rKTs


H6

(e-text produced by ACIP)

see text in transliteration
Tha1b
༄##། །རྒྱ་གར་སྐད་དུ། བི་ན་ཡ་ཀྵུ་དྲ་ཀ་བསྟུ། བོད་སྐད་དུ། འདུལ་བ་ཕྲན་ཚེགས་ཀྱི་གཞི།་བམ་པོ་དང་པོ། ཐམས་ཅད་མཁྱེན་པ་ལ་ཕྱག་འཚལ་ལོ། །ཕྲན་ཚེགས་ཀྱི་གཞིའི་སྡོམ་ནི། སོ་ཕག་ཆན་པ་ཆོས་གོས་དང ། །ཤིང་ཚད་དང་ནི་གནས་བརྟན་ལུས། །རྒྱུས་པ་འགྱོད་པ་འབྱུང་བ་ཉིད།། ཕྲན་ཚེགས་གཞིར་ནི་ཡང་དག་བཤད། །བསྡུས་པའི་སྡོམ་ནི། སོ་ཕག་སེན་མོ་བཅོས་པ་དང ། །ལྷུང་
Tha2a
༄##། །བཟེད་ཡན་ལག་མེ་ལོང་སྐྱེས། །ལམ་ཕྲན་ཆུ་ཚགས་མོན་སྲན་སྡེའུ། །རྐང་པ་བཀྲུ་དང་གོས་མདུད་དོ། ། སྡོམ་ནི། སོ་ཕག་དང་ནི་ས་དཀར་དང ། །ཉ་ཕྱིས་དྲི་ཡི་ལག་རིས་དང ། །ཀ་བ་དང་ནི་སྐུད་པ་གཉིས། །ལག་རྒྱན་དང་ནི་སོར་གདུབ་རྒྱ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ། ཁང་པ་བརྩེགས་པའི་གནས་ན་བཞུགས་སོ། །དྲུག་སྡེ་ཉིད་རྣམས་སྔ་དྲོ་ཤམ་ཐབས་དང ། ཆོས་གོས་བགོས། ལྷུང་བཟེད་ཐོགས་ཏེ་ཡངས་པ་ཅན་དུ་བསོད་སྙོམས་ཀྱི་ཕྱིར་ཞུགས་པ་དང ། ཡངས་པ་ཅན་གྱི་བར་དང ། ཁང་པ་བརྩེགས་པའི་བར་གྱི་བར་སྐབས་དེ་ན། ཡངས་པ་ཅན་གྱི་ལི་ཙ་བྱི་རྣམས་ཀྱི་སྐྱེད་
Tha2b
མོས་ཚལ་མེ་ཏོག་དང ། འབྲས་བུ་དང ། ཆུ་ཕུན་སུམ་ཚོགས་པ། བྱ་སྣ་ཚོགས་སྐད་འབྱིན་པ་དགའ་བའི་ཚལ་དང་འདྲ་བ་དེ་དག་ན་དེ་དག་གི་རྩལ་བ་དང ། གར་དང ། གླུ་དང ། རོལ་མོའི་སྒྲའི་ཆ་བྱད་སྣ་ཚོགས་དག་དང ། ཁྲུས་ཀྱི་ཡོ་བྱད་སྣ་ཚོགས་དག་ཀྱང་བཞག་པ་དང ། དྲུག་སྡེ་རྣམས་ཀྱིས་སྨྲས་པ།་དགའ་བོ་ཉེ་དགའ་བོ། ཡངས་པ་ཅན་གྱི་ལི་ཙ་བྱི་འདི་དག་དང ། སྐྱེད་མོས་ཚལ་གྱི་དགའ་བ་ནི། བཅོམ་ལྡན་འདས་ཀྱིས་སུམ་ཅུ་རྩ་གསུམ་པའི་ལྷ་རྣམས་དཔེར་མཛད་ན། རེ་ཞིག་དེ་དག་གི་སྐྱེད་མོས་ཚལ་ཅི་འདྲ་བ་བལྟའོ། །ཞེས་དེ་རྣམས་གློད་ནས་དེ་དག་གི་སྐྱེད་མོས་ཚལ་དུ་ཞུགས་སོ། །དེ་དག་གིས་དེ་ན་རྩལ་བའི་ཡོ་བྱད་མདའ་བོ་ཆེ་དང ། དྲང་བ་དང ། འཕང་རྡོ་སྣ་ཚོགས་དང ། གར་དང ། གླུ་དང ། རོལ་མོའི་སྒྲའི་ཆ་བྱད་སྣ་ཚོགས་དང ། པི་ཝང་དང་གླིང་བུ་དང ། རྫ་རྔ་དང ། འཁར་རྔ་དང ། སྐད་སྙན་ལ་སོགས་པ་སྣ་ཚོགས་དང ། ཁྲུས་ཀྱི་ཡོ་བྱད་སོ་ཕག་དང ། བཀྲུ་བའི་ཕྱེ་མ་དང ། མགོ་བཀྲུ་བ་སྐྱུ་རུ་
Tha3a
༄##། །ར་སྣ་ཚོགས་མཐོང་བ་དང ། དེ་རྣམས་ཀྱིས་ཕན་ཚུན་སྨྲས་པ། དགའ་བོ་ཉེ་དགའ་བོ། ཡོ་བྱད་ཕུན་སུམ་ཚོགས་པ་རྣམ་པ་དུ་མ་འདི་དག་ཡོད་ན། ཅི། རེ་ཞིག་བརྩལ་བར་བྱའམ། འོན་ཏེ་གར་བྱའམ། གླུ་བླང་ངམ། རོལ་མོའི་སྒྲ་བྱའམ། ཁྲུས་བྱ། ཁ་ཅིག་གིས་སྨྲས་པ། བདག་ཅག་བཀྲུས་ནས་རིང་ཞིག་ལོན་གྱི། ཇེ་ཁྲུས་བྱའོ། །ཞེས་དེ་དག་གློད་ནས་སོ་ཕག་དག་གིས་དྲུད་ཅིང་དྲུང་ནས་ཁྲུས་བྱ་བར་བརྩམས་པ་དང ། བཟོའི་གནས་དང ། ལས་ཀྱི་གནས་དེ་དག་ལ་མཁས་པས། ཁྲུས་ལ་ཞུགས་པ་དེ་རྣམས་ཀྱི་སྒྲ་ཡིད་དུ་འོང་བ་འདི་ལྟ་སྟེ། སིལ་སྙན་ཡན་ལག་ལྔ་པ་སྐྱེས་བུ་མཁས་པས་ལེགས་པར་དཀྲོལ་བའི་སྒྲ་ལྟ་བུ་བྱུང་ངོ ། །སྐྱེ་བོའི་ཚོགས་ཕལ་པོ་ཆེ་ལམ་དེ་ནས་འགྲོ་བས། སྒྲ་དེ་ཐོས་པ་དང ། དེ་རྣམས་རྣ་བ་བྱོ་སྟེ་ཡུད་ཙམ་བསྡད་ནས་སྨྲས་པ། ཤེས་ལྡན་དག་།ཡངས་པ་ཅན་གྱི་ལི་ཙ་བྱི་རྣམས་ཀྱི་སྐྱེད་མོས་ཚལ་ན། གར་མཁན་རྣམས་གར་བྱེད་པ་བལྟར་འདོང་ངམ། དེ་ལྟར་བྱའོ། །ཞེས་ལྟད་མོ་ལ་ཡིད་འདུན་པ་དེ་དག་མྱུར་བར་
Tha3b
ཆས་ཏེ་སྐྱེད་མོས་ཚལ་དུ་དོང་ནས་དེ་དག་ནང་དུ་ཞུགས་པ་དང ། དྲུག་སྡེ་རྣམས་ཀྱང་ཕྱིར་བྱུང་ངོ ། །དེ་དག་གིས་དེ་རྣམས་ལ་སྨྲས་པ། འཕགས་པ་དག་།ཕྱོགས་གང་ན་གར་མཁན་རྣམས་གར་བགྱིད། དེ་རྣམས་ཀྱིས་སྨྲས་པ། བཀྲེན་པ་ཁྱོད་ཀྱིས་བྱེ་བྲག་མི་ཕྱེད་དེ། གར་མཁན་གར་བྱེད་པ་ལ་སྒྲ་འདི་ལྟ་བུ་འབྱུང་ངམ། འཕགས་པ་དག་།འོ་ན་འདི་སུའི་སྒྲ་ལགས། ཤེས་ལྡན་དག་།ཁོ་བོ་ཅག་ལུས་དྲུད་ནས་ཁྲུས་བྱས་པ་ཡིན་ནོ། །འཕགས་པ་དག་།ཅི། དགེ་སྦྱོང་ཁྱེད་འདོད་པའི་ཡོན་ཏན་གྱིས་གཟིར་ཏམ། བཀྲེན་པ། ཁྱེད་ཀྱི་མགྲིན་པ་རྡོག་པས་མནན་ལ་དགེ་སྦྱོང་ཁོ་བོ་ཅག་འདོད་པའི་ཡོན་ཏན་གྱིས་གཟིར་ཏོ། ། ཁྱེད་ཁོ་བོ་ཅག་གི་རྗེས་སུ་སྟོན་པ་ཡིན་ནམ་ཅི། མ་སྨྲ་བར་དེངས། ཁྱེད་ལ་གནོད་པ་བྱས་ས་རེ་ཞེས་དེ་རྣམས་ཀྱིས་དེ་དག་བསྡིགས་པ་དང ། སྤ་གོང་ནས་དོང་སྟེ་ཡངས་པ་ཅན་དུ་ཞུགས་ནས་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་ཏུ་འཕྱ་བར་བརྩམས་སོ། །དགེ་སློང་རྣམས་ཀྱིས་སྐབས་དེ་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི། དགེ་སློང་རྣམས་སོ་ཕག་དག་གིས་ལུས་དྲུད་དེ་ཁྲུས་བྱེད་པ་ལས་གྱུར་གྱི། དེ་ལྟ་བས་ན། དགེ་སློང་གིས་སོ་ཕག་གིས་ལུས་དྲུད་དེ་ཁྲུས་མི་བྱའོ། །འདྲུད་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་སོ་ཕག་གིས་ལུས་དེ་ཁྲུས་མི་བྱའོ། །ཞེས་བཀའ་སྩལ་པ་དང ། དགེ་སློང་དག་རྐང་པ་སེར་ག་བྱུང་ཞིང་དྲི་མ་དང་བཅས་བཞིན་བསོད་སྙོམས་ལ་འཇུག་པ་དེ་དག་བྲམ་
Tha4a
༄#། །ཟེ་དང ། ཁྱིམ་བདག་རྣམས་ཀྱིས་མཐོང་ནས་སྨྲས་པ། འཕགས་པ་དག་།ཁྱེད་ཞབས་སེར་ག་བྱུང་ཞིང་དྲི་མ་དང་བཅས་ན། ཅི་སྟེ་དྲི་མ་སྦྱང་བར་མི་བགྱི། དེ་རྣམས་ཀྱིས་སྨྲས་པ། བཞིན་བཟང་དག་།བཅོམ་ལྡན་འདས་ཀྱིས་མ་གནང་ངོ ། །ཅི་འཕགས་པ། ཁྱེད་དྲི་མའི་འདམ་བཅངས་པས་དག་པར་འགྱུར་རམ། དེ་རྣམས་ཅང་མི་སྨྲ་བར་འདུག་སྟེ་བསོད་སྙོམས་ལ་རྒྱུས་ནས་གཙུག་ལག་ཁང་དུ་དོང་བ་དང ། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་རྒྱས་པར་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།དེ་ལྟར་ན། སྔ་མ་ནི། བཅས་པའོ། །འདི་ནི། གནང་བ་ཡིན་ཏེ། དེ་ལྟ་བས་ན། དགེ་སློང་གིས་རྐང་པ་སོ་ཕག་གིས་དྲུད་པར་གནང་ངོ ། །ལུས་གཞན་ནི། མ་ཡིན་ཏེ། འདྲུད་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པ་ན་བཞུགས་སོ། །དགེ་སློང་རྣམས་སྔ་དྲོ་ཤམ་ཐབས་དང ། ཆོས་གོས་བགོ་ས། ལྷུང་བཟེད་ཐོགས་ཏེ་ཡངས་པ་ཅན་དུ་བསོད་སྙོམས་ཀྱི་ཕྱིར་ཞུགས་པ་དང ། དེ་རྣམས་ཀྱིས་བྲམ་ཟེ་ཞིག་ས་དཀར་གྱིས་སོ་རིས་གསུམ་བྱུགས་ནས་སློང་མོ་ལ་རྒྱུ་ཞིང་དེའི་བསླངས་པ་ཡང་མང་དུ་རྙེད་པར་མཐོང་ངོ ། །དྲུག་སྡེ་རྣམས་ཀྱིས་སྨྲས་པ། དགའ་བོ་ཉེ་དགའ་བོ། ཐབས་འདི་ནི། བཟང་པོ་ཞིག་སྟེ། བདག་ཅག་ཀྱང་དེ་ལྟར་བྱའོ། །ཞེས་དེ་རྣམས་ཕྱི་དེ་ཉིན་ས་དཀར་གྱིས་སོ་རིས་གསུམ་བྱུགས་ནས་བསོད་སྙོམས་ལ་ཞུགས་པ་མ་དད་པ་
Tha4b
རྣམས་ཀྱིས་མཐོང་ནས་འཕྱ་ཞིང ། གུས་པར་སྨྲའོ། །གུས་པར་སྨྲའོ། །ཞེས་སྨྲས་པ་དང ། དྲུག་སྡེ་རྣམས་ཀྱིས་སྨྲས་པ། བཀྲེན་པ། ཁྱེད་ཀྱིས་གུས་པར་སྨྲ་བར་བྱ་བ་གང་དག་ཡིན་པ་དང ། ཕྱག་བྱ་བ་གང་དག་ཡིན་པ་འདི་ཡང་མི་ཤེས་སམ། དེ་དག་གིས་སྨྲས་པ། འདི་ལ་ཅི་ཞིག་འཚལ་བར་བགྱི། བྲམ་ཟེ་རྒན་པ་རྒན་པ་རྣམས་ནི། གུས་པར་སྨྲ་བར་བྱ་བ་ཡིན་ལ། དགེ་སློང་རྣམས་ནི། ཕྱག་བྱ་བ་ཡིན་ན། དེ་ཅིའི་ཕྱིར་ཁྱེད་དགེ་སློང་རྣམས་ལ་གུས་པར་སྨྲ་བ་བྱེད་ཀྱི། ཕྱག་མ་ཡིན། འཕགས་པ། བདག་ཅག་གིས་ཁྱེད་བྲམ་ཟེ་ལགས་པར་འཚལ་གྱི། དགེ་སློང་དུ་ནི། མ་ལགས་སོ། །དེ་ལྟ་ལགས་པས་བདག་ཅག་གིས་མ་འཚལ་གྱི། བཟོད་པར་གསོལ་ལོ། །ཞེས་བྱས་པ་དང ། དེ་དག་ཅང་མི་སྨྲ་བར་འདུག་གོ་།སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱི་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་ནི། དགེ་སློང་རྣམས་སོ་རིས་གསུམ་འདྲི་བ་ལས་གྱུར་གྱི། དེ་ལྟ་བས་ན། དགེ་སློང་གིས་སོ་རིས་གསུམ་འདྲི་བར་མི་བྱའོ། །དགེ་སློང་སོ་རིས་གསུམ་འདྲི་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་སོ་རིས་གསུམ་མི་བྱུག་གོ་།ཞེས་བཀའ་སྩལ་པ་དང ། དགེ་སློང་དག་སྨན་པས་བསྒོ་ཡང་ལུས་སས་མི་སྐུད་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།དེ་ལྟར་ན། སྔ་མ་ནི། བཅས་པའོ། །འདི་ནི། གནང་བ་ཡིན་ཏེ།
Tha5a
༄#། །དེ་ལྟ་བས་ན། སྨན་པས་བསྒོ་བ་ནི། མ་གཏོགས་སོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་སྔ་དྲོ་ཤམ་ཐབས་དང་ཆོས་གོས་བགོས། ལྷུང་བཟེད་ཐོགས་ཏེ་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་པ་ན། དེ་རྣམས་ཀྱིས་བྲམ་ཟེ་གྷི་ཝང་གི་ཐིག་ལེ་བྱས་པ་ཞིག་སྐྱེ་བོ་ཕལ་པོ་ཆེའི་ཚོགས་ཀྱིས་བསྐོར་ཅིང་སྟོན་མོའི་བསྔགས་པ་བརྗོད་པ་མཐོང་བ་དང ། དེ་རྣམས་ཀྱིས་སྨྲས་པ། དགའ་བོ་ཉེ་དགའ་བོ། ཐབས་འདི་ནི། བཟང་པོ་ཞིག་སྟེ། བདག་ཅག་ཀྱང་འདི་ལྟར་བྱའོ། །ལེགས་ཀྱི། དེ་ལྟར་བྱའོ། །ཞེས་དེ་རྣམས་ཕྱི་དེ་ཉིན་གྷི་ཝང་གི་ཐིག་ལེ་དག་གིས་བདག་ཉིད་བརྒྱན་པ་དག་བྱས་ནས་བསོད་སྙོམས་ལ་ཞུགས་པ་དང ། བྲམ་ཟེ་དང ། ཁྱིམ་བདག་དག་གི་མཐོང་ནས་འཕྱ་ཞིང་གུས་པར་སྨྲའོ། །གུས་པར་སྨྲའོ། །ཞེས་སྨྲས་པ་དང ། དྲུག་སྡེ་རྣམས་ཀྱིས་སྨྲས་པ། བཀྲེན་པ་ཁྱེད་ཀྱིས་གུས་པར་སྨྲ་བར་བྱ་བ་གང་དག་ཡིན་པ་དང ། ཕྱག་བྱ་བ་གང་དག་ཡིན་པ་འདི་ཡང་མི་ཤེས་སམ། དེ་དག་གིས་སྨྲས་པ། འདི་ལ་ཅི་ཞིག་འཚལ་བར་བགྱི། བྲམ་ཟེ་རྒན་པ་རྒན་པ་རྣམས་ནི། གུས་པར་སྨྲ་བར་བྱ་བ་ཡིན་ལ། དགེ་སློང་རྣམས་ནི། ཕྱག་བྱ་བ་ཡིན་ན། དེ་ཅིའི་ཕྱིར་ཁྱེད་དགེ་སློང་རྣམས་ལ་གུས་པར་སྨྲ་བ་བྱེད་ཀྱི། ཕྱག་མ་ཡིན། འཕགས་པ་དག་།བདག་ཅག་གིས་ཁྱེད་བྲམ་ཟེ་ལགས་པར་འཚལ་གྱི། དགེ་སློང་དུ་ནི་མ་ལགས་སོ། །དེའི་
Tha5b
སླད་དུ་བདག་ཅག་མི་འཚལ་གྱི། བཟོད་པར་གསོལ་ལོ། །ཞེས་བྱས་པ་དང ། དེ་དག་ཅང་མི་སྨྲ་བར་འདུག་གོ། སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་ནི། དགེ་སློང་དག་གྷི་ཝང་གི་ཐིག་ལེ་དག་གིས་བདག་ཉིད་བརྒྱན་པ་ལས་གྱུར་གྱི། དེ་ལྟ་བས་ན། དགེ་སློང་གིས་གྷི་ཝང་གི་ཐིག་ལེ་དག་གིས་བརྒྱན་པར་མི་བྱའོ། །བརྒྱན་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས། དགེ་སློང་གིས་གྷི་ཝང་གི་ཐིག་ལེ་དག་གིས་བདག་ཉིད་བརྒྱན་པར་མི་བྱའོ། །ཞེས་བཀའ་སྩལ་པ་དང ། དགེ་སློང་ཞིག་འཕྲལ་བར་རྨ་བྱུང་བ་དེ་སྨན་པའི་དྲུང་དུ་སོང་ནས་བཞིན་བཟང ། བདག་ལ་སྨན་སྟོན་ཅིག་།འཕགས་པ། རྨའི་ཐན་ཀོར་གྷི་ཝང་གིས་བསྐུས་ཤིག་དང ། ཁྱོད་འཚོ་བར་འགྱུར་རོ། །དེས་སྨྲས་པ། བཅོམ་ལྡན་འདས་ཀྱིས་མ་གནང་ངོ ། །འཕགས་པ། ཁྱོད་ཀྱི་སྟོན་པ་ནི། ཐུགས་རྗེ་ཅན་ཡིན་པས་གནང་བར་འགྱུར་རོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་དག་།སྨན་པས་བསྒོ་བ་ནི། མ་གཏོགས་སོ། །བཅོམ་ལྡན་འདས་ཀྱིས་དགེ་སློང་གིས་སོ་ཕག་གིས་ལུས་དྲུད་པར་མི་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ཉ་ཕྱིས་ཀྱིས་འདྲུད་པར་བྱེད་དོ། །བཅོམ་ལྡན་འདས་ཀྱིས་བཀའ་སྩལ་པ། ཉ་ཕྱིས་ཀྱིས་དྲུད་བར་མི་བྱའོ། །འདྲུད་ན། འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་
Tha6a
༄#། །ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་དྲིས་བྱུགས་ཏེ་གཞོན་ནུ་རྣམས་ཀྱི་ནང་དུ་དོང་ནས་སྨྲས་པ། གཞོན་ནུ་དག་།ངེད་ཀྱི་དྲི་ཇི་ལྟ་སྣོམས་ཤིག་།དེ་དག་གིས་སྨྲས་པ། གནས་བརྟན། ཅི། ཁྱེད་དྲིས་བྱུགས་སམ། བྱུགས་སོ། །གནས་བརྟན། ཁྱེད་དྲིས་བྱུག་ཏུ་རུང་ངམ། རུང་ཡང་རུང ། མི་རུང་ཡང་རུང་སྟེ། ངེད་ཀྱིས་ནི། བྱུགས་སོ། །དེ་དག་འཕྱ་སྨོད་ཁ་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་ནི། དྲིས་ཉུག་པ་ལས་གྱུར་གྱི། དེ་ལྟ་བས་ན། དགེ་སློང་རྣམས་ཀྱིས་དྲིས་བྱུག་པར་མི་བྱའོ། །ཉུག་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་དྲི་བྱུག་པར་མི་བྱའོ། །ཞེས་བཀའ་སྩལ་པ་དང ། དགེ་སློང་ནད་པ་ཞིག་སྨན་པའི་དྲུང་དུ་སོང་སྟེ་བཞིན་བཟང ། བདག་ལ་སྨན་སྟོན་ཅིག་།དེས་སྨྲས་པ། འཕགས་པ། དྲིས་བྱུགས་ན། ཁྱོད་འཚོ་བར་འགྱུར་རོ། །བཞིན་བཟང ། ཅི། ཁོ་བོ་འདོད་པ་སྤྱོད་དམ། འཕགས་པ། ཁྱོད་ཀྱི་སྨན་ནི། འདི་ཡིན་ཏེ། གཞན་གྱིས་འཚོ་བར་མི་ནུས་སོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི་།སྨན་པའི་ལུང་གིས་དྲི་བཅང་བར་བྱའོ། །དགེ་སློང་དག་།དྲིས་བྱུགས་ནས་དགེ་འདུན་གྱི་ནང་ན་འདུག་ཅིང ། བྲམ་
Tha6b
ཟེ་དང ། ཁྱིམ་བདག་འོངས་ཤིང་ལྷགས་པ་རྣམས་ལ་ཆོས་སྟོན་པར་བྱེད། བྲམ་ཟེ་དང ། ཁྱིམ་བདག་གི་ཁྱིམ་རྣམས་སུ་ཡང་འགྲོ་བར་བྱེད་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ངས་དགེ་སློང་དྲི་འཆང་བའི་ཀུན་ཏུ་སྤྱད་པའི་ཆོས་བཅའ་བར་བྱ་སྟེ། དགེ་སློང་དྲི་འཆང་བས་དྲིས་བྱུགས་ནས་དགེ་འདུན་གྱི་ནང་དུ་འདུག་པར་མི་བྱ། བྲམ་ཟེ་དང ། ཁྱིམ་བདག་འོངས་ཤིང་ལྷགས་པ་རྣམས་ལ་ཆོས་བསྟན་པར་མི་བྱ། བྲམ་ཟེ་དང ། ཁྱིམ་བདག་གི་ཁྱིམ་རྣམས་སུ་འགྲོ་བར་མི་བྱའི། ནམ་སོས་པར་གྱུར་པ་དེའི་ཚེ་ཁྲུས་བྱས་ནས་དྲི་མ་མེད་པར་གྱུར་བ་དང་དགེ་འདུན་གྱི་ནང་དུ་འདུག་པར་བྱ། བྲམ་ཟེ་དང ། ཁྱིམ་བདག་འོངས་ཤིང་ལྷགས་པ་རྣམས་ལ་ཆོས་བསྟན་པར་བྱ། བྲམ་ཟེ་དང ། ཁྱིམ་བདག་གི་ཁྱིམ་རྣམས་སུ་འགྲོ་བར་བྱའོ། །དགེ་སློང་དྲི་འཆང་བས་ཀུན་ཏུ་སྤྱད་པའི་ཆོས་ཇི་ལྟར་བཅས་པ་བཞིན་ཡང་དག་པར་བླངས་ཏེ་མི་འདུག་ན། འགལ་ཚབས་ཅན་དུ་འགྱུར་རོ། །བྲམ་ཟེ་དང ། ཁྱིམ་བདག་དད་པ་ཅན་དག་དགེ་སློང་རྣམས་ལ་དྲི་འབུལ་བ་ན། དགེ་སློང་རྣམས་འགྱོད་ནས་མི་ལེན་པ་དང ། དེ་དག་གིས་སྨྲས་པ། འཕགས་པ་དག་།གང་གི་ཚེ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བར་མ་གྱུར་པ་དེའི་ཚེ་ན། མུ་སྟེགས་ཅན་རྣམས་ཡོན་གནས་ལགས། ད་ནི། བཅོམ་ལྡན་འདས་འཇིག་རྟེན་དུ་བྱུང་བས། ད་ལྟར་ཁྱེད་ཡོན་གནས་ལགས་ན། གལ་ཏེ་ཁྱོད་ཀྱིས་མ་བཞེས་ན། ཅི། བདག་ཅག་འཇིག་རྟེན་འདི་ནས་འཇིག་རྟེན་ཕ་རོལ་ཏུ་དགེ་
Tha7a
༄#། །བའི་ལམ་རྒྱགས་མ་མཆིས་པར་མཆིའམ། བདག་ཅག་ལ་ཐུགས་བརྩེ་བའི་སླད་དུ་བཞེས་ཤིག་།དེ་དག་གིས་སྨྲས་པ། བཅོམ་ལྡན་འདས་ལ་ཞུའོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱའོ། །དགེ་སློང་རྣམས་ཀྱིས་བླངས་ནས་དེ་དག་ཉིད་ཀྱི་མདུན་དུ་བོར་བ་དང ། དེ་དག་གིས་སྨྲས་པ། འཕགས་པ་དག་།བདག་ཅག་གིས་རིན་ཐང་བཞིན་དུ་ཉོ་ཉོ་ན། ཁྱེད་ཀྱིས་བླངས་ཏེ་དོར་རམ། སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བླངས་ནས་དོར་བར་མི་བྱའི། འོན་ཀྱང་དེ་བཞིན་གཤེགས་པའི་མཆོད་རྟེན་ལ་དྲིའི་ལག་རིས་བྱུག་པར་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ཀྱིས་བླངས་ནས་དབུ་སྐྲ་དང ། སེན་མོའི་མཆོད་རྟེན་དག་ལ་དྲིའི་ལག་རིས་ཉུག་གོ་།དེ་དག་གིས་སྨྲས་པ། འཕགས་པ་དག་།ཅི། བདག་ཅག་གིས་མཆོད་རྟེན་མ་མཐོང་ངམ། བདག་ཅག་གིས་ནི། ཁྱེད་ཁོ་ན་ལ་ཕུལ་ཏེ། དབུ་སྐྲ་དང ། སེན་མོའི་མཆོད་རྟེན་དག་ལ་ནི། སྔར་ཕུལ་ལགས་སོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བླངས་ནས་གནས་ཁང་ལ་བྱུག་པར་བྱའོ། །དེ་རྣམས་ཀྱིས་གནས་ཁང་གི་སྒོ་ལ་བྱུགས་པ་དང ། དེ་དག་དྲི་གཙང་ཁང་ཡིན་ནོ། །སྙམ་ནས་ཕྱག་འཚལ་བར་བྱེད་པའི་སྐབས་དེ། དགེ་སློང་རྣམས་ཀྱིས་
Tha7b
བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ནང་དུ་བྱུག་པར་བྱའོ། །དགེ་སློང་རྣམས་ཀྱིས་དྲང་ཐད་དུ་བྱུགས་པ་དང ། ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། སྔས་དང་ཉེ་བའམ། རྐང་པ་དང་ཉེ་བར་བྱུག་པར་བྱ་ཞིང ། དྲི་ཞིམ་པོ་ཐམས་ཅད་མིག་ལ་ཕན་པས་དུས་དུས་སུ་བསྣམ་པར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་ཆུ་སྲིན་བྱིས་པ་གསོད་ཀྱི་རི་ལ་འཇིགས་འཇིགས་ལྟའི་ཚལ་རི་དྭགས་ཀྱི་ནགས་ན་བཞུགས་སོ། །ཇི་ཙམ་ན་རྒྱལ་བུ་གཞོན་ནུ་རྟོགས་བྱེད་ཀྱིས་ཁང་བཟང་པདྨ་རིས་བྱེད་དུ་བཅུག་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་གདུགས་ཚོད་ལ་སྤྱན་དྲངས་ཏེ་བཅོམ་ལྡན་འདས་ཁང་བཟང་པདྨའི་རིས་སུ་དགེ་སློང་གི་དགེ་འདུན་གྱི་གུང་ལ་གདན་བཤམ་པ་ལ་བཞུགས་སོ། །ཉེ་དགའ་བོ་ཟན་ཟ་བའི་ཚེ་ལག་པས་ཀ་བ་ལ་བསྣུན་པ་དང ། ཁང་བཟང་པདྨ་རིས་གཡོས་པར་གྱུར་ཏོ། །འབྲིམ་མཁན་རྣམས་ཀྱིས་སྨྲས་པ། འཕགས་པ། རྒྱལ་བུ་རྟོགས་བྱེད་ཀྱིས་ཁང་བཟང་པདྨ་རིས་ཚོན་བརྒྱ་རྩ་གཅིག་གིས་བཀྲ་བར་བྱས་པ། ཁྱེད་ཀྱིས་གཞིག་གམ་ཅི། ཉེ་དགའ་བོས་སྨྲས་པ། བཀྲེན་པ། རྟོགས་བྱེད་འདི་ལ་ལྷག་པར་ཆགས་པས་དུས་བྱས་ནས་གར་སྐྱེ་གཏོལ་མེད་དོ། །ཁྱེད་ཀྱང་འདི་ལ་ལྷག་པར་ཆགས་པས་དུས་བྱས་ནས་ཡི་དྭགས་ཝ་བ་ཅན་རྣམས་ཀྱི་ནང་དུ་སྐྱེ་བར་འགྱུར་རོ། །དེ་དག་ཁ་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱི་
Tha8a
༄#། །དགོངས་པ་ཉེས་དམིགས་གང་ཅུང་ཟད་བྱུང་བ་ནི། དགེ་སློང་དག་ཀ་བ་ལ་ལག་པས་བསྣུན་པ་ལས་གྱུར་གྱི། དེ་ལྟ་བས་ན། དགེ་སློང་གིས་ལག་པས་ཀ་བ་ལ་བསྣུན་པར་མི་བྱའོ། །བསྣུན་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་ཀ་བ་ལ་ལག་པས་བསྣུན་པར་མི་བྱ་ཞེས་བཀའ་སྩལ་པ་དང ། དྲུག་སྡེ་རྣམས་ཁུ་ཚུར་དང ། གྲུ་མོ་དང ། ཕྲག་པ་དང ། མགོ་དང ། རྩིབ་ལོགས་དང ། རྒྱབ་དང ། རྐེད་པ་དང ། བརླ་དང ། པུས་མོ་དང ། བྱིན་པ་དང ། རྐང་པ་དང ། དབྱུག་པ་དང ། བོང་བ་དང ། གཞན་གྱིས་བསྣུན་པར་བྱེད་པ་ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། གང་གིས་ཀྱང་བསྣུན་པར་མི་བྱའོ། །དྲུག་སྡེ་རྣམས་རྩིག་པ་དང ། ས་དང ། གཞན་ལ་སྣུན་པར་བྱེད་པ་དང ། བཅོམ་ལྡན་འདས་ཀྱིས་བཀའ་སྩལ་པ། གཞན་ལ་ཡང་གང་དག་གིས་བསྣུན་པར་མི་བྱའོ། །སྣུན་ན། འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་སྔ་དྲོ་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་པ་དང ། དེ་རྣམས་ཀྱིས་བྲམ་ཟེ་ཞིག་ཚངས་པའི་སྐུད་པ་ཐོགས་ཏེ་སློང་མོ་ལ་རྒྱུ་ཞིང ། དེས་བཟའ་བ་དང ། བཅའ་བ་ཡང་མང་དུ་རྙེད་པ་མཐོང་ནས་དྲུག་སྡེ་རྣམས་ཀྱིས་སྨྲས་པ། དགའ་བོ་ཉེ་དགའ་བོ། ཐབས་འདི་ནི། བཟང་པོ་ཞིག་སྟེ། བདག་ཅག་ཀྱང་དེ་ལྟ་བུ་བྱའོ། །ཞེས་དེ་དག་ཕྱི་དེ་ཉིན་ཚངས་པའི་
Tha8b
སྐུད་པ་ཐོགས་ཏེ་བསོད་སྙོམས་ལ་ཞུགས་པ་མ་དད་པ་རྣམས་ཀྱིས་མཐོང་ནས། འཕྱ་ཞིང་གུས་པར་སྨྲའོ། །གུས་པར་སྨྲའོ། །ཞེས་སྨྲས་པ་དང ། དྲུག་སྡེ་རྣམས་ཀྱིས་སྨྲས་པ། བཀྲེན་པ། ཁྱེད་ཀྱིས་གུས་པར་སྨྲ་བར་བྱ་བ་གང་དག་ཡིན་པ་དང ། ཕྱག་བྱ་བ་གང་དག་ཡིན་པ་འདི་ཡང་མི་ཤེས་སམ། དེ་དག་གིས་སྨྲས་པ། འདི་ལ་ཅི་ཞིག་འཚལ་བར་བགྱི། བྲམ་ཟེ་རྒན་པ་རྒན་པ་རྣམས་ནི། གུས་པར་སྨྲ་བར་བྱ་བ་ཡིན་ལ། དགེ་སློང་རྣམས་ནི། ཕྱག་བྱ་བ་ཡིན་ན། དེ་ཅིའི་ཕྱིར་ཁྱེད་དགེ་སློང་རྣམས་ལ་གུས་པར་སྨྲ་བར་བྱེད་ཀྱི། ཕྱག་མ་ཡིན། འཕགས་པ་དག་།བདག་ཅག་གིས་ཁྱེད་བྲམ་ཟེ་ལགས་པར་འཚལ་གྱི། དགེ་སློང་དུ་ནི་མ་ལགས་སོ། །དེ་ལྟ་ལགས་པས་བདག་ཅག་གིས་མ་འཚལ་གྱི། བཟོད་པར་གསོལ་ལོ། །ཞེས་བྱས་པ་དང ། དེ་དག་ཅང་མི་སྨྲ་བར་འདུག་གོ་།སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་ནི། དགེ་སློང་རྣམས་ཚངས་པའི་སྐུད་པ་ཐོགས་པ་ལས་གྱུར་གྱི། དེ་ལྟ་བས་ན། དགེ་སློང་གིས་ཚངས་པའི་སྐུད་པ་གདགས་པར་མི་བྱའོ། །འདོགས་ན། འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་སྔ་དྲོ་ཤམ་ཐབས་དང་ཆོས་གོས་བགོས། ལྷུང་བཟེད་ཐོགས་ཏེ་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་པ་ན། དེ་དག་གིས་བྲམ་ཟེ་དྲི་དང ། མེ་ཏོག་
Tha9a
༄#། །གིས་བརྒྱན་པ་ཚོན་སྣ་ལྔ་པའི་སྐུད་པས་ལག་པ་བཅིངས་པ་ཞིག་དུས་སྟོན་ཟོས་ནས་དབང་པོ་ཚིམ་སྟེ་ཁྱིམ་ནས་བྱུང་བ་མཐོང་བ་དང ། དེ་དག་གིས་སྨྲས་པ། དགའ་བོ་ཉེ་དགའ་བོ། ཐབས་འདི་ནི། བཟང་པོ་ཞིག་སྟེ། བདག་ཅག་ཀྱང་འདི་བཞིན་བྱའོ། །ཞེས་དེ་དག་ཕྱི་དེ་ཉིན་ཚོན་སྣ་ལྔ་པའི་སྐུད་པས་ལག་པ་བཅིངས་ནས་བསོད་སྙོམས་ལ་ཞུགས་པ་བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་འཕྱ་ཞིང ། གུས་པར་སྨྲའོ། །གུས་པར་སྨྲའོ། །ཞེས་སྨྲས་པ་དང ། དྲུག་སྡེ་རྣམས་ཀྱི་སྨྲས་པ། བཀྲེན་པ། ཁྱེད་ཀྱིས་གུས་པར་སྨྲ་བར་བྱ་བ་གང་དག་ཡིན་པ་དང ། ཕྱག་བྱ་བ་གང་དག་ཡིན་པ་འདི་ཡང་མི་ཤེས་སམ། དེ་དག་གིས་སྨྲས་པ། འདི་ལ་ཅི་ཞིག་འཚལ་བར་བགྱི། བྲམ་ཟེ་རྒན་པ་རྒན་པ་རྣམས་ནི། གུས་པར་སྨྲ་བར་བྱ་བ་ཡིན་ལ། དགེ་སློང་རྣམས་ནི། ཕྱག་བྱ་བ་ཡིན་ན། དེ་ཅིའི་ཕྱིར་ཁྱེད་དགེ་སློང་རྣམས་ལ་གུས་པར་སྨྲ་བ་བྱེད་ཀྱི། ཕྱག་མ་ཡིན། འཕགས་པ་དག་།བདག་ཅག་གིས་ཁྱེད་བྲམ་ཟེ་ལགས་པར་འཚལ་གྱི། དགེ་སློང་དུ་ནི་མ་ལགས་སོ། །དེ་ལྟ་ལགས་པས་བདག་ཅག་གིས་མ་འཚལ་གྱི། བཟོད་པར་གསོལ་ལོ། །ཞེས་བྱས་པ་དང ། དེ་དག་ཅང་མི་སྨྲ་བར་འདུག་གོ་།སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་ནི། དགེ་སློང་རྣམས་ཚོན་སྣ་ལྔ་པའི་སྐུད་པས་ལག་པ་འཆིང་བ་ལས་གྱུར་གྱི། དེ་ལྟ་བས་ན། དགེ་སློང་གིས་ཚོན་སྣ་ལྔ་པའི་
Tha9b
སྐུད་པས་ལག་པ་བཅིང་བར་མི་བྱའོ། །འཆིང་ན། འགལ་ཆབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་ཚོན་སྣ་ལྔ་པའི་སྐུད་པས་ལག་པ་བཅིང་བར་མི་བྱའོ། །ཞེས་བཀའ་སྩལ་པ་དང ། དགེ་སློང་ནད་པ་གཞན་ཞིག་སྨན་པའི་དྲུང་དུ་སོང་སྟེ་བཞིན་བཟང ། ཁོ་བོ་ལ་ནད་འདི་ལྟ་བུ་བྱུང་ན། སྨན་སྟོན་ཅིག་ཅེས་བྱས་པ་དང ། དེས་སྨྲས་པ། འཕགས་པ། སྐུད་པ་ལ་གསང་སྔགས་དག་གིས་བཟླས་བརྗོད་བྱས་ཏེ་ལག་པ་ལ་བཅིངས་ན། ཁྱོད་འཚོ་བར་འགྱུར་རོ། །དེས་སྨྲས་པ། བཞིན་བཟང ། བཅོམ་ལྡན་འདས་ཀྱིས་མ་གནང་ངོ ། །འཕགས་པ། ཁྱོད་ཀྱི་སྟོན་པ་ནི། ཐུགས་རྗེ་ཅན་ཡིན་པས། གནང་བར་འགྱུར་རོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི། སྨན་པའི་ལུང་གིས་སྐུད་པ་བཅིང་བར་བྱའོ། ། བཅོམ་ལྡན་འདས་ཀྱིས་སྨན་པའི་ལུང་གིས་སྐུད་པ་བཅིང་བར་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ལག་པ་གཡས་པའི་རྩེ་མོ་ལ་འཆིང་སྟེ་ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལག་པ་གཡས་པའི་རྩེ་མོ་ལ་བཅིང་བར་མི་བྱའོ། །དེ་རྣམས་ལག་པ་གཡས་པའི་དཔུང་པ་ལ་འཆིང་སྟེ་ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ལག་པ་གཡས་པའི་དཔུང་པ་ལ་བཅིང་བར་མི་བྱའོ། །དེ་རྣམས་ལག་པ་གཡོན་པའི་རྩེ་མོ་ལ་འཆིང་སྟེ་ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ལག་པ་
Tha10a
༄#། །གཡོན་པའི་རྩེ་མོ་ལ་བཅིང་བར་མི་བྱའི། འོན་ཀྱང་ལག་པ་གཡོན་པའི་དཔུང་པ་ལ་བཅིང་བར་བྱའོ། །དགེ་སློང་རྣམས་ནད་སོས་པར་གྱུར་ནས་སྐུད་པ་བབ་བབ་ཏུ་འདོར་བ་མི་མ་ཡིན་པ་རྣམས་འཕྱ་སྟེ། འཕགས་པ་དག་།ངེད་ཀྱིས་སོས་པར་བྱས་ན། ད་མ་གུས་པར་བྱེད་པ་ལྟ། སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བབ་བབ་ཏུ་དོར་བར་མི་བྱ་སྟེ། གལ་ཏེ་ནད་མ་བྱང་ན། ཆོས་གོས་ཀྱི་མཐའམ། རྒྱ་ཅང་ལ་བཅིང་བར་བྱའོ། །འོན་ཏེ་ཐམས་ཅད་ཀྱི་ཐམས་ཅད་དུ་སོས་པར་གྱུར་ན། ཀ་བའི་སེར་གའམ། རྩིག་པའི་གསེབ་ཏུ་གཞུག་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་སྔ་དྲོ་ཤམ་ཐབས་དང་ཆོས་གོས་བགོས། ལྷུང་བཟེད་ཐོགས་ཏེ་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་པ་ན་བྲམ་ཟེ་དང ། ཁྱིམ་བདག་རྣམས་ཀྱི་རྒྱན་སློ་མའི་ནང་དུ་བཞག་པ་དྲུག་སྡེ་རྣམས་ཀྱིས་རྐང་རྒྱན་དང ། ལག་རྒྱན་དག་ཐོགས་ནས་སྨྲས་པ། དགའ་བོ་ཉེ་དགའ་བོ། ཇི་ལྟར་མཛེས་སམ། བྲམ་ཟེ་དང ། ཁྱིམ་བདག་གིས་སྨྲས་པ། འཕགས་པ། ཁྱེད་མགོ་ནི། བྱི། མཆན་ཁུང་ནི། སྤུན་ན། འདི་ལ་ལུས་མཛེས་པ་ཅི་ཞིག་ཡོད། གདོན་མི་ཟ་བར་དགེ་སྦྱོང་ཁྱོད་འདོད་པའི་ཡོན་ཏན་དག་གིས་གཟིར་བར་གྱུར་ཏོ། །ཞེས་བྱས་པ་དང ། དེ་རྣམས་ཅང་མི་སྨྲ་བར་འདུག་གོ་།སྐབས་དེ།
Tha10b
དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་ནི། དགེ་སློང་རྣམས་ལག་རྒྱན་དང ། རྐང་རྒྱན་དག་གིས་བདག་ཉིད་བརྒྱན་པ་ལས་གྱུར་གྱི། དེ་ལྟ་བས་ན། དགེ་སློང་གིས་ལག་རྒྱན་དང ། རྐང་རྒྱན་གྱིས་བདག་ཉིད་བརྒྱན་པར་མི་བྱའོ། །བརྒྱན་ན། འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གཙུག་ལག་ཁང་དུ་མ་བྱིན་པར་ལེན་པ་རྣམས་ཀྱིས། དགེ་འདུན་གྱི་མཛོད་དང ། གང་ཟག་གི་གནས་ཁང་དག་ནས་བརྐུས་སོ། །དགེ་སློང་གཞན་དག་ཅིག་གི་ཡང་སྟོར་ན། བདག་ཅག་གི་སྟོར་ནས་ཇི་ཙམ་ལོན་པ་མ་ཚོར་རོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི་།རྒྱ་བཅང་བར་བྱའོ། །བཅོམ་ལྡན་འདས་ཀྱིས་རྒྱ་བཅང་བར་བྱའོ། །ཞེས་བཀའ་སྩལ་པ་དང ། དྲུག་སྡེ་རྣམས་ཀྱིས་གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་བྱས་པ་དང ། སོར་གདུབ་རྒྱ་རྒྱན་སྣ་ཚོགས་ཀྱིས་བརྒྱན་པ་དག་བཅངས་སོ། །དེ་ནས་བྲམ་ཟེ་དང ། ཁྱིམ་བདག་དག་གིས་མཐོང་ནས་ལག་པ་བརྐྱང་སྟེ་སྨྲས་པ། བཞིན་བཟང ། ནད་མེད་ཅིག་།ནད་མེད་ཅིག་།དེ་དག་གིས་སྨྲས་པ། འཕགས་པ། འདི་ཅི་ལགས། བཞིན་བཟང ། བཅོམ་ལྡན་འདས་ཀྱིས་རྒྱ་གནང་ངོ ། །དེ་དག་འཕྱ་སྨོད་ཁ་ཟེར་ཞིང ། དགེ་སྦྱོང་
Tha11a
༄#། །ཤཱཀྱའི་བུ་རྣམས་ཀྱི་དགེ་སྦྱོང་གི་ཚུལ་ཉམས་ཤིང་ཚངས་པའི་ཚུལ་ཉམས་ཏེ། འདི་ནི། དེ་ལྟར་རྒྱ་ལ་ཐ་སྙད་འདོགས་ཤིང ། རྒྱན་རྣམས་ཀྱིས་བདག་ཉིད་བརྒྱན་པར་བྱེད་དོ། །སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་བྱས་པའི་རྒྱ་བཅང་བར་མི་བྱ། སོར་གདུབ་རྒྱ་ཡང་བཅང་བར་མི་བྱའི། འོན་ཀྱང་རྒྱ་ལྔ་པོ་ར་གན་དང ། ཟངས་ལས་བྱས་པ་དང ། འཁར་བ་ལས་བྱས་པ་དང ། བ་སོ་ལས་བྱས་པ་དང ། རཝ་ལས་བྱས་པ་བཅང་བར་བྱའོ། །དྲུག་སྡེ་རྣམས་ཀྱིས་རྒྱ་ལ་སྐྱེས་པ་དང ། བུད་མེད་ཉལ་པོ་བྱེད་པ་བྲིས་པ་དང ། བྲམ་ཟེ་དང ། ཁྱིམ་བདག་རྣམས་ཀྱིས་སྨྲས་པ། འཕགས་པ། ཅི་དགེ་སྦྱོང་ཁྱེད་འདོད་པའི་ཡོན་ཏན་དག་གིས་གཟིར་ཏམ། གནས་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། རྒྱ་ནི། གཉིས་ཏེ། དགེ་འདུན་གྱི་དང ། གང་ཟག་གིའོ། །དེ་ལ་དགེ་འདུན་གྱི་ནི། དབུས་སུ་འཁོར་ལོ་བྲིས་ལ། གློ་གཉིས་སུ་རི་དྭགས། འོག་ཏུ་གཙུག་ལག་ཁང་གི་བདག་པོའི་མིང་བྲི་བར་བྱའོ། །གང་ཟག་གི་ནི། རུས་པའི་ཀེང་རུས་སམ། མགོའི་ཐོད་པ་བྲི་བར་བྱའོ། །སྡོམ་ནི། སེན་མོ་འབྲེག་དང་བྱི་དོར་དང ། ། མྲ་དང་ནི་སྐྱུ་རུ་ར། །ལྷུང་བཟེད་བརྒྱད་པོ་བཀག་པ་དང ། །རྗེས་སུ་གནང་བ་གཉིས་ཡིན་ནོ། །
Tha11b
སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཁྱིམ་བདག་མགོན་མེད་ཟས་སྦྱིན་གྱི་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་རྒྱལ་བུ་རྒྱལ་བྱེད་ཀྱི་ཚལ་ཕུལ་བ་དེའི་ཚེ་དེས་འབྲེག་མཁན་གྱི་མི་ལ་སྨྲས་པ། ཀྱེ་སྐྱེས་བུ་རྒྱལ་བུ་རྒྱལ་བྱེད་ཀྱི་ཚལ་དུ་སོང་ལ། འཕགས་པ་རྣམས་ཀྱི་སྐྲ་དང་ཁ་སྤུ་བྲེགས་ཤིག་།དེ་རྒྱལ་བུ་རྒྱལ་བྱེད་ཀྱི་ཚལ་དུ་སོང་བ་དང ། དྲུག་སྡེ་རྣམས་ཀྱི་ཀུན་ཏུ་སྤྱོད་པ་ནི། དྲུག་སྡེ་གང་ཡང་རུང་བ་ཞིག་གིས་རྒྱལ་བུ་རྒྱལ་བྱེད་ཀྱི་ཚལ་གྱི་སྒོ་མི་སྟོང་པ་ཡིན་ཏེ། ཚེ་དང་ལྡན་པ་ཉེ་དགའ་བོ། རྒྱལ་བུ་རྒྱལ་བྱེད་ཀྱི་ཚལ་ན་འཆག་ཅིང་འདུག་པ་དེས་དེ་རྒྱང་རིང་པོ་ནས་མཐོང་ནས་སྨྲས་པ། བཞིན་བཟང ། འོངས་པ་ལེགས་སོ། །འོངས་པ་ལེགས་སོ། །ཁྱོད་ཟླ་བ་ལྟ་བུར་གནས་ན། རིང་མོ་ཞིག་ལོན་ཏེ་གང་ནས་འོངས། དེས་སྨྲས་པ། འཕགས་པ། ཁྱིམ་བདག་གིས་འཕགས་པ་རྣམས་ཀྱི་སྐྲ་དང་ཁ་སྤུ་བྲེགས་པའི་སླད་དུ་འདིར་བཏང་ངོ ། །དེས་སྨྲས་པ། སེན་མོ་ལེགས་པར་འབྲེག་ཤེས་སམ། འཕགས་པ། འདི་ཉིད་བདག་གི་བཟོ་ལགས་སོ། །བལྟའི་ཚུར། དེ་ཉིད་ཉེ་བར་འོངས་པ་དང་ཉེ་དགའ་བོས་ལག་པ་བརྐྱང་ངོ ། །འབྲེག་མཁན་གྱིས་སྨྲས་པ། འཕགས་པ། ཅི་འདྲ་བར་བྲེག ། བཞིན་བཟང ། འབྲུའི་རྩེ་མོ་ལྟར་བྲེགས་ཤིག་།དེས་འབྲུའི་རྩེ་མོ་ལྟར་བྲེགས་པ་དང ། དེས་སྨྲས་པ། ད་ནི། ར་བའི་ལྕོག་ལྟ་བུ་དང ། སྤུ་གྲིའི་སོ་དང ། སྟེའུ་ཀ་དང ། ཟླ་བ་ཆེས་པ་ལྟར་གྱིས་ཤིག་།དེས་
Tha12a
༄#། །དེ་ཇི་ལྟ་ཇི་ལྟར་བསྒོ་བ་དེ་ལྟ་དེ་ལྟ་བུར་བྱས་པ་དང་མཇུག་ཏུ་སྨྲས་པ། བཀྲེན་པ། ཁྱོད་ཀོ་ཅུང་ཟད་ཀྱང་མི་ཤེས་པ་ཞིག་།འདི་ཁོ་ན་ལྟར་མཉན་པར་གྱིས་ལ་སོང་ཞིག་།ཅེས་དེས་དེ་ཉི་མ་ནུབ་ཀྱི་བར་དུ་མ་བཏང་ངོ ། །དེ་ཉིད་མ་ནུབ་ནས་ཁྱིམ་བདག་མགོན་མེད་ཟས་སྦྱིན་གྱི་དྲུང་དུ་སོང་བ་དང ། མགོན་མེད་ཟས་སྦྱིན་གྱིས་སྨྲས་པ། ཀྱེ་སྐྱེས་བུ། ཁྱོད་ཀྱིས་འཕགས་པ་མང་པོ་ཇི་སྙེད་ཅིག་གི་མགོ་དང་ཁ་སྤུ་བྲེགས། བདག་གིས་འཕགས་པ་རྣམས་ཀྱི་སྐྲ་དང་ཁ་སྤུ་ག་ལ་བྲེགས། དགེ་སློང་གཟུ་ལུམས་ཅན་ཉེ་དགའ་བོས་བདག་བསྒོར་ནས་སེན་མོ་འབྲུའི་རྩེ་མོ་དང ། ར་བའི་ལྕོག་དང ། སྤུ་གྲིའི་སོ་དང ། སྟེའུ་ཀ་དང ། ཟླ་བ་ཚེས་པ་ལྟ་བུར་གྱིས་ཤིག་ཅེས་པའི་རྣམ་པ་ཐམས་ཅད་བདག་གིས་བགྱིས་པ་དང ། དེ་ནས་འདི་སྐད་ཅེས། བཀྲེན་པ། ཁྱོད་ཀོ་ཅུང་ཟད་ཀྱང་མི་ཤེས་པ་ཞིག། འདི་ཁོ་ན་ལྟར་མཉམ་པར་གྱིས་ལ་སོང་ཞིག་ཅེས་མཆི་ནས་ད་གཟོད་ཁོ་ན་ཤོར་ན། ཅི་ཞིག་བགྱི། ཁྱིམ་བདག་མགོན་མེད་ཟས་སྦྱིན་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་རྣམས་ལ་ཉེ་བར་ཞི་བ་མེད་པ་ལྟ་ཞེས་འཕྱ་བ་ལ་ཞུགས་སོ། །སྐབས་དེ། དགེ་སློང་རྣམས་ཀྱིས་ཐོས་ནས། བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་ནི། དགེ་སློང་རྣམས་སེན་མོ་འབྲེག་པ་ལས་གྱུར་གྱི། དེ་ལྟ་བས་ན། དགེ་སློང་གིས་སེན་མོ་བྲེག་པར་མི་བྱའོ། །འབྲེག་ན། འགལ་ཚབས་
Tha12b
ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་སེན་མོ་བྲེག་པར་མི་བྱའོ། །ཞེས་བཀའ་སྩལ་པ་དང ། དགེ་སློང་རྣམས་སེན་མོ་རིང་པོ་རིང་པོར་འདུག་པ་བྲམ་ཟེ་དང ། ཁྱིམ་བདག་དག་གིས་མཐོང་ནས་སྨྲས་པ། འཕགས་པ་དག། ཅི་སྟེ་སེན་མོ་རིང་པོ་རིང་པོར་འཇོག་།བཞིན་བཟང ། བཅོམ་ལྡན་འདས་ཀྱིས་མ་གནང་ངོ ། །འཕགས་པ། ཅི། ཁྱེད་སེན་མོ་བཅངས་པས་དག་པར་འགྱུར་རམ། སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྔ་མ་ནི། བཅས་པའོ། །འདི་ནི། གནང་བ་ཡིན་ཏེ། དེ་ལྟ་བས་ན། གནང་གི། སེན་མོ་རྣམ་པ་གཉིས་པོ་སྤུ་གྲིའི་སོ་དང ། སྟེའུ་ཀ་ལྟ་བུར་བྲེག་པར་བྱའོ། །བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།། གང་གི་ཚེ་ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཞེས་བྱ་བ་ཐམས་ཅད་དེ་ཁོ་ན་བཞིན་ནོ། །ཁྱོད་སེན་མོ་འཆོས་ཤེས་སམ། འཕགས་པ། ཇི་ལྟ་བུར་བགྱི། སེར་པོ་དང ། དམར་པོ་དང ། དཀར་པོ་དང ། གསེར་གྱི་ཁ་དོག་ལྟ་བུར་གྱིས་ཤིག་ཅེས་པའི་རྣམ་པ་ཐམས་ཅད་བདག་གིས་བགྱིས་པ་དང ། དེ་ནས་འདི་སྐད་ཅེས། བཀྲེན་པ། ཁྱོད་ཀོ་ཅུང་ཟད་ཀྱང་མི་ཤེས་པ་ཞིག་།འདི་ཁོ་ན་ལྟར་མཉམ་པར་གྱིས་ལ་སོང་ཞིག་།ཅེས་མཆི་ནས་ད་གཟོད་ཁོ་ན་ཤོར་ན། ཅི་ཞིག་བགྱི། ཁྱིམ་བདག་མགོན་མེད་ཟས་སྦྱིན་ལེགས་པར་གསུངས་པའི་ཆོས་འདུལ་
Tha13a
༄#། །བ་ལ་རབ་ཏུ་བྱུང་བ་རྣམས་ལ་ཉེ་བར་ཞི་བ་མེད་པ་ལྟ་ཞེས་འཕྱ་བ་ལ་ཞུགས་སོ། །སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་ནི། དགེ་སློང་རྣམས་སེན་མོ་དག་བྱི་དོར་བྱེད་པ་ལས་གྱུར་གྱི། དེ་ལྟ་བས་ན། དགེ་སློང་གིས་སེན་མོ་དག་བྱི་དོར་མི་བྱའོ།། བྱེད་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས། དགེ་སློང་གིས་སེན་མོ་དག་བྱི་དོར་མི་བྱའོ། །ཞེས་བཀའ་སྩལ་པ་དང ། དགེ་སློང་ཚོན་རྩིའི་ལས་དང ། ལྷུང་བཟེད་ཀྱི་ལས་བྱེད་པ་རྣམས་ཀྱི་སེན་མོ་དྲི་མ་ཆགས་ལ་མདོག་མི་སྡུག་པར་གྱུར་ཅིང ། དེ་རྣམས་སེན་མོ་དེ་འདྲ་བ་ཁོ་ནར་བསོད་སྙོམས་ལ་འཇུག་གོ་།བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་སྨྲས་པ། འཕགས་པ་དག་།ཁྱེད་ཅིའི་ཕྱིར་སེན་མོ་འདི་ལྟ་བུ་དྲི་མ་ཆགས་ཤིང་མདོག་མི་སྡུག་།དེ་དག་གིས་བསྙད་པ་དང ། དེ་རྣམས་ཀྱིས་སྨྲས་པ། འཕགས་པ། ཅིའི་ཕྱིར་དྲི་མ་མི་དབྱི། བཅོམ་ལྡན་འདས་ཀྱིས་མ་གནང་ངོ ། །འཕགས་པ། ཁྱེད་ཅི་དྲི་མའི་འདམ་བཅངས་པས་འདག་པར་འགྱུར་རམ། སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དྲི་མ་དབྱི་བའི་ཕྱིར་སེན་མོ་བཞར་བར་བྱའོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལནད་ཀ་གནས་པ་ན་བཞུགས་སོ། །རྒྱལ་པོ་གཟུགས་ཅན་
Tha13b
སྙིང་པོའི་ཀུན་ཏུ་སྤྱོད་པ་ནི། དུས་ཀྱིས་གསར་ཐོག་འབྲུ་གསར་པའམ། །འབྲས་བུ་གསར་པ་གང་ཅི་ཡང་རུང ། དེ་དག་དང་པོར་དགེ་འདུན་ལ་འབུལ་ལོ། །དེའི་འོག་ཏུ་བདག་ཉིད་ཟའོ། །དེའི་བློན་པོ་རྣམས་ཀྱིས་ཨ་མྲའི་ཤིང་ཐོག་དག་ཕུལ་བ་དང ། དེས་སྨྲས་པ། སོང་ལ་འཕགས་པ་རྣམས་ལ་ཕུལ་ཅིག་།དེ་དག་གིས་བགད་པ་དང ། དེས་སྨྲས་པ། ཤེས་ལྡན་དག་།ཅི་ལ་དགོད། དེ་དག་གིས་སྨྲས་པ། ལྷ། ཅི་ཁྱེད་ད་ནི། འཕགས་པ་རྣམས་ལ་དང་པོར་འབུལ་སྙམ་དགོངས་ཀྱི། བདག་ཅག་གིས་ཆེས་སྔར་འཕགས་པ་རྣམས་ལ་ཕུལ་བར་ནི། མ་ལགས་སམ། དེས་སྨྲས་པ། གལ་ཏེ་དེ་ལྟ་ན། ངས་འཕགས་པ་རྣམས་ལ་སྟོང་གི་ཀུན་དགའ་ར་བ་ཉིད་ཕུལ་ལོ། །ལྷ། ལེགས་ཏེ་རྗེས་སུ་ཡི་རང་ངོ ། །དེས་ཕྱོགས་བཞིའི་དགེ་སློང་གི་དགེ་འདུན་གྱི་ཕྱིར་སྟོང་གི་ཀུན་དགའ་ར་བ་ཕུལ་ནས་དེར་དུས་སྟོན་ཀྱང་བཙུགས་སོ།། དེ་ཇི་ལྟར་ཡུལ་མ་ག་དྷ་ན་གནས་པའི་སྐྱེ་བོའི་ཚོགས་དུས་སྟོན་ལ་ལྟ་བར་འོངས་པ་ཨ་མྲའི་ཤིང་ཐོག་སྨིན་པ་རྣམས་ཀྱིས་ཚིམ་པར་གྱུར་པ་དེ་ལྟར་ཤིང་ཐོག་རྒྱས་པར་གྱུར་ཏོ། །དེ་དགེ་འདུན་ལ་ཕུལ་ལོ། །ཞེས་དགེ་སློང་རྣམས་ཀྱིས་ཨ་མྲའི་འབྲས་བུ་དག་མ་སྨིན་པ་ཉིད་དུ་ཟོས་སོ། །ཇི་ཙམ་ན་མཚམས་ཀྱི་རྒྱལ་པོ་ཞིག་ལ་ཨ་མྲ་དག་དགོས་པར་གྱུར་ནས་དེས་རྒྱལ་པོ་གཟུགས་ཅན་སྙིང་པོ་ལ་ཕོ་ཉ་བཏང་སྟེ། གྲོགས་པོ། བདག་ལ་ཨ་མྲ་དག་དགོས་ཀྱི། བསྐུར་བའི་རིགས་སོ། །ཞེས་བྱས་པ་དང ། དེས་ཕོ་ཉ་དེ་ལ་སྨྲས་པ་དང ། ཀྱེ་སྐྱེས་བུ། ངས་སྟོང་གི་ཀུན་དགའ་ར་བ་དེ། འཕགས་པའི་དགེ་
Tha14a
༄#། །འདུན་ལ་ཕུལ་གྱི། སོང་ལ་འཕགས་པའི་དགེ་འདུན་རྣམས་ལ་སློང་ཤིག་།དེ་འོད་མའི་ཚལ་དུ་སོང་བ་དང ། དྲུག་སྡེ་རྣམས་ཀྱི་ཀུན་ཏུ་སྤྱོད་པ་ནི། རྟག་ཏུ་ཀུན་དགའ་ར་བའི་སྒོ་མི་སྟོང་པར་བྱེད་པ་ཡིན་ཏེ། ཚེ་དང་ལྡན་པ་ཉེ་དགའ་བོ་འོད་མའི་ཚལ་གྱི་སྒོ་ན་འཆག་ཅིང་འདུག་གོ་།དེ་དེའི་དྲུང་དུ་སོང་ནས་ཕྱག་འཚལ་ཏེ་དེས་སྨྲས་པ། རྒྱལ་པོ་ཆེ་གེ་མོ་ཞིག་གིས་ཨ་མྲའི་ཆེད་དུ་ཁྱེད་ཀྱི་ཐད་དུ་བཏང་ན་དེའི་སླད་དུ་ཨ་མྲ་དག་སྩལ་བའི་རིགས་སོ། །དེས་སྨྲས་པ། ཀྱེ་སྐྱེས་བུ། སོང་ལ་ཨ་མྲ་ཇི་ཙམ་དགོས་པ་དེ་ཙམ་ལོངས་ཤིག་།དེ་སོང་ནས་ཨ་མྲའི་ཤིང་རྣམས་ཀྱི་དྲུང་དུ་བལྟས་ན་མི་སྣང་སྟེ། དེ་སླར་ལོག་ནས་སྨྲས་པ། འཕགས་པ། མ་མཆིས་སོ། །ཉེ་དགའ་བོས་དེ་ཁྲིད་ནས་ཀུན་དགའ་ར་བར་ཞུགས་ཏེ་ཀུན་དགའ་ར་བ་ཐམས་ཅད་བསྐོར་ནས་སྨྲས་པ། ཀྱེ་སྐྱེས་བུ། ཤིང་འདི་ལ་འཛེགས་ཤིག་།དེས་འཛེགས་ནས་མ་མཐོང་བ་དང ། ཉེ་དགའ་བོས་སྨྲས་པ། ཀྱེ་སྐྱེས་བུ། ཤར་གྱི་ཡལ་གར་སོང ། ལྷོ་དང ། ནུབ་ཀྱི་ཡལ་གར་སོང ། དེ་ཐམས་ཅད་དུ་སོང་ནས་སྐྱོ་བར་གྱུར་ཏེ་བབས་ནས་སྨྲས་པ། འཕགས་པ། ཅི་ཀུན་དགའ་ར་བ་འདི་ལོ་འདི་ལ་འབྲས་བུ་མ་ཆགས་སམ། བཞིན་བཟང ། ཇི་ལྟར་ལོ་རེ་ལོ་རེ་ཞིང་ཤིང་ཐོག་ཡོད་པ་དེ་ལྟར་འདི་འབྲས་བུ་ཆགས་སོ། །འཕགས་པ། ཅི་རླུང་དང་ཆར་པས་བླགས་སམ། བཞིན་བཟང ། རླུང་དང་ཆར་པས་མ་བླགས་ཀྱི། འོན་ཀྱང་ཁོ་བོ་ཅག་གིས་ཨ་མྲའི་འབྲས་བུ་དག་མ་སྨིན་པ་ཉིད་དུ་འཆོས་སོ། །
Tha14b
དེ་སླར་ལོག་ནས་རྒྱལ་པོ་གཟུགས་ཅན་སྙིང་པོ་ལ་གསོལ་པ། ལྷ། འཕགས་པ་རྣམས་ཀྱི་ཞལ་ནས། ཁོ་བོ་ཅག་གིས་ཨ་མྲའི་འབྲས་བུ་དག་མ་སྨིན་པ་ཉིད་དུ་འཆོས་སོ། །ཞེས་གསུང་ངོ ། །དེས་སྨྲས་པ། ལེགས་ཏེ། ང་ལ་ལོངས་སྤྱད་པ་ཉིད་དགོས་སོ། །ཞེས་བྱས་པ་དང ། མི་དེ་སླར་སོང་ངོ ། །ཇི་ཙམ་ན་དུས་སྟོན་ལ་བབ་པའི་ཚེ་ཡུལ་མ་ག་དྷ་ན་གནས་པའི་སྐྱེ་བོའི་ཚོགས་འདུས་ནས་དེ་དག་གིས་སྨྲས་པ། འཕགས་པ་དག་།ཅི། སྟོང་གི་ཀུན་དགའ་ར་བ་འདི་ལོ་འདི་ལ་འབྲས་བུ་མ་ཆགས་སམ། བཞིན་བཟང་དག་།ཇི་ལྟར་ལོ་རེ་ལོ་རེ་ཞིང་ཤིང་ཐོག་ཡོད་པ་དེ་ལྟར་འདི་འབྲས་བུ་ཆགས་མོད་ཀྱི། འོན་ཀྱང་ཁོ་བོ་ཅག་གིས་ཨ་མྲའི་འབྲས་བུ་དག་མ་སྨིན་པ་ཉིད་དུ་འཆོས་སོ། །འཕགས་པ་དག་།གང་ན་ཡུལ་མ་ག་དྷ་ན་གནས་པའི་སྐྱེ་བོའི་ཚོགས་ཐམས་ཅད་ཨ་མྲ་སྨིན་པ་དག་གིས་ཚིམ་པར་འགྱུར་བ་དེ་ཁྱོད་ཀྱིས་འབྲས་བུ་མ་སྨིན་པ་ཁོ་ནར་འཆོས་ཏེ། གང་ཁོ་བོ་ཅག་ལ་གནོད་པ་བྱས་པ་ནི། མ་ལེགས་པ་ཞིག་བྱས་སོ། །དེས་སྨྲས་པ། འདི་རྒྱལ་པོས་ཡུལ་མ་ག་དྷ་ན་གནས་པའི་སྐྱེ་བོའི་ཚོགས་ལ་བྱིན་པ་མ་ཡིན་གྱི། འོན་ཀྱང་དགེ་སློང་གི་དགེ་འདུན་ལ་ཕུལ་ཏེ། དེ་ལྟ་བས་ན། ཁོ་བོ་ཅག་གིས་ཇི་ལྟར་འདོད་པ་བཞིན་ཟོས་སོ། །ཁྱེད་ཅི་གཏོགས་ཞེས་བྱས་པ་དང ། དེ་དག་འཕྱ། སྨོད། ཁ་ཟེར་པར་བྱེད་དོ། །སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་ནི། དགེ་སློང་རྣམས་ཨ་མྲ་དག་
Tha15a
༄#། །ཟ་བ་ལས་གྱུར་གྱི། དེ་ལྟ་བས་ན། དགེ་སློང་གིས་ཨ་མྲ་དག་བཟའ་བར་མི་བྱའོ། །དགེ་སློང་ཨ་མྲ་དག་ཟ་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་ཨ་མྲ་དག་བཟའ་བར་མི་བྱའོ། །ཞེས་གསུངས་པ་དང ། བྲམ་ཟེ་དང ། ཁྱིམ་བདག་དད་པ་ཅན་དག་།དགེ་སློང་རྣམས་ལ། ཤིང་ས་ཧ་ཀ་རའི་ཤིང་ཏོག་དག་འབུལ་བ་ན། དགེ་སློང་རྣམས་ཀྱིས་སྨྲས་པ། བཅོམ་ལྡན་འདས་ཀྱིས་མ་གནང་ངོ ། །དེ་དག་གིས་སྨྲས་པ། འཕགས་པ་དག་།གང་གི་ཚེ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བར་མ་གྱུར་པ་ཞེས་བྱ་བ་ནས་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འགྲོའམ། བཞེས་ཤིག་ཅེས་བྱ་བའི་བར་སྔར་བཞིན་ནོ། །སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི་།མཚན་ཉིད་གྲུབ་པ་ཡིན་ནོ། །ཞེས་བྱས་ནས་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །དེ་ལ་མཚན་ཉིད་གྲུབ་པ་ནི། འདི་དག་ཡིན་ཏེ། ཚིག་གུ་ཆགས་པ་རྣམས་སོ། །བྲམ་ཟེ་དང ། ཁྱིམ་བདག་དད་པ་ཅན་གཞན་དག་ཅིག་།དགེ་སློང་རྣམས་ཨ་མྲའི་ཤིང་ཏོག་སྨིན་པ་དག་འབུལ་བ་ན་ཞེས་བྱ་བ་ནས་དེ་བཞིན་དུ་འཇིག་རྟེན་འདི་ནས་འཇིག་རྟེན་ཕ་རོལ་ཏུ་མཆིའམ། བཞེས་ཤིག་ཅེས་བྱ་བའི་བར་ཐམས་ཅད་སྔ་མ་བཞིན་ནོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་
Tha15b
ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི། མཚན་ཉིད་བྱེ་བྲག་ཕྱེད་དོ། །ཞེས་བྱས་ཏེ་བཟའ་བར་བྱའོ། །དེ་ལ་མཚན་ཉིད་བྱེ་བྲག་ཕྱེད་པ་ནི། འདི་དག་ཡིན་ཏེ། ཤ་ཞུགས་པ་རྣམས་སོ། ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་ནད་པ་ཞིག་།སྨན་པའི་དྲུང་དུ་སོང་སྟེ། བཞིན་བཟང ། བདག་འདི་འདྲ་བའི་ནད་ཀྱིས་ཐེབས་ན། སྨན་སྟོན་ཅིག་།དེས་སྨྲས་པ། འཕགས་པ། ཇེ་མར་འཐུང་ལ་སྣུམ་པར་གྱིས་ཤིག་དང ། བཀྲུ་སྨན་སྦྱིན་ནོ། །དེས་མར་འཐུངས་པ་དང ། སྐོམ་པས་གནོད་པར་གྱུར་ཏོ། །སྨན་པ་འོངས་ཏེ་དྲིས་པ། འཕགས་པ། བདེ་བར་འདུག་གམ། དེས་སྨྲས་པ། བཞིན་བཟང ། བདག་སྐོམ་པས་གནོད་དོ། །སྐྱུ་རུ་ར་ཆོངས་ཤིག་།ཅེས་བྱས་པ་དང ། དེས་ལག་ཏུ་བླངས་ཏེ་འདུག་གོ ། ཡང་སྨན་པས་དྲིས་པ། འཕགས་པ། སྐོམ་པ་དང་བྲལ་ལམ། དེས་སྨྲས་པ། བཞིན་བཟང་མ་བྲལ་ལོ། །སྨན་པས་སྨྲས་པ། དེའི་ཚེ་སྐྱུ་རུ་ར་མ་བཅངས་སམ། བཞིན་བཟང ། ཡོད་དེ། འདི་ཡིན་ནོ། །འཕགས་པ། ཁར་ཆོངས་ཤིག་།བཞིན་བཟང ། བཅོམ་ལྡན་འདས་ཀྱིས་མ་གནང་ངོ ། །འཕགས་པ། ཁྱོད་ཀྱི་སྟོན་པ་ནི། ཐུགས་རྗེ་ཅན་ཡིན་པས་གནང་བར་འགྱུར་རོ། །སྐབས་དེ་ཞེས་བྱ་བ་ནས་བཅོམ་ལྡན་འདས་ཀྱིས་བཀའ་སྩལ་པ། ཁར་བཅང་བའི་བར་དུ་ཞེས་བྱ་བའི་བར་དུའོ། །དེས་ཁར་བཅུག་ནས་འདུག་གོ་།ཡང་སྨན་པ་དེ་འོངས་ནས་དྲིས་པ། འཕགས་པ། སྐོམ་པ་དང་བྲལ་ལམ། དེས་སྨྲས་པ། བཞིན་བཟང ། ད་
Tha16a
༄#། །དུང་མ་བྲལ་ལོ། །སྨན་པས་སྨྲས་པ། འཕགས་པ། དེའི་ཚེ་སྐྱུ་རུ་ར་ཁར་མ་བཅངས་སམ། བཞིན་བཟང ། བཅངས་ཏེ་འདུག་པ་འདི་ཡིན་ནོ། །དེས་སྨྲས་པ། འཕགས་པ།་མུར་ཅིག་།གཞན་དུ་ན་སྐོམ་པ་དང་བྲལ་བར་མི་འགྱུར་རོ། །དེས་སྨྲས་པ། བཅོམ་ལྡན་འདས་ཀྱིས་མ་གནང་ངོ ། །འཕགས་པ། ཁྱོད་ཀྱི་སྟོན་པ་ནི། ཐུགས་རྗེ་ཅན་ཡིན་པས་གནང་བར་འགྱུར་རོ། ། སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། མུར་བར་བྱའོ། །མུར་མུར་ནས་བོར་གྱི། མ་མིད་པ་དང ། སྐོམ་པས་ཇེ་གནོད་པར་གྱུར་ཏོ། །ཡང་སྨན་པ་འོངས་ནས་དྲིས་པ། འཕགས་པ། སྐོམ་པ་དང་བྲལ་ལམ། དེས་སྨྲས་པ། བཞིན་བཟང ། ཤིན་ཏུ་གནོད་དོ། །འཕགས་པ། དེའི་ཚེ་སྐྱུ་རུ་ར་མ་མུར་རམ། བཞིན་བཟང ། མུར་ནས་བོར་རོ། །འཕགས་པ། ཅིའི་ཕྱིར་མ་མིད། བཞིན་བཟང ། བཅོམ་ལྡན་འདས་ཀྱིས་དུས་མ་ཡིན་པའི་ཟས་བཀག་གོ་།འཕགས་པ་ཁྱོད་ནི། ནད་པ་ཡིན་ལ། ཁྱོད་ཀྱི་སྟོན་པ་ནི། ཐུགས་རྗེ་ཅན་ཡིན་པས་གནང་བར་འགྱུར་རོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་དག་གནང་གི་།འབྲས་བུ་ལྔ་དུས་སུ་ཡང་རུང ། དུས་མ་ཡིན་པར་ཡང་རུང ། ནད་པ་ཡང་རུང ། མི་ན་བས་ཀྱང་རུང ། བཟའ་བར་བྱ་སྟེ། འདི་ལ་འགྱོད་པར་མི་བྱའོ། །བཅོམ་ལྡན་འདས་ཀྱིས་འབྲས་
Tha16b
བུ་ལྔ་དུས་སུ་ཡང་རུང ། དུས་མ་ཡིན་པར་ཡང་རུང ། ནད་པ་ཡང་རུང ། མི་ན་བས་ཀྱང་རུང་སྟེ། བཟའ་བར་བྱའོ། །ཞེས་གསུངས་པ་དང ། དགེ་སློང་རྣམས་ཀྱིས་འབྲས་བུ་ལྔ་གང་དག་ཡིན་པ་མི་ཤེས་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྐྱུ་རུ་ར་དང ། ་རུ་ར་དང ། བ་རུ་ར་དང ། པི་པི་ལིང་དང ། ན་ལེ་ཤམ་མོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལནད་ཀ་གནས་པ་ན་བཞུགས་སོ། །རྒྱལ་པོའི་ཁབ་ཀྱི་གྲོང་ཁྱེར་ན་ཁྱིམ་བདག་ཤིན་ཏུ་བཟང་པོ་ཞེས་བྱ་བ་ཕྱུག་ཅིང་ནོར་མང་བ། ལོངས་སྤྱོད་ཆེན་པོ་ཞིག་གནས་པ་དེ། གཅེར་བུ་རྣམས་ལ་རབ་ཏུ་དད་དོ། ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས། དུས་གཞན་ཞིག་ན་ཆུང་མ་ལ་སེམས་ཅན་ཞུགས་པར་གྱུར་ཏོ། །བཅོམ་ལྡན་འདས་ཀྱང་སྔ་དྲོ་ཤམ་ཐབས་དང་ཆོས་གོས་མནབས། ལྷུང་བཟེད་བསྣམས་ཏེ་རྒྱལ་པོའི་ཁབ་ཏུ་བསོད་སྙོམས་ཀྱི་ཕྱིར་ཞུགས་ནས་རྒྱལ་པོའི་ཁབ་ན་བསོད་སྙོམས་ལ་རྒྱུ་ཞིང ། ཁྱིམ་བདག་ཤིན་ཏུ་བཟང་པོའི་ཁྱིམ་ག་ལ་བ་དེ་ལོགས་སུ་གཤེགས་པ་དང ། ཁྱིམ་བདག་ཤིན་ཏུ་བཟང་པོས་བཅོམ་ལྡན་འདས་རྒྱང་མ་ནས་མཐོང་ངོ ། །མཐོང་ནས་ཀྱང་ཆུང་མ་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་མཆིས་བྲང་འདི་སེམས་
Tha17a
