་པས་བཅིང་བར་བྱ། །མཐེ་བོང་ཕྱག་ན་རྡོ་རྗེ་ཡི། །རྡོ་རྗེ་ལས་ནི་རྡོ་རྗེ་སྤྲོ། །བགེགས་རྣམས་ལ་ནི་བསྣུན་པར་བྱ། །བ་སྤུའི་གཤིས་ན་རྡོ་རྗེ་འཕྲོ། །ནམ་མཁའ་ཐམས་ཅད་རྡོ་རྗེར་གྲུབ། །ཡུངས་ཀར་རྡོ་རྗེར་བསྐྱེད་ལ་བྲབ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་རྡོ་རྗེ་འཛིན་པ་ལ་མཆོད་ཅིང་ཕྱག་འཚལ་ནས་ཆེད་དུ་བརྗོད་པ། ཨེ་མ་ཧོ་སྟོན་པ་རྡོ་རྗེ་འཛིན། །སེམས་ཅན་རྣམས་ལ་ཕན་དོན་དུ། །ཚར་གཅད་རྗེས་གཟུང་གསུངས་པ་མཚར། །དབུལ་དང་ཡི་དྭགས་གནས་ལས་ཐར། །རྡོ་རྗེ་འོག་གོ་རྒྱུད་ལས། ནོར་ 356b སྒྲུབ་པ་དང་གནོད་པ་ཟློག་པ་སྟེ་ལེའུ་གཉིས་པའོ།། །།དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་རྡོ་རྗེ་འཛིན་ལ་མཆོད་ཅིང་ཕྱག་འཚལ་ནས་གསོལ་བ་བཏབ་པ། ཀླུ་དང་གནོད་སྦྱིན་ས་བདག་གི། མཛེ་དང་དམུ་ཆུ་ཇི་ལྟར་བཟློག་།དེ་ནས་རྡོ་རྗེ་འཛིན་རྒྱལ་པོས། །གསུང་ནི་འདི་སྐད་བཀའ་སྩལ་ཏོ། །མདོ་སྡེས་ནི། ལས་ཀྱི་རྣམ་པར་སྨིན་པ་མི་བཟློག་ལ་སྔགས་ཀྱིས་བཟློག་པས་ཁྱད་པར་དུ་འཕགས་སོ། །དེ་ལ་ཀླུ་ཞེས་བྱ་བ་ཉོན་མོངས་པ་གཏི་མུག་ཤས་ཆེ་བས་ཆགས་པ་དང་ཞེ་སྡང་ཡང་ཆེ་སྟེ། གཏི་མུག་གི་དབང་གིས་གཉིད་ཆེ་བ་དང ། ཞེ་སྡང་གི་དབང་གིས་སྐྱེ་བ་བདུན་དུ་མི་གཏོང་བ་དང ། ཆགས་པའི་དབང་གིས་ཆགས་པ་ལ་གནས་པའི་ལུས་ལ་ཞུགས་ནས་མི་གཏོང་བའོ། །ཀླུ་གདོལ་པ་ཅན་གྱིས་མཐོང་བ་ཙམ་གྱིས་ནང་སྐྱེད་དོ། །རིགས་གསུམ་ནི། རེག་པ་ཙམ་གྱིས་ནད་སྐྱེད་དོ། །ཀླུ་བྲན་རྣམས་ནི། སྟེང་སྒོ་གསུམ་ནས་ཞུགས་ནས་ལུས་ཀྱི་བཅུད་ཟ་བར་བྱེད་དོ། །བྱང་ཆུབ་སེམས་དཔའ་ཕྱག་ན་རྡོ་རྗེས་གསོལ་པ། དེ་རྣམས་ཇི་ལྟར་འདུལ་བར་བགྱི། །དེ་ནས་བཅོམ་ལྡན་འདས་ཀླུ་འགུགས་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་འདི་གསུངས་སོ། །ནཱ་ག་བི་དཱ་རཱ་ཎཱ་ཛཿ ། ནཱ་ག་ཨུཏ་སཱ་ད་ན་ཡ་ཛཿ ། སྦྱོར་བ་གསུམ་ལ་ལེགས་གནས་པས། །འཇིགས་བའི་གཟུགས་ཀྱིས་འགུགས་པར་འགྱུར། །དེ་ནས་བཅོམ་ལྡན་ 357a ༄#། །འདས་ཀྱིས་ཀླུ་འདུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་དབུགས་ལས་སྔགས་འདི་རྣམས་ཕྱུང་ངོ ། །ཏདྱ་ཐཱ། བུདྡྷ་བུདྡྷ།་བི་བུདྡྷ་བི་བུདྡྷ། མཱ་ཏི་ཀྲ་མ་ཐ། ཧ་ར་ཧ་ར་ནཱ་གཱ་ནཱཾ། པྲ་ཧ་ར་པྲ་ཧ་ར་ན་གཱ་ནཱཾ། ཚིནད་ཚིནད་ནཱ་ག་ཧྲི་ད་ཡཱ་ནི། བྷིནྡ་བྷིནྡ་ནཱ་ག་མརྨྨ་ཎི་བི་ཥཱིརྱནྟུ་ནཱ་ག་ཤ་རཱི་རཱ་ཎི། བི་སྥོ་ཊ་ཡ་ནཱ་ག་ན་ཡ་ནི། འཇིགས་ཤིང་སྐྲག་སྟེ་བརྒྱལ་བར་འགྱུར། །སྙིང་གར་ཡི་གེ་ཧཱུཾ་བསྒོམས་པས། །ཀླུ་རྣམས་ཐམས་ཅད་བསྲེགས་གྱུར་པས། །བདེ་བ་ཅན་གྱི་གནས་སུ་སྐྱེ། །བྱང་ཆུབ་སེམས་དཔའ་ཕྱག་ན་རྡོ་རྗེས་གསོལ་པ། དེ་ལ་འཇུག་པའི་གནས་དུ་མཆིས། །བཅོམ་ལྡན་འདས་ཀྱིས་བཀའ་སྩལ་པ། རྩ་བཞི་དག་ནས་ཞུགས་གྱུར་ནས། །རྩ་རྣམས་ན་ཞིང་ཚ་བ་དང ། །སྟེང་སྒོ་མི་བདེ་རྡུལ་ཡང་འབྱུང ། །རྨུགས་དང་གཉིད་ཀྱི་བདག་ཉིད་ཅན། །ཤ་མདོག་ལྦུ་བ་ལྟ་བུ་སྟེ། །རྨི་ལམ་དུ་ནི་ཆུ་འོད་འབྱུང ། །དེ་ནས་ཆགས་པ་སྤྱད་པར་བྱ། །དབང་པོ་གསུམ་དུ་ཞུགས་གྱུར་ན། །དབང་པོ་སྦྲིད་ཅིང་ལུས་ཀྱང་འདར། །ཤ་ནི་སྐམ་ཞིང་རུས་པ་ན། །དེ་ལ་ཆགས་པ་མི་སྤྱད་དོ། །ས་ཡི་དབང་པོ་ཀུན་ནས་འཇུག་།བ་སྤུའི་ཁུང་བུ་དམར་ཞིང་འགྱུར། །ཕོལ་དང་ཤ་བཀྲ་འབྱུང་བ་དང ། །རྨི་ལམ་དུ་ནི་བྱོལ་སོང་འབྱུང ། །རྒྱལ་པོ་དང་ནི་རྩ་བཞིར་འཇུག་།ཐོ་རངས་མི་དགའ་མངོན་ཤེས་སྨྲ། །གཉིད་ 357b ཆུང་བ་སྤུའི་གཤིས་ཀྱང་དཀར། །གུ་གུལ་ནག་པོ་བསྟེན་པར་བྱ། །བྱང་ཆུབ་སེམས་དཔའ་ཕྱག་ན་རྡོ་རྗེས་གསོལ་པ། ནད་དེ་འཚོ་བ་དང་མི་འཚོ་བའི་རྣམ་པ་ཇི་ལྟར་ལགས། རྡོ་རྗེ་འཛིན་པས་གསུངས་པ། བསྙེན་པ་མཚན་མ་ཐོབ་པ་ཡིས། །བདུད་རྩི་ལྔ་དང་གླ་རྩི་དང ། །འབྲས་བུ་གསུམ་དང་རྨ་བྱའི་ཤ། །རིལ་བུ་བྱས་ལ་རྒལ་ཚིགས་གཞག་།དེ་ཡི་བར་དུ་རྨ་བྱའི་སྒྲོ། ། མདངས་དང་ལྡན་ན་འཚོ་བར་ངེས། །ནག་པོར་གྱུར་ན་མི་འཚོ་འོ། །བྱང་ཆུབ་སེམས་དཔའ་ཕྱག་ན་རྡོ་རྗེས་གསོལ་པ། བཅོམ་ལྡན་འདས། དེ་ལ་ཚར་གཅོད་པའི་ཐབས་དུ་མཆིས། །བཅོམ་ལྡན་འདས་ཀྱིས་བཀའ་སྩལ་པ། སྔགས་དང་འཁྲུལ་འཁོར་སྨན་དང་སྲེག་།ཐབས་ནི་རྣམ་པ་བཞི་ཡིན་ཏེ། །བྱང་ཆུབ་རྡོ་རྗེ་ཅན་གྱིས་གསུངས། །དབང་བསྐུར་དམ་ཚིག་ལྡན་པ་དང ། ། བསྙེན་པ་བརྟན་པར་གྱུར་པ་ཡིས། །དང་པོར་སྔགས་ཀྱིས་བཟློག་པར་བྱ། །སྙིང་གའི་སྔགས་ཀྱི་རྒྱལ་པོ་ཡིས། །རླུང་དང་འགྲོགས་ཏེ་འབྱུང་བར་འགྱུར། །ནད་ཀྱི་སྙིང་པོ་ཧཱུཾ་བསམས་ཏེ།། རྒྱུ་རྐྱེན་ཚོགས་པས་བསྲེག་པར་བྱ། །དེ་ནས་ཕྱིར་བཟློག་མནན་པར་བྱ། །སྦྱིན་སྲེག་རྣམ་པ་གསུམ་དུ་བཤད། །དང་པོ་ཞི་བའི་སྦྱིན་སྲེག་སྟེ། །ཟླུམ་པོ་ཁྲུ་གང་ཁ་དོག་དཀར། །ཁ་ཁྱེར་སོར་བཞིར་རྡོ་རྗེས་མཚན། །གྲུ་གསུམ་སོར་བཅུ་ཁ་དོག་ནག་།ཁ་ཁྱེར་སོར་གསུམ་རྡོ་རྗེས་མཚན། །ཟླ་དབྱིབས་ཟླ་བ་དམར་འདྲ་བ། །ཁྲུ་དོ་ཁ་ཁྱེར་དེ་འདྲར་ཤེས། །ཞི་བ་འོ་མ་ཅན་ཤིང་ 358a ༄#། །གི། གཏུམ་པ་འབིགས་པར་བྱེད་དེའོ། །དབང་ཡང་ཞི་བ་དག་དང་མཚུངས། །རྒྱུན་བཞག་མེ་དང་རིགས་ངན་ཁྱིམ། །རཾ་ལས་ཐབ་དང་མེ་ལྷ་བསྐྱེད། །ཞི་རྒྱས་དབང་ལ་བདུད་རྩི་ལྔ། །གཏུམ་པ་དམར་དང་ཁྲག་དག་དང ། །དུག་དང་གུ་གུལ་ནག་པོ་དང ། །གཟུགས་བརྙན་དག་གིས་མཆོད་པར་བྱ། །འཇིག་རྟེན་དབང་ཕྱུག་ཚངས་པ་མཆོག་གི་སྲས། །མེ་ལྷའི་རྒྱལ་པོ་ཊཀྐིས་དབང་བསྐུར་ཞིང ། །ཤེས་རབ་མཆོག་གིས་ཉོན་མོངས་ཐམས་ཅད་སྲེག་།འཇིགས་བྱེད་མེ་ལྷ་ཉིད་ལ་ཕྱག་འཚལ་འདུད། །གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་རབ་སྩོལ་ཞིང ། །བདག་གཞན་ཕན་སོགས་ལ་ཞུགས་པ། །ཚངས་སྲས་མཆོག་ལ་ཕྱག་འཚལ་འདུད། །མེ་ཡི་ཐུགས་ཀར་དྲག་པོ་ནི།། ཆོ་ག་བཞིན་དུ་བསྐྱེད་པར་བྱ། །སྦྱིན་སྲེག་དེ་དག་འབྲེལ་པ་ཡིས། །ནོར་རྣམས་ཐམས་ཅད་སྟེར་བར་བྱེད། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་རྡོ་རྗེ་འཛིན་པ་ལ་ཞུས་པ། དྲག་པོའི་སྔགས་རྣམས་ཇི་ལྟར་ལགས། དེ་ནས་རྡོ་རྗེ་འཛིན་པས་ལྷ་སྲིན་ཐམས་ཅད་འདུལ་བའི་སྔགས་འདི་གསུངས་སོ། །ཏདྱ་ཐཱ། ཧཱུཾ་ཕཊ། ནཱ་ག་བི་དྷ་ར་ཎཱ་ཡ་ཧཱུཾ་ཕཊ། ནཱ་ག་ཨུཏ་ས་ད་ནཱ་ཡ་ཧཱུཾ་ཕཊ། ནཱི་ལཾ་བ་ས་ནཱ་ཡ་ཧཱུཾ་ཕཊ། ཨ་པྲ་ཏི་ཧ་ཏ་བ་ལ་པ་རཱ་ཀྲ་མཱ་ཡ་ཧཱུཾ་ཕཊ། ཀྲྀ་ཏཱནྟ་ཡ་ཧཱུཾ་ཕཊ། ཀྲྀ་ཏཱནྟ་རཱུ་པཱ་ཡ་ཧཱུཾ་ཕཊ། རོ་ཥ་ཎ་ཡ་ཧཱུཾ་ཕཊ། 358b