rKTs


H47

(e-text produced by ACIP)

see text in transliteration
151a
།རྒྱ་གར་སྐད་དུ། ཨཱརྱ་ཏ་ཐཱ་ག་ཏཱ་ཨ་ཙི་ན་ཏྱ་གུ་ཧྱ་ནི་ར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་
151b
དེ་བཞིན་གཤེགས་པའི་གསང་བ་བསམ་གྱིས་མི་ཁྱབ་པ་བསྟན་པ་ཞེས་བྱ་བ་ཐེག་པ་ཆེན་པོ་མདོ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ། དགེ་སློང་བཞི་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པས་མངོན་པར་ཤེས་པ་ཕལ་ཆེར་སངས་རྒྱས་ཀྱི་ཞིང་གཞན་ནས་འདུས་པའི་བྱང་ཆུབ་སེམས་དཔའ་བརྒྱད་ཁྲི་བཞི་སྟོང་དང་ཐབས་གཅིག་ཏུ་བཞུགས་ཏེ། ཐམས་ཅད་ཀྱང་བཟོད་པ་ཐོབ་པ། ཕྱིར་མི་ལྡོག་པ། སྐྱེ་བ་གཅིག་གིས་ཐོགས་པ། གཟུངས་ཐོབ་པ། ཏིང་ངེ་འཛིན་ཐོབ་པ། སྤོབས་པ་ཐོགས་པ་མེད་པ། ཕྱོགས་བཅུ་མཐའ་ཡས་པའི་སངས་རྒྱས་ཀྱི་ཞིང་དུ་འགྲོ་བ་ལ་མཁས་པ། མངོན་པར་ཤེས་པའི་ཡེ་ཤེས་ཀྱིས་རྣམ་པར་རྩེན་པ། ཕས་ཀྱི་རྒོལ་བ་ཐམས་ཅད་ཀྱིས་ཟིལ་གྱིས་མི་ནོན་པ།་བདུད་དང་ཕྱིར་རྒོལ་བ་བཅོམ་པ། སེམས་ཅན་ཐམས་ཅད་ཀྱི་སེམས་དང ། བསམ་པ་དང ། སྤྱོད་པའི་སྒྲུབ་པ་ཤེས་པ། དབང་པོ་མཆོག་དང་མཆོག་མ་ཡིན་པ་ཤེས་པ་ལ་མཁས་པ། ཕ་རོལ་ཏུ་ཕྱིན་པ་ཐམས་ཅད་ཀྱི་ཚུལ་ལ་འཇུག་པར་རབ་ཏུ་ཞུགས་པ། ཐབས་ལ་མཁས་པ་དམ་པའི་ཕ་རོལ་ཏུ་སོན་པ། སངས་རྒྱས་ཐམས་ཅད་ཀྱིས་བསྟོད་ཅིང་བསྔགས་
152a
༄#། །ཏེ་བཀུར་ལ་རབ་ཏུ་བསྔགས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་བྱང་ཆུབ་ཀྱི་ལམ་མཐའ་ཡས་པ་མཐར་གཏུགས་པ། སེམས་དང ། ཆུ་དང ། མེ་དང ། རླུང་དང་མཚུངས་པ། ནམ་མཁའ་ལྟར་མཐའ་ཡས་པའི་བྱམས་པ་བསྒོམ་པའི་རྣལ་འབྱོར་ལ་བརྩོན་པ། ཆགས་པའི་གནས་སྒྲིབ་པ་དང ། ཆོད་པ་དང ། ཀུན་ནས་སྡང་བ་ཐམས་ཅད་ལས་ཡང་དག་པར་འདས་པ། མཐུ་བོ་ཆེའི་ལུས་ཐོབ་པ་རྡོ་རྗེ་ལྟར་སྲ་ཞིང་མི་ཚུགས་པའི་སེམས་དང་ལྡན་པ། སེང་གེའི་སྒྲ་ཆེན་པོ་སྒྲོགས་པ། འཁོར་ཐམས་ཅད་ཟིལ་གྱིས་གནོན་པ་ལ་འཇིགས་པ་མེད་པར་མཁས་པ། ཟླ་བ་དང་ཉི་མ་མོག་མོག་པོར་བྱེད་པ། ཆོས་ཐམས་ཅད་ཇི་ལྟ་བ་བཞིན་དུ་དུས་གསུམ་མཉམ་པ་ཉིད་ཐོབ་པ། །ཆོས་ཟབ་མོ་རྣམ་པར་ངེས་པ་ཡེ་ཤེས་ཀྱིས་སྟོན་པ་ལ་མཁས་པ། རྟེན་ཅིང་འབྲེལ་བར་འབྱུང་བ་ལ་ཞུགས་པས་རྟག་པ་དང་ཆད་པར་ལྟ་བའི་མཐའ་གཉིས་ཡོངས་སུ་སྤངས་པ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་དང ། མཉམ་པར་གཞག་པ་དང ། ལྡང་བར་ཤེས་པ་ལ་མཁས་པ། ཕྱོགས་བཅུར་སྒྲ་གྲགས་པ། དམ་པའི་ཆོས་དཀོན་མཆོག་གི་མཛོད་ཡང་དག་པར་འཛིན་པ། དཀོན་མཆོག་གསུམ་གྱི་རིགས་རྒྱུན་མི་འཆད་པར་བྱེད་པ། བསོད་ནམས་དང་ཡེ་ཤེས་ཀྱི་
152b
ཚོགས་དཔག་ཏུ་མེད་པ་བསགས་པ་ཤ་སྟག་ལ། འདི་ལྟ་སྟེ། བྱང་ཆུབ་སེམས་དཔའ་ཟླ་བའི་བླ་མ་ཞེས་བྱ་བ་དང ། ཟླ་བའི་ཏོག་དང ། རི་བོང་ཅན་གྱི་ཏོག་དང ། འོད་ཀྱི་ཏོག་དང ། འོད་དཔལ་དང ། དཔལ་བརྩེགས་དང ། དཔལ་སྦས་དང ། མཐུ་བོ་ཆེ་དང ། ཀླུ་དགའ་དང ། ཀླུའི་བླ་མ་དང ། ཀླུས་བྱིན་དང ། གཟུགས་འཛིན་དང ། མྱ་ངན་གྱི་ལྷ་དང ། ཡོན་ཏན་སྒྲོན་མའི་རྒྱལ་པོ་དང ། ལག་ན་སྒྲོན་མ་དང ། རྟག་ཏུ་ལག་འདེགས་དང ། རྟག་ཏུ་ལག་བརྐྱང་དང ། ལག་ན་ཕྱག་རྒྱ་རིན་པོ་ཆེ་དང ། ལག་ན་རིན་པོ་ཆེ་དང ། ཀུན་ཏུ་སྣང་དང ། སྐར་མའི་རྒྱལ་པོ་དང ། ལག་ན་རྡོ་རྗེ་དང ། རྡོ་རྗེའི་བློ་གྲོས་དང ། རྡོ་རྗེའི་བློ་གྲོས་ཆེན་པོ་དང ། རྡོ་རྗེས་རྣམ་པར་གནོན་པ་དང ། མི་གཡོ་བའི་གོམ་པར་འགྲོ་བ་དང ། འཇིག་རྟེན་གསུམ་རྣམ་པར་གནོན་པ་དང ། མཐའ་ཡས་རྣམ་པར་གནོན་དང ། བློ་གྲོས་མཐའ་ཡས་དང ། བློ་གྲོས་རྒྱ་མཚོ་དང ། བརྟན་པའི་བློ་གྲོས་དང ། ནོར་གྱི་བློ་གྲོས་དང ། བླ་མའི་བློ་གྲོས་དང ། ཁྱད་པར་བློ་གྲོས་དང ། འཕེལ་བའི་བློ་གྲོས་དང ། རྟག་ཏུ་མོས་པ་དང ། རྟག་ཏུ་དགོད་ཅིང་རབ་ཏུ་དགའ་བའི་དབང་པོ་དང ། ངན་སོང་སྤོང་བ་དང ། སྒྲིབ་པ་ཐམས་ཅད་རྣམ་པར་སེལ་བ་དང ། ཤིན་ཏུ་སྦྱངས་པ་དྲི་མ་མེད་པའི་གཟི་བརྗིད་འཆང་བ་དང ། བརྩོན་འགྲུས་འབར་བ་དང ། ཤེས་རབ་བརྩེགས་དང ། རྟག་པར་ལྟ་བ་དང ། སྤྱན་རས་གཟིགས་དབང་ཕྱུག་དང ། མཐུ་ཆེན་ཐོབ་དང ། ལྷུན་པོ་
153a
༄#། །བརྩེགས་དང ། ནམ་མཁའ་མཛོད་དང ། མི་འཛུམ་པ་དང ། བརྗོད་མེད་དང ། རིན་ཆེན་དམ་པ་དང ། རིན་ཆེན་སེམས་པ་དང ། ལེགས་པར་སེམས་པ་དང ། དོན་ལེགས་པར་རྣམ་པར་བསམས་པ་དང ། ཤིན་ཏུ་ངེས་པའི་བློ་གྲོས་དང ། གཟུངས་ཀྱི་དབང་ཕྱུག་གི་རྒྱལ་པོ་དང ། ས་འཛིན་དང ། བཀོད་པའི་རྒྱལ་པོ་དང ། ཞིང་ཡང་དག་པར་བརྒྱན་པ་དང ། རིན་ཆེན་འབྱུང་གནས་དང ། ཕུག་སྦས་དང ། དབང་པོའི་ལྷ་དང ། ཆུ་ལྷ་དང ། ཚངས་པ་དྲ་བ་ཅན་དང ། བྱང་ཆུབ་སེམས་དཔའ་དྲ་བ་ཅན་གྱི་འོད་ཅེས་བྱ་བ་དང ། ལྷའི་ཅོད་པན་དང ། ལག་བཟང་དང ། མིག་བཟང་དང ། སྤོས་ཀྱི་གླང་པོ་དང ། བ་གླང་སྤོས་ཀྱི་གླང་པོ་ཆེ་དང ། སེང་གེའི་ཏོག་དང ། དོན་འགྲུབ་བློ་གྲོས་དང ། ཁ་ལོ་སྒྱུར་དང ། ཞི་བའི་བློ་གྲོས་དང ། བྱམས་པ་དང ། འཇམ་དཔལ་གཞོན་ནུར་གྱུར་པ་དང ། དེ་དག་ལ་སོགས་པ་བྱང་ཆུབ་སེམས་དཔའ་བརྒྱད་ཁྲི་བཞི་སྟོང་དང ། གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། དེ་མ་ཡིན་པའི་ལྷའི་དབང་པོའམ། ཀླུའི་དབང་པོའམ། གནོད་སྦྱིན་གྱི་དབང་པོའམ། དྲི་ཟའི་དབང་པོའམ། ལྷ་མ་ཡིན་གྱི་དབང་པོའམ། ནམ་མཁའ་ལྡིང་གི་དབང་པོའམ། མིའམ་ཅིའི་དབང་པོའམ། ལྟོ་འཕྱེ་ཆེན་པོའི་དབང་པོ་དབང་ཆེ་
153b
བ་དབང་ཆེ་བར་གྲགས་པ་ཡོད་པ་དེ་དག་ཐམས་ཅད་ཀྱང་འཁོར་དེ་ཉིད་དུ་འདུས་པར་གྱུར་པ་ལ་འདི་ལྟ་སྟེ། ཀླུའི་རྒྱལ་པོ་མ་དྲོས་པ་ཞེས་བྱ་བ་དང ། ཀླུའི་རྒྱལ་པོ་རྒྱ་མཚོ་དང ། ཆུ་ལྷ་དང ། གཟི་ཅན་དང ། འཇོག་པོ་དང ། གསེར་མདོག་དང ། ཁ་དོག་མཐའ་ཡས་དང ། ཀླུའི་རྒྱལ་པོ་མཚན་བཟང་དང ། དེ་དག་དང་གཞན་ཡང་ཀླུའི་རྒྱལ་པོ་འཁོར་དང་བཅས་པ་བརྒྱ་སྟོང་ཕྲག་མང་པོ་བཅོམ་ལྡན་འདས་ལ་བལྟ་བ་དང ། ཕྱག་བྱ་བ་དང ། མཆོད་པ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་འཁོར་དེ་ཉིད་དུ་འདུས་པར་གྱུར་ཏོ། །ལྷ་མ་ཡིན་གྱི་དབང་པོ་སྒྲ་གཅན་དང ། ཐགས་བཟང་རིས་དང ། ལག་བཟང་དང ། ས་ལ་དང ། ཏ་ལ་དང ། བདེ་མཆོག་དང ། རབ་སིམ་དང ། ཆེ་རབ་དང ། ལྷ་མ་ཡིན་གྱི་དབང་པོ་གནོད་སྦྱིན་གཞན་དང ། དེ་དག་དང་གཞན་ཡང་ལྷ་མ་ཡིན་གྱི་དབང་པོ་འཁོར་དང་བཅས་པ་བརྒྱ་སྟོང་མང་པོ་བཅོམ་ལྡན་འདས་ལ་བལྟ་བ་དང ། ཕྱག་བྱ་བ་དང ། མཆོད་པ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་འཁོར་དེ་ཉིད་དུ་འདུས་པར་གྱུར་ཏོ། །རྒྱལ་པོ་མ་སྐྱེས་དགྲ་ཡང་བཙུན་མོའི་འཁོར་དང་བཅས། རང་གི་གཉེན་དང་འཁོར་དང་བཅས་ཏེ། བཅོམ་ལྡན་འདས་ལ་བལྟ་བ་དང།་ཕྱག་བྱ་བ་དང ། མཆོད་པ་དང ། བསྙེན་བཀུར་བྱ་དང ། ཆོས་མཉན་པའི་ཕྱིར་འཁོར་དེ་ཉིད་དུ་འདུས་པར་གྱུར་ཏོ། །དེ་མ་ཡིན་པ་གཞན་ཡང་འཁོར་བཞི་པོ་དགེ་སློང་དང ། དགེ་
154a
༄#། །སློང་མ་དང ། དགེ་བསྙེན་དང ། དགེ་བསྙེན་མ་རྣམས་ཀྱང་བཅོམ་ལྡན་འདས་ལ་བལྟ་བ་དང ། ཕྱག་བྱ་བ་དང ། མཆོད་པ་དང ། བསྙེན་བཀུར་བྱ་བ་དང།་ཆོས་མཉན་པའི་ཕྱིར་འཁོར་དེ་ཉིད་དུ་འདུས་པར་གྱུར་ཏོ། །ས་བླ་ན་སྤྱོད་པའི་ལྷའི་བུ་རྣམས་དང ། འདོད་པ་ན་སྤྱོད་པ་དང ། གཟུགས་ན་སྤྱོད་པ་དང ། གནས་གཙང་མའི་རིས་ཀྱི་ལྷའི་བུ་རྣམས་ཀྱང་བཅོམ་ལྡན་འདས་ལ་བལྟ་བ་དང ། ཕྱག་བྱ་བ་དང ། མཆོད་པ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་འཁོར་དེ་ཉིད་དུ་འདུས་པར་གྱུར་ཏོ། །དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ཏེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཚོགས་རྣམ་པར་དག་པའི་སྒོ་བསྡུ་བ་ཡོངས་སུ་བསྐང་བའི་ཕྱིར་ཆོས་སྟོན་ཏོ། །འདི་ལྟ་སྟེ། བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཚོགས་ནི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཚོགས་ནི་སྨོན་ལམ་ཡོངས་སུ་རྫོགས་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བཟོད་པའི་ཚོགས་ནི་མཚན་དང་དཔེ་བྱད་བཟང་པོ་ཡོངས་སུ་རྫོགས་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཚོགས་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །
154b
བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཚོགས་ནི་ཅང་ཤེས་ཀྱི་སེམས་སུ་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ཚོགས་ནི་ཉོན་མོངས་པ་ཐམས་ཅད་སྤོང་བར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཆོས་བསྟན་པའི་ཚོགས་ནི་སྤོབས་པ་ཐོགས་པ་མེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བསོད་ནམས་ཀྱི་ཚོགས་ནི་སེམས་ཅན་ཐམས་ཅད་ཉེ་བར་འཚོ་བར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཚོགས་ནི་ཐོགས་པ་མེད་པའི་ཡེ་ཤེས་སུ་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཞི་གནས་ཀྱི་ཚོགས་ནི་སེམས་ལས་སུ་རུང་བར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ལྷག་མཐོང་གི་ཚོགས་ནི་ཐེ་ཚོམ་དང་བྲལ་བར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བྱམས་པའི་ཚོགས་ནི་ཞེ་འགྲས་པ་མེད་པའི་སེམས་སུ་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྙིང་རྗེའི་ཚོགས་ནི་ཡོངས་སུ་མི་སྐྱོ་བའི་སེམས་སུ་འགྱུར་རོ། །དགའ་བའི་ཚོགས་ནི་ཆོས་ཀྱིས་ཀུན་དགའ་ལ་དགའ་ཞིང་མོས་པར་འགྱུར་རོ། །བཏང་སྙོམས་ཀྱི་ཚོགས་ནི་རྗེས་སུ་ཆགས་པ་དང ། ཁོང་ཁྲོ་བ་སྤོང་བར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཆོས་མཉན་པའི་ཚོགས་ནི་སྒྲིབ་པ་སྤོང་བར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་མངོན་པར་འབྱུང་བའི་ཚོགས་ནི་ཡོངས་སུ་འཛིན་པ་ཐམས་ཅད་འདོར་བར་འགྱུར་རོ། །བྱང་ཆུབ་
155a
༄#། །སེམས་དཔའ་རྣམས་ཀྱི་དགོན་པ་ལ་གནས་པའི་ཚོགས་ནི་བྱས་པའི་ལས་ཆུད་མི་ཟ་བར་འགྱུར་རོ། །དྲན་པའི་ཚོགས་ནི་གཟུངས་ཐོབ་པར་འགྱུར་རོ། །བློ་གྲོས་ཀྱི་ཚོགས་ནི་བློ་རབ་ཏུ་འབྱེད་པར་འགྱུར་རོ། །རྟོགས་པའི་ཚོགས་ནི་དོན་རྟོགས་པའི་རྗེས་སུ་འགྲོ་བར་འགྱུར་རོ། །དྲན་པ་ཉེ་བར་བཞག་པའི་ཚོགས་ནི། ལུས་དང་ཚོར་བ་དང་སེམས་དང་ཆོས་ལ་སོ་སོར་རྟོག་པར་འགྱུར་རོ། །ཡང་དག་པར་སྤོང་བའི་ཚོགས་ནི་མི་དགེ་བའི་ཆོས་ཐམས་ཅད་སྤོང་བ་དང ། དགེ་བའི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །རྫུ་འཕྲུལ་གྱི་རྐང་པའི་ཚོགས་ནི་ལུས་དང་སེམས་ཡང་བར་འགྱུར་རོ། །དབང་པོ་ལྔའི་ཚོགས་ནི་དབང་པོ་མཆོག་དང་མཆོག་མ་ཡིན་པ་ཤེས་པར་འགྱུར་རོ། ། སྟོབས་ལྔའི་ཚོགས་ནི་ཉོན་མོངས་པ་ཐམས་ཅད་ཀྱིས་མི་རྫི་བར་འགྱུར་རོ། །བྱང་ཆུབ་ཀྱི་ཡན་ལག་གི་ཚོགས་ནི་ཆོས་ཐམས་ཅད་ཇི་ལྟ་བ་བཞིན་དུ་ཁོང་དུ་ཆུད་པར་འགྱུར་རོ། ། ལམ་གྱི་ཚོགས་ནི་ལམ་ངན་པ་ཐམས་ཅད་ལས་ཡང་དག་པར་འདའ་བར་འགྱུར་རོ། །བདེན་པའི་ཚོགས་ནི་མི་འཁྲུགས་པའི་ཆོས་ཉིད་དུ་འགྱུར་རོ། །སོ་སོ་ཡང་དག་པར་རིག་པའི་ཚོགས་ནི་སེམས་ཅན་ཐམས་ཅད་ཀྱི་ཐེ་ཚོམ་གཅོད་པར་འགྱུར་རོ། །སྟོན་པའི་ཚོགས་ནི་གཞན་དག་ལ་རག་མ་ལས་པའི་ཡེ་ཤེས་སུ་འགྱུར་རོ། །དགེ་བའི་བཤེས་གཉེན་
155b
གྱི་ཚོགས་ནི་ཡོན་ཏན་ཐམས་ཅད་སྐྱེ་བའི་སྒོར་འགྱུར་རོ། །བསམ་པའི་ཚོགས་ནི་འཇིག་རྟེན་ཐམས་ཅད་ལ་མི་སླུ་བར་འགྱུར་རོ། །ལྷག་པའི་བསམ་པའི་ཚོགས་ནི་ཁྱད་པར་དུ་འགྲོ་བར་འགྱུར་རོ། །སྦྱོར་བའི་ཚོགས་ནི་ཅི་རྩོམ་པ་ཐམས་ཅད་ཉམས་འོག་ཏུ་ཆུག་པར་འགྱུར་རོ། །ནང་དུ་ཡང་དག་འཇོག་གི་ཚོགས་ནི་ཇི་སྐད་ཐོས་པའི་ཆོས་ཆུད་མི་གསོན་པར་འགྱུར་རོ།། བསྡུ་བའི་དངོས་པོའི་ཚོགས་ནི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །དམ་པའི་ཆོས་ཡོངས་སུ་འཛིན་པའི་ཚོགས་ནི་དཀོན་མཆོག་གསུམ་གྱི་རིགས་རྒྱུན་མི་གཅོད་པར། འགྱུར་རོ། །བསྔོ་བ་ལ་མཁས་པའི་ཚོགས་ནི་སངས་རྒྱས་ཀྱི་ཞིང་ཡོངས་སུ་དག་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པའི་ཚོགས་ནི་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་རོ། །དེ་ལྟར་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཚོགས་རྣམ་པར་དག་པའི་སྒོ་བསྡུ་བ་ཞེས་བྱ་བའི་ཆོས་ཀྱི་རྣམ་གྲངས་རྒྱས་པར་བཤད་དོ། །ཚོགས་རྣམ་པར་དག་པའི་སྒོ་བསྡུ་བ་བསྟན་པ་འདི་བཤད་པའི་ཚེ། བཅོམ་ལྡན་འདས་ཀྱི་གཡས་ཕྱོགས་ན། གསང་བ་པའི་བདག་པོ་ལག་ན་རྡོ་རྗེས་རྡོ་རྗེ་ཐོགས་ནས་འདུག་པར་གྱུར་ཏོ། །དེ་ནས་བཅོམ་ལྡན་འདས་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །ཇི་ཙམ་དུ་དེ་བཞིན་གཤེགས་པས་བྱང་ཆུབ་སེམས་
156a
༄#། །དཔའ་སེམས་དཔའ་ཆེན་པོ་རྣམས་ཀྱི་ཚོགས་རྣམ་པར་དག་པའི་སྒོ་བསྡུ་བ་ཞེས་བགྱི་བའི་ཆོས་ཀྱི་རྣམ་གྲངས་འདི་ལེགས་པར་གསུངས་པ་ནི། བཅོམ་ལྡན་འདས། ངོ་མཚར་ལགས་སོ། །ཡང་བཅོམ་ལྡན་འདས་ཀྱིས་ཇི་སྐད་བཤད་པའི་དོན་བདག་གིས་འཚལ་བ་ལྟར་ན། བདག་འདི་སྙམ་དུ་བགྱིད་དེ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཚོགས་དེ་དག་ཐམས་ཅད་ནི་བསོད་ནམས་ཀྱི་ཚོགས་དང ། ཡེ་ཤེས་ཀྱི་ཚོགས་ཀྱི་ནང་དུ་འདུས་ཤིང་རྗེས་སུ་ཞུགས་པར་འཚལ་བར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བསོད་ནམས་ཀྱི་ཚོགས་ནི་རྣམ་པར་སྒྲུབ་པ་ཐམས་ཅད་རྣམ་པར་བསྒྲུབ་བོ། །ཡེ་ཤེས་ཀྱི་ཚོགས་ནི་སེམས་ཅན་ཐམས་ཅད་ལེགས་པར་བཤད་པས་ཚིམ་པར་བགྱིད་དོ། །བཅོམ་ལྡན་འདས། དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་བསོད་ནམས་ཀྱི་ཚོགས་དང ། ཡེ་ཤེས་ཀྱི་ཚོགས་ལ་བརྩོན་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། བསོད་ནམས་ཀྱི་ཚོགས་ཀྱིས་ནི། བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བགྱིད་དོ། །ཡེ་ཤེས་ཀྱི་ཚོགས་ཀྱིས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བགྱིད་དེ།
156b
བྱང་ཆུབ་སེམས་དཔའི་ལམ་འདི་གཉིས་ནི་ལམ་ཐམས་ཅད་སྡུད་པར་འགྱུར་བ་ལགས་སོ། །བྱང་ཆུབ་སེམས་དཔའ་ལམ་ལ་གནས་པ་ནི་བདུད་སྡིག་ཅན་གྱིས་ཐུལ་བར་དཀའོ། །བདུད་ཀྱི་ལས་ལས་ཡང་དག་པར་འདས་པའི་བྱང་ཆུབ་སེམས་དཔའ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཏེ། ཕྱིར་མི་ལྡོག་པའི་བྱང་ཆུབ་སེམས་དཔའ་ལ་ནི་སངས་རྒྱས་བཅོམ་ལྡན་འདས་རྣམས་དེ་བཞིན་གཤེགས་པའི་གསང་བ་ཐམས་ཅད་སྟོན་ཏེ་མི་འཆབ་བོ། །དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས། གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །གསང་བ་པའི་བདག་པོ་ཁྱོད་ནི། དེ་བཞིན་གཤེགས་པའི་ཞབས་འབྲིང་བ་ཉེ་བ་ན་འདུག་པ་ཡིན་ན། གསང་བ་པའི་བདག་པོ། དེ་བཞིན་གཤེགས་པའི་གསང་བའི་གནས་གང་ཉན་ཐོས་དང ། རངས་སངས་རྒྱས་ཐམས་ཅད་ཀྱི་ས་ཡང་མ་ཡིན་ན། དེ་མ་ཡིན་པའི་སེམས་ཅན་ཐ་མལ་ལྟ་སྨོས་ཀྱང་ཅི་དགོས་པ་ལས་བརྩམས་ཏེ། ཁྱོད་སྤོབས་པར་གྱིས་ཤིག་།དེ་སྐད་ཅེས་སྨྲས་པ་དང ། གསང་བ་པའི་བདག་པོ་ལག་ན་རྡོ་རྗེས་ཅང་མི་སྨྲ་བས་ཁས་བླངས་སོ། །དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་གསང་བ་པའི་བདག་པོ་ལག་ན་རྡོ་རྗེ་ཅང་མི་སྨྲ་བར་ཁས་བླངས་པར་རིག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། གང་དག་ཐོས་པས་བྱང་ཆུབ་སེམས་དཔའ་
157a
༄#། །སེམས་དཔའ་ཆེན་པོ་རྣམས་རབ་ཏུ་དགའ་བར་འགྱུར་ཏེ། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་བསྒྲུབ་པ་དང ། དེ་བཞིན་གཤེགས་པའི་གསང་བ་ཡོངས་སུ་རྫོགས་པར་བགྱི་བའི་སླད་དུ་བརྩོན་པར་བགྱིད་པར་དེ་བཞིན་གཤེགས་པའི་གསང་བ་འཁོར་འདི་ལ་འཆད་པར་གསང་བ་པའི་བདག་པོ་ལག་ན་རྡོ་རྗེ་སྤྲོ་བར་མཛད་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བའི་བདག་པོ། བྱང་ཆུབ་སེམས་དཔའི་གསང་བ་དང ། དེ་བཞིན་གཤེགས་པའི་གསང་བ་འཁོར་འདི་ཉན་པར་འདོད་དེ། ཁྱོད་ལ་ངས་བསྐུལ་གྱི། དེ་བཞིན་གཤེགས་པའི་གསང་བ་ལས་བརྩམས་ཏེ།་འཁོར་འདིར་སྤོབས་པར་གྱིས་ཤིག་།དེ་སྐད་ཅེས་བཀའ་སྩལ་པ་དང ། གསང་བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་སངས་རྒྱས་ཀྱི་མཐུ་དང ། སངས་རྒྱས་ཀྱི་བྱིན་གྱི་རླབས་ཀྱིས་བྱང་ཆུབ་སེམས་དཔའི་གསང་བ་རྣམས་དང ། དེ་བཞིན་གཤེགས་པའི་གསང་བ་རྣམས་ལ་གང་ཅུང་ཟད་འཇུག་པར་བགྱི་བ་ཙམ་ཞིག་བསྟན་པ་བདག་གིས་བསྟན་པར་བགྱིའོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། མཚན་མོ་མུན་པ་མུན་ནག་གི་ནང་ན་མར་མེའི་མཐུས་
157b
གཟུགས་སུ་གྱུར་པའི་རྣམ་པ་ཐམས་ཅད་གདའ་བ་དེ་བཞིན་དུ། བཅོམ་ལྡན་འདས། སངས་རྒྱས་ཀྱི་མཐུ་དང ། སངས་རྒྱས་ཀྱི་བྱིན་གྱི་རླབས་ཀྱིས་བྱང་ཆུབ་སེམས་དཔའི་གསང་བ་རྣམས་དང ། དེ་བཞིན་གཤེགས་པའི་གསང་བ་རྣམས་ལ་གང་ཅུང་ཟད་འཇུག་པར་བགྱི་བ་ཙམ་བསྟན་པར་བགྱིའོ། །དེ་ནས་གསང་བ་པའི་བདག་པོ་ལག་ན་རྡོ་རྗེས། བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །རིགས་ཀྱི་བུ། དེའི་ཕྱིར་ཅི་ནས་བྱང་ཆུབ་སེམས་དཔའི་གསང་བ་རྣམས་དང ། དེ་བཞིན་གཤེགས་པའི་གསང་བ་རྣམས་ཐོས་ནས་མི་དངངས། མི་སྐྲག། སྐྲག་པར་མི་འགྱུར་བར་འཁོར་དེར་ལེགས་པར་འཁོད་ཅིག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ཀྱིས་ཐམས་ཅད་དང་ལྡན་པའི་འཁོར་ལ་སྨྲས་པ། གྲོགས་པོ་དག་།དེ་བཞིན་གཤེགས་པས་བསམ་གྱིས་མི་ཁྱབ་པ་འདི་བཞི་གསུངས་ཏེ། བཞི་གང་ཞེ་ན། འདི་ལྟ་སྟེ། ལས་བསམ་གྱིས་མི་ཁྱབ་པ་དང ། གླུ་བསམ་གྱིས་མི་ཁྱབ་པ་དང ། བསམ་གཏན་བསམ་གྱིས་མི་ཁྱབ་པ་དང ། སངས་རྒྱས་བསམ་གྱིས་མི་ཁྱབ་པའོ། །ཡང་གྲོགས་པོ་དག་།གང་གི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། བསམ་གྱིས་མི་ཁྱབ་པ་འདི་བཞི་རྣམ་པར་བཀོད་དེ། བསམ་གྱིས་མི་ཁྱབ་པ་འདི་བཞིའི་ནང་ན་དེ་བཞིན་
158a
༄#། །གཤེགས་པ་བསམ་གྱིས་མི་ཁྱབ་པ་མཆོག་ཏུ་གསུངས་སོ། །གྲོགས་པོ་དག་།དེ་ལ་ཁྱེད་ཀྱིས་བྱང་ཆུབ་སེམས་དཔའི་བསམ་གྱིས་མི་ཁྱབ་པ་དང ། དེ་བཞིན་གཤེགས་པའི་བསམ་གྱིས་མི་ཁྱབ་པ་ཐོས་ནས། མི་དངང་མི་སྐྲག་སྐྲག་པར་མི་འགྱུར་བར་བྱའོ། །ཐོས་ནས་ལྷག་པར་དགའ་བ་དང ། དད་པ་དང ། མཆོག་ཏུ་དགའ་བ་རྒྱ་ཆེར་བསྐྱེད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ཀྱིས། ཇི་ལྟར་ཐམས་ཅད་དང་ལྡན་པའི་འཁོར་དེ་བཞིན་གཤེགས་པའི་གསང་བ་ཉན་པ་ལ་མོས་པར་གྱུར་ཅིང ། ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་དུ་ལྷའི་མེ་ཏོག་གིས་པུས་མོ་ནུབ་ཙམ་དུ་བཀྲམ་པར་གྱུར་པ་དེ་ལྟ་བུའི་བྱིན་གྱི་རླབས་ཀྱིས་བྱིན་གྱིས་བརླབས་སོ། །དེ་ནས་གསང་བ་པའི་བདག་པོ་ལག་ན་རྡོ་རྗེས། བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །ཞི་བའི་བློ་གྲོས། དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་གཟུང་ཞིག་དང ། བྱང་ཆུབ་སེམས་དཔའི་གསང་བའི་གནས་རྣམས་བཤད་པར་བྱའོ། །ཞི་བའི་བློ་གྲོས། གང་ཚུན་ཆད་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ཀྱིས། དེ་བཞིན་གཤེགས་པ་བྱང་ཆུབ་སེམས་པར་གྱུར་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེ་ཚུན་ཆད་ཁོ་བོ་
158b
བྱང་ཆུབ་སེམས་དཔའི་ཞབས་འབྲིང་ན་འདུག་འདུག་ན། བྱང་ཆུབ་སེམས་དཔའི་ལུས་འགྱུར་བའམ། ལུས་ཚུལ་འཆོས་པ་ཁོ་བོས་ནམ་ཡང་མ་མཐོང་ངོ ། །ངག་འགྱུར་བའམ། ངག་གི་ཁ་གསག་ཀྱང་མ་ཐོས། སེམས་འགྱུར་བའམ། སེམས་གཡོ་བ་ཡང་མ་མཐོང་ངོ ། །དེ་ལུས་ཀྱི་སྤྱོད་ལམ་གྱིས་སེམས་ཅན་རྣམས་ཡོངས་སུ་སྨིན་པར་བྱེད་དེ། ཚིག་ཏུ་ནི་མི་སྨྲའོ། ། སེམས་ཅན་ཡོངས་སུ་སྨིན་པར་བྱ་བའི་ཕྱིར། དེའི་ལུས་ཀྱི་སྤྱོད་ལམ་མཐའ་ཡས་མུ་མེད་པར་སྣང་སྟེ། ཞི་བའི་བློ་གྲོས། སེམས་ཅན་ཐམས་ཅད་ཀྱི་ལུས་ཀྱི་སྤྱོད་ལམ་ཇི་སྙེད་པ། བྱང་ཆུབ་སེམས་དཔའི་ལུས་ཀྱི་སྤྱོད་ལམ་ཡང་དེ་སྙེད་དུ་ལྷུན་གྱིས་གྲུབ་ཅིང་སྒྲིམ་པ་མེད་པར་གནས་སོ། །འདི་ལྟ་སྟེ། བསམ་གཏན་གྱིས་འདུལ་བའི་སེམས་ཅན་རྣམས་ལ་བསམ་གཏན་གྱི་སྤྱོད་ལམ་སྟོན་ཏོ། །རྒྱུད་ཀྱི་སྒྲ་དང ། གླུ་དབྱངས་ཀྱིས་འདུལ་བའི་སེམས་ཅན་རྣམས་ལ་རྒྱུད་ཀྱི་སྒྲ་དང ། གླུའི་དབྱངས་ཀྱི་སྤྱོད་ལམ་དང ། ཁྱེའུས་འདུལ་བའི་སེམས་ཅན་རྣམས་ལ་ཁྱེའུའི་སྤྱོད་ལམ་དང ། བུ་མོས་འདུལ་བའི་སེམས་ཅན་རྣམས་ལ་བུ་མོའི་སྤྱོད་ལམ་དང ། བུད་མེད་ཀྱིས་འདུལ་བའི་སེམས་ཅན་རྣམས་ལ་བུད་མེད་ཀྱི་སྤྱོད་ལམ་དང ། སྐྱེས་པས་འདུལ་བའི་སེམས་ཅན་རྣམས་ལ་སྐྱེས་པའི་སྤྱོད་ལམ་དང ། གཞོན་ནུས་འདུལ་བའི་སེམས་ཅན་རྣམས་ལ་གཞོན་ནུའི་སྤྱོད་ལམ་དང ། བར་མས་འདུལ་བའི་སེམས་ཅན་རྣམས་ལ་བར་
159a
༄#། །མའི་སྤྱོད་ལམ་དང ། རྒན་པོས་འདུལ་བའི་སེམས་ཅན་རྣམས་ལ་རྒན་པོའི་སྤྱོད་ལམ་དང ། ཡན་ལག་མ་ཚང་བས་འདུལ་བའི་སེམས་ཅན་རྣམས་ལ་ཡན་ལག་མ་ཚང་བའི་སྤྱོད་ལམ་དང ། གདོལ་པ་རྐང་ལག་ཆད་པས་འདུལ་བའི་སེམས་ཅན་རྣམས་ལ་གདོལ་པ་རྐང་ལག་ཆད་པའི་སྤྱོད་ལམ་དང ། ལྐུགས་པ་དང ། འཕྱེ་བོས་འདུལ་བའི་སེམས་ཅན་རྣམས་ལ་ལྐུགས་པ་དང ། འཕྱེ་བོའི་སྤྱོད་ལམ་དང ། ལོང་བ་དང ། འོན་པས་འདུལ་བའི་སེམས་ཅན་རྣམས་ལ། ལོང་བ་དང ། འོན་པའི་སྤྱོད་ལམ་དང ། སེམས་ཅན་དམྱལ་བ་པའི་གཟུགས་ཀྱིས་འདུལ་བའི་སེམས་ཅན་རྣམས་དང ། སེམས་ཅན་དམྱལ་བ་པའི་གཟུགས་ཀྱི་སྤྱོད་ལམ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དང ། མིས་འདུལ་བའི་སེམས་ཅན་རྣམས་ལ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དང ། མིའི་སྤྱོད་ལམ་དང ། ལྷས་འདུལ་བའི་སེམས་ཅན་རྣམས་ལ། ལྷའི་སྤྱོད་ལམ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོས་འདུལ་བའི་སེམས་ཅན་རྣམས་ལ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོའི་སྤྱོད་ལམ་དང ། བརྒྱ་བྱིན་གྱིས་འདུལ་བའི་སེམས་ཅན་རྣམས་ལ་བརྒྱ་བྱིན་གྱི་སྤྱོད།
159b
ལམ་དང ། ཚངས་པས་འདུལ་བའི་སེམས་ཅན་ལ་ཚངས་པའི་སྤྱོད་ལམ་དང ། འཇིག་རྟེན་སྐྱོང་བས་འདུལ་བའི་སེམས་ཅན་རྣམས་ལ་འཇིག་རྟེན་སྐྱོང་བའི་སྤྱོད་ལམ་དང ། འཁོར་ལོས་སྒྱུར་བས་འདུལ་བའི་སེམས་ཅན་རྣམས་ལ། འཁོར་ལོས་སྒྱུར་བའི་སྤྱོད་ལམ་དང ། དགེ་སློང་གིས་འདུལ་བའི་སེམས་ཅན་རྣམས་ལ། དགེ་སློང་གི་སྤྱོད་ལམ་དང ། དགེ་སློང་མས་འདུལ་བའི་སེམས་ཅན་རྣམས་ལ། དགེ་སློང་མའི་སྤྱོད་ལམ་དང ། དགེ་བསྙེན་གྱིས་འདུལ་བའི་སེམས་ཅན་རྣམས་ལ། དགེ་བསྙེན་གྱི་སྤྱོད་ལམ་དང ། དགེ་བསྙེན་མས་འདུལ་བའི་སེམས་ཅན་རྣམས་ལ། དགེ་བསྙེན་མའི་སྤྱོད་ལམ་དང ། ཉན་ཐོས་ཀྱིས་འདུལ་བའི་སེམས་ཅན་རྣམས་ལ། ཉན་ཐོས་ཀྱི་སྤྱོད་ལམ་དང ། རང་སངས་རྒྱས་ཀྱིས་འདུལ་བའི་སེམས་ཅན་རྣམས་ལ། རང་སངས་རྒྱས་ཀྱི་སྤྱོད་ལམ་དང ། བྱང་ཆུབ་སེམས་དཔས་འདུལ་བའི་སེམས་ཅན་རྣམས་ལ། བྱང་ཆུབ་སེམས་དཔའི་སྤྱོད་ལམ་དང ། དེ་བཞིན་གཤེགས་པས་འདུལ་བའི་སེམས་ཅན་རྣམས་ལ། དེ་བཞིན་གཤེགས་པའི་སྤྱོད་ལམ་སྟོན་ཏེ། གཟུགས་མེད་པ་ནི་མ་གཏོགས་སོ། །ཞི་བའི་བློ་གྲོས། དེ་ལྟར་སེམས་ཅན་ཐམས་ཅད་ཀྱི་གཟུགས་དང ། ཁ་དོག་དང་སྤྱོད་ལམ་ཇི་སྙེད་པ་བྱང་ཆུབ་སེམས་དཔའི་གཟུགས་དང ། ཁ་དོག་དང ། སྤྱོད་ལམ་ཡང་དེ་སྙེད་དུ་ལྷུན་གྱིས་གྲུབ་ཅིང་ཡོངས་སུ་མི་རྟོག་པར་ཀུན་ཏུ་གནས་སོ། །དེ་ལ་བྱང་ཆུབ་སེམས་དཔའ་རྣམ་པར་
160a
༄#། །མི་རྟོག་ཅིང་བཏང་སྙོམས་པ་དེ་ལུས་ཀྱིས་ལུས་ཀྱི་སྤྱོད་ལམ་སྟོན་མོད་ཀྱི། ལུས་ཀྱི་ཆོས་ཉིད་ལས་ཀྱང་མི་གཡོའོ། །ལུས་ཀྱིས་ལུས་ཀྱི་ལས་བྱེད་མོད་ཀྱི།་ལུས་ཀྱི་དབེན་པ་ཡང་མི་འདོར་རོ། །དེ་ལུས་ཡོངས་སུ་དག་པས་ལུས་ཀྱི་འོད་ཀྱིས་སེམས་ཅན་དམྱལ་བ་པའི་སེམས་ཅན་ཐམས་ཅད་བདེ་བར་བྱེད་དོ། །ལུས་ལ་མི་ལྟ་བས་ཤ་ཟ་བའི་སེམས་ཅན་ཇི་སྙེད་ཡོད་པ། ཤའི་ལོངས་སྤྱོད་གང་དང་གང་འདོད་པ་དེ་ལྟ་བུའི་ཤ་རྣམས་བདག་གིས་ལུས་ལས་དེ་དག་ལ་བསྟབས་ནས། བདག་སྲོག་དང་ཕྲལ་ཏེ། སེམས་ཅན་དེ་དག་ལ་སྦྱིན་པར་བྱེད་དོ། །ཁྲག་འཐུང་བ་རྣམས་ལ་ཁྲག་སྦྱིན་པར་བྱེད་དོ། །རྐང་ཟ་བ་རྣམས་ལ་རྐང་སྦྱིན་པར་བྱེད་དོ། །གཟི་བྱིན་ཟ་བ་རྣམས་ལ་གཟི་བྱིན་སྦྱིན་པར་བྱེད་དེ། །ཞི་བའི་བློ་གྲོས། དེ་ལྟར་ཤའི་ལོངས་སྤྱོད་ཇི་སྙེད་པར་དེ་དག་ཐམས་ཅད་བདག་གི་ལུས་ལས་བསྟབས་ཏེ། སྲོག་དང་ཕྲལ་ནས་སེམས་ཅན་དེ་དག་ལ་སྦྱིན་པར་བྱེད་དོ། །དེའི་ལུས་ཚད་མེད་པ་ནི་ཆོས་ཀྱི་དབྱིངས་ཚད་མེད་པའི་རྗེས་སུ་འགྲོ་བས་མི་ཟད་དོ། །དེའི་ལུས་མི་ཟད་པ་མངོན་པར་སྒྲུབ་པ་ནི། རྟེན་ཅིང་འབྲེལ་བར་འབྱུང་བ་མི་ཟད་པ་མངོན་པར་བསྒྲུབས་པས་རབ་ཏུ་རིག་པར་འགྱུར་རོ། །དེ་ལུས་ཀྱིས་སེམས་ཅན་རྣམས་ཡོངས་སུ་སྨིན་པར་བྱེད་དེ། གང་དག་འདོད་ཆགས་ལ་སྤྱོད་པ་སྡུག་པའི་རྣམ་པ་དང ། མཚན་མར་འཛིན་པའི་
160b
སེམས་ཅན་དེ་དག་གི་མདུན་དུ་བུད་མེད་གཟུགས་བཟང་ཞིང་མཛེས་པ་བལྟ་ན་སྡུག་པ་སྟོན་ཏེ། དེ་ལ་སེམས་ཅན་དེ་དག་ཆགས་པ་སྐྱེས་ནས། བྱུགས་ཤིང་ཀུན་ཏུ་བྱུགས་ཏེ། དེ་དག་པང་དུ་འཇོག་གོ་།དེ་དག་སྐྱེས་བུ་དེ་དག་གི་པང་དུ་སོན་པ་དང ། རྙིས་ཤིང་བསྐམས་ནས་འཆི་བའི་དུས་བྱེད་དོ། །མི་གཙང་ཞིང་དྲི་མི་ཞིམ་པར་གྱུར་པས། སྐྱེས་བུ་དེ་དག་དེས་ཡིད་བྱུང་ནས་པོར་ཏེ་སོང་བ་དང ། ཤི་བའི་རོ་དེ་དག་ཉིད་ལས་སྐྱེས་བུ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བའི་ཆོས་བསྟན་པ་དེ་ལྟ་བུ་འབྱུང་ངོ། །ཡང་ཞི་བའི་བློ་གྲོས། བྱང་ཆུབ་སེམས་དཔའ་དེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལུས་ཀྱིས་ཁྱབ་པར་བྱས་ཏེ། སོར་མོའི་རྩེ་མོས་ཡུངས་འབྲུ་ལ་བྱ་བ་དེ་བཞིན་དུ་རིན་པོ་ཆེའི་གདུགས་ཀྱིས་ཁེབས་པར་བྱེད་དོ། །སྲེག་པའི་བསྐལ་པའི་མེ་ལ་ལག་པའི་སོར་མོས་གཡོགས་ཀྱང་དེའི་ལུས་ཉམས་པར་མི་འགྱུར་རོ། །དེའི་ལུས་ཀྱིས་སངས་རྒྱས་བཅོམ་ལྡན་འདས་རྣམས་ལ་མཆོད་ཅིང་རིམ་གྲོ་བྱེད་དེ། མེ་ཏོག་གི་གདུགས་རི་རབ་ཙམ་དག་ཀྱང་འབུལ་ལོ། །དེ་བཞིན་གཤེགས་པ་རྣམས་ལ་མཆོད་པ་བྱ་བའི་ཕྱིར་མེ་ཏོག་གི་སྐོན་བུ་དག་ཀྱང་འཐོར་རོ། །དེ་བཞིན་གཤེགས་པ་རྣམས་ལ་མཆོད་པ་བྱ་བའི་ཕྱིར་དེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྤོས་ཀྱི་འབྲུ་མར་གྱིས་གང་བའི་སྣོད་གཅིག་
161a
༄#། །ཏུ་མོས་ཏེ། རི་རབ་ཙམ་གྱི་སྙིང་པོ་འབར་བར་བྱས་པའི་མར་མེ་འབར་བར་བྱེད་དོ། །དེ་བཞིན་གཤེགས་པ་ལ་མཆོད་པ་བྱ་བའི་ཕྱིར་གངྒཱའི་ཀླུང་གི་བྱེ་མ་སྙེད་ཀྱི་མར་མེ་འབར་བར་བྱེད་དོ། །དེ་བཞིན་གཤེགས་པ་ལ་མཆོད་པ་བྱ་བའི་ཕྱིར་རང་གི་ལུས་ཀྱང་རས་བཅོས་བུས་དཀྲིས་ནས། མར་དང་འབྲུ་མར་གྱིས་བསྐུས་ཏེ། མར་མེར་འབུད་དོ། །དེ་འབར་བར་གྱུར་པའི་ཚེ་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་སྣང་བ་ཆེན་པོས་ཁྱབ་པར་གྱུར་ཏེ། སེམས་ཅན་དག་གིས་ཀྱང་མཐོང་ཞིང་ཤེས་ཏེ། བྱང་ཆུབ་སེམས་དཔའི་ཁྱུ་མཆོག་ཏུ་གྱུར་པ་དེ་མཐོང་ནས་ཀྱང ། སེམས་ཅན་ཚད་མེད་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ང་རྒྱལ་དང ། རྒྱགས་པ་དང ། དྲེགས་པས་རློམ་པའི་སེམས་ཅན་རྣམས་ལ་ཡང་བདག་གིས་གཟུགས་ཚན་པོ་ཆེ་ཆེན་པོ་དང ། སྲེད་མེད་ཀྱི་བུ་དང ། ལག་ན་རྡོ་རྗེའི་གཟུགས་སུ་སྟོན་ཏེ། དེར་སེམས་ཅན་དེ་དག་སྤྲུལ་པས་འཇིགས་སྐྲག་ནས། བྱང་ཆུབ་སེམས་དཔའ་དེ་ལ་མངོན་པར་འདུད་ཅིང་ཕྱག་འཚལ་ལོ། །དེ་ལ་ཆོས་ཀྱང་ཉན་པར་འདོད་དོ། །གང་ཡང་གྲོང་ཁྱེར་ཆེན་པོ་དག་གི་དུར་ཁྲོད་ཆེན་པོ་སྲོག་ཆགས་བརྒྱ་སྟོང་དུ་མས་གང་བར་གྱུར་པ་དེ་ཡང ། བྱང་ཆུབ་སེམས་དཔའ་སེམས་དཔའ་ཆེན་པོ་
161b
དེས་བདག་གི་ལུས་ཆེན་པོ་ཤི་ཞིང་དུས་ལས་འདས་པར་སྟོན་ཏོ། །དེར་ཡང་སེམས་ཅན་དུད་འགྲོའི་སྐྱེ་གནས་སུ་གྱུར་པ་དེ་དག་གིས་ཅི་ཙམ་དུ་འདོད་པར་ཤ་ལ་ཟོས་ནས་ཚེའི་མཐར་ཕྱིན་ཏེ། འཆི་བའི་དུས་སུ་གྱུར་ཅིང ། ཤི་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེའོ། །དེ་ཡང་དེ་དག་གི་ཡོངས་སུ་མྱ་ངན་ལས་འདའ་བའི་བར་གྱི་རྒྱུར་འགྱུར་རོ། །དེ་ནི་བྱང་ཆུབ་སེམས་དཔའ་དེ་ཉིད་ཀྱི་སྔོན་གྱི་སྨོན་ལམ་ཡོངས་སུ་དག་པའི་ཕྱིར་ཏེ། བདག་འཆི་བའི་དུས་སུ་གྱུར་ནས། ཤི་བའི་ལུས་ལ་སེམས་ཅན་གང་དག་གིས་ཟོས་པ་དེ་དག་ལ་དེ་ཉིད་མཐོ་རིས་སུ་སྐྱེ་བ་ནས། ཡོངས་སུ་མྱ་ངན་ལས་འདའ་བའི་བར་གྱི་རྒྱུར་གྱུར་ཅིག་།ཅེས་ཡུན་རིང་པོ་ནས་སྨོན་ལམ་བཏབ་སྟེ། ཚུལ་ཁྲིམས་དང་ལྡན་པ་དེ་བསམ་པ་འགྲུབ། འདོད་པ་གྲུབ། སྨོན་པ་གྲུབ་པོ། །ཞི་བའི་བློ་གྲོས། རྣམ་གྲངས་འདིས་ཅི་ལྟར་བྱང་ཆུབ་སེམས་དཔའི་ལུས་ཚད་མེད་ཅིང་མཐའ་ཡས་པར་ཁྱོད་ཀྱིས་འདི་ལྟར་རིག་པར་བྱ་སྟེ། ཞི་བའི་བློ་གྲོས། སྔོན་བྱུང་བ་འདས་པའི་དུས་ན། འཛམ་བུའི་གླིང་དུ་གཏོགས་པ་ནམ་མཁས་བསྐོར་བ་འདི་ཉིད་དུ་གྲོང་ཁྱེར་བརྒྱད་ཁྲི་བཞི་སྟོང་པ་ཕྲག་བཞི་བྱུང་སྟེ། དེ་ན་གྲོང་དང ། ཚོང་འདུས་དང ། རི་ཁྲོད་སྟོང་ཕྲག་མང་པོ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་གནས་པ་ཡོད་དེ། ཞི་བའི་བློ་གྲོས། དེའི་ཚེ་དེའི་དུས་ན། ནད་ཆེན་པོའི་བསྐལ་པ་པར་མ་བྱུང་སྟེ། དེར་སེམས་ཅན་དག་
162a
༄#། །ནད་སྣ་ཚོགས་ཀྱིས་བཏབ་པར་གྱུར་ནས། ཕལ་ཆེར་ལུས་ཤུ་བ་ཅན་དང ། ལུས་རྣགས་པ་དང ། འབྲས་དང ། ཕོལ་མིག་དང ། མེ་དབལ་དང ། ཐོར་བུ་དང།་རླུང་དང ། མཁྲིས་པ་དང ། བད་ཀན་གྱི་ནད་རྣམས་ཀྱིས་རྒྱས་པར་གྱུར་ཏོ། །དེའི་ཚེ་སྨན་པ་སྟོང་ཕྲག་དུ་མ་སེམས་ཅན་དེ་དག་གི་ནད་དེ་ཞི་བར་བྱ་བའི་ཕྱིར་བརྩོན་པར་གྱུར་ཀྱང།་སེམས་ཅན་དེ་དག་གི་ནད་དེ་བསལ་བར་མ་ནུས་སོ། །དེར་སེམས་ཅན་དེ་དག་གིས་གསོ་བའི་སྤྱད་མ་རྙེད་དེ་སྐྱབས་མེད་རྟེན་མེད་ནས་འདི་སྐད་དུ། ནད་འདི་ལས་ནི་ཐར་བྱེད་པ། །ལྷའམ་ཀླུའམ་དྲི་ཟའམ། །གནོད་སྦྱིན་དང་ནི་མི་ཡང་རུང ། །མི་མ་ཡིན་པ་སུ་ཞིག་ཡོད། །སྡུག་བསྔལ་འདི་ལས་ཐར་བྱེད་པ། །དེ་ལ་ནོར་རྣམས་ཐམས་ཅད་བཏང ། །རྗེས་སུ་བསྟན་པ་བཞིན་དུ་བྱ། །བྱས་པ་དག་ཀྱང་གཟོ་བར་བྱ། །ཞེས་ཀུ་ཅོ་ཆེར་འདོན་ཏོ། །ཞི་བའི་བློ་གྲོས། འདི་ལྟར་བཅོམ་ལྡན་འདས་ཤཱཀྱ་ཐུབ་པ་འདི། དེའི་ཚེ་དེའི་དུས་ན་ལྷའི་དབང་པོ་བརྒྱ་བྱིན་མིག་བཟང་ཞེས་བྱ་བར་གྱུར་ཏེ། དེས་ལྷའི་མིག་རྣམ་པར་དག་པ་མིའི་ལས་འདས་པས་སེམས་ཅན་དེ་དག་ནད་སྣ་ཚོགས་མང་པོས་བཏབ་པ་ཡང་མཐོང ། ལྷའི་རྣ་བ་རྣམ་པར་དག་པ་མིའི་ལས་འདས་པས་ཀུ་ཅོ་ཆེན་པོ་འདོན་པའི་སྒྲ་ཡང་ཐོས་སོ། །དེས་དེ་དག་མཐོང་ཞིང་ཐོས་ནས་ཀྱང ། སྙིང་རྗེ་ཆེན་པོ་བསྐྱེད་དེ། དེ་འདི་སྙམ་དུ་བདག་ཅི་ནས་
162b
སེམས་ཅན་གནས་མེད་པ་འདི་དག་གི་གནས་སུ་འགྱུར་བར་བྱའོ། །སྐྱབས་མེད་པ་དང ། རྟེན་མེད་པ་རྣམས་ཀྱི་སྐྱབས་དང་རྟེན་དུ་འགྱུར་བར་བྱའོ་སྙམ་དུ་བསམས་ནས་དེས་དེ་མ་ཐག་ཏུ་འཛམ་བུའི་གླིང་གི་དབུས་ན། གྲོང་ཁྱེར་ཆེན་པོ་ཀུ་རུ་ཞེས་བྱ་བ་ཞིག་ཡོད་པ་དང་ཧ་ཅང་ཡང་མི་རིང་བ་ཞིག་ཏུ་སྲོག་ཆགས་དེས་པ་ཞེས་བྱ་བར་རྫུས་ཏེ་སྐྱེས་ནས། སྟེང་གི་བར་སྣང་ལ་འདུག་སྟེ། འཛམ་བུ་གླིང་གི་མི་ཐམས་ཅད་ལ་ཚིགས་སུ་བཅད་པས་བསྐུལ་བ། ཀུ་རུའི་གྲོང་ཁྱེར་ཉེ་བ་ན། སྲོག་ཆགས་དེས་པ་ཞེས་བྱ་ཡོད། །དེ་ཡི་ཤ་ལ་སུས་ཟོས་པ། །དེ་ནི་ནད་ལས་ཐར་པར་འགྱུར། །འཇིགས་པར་མ་བྱེད་སྐྲག་པར་མ་བྱེད་པར། །ཇི་ལྟར་འདོད་པར་དེ་ཡི་ཤ་ལོང་ཞིག་།དེ་ལ་ཁྲོ་མེད་གཤེ་མེད་གནོད་སེམས་མེད། །འཛམ་བུ་གླིང་འདིར་དེ་ནི་སྨན་ཡིན་ནོ། །ཞི་བའི་བློ་གྲོས། དེ་ལྟར་ན། གྲོང་དང ། གྲོང་ཁྱེར་དང ། གྲོང་རྡལ་དང ། ཚོང་འདུས་དང ། རི་ཁྲོད་དེ་དག་ན་སེམས་ཅན་ནད་པ་ཇི་སྙེད་ཡོད་པ་དེ་དག་གིས་སྒྲ་དེ་ཐོས་ནས། གྲོང་ཁྱེར་ཆེན་པོ་ཀུ་རུ་ག་ལ་བ་དང ། སྲོག་ཆགས་ཀྱི་རྣམ་པ་དེས་པ་ག་ལ་བ་དེར་སོང་སྟེ་ཕྱིན་ནས། སྲོག་ཆགས་དེས་པའི་ལུས་ལས་ཤ་བཅད་ཅིང་བཅད་ཅིང་ཁྱེར་ཡང་དེའི་ལུས་ལ་ཤ་ཟད་པར་མ་གྱུར་ནས། དེས་པས་ཚིགས་སུ་བཅད་པ་འདི་དག་སྨྲས་སོ། །བདེན་པ་གང་གིས་བྱང་ཆུབ་འཐོབ་འགྱུར་ཞིང ། །བདག་གི་ཡེ་ཤེས་ཟད་པར་མི་འགྱུར་བ། །བདེན་པ་དེས་ནི་བདག་གི་ལུས་ལས་ཤ། །འདིར་ནི་
163a
༄#། །ནམ་ཡང་ཟད་པར་མ་གྱུར་ཅིག་།ཞི་བའི་བློ་གྲོས། དེ་ལྟར་ན་ཕྱོགས་བཞིའི་སེམས་ཅན་ནད་པ་ཇི་སྙེད་ཡོད་པ་དེ་དག་གིས་སྲོག་ཆགས་ཀྱི་རྣམ་པ་དེས་པའི་ལུས་ལ་ཤ་བཅད་ཅིང་བཅད་ཅིང་ཁྱེར་ཡང་དེའི་ལུས་ལ་བྲི་བའམ་གང་བར་ཡང་མི་མངོན་ཏེ། ཡང་བཅད། ཡང་བཅད་ཀྱང་ཕྱིར་སྐྱེ་བར་གྱུར་ཏོ། །ཞི་བའི་བློ་གྲོས། དེ་ལྟར་སེམས་ཅན་ཇི་སྙེད་ཀྱིས་སྲོག་ཆགས་ཀྱི་རྣམ་པ་དེས་པའི་ཤ་ཟོས་པ་དེ་དག་ཟོས་མ་ཐག་ཏུ་ནད་ཐམས་ཅད་ཞི་བར་གྱུར་ཏེ། ནད་མེད་ཅིང་བདེ་བ་དང ། ཉམས་པ་མེད་པར་གྱུར་ཏོ། །དེ་ནས་མཐར་གྱིས་འཛམ་བུའི་གླིང་གི་སེམས་ཅན་གྱི་ནད་ཐམས་ཅད་བསལ་བར་གྱུར་ཏོ། །ཞི་བའི་བློ་གྲོས། དེ་ནས་འཛམ་བུ་གླིང་གི་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དག་འདི་སྙམ་དུ་སེམས་ཏེ། སྲོག་ཆགས་ཀྱི་རྣམ་པ་དེས་པ་དེས་བདག་ཅག་ནད་ལས་ཡོངས་སུ་ཐར་ཅིང་ནད་མེད་པར་བྱས་ཏེ། བདེ་ཞིང་ཉམས་པ་མེད་པར་བྱས་ཀྱི། བདག་ཅག་གིས་དེ་ལ་མཆོད་པའི་གནས་ཤིག་བྱའོ་སྙམ་ནས་དེ་དག་ཐམས་ཅད་གཅིག་ཏུ་འདུས་ཏེ། སྲོག་ཆགས་ཀྱི་རྣམ་པ་དེས་པ་ག་ལ་བ་དེར་སོང་ནས་ཐལ་མོ་སྦྱར་ཏེ། སྲོག་ཆགས་ཀྱི་རྣམ་པ་དེས་པ་ལ་ཚིགས་སུ་བཅད་དེ་སྨྲས་པ། ཁྱོད་ནི་བདག་ཅག་གནས་དང་སྐྱབས། །ཁྱོད་ནི་བདག་ཅག་སྨན་པ་སྨན། །ཁྱོད་ལ་མཆོད་པ་གང་བགྱི་བ། །ཁྱོད་ཀྱིས་བདག་ཅག་བཀའ་
163b
སྩོལ་ཅིག་།དེ་ནས་སྲོག་ཆགས་ཀྱི་རྣམ་པ་དེས་པས་ལུས་དེ་མི་སྣང་བར་བྱས་ཏེ། བདག་བརྒྱ་བྱིན་གྱི་ལུས་སུ་འདུག་ནས་སྐྱེ་བོའི་ཚོགས་ཆེན་པོ་དེ་ལ་ཚིགས་སུ་བཅད་པས་སྨྲས་པ། ང་ལ་ནོར་དང་ཟས་སྐོམ་དང ། །གསེར་དང་འབྲུ་རྣམས་དགོས་པ་མེད། །ཐམས་ཅད་ལྷན་ཅིག་མཐུན་པར་ནི། །དགེ་བ་བཅུ་ཡི་ལས་ལམ་སྲུངས། །སེམས་ཅན་ཀུན་ལ་ཕན་པའི་ཕྱིར། །བྱང་ཆུབ་སྨོན་ལམ་བརྟན་པ་ཐོབ། །ཕན་པའི་དངོས་པོ་ཉིད་ཀྱི་སེམས། །གཅིག་ལ་གཅིག་ཀྱང་བྱམས་པ་སྐྱེད། །བརྒྱ་བྱིན་ལས་ནི་ཚིག་འདི་ཐོས། །སེམས་ཅན་དེ་དག་རབ་དགའ་སྟེ། །ཤིན་ཏུ་ཡོངས་སུ་དག་པ་ཡི། །དགེ་བ་བཅུ་ཡི་ལས་ལམ་བླངས། །ཞི་བའི་བློ་གྲོས། དེ་ལྟར་དེ་ཚུད་ཆད་འཛམ་བུའི་གླིང་ཐམས་ཅད་དུ་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དེ་སྙེད་ལས་ཐ་ན་སེམས་ཅན་གཅིག་ཀྱང་ལོག་པར་ལྟུང་བར་སོང་བ་མི་དྲན་ནོ། །དེ་ཚུན་ཆད་དེ་དག་ཐམས་ཅད་ཤི་འཕོས་ཏེ། ཤི་བའི་དུས་བྱས་ནས་ཀྱང ། བདེ་འགྲོ་མཐོ་རིས་ཀྱི་འཇིག་རྟེན་དུ་སུམ་ཅུ་རྩ་གསུམ་གྱི་ལྷ་རྣམས་དང་སྐལ་བ་མཉམ་པར་སྐྱེས་ཏེ། དེ་དག་ཡང་ལྷའི་དབང་པོ་བརྒྱ་བྱིན་དེས་ཆོས་ཀྱི་གཏམ་གྱིས་ཡང་དག་པར་དགའ་བར་བྱས། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད་ནས། དེ་ལ་ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་
164a
༄#། །དང་བྲལ་བ་རྣམ་པར་དག་གོ་།ཞི་བའི་བློ་གྲོས། འདི་ནི་བྱང་ཆུབ་སེམས་དཔའི་ལུས་ཀྱི་གསང་བ་དང ། ལུས་ཀྱི་ལས་ཡོངས་སུ་དག་པ་སྟེ། དེ་ལྟར་ལུས་གཅིག་ཡོངས་སུ་བཏང་བས་ན། སེམས་ཅན་ཚད་མེད་པ་གྲངས་མེད་པ་དག་ཡོངས་སུ་སྨིན་པར་བྱས་སོ། །གཞན་ཡང་གསང་བ་བའི་བདག་པོ་ལག་ན་རྡོ་རྗེས་བྱང་ཆུབ་སེམས་དཔའ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །ཞི་བའི་བློ་གྲོས། བྱང་ཆུབ་སེམས་དཔའི་ལུས་ནི་མི་ཤིགས་པ། སྲ་བ། བརྟན་པ། འཆི་འཕོ་མེད་པ། རྫུས་ཏེ་སྐྱེ་བ་སྟེ། ལུས་དེ་ནི་འཇིག་པས་འདུལ་བའི་སེམས་ཅན་རྣམས་འདུལ་བའི་དབང་གི་ཕྱིར་འཇིག་གོ་།ལུས་མི་འཇིག་པས་འདུལ་བའི་སེམས་ཅན་རྣམས་ལ། འདུལ་བའི་དབང་གི་ཕྱིར་ཐམས་ཅད་ཀྱིས་ཐམས་ཅད་དུ་མི་འཇིག་སྟེ། མེས་མི་ཚིག། མཚོན་གྱིས་མི་ཚུགས་ཤིང་དངོས་པོ་རྡོ་རྗེ་ལྟར་སྲ་ཞིང་བརྟན་ཏེ་མི་ཤིགས་པའོ། །ཞི་བའི་བློ་གྲོས། དེ་ལྟར་བྱང་ཆུབ་སེམས་དཔའ་ནི་ལུས་ཀྱིས་སེམས་ཅན་ཡོངས་སུ་སྨིན་པར་བྱེད་ཀྱང་བྱང་ཆུབ་སེམས་དཔའ་མི་སེམས་མི་རྟོག་སྟེ། ལུས་ལ་ལུས་ཀྱིས་དབེན་པའི་མཚན་ཉིད་ཀྱང་རབ་ཏུ་ཤེས་སོ། །ལུས་ཀྱི་དབེན་པའི་མཚན་ཉིད་ཀྱིས་ཀྱང་ཆོས་ཀྱི་དབེན་པའི་མཚན་ཉིད་ཤེས་སོ། །ལུས་ཀྱི་དབེན་པའི་མཚན་ཉིད་དང ། ཆོས་ཐམས་ཅད་ཀྱི་དབེན་པའི་མཚན་ཉིད་ཀྱང་གཉིས་སུ་མི་བྱེད་དེ། ལུས་ཀྱི་དབེན་པའི་མཚན་ཉིད་ཀྱི་
164b
མཚན་ཉིད་གང་ཡིན་པ་དེ་ནི་ཆོས་ཀྱི་དབེན་པའི་མཚན་ཉིད་ཀྱི་མཚན་ཉིད་དོ། །དེ་ལྟར་ན་དབེན་པའི་མཚན་ཉིད་ཀྱི་རྗེས་སུ་འཇུག་གོ་།དེ་རང་གི་ལུས་ཀྱི་དབེན་པའི་མཚན་ཉིད་དང ། སེམས་ཅན་ཐམས་ཅད་ཀྱི་ལུས་ཀྱི་དབེན་པའི་མཚན་ཉིད་མཉམ་པར་བྱེད་དོ། །དེ་རང་གི་ལུས་ཀྱི་དབེན་པའི་མཚན་ཉིད་དང ། སེམས་ཅན་ཐམས་ཅད་ཀྱི་ལུས་ཀྱི་དབེན་པའི་མཚན་ཉིད་ཀྱང་ཆོས་ཀྱི་དབྱིངས་ཀྱི་དབེན་པའི་མཚན་ཉིད་དུ་ཤེས་སོ། །ཆོས་ཕྲ་རབ་ཙམ་ཡང་མི་དམིགས་པས་ཆོས་ཀྱི་དབྱིངས་ཀྱི་དབེན་པའི་མཚན་ཉིད་དང ། ཆོས་ཐམས་ཅད་ཀྱི་དབེན་པའི་མཚན་ཉིད་ཀྱང་རྗེས་སུ་འཐོབ་བོ། །དེ་རང་གི་ལུས་ཀྱི་དེ་བཞིན་ཉིད་ཀྱིས་སེམས་ཅན་ཐམས་ཅད་ཀྱི་ལུས་ཀྱི་དེ་བཞིན་ཉིད་ཤེས་སོ། །སེམས་ཅན་ཐམས་ཅད་ཀྱི་ལུས་ཀྱི་དེ་བཞིན་ཉིད་ཀྱིས་རང་གི་ལུས་ཀྱི་དེ་བཞིན་ཉིད་ཤེས་སོ། །དེ་རང་གི་ལུས་ཀྱི་དེ་བཞིན་ཉིད་ཀྱིས་ཆོས་ཐམས་ཅད་ཀྱི་དེ་བཞིན་ཉིད་ཤེས་སོ། །ཆོས་ཐམས་ཅད་ཀྱི་དེ་བཞིན་ཉིད་ཀྱིས་སངས་རྒྱས་ཐམས་ཅད་ཀྱི་དེ་བཞིན་ཉིད་ཤེས་སོ། ། དེ་རང་གི་ལུས་ཀྱི་དེ་བཞིན་ཉིད་ཀྱིས་འདས་པ་དང ། མ་འོངས་པ་དང ། ད་ལྟར་བྱུང་བའི་དེ་བཞིན་ཉིད་ཤེས་ཏེ། འདས་པའི་དེ་བཞིན་ཉིད་དང ། མ་འོངས་པའི་དེ་བཞིན་ཉིད་དང་འགལ་བར་མི་བྱེད་དོ། །འདས་པ་དང ། མ་འོངས་པ་དང ། ད་ལྟར་བྱུང་བའི་དེ་བཞིན་ཉིད་གང་ཡིན་པ་དེ་ཕུང་པོ་དང ། ཁམས་དང ། སྐྱེ་མཆེད་ཀྱི་དེ་བཞིན་ཉིད་དོ། །ཕུང་པོ་དང ། ཁམས་དང །
165a
༄#། །སྐྱེ་མཆེད་ཀྱི་དེ་བཞིན་ཉིད་གང་ཡིན་པ་དེ་ཉིད་ཀུན་ནས་ཉོན་མོངས་པ་དང ། རྣམ་པར་བྱང་བའི་དེ་བཞིན་ཉིད་དོ། །ཀུན་ནས་ཉོན་མོངས་པ་དང ། རྣམ་པར་བྱུང་བའི་དེ་བཞིན་ཉིད་གང་ཡིན་པ་དེ་འཁོར་བ་དང ། མྱ་ངན་ལས་འདས་པའི་དེ་བཞིན་ཉིད་དོ། །འཁོར་བ་དང ། མྱ་ངན་ལས་འདས་པའི་དེ་བཞིན་ཉིད་གང་ཡིན་པ་དེ་མངོན་པར་འདུ་མི་བྱེད་པའི་དེ་བཞིན་ཉིད་དོ། །མངོན་པར་འདུ་མི་བྱེད་པའི་དེ་བཞིན་ཉིད་གང་ཡིན་པ་དེ་མངོན་པར་འདུ་བྱེད་པ་ཐམས་ཅད་ཀྱི་དེ་བཞིན་ཉིད་ཀྱང་དེ་ཉིད་ཡིན་ནོ། །རིགས་ཀྱི་བུ། དེ་བཞིན་ཉིད་ཅེས་བྱ་བ་ནི་དེ་ཁོ་ན་ཉིད་དང ། དེ་ལྟ་བུ་ཉིད་དང ། གཞན་མ་ཡིན་པ་དེ་བཞིན་ཉིད་དང ། མི་འགྱུར་བ་ཉིད་དང ། མི་འབྱུང་བ་ཉིད་དང ། རྩོད་པ་མེད་པ་ཉིད་དང ། གཟུགས་མེད་པ་ཉིད་དོ། །དེ་བཞིན་ཉིད་ལ་གཟུགས་གང་ཡང་མེད་དེ། གཟུགས་མེད་པ་ནི་དེ་བཞིན་ཉིད་ཅེས་བྱའོ། །ཇི་ལྟར་དེ་བཞིན་ཉིད་གཟུགས་མེད་པ་དེ་བཞིན་དུ་གཟུགས་ཐམས་ཅད་ཀྱང་གཟུགས་མེད་པ་སྟེ། བྱང་ཆུབ་སེམས་དཔའ་སེམས་ཅན་ཐམས་ཅད་ལ་གཟུགས་དེ་སྟོན་ཀྱང་དེ་བཞིན་ཉིད་གཟུགས་སུ་མི་བྱེད་དོ། །དེ་གཟུགས་མེད་ཅིང་རྩོད་པ་མེད་ཀྱང་ལུས་དང་གཟུགས་ཐམས་ཅད་ཀྱང་སྟོན་ཏེ། དེ་བཞིན་ཉིད་ཀྱང་འཁྲུགས་པར་མི་བྱེད་དོ། །དེ་བཞིན་ཉིད་ཀྱི་ཡེ་ཤེས་ཀྱིས་དེ་བཞིན་གཤེགས་པའི་སྐུ་ལ་རྟོག་གོ་།དེ་བཞིན་གཤེགས་
165b
པའི་སྐུ་མཉམ་པ་ཉིད་ཀྱིས་བདག་གི་ལུས་མཉམ་པ་ཉིད་ལ་རྟོག་གོ་།ལུས་ནི་ཤིན་ཏུ་མ་སྐྱེས་པ་ཉིད་ཡིན་པས་ལུས་ཐམས་ཅད་ནི་ལུས་མེད་པར་ཡང་དག་པར་མཐོང་ངོ ། །ལུས་ཐམས་ཅད་ནི་རྟེན་ཅིང་འབྲེལ་བར་འབྱུང་བར་རབ་ཏུ་ཤེས་སོ། །ཤེས་ནས་ཀྱང་ཆོས་ཀྱི་སྐུ་མངོན་པར་བསྒྲུབ་བོ། །དེ་ཆོས་ཀྱི་སྐུ་མངོན་པར་བསྒྲུབས་པས་ཆོས་ཀྱི་སྐུ་ཉིད་དུ་འགྱུར་ཏེ། ཕུང་པོ་དང།་ཁམས་དང ། སྐྱེ་མཆེད་ཀྱི་ལུས་ནི་མ་ཡིན་ནོ། །དེ་ཆོས་ཀྱི་སྐུ་རབ་ཏུ་ཕྱེ་བས་ན་མཐོང་བས་ཀྱང་སེམས་ཅན་རྣམས་ཀྱི་དོན་བྱེད་དོ། །ཐོས་པ་དང ། རེག་པས་ཀྱང་སེམས་ཅན་རྣམས་ཀྱི་དོན་བྱེད་དོ། །ཞི་བའི་བློ་གྲོས། འདི་ལྟ་སྟེ། དཔེར་ན། སྨན་པའི་རྒྱལ་པོ་འཚོ་བྱེད་ཀྱིས་རྩི་ཐམས་ཅད་བསྡུས་ཏེ། རྩིའི་ཤིང་མང་པོ་ལས་བུ་མོའི་གཟུགས་བཟང་ཞིང་མཛེས་པ། བལྟ་ན་སྡུག་པ་ལེགས་པར་བྱས་ཏེ། ལེགས་པར་ཟིན་ཅིང་ལེགས་པར་བྱི་དོར་བྱས་པ་དེ་འོང་བའམ། འགྲོ་བའམ། འགྲེང་ངམ། འདུག་གམ། ཉལ་ཡང་རྟོག་པ་མེད་ཅིང་རྣམ་པར་རྟོག་པ་མེད་དོ། །དེར་ནད་པ་གང་བཙུན་པའམ། རྒྱལ་པོའམ། རྒྱལ་པོའི་བློན་པོ་ཆེན་པོའམ། རྒྱལ་པོའི་བུའམ། ཚོང་དཔོན་ནམ། ཁྱིམ་བདག་གམ། བློན་པོའམ། རྒྱལ་ཕྲན་གང་དག་འོང་བ་དེ་དག་སྨན་པའི་རྒྱལ་པོ་འཚོ་བྱེད་ཀྱིས་སྨན་གྱི་བུ་མོ་དེ་དང་སྤྲད་ནས། དེ་དག་ཕྲད་མ་ཐག་ཏུ་ནད་ཐམས་ཅད་བྱང་སྟེ། ནད་མེད་ཅིང་བདེ་ལ། ཉམས་པ་མེད་པར་འགྱུར་རོ། །ཞི་བའི་བློ་གྲོས། གང་སྨན་པ་
166a
༄#། །གཞན་ལ་མེད་པ་སྨན་པའི་རྒྱལ་པོ་འཚོ་བྱེད་ཀྱི་འཇིག་རྟེན་གྱི་ནད་གསོ་བའི་ཤེས་པ་ལ་ལྟོས། ཞི་བའི་བློ་གྲོས། དེ་བཞིན་དུ་བྱང་ཆུབ་སེམས་དཔའ་ཆོས་ཀྱི་སྐུས་རབ་ཏུ་ཕྱེ་བ་ཡང་སེམས་ཅན་བུད་མེད་དང ། སྐྱེས་པ་དང ། ཁྱེའུ་དང ། བུ་མོ་འདོད་ཆགས་དང ། ཞེ་སྡང་དང ། གཏི་མུག་གིས་ཡོངས་སུ་གདུངས་པ་ཇི་སྙེད་ཡོད་པ་དེ་དག་གིས་ལུས་ལ་རེག་ན་རེག་མ་ཐག་ཏུ་དེ་དག་གི་ཉོན་མོངས་པ་ཐམས་ཅད་རྒྱུན་ཆད་པར་འགྱུར་རོ། །ལུས་ཡོངས་སུ་གདུང་བ་དང་བྲལ་བར་ཡང་ཤེས་སོ། །དེ་ནི་འདི་ལྟར་བྱང་ཆུབ་སེམས་དཔའ་དེ་ཉིད་ཀྱི་སྔོན་གྱི་སྨོན་ལམ་ཤིན་ཏུ་དག་པའི་ཕྱིར་རོ། །ཞི་བའི་བློ་གྲོས། ཆོས་ཀྱི་སྐུས་རབ་ཏུ་ཕྱེ་བའི་ཕྱིར། འདི་ཡང་བྱང་ཆུབ་སེམས་དཔའ་ལུས་ཀྱི་གསང་བའོ། །ཞི་བའི་བློ་གྲོས། བྱང་ཆུབ་སེམས་དཔའ་ཆོས་ཀྱི་སྐུ་དང་ལྡན་པ་རྣམས་ཀྱི་ལུས་ནི་ཟས་སྐོམ་གྱིས་བསྐྱེད་པ་མ་ཡིན། ཁམ་གྱིས་ཟ་བའི་ཟས་ཀྱིས་ཀྱང་ལུས་འཚོ་བ་མ་ཡིན་ཏེ། དེ་ཟས་ཐམས་ཅད་ཡོངས་སུ་ཤེས་པ་དང་ལྡན་པས་སེམས་ཅན་ལ་སྙིང་བརྩེ་བའི་ཕྱིར་ཟས་ཟའོ། །དེ་ཟས་ཟའང་མིད་པ་མ་ཡིན། ཟའང་ཁོང་དུ་འཇུག་པར་མི་བྱེད་དོ། །ཆོས་ཀྱི་སྐུའི་སྟོབས་ཀྱིས་མི་ཉམས། ཡོངས་སུ་མི་ཉམས་སོ། །ཞི་བའི་བློ་གྲོས། བྱང་ཆུབ་སེམས་དཔའ་ཆོས་ཀྱི་སྐུ་དང་ལྡན་པ་ལ་སྐྱེ་བ་དང ། འཆི་འཕོ་བ་དང ། འབྱུང་བ་མེད་ཀྱང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་སྐྱེ་བ་དང་
166b
འཆི་འཕོ་དང ། འབྱུང་བ་ཡང་སྟོན་ཏོ། །དེ་འཆི་འཕོ་ཡང་ཆོས་ཐམས་ཅད་ལ་འཆི་འཕོ་མེད་ཅིང་མངོན་པར་འདུ་བྱེད་པ་མེད་པར་རབ་ཏུ་ཤེས་སོ། །འབྱུང་ཡང་ཆོས་ཐམས་ཅད་ལ་འཕོ་བ་མེད་པར་རབ་ཏུ་ཤེས་སོ། །སྐྱེ་ཡང་ཆོས་ཐམས་ཅད་ལ་སྐྱེ་བ་མེད་པར་རབ་ཏུ་ཤེས་སོ། །དེ་ཆོས་ཀྱི་སྐུ་དང་ལྡན། ཆོས་ཀྱི་ཟས་དང་ལྡན། ཆོས་ཀྱི་སྟོབས་དང་ལྡན་ཞིང་ཆོས་ལ་རྟོན་པས། དེ་བཞིན་གཤེགས་པའི་སྐུ་རབ་ཏུ་ཤེས་ཏེ། ཞི་བའི་བློ་གྲོས། དེ་བཞིན་གཤེགས་པའི་སྐུ་ནི་ནམ་མཁའི་སྐུ། མི་མཉམ་པ་དང་མཉམ་པའི་སྐུ། འཇིག་རྟེན་གསུམ་པོ་ཐམས་ཅད་ལས་བྱེ་བྲག་ཏུ་འཕགས་པའི་སྐུ། སེམས་ཅན་ཐམས་ཅད་ཀྱི་དེ་བཞིན་ཉིད་དང་ལྡན་པའི་སྐུ། དཔེ་མེད་པ། འདྲ་བ་མེད་པ། དག་པ། དྲི་མ་མེད་པ། ཀུན་ནས་ཉོན་མོངས་པ་མེད་པའི་སྐུ། རང་བཞིན་གྱིས་འོད་གསལ་བའི་སྐུ། རང་བཞིན་གྱིས་མ་སྐྱེས་པའི་སྐུ། རང་བཞིན་གྱིས་མ་བྱུང་བའི་སྐུ། སེམས་དང་ཡིད་དང་རྣམ་པར་ཤེས་པ་དང་མ་འབྲེལ་བའི་སྐུ། སྒྱུ་མ་དང ། སྨིག་རྒྱུ་དང ། ཆུ་ཟླའི་ངོ་བོ་ཉིད་ཀྱི་སྐུ། སྟོང་པ་ཉིད་དང།་མཚན་མ་མེད་པ་དང ། སྨོན་པ་མེད་པ་ལ་ངེས་པར་བཏགས་པའི་སྐུ། ཕྱོགས་བཅུ་མ་ལུས་པའི་ནམ་མཁའ་ཁྱབ་པའི་སྐུ། སེམས་ཅན་ཐམས་ཅད་ལ་མཉམ་པའི་སྐུ། མཐའ་ཡས་མུ་མེད་པའི་སྐུ། འགྱུར་བ་མེད་ཅིང་རྣམ་པར་རྟོག་པ་མེད་པའི་སྐུ། མི་གཡོ་ཞིང་རློམ་སེམས་མེད་པའི་སྐུ། གནས་པ་དང ། མི་གནས་པ་དང ། མི་གཡོ་བ་ཐོབ་པའི་སྐུ། གཟུགས་ཀྱི་རང་བཞིན་
167a
༄#། །མ་ཡིན་པའི་སྐུ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་རང་བཞིན་མ་ཡིན་པའི་སྐུ་སྟེ། སའི་ཁམས་ཀྱིས་རབ་ཏུ་ཕྱེ་བ་མ་ཡིན། ཆུའི་ཁམས་ཀྱིས་མ་ཡིན། མེའི་ཁམས་ཀྱིས་མ་ཡིན། རླུང་གི་ཁམས་ཀྱིས་རབ་ཏུ་ཕྱེ་བ་མ་ཡིན་ཏེ། མ་བྱུང་བ། ཀུན་ནས་མ་བྱུང་བའོ། །འབྱུང་བ་ཆེན་པོ་རྣམས་ཀྱིས་རབ་ཏུ་ཕྱེ་བ་མ་ཡིན་པའོ། །འབྱུང་བ་མ་ཡིན། འབྱུང་བའི་ཆོས་མ་ཡིན་པའོ། །འཇིག་རྟེན་ཐམས་ཅད་དང་མི་མཐུན་པའོ། །མིག་ལས་མ་བྱུང་བའོ། །རྣ་བ་ལ་མི་གནས་པའོ། །སྣས་ཤེས་པར་བྱ་བ་མ་ཡིན་པའོ། །ལྕེས་རབ་ཏུ་མ་ཕྱེ་བའོ། །ལུས་དང་ལྡན་པ་མ་ཡིན་པའོ། །ཡིད་ཀྱིས་ཉེ་བར་སྤྲད་པ་མ་ཡིན་པའོ། །སེམས་དང་མི་འཇུག་པའོ། །ཡིད་ཀྱི་རྣམ་པར་ཤེས་པ་དང་མི་འཇུག། མི་ལྡོག་།རྗེས་སུ་མི་འཇུག་པ་སྟེ། ཞི་བའི་བློ་གྲོས། དེ་བཞིན་གཤེགས་པའི་སྐུ་ནི་དེ་འདྲའོ། །དེ་ལས་བྱང་ཆུབ་སེམས་དཔས་དེ་བཞིན་གཤེགས་པའི་སྐུ་མཉམ་པ་ཉིད་ཐོབ་ནས་བྱང་ཆུབ་སེམས་དཔའི་སྤྱོད་པ་ཡོངས་སུ་དག་པ་ལ་སྤྱོད་ཅིང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། གླིང་བཞི་པའང་རུང ། འཛམ་བུའི་གླིང་ཡང་རུང ། གྲོང་དང།་གྲོང་ཁྱེར་དང ། གྲོང་བརྡལ་དང ། ཡུལ་འཁོར་དང ། ཕོ་བྲང་འཁོར་དེ་ཇི་སྙེད་ཡོད་པ་ཐམས་ཅད་དུ། བྱང་ཆུབ་སེམས་དཔའ་མཐོང་བར་ཡང་བྱེད་ལ། བདུད་ཐམས་ཅད་
167b
ཀྱིས་མི་མཐོང་བར་ཡང་སྣང་བར་འགྱུར་རོ། །དེ་མཐོང་བར་ཡང་བྱེད་ལ་མཐོང་བར་སྣང་བ་ཡང་མེད་དོ། །མཐོང་བར་མི་བྱེད་པས་ཀྱང་མཐོང་བར་སྣང་ངོ ། །མཐོང་བ་དང ། ཐོས་པ་དང ། རྟོགས་པ་དང ། རྣམ་པར་རིག་པས་རབ་ཏུ་ཕྱེ་བ་ཡང་མ་ཡིན་ནོ། །སེམས་ཅན་ཡོངས་སུ་སྨིན་པར་བྱ་བས་རབ་ཏུ་ཕྱེ་བ་ཡིན་ཡང ། ལུས་སུ་གཏོགས་པའི་དྲན་པ་ཉེ་བར་བཞག་པ་ལས་ཀྱང་མི་ཉམས་ཡོངས་སུ་མི་ཉམས་སོ། །དེ་ལུས་མི་རྟག་པ་དང ། ལུས་སྡུག་བསྔལ་བ་དང ། ལུས་བདག་མེད་པར་ཡང་སེམས་ཅན་རྣམས་ལ་སྟོན་ལ། ལུས་ཀྱི་ཞི་བའི་ཆོས་ཉིད་ཀྱང་རབ་ཏུ་ཤེས་སོ། །དེ་ལུས་རབ་ཏུ་དབྱེ་བ་ཡང་སེམས་ཅན་རྣམས་ལ་སྟོན་ལ། རྒྱུ་གང་དང་དམིགས་པ་གང་དག་གིས་ལུས་མངོན་པར་འགྲུབ་པའི་རྒྱུ་དེ་དག་དང ། དམིགས་པ་དེ་དག་ཀྱང་བྱེད་པ་པོ་མེད་པ་དང།་ཚོར་བ་པོ་མེད་པར་ཡང་དག་པར་རྗེས་སུ་མཐོང་ངོ ། །ལུས་རྩཝ་དང ། ཤིང་དང ། རྩིག་པ་དང ། ལམ་དང ། མིག་ཡོར་ལྟ་བུར་ཡང་རབ་ཏུ་ཤེས་ཤིང ། དེ་ལུས་ཀྱི་ལས་ཡོངས་སུ་དག་པར་ཡང་སེམས་ཅན་རྣམས་ལ་སྟོན་ཏེ། ཞི་བའི་བློ་གྲོས། འདི་ནི་དེ་བཞིན་གཤེགས་པ་མར་མེ་མཛད་ཚུན་ཆད། བྱང་ཆུབ་སེམས་དཔའི་ལུས་ཀྱི་གསང་བ་དང ། ལུས་ཀྱི་ལས་ཡོངས་སུ་དག་པའོ། །དེ་བས་ལྷག་པར་བྱང་ཆུབ་སེམས་དཔའ་སེམས་དཔའ་ཆེན་པོའི་ལུས་ཀྱི་ལས་ཡོངས་སུ་དག་པ་བསྐལ་པ་བརྒྱ་སྟོང་ངམ། དེ་བས་ཀྱང་ལྷག་པར་བསྟན་ཏོ། །
168a
༄#། །ཞི་བའི་བློ་གྲོས། གལ་ཏེ་དེ་བཞིན་གཤེགས་པ་ཉིད་ཀྱིས་བྱང་ཆུབ་སེམས་དཔའི་ལུས་ཀྱི་གསང་བ་གངྒཱའི་ཀླུང་གི་བྱེ་མ་སྙེད་ཀྱི་བསྐལ་པར་བསྟན་ཀྱང་ཟད་པར་མི་འགྱུར་ཏེ། བྱང་ཆུབ་སེམས་དཔའི་ལུས་ཀྱི་གསང་བ་བསྟན་པ་ནི་དེ་ཙམ་དུ་ཚད་མེད་བསམ་གྱིས་མི་ཁྱབ་པའོ། །དེས་པའི་ལེའུ་སྟེ་དང་པོའོ།། །།བམ་པོ་གཉིས་པ།་གཞན་ཡང་གསང་བ་པའི་བདག་པོ་ལག་ན་རྡོ་རྗེས་བྱང་ཆུབ་སེམས་དཔའ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །ཞི་བའི་བློ་གྲོས། དེ་ལ་བྱང་ཆུབ་སེམས་དཔའི་ངག་གི་གསང་བ་དང ། ངག་གི་ལས་ཡོངས་སུ་དག་པ་གང་ཞེ་ན། ཞི་བའི་བློ་གྲོས། སེམས་ཅན་རྣམས་ཀྱི་སྐྱེ་བའི་གནས་ཇི་སྙེད་པར་བྱང་ཆུབ་སེམས་དཔའི་སྐྱེས་པའི་རབས་ཀྱང་དེ་སྙེད་དོ། །བྱང་ཆུབ་སེམས་དཔའི་སྐྱེས་པའི་རབས་ཇི་སྙེད་པར་སྒྲ་ལ་འཇུག་པའང་དེ་སྙེད་དོ། །སེམས་ཅན་དེ་དག་གི་སྒྲ་བརྗོད་པ་དང ། ཚིག་གི་ལམ་བརྗོད་པ་དང ། ངེས་པའི་ཚིག་དང ། བརྡ་དང ། སྨྲ་བ་དང ། ཡང་དག་པར་སྨྲ་བ་དང ། མཚན་མ་དང ། སྤྱོད་པ་དང ། བདེ་བ་དང ། སྡུག་བསྔལ་བརྗོད་པ་ཇི་སྙེད་པའི་སྒྲ་ལ་འཇུག་པ་དེ་དག་ཐམས་ཅད་ལ་བྱང་ཆུབ་སེམས་དཔའི་ཡེ་ཤེས་མཐོང་བ་ཐོགས་པ་མེད་པར་འཇུག་སྟེ། ཐ་ན་སྲིན་བུ་དང ། སྦྲང་བུ་དང ། ཤ་སྦྲང་དང ། སྦྲང་མ་དང ། ཕྱེ་མ་ལེབ་ཀྱི་སྒྲ་དག་ལའང་ཡེ་ཤེས་མཐོང་བ་འཇུག་གོ་།སྒྲའི་རྣམ་པར་
168b
རིག་པ་བསྒྲགས་པ་ཇི་ལྟ་བུས་སེམས་ཅན་དེ་དག་གི་ལུས་ཤིན་ཏུ་སྦྱངས་པ་དང ། སེམས་ཤིན་ཏུ་སྦྱངས་པ་སྐྱེ་བར་འགྱུར་བ་དེ་ལྟ་བུའི་སྒྲའི་རྣམ་པར་རིག་པ་བསྒྲགས་པ་བྱང་ཆུབ་སེམས་དཔའ་དེའི་ཁའི་སྒོ་ནས་འབྱུང་ངོ ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །ཇི་ལྟར་སེམས་ཅན་མཐའ་མ་གང་ཡང་མེད། །དེ་ལྟར་སྐྱེས་པའི་རབས་ཏེ་དཔག་ཏུ་མེད། །བསྐལ་པ་བརྒྱ་སྙེད་བཤད་ཀྱང་མཐའ་མ་མེད། །བསམ་ཡས་དེ་དག་ཇི་ལྟར་བཤད་པར་བྱ། །སྐྱོན་རྣམས་མེད་པ་བདག་ཉིད་ཆེ་བའི་ཚིག་།སེམས་དང་བསམ་པ་རྒྱ་ཆེར་རབ་སྟོན་པ། །ནམ་མཁའ་ལྟ་བུར་གང་མེད་བྲི་མེད་པ། །འོན་ཀྱང་དཔེ་དོན་ལྡན་པ་བཤད་པར་བྱ། །ཞི་བའི་བློ་གྲོས། བྱང་ཆུབ་སེམས་དཔའི་ཚིག་ནི་ཚངས་པའི་སྒྲ་སྐད་དུ་འབྱིན་པ་དང ། བརྒྱ་བྱིན་གྱི་སྒྲ་སྐད་དུ་འབྱིན་པ་དང ། འཇིག་རྟེན་སྐྱོང་གི་སྒྲ་སྐད་དུ་འབྱིན་པ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་ཐམས་ཅད་ཀྱི་སྒྲ་སྐད་དུ་འབྱིན་པ་དང ། སེམས་ཅན་ཐམས་ཅད་ཀྱི་སྒྲ་སྐད་དུ་འབྱིན་པ་ཡིན་ཏེ། སེམས་ཅན་ཐམས་ཅད་ཀྱི་བསམ་པ་ཚིམ་པར་བྱེད་པའོ། །དེ་ལ་འདི་སྐད་ཅེས་བྱ་སྟེ། །བདག་ཉིད་ཆེན་པོ་རྣམས་ཀྱིས་མ་སྨད་ཚིག་།གང་པ་མེད་ཅིང་བྲི་མེད་ནམ་མཁའ་བཞིན། །སེམས་དང་བསམ་པ་རྒྱ་ཆེན་བསྟན་པ་དག་།དེ་དག་
169a
༄#། །བརྗོད་པ་རྣམས་ལ་ནན་ཏན་ཉོན། །བྱམས་ལ་སྦྱོར་དང་སྙིང་རྗེར་འཇུག་པ་དང ། །དགའ་བ་དང་ནི་བཏང་སྙོམས་རབ་བཤད་དེ། །ཚངས་པ་ལས་ཀྱང་འདས་པའི་སྒྲ་ཕྱུང་བས། །ལེགས་བཤད་དེས་ནི་ཚངས་པ་ཚིམ་པར་བྱེད། །གང་དག་བརྒྱ་བྱིན་རོལ་མོ་ཡིད་འོང་སྒྲ། །དེ་དག་དེ་ཡི་སྒྲ་བརྗོད་ཟིལ་གྱིས་ནོན། །རོལ་མོ་སྒྲ་དབྱངས་བྱུང་བ་དེ་ལས་ནི།། ཆོས་རྣམས་རབ་ཏུ་དབྱེ་བ་དཔག་མེད་འབྱུང ། །མིའམ་ཅི་ཡི་སྒྲ་དག་གང་ཡོད་པ། །དེ་བས་དེ་ཡི་སྒྲ་མཆོག་ཕུན་སུམ་ཚོགས། །དེ་ནི་འདོད་ཆགས་འབར་བར་མི་བྱེད་དེ། །དེ་ཡི་ཚིག་གིས་མི་ཅི་དགའ་བར་འགྱུར། །འདོད་པའི་ཁམས་ན་ཡིད་འོང་སྒྲ་ཡོད་པས། །རོལ་མོའི་སྒྲ་དང་ལྷ་ཡི་སྒྲ་མང་པོ། །ཆོས་ཀྱི་དོན་སྦྱོར་དགེ་བར་ལྡན་པ་ཡི། །དེ་ཡི་ཚིག་གིས་ཀུན་དུ་ཚིམ་པར་བྱེད། །མི་ཡི་འདྲེན་པ་ཡི་ནི་ཚིག་ཐོས་ནས། །འདོད་ཆགས་ཞི་ཞིང་ཞེ་སྡང་རབ་ཏུ་ཞི། །གཏི་མུག་གཡོ་དང་ང་རྒྱལ་དྲེགས་པ་ཞི། །དོན་རྣམས་གཏན་ལ་ཕེབས་ཤིང་ཐེ་ཚོམ་མེད། །གཟུགས་ཀྱི་ཁམས་ན་ལྷ་རྣམས་གང་གནས་པ། །དེ་དག་ཡིད་ནི་དེ་ཡིས་ཚིམ་པར་བྱེད། །མི་ཡི་གཙོ་བོའི་ཚིག་རྣམས་ཐོས་ནས་ནི། །འཇིག་རྟེན་སངས་རྒྱས་གྱུར་ཞེས་བྱང་ཆུབ་ཚོལ། །ཀླུ་དབང་དྲི་ཟ་ལྟོ་འཕྱེ་ཆེ་རྣམས་ཀྱི། །རོལ་མོ་སྣ་ཚོགས་སྒྲ་ཡོད་དེ་དག་པས། །ཡོན་ཏན་རྒྱ་མཚོ་ལྡན་པའི་སྒྲ་བསྒྲགས་པ། །ཐམས་ཅད་རབ་ཏུ་དགའ་བ་རྒྱ་ཆེན་བྱེད།།
169b
འཛམ་གླིང་འདི་ན་ཐ་དད་ཕྱོགས་རྣམས་སུ། །ཀུན་ནས་སྒྲ་སྐད་མཐའ་ཡས་གྱུར་མོད་ཀྱི། །དེ་ཡི་སྐད་ཀྱི་རྣམ་པར་བསྒྲགས་གྱུར་ན། །དེ་ཐོས་མི་རྣམས་ཐར་པ་རྗེས་སུ་ཐོབ། །ས་བླའི་ལྷ་དང་དེ་བཞིན་བར་སྣང་ལྷ། །དེ་དག་སྒྲ་སྐད་འཇུག་པ་ཅི་འདྲ་བ། །དེ་ལྟར་དེ་ལ་དེ་ཡི་སྒྲ་ཡང་འཇུག་།རྣམ་པར་ངེས་བདེན་གཏམ་ཡང་དེ་འདྲའོ། །ངང་པ་ཁྲུང་ཁྲུང་ཀ་ལ་པིང་ཀ་དང ། །རྨ་བྱ་ནེ་ཙོ་ཁུ་བྱུག་ཤང་ཤང་ཏེའུ། །རི་སྐེགས་དང་ནི་ངུར་པ་ཀུན་ལ་ཀུན། །ཇི་ལྟའི་སྐད་ཀྱིས་དེས་ནི་ཚིམ་པར་བྱེད། །སྟག་དང་སེང་གེ་དེ་བཞིན་དོམ་དང་སྤྲེའུ། །གཟིག་དང་བྱི་ལ་རི་དྭགས་གླང་ཆེན་བསེ། །རྟ་དང་ཁྱི་དང་ཕག་དང་འུག་པ་ཀུན། །ཇི་ལྟའི་སྐད་ཀྱིས་དེས་ནི་ཚིམ་པར་བྱེད། །གང་དག་རྐང་བཞི་པ་དང་རྐང་གཉིས་དང ། །རྐང་མང་དང་ནི་དེ་བཞིན་རྐང་མེད་རྣམས།། བསྐུལ་དང་ཆད་པས་བཅད་དང་ཕན་གདགས་ཕྱིར། །ཀུན་ལ་དེ་ཡི་སྒྲ་སྐད་ཤེས་པ་འཇུག་།སེམས་ཅན་གང་དག་སྟོང་གསུམ་འཇིག་རྟེན་ན། །རབ་བམ་འབྲིང་ངམ་འོན་ཏེ་ཐ་མའམ། །དམྱལ་པ་དུད་འགྲོའི་གཤིན་རྗེའི་འཇིག་རྟེན་དང ། །ལྷ་མི་རྣམས་དང་དེ་ནི་སྐད་ཀྱང་མཐུན། །ཇི་ལྟར་རིགས་པར་བྱེད་པ་སྟོན་ཀྱང་ནི། །མི་སེམས་འདུ་ཤེས་མེད་ཅིང་རྟོག་པ་མེད། །མཚན་མ་མེད་ཅིང་འཛིན་མེད་འཆིང་བ་མེད། །མཉམ་པར་བཞག་པས་སེམས་ནི་འཁྲུག་པ་མེད། །དག་པའི་སེམས་ཅན་གལ་ཏེ་འདོད་ན་ཡང ། །དེ་ལ་འབད་དང་སེམས་འཛིན་མེད་པར་ནི། །
170a
༄#། །བྱེ་བའི་ཞིང་དང་དེ་ཡི་གོང་དུ་ཡང ། །གངྒཱའི་བྱེ་སྙེད་དབྱངས་ཀྱིས་གོ་བར་བྱེད། །སྟོང་གསུམ་འཇིག་རྟེན་བདུད་གང་ཅི་ཡོད་པ། །དེ་དག་དེ་ཡི་འཇིགས་ཆེན་སྒྲ་ཐོས་ནས། །ཆུང་མར་བཅས་ཏེ་འཇིགས་སྐྲག་ལ་གོར་དུ། །ཐལ་མོ་སྦྱར་ཏེ་གུས་པར་འདུད་པར་བྱེད། །སེམས་ཅན་གང་དག་རབ་ཏུ་སྨ་འདོད་དང ། །ང་རྒྱལ་ཟིལ་གནོན་སུ་ལའང་མི་འདུད་པ། །དེ་དག་དེ་ཡི་གསལ་བའི་ཚིག་ཐོས་ནས། །ཐལ་མོ་སྦྱར་ཏེ་གུས་པར་འདུད་པར་བྱེད། །འོན་པ་གླེན་པ་དག་དང་ལྕེ་མེད་དང ། །དིག་པ་རྣམས་དང་གང་དག་སྐད་འཛེར་བ། །དེ་དག་དེ་ཡི་ལེགས་སྨྲས་སྙན་ཐོས་ནས། །སྒྲ་སྐད་ཡིད་དུ་འོང་བ་འབྱིན་པར་བྱེད། །ཉོན་མོངས་གདུངས་ཤིང་ཉོན་མོངས་གཟིར་བ་དང ། །ཉེས་པའི་འགྱོད་པ་བརྒྱ་ཡིས་དཀྲིས་པ་རྣམས། །དེ་དག་དེ་ཡིས་དགེ་ཚིག་དག་ཐོས་ནས། །འགྱོད་པ་བརྟུལ་བར་གྱུར་ཅིང་བསིལ་བར་འགྱུར། །སངས་རྒྱས་དང་ནི་ཆོས་དང་དགེ་འདུན་སྒྲ། །མི་རྟག་སྒྲ་ཐོས་ནས་ནི་སེམས་ཅན་རྣམས། །སྦྱིན་དང་ཐོས་དང་ཚུལ་ཁྲིམས་བཟོད་པ་དང ། །བརྩོན་འགྲུས་བསམ་གཏན་བློ་གྲོས་རྩོམ་པར་བྱེད། །སངས་རྒྱས་དབྱངས་དང་བར་མེད་གང་གནས་པ། །མཐའ་ཡས་དབྱངས་ལྡན་མཐའ་ཡས་ཡེ་ཤེས་ཅན། །དེ་དག་རྣམས་ཀྱི་ཡོན་ཏན་ཐམས་ཅད་ནི། །བསྐལ་པ་བྱེ་མང་བརྗོད་ཀྱང་ཟད་མི་ནུས། །ཞི་བའི་བློ་གྲོས། བྱང་ཆུབ་སེམས་དཔའི་ངག་ནི་
170b
ཆགས་པའམ། སྡང་བའམ། རྨོངས་པའམ། ཉོན་མོངས་པའམ། ཐོགས་པའམ། ཉེ་བར་ཐོགས་པའམ། དམན་པའམ། རབ་ཏུ་དམན་པའམ། བརླང་བའམ། ཞེར་འདེབས་པའམ། མི་རྫོགས་པའམ། རྩུབ་པའམ། རྗེས་སུ་ཆགས་པའམ། ཁོང་ཁྲོ་བའམ། བྱུང་རྒྱལ་འམ། བག་ལ་ཉལ་བའམ། འགལ་བར་འགྱུར་བའི་ཚིག་གམ། ཉོན་མོངས་པ་སྣ་ཚོགས་པག་ལ་ཉལ་བའམ། མི་བརྟན་པའམ། གཅམ་པའམ། ཁེངས་པའམ། འགྱིང་བའམ། མྱུར་བའམ། དུས་མ་ཡིན་པར་སྨྲ་བའམ། འདོད་པ་དང་ལྡན་པའམ། སྡུག་པ་ལ་མངོན་པར་དགའ་བར་འགྱུར་བའམ། མངོན་པར་ཆེ་བའམ། ཤིན་ཏུ་ཆགས་པའམ། རབ་ཏུ་ལྷོད་པའམ། རབ་ཏུ་དངངས་པའམ། རབ་ཏུ་དལ་བའམ། དབང་པོ་ཉམས་པའམ། གདངས་ཉམས་པའམ། སེམས་ཉམས་པའམ། ཡོ་བའམ། དམན་པའམ། མི་གསལ་བའམ། སྐད་སུ་བ་སུབ་པོའམ། ངོར་བྱས་ཏེ་སྨྲ་བའམ། འགལ་བར་སྨྲ་བའམ། གླགས་པའམ། འབྱུང་བ་མ་ཡིན་པའམ། གཤེ་བར་བྱེད་པའམ། གཞན་ལ་གནོད་པར་འགྱུར་བའམ། བདག་དང་ཕ་རོལ་གདུང་བར་བྱེད་པའམ། ཚིག་བླང་བར་འོས་པ་མ་ཡིན་པའམ། ཚིག་གཟུང་བར་འོས་པ་མ་ཡིན་པའམ། ཚིག་དང་བམ་ཡིན་པའམ། རིགས་པའི་ཚིག་མ་ཡིན་པའམ། འབྱོར་པའི་ཚིག་མ་ཡིན་པའམ། མི་དགེ་བའི་ཚིག་གམ། ཡང་དག་པ་མ་ཡིན་
171a
༄#། །པའི་ཚིག་གམ། གཞོགས་འདྲིད་ཟེར་བའམ། ཆོས་དང་མི་ལྡན་པའམ། འགལ་བའམ། གནོད་པའམ། དུས་ལས་ཡོལ་བའམ། ཚོད་ལས་འདའ་བའམ། ལུང་བསྟན་པ་ལ་ཐོགས་པའམ། ཚུལ་འཆོས་པ་དང ། ཁ་གསག་དང་ལྡན་པའམ། རྙེད་པས་རྙེད་པར་འདོད་པའི་ཚིག་གམ། འབྱུང་བ་མ་ཡིན་པ་སྟོན་པའམ། མིག་འཁྲུལ་པར་འགྱུར་བའམ། རྨོངས་པར་འགྱུར་བའམ། སོམ་ཉིའི་ཚིག་གམ། སྡུག་པར་བྱེད་པའི་ཚིག་གམ། མི་སྡུག་ཅིང་གནད་དུ་འདེབས་པའི་ཚིག་གམ། ཁྱད་དུ་གསོད་པའི་ཚིག་གམ། རང་གི་ཕྱོགས་བསྟན་པའི་ཚིག་གམ། གཞན་གྱི་ཕྱོགས་ཚར་གཅད་པའི་ཚིག་གམ། བདག་བསྟོད་པ་ལ་རྗེས་སུ་ཆགས་པའི་ཚིག་གམ། གཞན་གྱི་བསྟོད་པ་ལ་བར་དུ་གཅོད་པའི་ཚིག་སྨྲ་བའམ། ཐིང་སླད་དམ། གཞོགས་འདྲིད་ཀྱི་ཚིག་གམ། གཞན་ལ་རབ་ཏུ་རློམ་པའི་ཚིག་གམ། བྱ་བ་དང་འགལ་བའི་ཚིག་གམ། གསང་བརྟོལ་བའི་ཚིག་གམ། ངག་བསྲུངས་པ་མ་ཡིན་པའི་ཚིག་གམ། མཁས་པས་སྨད་པའི་ཚིག་གམ། འཕགས་པ་ལ་སྐུར་པ་འདེབས་པའི་ཚིག་གམ། བརླང་འདེབས་པའི་ཚིག་གམ། ངོར་མངོན་དུ་བསྟོད་པའི་ཚིག་གམ། གཞན་གྱིས་ཉེས་པ་དུས་མ་ཡིན་པར་གླེང་བའི་ཚིག་གམ། ཟུག་རྔུས་གནད་དུ་འདེབས་པའི་ཚིག་གམ། གཞན་གྱི་ཉེས་པ་ཀུན་བརྗོད་པའི་
171b
ཚིག་གམ། ཁ་འོག་ཏུ་ལུས་འཁྲུས་པར་མི་བྱེད་པའི་ཚིག་གམ། མངོན་པའི་ང་རྒྱལ་གྱིས་བརྡ་སྤྲོད་པའི་ཚིག་གམ། ལས་དང་འགལ་བའི་ཚིག་གམ། རྗེས་སུ་མཐུན་པ་མ་ཡིན་པའི་ཚིག་མི་འབྱིན་ཏོ། །ཞི་བའི་བློ་གྲོས། ཡང་བྱང་ཆུབ་སེམས་དཔའི་ངག་ནི་སྒྲའི་མངོན་པར་ཤེས་པའི་ཡེ་ཤེས་ཀྱི་སྟོབས་དང ། བསོད་ནམས་རྣམ་པར་སྨིན་པའི་འབྲས་བུ་གྲུབ་པས་བདེན་པའི་རྗེས་སུ་འབྲང་བ་དང་ལྡན་པ་ཡིན་ཏེ། དེ་གང་སྨྲ་བ་དེ་དེ་ལྟ་བུ་ཉིད་ཡིན་ནོ། །གལ་ཏེ་དེ་ཤིང་དྲུང་ན་འདུག་གམ། འཆག་གམ། འདུག་གམ། ཉལ་ཀྱང་རུང ། ལ་ལ་ཞིག་འོངས་ནས། ཀྱེ་སྐྱེས་བུ་ཤིང་ལྗོན་པ་འདི་དག་ལ་འདབ་མ་ཇི་སྙེད་ཅིག་ཡོད་ཅེས་ཟེར་ན། དེ་ཤིང་ལྗོན་པ་དེ་ལ་ཡང་མི་བལྟ། འདབ་མ་ལ་ཡང་མི་བགྲང་བར་ཤིང་ལྗོན་པ་དེ་ལ་འདབ་མ་ཇི་སྙེད་ཡོད་པ་བཞིན་དུ་མི་ཉུང་མི་མང་བར་འདི་སྙེད་ཅིག་གོ་ཞེས་བྱང་ཆུབ་སེམས་དཔའ་དེའི་ངག་འབྱུང་ངོ ། །ཡང་གངྒཱའི་ཀླུང་གི་བྱེ་མའི་འབྲུ་དེ་བརྒྱ་ཕྲག་ཇི་སྙེད་ཅིག་ཡོད། སྟོང་ཕྲག་ཇི་སྙེད་ཅིག་ཡོད། འབུམ་ཕྲག་ཇི་སྙེད་ཅིག་ཡོད། བྱེ་བ་ཕྲག་ཇི་སྙེད་ཅིག་ཡོད། ཐེར་འབུམ་ཕྲག་ཇི་སྙེད་ཅིག་ཡོད། ཁྲག་ཁྲིག་ཕྲག་ཇི་སྙེད་ཅིག་ཡོད། དཀྲིགས་ཕྲག་ཇི་སྙད་ཅིག་ཡོད། གཏམ་ཕྲག་ཇི་སྙེད་ཅིག་ཡོད། ཁྱད་ཕྱིན་ཇི་སྙེད་ཅིག་ཡོད། མི་འཁྲུགས་པ་ཇི་སྙེད་ཅིག་ཡོད། དཔག་ཏུ་མེད་པ་ཇི་སྙེད་ཅིག་ཡོད། གྲངས་མེད་པ་ཇི་སྙེད་ཅིག་ཡོད།
