rKTs


H490

(e-text produced by ACIP)

see text in transliteration
22b
རྒྱ་གར་སྐད་དུ། ཨཱརྱ་སཔྟ་བུདྡྷ་ཀཾ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སངས་རྒྱས་བདུན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཏི་སེའི་རིའི་རྩེ་མོ་ལྷའི་གནས་ན་དྲང་སྲོང་གི་སྤྱོད་པ་དང་ཧ་ཅང་ཡང་མི་རིང་བ་ཞིག་ན། དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་ལྔ་བརྒྱ་ལ། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང ། ཀུན་ཏུ་བཟང་པོ་དང ། མཐའ་ཡས་མེ་ཏོག་དང ། ཀུན་ནས་མེ་ཏོག་དང།་དེ་དག་ལ་སོགས་པ་སྐྱེ་བ་གཅིག་གིས་ཐོགས་པ་ཤ་སྟག་དང་ཐབས་གཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱིས་རིའི་རྩེ་མོའི་ནགས་ཁྲོད་དེ་ཉིད་ན་དགེ་
23a
༄#། །སློང་ཞིག་འབྱུང་པོས་ཟིན་ནས་བརྡོལ་ཞིང་གཅེར་བུ་གོས་མེད་ལ་ལག་པ་སྒྲེང་སྟེ་ངུ་ཞིང་འདུག་པ་གཟིགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ནམ་མཁའི་དཀྱིལ་ན་ཀྱི་ཧུད་ཅེས་སྒྲ་འབྱིན་པ་འདི་དང ། དགེ་སློང་གཅེར་བུ་གོས་མ་མཆིས་ལ། ལག་པ་བསྟོད་པ་ཅིག་ཤོས་འདི་ཡང་སུ་ཞིག་ལགས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ནམ་མཁའི་སྙིང་པོ། འདི་ནི་ནད་ཀྱིས་བཏབ་པ་ཡིན་ནོ། །ཅིག་ཤོས་འདི་ཡང་ནད་ཀྱིས་བཏབ་པ་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །ནད་ཐམས་ཅད་རབ་ཏུ་ཞི་བར་བགྱིད་པ་དང ། འབྱུང་པོ་ཐམས་ཅད་བཟློག་པའི་རིག་སྔགས་བཅོམ་ལྡན་འདས་ཀྱིས་བསྟན་དུ་གསོལ། བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་སངས་རྒྱས་སྤྲུལ་པ་མཛད་དེ། དེ་ནས་ནམ་
23b