ཏྲཱ་ས་ནཱ་ཡ་ཧཱུཾ་ཕཊ། ཀུཾ་བྷཱཎྜ་ཨུཏ་ས་ད་ནཱ་ཡ་ཧཱུཾ་ཕཊ། པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཧཱུཾ་ཕཊ། ཡཀྵ་ཨ་པསྨཱ་ར་བི་ནཱ་ཤ་ཀ་རཱ་ཡ་ཧཱུཾ་ཕཊ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྣ་བི་ནཱ་ཤ་ཀ་རཱ་ཡ་ཧཱུཾ་ཕཊ། སརྦ་ཤ་ཏྲཱུཾ་སཾ་བརྟ་བི་ནཱ་ཤ་ཀ་རཱ་ཡ་ཧཱུཾ་ཕཊ། ནཱི་ལཱམྦ་ར་དྷ་ར་བཛྲ་པཱ་ཎི་རཱ་ཛྙཱ་པ་ཡ་ཏི་སཝཱཧཱ། ཨོཾ་བཛྲ་ཨ་ན་ལ་མ་ཧཱ་བྷུ་ཏ་ཛྭ་ལ་བྷསྨཾ་ཀུ་རུ་སཝཱཧཱ། མཱ་ར་ཡ་ཧཱུཾ་ཕཊ། པུཥྚི་ཀུ་རུ་ཨོཾ། སྔགས་འདི་གསུངས་པ་ཙམ་གྱིས་ནི། །ལྷ་སྲིན་ཐམས་ཅད་བརྒྱལ་བར་གྱུར། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་ཆེད་དུ་བརྗོད་པ། ཨེ་མ་དུས་གསུམ་སངས་རྒྱས་ཀྱིས། །དྲག་པོ་འདུལ་བར་དབང་བསྐུར་ནས། །སྔགས་རྒྱལ་གསུངས་པས་སྐྲག་འགྱུར་བ། །ངོ་མཚར་འདི་ནི་ཤིན་ཏུ་ལྷག། །ཅེས་པའོ། །དེ་ནས་རང་རང་གི་སྲོག་སྙིང་སྟོན་པ་ལ་ཕུལ་ནས་བྲན་གྱི་ཚུལ་དུ་གནས་སོ། །རྡོ་རྗེ་ས་འོག་གི་རྒྱུད་ལས། བཅོས་དཀའ་བའི་ནད་ཟློག་པའི་ལེའུ་སྟེ་གསུམ་པའོ།། །།དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་རྡོ་རྗེ་འཛིན་པ་ལ་མཆོད་པ་དང་ཕྱག་བྱས་ནས་གསོལ་བ་བཏབ་པ། སྐུ་དང་གསུང་དང་ཐུགས་ཀྱི་མཆོག་།དཀྱིལ་འཁོར་དམ་པ་བཤད་དུ་གསོལ། དེ་ནས་རྡོ་རྗེ་འཆང་རྒྱལ་པོས། །གསུང་ནི་འདི་སྐད་བཀའ་སྩལ་ཏོ། །དཀྱིལ་འཁོར་དག་ཏུ་མ་ཞུགས་ཤིང ། །དབང་བསྐུར་བ་ཡང་མ་ཐོབ་ན། །བསྒྲུབས་ཀྱང་ཅི་ཡང་མི་འགྲུབ་བོ། །དེ་བས་ད་ནི་བཤད་བྱ་བ། །གྲུ་ 359a ༄#། །བཞིར་བགྱི་ཞིང་སྒོ་བཞིར་བགྱི། །ཐིག་བཞི་དག་དང་ལྡན་གྱུར་པས། །ཆ་ཆེན་བཞི་རུ་བཏབ་བྱས་ན། །ཤར་གྱི་ཆ་ཆེན་དང་པོར་ནི། །བཞིར་བགོས་དང་པོ་ལྟེ་བ་དང ། །གཉིས་པ་པདྨ་རལ་གྲི་གཉིས། །གསུམ་པ་ལྷ་ཡི་སྣམ་བུ་འོ། །དེ་ནས་ཚོན་ནི་དགྱེ་བར་བྱ། །ལྟེ་བ་དཀྱིལ་འཁོར་འོད་དང་བཅས། །པདྨ་སྔོན་པོ་རལ་གྲི་སྔོན། །ལྷ་སྣམ་ནག་ལ་རྡོ་རྗེའི་སྒོ། །བཞི་ནི་དཀར་པོ་བྲི་བར་བྱ། །སྒོ་ཡི་ཕྱི་རོལ་ཁ་དོག་ནག་།མེ་རི་འབར་བ་བྲི་བར་བྱ། །དེ་ལ་རྡོ་རྗེ་ཕྲེང་བས་བསྐོར། །མདའ་དང་ཕུར་བུ་བཅུ་དྲུག་ལ། །ཚོན་སྐུད་སྔོན་པོ་བྲི་བར་བྱ། །དབུས་སུ་བཅོམ་ལྡན་འདས་མ་ལ། །ཀླུ་ཆེན་ཕྱེད་གཟུགས་སྦྲུལ་མགོ་ཅན། །རྫོགས་པར་བྱས་ནས་རྣལ་འབྱོར་ནི། །ཆོ་ག་བཞིན་དུ་གཉིས་ཀ་ཡི། །རྒྱུད་ལས་གསུངས་པ་བཞིན་དུ་བསྐྱེད། །དང་པོ་བླ་མའི་སྤྱན་སྔར་ནི། །ཕྱག་འཚལ་ལ་སོགས་བདུན་རྣམ་དག་།དེ་ནས་ཡེ་ཤེས་སེམས་དཔའ་ལ། །མེ་ཏོག་གཏོར་ཞིང་བསྟོད་པ་བྱ།། ཕྱག་འཚལ་བསྐོར་བ་བདུན་རྣམ་དག་།བྱས་ནས་ཡེ་ཤེས་དབབ་པར་བྱ། །གནས་གསུམ་ཡེ་གེ་གསུམ་བསམས་ལ། །སྔགས་འདི་ཡང་ནི་བརྗོད་པར་བྱ། །ཱ་བེ་ཤ་ཡ་སྟམྦྷ་ཡ་རཱ་རཱ་ཙཱ་ལ་ཡ་ཙཱ་ལ་ཡ་ཧཱུཾ་ཨཱ་ཨོཾ་ཛཻཿ ། དེ་ནས་དཀྱིལ་འཁོར་བསྟན་བྱས་ལ། །རིག་པའི་དབང་ནི་ཆོ་ག་བཞིན། །དེ་ནས་སྔགས་ཀྱི་རྗེས་གནང་སྦྱིན། །རྣལ་འབྱོར་སྙིང་གའི་ས་བོན་ 359b ལས། །སྔགས་ཀྱི་འོད་ཀྱིས་ཡེ་ཤེས་བསྐུལ། །ཡེ་ཤེས་ལྗགས་ལས་འོད་བྱུང་ལས། །སྣོད་གྱུར་ལྕེ་ལ་ཐིམ་པར་བསམ། །བསྒྲུབ་པའི་རྫས་ཀྱི་བཀྲ་ཤིས་བརྗོད། །རྡོ་རྗེ་ས་འོག་གི་རྒྱུད་ལས་དཀྱིལ་འཁོར་གྱི་ལེའུ་སྟེ་བཞི་པའོ།། །།དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་རྡོ་རྗེ་འཛིན་པ་ལ་མཆོད་ཅིང་ཕྱག་འཚལ་ནས་གསོལ་བ་བཏབ་པ། སྙིང་པོ་ཀུན་ལ་ཕན་གདགས་དང ། །སངས་རྒྱས་བསྟན་ལ་གཞུག་དོན་དུ། །གནོད་སྦྱིན་བསྒྲུབ་པར་བྱ་བ་ནི། །རྡོ་རྗེ་ཆེན་པོས་བཤད་དུ་གསོལ། །དེ་ནས་སྟོན་པ་རྡོ་རྗེ་འཛིན། །སེམས་ཅན་ཀུན་ལ་ཕན་དོན་དུ། ། གནོད་སྦྱིན་བསྒྲུབ་པར་བྱ་བ་ནི། །གསུང་ནི་འདི་སྐད་བཀའ་སྩལ་ཏོ། །རྡོ་རྗེ་སློབ་དཔོན་སྨོད་པ་དང ། །ཐེག་པ་ཆེ་ལ་སྨོད་པ་དང ། །དེ་སྒྲུབ་པ་ལ་སྙིང་ནས་བརྙས། །སྒྲུབ་པ་འདི་ནི་བརྩམ་པར་བྱ། །དེ་ལ་རི་རབ་ཀྱི་འོག་ན་ལས་ཀྱི་གནོད་སྦྱིན་གྱི་ལུས་བླངས་ལ་གདོང་བཞི་ལག་པ་བཞི་ཡོད་པ། གདོང་དང་པོ་བཅོམ་ལྡན་འདས་ཀྱི་སྔགས་ཟློས་པ། གཉིས་པ་རང་གི་སྲོག་སྙིང་བཟླ་བ། གསུམ་པ་ན་མེ་ལྕེའི་དབུགས་འབྱུང ། བཞི་པ་ན་ཤ་དང་ཁྲག་ཟ་བ་ཡོང ། དེ་སྒྲུབ་པའི་ཐབས་བཤད་ཀྱི། ལེགས་པར་ཉོན་ལ་ཡིད་ལ་ཟུངས་ཤིག་།རྡོ་རྗེ་འཛིན་པའི་ཏིང་འཛིན་གྱིས། །སྔགས་ཀྱི་རྒྱལ་པོ་འབུམ་བཟླས་ལ། །འབྱུང་\?\བཞི་ཡི་དཀྱིལ་འཁོར་བྲི། །དེ་ཡི་སྟེང་དུ་ཁྲག་ཆེན་གྱིས། །པདྨ་འདབ་མ་བཅུ་དྲུག་པ། །བཙོན་དོང་ཚུལ་དུ་བྲི་བར་བྱ།། 360a ༄#། །དར་སྔོན་དེ་ཡི་ནང་དུ་བཏིང ། །དབུས་སུ་མི་ཡི་ཤ་དང་ཁྲག་།དང་པོ་ཁྱི་སྟེ་གཉིས་པ་ཕག་།གསུམ་པར་རྣ་ཅན་ཟངས་གཙུག་ཕུད། །ལྔ་པར་སྐད་ཅན་དྲུག་པར་ར། །བདུན་པར་སྐྱེ་གཉིས་བརྒྱད་པར་གླང ། །གཡས་ཀྱི་ཕྱོགས་ནས་བསྐོར་བ་འོ། །མ་ཧེ་ལུག་དང་སྤྲེ་འུ་དང ། །གཡོན་གྱི་ཕྱོགས་ནས་བསྐོར་བ་འོ། །དེ་ནི་དབུལ་བའི་དམ་ཚིག་གོ་།ཁྲག་དང་དུག་དང་སྐེ་ཚེ་ཡིས། །ནམ་གྱི་ཕྱེད་ཀྱི་དུས་དག་ཏུ། །དུར་ཁྲོད་རས་ལ་འདི་ལྟར་བྲི། །ཞལ་བརྒྱད་ཕྱག་སྟོང་ཡང་ན་བཅུ། །ཞལ་བཞི་དང་པོ་ཞི་བ་སྟེ། །གཉིས་པ་དམར་པོ་ཆུ་སྲིན་ནོ། །གསུམ་པ་ཁྲོ་ནག་ཡིད་དང་ཁྲོ། །བཞི་པ་ཡི་དྭགས་མགོ་ཡིན་ནོ། །སྐྲ་ནི་གྱེན་བརྫེས་ཞལ་དང་མཚུངས། །སྤྲུལ་པ་བྱ་རྒོད་ཁྲ་དང་སྤྱང ། །དེ་ཡི་མགོ་ཅན་བྲི་བར་བྱ། །དགུག་གཞུག་དབང་ནི་བསྐྲད་པར་བྱའོ། །འདི་ནི་བསྟེན་པའི་དམ་ཚིག་གོ་།བསྙེན་པའི་དམ་ཚིག་གཉིས་དག་གིས། །གསུམ་རྒྱལ་དག་ལས་ཤེས་པར་བྱ། །ོཾ་ཡཀྵ་ཧ་ས་ཧ་ས་ད་ར་ད་ར་ཧཱུཾ། ཁྲ་དང་སྤྱང་ཀི་ཁྱི་ལ་སོགས། །རྨི་ལམ་དུ་འམ་དངོས་སུ་འབྱུང ། །དེ་ནས་མཆོད་པའི་དམ་རྫས་ཀུན། །བསྒྲུབ་བྱའི་རྫས་དང་བསྲེས་བྱས་ལ། །གཟུགས་བརྙན་བྱས་ལ་ཐོད་པར་གཞུག་།མར་ངོ་གནོད་སྦྱིན་གཟུགས་ཀྱིས་མཆོད། །ོཾ་ཡཀྵ་མཱ་ར་ཡ་མཱ་ར་ཡ། ཨ་པྲ་ཏི་ཧ་བ་ལ་བ་རཱ་ཀྲ་མཱ་ཡ་ཕཊ། སརྦ་ཤ་ཏྲཱུཾ་སཾ་གྷ་བི་ནཱ་ཤ་ཀ་རཱ་ཡ་ 360b ཕཊ།་ནཱི་ལཱཾ་བ་ར་དྷ་ར་བཛྲ་པཱ་ནི་རཱཿ ཛྙཱ་པ་ཡ་ཏི་མཱ་ར་ཡ་ཙིཏྟ་ལ་ཕཊ། དེས་ཀྱང་གྲུབ་པར་མ་གྱུར་ན། །གཟུགས་བརྙན་རྡུལ་ལ་སྦྱིན་སྲེག་བྱ། །ལས་སྐྱེས་གཟུགས་བརྙན་གོང་བུར་གཞུག་།དེས་ཀྱང་གྲུབ་པར་མ་གྱུར་ན། །ོཾ་ཡཀྵ་མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། ཙིཏྟ་ལ་རྦད་རྦད། ཕྱག་གི་རྡོ་རྗེས་བསྣུན་པར་བྱ། །དེས་ཀྱང་གྲུབ་པར་མ་གྱུར་ན། །ནཱི་ལཱཾ་བ་ས་ནཱ་ཡ་ཕཊ། སྟོང་པ་ཉིད་དུ་བསྒོམ་པར་བྱ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་ངོ་མཚར་ནས་ཆེད་དུ་བརྗོད་པ། ཟུང་དུ་འབྲེལ་བར་གནས་གྱུར་པ། །ཡཾ་ལས་རླུང་སྟེ་པཾ་ལས་པད། །འཆི་བ་ཞེས་བྱའི་རྣམ་རྟོག་འདི། །བདེ་བ་ཅན་དུ་འགྲོ་བར་འགྱུར། །རྡོ་རྗེས་འོག་གི་རྒྱུད་ལས། གནོད་སྦྱིན་སྒྲུབ་པའི་ལེའུ་སྟེ་ལྔ་པའོ།། །།དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་རྡོ་རྗེ་འཆང་ལ་གསོལ་བ་བཏབ་པ། སྙིང་ནས་སློབ་དཔོན་སྨོད་པ་ལ། །ཀླུ་གཞུག་པ་ནི་ཇི་ལྟར་ལགས། །རྡོ་རྗེ་ཅན་གྱིས་བཤད་དུ་གསོལ། །ཀླུའི་ལག་ན་ནད་བཅུ་གཅིག་ཡོད་དེ། མཛེ་དང ། མཛའ་ཏོ་དང ། ཀ་ཏ་མ་དང ། ཀ་ཤེ་དང ། འབྲས་དང ། ཕོལ་དང ། ཤུ་བ་དང ། སྐེམ་པ་དང ། གཡན་པ་དང ། དམུ་ཆུ་དང ། གག་པའོ། །ཀླུའི་གནས་ནི། ས་འོག་གི་རིམ་པ་བདུན་ནོ། །ཀླུ་བྲན་ནི། འཛམ་བུའི་གླིང་ན་ཡང་ཡོད་དོ། །འཁོར་ནི་རྣམ་པ་བཞི་དག་གིས། །གཙང་མའི་གོས་དག་གྱོན་ནས་ནི། །དཀར་གསུམ་དག་ཀྱང་བཟའ་བར་བྱ། 361a ༄#། །སྔགས་རྒྱལ་ཉིས་འབུམ་བཟླས་བྱས་ལ། །དཀྱིལ་འཁོར་ཙནྡན་གུར་གུམ་བྱུག་།པདྨ་འདབ་བརྒྱད་བྲི་བྱ་སྟེ། །བདག་ཉིད་ལག་ན་རྡོ་རྗེ་ལ། །ཀླུ་ཆེན་བརྒྱད་ཀྱིས་བསྐོར་བ་བྲི། །དེ་ལ་སོགས་པ་བཤད་ཟིན་ཏོ། །དཀྱིལ་འཁོར་གྱི་ནི་ནུབ་ཕྱོགས་སུ། །ཀླུ་ཡི་གཟུགས་གཅིག་བརྩམ་བྱ་སྟེ། །རིན་ཆེན་ལྔ་འམ་གླ་རྩི་འམ། །མཆོད་པའི་རྫས་ནི་འོ་མ་སོགས། །དང་པོ་འདས་པའི་མཆོད་པ་བྱ། །སྤྱན་དྲང་མཆོད་དང་བསྟོད་པ་ནི། །ཆོ་ག་བཞིན་དུ་བྱ་བ་འོ། །ཀླུ་ཡི་སྙིང་གར་ཧཱུཾ་བསྒོམས་ལ། །འོད་ཟེར་རྣམ་པ་གསུམ་དག་གིས། ཀླུ་ཆེན་གནས་ནས་དགུག་པར་བྱ། །གཟུགས་བརྙན་དེ་ལ་བསྟིམས་བྱས་ལ། །མཆོད་པ་དག་གིས་མཆོད་པར་བྱ། །གཟུགས་བརྙན་གཡོ་བ་འབྱུང་བ་ན། །སྡང་བའི་ལུས་ལ་གཞུག་བྱ་སྟེ། །དབང་པོ་བརྒྱད་ནས་གཞུག་བྱ་སྟེ། །བརྒྱད་ཆ་ཐ་མའི་དུས་དག་ཏུ། །འོ་མ་གླ་རྩི་ཁ་ར་ཡིས། །ལམ་ནི་དྲང་པོར་དྲངས་བྱས་ལ། །གོང་བུ་དགུག་པའི་སྦྱོར་བ་ཡིས། །དེ་ལ་ཀླུ་ཆེན་གཞུག་པར་བྱ། །སྒྲུབ་པ་པོ་ཡིས་གུ་གུལ་བསྟེན། །གཟུགས་ལ་ཕུར་བུས་གདབ་པར་བྱ། །དེས་ཀྱང་གྲུབ་པར་མ་གྱུར་ན། །ལྷ་ཡི་རྣམ་པ་ཉིད་དག་ལ། །སྤོགས་པ་དག་གི་ཆོ་ག་བཞིན། །ཏདྱ་ཐཱ། ཧཱུཾ་ཕཊ། ནཱ་ག་བི་དཱ་ར་ཎཱ་ཡ་ཧཱུཾ། ནཱ་ག་བི་དཱ་ར་ཎཱ་ཡ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། སརྦ་ཤ་ཏྲུཾ་སཾ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱཾ་བ་ར་དྷ་ར་ 361b