172a
༄#། །གཏན་པ་ཇི་སྙེད་ཅིག་ཡོད། ཕྱིན་བྱེད་ཕྲག་ཇི་སྙེད་ཅིག་ཡོད། སྟོབས་ཕྲག་ཇི་སྙེད་ཅིག་ཡོད། གླང་པོ་ཆེའི་སྟོབས་ཕྲག་ཇི་སྙེད་ཅིག་ཡོད། བགྲང་བ་ཕྲག་ཇི་སྙེད་ཅིག་ཡོད་ཅེས་འདྲི་ན། དེ་བྱེ་མ་དེ་དག་ལའང་མི་བལྟ། མི་བགྲང་བར་བྱེ་མའི་འབྲུ་དེ་དག་ཇི་སྙེད་ཡོད་པ་བཞིན་དུ་འདི་སྙེད་ཅིག་གོ་ཞེས་བྱང་ཆུབ་སེམས་དཔའ་དེའི་ངག་འབྱུང་སྟེ། བྱེ་མ་དེ་ནི་དེ་བཞིན་གཤེགས་པའི་ཡེ་ཤེས་ཀྱིས་འདི་སྙེད་ཅིག་ཡོད་དོ་ཞེས་མཁྱེན་པ་ཡིན་ནོ། །ཞི་བའི་བློ་གྲོས། དེ་ལ་དེ་བཞིན་གཤེགས་པ་ཉིད་མངོན་སུམ་དུ་གྱུར་པ་མ་གཏོགས་པ་ལྷའམ། ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་ནམ། རླུང་ལྷའམ། ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་ཆེན་པོའམ། ཉན་ཐོས་སམ། རང་སངས་རྒྱས་ཀྱི་མངོན་སུམ་ནི་མ་ཡིན་ནོ། །ཞི་བའི་བློ་གྲོས། རྣམ་གྲངས་འདིས་འདི་ལྟར་རིག་པར་བྱ་སྟེ། ཞི་བའི་བློ་གྲོས། སྔོན་བྱུང་བ་འདས་པའི་དུས་ན་དྲང་སྲོང་སྣང་བ་ཞེས་བྱ་བ་ཞིག་བྱུང་སྟེ། དེའི་དུས་ན་བྲམ་ཟེ་སྔོ་སངས་ཞེས་བྱ་བ་ཞིག་ཀྱང་བྱུང་ངོ ། །ཡང་དེའི་དུས་ན་ཤིང་ནྱ་གྲོ་དྷའི་རྒྱལ་པོ་བཟང་པོ་ཞེས་བྱ་བ་ཡལ་ག་དང ། འདབ་མ་མང་པོས་ཡོག་པ། ཁོར་ཁོར་ཡུག་ཏུ་ཚད་རྒྱང་གྲགས་གཅིག་ཡོད་པ་ཞིག་བྱུང་སྟེ། དེར་དྲང་སྲོང་སྣང་བ་དེ་གནས་སོ། །དེ་ན་གནས་པའི་ཚེ་དེས་མངོན་པར་ཤེས་པའི་སྟོབས་ཀྱིས་ཤིང་ནྱ་གྲོ་དྷའི་རྒྱལ་པོ་
172b
བཟང་པོ་དེའི་ཡལ་ག་གྲངས་དུ་ཡོད་པ་ལོ་བཅུ་གཉིས་དང་ཞག་བདུན་གྱི་བར་དུ་བགྲངས་ཏེ། རྟོགས་པར་བྱས། ཤེས་པར་བྱས་སོ། །དེ་ནས་དུས་གཞན་ཞིག་ན་བྲམ་ཟེ་སྔོ་སངས་ཞེས་བྱ་བ་གྲོང་ཁྱེར་ནས་ཁ་ཟས་བླངས་ཏེ་ཉིན་མོ་གནས་པའི་ཕྱིར། ཤིང་ནྱ་གྲོ་དའི་རྒྱལ་པོ་བཟང་པོ་ཞེས་བྱ་བ་ག་ལ་བ་དེར་སོང་ནས། དེས་ཟས་ཀྱི་བྱ་བ་བྱས་ཏེ། དྲང་སྲོང་སྣང་བ་ཞེས་བྱ་བ་ག་ལ་བ་དེར་སོང་ནས་མངོན་སུམ་དུ་ཡང་དག་པར་མགུ་བར་འགྱུར་བ་དང ། ཡང་དག་པར་ཆགས་པར་འགྱུར་བའི་གཏམ་མང་པོ་བྱས་ཏེ། ཕྱོགས་གཅིག་ཏུ་འཁོད་དོ། །དེ་ནས་དྲང་སྲོང་སྣང་བ་ཞེས་བྱ་བས་བྲམ་ཟེ་སྔོ་སངས་ཞེས་བྱ་བ་ལ་འདི་སྐད་ཅེས་སྨྲས་སོ། །ཀྱེ་བྲམ་ཟེ། མིའི་འཇིག་རྟེན་སེམས་ཅན་གྱི་རིས་ན་གང་ཤིང་ནྱ་གྲོ་དྷའི་རྒྱལ་པོ་འདིའི་འདབ་མའི་གྲངས་དུ་ཡོད་བརྩི་བའམ། རྟོགས་པར་བྱེད་པའམ། ཤེས་པར་བྱེད་ནུས་པའི་སེམས་ཅན་འགའ་ཡོད་དམ། སྨྲས་པ། བཙུན་པ། མཆིས་སོ། །དྲང་སྲོང་གིས་སྨྲས་པ། བྲམ་ཟེ་དེ། གང་ཡིན། བྲམ་ཟེས་སྨྲས་པ། བཙུན་པ། བདག་གིས་བགྲང་བར་བགྱིའོ། །དྲང་སྲོང་གིས་སྨྲས་པ། ཀྱེ་བྲམ་ཟེ། དེའི་ཕྱིར་བ་གྲོངས་ཤིག་།དེ་ནས་བྲམ་ཟེ་སྔོ་སངས་དེ་ཤིང་ལྗོན་པ་དེ་ལ་ཡང་མི་ལྟ། འདབ་མ་རྣམས་ལ་ཡང་མི་བགྲང་བར་སྐད་ཅིག་ལ་འདབ་མ་རྟོགས་པ་ལ་ཞུགས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མི་འཁྲུགས་དྲུག་ཅུ་པང་སྟེང་ཕྲག་།བཅུ་དྲུག་དང་ནི་ཁྱད་ཕྱིན་
173a
༄#། །ཕྲག་།བཅུ་གསུམ་དག་དང་དཀྲིགས་པ་ཕྲག་།དགུ་བཅུ་རྩ་དྲུག་ཁྲག་ཁྲིག་ཕྲག་།སུམ་ཅུ་རྩ་དགུ་ཁྲག་ཁྲིག་ཕྲག་།སུམ་ཅུ་དང་ནི་ཐེར་འབུམ་ཕྲག་།བརྒྱད་སྟོང་དང་ཡང་བྱེ་བ་ཕྲག་།དགུ་བཅུ་རྩ་གཉིས་འདབ་འདི་མཆིས། །བྲམ་ཟེ་དམ་པ་བདག་གིས་འཚལ། །དེ་སྐད་ཐོས་ནས་སྔོ་སངས་ལ། །སྣང་བས་སྨྲས་པ་བྲམ་ཟེའི་མཆོག་།ཁྱོད་ནི་བདེན་པའི་ཚིག་སྨྲ་བ། །ལེགས་སོ་ལེགས་སོ་འདིར་བདེན་ནོ། །ལོ་ནི་ཁྱུད་ཁོར་བཅུ་གཉིས་དང ། ཉི་མ་བདུན་དུ་མངོན་ཤེས་ཀྱིས། །འདབ་མ་རྣམས་ནི་བདག་གིས་བགྲངས། །གཙོ་བོ་ཁྱོད་ཀྱིས་སྐད་ཅིག་མཁྱེན། །ཁྱོད་ནི་གཟིགས་པ་མི་མཛད་ཅིང ། །བགྲང་བ་མི་མཛད་སྐད་ཅིག་ཏུ། །འདབ་མ་རྟོགས་པའི་རྗེས་སུ་ཞུགས། །མཁྱེན་འདི་ཉིད་ཀྱིའམ་ལྷ་ཡིས་བསྟན།། བྲམ་ཟེ་བདག་ལ་དོན་འདི་གསུངས། །སྔོ་སངས་ཀྱིས་སྨྲས་པ། །ཀྱེ་བཙུན་པ། གསོན་ཅིག་།འདི་ནི་ལྷ་ཡིས་སྨྲས་མིན་མི་ཡི་སྟེ། །བདག་ཚིག་བདེན་པའི་རྗེས་འབྲང་དོན་བཞིན་འཇུག ། ནམ་མཁའ་ཟད་པ་གྲུམ་པར་འགྱུར་སྲིད་ཀྱི། །ཁོ་བོ་བརྫུན་དུ་སྨྲ་བ་མི་སྲིད་དོ། །སྣང་བར་གྱུར་པ་བདག་ཉིད་ཆེན་པོ་ཤཱ་རིའི་བུ། བྲམ་ཟེ་སྔོ་སངས་གྱུར་པ་ཤཱཀྱ་སེང་གེ་སྟེ། །ཡོན་ཏན་རྒྱ་མཚོ་ལྡན་པ་རྣམས་ཀྱི་ངག་འདི་འདྲ། །བདེ་ལ་གནས་ཤིང་དོན་དང་ཆོས་དང་ལྡན་པ་ཡིན། །ཞི་བའི་བློ་གྲོས། དེ་ལྟར་བྱང་ཆུབ་སེམས་དཔའ་རྣམས་ངག་ཡོངས་སུ་དག་པ་
173b
ཡིན་ཏེ། འདི་ནི་བྱང་ཆུབ་སེམས་དཔའི་ངག་གི་གསང་བ་དང ། ངག་ཡོངས་སུ་དག་པ་ལ་འཇུག་པ་ཅུང་ཟད་ཙམ་ཞིག་བསྟན་པར་ཟད་ཀྱི། དེ་བས་གོང་དུ་བསྟན་ན་བྱང་ཆུབ་སེམས་དཔའི་ངག་ཡོངས་སུ་དག་པ་ཚད་ཟིན་པའམ། མཐར་ཕྱིན་པར་མི་འགྱུར་རོ། །བྱང་ཆུབ་སེམས་དཔའི་ངག་གི་གསང་བའི་ལེའུ་ཞེས་བྱ་སྟེ་གཉིས་པའོ།། །།གཞན་ཡང་གསང་བ་པའི་བདག་པོ་ལག་ན་རྡོ་རྗེས། བྱང་ཆུབ་སེམས་དཔའ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །ཞི་བའི་བློ་གྲོས། །དེ་ལ་བྱང་ཆུབ་སེམས་དཔའི་སེམས་ཀྱི་གསང་བ་དང ། སེམས་ཀྱི་ལས་ཡོངས་སུ་དག་པ་གང་ཞེ་ན། ཞི་བའི་བློ་གྲོས། འདི་ལ་བྱང་ཆུབ་སེམས་དཔའ་རྣམས་ནི་ཡེ་ཤེས་ཀྱིས་བྱས་པའི་ལས་རྣམས་བྱེད་ཀྱི། ང་རྒྱལ་གྱིས་བྱས་པའི་ལས་རྣམས་མི་བྱེད་དོ། །མངོན་པར་ཤེས་པ་ལས་ཀྱང་མ་ཉམས་ལ། ཡེ་ཤེས་ཀྱིས་བྱས་པའི་ལས་རྣམས་ཀྱང་བྱེད་དོ། །མངོན་པར་ཤེས་པས་ཀྱང་རྣམ་པར་རྩེན་ལ། བྱ་བ་ཐམས་ཅད་ཀྱང་སྟོན་ཏོ། །མངོན་པར་ཤེས་པ་ལ་ཡང་གནས་ལ། འཇུག་པ་ཆེན་པོ་ལ་ཡང་གནས་སོ། །དེ་དག་གི་མངོན་པར་ཤེས་པ་དེ་དག་ནི་ཡེ་ཤེས་ཀྱི་རྣམ་པ་སྟེ། རྣམ་པ་ཐམས་ཅད་ཀྱི་མཆོག་དང་ལྡན་པའོ། །དེ་དག་གི་མངོན་པར་ཤེས་པ་དེ་ནི་ཤེས་རབ་ཀྱི་རྣམ་པ་སྟེ། ཆོས་ཐམས་ཅད་མངོན་སུམ་དུ་མཐོང་བའོ། །དེ་དག་གི་མངོན་པར་ཤེས་པ་དེ་ནི་མི་ཟད་པའི་རྣམ་པ་སྟེ། ཐམས་ཅད་ཀྱི་རྗེས་སུ་འབྲང་བའོ། །དེ་དག་གི་
174a
༄#། །མངོན་པར་ཤེས་པ་དེ་ནི་གཟུགས་ཐམས་ཅད་གཟུགས་མ་ཡིན་པའི་ཕྱིར། །གཟུགས་ཐམས་ཅད་མཐོང་བའོ། །དེ་དག་གི་མངོན་པར་ཤེས་པ་དེ་ནི་སྔོན་གྱི་མཐའ་དང ། ཕྱི་མའི་མཐའི་སྒྲ་མཉམ་པ་ཉིད་ཀྱི་ཕྱིར་སྒྲ་ཐམས་ཅད་ཀྱི་རྗེས་སུ་སོང་བའོ། །དེ་དག་གི་མངོན་པར་ཤེས་པ་དེ་ནི་སེམས་ཅན་ཐམས་ཅད་ཀྱི་སེམས་ལ་བལྟ་བ་དང ། སེམས་ཀྱི་རང་བཞིན་ལ་སོ་སོར་རྟོག་ཅིང་བལྟ་བའོ། །དེ་དག་གི་མངོན་པར་ཤེས་པ་དེ་ནི་བསྐལ་པ་མཐའ་ཡས་པ་རྗེས་སུ་དྲན་པ་དང ། མངོན་གྱི་མཐའ་དང ། ཕྱི་མའི་མཐའ་ཡོངས་སུ་མ་ཆད་པའོ། །དེ་དག་གི་མངོན་པར་ཤེས་པ་དེ་ནི་རྫུ་འཕྲུལ་དང ། །རྣམ་པར་འཕྲུལ་པ་ཐམས་ཅད་མངོན་དུ་གྱུར་ཅིང ། །མངོན་པར་འདུ་བྱ་བ་མེད་པའི་མཚན་ཉིད་དོ། །དེ་དག་གི་མངོན་པར་ཤེས་པ་དེ་ནི་ཟག་པ་ཟད་པའི་རྗེས་སུ་མཐུན་པ་དང ། དུས་ལ་བལྟ་ཞིང་དུས་ལས་མི་ཡོལ་བའོ། །དེ་དག་གི་མངོན་པར་ཤེས་པ་དེ་ནི་འཇིག་རྟེན་ལས་འདས་པ་འཕགས་པ་ལ་མངོན་པར་ཕྱོགས་པའི་དེས་པར་འབྱེད་པའི་ཆ་དང་མཐུན་པའོ། །དེ་དག་གི་མངོན་པར་ཤེས་པ་དེ་ནི་ཉན་ཐོས་དང ། རང་སངས་རྒྱས་ཐམས་ཅད་ཀྱིས་རྟོགས་པར་དཀའ་བའོ།། དེ་དག་གི་མངོན་པར་ཤེས་པ་དེ་ནི་དོན་ཟབ་ཅིང ། བདུད་ཕྱིར་རྒོལ་བ་བཅོམ་པའོ། །དེ་དག་གི་མངོན་པར་ཤེས་པ་དེ་ནི་བྱང་ཆུབ་ཀྱི་སྙིང་པོ་བསྒྲུབ་ཅིང ། སངས་རྒྱས་ཀྱི་ཆོས་
174b
ཐམས་ཅད་མངོན་པར་རྫོགས་པར་བྱང་ཆུབ་པའི་མཆོག་ཡིན་ནོ། །དེ་དག་གི་མངོན་པར་ཤེས་པ་དེ་ནི་ཆོས་ཀྱི་འཁོར་ལོ་བསྐོར་བ་དང་མཐུན་པའོ། །དེ་དག་གི་མངོན་པར་ཤེས་པ་དེ་ནི་སེམས་ཅན་ཐམས་ཅད་འདུལ་བར་བྱེད་པའོ། །དེ་དག་གི་མངོན་པར་ཤེས་པ་དེ་ནི་ཆོས་ཐམས་ཅད་ལ་དབང་བྱེད་པའི་ཕྱིར་དབང་བསྐུར་བ་ཐོབ་པའོ། །ཞི་བའི་བློ་གྲོས་འདི་ནི་བྱང་ཆུབ་སེམས་དཔའི་སེམས་ཀྱི་ལས་ཡོངས་སུ་དག་པའོ། །སེམས་ཡོངས་སུ་དག་པ་དེ་ཉོན་མོངས་པ་མེད་ཅིང་ཡོངས་སུ་བྱ་བ་དང ། འོད་གསལ་བ་དང ། ཉེ་བའི་ཉོན་མོངས་པ་དང་བྲལ་བ་དང ། རབ་ཏུ་དུལ་བ་དང ། ལེགས་པར་སྦྱངས་པས་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་ལ་མཉམ་པར་འཇོག་ཀྱང ། ཤིན་ཏུ་ཟད་པ་དང ། མི་སྐྱེ་བ་ཉིད་དུ་ལྟུང་བ་ཡང་མ་ཡིན། །བསམ་བཞིན་དུ་ཡང་འདིར་སྐྱེ་ལ། འདོད་པའི་ཁམས་ན་འཁྲུགས་པ་ཡང་མེད་པ། བཅིངས་པ་བཞིན་དུ་སྐྱེ་བ་ཡང་མ་ཡིན། བཅིངས་བཞིན་དུ་འཆི་འཕོ་བ་ཡང་མ་ཡིན། །བཅིངས་བཞིན་དུ་འབྱུང་བ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། དེ་ནི་ཡང་དག་པ་མ་ཡིན་པ་ཀུན་ཏུ་རྟོག་པ་ལས་གྲོལ་བའོ། །ཀུན་ནས་ཉོན་མོངས་པའི་འཆིང་བ་ལས་གྲོལ་བའོ། །ཕྱིན་ཅི་ལོག་ཏུ་འཛིན་པ་ལ་གནས་པ་ལས་གྲོལ་བའོ། །དེས་ན་གྲོལ་བཞིན་དུ་སྐྱེའོ། །གྲོལ་བཞིན་དུ་འཆི་འཕོའོ། །གྲོལ་བཞིན་དུ་འབྱུང་ངོ ། །དེ་སྐྱེ་ཡང་ཐེག་པ་ཆེན་པོ་ལས་
175a
༄#། །ཉམས་པ་མེད་ལ། སངས་རྒྱས་ཀྱི་ཆོས་ཐམས་ཅད་ཀྱིས་ཀྱང་ཕུན་སུམ་ཚོགས་སོ། །ཕྱོགས་བཅུར་སངས་རྒྱས་ཀྱི་ཆོས་དེ་དག་ཡོངས་སུ་ཚོལ་ཡང་མི་རྙེད།་མི་དམིགས་སོ། །དེ་སངས་རྒྱས་ཀྱི་ཆོས་རྣམས་དང་ཆོས་ཐམས་ཅད་ཀྱང་སངས་རྒྱས་ཀྱི་ཆོས་སུ་རྟོགས་སོ། །དེ་ལྟར་ན་སངས་རྒྱས་ཀྱི་ཆོས་དང ། ཆོས་ཐམས་ཅད་ཀྱང་ཆོས་མ་ཡིན་ལ། ཆོས་མ་ཡིན་པ་ཡང་མ་ཡིན་པར་ཁས་ལེན་ཏོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་ཀུན་དུ་བཙལ་ན་ཡང་མི་རྙེད་དོ། །མི་དམིགས་སོ། །ཆོས་གང་ཡང་ཡང་དག་པ་ཇི་ལྟ་བ་བཞིན་དུ་བཙལ་ན་མི་རྙེད་ཅིང ། མི་དམིགས་པ་དེ་ལ་ནི་བགྲང་བ་གང་ཡང་མེད་དེ། ཆོས་ཐམས་ཅད་ནི་བགྲང་བའི་ལམ་ལས་ཡང་དག་པར་འདས་པའོ། །གང་ཆོས་ཐམས་ཅད་མཉམ་པ་ཉིད་དུ་ཤེས་པ་དེ་ནི་ཆོས་སམ། ཆོས་མ་ཡིན་པ་ལ་མངོན་པར་ཞེན་པ་མེད་དོ། །མངོན་པར་ཞེན་པ་མེད་པ་ནི་ཆོས་རྣམས་ཀྱི་དོན་ཏོ། །དོན་ལ་རློམ་སེམས་སུ་བྱེད་པ་གང་ཡིན་པ་དེ་ཉིད་དེའི་གནོད་པ་ཆེན་པོར་འགྱུར་རོ། །གང་ལ་རློམ་སེམས་མེད་པ་ལ་ནི་དོན་དང ། དོན་མ་ཡིན་པ་དེའི་མདུན་ན་མི་འདུག་གོ། །དོན་དུ་མི་བལྟ་བའི་བློ་ནི་གང་དུ་ཡང་ཐོགས་པ་མེད་དོ། །དེ་ན་བློ་ཐོགས་པ་མེད་པའོ། །གང་བློ་ཐོགས་པ་མེད་པ་དེ་ནི་ཆགས་པ་མེད་པའོ། །གང་ཆགས་པ་མེད་པ་དེ་ནི་རྒྱུན་ཆད་པ་མེད་པའོ། །གང་རྒྱུན་ཆད་མེད་པ་དེ་ནི་ཉམས་པ་མེད་པའོ། །
175b
གང་ཉམས་པ་མེད་པ་དེ་ནི་བཙལ་བ་དོན་མེད་པར་མི་འགྱུར་རོ། །གང་གི་བཙལ་བ་དོན་མེད་པར་མི་འགྱུར་བ་དེ་ལ་སྐྱོན་མེད་དོ། །གང་ལ་སྐྱོན་མེད་པ་དེ་ལ་བདག་གི་བ་མེད་དོ། །གང་ལ་བདག་གི་བ་མེད་པ་དེ་ལ་ཡོངས་སུ་འཛིན་པ་མེད་དོ། །གང་ལ་ཡོངས་སུ་འཛིན་པ་མེད་པ་དེ་ལ་རྩོད་པ་མེད་དོ། །གང་ལ་རྩོད་པ་མེད་པ་དེ་ལ་འགྱེད་པ་མེད་དོ། །གང་ལ་འགྱེད་པ་མེད་པ་དེ་ནི་རྩོད་པ་མེད་པ་སྟེ། དགེ་སྦྱོང་གི་ཆོས་དང་ལྡན་པ་ཞེས་བྱའོ། །གང་དགེ་སྦྱོང་གི་ཆོས་དང་ལྡན་པ་དེ་ནམ་མཁའ་དང་ལག་མཐིལ་དུ་མཉམ་པའོ། །གང་ནམ་མཁའ་དང་ལགས་མཐིལ་དུ་མཉམ་པ་དེ་ནི་འདོད་པའི་ཁམས་སུ་མི་གཏོགས་སོ། །གཟུགས་ཀྱི་ཁམས་སུ་མི་གཏོགས་སོ། །གཟུགས་མེད་པའི་ཁམས་སུ་མི་གཏོགས་སོ། །གང་ཐམས་ཅད་དུ་གཏོགས་པ་མ་ཡིན་པ་དེ་ལ་ནི་ཁ་དོག་མེད། རྟགས་མེད། དབྱིབས་མེད་དོ། །གང་ལ་ཁ་དོག་མེད། རྟགས་མེད། དབྱིབས་མེད་པ་དེ་ནི་དེ་འདྲ་བ་ཉིད་རྗེས་སུ་རྟོགས་སོ། །དེ་ཅི་འདྲ་བ་རྗེས་སུ་རྟོགས་པ་དེ་འདྲ་བ་ཉིད་རབ་ཏུ་རྟོགས་སོ། །ཅིའི་ཕྱིར་རྗེས་སུ་རྟོགས་པ་དང ། རབ་ཏུ་རྟོགས་པ་ཞེས་བྱ་ཞེ་ན། དེ་ལ་རྗེས་སུ་རྟོགས་པར་བྱ་བའམ། རབ་ཏུ་རྟོགས་པར་བྱ་བའི་ཆོས་ཕྲ་རབ་ཙམ་ཡང་མི་དམིགས་པས་དེའི་ཕྱིར་རྗེས་སུ་རྟོགས་པ་དང ། རབ་ཏུ་རྟོགས་པ་ཞེས་བྱ་སྟེ། ཞི་བའི་བློ་གྲོས། འདི་ཡང་བྱང་ཆུབ་སེམས་དཔའི་སེམས་ཀྱི་གསང་བའོ། །ཞི་བའི་བློ་གྲོས། གཞན་ཡང་བྱང་ཆུབ་སེམས་དཔའི་
176a
༄#། །སེམས་ཀྱི་གསང་བ་ནི། གང་བྱམས་པ་ཡང་ཡིན་ལ་བདག་མེད་པ་ཉིད་ཀྱང་ཡིན། སྙིང་རྗེ་ཡང་ཡིན་ལ་སེམས་ཅན་མེད་པ་ཉིད་ཀྱང་ཡིན། དགའ་བ་ཡང་ཡིན་ལ་སྲོག་མེད་པ་ཉིད་ཀྱང་ཡིན། བཏང་སྙོམས་ཀྱང་ཡིན་ལ། གང་ཟག་མེད་པ་ཉིད་ཀྱང་ཡིན། སྦྱིན་པ་ཡང་ཡིན་ལ་སེམས་དུལ་བ་ཉིད་ཀྱང་ཡིན། ཚུལ་ཁྲིམས་ཀྱང་ཡིན་ལ་སེམས་ཞི་བ་ཉིད་ཀྱང་ཡིན། བཟོད་པ་ཡང་ཡིན་ལ་སེམས་མི་ཟད་པ་ཉིད་ཀྱང་ཡིན། །བརྩོན་འགྲུས་ཀྱང་ཡིན་ལ་སེམས་དབེན་པ་ཉིད་ཀྱང་ཡིན། བསམ་གཏན་ཡང་ཡིན་ལ་སེམས་ངེས་པར་སེམས་པ་ཉིད་ཀྱང་ཡིན། །ཤེས་རབ་ཀྱང་ཡིན་ལ་རྒྱུ་བ་མེད་པའི་སེམས་ཉིད་ཀྱང་ཡིན། དྲན་པ་ཉེ་བར་བཞག་པ་རྣམས་ཀྱང་ཡིན་ལ་དྲན་པ་ཡིད་ལ་བྱེད་པ་མེད་པའི་སེམས་ཉིད་ཀྱང་ཡིན།་ཡང་དག་པར་སྤོང་བ་རྣམས་ཀྱང་ཡིན་ལ། ཡང་དག་པར་སེམས་མཉམ་པ་ཉིད་ཀྱང་ཡིན། རྫུ་འཕྲུལ་གྱི་རྐང་པ་རྣམས་ཀྱང་ཡིན་ལ། སྤྲོས་པ་མེད་པའི་སེམས་ཉིད་ཀྱང་ཡིན། དད་པ་ཡང་ཡིན་ལ་ཆགས་པ་མེད་པའི་སེམས་ཉིད་ཀྱང་ཡིན། བརྩོན་འགྲུས་ཀྱང་ཡིན་ལ་ལྷུན་གྱིས་གྲུབ་པའི་སེམས་ཉིད་ཀྱང་ཡིན། དྲན་པ་ཡང་ཡིན་ལ་རང་འབྱུང་གི་སེམས་ཉིད་ཀྱང་ཡིན། ཏིང་ངེ་འཛིན་ཀྱང་ཡིན་ལ་མཉམ་པ་ཉིད་ཤེས་པའི་སེམས་ཉིད་ཀྱང་ཡིན། ཤེས་རབ་ཀྱི་དབང་པོ་ཡང་ཡིན་ལ་དབང་པོ་མེད་པའི་སེམས་ཉིད་ཀྱང་ཡིན། དབང་པོ་རྣམས་
176b
ཀྱང་ཡིན་ལ་ཆོས་ཐམས་ཅད་ལ་དབང་པོ་མེད་པའི་སེམས་ཉིད་ཀྱང་ཡིན། སྟོབས་རྣམས་ཀྱང་ཡིན་ལ་མི་རྫི་བའི་སེམས་ཉིད་ཀྱང་ཡིན། བྱང་ཆུབ་ཀྱི་ཡན་ལག་རྣམས་ཀྱང་ཡིན་ལ་བློས་རབ་ཏུ་འབྱེད་པའི་སེམས་ཉིད་ཀྱང་ཡིན། ལམ་བསྒོམ་པ་ཉིད་ཀྱང་ཡིན་ལ་བསྒོམ་པ་མེད་པའི་སེམས་ཉིད་ཀྱང་ཡིན། ཞི་གནས་ཀྱང་ཡིན་ལ་སེམས་ཉེ་བར་ཞི་བ་ཉིད་ཀྱང་ཡིན། ལྷག་མཐོང་ཡང་ཡིན་ལ་རྗེས་སུ་མི་མཐོང་བའི་སེམས་ཉིད་ཀྱང་ཡིན། འཕགས་པའི་བདེན་པ་བསྒོམ་པ་ལ་ཡང་ཡིན་ལ་ཤིན་ཏུ་ཡོངས་སུ་ཤེས་པའི་སེམས་ཉིད་ཀྱང་ཡིན། སངས་རྒྱས་ཡིད་ལ་བྱེད་པ་ཡང་ཡིན་ལ་ཡིད་ལ་བྱེད་པ་མེད་པའི་སེམས་ཉིད་ཀྱང་ཡིན། ཆོས་ཡིད་ལ་བྱེད་པ་ཡང་ཡིན་ལ་ཆོས་ཀྱི་དབྱིངས་སུ་མཉམ་པའི་སེམས་ཉིད་ཀྱང་ཡིན། དགེ་འདུན་ཡིད་ལ་བྱེད་པ་ཡང་ཡིན་ལ་མི་གནས་པའི་སེམས་ཉིད་ཀྱང་ཡིན། སེམས་ཅན་ཡོངས་སུ་སྨིན་པར་ཡང་བྱེད་ལ་བཟོད་མ་ནས་དག་པའི་སེམས་ཉིད་ཀྱང་ཡིན། དམ་པའི་ཆོས་ཡོངས་སུ་འཛིན་པ་ཡང་ཡིན་ལ།་ཆོས་ཀྱི་དབྱིངས་དང ། དབྱེར་མེད་པའི་སེམས་ཉིད་ཀྱང་ཡིན། སངས་རྒྱས་ཀྱི་ཞིང་ཡོངས་སུ་དག་པ་ཡང་ཡིན་ལ། སེམས་ནམ་མཁའ་དང་མཉམ་པ་ཉིད་ཀྱང་ཡིན། མི་སྐྱེ་བའི་ཆོས་ལ་བཟོད་པ་ཡང་ཡིན་ལ། མི་དམིགས་པའི་སེམས་ཉིད་ཀྱང་ཡིན། ཕྱིར་མི་ལྡོག་པའི་ས་ཡང་ཡིན་ལ་ལྡོག་པ་དང་འཇུག་པ་མེད་པའི་སེམས་ཉིད་ཀྱང་ཡིན། མཚན་རབ་ཏུ་ཐོབ་པ་ཡང་
177a
༄#། །ཡིན་ལ་མཚན་མ་མེད་པའི་སེམས་ཉིད་ཀྱང་ཡིན། བྱང་ཆུབ་ཀྱི་སྙིང་པོའི་རྒྱན་ཉིད་ཀྱང་ཡིན་ལ་ཁམས་གསུམ་གྱི་སྙིང་པོའི་སེམས་ཉིད་ཀྱང་ཡིན། བདུད་ཚར་གཅོད་པ་ཡང་ཡིན་ལ་སེམས་ཅན་ཐམས་ཅད་ལ་ཕན་འདོགས་པའི་སེམས་ཉིད་ཀྱང་ཡིན། བྱང་ཆུབ་ཀྱང་ཡིན་ལ་ཆོས་ཐམས་ཅད་ནི་དངོས་པོ་མེད་པར་ཁོང་དུ་ཆུད་པའི་སེམས་ཉིད་ཀྱང་ཡིན། ཆོས་ཀྱི་འཁོར་ལོ་བསྐོར་བ་ཡང་ཡིན་ལ་མི་འཇུག་མི་ལྡོག་པའི་སེམས་ཉིད་ཀྱང་ཡིན། ཡོངས་སུ་མྱ་ངན་ལས་འདས་པ་ཆེན་པོ་ཡང་སྟོན་ལ་འཁོར་བའི་རང་བཞིན་དང་མཉམ་པའི་སེམས་ཉིད་ཀྱང་ཡིན་ཏེ། ཞི་བའི་བློ་གྲོས། འདི་ནི་བཟོད་པ་ཐོབ་པའི་བྱང་ཆུབ་སེམས་དཔའི་སེམས་ཀྱི་གསང་བ་དང ། སེམས་ཀྱི་ལས་ཡོངས་སུ་དག་པའོ། ། སེམས་དག་པ་དེས་སེམས་ཅན་ཐམས་ཅད་ཀྱི་སེམས་ཡོངས་སུ་དག་པར་རྟོགས་ཏེ། སེམས་ཅན་ཐམས་ཅད་ཀྱི་སེམས་ལ་བྱང་ཆུབ་ཀྱི་སེམས་དེ་རྗེས་སུ་ཞུགས་པ་ཡིན་ནོ། ། བྱང་ཆུབ་ཀྱི་སེམས་དེ་ལ་སེམས་ཅན་ཐམས་ཅད་ཀྱི་སེམས་ཀྱང་སྣང་བར་གྱུར་བ་ཡིན་ནོ། །ཞི་བའི་བློ་གྲོས། འདི་ལྟ་སྟེ། དཔེར་ན། ནམ་མཁའ་ནི་ཐམས་ཅད་ཀྱི་རྗེས་སུ་སོང་བ་དང ། ཐམས་ཅད་ཀྱི་རྗེས་སུ་ཞུགས་པ་ཡིན་ནོ། །ཞི་བའི་བློ་གྲོས། དེ་བཞིན་དུ་བྱང་ཆུབ་སེམས་དཔའི་སེམས་ནི་ཐམས་ཅད་ཀྱི་རྗེས་སུ་སོང་བ་དང ། ཐམས་ཅད་ཀྱི་རྗེས་སུ་ཞུགས་པ་ཡིན་ནོ། །
177b
གསང་བ་པའི་བདག་པོ་ལག་ན་རྡོ་རྗེས་བྱང་ཆུབ་སེམས་དཔའི་ལུས་དང ། ངག། སེམས་ཀྱི་གསང་བ་བསྟན་པ་འདི་བཤད་པ་ན། ལྷ་དང་མིའི་སྐྱེ་དགུའི་སྲོག་ཆགས་ལས། སྟོང་ཕྲག་བདུན་ཁྲི་ཉིས་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་སུམ་ཁྲི་ཉིས་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་བརྒྱད་ཁྲི་བཞི་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།དགེ་སློང་བརྒྱད་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་རབ་ཏུ་གཡོས་ཏེ། འཇིག་རྟེན་གྱི་ཁམས་འདི་ཐམས་ཅད་སྣང་བ་ཆེན་པོས་ཁྱབ་པར་གྱུར་ཏོ། །སྟེང་གི་བར་སྣང་ལས་ཀྱང་མེ་ཏོག་གི་ཆར་མངོན་པར་བབ་པོ། །མ་བསྐྱོད་པར་སིལ་སྙན་དང ། རོལ་མོའི་སྒྲ་སྟོང་སྙེད་རབ་ཏུ་གྲགས་པར་གྱུར་ཏེ། སིལ་སྙན་དང ། རོལ་མོའི་སྒྲ་དེ་དག་ལས་ཀྱང་གང་གསང་བ་པའི་བདག་པོ་ལག་ན་རྡོ་རྗེས་བསྟན་པ་འདི་ཉན་པ་དང ། ཐོས་ནས་ཀྱང་འཛིན་ཅིང་མོས་པར་བྱེད་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བྱེད་པ་དང ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པའི་སེམས་ཅན་དེ་དག་ནི་བྱང་ཆུབ་ཀྱི་སེམས་ལ་རྨོངས་པ་མེད་པའི་བསམ་པ་དང་ལྡན་ཏེ། དགེ་བའི་རྩ་བ་ཆུང་དུ་དང་ལྡན་པ་མ་ཡིན་ནོ། །དེ་དག་
178a
༄#། །ནི་སངས་རྒྱས་མང་པོ་ལ་བསྙེན་བཀུར་བྱས་པར་རིག་པར་བྱ་སྟེ། དགེ་བའི་རྩ་བ་བསྐྱེད་པ་བསོད་ནམས་ཀྱི་ཚོགས་ཀྱིས་ཉེ་བར་བརྟན་པའོ། །སེམས་ཅན་དེ་དག་ནི་སེམས་ཅན་ཐམས་ཅད་ལ་ཕན་འདོགས་པར་གྱུར་པ་ཡིན་ཏེ། སེམས་ཅན་དེ་དག་ནི་ལུང་བསྟན་པའི་ས་ཐོབ་པར་འགྱུར་རོ། །ཞེས་དེ་ལྟ་བུའི་སྒྲ་བྱུང་ངོ ། །བྱང་ཆུབ་སེམས་དཔའི་སེམས་ཀྱི་གསང་བའི་ལེའུ་ཞེས་བྱ་སྟེ་གསུམ་པའོ།། །།དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་བཀའ་སྩལ་པ། ཞི་བའི་བློ་གྲོས། སིལ་སྙན་དང ། རོལ་མོའི་སྒྲ་ལས་འདི་ལྟ་བུའི་སྒྲ་བྱུང་བ་ཁྱོད་ཀྱིས་ཐོས་སམ། གསོལ་པ། བཅོམ་ལྡན་འདས། ཐོས་ལགས་ཏེ། འདི་ལྟ་བུའི་སྒྲ་བྱུང་བ་དེ་སུའི་མཐུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཞི་བའི་བློ་གྲོས། འདི་ནི་འཇིག་རྟེན་གྱི་ཁམས་སྤྲིན་ལྡན་ཞེས་བྱ་བ་ན། བཅོམ་ལྡན་འདས་དེ་བཞིན་གཤེགས་པ་སྤྲིན་དབྱངས་རྒྱལ་པོ་ཞེས་བྱ་བའི་དྲུང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲ་དབྱངས་བསྒྲགས་པ་ཞེས་བྱ་བ་ང་ལ་བལྟ་བ་དང ། ཕྱག་བྱ་བ་དང ། མཆོད་པ་དང ། བསྙེན་བཀུར་བྱ་བ་དང ། ཆོས་མཉན་པ་དང ། ལག་ན་རྡོ་རྗེས་བསྟན་པའི་ཆོས་ཀྱི་རྣམ་གྲངས་འདི་ཡང་མཉན་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱོགས་བཅུ་ནས་འདུས་པ་འདི་དག་ལ་
178b
ཡང་བལྟ་བའི་ཕྱིར། འཇིག་རྟེན་གྱི་ཁམས་མི་མཇེད་འདིར་འོངས་ཏེ། ཞི་བའི་བློ་གྲོས། བྱང་ཆུབ་སེམས་དཔའ་སྒྲ་དབྱངས་བསྒྲགས་པ་ཞེས་བྱ་བ་དེ་ལུས་མི་སྣང་བར་སྟེང་གི་བར་སྣང་ལ་གནས་ནས།་ང་དང་ཆོས་ཀྱི་རྣམ་གྲངས་འདི་ལ་མཆོད་པའི་ཕྱིར་འདི་ལྟ་བུའི་མེ་ཏོག་ཆར་མངོན་པར་འབེབས་ཤིང ། སིལ་སྙན་དང ། རོལ་མོའི་སྒྲ་ཡང་རབ་ཏུ་ཕྱུང་ནས། སིལ་སྙན་དང ། རོལ་མོའི་སྒྲ་དེ་དག་ལས་སྒྲ་འདི་ལྟ་བུ་བྱུང་ངོ ། །བཅོམ་ལྡན་འདས་ཀྱིས་གསུང་དེ་སྐད་ཅེས་བཀའ་སྩལ་ནས་རིང་པོར་མ་ལོན་པར། དེ་ནས་བྱང་ཆུབ་སེམས་དཔའ་སྒྲ་དབྱངས་བསྒྲགས་པ་ཞེས་བྱ་བ་བར་སྣང་དེ་ལས་བབས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། ལན་བརྒྱ་སྟོང་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་འདུག་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་སྤྲིན་དབྱངས་རྒྱལ་པོས་བཅོམ་ལྡན་འདས་ལ་སྙུན་གསོལ་ཏེ། གནོད་པ་ཆུང་ངམ། ཉམ་ང་བ་ཉུང་ངམ།་བསྐྱོད་པ་ཡང་ངམ། སྟོབས་དང་བདེ་བ་ལ་རེག་པར་གནས་སམ་ཞེས་སྙུན་གསོལ་ལོ། །ཡང་བཅོམ་ལྡན་འདས་དེ་འདི་སྐད་དུ། འདི་ལྟ་སྟེ། སངས་རྒྱས་ཀྱི་མཐུས་གསང་བའི་བདག་པོས་བསྟན་པ་ཆེན་པོ་འདི་བསྟན་ཏོ་ཞེས་གསུང་ངོ ། །བཅོམ་ལྡན་འདས། འདི་འདྲ་བའི་སྤྱོད་པས་སངས་རྒྱས་ཀྱི་ཆོས་ཚད་མ་མཆིས་པ་ཐོབ་པར་རྔོ་ཐོགས་ལགས་སམ། དེ་ནས་བཅོམ་
179a
༄#། །ལྡན་འདས་ཀྱིས་བྱང་ཆུབ་སེམས་དཔའ་སྒྲ་དབྱངས་བསྒྲགས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ལེགས་པར་འོངས་སོ། །ཁྱོད་འདིར་འོངས་པ་ལེགས་སོ། །ཁྱོད་ཀྱིས་དེ་བཞིན་གཤེགས་པའི་གསང་བ་བསམ་གྱིས་མི་ཁྱབ་པའི་ལེའུ་གསང་བ་པའི་བདག་པོ་ལས་ཐོས་པར་འགྱུར་རོ། །སྒྲ་དབྱངས་བསྒྲགས་པ་འོངས་པའི་ལེའུ་ཞེས་བྱ་སྟེ་བཞི་པའོ།། །།དེ་ནས་འཁོར་དེ་ལས་བྱང་ཆུབ་སེམས་དཔའ་ཁ་ཅིག་འདི་སྙམ་དུ་སེམས་ཏེ། གསང་བ་པའི་བདག་པོ་འདིས་དགེ་བའི་རྩ་བ་གང་དུ་བསྐྱེད། སངས་རྒྱས་བཅོམ་ལྡན་འདས་ཇི་སྙེད་ཅིག་ལ་འདིས་བསྙེན་བསྐུར་བྱས། འདིས་སྨོན་ལམ་ཅི་འདྲ་བ་ཞིག་བཏབ་ན། གང་ཕྱིར་འདི་འདྲ་བའི་སྤོབས་པ་དང་ལྡན་པར་གྱུར་སྙམ་མོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་གི་སེམས་ཀྱི་རྟོག་པ་ཐུགས་ཀྱིས་མཁྱེན་ནས། བྱང་ཆུབ་སེམས་དཔའ་ཞི་བའི་བློ་གྲོས་ལ་བཀའ་སྩལ་པ།་ཞི་བའི་བློ་གྲོས། སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ། རྒྱ་ཆེན་པོ་ཚད་མེད་པ། བསམ་གྱིས་མི་ཁྱབ་པ། དཔག་ཏུ་མེད་པར་གྱུར་པ་དེའི་ཚེ་དེའི་དུས་ན། བསྐལ་པ་མཛེས་པར་སྣང་བ་ཞེས་བྱ་བ་ལ་འཇིག་རྟེན་གྱི་ཁམས་རྣམ་པར་བརྒྱན་པ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
179b
པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ ། །ཞི་བའི་བློ་གྲོས། འཇིག་རྟེན་གྱི་ཁམས་རྣམ་པར་བརྒྱན་པ་དེ་ཡང་འབྱོར་པ་རྒྱས་པ། བདེ་བ། ལོ་ལེགས་པ། ཉམས་དགའ་བ། ལྷ་དང་མི་མང་པོས་གང་བ། ལག་མཐིལ་ལྟར་མཉམ་པར་གྱུར་པ། གསེག་མ་དང་གྱོ་མོ་མེད་པ། རྩཝ་དག་དེར་སྐྱེས་པ་ཡང་འཇམ་པོ། གོས་ཀ་ཙ་ལིན་དི་ཀ་ལྟར་རེག་ན་བདེ་བ། རྨ་བྱའི་མགྲིན་པ་ལྟར་སྔོ་ཞིང་གཡུང་དྲུང་འཁྱིལ་བར་གཡས་སུ་འཁྱིལ་བ་ཁ་དོག་དང་ལྡན་པ། དྲི་དང་ལྡན་པ་ཡིད་དུ་འོང་བ། གོམ་པ་བོར་ན་སོར་བཞི་ཐུར་དུ་དམའ་བ། རྐང་པ་བཏེག་ན་སོར་བཞི་གྱེན་དུ་མཐོབ། ཧ་ཅང་ཡང་མི་གྲང ། ཧ་ཅང་མི་ཚ་བའི་རླུང་ཆུང་ངུ་བསིལ་བ་འདོད་པ་དང་མཐུན་པར་ལྡང་བའོ། །ས་ཆེན་པོ་དེ་ཡང་བཻ་ཌཱུརྱ་སྔོན་པོས་བརྒྱན་པའོ། །སེམས་ཅན་དེ་རྣམས་ཀྱང་རྣམ་པ་བཟང་ཞིང་མཁས་པ་དང་ལྡན་པར་གྱུར་ཏེ། འདོད་ཆགས་དང ། ཞེ་སྡང་དང ། གཏི་མུག་ཆུང་བ། ཉོན་མོངས་པ་ཐམས་ཅད་ཆུང་བ། ལེགས་པར་བཤད་པའི་དོན་ཀུན་ཤེས་པར་བྱེད་ནུས་པའི་མཐུ་དང་ལྡན་པ་ཤ་སྟག་གོ་།བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་དེ་
180a
༄#། །བཞིན་གཤེགས་པ་དེའི་ཉན་ཐོས་ཀྱི་དགེ་སློང་གི་དགེ་འདུན་ནི་ཁྲག་ཁྲིག་བཅུ་གཉིས་ཡོད་དོ། །བྱང་ཆུབ་སེམས་དཔའི་དགེ་འདུན་ནི་བྱེ་བ་ཕྲག་སུམ་ཅུ་རྩ་གཉིས་ཡོད་དོ། །དེའི་སྐུ་ཚེའི་ཚད་ནི་ལོ་བྱེ་བ་ཕྲག་སུམ་ཅུ་རྩ་དྲུག་ཐུབ་བོ། །མི་རྣམས་ཀྱང་དུས་མ་ཡིན་པར་གློ་བུར་བུ་འཆི་བ་མེད་དོ། །ཞི་བའི་བློ་གྲོས། དེའི་ཚེ་དེའི་དུས་ན་རྣམ་པར་བརྒྱན་པའི་འཇིག་རྟེན་གྱི་ཁམས་དེ་ན་མཛེས་པར་སྣང་བ་ཞེས་བྱ་བ་གླིང་བཞི་པའི་འཇིག་རྟེན་པར་མ་རབ་ཏུ་འབྱོར་པ་རྒྱས་པ་བདེ་བ། རབ་ཏུ་ལོ་ལེགས་པ། ཡངས་ཤིང་ཐ་གྲུ་ཆེ་བ་བྱུང་སྟེ། གླིང་བཞི་པ་རེ་རེ་ཡང་དཔག་ཚད་བརྒྱད་ཁྲི་བཞི་སྟོང་པར་གྱུར་ཏེ། དེར་གྲོང་ཁྱེར་ཆེན་པོ་ཡང་བར་བར་ན་དཔག་ཚད་གཅིག་ཡོད་པ། གྲོང་དང ། ཚོང་འདུས་དང ། རི་ཁྲོད་སྟོང་གིས་བསྐོར་བ་བྱུང་ངོ ། །ཞི་བའི་བློ་གྲོས། གླིང་བཞི་པ་མཛེས་པར་སྣང་བ་དེའི་དབུས་ན་ཕོ་བྲང་གྲོང་ཁྱེར་རྣམ་པར་དག་པ་ཅན་ཞེས་བྱ་བ་ཡངས་ཤིང་རྒྱ་ཆེ་བ། བྱང་དང་ལྷོར་ནི་དཔག་ཚད་དྲུག་ཅུ་རྩ་བཞི། ཤར་དང་ནུབ་ཏུ་ནི་དཔག་ཚད་བཞི་བཅུ་རྩ་གཉིས་ཡོད་པ། སྐྱེད་མོས་ཚལ་ཁྲིས་རབ་ཏུ་བརྒྱན་པ། གྲོང་དང ། ཚོང་འདུས་དང ། རི་ཁྲོད་ཁྲིས་ཀུན་ནས་བསྐོར་བ་ཡོད་དོ། །ཞི་བའི་བློ་གྲོས། རྒྱལ་པོའི་ཕོ་བྲང་རྣམ་པར་དག་པ་ཅན་ཞེས་བྱ་བ་དེར། འཁོར་ལོས་བསྒྱུར་བའི་རྒྱལ་པོ་ཡུལ་འཁོར་བསྲུང་ཞེས་བྱ་བ། རིན་པོ་ཆེ་སྣ་བདུན་དང་ལྡན་པ། གླིང་
180b
བཞི་པ་ལ་དབང་བ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། བསོད་ནམས་ཀྱི་གཟི་བརྗིད་དང་ལྡན་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཞིག་བྱུང་ངོ ། །ཞི་བའི་བློ་གྲོས། རྒྱལ་པོ་ཡུལ་འཁོར་སྲུང་གི་གྲོང་ཁྱེར་གྱི་དབུས་ན་ཁང་པ་རྒྱ་ཆེ་ཞིང་ཡངས་པ། ཆུ་ཞིང་དུ་དཔག་ཚད་བཅུ་དྲུག་ཡོད་པ། རིན་པོ་ཆེ་སྣ་བདུན་གྱི་ར་བ་རིམ་བདུན་དང ། རྟ་བབས་དང ། དྲིལ་བུ་གཡེར་ཀའི་དྲ་བ་རིམ་བདུན་གྱིས་ཀུན་ནས་བསྐོར་བ་བརྩིགས་སོ། །ར་བའི་ནང་ན་སྐྱེད་མོས་ཚལ་ཆེན་པོ་བཞི་བྱས་ཏེ། འདི་ལྟ་སྟེ། མེ་ཏོག་སྣ་ཚོགས་ཞེས་བྱ་བའི་སྐྱེད་མོས་ཚལ་ཆེན་པོ་དང ། ཡོན་ཏན་གྱིས་མངོན་པར་དགའ་བ་ཞེས་བྱ་བ་དང ། རྨ་བྱས་མངོན་པར་དགའ་བ་ཞེས་བྱ་བ་དང ། དུས་ཀྱི་བདེ་བ་ཞེས་བྱ་བའོ། །རྫིང་ཁྱོན་དཔག་ཚད་ཕྱེད་པ་རིན་པོ་ཆེའི་ཁ་ཁྱེར་གྱིས་ཀུན་ནས་བསྐོར་བ། འཛམ་བུ་ཆུ་བོའི་གསེར་གྱི་གླེགས་མའི་འབབ་སྟེགས་ཅན། གསེར་གྱི་བྱེ་མ་བདལ་བ། ཡན་ལག་བརྒྱད་དང་ལྡན་པའི་ཆུས་གང་བ། རིན་པོ་ཆེའི་པད་མས་ཀུན་ནས་ཁེབས་པ། ངང་པ་དང ། ཆུ་སྐྱར་དང ། བྱ་གག་དང ། ངུར་བ་དག་སྒྲ་འབྱིན་པ་བཞི་བྱས་ཏེ། འདི་ལྟ་སྟེ། དགའ་བ་ཞེས་བྱ་བ་དང ། དགའ་མཆོག་ཅེས་བྱ་བ་དང ། སྤོས་མཆོག་ཅེས་བྱ་བ་དང ། ཆུ་རྒྱུན་རྗེས་སུ་འབབ་པ་ཞེས་བྱ་བའོ། །ཞི་བའི་བློ་གྲོས། རྒྱལ་པོ་ཡུལ་འཁོར་སྲུང་གི་བཙུན་མོའི་འཁོར་བདུན་འབུམ་ཡོད་དེ། ཐམས་ཅད་ཀྱང་མཚན་དང་ལྡན་
181a
༄#། །པའི་ན་ཆུང་བུད་མེད་རིན་པོ་ཆེའི་ལོངས་སྤྱོད་དང་འདྲ་བ་ཤ་སྟག་གོ་།དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་རབ་ཏུ་ཞུགས་པར་གྱུར་པ་དག་གོ་།དེ་ལ་བུ་སྟོང་དུ་ཚང་བ་ཡོད་དེ། དཔའ་བ། བརྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ། སྐྱེས་བུ་ཆེན་པོའི་མཚན་ཉི་ཤུ་རྩ་བརྒྱད་ཀྱིས་བརྒྱན་པ། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པ་ཤ་སྟག་གོ་།ཞི་བའི་བློ་གྲོས། དེའི་ཚེ་དེའི་དུས་ན།་བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་དེ་བཞིན་གཤེགས་པ་དེ་རྣམ་པར་དག་པ་དང་ལྡན་པའི་རྒྱལ་པོའི་ཕོ་བྲང་འཁོར་དུ་རྟེན་ཅིང་བཞུགས་ཏེ།་རྒྱལ་པོ་དང ། བློན་པོ་ཆེན་པོ་དང ། བྲམ་ཟེ་དང ། ཁྱིམ་བདག་དང ། གྲོང་བརྡལ་བ་དང ། ཡུལ་འཁོར་གྱི་མིས་བསྟི་སྟང་བྱས། བླ་མར་བྱས། རི་མོར་བྱས། མཆོད་པར་བྱས་སོ། །ཞི་བའི་བློ་གྲོས། རྒྱལ་པོ་ཆེན་པོ་ཡུལ་འཁོར་སྲུང་གིས་བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་དེ་བཞིན་གཤེགས་པ་དེ་ལ་དགེ་སློང་གི་དགེ་འདུན་དང་ཐབས་གཅིག་ཏུ་ལོ་བྱེ་བ་ཚང་བར་ཡིད་དུ་འོང་བའི་བཟའ་བ་དང ། བཏུང་བ་དང ། ན་བཟའ་དང ། གཙུག་ལག་ཁང་དང ། འཆག་སའི་ལོངས་སྤྱོད་ཀྱིས་བསྙེན་བཀུར་བྱས་ཏེ། དགེ་སློང་རེ་
181b
རེ་ལ་ཡང་རིམ་གྲོ་པ་དང ། སྤྱོད་པའི་ཕྱིར་གཡོག་གསུམ་གསུམ་ཕུལ་ལོ། །ཞི་བའི་བློ་གྲོས། རྒྱལ་བུ་གཞོན་ནུ་དེ་དག་ཀྱང་དེ་བཞིན་གཤེགས་པ་ལ་བསྟི་སྟང་བྱ་བ་དང ། མཆོད་པ་བྱ་བར་མོས་པ་དང ། ཆོས་ཉན་པ་དོན་དུ་གཉེར་བས་བག་ཡོད་པར་གྱུར་ཏེ། འདོད་པའི་ཡོན་ཏན་དོན་དུ་མི་གཉེར་རོ། །དེ་དག་བག་ཡོད་ཅིང་དམ་པའི་ཆོས་ཉན་པ་དང ། སེམས་ཀྱིས་ངེས་པར་སེམས་པས་རིང་པོ་མ་ལོན་པར་མངོན་པར་ཤེས་པ་ལྔ་བསྐྱེད་པར་གྱུར་ཏོ། །དེ་དག་བསྐྱེད་ནས་སྟེང་གི་བར་སྣང་ལས་ངང་པའི་རྒྱལ་པོ་བཞིན་དུ་སྐྱེད་མོས་ཚལ་ནས་སྐྱེད་མོས་ཚལ་དང ། གྲོང་ཁྱེར་ནས་གྲོང་ཁྱེར་དང ། ཚོང་འདུས་ནས་ཚོང་འདུས་དང ། གླིང་བཞི་པའི་འཇིག་རྟེན་གྱི་ཁམས་ཐམས་ཅད་དུ་མཐར་གྱིས་རྒྱུ་ཞིང་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་འབྱུང་བ་བརྒྱ་ལམ་རྙེད་པར་འགྱུར། །མིར་སྐྱེ་བ་ཡང་ཤིན་ཏུ་དཀའ་བས་རྙེད། །གྲོགས་པོ་གང་དག་དད་དང་ཆོས་མཉན་པ། འདི་འདྲ་བསྐལ་པ་བརྒྱར་ཡང་རྙེད་པར་དཀའ། །མི་དབང་རྒྱལ་པོ་དེ་ནི་ད་བྱུང་སྟེ། །རབ་ཏུ་ཞི་བར་འགྲོ་བའི་ཆོས་སྟོན་གྱིས། །བདེ་བར་གཤེགས་པའི་དྲུང་དུ་མྱུར་དུ་དེང ། །ཆོས་ཐོས་ནས་ནི་བདེ་འགྲོར་འགྲོ་བར་གྱིས། །ཆོས་ཐོས་པས་ནི་ངན་འགྲོ་རྣམ་པར་སྤོང ། ། ཆོས་ཐོས་པས་ནི་བཟང་འགྲོར་འགྲོ་བར་འགྱུར། །ཆོས་ཐོས་པས་ནི་ཉོན་མོངས་རྣམས་ཀྱང་ཞི། །བསིལ་བའི་དངོས་པོ་དམ་པ་ཐོབ་པར་འགྱུར། །དེ་དག་ཚིགས་བཅད་འདི་དག་རབ་བརྗོད་
182a
༄#། །པས། །ས་འདི་རྣམ་པ་དྲུག་ཏུ་རབ་ཏུ་གཡོས། །ལྷ་རྣམས་ཨ་ལ་ལ་ཞེས་ལན་བརྒྱ་སྨྲས། །ལྷ་ཡི་མེ་ཏོག་ཡིད་འོང་ཆར་དུ་བབ། །སྟོན་པ་བལྟ་ཕྱིར་གང་དག་བསྐུལ་བ་རྣམས། །རྐང་གཉིས་མཆོག་གི་ཞབས་ལ་ཕྱག་འཚལ་ནས། །དེ་དག་ཐལ་སྦྱར་གུས་བཅས་འཁོར་གྱུར་པ། །དེ་དག་བགྲང་ལས་དཔག་པར་མི་ནུས་སོ། །རྒྱལ་བས་དེ་དག་རྣམས་ཀྱི་བསམ་མཁྱེན་ནས། །དེ་དང་མཐུན་པའི་ཆོས་ནི་རབ་ཏུ་བཤད། །བདེ་བར་གཤེགས་ལས་ཆོས་ཐོས་བྱེ་བ་ཕྲག་།སུམ་ཅུ་རྩ་དྲུག་བྱང་ཆུབ་མཆོག་ལ་ཞུགས། །བྱེ་བ་བརྒྱ་ཕྲག་གསུམ་ཚང་མི་ཉུང་བ། །དེ་དག་ཆོས་མཆོག་མིག་ནི་རྣམ་པར་དག་།སྲིད་པ་ཀུན་ཏུ་ཡིད་བྱུང་སེམས་གྱུར་ན། །དེ་དག་དེར་ནི་བསྟན་འདིར་རབ་ཏུ་བྱུང ། །གཞན་ཡང་བྱེ་བ་ཁྲག་ཁྲིག་དེ་ཉིད་དུ། ། བསླབ་པ་བཟུང་ཞིང་དེ་བཞིན་གསོ་སྦྱོང་བླངས། །སྟོན་ལ་མཆོད་པ་བྱས་ཤིང་ཆོས་མཉན་ནས། །དེ་དག་སླར་ཡང་རང་གི་གནས་སུ་དོང ། །ཞི་བའི་བློ་གྲོས། དེ་ལྟར་རྒྱལ་བུ་གཞོན་དུ་དེ་དག་གིས་ཕ་ཡུལ་འཁོར་སྲུང་ལ་མཆོད་པའི་ལས་ཀྱི་ཕྱིར། ལྷའི་ཙན་དན་སྦྲུལ་གྱི་སྙིང་པོའི་ཁང་པ་བརྩེགས་པ། རྒྱ་ཆེ་ཞིང་ཡངས་པའི་བཀོད་པས་ལེགས་པར་བརྒྱན་པ། བ་གམ་དང་རྣམ་པར་རྒྱལ་བའི་བ་དན་དང ། རྟ་བབས་དང ། ཁ་ཁྱེར་གྱིས་བསྐོར་བ་ཞིག་བྱས་ཏེ། འཛམ་བུའི་གླིང་རིལ་གྱིས་ཀྱང་ཙན་དན་སྦྲུལ་གྱི་སྙིང་པོ་སྲང་ཕྱེད་ཀྱི་རིན་དུ་མི་ཆོག་
182b
པ་དེ་ལྟ་བུའི་ཙན་དན་སྦྲུལ་གྱི་སྙིང་པོའི་ཁང་པ་བརྩེགས་པ་རྒྱ་ཆེ་ཞིང་ཡངས་པ། ཆུ་ཞེང་དུ་དཔག་ཚད་བཅུ་ཡོད་པ་རྣམ་པར་བཀྲ་བ། བལྟ་ན་སྡུག་པ། ཀ་བ་བཞི་ཟུག་པ། ཆ་མཉམ་པ། ཤིན་ཏུ་རྣམ་པར་ཕྱེ་བ་ཞིག་བྱས་པར་གྱུར་ཏོ། །དེ་ནས་རྒྱལ་པོ་ཡུལ་འཁོར་སྲུང་དེ། ནམ་བཅོམ་ལྡན་འདས་ཉིད་ལ་བལྟ་བ་དང ། ཕྱག་བྱ་བ་དང ། མཆོད་པ་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་འགྲོ་བར་འདོད་པ་དེའི་ཚེ། ཕ་རྒྱལ་པོ་ཡུལ་འཁོར་སྲུང་དང ། རྒྱལ་བུ་གཞོན་ནུ་དེ་རྣམས་དང ། བཙུན་མོའི་འཁོར་དང ། གཡོག་དང་བཅས་པ་དང ། གཉེན་གྱི་འཁོར་དང་བཅས་ཏེ། ཁང་པ་བརྩེགས་པ་དེར་ཞུགས་ནས་པདྨའི་བཀོད་པའི་སེང་གེའི་ཁྲི་ལ་འདུག་སྟེ། བླ་མར་བྱ་བ་ཆེན་པོ་དང ། བསྟི་སྟང་དང ། རི་མོར་བྱ་བ་དང ། མེ་ཏོག་དང ། ཕྲེང་བ་དང ། སྤོས་དང ། བྱུག་པ་དང ། ཕྱེ་མ་དང ། གོས་དང ། གདུགས་དང ། རྒྱལ་མཚན་དང ། བ་དན་དང ། རྣམ་པར་རྒྱལ་བའི་བ་དན་དང ། སིལ་སྙན་དང ། ཕེག་རྡོབ་པ་དང ། རོལ་མོའི་སྒྲ་དབྱངས་ལེན་པའི་མཆོད་པ་དམ་པ་དང་བཅས་ནས། ཁང་པ་བརྩེགས་པ་དེ་ནི་རིན་པོ་ཆེའི་དྲ་བས་རབ་ཏུ་གཡོགས་ཏེ། ཐམས་ཅད་ལྷན་ཅིག་ཏུ་འདུས་ནས་ཁང་བ་བརྩེགས་པ་དེ་སྤྲུལ་ཏེ། སྟེང་གི་ནམ་མཁའ་བར་སྣང་ལ་ངང་པའི་རྒྱལ་པོ་ལྟར་ཐོགས་པ་མེད་པར་བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་དེ་བཞིན་གཤེགས་པ་ག་ལ་བ་དེར་
183a
༄#། །དོང་ནས་ཕྱིན་པ་དང ། ཁང་པ་བརྩེགས་པ་དེ་ས་ལ་བཞག་སྟེ། བཅོམ་ལྡན་འདས་དེའི་ཞབས་གཉིས་ལ་མགོ་བོས་ཕྱག་འཚལ་ནས། དགེ་སློང་གི་དགེ་འདུན་ལ་ཡང་ཕྱག་འཚལ་ཏེ། ལན་བདུན་བསྐོར་བ་བྱས་ནས་ཕྱོགས་གཅིག་ཏུ་འཁོད་དེ། །རྒྱལ་པོ་ཡུལ་འཁོར་སྲུང་གི་བཙུན་མོའི་འཁོར་དང ། གཉེན་གྱི་འཁོར་ཀྱང་ཁང་པ་བརྩེགས་པ་དེ་ལས་བབས་ནས། བཅོམ་ལྡན་འདས་དེའི་ཞབས་གཉིས་དང ། དགེ་སློང་གི་དགེ་འདུན་ལ་མགོ་བོས་ཕྱག་འཚལ་ཏེ། ལན་བདུན་བསྐོར་བ་བྱས་ནས། ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་བཙུན་མོའི་འཁོར་དང ། གཉེན་གྱི་འཁོར་དུ་བཅས་ཏེ་འདུག་གོ། །།བམ་པོ་གསུམ་པ། དེ་ནས་བཅོམ་ལྡན་འདས་དེ་བཞིན་གཤེགས་པ་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོས། རྒྱལ་པོ་ཡུལ་འཁོར་སྲུང་ཆོས་མཉན་པའི་ཕྱིར་འོངས་པར་མཁྱེན་ནས། ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དོ། །དེ་ལ་བཅོམ་ལྡན་འདས་དེའི་ཆོས་ཀྱི་གཏམ་ནི་འདི་ཡིན་ཏེ། རྒྱལ་པོ་ཆེན་པོ།་ཆོས་བཞི་པོ་འདི་དག་ནི། ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཡོངས་སུ་མི་ཉམས་ཤིང་ཁྱད་པར་དུ་འགྲོ་བར་འགྱུར་རོ། །བཞི་གང་ཞེ་ན། རྒྱལ་པོ་ཆེན་པོ།
183b
དད་པ་ནི་ཡོངས་སུ་མི་ཉམས་ཤིང་ཁྱད་པར་དུ་འགྲོ་བར་འགྱུར་པའོ། །དད་པ་དེ་གང་ཞེ་ན། དད་པ་གང་གིས་འཕགས་པའི་དྲུང་དུ་ཉེ་བར་འགྲོ་བ་དང ། བྱ་བ་མ་ཡིན་པ་མི་བྱེད་པའོ། ། རྒྱལ་པོ་ཆེན་པོ། གུས་པ་ནི་ཁྱད་པར་དུ་འགྲོ་བར་འགྱུར་བ་སྟེ། གུས་པ་གང་གིས་འཕགས་པ་རྣམས་ཀྱི་ལེགས་པར་བཤད་པ་རྣམས་གུས་པར་ཉན་པ་དང ། རྣ་བ་བླགས་ཏེ་ཆོས་ཉན་པའོ། །རྒྱལ་པོ་ཆེན་པོ། ང་རྒྱལ་མེད་པ་ནི་ཁྱད་པར་དུ་འགྲོ་བར་འགྱུར་བ་སྟེ། ང་རྒྱལ་མེད་པ་གང་གིས་འཕགས་པ་རྣམས་ལ་མངོན་པར་འདུད་པ་དང ། རབ་ཏུ་འདུད་པ་དང ། ཕྱག་འཚལ་བུའོ། །རྒྱལ་པོ་ཆེན་པོ། བརྩོན་འགྲུས་ནི་ཁྱད་པར་དུ་འགྲོ་བར་འགྱུར་བ་སྟེ། བརྩོན་འགྲུས་གང་གིས་ལུས་ཡང་བ་དང ། སེམས་ཡང་བ་འཐོབ་པ་དང ། བྱ་བ་ཐམས་ཅད་ཀྱང་ཉམས་འོག་ཏུ་ཆུད་པར་བྱེད་པ་སྟེ། རྒྱལ་པོ་ཆེན་པོ། ཆོས་བཞི་པོ་དེ་དག་ནི། ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཡོངས་སུ་མི་ཉམས་ཤིང་ཁྱད་པར་དུ་འགྲོ་བར་འགྱུར་བའོ། །རྒྱལ་པོ་ཆེན་པོ། ཆོས་བཞི་པོ་འདི་དག་ནི། ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་འགྱོད་པ་མེད་པ་དང ། བག་ཡོད་པ་ཡོངས་སུ་རྫོགས་པར་འགྱུར་བའོ། །བཞི་གང་ཞེ་ན། དབང་པོ་སྡོམ་པ་དང ། འདོད་པ་རྣམས་ལ་སྐྱོན་དུ་བལྟ་བ་དང ། ཡོངས་སུ་འཛིན་པ་ཐམས་ཅད་ལ་མི་རྟག་པའི་འདུ་ཤེས་དང ། ཆོས་ལ་ངེས་པར་སེམས་པ་ནི་སྲོག་གི་དབང་
184a
༄#། །པོའི་དམ་པ་སྟེ། རྒྱལ་པོ་ཆེན་པོ། ཆོས་བཞི་པོ་དེ་དག་ནི། ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་འགྱོད་པ་མེད་པ་དང ། བག་ཡོད་པ་ཡོངས་སུ་རྫོགས་པར་འགྱུར་བའོ། །རྒྱལ་པོ་ཆེན་པོ། ཆོས་བཞི་དང་ལྡན་ན། རྒྱལ་པོ་ལ་ཆོས་ཀྱི་རྒྱལ་པོ་ཞེས་བྱ་སྟེ། བཞི་གང་ཞེ་ན། བྱང་ཆུབ་ཀྱི་སེམས་རྗེས་སུ་མི་གཏོང་བ་དང ། གཞན་དག་ཀྱང་བྱང་ཆུབ་ལ་ཡང་དག་པར་འཛུད་པ་དང ། དགེ་བའི་རྩ་བ་ཐམས་ཅད་བྱང་ཆུབ་ཏུ་བསྔོ་བ་དང ། སངས་རྒྱས་ཀྱི་ཆེ་བ་ཉིད་མཐོང་ངམ་ཐོས་ན་སངས་རྒྱས་ཀྱི་ཆེ་བ་ཉིད་ལ་མོས་པ་མ་གཏོགས་པར་ལྷ་དང ། མི་དང ། ཉན་ཐོས་དང ། རང་སངས་རྒྱས་ཐམས་ཅད་ཀྱི་ཆེ་བ་ཉིད་ལ་མངོན་པར་དགའ་བ་མ་ཡིན་པ་སྟེ། རྒྱལ་པོ་ཆེན་པོ། ཆོས་བཞི་པོ་དེ་དག་དང་ལྡན་ན ། རྒྱལ་པོ་ལ་ཆོས་ཀྱི་རྒྱལ་པོ་ཞེས་བྱའོ། །རྒྱལ་པོ་ཆེན་པོ། དེ་ལྟ་བས་ན་ཁྱོད་རྟག་པར་བག་ཡོད་པར་བྱ་བ་དང ། དད་པ་དང ། དང་བ་མང་བ་དང ། ཆོས་དོན་དུ་གཉེར་བ་དང ། ཆོས་ཀྱིས་ཀུན་དགའ་ལ་དགའ་བ་དང ། མོས་པར་བྱའོ། །ཁྱོད་ཆོས་ཡོངས་སུ་བཙལ་བ་ལ་བརྩོན་པ་དང ། ཆོས་འདོད་པར་བྱའི་ཡུལ་ལ་ཆགས་པར་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། འདོད་པ་རྣམས་ལ་ཆོག་པ་མེད་པའི་ཕྱིར་ཏེ། གང་དག་འཕགས་པའི་ཤེས་རབ་ཀྱིས་ངོམས་པ་དེ་དག་ནི་ངོམས་པའོ། །རྒྱལ་པོ་ཆེན་པོ། མི་རྣམས་ཀྱི་སྲོག་ནི་ཐུང་བ།
184b
ཚེའི་ཚད་ཀྱང་ཐུང་བ་སྟེ། ཚེ་རབས་འཕོ་བར་འགྲོ་བ་ཡིན་གྱི། ཁྱོད་འཇིག་རྟེན་ཕ་རོལ་ལ་འཇིགས་པར་བལྟ་བར་བྱའོ། །རྒྱལ་པོ་ཆེན་པོ། ཁྱོད་ཀྱིས་གང་དེ་བཞིན་གཤེགས་པ་ལ། མཆོད་པ་དང ། རིམ་གྲོ་བྱས་པའི་དགེ་བའི་རྩ་བ་དེ་ཁྱོད་ཀྱིས་ཡོངས་སུ་བསྔོ་བ་བཞིས་ཡོངས་སུ་བསྔོ་བར་བྱའོ། །བཞི་གང་ཞེ་ན། ལོངས་སྤྱོད་མི་ཟད་པ་དང ། ཆོས་མི་ཟད་པ་དང ། སྤོབས་པ་མི་ཟད་པ་དང ། ཡེ་ཤེས་མི་ཟད་པ་སྟེ་བཞི་པོ་དེ་དག་གོ་།གཞན་ཡང་བཞི་སྟེ། བཞི་གང་ཞེ་ན། ཚུལ་ཁྲིམས་ཀྱི་ཚོགས་ཀྱིས་ལུས་ཡོངས་སུ་དག་པ་དང ། ཐོས་པའི་ཆོགས་ཀྱིས་དག་ཡོངས་སུ་དག་པ་དང ། ཤེས་རབ་ཀྱི་ཚོགས་ཀྱིས་སེམས་ཡོངས་སུ་དག་པ་དང ། ཡེ་ཤེས་ཀྱི་ཚོགས་ཀྱིས་ཤེས་རབ་ཡོངས་སུ་དག་པ་སྟེ། བཞི་པོ་དེ་དག་གོ་།གཞན་ཡང་བཞི་སྟེ། བཞི་གང་ཞེ་ན་སེམས་ཅན་ཡོངས་སུ་སྨིན་པར་བྱེད་པས་ཐབས་ཡོངས་སུ་རྫོགས་པ་དང ། བདུད་ཚར་གཅོད་པས་ཤེས་རབ་ཡོངས་སུ་རྫོགས་པ་དང ། ཇི་སྐད་སྨྲས་པ་དེ་བཞིན་བྱེད་པས་སྨོན་ལམ་ཡོངས་སུ་རྫོགས་པ་དང ། སངས་རྒྱས་མཐོང་བ་དང་ཕྲད་པས་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པའོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཡུལ་འཁོར་སྲུང་ལ་ཆོས་ཀྱི་གཏམ་དེས་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་དགའ་བར་མཛད་པས། ཚིམ་ཞིང་མགུ་ལ་ཡི་རངས་ཏེ།
185a
༄#། །རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། རིན་ཐང་མེད་པའི་མུ་ཏིག་གི་དོ་ཤལ་གྱིས་དེ་བཞིན་གཤེགས་པ་ལ་མཆོད་པ་བྱས་སོ། །ཡོངས་སུ་ལོངས་སྤྱད་པར་བྱ་བའི་ཕྱིར་རྒྱལ་སྲིད་ཐམས་ཅད་ཀྱང་བཅོམ་ལྡན་འདས་དེ་ལ་ཕུལ་ལོ། །ཇི་སྲིད་འཚོའི་བར་དུ་ལྔ་པ་ཚངས་པར་སྤྱོད་པ་དང ། བསླབ་པའི་གཞི་རྣམས་མནོས་སོ། །བཙུན་མོའི་འཁོར་དེ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །ལྔ་པ་ཚངས་པར་སྤྱོད་པ་དང ། བསླབ་པའི་གཞི་རྣམས་ཀྱང་མནོས་སོ། །རྒྱལ་པོའི་བཙུན་མོའི་འཁོར་ཀྱང་བཅོམ་ལྡན་འདས་ལས་ཆོས་ཀྱི་གཏམ་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ། གོས་དང་རྒྱན་ཅི་ཐོགས་པ་རྣམས་བཅོམ་ལྡན་འདས་ཀྱི་སྐུ་ལ་མངོན་པར་གསོལ་པར་གྱུར་ཏེ། མངོན་པར་གསོལ་ནས་ཀྱང་ཇི་སྲིད་འཚོའི་བར་དུ་ལྔ་ཚངས་པར་སྤྱོད་པ་དང ། བསླབ་པའི་གཞི་རྣམས་མནོས་སོ། །ཞི་བའི་བློ་གྲོས། དེ་ལྟར་རྒྱལ་པོ་ཡུལ་འཁོར་སྲུང་ཆོས་ཀྱི་རྙེད་པ་ཕུན་སུམ་ཚོགས་པས་རྙེད་པ་ཆེན་པོ་དང་ལྡན་ནས། བཙུན་མོའི་འཁོར་དང་བཅས། གཉེན་གྱི་འཁོར་དང་བཅས་ཤིང་འཁོར་དང་བཅས་ཏེ། བཅོམ་ལྡན་འདས་དེའི་ཞབས་དང ། དགེ་སློང་གི་དགེ་འདུན་གྱི་རྐང་པ་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་
185b
ཏེ།་སྟེང་གི་བར་སྣང་གི་ནམ་མཁའ་ལས་ཁང་པ་བརྩེགས་པ་དེ་ཉིད་ནས་རྒྱལ་པོའི་ཕོ་བྲང་རྣམ་པར་དག་པ་ཅན་དུ་སླར་འཁོར་ནས། རང་གི་ཁྱིམ་དུ་ཕྱིན་ཏོ། །ཞི་བའི་བློ་གྲོས། དེ་ནས་རྒྱལ་པོ་ཡུལ་འཁོར་སྲུང་དུས་གཞན་ཞིག་ན་ཟླ་བ་ཉ་བའི་ཚེ་མེ་ཏོག་སྣ་ཚོགས་ཞེས་བྱ་བའི་སྐྱེད་མོས་ཚལ་གྱི་ས་བཟང་པོ་བལྟ་བའི་ཕྱིར་སོང་ནས། དེ་སྐྱེད་མོས་ཚལ་ཆེན་པོ་དེ་ན་གནས་ཤིང།་སིལ་སྙན་དང ། ཕེག་རྡོབ་པ་དང ། རོལ་མོའི་སྒྲ་རབ་ཏུ་ལེན་པ་དང ། རྩེ་བའི་དམ་པ་རྩེ་དགའ་ཞིང་དགའ་མགུར་སྤྱོད་དོ། །ཆུང་མ་དམ་པར་མ་སྨད་པ་ཞེས་བྱ་བ་དང ། དཔེ་མེད་མ་ཞེས་བྱ་བ་དེ་གཉིས་རྫིང་དགའ་བ་ཞེས་བྱ་བར་ཁྲུས་བྱས་ཏེ། སྤོས་ཆུས་གོས་བརླན་ནས་སེང་གེའི་ཁྲི་པདྨའི་འབྱུང་གནས་བཟང་པོ་ལ་འདུག་གོ་།དེ་གཉིས་དེར་འདུག་པའི་པང་པ་ནས། རྒྱལ་བུ་གཞོན་ནུ་གཟུགས་བཟང་པོ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་གཉིས་སྐྱིལ་མོ་ཀྲུང་བཅས་པར་རྫུས་ཏེ་བྱུང་ངོ ། །ཁྱེའུ་དེ་གཉིས་བྱུང་མ་ཐག་ཏུ་དེ་ནས་སྐད་ཅིག་དེ་ཉིད་ལ་སྟེང་གི་བར་སྣང་ལས་ལྷ་རྣམས་ཀྱིས་ཀྱེ་མ་ཁྱེའུ་འདི་ནི་ཆོས་སེམས་པའོ། །ཀྱེ་མ་ཁྱེའུ་འདི་ནི་ཆོས་ཀྱི་བློ་གྲོས་སོ་ཞེས་སྒྲ་བྱུང་ངོ ། །ཞི་བའི་བློ་གྲོས། དེ་ལྟར་འཇིག་རྟེན་དུ་ཁྱེའུ་དེ་གཉིས་ཆོས་སེམས་པ་དང ། ཆོས་ཀྱི་བློ་གྲོས་ཞེས་བྱ་བའི་མིང་དུ་གྱུར་ཏེ། །དེ་ལ་ཁྱེའུ་ཆོས་སེམས་པ་ནི། བཙུན་མོ་མ་སྨད་པའི་པང་པ་ནས་
186a
༄#། །བྱུང་ངོ ། །ཆོས་ཀྱི་བློ་གྲོས་ནི། བཙུན་མོ་དཔེ་མེད་པའི་པང་པ་ནས་བྱུང་ངོ ། །ཁྱེའུ་དེ་གཉིས་བྱུང་མ་ཐག་ཏུ་སྐྱིལ་མོ་ཀྲུང་མ་ཉམས་པར་གཉི་གས་ཚིགས་སུ་བཅད་པ་འདི་དག་སྨྲས་སོ། །གང་དག་བྱང་ཆུབ་ཏུ་ནི་སེམས་བསྐྱེད་ཅིང ། །འཇིག་རྟེན་མགོན་པོ་ཡུལ་དུ་བྱུང་བ་ལ། །རབ་ཏུ་དང་བའི་སེམས་ཀྱིས་ཕྱག་འཚལ་བ། །དེ་དག་རྙེད་པ་རབ་རྙེད་གྲོགས་པོ་དག་།གང་ཞིག་བྱང་ཆུབ་སེམས་ནི་མ་བརྗེད་པ། །དེ་ནི་སྲིད་པའི་རྒྱ་མཚོའི་གཏིང་ནས་ཕྱིན། །འཁོར་བའི་འཁོར་ལོ་ལས་ནི་ཡིད་ཀྱང་ལོག་།སེམས་ཅན་རྒྱ་ཆེན་རྣམས་ཀྱིས་ལེགས་པར་གསུངས། །སྟེང་གི་ཕྱོགས་ན་ཡན་ལག་མ་སྨད་པ། །འདྲེན་པ་མཚན་ནི་དུས་དཔོག་རྒྱལ་པོ་སྟེ། །དེ་ནས་བདག་ཅག་ཆོས་དོན་གཉེར་བ་དང ། །འཇིག་མགོན་ཡོན་ཏན་འབྱུང་གནས་བལྟ་ཕྱིར་མཆིས། །ཁྱེའུ་དེ་གཉིས་སྐྱིལ་མོ་ཀྲུང་བཤིག་ནས། །དེ་ཡི་ཚེ་ན་མ་ཡི་པང་ནས་བབས། །ཡུལ་འཁོར་སྲུང་པོ་ག་ལར་དེ་གཉིས་དོང ། །རྐང་པར་ཕྱག་འཚལ་ཐལ་མོ་སྦྱར་ཏེ་འདུག་།ཡབ་གཅིག་བདག་ཅག་མཆི་བ་གསན་དུ་གསོལ། །བསྐལ་པ་བྱེ་བར་ཆོས་རྙེད་རབ་ཏུ་དཀའ། །དེ་རྙེད་ནས་ནི་བྱང་ཆུབ་མ་ཐོབ་བར། ། མཁས་པ་དག་ནི་གཞར་ཡང་མི་གཏོང་ངོ ། །སངས་རྒྱས་འབྱུང་བ་རྟག་ཏུ་རབ་རྙེད་དཀའ། །ཕ་མ་དག་ནི་ཆོས་ལ་གནས་པ་དང ། །དལ་བ་འབྱོར་དང་ཆོས་འདོད་གྲོགས་པོ་
186b
དང། །མཐུན་པར་གནས་དང་བསྟན་ལ་དད་རབ་དཀོན། །འདུན་དང་བརྩོན་འགྲུས་དེ་བཞིན་བག་ཡོད་དང ། །རབ་ཏུ་བྱུང་ཐོབ་རྟག་ཏུ་ཤེས་བཞིན་ཅན། །ཕན་པའི་དངོས་དང་མཉེན་དང་མ་ཁེངས་དང ། །ངོ་ཚ་ཁྲེལ་ཡོད་ཐོས་དང་ཚུལ་ཁྲིམས་བཟང ། །ཞི་དུལ་སྤོག་ཆགས་རྣམས་ལ་སྙིང་རྗེ་བྱམས། །ཟབ་མོའི་ཆོས་ལ་ཆོས་ཀྱི་བཟོད་ལྡན་དང ། །བརྩོན་འགྲུས་མཐུ་དང་སེམས་ནི་མ་ཞུམ་དང ། །བསྡུ་བས་སེམས་ཅན་ཡོངས་སུ་སྨིན་བྱེད་དང ། །སེམས་ལས་རུང་ཞིང་དཔེན་པར་གནས་པ་དང ། །ལུས་དང་དེ་བཞིན་སྲོག་ལ་མི་ལྟ་དང ། །མགོ་དང་གོས་ལ་འབར་ལྟར་ཆོས་སེམས་པ། །དེ་དག་སངས་རྒྱས་ཡོན་ཏན་དེ་འདྲ་ཐོབ། །བདག་ཅག་ཆོས་མཆོག་གང་དག་རབ་བརྗིད་པ། །ཆོས་མཆོག་དེ་དག་ཡབ་གཅིག་རབ་རྙེད་དཀའ། །ཆོས་རྣམས་དེ་དག་དོན་དུ་བདག་ཅག་ལྷགས། ད་ནི་རྒྱལ་པོའི་དྲུང་དུ་བཞུད་པར་བགྱིད། །དཀར་པོའི་ཆོས་རྣམས་ཀྱིས་ནི་ཡོངས་ཟིན་ཅིང ། །སྐད་ཅིག་གིས་ནི་མངོན་ཤེས་ལྔ་ཐོབ་པ། །རྗེས་སུ་དྲན་པ་བསྒོམ་ཞིང་ཡེ་ཤེས་ཅན། །བྱང་ཆུབ་སེམས་དཔའ་མཁས་པ་དེ་གཉིས་དོང ། །རྒྱལ་པོ་བུ་དང་བཅས་ཤིང་བུད་མེད་བཅས། །བྱང་ཆུབ་སེམས་དཔའ་མངོན་ཤེས་ཐོབ་མཁས་གཉིས། །སྟོན་པ་ཡོན་ཏན་རྒྱལ་མཆོག་ག་ལ་བར།། ནམ་མཁའ་ལ་ནི་དེར་ཡང་མངོན་དུ་དོང ། །དེ་བཞིན་གཤེགས་པའི་ཞབས་ལ་ཕྱག་འཚལ་ཏེ། །ཐམས་ཅད་འདུས་ནས་གུས་དང་བཅས་པར་གནས། །དེ་ནས་རྒྱལ་སྲས་ཆོས་ཀྱི་བློ་གྲོས་
187a
༄#། །སྨྲས། །བྱང་ཆུབ་ལམ་དེ་བདག་ཅག་བཤད་དུ་གསོལ། །རྒྱལ་པས་དེ་དག་རྣམས་ཀྱི་བསམ་མཁྱེན་ནས། །ཟབ་མོའི་ཆོས་ཀྱི་གཏམ་ནི་རབ་གསུངས་པ། ། ཆོས་རྣམས་འདི་དག་རྟེན་ནས་བྱུང་བ་སྟེ། །བདག་པོ་མེད་ཅིང་བྱེད་པ་པོ་དང་བྲལ། །ནང་ཡང་སྟོང་ཞིང་ཕྱི་རོལ་རྒྱུ་བ་མེད། །ཆོས་རྣམས་འདི་དག་སྲོག་དང་གསོབ་ཡིན་ཏེ། །ལྷ་དང་བྱ་བ་དག་ཅིང་གཡོ་བ་མེད། །ནམ་མཁའ་ལྟ་བུར་རྟག་ཏུ་གཟུང་དུ་མེད། །བདེ་བར་གཤེགས་པས་ཆོས་གཏམ་རྣམ་དག་པ། །རྣམ་པ་མང་པོ་དེ་དག་རྣམས་ལ་བཤད། །བྱེ་བ་ཕྲག་གསུམ་ཁྲག་ཁྲིག་བདུན་ཅུ་དྲུག་།མི་སྐྱེ་བཟོད་པ་རྗེས་སུ་ཐོབ་པར་གྱུར། །ཞི་བའི་བློ་གྲོས། དེ་ལྟར་བཅོམ་ལྡན་འདས་དེ་ལ་རྒྱལ་བུ་ཡུལ་འཁོར་སྲུང་གིས་ཞག་བདུན་གྱི་བར་དུ་མཆོད་པ་བྱས་ནས། བཙུན་མོའི་འཁོར་དང་བཅས། གཉེན་གྱི་འཁོར་དང་བཅས་ཏེ། སྐད་ཅིག་ཐང་ཅིག་ཡུད་ཙམ་དེ་ལ་རང་གི་ཁྱིམ་དུ་སླར་ཕྱིན་ཏོ། །ཞི་བའི་བློ་གྲོས། དེ་ནས་རྒྱལ་པོ་ཡུལ་འཁོར་སྲུང་གཅིག་པུ་དཔེན་པར་སོང་སྟེ། བཀོད་པ་ཆེན་པོའི་ཁང་པ་བརྩེགས་པར་སེང་གེའི་ཁྲི་པདྨའི་འབྱུང་གནས་བཟང་པོ་ལ་འདུག་ནས་ནང་དུ་ཡང་དག་བཞག་ཅིང་འདི་སྙམ་དུ་སེམས་ཏེ། །བདག་གི་གཞོན་ནུ་འདི་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་ཤ་སྟག་ནི། གཞོན་ནུ་འདི་དག་ཐམས་ཅད་ཀྱི་ནང་ན་གང་ཐོག་མར་བླ་ན་
187b
མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་བདག་གིས་བརྟག་གོ་སྙམ་མོ། །དེ་ནས་རྒྱལ་པོ་ཡུལ་འཁོར་སྲུང་གིས་དེའི་མོད་ལ་རིན་པོ་ཆེ་སྣ་བདུན་གྱི་བུམ་པ་བྱེད་དུ་བཅུག་སྟེ། བྱི་དོར་ལེགས་པར་བྱས་ཤིང་ལེགས་པར་ཟིན་པར་བྱ་བ་ནས་གཞོན་ནུ་དེ་དག་ཐམས་ཅད་ཀྱི་མིང་བྲིས་ཏེ། བུམ་པ་དེའི་ནང་ན་བཅུག་ནས་རིན་པོ་ཆེ་སྣ་བདུན་གྱི་པདྨ་སྣ་ཚོགས་བལྟ་ན་སྡུག་པ་བྱས་ནས། པདྨ་དེའི་སྟེང་དུ་བུམ་པ་དེ་བཞག་སྟེ། ཞག་བདུན་དུ་ལྷའི་མཆོད་པ་མེ་ཏོག་ཐམས་ཅད་དང ། སྤོས་ཐམས་ཅད་དང ། ཕྱེ་མ་ཐམས་ཅད་དང ། བདུག་པ་ཐམས་ཅད་དང ། བྱུག་པ་ཐམས་ཅད་དང ། རོལ་མོའི་སིལ་སྙན་ཐམས་ཅད་ཀྱིས་མཆོད་དོ། །མིང་དེ་དག་མཆོད་པའི་ཚེ་ན་ལྷའི་བུ་ཁྲི་མཆོད་པའི་ལས་ཀྱི་ཕྱིར་བརྩོན་པར་གྱུར་ཏོ། །ཞག་བདུན་དུ་མཆོད་པ་བྱས་ནས་བཙུན་མོའི་འཁོར་དང ། དེའི་བུ་སྟོང་དང ། གཞོན་ནུ་དེ་གཉིས་ཀྱི་མདུན་དུ་རིལ་གྱིས་གསེར་ལས་བྱས་པའི་ཁྲིའུ་བཟང་པོའི་སྟེང་དུ་བུམ་པ་དེ་བཞག་ནས། ནང་གི་མིས་བུམ་པ་དེའི་ནང་ནས་མིང་དེ་རྣམས་ཕྱུང་ངོ ། །ཞི་བའི་བློ་གྲོས། དེའི་ཚེ་ཐམས་ཅད་ཀྱི་ཐོག་མར་རྒྱལ་བུ་གཞོན་ནུ་རྣམ་པར་དག་པའི་བློ་གྲོས་ཞེས་བྱ་བ་དེའི་མིང་བྱུང་བར་གྱུར་ཏོ། །མིང་དེ་བྱུང་མ་ཐག་ཏུ་སྨད་ཅིག་དེ་ཉིད་ལས་ཆེན་པོ་འདི་རྣམ་པ་དྲུག་ཏུ་གཡོས་སོ། །བཙུན་མོའི་འཁོར་ཐམས་ཅད་ཀྱི་པང་ན་སིལ་སྙན་ཡོད་པ་དེ་དག་ཀྱང་མ་
188a
༄#། །དཀྲོལ་བྱེ་བ་ཕྲག་དུ་མའི་སྒྲ་བྱུང་ངོ ། །ཞི་བའི་བློ་གྲོས། འདི་ཇི་སྙམ་དུ་སེམས། ཞི་བའི་བློ་གྲོས། དེའི་ཚེ་དེའི་དུས་ན་ཐམས་ཅད་ཀྱི་ཐོག་མར་མིང་བྱུང་བ་རྒྱལ་བུ་གཞོན་ནུ་རྣམ་པར་དག་པའི་བློ་གྲོས་ཞེས་བྱ་བར་གྱུར་པ་དེ་གཞན་ཡིན་པར་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་འཁོར་བ་འཇིག་དེ་དེའི་ཚེ་དེའི་དུས་ན་རྒྱལ་བུ་གཞོན་ནུ་རྣམ་པར་དག་པའི་བློ་གྲོས་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་རྣམ་པར་རྒྱལ་བའི་སྡེ་ཞེས་བྱ་བ་དེའི་མིང་བྱུང་སྟེ། བཅོམ་ལྡན་འདས་གསེར་ཐུབ་དེ་དེའི་ཚེ་དེའི་དུས་ན་རྒྱལ་བུ་གཞོན་ནུ་རྣམ་པར་རྒྱལ་བའི་སྡེ་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་དབང་པོ་ཞི་བ་ཞེས་བྱ་བ་དེའི་མིང་བྱུང་སྟེ། བཅོམ་ལྡན་འདས་འོད་སྲུང་དེ་དེའི་ཚེ་དེའི་དུས་ན། རྒྱལ་བུ་གཞོན་ནུ་དབང་པོ་ཞི་བ་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་དོན་ཐམས་ཅད་གྲུབ་པ་ཞེས་བྱ་བ་དེའི་མིང་བྱུང་ངོ། །དེ་ནི་ང་ཡིན་ཏེ། དེའི་ཚེ་དེའི་དུས་ན་རྒྱལ་བུ་གཞོན་ནུ་དོན་ཐམས་ཅད་གྲུབ་པ་ཞེས་བྱ་བར་གྱུར་ཏོ། །དེའི་འོག་ཏུ་རྒྱལ་བུ་གཞོན་ནུ་སྐ་རགས་ཅན་ཞེས་བྱ་བའི་མིང་བྱུང་བར་གྱུར་ཏེ། དེ་ནི་བྱམས་པ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་མཆོག་གི་བློ་གྲོས་ཞེས་བྱ་བ་དེའི་མིང་བྱུང་སྟེ། དེ་ནི་སེང་གེ་ཞེས་
188b
བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་གློག་གི་ལྷ་ཞེས་བྱ་བ་དེའི་མིང་བྱུང་སྟེ། དེ་ནི་ཏོག་ཅེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་བཟང་པོའི་རྒྱལ་པོ་ཞེས་བྱ་བའི་མིང་བྱུང་སྟེ། དེ་ནི་མེ་ཏོག་དམ་པ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་འོད་ཀྱི་དཔལ་ཞེས་བྱ་བའི་མིང་བྱུང་སྟེ། དེ་ནི་མེ་ཏོག་ཅེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་རྣམ་པར་སྣང་བའི་པདྨ་ཞེས་བྱ་བའི་མིང་བྱུང་སྟེ། དེ་ནི་སྐར་མ་རྒྱལ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་དྲི་མ་མེད་པའི་འོད་ཅེས་བྱ་བའི་མིང་བྱུང་སྟེ། དེ་ནི་སྤྱན་ལེགས་པ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་རྒྱལ་བུ་གཞོན་ནུ་རྡུལ་མེད་ཅེས་བྱ་བའི་མིང་བྱུང་སྟེ། དེ་ནི་ལག་བཟང་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་བློ་གྲོས་རྒྱལ་པོ་ཞེས་བྱ་བའི་མིང་བྱུང་སྟེ། དེ་ནི་འོད་ཅེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་དགེ་བ་བཀོད་པའི་རྒྱལ་པོ་ཞེས་བྱ་བའི་མིང་བྱུང་སྟེ། དེ་ནི་སྐར་མ་ལ་དགའ་བ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་ཕྱོགས་འཕྱོར་པ་ཞེས་བྱ་བའི་མིང་བྱུང་སྟེ། དེ་ནི་མངོན་འཕགས་གཤེགས་
189a
༄#། །པ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་རྣམ་པར་དག་པ་བཀོད་པའི་རྒྱལ་པོ་ཞེས་བྱ་བའི་མིང་བྱུང་སྟེ། །དེ་ནི་ཡོན་ཏན་གྱི་མཆོག་མངའ་བ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་དཔལ་སྦས་ཞེས་བྱ་བའི་མིང་བྱུང་སྟེ། དེ་ནི་ནོར་དཔལ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་ལུས་ཤིན་ཏུ་རྣམ་པར་འབྱེད་པ་ཞེས་བྱ་བའི་མིང་བྱུང་སྟེ། དེ་ནི་ཡེ་ཤེས་འབྱུང་གནས་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་དྲག་ཤུལ་ཅན་ཞེས་བྱ་བའི་མིང་བྱུང་སྟེ། དེ་ནི་རིན་པོ་ཆེ་འབྱུང་གནས་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེའི་འོག་ཏུ་རྒྱལ་བུ་གཞོན་ནུ་རིན་ཆེན་གྲགས་པ་ཞེས་བྱ་བའི་མིང་བྱུང་སྟེ། དེ་ནི་ཀུན་དུ་སྣང་བ་ཞེས་བྱ་བའི་དེ་བཞིན་གཤེགས་པར་འགྱུར་རོ། །དེ་བཞིན་དུ་རྒྱ་ཆེར་བྱ་སྟེ། ཞི་བའི་བློ་གྲོས། དེ་ལྟར་བུ་སྟོང་ཡོད་པ་དེའི་ནང་ནས་གཅིག་བཞག་སྟེ། རྒྱལ་བུ་གཞོན་ནུ་ཅོད་པན་བརྒྱན་པ་ཞེས་བྱ་བའི་མིང་གི་བར་དུ་བྱུང་ངོ ། །དེ་ནི་ཡོན་ཏན་མཐའ་ཡས་གྲགས་པ་ཞེས་བྱ་བའི་དེ་བཞིན་གཤེགས་པར་འགྱུར་རོ། །ཞི་བའི་བློ་གྲོས། དེའི་ཚེ་རྒྱལ་བུ་གཞོན་ནུ་ཐམས་ཅད་ཀྱི་ཐ་ཆུང་བློ་མཐའ་ཡས་ཞེས་བྱ་བ་དེའི་མིང་བྱུང་བར་གྱུར་པ་དང ། སྣག་གི་
189b
གཉེན་མཚམས་ཐམས་ཅད་དང ། སྤུན་རྣམས་ན་རེ། གང་གི་ཚེ་བདག་ཅག་ཐམས་ཅད་ཀྱིས་སེམས་ཅན་ཐམས་ཅད་ཡོངས་སུ་སྨིན་པར་བྱས་ཤིང་སངས་རྒྱས་ཀྱི་བྱ་བ་ཐམས་ཅད་བྱས་པ་དེའི་འོག་ཏུ་ཁྱོད་ཀྱིས་ཅི་ཞིག་བྱར་ཡོད་ཅེས་སྤྱོས་པ་དང ། བློ་གྲོས་མཐའ་ཡས་ཀྱིས་སྨྲས་པ། སངས་རྒྱས་ཆོས་རྣམས་འདི་དག་ནམ་མཁའ་མཚུངས་ཤིང་འདྲ། །བདག་གི་ཡིད་ལ་སེམས་ཅན་ཟད་པ་མེད་སྙམ་བགྱིད། །ཚུལ་ཁྲིམས་ཀྱིས་ནི་བདག་གི་སྨོན་ལམ་འདི་དག་གྱུར། །བདག་གི་སྨོན་ལམ་ཅི་འདྲ་ཐམས་ཅད་འདིར་གསོན་ཅིག་།ཁྱེད་ཀྱི་ཚེ་ཚད་ཇི་ཙམ་པ་དག་བསྡོམས་པ་དང ། ། ཚོགས་ཀྱི་རྒྱལ་པོ་ཇི་སྙེད་དེ་དག་ཀུན་བསྡོམས་པ། །ཐམས་ཅད་བསྡོམས་པ་དེ་སྙེད་བདག་གི་ཚེར་གྱུར་ཏེ། །བདག་གི་དགེ་སློང་ཚོགས་ཀྱང་དེ་ཀུན་མ་ལུས་སྙེད། །དེ་ཡིས་ཚིགས་སུ་བཅད་པ་དེ་ནི་སྨྲས་མ་ཐག་།དེ་ཡི་ཚེ་ན་ལེགས་ཞེས་ལྷ་ཡིས་སྒྲ་ཕྱུང་སྟེ། །སེམས་ཅན་དག་པ་ཁྱོད་ཀྱི་བསམ་པ་རྫོགས་གྱུར་ཅིག་།ཁྱོད་ཀྱིས་ཇི་ལྟར་བསམ་བཞིན་སེམས་ཅན་དོན་མཛོད་ཅིག ། ཞི་བའི་བློ་གྲོས། དེ་ལྟར་རྒྱལ་བུ་གཞོན་ནུ་ཐམས་ཅད་ཀྱི་ཐ་ཆུང་དུ་གྱུར་པ་བློ་མཐའ་ཡས་ཞེས་བྱ་བ་དེ་ནི་བསྐལ་པ་བཟང་པོ་འདི་ལ་དེ་བཞིན་གཤེགས་པ་ཐ་མ་པ་མོས་པ་ཞེས་བྱ་བར་འགྱུར་ཏེ།་ཞི་བའི་བློ་གྲོས། བསྐལ་པ་བཟང་པོའི་དེ་བཞིན་གཤེགས་པ་དེ་དག་ཐམས་ཅད་ཀྱི་ཆེའི་ཚད་ཇི་ཙམ་པ་དང ། ཉན་ཐོས་ཀྱི་དགེ་འདུན་ཇི་སྙེད་པར་གྱུར་པ་དེ་བཞིན་གཤེགས་པ་
190a
༄#། །མོས་པའི་ཚེའི་ཚད་ཀྱང་དེ་སྲིད་དུ་འགྱུར། ཉན་ཐོས་ཀྱི་དགེ་འདུན་ཡང་དེ་སྙེད་དུ་འགྱུར་རོ། །བདག་དེ་ལྟར་མོས་པ་ན་དེའི་ཕྱིར་མོས་པ་ཞེས་བྱའོ། ། ཞི་བའི་བློ་གྲོས། འདི་ལྟར་སངས་རྒྱས་སྟོང་དུ་གཅིག་གིས་མཚང་བ་དག་སངས་རྒྱས་ཀྱི་མཛད་པ་ཇི་སྙེད་མཛད་པ་དེ་སྙེད་དེ་བཞིན་གཤེགས་པ་མོས་པས་བྱེད་པར་འགྱུར་བས། ཐབས་མཁས་པའི་ཚུལ་ཁྲིམས་ཕུན་སུམ་ཚོགས་པའི་རྒྱུ་མཐུན་པ་སྨོན་ལམ་ཡོངས་སུ་རྫོགས་པའི་ཁྱད་པར་ལ་ལྟོས། ཞི་བའི་བློ་གྲོས། དེ་ནས་གཞོན་ནུ་སྟོང་པོ་དེ་དག་གིས་བྱང་ཆུབ་སེམས་དཔའ་གཞོན་ནུ་ཆོས་སེམས་པ་དང ། ཆོས་ཀྱི་བློ་གྲོས་དེ་གཉིས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱེད་གཉིས་ཀྱིས་སྨོན་ལམ་ཇི་ལྟ་བུ་ཞིག་བཏབ། ཆོས་སེམས་པས་སྨྲས་པ། གྲོགས་པོ་དག་།བདག་ནི་ཁྱེད་ཐམས་ཅད་ཀྱི་ལག་ན་རྡོ་རྗེར་གྱུར་ཏེ། ནང་ན་སྤྱོད་ཅིང་དེ་བཞིན་གཤེགས་པའི་གསང་བ་ཐམས་ཅད་ལས་ཕྱི་རོལ་དུ་མ་གྱུར་ལ།་ཕྱི་ནང་གི་སངས་རྒྱས་ཀྱི་ཆོས་ཐམས་ཅད་ཉན་པ་དང ། མོས་པ་དང ། རྟོགས་པ་དེ་ལྟར་བདག་སྨོན་ལམ་འདེབས་སོ། །ཆོས་ཀྱི་བློ་གྲོས་ཀྱིས་སྨྲས་པ། སྣག་གི་གཉེན་མཚམས་དག།་བགྲེས་རབས་དག་།བདག་ནི་ཁྱེད་རྣམས་ཐམས་ཅད་ཀྱིས་བྱང་ཆུབ་ཐོབ་པ་ན་ཆོས་ཀྱི་འཁོར་ལོ་བསྐོར་བར་བསྐུལ་ཏེ། བདག་གིས་བསྐུལ་བས་ཁྱེད་ཐམས་ཅད་ཀྱིས་
190b
ཆོས་ཀྱི་འཁོར་ལོ་བསྐོར་བར་གྱུར་ཅིག་ཅེས་སྨོན་ལམ་འདི་ལྟར་འདེབས་སོ། །ཞི་བའི་བློ་གྲོས། དེ་གཉིས་ཀྱང་སྨོན་ལམ་ཇི་ལྟར་བཏབ་པ་དེ་བཞིན་དུ། བཅོམ་ལྡན་འདས་དེས་ལུང་བསྟན་པར་གྱུར་ཏོ། །ཞི་བའི་བློ་གྲོས། དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་ཡུལ་འཁོར་སྲུང་ཞེས་བྱ་བར་གྱུར་པ་དེ་ཁྱོད་ཀྱིས་གཞན་ཡིན་པར་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བཅོམ་ལྡན་འདས་མར་མེ་མཛད་དེ། དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་ཡུལ་འཁོར་སྲུང་ཞེས་བྱ་བར་གྱུར་ཏོ། །དེའི་བུ་གཞོན་ནུ་སྟོང་ཡོད་པ་དེ་དག་ནི་བསྐལ་པ་བཟང་པོའི་དེ་བཞིན་གཤེགས་པ་ཤ་སྟག་སྟེ། དེ་བཞིན་གཤེགས་པ་འཁོར་བ་འཇིག་ནས་བཟུང་སྟེ། དེ་བཞིན་གཤེགས་པ་མོས་པ་ཞེས་བྱ་བའི་བར་དག་དེའི་ཚེ་དེའི་དུས་ན་རྒྱལ་བུ་གཞོན་ནུར་གྱུར་ཏོ། །ཞི་བའི་བློ་གྲོས། བཙུན་མོ་མ་སྨད་པ་ཞེས་བྱ་བའི་པང་པ་ནས་རྫུས་ཏེ་བྱུང་བའི་ཁྱེའུ་ཆོས་སེམས་པ་ཞེས་བྱ་བར་གྱུར་པ་དེ་ནི་གསང་བ་པའི་བདག་པོ་ལག་ན་རྡོ་རྗེ་འདི་ཡིན་ཏེ། དེའི་ཚེ་དེའི་དུས་ན་ཁྱེའུ་ཆོས་སེམས་པ་ཞེས་བྱ་བར་གྱུར་ཏོ། །ཞི་བའི་བློ་གྲོས། བཙུན་མོ་དཔེ་མེད་མ་ཞེས་བྱ་བའི་པང་པ་ནས་རྫུས་ཏེ་བྱུང་བའི་ཁྱེའུ་ཆོས་ཀྱི་བློ་གྲོས་ཞེས་བྱ་བ་དེ་ནི་ཚངས་པ་གཙུག་ཕུད་ཅན་འདི་ཡིན་ཏེ། དེའི་ཚེ་དེའི་དུས་ན་ཁྱེའུ་ཆོས་ཀྱི་བློ་གྲོས་ཞེས་བྱ་བར་གྱུར་ཏོ། །ཞི་བའི་བློ་གྲོས། རྒྱལ་པོ་ཡུལ་འཁོར་སྲུང་གི་བཙུན་མོའི་འཁོར་དུ་གྱུར་པ་
191a
༄#། །གང་ཡིན་པ་དེ་དག་ནི་འཁོར་འདིར་འདུས་པའི་བྱང་ཆུབ་སེམས་དཔའ་རྣམས་ཡིན་ནོ། །རྒྱལ་བུ་གཞོན་ནུ་དེ་རྣམས་ཀྱིས་སེམས་ཅན་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་པ། ཐེག་པ་ཆེན་པོ་ལ་ཡང་དག་པར་ཞུགས་པ་དེ་དག་ཐམས་ཅད་ནི། བསྐལ་པ་བཟང་པོ་འདི་ཉིད་ལ་མཐར་གྱིས་ལུང་བསྟན་པ་ཐོབ་པར་འགྱུར་རོ། །ཞི་བའི་བློ་གྲོས། འདི་ལྟར་སྐྱེས་བུ་དམ་པ་དེ་དག་གིས་བསམ་པ་ཐམས་ཅད་འབྱོར་པས་དགེ་བའི་རྩ་བའི་རྒྱུ་ལས་བྱུང་བའི་སེམས་བསྐྱེད་པ་ཆུད་མི་ཟ་བརྟེན་ཅིང་འབྲེལ་པར་འབྱུང་བའི་མི་འགལ་བ་ལ་ལྟོས། ཡུལ་འཁོར་སྲུང་གི་སྔོན་གྱི་ཚུལ་གྱི་ལེའུ་སྟེ་ལྔ་བའོ།། །།ཞི་བའི་བློ་གྲོས། དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པར་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ་རྣམས་ཀྱིས་སེམས་ཅན་ཆེན་པོ་དེ་དག་གི་རྗེས་སུ་བསླབ་པར་བྱའོ། །ཚིག་ལྷུར་བླང་བར་མི་བྱའི། བྱང་ཆུབ་ཀྱི་ལམ་ལ་མངོན་པར་བརྩོན་པས་བསྒྲུབ་པ་སྙིང་པོར་བྱའོ། །དེ་ལ་བྱང་ཆུབ་ཀྱི་ལམ་གང་ཞེ་ན། འདི་ལྟ་སྟེ། བྱམས་པའི་རྗེས་སུ་འབྲང་བའི་སེམས་བསྐྱེད་པས། སེམས་ཅན་ཐམས་ཅད་ལ་ཁོང་ཁྲོ་བ་མེད་པ་དང ། ཕ་རོལ་ཏུ་ཕྱིན་པ་རྣམས་ལ་བརྩོན་པ་དང ། བསྡུ་བའི་དངོས་པོའི་རྗེས་སུ་འབྲང་བ་དང ། ཚངས་
191b
པའི་གནས་བཞི་བསྒྲུབ་པ་དང ། བྱང་ཆུབ་ཀྱི་ཕྱོགས་ཀྱི་ཆོས་རྣམས་ལ་མངོན་པར་བརྩོན་པ་དང ། མངོན་པར་ཤེས་པ་ཡོངས་སུ་སྦྱང་བ་ཡོངས་སུ་སྐོང་པ་དང ། ཐབས་ལ་མཁས་པས་མངོན་པར་བསྒྲུབས་པའི་དགེ་བའི་ཆོས་ཐམས་ཅད་ཀྱི་ཚོགས་གསོག་པ་སྟེ། འདི་ནི་བྱང་ཆུབ་ཀྱི་ལམ་ཞེས་བྱའོ། །ཞི་བའི་བློ་གྲོས། གཞན་ཡང་བྱང་ཆུབ་ཀྱི་ལམ་ནི། འདི་ལྟ་སྟེ། དད་པ་དང ། བསམ་པ་དང ། ལྷག་པའི་བསམ་པ་ཡོངས་སུ་དག་པ་དང ། དྲང་བ་ཉིད་དང ། གཡོ་མེད་པ་ཉིད་དང ། ཡངས་པ་ཉིད་དང ། སྒྲིབ་པ་མེད་པ་ཉིད་དང ། མཉམ་པ་ཉིད་དང ། སེམས་སྙོམས་པ་ཉིད་དང ། མི་འཇིགས་པ་ཉིད་དང ། སྡིག་པ་ཐམས་ཅད་མི་བྱེད་པ་ཉིད་ཡིན་ནོ། །ལམ་དེ་ནི་སྦྱིན་པའི་ཕ་རོལ་ཏུ་ཕྱིན་པས་འབྱོར་པའོ། །ལམ་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་བདེ་བར་འགྲོའོ། །ལམ་དེ་ནི་བཟོད་པའི་ཕ་རོལ་ཏུ་ཕྱིན་པས་གནོད་པ་མེད་པའོ། །ལམ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པས་རྒྱུན་ཆད་མེད་པའོ། །ལམ་དེ་ནི་བསམ་གཏན་གྱི་ཕ་རོལ་ཏུ་ཕྱིན་པས་མི་འཁྲུགས་པའོ། །ལམ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པས་ལེགས་པར་རྟོགས་པའོ། །ལམ་དེ་ནི་བྱམས་པ་ཆེན་པོས་འབྱུང་བ་ཤེས་པའི་རྗེས་སུ་སོང་པའོ། ། ལམ་དེ་ནི་སྙིང་རྗེ་ཆེན་པོས་ཕྱིར་མི་ལྡོག་པའོ། །ལམ་དེ་ནི་དགའ་བ་ཆེན་པོས་མཆོག་ཏུ་དགའ་བར་བྱེད་པའོ། །ལམ་དེ་ནི་བཏང་སྙོམས་ཆེན་པོས་སྙིང་པོའི་རྗེས་སུ་སོང་བའོ། །ལམ་དེ་
