rKTs


H556

(e-text produced by ACIP)

see text in transliteration
292b
རྒྱ་གར་སྐད་དུ། ཨཱརྱ་རསྨི་བི་མ་ལེ་བི་ཤུདྡྷེ་པྲ་བྷ་ཎཱ་ནཱ་མ་དྷ་ར་ཎི། བོད་སྐད་དུ། འཕགས་པ་འོད་ཟེར་དྲི་མ་མེད་པ་རྣམ་པར་དག་པའི་འོད་ཅེས་བྱ་བའི་གཟུངས། །སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོང་ཁྱེར་ཆེན་པོ་སེར་སྐྱའི་གནས་ཀྱི་ཕོ་བྲང་གི་འཁོར་གྱི་ཁྱམས་ཆེན་པོ་ན་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་ཅིག་ཏུ་བཞུགས་པ་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་དང ། ལག་ན་རྡོ་རྗེ་དང ། འཕགས་པ་སྤྱན་རས་གཟིགས་དབང་ཕྱུག་དང ། འཇམ་དཔལ་དང ། ཤེས་རབ་འོད་དང ། བྱམས་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་པ་རྣམས་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ན་མ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་ལ་སོགས་པ་གྲངས་མེད་པས་བཅོམ་ལྡན་འདས་ལ་ཞེ་སར་བྱས། རི་མོར་བྱས། བཀུར་སྟིར་བྱས་ཏེ་ཡོངས་སུ་བསྐོར་བ་ལ་ཆོས་སྟོན་ཅིང་བཞུགས་སོ། །དེའི་ཚེ་སེར་སྐྱའི་གྲོང་ཁྱེར་ན་གནས་པ་བྲམ་ཟེ་ཆེན་པོ་
293a
༄#། །སེར་སྐྱའི་ཟླ་བ་ཞེས་བྱ་བ། བཅོམ་ལྡན་འདས་ཀྱིས་བསྟན་པ་ལ་ཡིད་མི་ཆེས་ཤིང་ལོག་པར་ལྟ་བ་ཞིག་གནས་པ་དེ་དུས་གཞན་ཞིག་གི་ཚེ། གཞན་ཞིག་གི་རྨི་ལྟས་སུ་རྨིས་ཏེ་བསྟན་པ། བྲམ་ཟེ་ཆེན་པོ། ཁྱོད་ད་སྟེ་ཞག་བདུན་ན་འཆི་བའི་དུས་བྱེད་པར་འགྱུར་རོ། །ཞེས་ཟེར་བ་ཐོས་ནས་བྲམ་ཟེ་དེ་ཤིན་ཏུ་ཡང་མི་དགའ་སྟེ་འཇིགས་སྐྲག་ནས་ཡིད་ལ་བསམ་པ། དེ་བདག་གི་སྲོག་གི་སྐྱབས་སུ་ལ་བཙལ་བར་བྱ། ཡང་དགེ་སྦྱོང་གཽ་ཏ་མ་ཐམས་ཅད་མཁྱེན་པ་རྫུ་འཕྲུལ་དང་ལྡན་པ་ཞིག་ཡིན་ནོ་ཞེས་གྲགས་ན། བདག་དེའི་གནས་སུ་སོང་སྟེ། དེ་ཐམས་ཅད་མཁྱེན་པ་ཡིན་ཡང་དག་ན། དེ་འཇིགས་པས་ཉམ་ཐག་པར་འགྱུར་བའི་སྐྱབས་མཛད་པའི་ཆོས་ཕྱིར་སྟོན་གོར་མ་ཆག་གོ་སྙམ་བསམ་ནས་བཅོམ་ལྡན་འདས་ཀྱི་གན་དུ་སོང་བ་དང ། རྒྱང་རིང་པོ་ནས་བཅོམ་ལྡན་འདས་འཁོར་མང་པོ་དང་ཐབས་ཅིག་ཏུ་བཞུགས་པ་མཐོང་ནས་བཅོམ་ལྡན་འདས་ལ་ཞུ་བར་མ་སྤོབས་ཏེ་སེམས་ཤིང་འདུག་ལ། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་དུས་གསུམ་མཁྱེན་པ། ཐམས་ཅད་གཟིགས་པ།་སྒྲིབ་པ་མི་མངའ་བས་བྲམ་ཟེའི་བསམ་པ་མཁྱེན་ནས་བྱམས་པའི་ཐུགས་ཀྱིས་བརྩེ་བར་དགོངས་ཏེ་བཀའ་སྩལ་པ། བྲམ་ཟེ་ཆེན་པོ། ཁྱོད་ད་སྟེ་ཞག་བདུན་ན་འཆི་
293b
བའི་དུས་བྱས་ནས་ངན་སོང་ངན་འགྲོ་མནར་མེད་པའི་སེམས་ཅན་དམྱལ་བར་སྐྱེ་བར་འགྱུར་རོ། །དེ་ནས་ཡང་རིམ་གྱིས་སེམས་ཅན་དམྱལ་བ་ཆེན་པོ་བཅུ་དྲུག་ཏུ་ཁ་བརྒྱུད་དེ་སྐྱེ་བར་འགྱུར་རོ། །དེ་ལས་ཐར་ནས་ཀྱང་རིགས་ངན་ཤན་པའི་རིགས་སུ་སྐྱེ་བར་འགྱུར་རོ། །དེ་ནས་ཤི་འཕོས་ནས་ཡང་ཕག་གི་ལུས་སུ་སྐྱེ་བར་འགྱུར་ཏེ། རྟག་ཏུ་ངན་སྐྱུག་མི་གཙང་བ་ཟ་ཞིང་འདབ་རྫབ་ཀྱི་ནང་དུ་ཡང་ཡུན་རིང་དུ་གནས་ཏེ་རྒྱུན་དུ་སྡུག་བསྔལ་མྱོང་བར་འགྱུར་རོ། །དེ་ནས་གལ་ཏེ་མིའི་ལུས་ཐོབ་ན་ཡང་ཤིན་ཏུ་དབུལ་བ་དང ། མི་གཙང་བ་དང ། དྲི་ང་བ་དང ། མདོག་མི་སྡུག་ཅིང་ནག་པ་དང ། ལུས་རིང་ཅིང་ཉམ་ཆུང་བ་དང ། མཛེ་ནད་ཅན་དུ་འགྱུར་ཏེ། སྐྱེ་བོ་ཡོངས་ལ་མི་སྡུག་ཅིང་རྟག་ཏུ་བཀྲེས་པས་ཉམ་ཐག་པ།་སྐྱེ་བོ་ཡོངས་ཀྱི་སྨད་པ། རྟག་པར་བརྡེག་བཙོག་བྱ་ཞིང་ཤིན་ཏུ་སྡུག་བསྔལ་བར་འགྱུར་རོ། །ཞེས་བཀའ་སྩལ་པ་དེ་ཐོས་ནས་བྲམ་ཟ་དེ་ཤིན་ཏུ་འཇིགས་སྐྲག་སྟེ་ཡིད་གདུངས་པས་དུས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་གསོལ་བ། བཅོམ་ལྡན་འདས། ཡང་དག་པར་རྫོགས་པའི་སངས་རྒྱས་རྣམས་ནི། སེམས་ཅན་ཐམས་ཅད་ཀྱི་མགོན་དང་སྐྱབས་མཛད་པ་ལགས་ན། བདག་ནི། སྡིག་པའི་ལས་ཐམས་ཅད་འཆགས་ཏེ། དེང་སླན་ཆད་བཅོམ་ལྡན་འདས་ཀྱི་བཀའ་བཞིན་དུ་བགྱིད་ན།
294a
༄#། །བདག་ངན་སོང་ངན་འགྲོ་སེམས་ཅན་དམྱལ་བར་སྐྱེ་བའི་སྡུག་བསྔལ་ལས་སྐྱབས་མཛད་པར་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ། ཁྱོད་སོང་ལ་གྲོང་ཁྱེར་སེར་སྐྱའི་ལམ་གྱི་སུམ་མདོན་མཆོད་རྟེན་རིང་བསྲེལ་ཅན་རྙིང་པ་རལ་པ་ཞིག་ཡོད་པ་དེ་སླར་བརྩིགས་ཏེ་མཆོད་རྟེན་གྱི་རྩེ་མོར་སྲོག་ཤིང་བཙུགས་ལ་གསང་སྔགས་ཡི་གེར་བྲིས་པ་དེའི་ནང་དུ་བཅུག་སྟེ་མཆོད་པ་བྱས་ནས་གསང་སྔགས་ལན་བདུན་བཏོན་ན། ཁྱོད་ཀྱི་ཚེ་ཡང་ཕྱིར་ནུར་ཏེ་འཕེལ་བར་འགྱུར་ལ། འཆི་བའི་དུས་བྱས་ནས་ཀྱང་བདེ་འགྲོ་མཐོ་རིས་ཀྱི་གནས་ལོངས་སྤྱོད་ཆེ་བ་རྣམས་སུ་སྐྱེ་སྟེ། བསྐལ་པ་སྟོང་ཕྲག་བརྒྱའི་བར་དུ་བདེ་བའི་ལོངས་སྤྱོད་ཀྱང་ཕྱིར་འཕེལ་ཞིང་རྒྱས་པར་འགྱུར། དེ་ནས་ཀྱང་དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འགྱུར་ཏེ། བསྐལ་པ་བརྒྱ་སྟོང་དུ་མར་བདེ་བ་ཆེན་པོ་མྱོང་བར་འགྱུར་རོ། །དེ་ནས་ཡང་ཤི་འཕོས་ནས་རྒྱལ་ཆེན་རིས་བཞིའི་ལྷ་རྣམས་ཀྱི་གནས་སུ་སྐྱེ་བར་འགྱུར་ཏེ། དེར་ཡང་བསྐལ་པ་ཆེན་པོ་སྟོང་ཕྲག་བརྒྱའི་བར་དུ་བདེ་བའི་ལོངས་སྤྱོད་མི་ཟད་པ་མྱོང་བར་འགྱུར་རོ། །ཚེ་རབས་གང་དུ་སྐྱེས་པའི་གནས་ཀུན་ཏུ་ཡང་ཡིད་གཞུངས་ཤིང་ཚེའི་བར་ཆད་མེད་པ་དང ། ལས་ཀྱི་སྒྲིབ་པ་ཐམས་ཅད་ཟད་
294b