མཁའ་ལ་དེ་བཞིན་གཤེགས་པ་དྲུག་བྱུང་ངོ ། །བདུན་པ་ནི། སངས་རྒྱས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་བའོ། །དེ་ནས་དེ་བཞིན་གཤེགས་པ་རྣམ་པར་གཟིགས་སྟེང་གི་ནམ་མཁའ་ལ་བཞུགས་ཏེ། སེམས་ཅན་ཐམས་ཅད་ལ་ཕན་པའི་དོན་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ། །ན་མོ་བུདྡྷཱ་ཡ། ན་མོ་དྷརྨཱ་ཡ། ན་མཿ ་སཾ་གྷཱ་ཡ། ཏདྱ་ཐཱ། ཨོཾ་ཧ་ལ་ཧ་ལ། ཧི་ལི་ཧི་ལཱ་ཡ། ན་མོ་ཛ་ག་ན་མི་ཙ་ནཱ་ཡ། ན་མོ་ན་མཿ ་སཝཱཧཱ། དེ་ནས་དེ་བཞིན་གཤེགས་པ་རྣམ་པར་གཟིགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ནམ་མཁའི་སྙིང་པོ། གང་ལ་ལ་ཞིག་རིག་སྔགས་འདི་འཆང་ངམ། ཀློག་གམ། ཀུན་ཆུབ་པར་བྱེད་ན་དེའི་ལུས་ལ་མཚོན་གྱིས་མི་ཚུགས་ཆུ་དང ། མེའི་སྡུག་བསྔལ་བའི་ནད་ཀྱིས་འཆི་བའི་དུས་བྱེད་པར་མི་འགྱུར་རོ། །དུས་མ་ཡིན་པའི་འཆི་བས་འཆི་བའི་དུས་བྱེད་པར་མི་འགྱུར་རོ། །དེ་དུག་ཟོས་ཀྱང་ཟས་བཞིན་དུ་འགྱུར་རོ། །ཟས་དང ། སྐོམ་ལ་ལན་བདུན་བཟླས་བརྗོད་བྱས་ཏེ་ཟོས་ན། ཕ་རོལ་གྱི་གནོད་པ་མི་འབྱུང་ངོ ། །ནད་ཐམས་ཅད་ཀྱིས་བཏབ་པར་མི་འགྱུར་རོ། །རིང་དུ་
24a
༄#། །འཚོ་བར་འགྱུར་རོ། །ཐོས་པ་འཛིན་པར་འགྱུར་རོ། །དེ་བཞིན་གཤེགས་པ་བདུན་གྱི་གཟུགས་མཐོང་བར་འགྱུར་རོ། །མཚོན་བཏབ་པའི་རྣ་བར་བཟླས་བརྗོད་བྱས་ལ་སྣ་མའི་མར་སྦྱིན་ནོ། །མཛེ་དང ། སྐྲངས་ནད་ཀྱིས་བཏབ་པ་རྣམས་ལ། སྣ་མའི་མར་དང ། ུཏྤ་ལ་སྔོན་པོ་དང ། ཤུ་ཏི་དང ། ཉེའུ་ཤིང་པ་རྣམས་བསྲེས་པའི་མར་བྱིན་ན་ནད་ཐམས་ཅད་སོས་པར་འགྱུར་རོ། །ལས་ཐམས་ཅད་ལ་ཡང་སྦྱར་བར་བྱའོ། །དེ་ནས་དེ་བཞིན་གཤེགས་པ་གཙུག་ཏོར་ཅན་སྟེང་གི་ནམ་མཁའ་ལ་བཞུགས་ཏེ། སེམས་ཅན་ཐམས་ཅད་ལ་ཕན་པའི་དོན་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ། །ན་མོ་བུདྡྷ་ཡ།་ན་མོ་དྷརྨཱ་ཡ། ན་མཿ སཾ་གྷ་ཡ། ཨོཾ་པ་ཙ་པ་ཙ་པ་ཙཱ་ཡ་པ་ཙཱ་ཡ། སརྦ་བྷཱུ་ཏཱ་ནཱཾ། ཙྪིནྡྷ་ཡ། ཀཱི་ལ་ཡ། པ་ར་བིདྱཱ་ནཱཾ་སཝཱཧཱ། ནམ་མཁའི་སྙིང་པོ། སེམས་ཅན་ཐམས་ཅད་ལ་ཕན་པའི་དོན་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། བསྒོམ་ཉེས་པ་དང ། རྨི་ལམ་ངན་པ་ཐམས་ཅད་བཟློག་པ་དང ། དུས་མ་ཡིན་པར་འཆི་བ་དགག་པའི་ཕྱིར་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་གསུངས་ཤིང ། ངས་ཀྱང་ད་ལྟར་བཤད་པའི་སྙིང་པོ་འདི་ཟུངས་ཤིག། ནམ་མཁའི་སྙིང་པོ། གང་ལ་ལ་ཞིག་ངའི་
