རྒྱ་གར་སྐད་དུ། ཨཱརྱ་ཡུཥྨི་ནདྣཾ་གརྦྷཱ་བ་ཀྲནྟི་ནི་ར་དེ་ཤ། བོད་སྐད་དུ། འཕགས་པ་ཚེ་དང་ལྡན་པ་དགའ་བོ་ལ་མངལ་དུ་འཇུག་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་གཅིག་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་དེའི་ཚེ་ཚེ་དང་ལྡན་པ་དགའ་བོ་ཕྱི་ 381a ༄#། །དྲོའི་དུས་ཀྱི་ཚེ་ནང་དུ་ཡང་དག་འཇོག་པ་ལས་ལངས་ཏེ་དགེ་སློང་ལྔ་བརྒྱ་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ཐལ་མོ་སྦྱར་ནས་གུས་པས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་དགའ་བོ་དང་དགེ་སློང་རྣམས་ལ་བཀའ་སྩལ་པ། ང་ལ་ཆོས་ཀྱི་རྣམ་གྲངས་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །གཅིག་པུ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་དཀར་བ། ཚངས་པར་སྤྱོད་པའི་ཆོས་འདི་ལྟ་སྟེ། མངལ་དུ་འཇུག་པ་ཞེས་བྱ་བའི་ཆོས་ཀྱི་རྣམ་གྲངས་ཡོད་ཀྱི། ལེགས་པར་ཉོན་ལ་ཡིད་ལ་ཟུངས་ཤིག་དང ། ངས་ཁྱོད་ལ་རྣམ་པར་ཕྱེ་སྟེ་བསྟན་པར་བྱའོ། །བཅོམ་ལྡན་འདས་ལ་ཚེ་དང་ལྡན་པ་དགའ་བོས་གསོལ་པ། བཅོམ་ལྡན་འདས། དེ་བཞིན་དུ་ཐོས་པར་འཚལ་ལོ། །ཞེས་གསོལ་པ་དང ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་དགའ་བོ་ལ་འདི་སྐད་ཅེས་བཀའ་སྩལ་ཏོ། །དགའ་བོ། སེམས་ཅན་རྣམས་ནི། མངལ་དུ་འཇུག་པར་འདོད་པའི་ཚེ་རྒྱུ་དང ། རྐྱེན་ཕུན་སུམ་ཚོགས་པར་གྱུར་ན་ནི། ལུས་ལེན་པར་འགྱུར་གྱི། གལ་ཏེ་ཕུན་སུམ་ཚོགས་པར་མ་གྱུར་ན་ནི། ལུས་ལེན་པར་མི་འགྱུར་རོ། །དེ་ལ་རྐྱེན་དང་མི་ལྡན་པ་ཞེས་བྱ་བ་གང་ཞེ་ན། 381b འདི་ལྟ་སྟེ། ཕ་དང ། མ་གཉིས་ཀ་ཡང་ཆགས་པའི་སེམས་བྱུང་བར་གྱུར་ལ། བར་མ་དོའི་ཕུང་པོ་ཡང་མངོན་དུ་གྱུར་ཅིང་སྐྱེ་བའི་གནས་ཡོངས་སུ་ཚོལ་བར་བྱེད་ཀྱང་ཕ་མ་དེ་དག་གི་འདུ་འཕྲོད་སྔ་ཕྱིར་གྱུར་ཅིང་དུས་གཅིག་ཏུ་བྱུང་བར་མ་གྱུར་ཏམ། སོ་སོའི་ལུས་ལ་ནད་རྣམས་ལྡན་པར་གྱུར་ན་ཡང་མངལ་དུ་འཇུག་པར་མི་འགྱུར་རོ། །གལ་ཏེ་མལ་མངལ་རླུང་དང ། མཁྲིས་པ་དང ། བད་ཀན་དང ། ཁྲག་གིས་ཉེ་བར་ནོན་པར་གྱུར་ཏམ། མཚམས་ཤས་གང་བའམ། སྨན་གྱིས་གང་བའམ། དབུས་ནས་འདྲ་བའམ། གྲོག་མོའི་རྐེད་པ་འདྲ་བའམ། རྔ་མོའི་ཁ་འདྲ་བའམ། ཤིང་རྟའི་ཚིགས་པ་བཞིན་སོག་ཁར་འདུག་པའམ། ཤིང་རྟའི་སྲོག་ཤིང་ལྟ་བུར་འདུག་པའམ། ཤིང་རྟའི་ལྟེ་བའི་ཁ་ལྟ་བུར་འདུག་པའམ། ཤིང་ལོ་ལྟ་བུར་གྱུར་པའམ། སྤ་ལྟ་བུར་གྱུ་གྱུར་འཁྱིལ་བར་གྱུར་ཏམ། མངལ་གྱི་ནང་ནས་ཀྱི་གྲ་མ་སྐྱེས་པ་ལྟ་བུར་གྱུར་ཏམ། ཁུ་ཆུ་དང་ཁྲག་མང་དུ་འཛག་ཅིང་སྐད་ཅིག་ཡུད་ཙམ་ཡང་འདུག་ཏུ་མི་བཏུབ་པར་གྱུར་ཏམ། ཐུར་དུ་འཛག་པར་གྱུར་ཏམ། མངལ་གྱི་ལམ་རྩུབ་པར་གྱུར་ཏམ། སྟེང་དུ་ཡངས་པའམ། འོག་ཏུ་ཡངས་པའམ། ཡོ་བའམ། ཟབ་པ་མ་ཡིན་པའམ། རྡོལ་ནས་ཟགས་པའམ། མཐོ་བའམ། དམའ་བའམ། ཐུང་ཞིང་དོག་པའམ། ནད་སྣ་ཚོགས་དང་བཅས་པར་གྱུར་ན་ཡང་མངལ་དུ་འཇུག་པར་མི་འགྱུར། གལ་ཏེ་ཕ་མ་ 382a ༄#། །ཆོ་རིགས་བཙུན་ཞིང་བསོད་ནམས་ཆེན་པོ་དང་ལྡན་པར་གྱུར་ལ། བར་མ་དོའི་ཕུང་པོ་བསོད་ནམས་ཆུང་བ་དང ། བར་མ་དོའི་སྲིད་པ་ཆོ་རིགས་བཙུན་ཞིང་བསོད་ནམས་ཆེན་པོ་དང་ལྡན་པར་གྱུར་ལ། ཕ་མ་བསོད་ནམས་ཆུང་བར་གྱུར་ཏམ། གཉིས་ཀ་བསོད་ནམས་དང་ལྡན་ཡང་ཕན་ཚུན་ཕྲད་པར་འགྱུར་བའི་ལས་བསགས་པར་མ་གྱུར་ན་ཡང་མངལ་དུ་འཇུག་པར་མི་འགྱུར་རོ། །འདི་ལྟར་བར་མ་དོའི་ཕུང་པོ་དེ་མངལ་དུ་འཇུག་པར་འགྱུར་བ་ན་ཐོག་མ་ཁོ་ནར་ཕྱིན་ཅི་ལོག་གི་སེམས་རྣམ་པ་གཉིས་འབྱུང་བར་འགྱུར་ཏེ། གཉིས་གང་ཞེ་ན། འདི་ལྟ་སྟེ། ཕ་མ་གཉིས་ཕྲད་པར་གྱུར་པའི་ཚེ་གལ་ཏེ་ཕོར་འགྱུར་བ་ཞིག་ཡིན་ན་ནི། མ་ལ་ནི། ཆགས་པ་སྐྱེ་བར་འགྱུར་ལ། ཕ་ལ་ནི། ཞེ་སྡང་སྐྱེ་བར་འགྱུར་ཏེ། ཕའི་ཁུ་བ་བྱུང་ན། འདི་ནི། བདག་གི་ཡིན་ནོ། །སྙམ་དུ་སེམས་སོ། །གལ་ཏེ་མོར་འགྱུར་བ་ཞིག་ཡིན་ན་ནི། ཕ་ལ་ནི། ཆགས་པ་སྐྱེ་བར་འགྱུར་ལ། མ་ལ་ནི། ཞེ་སྡང་སྐྱེ་བར་འགྱུར་ཏེ། མའི་ཁུ་བ་བྱུང་ན། འདི་ནི། བདག་གི་ཡིན་ནོ། །སྙམ་དུ་སེམས་པས། གལ་ཏེ་འདི་ལྟ་བུའི་ཞེ་སྡང་དང ། ཆགས་པའི་སེམས་སྐྱེས་པར་མ་གྱུར་ན། མངལ་དུ་འཇུག་པར་མི་འགྱུར་རོ། །གཞན་ཡང་དགའ་བོ། ཇི་ལྟར་མའི་མངལ་དུ་འཇུག་པར་འགྱུར་ཞེ་ན། འདི་ལྟ་སྟེ། ཕ་མ་ཡང་ཆགས་པའི་སེམས་སྐྱེས་པར་གྱུར། དུས་ཀྱི་ཟླ་མཚན་ 382b ཡང་རྗེས་སུ་མཐུན་པར་གྱུར། བར་མ་དོའི་ཕུང་པོ་ཡང་མངོན་དུ་གྱུར་ལ། གོང་མ་ལྟ་བུའི་སྐྱོན་མང་པོ་ཡང་མེད་ཅིང་ལས་ཀྱི་རྐྱེན་དང་ཡང་ལྡན་པར་གྱུར་ན། མངལ་དུ་འཇུག་པར་འགྱུར་རོ། །འདི་ལྟར་བར་མ་དོའི་ཕུང་པོ་དེ་མངལ་དུ་འཇུག་པར་འདོད་པ་ན་དེ་ཡང་རྣམ་པ་གཉིས་སུ་འགྱུར་ཏེ། གཉིས་གང་ཞེ་ན། བསོད་ནམས་དང་མི་ལྡན་པ་དང ། བསོད་ནམས་ཆེན་པོ་དང་ལྡན་པ་གང་ཡིན་པའོ། །བསོད་ནམས་དང་མི་ལྡན་པ་གང་ཡིན་པ་དེ་ནི། རྣམ་པར་རྟོག་པའི་སེམས་བྱུང་ནས་ཡུལ་མཐོང་བར་གྱུར་པ་ན་འདི་སྙམ་དུ་སེམས་ཏེ། དེང་བདག་ནི།་རླུང་དང ། གྲང་བ་དང ། གནམ་རྨུགས་པ་དང ། ཆར་འབབ་པ་དང ། སྐྱེ་བོ་མང་པོའི་ཅ་ཅོ་དང ། མང་པོའི་མཐུ་སྟོབས་ཀྱིས་གནོད་པར་བྱེད་པ་དང་ཕྲད་པར་གྱུར་ཏེ། །ཞེས་འཇིགས་ཤིང་སྐྲག་པ་སྐྱེས་ནས་དེང་བདག་རྩཝའི་ཁྱིམ་དང ། ལོ་མའི་ཁྱིམ་དང ། རྩིག་པའི་དྲུང་དབེན་པར་འཇུག་པར་བྱའོ། །ཡང་ན་རི་དང ། ནགས་སྟུག་པོ་དང ། བྲག་ཕུག་དག་ཏུ་འཇུག་བར་བྱའོ། །སྙམ་དུ་སེམས་ཏེ། གཞན་ཡང་འདུ་ཤེས་རྣམ་པ་སྣ་ཚོགས་བསྐྱེད་ནས་ཇི་ལྟར་མཐོང་བ་བཞིན་དུ་མའི་མངལ་དུ་འཇུག་པར་བྱེད་དོ། །གང་བསོད་ནམས་ཆེན་པོ་དང་ལྡན་པ་དེ་ཡང་འདི་སྙམ་དུ་དེང་བདག་ནི། རླུང་དང ། གྲང་བ་དང ། གནམ་རྨུགས་པ་དང ། ཆར་འབབ་པ་དང ། སྐྱེ་བོ་མང་པོའི་ཅ་ཅོ་དང ། མང་པོའི་མཐུ་སྟོབས་ཀྱིས་གནོད་པར་བྱེད་པ་དང་ 383a ༄#། །ཕྲད་པར་གྱུར་ཏོ། །ཞེས་འཇིགས་ཤིང་སྐྲག་པ་སྐྱེས་ནས་ཁང་པ་བརྩེགས་མའི་སྟེང་དུ་འཛེག་པའམ། ཡང་ཐོག་མཐོན་པོའི་སྟེང་དུ་འཛེག་པའམ། གཞལ་མེད་ཁང་གི་ནང་དུ་འཇུག་པའམ། ཁྲི་ལ་འདུག་པར་བྱའོ། །སྙམ་དུ་སེམས་ཏེ། གཞན་ཡང་འདུ་ཤེས་རྣམ་པ་སྣ་ཚོགས་བསྐྱེད་ནས་ཇི་ལྟར་མཐོང་བ་བཞིན་དུ་མའི་མངལ་དུ་འཇུག་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། དགའ་བོ། འདི་ལྟར་བར་མ་དོའི་ཕུང་པོ་དེ་ཐོག་མ་ཁོ་ནར་མངལ་དུ་ཞུགས་པ་གང་ཡིན་པ་དེ་ནི། མེར་མེར་པོ་ཞེས་བྱ་སྟེ། ཕ་མའི་མི་གཙང་བ་དང ། འདས་པའི་ལས་ལ་བརྟེན་ནས་ལུས་ལེན་པར་བྱེད་ཀྱང་འདི་ལྟར་ལས་དེ་དང ། ཕ་མའི་རྐྱེན་རྣམས་ཀྱིས་སོ་སོ་ནས་རང་བསྐྱེད་པར་མི་བྱེད་ཀྱི། འདུས་པའི་མཐུ་སྟོབས་ཀྱིས་ལུས་ལེན་པར་བྱེད་པས། འདི་ལྟ་སྟེ། དཔེར་ན། སྣོད་ཀྱི་ནང་དུ་ཞོས་བཀང་ནས་སྐྱེས་བུའི་རྩོལ་བ་དང ། ཐག་པ་ལ་སོགས་པ་ལ་བརྟེན་ཏེ་མར་འབྱུང་བ་ཡང་རྐྱེན་རྣམས་ལས་དམིགས་པར་མི་འགྱུར་མོད་ཀྱི། འོན་ཀྱང་འདུས་པའི་མཐུ་ལས་མར་འབྱུང་བར་འགྱུར་བ་དེ་བཞིན་དུ་མེར་མེར་པོའི་ལུས་ཀྱང་དེ་བཞིན་ཏེ། འདི་ལྟར་རྒྱུ་དང ། རྐྱེན་གྱི་མཐུས་མངལ་དུ་ལུས་མངོན་པར་འགྲུབ་པར་འགྱུར་རོ། །དགའ་བོ། འདི་ལྟ་སྟེ། དཔེར་ན། རྩཝ་སྔོན་པོ་དང ། བ་ལང་གི་ལྕི་བ་དང ། རྒྱ་ཤུག་དང ། ཞོ་ལ་བརྟེན་ནས་སོ་སོ་ནས་སྲིན་བུ་ 383b སྐྱེ་བར་འགྱུར་བ་རེ་རེའི་ནང་དུ་སྲིན་བུ་མི་དམིགས་ཀྱང་རྒྱུ་དང ། རྐྱེན་གྱི་སྟོབས་ཀྱིས་སྲིན་བུ་སྐྱེ་བར་འགྱུར་ཏེ། སྲིན་བུ་དེ་དག་སྐྱེ་བ་ན་སོ་སོ་ནས་རྟེན་ཇི་ལྟ་བ་བཞིན་དུ་ཁ་དོག་སྔོན་པོ་དང ། སེར་པོ་དང ། དམར་པོ་དང ། དཀར་པོར་འགྱུར་རོ། །དེ་བཞིན་དུ་ཕ་མའི་མི་གཙང་བ་ལས་ལུས་འདི་སྐྱེ་བ་ཡང་རྐྱེན་རྣམས་ཀྱི་ནང་དུ་བཙལ་ན། དམིགས་པར་མི་འགྱུར་མོད་ཀྱི། འོན་ཀྱང་རྐྱེན་འདུས་པའི་མཐུ་དང་མ་བྲལ་བར་ཡང་ལུས་ཡང་དག་པར་ལེན་པར་ཡང་མི་འགྱུར་རོ། །ལུས་འདི་སྐྱེས་པ་ན་ཕ་མའི་འབྱུང་བ་ཆེན་པོ་བཞི་དང་ངོ་བོ་ཉིད་ཐ་མི་དད་པར་གྱུར་ཏེ། འདི་ལྟ་སྟེ། སའི་ཁམས་ཀྱིས་ནི། སྲ་བའི་བྱ་བ་བྱེད་དོ། །ཆུའི་ཁམས་ཀྱིས་ནི། གཤེར་བའི་བྱ་བ་བྱེད་དོ། །མེའི་ཁམས་ཀྱིས་ནི། དྲོ་བའི་བྱ་བ་བྱེད་དོ། །རླུང་གི་ཁམས་ཀྱིས་ནི། ཡང་ཞིང་གཡོ་བའི་བྱ་བ་བྱེད་དེ། མེར་མེར་པོའི་ལུས་དེ་དག་གལ་ཏེ་སའི་ཁམས་འབའ་ཞིག་དང་ལྡན་ལ་ཆུའི་ཁམས་མེད་པར་གྱུར་ན་ནི། འདི་ལྟ་སྟེ། དཔེར་ན། ཕྱེ་དང་ཐལ་བ་སྐམ་པོ་བཅངས་པ་བཞིན་དུ་འདུར་མི་བཏུབ་པར་འགྱུར་རོ། །གལ་ཏེ་ཆུའི་ཁམས་འབའ་ཞིག་དང་ལྡན་ལ་སའི་ཁམས་མེད་པར་གྱུར་ན་ནི། འདི་ལྟ་སྟེ། དཔེར་ན། འབྲུ་མར་རམ། ཆུའི་རང་བཞིན་སྣུམ་ཞིང་གཤེར་བས། སྲ་བ་མེད་པ་བཞིན་དུ་བོ་ཞིང་གྱེས་པར་འགྱུར་རོ། །གལ་ཏེ་ས་དང་ཆུའི་ཁམས་འབའ་ཞིག་དང་ལྡན་ལ་མེའི་ཁམས་མེད་པར་གྱུར་ན་ནི། འདི་ལྟ་སྟེ། དཔེར་ 384a ༄#། །ན།་དབྱར་ཚ་བའི་དུས་སུ་ཤའི་གོང་བུ་གྲིབ་མ་ལ་བཞག་པ་ཉི་མའི་འོད་ཀྱིས་མ་ཕོག་པ་བཞིན་དུ་རུལ་ཞིང་མྱགས་པར་འགྱུར་རོ། །གལ་ཏེ་ས་དང ། ཆུ་དང ། མེའི་ཁམས་དང་ལྡན་ལ་རླུང་གི་ཁམས་མེད་པར་གྱུར་ན་ནི། འཕེལ་བར་མི་འགྱུར་ཏེ། འདི་ལྟ་སྟེ། དཔེར་ན། འཁུར་བ་མཁན་ནམ་དེའི་སློབ་མ་མཁས་པས་འཁུར་བ་བཙོས་ནས་དབུགས་ཀྱིས་བུས་ཏེ། ཅི་དང་ཅི་བྱ་བ་རྣམས་མངོན་པར་འདུས་བྱས་ནས་དེ་དག་ནང་ཁོང་སྟོང་དུ་བྱེད་པ། གལ་ཏེ་རླུང་གི་སྟོབས་མེད་པར་གྱུར་ན་མངོན་པར་འགྲུབ་པར་མི་འགྱུར་རོ། །དེ་བཞིན་དུ་འབྱུང་བ་ཆེན་པོ་བཞི་པོ་དེ་དག་ཀྱང་ཕན་ཚུན་གཅིག་ལ་གཅིག་བརྟེན་ཅིང་ཡོངས་སུ་བཟུང་ནས་རྣམ་པར་བཞག་པ་ཡིན་པས་དེའི་ཕྱིར་མེར་མེར་པའི་ལུས་ཕ་མའི་འབྱུང་བ་ཆེན་པོ་བཞི་དང ། ལས་ཀྱི་རླུང་གི་རྒྱུས་སྐྱེ་བར་འགྱུར་བ་དང ། དེ་བཞིན་དུ་རྐྱེན་མང་པོ་རྣམས་ཀྱི་ནང་ན་དམིགས་པར་མི་འགྱུར་ཡང་འདུས་པའི་སྟོབས་ཀྱིས་ལུས་ཡང་དག་པར་ལེན་པར་འགྱུར་བར་རིག་པར་བྱའོ། །གཞན་ཡང་དགའ་བོ། འདི་ལྟ་སྟེ། དཔེར་ན། ས་བོན་གསར་པ་ཡོངས་སུ་གཙང་ལ་ལེགས་པར་སྦས་པ། སྲིན་བུས་མ་ཟོས་པ། མ་རུལ་ཅིང་མ་ཚིག་པ་དང ། མ་གས་པ་དང ། བུ་ག་མེད་པ་ཞིག་གང་ལ་ལ་ཞིག་གིས་ཞིང་བཟང་ཞིང་གཤིན་པ་བཙལ་ཏེ་ས་བོན་དེ་བཏབ་ན། ཅི་ཉིན་ཞག་གཅིག་གིས་མྱུ་གུ་དང ། 384b སྡོང་བུ་དང ། ཡལ་ག་དང ། ལོ་མ་གྲིབ་མ་དང་བཅས་པ་དང ། མེ་ཏོག་དང ། འབྲས་བུ་རྒྱས་ཤིང་ཕུན་སུམ་ཚོགས་པར་འགྱུར་རམ། བཅོམ་ལྡན་འདས། དེ་ནི། འདི་ལྟར་མི་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགའ་བོ། མེར་མེར་པོའི་ལུས་ཀྱང་དེ་བཞིན་དུ་རྒྱུ་དང ། རྐྱེན་ལས་རིམ་གྱིས་སྐྱེ་བར་འགྱུར་གྱི། དུས་གཅིག་ཏུ་དབང་པོ་རྣམས་ཕུན་སུམ་ཚོགས་པར་མི་འགྱུར་ཏེ། དེ་ལྟ་བས་ན། ཕ་མ་ལས་བྱུང་བར་གྱུར་པའི་ལུས་འདི་རྐྱེན་རྣམས་ཀྱི་ནང་ན་བཙལ་ན་ཡང་དམིགས་པར་མི་འགྱུར་མོད་ཀྱི། འོན་ཀྱང་ཚོགས་པའི་སྟོབས་ཀྱིས་སྐྱེ་བ་ལེན་པར་འགྱུར་བར་རིག་པར་བྱའོ། །གཞན་ཡང་དགའ་བོ། འདི་ལྟ་སྟེ། དཔེར་ན། སྐྱེས་བུ་མིག་དང་ལྡན་པས་མེ་ཤེལ་གྱི་ནོར་བུ་བླངས་ནས་ཉི་མ་ལ་བཞག་སྟེ་ལྕི་བ་སྐམ་པོ་ནོར་བུ་དང་མི་རིང་བར་བསྟེན་པ་ལས་མེ་འབྱུང་བར་འགྱུར་བ། ལྕི་བ་དང ། ཉི་མའི་འོད་སོ་སོ་ནས་མེ་འབྱིན་པར་མི་ནུས་ཀྱང་ཕན་ཚུན་མི་འབྲལ་བས་རྒྱུ་དང ། རྐྱེན་གྱི་སྟོབས་ཀྱིས་མེ་འབྱུང་བར་བྱེད་དོ། །ཕ་མ་ལས་བྱུང་བའི་ལུས་ཀྱང་དེ་བཞིན་ཏེ། འདི་ལྟ་སྟེ། མེར་མེར་པོའི་ལུས་གང་ཡིན་པ་དེ་ནི། གཟུགས་ཞེས་བྱའོ། །ཚོར་བ་དང ། འདུ་ཤེས་དང ། འདུ་བྱས་དང ། རྣམ་པར་ཤེས་པ་གང་ཡིན་པ་དེ་ནི། མིང་ཞེས་བྱ་སྟེ། མིང་དང་གཟུགས་ཀྱི་ཕུང་པོ་ལྔ་པོས་སྐད་ཅིག་མ་གཅིག་ལ་ལུས་བླངས་ནས་སྡུག་བསྔལ་མྱོང་བར་བྱེད་པ་ལ་ཡང་ངས་བསྔགས་པ་ 385a ༄#། །རྗོད་པར་མི་བྱེད་ན། ཡུན་རིང་པོར་སྲིད་པ་རྣམས་སུ་འཁོར་བར་འགྱུར་བ་ལྟ་སྨོས་ཀྱང་ཅི་དགོས། འདི་ལྟ་སྟེ། དཔེར་ན། མི་གཙང་བ་ནི། ཉུང་ཡང་མནམ་ན། མང་པོ་ལྟ་སྨོས་ཀྱང་ཅི་དགོས་ཏེ། དེ་ལྟ་བས་ན། མེར་མེར་པོའི་ལུས་ཉེ་བར་ལེན་པའི་ཕུང་པོ་ལྔ་པོ་དག་ལ་སུ་ཞིག་སྲེད་ཅིང་ཆགས་པར་བྱེད། གཞན་ཡང་དགའ་བོ། འདི་ལྟར་ལུས་དེ་མའི་མངལ་ན་གནས་པ་ཡང་ཞག་བདུན་ཕྲག་སུམ་ཅུ་རྩ་བརྒྱད་ལོན་ནས་གདོད་འབྱུང་བར་འགྱུར་ཏེ། ཞག་བདུན་ཕྲག་དང་པོ་ལ་མའི་མངལ་ན་གནས་པ་གང་ཡིན་པ་དེ་ནི། མེར་མེར་པོ་ཞེས་བྱ་སྟེ། ལུས་ཀྱི་མཚན་མ་དང་པོར་སྣང་བ་ཡིན་པས། འདི་ལྟ་སྟེ། དཔེར་ན། ཞོ་མ་ཆགས་པ་དང་འདྲ་བས་ཞག་བདུན་གྱི་བར་དུ་མངལ་གྱི་ནང་དུ་བཙོས། རབ་ཏུ་བཙོས་ནས་འབྱུང་བ་ཆེན་པོ་བཞི་མཐར་གྱིས་མངོན་པར་གྲུབ་པར་བྱེད་དོ། །ཞག་བདུན་ཕྲག་གཉིས་པ་ལ་མའི་མངལ་དུ་གནས་པའི་ཚེ་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ཀུན་སྡུད་ཅེས་བྱ་སྟེ། རླུང་ཤིན་ཏུ་ཕྲ་མོ་དེས་མའི་རྩིབ་ལོགས་གཡོན་པ་དང ། གཡས་པ་བུས་ཏེ་མེར་མེར་པོའི་ལུས་ཀྱི་མཚན་མ་རིམ་གྱིས་སྣང་བར་བྱེད་པས། དེའི་དབྱིབས་ཞོ་བསྐ་བའམ། མར་འཁྱགས་པ་འདྲ་སྟེ། མངལ་གྱི་ནང་དུ་བཙོས། རབ་ཏུ་བཙོས་པས་ནུར་ནུར་པོའི་ལུས་སུ་གྱུར་ནས་འདི་ལྟར་འབྱུང་བ་ཆེན་པོ་བཞི་པོ་དག་མཐར་གྱིས་མངོན་པར་གྲུབ་པར་བྱེད་དོ། ། 385b