ནས་ནམ་དུ་ཡང་སེམས་ཅན་དམྱལ་བར་ལྟུང་བར་མི་འགྱུར་རོ། །རྟག་ཏུ་ཡང་དག་པར་རྫོགས་པའི་སངས་རྒྱས་འབྱུང་བ་རྣམས་དང་ཕྲད་ཅིང་རྗེས་སུ་དགོངས་པར་མཛད་དོ། །བྲམ་ཟེ་ཆེན་པོ། གཞན་ཡང་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། རིགས་ཀྱི་བུ་མོ་གང་ལ་ལ་ཚེ་ཐུང་བའམ། ནད་མང་པ་ཞིག་ཡོད་ན། དེས་མཆོད་རྟེན་རྙིང་པ་བཅོས་སམ། གསར་དུ་བརྩིགས་ཀྱང་རུང་སྟེ། གསང་སྔགས་འདི་བྲིས་ལ་ནང་དུ་གཞུག་ནས་དཀྱིལ་འཁོར་བྱི་དོན་བྱས་ཏེ་མཆོད་ན། དེ་དག་གི་ཡོན་ཏན་ནི། ཚེ་ཟད་པ་ཡང་ཚེ་སླར་ནུར་ཞིང་རིང་བ་དང ། ནད་ཀྱིས་བཏབ་ཅིང་སྡུག་བསྔལ་བ་ཡང་ནད་དོ་ཅོག་ལས་ཐར་པ་དང ། ནམ་དུ་ཡང་ངན་སོང་ངན་འགྲོས་སེམས་ཅན་དམྱལ་བ་དང ། བྱོལ་སོང་གི་སྐྱེ་གནས་དང ། གཤིན་རྗེའི་འཇིག་རྟེན་དུ་སྐྱེ་བར་མི་འགྱུར་ཏེ། དེ་དག་གི་སྒྲ་རྣ་ལམ་དུ་ཡང་གྲག་པར་མི་འགྱུར་ན། དེ་དག་ཏུ་སྐྱེ་བ་ལྟ་ཅི་སྨོས། དེ་ནས་བྲམ་ཟེ་དེས་དེ་སྐད་ཐོས་ནས་ཤིན་ཏུ་ཡིད་རངས་ཏེ་མཆོད་རྟེན་ཞིག་པ་བཅོས་པར་བསམ་ནས་དེ་འཁོར་དེ་ནས་ལངས་ཏེ་སོང་ངོ ། །དེའི་ཚེ་འཁོར་དེ་ཉིད་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ཞེས་བྱ་བ་ཞིག་སྟན་ལས་ལངས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་གསང་སྔགས་ཀྱི་ཆོ་ག་འདི་ཇི་ལྟ་བུར་བགྱིས་ན། ཡོན་ཏན་དང །
295a
༄#། །ལེགས་པ་དང ། དགེ་བའི་རྩ་བ་བསྐྱེད་པར་འགྱུར། ད་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། གསང་སྔགས་ཆེན་པོ་རྣམས་ཀྱི་མཆོག་།བདག་ཉིད་ཆེ་བ། དྲི་མ་མེད་ཅིང་རྣམ་པར་དག་པའི་འོད་ཅེས་བྱ་བ་འདི་དཀྱིལ་འཁོར་ཆེན་པོའི་ཆོ་ག་བཞིན་བྱས་ན། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་སེམས་ཅན་ཐམས་ཅད་ཀྱི་ཕན་པ་དང་བདེ་བར་འགྱུར་རོ། །ལ་ལ་ཞིག་གིས་གསང་སྔགས་འདི་ཐོས་ན། མཚམས་མེད་པ་ལྔ་བྱས་པའི་སྡིག་པ་ཡང་མ་ལུས་པར་འབྱང་བར་འགྱུར་རོ། ། སེར་སྣ་དང ། བརྣབ་སེམས་དང ། ཕྲག་དོག་ལ་སོགས་པ་མི་དགེ་བའི་རྩ་བ་ཐམས་ཅད་ཀྱང་འབྱང་བར་འགྱུར་ཏེ། ཚེ་ཟད་པ་ལས་ཀྱང་ཚེ་རིང་དུ་ནུར་པ་དང ། བཀྲ་ཤིས་དང ། ལེགས་པ་ཕུན་སུམ་ཚོགས་པ་ཐམས་ཅད་འགྲུབ་པར་འགྱུར་རོ། །དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བས་བཅོམ་ལྡན་འདས་ལ་གསོལ་པ། བཅོམ་ལྡན་འདས། བཅོམ་ལྡན་འདས་ཀྱིས་སེམས་ཅན་ཐམས་ཅད་ཀྱི་སྲོག་གི་སྐྱབས་མཛད་པ་དང ། ལས་ཀྱི་སྒྲིབ་པ་ཐམས་ཅད་བསལ་བའི་སླད་དུ་བཅོམ་ལྡན་འདས་ཀྱིས་གསང་སྔགས་ཀྱི་ཆོ་ག་འདི་ཐམས་ཅད་དང་ལྡན་པའི་འཁོར་ལ་བཀའ་སྩལ་དུ་གསོལ། དེ་སྐད་ཅེས་གསོལ་བ་དང ། བཅོམ་ལྡན་
295b
འདས་ཀྱིས་གནང་སྟེ་བཅོམ་ལྡན་འདས་ཀྱི་དབུའི་གཙུག་ཏོར་གྱི་སྟེང་ནས་འོད་ཟེར་གྱི་སྣང་བ་ཆེན་པོ་བྱུང་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་འོད་ཀྱིས་ཁྱབ་པར་མཛད་དེ། དེ་བཞིན་གཤེགས་པ་ཐམས་ཅད་ལ་ཡང་མཁྱེན་པར་མཛད་ནས་འོད་ཟེར་དེ་དག་སླར་འདུས་ཏེ་བཅོམ་ལྡན་འདས་ཀྱི་དབུའི་གཙུག་ཏོར་ཏུ་ནུབ་བོ། ། དེ་ནས་བཅོམ་ལྡན་འདས་དགྱེས་ཤིང་བྱ་ཀ་ལ་བིངྐའི་གསུང་དབྱངས་ཀྱིས་གསང་སྔགས་བཀའ་སྩལ་པ། ན་མཿ ་སཔྟཱ་ནཱན། སམྱཀྶཾ་བུདྡྷ་ཀོ་ཊཱི་ནཱན། པ་རི་ཤུདྡྷེ། མ་ན་སི། ཨ་བྷྱ་རྩི་ཏ་དུཥྚི་ཏཱ་ནཱན། ན་མོ་བྷ་ག་བྷ་བ་ཏི། ཨ་མྲྀ་ཏ་ཨཱ་ཡུཿ ་སྱ་ཏ་ཐཱ་ག་ཏ་སྱ། ཨོཾ་སརྦ་ཏ་ཐཱ་ག་ཏ་ཤུདྡྷི། ཨཱ་ཡུར་བི་ཤོ་དྷ་ནི། སཾ་ཧ་ར་སཾ་ཧ་ར་ཎེ། སཾ་ཧ་ར་སཾ་ཧ་ར། སརྦ་ཏ་ཐཱ་ག་ཏ་བིརྱ་བ་ལེ་ན་པྲ་ཏི་སཾ་ཧ་ར། ཨཱ་ཡུཿ ་སཱ་ར་སཱ་ར། སརྦ་ཏ་ཐཱ་ག་ཏ་ས་མ་ཡ། བོ་དྷི་བོ་དྷི། བུདྡྷྱ་བུདྡྷྱ། བོ་དྷ་ཡ་བོ་དྷ་ཡ། མ་མ་སརྦ་པཱ་པཾ་ཨཱ་བ་ར་ཎི་བི་ཤུདྡྷེ། བི་གཏ་མ་ལཾ། ཚ་ར་སུ་བུདྡྷེ་བུདྡྷེ། ཧུ་རུ་ཧུ་རུ་སཝཱཧཱ། འདི་ནི། རྩ་བའི་སྔགས་ཏེ། གང་ལ་ལ་འདིའི་ཆོ་ག་བྱེད་པར་འདོད་ན། ཚེས་བརྒྱད་དང ། བཅུ་གསུམ་དང ། བཅུ་བཞི་དང ། བཅོ་ལྔ་རྣམས་གང་ཡང་རུང་བ་ལ་མཆོད་རྟེན་རིང་བསྲེལ་ཅན་ལ་ལན་བདུན་ཅུ་རྩ་བདུན་བསྐོར་ལ། གསང་སྔགས་འདི་ལན་བདུན་ཅུ་རྩ་བདུན་བཟླས་བརྗོད་བྱས་ཏེ་ཁྲུས་བྱས་ལ་དཀྱིལ་འཁོར་བྱས་
296a
༄#། །གསང་སྔགས་ཀྱི་ཡི་གེ་བདུན་ཅུ་རྩ་བདུན་བྲིས་ཏེ། དེའི་ཚེ་གསང་སྔགས་འདོན་པ་དང ། ཡི་གེར་འབྲི་བ་ཡང་ཁྲུས་བྱས་ལ་གོས་གཙང་མ་གྱོན་ཏེ་ལུས་སྤོས་ཀྱིས་བྱུགས་ནས་ཁ་ཟས་གཙང་མ་ཟོས་ལ་མེ་ཏོག་དང་བདུག་པས་མཆོད་དེ། དེ་ལ་རིན་པོ་ཆེ་སྣ་བདུན་ཡང་ཡོན་དུ་ཕུལ་ལམ། ཡང་ན་བདག་གི་ཉམས་ཀྱིས་ཅི་འབྱོར་པར་ཕུལ་ཡང་རུང་སྟེ། སེམས་མགུ་བར་བྱའོ། །ཆོས་བཙུན་པར་བྱ་བའི་ཕྱིར་བ་སྟི་སྟང་དང ། རི་མོ་ཆེར་བྱའོ། །གསང་སྔགས་ཀྱི་ཡི་གེ་ལ་ཡང་དཀོན་ཞིང་རིན་པོ་ཆེར་འདུ་ཤེས་བཞག་སྟེ་མཆོད་རྟེན་ཆེ་ཆུང་ཇི་ཙམ་ནུས་པ་བདུན་ཅུ་རྩ་བདུན་གདབ་པར་བྱ་ཞིང ། དེ་རེ་རེའི་ནང་དུ་གསང་སྔགས་བཅུག་སྟེ་སེམས་རྩེ་གཅིག་ཏུ་མཆོད་པ་ཆེན་པོ་བྱས་ན།་ཚེ་ཟད་པ་ལས་ཚེ་སླར་ནུར་ཏེ་ཚེ་རིང་བར་འགྱུར་རོ། །སྔོན་གྱི་ལས་ཀྱི་སྒྲིབ་པ་ཚེ་རབས་གྲངས་མེད་པའི་སྡིག་པ་ཐམས་ཅད་བྱང་ནས་ནམ་དུ་ཡང་སེམས་ཅན་དམྱལ་བ་དང ། དུད་འགྲོ་དང ། ཡི་དྭགས་ཀྱི་སྐྱེ་གནས་ཐམས་ཅད་དུ་སྐྱེ་བར་མི་འགྱུར་རོ། །གང་དུ་སྐྱེས་པའི་གནས་ཐམས་ཅད་དུ་ཡང་སྔོན་གྱི་ཚེ་རབས་རྗེས་སུ་དྲན་པར་འགྱུར། ཡིད་ལ་བསམ་པ་ཐམས་ཅད་ཀྱང་དེ་བཞིན་དུ་འགྲུབ་པར་འགྱུར། དེ་བཞིན་གཤེགས་པ་འབུམ་ཕྲག་བདུན་ཅུ་རྩ་བདུན་སྙེད་ལ་དགེ་བའི་རྩ་བ་བསྐྱེད་པར་འགྱུར། ནད་
296b