24b
སྙིང་པོ་འདི་ཉིན་ལན་གསུམ་ཡིད་ལ་བྱེད་ན་དེ་ལ་ཕ་རོལ་གྱི་གནོད་པ་འབྱུང་བར་མི་འགྱུར་རོ། །གཉིད་ཀྱིས་ལོག་པའི་རྨི་ལམ་ན་དེ་བཞིན་གཤེགས་པའི་གཟུགས་མཐོང་བར་འགྱུར་རོ། ། གཤིས་ངན་དུ་འཆི་བར་མི་འགྱུར་རོ། །འདི་ནས་ཤི་འཕོས་ནས་དེ་བཞིན་གཤེགས་པ་དང་ཕྲད་པར་འགྱུར་ཞིང་མཉེས་པར་བྱེད་པར་འགྱུར་རོ། །དེ་ནས་འདིའི་ཆོ་ག་གཞན་ནི། ནད་ཐམས་ཅད་ལ་སྐུད་པས་བཅིང་བར་བྱའོ། །འདུས་པ་ལས་གྱུར་པ་ལ་ནི་སྣ་མའི་མར་ལས་བཟླས་བརྗོད་བྱས་ཏེ་སྦྱིན་ནོ། །ཆུས་ཕྱོགས་བཅིང་བར་བྱའོ། །སྐུད་པས་བདག་སྲུང་ངོ ། །བྱིས་པ་རྣམས་ཀྱི་གདོན་དག་ལ་སྐུད་པ་སྔོན་པོ་གདགས་སོ། །མཚོན་བཏབ་པའི་རྣ་བར་ལན་བདུན་བཟླས་བརྗོད་བྱའོ། །གཞན་དག་ལ་ཡང་རང་གི་བློས་སྦྱར་བར་བྱའོ། །དེ་ནས་དེ་བཞིན་གཤེགས་པ་ཐམས་ཅད་སྐྱོབ་སྟེང་གི་ནམ་མཁའ་ལ་བཞུགས་ཏེ། སེམས་ཅན་ཐམས་ཅད་ལ་ཕན་པའི་དོན་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ། །ན་མོ་བུདྡྷཱ་ཡ། ན་མོ་དྷརྨཱ་ཡ། ན་མཿ སཾ་གྷཱ་ཡ། ཨོཾ་ཀ་ལ་ཀ་ལ། ཀི་ལི་ཀི་ལི། ཀུ་ལུ་ཀུ་ལུ། ཀུ་ལོད་སཱ་དྷཱ་ནཱཾ། ཀུ་རུ་སརྦ་གྲ་ཧཱ་ཎཱཾ་སཝཱཧཱ། ནམ་མཁའི་སྙིང་པོ། གསང་སྔགས་ཀྱི་གཞི་འདི་དག་ནི་བསྐལ་པ་བཟང་པོའི་དེ་བཞིན་གཤེགས་པ་འདས་པ་དང ། མ་བྱོན་པ་དང ། ད་ལྟར་བྱུང་བ་
25a
༄#། །ཐམས་ཅད་ཀྱིས་གསུངས་ཤིང ། ངས་ཀྱང་ད་ལྟར་བཤད་དེ། ནམ་མཁའི་སྙིང་པོ། ཁྱོད་ཀྱིས་གསང་སྔགས་ཀྱི་གཞི་འདི་དག་ཟུངས་ཤིག། གང་ལ་ལ་ཞིག་འཛིན་ཏམ། ཀློག་གམ། ཀུན་ཆུབ་པར་བྱེད་ན། དེའི་ལུས་ལ་མཚོན་གྱིས་མི་ཚུགས། དུག་གིས་མི་ཚུགས། དབྱིག་དུག་གིས་མི་ཚུགས། རིམས་ནད་ཀྱིས་མི་འདེབས་ཤིང་ཆུ་དང ། དུས་མ་ཡིན་པར་འཆི་བ་དང ། གཤིས་ངན་དུ་འཆི་བར་མི་འགྱུར་ཏེ། སྔོན་གྱི་ལས་ཀྱི་སྒྲིབ་པ་རྣམས་ནི་མ་གཏོགས་སོ། །དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་ནང་པར་ལངས་ནས་མགོ་བཀྲུས་ཏེ་དེ་བཞིན་གཤེགས་པའི་སྤྱན་སྔར་ལན་བརྒྱ་རྩ་བརྒྱད་བརྗོད་ན། དེའི་ལས་ཀྱི་སྒྲིབ་པ་ཐམས་ཅད་བྱང་བར་འགྱུར་རོ། །དེ་ལ་སེམས་ཅན་སྡང་བ་གང་དག་རྒྱལ་པོ་རྣམས་ཐོག་མར་སྨྲ་བར་འགྱུར་རོ། །སེམས་ཅན་ཐམས་ཅད་དེའི་དབང་དུ་འགྱུར་རོ། །འཇིགས་པ་ཐམས་ཅད་ཀྱི་ནང་དུ་ཡིད་ལ་བྱའོ། །འཐབ་པ་དང ། འཐབ་མོ་དང ། རྩོད་པ་དང ། འགྱེད་པ་ཐམས་ཅད་དུ་སྐུད་པ་དཀར་པོ་གདགས་སོ། །མིག་ནད་ལ་ཤིང་འོ་མ་ཅན་ལས་སྐུད་པ་བྱས་ཏེ་རྣ་བ་ལ་གདགས་སོ། །དམག་རེངས་པར་བྱེད་པར་འདོད་པས་ཞོ་དང ། སྦྲང་རྩི་ལ་སྔགས་པའི་འབྲས་ཡོས་ལ་ལན་བརྒྱ་རྩ་བརྒྱད་སྦྱིན་སྲེག་བྱའོ། །
25b
རཱ་ཛཱ་ནཾ་རཱ་ཛཱ་མ་ཏྲ་བ་ཤཱི་ཀ་ར་ཏུ་ཀྵ་མེ་ན། འོ་མ་ཅན་གྱི་ཤིང་གི་སྦར་ཤིང་གིས་མེ་བུས་ལ་བསྲེག་བྱ་ཏིལ་དག་ལན་སྟོང་སྦྱིན་བསྲེག་བྱའོ། །བདག་དང ། སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་དང ། སྡིག་པ་སྦྱངས་ཞིང་དཔལ་ཆེན་པོ་དང ། ནོར་གྱི་ཕུང་པོ་ཆེན་པོ་བསྒྲུབ་པར་འདོད་ན། འོ་མ་ཅན་གྱི་ཤིང་སྦར་ཤིང་གིས་མེ་བུས་ལ་བསྲེག་བྱ་ཏིལ་དག་ལན་སྟོང་སྦྱིན་བསྲེག་བྱའོ། །སྡིག་པ་ཇི་སྙེད་པ་ཐམས་ཅད་སྦྱང་བར་འདོད་པ་དང ། རིག་སྔགས་ཐམས་ཅད་འགྲུབ་པར་འདོད་པ་དང ། བདག་བཀྲུ་བར་འདོད་པས་ཤུ་ཏི་དང ། ན་ལ་དང ། ཁྲེ་དང ། ཤི་རི་ཤ་དང ། རྒྱ་སྤོས་དང ། གུར་གུམ་དང ། གླ་སྒང་དང ། ིནྡྲ་བ་རུ་དང ། བྱང་ཆུབ་ཀྱི་ཤིང་དང ། ་མྲའི་མགོ་ཐོགས་དང ། འདི་རྣམས་ཀྱིས་བཀྲུ་བར་བྱ་སྟེ་།སངས་རྒྱས་ཀྱི་སྤྱན་སྔར་ཉིན་ཞག་གཅིག་སྨྱུང་བ་བྱ་ཞིང་བུམ་པ་གསར་པ་བཞག་སྟེ། ཟླ་བ་ཉ་ལ་སངས་རྒྱས་ཀྱི་གཟུགས་ཀྱི་སྤྱན་སྔར་སྙིང་པོ་ལན་སྟོང་རྩ་བརྒྱད་སྔགས་ལ་ཁྲུས་བྱའོ། །དུག་མི་གདུག་པར་བྱེད་པར་འདོད་པས་སངས་རྒྱས་ཀྱི་སྤྱན་སྔར་སེང་ལྡེང་གི་ཐུར་མ་བའི་ལྕི་བར་སྨྱུགས་ལ་བརྒྱ་རྩ་བརྒྱད་མིང་ནས་སྨོས་ཏེ་སྦྱིན་སྲེག་བྱས་ན་དུག་མི་གདུག་པར་འགྱུར་རོ། །གདོན་དང ། སྲུང་བ་དང ། འབྱུང་པོ་ལ་སོགས་པའི་ལས་ཐམས་ཅད་ལ་ཡང་སྦྱར་བ་བྱས་ན་བདེ་བར་གནས་པར་འགྱུར་རོ། །དེ་ནས་བཅོམ་ལྡན་འདས་དེ་བཞིན་གཤེགས་