༄#། །ཅན་ཞུགས་པར་གྱུར་ན། ཅི་ཞིག་ཏུ་བཙའ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། བུ་ཕོར་བཙའ་བར་འགྱུར་ཞིང ། རིགས་གསལ་བར་བྱེད་པར་འགྱུར།་ལྷ་དང་མིའི་དཔལ་ཉམས་སུ་མྱོང་བར་འགྱུར། ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །དེས་བཅོམ་ལྡན་འདས་ལ་བཟའ་བ་དང ། བཅའ་བ་གཙང་ཞིང་བསོད་པས་ལྷུང་བཟེད་བཀང་སྟེ་ཕུལ་བ་དང ། བཅོམ་ལྡན་འདས་ཀྱིས་ནད་མེད་ཅིག་ཅེས་གསུངས་ནས་བསོད་སྙོམས་བཞེས་ཏེ་གཤེགས་སོ། །དེ་དང་ཧ་ཅང་མི་རིང་བ་ཞིག་ན་གཅེར་བུ་པ་ཞིག་འདུག་པ་དེས་བསམ་པ། གང་བདག་ཅག་ལ་བསླང་བའི་ཁྱིམ་གཅིག་པུ་ཞིག་ཡོད་པ་དེ་ཡང་དགེ་སྦྱོང་གོའུ་ཏ་མས་ཁ་དྲངས་ཀྱི། སོང་ལ་དགེ་སྦྱོང་གོའུ་ཏ་མས་ཅི་ལུང་བསྟན་པ་བལྟའོ། །སྙམ་མོ། །དེ་དེར་སོང་སྟེ་སྨྲས་པ། ཁྱིམ་བདག་།དགེ་སྦྱོང་གོའུ་ཏ་མ་འོངས་པར་གྱུར་ཏམ། བྱོན་ཏོ། །དེས་ཅི་ཞིག་ལུང་བསྟན། འཕགས་པ། བདག་གིས་དེ་ལ་ཆུང་མ་བསྟན་ཏེ། ཅི་ཞིག་བཙའ་བར་འགྱུར་ཞེས་བགྱིས་པ་དང ། དེ་བུ་ཕོར་བཙའ་བར་འགྱུར་ཞིང ། རིགས་གསལ་བར་བྱེད་པར་འགྱུར། ལྷ་དང་མིའི་དཔལ་ཉམས་སུ་མྱོང་བར་འགྱུར། ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ཞེས་གསུང་ངོ ། །གཅེར་བུ་པ་དེ་རྩིས་མཁས་པ་ཞིག་སྟེ། རྡོ་
Tha17b
རྒྱུས་ཁ་དོག་དཀར་པོ་བླངས་ནས་བརྩིས་པ་དང ། བཅོམ་ལྡན་འདས་ཀྱིས་ཇི་སྐད་དུ་ལུང་བསྟན་པ་དེ་ཐམས་ཅད་དེ་ཁོ་ན་བཞིན་དུ་མཐོང་ནས་དེས་བསམ་པ། གལ་ཏེ་རྗེས་སུ་བསྔགས་ན་ནི། ཁྱིམ་བདག་འདི་དགེ་སྦྱོང་གོའུ་ཏ་མ་ལ་དད་པར་འོང་བས། དེ་བས་ན། འདིར་ཅུང་ཟད་ཅིག་ནི། བསྔགས་པར་བྱ། ཅུང་ཟད་ཅིག་ནི། སྨད་པར་བྱའོ། །སྙམ་དུ་བསམ་ནས། ལག་པ་དཀྱོགས། བཞིན་བསྒྱུར་བ་དང ། ཁྱིམ་བདག་ཤིན་ཏུ་བཟང་པོས་སྨྲས་པ། འཕགས་པ། ཅི་སྟེ་ལག་པ་དཀྱོགས། བཞིན་བསྒྱུར། དེས་སྨྲས་པ། ཁྱིམ་བདག་།འདི་ལ་ཅུང་ཟད་ཅིག་ནི། བདེན། ཅུང་ཟད་ཅིག་ནི། རྫུན་ནོ། ། འཕགས་པ། གང་ནི། བདེན། གང་ནི། རྫུན། ཁྱིམ་བདག་།བུ་ཕོར་བཙའ་བར་འགྱུར་རོ། །ཞེས་ཟེར་བ་གང་ཡིན་པ་དེ་ནི། བདེན་ནོ། །རིགས་གསལ་བར་བྱེད་པར་འགྱུར་རོ། །ཞེས་བྱ་བ་གང་ཡིན་པ་དེ་ནི། བདེན་ནོ། །གསལ་བ་ནི། མེའི་མིང་ཡིན་པས། སེམས་ཅན་སྐལ་བ་ཆུང་ངུ་དེ་བཙས་མ་ཐག་ཁོ་ནར་ཁྱིམ་མེས་ཚིག་པར་འགྱུར་རོ། །ལྷ་དང་མིའི་དཔལ་ཉམས་སུ་མྱོང་བར་འགྱུར་རོ། །ཞེས་ཟེར་བ་གང་ཡིན་པ་དེ་ནི། རྫུན་ཏེ། ཁྱིམ་བདག་།ཁྱོད་ཀྱིས་མིར་གྱུར་པ་ལ་ལྷ་དང་མིའི་དཔལ་ཉམས་སུ་མྱོང་བར་གྱུར་པ་འགའ་ཡོད་པ་ལྟ་མཐོང་ངམ། ངའི་བསྟན་པ་ལ་རབ་ཏུ་འབྱུང་ངོ། །ཞེས་ཟེར་བ་དེ་བདེན་ཏེ། གང་གི་ཚེ་འདི་བཟའ་བ་ཡང་མེད། བགོ་བ་ཡང་མེད་པ་དེའི་ཚེ་གདོན་མི་ཟ་བར་དགེ་སྦྱོང་གོའུ་ཏ་མའི་ཐད་དུ་རབ་ཏུ་འབྱུང་བར་འགྱུར་རོ། །ཉོན་མོངས་པ་ཐམས་ཅད་
Tha18a
༄#། །སྤངས་ནས་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ཞེས་ཟེར་བ་དེ་ནི། རྫུན་ཏེ། རེ་ཞིག་དགེ་སྦྱོང་གོའུ་ཏ་མ་ལ་ཡང་ཉོན་མོངས་པ་ཐམས་ཅད་སྤངས་པའི་དགྲ་བཅོམ་པ་ཉིད་མེད་ན། དེའི་ཉན་ཐོས་ལ་ལྟ་སྨོས་ཀྱང་ཅི་དགོས། ཁྱིམ་བདག་ཤིན་ཏུ་བཟང་པོ་མི་དགའ་བར་གྱུར་ནས་སྨྲས་པ། འཕགས་པ། འདི་ལ་བདག་གིས་ཇི་ལྟར་བསྒྲུབ་པར་བགྱི། གཅེར་བུ་པས་སྨྲས་པ། ཁྱིམ་བདག་།བདག་ཅག་ནི། རབ་ཏུ་བྱུང་བ་སྟེ། བསླབ་པ་བླངས་པ་ཡིན་པས། ཁྱོད་ཉིད་ཤེས་སོ། །ཞེས་སྨྲས་ནས་སོང་ངོ ། །ཤིན་ཏུ་བཟང་པོས་བསམ་པ། འདི་ཡང་དོར་རོ། ། སྙམ་ནས་སྨན་མ་ཡིན་པ་སྦྱིན་པར་བརྩམས་པ་དང ། སེམས་ཅན་དེ་སྲིད་པ་ཐ་མ་པ་ཞིག་པས་སྨན་མ་ཡིན་པ་དེ་ཡང་དེ་ལ་སྨན་དུ་གྱུར་ཏོ། །དེས་དེའི་དཀུ་གཡོན་པ་མཉེ་བར་བརྩམས་པ་དང ། མངལ་ན་འདུག་པ་དེ་དཀུ་གཡས་པར་སོང་ངོ ། །ཤིན་ཏུ་བཟང་པོས་དཀུ་གཡས་པ་མཉེ་བར་བརྩམས་པ་དང ། དེ་དཀུ་གཡོན་པར་སོང་སྟེ་སྲིད་པ་ཐ་མ་པའི་སེམས་ཅན་ཟག་པ་ཟད་པ་མ་ཐོབ་ཀྱི་བར་དུ་བར་མ་དོར་རྒྱུན་ཆད་ཅིང་དུས་བྱེད་པར་འགྱུར་པ་གང་ཡིན་པ་དེ་ནི། གནས་མ་ཡིན་ཞིང་གོ་སྐབས་མེད་དོ། །ཁྱིམ་བདག་ཤིན་ཏུ་བཟང་པོའི་ཆུང་མ་དེ་དཀུ་མཉེས་པས་ངུ་བར་བརྩམས་པ་དང ། ཁྱིམ་ཚེས་དག་གིས་ཐོས་ནས་རིངས་པ་རིངས་པར་སོང་སྟེ་དྲིས་པ། ཤེས་ལྡན། ཁྱིམ་བདག་གི་ཆུང་མ་འདི་ཅི་སྟེ་ངུ ། ཤིན་ཏུ་བཟང་པོས་སྨྲས་པ། གདོན་མི་ཟ་བར་འདི་བུ་བཙའ་བའི་དུས་ལ་བབ་བོ། །
Tha18b
ཞེས་བྱས་པ་དང ། དེ་དག་དོང་ངོ ། །ཤིན་ཏུ་བཟང་པོས་བསམ་པ། བདག་གིས་འདི་འདིར་གསད་མི་ནུས་ཀྱི། དགོན་པར་བཀྲིའོ། །སྙམ་ནས་དེས་དེ་དགོན་པར་ཁྲིད་ནས་ཅི་ནས་འཆི་བར་འགྱུར་བ་དེ་ལྟ་དེ་ལྟར་བརྩལ་ནས་དེས་དེ་སྦས་ཏེ་ཁྱིམ་དུ་ཁྱེར་ནས་མཛའ་བོ་དང ། ཉེ་དུ་དང ། ཕུ་ནུ་དང ། ཁྱིམ་ཚེས་རྣམས་ལ་སྨྲས་པ། ཤེས་ལྡན་དག་།ཁོ་བོའི་ཆུང་མ་ཤིའོ། །དེ་དག་གིས་ངུ་བར་བརྩམས་ནས་དེ་དག་ངུ་ཞིང་དེ་གོས་སྔོན་པོ་དང ། སེར་པོ་དང ། དམར་པོ་དང ། དཀར་པོ་རྣམས་ཀྱིས་ཁྱོགས་བརྒྱན་ནས་བསིལ་བ་ཚལ་གྱི་དུར་ཁྲོད་དུ་ཁྱེར་རོ། །གཅེར་བུ་པ་དག་གིས་ཐོས་ནས་དེ་དག་དགའ་མགུ་རངས་ནས་གདུགས་དང ། རྒྱལ་མཚན་དང ། བ་དན་དག་བསྒྲེང་སྟེ་རྒྱལ་པོའི་ཁབ་ཀྱི་གྲོང་ཁྱེར་གྱི་ལམ་པོ་ཆེ་དང ། སྲང་དང ། བཞི་མདོ་དང ། སུམ་མདོ་དག་ཏུ་རྒྱུ་ཞིང་སྨྲས་པ། ཤེས་ལྡན་དག་ཉོན་ཅིག་།དགེ་སྦྱོང་གོའུ་ཏ་མས་ཁྱིམ་བདག་ཤིན་ཏུ་བཟང་པོའི་ཆུང་མ་བུ་ཕོར་བཙའ་བར་འགྱུར་ཞིང ། རིགས་གསལ་བར་བྱེད་པར་འགྱུར། ལྷ་དང་མིའི་དཔལ་ཉམས་སུ་མྱོང་བར་འགྱུར། ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ཞེས་ལུང་བསྟན་པ་དེ་ནི། ཤི་ནས་བསིལ་བའི་ཚལ་གྱི་དུར་ཁྲོད་དུ་ཁྱེར་རོ། །རེ་ཞིག་ཤིང་གང་ལ་རྩ་བ་ཉིད་ཀྱང་མེད་པ་དེ་ལ་ཡལ་ག་དང ། འདབ་མ་དང ། ལོ་མ་འབྱུང་བར་ལྟ་ག་ལ་འགྱུར། སྐབས་འདི་ལྟ་བུ་ལ་སངས་རྒྱས་བཅོམ་ལྡན་འདས་རྣམས་མི་མཁྱེན་པའམ། མི་གཟིགས་པའམ། མི་རིག་པའམ། རྣམ་
Tha19a
༄#། །པར་མི་མཁྱེན་པ་ཅུང་ཟད་ཀྱང་མི་མངའ་སྟེ། སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ། གཅིག་ཏུ་དཔའ་བ། ཟླ་མེད་པ། གཉིས་མི་གསུང་བ། ཞི་གནས་དང་ལྷག་མཐོང་གིས་གནས་པ། བསླབ་པ་གསུམ་ལ་ལེགས་པར་བསླབ་པ། འདུལ་བའི་གཞི་གསུམ་ལ་མཁས་པ། ཆུ་བོ་བཞི་ལས་བརྒལ་བ། རྫུ་འཕྲུལ་གྱི་རྐང་པ་བཞིའི་ཞབས་ཀྱི་མཐིལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་གོམས་པར་མཛད་པ། མི་འཇིགས་པ་བཞིས་མི་བསྙེངས་པ། ཡན་ལག་ལྔ་རྣམ་པར་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། དྲུག་ལ་རྟག་ཏུ་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་ཡན་ལག་བརྒྱད་པ་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་མངའ་བ། གྲགས་པས་ཕྱོགས་བཅུར་ཁྱབ་པ། སྟོང་ལ་དབང་བསྒྱུར་བས་ཁྱད་པར་དུ་འཕགས་པ་རྣམས་ནི། ཆོས་ཉིད་ཀྱིས་ཉིན་ལན་གསུམ། མཚན་ལན་གསུམ་དུ་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་ཤིང ། སུ་ནི། ཉམས། སུ་ནི། དར། སུ་ནི། ཉམ་ང་བར་གྱུར། སུ་ནི། སྐོབས་སུ་ཆུད་པར་གྱུར། སུ་ནི། གནོད་པར་གྱུར། སུ་ནི། ཉམ་ང་བ་དང ། སྐོབས་སུ་ཆུད་པ་དང ། གནོད་པར་གྱུར། སུ་ནི། ངན་སོང་ལ་གཞོལ། སུ་ནི། ངན་སོང་
Tha19b
ལ་འབབ། སུ་ནི། ངན་སོང་ལ་བབ། གང་ནི། ངན་སོང་ལས་དྲངས་ནས་མཐོ་རིས་དང ། ཐར་པ་དང ། འབྲས་བུ་ལ་དགོད། གང་ཞིག་གི་དགེ་བའི་རྩ་བ་བསྐྱེད་པར་བྱ། གང་ཞིག་གིས་བསྐྱེད་པ་ནི། ཡོངས་སུ་སྨིན་པར་བྱ། གང་ཞིག་སྨིན་པ་ནི། གྲོལ་བར་བྱ་ཞེས་ཡེ་ཤེས་གཟིགས་པ་འཇུག་གོ་།ཡང་སྨྲས་པ། ཆུ་སྲིན་གནས་ཀྱི་རྒྱ་མཚོ་ནི། །དུས་རླབས་འདའ་བར་འགྱུར་སྲིད་ཀྱི། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་མི་འདའོ། །ཇི་ལྟར་མ་ནི་སྡུག་པའི་བུ་གཅིག་ལ། །ལྟ་ཞིང་དེ་ཡི་སྲོག་ཀྱང་སྲུང་བ་ལྟར། །དེ་བཞིན་གཤེགས་པ་གདུལ་བའི་སྐྱེ་བོ་ལ། །དེ་བཞིན་གཟིགས་ཤིང་དེ་ཡི་རྒྱུད་ཀྱང་སྲུང ། །ཐམས་ཅད་མཁྱེན་པའི་རྒྱུད་ལ་གནས་པ་ཡི། །ཐུགས་རྗེའི་བ་དྲུས་པ་གཤིན་བེའུ་སྟོར་བཞིན། །སྲིད་པ་བགྲོད་དཀའ་འཁྱམས་པར་གྱུར་པ་ཡི། །གདུལ་བའི་སྲས་རྣམས་སྐྱོ་མི་མཁྱེན་པར་ཚོལ།། །།འདུལ་བ་ཕྲན་ཚེགས་ཀྱི་གཞི། བམ་པོ་གཉིས་པ། དེ་ནས་བཅོམ་ལྡན་འདས་ཀྱིས་ཕྱོགས་ཤིག་ཏུ་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ཞལ་ནས་འོད་ཟེར་སྔོན་པོ་དང ། སེར་པོ་དང ། དམར་པོ་དང ། དཀར་པོ་དག་བྱུང་ནས་ཁ་ཅིག་ནི། འོག་ཏུ་འགྲོ། ཁ་ཅིག་ནི། སྟེང་དུ་འགྲོ་སྟེ། གང་དག་འོག་ཏུ་འགྲོ་བ་དེ་དག་ནི། དམྱལ་བ་ཡང་སོས་དང ། ཐིག་ནག་དང ། བསྡུས་གཞོམ་དང ། ངུ་འབོད་དང ། ངུ་འབོད་ཆེན་པོ་དང ། ཚ་བ་དང ། རབ་ཏུ་ཚ་བ་དང ། མནར་མེད་པ་དང ། ཆུ་
Tha20a
༄#། །བུར་ཅན་དང ། ཆུ་བུར་རྡོལ་བ་དང ། སོ་ཐམས་ཐམས་དང ། ཀྱི་ཧུད་ཟེར་བ་དང ། ་ཆུ་ཟེར་བ་དང ། ུཏྤལ་ལྟར་གས་པ་དང ། པདྨ་ལྟར་གས་པ་དང ། པདྨ་ལྟར་གས་པ་ཆེན་པོར་སོང་སྟེ། ཚ་བའི་དམྱལ་བ་གང་དག་ཡིན་པ་དེ་དག་ཏུ་ནི། བསིལ་བར་གྱུར་ནས་འབབ། གྲང་བའི་དམྱལ་བ་གང་དག་ཡིན་པ་དེ་དག་ཏུ་ནི། དྲོ་བར་གྱུར་ནས་འབབ་བོ། །དེས་སེམས་ཅན་དེ་རྣམས་ཀྱི་སྡུག་བསྔལ་གྱི་ཁྱད་པར་རྒྱུན་བཅད་པ་དང ། དེ་དག་འདི་སྙམ་དུ་སེམས་ཏེ། ཤེས་ལྡན་དག་ཅི། བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་ཞེས་ཟེར་རོ། །དེ་དག་དད་པ་བསྐྱེད་པའི་ཕྱིར་བཅོམ་ལྡན་འདས་སྤྲུལ་པ་གཏོང་སྟེ། དེ་དག་གིས་སྤྲུལ་པ་དེ་མཐོང་ནས་འདི་སྙམ་དུ་སེམས་ཤིང་ཤེས་ལྡན་དག་།བདག་ཅག་འདི་ནས་ཤི་འཕོས་པ་ཡང་མ་ཡིན། གཞན་དུ་སྐྱེས་པ་ཡང་མ་ཡིན་གྱི། འོན་ཀྱང་སེམས་ཅན་འདི་སྔོན་མ་མཐོང་བ་ཞིག་སྟེ། འདིའི་མཐུས་བདག་ཅག་སྡུག་བསྔལ་གྱི་ཁྱད་པར་རྒྱུན་ཆད་དོ། །ཞེས་ཟེར་རོ། །དེ་དག་སྤྲུལ་པ་དེ་ལ་སེམས་མངོན་པར་དང་བས་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་སེམས་ཅན་རྣམས་སྣོད་དུ་གྱུར་པ་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་འཛིན་ཏོ། ། གང་དག་སྟེང་དུ་འགྲོ་བ་དེ་དག་ནི། རྒྱལ་ཆེན་བཞིའི་ལྷ་དང ། སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་དང ། ཚངས་
Tha20b
རིས་དང ། ཚངས་པའི་མདུན་ན་འདོན་དང ། ཚངས་ཆེན་དང ། འོད་ཆུང་དང ། ཚད་མེད་འོད་དང ། འོད་གསལ་དང ། དགེ་ཆུང་དང ། ཚད་མེད་དགེ་དང ། དགེ་རྒྱས་དང ། སྤྲིན་མེད་དང ། བསོད་ནམས་འཕེལ་དང ། འབྲས་བུ་ཆེ་དང ། མི་ཆེ་བ་དང ། མི་གདུང་བ་དང ། གྱ་ནོམ་སྣང་དང ། ཤིན་ཏུ་མཐོང་དང ། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང ། སྡུག་བསྔལ་བ་དང ། སྟོང་པ་དང ། བདག་མེད་པ་ཞེས་བྱ་བ་ཡང་སྒྲོག་གོ་།ཚིགས་བཅད་གཉིས་ཀྱང་སྒྲོག་སྟེ། བརྩམ་པར་བྱ་ཞིང་དབྱུང་བར་བྱ། །སངས་རྒྱས་བསྟན་ལ་འབད་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །ཆོས་འདུལ་འདི་ལ་གང་ཞིག་ནི། །བག་དང་བཅས་པར་སྤྱོད་བྱེད་པ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་གྱི་ནི་མཐར་བྱེད་འགྱུར།། དེ་ནས་འོད་ཟེར་དེ་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བསྐོར་ནས་བཅོམ་ལྡན་འདས་ཉིད་ཀྱི་ཕྱི་བཞིན་ཕྱི་བཞིན་འབྲང་ཞིང་འགྲོ་སྟེ། དེ་གལ་ཏེ་བཅོམ་ལྡན་འདས་ལས་འདས་པ་ལུང་སྟོན་པར་བཞེད་ན་ནི། བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པ་ལུང་སྟོན་པར་བཞེད་ན་ནི། མདུན་དུ་ནུབ་པར་འགྱུར་རོ། །དམྱལ་བར་སྐྱེ་བ་ལུང་སྟོན་པར་བཞེད་ན་ནི། ཞབས་ཀྱི་མཐིལ་དུ་ནུབ་པར་འགྱུར་རོ། །དུད་འགྲོར་སྐྱེ་བ་ལུང་སྟོན་པར་བཞེད་ན་ནི། ལོང་བུར་ནུབ་པར་འགྱུར་རོ། །ཡི་དྭགས་སུ་སྐྱེ་བ་ལུང་སྟོན་པར་བཞེད་ན་ནི། ཞབས་ཀྱི་མཐེ་བོར་
Tha21a
༄#། །ནུབ་པར་འགྱུར་རོ། །མིར་སྐྱེ་བ་ལུང་སྟོན་པར་བཞེད་ན་ནི། པུས་མོར་ནུབ་པར་འགྱུར་རོ། །སྟོབས་ཀྱི་འཁོར་ལོས་བསྒྱུར་བའི་རྒྱལ་སྲིད་དུ་ལུང་སྟོན་པར་བཞེད་ན་ནི། ཕྱག་གཡོན་གྱི་མཐིལ་དུ་ནུབ་པར་འགྱུར་རོ། །འཁོར་ལོས་བསྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི། ཕྱག་གཡས་ཀྱི་མཐིལ་དུ་ནུབ་པར་འགྱུར་རོ། །ལྷར་སྐྱེ་བ་ལུང་སྟོན་པར་བཞེད་ན་ནི། ལྟེ་བར་ནུབ་པར་འགྱུར་རོ། །ཉན་ཐོས་ཀྱི་བྱང་ཆུབ་ལུང་སྟོན་པར་བཞེད་ན་ནི། །ཞལ་དུ་ནུབ་པར་འགྱུར་རོ། །རང་སངས་རྒྱས་ཀྱི་བྱང་ཆུབ་ལུང་སྟོན་པར་བཞེད་ན་ནི། མཛོད་སྤུར་ནུབ་པར་འགྱུར་རོ། ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་སྟོན་པར་བཞེད་ན་ནི། གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བསྐོར་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་ཞལ་དུ་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་ཞུས་པ། རྣམ་པ་སྣ་ཚོགས་ཚོན་ནི་སྟོང་དག་གིས། །བཀྲ་བའི་ཚོགས་དག་ཞལ་གྱི་ནང་ནས་བྱུང ། །ཉི་མ་ཤར་བར་གྱུར་པ་ཇི་ལྟ་བར། །དེ་ཡིས་ཕྱོགས་རྣམས་ཀུན་ཏུ་སྣང་བར་བགྱིས། །ཚིགས་སུ་བཅད་དེ་ཡང་གསོལ་པ། སངས་རྒྱས་རྒོལ་བྲལ་ཞུམ་དང་རྒྱགས་པ་སྤངས། །རྒྱལ་བ་དགྲ་ཐུལ་འགྲོ་མཆོག་རྒྱུར་གྱུར་པ། །རྒྱུ་མ་མཆིས་པར་པདྨའི་རྩ་ལག་དང ། །དུང་ལྟར་དཀར་བའི་འཛུམ་བ་སྟོན་མི་མཛད།།
Tha21b
ད་ལྟས་ཉིད་ཀྱི་བསྟན་བློས་དུས་མཁྱེན་ནས། །རྒྱལ་དབང་ཉན་པོ་ཉན་པར་འཚལ་རྣམས་ཀྱི། །ཐེ་ཚོམ་སྐྱེས་པ་ཐུབ་པ་སྐྱེས་མཆོག་གི་།གསུང་མཆོག་བཟང་ཞིང་བསྟན་པས་བསལ་དུ་གསོལ། །རྫོགས་པའི་སངས་རྒྱས་རི་རབ་ལྟར་བརྟན་པ། །ཟུང་ཐུབ་རྣམས་ནི་གློ་བུར་འཛུམ་མི་སྟོན། །མགོན་པོ་ཅི་སླད་འཛུམ་པ་མཛད་པ་དེ། །སྐྱེ་བོའི་ཚོགས་འདི་ཉན་པར་ཡང་དག་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། །དེ་དེ་བཞིན་ནོ། །དེ་དེ་བཞིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི། རྒྱུ་མེད་རྐྱེན་མེད་པར་འཛུམ་པ་མི་མཛད་དོ། །ཀུན་དགའ་པོ།་སོང་ལ་དགེ་སློང་རྣམས་ལ། དགེ་སློང་དག་།དེ་བཞིན་གཤེགས་པ་དུར་ཁྲོད་དུ་རྒྱུ་ཞིང་གཤེགས་པར་བཞེད་ཀྱི། ཁྱེད་ལས་གང་ཞིག་དེ་བཞིན་གཤེགས་པ་དང་ལྷན་ཅིག་དུར་ཁྲོད་དུ་རྒྱུ་ཞིང་འགྲོ་བར་སྤྲོ་བ་དེ། ཆོས་གོས་དག་སོ་སོ་ནས་ལོངས་ཤིག་ཅེས་སྒོས་ཤིག་།ཚེ་དང་ལྡན་པ་ཀུན་དགའ་བོས། བཙུན་པ། དེ་ལྟར་འཚལ་ཞེས་བཅོམ་ལྡན་འདས་ཀྱི་ལྟར་མཉན་ནས་དགེ་སློང་དག་གང་ན་བ་དེར་སོང་སྟེ་ཕྱིན་ནས་དགེ་སློང་རྣམས་ལ། དགེ་སློང་དག་།དེ་བཞིན་གཤེགས་པ་དུར་ཁྲོད་དུ་རྒྱུ་ཞིང་གཤེགས་པར་བཞེད་ཀྱི། ཁྱེད་ལས་གང་ཞིག་དེ་བཞིན་གཤེགས་པ་དང་ལྷན་ཅིག་དུར་ཁྲོད་དུ་རྒྱུ་ཞིང་འགྲོ་བར་སྤྲོ་བ་དེ། ཆོས་གོས་དག་སོ་སོ་ནས་ལོངས་ཤིག་ཅེས་བསྒོས་པ་དང ། དགེ་སློང་ཐམས་ཅད་འདུས་ནས་བཅོམ་ལྡན་འདས་ཀྱི་སྤྱན་སྔར་ལྷགས་སོ། །དེ་ནས་བཅོམ་ལྡན་འདས་དུལ་བ་འཁོར་
Tha22a
༄#། །དུལ་བ། ཞི་བ་འཁོར་ཞི་བ། གྲོལ་བ་འཁོར་གྲོལ་བ། དབུགས་ཕྱིན་པ་འཁོར་དབུགས་ཕྱིན་པ། རྣམ་པར་དུལ་བ་འཁོར་རྣམ་པར་དུལ་བ། དགྲ་བཅོམ་པ་འཁོར་དགྲ་བཅོམ་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ། མཛེས་པ་འཁོར་མཛེས་པ། ཁྱུ་མཆོག་པ་གླང་གི་ཚོགས་ཀྱིས་བསྐོར་བ་ལྟ་བུ་དང ། གླང་པོ་ཆེ་གླང་པོ་ཆེའི་ཕྲུ་གུའི་ཚོགས་ཀྱིས་བསྐོར་བ་ལྟ་བུ། སེང་གེ་མཆེ་བ་ཅན་གྱི་ཚོགས་ཀྱིས་བསྐོར་བ་ལྟ་བུ། ངང་པའི་རྒྱལ་པོ་ངང་པའི་ཚོགས་ཀྱིས་བསྐོར་བ་ལྟ་བུ། ནམ་མཁའ་ལྡིང་བྱའི་ཚོགས་ཀྱིས་བསྐོར་བ་ལྟ་བུ། བྲམ་ཟེ་བྲམ་ཟེའི་ཁྱེའུའི་ཚོགས་ཀྱིས་བསྐོར་བ་ལྟ་བུ། སྨན་པ་ནད་པའི་ཚོགས་ཀྱིས་བསྐོར་བ་ལྟ་བུ། དཔའ་བོ་དམག་མིའི་ཚོགས་ཀྱིས་བསྐོར་བ་ལྟ་བུ། ས་མཁན་འགྲོན་པོའི་ཚོགས་ཀྱིས་བསྐོར་བ་ལྟ་བུ། དེད་དཔོན་ཚོང་པའི་ཚོགས་ཀྱིས་བསྐོར་བ་ལྟ་བུ། ཚོང་དཔོན་ཚོང་པའི་ཚོགས་ཀྱིས་བསྐོར་བ་ལྟ་བུ། ཁམས་ཀྱི་རྒྱལ་པོ་བློན་པོའི་ཚོགས་ཀྱིས་བསྐོར་བ་ལྟ་བུ། འཁོར་ལོས་བསྒྱུར་བ་བུ་སྟོང་གིས་བསྐོར་བ་ལྟ་བུ། ཟླ་བ་སྐར་མའི་ཚོགས་ཀྱིས་བསྐོར་བ་ལྟ་བུ། ཉི་མ་འོད་ཟེར་སྟོང་གིས་བསྐོར་བ་ལྟ་བུ། ཡུམ་འཁོར་སྲུང་དྲི་ཟའི་ཚོགས་ཀྱིས་བསྐོར་བ་ལྟ་བུ། འཕགས་སྐྱེས་པོ་གྲུལ་བུམ་གྱི་ཚོགས་ཀྱིས་བསྐོར་བ་ལྟ་བུ། མིག་མི་བཟང་ཀླུའི་ཚོགས་ཀྱིས་བསྐོར་བ་ལྟ་བུ། ནོར་སྦྱིན་གནོད་སྦྱིན་གྱི་ཚོགས་ཀྱིས་བསྐོར་བ་ལྟ་བུ། ཐག་བཟང་རིས་ལྷ་མ་ཡིན་གྱི་ཚོགས་ཀྱིས་བསྐོར་བ་ལྟ་བུ། བརྒྱ་བྱིན་
Tha22b
སུམ་ཅུ་རྩ་གསུམ་པའི་ཚོགས་ཀྱིས་བསྐོར་བ་ལྟ་བུ། ཚངས་པ་ཚངས་རིས་པའི་ཚོགས་ཀྱིས་བསྐོར་བ་ལྟ་བུ། རྒྱ་མཚོ་མི་གཡོ་བ་ལྟ་བུ། སྤྲིན་ཆུ་དང་བཅས་པ་ལྟ་བུ། གླང་པོ་ཆེའི་རྒྱལ་པོ་དྲགས་པ་མེད་པ་ལྟ་བུ།་དབང་པོ་ཤིན་ཏུ་དུལ་བས་སྤྱོད་ལམ་མི་ཉམས་པར་གཤེགས་པ། སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ། དཔེ་བྱད་བཟང་པོ་བརྒྱད་ཅུས་མཛེས་པར་བྱས་པ། སྐུ་འོད་འདོམ་གང་གིས་བརྒྱན་པ། འོད་ཉི་མ་སྟོང་བས་ལྷག་པ། རིན་པོ་ཆེའི་རི་འགྲོ་བ་ལྟ་བུར་ཀུན་ནས་བཟང་བ། སྟོབས་བཅུ་དང ། མི་འཇིགས་པ་བཞི་དང ། མ་འདྲེས་པ་གསུམ་དང ། དྲན་པ་ཉེ་བར་གཞག་པ་བཞི་དང ། ཐུགས་རྗེ་ཆེན་པོ་དང་ལྡན་པ། ཉན་ཐོས་ཆེན་པོ་ཀུན་ཤེས་ཀོའུ་དི་ནྱ་དང ། རྟ་ཐུལ་དང ། རླངས་པ་དང ། མིང་ཆེན་དང ། བཟང་པོ་དང ། ཤཱ་རིའི་བུ་དང ། མོའུ་དགལ་གྱི་བུ་དང ། འོད་སྲུང་དང ། གྲགས་པ་དང ། གང་པོ་ལ་སོགས་པ་དང ། དགེ་སློང་གི་དགེ་འདུན་མང་པོ་གཞན་དང ། སྲོག་ཆགས་བརྒྱ་སྟོང་ཕལ་མོ་ཆེས་བསྐོར་ནས་བསིལ་ཚལ་གྱི་དུར་ཁྲོད་དུ་གཤེགས་སོ། །སངས་རྒྱས་གཤེགས་པ་ལ་ཕན་ཡོན་བཅོ་བརྒྱད་ཡོད་དེ། བཅོ་བརྒྱད་གང་ཞེ་ན། མེའི་འཇིགས་པ་མེད། ཆུའི་འཇིགས་པ་མེད། སེང་གེའི་འཇིགས་པ་མེད། སྟག་གི་འཇིགས་པ་མེད། གཟིག་གི་འཇིགས་པ་མེད། ཕ་རོལ་གྱི་དམག་ཚོགས་ཀྱི་འཇིགས་པ་མེད། རྐུན་པོའི་འཇིགས་པ་མེད། ལ་གཅན་པའི་འཇིགས་པ་མེད། གྲུ་བཙས་ཀྱི་འཇིགས་པ་མེད། ཤོ་གམ་གྱི་འཇིགས་པ་མེད། བསེལ་རྔན་གྱི་
Tha23a
༄#། །འཇིགས་པ་མེད། མིའི་འཇིགས་པ་མེད། མི་མ་ཡིན་པའི་འཇིགས་པ་མེད། དུས་དུས་སུ་གཟུགས་བཟང་པོ་དག་མཐོང་བར་འགྱུར། སྒྲ་སྙན་པ་དག་ཐོས་པར་འགྱུར། འོད་ཆེན་པོ་དག་མཐོང་བར་འགྱུར། ཀུན་ཤེས་པ་ལུང་སྟོན་པ་དག་ཐོས་པར་འགྱུར། ཆོས་ཀྱི་ལོངས་སྤྱོད་དང ། ཟང་ཟིང་གི་ལོངས་སྤྱོད་དང་ལྡན་པར་འགྱུར་རོ། །སངས་རྒྱས་གཤེགས་པ་ནི། གནོད་པ་ཆུང་བ་ཡིན་པས། ལྷ་དང་མི་བརྒྱ་སྟོང་དུ་མ་བཅོམ་ལྡན་འདས་ཀྱི་ཞམ་འབྲིང་དུ་ཕྱི་བཞིན་འབྲང་ངོ ། །བསིལ་ཚལ་ལོགས་ནས་རླུང་དག་ཀྱང་ལངས་སོ། །རྒྱལ་རིགས་ཀྱི་ཁྱེའུ་ཞིག་དང ། བྲམ་ཟེའི་ཁྱེའུ་བྱིས་པ་གཉིས་ཤིག་རྒྱལ་པོའི་ཁབ་ནས་ཕྱི་རོལ་ཏུ་བྱུང་སྟེ་རྩེ་ཞིང་འཁོད་དོ། །དེ་གཉིས་ལས་རྒྱལ་རིགས་ཀྱི་ཁྱེའུ་ནི། དད་པ་དང་ལྡན་པ་ཡིན། བྲམ་ཟེའི་ཁྱེའུ་ནི། དེ་ལྟ་མ་ཡིན་ནོ། །བྲམ་ཟེའི་ཁྱེའུ་དེས་རྒྱལ་རིགས་ཀྱི་ཁྱེའུ་ལ་སྨྲས་པ། གྲོགས་པོ། བཅོམ་ལྡན་འདས་ཀྱིས་ཁྱིམ་བདག་ཤིན་ཏུ་བཟང་པོའི་ཆུང་མའི་བུ་ཁྱེའུར་སྐྱེ་བར་འགྱུར་ཏེ། རིགས་འབར་བར་འགྱུར་ཞིང ། ལྷ་དང་མིའི་དཔལ་ཡང་མྱོང་བར་གྱུར་ནས་ངའི་བསྟན་པ་ལ་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ཞེས་ལུང་བསྟན་ན། དེ་ནི། འཆི་བའི་དུས་བྱས་ནས་བསིལ་ཚལ་གྱི་དུར་ཁྲོད་དུ་ཁྱེར་ན། བཅོམ་ལྡན་འདས་ཀྱིས་བཀའ་སྩལ་པ་རྫུན་དུ་མ་གྱུར་གྲང ། རྒྱལ་རིགས་ཀྱི་ཁྱེའུ་དེས་ཚིགས་སུ་བཅད་པ་སྨྲས་པ། ཟླ་བ་སྐར་མའི་ཚོགས་བཅས་ས་ལ་
Tha23b
ལྟུང་ཡང་སྲིད། །ས་འདི་རི་དང་ནགས་བཅས་མཁའ་ལ་འགྲོ་ཡང་སྲིད། །རྒྱ་མཚོ་ཆེན་པོའི་ཆུ་ནི་སྐམ་པར་འགྱུར་སྲིད་ཀྱི། །དྲང་སྲོང་ཆེན་པོ་རྫུན་གསུང་འགྱུར་བ་སྲིད་པ་མིན། །བྲམ་ཟེའི་ཁྱེའུ་དེས། གྲོགས་པོ།་དེ་ལྟ་ན་བསིལ་ཚལ་གྱི་དུར་ཁྲོད་བལྟ་ཞིང་འདོང་ངོ ། །ཞེས་སྨྲས་ནས་དེ་གཉིས་དོང་བ་དང ། བཅོམ་ལྡན་འདས་རྒྱལ་པོའི་ཁབ་ནས་གཤེགས་པ་མཐོང་ངོ ། །རྒྱལ་རིགས་ཀྱི་ཁྱེའུས་བཅོམ་ལྡན་འདས་ཐག་རིང་པོ་ཁོ་ནས་མཐོང་ནས་ཡང་ཚིགས་སུ་བཅད་པ་སྨྲས་པ། ཐུབ་པ་ཐེ་ཚོམ་བྲམ་ཞིང་རྒོད་པ་མི་མངའ་བ། །རི་དྭགས་རྒྱལ་པོ་ལྟ་བུའི་སྒྲ་སྐད་མཆོག་སྒྲོག་ཅིང ། །ཐེ་ཚོམ་མེད་པར་ཕ་རོལ་སྨྲ་བས་མི་བརྫི་བ། །འདི་ལྟར་སྐྱེ་བོའི་ཚོགས་ཀྱིས་ཡོངས་སུ་བསྐོར་ཅིང་གཤེགས། །བསིལ་ཚལ་ཕྱོགས་སུ་ཁ་བའི་ཚོགས་ལྟ་བུའི། །བསིལ་བའི་ངད་ཅན་རླུང་ནི་ལངས་པར་གྱུར་པ་ན། །ཤཱཀྱ་ཐུབ་པའི་རྫུ་འཕྲུལ་བརྟག་པའི་དོན་གྱི་ཕྱིར། །ལྷ་ཚོགས་མང་པོ་གནས་ནས་འོངས་པ་ཉིད་དུ་ངེས། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ཀྱིས་ཁྱིམ་བདག་ཤིན་ཏུ་བཟང་པོའི་ཆུང་མའི་བུ་ཁྱེའུ་སྐྱེ་བར་འགྱུར་ཏེ། རིགས་འབར་བར་འགྱུར་ཞིང ། ལྷ་དང་མིའི་དཔལ་ཡང་མྱོང་བར་གྱུར་ནས་ངའི་བསྟན་པ་ལ་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ཞེས་ལུང་བསྟན་ན། དེ་ནི། འཆི་བའི་དུས་ལ་བབ་ནས་བསིལ་ཚལ་གྱི་དུར་ཁྲོད་དུ་ཕྱུང་ཞིང ། བཅོམ་ལྡན་འདས་ཀྱང་ཉན་ཐོས་ཀྱི་དགེ་འདུན་དང་ཐབས་ཅིག་ཏུ་བསིལ་ཚལ་གྱི་དུར་ཁྲོད་
Tha24a
༄#། །དུ་གཤེགས་སོ། །ཞེས་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། བཅོམ་ལྡན་འདས་ནི། དོན་མེད་པར་བསིལ་ཚལ་གྱི་དུར་ཁྲོད་དུ་མི་གཤེགས་པས། བཅོམ་ལྡན་འདས་ཀྱིས་ཁྱིམ་བདག་ཤིན་ཏུ་བཟང་པོའི་ཆུང་མ་ལ་བརྟེན་ཏེ། གདུལ་བའི་དོན་ཆེན་པོ་ཞིག་མཛད་པར་འགྱུར་གོར་མ་ཆག་གི། བལྟར་འགྲོའོ། །སྙམ་ནས་དེ་བཙུན་མོ་དང ། གཞོན་ནུ་དང ། བློན་པོ་དང ། ཕོ་བྲང་འཁོར་དང ། ལྗོངས་ཀྱི་མིས་ཡོངས་སུ་བསྐོར་ནས་རྒྱལ་པོའི་ཁབ་ཏུ་སོང་བ་དང ། རྒྱལ་རིགས་ཀྱི་ཁྱེའུ་དེས། རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཐག་རིང་པོ་ཁོ་ནས་མཐོང་ནས་ཡང་ཚིགས་སུ་བཅད་པ་སྨྲས་པ། མ་ག་དྷ་ཡི་མངའ་བདག་རྒྱལ་པོའི་གཙོ་བོ་འདི། །འདི་ལྟར་འཁོར་བཅས་རྒྱལ་པོའི་ཁབ་ནས་བྱུང་བ་ལས། སྐྱེ་བོའི་ཚོགས་ཀྱིས་འབྱོར་བ་ཕུན་སུམ་ཚོགས་པར་ནི། ། བདག་གི་སྙིང་ལ་ངེས་པའི་བློ་དག་སྐྱེས་པར་གྱུར། །སྐྱེ་བོའི་ཚོགས་རྣམས་ཀྱིས་བཅོམ་ལྡན་འདས་མཐོང་ནས་གཤེགས་ཤུལ་ཕྱེ་བ་དང ། བཅོམ་ལྡན་འདས་ཞལ་འཛུམ་པ་མཛད་ཅིང་སྐྱེ་བོ་རྣམས་ཀྱི་གུང་ལ་བཞུགས་སོ། །བཅོམ་ལྡན་འདས་ཞལ་འཛུམ་པ་མཛད་པ་གཅེར་བུ་བདག་གིས་མཐོང་ནས་བསམ་པ། འདི་ལྟར། དགེ་སྦྱོང་གོའུ་ཏ་མ་བཞིན་འཛུམ་པ་བྱེད་ཅིང ། སྐྱེ་བོ་མང་པོའི་གུང་ལ་འདུག་པ་ལས་ན། སེམས་ཅན་འདི་མ་ཤི་བར་ངེས་སོ་སྙམ་ནས་དེས་ཁྱིམ་བདག་ཤིན་ཏུ་བཟང་པོ་ལ་སྨྲས། ཁྱིམ་བདག། སེམས་ཅན་སྐལ་བ་ཆུང་ངུ་འདི་ནི། མ་ཤིའོ། །དེས་སྨྲས་པ། འཕགས་
Tha24b
པ། དེ་ལྟར་གྱུར་ན། སྐབས་འདི་ལ་ད་ཇི་ལྟར་བསྒྲུབ་པར་བྱ། དེས་སྨྲས་པ། ཁྱིམ་བདག། ཁོ་བོ་ནི། བསླབ་པའི་གཞི་ཡང་དག་པར་བླངས་པ་ཡིན་གྱི། ཁྱོད་ཉིད་ཤེས་པར་གྱིས་ཤིག་།དེས་བུད་ཤིང་གཅེར་ཏེ་ཆུང་མའི་རོ་དེ་མེའི་ཕུང་པོའི་ནང་དུ་བཅུག་སྟེ་བསྲེགས་པ་དང ། དེའི་ལུས་ཐམས་ཅད་ཚིག་ན། ལྟོའི་ཉེ་འཁོར་དེ་བཞིན་དུ་འདུག་གོ་།དེ་ནས་ལྟོའི་ཉེ་འཁོར་དེ་རྡོལ་ནས་པདྨ་བྱུང་སྟེ། པདྨ་དེའི་སྙིང་པོ་ལས་གཞོན་ནུ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་བྱུང་ངོ ། །དེ་སྲོག་ཆགས་བརྒྱ་སྟོང་དག་གིས་མཐོང་ནས་མཆོག་ཏུ་ངོ་མཚར་ཆེན་པོ་སྐྱེས་པར་གྱུར་པ་དང ། གཅེར་བུ་པ་དག་གིས་རྒྱགས་པ་དང།་ང་རྒྱལ་དང ། ཁེངས་པ་དག་ཉམས་སོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་ཤིན་ཏུ་བཟང་པོ་ལ་བཀའ་སྩལ་པ། ཁྱིམ་བདག་།གཞོན་ནུ་ལོངས་ཤིག་།དེས་གཅེར་བུ་པའི་གདོན་དུ་བལྟས་པ་དང།་དེས་སྨྲས་པ། ཁྱིམ་བདག། མེ་ཕུང་རབ་ཏུ་འབར་བའི་ནང་དུ་ཞུགས་ན། ཐམས་ཅད་ཀྱི་ཐམས་ཅད་དུ་ཚིག་པར་མི་འགྱུར་རམ། དེ་སྐད་ཅེས་སྨྲས་པ་དང ། དེས་མ་བླངས་སོ། །དེ་ནས་བཅོམ་ལྡན་འདས་ཀྱིས་འཚོ་བྱེད་གཞོན་ནུས་གསོས་ལ་བཀའ་སྩལ་པ། འཚོ་བྱེད། གཞོན་ནུ་ལོངས་ཤིག་།དེས་བསམ་པ། བཅོམ་ལྡན་འདས་ཀྱིས་གནས་མ་ཡིན་སྐབས་མ་ཡིན་པར་བདག་མི་བསྐོ་ཡི། བླང་ངོ ། །སྙམ་ནས་དེས་ཐེ་ཚོམ་མེད་པར་མེ་ཕུང་གི་ནང་དུ་ཞུགས་ཏེ་བླངས་སོ། །རྒྱལ་བའི་བཀའ་ཡིས་མེ་ཡི་ཕུང་པོར་ཞུགས་གྱུར་ཏེ། །དེ་ཡིས་གཞོན་ནུ་མེ་ཡི་ནང་ནས་བླངས་པ། །རྒྱལ་བའི་མཐུ་ཡིས་
Tha25a
༄#། །མེ་ནི་ཞི་བ་ཉིད་གྱུར་ཅིང ། །ཁ་བའི་ཚོགས་ལྟར་བསིལ་བའང་སྐད་ཅིག་དེ་ལ་བྱུང ། །དེ་ནས་བཅོམ་ལྡན་འདས་ཀྱིས་འཚོ་བྱེད་གཞོན་ནུས་གསོས་ལ་བཀའ་སྩལ་པ། འཚོ་བྱེད། ཁྱོད་ཉམས་པའི་གནོད་པ་དག་ཏུ་མ་གྱུར་ཏམ། དེས་གསོལ་པ། བཙུན་པ། བདག་རྒྱལ་པོའི་ཕོ་བྲང་དུ་བཙས་ཤིང་རྒྱལ་པོའི་ཕོ་བྲང་དུ་སྐྱེས་པར་གྱུར་ཀྱང་འདི་ལྟར་བཅོམ་ལྡན་འདས་ཀྱི་བྱིན་གྱི་རླབས་ཀྱིས་ཞུགས་ཀྱི་ཕུང་པོ་ཙནྡན་ས་མཆོག་ལྟ་བུར་བསིལ་བར་གྱུར་པ་འདི་ལྟ་བུ་ནི། སྔོན་ཆད་མ་མྱོང་ལགས་སོ། །དེའི་ཚེ་བཅོམ་ལྡན་འདས་ཀྱིས་ཁྱིམ་བདག་ཤིན་ཏུ་བཟང་པོ་ལ་བཀའ་སྩལ་པ།་ཁྱིམ་བདག། གཞོན་ནུ་འདི་ལོངས་ཤིག་།དེ་ལོག་པར་ལྟ་བ་ལ་ཕྱོགས་པས་རེ་ཞིག་ལེན་པར་མི་བྱེད་ཅིང ། གཅེར་བུ་པ་དེ་ཉིད་ཀྱི་གདོང་དུ་ལྟ་བར་བྱེད་དོ། །དེས་སྨྲས་པ། ཁྱིམ་བདག། མང་དུ་སྨྲ་ཅི་དགོས།་མེས་ནི། ཐམས་ཅད་འཚིག་པ་ཡིན་ན། གཞོན་ནུ་ཤིན་ཏུ་སྐལ་བ་ཆུང་བ་འདི་མ་ཚིག་པ་ལས་ན། འདི་ཁྱོད་ཀྱིས་ཁྱིམ་དུ་ཁྱེར་ན། ཁྱོད་ཀྱི་ཁྱིམ་ཡང་ཚིག་ཅིང་ཁྱོད་ཀྱི་སྲོག་གི་བར་ཆད་དུ་ཡང་འགྱུར་བར་ངེས་སོ། །དེས་བདག་ལས་གཅེས་པ་མེད་དོ། །སྙམ་ནས་དེ་མ་བླངས་པ་དང ། དེའི་ཚེ་བཅོམ་ལྡན་འདས་ཀྱིས་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་བཀའ་སྩལ་པ་རྒྱལ་པོ་ཆེན་པོ། གཞོན་ནུ་ལོངས་ཤིག་།དེས་གུས་པར་སྒྲིམ་པ་དང་བཅས་པས་ལག་པ་བརྐྱང་སྟེ་དེ་བླངས་ནས་ཀུན་ཏུ་བརྟགས་ཏེ་གསོལ་པ། བཅོམ་ལྡན་འདས། ཁྱེའུ་འདིའི་མིང་ཅིར་གདགས།
Tha25b
བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། ཁྱེའུ་འདི། འདི་ལྟར་མེའི་ནང་ནས་སྐྱེས་པས། དེའི་ཕྱིར་ཁྱེའུ་འདིའི་མིང་མེ་སྐྱེས་ཞེས་བྱ་བར་གདགས་སོ། །དེ་ནས་བཅོམ་ལྡན་འདས་ཀྱིས་སྐྱེ་བོ་ཕལ་པོ་ཆེའི་ཚོགས་དེ་དག་གི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་ཐུགས་སུ་ཆུད་ནས་ཅི་ནས་ཀྱང་སེམས་ཅན་བརྒྱ་ཕྲག་མང་པོ་དེ་དག་གིས་ཐོས་ནས་ཁྱད་པར་རྙེད་པར་འགྱུར་བ་དེ་ལྟ་བུར་ཆོས་བསྟན་པ་མཛད་པས། ཁ་ཅིག་གིས་ནི། རྒྱུན་ཏུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི། ལན་ཅིག་ཕྱིར་འོང་བའི་འབྲས་བུ། ཁ་ཅིག་གིས་ནི། ཕྱིར་མི་འོང་བའི་འབྲས་བུ། ཁ་ཅིག་གིས་ནི། རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་པར་གྱུར་ཏོ། །ཁ་ཅིག་གིས་ནི། དྲོ་བར་གྱུར་པའི་དགེ་བའི་རྩ་བ་དང ། ཁ་ཅིག་གིས་ནི། རྩེ་མོ་དང ། ཁ་ཅིག་ནི། བཟོད་པ་ཆུང་ངུ་དང ། འབྲིང་བསྐྱེད་པར་གྱུར་ཏོ། །ཁ་ཅིག་གིས་ནི། ཉན་ཐོས་ཀྱི་བྱང་ཆུབ་དང ། ཁ་ཅིག་གིས་ནི། རང་སངས་རྒྱས་ཀྱི་བྱང་ཆུབ་དང ། ཁ་ཅིག་གིས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་བསྐྱེད་པར་གྱུར་ཏོ། །ཁ་ཅིག་གིས་ནི། སྐྱབས་སུ་འགྲོ་བ་དང ། བསླབ་པའི་གཞི་དག་ཡང་དག་པར་བླངས་ཏེ་འཁོར་དེ་དག་ལས་ཕལ་ཆེར་སངས་རྒྱས་ལ་གཞོལ་བ་དང ། ཆོས་ལ་འབབ་པ་དང ། དགེ་འདུན་ལ་བབ་པར་གྱུར་ཏོ། །དེ་རྒྱལ་པོ་གཟུགས་ཅན་སྙིང་པོས་ཁྱེའུ་མེ་སྐྱེས་མ་མ་བརྒྱད་པོ། པང་ན་འཚོ་བའི་མ་མ་གཉིས་དང །
Tha26a
༄#། །ནུ་མ་སྣུན་པའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང ། ཞོ་དང ། མར་དང ། ཞུན་མར་དང ། མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང ། རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །དེའི་ཞང་པོ་ཟོང་ཐོགས་ཏེ་ཡུལ་གཞན་དུ་སོང་བ་དེས། ཇི་ལྟར་བདག་གི་སྲིང་མོ་ལ་སེམས་ཅན་ཞུགས་པར་གྱུར་པ་དེ། བཅོམ་ལྡན་འདས་ཀྱིས་ཁྱེའུར་སྐྱེ་བར་འགྱུར་ཏེ། རིགས་འབར་བར་འགྱུར་ཞིང ། ལྷ་དང་མིའི་དཔལ་ཡང་མྱོང་བར་གྱུར་ནས་ངའི་བསྟན་པ་ལ་རབ་ཏུ་བྱུང་སྟེ། ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ཞེས་ལུང་བསྟན་པ་ཐོས་ནས་དེས་ཟོང་བསྒྱུར་ཏེ་རིན་བླངས་ནས་རྒྱལ་པོའི་ཁབ་ཏུ་སོང་བ་དང ། དེས་འདི་ལྟར་བདག་གི་སྲིང་མོ་དེ་འཆི་བའི་དུས་ལ་བབ་བོ། །ཞེས་ཐོས་སོ། །ཐོས་ནས་ཀྱང་བསམ་པ། བཅོམ་ལྡན་འདས་ཀྱིས་དེའི་བུ་ཁྱེའུར་སྐྱེ་བར་འགྱུར་ཏེ། རིགས་འབར་བར་འགྱུར་ཞིང ། ལྷ་དང་མིའི་དཔལ་ཡང་མྱོང་བར་གྱུར་ནས་ངའི་བསྟན་པ་ལ་རབ་ཏུ་བྱུང་སྟེ། ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ཞེས་ལུང་བསྟན་ན། བཅོམ་ལྡན་འདས་ཀྱིས་བཀའ་སྩལ་པ་དེ། རྫུན་དུ་མ་གྱུར་ཏམ་སྙམ་ནས་དེས་ཁྱིམ་ཚེས་དག་ལ་དྲིས་པ། བདག་གི་
Tha26b
སྲིང་མོ་ལ་སེམས་ཅན་ཞུགས་པར་གྱུར་པ་དེ། བཅོམ་ལྡན་འདས་ཀྱིས་ཁྱེའུར་འགྱུར་ཏེ། རིགས་འབར་བར་འགྱུར་ཞིང ། ལྷ་དང་མིའི་དཔལ་ཡང་མྱོང་བར་གྱུར་ནས་ངའི་བསྟན་པ་ལ་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ཞེས་ལུང་བསྟན་པར་ཐོས་སོ། །ཐོས་ནས་བདག་ཀུན་ཏུ་དགའ་བ་ལས། དེ་ཡང་འཆི་བའི་དུས་ལ་བབ་པོ། །ཞེས་ཐོས་ན། བཅོམ་ལྡན་འདས་ཀྱིས་བཀའ་སྩལ་པ་དེ། རྫུན་དུ་མ་གྱུར་ཏམ། དེ་དག་གིས་ཚིགས་སུ་བཅད་པ་སྨྲས་པ། ཟླ་བ་སྐར་མའི་ཚོགས་བཅས་ས་ལ་ལྟུང་ཡང་སྲིད། །ས་འདི་རི་དང་ནགས་བཅས་མཁའ་ལ་འགྲོ་ཡང་སྲིད། །རྒྱ་མཚོ་ཆེན་པོའི་ཆུ་ནི་སྐམ་པར་འགྱུར་སྲིད་ཀྱི། །དྲང་སྲོང་ཆེན་པོ་རྫུན་གསུང་འགྱུར་བ་སྲིད་པ་མིན། །བཅོམ་ལྡན་འདས་ཀྱིས་བཀའ་སྩལ་པ་རྫུན་དུ་མི་འགྱུར་ཏེ། འདི་ལྟར་ཁྱིམ་ཐབ་དེས་དེ་ཇི་ལྟ་ཇི་ལྟར་འཆི་བར་འགྱུར་བ་དེ་ལྟ་དེ་ལྟར་བྱས་པས་འཆི་བའི་དུས་ལ་བབ་ནས་དེའི་ཁྱེའུ་དབང་ཐང་ཆེན་པོ་ཅན་མེར་བསྲེགས་ཀྱང་མ་ཚིག་པ་མཐུ་བོ་ཆེ་ཞིག་།ད་ལྟར་རྒྱལ་པོའི་ཕོ་བྲང་ན་གསོ་ཞིང་འདུག་གོ་།ཞེས་སྨྲས་པ་དང ། དེ་ཁྱིམ་བདག་ཤིན་ཏུ་བཟང་པོའི་གན་དུ་སོང་སྟེ་སྨྲས་པ། ཁྱིམ་བདག་།ཁྱོད་ཀྱིས་མི་རིགས་པ་ཞིག་བྱས་སོ། །ཅི་ཞིག་བྱས། གཅེར་བུ་པས་བསླུས་ནས་ཁྱོད་ཀྱིས་ངའི་སྲིང་མོ་ལ་སེམས་ཅན་ཞུགས་པ། ཇི་ལྟ་ཇི་ལྟར་འཆི་བར་འགྱུར་བ་དེ་ལྟ་དེ་ལྟར་བྱས་པས། འཆི་བའི་དུས་ལ་བབ་པར་བྱས་སོ། །དེའི་ཁྱེའུ་དབང་ཐང་ཅན་མེར་བསྲེགས་ཀྱང་མ་
Tha27a
༄#། །ཚིག་པ་མཐུ་བོ་ཆེ་ཞིག་།ད་ལྟར་རྒྱལ་པོའི་ཕོ་བྲང་ན་གསོ་ཞིང་འདུག་པ་དེས་ནི་རེ་ཞིག་ཅི་བྱར་ཡང་མེད་དེ། འདི་ལྟར། ཡང་གལ་ཏེ་གཞོན་ནུ་དེ་བླངས་ན། དེ་ལྟ་ན་ལེགས་འོན་ཏེ་མི་ལེན་ན། ངས་ཁྱོད་གཉེན་དུ་ཡང་མི་བརྩི། རབས་ཡིག་ཀྱང་འདོར་ཞིང ། ལམ་པོ་ཆེ་དང ། སྲང་དང ། ལམ་གྱི་སུམ་མདོ་དང ། བཞི་མདོ་དག་ཏུ་ཡང་ཁྱིམ་བདག་ཤིན་ཏུ་བཟང་པོས་བདག་གི་སྲིང་མོ་བསད་དོ། །ཆུང་མ་གསོད་པ་འདི་ལ་སུས་ཀྱང་གཏམ་འདྲེ་བར་མི་བྱའོ། །ཞེས་མི་སྙན་པ་བསྒྲག་ཅིང ། རྒྱལ་པོའི་གནོད་པ་ཡང་བྱེད་དུ་གཞུག་གོ། ཞེས་སྨྲས་པ་དང ། དེས་དེ་ཐོས་ནས་སྐྲག་སྟེ། དེ་སྐད་སྨྲ་བ་དང་སྦྱར་ན། བདག་ལ་དེ་ལྟར་བྱེད་པར་ངེས་སོ། །སྙམ་ནས་དེ་རྒྱལ་པོའི་གན་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། ལྷ། བདག་གི་ཉེ་དུ་པོའི་མཆིད་ནས། ད་ཡང་གལ་ཏེ་གཞོན་ནུ་དེ་བླངས་ན། དེ་ལྟ་ན་ལེགས། འོན་ཏེ་མི་ལེན་ན། ངས་ཁྱོད་གཉེན་དུ་ཡང་མི་བརྩི། རབས་ཡིག་ཀྱང་འདོར་ཞིང ། ལམ་པོ་ཆེ་དང ། སྲང་དང ། ལམ་གྱི་སུམ་མདོ་དང ། བཞི་མདོ་དག་ཏུ་ཡང་ཁྱིམ་བདག་ཤིན་ཏུ་བཟང་པོས་བདག་གི་སྲིང་མོ་བསད་དོ། །ཆུང་མ་གསོད་པ་འདི་ལ་སུས་ཀྱང་གཏམ་འདྲེ་བར་མི་བྱའོ། །ཞེས་མི་སྙན་པ་བསྒྲག་ཅིང ། རྒྱལ་པོའི་གནོད་པ་ཡང་བྱེད་དུ་གཞུག་གོ་།ཞེས་མཆི་བས། དེའི་སླད་དུ་ལྷས་གཞོན་ནུ་མེ་སྐྱེས་བདག་ལ་སྩལ་བའི་རིགས་སོ། །རྒྱལ་པོས་སྨྲས་པ། ཁྱིམ་བདག་།གཞོན་ནུ་མེ་སྐྱེས་ངས་ཁྱོད་ལས་བླངས་པ་མ་ཡིན་
Tha27b
གྱི། བཅོམ་ལྡན་འདས་ཀྱིས་ང་ལ་གཏད་པ་ཡིན་པས། ཁྱོད་ལ་གལ་ཏེ་གཞོན་ནུ་དགོས་ན། གཞོན་ནུའི་ཆེད་དུ་བཅོམ་ལྡན་འདས་ལ་སྔར་ཞུས་ཤིག་།དེ་བཅོམ་ལྡན་འདས་ཀྱི་སྤྱན་སྔར་སོང་ནས་ཞབས་གཉིས་ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གི་ཉེ་དུ་པོའི་མཆིད་ནས། ད་ཡང་གལ་ཏེ་གཞོན་ནུ་དེ་བླངས་ན། དེ་ལྟ་ན་ལེགས། འོན་ཏེ་མི་ལེན་ན། ངས་ཁྱོད་གཉེན་དུ་ཡང་མི་བརྩི། རབས་ཡིག་ཀྱང་འདོར་ཞིང ། ལམ་པོ་ཆེ་དང ། སྲང་དང ། ལམ་གྱི་སུམ་མདོ་དང ། བཞི་མདོ་དག་ཏུ་ཡང་ཁྱིམ་བདག་ཤིན་ཏུ་བཟང་པོས་བདག་གི་སྲིང་མོ་བསད་དོ། །ཆུང་མ་གསོད་པ་འདི་ལ་སུས་ཀྱང་གཏམ་འདྲེ་བར་མི་བྱའོ། །ཞེས་མི་སྙན་པ་བསྒྲག་ཅིང ། རྒྱལ་པོའི་གནོད་པ་ཡང་བྱེད་དུ་གཞུག་གོ། ཞེས་མཆི་བས། དེའི་སླད་དུ་གཞོན་ནུ་མེ་སྐྱེས་བདག་ལ་སྩལ་བའི་རིགས་སོ། །བཅོམ་ལྡན་འདས་ཀྱིས། གལ་ཏེ་ཁྱིམ་བདག་ཤིན་ཏུ་བཟང་པོ་གཞོན་ནུ་མེ་སྐྱེས་མ་ཐོབ་ན། ཁྲག་ཚ་བ་སྐྱུགས་ནས་འཆི་བའི་དུས་བྱེད་པར་འགྱུར་བའི་གནས་སྐབས་དེ་ལྟ་བུ་ཡོད་པར་གཟིགས་ནས། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། སོང་ལ་རྒྱལ་པོ་གཟུགས་ཅན་སྙིང་པོ་ལ། ངའི་བཀས་ཨ་རོག་གྱ་ཞེས་བྱོས་ལ་འདི་སྐད་ཅེས། རྒྱལ་པོ་ཆེན་པོ། ཁྱིམ་བདག་ཤིན་ཏུ་བཟང་པོ་ལ་གཞོན་ནུ་མེ་སྐྱེས་བྱིན་ཅིག་།གལ་ཏེ་ཁྱིམ་བདག་ཤིན་ཏུ་བཟང་པོ་གཞོན་ནུ་མེ་སྐྱེས་མ་ཐོབ་ན། ཁྲག་ཚ་བ་སྐྱུགས་ནས་འཆི་བའི་དུས་བྱེད་པར་འགྱུར་བའི་གནས་སྐབས་དེ་ལྟ་བུ་ཡོད་པར་འགྱུར་རོ། །ཞེས་ཀྱང་སྒོས་ཤིག་།ཚེ་དང་ལྡན་པ་
Tha28a
༄#། །ཀུན་དགའ་བོས། བཙུན་པ། བཀའ་བཞིན་འཚལ་ཞེས་བཅོམ་ལྡན་འདས་ཀྱི་བཀའ་མཉན་ནས་རྒྱལ་པོ་གཟུགས་ཅན་སྙིང་པོ་ག་ལ་བ་དེར་སོང་སྟེ་ཕྱིན་ནས་རྒྱལ་པོ་གཟུགས་ཅན་སྙིང་པོ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་ཀྱིས་ཁྱོད་ལ་རྒྱལ་པོ་ཆེན་པོ་ཨ་རོག་གྱ་ཞེས་བཀའ་སྩལ་ཏེ། རྒྱལ་པོ་ཆེན་པོ། ཁྱིམ་བདག་ཤིན་ཏུ་བཟང་པོ་ལ་གཞོན་ནུ་མེ་སྐྱེས་བྱིན་ཅིག། གལ་ཏེ་ཁྱིམ་བདག་ཤིན་ཏུ་བཟང་པོ་གཞོན་ནུ་མེ་སྐྱེས་མ་ཐོབ་ན། ཁྲག་ཚ་བ་སྐྱུགས་ནས་འཆི་བའི་དུས་བྱེད་པར་འགྱུར་བའི་གནས་སྐབས་དེ་ལྟ་བུ་ཡོད་པར་འགྱུར་རོ། །ཞེས་ཀྱང་བཀའ་སྩལ་ཏོ། །རྒྱལ་པོས་སྨྲས་པ། བཙུན་པ་ཀུན་དགའ་བོ། བཅོམ་ལྡན་འདས་ལ་ཕྱག་འཚལ་ལོ། །བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་དེ་བཞིན་འཚལ་ལོ། །ཚེ་དང་ལྡན་པ་ཀུན་དགའ་བོས་རྒྱལ་པོ་ཆེན་པོ་ཨ་རོག་གྱ་ཞེས་སྨྲས་ཏེ་སོང་ངོ ། །རྒྱལ་པོས་སྨྲས་པ། ཁྱིམ་བདག་གཞོན་ནུ་འདི་ངས་བསྐྱེད་དེ་ཡིད་དུ་འོང་ཞིང་སྡུག་པ་ཡིན་པས། དམ་ཚིག་བཅས་ལ་སྦྱིན་པར་བྱ་སྟེ། ཉི་མ་རེ་རེ་ལ་ཡང་དུས་གསུམ་གསུམ་དུ་ང་བལྟ་བའི་ཕྱིར་གཏོང་ན། སྦྱིན་པར་བྱའོ། །དེས་སྨྲས་པ། ལྷ། ཁྱོད་ཀྱི་སྤྱན་སྔར་མི་གཏང་ན། གཞན་སུའི་ཐད་དུ་གཏང་བར་བགྱི། གཏང་བར་འཚལ་ལོ། །རྒྱལ་པོས་དེ་རྒྱན་ཐམས་ཅད་ཀྱིས་བརྒྱན་ཏེ་གླང་པོ་ཆེ་ལ་བསྐྱོན་ནས་བཏང་ངོ ། །འདི་ལྟར་འཇིག་རྟེན་པ་རྣམས་ཀྱི་ཀུན་ཏུ་སྤྱོད་པ་ནི། ཇི་སྲིད་དུ་ཕ་གསོན་པ་དེ་སྲིད་དུ་བུའི་མིང་མི་སྒྲོག་གོ་།ཇི་ཙམ་དུས་གཞན་ཞིག་ན་ཁྱིམ་བདག་ཤིན་ཏུ་
Tha28b
བཟང་པོ་འཆི་བའི་དུས་བྱས་ནས་གཞོན་ནུ་མེ་སྐྱེས་ཕའི་ཁྱིམ་ན་གནས་པར་གྱུར་ཏེ། དེ་སངས་རྒྱས་ལ་མངོན་པར་དད། ཆོས་དང ། དགེ་འདུན་ལ་མངོན་པར་དད། སངས་རྒྱས་ལ་སྐྱབས་སུ་སོང ། ཆོས་དང ། དགེ་འདུན་ལ་སྐྱབས་སུ་སོང་ངོ ། །དེས་ཁྱིམ་བདག་ཤིན་ཏུ་བཟང་པོས་ཕྱོགས་གང་དུ་བདག་གི་མ་བསད་པའི་ཕྱོགས་དེར་གཙུག་ལག་ཁང་རྩིག་ཏུ་བཅུག་ནས་ཡོ་བྱད་ཐམས་ཅད་ཕུན་སུམ་ཚོགས་པར་སྦྱར་ཏེ་ཕྱོགས་བཞིའི་དགེ་འདུན་ལ་ཕུལ་ནས་འདི་ལྟར། གནས་བརྟན་དག་གིས་ཀྱང་མདོ་སྡེ་དག་ལ། བཅོམ་ལྡན་འདས་རྒྱལ་པོའི་ཁབ་ན་དཀུ་མཉེད་པའི་ཚལ་ན་བཞུགས་སོ། །ཞེས་ཉེ་བར་སྦྱར་ཏོ། །ཁྱིམ་བདག་ཤིན་ཏུ་བཟང་པོའི་མི་ཞོ་ཤས་འཚོ་བ་ཡུལ་གཞན་དུ་དོང་བ་དག་གིས། ཁྱིམ་བདག་ཤིན་ཏུ་བཟང་པོ་ནི། འཆི་བའི་དུས་ལ་བབ་བོ། །གཞོན་ནུ་མེ་སྐྱེས་ནི། རང་གི་ཁྱིམ་ན་གནས་ཏེ། དེ་སངས་རྒྱས་ལ་མངོན་པར་དད། ཆོས་དང ། དགེ་འདུན་ལ་མངོན་པར་དད། སངས་རྒྱས་ལ་སྐྱབས་སུ་སོང ། ཆོས་དང ། དགེ་འདུན་ལ་སྐྱབས་སུ་སོང་ངོ ། །ཞེས་ཐོས་སོ། །ཐོས་ནས་ཀྱང་དེ་དག་གིས་ཙན་ར་ནས་མཆོག་པའི་ལྷུང་བཟེད་གཅིག་།རིན་པོ་ཆེ་དག་གིས་བཀང་སྟེ་ཁྱིམ་བདག་མེ་སྐྱེས་ལ་སྐྱེས་སུ་བསྐུར་རོ། །དེས་ཀྱང་དེ་ཤིང་རིང་པོའི་རྩེ་མོ་ལ་བཏགས་ཏེ་བཞག་ནས་འདི་སྐད་ཅེས། འདི་སུས་ཀྱང་སྐས་དང ། ཡ་གད་དང ། ཀྱོ་བཏང་དག་གིས་བླང་བར་མི་བྱའི། འདི་ལྟར། དགེ་སྦྱོང་ངམ། བྲམ་ཟེ་གང་དག་རྫུ་འཕྲུལ་ཆེ་བའམ། མཐུ་ཆེ་བ་དེ་དག་ལས་འགའ་ཞིག་གིས་ལེན་ན། དེས་ནི། འདི་ཅི་བདེར་
Tha29a
༄#། །ཁྱེར་ལ་རག་གོ་།ཞེས་དྲིལ་བསྒྲགས་པ་ཡང་བྱས་སོ། །གཞན་མུ་སྟེགས་ཅན་རྣམས་ནང་པར་སྔར་ལངས་ནས་ཆུ་ངོགས་དག་ཏུ་ཉེ་རེག་བྱེད་དུ་འདོང་བ་དེ་དག་གིས་དེ་མཐོང་ངོ ། ། མཐོང་ནས་ཀྱང་ཁྱིམ་བདག་མེ་སྐྱེས་ལ་སྨྲས་པ། ཁྱིམ་བདག་འདི་ཅི་ཡིན། དེས་དེ་དག་ལ་རྒྱས་པར་བསྙད་པ་དང ། དེ་དག་གིས་སྨྲས་པ། ཁྱིམ་བདག། ཁྱོད་ཤཱཀྱའི་བུའི་དགེ་སྦྱོང་རྣམས་ལ་མངོན་པར་དད་པས། དེ་དག་ཉིད་ལེན་པར་འགྱུར་རོ། །ཞེས་སྨྲས་ནས་དོང་ངོ ། །ཇི་ཙམ་ན་དགེ་སློང་གནས་བརྟན་གནས་བརྟན་དག་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དེ་དག་གིས་དེ་མཐོང་ནས། དེ་དག་གིས་ཀྱང་ཁྱིམ་བདག་མེ་སྐྱེས་ལ་སྨྲས་པ། ཁྱིམ་བདག། འདི་ཅི་ཡིན། དེས་དེ་དག་ལ་དེ་ཁོ་ན་བཞིན་དུ་རྒྱས་པར་བསྙད་པ་དང ། དེ་དག་གིས་སྨྲས་པ། ཁྱིམ་བདག་།བཅོམ་ལྡན་འདས་ཀྱིས་དགེ་སློང་དག་གི་ཡོན་ཏན་ནི། བཅབ་པར་བྱ། སྐྱོན་ནི། བསྒྲག་པར་བྱའོ། །ཞེས་བཀའ་སྩལ་ན། ཅི། ལྷུང་བཟེད་ཙམ་གྱི་ཆེད་དུ་བདག་ཉིད་བསྟན་པར་བྱའམ་ཞེས་སྨྲས་ནས་དོང་ངོ ། །ཇི་ཙམ་ན་ཚེ་དང་ལྡན་པ་འོད་སྲུང་སྟོབས་བཅུ་པ་དེ་ཕྱོགས་དེར་འོངས་ཏེ་ཁྱིམ་བདག་ལ་སྨྲས་པ། ཁྱིམ་བདག། འདི་ཅི་ཡིན། དེས་ཇི་ལྟ་བུ་ཡིན་པ་སྨྲས་པ་དང ། ཚེ་དང་ལྡན་པ་འོད་སྲུང་སྟོབས་བཅུ་པས་བསམ་པ།་བདག་གིས་ཐོག་མ་མེད་པའི་དུས་ནས་བསགས་པའི་ཉོན་མོངས་པའི་ཚོགས་རྣམས་སྤངས་ཤིང་བོར་ལ། བསལ་ཅིང་སྦྱངས་པ་བྱས་ན། ཁྱིམ་བདག་གིས་བདག་མུ་སྟེགས་ཅན་དང ། རྫུ་
Tha29b
འཕྲུལ་འགྲན་པར་ཆད་ཀྱི། དེའི་ཕྱིར་འདིའི་ཡིད་མགུ་བར་བྱའོ། །སྙམ་ནས་དེས་ལག་པ་གླང་པོ་ཆེའི་སྣ་ལྟ་བུ་བརྐྱང་སྟེ་ལྷུང་བཟེད་དེ་བླངས་ནས་དེས་དེ་ཁྱེར་ཏེ་གཙུག་ལག་ཁང་དུ་སོང་ངོ ། །དེ་ལ་དགེ་སློང་གིས་སྨྲས་པ། གནས་བརྟན། ཁྱོད་ཀྱིས་ཙནྡན་ས་མཆོག་པའི་ལྷུང་བཟེད་འདི་ག་ལས་མཆིས། དེས་ཇི་ལྟར་གྱུར་པ་དེ་བརྗོད་པ་དང ། དགེ་སློང་དག་གིས་སྨྲས་པ། གནས་བརྟན། ཁྱོད་ལྷུང་བཟེད་ཙམ་གྱི་ཆེད་དུ་ཁྱིམ་པའི་མདུན་དུ་རྫུ་འཕྲུལ་རྣམ་པར་བསྟན་དུ་རུང་ངམ། དེ་ཚེ་དང་ལྡན་པ་དག་རུང་ཡང་བླ། མི་རུང་ཡང་བླ་སྟེ། བྱས་ཟིན་པས་ད་ཅི་བྱར་ཡང་མེད་དོ། །ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཁྱིམ་པའི་མདུན་དུ་རྫུ་འཕྲུལ་རྣམ་པར་བསྟན་པར་མི་བྱའོ། །རྣམ་པར་སྟོན་ན། འགལ་ཚབས་ཅན་དུ་འགྱུར་རོ། །གཞན་ཡང་ལྷུང་བཟེད་རྣམ་པ་བཞི་པོ། གསེར་ལས་བྱས་པ་དང ། དངུལ་ལས་བྱས་པ་དང ། བཻ་ཌཱུརྱ་ལས་བྱས་པ་དང ། ཤེལ་ལས་བྱས་པ་དང ། གཞན་ཡང་ལྷུང་བཟེད་རྣམ་པ་བཞི་པོ། ར་གན་དང།་ཟངས་དང ། འཁར་བ་དང ། ཤིང་ལས་བྱས་པ་དག་ལས། འདི་ལྟར་ལྷུང་བཟེད་སྔ་མ་བཞི་པོ་གང་དག་ཡིན་པ་དེ་དག་ནི། མ་བླངས་པ་ཡང་བླང་བར་མི་བྱ་ལ། བླངས་པ་ཡང་གཏང་བར་བྱའོ། །ལྷུང་བཟེད་ཕྱི་མ་བཞི་པོ་གང་དག་ཡིན་པ་དེ་དག་ནི། མ་བླངས་པ་ནི། བླང་བར་མི་བྱ་ཞིང ། བླངས་པ་ན། སྨན་ཕོར་དུ་ལོངས་སྤྱད་པས་སྤྱད་པར་བྱ་བ་ཡིན་ནོ། །འདི་ལྟར་ལྕགས་དང ། སའི་ལྷུང་བཟེད་གཉིས་
Tha30a
༄#། །ནི། བྱིན་གྱིས་བརླབ་ཏུ་རུང་བ་དག་ཡིན་ནོ། །དེ་ནས་དུས་གཞན་ཞིག་ན་ཁྱིམ་བདག་མེ་སྐྱེས་ལྷ་དང་མིའི་དཔལ་ཡང་མྱོང་བར་གྱུར་ནས་རྒྱལ་པོའི་ཁབ་དང ། ཙམ་པ་དག་གི་བར་ན་ཤོ་གམ་གྱི་གནས་ཤིག་ཡོད་པ་དེའི་ཤོ་གམ་པ་འཆི་བའི་དུས་ལ་བབ་ནས་དེ་གནོད་སྦྱིན་གདུག་པ་ཞིག་ཏུ་སྐྱེས་པ་དང ། དེས་བུའི་རྨི་ལམ་དུ་འདི་སྐད་ཅེས། བུ། ཁྱོད་ཀྱིས་གནས་འདིར་གནོད་སྦྱིན་གྱི་རྟེན་འཛུགས་སུ་ཆུག་ལ། དེར་དྲིལ་ཡང་གྱིས་ལ་ཐོགས་ཤིག་དང ། གང་གི་ཚེ་དེར་སུ་དག་ཟོང་ལས་ཤོ་གམ་མི་འཇལ་བར་འགྲོ་བར་བྱེད་པ་དེའི་ཚེ་དྲིལ་དེ་སྒྲ་འབྱིན་པར་བྱེད་ཅིང ། དེ་དག་ཕྱིར་ལྡོག་པ་ལས་ཤོ་གམ་ཆོད་པར་འགྱུར་རོ། །ཞེས་བསྟན་ཏོ། །དེས་གཉེན་བཤེས་དང ། ཉེ་དུ་དང ། རྩ་ལག་དག་ལ་རྨི་ལམ་དེ་བཟླས་ནས་ཉི་མ་དང ། ཚེས་གྲངས་དང ། ཡུད་ཙམ་དང ། གཟའ་དང ། རྒྱུ་སྐར་དང ། དུས་ཤིས་པ་ལ་བབ་པའི་ཚེ་གནས་དེར་གནོད་སྦྱིན་གྱི་རྟེན་འཛུགས་སུ་བཅུག་ནས་དེར་དྲིལ་ཡང་བྱས་ཏེ་བཏགས་སོ། །གྲོང་ཁྱེར་ཙམ་པ་ན་བྲམ་ཟེ་ཞིག་གིས། རིགས་མཉམ་པ་ལས་ཆུང་མ་བླངས་བ་དང ། བྲམ་ཟེ་མོ་དེ་བསམ་པ། བདག་བྲམ་ཟེས་ཐབས་དེ་དང་དེ་དག་གིས་བསྒྲུབ་པའི་ནོར་དག་སྤྱོད་ཅིང ། ལས་ཅི་ཡང་མི་བྱེད་པར་འདུག་པ་ནི། བདག་གི་ཚུལ་དང་མཐུན་པ་མ་ཡིན་ནོ། །སྙམ་ནས་དེ་ཚོང་འདུས་སུ་སོང་སྟེ་རས་བལ་ཉོས་ནས་སེལ་གྱིས་ཞག་པར་བྱས་ཤིང་བཀལ་ཏེ་ཐ་ག་པ་མཁས་པ་ལ་ཀཪྴ་པ་ཎ་སྟོང་རི་བའི་རས་ཟུང་ཅིག་འཐག་ཏུ་བཅུག་
Tha30b
གོ་།དེ་ནས་དེས་བྲམ་ཟེ་ལ་སྨྲས་པ། རས་ཟུང་འདི་ཀཪྴ་པ་ཎ་སྟོང་རི་བ་ལགས་ཀྱི། ཚོང་འདུས་སུ་བཞུད་ལ་གང་དག་ཀཪྴ་པ་ཎ་སྟོང་གིས་འཇལ་བ་ལ་ནི། སྩོལ་ཅིག་།གལ་ཏེ་དེས་མི་འཇལ་ན། ཚོང་འདུས་མ་ཡིན་ནོ། །ཞེས་བསྒྲགས་ནས་གཞན་དུ་བཞུད་པར་མཛོད་ཅིག་།དེས་དེ་ཁྱེར་ཏེ་ཚོང་འདུས་སུ་སོང་བ་ན་ཀཪྴ་པ་ཎ་སྟོང་གིས་ཉོ་བ་སུ་ཡང་མེད་ནས་དེས་ཚོང་འདུས་མ་ཡིན་ནོ། །ཞེས་བསྒྲགས་ཏེ་རས་ཟུང་དེ་གདུགས་ཀྱི་རྩ་བའི་ནང་དུ་བཅུག་སྟེ་འགྲོན་པོ་དག་དང་ལྷན་ཅིག་རྒྱལ་པོའི་ཁབ་ཏུ་སོང་ངོ ། །ཇི་ཙམ་ན་ཙམ་པའི་བར་གྱི་ཤོ་གམ་གྱི་གནས་སུ་ཕྱིན་པ་དང ། ཤོ་གམ་པས་འགྲོན་པོ་དེ་དག་ལ་ཤོ་གམ་བཅད་པ་ན། དེ་དག་གིས་ཤོ་གམ་ཕུལ་ནས་དོང ། དེ་ནས་དྲིལ་སྒྲ་འབྱིན་པར་བྱེད་ནས་ཤོ་གམ་པ་དག་གིས་སྨྲས་པ། ཤེས་ལྡན་དག་།དྲིལ་འདི་ལྟར་སྒྲ་འབྱིན་པ་ལས་ན། འགྲོན་པོ་དག་གིས་ཤོ་གམ་ལེགས་པར་མ་ཕུལ་གོར་མ་ཆག་གི་།ཡང་ཤོ་གམ་གཅད་དོ། །ཞེས་དེ་དག་གིས་འགྲོན་པོ་དག་ཡང་ཕྱིར་བཀུག་སྟེ་བཙལ་ན། ཤོ་གམ་མ་ཕུལ་བ་འགའ་ཡང་མེད་དོ། །དེ་དག་དང་པ་དང ། ཡང་དྲིལ་སྒྲ་འབྱིན་པ་ཉིད་དུ་བྱེད་ནས་དེ་དག་གིས་འགྲོན་པོ་དག་ཡང་ཕྱིར་བཀུག་སྟེ་བཙལ་ན། ཤོ་གམ་མ་ཕུལ་བ་འགའ་ཡང་མེད་པར་གྱུར་ནས་འགྲོན་པོ་དག་ངེད་ལ་ཁྱེད་ཅག་ཆོམ་པོ་བྱེད་པར་སེམས་སམ་ཅི་ན། ཡང་དང་ཡང་དུ་ཕྱིར་འགུགས་པར་བྱེད་ཅེས་སྨོད་པར་བྱེད་དོ། །དེ་དག་གིས་འགྲོན་པོ་དེ་དག་ཚོམས་གཉིས་སུ་བྱས་ཏེ་བཀྱེ་བ་དང ། ཚོམས་གང་གི་ནང་ན་བྲམ་ཟེ་དེ་མེད་པ་དག་ནི། དེ་བཞིན་དོང་ངོ །