དང་སྡུག་བསྔལ་ཐམས་ཅད་ལས་ཐར་པར་འགྱུར་རོ། །གང་ལ་ལ་ཞིག་ནད་ཚ་བས་པོ་ཆེས་བཏབ་སྟེ་འཆི་བའི་དུས་བྱེད་པ་ལ་ཐུག་ན། དཀྱིལ་འཁོར་གྲུ་བཞི་པར་བྱས་ལ་དེའི་སྟེང་དུ་ཚོན་སྣ་ལྔས་རི་མོར་བྲིས་ཏེ་དབུས་ཀྱི་ཆར་ནི། འཁོར་ལོ་དང ། རྡོ་རྗེ་དང ། དུང་དང ། མདུང་རྩེ་གསུམ་པ་དང ། གཡུང་དྲུང་རིས་དང ། པདྨོ་རྣམས་བྲིའོ། །གྲ་བཞིར་ཡང་པདྨོ་རེ་རེ་བྲིས་ཏེ། དེའི་སྟེང་དུ་སྤོས་ཆུས་བཀང་བའི་བུམ་པ་རེ་རེ་གྲ་བཞིར་གཞག་གོ་།བདུག་སྤོས་ཀྱི་སྣོད་བཀང་བ་སྤོས་སྣ་ཚོགས་འཐུལ་བ་ཡང་གཞག་གོ། ཁ་དོག་སྣ་ལྔའི་སྣོད་དུ་ཁ་ཟས་སྣ་ཚོགས་དང ། ཟས་དཀར་གསུམ་དང་འབྲས་ཆན་དུ་སྦྱར་བ་གཞག་།ཡང་དྲིའི་ཆུ་དང ། མེ་ཏོག་དང ། འབྲས་སམ་འབྲུའི་སྣོད་བཀང་བ་ཕོར་བུ་རེ་རེ་བླགས་པ་དང ། ཡང་ཁ་ཟས་སྣ་ཚོགས་སྦྱར་བའི་གཏོར་མ་སྤོས་ཆུ་བུམ་པ་གང་དང་སྦྱར་ཏེ་དཀྱིལ་འཁོར་གྱི་སྟེང་དུ་གཞག་གོ་།གཏོར་མ་དེ་དང ། འབྲས་ཀྱི་དྲུང་དུ་ཉེ་བར་ཚོགས་ཀྱི་བདག་པོའི་གཟུགས་བྲིས་ལ་དེའི་སྤྱི་བོའི་སྟེང་དུ་མར་མེ་གཞག་གོ་།དེ་ནས་དཀྱིལ་འཁོར་གྱི་ནུབ་ཕྱོགས་སུ་ནད་པ་བཞག་ལ་དཀྱིལ་འཁོར་གྱི་ནང་དུ་ཁ་བསྟན་པའི་ནད་པའི་མདུན་དུ་ཡང་མཆོད་པའི་བཤོས་བཞག་སྟེ་འབུལ་དུ་གཞུག་གོ་།དེ་ནས་སྔགས་མཁན་གཙང་སྦྲ་ཆེར་བྱས་ཏེ་ནད་པ་དེ་ལ་གསང་སྔགས་བདུན་ཅུ་རྩ་བདུན་གྱིས་བཏབ་
297a
༄#། །སྟེ་ཆོ་ག་འདི་ལྟར་བྱས་ན། ནད་པ་ཚེ་ཟད་དེ་འཆི་བའི་དུས་བྱེད་དུ་ཉེ་བ་ཞག་བདུན་ནས་དྲན་པ་ཉམས་ཤིང་འཁྲུལ་བར་འགྱུར་བ་ཡང་ཚེ་སླར་ནུར་ཞིང་རིང་པོར་འགྱུར་རོ། །རྨི་ལམ་གྱི་སྡུག་བསྔལ་ཡང་མྱོང་བར་མི་འགྱུར་རོ། །གང་ལ་ལ་ཞིག་གིས་གཙང་སྦྲ་ཆེར་བྱས་ཏེ་ཉིན་གཅིག་བཞིན་རྟག་པར་གསང་སྔགས་ལན་རེ་རེ་ཇི་སྲིད་འཚོའི་བར་དུ་བཏོན་ན། དེ་འཆི་བའི་དུས་བྱས་ནས་ལོངས་སྤྱོད་དང ། བདེ་བ་མི་ཟད་པའི་གནས་སུ་སྐྱེ་བར་འགྱུར་རོ། །རྟག་པར་དུས་ཐམས་ཅད་དུ་བཟླས་བརྗོད་བྱས་ན། སངས་རྒྱས་བཞུགས་པའི་ཞིང་དུ་སྐྱེ་བར་འགྱུར་ཞིང ། ཚེ་རབས་རྗེས་སུ་དྲན་པར་འགྱུར་རོ། །དུས་མ་ཡིན་པའི་འཆི་བ་དང ། སྒྲིབ་པ་ཐམས་ཅད་བྱང་བར་འགྱུར་རོ། །ཡང་གང་ལ་ལ་ཞིག་གིས་མི་ཤི་བའི་ཆེད་དུ་ཕན་པར་འདོད་པས་སེམས་ཐག་པ་ནས་གསང་སྔགས་ལན་བདུན་ཅུ་རྩ་བདུན་བཟླས་བརྗོད་བྱས་ན། ཤི་བ་དེ་ངན་སོང་གི་གནས་སུ་ལྷུང་ན་ཡང་དེའི་མོད་ལ་ལས་ཀྱི་སྒྲིབ་པ་རྣམས་ཟད་ནས་མཐོ་རིས་ཀྱི་ལྷའི་གནས་སུ་སྐྱེ་ཞིང་བདེ་བ་མྱོང་བར་འགྱུར་རོ། །ཡང་གང་ལ་ལ་ཞིག་གིས་གསང་སྔགས་ཡི་གེར་བྲིས་པ་གཞན་གྱི་མིང་ནས་སྨོས་ཏེ་མཆོད་རྟེན་གྱི་ནང་དུ་བཅུག་ལ་ནན་ཏན་དུ་མཆོད་པ་བྱས་ན། ཤི་བ་གང་ཡིན་པ་དེ་ངན་སོང་གི་གནས་ནས་ཐར་ཏེ་མཐོ་རིས་སུ་སྐྱེ་བར་འགྱུར་རོ། །ཡང་དགའ་ལྡན་གྱི་ལྷའི་རིས་སུ་
297b
སྐྱེ་བར་འགྱུར་ཏེ། སངས་རྒྱས་ཀྱི་བྱིན་གྱི་རླབས་ཀྱིས་ངན་སོང་དུ་ལྷུང་བར་མི་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་མཆོད་རྟེན་ད་ལ་བསྐོར་བ་བྱས་སམ། ཕྱག་བྱས་སམ། མཆོད་པ་ཕུལ་ཡང་རུང་སྟེ། དེ་བཞིན་གཤེགས་པའི་བྱིན་གྱིས་རླབས་ཀྱིས་བླ་ན་མེད་པའི་བྱང་ཆུབ་ཀྱི་ལམ་ལས་ཕྱིར་མི་ལྡོག་པར་ཡང་འགྱུར་རོ། །སྔོན་གྱི་ལས་ཀྱི་སྒྲིབ་པ་རྣམས་ཀྱང་མ་ལུས་པར་བྱང་བར་འགྱུར་རོ། །ཐ་ན་བྱ་དང་རི་དྭགས་ལ་སོགས་ཏེ་གང་དག་ལ་མཆོད་རྟེན་དེའི་གྲིབ་མ་ཕོག་པ་དེ་དག་ཀྱང་ནམ་ཡང་དུད་འགྲོ་ལ་སོགས་པ་ངན་སོང་གི་གནས་སུ་སྐྱེ་བར་མི་འགྱུར་རོ། །གང་ལ་ལ་མཚམས་མེད་པ་ལྔའི་སྡིག་པ་ཆེན་པོ་དང་ལྡན་པ་ཡང་མཆོད་རྟེན་དེ་ལ་རེག་གམ། དེའི་གྲིབ་མས་ཕོག་ཀྱང་རུང་སྟེ། དེའི་སྡིག་པ་ཐམས་ཅད་བྱང་ཞིང་ཟད་པར་འགྱུར་རོ། །མཆོད་རྟེན་དེའི་གནས་ནས་འབྱུང་པོ་དང ། གནོད་སྦྱིན་དང ། སྲིན་པོ་དང ། ཡི་དྭགས་དང ། ཤ་ཟ་ལ་སོགས་པ་ལུས་ལ་འཇུག་ཅིང་གནོད་པ་དང ། གཅན་གཟན་ཁྲོ་བོ་དང ། ཐོག་འབབ་པ་ངང ། སྡིག་སྦྲུལ་ཁ་གདུག་པ་དང ། སྦྱར་དུག་ལ་སོགས་པ་ཐམས་ཅད་ཀྱིས་ཀྱང་མི་ཚུགས་ཤིང་མེད་པར་འགྱུར་རོ། །གཞན་ཡང་ཕ་རོལ་གྱི་དམག་ཚོགས་དང ། མཚོན་དང ། མེ་དང ། ཆུ་དང ། སེར་བ་དང ། མུ་གེ་དང ། དུས་མ་ཡིན་པར་འཆི་བ་དང ། རྨི་ལམ་ངན་པ་དང ། བཀྲ་མི་ཤིས་པ་དང ། སྡུག་བསྔལ་གྱི་
298a
༄#། །གནོད་པ་ཐམས་ཅད་མེད་པར་འགྱུར་རོ། །ཡུལ་དེར་ལྟས་ངན་ཞིག་བྱུང་ན་ཡང་མཆོད་རྟེན་དང ། སངས་རྒྱས་ཀྱི་བྱིན་གྱི་རླབས་ཀྱིས་འོད་ཟེར་ཆེན་པོ་བྱུང་བས་ལྟས་ངན་དང ། བཀྲ་མི་ཤིས་པ་ཐམས་ཅད་ཟློག་པར་འགྱུར་རོ། །གང་གཞན་ཞིག་བསམ་པ་ངན་པས་དམག་དང ། ཆོམ་རྐུན་གྱིས་གནོད་པ་བྱ་བར་སེམས་སམ། དགྲ་རྒོལ་བ་ཞིག་བྱུང་ན་ཡང་གནས་དེར་མཆོད་རྟེན་དེ་ལ་འོད་ཟེར་ཆེན་པོ་འབྱུང་སྟེ། དེ་བཞིན་གཤེགས་པའི་རྫུ་འཕྲུལ་གྱིས་མེ་ལྕེ་ཀུན་ཏུ་འབར་བས་བསྐོར་བའི་ནང་ནས་དམག་གི་དཔུང་དང ། མཚོན་ཆའི་ཆར་མངོན་པར་བསྟན་པས་ཕ་རོལ་གྱི་དམག་ཚོགས་ཐམས་ཅད་ཞི་ཞིང་ཕྱིར་ཟློག་པར་འགྱུར་རོ། །ལྷ་རྣམས་ཀྱིས་ཀྱང་སྲུང་བ་དང ། སྐྱོབ་པར་བྱེད་དེ། ཕྱོགས་བཞིར་དཔག་ཚང་བརྒྱ་ཚུན་ཆད་དུ་མཚམས་བཅད་དེ་བསྲུངས་པས་དེའི་ནང་དུ་འཁྲུག་པ་དང ། ནད་འགོ་བ་དང ། ཕྱུགས་ནད་ཐམས་ཅད་མི་འབྱུང་ངོ ། །འཐབ་ཅིང་རྩོད་པ་མི་འབྱུང ། ཆོས་མ་ཡིན་པར་སྤྱོད་པ་མེད་པར་འགྱུར་རོ། །འདི་ལ་གསང་སྔགས་གཞན་གྱིས་གཅད་པ་དང ། མནན་པར་མི་ནུས་ཏེ། གསང་སྔགས་ཐམས་ཅད་ཀྱི་རྩ་བ་ཡིན་པའི་ཕྱིར་རོ། །ཡང་མཆོད་རྟེན་དེའི་སྲོག་ཤིང་གི་གསང་སྔགས་བཤད་པ། ཨོཾ་སརྦ་ཏ་ཐཱ་ག་ཏཱ་བི་པུ་ལ་ཡཥྚི། མ་ཎི་ཀ་ན་རཱ་ཛ་ཏ། བི་བུ་ཤི་
298b