192a
༄#། །ནི་འདོད་པ་ལ་འདོད་ཆགས་དང ། གནོད་སེམས་དང ། འཚེ་བའི་རྣམ་པར་རྟོག་པ་དང་བྲལ་བས་སྡོང་དུམ་དང ། ཚེར་མ་མེད་པའོ། །ལམ་དེ་ནི་ཞེ་འགྲས་པའི་སེམས་མེད་པས་བདེ་བར་འགྲོ་བའོ། །ལམ་དེ་ནི་གཟུགས་དང ། སྒྲ་དང ། དྲི་དང ། རོ་དང ། རེག་དང་བྲལ་བས་གཡོ་ཅན་དང་བྲལ་བའོ། །ལམ་དེ་ནི་ཕུང་པོ་དང ། ཁམས་དང ། སྐྱེ་མཆེད་ལ་ལེགས་པར་བཏགས་པས་ཕྱིར་རྒོལ་བ་དང་བྲལ་བའོ། །ལམ་དེ་ནི་ཉོན་མོངས་པ་ཐམས་ཅད་དང་བྲལ་བས་བདུད་དང་ཕྱིར་རྒོལ་བ་བཅོམ་པའོ། །ལམ་དེ་ནི་ཉན་ཐོས་དང ། རང་སངས་རྒྱས་ཀྱི་ཡིད་ལ་བྱེད་པ་དང་བྲལ་བས་སེམས་རླབས་པོ་ཆེར་འགྲོ་བའོ། །ལམ་དེ་ནི་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཞུགས་པའོ། །ལམ་དེ་ནི་རྣམ་པ་ཐམས་ཅད་མཁྱེན་པའི་རིན་པོ་ཆེ་དང་མཐུན་པའི་རིན་པོ་ཆེ་ཆེན་པོ་བསྒྲུབ་པའོ། །ལམ་དེ་ནི་ཆགས་པ་མེད་པའི་ཡེ་ཤེས་ཀྱི་སྣང་བས་རྟག་ཏུ་གསལ་བའོ། །ལམ་དེ་ནི་དགེ་བའི་བཤེས་གཉེན་གྱིས་ལེགས་པར་ཡོངས་སུ་ཟིན་པས་དགེ་བ་སྟོན་པའོ། །ལམ་དེ་ནི་རྗེས་སུ་ཆགས་པ་དང ། ཁོང་ཁྲོ་བ་མེད་པས་མཐོན་དམན་མེད་པའོ། །ལམ་དེ་ནི་གནོད་སེམས་དང ། ཐ་བ་དང ། ཁྲོ་བ་མེད་པས་རྡུལ་དང་བྲལ་བའོ། །ལམ་དེ་ནི་མི་དགེ་བའི་ཆོས་ཐམས་ཅད་དང་བྲལ་བས་བདེ་འགྲོར་འགྲོ་བའོ། །ལམ་
192b
དེ་ནི་མྱ་ངན་ལས་འདས་པའི་མཐར་འགྲོ་བས་བདེ་བའི་ཕྱོགས་སུ་འགྲོ་བའོ། །ཞི་བའི་བློ་གྲོས། དེ་ལྟར་ན་གང་ལ་ཉན་ཐོས་དང ། རང་སངས་རྒྱས་ཐམས་ཅད་ཀྱི་འགྲོ་བ་མེད་པ་དང ། ལམ་མ་ཡིན་པ་དེ་འདྲ་བ་དེ་ནི་བྱང་ཆུབ་སེམས་དཔའི་ལམ་སྟེ། ལམ་དེ་ལ་གནས་ན་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱང་ཆུབ་ཀྱི་ལམ་གྱི་ལེའུ་སྟེ་དྲུག་པའོ།། །།དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །གསང་བ་པའི་བདག་པོ་དེ་བཞིན་གཤེགས་པའི་གསང་བ་ཅི་འདྲ། དེ་བཞིན་གཤེགས་པའི་གསང་བའི་ཕྱོགས་ཙམ་ཞིག་ལ་ཁྱོད་སྤོབས་པར་གྱིས་ཤིག་།དེ་སྐད་ཅེས་སྨྲས་པ་དང།་གསང་བ་པའི་བདག་པོ་ལག་ན་རྡོ་རྗེས། བྱང་ཆུབ་སེམས་དཔའ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །སངས་རྒྱས་ཀྱི་མཐུ་དང ། སངས་རྒྱས་ཀྱི་བྱིན་གྱི་རླབས་ཀྱིས་བསྟན་གྱི། རིགས་ཀྱི་བུ་ཉོན་ཅིག། ཞི་བའི་བློ་གྲོས། གསུམ་པོ་འདི་དག་ནི། དེ་བཞིན་གཤེགས་པའི་གསང་བའོ། །གསུམ་གང་ཞེ་ན། འདི་ལྟ་སྟེ། སྐུའི་གསང་བ་དང ། གསུང་གི་གསང་བ་དང ། ཐུགས་ཀྱི་གསང་བའོ། །ཞི་བའི་བློ་གྲོས། དེ་ལ་དེ་བཞིན་གཤེགས་པའི་སྐུའི་གསང་བ་གང་ཞེ་ན། ཞི་བའི་བློ་གྲོས། འདི་ལ་དེ་བཞིན་གཤེགས་པ་ནི་མི་དགོངས་
193a
༄#། །ཤིང་རབ་ཏུ་མི་རྟོག་པར་སྤྱོད་ལམ་ཐམས་ཅད་ཀྱང་ཀུན་ཏུ་སྟོན་ཏེ། རིགས་ཀྱི་བུ། དེ་ལ་ལྷ་དང་མི་ཁ་ཅིག་འདུག་པ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་བཞུགས་པར་མཐོང་ངོ ། །ལྷ་དང་མི་ཁ་ཅིག་འཆག་པ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་འཆག་པར་མཐོང་ངོ ། །ལྷ་དང་མི་ཁ་ཅིག་འགྲེང་བ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་འགྲེང་བར་མཐོང་ངོ ། །ལྷ་དང་མི་ཁ་ཅིག་ཉལ་བ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་མནལ་བར་མཐོང་ངོ ། །ལྷ་དང་མི་ཁ་ཅིག་ཆོས་སྟོན་པ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་ཆོས་སྟོན་པར་མཐོང་ངོ ། །ལྷ་དང་མི་ཁ་ཅིག་མི་སྨྲ་བ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་མི་གསུང་བར་གྱུར་པར་མཐོང་ངོ ། །ལྷ་དང་མི་ཁ་ཅིག་བསམ་གཏན་གཙོ་བོར་བྱེད་པ་དེ་དག་གི་ནི་དེ་བཞིན་གཤེགས་པ་བསམ་གཏན་ལ་སྙོམས་པར་ཞུགས་པར་མཐོང་ངོ ། །ལྷ་དང་མི་ཁ་ཅིག་ལངས་པ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་བཞེངས་པར་མཐོང་ངོ ། །ལྷ་དང་མི་ཁ་ཅིག་མིག་མི་འཛུམ་པར་བལྟ་བ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་སྤྱན་མི་འཛུམ་པར་གཟིགས་པ་མཐོང་ངོ ། །ལྷ་དང་མི་ཁ་ཅིག་འཛུམ་པ་བྱེད་པ་གཙོ་བོར་འཛིན་པ་
193b
དེ་དག་གིས་ནི་དེ་བཞིན་གཤེགས་པ་འཛུམ་པ་མཛད་པར་མཐོང་ངོ ། །ལྷ་དང་མི་ཁ་ཅིག་མདོག་གསེར་གྱི་ཁ་དོག་ལྟ་བུ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་སྐུ་མདོག་གསེར་གྱི་ཁ་དོག་ལྟ་བུར་མཐོང་ངོ ། །དེ་བཞིན་དུ་ལ་ལས་ནི་དངུལ་གྱི་མདོག་ཏུ་མཐོང་ངོ ། །དེ་བཞིན་དུ་ཤེལ་གྱི་མདོག་དང ། བཻ་ཌཱུརྱའི་མདོག་དང ། རྡོའི་སྙིང་པོའི་མདོག་དང ། སྤུག་གི་མདོག་དང ། མུ་ཏིག་དམར་པོའི་མདོག་དང ། མུ་ཏིག་དཀར་པོའི་མདོག་དང ། མདོག་དམར་པོ་དང ། མདོག་དཀར་པོ་དང ། བཙོད་ཀའི་མདོག་དང ། མདོག་སྔོན་པོ་དང ། མདོག་སེར་པོ་དང ། ཟླ་བའི་མདོག་དང ། ཉི་མའི་མདོག་དང ། མའི་མདོག་དང ། འོད་ཀྱི་མདོག་དང ། བརྒྱ་བྱིན་གྱི་མདོག་དང ། ཚངས་པའི་མདོག་དང ། བ་མོའི་མདོག་དང ། ལྡོང་རོས་ཀྱི་མདོག་དང ། མཚལ་གྱི་མདོག་ཏུ་མཐོང་ངོ ། །ལ་ལས་ནི་ཆུའི་མདོག་དང ། ལ་ལས་ནི་མྱ་ངན་འཚང་གི་མེ་ཏོག་གི་མདོག་དང ། ཙམ་པ་ཀའི་མདོག་དང ། སྣ་མའི་མེ་ཏོག་གི་མདོག་དང ། བར་ཤི་ཀའི་མདོག་དང ། པདྨའི་མདོག་དང ། ཀུ་མུ་ཏའི་མདོག་དང ། པདྨ་དཀར་པོའི་མདོག་དང ། དཔལ་གྱི་མདོག་དང ། རྣམ་ཐོས་ཀྱི་བུའི་མདོག་དང ། ངང་བའི་རྒྱལ་བོ་ངང་སྐྱའི་མདོག་དང ། །པདྨ་སར་པའི་མདོག་དང ། དཔལ་གྱི་སྙིང་པོའི་མདོག་དང ། རིན་པོ་ཆེ་བྱི་རུའི་མདོག་དང ། ནོར་བུ་རིན་པོ་ཆེའི་མདོག་དང ། ན་ད་རྙིལ་
194a
༄#། །གྱི་མདོག་དང ། ནམ་མཁའ་དག་པ་གཟི་བརྗིད་ཀྱི་མདོག་དང ། ལྷ་དང་མི་ཁ་ཅིག་ཡོན་ཏན་གྱི་བསྔགས་པ་མཐའ་ཡས་པར་མོས་བདེ་དག་གིས་ནི་དེ་བཞིན་གཤེགས་པའི་སྐུའི་ཡོན་ཏན་གྱི་སྔགས་པ་མཐའ་ཡས་པ་དང་ལྡན་པར་མཐོང་ངོ ། །ཞི་བའི་བློ་གྲོས། དེ་ལྟར་ཡོངས་སུ་བརྟག་པར་ཉེ་བར་བཟུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སེམས་ཅན་ཇི་སྙེད་ཡོད་པ་དང ། གང་ཡང་གངྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་སེམས་ཅན་དེ་དག་ཐམས་ཅད་མིའི་ལུས་ཐོབ་པར་གྱུར་ལ། དེའི་ནང་ནས་སེམས་ཅན་གཅིག་གིས་སེམས་ཅན་དེ་དག་ཇི་སྙེད་པ་སྙེད་ལ། དེ་བཞིན་གཤེགས་པའི་སྐུའི་གཟུགས་དང ། མདོག་དང ། རྟགས་དང།་དབྱིབས་དང ། སྤྱོད་ལམ་དུ་སེམས་ཤིང་མོས་ཏེ་མངོན་པར་བསྒྲུབ་ལ། སེམས་ཅན་གཅིག་གིས་ཇི་ལྟ་བ་དེ་བཞིན་དུ་སེམས་ཅན་དེ་དག་ཐམས་ཅད་རེ་རེས་ཀྱང་དེ་སྙེད་ལ་དེ་བཞིན་གཤེགས་པའི་སྐུའི་གཟུགས་དང ། མདོག་དང ། རྟགས་དང ། དབྱིབས་དང ། སྤྱོད་ལམ་དུ་སེམས་ཤིང་མོས་ཏེ། མངོན་པར་བསྒྲུབ་ལ། སེམས་ཅན་གཅིག་གིས་སེམས་ཀྱི་མོས་པ་གང་ཡིན་པ་དེ་སེམས་ཅན་གཉིས་པའི་མ་ཡིན་ཏེ། ཞི་བའི་བློ་གྲོས། རྣམ་གྲངས་དེས་ན། དེ་བཞིན་གཤེགས་པ་སེམས་ཅན་དེ་དག་ཐམས་ཅད་ཀྱི་སེམས་
194b
ཀྱི་མོས་པ་ཚིམ་པར་མཛད་དེ། ཇི་ལྟར་མོས་པ་བཞིན་དུ་སེམས་ཅན་དེ་དག་གིས་དེ་བཞིན་གཤེགས་པའི་སྐུའི་མདོག་དང ། གཟུགས་དང ། རྟགས་དང ། དབྱིབས་དང ། སྤྱོད་ལམ་དུ་ཤེས་མོད་ཀྱི། དེ་ལ་དེ་བཞིན་གཤེགས་པའི་སྐུ་འམ། ཐུགས་ཀྱི་མཛད་པ་ནི་མ་ཡིན་ཏེ། དེ་བཞིན་གཤེགས་པ་སྔོན་གྱི་སྤྱོད་པ་ཡོངས་སུ་སྦྱངས་པའི་ཁྱད་པར་གྱིས་ལྷུན་གྱིས་གྲུབ་པས། སེམས་ཅན་ཐམས་ཅད་ཀྱི་སེམས་ཀྱི་བསམ་པ་ཚིམ་པར་མཛད་པའི་གཟུགས་དང ། མདོག་དང ། རྟགས་དང ། དབྱིབས་དང ། སྤྱོད་ལམ་གྱིས་ཀུན་དུ་བཞུགས་སོ། །ཞི་བའི་བློ་གྲོས། འདི་ལྟ་སྟེ། དཔེར་ན། མེ་ལོང་གི་དཀྱིལ་འཁོར་ཡོངས་སུ་དག་པ་ལ་གཟུགས་སུ་སྣང་བ་ལ་ཅི་འདྲ་བ་ཉེ་བར་བཞག་པ་དེ་འདྲ་བ་ཉིད་ཀྱི་གཟུགས་བརྙན་དེ་ན་ལྷག་ཆད་མེད་པར་མཚུངས་པར་སྣང་ཡང ། མེ་ལོང་གི་དཀྱིལ་འཁོར་ནི་མི་སེམས་མི་རྟོག་གོ་།ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པ་ཡང་མི་དགོངས་མི་རྟོག་པར་ལྷུན་གྱིས་གྲུབ་པས་སེམས་ཅན་ཐམས་ཅད་ཀྱི་སེམས་ཀྱི་བསམ་པའི་རྣམ་པར་རིག་པ་ཚིམ་པར་མཛད་དེ། ཞི་བའི་བློ་གྲོས། འདི་ནི་དེ་བཞིན་གཤེགས་པའི་སྐུའི་གསང་བའོ། །ཞི་བའི་བློ་གྲོས། གཞན་ཡང་དེ་བཞིན་གཤེགས་པའི་སྐུ་ནི་ཕུང་པོས་རབ་ཏུ་ཕྱེ་བ་མ་ཡིན། ཁམས་ཀྱིས་རབ་ཏུ་ཕྱེ་བ་མ་ཡིན། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན། ལས་ལས་བྱུང་བ་མ་ཡིན། ཉོན་མོངས་པ་ལས་བྱུང་བ་མ་ཡིན། ཕ་མ་
195a
༄#། །ལས་བྱུང་བ་མ་ཡིན། འབྱུང་བ་ཆེན་པོའི་ནུར་ནུར་བོ་ལས་བྱུང་བ་མ་ཡིན། ཤ་དང་ཁྲག་གིས་གཡོགས་པ་མ་ཡིན། རུས་པ་དང་ཆུ་བའི་བོག་དེས་སྦྲེལ་བ་མ་ཡིན། དབུགས་ཕྱི་ནང་དུ་རྒྱུ་བ་དང་སྲོག་དང་འབྲེལ་བ་མ་ཡིན་ཏེ། ཞི་བའི་བློ་གྲོས། དེ་བཞིན་གཤེགས་པའི་སྐུ་ནི་སྐུ་མེད་པ་སྟེ། ཆོས་ཀྱི་སྐུ་དང ། གཟུགས་དང ། མཚན་མེད་པའི་སྐུ་དང ། སྤྲོས་པ་མེད་ཅིང་རྒྱུ་བ་མེད་པའི་སྐུ་ཡིན་ཡང་དེ་གཟུགས་དང་མཚན་གཙོ་བོར་བྱེད་པའི་སེམས་ཅན་སྐུ་བསྟན་པས་འདུལ་བ་རྣམས་ཀྱི་མིག་ལ་སྣང་བར་འགྱུར་རོ། །གཟུགས་ལས་དབེན་པའི་ཆོས་ཀྱི་མཚན་ཉིད་གཙོ་བོར་བྱེད་པའི་སེམས་ཅན་རྣམས་ལ་ནི་ལྷའི་མིག་གིས་ཀྱང་ཐམས་ཅད་ཀྱི་ཐམས་ཅད་དུ་བལྟར་སྣང་པར་མི་འགྱུར་རོ་ཞི་བའི་བློ་གྲོས། དེ་ལ་འཁོར་གཅིག་ཏུ་འདུས་པའི་སེམས་ཅན་གྱི་ནང་ནས་ཀྱང་ཁ་ཅིག་གིས་ནི་དེ་བཞིན་གཤེགས་པའི་སྐུ་མཐོང ། ཁ་ཅིག་གིས་ནི་མི་མཐོང ། ཁ་ཅིག་ནི་རྒྱང་རིང་པོ་ན་འདུག་ཀྱང་མཐོང ། ཁ་ཅིག་ནི་ཉེ་བ་ན་འདུག་ཀྱང་མི་མཐོང ། ཁ་ཅིག་ནི་ཐག་རིང་པོ་ན་འདུག་ཀྱང་མཐོང ། ཁ་ཅིག་ནི་ཉེ་བ་ན་འདུག་ཀྱང་མི་མཐོང་ངོ ། ལ་ལས་ནི་དྲན་བའི་རྣམ་པས་མཐོང་ལ་གཡེང་བའི་རྣམ་པས་མི་མཐོང་ངོ ། །ལ་ལས་ནི་གཡེང་བའི་རྣམ་པས་མཐོང་ལ། དྲན་པའི་རྣམ་པས་མི་མཐོང་ངོ ། །ལ་ལས་ནི་གཞན་གྱི་ཉེ་བར་བསྟན་པས་
195b
མཐོང་ཞིང་བདག་གིས་བལྟས་བས་མི་མཐོང་ངོ ། །ལ་ལས་ནི་བདག་གིས་བལྟས་པས་མཐོང་ལ། གཞན་གྱིས་བསྟན་པས་མི་མཐོང་ངོ ། །ལ་ལས་ནི་རྨི་ལམ་མཐོང་ལ། སད་པ་ན་མི་མཐོང་ངོ ། །ལ་ལས་ནི་སད་པ་ན་མཐོང་ལ་རྨི་ལམ་ན་མི་མཐོང་ངོ ། །ལ་ལས་ནི་མཉམ་པར་བཞག་ན་མཐོང་ལ་ལངས་ན་མི་མཐོང་ངོ ། །ལ་ལས་ནི་ལངས་ན་མཐོང་ལ་མཉམ་པར་བཞག་ན་མི་མཐོང་ངོ ། །ལ་ལས་ནི་སྡུག་པའི་རྣམ་པར་མཐོང་ལ། མི་སྡུག་པའི་རྣམ་པར་མ་ཡིན་ནོ། །ལ་ལས་ནི་མི་སྡུག་པའི་རྣམ་པར་མི་མཐོང་ལ། སྡུག་པའི་རྣམ་པར་མ་ཡིན་ནོ། །ལ་ལས་ནི་མ་བཙལ་བས་མི་མཐོང་ལ། བཙལ་བས་མཐོང་ངོ ། །ལ་ལས་ནི་མ་བཅལ་བས་མཐོང་ལ། བཙལ་བས་མི་མཐོང་ངོ ། །ལ་ལས་ནི་བསྒྲིམས་ན་མཐོང་ལ། མ་བསྒྲིམས་ན་མ་ཡིན་ནོ། །ལ་ལས་ནི་མ་བསྒྲིམས་ན་མཐོང་ལ། བསྒྲིམས་ན་མ་ཡིན་ནོ། །ཞི་བའི་བློ་གྲོས། དེ་ལྟར་དེ་བཞིན་གཤེགས་པའི་སྐུ་ནི་འདི་དག་དང ། གཞན་ཡང་ཚད་མེད་པའི་རྣམ་པར་སྟོན་པར་མཛད་དོ། །གང་ཡང་གཟུགས་ན་སྤྱོད་པའི་ལྷའི་བུའི་ལུས་དང་སྤྱོད་པ་དང་སྤྱོད་ལམ་རབ་ཏུ་ཞི་བ། མཉམ་པར་བཞག་པ། ལུས་ཞི་བ་དུལ་བ་དེ་དག་གི་མིག་ཀྱང་འཁྲུལ་པར་འགྱུར་ཏེ། དེ་བཞིན་གཤེགས་པའི་སྐུ་དཔག་པར་བྱ་བའམ་མཚན་མ་གཟུང་བར་མི་ནུས་སོ། །དེ་ཅིའི་ཕྱིར་ཞེ་ན། ཞི་བའི་བློ་གྲོས། དེ་བཞིན་གཤེགས་པའི་སྐུ་ནི་ཁ་དོག་
196a
༄#། །ཐ་དད་པས་ཚད་མེད་པའོ། ཆོས་ཀྱི་སྐུས་རབ་ཏུ་ཕྱེ་བའི་ཕྱིར་ནམ་མཁའ་དང་མཚུངས་སོ། །ཞི་བའི་བློ་གྲོས། ནམ་མཁས་ཇི་ཙམ་དུ་ཁྱབ་པ་དེ་ཙམ་དུ་དེ་བཞིན་གཤེགས་པའི་སྐུས་ཁྱབ་བོ། །ཞི་བའི་བློ་གྲོས། འདི་ལྟ་སྟེ། དཔེར་ན། ནམ་མཁའ་ནི་ཐམས་ཅད་ཀྱི་རྗེས་སུ་སོང་བའོ། །ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པའི་སྐུ་ཡང་ཐམས་ཅད་ཀྱི་རྗེས་སུ་སོང་བའོ། །ཞི་བའི་བློ་གྲོས། འདི་ལྟ་སྟེ། དཔེར་ན། ནམ་མཁའ་ནི་སྤྲོས་པ་མེད་པའོ། །ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པའི་སྐུ་ཡང་སྤྲོས་པ་མི་མངའ་བའོ། །ཞི་བའི་བློ་གྲོས། འདི་ལྟ་སྟེ། དཔེར་ན། ནམ་མཁའ་ནི་སེམས་ཅན་ཐམས་ཅད་ཀྱི་ཉེ་བར་འཚོ་བའོ། །ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པའི་སྐུ་ཡང་སེམས་ཅན་ཐམས་ཅད་ཀྱི་ཉེ་བར་འཚོ་བའོ། །ཞི་བའི་བློ་གྲོས། འདི་ལྟ་སྟེ། དཔེར་ན། ནམ་མཁའ་ནི་འགྱུར་བ་མེད་ཅིང་རྣམ་པར་རྟོག་པ་མེད་དོ། །ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པའི་སྐུ་ཡང་འགྱུར་བ་མི་མངའ་ཞིང་རྣམ་པར་རྟོག་པ་མི་མངའོ། །ཞི་བའི་བློ་གྲོས། འདི་ལྟ་སྟེ། དཔེར་ན། ནམ་མཁའ་ནི་གཟུགས་སུ་སྣང་བ་ཐམས་ཅད་དུ་ཞུགས་པའོ། །ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པའི་སྐུ་ཡང་སེམས་ཅན་དུ་སྣང་བ་ཐམས་ཅད་དུ་ཞུགས་པའོ། །ཞི་བའི་བློ་གྲོས། འདི་
196b
ལྟ་སྟེ། དཔེར་ན། ནམ་མཁའི་ནང་དུ་ནི་གཟུགས་སུ་སྣང་བ་ཐམས་ཅད་འདུས་སོ། །ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པའི་སྐུའི་ནང་དུ་ཡང་སེམས་ཅན་དུ་སྣང་བ་ཐམས་ཅད་འདུས་སོ། །ཞི་བའི་བློ་གྲོས། འདི་ལྟ་སྟེ། དཔེར་ན། ནམ་མཁའ་ནི་རྩཝ་དང ། ཤིང་གེལ་པ་དང ། སྨན་དང ། ནགས་ཚལ་ཐམས་ཅད་རྣམ་པར་འཕེལ་ལོ། །ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པའི་སྐུ་ལས་ཀྱང་སེམས་ཅན་ཐམས་ཅད་ཀྱི་དགེ་བའི་རྩ་བ་དག་རྣམ་པར་འཕེལ་ལོ། །ཞི་བའི་བློ་གྲོས། འདི་ལྟ་སྟེ། དཔེར་ན། ནམ་མཁའ་ནི་རྟག་པ་ཡང་མ་ཡིན། མི་རྟག་པ་ཡང་མ་ཡིན་ཏེ། ཅིར་ཡང་བརྗོད་པ་མ་ཡིན་ནོ། །ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པའི་སྐུ་ཡང་རྟག་པ་ཡང་མ་ཡིན། མི་རྟག་པ་ཡང་མ་ཡིན་ཏེ། ཅིར་ཡང་བརྗོད་པ་མ་ཡིན་ནོ། །ཞི་པའི་བློ་གྲོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྤྱི་གཙུག་བལྟར་མི་མཐོང་བ་སྟེ། ཞི་བའི་བློ་གྲོས། གང་དེ་བཞིན་གཤེགས་པའི་སྤྱི་གཙུག་མཐོང་པར་ནུས་པ་དེ་ནི་ཁོ་པོས་ལྷ་དང་བཅས་པ་དང ། བདུད་དང་བཅས་པ་དང ། ཚངས་པ་དང་བཅས་པ་དང ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང ། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ནམ་མཐོང་ངོ ། །དེ་ཅིའི་ཕྱིར་ཞེ་ན། ཞི་བའི་བློ་གྲོས། ཁོ་བོས་འདི་ལྟར་མངོན་པར་ཤེས་ཏེ། བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་
197a
༄#། །རིང་པོ་མ་ལོན་ཏེ། ཆོས་ཀྱི་འཁོར་ལོ་བསྐོར་ནས་གྲོང་ཁྱེར་ཝཱ་ར་ཎཱ་སི་ན་དྲང་སྲོང་ལྷུང་བ་རི་དྭགས་ཀྱི་ནགས་ན་བཞུགས་པའི་དུས་གཅིག་ན། ཤར་ཕྱོགས་ལོགས་ཀྱི་དེ་བཞིན་གཤེགས་པ་ཙམ་པ་ཀའི་མདོག་གི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དགྲ་འདུལ་ནས་བྱང་ཆུབ་སེམས་དཔའ་ཤུགས་འཆང་ཞེས་བྱ་བ་དེ། བཅོམ་ལྡན་འདས་ལ་བལྟ་བ་དང ། ཕྱག་བྱ་བ་དང ། མཆོད་པ་དང་བསྙེན་བཀུར་བྱ་བའི་ཕྱིར་འཇིག་རྟེན་གྱི་ཁམས་མི་མཇེད་འདིར་འོངས་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱན་སྔར་འདུག་གོ་།དེ་ནས་སངས་རྒྱས་ཀྱི་མཐུས་བྱང་ཆུབ་སེམས་དཔའ་ཤུགས་འཆང་འདི་སྙམ་དུ་སེམས་ཏེ།་སངས་རྒྱས་བཅོམ་ལྡན་འདས་རྣམས་ནི་སྤྱི་གཙུག་བལྟར་མི་མཐོང་ལ། སྐུ་ཚད་མེད་ཅིང་མཐའ་ཡས་ཀྱང་བདག་གིས་དེ་བཞིན་གཤེགས་པའི་སྐུའི་ཚད་དང་མཐའ་ཡོངས་སུ་བཙལ་བར་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་ཤུགས་འཆང་གིས་རང་གི་ལུས་དཔག་ཚད་བརྒྱད་ཁྲི་བཞི་སྟོང་དུ་བྱིན་གྱིས་བརླབས་ཏེ། དེ་བཞིན་གཤེགས་པའི་སྐུ་ལ་བལྟས་ན་དེ་བཞིན་གཤེགས་པའི་སྐུ་དཔག་ཚད་འབུམ་ཕྲག་དྲུག་ཅུ་རྩ་བརྒྱད་པར་མཐོང་ནས་དེས་འདི་སྙམ་དུ་སེམས་ཏེ། བདག་ནི་མངོན་པར་ཤེས་པ་ཐོབ་པ་རྫུ་འཕྲུལ་
197b
གྱི་རྐང་པས་རྣམ་པར་རྩེ་བ་ཡིན་གྱི། བདག་གིས་དེ་བས་ཀྱང་རྒྱ་ཆེར་དེ་བཞིན་གཤེགས་པའི་སྐུའི་ཚད་བཙལ་བར་བྱའོ། །སྙམ་ནས་དེ་སངས་རྒྱས་ཀྱི་མཐུ་དང་རང་གི་རྫུ་འཕྲུལ་གྱིས་སྟོབས་བསྐྱེད་པས་སྟེང་གི་ཕྱོགས་ལོགས་སུ་སངས་རྒྱས་ཀྱི་ཞིང་གངྒཱའི་ཀླུང་བྱེད་བ་ཕྲག་བརྒྱའི་བྱེ་མ་སྙེད་འདས་ཏེ། འཇིག་རྟེན་གྱི་ཁམས་པདྨ་ཅན་ཞེས་བྱ་བ་དེ་ན་དེ་བཞིན་གཤེགས་པ་པདྨའི་དཔལ་གྱི་རྒྱལ་པོའི་སྙིང་པོ་ཞེས་བྱ་བ་ད་ལྟར་བཞུགས་ཤིང་འཚོ་ལ་བཞེས་ཏེ། ཆོས་ཀྱང་སྟོན་པ་དེར་བྱང་ཆུབ་སེམས་དཔའ་ཤུགས་འཆང་ཕྱིན་ནས་དེ་འཇིག་རྟེན་གྱི་ཁམས་དེར་གནས་ཀྱང ། དེ་བཞིན་གཤེགས་པའི་སྤྱི་གཙུག་མཐོང་བར་མ་ནུས་ཤིང ། དེ་བཞིན་གཤེགས་པའི་སྐུའི་ཚད་དམ་མཐའ་ཡང་མ་དམིགས་སོ། །དེ་ནས་བྱང་ཆུབ་སེམས་དཔའ་ཤུགས་འཆང་བཅོམ་ལྡན་འདས་དེ་བཞིན་གཤེགས་པ་པདྨའི་དཔལ་གྱི་རྒྱལ་པོའི་སྙིང་པོ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་པདྨའི་དཔལ་གྱི་རྒྱལ་པོའི་སྙིང་པོ་དེའི་ཞབས་ལ་མགོ་བོས་ཕྱག་འཚལ་ཏེ། ལན་བདུན་བསྐོར་བ་བྱས་ནས་བཅོམ་ལྡན་འདས་དེའི་སྤྱན་སྔར་འདུག་སྟེ། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཐག་རྗེ་སྲིད་ཅིག་ནས་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གངྒཱའི་ཀླུང་བྱེ་བ་ཕྲག་བརྒྱའི་བྱེ་མ་སྙེད་ཀྱི་སངས་རྒྱས་ཀྱི་ཞིང་འདས་པ་ན། ཁྱོད་འཇིག་
198a
༄#། །རྟེན་གྱི་ཁམས་འདིར་འོངས་སོ། །བྱང་ཆུབ་སེམས་དཔའ་ཤུགས་འཆང་གིས་གསོལ་པ། བཅོམ་ལྡན་འདས། བདག་ཐག་རིང་པོ་ཞིག་ནས་མཆིས་ཀྱང་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེའི་དབུའི་གཙུག་མཐོང་བར་ཡང་རྔོ་མ་ཐོག་ལ། སྐུའི་ཚད་དམ་མཐའ་རྟོགས་པར་ཡང་རྔོ་མ་ཐོག་ལགས་སོ། ། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་ཁྱོད་ག་ཏེ་ཤུགས་འདི་ཉིད་དང ། རྫུ་འཕྲུལ་གྱི་སྟོབས་བསྐྱེད་པ་འདི་ཉིད་ཀྱིས་གངྒཱའི་ཀླུང་གི་བྱེ་མ་སྙེད་ཀྱི་བསྐལ་པར་སྟེང་གི་ཕྱོགས་ལོགས་སུ་སོང་དུ་ཟིན་ཀྱང ། བཅོམ་ལྡན་འདས་དེའི་སྐུའི་མཐའ་རྟོགས་པར་མི་ནུས་སོ། །རིགས་ཀྱི་བུ། གང་ཡང་དཔེ་བཞག་པ་ཇི་སྙེད་པ་དེ་བཞིན་གཤེགས་པའི་ཚུལ་ཁྲིམས་ཀྱི་དཔེར་བྱ་བའམ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བ་དང ། སྐུ་དང ། གསུང་དང ། ཐུགས་དང ། གཟུགས་དང ། མཚན་གྱི་དཔེར་བྱ་བའི་དཔེར་འགོད་པ་དེ་དག་ཐམས་ཅད་ནི་དེ་བཞིན་གཤེགས་པ་ལ་སྐུར་བ་འདེབས་པའོ། །དཔེ་གཅིག་ནི་མ་གཏོགས་ཏེ། འདི་ལྟར་དཔེར་ནམ་མཁའོ། ། ནམ་མཁའ་ཇི་ཙམ་པར་དེ་བཞིན་གཤེགས་པའི་ཚུལ་ཁྲིམས་ཀྱང་དེ་ཙམ་མོ། །ཏིང་ངེ་འཛིན་ཀྱང་དེ་ཙམ་མོ། །ཤེས་རབ་ཀྱང་དེ་ཙམ་མོ། །རྣམ་པར་གྲོལ་བ་ཡང་དེ་ཙམ་མོ། །རྣམ་
198b
པར་གྲོལ་པའི་ཡེ་ཤེས་མཐོང་བ་ཡང་དེ་ཙམ་མོ། །སྐུ་ཡང་དེ་ཙམ་མོ། །གསུང་ཡང་དེ་ཙམ་མོ། །ཐུགས་ཀྱང་དེ་ཙམ་མོ། །གཟུགས་ཀྱང་དེ་ཙམ་མོ། །མཚན་ཡང་དེ་ཙམ་མོ། །དེ་བས་ན་ནམ་མཁའ་ཚད་མེད་པས་དེ་བཞིན་གཤེགས་པའི་སྐུའི་ཚད་མེད་པ་ཁོང་དུ་ཆུད་པར་བྱའོ་ཞེས་བསྟན་ཏོ། །ཞི་བའི་བློ་གྲོས། དེ་ནས་བྱང་ཆུབ་སེམས་དཔའ་ཤུགས་འཆང་གིས་བཅོམ་ལྡན་འདས་དེ་ལས་བསྟན་པ་འདི་ཐོས་ནས་ངོ་མཚར་དུ་གྱུར་ཏོ། །ཚིམ་ཞིང་མགུ་ལ་ཡི་རངས་ནས་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། ལན་བདུན་བསྐོར་བ་བྱས་ནས་སངས་རྒྱས་ཀྱི་ཞིང་དེ་ཉིད་ནས་མི་སྣང་བར་གྱུར་པ་དང ། སངས་རྒྱས་ཀྱི་མཐུ་དང ། རང་གི་རྫུ་འཕྲུལ་གྱི་སྟོབས་ཀྱིས་སེམས་ཀྱི་རྣམ་པར་རྟོག་པ་ཙམ་གྱིས་འཇིག་རྟེན་གྱི་ཁམས་མི་མཇེད་འདིར་བཅོམ་ལྡན་འདས་ཤཱཀྱ་ཐུབ་པའི་སྤྱན་སྔར་ཕྱིན་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་ལན་བདུན་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱན་སྔར་འདུག་ནས་ཐལ་མོ་སྦྱར་ཏེ། དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ནམ་མཁའ་མཚུངས་ཤིང་འདྲ་བ་ཡི། །སངས་རྒྱས་ཆོས་ལ་མི་གང་ཞིག་།ཕ་རོལ་དུ་ནི་མཆི་འཚལ་བ། །དེ་ནི་ཉམ་ཐག་འགྱུར་བ་ལགས། །སངས་རྒྱས་སྐུ་ནི་བལྟ་སླད་དུ། །གངྒཱ་བྱེ་བ་ཕྲག་བརྒྱ་ཡི། །བྱེ་མ་ཇི་སྙེད་དེ་སྙེད་ཀྱི། །ཞིང་རྣམས་
199a
༄#། །སུ་ནི་བདག་མཆིས་སོ། །དེ་སྙེད་ཞིང་དུ་མཆིས་ནས་ནི། །པདྨ་ཅན་གྱི་ཞིང་དུ་མཆིས། །འོན་ཀྱང་ཁྱོད་ཀྱི་དབུ་གཙུག་དང ། །སྐུ་ཡི་ཚད་ཀྱང་མ་མཐོང་ལགས། །ཞིང་དེ་ན་ནི་འདྲེ་ན་བཞུགས་པ། །མཚན་ནི་དཔལ་གྱི་སྙིང་པོ་ལགས། །དེ་ཡིས་བདག་གི་བསམ་མཁྱེན་ནས། །འདི་སྐད་དུ་ནི་བཀའ་སྩལ་ཏོ། །ལ་ལས་སངས་རྒྱས་ཆོས་རྣམས་ལ། །དཔེ་དགོད་ཇི་སྙེད་བྱེད་པ་ནི། །དེ་དག་སངས་རྒྱས་མི་འཚལ་ཏེ། །དེ་དག་རྒྱལ་ལ་སྐུར་བ་འདེབས། །འདི་ལ་དཔེ་གཅིག་ཡང་དག་སྟེ། །ནམ་མཁའི་ཁམས་སུ་བསྟན་པ་ལགས། །དེ་ནི་སངས་རྒྱས་ཆོས་དང་མཐུན། །གང་ནའང་དེ་ཡི་ཚད་མ་མཆིས། །ནམ་མཁའ་འདི་ནི་ཇི་ཙམ་པར། །སངས་རྒྱས་ཀྱི་ནི་ཚུལ་ཁྲིམས་དང ། །ཏིང་ངེ་འཛིན་དང་རྣམ་གྲོལ་དང ། །རྣམ་གྲོལ་ཡེ་ཤེས་མཐོང་དེ་ཙམ། །ནམ་མཁའི་ཚད་ནི་ཇི་ཙམ་པ། །སངས་རྒྱས་གཟུགས་ཀྱང་དེ་ཙམ་སྟེ། །འཇིག་རྟེན་མགོན་པོའི་དབུའི་གཙུག་ཀྱང ། །ནམ་མཁའི་ཁམས་དང་མཚུངས་པ་ལགས། །ནམ་མཁས་ཇི་སྙེད་ཁྱབ་གྱུར་པ། །སྐུས་ཀྱང་དེ་སྙེད་ཁྱབ་པ་ལགས། །སྐུ་ཡིས་ཇི་སྙེད་ཁྱབ་གྱུར་པ། །འོད་ཀྱིས་ཀྱང་ནི་དེ་སྙེད་ཁྱབ། །འོད་ཀྱིས་ཇི་སྙེད་ཁྱབ་གྱུར་པ། །གསུང་གིས་ཀྱང་ནི་དེ་སྙེད་ཁྱབ། །གསུང་གིས་ཇི་སྙེད་ཁྱབ་གྱུར་པ། །ཐུགས་ཀྱིས་ཀྱང་ནི་དེ་སྙེད་ཁྱབ། །ཐུགས་ཀྱིས་ཇི་སྙེད་ཁྱབ་གྱུར་པ། །བྱམས་
199b
པས་ཀྱང་ནི་དེ་སྙེད་ཁྱབ། །བྱམས་པས་ཇི་སྙེད་ཁྱབ་གྱུར་པ། །ཡེ་ཤེས་ཀྱིས་ནི་དེ་སྙེད་ཁྱབ། །ཡེ་ཤེས་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །གང་གིས་བྱང་ཆུབ་བློ་བསྐྱེད་པ། ། དེ་སྙེད་བསོད་ནམས་ཁྱབ་པར་བགྱིད། །བྱང་ཆུབ་སེམས་ཀྱི་བསོད་ནམས་གང ། །དེ་ལ་གལ་ཏེ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་ནི་དེ་བས་ལྷག་པར་འགྱུར། ། སེམས་ཅན་ཀུན་གྱི་བསོད་ནམས་ཀྱི། །ཕུང་པོ་ཇི་སྙེད་ཡོངས་བཟུང་བ། །དེ་སྙེད་བྱང་ཆུབ་སེམས་དཔའ་ཡི། །བྱང་ཆུབ་སེམས་ལས་རབ་ཏུ་བྱུང ། །བྱང་ཆུབ་སེམས་ཀྱི་བསོད་ནམས་ཀྱི། །ཕུང་པོ་ཇི་སྙེད་བརྗོད་པ་བས། །དམ་པའི་ཆོས་ནི་ཡོངས་འཛིན་ན། །དེ་བས་བསོད་ནམས་ཆེས་མང་ངོ ། །དམ་ཆོས་འཛིན་པའི་བསོད་ནམས་ནི། །སངས་རྒྱས་ཀུན་གྱིས་ནན་ཏན་དུ། །བསྐལ་པ་བྱེ་བར་བརྗོད་བྱས་ཀྱང ། །མཐའ་མར་ཕྱིན་པར་འགྱུར་མ་ལགས། །དམ་པའི་ཆོས་ནི་འཛིན་པ་དང ། །བྱང་ཆུབ་སེམས་ཀྱི་བསོད་ནམས་དེ། །སྟོང་པ་ཉིད་ལ་མོས་པ་ཡི། །བཅུ་དྲུག་ཆར་ཡང་མི་རི་ལགས། ། སྟོང་པ་ཉིད་ལ་འདིར་མོས་ནས། །བྱང་ཆུབ་སེམས་ཀྱང་མི་གཏོང་དང ། །དམ་པའི་ཆོས་ནི་འཛིན་བགྱིད་པ། །འདི་ནི་བསོད་ནམས་སྡུད་པ་ལགས། །བྱང་ཆུབ་སེམས་དཔའ་གྲགས་ཆེན་པོ། །ཆོས་ཀྱི་རྟོགས་པ་འདི་ཐོས་ནས། །དེ་ཡི་བྱང་ཆུབ་སྤྱད་སྤྱོད་ཅིང ། །སངས་རྒྱས་ཡོན་ཏན་འཐོབ་པར་འགྱུར། །ཚིགས་སུ་བཅད་པ་བརྗོད་པ་ན། །ཞིང་རྣམས་བྱེ་བར་རབ་ཏུ་གཡོས། །ལྷ་
200a
༄#། །ནི་བྱེ་བ་ཕྲག་སྟོང་གིས། །རོལ་མོའི་སིལ་སྙན་བྱེ་བ་བླངས། །སངས་རྒྱས་ཀྱི་ནི་ཕྱེ་བ་ཉིད། །ཤུགས་འཆང་གིས་ནི་འདི་བཤད་ཐོས། །སྲོག་ཆགས་བྱེ་བ་ཕྲག་སྟོང་དག་།བྱང་ཆུབ་ཏུ་ནི་སེམས་བསྐྱེད་དོ། །སངས་རྒྱས་ཐམས་ཅད་གཟིགས་པ་པོ། །རང་བྱུང་རྣམས་ཀྱི་གསང་བའི་གནས། །གནས་འདི་བསམ་གྱིས་མི་ཁྱབ་སྟེ། །དཔག་ཡས་བླ་ན་མ་མཆིས་ལགས། །ཞི་བའི་བློ་གྲོས། འདི་ཡང་དེ་བཞིན་གཤེགས་པའི་སྐུའི་གསང་བའོ།། །།བམ་པོ་བཞི་པ། ཞི་བའི་བློ་གྲོས། དེ་ན་སེམས་ཅན་དུ་མ་འཁོར་གཅིག་ཏུ་འདུས་པ་དག་ལས། ཁ་ཅིག་གིས་ནི་དེ་བཞིན་གཤེགས་པའི་སྐུ་མཐོང་ངོ ། །ཁ་ཅིག་གིས་ནི་མ་མཐོང་ངོ ། །དེ་ལ་གང་དག་གིས་མཐོང་བ་དེ་དག་ནི་དགའ་བ་སྐྱེས་ནས་བལྟའོ། །གང་དག་གིས་མ་མཐོང་བ་དེ་དག་ནི་ཅང་མི་སྨྲ་བར་གྱུར་ཅིང་སྡོད་དོ། །ཞི་བའི་བློ་གྲོས། དེ་བཞིན་གཤེགས་པ་ནི་ཞལ་ཟས་མི་གསོལ་མོད་ཀྱི། སེམས་ཅན་རྣམས་ཀྱིས་དེ་བཞིན་གཤེགས་པ་ཞལ་ཟས་གསོལ་བར་མཐོང་ངོ ། །ཞི་བའི་བློ་གྲོས། དེ་ལ་བྱང་ཆུབ་ཀྱི་རིམ་གྲོ་པའི་ལྷ་གཟི་བརྗིད་ཀྱི་སྟོབས་ཞེས་བྱ་དག་རྟག་ཏུ་དེ་བཞིན་གཤེགས་པའི་ཞམ་འབྲིང་དུ་འབྲང་ཞིང ། དེ་དག་དེ་བཞིན་གཤེགས་པའི་ཞལ་ཟས་སྣོད་དུ་བཟེད་ན་སེམས་ཅན་རྣམས་ཀྱིས་དེ་བཞིན་གཤེགས་པའི་ཁམ་ཚད་དུ་བླངས་ཏེ་གསོལ་བར་མཐོང་ངོ ། །དེ་བཞིན་གཤེགས་པས་
200b
ཁམ་ཚད་དུ་བླངས་པ་དེ་དེ་ཡང་སྣོད་དེ་ཉིད་ན་འདུག་སྟེ། དེ་ལྷ་དེ་དག་གིས་ཁྱེར་ནས་དེ་བཞིན་གཤེགས་པའི་འདུས་པའི་སེམས་ཅན་སྔོན་དགེ་བའི་རྩ་བ་བསྐྱེད་པ། ལས་ཀྱི་སྒྲིབ་པའི་དབང་གིས་སྐྱེ་གནས་དེ་དང་དེ་དག་ཏུ་འཕངས་པ། བཟའ་བ་དང ། བཏུང་བ་དང ། ཟས་མི་རྙེད་པ། བཀྲེས་པས་ཉམས་ཆུང་བར་གྱུར་པ་ཇི་སྙེད་པ་དེ་དག་ལ་དེ་བཞིན་གཤེགས་པའི་བཤོས་ཀྱི་ཕམ་ཕབས་དེ་བྱིན་ནས་སེམས་ཅན་དེ་དག་གིས་ཀྱང་ཟས་དེ་ཟོས་པ་དང ། བཀྲེས་སྐོམ་དང་བྲལ་ཏེ། བདེ་ཞིང་ལུས་ཚིམ་ནས་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །གང་དག་ལོག་པར་ལྟུང་བ་ཡི་དྭགས་སམ། གཤིན་རྗེའི་འཇིག་རྟེན་ན་གནས་པ་བྱང་ཆུབ་ཏུ་སེམས་བསྐྱེད་པར་མི་ནུས་པ་དེ་དག་ལ་ཡང་དེ་ཉིད་མྱ་ངན་ལས་འདས་པའི་བར་གྱི་རྒྱུར་འགྱུར་རོ། །ཞི་བའི་བློ་གྲོས། རྣམ་གྲངས་འདིས་ན་ཡང་ཁྱོད་ཀྱིས་ཇི་ལྟར་དེ་བཞིན་གཤེགས་པ་ཞལ་ཟས་མི་གསོལ་ཞིང་དེ་བཞིན་གཤེགས་པ་ཆོས་ཀྱི་ཞལ་ཟས་ཅན་དུ་དེ་ལྟར་རིག་པར་བྱ་སྟེ། ཞི་བའི་བློ་གྲོས། དེ་བཞིན་གཤེགས་པའི་སྐུ་ནི་སྲེད་མེད་ཀྱི་བུ་ལྟར་མཁྲེགས་པ། སྲ་བ་སྙིང་པོ་ཅན། མི་ཤིགས་པ་རྡོ་རྗེའི་རང་བཞིན་ནོ། །ཞི་བའི་བློ་གྲོས། དེ་བཞིན་གཤེགས་པའི་སྐུ་ལ་ནི་ཕོ་བ་དང ། ལོང་ཀ་མེད་དེ། རྣག་གམ། ཁྲག་གམ། འཆིལ་མའམ། ངར་སྣབས་སམ། ངན་སྐྱུགས་སམ། མི་གཙང་བ་མེད་ཀྱི། ཞི་བའི་བློ་གྲོས།
201a
༄#། །དེ་བཞིན་གཤེགས་པའི་སྐུ་ནི་འཛམ་བུའི་ཆུ་བོའི་གསེར་གྱི་གར་བུ་ལྟ་བུ་སྟེ། ཁོག་སྟོང་མ་ཡིན། བ་སྤུའི་བུ་ག་མེད་པ། ཁ་ན་མ་ཐོ་བ་མེད་པའོ། །ཞི་བའི་བློ་གྲོས། འདི་ལྟར་ཅི་ཁྱད་རྡོ་རྗེ་དང་འདྲ་ཡང་འཇམ་ཁྱད་ཀ་ཙ་ལིན་དི་ཀ་ལྟར་རེག་ན་བདེ་བར་འགྱུར་བས་དེ་བཞིན་གཤེགས་པའི་སྐུའི་ཆེ་བ་ཉིད་ལ་ལྟོས། ཞི་བའི་བློ་གྲོས། གང་གི་ཚེ་གཟི་བརྗིད་ཆེ་བ། གཟི་བརྗིད་ཆེ་བའི་ལྷའི་བུ་རྣམས་དང ། ལྷའི་བུ་མོ་རྣམས་དེ་བཞིན་གཤེགས་པའི་ཞབས་ལ་ཕྱག་འཚལ་བ་ན། སྔོན་མ་རེག་པའི་རེག་པ་རེག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་དག་ཉོན་མོངས་པ་བསྐྱེད་པར་མི་འགྱུར་བའི་དུས་དེ་དང ། ཚོད་དེ་ཡོད་དོ། །ཞི་བའི་བློ་གྲོས། སེམས་ཅན་འདོད་ཆགས་ལ་སྤྱོད་པ་གང་དག་གིས་དེ་བཞིན་གཤེགས་པའི་སྐུ་མཐོང་བ་དེ་དག་དེ་བཞིན་གཤེགས་པའི་སྐུ་མཐོང་མ་ཐག་ཏུ་བདག་ཉིད་འདོད་ཆགས་དང་བྲལ་བར་ཤེས་སོ། །ཞེ་སྡང་ལ་སྤྱོད་པ་གང་དག་གིས་མཐོང་ན་དེ་དག་བྱམས་པ་ཐོབ་བོ། །གཏི་མུག་ལ་སྤྱོད་པ་གང་དག་གིས་མཐོང་ན་དེ་དག་ཡེ་ཤེས་ཀྱི་སྣང་བ་ཐོབ་བོ། །ཆ་མཉམ་པ་ལ་སྤྱོད་པ་གང་དག་གིས་མཐོང་ན་དེ་དག་ཉོན་མོངས་པ་དང་བྲལ་བར་ཤེས་སོ། །སེར་སྣ་ཅན་གང་དག་གིས་མཐོང་ན་དེ་དག་གཏོང་བ་ལ་མོས་པར་འགྱུར་རོ། །ཚུལ་ཁྲིམས་འཆལ་བ་གང་དག་གིས་མཐོང་ན་དེ་དག་ཚུལ་ཁྲིམས་ལ་མོས་པར་འགྱུར་རོ།།
201b
གནོད་སེམས་ཅན་གང་དག་གིས་མཐོང་ན་དེ་དག་བཟོད་པ་འཐོབ་བོ། །ལེ་ལོ་ཅན་གང་དག་གིས་མཐོང་ན་དེ་དག་བརྩོན་འགྲུས་ལ་མོས་པར་འགྱུར་རོ། །སེམས་གཡེང་བ་གང་དག་གིས་མཐོང་ན་དེ་དག་ཏིང་ངེ་འཛིན་འཐོབ་བོ། །ཤེས་རབ་འཆལ་པ་གང་དག་གིས་མཐོང་ན་དེ་དག་ཤེས་རབ་ལ་མོས་པར་འགྱུར་རོ། །རིགས་ཀྱི་བུ། མདོར་ན་སེམས་ཅན་དཀར་པོའི་ཆོས་གང་དང་གང་དག་དང་བྲལ་བ་དག་གིས་དེ་བཞིན་གཤེགས་པའི་སྐུ་མཐོང་བ་དེ་དང་དེ་དག་དེ་བཞིན་གཤེགས་པའི་སྐུ་མཐོང་མ་ཐག་ཏུ་མི་དགེ་བའི་རྣམ་པར་རྟོག་པ་ཐམས་ཅད་རྒྱུན་ཆད་ནས་།དགེ་བའི་སེམས་ལ་རབ་ཏུ་གནས་པར་འགྱུར་ཏེ། དེ་ལ་ཡང་དེ་བཞིན་གཤེགས་པ་རྣམ་པར་རྟོག་པ་མི་མངའ་ཞིང་བཏང་སྙོམས་པ་སྟེ། ཞི་བའི་བློ་གྲོས། འདི་ཡང་དེ་བཞིན་གཤེགས་པའི་སྐུའི་གསང་བའོ། ། ཞི་བའི་བློ་གྲོས། དེ་བཞིན་གཤེགས་པས་སྤྲུལ་པ་གང་སྤྲུལ་པ་དེ་ཡང་ལྷུན་གྱིས་གྲུབ་ཅིང་བསྒྲིམས་པ་མི་མངའ་བ་དང ། མངོན་པར་འདུ་མཛད་པ་མི་མངའ་བས་མཛད་དེ། དེ་བཞིན་གཤེགས་པ་འདི་སྙམ་དུ་ངས་སྤྲུལ་པ་དག་སྤྲུལ་ཏོ། །སྤྲུལ་ལོ། །སྤྲུལ་པར་བྱའོ་སྙམ་དུ་མི་དགོངས་མོད་ཀྱི། འོན་ཀྱང་སྤྲུལ་པས་འདུལ་བའི་སེམས་ཅན་ཇི་སྙེད་པར་འཇིག་རྟེན་གྱི་ཁམས་འདི་འམ། ། འཇིག་རྟེན་གྱི་ཁམས་གྲངས་མེད་པ་བརྒྱ་སྟོང་དེ་དང་དེ་དག་ཏུ་སེམས་ཅན་ཡོངས་སུ་སྨིན་པར་མཛད་པའི་དོན་དུ་དེ་བཞིན་གཤེགས་པའི་སྤྲུལ་པ་དེ་སྙེད་དུ་བཞུད་དེ། ཞི་བའི་བློ་གྲོས། འདི་ཡང་
202a
༄#། །དེ་བཞིན་གཤེགས་པའི་སྐུའི་གསང་བའོ། །ཞི་བའི་བློ་གྲོས། དེ་བཞིན་གཤེགས་པའི་སེམས་ཅན་ཡོངས་སུ་སྨིན་པར་མཛད་པའི་དོན་དུ་སྐུ་ལས་འོད་ཁ་དོག་དུ་མ་པ། ཁ་དོག་ཐ་དད་པ། ཁ་དོག་བརྒྱ་སྟོང་པ་དག་བྱུང་སྟེ། འོད་དེས་ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་སྣང་བ་བྱེད་པ་དེ་ཡང་ལྷུན་གྱིས་གྲུབ་ཅིང་བསྒྲིམས་པ་མི་མངའ་བ་དང ། མངོན་པར་འདུ་མཛད་པ་མི་མངའ་བས་མཛད་དེ། ཞི་བའི་བློ་གྲོས། འདིའང་དེ་བཞིན་གཤེགས་པའི་སྐུའི་གསང་བ་དང་སྐུའི་ཕྲིན་ལས་ཏེ། སྐུའི་ཕྲིན་ལས་ཡོངས་སུ་དག་པ་ལ་འཇུག་པ་ཅུང་ཟད་ཙམ་ཞིག་བསྟན་དུ་ཟད་ཀྱི། བསྐལ་པའམ་དེ་བས་ལྷག་པར་བརྗོད་ཀྱང ། དེ་བཞིན་གཤེགས་པའི་སྐུའི་ཕྲིན་ལས་ཡོངས་སུ་དག་པའི་ཡོན་ཏན་བསྔགས་པའི་མཐར་ཕྱིན་པར་མི་ནུས་སོ། །དེ་བཞིན་གཤེགས་པའི་སྐུའི་གསང་བ་བསམ་གྱིས་མི་ཁྱབ་པ་བསྟན་པ་འདི་བཤད་པ་ན། སྲོག་ཆགས་ཁྲིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་བརྒྱད་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཐམས་ཅད་དང་ལྡན་པའི་འཁོར་ངེས་ཀྱང་དེ་བཞིན་གཤེགས་པ་དང ། གསང་བ་བའི་བདག་པོ་ལག་ན་རྡོ་རྗེ་ལ་ལྷ་དང ། མིའི་མེ་ཏོག་རྣམས་ཀྱིས་མངོན་པར་གཏོར་ཏོ། །བཅོམ་ལྡན་འདས་ཀྱིས་ཕྱག་གཡས་པ་གསེར་གྱི་ཁ་དོག་ཅན་བརྐྱང་སྟེ། གསང་བ་པའི་བདག་པོ་ལག་ན་རྡོ་
202b
རྗེའི་སྤྱི་བོ་ལ་བཞག་ནས་གསང་བ་པའི་བདག་པོ་ལག་ན་རྡོ་རྗེ་ཁྱོད་དེ་བཞིན་གཤེགས་པའི་གསང་བ་བསྟན་པ་འདི་ལེགས་པར་སྨྲས་པ་ལེགས་སོ། །ལེགས་སོ། །དེ་བཞིན་གཤེགས་པས་ཀྱང་སྣང་ཞིང་རྗེས་སུ་དགྱེས་སོ། །ཞེས་ལེགས་སོ་ཞེས་བྱ་བ་བྱིན་ནོ། །དེ་བཞིན་གཤེགས་པའི་སྐུའི་གསང་བའི་ལེའུས་ཏེ་བདུན་པའོ།། །།གསང་བ་པའི་བདག་པོ་ལག་ན་རྡོ་རྗེས་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །ཞི་བའི་བློ་གྲོས། དེ་ལ་དེ་བཞིན་གཤེགས་པའི་གསུང་གི་གསང་བ་དང ། གསུང་གི་ཕྲིན་ལས་ཡོངས་སུ་དག་པ་གང་ཞེ་ན། ཞི་བའི་བློ་གྲོས། གང་གི་ནུབ་མོ་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང ། གང་གི་ནུབ་མོ་ལེན་པ་མི་མངའ་བར་ཡོངས་སུ་མྱ་ངན་ལས་འདའ་བར་འགྱུར་བ་དེའི་བར་དུ་དེ་བཞིན་གཤེགས་པས་ཐ་ན་ཡི་གེའི་འབྲུ་གཅིག་ཀྱང་མ་གསུངས་སོ། །གསུང་བར་མི་འགྱུར་རོ། །དེ་ཅིའི་ཕྱིར་ཞེ་ན། ཞི་བའི་བློ་གྲོས། དེ་བཞིན་གཤེགས་པ་ནི་རྟག་ཏུ་མཉམ་པར་བཞག་པ་སྟེ། དེ་བཞིན་གཤེགས་པ་ལ་དབུགས་ཕྱུང་བའམ། རྔུབ་པ་མི་མངའོ། །རྣམ་པར་མི་རྟོག་གོ་།རྣམ་པར་མི་དཔྱོད་དོ། །རྣམ་པར་རྟོག་པ་དང ། རྣམ་པར་དཔྱོད་པ་མེད་ན་ངག་མི་འབྱུང་སྟེ། དེ་བཞིན་གཤེགས་པ་དེ་ཡང་རྣམ་པར་མི་རྟོག་།རྣམ་པར་མི་དཔྱོད། རྟོག་པར་མི་མཛད། རྣམ་པར་རྟོག་པར་མི་མཛད། མི་གསུང ། མི་
203a
༄#། །བརྗོད། གསུང་བར་མི་མཛད་ཀྱང་སེམས་ཅན་རྣམས་འདི་སྙམ་དུ་སེམས་ཏེ། དེ་བཞིན་གཤེགས་པ་ནི་གསུང་ངོ་སྙམ་མོ། །དེ་བཞིན་གཤེགས་པ་ནི་ཤིན་ཏུ་མཉམ་པར་བཞག་པ་སྟེ། ཡི་གེའི་རྣམ་པར་རྟོག་པ་ཐམས་ཅད་ཀྱི་ཐམས་ཅད་དུ་རྣམ་པར་རིག་པ་མི་མཛད་ཀྱང་སེམས་ཅན་ཡི་གེ་ལྷུར་ལེན་པ་རྣམས་འདི་སྙམ་དུ་སེམས་ཏེ། དེ་བཞིན་གཤེགས་པ་ནི། བདག་ཅག་ལ་ཆོས་སྟོན་ཏོ། །བདག་ཅག་ནི་དེ་བཞིན་གཤེགས་པའི་ཆོས་བསྟན་པ་ཀུན་ཤེས་སོ་སྙམ་མོ། །དེ་ལ་ཡང་དེ་བཞིན་གཤེགས་པ་ནི་རྣམ་པར་མི་རྟོག་ཅིང་བཏང་སྙོམས་སུ་མཛད་དོ། །ཞི་བའི་བློ་གྲོས། དེ་བཞིན་གཤེགས་པའི་ཚེམས་དང ། སྒྲོས་དང ། ཞལ་གྱི་རྐན་དང ། ལྗགས་དང ། ཞལ་གྱི་སྒོ་ནས་སྒྲ་འབྱུང་བ་ཡང་མེད་ལ། འབྱུང་བར་ཡང་གྲག་གོ། དེ་བཞིན་གཤེགས་པའི་གསུང་གི་སྒྲ་འབྱུང་བ་དེ་ནི་ནམ་མཁའ་ལས་འབྱུང་ན། སེམས་ཅན་རྣམས་འདི་སྙམ་དུ་སེམས་ཏེ། སྒྲ་འདི་ནི་དེ་བཞིན་གཤེགས་པའི་ཞལ་གྱི་སྒོ་ནས་འབྱུང་ངོ་སྙམ་མོ། །ཞི་བའི་བློ་གྲོས། དེ་བཞིན་གཤེགས་པའི་གསུང་ནི་རྣམ་པ་དྲུག་ཅུ་རྩ་བཞི་དང་ལྡན་པར་འབྱུང་སྟེ། རྣམ་པ་དྲུག་ཅུ་རྩ་བཞི་གང་ཞེ་ན། འདི་ལྟ་སྟེ། མཉེན་པའི་གསུང་འབྱུང་བ་དང ། འཇམ་པ་དང ། ཡིད་དུ་འོང་དང ། ཡིད་དུ་འཐད་པ་དང ། དག་པ་དང ། དྲི་མ་མེད་པ་དང ། འོད་གསལ་བ་དང ། སྙན་ཅིང་འཇེབས་པ་དང ། མཉན་པར་འོས་པ་དང ། མི་ཚུགས་པ་དང ། སྙན་པ་དང་དུལ་བ་དང །
203b
མི་རྩུབ་པ་དང ། མི་བརླང་བ་དང ། རབ་ཏུ་དུལ་བ་དང ། རྣར་སྙན་པ་དང ། ལུས་སིམ་པར་བྱེད་པ་དང ། སེམས་ཚིམ་པར་བྱེད་པ་དང ། སྙིང་དགའ་བར་བྱེད་པ་དང ། དགའ་བདེ་བསྐྱེད་པ་དང ། ཡོངས་སུ་གདུང་བ་མེད་པ་དང ། ཀུན་ཏུ་ཤེས་པར་བྱ་བ་དང ། རྣམ་པར་རིག་པར་བྱ་བ་དང ། རྣམ་པར་གསལ་བ་དང ། དགའ་བར་བྱེད་པ་དང ། མངོན་པར་དགའ་བར་བྱེད་པ་དང ། ཀུན་ཤེས་པར་བྱེད་པ་དང ། རྣམ་པར་རིག་པར་བྱེད་པ་དང ། རིགས་པ་དང་འབྲེལ་བ་དང ། ཟློས་པའི་སྐྱོན་མེད་པ་དང ། སེང་གེའི་སྒྲའི་ཤུགས་ཅན་དང ། གླང་པོ་ཆེའི་སྒྲ་སྐད་དང ། འབྲུག་གི་སྒྲ་དབྱངས་དང ། ཀླུའི་དབང་པོའི་སྒྲ་དང ། དྲི་ཟའི་གླུ་དབྱངས་དང ། བྱ་ཀ་ལ་པིང་ཀའི་སྒྲ་དབྱངས་དང ། ཚངས་པའི་སྒྲ་དབྱངས་བསྒྲགས་པ་དང ། ཤང་ཤང་ཏེའུའི་སྒྲ་དབྱངས་སུ་གྲག་པ་དང ། ལྷའི་དབང་པོའི་དབྱངས་ལྟར་སྙན་པ་དང ། རྔའི་སྒྲ་དང ། མ་ཁེངས་པ་དང ། མི་དམའ་བ་དང ། སྒྲ་ཐམས་ཅད་ཀྱི་རྗེས་སུ་ཞུགས་པ་དང ། ཚིག་ཟུར་ཆག་པ་མེད་པ་དང ། མ་ཚང་བ་མེད་པ་དང ། མ་ཞུམ་པ་དང ། མི་ཞན་པ་དང ། རབ་ཏུ་དགའ་བ་དང ། ཁྱབ་པ་དང ། ཆུབ་པ་དང ། རྒྱུན་ཆགས་པ་དང ། འབྲེལ་བ་དང ། སྒྲ་ཐམས་ཅད་རྫོགས་པར་བྱེད་པ་དང ། དབང་པོ་ཐམས་ཅད་ཚིམ་པར་བྱེད་པ་དང ། མ་སྨད་པ་དང ། མི་འགྱུར་བ་དང ། མ་བརྟགས་པ་དང ། འཁོར་ཀུན་དུ་གྲག་པ་དང ། འདོད་ཆགས་ཞི་བར་བྱེད་པ་དང ། ཞེ་སྡང་འདུལ་བ་དང ། གཏི་མུག་སེལ་བ་དང ། བདུད་ཚར་གཅོད་པ་དང ། རྣམ་པ་ཐམས་ཅད་
204a
༄#། །མཆོག་དང་ལྡན་པར་འབྱུང་བ་སྟེ། ཞི་བའི་བློ་གྲོས། དེ་བཞིན་གཤེགས་པའི་གསུང་ནི་ཡན་ལག་དྲུག་ཅུ་རྩ་བཞི་པོ་དེ་དག་དང་ལྡན་པར་འབྱུང་ངོ ། །ཞི་བའི་བློ་གྲོས ། གཞན་ཡང་དེ་བཞིན་གཤེགས་པའི་གསུང་ནི་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་ཤིང ། སེམས་ཅན་ཐམས་ཅད་ཀྱི་བསམ་པ་ཡང་དག་པར་ཚིམ་པར་མཛད་ཀྱང ། ཞི་བའི་བློ་གྲོས། དེ་བཞིན་གཤེགས་པ་ནི་འདི་སྙམ་དུ་ང་མདོའི་སྡེའམ། དབྱངས་ཀྱིས་བསྙད་པའི་སྡེའམ། ལུང་དུ་བསྟན་པའི་སྡེའམ། ཚིགས་སུ་བཅད་པའི་སྡེའམ། ཆེད་དུ་བརྗོད་པའི་སྡེའམ། གླེང་གཞིའི་སྡེའམ། དེ་ལྟ་བུ་བྱུང་བའི་སྡེའམ། སྐྱེས་པའི་རབས་ཀྱི་སྡེའམ། ཤིན་ཏུ་རྒྱས་པའི་སྡེའམ། རྨད་དུ་བྱུང་བའི་ཆོས་ཀྱི་སྡེའམ། གཏན་ལ་ཕབས་པར་བསྟན་པའི་སྡེའམ། དཔེའམ། སྔོན་གྱི་ཚུལ་ལམ། རྟོགས་པ་རྗོད་པའི་སྡེའམ། ཀུན་ཏུ་བསྙད་པ་འདི་སྟོན་ཏོ་ཞེའམ། རབ་ཏུ་གསལ་བར་མཛད་དོ་ཞེའམ། རབ་ཏུ་ཤེས་པར་མཛད་དོ་ཞེའམ། རབ་ཏུ་འཇོག་གོ་ཞེའམ། རྣམ་པར་འབྱེད་དོ་ཞེའམ། རྣམ་པར་འགྲེལ་ཏོ་ཞེའམ། བརྗོད་དོ་ཞེའམ། ཡང་དག་པར་བསྒྲགས་པར་མཛད་དོ་སྙམ་དུ་མི་དགོངས་སོ། །དེ་ལྟ་མོད་ཀྱི་དེ་བཞིན་གཤེགས་པའི་འཁོར་འདུས་པ་ཅི་འདྲ་བ་དགེ་སློང་གི་འཁོར་རམ། དགེ་སློང་མའི་འཁོར་རམ། དགེ་བསྙེན་གྱི་འཁོར་རམ། དགེ་བསྙེན་མའི་འཁོར་རམ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་
204b
དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོའི་འཁོར་ཀྱང་རུང་སྟེ། དེར་དེ་དག་གི་དབང་པོའི་རིམ་པ་དང ། དེ་དག་ཅི་འདྲ་བའི་ཆོས་ཀྱི་སྦྱིན་པ་ཐོས་པས་དགོངས་པར་འགྱུར་བ་དེ་འདྲ་བའི་ཆོས་ཀྱི་སྦྱིན་པ་ཐོས་པ་དེ་དེ་བཞིན་གཤེགས་པའི་ཞལ་གྱི་སྒོ་ནས་འབྱུང་བར་ཤེས་ཀྱང ། ཆོས་བསྟན་པ་དེ་ནི་ཕན་ཚུན་གྱི་ངེས་པའི་ཚིག་ཐ་དད་པ་ལ་གནོད་པ་མེད་པར་ཐམས་ཅད་ཀྱང་རང་རང་གི་ཆོས་རྣམ་པར་རིག་པར་ཀུན་ཏུ་ཤེས་ཏེ། ཞི་བའི་བློ་གྲོས། འདི་ནི་དེ་བཞིན་གཤེགས་པའི་གསུང་གི་གསང་བའོ། །ཞི་བའི་བློ་གྲོས། གཞན་ཡང་དེ་བཞིན་གཤེགས་པས་སེམས་ཅན་ཚད་མེད་པ་དག་གི་སྤྱོད་པ་ཚད་མེད་པ་གསུངས་ན། སེམས་ཅན་གྱི་སྤྱོད་པ་བརྒྱད་ཁྲི་བཞི་སྟོང་ཞེས་འབྱུང་བ་ནི། སེམས་ཅན་དབང་པོ་མཐུ་ཆུང་བ་རྣམས་གཟུང་བའི་ཕྱིར་བསྟན་པ་འདི་དེ་བཞིན་གཤེགས་པས་བསྟན་གྱི། ཞི་བའི་བློ་གྲོས། སེམས་ཅན་གྱི་སྤྱོད་པ་ནི་ཚད་མེད་དེ། སེམས་ཅན་འདོད་ཆགས་ལ་སྤྱོད་པ་རྣམས་ཀྱི་སྤྱོད་པ་གང་ཡིན་པ་དེ་བསྐལ་པ་ཙམ་དུ་བཤད་ཀྱང་དེ་བས་ལྷག་པར་འགྱུར་རོ། །ཞེ་སྡང་ལ་སྤྱོད་པ་རྣམས་ཀྱི་གང་ཡིན་པ་དང ། གཏི་མུག་ལ་སྤྱོད་པ་རྣམས་ཀྱི་གང་ཡིན་པ་དང ། སེམས་ཅན་ཆ་མཉམ་པ་ལ་སྤྱོད་པ་རྣམས་ཀྱི་སྤྱོད་པ་གང་ཡིན་པ་དེ་དག་བསྐལ་པ་ཙམ་དུ་བསྟན་ཀྱང་དེ་དག་རེ་རེ་ཡང་དེ་བས་ལྷག་པར་འགྱུར་རོ། །ཞི་བའི་བློ་གྲོས། གལ་ཏེ་དེ་བཞིན་གཤེགས་པའི་སྐུའི་ཚེ་ཚད་བསྐལ་པ་བརྒྱ་སྟོང་དུ་
205a
༄#། །བཞུགས་པས་སེམས་ཅན་རྣམས་ལ་ཆོས་བསྟན་པ་གཞན་གྱི་སྐབས་མི་དབྱེ་བར་སེམས་ཅན་གྱི་སྤྱོད་པ་ཉིད་བསྟན་ཀྱང ། དེ་བཞིན་གཤེགས་པའི་སྐུ་ཚེ་མཐར་ཐུག་པར་འགྱུར་གྱི། སེམས་ཅན་གྱི་སྤྱོད་པ་ལ་མཐར་ཐུག་པ་གང་ཡང་མེད་དོ། །སེམས་ཅན་རྣམས་མགོ་རྨོངས་སུ་འོང་ཞེས་སེམས་ཅན་གྱི་སྤྱོད་པ་དེ་ཙམ་དུ་ཚད་མེད་པ་དེ་ཡང་དེ་བཞིན་གཤེགས་པས་ཚད་དང་ལྡན་པར་སྟོན་ཏོ། །ཞི་བའི་བློ་གྲོས། དེ་ལ་དེ་བཞིན་གཤེགས་པའི་གསུང་ནི། ཇི་ལྟར་སྤྱོད་པ་ཁོང་དུ་ཆུད་པར་འགྱུར་བ་བཞིན་དུ་སེམས་ཅན་གྱི་སྤྱོད་པ་ཐམས་ཅད་ལ་འབྱུང་སྟེ།་ཞི་བའི་བློ་གྲོས། འདི་འང་དེ་བཞིན་གཤེགས་པའི་གསུང་གི་གསང་བའོ། །ཞི་བའི་བློ་གྲོས། སེམས་ཅན་གང་དག་དེ་བཞིན་གཤེགས་པའི་གསུང་གི་གསང་བའི་ཡེ་ཤེས་ཀྱི་རྗེས་སུ་ཞུགས་པ་དེ་དག་ནི་དེ་བཞིན་གཤེགས་པའི་གསུང་ཞལ་གྱི་སྒོ་ནས་འབྱུང་བ་མི་ཤེས་ཀྱི་ནམ་མཁའ་ལས་འབྱུང་བར་ཤེས་སོ། །ཞི་བའི་བློ་གྲོས། སེམས་ཅན་རྣམས་ཀྱིས་དེ་བཞིན་གཤེགས་པའི་གསུང་ཞལ་གྱི་སྒོ་ནས་འབྱུང་བར་ཤེས་སོ། །སྙམ་དུ་ཁྱོད་སེམས་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཞི་བའི་བློ་གྲོས། སེམས་ཅན་གང་དག་དེ་བཞིན་གཤེགས་པའི་གསུང་གཙུག་ཏོར་ནས་བྱུང་བར་ཤེས་པ་དང ། སྤྱི་གཙུག་ནས་བྱུང་བར་ཤེས་པ་དང ། དབུ་སྐྲ་རྣམས་ལས་བྱུང་བར་ཤེས་པ་དང ། ཕྲག་པ་ནས་བྱུང་བར་ཤེས་པ་དང ། དཔྲལ་བ་དང །
205b
སྨིན་མཚམས་དང ། མཛོད་སྤུ་དང ། སྤྱན་དང ། སྙན་དང ། ཤངས་དང ། འགྲམ་པ་དང ། ཞལ་དང ། མགུལ་ནས་བྱུང་བར་ཤེས་པ་དང ། དེ་བཞིན་དུ་དབུང་\་ཌPཱུཎG\་བ་དང ། ཕྱག་དང ། སོར་མོ་དང།་རྩིབ་ལོགས་དང ། བྲང་དང ། རྒྱབ་དང ། ལྟེ་བ་དང ། གསང་བའི་གནས་དང ། བརླ་དང ། པུས་མོའི་ལྷ་ང་དང ། བྱིན་པ་དང ། ལོང་བུ་དང ། ཞབས་ཀྱི་མཐིལ་དང ། མཚན་རྣམས་དང ། དཔེ་བྱད་བཟང་པོ་རྣམས་དང ། སྤུའི་ཁུང་བུ་ཐམས་ཅད་ནས་དེ་བཞིན་གཤེགས་པའི་གསུང་འབྱུང་བར་ཤེས་པའི་སེམས་ཅན་ཁ་ཅིག་ཡོད་དོ། ཞི་བའི་བློ་གྲོས། འདི་ཡང་དེ་བཞིན་གཤེགས་པའི་གསུང་གི་གསང་བའོ། ཞི་བའི་བློ་གྲོས། མོས་པ་ཇི་ལྟ་བ་དང ། ཡོངས་སུ་སྨིན་པ་ཇི་ལྟ་བ་དང ། བསམ་པ་ཇི་ལྟ་བ་དེ་བཞིན་དུ་དེ་བཞིན་གཤེགས་པའི་གསུང་འབྱུང་བར་ཤེས་ཀྱང ། ཞི་བའི་བློ་གྲོས། དེ་ལ་དེ་བཞིན་གཤེགས་པ་ནི་རྣམ་པར་རྟོག་པ་མི་མངའ་སྟེ། བཏང་སྙོམས་པའོ། །ཞི་བའི་བློ་གྲོས། འདི་ལྟ་སྟེ། དཔེར་ན། རོལ་མོ་སིལ་སྙན་གྱི་འཁྲུལ་འཁོར་དེ་ཙམ་དུ་ལེགས་པར་སྦྱར་བ་བྱས་པ། གང་དག་ལ་ལག་གིས་མ་རེག་པར་རླུང་གིས་བསྐྱོད་པས་སྒྲ་སྙན་པ་འབྱུང་བ་དག་ཀྱང་ཡོད་དེ། འོན་ཀྱང་དེ་ལ་སྒྲ་འབྱིན་པར་སྤྲོ་བ་གང་ཡང་མེད་མོད་ཀྱི། ཡོངས་སུ་སྦྱང་བ་བྱས་པའི་ཁྱད་པར་གྱིས་སྒྲ་སྙན་པ་ཡང་འབྱུང་ངོ ། །ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པའི་གསུང་ཡང་སེམས་ཅན་གྱི་བསམ་པའི་
206a
༄#། །ཤེས་པས་བསྐྱོད་ན་འབྱུང་སྟེ། འོན་ཀྱང་དེ་ལ་དེ་བཞིན་གཤེགས་པའི་གསུང་འབྱིན་པར་སྤྲོ་བ་ཡང་མི་མངའ་མོད་ཀྱི། སྔོན་ཡོངས་སུ་སྦྱང་བ་མཛད་པའི་ཁྱད་པར་གྱིས་དེ་བཞིན་གཤེགས་པའི་གསུང་སེམས་ཅན་ཐམས་ཅད་ཀྱི་ཡུལ་གྱི་རྗེས་སུ་འཇུག་པར་ཡང་འགྱུར་རོ། །ཞི་བའི་བློ་གྲོས། འདི་ལྟ་སྟེ། དཔེར་ན། བྲག་ཅའི་སྒྲ་ནི་གཞན་རྣམ་པར་རིག་པར་བྱེད་པ་ཡང་འབྱུང་ལ། དེའི་ནང་ན་ཡང་མ་ཡིན། ཕྱི་རོལ་ན་ཡང་མ་ཡིན། གཉིས་ཀ་མེད་པ་ལས་ཀྱང་མི་དམིགས་སོ། །ཞི་པའི་བློ་གྲོས། དེ་བཞིན་དུ་དེ་བཞིན་གཤེགས་པའི་གསུང་ཡང་སེམས་ཅན་གྱི་བསམ་པ་རྣམ་པར་རིག་པར་བྱེད་པར་འབྱུང་ལ་དེའི་ནང་ན་ཡང་མ་ཡིན། ཕྱི་རོལ་ན་ཡང་མ་ཡིན་ལ། གཉིས་ཀ་མེད་པར་ཡང་མི་དམིགས་སོ། །ཞི་བའི་བློ་གྲོས། འདི་ལྟ་སྟེ། དཔེར་ན། རྒྱ་མཚོ་ཆེན་པོའི་ནང་ན་ཡིད་བཞིན་གྱི་ནོར་བུ་རིན་པོ་ཆེ་བསམ་པ་ཐམས་ཅད་ཡོངས་སུ་སྐོང་བ་ཞེས་བྱ་བ་ཡོད་དེ། དེ་རྒྱལ་མཚན་གྱི་རྩེ་མོ་ལ་བཏགས་ན། སེམས་ཅན་གང་གིས་བསམ་པ་ཅི་འདྲ་བར་གྱུར་པ་དེ་འདྲ་བའི་སྒྲ་དེ་ལས་འབྱུང་ཡང་ནོར་བུ་རིན་པོ་ཆེ་དེ་ནི་རྣམ་པར་མི་རྟོག་གོ། ཞི་པའི་བློ་གྲོས། དེ་བཞིན་དུ་དེ་བཞིན་གཤེགས་པའི་གསུང་རིན་པོ་ཆེ་ལྷག་པའི་བསམ་པ་ཡོངས་སུ་དག་པ་ཡང་སྙིང་རྗེ་ཆེན་པོའི་རྒྱལ་མཚན་གྱི་རྩེ་མོ་ལ་བཏགས་ན། སེམས་ཅན་གང་གིས་བསམ་པ་ཅི་འདྲ་བར་འགྱུར་པ་དེ་འདྲ་བར་དེ་བཞིན་གཤེགས་པའི་
206b
གསུང་འབྱུང་བར་དེས་ཤེས་ཀྱང་དེ་ལ་དེ་བཞིན་གཤེགས་པ་ལ་ནི་རྣམ་པར་རྟོག་པ་མི་མངའ་ཞིང་བཏང་སྙོམས་པ་སྟེ། ཞི་བའི་བློ་གྲོས། འདི་ཡང་དེ་བཞིན་གཤེགས་པའི་གསུང་གི་གསང་པའོ། །ཞི་བའི་བློ་གྲོས། སངས་རྒྱས་བཅོམ་ལྡན་འདས་རྣམས་ནི་གསུང་དབྱངས་ཚད་མེད་པ་སྟེ། ཞི་བའི་བློ་གྲོས། གང་ཞིག་དེ་བཞིན་གཤེགས་པའི་དབྱངས་ཀྱི་ཚད་དམ། མཐའ་གཟུང་བར་ནུས་པ་དེ་ནི། ཁོ་བོས་ལྷ་དང་བཅས་པ་དང ། བདུད་དང་བཅས་པ་དང ། ཚངས་པ་དང་བཅས་པ་དང ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང ། ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་ན་མ་མཐོང་ངོ ། །དེ་ཅིའི་ཕྱིར་ཞེ་ན། ཞི་བའི་བློ་གྲོས། ཁོ་བོས་མངོན་པར་ཤེས་ཏེ། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཀྱི་ཕུང་པོའི་རི་འདི་ཉིད་ལ་བྱང་ཆུབ་སེམས་དཔའི་ཚོགས་ཀྱིས་བསྐོར་ཅིང་བཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོས་བྱམས་པ་ལ་བརྟེན་ནས། དབྱངས་ཀྱི་དཀྱིལ་འཁོར་ཡོངས་སུ་དག་པ་ཞེས་བྱ་བའི་ཆོས་ཀྱི་རྣམ་གྲངས་རྒྱ་ཆེར་རབ་ཏུ་སྟོན་པ་དེ་འཇུག་ཏུ་ཕྱིན་པའི་དུས་ཀྱི་ཚེ། ཚེ་དང་ལྡན་པ་མོའུ་དགལ་གྱི་བུ་ཆེན་པོ་འདི་སྙམ་དུ་སེམས་ཏེ། དེ་བཞིན་གཤེགས་པའི་གསུང་གི་དཀྱིལ་འཁོར་ཇི་སྲིད་ཅིག་ཏུ་རིང་དུ་འགྲོ་བ་ཞིག་བདག་གིས་དེ་བཞིན་གཤེགས་པའི་གསུང་གི་དཀྱིལ་འཁོར་དཔག་པར་བྱའོ་སྙམ་མོ། །དེ་ནས་གནས་བརྟན་མོའུ་དགལ་གྱི་བུ་ཆེན་པོ་རང་གི་
207a
༄#། །སྟན་གྱི་སྟེང་ནས་མི་སྣང་བར་གྱུར་ཏེ། རི་རབ་ཀྱི་རྩེ་མོར་ཕྱིན་ནས་དེ་དེ་ན་འདུག་ན་ཡང་དེ་བཞིན་གཤེགས་པའི་གསུང་དེ་འདྲ་བར་ཁོ་ནར་ཐོས་སོ། །རང་གི་རྫུ་འཕྲུལ་གྱི་སྟོབས་ཀྱིས་འཇིག་རྟེན་གྱི་ཁམས་མི་མཇེད་ཀྱི་ནུབ་ཕྱོགས་ཀྱི་རི་རབ་ལས་འདས་ཤིང་གླིང་བཞི་པ་ལས་ཀྱང་འདས། ཁོར་ཡུག་ལས་ཀྱང་འདས་ཏེ། འཇིག་རྟེན་གྱི་ཁམས་ཀྱི་བར་གྱི་ཁོར་ཡུག་གི་ཟོམ་ལ་འདུག་ན་ཡང ། བཅོམ་ལྡན་འདས་ཀྱི་གསུང་ལྷག་ཆད་མེད་ཅིང་མཉམ་པར་དེ་འདྲ་བར་ཁོ་ནར་ཐོས་སོ། །དེ་ནས་བཅོམ་ལྡན་འདས་ཀྱིས་འདི་སྙམ་དུ་དགོངས་ཏེ། ཀྱེ་མ་མོའུ་དགལ་གྱི་བུ་འདི་ངའི་སྒྲ་སྐད་དཔོག་པར་འདོད་ཀྱི། ངས་འདི་དག་ལ་རྫུ་འཕྲུལ་གྱིས་བསྟང་ངོ་སྙམ་ནས། བཅོམ་ལྡན་འདས་ཀྱིས་དེ་ལ་རྫུ་འཕྲུལ་གྱི་བསྟོངས་པ་དང ། དེ་སངས་རྒྱས་ཀྱི་མཐུ་དང ། རང་གི་རྫུ་འཕྲུལ་གྱི་སྟོབས་ཀྱིས་སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་གངྒཱའི་ཀླུང་དགུ་ཅུ་རྩ་དགུའི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་འོད་ཟེར་གྱི་རྒྱལ་མཚན་ཞེས་བྱ་བ་དེ་ན་དེ་བཞིན་གཤེགས་པ་འོད་ཟེར་གྱི་རྒྱལ་པོ་ཞེས་བྱ་བ་ད་ལྟར་ན་བཞུགས་ཤིང་འཚོ་ལ་གཞེས་ཏེ། ཆོས་ཀྱང་སྟོན་པ་དེར་གནས་བརྟན་མོའུ་དགལ་གྱི་བུ་ཆེན་པོས་ཕྱིན་ཏེ། དེ་ན་འདུག་ཀྱང་བཅོམ་ལྡན་འདས་ཀྱི་སྒྲ་སྐད་དེ་འདྲ་བ་ཁོ་ནར་ཐོས་ཏེ། འདི་ལྟ་སྟེ། དཔེར་ན། འདོམ་གང་ཙམ་
207b
གྱི་ཕྱོགས་ན་འདུག་པའི་མིས་མི་ཅིག་ཤོས་ཀྱི་སྒྲ་ཐོས་པ་དེ་བཞིན་དུ། གནས་བརྟན་མོའུ་དགལ་གྱི་བུ་ཆེན་པོས་འཇིག་རྟེན་གྱི་ཁམས་དེ་ན་གནས་ཀྱང་བཅོམ་ལྡན་འདས་ཀྱི་གསུང་སྒྲ་ཐོས་སོ། །བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དེའི་སྐུའི་ཁྲུན་ནི་དཔག་ཚད་ཙམ་མོ། །བྱང་ཆུབ་སེམས་དཔའ་དེ་དག་གི་ལུས་ཀྱི་ཁྲུན་ནི་དཔག་ཚད་ཕྱེད་དོ། །དེ་ནས་བྱང་ཆུབ་སེམས་དཔའ་དེ་དག་གི་སྤྱད་པར་བྱ་བའི་ལྷུང་བཟེད་ཀྱི་རྟེན་མ་གདུ་བུ་དེ་ལ་གནས་བརྟན་མོའུ་དགལ་གྱི་བུ་ཆེན་པོ་འཆག་ཅིང་འདུག་གོ། དེ་ནས་བྱང་ཆུབ་སེམས་དཔའ་དེ་དག་རབ་ཏུ་དགའ་ནས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དགེ་སྦྱོང་གི་ཁ་དོག་འདྲ་བའི་སྲོག་ཆགས་ལྷུང་བཟེད་ཀྱི་རྟེན་མའི་གདུ་བུ་ལ་འཆག་ཅིང་མཆིས་པ་འདི་ག་ལས་མཆིས་པ་ཞིག། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་དག། ཁྱེད་འདི་ལ་བརྙས་པའི་སེམས་མ་བསྐྱེད་ཅིག། དེ་ཅིའི་ཕྱིར་ཞེ་ན། འདི་ནི་གནས་བརྟན་མོའུ་དགལ་གྱི་བུ་ཆེན་པོ་ཞེས་བྱ་སྟེ། བཅོམ་ལྡན་འདས་ཤཱཀྱ་ཐུབ་པའི་ཉན་ཐོས་ཀྱི་མཆོག་གོ། ཉན་ཐོས་ཆེན་པོ་རྣམས་ཀྱི་ནང་ན་རྫུ་འཕྲུལ་དང་ལྡན་པའི་མཆོག་གོ།་དེ་ནས་བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་རྒྱལ་པོས་མོའུ་དགལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མོའུ་དགལ་གྱི་བུ་ཁྱོད་ལ་བྱང་ཆུབ་སེམས་དཔའ་
208a
༄#། །འདི་དག་ཁྱད་དུ་གསོད་ཀྱི། ཁྱོད་ཀྱིས་འདི་ལྟ་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ཉིད་ཀྱི་བྱིན་གྱི་རླབས་ཀྱིས། རང་གི་རྫུ་འཕྲུལ་གྱི་ཆོ་འཕྲུལ་སྟོན་ཅིག་།དེ་ནས་གནས་བརྟན་མོའུ་དགལ་གྱི་བུ་ཆེན་པོས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། ལན་བདུན་བསྐོར་བ་བྱས་ནས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རིན་པོ་ཆེའི་གླིང་འདི་སྐྱིལ་མོ་ཀྲུང་གཅིག་གིས་ཁྱབ་པར་བྱའོ། །བཀའ་སྩལ་པ། མོའུ་དགལ་གྱི་བུ་ཁྱོད་ཀྱིས་དེའི་དུས་ལ་བབ་པར་ཤེས་ན་གྱིས་ཤིག་།དེ་ནས་གནས་བརྟན་མོའུ་དགལ་གྱི་བུས་སྟེང་གི་ནམ་མཁའ་ལ་ཤིང་ཏ་ལ་བདུན་ཙམ་གྱི་གོང་དུ་མངོན་པར་འཕགས་ཏེ། རིན་པོ་ཆེའི་གླིང་དེ་སྐྱིལ་མོ་ཀྲུང་གཅིག་གིས་ཁྱབ་པར་བྱས་སོ། །སྐྱིལ་མོ་ཀྲུང་དེ་ལས་ཀྱང་མུ་ཏིག་གི་རྒྱན་ཕྲེང་བྱེ་བ་ཁྲག་ཁྲིག་བརྒྱ་སྟོང་མངོན་པར་འཕྱང་ངོ ། །མུ་ཏིག་གི་རྒྱན་ཕྲེང་གི་འབྲུ་ཐམས་ཅད་ལས་ཀྱང་འོད་ཟེར་བརྒྱ་སྟོང་བྱུང་ངོ ། །འོད་ཟེར་དེ་དག་ཐམས་ཅད་ཀྱི་རྩེ་མོ་དག་ལས་ཀྱང་པདྨ་རྣམས་བྱུང་ངོ ། །པདྨ་ཐམས་ཅད་ཀྱི་སྙིང་པོ་རྣམས་ལ་ཡང་བཅོམ་ལྡན་འདས་ཤཱཀྱ་ཐུབ་པ་ཅི་འདྲ་བ་དེ་འདྲ་བའི་དེ་བཞིན་གཤེགས་པའི་གཟུགས་བཞུགས་པར་སྣང་ངོ ། །དེ་བཞིན་གཤེགས་པའི་གཟུགས་དེ་དག་ཐམས་ཅད་ཀྱང་བཅོམ་ལྡན་འདས་ཤཱཀྱ་ཐུབ་པའི་དབྱངས་ཀྱི་དཀྱིལ་འཁོར་
208b
ཡོངས་སུ་དག་པའི་ཆོས་ཀྱི་རྣམ་གྲངས་ལས་བརྩམས་ཏེ་བསྔགས་པ་གསུང་ངོ ། །དེ་ནས་གནས་བརྟན་མོའུ་དགའ་གྱི་བུ་ཆེན་པོས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། གླིང་བཞི་པའི་འཇིག་རྟེན་གྱི་ཁམས་འདི་སྐྱིལ་མོ་ཀྲུང་གཅིག་གིས་ཁྱབ་པར་བགྱིའོ། །དེ་བཞིན་དུ་སྦྱར་ཏེ། དེ་ལྟར་སྟོང་དང ། སྟོང་གཉིས་པ་ཁྱབ་པར་བགྱིའོ། །བཅོམ་ལྡན་འདས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྐྱིལ་མོ་ཀྲུང་གཅིག་གིས་ཁྱབ་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། མོའུ་དགལ་གྱི་བུ་ཁྱོད་ཀྱིས་དེའི་དུས་ན་བབ་པར་ཤེས་ན་གྱིས་ཤིག། དེ་ནས་གནས་བརྟན་མོའུ་དགལ་གྱི་བུ་ཆེན་པོས་རྫུ་འཕྲུལ་གྱི་ཆོ་འཕྲུལ་དེ་བསྡུས་ཏེ། བཅོམ་ལྡན་འདས་ཀྱི་སྤྱན་སྔར་འདུག་གོ་།དེ་ནས་བྱང་ཆུབ་སེམས་དཔའ་དེ་དག་ངོ་མཚར་དུ་གྱུར་ཏེ། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། གནས་བརྟན་མོའུ་དགལ་གྱི་བུ་ཆེན་པོ་འདི་ཅི་ཞིག་གི་སླད་དུ་འཇིག་རྟེན་གྱི་ཁམས་འདིར་མཆིས ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག། བཅོམ་ལྡན་འདས་ཤཱཀྱ་ཐུབ་པ་དེའི་དབྱངས་ཀྱི་དཀྱིལ་འཁོར་ཤེས་པར་འདོད་པས་འཇིག་རྟེན་གྱི་ཁམས་འདིར་འོངས་སོ། །དེ་ནས་བཅོམ་ལྡན་འདས་དེས་གནས་བརྟན་མོའུ་དགལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མོའུ་དགལ་གྱི་བུ་ཁྱོད་དེ་བཞིན་གཤེགས་པའི་གསུང་དབྱངས་ཚད་
209a
༄#། །མེད་པའི་གསུང་གི་དཀྱིལ་འཁོར་ཤེས་བར་འདོད་པས་འཇིག་རྟེན་གྱི་ཁམས་འདིར་ཕྱིན་གྱི་ཁྱོད་ཀྱིས་ལན་གཉིས་སུ་དེ་ལྟ་བུའི་སེམས་མ་བསྐྱེད་ཅིག། གལ་ཏེ་མོའུ་དགལ་གྱི་བུ་ཁྱོད་ཤུགས་འདི་ཉིད་དང ། རྫུ་འཕྲུལ་གྱི་སྟོབས་འདི་ཉིད་ཀྱིས་ནུབ་ཕྱོགས་ལོགས་སུ་གངྒཱའི་ཀླུང་གི་བྱེ་མ་སྙེད་ཀྱི་བསྐལ་པར་སོང་ཡང་ཁྱོད་ཀྱིས་འདི་ལྟར་བཅོམ་ལྡན་འདས་ཤཱཀྱ་ཐུབ་པ་དེའི་གསུང་གི་དཀྱིལ་འཁོར་གྱི་མཐའ་རྟོགས་པར་མི་ནུས་ཏེ། སངས་རྒྱས་བཅོམ་ལྡན་འདས་རྣམས་ནི་དེ་ལྟར་གསུང་དབྱངས་ཚད་མེད་པ་དང་ལྡན་ནོ། །དེ་ནས་གནས་བརྟན་མོའུ་དགལ་གྱི་བུ་ཆེན་པོས་བཅོམ་ལྡན་འདས་དེའི་ཞབས་གཉིས་ལ་ཕྱག་འཚལ་ཏེ་ཉེས་པ་བཤགས་པ། བཅོམ་ལྡན་འདས་དེ་བཞིན་གཤེགས་པའི་གསུང་དབྱངས་ཚད་མ་མཆིས་པའི་གསུང་གི་དཀྱིལ་འཁོར་རྟོག་པར་འཚལ་བས། བདག་ནི་ནོངས་པ་ཅན་དེ་ནོངས་པ་འཆགས་སོ། །བཅོམ་ལྡན་འདས། བདག་ཇི་སྲིད་ཅིག་ནས་མཆིས། བཅོམ་ལྡན་འདས་དེས་བཀའ་སྩལ་པ། འཇིག་རྟེན་གྱི་ཁམས་གངྒཱའི་ཀླུང་དགུ་ཅུ་རྩ་དགུའི་བྱེ་མ་སྙེད་འདས་པ་ནས་ཁྱོད་འཇིག་རྟེན་གྱི་ཁམས་འདིར་འོངས་སོ། །མོའུ་དགལ་གྱི་བུས་གསོལ་པ། བཅོམ་ལྡན་འདས། བདག་ནི་རིང་མོ་ཞིག་ནས་མཆིས་པས། ལུས་དུབ་སྟེ། འཇིག་རྟེན་གྱི་ཁམས་མི་མཇེད་དེར་མཆི་བའི་རྡོ་མི་ཐོག་གོ། བཅོམ་ལྡན་འདས་དེས་བཀའ་སྩལ་པ། མོའུ་དགལ་གྱི་བུ་འདི་ཇི་སྙམ་
209b
དུ་སེམས། ཁྱོད་རང་གི་རྫུ་འཕྲུལ་གྱི་སྟོབས་ཀྱིས་འཇིག་རྟེན་གྱི་ཁམས་འདིར་ཕྱིན་སྙམ་དུ་སེམས་ན་ཁྱོད་ཀྱིས་དེ་ལྟར་མི་ལྟའོ། །དེ་ཅིའི་སླད་དུ་ཞེ་ན། ཁྱོད་ནི་བཅོམ་ལྡན་འདས་ཤཱཀྱ་ཐུབ་པ་དེ་ཉིད་ཀྱི་བྱིན་གྱི་རླབས་ཀྱིས། འཇིག་རྟེན་གྱི་ཁམས་འདིར་ཕྱིན་གྱི། ཁྱོད་བཅོམ་ལྡན་འདས་དེ་ཉིད་ལ་ཕྱག་འཚོལ་ཅིག་དང ། དེ་ཉིད་ཀྱིས་ཁྱོད་སླར་ཁྲིད་པར་འགྱུར་རོ། །མོའུ་དགལ་གྱི་བུ། གལ་ཏེ་ཁྱོད་རང་གི་རྫུ་འཕྲུལ་གྱི་སྟོབས་ཀྱིས་འཇིག་རྟེན་གྱི་ཁམས་དེར་འགྲོ་ན་ནི་བསྐལ་པ་སྲིད་ཀྱིས་ཀྱང་ཕྱིན་པར་མི་ནུས་ཏེ། འཇིག་རྟེན་གྱི་ཁམས་དེར་མ་ཕྱིན་པར་བར་དུ་ཡོངས་སུ་མྱ་ངན་འདའ་བར་འགྱུར་རོ། །མོའུ་དགལ་གྱི་བུ། འདི་ཇི་སྙམ་དུ་སེམས། ཤར་རམ། ལྷོའམ། ནུབ་བམ། བྱང་ངམ། ཕྱོགས་གང་ཞིག་ཏུ་ཕྱིན། གསོལ་པ། བཅོམ་ལྡན་འདས། བདག་ཕྱོགས་སླད་དེ། གང་ནས་འདིར་མཆིས་པ་མ་འཚལ་ཏོ། །བཅོམ་ལྡན་འདས་དེས་བཀའ་སྩལ་པ། མོའུ་དགལ་གྱི་བུ་ཁྱོད་ཀྱིས་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། གལ་ཏེ་ཁྱོད་རང་གི་རྫུ་འཕྲུལ་གྱི་སྟོབས་ཀྱིས་འཇིག་རྟེན་གྱི་ཁམས་དེར་འགྲོ་ན་ནི། བསྐལ་པས་ཀྱང་ཕྱིན་པར་མི་ནུས་སོ། །གསོལ་པ། བཅོམ་ལྡན་འདས། ཕྱོགས་གང་ན་བཅོམ་ལྡན་འདས་ཤཱཀྱ་ཐུབ་པ་དེ་བཞུགས། བཀའ་སྩལ་པ། མོའུ་དགལ་གྱི་བུ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ནི་ཤར་ཕྱོགས་ལོགས་ན་བཞུགས་སོ། །དེ་ནས་གནས་བརྟན་མོའུ་དགལ་གྱི་བུ་ཆེན་པོས་དེའི་ཚེ་ཡན་ལག་ལྔ་ས་ལ་
210a
༄#། །གཏུགས་ཏེ། ཤར་ཕྱོགས་ལོགས་སུ་ཕྱག་འཚལ་ནས། དེའི་ཚེ་ཚིགས་སུ་བཅད་པ་འདི་སྨྲས་སོ། །མཐུ་ཆེན་མངའ་བ་ལྷ་དང་མིས་མཆོད་པ། །ཡེ་ཤེས་མཐའ་ཡས་མཐའ་ཡས་གསུང་ལྡན་པ། །རྐང་གཉིས་རྣམས་ཀྱི་དམ་པ་དགོངས་སུ་གསོལ། །སླར་ཡང་ཞིང་འདིར་རབ་ཏུ་མཆི་བར་བགྱི། །ཞི་བའི་བློ་གྲོས། དེ་ལྟར་སངས་རྒྱས་ཀྱི་མཐུས། བཅོམ་ལྡན་འདས་ཀྱི་ཐམས་ཅད་དང་ལྡན་པའི་འཁོར་བྱ་རྒོད་ཀྱི་ཕུང་པོའི་རི་ལ་གནས་པ་དེས་གནས་བརྟན་མོའུ་དགལ་གྱིས་བུས་གསོལ་བ་བཏབ་བའི་སྒྲ་དེ་ཐོས་སོ། །ཐོས་ནས་ཀྱང་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་གསོལ་བ་འདེབས་པ་འདི་སུ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། འདི་ནི་མོའུ་དགལ་གྱི་བུ་སྟེ། སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་གངྒཱའི་ཀླུང་དགུ་ཅུ་རྩ་དགུའི་བྱེ་མ་སྙེད་འདས་པར་སོང་སྟེ། འཇིག་རྟེན་གྱི་ཁམས་འོད་ཟེར་གྱི་རྒྱལ་མཚན་ཞེས་བྱ་བར་བཅོམ་ལྡན་འདས་འོད་ཟེར་གྱི་རྒྱལ་པོའི་སངས་རྒྱས་ཀྱི་ཞིང་ན་གནས་ཏེ། དེ་འཇིག་རྟེན་གྱི་ཁམས་འདིར་འོང་བར་འདོད་པས། གསོལ་བ་འདེབས་པའི་སྒྲ་དེ་ལྟ་བུ་ཕྱུང་ངོ ། །ཀུན་དགའ་བོས་གསོལ་པ། བཅོམ་ལྡན་འདས། མོའུ་དགལ་གྱི་བུ་ཆེན་པོ་ཅིའི་སླད་དུ་འཇིག་རྟེན་གྱི་ཁམས་དེར་མཆིས། བཀའ་སྩལ་པ། ཀུན་དགའ་བོ། མོའུ་དགལ་
210b
གྱི་བུ་འདིར་སླར་འོངས་པ་དང ། འདི་ཉིད་དུ་ཐོས་པར་འགྱུར་རོ། །དེ་ནས་ཐམས་ཅད་དང་ལྡན་པའི་འཁོར་དེས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་གྱི་ཁམས་འོད་ཟེར་གྱི་རྒྱལ་མཚན་དེ་དང ། དེ་བཞིན་གཤེགས་པ་འོད་ཟེར་གྱི་རྒྱལ་པོ་དེ་དང ། བྱང་ཆུབ་སེམས་དཔའ་དེ་དག་དང ། གནས་བརྟན་མོའུ་དགལ་གྱི་བུ་ཆེན་པོ་བལྟ་བར་འཚལ་ལོ། །དེ་ནས་བཅོམ་ལྡན་འདས་ཀྱིས་འཁོར་དེས་གསོལ་བ་བཏབ་པར་མཁྱེན་ནས། མཛོད་སྤུ་ནས་ཐམས་ཅད་ཀྱི་རྗེས་སུ་སོང་བ་ཞེས་བྱ་བའི་འོད་ཟེར་བྱུང་སྟེ། འོད་ཟེར་དེས་སངས་རྒྱས་ཀྱི་ཞིང་གངྒཱའི་ཀླུང་དགུ་བཅུ་རྩ་དགུའི་བྱེ་མ་སྙེད་པོ་དེ་དག་ལས་ཐལ་ཏེ་འཇིག་རྟེན་གྱི་ཁམས་འོད་ཟེར་གྱི་རྒྱལ་མཚན་དེ་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་ཐམས་ཅད་དང་ལྡན་པའི་འཁོར་དེས་འཇིག་རྟེན་གྱི་ཁམས་འོད་ཟེར་གྱི་རྒྱལ་མཚན་དེ་དང ། དེ་བཞིན་གཤེགས་པ་འོད་ཟེར་གྱི་རྒྱལ་པོ་དེ་དང ། བྱང་ཆུབ་སེམས་དཔའ་དེ་དག་དང ། གནས་བརྟན་མོའུ་དགལ་གྱི་བུ་ཆེན་པོ་ཡན་ལག་ལྔ་ས་ལ་གཏུགས་ཏེ། བཅོམ་ལྡན་འདས་ལ་གསོལ་བ་འདེབས་པ་མཐོང་ངོ ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མོའུ་དགལ་གྱི་བུ་ཆེན་པོ་ལ་བཀའ་སྩལ་པ། མོའུ་དགའ་གྱི་བུ། འོད་ཀྱི་དཀྱིལ་འཁོར་འདིའི་རྗེས་སུ་འབྲངས་ཏེ་ཤོག་ཅིག། དེ་ནས་གནས་བརྟན་མོའུ་དགལ་གྱི་བུ་ཆེན་པོས། བཅོམ་ལྡན་འདས་ཀྱི་འོད་ཀྱི་དཀྱིལ་འཁོར་ལ་བརྟེན་ཏེ་
211a
༄#། །སེམས་ཀྱིས་རྣམ་པར་རྟོག་པ་ཙམ་གྱིས་འཇིག་རྟེན་གྱི་ཁམས་མི་མཇེད་འདིར་བཅོམ་ལྡན་འདས་ཤཱཀྱ་ཐུབ་པའི་སྤྱན་སྔར་ཕྱིན་ནས། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་བདུན་བསྐོར་བ་བྱས་ནས་སྤྱན་སྔར་ཡན་ལག་ལྔ་ས་ལ་གཏུགས་ཏེ། ཕྱག་འཚལ་ནས་ཉེས་པ་བཤགས་པ། བཅོམ་ལྡན་འདས། བདག་དེ་བཞིན་གཤེགས་པའི་གསུང་དབྱངས་ཚད་མ་མཆིས་པའི་གསུང་དབྱངས་ཀྱི་དཀྱིལ་འཁོར་རྟོགས་པར་འཚལ་ན། དེ་སྲིད་དུ་རིང་དུ་མཆིས་པས་བདག་ནོངས་པ་ཅན་ཏེ་ནོངས་པ་འཆགས་སོ། །བཅོམ་ལྡན་འདས། དེ་སྲིད་དུ་རིང་དུ་མཆིས་ཀྱང་དེ་བཞིན་གཤེགས་པའི་གསུང་ནི་འདི་ན་ཇི་ཙམ་པ་དེ་ཙམ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། མོའུ་དགལ་གྱི་བུ་ཆེན་པོ། ཇི་སྐད་སྨྲས་པ་དེ་བཞིན་ནོ། །དེ་བཞིན་གཤེགས་པའི་གསུང་ལ་ནི་ཚད་གང་ཡང་མེད་དེ། མོའུ་དགལ་གྱི་བུ་གང་དེ་བཞིན་གཤེགས་པའི་གསུང་གི་ཚད་དམ ། མཐའི་ཡོངས་སུ་ཚོལ་བར་སེམས་པ་དེ་ནི་ནམ་མཁའི་ཚད་དམ། མཐའ་ཡོངས་སུ་ཚོལ་བར་སེམས་པ་ཡིན་ནོ། །དེ་ཅིའི་ཕྱིར་ཞེ་ན། ནམ་མཁའ་ཇི་ཙམ་དུ་ཁྱབ་པ་དེ་ཙམ་དུ་དེ་བཞིན་གཤེགས་པའི་གསུང་གིས་ཁྱབ་བོ། །གནས་བརྟན་མོའུ་དགལ་གྱི་བུ་ཆེན་པོ་འགྲོ་བ་དང ། འོང་བའི་ལེའུ་འདི་བཤད་པ་ན། སྲོག་ཆགས་ཁྲིས་བླ་ན་མེད་པ་ཡང་དག་