Tha31a
༄#། །ཚོམས་གཅིག་ཤོས་འདོང་བ་ན། དྲིལ་དེ་དེ་བཞིན་དུ་སྒྲ་འབྱིན་པར་བྱེད་ནས་དེ་དག་གིས་དེ་དག་ཀྱང་དེ་བཞིན་དུ་ཚོམས་གཉིས་སུ་བྱས་ཤིང་བྱས་ཤིང་བཀྱེ་བ་དང ། ཐ་མར་བྲམ་ཟེ་དེ་གཅིག་པུ་ཉི་ཚེ་ལུས་པར་གྱུར་ནས། དེ་དེ་དག་གིས་བཟུང་ངོ ། །དེས་བདག་ལ་ཅུང་ཟད་ཀྱང་མེད་ཀྱི། ཚོལ་ཅིག་ཅེས་སྨྲས་པ་དང ། དེ་དག་གིས་བཙལ་ནས་ཅི་ཡང་མེད་ནས་བཏང་བ་ན། ཡང་དྲིལ་དེ་སྒྲ་འབྱིན་པ་ཉིད་དུ་བྱེད་དོ། །དེ་དག་གིས་བྲམ་ཟེ་དེ་ཡང་ཕྱིར་བཀུག་ནས་སྨྲས་པ། ཀྱེ་བྲམ་ཟེ། ལྷའི་བྱིན་གྱི་རླབས་ནི། དེ་ལྟར་གྱུར་ན། ཁྱོད་བདེན་པར་སྨྲོས་ཤིག་དང ། ཁོ་བོ་ཅག་ཁྱོད་ལ་ཤོ་གམ་མི་ལེན་ཏོ། །དེས་སྨྲས་པ། བདེན་པར་མི་ལེན་ཏམ། དེ་དག་གིས་སྨྲས་པ། མི་ལེན་ཏོ། དེས་གདུགས་ཀྱི་རྩ་བའི་ནང་ནས་རས་ཟུང་དེ་ཕྱུང་སྟེ་བསྟན་ཏོ། །དེ་དག་ཀྱེ་མ། ལྷའི་བྱིན་གྱི་རླབས་ནི། འདི་འདྲའོ། །ཞེས་ངོ་མཚར་ཆེན་པོ་སྐྱེས་བར་གྱུར་ནས་དེ་དག་གིས་དེའི་རས་ཡ་གཅིག་ཕྱེ་སྟེ་ལྷ་ལ་བསྟན་ཏོ། །བྲམ་ཟེས་སྨྲས་པ། ཀྱེ་ཁྱེད་ཅག་ན་རེ། ཤོ་གམ་མི་ལེན་ཏོ་ཞེས་ཟེར་ན།་ཐམས་ཅད་འཕྲོག་གམ། དེ་དག་གིས་སྨྲས་པ། བྲམ་ཟེ། ངེད་ཅག་ལེན་པར་མི་བྱེད་དེ། ལྷའི་བྱིན་གྱིས་རླབས་དེ་ལྟ་ཕུ་མཛད་པས། ངེད་ཀྱིས་ལྷ་ལ་བསྟན་པར་ཟད་ཀྱི། ལོངས་ལ་སོང་ཞིག ། དེས་དེ་བླངས་ནས་ཡང་གདུགས་ཀྱི་རྩ་བའི་ནང་དུ་བཅུག་སྟེ་སོང་ནས་ཁད་ཀྱིས་རྒྱལ་པོའི་ཁབ་ཏུ་ཕྱིན་ཏོ། །དེས་ཚོང་འདུས་སུ་རས་ཟུང་དེ་བཀྲམ་པ་ན་དེར་ཡང་ཀཪྴ་པ་ཎ་སྟོང་གིས་ཉོ་བ་སུ་ཡང་མེད་
Tha31b
ནས་དེས་རྒྱལ་པོའི་ཁབ་ཀྱི་ཚོང་འདུས་ཀྱང་ཚོང་འདུས་མ་ཡིན་ནོ། །ཞེས་བསྒྲགས་སོ། །དེ་ན་གཞོན་ནུ་མེ་སྐྱེས་གླང་པོ་ཆེ་ལ་ཞོན་ཏེ་རྒྱལ་པོའི་ཕོ་བྲང་ནས་ཕྱིར་བྱུང་སྟེ་ཚོང་འདུས་ཀྱི་ནང་ནས་རང་གི་ཁྱིམ་དུ་འགྲོ་བས་དེ་ཐོས་པ་དང ། དེས་ཤེས་ལྡན་དག་།བྲམ་ཟེ་དེ་ཅིའི་ཕྱིར་ཚོང་འདུས་མ་ཡིན་ནོ། །ཞེས་སྒྲོག་པར་བྱེད་པ་དྲི་བར་བྱའི། བོས་ཤིག་།དེ་དག་གིས་དེ་བོས་ནས་མེ་སྐྱེས་ཀྱིས་སྨྲས་པ། བྲམ་ཟེ། ཁྱོད་ཅིའི་ཕྱིར་ཚོང་འདུས་འདི་ཚོང་འདུས་མ་ཡིན་ནོ། །ཞེས་སྒྲོག་པར་བྱེད། དེས་སྨྲས་པ། ཁྱིམ་བདག་རས་ཟུང་འདི་ལྟ་བུ་ཀཪྴ་པ་ཎ་སྟོང་གིས་ཉོ་བ་སུ་ཡང་མེད་པའི་ཕྱིར་རོ། །དེས་སྨྲས་པ། བལྟའི། ཁྱེར་ཏེ་ཤོག་།དེས་དེ་ཉེ་བར་བསྟན་ཏོ། །མེ་སྐྱེས་ཀྱིས་སྨྲས་པ། བྲམ་ཟེ། དེ་ཙམ་ནི། རི་མོད་ཀྱི། འོན་ཀྱང་རས་གཅིག་ནི། སྤྱད་ཟིན་པ་ཞིག་།གཅིག་ནི། མ་སྤྱད་པ་ཞིག་པས། མ་སྤྱད་པ་གང་ཡིན་པ་འདི་ནི། ཀཪྴ་པ་ཎ་ལྔ་བརྒྱ་རི། གང་སྤྱད་པ་འདི་ནི། ཉིས་བརྒྱ་ལྔ་བཅུ་རིའོ། །བྲམ་ཟེས་སྨྲས་པ། ཅི། འདི་དེ་ལྟ་བུར་འགྱུར་རམ། མེ་སྐྱེས་ཀྱིས་སྨྲས་པ། བྲམ་ཟེ། ཁྱོད་ཀྱིས་མངོན་སུམ་དུ་བསྟན་གྱི། ལྟོས་ཤིག། ཅེས་དེས་མ་སྤྱད་པ་དེ་སྟེང་གི་ནམ་མཁའ་ལ་བོར་བ་དང ། དེ་སྐྱེངས་ཤིང་འདུག་གོ་།སྤྱད་པ་བོར་བ་ན། དེ་མ་ཐག་ཏུ་ཕྱིར་ལྷུང་ངོ ། །བྲམ་ཟེ་ངོ་མཚར་སྐྱེས་ཏེ་སྨྲས་པ། ཁྱིམ་བདག། ཁྱོད་ནི། རྫུ་འཕྲུལ་ཆེ་བ། མཐུ་ཆེ་བ་ཞིག་གོ་།མེ་སྐྱེས་ཀྱིས་ཡང་ལྟོས་ཤིག་།ཅེས་སྨྲས་ནས། དེས་མ་སྤྱད་པ་གང་ཡིན་པ་དེ། ཚེར་མའི་སྟེང་དུ་བོར་ན། མ་ཐོགས་པར་སོང་ངོ ། །གཅིག་ཤོས་དེ་བོར་ན། ཚེར་མ་ལ་ཐོགས་
Tha32a
༄#། །ནས་བྲམ་ཟེ་དེ། ངོ་མཚར་ཆེན་པོ་དེས་མངོན་པར་དད་པར་གྱུར་ནས་སྨྲས་པ། ཁྱིམ་བདག་།ཁྱོད་ནི། རྫུ་འཕྲུལ་ཆེ་བ། མཐུ་ཆེ་བ་ཞིག་པས། ཁྱོད་རིན་ཇི་ཙམ་གྱིས་བཞེད་པ་དེ་ཙམ་གྱིས་སྣོམས་ཤིག་།དེས་སྨྲས་པ། བྲམ་ཟེ། ཁྱོད་མགྲོན་ཡིན་གྱི། ཁྱོད་ཉིད་ལ་མཆོད་པ་བྱ་བའི་ཕྱིར་ཀཪྴ་པ་ཎ་སྟོང་ཉིད་སྦྱིན་པར་བྱའོ། །ཞེས་དེས་དེ་ལ་ཀཪྴ་པ་ཎ་སྟོང་བྱིན་པ་དང ། བྲམ་ཟེས་དེ་བླངས་ནས་སོང་ངོ ། །མེ་སྐྱེས་ཀྱིས་དེ་དག་ལས་གང་སྤྱད་པ་དེ་ནི། ཁྱེའུ་ཞིག་ལ་བྱིན། མ་སྤྱད་པ་ནི། ཁྲུས་རས་སུ་བྱས་སོ། །དེ་ནས་དུས་གཞན་ཞིག་ན། རྒྱལ་པོ་གཟུགས་ཅན་སྙིང་པོ་སྟེང་གི་ཁང་བཟང་གི་ཐོག་ན་བློན་པོའི་ཚོགས་ཀྱིས་ཡོངས་སུ་བསྐོར་ཅིང་འདུག་པའི་ཚེ། མེ་སྐྱེས་ཀྱིས་ཁྲུས་རས་ཁང་པའི་སྟེང་དུ་སྐམ་དུ་བཅུག་པ་རླུང་གིས་ནམ་མཁའ་ལ་ཁྱེར་ནས་རྒྱལ་པོ་གཟུགས་ཅན་སྙིང་པོའི་སྟེང་དུ་ལྷུང་བ་དང ། རྒྱལ་པོས་སྨྲས་པ། ཤེས་ལྡན་དག་།རྒྱལ་པོ་ལ་འོས་པའི་གོས་འདི་ལྟ་བུ་ག་ལས་འོངས། དེ་དག་གིས་སྨྲས་པ། ལྷ། རྒྱལ་པོ་ང་ལས་ནུ་བྱུང་བའི་ཚེ་ནི། དགུང་བདུན་དུ་རིང་པོ་ཆེའི་ཆར་བབ་བོ། །ཞེས་ཐོས་ནས། ལྷ་ལ་ཡང་ན་བཟའི་ཆར་བབ་པ་ལས་ན། རིང་པོ་མི་ཐོགས་པར་རིན་པོ་ཆེའི་ཆར་འབབ་པར་འགྱུར་རོ། །རྒྱལ་པོས་སྨྲས་པ། བཅོམ་ལྡན་འདས་ཀྱིས་ཁྱིམ་བདག་མེ་སྐྱེས་ལྷ་དང་མིའི་དཔལ་ཡང་མྱོང་བར་འགྱུར་རོ། །ཞེས་ལུང་བསྟན་ལ། འདི་ཡང་ལྷའི་གོས་ནམ་མཁའ་ལས་འོངས་པ་ཞིག་ན། དེ་འོངས་དང་སྦྱིན་པར་བྱའི། ཞོག་ཅིག་ཅེས་བསྒོའོ། །དེ་དག་དེ་
Tha32b
སྐད་སྨྲ་བའི་ཚེ་ཉིད་ན་མེ་སྐྱེས་འོངས་པ་དང ། རྒྱལ་པོས་སྨྲས་པ། གཞོན་ནུ། ཁྱོད་བཅོམ་ལྡན་འདས་ཀྱིས་ལྷ་དང་མིའི་དཔལ་ཡང་མྱོང་བར་འགྱུར་རོ། །ཞེས་ལུང་བསྟན་ལ། ང་ལ་ཡང་ལྷའི་གོས་ནམ་མཁའ་ལས་ལྷུང་བ་འདི་ལྟ་བུ་ཡོད་ཀྱི། དེ་ཁྱོད་ཁྱེར་ཅིག་།དེས་ལག་པ་བརྐྱང་སྟེ་སྨྲས་པ། ལྷ། གཡར་སྔ་བྲིམ་གྱི། ཚུར་སྩལ་ཞེས་བརྟགས་ན། ཇི་ཙམ་ན་བདག་གིས་ཁྲུས་རས་ཡིན་པར་མཐོང་ནས་ཅུང་ཟད་བགད་དེ་སྨྲས་པ། ལྷ། འདི་བདག་གི་ཁྲུས་རས་བསེར་མས་འཚལ་ནས་འདིར་མཆིས་པ་ལགས་སོ། །རྒྱལ་པོས་སྨྲས་པ། གཞོན་ནུ། ད་ཁྱོད་ཀྱིས་ལྷ་དང་མིའི་དཔལ་ཡང་མྱོང་བར་གྱུར་ཏམ། ལྷ། མྱོང་བར་གྱུར་ཏོ། །གཞོན་ནུ། གལ་ཏེ་དེ་ལྟ་ན། ཅིའི་ཕྱིར་ང་སྤྱན་འདྲེན་པར་མི་བྱེད། ལྷ། སྤྱན་འདྲེན་ཏོ། །སོང་ལ་ཡོ་ལང་གི་ཞལ་ཏ་དག་ཤོམས་ཤིག་།ལྷ། གང་གིས་ལྷ་དང་མིའི་དཔལ་ཡང་མྱོང་བར་གྱུར་པ་ལ་ཞལ་ཏ་བགྱིད་ཅི་འཚལ་མོད་ཀྱི། འོན་ཀྱང་བདག་ཞལ་ཏ་བགྱིད་དུ་མཆིའོ། །རྒྱལ་པོ་མེ་སྐྱེས་ཀྱི་ཁྱིམ་དུ་སོང་ནས་བུད་མེད་ཀྱི་འཁོར་ཕྱི་པ་དག་མཐོང་བ་དང ། དབང་པོ་དག་ཕྱིར་གློན་པར་བྱེད་དོ། །མེ་སྐྱེས་ཀྱིས་སྨྲས་པ། ལྷ། ཅིའི་སླད་དུ་དབང་པོ་དག་སླར་གློན་པར་མཛད། དེས་སྨྲས་པ། གཞོན་ནུ། མནའ་མ་ཡིན་པས་དེ་ལྟར་བྱས་སོ། །ལྷ། སྣམ་ཟུངས་མ་ལགས་ཏེ། འདི་ལྟར། བུད་མེད་ཀྱི་འཁོར་ཕྱི་པ་དག་ལགས་སོ། །དེ་ངོ་མཚར་ཆེན་པོ་སྐྱེས་ནས། ཡང་བུད་མེད་ཀྱི་འཁོར་བར་མ་དག་མཐོང་བ་དང ། དབང་པོ་དག་ཕྱིར་ལྡོན་པར་བྱེད་དོ། །མེ་སྐྱེས་ཀྱིས་དེ་བཞིན་དུ་དྲིས་པ་དང ། རྒྱལ་
Tha33a
༄#། །པོས་ཀྱང་དེ་བཞིན་སྨྲས་སོ། །མེ་སྐྱེས་ཀྱིས་སྨྲས་པ། ལྷ། འདི་དག་ཀྱང་སྣམ་ཟུངས་ནི། མ་ལགས་ཏེ། འདི་ལྟར་བུད་མེད་ཀྱི་འཁོར་པར་མ་དག་ལགས་སོ། །དེ་ངོ་མཚར་ཆེན་པོ་ལྷག་པར་སྐྱེས་སོ། །རྒྱལ་པོས་དེའི་བར་སྒོའི་ཕྱོགས་རིན་པོ་ཆེའི་རང་བཞིན་ལས་གྱུར་པ། རྫིང་ཆུས་གང་བ་ལྟ་བུ་དེ་ན་ཉ་དག་རྒྱུ་བ་འདྲ་བའི་འཁྲུལ་འཁོར་གྱི་སྦྱོར་བ་བྱས་པ་དག་མཐོང་སྟེ་ནང་དུ་འགྲོ་བར་འདོད་ནས་ལྷ་མ་དག་འབུད་པར་བརྩམས་པ་དང ། མེ་སྐྱེས་ཀྱིས་སྨྲས་པ། ལྷ། ཅིའི་སླད་དུ་ཆགས་དག་གསལ་བར་མཛད། དེས་སྨྲས་པ། གཞོན་ནུ། ཆུ་ལ་འབོག་པར་བྱ་བའི་ཕྱིར་རོ། །མེ་སྐྱེས་ཀྱིས་སྨྲས་པ། ལྷ། འདི་ཆབ་མ་ལགས་ཏེ། ཆབ་ལྟ་བུར་གདའ་བ་ནི། རིན་པོ་ཆེའི་ས་གཞི་ལགས་སོ། །དེས་སྨྲས་པ། གཞོན་ནུ། ཉ་རྒྱུ་བ་དག་འདི་ལྟར་སྣང་ངོ ། །ལྷ། འཁྲུལ་འཁོར་གྱི་སྦྱོར་བ་ལས་དེ་དག་རྒྱུ་བར་གདའོ། །རྒྱལ་པོ་ཡིད་མ་ཆེས་པ་དང ། དེས་སོར་གདུབ་རྒྱ་འཕངས་པ་ན། སྒྲ་ཀྲ་ལ་ལ་ཟེར་ཏེ་རིན་པོ་ཆེའི་ས་གཞིའི་སྟེང་དུ་འཇོལ་བར་གྱུར་ནས་དེ་ངོ་མཚར་སྐྱེས་ཏེ། ནང་དུ་སོང་ནས་སེང་གེའི་ཁྲི་ལ་འདུག་གོ། མནའ་མ་དག་རྐང་པ་ལ་ཕྱག་འཚལ་དུ་ལྷགས་པ་དེ་དག་མཆི་མ་བྱུང་ནས་རྒྱལ་པོས་སྨྲས་པ། གཞོན་ནུ། ཅིའི་ཕྱིར་མནའ་མ་འདི་དག་དུ། དེས་སྨྲས་པ། ལྷ། འདི་དག་དུ་བ་མ་ལགས་ཏེ། འདི་ལྟར། ལྷའི་ན་བཟའ་ལ་ཤིང་གི་དུད་པའི་དྲི་གདའ་བས། དེས་འདི་དག་མཆི་མ་བྱུང་བར་གྱུར་ཏོ། །རྒྱལ་པོ་ལྷ་དང་མིའི་
Tha33b
དཔལ་དེ་དག་ལ་ཉེ་བར་སྤྱོད་ཅིང་ཕྱིར་མི་ལྡོག་པ་ན། རྒྱལ་པོའི་བྱ་བ་དང ། རྒྱལ་པོའི་བྱེད་པ་དག་ཡོངས་སུ་ཉམས་པར་གྱུར་ནས་གཞོན་ནུ་མ་སྐྱེས་དགྲ་ལ་བློན་པོ་རྣམས་ཀྱིས་སྨྲས་པ། གཞོན་ནུ། ལྷ་ནི། མེ་སྐྱེས་ཀྱི་ཁྱིམ་དུ་གཤེགས་ནས་བག་མ་མཆིས་པར་གྱུར་གྱི། བཞུད་ལ་སྦྲོན་ཅིག་།དེ་སོང་ནས་སྨྲས་པ། ལྷ། ཁྱོད་འདིར་གཤེགས་ཏེ་བཞུགས་པར་མཛད་དམ་ཅི། བློན་པོ་རྣམས་ཀྱི་མཆིད་ནས་རྒྱལ་པོའི་བྱ་བ་དང ། བྱེད་པ་དག་ཡོངས་སུ་ཉམས་པར་གྱུར་ཏོ། །ཞེས་མཆིའོ། །དེས་སྨྲས་པ། གཞོན་ནུ། ཅི། ཁྱོད་ཀྱིས་ཞག་གཅིག་ཙམ་རྒྱལ་སྲིད་བྱེད་དུ་འཇུག་ཀྱང་མི་ནུས་སམ། དེས་སྨྲས་པ། ལྷ། བདག་གིས་ནི། ལྷས་དགུང་བདུན་ལགས་པར་འཚལ་ན། ལྷས་ནི། དགུང་གཅིག་ལགས་པར་མཁྱེན་པ་ལྟ། རྒྱལ་པོས་མེ་སྐྱེས་ཀྱི་གདོང་དུ་བརྟགས་ཏེ་སྨྲས་པ། གཞོན་ནུ། བདེན་ནམ། ལྷ། མད་དོ། །དགུང་བདུན་ཁོ་ན་ལགས་སོ། །འོ་ན། ཉིན་མཚན་ཇི་ལྟར་ཤེས། ལྷ། མེ་ཏོག་དག་ཁ་འབྱེ་ཞིང་འཛུམ་པ་དང ། ནོར་བུ་དག་གི་འོད་འབར་རམ་མི་འབར་བ་དང ། བྱ་དག་སྐད་འབྱིན་ཏམ་མི་འབྱིན་པའི་ཚུལ་ལས་གདའོ། །མེ་ཏོག་གང་དག་དགུང་ལ་ཁ་འབྱེ་ཞིང་གདུགས་ལ་ཟུམ་པར་འགྱུར་བ་ཡང་མཆིས། གང་དག་གདུགས་ལ་ཁ་འབྱེ་ཞིང་དགུང་ལ་ཟུམ་པར་འགྱུར་བ་ཡང་མཆིས། ནོར་བུ་གང་དག་དགུང་ལ་འབར་ཞིང་གདུགས་ལ་མི་འབར་བ་ཡང་མཆིས། གང་དག་གདུགས་ལ་འབར་ཞིང་དགུང་ལ་མི་འབར་བ་ཡང་མཆིས། བྱ་གང་དག་དགུང་ལ་སྐད་འབྱིན་ཅིང་གདུགས་ལ་མི་འབྱིན་
Tha34a
༄#། །པ་ཡང་མཆིས། གང་དག་གདུགས་ལ་སྐད་འབྱིན་ཅིང་དགུང་ལ་སྐད་མི་འབྱིན་པ་ཡང་མཆིས་སོ། །རྒྱལ་པོ་ངོ་མཚར་སྐྱེས་ནས་སྨྲས་པ། གཞོན་ནུ། བཅོམ་ལྡན་འདས་ནི།་ཕྱིན་ཅི་མ་ལོག་པར་གསུང་བ་སྟེ། བཅོམ་ལྡན་འདས་ཀྱིས་ཁྱོད་ཇི་ལྟར་ལུང་བསྟན་པ་ཁོ་ན་ལས་གཞན་དུ་མ་གྱུར་ཏོ། །དེ་སྐད་སྨྲས་ནས། རྒྱལ་པོ་དེ་མེ་སྐྱེས་ཀྱི་ཁྱིམ་ནས་ཕྱིར་བྱུང་སྟེ་སོང་ངོ ། ། གཞོན་ནུ་མ་སྐྱེས་དགྲས་མེ་སྐྱེས་ཀྱི་ནོར་བུ་གཅིག་བརྐུས་ཏེ་ཁྱེའུ་ཞིག་གི་ལག་ཏུ་གཏད་པ་དང ། དེས་གང་ནས་བླངས་པ་དེ་ཉིད་དུ་ཕྱིར་སོང་སྟེ་འདུག་གོ། མ་སྐྱེས་དགྲས་སྨྲས་པ། ཁྱེའུ། ནོར་བུ་དེ་བལྟའི། ཁྱེར་ཤོག་།དེས་ཆང་བ་ཕྱེ་སྟེ་སྨྲས་པ། གཞོན་ནུ། གར་མཆིས། མ་འཚལ་ཏོ། །དེས་དེ་རྡེག་པར་བརྩམས་པ་དང ། མེ་སྐྱེས་ཀྱིས་སྨྲས་པ། གཞོན་ནུ། འདི་ལ་ཅིའི་ཕྱིར་རྡེག་པར་བྱེད།་ཁྱིམ་བདག་།ཁོ་བོ་ཡང་རྐུན་མ་ཡིན་ན། འདི་ནི། རྐུན་ཆེན་ཞིག་སྟེ། བདག་གིས་ཁྱོད་ཀྱི་ནོར་བུ་བརྐུས་པ་དེ་ཡང་འདིས་བརྐུས་སོ། །དེས་སྨྲས་པ། གཞོན་ནུ་ཁྱོད་ཀྱིས་ཀྱང་མ་བརྐུས། འདིས་ཀྱང་མ་བརྐུས་ཏེ། འདི་ལྟར་ཁྱོད་ཀྱིས་གང་ནས་བླངས་པ་དེ་ཉིད་དུ་ཕྱིར་སོང་སྟེ་འདུག་གོ་།དེ་ལྟ་མོད་ཀྱི། གཞོན་ནུ་ཁྱོད་ཀྱི་ཁྱིམ་ཡིན་གྱི། ནོར་བུ་ཇེ་སྙེད་དགོས་པ་དང ། གཞན་ཡང་ནོར་རྫས་ཅི་དགོས་པ་དེ་དག་ཅི་བདེར་ལོངས་ཤིག་།དེ་སྐྱེངས་ནས་བསམ་པ། ནམ་ཞིག་ན་བདག་གི་ཕ་འཆི་བའི་དུས་ལ་བབ་ནས་བདག་རྒྱལ་པོ་བྱེད་པ་དེའི་ཚེ་བླང་ངོ ། །སྙམ་མོ། །ཇི་ཙམ་ན་མ་སྐྱེས་དགྲ་ལྷ་སྦྱིན་
Tha34b
གྱིས་བསླུས་ནས་ཕ་ཆོས་ཀྱི་རྒྱལ་པོ། ཆོས་དང་ལྡན་པ་སྲོག་དང་ཕྲལ་ནས་རང་གིས་ཅོད་བ་ན་བཅིངས་ཏེ་རྒྱལ་པོར་ཞུགས་ནས་དེའི་ཚེ་དེས་མེ་སྐྱེས་བོས་ཏེ། ཁྱིམ་བདག། ཁྱོད་དང་ང་སྤུན་ཡིན་པས་ཁྱིམ་དག་བགོ་བར་བྱའོ། །དེས་བསམ་པ། འདི་ནི། ཕ་ཆོས་ཀྱི་རྒྱལ་པོ་ཆོས་དང་ལྡན་པ་དེ་ལྟ་བུ་བསད་དེ་བདག་ཉིད་ཀྱི་ཅོད་པ་ན་བཅིངས་ནས་རྒྱལ་པོར་ཞུགས་པ་ཡིན་པས། འདིས་གལ་ཏེ་ན་བདག་ཀྱང་གསོད་པར་འགྱུར་རོ། །འདི་བདག་གི་ཁྱིམ་དབྲོག་པར་སེམས་ཡང་ཐག་གི། སྦྱིན་པར་བྱའོ། །སྙམ་དུ་བསམ་ནས་སྨྲས་པ། ལྷ། འདི་ཁྱོད་མངའ་ན། བགོ་ཅི་འཚལ། ཁྱོད་ཀྱི་ཁབ་ཏུ་ནི། བདག་མཆིའོ། །བདག་གི་སྡུམ་པར་ནི། ཁྱོད་གཤེགས་སུ་གསོལ། མ་སྐྱེས་དགྲས་སྨྲས་པ། ལེགས་ཀྱི། དེ་བཞིན་བྱའོ། །ཞེས་དེ་དེའི་ཁྱིམ་དུ་འཕོས་ཤིང ། མེ་སྐྱེས་ནི། མ་སྐྱེས་དགྲའི་ཁྱིམ་དུ་འཕོས་པ་དང ། དཔལ་དང་ལྡན་པའི་ཁྱིམ་དེ་མི་སྣང་བར་གྱུར་ཅིང་མེ་སྐྱེས་ག་ལ་བ་དེ་ཉིད་དུ་བྱུང་ངོ ། །དེ་ལྟར་ལན་བདུན་གྱི་བར་དུ་མི་སྣང་བར་གྱུར་ཅིང་བྱུང་བ་དང ། མ་སྐྱེས་དགྲས་བསམ་པ། འདི་ལྟར་མེ་སྐྱེས་ཀྱིས་ནོར་བུ་དག་བདག་གིས་འཕྲོག་པར་མ་ནུས་ཀྱི། ཐབས་གཞན་ཞིག་བྱའོ། །སྙམ་ནས་ངེས་ཆོམ་རྐུན་མ་དག་བསྐོས་ཏེ། དེངས་ལ་མེ་སྐྱེས་ཀྱི་ཁྱིམ་ནས་ནོར་བུ་དག་རྐུས་ཤིག་།ཅེས་བསྒོས་ནས། དེ་དག་གིས་སྐས་དང ། ཡ་གད་དང ། ཀྱོ་བཏང་དག་གིས་འཛེག་པར་བརྩམས་པ་དང ། སྟེང་གི་ཁང་བཟང་གི་གཞིར་གཏོགས་པ་ན་ཆུང་མའི་འཁོར་འཁོད་པས་དེ་དག་མཐོང་ནས་དེ་དག་གིས་རྐུན་པོ་བྱུང་ངོ ། །རྐུན་པོ་བྱུང་ངོ ། །
Tha35a
༄#། །ཞེས་བྱ་བའི་སྒྲ་ཕྱུང་ངོ ། །མེ་སྐྱེས་ཀྱིས་དེ་ཐོས་ནས། ཆོམ་རྐུན་པ་དག་འདུག་པར་གྱུར་ཅིག་ཅེས་ཡིད་ལ་ཡང་བསམ། ཚིག་ཏུ་ཡང་བརྗོད་པ་དང ། དེ་དག་གང་ནས་ཇི་ལྟར་འཛེག་པ་དེ་ཉིད་ན་དེ་བཞིན་འཁོད་པར་གྱུར་ཏོ། །ཇི་ཙམ་ན་མཚན་མོ་འདས་ཏེ་ནམ་ནངས་པ་དང ། སྐྱེ་བོ་ཕལ་པོ་ཆེའི་ཚོགས་དག་གིས་མཐོང་ནས་དེ་དག་གིས་སྨྲས་པ། ཤེས་ལྡན་དག ། རྒྱལ་པོ་སྡིག་ཅན་འདིས། ཕ་ཆོས་ཀྱི་རྒྱལ་པོ། ཆོས་དང་ལྡན་པ་སྲོག་དང་ཕྲལ་ནས་དེ་ཡང་ཁྱིམ་འཇོམས་པར་བྱེད་པ་དེ། ཅིའི་ཕྱིར་བདག་ཅག་གིས་དང་དུ་བླང་བར་བྱ། མ་སྐྱེས་དགྲས་མེ་སྐྱེས་ཀྱི་གན་དུ་ཕོ་ཉ་བཏང་སྟེ། ང་ལ་སྐྱོན་དུ་འགྱུར་བས་དེ་དག་ཐོང་ཞིག་ཅེས་བྱས་པ་དང ། མེ་སྐྱེས་ཀྱིས་ཆོམ་རྐུན་པ་འདི་དག་འདོང་བར་གྱུར་ཅིག་ཅེས་ཡིད་ལ་ཡང་བསམ། ཚིག་ཏུ་ཡང་བརྗོད་ནས་དེ་དག་དོང་ངོ ། །མེ་སྐྱེས་ཀྱིས་བསམ་པ། གང་གིས་འདི་ལྟར་ཕ་ཆོས་ཀྱི་རྒྱལ་པོ། ཆོས་དང་ལྡན་པ་སྲོག་དང་ཕྲལ་བ་དེས། བདག་གསོད་པར་འགྱུར་གོར་མ་ཆག་གི། །བདག་ནི། བཅོམ་ལྡན་འདས་ཀྱིས་ངའི་བསྟན་པ་ལ་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ཞེས་ལུང་བསྟན་པ་ཡིན་པས། རྣམ་པ་ཐམས་ཅད་དུ་དེར་སོང་ལ་རབ་ཏུ་འབྱུང་ངོ ། །སྙམ་ནས་དེར་ནོར་གྱི་རྣམ་པ་ཐམས་ཅད་ཕོངས་པ་དག་དང ། མགོན་མེད་པ་དག་དང ། དབུལ་པོ་དག་དང ། ནད་པ་དག་ལ་བྱིན་ཏེ། ནོར་མེད་པ་རྣམས་ནོར་དང་ལྡན་པར་
Tha35b
བྱས་ཏེ་བཞག་གོ་།དེ་ནས་ཁྱིམ་བདག་མེ་སྐྱེས་མཛའ་བཤེས་དང ། རྩ་ལག་དང ། ཉེ་དུ་དང ། ཕུ་ནུ་དག་གི་ངོ་བལྟས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས་ཁྱིམ་བདག་མེ་སྐྱེས་ཀྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པ་ལྟ་ན། བཅོམ་ལྡན་འདས་ཀྱི་སྤྱན་སྔར་བདག་ཚངས་པར་སྤྱད་པ་སྤྱོད་པར་འཚལ་ལོ། །དེ་ལ་བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བས་དགེ་སློང་ཚུར་ཤོག་།ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་མ་ཐག་ཁོ་ནར་སྐྲ་བྱི་ཞིང་སྣམ་སྦྱར་བགོས་ནས་ལག་པ་ལྷུང་བཟེད་དང ། བྱ་མ་བུམ་དང་ལྡན་པ་དང ། སྐྲ་དང་ཁ་སྤུ་བྲེགས་ནས་ཞག་བདུན་ལོན་པ་ཙམ་དུ་གྱུར་ཅིང ། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང ། །མོད་ལ་དབང་པོ་རབ་ཞིར་གནས་གྱུར་ཏེ། སངས་རྒྱས་དགོངས་པས་ལུས་གཟུགས་བཀའ་པར་གྱུར། །བཅོམ་ལྡན་འདས་ཀྱིས་དེ་ལ་ལུང་ཕོག་ནས་དེས་རྩོལ་བ་དང ། འབད་པ་དང ། སྒྲིམ་པ་བྱས་པས་འཁོར་བའི་འཁོར་ལོ་ཆ་ལྔ་པ། གཡོ་བ་དང ། མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང ། ལྟུང་བ་དང །
Tha36a
༄#། །རྣམ་པར་འཐོར་བ་དང ། རྣམ་པར་འཇིག་པའི་ཆོས་ཉིད་ཀྱིས་བཅོམ་ནས་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བྱས་ཏེ། དགྲ་བཅོམ་པ་ཁམས་གསུམ་པའི་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་ལྟར་སེམས་མཉམ་པ། སྟེའུ་དང་ཙནྡན་དུ་མཉམ་པ། རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང ། འདོད་པའི་རྙད་\་RཎYཱེཌ?\་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། གུས་པར་སྨྲ་བར་བྱ་བར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། ཚེ་དང་ལྡན་པ་མེ་སྐྱེས་འདིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་མ་དང་ལྷན་ཅིག་ཞུགས་ཀྱི་ཕུང་པོར་བསྲེགས་ཤིང་ལྷ་དང་མིའི་དཔལ་ཡང་མྱོང་ནས་བཅོམ་ལྡན་འདས་ཀྱི་བསྟན་པ་ལ་ཡང་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བགྱིས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།རིགས་ཀྱི་བུ་མེ་སྐྱེས་ཉིད་ཀྱིས། ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་
Tha36b
དག་བྱས་ཤིང་བསགས་པས། མེ་སྐྱེས་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་།ལས་བྱས་ཤིང་བསགས་པ་དག་ནི། ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང ། མི་དགེ་བ་བྱས་ཤིང་བསགས་པ་དག་ནི། ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་པ་ཉིད། །དགེ་སློང་དག་།སྔོན་བྱུང་བ་བསྐལ་པ་དགུ་བཅུ་རྩ་གཅིག་འདས་པ་ན། སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྣམ་པར་གཟིགས་ཞེས་བྱ་བ་འཇིག་རྟེན་དུ་བྱུང་སྟེ། དགེ་སློང་དྲུག་ཁྲི་ཉིས་སྟོང་གི་འཁོར་དང་ཐབས་ཅིག་ཏུ་ལྗོངས་རྒྱུར་གཤེགས་པ་ན། རྒྱལ་པོའི་ཕོ་བྲང་རྩ་ལག་ཅན་དུ་བྱོན་ནས་རྩ་ལག་ཅན་གྱི་ཚལ་ན་བཞུགས་སོ། །དེའི་ཚེ་རྒྱལ་པོའི་ཕོ་བྲང་རྩ་ལག་ཅན་ན། རྒྱལ་པོ་གཉེན་ལྡན་ཞེས་བྱ་བ་ཆོས་ཀྱི་རྒྱལ་པོ། ཆོས་དང་ལྡན་པས་རྒྱལ་སྲིད་འབྱོར་པ་རྒྱས་པ། བདེ་བ། ལོ་ལེགས་པ། སྐྱེ་བོ་དང་
Tha37a
༄#། །མི་མང་པོས་གང་བ། འཐབ་མོ་དང ། འཐབ་པ་དང ། རྩོད་པ་དང ། འགྱེད་པ་དང ། ཕྱི་དགྲ་དང ། ནང་འཁྲུག་དང ། ཆོམ་རྐུན་དང ། མུ་གེ་དང ། ནད་རབ་ཏུ་ཞི་བ། འབྲུ་དང ། བུ་རམ་ཤིང་དང ། བ་ལང་དང ། མ་ཧེ་ཕུན་སུམ་ཚོགས་པ་བྱེད་དུ་བཅུག་གོ་།དེ་ན་ཁྱིམ་བདག་ཉེས་མེད་ཅེས་བྱ་བ། ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་བསམ་པ། བདག་གིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལན་དུ་མ་ཞིག་ཁྱིམ་དུ་སྤྱན་དྲངས་ཏེ། གདུགས་ཚོད་གསོལ་མོད་ཀྱི། ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྟབས་པ་ནི། ནམ་ཡང་མ་བྱས་པས། ད་བདག་གིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྟབ་བོ། །སྙམ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ག་ལ་བ་དེར་སོང་སྟེ་ཕྱིན་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཁྱིམ་བདག་ཉེས་མེད་ལ་ཆོས་དང་ལྡན་པའི་གཏམ་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་བསྟོད་པར་
Tha37b
མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་བར་བཞུགས་སོ། །དེ་ནས་ཁྱིམ་བདག་ཉེས་མེད་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་བདག་དགུང་ཟླ་གསུམ་དུ་ན་བཟའ་དང ། ཞལ་ཟས་དང ། གནས་མལ་དང ། སྙུན་གྱི་རྐྱེན་དང ། སྨན་གྱི་ཡོ་བྱད་རྣམས་འབུལ་བར་ཅི་གནང ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས། ཁྱིམ་བདག་ཉེས་མེད་ལ་ཅང་མི་གསུང་བས་གནང་ངོ ། །དེ་ནས་ཁྱིམ་བདག་ཉེས་མེད་ཀྱིས། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་ཅང་མི་གསུང་བས་གནང་བར་རིག་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སྟན་ལས་ལངས་ནས་སོང་ངོ ། །རྒྱལ་པོ་གཉེན་ལྡན་གྱིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དགེ་སློང་དྲུག་ཁྲི་ཉིས་སྟོང་གི་འཁོར་དང་ཐབས་ཅིག་ཏུ་ལྗོངས་རྒྱུར་གཤེགས་པ་ན། རྒྱལ་པོའི་ཕོ་བྲང་རྩ་ལག་ཅན་དུ་བྱོན་ནས་རྩ་ལག་ཅན་གྱི་ཚལ་
Tha38a
༄#། །ན་བཞུགས་སོ། །ཞེས་ཐོས་སོ། །ཐོས་ནས་ཀྱང་དེས་བསམ་པ། བདག་གིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལན་དུ་མ་ཞིག་ཕོ་བྲང་དུ་སྤྱན་དྲངས་ཏེ་གདུགས་ཚོད་གསོལ་མོད་ཀྱི། ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྟབས་པ་ནི། ནམ་ཡང་མ་བྱས་པས་བདག་གིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྟབ་བོ། །སྙམ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ག་ལ་བ་དེར་སོང་སྟེ་ཕྱིན་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་རྒྱལ་པོ་གཉེན་ལྡན་ལ་ཆོས་དང་ལྡན་པའི་གཏམ་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་ཡང་དག་པར་བསྟན། ཡང་དག་པར་འཛིན་ཏུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་བར་བཞུགས་སོ།། །།འདུལ་བ་ཕྲན་ཚེགས་ཀྱི་གཞི། བམ་པོ་གསུམ་པ། དེ་ནས་རྒྱལ་པོ་གཉེན་ལྡན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཡང་དག་པར་རྫོགས་པའི་
Tha38b
སངས་རྒྱས་རྣམ་པར་གཟིགས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་བདག་དགུང་ཟླ་གསུམ་དུ་ན་བཟའ་དང ། ཞལ་ཟས་དང ། གནས་མལ་དང ། སྙུན་གྱི་རྐྱེན་དང ། སྨན་གྱི་ཡོ་བྱད་རྣམས་འབུལ་བར་ཅི་གནང ། རྒྱལ་པོ་ཆེན་པོ། ཁྱིམ་བདག་ཉེས་མེད་ཀྱིས་དང་པོ་ཁོ་ནར་སྤྱན་དྲངས་ཟིན་ཏོ། །བཅོམ་ལྡན་འདས་ཀྱིས་བདག་ལ་གནང་ན། ཇི་ལྟར་གནང་བ་དེ་ལྟར་བདག་གི་ཁྱིམ་བདག་ཉེས་མེད་འདྲང་བར་བགྱིའོ། །བཀའ་སྩལ་པ། རྒྱལ་པོ་ཆེན་པོ། གལ་ཏེ་ཁྱིམ་བདག་ཉེས་མེད་འདྲངས་ན། ངས་དེ་བཞིན་གནང་བར་བྱའོ། །རྒྱལ་པོ་གཉེན་ལྡན་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་སྟན་ལས་ལངས་ཏེ་རང་གི་གནས་ག་ལ་བ་དེར་སོང་སྟེ་ཕྱིན་ནས་རྒྱལ་པོ་གཉེན་ལྡན་གྱིས་ཁྱིམ་བདག་ཉེས་མེད་ཕོ་ཉས་བཀུག་ནས་སྨྲས་པ། ཁྱིམ་བདག་ཤེས་པར་བྱོས་ཤིག་།ཡང་དག་བར་རྫོགས་པའི་སངས་རྒྱས་རྣམ་པར་གཟིགས་དང་པོ་ནས་ངས་གདུགས་ཚོད་གསོལ་ལ། དེའི་འོག་ཏུ་ཁྱོད་ཀྱིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་གདུགས་ཚོད་གསོལ་ན་ཁྱོད་ལ་གནོད་པ་མེད་དམ། དེས་སྨྲས་པ། ལྷ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དང་པོ་ཁོ་ནར་བདག་གིས་སྤྱན་དྲངས་ལགས་པས་བདག་གིས་གདུགས་ཚོད་གསོལ་བར་
Tha39a
༄#། །འཚལ་ལོ། །རྒྱལ་པོས་སྨྲས་པ། ཁྱིམ་བདག་།གལ་ཏེ་དེ་ལྟ་མོད་ཀྱི། འོན་ཀྱང་ཁྱོད་ངའི་ཡུལ་ན་གནས་པས་དང་པོ་ཁོ་ནར་ངས་གདུགས་ཚོད་གསོལ་བར་འོས་སོ། །ལྷ། འདི་ལྟར་བདག་ཁྱོད་ཀྱི་ཡུལ་ན་མཆིས་མོད་ཀྱི། འོན་ཀྱང་གང་གིས་སྔར་སྤྱན་དྲངས་པ་དེ་ཉིད་ཀྱིས་གདུགས་ཚོད་གསོལ་བ་འདི་ལ་ལྷས་གནོད་པར་བགྱི་བར་མི་རིགས་སོ། །ཁྱིམ་བདག་།ཁྱོད་འདོད་རྒྱལ་དུ་མི་གཏང་གི་།གདུགས་ཚོད་གང་བཟང་བས་སྤྱན་དྲང་བར་བྱ་སྟེ། གང་གི་གདུགས་ཚོད་བཟང་བས་སྔར་གསོལ་བར་བྱ་ཞིང ། གང་གིས་མ་ཐུབ་པ་དེས་ཕྱིས་གདུགས་ཚོད་གསོལ་བར་བྱའོ། །ཁྱིམ་བདག་ཉེས་མེད་ཀྱིས་དེ་བཞིན་བགྱིའོ། །ཞེས་མཉན་ནས་དེ་ཉིད་ཀྱི་ནུབ་མོ་ཁྱིམ་བདག་ཉེས་མེད་ཀྱིས། བཟའ་བ་དང ། བཅའ་བ་གཙང་ཞིང་བསོད་པ་དག་སྦྱར་ཏོ། །ནང་པར་སྔར་ལངས་ནས་གདན་ཐབས་མང་པོ་བཤམས་ཤིང ། ཆུ་ར་དག་ཉེ་བར་བཞག་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་གདུགས་ཚོད་ཀྱི་དུས་སུ་སྤྱན་འདྲེན་གྱིས། བཅོམ་ལྡན་འདས། གདུགས་ཚོད་གཡར་དགོངས་འཚལ་ལགས་ཏེ། བཙུན་པས་ད་དེའི་དུས་ལ་བབ་པར་དགོངས་སུ་གསོལ་ཞེས་གསོལ་པ་དང ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས། སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་དགེ་འདུན་གྱི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ་ཁྱིམ་བདག་ཉེས་མེད་ཀྱི་བཀད་ས་ག་ལ་བ་དེར་གཤེགས་ཏེ་བྱོན་ནས་
Tha39b
དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་ཁྱིམ་བདག་ཉེས་མེད་ཀྱིས། སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཟའ་བ་དང ། བཅའ་བ་གཙང་ཞིང་བསོད་པ་དག་རང་གི་ལག་ནས་བསྟབས་ཤིང་ཚིམ་པར་བྱས་ཏེ་ལན་གྲངས་དུ་མར་བཟའ་བ་དང ། བཅའ་བ་གཙང་ཞིང་བསོད་པ་དག་རང་གི་ལག་ནས་བསྟབས་ཤིང་ཚིམ་པར་བྱས་པ་དང ། བཅོམ་ལྡན་འདས་ཀྱིས་གསོལ་ནས་ཕྱག་བཅབས་ཏེ་ལྷུང་བཟེད་བཞག་པར་རིག་ནས། སྟན་ཆེས་དམའ་པ་ཞིག་བླངས་ཏེ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ་།དེ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཁྱིམ་བདག་ཉེས་མེད་ལ་ཆོས་དང་ལྡན་པའི་གཏམ་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་ཡང་དག་པར་བསྟན། ཡང་དག་པར་འཛིན་ཏུ་འཇུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་སླར་གཤེགས་སོ། །རྒྱལ་པོ་གཉེན་ལྡན་གྱིས་ཀྱང་གཞུང་གོང་མ་ཇི་ལྟ་བ་དེ་བཞིན་དུ་གདུགས་ཚོད་གསོལ་བ་རྒྱ་ཆེར་རིག་པར་བྱའོ། །རྒྱལ་པོ་དང་ཁྱིམ་བདག་གི་གདུགས་ཚོད་བཟང་བར་འདྲ་སྟེ། གང་ཡང་ཕམ་རྒྱལ་མེད་ནས་རྒྱལ་པོ་གཉེན་ལྡན་རྐོམ་ཚུགས་བཅས་ཏེ་སེམས་ཁོང་དུ་ཆུད་ཅིང་
Tha40a
༄#། །འདུག་པ་དང ། བློན་པོ་དག་གིས་སྨྲས་པ། ལྷ། ཁྱོད་ཅིའི་སླད་དུ་རྐོམ་ཚུགས་བཅས་ཏེ་སེམས་ཁོང་དུ་ཆུད་ཅིང་བཞུགས། དེས་སྨྲས་པ། ཤེས་ལྡན་དག་།ངས་ངའི་ཡུལ་ན་གནས་པའི་གྲོང་མི་གང་ཡིན་པ་དེ་ཡང་གདུགས་ཚོད་ལྷག་པར་བཟང་པོས་ཕམ་པར་མ་ནུས་ན། ད་ཇི་ལྟར་རྐོམ་ཚུགས་བཅས་ཏེ་སེམས་ཁོང་དུ་ཆུད་ཅིང་མི་འདུག་ཏུ་རུང ། དེ་དག་གིས་སྨྲས་པ། ལྷ། ཞུགས་ཤིང་ཚོང་པ་རྣམས་དགག་དང ། ཁྱིམ་བདག་དེའི་ཞུགས་ཤིང་མ་མཆིས་པར་འགྱུར་རོ། །རྒྱལ་པོས་སྨྲས་པ། ཤེས་ལྡན་དག་།གང་དག་ངའི་ཡུལ་ན་གནས་པ་དེ་དག་གིས་ཤིང་བཙོང་བར་མི་བྱའོ། །གང་དག་ཤིང་ཚོང་བ་དེ་དག་ནི། ངའི་ཡུལ་ན་མ་འདུག་ཅིག་ཅེས་དྲིལ་སྒྲོགས་ཤིག་།དེ་ལྟར་བྱས་པ་དང ། ཁྱིམ་བདག་ཉེས་མེད་ཀྱིས་སྤོས་ཀྱི་ཤིང་དག་གིས་གདུགས་ཚོད་གཡོས་ཤིང ། འབྲུ་མར་དྲི་ཞིམ་པོས་བརླན་པའི་རས་ཀྱིས་བག་ཚོས་དག་བཙོ་བར་བརྩམས་པ་དང ། གཉེན་ལྡན་གྱི་གྲོང་ཁྱེར་ཐམས་ཅད་དྲི་ཞིམ་པོ་དག་གིས་ཁྱབ་པར་གྱུར་ཏོ། །རྒྱལ་པོ་གཉེན་ལྡན་གྱིས་སྨྲས་པ། ཤེས་ལྡན་དག་།འདི་ལྟ་བུའི་དྲི་ཞིམ་པོ་གང་ནས་བྱུང ། དེ་དག་གིས་རྒྱ་ཆེར་བརྗོད་པ་དང ། དེས་སྨྲས་པ། ཅི། ང་ལ་ཡོ་བྱད་དག་མེད་དམ། ངས་ཀྱང་དེ་ལྟ་བུ་བྱའོ། །བློན་པོ་དག་གིས་སྨྲས་པ། ལྷ། དེ་ལྟར་མཛད་དུ་མི་རུང་སྟེ། ཁྱིམ་བདག་འདི་ནི། བུ་མ་མཆིས་པས། རིང་པོ་མི་ཐོགས་པར་འགུམ་པའི་དུས་ལ་བབ་ནས་ནོར་ཐམས་ཅད་ཁྱོད་ཉིད་
Tha40b
མངའ་བར་འགྱུར་གྱི། ལྷ། ཞུགས་ཤིང་ཚོང་དུ་གནང་བར་མཛོད་ཅིག་།དེ་ནས་དེས་ཤིང་དག་ཚོང་དུ་གནང་ངོ ། །ཁྱིམ་བདག་ཉེས་མེད་ཀྱིས་རྒྱལ་པོས་ཤིང་དག་ཚོང་དུ་གནང་ངོ ། །ཞེས་ཐོས་ནས་སེམས་འཁྲུགས་ཏེ། ཁོ་བོ་ལ་ཤིང་དག་གིས་རྒྱལ་པོ་གཉེན་ལྡན་དེ་མ་དང་ལྷན་ཅིག་མེའི་ཕུང་པོར་བསྲེགས་ཀྱང་ཆོག་བ་ཙམ་ཡོད་དོ། །ཞེས་ཚིག་བརླང་པོ་དག་བརྗོད་དོ། །རྒྱལ་པོ་རྐོམ་ཚུགས་བཅས་ཏེ་སེམས་ཁོང་དུ་ཆུད་ཅིང་འདུག་ནས་བློན་པོ་དག་གིས་སྨྲས་པ། ལྷ། ཅིའི་སླད་དུ་རྐོམ་ཚུགས་བཅས་ཏེ་སེམས་ཁོང་དུ་ཆུད་ཅིང་བཞུགས། དེས་རྒྱས་པར་བརྗོད་པ་དང ། དེ་དག་གིས་སྨྲས་པ། ལྷ། མི་དགྱེས་པར་མ་མཛད་ཅིག་དང ། བདག་ཅག་གིས་ཇི་ལྟར་ལྷས་ཁྱིམ་བདག་ཉེས་མེད་ཐུབ་པར་འགྱུར་བ་དེ་ལྟར་བགྱིའོ། །ཞེས་བྱས་ནས་དེ་དག་གིས་ཕྱི་དེ་ཉིན་པར་རྒྱལ་པོ་གཉེན་ལྡན་གྱི་གྲོང་ཁྱེར་གྱི་རྡོ་བ་དང ། གསེག་མ་དང ། གྱོ་མོ་དག་བསལ་བ་བྱས་ནས་ཙནྡན་གྱི་ཆུས་ཆག་ཆག་བཏབ་སྟེ་དྲི་རབ་ཏུ་ཞིམ་པོས་གང་བའི་པོག་སྣོད་དག་བཞག་ཅིང ། དར་གྱི་ཆུན་པོ་དག་དཔྱངས། རྒྱལ་མཚན་དང ། བ་དན་དག་ཀྱང་བསྒྲེང ། མེ་ཏོག་སྣ་ཚོགས་དག་ཀྱང་བཀྲམ་སྟེ་དགའ་བའི་ཚལ་དང་འདྲ་བར་འཁོར་གྱི་ཁྱམས་ལེགས་པར་བརྒྱན་པ་དེ་དང་བསྒྲིན་དུ་རུང་བ་བྱས་ནས་དེ་རིན་པོ་ཆེ་སྣ་ཚོགས་ཀྱིས་བརྒྱན་པའི་གདན་ཐབས་རིན་པོ་ཆེ་དང ། གདིང་བ་དང ། གོས་ཕུན་སུམ་ཚོགས་པས་མཛེས་པར་བྱས་པ་བཤམས་ནས་བཟའ་བ་དང ། བཅའ་བ་བསོད་པ་མང་པོ་རྒྱ་ཆེ་ལ་དྲི་རབ་ཏུ་ཞིམ་པ། ཕུན་སུམ་ཚོགས་
Tha41a
༄#། །པ་རྣམ་པ་སྣ་ཚོགས་སྐྱུ་རུམས་དང་བཅས་པ་ལྷའི་ཞལ་ཟས་དང་འདྲ་བར་ཡིད་དུ་འོང་བ། འཇིག་རྟེན་གསུམ་གྱི་བླ་མ་དང་རྗེས་སུ་མཐུན་པའི་ཞལ་ཟས་དག་བཤམས་ནས་རྒྱལ་པོ་གཉེན་ལྡན་ལ་སྨྲས་པ། ལྷ་གྲོང་ཁྱེར་འདི་འདྲ་བ་དང ། ཞལ་ཟས་དང ། ཡོ་ལང་འདི་འདྲ་བ་དག་བཤམས་ཀྱི། དགྱེས་པ་བསྐྱེད་དུ་གསོལ། རྒྱལ་པོ་གཉེན་ལྡན་གྱིས་བལྟས་ནས་ངོ་མཚར་ཆེན་པོ་སྐྱེས་ཏེ་ངོ་མཚར་དང་ལྡན་པའི་སེམས་ཀྱི་རྒྱུད་ཀྱིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་གདུགས་ཚོད་ཀྱི་དུས་སུ་སྤྱན་འདྲེན་གྱིས། བཅོམ་ལྡན་འདས་གདུགས་ཚོད་ཀྱི་གཡར་དགོངས་འཚལ་ལགས་ཏེ། བཙུན་པས་ད་དེའི་དུས་ལ་བབ་པར་དགོངས་སུ་གསོལ་ཞེས་གསོལ་བ་དང ། དེ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་དགེ་འདུན་གྱི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ་རྒྱལ་པོ་གཉེན་ལྡན་གྱི་གདན་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་དབུའི་སྟེང་དུ་རྒྱལ་པོ་གཉེན་ལྡན་ཉིད་དབང་བསྐུར་བའི་བཀྲ་ཤིས་ལ་གཏོགས་པའི་གླང་པོ་ཆེའི་གཙོ་བོ་རྩིབས་བརྒྱ་དང་ལྡན་པའི་གདུགས་འཛིན་ཏུ་བཅུག་གོ་།དགེ་སློང་རྣམས་ཀྱི་སྟེང་དུ་ཡང་གླང་པོ་
Tha41b
ཆེ་གཞན་དག་གདུགས་གཞན་དག་འཛིན་དུ་བཅུག་གོ་།ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་རྒྱལ་པོ་གཉེན་ལྡན་གྱི་བཙུན་མོ་དམ་པ། བསིལ་ཡབ་གསེར་དང་ནོར་བུ་ལས་བྱས་པའི་ཡུ་བ་ཅན་གྱིས་གཡོབ་ཏུ་བཅུག་གོ་།དགེ་སློང་རྣམས་ལ་ཡང་བཙུན་མོའི་ཚོགས་གཞན་དག་བསིལ་ཡབ་དག་གིས་གཡོབ་ཏུ་བཅུག་གོ་།ཁྱིམ་བདག་ཉེས་མེད་ཀྱིས་རྟོག་ཆེན་གྱི་མི་ཞིག་བསྐོས་ཏེ་ཀཝའི་ནང་རྗེ། སོང་ལ་བཅོམ་ལྡན་འདས་ལ་སོགས་པ་དགེ་སློང་གི་དགེ་འདུན་ལ་རྒྱལ་པོ་གཉེན་ལྡན་གྱིས་གདུགས་ཚོད་ཇི་ལྟ་བུ་ཞིག་གསོལ་བ་རྟོགས་ཤིག་ཅེས་བསྒོའོ། །དེ་སོང་སྟེ་བརྟགས་ན་འབྱོར་པ་དེ་ལྟ་བུ་དག་མཐོང་ནས་ངོ་མཚར་ཆེན་པོ་སྐྱེས་ཏེ་ངོ་མཚར་དང་ལྡན་པའི་ཡིད་ཀྱིས་དེ་ཉིད་དུ་འདུག་གོ་།དེ་བཞིན་དུ་གཉིས་པ་དང་གསུམ་པ་དག་བཏང་ན། དེ་དག་ཀྱང་སོང་ཞིང་དེ་ཉིད་དུ་འདུག་གོ་།དེ་ནས་ཁྱིམ་བདག་ཉེས་མེད་རང་ཉིད་དེར་སོང་སྟེ་བརྟགས་ན། འབྱོར་པ་དེ་དག་མཐོང་ནས་ངོ་མཚར་ཆེན་པོ་སྐྱེས་ཏེ། དེས་བསམ་པ། གཞན་ནི། བདག་གིས་ཀྱང་འབྱོར་བར་ནུས་ན། གླང་པོ་ཆེ་དང་བཙུན་མོའི་ཚོགས་བདག་གིས་ག་ལ་འབྱོར་སྙམ་དུ་རིག་ནས་ཁྱིམ་དུ་སོང་སྟེ་མི་སྒོ་བ་བོས་ནས་སྨྲས་པ། ཀཝའི་སྒོ་བ། མི་སློང་མོ་པ་གང་དག་ལྷགས་ན། དེ་དག་ཅི་འདོད་པ་དག་བྱིན་ལ། ནང་དུ་མ་གཏང་ཞིག་ཅེས་བསྒོ་ནས། དེ་མྱ་ངན་གྱི་ཁང་པར་ཞུགས་ཏེ་རྐོམ་ཚུགས་བཅས་ནས་སེམས་ཁོང་དུ་ཆུད་ཅིང་འདུག་གོ་།དེ་ནས་ལྷའི་དབང་པོ་བརྒྱ་བྱིན་གྱི་ཤེས་པ་དང ། མཐོང་བ་ནི། འོག་གི་ཕྱོགས་སུ་འཇུག་པ་
Tha42a
༄#། །ཡིན་པས། དེས་བསམ་པ། འཇིག་རྟེན་ན་མཆོད་གནས་གང་དག་ཡིན་པ་དེ་དག་གི་ནང་ན་ནི། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་མཆོག་ཡིན་ལ།་སྦྱིན་བདག་གང་དག་ཡིན་པ་དེ་དག་གི་ནང་ན་ནི། ཁྱིམ་བདག་ཉེས་མེད་མཆོག་ཡིན་པས། དེའི་གྲོགས་བྱའོ། །སྙམ་ནས་བདག་ཉིད་ཀོའུ་ཤི་ཀའི་རིགས་ཀྱི་བྲམ་ཟེ་ཞིག་ཏུ་སྤྲུལ་ནས་ཁྱིམ་བདག་ཉེས་མེད་ཀྱི་ཁྱིམ་ག་ལ་བ་དེར་སོང་སྟེ་ཕྱིན་ནས་མི་སྒོ་བ་བོས་ཏེ་སྨྲས་པ། ཀྱེ་སྒོ་བ། སོང་ལ་ཁྱིམ་བདག་ཉེས་མེད་ལ། ཀོའུ་ཤི་ཀའི་རིགས་ཀྱི་བྲམ་ཟེ་ཞིག་སྒོར་འོངས་ཏེ་ཁྱོད་མཐོང་བར་འདོད་དོ། །ཞེས་གྱིས་ཤིག་།དེས་སྨྲས་པ། བྲམ་ཟེ། ཁྱིམ་བདག་གིས་བདག་ལ་མི་སློང་མོ་བ་གང་དག་ལྷགས་ན། དེ་དག་ཅི་འདོད་པ་དག་བྱིན་ལ་ནང་དུ་མ་གཏང་ཞིག་ཅེས་བསྒོའི། ཁྱིམ་བདག་གིས་ཁྱོད་ལ་ཅི་བྱ། ཁྱོད་ཅི་དགོས་པ་དེ་དག་ཁྱེར་ལ་སོང་ཞིག་།དེས་སྨྲས་པ། ཀྱེ་སྒོ་བ། ཁོ་བོ་ལ་དགོས་པ་གཞན་ཅི་ཡང་མེད་དེ། ཁོ་བོ་ནི། ཁྱིམ་བདག་ཉིད་མཐོང་བར་འདོད་ཀྱི།་སོང་ཞིག་།དེ་ཁྱིམ་བདག་ཉེས་མེད་ཀྱི་གན་དུ་སོང་སྟེ་སྨྲས་པ། ཇོ་བོ། ཀོའུ་ཤི་ཀའི་རིགས་ཀྱི་བྲམ་ཟེ་ཞིག་ཆབ་སྒོར་མཆིས་ཏེ་ཇོ་བོ་མཐོང་བར་འཚལ་ཞེས་མཆིའོ། །དེས་སྨྲས་པ། ཀཝའི་སྒོ་བ། ངས་ཁྱོད་ལ་སྔར་མི་སློང་མོ་པ་གང་དག་ལྷགས་ན། དེ་དག་ཅི་འདོད་པ་བྱིན་ལ། ནང་དུ་མ་གཏང་ཞིག་ཅེས་མ་བསྒོས་སམ། དེ་ནང་དུ་འོངས་པས་ཅི་ཞིག་བྱ། ཅི་འདོད་པ་དག་བྱིན་ལ་ཐོང་
Tha42b
ཞིག་།ཇོ་བོ། བདག་གིས་དེ་སྐད་བགྱིས་ན། དེའི་མཆིད་ནས་ཁོ་བོ་ལ་དགོས་པ་གཞན་ཅི་ཡང་མེད་དེ། ཁོ་བོ་ནི། ཁྱིམ་བདག་ཉིད་མཐོང་བར་འདོད་དོ། །ཞེས་མཆིའོ། །དེས་སྨྲས་པ། ཀཝའི་སྒོ་བ། སོང་ལ་དེ་ནང་དུ་ཐོང་ཞིག་།དེས་དེ་བཏང་བ་དང ། དེས་སྨྲས་པ། ཁྱིམ་བདག་།ཁྱོད་ཅིའི་ཕྱིར་མྱ་ངན་གྱི་ཁང་བུར་ཞུགས་ཏེ་རྐོམ་ཚུགས་བཅས་ནས་སེམས་ཁོང་དུ་ཆུད་ཅིང་འདུག་།ཁྱིམ་བདག་གིས་ཚིགས་སུ་བཅད་པ་སྨྲས་པ། གང་གིས་མྱ་ངན་སེལ་བར་མི་ནུས་པ། དེ་ལ་མྱ་ངན་བརྗོད་པར་མི་བྱ་སྟེ། གང་གིས་མྱ་ངན་སེལ་བར་བྱེད་ནུས་པ། དེ་ལ་མྱ་ངན་བརྗོད་པར་བྱ་བ་ཡིན། བརྒྱ་བྱིན་གྱིས་སྨྲས་པ། ཁྱིམ་བདག་།ཁྱོད་ཀྱི་མྱ་ངན་གང་ཡིན་པ་སྨྲོས་དང ། ཁོ་བོས་ཁྱོད་ཀྱི་མྱ་ངན་བསལ་བར་བྱའོ། །དེས་རྒྱ་ཆེར་བརྗོད་པ་དང ། དེ་ནས་ལྷའི་དབང་པོ་བརྒྱ་བྱིན་གྱིས། ཀོའུ་ཤི་ཀའི་རིགས་ཀྱི་བྲམ་ཟེའི་གཟུགས་མི་སྣང་བར་བྱས་ཏེ་རང་བཞིན་དུ་འདུག་ནས་སྨྲས་པ། ཁྱིམ་བདག་།ཁོ་བོས་ལྷའི་བུ་ལས་ཐམས་ཅད་པ་ཁྱོད་ཀྱི་གྲོགས་བྱེད་དུ་གཞུག་གོ་།ཞེས་བྱས་ནས་སོང་ངོ ། །དེ་ནས་ལྷའི་དབང་པོ་བརྒྱ་བྱིན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་སོང་སྟེ་ལྷའི་བུ་ལས་ཐམས་ཅད་པ་བོས་ནས་སྨྲས་པ། ལྷའི་བུ་ལས་ཐམས་ཅད་པ། སོང་ལ་ཁྱིམ་བདག་ཉེས་མེད་ཀྱི་གྲོགས་གྱིས་ཤིག་།དེས་སྨྲས་པ། ཀོའུ་ཤི་ཀ། རབ་ཏུ་ལེགས་སོ། །ཞེས་ལྷའི་བུ་ལས་ཐམས་ཅད་བས། ལྷའི་དབང་པོ་བརྒྱ་བྱིན་གྱི་ཚིག་མཉན་ནས། དེས་དེ་བས་ཆེས་མཛེས་ཤིང་ཁྱད་པར་དུ་འཕགས་པའི་གྲོང་
Tha43a
༄#། །ཁྱེར་དག་མངོན་པར་སྤྲུལ་ཅིང ། ལྷའི་འཁོར་གྱི་ཁྱམས་དང ། ལྷའི་གདན་དག་ཀྱང་བཤམས། ལྷའི་ཞལ་ཟས་དག་ཀྱང་གཡོས་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་དབུའི་སྟེང་དུ་ནི། ལྷའི་དབང་པོ་བརྒྱ་བྱིན་གྱི་གཡུལ་ངོར་སྤྱད་པའི་གླང་པོ་ཆེའི་རྒྱལ་པོ་ས་སྲུང་གི་བུ་རྩིབས་བརྒྱ་དང་ལྡན་པའི་གདུགས་འཛིན་ཏུ་བཅུག་གོ ། དགེ་སློང་རྣམས་ཀྱི་སྟེང་དུ་ཡང་ལྷའི་གླང་པོ་ཆེ་གཞན་དག་གདུགས་གཞན་དག་འཛིན་ཏུ་བཅུག་གོ་།ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་ལྷའི་དབང་པོ་བརྒྱ་བྱིན་གྱི་བཙུན་མོ་དམ་པ། ལྷ་མོ་བདེ་སོགས་ལྷའི་བསིལ་ཡབ། གསེར་དང་ནོར་བུ་ལས་བྱས་པའི་ཡུ་བ་ཅན་གྱིས་གཡོབ་ཏུ་བཅུག་གོ་།དགེ་སློང་རྣམས་ལ་ཡང་ལྷའི་བཙུན་མོའི་ཚོགས་གཞན་དག་པ་སིལ་ཡབ་གཞན་དག་གིས་གཡོབ་ཏུ་བཅུག་གོ་།རྒྱལ་པོ་གཉེན་ལྡན་གྱིས་རྟོག་ཆེན་གྱི་མི་ཞིག་བསྐོས་ཏེ། ཀཝའི་ནང་རྗེ། སོང་ལ་བཅོམ་ལྡན་འདས་ལ་སོགས་པ་དགེ་སློང་གི་དགེ་འདུན་ལ་ཁྱིམ་བདག་ཉེས་མེད་ཀྱིས་གདུགས་ཚོད་ཇི་ལྟ་བུ་ཞིག་གསོལ་བ་རྟོགས་ཤིག་ཅེས་བསྒོའོ། །དེས་བརྟགས་ན། འབྱོར་པ་དེ་ལྟ་བུ་དག་མཐོང་ནས་ངོ་མཚར་ཆེན་པོ་སྐྱེས་ཏེ། ངོ་མཚར་དང་ལྡན་པའི་ཡིད་ཀྱིས་དེ་ཉིད་དུ་འདུག་གོ་།དེས་བློན་པོ་དག་བཏང་བ་དང ། དེ་དག་ཀྱང་སོང་ཞིང་དེ་ཉིད་དུ་འདུག་གོ་།གཞོན་ནུ་བཏང་ན། དེ་ཡང་སོང་ཤིང་དེ་ཉིད་དུ་འདུག་གོ་།དེ་ནས་རྒྱལ་པོ་གཉེན་ལྡན་རང་ཉིད་དེར་སོང་སྟེ་
Tha43b
སྒོར་བསྡད་པ་དང ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་བཀའ་སྩལ་པ། ཁྱིམ་བདག་།ཁྱོད་ཀྱིས་རྒྱལ་པོ་གཉེན་ལྡན་བདེན་པ་མཐོང་བར་གྱུར་པ་ལ་ཚིག་བརླང་པོ་སྨྲས་པ་དེ།་སྒོ་འདི་ན་འདུག་གི་།སོང་ལ་བཟོད་པ་གསོལ་ཅིག་།དེས་དེའི་གན་དུ་སོང་སྟེ་བཟོད་པ་གསོལ་ནས་སྨྲས་པ། རྒྱལ་པོ་ཆེན་པོ། ནང་དུ་གཤེགས་ལ་ཉིད་ཀྱི་ཕྱག་ནས་བྲིམ་པ་དག་མཛད་དུ་གསོལ། དེ་ནང་དུ་སོང་སྟེ་བལྟས་ན། ལྷའི་འབྱོར་བ་དག་མཐོང་བ་དང་ངོ་མཚར་ཆེན་པོ་སྐྱེས་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་ནི། ཁྱིམ་བདག་ཁྱོད་གཅིག་པུས་གདུགས་ཚོད་གསོལ་བའི་རིགས་ཀྱི། ཁོ་བོས་ནི་མ་ཡིན་ནོ། །ཞེས་སྨྲས་སོ། །ཁྱིམ་བདག་ཉེས་མེད་ཀྱིས། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ། དེ་ལྟ་བུའི་འབྱོར་པས་ཞལ་ཟས་དག་གིས་ཚིམ་པར་བྱས་ནས་ཞབས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། ཇི་ལྟར་བདག་གིས་ཡོན་གནས་འདི་ལྟ་བུ་ལ་བསྙེན་བཀུར་བྱས་པའི་དགེ་བའི་རྩ་བ་འདིས་བདག་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེ་ཞིང ། ལྷ་དང་མིའི་དཔལ་ཡང་མྱོང་བར་འགྱུར་བ་དང ། ཆོས་ཀྱི་ཚུལ་འདི་ལྟ་བུ་ཐོབ་པ་དང ། འདི་ལྟ་བུའི་སྟོན་པ་མཉེས་པར་བྱེད་ཅིང་མི་མཉེས་པར་བྱེད་པར་མ་གྱུར་ཅིག་ཅེས་བཏབ་བོ། དགེ་སློང་དག་།དེའི་ཚེ་དེའི་དུས་ན་ཁྱིམ་བདག་ཉེས་མེད་གང་ཡིན་པ་དེ་ནི། ཁྱིམ་བདག་མེ་སྐྱེས་འདི་ཡིན་ཏེ། རིགས་ཀྱི་བུ་དེས་རྒྱལ་པོ་གཉེན་ལྡན་བདེན་པ་མཐོང་བ་ལ་ཚིག་བརླང་པོ་སྨྲས་པ་དེའི་ལས་ཀྱི་རྣམ་པར་སྨིན་པས་ནི། ཚེ་
Tha44a
༄#། །རབས་ལྔ་བརྒྱར་མ་དང་ལྷན་ཅིག་མེའི་ཕུང་པོར་བསྲེགས་ཤིང ། ད་ལྟ་འདིར་ཡང་མེའི་ཕུང་པོར་བསྲེགས་པར་གྱུར་ཏོ། །དེ་བཞིན་གཤེགས་པ་རྣམ་པར་གཟིགས་གང་ཡིན་པ་ལ་བསྙེན་བཀུར་བྱས་ཤིང་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་ནི། ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ཏེ། ལྷ་དང་མིའི་དཔལ་ཡང་མྱོང་བར་གྱུར་ཅིང ། ངའི་བསྟན་པ་ལ་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བྱས་ཤིང ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དང་ཤུགས་མཉམ་པ་དང ། སྟོབས་མཉམ་པ་དང ། བརྩོན་འགྲུས་མཉམ་པས་ཀུན་ཏུ་མཉམ་པར་གྱུར་པའི་སྟོན་པ་ང་མཉེས་པར་བྱས་ཤིང ། མི་མཉེས་པར་མ་བྱས་སོ། །དགེ་སློང་དག་།དེ་ལྟ་བས་ན། ལས་གཅིག་ཏུ་གནག་པར་རྣམས་ཀྱི་རྣམ་པར་སྨིན་པ་ནི། གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་དཀར་བ་ཡིན། །ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་།དེ་ལྟ་བས་ན། ལས་གཅིག་ཏུ་གནག་པ་རྣམས་དང ། འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་།ཁྱེད་ཀྱིས་དེ་ལྟར་བསླབ་པར་བྱའོ། །དེ་སྐད་ཅེས་བཀའ་སྩལ་ནས་དགེ་སློང་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །སྡོམ་ལ། ལྷུང་བཟེད་གླན་དང་སྤྱད་རྣམས་དང ། །
Tha44b
གྲིའུ་དང་ཁབ་དང་ཁབ་རལ་དང ། །གཏན་པ་དང་ནི་མང་པོ་དག་།དྲང་སྲོང་ཆེན་པོས་རྗེས་སུ་གནང ། །གླེང་གཞི་ནི། མཉན་ཡོད་ནའོ། །མཉན་ཡོད་ན་དགེ་སློང་ཞིག་གི་ལྷུང་བཟེད་རྡོལ་ནས་དེས་མགར་བའི་གན་དུ་ཁྱེར་ཏེ་སོང་ནས་སྨྲས་པ། བཞིན་བཟང ། ཁོ་བོའི་ལྷུང་བཟེད་རྡོལ་བ་འདི་གློན་ལ་བྱིན་ཅིག་།དེས་བསམ་པ། འདི་དག་ནི། ཁས་ལས་བྱེད་དུ་འཇུག་པ་ཡིན་གྱི། གླ་རྔན་ནི། མི་སྟེར་པས། ཅི་ནས་ཀྱང་ཡུན་རིང་དུ་བསྒྱངས་ཏེ་བཞག་ན། འདི་རང་གི་བློས་ཕྱིར་ལེན་པར་འགྱུར་སྙམ་ནས་སྨྲས་པ། འཕགས་པ། བཞུད་ལ་སང་ངམ། གནངས་སྤྱོན་ཅིག་།སྔ་དྲོའམ། གུང་ཚིགས་སམ། ཕྱི་དྲོ་སྤྱོན་ཅིག་ཅེས་བསྒྱངས་པར་བརྩམས་སོ། །དགེ་སློང་དེ་ཉིན་གཅིག་བཞིན་དེར་འགྲོ་བ་ན་སྐྱོ་བ་སྐྱེས་པ་དང ། དེའི་མཛའ་བོ་ཞིག་གིས་མཐོང་ནས། ཚེ་དང་ལྡན་པ། ཁྱོད་ཉིན་གཅིག་བཞིན་དེར་འགྲོ་ན། ཅི།་དེ་ཁྱོད་ཀྱི་ཉེ་དུའི་ཁྱིམ་མམ། སྦྱིན་བདག་གི་ཁྱིམ་ཡིན། དེས་སྨྲས་པ། ཚེ་དང་ལྡན་པ། འདི་ཁོ་བོའི་ཉེ་དུའི་ཁྱིམ་ཡང་མ་ཡིན། །སྦྱིན་བདག་གི་ཁྱིམ་ཡང་མ་ཡིན་ཏེ། འདི་ལྟར་ཁོ་བོའི་ལྷུང་བཟེད་རྡོལ་ནས་དེ་གློན་དུ་བཅུག་པ་ན། འདི་སྒྱོང་བར་བྱེད་པས། དེའི་ཕྱིར་འགྲོའོ། །དེས་སྨྲས་པ། ཚེ་དང་ལྡན་པ། ཁྱོད་ཀྱིས་ལག་བཟོ་བདེན་པར་སྨྲ་བ་དཀོན་ནོ། །ཞེས་བྱ་བ་མ་ཐོས་སམ། ཁོ་བོ་ཡང་བཟོ་ཤེས་མོད་ཀྱི། བཅོམ་ལྡན་འདས་ཀྱིས་མ་གནང་ངོ ། །ཞེས་ཟེར་བའི་སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ་
Tha45a
༄#། །དེ་ལྟ་བས་ན། དགེ་སློང་བཟོ་བོ་དག་ཡོད་ན། དེས་དབེན་པའི་ཕྱོགས་སུ་ལྷུང་བཟེད་གླན་པར་རྗེས་སུ་གནང་ངོ ། །དེ་དགེ་སློང་དེའི་གན་དུ་སོང་སྟེ་སྨྲས་པ། ཚེ་དང་ལྡན་པ་བཅོམ་ལྡན་འདས་ཀྱིས་གནང་གི། ལྷུང་བཟེད་འདི་གློན་ཅིག་།དེས་སྨྲས་པ། ཚེ་དང་ལྡན་པ་འདི་ལག་པ་འབའ་ཞིག་གིས་གླན་དུ་མི་རུང་གི། མགར་སྤྱད་དག་ཀྱང་དགོས་སོ། །ཞེས་ཟེར་བའི་སྐབས་དེ།་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཆེད་དུ་མགར་སྤྱད་ཉེ་བར་གཞག་པར་རྗེས་སུ་གནང་ངོ ། །གླེང་གཞི་ནི།་མཉེན་ཡོད་ནའོ། །དགེ་སློང་དག་གིས་ཆོས་གོས་དྲ་དགོས་པར་གྱུར་པ་ན། དེ་དག་ལག་པ་དག་གིས་འདྲལ་ནས་མ་ལེགས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ལག་པས་དྲལ་བར་མི་བྱ་བར་གྲིའུས་དྲ་བར་བྱའོ། །བཅོམ་ལྡན་འདས་ཀྱིས་གྲིའུས་དྲ་བར་བྱའོ། །ཞེས་བཀའ་སྩལ་པ་དང ། དགེ་སློང་ཞིག་གིས་ཆོས་གོས་དྲ་དགོས་ནས་དེས་ཁྱིམ་བདག་ལས་གྲི་བརྙས་ཏེ་དྲས་ནས་དེས་དེ་ཁྱིམ་བདག་དེ་ལ་སླར་བྱིན་པ་དང ། དེས་སྨྲས་པ། འཕགས་པ། ཁྱོད་ཉིད་ཀྱི་ལགས་སོ། །བཞིན་བཟང ། བཅོམ་ལྡན་འདས་ཀྱིས་མ་གནང་ངོ ། །ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་གྲིའུ་བཅང་བར་རྗེས་སུ་གནང་ངོ ། །བཅོམ་ལྡན་
Tha45b