ཏ་ཡཥྚི་དྷུ་རུ་དྷུ་རུ། ས་མནྟེ་བི་ལོ་ཏེ། ས་ར་ས་ར། མ་མ་སརྦ་པཱ་བཾ་བི་ཤོ་དྷ་ཎི། སཾ་བོ་དྷ་ཎི། པྲ་བ་ར་ཡཥྚི། པ་རི་མ་ཎི་དུཥྚ་ཧུ་རུ་ཙི་ར་མ་ལ་བི་ཤུདྡྷེ་ཧཱུཾ་ཧཱུཾ་སཝཱཧཱ། རིགས་ཀྱི་བུ། ཅི་ནས་ཀྱང་གསང་སྔགས་འདི་ནན་ཏན་དུ་དགུ་བཅུ་རྩ་དགུར་ཡི་གེར་བྲིས་ཏེ་མཆོད་རྟེན་གྱི་སྲོག་ཤིང་གི་ངོས་བཞིར་གཞུག་གོ་།དེ་ཡང་ཆོ་གའི་གཞུང་འདི་ཉིད་ཀྱང་བྲིས་ཏེ་སྲོག་ཤིང་གི་ནང་དུ་གཞུག་གོ་།ཆོ་ག་དེ་ལྟར་བྱས་ན། མཆོད་རྟེན་དགུ་ཁྲི་དགུ་སྟོང་གི་སྲོག་ཤིང་བཙུགས་པ་དང་འདྲའོ། །དེའི་གོང་དུ་ཡང་མཆོད་རྟེན་རིང་བསྲེལ་ཅན་དགུ་ཁྲི་དགུ་སྟོང་བཞེངས་པ་དང་འདྲའོ། །དེའི་ཡང་གོང་དུ་དེ་བཞིན་གཤེགས་པ་ལ་མཆོད་པའི་ལས་ཀྱི་ཕྱིར་ཆོས་བཟང་ལྷའི་མདུན་ས་དང་འདྲ་བའི་གཙུག་ལག་ཁང་གི་མཆོད་རྟེན་དགུ་ཁྲི་དགུ་སྟོང་བརྩིགས་པ་དང་འདྲའོ། །ཡང་གང་ལ་ལ་ཞིག་གིས་འཇིམ་པ་ལས་མཆོད་རྟེན་ཆུང་ངུ་ཞིག་བྱས་ཏེ། དེའི་ནང་དུ་གསང་སྔགས་འདི་དག་བཅུག་ན་ཡང་རིན་པོ་ཆེ་སྣ་བདུན་གྱི་མཆོད་རྟེན་ལྷ་དགུ་ཁྲི་དགུ་སྟོང་བརྩིགས་པ་དང་འདྲའོ། །ཡང་གང་ལ་ལ་ཞིག་གིས་མཆོད་རྟེན་འདི་ལ་བསྐོར་བ་བྱས་སམ། ཕྱག་བྱས་སམ། ཐལ་མོ་སྦྱར་རམ། མེ་ཏོག་ཕུལ་ལམ། བྱུག་པ་དང ། བདུག་སྤོས་ཕུལ་ལམ། དྲིལ་བུ་དང ། བ་དན་དང ། གདུགས་འགའ་ཞིག་ཕུལ་ན་ཡང་དེ་བཞིན་གཤེགས་པ་དགུ་ཁྲི་དགུ་སྟོང་གི་མཆོད་རྟེན་ལ་ཕུལ་བའི་བསོད་ནམས་དང་མཉམ་
299a
༄#། །པ་ཡིན་ནོ། །དགེ་བའི་རྩ་བ་ཐམས་ཅད་ཡོངས་སུ་རྫོགས་པའི་དཔལ་དང ། མཐུ་སྟོབས་རྒྱ་ཆེན་པོ་ཐོབ་པར་འགྱུར་ཏེ། ཐ་ན་བྱ་དང་སྦྲང་མ་ལ་སོགས་པ་མཆོད་རྟེན་དེའི་གྲིབ་མས་ཕོག་ན་ཡང་དེ་བཞིན་གཤེགས་པས་མཁྱེན་ཅིད་རྗེས་སུ་དགོངས་པར་མཛད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་ཅིང་ཕྱིར་མི་ལྡོག་པའི་ས་ལ་གནས་པར་ཡང་འགྱུར་རོ། །ཡང་གང་ལ་ལ་ཞིག་གིས་མཆོད་རྟེན་འདི་ལྟ་བུའི་རྨི་ལམ་དུ་རྨིས་སམ། རྒྱང་ནས་མཐོང་ངམ། དྲིལ་བུའི་སྒྲ་ཐོས་སམ། མཆོད་རྟེན་བཞེངས་པ་རྣ་བར་གཏམ་ཐོས་པ་དེ་དག་ཀྱང་མཚམས་མེད་པ་ལྔ་ལ་སོགས་ཏེ་སྡིག་པ་དང་སྒྲིབ་པ་ཐམས་ཅད་བྱང་སྟེ། རྟག་ཏུ་དེ་བཞིན་གཤེགས་པ་རྣམས་ཀྱིས་སྲུང་བ་དང ། རྗེས་སུ་དགོངས་པ་མཛད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་ཡོངས་སུ་དག་པ་འཐོབ་པར་འགྱུར་རོ། །གསང་སྔགས་འདི་ནི། མཆོད་རྟེན་གྱི་སྲོག་ཤིང་གི་གསང་སྔགས་ཞེས་བྱའོ། །ཡང་རིགས་ཀྱི་བུ་དེ་བཞིན་གཤེགས་པའི་མཆོད་རྟེན་བྱ་བའི་གསང་སྔགས་དེ་དག་གི་སྙིང་པོ་ནི། འདི་ཡིན་ནོ། །ོཾ་སརྦ་ཏ་ཐཱ་གཱ་ཏ་མ་ལ་བི་ཤོ་དྷ་ནི། རུད་དྷ་བ་ལེ་བྲ་ཏི་སཾ་སྐ་ར་ཏ་ཐཱ་ག་ཏ་དྷུ་ཏུ་དྷ་རེ། དྷ་ར་དྷ་ར། སནྡྷ་ར་སནྡྷ་ར་སརྦ་ཏ་ཐཱ་ག་ཏ་ཨ་དྷིཥྛ་ན་ཨ་དྷིཥྛི་ཏེ་སཝཱཧཱ། དགེ་སློང་ངམ། དགེ་
299b
སློང་མའམ། དགེ་བསྙེན་ནམ། དགེ་བསྙེན་མའམ། གང་ལ་ལ་ཞིག་གིས་མཆོད་རྟེན་བདག་ཉིད་ཀྱིས་བྱས་སམ། གཞན་བྱེད་དུ་བཅུག་གམ། མཆོད་རྟེན་རྙིང་པ་བཅོས་ལེགས་བྱས་ཀྱང་རུང ། ས་འཇིམ་ལས་མཆོད་རྟེན་ཆུང་དུ་བྱས་སམ། སོ་པག་གམ་རྡོ་བ་ལས་བྱས་ཀྱང་རུང་སྟེ། དང་པོར་གསང་སྔགས་ཀྱི་སྙིང་པོ་སྟོང་རྩ་བརྒྱད་དུ་བཟླས་བརྗོད་བྱས་ཏེ། དེའི་འོག་ཏུ་མཆོད་རྟེན་སེན་མོ་གང་ཙམ་གྱི་ས་ལ་བྱས་སམ། ཁྲུ་གང་གི་ཚད་དུ་བྱས་སམ། དཔག་ཚད་གཅིག་ཙམ་གྱི་ཚད་དུ་བྱས་ན་ཡང་རུང་སྟེ། གསང་སྔགས་ཀྱི་མཐུ་དང ། སེམས་རྩེ་གཅིག་ཏུ་བྱས་པའི་སྟོབས་ཀྱིས་མཆོད་རྟེན་དེ་ལ་ཡང་སྤོས་ཀྱི་ངང་ལྡང་སྟེ། ཙནྡན་དང ། ག་བུར་དང ། གླ་རྩི་དང ། གུར་གུམ་ལ་སོགས་པའི་དྲི་བྲོའམ། ལྷའི་སྤོས་དྲི་ཞིམ་པའི་ངད་ལྡང་བར་འགྱུར་རོ། །བདག་དང་གཞན་མཆོད་རྟེན་གྱི་ལས་བྱེད་པ་དང ། བཟླས་བརྗོད་བྱེད་པ་དེ་བསམ་པ་ཐམས་ཅད་ཀྱང་ཡིད་བཞིན་དུ་འགྲུབ་པར་འགྱུར་རོ། །དགེ་བའི་རྩ་བ་རྒྱ་ཆེན་པོ་བསགས་པར་འགྱུར་ཏེ། ཡོན་ཏན་དང ། ལེགས་པ་ཕུན་སུམ་ཚོགས་པ་ཡང་ཐོབ་པར་འགྱུར། ཚེ་ཐུང་བའི་ལས་ཤིག་ཡོད་ན་ཡང་ཚེ་ནུར་ཞིང་རིང་བར་འགྱུར། ནམ་འཆི་བའི་དུས་བྱེད་ན་ཡང་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུའི་ཞལ་མཐོང་ཞིང ། དེ་བཞིན་གཤེགས་པ་དེ་དག་གིས་རྗེས་
300a
༄#། །སུ་དགོངས་ཏེ། སྐྱེ་གནས་ཕྱི་མར་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འགྱུར་ཞིང་མངོན་སུམ་དུ་ལུང་སྟོན་པར་འགྱུར། དེར་ཡང་ཚེ་ལོ་བྱེ་བ་ཁྲག་ཁྲིག་བརྒྱ་སྟོང་ཐུབ་པར་འགྱུར་ཏེ། སྔོན་གྱི་གནས་རྗེས་སུ་དྲན་པ་དང ། ལྷའི་མིག་དང ། ལྷའི་རྣ་བ་རྣམ་པར་དག་པ་འཐོབ་ཅིང་ཕ་རོལ་གྱི་སེམས་ཤེས་པ་དང ། འཆི་འཕོ་བ་དང ། སྐྱེ་བ་ཤེས་པ་འཐོབ་བོ། །ལུས་ལས་ཙནྡན་གྱི་དྲིའི་ངད་འབྱུང་ཞིང ། ཁ་ནས་ཨུཏྤ་ལའི་བསུང་ལྡང་བར་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱང་ཆུབ་ཀྱི་ལམ་ཐོབ་ནས་ཕྱིར་མི་ལྡོག་པའི་ས་ཡང་འཐོབ་པར་འགྱུར་རོ། །ཡང་དྲིའི་བྱུག་པ་ཡུངས་འབྲུ་ཙམ་ཡང་རུང་སྟེ་གསང་སྔགས་བཟླས་ནས་མཆོད་རྟེན་བསྐུས་ན། དེ་དག་གི་ཡོན་ཏན་དང ། ལེགས་པ་སྔར་བཤད་པ་བཞིན་དུ་ཐོབ་པར་འགྱུར་རོ། །ཡང་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་གང་ལ་ལ་ཞིག་གིས་བདག་ཉིད་གཙང་བར་བྱས་ཏེ་གསང་སྔགས་ཀྱི་ཚིག་འདི་དག་དཀོན་པ་དང ། རིན་པོ་ཆེར་འདུ་ཤེས་པས་བཟུང་ན། དེ་བཞིན་གཤེགས་པ་དང་འདྲ་བར་དད་པར་བྱ་སྟེ། གསང་སྔགས་རྣམས་ལ་གུས་པ་བསྐྱེད་ནས་ཡི་གེར་བྲི་བར་བྱའོ། །གོང་དུ་བཤད་པ་བཞིན་གསང་སྔགས་དང་ཕྱག་རྒྱ་ཆོ་ག་བཞིན་དུ་བྲིས་ནས་མཆོད་རྟེན་གྱི་སྲོག་ཤིང་གི་རྩ་བར་སྙིང་པོ་བཅུག་སྟེ་མཆོད་