བཛྲ་པཱ་ཎི་རཱ་ཛྙཱ་པ་ཡ་ཏི་ཤ་ཏྲུཾ་ཙིཏྟ་མཱ་ར་ཡ་ཕཊ། ཨོཾ་ནཱ་ག་གྷ་གྷ། གྷཱ་ཏ་ཡ་གྷཱ་ཏ་ཡ། སརྦ་དུཥྚན་ཕཊ། ཀཱི་ལཱ་ཡ་ཀཱི་ལཱ་ཡ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ། བཛྲ་དཾཥྚོད་ཨཱ་ཛྙཱ་པ་ཡ་ཏི་ནཱ་ག་ཀཱ་ཡ་བཱཀ་ཙི་ཏ་བཛྲ་ཀཱི་ལ་ཡ་ཕཊ། ནཱ་ག་བི་དཱ་རཱ་ཡ་ཕཊ། ནཱ་ག་ཨུཏ་སཱ་ད་ནཱ་ཡ་ཕཊ། ནཱི་ལཱཾ་བ་ས་ནཱ་ཡ་ཕཊ། སྔགས་འདི་གསུངས་པ་ཙམ་གྱིས་ཁམས་གསུམ་ན་གནས་པའི་སེམས་ཅན་རྣམས་འདར་ཞིང་བརྒྱལ་བར་གྱུར་ཏོ། །དེ་ནས་བཅོམ་ལྡན་འདས་བརྒྱལ་བ་སེལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཨཱ་བེ་ཤ་གསུངས་པས་ཐམས་ཅད་ཀྱང་དབུགས་དབྱུང་ཞིང་བརྒྱལ་བ་སངས་ནས་འདར་ཞིང་ཐལ་མོ་སྦྱར་ནས་ཆེད་དུ་བརྗོད་པ། སངས་རྒྱས་ཀུན་གྱིས་དབང་བསྐུར་ཞིང ། །གདུག་པ་ཐམས་ཅད་འཇོམས་མཛད་པའི། །སྔགས་དང་ཏིང་འཛིན་ནུས་པ་ཡིས། །སངས་རྒྱས་ཀྱིས་ཀྱང་གཞལ་མི་ནུས། །རྡོ་རྗེ་ས་འོག་གི་རྒྱུད་ལས། ཀླུ་སྒྲུབ་པའི་ལེའུ་སྟེ་དྲུག་པའོ།། །།དེ་ནས་གཏམ་རྒྱུད་བཤད་པར་བྱ་སྟེ། བཅོམ་ལྡན་འདས་རྡོ་རྗེ་འཆང་ཆེན་པོས་ལྷ་གནས་རྣམ་པ་བརྒྱད་དུ་རྒྱུད་ཐམས་ཅད་བསྡུས་ནས་རི་རབ་ཀྱི་བྱང་ཕྱོགས་སུ་འཇིག་རྟེན་གསུམ་འདུལ་བའི་རྒྱུད་གསུངས་སོ། །དེ་ནས་ཞལ་གསུམ་པ་ཕྱག་དྲུག་པའི་སྔགས་གསུངས་པས་ལྷ་དང་ལྷ་མ་ཡིན་གྱི་རྣ་བར་སོང་ངོ ། །རིག་སྔགས་འཆང་དེ་རྣམས་ངོ་མཚར་ནས་བསྟོད་པ་བྱས་སོ། །དེ་ནས་གླིང་གི་སྙིང་པོར་འཁོར་གྱི་སྙིང་པོ་གནོད་ 362a ༄#། །སྦྱིན་གྱི་ཆ་འཛིན་པ། བྱང་ཆུབ་སེམས་དཔའ་ཕྱག་ན་རྡོ་རྗེ་བྱོན་ནས་མར་གྱི་སྙིང་པོ་དང་འདྲ་བ་དམ་པའི་ཆོས་རྒྱུད་ཐམས་ཅད་བསྡུས་སོ། །ཉིད་ཀྱི་ལས་གཉིས་ཀྱི་བདག་ཉིད་ཅན་རྒྱུད་སྡེ་སྟོང་ཕྲག་བརྒྱད་ཅུ་ཡང་དག་གསུངས་སོ། །དེ་ནས་འཇིག་རྟེན་དུ་གནོད་སྦྱིན་རྣམས་ཀྱིས་མཆོད་དེ་སྒྲོན་མ་ཟ་བ་རྡོ་རྗེས་མགོ་ལུས་ཕྲལ་ཏེ་ཉམས་པར་བྱས་སོ། །དེ་ནས་ཀླུ་འདུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ས་འོག་རིམ་པ་བདུན་དུ་བྱོན་ནས་རྡོ་རྗེ་ས་འོག་གི་རྒྱུད་གསུངས་སོ། །རྡོ་རྗེ་ས་འོག་གི་རྒྱུད་ལས། གཏམ་རྒྱུད་ཀྱི་ལེའུ་སྟེ་བདུན་པའོ།། །།རྡོ་རྗེ་ས་འོག་གི་རྒྱུད་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀ་ར་དང ། སྒྲ་སྒྱུར་གྱི་ལོ་ཙཱ་བ་དགེ་སློང་བྱའི་གདོང་པ་ཅན་གྱིས་བསྒྱུར་བའོ།། |