211b
པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཞི་བའི་བློ་གྲོས། འདི་ཡང་དེ་བཞིན་གཤེགས་པའི་གསུང་གི་གསང་བའོ། །ཞི་བའི་བློ་གྲོས། འདི་ཇི་སྙམ་དུ་སེམས། སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་འཇུག་པ་གང་དག་ཡིན་པ་དེ་དག་ཅི་མང་བ་ཡིན་ནམ། ཞི་བའི་བློ་གྲོས་ཀྱིས་སྨྲས་པ། གསང་བ་པའི་བདག་པོ། སེམས་ཅན་གཅིག་གི་སེམས་དང་སེམས་ལས་བྱུང་བའི་འཇུག་པ་གང་ཡིན་པ་དེ་དག་ཀྱང་སྟོང་གསུམ་གྱི་སྟོང་ཆེན་པོར་གཏོགས་པའི་སེམས་ཅན་ཐམས་ཅད་རང་སངས་རྒྱས་སུ་འགྱུར་བ་རྣམས་ཀྱིས་བསྐལ་པར་ཡང་བསམ་པའམ། གཞལ་བའམ། བརྩི་བའམ། བརྟག་པར་མི་ནུས་ན། སེམས་ཅན་ཐམས་ཅད་ཀྱི་ལྟ་སྨོས་ཀྱང་ཅི་དགོས། ལག་ན་རྡོ་རྗེས་སྨྲས་པ། ཞི་བའི་བློ་གྲོས། ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་འཇུག་པ་ཇི་སྙེད་པ་འདི་ལྟ་སྟེ། སེམས་ཅན་ཐམས་ཅད་ཚིམ་པར་བྱ་བའི་ཕྱིར་དེ་བཞིན་གཤེགས་པའི་ཆོས་སྟོན་པའི་གསུང་གི་ཡན་ལག་གི་རྣམ་པ་ཡང་དེ་སྙེད་དུ་འབྱུང་སྟེ། དེ་ལ་ཡང་དེ་བཞིན་གཤེགས་པ་ནི་རྣམ་པར་མི་རྟོག་ཅིང་བཏང་སྙོམས་པའོ། །དེ་ལ་འདི་སྐད་ཅེས་བྱ་སྟེ། སྟོང་གསུམ་སེམས་ཅན་གང་ཡིན་པ། །དེ་དག་རང་རྒྱལ་འདྲེན་གྱུར་པས། །བསྐལ་པར་སེམས་ཅན་གཅིག་ཅིག་གི་།སེམས་ཀྱི་ཁམས་ཀྱང་མི་ཤེས་སོ། །སེམས་ཅན་གཅིག་ཡིད་ཇི་སྙེད་པ། །སངས་
212a
༄#། །རྒྱས་ཀྱིས་ནི་རབ་མཁྱེན་ཀྱང ། །ང་ཡིས་ཡིད་འདི་ཤེས་སོ་ཞེས། །དེ་ནི་རྟོག་པར་མི་འགྱུར་རོ། །དུས་གསུམ་སེམས་ཅན་ཐམས་ཅད་ཀྱི། །སེམས་པ་དག་ནི་ཇི་སྙེད་པ། །འཇིག་རྟེན་མགོན་པོ་ཆོས་སྟོན་ཚེ། །དབྱངས་ཀྱི་ཡན་ལག་དེ་སྙེད་དོ། །ཆོས་ཀྱི་བདག་པོ་གསུང་བ་ན། །དབྱངས་ཀྱི་ཡན་ལག་ཇི་སྙེད་པ། །ཆོས་ཀྱི་མིང་གིས་བཤད་པ་ཡི། །ཆོས་སྟོན་པ་ཡང་དེ་ཙམ་མོ། །སེམས་ཅན་ཀུན་གྱི་གཟུགས་དང་ནི། །མིང་དང་སེམས་པ་ཇི་སྙེད་པ། །སེམས་ཅན་གཅིག་པོའི་སྤུ་གཅིག་ནས། །འོད་ཟེར་འབྱུང་བ་དེ་སྙེད་དོ། །འཇིག་རྟེན་མགོན་པོའི་སྤུ་ཀུན་གྱི། །འོད་ཟེར་དག་ནི་ཇི་སྙེད་པ། །མི་ཡི་དབང་པོ་ཆོས་སྟོན་ཚེ། །གསུང་གི་ཡན་ལག་དེ་བས་མང ། །དཔེ་བཀོད་ནས་ནི་སངས་རྒྱས་ཀྱི། །བསྐལ་པ་རབ་ཏུ་བསྟན་མཛད་ཀྱང ། །སངས་རྒྱས་ཀྱིས་ནི་གསུང་དབྱངས་ཀྱི། །མཐའ་མ་རྙེད་པར་མི་འགྱུར་རོ། །ཉོན་མོངས་གཟུགས་ཅན་མ་ཡིན་རྣམས། །གཟུགས་ཅན་མིན་པའི་ཚིག་གིས་བརྗོད། །གཟུགས་ཅན་མིན་པའི་ཚིག་གིས་ནི། །ཉོན་མོངས་གཟུགས་མེད་ཞི་བར་བྱེད། །ཇི་ལྟར་ཚིག་ནི་གཟུགས་མེད་པ། །ཐམས་ཅད་དུ་ནི་མི་དམིགས་ཏེ། །དེ་ལྟར་ཉོན་མོངས་གཟུགས་མེད་པ། །ཤིན་ཏུ་དམིགས་པར་མི་འགྱུར་རོ། །ཇི་ལྟར་ཚིག་ནི་ཡོད་མིན་ཏེ། །ནང་དང་ཕྱི་རོལ་མི་གནས་པ། །དེ་ལྟར་ཉོན་མོངས་རྣམས་མེད་ཅིང ། །ནང་དང་ཕྱི་རོལ་མི་གནས་སོ། །ཇི་ལྟར་ཕྱོགས་བཅུར་སངས་རྒྱས་གསུང ། །གང་
212b
ཡང་རྙེད་པར་མི་འགྱུར་བ། །དེ་ལྟར་ཉོན་མོངས་མི་དམིགས་ཤིང ། །དེ་ནི་ཚིག་གིས་བརྗོད་པ་ཡིན། །སེམས་ཅན་དག་ནི་ཀུན་གྱི་ཚིག། །རབ་འབྲིང་ཐ་མ་གང་ཡིན་པ། །དེ་དག་ལུས་དང་སེམས་མི་གནས། །གནས་པ་མེད་པའང་མ་ཡིན་ནོ། །ཇི་ལྟར་སིལ་སྙན་འཕྲུལ་འཁོར་བྱས། །རླུང་གིས་བསྐྱོད་ནས་སྒྲ་འབྱུང་བ། །སྒྲ་འབྱིན་བྱེད་པ་གང་ཡང་མེད། །འོན་ཀྱང་སྒྲ་རྣམས་དེ་དག་འབྱུང ། །དེ་ལྟར་སྔོན་ཆད་རྣམ་དག་ཕྱིར། །སེམས་ཅན་ཀུན་གྱི་བསམ་པས་བསྐྱོད། །སངས་རྒྱས་ཀྱི་ནི་གསུང་འབྱུང་ཡང ། །འདི་ལ་དེ་ནི་རྟོག་མི་མངའ། །ཇི་ལྟར་བྲག་ཅ་རྣམས་ཀྱི་སྒྲ། །ནང་དང་ཕྱི་རོལ་མི་གནས་པ། །དེ་ལྟར་མི་ཡི་དབང་པོའི་གསུང ། །ནང་དང་ཕྱི་རོལ་མི་གནས་སོ། །ཇི་ལྟར་རིན་ཆེན་མི་རྟོག་པར། །སྣང་བས་སེམས་ཅན་ཚིམ་པར་བྱེད། །དེ་ལྟར་རྒྱལ་བའི་མི་རྟོག་གསུང ། །སྒྲ་ཀུན་རབ་ཏུ་རྫོགས་པར་བྱེད། །ཞི་བའི་བློ་གྲོས། གཞན་ཡང་དེ་བཞིན་གཤེགས་པའི་གསུང་གི་གསང་བ་ནི་སེམས་ཅན་ཐམས་ཅད་ཀྱི་སྐད་ཀྱི་འཇུག་པ་ཇི་ལྟར་བ་བཞིན་ཆོས་སྟོན་པར་ཁོང་དུ་ཆུད་པར་བྱའོ། །ཞི་བའི་བློ་གྲོས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སྐྱེ་བའི་གནས་ཐ་དད་པ་དག་ཡོད་པ་རྣམས་སུ་དེ་བཞིན་གཤེགས་པས་སེམས་ཅན་རྣམས་ཀྱི་སྐད་ཀྱི་འཇུག་པ་ཇི་ལྟ་བ་བཞིན་དུ། བདེན་པ་རྣམས་ཀྱི་མིང་ཐ་དད་པ་དག་གིས་རྣམ་པར་བཞག་གོ། ཞི་བའི་བློ་གྲོས། འདིར་སྡུག་བསྔལ་པ་དང ། སྡུག་བསྔལ་ཀུན་འབྱུང་བ་དང ། སྡུག་
213a
༄#། །བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་ས་བླ་བའི་ལྷ་རྣམས་ཀྱི་འདི་སྐད་ཅེས་བྱ་སྟེ། ཟ་བ་དང ། ཟ་བའི་རྩ་བ་དང།་ཟ་བ་སེལ་བ་དང ། ཟ་བ་འགོག་བྱེད་ཅེས་བྱའོ། །འདིར་སྡུག་བསྔལ་བ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་བར་སྣང་གི་ལྷ་རྣམས་ཀྱིས་འདི་སྐད་ཅེས་བྱ་སྟེ། འཇུག་པ་དང ། ཀུན་དུ་འཇུག་བྱེད་དང ། ཀུན་དུ་འཇུག་བྲལ་དང ། ཀུན་དུ་འཇུག་སྒྲོལ་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་འདི་སྐད་ཅེས་བྱ་སྟེ། འབྱུང་བ་དང ། འགོག་པ་དང ། བསྲེགས་པ་དང ། འཇིག་བྱེད་ཅེས་བྱའོ། །འདིར་སྡུག་བསྔལ་བ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་སུམ་ཅུ་རྩ་གསུམ་གྱི་ལྷ་རྣམས་ཀྱི་འདི་སྐད་ཅེས་བྱ་སྟེ། འཁོར་བ་དང ། ཀུན་བསྙེན་དང ། ཟད་པ་དང ། ཟད་པ་ལྡོག་བྱེད་ཅེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་
213b
འཐབ་བྲལ་གྱི་ལྷ་རྣམས་ཀྱི་འདི་སྐད་ཅེས་བྱ་སྟེ། གནོད་པ་དང ། གནོད་བསྙེན་དང ། གནོད་པ་ཟད་དང ། གནོད་པ་ཟད་པར་སྒོམ་པ་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་དགའ་ལྡན་གྱི་ལྷ་རྣམས་ཀྱི་འདི་སྐད་ཅེས་བྱ་སྟེ། ཤིན་ཏུ་མི་སྲུན་དང ། མི་སྲུན་རྩ་བ་དང ། ལྡོག་པ་དང ། ཡང་དག་པར་ལྡོག་བྱེད་ཅེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་འཕྲུལ་དགའི་ལྷ་རྣམས་ཀྱི་འདི་སྐད་ཅེས་བྱ་སྟེ། རྐྱལ་བ་དང ། ཀུན་དུ་རྐྱལ་བྱེད་དང ། རྐྱལ་ཟད་དང ། རྐྱལ་ཟད་སྒོམ་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་འདི་སྐད་ཅེས་བྱ་སྟེ། ཧ་ཧ་ཧོ་དང ། ཧ་ཧ་ཐོབ་བྱེད་དང ། ཧ་ཧ་བྲལ་དང ། ཧ་ཧ་བྲལ་བྱེད་ཅེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་བདུད་ཀྱི་རིས་ཀྱི་ལྷ་རྣམས་ཀྱི་འདི་སྐད་ཅེས་བྱ་སྟེ། མེ་མུར་དང ། མེ་མུར་གནོད་དང ། མེ་མུར་འདོར་འདོད་
214a
༄#། །དང ། མེ་མུར་སྒྲོལ་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་ཚངས་པའི་ལྷ་རྣམས་ཀྱི་འདི་སྐད་ཅེས་བྱ་སྟེ། སྡུག་པ་དང ། སྡུག་བྱེད་དང ། སྡུག་པ་ཉལ་བ་དང ། སྡུག་པར་འཁོར་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་ཚངས་རིས་ཀྱི་ལྷ་རྣམས་ཀྱི་འདི་སྐད་ཅེས་བྱ་སྟེ། འཛག་པ་དང།་ཀུན་དུ་འཛག་བྱེད་དང ། རྒྱུན་གཅོད་དང ། ཤིན་ཏུ་འབྱུང་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་ཚངས་པའི་མདུན་ན་འདོན་གྱི་ལྷ་རྣམས་ཀྱི་འདི་སྐད་ཅེས་བྱ་སྟེ། རྨ་དང ། རྨའི་མཚམས་སྦྱོར་བ་དང ། རྨ་རུབ་པ་དང ། རྨ་ཉེ་བར་ཞི་བྱེད་ཅེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་ཚངས་ཆེན་གྱི་ལྷ་རྣམས་ཀྱི་འདི་སྐད་ཅེས་བྱ་སྟེ། རྐྱལ་བྱེད་དང ། རྣམ་པར་རྐྱལ་བྱེད་དང ། རྐྱལ་པ་ཐར་བྱེད་དང ། བྱེད་པ་ཐོབ་མེད་ཅེས་བྱའོ། །འདིར་སྡུག་བསྔལ་དང ། སྡུག་བསྔལ་
214b
ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་འོད་ཆུང་གི་ལྷ་རྣམས་ཀྱི་འདི་སྐད་ཅེས་བྱ་སྟེ། ཧ་ཧི་དང ། ཧེ་ཧི་དང ། ཧུ་ཧུ་དང ། ཧ་ན་ནུ་སིན་དྷི་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་དགེ་ཆུང་གི་ལྷ་རྣམས་ཀྱི་འདི་སྐད་ཅེས་བྱ་སྟེ། ཨེ་ཧི་ཏ་དང ། ནི་པ་ཧི་ཏ་དང ། ནི་ག་ཀྵི་ཏ་དང ། ནི་ག་མ་ནི་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་ཚད་མེད་དགེ་བའི་ལྷ་རྣམས་ཀྱི་འདི་སྐད་ཅེས་བྱ་སྟེ། བསྟན་པ་དང ། ཡང་དག་པར་བསྟན་པ་དང ། ཟད་པ་སྟེན་པ་དང ། ཀུན་དུ་སྟེན་པ་ཞེས་བྱའོ།། འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ། དགེ་རྒྱས་ཀྱི་ལྷ་རྣམས་ཀྱི་འདི་སྐད་ཅེས་བྱ་སྟེ། ཡོངས་གཅོད་དང ། ཡོངས་གཅོད་འབྱུང་དང ། ཁྱིམ་མཐའ་དང ། རྟག་ཏུ་རྣམ་དག་ཅེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་མི་ཆེ་བའི་ལྷ་རྣམས་ཀྱི་འདི་སྐད་ཅེས་བྱ་སྟེ། རྗེས་སུ་འགྲོ་བ་དང ། མི་འོང་བ་མ་ཡིན་པ་དང ། རྗེས་ཀྱི་མཚམས་དང ། རྗེས་ཀྱི་མཚམས་
215a
༄#། །འགྲོ་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་མི་གདུང་བའི་ལྷ་རྣམས་ཀྱི་འདི་སྐད་ཅེས་བྱ་སྟེ། དག་པ་དང ། དག་པ་ཅན་དང ། དག་པ་ཡོངས་སུ་དག་དང ། དག་པར་འགྲོ་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་གྱ་ནོམ་སྣང་བའི་ལྷ་རྣམས་ཀྱི་འདི་སྐད་ཅེས་བྱ་སྟེ། མམ་མ་མ་དང ། མམ་མ་མེ་དང ། མ་ན་ནུ་ན་ཡ་དང ། མ་ན་ནུ་ག་མ་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་ཤིན་ཏུ་མཐོང་བའི་ལྷ་རྣམས་ཀྱི་འདི་སྐད་ཅེས་བྱ་སྟེ། གྲོལ་བ་དང ། གྲོལ་བ་ཅན་དང ། གྲོལ་བའི་རྩ་བ་དང ། གྲོལ་བའི་བྱེ་བྲག་ཕྱེད་པར་མཚམས་སྦྱོར་བ་ཞེས་བྱའོ། །འདིར་སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་འབྲས་བུ་ཆེ་བའི་ལྷ་རྣམས་ཀྱི་འདི་སྐད་ཅེས་བྱ་སྟེ། མི་བྱ་བ་དང ། མི་བྱེད་པ་དང ། བྱེད་བྲལ་དང ། བྱེད་པ་མཐར་ཐུག་ཅེས་བྱའོ། །འདིར་
215b
སྡུག་བསྔལ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་ཞེས་བྱ་བ་གང་ཡིན་པ་དེ་གནས་གཙང་མའི་རིས་ཀྱི་འོག་མིན་གྱི་ལྷ་རྣམས་ཀྱི་འདི་སྐད་ཅེས་བྱ་སྟེ། མཐར་ཐུག་དང ། ཤིན་ཏུ་མཐར་ཐུག་དང ། མི་རྟོག་པ་དང ། ཉིང་མཚམས་སྦྱོར་བ་མེད་པ་ཞེས་བྱའོ། །ཞི་བའི་བློ་གྲོས། དེ་ལྟར་ཇི་ལྟར་ལྷ་རྣམས་ཀྱི་བདེན་པ་རྣམ་པར་བཞག་པ་དེ་བཞིན་དུ་ཀླུ་རྣམས་ཀྱི་ཡང་གཞན་ནོ། །གནོད་སྦྱིན་རྣམས་ཀྱི་ཡང་གཞན་ནོ། །དྲི་ཟ་རྣམས་ཀྱི་ཡང་གཞན་ནོ། །ལྷ་མ་ཡིན་རྣམས་ཀྱི་ཡང་གཞན་ནོ། །ནམ་མཁའ་ལྡིང་རྣམས་ཀྱི་ཡང་གཞན་ནོ། །མིའམ་ཅི་རྣམས་ཀྱི་ཡང་གཞན་ནོ། །ལྟོ་འཕྱེ་ཆེན་པོ་རྣམས་ཀྱི་ཡང་གཞན་ནོ། །གནོད་སྦྱིན་ལག་ན་གཞོང་ཐོགས་རྣམས་ཀྱི་ཡང་གཞན་ནོ། །ཕྲེང་ཐོགས་རྣམས་ཀྱི་བདེན་པ་རྣམ་པར་བཞག་པ་ཡང་གཞན་ནོ། །ཞི་བའི་བློ་གྲོས། གང་ཡང་ཡུལ་ཆེན་པོ་བཅུ་དྲུག་ཏུ་བསྡུ་བས་བསྡུས་པའི་ཡུལ་སྟོང་གིས་འཛམ་བུའི་གླིང་འདི་ཡོངས་སུ་གང་སྟེ། གང་ན་མི་རྣམས་ཀྱི་ཚིག་ཀྱང་གཞན། ངེས་པའི་ཚིག་ཀྱང་གཞན། བརྡ་ཡང་ཐ་དད་པ་དེར་ཡང་དེ་བཞིན་གཤེགས་པས་སྐད་ཀྱི་འཇུག་པ་ཇི་ལྟ་བ་བཞིན་དུ་མིང་ཐ་དད་པ་རྣམས་ཀྱི་བདེན་པ་དག་རྣམ་པར་བགོད་དེ། འདི་ལྟ་སྟེ། ཡུལ་ཀ་ཤ་དང ། པ་ཧུ་བ་དང ། ཐོ་གར་ཡུལ་དང ། ཡ་བ་ན་དང ། ཀམ་པོ་ཙ་དང ། ཁ་ཤ་དང ། ཧུ་ན་དང ། རྒྱ་ཡུལ་དང ། ད་ར་ཏ་དང ། ུ་ར་
216a
༄#། །ཤ་དང ། པི་ལིན་དང ། སོ་མ་དང ། བྲམ་ཟེ་དང ། རྒྱལ་རིགས་དང ། རྗེའི་རིགས་དང ། དམངས་རིགས་དང ། དེ་ཙི་བ་དང ། ཀི་ར་ཏ་དང ། བུ་ལིན་ཏ་དང ། པུན་དྲ་དང ། ཀུ་རུ་ན་དང ། ལྔ་ལེན་དང ། ཤར་ཕྱོགས་དང ། ཕུ་རུ་བ་དང ། ལྷོ་ཕྱོགས་དང ། ཀ་ལིང་ཀ་དང ། གཅེར་བུ་དང ། པ་ནས་ག་དང ། པ་ན་ཏ་དང ། སྦ་ལ་ཀ་དང ། ཁྱི་གདོང་དང ། ཝ་གདོང་དང ། ཀྲི་པ་ཤའི་གདོང་དང ། སྤྱི་བོ་བཙུགས་དང ། གནམ་གདོང་པོ་དང ། ཕྱི་ཕྱོགས་གདོང་དང ། བྱང་ཕྱོགས་གདོང་དང ། རྗེས་སུ་རྒྱུག་དང ། རྒྱ་མཚོའི་ཁོལ་བ་དང ། ཡུལ་མཐས་གཏུགས་པ་དང ། ང་ཀུ་ར་དང ། མང་ཀུར་དང ། སྣ་མེད་དང ། གློ་བཀྲ་དང ། ཕྱོགས་ཀྱི་གཅེར་བུ་དང ། གཤོག་ཐོགས་གཅེར་བུ་དང ། དགུས་ཏེ་འགྲོ་དང ། རྫོགས་བྱེད་རྣམ་པ་དང ། འཇིག་རྟེན་གྱི་བར་ན་གནས་པའི་ཡུལ་ལ་སོགས་པའི་ཡུལ་སྟོང་གིས་འཛམ་བུའི་གླིང་ཡོངས་སུ་གང་སྟེ། ཞི་བའི་བློ་གྲོས། གང་ན་མི་རྣམས་ཀྱི་ཚིག་དང ། ངེས་པའི་ཚིག་དང ། བརྡ་ཐ་དད་པ་དེར་ཡང་དེ་བཞིན་གཤེགས་པས་སྐད་ཀྱི་འཇུག་པ་ཇི་ལྟ་བ་བཞིན་དུ་མིང་དུ་ཐ་དད་པ་རྣམས་ཀྱིས་བདེན་པ་དག་བསྟན་ཀྱང ། དེ་བཞིན་གཤེགས་པའི་གསུང་སེམས་ཀྱི་རྗེས་སུ་འབྲང་བ་མ་ཡིན་ཞིང ། རྣམ་པར་ཤེས་པའི་རྗེས་སུ་འབྲང་བ་མ་ཡིན་པར་འབྱུང་ངོ ། །ཞི་བའི་བློ་གྲོས། སྟོང་གི་འཇིག་རྟེན་གྱི་ཁམས་འདི་ན་བདེན་པ་མིང་ཐ་དད་པས་བསྟན་
216b
པ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་བཞི་ཡོད་དེ། བདེན་པ་བསྟན་པ་དེ་དག་ཐམས་ཅད་ཀྱང་འདི་ལྟ་སྟེ། དོན་དམ་པའི་བདེན་པ་དང ། སྐྱེ་བ་མེད་པའི་བདེན་པ་དང ། ཇི་ལྟ་བ་བཞིན་གྱི་བདེན་པ་དང ། མི་འཁྲུགས་པའི་བདེན་པར་དོན་གཅིག་ཏུ་ཡང་དག་པར་འདུས་ཏེ། ཞི་བའི་བློ་གྲོས། འདི་ཡང་དེ་བཞིན་གཤེགས་པའི་གསུང་གི་གསང་བའོ།། །།བམ་པོ་ལྔ་པ། ཞི་བའི་བློ་གྲོས། གཞན་ཡང་དེ་བཞིན་གཤེགས་པའི་གསུང་ནི་སེམས་ཅན་ཐམས་ཅད་ཀྱི་དོགས་པ་གཅོད་པ། སེམས་ཅན་ཐམས་ཅད་ཀྱི་སོམ་ཉི་སེལ་བའོ། །ཞི་བའི་བློ་གྲོས། ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་པ་དག་ན་སེམས་ཅན་དུ་བསྡུ་བར་བསྡུས་པའི་སེམས་ཅན་ཇི་སྙེད་ཡོད་པ་སངས་རྒྱས་ཀྱི་ཡེ་ཤེས་ཀྱིས་མཁྱེན་པའི་སེམས་ཅན་གྱི་ཁམས་ནི་ཆེས་མང་གི། སའི་ཁམས་ནི་དེ་ལྟ་མ་ཡིན་ནོ་ཞེས་བྱ་སྟེ། ཞི་བའི་བློ་གྲོས། ཡོངས་སུ་བརྟག་པ་ཉེ་བར་བཟུང་ནས་སེམས་ཅན་དེ་དག་ཐམས་ཅད་སྔ་ཕྱི་མེད་པར་མིའི་ལུས་ཐོབ་པར་གྱུར་ལ། ཞི་བའི་བློ་གྲོས། སེམས་ཅན་ཐམས་ཅད་འདི་ལྟ་སྟེ། གནས་བརྟན་ཤཱ་རདྭ་ཏིའི་བུའི་ཤེས་རབ་དང་ཡེ་ཤེས་དེ་ལྟ་བུ་དང་ལྡན་པར་གྱུར་ལ། ཤཱ་རིའི་བུ་ལྟ་བུ་སེམས་ཅན་དེ་དག་ཐམས་ཅད་ཀྱི་ཤེས་རབ་དང་ཡེ་ཤེས་གང་ཡིན་པའི་ཤེས་རབ་དང་ཡེ་ཤེས་དེ་སེམས་ཅན་གཅིག་དང་ལྡན་པར་གྱུར་ཅིང ། རྣམ་གྲངས་འདིས་སེམས་ཅན་ཐམས་ཅད་ཤེས་རབ་དང་ཡེ་ཤེས་དེ་ལྟ་བུ་
217a
༄#། །དང་ལྡན་པར་གྱུར་ལ། ཞི་བའི་བློ་གྲོས། སེམས་ཅན་དེ་དག་ཐམས་ཅད་ཀྱིས་བསྐལ་བའམ། བསྐལ་པ་ལས་ལྷག་པར་ཐེ་ཚོམ་གྱི་དྲི་བ་བསམས་ཤིང་གཞལ་ཏེ།་ཡོངས་སུ་བསལ་ན་སེམས་ཅན་གཅིག་གི་ཐེ་ཚོམ་གྱི་དྲི་བ་གང་ཡིན་པ་དེ་གཉིས་པའི་མ་ཡིན་ཞིང ། ཞི་བའི་བློ་གྲོས། རྣམ་གྲངས་འདིས་སེམས་ཅན་ཐམས་ཅད་ཀྱི་ཐེ་ཚོམ་ཀྱི་དྲི་པ་ཐ་དད་པ་བསམས་ཏེ། བཅོམ་ལྡན་འདས་ཀྱི་གན་དུ་དོང་ནས་སེ་གོལ་གཏོགས་པ་སྲིད་ལ་ཐེ་ཚོམ་གྱི་དྲི་བ་དེ་དག་གསོལ་ཀྱང ། དེ་སེམས་ཅན་གཅིག་གི་རྗེས་སུ་ཞུགས་པའི་དྲན་པས་ཐམས་ཅད་བཟུང་ནས་གསུང་བརྗོད་པ་གཅིག་གིས་དེ་དག་གི་ཐེ་ཚོམ་གྱི་དྲི་བ་ཐམས་ཅད་གཅོད་དེ། དེ་དག་ཐམས་ཅད་ཀྱང་རང་རང་གི་ཐེ་ཚོམ་གྱི་དྲི་བ་ཆད་པར་ཤེས་ཤིང ། བཅོམ་ལྡན་འདས་ཀྱིས་ཞུས་པ་ལུང་བསྟན་པས་ཐམས་ཅད་ཀྱང་སེམས་རངས་པར་གྱུར་ཏེ། ཞི་བའི་བློ་གྲོས། དེ་ལྟར་ན་དེ་བཞིན་གཤེགས་པའི་གསུང་ནི་སེམས་ཅན་ཐམས་ཅད་ཀྱི་དོགས་པ་གཅོད་ཅིང་སེམས་ཅན་ཐམས་ཅད་ཀྱི་སོམ་ཉི་སེལ་ཀྱང ། དེ་བཞིན་གཤེགས་པ་ནི་དེ་ལ་ཐུགས་ཀྱིས་མཛད་པའམ། གསུང་དུ་བརྗོད་པ་ཡང་མི་མངའ་ལ། མཛད་པ་དེ་ཡང་མཛད་དེ། ཞི་བའི་བློ་གྲོས། འདི་ཡང་དེ་བཞིན་གཤེགས་པའི་གསུང་གི་གསང་བའོ། །འདི་ནི་གསུང་རྨད་དུ་བྱུང་བའོ། །འདི་ནི་གསུང་ཡོངས་སུ་དག་པའོ། །དེ་བཞིན་
217b
གཤེགས་པའི་གསུང་ངོ་མཚར་ཅན་དང ། གསུང་གི་གསང་བ་འདི་གསང་བ་པའི་བདག་པོ་ལག་ན་རྡོ་རྗེས་བཤད་པའི་སྲོག་ཆགས་སུམ་ཁྲི་ཉིས་སྟོང་གི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བསྐལ་པ་བཟང་པོའི་བྱང་ཆུབ་སེམས་དཔའ་སངས་རྒྱས་ཀྱི་ཞིང་གང་དང་གང་ན་སངས་རྒྱས་བཅོམ་ལྡན་འདས་རྣམས་ཀྱི་ཐད་ན་ཚངས་པར་སྤྱད་པ་སྤྱོད་པའི་བྱང་ཆུབ་སེམས་དཔའ་དེ་དག་གིས་གསང་བ་པའི་བདག་པོ་ལག་ན་རྡོ་རྗེ་ལ་མཆོད་པའི་ལས་ཀྱི་ཕྱིར་མེ་ཏོག་རྣམས་ཀྱིས་ཀྱང་གཏོར། རིན་པོ་ཆེའི་གདུགས་རྣམས་ཀྱང་བཏང་ངོ ། །དེ་ནས་མེ་ཏོག་དེ་དག་བཅོམ་ལྡན་འདས་ཀྱི་སྐུ་ལ་ཡང་ཕོག། གསང་བ་པའི་བདག་པོ་ལག་ན་རྡོ་རྗེའི་ལུས་ལ་ཡང་ཕོག་ཅིང ། འཁོར་ཐམས་ཅད་ལ་ཡང་འཐོར་རོ། །རིན་པོ་ཆེའི་གདུགས་དེ་དག་ཀྱང་བར་སྣང་ལ་གནས་ཏེ། བཅོམ་ལྡན་འདས་ཀྱི་དབུའི་གཙུག་གི་སྟེང་ན་འདུག་གོ། རིན་པོ་ཆེའི་གདུགས་དེ་དག་ལས་ཀྱང ། བཅོམ་ལྡན་འདས། བདག་ཅག་ནི་བཅོམ་ལྡན་འདས་ལ་མཆོད་པ་བགྱི་བ་དང ། དེས་དེ་བཞིན་གཤེགས་པའི་ཆོས་ཉིད་རྨད་དུ་བྱུང་བ་འདི་བསྟན་པས་གསང་བ་པའི་བདག་པོ་ལག་ན་རྡོ་རྗེས་རྗེས་སུ་གཟུང་བའི་སླད་དུ་བསྐལ་པ་བཟང་པོའི་བྱང་ཆུབ་སེམས་དཔའ་རྣམས་ཀྱིས་བཏང་བ་ལགས་སོ་ཞེས་སྒྲ་བྱུང་ངོ ། །དེ་ནས་ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ནས། གསང་བ་པའི་བདག་པོ་ལག་ན་རྡོ་རྗེ་ལ་
218a
༄#། །ཕྱག་འཚལ་ཞིང་གུས་པ་ཆེར་བསྐྱེད་དེ། ཚིག་འདི་སྐད་ཅེས་བདག་ཅག་གིས་གསང་བ་བའི་བདག་པོ་ལག་ན་རྡོ་རྗེ་མཐོང་བ་དང ། དེ་བཞིན་གཤེགས་པའི་གསུང་བསམ་གྱིས་མི་ཁྱབ་པ་འདི་ཐོས་པ་ནི་བདག་ཅག་གིས་རྙེད་པ་ལེགས་པར་རྙེད་དོ། །གང་དག་བསྟན་པ་འདི་ཐོས་ནས་མོས་ཤིང་སོམ་ཉི་ཟ་བར་མི་འགྱུར་བའི་སེམས་ཅན་དེ་དག་ནི་དོན་ཡོད་པའི་མི་ཉིད་རྙེད་པར་འགྱུར་རོ། །དེ་དག་ནི་དེ་བཞིན་གཤེགས་པས་འདུལ་བར་འགྱུར་ཞིང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ་ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་འཁོར་ཐམས་ཅད་ལ་ལེགས་སོ་ཞེས་བྱ་བ་བྱིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་བཀའ་སྩལ་པ། ཞི་བའི་བློ་གྲོས། དེ་བཞིན་གཤེགས་པའི་ཡང་དག་པར་དེ་བཞིན་གཤེགས་པའི་ཆོས་འཇིག་རྟེན་ཐམས་ཅད་དང་མི་མཐུན་པ་དེ་བཞིན་གཤེགས་པའི་གནས་པ་གང་ཡིན་པ་དེ་དག་ནི། གསང་བ་བའི་བདག་པོ་ལག་ན་རྡོ་རྗེས་ཆོས་ཀྱི་རྣམ་གྲངས་འདིའི་ནང་དུ་བསྟན་ཏོ། །བསྙད་དོ། །ཡང་དག་པར་བཤད་དོ། །གང་དག་ཆོས་བསྟན་པ་འདི་ལ་མོས་པའི་སེམས་ཅན་དེ་དག་ནི་རིང་པོ་མི་ཐོགས་པར་ཆོས་ཉིད་འདི་ལྟ་བུ་དང་ལྡན་པར་འགྱུར་རོ། །གང་དག་ཆོས་ཀྱི་རྣམ་གྲངས་འདི་ཐོས་ནས་མོས་པ་དང ། འཆང་བ་དང ། མི་དངང ། མི་
218b
སྐྲག། སྐྲག་པར་མི་འགྱུར་བ་དང ། དོན་རྟོགས་པའི་རྗེས་སུ་རྟོགས་པ་དང ། དེ་བཞིན་ཉིད་དུ་བསྒྲུབ་པ་དེ་ཉིད་དེ་དག་གི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་རོ། །གསང་བ་པའི་བདག་པོ་ལག་ན་རྡོ་རྗེས་བསྟན་པ་འདི་བཤད་པ་ན། ཕྱོགས་བཅུའི་འཇིག་རྟེན་གྱི་ཁམས་གྲངས་མེད། དཔག་ཏུ་མེད་པ་དག་རྣམ་པ་དྲུག་ཏུ་རབ་ཏུ་གཡོས་ཏེ། སྣང་བ་ཆེན་པོས་ཁྱབ་པར་གྱུར་ཏོ། །མེ་ཏོག་གི་ཆར་ཆེན་པོ་ཡང་བབ་བོ། །སིལ་སྙན་དང ། རོལ་མོའི་སྒྲ་བྱང་བྱུང་ངོ ། །སེམས་ཅན་གྲངས་མེད་པ་དག་གིས་ནི་བྱང་ཆུབ་ཏུ་སེམས་བསྐྱེད་དོ། ། བྱང་ཆུབ་སེམས་དཔའ་གྲངས་མེད་པ་དག་གིས་ནི་རྗེས་སུ་མཐུན་པའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་གྲངས་མེད་པ་དག་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་གྲངས་མེད་པ་དག་གིས་ནི་སྐྱེ་བ་གཅིག་གིས་ཐོགས་པར་འགྱུར་བའི་དགེ་བའི་རྩ་བ་རྣམས་ཡོངས་སུ་སྨིན་པར་བྱས་སོ། །དེ་ནས་འཁོར་དེའི་ཁྱམས་ཀྱི་དབུས་ནས་བཅོམ་ལྡན་འདས་ཀྱི་སྤྱན་སྔར་ཆུའི་རྒྱུན་ཤིང་རྟའི་སྲོག་ཤིང་ཙམ་གྱིས་ས་ཆེན་པོ་དཔག་ཚད་སྟོང་ཕྲག་དྲུག་ཅུ་རྩ་བརྒྱད་པ་བརྟོལ་ཏེ་མངོན་དུ་བྱུང་བར་སྣང་ངོ ། །དེ་དག་སྟེང་གི་བར་སྣང་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་སྤོས་ཆུས་ཆག་ཆག་བཏབ་པར་གྱུར་ཏོ།།
219a
༄#། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཞི་བའི་བློ་གྲོས་ལ་བཀའ་སྩལ་པ། ཞི་བའི་བློ་གྲོས། ཁྱོད་ཀྱིས་ཆུའི་རྒྱུན་མངོན་པར་འཕགས་པ་འདི་དག་མཐོང་ངམ། གསོལ་པ། བཅོམ་ལྡན་འདས། མཐོང་ལགས་ཏེ། འདི་སུའི་སྔ་ལྟས་ལགས། བཅོམ་ལྡན་འདས་ཀྱིས་བཀའ་སྩལ་པ། ཞི་བའི་བློ་གྲོས། ཆུའི་རྒྱུན་འདི་དག་སེམས་མེད་ཀྱང་ཇི་ལྟར་འདི་དག་གིས་ས་ཆེན་པོ་བརྟོལ་ཏེ་མངོན་པར་འཕགས་པ་དེ་བཞིན་དུ་གང་དག་ཆོས་ཀྱི་རྣམ་གྲངས་འདི་འཆང་བ་དང ། དེ་བཞིན་ཉིད་དུ་སྒྲུབ་པར་བྱེད་པའི་སེམས་ཅན་དེ་དག་ཀྱང་མངོན་པར་འཕགས་པར་འགྱུར་ཏེ། དེ་དག་ནི་མ་རིག་པ་དང ། ལྟ་བར་འགྱུར་བའི་སྒོ་གླེགས་བཅག་ནས་ཆོས་ཀྱི་སྣང་བ་མི་ཟད་པ་དང ། ཤེས་རབ་དང་སྤོབས་པ་འབྱུང་བར་འགྱུར་རོ། །དེ་སྐྱེས་བུ་དེ་དག་གིས་ལེགས་པར་བཤད་པས་སེམས་ཅན་ཐམས་ཅད་ཀྱི་སེམས་རྣམས་ཚིམ་པར་འགྱུར་ཏེ། འདི་ནི་ཆོས་ཀྱི་རྣམ་གྲངས་འདིའི་མ་འདྲེས་པའི་མཚན་ཉིད་དུ་རིག་པར་བྱའོ། །དེ་བཞིན་གཤེགས་པའི་གསུང་གི་གསང་བ་བསམ་གྱིས་མི་ཁྱབ་པ་བསྟན་པའི་ལེའུ་སྟེ་བརྒྱད་པའོ།། །།གསང་བ་བའི་བདག་པོ་ལག་ན་རྡོ་རྗེས་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །ཞི་བའི་བློ་གྲོས། དེ་ལ་དེ་བཞིན་གཤེགས་པའི་ཐུགས་ཀྱི་གསང་བ་དང །
219b
ཐུགས་ཀྱི་འཕྲིན་ལས་ཡོངས་སུ་དག་པ་གང་ཞེ་ན། ཞི་བའི་བློ་གྲོས། འདི་ལྟ་སྟེ། དཔེར་ན། གཟུགས་མེད་པ་ན་སྤྱོད་པའི་ལྷའི་རིས་སུ་སེམས་ཅན་གང་དག་སྐྱེས་པ་དེ་དག་རྣམ་པར་ཤེས་པའི་དམིགས་པ་གཅིག་གིས་བསྐལ་པ་བརྒྱད་ཁྲི་བཞི་སྟོང་དུ་གནས་ཀྱང་ཏིང་ངེ་འཛིན་གྱི་ཚེའི་མཐར་མ་ཐུག་གི་བར་དུ་དེ་དག་གི་རྣམ་པར་ཤེས་པ་དེ་རྣམ་པར་ཤེས་པ་གཞན་གྱི་རྗེས་སུ་མ་འབྲང་སྟེ།་དེ་ནས་ཤི་འཕོས་ནས་ལས་ཇི་ལྟར་བསགས་པ་བཞིན་དུ་སྐྱེ་བ་ཡོངས་སུ་འཛིན་ཏོ། །ཞི་བའི་བློ་གྲོས། དེ་བཞིན་གཤེགས་བཞིན་གཤེགས་པའི་རྣམ་པར་ཤེས་པ་ཡང་མི་གནས་པ་སྟེ། གང་གི་ནུབ་མོ་བྱང་ཆུབ་སེམས་དཔའ་བླ་ན་མེད་པར་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང ། གང་གི་ནུབ་མོ་དེ་བཞིན་གཤེགས་པ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་བའི་བར་དུ་དེ་བཞིན་གཤེགས་པའི་ཐུགས་ལ་ལྡོག་པ་མི་མངའོ། །ཐུགས་ལ་རྟོག་པ་མི་མངའ། ཐུགས་ལ་རྣམ་པར་དཔྱོད་པ་མི་མངའ། ཐུགས་ལ་འགྱུར་བ་མི་མངའ། ཐུགས་ལ་ཚད་མི་མངའ། ཐུགས་ལ་འཁྲུལ་བ་མི་མངའ། ཐུགས་ལ་སེལ་བ་མི་མངའ། ཐུགས་ལ་གཡེང་བ་མི་མངའ། ཐུགས་ལ་ཁེངས་པ་མི་མངའ། ཐུགས་ལ་དམའ་བ་མི་མངའ། ཐུགས་ལ་ཀུན་དུ་སྲུང་བ་མི་མངའ། ཐུགས་ལ་རྒྱུ་བ་མི་མངའ། ཐུགས་ལ་ཤིན་ཏུ་རིངས་པ་མི་མངའ། ཐུགས་
220a
༄#། །ལ་རྣམ་པར་འཁྲུག་པ་མི་མངའ། ཐུགས་ལ་ཁོན་དུ་འཛིན་པ་མི་མངའ། ཐུགས་ལ་གཡོ་བ་མི་མངའ། ཐུགས་ལ་ངེས་པར་སེམས་པ་མི་མངའ། ཐུགས་ལ་དགྱེས་པ་མི་མངའ། ཐུགས་ལ་གནོད་པ་མི་མངའ། ཐུགས་ལ་འཇུག་པ་མི་མངའ། ཐུགས་ལ་རབ་ཏུ་རྒྱུ་བ་མི་མངའ། ཐུགས་ལ་རྟོག་པ་མི་མངའ། ཐུགས་ལ་རྣམ་པར་རྟོག་པ་མི་མངའ། ཐུགས་ལ་ཡོངས་སུ་རྟོག་པ་མི་མངའ། ཐུགས་ལ་ཞི་གནས་མི་མངའ། ཐུགས་ལ་ལྷག་མཐོང་མི་མངའ། ཐུགས་ལ་རྣམ་པར་ཤེས་པའི་རྗེས་སུ་འབྲང་བ་མི་མངའ། རང་གི་ཐུགས་ལ་གནས་པ་མི་མངའ། གཞན་གྱི་སེམས་ལ་བལྟ་བ་མི་མངའ། ཐུགས་མིག་ལ་གནས་པ་མི་མངའ། ཐུགས་རྣ་བ་དང ། སྣ་དང ། ལྕེ་དང ། ལུས་དང ། ཡིད་ལ་གནས་པ་མི་མངའ། ཐུགས་གཟུགས་ལ་གནས་པ་མི་མངའ། ཐུགས་སྒྲ་དང ། དྲི་དང ། རོ་དང ། རེག་ལ་གནས་པ་མི་མངའ། ཐུགས་ཆོས་ལ་གནས་པ་མི་མངའ། ཐུགས་དམིགས་པ་ལ་གནས་པ་མི་མངའ། ཐུགས་ཡིད་ལ་གནས་པ་མི་མངའ། ཐུགས་ན་ངན་ནས་པ་མི་མངའ། ཐུགས་ཕྱི་རོལ་ན་གནས་པ་མི་མངའོ། །ཐུགས་དེ་ཆོས་རྣམས་ལ་མི་འཇུག་གོ ། ཐུགས་དེ་ཡེ་ཤེས་ལ་མི་འཇུག་གོ་།ཐུགས་དེ་འདས་པ་དང ། མ་འོངས་པ་དང ། ད་ལྟར་བྱུང་བ་ལ་མི་རྟོག་གོ་།ཞི་བའི་བློ་གྲོས། དེ་བཞིན་གཤེགས་པ་ནི་དེ་ལྟར་ཐུགས་ཡོངས་
220b
སུ་དག་པ་སྟེ། ཐུགས་ཀྱིས་ཆོས་གང་ཡང་མངོན་པར་མི་སྒྲུབ་ལ། ཆོས་ཐམས་ཅད་ལ་ཡང་དེའི་ཡེ་ཤེས་མ་ཆགས། མ་ཐོགས་པར་འཇུག་གོ་།རང་གི་ཐུགས་ཡོངས་སུ་དག་པས་སེམས་ཅན་གང་གི་སེམས་ཀྱང་ཡོངས་སུ་མ་དག་པར་མི་གཟིགས་ཏེ། དེ་གཟིགས་ཀྱང་གཟིགས་པ་མ་ཡིན་ཞིང་རྣམ་པར་མི་རྟོག་གོ་།གཟིགས་ཀྱང་སྤྲོས་པར་མི་མཛད་དོ། །གཟིགས་པས་གཟིགས་པ་དང ། རྣམ་པར་གཟིགས་པ་མི་གཟིགས་སོ། །དེ་བཞིན་གཤེགས་པའི་ཡེ་ཤེས་དེ་ནི་ཤའི་མིག་གིས་མཐོང་བ་དང་ལྡན་པ་མ་ཡིན། ལྷའི་མིག་གིས་མཐོང་བ་དང་ལྡན་པ་མ་ཡིན། ཤེས་རབ་ཀྱི་མིག་གིས་མཐོང་བ་དང་ལྡན་པ་མ་ཡིན། ཆོས་ཀྱི་མིག་གིས་མཐོང་བ་དང་ལྡན་པ་མ་ཡིན། སངས་རྒྱས་ཀྱི་སྤྱན་གྱིས་གཟིགས་པ་དང་ལྡན་པ་མ་ཡིན། ལྷའི་རྣ་བས་ཐོས་པ་དང་ལྡན་པ་མ་ཡིན། གཞན་གྱི་སེམས་ལ་ལྟ་བ་དང་ལྡན་པ་མ་ཡིན། སྔོན་གྱི་གནས་རྗེས་སུ་དྲན་པ་དང་ལྡན་པ་མ་ཡིན། རྫུ་འཕྲུལ་རྣམ་པར་འཕྲུལ་པ་དང་ལྡན་པ་མ་ཡིན། ཟག་པ་ཟད་པ་ཤེས་པ་དང་ལྡན་པའང་མ་ཡིན་ལ། དེ་ཆོས་ཐམས་ཅད་དང་མི་ལྡན་པ་ཡང་མ་ཡིན་ཏེ། ཆོས་ཐམས་ཅད་ལ་ཆགས་པ་མེད་པར་ལྡན་པ་ཡང་མ་ཡིན་ནོ། །དེའི་དེ་བཞིན་གཤེགས་པའི་ཡེ་ཤེས་ཀྱི་རྒྱུན་རྣམས་ནི་བསྒྲིམ་པ་མི་མངའ་ཞིང་ལྷུན་གྱིས་གྲུབ་ལ། མངོན་པར་འདུ་མཛད་པར་མི་མངའ་བར་གནས་སོ། །སེམས་ཅན་གྱི་སྤྱོད་པ་ཐམས་ཅད་ལ་གཟིགས་སོ། །སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་དང །
221a
༄#། །རྣམ་པར་བྱང་བ་ཡང་རབ་ཏུ་མཁྱེན་ཏོ། །དེའི་སྟོབས་བཅུ་དང ། མི་འཇིགས་པ་དང ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་མཁྱེན་པ་ཡང་བསྙེལ་བ་མི་མངའ་སྟེ།་དེ་བཞིན་གཤེགས་པའི་ཆོས་དེ་དག་ནི་ལྷུན་གྱིས་གྲུབ་ཅིང་བསྒྲིམ་པ་མི་མངའ་ལ། མངོན་པར་འདུ་མཛད་པ་མི་མངའ་བར་འཇུག་གོ་།དེ་བཞིན་གཤེགས་པ་ནི་སེམས་དང་ཡིད་དང་རྣམ་པར་ཤེས་པ་དང་ཡང་བྲལ་ལ། ཏིང་ངེ་འཛིན་གྱི་གནས་ཀྱང་མི་འདོར་རོ། །སངས་རྒྱས་ཀྱི་མཛད་པ་ཐམས་ཅད་ཀྱང་མཛད་ལ། དེའི་ཆོས་ཐམས་ཅད་ལ་ཆགས་པ་མི་མངའ་བའི་ཡེ་ཤེས་ཀྱང་གང་དུ་ཡང་མི་ཆགས་སོ། །ཞི་བའི་བློ་གྲོས། འདི་ལྟ་སྟེ། དཔེར་ན། དེ་བཞིན་གཤེགས་པས་སྤྲུལ་བའི་དེ་བཞིན་གཤེགས་པ་གཉིས་པ་གང་ཡིན་པ་དེ་ལ་ནི་སེམས་ཀྱང་མི་མངའ།་ཡིད་ཀྱང་མི་མངའ། རྣམ་པར་ཤེས་པ་ཡང་མི་མངའ། སྐུའི་འདུ་བྱེད་ཀྱང་མི་མངའ། གསུང་གི་འདུ་བྱེད་ཀྱང་མི་མངའ། ཐུགས་ཀྱི་འདུ་བྱེད་ཀྱང་མི་མངའ་མོད་ཀྱི། འདི་ལྟ་སྟེ། སངས་རྒྱས་ཀྱི་མཐུ་ཉིད་ཀྱིས་སངས་རྒྱས་ཀྱི་མཛད་པ་ཐམས་ཅད་ཀྱང་མཛད་དོ། །ཞི་བའི་བློ་གྲོས། དེ་བཞིན་དུ་དེ་བཞིན་གཤེགས་པ་ཡང་སྤྲུལ་པ་དང་མཚུངས་པས་མཉམ་མོ། །སྤྲུལ་པའི་ཆོས་ཉིད་ཀྱིས་རྣམ་པར་མི་རྟོག་གོ་།དེ་ལ་སྐུའི་རྩོམ་པ་དང ། གསུང་གི་རྩོམ་པ་དང ། ཐུགས་ཀྱི་རྩོམ་པ་ཡང་མི་སྣང་ལ་སངས་རྒྱས་ཀྱི་མཛད་པ་ཐམས་ཅད་ཀྱང་མཛད་དེ། དེ་ཡང་ལྷུན་གྱིས་གྲུབ་
221b
ཅིང་བསྒྲིམ་པ་མི་མངའ་ལ། མངོན་པར་འདུ་མཛད་པ་མི་མངའ་བས་མཛད་དོ། །དེ་ཅིའི་ཕྱིར་ཞེ་ན། ཞི་བའི་བློ་གྲོས། དེ་བཞིན་གཤེགས་པས་སྤྲུལ་པའི་རང་བཞིན་གྱི་མཚན་ཉིད་དུ་ཆོས་ཐམས་ཅད་མངོན་པར་རྫོགས་པར་སངས་རྒྱས་ཏེ། མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་ལ་ཐུགས་བརྩེ་བས་དེ་བཞིན་དུ་བསྟན་ཏོ། །ཞི་བའི་བློ་གྲོས། དེ་བཞིན་གཤེགས་པའི་ཡེ་ཤེས་ནི་འདུས་བྱས་ལ་གནས་པ་མ་ཡིན། འདུས་མ་བྱས་ལ་གནས་པ་མ་ཡིན། ཕུང་པོ་ལ་གནས་པ་མ་ཡིན། ཁམས་ལ་གནས་པ་མ་ཡིན། སྐྱེ་མཆེད་ལ་གནས་པ་མ་ཡིན། ནང་ལ་གནས་པ་མ་ཡིན། ཕྱི་ལ་གནས་པ་མ་ཡིན། དགེ་བ་ལ་གནས་པ་མ་ཡིན། མི་དགེ་བ་ལ་གནས་པ་མ་ཡིན། འཇིག་རྟེན་ལ་གནས་པ་མ་ཡིན། འཇིག་རྟེན་ལས་འདས་པ་ལ་གནས་པ་མ་ཡིན། ཁ་ན་མ་ཐོ་བ་དང་བཅས་པ་ལ་གནས་པ་མ་ཡིན། ཁ་ན་མ་ཐོ་བ་མེད་པ་ལ་གནས་པ་མ་ཡིན། ཟག་པ་དང་བཅས་པ་ལ་གནས་པ་མ་ཡིན། ཟག་པ་མེད་པ་ལ་གནས་པས་མ་ཡིན། འདས་པ་ལ་གནས་པ་མ་ཡིན། མ་འོངས་པ་ལ་གནས་པ་མ་ཡིན། ད་ལྟར་བྱུང་བ་ལ་གནས་པ་མ་ཡིན། སོ་སོར་བརྟག་པ་ལ་གནས་པ་མ་ཡིན། སོ་སོར་བརྟགས་པ་མ་ཡིན་པ་ལ་གནས་པ་མ་ཡིན་ཏེ། ཞི་བའི་བློ་གྲོས། དེ་ལྟར་དེ་བཞིན་གཤེགས་པའི་ཡེ་ཤེས་གནས་པ་མི་མངའོ། །དེ་ཆོས་གང་ཡང་མངོན་པར་མི་སྒྲུབ་ལ། སེམས་ཅན་ལ་ཐུགས་བརྩེ་བས་སེམས་ཅན་ཐམས་ཅད་ཀྱི་
222a
༄#། །སེམས་དང ། སྤྱོད་པ་དང ། བསམ་པ་རྣམས་ལ་ཡང་དེའི་ཡེ་ཤེས་མཐོང་བ་ཆགས་པ་མི་མངའ་ཞིང ། ཐོགས་པ་མི་མངའ་བ་འཇུག་སྟེ། དེ་ཡང་ལྷུན་གྱིས་གྲུབ་ཅིང་བསྒྲིམ་པ་མི་མངའ་ལ། མངོན་པར་འདུ་བྱ་བ་མི་མངའ་བས་འཇུག་གོ། ཞི་བའི་བློ་གྲོས། འདི་ཡང་དེ་བཞིན་གཤེགས་པའི་ཐུགས་ཀྱི་གསང་བ་སྟེ། མཉམ་པར་བཞག་པའི་གནས་ཀྱང་མི་འདོར་ལ་སེམས་ཅན་ཐམས་ཅད་ལ་སེམས་རྣམ་པར་རིག་པར་ཡང་མཛད་པས་ཐུགས་བསམ་གྱིས་མི་ཁྱབ་པ་ཉིད་དོ། །དེ་བཞིན་གཤེགས་པའི་ཐུགས་ཀྱི་གསང་བའི་ལེའུ་ཞེས་བྱ་སྟེ་དགུ་པའོ།། །།དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རདྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། ཕྱོགས་བཅུ་དག་ན་བསྐལ་པ་བཟང་པོ་པའི་བྱང་ཆུབ་སེམས་དཔའ་གང་དག་སངས་རྒྱས་བཅོམ་ལྡན་འདས་རྣམས་ཀྱི་ཐད་ན་ད་ལྟར་ཚངས་པར་སྤྱད་པ་སྤྱོད་པའི་བྱང་ཆུབ་སེམས་དཔའ་དེ་དག་ཐམས་ཅད་ཀྱི་སླད་ན་ཡང་གསང་བ་པའི་བདག་པོ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། བྱ་བ་འདི་བསམ་གྱིས་མི་ཁྱབ་ཀྱི་ཞོག་ཅིག། ལྷ་དང་བཅས་པའི་འཇིག་རྟེན་བྱང་ཆུབ་སེམས་དཔའི་སྤྱོད་པ་འདི་ལ་མགོ་རྨོངས་པར་འགྱུར་རོ། །དེ་ལྟ་མོད་ཀྱི། ཤཱ་རིའི་བུ། གང་དག་དད་ཅིང་དགེ་བའི་བཤེས་གཉེན་གྱིས་ཡོངས་སུ་ཟིན་པ་དེ་
222b
དག་གནས་འདི་ལ་སྐྲག་པར་མི་འགྱུར་རོ། །གསོལ་པ། བཅོམ་ལྡན་འདས་ཀྱིས་བཤད་དུ་གསོལ། བདག་དེ་བཞིན་གཤེགས་པ་ལ་ཡིད་ཆེས་པར་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ཁྱོད་ཀྱིས་གསང་བ་པའི་བདག་པོ་ལག་ན་རྡོ་རྗེས་རྟག་ཏུ་ངའི་ཕྱི་བཞིན་འབྲང་བ་མཐོང་ངམ། གསོལ་པ། བཅོམ་ལྡན་འདས། ད་ལྟར་སངས་རྒྱས་ཀྱི་མཐུས་མཐོང་ལགས་ཏེ།་འདི་སྔོན་ནི་བདག་གིས་ནམ་ཡང་མ་མཐོང་ངོ ། །བཀའ་སྩལ་པ། ཤཱ་རིའི་བུ། དེ་བཞིན་དུ་གསང་བ་པའི་བདག་པོ་ལ་ག་ན་རྡོ་རྗེ་འདི་ནི་བསྐལ་པ་བཟང་པོ་པའི་བྱང་ཆུབ་སེམས་དཔའ་རྣམས་ཀྱི་རྒྱབ་རྒྱབ་ན་ཡང་གནས་ཏེ། སྔོན་གྱི་སྨོན་ལམ་གྱི་སྟོབས་དང ། མངོན་པར་ཤེས་པའི་སྟོབས་ཀྱིས་ཐམས་ཅད་དུ་ཡང་ལག་ན་རྡོ་རྗེས་གཟུགས་སུ་ཀུན་ཏུ་སྟོན་ཏོ། །ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། སེམས་ཅན་ཇི་སྙེད་འཁོད་པའི་སེམས་ཅན་དེ་དག་ཐམས་ཅད་ཀྱི་རྒྱབ་རྒྱབ་ཏུ་གསང་བ་པའི་བདག་པོ་ལག་ན་རྡོ་རྗེས། ལག་ན་རྡོ་རྗེའི་གཟུགས་ཀུན་ཏུ་བསྟན་ཀྱང ། དེས་ཡེ་ཤེས་ཀྱི་བྱིན་གྱི་རླབས་ཡོངས་སུ་རྫོགས་པར་བསྟན་པར་མི་འགྱུར་རོ། །ཤཱ་རིའི་བུ་ཁྱོད་ཀྱིས་བྱང་ཆུབ་སེམས་དཔའ་བྱམས་པའི་རྒྱབ་ན་ལག་ན་རྡོ་རྗེ་འདུག་པ་མཐོང་ངམ། གསོལ་པ།་བཅོམ་ལྡན་འདས། བདག་གིས་ད་གདོད་མཐོང་ལགས་ཏེ། སྔོན་ནི་མ་མཐོང་ངོ ། །བཀའ་སྩལ་པ། འདི་ནི་དེའི་རྒྱབ་ན་རྟག་ཏུ་ཀུ་གནས་ན་ཁྱོད་ཀྱིས་དེ་མ་མཐོང་བ་མ་གཏོགས་པར་བྱང་ཆུབ་
223a
༄#། །སེམས་དཔའ་མ། བརྒྱ་བྱིན་ནམ། ཚངས་པའམ། འཇིག་རྟེན་སྐྱོང་བ་གང་དག་འཇིག་རྟེན་གྱི་ཁམས་གཞན་ནས་ལྷགས་པ་དེ་དག་གིས་ནི་བྱང་ཆུབ་སེམས་དཔའ་བྱམས་པའི་རྒྱབ་ན་ལག་ན་རྡོ་རྗེ། རྡོ་རྗེ་ཐོགས་ཤིང་རྟག་ཏུ་འདུག་པར་མཐོང་ངོ ། །ཤཱ་རིའི་བུ། བྱང་ཆུབ་སེམས་དཔའ་བྱམས་པ་དང ། བསྐལ་པ་བཟང་པོ་པའི་བྱང་ཆུབ་སེམས་དཔའ་ཐམས་ཅད་ཀྱིས་སྤྲུལ་པ་བྱེ་བ་ཁྲག་ཁྲིག་བརྒྱ་སྟོང་དག་སྤྲུལ་ཀྱང་དེ་དག་ཐམས་ཅད་ཀྱི་རྒྱབ་ན་ཡང་གསང་བ་པའི་བདག་པོ་ལག་ན་རྡོ་རྗེ་གནས་པར་སྣང་སྟེ། བྱིན་གྱིས་བརླབས་པ་དེ་དག་ཐམས་ཅད་ནི་གསང་བ་པའི་བདག་པོའི་ཡིན་ནོ། །ཤཱ་རིའི་བུ། དེ་བཞིན་གཤེགས་པས་སྤྲུལ་པ་གང་ཡིན་པ་དེ་དག་གི་རྒྱབ་ན་ཡང་འདིའི་བྱིན་གྱི་རླབས་ཀྱིས་གསང་བ་པའི་བདག་པོ་ལག་ན་རྡོ་རྗེ་གནས་ཏེ། ཤཱ་རིའི་བུ། གསང་པ་བའི་བདག་པོ་ལག་ན་རྡོ་རྗེ་ནི་དེ་ལྟར་ཡེ་ཤེས་དང ། མངོན་པར་ཤེས་པའི་བྱིན་གྱི་རླབས་ཀྱི་སྟོབས་དང་ལྡན་ནོ། །གསང་བ་པའི་བདག་པོ་ལག་ན་རྡོ་རྗེའི་ཡོན་ཏན་ཡོངས་སུ་བརྗོད་པའི་ལེའུ་ཞེས་བྱ་སྟེ་བཅུ་པའོ།། །།དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་གསང་པ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །གསང་པ་པའི་བདག་པོ། བྱང་ཆུབ་སེམས་དཔའི་དཀའ་བ་སྤྱོད་པ་དང ། བྱང་ཆུབ་ཀྱི་སྙིང་པོར་འགྲོ་བ་དང ། བདུད་འདུལ་བ་དང ། ཆོས་ཀྱི་འཁོར་ལོ་བསྐོར་བ་དང །
223b
བཀོད་པ་བསྟན་པ་ལས་བརྩམས་ཏེ། དེ་ན་རྨད་དུ་བྱུང་བའི་རྒྱུ་གང་དག་བྱུང་བ་དང ། གང་དུ་ཁྱོད་ལ་མངོན་སུམ་དུ་གྱུར་པ་ཁྱོད་སྤོབས་པར་གྱིས་ཤིག། གསང་བ་པའི་བདག་པོས་སྨྲས་པ། ཞི་བའི་བློ་གྲོས། བྱང་ཆུབ་སེམས་དཔའི་ཡོན་ཏན་བཀོད་པ་བྱུང་བ་ནི་ཚད་མེད་དེ། དེ་དག་ནི་ཚེའི་ཚད་བསྐལ་པར་གནས་པས་ཀྱང་རྒྱས་པར་རྣམ་པར་ཕྱེ་སྟེ། བསྟན་པར་སླ་བ་མ་ཡིན་མོད་ཀྱི།་འོན་ཀྱང་ཅུང་ཟད་ཙམ་ཞིག་བརྗོད་པར་བྱའོ། །ཞི་བའི་བློ་གྲོས། བྱང་ཆུབ་སེམས་དཔའི་དཀའ་བ་སྤྱོད་པ་ན་རྣམ་པ་གཅིག་མ་ཡིན་ཏེ། མུ་སྟེགས་ཅན་གཞོམ་པའི་ཕྱིར་བྱང་ཆུབ་སེམས་དཔས་སྤྱད་དོ། །དཀའ་ཐུབ་དང ། ལུས་ལ་ཡོངས་སུ་གདུང་བ་ཇི་སྙེད་དང ། ལུས་ཀྱི་སྤྱོད་ལམ་ཇི་སྙེད་ཀྱིས་ཕ་རོལ་མུ་སྟེགས་ཅན་དག་མངོན་པར་སྙེམས་པ་དེ་བས་ཆེས་ཁྱད་པར་དུ་འཕགས་པ་འམ། ཆེས་མཆོག་ཏུ་གྱུར་པའི་བྱ་དཀའ་བ་དང ། བརྟུལ་ཞུགས་དང ། དཀའ་ཐུབ་གང་དག་གིས་བྱ་བས་ཀུན་དུ་བསྟན་པར་མི་ནུས་པ་དེ་དག་ཐམས་ཅད་བྱང་ཆུབ་སེམས་དཔས་ཀུན་དུ་བསྟན་ཏེ། ཞི་བའི་བློ་གྲོས། དེ་ལ་ཁ་ཅིག་གིས་ནི་བྱང་ཆུབ་སེམས་དཔའ་རྐང་པ་ཡ་གཅིག་བཙུགས་ཏེ་འདུག་པར་མཐོང ། ཁ་ཅིག་གིས་ནི་ལག་པ་བཏེག་སྟེ་འདུག་པར་མཐོང ། ཁ་ཅིག་གིས་ནི་ཉི་མ་ལྟ་ཞིང་འདུག་པར་མཐོང ། ཁ་ཅིག་གིས་ནི་གདུང་བ་ལྔས་གདུང་བར་མཐོང ། ཁ་ཅིག་གིས་ནི་ཙོ་ཙོག་པུར་འདུག་ཅིང་སྤོང་བ་ལ་སྦྱོར་བར་བརྩོན་པར་མཐོང ། ཁ་ཅིག་
224a
༄#། །གིས་ནི་རྐང་པ་བཙུགས་ཏེ་མི་འགུལ་བར་མཐོང ། ཁ་ཅིག་གིས་ནི་རྐང་པ་གྱེན་དུ་བསྒྲེངས་ཏེ་འདུག་པར་མཐོང ། ཁ་ཅིག་གིས་ནི་ཁ་ཕུབ་ཏུ་འདུག་པར་མཐོང ། ཁ་ཅིག་གིས་ནི་ཚེར་མའི་སྟེང་ན་ཉལ་བར་མཐོང ། ཁ་ཅིག་གིས་ནི་བ་ལང་གི་ལྕི་བའི་ནང་ན་ཉལ་བར་མཐོང ། ཁ་ཅིག་གིས་ནི་རྡོ་ལེབ་ལ་སྐྱིལ་མོ་ཀྲུང་བཅས་ཏེ་འདུག་པར་མཐོང ། ཁ་ཅིག་གིས་ནི་རྩིག་པ་ལ་སྙེས་པ་དང ། ཁ་ཅིག་གིས་ནི་ཤིང་ལེབ་ལ་སྙེས་པ་དང ། ཁ་ཅིག་གིས་ནི་གཏུན་ཤིང་ལ་སྙེས་པ་དང ། ཁ་ཅིག་གིས་ནི་ཕྱག་དར་ཁྲོད་ན་ཉལ་བ་དང ། ཁ་ཅིག་གིས་ནི་ཉི་མ་ཡོངས་སུ་བསྒྱུར་བ་དང ། ཁ་ཅིག་གིས་ནི་ཤིང་ལེབ་གྱོན་པ་དང ། ཁ་ཅིག་གིས་ནི་རྩཝ་མུན་ཛའོ་གོས་གྱོན་པ་དང ། ཁ་ཅིག་གིས་ནི་རྩཝ་བལ་བ་ཛའི་གོས་གྱོན་པ་དང ། ཁ་ཅིག་གིས་ནི་རྩཝ་ཀུ་ཤའི་གོས་གྱོན་པ་དང ། ཁ་ཅིག་གིས་ནི་རི་དྭགས་ཀྱི་པགས་པའི་གོས་གྱོན་པ་དང ། ཁ་ཅིག་གིས་ནི་རྩཝ་རྩིར་གྱོན་པ་དང ། ཁ་ཅིག་གིས་ནི་སྒྲེན་མོར་འདུག་པ་དང ། ཁ་ཅིག་གིས་ནི་རྩཝ་དར་བྷའི་གོས་གྱོན་པ་དང ། ཁ་ཅིག་གིས་ནི་ཤིང་ཤུན་གྱི་གོས་གྱོན་པ་དང ། ཁ་ཅིག་གིས་ནི་སྲེད་ཟ་བ་དང ། ཁ་ཅིག་གིས་ནི་ནས་ཟ་བར་མཐོང་ངོ ། །ཁ་ཅིག་གིས་ནི་རྩ་བ་ཟ་བ་དང ། ལོ་མ་ཟ་བ་བ་དང ། མེ་ཏོག་ཟ་བ་དང ། འབྲས་བུ་ཟ་བ་དང ། སྡོང་བུ་ཟ་བ་དང ། གཟེགས་མ་ཟ་བ་དང ། པདྨའི་རྩ་བ་ཟ་བ་དང ། ཞག་དྲུག་སྨྱུང་བ་དང ། ཤ་མི་ཟ་བ་དང ། རྒྱ་ཤུགས་ཟ་བ་དང ། ནས་
224b
ཤིན་ཏེ་མ་ཟ་བ་དང ། ཅི་ཙེ་ཟ་བ་དང ། མོན་སྲན་སྡེའུ་ཟ་བ་དང ། མོན་སྲན་དྲེའུ་ཟ་བ་དང ། བྲ་ཡོས་ཟ་བ་དང ། ཏིལ་ཟ་བ་དང ། འབྲས་སྐམ་ཟ་བ་དང ། ཆུ་འཐུང་བ་ཙམ་གྱིས་འཚོ་བ་དང ། མར་གྱི་ཐིགས་བ་ཙམ་གྱིས་འཚོ་བ་དང ། སྦྲང་རྩིའི་ཐིགས་པ་ཙམ་གྱིས་འཚོ་བ་དང ། འོ་མའི་ཐིགས་པ་ཙམ་གྱིས་འཚོ་བ་དང ། ཁ་ཅིག་གིས་ནི་ཟས་མི་ཟ་བ་དང ། ཁ་ཅིག་གིས་ནི་གཉིད་དང་བྲལ་བར་མཐོང་ངོ ། །ཁ་ཅིག་གིས་ནི་འདུག་པ་འབའ་ཞིག་ཏུ་མཐོང་ངོ ། །ཁ་ཅིག་གིས་ནི་འགྲེང་བ་འབའ་ཞིག་ཏུ་མཐོང་ངོ ། །ཞི་བའི་བློ་གྲོས། དེ་ལྟར་བྱང་ཆུབ་སེམས་དཔའ་སྤྱོད་ལམ་དེ་དག་དང ། དཀའ་བ་སྤྱོད་པ་ཚད་མེད་པ་གཞན་དག་ཀྱང་སྟོན་སྟེ། ལོ་དྲུག་ཚང་བར་སྤྱོད་ལམ་གཅིག་ཀྱང་མ་འཁྲུགས་པར་ཐམས་ཅད་རྫོགས་པར་བསྟན་པར་གྱུར་ཏོ། །བརྟུལ་ཞུགས་ཤིན་ཏུ་ཁྱད་པར་དུ་འཕགས་པ་དང ། བརྩོན་འགྲུས་ཤིན་ཏུ་སྦྱངས་པ་དང ། དཀའ་ཐུབ་ཤིན་ཏུ་བརྟན་པོས་ལོ་དྲུག་ཏུ་བརྟུལ་ཞུགས་དང་དཀའ་ཐུབ་ཐམས་ཅད་སྟོན་ཀྱང ། སེམས་ཅན་གཞན་དང་གཞན་ལ་མ་མོས་པ་དག་གིས་བརྟུལ་ཞུགས་དང་དཀའ་ཐུབ་གཞན་དང་གཞན་དུ་མི་མཐོང་སྟེ། གཞན་དུ་ན་ཅི་འདྲེ་བའི་བརྟུགས་ཞུགས་དང ། དཀའ་ཐུབ་ཅི་འདྲ་བ་དག་གིས་སེམས་ཅན་དེ་དག་འདུལ་བར་འགྱུར་བ་དེ་འདྲ་བའི་བརྟུལ་ཞུགས་དང་དཀའ་ཐུབ་མཐོང་བ་ནི་མ་གཏོགས་སོ། །ཞི་བའི་བློ་གྲོས། དེ་ལ་བྱང་ཆུབ་སེམས་དཔའ་ནི་ཐམས་ཅད་དུ་ཁ་ན་མ་ཐོ་བ་མེད་
225a
༄#། །པའི་བཏང་སྙོམས་ཅན་ཡང་ཡིན་ལ། བྱ་བ་དེ་དག་ལ་ཀུན་ཏུ་སྟོན་ཏེ། དཀའ་བ་སྤྱད་པ་འདིས་ལྷ་དང་མི་བྱེ་བ་ཕྲག་དྲུག་ཅུ་རྩ་བཞི་ཐེག་པ་གསུམ་པོ་དག་ལ་ཡོངས་སུ་སྨིན་པར་བྱས་སོ། །ཞི་བའི་བློ་གྲོས། ལྷ་དང་མི་གང་དག་རྒྱ་ཆེན་པོ་ལ་མོས་པ་ཡོངས་སུ་སྦྱང་བ་བྱས་པ་དེ་དག་གིས་ནི་བྱང་ཆུབ་སེམས་དཔའ་རིན་པོ་ཆེའི་ཁང་པ་བརྩེགས་པ་ན་འདུག་ཅིང་མཁའ་ཁྱབ་ཀྱི་བསམ་གཏན་ལ་བསམ་གཏན་བྱེད་པ་དང ། མི་གཡོ་བ་དང ། བདེ་བ་མྱོང་བ་དང ། ལོ་དྲུག་ལོན་ནས་བྱང་ཆུབ་སེམས་དཔའ་ཏིང་ངེ་འཛིན་དེ་ལས་ལངས་པར་མཐོང་ངོ ། །ཞི་བའི་བློ་གྲོས། དེ་ལ་ལྷ་དང་མི་ཆོས་ཅན་ཆོས་འདོད་པ་ཆོས་བསྟན་པས་ཡོངས་སུ་སྨིན་པར་བྱ་བ་གང་དག་ཡིན་པ་དེ་དག་གིས་ནི་བྱང་ཆུབ་སེམས་དཔའ་ལས་གཞན་མི་བྱེད་པར་རྒྱུན་མི་འཆད་པར་ཆོས་སྟོན་པར་མཐོང་སྟེ། ཞི་བའི་བློ་གྲོས། འདི་ནི་བྱང་ཆུབ་སེམས་དཔའི་སྙིང་རྗེ་ཆེན་པོ་ལ་སྦྱོར་བ་ཡེ་ཤེས་ཆེན་པོ་ཡང་དག་པར་འབྱུང་བ་ཞེས་བྱའོ། །ཆོས་ཀྱི་ཚུལ་ལ་འཇུག་པ་བསམ་གྱིས་མི་ཁྱབ་པ་ལ་འཇུག་པ་ཞེས་བྱའོ། བྱ་དཀའ་བའི་ཡེ་ཤེས་ལ་འཇུག་པ་བདུད་དང་ཕས་ཀྱི་རྒོལ་བ་ཐམས་ཅད་འདུལ་བ་ཞེས་བྱའོ། །ཞི་བའི་བློ་གྲོས། དེ་ལྟར་ལོ་དྲུག་ཚང་ནས་བྱང་ཆུབ་སེམས་དཔའ་ཇི་སྐད་སྨོས་པའི་བརྟུལ་ཞུགས་དང་དཀའ་ཐུབ་དེ་དག་ལས་ལངས་ཏེ། ཀླུང་ནེ་རཉྫ་ནའི་འགྲམ་དུ་སོང་ནས་འཇིག་རྟེན་དང་མཐུན་པར་ཁྲུས་བྱས་ཏེ། ལུས་
225b
གཙང་མར་བྱས་ནས། ཀླུང་ནེ་རཉྫ་ན་ནས་བྱུང་སྟེ་འདུག་པར་གྱུར་ཏོ། །དེ་ན་གྲོང་མིའི་བུ་མོ་ལེགས་སྐྱེས་མ་ཞེས་བྱ་བ་དེས་བ་སྟོང་གི་འོ་མ་བསྐོལ་བ་སྦྲང་རྩི་དང་བསྲེས་པའི་འོ་ཐུག་ཁྱེར་ཏེ། བྱང་ཆུབ་སེམས་དཔའ་ག་ལ་བ་དེར་སོང་ངོ ། །གཞན་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་བྱེ་བ་ཕྲག་དྲུག་ཅུ་ཡང་རང་རང་གི་ཟས་ཐོགས་ཏེ་འཁོད་ནས། སོ་སོ་ནས་ཚིག་འདི་སྐད་དུ། ཀྱེ་སྐྱེས་བུ་དམ་པ། བདག་གི་བཤོས་གསོལ་ཅིག་།ཀྱེ་སྐྱེས་བུ་དམ་པ། བདག་གི་བཤོས་གསོལ་ཅིག་ཟེར་རོ། །ཞི་བའི་བློ་གྲོས། དེས་ན་བྱང་ཆུབ་སེམས་དཔས་གྲོང་པའི་བུ་མོ་ལེགས་སྐྱེས་མ་ལ་སོགས་པ་ལྷ་དང ། ཀླུ་དང ། གནོད་སྦྱིན་དང ། དྲི་ཟ་བྱེ་བ་ཁྲག་དྲུག་ཅུ་པོ་དེ་དག་ཐམས་ཅད་ཀྱི་ཁ་ཟས་དེ་དག་བླངས་ནས་ཐམས་ཅད་ཟོས་ཀྱང་ཕན་ཚུན་མི་མཐོང་ངོ ། །ལྷའི་བུ་རེ་རེས་ཀྱང་བྱང་ཆུབ་སེམས་དཔས་བདག་གིས་བཤོས་གསོལ་ཏེ། བྱང་ཆུབ་སེམས་དཔས་བདག་གི་བཤོས་གསོལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་པར་འགྱུར་བར་ཤེས་སོ། །དེ་དག་ཐམས་ཅད་ཀྱང་བྱང་ཆུབ་སེམས་དཔས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་པར་གྱུར་ཏེ། ཞི་བའི་བློ་གྲོས། འདི་ནི་བྱང་ཆུབ་སེམས་དཔས་ཟས་ལེན་པར་སྦྱོར་བ་དཀའ་བ་སྤྱོད་པ་ཡང་དག་འཕགས་ཞེས་བྱའོ། །ཟས་ལེན་པས་སེམས་ཅན་ཡོངས་སུ་
226a
༄#། །སྨིན་པར་བྱེད་པ་དཀའ་བ་སྤྱོད་པ་ཡང་དག་འཕགས་ཀྱི་ལེའུ་ཞེས་བྱ་སྟེ་བཅུ་གཅིག་པའོ།། །།དེ་ནས་བྱང་ཆུབ་སེམས་དཔའ་ལུས་བཀྲུས་ཏེ་ལུས་སྟོབས་དང་ལྡན་པར་གྱུར་ནས་ཟས་ཟོས་ཏེ། བྱང་ཆུབ་ཀྱི་སྙིང་པོ་ག་ལ་བ་དེར་སོང་ངོ ། །དེར་སོང་བ་དང ། ས་ལ་སྤྱོད་པའི་ལྷའི་བུ་ས་བཟང་ཞེས་བྱ་བས་ས་ལ་སྤྱོད་པའི་ལྷའི་བུ་ཐམས་ཅད་ལ་བོས་ཏེ་སྨྲས་པ། ས་འཛིན་གང་ཞིག་མི་གཡོ་མི་སྤྱོད་པ། །སྲེད་པ་བསལ་ཅིང་ཁོང་ཁྲོ་རབ་སྤངས་པ། །བྱང་ཆུབ་སེམས་དཔའ་དེ་ནི་ཤིང་དྲུང་བྱོན། །ས་གཞི་དག་ནི་ལེགས་པར་བརྒྱན་པར་བྱེད། །ལེགས་སོ་ཞེས་ཏེ་ས་ལ་སྤྱོད་རྣམས་དགའ། །སྟོང་གསུམ་ཐམས་ཅད་ཡོངས་སུ་ཕྱག་དར་བྱེད། །མེ་ཏོག་སིལ་མ་བཀྲམ་ཞིང་སྤོས་མཆོག་བདུགས། །སྤོས་ཆུ་དག་གིས་ས་གཞི་ཆག་ཆག་བཏབ། །ལག་ན་གཞོང་ཐོགས་དེ་བཞིན་ཕྲེང་བ་ཐོགས། །གཞལ་མེད་ཁང་གནས་དེ་བཞིན་པར་སྣང་ལ། །དེ་དག་བྱང་ཆུབ་སེམས་དཔའ་མཐོང་ནས་དགའ། །དེ་ཚེ་མེ་ཏོག་སྣ་ཚོགས་རབ་ཏུ་ཕབ། །གླིང་བཞི་པ་དག་རྣམས་ན་སྐྱོང་བའི་གཞི། །ཇི་སྙེད་པ་དག་ཐམས་ཅད་འཁོར་བཅས་ཏེ། །རྣམ་པར་འདྲེན་ལ་མཆོད་པར་བྱ་བའི་ཕྱིར། །གསེར་གྱི་དྲ་བས་སྟོང་གསུམ་ཐམས་ཅད་བཀབ། །སྟོང་གསུམ་འཇིག་རྟེན་བརྒྱ་བྱིན་རྫུ་འཕྲུལ་ཆེ། །དེ་དག་བྱང་ཆུབ་སེམས་དཔའ་མཆོད་པའི་ཕྱིར། །སུམ་ཅུ་རྩ་གསུམ་རྣམ་རྒྱལ་ཁང་མཛེས་པ། །དེ་ལྟས་སྟོང་
226b
གསུམ་ཐམས་ཅད་མཛེས་པར་བརྒྱན། །འཐབ་བྲལ་ལྷ་རྣམས་ཐམས་ཅད་རབ་དགའ་སྟེ། །སྐྱེས་བུ་མཆོག་ལ་ཡང་དག་མཆོད་པའི་ཕྱིར། །མི་མཇེད་འཇིག་རྟེན་ཁམས་ཀྱི་སྟོང་གསུམ་ཀུན། ། ནམ་མཁའ་བཻ་ཌཱུརྱ་ཡི་དྲ་བས་བཀབ། །དགའ་ལྡན་རབ་དང་དགའ་ལྡན་ལྷ་རྣམས་ཀྱང ། །དེ་དག་མུ་ཏིག་དྲ་བས་བརྒྱན་པ་བྱས། །རྒྱན་ཕྲེང་དེ་བཞིན་ཟླ་གམ་རྣམས་ཀྱང་ཐོགས། །མུ་ཏི་གསིལ་མའི་ཆར་ཡང་རབ་ཏུ་འབེབས། །ལྷ་ཡི་རྒྱལ་པོ་རབ་ཏུ་འཕྲུལ་གྱི་བར། །རབ་ཏུ་དགའ་ནས་འཛམ་བུའི་ཆུ་གསེར་གྱི། །དྲིལ་བུའི་དྲ་བས་གསེར་གྱི་དར་བཅས་ནས། །སྒྲ་སྙན་བཅས་པས་སྟོང་གསུམ་ཐམས་ཅད་བཀབ། །ཐམས་ཅད་དོན་ལ་མི་འཇིགས་མཆོད་པའི་ཕྱིར། །དབང་བསྒྱུར་དག་གིས་ལྷ་ཡི་རིན་པོ་ཆེ། །རྣམ་པར་དག་ཅིང་གཟི་བརྗིད་མཐའ་ཡས་པ། །འོད་གསལ་དྲི་མེད་དྲ་བ་གཅིག་ཀྱང་སྤྲུལ། །ཀླུ་དང་དྲི་ཟ་ལྟོ་འཕྱེ་ཆེན་པོ་དང ། །ལྷ་མིན་མཁའ་ལྡིང་མིའམ་ཅི་ཀུན་གྱིས། རང་རང་གནས་ནས་བཀོད་པ་རྣམས་ཀྱིས་ནི། །འདོད་ཁམས་ལེགས་པར་བརྒྱན་ནས་མཛེས་པར་བྱས།། ཞི་བའི་བློ་གྲོས། དེ་ནས་སྟོང་གསུམ་གྱི་དབང་པོ་ཚངས་པ་ཆེན་པོ་དབང་བསྒྱུར་ཞེས་བྱ་བས་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་མངོན་དུ་ཕྱོགས་པར་མཐོང་ནས་ཚངས་རིས་ཀྱི་ལྷ་རྣམས་ལ་སྨྲས་པ། གྲོགས་པོ་དག། ཤེས་པར་གྱིས་ཤིག། བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བསྣམས་པ། དམ་བཅས་པ་ཆེན་པོ་མ་བོར་བ། གོ་ཆ་སྲ་བ་མནབས་
227a
༄#། །པ།་ཐུགས་ཡོངས་སུ་མི་སྐྱོ་བ། བྱང་ཆུབ་སེམས་དཔའི་སྤྱོད་པ་ཐམས་ཅད་ལས་ངེས་པར་བྱུང་བ། ཕ་རོལ་ཏུ་ཕྱིན་པ་ཐམས་ཅད་ཀྱི་ཕ་རོལ་ཏུ་བྱོན་པ། བྱང་ཆུབ་སེམས་དཔའི་ས་ཐམས་ཅད་ལ་མངའ་དབང་བརྙེས་པ། བྱང་ཆུབ་སེམས་དཔའི་བསམ་པ་ཐམས་ཅད་ཤིན་ཏུ་རྣམ་པར་དག་པ། སེམས་ཅན་ཐམས་ཅད་ཀྱི་དབང་པོའི་རྗེས་སུ་བཞུགས་པ། དེ་བཞིན་གཤེགས་པའི་གསང་བ་ཐམས་ཅད་ལ་ཤིན་ཏུ་ཞུགས་པ། བདུད་ཀྱི་ལས་ཀྱི་ལམ་ཐམས་ཅད་ལས་ཡང་དག་པར་འདས་པ། དགེ་བའི་རྩ་བ་ཐམས་ཅད་ལ་གཞན་གྱི་དྲིང་མི་འཇོག་པ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ། སེམས་ཅན་ཐམས་ཅད་ལ་རབ་ཏུ་ཐར་པའི་ལམ་སྟོན་པ། དེད་དཔོན་ཆེན་པོར་གྱུར་པ། བདུད་ཀྱི་དཀྱིལ་འཁོར་ཐམས་ཅད་འཇོམས་པར་མཛད་པ། སྟོང་གསུམ་ན་དཔའ་བོ་གཅིག་པུར་གྱུར་པ། ཆོས་ཀྱི་སྨན་ཐམས་ཅད་ཡང་དག་པར་བསྒྲུབས་པ། སྨན་པའི་རྒྱལ་པོ་ཆེན་པོ་རྣམ་པར་གྲོལ་བའི་ཐབས་བརྙེས་པ། ཆོས་ཀྱི་རྒྱལ་པོ་ཆེན་པོ་ཤེས་རབ་ཀྱི་འོད་ཆེན་པོ་གཏོང་བ། ཏོག་ཆེན་པོའི་རྒྱལ་པོ། འཇིག་རྟེན་གྱི་ཆོས་བརྒྱད་ཀྱིས་མ་གོས་པ་པདྨ་ཆེན་པོ་ལྟ་བུ། ཆོས་ཐམས་ཅད་ཀྱིས་གཟུངས་མ་བསྙེལ་བར་རྒྱ་མཚོ་ཆེན་པོ་དང་འདྲ་བ། རྗེས་སུ་ཆགས་པ་དང ། ཁོང་ཁྲོ་བ་དང་བྲལ་བ། མི་གཡོ་བ། མི་བསྐྱོང་\་BཥKYཱོཌ\་པ་རི་རབ་ཆེན་པོ་ལྟ་བུ། ཤིན་ཏུ་དྲི་མ་མེད་པ།
227b
ཤིན་ཏུ་ཡོངས་སུ་དག་པ། ཤིན་ཏུ་དཀར་བའི་བློ་དང་ལྡན་པ་ནོར་བུ་རིན་པོ་ཆེ་ཆེན་པོ་དང་འདྲ་བ། ཆོས་ཐམས་ཅད་ལ་དབང་བསྒྱུར་བ། སེམས་ལས་སུ་རུང་བ་ཚངས་པ་ཆེན་པོ་ལྟ་བུའི་བྱང་ཆུབ་སེམས་དཔའ་དེ་བདུད་ཀྱི་སྡེ་རབ་ཏུ་འདུལ་བ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་པར་བཞེད་པ་དང ། སྟོབས་བཅུ་དང ། མི་འཇིགས་པ་དང ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཡོངས་སུ་རྫོགས་པར་མཛད་པ་དང ། ཆོས་ཀྱི་འཁོར་ལོ་ཆེན་པོ་བསྐོར་བ་དང ། སེངྒེའི་སྒྲ་ཆེན་པོ་བསྒྲགས་པ་དང ། ཆོས་ཀྱི་སྦྱིན་པས་སེམས་ཅན་ཐམས་ཅད་ཚིམ་པར་མཛད་པ་དང ། སེམས་ཅན་ཐམས་ཅད་ཀྱི་ཆོས་ཀྱི་མིག་རྣམ་པར་སྦྱོང་བ་དང ། ཕས་ཀྱི་རྒོལ་བ་ཐམས་ཅད་ཆོས་དང་མཐུན་པར་ཚར་གཅོད་པ་དང ། སྔོན་དམ་བཅས་པ་ཡོངས་སུ་རྫོགས་པ་སངས་རྒྱས་བཅོམ་ལྡན་འདས་རྣམས་ལ་བསྟན་པར་བཞེད་པ་དང ། ཆོས་ཐམས་ཅད་ལ་དབང་ཕྱུག་གི་མངའ་དབང་བརྙེས་པར་མཛད་པའི་ཕྱིར། བྱང་ཆུབ་ཀྱི་སྙིང་པོར་བཞུད་ཀྱི། དེ་ལ་གྲོགས་པོ་དག། ཁྱེད་བྱང་ཆུབ་སེམས་དཔའ་ལ་མཆོད་པ་དང ། རིམ་གྲོ་བྱ་བ་སྤྲོ་བར་གྱིས་ཤིག། དེ་ནས་སྟོང་གསུམ་གྱི་བདག་པོ་ཚངས་པ་ཆེན་པོ་མི་མཇེད་ཀྱི་བདག་པོ་དེ་ཡིད་རབ་ཏུ་དགའ་ནས། ཚངས་རིས་ཀྱི་ལྷ་ཐམས་ཅད་ལ་སྨྲས་པ། གྲོགས་པོ་དག། བསྐལ་པ་བརྒྱ་སྟོང་མང་པོར་བརྟུལ་ཞུགས་དང་དཀའ་ཐུབ་བསགས་པ། སྐྱེས་བུ་ཆེན་པོ་དམ་པ་
228a
༄#། །དེ་བྱང་ཆུབ་ཀྱི་སྙིང་པོ་ག་ལ་བ་དེར་བཞུད་ཀྱི། དེ་ལ་ཁྱོད་ཀྱིས་བཀོད་པ་ཆེན་པོ་རྣམས་ཀྱིས་སྟོང་གསུམ་གྱི་སྟོང་ཆེན་པོ་ཐམས་ཅད་བརྒྱན་པར་གྱིས་ཤིག། དེ་ནས་ཚངས་བ་ཆེན་པོ་མི་མཇེད་ཀྱི་བདག་པོས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སེམས་ཅན་རྣམ་དག་བརྟུལ་ཞུགས་ཆོས་ངེས་པ། །ལྷར་བཅས་འཇིག་རྟེན་དག་ལ་ཕན་བཞེད་པ། །ལྷ་དང་མི་ཡི་མཆོད་པ་ལྷ་ཡི་ལྷ། །ཐུབ་པ་ཆེན་པོ་བྱང་ཆུབ་སྙིང་པོར་གཤེགས། །བདེ་དང་བཅས་པའི་བདུད་ནི་གདུལ་བ་དང ། །ཐམས་ཅད་མཁྱེན་པའི་ཡེ་ཤེས་འཚང་རྒྱ་དང ། །རྫོགས་པའི་སངས་རྒྱས་ཆོས་རྣམས་ཡོངས་བཀང་དང ། །དམ་པའི་ཆོས་ཀྱི་འཁོར་ལོ་བསྐོར་བ་དང ། །མཁས་པ་སེངྒེའི་སྒྲ་ཆེན་བསྒྲགས་པ་དང ། །སེམས་ཅན་ཐམས་ཅད་ཚིམ་པར་བྱ་བ་དང ། དམ་པའི་ཆོས་མིག་ཡོངས་སུ་སྦྱང་བའི་ཕྱིར། །འདྲེན་པ་བྱང་ཆུབ་སྙིང་པོར་ཉེ་བར་གཤེགས། །ཕས་ཀྱི་རྒོལ་བ་རྣམས་ནི་ཚར་བཅད་དང ། །སྔོན་གྱི་དམ་བཅས་ཡོངས་སུ་བསྐང་བ་དང ། །རྫོགས་སངས་རྒྱས་ཀྱི་མཛད་པ་བསྟན་པའི་ཕྱིར། །འདྲེན་པ་བྱང་ཆུབ་སྙིང་པོར་ཉེ་བར་གཤེགས། །ལེགས་པར་ཐམས་ཅད་ལྷན་ཅིག་འདུག་ནས་ནི། །ས་ཡི་གཞི་ནི་ལེགས་པར་བརྒྱན་པར་བྱ། །སྟོང་གསུམ་བརྒྱན་པར་གྱུར་ལ་ལྟོས་ཤིག་ཀྱེ། །འདོད་པའི་ཁམས་ཀྱང་བརྒྱན་པར་གྱུར་ལ་ལྟོས། །འདོད་པའི་ཁམས་ནི་ཇི་ལྟར་བརྒྱན་པ་བཞིན། །དེ་ལྟར་གཟུགས་
228b
ཀྱི་ཁམས་ཀྱང་བརྒྱན་པར་བྱ། །ཚངས་པ་རྣམས་ནི་སེམས་དང་ལེགས་སོ་ཞེས། །རབ་ཏུ་དགའ་ནས་སྟོང་གསུམ་བརྒྱན་པར་འགྱུར། །ཇི་ལྟར་འདོད་པའི་ཁམས་ན་བཀོད་སྣང་བ། །དེ་བས་ལྷག་པའི་མཆོད་པ་དེ་དག་བསྟན། །མེ་ཏོག་རྣམས་ཀྱིས་བཀང་ཞིང་སྤོས་ཀྱིས་བཀང ། །རིན་ཆེན་རྣམས་ཀྱིས་མཆོད་ཅིང་སིལ་སྙན་བསྒྲགས། །ཚངས་པ་ལ་སོགས་འོག་མིན་ལྷ་ཡི་རྣམས། །རབ་ཏུ་དགའ་ནས་སྟོང་གསུམ་ཐམས་ཅད་ཀྱང ། །དགའ་བར་འགྱུར་དང་ཕྱག་བྱའི་འོས་སུ་བྱས། །རང་རང་གནས་ཀྱི་གཞི་ཡང་བཀོད་པ་བྱས། །ལྷ་རྣམས་ཀྱིས་ནི་གོང་ནས་གོང་དུ་ཡང ། །ལྷག་པ་ལྷག་པའི་རྒྱན་རྣམས་རབ་ཏུ་བསྟན། །ལྷ་ཡི་བུ་མོ་བྱེ་བ་དྲུག་ཅུ་བརྒྱས། །བྱང་ཆུབ་རྡོ་རྗེ་གདན་ནི་རྒྱན་པར་བྱེད། །སྤོས་ཆུ་ཡིས་ནི་ཀུན་དུ་ཆག་ཆག་འདེབས། །མེ་ཏོག་སྣ་ཚོགས་དང་ཀྱང་འཐོར་པར་བྱེད། །ས་གཞི་དག་ལས་རིན་ཆེན་རྣམས་ཀྱང་བཀྲམ། །བྱང་ཆུབ་སྙིང་པོར་བརྒྱན་རྣམས་རབ་ཏུ་བསྟན། །ཐམས་ཅད་ཚིག་གིས་བརྗོད་པར་མི་ནུས་པ། །དེ་སྙེད་ཚད་ཀྱི་བཀོད་པ་འདིར་བྱས་གྱུར། །ཞི་བའི་བློ་གྲོས། བྱང་ཆུབ་སེམས་དཔའ་དེ་བྱང་ཆུབ་ཀྱི་སྙིང་པོར་འགྲོ་བ་ན་སྟོང་གི་དབང་པོ་ཚངས་པ་ཆེན་པོ་མི་མཇེད་ཀྱི་བདག་པོས་ཚངས་རིས་ཀྱི་ལྷ་ཐམས་ཅད་ལ་སྨྲས་པ། གྲོགས་པོ་དག། བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་བརྟུལ་ཞུགས་དང ། དཀའ་ཐུབ་རྣམས་ཀྱི་སྤྱོད་པ་སྤྱད་པ་སེམས་ཅན་གྱི་མཆོག་སྐྱེས་བུ་ཆེན་པོ་འདི་ལ་བྱང་ཆུབ་ཀྱི་སྙིང་པོར་
229a
༄#། །བཞུད་ཀྱི། དེ་ལ་ཁྱེད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་བཀོད་པ་ཆེན་པོ་རྣམས་ཀྱིས་བརྒྱན་པ་གྱིས་ཤིག། དེ་ནས་མི་མཇེད་ཀྱི་བདག་པོ་ཚངས་པས་ཚངས་རིས་ཀྱི་ལྷའི་བུ་རྣམས་ལ་ཚིགས་སུ་བཅད་པ་འདི་དག་སྨྲས་སོ། །སེམས་ཅན་རྣམ་དག་བརྟུལ་ཞུགས་ཆོས་ངེས་པ། །ཕན་བཞེད་འཇིག་རྟེན་དོན་མཛད་བདག་ཉིད་ཆེ། །དེ་ནི་བློ་ངན་སྡེར་བཅས་བདུད་འདུལ་དུ། །ཤིང་གི་དབང་པོ་བྱང་ཆུབ་དྲུང་དུ་བཞུད། །ཐམས་ཅད་འདུས་ཏེ་ལྷན་ཅིག་འདོང་པར་བྱ། །སྟོང་གསུམ་མི་མཇེད་འདི་དག་བརྒྱན་པར་བྱ། །འདི་ནི་ལྷར་བཅས་འཇིག་རྟེན་ཆོས་ཀྱི་དབང ། །ཡང་དག་མཆོད་ན་བསོད་ནམས་མཐའ་ཡས་གྱུར། །ཚངས་པ་དེ་དག་ཚིག་མཆོག་དེ་ཐོས་ནས། །སྟོང་གསུམ་ཐམས་ཅད་མ་ལུས་རྒྱན་བྱེད་ཅིང ། །ལེགས་པར་ཕྱགས་ཏེ་མེ་ཏོག་རྒྱལ་མཚན་བརྒྱན། །འཇིག་རྟེན་ཁམས་ནི་རིན་ཆེན་རང་བཞིན་སྤྲུལ། །ཉི་མ་ཟླ་བའི་འོད་ཀྱི་བཀོད་པ་དང ། །བྱེ་བའི་གདུགས་རྣམས་ནམ་མཁར་དེ་དག་སྦྲུལ། །སཱ་ལའི་ཤིང་རྣམས་མེ་ཏོག་མཆོག་སྤྲས་པ། །དགའ་ཚལ་ལྟ་བུ་དེ་དག་རྣམས་ཀྱིས་སྤྲུལ། །ལམ་གང་ནས་ནི་དྲང་སྲོང་ཆེ་གཤེགས་པ། །དེ་ནི་ཤིང་རྟ་བདུན་བསྟན་ཚད་དུ་སྤྲུལ། །རིན་ཆེན་གཞི་ལ་གསེར་གྱི་པདྨ་བཀྲམ། །ཁ་ཁྱེར་རིམ་པ་བདུན་གྱིས་ཡོངས་སུ་བསྐོར། །བརྒྱ་བྱིན་གྱིས་དེར་བཀོད་པ་གང་བྱས་པ། །དེ་དག་ལྷ་མི་རྣམས་
229b
ཀྱི་སྔོན་མ་མཐོང ། །སུམ་ཅུ་གསུམ་དབང་རྣམ་རྒྱལ་ཁང་འདྲ་བར། །དེ་ལྟར་གླིང་བཞི་དག་ནི་མཛེས་པར་བརྒྱན། །འཐབ་བྲལ་ལྷ་དང་དགའ་ལྡན་འཕྲུལ་དགའ་དང ། །གཞན་འཕྲུལ་བ་དང་འོག་མིན་ལྷ་ཡི་རྣམས། །སྟོབས་དང་ཤུགས་འཆང་ཐམས་ཅད་བརྩོན་པར་ནི། །བྱང་ཆུབ་སྙིང་པོ་དམ་པ་རྒྱན་པར་བྱེད། །བྱང་ཆུབ་སྙིང་པོར་གཤེགས་པའི་བར་དེར་ནི། །འདོད་པའི་ཁམས་འདིར་དཀོན་མཆོག་གང་ཡོད་པ། །ལྷའམ་ཀླུ་འམ་མི་འམ་ཅི་རྣམས་ཀྱི། །དེ་དག་ཐམས་ཅད་སྐད་ཅིག་དེ་ལ་བསྟན། །ཕྱོགས་བཞི་དག་ན་ལྷ་མི་བྱེ་བ་ལྷགས། །མེ་ཏོག་རྣམས་དང་སྤོས་དང་བྱུག་པ་ཡིས། །བྱང་ཆུབ་ཤིང་ནི་མངོན་དུ་རྒྱན་པར་བྱེད། །སྤོས་ཆུ་ཡིས་ནི་ཀུན་དུ་ཆག་ཆག་འདེབས། །བྱང་ཆུབ་ཤིང་ནི་ལེགས་པར་བརྒྱན་བྱས་ཏེ། །སུམ་ཅུ་རྩ་གསུམ་ལྷ་ཡི་ཡོངས་འདུ་འདྲ། །ལྷ་རྣམས་བྱེ་བ་དག་གིས་མཛེས་སྤྲུལ་པ། །བཀོད་པ་དེ་དག་ཚིག་གིས་བརྗོད་མི་ནུས། །ཞི་བའི་བློ་གྲོས། དེ་ནས་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོར་འགྲོ་བ་ན་རྐང་པའི་མཐིལ་འཁོར་ལོ་རྩིབས་སྟོང་པ་གཉིས་ལས་འདི་འདྲ་བའི་འོད་བྱུང་སྟེ། འོང་དེས་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་པའི་སེམས་ཅན་ཐམས་ཅད་ཀྱི་སྡུག་བསྔལ་གྱི་ཚོར་བ་རྣམས་རྒྱུན་བཅད་དོ། །ཀླུའི་རྒྱལ་པོ་ནག་པོའི་གནས་ཀྱང་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་ཀླུའི་བདག་པོ་ནག་པོས་བྱང་ཆུབ་སེམས་དཔའི་
230a
༄#། །འོད་མཐོང་ནས། ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། ཐམས་ཅད་དང་ལྡན་པའི་རང་གི་འཁོར་ལ་ཚིགས་སུ་བཅད་པས་སྨྲས་པ། གསེར་གྱི་ཁ་དོག་འདྲ་བའི་འོད། །གནས་འདིར་ལྷང་དེར་གྱུར་པས་ན། །ཁོ་བོའི་ལུས་འདི་རབ་ཏུ་ཚིམ། །སེམས་ཀྱང་རབ་ཏུ་དགའ་བར་འགྱུར། །ཁོ་བོས་སྔོན་གྱི་སངས་རྒྱས་ཀྱི། །ལྟས་བཟང་མཐོང་བ་ལྟར་ན་ནི། །གདོན་མི་ཟ་བར་དཔའ་ཆེན་པོ། །སངས་རྒྱས་འཇིག་རྟེན་འབྱུང་བར་འགྱུར། །ལེགས་པར་ཕྱེ་མ་ཕྲེང་བ་དང ། །མེ་ཏོག་སྤོས་དང་བྱུག་པ་དང ། །གསེར་དང་ནོར་བུ་མུ་ཏིག་དང ། །དུད་དང་རྒྱན་ཕྲེང་མཆོག་རྣམས་དང ། །རོལ་མོ་སིལ་སྙན་རྣམས་ཐོགས་ལ། །གདུགས་དང་རྒྱལ་མཚན་ཐོགས་ནས་ནི། །བ་དན་དག་ཀྱང་བསྒྲེངས་བྱས་ཏེ། །སྟོན་པ་ལ་ནི་མཆོད་པར་བྱ། །ཀླུ་ཡི་རྒྱལ་པོའི་གནས་འདི་ལ། །བཟང་པོའི་རྒྱན་རྣམས་ཇི་སྙེད་པ། །དེ་དག་རབ་ཏུ་དགའ་བ་ཡིས། །སངས་རྒྱས་ལ་ནི་རིམ་གྲོ་བྱ། །དེ་ནས་ཀླུའི་རྒྱལ་པོ་ནག་པོ་ཆུང་མའི་འཁོར་དང་བཅས། གཉེན་གྱི་འཁོར་གྱི་འཁོར་དང་བཅས་ཏེ། མེ་ཏོག་དང ། སྤོས་དང ། ཕྲེང་པ་དང ། བྱུག་པ་དང ། ཕྱེ་མ་དང ། གོས་དང ། གདུགས་དང ། རྒྱལ་མཚན་དང ། བ་དན་ཐོགས་པ་དང ། སིལ་སྙན་དང ། ཕེག་རྡོབ་པ་དང ། རོལ་མོའི་སྒྲ་འབྱིན་པ་རྣམས་དང ། ལྷན་ཅིག་ཏུ་རང་གི་གནས་ནས་བྱུང་སྟེ། སྤོས་ཆུས་གང་བའི་སྤྲིན་མངོན་པར་
230b
སྤྲུལ་ནས་སྤོས་ཆུའི་ཆར་པ་ནི་འབེབས། ཀླུའི་མེ་ཏོག་དང ། མེ་ཏོག་གི་ཆར་ནི་འབེབས་ཤིང ། ཀླུའི་མཐུ་ཆེན་པོ་དང ། ཀླུའི་རྫུ་འཕྲུལ་ཆེན་པོས་བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། འཁོར་དང་བཅས་པས་བྱང་ཆུབ་སེམས་དཔའ་ལ་མཆོད་པ་བྱས་ཏེ། ཞབས་ལ་ཕྱག་འཚལ་ནས། རོལ་མོ་དང ། སིལ་སྙན་ལེན་པ་དང་བཅས་པས་བྱང་ཆུབ་སེམས་དཔའ་ལ་བསྐོར་བ་བྱས་ཏེ། ཕྱོགས་གཅིག་ཏུ་འདུག་ནས་མངོན་པར་བསྟོད་དོ། །དེ་ལ་འདི་སྐད་ཅེས་བྱ་སྟེ། །སྐྱེས་བུ་མཆོག་གི་འོད་འདི་རབ་བཀྱེ་བས། །སངས་རྒྱས་ཞིང་འདིར་ཐམས་ཅད་སྣང་བར་འགྱུར།། སྐད་ཅིག་དེ་ལ་ངན་སོང་གསུམ་ཡང་ཞི། །ནག་པོའི་གནས་ཀྱང་འོད་ཀྱིས་ཁྱབ་པར་གྱུར། །ཀླུ་ཡི་རྒྱལ་པོ་དེ་ཡིས་འོད་མཐོང་ནས། །རབ་ཏུ་དགའ་སྟེ་དེ་ཚེ་ཚིག་སྨྲས་པ། །གསེར་གྱི་མདོག་གི་འོད་ཀྱིས་ཁྱབ་པར་གྱུར། །དེ་རིང་སངས་རྒྱས་འབྱུང་དུ་གདོན་མི་ཟ། །ཀླུ་མོ་ཁྲག་ཁྲིག་དག་གིས་མདུན་བདར་ཏེ། །གདུགས་དང་མེ་ཏོག་གོས་མཆོག་ཐོགས་ནས་སུ། །བྱང་ཆུབ་སེམས་དཔའ་དེ་ནི་ག་ལར་སོང ། །ཕྱག་བྱས་མཆོད་པ་བྱས་ནས་གུས་བཅས་འདུག་།ས་ཀུན་རིན་ཆེན་མེ་ཏོག་རྣམས་ཀྱིས་གང་ཞིང་དེ་ཚེ་མཛེས་པར་བརྒྱན། །ཤིང་མཆོག་ཀུན་དང་སྨན་དང་རྩཝ་རྣམས་དེ་དག་བྱང་ཆུབ་ཤིང་ལ་འདུད། །འདི་ན་ཡོད་པའི་ཆུ་ཀླུང་ཐམས་ཅད་མི་འབབས་མཁའ་ལ་རླུང་མི་ལྡང ། །དེ་རིང་བདུད་བཏུལ་ནས་ནི་འཇིག་རྟེན་ཐམས་ཅད་ཟིལ་གྱིས་གནོན་
231a
༄#། །པར་འགྱུར། །སྲིད་པ་གསུམ་ན་བརྒྱ་བྱིན་ཚངས་པ་ཉི་མ་ཟླ་བའི་འོད་མི་སྣང ། །མཚུངས་མེད་ཁྱོད་ཀྱི་འོད་ཀྱིས་རེག་ནས་དེ་རིང་ངན་སོང་གསུམ་པོ་ཞི། །བདག་གི་གནས་སུ་འོད་བྱུང་ནས་ནི་སངས་རྒྱས་འབྱུང་བར་སྟོན་པར་བྱེད། །དེ་རིང་རྒྱལ་བ་བྱོན་པར་འགྱུར་གྱི་དགྱེས་མཛོད་རངས་ཤིང་ཚིམ་པར་བསྐྱེད། །བུམ་པ་གང་བ་འདི་དག་ནམ་མཁར་སོང་སྟེ་ཁྱོད་ལ་བསྐོར་བ་དང ། །རྩཝ་ཤའི་ཚོགས་རྣམས་འདི་དག་ནམ་མཁར་སོང་སྟེ་ཁྱོད་ལ་བསྐོར་བ་དང ། །ལྷར་བཅས་མིར་བཅས་འཇིག་རྟེན་དག་ཀྱང་མཆོད་པར་བརྩོན་པར་གནས་པ་ལ། །དེ་རིང་འགྲོ་བའི་སྦྱིན་གནས་འགྱུར་ཞིང་ཤེས་རབ་འདོད་པའི་ལམ་དུ་འགྱུར། །བདེ་བར་གཤེགས་པ་བདག་གིས་རྙེད་པ་ལེགས་རྙེད་གཟི་བརྗིད་ཚེ་ལྡན་པ། །མི་མཆོག་འཁོར་བ་འཇིག་དང་དེ་བཞིན་གཤེར་ཐུབ་བཅས་ནི་བྱ་བ་མཆོད། །མི་མཆོག་འོད་སྲུང་དང་ནི་ཤཱཀྱའི་མཆོག་ཁྱོད་དེ་རིང་བདག་གིས་མཆོད། །བདག་ནི་སངས་རྒྱས་དཔའ་མཐོང་མ་བྲལ་བྱང་ཆུབ་དམ་པ་དོན་དུ་གཉེར། །ས་ནི་གྲུམ་ཞིང་རི་རྣམས་གཡོས་ལ་འགྲོ་བ་ཐམས་ཅད་མེད་གྱུར་སྲིད། །སུ་ཞིག་བྱང་ཆུབ་ཏུ་ནི་སེམས་ངེས་ལྷག་པའི་བསམ་པས་འཕགས་གྱུར་པ།། དེ་ནི་དེ་རིང་སྟོབས་བཅུ་ལྡན་པར་མི་འགྱུར་གནས་ནི་མཆིས་མ་ལགས། །སེངྒེའི་སྒྲ་བསྒྲགས་ཚངས་པའི་དབྱངས་ཅན་བཅོམ་ལྡན་འདྲེན་པ་གསུང་ཕྱུང་ཞིག། ཞི་བའི་བློ་གྲོས། དེ་
231b
ནས་ཀླུའི་རྒྱལ་པོ་ནག་པོའི་ཆུང་མ་དམ་པ་གསེར་འོད་ཅེས་བྱ་བ་དེ་ཀླུའི་བུ་མོ་རབ་ཏུ་མང་པོས་བསྐོར་ཅིང་མདུན་དུ་བདར་ནས་གདུགས་སྣ་ཚོགས་ཐོགས་པ་དང ། རས་བཅོས་བུ་སྣ་ཚོགས་ཐོགས་པ་དང ། མུ་ཏིག་གི་རྒྱན་ཕྲེང་སྣ་ཚོགས་ཐོགས་པ་དང ། ནོར་བུ་རིན་པོ་ཆེ་སྣ་ཚོགས་ཐོགས་པ་དང ། ལྷ་དང་མིའི་ཕྲེང་བ་བརྒྱུས་པ་ཐོགས་པ་དང ། པོག་པོར་སྣ་ཚོགས་ཐོགས་པ་དང ། སིལ་སྙན་དང་རོལ་མོའི་སྒྲ་སྣ་ཚོགས་ལེན་པ་རྣམས་དང་ལྷན་ཅིག་ཏུ་རིན་པོ་ཆེ་མེ་ཏོག་སྣ་ཚོགས་ཀྱིས། བྱང་ཆུབ་སེམས་དཔའ་འོད་བ་ལ་མཐོར་ཞིང་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འཁྲུལ་པ་མི་མངའ་མི་དངང་མི་སྙེངས་བག་མི་ཚ། །མི་ཞུམ་མི་དམན་རབ་དགྱེས་མི་ཆགས་མི་མངའ་བ། །སྡང་དང་རྨོངས་དང་བརྐམ་པ་མི་མངའ་ཆགས་བྲལ་བ། །རྣམ་གྲོལ་དྲང་སྲོང་ཆེན་པོ་ཁྱེད་ལ་ཕྱག་འཚལ་ལོ། །དོགས་བྲལ་ཟུག་རྡུ་བྲལ་ཞིང་དུལ་ལ་མ་རིག་སེལ། །འགྲོ་བ་ཐམས་ཅད་སྡུག་བསྔལ་རྣམས་ལས་རབ་ཏུ་འགྲེལ། །གནས་དང་སྐྱབས་དང་གླིང་མ་མཆིས་པ་མཁྱེན་ནས་ནི། །གནས་ཁྱོད་སྐྱབས་ཁྱོད་འཇིག་རྟེན་གསུམ་པོ་དག་ཏུ་བྱུང ། །ཇི་ལྟར་ལྷ་ཡི་ཚོགས་རྣམས་དད་ཅིང་རབ་དགའ་སྟེ། །མཁའ་ལས་མེ་ཏོག་ཆར་ཆེན་རབ་ཏུ་འབེབས་པ་དང ། །ཇི་ལྟར་གོས་ཆེན་དག་ཀྱང་འདོར་བ་བགྱིད་ལགས་ན། །དྲང་སྲོང་ཆེན་པོ་མགོན་པོ་རྒྱལ་བར་དེང་འགྱུར་སྙམ། །དགྱེས་བསྐྱེད་ཤིང་དབང་དྲུང་གཤེགས་མི་སྙེངས་བཞུགས་མཛོད་
232a
༄#། །ལ། །བདུད་སྡེ་ཕམ་པར་མཛད་དེ་ཉོན་མོངས་དྲ་བ་དྲོལ། །ཇི་ལྟར་སྔོན་གྱི་རྒྱལ་དབང་དེ་དག་སངས་རྒྱས་པ། །དེ་ལྟར་བྱང་ཆུབ་རབ་མཆོག་ཞི་བ་འཚང་རྒྱར་མཛོད། ། གང་གི་ཆེད་དུ་ཁྱེད་ཀྱིས་བསྐལ་པ་བྱེ་མང་དུ། །འགྲོ་བ་དེ་དག་དགྲོལ་ཕྱིར་དཀའ་བ་རྣམས་ཀྱང་སྤྱད། །ཁྱོད་ཀྱི་དགོངས་པ་དེ་རྫོགས་ཤིང་དབང་དྲུང་གཤེགས་ཏེ། །བྱང་ཆུབ་མཆོག་ལ་རེག།་པར་མཛད་པའི་དུས་འདི་ལགས།། །།བམ་པོ་དྲུག་པ། ཞི་བའི་བློ་གྲོས། དེ་ནས་བྱང་ཆུབ་སེམས་དཔའ་ཀླུའི་རྒྱལ་པོ་ནག་པོའི་གནས་ནས་བྱུང་ནས་བྱང་ཆུབ་སྙིང་པོ་ག་ལ་བ་དེར་སོང་སྟེ་འགྲོ་བ་ན། ལམ་གྱི་གཡས་རོལ་ན་རྩཝ་འཚོང་བཀྲ་ཤིས་པ་ཞེས་བྱ་བ་རྩཝ་བརྡ་ཞིང་འདུག་བ་དེས་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་མངོན་དུ་ཕྱོགས་པར་མཐོང་སྟེ།་ལྷ་རྣམས་ཀྱིས་བསྐུལ་ནས་རྩཝ་འཇམ་བ་ཤིན་ཏུ་གཞོན་པ། ཉམས་དགའ་བ། ཡིད་དགའ་བར་བྱེད་པ། རྨ་བྱའི་མགྲིན་པ་ལྟ་བུ་དགའ་བ་འཁྱིལ་བ། གཡས་སུ་འཁྱིལ་བ། ཁ་དོག་དང་ལྡན་པ་དང ། དྲི་དང་ལྡན་པ་དང ། ཀ་ཙ་ལིན་དི་ཀ་ལྟར་རེག་ན་བདེ་བ་སྤར་གང་བླངས་ཏེ། བྱང་ཆུབ་སེམས་དཔའ་ག་ལ་བ་དེར་སོང་ནས་ཕྱིན་པ་དང ། རྩཝ་སྤར་གང་བྱང་ཆུབ་སེམས་དཔའ་ལ་བྱིན་ཏེ། བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཞི་བའི་བློ་གྲོས། ཁྱོད་རྩཝ་འཚོང་བཀྲ་ཤིས་པ་མི་སྔ་མི་འཕྱི་
232b
བར་བྱང་ཆུབ་ཏུ་སེམས་བསྐྱེད་ཅིང་རྩཝ་ཡང་བྱིན་ནོ་སྙམ་དུ་སེམས་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། །དེ་ནི་རྩཝ་འཚོང་བཀྲ་ཤིས་པའི་སྔོན་གྱི་སྨོན་ལམ་ཡིན་ཏེ། ཇི་ལྟར་ཁོ་བོ་བསྐལ་པ་བཟང་པོའི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་སྙིང་པོར་ཁྲི་ཤོམ་པ་བཞིན་ནོ། །དེ་ཅིའི་ཕྱིར་ཞེ་ན། ཞི་བའི་བློ་གྲོས། ཁོ་བོས་མངོན་པར་ཤེས་ཏེ་འདས་པའི་དུས་ན་བསྐལ་པ་བཟང་པོ་འདིའི་སྔ་རོལ་བསྐལ་པ་དགུ་བཅུ་རྩ་གཅིག་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་རྣམ་པར་གཟིགས་ཞེས་བྱ་བ་འཇིག་རྟེན་དུ་བྱུང་སྟེ། དེའི་གསུང་རབ་ལ་དགེ་སློང་སྟོང་ཐམས་པ་ཚངས་པར་སྤྱོད་པ་སྤྱད་ནས། བཅོམ་ལྡན་འདས་དེས་ཁྱེད་ཅག་བསྐལ་པ་བཟང་པོ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་དེ་དག་ལུང་བསྟན་ཏོ། །དེའི་ཚེ་ན་ཁྱིམ་བདག་བློ་གྲོས་ལྡན་ཞེས་བྱ་བ་ཞིག་འཁོར་དེ་ཉི་དུ་འདུས་པར་གྱུར་ཏེ་འདུག་པ་དེས་བྱང་ཆུབ་སེམས་དཔའ་དེ་དག་ལུང་བསྟན་པ་དེ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། འདི་སྐད་དུ། བསྐལ་པ་བཟང་པོ་པའི་བྱང་ཆུབ་སེམས་དཔའ་དེ་དག་བྱང་ཆུབ་
233a
༄#། །ཀྱི་སྙིང་པོར་འགྲོ་བ་ན་སེངྒེའི་ཁྲི་བྱི་དོར་བྱའོ་ཞེས་སྨོན་ལམ་བཏབ་བོ། །ཞི་བའི་བློ་གྲོས། དེའི་ཚེ་དེའི་དུས་ན་ཁྱིམ་བདག་བློ་གྲོས་ལྡན་ཞེས་བྱ་བར་གྱུར་པ་དེ་གཞན་ཞིག་ཡན་སྙམ་དུ་ཁྱོད་དོགས་ཤིང་ཐེ་ཚོམ་ཟའམ། ཡིད་གཉིས་སུ་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྩཝ་འཚོང་བཀྲ་ཤིས་པ་འདི་དེའི་ཚེ་དེའི་དུས་ན་ཁྱིམ་བདག་བློ་གྲོས་ལྡན་ཞེས་བྱ་བར་གྱུར་ཏོ། །ཞི་བའི་བློ་གྲོས། ཁྱོད་ཀྱིས་རྣམ་གྲངས་འདིས་ཀྱང་རྩཝ་འཚོང་བཀྲ་ཤིས་པའི་སྔོན་གྱི་སྨོན་ལམ་འདི་ལྟར་རིག་པར་བྱ་སྟེ། སེམས་ཅན་རྣམས་ཀྱི་མོས་པ་ཇི་ལྟ་བ་དང ། དབང་པོ་ཡོངས་སུ་སྨིན་པ་ཇི་ལྟ་བ་བཞིན་དུ་དེ་ཁ་ཅིག་ལ་ནི་རྩཝ་སྤར་གང་འབུལ་བར་འགྱུར། ཁ་ཅིག་ལ་ནི་རིན་པོ་ཆེ་བཀོད་པའི་སེངྒེའི་ཁྲི་འབུལ་བར་འགྱུར་རོ། །ཞི་བའི་བློ་གྲོས། དེ་ནས་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོའི་ཤིང་དྲུང་དུ་སོང་བ་དང ། བྱང་ཆུབ་ཀྱི་སྙིང་པོའི་ལྷ་རྣམས་ལྷའི་བུ་མོ་མེ་ཏོག་གི་སྐོན་བུ་ཐོགས་པ་དང ། སྤོས་དང ། ཕྱེ་མའི་ཕུར་མ་ཐོགས་པ་ཁྲི་དང་ལྷན་ཅིག་ཏུ། བྱང་ཆུབ་ཀྱི་སྙིང་པོ་ག་ལ་བ་དེར་སོང་སྟེ་ཕྱིན་པ་དང ། བྱང་ཆུབ་སེམས་དཔའི་རྐང་པ་ལ་མགོ་བོས་ཕྱག་འཚལ་ནས་ཇི་ལྟར་ཐོགས་པའི་མེ་ཏོག་དང ། ཕྱེ་མ་དང ། སྤོས་དང ། ཕྲེང་བ་དང ། བྱུག་པ་རྣམས་ཀྱིས་བྱང་ཆུབ་སེམས་དཔའ་ལ་གཏོར་ཏེ། ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །བདག་ཉིད་ཆེན་པོ་མི་སྙེངས་དཔའ་ཞིང་
233b
དུལ་ཞི་བ། །དགྱེས་ཤིང་ཚིམ་པ་བརྟན་པ་ཁྱོད་ལ་ཕྱག་འཚལ་ལོ། །འབར་བ་ཉམས་དགྱེས་ཁ་ན་མ་ཐོ་མི་མངའ་བ། །སྐྱོན་ལས་གྲོལ་བའི་སྟོན་པ་ཁྱོད་ལ་ཕྱག་འཚལ་ལོ། །སྡུག་བསྔལ་ཆེན་པོར་བྱིང་བ་མགོན་མེད་འགྲོ་འདི་ལ། །ཁྱོད་ནི་བདེ་བ་རབ་ཏུ་སྩོལ་བའི་མགོན་པོ་གཅིག་།འགྲོ་བའི་ཉོན་མོངས་ནད་རྣམས་སྤང་བའི་ཕྱིར་ཕྱུང་བ། །སྨན་པའི་རྒྱལ་ཆེན་གྲགས་ལྡན་ཁྱོད་ལ་ཕྱག་འཚལ་ལོ། །ཇི་ལྟར་ལྷ་ཚོགས་དད་ཅིང་རབ་ཏུ་དགའ་བ་ཡིས། །ལྷ་ཡི་མེ་ཏོག་ཆར་པ་རབ་ཏུ་འབེབས་པ་ལས། །བདུད་དགྲ་སྡེ་དང་བཅས་པ་བྱམས་པས་བཅོམ་ནས་ནི། །ཁྱོད་ཀྱིས་བྱང་ཆུབ་དམ་པ་དེ་རིང་བརྙེས་སུ་ངེས། །ཤིང་དབང་དྲུང་དུ་གཤེགས་ཏེ་ཁྲི་དེར་བཞུགས་ནས་སུ། །བདུད་བཏུལ་ནས་ནི་མུན་པ་ཐམས་ཅད་གཞོམ་པར་མཛོད། །ཇི་ལྟར་སྔོན་གྱི་ཐུབ་དབང་དེ་དག་སངས་རྒྱས་པ། །དེ་ལྟར་བྱང་ཆུབ་ཞི་བ་མཆོག་རབ་འཚང་རྒྱར་མཛོད། །ཇི་ལྟར་ཁྱོད་ཀྱིས་འགྲོ་བ་སྒྲོལ་བའི་དོན་དུ་ནི། །བསྐལ་པ་བྱེ་བར་དཀའ་མཛད་རྣམ་པར་དག་འགྱུར་བ། །དྲང་སྲོང་ཆེན་པོ་ཁྱོད་ཀྱི་དགོངས་མཆོག་དེང་རྫོགས་ཀྱི། །ཤིང་དབང་དྲུང་དུ་བཞུགས་ཏེ་བྱང་ཆུབ་འཚང་རྒྱར་མཛོད། །ཞི་བའི་བློ་གྲོས། དེ་ནས་བྱང་ཆུབ་སེམས་དཔའ་རྩཝ་སྤར་གང་ཁྱེར་ནས་བྱང་ཆུབ་ཀྱི་སྙིང་པོ་ག་ལ་བ་དེར་སོང་སྟེ་ཕྱིན་པ་དང ། བྱང་ཆུབ་ཀྱི་ཤིང་དྲུང་དུ་བདག་ཉིད་ཀྱིས་རྩཝའི་གདིང་བ་བཏིང་ནས་བྱང་ཆུབ་ཀྱི་ཤིང་ལ་ཕྱག་འཚལ་ཏེ་ལན་བདུན་བསྐོར་བ་བྱས་སོ། །ཞི་བའི་བློ་གྲོས།
234a
༄#། །བྱང་ཆུབ་སེམས་དཔའ་རྩཝའི་གདིང་བ་བཏིང་མ་ཐག་ཏུ། །དེ་ནས་ལྷའི་བུ་བརྒྱད་ཁྲི་བཞི་སྟོང་གིས་སེངྒེའི་ཁྲི་སྣ་ཚོགས་བལྟ་ན་སྡུག་པ། མཐོ་བ་ཡངས་པ། རིན་པོ་ཆེ་ཐམས་ཅད་ཀྱིས་སྤྲས་པ། རིན་པོ་ཆེའི་ཁ་ཁྱེར་ཅན། རིན་པོ་ཆེའི་དྲ་བས་གཡོགས་པ། རིན་པོ་ཆེའི་དྲིལ་བུ་གཡེར་ཀའི་དྲ་བས་བྲེས་པ། མུ་ཏེག་གི་རྒྱན་ཕྲེང་རབ་ཏུ་དཔྱངས་པ། རས་བཅོས་བུ་བརྒྱ་སྟོང་དུ་མ་བཏིང་བ་བརྒྱད་ཁྲི་བཞི་སྟོང་བྱང་ཆུབ་སེམས་དཔའི་ཆེད་དུ་བཤམས་སོ། །ཞི་བའི་བློ་གྲོས། དེ་ནས་བྱང་ཆུབ་སེམས་དཔས་སེངྒེའི་ཁྲི་བརྒྱད་ཁྲི་བཞི་སྟོང་པོ་དེ་དག་ཐམས་ཅད་ལ་བདག་ཉིད་འདུག་པས་ཀུན་ཏུ་བསྟན་པར་གྱུར་ཏོ། །ལྷའི་བུ་དེ་དག་གིས་ཀྱང་གཞན་དང་གཞན་དུ་མི་མཐོང་མི་ཤེས་ཏེ། ལྷའི་བུ་རེ་རེས་ཀྱང་འདི་ལྟར་བྱང་ཆུབ་སེམས་དཔའ་ནི་བདག་གི་སེངྒེའི་ཁྲི་ལ་བཞུགས་སོ། །བདག་གི་སེངྒེའི་ཁྲི་ལ་བཞུགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བར་ཤེས་ཏེ། དེ་དག་དགའ་བ་དང ། མཆོག་ཏུ་དགའ་བ་དེ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །བྱང་ཆུབ་ཀྱི་སྙིང་པོར་བཞུད་པའི་ལེའུ་ཞེས་བྱ་སྟེ་བཅུ་གཉིས་པའོ།། །།ཞི་བའི་བློ་གྲོས། བྱང་ཆུབ་སེམས་དཔའ་སེངྒེའི་ཁྲི་དེ་ལ་འདུག་མ་ཐག་ཏུ། དེ་ནས་སྨིན་མཚམས་ཀྱི་མཛོད་
234b
སྤུའི་བར་ནས་བདུད་བསྐུལ་བ་ཞེས་བྱ་བའི་འོད་བྱུང་སྟེ། འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་འཁོད་པའི་བདུད་བྱེ་བ་ཕྲག་བཞི་བརྒྱ་ལ་རེག་གོ། འོད་དེས་དེ་དག་ལ་རེག་མ་ཐག་ཏུ་རང་རང་གི་གནས་ན་འཁོད་བཞིན་དུ་སྤུ་ཟིང་ཞེས་བྱེད་དེ། རང་གི་བདུད་ཀྱི་གནས་ཚིག་ཅིང་མོག་མོག་པོར་གྱུར་པར་ཤེས་ནས་དེ་དག་འདི་སྙམ་དུ་སེམས་ཏེ། གང་གི་ཕྱིར་གནས་འདི་དག་མོག་མོག་པོར་གྱུར་པར་སྣང་བ་འདི་ལ་རྒྱུ་ནི་ཅི་ཞིག་ཡོད། རྐྱེན་ནི་ཅི་ཞིག་ཡོད། བྱང་ཆུབ་སེམས་དཔའ་མ་གཅིག་བྱང་ཆུབ་ཀྱི་སྙིང་པོར་འདུག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་གྲང་སྙམ་སྟེ། རྣམ་པར་བལྟས་པ་དང ། བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་པར་མཐོང་ངོ ། །དེ་ནས་བདུད་སྡིག་ཅན་དེ་དག་རང་རང་གི་གནས་ནས་མི་སྣང་བར་གྱུར་ནས་བདུད་རེ་རེ་ཡང་གནོད་སྦྱིན་ཁ་དོག་རྣམ་པ་མང་པོ་དང ། ཆ་བྱད་རྣམ་པ་མང་པོ་དང ། དབྱིབས་རྣམ་པ་མང་པོ་དང ། ཆུ་ཞེང་རྣམ་པ་མང་པོ་དང ། གཡོ་བ་རྣམ་པ་མང་པོ་དང ། མགོ་རྣམ་པ་མང་པོ་དང ། མཚོན་ཆ་རྣམ་པ་མང་པོ་དང ། རྒྱལ་མཚན་རྣམ་པ་མང་པོ་ཐོགས་པ་བྱེ་བ་ཁྲག་ཁྲིག་བརྒྱ་སྟོང་དག་གིས་བསྐོར་ཏེ་སྨྲ་བ་རྣམ་པ་མང་པོས་སྨྲ་ཞིང ། བདུད་ཀྱི་མཐུ་ཆེན་པོ་དང ། བདུད་ཀྱི་རྫུ་འཕྲུལ་ཆེན་པོས་བདུད་རེ་རེས་ཀྱང་བདུད་ཀྱི་འཁོར་གྱིས་རྒྱར་དཔག་ཚད་ཉི་ཁྲི་ཉི་ཁྲི་སྟེ།
235a
༄#། །ཁོ་ར་ཡུག་ཏུ་དཔག་ཚད་བརྒྱད་ཁྲི་བཞི་སྟོང་བཀང་ནས་བྱང་ཆུབ་ཀྱི་ཤིང་དྲུང་དུ་དོང་ངོ ། །ཞི་བའི་བློ་གྲོས། འཁོར་ཆེན་པོ་དེ་དག་དོང་མ་ཐག་ཏུ་དེ་ནས་དེའི་ཚེ་ཡིད་དུ་མི་འོང་བ། མཉན་པར་མི་འོས་པ། མི་སྙན་པ་ཨུ་དུག་ཅེས་བྱ་བ་དང ། པི་ཚིག་ཅེས་བྱ་བ་དང ། ཧུ་ལུ་ཧུ་ལུ་ཞེས་བྱ་བ་དང ། རྒྱོབ་ཅིག་།གཟུང་ཞིག་།སོད་ཅིག། ཆིངས་ཤིག་ཅེས་བྱ་བའི་སྒྲ་ཆེན་པོ་དེ་ལྟ་བུ་ཕྱུང་བར་གྱུར་ཏོ། །གལ་ཏེ་འདོད་ཆགས་དང་མ་བྲལ་བའི་སེམས་ཅན་རྣམས་ཀྱིས་སྒྲ་དེ་ཐོས་ལ། ཞི་བའི་བློ་གྲོས། གལ་ཏེ་བྱང་ཆུབ་སེམས་དཔས་སྒྲ་དེ་མི་གྲག་པར་མ་བྱས་ན་ནི། དེ་དག་ཁ་ནས་ཁྲག་དྲོན་མོ་སྐྱུག་ཅིང་འཆི་བའམ། ཤི་ལ་ཐུག་པའི་སྡུག་བསྔལ་རྙེད་པར་འགྱུར་རོ། །དེས་ན་ནི་བྱང་ཆུབ་སེམས་དཔའ་སྙིང་རྗེ་ཆེན་པོས་ནོན་པས་སེམས་ཅན་ལ་རྣམ་པར་འཚེ་བར་གྱུར་དུ་འོང་ཞེས་སྒྲ་དེ་མི་གྲག་པར་བྱས་པར་གྱུར་ཏོ། །ཞི་བའི་བློ་གྲོས། འདི་ཡང་བྱང་ཆུབ་སེམས་དཔའི་ཐབས་ལ་མཁས་པའི་ཡུལ་ཡིན་ནོ། །ཞི་བའི་བློ་གྲོས། སྒྲ་དེ་ལྟ་བུ་དེ་ཐོས་ཀྱང་བྱང་ཆུབ་སེམས་དཔའ་ནི་ཐ་ན་སྤུ་གཡོས་པར་ཡང་མ་གྱུར་ཏོ། །དེ་ཅིའི་ཕྱིར་ཞེ་ན། སྒྲ་འདི་དག་ཐམས་ཅད་བྲག་ཅ་དང་མཚུངས་པར་ལེགས་པར་རྟོགས་པའི་ཕྱིར་རོ། །ཞི་བའི་བློ་གྲོས། བྱང་ཆུབ་ཀྱི་བསྙེན་བཀུར་བའི་ལྷ་རྣམས་ཀྱིས་བདུད་ལྷགས་པར་རིག་ནས། བདུད་སྡིག་ཅན་དེ་དག་བཟློག་པ་རྣམ་པ་བཅུ་
235b
དྲུག་གིས་ཟློག་པར་བྱེད་དེ། སྡིག་ཅན་དག་།ཕོངས་པར་འགྱུར་བ་གདོན་པར་དཀའ་བ་རྣམ་པ་འདི་ལྟ་བུ་འདི་དག་གིས་ཅི་ཞིག་བྱའི། ཐོང་ཞིག་།དེ་ཅིའི་ཕྱིར་ཞེ་ན། སྡིག་ཅན་ཁྱེད་ནི། གྱད་སྟོབས་ཆུད་དུ་ལ་གྱད་སྟོབས་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་བརྡབས་པར་འགྱུར་རོ། །སྡིག་ཅན་ཁྱེད་ནི་དཔའ་བོ་ཆེན་པོས་ཕ་རོལ་གྱི་སྡེ་བཅོམ་པ་ལྟར་དོ་མོད་བྱང་ཆུབ་སེམས་དཔས་ཕམ་པར་བྱས་པར་འགྱུར་རོ། །སྡིག་ཅན་ཁྱེད་ནི་སྲིན་བུ་མེ་ཁྱེར་ལ་ཟླ་བའི་དཀྱིལ་འཁོར་བབ་པ་ལྟར་དོ་མོད་བྱང་ཆུབ་སེམས་དཔས་ཟིལ་གྱིས་ནོན་པར་འགྱུར་རོ། །སྡིག་ཅན་ཁྱེད་ནི་ཕུབ་མ་སྤར་གང་ལ་རླུང་མར་བབ་པ་ལྟར་དོ་མོད་བྱང་ཆུབ་སེམས་དཔས་གཏོར་བར་འགྱུར་རོ། །སྡིག་ཅན་ཁྱེད་ནི་ཤིང་སཱ་ལ་ཆེན་པོ་རྩ་བ་ནས་ཆད་པ་ལྟར་དོ་མོད་བྱང་ཆུབ་སེམས་དཔས་བསྒྱེལ་བར་འགྱུར་རོ། །སྡིག་ཅན་ཁྱེད་ནི་རི་དྭགས་ཀྱི་ཚོགས་ལ་སེངྒེ་བབ་པ་ལྟར་དོ་མོད་བྱང་ཆུབ་སེམས་དཔས་དངངས་པར་བྱས་པར་འགྱུར་རོ། །སྡིག་ཅན་ཁྱོད་ནི་བ་རྗེས་ཀྱི་ཆུ་ལ་ཉི་ཚན་བབ་པ་ལྟར་དོ་མོད་བྱང་ཆུབ་སེམས་དཔས་ཡོངས་སུ་ཟད་པར་བྱས་པར་འགྱུར་རོ། །སྡིག་ཅན་ཁྱེད་ནི་མི་མཛའ་བའི་གྲོང་ཁྱེར་ལ་རྒྱལ་པོ་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་བརླག་པར་འགྱུར་རོ། །སྡིག་ཅན་ཁྱེད་ནི་མི་གཡོན་ཅན་དག་གསད་པར་བྱ་བ་ཤོར་བ་ལྟར་དོ་མོད་བྱང་ཆུབ་སེམས་དཔས་འབྲོས་པར་བྱེད་པར་འགྱུར་རོ། །སྡིག་ཅན་ཁྱོད་ནི་ཚོང་པ་ལམ་རྒྱགས་
236a
༄#། །མང་པོ་མེས་ཚིག་པ་ལྟར་དོ་མོད་བྱང་ཆུབ་སེམས་དཔས་མགོ་བོ་འཁོར་བར་བྱེད་པར་འགྱུར་རོ། །སྡིག་ཅན་ཁྱེད་ནི་ཆོས་ཀྱི་རྒྱལ་པོ་རྒྱལ་སྲིད་ཉམས་པ་ལྟར་དོ་མོད་བྱང་ཆུབ་སེམས་དཔས་མྱ་ངན་བྱེད་དུ་བཅུག་པར་འགྱུར་རོ། །སྡིག་ཅན་ཁྱེད་ནི་ཁྲུང་ཁྲུང་རྒན་པོ་འདབ་མ་བྲེགས་པ་ལྟར་དོ་མོད་བྱང་ཆུབ་སེམས་དཔས་སེམས་ཁོང་དུ་བཅུག་པར་འགྱུར་རོ། །སྡིག་ཅན་ཁྱེད་ནི་འབྲོག་དགོན་པར་ལམ་རྒྱགས་ཆད་པ་ལྟར་དོ་མོད་བྱང་ཆུབ་སེམས་དཔས་ཕོངས་པར་བྱས་པར་འགྱུར་རོ། །སྡིག་ཅན་ཁྱེད་ནི་རྒྱ་མཚོ་ཆེན་པོའི་དབུས་སུ་གྲུ་ཞིག་པ་ལྟར་དོ་མོད་བྱང་ཆུབ་སེམས་དཔས་སྨྲེ་སྔགས་འདོན་དུ་བཅུག་པར་འགྱུར་རོ། །སྡིག་ཅན་ཁྱེད་ནི་བསྲེག་པའི་བསྐལ་པས་རྩཝ་དང་ནགས་ཚལ་ལྟར་དོ་མོད་བྱང་ཆུབ་སེམས་དཔས་རྙིས་པར་བྱས་པར་འགྱུར་རོ། །སྡིག་ཅན་ཁྱོད་ནི་རྡོ་བ་ལ་རྡོ་རྗེ་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་རྣམ་པར་གཏོར་བར་འགྱུར་རོ། །ཞི་བའི་བློ་གྲོས། དེ་ལྟར་བྱང་ཆུབ་ཀྱི་བསྙེན་བཀུར་བའི་ལྷ་རྣམས་ཀྱིས་བཟློག་པ་རྣམ་པ་བཅུ་དྲུག་གིས་བདུད་སྡིག་ཅན་རྣམས་ཟློག་པར་བྱེད་ཀྱང་བདུད་སྡིག་ཅན་དེ་དག་ཕྱིར་མ་ལྡོག་གོ་།དེ་ནས་བྱང་ཆུབ་སེམས་དཔའ་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་སྦྱིན་པ་དང ། དུལ་བ་དང ། ལེགས་པར་སྡོམ་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང །
236b
བསམ་གཏན་དང ། ཤེས་རབ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། དྲན་པ་ཉེ་བར་བཞག་པ་དང ། ཡང་དག་པར་སྤོང་བ་དང ། རྫུ་འཕྲུལ་གྱི་རྐང་པ་དང ། དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་དང ། ལམ་དང ། ཞི་གནས་དང ། ལྷག་མཐོང་དང ། རིག་པ་དང ། རྣམ་པར་གྲོལ་བ་ཡོངས་སུ་སྦྱང་བ་བྱས་པས་ལག་པ་གཡས་པ་འཇམ་ཞིང་གཞོན་ལ། ཤིན་ཏུ་གཞོན་པ་གསེར་གྱི་ཁ་དོག་ལྟར་འདུག་པ་བརྐྱང་སྟེ། སྙིང་རྗེ་ཆེན་པོས་བསྐྱོད་པ་དང ། སེམས་ཅན་ཐམས་ཅད་རབ་ཏུ་ཐར་བར་བྱ་བའི་ལྷག་པའི་བསམ་པས་སྤྱི་བོ་ནས་བཟུང་སྟེ། ལུས་ཐམས་ཅད་ལ་བྱུགས་ནས་འཇིག་རྟེན་གྱི་ཁམས་ཐམས་ཅད་ཀྱི་སངས་རྒྱས་བཅོམ་ལྡན་འདས་རྣམས་མངོན་དུ་བྱས་ཏེ། དྲན་པ་དང་ལྡན་ཞིང ། ཤེས་བཞིན་དུ་ས་ཆེན་པོ་ལ་བརྡབས་སོ། །ཞི་བའི་བློ་གྲོས། བྱང་ཆུབ་སེམས་དཔས་ས་ཆེན་པོ་ལ་བརྡབས་མ་ཐག་ཏུ། དེ་ནས་དེའི་ཚེ་ས་ཆེན་པོ་རྣམ་པ་དྲུག་ཏུ་གཡོས་སོ། །རབ་ཏུ་གཡོས་སོ། །ཀུན་ཏུ་རབ་ཏུ་གཡོས་སོ། །འགུལ་ཏོ། །རབ་ཏུ་འགུལ་ཏོ། །ཀུན་ཏུ་རབ་ཏུ་འགུལ་ཏོ། །ལྡེག་གོ་།རབ་ཏུ་ལྡེག་གོ་།ཀུན་ཏུ་རབ་ཏུ་ལྡེག་གོ་།འཁྲུགས་སོ། །རབ་ཏུ་འཁྲུགས་སོ། །ཀུན་ཏུ་རབ་ཏུ་འཁྲུགས་སོ། །འུར་འུར་རོ། །རབ་ཏུ་འུར་འུར་རོ། །ཀུན་ཏུ་རབ་ཏུ་འུར་འུར་རོ། །ཆེམ་ཆེམ་མོ། །རབ་ཏུ་ཆེམ་ཆེམ་མོ། །ཀུན་ཏུ་རབ་ཏུ་ཆེམ་ཆེམ་མོ། །ཤར་ཕྱོགས་དམའ་ན་ནུབ་ཕྱོགས་མཐོའོ། །ནུབ་ཕྱོགས་
237a
༄#། །དམའ་ན་ཤར་ཕྱོགས་མཐོའོ། །ལྷོ་ཕྱོགས་དམའ་ན་བྱང་ཕྱོགས་མཐོའོ། །བྱང་ཕྱོགས་དམའ་ན་ལྷོ་ཕྱོགས་མཐོའོ། །མཐའ་མཐོ་ན་དབུས་དམའོ། །དབུས་མཐོ་ན་མཐའ་དམའོ། །ཞི་བའི་བློ་གྲོས། དེ་ལྟར་རྣམ་པ་དྲུག་དང ། ལྟས་ཆེན་པོ་བཅོ་བརྒྱད་དུ་ས་གཡོས་པ་ཆེན་པོ་འཇིག་རྟེན་དུ་འབྱུང་བར་འགྱུར་རོ། །བདུད་སྡིག་ཅན་རྣམས་ཀྱིས་ཀྱང་འུར་སྒྲ་དང ། རྟུག་ཆམ་གྱི་སྒྲ་ཆེན་པོ་དང ། གཟུང་ཞིག་པ་དང ། རྒྱོབ་ཅིག་པ་དང ། ཆིངས་ཤིག་པ་དང ། གསོད་ཅིག་པའི་སྒྲ་ཐོས་སོ། །བདུད་ཀྱི་འཁོར་གྱིས་ནི། བྱང་ཆུབ་སེམས་དཔའི་མཐུས་སྟེང་གི་བར་སྣང་ལ་འདི་ལྟ་བུའི་སྒྲ་འདི་ཐོས་སོ། །དྲང་སྲོང་ནང་ན་དྲང་སྲོང་མཆོག། འདི་ནི་མི་འཇིགས་སྦྱིན་པ་སྟེ། །སྲོག་ཆགས་ཀུན་གྱི་སྐྱབས་ཡིན་གྱི། །འདི་ལ་སྐྱབས་སུ་འགྲོ་བར་གྱིས། །ཞི་བའི་བློ་གྲོས། བདུད་ཀྱི་འཁོར་གྱིས་སྒྲ་དེ་ཐོས་པ་དང ། གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་ཁས་ཕུབ་ཏུ་ས་ལ་འགྱེལ་ནས། སྐྱེས་བུ་ཆེན་པོ། ཡོངས་སུ་བསྐྱབ་ཏུ་གསོལ། ཡོངས་སུ་བསྐྱབ་ཏུ་གསོལ་ཞེས་ཚིག་འདི་སྐད་ཅེས་སྨྲས་སོ། །བདུད་སྡིག་ཅན་ལྷག་མ་རྣམས་ནི་དཔུང་གི་ཚོགས་དང་ལྷན་ཅིག་ཏུ་འབྲོས་པར་འདོད་ན་འབྲོས་མ་ནུས་ནས་དེ་དག་ལ་སྙིང་བརྩེ་བའི་ཕྱིར། བྱང་ཆུབ་སེམས་དཔས་ལུས་ལས་འོད་བྱུང་བ་དང ། འོད་དེས་དེ་དག་འཇིགས་པ་ཐམས་ཅད་དང་བྲལ་ཏེ་རང་རང་གིས་གནས་
237b
སུ་དོང་ངོ ། །ཞི་བའི་བློ་གྲོས། བྱང་ཆུབ་སེམས་དཔས་བདུད་འདུལ་བའི་རྣམ་པར་སྤྲུལ་པ་འདི་བསྟན་པ་ན་བདུད་ཀྱི་འཁོར་དེ་ལས་གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལྷའི་བུ་སྔོན་སྦྱང་བ་བྱས་པ་བྱེ་བ་བརྒྱད་ཁྲི་བཞི་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བདུད་བཏུལ་བའི་ལེའུ་ཞེས་བྱ་སྟེ་བཅུ་གསུམ་པའོ།། །།ཞི་བའི་བློ་གྲོས། དེ་ལྟ་ལྷ་དང་མི་ཁ་ཅིག་གིས་ནི་དེ་ལྟར་བདུད་འདུལ་བ་ཚང་མེད་པ་དང་ལྡན་པར་ཤེས་སོ། །ཁ་ཅིག་གིས་ནི་བདུད་ཡོང་ཐམས་ཅད་དུ་མ་འོངས་པར་ཤེས་སོ། །ཁ་ཅིག་གིས་ནི་བྱང་ཆུབ་སེམས་དཔའ་རྩཝ་བཏིང་བ་ལ་འདུག་པར་ཤེས་སོ། །ཁ་ཅིག་གིས་ནི་བྱང་ཆུབ་སེམས་དཔའ་རིན་པོ་ཆེའི་པདྨ་བཀོད་པའི་སེངྒེའི་ཁྲི་ལ་འདུག་པར་མཐོང་ངོ ། །ཁ་ཅིག་གིས་ནི་བྱང་ཆུབ་སེམས་དཔའ་ས་ལ་འདུག་པར་མཐོང་ངོ ། །ཁ་ཅིག་གིས་ནི་བྱང་ཆུབ་སེམས་དཔའ་ནམ་མཁའི་དཀྱིལ་ན་གནས་པའི་སེངྒེའི་ཁྲི་ལ་འདུག་པར་མཐོང་ངོ ། །ཁ་ཅིག་གིས་ནི་བྱང་ཆུབ་ཀྱི་ཤིང་ཤིང་གི་རྒྱལ་པོ་ཨ་ཤཝད་ཐར་མཐོང་ངོ ། །ཁ་ཅིག་གིས་ནི་བྱང་ཆུབ་ཀྱི་ཤིང་ཡོངས་འདུས་བརྟོལ་དུ་མཐོང་ངོ ། །ཁ་ཅིག་གིས་ནི་བྱང་ཆུབ་ཀྱི་ཤིང་རིན་པོ་ཆེ་ཐམས་ཅད་ཀྱི་རང་བཞིན་ཅན་དུ་མཐོང་ངོ ། །
238a
༄#། །ལྷ་དང་མི་ཁ་ཅིག་གིས་ནི་བྱང་ཆུབ་ཀྱི་ཤིང་ཤིང་ཏ་ལའི་སྲིད་ཙམ་དུ་མཐོང་ཞིང ། སེངྒེའི་ཁྲི་ཤིང་ཏ་ལའི་ཕྱེད་ཙམ་དུ་མཐོང་ངོ ། །ཁ་ཅིག་གིས་ནི་བྱང་ཆུབ་ཀྱི་ཤིང་ཤིང་ཏ་ལ་བདུན་སྲིད་ཙམ་དུ་མཐོང་ཞིང ། སེངྒེའི་ཁྲི་ཤིང་ཏ་ལ་ཕྱེད་དང་གཉིས་སྲིད་ཙམ་དུ་མཐོང་ངོ ། །ཁ་ཅིག་གིས་ནི་བྱང་ཆུབ་ཀྱི་ཤིང་དཔག་ཚད་བརྒྱད་ཁྲི་བཞི་སྟོང་གི་བར་དུ་མཐོང་ཞིང ། སེངྒེའི་ཁྲི་དཔག་ཚད་བཞི་ཁྲི་ཉིས་སྟོང་བར་མཐོང་ངོ ། །ལྷ་དང་མི་ཁ་ཅིག་གིས་ནི་བྱང་ཆུབ་སེམས་དཔའ་བདུད་འཇོམས་པ་ལ་བརྩོན་ཞིང་འདུལ་བར་མཐོང་ངོ ། །ཁ་ཅིག་གིས་ནི་བདུད་གཅིག་མཐོང་ངོ ། །ཁ་ཅིག་གིས་ནི་བདུད་རྒྱ་ཆེན་པོར་མཐོང་ངོ ། །ཁ་ཅིག་གིས་ནི་བྱང་ཆུབ་སེམས་དཔའ་བདུད་འཇོམས་པ་ལ་བརྩེ་བར་མཐོང་ངོ ། །ཁ་ཅིག་གིས་ནི་བྱང་ཆུབ་སེམས་དཔའ་ནམ་མཁའི་དཀྱིལ་ན་གནས་ཤིང ། ནམ་མཁའ་ལ་འདུག་པའི་བྱང་ཆུབ་ཀྱི་ཤིང་དྲུང་ན་སེངྒེའི་ཁྲི་ལ་འདུག་ཅིང ། བྱང་ཆུབ་སེམས་དཔའ་བྱང་ཆུབ་མངོན་པར་རྫོགས་པར་འཚང་རྒྱ་བར་མཐོང་སྟེ།་ཞི་བའི་བློ་གྲོས། དེ་ལྟར་ན་བྱང་ཆུབ་སེམས་དཔའ་རྣམས་ནི་ཡུལ་མཐའ་མེད་པ་ཡིན་ཏེ། བྱང་ཆུབ་ཀྱི་སྙིང་པོ་མཆོག་དམ་པ་ན་འཁོད་པ་དེ་དག་གི་ཡོན་ཏན་གྱི་རྒྱུའི་ཁྱད་པར་ནི་ཚད་མེད་པར་སྣང་ངོ ། །ཞི་བའི་བློ་གྲོས། བྱང་ཆུབ་སེམས་དཔས་བྱང་ཆུབ་ཀྱི་སྙིང་པོ་མཆོག་དམ་པར་འདུག་པ་དང ། སྔོན་མཐུན་པར་སྤྱོད་པའི་བྱང་ཆུབ་སེམས་དཔའ་གྲངས་མེད་དཔག་
238b
ཏུ་མེད་པ་དག་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་པ་དག་ནས་ལྷགས་ཏེ་མི་འཇིགས་པའི་སྒྲ་བརྗོད་ཅིང ། ཤིས་པའི་སྒྲ་དང ། བདེ་བའི་སྒྲ་དང ། ཀུན་དགའ་བའི་སྒྲ་དང ། མགྱོགས་པའི་སྒྲ་དང ། མྱུར་བའི་སྒྲ་དང ། ལེགས་པའི་སྒྲ་དང ། དོན་ཡོད་པའི་སྒྲ་དང ། དཔའ་བའི་སྒྲ་དང ། སྐྱེས་བུ་དམ་པའི་སྒྲ་དང ། ཕྱིར་མི་ལྡོག་པའི་སྒྲ་དང ། རྒྱས་པའི་སྒྲ་དང ། བཀྲ་ཤིས་པའི་སྒྲ་དང ། མི་གདུང་བའི་སྒྲ་དང ། མ་ཞུམ་པའི་སྒྲ་དང ། སྔོན་གྱི་བསམ་པའི་སྒྲ་དང ། སྤོང་བ་དོན་ཡོད་པའི་སྒྲ་དང ། ཡིད་བདེ་བའི་སྒྲ་དང ། རྡོ་རྗེ་ལྟར་མཁྲེགས་པའི་སྒྲ་དང ། སྐྱེས་བུ་དམ་པ་རྣམ་པར་རྩེ་བའི་སྒྲ་དང ། ཕན་པའི་སྒྲ་དང ། སྐད་ཅིག་གཅིག་དང་ལྡན་པའི་སྒྲ་དང ། ཐམས་ཅད་མཁྱེན་པའི་ཡེ་ཤེས་ཀྱི་སྒྲ་དང ། མངོན་པར་རྫོགས་པར་བྱང་ཆུབ་པའི་སྒྲ་བརྗོད་དེ། ཞི་བའི་བློ་གྲོས། དེ་ལྟར་བྱང་ཆུབ་ཀྱི་སྙིང་པོ་མཆོག་དམ་པ་ལ་འདུག་པའི་བྱང་ཆུབ་སེམས་དཔའ་ལ་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་རྣམས་ཀྱིས་དབུགས་འབྱིན་པ་རྣམ་པ་སྣ་ཚོགས་བརྒྱ་སྟོང་དག་གིས་དབུགས་འབྱིན་ཏོ། །མཆོད་པ་རྣམ་པ་སྣ་ཚོགས་བྱེད་དོ། །བསྟོད་པ་རྣམ་པ་སྣ་ཚོགས་བྱེད་དོ། །འདི་ནི་བྱང་ཆུབ་སེམས་དཔའི་སྔོན་ལེགས་པར་སྤྱད་པ་སྟེ། དེས་ན་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་དེ་དག་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་མཆོག་དམ་པ་ལ་འདུག་པ་ལ་དབུགས་འབྱིན་ཅིང་མཆོད་
239a
༄#། །པ་བྱེད་ཀྱང ། བྱང་ཆུབ་སེམས་དཔའ་དེ་ལ་ཡང་རྗེས་སུ་ཆགས་པ་མེད་ལ། བདུད་ཀྱི་སྡེ་ལ་ཡང་ཁོང་ཁྲོ་བ་མེད་དོ། །ཞི་བའི་བློ་གྲོས། བྱང་ཆུབ་སེམས་དཔའ་རྗེས་སུ་ཆགས་པ་དང ། ཁོང་ཁྲོ་བ་དང་བྲལ་བས་སྐད་ཅིག་གཅིག་དང་ལྡན་པའི་ཤེས་རབ་ཀྱིས་ཤེས་པར་བྱ་བ་དང ། བལྟ་བར་བྱ་བ་དང ། ཐོབ་པར་བྱ་བ་དང ། མངོན་པར་རྫོགས་པར་བྱང་ཆུབ་པར་བྱ་བ་གང་ཅི་ཡང་རུང་སྟེ་ཐམས་ཅད་མངོན་པར་རྫོགས་པར་སངས་རྒྱས་སོ། །ཞི་བའི་བློ་གྲོས། བྱང་ཆུབ་བརྙེས་པའི་དེ་བཞིན་གཤེགས་པ་ལ་ཕྱོགས་བཅུ་ནས་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་པ་དག་གིས་ཕྱག་གཡས་པ་བརྐྱང་སྟེ། སྐུ་མ་བསྙེལ་ཏམ་ཞེས་སྙུན་གསོལ་ཏོ། །བསྙེལ་བ་མི་མངའ་བར་བྱང་ཆུབ་བམ། རང་བྱུང་དུ་མངོན་པར་རྫོགས་པར་བྱང་ཆུབ་བམ། སྒྲིབ་པ་མི་མངའ་བར་མངོན་པར་རྫོགས་པར་བྱང་ཆུབ་བམ། མཉམ་པ་ཉིད་ཀྱི་ཡེ་ཤེས་ཀྱིས་མངོན་པར་རྫོགས་པར་བྱང་ཆུབ་བམ། ཀུན་ཏུ་ཡེ་ཤེས་ཀྱིས་མངོན་པར་རྫོགས་པར་བྱང་ཆུབ་བམ། སྤྱོད་ཡུལ་མ་འདྲེས་པ་དང་ལྡན་ནམ། སྙིང་རྗེ་ཆེན་པོའི་གོ་ཆ་བགོས་སམ། དཀོན་མཆོག་གསུམ་གྱི་རིགས་བསབས་སམ། ཆོས་ཐམས་ཅད་ལ་དབང་བསྒྱུར་རམ་ཞེས་ཡོངས་སུ་འདྲིའོ། །དེ་ལ་སེམས་ཅན་གང་དག་དབང་པོ་ཡོངས་སུ་སྨིན་པ་དེ་དག་གིས་ནི་བྱ་བ་དེ་ཤེས་སོ། །སེམས་ཅན་གང་དག་དབང་པོ་ཡོངས་སུ་མ་སྨིན་པ་དེ་དག་གིས་
239b
ནི་བྱ་བ་དེ་མི་ཤེས་སོ། །ཞི་བའི་བློ་གྲོས། བྱང་ཆུབ་བརྙེས་པའི་དེ་བཞིན་གཤེགས་པ་ཞག་བདུན་གྱི་བར་དུ་སྤྱན་མི་འཛུམ་པར་ཆོས་ཀྱི་དགའ་བའི་བདེ་བ་ཉམས་སུ་བསྟར་ཏེ། སྤྱན་མི་འཛུམ་པར་བྱང་ཆུབ་ཀྱི་ཤིང་ལ་ཡང་གཟིགས་སོ། །ལྷའི་བུ་བརྒྱ་སྟོང་ཡང་དེ་ལ་མཆོད་དེ་བསྟོད་དོ། །ཕྱག་འཚལ་ལོ། །ལྷའི་བུ་མོ་བརྒྱ་སྟོང་དག་ཀྱང་དེ་ལ་མཆོད་པ་བྱེད་དོ། །བསྟོད་དོ། །ཕྱག་འཚལ་ལོ། །དེ་བཞིན་གཤེགས་པའི་སྤྱོད་ལམ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ཀྱང་བསྐྱེད་དོ། །ཞི་བའི་བློ་གྲོས། དེ་བཞིན་གཤེགས་པས་བྱང་ཆུབ་བརྙེས་པ་དང ། རྒྱལ་པོ་ཆེན་པོ་བཞི་ལྷུང་བཟེད་རྣམས་ཐོགས་ཏེ་དེ་བཞིན་གཤེགས་པའི་གན་དུ་དོང་བར་གྱུར་ཏོ། །བཞི་གང་ཞེ་ན། ཡུལ་འཁོར་སྲུང་དང ། འཕགས་སྐྱེས་པོ་དང ། མིག་མི་བཟང་དང ། རྒྱལ་པོ་ཆེན་པོ་རྣམ་ཐོས་ཀྱི་བུ་སྟེ། རྒྱལ་པོ་ཆེན་པོ་བཞི་དག་གོ། གླིང་བཞི་པ་འདི་ནས་ཇི་ལྟར་དོང་བ་དེ་བཞིན་དུ་གླིང་བཞི་པ་བྱེ་བ་ཕྲག་བརྒྱ་ནས་རྒྱལ་པོ་བྱེ་བ་ཕྲག་བཞི་བརྒྱ་ལྷུང་བཟེད་རྣམས་ཐོགས་ཏེ།་དེ་བཞིན་གཤེགས་པའི་གན་དུ་དོང་ངོ ། །ཞི་བའི་བློ་གྲོས། དེ་ལ་དེ་བཞིན་གཤེགས་པས་ལྷུང་བཟེད་བྱེ་བ་ཕྲག་བཞི་བརྒྱ་རྣམས་བཞེས་ཏེ། བཞེས་ནས་ཀྱང་ལྷུང་བཟེད་གཅིག་ཏུ་བྱིན་གྱིས་བརླབས་ནས་རྒྱལ་པོ་ཆེན་པོ་རེ་རེ་ཡང་འདི་སྙམ་དུ་དེ་བཞིན་གཤེགས་པས་བདག་གི་ལྷུང་བཟེད་བཞེས་སོ། །དེ་བཞིན་གཤེགས་པས་བདག་གི་ལྷུང་བཟེད་དུ་གསོལ་ལོ་སྙམ་དུ་སེམས་
240a
༄#། །ཏེ།་དེ་དག་དགའ་བ་དང ། མཆོག་ཏུ་དགའ་བ་དེ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །ཞི་བའི་བློ་གྲོས། དེ་བཞིན་གཤེགས་པས་བྱང་ཆུབ་བརྙེས་ནས་ཚོང་པ་ག་གོན་དང ། བཟང་པོ་དང ། གཞན་ཡང་ལྷའི་བུ་དྲུག་ཁྲི་དེ་བཞིན་གཤེགས་པའི་ཐོག་མའི་ཞལ་ཟས་ཐོགས་ནས་དོང་བར་གྱུར་ཏེ། དེ་དག་ནི་སྔོན་འདི་སྐད་དུ་བདག་ཅག་གིས་དེ་བཞིན་གཤེགས་པ་ལ་ཐོག་མར་ཞལ་ཟས་འབུལ་ལོ་ཞེས་སྨོན་ལམ་བཏབ་པར་གྱུར་པ་དག་གོ། དེ་དག་གིས་དེ་བཞིན་གཤེགས་པ་ལ་ཐོག་མར་ཞལ་ཟས་ཕུལ་ནས་དགའ་བ་དང ། མཆོག་ཏུ་དགའ་བ་དེ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །ཞི་བའི་བློ་གྲོས། དེ་ལྟར་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་མཆོག་དམ་པར་འདུག་སྟེ། ཐམས་ཅད་མཁྱེན་པ་མ་ཐོབ་པ་ལས་བྱང་ཆུབ་བརྙེས་པ་དང ། དེ་བཞིན་གཤེགས་པས་ཆོས་ཀྱི་འཁོར་ལོ་མ་བསྐོར་བའི་བར་དུ་སེམས་ཅན་གྱི་དོན་མཛད་པ་དེ་ནི་རབ་ཏུ་མང་གི་།སེམས་དང་པོ་བསྐྱེད་པ་ནས་བཟུང་སྟེ་བྱང་ཆུབ་ཀྱི་སྙིང་པོར་སོང་བའི་བར་དུ་ནི་དེ་ལྟ་མ་ཡིན་ནོ། །ཞི་བའི་བློ་གྲོས། ཁྱོད་ཀྱིས་རྣམ་གྲངས་འདིས་ཀྱང་ཇི་ལྟ་ཇི་ལྟར་བྱང་ཆུབ་སེམས་དཔའ་བྱང་ཆུབ་ལ་ཉེ་བར་གྱུར་པ་དེ་ལྟ་དེ་ལྟར་སེམས་ཅན་ཚད་མེད་པའི་དོན་བྱེད་པ་དེ་ལྟར་ཤེས་པར་བྱའོ། །ཞི་བའི་བློ་གྲོས། དེ་བཞིན་གཤེགས་པས་བྱང་
240b
ཆུབ་བརྙེས་ནས་ཚངས་པ་གཙུག་ཕུང་ཅན་ཞེས་བྱ་བ་ཚངས་རིས་ཀྱི་ལྷའི་བུ་འབུམ་ཕྲག་དྲུག་ཅུ་རྩ་བརྒྱད་ཀྱིས་བསྐོར་ཅིང་མདུན་དུ་བདར་ཏེ། ཚངས་པའི་འཇིག་རྟེན་ནས་མི་སྣང་བར་གྱུར་ནས་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ལན་བདུན་བསྐོར་བ་བྱས་ཏེ། བཅོམ་ལྡན་འདས་ལ་ཆོས་ཀྱི་འཁོར་ལོ་བསྐོར་བའི་ཕྱིར་སེམས་ཅན་ཆོས་ཀྱི་སྣོད་དུ་གྱུར་པ་དག་མཆིས་ཏེ། དེ་དག་དེ་བཞིན་གཤེགས་པའི་ཆོས་བསྟན་པ་འཚལ་བར་འགྱུར་གྱི། བཅོམ་ལྡན་འདས་ཀྱིས་ཆོས་བསྟན་དུ་གསོལ། བདེ་བར་གཤེགས་པས་ཆོས་བསྟན་དུ་གསོལ་ཞེས་གསོལ་བ་བཏབ་བོ། །དེ་ནི་སྔོན་གྱི་སྨོན་ལམ་གྱིས་གྱུར་པ་སྟེ། གང་གིས་རྒྱལ་པོ་ཡུལ་འཁོར་སྲུང་གི་བུར་ཁས་བླངས་ནས་བདག་གིས་བསྐལ་པ་བཟང་པོ་པའི་དེ་བཞིན་གཤེགས་པ་བྱང་ཆུབ་བརྙེས་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བསྐུལ་ལོ་ཞེས་སྨོན་ལམ་བཏབ་པ་ཡིན་ནོ། །ཞི་བའི་བློ་གྲོས། ཚངས་པ་གཙུག་ཕུད་ཅན་ཉིད་ཀྱིས་དེ་བཞིན་གཤེགས་པ་ལ་ཆོས་ཀྱི་འཁོར་ལོ་བསྐོར་བར་གསོལ་བ་བཏབ་ཀྱི། གཞན་དག་གིས་ནི་མ་ཡིན་ནོ་སྙམ་དུ་ཁྱོད་སེམས་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཇི་ལྟར་ཚངས་པ་གཙུག་ཕུད་ཅན་གྱིས་གསོལ་བ་བཏབ་པ་དེ་བཞིན་དུ་ཚངས་པ་བྱེ་བ་ཕྲག་བཅུས་ཀྱང་དེ་བཞིན་གཤེགས་པ་ལ་གསོལ་བ་བཏབ་པར་གྱུར་ཏོ། །བརྒྱ་བྱིན་བྱེ་བ་ཕྲག་བཅུ་དང ། བྱང་ཆུབ་སེམས་དཔའ་བྱེ་བ་ཕྲག་བཅུས་ཀྱང་
241a
༄#། །བཅོམ་ལྡན་འདས་ལ་ཆོས་ཀྱི་འཁོར་ལོ་བསྐོར་བར་གསོལ་བ་བཏབ་པར་གྱུར་ཏོ། །གང་གི་ཚེ་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བར་གནང་བ་དེའི་ཚེ། ཚངས་པ་གཙུག་ཕུད་ཅན་གྱིས་གྲོང་ཁྱེར་ཝཱ་ར་ཎཱ་སི་དྲང་སྲོང་ལྷུང་བ་རི་དྭགས་ཀྱི་ནགས་སུ་བཅོམ་ལྡན་འདས་ཀྱིས་སེང་གེའི་ཁྲི་འཕང་དུ་དཔག་ཚད་བཞི་ཁྲི་ཉིས་སྟོང་ཡོད་པ། རྣམ་པ་ཐམས་ཅད་ཀྱི་མཆོག་དང་ལྡན་པ། བཀྲ་བ་བལྟ་ན་སྡུག་པ། སའི་སྟེང་ན་འདུག་པ་བཤམས་པར་གྱུར་ཏོ། །ཇི་ལྟར་ཚངས་པ་གཙུག་ཕུད་ཅན་གྱིས་དེ་བཞིན་གཤེགས་པའི་སེང་གེའི་ཁྲི་བཤམས་པར་གྱུར་པ་དེ་བཞིན་དུ་ཚངས་པ་བྱེ་བ་ཕྲག་བཅུ་དང ། བརྒྱ་བྱིན་བྱེ་བ་ཕྲག་བཅུ་དང ། བྱང་ཆུབ་སེམས་དཔའ་འཁོར་དང་བཅས་པ་བྱེ་བ་ཕྲག་བཅུས་ཀྱང་བཅོམ་ལྡན་འདས་ཀྱི་སེང་གེའི་ཁྲི་བཀྲ་བ་བལྟ་ན་སྡུག་པ། རྣམ་པ་ཐམས་ཅད་ཀྱི་མཆོག་དང་ལྡན་པ་བཤམས་པར་གྱུར་ཏོ། །ཞི་བའི་བློ་གྲོས། དེ་ནས་བཅོམ་ལྡན་འདས་གྲོང་ཁྱེར་ཆེན་པོ་ཝཱ་ར་ཎཱ་སི་ག་ལ་བ་དང ། དྲང་སྲོང་ལྷུང་བ་རི་དྭགས་ཀྱི་ནགས་ཚལ་ག་ལ་བ་དེར་གཤེགས་ཏེ་ཕྱིན་ནས། སེང་གེའི་ཁྲི་དེ་དག་ཐམས་ཅད་ལ་བདག་ཉིད་བཞུགས་པར་ཀུན་དུ་བསྟན་ཏོ། །དེ་ན་རེ་རེས་ཀྱང་དེ་བཞིན་གཤེགས་པ་བདག་གི་སེང་གེའི་ཁྲི་ལ་བཞུགས་སོ། །བདག་གི་སེང་གེའི་ཁྲི་ལ་བཞུགས་ནས་ཆོས་ཀྱི་འཁོར་ལོ་བསྐོར་བར་འགྱུར་བར་ཤེས་ཏེ། དེ་དག་དགའ་བ་དང ། མཆོག་
241b
ཏུ་དགའ་བ་དེ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །བཅོམ་ལྡན་འདས་སེང་གེའི་ཁྲི་དེ་ལ་བཞུགས་མ་ཐག་ཏུ་དེ་ནས་དེའི་ཚེ་ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་རབ་ཏུ་གཡོས་ཏེ་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱི་ཡུལ་མཐའ་ཡས་པ་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་གོ། བཅོམ་ལྡན་འདས་ཀྱིས་ཡུལ་མཐའ་ཡས་པའི་ཏིང་ངེ་འཛིན་དེ་ལ་མཉམ་པར་བཞག་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མཉམ་པར་གྱུར་པར་གནས་ཏེ་ལག་མཐིལ་ལྟར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་དམྱལ་བ་པའམ། དུད་འགྲོའི་སྐྱེ་གནས་པའམ། གཤིན་རྗེའི་འཇིག་རྟེན་པའམ། མིའམ ། ལྷའམ། སེམས་ཅན་ཇི་སྙེད་ཡོད་པ་དེ་དག་ཐམས་ཅད་དེའི་ཚེ་བདེ་བ་དང་ལྡན་པར་གྱུར་ཏེ། སེམས་ཅན་གང་ལ་ཡང་འདོད་ཆགས་ཀྱིས་གནོད་པ་མེད་ཅིང་ཞེ་སྡང་གིས་མ་ཡིན། གཏི་མུག་གིས་མ་ཡིན། ཉོན་མོངས་པ་ཐམས་ཅད་ཀྱིས་གནོད་པ་མེད་ཅིང་གཅིག་ལ་གཅིག་ཕ་མ་ཙམ་དུ་འདུ་ཤེས་ཏེ། བྱམས་པའི་སེམས་དང་ལྡན་པར་གྱུར་ཏོ། །བཅོམ་ལྡན་འདས་ཀྱིས་ཡུལ་བསམ་གྱིས་མི་ཁྱབ་པའི་ཏིང་ངེ་འཛིན་དེ་ལ་མཉམ་པར་བཞག་མ་ཐག་ཏུ་དེ་ནས་དེའི་ཚེ་བཅོམ་ལྡན་འདས་ལ་ཆོས་མཉན་པའི་ཕྱིར། ཕྱོགས་བཅུ་ནས་བྱང་ཆུབ་སེམས་དཔའ་གྲངས་མེད་དཔག་ཏུ་
242a
༄#། །མེད་པ་དག་ལྷགས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་དབང་ཆེ་བ། དབང་ཆེ་བར་གྲགས་པའི་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་ཇི་སྙེད་འཁོད་པ་དེ་དག་ཐམས་ཅད་ཀྱང་བཅོམ་ལྡན་འདས་ལ་ཆོས་མཉན་བའི་ཕྱིར། བཅོམ་ལྡན་འདས་ག་ལ་བ་དེར་དོང་ངོ ། །ཞི་བའི་བློ་གྲོས། དེ་ལྟར་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་བཅོམ་ལྡན་འདས་ལ་ཆོས་ཉན་པ་དབང་ཆེ་བ། དབང་ཆེ་བར་གྲགས་པ་དག་གིས་ས་ཕྱོགས་གང་ཁྱབ་པར་མ་གྱུར་པ་དེ་ནི་ཐ་ན་སྐྲའི་རྩེ་མོའི་ཆ་གཞག་པ་ཙམ་ཡང་མེད་དོ། །དེ་ནས་བཅོམ་ལྡན་འདས་ཀྱིས་འཁོར་ཆེན་པོ་དེ་འདུས་པར་མཁྱེན་ནས་དྲན་པ་དང་ལྡན་ཞིང་མཁྱེན་བཞིན་དུ་ཏིང་འཛིན་དེ་ལས་བཞེངས་ཏེ། དེ་བཞིན་གཤེགས་པའི་སྤྱན་ཐུགས་རྗེ་ཆེན་པོས་བསྐྱོད་པས། ཐམས་ཅད་དང་ལྡན་པའི་འཇིག་རྟེན་ལ་རྣམ་པར་གཟིགས་ནས་དགེ་སྦྱོང་ངམ། བྲམ་ཟེའམ། གང་ཡང་རུང་བས་ཆོས་དང་མཐུན་པར་འཇིག་རྟེན་དུ་མ་བསྐོར་བའི་ཆོས་ཀྱི་འཁོར་ལོ་བསྐོར་ཏོ། །ཞི་བའི་བློ་གྲོས། དེ་བཞིན་གཤེགས་པས་ཆོས་ཀྱི་འཁོར་ལོ་དེ་ནི་ཅི་ནས་ཀྱང་འཁོར་འདུས་པའི་སེམས་ཅན་རྣམས་རང་རང་གི་རྣམ་པར་རིག་པ་བཞིན་དུ་ཀུན་དུ་ཤེས་ཏེ། སེམས་ཅན་ཐམས་ཅད་ཀྱི་སེམས་
242b
ཀྱི་བསམ་པ་ཚིམ་པར་བྱ་བའི་ཕྱིར་བསྐོར་ཏོ། །གང་གི་ཚེ་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་དེའི་ཚེ་ཆོས་མཉན་པའི་ཕྱིར་ཕྱོགས་བཅུ་ནས་བྱང་ཆུབ་སེམས་དཔའ་གྲངས་མེད་དཔག་ཏུ་མེད་པ་དག་འདུས་པར་གྱུར་ཏོ། །འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དག་ཀྱང་འདུས་པར་གྱུར་ཏོ། །ཞི་བའི་བློ་གྲོས། དེ་ལ་གང་གི་ཚེ་བཅོམ་ལྡན་འདས་ཀྱིས་གསུང་འདི་སྐད་དུ། ཀོའུ་དི་ནྱ། མིག་མི་རྟག་གོ་ཞེས་བཀའ་སྩལ་པ་དེ་ལ་སྡུག་བསྔལ་གྱི་སྒྲས་འདུལ་བ་རྣམས་ཀྱིས་ནི་མིག་སྡུག་བསྔལ་ལོ་ཞེས་ཐོས་སོ། །བདག་མེད་པས་འདུལ་བ་རྣམས་ཀྱིས་ནི་མིག་བདག་མེད་པའོ་ཞེས་ཐོས་སོ། །སྟོང་པ་ཉིད་ཀྱིས་འདུལ་བ་རྣམས་ཀྱིས་ནི་མིག་སྟོང་ངོ་ཞེས་ཐོས་སོ། །ཞི་བས་འདུལ་བ་རྣམས་ཀྱིས་ནི་མིག་ཞི་བའོ་ཞེས་ཐོས་སོ། །དབེན་པས་འདུལ་བ་རྣམས་ཀྱིས་ནི་མིག་དབེན་པའོ་ཞེས་ཐོས་སོ། །མི་རྟག་པས་འདུལ་བ་རྣམས་ཀྱིས་ནི་མིག་མི་རྟག་པའོ་ཞེས་ཐོས་སོ། །གནས་མེད་པས་འདུལ་བ་རྣམས་ཀྱིས་ནི་མིག་གནས་མེད་པའོ་ཞེས་ཐོས་སོ། །སྒྱུ་མ་ལྟ་བུས་འདུལ་བ་རྣམས་ཀྱིས་ནི་མིག་སྒྱུ་མ་ལྟ་བུའོ་ཞེས་ཐོས་སོ། །རྨི་ལམ་ལྟ་བུས་འདུལ་བ་རྣམས་ཀྱིས་ནི་མིག་རྨི་ལམ་ལྟ་བུའོ་ཞེས་ཐོས་སོ། །ཆུ་བླ་ལྟ་བུས་འདུལ་བ་རྣམས་ཀྱིས་ནི་མིག་ཆུ་ཟླ་ལྟ་བུའོ་ཞེས་ཐོས་སོ། །མིག་ཡོར་ལྟ་བུས་འདུལ་བ་རྣམས་ཀྱིས་ནི་མིག་མིག་ཡོར་ལྟ་བུའོ་ཞེས་ཐོས་སོ། །བྲག་ཅ་ལྟ་བུས་འདུལ་བ་རྣམས་ཀྱིས་ནི་མིག་བྲག་ཅ་ལྟ་
243a
༄#། །བུའོ་ཞེས་ཐོས་སོ། །དེ་བཞིན་དུ་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་དང ། མངོན་པར་འདུ་བྱེད་པ་མེད་པ་དང ། མ་སྐྱེས་པ་དང ། སྐྱེ་བ་མེད་པས་འདུལ་བ་རྣམས་ཀྱིས་ནི་མིག་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ཉིད་དང ། མངོན་པར་འདུ་བྱེད་པ་མེད་པ་དང ། མ་སྐྱེས་པ་དང ། མ་བྱུང་བར་ཐོས་སོ། །རྟེན་ཅིང་འབྲེལ་བར་འབྱུང་བས་འདུལ་བ་རྣམས་ཀྱིས་ནི་མིག་རྟེན་ཅིང་འབྲེལ་པར་འབྱུང་བའོ་ཞེས་ཐོས་སོ། །མིག་ལ་ཇི་ལྟ་བ་བཞིན་དུ་དེ་ཡིད་ཀྱི་བར་དུ་རྟེན་ཅིང་འབྲེལ་པར་འབྱུང་བའོ་ཞེས་ཐོས་སོ། །དེ་བཞིན་དུ་གཟུགས་རྣམས་དང ། སྒྲ་རྣམས་དང ། དྲི་རྣམས་དང ། རོ་རྣམས་དང ། རེག་བྱ་རྣམས་དང ། ཆོས་རྣམས་སྟོང་ངོ་ཞེས་ཐོས་སོ། །ཁ་ཅིག་གིས་ནི་ཕུང་པོ་མི་རྟག་པ་དང ། ཁ་ཅིག་གིས་ནི་ཁམས་མི་རྟག་པར་ཐོས་སོ། །ཁ་ཅིག་གིས་ནི་སྐྱེ་མཆེད་བདག་མེད་པའོ་ཞེས་ཐོས་སོ། །ཁ་ཅིག་གིས་ནི་ཕུང་པོ་མི་རྟག་པ་ཉིད་དུ་ཐོས་ལ། ཁམས་ལ་མི་རྟག་པ་ཉིད་དུ་མ་ཡིན་ནོ། །ཁ་ཅིག་གིས་ནི་ཁམས་ལ་མི་རྟག་པ་ཉིད་དུ་ཐོས་ལ། ཕུང་པོ་ལ་མི་རྟག་པ་ཉིད་དུ་མ་ཡིན་ནོ། །ཁ་ཅིག་གིས་ནི་སྡུག་བསྔལ་གྱི་སྒྲས་རྣམ་པར་གྲོལ་ལོ། །ཁ་ཅིག་གིས་ནི་ཀུན་འབྱུང་བའི་སྒྲས་རྣམ་པར་གྲོལ་ལོ། །ཁ་ཅིག་གིས་ནི་འགོག་པའི་སྒྲས་རྣམ་པར་གྲོལ་ལོ། །ཁ་ཅིག་གིས་ནི་ལམ་གྱི་སྒྲས་རྣམ་པར་གྲོལ་ལོ། །ཁ་ཅིག་གིས་ནི་དྲན་པ་ཉེ་བར་བཞག་
243b
པའི་གཏམ་དུ་ཐོས་སོ། །ཁ་ཅིག་གིས་ནི་ཡང་དག་པའི་སྤོང་བའི་གཏམ་དུ་ཐོས་སོ། །ཁ་ཅིག་གིས་ནི་རྫུ་འཕྲུལ་གྱི་རྐང་པའི་གཏམ་དུ་ཐོས་སོ། །ཁ་ཅིག་གིས་ནི་དབང་པོའི་གཏམ་དུ་ཐོས་སོ། །ཁ་ཅིག་གིས་ནི་སྟོབས་ཀྱི་གཏམ་དུ་ཐོས་སོ། །ཁ་ཅིག་གིས་ནི་བྱང་ཆུབ་ཀྱི་ཡན་ལག་གི་གཏམ་དུ་ཐོས་སོ། །ཁ་ཅིག་གིས་ནི་ལམ་གྱི་གཏམ་དུ་ཐོས་སོ། །ཁ་ཅིག་གིས་ནི་ཞི་གནས་ཀྱི་གཏམ་དུ་ཐོས་སོ། །ཁ་ཅིག་གིས་ནི་ལྷག་མཐོང་གི་གཏམ་དུ་ཐོས་སོ། །ཁ་ཅིག་གིས་ནི་བདེན་པའི་གཏམ་དུ་ཐོས་སོ། །ཁ་ཅིག་གིས་ནི་ཉན་ཐོས་དང་རབ་ཏུ་ལྡན་པའི་གཏམ་དུ་ཐོས་སོ། །ཁ་ཅིག་གིས་ནི་རང་སངས་རྒྱས་དང་རབ་ཏུ་ལྡན་པའི་གཏམ་དུ་ཐོས་སོ། །ཁ་ཅིག་གིས་ནི་ཐེག་པ་ཆེན་པོ་དང་རབ་ཏུ་ལྡན་པའི་གཏམ་དུ་ཐོས་སོ། །ཞི་བའི་བློ་གྲོས། དེ་ལྟར་ན་དེ་བཞིན་གཤེགས་པས་སེམས་ཅན་ཐམས་ཅད་ཀྱི་སེམས་ཀྱི་བསམ་པ་ཚིམ་པར་བྱ་བའི་ཕྱིར་ཆོས་ཀྱི་འཁོར་ལོ་བསྐོར་ཏོ། །ཞི་བའི་བློ་གྲོས། དེ་ལྟར་དེ་བཞིན་གཤེགས་པས་ཆོས་ཀྱི་འཁོར་ལོ་བསྐོར་བ་ལ་སེམས་ཅན་གྱི་དོན་མཛད་པ་གང་ཡིན་པ་དེ་ནི། དགེ་སློང་ཤཱ་རིའི་བུས་ཀྱང་སེམས་ཅན་དེ་དག་བགྲང་བའི་རྟོགས་པས་ལོ་བརྒྱར་ཡང་རྟོགས་པར་མི་ནུས་ན། སེམས་ཅན་གཞན་དག་གིས་ལྟ་སྨོས་ཀྱང་ཅི་དགོས། བཅོམ་ལྡན་འདས་ཀྱིས་དཀའ་བ་སྤྱད་པ་དང ། བྱང་ཆུབ་ཀྱི་སྙིང་པོར་འགྲོ་བ་དང ། བདུད་བཏུལ་བ་དང ། བཀོད་པ་དང ། སེང་གེའི་སྒྲ་དང ། རྣམ་པར་རོལ་པ་དང ། ཆོས་ཀྱི་འཁོར་ལོ་བསྐོར་བ་བསྟན་པ་འདི་
244a
༄#། །བཤད་པ་ན་སྲོག་ཆགས་བརྒྱད་ཁྲི་བཞི་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སེམས་ཅན་ཚད་མེད་པ་དག་ནི་ཐེག་པ་གསུམ་ལ་ཡོངས་སུ་སྨན་པར་བྱས་སོ། །ཆོས་ཀྱི་འཁོར་ལོ་བསྐོར་བའི་ལེའུ་ཞེས་བྱ་སྟེ་བཅུ་བཞི་པའོ།། །།དེ་ནས་བཅོམ་ལྡན་འདས་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་དེ་སྐད་ཅེས་བསྟན་པས་དེ་བཞིན་གཤེགས་པ་ལ་སྐུར་པའམ། གཅིག་ཏུ་མ་གྱུར་ལགས་སམ། འོན་ཏེ་དེ་བཞིན་གཤེགས་པས་བསྟན་པ་དང་རྗེས་སུ་མཐུན་པའམ་གཅིག་ཏུ་ལྟའང་ལགས་སམ། བཅོམ་ལྡན་འདས། དེ་བཞིན་གཤེགས་པས་བསྟན་པ་ནི་ཟབ་ལགས། བཅོམ་ལྡན་འདས། དེ་བཞིན་གཤེགས་པའི་གསང་བ་ནི་ཟབ་སྟེ། འཇིག་རྟེན་ཐམས་ཅད་དང་མི་མཐུན་པ་ལགས། བཅོམ་ལྡན་འདས། དེ་བཞིན་གཤེགས་པའི་ཐུགས་ངེས་པར་དགོངས་པ་ནི་ཟབ་པ་ལགས་ཏེ། བཅོམ་ལྡན་འདས། བདག་གིས་གང་བསྟན་པ་དེ་ནི་འདི་ལྟར་དེ་བཞིན་གཤེགས་པའི་ཡེ་ཤེས་བདག་གིས་ལུས་ལ་གནས་པ་ལགས་ཀྱི། འདི་བདག་གི་རྩལ་གྱིས་ནི་མ་ལགས་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ།་གསང་པ་པའི་བདག་པོ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། གསང་བ་པའི་བདག་པོ། གང་སུ་དག་དེ་བཞིན་གཤེགས་པའི་རྗེས་སུ་འགྲོ་བའི་
244b
ཕྱིར་ཆོས་སྨྲ་བ་དེ་དག་ཐམས་ཅད་ཀྱི་ལུས་ལ་དེ་བཞིན་གཤེགས་པའི་ཡེ་ཤེས་གནས་སོ། །དེ་ཅིའི་ཕྱིར་ཞེ་ན། གསང་བ་པའི་བདག་པོ། གནས་མ་ཡིན་ཞིང་གོ་སྐབས་མེད་དེ། གང་དེ་བཞིན་གཤེགས་པས་བྱིན་གྱིས་མ་བརླབས་པར་སེམས་ཅན་དེ་དག་དེ་བཞིན་གཤེགས་པའི་གསང་བ་སྨྲ་བའམ། དེ་བཞིན་གཤེགས་པའི་ཆོས་ཉིད་དང་མཐུན་པ་དེ་ནི་གནས་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་བྱིན་གྱིས་མ་བརླབས་པ་རྣམས་ཀྱིས། དེ་བཞིན་གཤེགས་པའི་གསང་བ་ཤེས་པར་རམ། མཉན་པར་རམ། བཤད་པར་ནུས་པ་སུ་ཞིག་ཡོད། གསང་བ་པའི་བདག་པོ་དེ་བཞིན་གཤེགས་པའི་ཆོས་ཉིད་ནི་མཆོག་ཏུ་ཡང་དག་པའོ། །དེ་བཞིན་གཤེགས་པའི་ཆོས་ཉིད་ནི་དེ་ཁོ་ནའོ། །དེ་བཞིན་གཤེགས་པའི་བཞུགས་པ་ནི་ཡང་དག་པའོ་ཞེས་ཡང་དག་པར་སྨྲ་བས་སྨྲ་བ་ནི་ཆོས་ཀྱི་རྣམ་གྲངས་འདི་ཉིད་ཡང་དག་པར་སྨྲ་བས་སྨྲ་བའོ། །དེ་ཅིའི་ཕྱིར་ཞེ་ན། གསང་བ་པའི་བདག་པོ། འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཇིག་རྟེན་ཐམས་ཅད་དང་མི་མཐུན་པ་གང་ཡིན་པ་དེ་ནི་ཆོས་ཀྱི་རྣམ་གྲངས་འདིར་བསྟན་ཏོ། །བསྙད་དོ། །རབ་ཏུ་བཤད་དོ། །གསང་བ་པའི་བདག་པོ། གང་དག་ཆོས་ཀྱི་རྣམ་གྲངས་འདི་ཐོས་ནས་མོས་པ་དང ། ཡིད་ཆེས་པར་འགྱུར་བའི་སེམས་ཅན་དེ་དག་ཀྱང་འཇིག་རྟེན་ཐམས་ཅད་དང་མི་མཐུན་པར་འགྱུར་
245a
༄#། །རོ། །གསང་བ་པའི་བདག་པོ། རིའི་རྒྱལ་པོ་རི་རབ་ནི་མགོ་བོས་བསྒྱེལ་བའམ། ཕྲག་བ་ལ་ཐོགས་པར་ནུས་ཀྱི། དགེ་བའི་རྩ་བ་མ་བསྐྱེད་པའི་སེམས་ཅན་རྣམས་ཀྱིས་ནི་ཆོས་ཀྱི་རྣམ་གྲངས་འདི་ལ་མོས་པར་རམ། དད་པར་རམ། ཡིད་ཆེས་པར་ཡང་མི་ནུས་ན། བླང་བར་རམ། ཀུན་ཆུབ་པར་བྱ་བར་རམ། གཟུང་བར་རམ། སྦྱོར་བར་བྱ་བ་ལྟ་སྨོས་ཀྱང་ཅི་དགོས་ཏེ། དེ་ནི་གནས་མ་ཡིན་ནོ། །གསང་བ་པའི་བདག་པོ། གང་དག་ཆོས་ཀྱི་རྣམ་གྲངས་འདི་ཉན་པ་དང ། མོས་པའི་སེམས་ཅན་དེ་དག་ནི་སངས་རྒྱས་གཅིག་ལ་བསྙེན་བཀུར་བྱས་པ་མ་ཡིན་པ་ནས། སངས་རྒྱས་བཅུ་ལ་བསྙེན་བཀུར་བྱས་པ་མ་ཡིན་གྱི། གསང་བ་པའི་བདག་པོ། སྐྱེས་བུ་དམ་པ་དེ་དག་ནི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་བྱས་པ་དང ། བསོད་ནམས་ཀྱི་ཚོགས་ཀྱིས་བརྟན་པ་དང ། ཐེག་པ་ཆེན་པོ་འདི་ལ་ངེས་པར་བྱས་པར་རིག་པར་བྱའོ། །གསང་བ་པའི་བདག་པོ། སྐྱེས་བུ་དམ་པ་དེ་དག་ནི་སངས་རྒྱས་གཅིག་ལ་བསྙེན་བཀུར་བྱས་པ་མ་ཡིན། གཉིས་ལ་མ་ཡིན། གསུམ་ལ་མ་ཡིན། བཞི་ལ་མ་ཡིན། ལྔ་ལ་མ་ཡིན། སངས་རྒྱས་བཅུ་ལ་བསྙེན་བཀུར་བྱས་པ་མ་ཡིན་གྱི། གསང་བ་པའི་བདག་པོ།་སེམས་ཅན་དེ་དག་ནི་སངས་རྒྱས་མང་པོ་ལ་བསྙེན་བཀུར་བྱས་པ་དང ། ཡོངས་སུ་སྦྱང་བ་བྱས་པ་དང ། ཐེག་པ་ཆེན་པོ་འདི་ལ་དགེ་བའི་རྩ་བའི་ས་བོན་བཏབ་པ་ཡིན་ནོ། །དེ་ནས་བཅོམ་
245b
ལྡན་འདས་ལ་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཉེ་བར་ཞི་བ། ཉེ་བར་ཞི་བ་ཞེས་བགྱི་བ་ལ། ཉེ་བར་ཞི་བ་ཞེས་བགྱི་བ་འདི་ནི་གང་ལགས། གང་ཉེ་བར་ཞི་བས་ཉེ་བར་ཞི་བ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཉེ་བར་ཞི་བ། ཉེ་བར་ཞི་བ་ཞེས་བྱ་བ་འདི་ནི་ཉོན་མོངས་པ་ཉེ་བར་ཞི་བའི་ཚིག་བླ་དྭགས་སོ། །ཉོན་མོངས་པ་ཉེ་བར་ཞི་བ་ཞེས་བྱ་བ་འདི་ནི་ཀུན་དུ་རྟོག་པ་དང ། རྣམ་པར་རྟོག་པ་དང ། ཡོངས་སུ་རྟོག་པ་ཉེ་བར་ཞི་བའི་ཚིག་བླ་དྭགས་སོ། །ཀུན་དུ་རྟོག་པ་དང ། རྣམ་པར་རྟོག་པ་དང ། ཡོངས་སུ་རྟོག་པ་ཉེ་བར་ཞི་བ་ཞེས་བྱ་བ་འདི་ནི་འདུ་ཤེས་ཡིད་ལ་བྱེད་པ་ཉེ་བར་ཞི་བའི་ཚིག་བླ་དྭགས་སོ། །འདུ་ཤེས་ཡིད་ལ་བྱེད་པ་ཉེ་བར་ཞི་བ་ཞེས་བྱ་བ་འདི་ནི་ཕྱིན་ཅི་ལོག་ཉེ་བར་ཞི་བའི་ཚིག་བླ་དྭགས་སོ། །ཕྱིན་ཅི་ལོག་ཉེ་བར་ཞི་བ་ཞེས་བྱ་བ་འདི་ནི་རྒྱུ་དང་དམིགས་པ་ཉེ་བར་ཞི་བའི་ཚིག་བླ་དྭགས་སོ། །རྒྱུ་དང་དམིགས་པ་ཉེ་བར་ཞི་བ་ཞེས་བྱ་བ་འདི་ནི་མ་རིག་པ་དང ། སྲིད་པའི་སྲེད་པ་ཉེ་བར་ཞི་བའི་ཚིག་བླ་དྭགས་སོ། །མ་རིག་པ་དང ། སྲིད་པའི་སྲེད་པ་ཉེ་བར་ཞི་བ་ཞེས་བྱ་བ་འདི་ནི་ངར་འཛིན་པ་དང ། ང་ཡིར་འཛིན་པ་ཉེ་བར་ཞི་བའི་ཚིག་བླ་དྭགས་སོ། །ངར་འཛིན་པ་དང ། ང་ཡིར་འཛིན་པ་ཉེ་བར་ཞི་བ་ཞེས་བྱ་བ་འདི་ནི་མིང་དང་གཟུགས་ཉེ་བར་ཞི་བའི་ཚིག་བླ་དྭགས་སོ། །མིང་དང་གཟུགས་
246a
༄#། །ཉེ་བར་ཞི་བ་ཞེས་བྱ་བ་འདི་ནི་ཆད་པ་དང ། རྟག་པར་ལྟ་བ་ཉེ་བར་ཞི་བའི་ཚིག་བླ་དྭགས་སོ། །ཆད་པ་དང ། རྟག་པར་ལྟ་བ་ཉེ་བར་ཞི་བ་ཞེས་བྱ་བ་འདི་ནི་འཇིག་ཚོགས་ལ་ལྟ་བ་ཉེ་བར་ཞི་བའི་ཚིག་བླ་དྭགས་སོ། །ཞི་བའི་བློ་གྲོས། དེ་ལྟར་ན་དམིགས་པ་དང ། རྒྱུ་དང ། ལྟ་བ་དང་ལྡན་པའི་ཀུན་ནས་ཉོན་མོངས་པ་འབྱུང་བ་གང་ཡིན་པ་དེ་དག་ཐམས་ཅད་ནི་འཇིག་ཚོགས་ལ་ལྟ་བ་ལས་བྱུང་ངོ ། །འཇིག་ཚོགས་ལ་ལྟ་བ་ཉ་བར་ཞི་ན་ལྟ་བ་ཐམས་ཅད་ཉེ་བར་ཞིའོ། །འཇིག་ཚོགས་ལ་ལྟ་བ་ཉེ་བར་ཞི་ན་སྨོན་པ་ཐམས་ཅད་ཉེ་བར་ཞིའོ། །འཇིག་ཚོགས་ལ་ལྟ་བ་ཉེ་བར་ཞི་ན་ཉོན་མོངས་པ་ཐམས་ཅད་ཉེ་བར་ཞིའོ། །ཞི་བའི་བློ་གྲོས། འདི་ལྟ་སྟེ། དཔེར་ན། ཤིང་གི་རྩ་བ་བཅད་ན་ཡལ་ག་དང ། ལོ་མ་དང ། ཡལ་ག་ཕྲེའུ་ཐམས་ཅད་སྐམ་པར་འགྱུར་རོ། །ཞི་བའི་བློ་གྲོས། དེ་བཞིན་དུ་འཇིག་ཚོགས་ལ་ལྟ་བ་ཉེ་བར་ཞི་ན་ཉོན་མོངས་པ་ཐམས་ཅད་ཉེ་བར་ཞི་བར་འགྱུར་རོ། །ཞི་བའི་བློ་གྲོས། འཇིག་ཚོགས་ལ་ལྟ་བ་ཡོངས་སུ་མི་ཤེས་ན་ཉེ་བར་ལེན་པ་དང ། ཉེ་བའི་ཉོན་མོངས་པ་ཐམས་ཅད་འབྱུང་ངོ ། །འཇིག་ཚོགས་ལ་ལྟ་བ་ཡོངས་སུ་ཤེས་པར་གྱུར་ན། ཉེ་བར་ལེན་པ་དང ། ཉེ་བའི་ཉོན་མོངས་པ་ཐམས་ཅད་མི་འབྱུང་སྟེ།་གནོད་པར་མི་འགྱུར་རོ། །ཞི་བའི་བློ་གྲོས་ཀྱིས་གསོལ་པ། བཅོམ་ལྡན་འདས། འཇིག་ཚོགས་ལ་ལྟ་བ་ཡོངས་སུ་འཚལ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་
246b
པ།་ཞི་བའི་བློ་གྲོས། བདག་ཀུན་ནས་མི་སློང་བ་ནི་འཇིག་ཚོགས་ལ་ལྟ་བ་ཡོངས་སུ་ཤེས་པའོ། །སེམས་ཅན་ཀུན་ནས་མི་སློང་བ་དང ། སྲོག་དང་གང་ཟག་ཏུ་ལྟ་བ་ཀུན་ནས་མི་སློང་བ་ནི་འཇིག་ཚོགས་ལ་ལྟ་བ་ཡོངས་སུ་ཤེས་པའོ། །ཞི་བའི་བློ་གྲོས། ལྟ་བ་དེ་ནི་ནང་ན་ཡང་མི་གནས། ཕྱི་རོལ་ན་ཡང་མི་གནས་སོ། །ལྟ་བ་གནས་པ་མེད་པ་དེ་ལ་མི་གནས་པར་ཤེས་པ་གང་ཡིན་པ་འདི་ནི། ཞི་བའི་བློ་གྲོས། འཇིག་ཚོགས་ལ་ལྟ་བ་ཡོངས་སུ་ཤེས་པའོ། །ཞི་བའི་བློ་གྲོས། འཇིག་ཚོགས་ལ་ལྟ་བ་ཡོངས་སུ་ཤེས་པ་ཞེས་བྱ་བ་འདི་ནི་སྟོང་པ་ཉིད་ཀྱི་ཚིག་བླ་དྭགས་ཏེ། སྟོང་པ་ཉིད་ཀྱི་རྗེས་སུ་མཐུན་པའི་བཟོད་པས་ལྟ་བ་དེ་མི་འཛིན་པ་གང་ཡིན་པ་འདི་ཡང ། ཞི་བའི་བློ་གྲོས། འཇིག་ཚོགས་ལ་ལྟ་བ་ཡོངས་སུ་ཤེས་པའོ། །ཞི་བའི་བློ་གྲོས། མཚན་མ་མེད་པ་དང ། སྨོན་པ་མེད་པ་དང ། མངོན་པར་འདུ་བྱ་བ་མེད་པ་དང ། མ་སྐྱེས་པ་དང ། སྐྱེ་བ་མེད་པའི་ལྟ་བས་འཇིག་ཚོགས་ཞེས་བྱ་བའི་ལྟ་བ་དེ་མི་འཛིན་པ་འདི་ཡང ། ཞི་བའི་བློ་གྲོས། འཇིག་ཚོགས་ལ་ལྟ་བ་ཡོངས་སུ་ཤེས་པའོ། ཞི་བའི་བློ་གྲོས། འཇིག་ཚོགས་ཞེས་བྱ་བ་དེ་ནི་ཚོགས་མ་ཡིན་པ། འབྱུང་བ་མ་ཡིན་པ། རྣམ་པར་འབྱུང་བ་མ་ཡིན་པ་སྟེ། དེ་ནི་གཟོད་མ་ཉིད་ནས་བྱུང་བ་མ་ཡིན་པ་ཀུན་བརྟགས་པའོ། །འབྱུང་བ་མ་ཡིན་ཞིང་ཀུན་བརྟགས་པ་གང་ཡིན་པ་དེ་ནི་ཡོངས་སུ་བརྟག་པ་མ་ཡིན། རྣམ་པར་བརྟག་པ་མ་ཡིན་ནོ། །ཡོངས་སུ་བརྟག་པ་མ་ཡིན། རྣམ་པར་བརྟག་པ་མ་ཡིན་པ་གང་ཡིན་པ་དེ་ནི་བྱ་བ་མ་ཡིན་
247a
༄#། །པ། རྣམ་པར་བསྒྲུབ་པ་མ་ཡིན་པ། བསླང་བ་མ་ཡིན་པ། ཤེས་པར་བྱ་བ་མ་ཡིན་པའོ། །བྱ་བ་མ་ཡིན་པ་དང ། རྣམ་པར་བསྒྲུབ་པ་མ་ཡིན་པ་དང ། བསླང་བ་མ་ཡིན་པ་དང ། ཤེས་པར་བྱ་བ་མ་ཡིན་པ་གང་ཡིན་པ་དེ་ནི་ཞི་བ་ཞེས་བྱའོ། །གསོལ་པ། ཉེ་བར་ཞི་བ་དང་ལྡན་པ་ཉེ་བར་ཞི་བ་དང་ལྡན་པ་ཞེས་བགྱི་བ་གང་ཉེ་བར་ཞི་བས་ཞི་བ་དང་ལྡན་པ་ཞེས་བགྱི། བཀའ་སྩལ་པ། དམིགས་པས་སེམས་འབར་བར་བྱེད་དེ། གང་ཕྱིས་དམིགས་པར་མི་བྱེད་པ་དེ་མི་འབར་རོ། །མི་འབར་ན་ཉེ་བར་ཞི་བ་དང་ལྡན་པ་ཞེས་བྱའོ། །ཞི་བའི་བློ་གྲོས། འདི་ལྟ་སྟེ། དཔེར་ན། མེ་ནི་རྒྱུ་ལ་འབར་གྱི། རྒྱུ་མེད་ན་འཆི་བར་འགྱུར་རོ། །དེ་བཞིན་དུ་དམིགས་པ་ལས་སེམས་འབར་གྱི། དམིགས་པ་མེད་ན་ཞི་བར་འགྱུར་རོ།། །།བམ་པོ་བདུན་པ། །ཞི་བའི་བློ་གྲོས། དེ་ལ་བྱང་ཆུབ་སེམས་དཔའ་ཐབས་ལ་མཁས་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ནི་དམིགས་པ་ཉེ་བར་ཞི་བ་ཉིད་དུ་ཡང་རབ་ཏུ་ཤེས་ལ། དགེ་བའི་རྩ་བ་ལ་དམིགས་པའང་ཞི་བར་མི་བྱེད་དོ། །ཉོན་མོངས་པ་ལ་དམིགས་པ་ཡང་མི་བསྐྱེད་ལ། ཕ་རོལ་ཏུ་ཕྱིན་པ་ལ་དམིགས་པ་ཡང་བསྐྱེད་དོ། །བདུད་དང་ཉེ་བའི་ཉོན་མོངས་པའི་དམིགས་པ་ཡང་སྤོང་ལ། བྱང་ཆུབ་ཀྱི་ཕྱོགས་དང་མཐུན་པའི་ཆོས་ལ་དམིགས་པ་ཡང་མི་སྤོང་ངོ ། །ཉན་ཐོས་དང ། རང་སངས་རྒྱས་ཀྱི་ཆོས་འདོད་པ་ལ་དམིགས་པ་ཡང་མི་
247b
ལེན་ལ། ཐམས་ཅད་མཁྱེན་པ་ཉིད་ཀྱི་སེམས་ལ་དམིགས་པ་ཡང་མི་འདོར་རོ། །སྟོང་པ་ཉིད་དུ་དམིགས་པ་ལ་ཡང་རབ་ཏུ་རྟོག་ལ། སེམས་ཅན་ཐམས་ཅད་སྙིང་རྗེ་ཆེན་པོའི་དམིགས་པར་ཡང་བལྟའོ། །ཞི་བའི་བློ་གྲོས། དེ་ལྟར་བྱང་ཆུབ་སེམས་དཔའ་ཐབས་ལ་མཁས་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ནི་དམིགས་པ་ལ་དབང་ཐོབ་སྟེ། མ་སྐྱེས་པའི་དམིགས་པ་ལ་ཡང་ངེས་པར་སེམས་ལ། བསམ་བཞིན་དུ་སྐྱེ་བའི་དམིགས་པ་ཡང་མི་སྤོང་ངོ ། །མངོན་པར་འདུ་བྱ་བ་མེད་པས་དམིགས་པ་ལ་ཡང་འཇུག་ལ། དགེ་བའི་རྩ་བ་མངོན་པར་འདུ་བྱ་བའི་དམིགས་པ་ཡང་ཉམས་འོག་ཏུ་ཆུད་པར་བྱེད་དོ། །མཚན་མ་མེད་པའི་དམིགས་པ་ལ་ཡང་སྤྱོད་ལ། བྱང་ཆུབ་ཀྱི་སེམས་ཀྱི་དམིགས་པ་ཡང་ཆུད་མི་གསོན་ཏོ། །སྨོན་པ་མེད་པའི་དམིགས་པ་ཡང་རྣམ་པར་མཐོང་ལ། ཁམས་གསུམ་པའི་དམིགས་པ་ལ་ཡང་མི་སྨོད་དོ། །ཤེས་རབ་དང་ཐབས་ལས་ངེས་པར་བྱུང་བ་དེ་ནི་དམིགས་པ་ཐམས་ཅད་ལ་དབང་བྱེད་པར་གྱུར་ཏེ། དེ་མི་སྡུག་པ་ལ་དམིགས་ནས་དེ་བཞིན་གཤེགས་པའི་སྐུ་སྡུག་པ་ལ་སེམས་གནས་སོ། །མི་རྟག་པ་ལ་དམིགས་ནས་འཁོར་བ་ལ་སེམས་ཡོངས་སུ་མི་སྐྱོ་བ་ཉིད་དུ་སེམས་གནས་སོ། །སྡུག་བསྔལ་ལ་དམིགས་ནས་སེམས་ཅན་ཐམས་ཅད་མྱ་ངན་ལས་འདས་པའི་བདེ་བ་ལ་དགོད་པར་སེམས་གནས་སོ། །བདག་མེད་པ་ལ་དམིགས་ནས་སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་གནས་སོ། །འདོད་
248a
༄#། །ཆགས་ལ་དམིགས་ནས་སེམས་ཅན་འདོད་ཆགས་ལ་སྤྱོད་པ་རྣམས་ལ་མི་སྡུག་པའི་སྨན་ཆེན་པོ་ཡང་དག་པར་བསྟན་པར་སེམས་གནས་སོ། །ཞེ་སྡང་ལ་དམིགས་ནས་སེམས་ཅན་ཞེ་སྡང་ལ་སྤྱོད་པ་རྣམས་ལ་བྱམས་པ་ཆེན་པོའི་སྨན་ཆེན་པོ་ཡང་དག་པར་བསྟན་པར་སེམས་གནས་སོ། །གཏི་མུག་ལ་དམིགས་ནས་སེམས་ཅན་གཏི་མུག་ལ་སྤྱོད་པ་རྣམས་ལ་རྟེན་ཅིང་འབྲེལ་པར་འབྱུང་བའི་སྨན་ཆེན་པོ་ཡང་དག་པར་བསྟན་པར་སེམས་གནས་སོ། །ཆ་མཉམ་པ་ལ་དམིགས་ནས་སེམས་ཅན་ཆ་མཉམ་པ་ལ་སྤྱོད་པ་རྣམས་ལ་མི་རྟག་པའི་འདུ་ཤེས་ཀྱིས་སྨན་ཆེན་པོ་ཡང་དག་པར་བསྟན་པར་སེམས་གནས་སོ། །འདོད་ཆགས་དང་བྲལ་བ་ལ་དམིགས་ནས་ཉན་ཐོས་སུ་འདུལ་བར་སེམས་གནས་སོ། །ཞེ་སྡང་དང་བྲལ་བ་ལ་དམིགས་ནས་རང་སངས་རྒྱས་སུ་འདུལ་བར་སེམས་གནས་སོ། །གཏི་མུག་དང་བྲལ་བ་ལ་དམིགས་ནས་བྱང་ཆུབ་སེམས་དཔར་འདུལ་བར་སེམས་གནས་སོ། །གཟུགས་ལ་དམིགས་ནས་དེ་བཞིན་གཤེགས་པའི་གཟུགས་ཐོབ་པར་བྱ་བར་སེམས་གནས་སོ། །སྒྲ་ལ་དམིགས་ནས་དེ་བཞིན་གཤེགས་པའི་སྒྲ་དབྱངས་ཐོབ་པར་བྱ་བར་སེམས་གནས་སོ། །དྲི་ལ་དམིགས་ནས་དེ་བཞིན་གཤེགས་པའི་ཚུལ་ཁྲིམས་ཀྱི་དྲི་བསུང་ཐོབ་པར་བྱ་བར་སེམས་གནས་སོ། །རོ་ལ་དམིགས་ནས་དེ་བཞིན་གཤེགས་པའི་སྐྱེས་བུ་ཆེན་པོའི་མཚན་རོ་བྲོ་བའི་མཆོག་ཐོབ་པར་བྱ་བར་
248b
སེམས་གནས་སོ། །རེག་བྱ་ལ་དམིགས་ནས་དེ་བཞིན་གཤེགས་པའི་ཕྱག་དང་ཞབས་འཇམ་ཞིང་གཞོན་པ་ཐོབ་པར་བྱ་བར་སེམས་གནས་སོ། །ཆོས་ལ་དམིགས་ནས་དེ་བཞིན་གཤེགས་པའི་སེམས་ངེས་པར་སེམས་པ་ཐོབ་པར་བྱ་བར་སེམས་གནས་སོ། །སྦྱིན་པ་ལ་དམིགས་ནས་མཚན་དང་དཔེ་བྱད་བཟང་པོ་ཐོབ་པར་བྱ་བར་སེམས་གནས་སོ། །ཚུལ་ཁྲིམས་ལ་དམིགས་ནས་སངས་རྒྱས་ཀྱི་ཞིང་ཡོངས་སུ་དག་པར་བྱ་བར་སེམས་གནས་སོ། །བཟོད་པ་ལ་དམིགས་ནས་ཚངས་པའི་སྒྲ་དབྱངས་དང ། གསེར་གྱི་མདོག་ཏུ་འདུག་པའི་པགས་པ་ཐོབ་པར་བྱ་བར་སེམས་གནས་སོ།། བརྩོན་འགྲུས་ལ་དམིགས་ནས་སེམས་ཅན་ཐམས་ཅད་བསྒྲལ་བར་སེམས་གནས་སོ། །བསམ་གཏན་ལ་དམིགས་ནས་མངོན་པར་ཤེས་པ་བསྐྱེད་པར་སེམས་གནས་སོ། །ཤེས་རབ་ལ་དམིགས་ནས་སེམས་ཅན་ཐམས་ཅད་ཀྱི་ལྟ་བ་དང ། ཉོན་མོངས་པའི་ཀུན་ནས་ཉོན་མོངས་པ་རྒྱུན་གཅོད་པར་སེམས་གནས་སོ། །བྱམས་པ་ལ་དམིགས་ནས་སེམས་ཅན་ཐམས་ཅད་ལ་ཁོང་ཁྲོ་བའི་སེམས་མེད་པར་བྱ་བར་སེམས་གནས་སོ། །སྙིང་རྗེ་ལ་དམིགས་ནས་དམ་པའི་ཆོས་ཡོངས་སུ་གཟུང་བར་སེམས་གནས་སོ། །དགའ་བ་ལ་དམིགས་ནས་ཆོས་བསྟན་པ་ལ་མཆོག་ཏུ་དགའ་བར་བྱ་བར་སེམས་གནས་སོ། །བཏང་སྙོམས་ལ་དམིགས་ནས་སེམས་ཅན་རྗེས་སུ་ཆགས་པ་དང ། ཁོང་ཁྲོ་བ་སྤོང་བ་ལ་སྦྱར་བར་སེམས་གནས་སོ། །བསྡུ་བའི་དངོས་པོ་ལ་དམིགས་ནས་
249a
༄#། །སེམས་ཅན་ཡོངས་སུ་སྨིན་པར་བྱ་བར་སེམས་གནས་སོ། །སེར་སྣའི་སྐྱོན་ལ་དམིགས་ནས་བདོག་པ་ཐམས་ཅད་ཡོངས་སུ་གཏང་བར་སེམས་གནས་སོ། །འཆལ་བའི་ཚུལ་ཁྲིམས་ཀྱི་སྐྱོན་ལ་དམིགས་ནས་ཚུལ་ཁྲིམས་རྣམ་པར་དག་པར་བྱ་བར་སེམས་གནས་སོ། །གནོད་སེམས་ཀྱི་སྐྱོན་ལ་དམིགས་ནས་བཟོད་པའི་སྟོབས་དང་དེས་པ་ལ་སེམས་གནས་སོ། །ལེ་ལོའི་སྐྱོན་ལ་དམིགས་ནས་དེ་བཞིན་གཤེགས་པའི་སྟོབས་ཡོངས་སུ་བསྒྲུབ་པར་སེམས་གནས་སོ། །གཡེང་བའི་སྐྱོན་ལ་དམིགས་ནས་དེ་བཞིན་གཤེགས་པའི་བསམ་གཏན་ཐོབ་པར་བྱ་བར་སེམས་གནས་སོ། །འཆལ་བའི་ཤེས་རབ་ཀྱི་སྐྱོན་ལ་དམིགས་ནས་ཆགས་པ་མེད་པའི་ཡེ་ཤེས་རབ་ཏུ་རྫོགས་པར་བྱ་བར་སེམས་གནས་སོ། །ཉན་ཐོས་དང་རང་སངས་རྒྱས་ཡིད་ལ་བྱས་ནས་ཐེག་པ་ཆེན་པོ་ལ་ཡང་དག་པར་བསྒྲུབ་པར་སེམས་གནས་སོ། །ཡིད་འབྱུང་བ་ཡིད་ལ་བྱས་ནས་སྡིག་པ་ཐམས་ཅད་མི་བྱ་བར་སེམས་གནས་སོ། །ངན་འགྲོ་ངན་སོང་ཡིད་ལ་བྱས་ནས་ངན་འགྲོ་དང་ངན་སོང་དང་མི་ཁོམ་པར་སྐྱེས་པའི་སེམས་ཅན་ཐམས་ཅད་ཡོངས་སུ་བསྐྱབ་པར་སེམས་གནས་སོ། །ལྷ་ཡིད་ལ་བྱས་ནས་འབྱོར་པ་ཐམས་ཅད་མཐར་རྒུད་པར་འགྱུར་བར་སེམས་གནས་སོ། །མི་ཡིད་ལ་བྱས་ནས་སྙིང་པོ་བླང་བར་སེམས་གནས་སོ། །སངས་རྒྱས་རྗེས་སུ་དྲན་པ་ཡིད་ལ་བྱས་ནས་སངས་རྒྱས་དང་ཕྲད་པར་བྱ་བར་སེམས་
249b
གནས་སོ། །ཆོས་རྗེས་སུ་དྲན་པ་ཡིད་ལ་བྱས་ནས་སློབ་དཔོན་ཆོས་ལ་དཔེ་མཁྱུད་མེད་པར་བྱ་བར་སེམས་གནས་སོ། །དགེ་འདུན་རྗེས་སུ་དྲན་པ་ཡིད་ལ་བྱས་ནས་ཕྱིར་མི་ལྡོག་པའི་ཆོས་ཐོབ་པར་བྱ་བར་སེམས་གནས་སོ། །གཏོང་བ་རྗེས་སུ་དྲན་པ་ཡིད་ལ་བྱས་ནས་གཏོང་བ་ཐམས་ཅད་ཡོངས་སུ་གཏང་བར་སེམས་གནས་སོ། །ཚུལ་ཁྲིམས་རྗེས་སུ་དྲན་པ་ཡིད་ལ་བྱས་ནས་སྨོན་པ་དང ། བསམ་གཏན་དང ། བྱང་ཆུབ་ཀྱི་ཡན་ལག་ཡོངས་སུ་རྫོགས་པར་བྱ་བར་སེམས་གནས་སོ། །ལྷ་རྗེས་སུ་དྲན་པ་ཡིད་ལ་བྱས་ནས་ལྷ་ཐམས་ཅད་ཀྱིས་བསྟོད་ཅིང་བསྔགས་པའི་སངས་རྒྱས་ཀྱི་ཡེ་ཤེས་ལ་གནས་པར་བྱ་བར་སེམས་གནས་སོ། །ལུས་ཡིད་ལ་བྱས་ནས་སངས་རྒྱས་ཀྱི་སྐུ་ཐོབ་པར་བྱ་བར་སེམས་གནས་སོ། །ངག་ཡིད་ལ་བྱས་ནས་སངས་རྒྱས་ཀྱི་གསུང་ཐོབ་པར་བྱ་བར་སེམས་གནས་སོ། །སེམས་ཡིད་ལ་བྱས་ནས་སངས་རྒྱས་དང་མཉམ་པའི་སེམས་ཐོབ་པར་བྱ་བར་སེམས་གནས་སོ། །འདུས་བྱས་ལ་དམིགས་ནས་དེ་བཞིན་གཤེགས་པའི་ཡེ་ཤེས་ཡོངས་སུ་རྫོགས་པར་བྱ་བར་སེམས་གནས་སོ། །འདུས་མ་བྱས་ལ་དམིགས་ནས་སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བྱ་བར་སེམས་གནས་ཏེ། ཞི་བའི་བློ་གྲོས། དེ་ལྟར་ན་བྱང་ཆུབ་སེམས་དཔའ་ཐམས་ཅད་མཁྱེན་པའི་ཡེ་ཤེས་ཀྱི་ཕྱིར་ཡིད་ལ་མི་བྱེད་པའི་དམིགས་པ་དེ་གང་ཡང་མེད་དོ། །བྱང་ཆུབ་སེམས་དཔའ་དེའི་དམིགས་པ་ཐམས་ཅད་ནི་བྱང་ཆུབ་ཏུ་ཡོངས་སུ་བསྔོས་པའོ། །ཆོས་ཐམས་
250a
༄#། །ཅད་བྱང་ཆུབ་ཀྱི་རྗེས་སུ་སོང་བར་མཐོང་བ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པ་སྟེ། ཞི་བའི་བློ་གྲོས། འདི་ལྟ་སྟེ། དཔེར་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ས་ལས་སྐྱེ་བ་ནི་སྐྱེ་བ་ཇི་ལྟར་སྐྱེས་པའི་སེམས་ཅན་རྣམས་ཀྱི་ཡོངས་སུ་སྤྱད་པར་མི་འགྱུར་བ་གང་ཡང་མེད་དོ། །ཞི་བའི་བློ་གྲོས། དེ་བཞིན་དུ་བྱང་ཆུབ་སེམས་དཔའ་ཐབས་ལ་མཁས་པའི་བྱང་ཆུབ་ཀྱི་ཕྱིར་ཡོངས་སུ་སྤྱད་པ་དང ། བྱང་ཆུབ་ཀྱི་ཕྱིར་ཕན་འདོགས་པར་མི་མཐོང་བའི་དམིགས་པ་གང་ཡང་མེད་དོ། །ཞི་བའི་བློ་གྲོས། འདི་ལྟ་སྟེ། དཔེར་ན། གཟུགས་གང་ཅི་ཡང་རུང་སྟེ་དེ་ཐམས་ཅད་ནི་འབྱུང་བ་ཆེན་པོ་བཞི་ལས་གྱུར་པའོ། །ཞི་བའི་བློ་གྲོས། དེ་བཞིན་དུ་ཐབས་ལ་མཁས་པའི་བྱང་ཆུབ་སེམས་དཔའ་རྣམས་ཀྱི་དམིགས་པ་གང་ཅི་ཡང་རུང་སྟེ། དེ་ཐམས་ཅད་ནི་བྱང་ཆུབ་ཀྱི་རྣམ་པ་དང་ཡང་དག་པར་ལྡན་པའོ། །ཞི་བའི་བློ་གྲོས། སེམས་ཅན་གང་དག་འཇུངས་པ་དང ། བྱས་པ་མི་གཟོ་བ་དེ་དག་ལས་བྱང་ཆུབ་སེམས་དཔའ་སྦྱིན་པའི་ཕ་རོལ་ཏུ་ཕྱིན་པ་དང ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །སེམས་ཅན་གང་དག་ཁྲོ་བ་ལ་སྤྱོད་བ་དང ། ལེ་ལོ་ཅན་དེ་དག་ལས་བྱང་ཆུབ་སེམས་དཔའི་བཟོད་པའི་ཕ་རོལ་ཏུ་ཕྱིན་པ་དང ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །སེམས་ཅན་གང་དག་གླེན་པ་དང ། རྨོངས་པ་དེ་དག་
250b
ལས་བྱང་ཆུབ་སེམས་དཔའི་བསམ་གཏན་གྱི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །སེམས་ཅན་གང་དག་ཕན་མི་འདོགས་པ་དེ་དག་ལ་བྱང་ཆུབ་སེམས་དཔའ་ཁོང་ཁྲོ་བའི་སེམས་སུ་མི་འགྱུར་རོ། །སེམས་ཅན་གང་དག་ཕན་འདོགས་པ་དེ་དག་ལ་བྱང་ཆུབ་སེམས་དཔའ་རྗེས་སུ་ཆགས་པའི་སེམས་སུ་མི་འགྱུར་རོ། །སེམས་ཅན་གང་དག་བསྔགས་པ་བརྗོད་པ་དེ་དག་ལ་ཡང་བྱང་ཆུབ་སེམས་དཔའ་ཁེངས་པར་མི་འགྱུར་རོ། །སེམས་ཅན་གང་དག་བསྔགས་པ་མི་བརྗོད་པ་དེ་དག་ལ་ཡང་བྱང་ཆུབ་སེམས་དཔའ་སྲོ་ཤི་བར་མི་འགྱུར་རོ། །སེམས་ཅན་གང་དག་སྡུག་བསྔལ་བ་དེ་དག་ལ་བྱང་ཆུབ་སེམས་དཔའ་སྙིང་རྗེ་ཆེན་པོ་སྐྱེའོ། །སེམས་ཅན་གང་དག་བདེ་བ་དེ་དག་ལ་བྱང་ཆུབ་སེམས་དཔའ་དགའ་བ་དང ། མཆོག་ཏུ་དགའ་བ་སྐྱེའོ། །སེམས་ཅན་གང་དག་གདུལ་དཀའ་བ་དང ། དམུ་རྒོད་དེ་དག་ལ་བྱང་ཆུབ་སེམས་དཔའ་ཞི་གནས་ཀྱི་སེམས་སྐྱེའོ། །སེམས་ཅན་གང་དག་ཅང་ཤེས་པ་དེ་དག་ལ་བྱང་ཆུབ་སེམས་དཔའ་བྱས་པ་གཟོ་བའི་བློ་སྐྱེའོ། །སེམས་ཅན་གང་དག་རྐྱེན་གྱི་སྟོབས་ཅན་ཡིན་པ་དེ་དག་ལ་བྱང་ཆུབ་སེམས་དཔའ་རྗེས་སུ་བསྲུང་བའི་བློ་སྐྱེའོ། །སེམས་ཅན་གང་དག་རྒྱུའི་སྟོབས་ཅན་ཡིན་པ་དེ་དག་ལ་བྱང་ཆུབ་སེམས་དཔའ་ཆད་པས་བཅད་པ་དང ། བསྡིགས་པ་དང ། གདམས་པའི་བློ་སྐྱེའོ། །སེམས་ཅན་གང་དག་ཟུར་ཙམ་གྱིས་གོ་བ་དེ་དག་ལ་བྱང་ཆུབ་སེམས་དཔས་ཟབ་མོའི་གཏམ་བརྗོད་
251a
༄#། །པར་བྱའོ། །སེམས་ཅན་གང་དག་རྣམ་པར་སྤྲོས་པས་གོ་བ་དེ་དག་ལ་བྱང་ཆུབ་སེམས་དཔས་གཏམ་རྒྱས་པར་བརྗོད་པར་བྱའོ། །སེམས་ཅན་གང་དག་བཀྲི་དགོས་བ་དེ་དག་ལ་བྱང་ཆུབ་སེམས་དཔས་གཏམ་གོ་རིམས་སུ་ཕབ་སྟེ་བརྗོད་པར་བྱའོ། །སེམས་ཅན་གང་དག་ཚིག་ལྷུར་ལེན་པ་དེ་དག་ལ་ཚིག་དང ། ཡི་གེ་བསྙུངས་ཏེ་གཏམ་བརྗོད་པར་བྱའོ། ། གང་དག་ཞི་གནས་སྔོན་དུ་འགྲོ་བ་དེ་དག་ལ་ལྷག་མཐོང་གི་གཏམ་བརྗོད་པར་བྱའོ། །གང་དག་ལྷག་མཐོང་སྔོན་དུ་འགྲོ་བ་དེ་དག་ལ་ཏིང་ངེ་འཛིན་ལ་འཇུག་པའི་གཏམ་བརྗོད་པར་བྱའོ། །གང་དག་ཚུལ་ཁྲིམས་ལ་ཆགས་པ་དེ་དག་ལ་མཐར་ཕྱིན་པ་མ་ཡིན་པས་ཡང་སེམས་ཅན་དམྱལ་བའི་གཏམ་བརྗོད་པར་བྱའོ། །སེམས་ཅན་གང་དག་ཐོས་པ་ལ་ཆགས་པ་དེ་དག་ལ་འབྱུང་བའི་གཏམ་བརྗོད་པར་བྱའོ། །སེམས་ཅན་གང་དག་ཏིང་ངེ་འཛིན་ལ་ཆགས་པ་དེ་དག་ལ་ཤེས་རབ་ལ་འཇུག་པའི་གཏམ་བརྗོད་པར་བྱའོ། །སེམས་ཅན་གང་དག་དགོན་པའི་གནས་ལ་ཆགས་པ་དེ་དག་ལ་སེམས་དབེན་པར་བྱ་བའི་གཏམ་བརྗོད་པར་བྱའོ། །གང་དག་སྦྱངས་པའི་ཡོན་ཏན་དང ། ཡོ་བྱད་བསྙུངས་པ་ལ་ཆགས་པ་དེ་དག་ལ་འཕགས་པའི་ཤེས་རབ་ཀྱི་དབང་པོའི་གཏམ་བརྗོད་པར་བྱའོ། །གང་དག་གཏི་མུག་ཆུང་བ་དེ་དག་ལ་ཐོས་པས་སྣང་བའི་གཏམ་བརྗོད་པར་བྱའོ། །གང་དག་འདོད་ཆགས་ཀྱིས་ནོན་པ་དེ་དག་ལ་མི་སྡུག་པའི་གཏམ་བརྗོད་པར་
251b