300b
རྟེན་བྱས་ན། དེ་དགེ་བའི་རྩ་བརྒྱ་ཆེན་པོ་བསགས་པར་འགྱུར་ཏེ། ཡོན་ཏན་དང་ལེགས་པ་ཐམས་ཅད་འཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་གསང་སྔགས་ཀྱི་ཕྱག་རྒྱའི་ཆོ་ག་འདི་དག་བཤད་པའི་ཚེ་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་རྗེས་སུ་ཐུགས་རངས་པར་མཛད་ནས་གསུངས་པ། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་སེམས་ཅན་ཐམས་ཅད་མཉམ་པར་དགོངས་ཤིང་ཐམས་ཅད་ཆོས་ཀྱི་དབྱིངས་ལ་བཀོད་ནས་གསང་སྔགས་ཆེན་པོའི་ཕྱག་རྒྱའི་ཆོ་ག་བྱིན་གྱི་རླབས་འཐོབ་པར་བསྟན་པ་ནི། ལེགས་སོ་ལེགས་སོ། །ཤིན་ཏུ་ཡང་ལེགས་ཏེ། དགེ་བའི་རྩ་བ་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་ཅིང་ཕྱིར་མི་ལྡོག་པར་ཡང་འགྱུར་རོ། །དེ་ནས་འཁོར་གྱི་དཀྱིལ་འཁོར་དེ་ཉིད་ན་ལྷ་དང ། ཀླུ་དང ། གནོད་སྦྱིན་དང ། སྲིན་པོ་དང ། དྲི་ཟ་དང ། ལྷ་མ་ཡིན་དང ། མིའམ་ཅི་དང ། ལྟོ་འཕྱེ་ཆེན་པོ་འདུས་པ་རྣམས་དང ། བྱང་ཆུབ་སེམས་དཔའ་ལག་ན་རྡོ་རྗེ་དང ། རྒྱལ་པོ་ཆེན་པོ་བཞི་དང ། འཇིག་རྟེན་སྐྱོང་བའི་མེས་པོ་ཚངས་པ་དང ། ཁྱབ་འཇུག་དང ། དབང་ཕྱུག་ཆེན་པོ་དང ། བརྒྱ་བྱིན་དང ། གཤིན་རྗེ་དང ། ཆུ་ལྷ་དང ། ཀུ་བེ་ར་དང ། དེ་དག་ལ་སོགས་པ་རྫུ་འཕྲུལ་ཆེ་བའི་ལྷ་དེ་དག་གིས་བཅོམ་ལྡན་འདས་ཀྱིས་གསུངས་པ་དེ་ཐོས་
301a
༄#། །ནས་བདག་ཅག་རང་རང་གི་སྤྱོད་ཡུལ་ལ་སྐྱོ་ཞིང་ཡིད་འབྱུང་བར་གྱུར་ཏེ་མཐར་གྱིས་ཡོན་ཏན་ཆེན་པོ་ཐོབ་པར་འདོད་པའི་ཕྱིར་གཅིག་ལ་གཅིག་པོས་ཏེ་སྨྲས་པ།་ཀྱེ་མ་ཡང་དག་པར་རྫོགས་པའི་སངས་རྒྱས་འབྱུང་བ་ནི། ཤིན་ཏུ་ཡང་རྙེད་པར་དཀའོ། །དེའི་བསྟན་པ་དམ་པའི་ཆོས་ཐོས་པ་ཡང་ཤིན་ཏུ་རྙེད་པར་དཀའ། གསང་སྔགས་དང་ཕྱག་རྒྱའི་ཚོགས་ཡང་དག་པར་རྫོགས་པའི་སངས་རྒྱས་ཀྱི་བསྟན་པ་ཐོས་པ་ཡང་ཤིན་ཏུ་རྙེད་པར་དཀའ་སྟེ། འདི་ནི། ཤིན་ཏུ་ངོ་མཚར་ཏོ་ཞེས་སྨྲས་སོ། །དེ་ནས་དེའི་ཚེ་བྲམ་ཟེ་སེར་སྐྱའི་ཟླ་བ་ཞེས་བྱ་བ་བཅོམ་ལྡན་འདས་ལས་དེ་ལྟ་བུའི་གསང་སྔགས་དང ། ཆོ་གའི་ཡོན་ཏན་ཆེན་པོ་དེ་དག་ཐོས་ཤིང་ཐོབ་ནས་སེམས་ཀྱི་སྒྲིབ་པའི་རྡུལ་དང་རྙོག་པ་རྣམས་དྭངས་པར་གྱུར། འཆི་བའི་འཇིགས་པ་དང ། སྡིག་པ་དང ། ལས་ཀྱི་སྒྲིབ་པ་ཐམས་ཅད་ཀྱང་དག་པར་གྱུར། ཚ་ཡང་ཕྱིར་ནུར་ཏེ་རིང་བར་གྱུར་ནས་དགའ་མགུ་ཡི་རང་སྟེ་ཡིད་བདེ་བ་ཆེན་པོ་ཐོབ་པར་གྱུར་ཏོ། །དེ་ནས་འབྱུང་པོའི་ཚོགས་ཐམས་ཅད་ཀྱང་སེམས་དང་ཞིང་རྗེས་སུ་ཡི་རང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བས་དེ་བཞིན་གཤེགས་པ་ལ་མཆོད་པའི་ལས་ཀྱི་ཕྱིར་འཁོར་དེར་རིན་པོ་ཆེའི་ཁང་པ་བརྩེགས་པ་ནོར་
301b
བུ་སྣ་ཚོགས་ཀྱིས་སྤྲས་པ་ཞིག་མངོན་པར་སྤྲུལ་ནས་ཆོས་ལ་དགའ་བའི་ཕྱིར་བཅོམ་ལྡན་འདས་ལ་ཕུལ་ཏེ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་གསང་སྔགས་དང ། ཕྱག་རྒྱ་དང ། དཀྱིལ་འཁོར་གྱི་ཆོ་ག་ཤིན་ཏུ་རྙེད་པར་དཀའ་བ། སེམས་ཅན་ཐམས་ཅད་ལ་ཕན་པ་དང་བདེ་བ་རྣམས་ཀྱི་མཆོག་འཛམ་བུའི་གླིང་གི་སེམས་ཅན་སྒྲིབ་པ་ཆེ་བ་རྣམས་ཀྱི་དོན་དུ་བཤད་དེ་དགེ་བའི་རྩ་བ་བསྐྱེད་ཅིང་ཚེ་རིང་བ་དང ། སྡུག་བསྔལ་གྱི་ཕུང་པོ་ཐམས་ཅད་ལས་ཐར་པར་མཛད་པ་ལགས་ན། དེང་འདིར་བདག་ཅག་བྱང་ཆུབ་སེམས་དཔའ་རྣམས་ཀྱིས་ཀྱང་སངས་རྒྱས་བཅོམ་ལྡན་འདས་ཐམས་ཅད་ལ་གསོལ་ཏེ། དེ་བཞིན་གཤེགས་པའི་སྤྱན་སྔར་ཡང་དག་པའི་ཡེ་ཤེས་ཆུབ་པར་བགྱིད་པའི་ཕྱག་རྒྱ་དང ། གསང་སྔགས་ཀྱི་ཚིག་བཤད་པར་འཚལ་ཏོ། །ན་མོ་བྷ་ག་བྷ་བ་ཏེ། ན་བ་ན་བ་ཊཱི་ནཱཾ། སཾ་མྱཀྶཾ་བུདྡྷ་ཀོ་ཊི་ཡུ་ཏ་ཤ་ཏ་ས་ཧ་སྲ་ཎཱཾ། ན་མཿ སརྦ་ཎི་བ་ར་ཎ་བི་སྐམྦི་ནི་བྷོ་དྷི་ས་ཏྭ་ཡ། ཨོཾ་ཏུ་རུ་ཏུ་རུ་མ་མ་སརྦ་ཨཱ་བ་ར་ཎ་བི་ཤོ་དྷ་ནི།་སརྦ་ཏ་ཐཱ་ག་ཏ་ཨཱ་ཡུར་བ་ལཱ་ནཱི་བི་བུ་ལ་ནི་མཱེ་སརྦ་སིདྡྷི་ནཱ་མ་།སྐྲི་དྭཱཾ། བ་ར་བ་ར། སརྦ་སཏྭ་ཨ་བ་ལོ་ཀི་ནི། ཨོཾ་སརྦ་ནི་བཱ་ར་ཎ་བི་སྐམྦི་ནི་མ་མ་སརྦ་པཱ་པཾ་བི་
302a
༄#། །ཤོ་དྷ་ནི་ཀུ་རུ་སཝཱཧཱ། བཅོམ་ལྡན་འདས། བདག་གི་གསང་སྔགས་འདི་ནི། སངས་རྒྱས་བྱེ་བ་ཕྲག་དགུ་བཅུ་རྩ་དགུས་བཤད་པ་ལགས་ཏེ།་གང་ལ་ལ་ཞིག་གིས་མ་ཡེངས་པའི་སེམས་ཀྱིས་རྩེ་གཅིག་ཏུ་བྱས་ཏེ་སྐད་ཅིག་གཅིག་བཏོན་ན་ཡང་སྡིག་པ་ཐམས་ཅད་བྱང་བར་འགྱུར་རོ། །ཡང་གང་ལ་ལ་ཞིག་གིས་གསང་སྔགས་འདི་ཆོ་ག་བཞིན་དུ་དགུ་བཅུ་རྩ་དགུ་ཡི་གེར་བྲིས་ཏེ་མཆོད་རྟེན་གྱི་ནང་དུ་བཅུག་ན། མཆོད་རྟེན་དེ་ལ་ལ་ལ་ཞིག་གིས་ཕྱག་བྱས་སམ། ཚིག་སྙན་པས་བསྟོད་དམ། སྤོས་དང ། མེ་ཏོག་དང ། བྱུག་པ་དང ། མར་མེ་འབུལ་ན། རིགས་ཀྱི་བུ་དེ་དེའི་ཚེ་འདི་ཉིད་ལ་སྡིག་པ་ཐམས་ཅད་བྱང་ཞིང་ལས་ཀྱི་སྒྲིབ་པ་ཐམས་ཅད་བསལ་ཏེ་བསམ་པ་ཐམས་ཅད་ཡིད་བཞིན་དུ་གྲུབ་པར་འགྱུར། སངས་རྒྱས་བཅོམ་ལྡན་འདས་བརྒྱ་སྟོང་གྲངས་མེད་པའི་གངྒཱའི་ཀླུང་གི་བྱེ་མ་སྙེད་ལ་མཆོད་ཅིང་བསྙེན་བཀུར་བྱས་པ་དང་འདྲ་བར་འགྱུར་རོ། །དེ་བཞིན་དུ་མཆོད་རྟེན་རིང་བསྲེལ་གྱི་སྙིང་པོ་ཅན་བརྒྱ་སྟོང་བྱེ་བ་ཁྲག་ཁྲིག་གངྒཱའི་ཀླུང་གི་བྱེ་མ་སྙེད་ལ་མཆོད་པ་བྱས་པར་འགྱུར་རོ། །དེའི་དགེ་བའི་རྩ་བ་རྒྱ་ཆེན་པོ་གསོག་པར་འགྱུར་རོ། །ཡང་དགེ་སྦྱོང་གང་ཞིག་གིས་ཚེས་བརྒྱད་དང ། བཅུ་བཞི་དང ། བཅོ་ལྔ་གང་ཡང་
302b