26a
༄#། །པ་ལོག་པར་དད་སེལ་སྟེང་གི་ནམ་མཁའ་ལ་བཞུགས་ཏེ། སེམས་ཅན་ཐམས་ཅད་ལ་ཕན་པའི་དོན་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ། །ན་མོ་བུདྡྷཱ་ཡ། ན་མོ་དྷརྨཱ་ཡ། ན་མཿ སམ་གྷཱ་ཡ། ན་མཿ ཀྲ་ཀུཙྪ་ན་དཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཨོཾ་ཀ་ཊ་ཀ་ཊ། ཀ་ཋ་ཀ་ཋ། ཀི་ཊི་ཀི་ཊི། ཀི་ཋི་ཀི་ཋི། ཀི་ཊཱ་པ་ཡ་ན་མཿ སཝཱཧཱ། ནམ་མཁའི་སྙིང་པོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལོག་པར་དད་སེལ་ཅེས་བྱ་བ་གང་གཱའི་ཀླུང་གི་བྱེ་མ་སྙེད་དག་གིས་གསུངས་ཤིང་རྗེས་སུ་ཡི་རང་བའི་སྙིང་པོ་འདི་ཁྱོད་ཀྱིས་ཟུངས་ཤིག ། བླངས་ཤིང་བཟུང་སྟེ་ཀུན་ཆུབ་པར་བྱས་ན་ཕྱི་མའི་ཚེ་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དག་དེའི་ཚེ་དཀོན་མཆོག་གསུམ་ལ་དད་པ་རྙེད་ནས་ཁྲུས་བྱས་ཏེ། བཅོམ་ལྡན་འདས་ལ་མེ་ཏོག་དང ། བདུག་པ་དང ། སྤོས་དག་གིས་མཆོད་པ་བྱས་ནས་གསང་སྔགས་འདི་ལན་བརྒྱ་རྩ་བརྒྱད་བརྗོད་པར་འགྱུར་ཏེ། ཚེ་རབས་བདུན་དུ་ཚེ་རབས་དྲན་པར་འགྱུར་རོ། །ལྷ་རྣམས་ཀྱི་ནང་དུ་ལྷའི་ཆེ་བ་ཉིད་ཐོབ་པར་འགྱུར་རོ། །ཡང་ན་མི་རྣམས་ཀྱི་ནང་དུ་འཁོར་ལོས་བསྒྱུར་བར་འགྱུར་རོ། །ཡང་ན་ཆོ་
26b
ག་བཞིན་དུ་བསྒྲུབས་ན་དེ་མིར་སྐྱེ་བ་ཐ་མ་ཐོབ་པར་འགྱུར་ཏེ། འདི་ནས་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། ཚེ་འདི་ལ་ཡང་རྟག་ཏུ་བརྗོད་ན་ནད་ཐམས་ཅད་ལས་ཐར་བར་འགྱུར་རོ། །ཐོས་པ་འཛིན་པར་འགྱུར་རོ། །ཟས་དང ། སྐོམ་གྱི་རྣམ་པ་ལ་ལན་བདུན་སྔགས་ཏེ་ཟོས་འཐུང་ན་ནད་ཐམས་ཅད་ལས་ཐར་བར་འགྱུར་རོ། །ཇི་སྟེ་སྐོམ་ཞི་བར་འདོད་ན། བཟའ་བ་ཐམས་ཅད་ལ་ལན་སྟོང་རྩ་བརྒྱད་ཀྱིས་བཀྲུ་བར་བྱའོ། །ལྷོག་རྒལ་བཅད་ན་ཟངས་ཁབ་ཀྱིས་བྱའོ། །འཐབ་པ་དང ། རྩོད་པ་དང ། བཅིངས་པ་ཐམས་ཅད་ལས་ཐར་བར་བྱ་ན་ལན་བདུན་བཟླས་བརྗོད་བྱ་སྟེ། རྟག་ཏུ་ནོར་ཡང་འཕེལ་བར་འགྱུར། བགེགས་དང ། ལོག་འདྲེན་ཐམས་ཅད་ལས་ཀྱང་ཐར་བར་འགྱུར་རོ། ། ཅི་སྟེ་དེ་བཞིན་གཤེགས་པ་མཐོང་བར་འདོད་ན་དེས་ཕྱོགས་གཙང་མར་འཇིག་རྟེན་གྱི་འཁོར་སར་དཀྱིལ་འཁོར་བསྐུས་ལ་ཨ་ག་རུས་བདུགས་ཏེ། ལན་སྟོང་རྩ་བརྒྱད་བཟླས་བརྗོད་བྱས་ལ། དེའི་དྲུང་དུ་སྔས་ཤར་ཕྱོགས་སུ་སྟན་ཏེ་ཉལ་ན། དེ་བཞིན་གཤེགས་པ་མཐོང་བར་འགྱུར་རོ། །ཡིད་ལ་ཅི་སྨོས་པ་དེ་ཐམས་ཅད་སྟོན་ཏོ། །ཚེ་འམ། སྟོབས་སམ། ཕམ་རྒྱལ་ཐམས་ཅད་ཀྱང་སྟོན་ཏོ། །དེ་ནས་དེ་བཞིན་གཤེགས་པ་གསེར་ཐུབ་སྟེང་གི་ནམ་མཁའ་ལ་བཞུགས་ཏེ། སེམས་ཅན་ཐམས་ཅད་ལ་ཕན་པའི་
27a
༄#། །དོན་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། འབྱུང་པོ་ཐམས་ཅད་བཟློག་པའི་ཕྱིར་སྔགས་ཀྱི་གཞི་འདི་དག་བཀའ་སྩལ་ཏོ། །ན་མོ་བུདྡྷཱ་ཡ། ན་མོ་དྷརྨཱ་ཡ།་ན་མཿ སཾ་གྷ་ཡ། ན་མཿ ཀ་ན་ཀ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་ས་ར་ས་ར། ས་ར་ས་ར། སི་རི་སི་རི། སི་རི་སི་རི། སི་རཱ་ཡ། དྷ་མ་དྷ་མ། དྷ་མ་དྷ་མ། དྷུ་མ་དྷུ་མ། དྷུ་མ་དྷུ་མ། དྷུ་མ་ཡ། ན་མོ་ན་མ། ཀ་ན་ཀ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ་སཝཱཧཱ། དེ་ནས་དེ་བཞིན་གཤེགས་པ་གསེར་ཐུབ་ཀྱིས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ནམ་མཁའི་སྙིང་པོ། གང་ལ་ལ་ཞིག་སྙིང་པོ་འདི་འཛིན་ཅིང་རྟག་ཏུ་བཟླས་བརྗོད་བྱེད་པ་དེ་ལ་མཚོན་གྱི་འཇིགས་པ་མི་འབྱུང ། མེ་དང ། ཆུ་དང ། ལྕེ་འབབ་པས་འཆི་བའི་དུས་བྱེད་པར་མི་འགྱུར། དུག་ཐམས་ཅད་ཀྱང་ཟས་དང་འདྲ་བར་ཐུབ་པར་འགྱུར། དུས་མ་ཡིན་པར་འཆི་བས་འཆི་བའི་དུས་བྱེད་པར་མི་འགྱུར། གཤིས་ངན་དུ་འཆི་བར་མི་འགྱུར། ཚེ་རིང་པོར་འགྱུར། ལོངས་སྤྱོད་ཆེ་བར་འགྱུར། རྟག་ཏུ་དེ་བཞིན་གཤེགས་པ་དང་ཕྲད་པར་འགྱུར། དེ་བཞིན་གཤེགས་པས་བྱིན་གྱིས་བརླབ་པར་འགྱུར་རོ། །དུས་གསུམ་དུ་བཟླས་བརྗོད་བྱས་ན་སྔོན་གྱི་ལས་ཀྱི་སྒྲིབ་པ་ཐམས་ཅད་བྱང་བར་འགྱུར་རོ། །ཅི་སྟེ་