བྱའོ། །གང་དག་ཞེ་སྡང་གིས་ནོན་པ་དེ་དག་ལ་བྱམས་པའི་གཏམ་བརྗོད་པར་བྱའོ། །གང་དག་གཏི་མུག་གིས་ནོན་པ་དེ་དག་ལ་རྟེན་ཅིང་འབྲེལ་པར་འབྱུང་བའི་གཏམ་བརྗོད་པར་བྱའོ། །སེམས་ཅན་གང་དག་ཆ་མཉམ་པ་ལ་སྤྱོད་པ་དེ་དག་ལ་སྐབས་སྐབས་སུ་གཏམ་རྒྱས་པར་བརྗོད་པར་བྱ་སྟེ། འདི་ལྟ་སྟེ། མི་སྡུག་པའི་གཏམ་དང ། བྱམས་པའི་གཏམ་དང ། རྟེན་ཅིང་འབྲེལ་པར་འབྱུང་བའི་གཏམ་བརྗོད་པར་བྱའོ། །སེམས་ཅན་གང་དག་རྗེས་སུ་མཐུན་པའི་གཏམ་གྱིས་འདུལ་བ་དེ་དག་ལ་ལྷག་པའི་ཚུལ་ཁྲིམས་ཀྱི་གཏམ་བརྗོད་པར་བྱ། ལྷག་པའི་སེམས་ཀྱི་གཏམ་བརྗོད་པར་བྱ།་ལྷག་པའི་ཤེས་རབ་ཀྱི་གཏམ་བརྗོད་པར་བྱའོ། །གང་དག་སངས་རྒྱས་ཀྱིས་འདུལ་བ་དེ་དག་ལ་དབེན་པའི་གཏམ་གྱིས་རྗེས་སུ་མཐུན་པར་བྱང་ཆུབ་ཀྱི་ཕྱོགས་ཀྱི་ཆོས་ཀྱི་གཏམ་བརྗོད་པར་བྱའོ། །སེམས་ཅན་གང་དག་སྨ་དབབ་པས་འདུལ་བ་དེ་དག་ལ་གདོང་བསྒྱུར་ཏེ་ཕྱིས་ཆོས་ཀྱི་གཏམ་བརྗོད་པར་བྱའོ། །གང་དག་རྒྱུན་མི་འཆད་པར་བསྟན་པས་འདུལ་བ་དེ་དག་ལ་རྟག་པར་རྒྱུན་དུ་བསྟན་པར་བྱའོ། །དབང་པོ་ཡོངས་སུ་མ་སྨིན་པ་རྣམས་ལ་ནི་ཆོས་ཀྱི་གཏམ་བརྗོད་པར་མི་བྱའོ། །གང་དག་སྣ་ཚོགས་ཀྱི་གཏམ་གྱིས་འདུལ་བ་དེ་དག་ལ་རྟོགས་པ་བརྗོད་པ་གཏན་ལ་ཕབ་པ་བསྟན་པ་དང ། དཔེ་དགོད་པའི་གཏམ་བརྗོད་པར་བྱའོ། །སེམས་ཅན་གང་དག་ཟབ་མོའི་གཏམ་གྱིས་འདུལ་བ་དེ་དག་ལ་རྟེན་ཅིང་འབྲེལ་པར་འབྱུང་བའི་གཏམ་དང །
252a
༄#། །སེམས་ཅན་མེད་པའི་གཏམ་དང ། གང་ཟག་མེད་པའི་གཏམ་བརྗོད་པར་བྱའོ། །ལྟ་བར་བྱིང་བ་རྣམས་ལ་སྟོང་པ་ཉིད་ཀྱི་གཏམ་བརྗོད་པར་བྱའོ། །རྣམ་པར་རྟོག་པ་ལ་སྤྱོད་པ་རྣམས་ལ་མཚན་མ་མེད་པའི་གཏམ་བརྗོད་པར་བྱའོ། །སེམས་ཅན་སྨོན་ལམ་ལ་སྤྱོད་པ་རྣམས་ལ་སྨོན་པ་མེད་པའི་གཏམ་བརྗོད་པར་བྱའོ། །ཕུང་པོ་ལ་གནས་པ་རྣམས་ལ་སྒྱུ་མའི་ཆོས་ཀྱི་གཏམ་བརྗོད་པར་བྱའོ། །ཁམས་ལ་གནས་པ་རྣམས་ལ་རབ་ཏུ་དབེན་པའི་གཏམ་བརྗོད་པར་བྱའོ། །སྐྱེ་མཆེད་ལ་གནས་པ་རྣམས་ལ་རྨི་ལམ་ལྟ་བུའི་གཏམ་བརྗོད་པར་བྱའོ། །འདོད་པའི་ཁམས་ལ་གནས་པ་རྣམས་ལ་ཀུན་ཏུ་འབར་བའི་གཏམ་བརྗོད་པར་བྱའོ། །གཟུགས་ཀྱི་ཁམས་ལ་གནས་པ་རྣམས་ལ་འདུ་བྱེད་ཐམས་ཅད་སྡུག་བསྔལ་བའི་གཏམ་བརྗོད་པར་བྱའོ། །གཟུགས་མེད་པའི་ཁམས་ལ་གནས་པ་རྣམས་ལ་འདུ་བྱེད་ཐམས་ཅད་མི་རྟག་པའི་གཏམ་བརྗོད་པར་བྱའོ། །སྡུག་བསྔལ་གྱིས་འདུལ་བ་རྣམས་ལ་འཕགས་པའི་རིགས་ཆོག་ཤེས་པའི་གཏམ་བརྗོད་པར་བྱའོ། །བདེ་བས་འདུལ་བ་རྣམས་ལ་བསམ་གཏན་དང ། ཚད་མེད་པའི་གཏམ་བརྗོད་པར་བྱའོ། །ལྷས་འདུལ་བ་རྣམས་ལ་གཅིག་ཏུ་བདེ་བའི་གཏམ་བརྗོད་པར་བྱའོ། །མཚན་མས་འདུལ་བ་རྣམས་ལ་ང་ཡི་བ་མེད་པ་དང ། ཡོངས་སུ་འཛིན་པ་མེད་པའི་གཏམ་བརྗོད་པར་བྱའོ། །ཉན་ཐོས་ཀྱིས་འདུལ་བ་རྣམས་ལ་
252b
རྗེས་སུ་བསྟན་པ་དང ། དེའི་བྱ་བའི་གཏམ་བརྗོད་པར་བྱའོ། །རང་སངས་རྒྱས་ཀྱིས་འདུལ་བ་རྣམས་ལ་དོན་ཉུང་བ་དང ། བྱ་བ་ཉུང་བའི་གཏམ་བརྗོད་པར་བྱའོ། །སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམས་ལ་ལྷག་པའི་བསམ་པ་དང ། སྙིང་རྗེ་ཆེན་པོའི་གཏམ་བརྗོད་པར་བྱའོ། །སྤྱོད་པ་ལ་ཞུགས་པའི་བྱང་ཆུབ་སེམས་དཔའ་རྣམས་ལ་འཁོར་བས་ཡོངས་སུ་མི་སྐྱོ་བའི་གཏམ་བརྗོད་པར་བྱའོ། །ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ལ་སངས་རྒྱས་ཀྱི་ཞིང་ཡོངས་སུ་སྤྱང་བའི་གཏམ་བརྗོད་པར་བྱའོ། །སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་རྣམས་ལ་བྱང་ཆུབ་ཀྱི་སྙིང་པོའི་རྒྱན་གྱི་གཏམ་བརྗོད་པར་བྱའོ། །སེམས་ཅན་གང་དག་སངས་རྒྱས་ཀྱིས་འདུལ་བ་དེ་དག་ལ་བྱང་ཆུབ་སེམས་དཔས་མ་ཚང་བ་མེད་པ་དང ། འབྲས་བུ་ཡོད་པའི་གཏམ་བརྗོད་པར་བྱའོ། །ཞི་བའི་བློ་གྲོས། དེ་ལྟར་ན་བྱང་ཆུབ་སེམས་དཔའ་ཐབས་དང ། ཤེས་རབ་ཡོངས་སུ་དག་ཅིང་དམིགས་པ་ལ་དབང་ཐོབ་པ་ནི་འབྲས་བུ་ཡོད་པའི་ཆོས་སྟོན་པ་ཡིན། ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པ་ཡིན་ནོ། །བསྟན་པ་འདི་བཤད་པ་ན་སྲོག་ཆགས་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་ལྔ་བརྒྱ་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །དམིགས་པའི་ལེའུ་ཞེས་བྱ་སྟེ་བཅོ་ལྔ་པའོ།། །།དེ་ནས་
253a
༄#། །འཁོར་དེའི་ནང་ནས་བྱང་ཆུབ་སེམས་དཔའ་ཁ་ཅིག་འདི་སྙམ་དུ་སེམས་ཏེ། ཀྱེ་མ་གསང་བ་པའི་བདག་པོ་ལག་ན་རྡོ་རྗེ་འདི་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། དེའི་སངས་རྒྱས་ཀྱི་ཞིང་ནི་མིང་ཅི་ཞེས་བྱ་བར་འགྱུར། དེ་བྱང་ཆུབ་ཐོབ་པའི་མིང་ནི་ཅི་ཞེས་བྱ་བར་འགྱུར། དེའི་བྱང་ཆུབ་སེམས་དཔའི་འཁོར་ནི་ཅི་འདྲ་བ་ཞིག་ཏུ་འགྱུར་སྙམ་མོ། །དེ་ནས་བཅོམ་ལྡན་འདས་ཀྱིས་དེའི་ཚེ་བྱང་ཆུབ་སེམས་དཔའ་དེ་དག་གི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས་དེའི་ཚེ་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་མཛད་པ་དེའི་ཚེ་འོད་ཟེར་ཁ་དོག་སྣ་ཚོགས་འབྱུང་བས། དེ་ནས་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་དུ་མ་དང་ལྡན་པ། ཁ་དོག་ཐ་དད་པ་འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོད་ཀ་དང ། ཤེལ་དང ། དངུལ་གྱི་ཁ་དོག་ལྟ་བུ་བྱུང་ནས་འོད་དེས་འཇིག་རྟེན་གྱི་ཁམས་མཐའ་ཡས་མུ་མེད་པར་ཁྱབ་པར་བྱས་ཏེ། ཚངས་པའི་འཇིག་རྟེན་གྱི་བར་དུ་མངོན་པར་འཕགས་ནས་སླར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་དབུའི་གཙུག་ཏུ་ནུབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་
253b
གྲོས་ཀྱིས་ཚིགས་སུ་བཅད་པའི་དབྱངས་ཀྱིས་བཅོམ་ལྡན་འདས་ལ་འཛུམ་པ་མཛད་པའི་དོན་ཞུས་པ། འོད་བཟང་དྲི་མ་མི་མངའ་གསེར་དང་འདྲ། །ཟླ་བའི་ཞལ་འདྲ་ཞི་གནས་ལེགས་པར་བཞུགས། །ཉི་མ་ལྟ་བུ་མུན་པ་འཇོམས་མཛད་པ། །མི་མཆོག་ཅི་ཡི་སླད་དུ་འཛུམ་པ་བསྟན། །མོས་པ་ཞི་གནས་རྫིང་དུ་རབ་ཏུ་བཞུགས། །ཐུགས་རྗེའི་ཆུ་བོ་བརྩོན་འགྲུས་སྟོབས་ཀྱིས་འཁྲུངས།། དྲན་པས་ཁ་བྱེ་ཡོན་ཏན་དྲི་ཞིམ་ལྡན། །བདེ་གཤེགས་པདྨ་ཅི་སླད་འཛུམ་པ་མཛད། །དྲན་པ་གནོད་བཟང་ཞི་གནས་མར་ལགས་ཏེ། །སྙིང་པོ་ཐུགས་རྗེ་དྲི་མ་གསུམ་སེལ་མཛད། །ཤེས་རབ་མར་མེས་མུན་པ་སེལ་མཛད་པ། །བདེ་གཤེགས་མར་མེ་ཅི་སླད་འཛུམ་པ་མཛད། །དཀྱིལ་འཁོར་ཐུགས་རྗེ་ལྷག་མཐོང་འོད་ལྡན་པ། །རབ་རིབ་སེལ་བ་སྲེད་པ་སྐམ་མཛད་པ། །འགྲོ་བ་རྒྱས་མཛད་མིག་ནི་སྦྱོང་མཛད་པ། །བདེ་གཤེགས་ཉི་མ་ཅི་སླད་འཛུམ་པ་མཛད། །ཁྱོད་ནི་འགྲོ་བའི་བསམ་པ་རབ་ཏུ་མཁྱེན། །ཁྱོད་ནི་ལྷར་བཅས་འགྲོ་ནའང་ལྷང་ངེ་བ། །དྲང་སྲོང་ཆེན་པོའི་ཞལ་དུ་འཁོར་རྣམས་ལ། །མི་མཆོག་ཅི་སླད་འདིར་ནི་འཛུམ་པ་མཛད། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་འདི་སྐད་ཅེས་བཀའ་སྩལ་ཏོ། །ཞི་བའི་བློ་གྲོས། གསང་བ་པའི་བདག་པོ་ལག་ན་རྡོ་རྗེ་འདི་ནི་རྡོ་རྗེ་ཐོགས་ནས་བསྐལ་པ་བཟང་པོ་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་
254a
༄#། །རྫོགས་པའི་སངས་རྒྱས་ཐམས་ཅད་ལ་མཆོད་པ་བྱེད་པར་འགྱུར། དམ་པའི་ཆོས་ཀྱང་ཡོངས་སུ་འཛིན་པར་འགྱུར། དེ་བཞིན་གཤེགས་པའི་གསང་བ་པའི་ཆོས་ཀྱི་རྣམ་གྲངས་འདི་ཡང་རྒྱས་པར་བྱེད་པར་འགྱུར། སེམས་ཅན་ཚད་མེད་པ་དག་ཀྱང་བྱང་ཆུབ་ཀྱི་ཕྱིར་ཡོངས་སུ་སྨིན་པར་བྱེད་པར་འགྱུར་རོ། །དེ་བསྐལ་པ་བཟང་པོ་དེ་འདས་ནས་དེ་བཞིན་གཤེགས་པ་མོས་པའི་བར་གྱི་དམ་པའི་ཆོས་ནུབ་པ་ན་དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་དུ་སྐྱེ་བར་འགྱུར་ཏེ། དེ་འཇིག་རྟེན་གྱི་ཁམས་མངོན་པར་དགའ་བ་དེར་སྐྱེས་ནས་དེ་བཞིན་གཤེགས་པ་མི་འཁྲུགས་པ་དེས་ཕྱག་རྒྱ་བརྒྱ་རྩ་བརྒྱད་བྱང་ཆུབ་སེམས་དཔའ་དེ་དག་ལ་བསྟན་པ་དེ་འཛིན་པར་འགྱུར། དོན་གྱི་ཚུལ་ལ་ཡང་འཇུག་པར་འགྱུར། དེ་བཞིན་ཉིད་དུ་ཡང་བསྒྲུབ་པར་འགྱུར་རོ། །དེའི་འོག་ཏུ་དེ་བཞིན་གཤེགས་པ་གྲངས་མེད་དཔག་ཏུ་མེད་པ་མཉེས་པར་བྱེད་པར་འགྱུར། བསྟི་སྟང་དུ་བྱེད་པར་འགྱུར། བླ་མར་བྱེད་པར་འགྱུར། རིམ་གྲོ་བྱེད་པར་འགྱུར། མཆོད་པར་བྱེད་པར་འགྱུར། དེ་དག་གི་གན་ན་ཚངས་པར་སྤྱོད་པར་འགྱུར། དམ་པའི་ཆོས་ཀྱང་བསྐུལ་བར་འགྱུར། སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་དག་ཀྱང་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱེད་པར་འགྱུར་རོ། །དེ་དེའི་འོག་ཏུ་བསྐལ་པ་གངྒཱའི་ཀླུང་གི་བྱེ་མ་སྙེད་
254b
འདས་པ་ན་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཆང་རྒྱ་བར་འགྱུར་ཏེ། བསྐལ་པ་རྣམ་པར་སྦྱོང་བ་ཞེས་བྱ་བ་ལ་འཇིག་རྟེན་གྱི་ཁམས་ཀུན་ནས་ཡོངས་སུ་དག་པ་ཞེས་བྱ་བར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བ་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྡོ་རྗེས་རྣམ་པར་གནོན་པ་ཞེས་བྱ་བ་འཇིག་རྟེན་དུ་འབྱུང་བར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་རྡོ་རྗེས་རྣམ་པར་གནོན་པ་དེའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཀུན་ནས་ཡོངས་སུ་དག་པ་དེ་ནི་འབྱོར་བ་དང ། རྒྱས་པ་དང ། ལོ་ལེགས་པ་དང ། ཉམས་དགའ་བ་དང ། ལྷ་དང་མི་མང་པོས་གང་དང ། བྱང་ཆུབ་སེམས་དཔས་གང་བར་འགྱུར་རོ། །སངས་རྒྱས་ཀྱི་ཞིང་དེ་རིན་པོ་ཆེ་སྣ་བདུན་འདི་ལྟ་སྟེ། གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། བྱི་རུ་དང ། སྤུག་དང ། རྡོའི་སྙིང་པོ་དང ། མུ་ཏིག་དམར་པོས་ལེགས་པར་བརྒྱན་པར་འགྱུར་རོ། །འཇིག་རྟེན་གྱི་ཁམས་དེ་མིག་མང་རིས་སུ་བྱས་པ། ལག་མཐིལ་ལྟར་མཉམ་པར་གྱུར་པ། ཀ་ཙ་ལན་ད་ཀི་ལྟར་རེག་ན་བདེ་བ། དར་གྱི་ལྔ་ལྡི་མང་པོས་བྲེས་པ། གདུགས་དང ། རྒྱལ་མཚན་དང །
255a
༄#། །བ་དན་བསྒྲེངས་པས་ལེགས་པར་བརྒྱན་པ། ལྷའི་མེ་ཏོག་དང ། རིན་པོ་ཆེའི་མེ་ཏོག་གིས་ཁེབས་པར་བྱས་པ། སྤོས་ཀྱི་སྙིང་པོ་དམ་པས་ལེགས་པར་བདུགས་པ། སྟེང་གི་བར་སྣང་ལ་ལྷའི་རོལ་མོའི་སྒྲ་ལེན་པ་ཅན་དུ་འགྱུར་རོ། །འཇིག་རྟེན་གྱི་ཁམས་དེ་ངན་སོང་དང ། མི་ཁོམ་པ་ཐམས་ཅད་དང་བྲལ་བར་འགྱུར་རོ། །འཇིག་རྟེན་གྱི་ཁམས་དེ་དགའ་ལྡན་གྱི་ལྷའི་ཡོངས་སུ་སྤྱོད་པ་དང་འདྲ་བ་དང ། ཡིད་ལ་བསམས་པས་ཟས་དང ། སྐོམ་དང ། སྐྱེད་མོས་ཚལ་དང ། གཞལ་མེད་ཁང་དང ། གོས་དང ། རྒྱན་གྲུབ་ཅིང་ལེགས་པར་བརྒྱན་པར་འགྱུར་རོ། །ལྷ་དང་མི་ཐམས་ཅད་ཀྱང་ཁང་བ་བརྩེགས་པ་ལ་མཚུངས་པར་ཡོངས་སུ་སྤྱོད་པར་འགྱུར་རོ། །ལྷ་དང་མི་དེ་དག་ཐམས་ཅད་ཀྱང་རྒྱ་ཆེན་པོ་ལ་མོས་པར་འགྱུར་ཏེ། འདི་ལྟ་སྟེ། སངས་རྒྱས་ཀྱི་ཡེ་ཤེས་ལ་མོས་པ་ཤ་སྟག་གོ། འཇིག་རྟེན་གྱི་ཁམས་དེ་ནི། འདི་ལྟ་སྟེ། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པ་ཡང་རུང་སྟེ། ཐེག་པ་གཉིས་ཀྱིས་མིང་ཡང་མི་གྲག་པར་འགྱུར་རོ། །བཅོམ་ལྡན་འདས། དེ་ནི་བྱང་ཆུབ་སེམས་དཔའི་གཏམ་འབའ་ཞིག་གསུང་བར་འགྱུར་རོ། །དེ་བཞིན་གཤེགས་པ་རྡོ་རྗེས་རྣམ་པར་གནོན་པ་དེའི་བྱང་ཆུབ་སེམས་དཔའི་འཁོར་ནི་འབུམ་ཕྲག་མང་པོར་འགྱུར་རོ། །འཇིག་རྟེན་གྱི་ཁམས་དེ་ན་སེམས་ཅན་གང་ཡང་ཆོ་ག་ཉམས་པའམ། འཚོ་བ་ཉམས་པའམ། ཚུལ་ཁྲིམས་ཉམས་པའམ། ལྟ་བ་
255b
ཉམས་པར་མི་འགྱུར་རོ། །ཞར་བའམ། ཐེང་པོའམ། སྒུར་པོའམ། གཏུམ་པོའམ། དིག་པའམ། མི་སྲུན་པའམ། ཀླ་ཀློ་ན་ནམ། ལྐུག་པའམ། གྲུམ་པོའམ། དབང་པོ་མ་ཚང་བར་མི་འགྱུར་རོ། །ལྷ་དང་མི་དེ་དག་ཐམས་ཅད་ཀྱང་མཚན་ཉི་ཤུ་རྩ་བརྒྱད་ཀྱིས་བརྒྱན་པར་འགྱུར་རོ། །དེ་བཞིན་གཤེགས་པ་དེའི་ཚེའི་ཚད་ནི་བར་གྱི་བསྐལ་པ་བརྒྱད་ཐུབ་པར་འགྱུར་རོ། །ལྷ་དང་མི་རྣམས་ཀྱང་གློ་བུར་དུ་འཆི་བར་མི་འགྱུར་རོ། །ཞི་བའི་བློ་གྲོས། དེ་ལྟར་དེ་བཞིན་གཤེགས་པ་རྡོ་རྗེས་རྣམ་པར་གནོན་པ་དེའི་ཡོན་ཏན་ཚད་མེད་པའི་རྒྱུའི་ཁྱད་པར་ནི་འདི་དང་གཞན་ཡང་མང་དུ་ཡོད་དོ། །དེ་བཞིན་གཤེགས་པ་དེ་དམ་ཆོས་སྟོན་པར་འགྱུར་བ་དེའི་ཚེ་སྐུ་ལས་འོད་ཕྱུང་བ་དང ། དེ་ནས་སེམས་ཅན་དེ་དག་གིས་འོད་དེ་མཐོང་ནས་འདི་སྙམ་དུ་སེམས་པར་འགྱུར་ཏེ། དེ་བཞིན་གཤེགས་པ་ཆོས་སྟོན་པར་འགྱུར་གྱི། བདག་ཅག་བཅོམ་ལྡན་འདས་ལ་ཆོས་ཉན་དུ་འདོང་ངོ་སྙམ་མོ། །དེ་ན་ཁ་ཅིག་ནི་མངོན་པར་ཤེས་པའི་རྫུ་འཕྲུལ་གྱི་སྟོབས་ཀྱིས་འོང་བར་འགྱུར་རོ། །ཁ་ཅིག་ནི་དེ་བཞིན་གཤེགས་པའི་བྱིན་གྱི་རླབས་ཀྱིས་འོང་བར་འགྱུར་རོ། །དེར་ལྷ་དང་མི་དེ་དག་འདུས་པ་དང ། དེ་བཞིན་གཤེགས་པ་དེ་སྟེང་གི་བར་སྣང་ལ་ཤིང་ཏ་ལ་འབུམ་སྲིད་དུ་མངོན་པར་འཕགས་ཏེ། གླིང་བཞི་པ་ཆེན་པོའི་འཇིག་རྟེན་གྱི་ཁམས་སུ་སྐྱིལ་མོ་ཀྲུང་དུ་བཞུགས་ནས། སྐུས་ཁྱབ་པར་མཛད་དེ། སེམས་ཅན་
256a
༄#། །ཐམས་ཅད་ཀྱི་སེམས་ཀྱི་བསམ་པ་ཚིམ་པར་བྱ་བའི་ཕྱིར་ཕྱོགས་བཅུའི་འཇིག་རྟེན་གྱི་ཁམས་ཚད་མེད་པ་སངས་རྒྱས་ཀྱི་གསུང་དབྱངས་ཀྱིས་གོ་བར་མཛད་དེ། དེ་བཞིན་གཤེགས་པའི་གསུང་གིས་བྱང་ཆུབ་སེམས་དཔའ་དེ་དག་ལ་ཆོས་སྟོན་པར་འགྱུར་རོ། །དེའི་ནང་ན་གང་དེ་བཞིན་གཤེགས་པའི་ཆོས་སྟོན་པ་དང་འགལ་བར་བྱེད་པའམ། ཟློག་པར་བྱེད་པའི་སེམས་ཅན་ནི་གཅིག་ཀྱང་མེད་དོ། །སེམས་ཅན་དེ་དག་ཐམས་ཅད་ནི་དབང་པོ་རྣོ་བ་མགོ་སྨོས་པས་གོ་བར་འགྱུར་བ་ཤ་སྟག་གོ། འཇིག་རྟེན་གྱི་ཁམས་དེ་ན་ཆོས་ཀྱི་རྒྱལ་པོ་དེ་བཞིན་གཤེགས་པ་རྡོ་རྗེས་རྣམ་པར་གནོན་པ་དེ་མ་གཏོགས་པར་རྒྱལ་པོ་གཞན་གང་ཡང་མེད་པར་འགྱུར་རོ། །འཇིག་རྟེན་གྱི་ཁམས་དེ་ན་ང་ཡི་བ་མེད་ཅིང ། ཡོངས་སུ་འཛིན་པ་མེད་པར་འགྱུར་རོ། །སེམས་ཅན་དེ་དག་ཐམས་ཅད་ང་ཡི་བ་མེད་ཅིང་ཡོངས་སུ་འཛིན་པ་མེད་པར་འགྱུར་རོ། །ཞི་བའི་བློ་གྲོས། དེ་བཞིན་གཤེགས་པ་རྡོ་རྗེས་རྣམ་པར་གནོན་པ་དེ་ལྷའི་བུའམ་མིར་གྱུར་པ་གང་ལ་བསོད་སྙོམས་བླང་བར་བཞེད་པར་གྱུར་པའི་ལྷའི་བུའམ་མིར་གྱུར་པ་དེའི་མདུན་དུ་དེ་བཞིན་གཤེགས་པའི་གཟུགས་ལྷུང་བཟེད་ཐོགས་པ་ཉེ་བར་གནས་པ་དང ། དེར་ལྷའི་བུའམ་མིར་གྱུར་པ་དེས། དེ་བཞིན་གཤེགས་པའི་གཟུགས་མཐོང་ནས་འདི་སྙམ་དུ་སེམས་པར་འགྱུར་ཏེ། བཅོམ་ལྡན་འདས་དེ་བཞིན་གཤེགས་
256b
པ་རྡོ་རྗེས་རྣམ་པར་གནོན་པ་བདག་ལས་བཤོས་གསོལ་བར་བཞེད་དོ་སྙམ་ནས་ཡིད་ལ་བསམས་པས་འཁོར་གྱི་ཁམས་སུ་སྟན་དང ། ཟས་དང ། སྐོམ་དང ། རོ་བརྒྱ་པའི་ཟས་སྦྱར་ནས་བཅོམ་ལྡན་འདས་དེ་ལ་གདུགས་ཚོད་བབ་ཅེས་གསོལ་པ་དང ། དེར་དེ་བཞིན་གཤེགས་པ་དེ་བཤོས་གསོལ་ལོ། །བཤོས་གསོལ་ནས་སླར་བདུད་པར་འགྱུར་རོ། །དེ་བཞིན་གཤེགས་པ་དེ་གང་གི་ཚེ་ནང་དུ་ཡང་དག་འཇོག་ལ་འཇུག་པར་འགྱུར་བ་དེ་ན་བྱང་ཆུབ་སེམས་དཔའ་དེ་དག་ཏིང་ངེ་འཛིན་གྱི་བཀོད་པས་གནས་པར་འགྱུར་རོ། །འཇིག་རྟེན་གྱི་ཁམས་དེ་ནི་ཡོན་ཏན་གྱི་རྒྱུའི་ཁྱབ་པར་འདི་དག་དང ། གཞན་ཡང་ཚད་མེད་པ་དག་དང་ལྡན་པར་འགྱུར་ཏེ། དེའི་ཕྱིར་འཇིག་རྟེན་གྱི་ཁམས་དེ་ཀུན་ནས་ཡོངས་སུ་དག་པ་ཞེས་བྱའོ། །གསང་བ་པའི་བདག་པོ་ལག་ན་རྡོ་རྗེ་ལུང་བསྟན་པ་འདི་བཤད་པ་འདི་བསྟན་པ་ན་སྲོག་ཆགས་ཉི་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། སངས་རྒྱས་ཀྱི་ཞིང་དེར་སྐྱེ་བར་ཤོག་ཅིག་ཅེས་སྨོན་ལམ་ཡང་བཏབ་བོ། །དེ་དག་ཐམས་ཅད་ཀྱང་བཅོམ་ལྡན་འདས་དེ་བཞིན་གཤེགས་པ་རྡོ་རྗེས་རྣམ་པར་གནོན་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཀུན་ནས་ཡོངས་སུ་དག་པ་དེར་སྐྱེ་བར་བཅོམ་ལྡན་འདས་ཀྱིས་ལུང་བསྟན་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་རང་གི་ལུང་བསྟན་པ་འདི་ཐོས་ནས་ཚིམ་ཞིང་མགུ་ལ་ཡི་རངས་ཏེ།
257a
༄#། །རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ། རྡོ་རྗེ་དེ་ནམ་མཁའི་དཀྱིལ་འཁོར་དུ་འཕངས་སོ། །རྡོ་རྗེ་དེ་འཕངས་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ། །མེ་ཏོག་གི་ཆར་ཡང་བབ་བོ། །རོལ་མོའི་སིལ་སྙན་བརྒྱའི་སྒྲ་ཡང་བྱུང་ངོ ། །འཁོར་ཐམས་ཅད་ཀྱི་ལག་པ་གཡས་པར་ཡང་མེ་ཏོག་ཁ་དོག་སྣ་ཚོགས་ཀྱི་ཕྲེང་བ་དག་བྱུང་ངོ ། །དེ་ནས་གསང་བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། ། ཆོས་ཀྱི་དབང་ཕྱུག་རྒྱ་ཆེན་མི་ཟད་ཆོས་ཀྱི་མཛོད། །ཆོས་རྣམས་རབ་ཏུ་འབྱེད་ལ་མཁས་པ་འགྲོ་དོན་བཞེད། །ཆོས་ལ་ཐུགས་མ་ཞུམ་ཞིང་རྟག་ཏུ་ལྷུག་པར་བཏང ། །ཆོས་ཀྱི་རྗེས་མཐུན་ཆོས་བསྒྲུབ་གནས་ལ་ཕྱག་འཚལ་ལོ། །སེམས་ཅན་དག་པ་ཁྱོད་ཀྱི་ཡེ་ཤེས་སྤྱོད་རྣམ་དག། ཡོན་ཏན་རྒྱལ་གྲགས་སྙན་པ་འཇིག་རྟེན་གསུམ་དུ་གྲགས། །ཡེ་ཤེས་རྒྱུན་ནི་དུས་གསུམ་རྟག་ཏུ་བསམ་འཚལ། །ཆགས་འདས་ཞབས་མཉམ་ལེགས་པ་ཁྱོད་ལ་ཕྱག་འཚལ་ལོ། །ཟླ་བ་ལས་ལྷག་ཡོངས་དག་ཚུལ་ཁྲིམས་རྣམ་པར་དག། ཉི་མ་ལས་ལྷག་འོད་མཛེས་འོད་མངའ་གཟི་བརྗིད་མཆོག། ཚངས་པ་ལས་ལྷག་གསུང་སྙན་ཚངས་པའི་གསུང་མངའ་བ། །དཀོན་མཆོག་གསུམ་ལྡན་གསེར་འདྲ་ཁྱོད་ལ་ཕྱག་འཚལ་ལོ། །
257b
ཁྱོད་ནི་སྐུ་ཡང་སྟོན་ལ་སྐུ་དང་ལྡན་མ་ལགས། །ཁྱོད་ནི་གསུང་ཡང་བརྗོད་ལ་སྒྲ་སྐད་རྟོག་མི་མངའ། །ཁྱོད་ནི་ཆོས་ཀྱང་གསུང་ལ་ཆོས་ཀྱི་འདུ་ཤེས་བྲལ། །སེམས་ཅན་ཐར་པར་མཛད་ལ་སེམས་ཅན་འདུ་ཤེས་བྲལ། །ཁྱོད་ནི་གང་དག་ཆོས་སྟོན་ཐོས་ནས་ཇི་ལྟ་བསྟན་པ་ལྟར། །སྒྲུབ་པ་སྙིང་པོ་སྙིང་པོར་གནས་པ་དག་ནི་མ་གཏོགས་པར། །འགྲོ་བ་ཐམས་ཅད་རྟག་ཏུ་རབ་ཏུ་བྱུང་ཡང་ནི། །ཁྱོད་ཀྱི་བཀའ་དྲིན་ལན་ལྡོན་ནམ་ཡང་རྡོ་མི་ཐོགས། དེ་ནས་གསང་བ་པའི་བདག་པོ་ལག་ན་རྡོ་རྗེ་དང་ཐམས་ཅད་དང་ལྡན་པའི་འཁོར་དེས་ཇི་ལྟར་ཐོགས་ཐོགས་པའི་རིན་པོ་ཆེ་སྣ་ཚོགས་ཀྱི་མེ་ཏོག་གི་ཕྲེང་བ་རྣམས་བཅོམ་ལྡན་འདས་ལ་མངོན་པར་གཏོར་རོ། །མེ་ཏོག་གི་ཕྲེང་བ་དེ་དག་གཏོར་མ་ཐག་ཏུ་དེ་ནས་དེའི་ཚེ་འདི་ལྟ་སྟེ། སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་མེ་ཏོག་སྣ་ཚོགས་ཀྱི་ཕྲེང་བས་ལེགས་པར་བརྒྱན་པར་གྱུར་ཅིང ། མིག་མང་རིས་སུ་གནས་པར་ཀུན་དུ་སྣང་ངོ ། །གསང་བ་པའི་བདག་པོ་ལག་ན་རྡོ་རྗེ་ལུང་བསྟན་པའི་ལེའུ་ཞེས་བྱ་བ་སྟེ་བཅུ་དྲུག་པའོ།། །།དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །གསང་བ་པའི་བདག་པོ་ཁྱོད་དེ་བཞིན་གཤེགས་པས་ལུང་བསྟན་མོད། །སྨྲས་པ། རིགས་ཀྱི་བུ། རྨི་ལམ་གྱི་རང་བཞིན་ལྟ་བུའི་ལུང་བསྟན་པས་བདག་ལུང་བསྟན་ཏོ། །སྨྲས་པ། ཅི་
258a
༄#། །ཞིག་ཐོབ་པར་བྱ་བའི་ཕྱིར་ཁྱེད་ལུང་བསྟན། སྨྲས་པ། རིགས་ཀྱི་བུ། ཐོབ་པར་བྱ་བ་མེད་པར་ལུང་བསྟན་པ་ཐོབ་པོ། སྨྲས་པ། ཅི་ཞིག་ཐོབ་པ་མེད། སྨྲས་པ། སེམས་ཅན་དང ། སྲོག་དང ། གང་ཟག་དང ། གསོ་བ་དང ། སྐྱེས་བུ་ཐོབ་པ་མེད་དོ། །ཕུང་པོ་རྣམས་དང ། ཁམས་རྣམས་དང ། སྐྱེ་མཆེད་རྣམས་ཐོབ་པ་མེད་དོ། །དགེ་བ་དང ། མི་དགེ་བ་དང ། ཁ་ན་མ་ཐོ་བ་དང་བཅས་པ་དང ། ཁ་ན་མ་ཐོ་བ་མེད་པ་དང ། ཟག་པ་དང་བཅས་པ་དང ། ཟག་པ་མེད་པ་དང ། འཇིག་རྟེན་དང ། འཇིག་རྟེན་ལས་འདས་པ་དང ། འདུས་བྱས་དང ། འདུས་མ་བྱས་དང ། ཀུན་ནས་ཉོན་མོངས་པ་དང ། རྣམ་པར་བྱང་བ་དང ། འཁོར་བ་དང ། མྱ་ངན་ལས་འདས་པའི་བར་དུ་ཐོབ་པ་མེད་དོ། །སྨྲས་པ། གལ་ཏེ་ཐོབ་པ་མེད་ན།་འདིར་ཅི་ཞིག་ལུང་སྟོན། སྨྲས་པ། མི་དམིགས་པ་གང་ཡིན་པ་དེའི་རྗེས་སུ་འགྲོ་བའི་ཡེ་ཤེས་ལུང་བསྟན་ཏོ། །སྨྲས་པ། ཡེ་ཤེས་གང་ལུང་བསྟན། སྨྲས་པ། གང་གཉིས་ཀྱིས་རབ་ཏུ་མ་ཕྱེ་བའོ། །སྨྲས་པ། གལ་ཏེ་གཉིས་ཀྱིས་རབ་ཏུ་ཕྱེ་བར་གྱུར་ན་ལུང་བསྟན་པ་ཐོབ་པར་མི་འགྱུར་ཏེ། གང་གི་ཕྱིར་ཡེ་ཤེས་གཉིས་ཀྱིས་རབ་ཏུ་ཕྱེ་བ་མ་ཡིན་པ་དེའི་ཕྱིར་གཉིས་སུ་མེད་པའི་ལུང་བསྟན་པ་ཉིད་བྱང་ཆུབ་སེམས་དཔའི་ལུང་བསྟན་པའོ། །སྨྲས་པ། གལ་ཏེ་ཡེ་ཤེས་གཉིས་སུ་མེད་པས་རབ་ཕྱེ་བ་ཡིན་ན་ལུང་སྟོན་པ་ནི་སུ་ཞིག།
258b
ལུང་ནི་སུ་ལ་སྟོན། སྨྲས་པ། ལུང་སྟོན་པ་གང་ཡིན་པ་དང ། སུ་ལ་ལུང་སྟོན་པ་དེ་དག་ན་མཉམ་པ་ཉིད་དུ་གྱུར་པའོ། །དེ་དག་ནི་གཉིས་སུ་མེད་པའི་མཐའ་ལ་གནས་པའོ། །སྨྲས་པ། གསང་བ་པའི་བདག་པོ། གཉིས་སུ་མེད་པའི་མཐའ་གང་ཡིན་པ་དེ་ལ་ལུང་བསྟན་དུ་ཅི་ཡོད། སྨྲས་པ། མཐའ་གང་ཡིན་པ་དེ་གཉིས་སུ་མེད་པའི་མཐའ་སྟེ། མཐའ་དེ་ཉིད་དུ་ལུང་བསྟན་པའོ།། སྨྲས་པ། གང་ལ་གནས་ན་ལུང་བསྟན་པ་ཐོབ་པའི་མཐའ་གང་ཡིན། སྨྲས་པ། བདག་གི་མཐའ་ལ་གནས་ན་ལུང་བསྟན་པར་འགྱུར་རོ། །སེམས་ཅན་མཐའ་དང ། སྲོག་དང ། གང་ཟག་གི་མཐའ་ལ་གནས་ན་ལུང་བསྟན་པར་འགྱུར་རོ། །བདག་གི་མཐའི་གནས་གང་གི་གནས་ཡིན། སྨྲས་པ། བདག་གི་མཐའི་གནས་ནི་དེ་བཞིན་གཤེགས་པའི་རྣམ་པར་གྲོལ་བའི་མཐའི་གནས་སོ། །སྨྲས་པ། དེ་བཞིན་གཤེགས་པའི་རྣམ་པར་གྲོལ་བའི་མཐའི་གནས་གང་གི་གནས་ཡིན། སྨྲས་པ། དེ་བཞིན་གཤེགས་པའི་རྣམ་པར་གྲོལ་བའི་མཐའི་གནས་ནི་མ་རིག་པ་དང ། སྲིད་པའི་སྲེད་པའི་མཐའི་གནས་སོ། །སྨྲས་པ། མ་རིག་པ་དང ། སྲིད་པའི་སྲེད་པའི་མཐའི་གནས་གང་གི་གནས་ཡིན། སྨྲས་པ། ཤིན་ཏུ་མ་སྐྱེས་མ་བྱུང་བའི་མཐའི་གནས་སོ། །སྨྲས་པ། མ་སྐྱེས་པ་དང ། མ་བྱུང་བའི་གནས་གང་ཡིན། སྨྲས་པ། རྣམ་པར་རིག་པ་མ་ཡིན་པའི་མཐའ་ནི་གནས་སོ། །སྨྲས་པ། རྣམ་པར་རིག་པས་ཅི་ཞིག་རིག་པར་བྱེད། སྨྲས་
259a
༄#། །པ།་གལ་ཏེ་རྣམ་པར་རིག་པར་བྱེད་ན། རྣམ་པར་རིག་པ་མ་ཡིན་པར་མི་འགྱུར་རོ། །སྨྲས་པ། ཅི་ཞིག་རྣམ་པར་རིག་པར་མི་བྱེད། སྨྲས་པ། རྣམ་པར་རིག་པ་ཐམས་ཅད་རྣམ་པར་རིག་པར་མི་བྱེད་དོ། །སྨྲས་པ། གལ་ཏེ་རྣམ་པར་རིག་པར་མི་བྱེད་ན་ཇི་ལྟར་ཀུན་ཤེས་པར་བྱེད། སྨྲས་པ། གལ་ཏེ་ཀུན་ཤེས་པར་བྱེད་ན་རྣམ་པར་རིག་པར་བྱེད་པ་མ་ཡིན་ཏེ།་གང་གི་ཕྱིར་རྣམ་པར་རིག་པར་མི་བྱེད་པ་དེའི་ཕྱིར་ཀུན་ཤེས་པར་བྱེད་དོ། །སྨྲས་པ། ཀུན་ཤེས་པར་བྱེད་པ་ཇི་ལྟ་བུ་ཡིན། སྨྲས་པ། གང་གི་ཚེ་རྣམ་པར་རིག་པ་ཁས་མི་ལེན་པའོ། །སྨྲས་པ། ཇི་ལྟར་ན་རྣམ་པར་རིག་པ་ཁས་མི་ལེན། སྨྲས་པ། གང་གི་ཚེ་ཚིག་འབྲུའི་རྗེས་སུ་མི་རྒྱུག་པའོ། །སྨྲས་པ། ཇི་ལྟར་ན་ཚིག་འབྲུའི་རྗེས་སུ་མི་རྒྱུག་།སྨྲས་པ། གང་གི་ཚེ་དོན་ལ་རྟོན་པའོ། །སྨྲས་པ། དོན་ལ་རྟོན་པ་ཇི་ལྟ་བུ་ཡིན། སྨྲས་པ། གང་གི་ཚེ་དོན་མི་མཐོང་བའོ། །སྨྲས་པ། དོན་མི་མཐོང་བ་ཇི་ལྟ་བུ་ཡིན། སྨྲས་པ། གང་གི་ཚེ་དོན་དང་དོན་མ་ཡིན་པ་དོན་དུ་མི་གཉེར་བའོ། །སྨྲས་པ། གང་གི་ཚེ་དོན་དང་དོན་མ་ཡིན་པ་དོན་དུ་མི་གཉེར་བར་གྱུར་པ་དེའི་ཚེ་ཅི་ཞིག་དོན་དུ་གཉེར་བར་འགྱུར། སྨྲས་པ། གང་གི་ཚེ་དོན་དང ། དོན་མ་ཡིན་པ་དོན་དུ་མི་གཉེར་བར་གྱུར་བ་དེའི་ཚེ་ཆོས་དོན་དུ་གཉེར་བར་འགྱུར་ཏོ། །སྨྲས་པ། གལ་ཏེ་ཆོས་དོན་དུ་གཉེར་བར་གྱུར་ན་དེ་དོན་དུ་གཉེར་བ་ཉིད་མ་ཡིན་ནམ། སྨྲས་པ། རིགས་
259b
ཀྱི་བུ། ཆོས་དོན་དུ་གཉེར་བ་ནི་ཅི་ཡང་དོན་དུ་གཉེར་བ་མ་ཡིན་ནོ། །དེ་ཅིའི་ཕྱིར་ཞེ་ན། གང་གིས་གང་དོན་དུ་གཉེར་བ་དེ་ནི་ཆོས་མ་ཡིན་ཏེ། ཆོས་སུ་མི་རུང་ངོ ། །སྨྲས་པ། ཆོས་གང་ཡིན། སྨྲས་པ།་གང་ལ་ཆོས་ཀྱི་སྒྲ་ཡང་མི་དམིགས་པའོ། །སྨྲས་པ། གང་ལ་ཆོས་ཀྱི་སྒྲ་ཡང་མི་དམིགས་པ་དེ་ལ་ཆོས་གང་ཡིན། སྨྲས་པ། རིགས་ཀྱི་བུ། གང་ལ་ཡི་གེ་རྣམས་ཀུན་དུ་མི་འབྱུང་བ་དེ་ཉིད་ཆོས་ཡིན་ནོ། །དེ་བས་ན་ཆོས་ཐམས་ཅད་ནི་བརྗོད་དུ་མེད་པ། སྒྲ་མེད་པ། བརྗོད་པ་མེད་པའོ། །རིགས་ཀྱི་བུ། སུ་ཞིག་བདག་སྨྲའོ་ཞེས་སྨྲས་པ་དེ་འཆལ་པར་སྨྲ་བའོ། །གང་འཆལ་པར་སྨྲ་བ་དེ་ལ་ཆོས་མེད་དོ། །འདུལ་བ་མེད་དོ། །སྨྲས་པ། གསང་བ་པའི་བདག་པོ། གང་ཆོས་གསུང་བ་དེ་བཞིན་གཤེགས་པ་འཆལ་བར་གསུང་བར་མི་འགྱུར་རམ། སྨྲས་པ། ཞི་བའི་བློ་གྲོས། དེ་བཞིན་གཤེགས་པས་ཡི་གེ་གཅིག་ཀྱང་མ་གསུངས་སོ། །མ་བརྗོད་དོ་ཞེས་ཁོ་བོས་སྔར་མ་བཤད་དམ། དེ་ལྟ་མོད་ཀྱི་སྨོན་ལམ་གྱི་དབང་གིས་དེ་བཞིན་གཤེགས་པའི་གསུང་སེམས་ཅན་རྣམས་ཀྱིས་དམིགས་སོ། །སྨྲས་པ། སྨྲས་ན་ཉེས་པ་ཅི་ཡོད། སྨྲས་པ། ངག་གི་ལས་ཀྱི་ཉེས་པར་འགྱུར་རོ། །སྨྲས་པ། ངག་གི་ལས་ལས་ཉེས་པ་ཅི་ཞིག་འབྱུང ། སྨྲས་པ།་ཡི་གེ་ལ་སེམས་པས་བཀླགས་པའི་ཉེས་པར་འགྱུར་རོ། །སྨྲས་པ། ཉེས་པ་མེད་པ་གང་ཡིན། སྨྲས་པ། གང་མི་སྨྲ། མི་བརྗོད་པ་དེ་ལ་རྣམ་པར་རིག་པ་གང་ཡང་མེད་དོ། །རྣམ་པར་
260a
༄#། །རིག་པ་མེད་པ་ནི་ཉེས་པ་མེད་པའོ། །གང་བདག་ལ་རྣམ་པར་རིག་པར་མི་བྱེད་པ་དང ། གཞན་ལ་རྣམ་པར་རིག་པར་མི་བྱེད་པ་དེ་ཉེས་པ་མེད་པའོ། །སྨྲས་པ། ཉེས་པའི་རྩ་བ་གང་ཡིན། སྨྲས་པ། ཉེས་པའི་རྩ་བ་ནི་འཛིན་པའོ། །སྨྲས་པ། འཛིན་པའི་རྩ་བ་ཅི་ཡིན། སྨྲས་པ། མངོན་པར་ཞེན་པ་ནི་རྩ་བའོ། །སྨྲས་པ། མངོན་པར་ཞེན་པའི་རྩ་བ་ཅི་ཡིན། སྨྲས་པ། ཡང་དག་པ་མ་ཡིན་པ་ཀུན་བཏགས་པ་ནི་རྩ་བའོ། །སྨྲས་པ། ཡང་དག་པ་མ་ཡིན་པ་ཀུན་བཏགས་པའི་རྩ་བ་ཅི་ཡིན། སྨྲས་པ། ལྷག་པར་དམིགས་པའི་ལྟ་བ་ནི་རྩ་བའོ། ། སྨྲས་པ། ཅི་ཞིག་ལ་ལྷག་པར་དམིགས། སྨྲས་པ། གཟུགས་རྣམས་དང ། སྒྲ་རྣམས་དང ། དྲི་རྣམས་དང ། རོ་རྣམས་དང ། རེག་བྱ་རྣམས་དང ། ཆོས་རྣམས་ལ་ལྷག་པར་དམིགས་སོ། ། སྨྲས་པ། ལྷག་པར་མི་དམིགས་པ་ཇི་ལྟ་བུ། སྨྲས་པ། གལ་ཏེ་སྲེད་པའི་བག་ལ་ཉལ་ལ་ལྷག་པར་མི་དམིགས་པ་སྟེ། ཞི་བའི་བློ་གྲོས། དེ་ལྟ་བས་ན་སྲེད་པ་ལ་དམིགས་པ་སྤང་བའི་ཕྱིར་དེ་བཞིན་གཤེགས་པས་ཆོས་བསྟན་ཏོ། །གསང་བ་པའི་བདག་པོ་ལག་ན་རྡོ་རྗེས་བསྟན་པ་འདི་བཤད་པ་ན་དགེ་སློང་ལྔ་བརྒྱ་ནི་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་ཉིས་བརྒྱ་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །གཉིས་སུ་མེད་པའི་ལེའུ་ཞེས་བྱ་སྟེ་བཅུ་བདུན་པའོ།། །།དེ་ནས་གསང་བ་པའི་བདག་
260b
བོ་ལག་ན་རྡོ་རྗེ་བྲང་པ་ཡོངས་སུ་རྫོགས་པར་ལུང་བསྟན་པས་དབུགས་ཕྱིན་པ་ཐོབ་སྟེ། ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་སྟེ་དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བར་དགོངས་ཏེ་བྱང་ཆུབ་སེམས་དཔའ་རྣམས་དང་ཐབས་གཅིག། ཉན་ཐོས་ཆེན་པོ་རྣམས་དང་ཐབས་གཅིག་ཏུ་གསང་བ་པ་བདག་གི་གནས་ལྕང་ལོ་ཅན་གྱི་ཕོ་བྲང་འཁོར་དུ་གཤེགས་ཤིང་དགུང་བདུན་ཞིག་བཞུགས་པར་ཅི་གནང ། དེ་ཅིའི་སླད་དུ་ཞེ་ན། བཅོམ་ལྡན་འདས། ལྕང་ལོ་ཅན་གྱི་ཕོ་བྲང་འཁོར་ན་གནོད་སྦྱིན་དང ། གྲུལ་བུམ་དང ། སྲིན་པོ་དང ། ཤ་ཟ་དང ། དྲི་ཟ་དང ། ལྟོ་འཕྱེ་ཆེན་པོ་མང་དུ་མཆིས་ཏེ། སེམས་ཅན་གྱི་རིགས་རྣམ་པ་སྣ་ཚོགས་གནས་པ། དེ་དག་གིས་བཅོམ་ལྡན་འདས་མཐོང་ཞིང་ཆོས་ཀྱང་ཐོས་ན། ཡུན་རིང་པོའི་དོན་དང ། སྨན་པ་དང ། བདེ་བ་དང ། གྲུབ་པ་དང ། བདེ་བར་འགྱུར་ལགས་སོ། །དེས་ན་ཡང་ཁྲོ་བ་དང་སྡང་བའི་སེམས་མ་མཆིས་པར་འགྱུར་ལགས་སོ། །རྒྱལ་པོ་ཆེན་པོ་བཞིའི་གཡོག་འཁོར་གང་ལགས་པ་དེ་དག་གི་ཡུན་རིང་པོའི་དོན་དང ། སྨན་པ་དང ། བདེ་བ་དང ། གྲུབ་པ་དང ། བདེ་བར་འགྱུར་ལགས་སོ། །བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་ཐུགས་བརྩེ་བ་དང ། སེམས་ཅན་ཚད་མེད་པ་དག་གི་དགེ་བའི་རྩ་བ་རྣམ་པར་སྤེལ་བ་
261a
༄#། །དང ། གསང་བ་པའི་བདག་པོ་ལག་ན་རྡོ་རྗེའི་བསམ་པ་ཡོངས་སུ་བསྐང་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། ཉན་ཐོས་ཆེན་པོ་རྣམས་དང་ཐབས་གཅིག་ཏུ་གསང་བ་པའི་བདག་པོའི་གནས་ལྕང་ལོ་ཅན་གྱི་ཕོ་བྲང་འཁོར་དུ་གཤེགས་ཏེ་ཞག་བདུན་བཞུགས་པར་གནང་ངོ ། །དེ་ནས་གསང་བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་མཛད་པར་རིག་ནས་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་བདུན་བསྐོར་བ་བྱས་ཏེ། བཅོམ་ལྡན་འདས་ཀྱི་ཐད་ནས་སོང་ནས་ལྕང་ལོ་ཅན་གྱི་ཕོ་བྲང་འཁོར་ག་ལ་བ་དེར་སོང་སྟེ། རང་གི་གནས་སུ་ཕྱིན་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་འདི་སྙམ་དུ་བསམས་ཏེ། བདག་གིས་བཅོམ་ལྡན་འདས་དེ་བཞིན་གཤེགས་པ་ལ་མཆོད་པའི་ལས་ཀྱི་ཕྱིར་ཅི་ནས་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་ཐམས་ཅད་ངོ་མཚར་དུ་སེམས་པར་འགྱུར་བ་དང ། ཕྱོགས་བཅུ་ནས་འདུས་པའི་བྱང་ཆུབ་སེམས་དཔའ་ཐམས་ཅད་ཀྱང་དགའ་བ་སྐྱེ་བར་འགྱུར་བ་དང ། བདག་གིས་ཀྱང་དེ་བཞིན་གཤེགས་པ་ལ་མཆོད་པ་རྒྱ་ཆེན་པོ་བྱས་པར་འགྱུར་
261b
བ་དེ་ལྟ་བུའི་འཁོར་གྱི་ཁྱམས་བཀོད་པ་བྱའོ་སྙམ་མོ། །དེ་ནས་ཡང་འདི་སྙམ་དུ་བསམས་ཏེ། བདག་གིས་མངོན་པར་ཤེས་ཏེ་དུས་གཅིག་ཅིག་ན། བཅོམ་ལྡན་འདས་དེ་བཞིན་གཤེགས་པ་བཀོད་པའི་རྒྱལ་པོའི་སངས་རྒྱས་ཀྱི་ཞིང་དུ་བྱང་ཆུབ་སེམས་དཔའ་ཁྲི་ལུང་བསྟན་པའི་ཕྱིར། བཅོམ་ལྡན་འདས་མཚན་མོ་མི་ཉལ་ཙམ་ན་སྤྱོད་པ་བསམ་གྱིས་མི་ཁྱབ་པ་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། འཇིག་རྟེན་གྱི་ཁམས་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་འདས་ཏེ། འཇིག་རྟེན་གྱི་ཁམས་ཡོན་ཏན་རིན་པོ་ཆེ་མཐའ་ཡས་བཀོད་པ་ཞེས་བྱ་བར་གཤེགས་པའི་ཚེ། སངས་རྒྱས་ཀྱི་ཞིང་དེར་བདག་གིས་ལྷ་དང་མིའི་བཀོད་པ་བསམ་གྱིས་མི་ཁྱབ་པ་ལས་ཡང་དག་པར་འདས་པའི་བཀོད་པ་མཐོང་གི། བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་བདག་གིས་འཇིག་རྟེན་གྱི་ཁམས་ཡོན་ཏན་རིན་པོ་ཆེ་མཐའ་ཡས་པ་བཀོད་པ་དེའི་བཀོད་པ་ཅི་འདྲ་བ་དེ་འདྲ་བའི་འཁོར་གྱི་ཁྱམས་བཀོད་པར་བྱའོ་སྙམ་མོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་དེའི་ཚེ་བཀོད་པ་ཆེན་པོའི་རྒྱལ་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། གསང་བ་པའི་བདག་པོ་ལག་ན་རྡོ་རྗེ་བཀོད་པ་ཆེན་པོའི་རྒྱལ་པོའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་དེ་ནས་དེའི་ཚེ་འཇིག་རྟེན་གྱི་ཁམས་ཡོན་ཏན་རིན་པོ་ཆེ་མཐའ་ཡས་
262a
༄#། །བཀོད་པ་དེའི་བཀོད་པ་ཅི་འདྲ་བ་དེ་འདྲ་བའི་འཁོར་གྱི་ཁྱམས་བཀོད་པ་ཞིག་ལྕང་ལོ་ཅན་གྱི་ཕོ་བྲང་འཁོར་གྱི་དབུས་ན་གནས་པར་སྣང་ངོ ། །འཁོར་གྱི་ཁྱམས་དེ་ཡང་ཡངས་ཤིང་རྒྱ་ཆེ་སྟེ། ཤར་ནུབ་ཏུ་ཆུར་ནི་དཔག་ཚད་དྲུག་ཅུ་རྩ་བཞི་ཡོད་པ། ལྷོ་བྱང་དུ་རྒྱར་ནི་དཔག་ཚད་བཞི་བཅུ་རྩ་གཉིས་ཡོད་པ། ས་གཞི་ནི་བཻ་ཌཱུརྱ་སྔོན་པོའི་རང་བཞིན་དུ་གནས་པ། ཕྱིར་ནི་ཨ་ན་ད་རྙིལ་ལས་བྱས་པ། ཟུང་གི་ཕྲུགས་རིན་པོ་ཆེ་ཐམས་ཅད་ཀྱིས་སྤྲས་པ། ཛམྦུ་ཆུ་བོའི་གསེར་གྱི་པདྨས་བརྒྱན་པ། རྒྱན་ཕྲེང་སྣ་ཚོགས་དུ་མས་སྤྲས་པ།་རས་བཅོས་བུ་དུ་མ་བཏིང་བ། མུ་ཏིག་གི་རྒྱན་ཕྲེང་དུ་མ་དབྱངས་པ། དར་གྱི་ལྔ་ལྡིང་དུ་མས་མཛེས་པར་བྱས་པ། མེ་ཏོག་གི་ཕྲེང་བ་དུ་མས་བཀབ་པ། པོག་ཕོར་དུ་མ་ནས་བདུགས་པ། ལྷའི་མེ་ཏོག་ཁ་དོག་དུ་མ་དང ། ཁ་དོག་སྣ་ཚོགས་བཀྲམ་པ། བཀྲ་བ་བལྟ་ན་སྡུག་པ་ཡིད་དུ་འོང་བ་ལུས་སིམ་པར་བྱེད་པ། སེམས་དགའ་བ་བསྐྱེད་པ། ཡོན་ཏན་གྱི་ཚོགས་མཐའ་ཡས་པ་དང་ལྡན་པ། བསྔགས་པའི་ཚོགས་བསྟན་པ་ཚད་མེད་པ་སྟེ། འཁོར་གྱི་ཁྱམས་དེར་སེང་གེའི་ཁྲི་རིན་པོ་ཆེའི་རྩ་བས་བརྒྱན་པ། རིན་པོ་ཆེའི་ཁ་ཁྱེར་གྱིས་བསྐོར་བ། རིན་པོ་ཆེའི་པདྨ་བཀོད་པ་དང་ལྡན་པ། མུ་ཏིག་གི་དྲ་བས་གཡོགས་པ་མིག་མང་རིས་སུ་བྲིས་པ། ལྷའི་རས་བཅོས་བུ་དུམ་བཏིང་བ། སྟེང་དུ་རིན་པོ་ཆེའི་དྲ་བས་བྲེས་
262b
པ།་བཀོད་པ་སྔོན་མ་མཐོང ། མ་ཐོས་པ་འཇིག་རྟེན་གྱི་ཁམས་མང་པོ་དག་ན་མེད་པ་བརྒྱ་སྟོང་མང་པོ་བྱུང་ངོ ། །ཞལ་ཟས་རོ་བྲོ་བ་བརྒྱས་བསྒོས་པའང་བཤམས་སོ། །སེང་གེའི་ཁྲི་ས་ལ་མི་བརྟེན་པ་བརྒྱ་སྟོང་ཡང་བཞག་སྟེ། སེང་གེའི་ཁྲི་རེ་རེའི་བར་སྣང་ལ་ཡང་རིན་པོ་ཆེའི་གདུགས་རྣམ་པ་སྣ་ཚོགས་ཀྱི་མཆོག་དང་ལྡན་པ་དག་བྲེས་སོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་འཁོར་གྱི་ཁྱམས་བཀོད་པ་དང ། སེང་གེའི་ཁྲི་བཀོད་པ་རྣམ་པ་དེ་ལྟ་བུ་བྱས་ནས་དྲན་པ་དང་ལྡན་ཞིང་ཤེས་བཞིན་དུ་ཏིང་ངེ་འཛིན་དེ་ལས་ལངས་ཏེ། དེའི་ནུབ་མོ་ཉིད་དེ་བཞིན་གཤེགས་པ་ལ་མཆོད་པར་འོས་པའི་ཞལ་ཟས་བྱང་ཆུབ་སེམས་དཔའི་བསམ་པས་ཡོངས་སུ་དག་པ། རོ་བྲོ་བ་མང་པོ་སྣ་ཚོགས་དང་ལྡན་པ་བསོད་པ་མང་པོ་ཡང་བཤམས་ནས་ནམ་ནངས་པ་དང་རྒྱལ་པོ་ཆེན་པོ་བཞི་ལ་སྨྲས་པ། གྲོགས་པོ་དག། ཤེས་པར་གྱིས་ཤིག། ཁོ་བོས་བཅོམ་ལྡན་འདས་བྱང་ཆུབ་སེམས་དཔའ་རྣམས་དང ། ཉན་ཐོས་ཆེན་པོ་རྣམས་དང་ཐབས་གཅིག་ཏུ་གསང་བ་པ་རང་གི་གནས་སུ་སྤྱན་དྲངས་ན། བཅོམ་ལྡན་འདས་ཀྱིས་ཁོ་བོ་ལ་ཐུགས་བརྩེ་བའི་ཕྱིར་གནང་གི་དེ་ལ་ཁྱོད་དཔུང་དང་བཅས། གཡོག་འཁོར་དང་བཅས་པར་མི་གཡེང་བའི་སེམས་ཀྱིས་ཞག་བདུན་གྱི་བར་དུ་ལས་གཞན་མི་བྱེད་པར་དེ་བཞིན་གཤེགས་པ་ལ་མཆོད་པ་དང ། རིམ་གྲོ་བྱ་བར་སྤྲོ་བར་གྱིས་ཤིག། ལྕང་ལོ་ཅན་
263a
༄#། །གྱི་ཕོ་བྲང་འཁོར་ན་གནོད་སྦྱིན་དང ། སྲིན་པོ་དང ། ཡི་དྭགས་དང ། ཤ་ཟ་དང ། དྲི་ཟ་དང ། གྲུལ་བུམ་དང ། གསང་བ་དང ། ལྟོ་འཕྱེ་ཆེན་པོ་ཇི་སྙེད་འཁོད་པ་དང ། དེ་མ་ཡིན་པའི་སེམས་ཅན་གཞན་དག་འཁོད་པ་དེ་དག་ལ་ཡང ། གྲོགས་པོ་དག། ཤེས་པར་གྱིས་ཤིག། ཁོ་བོས་བཅོམ་ལྡན་འདས་ལྕང་ལོ་ཅན་གྱི་ཕོ་བྲང་འཁོར་འདིར་སྤྱན་དྲངས་ན་གཤེགས་པར་གནང་གི། དེ་ལ་ཁྱེད་ཀྱིས་ངན་སེམས་མེད་པ་དང ། སྡང་བ་མེད་པ་དང ། དགའ་བ་དང ། དད་པ་དང་མཆོག་ཏུ་དགའ་བ་མང་པོས་བཅོམ་ལྡན་འདས་དེ་ལ་བསྙེན་བཀུར་གྱིས་ཤིག། ཆོས་ཀྱང་ཉོན་ཅིག་ཅེས་བསྒོའོ།། །།བམ་པོ་བརྒྱད་པ། དེ་ནས་གསང་བ་བའི་བདག་པོ་ལག་ན་རྡོ་རྗེས་བུ་ཐུ་བོ་རྡོ་རྗེའི་སྡེ་ཞེས་བྱ་བ་ལ་སྨྲས་པ། བཞིན་བཟང་ཁྱོད་རང་གི་རྫུ་འཕྲུལ་གྱི་སྟོབས་ཀྱིས་སོང་ལ། ཚངས་རིས་ནས་བཟུང་སྟེ་འོག་མིན་གྱི་བར་གྱི་ལྷ་རྣམས་ལ་བཅོམ་ལྡན་འདས་གསང་བ་བའི་བདག་པོ་ལག་ན་རྡོ་རྗེའི་གནས་ལྕང་ལོ་ཅན་གྱི་ཕོ་བྲང་འཁོར་དུ་གདུགས་ཚོད་གསོལ་གྱི། ཁྱོད་ཀྱི་ནང་ནས་སུ་ལྟ་འདོད་པ་དེ་མྱུར་དུ་ཤོག་ཅིག་ཅེས་སྤྲོ་ན་ཞིག། ཡང ། དེ་ལྟར་བགྱིའོ། །ཞེས་ཏེ་ཇི་སྐད་བསྒོ་བ་བཞིན་དུ་གསང་བ་པའི་བདག་པོའི་བུ་དེས་བྱས་སོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་བུ་གཉིས་པ་ལག་བཟང་ཞེས་བྱ་བ་ལ་སྨྲས་པ། ཁྱོད་རང་གི་རྫུ་འཕྲུལ་གྱི་
263b
སྟོབས་ཀྱིས་སོང་ལ། ས་བླ་བའི་ལྷ་རྣམས་ནས་བཟུང་སྟེ་བར་སྣང་དང ། རྒྱལ་ཆེན་བཞིའི་རིས་དང ། སུམ་ཅུ་རྩ་གསུམ་པ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷའི་བུ་རྣམས་ལ་བཅོམ་ལྡན་འདས་གསང་བ་པའི་བདག་པོ་ལག་ན་རྡོ་རྗེའི་གནས་ལྕང་ལོ་ཅན་གྱི་ཕོ་བྲང་འཁོར་དུ་གདུགས་ཚོད་གསོལ་གྱི། ཁྱེད་ཀྱི་ནང་ནས་སུ་བལྟ་འདོད་པ་དེ་མྱུར་དུ་ཤོག་ཅིག་ཅེས་སྦྲོན་ཅིག། ཡབ། དེ་ལྟར་བགྱིའོ། །ཞེས་ཏེ་ཇི་སྐད་བསྒོ་བ་བཞིན་དུ་གཞོན་ནུ་ལག་བཟང་གིས་བྱས་སོ། །དེ་ནས་སྐད་ཅིག་ཐང་ཅིག་ཡུད་ཙམ་དེ་ལ་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་བརྒྱ་སྟོང་དག་གིས་དཔག་ཚད་ཁྲི་ཁོར་ཁོར་ཡུག་གི་བར་སྣང་ཁྱབ་པར་གྱུར་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ཀྱི་མཆོད་པ་བཤམས་ཏེ། ནམ་ནངས་པ་དང ། པུས་མོ་གཡས་པའི་ལྷ་ངས་ལ་བཙུགས་ཏེ། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་ཚིགས་སུ་བཅད་པའི་དབྱངས་ཀྱིས་བཅོམ་ལྡན་འདས་ལ་གདུགས་ཚོད་བབ་པ་གསོལ་པ། ཐུབ་པ་ཆེན་པོ་དུས་འདི་ལགས། སྐྱེས་བུ་གཙོ་བོ་གཤེགས་སུ་གསོལ། ། སྐྱེས་བུ་དམ་པ་གཤེགས་སུ་གསོལ། །སྐྱེས་བུ་ཅང་མཁྱེན་གཤེགས་སུ་གསོལ། །ཐུབ་པ་ཆེན་པོ་གདུགས་ཚོད་བབ། །རྐང་གཉིས་གཙོ་བོ་གཤེགས་སུ་གསོལ། །རྐང་གཉིས་
264a
༄#། །དམ་པ་གཤེགས་སུ་གསོལ། །རྐང་གཉིས་ཅང་མཁྱེན་གཤེགས་སུ་གསོལ། །ཚུལ་ཁྲིམས་པདྨའི་རྫིང་ནས་འཁྲུངས། །བརྩོན་འགྲུས་ཆབ་ཀྱིས་རྣམ་པར་འཕེལ། །སློབ་མ་བུང་བ་སྒྲ་འབྱིན་པ། །ཐུབ་པ་པདྨ་གཤེགས་སུ་གསོལ། །འཕགས་པའི་བདེན་པར་གནས་བཅས་ཏེ། །བྱམས་དང་ཐུགས་རྗེའི་སྤྱན་མངའ་ཞིང ། །བདག་མེད་པ་ཡི་སྒྲ་སྒྲོགས་པ། རྒྱལ་བ་སེང་གེ་གཤེགས་སུ་གསོལ། །ཁྲིམས་ནི་རྩ་བ་ཆུ་བ་དྲན། །བྱང་ཆུབ་ཡན་ལག་མེ་ཏོག་བརྒྱན། །རྣམ་གྲོལ་འབྲས་བུ་ཕུན་སུམ་ཚོགས། །རྒྱལ་བ་སྡོང་པོ་གཤེགས་སུ་གསོལ། །ཤེས་རབ་རྒྱ་ཆེན་ཟབ་པ་པོ། །ཏིང་འཛིན་ཆབ་ནི་གྲང་ལྡན་ཞིང ། །རྣལ་འབྱོར་པ་ཡི་ཚོང་པས་གཏམས། །ཡོན་ཏན་རྒྱ་མཚོ་གཤེགས་སུ་གསོལ། །ཐུགས་རྗེ་དཀྱིལ་འཁོར་དཔལ་ལྡན་པ། །ཤེས་རབ་འོད་ཟེར་ལེགས་པར་བརྒྱན། །སློབ་མ་པདྨ་ཁ་འབྱེད་པ། །ཐུབ་པ་ཉི་མ་གཤེགས་སུ་གསོལ། །ཕས་ཀྱི་རྒོལ་བས་མི་བསྐྱོད་ཅིང ། རྣམ་ཐར་ལ་སོགས་སྨན་ཚོགས་ཅན། །སློབ་དང་མི་སློབ་རི་དྭགས་གཏམས། །ཐུབ་པ་རི་བོ་གཤེགས་སུ་གསོལ། །དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེའི་གདུགས་ཚོད་བབ་པར་མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག། གསང་བ་པའི་བདག་པོའི་གདུགས་ཚོད་བབ་ཀྱི། ཆོས་གོས་གྱོན་ལ་ལྷུང་བཟེད་
264b
ཐོགས་ཤིག། ཞག་བདུན་བྱིན་གྱིས་བརླབ་པ་བྱིན་གྱིས་རློབ་ལ་གཙུག་ལག་ཁང་གི་ཁང་སྐྱོང་སྐོས་ཤིག། དེ་ནས་ཉན་ཐོས་དང ། བྱང་ཆུབ་སེམས་དཔའ་གང་དག་རྫུ་འཕྲུལ་དང་ལྡན་པ་དེ་དག་ནི་རང་གི་རྫུ་འཕྲུལ་གྱི་སྟོབས་ཀྱིས་བར་སྣང་ལ་དོང་ངོ ། །གང་དག་རྫུ་འཕྲུལ་དང་ལྡན་པ་མ་ཡིན་པ་དེ་དག་ནི་དེ་བཞིན་གཤེགས་པའི་འོད་ཀྱི་དཀྱིལ་འཁོར་གྱི་ཁྲོད་དུ་བཞུགས་ནས་བཅོམ་ལྡན་འདས་དང་ལྷན་གཅིག་ཏུ་ནམ་མཁའི་དཀྱིལ་གྱི་ལམ་ནས་དོང་ངོ ། །དེ་ནས་བཅོམ་ལྡན་འདས་བྱ་རྒོད་ཀྱི་ཕུང་པོའི་རི་ལས་མི་སྣང་བར་གྱུར་ནས་བྱང་ཆུབ་སེམས་དཔའི་ཚོགས་ཀྱིས་ནི་བསྐོར། ཉན་ཐོས་ཀྱི་ཚོགས་ཀྱིས་ནི་མདུན་དུ་བདར། ལྷའི་ཚོགས་ཀྱིས་ནི་མངོན་པར་བསྟོད། ལྷའི་བུ་མོ་རྣམས་ནི་གླུ་དབྱངས་ལེན། འོད་ཟེར་ནི་འགྱེད། མེ་ཏོག་གི་ཆར་ནི་འབེབས། རོལ་མོའི་སིལ་སྙན་བྱེ་བ་ཁྲག་ཁྲིག་བརྒྱ་སྟོང་ནི་ལེན། ཞིང་རྣམས་ནི་གཡོ་བར་མཛད་ཅིང ། སངས་རྒྱས་ཀྱི་མཐུ་ཆེན་པོ་དང ། སངས་རྒྱས་ཀྱི་རྫུ་འཕྲུལ་ཆེན་པོ་དང ། སངས་རྒྱས་ཀྱི་རྣམ་པར་འཕྲུལ་བ་ཆེན་པོ་དང ། སངས་རྒྱས་ཀྱི་ཆོ་འཕྲུལ་ཆེན་པོ་དང ། སངས་རྒྱས་ཀྱི་དཔལ་ཆེན་པོ་དང ། སངས་རྒྱས་ཀྱི་གཟི་བརྗིད་ཆེན་པོ་དང ། སངས་རྒྱས་ཀྱི་སྤྱོད་ལམ་ཆེན་པོ་དང ། སངས་རྒྱས་ཀྱི་རྣམ་པར་རོལ་པ་ཆེན་པོས་ལྕང་ལོ་ཅན་གྱི་ཕོ་བྲང་འཁོར་ག་ལ་བ་དེར་ནམ་མཁའི་དཀྱིལ་གྱི་ལམ་ནས་ངང་པའི་རྒྱལ་པོ་བཞིན་དུ་ཐོགས་པ་མེད་པར་
265a
༄#། །གཤེགས་པ་དང ། འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་དེ་དག་གིས་བཅོམ་ལྡན་འདས་ནམ་མཁའི་དཀྱིལ་གྱི་ལམ་ནས་ངང་པའི་རྒྱལ་པོ་ལྟར་ཐོགས་པ་ནི་མི་མངའ། ཉི་མའི་དཀྱིལ་འཁོར་འཆར་བ་ནི་འདྲ། ཟླ་བ་ཉ་བའི་དཀྱིལ་འཁོར་སྐར་མའི་ཚོགས་ཀྱིས་བསྐོར་བ་དང་ནི་མཚུངས། ལྷའི་དབང་པོ་བརྒྱ་བྱིན་ལྟར་ལྷའི་ཚོགས་ཀྱིས་ནི་བསྐོར། ཚངས་པ་ཆེན་པོ་ལྟར་ཚངས་པའི་ཚོགས་ཀྱིས་ནི་བསྐོར་ཞིང་གཤེགས་པ་རྒྱང་རིང་པོ་ནས་མཐོང་ངོ ། །མཐོང་ནས་ཀྱང་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ། བཅོམ་ལྡན་འདས་ལ་མཆོད་པའི་ལས་ཀྱི་ཕྱིར། ལྷའི་མེ་ཏོག་ཨུཏྤ་ལ་དང ། ཀུ་མུ་ཏ་དང ། པདྨ་དཀར་པོ་དང ། མནད་ར་བ་དང ། མན་ད་ར་བ་ཆེན་པོ་དང ། ཡོངས་སུ་འདུ་དང ། ཡོངས་སུ་འདུ་ཆེན་པོ་དང ། མཉྫུ་ཤ་ཀ་དང ། མཉྫུ་ཤ་ཀ་ཆེན་པོ་དང ། སྠ་ལ་དང ། སྠ་ལ་ཆེན་པོ་དང ། མདོག་མཛེས་དང ། མདོག་མཛེས་ཆེན་པོ་དང ། འཁོར་ལོ་དང ། འཁོར་ལོ་ཆེན་པོ་དང ། དྲི་ཞིམ་དང ། པདྨ་འདབ་བརྒྱ་དང ། འདབ་སྟོང་དང ། སྐར་འོད་དང ། སྐར་མ་དགའ་དང ། ཀུན་དུ་བསུང་དང ། བསུང་རྟག་དང ། རྟག་ཏུ་མེ་ཏོག་ཆགས་དང ། མིག་ཏུ་སྡུག་པ་དེ་དག་དང ། མེ་ཏོག་གཞན་དག་གིས་ཀྱང་བཅོམ་ལྡན་འདས་ལ་མངོན་པར་གཏོར་ཏོ། །གདུགས་དང ། རྒྱལ་མཚན་དང ། བ་དན་
265b
དག་ཀྱང་བསྒྲེང་ངོ ། །རོལ་མོའི་སིལ་སྙན་བརྒྱ་སྟོང་ཡང་ལེན་ཏོ། །དེ་ནས་བཅོམ་ལྡན་འདས་ཀྱིས་བཀོད་པ་རྣམ་པ་དེ་ལྟ་བུ་མེ་ཏོག་གི་ཆར་འབེབས་པ་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། གོས་དང ། གདུགས་དང ། རྒྱལ་མཚན་དང ། བ་དན་གྱི་ཆར་འབེབས་པ་དང ། སིལ་སྙན་དང ། གླུ་དབྱངས་དང ། རོལ་མོའི་སྒྲ་དང ། ལྷའི་བུ་མོ་བརྒྱ་སྟོང་གླུ་ལེན་པ་དག་དང ། སྐད་ཅིག་ཐང་ཅིག་ཡུད་ཙམ་དེ་ལ་ལྕང་ལོ་ཅན་གྱི་ཕོ་བྲང་འཁོར་དུ་བྱོན་ཏེ། བྱང་ཆུབ་སེམས་དཔའ་རྣམས་དང ། ཉན་ཐོས་ཆེན་པོ་རྣམས་དང་ཐབས་གཅིག་ཏུ་རྒྱལ་པོ་ཆེན་པོ་རྣམ་ཐོས་ཀྱི་བུའི་མདུན་ཁང་དུ་བཞུགས་སོ། །བཅོམ་ལྡན་འདས་ས་ལ་བཞུགས་མ་ཐག་ཏུ་དེ་ནས་དེའི་ཚེས་ཆེན་པོ་དལ་ཞིང་མི་དྲག་ལ། སེམས་ཅན་ཐམས་ཅད་ལ་མི་གནོད་པར་གཡོས་པར་གྱུར་ཏོ། །ད་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ལྕང་ལོ་ཅན་གྱི་ཕོ་བྲང་འཁོར་དུ་བྱོན་པར་རིག་ནས་མྱུར་བ་མྱུར་བར་ལ་གོར་དུ་བཙུན་མོའི་འཁོར་དང་བཅས། གཉེན་གྱི་འཁོར་དང་བཅས་ཏེ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་ཐོགས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།་ཇི་ལྟར་ཐོགས་ཐོགས་པའི་མེ་ཏོག་དང ། སྤོས་དང ། ཕྲེང་བ་དང ། བྱུག་པ་རྣམས་ཀྱིས་བཅོམ་ལྡན་འདས་ལ་མཆོད་པ་བྱས་ནས་ཐལ་མོ་སྦྱར་ཏེ། བཅོམ་ལྡན་འདས་ལ་ཕྱག་འཚལ་
266a
༄#། །ཞིང་ཕྱོགས་གཅིག་ཏུ་འཁོད་དོ། །བཙུན་མོའི་འཁོར་དང ། དཔུང་གི་ཚོགས་དང ། འཁོར་འདུས་པ་གང་ཡིན་པ་དེ་དག་ཐམས་ཅད་ཀྱིས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཐལ་མོ་སྦྱར་ནས་བཏུད་པ་དང ། བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལས་བརྩམས་ཏེ། འཁོར་དེ་ལྟར་འདུས་པ་དེ་དག་ལ་དེ་ལྟ་བུའི་གཏམ་གྱི་སྦྱོར་བ་མཛད་པས་ཀླུ་དང ། གནོད་སྦྱིན་དང ། དྲི་ཟ་དང ། གྲུལ་བུམ་དང ། སྲིན་པོའི་འཁོར་དེའི་ནང་ནས་སྲོག་ཆགས་ཁྲི་ཉིས་སྟོང་གིས་བྱང་ཆུབ་ཏུ་སེམས་བསྐྱེད་དོ། །རྒྱལ་པོ་ཆེན་པོ་དེ་དག་གི་བཙུན་མོའི་འཁོར་གྱི་ནང་ནས་བུད་མེད་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་གསང་བ་པའི་བདག་པོ་ལག་ན་རྡོ་རྗེ་བཙུན་མོའི་འཁོར་དང་བཅས། གཉེན་གྱི་གཡོག་འཁོར་དང་བཅས་ཤིང་འཁོར་དང ། ཡོན་ཏན་མཐའ་ཡས་པ་བཀོད་པའི་གཡོག་འཁོར་དང་བཅས་ཏེ། མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། གོས་དང ། གདུགས་དང ། རྒྱལ་མཚན་དང ། བ་དན་ཐམས་ཅད་ཐོགས་ཤིང་སིལ་སྙན་དང ། ཕེག་རྡོབ་པ་དང ། རོལ་མོའི་སྒྲ་འབྱིན་པ་རྣམས་དང་ལྷན་གཅིག་ཏུ་རྒྱལ་པོ་ཆེན་པོ་རྣམ་ཐོས་ཀྱི་བུའི་མདུན་ཁང་ག་ལ་བ་དང ། བཅོམ་ལྡན་འདས་ག་ལ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།
266b
ལན་བདུན་བསྐོར་བ་བྱས་ནས་ཇི་ལྟར་ཐོགས་ཐོགས་པའི་མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། གོས་དང ། གདུགས་དང ། རྒྱལ་མཚན་དང ། བ་དན་རྣམས་ཀྱིས་བཅོམ་ལྡན་འདས་ལ་མཆོད་པ་བྱས་ཏེ། སིལ་སྙན་དང ། རོལ་མོ་སྣ་ཚོགས་བྱས་ནས་བཅོམ་ལྡན་འདས་ལ་ཕྱག་འཚལ་ཏེ། དགེ་སློང་གི་དགེ་འདུན་དང ། བྱང་ཆུབ་སེམས་དཔའི་ཚོགས་དང་བཅས་པར་ལྷན་གཅིག་ཏུ་རང་གི་འཁོར་གྱི་ཁྱམས་སུ་སྤྱན་དྲངས་སོ། །དེ་ནས་བཅོམ་ལྡན་འདས་འཁོར་གྱི་ཁྱམས་དེར་ས་ལ་མི་བརྟེན་པ། རྣམ་པ་ཐམས་ཅད་ཀྱི་མཆོག་དང་ལྡན་པ་ཉིད་ཀྱི་སེང་གེའི་གདན་ཇི་ལྟར་བཤམས་པ་ལ་བཞུགས་སོ། །བྱང་ཆུབ་སེམས་དཔའ་དང ། ཉན་ཐོས་ཆེན་པོ་དེ་དག་དང ། ཐམས་ཅད་དང་ལྡན་པའི་འཁོར་ཡང་སྟན་ཅི་རིགས་པ་དག་ལ་འཁོད་དོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དེ་དག་དང ། ལྷའི་འཁོར་ཆེན་པོ་དེ་ལ་འདི་སྐད་ཅེས་སྨྲས་སོ། །ཁྱེད་དེ་བཞིན་གཤེགས་པ་ལ་བསུབ་གྱིས་ཤིག ། མཆོད་པ་དང ། རིམ་གྲོ་གྱིས་ཤིག། དེ་ནི་དེ་བཞིན་གཤེགས་པས་ཀྱང ། །དེ་ལ་གང་དག་ཡི་རང་དང ། །ཞལ་ཏ་བྱ་བར་བྱེད་པ་ནི། །དེ་དག་བསོད་ནམས་སྐལ་བ་ཅན། །དེ་དག་ཡོན་ནི་ཆུང་བ་མིན། ། ཞེས་བཀའ་སྩལ་གྱི། དེ་ལ་གྲོགས་པོ་དག་ཁྱེད་ཀྱིས་རྗེས་སུ་ཡི་རང་བ་དང་ལྡན་པ་དང ། ཞལ་ཏ་བྱ་བ་དང་ལྡན་པའི་བསོད་ནམས་བྱ་བའི་དངོས་པོ་ལོངས་ཤིག། དེ་ནས་ལྷའི་བུ་དེ་དག་གིས་
267a
༄#། །འཁོར་གྱི་ཁྱམས་བཀོད་པ་དེ་དང ། སེང་གེའི་ཁྲི་བཀོད་པ་ཡང་མཐོང་ངོ ། །དེ་མཐོང་ནས་ངོ་མཚར་དུ་གྱུར་ཏེ། འདི་ནི་དེ་བཞིན་གཤེགས་པའི་མཐུའམ། འོན་ཏེ་གསང་བ་པའི་བདག་པོའི་འམ། སུའི་ཡིན་ཞེས་ཆེད་དུ་བརྗོད་པས་ཆེད་དུ་བརྗོད་པ་དང ། དེ་དག་གིས་བར་སྣང་ལས་འདི་ནི་གསང་བ་པའི་བདག་པོའི་བྱིན་གྱི་རླབས་ཡིན་ཏེ། གྲོགས་པོ་དག། སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་ཡོན་ཏན་རིན་པོ་ཆེ་མཐའ་ཡས་བཀོད་པ་ཞེས་བྱ་བ་དེ་ན། དེ་བཞིན་གཤེགས་པ་བཀོད་པ་ཆེན་པོའི་རྒྱལ་པོ་ཞེས་བྱ་བ་ཆོས་སྟོན་པ་དེར་གསང་བ་པའི་བདག་པོ་ལག་ན་རྡོ་རྗེས་བཀོད་པ་རྣམ་པ་འདི་ལྟ་བུ་མཐོང་ནས། གསང་བ་པའི་བདག་པོས་བཀོད་པ་དེ་ཉིད་འཁོར་གྱི་ཁྱམས་འདིར་བྱིན་གྱིས་བརླབས་སོ་ཞེས་སྒྲ་ཐོས་སོ། །བཅོམ་ལྡན་འདས་སེང་གེའི་གདན་དེ་ལ་བཞུགས་མ་ཐག་ཏུ། དེ་ནས་དེའི་ཚེ་ལྕང་ལོ་ཅན་གྱི་ཕོ་བྲང་འཁོར་ན་གནོད་སྦྱིན་དང ། སྲིན་པོ་དང ། ཡི་དྭགས་དང ། ཤ་ཟ་དང ། དྲི་ཟ་དང ། གསང་བ་པ་དང ། ལྟོ་འཕྱེ་ཆེན་པོ་ཇི་སྙེད་འཁོད་པ་དེ་དག་ཐམས་ཅད་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདུད་དོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་རྒྱལ་
267b
པོ་ཆེན་པོ་བཞི་དང་ཐམས་ཅད་དང་ལྡན་པའི་འཁོར་ལ་སྨྲས་པ། ཁྱེད་ཐམས་ཅད་ལྷན་གཅིག་ཏུ་འདུས་ལ། ལྷན་གཅིག་ཏུ་ཚུར་ཤོག་།ཇི་ལྟར་བཤམས་པའི་ཞལ་ཟས་བཅོམ་ལྡན་འདས་ལ་གསོལ་ཅིག། དེ་ནས་གསང་བ་པའི་བདག་པོ་ལག་ན་རྡོ་རྗེ་བཙུན་མོའི་འཁོར་དང་བཅས། གཉེན་གྱི་འཁོར་དང་བཅས། བུ་དང་བཅས། དཔུང་དང་བཅས། གཡོག་འཁོར་དང་བཅས་ཏེ། རང་གི་ལག་ནས་གུས་པར་བསྟི་སྟང་དུ་བྱས་ཏེ། བཟའ་བ་དང ། བཅའ་བ་བསོད་པ་མང་པོ་རོ་བྲོ་བ་མང་པོ་དུ་མ་དང་ལྡན་པ། བྱང་ཆུབ་སེམས་དཔའི་ལྷག་པའི་བསམ་པས་ཡོངས་སུ་དག་པ་དེ་བཞིན་གཤེགས་པ་ལ་མཆོད་པར་འོས་པའི་ཞལ་ཟས་ཀྱིས་དེ་བཞིན་གཤེགས་པ་བྱང་ཆུབ་སེམས་དཔའི་དགེ་འདུན་དང ། དགེ་སློང་གི་དགེ་འདུན་དང་བཅས་པ་ལ་བསྟབས་ཏེ་ཚིམ་པར་བྱས་སོ། །བསྟབས་ཏེ་ཚིམ་པར་བྱས་ནས་ལྷུང་བཟེད་བཀྲུས་ཏེ། བཅོམ་ལྡན་འདས་ཕྱག་བཅབས་པར་རིག་ནས་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། ལྕང་ལོ་ཅན་གྱི་ཕོ་བྲང་འཁོར་ན་འཁོད་པའི་གནོད་སྦྱིན་དང ། སྲིན་པོ་གང་ཡིན་པ་དེ་དག་ཀྱང་འདུས་ནས་བཅོམ་ལྡན་འདས་ཀྱི་ཞལ་དུ་བལྟས་ཏེ། ཐལ་མོ་སྦྱར་ནས་ཕྱག་འཚལ་ཏེ་འཁོད་པར་གྱུར་ཏོ། །ལྕང་ལོ་ཅན་དུ་གཤེགས་ནས་བཤོས་གསོལ་བའི་ལེའུ་ཞེས་བྱ་བ་སྟེ་བཅོ་བརྒྱད་པའོ།། །།དེ་ནས་གསང་བ་པའི་བདག་པོ་ལག་ན་རྡོ་རྗེས་ཆོས་མཉན་པའི་ཕྱིར་བཅོམ་ལྡན་འདས་ལ་གསོལ་བ་བཏབ་པ། ཅི་ནས་བྱང་
268a
༄#། །ཆུབ་ཏུ་སེམས་མ་བསྐྱེད་པའི་སེམས་ཅན་རྣམས་བྱང་ཆུབ་ཏུ་སེམས་བསྐྱེད་པར་འགྱུར་བ་དང ། ཕྱིར་མི་ལྡོག་པ་ལ་གནས་པར་འགྱུར་བ་དང ། གནོད་སྦྱིན་དང ། སྲིན་པོ་དང ། ཤ་ཟ་དང ། དྲི་ཟ་དང ། གསང་བ་པ་དང ། ལྟོ་འཕྱེ་ཆེན་པོའི་འཁོར་འདིའི་ཡུན་རིང་པོའི་དོན་དང ། སྨན་པ་དང ། བདེ་བ་དང ། གྲུབ་པ་དང ། བདེ་བར་འགྱུར་བ་དང ། ཁྱད་པར་གྱིས་ཁྱད་པར་དུ་མངོན་དུ་འཕགས་པར་འགྱུར་བ་དང ། ཉམས་པའི་ཆོས་ཅན་དུ་མི་འགྱུར་བར་དེ་ལྟར་ཆོས་ཀྱི་ཚུལ་ལ་འཇུག་པ་བཅོམ་ལྡན་འདས་ཀྱིས་བཤད་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་དང ། ཐམས་ཅད་དང་ལྡན་པའི་འཁོར་དེ་ལ་བཀའ་སྩལ་པ། གྲོགས་པོ་དག། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་གཟུང་ཞིག་དང་བཤད་པར་བྱ་སྟེ། རིགས་ཀྱི་བུའམ་རིགས་ཀྱི་བུ་མོ་གང་ལ་ཞུགས་ན་ཁྱད་པར་དུ་མངོན་པར་འཕགས་པར་འགྱུར་ཞིང ། ཉམས་པའི་ཆོས་ཅན་དུ་མི་འགྱུར་བའི་ཆོས་ཀྱི་ཚུལ་ཁྱོད་ལ་བསྟན་པར་བྱའོ། །བཅོམ་ལྡན་འདས། ལེགས་སོ་ཞེས་གསོལ་ཏེ། གསང་བ་པའི་བདག་པོ་ལག་ན་རྡོ་རྗེ་དང ། ཐམས་ཅད་དང་ལྡན་པའི་འཁོར་དེས་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །གྲོགས་པོ་དག། འདི་ལ་རིགས་ཀྱི་བུའམ་རིགས་ཀྱི་བུ་མོ་བསམ་པ་
268b
ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་དད་པ་ཡིན། དད་པ་མང་ཞིང་འཕགས་པ་རྣམས་ལ་ལྟ་འདོད་པ་དང ། དམ་པའི་ཆོས་ཉན་པར་འདོད་པ་དང ། སེར་སྣ་མེད་པར་གཏོང་བ་གཏོང་བ་དང ། ལག་པ་བརྐྱང་སྟེ་གཏོང་བ་ལ་དགའ་བ་དང ། མཆོད་སྦྱིན་བྱེད་པའི་ངང་ཅན་དང ། གཏོང་བ་ཕུན་སུམ་ཚོགས་པ་དང ། སྦྱིན་པ་འབྱེད་པ་ལ་དགའ་བ་དང ། ཁོང་ཁྲོ་བ་མེད་པའི་སེམས་དང་ལྡན་པ་དང ། རྙོག་པ་མེད་པའི་སེམས་དང་ལྡན་པ་དང ། དེ་ལས་ཀྱི་རྣམ་པར་སྨིན་པ་ལ་ཡིད་ཆེས་པ་དང ། མོས་པ་དང ། རྟོགས་པ་དང ། སོམ་ཉི་མེད་ལ་ཐེ་ཚོམ་མི་ཟ་ཞིང་ཡིད་གཉིས་མི་ཟ་བ་ཡིན། དེ་དཀར་པོ་དང་ནག་པོའི་ལས་རྣམས་ཀྱི་རྣམ་པར་སྨིན་པ་ཆུད་མི་ཟ་བར་རིག་ནས་སྲོག་གི་ཕྱིར་ཡང་མི་བྱ་བ་མི་བྱེད་དེ། དེ་སྲོག་གཅོད་པ་སྤངས་པ་ཡིན། མ་བྱིན་པར་ལེན་པ་དང ། འདོད་པ་ལ་ལོག་པར་གཡེམ་པ་དང ། བརྫུན་དུ་སྨྲ་བ་དང ། ཕྲ་མ་དང ། ངག་རྩུབ་མོ་དང ། ཚིག་ཀྱལ་པ་དང ། བརྣབ་སེམས་དང ། གནོད་སེམས་དང ། ལོག་པར་ལྟ་བ་སྤངས་པ་ཡིན་ཏེ། མི་དགེ་བ་བཅུའི་ལས་ཀྱི་ལམ་ལ་མི་དམིགས་པ་ཡིན་ནོ། །དེ་དད་པར་གྱུར་ནས་དགེ་སྦྱོང་ངམ། བྲམ་ཟེ་གང་དག་ཡང་དག་པར་སོང་བ་དང ། ཡང་དག་པར་ཞུགས་པ་དང ། ཚུལ་ཁྲིམས་དང་ལྡན་པ་དང ། ཡོན་ཏན་དང་ལྡན་པ་དང ། དེས་པ་དང ། དགེ་བའི་ཆོས་ཅན་དང ། མང་དུ་ཐོས་པ་དང ། ཐོས་པ་ལ་མངོན་པར་བརྩོན་པ་དང ། ཚུལ་བཞིན་ཡིད་ལ་བྱེད་པ་ལ་རབ་ཏུ་བརྩོན་པ་དང ། ཞི་བ་དང ། དུལ་
269a
༄#། །བ་དང ། ཉེ་བར་ཞི་བ་དང ། ངོ་བཟློག་ཕོད་པར་སྨྲ་ཞིང་བཅམ་བུར་མི་སྨྲ་བ་དང ། དགེ་བའི་བསམ་པ་ཅན་དང ། མི་དགེ་བའི་ཆོས་ཡོངས་སུ་སྤོང་བ་དང ། མི་རྒོད་པ་དང ། མ་ཁེངས་པ་དང ། མུ་ཅོར་སྨྲ་བ་མ་ཡིན་པ་དང ། ཚིག་མ་འཚལ་བ་དང ། དྲན་པ་ཉེ་བར་གནས་པ་དང ། ཤིན་ཏུ་མཉམ་པར་བཞག་པའི་སེམས་དང་ལྡན་པ་དང ། སྲིད་པའི་ཚུལ་བཅད་པ་དང ། ཟུག་རྔུ་ཕྱུང་བ་དང ། ཁུར་བོར་བ་དང ། སོམ་ཉི་ལས་ངེས་པར་བརྒལ་བ་དང ། ཐེ་ཚོམ་ལས་བརྒལ་བ་དང ། ཡང་སྲིད་པ་ལས་བརྒལ་བ་འདི་ལྟ་སྟེ། དེ་བཞིན་གཤེགས་པ་དང ། དེ་བཞིན་གཤེགས་པའི་ཉན་ཐོས་དགེ་སྦྱོང་དང ། བྲམ་ཟེ་དམ་པ་དེ་ལྟ་བུ་ལ་དགེ་བའི་བཤེས་གཉེན་དུ་རིག་ནས་བསྟེན་ཏོ། །བསྙེན་ཏོ། །བསྙེན་བཀུར་བྱེད་དོ། །མཉེས་པར་བྱེད་ཅིང་མི་མཉེས་པར་མི་བྱེད་ལ། དགྱེས་པར་བྱེད་དེ། དེས་དགེ་བའི་བཤེས་གཉེན་དེ་དག་མཉེས་པར་བྱས་ནས་ཆོས་ཀྱི་གཏམ་གྱི་ཡང་དག་པར་སྟོན། ཡང་དག་པར་འཛིན་དུ་འཇུག། ཡང་དག་པར་གཟེངས་བསྟོད། ཡང་དག་པར་དགའ་བར་མཛད་དེ། སྦྱིན་པས་ནི་ལོངས་སྤྱོད་ཆེན་པོར་འགྱུར་བར་ཡང་དག་པར་སྟོན། ཚུལ་ཁྲིམས་ཀྱིས་ནི་མཐོ་རིས་སུ་སྐྱེ་བ་དང ། ཐོས་པས་ནི་ཤེས་རབ་ཆེན་པོར་འགྱུར་བ་དང ། བསྒོམ་པས་ནི་འབྲལ་བར་འགྱུར་བ་ཡང་དག་པར་སྟོན་ཏོ། །འདི་ནི་སྦྱིན་པའོ། །འདི་ནི་སྦྱིན་པའི་རྣམ་པར་སྨིན་པའོ། །འདི་ནི་སེར་སྣའོ། །འདི་ནི་སེར་སྣའི་རྣམ་པར་སྨིན་པའོ། །འདི་ནི་ཚུལ་ཁྲིམས་སོ། །འདི་ནི་ཚུལ་ཁྲིམས་ཀྱི་རྣམ་པར་སྨིན་པའོ། །འདི་
269b
ནི་བཟོད་པའོ། །འདི་ནི་བཟོད་པའི་རྣམ་པར་སྨིན་པའོ། །འདི་ནི་བརྩོན་འགྲུས་སོ། །འདི་ནི་བརྩོན་འགྲུས་ཀྱི་རྣམ་པར་སྨིན་པའོ། །འདི་ནི་བསམ་གཏན་ནོ། །འདི་ནི་བསམ་གཏན་གྱི་རྣམ་པར་སྨིན་པའོ། །འདི་ནི་ཤེས་རབ་བོ། །འདི་ནི་ཤེས་རབ་ཀྱི་རྣམ་པར་སྨིན་པའོ། །འདི་ནི་འཆལ་པའི་ཤེས་རབ་བོ། །འདི་ནི་འཆལ་པའི་ཤེས་རབ་ཀྱི་རྣམ་པར་སྨིན་པའོ། །འདི་ནི་ལུས་ཀྱིས་ལེགས་པར་སྤྱོད་པའོ། །འདི་ནི་ལུས་ཀྱིས་ལེགས་པར་སྤྱད་པའི་རྣམ་པར་སྨིན་པའོ། །འདི་ནི་ལུས་ཀྱིས་ཉེས་པར་སྤྱད་པའོ། །འདི་ནི་ལུས་ཀྱིས་ཉེས་པར་སྤྱད་པའི་རྣམ་པར་སྨིན་པའོ། །འདི་ནི་ངག་གིས་ལེགས་པར་སྤྱོད་པའོ། །འདི་ནི་ངག་གིས་ལེགས་པར་སྤྱད་པའི་རྣམ་པར་སྨིན་པའོ། །འདི་ནི་ངག་གིས་ཉེས་པར་སྤྱོད་པའོ། །འདི་ནི་ངག་གིས་ཉེ་བར་སྤྱད་པའི་རྣམ་པར་སྨིན་པའོ། །འདི་ནི་ཡིད་ཀྱིས་ལེགས་པར་སྤྱོད་པའོ། ། འདི་ནི་ཡིད་ཀྱིས་ལེགས་པར་སྤྱད་པའི་རྣམ་པར་སྨིན་པའོ། །འདི་ནི་ཡིད་ཀྱིས་ཉེས་པར་སྤྱོད་པའོ། །འདི་ནི་ཡིད་ཀྱི་ཉེ་བར་སྤྱད་པའི་རྣམ་པར་སྨིན་པའོ། །འདི་ནི་དགེ་བའོ། །འདི་ནི་མི་དགེ་བའོ། ། འདི་ནི་བྱ་བའོ། །འདི་ནི་བྱ་བ་མ་ཡིན་པའོ། །འདི་ནི་བྱས་ན་ཡུན་རིང་པོའི་དོན་དང ། ཕན་པ་དང ། བདེ་བ་དང ། གྲུབ་པ་དང ། བདེ་བར་འགྱུར་རོ། །ཞེས་དེ་ལྟར་དགེ་བའི་བཤེས་གཉེན་དེ་དག་གི་ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག། ཡང་དག་པར་གཟེངས་བསྟོད། ཡང་དག་པར་དགའ་བར་མཛད་དོ། །དེ་ནས་དེ་དག་སྣོད་དུ་རུང་བར་མཁྱེན་ནས་ཟབ་
270a
༄#། །མོའི་གཏམ་འདི་ལྟ་སྟེ། སྟོང་པ་ཉིད་ཀྱི་གཏམ་དང ། མཚན་མ་མེད་པའི་གཏམ་དང ། སྨོན་པ་མེད་པའི་གཏམ་དང ། མངོན་པར་འདུ་བྱེད་པ་མེད་པའི་གཏམ་དང ། མ་སྐྱེས་པའི་གཏམ་དང ། མ་བྱུང་བའི་གཏམ་དང ། བདག་མེད་པ་དང ། སེམས་ཅན་མེད་པ་དང ། སྲོག་མེད་པ་དང ། གང་ཟག་མེད་པའི་གཏམ་རབ་ཏུ་སྟོན་ཏོ། །རྟེན་ཅིང་འབྲེལ་པར་འབྱུང་བ་ཟབ་མོའི་གཏམ་འདི་ལྟ་སྟེ། འདི་ཡོད་པའི་ཕྱིར་འདི་འབྱུང ། འདི་མེད་པའི་ཕྱིར་འདི་མི་འབྱུང ། འདི་ཡོད་པའི་ཕྱིར་འདི་སྐྱེ། འདི་མེད་པའི་ཕྱིར་འདི་འགག་པ་འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག། སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་མེད་པའི་ཕྱིར་འདི་མི་འབྱུང ། འདི་འགགས་པས་འདི་འགག་སྟེ། འདི་ལྟར་མ་རིག་པ་འགགས་པས་འདུ་བྱེད་འགག། འདུ་བྱེད་འགགས་པས་རྣམ་པར་ཤེས་པ་འགག། རྣམ་པར་ཤེས་པ་འགགས་
270b
པས་མིང་དང་གཟུགས་འགག། མིང་དང་གཟུགས་འགགས་པས་སྐྱེ་མཆེད་དྲུག་འགག། སྐྱེ་མཆེད་དྲུག་འགགས་པས་རེག་པ་འགག། རེག་པ་འགགས་པས་ཚོར་བ་འགག། ཚོར་བ་འགགས་པས་སྲེད་པ་འགག། སྲེད་པ་འགགས་པས་ལེན་པ་འགག། ལེན་པ་འགགས་པས་སྲིད་པ་འགག། སྲིད་པ་འགགས་པས་སྐྱེ་བ་འགག། སྐྱེ་བ་འགགས་པས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འགག་པར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །དེ་ལ་དོན་དམ་པར་ནི་འབྱུང་བའམ། འགག་པའི་ཆོས་གང་ཡང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་རྟེན་ཅིང་འབྲེལ་བར་འབྱུང་བ་སྟེ། བདག་པོ་མེད་པ། བྱེད་པ་པོ་མེད་པ། ཚོར་བ་པོ་མེད་པ། རྒྱུ་དང ། རྐྱེན་ལས་བྱུང་བའོ། །འདི་ལ་འཇུག་པའམ། ལྡོག་པའམ། རྗེས་སུ་འཇུག་པའི་ཆོས་གང་ཡང་མེད་དེ། གཞན་དུ་ན་ཡང་དག་པ་མ་ཡིན་པ། ཀུན་དུ་གཏི་མུག་པས་ཁམས་གསུམ་པ་འདོགས་པར་འགྱུར་ཏེ། ཉོན་མོངས་པའི་རྗེས་སུ་འཇུག་པ་དང ། ལས་ཀྱི་རྗེས་སུ་འཇུག་པ་དང ། སྡུག་བསྔལ་གྱི་རྗེས་སུ་འཇུག་པའི་འདོགས་པ་འབྱུང་བ་ནི་མ་གཏོགས་སོ། །ཡང་དག་པ་མ་ཡིན་པ་ཀུན་དུ་གཏི་མུག་པ་དེ་ཡང་ཡང་དག་པ་ཇི་ལྟ་བ་བཞིན་དུ་ཡོངས་སུ་བརྟགས་ན་ཆོས་གང་ཡང་ཆོས་གང་གི་བྱེད་པ་པོར་འགྱུར་བ་མེད་དེ། གང་ལ་བྱེད་པ་པོ་མི་དམིགས་པ་དེ་ལ་འཇུག་
271a
༄#། །པ་མེད་ལྡོག་པ་མེད་དོ་ཞེས་བརྗོད་པར་བྱའོ། །དེར་ཆོས་ཟབ་མོའི་གཏམ་དེ་ལྟ་བུ་ཐོས་ནས་སོམ་ཉི་མེད་དོ། །ཐེ་ཚོམ་མི་ཟའོ། །ཆོས་ཐམས་ཅད་ལ་ཆགས་པ་མེད་པར་འཇུག་སྟེ། དེ་གཟུགས་ལ་མི་ཆགས་སོ། །ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ལ་མི་ཆགས་སོ། །དེ་མིག་དང ། གཟུགས་དང ། མིག་གི་རྣམ་པར་ཤེས་པ་ལ་མི་ཆགས་སོ། །རྣ་བ་དང ། སྣ་དང ། ལྕེ་དང ། ལུས་དང ། ཡིད་དང ། ཆོས་རྣམས་དང ། ཡིད་ཀྱི་རྣམ་པར་ཤེས་པ་ལ་མི་ཆགས་སོ། །ཆོས་ཐམས་ཅད་ཀྱང་རང་བཞིན་གྱིས་སྟོང་པ་དང ། ཆོས་ཐམས་ཅད་རང་བཞིན་གྱིས་དབེན་པར་ཡིད་ཆེས་སོ། །གྲོགས་པོ་དག། དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི་སངས་རྒྱས་མཐོང་བ་ལས་ཡོངས་སུ་ཉམས་པར་མི་འགྱུར། དམ་པའི་ཆོས་ཉན་པ་དང ། དགེ་འདུན་ལ་བསྙེན་བཀུར་བྱེད་པ་ལས་ཡོངས་སུ་ཉམས་པར་མི་འགྱུར་རོ། །དེ་གང་དང་གང་དུ་སྐྱེས་པ་དེ་དང་དེར་སངས་རྒྱས་མཐོང་བ་དང ། ཆོས་ཉན་པ་དང ། དགེ་འདུན་ལ་བསྙེན་བཀུར་བྱ་བ་དང་བྲལ་བར་མི་འགྱུར་རོ། །སངས་རྒྱས་བཅོམ་ལྡན་འདས་རྣམས་ཀྱི་སྤྱན་སྔར་སྐྱེ་བར་འགྱུར་རོ། །དེར་སྐྱེས་ནས་ཀྱང་བརྩོན་འགྲུས་བརྩམ་པར་འགྱུར། དགེ་བའི་ཆོས་ཡོངས་སུ་བཙལ་པ་ལ་མངོན་པར་བརྩོན་པར་འགྱུར་རོ། །དེ་བརྩོན་འགྲུས་བརྩམས་པས་ཁྱིམ་གྱི་གནས་དོན་དུ་གཉེར་བར་མི་འགྱུར་རོ། །ཆུང་མ་དང ། བུ་དང ། བུ་མོ་དང །
271b
བྲན་ཕོ་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་ཡོངས་སུ་འཛིན་པས་ཡོངས་སུ་སྤྱོད་པ་དོན་དུ་གཉེར་བར་མི་འགྱུར་བ་སྟེ། དེ་ན་ཚོད་གཞོན་ནུར་རྣམ་པར་རྩེ་བ་ལ་མི་དགའ་བས་ན་ཚོད་མཛེས་པ་ལ་བབ་པའི་ཚེ་སངས་རྒྱས་བཅོམ་ལྡན་འདས་ཀྱི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་མྱུར་ཏུ་རབ་ཏུ་འབྱུང་ངོ ། །དེ་དད་པས་རབ་ཏུ་བྱུང་ནས་དགེ་བའི་བཤེས་གཉེན་རྣམས་དང ། དགེ་བའི་གྲོགས་པོ་དགེ་བ་ཐོབ་པར་བྱེད་པ་རྣམས་དང ། དགེ་བའི་བསམ་པ་འཐོབ་བོ། །དེ་དགེ་བའི་བསམ་པ་དང་ལྡན་པས་དགེ་བའི་ཆོས་རྣམས་ཉན་ཏོ། །སྒྲུབ་པ་སྙིང་པོར་བྱེད་ཀྱི་ཚིག་ལྷུར་ལེན་པའི་བློ་དང་ལྡན་པ་མ་ཡིན་ནོ། །མང་དུ་ཐོས་པ་ཡོངས་སུ་བཙལ་བའི་ཕྱིར་བརྩོན་འགྲུས་བརྩམས་པ་ཡིན་ཏེ། ཇི་ལྟར་ཐོས་པའི་ཆོས་རྣམས་ཀྱང་ཟང་ཟིང་མེད་པའི་སེམས་ཀྱིས་འཐོབ་པ་དང ། བཀུར་སྟི་དང ། ཚིགས་སུ་བཅད་པ་ལ་མི་རེ་བར། གཞན་དག་ལ་རྒྱ་ཆེར་ཡང་དག་པར་སྟོན་ཏོ། །བདག་གི་ཚིག་གི་རྗེས་སུ་འབྲང་བར་གཞན་དག་ལ་ཆོས་མི་སྟོན་ཏོ། །དེ་ཇི་ལྟར་ཐོས་པ་དང ། ཇི་ལྟར་གནས་པ་དེ་བཞིན་དུ་གཞན་དག་ལ་ཆོས་སྟོན་ཏོ། །ཆོས་ཉན་པ་རྣམས་ལ་ནི་བྱམས་པ་ཆེན་པོ་ཐོབ་བོ། །སེམས་ཅན་ཐམས་ཅད་ལ་སྙིང་རྗེ་ཆེན་པོ་བསྐྱེད་དོ། །དེ་མང་དུ་ཐོས་པར་གྱུར་པས་ལུས་དང ། སྲོག་ལ་མི་ལྟ་བ་ཡིན། འདོད་པ་ཆུང་བ་དང ། ཆོག་ཤེས་པ་དང ། རབ་ཏུ་དབེན་པ་དང ། མགུ་སླ་བ་དང ། གསོ་སླ་བ་དང ། དགོན་པ་དང ། བས་མཐར་མངོན་པར་དགའ་བ་ཡིན། ཇི་ལྟར་ཐོས་པའི་ཆོས་རྣམས་