རུང་བ་ལ་ཁྲུས་དང་གཙང་སྦྲ་བྱས་ཏེ་གོས་གཙང་མ་གྱོན་ལ་ཞག་གཅིག་སྨྱུང་བའམ། ཡང་ན་ཟས་དཀར་གསུམ་ཟོས་ཏེ་མཆོད་རྟེན་ལ་བསྐོར་ཞིང་གསང་སྔགས་འདི་ལན་བརྒྱ་རྩ་བརྒྱད་བཟླས་བརྗོད་བྱས་ན། བསྐལ་པ་བརྒྱ་སྟོང་དུ་བསགས་པའི་ལས་ཀྱི་སྒྲིབ་པ་ཐམས་ཅད་དང ། མཚམས་མེད་པ་ལྔ་བྱས་པ་ཡང་ཡོངས་སུ་འབྱང་བར་འགྱུར། གཞན་ཡང་ལས་དང་ཉོན་མོངས་པའི་སྒྲིབ་པ་ཐམས་ཅད་རྣམ་པར་དག་པར་གྱུར་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་བདག་ཉིད་ཀྱི་ལུས་མངོན་པར་བསྟན་ཏེ་བསམ་པ་ཐམས་ཅད་དངོས་གྲུབ་ཏུ་སྦྱིན་པར་མཛད་ཅིང ། ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་ཞལ་ཡང་མཐོང་བར་འགྱུར་རོ། །དེ་བཞིན་དུ་གང་ལ་ལ་ཞིག་གིས་ཉིས་བརྒྱ་རྩ་བརྒྱད་བཏོན་ན། ཏིང་ངེ་འཛིན་འཐོབ་པར་འགྱུར་རོ། །གང་གིས་སུམ་བརྒྱ་རྩ་བརྒྱད་བཏོན་ན།་སྒྲིབ་པ་ཐམས་ཅད་བྱང་སྟེ་ཕྱིར་མི་ལྡོག་པའི་ས་ལ་གནས་པར་འགྱུར་རོ། །ཡང་གང་གིས་བཞི་བརྒྱ་རྩ་བརྒྱད་བཏོན་ན། རྒྱལ་ཆེན་རིས་བཞིའི་རྒྱལ་པོ་ཆེན་པོ་དག་ཀྱང་ཉེ་བར་འོངས་ནས་ལུས་མངོན་པར་བསྟན་ཏེ། སྲུང་བ་དང ། སྐྱོབ་པར་བྱེད་ཅིང་ཤེས་རབ་ཀྱི་སྟོབས་ཀྱང་བསྐྱེད་ནས་བསོད་ནམས་ཐམས་ཅད་ཉེ་བར་སྒྲུབ་བོ། །
303a
༄#། །གང་གིས་ལྔ་བརྒྱ་རྩ་བརྒྱད་བཏོན་ན། དགེ་བའི་རྩ་བ་དེ་ཉིད་ཀྱིས་འདུས་མ་བྱས་ཀྱི་ལམ་ལ་གནས་པ་འཐོབ་བོ། །ཡང་གང་གིས་དྲུག་བརྒྱ་རྩ་བརྒྱད་བཏོན་ན། རིག་སྔགས་འཆང་དུ་འགྱུར་ཏེ། ནམ་མཁའ་ལ་རིག་འཛིན་གྱི་གནས་སུ་འགྲོ་བར་འགྱུར་རོ། །ཡང་གང་གིས་བདུན་བརྒྱ་རྩ་བརྒྱད་བཏོན་ན། ལེགས་པར་ཡོན་ཏན་ཐམས་ཅད་ལྡན་པར་འགྱུར་རོ། །ཡང་གང་གིས་བརྒྱད་བརྒྱ་རྩ་བརྒྱད་བཏོན་ན། གཞན་གྱིས་བསྒོ་བ་མེད་པའི་རང་དབང་ཐོབ་སྟེ་སེམས་རྣམ་པར་དག་པར་འགྱུར་རོ། །ཡང་གང་གིས་དགུ་བརྒྱ་རྩ་བརྒྱད་དུ་བཏོན་ན། ཕུང་པོ་ལྔ་རྣམ་པར་དག་པར་འགྱུར་རོ། །ཡང་གང་གིས་སྟོང་རྩ་བརྒྱད་དུ་བཏོན་ན། རྒྱུན་དུ་ཞུགས་པའི་འབྲས་བུ་འཐོབ་བོ། །གང་གིས་ཉིས་སྟོང་ཚང་བར་བཏོན་ན། ལན་གཅིག་ཕྱིར་འོང་བའི་འབྲས་བུ་འཐོབ་བོ། །གང་གིས་སུམ་སྟོང་ཚང་བར་བཏོན་ན།་ཕྱིར་མི་འོང་བའི་འབྲས་བུ་འཐོབ་བོ། །གང་གིས་བཞི་སྟོང་ཚང་བར་བཏོན་ན། དགྲ་བཅོམ་པའི་འབྲས་བུ་འཐོབ་བོ། །གང་གིས་ལྔ་སྟོང་ཚང་བར་བཏོན་ན། རང་སངས་རྒྱས་ཀྱིས་འཐོབ་པར་འགྱུར་རོ། །གང་གིས་དྲུག་སྟོང་ཚང་བར་བཏོན་ན། བྱང་ཆུབ་སེམས་དཔའི་རྫུ་འཕྲུལ་གྱི་གནས་འཐོབ་པར་འགྱུར་རོ། །ཡང་གང་གིས་
303b
བདུན་སྟོང་ཚང་བར་བཏོན་ན། བྱང་ཆུབ་སེམས་དཔའ་ས་དང་པོ་འཐོབ་པར་འགྱུར་རོ། །ཡང་གང་གིས་བརྒྱད་སྟོང་ཚང་བར་བཏོན་ན། བྱང་ཆུབ་སེམས་དཔའི་ས་ལྔ་པ་གནོན་པར་འགྱུར་རོ། །ཡང་གང་གིས་དགུ་སྟོང་ཆང་བར་བཏོན་ན། རིག་སྔགས་དང ། གསང་སྔགས་རྣམས་ཀྱི་བདག་པོ་གསང་བ་པའི་ལུས་འཐོབ་པར་འགྱུར་རོ། །ཡང་གང་གིས་ཁྲི་ཚང་བར་བཏོན་ན། བྱང་ཆུབ་སེམས་དཔའི་ས་བརྒྱད་བ་མི་གཡོ་བ་གནོན་པར་འགྱུར་རོ། །ཡང་གང་གིས་ཉི་ཁྲི་ཚང་བར་བཏོན་ན། བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་སྐུ་འཐོབ་པར་འགྱུར་ཏེ། སེངྒེའི་སྒྲ་ཆེན་པོ་སྒྲོག་པར་འགྱུར་རོ། །ཡང་གང་ལ་ལ་ཞིག་གིས་ཕ་མའི་དོན་གྱི་ཕྱིར་བསོད་ནམས་ཀྱི་ལས་བྱ་བར་འདོད་ན། མཆོད་རྟེན་རྙིང་བ་རིང་བསྲེལ་ཅན་ཞིག་རལ་དུ་གྱུར་པ་གསོས་ལ་བཅོས་ལེགས་བྱས་ཏེ་གང་ཡང་ཕྱོགས་སུ་བསྐོར་བ་བྱེད་ཅིང་སྔགས་ལན་བརྒྱ་རྩ་བརྒྱད་ཚང་གི་བར་དུ་བསྐོར་བ་བྱས་ན། བསམ་པ་ཐམས་ཅད་ཡིད་བཞིན་དུ་འགྲུབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ། །རིགས་ཀྱི་བུ། ཁྱོད་ཀྱིས་ངའི་གྲོགས་བྱས་ཏེ་དེ་བཞིན་གཤེགས་པའི་གསང་སྔགས་ཀྱི་
304a
༄#། །ཆོས་ཚུལ་བཞིན་དུ་བཤད་པ་དེ་ཁོ་ན་བཞིན་ནོ། །དེ་ནས་གནོད་སྦྱིན་ཐམས་ཅད་ཀྱི་རྒྱལ་པོ་གསང་བ་པའི་བདག་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་གསང་སྔགས་ཀྱི་རྒྱལ་པོ་གསང་སྔགས་ཀྱི་ཆོ་ག་འདི་དག་དེ་བཞིན་གཤེགས་པ་རྣམས་དང་འདྲ་བ། དེ་བཞིན་གཤེགས་པའི་ཆོས་ཀྱི་སྐུ་ལས་བྱུང་བ་ལགས་ན། བཅོམ་ལྡན་འདས། སྙིང་པོ་དམ་པ་འདི་དག་འཛམ་བུ་གླིང་ན་གནས་པའི་སེམས་ཅན་རྣམས་ཀྱི་ལས་ཀྱི་སྒྲིབ་པ་དང ། སྡིག་པ་ཐམས་ཅད་བསལ་ནས་དེ་ཕྱིན་ཆད་བཅོམ་ལྡན་འདས་ཀྱི་བསྟན་པ་ལ་འཇུག་པར་འགྱུར་རོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་གསང་བ་པའི་བདག་པོ་ལ་བཀའ་སྩལ་པ། གསང་བ་པའི་བདག་པོ། གསང་སྔགས་ཀྱི་ཆོ་ག་འདི་དག་ནི། མ་འོངས་པའི་དུས་ན་ཡང་དེ་བཞིན་གཤེགས་པ་འཇིག་རྟེན་ན་ཞུགས་པ་དང་འདྲ་བ་ཡིན་ནོ། །ངས་ཆོ་ག་ཇི་སྐད་བསྟན་པ་བཞིན་དུ་བྱས་ན། ལས་ཀྱི་སྦྱོར་བ་ཆུང་ངུས་ཀྱང་འབྲས་བུ་ཆེན་པོ་འགྲུབ་ཅིང་ཕན་ཡོན་ཆེར་གནས་པར་གྱུར་ན། ལས་ཀྱི་སྦྱོར་བ་ཆེར་བྱས་པ་ལྟ་ཅི་སྨོས་ཏེ། དགེ་བའི་རྩ་བ་ཐམས་ཅད་བསགས་པར་འགྱུར་རོ། །དེ་ལྟ་བས་ན། དེ་དག་
304b
གི་ཡོན་ཏན་ནི། དེ་བཞིན་གཤེགས་པ་བརྒྱ་སྟོང་བྱེ་བ་ཁྲག་ཁྲིག་གངྒཱའི་ཀླུང་གི་བྱེ་མ་སྙེད་ཀྱིས་བཤད་ཀྱང་མི་རྫོགས་ཏེ། དེ་བཞིན་གཤེགས་པ་དེ་དག་གིས་མཁྱེན་ཅིང་གཟིགས་པར་ཟད་དེ། གསང་བ་པའི་བདག་པོས་གསོལ་པ། བཅོམ་ལྡན་འདས། ལས་ཆེགས་ཆུང་ངུ་ཇི་ལྟ་བུ་ཞིག་བགྱི་བ་བསོད་ནམས་ཀྱི་འབྲས་བུ་ཆེན་པོ་འགྲུབ་ཅིང་བསོད་ནམས་ཆེན་པོ་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་ལེགས་པར་ཉོན་ཅིག་དང་བཤད་པར་བྱའོ། །དགེ་སློང་དང ། དགེ་སློང་མ་དང ། དགེ་བསྙེན་མ་གང་ལ་ལ་ཞིག་གིས་བསོད་ནམས་ཀྱི་འབྲས་བུ་ཆེན་པོ་ཐོབ་ཡོན་ཏན་ཐོབ་པར་འདོད་པས་གསང་སྔགས་ཀྱི་རྒྱལ་པོའི་ཆོ་ག་སྔར་བསྟན་པ་བཞིན་དུ་བྱས་ཏེ་དགུ་བཅུ་རྩ་དགུ་ཡི་གེར་བྲིས་ལ་སངས་རྒྱས་ཀྱི་མཆོད་རྟེན་གྱི་མདུན་དུ་དཀྱིལ་འཁོར་གྲུ་བཞིར་བྱས་ལ་བའི་ལྕི་བས་བྱུགས་ཏེ་གྲ་བཞིར་དྲིའི་ཆུ་ཕོར་བུ་བཀང་བ་རེ་རེ་བཞག་།བདུག་སྤོས་ཀྱི་སྣེད་འཐུལ་བ་ཡང་བཞག་ནས་སྣོད་ཆེན་པོའི་ནང་དུ་མེ་ཏོག་དང ། དྲིའི་ཆུ་དང ། འབྲས་སྐམ་པོ་རྣམས་བླུགས་ཏེ་དཀྱིལ་འཁོར་གྱི་སྟེང་དུ་བཞག་པ་དང ། ཡང་ཏིལ་ནག་པོ་དང ། སྲན་མ་མ་ཥ་དང ། འབྲས་རྣམས་བསྲེས་ཏེ་བཅོས་པའི་འབྲས་ཐུག་ཀྲི་ས་ར་ཞེས་