27b
ཕ་རོལ་ནད་ལས་ཐར་བར་བྱེད་པར་འདོད་ན་ཅི་ནུས་སུ་གཏོར་མ་གཏོང་ཞིང་པོ་ག་གམ། ཨ་ག་རུས་བདུགས་ལ་གཟའ་ཐམས་ཅད་ལ་ཁྲུས་བྱའོ། །མཛེ་དང ། སྐྲངས་ནད་དང ། མཆིན་སྐྲན་ལ་ཤུ་དག་འཇམ་པོ་བཏགས་ལ་སྦྲང་རྩི་དང་བསྲེས་ཏེ། སངས་རྒྱས་བཅོམ་ལྡན་འདས་ཀྱི་སྤྱན་སྔར་ལན་སྟོང་རྩ་བརྒྱད་སྔགས་ལ་བསྐུས་ན་མཛེ་ནད་ཐམས་ཅད་སོས་པར་འགྱུར་རོ། །ཞག་བཞི་པ་ལ་སངས་རྒྱས་བཅོམ་ལྡན་འདས་ཀྱི་སྤྱན་སྔར་སྣ་མའི་མེ་ཏོག་གི་ཕྲེང་བ་ལ་ལན་སྟོང་རྩ་བརྒྱད་སྔགས་ཏེ་མིའི་མགོ་ལ་བཅིངས་ན་ཞག་བཞི་པའི་རིམས་སོས་པར་འགྱུར་རོ། །མཚོན་བཏབ་པའི་རྣ་བར་བཟླས་བརྗོད་བྱས་ན་བརྗེད་བྱེད་ལས་ཐར་བར་འགྱུར་རོ། །ལུས་སྲུལ་པོས་ཟིན་པ་རྣམས་ལ་སངས་རྒྱས་ལ་ཕུལ་བའི་མེ་ཏོག་གིས་བདུག་གོ་།དེ་ལ་སོགས་པའི་ལས་རྣམས་བྱེད་དེ། ལས་ཐམས་ཅད་པ་ཞེས་བྱའོ། །དེ་ནས་དེ་བཞིན་གཤེགས་པ་འོད་སྲུང་སྟེང་གི་ནམ་མཁའ་ལ་བཞུགས་ཏེ་སེམས་ཅན་ཐམས་ཅད་ལ་ཕན་པའི་དོན་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་གཞི་འདི་དག་བཀའ་སྩལ་ཏོ། །ན་མོ་བུད་དྷཱ་ཡ།་ན་མོ་དྷརྨཱ་ཡ། ན་མཿ སཾ་གྷཱ་ཡ། ཨོཾ་ཧ་ར་ཧ་ར། ཧ་ར་ཧ་ར། ཧ་ཧ་ཧ། ན་མཿ ཀཱ་ཤྱ་བཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུད་དྷཱ་ཡ། སིདྷྱནྟུ་མནྟྲ་པཱ་ད་སཝཱཧཱ། དེ་ནས་
28a
༄#། །དེ་བཞིན་གཤེགས་པ་འོད་སྲུང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ནམ་མཁའི་སྙིང་པོ། འདི་ནི་སངས་རྒྱས་བཅོམ་ལྡན་འདས་གང་གཱའི་ཀླུང་སུམ་ཅུ་རྩ་གཉིས་ཀྱི་བྱེ་མ་སྙེད་དག་གིས་གསུངས་པ་སྟེ། ནམ་མཁའི་སྙིང་པོ། ཁྱོད་ཀྱིས་ཀྱང་སྙིང་པོ་འདི་ཟུངས་ཤིག།་ཀུན་ཆུབ་པར་གྱིས་ཤིག། གང་ལ་ལ་ཞིག་འཛིན་ཏམ། ཀློག་གམ། ཀུན