ཞག་བདུན་ཕྲག་གསུམ་པ་ལ་མའི་མངལ་དུ་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། མཛོད་ཁ་ཞེས་བྱ་སྟེ། རླུང་དེའི་སྟོབས་ཀྱིས་ནུར་ནུར་པོ་གང་ཡིན་པ་དེ་མཐར་གྱིས་མཁྲེགས་ཤིང་ལྟར་ལྟར་པོར་བྱེད་པས་དེའི་དབྱིབས་ནི། སྨན་བརྡུངས་པའི་གཏུན་བུ་འདྲ་ལ་ཐུང་ཞིང་ཆུང་སྟེ་མངལ་གྱི་ནང་དུ་བཙོས། རབ་ཏུ་བཙོས་པས་འདི་ལྟར་འབྱུང་བ་ཆེན་པོ་བཞི་པོ་འདི་དག་མཐར་གྱིས་འབྲེལ་པར་བྱེད་དོ། །ཞག་བདུན་ཕྲག་བཞི་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ནང་རབ་ཏུ་འབྱེད་པ་ཞེས་བྱ་སྟེ། རླུང་དེའི་སྟོབས་ཀྱིས་ལྟར་ལྟར་པོ་གང་ཡིན་པ་དེ་ནི། མཁྲང་བར་བྱེད་པས། དེའི་དབྱིབས་ནི། མཆིག་གུ་འདྲ་བ་སྟེ། ནང་དུ་བཙོས། རབ་ཏུ་བཙོས་པས་འབྱུང་བ་ཆེན་པོ་བཞི་པོ་མཐར་གྱིས་འཕེལ་བར་བྱེད་དོ། །ཞག་བདུན་ཕྲག་ལྔ་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ཡང་དག་པར་སྡུད་པ་ཞེས་བྱ་སྟེ། རླུང་དེའི་སྟོབས་ཀྱིས་མཁྲང་འགྱུར་གང་ཡིན་པ་དེ་ནི། རྐང་ལག་འགྱུར་བར་སྒྱུར་བར་བྱེད་པས་གོར་གོར་པོ་གང་ཡིན་པ་དེ་ནི། རྣམ་པར་ཕྱེ་ནས་བརླ་གཉིས་དང ། དཔུང་པ་གཉིས་དང ། མགོའི་མཚན་མ་མངོན་དུ་འབྱུང་བར་བྱེད་དེ། འདི་ལྟ་སྟེ། དཔེར་ན། དབྱར་གྱི་དུས་སུ་ཆར་འབབ་པའི་ཚེ་ལྗོན་ཤིང་རྣམས་ཡལ་ག་དང ། འདབ་མ་སྐྱེད་པར་བྱེད་པ་དེ་བཞིན་དུ་ལས་ཀྱི་རླུང་གི་སྟོབས་ཀྱིས་ཀྱང་ལུས་ 386a ༄#། །ཀྱི་མཚན་མ་རྣམས་སྣང་བར་བྱེད་དོ། །ཞག་བདུན་ཕྲག་དྲུག་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ཟས་ཞེས་བྱ་སྟེ། རླུང་དེའི་སྟོབས་ཀྱིས་མཚན་མ་བཞི་འབྱུང་བར་བྱེད་དོ། །བཞི་གང་ཞེ་ན། འདི་ལྟ་སྟེ། པུས་མོ་གཉིས་དང ། དཔུང་པ་གཉིས་གང་ཡིན་པ་དེ་ནི། མཚན་མ་རྣམ་པ་བཞི་ཞེས་བྱའོ། །ཞག་བདུན་ཕྲག་བདུན་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། འཁྱིལ་བར་བྱེད་པ་ཞེས་བྱ་སྟེ། རླུང་དེའི་སྟོབས་ཀྱིས་མཚན་མ་རྣམ་པ་བཞི་འབྱུང་བར་བྱེད་དེ། འདི་ལྟ་སྟེ། ལག་པའི་མཐིལ་གཉིས་དང ། རྐང་པའི་མཐིལ་གཉིས་ཏེ། དེའི་མཚན་མ་ནི། ཤིན་ཏུ་མཉེན་པས་དབུ་བ་འདུས་པ་དང་འདྲའོ། །ཞག་བདུན་ཕྲག་བརྒྱད་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ཟློག་ཅིང་སྒྱུར་བར་བྱེད་པ་ཞེས་བྱ་སྟེ། རླུང་དེའི་སྟོབས་ཀྱིས་མཚན་མ་ཉི་ཤུ་འབྱུང་བར་བྱེད་དེ། འདི་ལྟ་སྟེ། ལག་པ་དང ། རྐང་པའི་སོར་མོའི་མཚན་མ་ཉི་ཤུ་འབྱུང་བར་བྱེད་པ་གང་ཡིན་པའོ། །དེ་ནི། འདི་ལྟ་སྟེ། དཔེར་ན། དབྱར་ཆར་འབབ་པའི་ཚེ་ལྗོན་ཤིང་རྣམས་ཀྱི་ཡལ་ག་དང ། འདབ་མ་མཐར་གྱིས་སྐྱེས་ཤིང་འཕེལ་བར་བྱེད་པ་དེ་བཞིན་དུ་ལས་ཀྱི་རླུང་གི་སྟོབས་ཀྱིས་ཀྱང་མཚན་མ་རྣམས་མངོན་དུ་སྣང་བར་ 386b བྱེད་དོ། །ཞག་བདུན་ཕྲག་དགུ་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། རྣམ་པར་འབྱེད་པ་ཞེས་བྱ་སྟེ། རླུང་དེའི་སྟོབས་ཀྱིས་མཚན་མ་རྣམ་པ་དགུ་འབྱུང་བར་བྱེད་དོ། །དགུ་གང་ཞེ་ན། འདི་ལྟ་སྟེ། མིག་གཉིས་དང ། རྣ་བ་གཉིས་དང ། སྣ་གཉིས་དང ། ཁ་དང ། བཤང་བ་དང ། གཅི་བའི་གནས་གང་ཡིན་པ་དེ་དག་ནི། མཚན་མ་རྣམ་པ་དགུ་ཞེས་བྱའོ། །ཞག་བདུན་ཕྲག་བཅུ་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། སྲ་བར་བྱེད་པ་ཞེས་བྱ་སྟེ། རླུང་དེའི་སྟོབས་ཀྱིས་སྲ་ཞིང་བརྟན་པར་བྱེད་དོ། །གཞན་ཡང་དེའི་ཚེ་ཀུན་ནས་སྒོ་ཞེས་བྱ་བའི་རླུང་འབྱུང་སྟེ། དེས་མངལ་ན་གནས་པའི་ལུས་བུས་པས་ལུས་ཀུན་ཏུ་རྒྱས་ཤིང་གང་བར་བྱེད་དེ། འདི་ལྟ་སྟེ། དཔེར་ན། རྐྱལ་པ་གང་བ་ཇི་ལྟ་བ་བཞིན་ནོ། །ཞག་བདུན་ཕྲག་བཅུ་གཅིག་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། རྡོ་རྗེ་ཞེས་བྱ་སྟེ། རླུང་དེའི་སྟོབས་ཀྱི་མངལ་ན་གནས་པ་དེ་སྟེང་དང ། འོག་གི་ཕྱོགས་སུ་འགྲོ་ཞིང་ལུས་ཀྱི་བུ་ག་རྣམས་འབྱིན་པར་བྱེད་དོ། །གཞན་ཡང་རླུང་དེའི་སྟོབས་ཀྱིས་མ་དེ་རེས་འགའ་དགའ་བ་དང ། མི་དགའ་བར་ཡང་བྱེད། འགྲོ་བ་དང ། འགྲེང་བ་དང ། འདུག་པ་དང ། ཉལ་བ་ན་ཡང་དེའི་རང་བཞིན་དུ་འགྱུར་ཞིང་རྐང་ལག་བསྐྱོད་པར་ཡང་བྱེད་པས་མངལ་ན་གནས་པའི་བུ་ག་རྣམས་མཐར་གྱིས་སྐྱེ་ཞིང་འཕེལ་བར་ཡང་ 387a ༄#། །བྱེད་ལ། དེའི་ཁ་ནས་ཁྲག་ནག་པོ་ཡང་འབྱུང་བར་འགྱུར། སྣ་ནས་ཀྱང་ཆུ་མི་གཙང་བ་འབྱུང་བར་འགྱུར་ཏེ། རླུང་དེས་དབང་པོ་རྣམས་བཟློག་ནས་དེ་ནས་ཞི་བར་འགྱུར་རོ། །ཞག་བདུན་ཕྲག་བཅུ་གཉིས་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ཡོན་པའི་སྒོ་ཞེས་བྱ་སྟེ། རླུང་དེའི་སྟོབས་ཀྱིས་རྩིབ་ལོགས་གཡས་གཡོན་གྱི་ནང་ཁྲོལ་གྱི་རྒྱུ་མ་ཆེ་ཆུང་རྣམས་སྐྱེད་པར་བྱེད་དེ། དེ་ནི། འདི་ལྟ་སྟེ། དཔེར་ན། པདྨའི་རྩ་བ་ཤད་ཤད་པོའམ། སྐུད་པ་གྲིམས་པ་ས་ལ་བཞག་པ་ལྟ་བུར་ལན་བཅོ་བརྒྱད་འཁོར་བར་ལུས་ལ་བརྟེན་ཏེ་གནས་སོ། །དེའི་ཚེ་གཞན་ཡང་སྦུ་བ་རྒྱུས་པ་ཞེས་བྱ་བའི་རླུང་འབྱུང་སྟེ། རླུང་དེའི་དབང་གིས་ཚིགས་ཀྱི་ཡན་ལག་སུམ་བརྒྱ་ཉི་ཤུ་དང ། གནད་བརྒྱ་རྩ་གཅིག་ལུས་ལ་གནས་པར་འགྱུར་རོ། །ཞག་བདུན་ཕྲག་བཅུ་གསུམ་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། བཀྲེས་ཤིང་སྐོམ་པར་བྱེད་པ་ཞེས་བྱ་སྟེ། རླུང་དེའི་སྟོབས་ཀྱིས་མངལ་གྱི་ལུས་དེ་ཉམ་ཆུང་ཞིང་བཀྲེས་པ་དང ། སྐོམ་པའི་འདུ་ཤེས་སྐྱེད་པར་བྱེད་པས། དེའི་ཚེ་མས་ཟོས་ཤིང་འཐུངས་པའི་རོ་ཇི་སྙེད་པ་དག་ལུས་ཀྱི་གནད་དང ། ལྟེ་བའི་དཀྱིལ་འཁོར་ཡོངས་སུ་འཛིན་ཅིང་ཕན་འདོགས་པར་བྱེད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བུ་ནི་མ་མངལ་ 387b གནས་པ་ན། །མངལ་གནས་དེ་ལ་ཕན་འདོགས་པས། །དེས་ན་ལུས་སྲོག་རབ་གནས་ཤིང ། །རིམ་གྱིས་སྐྱེ་དང་འཕེལ་བར་བྱེད། །མས་ནི་ཟོས་ཤིང་འཐུངས་པ་དང ། མངལ་ན་གནས་ལ་ཕན་འདོགས་པས། །རིམ་གྱིས་སྐྱེ་དང་འཕེལ་བར་བྱེད། །ཞག་བདུན་ཕྲག་བཅུ་བཞི་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། སྐུད་པའི་སྒོ་ཞེས་བྱ་སྟེ། རླུང་དེའི་སྟོབས་ཀྱིས་རྩ་རྒྱུས་དགུ་བརྒྱ་བསྐྱེད་ནས་ལུས་ཀྱི་མདུན་དང ། རྒྱབ་དང ། གཡས་གཡོན་སྣོལ་མར་གཡོག་པར་བྱེད་དོ། །ཞག་བདུན་ཕྲག་བཅོ་ལྔ་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། པདྨ་ཞེས་བྱ་སྟེ། རླུང་དེའི་སྟོབས་ཀྱིས་རྩ་རྒྱུ་བ་ཉི་ཤུ་བསྐྱེད་ནས་བཟའ་བ་དང ། བཏུང་བའི་རོ་གང་ཡིན་པ་རྩ་འདི་བཞུགས་ནས་ལུས་ལ་ཕན་འདོགས་པར་བྱེད་དོ། །ཉི་ཤུ་གང་ཞེ་ན། ལུས་ཀྱི་མདུན་དང ། རྒྱབ་དང ། གཡས་གཡོན་རེ་རེ་ལ་ཡང་རྩ་ལྔ་ལྔ་ཡོད་དེ། རྩ་འདི་དག་རེ་རེ་ལ་ཡང་རྩ་ཕྲ་མོའི་ཡན་ལག་བཞི་བཅུ་བཞི་བཅུ་ཡོད་དོ། །རྩ་དེ་དག་རེ་རེ་ལ་ཡང་ཡན་ལག་བརྒྱ་བརྒྱ་ཡོད་དོ། །ལུས་ཀྱི་མདུན་ན་ཡོད་པ་ཉི་ཁྲི་ནི། ས་ག་ཞེས་བྱའོ། །ལུས་ཀྱི་རྒྱབ་ན་ཡོད་པ་ཉི་ཁྲི་ནི། སྟོབས་ཞེས་བྱའོ། །ལུས་ཀྱི་གཡོན་ཕྱོགས་ན་ཡོད་པ་ཉི་ཁྲི་ནི། བརྟན་པ་ཞེས་བྱའོ། །ལུས་ཀྱི་གཡས་ཕྱོགས་ན་ཡོད་པ་ཉི་ཁྲི་ནི། མཐུ་དང་ལྡན་པ་ཞེས་བྱ་སྟེ། དེ་ལྟར་ན་ 