305a
༄#། །བྱ་བ་དང ། ཟས་དཀར་གསུམ་དང ། འདི་རྣམས་བུམ་པའི་ནང་དུ་བླུགས་པ་དང ། ཡང་ཤིང་ཏོག་སྣ་ཚོགས་འབྲས་བུ་དགུ་བཅུ་རྩ་དགུ་དང ། ཁ་ཟས་མིང་གིས་སྨྲོས་པ་འདི་རྣམས་དང ། སྤོས་དང ། མེ་ཏོག་ལ་སོགས་པ་དཀྱིལ་འཁོར་གྱི་སྟེང་དུ་བཀྲམ་ལ། གསང་སྔགས་ཀྱི་ཡི་གེ་མཆོད་རྟེན་གྱི་སྲོག་ཤིང་གི་ནང་དུ་བཅུག་ནས་མཆོད་རྟེན་གྱི་ཕྱོགས་བཞིར་ཕྱོགས་བཅུའི་དེ་བཞིན་གཤེགས་པ་ཐམས་ཅད་མངོན་དུ་དམིགས་ཏེ་ཕྱག་བྱས་ལ་སེམས་རྩེ་གཅིག་པས་གསང་སྔགས་འདི་དག་གདེན་པར་བྱའོ། །འདི་ལྟ་སྟེ། ཨོཾ་བི་པུ་ལ་བི་པུ་ལ་བི་མ་ལེ། པྲ་བ་རེ་ཛི་ན་བ་རེ། ས་ར་ས་ར། སརྦ་ཏ་ཐཱ་ག་ཏ་དྷཱ་ཏུ་གརྦྷེ། ཨ་དྷིཥྛི་ཏི་སཝཱཧཱ། ཨ་ཡ་ཏ་ཏོ་བ་ནི་སཝཱཧཱ། སརྦ་དེ་བ་ན། བ་ཧ་ཡ་བི་ཤུདྡྷེ་ཨ་དྷིཥྛ་ན་ས་མ་ཡེ་སཝཱཧཱ། བདུག་སྤོས་འཐུལ་བ་རྒྱུན་མི་འཆད་པར་བྱ་ཞིང ། གསང་སྔགས་ལན་ཉི་ཤུ་རྩ་བརྒྱད་བཏོན་ན། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་དང ། གནོད་སྦྱིན་གྱི་སྡེ་དཔོན་ཆེན་པོ་བརྒྱད་དང ། གསང་བ་པའི་བདག་པོ་དང །
305b
རྒྱལ་པོ་ཆེན་པོ་བཞི་དང ། ཚངས་པ་དང ། དབང་ཕྱུག་ཆེན་པོ་དང ། སྲེད་མེད་ཀྱི་བུ་རྣམས་དེའི་མོད་ལ་མཆོད་རྟེན་དེ་ལ་མཆོད་པ་དང ། རིམ་གྲོ་བྱེད་སྲོག་ཤིང་བརྟན་པར་བྱེད་དོ། །དེ་བས་གོང་དུ་ཡང་སངས་རྒྱས་བྱེ་བ་འབུམ་ཕྲག་དགུ་བཅུ་རྩ་དགུ་དང ། གངྒཱའི་ཀླུང་གི་བྱེ་མ་སྙེད་ཀྱང་གནས་དེར་གཤེགས་ཏེ་མཆོད་རྟེན་དེ་ལ་མཆོད་པ་དང ། ཆོས་ཀྱི་སྐུར་བྱིན་གྱིས་རློབ་ཅིང་རིང་བསྲེལ་དང་ལྡན་པར་མཛད་དོ། །དེ་ལྟར་སེམས་ཐག་པ་ནས་ཆོ་ག་ཚུལ་བཞིན་དུ་བྱས་ན། ཡོན་ཏན་དེ་དག་དང ། གཞན་ཡང་མཆོད་རྟེན་དེ་ཡིད་བཞིན་གྱི་ནོར་བུ་རིན་པོ་ཆེ་ལས་བྱས་པའི་བསོད་ནམས་ཐོབ་པར་འགྱུར་ཏེ། རིན་པོ་ཆེའི་རྣམ་པ་བྱེ་བ་ཁྲག་ཁྲིག་བརྒྱ་སྟོང་དུ་མ་ལས་མཆོད་རྟེན་བྱས་པ་དང་འདྲ་བར་འགྱུར་ཏེ། དགེ་བའི་རྩ་བ་རྒྱ་ཆེན་པོ་དང་ལྡན་ཞིང་ལུས་རྣམ་པར་དག་ལ་ཚེ་རིང་ཞིང་ནད་མེད་པ་དང ། བགེགས་ཐམས་ཅད་ཀྱིས་མི་ཚུགས་པར་འགྱུར་རོ། །གང་གཞན་ལ་ལ་ཞིག་གིས་མཆོད་རྟེན་འདི་མཐོང་ངམ། མཆོད་རྟེན་དེའི་དྲིལ་བུའི་སྒྲ་དེ་ཐོས་ན་ཡང་ལས་ཀྱི་སྒྲིབ་པ་དང ། སྡིག་པ་ཐམས་ཅད་བྱང་བར་འགྱུར་ཏེ། མཚམས་མེད་པ་ལྔ་བྱས་པ་ཡང་ཡོངས་སུ་བྱང་ནས་འཆི་བའི་དུས་བྱས་པའི་འོག་ཏུ་བདེ་བ་ཅན་གྱི་འཇིག་
306a
༄#། །རྟེན་དུ་སྐྱེའོ། །གང་ལ་ལ་ཞིག་གིས་མཆོད་རྟེན་དེའི་མིང་ཙམ་ཐོས་པ་ཡང་འཆི་བའི་དུས་བྱས་ནས་བླ་ན་མེད་པའི་བྱང་ཆུབ་ཀྱི་ལམ་ཐོབ་པར་འགྱུར།་ཐ་ན་བྱ་དང ། རི་དྭགས་ལ་སོགས་པ་སེམས་ཅན་གང་གིས་མཐོང་བ་དེ་ཡང་ཚེ་འཕོས་ནས་དུད་འགྲོའི་སྐྱེ་གནས་སྤངས་ཏེ་བསོད་ནམས་དང་ལྡན་པའི་ལུས་ཐོབ་པར་འགྱུར་རོ། །གང་ལ་ལ་ཞིག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་སྤྱོད་པར་འདོད་པ་དེས་སྔ་མ་བཞིན་དུ་དཀྱིལ་འཁོར་གྲུ་བཞི་པ་བྱས་ཏེ་ས་དང་ལྕི་བས་བྱུགས་ལ་དེའི་སྟེང་དུ་སྤོས་ཀྱི་སྐྱང་ནུལ་གྱིས་བྱུགས་ཏེ་དཀྱིལ་འཁོར་གྱི་གྲ་བཞིར་དྲིའི་ཆུས་བཀང་བའི་སྣོད་རེ་རེ་བཞག་ལ། སྔར་བསྟན་པའི་གསང་སྔགས་བཞི་པོ་དག་ལས་རྣམ་པ་གཅིག་ཀྱང་དགུ་བཅུ་རྩ་དགུ་བྲིས་ཏེ། རང་གི་ལག་གིས་མཆོད་རྟེན་ཆུང་ངུ་དགུ་བཅུ་རྩ་དགུ་གདབ་ཅིང་གསང་སྔགས་རྣམས་གཅིག་ཀྱང་རེ་རེའི་ནང་དུ་གཞུག་གོ་།དེ་ནས་ཡང་གསང་སྔགས་འདི་དགུ་བཅུ་རྩ་དགུ་ཡི་གེར་བྲིས་ཏེ་མཆོད་རྟེན་གྱི་འཕང་ལོ་རྣམས་ཀྱི་ནང་དུ་བཅུག་སྟེ་མཆོད་རྟེན་རྣམས་དཀྱིལ་འཁོར་གྱི་སྟེང་དུ་བཞག་སྟེ་མེ་ཏོག་དང ། བྱུགས་པས་མཆོད་ལ། ལན་བདུན་བདུན་དུ་བསྐོར་ཞིང་གསང་སྔགས་འདི་ཡང་གདོན་པར་བྱའོ། །ནམཿ ན་པ་ནཱ་ཊཱི་ནཱཾ། ཏ་ཐཱ་
306b
ག་ཏ་གཾ་ག་ཎཱ་ནཱཾ་ཌི་བཱ་ལུ་ཀཱཾ་།ཀོ་ཊི་ནི་ཡུཀྟ་ཤ་ཏ་ས་ཧ་ས་ཎཱཾ། ཨོཾ་པོ་བོ་རི། ཙ་རི་ཎི་ཙ་རི། མོ་རི་གོ་རི་ཙ་ལ་བ་རི་སཝཱཧཱ། ཆོ་ག་འདི་ལྟར་བྱས་ན་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་སྤྱད་པར་ཡང་མ་ཟད་དེ། དེས་ནི། རིན་པོ་ཆེའི་མཆོད་རྟེན་བྱེ་བ་ཁྲག་ཁྲིག་བརྒྱ་སྟོང་གངྒཱའི་ཀླུང་གི་བྱེ་མ་སྙེད་བྱས་པར་འགྱུར་རོ། །ཡང་དག་པར་རྫོགས་པའི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུ་སྙེད་ལ་མཆོད་ཅིང་བསྙེན་བཀུར་བྱས་པར་འགྱུར་རོ། །དེའི་གོང་དུ་ཡང་ལྷ་ཐམས་ཅད་ཀྱིས་མཆོད་པའི་སྦྲིན་སྣ་ཚོགས་བསྡུས་ཏེ་མཆོད་རྟེན་དེ་ལ་ཡོ་བྱད་སྣ་ཚོགས་སྦྱར་ནས་དེ་བཞིན་གཤེགས་པའི་ཕོ་བྲང་དང ། ཡོ་བྱད་སྣ་ཚོགས་སྦྱར་ནས་མཆོད་པར་འགྱུར་ཏེ། ཡང་དག་པར་རྫོགས་པའི་སངས་རྒྱས་དེ་དག་སྙེད་ཀྱིས་མཁྱེན་ཅིང་གཟིགས་ཏེ་བྱིན་གྱིས་རློབ་པར་མཛད་དོ། །རིགས་ཀྱི་བུའམ་རིགས་ཀྱི་བུ་མོ་དེའི་དགེ་བའི་རྩ་བརྒྱ་ཆེན་པོའི་བསོད་ནམས་དང ། ཡོན་ཏན་ཐམས་ཅད་ཐོབ་པར་མཛད་དོ། །ཡང་གང་ལ་ལ་ཞིག་གིས་གསང་སྔགས་ཀྱི་རྒྱལ་པོའི་སྙིང་པོ་འདི་མ་ནོར་བར་ཡི་གེར་བྲིས་ལ་རྟག་ཏུ་བཏེན་ཏེ་མཆོད་པའི་ལས་བྱས་ལ་ལུས་ལ་ཐོགས་ན། རིག་པ་དེ་ཉིད་ཀྱིས་སྲུང་བ་དང ། སྐྱོབ་པ་མཛད་དེ། ཕས་ཀྱི་རྒོལ་བའི་དགྲ་ཐམས་ཅད་དང ། ཤར་གཉེར་བ་རྣམས་དང ། གནོད་སྦྱིན་དང ། སྲིན་པོ་དང །