་ཆུབ་པར་བྱེད་དམ། ཉིན་མོའམ། མཚན་མོ་ལན་གསུམ་གསུམ་བཟླས་བརྗོད་བྱེད་ན། མདོར་ན།་རྨི་ལམ་ན་དེ་བཞིན་གཤེགས་པ་མཐོང་བར་འགྱུར་རོ། །དེའི་ལས་ཀྱི་སྒྲིབ་པ་ཐམས་ཅད་ཀྱང་བྱང་བར་འགྱུར་ཏེ། སྔོན་གྱི་ལས་ནི་མ་གཏོགས་སོ། །ལས་ཐམས་ཅད་ལ་ཡང་སྦྱར་བར་བྱའོ། །མཛེ་དང ། ཤ་གར་ལ་སོགས་པ་ལ་སངས་རྒྱས་ལ་ཕུལ་བའི་མེ་ཏོག་ལ་སངས་རྒྱས་ཀྱི་སྤྱན་སྔར་ལན་སྟོང་རྩ་བརྒྱད་སྔགས་ཏེ་བཀླགས་ཤིང་བཀྲུས་ན་སོས་པར་འགྱུར་རོ། །ཀླད་པ་ན་བ་ལ་སངས་རྒྱས་ལ་ཕུལ་བའི་མེ་ཏོག་སངས་རྒྱས་ཀྱི་སྤྱན་སྔར་བཞག་སྟེ། སངས་རྒྱས་ཀྱི་སྤྱན་སྔར་ལན་སྟོང་རྩ་བརྒྱད་བཟླས་བརྗོད་བྱའོ།། ཐམས་ཅད་དུ་ཡང་སྦྱར་བར་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་སྟེང་གི་ནམ་མཁའ་ལ་བཞུགས་ཏེ། སེམས་ཅན་ཐམས་ཅད་ལ་ཕན་
28b
བའི་དོན་གྱི་ཕྱིར་རིག་སྔགས་འདི་དག་བཀའ་སྩལ་ཏོ། །ན་མོ་བུད་དྷཱ་ཡ། ན་མོ་དྷརྨཱ་ཡ། ན་མཿ སཾ་གྷཱ་ཡ། ཏདྱ་ཐཱ། གྷུ་མེ་གྷུ་མེ། མཧཱ་གྷུ་མེ། ཏ་ལེ་ཏ་ལེ། མ་ཧཱ་ཏ་ལེ། ཙ་ལེ་ཙ་ལེ། མ་ཧཱ་ཙ་ལེ།་དྷུ་རེ་དྷུ་རེ། མཧཱ་དྷུ་རེ། ཏི་རི་ཏི་རི། མཧཱ་ཏི་རི། ཀི་ལི་ལི་ལི། མ་ཧཱ་ཀི་ལི། ཙུ་རུ་ཙུ་རུ། མ་ཧཱ་ཙུ་རུ། མི་ལི་མི་ལི། མ་ཧཱ་མི་ལི། ཏི་ལི་ཏི་ལི། མ་ཧཱ་ཏི་ལི། དྷུ་མེ་དྷུ་མེ། མ་ཧཱ་དྷུ་མེ།་ཙ་ལེ་ཙ་ལེ། མ་ཧཱ་ཙ་ལེ། ཁི་རི་ཁི་རི། མ་ཧཱ་ཁི་རི། ཙི་ལི་ཙི་ལི། མ་ཧཱ་ཙི་ལི་སཝཱཧཱ། དེ་ནས་དེ་བཞིན་གཤེགས་པ་ཤཱཀྱ་ཐུབ་པས། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ཀླད་པའི་ནད་བསལ་ན་མཚོན་དང ། ལག་མཐིལ་གྱིས་བྱའོ། །སྤྲིན་བཟློག་ན་ཤིང་ཀ་ར་བི་རའི་ལྕུག་མས་བྱའོ། །དུག་སྦྱོང་ན་ཆུས་བྱའོ། །ལས་གཞན་རྣམས་ཀྱང་བྱའོ། །ཁྲུས་ཀྱི་ཆོ་གས་སྦྱར་བར་བྱའོ། །ཆོག་ཐམས་ཅད་ཀྱིས། དུས་ཐམས་ཅད་དུ་སྦྱར་བར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སངས་རྒྱས་བདུན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།།