འདས་ཀྱིས་གྲིའུ་བཅང་བར་བྱའོ། །ཞེས་བཀའ་སྩལ་པ་དང ། དྲུག་སྡེ་དག་།གསེར་དང ། དངུལ་དང ། བཻཌཱུརྱ་དང ། ཤེལ་ལས་བྱས་པའི་གྲི་ཡུ་བ་བསྲུབ་པས་སྦྱངས་པ་དག་འཆང་ནས་བྲམ་ཟེ་དང ། ཁྱིམ་བདག་གིས་སྨྲས་པ། འཕགས་པ་དག་།འདི་ཅི་ལགས། དེ་དག་གིས་སྨྲས་པ། བཅོམ་ལྡན་འདས་ཀྱིས་གྲི་རྗེས་སུ་གནང་བའོ། །འཕགས་པ་དག་།དགེ་སྦྱོང་ཁྱེད་ཅག་ནི། འདོད་པའི་ཡོན་ཏན་དག་གིས་གཟིར་ཏོ་ཞེས་བྱས་བ་དང ། དེ་དག་སྤོབས་པ་མེད་པར་གྱུར་ནས་ཅང་མི་སྨྲ་བར་འཁོད་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། །དགེ་སློང་གིས་གསེར་དང ། དངུལ་དང ། བཻཌཱུརྱ་དང ། ཤེལ་ལས་བྱས་པའི་གྲི་ཡུ་བ་ཁྲ་བོ་དང ། བཀྲ་བ་བཅང་བར་མི་བྱ་བར་ལྕགས་ཀྱི་གྲིའུ་བཅང་བར་བྱའོ། །བཅོམ་ལྡན་འདས་ཀྱིས་ལྕགས་ཀྱི་གྲིའུ་བཅང་བར་བྱའོ། །ཞེས་བཀའ་སྩལ་པ་དང ། དེ་དག་གྲི་ཧ་ཅང་ཆེན་པོ་དག་འཆང་ནས་བྲམ་ཟེ་དང ། ཁྱིམ་བདག་དག་གིས་སྨྲས་པ། འཕགས་པ་དག་།འདི་ཅི་ལགས། བཞིན་བཟང་དག་།གྲེའུ་ཡིན་ནོ། །འཕགས་པ་དག་།གྲི་ལགས་ཀྱི། གྲིའུ་ནི། མ་ལགས་སོ། །ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། གྲི་ཧ་ཅང་ཆེན་པོ་དག་བཅང་བར་མི་བྱའོ། །དགེ་སློང་དག་གྲི་ཧ་ཅང་ཆུང་ངུ་འཆང་བར་བྱེད་པ་ན། དེས་བྱ་བ་ཅི་ཡང་མི་ནུས་ནས་བཅོམ་ལྡན་འདས་ཀྱིས་བཀའ་སྩལ་པ། གྲིའུ་ཆེན་པོ་དང ། འབྲིང་དང །
Tha46a
༄#། །ཆུང་ངུ་རྣམ་པ་གསུམ་བཅང་བར་བྱ་སྟེ། དེ་ལ་ཆེན་པོ་ནི། སོར་དྲུག་གོ་།ཆུང་ངུ་ནི། སོར་བཞིའོ། །དེ་དག་གི་པར་མ་ནི། འབྲིང་ངོ ། །གླེང་གཞི་ནི། མཉན་ཡོད་ནའོ། །དགེ་སློང་རྣམས་ཀྱི་ཆོས་གོས་དག་དྲུབ་དགོས་པར་གྱུར་པ་ན། དགེ་སློང་དག་གིས་སྨྱུག་མའི་ཚལ་བ་དང ། ཕྱག་ག་གི་གཤོག་ཤིང་གིས་འདྲུབ་པ་ན། དེ་དག་རལ་ནས་བཅོམ་ལྡན་འདས་ཀྱིས་བཀའ་སྩལ་པ། ཁབ་བཅང་བར་བྱའོ། །དགེ་སློང་ཞིག་གིས་ཆོས་གོས་དྲུབ་དགོས་ནས་དེས་ཁྱིམ་བདག་ལས་ཁབ་བརྙས་ཏེ་དྲུབས་ནས་དེས་དེ་ཁྱིམ་བདག་དེ་ལ་ཕྱིར་བྱིན་པ་དང ། དེས་སྨྲས་པ། འཕགས་པ། ཁྱོད་ཉིད་ཀྱི་ལགས་སོ། །བཞིན་བཟང ། བཅོམ་ལྡན་འདས་ཀྱིས་མ་གནང་ངོ ། །ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་ཁབ་བཅང་བར་རྗེས་སུ་གནང་ངོ ། །བཅོམ་ལྡན་འདས་ཀྱིས་དགེ་སློང་གིས་ཁབ་བཅང་བར་བྱའོ། །ཞེས་བཀའ་སྩལ་པ་དང ། དྲུག་སྡེ་དག་གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་བྱས་པའི་ཁབ་དག་འཆང་ནས་བྲམ་ཟེ་དང ། ཁྱིམ་བདག་དག་གིས་སྨྲས་པ། འཕགས་པ་དག་།འདི་ཅི་ལགས། དེ་དག་གིས་སྨྲས་པ། བཅོམ་ལྡན་འདས་ཀྱིས་ཁབ་རྗེས་སུ་གནང་བའོ། །འཕགས་པ་དག་།དགེ་སྦྱོང་ཁྱེད་ཅག་ནི། འདོད་པའི་ཡོན་ཏན་གྱིས་གཟིར་བའོ། །ཞེས་བྱས་པ་དང ། དེ་དག་སྤོབས་པ་
Tha46b
མེད་པར་གྱུར་ནས་ཅང་མི་སྨྲ་བར་འཁོད་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་བྱས་པའི་ཁབ་བཅང་བར་མི་བྱ་བར་ཁབ་རྣམ་པ་བཞི་པོ་འདི་ལྟ་སྟེ། ར་གན་དང ། ཟངས་དང ། འཁར་བ་དང ། ལྕ་གས་ལས་བྱས་པ་དག་བཅང་བར་བྱའོ། །བཅོམ་ལྡན་འདས། ཀྱིས་དགེ་སློང་གིས་རྣམ་པ་བཞི་པོ་དག་བཅང་བར་བྱའོ། །ཞེས་བཀའ་སྩལ་པ་དང ། དགེ་སློང་གིས་བབ་བབ་ཏུ་བཞག་སྟེ་དེ་དག་བཙའ་ཞུགས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཁབ་རལ་བཅང་བར་བྱའོ། །དགེ་སློང་དག་གིས་ཁབ་རལ་ཅི་འདྲ་བར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཁབ་རལ་ནི། རྣམ་པ་གཉིས་ཏེ། སྦུ་གུ་ཅན་དང ། ཆང་བ་ལྟ་བུའོ། དགེ་སློང་དག་གིས་ཆང་བ་ལྟ་བུའི་ཁབ་རལ་དུ་གྲིའུ་བཅུག་ནས་དེ་རལ་པར་གྱུར་པ་དང ། བཅོམ་ལྡན་འདས་ཀྱིས་བཀའ་སྩལ་པ། གྲིའུ་ནི། རྣམ་པ་གཉིས་སུ་བྱ་སྟེ། བྱ་རོག་གི་མཆུ་ལྟ་བུ་དང ། བྱ་གག་གི་གཤོག་པ་ལྟ་བུར་བྱའོ། །གླེང་གཞི་ནི། མཉན་ཡོད་ནའོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་ཆོས་གོས་སྣམ་སྦྱར་དག་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ས་ལ་བརྐྱང་སྟེ་འདྲ་བར་བྱེད་པ་ན། རྡུལ་དག་གིས་དྲི་མ་ཅན་དུ་གྱུར་ཅིང ། སྲིལ་དག་གིས་ཀྱང་མ་རུང་བར་བྱས་ནས་བཅོམ་ལྡན་འདས་ཀྱིས་བཀའ་སྩལ་པ། ས་ལ་བཏིང་སྟེ་དྲ་བར་མི་
Tha47a
༄#། །བྱ་བར་གཏན་པ་དག་བྱའོ། །དགེ་སློང་དག་གིས་གཏན་པ་ཇི་ལྟར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། གཏན་པ་ནི། གཉིས་ཏེ། ཤིང་དང ། སྨྱུག་མ་ལས་གྲུ་བཞིར་བྱས་པ་དག་གོ་།དག་སློང་དག་གིས་ཕུར་བུས་བརྒྱངས་པ་དང་རལ་ནས་བཅོམ་ལྡན་འདས་ཀྱིས་བཀའ་སྩལ་པ། བུ་གུ་བྱས་ལ་སྒྲོག་ཟུངས་ཀྱིས་བརྒྱང་བར་བྱའོ། །གླེང་གཞི་ནི། མཉན་ཡོད་ནའོ། །བཅོམ་ལྡན་འདས་ཀྱིས་ཆོས་གོས་རྣམ་པ་གསུམ་པོ་ཆེན་པོ་དང ། འབྲིང་དང ། ཆུང་ངུའོ། །ཞེས་བཀའ་སྩལ་པ། ཆོས་གོས་ཆེན་པོ་བརྒྱང་བའི་གཏན་པ་གང་ཡིན་པ་དེ་ལ། འབྲིང་པོ་དང ། ཆུང་ངུ་བརྒྱང་དུ་མི་རུང་ནས་བཅོམ་ལྡན་འདས་ཀྱིས་བཀའ་སྩལ་པ། གཏན་པ་མང་པོ་དག་བྱའོ། །སྡོམ་ལ། མེ་ལོང་དང་ནི་ཆུ་དག་དང ། །དེ་བཞིན་སོ་མང་སྨྱུག་ཤད་གཉིས། །གཙུག་ཕུད་དང་ནི་སྐྲ་རིང་དང ། །བསྲོ་ཁང་ལི་ཙ་ཆེན་པོ་འོ། །གླེང་གཞི་ནི། །མཉན་ཡོད་ནའོ། །དྲུག་སྡེ་དག་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་དང ། དེ་དག་གིས་བྲམ་ཟེ་དང ། ཁྱིམ་བདག་དག་གི་བྱི་དོར་གྱི་ཡོ་བྱད་གོས་ཀྱི་སྤྲོག་མའི་སྟེང་དུ་བཞག་པ་མཐོང་ནས་དྲུག་སྡེ་དག་གིས་དེ་དག་གི་མེ་ལོང་བླངས་ཏེ་བཞིན་བལྟས་ནས་སྨྲས་པ། དགའ་བོ་ཉེ་དགའ་བོ། ཇི་ལྟ་བདག་ཅག་བཟང་ངམ། བྲམ་ཟེ་དང ། ཁྱིམ་བདག་དག་གིས་སྨྲས་པ། འཕགས་པ་དག་།ཁྱེད་མགོ་ནི། བྲེགས་ལ། མཆན་ཁུང་ནི། རལ་བུ་ཅན་དུ་འདུག་ན། ཁྱེད་ཀྱི་
Tha47b
གདོང་མཛེས་པར་ག་ལ་འགྱུར། དགེ་སྦྱོང་འདི་དག་ནི། འདོད་པའི་ཡོན་ཏན་དག་གིས་གཟིར་བར་ངེས་སོ། །ཞེས་བྱས་པ་དང ། དེ་དག་ཅང་མི་སྨྲ་བར་འཁོད་པའི་སྐབས་དེ། དགེ་སློང་དག་གིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་མེ་ལོང་ལ་བཞིན་བརྟག་པར་མི་བྱའོ། །རྟོག་པར་བྱེད་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་མེ་ལོང་ལ་བཞིན་བརྟག་པར་མི་བྱའོ། །ཞེས་བཀའ་སྩལ་པ་དང ། དེ་དག་གི་ཆུ་དག་ལ་བཞིན་བརྟག་པར་བརྩམས་ནས་བཅོམ་ལྡན་འདས་ཀྱིས་བཀའ་སྩལ་པ། ཆུ་ལ་ཡང་བཞིན་བརྟག་པར་མི་བྱའོ། །བཅོམ་ལྡན་འདས་ཀྱིས་དགེ་སློང་གིས་ཆུ་ལ་ཡང་བཞིན་བརྟག་པར་མི་བྱའོ། །ཞེས་བཀའ་སྩལ་པ་དང ། དགེ་སློང་དག་ཆུ་རྟོག་པར་བྱེད་པ་ན་བཞིན་མཐོང་ནས་དེ་དག་འགྱོད་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཆུ་བརྟག་པ་དང ། རྨ་དང ། གཉེར་མ་དང ། རྒས་པ་དང ། ལུས་ཀྱི་གནས་སྐབས་སྔ་ཕྱི་བརྟག་པའི་ཕྱིར་བལྟས་པ་ལ་ལྟུང་བ་མེད་དོ། །གླེང་གཞི་ནི། མཉན་ཡོད་ནའོ། །དྲུག་སྡེ་དག་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་དང ། དེ་དག་གིས་བྲམ་ཟེ་དང ། ཁྱིམ་བདག་གི་བྱི་དོར་གྱི་ཡོ་བྱད་གོས་ཀྱི་སྤྲོག་མའི་སྟེང་དུ་བཞག་པ་མཐོང་ནས་དྲུག་སྡེ་དག་གིས་དེ་དག་གི་སོ་མང་བླངས་ཏེ་སྐྲ་བཤད་ནས་སྨྲས་པ། དགའ་བོ་ཉེ་དགའ་བོ། ཇི་ལྟར་
Tha48a
༄#། །བདག་ཅག་བཟང་ངམ། བྲམ་ཟེ་དང ། ཁྱིམ་བདག་དག་གིས་སྨྲས་པ། འཕགས་པ་དག་།ཁྱེད་མགོ་ནི། བྲེགས་ལ། མཆན་ཁུང་ནི། རལ་བུ་ཅན་དུ་འདུག་ན། ཁྱེད་ཀྱི་སྐྲ་མཛེས་པར་ག་ལ་འགྱུར། དགེ་སྦྱོང་འདི་དག་ནི། འདོད་པའི་ཡོན་ཏན་དག་གིས་གཟིར་བར་ངེས་སོ། །ཞེས་བྱ་བ་དང ། དེ་དག་ཅང་མི་སྨྲ་བར་འཁོད་པའི་སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་སོ་མང་གིས་སྐྲ་བཤད་པར་མི་བྱའོ། །བཤད་པར་བྱེད་ན། འགལ་ཚབས་ཅན་དུ་འགྱུར་རོ། །གླེང་གཞི་ནི། མཉན་ཡོད་ནའོ། །བཅོམ་ལྡན་འདས་ཀྱིས་དགེ་སློང་གིས་སོ་མང་གིས་སྐྲ་བཤད་པར་མི་བྱའོ། །ཞེས་བཀའ་སྩལ་པ་དང ། དྲུག་སྡེ་དག་གིས་སྨྱུག་ཤད་ཀྱིས་བཤད་པར་བརྩམས་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྨྱུག་ཤད་ཀྱིས་ཀྱང་བཤད་པར་མི་བྱའོ། །བཤད་པར་བྱེད་ན། འགལ་ཚབས་ཅན་དུ་འགྱུར་རོ། །གླེང་གཞི་ནི། མཉན་ཡོད་ནའོ། །བཅོམ་ལྡན་འདས་ཀྱིས་དགེ་སློང་གིས་སྨྱུག་ཤད་ཀྱིས་སྐྲ་བཤད་པར་མི་བྱའོ། །ཞེས་བཀའ་སྩལ་པ་དང ། དེ་དག་གིས་ཕྱོགས་གཅིག་ནི། སོ་མང་དུ་བྱས་ལ། ཕྱོགས་གཅིག་ནི། སྨྱུག་ཤད་དུ་བྱས་པས་སྐྲ་བཤད་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། སོ་མང་དང ། སྨྱུག་ཤད་གཉི་གས་ཀྱང་སྐྲ་བཤད་པར་མི་བྱའོ། །གླེང་གཞི་ནི།
Tha48b
མཉན་ཡོད་ནའོ། །གང་གི་ཚེ་ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་རྒྱལ་བྱེད་ཀྱི་ཚལ་ཕུལ་བ་དེའི་ཚེ། དེས་འབྲེག་མཁན་ཞེས་བྱ་བ་ལ་སོགས་པ་སྔ་མ་ཇི་ལྟ་བ་བཞིན་ནོ། །ཉེ་དགས་སྨྲས་པ། བཞིན་བཟང ། གཙུག་ཕུད་འཇོག་ཤེས་སམ། འཕགས་པ། དེ་ནི། བདག་གི་སུག་ལས་ལགས་སོ། །བལྟའི། ཞོག་ཅིག་།འཕགས་པ། ཇི་ལྟར་གཞག་པར་བགྱི། ཆེན་པོར་རོ། །དེས་གཙུག་ཕུད་ཆེན་པོར་བཞག་པ་དང ། ཉེ་དགས་སྨྲས་པ། ཕྱོགས་གཅིག་བྲེགས་ཤིག་།དེས་ཕྱོགས་གཅིག་བྲེགས་པ་དང ། དེས་སྨྲས་པ། གཉིས་པ་དང ། གསུམ་པ་ཞེས་བྱ་བ་ནས་ཕྱོགས་བདུན་པའི་བར་བྲེགས་ཤིག་ཅེས་ཟེར་ནས་དེས་ཕྱོགས་བདུན་པའི་བར་དུ་བྲེགས་པ་དང ། ཉེ་དགས་སྨྲས་པ། བཀྲེན་པ། ཁྱོད་ཀོ་ཅི་ཡང་མི་ཤེས་པ་ཞིག་གི། སྔ་མཁོ་བཞིན་དུ་བྱོས་ཏེ་སོང་ཞིག་ཅེས་བྱ་བ་ལ་སོགས་པ་སྔ་མ་ཇི་ལྟ་བ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་གཙུག་ཕུད་གཞག་པར་མི་བྱའོ། །འཇོག་པར་བྱེད་ན། འགལ་ཚབས་ཅན་དུ་འགྱུར་རོ། །གླེང་གཞི་ནི། མཉན་ཡོད་ནའོ། །ཚེ་དང་ལྡན་པ་བ་ལང་གནས་ཀོའུ་ཤམྦྷི་ན་རི་ཆུས་བསྐོར་ལ་བད་སའི་རྒྱལ་པོ་འཆར་བྱེད་ཀྱི་སྐྱེད་མོས་ཚལ་གྱི་ཕག་མོའི་ཕུག་ན་འདུག་གོ། དེ་ནས་དུས་གཞན་ཞིག་ན། གང་གི་ཚེ་དཔྱིད་ཀྱི་དུས་ལ་བབ་པ་དེའི་ཚེ་ཤིང་ལྗོན་པ་དག་མེ་ཏོག་རྒྱས་ཤིང ། ངང་པ་དང ། ཁྲུང་ཁྲུང་དང ། རྨ་བྱ་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ཤང་ཤང་
Tha49a
༄#། །ཏེའུ་དག་ཚལ་གྱི་ནང་ན་སྒྲ་འབྱིན་པར་བྱེད་པ་ན། བད་སའི་རྒྱལ་པོ་འཆར་བྱེད་ཀྱིས་སྐྱེད་མོས་ཚལ་སྲུང་བའི་མི་བོས་ཏེ་སྨྲས་པ། ཀཝའི་མི་ཁྱོད་ཚུར་ཤོག་།ང་སྐྱེད་མོས་ཚལ་དུ་འགྲོའི། རི་ཆུས་བསྐོར་གྱི་ཉེན་ཀོར་གྱི་རྡོ་བ་དང ། གསེག་མ་དང ། གྱོ་མོ་ཐམས་ཅད་སོལ་ལ། ཆུ་ར་དག་ཀྱང་བཞག་སྟེ་ཚལ་རྟོགས་ལ་ལ་གཅན་པ་དག་ཀྱང་སྐོས་ཤིག་།སྐྱེད་མོས་ཚལ་སྲུང་བའི་མིས་ལྷ། བཀའ་བཞིན་འཚལ་ཞེས་བད་སའི་རྒྱལ་པོ་འཆར་བྱེད་ཀྱི་ཚིག་མཉན་ནས་རི་ཆུས་བསྐོར་གྱི་ཉེན་ཀོར་གྱི་རྡོ་བ་དང ། གསེག་མ་དང ། གྱོ་མོ་ཐམས་ཅད་བསལ་ནས་ཆུ་ར་དག་ཀྱང་བཞག་སྟེ་ཚལ་བརྟགས་ཤིང་ལ་གཅན་པ་དག་ཀྱང་བསྐོས་ནས་བད་སའི་རྒྱལ་པོ་འཆར་བྱེད་ག་ལ་བ་དེར་སོང་སྟེ་ཕྱིན་ནས་བད་སའི་རྒྱལ་པོ་འཆར་བྱེད་ལ་འདི་སྐད་ཅེས་སྨྲས་སོ། །ལྷ། འདི་ལྟར་མཁྱེན་པར་མཛད་དུ་གསོལ། རི་ཆུས་བསྐོར་གྱི་ཉེན་ཀོར་གྱི་གོར་མ་དང ། གསེག་མ་དང ། གྱོ་མོ་ཐམས་ཅད་བསལ་ཅིང ། ཆུ་ར་དག་ཀྱང་བཞག་སྟེ་ཚལ་ཀྱང་བརྟགས། ལ་གཅན་པ་དག་ཀྱང་བསྐོས་ལགས་ན། ལྷ། ད་དེའི་དུས་ལ་བབ་པར་མཁྱེན་པར་མཛད་དུ་གསོལ། དེ་ནས་བད་སའི་རྒྱལ་པོ་འཆར་བྱེད་བཙུན་མོའི་ཚོགས་ཀྱིས་ཡོངས་སུ་བསྐོར་ནས་སྐྱེད་མོས་ཚལ་དུ་སོང་སྟེ། དེས་དེར་དགའ་བ་དང ། རྩེ་བ་དང ། དགའ་མགུར་སྤྱད་པ་ཉམས་སུ་མྱོང་བར་བྱས་ནས་དེ་གཉིད་ལོག་པར་གྱུར་ཏོ། །བུད་མེད་རྣམས་ཀྱི་རང་བཞིན་ནོ། །མེ་ཏོག་དང ། འབྲས་བུ་ལ་དགའ་བ་ཡིན་པས།
Tha49b
དེའི་བཙུན་མོའི་འཁོར་རྣམས་སྐྱེད་མོས་ཚལ་དེར་ཅི་དགར་རྒྱུ་ཞིང་འཁྱམ་དུ་དོང་བ་དང ། དེའི་ཚེ་ཚེ་དང་ལྡན་པ་བ་ལང་གནས་སྐྲ་དང ། ཁ་སྤུ་རིང་ཞིང་ཆོས་གོས་རྙིང་པ་དང ། ཤམ་ཐབས་ཧྲུལ་པོ་བགོས་ནས་ཤིང་ལྗོན་པ་ཞིག་གི་དྲུང་ན་བརྟེན་ཅིང་འདུག་གོ་།ཚེ་དང་ལྡན་པ་བ་ལང་གནས་སྐྲ་དང ། ཁ་སྤུ་རིང་ཞིང་ཆོས་གོས་རྙིང་པ་དང ། ཤམ་ཐབས་ཧྲུལ་པོ་བགོས་ནས་འདུག་པ། བཙུན་མོའི་འཁོར་དེ་དག་གིས་མཐོང་ངོ ། །མཐོང་ནས་ཀྱང་དངངས་ཏེ་ཨ་ཙི་ལྷ་གཅིག་།འདི་ན་འདྲེ་ཞིག་གདའོ། ། ཙི་ལྷ་གཅིག་།འདི་ན་འདྲེ་ཞིག་གདའོ། །ཞེས་བྲེད་སྐད་ཕྱུང་བ་དང ། ཚེ་དང་ལྡན་པ་བ་ལང་གནས་དེ་ནས་ལངས་ཏེ་རིངས་པ་རིངས་པར་ཕག་མོའི་ཕུག་ཏུ་སོང་ངོ ། །སྒྲ་དེས་རྒྱལ་པོ་སད་ནས་རལ་གྲི་ཤུབས་ནས་ཕྱུང་སྟེ་བརྒྱུགས་ནས་བུད་མེད་དག་འདྲེ་ག་ལ་འདུག་ཅེས་སྨྲས་པ་དང ། དེ་དག་གིས་སྨྲས་པ། ལྷ་གཅིག་།ཕག་མོའི་ཕུག་ཏུ་མཆིས་སོ། །དེ་ནས་བད་སའི་རྒྱལ་པོ་འཆར་བྱེད་མཚོན་ཐོགས་ཏེ། ཕག་མོའི་ཕུག་སྒོར་བསྡད་ནས་སྨྲས་པ། ཀཝའི་འབྱུང་པོ། ཁྱོད་སུ་ཞིག་།དེས་སྨྲས་པ། ལྷ། དགེ་སྦྱོང་ལགས་སོ། །ཁྱོད་གང་གི་དགེ་སྦྱོང་ཡིན། ཤཱཀྱའི་སྲས་ཀྱི་དགེ་སྦྱོང་ལགས་སོ། །ཅི་ཁྱོད་དགྲ་བཅོམ་པའམ། ལྷ། མ་ལགས་སོ། །འོ་ན་ཁྱོད་ཕྱིར་མི་འོང་བའམ། ལན་གཅིག་ཕྱིར་འོང་བའམ། རྒྱུན་ཏུ་ཞུགས་པ་ཞིག་ཡིན་ནམ། ལྷ། མ་ལགས་སོ། །འོ་ན། ཅི་ཁྱོད་བསམ་གཏན་བཞི་པ་ཐོབ་པ་ཡིན་ནམ། མ་ལགས་སོ། །འོ་ན་ཁྱོད་བསམ་གཏན་གསུམ་པའམ། གཉིས་
Tha50a
༄#། །པའམ། དང་པོ་ཐོབ་པ་ཞིག་ཡིན་ནམ། ལྷ། མ་ལགས་སོ། །ཞེས་བྱས་པ་དང ། རྒྱལ་པོ་བཙུན་མོའི་འཁོར་ལ་ཕྲག་དོག་ཟ་བས། ཕྱིར་ལྷགས་པར་ཁྲོས་ཏེ་བློན་པོ་རྣམས་ལ་སྨྲས་པ། ཀཝའི་ཤེས་ལྡན་དག་།དགེ་སྦྱོང་སོ་སོའི་སྐྱེ་བོ་འདིས། ངའི་བཙུན་མོའི་འཁོར་རྣམས་མ་རུངས་པར་བྱས་ཀྱི། རྔ་མོའི་གྲོག་མ་ཆེན་པོ་དག་འདིར་མྱུར་དུ་ལྷོགས་ཤིག་དང ། དེ་དག་གིས་ཕུག་འདི་ཁྱབ་པར་བཀང་སྟེ། དགེ་སློང་འདི་གསད་པར་བྱའོ། །དེ་ནས་ཕག་མོའི་ཕུག་ན་གཉུག་མར་གནས་པའི་ལྷ་ཞིག་འདུག་པ་དེས་བསམ་པ། རྒྱལ་པོ་གཏུམ་པོ་འདིས་བདག་ལ་སྐྱབས་སུ་འོངས་པའི་དགེ་སྦྱོང་ཉེས་པ་མེད་པ། སྐྱོན་མེད་པ་བསད་པར་གྱུར་ན་མི་རུང་གི་།བདག་གིས་འདི་ཐར་བར་བྱ་བའི་ཐབས་ཤིག་ལ་བརྩོན་པར་བྱའོ། །སྙམ་ནས་དེ་བདག་ཉིད་ཕག་མོའི་གཟུགས་སུ་མངོན་པར་སྤྲུལ་ཏེ་ཕུག་ནས་སྒོར་བྱུང་ངོ ། །རྒྱལ་པོ་དེ་ལིངས་ལ་དགའ་བས་མི་ཞིག་ལ་སྨྲས་པ། ཀཝའི་མི་འདི་སོང་ལ་ངའི་རྟ་དང ། མདའ་གཞུ་དག་ཁྱེར་ཏེ་ཤོག་ཅིག་།དེས་རྒྱལ་པོའི་རྟ་དང ། མདའ་གཞུ་དག་ཕུལ་ལོ། །དེ་ནས་ཕག་མོ་དེ་སྐྱེད་མོས་ཚལ་གྱི་ནང་ནས་ཕྱིར་བྱུང་སྟེ་འབྲོས་པར་བརྩམས་པ་དང ། རྒྱལ་པོ་དེ་དེའི་ཕྱི་བཞིན་སྙེགས་སུ་འགྲོ་བ་ན། དེས་ཐག་རིང་དུ་ཁྲིད་དེ་སོང་ངོ ། །དེ་ནས་བཙུན་མོའི་འཁོར་གྱི་ཚོགས་ཀྱིས་ཚེ་དང་ལྡན་པ་བ་ལང་གནས་ལ་སྨྲས་པ། འཕགས་པ། རྒྱལ་པོ་འདི་ནི། གཏུམ་པ་ལགས་པས། ཁྱོད་བཀྲོངས་པར་གྱུར་ན།
Tha50b
མ་ལེགས་ཀྱི། ཁྱོད་ད་མྱུར་དུ་བཞུད་ཅིག་།ཚེ་དང་ལྡན་པ་བ་ལང་གནས་ཀྱིས་མྱུར་བ་མྱུར་བར་ལྷུང་བཟེད་དང ། ཆོས་གོས་བླངས་ཏེ་སྐྱེད་མོས་ཚལ་དེ་ནས་ཕྱིར་བྱུང་ནས་མཉན་ཡོད་དུ་སོང་ངོ ། དེ་ཁང་ཀྱིས་མཉན་ཡོད་དུ་ཕྱིན་པ་དང ། དགེ་སློང་དག་གིས་མཐོང་ནས་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཁྱོད་ཡུན་རིང་པོ་རིང་པོ་ནས་ཟླ་བ་བཞིན་དུ་རྒྱུ་ཞིང་ག་ལས་འོངས། ཀོའུ་ཤམྦྷི་ནས་སོ། །ཇི་ལྟར་ཚེ་དང་ལྡན་པས་བདེ་བར་རྒྱུས་སམ། ཚེ་དང་ལྡན་པ་དག་ཇི་ལྟར་བདེ་བར་རྒྱུས། བདག་བད་སའི་རྒྱལ་པོ་འཆར་བྱེད་ཀྱིས་ཧད་པོར་དེའུ་བསད་དོ། །ཅིའི་ཕྱིར། དེས་རྒྱས་པར་སྨྲས་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་ཞིག་ལ་བཀའ་སྩལ་པ། དགེ་སློང་ཚུར་ཤོག་།ཁྱོད་དགེ་སློང་བ་ལང་གནས་ག་ལ་བ་དེར་སོང་ལ། བ་ལང་གནས་ལ་འདི་སྐད་ཅེས་སྟོན་པས་བཀའ་སྩལ་པ། ཁྱོད་སྤྱན་སྔར་མཆི་ཞིག་ཅེས་བྱུང་ངོ ། །ཞེས་སྒོས་ཤིག་།དགེ་སློང་དེས། བཙུན་པ། བཀའ་བཞིན་འཚལ་ཞེས་བཅོམ་ལྡན་འདས་ཀྱི་བཀའ་མཉན་ནས་ཚེ་དང་ལྡན་པ་བ་ལང་གནས་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་བ་ལང་གནས་ལ་འདི་སྐད་ཅེས་སྨྲས་སོ། །སྟོན་པས་བཀའ་སྩལ་པ། ཁྱོད་སྤྱན་སྔར་མཆི་ཞིག་ཅེས་བྱུང་ངོ ། །ཚེ་དང་ལྡན་པ་བ་ལང་གནས་ཀྱིས། ཚེ་དང་ལྡན་པ། བཀའ་བཞིན་འཚལ་ཞེས་དགེ་སློང་དེའི་ཚིག་མཉན་ནས་བཅོམ་ལྡན་འདས་ག་ལ་
Tha51a
༄#། །བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས་བཅོམ་ལྡན་འདས་ཀྱིས་ཚེ་དང་ལྡན་པ་བ་ལང་གནས་ལ་འདི་སྐད་ཅེས་བཀའ་སྩལ་ཏོ། །དགེ་སློང ། ཁྱོད་བད་སའི་རྒྱལ་པོ་འཆར་བྱེད་ཀྱིས་ཅིའི་ཕྱིར་དེའུ་བསད། དེས་བཅོམ་ལྡན་འདས་ལ་སྐབས་དེ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། འདི་ལྟར་མི་གཏི་མུག་ཅན་ཁྱོད་ཕུག་དེ་ལ་ལྷག་པར་ཆགས་པས། དེས་ན་ཁྱོད་ཤིན་ཏུ་སྡུག་བསྔལ་བར་གནས་པར་གྱུར་ཏོ། །དེ་ཅང་མི་སྨྲ་བར་འདུག་ནས་བཅོམ་ལྡན་འདས་ཀྱིས་དགེ་སློང་དག་ལ་ཉེས་དམིགས་ཅུང་ཟད་གང་ཅི་བྱུང་བ་དེ་ནི། སྐྲ་རིང་པོ་འཇོག་པ་ལས་གྱུར་པར་མཁྱེན་ནས་བཀའ་སྩལ་པ། དེ་ལྟ་བས་ན། དགེ་སློང་གིས་སྐྲ་རིང་པོར་གཞག་པར་མི་བྱའོ། །འཇོག་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་སྐྲ་རིང་པོར་གཞག་པར་མི་བྱའོ། །ཞེས་བཀའ་སྩལ་པ་དང ། དགེ་སློང་དགོན་པ་པ་དག་གིས་འབྲེག་མཁན་མ་རྙེད་ནས་དེ་དག་གིས་དགོན་པའི་གནས་མལ་སྤངས་ནས་གོང་མཐའི་གནས་མལ་དག་ཏུ་འཁོད་དོ། །སངས་རྒྱས་བཅོམ་ལྡན་འདས་རྣམས་ནི། མཁྱེན་བཞིན་དུ་རྨེད་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ། ཅིའི་ཕྱིར་དགེ་སློང་དགོན་པ་པ་དག་གིས་དགོན་པའི་གནས་མལ་སྤངས་
Tha51b
ནས་གྲོང་མཐའི་གནས་མལ་དག་ཏུ་འཁོད་པར་གྱུར། དེས་བཅོམ་ལྡན་འདས་ལ་སྐབས་དེ་རྒྱས་པར་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་དགོན་པ་པས་ནི། སྐྲ་སོར་གཉིས་ཀྱི་ཚད་དུ་གཞག་པར་རྗེས་སུ་གནང་ངོ ། །གྲོང་མཐའ་པས་ནི། དེ་བས་ཐུང་ངུར་བྱའོ། །གླེང་གཞི་ནི། མཉན་ཡོད་ནའོ། །མཉན་ཡོད་ན། དགེ་སློང་ནད་པ་ཞིག་འདུག་པ་དེ། སྨན་པའི་གན་དུ་སོང་ནས་སྨྲས་པ། བཞིན་བཟང ། བདག་ལ་སྨན་སྟོན་ཅིག་།དེས་སྨྲས་པ། འཕགས་པ། བསྲོ་ཁང་སྟེན་ཅིག་དང་ཁྱོད་སོས་པར་འགྱུར་རོ། །དེས་སྨྲས་པ། བཞིན་བཟང ། ཅི། ཁོ་བོས་འདོད་པ་དག་སྤྱད་པར་བྱའམ། འཕགས་པ། ཁྱོད་ཀྱི་སྨན་ནི། འདི་ལགས་ཀྱི། གཞན་གྱིས་འཚོ་བར་མི་འགྱུར་རོ། །ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྨན་པས་དགེ་སློང་ཁྱོད་ཀྱི་སྨན་འདི་ཡིན་གྱི། གཞན་གྱིས་འཚོ་བར་མི་འགྱུར་རོ། །ཞེས་བསྒོ་ན། དགེ་སློང་གིས་བསྲོ་ཁང་བསྟེན་པར་བྱའོ། ། བཅོམ་ལྡན་འདས་ཀྱིས་དགེ་སློང་གིས་བསྲོ་ཁང་བསྟེན་པར་བྱའོ། །ཞེས་བཀའ་སྩལ་པ་དང ། དགེ་སློང་དག་གིས་སྨན་པ་དེ་ལ་དྲིས་པ། བཞིན་བཟང ། བཅོམ་ལྡན་འདས་ཀྱིས་གནང་ན། བསྲོ་ཁང་ཇི་ལྟ་བུ་ཡིན་པ་སྨྲོས་ཤིག་།དེས་སྨྲས་པ། འཕགས་པ། བདག་གིས་འཁོར་ལོས་བསྒྱུར་བའི་གསོ་བཀླགས་པ་ལས་བསྲོ་ཁང་ཞེས་འབྱུང་བར་བས་ཀྱི། བསྲོ་ཁང་ཇི་ལྟ་བུ་ལགས་པ་ད་དུང་མ་
Tha52a
༄#། །འཚལ་ཏེ། འདི་ལྟར་ཁྱེད་ཉིད་ཀྱི་སྟོན་པ་ཐམས་ཅད་མཁྱེན་པ་ལགས་པས། དེ་ཉིད་མཁྱེན་ཏོ། །ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བསྲོ་ཁང་གི་ཁང་པ་ཟླུམ་པོ་བྱའོ། །དེ་དག་སྐར་ཁུང་མི་གདོད་ནས་བཅོམ་ལྡན་འདས་ཀྱིས་བཀའ་སྩལ་པ། སྐར་ཁུང་གདོད་པར་བྱའོ། །དེ་དག་སྐར་ཁུང་ཕྱི་ཡངས་ལ། ནང་དོག་པ་བྱེད་དུ་བཅུག་ནས་བཅོམ་ལྡན་འདས་ཀྱིས་བཀའ་སྩལ་པ། ཕྱི་རུབ་ལ་ནང་ཡངས་པ་རྒྱ་མཚོའི་རྣམ་པ་ལྟ་བུར་བྱའོ། །དེ་དག་གིས་མཐོན་པོར་བཏོད་པ་ན། མུན་གནག་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཧ་ཅང་མཐོན་པོར་གདོད་པར་མི་བྱའོ། །དེ་དག་གིས་དམའ་བར་བཏོད་པ་ན། དུ་བ་འཆང་དུ་མི་བཏུབ་ནས་བཅོམ་ལྡན་འདས་ཀྱིས་བཀའ་སྩལ་པ། ཧ་ཅང་དམའ་བར་གདོད་པར་མི་བྱའོ། །དེ་དག་གིས་གར་གདོད་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། དཀྱིལ་དུ་གདོད་པར་བྱའོ། ། བྱེའུ་དང ། ཕུག་རོན་དག་འཇུག་ནས་བཅོམ་ལྡན་འདས་ཀྱིས་བཀའ་སྩལ་པ། སྐར་ཁུང་དྲ་བ་ཅན་དུ་བྱའོ། །རླུང་དང་ཆར་ཆུའི་ཟེར་མ་དག་ནང་དུ་འོངས་ནས་བཅོམ་ལྡན་འདས་ཀྱིས་བཀའ་པ།་སྐར་ཁུང་ལ་སྒོ་གླེགས་གཞུག་པར་བྱའོ། །རླུང་གིས་བསྐྱོད་དེ་འདུག་ཏུ་མི་བཏུབ་ནས་བཅོམ་ལྡན་འདས་ཀྱིས་བཀའ་སྩལ་པ། འཁོར་གཏན་དང ། གནམ་ཟེར་དང ། ཕྲེད་གཏན་དག་
Tha52b
གཞུག་པར་བྱའོ། །དབྱེ་བ་དང ། བཅད་པས་དགེ་སློང་དག་ཉོན་མོངས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དབྱུག་གུ་སྐམ་ཁ་ཉེ་བར་གཞག་པར་བྱའོ། །སྒོ་ལ་སྒོ་གླེགས་མི་འཇུག་ནས་བཅོམ་ལྡན་འདས་ཀྱིས་བཀའ་སྩལ་པ། སྒོ་གླེགས་གཞུག་པར་བྱ་ཞིང ། སྒོ་གཏན་ཡང་གཞུག་པར་བྱ་སྟེ། དེ་ལ་ཡང་མིག་དང ། ལག་གཟུངས་ཀྱང་གཞུག་པར་བྱའོ། །ཆུ་དག་དམའ་བའི་ཕྱོགས་སུ་བཞག་པ་དེ་གྲང་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ནང་གི་ཕྱོགས་སུ་བཞག་སྟེགས་བྱ་ཞིང་དེར་བུམ་པ་དག་གཞག་པར་བྱའོ། །ས་གཞིར་མེ་བུས་པས་དེས་ཞལ་ཞལ་མ་རུང་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། སོ་ཕག་གི་གཅལ་དགྲམ་པར་བྱའོ། །དེ་དག་གི་མེ་བདལ་བ་དང ། དེ་ཤི་ནས་བཅོམ་ལྡན་འདས་ཀྱིས་བཀའ་སྩལ་པ། གདལ་ནས་དེ་བཞིན་མི་དོར་བར་བཅེར་ཏེ་གཞག་པར་བྱའོ། །དེ་དག་གིས་ཅིས་བཅེར་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ལྕགས་ཀྱིས་ཐལ་ཕྱགས་བྱས་ལ་དེས་བཅེར་བར་བྱའོ། །དེ་དག་མེ་འབར་བ་ན་བསྲོ་ཁང་གི་ནང་དུ་འཇུག་ཅིང་རྨྱ་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། མེ་འབར་བ་ན། འཇུག་པར་མི་བྱའོ། །དགེ་སློང་དག་དེར་ཞུགས་པ་ན། མེའི་དུགས་ཀྱིས་བོག་པར་གྱུར་ནས་དེ་དག་མྱོས་ཏེ་ས་ལ་བསྒྱེལ་ནས་བཅོམ་ལྡན་འདས་ཀྱིས་བཀའ་སྩལ་པ། ཕྱེ་དང་ཡུངས་མར་དུ་བསྲེས་པ་དག་མེར་བླུགས་པར་བྱའོ། །དྲི་མི་ཞིམ་པར་གྱུར་ནས་
Tha53a
༄#། །བཅོམ་ལྡན་འདས་ཀྱིས་བཀའ་སྩལ་པ། བདུག་སྤོས་བླུགས་པར་བྱའོ། །དུད་པས་དགེ་སློང་དག་མཆི་མ་འཛག་ནས་བཅོམ་ལྡན་འདས་ཀྱིས་བཀའ་སྩལ་པ། ནས་ཀྱི་བག་ཟན་གྱི་ཆང་བུས་གླན་པར་བྱའོ། །འོན་ཀྱང་འཛག་ནས་བཅོམ་ལྡན་འདས་ཀྱིས་བཀའ་སྩལ་པ། སྐྱུ་རུ་རའི་ཆང་བུས་གླན་པར་བྱའོ། །སྟན་མེད་ནས་དགེ་སློང་དག་གིས་སྟན་ཁྱེར་ཏེ་སོང་བ་དང ། དེ་དག་འབྲུ་མར་གྱིས་སྣུམ་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། རྩཝ་བམ་དག་གཞག་པར་བྱའོ། །རྐང་པ་དག་ས་ལ་བཞག་པས་རྡུལ་གྱིས་གོས་ནས་བཅོམ་ལྡན་འདས་ཀྱིས་བཀའ་སྩལ་པ། ས་གཞི་རྩཝ་དག་དགྲམ་པར་བྱའོ། །སྐམ་པོ་དག་བཏིང་བ་ན། མེ་སྟག་གིས་ཚིག་ནས་བཅོམ་ལྡན་འདས་ཀྱིས་བཀའ་སྩལ་པ། སྔོན་པོ་དག་དགྲམ་པར་བྱའོ། །སྔོན་པོ་དག་མ་རྙེད་ནས་བཅོམ་ལྡན་འདས་ཀྱིས་བཀའ་སྩལ་པ། ཆུས་སྤངས་ལ་དགྲམ་པར་བྱའོ། །དགེ་སློང་དག་འབྲུ་མར་གྱིས་སྣུམ་པ་ན། འཇག་མ་དང་གསེག་མ་དག་གི་ལུས་ལ་ཕྲུགས་པས་རྨ་བྱུང་ནས་བཅོམ་ལྡན་འདས་ཀྱིས་བཀའ་སྩལ་པ། ལྕགས་ཀྱི་ཕྲུག་སྤྱད་བྱའོ། །དེ་བབ་བབ་ཏུ་བཞག་པས་དེ་མ་རུང་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ལུང་མིག་བྱས་ལ་ཐག་གུས་བཏགས་ཏེ་རྫས་ཀྱི་བླས་དབེན་པར་གཞག་པར་བྱའོ། །དེ་སྣུམ་པར་གྱུར་ནས་དགེ་སློང་དག་དེ་ཡང་དང་ཡང་དུ་སྦྱོང་བར་བྱེད་ནས་བཅོམ་ལྡན་
Tha53b
འདས་ཀྱིས་བཀའ་སྩལ་པ། མེས་རུང་བར་བྱའོ། །དགེ་སློང་དག་གིས་དེར་ཁྲུས་བྱས་པས། འདམ་རྫབ་ཏུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དེར་ཁྲུས་མི་བྱ་བར་ཁྲུས་ཁང་བྱས་ལ་དེར་ཁྲུས་བྱའོ། །གང་དག་ཁྲུས་བྱེད་པ་དེ་དག་ལ་ཆུས་གནོད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཁྲུས་དོང་བརྐོས་ལ་སོ་ཕག་གིས་སྒྲོན་ཏེ་གང་ཁྲུས་བྱེད་པ་དེ་ཁྲུས་དོང་དུ་ཞུགས་ལ། གང་ཁྲུས་ཆུ་ལྡུགས་པ་དེ་ནི། ཁར་འདུག་སྟེ། ཁྲུས་ཆུ་བླུགས་པར་བྱའོ། །དེ་ཆུས་གང་ནས་བཅོམ་ལྡན་འདས་ཀྱིས་བཀའ་སྩལ་པ། སྟོར་ཁུང་གདོད་པར་བྱའོ། །དགེ་སློང་དག་ཁྲུས་བྱས་ནས་འདག་རྫས་དང ། བ་ལང་གི་ལྕི་བ་དང ། སོ་ཤིང་ལེན་དུ་གཙུག་ལག་ཁང་དུ་འདོང་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ཉིད་དུ་འདག་རྫས་དང ། བ་ལང་གི་ལྕི་བ་དང ། སོ་ཤིང་གིས་བཀང་བའི་གྱོ་མོ་དག་གཞག་པར་བྱའོ། །དགེ་སློང་དག་མེའི་དུགས་ཀྱིས་ཉམས་དམས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་སུས་བཟའ་བར་བྱའོ། །དེ་དག་ལག་པ་བསྙལ་པས་ཐོགས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཁ་གཟར་བཅང་བར་བྱའོ། །དགེ་སློང་ཞིག་གིས་ཁྱེའུ་སུས་ཐུག་པ་ཧ་ཅང་ཚ་བ་ཞིག་རྙེད་ནས་བཅོམ་ལྡན་འདས་ཀྱིས་བཀའ་སྩལ་པ། ཁ་གཟར་གྱིས་བཏུང་བར་བྱའོ། །དེ་ལ་ལན་ཚཝ་དགོས་པ་དང ། ལོ་མ་དག་མ་རྙེད་ནས་བཅོམ་ལྡན་འདས་ཀྱིས་བཀའ་སྩལ་པ། ཚ་ཁུག་བཅང་བར་བྱའོ། །བཅོམ་ལྡན་འདས་ཀྱིས་བསྲོ་
Tha54a
༄#། །ཁང་དུ་བྱི་དོར་གྱི་ལས་བྱའོ། །ཞེས་བཀའ་སྩལ་པ་དང ། དགེ་སློང་དག་གིས་བྱི་དོར་གྱི་ལས་སུས་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ།་ལྷན་ཅིག་གནས་པ་དང ། ཉེ་གནས་དག་གིས་བྱའོ། །དེ་དག་གི་ནི། གཅིག་གིས་གཅིག་ལ་བྱའོ། །དེ་ལྟར་བསྲོ་གང་ཡོ་བྱད་དང་བཅས་པ་རྗེས་སུ་གནང་ངོ ། །གླེང་གཞི་ནི། མཉན་ཡོད་ནའོ། །དེའི་ཚེ་ཡངས་པ་ཅན་ན་ལི་ཙ་བྱི་ཆེན་པོ་ཞེས་བྱ་བ། གཡོ་སྒྱུ་མེད་པ། དྲང་པོ། དྲང་པོའི་རང་བཞིན་ཅན་ཞིག་འདུག་པ་དེ། ཉིན་གཅིག་བཞིན་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འགྲོ་བ་ཡིན་པས། དེ་བཅོམ་ལྡན་འདས་ཀྱི་སྤྱན་སྔར་འགྲོ་བའི་ཚེ་དགེ་སློང་མཛའ་བོ་དང ། ས་ལས་སྐྱེས་ཀྱང་ལྗོངས་རྒྱུ་ཞིང་འགྲོ་བ་ན། ཡངས་པ་ཅན་དུ་ཕྱིན་ནས་དེ་གཉིས་ཀྱིས་དེ་ལམ་ཀར་མཐོང་ནས་དེ་གཉིས་ཀྱིས་སྨྲས་པ། ཆེན་པོ། གར་འགྲོ། དེས་སྨྲས་པ། འཕགས་པ་གཉིས། བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཆིའོ། །དེ་གཉིས་ཚེ་དང་ལྡན་པ་གྱད་བུ་ནོར་དང་ཚེ་རབས་ཚེ་རབས་སུ་འཁོན་ཡོད་པས། དེ་གཉིས་ཀྱིས་སྨྲས་པ། ཆེན་པོ། སངས་རྒྱས་བཅོམ་ལྡན་འདས་ལ་ནི། གཏམ་གྱི་སྐྱེས་དབུལ་བར་བྱ་བ་ཡིན་ན། ཁྱོད་ལ་གཏམ་གྱི་སྐྱེས་ཅུང་ཟད་ཡོད་དམ། འཕགས་པ་གཉིས། མ་མཆིས་སོ། །ཆེན་པོ་ཚུར་ཤོག་།ཁྱོད་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས། བཙུན་པ།
Tha54b
འདི་ལྟར་འཕགས་པ་གྱད་བུ་ནོར་གྱིས་བདག་གི་མཆིས་བྲང་དང་ལྷན་ཅིག་མི་ཚངས་པར་སྤྱད་དེ་ཕམ་པར་གྱུར་པ་དེ་མི་མཛེས་ཤིང་ཚུལ་དང་མཐུན་པ་མ་ལགས་སོ། །ཞེས་གསོལ་ཅིག་དང ། བཅོམ་ལྡན་འདས་ཁྱོད་ལ་དགྱེས་པར་འགྱུར་རོ། །དེས་འཕགས་པ་གཉིས། དེ་བཞིན་འཚལ་ལོ། །ཞེས་སྨྲས་ཏེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས། བཙུན་པ། འདི་ལྟར་འཕགས་པ་གྱད་བུ་ནོར་གྱིས་བདག་གི་མཆིས་བྲང་དང་ལྷན་ཅིག་མི་ཚངས་པར་སྤྱད་དེ་ཕམ་པར་གྱུར་པ་དེ་ནི། མི་མཛེས་ཤིང ། ཚུལ་དང་མཐུན་པ་མ་ལགས་སོ། །ཞེས་གསོལ་ནས་སོང་ངོ ། །དེ་ནས་བཅོམ་ལྡན་འདས་ཀྱིས། དགེ་སློང་རྣམས་ལ་བཀའ་སྩལ་པ། དགེ་སློང་དག། ལི་ཙ་བྱི་ཆེན་པོ་དང ། གཞན་ཡང་དེ་ལྟ་བུ་གང་ཡིན་པ་ལ་ལྷུང་བཟེད་ཁས་དབུབ་པར་བྱའོ། །ཁས་དབུབ་པ་ནི། འདི་ལྟར་བྱ་སྟེ། གནས་མལ་བཤམས་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ། དགེ་སློང་གཅིག་གིས་གསོལ་བ་འབའ་ཞིག་གི་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ལི་ཙ་བྱི་ཆེན་པོས་ཚེ་དང་ལྡན་པ་གྱད་བུ་ནོར་ལ་ཡང་དག་པ་མ་ལགས་པས་བསྐུར་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང ། དགེ་
Tha55a
༄#། །འདུན་གྱིས་ལི་ཙ་བྱི་ཆེན་པོ་ལ་ལྷུང་བཟེད་ཁས་དབུབ་པར་བགྱིའོ། །འདི་ནི། གསོལ་བའོ། །དགེ་འདུན་གྱིས་གང་ལ་ལྷུང་བཟེད་ཁས་ཕུབ་པ་དེའི་ཁྱིམ་དུ་དགེ་སློང་དག་གིས་འགྲོ་བར་མི་བྱ། སྟན་ལ་ལོངས་སྤྱད་པར་མི་བྱ། བསོད་སྙོམས་བླང་བར་མི་བྱ། ཆོས་བསུན་པར་མི་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།་ཀུན་དགའ་བོ། སོང་ལ་ལི་ཙ་བྱི་ཆེན་པོ་ལ་འདི་སྐད་ཅེས། ཁྱོད་ལ་དགེ་འདུན་གྱིས་ལྷུང་བཟེད་ཁས་དབུབ་པ་མཛད་དོ། །ཞེས་སྒོས་ཤིག་།ཚེ་དང་ལྡན་པ་ཀུན་དགའ་བོས། བཙུན་པ། བཀའ་བཞིན་འཚལ་ཞེས་བཅོམ་ལྡན་འདས་ཀྱི་བཀའ་མཉན་ནས་ལི་ཙ་བྱི་ཆེན་པོའི་ཁྱིམ་ག་ལ་བ་དེར་སོང་ངོ ། །དེའི་ཚེ་ལི་ཙ་བྱི་ཆེན་པོ་བྱ་བ་ཞིག་གི་ཆེད་དུ་ཕྱི་རོལ་ཏུ་སོང་ངོ ། །དེས་དེའི་ཆུང་མ་ལ་སྨྲས་པ། སྲིང་མོ། ལི་ཙ་བྱི་ཆེན་པོ་གར་སོང ། དེས་སྨྲས་པ། འཕགས་པ། སླད་རོལ་ཏུ་མཆིས་སོ། །སྲིང་མོ། འདི་ལྟ་སྟེ། ཁྱེད་ལ་དགེ་འདུན་གྱིས་ལྷུང་བཟེད་ཁས་དབུབ་པ་མཛད་པ་ཤེས་པར་བྱོས་ཤིག་།དེས་སྨྲས་པ། བཙུན་པ་ཀུན་དགའ་བོ། ལྷུང་བཟེད་ཁས་དབུབ་པ་ཞེས་བགྱི་བ་ཅི་ལགས། སྲིང་མོ། གང་ལ་ལྷུང་བཟེད་ཁས་ཕུབ་པ་དེའི་ཁྱིམ་དུ་དགེ་སློང་དག་འདོང་བར་མི་བྱེད་སྟན་ལ་ལོངས་སྤྱོད་པར་མི་བྱེད། བསོད་སྙོམས་ལེན་པར་མི་བྱེད། ཆོས་སྟོན་པར་མི་བྱེད་དོ། །འཕགས་པ་ཀུན་དགའ་བོ། དགེ་འདུན་གྱིས་ཐབས་ཀྱིས་བདག་ཅག་གི་ཚུལ་ཤིང་བོར་ཏེ། དགེ་
Tha55b
འདུན་ལ་བདག་ཅག་གིས་ནོངས་པ་དེ་ལྟ་བུ་ཅི་ཞིག་བགྱིས་ན། དེའི་སླད་དུ་ལྷུང་བཟེད་ཁས་དབུབ་པ་མཛད། སྲིང་མོ། འདི་ལྟར་ཁྱོད་ཀྱི་ཁྱིམ་ཐབ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས། བཙུན་པ། འདི་ལྟར་འཕགས་པ་གྱད་བུ་ནོར་གྱིས་བདག་གི་མཆིས་བྲང་དང་ལྷན་ཅིག་མི་ཚངས་པར་སྤྱད་དེ་ཕམ་པར་གྱུར་པ་དེ་ནི། མི་མཛེས་ཤིང ། ཚུལ་དང་མཐུན་པ་མ་ལགས་སོ། །ཞེས་གསོལ་ཏོ། །དེ་ངོ་ཚ་བར་གྱུར་ནས་ཁྱིམ་དུ་ཞུགས་པ་དང ། ཚེ་དང་ལྡན་པ་ཀུན་དགའ་བོ་ཕྱིར་སོང་ངོ ། །ཇི་ཙམ་ན་ལི་ཙ་བྱི་ཆེན་པོ་ཁྱིམ་དུ་འོངས་ནས་ཆུང་མས་སྨྲས་པ། རྗེའི་སྲས། འོ་སྐོལ་ལ་དགེ་འདུན་གྱིས་ལྷུང་བཟེད་ཁས་དབུབ་པ་མཛད་དོ། །བཟང་མོ། ལེགས་པར་ལྷུང་བཟེད་ཁས་ཕུབ་བོ། །ཤིན་ཏུ་ལྷུང་བཟེད་ཁས་ཕུབ་བོ། །རྗེའི་སྲས། ལེགས་པར་ལྷུང་བཟེད་ཁས་ཕུབ་བོ། །ཤིན་ཏུ་ལྷུང་བཟེད་ཁས་ཕུབ་བོ། །ཞེས་གསུང་ངམ། ཁས་ཕུབ་པ་ཞེས་བགྱི་བ་ཅི་མཁྱེན་ཏམ། མི་ཤེས་སོ། །རྗེའི་སྲས། གང་ལ་ལྷུང་བཟེད་ཁས་ཕུབ་པ་དེའི་ཁྱིམ་དུ་དགེ་སློང་དག་འོང་བར་མི་བགྱིད། སྟན་ལ་ལོངས་སྤྱོད་པར་མི་བགྱིད། བསོད་སྙོམས་ལེན་པར་མི་བགྱིད། ཆོས་སྟོན་པར་མི་བགྱིད་དོ། །རྗེའི་སྲས། ཅི། ཁྱོད་ཀྱིས་འཕགས་པ་གྱད་བུ་ནོར་དང་བདག་ལྷན་ཅིག་མཆིས་པ་གཟིགས་སམ། བཟང་མོ། མ་མཐོང ། འོ་ན། ཅི་སྟེ་འཕགས་པ་ལ་ཡང་དག་པ་མ་ལགས་པས་བསྐུར། གལ་ཏེ་ད་ཡང་འདི་ལྟར་བཅོམ་ལྡན་འདས་དང ། དགེ་སློང་གི་དགེ་འདུན་ལ་བཟོད་པ་
Tha56a
༄#། །གསོལ་ན། དེ་ལྟ་ན་ལེགས། མི་གསོལ་ན། ཁྱོད་ཁོ་མོའི་ཁྱིམ་དུ་མི་གཞུག་གོ་།ཞེས་བྱས་པ་དང ། དེ་སེམས་ཁོང་དུ་ཆུད་ཅིང་འདུག་སྟེ་བསམ་པ། འདིས་ཇི་སྐད་སྨྲས་པ་དེ་བཞིན་འགྱུར་བས། བཟོད་པ་གསོལ་དུ་འགྲོའོ་སྙམ་ནས་དེ་བཅོམ་ལྡན་འདས་ཀྱི་སྤྱན་སྔར་སོང་སྟེ་ཕྱིན་ནས་ཞབས་གཉིས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ། ། བཅོམ་ལྡན་འདས། བདག་གི་ཀུན་ཏུ་སྤྱོད་པ་ནི། གདུགས་གཅིག་བཞིན་ནང་པར་སྔར་ལངས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཆིས་པ་ལགས་པས། བདག་ལ་དགེ་སློང་མཛའ་བོ་དང ། ས་ལ་སྐྱེས་གཉིས་ཀྱིས་མཆིད་ནས་ཆེན་པོ་ཚུར་ཤོག་།ཁྱོད་བཅོམ་ལྡན་འདས་ག་ལ་བ་དེར་སོང་སྟེ་ཞེས་བྱ་བ་ནས་བདག་གི་མཆིས་བྲང་དང་ལྷན་ཅིག་མི་ཚངས་པར་སྤྱད་དེ་ཕམ་པར་གྱུར་ཏོ། །ཞེས་བྱ་བའི་བར་ཐམས་ཅད་སྔ་མ་བཞིན་དུ་སྦྱར་རོ། །དེས་བཙུན་པ་བདག་གིས་ཅི་ནོངས་པ་བཟོད་པར་གསོལ་ཞེས་གསོལ་པ་དང ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།ལི་ཙ་བྱི་ཆེན་པོ་དང ། གཞན་ཡང་དེ་ལྟ་བུ་གང་ཡིན་པ་ལ་ལྷུང་བཟེད་ཕྱིར་ལྡོག་པར་བྱའོ། །ཕྱིར་ལྡོག་པ་ནི། འདི་ལྟར་བྱ་སྟེ། གནས་མལ་བཤམས་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ། ལི་ཙ་བྱི་ཆེན་པོས་ཕྱག་འཚལ་ནས་རྒན་པའི་
Tha56b
མཐའ་ལོགས་སུ་ཙོག་པུར་འདུག་སྟེ་ཐལ་མོ་སྦྱར་ནས་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་ལི་ཙ་བྱི་ཆེན་པོ་མི་དགེ་བའི་གྲོགས་པོས་བསླུས་པས།་འཕགས་པ་གྱད་བུ་ནོར་ལ་ཡང་དག་པ་མ་ལགས་པས་བསྐུར་པས། དགེ་འདུན་གྱིས་བདག་ལ་ལྷུང་བཟེད་ཁས་དབུབ་པ་མཛད་དེ། བདག་ལྷུང་བཟེད་ཁས་ཕུབ་པ། དགེ་འདུན་ལས་ལྷུང་བཟེད་སླར་ལྡོག་པར་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས། ལི་ཙ་བྱི་ཆེན་པོ་བདག་ལ་ཐུགས་བརྩེ་བའི་སླད་དུ་ལྷུང་བཟེད་སླར་ལྡོག་ཏུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། དེ་ནས་ལི་ཙ་བྱི་ཆེན་པོ་ཐོས་པའི་ཉེན་ཀོར་ནས་བཀར་ཏེ་མཐོང་བའི་ཉེན་ཀོར་དུ་བཞག་ལ། དགེ་སློང་གཅིག་གིས་གསོལ་བ་འབའ་ཞིག་གི་ལས་བྱའོ། ། འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ལི་ཙ་བྱི་ཆེན་པོ་མི་དགེ་བའི་གྲོགས་པོས་བསླུས་པ་འདིས་ཚེ་དང་ལྡན་པ་གྱད་བུ་ནོར་ལ་ཡང་དག་པ་མ་ལགས་པས་བསྐུར་ཏེ།་དགེ་འདུན་གྱིས་དེ་ལ་ལྷུང་བཟེད་ཁས་དབུབ་པར་མཛད་པ་ལས། ལི་ཙ་བྱི་ཆེན་པོ་ལྷུང་བཟེད་ཁས་ཕུབ་པ་དེ། དགེ་འདུན་ལས་ལྷུང་བཟེད་སླར་ལོག་པ་གསོལ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་ལི་ཙ་བྱི་ཆེན་པོ་ལ་ལྷུང་བཟེད་སླར་ལྡོག་པ་མཛད་དོ། །འདི་ནི། གསོལ་བའོ། །དགེ་
Tha57a
༄#། །འདུན་གྱིས་གང་ལ་ལྷུང་བཟེད་ཕྱིར་ལྡོག་པ་དེའི་ཁྱིམ་དུ་དགེ་སློང་དག་གིས་འགྲོ་བར་བྱ། སྟན་ལ་ལོངས་སྤྱད་པར་བྱ། བསོད་སྙོམས་བླང་བར་བྱ། ཆོས་བསྟན་པར་བྱའོ། །སྡོམ་ལ། ཡན་ལག་རྣམ་པ་མེ་ལོང་དང ། །གར་དང་གླུ་དང་རོལ་མོའི་སྒྲ། །སྐད་ཀྱི་གཏང་རག་གནང་བ་དང ། །ལྷུང་བཟེད་བཞི་དང་ལྷན་ཅིག་པའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན། དགེ་སློང་སྤོང་བ་ཞིག་གནས་པ་དེ་གང་གི་ཚེ་སྐྱིལ་མོ་ཀྲུང་བཅས་ཏེ་འདུག་གོ་ཅོག་ན་དེའི་ཚེ་དེའི་ཡན་ལག་གི་རྣམ་པ་ལས་སུ་རུང་བར་གྱུར་ཏོ། །དེ་དུས་གཞན་ཞིག་ན་བསོད་སྙོམས་རྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང ། ཆོས་གོས་མཁོས་སུ་ཕ་བ་སྟེ་རྐང་པ་གཉིས་བཀྲུས་ནས་ཤིང་ལྗོན་པ་ཞིག་གི་དྲུང་དུ་སྐྱིལ་མོ་ཀྲུང་བཅས་ཏེ་ཡིད་ལ་བྱེད་པ་ལ་ཞུགས་ཤིང་འདུག་པ་ན། ཡང་དེའི་ཡན་ལག་གི་རྣམ་པ་ལས་སུ་རུང་བར་གྱུར་ནས། དེས་དེ་ཇི་ལྟར་ཞི་བར་འགྱུར་བ་དེ་ལྟར་བྱས་སོ། །སེམས་ནི་མྱུར་དུ་འགྱུར་བ་ཡིན་པས། དེ་སེམས་ཡེངས་པ་ན། ཡང་དང་ཡང་དུ་ལས་སུ་རུང་བར་གྱུར་ནས་དེ་འདོད་ཆགས་ཀྱིས་ཀུན་ནས་དཀྲིས་པ་ན་ཞེ་སྡང་ཆེན་པོ་ཡང་སྐྱེས་ནས་དེས་དེ་རྡོ་བའི་སྟེང་དུ་བཞག་ནས་རྡོ་བ་གཞན་གྱིས་བརྡུངས་སོ། །དེ་སྡུག་བསྔལ་གྱི་ཚོར་བས་གདུངས་ནས་བསམ་པ། བདག་
Tha57b
སྡུག་བསྔལ་གྱི་ཚོར་བས་གདུངས་ན། བཅོམ་ལྡན་འདས་ཀྱིས་མི་དགོངས་པ་ལྟ་ཞིག་སྙམ་པ་དང ། དེ་ནས་བཅོམ་ལྡན་འདས་ཐུགས་རྗེ་ཆེན་པོའི་དབང་གིས་དེར་གཤེགས་ནས་བཀའ་སྩལ་པ། དགེ་སློང ། འདི་ཅིས་ཉེས། དེས་ཇི་ལྟར་གྱུར་པ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང ། ངས་འདོད་ཆགས་ཀྱི་གཉེན་པོ་ནི། མི་སྡུག་པ་བསྒོམ་པའོ། །ཞེས་མ་གསུངས་སམ། མི་གཏི་མུག་ཅན་བརྡུང་བར་བྱ་བ་ནི། གཞན་ཡིན་ན། ཁྱོད་ཀྱིས་ནི། གཞན་བརྡུངས་སོ། །དེ་ཅང་མི་སྨྲ་བར་འདུག་པ་དང ། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།ཁྱེད་ཀྱི་ཆོས་གཅིག་བསྒོམས་ན། ཕྱིར་མི་འོང་བར་འགྱུར་བ་ང་ཁས་འཆེ་སྟེ། དེ་ནི། འདི་ལྟ་སྟེ། ལུས་ལ་དམིགས་པའི་དྲན་པའོ། །དགེ་སློང་དག་།ཁྱེད་ཀྱིས་ལུས་ལ་དམིགས་པའི་དྲན་པ་སྒོམས་ཤིག་དང ། ཕྱིར་མི་འོང་བར་འགྱུར་བ་ང་ཁས་འཆེའོ། །དེ་ལྟ་བས་ན། དགེ་སློང་གིས་བརྡུང་བར་བྱ་བ་གཞན་ཡིན་ལ། གཞན་བརྡུང་བར་མི་བྱའོ། །བརྡུངས་ན། འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བ་དང ། དགའ་བ་དང ། དགའ་མགུར་སྤྱད་པས། དེའི་ཆུང་མ་ལ་སེམས་ཅན་ཞུགས་
Tha58a
༄#། །པར་གྱུར་ཏོ། །དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས། ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་བྱུང་ངོ ། །དེ་དུས་གཞན་ཞིག་ན་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་དེ་དུས་ཅུང་ཞིག་ལྗོངས་སུ་འདུག་ནས་ལྷུང་བཟེད་དང་ཆོས་གོས་ཐོགས་ཏེ་ལྗོངས་རྒྱུ་ཞིང་སོང་ངོ ། །དེ་ལྗོངས་རྒྱུ་ཞིང་འགྲོ་བ་ན་གདོང་ལ་ཕོལ་མིག་བྱུང་ནས་དེས་སྨན་པ་གཏར་ཀ་བྱེད་དུ་བཅུག་པ་དང ། གདོང་མི་སྡུག་པར་གྱུར་ནས་དེ་དུས་གཞན་ཞིག་ན་མཉན་ཡོད་དུ་སོང་བ་དང ། དགེ་སློང་ཞིག་གིས་མཇུག་ཏུ་མ་སྟེར་ཏོ། །དགེ་སློང་གཞན་ཞིག་གི་གན་དུ་སོང་ནས་སྨྲས་པ། བཙུན་པས་བདག་མི་མཁྱེན་ཏམ། དེས་སྨྲས་པ། བཞིན་བཟང ། མི་ཤེས་ན། ཁྱོད་གང་ཞིག་ཡིན། དེས་སྨྲས་པ། བདག་གི་མིང་ནི། འདི་ཞེས་བྱ། ཁྱིམ་བདག་ཆེ་གེ་མོ་ཞིག་གི་ནི། བུའོ། །རབ་ཏུ་ནི། དེར་བྱུང་ངོ ། །ཡུལ་དེ་ནས་ནི། འདིར་འོངས་སོ། །དེས་སྨྲས་པ། ཚེ་དང་ལྡན་པ་ཁྱོད། བཞིན་བཟང་ཞིང་མདོག་སྡུག་པ་ཡིན་ན། ཅིའི་ཕྱིར་ཁྱོད་ཀྱི་བཞིན་མི་སྡུག་པར་གྱུར། དེས་ཇི་ལྟར་གྱུར་པ་ཀུན་སྨྲས་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གི་གདོང་ནི། མེ་ལོང་དང་འདྲ་བ་ཡིན་པས། དེ་ལྟ་བས་ན། དགེ་སློང་གིས་གདོང་ལ་སྨན་པ་གཏར་ཀ་བྱེད་དུ་གཞུག་པར་མི་བྱའོ། །བྱེད་དུ་བཅུག་ན། འགལ་ཚབས་ཅན་དུ་འགྱུར་རོ། །
Tha58b
བཅོམ་ལྡན་འདས་ཀྱིས་དགེ་སློང་གི་གདོང་ལ་སྨན་པ་གཏར་ཀ་བྱེད་དུ་གཞུག་པར་མི་བྱའོ། །ཞེས་བཀའ་སྩལ་པ་དང ། དགེ་སློང་དག་ཁྲག་རྒྱས་ནས་གཏར་ཀ་གདབ་དགོས་པར་གྱུར་པ་ན། དགེ་སློང་དག་མི་འདེབས་ནས་བཅོམ་ལྡན་འདས་ཀྱིས་བཀའ་སྩལ་པ། གཏར་ཀ་གདབ་པར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་མཉན་ཡོད་ན་དགའ་འདུན་གཉིས་ཤིག་ཡོད་དེ། ཚོང་པའི་དགའ་འདུན་དང ། རུ་བའི་དགའ་འདུན་ནོ། །དེ་གཉིས་ལས། ཚོང་པའི་དགའ་འདུན་གྱིས་ནི། རུ་བའི་དགའ་འདུན་གར་དང ། གླུ་དང ། རོལ་མོའི་སྒྲ་དག་གིས་ཕམ་པར་བྱེད་དོ། །རུ་བའི་དགའ་འདུན་གྱིས་ནི། ཚོང་པའི་དགའ་འདུན་དགྲ་ཐབས་ཀྱིས་ཕམ་པར་བྱེད་དོ། །དེ་ནས་དུས་གཞན་ཞིག་ན་རུ་བའི་དགའ་འདུན་དག་གིས་སྨྲས་པ། ཤེས་ལྡན་དག་།འདི་དག་གིས་བདག་ཅག་གར་དང ། གླུ་དང ། རོལ་མོའི་སྒྲ་དག་གིས་ཕམ་པར་བྱས་ཤིང ། བདག་ཅག་གིས་ཀྱང་དེ་དག་དགྲ་ཐབས་ཀྱིས་ཕམ་པར་བྱས་ན། བདག་ཅག་གིས་ཀྱང་ཐབས་ཇི་ལྟ་བུ་ཞིག་གིས་དེ་དག་གར་དང ། གླུ་དང ། རོལ་མོའི་སྒྲ་དག་གིས་ཕམ་པར་བྱ། དེ་དག་ལས་ཁ་ཅིག་གིས་སྨྲས་པ། དེ་བཞིན་ཏེ། བདག་ཅག་གིས་ཀྱང་གར་དང ། གླུ་དང ། རོལ་མོའི་སྒྲ་དག་བསླབ་པར་བྱའོ། །ཁ་ཅིག་གིས་སྨྲས་པ། ལེགས་སོ། །སུ་ལས་བསླབ་པར་བྱ། དེ་རྣམས་ཀྱིས་སྨྲས་པ། འཕགས་
Tha59a
༄#། །པ་དྲུག་སྡེ་དག་གར་དང ། གླུ་དང ། རོལ་མོའི་སྒྲ་དག་ལ་མཁས་པས། དེ་དག་ལས་བསླབ་པར་བྱ་ན། དེ་དག་ནི་འདོད་པའི་བདག་ཉིད་ཅན་ཡིན་པས། གལ་ཏེ་ཅུང་ཟད་ཅིག་སློང་ན་ཡང་སྦྱིན་པར་བྱའོ། །དེ་རྣམས་ཀྱིས་སྨྲས་པ། ལེགས་སོ། །དེ་བཞིན་དུ་སྦྱིན་པར་བྱའོ། །དེ་རྣམས་དྲུག་སྡེ་དག་ག་ལ་བ་དེར་སོང་སྟེ་ཕྱིན་ནས་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་དག་།བདག་ཅག་ལ་གར་དང ། གླུ་དང ། རོལ་མོའི་སྒྲ་དག་བསླབ་ཏུ་གསོལ། དེ་དག་གིས་སྨྲས་པ། ཤེས་ལྡན་དག་།གལ་ཏེ་བཅའ་བའི་རིན་དག་ངེད་ལ་སྦྱིན་ན། བསླབ་པར་བྱའོ། །འཕགས་པ་དག་།བདག་ཅག་ལ་སྨན་ཡོན་བཏགས་ཀྱི། དབུལ་ལོ། །དེ་དག་གིས་དེ་རྣམས་གར་དང ། གླུ་དང ། རོལ་མོའི་སྒྲ་དག་བསླབ་བོ། །གང་གི་ཚེ་བྱང་བར་གྱུར་པའི་ཚེ་དེ་རྣམས་ཀྱིས་ཚོང་པའི་དགའ་འདུན་དག་དགྲ་ཐབས་ཀྱིས་ཀྱང་ཕམ་པར་བྱས་ཤིང་གར་དང ། གླུ་དང ། རོལ་མོའི་སྒྲ་དག་གིས་ཀྱང་ཕམ་པར་བྱས་པ་དང ། དེ་དག་གིས་སྨྲས་པ། བཞིན་བཟང་དག་།སྔོན་ནི། ཁྱེད་ཅག་གིས་ངེད་དགྲ་ཐབས་ཀྱིས་ཕམ་པར་བྱས་ཤིང ། ངེད་ཀྱིས་ཀྱང་གར་དང ། གླུ་དང ། རོལ་མོའི་སྒྲ་དག་གིས་ཁྱེད་ཕམ་པར་བྱས་ན། ད་ནི། ཁྱེད་ཀྱིས་ཁོ་བོ་ཅག་གཉི་གས་ཕམ་པར་བྱས་པའི་སྦྱོར་བ་གང་ཡིན། དེ་རྣམས་ཀྱིས་སྨྲས་པ། དེ་ཁོ་བོ་ཅག་གིས་བསླབ་པོ། །སུ་ལས་བསླབ། འཕགས་པ་དྲུག་སྡེ་དག་ལས་སོ། །
Tha59b
དེ་རྣམས་ཤཱཀྱའི་སྲས་ཀྱི་དགེ་སྦྱོང་དག་གི་དགེ་སྦྱོང་གི་ཚུལ་ནི། ཚིག་གོ་།བྲམ་ཟེའི་ཚུལ་ནི་ཚིག་སྟེ། འདི་ལྟར་གར་དང ། གླུ་དང ། རོལ་མོའི་སྒྲ་དག་ཀྱང་སློབ་པར་བྱེད་དོ། །ཞེས་སྨོད་པར་བྱེད། འཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་དགེ་སློང་དག་ལ་ཉེས་དམིགས་ཅུང་ཟད་གང་བྱུང་བ་ནི། གར་དང ། གླུ་དང ། རོལ་མོའི་སྒྲ་དག་སློབ་པ་ལས་གྱུར་པར་མཁྱེན་ནས་བཀའ་སྩལ་པ། དེ་ལྟ་བས་ན། དགེ་སློང་གིས་གར་དང ། གླུ་དང ། རོལ་མོའི་སྒྲ་དག་བསླབ་པར་མི་བྱའོ། །སློབ་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་གར་དང ། གླུ་དང ། རོལ་མོའི་སྒྲ་དག་བསླབ་པར་མི་བྱའོ། །ཞེས་བཀའ་སྩལ་པ་དང ། དགའ་འདུན་དེ་རྣམས་ཀྱིས་བརྗེད་ནས་དེ་རྣམས་ཡང་དྲུག་སྡེ་དག་གི་གན་དུ་དོང་སྟེ་སྨྲས་པ། འཕགས་པ་དག་།བདག་ཅག་གིས་དེ་བསྐྱུད་པར་གྱུར་ན། ཡང་བསླབ་ཏུ་གསོལ། དེ་དག་གིས་སྨྲས་པ། བཞིན་བཟང་དག་།བཅོམ་ལྡན་འདས་ཀྱིས་དགེ་སློང་གིས་གར་དང ། གླུ་དང ། རོལ་མོའི་སྒྲ་དག་བསླབ་པར་མི་བྱའོ། །ཞེས་བསླབ་པའི་གཞི་བཅའ་བ་མཛད་པས་མི་བསླབ་བོ། །འཕགས་པ་དག་།གལ་ཏེ་མི་བསླབ་ན། སྦྱང་བ་ཙམ་མཛད་ཅིང་གཤེགས་སུ་གསོལ། དེ་དག་གིས་སྨྲས་པ། བཞིན་བཟང་དག། འདོང་ངོ ། །དེ་དག་དེར་དོང་ནས་དེ་རྣམས་སྦྱངས་ཏེ་དེ་རྣམས་ཀྱིས་དེ་དག་ཕམ་པར་བྱས་པ་དང ། ཡང་དགེ་སྦྱོང་གི་ཚུལ་
Tha60a
༄#། །ནི། ཚིག་གོ་།བྲམ་ཟེའི་ཚུལ་ནི། ཚིག་གོ་།ཞེས་བྱ་བ་ནས་སྨོད་པར་བྱེད། འཕྱར་ཁ་གཏོང་བར་བྱེད། ཁ་ཟེར་བར་བྱེད་ཅེས་བྱ་བའི་བར་དུ་སྔ་མ་བཞིན་ནོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགེ་སློང་དག་ལ་ཉེས་དམིགས་ཅུང་ཟད་གང་བྱུང་བ་ནི། གར་དང ། གླུ་དང ། རོལ་མོའི་སྒྲ་དག་སྦྱོང་བར་བྱེད་པ་ལས་གྱུར་པར་མཁྱེན་ནས་བཀའ་སྩལ་པ། དེ་ལྟ་བས་ན། དགེ་སློང་གིས་གར་དང ། གླུ་དང ། རོལ་མོའི་སྒྲ་དག་སྦྱང་བར་མི་བྱའོ། །སྦྱོང་བར་བྱེད་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་གར་དང ། གླུ་དང ། རོལ་མོའི་སྒྲ་དག་སྦྱང་བར་མི་བྱའོ། །ཞེས་བཀའ་སྩལ་པ་དང ། དགའ་འདུན་རྣམས་ཀྱིས་ཡང་བརྗེད་ནས་དེ་རྣམས་ཡང་དྲུག་སྡེ་དག་གི་གན་དུ་དོང་སྟེ་དེ་བཞིན་དུ་སྨྲས་པ་དང ། དེ་དག་གིས་སྨྲས་པ། བཞིན་བཟང ། བཅོམ་ལྡན་འདས་ཀྱིས་བཀག་པས་མི་སྦྱང་ངོ ། །དེ་རྣམས་ཀྱིས་སྨྲས་པ། འཕགས་པ་དག་།ཁྱེད་གཤེགས་ཏེ་གཟིགས་པ་ཙམ་ཁོ་ནས་ཀྱང་བདག་ཅག་གིས་དེ་དག་ལ་ཕན་པར་འགྱུར་རོ། །གལ་ཏེ་དེ་ལྟ་ན། འདོང་ངོ ། །ཞེས་དེ་དག་དེར་དོང་བ་དང ། དགའ་འདུན་དེ་རྣམས་མཐོང་བ་ཙམ་ཉིད་ཀྱིས་བག་འཁུམས་པར་གྱུར་ནས་དེ་རྣམས་ཤཱཀྱའི་སྲས་ཀྱི་དགེ་སྦྱོང་དག་གི་དགེ་སྦྱོང་གི་ཚུལ་ནི། ཚིག་གོ་།བྲམ་ཟེའི་ཚུལ་ནི། ཚིག་སྟེ། འདི་ལྟར་གར་དང ། གླུ་དང །