272a
༄#། །ཀྱི་དོན་ལ་ཡོངས་སུ་རྟོག་པ་ཡིན་ནོ། །དོན་ལ་རྟོན་པ་ཡིན་ཏེ། ཚིག་འབྲུ་ལ་རྟོན་པ་མ་ཡིན་ནོ། །ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་གྱི་སྟོན་པར་འགྱུར་བ་ཡིན་ནོ། །བདག་འབའ་ཞིག་གི་ཕྱིར་བརྩོན་པ་མ་ཡིན་གྱི། སེམས་ཅན་ཐམས་ཅད་ཀྱི་དོན་གྱི་ཕྱིར། བླ་ན་མེད་པའི་ཐེག་པ་ཆེན་པོ་འདི་ལྟ་སྟེ། སངས་རྒྱས་ཀྱི་ཡེ་ཤེས་ཡོངས་སུ་ཚོལ་ལོ། །བག་ཡོད་པ་ལྷུར་ལེན་པ་ཡང་ཡིན་ཏེ། དེ་ལ་བག་ཡོད་པ་གང་ཞེ་ན། འདི་ལྟ་སྟེ། དབང་པོ་སྡོམ་པའོ། །དེ་མིག་གིས་གཟུགས་རྣམས་མཐོང་ནས་མཚན་མར་མི་འཛིན་ཅིང་མངོན་རྟགས་སུ་མི་འཛིན་པ་ཡིན་ནོ། །དེ་གཟུགས་རྣམས་ཀྱི་རོ་མྱང་བ་དང ། ཉེས་དམིགས་དང ། འབྱུང་བ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་བཞིན་དུ་རྣ་བས་སྒྲ་རྣམས་དང ། སྣས་དྲི་རྣམས་དང ། ལྕེས་རོ་རྣམས་དང ། ལུས་ཀྱིས་རེག་བྱ་རྣམས་དང ། ཡིད་ཀྱིས་ཆོས་རྣམས་ཤེས་ནས་མཚན་མར་མི་འཛིན་ཅིང་མངོན་རྟགས་སུ་མི་འཛིན་པ་ཡིན་ཏེ། ཆོས་རྣམས་ཀྱི་རོ་མྱང་བ་དང ། ཉེས་དམིགས་དང ། འབྱུང་བ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། འདི་ནི་བག་ཡོད་པ་ཞེས་བྱའོ། །གཞན་ཡང་བག་ཡོད་པ་ནི་གང་རང་གི་སེམས་འདུལ་བ་དང ། གཞན་གྱི་སེམས་རྗེས་སུ་བསྲུང་བ་དང ། ཉོན་མོངས་པ་ལ་དགའ་བ་སེལ་བ་དང ། ཆོས་ལ་དགའ་བའི་རྗེས་སུ་འཇུག་པ་དག། འདོད་པ་ལ་རྣམ་པར་རྟོག་པ་དང ། གནོད་སེམས་ཀྱི་རྣམ་པར་རྟོག་པ་དང ། རྣམ་པར་འཚེ་བའི་རྣམ་པར་རྟོག་པ་རྣམས་ཀྱི་རྒྱུ་བ་
272b
མེད་པ་དང ། མི་དགེ་བའི་རྩ་བ་ཆགས་པ་དང ། ཞེ་སྡང་དང ། གཏི་མུག་གི་རྒྱུ་བ་མེད་པ་དང ། ལུས་ཀྱིས་ཉེས་པར་སྤྱོད་པའི་རྒྱུ་བ་མེད་པ་དང ། ངག་གིས་ཉེས་པར་སྤྱོད་པའི་རྒྱུ་བ་མེད་པ་དང ། ཡིད་ཀྱིས་ཉེས་པར་སྤྱོད་པའི་རྒྱུ་བ་མེད་པ་དང ། ཚུལ་བཞིན་མ་ཡིན་པ་ཡིད་ལ་བྱེད་པའི་རྒྱུ་བ་མེད་པ་དང ། སྡིག་པ་མི་དགེ་བའི་ཆོས་ཐམས་ཅད་ཀྱི་རྒྱུ་བ་མེད་པ་སྟེ། འདི་ནི་བག་ཡོད་པ་ཞེས་བྱའོ། །གྲོགས་པོ་དག་།དེ་ལྟར་ན་བག་ཡོད་པར་ཚུལ་བཞིན་ཡིད་ལ་བྱེད་པ་ལ་བརྩོན་པའི་བྱང་ཆུབ་སེམས་དཔའ་ནི་དད་པ་དང ། བག་ཡོད་པ་དང་ལྡན་པ་ཡིན་ནོ། །གསང་བ་པའི་བདག་པོ། དད་པ་མང་བ་དང ། རྟག་ཏུ་མཐུན་པ་དང ། ཆོས་དོན་དུ་གཉེར་བ་དང ། ཆོས་འདོད་པར་བྱའོ། །གསང་བ་པའི་བདག་པོ། དད་པ་དང་ལྡན་པའི་སྐྱེས་བུ་གང་ཟག་ནི་འཇིག་རྟེན་ཕ་རོལ་ཏུ་ངན་འགྲོའི་འཇིགས་པ་མེད་པ་ཡིན་ཏེ། དེའི་སེམས་ཉེས་པར་སྤྱོད་པ་ལ་མི་འགྲོའོ། །འཕགས་པ་རྣམས་ཀྱིས་བསྔགས་པར་འགྱུར་རོ། །གསང་བ་པའི་བདག་པོ། གཞན་ཡང་ཆོས་སྤྱོད་པ་ལ་གནས་པའི་སྐྱེས་བུ་གང་ཟག་ནི་ཆོས་དང་ལྡན་པར་འགྲོ་བ་ཡིན་ཏེ། སངས་རྒྱས་མཐོང་བ་རྣམས་མཉེས་པར་བྱེད་དོ། །འཕགས་པའི་ལམ་ལ་གནས་སོ། །ཆེ་བ་ཉིད་ཀྱང་འཐོབ་བོ། །གསང་བ་པའི་བདག་པོ། ཆེ་བ་ཉིད་ཐོབ་ནས་ཆེ་བ་ཉིད་འདི་ལྟ་སྟེ། དེ་བཞིན་གཤེགས་པའི་ཡེ་ཤེས་ཐོབ་པར་བྱེད་པའི་བྱང་ཆུབ་ཀྱི་སེམས་ཡོངས་སུ་རྫོགས་པར་བྱའོ། །གསང་བ་པའི་བདག་པོ། གཞན་ཡང་བདེ་བ་ཐོབ་པར་འདོད་པའི་སྐྱེས་བུ་གང་ཟག་གིས་ཤིན་
273a
༄#། །ཏུ་གྲུབ་པ་དང ། བདེ་བ་ཡོངས་སུ་མྱ་ངན་ལས་འདས་པ་ལ་བརྩོན་པར་བྱའོ། །གསང་བ་པའི་བདག་པོ། སྔོན་གྱི་དགེ་བའི་རྩ་བ་རྣམས་ཀྱིས་འོངས་པའི་འཁོར་འདི་ཇི་ལྟར་ལྷང་ངེ་བ་ལ་ལྟོས། གསང་བ་པའི་བདག་པོ། དེ་དགེ་བའི་རྩ་བ་ལས་ཡོངས་སུ་མི་ཉམས་པར་བྱ་བའི་ཕྱིར་ཤིན་ཏུ་བརྩོན་པར་བྱའོ། །གསང་བ་པའི་བདག་པོ། ཇི་ལྟར་དགེ་བའི་རྩ་བ་ལས་ཡོངས་སུ་ཉམས་པར་མི་འགྱུར་ཞེ་ན། གསང་བ་པའི་བདག་པོ། བག་ཡོད་པར་གནས་པའི་ལྷ་དང་མི་རྣམས་ཀྱིས་དགེ་བའི་རྩ་བ་ལས་ཡོངས་སུ་ཉམས་པར་མི་འགྱུར་རོ། །དེ་ལ་བག་ཡོད་པ་ནི་སེམས་རྗེས་སུ་བསྲུང་བ་དང ། ཡུལ་འདོར་བ་དང ། འདོད་པ་ལ་དགའ་བ་རྣམ་པར་སྤོང་བ་དང ། ཆོས་ཀྱི་དགའ་བ་ལ་བསྟེན་པ་དང ། འདོད་པ་ལ་རྣམ་པར་རྟོག་པ་དང ། གནོད་སེམས་ཀྱི་རྣམ་པར་རྟོག་པ་དང ། རྣམ་པར་འཚེ་བའི་རྣམ་པར་རྟོག་པ་རྣམས་ཀྱི་རྒྱུ་བ་མེད་པ་དང ། མི་དགེ་བའི་རྣམས་དང་ཚུལ་བཞིན་མ་ཡིན་པ་ཡིད་ལ་བྱེད་པ་རྣམས་ཀྱི་རྒྱུ་བ་མེད་པ་དང ། ཆགས་པ་དང ། ཞེ་སྡང་དང ། གཏི་མུག་རྣམས་ཀྱི་རྒྱུ་བ་མེད་པ་དང ། ལུས་དང ། ངག་དང ། ཡིད་ཀྱི་གནས་ངན་ལེན་རྣམས་ཀྱི་རྒྱུ་བ་མེད་པ་ནས་ཉམས་པའི་ཆ་དང་མཐུན་པར་འགྱུར་བའི་ཆོས་ཐམས་ཅད་ཀྱི་བར་གྱི་རྒྱུ་བ་མེད་པ་སྟེ། འདི་ནི་བག་ཡོད་པ་ཞེས་བྱའོ། །གསང་བ་པའི་བདག་པོ། སུ་དད་པ་དང་ལྡན་
273b
ཞིང་བག་ཡོད་པ་དང་ལྡན་པ་དེས་བརྩོན་འགྲུས་གང་གིས་བག་ཡོད་པར་བྱེད་པ་དང ། དད་པར་བྱེད་པའི་ཆོས་དེ་དག་ཡང་དག་པར་སྒྲུབ་པར་འགྱུར་བའི་བརྩོན་འགྲུས་དང་ལྡན་པར་བྱའོ། ། གསང་བ་པའི་བདག་པོ། སུ་དད་པ་དང ། བག་ཡོད་པ་དང ། བརྩོན་འགྲུས་དང་ལྡན་པ་དེས་དྲན་པ་དང་ཤེས་བཞིན་ལ་བརྩོན་པར་བྱའོ། །དྲན་པ་དང་ཤེས་བཞིན་དེས་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཆུང་ཟ་བར་མི་འགྱུར་རོ། །གསང་བ་པའི་བདག་པོ། སུ་དད་པ་དང ། བག་ཡོད་པ་དང ། བརྩོན་འགྲུས་དང ། དྲན་པ་དང ། ཤེས་བཞིན་དང་ལྡན་པ་དེས་ཚུལ་བཞིན་དུ་སྦྱོར་བ་ལ་བརྩོན་པར་བྱའོ། །གསང་བ་པའི་བདག་པོ། ཚུལ་བཞིན་སྦྱོར་བ་ལ་བརྩོན་པའི་བྱང་ཆུབ་སེམས་དཔའ་ནི་གང་ཡོད་པ་དེ་ཡང་ཡོད་པར་རབ་ཏུ་ཤེས་སོ། །གང་མེད་པ་དེ་ཡང་མེད་པར་རབ་ཏུ་ཤེས་སོ། །དེ་ལ་ཡོད་པ་ནི་གང ། མེད་པ་ནི་གང་ཞེ་ན། ཡང་དག་པར་སྦྱོར་བ་དང་ལྡན་པ་ལ་ནི་འཕགས་པའི་རྣམ་པར་གྲོལ་བ་ཡོད་དོ། ། འདི་ནི་ཡོད་པ་ཞེས་བྱའོ། །དེ་ལ་མེད་པ་གང་ཞེ་ན། ལོག་པར་སྦྱོར་བ་དང་ལྡན་པ་ལ་ནི་འཕགས་པའི་རྣམ་པར་གྲོལ་བ་མེད་དེ། དེ་ནི་མེད་པ་ཞེས་བྱའོ། །གཞན་ཡང་ལས་དང ། རྣམ་པར་སྨིན་པ་ནི་ཡོད་དོ། །གང་ལས་དེ་དང་རྣམ་པར་སྨིན་པ་དང་ལྡན་པ་དེ་ནི་མེད་དོ། །གཞན་ཡང་ཀུན་རྫོབ་ཏུ་མིག་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་ནི་ཡོད་དོ། །
274a
༄#། །གང་མིག་ནས་ཡིད་ཀྱི་བར་དང་ལྡན་པ་ནི་མེད་དོ། །གཞན་ཡང་བྱང་ཆུབ་སེམས་དཔའ་བརྩོན་འགྲུས་བརྩམས་པ་ལ་ནི་བྱང་ཆུབ་ཡོད་དོ། །ལེ་ལོ་ཅན་ལ་ནི་བྱང་ཆུབ་མེད་དོ། །ཕྱིན་ཅི་ལོག་ལས་བྱུང་བའི་ཕུང་པོ་ལྔ་དག་ནི་ཡོད་དོ། །རྒྱུ་མེད་པ་ལས་ཆོས་འབྱུང་བ་ནི་མེད་དོ། །གཞན་ཡང་མི་རྟག་པ་དང ། སྡུག་བསྔལ་བ་དང ། འགྱུར་བའི་ཆོས་ཅན་གྱི་གཟུགས་ནི་ཡོད་དོ། །རྟག་པ་དང ། བརྟན་པ་དང ། ཐེར་ཟུག་མི་འགྱུར་བའི་ཆོས་ཅན་དང ། ཡང་དག་པར་དེ་བཞིན་ཉིད་དུ་གནས་པའི་གཟུགས་དེ་ནི་མེད་དོ། ། དེ་བཞིན་དུ་མི་རྟག་པ་དང ། སྡུག་བསྔལ་བ་དང ། འགྱུར་བའི་ཆོས་ཅན་གྱི་ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ནི་ཡོད་དོ། །རྟག་པ་དང ། བརྟན་པ་དང ། ཐེར་ཟུག་དང ། མི་འགྱུར་བའི་ཆོས་ཅན་དང ། ཡང་དག་པར་དེ་བཞིན་ཉིད་དུ་གནས་པའི་རྣམ་པར་ཤེས་པ་དེ་ནི་མེད་དོ། །གཞན་ཡང་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་དེ་དག་ནི་ཡོད་དོ། །མ་རིག་པ་མེད་ན་འདུ་བྱེད་རྣམས་ཞེས་བྱ་བ་དེ་དག་མེད་དོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་དེ་ནི་ཡོད་དོ། །འདུ་བྱེད་རྣམས་མེད་ན་རྣམ་པར་ཤེས་པ་ཞེས་བྱ་བ་དེ་ནི་མེད་དོ། །རྣམ་པར་ཤེས་པའི་རྐྱེན་གྱིས་མིང་དང ། གཟུགས་ཞེས་བྱ་བ་དེ་ནི་ཡོད་དོ། །རྣམ་པར་ཤེས་པ་མེད་ན་མིང་དང་གཟུགས་ཞེས་བྱ་བ་དེ་ནི་མེད་
274b
དོ། །མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བྱ་བ་དེ་ནི་ཡོད་དོ། །མིང་དང་གཟུགས་མེད་ན་སྐྱེ་མཆེད་དྲུག་ཅེས་བྱ་བ་དེ་མེད་དོ། །སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་བྱ་བ་དེ་ནི་ཡོད་དོ། །སྐྱེ་མཆེད་དྲུག་མེད་ན་རེག་པ་ཞེས་བྱ་བ་དེ་མེད་དོ། །རེག་པའི་རྐྱེན་གྱིས་ཚོར་བ་ཞེས་བྱ་བ་དེ་ནི་ཡོད་དོ། །རེག་པ་མེད་ན་ཚོར་བ་ཞེས་བྱ་བ་དེ་ནི་མེད་དོ། །ཚོར་བའི་རྐྱེན་གྱིས་སྲེད་པ་ཞེས་བྱ་བ་དེ་ཡིན་ཡོད་དོ། །ཚོར་བ་མེད་ན་སྲེད་པ་ཞེས་བྱ་བ་དེ་མེད་དོ། །སྲེད་པའི་རྐྱེན་གྱིས་ལེན་པ་ཞེས་བྱ་བ་དེ་ནི་ཡོད་དོ། །སྲེད་པ་མེད་ན་ལེན་པ་ཞེས་བྱ་བ་དེ་མེད་དོ། །ལེན་པའི་རྐྱེན་གྱིས་སྲིད་པ་ཞེས་བྱ་བ་དེ་ནི་ཡོད་དོ། །ལེན་པ་མེད་ན་སྲིད་པ་ཞེས་བྱ་བ་དེ་མེད་དོ། །སྲིད་པའི་རྐྱེན་གྱིས་སྐྱེ་བ་ཞེས་བྱ་བ་དེ་ནི་ཡོད་དོ། །སྲིད་པ་མེད་ན་སྐྱེ་བ་ཞེས་བྱ་བ་དེ་ནི་མེད་དོ། །སྐྱེ་བའི་རྐྱེན་གྱིས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་ནི་ཡོད་དོ། །སྐྱེ་བ་མེད་ན་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་མེད་དོ། །གཞན་ཡང་སྦྱིན་པས་ལོངས་སྤྱོད་ཆེན་པོར་འགྱུར་བ་ནི་ཡོད་དོ། །སྦྱིན་པས་དབུལ་པོར་འགྱུར་བ་ནི་མེད་དོ། །ཚུལ་ཁྲིམས་ཀྱིས་མཐོ་རིས་སུ་སྐྱེ་བ་ནི་ཡོད་དོ། །ཚུལ་ཁྲིམས་ཀྱིས་ངན་སོང་དུ་སྐྱེ་བ་ནི་མེད་དོ། །ཐོས་པས་ཤེས་རབ་ཆེན་པོར་འགྱུར་བ་ནི་ཡོད་དོ། །
275a
༄#། །ཐོས་པས་ཤེས་རབ་འཆལ་བར་འགྱུར་བ་ནི་མེད་དོ། །བསྒོམས་པས་འབྲལ་བར་འགྱུར་བ་ནི་ཡོད་དོ། །བསྒོམས་པས་འབྲལ་བར་མི་འགྱུར་བ་ནི་མེད་དོ། །ཚུལ་བཞིན་མ་ཡིན་པ་ཡིད་ལ་བྱེད་པ་དང་ལྡན་ན། ཉོན་མོངས་པ་འབྱུང་བ་ནི་ཡོད་དོ། །ཚུལ་བཞིན་མ་ཡིན་པ་ཡིད་ལ་བྱེད་པ་དང་བྲལ་ན་ཉོན་མོངས་པ་འབྱུང་བ་ནི་མེད་དོ། །མངོན་པའི་ང་རྒྱལ་ཅན་ལ་ནི་ཀུན་ཤེས་པ་བརྡ་སྤྲོད་པ་མེད་དོ། །མངོན་པའི་ང་རྒྱལ་མེད་པ་ལ་ནི་མྱ་ངན་ལས་འདས་པ་ཡོད་དོ། །གཞན་ཡང་ཐམས་ཅད་ཀྱི་རྗེས་སུ་སོང་བའི་སྟོང་པ་ཉིད་ནི་ཡོད་དོ། །ནང་གི་རྗེས་སུ་སོང་བའི་བདག་ནི་མེད་དོ། །ཡེ་ཤེས་དང་ལྡན་པ་ལ་ནི་ཐར་པ་ཡོད་དོ། །ང་རྒྱལ་དང་ལྡན་པ་ལ་ནི་འབྱུང་བ་མེད་དོ། །བདག་གམ། སེམས་ཅན་ནམ། སྲོག་གམ། གང་ཟག་ཅེས་བྱ་བ་གང་ཡིན་པ་དེ་ནི་མེད་དོ། །གསང་བ་པའི་བདག་པོ། དེ་ལྟར་ན་བག་ཡོད་པ་དང ། ཚུལ་བཞིན་ཡིད་ལ་བྱེད་པ་དང་ལྡན་པའི་བྱང་ཆུབ་སེམས་དཔས་འཇིག་རྟེན་ན་མཁས་པ་རྣམས་ལ་ཡོད་པར་གྲགས་པ་གང་ཡིན་པ་དེ་ནི་ཡོད་པར་རབ་ཏུ་ཤེས་སོ། །འཇིག་རྟེན་ན་མཁས་པ་རྣམས་ལ་མེད་པར་གྲགས་པ་གང་ཡིན་པ་དེ་ནི་མེད་པར་རབ་ཏུ་ཤེས་སོ། །དེ་ཡོད་དོ་ཞེས་ཐ་སྙད་འདོགས་པ་ལ་ཡང་མི་ཆགས་སོ། །མེད་དོ་ཞེས་ཐ་སྙད་འདོགས་པ་ལ་ཡང་མི་ཆགས་ཏེ། སངས་རྒྱས་བཅོམ་
275b
ལྡན་འདས་རྣམས་ཀྱིས་གསུངས་པ་ཡང་དག་པའི་དོན་རྗེས་སུ་རྟོགས་སོ། །གསང་བ་པའི་བདག་པོ། དེ་ལ་དེ་བཞིན་གཤེགས་པས་ཆོས་ཐམས་ཅད་མདོར་བསྡུས་ཏེ། ཆོས་ཀྱི་མདོ་བཞི་རྣམ་པར་བཞག་གོ་།བཞི་གང་ཞེ་ན། དགེ་སྦྱོང་དང ། བྲམ་ཟེ་རྟག་པར་སྨྲ་བ་རྣམས་དང ། ལྷ་ཚེ་རིང་པོ་རྟག་པར་འདུ་ཤེས་པ་རྣམས་ཀྱི་གཞོམ་པའི་ཕྱིར་འདུ་བྱེད་ཐམས་ཅད་མི་རྟག་གོ་ཞེས་བྱ་བ་དང ། ལྷ་དང་མི་བདེ་བར་འདུ་ཤེས་པ་རྣམས་ཀྱི་གཞོམ་པའི་ཕྱིར་འདུ་བྱེད་ཐམས་ཅད་སྡུག་བསྔལ་ལོ་ཞེས་བྱ་བ་དང ། མུ་སྟེགས་ཅན་བདག་ཏུ་སྨྲ་བ་རྣམས་ཀྱི་གཞོམ་པའི་ཕྱིར་ཆོས་ཐམས་ཅད་ལ་བདག་མེད་དོ་ཞེས་བྱ་བ་དང ། རྣམ་པར་རྟོག་པ་ལ་སྤྱོད་པ་མངོན་པའི་ང་རྒྱལ་ཅན་རྣམས་ཀྱི་གཞོམ་པའི་ཕྱིར་མྱ་ངན་ལས་འདས་པ་ནི་ཞི་བ་ཞེས་བྱའོ། །གསང་བ་པའི་བདག་པོ། མི་རྟག་ཅེས་བྱ་བ་དེ་ནི་ཤིན་ཏུ་མི་རྟག་པའི་དོན་གྱི་ཚིག་བླ་དྭགས་སོ། །སྡུག་བསྔལ་ཞེས་བྱ་བ་དེ་ནི་སྨོན་པ་དང་བྲལ་བའི་ཚིག་བླ་དྭགས་སོ། །བདག་མེད་ཅེས་བྱ་བ་དེ་ནི་སྟོང་པ་ཉིད་ཀྱི་མཚན་ཉིད་ཀྱི་ཚིག་བླ་དྭགས་སོ། །མྱ་ངན་ལས་འདས་པ་ནི་ཞི་བའོ་ཞེས་བྱ་བ་དེ་ནི་མཚན་མ་མེད་པ་མངོན་དུ་བྱ་བའི་ཚིག་བླ་དྭགས་སོ། །གསང་བ་པའི་བདག་པོ། དེ་ལྟར་ན་ཆོས་ཐམས་ཅད་ལ་དེ་ལྟར་མོས་ཤིང་ཚུལ་བཞིན་ཡིད་ལ་བྱེད་པ་དང་ལྡན་པའི་བྱང་ཆུབ་སེམས་དཔའ་ནི། དགེ་བ་བྱང་ཆུབ་ཀྱི་ཕྱོགས་
276a
༄#། །ཀྱི་ཆོས་རྣམས་ལས་མི་ཉམས་ཤིང་ཡོངས་སུ་ཉམས་པར་མི་འགྱུར་ཏེ། སངས་རྒྱས་ཀྱི་ཆོས་ཐམས་ཅད་ཀྱང་མྱུར་དུ་ཡོངས་སུ་རྫོགས་པར་བྱེད་དོ། ། དེ་ནས་བཅོམ་ལྡན་འདས་ལ་འཇིག་རྟེན་སྐྱོང་བ་རྒྱལ་པོ་ཆེན་པོ་བཞིས་འདི་སྐད་ཅེས་གསོལ་ཏོ། །བཅོམ་ལྡན་འདས། རྒྱལ་པོ་ཆེན་པོ་བཞི་པོ་བདག་ཅག་འཇིག་རྟེན་སྐྱོང་པ་ཞེས་བགྱི་ན། བཅོམ་ལྡན་འདས། བདག་ཅག་གི་ཇི་ལྟར་འཇིག་རྟེན་སྐྱོང་བར་བགྱི། དེ་ནས་བཅོམ་ལྡན་འདས་ཀྱིས་འཇིག་རྟེན་སྐྱོང་བ་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །གྲོགས་པོ་དག་།ཁྱེད་ཀྱིས་ཆོས་ཀྱི་བྱ་བས་འཇིག་རྟེན་སྐྱོངས་ཤིག་།དེ་ལ་དགེ་བ་བཅུའི་ལས་ཀྱི་ལམ་འདི་དག་ནི་འཇིག་རྟེན་སྐྱོང་བར་བྱེད་པའོ། །བཅུ་གང་ཞེ་ན།་འདི་ལྟ་སྟེ། སྲོག་གཅོད་པ་སྤོང་བ་དང ། རང་གི་ལོངས་སྤྱོད་ཀྱིས་ཆོག་པར་འཛིན་པ་དང ། གཞན་གྱི་ཆུང་མ་ལ་མི་འཕྱོ་བ་དང ། ཆོས་སྤྱོད་པ་རྣམས་ལ་བདེན་པ་ཉིད་དང་གཞན་གྱི་འཁོར་མི་འབྱེད་པ་དང ། ཐ་བའི་ཚིག་མེད་དེ། ཞེར་མི་འདེབས་པ་དང ། ཚིག་ཙམ་ཇི་ལྟ་བ་བཞིན་ཏེ། གཞན་མི་སླུ་བ་དང ། གཞན་གྱི་ལོངས་སྤྱོད་ལ་འདོད་པ་མེད་པ་དང ། གནོད་སེམས་ཉེ་བར་ཞི་བ་དང ། ལྟ་བ་ཡོངས་སུ་དག་ཅིང་ཡང་དག་པར་སོང་བ་སྟེ། གྲོགས་པོ་དག་།དགེ་བ་བཅུའི་ལས་ཀྱི་ལམ་དེ་དག་ནི་འཇིག་རྟེན་སྐྱོང་བར་
276b
བྱེད་པའོ། །གྲོགས་པོ་དག་།གཞན་ཡང་འཇིག་རྟེན་སྐྱོང་བར་བྱེད་པའི་ཆོས་བརྒྱད་དེ། བརྒྱད་གང་ཞེ་ན། འདི་ལྟ་སྟེ། ཇི་སྐད་སྨྲས་པ་དེ་བཞིན་དུ་བྱེད་པ་དང ། བླ་མ་ལ་གུས་པ་དང ། ཐམས་ཅད་དུ་མཐུན་པར་འཛིན་པ་དང ། དྲང་བ་དང ། མཉེན་པ་དང ། སེམས་ཅན་ཐམས་ཅད་ལ་བྱམས་པའི་སེམས་དང་ལྡན་པ་དང ། སྡིག་པ་ཐམས་ཅད་མི་བྱེད་པ་དང ། དགེ་བའི་རྩ་བ་ཐམས་ཅད་ཡང་དག་པར་སྡུད་པ་སྟེ། གྲོགས་པོ་དག་།ཆོས་བརྒྱད་པོ་དེ་དག་ནི་འཇིག་རྟེན་སྐྱོང་བར་བྱེད་པའོ། །གྲོགས་པོ་དག་།གཞན་ཡང་ཡང་དག་པར་མགུ་བར་བྱ་བའི་ཆོས་འཇིག་རྟེན་སྐྱོང་བར་བྱེད་པ་དྲུག་སྟེ། དྲུག་གང་ཞེ་ན། འདི་ལྟ་སྟེ། སྟོན་པ་དང ། ཚངས་པ་མཚུངས་པར་སྤྱོད་པ་མཁས་པ་རྣམས་དང ། སེམས་ཅན་ཐམས་ཅད་ལ་བྱམས་པའི་ལུས་ཀྱི་ལས་ཀྱི་ལས་འདི་ནི་ཡང་དག་པར་མགུ་བར་འགྱུར་བའི་ཆོས་དགའ་བར་བྱེད་པ་དང ། བླ་མར་བྱེད་པ་དང ། ཡིད་དུ་འོང་བར་བྱེད་པ་དང ། དགའ་བར་བྱ་བ་དང ། བླ་མར་བྱ་བ་དང ། གུས་པར་བྱ་བ་དང ། བསྒོམ་པ་དང ། བསྡུ་བ་དང ། ཏིང་ངེ་འཛིན་དུ་བྱ་བར་འགྱུར་བ་དང་པོའོ། །དེ་བཞིན་དུ་སྟོན་པ་དང ། ཚངས་པ་མཚུངས་པར་སྤྱོད་པ་མཁས་པ་རྣམས་དང ། སེམས་ཅན་ཐམས་ཅད་ལ་བྱམས་པའི་ངག་དང ། ཡིད་ཀྱི་ལས་འདི་ནི་ཡང་དག་པར་མགུ་བར་འགྱུར་བའི་ཆོས་དགའ་བར་བྱེད་པ་དང ། བླ་མར་བྱེད་པ་དང ། ཡིད་དུ་འོང་བར་བྱེད་པ་དང ། དགའ་བར་བྱ་བ་དང །
277a
༄#། །བླ་མར་བྱ་བ་དང ། གུས་པར་བྱ་བ་དང ། བསྒོམ་པར་བྱ་བ་དང ། བསྡུ་བ་དང ། ཏིང་ངེ་འཛིན་དུ་བྱ་བར་འགྱུར་བ་གཉིས་པ་དང ། གསུམ་པའོ། །རྙེད་པ་གང་དག་ཆོས་དང་མཐུན་པའི་ཆོས་ཀྱིས་རྙེད་པ་ཐ་ན་ལྷུང་བཟེད་ཀྱི་ནང་དུ་ཆུད་པའམ། ལྷུང་བཟེད་པར་གཏོགས་པ་དེ་ལྟ་བུའི་རྙེད་པ་དག་གིས་ཚངས་པ་མཚུངས་པར་སྤྱོད་པ་ཐབས་མཁས་པ་རྣམས་དང་ལྷན་ཅིག་ཏུ་རྙེད་པ་མཐུན་པར་བྱའོ་སྙམ་པ་འདི་ནི་ཡང་དག་པར་མགུ་བར་འགྱུར་བའི་ཆོས་དགའ་བར་བྱེད་པ་དང ། བླ་མར་བྱེད་པ་དང ། ཡིད་དུ་འོང་བར་བྱེད་པ་དང ། དགའ་བར་བྱ་བ་དང ། བླ་མར་བྱ་བ་དང ། གུས་པར་བྱ་བ་དང ། བསྒོམ་པ་དང ། བསྡུ་བ་དང ། ཏིང་ངེ་འཛིན་དུ་བྱ་བར་འགྱུར་བ་བཞི་པའོ། །ཚུལ་ཁྲིམས་མ་ཉམས་པ། སྐྱོན་མེད་པ། འདྲེན་མ་མ་ཡིན་པ། བསྲ་བསྲེ་མ་ཡིན་པ་རང་དབང་ཅན། མ་འགགས་པ། མཁས་པས་བསྔགས་པ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་མ་སྨད་པ་གང་དག་ཡིན་པ་དེ་ལྟ་བུའི་ཚུལ་ཁྲིམས་རྣམས་ཀྱིས་ཚངས་པ་མཚུངས་པར་སྤྱོད་པ་མཁས་པ་རྣམས་དང་ལྷན་ཅིག་ཏུ་ཚུལ་ཁྲིམས་མཐུན་པར་བྱའོ་སྙམ་པ་འདི་ནི་ཡང་དག་པར་མགུ་བར་འགྱུར་བའི་ཆོས་དགའ་བར་བྱེད་པ་དང ། མགུ་བར་བྱེད་པ་དང ། བླ་མར་བྱེད་པ་དང ། ཡིད་དུ་འོང་བར་བྱེད་པ་དང །
277b
དགའ་བར་བྱ་བ་དང ། བླ་མར་བྱ་བ་དང ། གུས་པར་བྱ་བ་དང ། བསྒོམ་པ་དང ། བསྡུ་བ་དང ། ཏིང་ངེ་འཛིན་དུ་བྱ་བར་འགྱུར་བ་ལྔ་པའོ། །ལྟ་བ་གང་འཕགས་པ་ངེས་པར་འབྱུང་བ་ངེས་པར་འབྱེད་པའི་ཆ་དང་མཐུན་པ་དེ་བྱེད་པའི་སྡུག་བསྔལ་ཡང་དག་པར་ཟད་པར་འགྱུར་བ་དང ། སྡུག་བསྔལ་མཐར་འབྱིན་པ་ངེས་པར་འབྱུང་བའི་ལྟ་བ་དེ་ལྟ་བུས་ཚངས་པ་མཚུངས་པར་སྤྱོད་པ་རྣམས་དང་ལྷན་ཅིག་ཏུ་ལྟ་བ་མཐུན་པར་བྱའོ་སྙམ་པ་འདི་ནི་ཡང་དག་པར་མགུ་བར་འགྱུར་བའི་ཆོས་དགའ་བར་བྱེད་པ་དང ། བླ་མར་བྱེད་པ་དང ། ཡིད་དུ་འོང་བར་བྱེད་པ་དང ། དགའ་བར་བྱ་བ་དང ། བླ་མར་བྱ་བ་དང ། གུས་པར་བྱ་བ་དང ། བསྒོམ་པ་དང ། བསྡུ་བ་དང ། ཏིང་ངེ་འཛིན་དུ་བྱ་བར་འགྱུར་བ་དྲུག་པ་སྟེ། གྲོགས་པོ་དག ། ཡང་དག་པར་མགུ་བར་བྱ་བའི་ཆོས་དྲུག་པོ་དེ་དག་ནི་འཇིག་རྟེན་སྐྱོང་བར་བྱེད་པའོ། །གྲོགས་པོ་དག་།གཞན་ཡང་འཇིག་རྟེན་སྐྱོང་བར་བྱེད་པའི་ཆོས་བཞི་སྟེ། བཞི་གང་ཞེ་ན། འདི་ལྟ་སྟེ།་འདོད་པ་དང ། ཞེ་སྡང་དང ། གཏི་མུག་དང ། འཇིགས་པ་སྤངས་པས། འདོད་པས་འགྲོ་བ་མ་ཡིན་པར་མི་འགྲོ་བ་དང ། ཞེ་སྡང་གིས་འགྲོ་བ་མ་ཡིན་པར་མི་འགྲོ་བ་དང ། གཏི་མུག་གིས་འགྲོ་བ་མ་ཡིན་པར་མི་འགྲོ་བ་དང ། འཇིགས་པས་འགྲོ་བ་མ་ཡིན་པར་མི་འགྲོ་བ་སྟེ། གྲོགས་པོ་དག། འགྲོ་བ་མ་ཡིན་པར་འགྲོ་བ་སྤངས་པའི་ཆོས་བཞི་པོ་འདི་དག་
278a
༄#། །ནི་འཇིག་རྟེན་སྐྱོང་བར་བྱེད་པའོ། །གྲོགས་པོ་དག་།གཞན་ཡང་འཇིག་རྟེན་སྐྱོང་བར་བྱེད་པའི་ཆོས་གཉིས་ཏེ། གཉིས་གང་ཞེ་ན། འདི་ལྟ་སྟེ། ངོ་ཚ་ཤེས་པ་དང ། ཁྲེལ་ཡོད་པ་སྟེ། ཆོས་གཉིས་པོ་དེ་དག་ནི་འཇིག་རྟེན་སྐྱོང་བར་བྱེད་པའོ། །གྲོགས་པོ་དག་།གཞན་ཡང་འཇིག་རྟེན་སྐྱོང་བར་བྱེད་པའི་ཆོས་ནི་གཅིག་ཁོ་ན་སྟེ། འདི་ལྟ་སྟེ། བདེན་པ་ནི་འཇིག་རྟེན་སྐྱོང་བར་བྱེད་པ། བཀའ་བློ་བདེ་བ་ནི་འཇིག་རྟེན་སྐྱོང་བར་བྱེད་པ། གྱ་གྱུ་མེད་པ་ནི་འཇིག་རྟེན་སྐྱོང་བར་བྱེད་པ་སྟེ། གྲོགས་པོ་དག། ཆོས་གཅིག་པོ་དེ་ནི་འཇིག་རྟེན་སྐྱོང་བར་བྱེད་པའོ། །གྲོགས་པོ་དག་།དེ་ལྟ་བུའི་ཆོས་ལ་བརྩོན་ན་འཇིག་རྟེན་སྐྱོང་བར་བྱེད་དེ། གྲོགས་པོ་དག་།ཁྱེད་ཀྱིས་ཆོས་དེ་ལྟ་བུ་ལ་བརྩོན་པས་འཇིག་རྟེན་སྐྱོངས་ཤིག་།འཇིག་རྟེན་སྐྱོང་བའི་ལེའུ་ཞེས་བྱ་སྟེ་བཅུ་དགུ་པའོ།། །།དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གསང་སྔགས་ཀྱི་ཚིག་གང་དག་བརྗོད་པས་འཁོར་འདི་ཐམས་ཅད་དགེ་བ་དང་ལྡན་པར་འགྱུར་བ་དང ། དེ་བཞིན་གཤེགས་པའི་བྱང་ཆུབ་འདི་ཡང་ཡུན་རིང་དུ་གནས་པར་འགྱུར་བའི་གསང་སྔགས་ཀྱི་ཚིག་དེ་དག་ངས་འཁོར་འདི་ལ་བརྗོད་པར་བྱའོ། །སྙམ་ནས་དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ། ངས་ཀླུའི་
278b
རྒྱལ་པོ་སོགས་མ་མེད་ཀྱི་གནས་སུ་གསང་སྔགས་ཀྱི་ཚིག་གང་དག་སྨྲས་པ་དེ་དག་དང ། བྱང་ཆུབ་ཀྱི་སྙིང་པོ་མཆོག་དམ་པར་འདུག་ནས་འགྲོ་བ་ལ་ཕན་པ་དང ། བདེ་བའི་ཕྱིར་ངས་སེམས་ཀྱིས་དྲན་པས་གང་དག་སྨྲས་པ་དེ་དག་ཁྱོད་ཀྱིས་དྲན་ནམ། གསོལ་པ། བཅོམ་ལྡན་འདས། དྲན་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ། གསང་སྔགས་ཀྱི་ཚིག་དེ་དག་ལ་ཁྱོད་སྤོབས་པར་གྱིས་ཤིག་།དེ་ནས་གསང་བ་པའི་བདག་པོ་ལག་ན་རྡོ་རྗེ་སྟན་ལས་ལངས་ཏེ། བཅོམ་ལྡན་འདས་ཀྱི་སྤྱན་སྔར་ཙོག་ཙོག་པོར་འདུག་ནས་ལག་པ་གཉིས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ། གསང་སྔགས་ཀྱི་ཚིག་འདི་དག་སྨྲས་སོ། །འདི་ལྟ་སྟེ། ཨ་ཧུ་ཡ། ཧུ་ལ་བཱ་ཏཱི། ཧུ་ལ་ར་ཎཱ་ཨ་གུ་ཧཱ། ཙ་ཙ་ཙ་ཙ་ཙ། ནི་ཥུ་ར་ཎཱ་།ཀྵུ་ཏཱ་ཀྵ་ཏ། ཀྵ་ཡ་ཀྵ་ཡ། ཨ་ཀྵ་ཡ་ས་མཱ། ཤ་མ་ནི་ཀ་རཱ། ཧ་ཧུ་ལ་ཧུ་བ་ཏི། ཁི་ལ་བ་ཏི། ཀི་ན་ཨ་བྷི་ཥི་ཏ། ནི་ས་ས་ར་ཎཱི། ཛ་ཛ་ཛ་ཛ་མ་ཏི། ཨ་བ་དྲཱ། ནི་བཱ་ཏྲཱ།་བརྟ་བརྟ་ཨ་ནུ་སཱ་ནཱི། བྷུ་ཏཱ་ནུ། སྨྲི་ཏི་ཧོཿ ་མ་ནུ་ཥཱ་ནུ་སྨྲི་ཏི་ཧོ། དེ་བཱ་ནུ་སྨྲི་ཏི་ཧོ། ནཱ་གཱ་ནཱཾ། ཡཀྵ་ནཱཾ། གྷ་ན་དྷ་རྦཱ་ནཱཾ། ཀི་ན་ན་རཱ་ནཾ། མ་ཧོ་ར་ག་ཎཱཾ། སཝཱ་སྟིར་བྷ་བནྟུ་སརྦ་སཏྭཱ་ནཾ ། བྷི་ཀི་རན་ཏུ་མཧཱ་པརྦ་ཏ། སམ་བྱ་ཐཱ་ཏྭ་ན། དྷ་ར་ནི། གརྫ་ཏུ་ས་མུ་དྲ་བེ་ག། ཨི་ཏི། གསང་སྔགས་ཀྱི་ཚིག་བསྟན་པ་འདི་བཤད་པ་ན་ལྷའི་གནས་ཐམས་ཅད་རབ་ཏུ་གཡོས་སོ། །ས་
279a
༄#། །ཐམས་ཅད་ཀྱང་རབ་ཏུ་གཡོས་སོ། །རྒྱ་མཚོ་ཆེན་པོ་ཡང་རབ་ཏུ་འཁྲུགས་སོ། །དེ་ནས་ཐམས་ཅད་དང་ལྡན་པའི་འཁོར་དེ་ཡང་འདར་ཕད་ཕད་ནས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་བར་གྱུར་ཏོ། །བཅོམ་ལྡན་འདས་ཀྱིས་སྟོང་གི་འཇིག་རྟེན་གྱི་ཁམས་དེ་ལ་ཞབས་གཅིག་གིས་རེག་པར་མཛད་དོ། །དེ་ན་ཐམས་ཅད་དང་ལྡན་པའི་འཁོར་དེ། དེ་བཞིན་གཤེགས་པའི་ཞབས་ལ་མ་རེག་ཙམ་དུ་ཉེ་བར་འདུག་སྟེ། འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་བསྲུང་དུ་གསོལ། བདེ་བར་གཤེགས་པ། བདག་ཅག་བསྐྱབ་ཏུ་གསོལ། བདག་ཅག་ལ་གནོད་ལགས་སོ། །བདག་ཅག་ལ་རབ་ཏུ་གནོད་ལགས་སོ། །བདག་ཅག་འདར་ཕད་ཕད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གྲོགས་པོ་དག་།མ་འཇིགས་ཤིག་།མ་འཇིགས་ཤིག་།དེ་བཞིན་གཤེགས་པས་བྱིན་གྱིས་བརླབས་པའི་གསང་སྔགས་ཀྱི་ཚིག་འདི་དག་གི་ཡུལ་ནི་འདི་ལྟ་སྟེ། ས་ཆེན་པོ་འདི་རབ་ཏུ་གཡོས་པ་དང ། རྒྱ་མཚོ་ཆེན་པོ་འཁྲུགས་པ་དང ། ཁྱེད་ཀྱང་ནམ་མཁའ་ལ་གནས་ནས་རབ་ཏུ་གཡོས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེའི་འཁོར་གྱི་ཁྱམས་སུ་ཅི་ནས་སྲོག་ཆགས་བརྒྱད་ཁྲིས་བྱང་ཆུབ་ཏུ་སེམས་བསྐྱེད་པ་དང ། སེམས་
279b
ཅན་ཚད་མེད་པ་དེ་དག་གིས་བསླབ་པའི་གནས་རྣམས་བླངས་པར་གྱུར་པ་དེ་ལྟར་ཆོས་རྒྱ་ཆེར་བསྟན་ཏོ།། །།བམ་པོ་དགུ་པ། དེ་ནས་གསང་བ་པའི་བདག་པོའི་བུ་རྡོ་རྗེའི་སྡེས། བཅོམ་ལྡན་འདས་ལ་རིན་པོ་ཆེའི་དྲ་བས་མངོན་པར་བཀབ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་ཇི་ལྟར་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་མི་འཁྲུགས་པའི་ཆོས་ཅན་དུ་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཅུ་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་མི་འཁྲུགས་པའི་ཆོས་ཅན་དུ་འགྱུར་རོ། །བཅུ་གང་ཞེ་ན། ཁོང་ཁྲོ་བ་མེད་པའི་བྱམས་པ་ཆེན་པོ་དང ། ཡོངས་སུ་མི་སྐྱོ་བའི་སྙིང་རྗེ་ཆེན་པོ་དང ། བྱ་བ་ཐམས་ཅད་ཉམས་འོག་ཏུ་ཆུད་པར་བྱེད་པའི་བརྩོན་འགྲུས་དང ། སྟོང་པ་ཉིད་ཀྱི་རྣམ་པར་སྦྱོར་བའི་ཏིང་ངེ་འཛིན་དང ། མངོན་སུམ་དུ་རྟོགས་པའི་ཤེས་རབ་དང ། ཐམས་ཅད་ཀྱི་རྗེས་སུ་སོང་བའི་མཁས་པ་དང ། དུས་གསུམ་དུ་ཡོངས་སུ་སྦྱོང་བའི་ཡེ་ཤེས་དང ། བདེན་པ་མཐོང་བ་རྣམ་པར་སྦྱང་བར་བྱ་བ་སྒྲིབ་པ་མེད་པ་དང ། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་དང ། ཇི་ལྟ་བ་བཞིན་གྱིས་ཡོངས་སུ་དག་པའི་ལམ་
280a
༄#། །ལ་འཇུག་པ་སྟེ། གཞོན་ནུ། བྱང་ཆུབ་སེམས་དཔའ་ཆོས་བཅུ་པོ་དེ་དག་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་མི་འཁྲུགས་པའི་ཆོས་ཅན་དུ་འགྱུར་རོ། །གསང་བ་པའི་བདག་པོའི་བུ་རྡོ་རྗེའི་སྡེས་བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས། །ཇི་ལྟར་ན་བྱང་ཆུབ་སེམས་དཔའ་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཉིད་ཐོས་ན་མི་དངང་མི་སྐྲག་ཅིང་སྐྲག་པར་མི་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། གཞོན་ནུ། བྱང་ཆུབ་སེམས་དཔའ་ཆོས་བརྒྱད་དང་ལྡན་ན་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཉིད་ཐོས་ན་མི་དངང་མི་སྐྲག་ཅིང་སྐྲག་པར་མི་འགྱུར་ཏེ། བརྒྱད་གང་ཞེ་ན། ཤེས་རབ་ཀྱིས་བརྟན་པ་ཡིན། ཡེ་ཤེས་ཀྱིས་བརྟན་པ་ཡིན། དགེ་བའི་བཤེས་གཉེན་གྱིས་ཡོངས་སུ་ཟིན་པ་ཡིན། རྒྱ་ཆེན་པོ་ལ་མོས་པ་ཡིན། སྒྱུ་མ་དང་མཚུངས་པའི་ཆོས་ལས་ངེས་པར་འབྱུང་བ་ཡིན། ཆོས་ལ་མི་རྟག་པར་མོས་པ་ཡིན། སེམས་ནམ་མཁའ་དང་མཚུངས་པ་ཡིན། ཆོས་ཐམས་ཅད་རྣམ་པར་བསྒྲུབ་པར་གནས་པའི་མཚན་ཉིད་དུ་ཤེས་པ་ཡིན་ཏེ། གཞོན་ནུ། བྱང་ཆུབ་སེམས་དཔའ་ཆོས་བརྒྱད་པོ་དེ་དག་དང་ལྡན་ན་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་འདི་ཐོས་ནས་མི་དངང་མི་སྐྲག་ཅིང་
280b
སྐྲག་པར་མི་འགྱུར་རོ། །གསོལ་པ། བཅོམ་ལྡན་འདས། བྱང་ཆུབ་སེམས་དཔའ་ཆོས་དུ་དང་ལྡན་ན་བགྱི་བ་ཐམས་ཅད་ལ་དབང་དང་ལྡན་པར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། གཞོན་ནུ། བྱང་ཆུབ་སེམས་དཔའ་ཆོས་བཞི་དང་ལྡན་ན་བྱ་བ་ཐམས་ཅད་ལ་དབང་དང་ལྡན་པར་འགྱུར་ཏེ། བཞི་གང་ཞེ་ན། ལེགས་པར་བསྒོམས་ཞིང་ཉམས་པར་མ་གྱུར་པའི་མངོན་པར་ཤེས་པ་ལྔ་དང་ལྡན་པ་ཡིན། རྣམ་པར་ཐར་པའི་སྒོ་ཡོངས་སུ་བསྒོམས་པའི་བསམ་གཏན་བཞི་དང་ལྡན་པ་ཡིན། ཚངས་པའི་བླ་མ་འཇིག་རྟེན་ལས་འདས་པའི་ཚངས་པའི་གནས་པ་བཞི་དང་ལྡན་པ་ཡིན། ཐམས་ཅད་ཀྱིས་རྗེས་སུ་རྣམ་པར་རྒྱུ་བའི་ཐབས་དང་ཤེས་རབ་ལས་ངེས་པར་འབྱུང་བ་ཡིན་ཏེ། གཞོན་ནུ།་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་བྱ་བ་ཐམས་ཅད་ལ་དབང་དང་ལྡན་པར་འགྱུར་རོ། །གསོལ་པ། བཅོམ་ལྡན་འདས། བྱང་ཆུབ་སེམས་དཔའ་རྣམས་ཀྱི་སྒོ་དུ་མཆིས། བཅོམ་ལྡན་འདས་ཀྱིས་བཀའ་སྩལ་པ། གཞོན་ནུ། བྱང་ཆུབ་སེམས་དཔའ་རྣམས་ཀྱི་སྒོ་བཞི་སྟེ། བཞི་གང་ཞེ་ན། འདི་ལྟ་སྟེ། སེམས་ཅན་གྱི་དབང་པོ་ལ་འཇུག་པ་ཡེ་ཤེས་ཀྱི་སྒོ་དང ། ཚིག་རབ་ཏུ་དབྱེ་བ་བསྟན་པ་ཤེས་རབ་ཀྱི་སྒོ་དང ། སྐད་ཐམས་ཅད་ཀུན་དུ་འཛིན་པ་ལ་འཇུག་པ་གཟུངས་ཀྱི་སྒོ་དང ། ཆོས་མི་ཟད་པ་བསྟན་པ་སོ་སོ་
281a
༄#། །ཡང་དག་པར་རིག་པའི་སྒོ་སྟེ། གཞོན་ནུ། ཆོས་བཞི་པོ་དེ་དག་ནི། བྱང་ཆུབ་སེམས་དཔའ་རྣམས་ཀྱི་སྒོའོ། །གསོལ་པ། བཅོམ་ལྡན་འདས། བྱང་ཆུབ་སེམས་དཔའ་རྣམས་ཀྱི་སྟོབས་དུ་མཆིས། བཅོམ་ལྡན་འདས་ཀྱིས་བཀའ་སྩལ་པ། གཞོན་ནུ། བྱང་ཆུབ་སེམས་དཔའ་རྣམས་ཀྱི་སྟོབས་ནི་དགུ་སྟེ། དགུ་གང་ཞེ་ན། སྙིང་རྗེ་བར་བྱ་བའི་ཕྱིར་ངེས་པར་སེམས་པའི་སྟོབས་དང ། ཕྱིར་མི་ལྡོག་པར་བྱ་བའི་ཕྱིར་བརྩོན་འགྲུས་ཀྱི་སྟོབས་དང ། ཤེས་རབ་ཆེན་པོར་བྱ་བའི་ཕྱིར་ཐོས་པའི་སྟོབས་དང ། རྣམ་པར་གྲོལ་བ་ཡོངས་སུ་རྫོགས་པར་བྱ་བའི་ཕྱིར་མོས་པའི་སྟོབས་དང ། འབྲལ་བར་བྱ་བའི་ཕྱིར་བསྒོམས་པའི་སྟོབས་དང ། སེམས་ཅན་བསྲུང་བའི་ཕྱིར་བཟོད་པའི་སྟོབས་དང ། བདུད་ཚར་གཅད་པའི་ཕྱིར་བྱང་ཆུབ་ཀྱི་སེམས་ཀྱི་སྟོབས་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་སྙིང་རྗེ་ཆེན་པོའི་སྟོབས་དང ། སྟོབས་བཅུ་ཡོངས་སུ་རྫོགས་པར་བྱ་བའི་ཕྱིར་མི་སྐྱེ་བར་བཟོད་པའི་སྟོབས་ཏེ། གཞོན་ནུ། དགུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྟོབས་སོ། །བསྟན་པ་འདི་བཤད་པ་ན་གསང་བ་པའི་བདག་པོའི་བུ་དེ་དག་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏེ། དེ་དག་བཟོད་པ་ཐོབ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
281b
འདས།་ཆོས་ཀྱི་རྣམ་གྲངས་འདི་གསང་བ་པའི་བདག་པོའི་གནས་སུ་ཡུན་རིང་དུ་གནས་ཤིང་སྤྱོད་པར་འགྱུར་བ་དང ། སེམས་ཅན་སྣོད་དུ་གྱུར་པ་དེ་དག་གི་རྣ་ལམ་དུ་གྲགས་པར་འགྱུར་བ་དང ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་སླད་དུ་ན་འཛམ་བུའི་གླིང་དུ་རྒྱས་པར་འགྱུར་ཞིང་ཅི་ནས་ཀྱང་ནུབ་པར་མི་འགྱུར་བར་བྱིན་གྱིས་བརླབ་ཏུ་གསོལ།་དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོའི་བུ་དེ་དག་གིས་གསོལ་བ་བཏབ་པ་མཁྱེན་ནས། གསང་བ་པའི་བདག་པོ་ལག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ། འདི་ལྟ་སྟེ། དམ་པའི་ཆོས་ཀྱི་ཚུལ་ཡུན་རིང་དུ་གནས་པར་བྱ་བ་དང ། བདུད་དང་པས་ཀྱི་རྒོལ་བ་ཐམས་ཅད་ཆོས་དང་མཐུན་པས་ཚར་གཅད་པར་བྱ་བའི་ཕྱིར་ངས་ཁྱོད་ལ་བསྐུལ་གྱི། བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་མཆོག་དམ་པ་ལ་འདུག་པ་བསྲུང་བ་དང ། བདུད་ཀྱི་སྡེ་འོངས་པ་ན་བདུད་ཚར་གཅད་པའི་ཕྱིར་ངས་ཁྱོད་ཀྱིས་གསང་སྔགས་ཀྱི་གཞི་གང་དག་བསམས་ཤིང་བརྗོད་པ་དང ། ཁ་ཏོན་བྱས་པ་དེ་དག་ལ་ཁྱོད་སྤོབས་པར་གྱིས་ཤིག་།དེ་ནས་གསང་བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ཀྱིས་བསྐུལ་བར་རིག་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་
282a
༄#། །ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་དེའི་ཚེ་གསང་སྔགས་ཀྱི་གཞི་འདི་དག་སྨྲས་སོ། །ཏདྱ་ཐཱ། ཧུ་ལུ་ཧུ་ལུ། ཧུ་ལེ་དྷི་རེ། ཧ་རི་ཏི། ཨ་ཀུ་ཤ་ལ་ཀྵ་ཡེ། ཙ་ལེ་ཙ་ལ་བ་ཏི། སཱ་རེ། ཀྵུ་རེ། ཀྵན་ཏི་བ་ལ། ཀྵེ་མེ། ཤན་ཏི་ཀ་རེ། ཀྵ་མེ། ཤ་མེ། ཧུ་ལུ། ཨ་ལི་ཁི། ཁི་རི་ཁ་རི། ཨཱ་བེ་ཤ་ནི་ས་ར་ཎེ། ཛ་ཡེ་ཛ་ཡ་བ་ཏི། སྠི་རེ་ཨ་བརྟེ། བི་བརྟེ། ཨ་བརྟ་ནི། མེ་ཏི། བྷུ་ཏཱ་ནཱ་ན། སད་དྲ་ཧེ་ད་མི། ད་མ་ས་མ་བན་ནེ་ཏ་རྣེ། ཏ་ར་ཡ་སེ་སཝ་ཡན། སཝ་སྟི་དེ་བེ་བྷྱོ། ནཱ་གེ་བྷྱོ། ཡཀྵེ་བྷྱོ། གན་དྷ་རྦེ་རཱ་ཀྵ་སེ་བྷྱོ། མྲ་ནུ་ཥེ་བྷྱོ། ཨ་མ་ནུ་ཥེ་བྷྱོ་སཝ་སྟིར་བྷ་བ་ཏུ་སཝ་དཱ་མུ་ཁམ། གསང་སྔགས་འདི་དག་རབ་བརྗོད་པས། །རི་ཡི་རྒྱལ་པོ་རྣམས་ཀྱང་གཡོས། །ས་ཡང་རབ་ཏུ་གཡོས་པར་གྱུར། །ཆུ་ཡི་རྒྱལ་པོ་རྣམས་ཀྱང་འཁྲུགས། །གསང་སྔགས་འདི་དག་རབ་བརྗོད་པས། །ཕས་ཀྱི་རྒོལ་རྣམས་ཚར་ཡང་གཅོད། །ཆོས་སྨྲ་བ་ནི་ཡང་དག་བསྡུས། །ཆོས་ཀྱི་མཛོད་ནི་ཀུན་ཏུ་བསྲུངས།། གསང་སྔགས་གཞི་འདི་ཐོས་ནས་ནི། །ལྷ་ཚོགས་ཀུན་ཏུ་དགར་གྱུར་ནས། །དམ་ཆོས་རིང་དུ་གནས་འགྱུར་ཞེས། །ཕན་ཚུན་དུ་ནི་སྨྲ་བར་བྱེད། །སྟོང་གསུམ་པོ་ཡང་རབ་ཏུ་གཡོས། །འཁོར་ཡང་རབ་ཏུ་འདར་གྱུར་ནས། །མི་ཡི་དབང་པོའི་ཞབས་གཉིས་ལ། །གཏུགས་པར་བྱས་ཏེ་སྐྱབས་སུ་དོང ། །དེ་དག་མི་འཇིགས་དེར་ཕྱིན་ནས། །སྟོན་པས་
282b
འདི་སྐད་བཀའ་སྩལ་ཏོ། །མདོ་འདི་བྱིན་གྱིས་བརླབས་པས་ན། །དམ་ཆོས་རིང་དུ་གནས་པར་འགྱུར། །དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེའི་གནས་སུ་ཞག་བདུན་འདས་ནས་སུ། སེམས་ཅན་ཚད་མེད་པ་དག་གི་དོན་མཛད་ནས་ཞག་བདུན་འདས་ཏེ། ལྕང་ལོ་ཅན་གྱི་ཕོ་བྲང་འཁོར་དུ་སེམས་ཅན་གྱི་དོན་མཛད་པ་ཇི་སྙེད་པ་དེ་དག་ཐམས་ཅད་རྒྱས་པར་མཛད་ནས། གསང་བ་པའི་བདག་པོ་ལག་ན་རྡོ་རྗེའི་གནས་ནས་གཤེགས་ཏེ། ནམ་མཁའི་དཀྱིལ་གྱི་ལམ་དེ་ཉིད་ནས་བྱང་ཆུབ་སེམས་དཔའི་ཚོགས་ཀྱིས་ནི་བསྐོར། ཉན་ཐོས་ཀྱི་ཚོགས་ཀྱིས་ནི་མདུན་དུ་བདར། ལྷའི་ཚོགས་ཀྱིས་ནི་ཕྱག་བྱས། ལྷའི་བུ་མོའི་ཚོགས་ཀྱིས་ནི་མངོན་པར་བསྟོད། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དུ་མས་ནི་བསྐོར། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་རྣམས་ཀྱིས་ནི་མངོན་པར་བསྟོད། འོད་ཟེར་གྱི་དྲ་བ་ནི་རབ་ཏུ་འགྱེད། །རོལ་མོའི་སིལ་སྙན་ནི་ལེན། མེ་ཏོག་གི་ཆར་ནི་འབེབས། ཞིང་རྣམས་ནི་རབ་ཏུ་གཡོ་བར་མཛད་ཅིང ། སངས་རྒྱས་ཀྱི་མཐུ་ཆེན་པོ་དང ། སངས་རྒྱས་ཀྱི་རྫུ་འཕྲུལ་ཆེན་པོ་དང ། སངས་རྒྱས་ཀྱི་རྣམ་པར་འཕྲུལ་པ་ཆེན་པོ་དང ། སངས་རྒྱས་ཀྱི་ཆོ་འཕྲུལ་ཆེན་པོ་དང ། སངས་རྒྱས་ཀྱི་དཔལ་ཆེན་པོ་དང ། སངས་རྒྱས་ཀྱི་གཟི་བརྗིད་ཆེན་པོ་དང ། སངས་རྒྱས་ཀྱི་སྤྱོད་ལམ་ཆེན་
283a
༄#། །པོ་དང ། སངས་རྒྱས་ཀྱི་རྣམ་པར་རོལ་པ་ཆེན་པོས། ངང་པའི་རྒྱལ་པོ་ལྟར་ཐོགས་པ་མེད་པར་གཤེགས་ཏེ། སླར་བྱ་རྒོད་ཀྱི་ཕུང་པོའི་རི་ལ་བྱོན་ཏོ། །གསང་བ་པའི་བདག་པོ་ལག་ན་རྡོ་རྗེ་ཡང་བཅོམ་ལྡན་འདས་ཀྱི་ཞམ་འབྲིང་དུ་འབྲང་བར་གྱུར་ཏོ། །བཞུད་པ་དང ། བྱོན་པའི་ལེའུ་ཞེས་བྱ་སྟེ་ཉི་ཤུ་པའོ།། །། དེ་ནས་བཅོམ་ལྡན་འདས་བྱང་ཆུབ་སེམས་དཔའ་རྣམས་དང ། ཉན་ཐོས་ཆེན་པོ་རྣམས་དང་ཐབས་གཅིག་ཏུ་བྱ་རྒོད་ཀྱི་ཕུང་པོའི་རི་ལ་བཞུགས་སོ། །དེ་ནས་བཅོམ་ལྡན་འདས་ཕྱེ་མ་རེད་ཀྱི་དུས་ཀྱི་ཚེ། ནང་དུ་ཡང་དག་འཇོག་ལས་བཞེངས་ནས་ཆོས་སྟོན་ཏོ། །དེ་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྲོག་ཆགས་དྲུག་ཁྲི་དང ། རྒྱལ་པོ་མ་སྐྱེས་དགྲ་འཁོར་དང་བཅས་པས་བཅོམ་ལྡན་འདས་སླར་གཤེགས་པར་རིག་ནས་ཕྱེ་མ་རེད་ཀྱི་དུས་ཀྱི་ཚེ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་ཐོགས་ཏེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ནས་བྱ་རྒོད་ཀྱི་ཕུང་པོའི་རི་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་ཀྱང་རྒྱལ་པོ་མ་སྐྱེས་དགྲས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
283b
བཅོམ་ལྡན་འདས། བདག་འདི་ན་མདུན་ཁང་ན་མཆིས་ན་གཞོན་ནུ་འཇིགས་བྱེད་སྦྱིན་མཆིས་ཏེ། འདི་སྐད་ཅེས་མཆིའོ། །ཡབ། བཅོམ་ལྡན་འདས་ནི་གསང་བ་པའི་བདག་པོ་ལག་ན་རྡོ་རྗེའི་གནས་ལྕང་ལོ་ཅན་གྱི་ཕོ་བྲང་འཁོར་དུ་གདུགས་ཚོད་གསོལ་ནས་སླར་གཤེགས་ཞེས་གདའོ་ཞེས་མཆིས་ནས། བཅོམ་ལྡན་འདས། དེ་ལ་བདག་གིས་འདི་སྙམ་དུ་བསམས་ཏེ། གང་གིས་སླད་དུ་གསང་བ་པའི་བདག་པོ་ལག་ན་རྡོ་རྗེའི་གནས་ལྕང་ལོ་ཅན་གྱི་ཕོ་བྲང་འཁོར་དུ་བཅོམ་ལྡན་འདས་སྤྱན་དྲངས་ན་ཡང་སེམས་ཅན་ཡོངས་སུ་སྨིན་པར་མཛད་པའི་སླད་དུ། ལྕང་ལོ་ཅན་གྱི་ཕོ་བྲང་འཁོར་དུ་གཤེགས་པས། འདི་ལྟར་གང་དེ་བཞིན་གཤེགས་པས་ཡོངས་སུ་བཏང་བའི་སེམས་ཅན་དེ་ནི་སེམས་ཅན་གྱི་རིས་ན་གང་ཡང་མ་མཆིས་ཏེ། སེམས་ཅན་རྣམས་ལ་སངས་རྒྱས་བཅོམ་ལྡན་འདས་རྣམས་ཀྱི་ཐུགས་རྗེ་ཆེན་པོ་འཇུག་པ་ནི་ངོ་མཚར་ཏོ། །བཅོམ་ལྡན་འདས། དེ་བཞིན་གཤེགས་པས་ཆོས་རྣམ་པར་ངེས་པ་ལུང་བསྟན་པ་ལུང་བསྟན་པས་གསང་བ་པའི་བདག་པོ་ལག་ན་རྡོ་རྗེ་དགའ་བར་འགྱུར་བའི་བདག་ཉིད་ཆེན་པོ་ནི་ངོ་མཚར་ཏོ་སྙམ་བགྱིད་དོ། །བཅོམ་ལྡན་འདས། གསང་བ་པའི་བདག་པོ་ལག་ན་རྡོ་རྗེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་དགེ་བའི་
284a
༄#། །རྩ་བ་བསྐྱེད་ན་དེས་འདི་འདྲ་བའི་སྤོབས་པ་དང་ལྡན་པར་གྱུར། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ། སེམས་ཅན་དགེ་བའི་རྩ་བ་མ་བསྐྱེད་པ་རྣམས་ཀྱིས་ནི་གནས་འདི་ལ་མོས་པར་དཀའ་སྟེ། འོན་གྱིས་ཀྱང་དགེ་བའི་རྩ་བ་རྣམས་བསྐྱེད་པར་གྱུར་པ་དེ་དག་ནི་མོས་པར་འགྱུར་རོ། །རྒྱལ་པོ་ཆེན་པོ། ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་པོ་དེ་དག་ནི་བགྲང་བའི་ཚུལ་གྱིས་མཐའ་རྟོགས་པར་ནུས་ཀྱི། གསང་བ་པའི་བདག་པོ་ལག་ན་རྡོ་རྗེས་སངས་རྒྱས་བཅོམ་ལྡན་འདས་ཇི་སྙེད་ཅིག་ལ་མཆོད་པ་དང་བསྙེན་བཀུར་བྱས་པའི་སངས་རྒྱས་བཅོམ་ལྡན་འདས་དེ་དག་ནི་བགྲང་བའི་ཚུལ་གྱིས་མཐའ་རྟོགས་པར་མི་ནུས་ཏེ། དེ་དག་གི་གན་ནས་ཚངས་པར་སྤྱོད་པ་སྤྱད་ནས་དེས་ན་སྤོབས་པ་འདི་ལྟ་བུ་དང་ལྡན་པར་གྱུར་ཏོ། །རྒྱལ་པོ་ཆེན་པོ་ཁྱོད་ཀྱིས་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། རྒྱལ་པོ་ཆེན་པོ། སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ། རྒྱ་ཆེ་བའི་ཡང་ཆེས་རྒྱ་ཆེ་བ། ཚད་མེད་པ་བསམ་གྱིས་མི་ཁྱབ་པར་གྱུར་པ་དེའི་ཚེ་དེའི་དུས་ན་མ་སྨད་པ་ཞེས་བྱ་བའི་བསྐལ་པ་ལ་འཇིག་རྟེན་གྱི་ཁམས་རྣམ་
284b
པར་རྒྱལ་བ་ཅན་ཞེས་བྱ་བ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ།་སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་རྣམ་པར་ཞི་སྤྱོད་ཅེས་བྱ་བ་འཇིག་རྟེན་དུ་བྱུང་སྟེ། བཅོམ་ལྡན་འདས་དེ་བཞིན་གཤེགས་པ་རྣམ་པར་ཞི་སྤྱོད་དེ། རིགས་ཀྱི་བུ་དག་།ཁྱེད་ཀྱིས་ལུས་དང་སྲོག་ཀྱང་བཏང་སྟེ། བརྩོན་འགྲུས་བརྩམས་པར་བྱའོ་ཞེས་བྱང་ཆུབ་སེམས་དཔའི་གཏམ་འབའ་ཞིག་ཡང་དག་པར་སྟོན་པ། རྒྱལ་པོ་ཆེན་པོ། དེའི་ཚེ་བྱང་ཆུབ་སེམས་དཔའ་སྟོབས་ཞེས་བྱ་བ་འཁོར་དེར་འདུས་པར་གྱུར་ཏེ། འདུག་པ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ལུས་དང་སྲོག་ཀྱང་བཏང་སྟེ། བརྩོན་འགྲུས་བརྩམ་པར་བྱའོ་ཞེས་དེ་སྐད་ཅེས་བཀའ་སྩལ་བ་ལ། བཅོམ་ལྡན་འདས་ཀྱིས་བཀའ་སྩལ་པའི་དོན་བདག་གིས་འཚལ་བ་ལྟར་ན། བཅོམ་ལྡན་འདས། བྱང་ཆུབ་སེམས་དཔའ་འདི་སྙམ་དུ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་སྙམ་དུ་སེམས་པ་དེ་ནི་ལེ་ལོ་ཅན་དུ་གྲགས་པ་ལགས་པ་སྙམ་དུ་བདག་བགྱིད་དོ། །དེ་ཅིའི་སླད་དུ་ཞེ་ན། བཅོམ་
285a
༄#། །ལྡན་འདས། བྱང་ཆུབ་སེམས་དཔའ་བརྩོན་འགྲུས་བརྩམས་པ་རྣམས་ནི་འཁོར་བ་ལ་ཡོངས་སུ་སྐྱོ་བའི་བློ་སྐྱེ་བར་མི་འགྱུར་ཏེ། བཅོམ་ལྡན་འདས། བྱང་ཆུབ་སེམས་དཔའ་རྣམས་ནི་སེམས་ཅན་ཡོངས་སུ་སྨིན་པར་བགྱི་བའི་སླད་དུ་འཁོར་བ་ལ་ཕན་ཡོན་དུ་ལྟ་བ་ལགས་ཀྱི། མྱ་ངན་ལས་འདས་པ་ལ་ནི་དེ་ལྟ་མ་ལགས་ཏེ།་བཅོམ་ལྡན་འདས། བྱང་ཆུབ་སེམས་དཔའ་རྣམས་ནི་སེམས་ཅན་གྱི་དོན་ལ་བརྩོན་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། བྱང་ཆུབ་སེམས་དཔའ་བརྩོན་འགྲུས་ལ་མོས་པ་རྣམས་ལ་འཁོར་བ་ནི་ཆེས་བདེའོ། མྱ་ངན་ལས་འདས་པ་ནི་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། བྱང་ཆུབ་སེམས་དཔའ་སེམས་ཅན་གྱི་དོན་ལ་བརྩོན་པ་དེ་དག་ནི་ཇི་ལྟ་ཇི་ལྟར་སེམས་ཅན་རྣམས་ཀྱི་དོན་བགྱིད་པ་དེ་ལྟ་དེ་ལྟར་བདེ་བར་འགྱུར་ཏེ། བཅོམ་ལྡན་འདས། ཡོངས་སུ་མྱ་ངན་འདས་ན་སླད་ཀྱིས་ཅི་ཞིག་བགྱི་བར་འགྱུར། བཅོམ་ལྡན་འདས། དེ་ལྟ་ལགས་པས་བྱང་ཆུབ་སེམས་དཔས་འཁོར་བའི་བདེ་བའི་རོ་མི་མྱང་བར་འཁོར་བ་སྤྱོད་ཡུལ་དུ་བགྱིས་ཏེ། མྱ་ངན་ལས་འདས་པ་སྤྱོད་ཡུལ་དུ་མི་བགྱིའོ། །བཅོམ་ལྡན་འདས། བྱང་ཆུབ་སེམས་དཔའ་འཁོར་བའི་བདེ་བའི་རོ་མི་མྱང་བར་འཁོར་བ་སྤྱོད་ཡུལ་དུ་བགྱིད་ཅིང་སེམས་
285b
ཅན་གྱི་དོན་ལ་བརྩོན་པ་ནི། སངས་རྒྱས་བཅོམ་ལྡན་འདས་ཚད་མ་མཆིས་པ་མཐོང་བར་འགྱུར། ཆོས་ཚད་མ་མཆིས་པ་ཉན་པར་འགྱུར་ཞིང་སེམས་ཅན་ཚད་མ་མཆིས་པ་ཡོངས་སུ་སྨིན་པར་བགྱིད་དོ། །བཅོམ་ལྡན་འདས། བྱང་ཆུབ་སེམས་དཔའ་འཁོར་བ་སྤྱོད་ཡུལ་དུ་བགྱིད་པ་ནི། སེམས་ཅན་གྱི་སྤྱོད་ཡུལ་གྱི་རྗེས་སུ་འཇུག་གོ་།བཅོམ་ལྡན་འདས། བྱང་ཆུབ་སེམས་དཔའ་མྱ་ངན་ལས་འདས་པ་སྤྱོད་ཡུལ་དུ་བགྱིད་པ་ནི། བཏང་སྙོམས་སུ་ལྟུང་ལགས་སོ། །བཅོམ་ལྡན་འདས། གལ་ཏེ་བྱང་ཆུབ་སེམས་དཔའ་འཁོར་བའི་སྤྱོད་ཡུལ་གྱིས་སྐྲག་ན་སྤྱོད་ཡུལ་མ་ལགས་པར་ལྟུང་སྟེ། སླད་ཀྱི་སེམས་ཅན་གྱི་དོན་མི་བགྱིད། དེ་བཞིན་གཤེགས་པའི་སྤྱོད་ཡུལ་ལ་གནས་པར་མི་འགྱུར་ཞིང ། སེམས་ཅན་ཐམས་ཅད་ཀྱི་ཉེ་བར་འཚོ་བར་མི་འགྱུར་ལགས་སོ། །དེའི་སྤྱོད་ཡུལ་མ་ལགས་པ་གང་ཞེ་ན། འདི་ལྟ་སྟེ། ཉན་ཐོས་དང ། རང་སངས་རྒྱས་ཀྱིས་འཚལ་ཞིང་སེམས་ཅན་ཡོངས་སུ་སྨིན་པར་བགྱིད་པ་ལ་གཡེལ་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཉན་ཐོས་རྣམས་ཀྱི་སྤྱོད་ཡུལ་གང་ལགས་པ་དེ་ནི་བྱང་ཆུབ་སེམས་དཔའི་སྤྱོད་ཡུལ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཉན་ཐོས་དང ། རང་སངས་རྒྱས་རྣམས་ནི་འཁོར་བས་སྐྲག་པའི་སྤྱོད་ཡུལ་
286a
༄#། །བ་ལགས་སོ། །བྱང་ཆུབ་སེམས་དཔའ་རྣམས་ནི་འཁོར་བ་དཔག་ཏུ་མ་མཆིས་པ་ཡོངས་སུ་འཛིན་པ་ལགས་ཏེ། བཅོམ་ལྡན་འདས་དེ་ལ་བྱང་ཆུབ་སེམས་དཔས་རང་གི་སྤྱོད་ཡུལ་ལ་གནས་པར་བགྱིའོ། །རྒྱལ་པོ་ཆེན་པོས་དེ་སྐད་ཅེས་གསོལ་པ་དང ། དེ་བཞིན་གཤེགས་པ་རྣམ་པར་ཞི་སྤྱོད་ཀྱིས་བྱང་ཆུབ་སེམས་དཔའ་དཔའ་སྟོབས་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་དམ་པ་ཁྱོད་ཀྱིས་ཚིག་འདི་ལེགས་པར་སྨྲས་པ་ལེགས་སོ། །ལེགས་སོ། །བྱང་ཆུབ་སེམས་དཔས་རང་གི་སྤྱོད་ཡུལ་གྱི་བྱ་བ་དག་ལ་གུས་པར་བྱ་སྟེ། རང་གི་སྤྱོད་ཡུལ་ལ་སྤྱད་པར་བྱའི། གཞན་གྱི་སྤྱོད་ཡུལ་ལ་སྤྱད་པར་མི་བྱའོ། །གསོལ་པ། བཅོམ་ལྡན་འདས། བྱང་ཆུབ་སེམས་དཔའ་རྣམས་ཀྱི་རང་གི་སྤྱོད་ཡུལ་གང་ལགས། བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའི་རང་གི་སྤྱོད་ཡུལ་ནི། འདི་ལྟ་སྟེ།་འཁོར་བ་དཔག་ཏུ་མེད་པ་ཡོངས་སུ་འཛིན་པས་མི་སྐྲག་པ་དང ། བྱང་ཆུབ་སེམས་དཔའི་སྤྱོད་པའི་ཕན་ཡོན་དང ། ཉན་ཐོས་དང ། རང་སངས་རྒྱས་ཀྱི་ས་ལ་འདོད་པ་མེད་པ་དང ། ཉིང་མཚམས་སྦྱོར་བ་མེད་པར་ཡང་ཤེས་ལ། ཁམས་གསུམ་དུ་ཡང་མཚམས་སྦྱོར་བ་དང ། སེལ་བ་དང ། སྡུད་པ་དང ། དགེ་བའི་རྩ་བ་
286b
རྣམས་སྤེལ་བ་དང ། ཚུལ་ལ་མཁས་པ་དང ། བསྡུ་བ་ཤེས་པ་དང ། དགེ་བ་ཐམས་ཅད་གསོག་པ་ལ་མཁས་པ་དང ། ཟད་པ་ཡང་ཤེས་ལ་བསོད་ནམས་ཀྱི་ཚོགས་མི་ཟད་པ་ལ་ཡང་མཁས་པ་དང ། སྐྱེ་བ་མེད་པར་ཡང་རབ་ཏུ་རྟོགས་ལ་བསམ་བཞིན་དུ་སྐྱེ་བ་ལ་ཡང་མཁས་པ་དང ། སེམས་ཅན་ཡང་མེད་ལ། སེམས་ཅན་ཡོངས་སུ་སྨིན་པར་བྱེད་པ་ལ་ཡང་མཁས་པ་དང ། ཆོས་ཐམས་ཅད་དབེན་པར་ཡང་ཤེས་ལ་དམ་པའི་ཆོས་ཡོངས་སུ་གཟུང་བ་ལ་ཡང་མཁས་པ་དང ། སངས་རྒྱས་ཀྱི་ཞིང་ཐམས་ཅད་ནམ་མཁའི་རང་བཞིན་དུ་ཡང་ཤེས་ལ་སངས་རྒྱས་ཀྱི་ཞིང་ཡོངས་སུ་སྦྱོང་བ་ལ་ཡང་མཁས་པ་དང ། སངས་རྒྱས་ཐམས་ཅད་ཆོས་ཀྱི་སྐུ་ཡིན་པར་ཤེས་ལ་མཚན་དང་དཔེ་བྱད་བཟང་པོའི་རྒྱན་རྣམ་པར་བསྒྲུབ་པ་ཡོངས་སུ་ཚོལ་བ་ལ་ཡང་མཁས་པ་དང ། མངོན་པར་འདུ་བྱེད་པ་མེད་པར་ཡང་ཤེས་ལ་དགེ་བའི་རྩ་བ་ཐམས་ཅད་མངོན་པར་འདུ་བྱ་བའི་རྒྱུན་མི་གཅོད་པ་ལ་ཡང་མཁས་པ་དང ། འདུས་བྱས་ཀྱི་ཆོས་ཀྱང་ཡོངས་སུ་སྦྱོང་ལ་དོན་ཉུང་ཞིང་བྱ་བ་ཉུང་བ་དང ། སེམས་ཅན་ཐམས་ཅད་ཀྱི་ཅི་བྱའོ་ཅོག་ལ་ཡང་མཁས་ལ་ལུས་དང་སེམས་དབེན་པར་དགའ་བ་ཡང་ཤེས་པ་དང ། ཆོས་བསྟན་པ་ཡང་མི་འདོར་ལ་སྨྲ་བ་ལ་སྨད་པ་ལ་མཁས་པ་དང ། བསམ་གཏན་ཡང་བསྐྱེད་
287a
༄#། །ལ་བསམ་གཏན་གྱི་རོ་མྱོང་བར་ཡང་མི་བྱེད་པ་དང ། ཆོས་ཟབ་མོ་རྟོགས་པ་ཡང་ཤེས་ལ་སེམས་ཅན་གྱི་སྤྱོད་པ་སྣ་ཚོགས་ཀྱི་རྗེས་སུ་ཡང་འཇུག་ཅིང་གཏམ་ཡང་དག་པར་སྟོན་པ་ལ་ཡང་མཁས་པ་དང ། འབྱུང་བ་མེད་པར་ཡང་ཤེས་ལ་བསམ་བཞིན་དུ་སྲིད་པ་ཡང་ཡོངས་སུ་འཛིན་པ་དང ། ལྷག་མཐོང་ཡང་ཤེས་ལ་འབྲས་བུ་ཐོབ་པར་མི་བྱེད་པ་ལ་ཡང་མཁས་པ་དང ། ཉན་ཐོས་དང ། རང་སངས་རྒྱས་ཀྱི་ཡུལ་ཡང་ཡིན་ལ་དེ་བཞིན་གཤེགས་པའི་རྣམ་པར་གྲོལ་བའི་འདོད་པའི་རྒྱུན་མི་གཅོད་པ་ལ་ཡང་མཁས་པ་དང ། བྱང་ཆུབ་སེམས་དཔའི་སྤྱོད་པ་མི་འདོར་བ་ཡང་ཤེས་ལ་སངས་རྒྱས་ཀྱི་ཡུལ་ལ་བལྟ་བ་ལ་ཡང་མཁས་པ་སྟེ།་རིགས་ཀྱི་བུ། འདི་ནི་བྱང་ཆུབ་སེམས་དཔའ་རྣམས་ཀྱི་རང་གི་སྤྱོད་ཡུལ་ལོ། །རྒྱལ་པོ་ཆེན་པོ། དེ་ལྟར་ན་བྱང་ཆུབ་སེམས་དཔའ་དཔའ་སྟོབས་དེས། བཅོམ་ལྡན་འདས་དེ་བཞིན་གཤེགས་པ་རྣམ་པར་ཞི་སྤྱོད་ལས་སྤྱོད་ཡུལ་ཡོངས་སུ་དག་པ་བསྟན་པ་འདི་ཐོས་ནས་ངོ་མཚར་དུ་གྱུར་ཏེ། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པས་བྱང་ཆུབ་སེམས་དཔའ་རྣམས་ཀྱི་རང་གི་སྤྱོད་ཡུལ་ཡོངས་སུ་དག་པ་བསྟན་པ་འདི་ལེགས་པར་གསུངས་
287b
པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པའི་དོན་བདག་གིས་འཚལ་བ་དང་བདག་སེམས་པ་ལྟར་ན། བྱང་ཆུབ་སེམས་དཔའ་ཐབས་ལ་མཁས་པའི་རང་གི་སྤྱོད་ཡུལ་ནི་ཆོས་ཐམས་ཅད་ལགས་པ་སྙམ་བགྱིད་དོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། གནས་གང་ལགས་པ་དང ། གཟུགས་སྣང་བ་ཐམས་ཅད་ལ་མི་སྒྲིབ་པ་དང ། ནམ་མཁའི་སྤྱོད་ཡུལ་ལ་སྒྲིབ་པ་མ་མཆིས་པས་གཟུགས་སུ་གདའ་བ་ཐམས་ཅད་ནི་ནམ་མཁའི་སྤྱོད་ཡུལ་ལགས་སོ། །བཅོམ་ལྡན་འདས། དེ་བཞིན་དུ་མངོན་པར་རྫོགས་པར་འཚང་རྒྱ་བས་བྱང་ཆུབ་སེམས་དཔའ་ཐབས་ལ་མཁས་པའི་སྤྱོད་ཡུལ་ནི་ཆོས་ཐམས་ཅད་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། གནོད་པ་མ་མཆིས་པའི་སླད་དུ་གཟུགས་སུ་གདའ་བ་ཐམས་ཅད་ནི་ནམ་མཁའི་སྤྱོད་ཡུལ་ལགས་ཏེ། དུག་གི་ཤིང་ལྗོན་པའམ། སྨན་གྱི་ཤིང་ལྗོན་པའམ། ཚེར་མ་ཅན་གྱི་ཤིང་ལྗོན་པའམ། མེ་ཏོག་གི་ཤིང་ལྗོན་པའམ། འབྲས་བུའི་ཤིང་ལྗོན་པའམ། སྤོས་ཀྱི་ཤིང་ལྗོན་པ་གང་ལགས་པ་དེ་དག་ཐམས་ཅད་ནི་ནམ་མཁའ་ལས་རྣམ་པར་འཕེལ་ཡང་ནམ་མཁའ་ནི་དེ་དག་གིས་ཀུན་ནས་ཉོན་མོངས་པར་མི་འགྱུར། རྣམ་པར་དག་པར་ཡང་མི་འགྱུར། རྗེས་སུ་ཆགས་པར་ཡང་མི་འགྱུར། ཁོང་ཁྲོ་བར་ཡང་མི་འགྱུར་ལགས་
288a
༄#། །སོ། །བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའ་ཐབས་ལ་མཁས་པ་ཤེས་རབ་ལས་ངེས་པར་བྱུང་བའི་རང་གི་སྤྱོད་ཡུལ་ནི་ཆོས་ཐམས་ཅད་ལགས་ཏེ། སོ་སོའི་སྐྱེ་བོའི་ཆོས་གང་དག་ལགས་པ་དང ། སློབ་པའི་ཆོས་དང ། མི་སློབ་པའི་ཆོས་དང ། རང་སངས་རྒྱས་ཀྱི་ཆོས་དང ། བྱང་ཆུབ་སེམས་དཔའི་ཆོས་གང་དག་ལགས་པ་དང ། དེ་བཞིན་གཤེགས་པའི་ཆོས་གང་དག་ལགས་པ་རྣམས་སོ། །དེ་ཅིའི་སླད་དུ་ཞེ་ན། དེ་དག་ཐམས་ཅད་ནི་དེས་མངོན་པར་རྫོགས་པར་རྟོགས་པར་བགྱི་བ་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། ཞུགས་ནི་རྩཝའམ་ནགས་ཚལ་གང་ཡང་རུང་སྟེ་དེ་ལ་མི་འབྲོས་ཀྱི། དེ་དག་ཐམས་ཅད་ནི་མེ་སྒྲོན་གསལ་བར་འབར་བར་བགྱིད་པས་ཕན་པར་འགྱུར་བ་ལགས་སོ། །བཅོམ་ལྡན་འདས། དེ་བཞིན་དུ་ཤེས་རབ་ཀྱི་མེ་སྒྲོན་འབར་བར་བགྱིད་པས་ཆོས་ཐམས་ཅད་ནི་བྱང་ཆུབ་སེམས་དཔའི་རང་གི་སྤྱོད་ཡུལ་བ་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། ཚན་པོ་ཆེའི་ལུས་ནི་ཞུགས་ཀྱིས་མི་འཚིག་།མཚོན་གྱིས་མི་ཁུམས། དུག་གིས་མི་འགུམ་སྟེ། དེ་ལ་ཕ་རོལ་གྱིས་གནོད་པས་མི་ཚུགས་སོ། །བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའི་ཤེས་རབ་དང་ཡེ་ཤེས་ཀྱང ། ཉན་ཐོས་དང་འདྲིས་
288b
པར་བགྱིད་པ་དང ། རང་སངས་རྒྱས་དང་འདྲིས་པར་བགྱིད་པ་དང ། ཉོན་མོངས་པ་དང་འདྲིས་པར་བགྱིད་པས་ཞི་བར་བགྱིད་མི་ནུས་ཏེ། དེ་ཇི་ལྟ་ཇི་ལྟར་འདྲིས་པར་བགྱིད་པ་དེ་ལྟ་དེ་ལྟར་བྱང་ཆུབ་སེམས་དཔའ་ལྷག་མཐོང་ལ་བརྩོན་པ་ཤེས་རབ་གསལ་བར་འགྱུར་རོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། ནོར་བུ་རིན་པོ་ཆེ་ཆབ་དང་བར་བགྱིད་པ་ནི་རྙོག་པ་ཐམས་ཅད་དང་བར་བགྱིད་དོ། །བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའི་ཤེས་རབ་རིན་པོ་ཆེ་ཡང་སེམས་ཅན་རྣམས་ཀྱི་ཉོན་མོངས་པའི་དྲི་མ་ཐམས་ཅད་དང་བར་བགྱིད་དོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། སྨན་གྱི་རིགས་འབྲལ་བྱེད་ཅེས་བགྱི་བ་དེ་ནི་དུག་དང་ལྷན་ཅིག་ཏུའང་མི་གནས་ལ། དུག་ཐམས་ཅད་ཀྱང་ཞི་བར་བགྱིད་དོ། །བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའི་ཐབས་དང་ཤེས་རབ་བསྒོམ་པ་ཡང་སེམས་ཅན་གྱི་ཉོན་མོངས་པའམ། རང་གི་ཉོན་མོངས་པ་རྣམས་དང་ལྷན་ཅིག་ཏུ་མི་གནས་ཤིང ། སེམས་ཅན་རྣམས་ཀྱི་ཉོན་མོངས་པ་ཐམས་ཅད་ཀྱང་ཞི་བར་བགྱིད་དེ། བཅོམ་ལྡན་འདས། རྣམ་གྲངས་འདིས་ན་ཆོས་ཐམས་ཅད་བྱང་ཆུབ་སེམས་དཔའི་རང་གི་སྤྱོད་ཡུལ་ལགས་སོ། །རྒྱལ་པོ་ཆེན་པོ། བྱང་ཆུབ་སེམས་དཔའ་དཔའ་སྟོབས་ཀྱིས་དེ་སྐད་བསྟན་པ་ན་སྲོག་ཆགས་བརྒྱད་སྟོང་གིས་བླ་ན་མེད་པ་
289a
༄#། །ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་ཉིས་བརྒྱ་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །རྒྱལ་པོ་ཆེན་པོ། འདི་ཇི་སྙམ་དུ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་རྣམ་པར་ཞི་སྤྱོད་ཀྱི་གསུང་རབ་ལ་བྱང་ཆུབ་སེམས་དཔའ་སྟོབས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་དེ་ལྟར་མི་ལྟ་སྟེ། གསང་བ་པའི་བདག་པོ་ལག་ན་རྡོ་རྗེ་འདི་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་དཔའ་སྟོབས་ཞེས་བྱ་བར་གྱུར་ཏེ། རྒྱལ་པོ་ཆེན་པོ། སྐྱེས་བུ་དམ་པ་འདི་ནི་བརྩོན་འགྲུས་ཀྱི་གོ་ཆ་བརྟན་པོ་འདི་ལྟ་བུ་བགོས་སོ། །དེ་ལྟར་སངས་རྒྱས་མང་པོ་ལ་བསྙེན་བཀུར་བྱས་སོ། །དཔའ་སྟོབས་ཀྱི་ལེའུ་ཞེས་བྱ་སྟེ་ཉི་ཤུ་རྩ་གཅིག་པའོ།། །།དེ་ནས་རྒྱལ་པོ་མ་སྐྱེས་དགྲ་འདི་སྙམ་དུ་སེམས་ཏེ། གསང་བ་པའི་བདག་པོ་ལག་ན་རྡོ་རྗེ་ལག་པ་གཡས་པ་ན་རྡོ་རྗེ་ཐོགས་པ་དེ་ཅི་ལྕི་བ་ཞིག་གམ། འོན་ཏེ་ཡང་བ་ཞིག་།གང་གི་ཕྱིར་ན་གསང་བ་པའི་བདག་པོ་ལག་ན་རྡོ་རྗེ་འདི་སྟོབས་ཀྱི་ཤུགས་ཆེན་པོ་བདོག་པ་ཞེས་བྱ་སྙམ་མོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་རྒྱལ་པོ་མ་སྐྱེས་དགྲའི་སེམས་ཀྱི་རྣམ་པར་རྟོག་པ་སེམས་ཀྱིས་ཤེས་ནས་རྒྱལ་པོ་མ་
289b
སྐྱེས་དགྲ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། རྡོ་རྗེ་འདི་ནི་ལྕི་བ་ཡང་ཡིན་ལ། ཡང་བ་ཡང་ཡིན་ནོ། །སྨྲས་པ། ཅིའི་ཕྱིར་ན་ལྕི་བ་ཡིན་ལ། ཇི་ལྟར་ན་ཡང་བ་ཡང་ཡིན།། སྨྲས་པ། རྒྱལ་པོ་ཆེན་པོ། སེམས་ཅན་ང་རྒྱལ་ཅན་དང ། རྒྱགས་པ་དང ། དྲེགས་པ། སྙེམས་པ་རྣམས་ཡོངས་སུ་འདུལ་བའི་ཕྱིར་ལྕི་བ་ཡིན་ནོ། །སེམས་ཅན་ང་རྒྱལ་མེད་པ་དང ། དྲང་བ་རྣམས་ལ་ནི་ཡང་བ་ཡིན་ནོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ས་ཕྱོགས་དེ་རྡོ་རྗེར་བྱིན་གྱིས་པ་རླབས་ནས་རྡོ་རྗེ་སའི་སྟེང་དུ་བཞག་པ་དང ། དེ་བཞག་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་དྲུག་ཏུ་རབ་ཏུ་གཡོས་སོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ཀྱིས་རྡོ་རྗེ་འདི་སའི་སྟེང་འདི་ནས་ཐེག་ཅིག་།དེ་ནས་རྒྱལ་པོ་མ་སྐྱེས་དགྲས་ཚན་པོ་ཆེ་ཆེན་པོའི་སྟོབས་ཀྱི་ཤུགས་ཆེན་པོ་དང་ལྡན་པས། རྡོ་རྗེ་དེ་སྟོབས་ཀྱི་ཤུགས་ཐམས་ཅད་ཀྱིས་བཏེག་པར་བསྐྱོད་ན། སྐྲའི་རྩེ་མོ་ཆ་ཙམ་ཡང་བ་སྐྱོད་པའམ། བསྒུལ་བ་མ་ནུས་ནས་དེ་ངོ་མཚར་དུ་གྱུར་ཏེ། ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ནི་ཚན་པོ་ཆེན་པོའི་སྟོབས་ཀྱི་ཤུགས་དང་ལྡན་ཏེ། གོ་ཆ་དང ། ཡ་ལད་བ་སྐོན་པའི་
290a
༄#། །གླང་པོ་ཆེ་ཡང་ལག་པ་ཡ་གཅིག་གིས་བདེག་པའི་རྔོ་ཐོག་ན། བདག་གིས་རྡོ་རྗེ་འདི་ལྟར་ཆུང་བ་འདི་བསྐྱོད་པའམ། བསྒུལ་བའི་རྡོ་ཡང་མ་ཐོག་ན་གདེག་པར་ལྟ་སྨོས་ཀྱང་ཅི་འཚལ་ཏེ། འདི་ལ་རྒྱུ་ཅི་ཞིག་མཆིས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། རྡོ་རྗེ་འདི་ནི་ལྕིའི། འདི་ལ་ཁྱོད་ཡི་མ་ཆད་ཅིག་།དེ་ནས་རྒྱལ་པོ་མ་སྐྱེས་དགྲས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀོའུ་ཤི་ཀ་ཁྱོད་རྡོ་རྗེ་འཆང་བ་ཞེས་བྱ་ན་རྡོ་རྗེ་འདི་སའི་སྟེང་འདི་ནས་ཐེག་ཅིག་།དེ་ནས་ལྷའི་དབང་པོ་བརྒྱ་བྱིན་གྱི་ས་རང་གི་སྟོབས་ཀྱི་ཤུགས་དང ། རྫུ་འཕྲུལ་གྱི་སྟོབས་དང ། སྟོབས་ཀྱི་ཤུགས་ཐམས་ཅད་བསྟན་ཀྱང་རྡོ་རྗེ་དེ་བསྐྱོད་པའམ། བསྒུལ་བར་མ་ནུས་སོ། །དེ་ནས་ལྷའི་དབང་པོ་བརྒྱ་བྱིན་ངོ་མཚར་དུ་གྱུར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གང་གི་ཚེ་ལྷ་མ་ཡིན་དང་གཡུལ་འགྱེད་པ་དེའི་ཚེ། ལག་པ་གཡས་པས་ལྷ་མ་ཡིན་གྱི་བདག་པོ་ཐགས་བཟང་རིས་ཀྱི་ཤིང་རྟ་དཔག་ཚད་བདུན་བརྒྱ་པ་དྲག་ཏུ་མཆི་བ་ཡང་འཛིན་པར་རྔོ་ཐོག་ན། བདག་གིས་རྡོ་རྗེ་ཆུང་དུ་འདི་བསྐྱོད་པའམ། བསྒུལ་བའི་རྔོ་མི་ཐོག་པ་འདི། བཅོམ་ལྡན་འདས། ཅི་ལགས། སངས་རྒྱས་ཀྱི་བྱིན་གྱིས་བརླབས་
290b
བ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཀོའུ་ཤི་ཀ་།རྡོ་རྗེ་འདི་ནི་ལྕི་སྟེ། འདི་ལ་ངའི་བྱིན་གྱིས་བརླབས་པ་མ་ཡིན་པར་རིག་པར་བྱའོ། །ཀོའུ་ཤི་ཀ་།འདི་ཇི་སྙམ་དུ་སེམས། རིའི་རྒྱལ་པོ་རི་རབ་ལྕི་བ་ཡིན་ནམ། གསོལ་པ། བཅོམ་ལྡན་འདས། རིའི་རྒྱལ་པོ་རི་རབ་ཇི་ཙམ་དུ་ལྕི་བ་ནི་དཔེར་བགྱི་བར་ཡང་སླ་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀོའུ་ཤི་ཀ་།རྡོ་རྗེ་འདི་ནི་ལྕི་བ་སྟེ། ཀོའུ་ཤི་ཀ་།གལ་ཏེ་གསང་བ་པའི་བདག་པོ་ལག་ན་རྡོ་རྗེས་རྡོ་རྗེ་འདི་རྡོ་རྗེའི་རང་བཞིན་གྱི་ཁོར་ཡུག་གི་རི་ལ་བསྣུན་ན། དེ་ཡང ། དཔེར་ན། ཕུར་མ་སྦར་གང་གཏོར་བ་བཞིན་དུ་རྣམ་པར་གཏོར་ཏེ། ཀོའུ་ཤི་ཀ་།རྡོ་རྗེ་འདིའི་སྟོབས་ཀྱི་ཤུགས་ནི་དེ་ཙམ་མོ། །དེ་ནས་ལྷའི་དབང་པོ་བརྒྱ་བྱིན་གྱིས་ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མོའུ་འགལ་གྱི་བུ་ཆེན་པོ་ཁྱོད་བཅོམ་ལྡན་འདས་ཀྱི་ཉན་ཐོས་རྣམས་ཀྱི་ནང་ན་རྫུ་འཕྲུལ་དང་ལྡན་པའི་མཆོག་ཏུ་བསྟན་པ་ཡིན་ན། རྡོ་རྗེ་འདི་སའི་སྟེང་འདི་ནས་ཐེག་ཅིག་།དེ་ནས་ཚེ་དང་ལྡན་པ་མོའུ་འགལ་གྱི་བུ་ཆེན་པོས་འདི་སྙམ་དུ་བསམས་ཏེ། གལ་ཏེ་བདག་གིས་ལྷ་དང་བཅས་པའི་འཇིག་རྟེན་འདིའི་མདུན་དུ། རྡོ་རྗེ་འདི་གདེག་པར་མ་ནུས་ན་ནི་བདག་ལ་དབང་ཟ་བར་འགྱུར་རོ་སྙམ་ནས། དེས་དེ་འདྲ་བའི་སྟོབས་ཀྱི་ཤུགས་
291a
༄#། །ཀྱིས་རྡོ་རྗེ་དེ་ལ་བཟུང་བ་དང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས། རབ་ཏུ་གཡོས་ཏེ། ཆུ་ཡང་གནམ་དུ་བརྒལ་ཞིང ། རྒྱ་མཚོ་ཐམས་ཅད་འཁྲུགས་ཀྱང་རྡོ་རྗེ་དེ་བསྐྱོད་པའམ། བསྒུལ་བར་མ་ནུས་སོ། །དེ་ནས་ཚེ་དང་ལྡན་པ་མོའུ་འགལ་གྱི་བུ་ཆེན་པོ་ངོ་མཚར་དུ་གྱུར་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་བཅོམ་ལྡན་འདས་ཀྱིས་ཉན་ཐོས་རྣམས་ཀྱི་ནང་ན་རྫུ་འཕྲུལ་དང་ལྡན་པའི་མཆོག་ཏུ་བསྟན་པ་ལགས་ཏེ། བཅོམ་ལྡན་འདས། བདག་དེ་ལྟར་རྫུ་འཕྲུལ་ཆེ་ཞིང་དེ་ལྟར་དབང་ཆེ་བར་གྲགས་ལ། དེ་ལྟར་མཐུ་ཆེ་བ་ལགས་ཏེ།་བཅོམ་ལྡན་འདས། བདག་གང་གི་ཚེ་འཚལ་ན་རྒྱ་མཚོ་ཆེན་པོ་བཞིའི་ཆབ་ཀྱི་ཕུང་པོ་ལག་མཐིལ་གཅིག་ཏུ་འཇོག་གོ་།བཅོམ་ལྡན་འདས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང ། དཔེར་བགྱི་ན། མི་ལ་ལ་ཞིག་གིས་ཀར་ཤ་པ་ནེ་གཅིག་མཛུབ་མོའི་རྩེ་མོས་སྒྲེ་བཟློག་པ་དེ་བཞིན་དུ་བདག་གིས་སྒྲེ་བཟློག་གོ་།བཅོམ་ལྡན་འདས། ཉི་མ་དང ། ཟླ་བ་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་མཆི་བ་ཡང་བདག་གིས་ཐོགས་པར་བགྱིད་དོ། །རིའི་རྒྱལ་པོ་རི་རབ་ཀྱང་ལག་པ་
291b
ཡ་གཅིག་གིས་བླངས་ཏེ་ཚངས་པའི་འཇིག་རྟེན་གྱི་བར་དུ་འཕེན་ཏོ། །བཅོམ་ལྡན་འདས། བདག་གིས་ཀླུའི་རྒྱལ་པོ་དགའ་བོ་དང ། ཉེ་དགའ་བོ་དེ་གཉིས་ཀྱང་བཏུལ་ཏོ། །བཅོམ་ལྡན་འདས། བདག་འཇིག་རྟེན་གྱི་ཁམས་འོད་ཟེར་ཅན་དུ་ཡང་མཆིས། བདག་གིས་རི་རབ་ཙམ་གྱི་ཁམས་དེ་དག་ཀྱང་འཚལ་འཚལ་ན། བཅོམ་ལྡན་འདས། བདག་གིས་རྡོ་རྗེ་འདི་ལྟར་ཆུང་བ་འདི་བསྐྱོད་པའམ། བསྒུལ་བའི་རྔོ་ཡང་མ་ཐོག་པ་འདི། བཅོམ་ལྡན་འདས། བདག་རྫུ་འཕྲུལ་གྱི་སྟོབས་དེ་ལས་ཡོངས་སུ་ཉམས་པའམ་གཅིག་ཏུ་མ་གྱུར་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། མོའུ་འགལ་གྱི་བུ་ཆེན་པོ་ཁྱོད་རྫུ་འཕྲུལ་གྱི་སྟོབས་དེ་ལས་ཡོངས་སུ་ཉམས་པ་ནི་མེད་མོད་ཀྱི། བྱང་ཆུབ་སེམས་དཔའི་སྟོབས་ཀྱི་བྱིན་གྱིས་བརླབས་འདི་ཉན་ཐོས་དང ། རང་སངས་རྒྱས་ཐམས་ཅད་ཀྱིས་ཀྱང་རྣམ་པར་དཀྲུག་པར་མི་ནུས་ན་སེམས་ཅན་གཞན་དག་གིས་ལྟ་སྨོས་ཀྱང་ཅི་དགོས། མོའུ་འགལ་གྱི་བུ།་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ན་རིའི་རྒྱལ་པོ་རི་རབ་ཡོད་པ་རྣམས་ནི་བསྐྱོད་པའམ། བསྒུལ་བར་ནུས་ཀྱི། རྡོ་རྗེ་འདི་ནི་ས་ཕྱོགས་འདི་ནས་བསྐྱོད་པའམ། བསྒུལ་བར་མི་ནུས་སོ། །ཚེ་དང་ལྡན་པ་མོའུ་འགལ་གྱི་བུ་ཆེན་པོས་གསོལ་པ། བཅོམ་ལྡན་འདས། འདི་ལྟར་རྡོ་རྗེ་འདི་འཆང་བས་གསང་བ་པའི་བདག་པོ་ལག་ན་རྡོ་རྗེ་ནི་སྟོབས་
292a
༄#། །ཆེ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། མོའུ་འགལ་གྱི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རི་རབ་ཇི་སྙེད་ཡོད་པ་དེ་དག་རི་གཅིག་ཏུ་གྱུར་ཀྱང་དེ་ནི་གདེག་པར་ནུས་ཀྱི་རྡོ་རྗེ་འདི་ནི་གདེག་པར་མི་ནུས་སོ། །དེ་ནས་གནས་བརྟན་མོའུ་འགལ་གྱི་བུ་ཆེན་པོ་ངོ་མཚར་དུ་གྱུར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་རྡོ་རྗེ་འདི་འཆང་བས་གསང་བ་པའི་བདག་པོ་ལག་ན་རྡོ་རྗེ་འདི་ནི་སྟོབས་ཀྱི་ཤུགས་ཆེན་པོ་དང་ལྡན་པ་ལགས་ཏེ་ངོ་མཚར་ཏོ། །བཅོམ་ལྡན་འདས། ཅི་ལགས། གསང་བ་པའི་བདག་པོ་ལག་ན་རྡོ་རྗེའི་སྟོབས་དེ་ཕ་མ་ལས་གྱུར་པ་ལགས་སམ། འོན་ཏེ་རྫུ་འཕྲུལ་གྱི་སྟོབས་ལགས། བཅོམ་ལྡན་འདས་ཀྱིས་བཀའ་སྩལ་པ། མོའུ་འགལ་གྱི་བུ། ཕ་མ་ལས་གྱུར་པའི་སྟོབས་དེ་ནི་གང་ཅི་ཡང་རུང་སྟེ། འཇུག་པ་ཙམ་དུ་མིང་བསྟན་པར་ཟད་དོ། ། གལ་ཏེ་བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་གྱི་སྟོབས་དེ་མ་ལུས་པར་བསྟན་ན།་ལྷ་དང་བཅས་པའི་འཇིག་རྟེན་མྱོས་མྱོས་པོར་འགྱུར་རོ། །དེ་ནས་བཅོམ་ལྡན་འདས་ཀྱིས་གླང་པོ་ཆེའི་བལྟ་སྟངས་ཀྱིས་ཕྱོགས་ཐམས་ཅད་ཀུན་དུ་གཟིགས་ཏེ། གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་
292b