307a
༄#། །ཡི་དྭགས་ལ་སོགས་པ་ཐམས་ཅད་ཀྱང་གནོད་པར་བྱེད་པར་མི་འགྱུར་ཏེ། འཇིགས་ཤིང་སྐྲག་ནས་སོ་སོར་འབྱེར་བར་འགྱུར་རོ། །གང་ལ་ལ་ཞིག་གིས་རིག་པ་འདོན་པ་དེ་དང་གཏམ་བྱས་པ་ཡང་མཚམས་མེད་པ་ལྔའི་ལས་ཀྱི་སྒྲིབ་པ་ཡོངས་སུ་འབྱང་བར་འགྱུར་རོ། །གང་ལ་ལ་ཞིག་གིས་སྔགས་པ་དེའི་སྒྲ་ཐོས་སམ། གྲིབ་མས་ཕོག་གམ། ལུས་ལ་རེག་ཀྱང་རུང་སྟེ། དེའི་ཚེ་རབས་གཞན་གྱི་ལས་ཀྱི་སྒྲིབ་པ་དང ། སྡིག་པ་ཐམས་ཅད་ཡོངས་སུ་འབྱང་བར་འགྱུར་རོ། ། གང་རིག་པ་འདོན་པ་དེའི་ལུས་ལ་དུག་གིས་མི་ཚུགས། མེས་མི་ཚུགས། ཆུས་ཁྱེར་བར་མི་འགྱུར། གདོན་ཐམས་ཅད་ཀྱིས་ཀྱང་གླགས་མི་རྙེད། ཐོག་འབབ་པར་མི་འགྱུར་ཏེ། སངས་རྒྱས་ཀྱིས་སྲུང་བ་དང ། སྐྱོབ་པ་མཛད་ཅིང་སྤྱན་རས་ཀྱིས་འཚོ་བར་མཛད་དོ། །ལྷ་ཐམས་ཅད་དང ། དམ་ཚིག་ཅན་ཐམས་ཅད་ཀྱིས་ཀྱང་དེ་ལ་སྟོང་གྲོགས་བྱེད་པར་འགྱུར་ཏེ། གཞན་གྱི་རིག་སྔགས་དང ། བྱད་དང ། སྦྱོར་བ་ཐམས་ཅད་ཀྱིས་མི་ཚུགས་པར་འགྱུར་རོ། །དེ་ལྟ་བས་ན་རིག་པ་འདོན་པ་གནས་གང་ན་འདུག་ཀྱང་གསང་སྔགས་འདིའི་ཆོ་ག་དོན་དུ་གཉེར་བར་བྱ་སྟེ། གསང་སྔགས་ཡི་གེར་བྲིས་ལ་ལམ་གྱི་བཞི་མདོའམ། སུམ་མདོ་སྐྱེ་བོ་མང་པོ་ཕན་ཚུན་འགྲོ་བའི་
307b
གནས་སུ་མཆོད་རྟེན་བྱས་ལ་དེའི་ནང་དུ་བཅུག་ན། འགྲོ་བ་ཐམས་ཅད་དང ། བྱ་དང ། སྦྲང་མ་དང ། ཐ་ན་གྲོག་སྦུར་ཡན་ཆད་ཀྱིས་མཐོང་བ་དང ། ཐོས་པ་དང ། རེག་པ་དང་དེ་ལ་ཕོག་པའི་ས་དང ། རྡུལ་དང ། རླུང་དང ། གྲིབ་མས་ཕོག་ན་ཡང་བྱོལ་སོང་དང ། ཡི་དྭགས་དང ། ངན་སོང་ལོག་པར་ལྟུང་བ་སེམས་ཅན་དམྱལ་བར་སྐྱེ་བར་འགྱུར་བའི་སྡིག་པ་ཐམས་ཅད་དང་བྲལ་ཞིང་འཆི་བའི་དུས་བྱས་ནས་བདེ་འགྲོ་མཐོ་རིས་ཀྱི་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། སྔོན་གྱི་ལས་ཀྱི་སྒྲིབ་པ་ཡོངས་སུ་བྱང་བས་ཚེ་རབས་རྗེས་སུ་དྲན་པ་འཐོབ་པར་འགྱུར་ཞིང་ཕྱིར་མི་ལྟུང་བའི་ཆོས་ཅན་དུ་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་དང ། གསང་བ་པའི་བདག་པོ་ལག་ན་རྡོ་རྗེ་དང ། རྒྱལ་པོ་ཆེན་པོ་བཞི་དང ། ཚངས་པ་མི་མཇེད་ཀྱི་བདག་པོ་དང ། ཚངས་རིས་ཀྱི་ལྷ་རྣམས་དང ། དབང་ཕྱུག་ཆེན་པོ་ལ་སོགས་པའི་ལྷ་རྣམས་ལ་བཀའ་སྩལ་པ། སྐྱེས་བུ་དམ་པ་དག་།ངས་གསང་སྔགས་ཀྱི་རྒྱལ་པོའི་སྙིང་པོ་འདི་དག་ཁྱེད་རྣམས་ལ་ཡོངས་སུ་གཏད་ཀྱི། རྟག་ཏུ་རིམ་གྲོར་བྱ་ཞིང་ཡོངས་སུ་གཟུང་བར་བྱ་སྟེ། རིན་པོ་ཆེའི་ཟ་མ་ཏོག་གི་ནང་དུ་ཆུག་ལ་གནས་ཐམས་ཅད་དུ་བསྒྲགས་ཏེ། ནམ་དུ་ཡང་རྒྱུན་མ་ཆད་པར་སེམས་
308a
༄#། །ཅན་ལ་སྟོན་ཅིང ། མཐོང་ཞིང་ཐོས་པར་བྱས་ན་མཚམས་མེད་པ་ལྔའི་སྡིག་པ་ཡང་འབྱུང་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་དང ། གསང་བ་པའི་བདག་པོ་ལག་ན་རྡོ་རྗེ་དང ། རྒྱལ་པོ་ཆེན་པོ་བཞི་དག་དང ། ཚངས་པ་དང ། དབང་ཕྱུག་ཆེན་པོ་དང ། སྲེད་མེད་ཀྱི་བུ་དང ། ལྷ་དང ། ཀླུ་དང ། གནོད་སྦྱིན་དང ། སྲིན་པོ་དང ། ལྷ་མ་ཡིན་དང ། ལྟོ་འཕྱེ་ཆེན་པོ་ལ་སོགས་པ་ཐམས་ཅད་ཀྱིས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་ཚིག་མཐུན་པར་སྨྲས་ཏེ་གསོལ་པ། བཅོམ་ལྡན་འདས། བཅོམ་ལྡན་འདས་ཀྱིས་བདག་ཅག་ལ་ཐུགས་བརྩེ་བར་དགོངས་ཏེ་གསང་སྔགས་འདིའི་ཆོ་ག་དང ། མཆོད་རྟེན་བགྱི་བའི་ཆོ་ག་ཇི་སྐད་གསུངས་པ་རྣམས་སེམས་ཅན་ཐམས་ཅད་ལ་སྨན་པའི་སླད་དུ་བདག་ཅག་ཀུན་གྱིས་བསྲུང་ཞིང་རིམ་གྲོར་བགྱི། རྟག་པར་གཟུངས་སུ་བཟུང་ཞིང་མི་བསྐྱུད་པར་བགྱི། ཡི་གེར་བྲི་བ་དང ། བཀླག་པ་དང ། མཆོད་པའི་ལས་རྣམས་ཀྱང་བགྱི་སྟེ། མ་འོངས་པའི་དུས་ན་སེམས་ཅན་གང་ལ་ལས་ཆོས་ཀྱི་རྣམ་གྲངས་འདི་ཐོས་ཤིང་ཁོང་དུ་ཆུད་ནས་ངན་སོང་ངན་འགྲོ་སེམས་ཅན་དམྱལ་བ་ལ་སོགས་པ་དང ། སྡིག་པ་ཐམས་ཅད་ལས་ཐར་པར་འགྱུར་བར་བཅོམ་
308b
ལྡན་འདས་ཀྱིས་གསུངས་པས་ན། བདག་ཅག་རྣམས་ཀྱིས་བཅོམ་ལྡན་འདས་ཀྱིས་བཀའ་དྲིན་སྤྱི་བོས་བླང་བའི་སླད་དུ་གསང་སྔགས་ཀྱི་ཆོ་ག་འདི་དག་རིམ་གྲོར་བགྱི། བཙུན་པར་བགྱི། གུས་པར་བགྱི། རིན་པོ་ཆེའི་འདུ་ཤེས་གཞག་པར་བགྱི། རྒྱ་ཆེར་འཕེལ་བར་བགྱི། བཅོམ་ལྡན་འདས་ཀྱི་ཞལ་དང་འདྲ་བར་བལྟ་བར་བགྱི་སྟེ། ནམ་དུ་ཡང་ནུབ་པར་མི་འགྱུར་ཞིང་ཅི་ནས་ཀྱང་རྒྱས་པར་བགྱི་བའི་སླད་དུ་ནན་ཏན་བགྱི་བར་འཚལ་ལོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྐྱེས་བུ་དམ་པ་རྣམས། དམ་ཚིག་ལ་གནས་པས་གསང་སྔགས་ཀྱི་ཆོ་ག་འདི་དག་བསྲུང་བ་དང ། རིམ་གྲོར་བྱ་བ་དང ། ཡོངས་སུ་གཟུང་བར་ཁས་བླངས་པ་ནི། ལེགས་སོ་ལེགས་སོ། །ཤིན་ཏུ་ཡང་ལེགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཐམས་ཅད་དང་ལྡན་པའི་འཁོར་དེ་དག་ཡིད་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་འོད་ཟེར་དྲི་མ་མེད་པ་རྣམ་པར་དག་པའི་འོད་ཅེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་བིདྱཱ་ཀ་ར་སིཾ་ཧ་དང ། ཞུ་ཆེན་གྱི་ལོཙྪ་བ་བནྡྷེ་དཔལ་གྱི་ལྷུན་པོའི་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། ཇོ་བོ་ཨ་ཏི་ཤ་དང ། དགེ་བཤེས་འབྲེ་མ་སྟོན་པས་སྔགས་རྣམས་དག་བར་བཅོས་
309a
༄#། །སོ།། །།