Tha60b
རོལ་མོའི་སྒྲ་དག་བལྟ་བའི་ཕྱིར་ཡང་འགྲོའོ། །ཞེས་སྨོད་པར་བྱེད། འཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་དགེ་སློང་དག་ལ་ཉེས་དམིགས་ཅུང་ཟད་གང་བྱུང་བ་དེ་ནི། གར་དང ། གླུ་དང ། རོལ་མོའི་སྒྲ་དག་བལྟར་འགྲོ་བ་ལས་གྱུར་པར་མཁྱེན་ནས་བཀའ་སྩལ་པ། དེ་ལྟ་བས་ན། དགེ་སློང་གིས་གར་མི་བྱ། གླུ་བླང་བར་མི་བྱ། རོལ་མོའི་སྒྲ་མི་བྱའོ། །གར་དང ། གླུ་དང ། རོལ་མོའི་སྒྲ་དག་སྦྱང་བར་མི་བྱའོ། །དེ་དག་ལ་བལྟར་ཡང་འགྲོ་བར་མི་བྱའོ། །དེ་དགེ་སྦྱོང་གར་སློབ་བམ། གླུ་སློབ་བམ། རོལ་མོའི་སྒྲ་སློབ་བམ། གར་དང ། གླུ་དང ། རོལ་མོའི་སྒྲ་སྦྱོང་ངམ། དེ་དག་ལ་བལྟར་འགྲོ་ན། འགལ་ཚབས་ཅན་དུ་འགྱུར་རོ།། །།འདུལ་བ་ཕྲན་ཚེགས་ཀྱི་གཞི། བམ་པོ་བཞི་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཀོའུ་ཤམྦྷི་ན་ཁྱིམ་བདག་བཟང་ལྡན་ཞེས་བྱ་བ། དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཞིག་འདུག་པ་དེས། རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བ་དང ། དགའ་བ་དང ། དགའ་མགུར་སྤྱོད་པས། དུས་གཞན་ཞིག་ན་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །ཚེ་དང་ལྡན་པ་ཤཱ་རིའི་བུ་
Tha61a
༄#། །སེམས་ཅན་དེ་གདུལ་བ་ལ་ལྟོས་པས་དེའི་ཁྱིམ་དུ་སོང་སྟེ་ཁྱིམ་བདག་རང་བཞིན་བཟང་པོ་དེ་སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཞག་ནས་དུས་དུས་སུ་དེའི་གན་དུ་འགྲོའོ། །ཇི་ཙམ་དུས་གཞན་ཞིག་ན་ཚེ་དང་ལྡན་པ་ཤཱ་རིའི་བུ་ཕྱི་བཞིན་འབྲང་བའི་དགེ་སྦྱོང་མེད་པར་གཅིག་པུ་སོང་བ་དང ། ཁྱིམ་བདག་གིས་སྨྲས་པ། འཕགས་པ། ཅི།་ཁྱོད་ཕྱི་བཞིན་འབྲང་བའི་དགེ་སྦྱོང་མ་མཆིས་སམ། དེས་སྨྲས་པ། བཞིན་བཟང ། ཅི། ཁོ་བོའི་ཕྱི་བཞིན་འབྲང་བའི་དགེ་སྦྱོང་རྩཝ་ཀ་ཤའི་ཁྲོད་དང ། ཀུ་ཤའི་ཁྲོད་ནས་འོང་ངམ། ཁྱོད་ལྟ་བུ་ལས་འཐོབ་པར་འགྱུར་བ་གང་དག་ཡིན་པ་དེ་དག་ཁོ་བོའི་ཕྱི་བཞིན་འབྲང་བའི་དགེ་སྦྱོང་ཁོ་ནར་འགྱུར་རོ། །དེས་སྨྲས་པ། འཕགས་པ། གལ་ཏེ་དེ་ལྟ་ན། བདག་གི་མཆིས་བྲང་ལ་སེམས་ཅན་ཞུགས་པར་གྱུར་པ་དེ། གལ་ཏེ་ཁྱེའུར་བཙས་ན། དེ་འཕགས་པའི་ཕྱི་བཞིན་འབྲང་བའི་དགེ་སྦྱོང་དུ་དབུལ་ལོ། །བཞིན་བཟང ། ཁྱོད་ནད་མེད་པར་གྱུར་ཅིག་།ཁོ་བོས་དཀྲིའོ། ། ཞེས་སྨྲས་ནས་སོང་ངོ ། །ཇི་ཙམ་ན་ཁྱིམ་བདག་གི་ཆུང་མ་དེ་ཟླ་བ་དགུ་ཚང་སྟེ་བཙས་པ་ལས། ཁྱེའུ་མདོག་ངན་ཞིང་ལུས་ཆུང་ལ་སྐད་སྙན་པ་ཞིག་བྱུང་ངོ ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་རྩ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་པ་ན། ཉེ་དུ་དག་གིས་སྨྲས་པ། གང་གི་ཕྱིར་ཁྱེའུ་
Tha61b
འདི་མདོག་ངན་ཞིང་ལུས་ཆུང་ཡང ། ཁྱིམ་བདག་བཟང་ལྡན་གྱི་བུ་ཡིན་ཞིང་སྐད་སྙན་པ་དེའི་ཕྱིར་ཁྱེའུ་འདིའི་མིང་སྙན་པ་བཟང་ལྡན་ཞེས་བྱའོ། །ཞེས་དེའི་མིང་སྙན་པ་བཟང་ལྡན་ཞེས་བྱ་བར་བཏགས་སོ། །དེ་བསྲིངས་ཤིང་བསྐྱེད་ནས་ཆེན་པོར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུ་སྔ་དྲོ་ཤམ་ཐབས་བགོས། ལྷུང་བཟེད་དང ། ཆོས་གོས་ཐོགས་ཏེ་ཀོའུ་ཤམྦྷིར་བསོད་སྙོམས་ལ་ཞུགས་སོ། །ཀོའུ་ཤམྦྷི་ན་བསོད་སྙོམས་ལ་རྒྱུ་བའི་ཚེ་ཁྱིམ་བདག་བཟང་ལྡན་གྱི་ཁྱིམ་དུ་སོང་བ་དང ། ཁྱིམ་བདག་བཟང་ལྡན་གྱིས། འཕགས་པ་བྱོན་པ་ལེགས་སོ། །ཞེས་བྱ་བའི་ཚིག་ཀུན་ཏུ་སྤྱོད་པས་ཀུན་ཏུ་སྤྱད་ནས་རྐང་པ་གཉིས་ལ་ཕྱག་བྱས་སོ། །དེའི་ཆུང་མས་ཀྱང་བཅའ་བ་དང ། བཟའ་བ་གཙང་ཞིང་བསོད་པས་ལྷུང་བཟེད་བཀང་སྟེ་ཕུལ་ལོ། །ཁྱེའུ་དེ་ཚེ་དང་ལྡན་པ་ཤཱ་རིའི་བུའི་གདོང་དུ་རྟོགས་ནས་ཚེ་དང་ལྡན་པ་ཤཱ་རིའི་བུས་ཁྱིམ་བདག་བཟང་ལྡན་ལ་བརྡ་བྱས་པ་དང ། དེས་ཁྱེའུ་དེ་ལ་སྨྲས་པ། བུ། ཁྱོད་མ་བཙས་པ་ཉིད་ནས་ངས་འཕགས་པ་ཤཱ་རིའི་བུའི་ཞམ་འབྲིང་དུ་ཕུལ་གྱི། ཁྱོད་འཕགས་པ་དང་ལྷན་ཅིག་སོང་ཞིག་།སྲིད་པ་ཐ་མ་པའི་སེམས་ཅན་དེ། དེའི་ཕྱི་ན་འདུག་པའི་ཚེ་དེས་དེ་རབ་ཏུ་ཕྱུང་བསྙེན་པར་རྫོགས་པར་བྱས་ཏེ་དེ་ལ་ལུང་ཕོག་ནས་དེས་བརྩལ་བ་དང ། འབད་པ་དང ། སྒྲིམ་པར་བྱས་པས། འཁོར་བའི་འཁོར་ལོ་ཆ་ལྔ་པ་གཡོ་བ་དང ། མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང ། ལྟུང་བ་དང ། རྣམ་པར་འཐོར་
Tha62a
༄#། །བ་དང ། རྣམ་པར་འཇིག་པའི་ཆོས་ཉིད་ཀྱི་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བྱས་ཏེ་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙནྡན་ཞག་ལོན་པར་བཞག་པ་ལྟ་བུ།་རིག་པས་སྒོ་ངའི་སྦུབས་དྲལ་བར་གྱུར་ཅིང ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པར་ཐོབ་པ། སྲིད་པ་དང ། འདོད་པའི་རྙེད་པ་དང ། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང ། རྗེད་པར་བྱ་བ་དང ། གུས་པར་སྨྲ་བར་བྱ་བར་གྱུར་ཏེ། གང་གི་ཚེ་དེས་སྐད་ཀྱི་གཏང་རག་གིས་ཆོས་སྨྲས་པ་དེའི་ཚེ་ན། ཚངས་པའི་འཇིག་རྟེན་མན་ཆད་ཁྱབ་པར་གྱུར་ཅིང ། སེམས་ཅན་མང་པོ་དག་གི་རྒྱུད་ལ་ཡང་ཐར་པའི་ཆ་དང་མཐུན་པའི་དགེ་བའི་རྩ་བ་དག་སྐྱེད་པར་བྱེད་དེ། མདོར་ན་དུད་འགྲོའི་སྐྱེ་གནས་སུ་གཏོགས་པའི་སེམས་ཅན་དག་ཀྱང་སྒྲ་སྙན་པ་དེ་ལ་རྣ་བླགས་ཏེ་ཉན་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།ངའི་ཉན་ཐོས་ཀྱི་དགེ་སློང་སྐད་ཀྱི་གཏང་རག་སྙན་པ་རྣམས་ཀྱི་ནང་ན། འདི་ལྟ་སྟེ། དགེ་སློང་སྙན་པ་བཟང་ལྡན་འདི་མཆོག་ཡིན་ནོ། །དེའི་སྐད་ཀྱི་གཏང་རག་སྙན་པ་ཡིད་དུ་འོང་བའི་
Tha62b
སྦྱོར་བས་དགེ་སློང་འདོད་ཆགས་དང་མ་བྲལ་བ་རྣམས། རང་གི་བྱ་བ་བཏང་ནས་ཉིན་གཅིག་བཞིན་དེའི་གན་དུ་འགྲོ་བར་བྱེད་དོ། །ཇི་ཙམ་དུས་གཞན་ཞིག་ན། ཀོ་ས་ལའི་རྒྱལ་པོ་གསལ་རྒྱལ།་གླང་པོ་ཆེའི་གཙོ་བོ་པདྨ་དཀར་པོ་གཅིག་པ་ལ་ཞོན་ནས་ཁ་ལོ་བསྒྱུར་བ་དཔལ་འཕེལ་དང་ནམ་གྱི་ཐོ་རངས་རི་བྲག་ཅིག་ཏུ་སོང་བའི་ཚེ་ཚེ་དང་ལྡན་པ་སྙན་པ་བཟང་ལྡན་གྱིས་ནང་པར་སྐད་ཀྱི་གཏང་རག་གིས་ཆོས་སྨྲ་བར་བརྩམས་པ། གླང་པོ་ཆེའི་གཙོ་བོ་པདྨ་དཀར་པོ་གཅིག་པས་ཐོས་སོ། །དེས་ཚེ་དང་ལྡན་པ་སྙན་པ་བཟང་ལྡན་གྱི་སྐད་ཀྱི་གཏང་རག་ཐོས་ནས་ཀྱང་ཡང་རྣ་བ་བླགས་ཏེ་མི་གཡོ་བར་སྡོད་དོ། །ཁ་ལོ་བསྒྱུར་བ་དཔལ་འཕེལ་གྱིས། ཕན་ཚུན་ནས་ལག་པ་དང ། རྐང་པ་དག་གཡབས་ཏེ་བསྐྱོད་པར་བརྩམས་ཀྱང་དེ་བཞིན་མི་གཡོ་བ་དང ། རྒྱལ་པོས་སྨྲས་པ། དཔལ་འཕེལ།་གླང་པོ་ཆེ་ཐོབ་ཅིག་།ལྷ། བཏབ་ཀྱང་མི་མཆི་ན། འདི་རྒྱུ་གང་ལགས་མ་འཚལ་ཏོ། །རྒྱལ་པོས་སྨྲས་པ། ཞོག་ཅིག་དང་ལམ་གང་དུ་འགྲོ་བ་བལྟའོ། །དེས་ཅི་བདེར་བཞག་པ་དང ། དེ་རྒྱལ་བྱེད་ཀྱི་ཚལ་ལོགས་སུ་སོང་ནས་ཁད་ཀྱིས་རྒྱལ་བྱེད་ཀྱི་ཚལ་དུ་ཕྱིན་པ་དང་རྒྱལ་བྱེད་ཀྱི་ཚལ་གྱི་སྒོ་ན་རྣ་བླགས་ཏེ་སྡོད་དོ། །ཚེ་དང་ལྡན་པ་སྙན་པ་བཟང་ལྡན་གྱིས་སྐད་ཀྱི་གཏང་རག་གིས་ཆོས་དག་སྨྲས་པའི་མཇུག་ཏུ། འབྱུང་པོ་གང་དག་འདིར་ནི་ལྷགས་གྱུར་ཏེ། །ས་འམ་འོན་ཏེ་བར་སྣང་གནས་པ་དག་།སེམས་ཅན་རྣམས་ལ་རྟག་ཏུ་བྱམས་བྱེད་ཅིང ། །ཉིན་དང་མཚན་དུ་ཆོས་ཀྱང་
Tha63a
༄#། །སྤྱོད་པར་ཤོག་།ཅེས་ཡོངས་སུ་བསྔོ་བ་བྱས་པ་དང ། དེ་ནས་གླང་པོ་ཆེའི་གཙོ་བོ་པདྨ་དཀར་པོ་གཅིག་པས། ཚེ་དང་ལྡན་པ་སྙན་པ་བཟང་ལྡན་གྱིས་སྐད་ཀྱི་གཏང་རག་གིས་ཆོས་དག་སྨྲས་པའི་མཐར་ཕྱིན་པར་ཤེས་ནས་ཡིད་དང་མཐུན་པར་གང་དང་གང་དུ་བསྐྱོད་པ་དེ་དང་དེར་སོང་ངོ ། །རྒྱལ་པོས་སྨྲས་པ། དཔལ་འཕེལ། རྒྱུ་གང་གིས་འདི་གང་དང་གང་དུ་བསྐྱོད་པ་དེ་དང་དེར་འགྲོ་།དེས་སྨྲས་པ། ལྷ། མ་འཚལ་ཏེ། འཕགས་པ་ཞིག་གིས། སྐད་ཀྱི་གཏང་རག་གིས་ཆོས་སྨྲས་པའི་སྒྲ་གང་ལགས་པ་དེ་དག་ཐོས་ནས་གླང་པོ་ཆེ་འདིའི་ཡིད་འཕྲོག་སྟེ་དབང་མ་མཆིས་པར་གྱུར་ཏོ། །རྒྱལ་པོས་སྨྲས་པ། དཔལ་འཕེལ། གླང་པོ་ཆེ་ཕྱིར་ལྡོག་ཅིག་དང ། འཕགས་པ་དེ་བཙལ་ལ་ན་བཟའ་ཞིག་དབུལ་ཞིང ། སང་ནང་པར་རི་བྲག་ཏུ་འདོང་ངོ ། །ལྷ། དེ་བཞིན་འཚལ་ལོ། །དེ་ཕྱིར་ལོག་སྟེ་ཁྱིམ་དུ་སོང་བ་དང ། བཙུན་མོ་ཕྲེང་ལྡན་མས་དྲིས་པ། ལྷ། ཅིའི་སླད་དུ་སླར་གཤེགས། དེས་ཇི་ལྟར་གྱུར་པ་བརྗོད་ནས་འདི་སྐད་ཅེས་སྨྲས་སོ། །ཕྲེང་ལྡན་མ། ང་ལ་གོས་བྱིན་ཅིག་དང ། སོང་ལ་འཕགས་པ་དེ་ལ་དབུལ་ལོ། །དེས་བསམ་པ། འཕགས་པ་སྙན་པ་བཟང་ལྡན་གྱིས་སྐད་ཀྱིས་གཏང་རག་གིས་ཆོས་སྨྲས་པར་གྱུར་པ་ལྟ་ཞིག་ན། དེ་ནི། མདོག་ངན་ཞིང་ལུས་ཆུང་ལ། རྒྱལ་པོ་འདི་ནི། རྒྱ་ཆེན་པོ་ལ་མོས་པ་ཡིན་པས། འདིས་དེ་མཐོང་ན། གལ་ཏེ་མ་དད་པར་འགྱུར་བའི་གནས་ཡོད་པར་འགྱུར་སྲིད་
Tha63b
ཀྱི།་ཐབས་ཀྱི་རྣམ་པ་ཞིག་བྱའོ། །སྙམ་ནས་སྨྲས་པ། ལྷ་ནི། རི་བྲག་ཏུ་གཤེགས་ཤིག་།བདག་གིས་ནི། འཕགས་པ་དེ་ལ་ན་བཟའ་དབུལ་ལོ། །དེས་སྨྲས་པ། ཕྲེང་ལྡན་མ། ཁྱོད་ཀྱིས་ཀྱང་གོས་གཞན་ཕུལ་ཅིག་།ཅི། གོས་གཉིས་ཀྱིས་ཀོ་ས་ལའི་ཕོ་བྲང་དབུལ་པོར་འགྱུར་རམ། དེ་ཅང་མི་སྨྲ་བར་འདུག་པ་དང ། རྒྱལ་པོས་ཆེན་པོ་ལ་འོས་པའི་གོས་ཁྱེར་ནས་རྒྱལ་བྱེད་ཀྱི་ཚལ་དུ་སོང་ངོ། །དེའི་ཚེ་ན་ཚེ་དང་ལྡན་པ་ཀུན་དགའ་བོ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་ནས་རྒྱལ་པོ་གླང་པོ་ཆེ་ལས་བབས་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ། ད་ནང་སྐད་ཀྱི་གཏང་རག་གིས་ཆོས་སྨྲ་བའི་འཕགས་པ་དེ་གང་ལགས། དེས་སྨྲས་པ། རྒྱལ་པོ་ཆེན་པོ། དེ་ཅིར་འཚལ། འཕགས་པ་དེ་ལ་ན་བཟའ་དབུལ་ལོ། །དེས་བསམ་པ། ཚེ་དང་ལྡན་པ་སྙན་པ་བཟང་ལྡན་གྱིས་སྐད་ཀྱི་གཏང་རག་གིས་ཆོས་དག་ནི། སྨྲས་ན། དེ་ནི། མདོག་ངན་ཞིང་ལུས་ཆུང་ལ། རྒྱལ་པོ་འདི་ནི། རྒྱ་ཆེན་པོ་ལ་མོས་པ་ཡིན་པས། འདིས་དེ་མཐོང་ན། གལ་ཏེ་མ་དད་པར་འགྱུར་བའི་གནས་ཡོད་པར་འགྱུར་སྲིད་ཀྱི། ཐབས་ཀྱི་རྣམ་པ་ཞིག་བྱའོ། །སྙམ་ནས་སྨྲས་པ། རྒྱལ་པོ་ཆེན་པོ། བདག་ལ་སྩོལ་ཅིག་དང ། བདག་གིས་དེ་ལ་དབུལ་བར་བགྱིའོ། །རྒྱལ་པོས་སྨྲས་པ། བཅོམ་ལྡན་འདས་ཀྱིས་རང་གི་ལག་ནས་དབུལ་བ་བསྔགས་པས། རང་གི་ལག་ཉིད་ནས་དབུལ་གྱི། དེ་སྟོན་ཅིག་།དེའི་ཚེ། ཚེ་དང་ལྡན་པ་སྙན་པ་བཟང་ལྡན་ཉིན་མོ་སྤྱོད་པའི་ཕྱིར་ཤིང་
Tha64a
༄#། །ལྗོན་པ་ཞིག་གི་དྲུང་ན་ཉེ་བར་བརྟེན་ཅིང་འདུག་གོ་།དེ་ནས་ཚེ་དང་ལྡན་པ་ཀུན་དགའ་བོས་སྨྲས་པ། རྒྱལ་པོ་ཆེན་པོ། དེ་ནི། ཤིང་ལྗོན་པ་ཞིག་གི་དྲུང་ན་ཉེ་བར་བརྟེན་ཅིང་མཆིས་ཀྱི། བཞུད་ཅིག་།དེ་དེའི་གན་དུ་སོང་སྟེ་བལྟས་པ་དང ། རེ་ཞིག་ན། དེ་ཤིན་ཏུ་མི་སྡུག་པ་མཐོང་བ་དང ། དེ་མ་དད་པ་སྐྱེས་ནས་མི་དགའ་སྟེ། བཞིན་ཕྱིར་ཕྱོགས་ནས་གོས་འཕངས་ཏེ་ཕྱིར་སོང་ངོ ། །ཚེ་དང་ལྡན་པ་སྙན་པ་བཟང་ལྡན་གྱིས་དེའི་ཚེ་ཚིགས་སུ་བཅད་པ་དག་སྨྲས་པ། གང་དག་ང་ཡི་གཟུགས་ལ་རྟོག་།སྒྲ་ལའང་རྗེས་སུ་འབྲང་བྱེད་པ། །འདོད་པའི་དབང་དུ་གྱུར་པ་ཡིན། །སྐྱེ་བོ་དེ་དག་ང་མི་མཐོང ། །གལ་ཏེ་ནང་ནི་ཤེས་གྱུར་ཅིང ། །ཕྱི་རོལ་དག་ལ་མི་ལྟ་བ། །ནང་གི་འབྲས་བུ་མཐོང་བ་གང ། །དེ་གཉིས་སྒྲ་ཡིས་ཁྲིད་པར་འགྱུར། །གལ་ཏེ་ནང་ནི་མི་ཤེས་ཤིང ། །ཕྱི་རོལ་རྣམ་པར་མཐོང་གྱུར་པ། །ཕྱི་རོལ་འབྲས་བུ་མཐོང་བ་གང ། །དེ་ཡང་སྒྲ་ཡིས་ཁྲིད་པར་འགྱུར། །གལ་ཏེ་ནང་ཡང་མི་ཤེས་ཤིང ། །ཕྱི་རོལ་དག་ཀྱང་མ་མཐོང་བ། །ཀུན་ཏུ་རྨོངས་པའི་བྱིས་པ་དག་།དེ་ཡང་སྒྲ་ཡིས་ཁྲིད་པར་འགྱུར། །གལ་ཏེ་ནང་ཡང་རབ་ཤེས་ཤིང ། །ཕྱི་རོལ་དག་ཀྱང་མཐོང་བ་ཡི། །བརྟན་པོ་ཤེས་རབ་ཕྱོགས་པ་དེ། །སྒྲ་ཡིས་ཁྲིད་པར་མི་འགྱུར་རོ། །དེའི་ཚེ་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། ཚེ་དང་ལྡན་པ་སྙན་པ་བཟང་ལྡན་གྱིས་
Tha64b
ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས། མདོག་ངན་ཞིང་ལུས་ཆུང་ལ་སྐད་སྙན་པར་གྱུར། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།རིགས་ཀྱི་བུ་སྙན་པ་བཟང་ལྡན་ཉིད་ཀྱི། ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པ། སྙན་པ་བཟང་ལྡན་ཉིད་ཀྱིས་ལས་བྱས་ཤིང་བསགས་པ་དག་།གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་།ལས་བྱས་ཤིང་བསགས་པ་དག་ནི། ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར། ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི། ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་།སྔོན་བྱུང་བ་འདས་པའི་དུས་ན་བསྐལ་པ་བཟང་པོ་འདི་ཉིད་ལ་སྐྱེ་རྒུའི་ཚེ་ལོ་བཞི་ཁྲི་ཐུབ་པ་ན། སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཁོར་བ་
Tha65a
༄#། །འཇིག་།འཇིག་རྟེན་དུ་བྱུང་སྟེ། དེས་སངས་རྒྱས་ཀྱི་མཛད་པ་མཐའ་དག་མཛད་ནས་བུད་ཤིང་ཟད་པའི་མེ་བཞིན་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །རྒྱལ་པོ་མཛེས་ལྡན་གྱིས་དེའི་སྐུ་ལ་མཆོད་པ་དག་བྱས་ནས་མཆོད་རྟེན་འཁོར་ཡུག་ཏུ་དཔག་ཚད་རེ་རེ་ཡོད་པ། གནམ་འཕང་དུ་དཔག་ཚད་ཕྱེད་དང་གཉིས་པ་ཞིག་བྱེད་དུ་གཞུག་པར་བརྩམས་ནས་དེའི་ལག་གི་གླ་མི་དད་པ་དང་ལྡན་ཞིང་བཟང་ལ། དགེ་བའི་བསམ་པ་ཅན། ལས་བྱེད་པ་ལ་བརྩོན་པ་ཞིག་བསྐོས་སོ། །དེ་ན་ཡང་གླ་མི་གཞན་ཞིག་ཡོད་པ་དེས་མཆོད་རྟེན་ཧ་ཅང་ཆེན་པོ་རྩོམ་པ་དེ་མཐོང་ནས་ལྟ་ཞིང་ཤེས་ལྡན་དག་།རྒྱལ་པོ་འདིས་འདི་ལྟ་བུའི་མཆོད་རྟེན་ཆེན་པོ་བྱེད་དུ་གཞུག་པར་བརྩམས་པ།་ནམ་ཙམ་ཟིན་པར་འགྱུར་མ་ཤེས་སོ། །ཞེས་འཕྱ་བར་བརྩམས་པ་དང ། དེ་ལ་ལག་གི་གླས་སྨྲས་པ། ཀཝའི་ནང་རྗེ། ཅིའི་ཕྱིར་འཕྱ་བར་བྱེད། གལ་ཏེ་མི་ནུས་ན། ལས་བྱ་བ་ཐོང་ཞིག་།དེ་ཅང་མི་སྨྲ་བར་འདུག་པ་དང ། ལག་གི་གླ་དེས་དེ་ཕྱིར་དབྱུང་བར་བརྩམས་སོ། །དེས་དེ་ལ་བཟོད་པ་གསོལ་ནས་ཡང་ལས་བྱ་བར་བརྩམས་པ་ན། མཆོད་རྟེན་དེ་མ་ཟིན་ནས་དེས་ཡང་འཕྱ་བར་བརྩམས་པ་དང ། ལག་གི་གླ་དེས་དེ་ཕྱིར་ཕྱུང་ངོ ། །ཡང་ཤིན་ཏུ་འབད་དེ་བཟོད་པ་གསོལ་ནས་ལས་བྱ་བར་བརྩམས་པ་དང ། ཇི་ཙམ་ན་མཆོད་རྟེན་བལྟ་བས་མི་ངོམས་
Tha65b
པ།་སྲོག་ཆགས་འབུམ་ཕྲག་མང་པོ་དག་གི་མིག་དང ། ཡིད་འཕྲོག་པར་བྱེད་པ་ཞིག་ཟིན་པར་གྱུར་ཏོ། །དེ་ནས་གླ་མི་དེས་དེ་མཐོང་ནས་འདི་ལྟར་ལས་བྱེད་པ་ན། བདག་གི་འདི་ལ་དཔྱས་པ་ནི། མ་ལེགས་པ་ཞིག་བྱས་སོ་།ཞེས་འགྱོད་པ་སྐྱེས་ནས་འདི་ལ་རྣམ་པ་ཐམས་ཅད་དུ་མཆོད་པ་བྱའོ། །ཞེས་དེས་དེའི་གླ་རྔན་ཅི་ཐོབ་པ་དེ་ལས་གསེར་གྱི་དྲིལ་བུ་བྱེད་དུ་བཅུག་ནས་སེམས་མངོན་པར་དད་པས་མཆོད་རྟེན་དེ་ལ་བཏགས་སོ། །དགེ་སློང་དག་།དེའི་ཚེ་དེའི་དུས་ན་གླ་མི་གང་ཡིན་པ་དེ་ནི། དགེ་སློང་སྙན་པ་བཟང་ལྡན་འདི་ཉིད་ཡིན་ཏེ། དེས་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་མཆོད་རྟེན་གྱི་ལས་བྱེད་པ་ན། དཔྱས་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ནི། མདོག་ངན་ཞིང་ལུས་ཆུང་བར་སྐྱེས་སོ། །ཡང་དད་པ་སྐྱེས་ནས་གསེར་གྱི་དྲིལ་བུ་བྱེད་དུ་བཅུག་ནས་མཆོད་རྟེན་ལ་བཏགས་པའི་ལས་ཀྱི་རྣམ་པར་སྨིན་པ་གང་ཡིན་པ་དེས་ནི། སྐད་སྙན་པར་གྱུར་ཏོ། །དེ་ནས་ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། ཚེ་དང་ལྡན་པ་སྙན་པ་བཟང་ལྡན་གྱིས་ལས་ཅི་ཞིག་བགྱིས་ན། དེས་ཚངས་པའི་འཇིག་རྟེན་མན་ཆད་སྒྲས་ཁྱབ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།རིགས་ཀྱི་བུ་སྙན་པ་བཟང་ལྡན་ཉིད་ཀྱིས་ལས་ཚོགས་རྙེད་པ་ཞེས་བྱ་བ་ནས། འབྲས་བུ་དག་ཏུ་འགྱུར་བ་ཉིད། །ཅེས་བྱ་བའི་
Tha66a
༄#། །བར་དུ་སྔ་མ་བཞིན་ནོ། །དགེ་སློང་དག་།སྔོན་བྱུང་བ་འདས་པའི་དུས་ན་བསྐལ་པ་བཟང་པོ་འདི་ཉིད་ལ་སྐྱེ་རྒུའི་ཚེ་ལོ་ཉི་ཁྲི་ཐུབ་པ་ན། སྟེན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་ཝཱ་ར་ཎཱ་སི་ན་དྲང་སྲོང་སྨྲ་བ་རི་དྭགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །ཝཱ་ར་ཎཱ་སི་དང ། དྲང་སྲོང་སྨྲ་བའི་བར་ན་ཨ་མྲའི་ཤིང་ལྗོན་པ་ཞིག་ཡོད་པ་དེ་ལ། བྱ་ཀོ་ཀི་ལ་ཕོ་ཞིག་གནས་པ་དེས་གང་གི་ཚེ་སངས་རྒྱས་བཅོམ་ལྡན་འདས་འོད་སྲུང་ཝཱ་ར་ཎཱ་སིར་བསོད་སྙོམས་ལ་གཤེགས་པ་དེའི་ཚེ། དེ་ལ་ཤིན་ཏུ་རྟོག་ཅིང་སྒྲ་སྙན་པ་ཁྱད་པར་ཅན་ཕྱུང་ནས་དེ་བཞིན་ཡང་དང་ཡང་དུ་བལྟས་པས་སེམས་ཚིམ་པར་གྱུར་ནས་དད་པ་སྐྱེས་སོ། །དེས་དུས་གཞན་ཞིག་ན་སྐད་འབྱིན་ཅིང་ཡང་དག་པར་རྫོགས་པའི་སངས་རྒྱས་འོད་སྲུང་ལ་ལན་གསུམ་བསྐོར་བ་བྱས་ནས་དགའ་བ་དང ། བདེ་བ་སྐྱེས་ཏེ། ཨ་མྲའི་ཤིང་ལྗོན་པ་དེ་ཉིད་ལ་འདུག་གོ་།འདུག་མ་ཐག་ཏུ་བྱ་ཁྲ་ཞིག་གིས་སྲོག་དང་ཕྲལ་ཏེ་འཆི་བའི་དུས་བྱས་ནས་ལས་དྲུག་ལ་མཁས་པའི་བྲམ་ཟེ་ཞིག་ཏུ་སྐྱེས་སོ། །དགེ་སློང་དག་།དེའི་ཚེ་དེའི་དུས་ན། བྱ་ཀོ་ཀི་ལ་གང་ཡིན་པ་དེ་ནི། དགེ་སློང་སྙན་པ་བཟང་ལྡན་འདི་ཉིད་ཡིན་ཏེ། དེས་ཡང་
Tha66b
དག་པར་རྫོགས་པའི་སངས་རྒྱས་འོད་སྲུང་ལ་སྒྲ་སྙན་པ་ཕྱུང་སྟེ་བསྐོར་བ་བྱས་པ་དེའི་ལས་ཀྱི་རྣམ་པར་སྨིན་པས། ཚངས་པའི་འཇིག་རྟེན་མན་ཆད་སྒྲས་ཁྱབ་པར་གྱུར་ཏོ། །དེ་ནས་ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། ཚེ་དང་ལྡན་པ་སྙན་པ་བཟང་ལྡན་གྱིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས།་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བགྱིས་ཏེ་བཅོམ་ལྡན་འདས་ཀྱིས་སྐད་ཀྱི་གཏང་རག་སྙན་པོ་རྣམས་ཀྱི་མཆོག་ཏུ་བསྟན། བཅོམ་ལྡན་འདས་ཀྱིས་བཀའ་སྩལ་པ། དེ་ནི། སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅན། ཡང་དག་པར་རྫོགས་པའི་སངས་རྒྱས་འོད་སྲུང་དེ་ཉིད་ཀྱི་གསུང་རབ་ལ་དགེ་སློང་ཞིག་རབ་ཏུ་བྱུང་བར་གྱུར་པ་དེ། བཅོམ་ལྡན་འདས་འོད་སྲུང་གིས་སྐད་ཀྱི་གཏང་རག་སྙན་པ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཀྱང་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན། ཡོན་ཏན་གྱི་ཚོགས་འགའ་ཡང་མ་ཐོབ་ནས་དེའི་འོག་འཆི་བའི་ཚེ་འདི་སྐད་ཅེས། བདག་གིས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན། ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གི་དགེ་བའི་རྩ་བ་འདིས། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་
Tha67a
༄#། །བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་རྒུའི་ཚེ་ལོ་བརྒྱ་ཐུབ་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་སྟེ། ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱེད་ཅིང ། ཇི་ལྟར་མཁན་པོ་འདི་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གིས་སྐད་ཀྱི་གཏང་རག་སྙན་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ་བདག་ཀྱང་བཅོམ་ལྡན་འདས་དེས་སྐད་ཀྱི་གཏང་རག་སྙན་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་བཏབ་པས་སྨོན་ལམ་དེའི་དབང་གིས། ད་ལྟར་ངའི་བསྟན་པ་ལ་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་སུམ་དུ་བྱས་ཏེ། ངས་དགེ་སློང་སྐད་ཀྱི་གཏང་རག་སྙན་པ་རྣམས་ཀྱི་མཆོག་ཏུ་བསྟན་ཏེ། །དགེ་སློང་དག་།དེ་ལྟ་བས་ན། ལས་གཅིག་ཏུ་ནག་པ་རྣམས་ཀྱི་རྣམ་པར་སྨིན་པ་ནི། ནག་པ་ཞེས་བྱ་བ་ནས་དགེ་སློང་དག་ཁྱེད་ཀྱིས་ད་ལྟར་བསླབ་པར་བྱའོ། །ཞེས་བྱ་བའི་བར་དུ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཇི་ཙམ་ན་དགེ་སློང་དག་ཆོས་འདོན་པ་ཉིད་ན་རྒྱ་ཤུག་གི་འབྲས་བུའི་ཚོགས་གཏོར་བ་བཞིན་འདོན་ལ། མུ་སྟེགས་
Tha67b
ཅན་རྣམས་ནི། སྐད་ཀྱི་གཏང་རག་གིས་གཞུང་འདོན་ཏོ། །ཁྱིམ་བདག་མགོན་མེད་ཟས་སྦྱིན་གྱི་ཀུན་ཏུ་སྤྱོད་པ་ནི། ནང་པར་སྔར་ལངས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འགྲོའོ་དེས་མུ་སྟེགས་ཅན་རྣམས་སྐད་ཀྱི་གཏང་རག་གིས་གཞུང་འདོན་པ་ཐོས་ནས། དེས་བསམ་པ། མུ་སྟེགས་ཅན་རྣམས་ཀྱིས་ཆོས་འདུལ་བ་ནི། ཉེས་པར་སྨྲས་པ་ཡིན་ཡང ། འདི་སྐད་ཀྱི་གཏང་རག་གིས་གཞུང་འདོན་ལ། བདག་གི་འཕགས་པ་རྣམས་ནི། གཞུང་འདོན་པ་ཉིད་ན་རྒྱ་ཤུག་གི་འབྲས་བུའི་ཚོགས་གཏོར་བ་བཞིན་འདོན་པས། འདི་ཉིད་བདག་གི་བྱ་བ་ཡིན་ནོ། །སྙམ་ནས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། འདི་ལྟར་རེ་ཞིག་མུ་སྟེགས་ཅན་རྣམས་ཀྱི་ཆོས་འདུལ་བ་ནི། ཉེས་པར་སྨྲས་པ་ལགས་ཀྱང ། དེ་དག་སྐད་ཀྱི་གཏང་རག་གིས་གཞུང་འདོན་པར་བགྱིད་ལ། འཕགས་པ་རྣམས་ནི། གཞུང་འདོན་པ་ཉིད་ན་རྒྱ་ཤུག་གི་འབྲས་བུའི་ཚོགས་གཏོར་བ་བཞིན་འདོན་པས། དེ་ལ་གལ་ཏེ་བཅོམ་ལྡན་འདས་ཀྱིས་འཕགས་པ་རྣམས་ཀྱང་སྐད་ཀྱི་གཏང་རག་གིས་གཞུང་འདོན་པར་གནང་ན་ལེགས་སོ། །བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་ཅང་མི་གསུང་བས་གནང་ངོ ། །
Tha68a
༄#། །ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།དེ་ལྟ་བས་ན། ཁྱེད་ཀྱིས་སྐད་ཀྱི་གཏང་རག་གིས་ཆོས་འདོན་པར་གནང་ངོ ། །བཅོམ་ལྡན་འདས་ཀྱིས་སྐད་ཀྱི་གཏང་རག་གིས་ཆོས་འདོན་པར་བྱའོ། །ཞེས་བཀའ་སྩལ་པ་དང ། དགེ་སློང་རྣམས་སྐད་ཀྱི་གཏང་རག་གིས་ལུང་འབོག་པར་བྱེད། འདོན་པར་བྱེད། ཁ་ཏོན་བྱེད། ཡོངས་སུ་འདྲི་བར་བྱེད་དོ། །ཇི་ཙམ་ན་ཁྱིམ་བདག་མགོན་མེད་ཟས་སྦྱིན་རྒྱལ་བྱེད་ཀྱི་ཚལ་དུ་སོང་བ་ན་དས་ཐོས་ནས་སྨྲས་པ། འཕགས་པ་དག། ཅི།་ཁྱེད་ཀྱི་གཙུག་ལག་ཁང་འདིར་རོལ་མོ་མཁན་གྱི་བྲང་བཏབ་བམ། སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ།་དགེ་སློང་གིས་སྐད་ཀྱི་གཏང་རག་གིས་ལུང་འབོག་པར་མི་བྱ། གདོན་པར་མི་བྱ། ཁ་ཏོན་མི་བྱ། ཡོངས་སུ་དྲི་བར་མི་བྱའོ། །འདི་ལྟར། སྟོན་པའི་ཡོན་ཏན་ཡང་དག་པར་བསྒྲག་པ་དང ། རྒྱུད་ཆགས་གསུམ་པ་གདོན་པ་དག་ནི། སྐད་ཀྱི་གཏང་རག་གིས་གདོན་པར་བྱའོ། །བཅོམ་ལྡན་འདས་ཀྱིས་སྐད་ཀྱི་གཏང་རག་གིས་དེ་དག་གདོན་པར་བྱའོ། །ཞེས་བཀའ་
Tha68b
སྩལ་པ་དང ། གཞོན་ནུ་ཞིག་སྐད་ཀྱི་གཏང་རག་མི་ཤེས་ནས་དེས་གཞུང་དག་བཏོན་པ་ཉིད་ན། རྒྱ་ཤུག་གི་འབྲས་བུའི་ཚོགས་གཏོར་བ་བཞིན་བཏོན་པར་གྱུར་ནས་དགེ་སློང་དག་གིས་སྨྲས་པ། ཚེ་དང་ལྡན་པ། བཅོམ་ལྡན་འདས་ཀྱི་སྐད་ཀྱིས་གཏང་རག་གནང་གི། སྐད་ཀྱི་གཏང་རག་གིས་ཐོན་ཅིག་།དེས་སྨྲས་པ། ཚེ་དང་ལྡན་པ་དག་།བདག་གིས་སྐད་ཀྱི་གཏང་རག་མི་ཤེས་སོ། ། སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། སྐད་ཀྱི་གཏང་རག་བསླབ་པར་བྱའོ། །བཅོམ་ལྡན་འདས་ཀྱིས་སྐད་ཀྱི་གཏང་རག་བསླབ་པར་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ཁྱམས་དང ། གནས་ཁང་དང ། སྒོ་ཁང་དག་ན་སྐད་ཀྱི་གཏང་རག་སློབ་པར་བྱེད་པ་ན། ཁྱིམ་བདག་མགོན་མེད་ཟས་སྦྱིན་གཙུག་ལག་ཁང་དུ་འོངས་པ་དང ། དེས་ཐོས་ནས་སྨྲས་པ། འཕགས་པ་དག་།གཙུག་ལག་ཁང་འདི་རོལ་མོ་མཁན་གྱི་བྲང་མ་ལགས་ན། ཁྱེད་ཀྱི་ད་དུང་ཡང་རོལ་མོ་མཁན་དག་མ་གཏང་ངམ། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དབེན་པའི་ཕྱོགས་སུ་སྐད་ཀྱི་གཏང་རག་དག་བསླབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་ཞིག་འགྲེང་སྟེ་ལྷུང་བཟེད་ཀྱི་སྣོད་ནས་ལྷུང་བཟེད་འབྱིན་པ་དང ། དགེ་སློང་དག་གིས་དེ་
Tha69a
༄#། །ལ་སྨྲས་པ། ཚེ་དང་ལྡན་པ། འགྲེང་སྟེ་ལྷུང་བཟེད་མ་འབྱིན་ཅིག་།དེས་སྨྲས་པ། ཅི་ཉེས། དེ་དག་གིས་སྨྲས་པ། ལྷུང་སྟེ་ཆག་པར་འགྱུར་མོད། གཞན་ཅི་ཉེས་པར་འགྱུར། དེ་ཅང་མི་སྨྲ་བར་འདུག་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་འགྲེང་སྟེ་ལྷུང་བཟེད་དབྱུང་བར་མི་བྱའོ། །དེ་བཞིན་དུ་གཞུག་པ་དང ། བཀྲུ་བ་དང ། བསྐམ་པ་དག་ལ་ཡང་རྒྱ་ཆེར་སྦྱར་བར་བྱའོ། །སྡོམ་ལ། ལམ་ཕྲན་དང་ནི་སྣོད་གསུམ་དང ། །ཕྱིང་བ་དྲ་བར་མི་བྱ་དང ། ། གདིང་བ་དང་ནི་མི་འབྲལ་བ། །དྲང་སྲོང་ཆེན་པོས་རྗེས་སུ་གནང ། །སངས་རྒྱས་བཅོམ་ལྡན་འདས་ངན་སྤོང་གི་ཕུ་དག་ན་ཆུ་སྲིན་བྱིས་པ་གསོད་ཀྱི་རི་ལ་འཇིགས་རུང་གི་ནགས་རི་དྭགས་ཀྱི་གནས་ན་བཞུགས་སོ། །གང་གི་ཚེ་རྒྱལ་བུ་གཞོན་ནུ་རྟོགས་ལྡན་གྱི་ཁང་བཟང་པདྨ་ཅན་ཚོན་བརྒྱ་རྩ་གཅིག་གིས་བྲིས་པ་བྱེད་དུ་བཅུག་ཅིང་རས་གསར་པ་ཁ་ཚར་རིང་པོ་ཅན་དག་གིས་འཆལ་བར་བཏིང་སྟེ། བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་གདུགས་ཚོད་ལ་སྤྱན་དྲངས་པའི་ཚེ་བཅོམ་ལྡན་འདས་ཁང་བཟང་པདྨ་ཅན་དུ་གཤེགས་བཞེད་པ་ན། མ་གཤེགས་པ་དང ། རྒྱལ་བུ་གཞོན་ནུ་རྟོགས་ལྡན་གྱིས་སྨྲས་པ། བཅོམ་ལྡན་འདས། གཤེགས་སུ་གསོལ། འོན་ཀྱང་བཅོམ་ལྡན་འདས་མ་གཤེགས་པ་དང ། རྒྱལ་བུ་གཞོན་ནུ་རྟོགས་ལྡན་གྱིས་རས་
Tha69b
རྣམས་བསྡུས་པ། མུ་སྟེགས་ཅན་རྣམས་ཀྱིས་ཐོས་ནས་དེ་རྣམས་ཀྱིས་སྨྲས་པ། ཤེས་ལྡན་དག་།དགེ་སྦྱོང་གོའུ་ཏ་མ་ནི། བཀུར་སྟི་དེ་ལྟ་བཱི་གནས་མ་ཡིན་ནོ། །ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།གལ་ཏེ་བྲམ་ཟེ་དང ། ཁྱིམ་བདག་དད་པ་ཅན་དག་གིས་ལམ་ཕྲན་དག་ཏུ་ཡང་རས་གསར་པ། ཁ་ཚར་རིང་པོ་ཅན་དག་བཏིང་ཞིང ། འཕགས་པ་དག་།བདག་ཅག་ལ་ཐུགས་བརྩེ་བའི་སླད་དུ་གཤེགས་སུ་གསོལ་ཞེས་ཟེར་ན། མུ་སྟེགས་ཅན་རྣམས་ཟིལ་གྱིས་མནན་པའི་ཕྱིར་མི་རྟག་པ་ཡིད་ལ་བྱ་བས་ཟིལ་གྱིས་མནན་ཅིང་འདོང་བར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་ངན་སྤོང་གི་ཕུ་དག་ན་ཆུ་སྲིན་བྱིས་པ་གསོད་ཀྱི་རི་ལ་འཇིགས་རུང་གི་ནགས་རི་དྭགས་ཀྱི་གནས་ན་བཞུགས་སོ། །དགེ་སློང་ཞིག་ལྷུང་བཟེད་ལག་ན་ཐོགས་ཏེ་སོང་བ་དང ། དེ་ཕྱོགས་གཞན་ཞིག་ཏུ་བསྒྱེལ་ནས་ལྷུང་བཟེད་དེ་ས་ལ་ལྷུང་སྟེ་ཆག་ནས་དེའི་བར་ཆད་དུ་གྱུར་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་ལྷུང་བཟེད་ལག་ན་བཀུར་བར་མི་བྱ་བར་ལྷུང་བཟེད་ཀྱི་སྣོད་དུ་བཅུག་སྟེ་བཀུར་བར་བྱའོ། །བཅོམ་ལྡན་འདས་ཀྱིས་དགེ་སློང་གིས་ལྷུང་བཟེད་ལག་ན་བཀུར་བར་མི་བྱ་བར་ལྷུང་བཟེད་ཀྱི་སྣོད་དུ་བཅུག་སྟེ་བཀུར་བར་
Tha70a
༄#། །བྱའོ། །ཞེས་བཀའ་སྩལ་པ་དང ། དགེ་སློང་རྣམས་ལྷུང་བཟེད་ཀྱི་སྣོད་དུ་བཅུག་སྟེ་ལག་པ་ཉིད་ན་ཁྱེར་ཏེ་འདོང་བ་ན་ཉེས་དམིགས་དེ་ཉིད་དུ་གྱུར་པའི་སྐབས་དེ། དགེ་སློང་རྣམས་ཀྱི་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་ཀྱི་སྣོད་ལག་ན་བཀུར་བར་མི་བྱ་བར་ལུང་ཐག་བཏགས་ཏེ་མཆན་ཁུང་གིས་བཀུར་བར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་རྣམས་དོན་མཐུན་དག་དང་ལྷན་ཅིག་ལྗོངས་རྒྱུ་ཞིང་འདོང་ངོ ། །ཇི་ཙམ་ན་བྲམ་ཟེ་ཞིག་ན་ནས་དེ་སྨན་པའི་གན་དུ་སོང་སྟེ་སྨྲས་པ། ཀྱེ་བདག་ཉིད་ཆེན་པོ། ཁོ་བོའི་ནད་ཀྱི་རྣམ་པ་འདི་ལྟ་བུའི་སྨན་སྟོན་ཅིག་།དེས་སྨྲས་པ། ཇོ་བོ། ཨ་རུ་ར་གསོལ་དང་སྙུན་གདངས་པར་འགྱུར་རོ། །དེས་སྨྲས་པ། ལམ་ག་འདི་ན་ཨ་རུ་ར་ག་ལ་ཡོད། དེས་སྨྲས་པ། བྲམ་ཟེ། ཤཱཀྱའི་སྲས་ཀྱི་དགེ་སྦྱོང་འདི་དག་ནི།་མཁས་པ་ལགས་པས། འདི་དག་ལ་ཁྱོད་ཀྱིས་བསླངས་ན། འདི་དག་ལ་མཆིས་པར་འགྱུར་གདའོ། །དེ་དགེ་སློང་རྣམས་ཀྱི་དྲུང་དུ་སོང་སྟེ་དྲིས་པ། འཕགས་པ་དག་ལ་ཨ་རུ་ར་ལྟ་མཆིས་སམ། དེ་དག་གིས་སྨྲས་པ། བྲམ་ཟེ་ཡོད་ན། དེ་ཅིར་དགོས། བདག་ལ་སྨན་པའི་མཆིས་ནས། ཨ་རུ་ར་ཚོལ་ཅིག་ཅེས་མཆིས་ན། གལ་ཏེ་མངའ་ན། བདག་ལ་སྩལ་དུ་
Tha70b
གསོལ། དགེ་སློང་དེས་དེའི་མདུན་དུ་ལྷུང་བཟེད་ཀྱི་སྣོད་ཕྱེ་བ་དང ། དེ་ཉིད་ན་སྙུང་བུ་ཡང་འདུག་ཅིང་དེ་ཉིད་ན་གྲིའུ་དང ། དེ་ཉིད་ན་འབྲང་བུ་དང ། དེ་ཉིད་ན་སྨན་དག་འདུག་པ་བྲམ་ཟེས་མཐོང་ནས་སྨྲས་པ། འཕགས་པ་དག་།ཁྱེད་ནི། ཀུན་ཏུ་སྤྱོད་པ་མི་གཙང་བ་ཡིན་ཏེ། འདི་འདྲ་བ་ཟ་བ་བས་ནི། བདག་ཤི་ཡང་ཆེས་བླའི། མི་ཙང་བ་ཟ་བ་ནི། དེ་ལྟ་མ་ཡིན་ནོ། །ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། སྣོད་གསུམ་བཅང་བར་བྱ་སྟེ། ལྷུང་བཟེད་ཀྱི་སྣོད་དང ། སྨན་སྣོད་དང ། བར་བུར་སྣོད་རྣམས་སོ། །དགེ་སློང་དག་གིས་དེ་དག་གིས་ལུང་ཐག་མཉམ་པར་བཏགས་པས། དེ་དག་གིས་མཆན་ཁུང་རློ་བར་གྱུར་པ་དང ། མ་དང་ཕ་དག་འཕགས་པ་དག་།ཅི། ཁྱེད་རྫ་རྔ་ཐོགས་ཏེ་འགྲོའམ་ཞེས་ཅོ་འདྲི་བར་བྱེད་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། མཉམ་པར་གདགས་པར་མི་བྱ་བར་ཅི་རིགས་པར་གདགས་པར་བྱའོ། །དགེ་སློང་དག་གིས་རས་མ་ཕྲ་མོ་དག་བཏགས་པས་དེ་དག་ལན་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། རས་མ་ཞེང་ཆེན་པོ་དག་གདགས་པར་བྱའོ། །དེ་དག་གིས་ཞེང་ཆེན་པོ་བཏགས་པ་དང ། དེ་དག་ཉིད་ཞུམ་ནས་བཅོམ་ལྡན་འདས་ཀྱིས་བཀའ་སྩལ་པ། དཀྱིལ་ཕྱིང་བུ་དང་སྦྱར་ཏེ་སྐབས་སྐབས་སུ་སྲུབས་བྱ་རོག་རྐང་དག་དྲུབ་པར་བྱའོ། །སངས་རྒྱས་བཅོམ་ལྡན་
Tha71a
༄#། །འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་ཞིག་གིས་ཕྱིང་པ་ཞིག་རྙེད་ནས་དེས་བསམ་པ། བཅོམ་ལྡན་འདས་ཀྱིས་ཆོས་གོས་གསུམ་དྲས་ཏེ་བཙང་བར་བྱའོ། །ཞེས་བཀའ་སྩལ་གྱི། དྲའོ། །སྙམ་ནས་དེས་གྲིའུ་དང ། ཁབ་དག་ཁྱེར་ནས་ཤིང་ལྗོན་པ་ཞིག་གི་དྲུང་དུ་སོང་བ་དང ། བཅོམ་ལྡན་འདས་ཀྱང་ཕྱོགས་དེར་གཤེགས་ཏེ་གཟིགས་ནས་བཀའ་སྩལ་པ། དགེ་སློང ། འདི་ཅི་ཡིན། དེས་གསོལ་བ། བཙུན་པ། བཅོམ་ལྡན་འདས་ཀྱིས་དགེ་སློང་གིས་ཆོས་གོས་གསུམ་དྲས་ཏེ་བཅང་བར་བྱའོ། །ཞེས་བཀའ་སྩལ་པས། བདག་གིས་ཕྱིང་བ་འདི་རྙེད་ནས་ཆོས་གོས་སུ་འདྲ་བ་ལགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་ལ་གུས་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་།དེ་ལྟ་བས་ན། ལྔ་པོ་འདི་དག་ནི། དྲ་བར་མི་བྱ་སྟེ། བེའུ་རས་ཐམས་ཅད་དང ། ལ་བ་ཐམས་ཅད་དང ། ཕྱིང་བ་ཐམས་ཅད་དང ། ཀླམ་ཐམས་ཅད་དང ། སེང་བ་ཐམས་ཅད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་ཞིག་བྱ་བ་ཞིག་གི་ཆེད་དུ་གཙུག་ལག་ཁང་གཞན་དུ་སོང་བ་དང ། དེ་དེར་ནམ་སྲོས་པར་གྱུར་ནས་གནས་མལ་གྱི་ཞལ་ཏ་བྱེད་པས་སྨྲས་པ། ཚེ་དང་ལྡན་པ། གནས་མལ་དག་ནོས་ཤིག་།དེས་སྨྲས་པ། བདག་གིས་གདིང་
Tha71b
བ་ཁྱེར་ཏེ་མ་འོངས་སོ། །གནས་མལ་གྱི་ཞལ་ཏ་བྱེད་པས་སྨྲས་པ། གལ་ཏེ་དེ་ལྟ་ན། ཁྲི་བརླིང་བ་ནོས་ཤིག་།དེས་ཁྲི་བརླིང་བ་མནོས་ནས་ཉལ་བ་དང ། དེ་གྲང་བའི་སྡུག་བསྔལ་གྱིས་ཉེན་བཞིན་དུ་མཚན་མོ་འདས་ནས་ན་བར་གྱུར་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་གདིང་བ་མེད་པར་འགྲོ་བར་མི་བྱའོ། །འགྲོ་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་གདིང་བ་མེད་པར་འགྲོ་བར་མི་བྱའོ། །ཞེས་བཀའ་སྩལ་པ་དང ། དགེ་སློང་རྣམས་དེང་ཉིད་ཕྱིར་ལྡོག་པའི་བསམ་པས། དེའི་ཉེན་ཀོར་གྱི་གཙུག་ལག་ཁང་གཞན་དུ་འགྲོ་བ་དང ། འཆག་ཏུ་འགྲོ་བ་དང ། གྲོང་གཞན་ཏུ་འགྲོ་བ་དེ་དག་ཏུ་ཡང་གདིང་བ་ཁྱེར་བ་ན། གནས་བརྟན་རྒན་པོ་རྒས་པ་ཉམ་ཆུང་བ་རྣམས་དང ། ནད་པ་སྦྱོར་མི་བཟོད་པ་རྣམས་ཉམ་ཐག་པར་གྱུར་ནས་བཅོམ་ལྡན་འདས་ཀྱིས་དེང་ཉིད་ཕྱིར་ལྡོག་པའི་བསམ་པས་འགྲོ་བ་དེར་ཡང་གདིང་བ་མེད་པར་འགྲོར་མ་གནང་ངོ ། །ཞེས་མ་གནང་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་ཉེན་ཀོར་དང ། ཉིན་མོ་སྤྱོད་དུ་འགྲོ་བ་ལ་གདིང་བ་བཀུར་བར་མི་བྱའོ། །གྲོང་གཞན་དུ་འགྲོ་བ་ན། དེང་ཉིད་ཕྱིར་ལྡོག་པའི་བསམ་པས་འགྲོ་ན། དེར་ཡང་བཀུར་བར་མི་བྱའོ། །དགེ་སློང་གཞན་དག་གདིང་བ་མེད་པར་གྲོང་
Tha72a
༄#། །གཞན་དུ་དེང་ཉིད་ཕྱིར་ལྡོག་པའི་བསམ་པས་འགྲོ་བ་ན། དེ་རྣམས་ལ་བྱ་བའི་རྣམ་པ་དེ་ལྟ་བུ་དག་བྱུང་ནས་དེ་ནམ་སྲོས་པར་གྱུར་པ་དང ། དེ་དག་བསླབ་པ་ལ་གུས་པས་ནུབ་མོ་ཕྱིར་དོང་བ་ན། སེང་གེ་དང ། སྟག་དང ། ཆོམ་རྐུན་པ་དང ། གཡོན་ཅན་དག་གིས་བགྲོད་པར་གྱུར་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དེ་ལྟར་བསམ་སྟེ་དོང་བ་དག་དེར་ནམ་སྲོས་པར་གྱུར་ནས་དེ་ཉིད་དུ་གནས་པར་བྱ་སྟེ། འདི་ལྟར་ཚངས་པར་མཚུངས་པར་སྤྱོད་པ་དག་ལས་གདིང་བ་བརྙས་ཏེ་ཉལ་བར་བྱའོ། །གལ་ཏེ་རྙེད་ན། དེ་ལྟ་ན་ལེགས། གལ་ཏེ་མ་རྙེད་ན། བླ་གོས་བཞི་ལྟབ་ཏུ་བྱས་ཏེ་བཏིང་ལ་ཡུན་ཐུང་དུ་ནི། ཉལ། ཡུན་རིང་དུ་ནི། མི་ཉལ་བར་མཚན་མོ་འདའ་བར་བྱའོ། །དགེ་སློང་གཞན་ཞིག་གིས་དགེ་སློང་ཞིག་ལས་གདིང་བ་བརྙས་པ་དང ། དེ་ལ་རྨི་ལམ་གྱི་གནོད་པ་བྱུང་ནས་དེས་མི་གཙང་བས་མ་རུང་བར་གྱུར་པ་དེ་བཞིན་དུ་དགེ་སློང་དེ་ལ་ཕྱིར་དབུལ་བར་བརྩམས་པ་དང ། དེས་མ་འདོད་པའི་སྐབས་དེ་ཞེས་བྱ་བ་ལ་སོགས་པ་སྔ་མ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། བཀྲུས་ཏེ་སྦྱིན་པར་བྱའོ། །དགེ་སློང་དེས་བཀྲུས་ཏེ་བྱིན་ན། འོན་ཀྱང་དེ་ལེན་པར་མི་བྱེད་པའི་སྐབས་དེ་ཞེས་བྱ་བའི་བར་དུ་ཡང་སྔ་མ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། རི་བའི་རིན་སྦྱིན་
Tha72b
པར་བྱ་བའམ། དེའི་སེམས་མགུ་བར་བྱའོ། །དགེ་སློང་དག་གཙུག་ལག་ཁང་གཞན་དང ། གྲོང་གཞན་དག་ཏུ་དེང་ཉིད་ཕྱིར་ལྡོག་པའི་བསམ་པས་ཆོས་གོས་གསུམ་པོ་དག་མེད་པར་དོང་བ་དང ། དེ་རྣམས་དེར་དོང་བ་དག་ལ་ཇི་ཙམ་ན་བྱ་བའི་རྣམ་པ་དེ་ལྟ་བུ་དག་བྱུང་སྟེ། དེར་ནམ་སྲོས་པར་གྱུར་ཏོ། །དེ་དག་བསླབ་པ་ལ་གུས་པས་མཚན་མོ་ཕྱིར་དོང་བ་ན། སེང་གེ་དང ། སྟག་དང ། ཆོམ་རྐུན་པ་དང ། གཡོན་ཅན་དག་གིས་བགྲོད་པར་གྱུར་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དེ་ལྟ་བུའི་བསམ་པས་དོང་པ་རྣམས་དེར་ནམ་སྲོས་པར་གྱུར་ན། དེ་ཉིད་དུ་འདུག་པར་བྱ་ཞིང ། ཚངས་པ་མཚུངས་པར་སྤྱོད་པ་དག་ལས་ཆོས་གོས་དག་བརྙས་ཏེ་བྱིན་གྱིས་བརླབ་པར་བྱའོ། །དེ་རྣམས་ཆོས་གོས་དག་བརྙས་ནས་ཇི་ལྟར་བྱིན་གྱིས་བརླབ་པར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། སྔ་མ་རང་གི་སེམས་ཀྱིས་ཕྱུང་ལ་བྱིན་གྱིས་བརླབ་པར་བྱའོ། །ལྔ་པོ་འདི་དག་ནི། སེམས་བསྐྱེད་པས་འགྲུབ་སྟེ། གསོ་སྦྱོང་དང ། དགག་དབྱེ་དང ། ཆོས་གོས་བྱིན་གྱིས་བརླབ་པ་དང ། ཆོས་གོས་དབྱུང་བ་དང ། གང་ཟག་མགྲོན་དུ་བོས་པའོ། །དགེ་སློང་དེ་དག་གིས་ཆོས་གོས་དྲས་ཤིང་ཁ་དོག་མ་བསྒྱུར་བ་དག་རྙེད་ནས་བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དྲས་ཤིང་ཁ་དོག་མ་བསྒྱུར་བ་དག་རྙེད་ན། དྲས་ཤིང་ཁ་དོག་མ་བསྒྱུར་བ་དག་བྱིན་གྱིས་བརླབ་པར་
Tha73a
༄#། །བྱའོ། །ཅི་སྟེ་ཁ་དོག་མ་བསྒྱུར་ཅིང་མ་དྲས་པ་དག་རྙེད་ན། ལྷན་ཐབས་ཀྱིས་གླན་ལ་བྱིན་གྱིས་བརླབ་པར་བྱའོ། །གལ་ཏེ་རྙེད་ན། དེ་ལྟ་ན་ལེགས། གལ་ཏེ་མ་རྙེད་ན།་དེ་བཞིན་བྱིན་གྱིས་བརླབ་པར་བྱའོ། །ཐ་ན་ཁྱིམ་པའི་གོས་ལ་ཡང་བྱིན་གྱིས་བརླབ་པར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་དག་ཅིག་གདིང་བ་མེད་པར་ཡུལ་གཞན་དུ་དོང་བ་དང ། དེར་དོང་བ་དེ་རྣམས་འགྱོད་པར་གྱུར་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།ངས་ཆོས་གོས་གསུམ་དང་འབྲལ་བར་ནི། གསུངས་ཀྱི། གདིང་བ་དང་ནི་མ་ཡིན་ཏེ། དེ་ལྟ་བས་ན། བསམ་བཞིན་དུ་བཞག་སྟེ་འགྲོ་བར་མི་བྱའོ། །བརྗེད་པ་ལ་ནི། ལྟུང་བ་མེད་དོ། །སྡོམ་ལ། ཆུ་ཚགས་ལ་ནི་རྣམ་བཞི་དང ། །སྣོད་རྣམས་དང་ནི་གཅིག་ཏུ་ཟ། །གོས་གཅིག་གིས་ནི་ཟ་བ་དང ། །སྒྲེན་མོར་ཁྲུས་ནི་བྱེད་པའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ལྷོ་ལམ་ནས་དགེ་སློང་བཅོམ་ལྡན་འདས་ཀྱི་ཞབས་ལ་ཕྱག་འཚལ་བ་གཉིས་ཤིག་མཉན་ཡོད་དུ་དོང་ངོ ། །དེ་གཉིས་ལམ་དུ་ཆུ་ཟད་ནས་སྐོམ་པའི་སྡུག་བསྔལ་གྱིས་གདུངས་པ་ན། རྫིང་བུ་ཞིག་གི་དྲུང་དུ་ཕྱིན་ནས་དེ་
Tha73b
གཉིས་ལས་གཅིག་གིས་སྨྲས་པ། ཚེ་དང་ལྡན་པ་ཁྱོད་ཀྱིས་མྱུར་དུ་ཆུ་རྟོགས་ཤིག་དང་བཏུང་ངོ ། །དེས་བརྟག་པར་བརྩམས་པ་དང ། ཇི་ཙམ་ན་ཆུ་མ་དག་པར་གྱུར་ནས་དེས་ཚིགས་སུ་བཅད་པ་སྨྲས་པ། བསྐལ་པ་འབུམ་ཕྲག་སྟོང་དག་ཏུ། །གང་ཞིག་མཐོང་བར་རབ་དཀའ་བས། །བདག་གིས་ཆུ་དག་འཐུངས་ནས་ནི། །དེ་ནས་འདྲེན་པ་བལྟ་བར་བྱ། །གཅིག་ཤོས་ཀྱིས་ཚིགས་སུ་བཅད་པ་སྨྲས་པ། གང་ཞིག་སེམས་ཅན་རྣམས་ལ་རིང་ནས་ཐུགས་རྗེ་ཞིང ། །སྲིད་པ་ཀུན་ལ་ཆགས་པ་གཏན་ནས་སྤངས་གྱུར་པ། །དེ་ཡི་བསྟན་མཆོག་འདི་ལ་བསླབ་པ་ཡིས། །སྲོག་ཉིད་སྤང་གི་སྲོག་ཆགས་གསད་པར་བྱ་བ་མིན། །དེ་ནས་གང་གིས་ཆུ་འཐུངས་པ་དེ་ནི། སོང་ངོ ། །གང་གིས་ཆུ་མ་འཐུངས་པ་དེས་ནི། བརྩོན་འགྲུས་བརྩམས་ཏེ་ཤིང་ལྗོན་པ་ཞིག་གིས་དྲུང་དུ་འདུག་ནས་དེས་ཇི་སྲིད་དུ་ལུས་ཀྱི་མཐུ་ཡོད་པ་དེ་སྲིད་དགེ་བའི་ཕྱོགས་དག་བྱས་ཤིང་གང་གི་ཚེ་ལུས་ཀྱི་མཐུ་དང་བྲལ་བ་དེའི་ཚེ་འཆི་བའི་དུས་ལ་བབ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་སོ། །ལྷའི་བུའམ། ལྷའི་བུ་མོའི་ཆོས་ཉིད་ནི།་སྐྱེས་ནས་རིང་པོ་མ་ལོན་པ་ལ་སེམས་གསུམ་སྐྱེ་སྟེ། གང་ནས་ཤི་འཕོས་པ་དང ། གང་དུ་སྐྱེས་པ་དང ། ལས་གང་གིས་སྐྱེས་པའོ། །དེས་མི་རྣམས་ཀྱི་ནང་ནས་ཤི་འཕོས་པ་དང ། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་པ་དང ། བཅོམ་ལྡན་འདས་ལ་སེམས་མངོན་པར་དད་པར་བྱས་པས་སྐྱེས་པར་མཐོང་ངོ ། །དེ་ནས་སྔོན་དགེ་སློང་ལྷའི་བུ་དེ་འདི་སྙམ་དུ་སེམས་ཏེ། གང་གི་ཕྱིར་བདག་
Tha74a
༄#། །ཡོངས་སུ་གནས་པ་བསྟེན་ཏེ་བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི། བདག་ཚུལ་དང་མཐུན་པ་མ་ཡིན་གྱི། བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བའི་ཕྱིར་ཉེ་བར་འགྲོའོ། །སྙམ་མོ། །དེ་ནས་སྔོན་དགེ་སློང་ལྷའི་བུ་རྣ་ཆ་གདུབ་ཀོར་གཡོ་ཞིང་དྲི་མ་མེད་པ་ཐོགས་ཏེ་དོ་ཤལ་དང ། སེ་མོ་དོས་བརྒྱན་པའི་ལུས་ཀྱིས་ལྷའི་མེ་ཏོག་ཨུཏྤ་ལ་དང ། པདྨ་དང ། ཀུ་མུ་དང ། པདྨ་དཀར་པོ་དང ། མན་དཱ་ར་བ་དག་གིས་ཐུ་བ་བཀང་སྟེ་ཁ་དོག་ཤིན་ཏུ་འདས་པས།་མཚན་མོ་ལ་བབ་པ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་མེ་ཏོག་དག་གིས་མངོན་པར་གཏོར་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་མཐའ་གཅིག་ཏུ་འདུག་པ་དང ། འདི་ལྟར་སྔོན་དགེ་སློང་ལྷའི་བུའི་ཁ་དོག་གི་མཐུས་རྒྱལ་བྱེད་ཀྱི་ཚལ་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྔོན་དགེ་སློང་ལྷའི་བུའི་བསམ་པ་དང ། བག་ལ་ཉལ་བ་དང ། ཁམས་དང་རང་བཞིན་ཐུགས་སུ་ཆུད་ནས་གང་ཐོས་ནས་སྔོན་དགེ་སློང་ལྷའི་བུས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ། ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་
Tha74b
བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ། བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི། བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང ། བྲམ་ཟེ་དག་གིས་ཀྱང་མ་བགྱིས། བྱམས་པ་དང ། མཛའ་བཤེས་དང ། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང ། མཆི་མའི་རྒྱ་མཚོ་ནི། བསྐམས། རུས་པའི་རི་དག་ལས་ནི། བསྒྲལ། ངན་སོང་གི་སྒོ་དག་ནི། བཀུམ། མཐོ་རིས་དང ། ཐར་པའི་སྒོ་དག་ནི། ཕྱེ། སེམས་ཅན་དམྱལ་བ་དང ། དུད་འགྲོ་དང ། ཡི་དྭགས་དག་ནས་ནི། རྐང་པ་ཕྱུང ། ལྷ་དང ། མི་རྣམས་ཀྱི་ནང་དུ་ནི། བཞག་གོ། ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང ། །གོ་འཕང་ཞི་བ་འཕགས་པ་དགྱེས་ཐོབ་སྟེ། སྡུག་བསྔལ་རྒྱ་མཚོའི་ཕ་རོལ་བརྒལ་བར་གྱུར། །འགྲོ་བ་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བ་རབ་དཀོན་པ། །ཐུབ་པ་ད་རིང་ཁྱོད་མཐོང་འབྲས་བུ་མཆིས། །དེ་ནས་འདུད་
Tha75a
༄#། །བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང ། །དེ་ན་སྔོན་དགེ་སློང་ལྷའི་བུ་ཚོང་པ་ཁེ་སྤོགས་རྙེད་པ་ལྟ་བུ་དང ། ཞིང་པ་ལོ་ཏོག་འབྱོར་པ་ལྟ་བུ་དང ། དཔའ་བོ་གཡུལ་ལས་རྣམ་པར་རྒྱལ་བ་ལྟ་བུ་དང ། ནད་པ་ནད་ཐམས་ཅད་ལས་ཡོངས་སུ་ཐར་པ་ལྟ་བུར་གྱུར་ཏེ། ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ ། །དགེ་སློང་གཅིག་ཤོས་དེ་ཡང་ཁད་ཀྱིས་མཉན་ཡོད་དུ་ཕྱིན་ཏོ། །དེ་ནས་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་དག་བཀྲུས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ་།སངས་རྒྱས་བཅོམ་ལྡན་འདས་རྣམས་ནི། ཆོས་ཉིད་ཀྱིས་དགེ་སློང་གློ་བུར་དུ་འོངས་པ་ལ། དགེ་སློང ། ཁྱོད་ད་གཟོད་གང་ནས་འདིར་འོངས། དབྱར་གང་དུ་གནས་ཞེས་ཡང་དག་པར་དགའ་བས་ཡང་དག་པར་དགའ་བར་མཛད་པ་ཡིན་ཏེ། བཅོམ་ལྡན་འདས་ཀྱིས་དགེ་སློང་དེ་ལ་ཁྱོད་ག་ལས་འདིར་འོངས། དབྱར་གང་དུ་གནས་ཞེས་ཡང་དག་པར་དགའ་བ་མཛད་པ་དང ། དེས་གསོལ་པ། བཙུན་པ། བདག་ལྷོ་ཕྱོགས་ནས་ད་གཟོད་འདིར་མཆིས་ཏེ། ལྷོ་ཕྱོགས་སུ་དབྱར་གནས་ལགས་སོ། །བཅོམ་ལྡན་འདས་ཀྱིས་བཀའ་སྩལ་
Tha75b
པ།་དགེ་སློང་ཁྱོད་ལ་གྲོགས་དགེ་སློང་ལྟ་ཡོད་དམ། བཅོམ་ལྡན་འདས། མཆིས་སོ། །དེ་གར་སོང ། །དེས་ཇི་ལྟར་གྱུར་པ་གསོལ་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། ང་ཡི་བསྟན་ལམ་གུས་གང ། །དེས་ནི་ང་མཐོང་ཅི་ཞིག་ཕན། །དེས་ནི་ང་ལ་བལྟས་ན་ཡང ། །མཐོང་བ་མ་ཡིན་མཆོད་པ་མིན། །ང་ཡི་བསླབ་ལ་གང་སློབ་པའི། །དགེ་སློང་དེས་ནི་ང་མཐོང་སྟེ། །ཤེས་རབ་དམན་པ་ཁྱོད་ཀྱིས་ཀྱང ། །སངས་རྒྱས་མངོན་སུམ་མ་མཐོང་ངོ ། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་ལས་བླ་གོས་ཕྱེ་ནས་ཡང་ཚིགས་སུ་བཅད་དེ་བཀའ་སྩལ་པ། ལྟོས་ཤིག་དགེ་སློང་ལུས་འདི་ལ། །གཙང་ཞིང་གསེར་གྱི་མདོག་འདྲ་བ། །སྔོན་གྱི་ལས་ཀྱི་རྣམ་སྨིན་དང ། །ཕ་དང་མ་ལས་བྱུང་བའོ། །གང་གིས་ཆོས་ཉིད་མ་མཐོང་བ། །རྫོགས་པའི་སངས་རྒྱས་དེས་མི་མཐོང ། གང་གིས་ཆོས་ཉིད་མཐོང་གྱུར་པ། །དེ་ཡིས་ཐུབ་པ་ཆེན་པོ་མཐོང ། །གཞན་ཡང ། བརྟན་ཞིང་དགེ་བའི་བློ་གྲོས་ཅན། །བསླབ་པ་རྗེས་སུ་སྲུང་བྱེད་པ། །དེ་ཡི་དང་པོར་ང་ལ་ནི། །གཟུགས་ཀྱི་སྐུ་དང་ཆོས་སྐུར་མཐོང ། །བདག་ཉིད་ཆེན་པོ་འོད་སྲུང་གི་།བསླབ་མཚམས་འདས་པས་ད་དུང་དུ། །ེ་ལའི་འདབ་དེ་ཀླུ་ཡི་ནི། །སྐྱེ་གནས་དག་ལས་མ་ཐར་ཏོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི། དགེ་སློང་རྣམས་ཆུ་ཚགས་མི་འཆང་བ་ལས་གྱུར་གྱི། དེ་ལྟ་བས་ན། དགེ་སློང་གིས་ཆུ་ཚགས་ཉེ་བར་གཞག་པར་བྱའོ། །བཅོམ་ལྡན་འདས་ཀྱིས་ཆུ་ཚགས་
Tha76a