བདག་པོ་ཁྱོད་ཀྱིས་རྡོ་རྗེ་འདི་སའི་སྟེང་འདི་ནས་ཐེག་ཅིག་།དེ་ནས་གསང་བ་པའི་བདག་པོ་ལག་ན་རྡོ་རྗེ་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཡོས་པར་བྱས་ནས་སའི་སྟེང་དེ་ནས་རྡོ་རྗེ་དེ་ལག་པ་གཡོན་པས་བླངས་ཏེ་སྟེང་གི་པར་སྣང་དུ་འཕངས་ནས་དེས་དེ་བར་སྣང་ལ་ལན་བདུན་བསྐོར་ཏེ་ལག་པ་གཡས་པར་བཞག་གོ་།དེ་ནས་ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ཏེ། ཐལ་མོ་སྦྱར་ནས་གསང་བ་པའི་བདག་པོ་ལག་ན་རྡོ་རྗེ་ལ་ཕྱག་འཚལ་ཏེ། འདི་ལྟར་རྡོ་རྗེ་འདི་འཆང་བས་གསང་བ་བའི་བདག་པོ་ལག་ན་རྡོ་རྗེ་ཇི་ཙམ་དུ་སྟོབས་ཀྱི་ཤུགས་དང་ལྡན་པ་ནི་ངོ་མཚར་ཏེ། །བཅོམ་ལྡན་འདས། སེམས་ཅན་ཐམས་ཅད་ཀྱང་འདི་ལྟ་བུའི་སྟོབས་དང་ལྡན་པར་གྱུར་ཅིག་ཅེས་སྨྲས་སོ། །དེ་ནས་བཅོམ་ལྡན་འདས་ལ་རྒྱལ་པོ་མ་སྐྱེས་དགྲས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་ཆོས་དུ་དང་ལྡན་ན་སྟོབས་འདི་ལྟ་བུ་ཐོབ་བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། བྱང་ཆུབ་སེམས་དཔའ་ཆོས་བཅུ་དང་ལྡན་ན་སྟོབས་འདི་ལྟ་བུ་ཐོབ་སྟེ། བཅུ་གང་ཞེ་ན། རྒྱལ་པོ་ཆེན་པོ་འདི་ལ་བྱང་ཆུབ་སེམས་དཔའ་ལུས་དང་སྲོག་ནི་ཡོངས་སུ་གཏོང་གི་།དམ་པའི་ཆོས་ནི་ཡོངས་སུ་མི་གཏོང་བ་དང ། སེམས་ཅན་ཐམས་ཅད་ལ་འདུད་ཅིང་ང་རྒྱལ་འཕེལ་བར་མི་བྱེད་པ་
293a
༄#། །དང ། སེམས་ཅན་མཐུ་ཆུང་བ་རྣམས་ལ་བཟོད་ཅིང་ཁོང་ཁྲོ་བར་མི་བྱེད་པ་དང ། སེམས་ཅན་བཀྲེས་པ་རྣམས་ལ་ཁ་ཟས་བཟང་པོ་མཆོག་སྦྱིན་པ་དང ། སེམས་ཅན་འཇིགས་པ་རྣམས་ལ་མི་འཇིགས་པ་སྦྱིན་པ་དང ། སེམས་ཅན་ནད་པ་རྣམས་ལ་ཡང་དག་པའི་གསོ་བར་བྱ་བར་སྤྲོ་བ་དང ། སེམས་ཅན་དབུལ་པོ་རྣམས་ལ་ལོངས་སྤྱོད་དག་གིས་ཚིམ་པར་བྱེད་པ་དང ། དེ་བཞིན་གཤེགས་པའི་མཆོད་རྟེན་ལ་རྡོ་ཐལ་གྱིས་སྐུད་པ་དང ། སེམས་ཅན་རྣམས་ལ་ཀུན་དུ་དགའ་བར་འགྱུར་བའི་ཚིག་སྒྲོགས་པ་དང ། སེམས་ཅན་དབུལ་པོ་སྡུག་བསྔལ་བ་ངལ་བ་ཆད་པ་རྣམས་ཀྱི་ཁུར་ཁྱེར་བ་སྟེ། རྒྱལ་པོ་ཆེན་པོ། བྱང་ཆུབ་སེམས་དཔའ་ཆོས་བཅུ་པོ་དེ་དག་དང་ལྡན་ན་སྟོབས་འདི་ལྟ་བུ་ཐོབ་བོ། །གསོལ་པ། བཅོམ་ལྡན་འདས། ཇི་ལྟར་ན་བྱང་ཆུབ་སེམས་དཔའ་ཅང་ཤེས་པ་ལ་གནས་ཤིང ། ཅང་ཤེས་པའི་འགྲོ་བར་འགྲོ་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། བྱང་ཆུབ་སེམས་དཔའ་ཆོས་བརྒྱད་དང་ལྡན་ན་ཅང་ཤེས་པར་འགྱུར་ཞིང་ཅང་ཤེས་པའི་འགྲོ་བར་འགྲོ་སྟེ། བརྒྱད་གང་ཞེ་ན། འདི་ལྟ་སྟེ། བཀའ་བློ་བདེ་བ་དང ། དྲང་བ་དང ། མཉེན་པ་དང ། ངེས་པ་དང ། གཡོ་མེད་པ་དང ། སྒྱུ་མེད་པ་དང ། ཕྲག་དོག་མེད་པ་དང །
293b
སེམས་ལས་སུ་རུང་བ་སྟེ། རྒྱལ་པོ་ཆེན་པོ། བྱང་ཆུབ་སེམས་དཔའ་ཆོས་བརྒྱད་པོ་དེ་དག་དང་ལྡན་ན་ཅང་ཤེས་པར་འགྱུར་ཞིང་ཅང་ཤེས་པའི་འགྲོ་བར་འགྲོའོ། །གསོལ་པ། བཅོམ་ལྡན་འདས། བྱང་ཆུབ་སེམས་དཔའ་རྣམས་ཀྱི་ཅང་ཤེས་ཀྱི་འགྲོ་བ་ནི་དུ་ཞིག་མཆིས། བཅོམ་ལྡན་འདས་ཀྱིས་བཀའ་བསྩལ་པ། རྒྱལ་པོ་ཆེན་པོ། བྱང་ཆུབ་སེམས་དཔའ་རྣམས་ཀྱི་ཅང་ཤེས་ཀྱི་འགྲོ་བ་བཞི་སྟེ། བཞི་གང་ཞེ་ན། གང་གི་ཚེ་མིའི་འཇིག་རྟེན་དུ་སྐྱེས་པའི་ཚེ། འཁོར་ལོས་སྒྱུར་བའི་རྒྱལ་པོར་འགྱུར་ཏེ། དེར་ཡང་སངས་རྒྱས་འབྱུང་བ་མཉེས་པར་བྱེད་པ་དང ། ལྷའི་དབང་པོ་བརྒྱ་བྱིན་དུ་འགྱུར་ཏེ། དེར་ཡང་སངས་རྒྱས་འབྱུང་བ་མཉེས་པ་བྱེད་པ་དང ། མི་མཇེད་ཀྱི་བདག་པོ་ཚངས་པར་འགྱུར་ཏེ། དེར་ཡང་སངས་རྒྱས་འབྱུང་བ་མཉེས་པར་བྱེད་པ་དང ། ཁྱིམ་བདག་ཚོང་ང་དཔོན་དུ་འགྱུར་ཏེ། དེར་ཡང་སངས་རྒྱས་འབྱུང་བ་མཉེས་པར་བྱེད་པ་སྟེ། རྒྱལ་པོ་ཆེན་པོ། བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཅང་ཤེས་ཀྱི་འགྲོ་བའོ། །རྒྱལ་པོ་མ་སྐྱེས་དགྲས་གསོལ་པ། བཅོམ་ལྡན་འདས། དད་པའི་རྒྱུ་མཐུན་པ་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དད་པའི་རྒྱུ་མཐུན་པ་ནི་དགེ་བའི་བཤེས་གཉེན་ནོ། །གསོལ་པ། བཅོམ་ལྡན་འདས། སྦྱིན་པའི་རྒྱུ་མཐུན་པ་ཅི་ལགས། བཀའ་སྩལ་
294a
༄#། །པ།་རྒྱལ་པོ་ཆེན་པོ། སྦྱིན་པའི་རྒྱུ་མཐུན་པ་ནི་ལོངས་སྤྱོད་དོ། །གསོལ་པ། བཅོམ་ལྡན་འདས། ཐོས་པའི་རྒྱུ་མཐུན་པ་ཅི་ལགས། བཀའ་སྩལ་པ།་རྒྱལ་པོ་ཆེན་པོ། ཐོས་པའི་རྒྱུ་མཐུན་པ་ནི་ཤེས་རབ་བོ། །གསོལ་པ། བཅོམ་ལྡན་འདས། ཚུལ་ཁྲིམས་ཀྱི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། ཚུལ་ཁྲིམས་ཀྱི་རྒྱུ་མཐུན་པ་ནི་བདེ་འགྲོ་ཐམས་ཅད་དུ་འགྲོ་བའོ། །གསོལ་པ། བཅོམ་ལྡན་འདས། བཟོད་པའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། བཟོད་པའི་རྒྱུ་མཐུན་པ་ནི་སེམས་ཅན་རྗེས་སུ་བསྲུང་བའོ། །གསོལ་པ། བཅོམ་ལྡན་འདས། བརྩོན་འགྲུས་ཀྱི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། བརྩོན་འགྲུས་ཀྱི་རྒྱུ་མཐུན་པ་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་པའོ། །གསོལ་པ། བཅོམ་ལྡན་འདས། བསམ་གཏན་གྱི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། བསམ་གཏན་གྱི་རྒྱུ་མཐུན་པ་ནི་ཉེ་བར་ཞི་བའོ། །གསོལ་པ། བཅོམ་ལྡན་འདས། ཤེས་རབ་ཀྱི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། ཤེས་རབ་ཀྱི་རྒྱུ་མཐུན་པ་ནི་ཉོན་མོངས་པ་ཐམས་ཅད་སེལ་བའོ། །གསོལ་པ། བཅོམ་ལྡན་འདས། ཆོས་ཉན་པའི་རྒྱུ་མཐུན་པ་ཅི་ལགས། བཀའ་སྩལ་པ།
294b
རྒྱལ་པོ་ཆེན་པོ། ཆོས་ཉན་པའི་རྒྱུ་མཐུན་པ་ནི་ཐེ་ཚོམ་སྤོང་བའོ། །གསོལ་པ། བཅོམ་ལྡན་འདས། ཆོས་ཡོངས་སུ་འདྲི་བའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། ཆོས་ཡོངས་སུ་འདྲི་བའི་རྒྱུ་མཐུན་པ་ནི་སོམ་ཉི་མེད་པའོ། །གསོལ་པ། བཅོམ་ལྡན་འདས། དབེན་པར་གནས་པའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། དབེན་པར་གནས་པའི་རྒྱུ་མཐུན་པ་ནི་བསམ་གཏན་དང ། མངོན་པར་ཤེས་པ་ཐོབ་པའོ། །གསོལ་པ། བཅོམ་ལྡན་འདས། བསྒོམ་པའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། བསྒོམ་པའི་རྒྱུ་མཐུན་པ་ནི་འབྲལ་བའོ། །གསོལ་པ། བཅོམ་ལྡན་འདས། མི་རྟག་པ་ཐོས་པའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། མི་རྟག་པ་ཐོས་པའི་རྒྱུ་མཐུན་པ་ནི་ཡོངས་སུ་འཛིན་པར་འདོར་བའོ། །གསོལ་པ། བཅོམ་ལྡན་འདས། སྡུག་བསྔལ་ཐོས་པའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། སྡུག་བསྔལ་ཐོས་པའི་རྒྱུ་མཐུན་པ་ནི་ཉེ་བར་ལེན་པ་མེད་པའོ། །གསོལ་པ། བཅོམ་ལྡན་འདས། བདག་མེད་པ་ཐོས་པའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། བདག་མེད་པ་ཐོས་པའི་རྒྱུ་མཐུན་པ་ནི་ངར་འཛིན་པ་དང ། ང་ཡིར་འཛིན་པ་འགོག་པའོ། །གསོལ་པ། བཅོམ་ལྡན་འདས། ཞི་བ་ཐོས་པའི་རྒྱུ་མཐུན་པ་ཅི་
295a
༄#། །ལགས། བཀའ་སྩལ་པ། རྒྱལ་པོ་ཆེན་པོ། ཞི་བ་ཐོས་པའི་རྒྱུ་མཐུན་པ་ནི་ཉེ་བར་ཞི་བའོ། །གསོལ་པ། བཅོམ་ལྡན་འདས། ཚུལ་བཞིན་ཡིད་ལ་བགྱིད་པའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། ཚུལ་བཞིན་ཡིད་ལ་བྱེད་པའི་རྒྱུ་མཐུན་པ་ནི་འཕགས་པའི་ཡང་དག་པའི་ལྟ་བ་སྐྱེ་བའོ། །གསོལ་པ།་བཅོམ་ལྡན་འདས། ལུས་དང ། སེམས་དབེན་པའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། ལུས་དང་སེམས་དབེན་པའི་རྒྱུ་མཐུན་པ་ནི་བསམ་གཏན་དང ། མངོན་པར་ཤེས་པ་སྐྱེ་བའོ། །གསོལ་པ། བཅོམ་ལྡན་འདས། ལམ་གྱི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། ལམ་གྱི་རྒྱུ་མཐུན་པ་ནི་འབྲས་བུ་མངོན་པར་རྟོགས་པའོ། །གསོལ་པ། བཅོམ་ལྡན་འདས། མོས་པའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། མོས་པའི་རྒྱུ་མཐུན་པ་ནི་རྣམ་པར་གྲོལ་བ་ཡོངས་སུ་རྫོགས་པར་བྱེད་པའོ། །གསོལ་པ། བཅོམ་ལྡན་འདས། སངས་རྒྱས་འབྱུང་བའི་རྒྱུ་མཐུན་པ་ཅི་ལགས། བཀའ་སྩལ་པ། རྒྱལ་པོ་ཆེན་པོ། སངས་རྒྱས་འབྱུང་བའི་རྒྱུ་མཐུན་པ་ནི་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་འཐོབ་པའོ། །གསོལ་པ། བཅོམ་ལྡན་འདས། སངས་རྒྱས་འབྱུང་བ་ཇི་ལྟ་བུ་ལགས། བཀའ་
295b
སྩལ་པ། རྒྱལ་པོ་ཆེན་པོ། བྱང་ཆུབ་ཏུ་སེམས་བསྐྱེད་པ་ཇི་ལྟ་བ་བཞིན་ནོ། །གསོལ་པ། བཅོམ་ལྡན་འདས། བྱང་ཆུབ་ཏུ་སེམས་བསྐྱེད་པ་ཇི་ལྟ་བུ་ལགས། བཀའ་སྩལ་པ། རྒྱལ་པོ་ཆེན་པོ། སྙིང་རྗེ་ཆེན་པོ་བསྐྱེད་པ་ཇི་ལྟ་བ་བཞིན་ནོ། །གསོལ་པ། བཅོམ་ལྡན་འདས། སངས་རྒྱས་འབྱུང་བ་སུའི་ལགས། བཀའ་སྩལ་པ། རྒྱལ་པོ་ཆེན་པོ། སུ་དད་པ་བསྐྱེད་པའིའོ། །གསོལ་པ། བཅོམ་ལྡན་འདས། དད་པ་བསྐྱེད་པ་སུ་ལགས། བཀའ་སྩལ་པ། རྒྱལ་པོ་ཆེན་པོ། སུ་བྱང་ཆུབ་ཏུ་སེམས་བསྐྱེད་པའོ། །གསོལ་པ། བཅོམ་ལྡན་འདས། བྱང་ཆུབ་ཏུ་སེམས་བསྐྱེད་པ་དེ་སུ་ལགས། བཀའ་སྩལ་པ། རྒྱལ་པོ་ཆེན་པོ། སུ་ལྷག་པའི་བསམ་པ་རྣམ་པར་མི་འཁྲུགས་པའོ། །གསོལ་པ། བཅོམ་ལྡན་འདས། སུའི་ལྷག་པའི་བསམ་པ་རྣམ་པར་མི་འཁྲུགས་པ་ལགས། བཀའ་སྩལ་པ། རྒྱལ་པོ་ཆེན་པོ། སུ་སྙིང་རྗེ་ཆེན་པོ་བསྐྱེད་པའོ། །གསོལ་པ། བཅོམ་ལྡན་འདས། སྙིང་རྗེ་ཆེན་པོ་བསྐྱེད་པ་ཇི་ལྟ་བུ་ལགས། བཀའ་སྩལ་པ། རྒྱལ་པོ་ཆེན་པོ། ཇི་ལྟར་སེམས་ཅན་རྣམས་ལ་ཡོངས་སུ་མི་གཏོང་བ་བསྐྱེད་པ་ལྟ་བུའོ། །གསོལ་པ། བཅོམ་ལྡན་འདས། ཇི་ལྟར་ན་སེམས་ཅན་རྣམས་ཡོངས་སུ་མི་གཏོང་བ་ལགས། བཀའ་སྩལ་པ། རྒྱལ་པོ་ཆེན་པོ། གང་གི་ཚེ་བདག་གི་བདེ་བ་ཡོངས་སུ་གཏོང་བའོ། །
296a
༄#། །གསོལ་པ། བཅོམ་ལྡན་འདས། བདག་གི་བདེ་བ་ཡོངས་སུ་གཏོང་བ་ཇི་ལྟ་བུ་ལགས། བཀའ་སྩལ་པ། རྒྱལ་པོ་ཆེན་པོ། སུ་དཀོན་མཆོག་གསུམ་ཡོངས་སུ་མི་གཏོང་བ་ཡིན་ནོ། །གསོལ་པ། བཅོམ་ལྡན་འདས། དཀོན་མཆོག་གསུམ་ཡོངས་སུ་མི་གཏོང་བ་སུ་ལགས། བཀའ་སྩལ་པ། རྒྱལ་པོ་ཆེན་པོ། སུ་ཉོན་མོངས་པ་ཐམས་ཅད་ཡོངས་སུ་གཏོང་བ་དེ་དཀོན་མཆོག་གསུམ་ཡོངས་སུ་མི་གཏོང་བ་ཡིན་ནོ། །དེ་ནས་བཅོམ་ལྡན་འདས་ལ་རྒྱལ་པོ་མ་སྐྱེས་དགྲས་འདི་སྐད་ཅེས་གསོལ་ཏོ། །ཇི་ཙམ་དུ་དེ་བཞིན་གཤེགས་པས་ཆོས་འདུལ་བ་བསྟན་པ་ལེགས་པར་གསུངས་པ་དང ། ཇི་ཙམ་དུ་དེ་བཞིན་གཤེགས་པས་བསླབས་པ་ལེགས་པར་བཅས་པ་དང ། ཇི་ཙམ་དུ་སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྟན་པ་རྗེས་སུ་མཐུན་པ་དང ། རྒྱུ་དང་འབྲས་བུ་ཆབ་མི་འཚལ་བ་དང ། རྟག་པ་དང ། ཆད་པ་མ་མཆིས་པ་དང ། ལས་དང་བྱ་བ་ལ་འཇུག་པ་བསྟན་པ་དང ། དགེ་བ་དང་མི་དགེ་བ་ཆབ་མི་འཚལ་བ་དང ། མི་སླུ་བའི་མཚན་ཉིད་ལེགས་པར་གསུངས་པ་ནི། བཅོམ་ལྡན་འདས། ངོ་མཚར་ལགས་སོ། །བདེ་བར་གཤེགས་པ། ངོ་མཚར་ལགས་སོ། །བཅོམ་ལྡན་འདས། དགེ་བའི་རྩ་བ་མ་བསྐྱེད་པ་དང ། སྡིག་པའི་གྲོགས་པོས་ཡོངས་སུ་ཟིན་པ་དག་
296b
མ་གཏོགས་པར་འདི་ལྟར་ཆེ་ཞིང་འདི་ལྟར་གྱ་ནོམ་པའི་བསྟན་པ་འདི་ལ་བརྩོན་པ་རྣམས་ལ་སུ་ཞིག་པ་ཟློག་པར་བགྱིད། གནོད་པར་བགྱིད། སྤོང་བར་བགྱིད། བཅོམ་ལྡན་འདས། བདག་གིས་ནི་སྔོན་གྱི་དགེ་བའི་རྩ་བ་རྣམས་ལ་བྱས་པ་མི་གཟོ་བར་མི་བགྱིའོ། །གང་གི་མཐུས་བདག་ཉོན་མོངས་པའི་དྲི་མ་ཐམས་ཅད་དང ། སྡིག་པ་ཐམས་ཅད་ལས་རྣམ་པར་ལོག་པའི་དེ་བཞིན་གཤེགས་པ་ལ་བདག་གིས་ཤ་དང ། ཁྲག་གིས་ཀྱང་བཀའ་དྲིན་གླན་པའི་རྡོ་མི་ཐོགས་ལགས་སོ། །བཅོམ་ལྡན་འདས། གང་གི་མཐུས་པ་དག་གིས་བཟང་པོ་མ་ལགས་པའི་འགྱོད་པ་ཆེན་པོ་བསལ་བ་དང ། ཆོས་སྣང་བ་ཆེན་པོ་ཐོབ་པར་བགྱིས་པའི་འཇམ་དཔལ་གཞོན་ནུར་གྱུར་པ་ཡུན་རིང་པོའི་དགེ་བའི་བཤེས་གཉེན་ལ་ཡང་བདག་གིས་ལན་གླན་པའི་རྔོ་མི་ཐོག་ལགས་སོ། །ཚངས་པར་སྤྱོད་འདི་མཐའ་དག་ནི། འདི་ལྟ་སྟེ། དགེ་བའི་བཤེས་གཉེན་ལས་བྱུང་ངོ་ཞེས་བགྱི་བ་ནི་བཅོམ་ལྡན་འདས་ཀྱིས་ལེགས་པར་གསུངས་པའོ། །མ་སྐྱེས་དགྲས་ཞུས་པ་ལུང་བསྟན་པའི་ལེའུ་ཞེས་བྱ་སྟེ། ཉི་ཤུ་གཉིས་པའོ།། །།བམ་པོ་བཅུ་པ་སྟེ། ཐ་མའོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །གསང་བ་པའི་བདག་པོ། གང་གི་ཚེ་
297a
༄#། །བཅོམ་ལྡན་འདས་ཀྱིས་སྤྲུལ་པ་སྤྲུལ་པ་དེའི་ཚེ་ཁྱོད་ཀྱང་སྤྲུལ་པ་སྤྲུལ་ལམ། ལག་ན་རྡོ་རྗེས་སྨྲས་པ། བཅོམ་ལྡན་འདས། མངོན་སུམ་དུ་བཞུགས་པ་འདི་ཁོ་པོའི་དཔང་ཡིན་ཏེ། ཞི་བའི་བློ་གྲོས། གལ་ཏེ་དེ་བཞིན་གཤེགས་པས་དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་ཅིག་སྤྲུལ་ན། ཁོ་བོའི་སྤྲུལ་པ་གཟུགས་ཐ་དད་པ། རྣམ་པར་རྩེན་པ་ཐ་དད་པ་ཡང་དེ་སྙེད་དེ་དག་གི་རྗེས་སུ་འབྲང་བ་ཡིན་ཏེ། ཞི་བའི་བློ་གྲོས། འདི་ནི་སྔོན་གྱི་དང་བ་ཡོངས་སུ་དག་པའི་རྒྱུ་མཐུན་པའོ། །དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །གསང་བ་པའི་བདག་པོ། གང་གི་ཕྱིར་ཕྱི་མའི་ཚེ་ལྔ་བརྒྱ་པ་ཐམ་ལ་ཆོས་ཀྱི་རྣམ་གྲངས་འདི་སྤྱོད་པ་དང ། རྒྱས་པར་འགྱུར་བ་དང ། ཆོས་ཀྱི་རྣམ་གྲངས་འདི་དམ་པའི་ཆོས་ཡོངས་སུ་འཛིན་པ་སྐྱེས་བུ་དམ་པ་དེ་དག་གི་ལག་ཏུ་འགྲོ་བར་དེ་བཞིན་གཤེགས་པ་ལ་གསོལ་བ་ཐོབ་ཅིག་།གསང་བ་པའི་བདག་པོས་སྨྲས་པ། རིགས་ཀྱི་བུ། ཆོས་ཀྱི་རྣམ་གྲངས་འདི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་ཟིན་ཏོ། །དེ་ཅིའི་ཕྱིར་ཞེན། ཡི་གེ་གང་དག་གིས་ཆོས་ཀྱི་རྣམ་གྲངས་འདི་བསྙད་པའི་ཡི་གེ་དེ་དག་ནི་མ་སྐྱེས་པ། ཟད་པར་མི་འགྱུར་བ། ནུབ་པར་མི་འགྱུར་བའོ། །ཡི་གེ་
297b
གང་དག་གིས་དོན་གང་བརྗོད་པའི་དོན་དེ་ཡང་ནུབ་པར་བྱ་བར་མི་ནུས་པའོ། །ཞི་བའི་བློ་གྲོས། དེ་བཞིན་གཤེགས་པའི་དམ་པའི་ཆོས་ནི་ནུབ་པར་འགྱུར་བ་མ་ཡིན་པའོ། །དེ་ཅིའི་ཕྱིར་ཞེ་ན། དེ་ལ་སྐྱེ་བ་ཅི་ཡང་མེད་དོ། །གང་ལ་སྐྱེ་བ་མེད་པ་དེ་ནི་མི་འགག་གོ་།བཅོམ་ལྡན་འདས་ཀྱིས་འདི་ལས་དགོངས་ནས་དེ་བཞིན་གཤེགས་པ་རྣམས་བྱུང་ཡང་རུང ། མ་བྱུང་ཡང་རུང་སྟེ། ཆོས་རྣམས་ཀྱི་ཆོས་ཉིད་དང ། ཆོས་ཀྱི་དབྱིངས་དང ། ཆོས་གནས་པ་ཉིད་དང ། ཆོས་ཇི་ལྟ་བ་བཞིན་འདི་ནི་འདུག་པ་ཉིད་དོ་ཞེས་གསུངས་ཏེ། དེ་ལྟར་ན་རྟེན་ཅིང་འབྲེལ་པར་འབྱུང་བ་དང་མི་འགལ་བ་ཡིན་ནོ། །གང་རྟེན་ཅིང་འབྲེལ་བར་འབྱུང་བ་དང ། མི་འགལ་བ་དེ་དམ་པའི་ཆོས་ཡིན་ནོ། །དམ་པའི་ཆོས་གང་ཡིན་པ་དེ་བརྟག་པར་མི་ནུས་ཏེ། དེས་ན་དམ་པའི་ཆོས་ཞེས་བྱའོ། །ཞི་བའི་བློ་གྲོས་ཀྱིས་སྨྲས་པ། གསང་བ་བའི་བདག་པོ། གང་དག་དམ་པའི་ཆོས་ཡོངས་སུ་གཟུང་བའི་ཕྱིར་གོ་ཆ་གྱོན་པ་དེ་དག་གང་དུ་གོ་ཆ་གྱོན། སྨྲས་པ། གང་དག་དམ་པའི་ཆོས་ཡོངས་སུ་གཟུང་བའི་ཕྱིར་གོ་ཆ་གྱོན་པ་དེ་དག་ནི་ཆོས་ཐམས་ཅད་དང་མི་འགལ་བར་བྱ་བའི་ཕྱིར་གོ་ཆ་གྱོན་ནོ། །དེ་ཅིའི་ཕྱིར་ཞེ་ན། གང་ཆོས་ཐམས་ཅད་དང་མི་འགལ་བ་དེ་ཉིད་དམ་པའི་ཆོས་སོ། །སྨྲས་པ། ཇི་ལྟར་ན་ཆོས་དང་འགལ་བ་ཡིན། སྨྲས་པ། ཡི་གེ་དང་འགལ་ན་ཆོས་དང་འགལ་བ་ཡིན་ཏེ། ཆོས་དང་ནི་ནམ་ཡང་འགལ་
298a
༄#། །བར་མི་འགྱུར་རོ། །དེ་ལ་གང་དག་མི་འགལ་བ་དེ་དག་ནི་དམ་པའི་ཆོས་ཡོངས་སུ་འཛིན་པའོ། །སྨྲས་པ། གསང་བ་པའི་བདག་པོ། གང་དག་འཇིག་རྟེན་ཐམས་ཅད་དང་འགལ་བ་དེ་དག་དམ་པའི་ཆོས་ཡོངས་སུ་འཛིན་པའི་རྣམ་གྲངས་ཡོད་དམ། སྨྲས་པ། ཞི་བའི་བློ་གྲོས། ཡོད་དེ། དེ་ཅིའི་ཕྱིར་ཞེ་ན། ཞི་བའི་བློ་གྲོས། འཇིག་རྟེན་ནི་ལྟ་བ་ལ་མངོན་པར་ཞེན་པ་ཡིན་ལ། དེ་ནི་སྟོང་པ་ཉིད་དུ་སྨྲ་བ་ཡིན་ཏེ། དེས་ན་དེ་འཇིག་རྟེན་ཐམས་ཅད་དང་འགལ་ལོ། །འཇིག་རྟེན་ནི་རྟག་པ་དང ། བདེ་བ་དང ། བདག་དང ། བདག་གིར་སྨྲ་བ་ཡིན་ལ། དེ་ནི་མི་རྟག་པ་དང ། སྡུག་བསྔལ་བ་དང ། བདག་མེད་པ་དང ། མི་སྡུག་པ་དང ། བདག་དང་བདག་གི་མེད་པར་སྨྲ་བ་ཡིན་ཏེ། དེས་ན་དེ་འཇིག་རྟེན་ཐམས་ཅད་དང་འགལ་ལོ། །འཇིག་རྟེན་ནི་རྒྱུན་ཕྱོགས་སུ་འགྲོ་བ་ཡིན་ལ། དེ་ནི་རྒྱུན་ལས་བཟློག་སྟེ་འགྲོ་བས་དེས་ན་དེ་འཇིག་རྟེན་ཐམས་ཅད་དང་འགལ་ལོ། །འཇིག་རྟེན་ནི་ཚེ་འདི་ལྷུར་ལེན་པ་ཡིན་ལ། དེ་ནི་ཚེ་རབས་འཕོ་བ་ལྷུར་ལེན་པ་ཡིན་ཏེ། དེས་ན་དེ་འཇིག་རྟེན་ཐམས་ཅད་དང་འགལ་ལོ། །འཇིག་རྟེན་ནི་ཕུང་པོ་དང ། ཁམས་དང ། སྐྱེ་མཆེད་རྣམས་ལ་མངོན་པར་ཞེན་པ་ཡིན་ལ། དེ་ནི་ཆོས་ཐམས་ཅད་ལ་མངོན་པར་ཞེན་པ་མེད་པར་བྱ་བའི་ཕྱིར་ཆོས་སྟོན་ཏེ། དེས་ན་འཇིག་རྟེན་ཐམས་ཅད་
298b
དང་འགལ་ལོ། །ཞི་བའི་བློ་གྲོས། རྣམ་གྲངས་འདིས་ན། གང་དག་འཇིག་རྟེན་ཐམས་ཅད་དང་འགལ་བ་དེ་དག་དམ་པའི་ཆོས་ཡོངས་སུ་འཛིན་ཏོ། །སྨྲས་པ། གསང་བ་པའི་བདག་པོ་ཁྱོད་དམ་པའི་ཆོས་ཡོངས་སུ་འཛིན་ཏམ། སྨྲས་པ། རིགས་ཀྱི་བུ། ཡོངས་སུ་འཛིན་ཏེ། བདག་ཡོངས་སུ་མི་འཛིན། སེམས་ཅན་ཡོངས་སུ་མི་འཛིན། ཆོས་ཡོངས་སུ་མི་འཛིན་ཏོ།། སྨྲས་པ། ཇི་ལྟར་ཡོངས་སུ་མི་འཛིན། སྨྲས་པ། བདག་དབེན་པ་དང ། སེམས་ཅན་དབེན་པ་དང ། ཆོས་དབེན་པ་དང ། བདག་དང ། སེམས་ཅན་དང ། ཆོས་དབེན་པ་མ་ཡིན་པ་དང ། འདས་པ་དབེན་པ་དང ། མ་འོངས་པ་དབེན་པ་དང ། ད་ལྟར་བྱུང་བ་དབེན་པ་དང ། འདས་པ་དང ། མ་འོངས་པ་དང ། ད་ལྟར་བྱུང་བའི་དུས་དབེན་པ་དང ། འདས་པ་དང ། མ་འོངས་པ་དང ། ད་ལྟར་བྱུང་བའི་དུས་དབེན་པ་མ་ཡིན་པ་དང ། སངས་རྒྱས་དབེན་པ་དང ། སངས་རྒྱས་དབེན་པ་མ་ཡིན་པ་དང ། ཞིང་དབེན་པ་དང ། ཞིང་དབེན་པ་མ་ཡིན་པ་དང ། ཆོས་དབེན་པ་དང ། ཆོས་དབེན་པ་མ་ཡིན་པ་གང་དེ་ལྟར་ཆོས་རྣམས་རྗེས་སུ་རྟོགས་པ་དེ་ནི་དམ་པའི་ཆོས་ཡོངས་སུ་འཛིན་པའོ། །དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ། ལེགས་སོ། །ལེགས་སོ། །འདི་ནི་དམ་པའི་ཆོས་ཡོངས་སུ་འཛིན་པའོ། །གསང་བ་
299a
༄#། །པའི་བདག་པོ། དམ་པའི་ཆོས་ཡོངས་སུ་འཛིན་པ་ནི་གང་ཆོས་ཐམས་ཅད་མི་འཛིན་པ་དང ། མཆོག་ཏུ་འཛིན་པ་མེད་པ་དང ། གང་ཆོས་ཐམས་ཅད་ལ་མཚན་མ་དང་སྤྲོས་པར་མི་འཛིན་པ་དང ། ཀུན་ཏུ་སྤྱོད་པ་མེད་པ་དང ། གང་ཡོངས་སུ་རྟོག་པ་ཐམས་ཅད་ལ་མི་རྟོག་ཅིང་རྣམ་པར་མི་རྟོག་པའོ། །དེའི་ཚེ་ལྷའི་བུ་རྒྱལ་བུ་བཟང་ཞེས་བྱ་བ་འཁོར་དེ་ཉིད་དུ་འདུས་པར་གྱུར་པ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཉེ་བར་ཞི་བ་ནི་སངས་རྒྱས་ཀྱི་བཀའ་ལགས་སོ། །བཅོམ་ལྡན་འདས། སངས་རྒྱས་ཀྱི་བཀའ་ནི་ཉེ་བར་ཞི་བར་བགྱི་བའི་ཆེད་ལགས་ཏེ། ཉེ་བར་ཞི་བ་གང་ལགས་པ་དེ་སངས་རྒྱས་ཀྱི་བཀའོ། །བཅོམ་ལྡན་འདས། དེ་ལ་གང་དག་དམིགས་པ་ཐམས་ཅད་ཉེ་བར་ཞི་བར་མཐོང་བ་དེ་དག་ཉེ་བར་ཞི་བ་ལགས་ཏེ། དེ་དག་ནི་སླད་ཀྱིས་འབར་བ་མ་ལགས། མཆེད་པ་མ་ལགས། འབར་བར་བགྱིད་པ་མ་ལགས་སོ། །གང་དག་ཞི་བ་དང ། རབ་ཏུ་ཞི་བ་དང ། ཉེ་བར་ཞི་བ་དེ་དག་དེ་བཞིན་གཤེགས་པའི་དམ་པའི་ཆོས་འཛིན་ཅིང་མི་འདོར་བ་ལགས་ཏེ། ཇི་ལྟར་ཆོས་ཐམས་ཅད་མི་འཛིན་མི་འདོར་བ་དེ་ལྟར་འཛིན་ནོ། །ལྷའི་བུ་དེས་དེ་སྐད་བསྟན་པས་དགེ་སློང་སྟོང་ནི་སེམས་རྣམ་པར་གྲོལ་ལོ། །ལྷའི་བུ་སྟོང་ནི་ཆོས་ཀྱི་མིག་རྣམ་པར་དག་གོ །
299b
དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་ལྷའི་བུ་རྒྱལ་པོ་བཟང་ལ་འདི་སྐད་ཅེས་སྨྲས་སོ། །ལྷའི་བུ། སྤོབས་པ་འདི་སུའི་ཡིན། སྨྲས་པ། སྤོབས་པ་འདི་ནི་སུ་བག་ཆགས་ཐམས་ཅད་སྤངས་པ་དང ། ཚིག་གི་ལམ་ཐམས་ཅད་མེད་པ་དང ། དོན་དམ་པ་བརྗོད་དུ་མེད་པ་དང ། མངོན་པར་ཞེན་པ་མེད་པ་དེ་དག་གི་སྤོབས་པ་ཡིན་ནོ། །སྨྲས་པ། ལྷའི་བུ། སྤོབས་པ་ཇི་ལྟར་སྐྱེ། སྨྲས་པ། སྤོབས་པ་མེད་པ་དང ། སྤོབས་པ་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། སྤོབས་པ་མེད་པ་ཞེས་བྱ་བ་འདི་ནི་ཉིང་མཚམས་སྦྱོར་བ་མེད་པའི་ཕྱིར། སྤོབས་པ་མ་ཡིན་པ་ཞེས་བྱ་བ་དེ་ནི་སྤོབས་པ་མེད་པའི་ཚིག་གོ་།རིགས་ཀྱི་བུ། འདི་སྐད་དུ་སྤོབས་པ་འདི་སུའི་ཡིན་ཞེས་སྨྲས་པ་ལ་འདི་ནི་སུ་གཞན་གྱི་རྣམ་པར་རིག་པ་ལ་རྣམ་པར་ཤེས་པ་མི་འཇུག་པ་དང ། བདག་གི་རྣམ་པར་རིག་པ་ལ་རྣམ་པར་ཤེས་པ་མི་གནས་པ་དེའི་སྤོབས་པའོ། །འདི་ནི་སུ་དམིགས་པ་ལ་ཡང་ཡིད་ཀྱི་རྣམ་པར་རིག་པ་མི་དམིགས་ལ། དམིགས་པ་མེད་པའི་ཆོས་ཉིད་ལ་ཡང་མི་གནས་པ་དེའི་སྤོབས་པའོ། །འདི་ནི་སུ་ཆོས་ཐམས་ཅད་ལ་ཡང་ཤེས་པ་མི་འཇུག་ལ། དེ་ཤེས་པས་ཆོས་གང་ཡང་རབ་ཏུ་མ་རྟོགས་པ་མེད་པ་དེའི་སྤོབས་པའོ། །འདི་ནི་སུ་གནས་པ་མེད་པ་དང ། ལེན་པ་མེད་པ་དང ། འདོར་བ་མེད་པ་དང ། ཆུ་བོ་ལས་བརྒལ་བ་
300a
༄#། །དེའི་སྤོབས་པའོ། །འདི་ནི་སྐྱེ་བ་མེད་པ་ལ་སྐྱེས་པ་དང ། འགོག་པ་མེད་ལ་མྱ་ངན་ལས་འདའ་བར་ཡང་འགྱུར་བའི་སྤོབས་པའི། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ལྷའི་བུ་རྒྱལ་པོ་བཟང་པོ་འདིའི་སྤོབས་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཞི་བའི་བློ་གྲོས། ལྷའི་བུ་རྒྱལ་པོ་བཟང་འདི་ནི་གསང་བ་པའི་བདག་པོ་ལག་ན་རྡོ་རྗེས་དེ་བཞིན་གཤེགས་པའི་གསང་བ་བསྟན་པའི་ཆོས་ཀྱི་རྣམས་གྲངས་འདི་ཉན་པར་འདོད་ནས། དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མངོན་པར་དགའ་བ་ནས་འདིར་འོངས་སོ། །ཞི་བའི་བློ་གྲོས། ལྷའི་བུ་རྒྱལ་པོ་བཟང་འདིས་ནི་ཆོས་ཀྱི་རྣམ་གྲངས་རྗེས་སུ་འཇུག་པ་ཞེས་བྱ་བའི་གཟུངས་ཐོབ་སྟེ། དེ་འདོད་ན་བསྐལ་པ་བརྒྱ་སྟོང་དུ་ཐོག་པ་མེད་པའི་སྤོབས་པས་བསྟན་ཀྱང་འདིའི་སྤོབས་པ་ཟད་པར་མི་འགྱུར་རོ། །རྒྱལ་པོ་བཟང་གི་ལེའུ་ཞེས་བྱ་སྟེ། ཉི་ཤུ་རྩ་གསུམ་པའོ།། །།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་པའི་རྗེས་སུ་འཇུག་པ་ཞེས་བགྱི་བའི་གཟུངས་དེ་གང་ལགས། བཅོམ་ལྡན་འདས་ཀྱིས་
300b
བཀའ་སྩལ་པ། ཞི་བའི་བློ་གྲོས། ཆོས་ཀྱི་རྣམ་པའི་རྗེས་སུ་འཇུག་པ་ནི་གང་ཡི་གེ་རྣམས་ལ་ཡི་གེའི་རྗེས་སུ་འཇུག་པ་ཤེས་པ་སྟེ། ཞི་བའི་བློ་གྲོས། ཆོས་ཐམས་ཅད་ནི་ཨ་ཞེས་བྱ་བའི་རྗེས་སུ་འཇུག་པའོ། །ཆོས་ཐམས་ཅད་ནི་ཨ་ཞེས་བྱ་བའི་སྒོའོ། ། ཞེས་བྱ་བ་ལས་བྱུང་བའོ། ། ཞེས་བྱ་བའི་མཐའོ། ། ཞེས་བྱ་བ་ནི་ཚིག་གི་ལས་ཐམས་ཅད་ལས་བྱེད་དོ། ། ཞེས་བྱ་བ་ནི་མི་ཤེས་པའོ། །རྣམ་པར་མི་ཤེས་པའོ། །ཆོས་ཐམས་ཅད་ནི་ཨ་ཞེས་བྱ་བའི་རྗེས་སུ་འཇུག་སྟེ། དེའི་ཕྱིར་རྣམ་པའི་རྗེས་སུ་འཇུག་པ་ཞེས་བྱ་བའི་གཟུངས་ཞེས་བྱའོ།། ཞི་བའི་བློ་གྲོས། རྗེས་སུ་འཇུག་པ་ནི་དེ་ལ་ཆོས་འཕྲ་རབ་ཙམ་ཡང་ཞུགས་པ་མེད་པ་དང ། བྱུང་བ་མེད་པའོ། །ཞི་བའི་བློ་གྲོས། ཡི་གེ་དེ་དག་ནི་འགའ་ཞིག་ནས་ལྷགས་ནས་ཁོང་པའི་ནང་དུ་འཇུག་པ་མེད་དོ། །ཡི་གེ་དེ་དག་ནི་ཁོང་པའི་ནང་དུ་གནས་པ་མ་ཡིན་ནོ། །ཡི་གེ་དེ་དག་ནི་བྱུང་ནས་ཕྱོགས་འགའ་ཞིག་ཏུ་འགྲོ་བ་མ་ཡིན་ནོ། །ཡི་གེ་དེ་དག་ནི་ཕན་ཚུན་འབར་བར་བྱེད་པ་མ་ཡིན་ནོ། །ཡི་གེ་དེ་དག་ནི་སྨྲས་ཀྱང་རུང ། མ་སྨྲས་ཀྱང་རུང་སྟེ། ཟད་པར་འགྱུར་བའམ། འཕེལ་བར་འགྱུར་བ་མ་ཡིན་ནོ། །ཡི་གེ་དེ་དག་ནི་ཆོས་ཤེའམ། ཆོས་མ་ཡིན་ཞེས་བྱ་བར་རྣམ་པར་མི་རྟོག་གོ་།ཡི་གེ་དེ་དག་ནི་སུས་ཀྱང་བསྐྱེད་པའམ། བཀག་པ་མེད་དོ། །ཡི་གེ་དེ་དག་ནི་སུས་ཀྱང་བྱས་པའམ། ཆུད་གཟན་པ་
301a
༄#། །མེད་དོ། །ཞི་བའི་བློ་གྲོས། ཡི་གེ་བགྲང་བ་ཇི་ལྟ་བར་སེམས་བགྲང་བ་ཡང་དེ་བཞིན་ནོ། །སེམས་བགྲང་བ་ཇི་ལྟར་ཆོས་ཐམས་ཅད་བགྲང་བ་ཡང་དེ་བཞིན་ནོ། །ཆོས་ཐམས་ཅད་བགྲང་བ་ཇི་ལྟ་བར་བགྲང་བ་མེད་པ་ཡང་དེ་བཞིན་ནོ། །དེ་ཅིའི་ཕྱིར་ཞེ་ན། ཆོས་ནི་བགྲང་བར་ཉེ་བར་འགྲོ་བ་མ་ཡིན་ཏེ། བགྲང་བ་མེད་པ་ནི་ཆོས་བགྲང་བའོ། །ཇི་ལྟར་ཆོས་བགྲང་བ་ཉེ་བར་མི་འགྲོ་བ་བཞིན་དུ། ཨ་ཞེས་བྱ་བའི་རྗེས་སུ་འཇུག་པ་ཡང་དེ་ལྟ་བུ་སྟེ། བཟོད་མ་ཉིད་ནས་མ་སྐྱེས་པ་ལ་འཇུག་པ། སྐྱེ་བ་མེད་པ་ལ་འཇུག་པའོ། །མ་སྐྱེས་པ་དང ། མ་བྱུང་བ་གང་ཡིན་པ་དེ་ལ་འཇུག་པ་གང་ཡང་མེད་དོ། །དེ་ལྟར་ན་འཇུག་པ་མེད་པ་ནི་རྗེས་སུ་འཇུག་པའོ། །ཞི་བའི་བློ་གྲོས། སུ་བགྲང་བ་འདི་ལ་ཞུགས་པ་དེའི་སྤོབས་བ་རྒྱུན་གཅད་པར་མི་ནུས་སོ། །དེ་ཅིའི་ཕྱིར་ཞེ་ན། རྒྱུན་ཆད་པ་མེད་པས་དེས་ཆོས་ཉིད་རྗེས་སུ་རྟོགས་སོ། །དེས་ཆོས་ཉིད་མི་ཟད་པར་རྗེས་སུ་རྟོགས་སོ། །དེས་ཇི་ལྟ་ཇི་ལྟར་ཆོས་སྟོན་པ་དེ་ལྟ་དེ་ལྟར་ཆོས་དེ་དག་བརྗོད་ཅིང་མངོན་དུ་འགྱུར་རོ། །དེ་ཆོས་ཀྱི་རྣམ་པའི་རྗེས་སུ་འཇུག་པ་འདི་ལྟ་བུ་འདིས་སེམས་ཅན་གྱི་རྣམ་པ་ལ་འཇུག་པར་འཇུག་གོ་།སེམས་ཅན་རྣམ་པའི་རྗེས་སུ་འཇུག་པས་མོས་པ་ཇི་ལྟ་བ་བཞིན་དུ་ཆོས་སྟོན་ཏོ། །ཞི་བའི་བློ་གྲོས། གཟུངས་ཐོབ་པའི་བྱང་ཆུབ་སེམས་དཔའ་
301b
ནི་སེམས་ཀྱིས་དྲི་མ་མེད་པ་ཡིན་ནོ། །བསམ་པས་རྣམ་པར་དག་པ་ཡིན་ནོ། །སྦྱོར་བས་གཙང་མ་ཡིན་ནོ། །ལྷག་པའི་བསམ་པས་མངོན་དུ་འཕགས་པ་ཡིན་ནོ། །བསྒྲུབ་པ་ལ་ལེགས་པར་གནས་པ་ཡིན་ནོ། །ཤེས་རབ་ཀྱིས་མངོན་དུ་འཕགས་པ་ཡིན་ནོ། །དམ་བཅས་པ་ཉམས་འོག་ཏུ་ཆུད་པས་བརྟན་པ་ཡིན་ནོ། །བདུད་རྣམས་ཀྱིས་མི་ཤིགས་པ་ཡིན་ནོ། །ཕ་རོལ་མུ་སྟེགས་བྱེད་རྣམས་ཀྱི་མི་འདུས་པ་ཡིན་ནོ། །ཉོན་མོངས་པ་རྣམས་ཀྱིས་མི་རྫི་བ་ཡིན་ནོ། །ཕྱིར་རྒོལ་བ་རྣམས་ཀྱིས་མི་ཐུབ་པ་ཡིན་ནོ། །ལུས་ཀྱི་སྟོབས་དང་ལྡན་པ་ཡིན་ནོ། ། སེམས་ཀྱིས་ཞུམ་པ་མེད་པ་ཡིན་ནོ། །སྤོབས་པ་མི་ཟད་པ་ཡིན་ནོ། །བསྟན་པ་རྣམས་ལ་མཐའ་ཡས་པ་ཡིན་ནོ། །ངེས་པའི་ཚིག་རྣམས་ལ་མུ་མེད་པ་ཡིན་ནོ། །ཡེ་ཤེས་ཀྱིས་ཆགས་པ་མེད་པ་ཡིན་ནོ། །བློས་གཏིང་དཔག་དཀའ་བ་ཡིན་ནོ། །བདེན་པ་བསྟན་པ་རྣམས་ལ་དོན་ཟབ་པ་ཡིན་ནོ། །ཐོས་པ་རྒྱ་མཚོ་ལྟ་བུ་ཡིན་ནོ། །ཏིང་ངེ་འཛིན་གྱི་ལྷུན་པོ་དང་མཚུངས་པ་ཡིན་ནོ། །འཁོར་གྱི་ནང་ན་སེང་གེ་དང་མཚུངས་པ་ཡིན་ནོ། །འཇིག་རྟེན་གྱི་ཆོས་རྣམས་ལ་པདྨ་དང་མཚུངས་པ་ཡིན་ནོ། །སེམས་ཅན་ཐམས་ཅད་ཀྱི་ཉེ་བར་འཚོ་བས་ས་དང་མཚུངས་པ་ཡིན་ནོ། །ཉོན་མོངས་པ་དང་སྲེད་པ་འཁྲུ་བས་ཆུ་དང་མཚུངས་པ་ཡིན་ནོ། །སེམས་ཅན་ཐམས་ཅད་ཡོངས་སུ་སྨིན་པར་བྱེད་པས་མེ་དང་མཚུངས་པ་ཡིན་ནོ། །
302a
༄#། །སེམས་ཅན་ཐམས་ཅད་ལ་སེམས་མཉམ་པས་ཟླ་བ་དང་མཚུངས་པ་ཡིན་ནོ། །ཉོན་མོངས་པའི་མུན་པ་སེལ་བས་ཉི་མ་དང་མཚུངས་པ་ཡིན་ནོ། །ཉོན་མོངས་པའི་མུན་པའི་དགྲ་འཇོམས་པས་དཔའ་བོ་དང་མཚུངས་པ་ཡིན་ནོ། །སེམས་ཤིན་ཏུ་དུལ་བས་གླང་པོ་དང་མཚུངས་པ་ཡིན་ནོ། །ཆོས་སྔོན་དུ་སྒྲོགས་པས་འབྲུག་དང་མཚུངས་པ་ཡིན་ནོ། །ཆོས་ཀྱི་ཆར་འབེབས་པས་ཆར་པ་དང་མཚུངས་པ་ཡིན་ནོ། །སེམས་ཅན་རྣམས་ཀྱི་ཉོན་མོངས་པའི་ནད་ཞི་བར་བྱེད་པས་སྨན་པ་དང་མཚུངས་པ་ཡིན་ནོ། །ཆོས་ཀྱི་རྒྱལ་སྲིད་བྱེད་པས་རྒྱལ་པོ་དང་མཚུངས་པ་ཡིན་ནོ། །འཇིག་རྟེན་གྱི་ཆོས་སྐྱོང་བས་འཇིག་རྟེན་སྐྱོང་བ་དང་མཚུངས་པ་ཡིན་ནོ། །ལྷ་དང་མི་རྣམས་ཀྱི་སྤྱན་དུ་གྱུར་པས་བརྒྱ་བྱིན་དང་མཚུངས་པ་ཡིན་ནོ། །དབང་ཐོབ་སྟེ་རང་གི་སེམས་ལ་དབང་བསྒྱུར་བས་ཚངས་པ་དང་མཚུངས་པ་ཡིན་ནོ། །གནས་མེད་པར་རྒྱུ་བས་བྱ་དང་མཚུངས་པ་ཡིན་ནོ། །འདུ་འཛིས་འཇིགས་ཤིང་སྐྲག་པས་རི་དྭགས་སྤྲེའུ་དང་མཚུངས་པ་ཡིན་ནོ། །སེམས་ཅན་ཐམས་ཅད་ཀྱི་ཉེས་པར་བྱས་པ་ཐམས་ཅད་བཟོད་པས་མ་དང་མཚུངས་པ་ཡིན་ནོ། །བཟོ་ཐམས་ཅད་སློབ་པས་ཕ་དང་མཚུངས་པ་ཡིན་ནོ། །ཆོས་རིན་པོ་ཆེ་ཐམས་ཅད་སྦྱིན་པས་རྣམ་ཐོས་ཀྱི་བུ་དང་མཚུངས་པ་ཡིན་ནོ། །བསོད་
302b
ནམས་དག་གིས་བརྒྱན་པ་ཡིན་ནོ། །མཚན་རྣམས་ཀྱིས་ཀླུབས་པ་ཡིན་ནོ། །དཔེ་བྱད་བཟང་པོ་རྣམས་ཀྱིས་སྤྲས་པ་ཡིན་ནོ། །འཇིག་རྟེན་གྱིས་བལྟ་བར་བྱ་བ་ཡིན་ནོ། །ལྟ་བའི་གཞི་ཡིན་ནོ། །འཕགས་པའི་ནོར་བདུན་དང་ལྡན་པས་མི་དབུལ་བ་ཡིན་ནོ། །སངས་རྒྱས་རྣམས་ཀྱིས་ཡོངས་སུ་བཟུང་བ་ཡིན་ནོ། །རིག་པ་རྣམས་ཀྱིས་བསྔགས་པ་ཡིན་ནོ། །མཁས་པ་ཐམས་ཅད་ཀྱིས་སྐུར་བ་མི་གདབ་པ་ཡིན་ནོ། །ལྷ་རྣམས་ཀྱིས་ལེགས་པར་གསུངས་པ་ཡིན་ནོ། །ཀླུ་དང་གནོད་སྦྱིན་རྣམས་ཀྱིས་ལེགས་པར་བཟུང་བ་ཡིན་ནོ། །ཆོས་བསྟན་པ་རྣམས་ལ་དབང་ཕྱུག་ཏུ་གྱུར་པ་ཡིན་ནོ། །མངོན་པར་ཤེས་པ་རྣམས་ལ་དབང་བསྒྱུར་བ་ཡིན་ནོ། །སེམས་ཅན་གྱི་བསམ་པ་རྣམས་ལ་རྗེས་སུ་སོང་བ་ཡིན་ནོ། །སེམས་ཅན་གྱི་དབང་པོ་རྣམས་ལ་རྗེས་སུ་ཞུགས་པ་ཡིན་ནོ། །ཆོས་བསྟན་པ་ལ་ཆོག་མི་ཤེས་པ་ཡིན་ནོ། །རྙེད་པ་དང་བཀུར་སྟི་དོན་དུ་མི་གཉེར་བ་ཡིན་ནོ། །ཆོས་བསྟན་པ་དག་ལ་སེར་སྣ་མེད་པ་ཡིན་ནོ། །ཚུལ་ཁྲིམས་རྣམ་པར་དག་པས་ཉོན་མོངས་པ་མེད་པ་ཡིན་ནོ། །བཟོད་པ་ཡོངས་སུ་དག་པས་གནོད་པ་མེད་པ་ཡིན་ནོ། །བརྩོན་འགྲུས་ཡོངས་སུ་དག་པས་ལས་ཀྱི་མཐའ་ལེགས་པར་མཐར་ཕྱིན་པ་ཡིན་ནོ། །བསམ་གཏན་ཡོངས་སུ་དག་པས་ཅང་ཤེས་པ་ཡིན་ནོ། །ཤེས་རབ་ཡོངས་སུ་དག་པས་
303a
༄#། །བློ་ལེགས་པར་དཀར་བ་ཡིན་ནོ། །ཚད་མེད་པ་རྣམས་ལ་ཚངས་པའི་བླ་མ་ཡིན་ནོ། །བསམ་གཏན་དང ། ཏིང་ངེ་འཛིན་དང ། སྙོམས་པར་འཇུག་པ་རྣམས་ལ་འཇིག་རྟེན་ལས་འདས་པ་ཡིན་ནོ། །བྱང་ཆུབ་ཀྱི་ལམ་གྱིས་བླ་ན་མེད་པ་ཡིན་ནོ། །དབང་བསྐུར་བ་ཐོབ་པས་ཡོན་ཏན་གྱི་རྣམ་པ་ཐམས་ཅད་དང་ལྡན་པ་ཡིན་ནོ། ། ཞི་བའི་བློ་གྲོས། དེ་ལྟར་ན་བྱང་ཆུབ་སེམས་དཔའ་གཟུངས་ཐོབ་པ་ནི་ཡོན་ཏན་གྱི་བསྔགས་པ་ཚད་མེད་པ་དེ་ལྟ་བུ་དང་ལྡན་པ་ཡིན་ཏེ། ཞི་བའི་བློ་གྲོས། གལ་ཏེ་དེ་བཞིན་གཤེགས་པས་ཕྲིན་ལས་གཞན་མི་མཛད་པར་ལོ་བརྒྱ་སྟོང་དུ་རྒྱུན་དུ་བྱང་ཆུབ་སེམས་དཔའ་གཟུངས་ཐོབ་པའི་བསྔགས་པ་བརྗོད་ཀྱང་ཟད་པར་མི་འགྱུར་རོ། །དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་ལྷའི་བུ་རྒྱལ་པོ་བཟང་ལ་འདི་སྐད་ཅེས་སྨྲས་སོ། །གྲོགས་པོ། དེ་བཞིན་གཤེགས་པས་ཁྱོད་ཀྱི་ཡོན་ཏན་གྱི་བསྔགས་པ་མཐའ་ཡས་པ་བརྗོད་པ་མཛད་པ་ནི་ཁྱོད་ཀྱིས་རྙེད་པ་ལེགས་པར་རྙེད་དོ། །དེ་སྐད་ཅེས་སྨྲས་པ་དང ། ལྷའི་བུ་རྒྱལ་པོ་བཟང་གིས་བྱང་ཆུབ་སེམས་དཔའ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །རིགས་ཀྱི་བུ། འདི་ལ་ཡང་དག་པ་དོན་དམ་པར་ན་གང་དེ་ལྟར་བསྔགས་པའི་ཆོས་གང་ཡང་མི་དམིགས་སོ། །རིགས་ཀྱི་བུ། གང་ལ་ཁ་དོག་མེད་པ་དང ། གཟུགས་མེད་པ་དང ། དབྱིབས་
303b
མེད་པ་དེའི་ཡོན་ཏན་གྱི་བསྔགས་པ་དང ། གཟུགས་ཀྱི་མཐའ་རྟོགས་པར་མི་ནུས་སོ། །གང་ལ་གཟུགས་དང ། ཁ་དོག་དང ། དབྱིབས་འབའ་ཞིག་ཡོད་པ་དེའི་བསྔགས་པ་ནི་བརྗོད་པར་ནུས་སོ། །དེ་ནས་བཅོམ་ལྡན་འདས་ལ་ལྷའི་བུ་རྒྱལ་པོ་བཟང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཐམས་ཅད་ནི་མ་བསྡུས་པ། ང་ཡི་བ་མ་མཆིས་པ་དང ། ཡོངས་སུ་འཛིན་པ་མ་མཆིས་པ། གང་གིས་ཀྱང་ཉེ་བར་སྤྲད་པར་བགྱི་བ་མ་ལགས་པ། གང་གིས་ཀྱང་གསལ་བ་མ་ལགས་པ་སྟེ། འདི་ལ་བརྩོན་པ་དང་ཡང་དག་པར་སྦྱོར་བར་བགྱིའོ། །བཅོམ་ལྡན་འདས། བརྩོན་པ་དང་ཡང་དག་པར་སྦྱོར་བར་གྱུར་པ་རྣམས་ལ་ཆོས་དེ་དག་མངོན་དུ་འགྱུར་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན་ས་ཆེན་པོ་འདི་ནི་ཆབ་ཀྱི་ཕུང་པོའི་སྟེང་ན་གནས་ཏེ། དེ་ལ་མི་གང་ཞིག་ཁྲོན་པའམ། ཁྲོན་པ་ཆེན་པོ་རྐོ་བ་དེ་ཆབ་དང་ལྡན་པར་འགྱུར་ཏེ། གང་མི་རྐོ་བ་དེས་ནི་མི་རྙེད་པ་ལགས་སོ།། བཅོམ་ལྡན་འདས། དེ་བཞིན་དུ་ཐམས་ཅད་ཀྱི་རྗེས་སུ་ཞུགས་པའི་ཡེ་ཤེས་དེ་ལ་སུ་ཞིག་བརྩོན་པར་བགྱིད་པ་དེ་ནི་ཡེ་ཤེས་ཐོབ་པར་འགྱུར་ཏེ། སུ་བརྩོན་པར་མི་བགྱིད་པ་དེས་ནི་ཡེ་ཤེས་འཐོབ་པར་མི་འགྱུར་ལགས་སོ། །བཅོམ་ལྡན་འདས། དེ་ལྟ་ལགས་པས། བྱང་ཆུབ་དོན་དུ་གཉེར་བ་རྣམས་ཀྱིས་རྟག་ཏུ་བརྩོན་པ་དང་བརྩོན་འགྲུས་བརྩམ་པར་
304a
༄#། །བགྱིའོ། །དེ་ལྟར་ན་དེ་དག་ལ་ཆོས་དེ་དག་མངོན་དུ་འགྱུར་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། སྐྱེས་བུ་དམུས་ལོང་གིས་དེ་ལས་སྐྱེས་པའི་གཟུགས་རྣམས་མི་མཐོང་ལགས་སོ། །བཅོམ་ལྡན་འདས། དེ་བཞིན་དུ་ཉོན་མོངས་པས་ལྡོངས་པའི་སེམས་ཅན་རྣམས་ཀྱང་དེ་ལས་སྐྱེས་པའི་ཆོས་རྣམས་མི་མཐོང་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། སྐྱེས་བུ་མིག་དང་ལྡན་ཡང་སྣང་བ་མ་མཆིས་ན་མི་མཐོང་ལགས་སོ། །བཅོམ་ལྡན་འདས་དེ་བཞིན་དུ་གང་དག་ལྷའི་མིག་དང་ལྡན་པ་ལགས་ཀྱང་དེ་དག་དགེ་བའི་བཤེས་གཉེན་གྱི་མན་ངག་མ་མཆིས་ན་མོས་པར་མི་འགྱུར། མཐོང་བར་མི་འགྱུར་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། ལྷའི་མིག་ལ་སྣང་བས་བགྱི་བ་མ་མཆིས་སོ། །བཅོམ་ལྡན་འདས། དེ་བཞིན་དུ་ཡོངས་སུ་སྦྱང་བར་བགྱི་བ་ལ་ཡང་དག་པར་རྗེས་སུ་བསྟན་མི་འཚལ་ལོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། མངལ་ན་མཆིས་པའི་སེམས་ཅན་ནི་མི་གདའ་མི་མཐོང་ཡང་སྐྱེ་ལགས་སོ། །བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའ་བརྩོན་འགྲུས་བརྩམས་པའི་བྱང་ཆུབ་ཀྱང་མི་མཐོང་མོད་ཀྱི། སངས་རྒྱས་ཀྱི་ཆོས་རྣམས་ཀྱིས་ཀྱང་སྐྱེའོ། །བཅོམ་ལྡན་འདས། འདི་ལྟ་སྟེ།
304b
དཔེར་བགྱི་ན། རིའི་རྒྱལ་པོ་གངས་ཅན་ལ་ཤིང་ལྗོན་པ་གང་སྐྱེས་པ་དེ་ནི་བར་མ་དོར་ཆགས་པའམ། སྐམ་པར་མི་འགྱུར་ལགས་སོ། །བཅོམ་ལྡན་འདས། དེ་བཞིན་དུ་འཕགས་པའི་ཆོས་ལ་སྦྱོར་བ་ལ་བརྩོན་པ་གང་གི་ཤེས་པ་སྐྱེས་པ་དེ་ཡང་མི་འཇིག་ཅིང་ཡོངས་སུ་ཉམས་པར་མི་འགྱུར་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། གང་གི་ཚེ་འཁོར་ལོ་ས་བསྒྱུར་བའི་རྒྱལ་པོ་བྱུང་བ་དེའི་ཚེ། རིན་པོ་ཆེ་སྣ་བདུན་འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བདུན་པ་བློན་པོ་རིན་པོ་ཆེ་དག་འབྱུང་བར་འགྱུར་ལགས་སོ། །བཅོམ་ལྡན་འདས། དེ་བཞིན་དུ་གང་གི་ཚེ་བྱང་ཆུབ་ཀྱི་སེམས་སྐྱེ་བ་དེའི་ཚེ་ཆོས་རིན་པོ་ཆེ་སྣ་བདུན་འདི་ལྟ་སྟེ། སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཐབས་འབྱུང་བར་འགྱུར་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། གང་གི་ཚེ་འཁོར་ལོས་བསྒྱུར་བའི་རྒྱལ་པོ་གླིང་བཞི་པའི་འཇིག་རྟེན་གྱི་ཁམས་སུ་རྒྱུ་བ་དེའི་ཚེ་སེམས་ཅན་རྣམས་ལ་དེའི་བྱམས་པ་ཐ་དད་པ་མ་མཆིས་ལགས་སོ། །བཅོམ་ལྡན་འདས། དེ་བཞིན་དུ་གང་གི་ཚེ་བྱང་ཆུབ་སེམས་དཔས་བསྡུ་བའི་དངོས་པོ་བཞི་པོ་སྦྱིན་པ་དང ། སྙན་པར་སྨྲ་བ་དང ། དོན་
305a
༄#། །སྤྱད་པ་དང ། དོན་མཐུན་པས་སེམས་ཅན་དག་སྡུད་པ་དེའི་ཚེ་སེམས་ཅན་རྣམས་ལ་དེ་ཐ་དད་པ་མ་མཆིས་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། གང་གི་ཚེ་འཁོར་ལོས་བསྒྱུར་བའི་རྒྱལ་པོ་མདུན་ཁང་ན་མཆིས་པ་དེའི་ཚེ་འཐབ་པ་དང ། རྩོད་པ་མ་མཆིས་ལགས་སོ། །བཅོམ་ལྡན་འདས། དེ་བཞིན་དུ་གང་གི་ཚེ་བྱང་ཆུབ་སེམས་དཔའ་ཆོས་ཀྱི་འཕེལ་བའི་གཏམ་གྱི་སླད་དུ་མཆིས་པ་དེའི་ཚེ་འཐབ་པའམ། རྩོད་པའི་གཏམ་མ་མཆིས་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། གང་གི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གནས་པར་འགྱུར་པ་དེའི་ཚེ། ཐོག་མར་རིའི་རྒྱལ་པོ་རི་རབ་དང ། རྒྱ་མཚོ་ཆེན་པོ་གནས་པར་འགྱུར་ལགས་སོ། །བཅོམ་ལྡན་འདས། དེ་བཞིན་དུ་གང་གི་ཚེ་བྱང་ཆུབ་སེམས་དཔའ་ཐོག་མར་བྱང་ཆུབ་ཏུ་སེམས་བསྐྱེད་པ་དེའི་ཚེ། ལྷག་པའི་བསམ་པ་དང ། སྙིང་རྗེ་ཆེན་པོར་ཐོག་མར་གནས་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། གང་གི་ཚེ་གདུགས་འཆར་བ་དེའི་ཚེ། རི་གང་དག་མཐོ་བ་དེ་དག་ལ་ཐོག་མར་འོད་ཟེར་འབབ་བོ། །བཅོམ་ལྡན་འདས། དེ་བཞིན་དུ་གང་གི་ཚེ་བྱང་ཆུབ་སེམས་དཔའི་ཡེ་ཤེས་ཀྱི་སྣང་བ་ཐོགས་མར་བྱུང་བ་དེའི་ཚེ། སེམས་ཅན་གང་
305b
དག་དགེ་བའི་ཙབ་སྦྱངས་པ་དེ་དག་གིས་ཡེ་ཤེས་ཀྱི་སྣང་བ་དེ་མྱོང་བར་འགྱུར་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་བགྱི་ན། ས་བོན་ཐམས་ཅད་དང ། རྩཝ་དང ། ཤིང་གལ་པ་དང ། སྨན་དང ། ནགས་ཚལ་ཐམས་ཅད་ནི་སས་བཟེད་དེ། ཐམས་ཅད་ལས་བཅུད་མཉམ་དུ་གཏང་ངོ ། །བཅོམ་ལྡན་འདས། དེ་བཞིན་དུ་གཟུངས་ཐོབ་པའི་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་ལ་ཆོས་ཀྱི་བསམ་པའི་གཏོང་བས་སེམས་ཆགས་པ་མ་མཆིས་པར་གཏོང་ངོ ། །དེ་ནས་བཅོམ་ལྡན་འདས་ཀྱིས་ལྷའི་བུ་རྒྱལ་པོ་བཟང་ལ་ལེགས་སོ་ཞེས་བྱ་བ་བྱིན་ཏེ། ལྷའི་བུ་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་དཔེ་དགོད་པ་བསྟན་པ་འདི་ལེགས་པར་སྨྲས་པ་ལེགས་སོ། །ལེགས་སོ། །ལྷའི་བུ་རྩཝ་དང་ནགས་ཚལ་ཇི་སྙེད་པ་དང ། མིང་གི་བརྡ་དང ། ཆོས་ཀྱི་བརྡ་དང ། སྒྲའི་བརྡ་དག་ཇི་སྙེད་པ་དང ། གཟུགས་དང ། ཁ་དོག་གི་བརྡ་དག་ཇི་སྙེད་པ་དང ། སེམས་ཅན་གྱི་སེམས་ཀྱི་སྤྱོད་པ་ལ་འཇུག་པ་ཇི་སྙེད་པ་དང ། མིང་དང་གཟུགས་རབ་ཏུ་བརྗོད་པ་ཇི་སྙེད་པ་དང ། སེམས་ཅན་རྣམས་ཀྱི་སྤྱོད་པ་ཇི་སྙེད་པ་དང ། སེམས་ཅན་རྣམས་ཀྱི་ཡོངས་སུ་སྤྱོད་པ་ཟས་སྐོམ་ཇི་སྙེད་པ་དང ། ལྷའི་བུ། བྱང་ཆུབ་སེམས་དཔའ་གཟུངས་ཐོབ་པའི་དཔེ་དགོད་པར་བསྟན་པ་ཡང་དེ་སྙེད་དོ། །ལྷའི་བུ། གཟུངས་ཐོང་པའི་བྱང་ཆུབ་སེམས་
306a
༄#། །དཔའི་ཚིག་གང་ཅི་ཡང་རུང་སྟེ། སངས་རྒྱས་ཀྱི་བཀའ་མ་ཡིན་པ་མེད་དོ། །གཟུགས་སུ་སྣང་བའམ། སྒྲའམ། དྲིའམ། རོའམ། རེག་བྱའམ། ཆོས་སུ་སྣང་བ་གང་ཅི་ཡང་རུང་སྟེ། དེ་ལ་གང་སྣང་བར་མི་འགྱུར་བ་དེ་མེད་དོ། །དེ་ལ་གཞན་ལས་ཐོས་པ་ལ་རག་ལས་པའི་སྤོབས་པ་མེད་དོ། །གཞན་གྱི་དོར་ལྟ་བ་ལ་རག་ལས་པའི་བསྟན་པ་མེད་དོ། །དེ་མི་ཟད་པ་དང ། མཐའ་ཡས་པ་དང ། ཐམས་ཅད་ཀྱི་རྗེས་སུ་འགྲོ་བ་དང ། ཐམས་ཅད་ལ་འཇུག་པའི་རྗེས་སུ་སྔོ་བ་ཡིན་ནོ། །དེ་ལ་རྒྱུན་ཆད་པ་མེད་དོ། །ཆགས་པ་མེད་དོ། །ལུས་ལྕི་བ་མེད་དོ། །སེམས་ཞུམ་པ་མེད་དོ། །དེ་སངས་རྒྱས་བརྒྱ་སྟོང་གི་སྤྱན་སྔར་སྟོན་ཀྱང་ཞུམ་པར་མི་འགྱུར་ཏེ། འདི་ལྟར་སངས་རྒྱས་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པའི་བྱང་ཆུབ་སེམས་དཔའ་དེས་གཟུངས་དང ། ཤེས་རབ་དང ། ཡེ་ཤེས་དང ། སྤོབས་པ་ཐོབ་བོ། །དེ་སྟོན་ཀྱང་ཞུམ་པར་མི་འགྱུར། ཀུན་ཏུ་ཞུམ་པར་མི་འགྱུར་ཞིང ། བཟློག་པར་མི་འགྱུར་ཏེ། འདི་ལྟར་བྱང་ཆུབ་སེམས་དཔའ་དེ་ཆགས་པ་མེད་པ་གསུམ་གྱི་རྗེས་སུ་སྔོ་བ་ཡིན་ནོ། །གསུམ་གང་ཞེ་ན། བདག་ལ་ཆགས་པ་མེད་པ་དང ། སེམས་ཅན་ལ་ཆགས་པ་མེད་པ་དང ། ཆོས་ལ་ཆགས་པ་མེད་པའོ། །ཡོངས་སུ་དག་པ་གསུམ་གྱི་རྗེས་སུ་སོང་བ་ཡིན་ཏེ། གསུམ་གང་ཞེ་ན། ཆོས་ཀྱི་དབྱིངས་
306b
ཡོངས་སུ་དག་པ་དང ། དེ་བཞིན་ཉིད་ཡོངས་སུ་དག་པ་དང ། ཡང་དག་པའི་མཐའ་ཡོངས་སུ་དག་པའོ། །མི་ཟད་པ་གསུམ་གྱི་རྗེས་སུ་སོང་བ་ཡིན་ཏེ། གསུམ་གང་ཞེ་ན། ཆོས་མི་ཟད་པ་དང ། ཡི་གེ་མི་ཟད་པ་དང ། བསྟན་པ་མི་ཟད་པའོ། །བྱིན་གྱི་རླབས་གསུམ་ཐོབ་པ་ཡིན་ཏེ། གསུམ་གང་ཞེ་ན། སྤོབས་པའི་བྱིན་གྱི་རླབས་དང ། ཆོས་ཀྱི་དོན་གྱི་བྱིན་རླབས་དང ། ཆོས་ལ་འཇུག་པའི་བྱིན་གྱི་རླབས་སོ། །དགའ་བ་གསུམ་ཐོབ་པ་ཡིན་ཏེ། གསུམ་གང་ཞེ་ན། ཡེ་ཤེས་ཀྱི་དགའ་བ་དང ། ཤེས་རབ་ཀྱི་དགའ་བ་དང ། ཐེ་ཚོམ་ཆད་པས་དགའ་བའོ། ། མྱུར་བ་གསུམ་ཐོབ་པ་ཡིན་ཏེ། གསུམ་གང་ཞེ་ན། དྲན་པ་མྱུར་བ་དང ། བློ་གྲོས་མྱུར་བ་དང ། རྟོགས་པ་མྱུར་པའོ། །གཟུངས་ཀྱི་ཡོན་ཏན་བསྔགས་པའི་དཔེ་དགོད་པ་མི་ཟད་པ་བསྟན་པ་འདི་བཤད་པ་ན། བྱང་ཆུབ་སེམས་དཔའ་བརྒྱད་བརྒྱས་གཟུངས་ཐོབ་པར་གྱུར་ཏོ། །གཟུངས་ཀྱི་ཡོན་ཏན་གྱི་བསྔགས་པའི་དཔེ་དགོད་པའི་མི་ཟད་པའི་ལེའུ་ཞེས་བྱ་སྟེ། ཉི་ཤུ་བཞི་པའོ།། །།དེ་ནས་བཅོམ་ལྡན་འདས་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས། སླད་མའི་ཚེ་སླད་མའི་དུས་ལྔ་བརྒྱ་ཐ་མ་ལ་ཅི་ནས་ཆོས་ཀྱི་རྣམ་གྲངས་འདི་འཛམ་བུའི་གླིང་དུ་སྤྱོད་པར་བྱིན་གྱིས་བརླབ་ཏུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ།
307a
༄#། །དམ་པའི་ཆོས་ཡོངས་སུ་གཟུང་བའི་ཕྱིར། ངས་དེ་བཞིན་གཤེགས་པ་རིན་ཆེན་ཟླ་བ་ལས་ཆོས་སྦ་བ་དང ། བསྲུང་བའི་གསང་སྔགས་ཀྱི་གཞི་གང་དག་ཐོས་པ་དེ་དག་ཁྱོད་ཀྱིས་དྲན་ནམ། གསོལ་པ། བཅོམ་ལྡན་འདས། དྲན་ལགས་སོ། །བཅོམ་ལྡན་འདས་ཀྱས་\་KYཱིཥ\་བཀའ་སྩལ་པ། གསང་བ་པའི་བདག་པོ་ལག་ན་རྡོ་རྗེ། དེ་བས་ན་ཆོས་ཀྱི་རྣམ་གྲངས་འདི་ཡུན་རིང་དུ་གནས་པར་བྱ་བའི་ཕྱིར་ཆོས་ཐམས་ཅད་སྦ་བ་དང ། བསྲུང་བའི་གསང་སྔགས་ཀྱི་གཞི་དེ་དག་ཁྱོད་ཀྱིས་འཁོར་འདི་ལ་རྗོད་ཅིག། དེ་ལྟར་ན་ཆོས་ཀྱི་རྣམ་གྲངས་འདི་ཡུན་རིང་དུ་གནས་པར་འགྱུར་རོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ཕྱོགས་བཅུའི་སངས་རྒྱས་ཐམས་ཅད་ལ་ཕྱག་འཚལ་ཏེ།་གསང་སྔགས་ཀྱི་གཞི་འདི་དག་སྨྲས་སོ། །ཏདྱ་ཐཱ། ཛ་ཡེ་ཛ་ཡ་མ་ཏི། ཛ་ཡ་ཤ་ཏྲུ། ཨ་ལེ་ཨ་མ་ལེ། ཨ་ལུ་ལི་ཏེ། མ་མེ་མ་མ་མ་ཏི། ན་མ་སན་དྷི། ཨུད་ཏ་མེ། ཨུད་ཏ་མ་ཏི། ཨུད་ཏ་ར་ནི། ཨ་རེ་ཨཱ་ར་མ་ནི། ཨཱ་རི་ཤ་མ་ནི། ཨཱ་མཱུ་ལེ། ཨ་མཱུ་ལ། ཨ་བདཏྟི་ཏེ། མཱུ་ལ་ཨ་ནུ་ག་ཏེ། ཨད་ཊེ་མད་ཊི་མད་ཊི་ཏེ་ཨཱ་དི་མཱ་ཌི། མཱ་ཊི་ཏེ། ཁུ་རུ་ཁུ་རུ་སན་དྷི། དྷརྨ་ཨ་ནུ་ག་ཏེ། དྷརྨ་དཀྵེ་དྷ་རྨ་པྲ་བེ་ཤ། ས་རེ་ས་རེ་ས་རེ་ཨ་བེ་དྷེ། བེ་དྷ་སན་དྷི། ཨི་ཧི་ཨེ་ཧ་ནི། ཨེ་ཏ་དཱ་ནུ་ག་མ། བདུད་རྣམས་ཚར་གཅོད་པ་མུ་
307b
སྟེགས་ཅན་རྣམས་འཇོམས་པ། ཆོས་ལ་གནོད་པར་སེམས་པ་རྣམས་རྨུགས་པར་བྱེད་པ། ཉོན་མོངས་པ་རྣམས་སེལ་བ། ཆོས་ཀྱི་ཚུལ་རྣམས་འབར་བར་བྱེད་པ། ཆོས་སྨྲ་བ་རྣམས་ཀུན་དུ་བསྲུང་བ། མྱ་ངན་ལས་འདས་པར་འཛུད་པ། བྱང་ཆུབ་ཡོངས་སུ་སྨིན་པར་བྱེད་པ་རྣམས་ཡོངས་སུ་འཛིན་པ། འཁོར་ཡང་དག་པར་འཇོག་པ་ཆོས་ཉན་པ་རྣམས་ལ་ལུས་སྦྱིན་པར་བྱེད་པ། ཡང་དག་པར་སོང་བ་རྣམས་ཀྱིས་བསམས་པ། ཡང་དག་པར་ཞུགས་པ་རྣམས་ཀྱིས་བལྟ་བ། གསང་སྔགས་ཀྱི་གཞི་རྣམས་མངོན་དུ་གྱུར་པ་དང ། གསང་སྔགས་ཀྱི་མཚམས་འགུག་པ། བརྗོད་པ་ཤེས་པ། ཆད་པ། མི་ཐུལ་བ། བསྟན་པའི་ངོ་བོ་ཉིད་དུ་ཆུད་ཟ་བར་མ་གྱུར་ཅིག་།གསང་བ་པའི་བདག་པོ་ལག་ན་རྡོ་རྗེས་གསང་སྔགས་ཀྱི་གཞི་འདི་དག་ཡོངས་སུ་བརྗོད་མ་ཐག་ཏུ་དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རབ་ཏུ་གཡོས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་བདུད་གང་དག་འཁོད་པ་དེ་དག་ཐམས་ཅད་དཔུང་དང་བཅས། གཡོག་འཁོར་དང་བཅས་ཏེ། བཅོམ་ལྡན་འདས་ཀྱི་གན་དུ་ལྷགས་ནས་ལུས་བཏུད་ཏེ་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཆོས་སྨྲ་བ་སུའི་ཁའི་སྒོ་ནས་གསང་སྔགས་ཀྱི་གཞི་འདི་དག་བྱུང་བ་དེ་ལ་རིམ་
308a
༄#། །གྲོ་བགྱིའོ། །བསྙེན་བཀུར་བགྱིའོ། །བཅོམ་ལྡན་འདས། གསང་སྔགས་ཀྱི་གཞི་འདི་དག་གི་དཔལ་ནི་ལྷ་དང་བཅས་པའི་འཇིག་རྟེན་གྱིས་བཟོད་པར་རྔོ་མ་ཐོག་ལགས་སོ། །བཅོམ་ལྡན་འདས། བདག་ཅག་ཉིད་ཀྱིས་ཆོས་ཀྱི་རྣམ་གྲངས་འདི་སྦ་བར་བགྱིའོ། །གླགས་ལྟ་བ་གཞན་དག་ཀྱང་ཚར་གཅད་པར་བགྱིའོ། །དེ་ནས་བཅོམ་ལྡན་འདས་ཀྱིས་གླང་པོ་ཆེའི་ལྟ་སྟངས་ཀྱིས་ཕྱོགས་བཞི་ཀུན་ཏུ་གཟིགས་ཏེ། དེའི་ཚེ་གསང་སྔགས་ཀྱི་གཞི་འདི་དག་བཀའ་སྩལ་ཏོ། །ཛ་ཡེ་དུར་ཛ་ཡེ། ཛ་ཡ་མ་ཏི ། ཤ་མེ་ཤ་ཏྲུ་ནིར་གྷཱ་ཏ་ནི། ཨ་མཱུ་ལེ། མཱུ་ལ་པ་རི་ཚིན་ནེ། མཱ་རཱ་སཻ་ནྱ་བི་ཏྲཱ་ས་ནི། མུག་ཏེ་མུག་ཏ་བ་ཏི་ཤུད་དྷེ། ཨ་བྷེ་དྷེ། བྷ་ཡ་མོ་ཙ་ནི། བ་རོ་ཧ་ར་ནེ། ཏད་དེ་བི་དྱེ་བིདྱ་བ་རོད་ཏ་མེ། ཕ་རོལ་རྒོལ་བ་ཚར་གཅོད་པ། །ཆོས་སྨྲ་བ་དག་ཀུན་སྡུད་པ། །ཆོས་ཀྱི་མཛོད་ནི་ཀུན་བསྲུང་བ། །རིག་སྔགས་འདི་ནི་སངས་རྒྱས་གསུངས། ། མ་ཨ་མ་མེ་མ་མེ། མ་མ་ཚེ་དེ། ཨརྠེ་ཨརྠ་ནི། སྟ་ར་ཎེ། འཇིག་རྟེན་སྐྱོང་བ་བཞི་དགུག་པའི་ཚིག་རྣམས་སྨྲས་པའོ། །དྷཱི་རེ། དྷཱི་ར་བ་ཏི། གུ་བ་ཏེ། ཤུ་བྷེ་ཤུ་བྷ་བ་ཏི། ས་མེ། ལྷའི་དཔང་པོ་བརྒྱ་བྱིན་འདིར་དགུག་པར་བྱས་པའོ། །མཻ་ཏྲི་སོ་མ་བ་ཏི། ཀྵཱ་ན་ཏི། ཀྲི་པ་ཀ་རུ་ཎོ་ད་ཧྲི་ཏེ། པྲཱི་ཏེ། ཨུ་པེ་ཀྵ་སམ་པན་ཏེ། ཚངས་པ་ཡང་འདིར་དགུག་པར་བྱའོ། །
308b
་ར་ཊེ། བི་ར་ཊི། ཁ་ཁེ་ཨ་མཱུ་ལེ། མཱུ་ལ་ཤོ་དྷ་ནི། བདུད་ནི་ཚུར་གཅད་བྱ་བའི་ཕྱིར། །གསང་སྔགས་གཞི་ནི་འདི་དག་སྨྲས། །མདོ་སྡེ་ལེགས་པར་བཤད་པ་འདི། །མི་ཡི་དབང་པོས་བྱིན་གྱིས་བརླབས། །གང་ཚེ་ཤེས་པར་འགྱུར་བ་ནི། །དེ་ཡི་ཚེ་ན་སྤྱོད་པར་འགྱུར། །གསང་སྔགས་འདི་དག་རབ་བརྗོད་པས། །ས་ནི་རབ་ཏུ་གཡོས་པར་གྱུར། །བདུད་རྣམས་ཐམས་ཅད་ལྷགས་གྱུར་ཏེ། །འདི་སྐད་ཀྱི་ནི་ཚིག་སྨྲས་སོ། །ཕྱི་མའི་དུས་ན་མདོ་སྡེ་འདི། །གང་དག་ལག་ཏུ་མཆི་འགྱུར་བ། །ཆོས་སྨྲ་མཁས་པ་དེ་དག་ནི། །བདག་ཅག་རྣམས་ཀྱིས་བསྲུང་བར་བགྱི། །དེ་ནས་བཅོམ་ལྡན་འདས་ཀྱིས་གསང་བ་བའི་བདག་པོ་ལག་ན་རྡོ་རྗེ་ལ་བཀའ་སྩལ་པ། གསང་བ་བའི་བདག་པོ། ཆོས་ཀྱི་རྣམ་གྲངས་འདི་དེ་བཞིན་གཤེགས་པ་ཉིད་ཀྱིས་བྱིན་གྱིས་བརླབས་པར་ཤེས་པར་གྱིས་ཤིག་།བྱིན་གྱིས་བརླབས་པ་འདི་ནི་སུས་ཀྱང་རྣམ་པར་དཀྲུག་པར་མི་ནུས་སོ། །དེ་ཅིའི་ཕྱིར་ཞེ་ན། གསང་བ་པའི་བདག་པོ། ངས་མངོན་པར་ཤེས་ཏེ། འདས་པའི་དུས་ན་བསྐལ་པ་མ་སྨད་པ་ཞེས་བྱ་བ་ལ་འཇིག་རྟེན་གྱི་ཁམས་མ་སྨད་པ་ཞེས་བྱ་བར་དེ་བཞིན་གཤེགས་པ་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་
309a
༄#། །རིན་ཆེན་ཟླ་བ་ཞེས་བྱ་བ་འཇིག་རྟེན་དུ་བྱུང་ངོ ། །དེ་བཞིན་གཤེགས་པ་དེའི་གསུང་རབ་ལ་དགེ་སློང་ཆོས་སྨྲ་བ། རྫུ་འཕྲུལ་ཆེ་བ། དབང་ཆེ་བར་གྲགས་པ། མཐུ་ཆེ་བ་ཤེས་རབ་འཕགས་ཞེས་བྱ་བ་དང ། བདེན་པས་བྱིན་ཞེས་བྱ་བ་གཉིས་བྱུང་སྟེ། ཆོས་སྨྲ་བ་དེ་གཉིས་ཀྱིས་དེ་བཞིན་གཤེགས་པ་དེ་ལས་གསང་སྔགས་ཀྱི་གཞི་འདི་དག་བཟུང་ནས། བཅོམ་ལྡན་འདས་དེས་ཆོས་ཀྱི་འཁོར་ལོ་བསྐོར་བ་བསྐལ་པ་ཕྱེད་ཚང་བར་རྗེས་སུ་བསྐོར་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། བདུད་བྱེ་བ་ཁྲག་བརྒྱ་འཁོད་པ་གང་ཡིན་པ་དེ་དག་ཐམས་ཅད་ཡོངས་སུ་སྨིན་པར་བྱ་སྟེ། བྱང་ཆུབ་ཡང་དག་པར་འཛིན་དུ་བཅུག་གོ་།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་རིན་ཆེན་ཟླ་བ་དེ་བཞུགས་སམ། འོན་ཏེ་ཡོངས་སུ་མྱ་ངན་ལས་འདས་ལགས། བཅོམ་ལྡན་འདས་ཀྱིས་བཀའ་སྩལ་པ། ཞི་བའི་བློ་གྲོས། དེ་བཞིན་གཤེགས་པ་རིན་ཆེན་ཟླ་བ་དེ་ནི་ཤར་ཕྱོགས་ལོགས་ཀྱི་སངས་རྒྱས་ཀྱི་ཞིང་བྱེ་བ་ཕྲག་བརྒྱ་སྟོང་ཕྲག་བཅུ་འདས་པ་ན་འཇིག་རྟེན་གྱི་ཁམས་མ་སྨད་པ་ཞེས་བྱ་བ་ན་བཞུགས་སོ། །དེ་བཞིན་གཤེགས་པ་དེའི་ཚེའི་ཚད་ནི་བསྐལ་པ་ཁྲི་ཐུབ་བོ། །རིགས་ཀྱི་བུ། དེ་བཞིན་གཤེགས་པ་
309b
དེའི་སངས་རྒྱས་ཀྱི་ཞིང་ན་བདུད་གང་དག་འཁོད་པ་དེ་དག་ཁྲོས་ཤིང་དངང་བར་འགྱུར་བ་དང ། དེ་བཞིན་གཤེགས་པ་དེས་གསང་སྔགས་ཀྱི་གཞི་འདི་དག་གིས་དེ་དག་བཏུལ། ལེགས་པར་ཡོངས་སུ་བཏུལ་ཏེ། དེ་དག་ཐམས་ཅད་ཀྱང་བྱང་ཆུབ་ཏུ་ཡོངས་སུ་སྨིན་པར་བྱས་སོ། །རིགས་ཀྱི་བུ། ང་དང ། གསང་བ་པའི་བདག་པོ་ལག་ན་རྡོ་རྗེ་གཉིས་ཀྱིས་དེ་བཞིན་གཤེགས་པ་རིན་ཆེན་ཟླ་བ་དེའི་གསུང་རབ་ལ་ཚངས་པར་སྤྱོད་པ་སྤྱད་ནས་བྱང་ཆུབ་ཏུ་ངེས་པར་བྱུང་སྟེ། ང་ནི་ཤེས་རབ་འཕགས་ཞེས་བྱ་བར་གྱུར་ཏོ། །གསང་བ་པའི་བདག་པོ་ནི་བདེན་པས་བྱིན་ཞེས་བྱ་བར་གྱུར་ཏོ། །ཞི་བའི་བློ་གྲོས། དེ་ལྟར་ངེད་གཉིས་ལྷན་ཅིག་ཏུ་མཐུན་པར་བག་ཡོད་པར་སངས་རྒྱས་བཅོམ་ལྡན་འདས་ཚད་མེད་པ་དག་ལ་བསྟི་སྟང་དུ་བྱས་སོ།། བླ་མར་བྱས་སོ། །རིམ་གྲོར་བྱས་སོ། །མཆོད་པར་བྱས་སོ། །ཞི་བའི་བློ་གྲོས། དེ་ལྟར་ན་གསང་སྔགས་ཀྱི་གཞི་འདི་དག་ནི་བདུད་ཚར་གཅད་པ་དང ། དམ་པའི་ཆོས་ཡོངས་སུ་གཟུང་བའི་ཕྱིར་གཅེས་སྤྲས་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་ལ་གཟིགས་ནས་འདི་སྐད་ཅེས་བཀའ་སྩལ་ཏོ། །གྲོགས་པོ་དག། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་འོག་ཏུ་བསྐལ་པ་གྲངས་མེད་པར་བསྒྲུབས་པའི་བྱང་ཆུབ་འདི་ནུབ་པར་མི་འགྱུར་བར་བྱ་བའི་ཕྱིར་གཟུང་བ་དང ། ཡོངས་
310a
༄#། །བསྲུང་བར་ཁྱེད་ཀྱི་ནང་ནས་སུ་སྤྲོ། དེ་ནས་འཁོར་དེའི་ནང་ནས་བྱང་ཆུབ་སེམས་དཔའ་ཁྲི་ཉིས་སྟོང་དམ་པའི་ཆོས་ཡོངས་སུ་གཟུང་བའི་ཕྱིར་ལངས་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་དེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། ། ལུས་དང་སྲོག་ཀྱང་སྤང་བགྱིས་ལ། །རྣམ་པར་སྨིན་ལ་མི་རེ་བར། །འཇིག་རྟེན་མགོན་པོས་གསུངས་པ་ཡི། །མདོ་སྡེ་འདི་ནི་གཟུང་བར་བགྱི། །རྒྱལ་པོ་བཟང་ལ་སོགས་པ་ལྷའི་བུ་ལྔ་སྟོང་གིས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་དེ་བཞིན་གཤེགས་པའི་བྱང་ཆུབ་འདི་གཟུང་བར་བགྱིའོ། ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སེམས་ཅན་ཀུན་གྱི་དོན་སླད་དུ། །སྙིང་རྗེ་བརྟན་པར་བསྐྱེད་ནས་ནི། །སངས་རྒྱས་ཀྱིས་གཟུངས་ཟབ་པ་ཡི། །མདོ་སྡེ་འདི་ནི་གཟུང་བར་བགྱི། །དེ་ནས་ལྷའི་དབང་པོ་བརྒྱ་བྱིན་དང ། ཚངས་པ་གཙུག་ཕུད་ཅན་དང ། རྒྱལ་པོ་ཆེན་པོ་རྣམ་ཐོས་ཀྱི་བུས་དེའི་ཚེ་ཚིགས་སུ་བཅད་པ་འདི་སྨྲས་སོ། །ནད་ཀུན་ལས་ནི་ཐར་བགྱིད་པ། །མདོ་འདི་སྨན་དང་འདྲ་བ་ལགས། །སྟོན་པ་ལགས་པར་སེམས་བསྐྱེད་དེ། །བདག་ཅག་གིས་ཀྱང་གཟུང་བར་བགྱི། །དེ་ནས་བཅོམ་ལྡན་ལ་འདས་ལ་གསང་བ་པའི་
310b
བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་དེ་བཞིན་གཤེགས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྐལ་པ་གྲངས་མ་མཆིས་པར་བསྒྲུབས་པ་འདི་གཟུང་བར་བགྱིའོ། །དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། །ཆོས་འདི་ཡི་གེ་མ་མཆིས་ན། །མི་ཡི་དབང་པོས་ཐུགས་རྗེ་ཡིས། །ཡི་གེ་རྣམས་ཀྱིས་རབ་བཤད་པ། །ད་ནི་བདག་གིས་གཟུང་བར་བགྱི། །དེ་ནས་བཅོམ་ལྡན་འདས་ཀྱིས་ཚངས་པ་གཙུག་ཕུད་ཅན་ལ་བཀའ་སྩལ་པ། ཚངས་པ། གསུམ་པོ་འདི་དག་ནི་དེ་བཞིན་གཤེགས་པ་ལ་མཆོད་པ་དང ། རིམ་གྲོ་བྱེད་པ་བླ་ན་མེད་པའོ། །མཆོད་པའི་ལས་བླ་ན་མེད་པའོ། །བསོད་ནམས་ཚད་མེད་པ་འབྱུང་བའོ། །གསུམ་གང་ཞེ་ན། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང ། གང་དེ་བཞིན་གཤེགས་པ་རྣམས་ཀྱིས་དམ་པའི་ཆོས་འཛིན་པ་དང ། གང་ཇི་ལྟར་ཐོས་པའི་ཆོས་རྣམས་དེ་བཞིན་ཉིད་དུ་བསྒྲུབ་པ་སྟེ།་ཚངས་པ། གསུམ་པོ་དེ་དག་ནི་དེ་བཞིན་གཤེགས་པ་ལ་མཆོད་པ་དང ། རིམ་གྲོ་བྱ་བ་བླ་ན་མེད་པའོ། །ཚངས་པ། གལ་ཏེ་དེ་བཞིན་གཤེགས་པ་ཚེའི་ཚད་བསྐལ་པར་བཞུགས་པས་མཆོད་པའི་དངོས་པོ་གསུམ་པོ་འདི་དག་གི་བསོད་ནམས་ཀྱི་རྣམ་པར་སྨིན་པ་བསྐལ་པའི་བར་དུ་བསྟན་དུ་ཟིན་ཀྱང་མཐར་ཕྱིན་པར་མི་འགྱུར་རོ། །ཚངས་པ། དེ་ལྟ་བས་ན་དེ་
311a
༄#། །བཞིན་གཤེགས་པ་ལ་མཆོད་པ་དང ། རིམ་གྲོ་བྱ་བ་བླ་ན་མེད་པས་མཆོད་པ་བྱེད་འདོད་པས་མཆོད་པའི་དངོས་པོ་གསུམ་པོ་འདི་དག་གིས་མཆོད་པར་བྱའོ། །ཚངས་པ། དེ་བཞིན་གཤེགས་པ་གཅིག་གི་དམ་པའི་ཆོས་ཀྱི་ཚིག་བཞི་པའི་ཚིགས་སུ་བཅད་པ་ཡོངས་སུ་བཟུང་ན་འདས་པ་དང ། མ་བྱོན་པ་དང ། ད་ལྟར་བྱུང་བའི་དེ་བཞིན་གཤེགས་པ་རྣམས་ཀྱི་བྱང་ཆུབ་ཡོངས་སུ་གཟུང་བར་འགྱུར་རོ། །དེ་ཅིའི་ཕྱིར་ཞེ་ན། ཚངས་པ། དེ་བཞིན་གཤེགས་པ་རྣམས་ཀྱི་བྱང་ཆུབ་ནི་ཆོས་ལས་ངེས་པར་འབྱུང་བ་ཡིན་པས་དེ་ཆོས་ཀྱིས་མཆོད་པར་བྱའི། །ཟང་ཟིང་གིས་ནི་མ་ཡིན་ནོ། །དམ་པའི་ཆོས་ཀྱི་མཆོད་པ་ནི་མཆོད་པ་ཐམས་ཅད་ཀྱི་ནང་དུ་མཆོག་ཏུ་བཤད་དོ། ། དམ་པར་བཤད་དོ། །ཕུལ་དུ་བཤད་དོ། །ཚངས་པ། ངས་མངོན་པར་ཤེས་ཏེ་འདས་པའི་དུས་ན། ང་རྒྱལ་པོའི་ཕོ་བྲང་ཞིག་ཏུ་སྐྱེས་ཏེ། རྒྱལ་པོ་གཞོན་ནུ་བློ་གྲོས་ལྡན་ཞེས་བྱ་བར་གྱུར་པ་དེ་ན་ང་གཉིད་ཀྱིས་ལོག་པའི་རྨི་ལམ་ན་ཚིགས་སུ་བཅད་པ་གཉིས་ཐོས་ནས་བཟུང་བ་དང ། ང་སད་ནས་འདི་སྙམ་དུ་བསམས་ཏེ། བདག་གིས་གཏེར་ཆེན་པོ་ཞིག་རྙེད་དོ་སྙམ་ནས། ངས་གཏེར་ཆེན་པོ་རྙེད་དོ་ཞེས་སྐད་ཆེར་ཕྱུང་བ་དང ། ངའི་ཕ་མ་གཉིས་ན་རེ། གཞོན་ནུ་གཏེར་ག་ལ་ཡོད་ཅེས་ཟེར་རོ། །ངས་ཕ་མ་གཉིས་ལ་ཚིགས་སུ་
311b
བཅད་དེ་སྨྲས་པ། འཇིག་རྟེན་གཏེར་ཆེན་རྣམས་ནི་རྒྱལ་པོ་དང ། །རྐུན་པོ་མེ་ཆུས་བསླུས་པས་ཟད་པར་འགྱུར། །དེ་བཞིན་གཤེགས་པ་རྣམས་ཀྱི་ཆོས་གཏེར་ནི། །བསྐལ་པ་བྱེ་བ་མང་པོར་ཆུད་མི་ཟ། །སེམས་ཅན་དོན་བརྩོན་བྱང་ཆུབ་སེམས་དང་ནི། །ཚུལ་བཞིན་ཉིད་ཀྱིས་དབེན་སེམས་གང་ཡིན་དང ། །རྟག་ཏུ་བག་ཡོད་འཆི་མེད་རྒྱུ་ཡིན་ཏེ། །ཡོངས་སུ་འཛིན་མེད་བདེ་བ་ཀུན་གྱི་རྒྱུ། ཚངས་པ། ཚིགས་སུ་བཅད་པ་འདི་གཉིས་ངས་རྨི་ལམ་དུ་ཐོས་ཏེ། ཚངས་པ། ངས་ཚིགས་སུ་བཅད་པ་འདི་གཉིས་ཀྱིས་སེམས་ཅན་བརྒྱད་སྟོང་ནི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སྲོག་ཆགས་བཞི་ཁྲི་ཉིས་སྟོང་ནི་བདེ་འགྲོ་ཐོབ་པར་བྱས་སོ། །ཚངས་པ་ཁྱོད་ཀྱིས་རྣམ་གྲངས་འདིས་ཀྱང་ཇི་ལྟར་གང་དག་ཐོས་པ་ལ་བརྩོན་པ་དང ། བརྩོན་ནས་ཡང་དག་པར་བསྒྲུབ་པ་དང ། བསྒྲུབས་པ་ལ་གནས་ནས་ཀྱང་གཞན་ལ་ཕན་འདོགས་པ་དེ་དག་གིས་གཏེར་ཆེན་པོ་ཐོབ་པར་དེ་ལྟར་རིག་པར་བྱའོ། །ཚངས་པ།་ཐེག་པ་ཆེན་པོ་ལ་གཅེས་སྤྲས་བྱེད་པའི་ཆོས་གཉིས་ཏེ། གཉིས་གང་ཞེ་ན། སེམས་ཅན་ཐམས་ཅད་ལ་ཁོང་ཁྲོ་བ་མེད་པ་དང ། ཐོས་པ་ཚོལ་བས་ཆོག་མི་ཤེས་པ་སྟེ། གཉིས་པོ་དེ་དག་གོ། ཚངས་པ། དེ་ལྟ་བས་ན་ཆོས་ཀྱི་ཚུལ་འདི་རྒྱུན་མ་བཅད་ཅིག་།ཚངས་པ་ཁྱོད་ཀྱིས་བསྐལ་པ་བཟང་པོ་པའི་དེ་བཞིན་གཤེགས་པ་ཐམས་ཅད་ལ་གསོལ་བ་གདབ་པ་དང་
312a
༄#། །དམ་པའི་ཆོས་ཡོངས་སུ་གཟུང་བར་གྱིས་ཤིག་།ཚངས་པ། བསྐལ་པ་བཟང་པོ་འདི་ལ་སངས་རྒྱས་བཅོམ་ལྡན་འདས་གཞན་འབྱུང་བར་འགྱུར་བ་དེ་དག་དེ་འདྲ་བར་ཡོངས་སུ་དག་པའི་སེམས་ཅན་དུ་འགྱུར་ན་ནི། དེར་ཁྱོད་བཏང་སྙོམས་ཅན་དུ་འགྱུར་རོ། །ཚངས་པ། འདི་ལྟར་ཉོན་མོངས་པ་ཅན་གྱི་དུས་འདི་ན་སུ་ཞིག་ཉིན་གཅིག་གམ། མཚན་གཅིག་དམ་པའི་ཆོས་འཛིན་པ་དེ་ནི་ཆེས་མང་གི་།སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་བསྐལ་པ་བརྒྱ་སྟོང་གིས་ནི་དེ་ལྟ་མ་ཡིན་ནོ། །ཚངས་པ། དེ་ལྟ་བས་ན་ཁྱོད་ཀྱིས་དུས་ངན་པ་འདིར་དམ་པའི་ཆོས་ཡོངས་སུ་གཟུང་བའི་བརྩོན་འགྲུས་སུ་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། དེ་བཞིན་གཤེགས་པའི་གསང་བ་པའི་བདག་པོ་ལག་ན་རྡོ་རྗེའི་ལེའུ་ཀླུའི་གཟུངས་ཆེན་པོ་བསྟན་པ་འདི་ལོང་ཞིག་།གཟུང་ཞིག་།ལྷོགས་ཤིག ། གཞན་དག་ལ་ཡང་རྒྱ་ཆེར་ཡང་དག་པར་སྟོན་ཅིག་།ཀུན་དགའ་བོ། ཆོས་ཀྱི་རྣམ་གྲངས་འདི་ཁྱོད་ལ་ཡོངས་སུ་གཏད་དོ། །དེ་བཞིན་གཤེགས་པའི་གསང་བ་བསམ་གྱིས་མི་ཁྱབ་པ་འདི་སྐྱེ་བོ་ཕལ་པ་ལ་མ་བཤད་ཅིག་།ཀུན་དགའ་བོ། སེམས་ཅན་དམན་པ་ལ་མོས་པ་རྣམས་ནི་འདི་ལ་མགོ་རྨོངས་པར་འགྱུར་ཏེ། ཀུན་དགའ་བོ། ཆོས་ཀྱི་རྣམ་གྲངས་འདི་
312b
ནི་དེ་ཙམ་དུ་མོས་པར་དཀའ་བ། དེ་ཙམ་དུ་རྟོགས་པར་དཀའ་བའོ། །སེམས་ཅན་གང་དག་ཅང་ཤེས་པ་སྦྱངས་པ་ལེགས་པར་བྱས་པ་ཆོས་འདི་དག་གི་སྣོད་དུ་གྱུར་པ་མ་གཏོགས་ཏེ།་དེ་དག་ནི་ཆོས་ཀྱི་ཚུལ་གྱི་རྒྱུད་འདི་ཐོས་ན་སྐྲག་པར་མི་འགྱུར་རོ། །དེ་སྐད་ཅེས་བཀའ་སྩལ་པ་དང ། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས། སངས་རྒྱས་ཀྱི་མཐུས། བདག་གིས་ཆོས་ཀྱི་རྣམ་གྲངས་འདི་བླངས་ལགས་ཏེ། མཐུ་ཅི་མཆིས་པས་རྡོ་ཅི་ཐོག་ཏུ་གཟུང་བར་བགྱིའོ། །བཤད་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་སེམས་ཅན་ཆེན་པོ་དམ་པའི་ཆོས་ཡོངས་སུ་གཟུང་བའི་ཕྱིར་ལངས་པ་འདི་དག་མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། འདི་དག་ཐམས་ཅད་ནི་ཁྱོད་ཆོས་ཀྱི་རྣམ་གྲངས་འདི་སྟོན་པ་ན་ཕན་འདོགས་པར་འགྱུར་བ་ཤ་སྟག་གོ་།གསོལ་པ།་བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེ་ལྟ་བས་ན་ཁྱོད་ཀྱིས་ཆོས་ཀྱི་རྣམ་གྲངས་འདི་ལག་ན་རྡོ་རྗེའི་ལེའུ་ཞེས་བྱ་བར་ཡང་གཟུང་ཞིག་།འདི་དེ་བཞིན་གཤེགས་པའི་གསང་བ་བསྟན་པའི་ལེའུ་ཞེས་བྱ་བར་ཡང་གཟུང་ཞིག་།འདི་སངས་རྒྱས་ཀྱི་ཆོས་
313a
༄#། །བསམ་གྱི་མི་ཁྱབ་པ་བསྟན་པ་ཞེས་བྱ་བར་ཡང་གཟུང་ཞིག་།འདི་བསོད་ནམས་ཚད་མེད་པ་འབྱུང་བ་ཞེས་བྱ་བར་ཡང་གཟུང་ཞིག་།ཀུན་དགའ་བོ། །བྱང་ཆུབ་སེམས་དཔའི་ཐེག་པ་པའི་སྐྱེས་བུ་གང་ཟག་གང་ཞིག་སངས་རྒྱས་ཀྱི་སྤྱན་གྱིས་གཟིགས་པའི་སངས་རྒྱས་ཀྱི་ཞིང་རྣམས་སའི་སྟེང་ནས་བཟུང་སྟེ། སྲིད་པའི་རྩེ་མོའི་བར་དུ་རིན་པོ་ཆ་ཐམས་ཅད་ཀྱིས་ཡོངས་སུ་བཀང་ནས་སྦྱིན་པ་བྱིན་ཏེ། དེའི་རྣམ་པར་སྨིན་པ་ལ་རེ་བབས་གང་གིས་ཆོས་ཀྱི་རྣམ་གྲངས་འདི་ལེགས་པར་བཏོན་ཏེ། ཟང་ཟིང་མེད་པའི་སེམས་ཀྱིས་གཞན་དག་ལ་ཡང་རྒྱ་ཆེར་ཡང་དག་པར་བཤད་ན། འདི་ནི་དེ་བས་བསོད་ནམས་ཆེས་མང་དུ་བསྐྱེད་དོ། །དེ་བས་ན་ཆོས་ཀྱི་རྣམ་གྲངས་འདི་དེ་བཞིན་གཤེགས་པའི་གསང་བ་བསྟན་པའི་ལེའུ་དང ། བསོད་ནམས་ཚད་མེད་པ་འབྱུང་བ་ཞེས་བྱའོ། །དམ་པའི་ཆོས་ཡོངས་སུ་གཏད་པའི་ལེའུ་འདི་བསྟན་པ་ན་སྲོག་ཆགས་བྱེ་བ་བརྒྱ་སྟོང་ཕྲག་བཅུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་དགུ་ཁྲི་དྲུག་སྟོང་ནི་བཟོད་པ་ཐོབ་པར་གྱུར་ཏོ། །སྲོག་ཆགས་བརྒྱད་ཁྲི་བཞི་སྟོང་ནི་ཆོས་རྣམས་ལ་ཆོས་ཀྱི་མིག་རྣམ་པར་དག་གོ་།དགེ་སློང་སྟོང་དྲུག་བརྒྱ་ནི་སེམས་རྣམ་པར་གྲོལ་ལོ། །ཕྱོགས་བཅུའི་སངས་རྒྱས་ཀྱི་ཞིང་ཚད་མེད་པ་དག་ནི་རབ་ཏུ་གཡོས་སོ། །ལྷ་བརྒྱ་སྟོང་དག་
313b
གིས་ནི་རོལ་མོའི་སིལ་སྙན་བླངས་ཤིང་མེ་ཏོག་གི་ཆར་ཡང་རབ་ཏུ་ཕབ་སྟེ། འདི་སྐད་དུ་ཆོས་ཀྱི་རྣམ་གྲངས་འདི་འཛམ་བུའི་གླིང་དུ་ཤིན་ཏུ་ཡུན་རིང་དུ་གནས་པར་གྱུར་ཅིག་ཅེས་ཀྱང་སྨྲས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། གསང་པ་པའི་བདག་པོ་ལག་ན་རྡོ་རྗེ་དང ། བྱང་ཆུབ་སེམས་དཔའ་ཞི་བའི་བློ་གྲོས་དང ། ལྷའི་བུ་རྒྱལ་པོ་བཟང་དང ། རྒྱལ་པོ་མ་སྐྱེས་དགྲ་དང ། བྱང་ཆུབ་སེམས་དཔའ་དེ་དག་དང ། དགེ་སློང་དེ་དག་དང ། ཚེ་དང་ལྡན་པ་ཀུན་དགའ་བོ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དམ་པའི་ཆོས་ཡོངས་སུ་གཏད་པའི་ལེའུ་ཞེས་བྱ་སྟེ་ཉི་ཤུ་རྩ་ལྔ་པའོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། དེ་བཞིན་གཤེགས་པའི་གསང་བ་བསམ་གྱིས་མི་ཁྱབ་པ་བསྟན་པ་ཞེས་བྱ་བའི་ལེའུ་སྟེ། གསུམ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། མུ་ནེ་ཝརྨ་དང ། ཞུ་ཆེན་གྱི་ལོ་ཙྪ་བ་བན་དྷེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་བཅད་ཀྱིས་ཀྱང་གཏན་ལ་ཕབ་པ།།