388a ༄#། །རྩའི་ཡན་ལག་ཆེ་ཕྲ་བརྒྱད་ཁྲི་ལུས་དེ་ལ་སྐྱེ་བར་འགྱུར་རོ། །རྩ་དེ་དག་ཀྱང་ཁ་དོག་རྣམ་པ་སྣ་ཚོགས་དང་ལྡན་ཏེ། འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། མར་དང ། ཞོ་དང ། འབྲུ་མར་གྱི་ཁ་དོག་གོ་།རྩ་བརྒྱད་ཁྲི་པོ་དེ་དག་རེ་རེ་ལ་ཡང་རྩ་བ་རེ་རེ་ཡོད་དེ། རྩ་བ་རེ་རེ་ལ་ཡང་བུ་ག་སྣ་ཚོགས་ཡོད་དེ། བུ་ག་གཅིག་དང ། བུ་ག་གཉིས་ནས་བུ་ག་བདུན་པའི་བར་དང་ལྡན་ཏེ། རེ་རེ་ཡང་སྤུའི་བུ་ག་དང་ཕན་ཚུན་འབྲེལ་ཏེ། དེ་ནི། དཔེར་ན། པདྨའི་རྩ་བ་ལ་བུ་ག་མང་པོ་ཡོད་པ་ཇི་ལྟ་བ་བཞིན་ནོ། །ཞག་བདུན་ཕྲག་བཅུ་དྲུག་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། བདུད་རྩི་ཞེས་བྱ་སྟེ། རླུང་དེའི་སྟོབས་ཀྱིས་དེའི་མིག་དང ། རྣ་བ་དང ། སྣ་དང ། ཁའི་སྒོ་དང ། མིད་པ་དང ། སྙིང་གི་སྙིང་པོའི་ཁོ་ར་ཁོར་ཡུག་གི་བུ་ག་དགུ་པོ་དེ་དག་རྣམ་པར་ཕྱེ་ནས་དབུགས་ཕྱི་ནང་དུ་རྒྱུ་བ་སྟེང་དང ། འོག་ཏུ་རྒྱུ་ཞིང་ཐོགས་པ་མེད་པ་དང ། བཟའ་བ་དང ། བཏུང་བ་ཟོས་ཤིང་འཐུངས་པ་གང་ཡིན་པ་དེ་དག་ཀྱང་ལུས་ལ་ཕན་འདོགས་ཤིང་བསགས་པའི་གནས་ཡོད་པ་དང ། ལེགས་པར་ཞུགས་ནས་འོག་གི་ཕྱོགས་སུ་འབྱུང་བར་བྱེད་དེ། འདི་ལྟ་སྟེ། དཔེར་ན། རྫ་མཁན་ནམ་རྫ་མཁན་གྱི་སློབ་མ་མཁས་པས་འཇིམ་པ་ལེགས་པར་སྦྱར་ཏེ་འཁོར་ལོའི་སྟེང་དུ་བཞག་ནས་འོག་དང ། སྟེང་དུ་བསྒྱུར་ཞིང་སྣོད་ཀྱི་ 388b རྣམ་པ་མངོན་པར་འདུས་བྱས་ནས་མངོན་པར་གྲུབ་པ་དེ་བཞིན་དུ་འདི་ཡང་རླུང་གི་སྟོབས་དང ། དགེ་བ་དང ། མི་དགེ་བའི་ལམ་གྱིས་མགོ་དང ། རྣ་བ་ལ་སོགས་པ་རིམ་གྱིས་ཡོངས་སུ་རྫོགས་པར་བྱེད་དོ། །ཞག་བདུན་ཕྲག་བཅུ་བདུན་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། འབྲི་གདོང་ཞེས་བྱ་སྟེ། རླུང་དེའི་སྟོབས་ཀྱིས་དེའི་མིག་གཉིས་ཀུན་ཏུ་དང་བ་དང ། རྣ་བ་དང ། སྣའི་དབང་པོ་ལ་སོགས་པ་ཡང་རིམ་གྱིས་ཡོངས་སུ་སྨིན་པར་བྱེད་དེ། འདི་ལྟ་སྟེ། དཔེར་ན། མེ་ལོང་གི་དཀྱིལ་འཁོར་རྡུལ་གྱིས་གཡོགས་པ་སའི་ཕྱེ་མ་དང ། འབྲུ་མར་དང ། ཐལ་བ་བླངས་ཏེ་བྱི་དོར་བྱས་ན། ཡོངས་སུ་གསལ་བར་འགྱུར་བ་དེ་བཞིན་དུ་ལས་ཀྱི་རླུང་གི་སྟོབས་ཀྱིས་མིག་ལ་སོགས་པ་བུས་ནས་མིག་ལ་སོགས་པ་ཀུན་ཏུ་དང་བར་བྱེད་པ་ཡང་དེ་བཞིན་དུ་རིག་པར་བྱའོ། །ཞག་བདུན་ཕྲག་བཅོ་བརྒྱད་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། བརྟན་པར་འགྱུར་བ་ཞེས་བྱ་སྟེ། རླུང་དེའི་སྟོབས་ཀྱིས་དེའི་དབང་པོ་རྣམས་མཐར་གྱིས་ཡོངས་སུ་སྨིན་ཅིང་གསལ་བ་དང ། མཐར་གྱིས་ཡོངས་སུ་དག་པར་བྱེད་དེ། འདི་ལྟ་སྟེ། དཔེར་ན། ཉི་མ་དང ། ཟླ་བའི་དཀྱིལ་འཁོར་སྤྲིན་དང ། ཁུག་རྣ་རྣམས་ཀྱིས་བསྒྲིབས་ཤིང་ཁེབས་པར་གྱུར་པ་གློ་བུར་དུ་རླུང་དྲག་པོ་ལངས་ཏེ་བུས་ནས་ཕྱོགས་བཞིར་གཏོར་བར་གྱུར་ན། ཉི་མ་དང ། ཟླ་བའི་དཀྱིལ་འཁོར་དེ་ 389a ༄#། །ཤིན་ཏུ་ཡོངས་སུ་གསལ་བར་འགྱུར་བ་དེ་བཞིན་དུ་འདི་ལྟར་ལས་ཀྱི་རླུང་གི་དབང་པོ་རྣམས་བུས་པས་ཆེས་ཤིན་ཏུ་གསལ་ཞིང་ཡོངས་སུ་དག་པར་བྱེད་པ་ཡང་དེ་བཞིན་དུ་རིག་པར་བྱའོ། །ཞག་བདུན་ཕྲག་བཅུ་དགུ་པ་ལ་མའི་མངལ་ན་གནས་པའི་ཚེ་ཡང་སྔ་མའི་རླུང་གི་སྟོབས་ཀྱིས་མིག་དང ། སྣ་བ་དང ། སྣ་དང ། ལྕེའི་དབང་པོ་བཞི་པོ་དག་ཡོངས་སུ་སྨིན་པར་བྱེད་དོ། །དང་པོ་མངལ་དུ་འཇུག་པའི་ཚེ་ནི། དབང་པོ་གསུམ་དང་ལྡན་ཏེ། ལུས་ཀྱི་དབང་པོ་དང ། སྲོག་གི་དབང་པོ་དང ། ཡིད་ཀྱི་དབང་པོ་སྟེ། དེ་ལྟར་དབང་པོ་རྣམས་ཡོངས་སུ་རྫོགས་པར་བྱེད་དོ། །ཞག་བདུན་ཕྲག་ཉི་ཤུ་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ཤིན་ཏུ་སྲ་བ་ཞེས་བྱ་སྟེ། རླུང་དེའི་སྟོབས་ཀྱིས་དེའི་ལུས་ལས་རུས་པ་སྣ་ཚོགས་སྐྱེད་པར་བྱེད་དེ། རྐང་པ་གཡོན་པ་ལ་བརྟེན་ཏེ་རུས་པ་ཉི་ཤུ་བསྐྱེད་དོ། །རྐང་པ་གཡས་པ་ལ་བརྟེན་ཏེ་རུས་པ་ཉི་ཤུ་བསྐྱེད་དོ། །གཞན་ཡང་རྐང་པའི་རྟིང་པའི་རུས་པ་བཞི་དང ། རྗེ་ངར་གྱི་རུས་པ་གཉིས་དང ། ལྷ་ངའི་རུས་པ་གཉིས་དང ། བརླའི་རུས་པ་གཉིས་དང ། རྐེད་པ་དང ། དཔྱིའི་རུས་པ་གསུམ་གསུམ་དང ། སྒལ་ཚིགས་ཀྱི་རུས་པ་བཅོ་བརྒྱད་དང ། རྩིབ་མའི་རུས་པ་ཉི་ཤུ་རྩ་བཞི་དང ། བྲང་གི་རུས་པ་སུམ་ཅུ་དང ། ལག་པ་གཡས་གཡོན་རེ་རེ་ལ་རུས་པ་ཉི་ཤུ་ཉི་ཤུ་དང ། ལག་ངར་གྱི་རུས་པ་བཞི་དང ། 389b དཔུང་པའི་རུས་པ་གཉིས་དང ། འགྲམ་པའི་རུས་པ་གཉིས་དང ། མགོའི་རུས་པ་བཞི་དང ། སོའི་རྩ་བའི་རུས་པ་སུམ་ཅུ་རྩ་གཉིས་ཀྱང་སྐྱེད་པར་བྱེད་དོ། །འདི་ལྟ་སྟེ། དཔེར་ན། གཟུགས་མཁན་ནམ་གཟུགས་མཁན་གྱི་སློབ་མ་མཁས་པས་སྔར་ཤིང་སྲ་བ་བླངས་ཏེ་ཕྱིས་སྲད་བུས་བཅིངས་ནས་གཟུགས་རྣམས་བྱས་པ་ལ་འཇིམ་པ་མ་བསྐུས་མོད་ཀྱི། འོན་ཀྱང་དེའི་ཚེ་རུས་པའི་མཚན་ཉིད་ཅེས་བརྗོད་པ་དེ་བཞིན་དུ་ལས་ཀྱི་རླུང་གི་སྟོབས་ཀྱིས་རུས་པ་རྣམས་བསྐྱེད་པའི་དུས་ཀྱི་ཚེ་ཡང་དེ་བཞིན་ཏེ། དེ་ལྟ་བས་ན་ཞག་བདུན་པོ་དེ་དག་ཏུ་རུས་པ་ཕྲ་མོ་མ་གཏོགས་པར་རུས་པ་ཆེན་པོ་སྐྱེ་བའི་གྲངས་ནི། ཉིས་བརྒྱ་ཡོད་པར་རིག་པར་བྱའོ། །ཞག་བདུན་ཕྲག་ཉི་ཤུ་གཅིག་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ཡང་དག་སྐྱེད་པ་ཞེས་བྱ་སྟེ། རླུང་དེའི་སྟོབས་ཀྱིས་མངལ་ན་གནས་པ་དེའི་ལུས་ཀྱི་ཤ་སྐྱེད་པར་བྱེད་དེ། འདི་ལྟ་སྟེ། དཔེར་ན། ཞལ་ཞལ་མཁན་ནམ་ཞལ་ཞལ་མཁན་གྱི་སློབ་མས་འཇིམ་པ་ལེགས་པར་སྦྱངས་ནས་རྩིག་པ་རྣམས་ལ་ཞལ་ཞལ་བྱེད་པ་དེ་བཞིན་དུ་ལས་ཀྱི་རླུང་གི་དབང་གིས་དེའི་ལུས་ཀྱི་ཤ་སྐྱེད་པ་ཡང་དེ་བཞིན་དུ་རིག་པར་བྱའོ། །ཞག་བདུན་ཕྲག་ཉི་ཤུ་གཉིས་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ཀུན་ཏུ་རྒྱལ་བ་ཞེས་བྱ་སྟེ། རླུང་དེའི་སྟོབས་ཀྱིས་དེའི་ལུས་ཀྱི་ཁྲག་སྐྱེད་པར་བྱེད་དོ། །ཞག་བདུན་ཕྲག་ཉི་ཤུ་ 390a ༄#། །གསུམ་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ཡོངས་སུ་དག་པར་འཛིན་པ་ཞེས་བྱ་སྟེ། རླུང་དེའི་སྟོབས་ཀྱིས་ལུས་ཀྱི་པགས་པ་སྐྱེད་པར་བྱེད་དོ། །ཞག་བདུན་ཕྲག་ཉི་ཤུ་བཞི་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། སྤྲིན་འཛིན་ཞེས་བྱ་སྟེ། རླུང་དེའི་སྟོབས་ཀྱིས་དེའི་ལུས་ཀྱི་ལག་པ་རྐྱོང་ཞིང་མདོག་དང་ལྡན་པར་བྱེད་དོ། །ཞག་བདུན་ཕྲག་ཉི་ཤུ་ལྔ་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། གྲོང་ཁྱེར་འཛིན་ཅེས་བྱ་སྟེ། རླུང་དེའི་སྟོབས་ཀྱིས་མངལ་ན་གནས་པ་དེའི་ལུས་ལ་ཤ་དང ། ཁྲག་འཕེལ་ཞིང་རིམ་གྱིས་རབ་ཏུ་དང་བར་བྱེད་དོ། །ཞག་བདུན་ཕྲག་ཉི་ཤུ་དྲུག་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། སྐྱེ་བ་མངོན་པར་གྲུབ་པ་ཞེས་བྱ་སྟེ། རླུང་དེའི་སྟོབས་ཀྱིས་དེའི་སྐྲ་དང ། སྤུ་དང ། སེན་མོ་རྣམས་བསྐྱེད་ནས་ཐམས་ཅད་རྩ་རྒྱུས་རྣམས་དང་འབྲེལ་པར་བྱེད་དོ། །ཞག་བདུན་ཕྲག་ཉི་ཤུ་བདུན་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། སྨན་ཡོན་ཆེན་པོ་ཞེས་བྱ་སྟེ། རླུང་དེའི་སྟོབས་ཀྱིས་དེའི་ལུས་ཀྱི་མཚན་མ་རྣམས་མཐར་གྱིས་མངོན་པར་གྲུབ་པར་བྱེད་དོ། །གང་ཚེ་རབས་སྔ་མ་ལ་སྡིག་པ་མི་དགེ་ 390b བའི་ལས་རྣམས་མངོན་པར་འདུས་བྱས་ཤིང་ཡོ་བྱད་རྣམས་ལ་སེར་སྣས་ཕངས་ཤིང་སྦྱིན་པ་གཏོང་བར་མི་བྱེད་པ་དང ། ཕ་མ་དང ། མཁན་པོ་དང ། བླ་མའི་གནས་རྣམས་ཀྱིས་རྗེས་སུ་བསྟན་པ་ཉན་པར་མི་བྱེད་པ་ཞིག་ཡིན་ན་ནི། ལས་དེའི་དབང་གིས་ཡིད་དུ་མི་འོང་བའི་གཟུགས་རྣམ་པ་སྣ་ཚོགས་ཐོབ་པར་འགྱུར་བས། གལ་ཏེ་ལུས་རིང་ཞིང་སྦོམ་པ་དང ། ཚོ་ཞིང་དཀར་བ་དང ། མཉེན་པ་གང་ཡིན་པ་དེས་མཛེས་པར་གྱུར་ན་ནི། ལུས་ཐུང་ཞིང་ཕྲ་བ་དང ། རིད་ཅིང་གནག་པ་དང ། རྩུབ་པ་དག་ཐོབ་པར་བྱེད་དོ། །གལ་ཏེ་ལུས་ཐུང་ཞིང་ཕྲ་བ་དང ། རིད་ཅིང་གནག་པ་དང ། རྩུབ་པ་གང་ཡིན་པ་དེས་མཛེས་པར་གྱུར་ན་ནི། ལུས་རིང་ཞིང་སྦོམ་པ་དང ། ཚོ་ཞིང་དཀར་བ་དང ། ཤིན་ཏུ་མཉེན་པ་དག་ཐོབ་པར་བྱེད་དོ། །གལ་ཏེ་ལུས་ཀྱི་ཡན་ལག་མཐོ་བ་དང ། དམའ་བ་དང ། མང་བ་དང ། ཉུང་བ་དང ། ཐགས་བཟང་བ་དང ། ཐགས་ངན་པས་མཛེས་པར་གྱུར་ན་ནི། མཐོ་བ་དང ། དམའ་བ་དང ། མང་བ་དང ། ཉུང་བ་དང ། ཐགས་བཟང་བ་དང ། ཐགས་ངན་པ་དང ། མི་ལྡན་པའི་ལུས་ཡང་དག་པར་ལེན་པར་བྱེད་དོ། །གཞན་ཡང་འོན་པ་དང ། ལོང་པ་དང ། ལྐུགས་པ་དང ། རྐང་ལག་འཕྱེ་ཞིང་འགྲོ་བ་དང ། དབང་པོ་རྣམས་མ་ཚང་བ་དང ། ཚིག་སྨྲས་པ་གཞན་གྱིས་ཉན་པར་མི་འདོད་པ་དང ། ལུས་མི་སྡུག་ཅིང་ཡི་དྭགས་དང་འདྲ་བ་ཡང་ཡང་དག་པར་ལེན་པར་འགྱུར་ཏེ། སྡིག་པ་མི་དགེ་བའི་ལས་ཀྱི་དབང་ 391a ༄#། །གིས་ཡིད་དུ་མི་འོང་བའི་ལུས་རྣམ་པ་སྣ་ཚོགས་ལེན་པར་འགྱུར་བས། ཕ་མ་དང་ཉེ་བཤེས་རྣམས་ཀྱིས་ཀྱང་མཐོང་བར་མི་འདོད་ན། གཞན་ལྟ་སྨོས་ཀྱང་ཅི་དགོས། གལ་ཏེ་ཚེ་རབས་སྔ་མ་ལ་དགེ་བ་བཅུའི་ལས་མངོན་པར་འདུས་བྱས་ཤིང་སྦྱིན་པ་ལེགས་པར་བཏང་བ་དང ། སེར་སྣ་དང ། གཡོ་སྒྱུའི་བསམ་པ་མེད་པ་དང ། ཕ་མ་དང ། མཁན་པོ་དང ། བླ་མའི་གནས་རྣམས་ཀྱིས་རྗེས་སུ་བསྟན་པ་དག་ལ་མངོན་པར་ཡིད་ཆེས་ཤིང་ཡང་དག་པར་བླངས་པ་ཞིག་ཡིན་ན་ནི། རྒྱུ་དང ། རྐྱེན་དེས་གལ་ཏེ་མིའི་ལུས་ཐོབ་པར་གྱུར་ན་ཡང་གོང་དུ་བསྟན་པ་ལྟ་བུའི་སྡིག་པ་མི་དགེ་བའི་ལས་ལས་མངོན་པར་གྲུབ་པའི་ལུས་ལེན་པར་མི་འགྱུར་ཞིང་གྱ་ནོམ་སྣ་ཚོགས་དང་ལྡན་པའི་ལུས་ཐོབ་པར་འགྱུར་བས། བྱད་བཞིན་མཛེས་པ་དང ། མཚན་རྣམས་དང་ལྡན་ཞིང་ཚིག་སྨྲས་པ་རྣམས་མང་པོ་ཀུན་གྱིས་མཉན་པར་འདོད་པའི་འོས་སུ་འགྱུར་ཏེ། དེ་ལྟ་བས་ན། དགེ་བའི་ལས་ཀྱི་དབང་གིས་ཁྱད་པར་དུ་འཕགས་པའི་འབྲས་བུ་རྣམ་པར་སྨིན་པ་དེ་ལྟ་བུ་ཐོབ་པར་འགྱུར་བར་རིག་པར་བྱའོ། །དགའ་བོ། དེ་ལྟ་བུའི་ལུས་དེ་ཡང་གལ་ཏེ་ཕོ་ཡིན་ན་ནི། མའི་མངལ་ན་གཡས་ཕྱོགས་སུ་ཙོག་པུར་འདུག་ལ། ལག་པ་གཉིས་ཀྱིས་གདོང་གཡོགས་ནས་མའི་སྒལ་ཚིགས་ལོགས་སུ་བལྟས་ཏེ་འདུག་གོ་།གལ་ཏེ་མོ་ཡིན་ན་ནི། རྩིབ་ལོགས་གཡོན་ཕྱོགས་སུ་ 391b ཙོག་པུར་འདུག་གོ་།ལག་པ་གཉིས་ཀྱིས་གདོང་གཡོགས་ཏེ་མའི་ལྟོ་བ་ལ་ཁ་བལྟས་ནས་མ་ཞུ་བའི་གནས་ཀྱི་ནི། འོག། ཞུ་བའི་གནས་ཀྱི་ནི། སྟེང་ན་ནང་དུ་བཙོས། རབ་ཏུ་བཙོས་ཤིང་གནས་ལྔ་ཀུན་ཏུ་བཅིངས་པས་འདི་ལྟ་སྟེ། དཔེར་ན། རྩཝའི་རྐྱལ་བའི་ནང་ན་འདུག་པ་དང་འདྲའོ། །གལ་ཏེ་དེའི་མས་ཤིན་ཏུ་མང་དུ་ཟོས་སམ། ཤིན་ཏུ་ཉུང་དུ་ཟོས་སམ། གལ་ཏེ་ཟས་ཤིན་ཏུ་མངར་བའམ། ཤིན་ཏུ་རྩུབ་པའམ། ཤིན་ཏུ་བསྐ་བའམ། ཤིན་ཏུ་སྣུམ་པའམ། ཤིན་ཏུ་ལན་ཚཝ་བྲོ་བའམ། ཤིན་ཏུ་ཁ་བའམ། ཤིན་ཏུ་སྐྱུར་བའམ། ཤིན་ཏུ་གྲང་བའམ། ཤིན་ཏུ་ཚ་བ་དག་ཟོས་པར་གྱུར་ཏམ། གཞན་ཡང་འདོད་ཆགས་སྤྱད་པར་གྱུར་ཏམ། དྲག་ཏུ་སོང་ངམ། མཆོང་བ་བྱས་སམ། ཡུན་རིང་དུ་ཉལ་ལམ། ཡུན་རིང་དུ་འདུག་པར་གྱུར་ན་ཡང་མངལ་ན་གནས་པ་དེ་སྡུག་བསྔལ་མྱོང་བར་འགྱུར་ཏེ། དེ་ལྟ་བས་ན། མའི་མངལ་ན་གནས་པའི་ཚེ་སྡུག་བསྔལ་མང་པོ་དག་གིས་རབ་ཏུ་གཟིར་བར་རིག་པར་བྱའོ། ངས་མིར་གྱུར་པའི་སྡུག་བསྔལ་མདོ་ཙམ་དུ་བསྟན་པ་ཡང་དེ་འདྲ་ན། སེམས་ཅན་དམྱལ་བ་རྣམས་ཀྱི་སྡུག་བསྔལ་དཔེ་བྱར་དཀའ་བ་ལྟ་སྨོས་ཀྱང་ཅི་དགོས་ཏེ། མཁས་པ་སུ་ཞིག་འཁོར་བའི་རྒྱ་མཚོར་ལུས་འདི་ལྟ་བུ་ལ་རབ་ཏུ་མོས་པར་བྱེད། ཞག་བདུན་ཕྲག་ཉི་ཤུ་བརྒྱད་པ་ལ་མའི་མངལ་ན་གནས་པའི་ཚེ་ཕྱིན་ཅི་ལོག་གི་འདུ་ཤེས་རྣམ་པ་བརྒྱད་འབྱུང་བར་འགྱུར་ཏེ། 392a ༄#། །བརྒྱད་གང་ཞེ་ན། བཞོན་པའི་འདུ་ཤེས་དང ། ཁང་བུ་བརྩེགས་པའི་འདུ་ཤེས་དང ། ཁྲི་སྟན་གྱི་འདུ་ཤེས་དང ། ཆུ་མིག་གི་འདུ་ཤེས་དང ། རྫིང་གི་འདུ་ཤེས་དང ། ཆུ་བོའི་འདུ་ཤེས་དང ། ཀུན་དགའ་ར་བའི་འདུ་ཤེས་དང ། སྐྱེད་མོས་ཚལ་གྱི་འདུ་ཤེས་ཏེ། འདི་ནི། འདུ་ཤེས་རྣམ་པ་བརྒྱད་ཅེས་བྱའོ། །ཞག་བདུན་ཕྲག་ཉི་ཤུ་དགུ་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། མེ་ཏོག་ཕྲེང་བ་ཞེས་བྱ་སྟེ། རླུང་དེའི་སྟོབས་ཀྱིས་མངལ་ན་གནས་པ་དེའི་ལུས་ཀྱི་པགས་པའི་མདོག་ཀུན་ཏུ་བཟང་ཞིང་མཚན་མ་རྣམས་རབ་ཏུ་གསལ་བར་བྱེད་དེ། ཐམས་ཅད་ཀྱང་འདས་པའི་དུས་སུ་ལས་རྣམས་མངོན་པར་འདུས་བྱས་པའི་བྱེ་བྲག་མི་མཚུངས་པས་རྣམ་པ་ཇི་ལྟ་བ་བཞིན་དུ་ཁ་དོག་རྣམ་པ་སྣ་ཚོགས་དང་ལྡན་པར་འགྱུར་བས། ཁ་ཅིག་ནི། ཁ་དོག་དཀར་པོར་འགྱུར། ཁ་ཅིག་ནི། ཁ་དོག་ནག་པོར་འགྱུར། ཁ་ཅིག་ནི། ཁ་དོག་དཀར་བ་ཡང་མ་ཡིན། ནག་པ་ཡང་མ་ཡིན་པར་འགྱུར། ཁ་ཅིག་ནི། ཁ་དོག་སྔོན་པར་འགྱུར། ཁ་ཅིག་ནི། ཁ་དོག་རྩུབ་ཅིང་སྐམ་པར་འགྱུར། ཁ་ཅིག་ནི། ཁ་དོག་སྣུམ་པར་འགྱུར་ཏེ། འདི་ལྟ་བུའི་ཁ་དོག་གི་མཚན་ཉིད་དང་ལྡན་པར་འགྱུར་རོ། །ཞག་བདུན་ཕྲག་སུམ་ཅུ་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་ 392b པར་གྲུབ་པ་གང་ཡིན་པ་དེ་ནི། ལྕགས་ཀྱི་སྒོ་ཞེས་བྱ་སྟེ། རླུང་དེའི་སྟོབས་ཀྱིས་དེའི་སྐྲ་དང ། སྤུ་དང ། སེན་མོ་རྣམས་རབ་ཏུ་བསྐྱེད་པ་དང ། ཁ་དོག་དཀར་ནག་རྣམས་རབ་ཏུ་གསལ་བྱར་བྱེད་དེ། ལས་ཀྱི་རྐྱེན་གྱིས་མཚན་མ་འདི་དང་འདི་དག་འབྱུང་བར་འགྱུར་རོ། །ཞག་བདུན་ཕྲག་སུམ་ཅུ་གཅིག་པ་ནས་ཞག་བདུན་ཕྲག་སུམ་ཅུ་ལྔ་པའི་བར་དུ་མའི་མངལ་ན་གནས་པའི་ཚེ་ནི། ལུས་ཀྱི་མཚན་མ་རྣམས་ཆེར་སྐྱེ་བར་འགྱུར་བས། མཐར་གྱིས་ལུས་ཀྱི་ཡན་ལག་ཕུན་སུམ་ཚོགས་ཤིང་ཡངས་པར་འགྱུར་རོ། །ཞག་བདུན་ཕྲག་སུམ་ཅུ་དྲུག་པ་ལ་མའི་མངལ་ན་གནས་པའི་ཚེ་ནི། དེ་འབྱུང་བའི་བསམ་པ་སྐྱེ་བས་མངོན་པར་མི་དགའ་བར་འགྱུར་རོ། །ཞག་བདུན་ཕྲག་སུམ་ཅུ་བདུན་པ་ལ་མའི་མངལ་ན་གནས་པའི་ཚེ་ནི། ཕྱིན་ཅི་ལོག་ཏུ་མ་གྱུར་པའི་འདུ་ཤེས་རྣམ་པ་ལྔ་འབྱུང་བར་འགྱུར་རོ། །ལྔ་གང་ཞེ་ན། མི་གཙང་བའི་འདུ་ཤེས་དང ། དྲི་མི་ཞིམ་པའི་འདུ་ཤེས་དང ། བཙོན་རའི་འདུ་ཤེས་དང ། མུན་ནག་གི་འདུ་ཤེས་དང ། ཡོངས་སུ་སྐྱོ་ནས་ཕྱིར་འབྱུང་བའི་འདུ་ཤེས་སྐྱེ་བ་གང་ཡིན་པ་སྟེ། མངལ་ན་གནས་པ་དེ་ཡོངས་སུ་སྐྱོ་བའི་བསམ་པ་དེ་ལྟ་བུ་དག་སྐྱེ་བར་འགྱུར་རོ། །ཞག་བདུན་ཕྲག་སུམ་ཅུ་བརྒྱད་པ་ལ་མའི་མངལ་ན་གནས་པའི་ཚེ་ཡང་ལས་ཀྱི་རླུང་མངོན་པར་གྲུབ་པ་གང་ཡིན་པ་དེ་ནི། ཐོགས་པའི་རྐྱེན་ཅེས་བྱ་སྟེ། རླུང་དེའི་སྟོབས་ཀྱིས་དེ་རབ་ཏུ་བསྒྱུར་བར་བྱེད་ 393a ༄#། །དོ། །གཞན་ཡང་ཁ་ཐུར་དུ་ལྟ་བ་ཞེས་བྱ་བའི་རླུང་འབྱུང་སྟེ། དེའི་མགོ་ཐུར་དུ་ལྟ་ཞིང་ལག་པ་གཉིས་བརྐྱང་སྟེ་མཐར་གྱིས་འབྱུང་བར་འདོད་པར་འགྱུར་རོ། །མངལ་ན་གནས་པ་དེ་གལ་ཏེ་ཚེ་རབས་སྔ་མ་ལ་མངལ་དུ་འཆི་བར་འགྱུར་བའི་ལས་བསགས་པ་ཞིག་ཡིན་ན་ནི། དེའི་ལག་པ་དང ། རྐང་པ་སྣོལ་མར་གྱུར་ནས་བསྒྱུར་མི་ནུས་པས། སྡིག་པ་མི་དགེ་བའི་ལས་ཀྱི་རྐྱེན་གྱིས་མའི་མངལ་ཉིད་དུ་འཆི་བའི་དུས་བྱེད་པར་འགྱུར་ཏེ། དེའི་མ་ཡང་དེའི་ཚེ་སྡུག་བསྔལ་ཆེན་པོ་མྱོང་བའམ། ཡང་ན་འཆི་བའི་དུས་བྱེད་པར་འགྱུར་རོ། །གལ་ཏེ་ཚེ་རབས་སྔ་མ་ལ་དགེ་བའི་ལས་རྣམས་མངོན་པར་འདུས་བྱས་ཤིང་ཚེ་རིང་པོར་འགྱུར་བའི་རྒྱུ་བསགས་པ་ཞིག་ཡིན་ན་ནི། བཙས་སུ་ཉེ་བའི་ཚེ་མ་དང ། བུ་གཉིས་ཀ་རབ་ཏུ་བདེ་ཞིང ། སྡིག་པ་མི་དགེ་བའི་ལས་ཀྱི་སྡུག་བསྔལ་གོང་མ་ལྟ་བུ་མེད་དོ། །ཞག་བདུན་ཕྲག་སུམ་ཅུ་རྩ་བརྒྱད་འདས་ནས་མངལ་ནས་འབྱུང་བར་འདོད་པའི་ཚེ་སྡུག་བསྔལ་སྣ་ཚོགས་མྱོང་ནས་གདོད་འབྱུང་བར་འགྱུར་བ་དེའི་ཕྱིར་ལུས་འདི་ལྟ་བུ་ལེན་པ་འདི་ནི། ཡང་དག་པར་སྡུག་བསྔལ་ཆེན་པོ་ཡིན་པར་རིག་པར་བྱའོ། །དང་པོ་མངལ་ནས་འབྱུང་བའི་ཚེ་ཁྱེའུའམ་བུ་མོ་ཡང་རུང་སྟེ། ས་ལ་ལྷུང་མ་ཐག་ཏུ་ལག་པས་བཟུང་ངམ། གོས་ཀྱིས་བླངས་སམ། ཁྲི་ལ་བཞག་ 393b གམ། ཁང་པའི་ནང་དུ་བཞག་གམ། ས་ལ་བཞག་གམ། བླ་གབ་མེད་པར་བཞག་གམ། ཉི་མ་ལ་བཞག་གམ། དགུན་ནམ་དབྱར་གྱི་དུས་གྲང་བ་དང ། ཚ་བའི་རླུང་གིས་བཙས་མ་ཐག་པའི་ལུས་དེ་ལ་རེག་པར་གྱུར་ན་ཡང་སྡུག་བསྔལ་ཆེན་པོ་མྱོང་བར་འགྱུར་ཏེ། འདི་ལྟ་སྟེ། དཔེར་ན། བ་ལང་གསོན་པོར་བཤུས་རྩིག་པ་ལ་རེག་གམ། བླ་གབ་མེད་པའི་ཐང་ལ་ལྷུང་བར་གྱུར་ན། སྲོག་ཆགས་དག་གིས་ཟ་བར་འགྱུར་བའམ། གཞན་ཡང་འདི་ལྟ་སྟེ། དཔེར་ན། མི་ཞིག་ལ་སྦྲང་བུ་མཆུ་རིང་རྣམས་ཀྱིས་ཟ་བ་ལ་ཡང་ལྕག་གིས་བཞུས་པ་དེ་བཞིན་དུ་དང་པོ་མངལ་ནས་འབྱུང་བའི་ཚེ་ཆུ་དྲོན་པོ་དག་གིས་ལུས་དཀྲུས་པས་རེག་པའི་སྡུག་བསྔལ་མྱོང་བ་ཡང་དེ་དང་འདྲའོ། །བཙས་ནས་མཐར་གྱིས་ཆེར་འགྱུར་བ་དང ། མའི་ལུས་ལས་ཁྲག་དང་འདྲེས་པའི་ནུ་ཞོ་བྱུང་ནས་གསོ་བར་བྱེད་དེ། ངས་སྔར་མདོ་སྡེ་གཞན་དག་ལས་རྒྱ་ཆེར་བསྟན་པ་ཡིན་ནོ། །དེ་ལྟ་བས་ན། ལུས་འདི་ནི། མི་གཙང་བ་དང ། སྡུག་བསྔལ་མང་པོ་ལས་མངོན་པར་གྲུབ་པ་ཡིན་པས་མཁས་པ་སུ་ཞིག་འཁོར་བ་ན་འདི་འདྲ་བའི་ལུས་ལ་རྗེས་སུ་ཆགས་པར་བྱེད། གཞན་ཡང་དགའ་བོ། །དང་པོ་མངལ་ནས་བྱུང་ནས་ཞག་བདུན་ལོན་པ་དང ། སྲོག་ཆགས་སྲིན་བུའི་རིགས་སྟོང་ཕྲག་བརྒྱད་ཅུ་ལུས་ལས་སྐྱེས་ནས་དེ་ལས་ཟ་བར་བྱེད་དོ། །དེ་ལ་སྐྲ་ལ་ཟ་བ་ཞེས་ 394a ༄#། །བྱ་བའི་སྲིན་བུའི་རིགས་གཉིས་ཡོད་དེ། སྐྲ་ལ་གནས་ནས་སྐྲ་ལ་ཟ་བར་བྱེད་དོ། །སྲིན་བུའི་རིགས་གཉིས་ནི། མིག་ལ་གནས་ནས་མིག་ལ་ཟ་བར་བྱེད་དོ། ། སྲིན་བུའི་རིགས་བ་ཧ་ན་དང ། རྐན་ལྡན་དང ། ནད་རློང་དང ། ཡོངས་སུ་རྫོགས་པ་ཞེས་བྱ་བ་བཞི་ཡོད་དེ། ཀླད་པ་ལ་གནས་ནས་ཀླད་པ་ལ་ཟ་བར་བྱེད་དོ། །སྲིན་བུའི་རིགས་སཱ་ལུ་ནག་པོའི་ལོ་མ་ཞེས་བྱ་བ་ཞིག་ཡོད་དེ། རྣ་བ་ལ་གནས་ནས་རྣ་བ་ལ་ཟ་བར་བྱེད་དོ། །སྲིན་བུའི་རིགས་མཛོད་སྒོ་ཞེས་བྱ་བ་ཞིག་ཡོད་དེ། སྣ་ལ་གནས་ནས་སྣ་ལ་ཟ་བར་བྱེད་དོ། །སྲིན་བུའི་རིགས་འཕེན་པ་དང ། ཀུན་ཏུ་འཕེན་པ་ཞེས་བྱ་བ་གཉིས་ཡོད་དེ། མཆུ་ལ་གནས་ནས་མཆུ་ལ་ཟ་བར་བྱེད་དོ། །སྲིན་བུའི་རིག་ཁབ་མཆུ་ཞེས་བྱ་བ་ཞིག་ཡོད་དེ། ལྕེ་ལ་གནས་ནས་ལྕེ་ལ་ཟ་བར་བྱེད་དོ། །སྲིན་བུའི་རིགས་ཁ་རྣོ་ཞེས་བྱ་བ་ཞིག་ཡོད་དེ། ལྕེའི་དྲུང་ལ་གནས་ནས་ལྕེའི་དྲུང་ལ་ཟ་བར་བྱེད་དོ། །སྲིན་བུའི་རིགས་ལག་རྫོགས་ཞེས་བྱ་བ་ཞིག་ཡོད་དེ། རྐན་ལ་གནས་ནས་རྐན་ལ་ཟ་བར་བྱེད་དོ། །སྲིན་བུའི་རིགས་ལག་པ་དྲ་བ་ཅན་དང ། ཕྱེང་གྱུར་ཞེས་བྱ་བ་གཉིས་ཡོད་དེ། ལག་མཐིལ་ལ་གནས་ནས་ལག་མཐིལ་ལ་ཟ་བར་བྱེད་དོ། །སྲིན་བུའི་རིགས་དཔུང་བ་དང ། ཉེ་བའི་དཔུང་བ་ཞེས་བྱ་བ་གཉིས་ཡོད་དེ། དཔུང་པ་ལ་གནས་ནས་དཔུང་པ་ལ་ཟ་བར་བྱེད་དོ། །སྲིན་བུའི་རིགས་ལྕགས་ཅན་དང ། ཉེ་བའི་ལྕགས་ཅན་ཞེས་བྱ་བ་གཉིས་ 394b ཡོད་དེ། མིད་པ་ལ་གནས་ནས་མིད་པ་ལ་ཟ་བར་བྱེད་དོ། །སྲིན་བུའི་རིགས་རྡོ་རྗེ་དང ། རྡོ་རྗེ་ཆེན་པོ་ཞེས་བྱ་བ་གཉིས་ཡོད་དེ། སྙིང་ལ་གནས་ནས་སྙིང་ལ་ཟ་བར་བྱེད་དོ། །སྲིན་བུའི་རིགས་དམན་པ་དང ། དམན་པའི་ཞེས་བྱ་བ་གཉིས་ཡོད་དེ། ཤ་ལ་གནས་ནས་ཤ་ལ་ཟ་བར་བྱེད་དོ། །སྲིན་བུའི་རིགས་ཁ་དོག་ལྡན་དང ། གྲགས་ལྡན་ཞེས་བྱ་བ་གཉིས་ཡོད་དེ། ཁྲག་ལ་གནས་ནས་ཁྲག་ལ་འཐུང་བར་བྱེད་དོ། །སྲིན་བུའི་རིགས་དཔའ་བོ་དང ། དྲི་གཏོང་ཞེས་བྱ་བ་གཉིས་ཡོད་དེ། ཆུ་བ་ལ་གནས་ནས་ཆུ་བ་ལ་ཟ་བར་བྱེད་དོ། །སྲིན་བུའི་རིགས་མི་མཐོ་བ་དང ། ཁས་རྡུབ་\་RཎGཱུB?