༄#། །ཉེ་བར་བཞག་པར་བྱའོ། །ཞེས་བཀའ་སྩལ་པ་དང ། དགེ་སློང་དག་ཆུ་ཚགས་དུ་ཡོད་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཆུ་ཚགས་ནི། ལྔ་སྟེ། ཆུ་ཚགས་གྲུ་གསུམ་དང ། བུམ་ཚགས་ལྕེའུ་ཅན་དང ། རིལ་བ་ཞབས་ཚགས་ཅན་དང ། དབྱངས་ཚགས་དང ། བསལ་ཚགས་རྣམས་སོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་ཕན་ཚུན་ཞེ་འགྲས་པ་གཉིས་ཤིག་ལྗོངས་རྒྱུ་ཞིང་དོང་ངོ ། །དེ་དག་ལས་གཅིག་ལ་ནི། ཆུ་ཚགས་ཡོད། གཅིག་ཤོས་ལ་ནི། མེད་དོ། །གང་ལ་ཡོད་པ་དེས་ཆུ་བཙགས་ཏེ་འཐུངས་པ་དང ། གང་ལ་མེད་པ་དེས་སྨྲས་པ། ཚེ་དང་ལྡན་པ། ཆུ་ཚགས་གཡོར་ཅིག་།དེས་མ་སྟེར་ནས་དེ་ཕོངས་པར་གྱུར་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།དེ་ལྟ་བས་ན། དགེ་སློང་གིས་ཞེ་འགྲས་པ་དང་ལྷན་ཅིག་ལྗོངས་རྒྱུ་ཞིང་འགྲོ་བར་མི་བྱའོ། །གལ་ཏེ་དེ་ལྟ་བུའི་རྐྱེན་ཅིག་བྱུང་ན། གཅིག་ལ་གཅིག་བཟོད་པ་གསོལ་ཏེ་དོང་བར་བྱའོ།། །།འདུལ་བ་ཕྲན་ཚེགས་ཀྱི་གཞི། བམ་པོ་ལྔ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་
Tha76b
གཉིས་ཤིག་ལྗོངས་རྒྱུ་ཞིང་དོང་བ་དང ། དེ་དག་ལས་གཅིག་ལ་ནི། ཆུ་ཚགས་ཡོད། གཅིག་ཤོས་ལ་ནི། མེད་ནས་དེ་ལ་དེས་དྲིས་པ། ཁྱོད་ལ་ཆུ་ཚགས་ཡོད་དམ། དེས་སྨྲས་པ་ཡོད་དོ། །སྦྱིན་ནམ་མི་སྦྱིན་ཞེས་ནི། མ་སྨྲས་སོ། །དེ་དག་ལས་གང་ལ་ཆུ་ཚགས་ཡོད་པ་དེས་ནི། ཆུ་འཐུངས་པ་དང ། གང་ལ་མེད་པ་དེས་སྨྲས་པ། ཚེ་དང་ལྡན་པ། ཆུ་ཚགས་གཡོར་ཅིག་།དེས་སྨྲས་པ། ཚེ་དང་ལྡན་པ་ཁྱོད་ཀྱིས་བདག་ལ་ཆུ་ཚགས་ནི། །དྲིས་ཀྱི། སྦྱིན་ནམ་མི་སྦྱིན་མ་དྲིས་པས། དེ་བྱས་པ་ཁྱོད་ལ་ཁོ་བོས་ཆུ་ཚགས་ཅིའི་ཕྱིར་སྦྱིན། མི་སྦྱིན་གྱི། སོང་ཞིག་།དེས་དེ་ལ་མ་བྱིན་པར་དེ་ཕོངས་པར་གྱུར་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། འགྲོ་བར་འདོད་པའི་དགེ་སློང་གིས་གལ་ཏེ་ཆུ་ཚགས་མེད་ན། དགེ་སློང་གྲོགས་པོ་ལ་ཁྱེད་ལ་ཆུ་ཚགས་ཡོད་དམ་མེད་དྲི་བར་བྱའོ། །གལ་ཏེ་ཡོད་དོ། །ཞེས་ཟེར་ན། བདག་ལ་སྦྱིན་ནམ་མི་སྦྱིན་ཞེས་བརྗོད་པར་བྱ་ཞིང ། གལ་ཏེ་སྦྱིན་ནོ། །ཞེས་ཟེར་ན། འགྲོ་བར་བྱའི། །གཞན་དུ་ན་འགྲོ་བར་མི་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་གཉིས་ཤིག་ལྗོངས་རྒྱུ་ཞིང་དོང་ངོ ། །དེ་དག་ལས་གཅིག་ལ་ནི། ཆུ་ཚགས་ཡོད། གཅིག་ཤོས་ལ་ནི། མེད་པ་དང ། གང་ལ་མེད་པ་དེས་དེ་ལ་དྲིས་པ། ཁྱོད་ལ་ཆུ་ཚགས་ཡོད་དམ་མེད་
Tha77a
༄#། །དེས་སྨྲས་པ། ཡོད་དོ། །བདག་ལ་གཡར་རམ་མི་གཡར། གཡར་རོ། །དེ་དག་དོང་བ་དང ། ཇི་ཙམ་ན་ལམ་ཀར་འགྲོན་པོ་དག་ཅིག་འོངས་ནས་གང་ལ་ཆུ་ཚགས་ཡོད་བ་དེའི་བྱ་བ་གང་ཡིན་པ་དེ་འགྲོན་པོ་དེ་ཉིད་ལས་གྲུབ་སྟེ། དེ་ཕྱིར་ལྡོག་པར་བརྩམས་པ་དང ། གཅིག་ཤོས་དེས་སྨྲས་པ། ཚེ་དང་ལྡན་པ་ཁྱོད་ཀྱིས་བདག་ལ་ཆུ་ཚགས་ཁས་བླངས་པ་གཡོར་ཅིག་།དེས་སྨྲས་པ། དེ་ལྟ་བས་ན། དེ་ནི། བདེན་ན། དེས་ན་བདག་གིས་ཆུ་ཚགས་པའི་སླད་དུ་བྱིན་གྱི། ཐམས་ཅད་ཀྱི་ཐམས་ཅད་དུ་བྱིན་པ་ནི། མ་ཡིན་ནོ། །ཞེས་མ་བྱིན་པས་དེ་ཕོངས་པར་གྱུར་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གང་ལ་ཆུ་ཚགས་མེད་པ་དེས། དགེ་སློང་གྲོགས་པོ་ལ་ཁྱོད་ལ་ཆུ་ཚགས་ཡོད་དམ་མེད་ཅེས་དྲི་བར་བྱའོ། །གལ་ཏེ་ཡོད་དོ། །ཞེས་ཟེར་ན། དེས་ཇི་བདག་ལ་སྦྱིན་ནམ་མི་སྦྱིན་ཞེས་བརྗོད་པར་བྱའོ། །གལ་ཏེ་སྦྱིན་ནོ། །ཞེས་ཟེར་ན། གལ་ཏེ་ཁྱོད་སླར་ལྡོག་པར་གྱུར་ཏམ། གཞན་དུ་འགྲོ་བར་གྱུར་ན། སྦྱིན་ནམ་མི་སྦྱིན་ཞེས་བརྗོད་པར་བྱའོ། །གལ་ཏེ་སྦྱིན་ནོ་ཞེས་ཟེར་ན། འགྲོ་བར་བྱའི། གཞན་དུ་ན་འགྲོ་བར་མི་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཚེ་དང་ལྡན་པ་ཉེ་བར་འཁོར་གྱིས་སངས་རྒྱས་བཅོམ་ལྡན་
Tha77b
འདས་ལ་ཞུས་པ། བཙུན་པ། ཆུ་ཚགས་མ་མཆིས་པར་གཙུག་ལག་ཁང་གཞན་ནམ། གྲོང་གཞན་དུ་མཆིར་གནང་ངམ། ཉེ་བར་འཁོར་མི་གནང་ངོ ། །གལ་ཏེ་དེར་སོང་ནས་ཕོངས་པར་མི་འགྱུར་ན། གནང་ངོ ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཚེ་དང་ལྡན་པ་ཉེ་བར་འཁོར་གྱིས་བཅོམ་ལྡན་འདས་ལ་ཞུས་པ། བཙུན་པ། ཆུ་ཚགས་གཅིག་གིས་གཉིས་ལྗོངས་རྒྱུ་ཞིང་མཆིར་གནང་ངམ། ཉེ་བར་འཁོར། གལ་ཏེ་དེར་སོང་ནས་ཕོངས་པར་མི་འགྱུར་ན། གནང་ངོ ། །བཙུན་པ། ཆུ་ཚགས་གཅིག་གིས་མང་པོ་རྣམས་སམ། དགེ་འདུན་དག་ལྗོངས་རྒྱུ་མཆིར་གནང་ངམ། ཉེ་བར་འཁོར། གལ་ཏེ་དེར་སོང་ནས་ཕོངས་པར་མི་འགྱུར་ན། གནང་ངོ ། །བཙུན་པ། ཆུ་ཚགས་མ་མཆིས་པར་ཆུ་ཀླུང་གི་འགྲམ་ནས་མཆིར་གནང་ངམ། ཉེ་བར་འཁོར། གནང་སྟེ། མགྱོགས་པ་ལ་གལ་ཏེ་ཆུ་གཞན་དང་འདྲེས་པར་མ་གྱུར་ན། རྒྱང་གྲགས་རེ་རེ་ཞིང་བརྟག་པར་བྱའོ། །ཆུ་གཞན་དང་འདྲེས་པར་གྱུར་ན། གང་དང་གང་དུ་ལེན་པ་དེ་དང་དེར་བརྟག་པར་བྱའོ། །མི་མགྱོགས་པ་ལ་ནི། འགྲམ་དང་འགྲམ་དུ་བརྟག་པར་བྱའོ། །དེ་ལ་མགྱོགས་པ་ནི། །རྒྱུན་མྱུར་བའོ། །མི་མགྱོགས་པ་ནི། རྒྱུན་བུལ་བའོ། །བཙུན་པ། འགྲམ་གྱི་ཉེན་ཀོར་གང་ལགས། ཉེ་བར་འཁོར། འདོམ་གང་ཁོ་ར་ཁོར་ཡུག་གོ་།བཙུན་པ། ཆབ་མ་བཙགས་ཤིང་མ་བརྟགས་པ་འཚལ་དུ་
Tha78a
༄#། །གནང་ངམ། ཉེ་བར་འཁོར། མི་གནང་ངོ ། །བཙུན་པ། ཆབ་མ་བཙགས་ཤིང་བརྟགས་པ་འཚལ་དུ་གནང་ངམ། ཉེ་བར་འཁོར། མིག་གིས་དག་གོ་།ཞེས་བྱ་སྟེ་གནང་ངོ ། །བཙུན་པ། ཆབ་བཙགས་ཤིང་བརྟགས་པ་འཚལ་དུ་གནང་ངམ། ཉེ་བར་འཁོར། གནང་ངོ ། །འོན་ཀྱང་ཆུ་རུང་བ་ནི། ལྔ་སྟེ། དགེ་འདུན་གྱིས་རུང་བ་དང ། གང་ཟག་གིས་རུང་བ་དང ། ཆུ་ཚགས་ཀྱིས་རུང་བ་དང ། ཆུ་མིག་གིས་རུང་བ་དང ། ཁྲོན་པས་རུང་བའོ། །དེ་ལ་དགེ་འདུན་གྱིས་རུང་བ་ནི། གང་དགེ་འདུན་མཐུན་པས་བསྐོས་པའི་དགེ་སློང་གིས་ཆུ་བཙགས་པར་གྱུར་པ་སྟེ། དགེ་འདུན་གྱིས་རུང་བ་དེ་ལ་དགེ་སློང་གིས་ལོངས་སྤྱད་པར་བྱའོ། །གང་ཟག་གིས་རུང་བ་ནི། དགེ་སློང་གང་ཚུལ་ཁྲིམས་མ་ཉམས་པ་དང ། ལྟ་བ་མ་ཉམས་པ་དང ། སྤྱོད་པ་མ་ཉམས་པ་དང ། འཚོ་བ་མ་ཉམས་པས་ཡོངས་སུ་དག་པར་གྱུར་པ་སྟེ། གང་ཟག་གིས་རུང་བ་དེ་ལ་དགེ་སློང་གིས་ལོངས་སྤྱད་པར་བྱའོ། །ཆུ་ཚགས་ཀྱིས་རུང་བ་ནི། ཆུ་ཚགས་གང་ནམ་ཡང་མ་བརྟགས་པ་མ་ཡིན་པ་དེས་བཙགས་པ་སྟེ། བཏུང་བར་བྱའོ། །ཆུ་མིག་གིས་རུང་བ་ནི། འབབ་པའོ། །ཁྲོན་པས་རུང་བ་ནི། ཁྲོན་པ་གང་གི་ཆུ་དག་པ་དེ་ལས་ཉི་མ་ནུབ་ཀར་བླངས་ནས་ཇི་སྲིད་ཉི་མ་ཤར་གྱི་བར་དུ་སྟེ། ཁྲོན་པས་རུང་བའི་ཆུ་བཏུང་བར་བྱའོ། །དགེ་སློང་རྣམས་ཧ་ཅང་ཡུན་རིང་དུ་ཆུ་རྙོག་པས་འཁྲུག་པ་མཐོང་བར་གྱུར་ནས་བཅོམ་ལྡན་འདས་ཀྱིས་
Tha78b
བཀའ་སྩལ་པ། གླང་དྲུག་གི་ཤིང་རྟ་སྨྱིག་མས་བཀང་བ་འཁོར་བ་ཙམ་མམ། ཇི་ཙམ་གྱིས་ཡིད་ཆེས་པ་དེ་ཙམ་དུ་བརྟག་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བྲམ་ཟེ་དང ། ཁྱིམ་བདག་དད་པ་ཅན་རྣམས་དགེ་སློང་རྣམས་ལ་སྡེར་སྤྱད་དག་འབུལ་བར་བྱེད་པ་ན། དགེ་སློང་རྣམས་མི་ལེན་ཏོ། །དེ་དག་གིས་སྨྲས་པ། འཕགས་པ་དག་།གང་གི་ཚེ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བར་མ་གྱུར་པ་དེའི་ཚེ་ནི། མུ་སྟེགས་ཅན་དག་ཡོན་གནས་ལགས། ད་ནི། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བས་ཁྱེད་ཡོན་གནས་ལགས་ཏེ། གལ་ཏེ་ཁྱེད་ཀྱིས་མ་བཞེས་ན། ཅི། བདག་ཅག་འཇིག་རྟེན་འདི་ནས་འཇིག་རྟེན་ཕ་རོལ་ཏུ་དགེ་བའི་ལམ་རྒྱགས་མ་མཆིས་པར་མཆིའམ། བཞེས་ཤིག་།སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཕྱིར་སྡེར་སྤྱད་དག་བླང་བར་བྱའོ། །བཅོམ་ལྡན་འདས་ཀྱིས་དགེ་འདུན་གྱི་ཕྱིར་སྡེར་སྤྱད་དག་བླང་བར་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ཀྱིས་དེ་དག་བླངས་ནས་མཛོད་དུ་བཅུག་སྟེ་བཞག་ནས་དེ་བཞིན་དུ་ལྷུང་བཟེད་དག་ཏུ་ཟ་བ་དང ། བྲམ་ཟེ་དང ། ཁྱིམ་བདག་དད་པ་ཅན་རྣམས་ཀྱིས་མཐོང་སྟེ་སྨྲས་པ། འཕགས་པ་དག་།བདག་ཅག་གིས་སྡེར་སྤྱད་ཕུལ་བ་དེ་དག་མི་གདའ་ན། དགེ་སློང་རྣམས་
Tha79a
༄#། །ཀྱིས་སྨྲས་པ། བཞིན་བཟང་དག་།མཛོད་ན་འདུག་གོ་།དེ་དག་གིས་སྨྲས་པ། འཕགས་པ་དག་།ཅི། བདག་ཅག་གི་ཁྱིམ་ན་གནས་མ་མཆིས་ཏེ། བདག་ཅག་གིས་ཁྱེད་ལ་ཕུལ་ལམ། ཡོངས་སུ་ལོངས་སྤྱོད་ན། བདག་ཅག་ལ་ཡོངས་སུ་ལོངས་སྤྱད་པའི་རྒྱུ་ལས་བྱུང་བའི་བསོད་ནམས་སུ་འགྱུར་བ་ཞིག་ན། ཁྱེད་ཀྱིས་ཀྱང་མཛོད་དུ་བཅུག་པ་ལྟ། སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། སྦྱིན་བདག་གིས་བྱིན་པའི་སྡེར་སྤྱད་དག་ཡོངས་སུ་ལོངས་སྤྱད་པར་བྱའོ། །བཅོམ་ལྡན་འདས་ཀྱིས་སྦྱིན་བདག་གིས་བྱིན་པའི་སྡེར་སྤྱད་ཡོངས་སུ་ལོངས་སྤྱད་པར་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ཀྱིས་ཡོངས་སུ་ལོངས་སྤྱད་པར་བརྩམས་སོ། །བྲམ་ཟེ་དང ། ཁྱིམ་བདག་གཞན་རྒྱ་ཆེན་པོ་ལ་མོས་པ་དེ་དག་གིས། སྡེར་སྤྱད་ཚད་ཆེན་པོ་དག་ཕུལ་བ་དང ། དགེ་སློང་གནས་བརྟན་རྣམས་དེ་དག་འཁྲུ་བས་ངལ་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། སྡེར་སྤྱད་ཀྱི་ཞལ་ཏ་པ་བསྐོ་བར་བྱའོ། །བཅོམ་ལྡན་འདས་ཀྱིས་སྡེར་སྤྱད་ཀྱི་ཞལ་ཏ་བ་བསྐོ་བར་བྱའོ། །ཞེས་བཀའ་སྩལ་པ་དང ། བྱེ་བྲག་མེད་པར་བསྐོ་ནས་བཅོམ་ལྡན་འདས་ཀྱིས་བཀའ་སྩལ་པ། ཆོས་ལྔ་དང་མི་ལྡན་པའི་སྡེར་སྤྱད་ཀྱི་ཞལ་ཏ་པ་མ་བསྐོས་པ་ནི། བསྐོ་བར་མི་བྱའོ། །བསྐོས་པ་ནི། དབྱུང་བར་བྱ་སྟེ། ལྔ་གང་ཞེ་ན། འདུན་པས་འགྲོ་བ་དང །
Tha79b
ཞེ་སྡང་དང ། གཏི་མུག་དང ། འཇིགས་པས་འགྲོ་བ་དང ། སྡེར་སྤྱད་བྲིམས་པ་དང་མ་བྲིམས་པ་དག་མི་ཤེས་པའོ། །ཆོས་ལྔ་དང་ལྡན་པའི་སྡེར་སྤྱད་ཀྱི་ཞལ་ཏ་པ་མ་བསྐོས་པ་ནི། བསྐོ་བར་བྱ། བསྐོས་པ་ནི། དབྱུང་བར་མི་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང ། ཞེ་སྡང་གིས་མ་ཡིན་པ་དང ། གཏི་མུག་གིས་མ་ཡིན་པ་དང ། འཇིགས་པས་མི་འགྲོ་བ་དང ། སྡེར་སྤྱད་བྲིམས་པ་དང་མ་བྲིམས་པ་དག་ཤེས་པའོ། །བསྐོ་བ་ནི། འདི་ལྟར་བྱ་སྟེ། གནས་མལ་བཤམས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་འདུན་རྣམས་ལ་བསྒོ་ནས་དགེ་འདུན་ཐམས་ཅད་འདུས་ཏེ་འདུག་པ་དང ། རེ་ཞིག་དང་པོར་སྤྲོ་བར་བྱས་ཏེ་མིང་འདི་ཞེས་བྱ་བ་ཁྱོད། དགེ་འདུན་གྱི་སྡེར་སྤྱད་འབྲིམ་པར་བསྐོ་བར་སྤྲོའམ། གལ་ཏེ་སྤྲོ་ན། དེས་སྤྲོའོ། །ཞེས་སྨྲ་བར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ནས་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི། དགེ་འདུན་གྱི་སྡེར་སྤྱད་འབྲིམ་པར་སྤྲོ་སྟེ། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་མིང་འདི་ཞེས་བགྱི་བ་འདི། སྡེར་སྤྱད་ཀྱི་ཞལ་ཏ་པ་མིང་འདི་ཞེས་བགྱི་བ་དགེ་འདུན་གྱི་སྡེར་སྤྱད་འབྲིམ་པར་འགྱུར་རོ། །འདི་ནི། གསོལ་བའོ། །ལས་ནི། འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། །དགེ་སློང་མིང་འདི་ཞེས་བགྱི་བ་འདི། དགེ་འདུན་ལ་སྡེར་སྤྱད་
Tha80a
༄#། །འབྲིམ་པར་སྤྲོ་སྟེ། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་སྡེར་སྤྱད་ཀྱི་ཞལ་ཏ་པར་བསྐོ་ཞིང ། སྡེར་སྤྱད་ཀྱི་ཞལ་ཏ་པ་མིང་འདི་ཞེས་བགྱི་བ་དགེ་འདུན་ལ་སྡེར་སྤྱད་འབྲིམ་པར་འགྱུར་ན། ཚེ་དང་ལྡན་པ་གང་ངག་མིང་འདི་ཞེས་བགྱི་བ་སྡེར་སྤྱད་ཀྱི་ཞལ་ཏ་པར་བསྐོ་བར་བཟོད་པ་གང་ཡང་ཅང་མ་གསུངས་ཤིག་།གང་དག་མི་བཟོད་པ་དེ་དག་ནི་གསུངས་ཤིག་།དགེ་འདུན་གྱིས་བཟོད་ཅིང་གནང་ནས་སྡེར་སྤྱད་ཀྱི་ཞལ་ཏ་པ་མིང་འདི་ཞེས་བགྱི་བ་དགེ་འདུན་ལ་སྡེར་སྤྱད་དག་འབྲེལ་བར་འགྱུར་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་རྣམས་ཀྱིས་ཟས་ཟོས་ནས་ལྷག་མ་འབགས་བཞིན་དུ་དེ་ཉིད་ལ་བྱིན་པ་དང ། བཅོམ་ལྡན་འདས་ཀྱིས་བཀའ་སྩལ་པ། ལྷག་མས་འབགས་པ་དག་ལྷན་ཅིག་གནས་པ་དང ། ཉེ་གནས་རྣམས་ཀྱིས་བཀྲུ་བར་བྱའོ། །བཅོམ་ལྡན་འདས་ཀྱིས་ལྷག་མས་འབགས་པ་དག་ལྷན་ཅིག་གནས་པ་དང ། ཉེ་གནས་རྣམས་ཀྱིས་བཀྲུ་བར་བྱའོ། །ཞེས་བཀའ་སྩལ་པ་དང ། དགེ་སློང་གཞན་དག་ཅིག་ལ་འཁོར་མེད་ནས། དེ་དག་བདག་ཉིད་འཁྲུ་བར་བྱེད་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་དག་གི་འདི་སྡེར་སྤྱད་ཀྱི་ཞལ་ཏ་བ་དག་ཁོ་ནས་བཀྲུ་བར་བྱ་ཞིང ། དེ་དག་གིས་ཀྱང་དེ་དག་ལ་སྦྱིན་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱིས་ཀུན་དགའ་ར་བ་ན་བཞུགས་སོ།
Tha80b
དྲུག་སྡེ་རྣམས་ལྷུང་བཟེད་ནག་པོ་གཅིག་ཏུ་གཅིག་ཅར་བཟའ་བར་བརྩམས་ནས་དེ་དྲུག་ཅར་གྱིས་མཉམ་དུ་ལག་པ་བཅུག་པ་དང ། ལྷུང་བཟེད་ལག་པ་ལ་ཐོགས་ཏེ། དེ་འཕྱང་བར་གྱུར་པ་དང ། དེ་དག་གིས་ཚེ་དང་ལྡན་པ་དག་ལྷུང་བཟེད་ནག་པོ་ཆོ་འཕྲུལ་བྱེད་པ་ལ་ལྟོས། དེ་དག་གིས་ལག་པ་དྲངས་ཏེ་ལྷུང་ནས་ཆག་པ་དང ། དེ་དག་གིས་རྟ་གད་ཀྱིས་བཏབ་པ་དགེ་སློང་རྣམས་ཀྱིས་མཐོང་སྟེ་དེ་དག་གིས་སྨྲས་པ། ཚེ་དང་ལྡན་པ་དག་།འདི་ལྟ་བུ་མི་མཛེས་པ་བྱས་ནས་གནོང་སྟེ་འདུག་པར་བྱ་བ་ཡིན་ན། ཁྱེད་དགོད་པ་ལྟ་དེ་དག་གིས་སྨྲས་པ། ཅི་བྱས། ཆང་འཐུངས་སམ། ཀུན་དོང་ཟོས། དགེ་སློང་རྣམས་ཀྱིས་སྨྲས་པ། ཅི་དེ་ཡང་བྱེད་དམ། གཞན་ཅི་བྱས། ལྷུང་བཟེད་ནག་པོ་མ་བཅག་གམ། འདི་ལ་འགལ་བ་ཅི་ཞིག་ཡོད། ཅི་རྫ་མཁན་ཤིའམ། འཇིམ་པ་མེད་དམ། གཞན་བྱར་ཟད་མོད། དེ་དག་ཅང་མི་སྨྲ་བར་འདུག་པ་དང ། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི་དགེ་སློང་རྣམས་གཅིག་ཏུ་ཟ་བ་ལས་གྱུར་གྱི། དེ་ལྟ་བས་ན། དགེ་སློང་གིས་གཅིག་ཏུ་བཟའ་བར་མི་བྱའོ། །ཟ་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་གཅིག་ཏུ་བཟའ་བར་མི་བྱའོ། །ཞེས་བཀའ་སྩལ་པ་དང ། དགེ་སློང་དག་ཅིག་འགྲོན་པོ་དང་ཐབས་ཅིག་ཆས་པ། འགྲོན་པོ་ཕྱོགས་གཅིག་ཏུ་ཟན་བཟའ་བར་བརྩམས་པ་ན། དགེ་སློང་དེ་དག་ཐམས་ཅད་
Tha81a
༄#། །ལ་སྡེར་སྤྱད་དག་མི་བདོག་སྟེ། དེ་དག་རེ་རེ་ནས་ཟན་ཟ་བ་ལ་རིང་ཞིག་ཐོགས་ནས་འགྲོན་པོ་ཐལ་བ་དང ། ཆོམ་པོ་དག་གིས་བཅོམ་མོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ལམ་དུ་ཞུགས་པ་ན་གལ་ཏེ་སྡེར་སྤྱད་དག་མ་རྙེད་ན། གཅིག་ཏུ་བཟའ་བར་བྱ་སྟེ། ལག་པ་ནི། རེ་རེ་ནས་གཞུག་པར་བྱ་ཞིང་དབྱུང་བར་བྱའི། གཅིག་ཅར་དུ་མ་ཡིན་ནོ། །བཅོམ་ལྡན་འདས་ཀྱིས་ལམ་དུ་ཞུགས་པ་ན། གལ་ཏེ་སྡེར་སྤྱད་དག་མ་རྙེད་ན། གཅིག་ཏུ་བཟའ་བར་བྱའོ། །ཞེས་བཀའ་སྩལ་པ་དང ། དེ་ན་དགེ་ཚུལ་གང་དག་འཁོད་པ་དེ་དག་དང་ལྷན་ཅིག་གཅིག་ཏུ་ཟ་བར་བྱེད་པས་ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་བཟུང་ལ་དེ་དག་དང་ཡང་ལྷན་ཅིག་བཟའ་བར་བྱའོ། །རུང་བ་བྱེད་པ་གཞན་དག་ཅིག་ཡོད་པ་དེ་དག་ཟན་ཟ་བ་ན་འགྲོན་པོ་རྣམས་དང་བྲལ་ནས་ཉེས་དམིགས་དེ་ཉིད་དུ་གྱུར་པ་དང ། བཅོམ་ལྡན་འདས་ཀྱིས་བཀའ་སྩལ་པ་དང ། གོང་བུར་བསྒོངས་ལ་བྱིན་ཅིག་།དགེ་སློང་གཞན་དག་ཅིག་གཉེན་གྱི་ཁྱིམ་དུ་སོང་བ་དང ། གཉེན་དག་གིས་སྨྲས་པ། བདག་ཅག་ལྷན་ཅིག་ཟོས་ནས་རིང་ཞིག་ལོན་པས། ཟན་ལྷན་ཅིག་བཟའི། ཚུར། དེ་དག་གིས་སྨྲས་པ། ཁྱེད་ནི། ཁྱིམ་པ། བདག་ཅག་ནི། རབ་ཏུ་བྱུང་བ་ཡིན་པས་བཟར་མི་རུང་ངོ ། །དེ་དག་མི་དགའ་ནས་མཆི་མས་བརྣངས་
Tha81b
ཤིང་འདུག་གོ་།སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ཡང་དང་ཡང་དུ་དོན་དུ་གཉེར་ན། གདོན་མི་ཟ་བར་དུས་ཀྱིས་འཆུ་བར་ཤེས་ནས་གང་དུ་གཞན་དག་གིས་མཐོང་ནས་མི་མཛེས་པར་མི་འགྱུར་བ་དེར་སྡེར་སྤྱད་བཟུང་ལ་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་གོས་གཅིག་པུ་དང་བསོད་སྙོམས་ཟ་བ་བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་དྲིས་པ། ཤེས་ལྡན་དག་།ཟན་ཟ་བ་འདི་དག་སུ་ཞིག་།གཞན་དག་གིས་སྨྲས་པ། དགེ་སློང་ཤཱཀྱའི་བུ་ཡིན་ནོ། །དེ་དག་འཕྱ་ཞིང་ཤེས་ལྡན་དག་།སྟོན་པ་ངོ་ཚ་ཤེས་པ་དང་ལྡན་པ་དེ་ལྟ་བུ་ལ་ངོ་ཚ་ཤེས་པ་དང ། ཁྲེལ་ཡོད་པ་དང་བྲལ་བ་འདི་ལྟ་བུ་ག་ལ་ཡོད་ཅེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི། དགེ་སློང་རྣམས་གོས་གཅིག་གྱོན་པ་ལས་གྱུར་གྱི། དེ་པས་ན། དགེ་སློང་གིས་གོས་གཅིག་པ་དང་ཟན་བཟའ་བར་མི་བྱའོ། །ཟ་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་གོས་གཅིག་པ་དང་ཟན་བཟའ་བར་མི་བྱའོ། །ཞེས་བཀའ་སྩལ་པ་དང ། རྒན་པོ་རྒས་ཏེ་ཉམ་ཆུང་བ་དང ། ནད་པ་སྤྱོར་མི་བཟོད་
Tha82a
༄#། །པ་དག་ཆོས་གོས་རྣམས་གྱོན་ཏེ་ཟན་བཟའ་བར་མི་ནུས་ནས་བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་རྡུལ་ཟན་འཇམ་པོ་དང་ཟན་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །འོན་ཀྱང་གཞན་དག་ཅིག་གིས་མ་ནུས་པ་དང་བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་ཕྱོགས་དབེན་པར་བཟའ་བར་བྱ་སྟེ། འདི་ལ་འགྱོད་པར་མི་བྱའོ། ། སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་ཆུ་བོ་དྲེགས་ལྡན་ལ་གཅེར་བུར་ཁྲུས་བྱེད་པ་བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་དྲིས་པ། ཤེས་ལྡན་དག་།གཅེར་བུ་པ་ཁྲུས་བྱེད་པ་འདི་དག་སུ་ཞིག་།གཞན་དག་གིས་སྨྲས་པ། དགེ་སྦྱོང་ཤཱཀྱའི་བུ་ཡིན་ནོ། །དེ་དག་འཕྱ་ཞིང་ཤེས་ལྡན་དག་།སྟོན་པ་ངོ་ཚ་ཤེས་པ་དང་ལྡན་པ་དེ་ལྟ་བུ་ལ་ངོ་ཚ་ཤེས་པ་དང ། ཁྲེལ་ཡོད་པ་དང་བྲལ་བ་འདི་ལྟ་བུ་དག་ག་ལ་ཡོད་ཅེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི། དགེ་སློང་རྣམས་སྒྲེན་མོར་ཁྲུས་བྱེད་པ་ལས་གྱུར་གྱི། དེ་ལྟ་བས་ན། དགེ་སློང་གིས་སྒྲེན་མོར་ཁྲུས་མི་བྱའོ། །བྱེད་ན། འགལ་ཚབས་ཅན་དུ་འགྱུར་རོ། །འོན་ཀྱང་ཁྲུས་རས་བཅང་བར་བྱའོ། །བཅོམ་ལྡན་འདས་ཀྱིས་ཁྲུས་རས་བཅང་བར་བྱའོ། །ཞེས་བཀའ་
Tha82b
སྩལ་པ་དང ། དགེ་སློང་རྣམས་ཉིས་སྦྱར་འཆང་ནས་བཅོམ་ལྡན་འདས་ཀྱིས་བཀའ་སྩལ་པ། ཆིག་རྐྱང་བཅང་བར་བྱ་སྟེ། གང་ལ་ཉིས་སྦྱར་ཡོད་པ་དེས་ནི། ཆུ་བརྟགས་ལ་བཀྲུ་བར་བྱའོ། ། ཆོས་གོས་གསུམ་པ་རྣམས་མི་རུང་ངོ ། །སྙམ་ནས་མི་འཆང་བ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་རྣམས་ཀྱིས་ཀྱང་བྱིན་གྱིས་བརླབས་ཏེ་བཅང་བར་བྱའོ། །གཞན་དག་ཅིག་གིས་ཁྲུས་རས་མ་རྙེད་པ་དང ། བཅོམ་ལྡན་འདས་ཀྱིས་བཀའ་སྩལ་པ། གང་དག་གིས་ཁྲུས་རས་མ་རྙེད་ནས་ལོ་མ་དག་གིས་མདུན་དང་རྒྱབ་ནས་གཡོགས་ཏེ་ཕྱོགས་དབེན་པ་གང་ན་གཞན་དག་གིས་མཐོང་ནས་མ་དད་པར་མི་འགྱུར་བར་ཁྲུས་བྱའོ། །དགེ་སློང་རྣམས་ཁྲུས་རས་གཅུས་ཏེ་དེ་དག་འགྱོད་པར་གྱུར་པ་དང ། བཅོམ་ལྡན་འདས་ཀྱིས་བཀའ་སྩལ་པ། རས་ཆིག་རྐྱང་ལ་ནི། སྲོག་ཆགས་དག་མེད་མོད་ཀྱི། འོན་ཀྱང་རས་བཤལ་ནས་བཅུ་བར་བྱ་སྟེ། འདི་ལ་འགྱོད་པར་མི་བྱའོ། །སྡོམ་ནི། མོན་སྲན་གྲེའུ་དང་མི་རུང་བའི། །ས་དང་སྐྱུག་ཅིང་ཟ་བ་དང ། །བདམས་ཤིང་ཟས་ནི་ཟ་བ་དང ། །འགྱོད་དང་འཁར་བའི་ལྷུང་བཟེད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ནམ་གྲུ་གང་ཅི་ལ་ཡང་ཁུམ་འཕྲིག་ཟ་བ་ཞིག་པས། དེའི་མིང་ནམ་གྲུ་ཁུམ་འཁྲིག་ཅན། ནམ་གྲུ་ཁུམ་འཕྲིག་ཅན་ཞེས་བྱ་བར་ཆགས་སོ། །དེ་དུས་གཞན་ཞིག་ན་ཆབ་ཁུང་སར་ཞུགས་
Tha83a
༄#། །པ་དང ། དེས་དེ་ན་མོན་སྲན་གྲེའུའི་ཞ་ལུ་ཞིག་མཐོང་ནས་དེ་ལ་ཡང་དག་པ་མ་ཡིན་པའི་རྟོག་པ་སྐྱེས་པ། བདག་གིས་ས་བོན་གྱི་ཆོས་མ་རུང་བར་བྱས་སོ། །སྙམ་མོ། ། ཇི་ཙམ་དུས་གཞན་ཞིག་ན་དག་འདུན་ལ་མོན་སྲན་གྲེའུའི་བཟའ་བ་དག་ཅིག་གྲུབ་པ་དེ་མི་ཟ་བར་ལྷུང་བཟེད་བཀབ་སྟེ་འདུག་པ་དང ། ལྷན་ཅིག་གནས་པ་དང་ཉེ་གནས་དག་གིས་སྨྲས་པ། མཁན་པོ། དགེ་འདུན་ལ་མོན་སྲན་གྲེའུའི་བཟའ་བ་དག་བྱུང་བ་ཅིའི་སླད་དུ་མི་གསོལ། དེས་སྨྲས་པ། བུ་དག་།ཁོ་བོས་ས་བོན་གྱི་ཆོས་མ་རུང་བར་བྱས་སོ། །དེ་དག་གིས་སྨྲས་པ། མཁན་པོ། ཇི་ལྟ་བུ་ཞིག་བགྱིས། དེས་ཇི་ལྟར་གྱུར་པ་བསྙད་པ་དང ། དེ་དག་གིས་ཀྱང་མི་ཟ་བར་བརྩམས་སོ། །དེ་དག་ལ་འགྲོགས་བཤེས་རྣམས་ཀྱིས་དྲིས་པ། ཅིའི་ཕྱིར་མི་ཟ། དེ་དག་གིས་ཇི་ལྟར་གྱུར་པ་བསྙད་པ་དང ། དེ་འཁོར་མང་པོ་ཅན་ཞིག་པས། དེ་ལ་བརྟེན་ནས་དགེ་འདུན་ཐམས་ཅད་ཀྱིས་མ་ཟོས་སོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།ས་བོན་གྱི་རིགས་ཚོས་དཀའ་བ་ཞེས་བྱ་བ་ཡོད་དེ། དེ་ཡང་རླངས་པ་བྱུང་ན་ཆོས་སོ། །ཞེས་བྱས་ནས་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཉེ་
Tha83b
བར་འཁོར་གྱིས། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། མི་རུང་བའི་ས་ནས་ཤིང་འཁྲུངས་ལ། རུང་བའི་སར་འབྲས་བུ་དག་ལྷགས་ན། ཡོངས་སུ་ལོངས་སྤྱོད་པར་བགྱིའམ། ཡོངས་སུ་ལོངས་སྤྱོད་པར་མི་བགྱི། བཅོམ་ལྡན་འདས་ཀྱིས་བཀའ་སྩལ་པ། ཉེ་བར་འཁོར། ཡོངས་སུ་ལོངས་སྤྱོད་པར་མི་བྱའོ། །བཙུན་པ། རེ་ཞིག་རུང་བའི་ས་ནས་ཤིང་འཁྲུངས་ལ། མི་རུང་བའི་སར་འབྲས་བུ་དག་ལྷགས་ན། ཡོངས་སུ་ལོངས་སྤྱད་པར་བགྱིའམ། ཡོངས་སུ་ལོངས་སྤྱད་པར་མི་བགྱི། ཉེ་བར་འཁོར། གལ་ཏེ་ཞག་ཏུ་མ་ལོན་ན། ཡོངས་སུ་ལོངས་སྤྱད་པར་བྱའོ། །བཙུན་པ། རེ་ཞིག་རུང་བའི་ས་ནས་ཤིང་འཁྲུངས་ལ། མི་རུང་བའི་སར་འབྲས་བུ་དག་ལྷགས་ན། ཡོངས་སུ་ལོངས་སྤྱོད་པར་བགྱིའམ། ཡོངས་སུ་ལོངས་སྤྱད་པར་མི་བགྱི། ཉེ་བར་འཁོར། ཡོངས་སུ་ལོངས་སྤྱད་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་བྲམ་ཟེ་ཞིག་གནས་པ་དེས་སློང་མོ་བཏབ་པས་གླང་ཞིག་རྙེད་དོ། །དེའི་འོག་ཏུ་བ་ཞིག་རྙེད་དོ། །དེའི་འོག་ཏུ་ཡང་གླང་ཞིག་རྙེད་དོ། །དེའི་འོག་ཏུ་ཡང་བ་ཞིག་རྙེད་དེ། དེའི་བ་ལང་ཁྱུ་ལོངས་པར་གྱུར་ཏོ། །བྲམ་ཟེ་དེས་ཐོག་མར་རྙེད་པའི་གླང་ལ་བཀྲ་ཤིས་ཀྱི་བློ་བྱུང་ནས་གླང་དེ་ཡང་ཡན་དུ་བཏང་ངོ ། །དུས་གཞན་ཞིག་ན་དེ་རྒས་འཁོགས་ཉམ་ཆུང་བར་གྱུར་ཏེ། དེ་ཆུ་འདོད་ནས་ཆུ་བོ་དྲེགས་ལྡན་གྱི་འགྲམ་དུ་
Tha84a
༄#། །སོང་བ་ལས་འདམ་དུ་སོང་ངོ ། །ཚེ་དང་ལྡན་པ་ཤཱ་རིའི་བུ་ཡང་ལམ་དེར་སོང་བ་ལས་དེས་དེ་མཐོང་ནས་བསམ་པ། གླང་འདི་ལ་དགེ་བའི་རྩ་བ་ལྟ་ཅུང་ཟད་ཡོད་དམ་སྙམ་པ་དང ། ཡོད་པར་མཐོང་ངོ ། །སུ་ལ་རག་ལས་སྙམ་པ་དང ། བདག་ཁོ་ན་ལ་སྟེ། དེས་འདམ་ནས་ཕྱུང་ནས་ལག་པས་ཕྱིས་སོ། །དེ་ནས་བཞིན་བཟང ། འདི་ལྟར་འདུ་བྱེད་ཐམས་ཅད་ནི།་མི་རྟག་པའོ། །ཆོས་ཐམས་ཅད་ནི། བདག་མེད་པའོ། །མྱ་ངན་ལས་འདས་པ་ནི། ཞི་བའོ། །ཞེས་ཆོས་ཚིག་གསུམ་བཤད་དེ། ང་ལ་དང་བར་ཡང་གྱིས་ཤིག་དང ། དེ་ལྟ་ན་བྱོལ་སོང་གི་སྐྱེ་གནས་ལས་འདོད་ཆགས་དང་བྲལ་བར་འགྱུར་རོ། །ཞེས་སྨྲས་ནས་སོང་ངོ ། །དེ་ཡང་ཝ་དག་གིས་ཟོས་པ་དང ། དེ་ཝ་དག་གིས་ཟ་བའི་ཚེ་བསམ་པ། གལ་ཏེ་འཕགས་པ་འདིར་མ་ཕྱིན་ན། བདག་འདི་འདྲ་བའི་གནས་སྐབས་སུ་མི་འགྱུར་རོ། །སྙམ་ནས་དེ་ཚེ་དང་ལྡན་པ་ཤཱ་རིའི་བུ་ལ་སེམས་མངོན་པར་དང་བར་བྱས་ནས་དུས་ལས་འདས་ཏེ། མཉན་ཡོད་ཉིད་ན་བྲམ་ཟེ་ལས་དྲུག་ལ་བརྩོན་པའི་རིགས་ཤིག་ཏུ་སྐྱེས་སོ། །ཚེ་དང་ལྡན་པ་ཤཱ་རིའི་བུས་གླང་དེའི་གནས་སྐབས་དེ་ཇི་ལྟ་བུ་ཞིག་ཡིན་པ་བསམ་པ་དང ། ཇི་ཙམ་ན་དུས་ལས་འདས་པར་མཐོང་ངོ ། ། ཡང་གར་སྐྱེས་བསམ་པ་དང ། མཉན་ཡོད་ཉིད་དུ་བྲམ་ཟེ་ལས་དྲུག་ལ་བརྩོན་པའི་རིགས་སུ་སྐྱེས་པར་མཐོང་ནས་དེ་ཁྱིམ་དེར་ཡང་དང་ཡང་དུ་སོང་ཞིང ། དེས་བྲམ་ཟེ་དེ་ཆུང་མ་དང་བཅས་ཏེ་
Tha84b
སྐྱབས་སུ་འགྲོ་བ་དང ། བསླབ་པའི་གཞི་དག་ལ་བཀོད་དོ། །དེ་དུས་གཞན་ཞིག་ན། ཕྱི་བཞིན་འབྲང་བའི་དགེ་ཚུལ་མེད་པར་སོང་བ་དང ། བྲམ་ཟེ་དེས་སྨྲས་པ། འཕགས་པ། ཅི། ཕྱི་བཞིན་འབྲང་བའི་དགེ་ཚུལ་མི་མངའ་འམ། དེས་སྨྲས་པ། བཞིན་བཟང ། ཅི། ཁོ་བོའི་ཕྱི་བཞིན་འབྲང་བའི་དགེ་ཚུལ་དག་རྩཝ་ཀ་ཤ་ལ་བཟུང་བའམ། རྩཝ་ཀུ་ཤ་ལ་བཟུང་བས་འབྱུང་ངམ། ཁྱོད་ལྟ་བུ་ལས་རྙེད་པ་གང་ཡིན་པ་དེ། ཁོ་བོའི་ཕྱི་བཞིན་འབྲང་བའི་དགེ་ཚུལ་དུ་འགྱུར་མོད། འཕགས་པ། བདག་གི་མཆིས་བྲང་འདི་ལ་སེམས་ཅན་ཞུགས་ཏེ། གལ་ཏེ་ཁྱེའུར་བཙས་ན། དེ་ཁྱོད་ཀྱི་ཕྱི་བཞིན་འབྲང་བའི་དགེ་ཚུལ་བགྱིའོ། །བཞིན་བཟང ། ནད་མེད་ཅིག་།བླང་ངོ ། །ཞེས་སྨྲས་ནས་སོང་ངོ ། །དེ་ཟླ་བ་བརྒྱད་དམ་དགུ་འདས་ནས་བུ་བ་ལང་གི་ཤ་ཚུགས་ལྟ་བུ་ཞིག་བཙས་པ་དང་དེའི་ཉེ་དུ་རྣམས་ལྷགས་ཏེ་འདུས་ནས་ཞག་བདུན་གསུམ་ཉི་ཤུ་རྩ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་མིང་འདོགས་པར་བྱེད་དེ། ཁྱེའུའི་མིང་ཅིར་གདགས། ཉེ་དུ་རྣམས་ཀྱིས་སྨྲས་པ། གང་གི་ཕྱིར་ཁྱེའུ་འདི་ཤ་ཚུགས་བ་ལང་དང་འདྲ་བ་དེའི་ཕྱིར་ཁྱེའུའི་མིང་བ་ལང་བདག་ཏུ་གདགས་སོ། །ཞེས་མིང་བ་ལང་བདག་ཅེས་བྱ་བར་བརྟགས་སོ། །དེ་བསྐྱེད་བསྲིངས་ནས་ཆེན་པོར་གྱུར་པ་དང ། དེ་ནས་ཚེ་དང་ལྡན་པ་ཤཱ་རིའི་བུ་སྔ་དྲོ་ཤམ་ཐབས་དང ། ཆོས་གོས་དང་ལྷུང་བཟེད་ཐོགས་ཏེ། མཉན་ཡོད་དུ་བསོད་སྙོམས་ཀྱི་ཕྱིར་ཞུགས་སོ། །མཉན་ཡོད་དུ་བསོད་སྙོམས་
Tha85a
༄#། །ལ་རྒྱུ་བ་ན། དེས་བྲམ་ཟེ་དེའི་ཁྱིམ་དུ་ཕྱིན་པ་དང ། བྲམ་ཟེ་དེས་བྱོན་པ་ལེགས་སོ། །ཞེས་བྱ་བའི་སྨྲ་བ་ཀུན་ཏུ་སྤྱད་ནས་རྐང་པ་ལ་ཕྱག་བྱས་སོ། །ཆུང་མས་ཀྱང་དེ་ལ་བཟའ་བ་དང ། བཅའ་བ་གཙང་ཞིང་བསོད་པས་ལྷུང་བཟེད་བཀང་སྟེ་ཕུལ་ལོ། །ཁྱེའུ་དེ་ཚེ་དང་ལྡན་པ་ཤཱ་རིའི་བུའི་གདོང་དུ་ལྟ་ནས་དེས་བྲམ་ཟེ་ལ་བརྡ་བྱས་པ་དང ། དེས་ཁྱེའུ་དེ་ལ་སྨྲས་པ། བུ། ཁྱོད་ངས་མ་བཙས་པ་ནས་འཕགས་པ་ཤཱ་རིའི་བུའི་ཕྱི་བཞིན་འབྲང་བའི་དགེ་ཚུལ་དུ་ཕུལ་གྱི། འཕགས་པ་དང་ལྷན་ཅིག་སོང་ཞིག་།སེམས་ཅན་དེ་སྲིད་པ་ཐ་མ་པ་ཞིག་སྟེ།་དེའི་ཕྱི་བཞིན་སོང་བ་དང་དེས་དེ་རབ་ཏུ་ཕྱུང ། བསྙེན་པར་རྫོགས་པར་བྱས་ཏེ་གདམས་ངག་བྱིན་ནོ། །དེས་འབད། བརྩལ། བསྒྲིམས་པས། འཁོར་བའི་འཁོར་ལོ་གཡོ་བ་དང ། མི་གཡོ་བ་ཆ་ལྔ་པ་འདི་ཉིད་རྟོགས་ནས་འདུ་བྱེད་ཀྱི་རྣམ་པ་ཐམས་ཅད་ཆོས་ཉིད་ཀྱིས་འཇིག་པ་ལྟུང་བ། འགྱེས་པ། རྣམ་པར་འཇིག་པའི་ཆོས་ཅན་དུ་བསྒོམས་ཏེ་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་སུམ་དུ་བྱས་ཏེ་ཁམས་གསུམ་གྱི་འདོད་ཆགས་དང་བྲལ་བ། སེམས་གསེར་དང་བོང་བར་མཚུངས་པ། ཙནྡན་དང་སྟེའུར་འདྲ་བ། ནམ་མཁའ་དང་ལག་མཐིལ་དུ་མཉམ་པ། མ་རིག་པའི་སྒོ་ངའི་སྦུབས་བཅོམ་པ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པ་དང ། རྙེད་པ་ལ་ཆགས་པ་དང །
Tha85b
བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང ། ཉེ་དབང་དུ་བཅས་པའི་ལྷ་རྣམས་ཀྱིས་མཆོད་པ་དང ། ཕྱག་བྱ་བ་དང ། གུས་པར་སྨྲ་བར་བྱ་བའི་དགྲ་བཅོམ་པར་གྱུར་ཏོ། །དེ་ལ་ལས་ལས་སྐྱེས་པའི་མིད་པ་གཉིས་ཡོད་དེ། གཅིག་ནས་ནི། སྐྱུགས་པ་འབྱིན་ཏོ། །གཅིག་ཤོས་ནས་ནི། མིད་དོ། །གང་གི་ཚེ་བཅོམ་ལྡན་འདས་ཀྱིས་དུས་མ་ཡིན་པའི་ཟས་ཀྱི་བསླབ་པ་མ་བཅས་པ་དེའི་ཚེ་ནི་སྐྱུག་ཅིང་མིད་དོ། །གང་གི་ཚེ་བཅས་པ་དེའི་ཚེ་ནི། སྐྱུག་ཅིང་འདོར་བས་དེ་ལུས་རྐེ། ཉམ་ཆུང ། ཤིག་ཤིག་པོ། རོད་ཉམས་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི། མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་སྨྲས་པ། ཀུན་དགའ་བོ། བ་ལང་བདག་ཅིའི་ཕྱིར་ལུས་རྐེ། ཉམ་ཆུང ། ཤིག་ཤིག་པོ། རོད་ཉམས་པར་གྱུར། དེས་ཇི་ལྟར་གྱུར་པ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། གང་ལ་ལས་ཀྱི་རྣམ་པར་སྨིན་པ་ལས་སྐྱེས་པའི་མིད་པ་གཉིས་གྲུབ་པ་དེས་སྐྱུག་པ་ལན་གཉིས་སམ། གསུམ་དོར་ཏེ། ཁ་བཀྲུས་ནས་ལྷག་མ་མིད་པར་བྱ་སྟེ། འདི་ལ་འགྱོད་པར་མི་བྱའོ། །དགེ་སློང་རྣམས་ཟས་ཟོས་ནས་སྐྱུགས་ཏེ་དེ་དག་འགྱོད་པར་གྱུར་པ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དགེ་སློང་གཞན་ཞིག་ཟན་ཟོས་ཏེ་སྐྱུགས་ན་དེས་ཁ་བཀྲུ་བར་བྱ་སྟེ། འདི་ལ་འགྱོད་པར་མི་བྱའོ། །གང་གི་ཚེ་ཚེ་དང་ལྡན་པ་བ་ལང་བདག་
Tha86a
༄#། །རབ་ཏུ་ཕྱུང་བ་དེའི་ཚེ་བྲམ་ཟེ་དང ། ཁྱིམ་བདག་རྣམས་འཕྱ་སྨོད་ཁ་ཟེར་ཞིང ། དགེ་སྦྱོང་ཤཱཀྱའི་བུ་རྣམས་ཀྱི་དགེ་སྦྱོང་གི་ཚུལ་ཉམས་ཤིང ། ཚངས་པའི་ཚུལ་ཉམས་ཏེ། ད་ནི། བ་ལང་བདག་ལ་སོགས་པ་འཇིགས་འཇིགས་ལྟ་རྣམས་ཀྱང་རབ་ཏུ་འབྱིན་ཏོ། །ཞེས་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཉན་ཐོས་ཆེན་པོ་རི་རབ་དང་འདྲ་བ་ལ་སྐྱེ་བོའི་ཚོགས་ཕལ་པོ་ཆེ་མ་དད་པར་བྱེད་ཀྱི། དེ་ལྟ་བས་ན། བ་ལང་བདག་ཡུལ་དབུས་སུ་གནས་སུ་མི་གཞུག་གོ་།སྙམ་ནས་ཚེ་དང་ལྡན་པ་བ་ལང་བདག་ལ་བཀའ་སྩལ་པ། བ་ལང་བདག་།ཁྱོད་དེང་ཕྱིན་ཆད་ཡུལ་དབུས་ན་མ་གནས་པར་མཐའ་འཁོབ་ཀྱི་གནས་མལ་དག་སྟེན་ཅིག་།བཙུན་པ། དེ་ལྟར་འཚལ་ལོ། །ཞེས་ཚེ་དང་ལྡན་པ་བ་ལང་བདག་གིས་བཅོམ་ལྡན་འདས་ཀྱི་ལྟར་མཉན་ནས་མཉན་ཡོད་ནས་མི་སྣང་བར་གྱུར་ཏེ། ཤིང་ཤིར་ཤ་ཀའི་གཞལ་མེད་ཁང་སྟོང་པར་འདུག་གོ་།དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག། ངའི་ཉན་ཐོས་ཀྱི་དགེ་སློང་བས་མཐའི་གནས་མལ་ལ་དད་པ་རྣམས་ཀྱི་ནང་ན་མཆོག་ནི། འདི་ལྟ་སྟེ། དགེ་སློང་བ་ལང་བདག་འདི་ཡིན་ནོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། ཚེ་དང་ལྡན་
Tha86b
པ་བ་ལང་བདག་གིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ཤ་ཚུགས་པ་ལང་ལྟ་བུར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།བ་ལང་བདག་ཉིད་ཀྱིས་ལས་རྣམས་བྱས་ཤིང་བསགས་པ། ཚོགས་རྙེད་པ། རྐྱེན་ཡོངས་སུ་བསྒྱུར་བ། ཆུ་བོ་བཞིན་ཉེ་བར་གནས་པ། ངེས་པར་མྱོང་བར་འགྱུར་བ་ཡིན་ཏེ། བ་ལང་བདག་ཉིད་ཀྱིས་བྱས་པའི་ལས་རྣམས་གཞན་སུ་ཞིག་གིས་མྱོང་བར་འགྱུར། དགེ་སློང་དག། ལས་བྱས་ཤིང་བསགས་པ་རྣམས་ནི། ཕྱི་རོལ་གྱི་སའི་ཁམས་ལ་སྨིན་པར་མི་འགྱུར། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི། འོན་ཀྱང་ལས་དགེ་བ་དང ། མི་དགེ་བ་བྱས་ཤིང་བསགས་པ་རྣམས་ནི། ཟིན་པའི་ཕུང་པོ་དང ། སྐྱེ་མཆེད་དང ། ཁམས་དག་ཁོ་ན་ལ་རྣམ་པར་སྨིན་པར་འགྱུར་རོ། །བསྐལ་པ་བརྒྱ་ཕྲག་རྣམས་སུ་ཡང ། །ལས་རྣམས་ཆུད་ཟར་མི་འགྱུར་ཏེ། །ཚོགས་ཤིང་དུས་ལ་བབ་པ་ན། །ལུས་ཅན་རྣམས་ལ་འབྲས་བུར་སྨིན། །དགེ་སློང་དག། སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་རྒུའི་ཚེ་ལོ་ཉི་ཁྲི་ཐུབ་པ་ན་ཡང་དག་པར་རྫོགས་པའི་སངས་རྒྱས་འོད་སྲུང་ཞེས་བྱ་བ། རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བ་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེའི་བསྟན་པ་ལ་འདི་རབ་ཏུ་བྱུང་བར་གྱུར་ཏོ། །དགེ་སློང་གང་
Tha87a
༄#། །གིས་རབ་ཏུ་ཕྱུང་བ་ནི། རྒས་འཁོགས་ཉམ་ཆུང་བ་ཞིག་སྟེ། དེ་དེའི་ལྷུང་བཟེད་འཁྲུ་བ་ན། དགེ་སློང་གཞན་ཞིག་དང་ལྷན་ཅིག་ཁ་ཏོན་ཟེར་བ་ལས། རིང་ཞིག་ཐོགས་ནས་དེའི་མཁན་པོ་དེས་རང་དགར་ཟན་ཟོས་པ་དང ། དེ་ཁ་ཏོན་ལ་ཆགས་པས་མཁན་པོ་དེ་ལ་འཕྱས་སོ། །ཇི་ཙམ་དུས་གཞན་ཞིག་ན་ཟན་ཟོས་ནས་བདག་ཉིད་ཀྱིས་ལྷུང་བཟེད་བཀྲུས་ཏེ་མཁན་པོའི་དྲུང་དུ་སོང་བ་དང ། ད་དུང་ཟན་ཟ་བ་མཐོང་ནས་དེ་ཀུན་ནས་དཀྲིས་པས་སྨྲས་པ། མཁན་པོ། ཅི་ཁྱོད་གླང་རྒན་བཞིན་དུ་ལྡད་ཅིང་བཞུགས་སམ། དེས་བསམ་པ། འདི་ཀུན་ནས་དཀྲིས་པས་གལ་ཏེ་ཅུང་ཟད་ཅིག་སྨྲས་ན། ཇེ་ཐུ་བར་འཁྲུག་པ་བསྐྱེད་པར་འགྱུར་གྱི། གང་གི་ཚེ་ཀུན་ནས་དཀྲིས་པ་དང་བྲལ་བ་དེའི་ཚེ་དྲི་བར་བྱའོ། །སྙམ་ནས་དེས་དེ་ཀུན་ནས་དཀྲིས་པ་དང་བྲལ་བ་དང་སྨྲས་པ། ཚེ་དང་ལྡན་པ། ཅི་ཟེར། དེས་སྨྲས་པ། ཁྱོད་གླང་རྒན་བཞིན་ལྡང་ངམ་ཞེས་དེ་སྐད་མཆི་མོད། དེས་སྨྲས་པ། ཚེ་དང་ལྡན་པ། ཁྱོད་ཀྱིས་ང་སུ་ཡིན་ཤེས་སམ། འཚལ་ཏེ།་ཁྱོད་ཀྱང་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་རབ་ཏུ་བྱུང་བ་ལགས་ལ། བདག་ཀྱང་དེ་ཁོ་ནའི་གསུང་རབ་ལ་རབ་ཏུ་བྱུང་བ་ལགས་སོ། །དེས་སྨྲས་པ། དེ་ནི།་དེ་ལྟ་ཡིན་ཏེ་བདེན་ན། འོན་ཀྱང་རབ་ཏུ་བྱུང་བས་བྱ་བའམ། བྱེད་པ་གང་ཡིན་པ་དེ་ངས་བྱས་ཏེ། དེ་ལྟ་བས་ན། ང་ནི། འཆིང་བ་ཐམས་ཅད་ལས་གྲོལ་བ་ཡིན། ཁྱོད་ནི། འཆིང་
Tha87b
བ་མཐའ་དག་གིས་བཅིངས་པ་ཡིན་ན། ཁྱོད་ཀྱིས་ངག་གི་ལས་རྩུབ་མོ་སྨྲས་ཀྱི། ཁྱོད་ཀྱིས་ལས་དེ་ཅི་ནས་ཀྱང་བསྲབས་པ་ཉིད་དང ། ཡོངས་སུ་ཟད་པ་ཉིད་དང ། ཡོངས་སུ་གཏུགས་པར་འགྱུར་བར་ཉེས་པ་ལ་ཉེས་པར་ཤོག་ཅིག་།དེས་ཉེས་པ་ལ་ཉེས་པར་བཤགས་སོ། །གང་འདིས་དགེ་སློང་དགྲ་བཅོམ་པ་ལ་གླང་རྒན་ཞེས་བྱ་བའི་སྨྲ་བ་ཀུན་ཏུ་སྤྱོད་པ་ཀུན་ཏུ་སྤྱད་པའི་ལས་དེའི་རྣམ་པར་སྨིན་པས་ཚེ་རབས་ལྔ་བརྒྱར་བ་ལང་གི་སྐྱེ་གནས་སུ་སྐྱེས་སོ། །ལས་ཀྱི་ལྷག་མ་དེ་ཉིད་ཀྱིས་ད་ལྟར་ཤ་ཚུགས་བ་བ་ལང་ལྟ་བུར་སྐྱེས་སོ། །ཡང་དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། ཚེ་དང་ལྡན་པ་བ་ལང་བདག་གིས་ལས་ཅི་ཞིག་བགྱིས་ན། དེའི་རྣམ་པར་སྨིན་པས། བཅོམ་ལྡན་འདས་ཀྱིས་བས་མཐའི་གནས་མལ་ལ་དད་པ་རྣམས་ཀྱི་ནང་ན་མཆོག་ཏུ་བསྟན་ལགས། བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་གྱི་དབང་གིས་སོ། །གང་དུ་སྨོན་ལམ་བཏབ་ལགས། འདི་ཡང་དག་པར་རྫོགས་པའི་སངས་རྒྱས་འོད་སྲུང་དེ་ཁོ་ནའི་གསུང་རབ་ལ་རབ་ཏུ་བྱུང་བར་གྱུར་ཏེ། དེར་འདིས་ཚེ་གཅིག་ཏུ་ཚངས་པར་སྤྱོད་པ་སྤྱད་ན། ཡོན་ཏན་གྱི་ཚོགས་འགའ་ཡང་ཐོབ་པར་མ་གྱུར་ཏོ། །གང་གི་ཐད་དུ་རབ་ཏུ་བྱུང་བ་དེ་ནི། བཅོམ་ལྡན་འདས་འོད་སྲུང་གིས་བས་མཐའི་གནས་མལ་ལ་དད་པ་རྣམས་ཀྱི་ནང་ན་མཆོག་ཏུ་ལུང་བསྟན་ཏོ། །དེ་ན་འདིས་སྨོན་ལམ་བཏབ་པ། འདི་ལྟར་བདག་གིས་བཅོམ་
Tha88a
༄#། །ལྡན་འདས་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་གི་ཐད་དུ་ཚེ་གཅིག་ཏུ་ཚངས་པར་སྤྱོད་པ་སྤྱད་ཀྱང་ཡོན་ཏན་གྱི་ཚོགས་འགའ་ཡང་ཐོབ་པར་མ་གྱུར་གྱི། དགེ་བའི་རྩ་བ་འདིས། བདག་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གིས། བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་སྐྱེ་རྒུའི་ཚེ་ལོ་བརྒྱ་ཐུབ་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ལུང་བསྟན་པ་གང་ཡིན་པ་དེའི་གསུང་རབ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་ཞིང ། ཇི་ལྟར་བདག་གི་མཁན་པོ། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གིས་བས་མཐའི་གནས་མལ་ལ་དད་པ་རྣམས་ཀྱི་ནང་ན་མཆོག་ཏུ་བསྟན་པ་དེ་བཞིན་དུ་བདག་ཀྱང་ཤཱཀྱའི་རྒྱལ་པོ་ཆེན་པོ་ཤཱཀྱ་ཐུབ་པ་དེས། བས་མཐའི་གནས་མལ་ལ་དད་པ་རྣམས་ཀྱི་ནང་ན་མཆོག་ཏུ་སྟོན་པར་གྱུར་ཅིག་།ཅེས་བཏབ་པའི་སྨོན་ལམ་གྱི་དབང་གིས་ད་ལྟར་དེ་བཞིན་གཤེགས་པས། བས་མཐའི་གནས་མལ་ལ་དད་པ་རྣམས་ཀྱི་ནང་ན་མཆོག་ཏུ་བསྟན་ཏོ། །དགེ་སློང་དག་།དེ་ལྟར་ན། ལས་གཅིག་ཏུ་ནག་པ་རྣམས་ཀྱི་རྣམ་པར་སྨིན་པ་ནི། གཅིག་ཏུ་ནག་ལ། གཅིག་ཏུ་དཀར་བ་རྣམས་ཀྱི་ནི། གཅིག་ཏུ་དཀར། འདྲེན་མ་རྣམས་
Tha88b
ཀྱི་ནི། འདྲེན་མ་ཡིན་ནོ། །དགེ་སློང་དག་།དེ་ལྟ་བས་ན། ལས་གཅིག་ཏུ་ནག་པ་དང ། འདྲེན་མ་རྣམས་སྤངས་ནས། ལས་གཅིག་ཏུ་དཀར་བ་དག་ལ་བརྩལ་བར་བྱ་སྟེ། དགེ་སློང་དག་གིས་དེ་ལྟ་བུ་ལ་བསླབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་འདི་བྱིན་ཅིག། འདི་ལས་བྱིན་ཅིག་ཅེས་འདམ་ཞིང་འདམ་ཞིང་ཟས་ཟ་བ་དང་འབྲིམ་པ་འཁྲུག་པར་གྱུར་ནས་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་བདམས་ཤིང་ཟས་བཟའ་བར་མི་བྱ་སྟེ། ཟ་ན། འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་རྣམས་ཟས་ཟ་བ་ན་ལྷུང་བཟེད་བཟེད་པ་ལས། དེ་ལྷུང་བཟེད་ཀྱི་གཞིའི་སྟེང་དུ་ལྷུང་བཟེད་ཀྱི་གཞི་བཟེད་པ་ལས་ལྷུང་བཟེད་དུ་ལྷུང་ནས་དེ་རྣམས་འགྱོད་དེ་མི་ཟ་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།ལྷུང་བཟེད་བཟེད་པ་ལས་ལྷུང་བཟེད་ཀྱི་གཞིའི་སྟེང་དུ་ལྷུང་ན། བྱིན་ལེན་བྱས་པ་ཞེས་བྱ། ལྷུང་བཟེད་ཀྱི་གཞི་བཟེད་པ་ལས་ལྷུང་བཟེད་ཀྱི་ནང་དུ་ལྷུང་ན། བྱིན་ལེན་བྱས་པ་ཞེས་བྱ། ལྷུང་བཟེད་
Tha89a
༄#། །བཟེད་པ་ལས་ལྷུང་བཟེད་ཀྱི་ནང་དུ་ལྷུང་ན་བྱིན་ལེན་བྱས་པ་ཞེས་བྱ། ལྷུང་བཟེད་ཀྱི་གཞི་བཟེད་པ་ལས་ལྷུང་བཟེད་ཀྱི་གཞིའི་ནང་དུ་ལྷུང་ན། བྱིན་ལེན་བྱས་པ་ཞེས་བྱ་སྟེ། འོན་ཀྱང་བྱིན་ལེན་གྱི་སེམས་ནི། ཉེ་བར་གཞག་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། ། ཚེ་དང་ལྡན་པ་ཉེ་དགའ་བོ་འཁར་བའི་མགར་པའི་དྲུང་དུ་སོང་ནས་དེས་སྨྲས་པ། བཞིན་བཟང ། འཁར་བའི་ལྷུང་བཟེད་ཅིག་བྱ་ན། ནུས་སམ། དེས་སྨྲས་པ། འཕགས་པ། འདི་ཉིད་བདག་གི་བཟོ་ལགས་ཀྱི། ཚད་ཇི་ཙམ་ཞིག་བགྱི། ཆེན་པོར་བྱའོ། །འཕགས་པ། ཁྱོད་ལ་འཁར་བའི་ལྷུང་བཟེད་ཆེན་པོ་ཅི་འཚལ། བཀྲེན་པ། ཁྱོད་ཅི་རིན་མེད་པར་བྱེད་དུ་འཇུག་སྙམ་མམ།་རིན་ཐང་བཞིན་སྦྱིན་གྱི། བྱོས་ཤིག་།དེས་བསམ་པ། འདི་ལ་བདག་གི་འཁར་བ་ཅི་ཞིག་འགོད། བྱའོ། །སྙམ་ནས་དེས་དེའི་འཁར་བའི་ལྷུང་བཟེད་ཆེན་པོ་ཞིག་བྱས་སོ། །དེས་སྨྲས་པ། གང་འདིའི་ནང་དུ་ཆུད་པ་གཞན་ཞིག་ཀྱང་གྱིས་ཤིག་།དེས་གཞན་ཡང་བྱས་སོ། །དེ་བཞིན་དུ་གཞན་གང་ཡིན་པ་བདུན་པའི་བར་དུ་བྱས་ནས་དེ་རྣམས་ཚེ་དང་ལྡན་པ་ཉེ་དགའ་བོས།་དགེ་ཚུལ་འཁྲུར་བཅུག་སྟེ་ཚོན་སྣ་ལྔ་པའི་སྐུད་པ་ལས་དྲ་བ་བྱེད་དུ་བཅུག་ནས་དེ་རྣམས་དེར་བཅུག་སྟེ་གོ་རིམ་བཤམས་ནས་དགེ་ཚུལ་གྱི་མགོ་ལ་བཀུར་ཏེ་གང་དུ་མགྲོན་དུ་བོས་
Tha89b
པ་དེར་འགྲོའོ། །སོན་ནས་དེ་དག་བཀྲམ་སྟེ་འདུག་པ་དང ། ཁྱིམ་བདག་དང ། བྲམ་ཟེ་རྣམས་ཀྱིས་སྨྲས་པ། འཕགས་པ། ཅི་ཁྱོད་ཀྱིས་འཁར་བའི་མགར་བའི་ཟོང་བཀྲམ་མམ། དེས་སྨྲས་པ། བཀྲེན་པ། ཁྱེད་ཅི་ཤེས། འདིར་ནི། རེ་ཞིག་ཕྱེ་དག་བླང་ངོ ། །འདིར་ནི། སྣུམ་ཁུར་དག་གོ། འདིར་ནི། འབྲས་ཅན་དག་གོ་།གཞན་རྣམས་སུ་ནི། ཚོད་མ་དག་བླང་ངོ ། །དེ་རྣམས་ཀྱིས་སྨྲས་པ། འཕགས་པ། གལ་ཏེ་དེ་ལྟར་ན། ཀོ། རེས་འགའ་ཚོད་མ་མང་པོ་དག་འབྱུང་བས། གཞན་དང་གཞན་དག་ཀྱང་ཉེ་བར་གཞག་དགོས་སོ། །ཞེས་བྱས་པ་དང ། དེ་ཅང་མི་སྨྲ་བར་འདུག་གོ་།སྐབས་དེ།་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི། དགེ་སློང་རྣམས་འཁར་བའི་ལྷུང་བཟེད་འཆང་བ་ལས་གྱུར་གྱི། དེ་ལྟ་བས་ན། དགེ་སློང་གིས་འཁར་བའི་ལྷུང་བཟེད་བཅང་བར་མི་བྱའོ། །འཆང་ན། འགལ་ཚབས་ཅན་དུ་འགྱུར་རོ། །ཁ་གཟར་དང ། ཚ་ཁུག་དང ། ཕུལ་བའི་བཏུང་ཕོར་ནི། མ་གཏོགས་སོ། །སྡོམ་ནི། རྐང་པ་བཀྲུ་བ་བཀབ་པ་དང ། །ཆོལ་ཟངས་དག་ནི་གནང་བ་དང ། །དེ་བཞིན་བསིལ་ཡབ་ཉིད་དང་ནི། སྦྲང་མ་རྣམས་ལ་གཡབ་པའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་རྣམས་བབ་བབ་ཏུ་རྐང་པ་འཁྲུ་བ་དེར་སྦྲང་བུ་དག་གིས་གང་བར་
Tha90a
༄#། །འདུག་གོ་།ཇི་ཙམ་ན་བྲམ་ཟེ་དང ། ཁྱིམ་བདག་གཙུག་ལག་ཁང་བལྟར་འོངས་པ་དེ་དག་གིས་མཐོང་ནས་སྨྲས་པ། འཕགས་པ། སྦྲང་བུ་ཟི་ཟི་མཆི་བས་གང་དང་ཕྱོགས་འདི་ཅི་ཞིག། དགེ་སློང་རྣམས་ཀྱིས་སྨྲས་པ། བདག་ཅག་གིས་འདིར་རྐང་པ་བཀྲུས་སོ། །དེ་དག་འཕྱ་སྟེ་ཤཱཀྱའི་བུའི་དགེ་སྦྱོང་རྣམས་ནི། གཙང་སྦྲ་མེད་དེ། བབ་བབ་ཏུ་རྐང་པ་འཁྲུའོ། །ཞེས་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། རྐང་པ་བབ་བབ་ཏུ་བཀྲུ་བར་མི་བྱའི། འོན་ཀྱང་གནས་ཁང་གི་སྟེང་ཤར་ལྷོའི་མཚམས་སུ་རྐང་པ་བཀྲུ་བའི་གནས་བྱའོ། །བཅོམ་ལྡན་འདས་ཀྱིས་རྐང་པ་བཀྲུ་བའི་གནས་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ཀྱིས་ཇི་ལྟ་བུ་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། རུས་སྦལ་ལྟ་བུར་བྱའོ། །རབ་ཏུ་འཇམ་པར་བྱེད་པ་དང ། བཅོམ་ལྡན་འདས་ཀྱིས་བཀའ་སྩལ་པ། རྩུབ་པོར་བྱའོ། །དགེ་སློང་རྒས་པ། འཁོགས་པ། ཉམ་ཆུང་བ་དེ་དག་ཕྱོགས་དེར་འགྲོ་མི་ནུས་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་གྱོ་མོ་ཉེ་བར་གཞག་པར་བྱའོ། །དགེ་སློང་རྣམས་གྱོ་མོར་འཁྲུ་བ་ན། དེ་ཆག་ནས་ཇེ་མ་རུང་བར་གྱུར་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཆོལ་ཟངས་ཉེ་བར་གཞག་པར་བྱའོ། །བཅོམ་ལྡན་
Tha90b
འདས་ཀྱིས་ཆོལ་ཟངས་ཉེ་བར་གཞག་པར་བྱའོ། །ཞེས་བཀའ་སྩལ་པ་དང ། དྲུག་སྡེ་རྣམས་ཀྱིས་གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་བྱས་པའི་ཆོལ་ཟངས་དག་ཉེ་བར་གཞག་གོ།་བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་སྨྲས་པ། འཕགས་པ། འདི་ཅི་ཞིག་།དེ་རྣམས་ཀྱིས་སྨྲས་པ། བཞིན་བཟང་དག་།བཅོམ་ལྡན་འདས་ཀྱིས་ཆོལ་ཟངས་གནང་ངོ ། ། འཕགས་པ། ཅི། དགེ་སྦྱོང་ཁྱོད་འདོད་པའི་ཡོན་ཏན་དག་གིས་གནོད་དམ། དེ་དག་གིས་སྨྲས་པ། ཁྱེད་ཀྱི་མགྲིན་པར་རྡོག་པས་མནན་ཏེ་གནོད་དོ། །དེ་དག་འཕྱ་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གསེར་དང ། དངུལ་དང ། ཤེལ་དང ། བཻ་ཌཱུརྱ་ལས་བྱས་པའི་ཆོལ་ཟངས་དག་ཉེ་བར་གཞག་པར་མི་བྱ་སྟེ། འོན་ཀྱང་འཇིམ་ལས་བྱས་པའི་ཆོལ་ཟངས་ཉེ་བར་གཞག་པར་བྱའོ། །རྔ་མོ་ལྟ་བུ་ཉེ་བར་བཞག་པ་དང ། དེ་ལྡེག་ནས་བཅོམ་ལྡན་འདས་ཀྱིས་བཀའ་སྩལ་པ། གླང་པོ་ཆེའི་རྐང་པ་ལྟ་བུར་བྱ་ཞིང ། དེའི་དབུས་སུ་འབུར་ཀ་དམ་པའི་མེ་ཏོག་ལྟ་བུར་བྱའོ། །ཤིན་ཏུ་འཇམ་པོར་བྱས་པ་དང ། བཅོམ་ལྡན་འདས་ཀྱིས་བཀའ་སྩལ་པ། རྩུབ་པོར་བྱའོ། །དགེ་སློང་རྣམས་ཆོལ་ཟངས་བབ་བབ་ཏུ་འཇོག་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཁང་ཐོག་ཏུ་ཁས་ཕུལ་ལ་ཞོག་ཅིག་།གང་ཟག་གི་ནི། གནས་ཁང་གི་སྒོ་ལྐོག་ཏུ་ཞོག་
Tha91a
༄#། །ཅིག་།སངས་རྒྱས་བཅོམ་ལྡན་འདས་ཡུལ་ཀོའུ་ཤམྦྷི་ན་སྒྲ་ལེན་གྱི་ཀུན་དགའ་ར་བ་ན་བཞུགས་སོ། །དཔྱིད་ཀྱི་ཡུལ་ལ་བབ་ནས་དགེ་སློང་རྣམས་ཚ་བས་རྨྱ་སྟེ་དེ་དག་ལུས་སྐྱ་བོ་སེང་སེང་པོར་གྱུར་ཅིང ། རྐེ། ཉམ་ཆུང ། ཤིག་ཤིག་པོ། རོད་ཉམས་པར་གྱུར་པ་ཁྱིམ་བདག་དང ། བྲམ་ཟེ་རྣམས་ཀྱིས་མཐོང་ནས་སྨྲས་པ། འཕགས་པ། ཁྱེད་ཅིའི་སླད་དུ་ལུས་སྐྱ་བོ་སེང་སེང་པོར་གྱུར་ཅིང ། རྐེ། ཉམ་ཆུང ། ཤིག་ཤིག་པོ། རོད་ཉམས་པར་གྱུར། དེ་དག་གིས་ཇི་ལྟར་གྱུར་པ་བསྙད་པ་དང ། དེ་རྣམས་ཀྱིས་སྨྲས་པ། འཕགས་པ་དག། ཁྱེད་བསིལ་ཡབ་མི་འཆང་ངམ། བཞིན་བཟང་དག་བཅོམ་ལྡན་འདས་ཀྱིས་མ་གནང་ངོ ། །འཕགས་པ་དག་།ཁྱེད་ཀྱི་སྟོན་པ་ནི། ཐུགས་རྗེ་ཅན་ཡིན་པས། གནང་བར་འགྱུར་རོ། ། སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི། བསིལ་ཡབ་བཅང་བར་བྱའོ། །བཅོམ་ལྡན་འདས་ཀྱིས་བསིལ་ཡབ་བཅང་བར་བྱའོ། །ཞེས་བཀའ་སྩལ་པ་དང ། དྲུག་སྡེ་རྣམས་ཀྱིས་ཡུ་བ་གསེར་དང ། དངུལ་དང ། ཤེལ་དང ། བཻཌཱུརྱ་ལས་བྱས་པ། བསྲུབས་པ། བཀྲ་བ་དང ། ཉེ་བར་བཀྲ་བའི་ཡུ་བ་ཅན་གྱི་བསིལ་ཡབ་དག་བཅངས་པ་དང ། བྲམ་ཟེ་དང ། ཁྱིམ་བདག་རྣམས་ཀྱིས་ཞེས་བྱ་བ་ནས་ཁྱེད་ཀྱི་མགྲིན་པ་རྡོག་པས་མནན་ཏེ་གནོད་དོ། །ཞེས་བྱ་བའི་
Tha91b
བར་སྔ་མ་བཞིན་ནོ། །དེ་དག་འཕྱ་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཡུ་བ་གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་བྱས་པ། བསྲུབས་པ། བཀྲ་བ་དང ། ཉེ་བར་བཀྲ་བའི་ཡུ་བ་ཅན་གྱི་བསིལ་ཡབ་དག་ཉེ་བར་གཞག་པར་མི་བྱའི། འོན་ཀྱང་བསིལ་ཡབ་གཉིས་པོ་རྩཝ་བལ་བ་ཛ་ལས་བྱས་པ་དང ། ཤིང་ཏ་ལའི་འདབ་མ་བཅང་བར་བྱའོ། །བྲམ་ཟེ་དང ། ཁྱིམ་བདག་དད་པ་ཅན་དག་དགེ་སློང་རྣམས་ལ་བསིལ་ཡབ་རྣམ་པ་སྣ་ཚོགས་འབུལ་བ་ན་ཞེས་བྱ་བའི་བར་སྔ་མ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི། དགེ་འདུན་གྱི་ཕྱིར་བཅང་བར་བྱའོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པ་ན་བཞུགས་སོ། །དགེ་སློང་རྣམས་ལ་སྦྲང་མ་དག་ཟ་སྟེ། དེ་དག་གི་ལུས་སྦྲང་མས་ཟོས་པས། འབྲུམ་བུས་གང་སྟེ། དེ་དག་གིས་ཡང་དང་ཡང་དུ་ཕྲུགས་པ་དང ། བྲམ་ཟེ་དང ། ཁྱིམ་བདག་རྣམས་ཀྱིས་སྨྲས་པ། འཕགས་པ་དག། ཁྱེད་ཅིའི་ཕྱིར་ལུས་འདི་ལྟར་འབྲུམ་བུས་གང ། དེ་དག་གིས་ཇི་ལྟར་གྱུར་བ་བསྙད་པ་དང ། དེ་རྣམས་ཀྱིས་སྨྲས་པ། འཕགས་པ་དག། ཁྱེད་སྦྲང་ཡབ་མི་འཆང་ངམ། བཞིན་བཟང་དག་།བཅོམ་ལྡན་འདས་ཀྱིས་མ་གནང་ངོ ། །འཕགས་པ་དག་།ཁྱེད་ཀྱི་སྟོན་པ་ནི། ཐུགས་རྗེ་ཅན་ཡིན་པས་གནང་བར་འགྱུར་རོ། །སྐབས་དེ། དགེ་
Tha92a
༄#། །སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི། སྦྲང་ཡབ་བཅང་བར་བྱའོ། །བཅོམ་ལྡན་འདས་ཀྱིས་སྦྲང་ཡབ་བཅང་བར་བྱའོ། །ཞེས་བཀའ་སྩལ་པ་དང ། དྲུག་སྡེ་རྣམས་ཀྱིས་ཡུ་བ་གསེར་དང ། དངུལ་དང ། བཻཌཱུརྱ་དང ། ཤེལ་ལས་བྱས་པ་དང ། རྔ་མ་ལས་བྱས་པའི་བསིལ་ཡབ་དག་ཉེ་བར་བཞག་པ་དང ། བྲམ་ཟེ་དང ། ཁྱིམ་བདག་རྣམས་ཞེས་བྱ་བའི་བར་སྔ་མ་བཞིན་ནོ། །སྦྲང་ཡབ་ནི། ལྔ་སྟེ། བལ་ལས་བྱས་པ་དང ། ཤ་ན་ལས་བྱས་པ་དང ། རས་བལ་ལས་བྱས་པ་དང ། རས་མ་དང ། ལོ་མ་སྦམས་པའོ། །སྡོམ་ནི། གོས་མདུད་པ་དང་ལུས་དང་ནི། །འཁར་བ་དྲ་བ་འཆང་བ་དང ། །སྒོག་སྐྱ་དག་ནི་བཀག་པ་དང ། །ནད་པ་ལ་ནི་གནང་བའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་སྟོངས་མོ་བྱའོ།། ཞེས་བཀའ་སྩལ་པ་དང ། དེ་ན་དགེ་སློང་ཅིག་སྐས་ལ་འཇོག་པ་ན། འོག་ན་ཤིང་མཁན་ཞིག་འདུག་པ་དེས། དེ་མདོམས་ཐང་བ་མཐོང་ནས་སྨྲས་པ། འཕགས་པ། ཁྱོད་སྐྱེས་པའི་དབང་པོ་དང་ལྡན་པས་བདག་གིས་ཕོ་ལགས་པར་གདོད་འཚལ་ལོ། །དེ་གནོང་ནས་ཅང་མི་སྨྲ་བར་འདུག་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་
Tha92b
འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི། དགེ་སློང་རྣམས་གོས་མདུད་པ་མ་བོར་བ་ཉིད་དུ་སྐས་ལ་འཛེག་པ་ལས་གྱུར་གྱི། དེའི་ཕྱིར་དགེ་སློང་མཁར་ལེན་བྱེད་པ་གོས་མདུད་པ་བོར་ནས་མཁར་ལན་བྱེད་དུ་གཞུག་གོ་།སྙམ་དུ་དགོངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་།དེ་ལྟ་བས་ན། དགེ་སློང་སྟོངས་མོ་བྱེད་པས་གོས་མདུད་པ་བོར་ནས་མཁར་ལན་བྱའོ། །བཅོམ་ལྡན་འདས་ཀྱིས་དགེ་སློང་གིས་གོས་མདུད་པ་བོར་ནས་མཁར་ལན་བྱའོ། །ཞེས་བཀའ་སྩལ་པ་དང ། དགེ་སློང་རྣམས་གོས་མདུད་པ་བོར་ནས་མཁར་ལེན་བྱེད་པ་ན། མ་དད་པ་རྣམས་འཕྱ་སྟེ། འཕགས་པ། ཅི་སྟོབས་འགྱེད་དམ། དེ་དག་གིས་སྨྲས་པ། བཞིན་བཟང་དག་།མཁར་ལེན་བྱེད་དོ། །དེ་དག་ཅང་མི་སྨྲ་བར་འདུག་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གང་དག་སྐབས་ལ་འཛེག་པ་དེ་དག་གིས་མདུད་པ་པོར་བར་བྱའི། གཞན་དག་གིས་ནི། མ་ཡིན་ནོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་ལུས་ཀྱིས་ཁུར་ཁྱེར་བ་དང ། བྲམ་ཟེ་དང ། ཁྱིམ་བདག་རྣམས་འཕྱ་སྟེ། འཕགས་པ། བདག་ཅག་ནི། རེ་ཞིག་ཕ་མ་དང ། བུ་དང ། ཆུང་མའི་སླད་དུ་ཁུར་ཐོགས་ན། ཁྱེད་སུའི་སླད་དུ་ལུས་ཀྱིས་ཁུར་བསྣམས། དེ་
Tha93a
༄#། །དག་གིས་སྨྲས་པ། བཞིན་བཟང་དག་།བདག་ཅག་ལ་ཡང་སྟོན་པ་མཆོད་པ་དང ། དགེ་འདུན་བཤོས་གསོལ་བ་དང ། ནད་པ་རྣམས་ཀྱི་རིམ་གྲོ་དང་བྱ་བ་མང་པོ་ཡོད་དོ། །དེ་དག་ཅང་མི་སྨྲ་བར་འདུག་གོ་།སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་ལུས་ཀྱིས་ཁུར་བཀུར་བར་མི་བྱའོ། །ཁྱེར་ན། འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་བཞུགས་སོ། །དགེ་སློང་རྣམས་བྱ་རྒོད་ཀྱི་ཕུང་པོའི་རི་ལ་འཛེག་ཅིང་འབབ་པ་ན། དེ་དག་འབྲེད་ཅིང་རྡེག་འཆོས་ཏེ་སྣད་པར་གྱུར་ཏོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་རྣམས་ཀྱིས་འཁར་བ་བཅང་བར་བྱའོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་འཁར་བ་བཅང་བར་བྱའོ། །ཞེས་བཀའ་སྩལ་པ་དང ། དྲུག་སྡེ་རྣམས་ཀྱིས་གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་བྱས་པའི་འཁར་བ། བསྲུབས་པ། བཀྲ་བ། ཉེ་བར་བཀྲ་བ་དག་བཅངས་པ་བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་འཕྱ་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།དེ་ལྟ་བས་
Tha93b
ན།་གཉིས་ཀྱིས་འཁར་བ་བཅང་བར་བྱ་སྟེ། རྒན་པོ་རྒས་ཏེ་ཉམ་ཆུང་བ་དང ། ནད་པ་སྦྱོར་མི་ནུས་པས་སོ། །བཅོམ་ལྡན་འདས་ཀྱིས་གཉིས་ཀྱིས་འཁར་བ་བཅང་བར་བྱ་སྟེ། རྒན་པོ་རྒས་ཏེ་ཉམ་ཆུང་བ་དང ། ནད་པ་སྦྱོར་མི་བཟོད་པས་སོ། །ཞེས་བཀའ་སྩལ་པ། རྒན་པོར་གཏོགས་པ་དང ། ནད་པར་གཏོགས་པ་རྣམས་ཀྱང་འཁར་བ་འཆང་བ་ཞུགས་པ་དང ། བཅོམ་ལྡན་འདས་ཀྱིས་བཀའ་སྩལ་པ། རྒན་པོ་དང ། ནད་པས་དགེ་འདུན་ལ་འཁར་བའི་སྡོམ་པ་གསོལ་བར་བྱ་ཞིང ། གང་ལ་དགེ་འདུན་གྱིས་འཁར་བའི་སྡོམ་པ་བྱིན་པ་དེས་འཁར་བ་བཅང་བར་བྱའོ། གསོལ་བ་ནི། འདི་ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་བསྒོ་ནས་དགེ་འདུན་ཐམས་ཅད་འདུས་ཤིང་འཁོད་པ་དང ། དགེ་སློང་རྒན་པོ་རྒས་ཏེ་ཉམ་ཆུང་བའམ། ནད་པ་སྦྱོར་མི་བཟོད་པས་རྒན་པའི་མཐར་ཙོག་ཙོག་པོར་འདུག་ལ་ཐལ་མོ་སྦྱར་ཏེ་འདི་སྐད་ཅེས་སྨྲ་བར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་རྒན་པོ་རྒས་ཏེ་ཉམ་ཆུང་བའམ། ནད་པ་སྦྱོར་མི་བཟོད་པ་མིང་འདི་ཞེས་བགྱི་བ། དགེ་འདུན་ལས་འཁར་བའི་སྡོམ་པ་གསོལ་ན། དགེ་འདུན་ཐུགས་བརྩེ་བ་ཅན་བཙུན་པ་རྣམས་ཀྱིས་ཐུགས་བརྩེ་བས་ཉེ་བར་བཟུང་སྟེ། བདག་དགེ་སློང་རྒན་པོ་རྒས་ཏེ་ཉམ་ཆུང་བའམ། ནད་པ་སྦྱོར་མི་བཟོད་པ་མིང་འདི་ཞེས་བགྱི་བ་ལ་འཁར་བའི་སྡོམ་པ་སྩལ་དུ་གསོལ། དེ་བཞིན་དུ་ལན་གཉིས་ལན་གསུམ་
Tha94a
༄#། །གྱི་བར་དུའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ནས་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་རྒན་པོ་རྒས་ཏེ་ཉམ་ཆུང་བའམ། ནད་པ་སྦྱོར་མི་བཟོད་པ་མིང་འདི་ཞེས་བགྱི་བ་འདི། དགེ་འདུན་ལས་འཁར་བའི་སྡོམ་པ་གསོལ་ཏེ། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་རྒས་ཏེ་ཉམ་ཆུང་བའམ། ནད་པ་སྦྱོར་མི་བཟོད་པ་མིང་འདི་ཞེས་བགྱི་བ་ལ་འཁར་བའི་སྡོམ་པ་སྩལ་ཏོ། །འདི་ནི། གསོལ་བའོ།། ལས་ནི། འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་རྒན་པོ་རྒས་ཏེ་ཉམ་ཆུང་བའམ། ནད་པ་སྦྱོར་མི་བཟོད་པ་མིང་འདི་ཞེས་བགྱི་བ། དགེ་འདུན་ལས་འཁར་བའི་སྡོམ་པ་གསོལ་ཏེ། དེའི་སླད་དུ་དགེ་འདུན་གྱིས་དགེ་སློང་རྒན་པོ་རྒས་ཏེ་ཉམ་ཆུང་བའམ། ནད་པ་སྦྱོར་མི་བཟོད་པ་མིང་འདི་ཞེས་བགྱི་བ་ལ་འཁར་བའི་སྡོམ་པ་སྩོལ་ན། ཚེ་དང་ལྡན་པ་གང་དག་།དགེ་སློང་རྒན་པོ་རྒས་ཏེ་ཉམ་ཆུང་བའམ། ནད་པ་སྦྱོར་མི་བཟོད་པ་མིང་འདི་ཞེས་བགྱི་བ་ལ་འཁར་བའི་སྡོམ་པ་སྩལ་བར་བཟོད་པ་དེ་དག་ནི། ཅང་མ་གསུངས་ཤིག་།གང་དག་མི་བཟོད་པ་དེ་དག་ནི། གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་རྒན་པོ་རྒས་ཏེ་ཉམ་ཆུང་བའམ། ནད་པ་སྦྱོར་མི་བཟོད་པ་མིང་
Tha94b
འདི་ཞེས་བགྱི་བ་ལ་འཁར་བའི་སྡོམ་པ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གང་ལ་དགེ་འདུན་གྱིས་འཁར་བའི་སྡོམ་པ་བྱིན་པ་དེས་འཁར་བ་བཅང་པར་བྱ་སྟེ། འདི་ལ་འགྱོད་པར་མི་བྱའོ།། །།འདུལ་བ་ཕྲན་ཚེགས་ཀྱི་གཞི། བམ་པོ་དྲུག་པ། སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་བཞུགས་སོ། །དགེ་སློང་གནས་བརྟན་གནས་བརྟན་རྣམས་དང ། རླུང་ནད་ཅན་རྣམས་བྱ་རྒོད་ཕུང་པོའི་རི་ལ་འཛེག་པ་དང་འབབ་པ་ན་འདྲེད་ཅིང་རྡེག་འཆོས་ནས་སྣད་པར་ཡང་གྱུར། བྱ་མ་བུམ་དང ། རིལ་བ་སྤྱི་བླུགས་དག་ཀྱང་ཆག་གོ། སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་རྣམས་ཀྱིས་དྲ་བ་བཅང་བར་བྱའོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་དྲ་བ་བཅང་བར་བྱའོ། །ཞེས་བཀའ་སྩལ་པ་དང ། དྲུག་སྡེ་རྣམས་ཀྱིས་ཚོན་སྣ་ལྔ་པའི་སྐུད་པ་ལས་བྱས་པའི་དྲ་བ་བཅངས་པ་དང ། བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་འཕྱ་བར་བྱེད་དོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཚོན་སྣ་ལྔ་པའི་སྐུད་པ་ལས་བྱས་པའི་དྲ་བ་ཅང་བར་མི་བྱའི། །འོན་ཀྱང་ཚོན་སྣ་གཅིག་པ་ལས་བྱའོ། །བཅོམ་ལྡན་འདས་ཀྱིས་ཚོན་སྣ་གཅིག་ལས་བྱས་པའི་དྲ་བ་བཅང་བར་བྱའོ། །ཞེས་བཀའ་
Tha95a
༄#། །སྩལ་པ་དང ། རྒས་པས་ཉམ་ཆུང་བར་གཏོགས་པ་རྣམས་དང ། རླུང་ནད་ཅན་དུ་གཏོགས་པ་རྣམས་ཀྱང་དྲ་བ་འཆང་བ་ལ་ཞུགས་ནས་བཅོམ་ལྡན་འདས་ཀྱིས་བཀའ་སྩལ་པ། རྒན་པོ་དང ། རླུང་ནད་ཅན་གྱིས་ཀྱང་དགེ་འདུན་ལ་དྲ་བའི་སྡོམ་པ་གསོལ་བར་བྱ་ཞིང ། གང་ལ་དགེ་འདུན་གྱིས་དྲ་བའི་སྡོམ་པ་བྱིན་པ་དེས་དྲ་བ་བཅང་བར་བྱའོ། ། གསོལ་པ་ནི་འདི་ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་བསྒོ་ནས་དགེ་འདུན་ཐམས་ཅད་འདུས་ཏེ་འདུག་པ་དང ། དགེ་སློང་རྒན་པོ་རྒས་ཏེ་ཉམ་ཆུང་བའམ། རླུང་ནད་ཅན་གྱིས་རྒན་པའི་མཐར་ཙོག་ཙོག་པོར་འདུག་སྟེ་ཐལ་མོ་སྦྱར་ནས་ཚིག་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་རྒན་པོ་རྒས་ཏེ་ཉམ་ཆུང་བའམ། རླུང་ནད་ཅན་མིང་འདི་ཞེས་བགྱི་བ་དགེ་འདུན་ལས་དྲ་བའི་སྡོམ་པ་གསོལ་ན། དགེ་འདུན་བཙུན་པ་ཐུགས་བརྩེ་བ་ཅན་རྣམས་ཀྱིས་ཐུགས་བརྩེ་བ་ཉེ་བར་བཟུང་སྟེ་བདག་དགེ་སློང་རྒན་པོ་རྒས་ཏེ་ཉམ་ཆུང་པའམ། རླུང་ནད་ཅན་མིང་འདི་ཞེས་བགྱི་བ་ལ་དྲ་བའི་སྡོམ་པ་སྩལ་དུ་གསོལ། དེ་བཞིན་དུ་ལན་གཉིས། ལན་གསུམ་གྱི་བར་དུའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ནས་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་རྒན་པོ་རྒས་ཏེ་ཉམ་
Tha95b
ཆུང་བའམ། རླུང་ནད་ཅན་མིང་འདི་ཞེས་བགྱི་བ་འདི། དགེ་འདུན་ལས་དྲ་བའི་སྡོམ་པ་གསོལ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་རྒན་པོ་རྒས་ཏེ་ཉམ་ཆུང་བའམ། རླུང་ནད་ཅན་མིང་འདི་ཞེས་བགྱི་བ་ལ་དྲ་བའི་སྡོམ་པ་སྩོལ་ཏོ། །འདི་ནི། གསོལ་བའོ། །ལས་ནི། འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་རྒན་པོ་རྒས་ཏེ་ཉམ་ཆུང་བའམ་རླུང་ནད་ཅན་མིང་འདི་ཞེས་བགྱི་བ། དགེ་འདུན་ལས་དྲ་བའི་སྡོམ་པ་གསོལ་ཏེ་དེའི་སླད་དུ་དགེ་འདུན་གྱིས་དགེ་སློང་རྒན་པོ་རྒས་ཏེ་ཉམ་ཆུང་བའམ། རླུང་ནད་ཅན་མིང་འདི་ཞེས་བགྱི་བ་ལ་དྲ་བའི་སྡོམ་པ་སྩོལ་ན། ཚེ་དང་ལྡན་པ་གང་དག་དགེ་སློང་རྒན་པོ་རྒས་ཏེ་ཉམ་ཆུང་བའམ། རླུང་ནད་ཅན་མིང་འདི་ཞེས་བགྱི་བ་ལ་དྲ་བའི་སྡོམ་པ་སྩལ་བར་བཟོད་པ་དེ་དག་ནི། ཅང་མ་གསུངས་ཤིག་།གང་དག་མི་བཟོད་པ་དེ་དག་ནི། གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་རྒན་པོ་རྒས་ཏེ་ཉམ་ཆུང་བའམ། རླུང་ནད་ཅན་མིང་འདི་ཞེས་བགྱི་བ་ལ་དྲ་བའི་སྡོམ་པ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གང་ལ་དགེ་འདུན་གྱིས་དྲ་བའི་སྡོམ་པ་བྱིན་པར་གྱུར་བ་དེས་དྲ་བ་བཅང་བར་བྱ་སྟེ། འདི་ལ་འགྱོད་པར་མི་བྱའོ། །དགེ་སློང་གཞན་དག་ཅིག་ལ་འཁར་བ་ཡང་དགོས། དྲ་བ་ཡང་དགོས་ནས་དེ་དག་ལ་དགེ་སློང་རྣམས་
Tha96a
༄#། །ཀྱིས་འཁར་བ་དང ། དྲ་བའི་སྡོམ་པ་སོ་སོར་བྱིན་པ་དང ། བཅོམ་ལྡན་འདས་ཀྱིས་དཀའ་སྩལ་པ། འཁར་བ་དང ། དྲ་བའི་སྡོམ་པ་གཅིག་ཅར་དུ་སྔ་མ་བཞིན་སྦྱིན་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་པ་ན་བཞུགས་སོ། །མཉན་ཡོད་ན་དགེ་སློང་ཞིག་འདུག་པ་དེས་སྒོག་སྐྱ་ཟོས་ནས་དེས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ་།བཅོམ་ལྡན་འདས་ཀྱིས་དགེ་སློང་དེ་ལ་བཀའ་སྩལ་པ། དགེ་སློང ། དགེ་སློང ། ཁྱོད་ལ་ཆོས་བསྟན་གྱི། རྣ་བ་གཏོད་ལ་འདུག་ཅིག་།དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ་།བཅོམ་ལྡན་འདས་ཀྱིས་དེ་ལ་ཆོས་བསྟན་པར་བརྩམས་ཏེ་ཇི་ལྟ་ཇི་ལྟར་བཅོམ་ལྡན་འདས་ཀྱིས་དེ་ལ་ཆོས་བསྟན་པ་དེ་ལྟ་དེ་ལྟར་དགེ་སློང་དེ་བཅོམ་ལྡན་འདས་ལ་དྲིས་གནོད་པར་གྱུར་ན་མི་རུང་ངོ ། །སྙམ་ནས་ཁ་ལོགས་ཤིག་ཏུ་ལྟའོ། །ལན་གཉིས། ལན་གསུམ་དུ་བཅོམ་ལྡན་འདས་ཀྱིས་དགེ་སློང་དེ་ལ་འདི་སྐད་ཅེས། དགེ་སློང ། ཁྱོད་ལ་ཆོས་བསྟན་གྱི། རྣ་གཏོད་ཅིག་།ཅེས་བཀའ་སྩལ་ན། དགེ་སློང་དེ་ལན་གཉིས། ལན་གསུམ་དུ་ཡང་ཁ་གཞན་དུ་བལྟས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་
Tha96b
སྤྱན་སྔ་ནས་སོང་ངོ ། །སངས་རྒྱས་བཅོམ་ལྡན་འདས་རྣམས་ནི། མཁྱེན་བཞིན་དུ་རྨོད་པར་མཛད་པ་ཡིན་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ། ཅིའི་ཕྱིར་ངས་ཇི་ལྟ་ཇི་ལྟར་ཆོས་བསྟན་པ་དེ་ལྟ་དེ་ལྟར་དགེ་སློང་དེ་ཁ་གཞན་དུ་ལྟ། དེས་གསོལ་པ། བཙུན་པ། དགེ་སློང་དེས་སྒོག་སྐྱ་འཚལ་ཏོ། །ཀུན་དགའ་བོ། དགེ་སློང་དག་གང་གིས་ན།་བདེན་པ་རྣམས་ཀྱི་བར་ཆད་དུ་འགྱུར་བ་སྒོག་སྐྱ་ཟ་བ་ལྟ། བཅོམ་ལྡན་འདས། འཚལ་ལགས་སོ། །ཀུན་དགའ་བོ། གལ་ཏེ་དགེ་སློང་འདིས་དེ་རིང་སྒོག་སྐྱ་ཟོས་བར་མ་གྱུར་ན། དེང་ཉིད་དུ་འདིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ། ཡེ་ཤེས་ཀྱི་རྡོ་རྗེས་བཅོམ་ལྡན་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པར་འགྱུར་རོ། །ཀུན་དགའ་བོ། དེ་ལྟ་བས་ན། དགེ་སློང་གིས་ད་ཕྱིན་ཆད་སྒོག་སྐྱ་དང ། ཀུན་དོང་དང ། ཀེའུ་ཡོངས་སུ་ལོངས་སྤྱད་པར་མི་བྱ་སྟེ། ཡོངས་སུ་ལོངས་སྤྱད་ན། འགལ་ཚབས་ཅན་དུ་འགྱུར་རོ། །ཡང་དེའི་ཚེ། ཚེ་དང་ལྡན་པ་ཤཱ་རིའི་བུ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་བསམ་པ། དགེ་སློང་འདིས་དེ་རིང་བདེན་པ་དག་མ་མཐོང་ན། རེ་ཞིག་སང་མཐོང་བར་འགྱུར་རམ་བལྟའོ། །སྙམ་ནས་སེམས་པ་ལ་ཞུགས་པ་དང ། མ་མཐོང་ངོ ། །དེས་རབ་ཀྱི་མཐའ་བའི་བསམ་གཏན་བཞི་བ་ལ་རྣམ་པར་བལྟས་ནས་དུས་ཇི་ཙམ་ན་མཐོང་བར་འགྱུར་བ་སེམས་པ་ལ་ཞུགས་ན། འོན་ཀྱང་མ་མཐོང་སྟེ། ཚེ་དང་ལྡན་པ་ཤཱ་རིའི་བུ་
Tha97a
༄#། །ཏིང་ངེ་འཛིན་དེ་ལས་ལངས་ནས་ཚིགས་སུ་བཅད་དེ་སྨྲས་པ། དལ་བའི་མཆོག་འདི་འདིས་བོར་ནས། །འདི་ཡིས་འདི་ན་བདེན་པ་དག་།ནམ་ཡང་ཤིན་ཏུ་མཐོང་བར་ནི། །མི་འགྱུར་བ་ཡི་གནས་དེ་ཡོད། །དེ་ནས་བཅོམ་ལྡན་འདས་ཀྱི་ཐུགས་ཀྱིས་ཚེ་དང་ལྡན་པ་ཤཱ་རིའི་བུའི་སེམས་མཁྱེན་ནས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ།་ཁྱོད་སངས་རྒྱས་ཀྱི་ཡུལ་ལ་ལག་འཇུག་པར་མ་བྱེད་ཅིག་།འདི་ནི། འདི་ནས་ཉན་ཐོས་དང ། རང་སངས་རྒྱས་ཀྱི་ཡེ་ཤེས་ཀྱི་ཡུལ་ལས་འདས་པའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་བ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཐམས་ཅད་ཟིལ་གྱིས་གནོན་པ་ཞེས་བྱ་བའི་སྟོན་པ་འབྱུང་བར་འགྱུར་ཏེ། དེའི་བསྟན་པ་ལ་འདི་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །དེ་སྐད་ཅེས་གསུངས་ནས་བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི། དགེ་སློང་དག་སྒོག་སྐྱ་ཟ་བ་ལས་གྱུར་གྱི། དེ་ལྟ་བས་ན། དགེ་སློང་གིས་སྒོག་སྐྱ་བཟའ་བར་མི་བྱའོ། །ཟ་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་སྒོག་སྐྱ་བཟའ་བར་
Tha97b
མི་བྱའོ། །ཞེས་བཀའ་སྩལ་པ་དང ། དགེ་སློང་ཞིག་ན་བ་དེ། སྨན་པའི་དྲུང་དུ་སོང་སྟེ་ནད་མེད་ཅིག་ཅེས་བྱས་ནས་སྨྲས་པ། བཞིན་བཟང ། ཁོ་བོ་ལ་ནད་འདི་ལྟ་བུ་ཞིག་བྱུང་ན། སྨན་སྟོན་ཅིག་།སྨན་པས་སྨྲས་པ། འཕགས་པ། སྒོག་སྐྱ་གསོལ་ཅིག་དང་ཁྱོད་སོས་པར་འགྱུར་རོ། །དེས་སྨྲས་པ། བཞིན་བཟང ། བཅོམ་ལྡན་འདས་ཀྱིས་མ་གནང་ངོ ། །འཕགས་པ། ཁྱོད་ཀྱི་སྨན་འདི་ཡིན་ཏེ། གཞན་གྱིས་ནི། སོས་པར་མི་ནུས་སོ། །སྐབས་དེ། དགེ་སློང་རྣམས་ལ་སྨྲས་སོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྨན་པས་དགེ་སློང་ཁྱོད་ཀྱི་སྨན་འདི་ཡིན་ཏེ། གཞན་གྱིས་ནི། སོས་པར་མི་ནུས་སོ། །ཞེས་ཟེར་ན། བཟའ་བར་བྱ་སྟེ། འདི་ལ་འགྱོད་པར་མི་བྱའོ། །བཅོམ་ལྡན་འདས་ཀྱིས་དགེ་སློང་ནད་པས་སྨན་པའི་ལུང་གིས་སྒོག་སྐྱ་བཟའོ། །ཞེས་བཀའ་སྩལ་པ་དང ། དགེ་སློང་ནད་པས་སྒོག་སྐྱ་ཟོས་ནས་གཙུག་ལག་ཁང་ལ་ཡང་ལོངས་སྤྱད་པར་བྱེད། གནས་མལ་དང ། སྣམ་ཕྱིས་དང ། ཆབ་ཁུང་དུ་ཡང་འཇུག་།དགེ་འདུན་གྱི་ནང་དུ་ཡང་འགྲོ། བྲམ་ཟེ་དང ། ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས་སྟོན། མཆོད་རྟེན་ལ་ཡང་ཕྱག་བྱེད། བྲམ་ཟེ་དང ། ཁྱིམ་བདག་གི་ཁྱིམ་དག་ཏུ་ཡང་ཉེ་བར་འགྲོ། སྐྱེད་མོས་ཚལ་དང ། འདུན་ས་དང ། ལྷ་ཁང་དང ། སྐྱེ་བོས་གང་བའི་ཕྱོགས་གཞན་དག་ཏུ་ཡང་འདུག་པ་དང ། བྲམ་
Tha98a
༄#། །ཟེ་དང ། ཁྱིམ་བདག་རྣམས་ཀྱིས་དྲི་ཚོར་ནས་འཕྱ་སྨོད་ཁ་ཟེར་ཞིང ། དགེ་སྦྱོང་ཤཱཀྱའི་བུ་རྣམས་ཀྱི་དགེ་སྦྱོང་གི་ཚུལ་ཉམས། ཚངས་པའི་ཚུལ་ཉམས་ཏེ། ད་ནི།་རབ་ཏུ་བྱུང་བ་རྣམས་སྒོག་སྐྱ་ཟའོ། །ཞེས་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ངས་དགེ་སློང་སྒོག་སྐྱ་ཟ་བའི་ཀུན་ཏུ་སྤྱད་པའི་ཆོས་བཅའ་བར་བྱ་སྟེ། དགེ་སློང་སྒོག་སྐྱ་ཟ་བས་སྒོག་སྐྱ་ཟ་བཞིན་དུ་གཙུག་ལག་ཁང་ལ་ཡོངས་སུ་ལོངས་སྤྱད་པར་མི་བྱ། གནས་མལ་ལ་མ་ཡིན། སྣམ་ཕྱི་སར་འཇུག་པར་མི་བྱ། ཆབ་ཁུང་སར་མ་ཡིན། དགེ་འདུན་གྱི་ནང་དུ་འགྲོ་བར་མི་བྱ། བྲམ་ཟེ་དང་ཁྱིམ་བདག་འོངས་ཤིང་ལྷགས་པ་རྣམས་ལ་ཆོས་བསྟན་པར་མི་བྱ། མཆོད་རྟེན་ལ་ཕྱག་མི་བྱ། བྲམ་ཟེ་དང་ཁྱིམ་བདག་རྣམས་ཀྱི་ཁྱིམ་དུ་ཉེ་བར་འགྲོ་བར་མི་བྱ། སྐྱེད་མོས་ཚལ་དང ། འདུན་ས་དང ། ལྷ་ཁང་དང ། སྐྱེ་བོས་གང་བ་གཞན་དག་ཏུ་གནས་པར་མི་བྱའི། ཕྱོགས་དབེན་པ་གང་དུ་གཞན་དག་གིས་མཐོང་ན། མ་དད་པ་སྐྱེ་བར་མི་འགྱུར་བར་བཟའ་བར་བྱའོ། །གང་གི་ཚེ་བྱ་བ་ཟིན་པར་གྱུར་པ་དེའི་ཚེ་ཕྱོགས་དེ་ཉིད་དུ་ཞག་བདུན་འདུག་པར་བྱའོ། །ཀུན་དོང་ན་ནི། ཞག་གསུམ། ཀེའུ་ན་ནི། ཞག་གཅིག་གོ་།དེ་ནས་ཁྲུས་བྱས་ལ་ཆོས་གོས་དག་ཀྱང་བཀྲུ་བར་བྱ་ཞིང ། བདུག་པ་དག་གིས་བདུག་པར་
Tha98b
བྱའོ། །དེ་ནས་དྲི་ང་བ་མེད་པ་དང ། གཙུག་ལག་ཁང་དུ་འཇུག་པར་བྱ་ཞིང ། ཇི་ལྟར་བཀག་པ་ཡང་བྱའོ། །སྒོག་སྐྱ་ཟ་བའི་དགེ་སློང་གིས་ཀུན་ཏུ་སྤྱད་པའི་ཆོས་ཇི་ལྟར་བཅས་པ་རྣམས་ཡང་དག་པར་བླངས་ཏེ་མི་གནས་ན། འགལ་ཚབས་ཅན་དུ་འགྱུར་རོ། །ཕྲན་ཚེགས་ལས་སྒོ་དང་པོ་རྫོགས་སོ།། །།བསྡུས་པའི་སྡོམ་ནི། ཆན་པས་འབྲེག་དང་གདུགས་དང་ནི། །བེའུ་རས་དང་ནི་རྒྱན་སྤེལ་མ། །ལེན་དང་ཚོགས་དང་ཁྲུས་དང་ནི། །གཅིན་དང་སྒོ་འཕར་སྤོ་བའོ། །སྡོམ་ནི། ཆན་པས་འབྲེག་དང་མདོམས་དང་ནི། །དེ་བཞིན་བྱིན་པ་ཉིད་དང་ནི། ། ཁྲི་དང་རྩ་སྟན་གཅིག་དང་ནི། །ཁྱིམ་ན་གནས་དང་བགོ་བ་མིན། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཁྱིམ་བདག་མགོན་མེད་ཟས་སྦྱིན་གྱིས་ཕྱོགས་བཞིའི་དགེ་འདུན་ལ་རྒྱལ་བུ་རྒྱལ་བྱེད་ཀྱི་ཚལ་ཕུལ་བ་དེའི་ཚེ་དེས་འཕགས་པ་རྣམས་ཀྱི་སྐྲ་དང ། ཁ་སྤུ་བྲེགས་ཤིག་ཅེས་འབྲེག་མཁན་གྱི་མི་བཏང་བ་དང་ཞེས་བྱ་བའི་བར་སྔ་མ་བཞིན་ནོ། །ཉེ་དགའ་བོས་སྨྲས་པ། བཞིན་བཟང ། ཁྱོད་སྐྲ་ཆན་པས་འབྲེག་ཤེས་སམ། དེས་སྨྲས་པ། འཕགས་པ། དེ་ཉིད་བདག་གི་བཟོ་ལགས་སོ། །བཞིན་བཟང ། གལ་ཏེ་དེ་ལྟ་ན། ཚུར་ཤོག་།བྲེགས་ཤིག་།དེས་སྐྲ་ཆན་པས་བྲེགས་པ་དང ། ཉེ་དགའ་བོས་སྨྲས་པ། ད་དུང་བྲེགས་ཤིག་།དེས་ཡང་བྲེགས་པ་དང །
Tha99a
༄#། །དེས་སྨྲས་པ། ད་དུང་ཡང་བྲེགས་ཤིག་།དེས་ཡང་བྲེགས་སོ། །དེ་བཞིན་དུ་ཇི་ཙམ་ཉི་མ་ནུབ་ཀྱི་བར་དུ་མ་བཏང་ནས་དེའི་འོག་ཏུ་འདི་སྐད་ཅེས་སྨྲས་ཏེ། བཀྲེན་པ། ཁྱོད་ཅི་ཡང་མི་ཤེས་པ་ཞིག་།འདི་ཁོ་ན་བཞིན་མཉམ་པར་བྱོས་ཏེ་སོང་ཞིག་ཅེས་བྱ་བའི་བར་སྔ་མ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་སྐྲ་ཆན་པས་བྲེག་པར་མི་བྱའོ། །དགེ་སློང་སྐྲ་ཆན་པས་འབྲེག་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་སྐྲ་ཆན་པས་བྲེག་པར་མི་བྱའོ། །ཞེས་བཀའ་སྩལ་པ་དང ། དགེ་སློང་དག་གི་མགོ་ལ་རྨ་བྱུང་ནས་སྤུ་གྲིས་རེག་པ་ན་དེ་དག་སྣང་བའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། རྨའི་ཐན་ཀོར་གྱི་སྐྲ་ཆན་པས་བྲེག་པར་བྱ་ཞིང ། ལྷག་མ་རྣམས་སྤུ་གྲིས་བྲེག་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཡང་ཁྱིམ་བདག་མགོན་མེད་ཟས་སྦྱིན་གྱིས་འབྲེག་མཁན་གྱི་མི་བཏང་སྟེ་ཞེས་བྱ་བའི་བར་སྔ་མ་བཞིན་ནོ། །བཞིན་བཟང ། མདོམས་ཀྱི་ཕྱོགས་ཀྱི་སྤུ་འབྲེག་ཤེས་སམ། དེས་སྨྲས་པ། འཕགས་པ། དེ་ཉིད་བདག་གི་བཟོ་ལགས་སོ། །བཞིན་བཟང ། གལ་ཏེ་ན་དེ་ལྟ་ན། ཚུར་ཤོག་།བྲེགས་ཤིག་།འཕགས་པ། ཇི་
Tha99b
འདྲ་བར་བྲེག་།བཞིན་བཟང ། མཛེས་པར་བྲེགས་ཤིག་།དེས་བྲེག་པར་བརྩམས་པ་དང ། ཉེ་དགས་སྨྲས་པ། བཞིན་བཟང ། འདི་ལྟར་བྱོས་ཤིག་།དེས་དེ་བཞིན་བྱས་པ་དང ། ཡང་སྨྲས་པ། གཞན་འདི་ལྟ་བུར་ཡང་བྱོས་ཤིག་།ཅེས་དེས་དེ་ཇི་ཙམ་ཉི་མ་ནུབ་ཀྱི་བར་དུ་མ་བཏང་ནས་དགེ་སྦྱོང་ཤཱཀྱའི་སྲས་རྣམས་ཀྱི་དགེ་སྦྱོང་གི་ཚུལ་ནི། ཉམས། ཚངས་པའི་ཚུལ་ནི། ཉམས་ཏེ། ད་ནི། གསང་བའི་ཕྱོགས་ཀྱི་སྤུ་ཡང་འབྲེག་པར་བྱེད་དོ། །ཞེས་སྨོད་པར་བྱེད། གཞོགས་འཕྱས་བྱེད། ཁ་ཟེར་བར་བྱེད་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་མདོམས་ཀྱི་ཕྱོགས་ཀྱི་སྤུ་བྲེག་པར་མི་བྱའོ། །དགེ་སློང་མདོམས་ཀྱི་ཕྱོགས་ཀྱི་སྤུ་འབྲེག་པར་བྱེད་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་མདོམས་ཀྱི་ཕྱོགས་ཀྱི་སྤུ་བྲེག་པར་མི་བྱའོ། །ཞེས་བཀའ་སྩལ་པ་དང ། དགེ་སློང་དག་གི་མདོམས་ཀྱི་ཕྱོགས་སུ་རྨ་བྱུང་བ་དང ། དགེ་སློང་དག་འགྱོད་ནས་སྤུ་འབྲེག་པར་མི་བྱེད་དོ། །དགེ་སློང་གཞན་དག་ལ་ཡང་སྲིན་བུ་བྱུང་སྟེ། དེ་དག་དེའི་གནོད་པས་དགེ་བའི་ཕྱོགས་ཀྱི་བྱ་བ་མི་ནུས་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གནས་བརྟན་གནས་བརྟན་དག་ལ་བསྟན་ནས་རྨའམ། སྲིན་བུའི་ཕྱིར་ནི། མདོམས་
Tha100a
༄#། །ཀྱི་ཕྱོགས་ཀྱི་སྤུ་བྲེག་པར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཡང་ཁྱིམ་བདག་མགོན་མེད་ཟས་སྦྱིན་གྱིས་འབྲེག་མཁན་གྱི་མི་བཏང་བ་དང་ཞེས་བྱ་བའི་བར་སྔ་མ་བཞིན་ནོ། །བཞིན་བཟང ། ཁྱོད་བྱིན་སྤུ་འབྲེག་ཤེས་སམ། འཕགས་པ། དེ་ཉིད་བདག་གི་བཟོ་ལགས་སོ། །བཞིན་བཟང ། གལ་ཏེ་དེ་ལྟ་ན། ཚུར་ཤོག། བྲེགས་ཤིག་།འཕགས་པ། ཅི་འདྲ་བར་བྲེག་པར་བགྱི། བཞིན་བཟང ། མཛེས་པར་བྲེགས་ཤིག་།དེས་བྲེག་པར་བརྩམས་པ་དང ། ཉེ་དགའ་བོས་སྨྲས་པ། བཞིན་བཟང ། འདི་ལྟར་བྱོས་ཤིག་།དེས་དེ་བཞིན་བྱས་པ་དང ། ཡང་སྨྲས་པ།་གཞན་འདི་ལྟར་ཡང་བྱོས་ཤིག་།དེས་དེ་ཇི་ཙམ་ནམ་སྲོས་ཀྱི་བར་དུ་མ་བཏང་བས་ཁྱིམ་བདག་མགོན་མེད་ཟས་སྦྱིན་གྱིས་དེ་ལ་ཞེས་བྱ་བ་ནས་དྲིས་པ། ཞེས་བྱ་བའི་བར་སྔ་མ་བཞིན་ནོ། །དེས་ཇི་ལྟར་གྱུར་པ་སྨྲས་པ་དང ། དེ་སྨོད་པར་བྱེད་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་བྱིན་སྤུ་བྲེག་པར་མི་བྱའོ། །དགེ་སློང་བྱིན་སྤུ་འབྲེག་པར་བྱེད་ན། འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་
Tha100b
རྫིང་གི་འགྲམ་ཁང་པ་བརྩེགས་པ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གིས་བྱིན་སྤུ་བྲེག་པར་མི་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ཀྱི་བརླ་ལ་རྨ་བྱུང་ཞིང ། དགེ་སློང་གཞན་དག་ལ་སྲིན་བུ་བྱུང་ནས་དེ་དག་དེའི་གནོད་པས་དགེ་བའི་ཕྱོགས་བྱ་བར་མི་ནུས་པར་གྱུར་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། རྨ་བྱུང་བའི་ཕྱིར་རམ། སྲིན་བུའི་ཕྱིར་ནི། བྱིན་སྤུ་བྲེག་པར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་ཁྲི་གཅིག་ལ་ཉལ་བར་བྱེད་ཅིང ། དེ་དག་དེར་ཉལ་ནས་ཀུ་རེ་བྱེད། རྩེ་བར་བྱེད། ཅ་ཅོ་སྨྲ་བར་བྱེད། རྒོད་པ་དང ། འཕྱར་གཡེང་དང ། ལུས་ལ་རྡེག་པར་བྱེད་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི། དགེ་སློང་རྣམས་ཁྲི་གཅིག་ལ་ཉལ་བར་བྱེད་པ་ལས་གྱུར་པས། དེའི་ཕྱིར་དགེ་སློང་གཞན་དང་ལྷན་ཅིག་ཁྲི་གཅིག་ལ་ཉན་དུ་མི་གཞུག་གོ་།སྙམ་དུ་དགོངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་།ཁྱེད་ཀྱིས་དེང་ཕྱིན་ཆད་དགེ་སློང་གིས་ཁྲི་གཅིག་ལ་ཉལ་བར་མི་བྱའོ། །བྱེད་ན། འགལ་ཚབས་ཅན་དུ་འགྱུར་རོ། །
Tha101a
༄#། །བཅོམ་ལྡན་འདས་ཀྱིས་དགེ་སློང་གིས་ཁྲི་གཅིག་ལ་ཉལ་བར་མི་བྱའོ། །ཞེས་བཀའ་སྩལ་པ་དང ། ཇི་ཙམ་ན་དགེ་སློང་མང་པོ་རྣམས་ལྗོངས་རྒྱུ་ཞིང་དོང་སྟེ། ལྗོངས་རྒྱུ་བ་ན་རི་བྲག་གཅིག་ཏུ་ཕྱིན་ནས་དེ་དག་གིས་དེར་ཁྲི་བརྙས་པ་དང་དེ་དག་གིས་ཁྲི་དག་བྱིན་ནོ། །དེ་རྣམས་ཀྱིས་སྨྲས་པ། འདི་དག་ཉུང་གི། གཞན་ཡང་བསྣམས་ཏེ་སྤྱོན་ཅིག་།དེ་དག་གིས་སྨྲས་པ། འཕགས་པ་དག། བདག་ཅག་ནི། ཁྲི་རེ་རེ་ལ་སྐྱེ་བོ་མང་པོ་དག་ཉལ་བར་བགྱིད་ན། ཁྱེད་གཞན་ཡང་གཡོར་རམ། རེ་རེ་ལ་གཉིས་སམ། གསུམ་གཟིམས་པར་མཛོད་ཅིག་།དེ་རྣམས་ཀྱིས་སྨྲས་པ། བཅོམ་ལྡན་འདས་ཀྱིས་ཁྲི་གཅིག་ལ་གཉིས་སམ། གསུམ་ཉལ་དུ་མ་གནང་ན། ཇི་ལྟར་ཉལ་བར་བྱ། དེ་དག་གིས་སྨྲས་པ། འཕགས་པ་དག་།ཁྲི་གཞན་ནི། མ་མཆིས། དེ་སྐད་སྨྲས་པས་ཅང་མི་སྨྲ་བར་འཁོད་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གང་དག་ངོ་ཚ་ཤེས་ཤིང་འགྱོད་པ་དང་ལྡན་ལ། བསླབ་པ་འདོད་པ་དེ་དག་གིས་དྲན་པ་ཉེ་བར་བཞག་སྟེ་གདིང་བ་བཏིང་ལ་བར་དུ་ཆོས་གོས་ཀྱི་གཏུར་བུའམ། ལྷུང་བཟེད་ཀྱི་སྣོད་དག་བཅུག་ལ་ཉལ་བར་བྱ་སྟེ། འདི་ལ་འགྱོད་པར་མི་བྱའོ། །ཁྲི་ལ་ཇི་ལྟ་བར་རྩཝ་སྟན་དང ། གཞན་དག་ལ་ཡང་དེ་དང་འདྲའོ། །སངས་རྒྱས་བཅོམ་ལྡན་
Tha101b
འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་མང་པོ་རྣམས་ལྗོངས་རྒྱུ་ཞིང་དོང་བ་དང ། རི་བྲག་ཅིག་ཏུ་ཕྱིན་ནས་དེ་རྣམས་ཀྱིས་ཁྱིམ་བདག་ཅིག་ལས་བསྟི་གནས་བརྙས་སོ། །གྲང་བའི་དུས་ལ་བབ་པས་དེ་རྣམས་ཀྱིས་གོས་བརྙས་པ་དང ། བྲམ་ཟེ་དང ། ཁྱིམ་བདག་རྣམས་ཀྱིས་འདི་དག་ནི། རབ་ཏུ་བྱུང་བ་ཡིན་ནོ། །སྙམ་སྟེ། སྙིང་རྗེ་ཉེ་བར་བཞག་སྟེ་གོས་དག་བྱིན་པ་དང ། གང་གིས་གང་ཐོབ་པ་དས་དེ་གྱོན་ཏེ་ཉལ་ནས་དགེ་སློང་གཞན་དག་གྲང་བས་སྦྲེབས་པར་གྱུར་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གང་གིས་གང་ཐོབ་པ་དེ་དག་ཉིད་ཀྱིས་བགོ་བར་མི་བྱའི། ཐམས་ཅད་ཀྱིས་བགོ་བར་བྱ་སྟེ། གཅིག་རྙེད་པར་གྱུར་པ་གང་ཡིན་པ་དེས་ཐམས་ཅད་ཀྱི་སྟེང་དུ་རྒན་རིམ་བཞིན་ཇི་ཙམ་ཡོག་པ་དག་བ་པར་བྱའོ། །ཇི་ཙམ་ན་རི་བྲག་གཞན་ཞིག་ཏུ་སོང་བ་དང་གོས་གཅིག་ཅིག་རྙེད་ནས་ད་དག་གིས་སྟེང་དུ་གཡོགས་པ་ན། ཉེ་དགས་དེ་གྱོན་ཏེ་འཆག་ཏུ་སོང་བ་དང ། དགེ་སློང་རྣམས་གྲང་བས་སྡུག་བསྔལ་བར་གྱུར་ནས་སྨྲས་པ། བཙུན་པ་ཉེ་དགའ་བོ། བདག་ཅག་ནི། གྲང་བས་སྡུག་བསྔལ་ན། ཁྱོད་འབའ་ཞིག་གྱོན་ནས་འཆག་གམ། དེས་སྨྲས་པ། ཁོ་བོས་བཀག་གམ་ཅི། ཁྱེད་ཀྱང་ཅི་ཕྱིར་མི་འཆག་།དེ་རྣམས་གྲང་བའི་སྡུག་བསྔལ་གྱིས་མཚན་འདས་པར་གྱུར་
Tha102a
༄#། །པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། འཆག་པ་གང་ཡིན་པ་དེས་གང་ཟག་གི་གོས་བགོས་ཏེ་བཅག་པར་མི་བྱའོ། །གཞན་གྱིས་འཆག་ན། འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གྲང་བའི་དུས་ལ་བབ་པས་དགེ་སློང་རྣམས་གྲང་བའི་གནོད་པས་གློས་ཕབ་སྟེ་འདུག་གོ། ཇི་ཙམ་ན་ཁྱིམ་བདག་མགོན་མེད་ཟས་སྦྱིན་གཙུག་ལག་ཁང་དུ་འོངས་བ་དང ། དེས་དེ་དག་མཐོང་ནས་སྨྲས་པ། འཕགས་པ་དག་།ཅིའི་སླད་དུ་གཅིག་ཏུ་བརྩོན་པའི་གསུང་རབ་ལ་གློས་ཕབ་སྟེ་བཞུགས་ཤིང ། དགེ་བའི་ཕྱོགས་དག་མི་མཛད། དེ་དག་གིས་སྨྲས་པ། ཁྱིམ་བདག། བདེ་བ་དང་ལྡན་པ་དག་ནི། ཆོས་དྲན་པར་འགྱུར་གྱི། ཁོ་བོ་ཅག་ཤིན་ཏུ་གྲང་བས་སྡུག་བསྔལ་བར་གྱུར་ཏོ། །དེས་ཁྱིམ་དུ་སོང་ནས་བེའུ་རས་ལྔ་བརྒྱ་བཀུར་བ་དང ། དགེ་སློང་རྣམས་ཀྱིས་ཁྱིམ་པའི་གོས་དེ་དག་བགོས་ཏེ་ཕྱི་རོལ་ཏུ་དོང་བ་བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་ཅོ་འདྲི་ཞིང་སྨྲས་པ། འཕགས་པ་དག་།ཅི། ཁྱེད་བབས་སམ། དེ་དག་གིས་སྨྲས་པ། ཁོ་བོ་ཅག་གྲང་བར་གྱུར་ནས་བགྱིས་ཀྱི། ཚེ་དང་ལྡན་པ་དག་དེ་སྐད་མ་ཟེར་ཅིག། དེ་རྣམས་སྨོད་པར་བྱེད་པའི་སྐབས་དེ། དགེ་སློང་དག་གིས་
Tha102b
བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཁྱིམ་པའི་གོས་བགོ་བར་མི་བྱའོ། །དེ་ལྟ་བུའི་རྐྱེན་ཞིག་བྱུང་ན། སྟེང་དུ་གོས་ངུར་སྨྲིག་གིས་གཡོགས་ནས་བགོ་བར་བྱའོ། །དགེ་འདུན་གྱི་ཡང་དེ་བཞིན་དུ་གྱོན་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ནི། འོག་ཏུ་གོས་བཅུག་ནས་སྟེང་ནས་གཡོགས་ཏེ་བགོ་བར་བྱའི། གཞན་དུ་ན། འགལ་ཚབས་ཅན་དུ་འགྱུར་རོ། །སྡོམ་ནི། གདུགས་དང་འཇིག་རྟེན་རྒྱང་པན་དང ། །བསྡེབས་སྦྱར་དེ་བཞིན་ནགས་མེ་དང ། །གནས་མེད་པར་ནི་ལམ་དག་དང ། །ལ་བ་བགོས་པས་མི་བཅག་པའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་བྲམ་ཟེ་གོས་སྤྱོད་པ་ཞིག་འདུག་པ་དེས་གོས་བྱས་ཤིང་བྱས་ཤིང་འཚོང་བར་བྱེད་དོ། །དུས་གཞན་ཞིག་ན་དེས་གོས་མང་པོ་རྙེད་པར་གྱུར་ནས་དེས་བསམ་པ། ཐབས་ཇི་ལྟ་བུ་ཞིག་བྱས་ན། དེས་བསོད་ནམས་ཀྱང་འཐོབ་ཅིང ། རྙེད་པ་ཡང་འགྲུབ་པར་འགྱུར་སྙམ་པ་དང ། དེ་དད་པ་ཅན་ཞིག་པས་དེའི་བློ་སྐྱེས་ཏེ། སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས་ལ་གོས་ཀྱི་གདན་བཤམས་ཏེ་གདུགས་ཚོད་གསོལ་ལོ། །དེ་ལྟར་བྱས་ན། གོས་ཀྱང་ཡོངས་སུ་ལོངས་སྤྱད་པར་འགྱུར་ལ། གོས་ཡོངས་སུ་ལོངས་སྤྱད་པ་དང ། ཞལ་ཟས་ཡོངས་སུ་ལོངས་སྤྱད་པས་བསོད་ནམས་ཆེན་པོ་ཡང་
Tha103a
༄#། །འཐོབ་པར་འགྱུར་རོ། །སྙམ་དུ་རིག་ནས་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་རང་གི་ཁྱིམ་དུ་གདུགས་ཚོད་ལ་སྤྱན་དྲངས་ནས་ཞལ་ཟས་གཙང་ཞིང་བསོད་པ་བཤམས་ཏེ་གདན་དག་གི་སྟེང་དུ་གོས་བཏིང་ངོ ། །དེ་ནས་གདན་བཤམས་ཟིན་པ་དང་བཅོམ་ལྡན་འདས་སྤྱན་འདྲེན་གྱིས་སྤྱན་དྲངས་ན། དགེ་སློང་གི་དགེ་འདུན་ནི། གཤེགས། བཅོམ་ལྡན་འདས་ནི། གཙུག་ལག་ཁང་ན་བཞུགས་ཤིང་བསོད་སྙོམས་དྲངས་སོ། །སངས་རྒྱས་བཅོམ་ལྡན་འདས་རྣམས་ནི། རྒྱུ་རྣམ་པ་ལྔས་གཙུག་ལག་ཁང་ན་བཞུགས་ཤིང་བསོད་སྙོམས་འདྲེན་ཏེ། ལྔ་གང་ཞེ་ན། ནང་དུ་ཡང་དག་འཇོག་བཞེད་པར་གྱུར་པ་དང ། ལྷ་རྣམས་ལ་ཆོས་སྟོན་བཞེད་པར་གྱུར་པ་དང ། ནད་པ་གཟིགས་བཞེད་པར་གྱུར་པ་དང ། གནས་མལ་གཟིགས་བཞེད་པར་གྱུར་པ་དང ། ཉན་ཐོས་རྣམས་འདུལ་བ་ལ་བསླབ་པའི་གཞི་བཅའ་བར་བཞེད་པའོ། །དོན་འདི་ལ་ནི། སངས་རྒྱས་བཅོམ་ལྡན་འདས་ཉན་ཐོས་རྣམས་འདུལ་བ་ལ་བསླབ་པའི་གཞི་བཅའ་བར་བཞེད་ནས་གཙུག་ལག་ཁང་ན་བཞུགས་ཤིང་བསོད་སྙོམས་དྲངས་སོ། །དགེ་སློང་རྣམས་ལམ་གར་ཆར་པ་བབ་ནས་དེ་དག་གི་གོས་ཆར་པས་གཤེར་བཞིན་དུ་འཁོད་པས། གང་གི་གོས་ཅི་འདྲ་བས་འཁོད་པ་དེའི་དེ་ཁོ་ན་ལྟ་བུའི་སྦྲ་སྦྲེ་བྱུང་བར་གྱུར་པ་བྲམ་ཟེ་དེས་མཐོང་བ་དང ། འཁྲུགས་ནས་སྨྲས་པ། བདག་
Tha103b
གི་ཟང་འདི་ལྟ་བུ་དག་ཟོང་དུ་མི་རུང་བར་བགྱིས་ཀྱི། གོས་འདི་དག་ཁྱེད་ཐལ་བྱུང་སྣོམས་ཤིག་།ཅེས་ཟེར་བའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།བྲམ་ཟེ་དེས་མ་དད་བ་སྐྱེས་ནས་བྱིན་པས་བླང་བར་མི་བྱའོ། །དེ་འཁྲུགས་པ་དེ་དང་བྲལ་ནས་ཡང་དེས་དད་པའི་སེམས་ཀྱིས་ཕུལ་བའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།ད་ནི། བྲམ་ཟེ་དེས་དད་པའི་སེམས་ཀྱིས་ཕུལ་བས་བླང་བར་བྱ་སྟེ། བླངས་ནས་ཀྱང་རུང་བ་བྱས་ལ་བགོ་བར་བྱའོ། །དགེ་སློང་དག་གིས་བླངས་པ་དང ། བྲམ་ཟེ་དེས་སྨྲས་པ། ཨེ་མའོ་འཕགས་པ་དག་།གདུགས་བཅང་པའི་རིགས་སོ། །སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དེ་ལྟ་ན། རྗེས་སུ་གནང་སྟེ། དགེ་སློང་དག་གིས་གདུགས་བཅང་བར་བྱའོ། །བཅོམ་ལྡན་འདས་ཀྱིས་དགེ་སློང་དག་གིས་གདུགས་བཅང་པར་བྱའོ། །ཞེས་བཀའ་སྩལ་པ་དང ། དྲུག་སྡེ་རྣམས་ཀྱིས་གདུགས་ཀྱི་རྩ་བ་གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་བྱས་ཤིང ། གཞན་ཡང་བཀྲ་ཞིང་ཉེ་བར་བཀྲ་བ་དང ། བསྲུབས་ལས་བྱས་ལ། གདུགས་ནི། དཀར་པོ་དང ། རྨ་བྱའི་མདོངས་དག་ལས་བྱས་པ་དང ། བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་
Tha104a
༄#། །དེ་དག་གིས་སྨྲས་པ། འཕགས་པ་དག། འདི་ཅི་ལགས། བཅོམ་ལྡན་འདས་ཀྱིས་གདུགས་གནང་ངོ ། །འཕགས་པ་དག། དགེ་སྦྱོང་ཁྱེད་ཅི་འདོང་པའི་ཡོན་ཏན་གྱིས་གཟིར་ཏམ། གང་གི་ཕྱིར་འདི་འདྲ་བའི་གདུགས་དག་འཆང ། དེ་དག་གིས་སྨྲས་པ། དགྲ་བོ་རྣམས་ཀྱི་མགྲིན་པ་རྡོག་བས་མནན་ནས་འདོད་པའི་ཡོན་ཏན་གྱིས་གཟིར་ཏོ། །དེ་དག་སྨོད་པར་བྱེད་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བུའི་གདུགས་དག་བཅང་བར་མི་བྱའི། འོན་ཀྱང་རྩ་བ་རུ་ཏ་དང ། ལོ་མ་ལས་བྱས་པའི་གདུགས་རྣམ་གཉིས་བཅང་བར་བྱའོ། །བཅོམ་ལྡན་འདས་ཀྱིས་གདུགས་རྣམ་གཉིས་བཅང་བར་བྱའོ། །ཞེས་བཀའ་སྩལ་པ་དང ། དྲུག་སྡེ་རྣམས་ཀྱིས་གདུགས་ཀྱི་རྩ་བ་རིང་པོ་རིང་པོར་བྱས་ནས། གདུགས་ཀྱི་རྩ་བ་བསྒྲེང་སྟེ་གྲོང་ཁྱེར་གྱི་ནང་དུ་སོང་བ་དང ། བྲམ་ཟེ་དང ། ཁྱིམ་བདག་དག་གིས་མཐོང་ནས་འདི་ལྟ་བུ་ནོར་ཅན་ནམ། ཚོང་དཔོན་ནམ། དེད་དཔོན་ནམ། སུ་ཞིག་འོང་ཞེས་ལངས་ནས་རྟོག་པར་བྱེད་དོ། །ཁ་ཅིག་བསུར་དོང་བ་དང ། གང་གི་ཚེ་མཐོང་བར་གྱུར་པ་དེའི་ཚེ་མ་དད་པར་གྱུར་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གདུགས་ཀྱི་རྩ་བ་རིང་པོ་རིང་པོར་མི་བྱའི། འོན་ཀྱང་ལུས་ཀྱི་ཚད་ཙམ་
Tha104b
གྱི་རྩ་བ་གདགས་པར་བྱ་ཞིང ། གྲོང་གི་ནང་དུ་གདུགས་ཐོགས་ཏེ་འགྲོ་བར་མི་བྱའོ། །བཅོམ་ལྡན་འདས་ཀྱིས་གྲོང་གི་ནང་དུ་གདུགས་ཐོགས་ཏེ་འགྲོ་བར་མི་བྱའོ། །ཞེས་བཀའ་སྩལ་པ་དང ། ཇི་ཙམ་ན་དགེ་སློང་མང་པོ་དག་དོན་མཐུན་དང་ལྷན་ཅིག་ལྗོངས་རྒྱུ་ཞིང་དོང་བ་དང ། རེ་ཞིག་ན་གྲོང་དུ་ལམ་བྱུང་བར་གྱུར་ནས་དེ་དག་གིས་བསམ་པ། བཅོམ་ལྡན་འདས་ཀྱིས་གྲོང་གི་ནང་དུ་གདུགས་ཐོགས་ཏེ་འགྲོ་བར་མི་བྱའོ། །ཞེས་བཀའ་སྩལ་པས། གྲོང་དོར་བར་བྱའོ། །སྙམ་ནས་དེ་དག་གིས་གྲོང་སྤངས་པ་དང ། དོན་མཐུན་རྣམས་དང་བྲལ་བས་ཆོམ་བོས་བཅོམ་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་གྲོང་གི་དབུས་སུ་ལམ་བྱུང་བར་གྱུར་ན། གདུགས་གློར་བསྙལ་ནས་འདོང་བར་བྱ་སྟེ། འདི་ལ་འགྱོད་པར་མི་བྱའོ། །བསོད་སྙོམས་པ་རྣམས་བསོད་སྙོམས་ལ་ཞུགས་པ་དང ། ཆར་པ་བབ་ནས་ཆར་ཆུས་གོས་གཤེར་བར་གྱུར་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བསོད་སྙོམས་པས་གདུགས་ཀྱི་རྩ་བ་རུང་བར་བྱས་ནས་འཇུག་པར་བྱ་སྟེ་ཞུགས་ནས་གལ་ཏེ་ཆར་པ་ཆད་ན། གདུགས་ཁྱིམ་དང་པོར་བཞག་ལ་འཇུག་པར་བྱ་ཞིང ། དེ་ནས་ཕྱིར་བླངས་ཏེ་འགྲོ་བར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་
Tha105a
༄#། །མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ལྷོ་ཕྱོགས་ཀྱི་ཡུལ་ནས་ཀུན་ཏུ་རྒྱུ་འཇིག་རྟེན་རྒྱང་ཕན་པ་འཆར་པ་ཞེས་བྱ་བ་ཞིག་ལྗོངས་རྒྱུ་ཞིང་མཉན་ཡོད་དུ་འོངས་སོ། །དེ་ངལ་བསོས་ནས་ཚེ་དང་ལྡན་པ་ཀུན་ཤེས་ཀོའུ་དི་ནྱ་ག་ལ་པ་དེར་སོང་སྟེ་ཕྱིན་ནས་སྨྲས་པ། ཀྱེ་དགེ་སློང ། ཁོ་བོས་བླ་མ་དག་ལས་བླངས་པའི་ཡི་གེ་ཅུང་ཟད་ཡོད་དེ། དེའི་ཕྱིར་ཁྱོད་དང་ལྷན་ཅིག་གཏམ་བྱ་བར་འདོད་དོ། །དེས་དེ་ལ་སྨྲས་པ། བྲམ་ཟེ། ཁོ་བོ་སྨྲ་བ་མ་ཡིན་གྱི། སོང་ཞིག། དེ་ཚེ་དང་ལྡན་པ་རྟ་ཐུལ་དང ། བཟང་པོ་དང ། རླངས་པ་དང ། མིང་ཆེན་དང ། གྲགས་པ་དང ། གང་པོ་དང ། དྲི་མེད་དང ། བ་ལང་བདག་དང ། ལག་བཟང་ག་ལ་བ་དེར་སོང་བ་དང ། དེ་རྣམས་ཀྱིས་ཀྱང་དེ་ཁོ་ན་སྐད་སྨྲས་སོ། །དེ་ནས་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས་སྨྲས་པ། ཀྱེ་དགེ་སློང ། ཁོ་བོས་བླ་མ་ལས་ཡི་གེ་ཅུང་ཟད་བླངས་པ་དག་ཡོད་དེ། དེའི་ཕྱིར་ཁྱོད་དང་ལྷན་ཅིག་གཏམ་བྱ་བར་འདོད་དོ། །ཚེ་དང་ལྡན་པ་ཤཱ་རིའི་བུས་བསམ་པ། ཅི། ཀུན་ཏུ་རྒྱུ་འདི་ལ་དགེ་བའི་རྩ་བ་ཅུང་ཟད་ཡོད་དམ། འོན་ཏེ་མེད་སྙམ་ན། ཡོད་པར་མཐོང་ངོ ། །སུ་ལ་རག་ལས་བརྟགས་ན། བདག་ཉིད་ལའོ། །ཅི། སྨྲ་བས་འདུལ་བ་གཞན་ཅུང་ཟད་ཡོད་དམ་སྙམ་ན། ཡོད་པར་མཐོང་ངོ ། །ཇི་ཙམ་ན་ཚོགས་པ་བརྟགས་ན། ཞག་བདུན་ཚུན་ཆད་ཀྱིས་ཚོགས་པར་ཤེས་ནས་སྨྲས་པ། ལེགས་ཏེ། དེ་བཞིན་བྱ་
Tha105b
ན། རིག་པའི་གནས་གང་དུ་བྱ། ཆེ་གེ་མོ་ཞིག་ཏུའོ། །སྨྲ་བའི་ཞལ་ཆེ་བ་བཞག་སྟེ་ཕྱོགས་སྔ་མ་དང ། ཕྱི་མ་རྣམ་པར་བཞག་ནས་ཕྱོགས་སྔ་མ་སུས་གཟུགས་ཞེས་གླེང་པ་དང ། ཚེ་དང་ལྡན་པ་ཤཱ་རིའི་བུས་སྨྲས་པ། ཀུན་ཏུ་རྒྱུ་གློ་བུར་དུ་འོངས་པ་ཡིན་པས་འདི་ཉིད་ཀྱིས་ཕྱོགས་སྔ་མ་ཚུགས་ཤིག་།ཀུན་ཏུ་རྒྱུས་ཕྱོགས་སྔ་མ་སྨྲས་པ་དང ། ཚེ་དང་ལྡན་པ་ཤཱ་རིའི་བུས་བཟླས་ནས་ཁྱོད་ཀྱི་འདི་ནི། མི་རིགས་སོ། །འདི་ནི། མི་འདྲའོ། །འདི་ནི། མི་འཐད་དོ། །ཞེས་སྐྱོན་བརྟགས་སོ། །དེས་ཡང་སྨྲས་པ་དང ། ཚེ་དང་ལྡན་པ་ཤཱ་རིའི་བུས་མཇུག་ཏུ་མ་ཕྱིན་བར་བཞག་གོ། ལྷོ་ཕྱོགས་ཀྱི་ཡུལ་ནས་ཀུན་ཏུ་རྒྱུ་འཇིག་རྟེན་རྒྱང་པན་པ་འཆར་པ་ཞེས་བྱ་བ་ཞིག་མཉན་ཡོད་དུ་འོངས་ཏེ་དེ་ཚེ་དང་ལྡན་པ་ཤཱ་རིའི་བུ་དང་ལྷན་ཅིག་བརྩད་ནས་དེང་དུ་ཞག་བདུན་ལོན་ནོ། །ཞེས་ཀུན་ཏུ་སྒྲ་གྲགས་པ་དང ། སྲོག་ཆགས་བརྒྱ་ཕྲག་མང་པོ་དག་ཁ་ཅིག་ནི། ཡ་མཚན་སྐྱེས། ཁ་ཅིག་ནི། སྔོན་གྱི་དགེ་བའི་རྩ་བ་དག་གིས་བསྐུལ་ནས་འདུས་པ་དང ། ཚེ་དང་ལྡན་པ་ཤཱ་རིའི་བུས་བསམ་པ། བདག་གི་སྨྲ་བས་འདུལ་བ་འདུས་སམ་སྙམ་ན། འདུས་པར་མཐོང་ངོ ། །དེ་ནས་ཚེ་དང་ལྡན་པ་ཤཱ་རིའི་བུས་མ་ལུས་པར་སྨྲས་པ་དང ། ཀུན་ཏུ་རྒྱུ་དེ་ཚར་བཅད་དོ། །དེ་ནས་མངོན་པར་དད་བར་གྱུར་ཏེ་སྨྲས་པ། བཙུན་པ་ཤཱ་རིའི་བུ། བདག་གིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང ། བསྙེན་པར་རྫོགས་པར་དགེ་སློང་གི་དངོས་པོ་འཐོབ་ན། བདག་བཅོམ་
Tha106a
༄#། །ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་དོ། །དེ་ཚེ་དང་ལྡན་པ་ཤཱ་རིའི་བུས་རབ་ཏུ་ཕྱུང ། བསྙེན་པར་རྫོགས་པར་བྱས་ཏེ་གདམས་ངག་བྱིན་ནོ། །དེས་བརྩལ་བ་དང ། འབད་པ་དང ། བསྒྲིམ་པ་བྱས་པས་འཁོར་བའི་འཁོར་ལོ་ཆ་ལྔ་པ་གཡོ་བ་དང ། མི་གཡོ་བ་འདི་ཉིད་རིག་སྟེ་ཞེས་བྱ་བ་ནས་གུས་པར་སྨྲ་བར་བྱ་བར་གྱུར་ཏོ། །ཞེས་བྱ་བའི་བར་སྔ་མ་བཞིན་ནོ། །དེ་ནས་འཁོད་དེ་དག་འཕགས་པ་ཤཱ་རིའི་བུས་འདི་ལྟ་བུའི་སྨྲ་བ་ཆེན་པོ་ཕམ་པར་བྱས་སོ། །ཞེས་ཤིན་ཏུ་ཡ་མཚན་སྐྱེས་སོ། །དེ་ནས་ཚེ་དང་ལྡན་པ་ཤཱ་རིའི་བུས་འཁོར་དེ་དག་གི་བསམ་པ་དང ། བག་ལ་ཉལ་དང ། ཁམས་དང ། རང་བཞིན་རྟོགས་ནས་དེ་དག་དང་མཐུན་པར་ཆོས་བསྟན་ཏེ་སྲོག་ཆགས་འབུམ་ཕྲག་མང་པོ་དག་གི་དེ་ཐོས་ནས་ལྷག་པའི་ཁྱད་པར་ཆེན་པོ་ཐོབ་པ་འདི་ལྟ་སྟེ། ཁ་ཅིག་གིས་ནི། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི། ལན་གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི། ཕྱིར་མི་འོང་བའི་འབྲས་བུ་ཞེས་བྱ་བ་ནས་དགེ་འདུན་ལ་གཞོལ་ཞེས་བྱ་བའི་བར་སྔ་མ་བཞིན་ནོ། །སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ།་དགེ་སློང་དག་།ཐམས་ཅད་དུ་དགེ་སློང་ཤཱ་རིའི་བུའམ། ཤཱ་རིའི་བུ་དང་འདྲ་བར་མི་འགྱུར་བས། དེ་ལྟ་བས་ན། གནང་གི་།དགེ་སློང་དག་གིས་འཇིག་རྟེན་རྒྱང་ཕན་པ་ལ་སོགས་པ་ཕྱི་
Tha106b
རོལ་པའི་བསྟན་བཅོས་བསླབ་པར་བྱའོ། །བཅོམ་ལྡན་འདས་ཀྱིས་དགེ་སློང་དག་གིས་འཇིག་རྟེན་རྒྱང་ཕན་པ་ལ་སོགས་པ་ཕྱི་རོལ་པའི་བསྟན་བཅོས་བསླབ་པར་བྱའོ། །ཞེས་བཀའ་སྩལ་པ་དང ། དགེ་སློང་བྱིས་པའམ། རྨོངས་པའམ། མི་གསལ་བ་དང ། མི་མཁས་པ་དག་གིས་ཀྱང་ཐམས་ཅད་ཀྱིས་ཁྱད་པར་མེད་པར་བསླབ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཕས་ཀྱི་རྒོལ་བ་ཚར་གཅོད་ནུས་པ་གང་ཡིན་པ་དེ་དག་གིས་འཇིག་རྟེན་རྒྱང་ཕན་པ་ལ་སོགས་པ་ཕྱི་རོལ་པའི་བསྟན་བཅོས་བསླབ་པར་བྱའོ། །བྱིས་པ་དང ། རྨོངས་པ་དང ། མི་གསལ་བ་དང ། མི་མཁས་པ་དག་གིས་ནི། མ་ཡིན་ནོ། །དེ་རྣམས་དེ་ལ་བརྩོན་པ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དུས་གསུམ་དུ་བྱས་ལ། དུས་གཉིས་ནི། སངས་རྒྱས་ཀྱི་གསུང་རབ་བཀླག་པར་བྱ་ཞིང་གསུམ་པ་ལ་ནི། ཕྱི་རོལ་པའི་བསྟན་བཅོས་དག་གོ་།བཅོམ་ལྡན་འདས་ཀྱིས་དུས་གསུམ་དུ་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ལོ་དང ། ཟླ་བའི་དུས་དག་ཏུ་སློབ་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།ཚེ་ནི། སྐད་ཅིག་མ་ཡིན་པས། ངས་ལོ་དང་ཟླ་བའི་དུས་ལས་དགོངས་ཏེ་མ་གསུངས་ཀྱི། འོན་ཀྱང་ཉིན་གཅིག་ལ་ཆ་གསུམ་དུ་བྱའོ། །དགེ་སློང་རྣམས་གསལ་བའི་དུས་སུ་ནི། ཕྱི་རོལ་པའི་བསྟན་བཅོས་འདོན་ལ། གཞན་དག་ཏུ་ནི། སངས་རྒྱས་ཀྱི་གསུང་རབ་འདོན་ནས་བཅོམ་ལྡན་འདས་ཀྱིས་བཀའ་སྩལ་པ། གསལ་བའི་དུས་སུ་
Tha107a