\་ཅེས་བྱ་བ་གཉིས་ཡོད་དེ། རྒྱབ་ཀྱི་སྒལ་ཚིགས་ལ་གནས་ནས་རྒྱབ་ཀྱི་སྒལ་ཚིགས་ལ་ཟ་བར་བྱེད་དོ། །སྲིན་བུའི་རིགས་ཚིལ་གྱི་ཁ་དོག་ཅེས་བྱ་བ་ཞིག་ཡོད་དེ། ཚིལ་ལ་གནས་ནས་ཚིལ་ལ་ཟ་བར་བྱེད་དོ། །སྲིན་བུའི་རིགས་མཁྲིས་པའི་ཁ་དོག་ཅེས་བྱ་བ་ཞིག་ཡོད་དེ། མཁྲིས་པ་ལ་གནས་ནས་མཁྲིས་པ་ལ་ཟ་བར་བྱེད་དོ། །སྲིན་བུའི་རིགས་མུ་ཏིག་ཅེས་བྱ་བ་ཞིག་ཡོད་དེ། མཆིན་པ་ལ་གནས་ནས་མཆིན་པ་ལ་ཟ་བར་བྱེད་དོ། །སྲིན་བུའི་རིགས་འདམ་བུ་ཞེས་བྱ་བ་ཞིག་ཡོད་དེ། མཚེར་བ་ལ་གནས་ནས་མཚེར་བ་ལ་ཟ་བར་བྱེད་དོ། །སྲིན་བུའི་རིགས་ལྔ་བརྒྱ་ཡོད་དེ། རིགས་བརྒྱ་ནི། ཟླ་བ་ཞེས་བྱའོ། །རིགས་བརྒྱ་ནི། ཟླ་བའི་ཁ་ཞེས་བྱའོ། །རིགས་བརྒྱ་ནི། བསིལ་བྱེད་ཅེས་བྱའོ། །རིགས་བརྒྱ་ནི། བསིལ་བྱེད་གཏོང་ཞེས་བྱའོ། །རིགས་བརྒྱ་ནི། ཡངས་ 395a ༄#། །པ་ཞེས་བྱ་སྟེ། རྩིབ་ལོགས་གཡོན་པ་ལ་གནས་ནས་རྩིབ་ལོགས་གཡོན་པ་ལ་ཟ་བར་བྱེད་དོ། །གཞན་ཡང་སྲིན་བུའི་རིགས་ལྔ་བརྒྱ་ཡོད་པ་ཡང་མིང་གོང་མ་དང་མཐུན་ཏེ། རྩིབ་ལོགས་གཡས་པ་ལ་གནས་ནས་རྩིབ་ལོགས་གཡས་པ་ལ་ཟ་བར་བྱེད་དོ། །སྲིན་བུའི་རིགས་ཅུང་ཟད་འབིགས་པ་དང ། ཆེར་འབིགས་པ་དང ། རུས་པ་འབིགས་པ་དང ། རུས་པའི་གདོང་ཞེས་བྱ་བ་བཞི་ཡོད་དེ། རུས་པ་ལ་གནས་ནས་རུས་པ་ལ་ཟ་བར་བྱེད་དོ། །སྲིན་བུའི་རིགས་ཚོར་དཀར་བ་དང ། ཅུང་ཟད་དཀར་བ་དང ། སྣོམ་པའི་སྟོབས་དང ། སྟག་ལམ་ཞེས་བྱ་བ་བཞི་ཡོད་དེ། རྩ་རྒྱུས་ལ་གནས་ནས་རྩ་རྒྱུས་ལ་ཟ་བར་བྱེད་དོ། །སྲིན་བུའི་རིགས་མོས་པའི་ཡིད་དང ། སེངྒེའི་སྟོབས་དང ། རི་བོང་ལྟོ་དང ། འདོད་པ་ལ་མངོན་པར་ཞེན་པ་ཞེས་བྱ་བ་བཞི་ཡོད་དེ། མ་ཞུ་བའི་གནས་ལ་གནས་ནས་མ་ཞུ་བའི་གནས་ལ་ཟ་བར་བྱེད་དོ། །སྲིན་བུའི་རིགས་དཔའ་བོ་དང ། དཔའ་བོའི་བདག་པོ་ཞེས་བྱ་བ་གཉིས་ཡོད་དེ། ཞུ་བའི་གནས་ལ་གནས་ནས་ཞུ་བའི་གནས་ལ་ཟ་བར་བྱེད་དོ། །སྲིན་བུའི་རིགས་མུ་ཀ་དང ། དྲ་བ་ཁ་དང ། ཕུང་པོའི་ཁ་དང ། བྱེའུ་ཁ་ཞེས་བྱ་བ་བཞི་ཡོད་དེ།་གཅི་བའི་ལམ་ལ་གནས་ནས་གཅི་བའི་ལམ་ལ་ཟ་བར་བྱེད་དོ། །སྲིན་བུའི་རིགས་བྱེད་པ་དང ། བྱེད་པ་ཆེན་པོ་དང ། ཕྱེ་མ་དང ། པོ་ཏར་ཀ་ཞེས་བྱ་བ་བཞི་ཡོད་དེ། བཤང་བའི་ 395b ལམ་ལ་གནས་ནས་བཤང་བའི་ལམ་ལ་ཟ་བར་བྱེད་དོ། །སྲིན་བུའི་རིགས་གདོང་ནག་དང ། འཇིགས་སུ་རུང་བའི་གདོང་ཞེས་བྱ་བ་གཉིས་ཡོད་དེ། བརླ་ལ་གནས་ནས་བརླ་ལ་ཟ་བར་བྱེད་དོ། ། སྲིན་བུའི་རིགས་མཛེ་ཅན་དང ། མཛེ་ཅན་ཆུང་དུ་ཞེས་བྱ་བ་གཉིས་ཡོད་དེ། པུས་མོ་ལ་གནས་ནས་པུས་མོ་ལ་ཟ་བར་བྱེད་དོ། །སྲིན་བུའི་རིགས་མྱོས་པའི་རྩ་བ་ཞེས་བྱ་བ་ཞིག་ཡོད་དེ། བྱིན་པ་ལ་གནས་ནས་བྱིན་པ་ལ་ཟ་བར་བྱེད་དོ། །སྲིན་བུའི་རིགས་མགོན་ཅེས་བྱ་བ་ཞིག་ཡོད་དེ། རྐང་པ་ལ་གནས་ནས་རྐང་པ་ལ་ཟ་བར་བྱེད་དོ། །དགའ་བོ། ངས་དེང་ཁྱོད་ལ་སྲིན་བུའི་རིགས་སྟོང་ཕྲག་བརྒྱད་ཅུ་ལུས་འདི་ལ་གནས་ནས་ཉིན་མཚན་དུ་ཟ་བར་བྱེད་པས་ཉམས་སྟོབས་ཆུང་ཞིང་མདོག་ངན་པར་བྱེད་པ་དང ། ནད་ཀྱི་སྡུག་བསྔལ་རྣམ་པ་སྣ་ཚོགས་ལུས་འདི་ལ་འདུས་ནས་གཞན་ཡང་དེའི་སེམས་གདུང་བ་དང ། རབ་ཏུ་གདུང་བ་དང ། ཡོངས་སུ་གདུང་བར་བྱེད་པས་སྨན་པ་མཁས་པ་ཡོད་ཀྱང་དེ་ལ་རྨོངས་ནས་སྨན་གང་གིས་ནད་འདི་དག་གསོ་བར་ནུས་པ་ཤེས་པར་མི་འགྱུར་བ་མདོར་བསྟན་པ་ཡིན་ཏེ། མཁས་པ་སུ་ཞིག་འཁོར་བའི་རྒྱ་མཚོར་འདི་འདྲ་བའི་ལུས་ལ་རྗེས་སུ་ཆགས་པར་བྱེད། གཞན་ཡང་དགའ་བོ། དང་པོ་བཙས་ནས་ཆེར་སྐྱེ་བར་གྱུར་པའི་བར་དུ་གོས་དང ། ཟས་ཀྱིས་གསོས་ནས་ལུས་འདི་མངོན་པར་གྲུབ་པར་འགྱུར་ཀྱང་དེའི་ཚེའི་ཚད་ལོ་བརྒྱ་ཐུབ་པ་ཡང་ཡོད་དེ། དེ་བས་ཐུང་བ་ཡང་ཡོད་དོ། །ལོ་བརྒྱ་པོ་དེ་ཡང་དུས་གསུམ་ 396a ༄#། །དུ་འགྱུར་རོ། །འདི་ལྟ་སྟེ། དཔྱིད་དང ། དབྱར་དང ། དགུན་གྱི་དུས་གང་ཡིན་པའོ། །དེ་ལས་དཔྱིད་གང་ཡིན་པ་དེ་ནི། ཚ་བའི་དུས་སོ། །དབྱར་གང་ཡིན་པ་དེ་ནི། ཆར་འབབ་པའི་དུས་སོ། །དགུན་གང་ཡིན་པ་དེ་ནི། གྲང་བའི་དུས་སོ། །དུས་གསུམ་པོ་དེ་དག་རེ་རེ་ལ་ཡང་ཟླ་བ་བཞི་བཞི་ཡོད་པས་ལོ་གཅིག་ལ་ཟླ་བ་བཅུ་གཉིས་ཡོད་པར་འགྱུར་ལ། ལོ་བརྒྱ་ལ་ནི། ཟླ་བ་སྟོང་ཉིས་བརྒྱ་ཡོད་པར་འགྱུར་པས། ཟླ་བ་ཡར་གྱི་ངོ་དཀར་པོ་དང ། ཟླ་བ་མར་གྱི་ངོ་ནག་པོས་ཕྱེ་ན་ནི། ཉིས་སྟོང་བཞི་བརྒྱར་འགྱུར་ཏེ། དེ་ལ་ཉིན་མཚན་ནི། སྟོང་ཕྲག་གསུམ་ཅུ་རྩ་དྲུག་ཡོད་དོ། །ཉིན་གཅིག་ལ་ལན་གཉིས་སུ་ཟ་བས་ཟས་ནི། ལན་སྟོང་ཕྲག་བདུན་ཅུ་རྩ་གཉིས་ཟ་བར་འགྱུར་ཏེ། རེས་འགའ་ནི། མི་ཟ་བ་ཡང་གྲངས་དེར་འདུས་སོ། །དེ་ནི། འདི་ལྟ་སྟེ། ན་བ་དང ། ར་རོ་བ་དང ། ཆེད་དུ་ཟས་བཅད་པ་དང ། གཉིད་ལོག་པ་དང ། རྩེད་མོ་རྩེས་པ་དང ། ལས་གཞན་གྱིས་བྲེལ་བ་དང ། མའི་ནུ་ཞོ་འཐུངས་པའི་རྒྱུ་དང ། རྐྱེན་གྱིས་མ་ཟོས་པ་གང་ཡིན་པ་འདི་ནི། མ་ཟོས་པ་ཞེས་བྱའོ། །འདི་ལྟ་བུའི་ལུས་འདི་ལོ་བརྒྱ་ཐུབ་པར་གྱུར་ཀྱང་མཐར་འཇིག་པར་འགྱུར་བས། མཁས་པ་སུ་ཞིག་འཁོར་བའི་རྒྱ་མཚོ་འདིར་དེ་ལ་རྗེས་སུ་ཆགས་པར་བྱེད། གཞན་ཡང་དགའ་བོ། ལུས་འདི་ཡང་དག་པར་བླངས་པ་ལ་སྡུག་བསྔལ་རྣམ་པ་གཉིས་ཡོད་དེ། 396b གཉིས་གང་ཞེ་ན། ནད་མང་པོ་རྣམས་ལུས་ལ་འདུས་པ་གང་ཡིན་པ་དེ་ནི། ནང་གི་སྡུག་བསྔལ་ལོ་ཞེས་བྱའོ། །མི་དང་མི་མ་ཡིན་པས་རྣམ་པར་འཚེ་བ་གང་ཡིན་པ་དེ་ནི། ཕྱི་རོལ་གྱི་སྡུག་བསྔལ་ཞེས་བྱའོ། །དེ་ལ་ནད་མང་པོ་ལུས་ལ་འདུས་པ་ཞེས་བྱ་བ་ཇི་ལྟ་བུ་ཞེ་ན། འདི་ལྟ་སྟེ། མིག་དང ། རྣ་བ་དང ། སྣ་དང ། ལྕེ་དང ། ལྐོག་མ་དང ། སོ་དང ། བྲང་དང ། ལྟོ་བ་དང ། ལག་པ་དང ། རྐང་པ་རྣམས་ན་བར་གྱུར་པ་དང ། གཞན་ཡང་རླུང་ན་བ་དང ། མཆིལ་སྣབས་དང ། སྨྱོས་པ་དང ། ཁོང་རྡེ་དང ། དབུགས་མི་བདེ་བ་དང ། གློ་ན་བ་དང ། གཅི་བའི་ལམ་རྩུབ་པ་དང ། གཡན་པ་དང ། མཛེ་དང ། འབྲས་དང ། ཐོར་བུ་དང ། ཤུ་བ་དང ། འབྲུམ་བུ་དང ། རྐང་བམ་དང ། གཞན་ཡང་ནད་རྣམ་པ་སྣ་ཚོགས་ལུས་ལ་འདུས་པ་གང་ཡིན་པའོ། །གཞན་ཡང་མཁྲིས་པའི་ནད་བརྒྱ་རྩ་གཅིག་དང ། རླུང་ནད་བརྒྱ་རྩ་གཅིག་དང ། བད་ཀན་གྱི་ནད་བརྒྱ་རྩ་གཅིག་དང ། རླུང་དང་མཁྲིས་པ་དང་བད་ཀན་འདུས་པ་ལས་བྱུང་བའི་ནད་པ་བརྒྱ་རྩ་གཅིག་སྟེ། དེ་ལྟར་ནད་བཞི་བརྒྱ་རྩ་བཞི་པོ་དག་གིས་ལུས་ཉོན་མོངས་པ་གང་ཡིན་པ་དེ་ནི། ནང་གི་སྡུག་བསྔལ་ཞེས་བྱའོ། །གཞན་ཡང་ཕྱི་རོལ་གྱི་སྡུག་བསྔལ་གྱིས་ལུས་འདི་ལ་གནོད་པར་བྱེད་པ་འདི་ལྟ་སྟེ།་བཙོན་ར་དམ་པོར་བཅུག་པ་དང ། ལྕག་གིས་བཞུས་པ་དང ། བརྩོན་རར་བཅུག་པ་དང ། བཅིངས་པའི་སྡུག་བསྔལ་གང་ཡིན་པ་དང ། གཞན་ཡང་རྣ་བ་བཅད་པ་དང ། སྣ་བཅད་པ་ 397a ༄#། །དང ། ལག་པ་དང་རྐང་པ་གཏུབས་པ་དང ། མགོ་བཅད་པ་དང ། ལྷ་རྣམས་ཀྱིས་མ་བསྲུངས་པས་མི་མ་ཡིན་པའི་གདོན་མ་རུངས་པ་རྣམས་དང ། གནོད་སྦྱིན་དང ། སྲིན་བུ་རྣམས་ཀྱིས་གླགས་རྙེད་པར་འགྱུར་བ་གང་ཡིན་པ་དང ། གཞན་ཡང་སྦྲང་བུ་མཆུ་རིང་དང ། ཤ་སྦྲང་ལ་སོགས་པ་སྲིན་བུ་གདུག་པ་ཅན་རྣམས་ཀྱིས་ཟོས་པ་དང ། གྲང་བ་དང ། ཚ་པ་དང ། བཀྲེས་པ་དང ། སྐོམ་པ་དང ། རླུང་དང ། ཆར་པ་ཉེ་བར་གནས་པར་གྱུར་པའི་སྡུག་བསྔལ་རྣམ་པ་སྣ་ཚོགས་ཀྱིས་ལུས་ཉོན་མོངས་པར་བྱེད་དེ། མིར་གྱུར་པ་རྣམས་ཀྱིས་སྡུག་བསྔལ་ཡང་དེ་འདྲ་ན། ངན་འགྲོ་རྣམས་ཀྱི་སྡུག་བསྔལ་ལྟ་སྨོས་ཀྱང་ཅི་དགོས་ཏེ། དེ་ནི། ཤིན་ཏུ་བརྗོད་པར་དཀའོ། །དེ་ལྟ་བས་ན། འདི་དག་ཐམས་ཅད་ཀྱང་འདས་པའི་དུས་སུ་སྡིག་པ་མི་དགེ་བའི་ལས་མངོན་པར་འདུས་མ་བྱས་པའི་དབང་གིས་འདི་ལྟ་བུའི་རྣམ་པར་སྨིན་པ་མྱོང་བར་རིག་པར་བྱའོ། །གང་གིས་མཚོན་ཆ་དག་གིས་གནོད་པ་བྱས་པ་ཡོངས་སུ་བསྲུང་བའི་ཕྱིར་གྲོང་ཁྱེར་བརྩིགས་ཏེ་འོབས་ཀྱིས་བསྐོར་ནས་ལུས་འདི་ཡོངས་སུ་བསྲུངས་ཀྱང་རླུང་དང ། ཆར་པ་དང ། སྦྲང་བུ་མཆུ་རིངས་དང ། ཤ་སྦྲང་ལ་སོགས་པ་ཁང་ཁྱིམ་དག་ཏུ་འོངས་ནས་གནོད་པ་བྱེད་པར་འགྱུར་ལ་ནད་བཞི་བརྒྱ་རྩ་བཞིས་ཀྱང་ནང་དང་ཕྱི་རོལ་ཉོན་མོངས་པར་བྱེད་དོ། །བཟའ་བ་དང ། བཏུང་བ་དང ། མལ་ཆ་དང ། ན་བའི་གསོས་སྨན་དང ། ཞིང་དང ། 397b ཀུན་དགའ་ར་བ་དང ། ཁང་ཁྱིམ་དང ། གསེར་དང ། དངུལ་ལ་སོགས་པ་རིན་པོ་ཆེ་སྣ་བདུན་དང ། བྲན་ཕོ་དང ། བྲན་མོ་དང ། ཤིང་རྟ་དང ། བཞོན་པ་དང ། འཚོ་བའི་ཡོ་བྱད་རྣམས་ཡོངས་སུ་ཚོལ་བ་ན་གལ་ཏེ་ཡིད་དང་མཐུན་པར་མ་གྱུར་ན་ཡང་སྡུག་བསྔལ་སྐྱེད་པར་བྱེད་ལ། གལ་ཏེ་ལོངས་སྤྱོད་ཐོབ་པར་གྱུར་ན་ཡང་སེར་སྣས་ཕངས་ཤིང་རྟག་ཏུ་སྲུང་བ་དང ། གལ་ཏེ་སྟོར་ཅིང་ཆུད་ཟོས་པར་གྱུར་ན་ཡང་སྡུག་བསྔལ་ཆེན་པོ་སྐྱེད་པར་བྱེད་དོ། །དགའ་བོ། མདོར་ན་ཉེ་བར་ལེན་པའི་ཕུང་པོ་ལྔའི་ལུས་འདི་ནི། འགྲོ་བ་དང ། སྡོད་པ་དང ། འདུག་པ་དང ། ཉལ་བའི་སྤྱོད་ལམ་ཐམས་ཅད་སྡུག་བསྔལ་མ་ཡིན་པ་གང་ཡང་མེད་པས་གལ་ཏེ་ཡུན་རིང་དུ་འགྲོ་ཞིང་སྐད་ཅིག་ཙམ་དུ་ཡང་ངལ་གསོར་མེད་པར་གྱུར་ན་ཡང་སྡུག་བསྔལ་འབྱུང་བར་འགྱུར་ལ། སྡོད་པ་དང ། འདུག་པ་དང ། ཉལ་བ་དེ་དག་སོ་སོ་ནས་ཡུན་རིང་དུ་གྱུར་ན་ཡང་ཐམས་ཅད་སྡུག་བསྔལ་བར་འགྱུར་པས། གལ་ཏེ་ཡུན་རིང་དུ་སོང་སོང་པ་ལས་སྐད་ཅིག་ཙམ་འདུག་ཏུ་ཡོད་པར་གྱུར་ན་བདེ་བའི་འདུ་ཤེས་སྐྱེད་པར་བྱེད་ཀྱང་དེ་ཡང་དག་པར་བདེ་བར་བྱེད་པ་མ་ཡིན་ནོ། །གལ་ཏེ་ཡུན་རིང་དུ་འགྲེང་བ་ལས་སྐད་ཅིག་ཙམ་འདུག་པ་དང ། གལ་ཏེ་ཡུན་རིང་དུ་འདུག་པ་ལས་སྐད་ཅིག་ཙམ་ཉལ་བར་གྱུར་པ་ལ་ཡང་དག་པ་མ་ཡིན་པས་བདེ་བའི་འདུ་ཤེས་སྐྱེད་པར་བྱེད་ཀྱང་དེ་ཡང་དག་པར་བདེ་བ་མ་ཡིན་པས། དེའི་ཕྱིར་ཉེ་བར་ལེན་པའི་ཕུང་པོ་ལྔའི་ལུས་འདི་ནི། ཐམས་ཅད་སྡུག་བསྔལ་ཡིན་པར་རིག་པར་བྱའོ། ། 398a ༄#། །གང་ལ་ལ་ཞིག་བདག་གི་དོན་དང ། གཞན་གྱི་དོན་དང ། བདག་དང ། གཞན་གྱི་དོན་གྱི་ཕྱིར་དེ་ལྟ་བུའི་སྡུག་བསྔལ་རྣམས་ལ་ཡོངས་སུ་སྐྱོ་བ་བསྐྱེད་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་ཡང་དག་པར་སློབ་པར་བྱེད་ན། མྱ་ངན་ལས་འདས་པ་རྣམ་པར་གྲོལ་བའི་ཆོས་ལས་ཡོངས་སུ་ཉམས་པར་མི་འགྱུར་ལ། གང་ལ་ལ་ཞིག་གོས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་ཀྱིས་དེ་ལ་རིམ་གྲོ་བྱེད་པ་དེ་དག་ཀྱང་རྣམ་པར་སྨིན་པ་ཆེན་པོའི་མཐུ་དང ། གྲགས་པ་ཐོབ་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། དགའ་བོ། འདི་ཇི་སྙམ་དུ་སེམས། གཟུགས་གང་ཡིན་པ་དེ་ཅི་རྟག་པ་ཞིག་ཡིན་ནམ། འོན་ཏེ་མི་རྟག་པ་ཞིག་ཡིན། བཅོམ་ལྡན་འདས་ལ་ཚེ་དང་ལྡན་པ་དགའ་བོས་གསོལ་པ། བཅོམ་ལྡན་འདས། གཟུགས་དེ་ནི། མི་རྟག་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་མི་རྟག་པ་ཡིན་ན། དེ་སྡུག་བསྔལ་བ་ཞིག་ཡིན་ནམ། འོན་ཏེ་སྡུག་བསྔལ་མེད་པ་ཞིག་ཡིན། དགའ་བོས་གསོལ་པ། གཟུགས་གང་ཡིན་པ་དེ་ནི། སྡུག་བསྔལ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གང་མི་རྟག་ཅིང་སྡུག་བསྔལ་བ་དེ་ནི། རྣམ་པར་འཇིག་པའི་ཆོས་ཅན་ཡིན་ན། འཕགས་པའི་ཉན་ཐོས་མང་དུ་ཐོས་པ་དང་ལྡན་པ་གང་དེ་ལྟ་བུའི་བསྟན་པ་ཐོས་པར་གྱུར་ན་ཡང་ལུས་འདི་ནི། 398b འདི་ལྟ་བུའི་གཟུགས་ཅན་ནོ། །ཞེས་འཛིན་ཅིང ། དེ་ལ་བདག་དང ། བདག་གིར་འཛིན་པར་བྱེད་དམ། བཅོམ་ལྡན་འདས། དེ་ནི། མ་ལགས་ཏེ། གཟུགས་ལ་བདག་ཅེས་བགྱི་བ་ཡང་མ་མཆིས་ལ། བདག་གི་ཞེས་བགྱི་བ་ཡང་མ་མཆིས་ལགས་སོ། །གཞན་ཡང་དགའ་བོ། འདི་ཇི་སྙམ་དུ་སེམས། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་གང་ཡིན་པ་དེ་དག་ཅི། རྟག་པ་ཞིག་ཡིན་ནམ། འོན་ཏེ་མི་རྟག་པ་ཞིག་ཡིན། བཅོམ་ལྡན་འདས་ལ་ཚེ་དང་ལྡན་པ་དགའ་བོས་གསོལ་པ། བཅོམ་ལྡན་འདས། དེ་དག་ཐམས་ཅད་ནི། མི་རྟག་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་མི་རྟག་པ་ཡིན་ན། ཅི་སྡུག་བསྔལ་བ་ཞིག་ཡིན་ནམ། འོན་ཏེ་སྡུག་བསྔལ་མེད་པ་ཞིག་ཡིན། དགའ་བོས་གསོལ་པ།་འདི་ལྟར་ཕུང་པོ་བཞི་པོ་དེ་དག་ནི། སྡུག་བསྔལ་བ་ཞེས་བགྱི་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གང་མི་རྟག་ཅིང་སྡུག་བསྔལ་བ་དེ་ནི། རྣམ་པར་འཇིག་པའི་ཆོས་ཅན་ཡིན་ན།་འཕགས་པ་ཉན་ཐོས་མང་དུ་ཐོས་པ་དང་ལྡན་པ་གང་དེ་ལྟ་བུའི་བསྟན་པ་ཐོས་པར་གྱུར་ན་ཡང་ལུས་འདིའི་ཕུང་པོ་བཞི་པོ་དག་ལ་བདག་དང ། བདག་གིར་འཛིན་པར་བྱེད་དམ། བཅོམ་ལྡན་འདས། དེ་ནི། མ་ལགས་ཏེ། ཕུང་པོ་བཞི་བོ་དེ་དག་ལ་ཡང་དག་པར་བདག་ཅེས་བགྱི་བ་ཡང་མ་མཆིས་ལ། བདག་གི་ཞེས་བགྱི་བ་ཡང་མ་མཆིས་ལགས་སོ། །གཞན་ཡང་ 399a ༄#། །དགའ་བོ། འདི་ལྟར་བདག་ཅེས་བགྱི་བ་ནི། འདས་པ་དང ། ད་ལྟར་བྱུང་བ་དང ། མ་འོངས་པ་དང ། ནང་དང ། ཕྱི་རོལ་ན་ཡང་ཡོད་པ་མ་ཡིན་ལ། རགས་པ་དང ། ཕྲ་བ་དང ། བཟང་པོ་དང ། ངན་པ་དང ། ཉེ་བ་དང ། རིང་བ་ཡང་མ་ཡིན་པས་ཆོས་དེ་དག་ཐམས་ཅད་ནི། བདག་དང ། བདག་གི་བ་མ་ཡིན་ནོ། །དེ་ལྟ་བས་ན། དགའ་བོ།་འདི་ལྟར་ཡང་དག་པའི་ཤེས་པས་ཆོས་རྣམས་ལ་བདག་མེད་པར་སོ་སོར་བརྟག་པར་རིག་པར་བྱའོ། །འཕགས་པ་ཉན་ཐོས་མང་དུ་ཐོས་པ་དང་ལྡན་པ་གང་དེ་ལྟར་སོ་སོར་བརྟགས་ནས་ཡོངས་སུ་སྐྱོ་བ་སྐྱེད་པར་བྱེད་ན། རྣམ་པར་གྲོལ་ཞིང་མཐར་ཡོངས་སུ་མྱ་ངན་ལས་འདས་པ་ཐོབ་པར་འགྱུར་ཏེ། དེ་ལྟར་ཡང་དག་པར་བསླབ་ནས་ཆོས་འདི་མངོན་དུ་གྱུར་པའི་ཚེ་སྐྱེ་བའི་ཆ་ནི། ཟད་ཅིང ། ཚངས་པར་སྤྱོད་པ་ཡང་དག་པར་སྤྱད་པས་བྱ་བ་བྱས་ནས་ཡང་སྲིད་པ་ཕྱི་མ་ལེན་པར་མི་འགྱུར་རོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཀའ་སྩལ་པ་ན། ཚེ་དང་ལྡན་པ་དགའ་བོ་ནི། རྡུལ་སྤངས་ཤིང་དྲི་མ་དང་བྲལ་བས་ཆོས་ཀྱི་མིག་རྣམ་པར་དག་པ་ཐོབ་པར་འགྱུར་ཏོ། །དགེ་སློང་ལྔ་བརྒྱ་པོ་དེ་དག་ནི། ཆོས་རྣམས་ལ་ལེན་པ་མེད་པར་ཟག་པ་ཟད་ནས་སེམས་རྣམ་པར་གྲོལ་བར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་ 399b པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་བ་ལས། ཚེ་དང་ལྡན་པ་དགའ་བོ་ལ་མངལ་དུ་འཇུག་པ་བསྟན་པའི་ལེའུ་སྟེ། ལེའུ་བཅུ་གསུམ་པ་རྫོགས་སོ།། །།ལོ་ཙྪ་བ་འགོས་ཆོས་གྲུབ་ཀྱིས་རྒྱ་ནག་གི་དཔེ་ལས་བསྒྱུར་ཅིང་ཞུས་ཏེ་གཏན་ལ་ཕབ་པ། |