༄#། །སངས་རྒྱས་ཀྱི་གསུང་རབ་གདོན་པར་བྱ་སྟེ། ཕྱི་རོལ་པའི་བསྟན་བཅོས་ནི། མ་ཡིན་ནོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཤཱ་རིའི་བུས་བྲམ་ཟེའི་ཁྱེའུ་ལྷ་སྦྱིན་དང ། བ་ལང་འབྱོར་གཉིས་རབ་ཏུ་ཕྱུང་ནས་དེ་དག་ཚེ་དང་ལྡན་པ་ཤཱ་རིའི་བུས་མདོ་སྡེ་འདོན་དུ་བཅུག་གོ་།ཇི་ཙམ་དུས་གཞན་ཞིག་ན་ལྗོངས་རྒྱུ་ཞིང་དོང་ནས་རི་བྲག་ཅིག་ཏུ་ཕྱིན་པ་དང ། དེར་དེ་དག་ལ་རྙེད་པ་དང ། བཀུར་སྟི་ཆེན་པོ་བྱུང་ནས་དེ་གཉིས་དེར་འཁོད་དོ། །དེ་གཉིས་སྔོན་གོམས་པའི་ཤུགས་ཀྱིས་སངས་རྒྱས་ཀྱི་གསུང་རབ་སྡེབ་སྦྱོར་དང ། ཚིག་དང་རིམ་པར་སྦྱར་ནས་ཁ་ཏོན་དུ་འདོན་ནོ། །དེ་དག་ལས་གཅིག་ནི། ཤིའོ། །གཅིག་ཤོས་ཀྱིས་གཞུང་བརྗེད་པར་གྱུར་ནས་དེ་ལ་ཁ་ཏོན་ལས་བྱུང་བའི་རྙེད་པ་མེད་ནས་དེ་དང ། དེ་དག་ཏུ་འཁྱམས་འཁྱམས་ནས་ཕྱིར་མཉན་ཡོད་དུ་འོངས་སོ། །དེ་ནས་ངལ་བསོས་ཏེ་ཚེ་དང་ལྡན་པ་ཀུན་ཤེས་ཀོའུ་དི་ནྱ་ག་ལ་བ་དེར་སོང་སྟེ་ཕྱག་བྱས་ནས་སྨྲས་པ། གནས་བརྟན། གཡར་ཏོན་དཔོག་ཏུ་གསོལ། དེས་སྨྲས་པ། བུ། ལེགས་སོ། །དེ་བཞིན་ཁ་ཏོན་བསླབ་བོ། །ཞེས་དེས་དེ་དང་ལྷན་ཅིག་ཁ་ཏོན་བྱ་བར་བརྩམས་པ་དང ། ཁ་ཏོན་ཐུང་ངུར་འདོན་ནས་སྨྲས་པ། གནས་བརྟན། ཁྱོད་ཀྱིས་རིང་པོར་མ་བཏོན་པས་གདོན་ནོངས་སོ། །དེས་སྨྲས་པ། བུ། ཁོ་བོས་དེ་ལྟར་
Tha107b
བསླབ་བོ། །དེས་དེའི་རྐང་པ་ལ་མགོ་བོས་ཕྱག་འཚལ་ནས་ཚེ་དང་ལྡན་པ་རྟ་ཐུལ་དང ། བཟང་པོ་དང ། རླངས་པ་དང ། མིང་ཆེན་དང ། གྲགས་པ་དང ། གང་པོ་དང ། དྲི་མེད་དང ། བ་ལང་བདག་དང།་ལག་བཟང་ག་ལ་བ་དེར་སོང་སྟེ་ཕྱིན་ནས་རྐང་པ་ལ་ཕྱག་འཚལ་ཏེ་སྨྲས་པ། གནས་བརྟན། གཡར་ཏོན་དབོག་ཏུ་གསོལ། དེས་སྨྲས་པ། བུ། ལེགས་སོ། །དེ་བཞིན་ཁ་ཏོན་བསླབ་པར་བྱའོ། །ཞེས་དེས་དེ་དང་ལྷན་ཅིག་ཁ་ཏོན་འདོན་པར་བརྩམས་པ་དང ། དེ་ནས་ཁ་ཏོན་ཐུང་ངུར་བཏོན་ནས་སྨྲས་པ། གནས་བརྟན། ཁྱོད་ཀྱིས་གདོན་ནོངས་སོ། །དེས་སྨྲས་པ། བུ། ཁོ་བོས་དེ་ལྟར་བསླབ་བོ། །དེས་དེའི་རྐང་པ་ལ་ཕྱག་བྱས་ནས་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཤཱ་རིའི་བུའི་རྐང་པ་ལ་ཕྱག་བྱས་ནས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །མཁན་པོ། གཡར་ཏོན་དབོག་ཏུ་གསོལ། དེས་སྨྲས་པ། བུ། ལེགས་སོ། །དེ་བཞིན་དུ་ཁ་ཏོན་བསླབ་བོ། །དེས་དེ་དང་ལྷན་ཅིག་ཁ་ཏོན་བྱ་བར་བརྩམས་པ་དང ། ཇི་ཙམ་ན། ཁ་ཏོན་རིང་པོར་བཏོན་ནས་ཚེ་དང་ལྡན་པ་ཤཱ་རིའི་བུས་ཀྱང་རིང་པོར་བཏོན་པ་དང ། དེས་སྨྲས་པ། མཁན་པོ། དགེ་སློང་དེ་དག་ཀུན་གྱིས་ནི། གདོན་ནོངས་ཀྱི། ཁྱོད་ཉག་གཅིག་གིས་མ་ཉམས་པར་བཏོན་ཏོ། །དེས་སྨྲས་པ། མི་བླུན་པོ། ཁྱོད་ཉིད་ཀྱིས་གདོན་ཉེས་ཀྱི། དགེ་སློང་དག་གིས་ནི། མ་ཉམས་པར་བཏོན་ཏོ། །ཞེས་དེས་སྤྱོས་ནས་ཅང་མི་སྨྲ་བར་འདུག་པའི་སྐབས་དེ། དགེ་
Tha108a
༄#། །སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་ཅུང་ཟད་གང་བྱུང་བ་ནི། དགེ་སློང་རྣམས་སངས་རྒྱས་ཀྱི་གསུང་སྡེབ་སྦྱོར་དང ། ཚིག་དང ། རིམ་པ་སྦྱར་ནས་འདོན་པ་ལས་གྱུར་གྱི། དེ་ལྟ་བས་ན། དགེ་སློང་གིས་སངས་རྒྱས་ཀྱི་གསུང་རབ་སྡེབ་སྦྱོར་དང ། ཚིག་དང ། རིམ་པ་སྦྱར་ནས་གདོན་བར་མི་བྱའོ། །དགེ་སློང་གིས་སངས་རྒྱས་ཀྱི་གསུང་རབ་སྡེབ་སྦྱོར་དང ། ཚིག་དང ། རིམ་པ་སྦྱར་ནས་འདོན་ན། འགལ་ཚབས་ཅན་དུ་འགྱུར་རོ། །ཡུལ་གྱི་ངེས་པའི་ཚིག་དང ། སྐད་ཀྱི་ངེས་པའི་ཚིག་དང ། ལྗོངས་ཀྱི་ངེས་པའི་ཚིག་ཡིན་ན། ལྟུང་བ་མེད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་རྣམས་རྒས་པའི་གནས་སྐབས་ན་ཡང་རྒོད་བག་བྱེད་པ་དང ། དགེ་སློང་དེ་དག་གིས་སྨྲས་པ། ཚེ་དང་ལྡན་པ་དག་།ཁྱེད་མགོ་སྐྱེས་ཀྱང་དཀར་པོར་གྱུར་ན། ད་དུང་རྒོད་བག་མི་གཏོང་ངམ། དེ་དག་ཅང་མི་སྨྲ་བར་འཁོད་ནས་མཐའ་གཅིག་ཏུ་དོང་སྟེ་སྨྲས་པ། དགའ་བོ་ཉེ་དགའ། ལྷུང་བཟེད་ནག་པོ་ཅན། ཀོས་ཐག་པ་འདི་དག་ལ་མི་དགའ་བ་ཞིག་བྱའོ། །ཞེས་དེ་དག་དེ་ལྟར་གླགས་ཚོལ་བ་ལ་བརྩོན་པར་འཁོད་པ་ན། དགེ་སློང་གནས་བརྟན་གནས་བརྟན་དག་དགོན་པའི་གནས་སུ་དོང་སྟེ་བསམ་གཏན་དང ། བཀླག་པར་བྱ་བ་
Tha108b
དག་བརྩམས་སོ། །དེ་ནས་དྲུག་སྡེ་རྣམས་ཀྱིས་གནས་གསུམ་ནས་ནགས་མེས་བཏང་སྟེ་ངོས་གཅིག་ཏུ་འདུས་ནས་བསྡད་པ་དང ། དགེ་སློང་རྣམས་ནགས་མེས་ཚིག་པའི་གནོད་པ་བྱུང་བས་རིངས་པ་རིངས་པར་འབྲོས་པར་བརྩམས་སོ། །དྲུག་སྡེ་རྣམས་ཀྱིས་སྨྲས་པ། གནས་བརྟན་དག་།ཅིའི་སླད་དུ་རིངས་རིངས་ལྟར་བཞུད། ཚེ་དང་ལྡན་པ་དག་།ནགས་ཀྱི་མེ་མ་མཐོང་ངམ། གནས་བརྟན་དག་།བཅོམ་ལྡན་འདས་ཀྱིས་བདེ་བའི་གནས་སྐབས་སུ་ཚུལ་ཁྲིམས་གསུངས་སམ་ཅི་ལགས། ཞེས་ཅུང་ཟད་བགད་པ་དང ། དེ་དག་གིས་སྨྲས་པ། ཚེ་དང་ལྡན་པ་དག་།ཁྱེད་ཀྱིས་ཁོ་བོ་ཅག་ལ་བསམ་བཞིན་དུ་མ་གཙེས་གྲང ། བཀྲེན་པ་དག་།ཁྱེད་དེ་ལྟར་མི་དགའ་བར་བྱའོ། །ཞེས་ཟེར་བའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ནགས་མེས་གཏང་བར་མི་བྱའོ། །གཏོང་ན། ཉེས་པ་སྦོམ་པོར་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་རྒན་པོ་ཞིག་དང་གསར་བུ་ཞིག་ལྗོངས་རྒྱུ་ཞིང་དོང་བ་དང་རྒན་པོ་ལ་ནི། སྣོད་མང་ཞིང་ཡོ་བྱད་མང་ལ། གསར་བུ་ནི། མ་གྲགས་ཤིང་ཆོས་གོས་གསུམ་ལས་ལྷག་པ་མེད་པ་ཞིག་པས། རྒན་པོས་སྨྲས་པ། ཚེ་དང་ལྡན་པ། ཁོ་བོ་ངལ་གྱི། རེ་ཞིག་ཆོས་གོས་ཀྱི་གཏུར་བུ་ཁྱེར་ཏེ་ཤོག་ཅིག་
Tha109a
༄#། །གསར་བུ་དེས་སྨྲས་པ། གནས་བརྟན། བཀའ་འབབ་པར་མི་འགྱུར་ན། རེ་ཞིག་ཅུང་ཟད་ཅིག་གསོལ་བ་མཆིས་སོ། །ཚེ་དང་ལྡན་པ། འདི་ལ་སུ་ཞིག་གཤེ་།སྨྲོས་ཤིག་།གནས་བརྟན། སངས་རྒྱས་དང ། ཆོས་དང ། དགེ་འདུན་མ་གཟིགས་སམ། ཅི། རྨོངས་པའི་ཡོ་བྱད་འདིས་ཅི་ཞིག་བགྱི། བཞིན་བཟང ། གལ་ཏེ་མི་བཀུར་བ་ནི། རེ་ཞིག་རུང་ན། འདི་འདྲི་བར་བྱ་སྟེ། ཁྱོད་ཁོ་བོའི་མཁན་པོའམ། སློབ་དཔོན་ཡིན་ནམ། ཅི། གང་གི་ཕྱིར་རྗེས་སུ་སྟོན་པར་བྱེད། དེ་ཅང་མི་སྨྲ་བར་འདུག་པ་དང ། རྒན་པོས་བསམ་པ། བཀྲེན་པ་འདི། མི་དགའ་བར་བྱའོ། །སྙམ་མོ། །ཇི་ཙམ་ན། དེ་གཉིས་གཙུག་ལག་ཁང་དུ་དོང་བ་དང ། དེ་ན་ནུབ་གཅིག་ཀྱང་མི་གནས་པར་འདུག་པར་མི་བྱ་བའི་ཁྲིམས་སུ་བྱ་བ་ཡོད་དེ། དེ་གཉིས་ལ་གནས་མལ་གྱི་ཞལ་ཏ་བྱེད་པས། གནས་མལ་དག་སྣོམས་ཤིག་ཅེས་སྨྲས་པ་དང ། རྒན་པོས་ནི། བླངས་སོ། །གསར་བུ་དེས་སྨྲས་པ། ཚེ་དང་ལྡན་པ། ཁོ་བོས་གནས་མ་བཅས་ཀྱི། ཇེ་གནས་གསོལ་ལོ། །ཞེས་དེ་དགེ་འདུན་གྱི་གནས་བརྟན་གྱི་གན་དུ་སོང་སྟེ་རྐང་པ་ལ་ཕྱག་འཚལ་ནས་སྨྲས་པ། གནས་བརྟན། བདག་གི་གནས་མཛད་དུ་གསོལ། དེས་སྨྲས་པ། བཞིན་བཟང ། ཁྱོད་སུ་དང་ལྷན་ཅིག་འོངས། གནས་བརྟན་དགེ་སློང་ཆེ་གེ་མོ་ཞིག་དང་ངོ ། །བཞིན་བཟང ། དེ་དགེ་འདུན་གྱི་གནས་བརྟན་གྱིས་བདག་འཁོར་དང་ཕྱེའོ། །ཞེས་ཟེར་དུ་འོང་
Tha109b
གི།་སོང་ལ་དེ་ཉིད་ལ་གནས་གསོལ་ཅིག་།དེ་གཞན་དག་གི་གན་དུ་སོང་བ་དང ། ཐམས་ཅད་ཀྱིས་དེ་བཞིན་སྤངས་ནས་ནམ་སྲོས་ཏེ་རྒན་པོ་དེ་ཉིད་ཀྱི་གན་དུ་སོང་ནས་སྒོ་ལ་བརྡབས་ཏེ་སྨྲས་པ། གནས་བརྟན་ཕྱག་འཚལ་ལོ། །ཁྱོད་སུ་ཞིག། བདག་མིང་འདི་ཞེས་བགྱི་བ་དེ་ལགས་སོ། །ཁྱོད་ནད་མེད་པར་གྱུར་ཅིག་།གནས་བརྟན། གཙུག་ལག་ཁང་འདི་ན་ནུབ་གཅིག་ཀྱང་མི་གནས་པར་མཆིས་པར་མི་བགྱི་བའི་ཁྲིམས་སུ་མཛད་པ་མཆིས་ན། བདག་གི་གནས་མཛད་དུ་གསོལ། བཞིན་བཟང ། དགེ་འདུན་གྱིས་དེ་ལྟ་བུའི་ཁྲིམས་སུ་བཅའ་བ་མཛད་པ་ལེགས་ཏེ། གལ་ཏེ་མ་མཛད་ན། ཁོ་བོས་འཆར་གཞུག་པ་ཞིག་།དེའི་ཚེ་ནི། ཁོ་བོ་སྣོད་མང་ཞིང་ཡོ་བྱད་མང་བ་ཡིན་ལ། ད་ནི། གནས་བརྟན་ཡིན་ནམ། ཁྱོད་མ་གུས་པ་བྱས་ཀྱང་གནས་སྟེར་བ་གང་ཡིན་པ་དེ་ལ་གནས་ཆོས་ཤིག་།དེ་སྤོབས་པ་མེད་པར་གྱུར་ནས་ཅང་མི་སྨྲ་བར་འདུག་སྟེ། དེའི་གནས་བར་ཆད་དུ་གྱུར་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་བཀའ་སྩལ་པ། གནས་མེད་པར་ལྗོངས་རྒྱུ་ཞིང་འགྲོ་བར་མི་བྱ། དགེ་སློང་གིས་སེང་གེ་བཞིན་གཏུམ་པོར་མི་བྱ། དགེ་འདུན་གྱིས་ཀྱང་དགེ་སློང་རྣམས་ལ་གནོད་པར་འགྱུར་བའི་ཁྲིམས་བཅའ་བར་མི་བྱ་སྟེ། དགེ་སློང་གནས་མ་བཅས་པར་ལྗོངས་རྒྱུ་ཞིང་འགྲོའམ། སེང་གེ་བཞིན་གཏུམ་པོར་བྱེད་དམ། དགེ་འདུན་གྱི་ཁྲིམས་སུ་བྱ་བ་དེ་ལྟ་བུ་བཅས་ན། ཐམས་ཅད་འགལ་
Tha110a
༄#། །ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ཞམ་འབྲིང་བ་ཚེ་དང་ལྡན་པ་ཀླུ་སྐྱོང་དང་ཡུལ་མ་ག་དྷར་ལྗོངས་རྒྱུ་ཞིང་གཤེགས་ཏེ་གྲོང་ཁྱེར་ས་དཀར་ཅན་དུ་གཤེགས་ནས་དཀར་ཅན་ན་གནོད་སྦྱིན་བ་ཀུ་ལའི་གནས་ན་བཞུགས་སོ། །དེ་ནས་བཅོམ་ལྡན་འདས་མཚན་མོ་ནམ་སྲོས་ཏེ་མུན་གནག་ཅིང་ཁད་ཀྱིས་ཅུང་ཟད་ཆར་འབབ་ཅིང་གློག་འབྱུང་བ་ན།་བླ་གབ་མེད་པའི་འཆག་ས་ན་འཆག་པ་མཛད་དོ། །ཆོས་ཉིད་ཀྱིས་སངས་རྒྱས་བཅོམ་ལྡན་འདས་རྣམས་ཀྱི་ཞམ་འབྲིང་བ་དགེ་སློང་རྣམས་ནི། ཇི་སྲིད་སངས་རྒྱས་བཅོམ་ལྡན་འདས་རྣམས་ནང་དུ་ཡང་དག་འཇོག་ལ་མི་བཞུགས་པ་དེ་སྲིད་དུ་ནང་དུ་ཡང་དག་འཇོག་ལ་མི་འཇུག་གོ། བརྒྱ་བྱིན་ལྷའི་དབང་པོའི་ཤེས་པ་དང ། མཐོང་བ་ནི། འོག་ཏུ་འཇུག་པ་ཡིན་པས་དེས་བསམ་པ། སངས་རྒྱས་བཅོམ་ལྡན་འདས་དེ་གྲོང་ཁྱེར་ས་དཀར་ཅན་ན་ས་དཀར་ཅན་གྱི་རི་ལ་གནོད་སྦྱིན་བ་ཀུ་ལའི་གནས་ན་བཞུགས་ཤིང ། དེ་མཚན་མོ་ནམ་སྲོས་ཏེ་མུན་གནག་ཅིང་ཁད་ཀྱིས་ཅུང་ཟད་ཅུང་ཟད་ཆར་འབབ་ཅིང་གློག་འབྱུང་ན། བླ་གབ་མེད་པའི་འཆག་ས་ན་འཆག་སྟེ། མ་ལ་བདག་དེར་ཉེ་བར་འགྲོའོ། །སྙམ་དུ་རིག་ནས་བཻ་ཌཱུརྱ་ལས་བྱས་པའི་དྲི་གཙང་ཁང་མངོན་པར་སྤྲུལ་ཏེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་འཆག་པ་མཛད་པའི་ཞམ་འབྲིང་ན་འཆག་ཅིང་འདུག་གོ་།དེའི་ཚེ་ཡུལ་མ་ག་དྷ་པའི་མི་རྣམས་ཁྱེའུ་དང ། བུ་མོ་ངུ་བ་
Tha110b
གང་ཡིན་པ་དེ་དག་ལ་དེ་རྣམས་གནོད་སྦྱིན་བ་ཀུ་ལའི་མིང་གིས་བསྡིགས་པར་བྱེད་དོ། །དེ་ནས་ཚེ་དང་ལྡན་པ་ཀླུ་སྐྱོང་གིས་འདི་སྙམ་དུ་བསམ་སྟེ། ཀྱེ་མ་བཅོམ་ལྡན་འདས་ཧ་ཅང་ཡུན་རིང་དུ་བླ་གབ་མེད་པའི་འཆག་ས་ན་འཆག་པ་མཛད་པས། མ་ལ་བདག་གིས་དེ་ལ་གནོད་སྦྱིན་བ་ཀུ་ལས་བསྡིགས་སོ། །སྙམ་དུ་རིག་ནས་ལ་བ་ལྡོག་སྟེ་བགོས་ནས་འཆག་པའི་སླད་དུ་འདུག་སྟེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བ་ཀུ་ལ། བ་ཀུ་ལ། དགེ་སྦྱོང ། ང་ནི། གནོད་སྦྱིན་བ་ཀུ་ལ་ཡིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀླུ་སྐྱོང་ལ་འདི་སྐད་ཅེས་བཀའ་སྩལ་ཏོ། །མི་བླུན་པོ། ཁྱོད་ཀྱང་དེ་བཞིན་གཤེགས་པ་ལ་གནོད་སྦྱིན་བ་ཀུ་ལས་བསྡིགས་པར་སེམས་སམ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། བསྙེངས་པ་དང ། བག་ཚ་བ་དང་བྲལ་བ་སྟེ། དེ་བཞིན་གཤེགས་པ་ལ་བསྙེངས་པའམ། ཞུམ་པའམ། སྤུ་ཟིང་ཞེས་བྱེད་པ་མི་མངའོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་མ་དད་པར་གྱུར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། ཆོས་འདུལ་བ་འདི་ལ་འདི་འདྲ་བའི་གང་ཟག་ཀྱང་མཆིས་སམ། ཀོའུ་ཤི་ཀ། ཁྱོད་སྡོད་ཅིག་།གོའུ་ཏ་མའི་རིགས་ནི། རྒྱ་ཆེ་བ་ཡིན་པས། འདི་ཡང་ཕྱིས་རྣམ་པར་དག་པའི་ཆོས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི། དགེ་སློང་དག་ལ་བ་ལྡོག་སྟེ་གྱོན་པ་ལས་གྱུར་པར་
Tha111a
༄#། །མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག། མི་བླུན་པོ་ཀླུ་སྐྱོང་གིས་ལ་བ་ལྡོག་སྟེ་བགོས་ནས་དེ་བཞིན་གཤེགས་པ་ལ། བ་ཀུ་ལ། བ་ཀུ་ལ། དགེ་སྦྱོང ། ང་ནི། གནོད་སྦྱིན་བ་ཀུ་ལ་ཡིན་ནོ། །ཞེས་ཟེར་ཏེ། དེ་ལྟ་བས་ན། དགེ་སློང་གིས་ལ་བ་ལྡོག་སྟེ་བགོ་བར་མི་བྱའོ། །གྱོན་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་ལ་བ་ལྡོག་སྟེ་བགོ་བར་མི་བྱའོ། །གྱོན་ན། འགལ་ཚབས་ཅན་དུ་འགྱུར་རོ། །ཞེས་བཀའ་སྩལ་པ། དགེ་སློང་བ་ལང་གི་གནས་ན་འཁོད་པ་དེ་དག་གིས་དེར་ལ་བའི་བགོ་བ་དག་རྙེད་པ་དང ། དེ་དག་ལ་ཤིག་ཞུགས་ཏེ་དགེ་སློང་རྣམས་ཤིག་གིས་ཟོས་པས། བདེ་བ་མི་ཐོབ་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ལ་བ་ལྡོག་སྟེ་གྱོན་པས་འདུག་པར་བྱའོ། །ཉལ་བར་བྱའི། བཅག་པར་ནི། མི་བྱའོ། །སྡོམ་ནི། བེའུ་རས་དང་ནི་ལ་བ་དང ། དེ་བཞིན་ལ་བའི་མཆོག་དང་ནི། །སྒྲོག་མིག་སྒྲོག་རྟེན་མདུད་པ་དང ། །སྐ་རགས་དག་ནི་གསུམ་ཡིན་ནོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག། གལ་ཏེ་དགེ་འདུན་ལ་བེའུ་རས་གྲུབ་ན་ཡང་གནང་
Tha111b
ལ། གང་ཟག་ལ་ཡང་གནང་ངོ ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཤིང་སྔ་མ་བཞིན་ཏེ། དགེ་འདུན་ལ་ལ་བ་གྲུབ་ན་ཡང་གནང་ལ། གང་ཟག་ལ་ཡང་གནང་ངོ ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཤིང་སྔ་མ་བཞིན་ཏེ། དགེ་འདུན་ལ་ལ་བ་མཆོག་གྲུབ་ན་ཡང་གནང་ལ། གང་ཟག་ལ་ཡང་གནང་ངོ ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་བསོད་སྙོམས་པ་ཞིག་འདུག་པ་དེ། སྔ་དྲོ་ཤམ་ཐབས་དང་ཆོས་གོས་བགོས། ལྷུང་བཟེད་ཐོགས་ཏེ་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་སོ། །དེ་བསོད་སྙོམས་ཀྱི་ཕྱིར་རྒྱུ་བ་ན་ཆོས་གོས་ནར་ནས་དེས་མྱུར་བ་མྱུར་བར་ལྷུང་བཟེད་ས་ལ་བཞག་ནས་དེ་ཚགས་བྱས་པ་དང ། དེ་བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་འཕྱ་ཞིང་དགེ་སྦྱོང་ཤཱཀྱའི་བུ་རྣམས་ནི། གཙང་སྦྲ་མེད་དེ། ལྷུང་བཟེད་བབ་བབ་ཏུ་འཇོག་གོ་།ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ལྷུང་བཟེད་བབ་བབ་ཏུ་བཞག་པར་མི་བྱའོ། །དགེ་སློང་ལྷུང་བཟེད་བབ་བབ་ཏུ་འཇོག་ན། འགལ་ཚབས་ཅན་དུ་འགྱུར་རོ། །འོན་ཀྱང་ཆོས་
Tha112a
༄#། །གོས་བསྲུང་བའི་ཕྱིར་ཆོས་གོས་ཀྱི་སྒྲོག་མིག་གདགས་པར་བྱའོ། །དགེ་སློང་རྣམས་ཀྱིས་བཏགས་པ་དང ། དེས་ཆོས་གོས་རལ་ནས་བཅོམ་ལྡན་འདས་ཀྱིས་བཀའ་སྩལ་པ། སྒྲོག་ཟུངས་ཀྱིས་གློན་ལ་ཐོགས་ཤིག་།དགེ་སློང་རྣམས་ཀྱིས་སྒྲོག་ཟུངས་ཀྱིས་གླན་ནས་བཏགས་པ་དང ། དེ་སྒྲོག་མདུད་མེད་པས། མ་ཆགས་ཏེ། ཉེས་དམིགས་དེ་ཉིད་དུ་གྱུར་པ་དང ། བཅོམ་ལྡན་འདས་ཀྱིས་བཀའ་སྩལ་པ། མདུད་པ་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་བསོད་སྙོམས་པ་ཞིག་འདུག་པ་དེ། སྔ་དྲོ་ཤམ་ཐབས་དང ། ཆོས་གོས་བགོས་ལྷུང་བཟེད་ཐོགས་ཏེ་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་སོ། །དེ་བསོད་སྙོམས་ཀྱི་ཕྱིར་རྒྱུ་བ་དང ། སྨད་གཡོགས་བསྙིལ་བ་དང ། དེས་མྱུར་བ་མྱུར་བར་ལྷུང་བཟེད་ས་ལ་བཞག་སྟེ་དེ་ཚགས་བཅོས་སོ། །བྲམ་ཟེ་དང ། ཁྱིམ་བདག་རྣམས་ཀྱིས་མཐོང་ནས་ཞེས་བྱ་བ་སྔ་མ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། ཆོས་གོས་བསྲུང་བའི་ཕྱིར་སྐ་རགས་རྣམ་པ་གསུམ་པོ། ཤུར་བུ་དང ། ཤུར་བུ་ཕྲེའུ་དང ། ལྕག་ཕོད་བཅང་བར་བྱའོ།། །།འདུལ་བ་ཕྲན་ཚེགས་ཀྱི་གཞི། བམ་པོ་བདུན་པ། སྡོམ་ནི། སྟོན་པ་སེར་སྐྱའི་གནས་བཞུགས་པས། རྒྱན་སྤེལ་མ་དང་འཕྱང་འཕྲུལ་
Tha112b
ཅན། །ཟླ་གམ་དང་ནི་གསེར་སྐུད་ཅན། །ཁྲ་བོ་ཐམས་ཅད་བཀག་པ་ཡིན། །སངས་རྒྱས་བཅོམ་ལྡན་འདས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །དེའི་ཚེ་ཤཱཀྱ་མིང་ཆེན་གྱི་ཁྱིམ་གྱི་ཞལ་ཏ་པ་དུས་ལས་འདས་པ་དང ། རི་བྲག་ན་གནས་པའི་སྐྱེ་བོའི་ཚོགས། ཤཱཀྱ་མིང་ཆེན་ག་ལ་བ་དེར་སོང་སྟེ་སྨྲས་པ། རྗེ། ཁྱོད་ཀྱི་ཁབ་ཀྱི་ཞལ་ཏ་པ་གུམ་ན། ཞལ་ཏ་པ་གཞན་ཞིག་བསྐོ་བར་གསོལ། དེས་དེའི་དྲུང་ན་བྲམ་ཟེའི་ཁྱེའུ་ཞིག་འདུག་པ་དེ་ལ་སྨྲས་པ། བྲམ་ཟེའི་ཁྱེའུ། རེ་ཞིག་ཁྱོད་སོང་ཞིག་།ཇི་ཙམ་ན་ཞལ་ཏ་པ་གཞན་ཞིག་བཏང་ངོ ། །དེ་སོང་ནས་དེས་ཆོས་བཞིན་དུ་རིགས་པར་སྤྱད་པས། དཔྱ་ནར་མ་དང ། བླ་སྐྱེས་རབ་ཏུ་མང་པོར་ཕུལ་བ་དང ། ཤཱཀྱ་མིང་ཆེན་གྱིས་སྨྲས་པ། བྲམ་ཟེའི་ཁྱེའུ། དཔྱ་ནར་མ་དང ། བླ་སྐྱེས་འདི་ལྟར་མང་བ། ཁྱོད་ཀྱིས་སྐྱེ་བོའི་ཚོགས་ལ་གནོད་པར་མ་བྱས་གྲང ། དེས་སྨྲས་པ། རྗེ་དཔྱ་ནར་མ་དང ། བླ་སྐྱེས་འདི་རིགས་པས་མཆིས་པ་ལགས་ཏེ། བདག་གིས་སྐྱེ་བོའི་ཚོགས་ལ་གནོད་པ་བགྱིས་པ་མ་ལགས་སོ། །དེས་རི་བྲག་ན་གནས་པའི་སྐྱེ་བོའི་ཚོགས་དེ་ལ་སྨྲས་པ། ཤེས་ལྡན་དག་།བྲམ་ཟེའི་ཁྱེའུ་འདིས། ཁྱེད་འགའ་ལ་གནོད་པ་མ་བྱས་གྲང ། རྗེ། དཔྱ་ནར་མ་དང ། བླ་སྐྱེས་འདི་རིགས་པས་མཆིས་པ་ལགས་སོ། །འདིས་འགའ་ལ་ཡང་གནོད་པ་མ་བགྱིས་སོ། །ཞེས་སྨྲས་པ་དང ། དེས་དེ་རི་བྲག་གི་ཞལ་ཏ་པར་བཅུག་གོ། །འཇིག་རྟེན་ནི། འབྱོར་པ་འདོད་ཅིང ། རྒུད་པ་དང་མི་མཐུན་པ་ཡིན་པས། དེ་ལ་བྲམ་
Tha113a
༄#། །ཟེ་གཞན་ཞིག་གིས་བུ་མོ་བྱིན་པ་དང ། དེས་དེ་ཉི་མ་དང ། ཚེས་གྲངས་དང ། ཡུད་ཙམ་དང་སྦྱར་ནས་བག་མར་བླངས་སོ། །དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས། བུ་ཁྱེའུ་ཞིག་བཙས་ཏེ། དེ་བཙས་པའི་བཙས་སྟོན་རྒྱ་ཆེར་བྱས་ནས་རིགས་དང་མཐུན་པའི་མིང་བཏགས་སོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས། བུ་མོ་ཞིག་བཙས་ཏེ། དེའི་བཙས་སྟོན་ཡང་རྒྱ་ཆེར་བྱས་ནས་མིང་ཟླ་བ་ཞེས་བྱ་བར་བཏགས་སོ། །དེ་བསྐྱེད་བསྲིངས་ཏེ་ཆེན་མོར་གྱུར་པ་དང ། དེ་མཁས་ཤིང་སྤྱོད་ལམ་དང ། འགྲོ་འདུག་འོ་བཟེ་བས། རི་བྲག་ན་གནས་པའི་སྐྱེ་བོའི་ཚོགས་ཐམས་ཅད་ཀྱི་ཡིད་དུ་འོང་བར་གྱུར་ཏོ། །ཇི་ཙམ་དུས་གཞན་ཞིག་ན་བྲམ་ཟེའི་ཁྱེའུ་དེ་ན་བར་གྱུར་ནས། རྩ་བ་དང ། སྡོང་བུ་དང ། ལོ་མ་དང ། མེ་ཏོག་དང ། འབྲས་བུའི་སྨན་གྱིས་རིམ་གྲོ་བྱས་ཀྱང ། ནད་དེ་ཞི་བར་མ་གྱུར་ནས་རི་བྲག་པ་དེས་དཔྱ་ནར་མ་དང ། བླ་སྐྱེས་ཕུལ་བ་གང་ཡིན་པ་དེ་དག་ཐམས་ཅད་སྤྱད་ཅིང ། སྐྱིན་པོ་གཞན་དག་བླངས་ནས་འོན་ཀྱང་སོས་པར་མ་གྱུར་ནས་དེ་དེ་ཉིད་དུ་དུས་ལས་འདས་སོ། །རི་བྲག་ན་གནས་པའི་སྐྱེ་བོའི་ཚོགས་དག་ཤཱཀྱ་མིང་ཆེན་ག་ལ་བ་དེར་འོངས་ཏེ་སྨྲས་པ། རྗེ། ཞལ་ཏ་པ་དེ་ནི། གུམ་ལགས་སོ། །དེས་སྨྲས་པ། ཤེས་ལྡན་དག་།དེ་ན་དཔྱ་ནར་མ་དང ། བླ་སྐྱེས་སུ་ཕུལ་བ་ཡོད་
Tha113b
དམ། རྗེ། ཏེ་པོར་མང་དུ་ཕུལ་མོད་ཀྱི། དེས་བྲོ་འཚལ་བའི་ཡོ་བྱད་དུ་སྤྱད་ན། འོན་ཀྱང་སོས་པར་མ་གྱུར་ནས་སྐྱིན་པོ་གཞན་དག་ཀྱང་བགྱིས་སོ། །དེངས་ལ་དེ་ན་ལྷག་མ་ཅུང་ཟད་ཅི་ཡོད་པ་དེས་བུ་ལོན་སོབས་ཤིག་།རྗེ། དེ་ན་ཅུང་ཟད་ཀྱང་མ་མཆིས་ཏེ། ལུས་པར་བཏབ་ན། དེའི་མཆིས་བྲང་དང ། བུ་ཕོ་དང ། བུ་མོ་མཆིས་ཏེ། དེའི་བུ་མོ་དེ་མཁས་ཤིང་སྤྱོད་ལམ་དང ། འགྲོ་འདུག་འོ་བཟེ་བ་ལགས་པས། རི་བྲག་ན་གནས་པའི་སྐྱེ་བོའི་ཚོགས་ཐམས་ཅད་ཀྱི་ཡིད་དུ་མཆི་བར་གྱུར་ཏོ། །མིང་ཆེན་གྱི་སྨྲས་པ། ཤེས་ལྡན་དག་།དེའི་ཆུང་མ་དང ། བུ་ཕོ་དག་ཅི་དགར་ཐོང་ལ། བུ་མོ་དེ་འདིར་ཁུག་ཅིག་།དེ་རྣམས་ཀྱིས་དེའི་ཆུང་མ་དང ། བུ་ཕོ་དེ་དག་ཅི་དགར་བཏང་ནས་བུ་མོ་དེ་མིང་ཆེན་གྱི་གན་དུ་ཁྲིད་དོ། །ཤཱཀྱ་མིང་ཆེན་གྱི་ཆུང་མ་རྒན་མོ་ཞིག་ཁ་ཟས་གཡོ་བ་དང ། མེ་ཏོག་འཐུ་བའི་ལས་རྣམ་གཉིས་བྱེད་པ་དེས་སྨྲས་པ། ཇོ་བོ། དེ་ནི། བདག་ཤིན་ཏུ་རྒས་པས་སུག་ལས་རྣམ་གཉིས་བགྱིད་རྔོ་མི་ཐོགས་ན། ཟླ་བ་འདི་བདག་གི་ངན་གྲོགས་སུ་བསྐོར་གསོལ། དེས་དེ་ངན་གྲོགས་སུ་བསྐོས་སོ། །དེས་དེ་ལ་སྨྲས་པ། ཟླ་བ། ཁྱོད་ནི། ཀུན་དགའ་ར་བར་སོང་ལ་མེ་ཏོག་ཐུས་ཤིག་།ངས་ནི། ཁ་ཟས་གཡོའོ། །དེ་ཀུན་དགའ་ར་བར་སོང་ནས་མེ་ཏོག་བཏུས་ཏེ། དེ་ནས་ཕྲེང་བ་ལེགས་པར་བརྒྱུས་ནས་མིང་ཆེན་གྱི་གན་དུ་སོང་བ་དང ། དེས་མཐོང་ནས་ཡོངས་སུ་དགའ་སྟེ་སྨྲས་པ། ལེགས་སོ། །ཞོག་ཅིག་ཅེས་སྨྲས་ནས་ཆུང་མ་རྒན་མོ་དེ་ལ་འདི་སྐད་ཅེས་སྨྲས་སོ། །ཅིའི་ཕྱིར་སྔོན་ནི།
Tha114a
༄#། །མེ་ཏོག་ཉུང་ལ། དེ་རིང་མང་བར་གྱུར། དེས་སྨྲས་པ། སྔོན་ནི། ཁྱོད་ཀྱི་གཉེན་དག་མཆིས་ནས་བདག་ལ་སློང་བ་ན། བདག་གིས་དེ་དག་ལ་སྩལ་ལ། འདིས་ནི། སུ་ལ་ཡང་མ་སྩལ་པ་དང ། བདག་ནི། རྒས་པས་མིག་རྟུལ་ལ། འདི་ནི། མིག་རྣོ་བས་འཐུ་མཁས་པ་ལས་གྱུར་ཏོ། །དེས་སྨྲས་པ། གལ་ཏེ་དེ་ལྟ་ན། དེ་ཀུན་དགའ་ར་བར་ཐོང་ལ་དེར་ཞོག་ཅིག་།དེས་དེ་ཀུན་དགའ་ར་བ་དེ་ཉིད་དུ་བཞག་པ་དང ། དེ་མེ་ཏོག་གི་ཕྲེང་བ་བཟང་པོ་རྒྱུད་པར་བྱེད་པས། དེའི་མིང་ཕྲེང་ལྡན་མ་ཞེས་བྱ་བར་གྲགས་སོ། །དུས་གཞན་དེ་ཁྱིམ་ནས་རང་གི་ཟན་བླངས་ཏེ་ཀུན་དགའ་ར་བར་སོང་བ་དང ། བཅོམ་ལྡན་འདས་ཀྱང་བསོད་སྙོམས་ལ་གཤེགས་སོ། །དེས་བཅོམ་ལྡན་འདས་སྐུ་བལྟ་བས་ཆོག་མི་ཤེས་པ་མཐོང་ནས་ཤིན་ཏུ་བདེ་ཞིང་རབ་ཏུ་དགའ་བས་རྟོག་པར་བྱེད་ཅིང་བསམ་པ། འདི་ལྟ་བུའི་ཡོན་གནས་ཡང་དག་པ་ལ་བདག་གིས་བྱ་བ་མ་བྱས་པས། དེས་ན་བདག་འདི་ལྟ་བུའི་གནས་སྐབས་སུ་གྱུར་པར་གདོན་མི་ཟའོ། །དེའི་ཕྱིར་གལ་ཏེ་བཅོམ་ལྡན་འདས་ཀྱིས་བདག་ལས་བསོད་སྙོམས་བཞེས་ན། བདག་གིས་བཅོམ་ལྡན་འདས་ལ་དབུལ་ལོ། །སྙམ་པ་དང ། སྐབས་དེ་ལྟ་བུ་ལ། སངས་རྒྱས་བཅོམ་ལྡན་འདས་རྣམས་ལ་མི་མཁྱེན་པ་དང ། མི་གཟིགས་པ་དང ། མི་རིག་པ་དང ། རྣམ་པར་མི་མཁྱེན་པ་ཅི་ཡང་མི་མངའ་བས། སངས་རྒྱས་བཅོམ་ལྡན་འདས་རྣམས་ལ་
Tha114b
ནི།་ཆོས་ཉིད་ཀྱིས་ཞེས་བྱ་བ་ནས། ལུས་ཅན་རྣམས་ལ་འབྲས་བུར་སྨིན། །ཞེས་བྱ་བའི་བར་སྔ་མ་བཞིན་ནོ། །དེ་ནས་བཅོམ་ལྡན་འདས་ཀྱིས་དེ་རྗེས་སུ་གཟུང་བའི་ཕྱིར་ལྷུང་བཟེད་བཟེད་དེ།་སྲིང་མོ། ཁྱོད་ཀྱི་གལ་ཏེ་ཡོངས་སུ་བཏང་ན། ལྷུང་བཟེད་འདིར་བྱིན་ཅིག་།ཅེས་བཀའ་སྩལ་པ་དང ། དེས་ཤིན་ཏུ་དད་པས་བཅོམ་ལྡན་འདས་ལ་བསོད་སྙོམས་དེ་ཕུལ་ནས་ཞབས་གཉིས་ལ་ཕྱག་འཚལ་ཏེ་སྨོན་ལམ་བཏབ་པ། བདག་གི་དགེ་བའི་རྩ་བ་འདིས། བྲན་མོ་དང ། དབུལ་པོར་མི་འགྱུར་བ་ཤོག་ཅིག་།ཇི་ཙམ་ན། དེའི་ཕའི་གྲོགས་པོ་བྲམ་ཟེ་མཚན་མཁན་ཞིག་ཡོད་པ་དེས་དེ་མཐོང་ནས་སྨྲས་པ། བུ་མོ། ཁྱོད་ག་ལས་འོངས། རི་བྲག་དེ་ཁོ་ན་ནས་སོ། །སུ་ལ་གནས་ཤིང་འདུག་།དེས་སྨྲས་པ། གང་ན་སྐལ་པ་ཆུང་ངུ་གནས་པ་ན་སྟེ། བདག་མིང་ཆེན་གྱི་བྲན་མོར་བགྱིས་སོ། །ཁྱོད་ཀྱི་ཕ་དེ་གར་སོང ། གུམ་མོ། །མ་དང ། མིང་ཕོ་དེ་དག་གར་དོང ། གར་མཆིས་མ་འཚལ་ཏོ། །ཟླ་བ། ཁྱོད་བྲན་མོའི་འོས་མ་ཡིན་ན། ལག་པ་རྐྱོངས་ཤིག་དང་བལྟའོ། །དེས་ལག་པ་བརྐྱང་པ་དང ། དེས་བལྟས་ནས་ཚིགས་སུ་བཅད་དེ་སྨྲས་པ། གང་གི་ལག་པའི་མཐིལ་དག་ལ། །ལྕགས་ཀྱི་འཁོར་ལོའི་མཚན་ཡོད་པ། །བྲན་གྱི་རིགས་སུ་སྐྱེས་གྱུར་ཀྱང ། །རྒྱལ་པོའི་བཙུན་མོར་བཞེས་པར་འགྱུར། །གང་གི་བཞིན་ནི་རྒྱས་པ་དང ། །ངང་པའི་རྒྱལ་པོའི་གདངས་འདྲ་བ། །བྲན་གྱི་རིགས་སུ་སྐྱེས་གྱུར་ཀྱང ། །རྒྱལ་པོའི་བཙུན་མོར་བཞེས་པར་འགྱུར། །
Tha115a
༄#། །གང་གི་རྐང་པའི་མཐིལ་དགལ། །གྲོང་ཁྱེར་ལྕོག་དང་རྟ་བབས་བཅས། །བྲན་གྱི་རིགས་སུ་སྐྱེས་གྱུར་ཀྱང ། །རྒྱལ་པོའི་བཙུན་མོར་བཞེས་པར་འགྱུར། །ཁྱོད་མི་དགའ་བ་མ་བྱེད་པར་སོང་ཞིག་དང ། ཁྱོད་བྲན་མོར་མི་འགྱུར་གྱི། ཁྱོད་རྒྱལ་པོའི་བཙུན་མོར་འགྱུར་རོ། །དེ་གནས་དེ་ནས་སྐྱེད་མོས་ཚལ་དུ་སོང་བ་དང ། ཡུལ་ཀོ་ས་ལའི་རྒྱལ་པོ་གསལ་རྒྱལ་རི་དྲགས་ཤོར་དུ་སོང་བ། རྟས་ཁ་ཁྱེར་ཏེ་གཅིག་པུ་སེར་སྐྱའི་གནས་སུ་ཕྱིན་ཏོ། །དེ་ཕན་ཚུན་འཁྱམས་པ་ལས། མིང་ཆེན་གྱི་ཀུན་དགའ་ར་བར་སོང་ནས་དེས་བུ་མོ་དེ་ལ་དྲིས་པ། བུ་མོ། འདི་སུའི་ཀུན་དགའ་ར་བ་ཡིན། དེས་སྨྲས་པ། ལྷ། ཤཱཀྱ་མིང་ཆེན་གྱི་ལགས་སོ། །དེས་རྟ་ལས་བབས་ཏེ། སྨྲས་པ། བུ་མོ། རྐང་པ་བཀྲུའི། ཆུ་ལོངས་ཤིག་།དེས་ཤིན་ཏུ་མྱུར་བར་རྫིང་བུར་སོང་སྟེ་ཉི་མའི་འོད་ཟེར་གྱིས་བསྲོས་པའི་ཆུ་བླངས་པ་དང ། དེས་རྐང་པ་བཀྲུས་ནས་ཡུད་ཙམ་ཞིག་བསྡད་ཏེ་སྨྲས་པ། བུ་མོ། གདོང་བཀྲུའི་ཆུ་ལོངས་ཤིག་།དེས་ཆུའི་སྟེང་རིམ་ལག་པས་བསལ་ཏེ། ཆུ་ཧ་ཅང་དྲོ་བ་ཡང་མ་ཡིན། ཧ་ཅང་གྲང་བ་ཡང་མ་ཡིན་པ་བླངས་ནས་དེས་གདོང་བཀྲུས་སོ། །དེས་ཡང་སྨྲས་པ། བུ་མོ། བཏུང་དགོས་ཀྱི། ཆུ་ལོངས་ཤིག་དེས་ཆུ་རྣམ་པར་གློངས་ཏེ་ཆུ་བསིལ་པ་ལོ་མའི་སྣོད་དུ་བླངས་པ། རྒྱལ་པོས་འཐུངས་ནས་སྨྲས་པ། བུ་མོ། །ཀུན་དགའ་ར་བ་འདི་ན་རྫིང་བུ་གསུམ་ཡོད་དམ། ཅི་ན་ཁྱོད་ཀྱིས་ཆུ་རྣམ་པ་གསུམ་
Tha115b
ཁྱེར་ཏེ་འོངས། དེས་སྨྲས་པ། ལྷ། འདི་ན་རྫིང་བུ་གཅིག་ཁོ་ན་མཆིས་ཀྱི། གསུམ་ནི། མ་མཆིས་སོ། །དེས་སྨྲས་པ། འོ་ན་ཁྱོད་ཀྱིས་ཆུ་རྣམ་པ་གསུམ་ག་ལས་ཁྱེར་ཏེ་འོངས། དེས་ཇི་ལྟར་གྱུར་པ་བརྗོད་པ་དང ། རྒྱལ་པོས་སྨྲས་པ། དེ་ནི། གོའོ། །འདི་འདྲི་བར་བྱ་སྟེ། ཅིའི་ཕྱིར་ཁྱོད་ཀྱིས་ཆུ་རྣམ་པ་གསུམ་ཁྱེར་ཏེ་འོངས། དེས་སྨྲས་པ། ལྷ། བདག་གིས་དང་པོར་ཆབ་དྲོན་པོ་འཚལ་ཏེ་མཆིས་པ་ནི། ལྷ། མཉེལ་སོས་པར་བགྱི་བའི་སླད་དུའོ། །སླད་ཀྱི་ཧ་ཅང་དྲོ་བ་ཡང་མ་ལགས། ཧ་ཅང་གྲང་བ་ཡང་མ་ལགས་པ་འཚལ་ཏེ་མཆིས་པ་ནི། དྲོ་བ་དང ། གྲང་བ་གང་ལགས་པ་དག་སྤྱན་ལ་གནོད་པ་སྤང་བའི་སླད་དུའོ། །རྣམ་པར་གློངས་ནས་ཤིན་ཏུ་བསིལ་བ་འཚལ་ཏེ་མཆིས་པ་ནི། ལྷ་སྐྱེམས་པ་དང་བྲལ་བར་བགྱི་བའི་སླད་དུའོ། །དེས་བསམ་པ། བུ་མོ་འདི་ནི། མཁས་པ་ཡིན་ནོ། །སྙམ་དུ་རིག་ནས་སྨྲས་པ། བུ་མོ་མཛངས་ཤིང་མཁས་པ་ཁྱོད། རྐང་པ་མཉེ་དགོས་ཀྱི། རེ་ཞིག་མལ་ཆོས་ཤིག་།དེས་དེའི་རྐང་པ་མཉེས་པ་དང ། དེ་རེག་བྱ་དང་ལྡན་པ་ཡིན་པས། མཉེས་མ་ཐག་ཉིད་དུ་དེ་གཉིད་ལོག་།དེ་གཉིད་ལོག་པ་དང ། དེས་བསམ་པ། རྒྱལ་པོ་འདི་དག་ལ་ནི། དགྲ་མང་བས། གལ་ཏེ་འདི་གཉིད་ལོག་པ་ལ། འགའ་ཞིག་གིས་གནོད་པ་བྱས་ན། ངེས་པར་བདག་གི་རྗེ་བོ་ལ་གྲགས་པ་མ་ཡིན་པར་འགྱུར་བས། སྒོ་གཅད་པར་བྱའོ། །སྙམ་ནས་དེས་སྒོ་བཅད་དེ་འདུག་པ་དང ། ཇི་ཙམ་ན་གཅིག་ནས་གཅིག་ཏུ་ཐོས་ཏེ་
Tha116a
༄#། །དཔུང་གི་ཚོགས་ཡན་ལག་བཞི་པ་དག་སྐྱེད་མོས་ཚལ་དེར་ལྷགས་ནས་དེ་རྣམས་སྒོ་ཕྱེ་ཞེས་ཟེར་རོ། །དེས་སྒོ་མ་ཕྱེ་བ་དང ། རྒྱལ་པོ་ཀུ་ཅོའི་སྒྲས་སད་ནས་སྨྲས་པ། བུ་མོ། དེ་ཅི་ཞིག་།དེས་སྨྲས་པ། ལྷ། མི་དག་ཅིག་ཆབ་སྒོ་ཕྱེ་ཞེས་མཆི་ཞིང ། ལྷའི་མཚན་ཀྱང་སྨོས་སོ། །དེས་སྨྲས་པ། བུ་མོ། སྒོ་འདི་སུས་བཅད། ལྷ། བདག་གིས་བཀུམ་མོ། །ཅིའི་ཕྱིར་བཅད། ལྷ། བདག་གི་གློ་བ་ལ་རྒྱལ་པོ་འདི་དག་ལ་ནི། དགྲ་མང་བས། གལ་ཏེ་འདི་མནལ་ལོག་པ་ལ་འགའ་ཞིག་གིས་གནོད་པ་བགྱིས་ན། ངེས་པར་བདག་གི་རྗེ་བོ་ལ་གྲགས་པ་མ་ལགས་པར་འགྱུར་རོ། །སྙམ་ནས་དེའི་སླད་དུ་བདག་གིས་ཆབ་སྒོ་བཀུམ་མོ། །དེས་སྨྲས་པ། བུ་མོ་མཛངས་མ་མོ་ཁྱོད་ལ་ངའི་ཐེ་ཚོམ་འདི་འདྲི་བར་བྱ་སྟེ། རེ་ཞིག་ཁྱོད་མིང་ཆེན་གྱི་ཅིར་འོང་སྨྲོས་ཤིག་།དེས་སྨྲས་པ། བདག་དེའི་མངག་གཞུག་བགྱིད་པའི་བྲན་མོ་ལགས་སོ། །ཁྱོད་དེའི་མངག་གཞུག་བྱེད་པའི་བྲན་མོ་མ་ཡིན་གྱི། ཁྱོད་ངེས་པར་དེའི་བུ་མོ་ཡིན་གྱི། ཁྱོད་ཀྱིས་དྲང་པོར་སྨྲོས་ཤིག་།དེ་ཅང་མི་སྨྲ་བར་འདུག་པ་དང ། རྒྱལ་པོས་སྨྲས་པ། བུ་མོ། ཁྱོད་མིང་ཆེན་གྱི་གན་དུ་སོང་ལ་རྒྱལ་པོ་གསལ་རྒྱལ་ཁྱོད་ཀྱི་ཀུན་དགའ་ར་བ་ན་བཞུགས་སོ། །ཞེས་བྱོས་ཤིག་།དེ་མྱུར་བ་མྱུར་བར་སོང་སྟེ། ཇོ་བོ། ཀོ་ས་ལའི་རྒྱལ་པོ་གསལ་རྒྱལ་ཁྱོད་ཀྱི་ཀུན་དགའ་ར་བ་ན་བཞུགས་སོ། །ཞེས་སྨྲས་སོ། །ཤཱཀྱ་མིང་ཆེན་གྱིས་ཐོས་ནས་བཟའ་བ་དང །
Tha116b
བཏུང་བ་དང ། དྲི་དང ། ཕྲེང་བ་དག་བཤམས་ནས་སྐྱེ་བོ་ཕལ་པོ་ཆེས་བསྐོར་ཏེ་ཀུན་དགའ་ར་བར་སོང་ངོ ། །དེ་ནས་གཅིག་ལ་གཅིག་བྱོན་པ་ལེགས་སོ། །ཞེས་བྱ་བའི་ཚིག་གིས་ཀུན་ཏུ་སྤྱད་པས་སོ་སོ་ཡང་དག་པར་དགའ་བར་བྱས་ནས་རྒྱལ་པོ་ཁྲུས་བྱས་ཤིང་ཟན་ཟོས་ནས་གཏམ་དག་བྱས་ཏེ་ཡུད་ཙམ་ཞིག་བསྡད་ནས་སྨྲས་པ། མིང་ཆེན། བུ་མོ་འདི་ཁྱོད་ཀྱི་ཅིར་འོང ། ལྷ། མངག་གཞུག་བགྱིད་པའི་བྲན་མོ་ལགས་སོ། །འདི་ཁྱོད་ཀྱི་མངག་གཞུག་བྱེད་པའི་བྲན་མོ་མ་ཡིན་གྱི། འདི་ཁྱོད་ཀྱི་བུ་མོ་ཡིན་གྱི། ང་ལ་བྱིན་ཅིག་།དེས་སྨྲས་པ། ལྷ། ཤཱཀྱའི་བུ་མོ་གཞན་འདི་བས་ཆེས་ཁྱད་པར་དུ་འཕགས་པ་དག་མཆིས་ན། དེ་དག་བཞེས་སུ་གསོལ། འདི་ཅིར་འཚལ་རྒྱལ་པོས་སྨྲས་པ། འདི་ཉིད་ང་ལ་དགོས་ཀྱི། འདི་ང་ལ་བྱིན་ཅིག་།དེས་སྨྲས་པ། ལྷ། གལ་ཏེ་དེ་ལྟ་ན་ཚུལ་བཞིན་བགྱིས་ཏེ་དབུལ་ལོ། །དེ་བཞིན་བྱོས་ཤིག་།དེ་ནས་ཤཱཀྱ་མིང་ཆེན་གྱིས་གྲོང་ཁྱེར་མཛེས་པར་བྱེད་དུ་བཅུག་སྟེ། བུ་མོ་དེ་རྒྱན་ཐམས་ཅད་ཀྱིས་ཀླུབས་ནས་གླང་པོ་ཆེ་ལ་བསྐྱོན་ཏེ་ལམ་པོ་ཆེ་དང ། སྲང་དང ། ལམ་གྱི་སུམ་མདོ་དང ། བཞི་མདོ་དག་ཏུ་གྲོང་ཁྱེར་སེར་སྐྱའི་གནས་ན་འཁོད་པ་དང ། ཡུལ་སྣ་ཚོགས་ནས་ལྷགས་པའི་སྐྱེ་བོའི་ཚོགས་ལ། ཤེས་ལྡན་དག་ཉོན་ཅིག་།ཤཱཀྱ་མིང་ཆེན་གྱི་བུ་མོ་ཕྲེང་ལྡན་མ། ཀོ་ས་ལའི་རྒྱལ་པོ་གསལ་རྒྱལ་གྱི་བཙུན་མོར་ཕུལ་ལོ། །ཞེས་དྲིལ་བསྒྲགས་པ་བྱས་སོ། །དེ་ནས་དེ་ཀོ་ས་ལའི་རྒྱལ་པོ་གསལ་རྒྱལ་གྱི་བཙུན་མོར་ཕུལ་བར་
Tha117a
༄#། །སྐྱེ་བོ་ཕལ་པོ་ཆེ་རྣམས་ཀྱིས་ཀྱང་ཤེས་སོ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་དཔལ་གྱི་འབྱོར་བ་ཆེན་པོས་བླངས་ནས་མཉན་ཡོད་དུ་ཁྲིད་པ་དང ། དེའི་མས་བདག་གི་བུས་བྲན་མོ་ཆུང་མར་བླངས་སོ། །ཞེས་ཐོས་ཏེ། དེ་ཀུན་ནས་དཀྲིས་པ་སྐྱེས་ནས་བསམ་པ། འདི་ནི། ངེས་པར་ཕ་དེའི་བུ་མ་ཡིན་པའམ། བདག་གི་ཁོང་དུ་དོན་མེད་པ་ཞིག་བསྲེལ་ཏེ། འདི་ལྟར་བྲན་མོའི་ཁྱོར་སྐྱེས་པར་གྱུར་ཏོ། །སྙམ་ནས་དེ་ཡང་སེམས་ཁོང་དུ་ཆུད་ཅིང་འདུག་པ་དང ། རྒྱལ་པོས་ཀྱང་ཕྲེང་ལྡན་མ་ལ་སྨྲས་པ། ཕྲེང་ལྡན་མ། སོང་ལ་སྒྱུག་མོའི་ཞབས་ལ་ཕྱག་བྱོས་ཤིག་།དེ་སོང་སྟེ་དེའི་རྐང་པ་གཉིས་ལ་བཟུང་བ་དང ། དེ་རེག་བྱ་དང་ལྡན་པ་ཡིན་པས། དེས་རེག་པ་ཙམ་གྱིས་དེ་གཉིད་ལོག་སྟེ། སད་ནས་བསམ་པ། བུ་ཟན་མའི་བུ་མོ་འདིའི་རེག་པ་འདི་འདྲ་བས། ཀོ་ས་ལའི་རིགས་འདི་རྒྱས་པར་འགྱུར་རོ། །སྙམ་མོ། །དེའི་ཚེ་ཀོ་ས་ལའི་རྒྱལ་པོ་གསལ་རྒྱལ་ལ། བཙུན་མོ་དམ་པ། རྒྱལ་རིགས་དབྱར་ཚུལ་མ་དང ། ཕྲེང་ལྡན་མ་གཉིས་ཡོད་དེ། གང་གི་ཚེ་རྒྱལ་པོ་ཕྲེང་ལྡན་མ་དང་ཐབས་ཅིག་བཞུགས་པ་དེའི་ཚེ། ཕྲེང་ལྡན་མ། རྒྱལ་རིགས་དབྱར་ཚུལ་མ་ནི། འདི་ལྟ་བུར་ཡང་གཟུགས་བཟང་ངོ ། །ཞེས་དབྱར་ཚུལ་མའི་བསྔགས་པ་བརྗོད་པ་དང ། དེས་སྨྲས་པ། ལྷ། དེ་བདག་གིས་ནམ་ཞིག་ན་མཐོང་བར་འགྱུར་ལགས། རྒྱལ་པོས་སྨྲས་པ། མ་རིངས་ཤིག་དང ། རིང་པོ་མི་ཐོགས་པར་མཐོང་
Tha117b
བར་འགྱུར་རོ། །དེ་རེ་བ་དང་བཅས་པས་འདུག་གོ་།གང་གི་ཚེ་རྒྱལ་རིགས་དབྱར་ཚུལ་མ་དང་ཐབས་ཅིག་འདུག་པ་དེའི་ཚེ་ཡང ། དབྱར་ཚུལ་མ། ཕྲེང་ལྡན་མ་ནི། དེ་ལྟ་བུའི་རེག་བྱ་དང་ཡང་ལྡན་པ་ཡིན་ནོ། །ཞེས་ཕྲེང་ལྡན་མའི་བསྔགས་པ་བརྗོད་པ་དང ། དེས་སྨྲས་པ། ལྷ། དེ་བདག་གིས་ནམ་ཞིག་ན་མཐོང་བར་འགྱུར་ལགས། རྒྱལ་པོས་སྨྲས་པ། མ་རིངས་ཤིག་དང ། རིང་པོ་མི་ཐོགས་པར་མཐོང་བར་འགྱུར་རོ། །དེ་དག་རྒྱལ་པོས་ཇི་ལྟ་ཇི་ལྟར་ཡ་མཚན་བསྐྱེད་པ་དེ་ལྟར་ཕན་ཚུན་མཐོང་བར་སྤྲོ་བར་གྱུར་ཏོ། །ཇི་ཙམ་དུས་གཞན་ཞིག་ན་སོ་གའི་དུས་ལ་བབ་སྟེ། ནགས་ཚལ་ན་ཤིང་རྣམས་མེ་ཏོག་རྒྱས་པར་གྱུར་ཅིང ། ངང་པ་དང ། ཁྲུང་ཁྲུང་དང ། རྨ་བྱ་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ཤང་ཤང་ཏེའུ་སྒྲ་འབྱིན་པའི་སྐྱེད་མོས་ཚལ་གྱི་གནས་སུ་རྒྱལ་པོ་བཙུན་མོའི་ཚོགས་ཀྱིས་ཡོངས་སུ་བསྐོར་ཅིང་གཤེགས་སོ། །བུད་མེད་ནི། མེ་ཏོག་དང ། འབྲས་བུ་ལ་དགའ་བ་ཡིན་པས། སྐྱེད་མོས་ཚལ་དེ་དང་དེ་དག་ཏུ་འཁྱམས་པར་བརྩམས་པ་དང ། རྒྱལ་རིགས་དབྱར་ཚུལ་མ་ངལ་བས་སྐྱོ་ཞིང་སྙོམ་པར་གྱུར་ནས་ཤིང་མྱ་ངན་འཚང་ལ་བསྙེས་ཏེ་འདུག་པ་དང ། ཇི་ཙམ་ན་ཕྲེང་ལྡན་མས་མཐོང་ངོ ། །དེ་དེའི་གཟུགས་བཟང་བ་མཐོང་བས། ཤིང་གི་ལྷ་མོ་ཡིན་ནོ། །སྙམ་དུ་རིག་ནས་མོད་ལ་རྐང་པ་ལ་ཕྱག་བྱས་པ་དང ། ཕྲེང་ལྡན་མའི་ལག་པས་རེག་མ་ཐག་པ་ཉིད་དུ་གཉིད་ལོག་པར་གྱུར་ཏོ། །ཇི་ཙམ་ན་རྒྱལ་པོས་དབྱར་ཚུལ་མ་ལ་
Tha118a
༄#། །ཕྲེང་ལྡན་མའི་བསྔགས་པ་བརྗོད་པར་བརྩམས་པ་དང ། དེས་སྨྲས་པ། ལྷ། དེ་བདག་གིས་ནམ་ཞིག་ན་མཐོང་བར་འགྱུར་ལགས། རྒྱལ་པོས་སྨྲས་པ། དེ་ཁྱོད་ཀྱིས་མཐོང་ངོ ། །ལྷ། བདག་མ་དྲན་ནོ། །ངས་ཁྱོད་དྲན་པར་བྱའོ། །ལེགས་སོ། །གང་གི་ལག་པ་གཉིས་ཀྱིས་ཁྱོད་ཀྱི་རྐང་པ་ལ་བཟུང་བ་དེ་དྲན་ནམ། ལྷ། དེ་ལྷ་མོ་ཕྲེང་ལྡན་མ་ལགས་སམ། དེ་ཡིན་ནོ། །ལྷ། གང་ཁྱོད་རེག་བྱ་དང་ལྡན་པའི་བཙུན་མོ་དེ་ལྟ་བུ་སྤངས་ཏེ་བདག་གི་དྲུང་དུ་གཤེགས་པ་དེ་ནི། ཁྱོད་བདག་ལ་ངེས་པར་བྱམས་ཤིང་ཐུགས་གཅུགས་པ་ལགས་སོ། །དེ་བཞིན་དུ་ཕྲེང་ལྡན་མ་ལ། དབྱར་ཚུལ་མ་ནི། འདི་ལྟ་བུ་ཡིན་ནོ། །ཞེས་བསྔགས་པ་བརྗོད་པར་བརྩམས་པ་དང ། དེས་སྨྲས་པ། ལྷ། བདག་གིས་ནམ་ཞིག་ན་མཐོང་བར་འགྱུར་ལགས། རྒྱལ་པོས་སྨྲས་པ། དེ་ཁྱོད་ཀྱིས་མཐོང་ངོ ། །ལྷ། བདག་མི་དྲན་ནོ། །ངས་ཁྱོད་དྲན་པར་བྱའོ། །ལེགས་སོ། །ཁྱོད་ཀྱིས་ཤིང་མྱ་ངན་འཚང་ལ་བསྙེས་ཏེ་འདུག་པ་གང་ལ་ཕྱག་བྱས་པ་དེ་དྲན་ནམ། ལྷ། ཅི་དེ་དབྱར་ཚུལ་མ་ལགས་སམ། དེ་ཡིན་ནོ། །ལྷ། གང་ཁྱོད་ཀྱིས་བཙུན་མོ་གཟུགས་བཟང་བ་དེ་ལྟ་བུ་སྤངས་ཏེ་བདག་གི་དྲུང་དུ་གཤེགས་པ་དེ་ནི། ཁྱོད་ངེས་པར་བདག་ལ་བྱམས་ཤིང་ཐུགས་གཅུགས་པ་ལགས་སོ། །སྐབས་དེར་ཀོ་ས་ལའི་རྒྱལ་པོ་གསལ་རྒྱལ་ལ་བཙུན་མོ་དམ་པ་རྒྱལ་རིགས་དབྱར་ཚུལ་མ་དང ། ཕྲེང་
Tha118b
ལྡན་མ་གཉིས་ཡོད་དེ། དེ་དག་ལས་གཅིག་ནི། གཟུགས་བཟང་བ་རྣམས་ཀྱི་མཆོག་ཡིན་ལ། གཅིག་ཤོས་ནི། རེག་བྱ་དང་ལྡན་པ་རྣམས་ཀྱི་མཆོག་ཡིན་ནོ། །ཞེས་ཕྱོགས་སུ་སྒྲ་གྲགས་པ་དང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པར་མཛད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་མོ་ཕྲེང་ལྡན་མ་དང ། དབྱར་ཚུལ་མས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས། གཅིག་ནི། རེག་བྱ་དང་ལྡན་པ་རྣམས་ཀྱི་མཆོག་ཏུ་གྱུར་ལ། གཅིག་ཤོས་ནི། གཟུགས་བཟང་བ་རྣམས་ཀྱི་མཆོག་ཏུ་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།དེ་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། དེ་དག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་།ལས་བྱས་ཤིང་བསགས་པ་དག་ནི། སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི། འོན་ཀྱང་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི། ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། བསྐལ་པ་བརྒྱ་ཕྲག་རྣམས་སུ་ཡང ། །ལས་རྣམས་ཆུད་ཟར་མི་འགྱུར་ཏེ། །ཚོགས་ཤིང་དུས་ལ་བབ་པ་ན། །ལུས་
Tha119a
༄#། །ཅན་རྣམས་ལ་འབྲས་བུར་སྨིན། །དགེ་སློང་དག་།སྔོན་བྱུང་བ་འདས་པའི་དུས་ན་རི་བྲག་ཅིག་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པས་བུ་ཁྱེའུ་ཞིག་བཙས་སོ། །ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས། བུ་མོ་ཞིག་བཙས་ཏེ། དེ་དག་བསྲིངས་ཤིང་བསྐྱེད་ནས་ཆེན་པོར་གྱུར་ཏོ། །ཇི་ཙམ་དུས་གཞན་ཞིག་ན། བྲམ་ཟེ་དེ་ཆུང་མ་དང་བཅས་ཏེ་ཤི་ནས་བྲམ་ཟེའི་ཁྱེའུ་དེ་ཕ་མ་དང་བྲལ་བས་དབེན་པ་ལ་དགའ་བར་གྱུར་ཏེ། དེས་སྲིང་མོ་དེ་ཁྲིད་དེ། དགོན་པའི་གནས་སུ་སོང་ནས་འཁོད་དེ། དེར་དེ་དག་རྩ་བ་དང ། སྡོང་བུ་དང ། མེ་ཏོག་དང ། འབྲས་བུ་དག་གིས་འཚོ་བར་བརྩམས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།སྦྲུལ་ནག་པོ་ལ་ནི། ཉེས་དམིགས་རྣམ་པ་ལྔ་ཡོད་དེ། ལྔ་གང་ཞེ་ན། ཁྲོ་བ་དང ། འཁོན་དུ་འཛིན་པ་དང ། འཁུ་བ་དང ། བྱས་པ་མི་གཟོ་བ་དང ། དུག་རྣོ་བའོ། །དེ་བཞིན་དུ་བུད་མེད་ཁ་ཅིག་ལ་ཡང་ཉེས་དམིགས་རྣམ་པ་ལྔ་ཡོད་དེ། ལྔ་གང་ཞེ་ན། ཁྲོ་བ་དང ། འཁོན་དུ་འཛིན་པ་དང ། འཁུ་བ་དང ། བྱས་པ་མི་གཟོ་བ་དང ། དུག་རྣོ་བའོ། །དགེ་སློང་དག་།དེ་ལ་བུད་མེད་ཀྱི་དུག་རྣོ་བ་ནི། འདི་ཡིན་ཏེ།
Tha119b
འདི་ལྟར་བུད་མེད་ནི། ཕལ་ཆེར་འདོད་ཆགས་ལྷག་པར་ཆེ་བའོ། །དེའི་སྲིང་མོ་དེ་ཉོན་མོངས་པ་དག་གིས་གདུངས་ནས། དེས་སྨྲས་པ་མིང་པོ། བདག་དགོན་པའི་རྩ་བ་དང ། སྡོང་བུ་དང ། མེ་ཏོག་དང ། འབྲས་བུས་འཚོ་བའི་རྔོ་མི་ཐོགས་ཀྱི། གྲོང་མཐར་བཞུད་དོ། །དེས་དེ་ཁྲིད་དེ་གྲོང་མཐར་སོང་སྟེ། དེ་བྲམ་ཟེ་ཞིག་གི་དེར་སློང་མོ་ལ་ཞུགས་སོ། །དེས་སྲིང་མོ་དང་ལྷན་ཅིག་སློང་མོའི་ཕྱིར་གཅིག་ཅར་སྒྲ་ཕྱུང་བ། བྲམ་ཟེ་དེས་ཐོས་ཏེ་ཕྱིར་བྱུང་ནས་སྨྲས་པ། དྲང་སྲོང་དག་ཀྱང་ཆུང་མ་དང་བཅས་ཏེ་རྒྱུའམ། དེས་སྨྲས་པ། འདི་བདག་གི་ཆུང་མ་མ་ཡིན་གྱི། སྲིང་མོའོ། །འདི་སུ་ལ་བྱིན། སུ་ལ་ཡང་མ་བྱིན་ནོ། །གལ་ཏེ་དེ་ལྟ་ན། ཁོ་བོ་ལ་ཅིའི་ཕྱིར་མི་སྦྱིན། འདི་ནི། དམ་པ་མ་ཡིན་པ་སྡིག་པའི་ཆོས་དེ་སྤངས་པ་ཡིན་ནོ། །དེ་འདོད་པའི་འདོད་ཆགས་ཀྱིས་གདུངས་པས་སྨྲས་པ། མིང་པོ། ཅི། བདག་དགོན་པའི་རྩ་བ་དང ། སྡོང་བུ་དང ། ལོ་མ་དང ། མེ་ཏོག་དང ། འབྲས་བུས་འཚོ་བར་རྔོ་མི་ཐོགས་པ་མེད་སྙམ་མམ། བདག་གིས་ནི། ཉོན་མོངས་པ་སྤང་རྔོ་མ་ཐོགས་པའི་སླད་དུ་ཁྱོད་ལ་དེ་སྐད་བགྱིས་ཀྱི། བདག་བྲམ་ཟེ་འདི་ལ་སྩོལ་ཅིག་།དེས་སྨྲས་པ། དེ་ནི། ཆོས་དང་འགལ་བས་ངས་ཁྱོད་སྦྱིན་པར་མི་བྱའི། ཁྱོད་ཉིད་ཤེས་པར་ཟད་དོ། །བྲམ་ཟེ་དེས་དེ་དང་དེའི་བསམ་པ་ཤེས་ནས་འབྱོར་བའི་དཔལ་ཆེན་པོས་དེ་བག་མར་བླངས་ཏེ་རང་གི་ཁྱིམ་དུ་བཅུག་གོ་།དེ་ནས་དེས་མིང་པོ་དེ་ལ་སྨྲས་པ། མིང་པོ་ཚུར་སྤྱོན། ཁྱོད་ཀྱིས་ཁ་བ་དབུབ་པར་མཛོད་ཅིག་དང་
Tha120a
༄#། །ཐབས་ཅིག་བཞུགས་སོ། །དེས་སྨྲས་པ། སྲིང་མོ། ཁོ་བོ་ནི། འདོད་པ་དོན་དུ་མི་གཉེར་ཏེ། ཁྱོད་ཀྱིས་གནང་ན། རབ་ཏུ་འབྱུང་ངོ ། །དེས་སྨྲས་པ། དམ་ཞིག་བཅའ་སྟེ། གལ་ཏེ་ཁྱོད་སྐབས་སྐབས་སུ་བདག་གཟིགས་ཤིང་བྱོན་ན། གནང་བར་བགྱིའོ། །དེས་སྨྲས་པ། ལེགས་ཏེ། དེ་བཞིན་བྱའོ། །དེ་དེས་གནང་ནས་དྲང་སྲོང་རྣམས་ཀྱི་ནང་དུ་རབ་ཏུ་བྱུང་ངོ ། ། དེ་དགེ་བའི་རྩ་བ་བསྐྱེད་པ་ཡིན་པས་དེས་སློབ་དཔོན་མེད་པར་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་མངོན་དུ་བྱས་ཏེ། རང་བྱང་ཆུབ་མངོན་སུམ་དུ་བྱས་ནས་དེས་བསམ་པ། བདག་གིས་སྲིང་མོ་དེ་ལ་འོང་ངོ ། །ཞེས་དམ་བཅས་པས། དེའི་ཕྱིར་དེའི་གན་དུ་འགྲོ་བར་བྱའོ། །སྙམ་ནས་དེ་དེའི་གན་དུ་སོང་ངོ ། །སོང་ནས་འབར་བ་དང ། གསལ་བ་དང ། ཆར་འབབ་པ་དང ། གློག་འབྱུང་བའི་ཆོ་འཕྲུལ་དག་བྱ་བར་བརྩམས་པ་དང ། སོ་སོའི་སྐྱེ་བོ་དག་ནི། རྫུ་འཕྲུལ་ལ་མྱུར་དུ་དད་པ་ཡིན་པས། དེ་ཤིང་དྲུངས་ནས་བཅད་པ་བཞིན་དུ་རྐང་པ་ལ་ཕྱག་འཚལ་ཏེ་སྨྲས་པ། མིང་པོ། ཁྱོད་ཀྱིས་ཡོན་ཏན་གྱི་ཁྱད་པར་འདི་ལྟ་བུ་ཐོབ་བམ། ཐོབ་བོ། གལ་ཏེ་དེ་ལྟ་ན། ཁྱོད་ནི། བསོད་སྙོམས་དོན་དུ་གཉེར་བ་ལགས། བདག་ཀྱང་བསོད་ནམས་དོན་དུ་གཉེར་བ་ལགས་པས། དེའི་སླད་དུ་འདི་ཉིད་དུ་བཞུགས་ཤིག་དང ། ཁྱོད་ལ་བདག་གིས་བསོད་སྙོམས་དབུལ་བར་བགྱིའོ། །དེས་སྨྲས་པ། སྲིང་མོ། ཁྱོད་ནི་གཞན་ལ་རག་ལས་པ་ཡིན་
Tha120b
གྱི། ཁྱིམ་ཐབ་ལ་ཇེ་དྲིས་ཤིག་།ལེགས་ཏེ། དེ་བཞིན་བགྱིའོ། །དེས་ཁྱིམ་ཐབ་ལ་སྨྲས་པ། རྗེའི་སྲས། བདག་གི་མིང་པོ་རབ་ཏུ་བྱུང་བ། བརྟུལ་ཞུགས་གྲུབ་པ། བདག་ཉིད་ཆེན་པོར་གྱུར་ཏེ། གལ་ཏེ་ཁྱོད་ཀྱིས་གནང་ན། བདག་གིས་ཟླ་བ་གསུམ་དུ་བསོད་སྙོམས་ལ་སྤྱན་དྲང་ངོ ། །དེས་སྨྲས་པ། བཟང་མོ། གལ་ཏེ་འདི་རབ་ཏུ་བྱུང་བར་མ་གྱུར་ན། བདག་ཅག་གིས་མི་འདོད་བཞིན་གསོ་དགོས་པར་འགྱུར་ན། དེ་རབ་ཏུ་བྱུང་སྟེ་བརྟུལ་ཞུགས་གྲུབ་པ། བདག་ཉིད་ཆེན་པོར་གྱུར་ན་ལྟ་སྨོས་ཀྱང་ཅི་དགོས། སོང་ལ་སྤྱན་དྲོངས་ཤིག་།དེས་དེ་ཟླ་བ་གསུམ་དུ་བསོད་སྙོམས་ལ་སྤྱན་དྲངས་སོ། །བྲམ་ཟེ་དེའི་ཆུང་མ་གཉིས་པ་གཞན་ཞིག་ཡོད་པ་དེས་བསམ་པ། བདག་ཅག་ལོངས་སྤྱོད་ཐུན་མོང་ལས། འདི་ནི། བསོད་ནམས་འདི་ལྟ་བུ་བྱེད་ན། བདག་གིས་ཅིའི་ཕྱིར་མི་བྱ་སྙམ་དུ་རིག་ནས་དེ་ལ་སྨྲས་པ། ཕུ་ནུ་མོ། ཁྱོད་ཀྱི་དྲལ་གང་ལགས་པ་དེ་བདག་གི་མིང་པོ་ཡང་དེ་ཁོ་ན་ལགས་པས། ཁྱོད་ཀྱིས་གདུགས་གཅིག་བཤོས་གསོལ་ལ། བདག་གིས་ཀྱང་གདུགས་གཅིག་བཤོས་གསོལ་བར་བགྱིའོ། །དེས་སྨྲས་པ། ལེགས་ཏེ། དེ་བཞིན་བགྱིའོ། །རང་སངས་རྒྱས་ཀྱི་སྲིང་མོ་དེ། དེའི་སེམས་བསྲུང་བའི་ཕྱིར་ཟས་བསོད་པ། རེག་བྱ་ཕུན་སུམ་ཚོགས་པ། ཟས་དམན་པས་གཡོགས་ཏེ་དེ་ལ་བསྟན་ནས་ཕུ་ནུ་མོ། ཁྱོད་རྗེས་སུ་ཡི་རང་བྱོས་ཤིག་།བདག་གི་མིང་པོ་ལ་ཞལ་ཟས་འདི་ལྟ་བུ་གསོལ་ལོ། །དེས་སྨྲས་པ། ལེགས་སོ། །རྗེས་སུ་ཡི་
Tha121a
༄#། །རང་ངོ ། །དེ་ཡང་དེའི་སེམས་བསྲུང་བའི་ཕྱིར་ཟས་དམན་པ། བསོད་པ་དག་གིས་གཡོགས་ཏེ་དེ་ལ་བསྟན་ནས་ཕུ་ནུ་མོ། ཁྱོད་ཀྱང་རྗེས་སུ་ཡི་རང་བ་གྱིས་ཤིག་།བདག་ཀྱང་དྲལ་ལ་ཞལ་ཟས་བསོད་པ། ཁ་དོག་ཕུན་སུམ་ཚོགས་པ་འདི་ལྟ་བུ་གསོལ་ལོ། །དགེ་སློང་དག་ཇི་སྙམ་དུ་སེམས། རང་སངས་རྒྱས་ཀྱི་སྲིང་མོ་གང་ཡིན་པ་དེས་རང་སངས་རྒྱས་ལ་རེག་བྱ་ཕུན་སུམ་ཚོགས་པ། ཟས་དམན་པས་བཀབ་སྟེ་འབུལ་བ་གང་ཡིན་པ་དེ་ནི་ལྷ་མོ་ཕྲེང་ལྡན་མ་འདི་ཉིད་ཡིན་ཏེ། དེའི་ཚེ་དེའི་དུས་ན་འདིས། གང་རང་སངས་རྒྱས་ལ་རེག་བྱ་ཕུན་སུམ་ཚོགས་པ། ཟས་དམན་པས་བཀབ་སྟེ་ཕུལ་བའི་ལས་དེའི་རྣམ་པར་སྨིན་པས། ཚེ་རབས་ལྔ་བརྒྱ་ར་རེག་བྱ་དང་ལྡན་པར་གྱུར་ཏེ། དེའི་བར་དུ་ཡང་རེག་བྱ་དང་ལྡན་པ་རྣམས་ཀྱི་མཆོག་ཏུ་གྱུར་ཏོ། །གཅིག་ཤོས་གང་ཡིན་པ་དེས། རང་སངས་རྒྱས་ལ་ཟས་དམན་པ། ཁ་དོག་ཕུན་སུམ་ཚོགས་པས་བཀབ་སྟེ་ཕུལ་བ་གང་ཡིན་པ་དེ་ནི་རྒྱལ་རིགས་དབྱར་ཚུལ་མ་འདི་ཉིད་ཡིན་ཏེ། དེའི་ཚེ་དེའི་དུས་ན་གང་འདིས། རང་སངས་རྒྱས་ལ་ཟས་དམན་པ། ཁ་དོག་ཕུན་སུམ་ཚོགས་པས་བཀབ་སྟེ་ཕུལ་བའི་ལས་དེའི་རྣམ་པར་སྨིན་པས། ཚེ་རབས་ལྔ་བརྒྱར་གཟུགས་བཟང་བར་གྱུར་ཏེ། ད་ལྟའི་བར་དུ་ཡང་གཟུགས་བཟང་བ་རྣམས་ཀྱི་མཆོག་ཏུ་གྱུར་ཏོ། །དགེ་སློང་དག། དེ་ལྟ་བས་ན། ལས་གཅིག་ཏུ་ནག་པ་རྣམས་ཀྱི་རྣམ་པར་
Tha121b
སྨིན་པ་སྟེ་གཅིག་ཏུ་ནག་པ་ཡིན་ལ་ཞེས་བྱ་བ་ནས་དགེ་སློང་དག་།འདི་ལྟར་བསླབ་པར་བྱའོ། །ཞེས་བྱ་བའི་བར་སྔ་མ་བཞིན་ནོ། །དུས་གཞན་ཞིག་ན་ལྷ་མོ་ཕྲེང་ལྡན་མ་སེམས་ཅན་ཞུགས་བར་གྱུར་ཏོ། །ཉི་མ་གང་ལ་སེམས་ཅན་ཞུགས་པར་གྱུར་པ་དེ་ཉིད་ཀྱི་ཉི་མ་ལ་བྲམ་ཟེ་མདུན་ན་འདོན་གྱི་ཆུང་མ་ལ་ཡང་སེམས་ཅན་ཞུགས་པར་གྱུར་ཏེ། ཉི་མ་གང་ལ་སེམས་ཅན་ཞུགས་པར་གྱུར་པ་དེ་ཉིད་ཀྱི་ཉི་མ་ནས་སྡུག་བསྔལ་གྱི་ཉེན་ཏོ། །ཇི་ཙམ་ན་ལྷ་མོ་ཕྲེང་ལྡན་མ་ཟླ་བ་དགུ་ལོན་ནས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ་ཞིག་བཙས་སོ། །དེའི་བཙས་བའི་བཙས་སྟོན་རྒྱ་ཆེར་བྱས་ནས་ཁྱེའུ་འདིའི་མིང་ཅིར་གདགས་ཞེས་མིང་འདོགས་པར་བྱེད་པ་ན། རྒྱལ་པོས་སྨྲས་པ། སོང་ལ་འདི་ཕྱི་མོ་ལ་ཕུལ་ཅིག་དང ། དེ་ཉིད་མིང་འདོགས་པར་འགྱུར་རོ། ། བློན་པོ་རྣམས་ཀྱིས་དེ་ཁྱེར་ཏེ་དེའི་གན་དུ་དོང་ནས་སྨྲས་པ། ལྷ་མོ། ལྷའི་ཞལ་ནས་གཞོན་ནུའི་མིང་གདགས་སུ་གསོལ་ཞེས་བྱུང་ངོ ། །དེས་སྨྲས་པ། ཤེས་ལྡན་དག་།ངས་དང་པོ་ཉིད་ནས་བུ་ཟན་མའི་བུ་མོ་འདིས་ཀོ་ས་ལའི་རིགས་འདི་རྒྱས་པར་འགྱུར་རོ། །ཞེས་མ་སྨྲས་སམ། བློན་པོ་དག་གིས་སྨྲས་པ། དེའི་དོན་འཚལ་ཏེ། ལྷ་མོས་འདི་མ་བལྟམས་པ་ཉིད་ནས་འཕགས་སྐྱེས་པོ་ཞེས་ཀུན་ཏུ་སྤྱད་པས། དེའི་སླད་དུ་གཞོན་ནུའི་མཚན་འཕགས་སྐྱེས་པོ་ཞེས་གདགས་སོ། །ཞེས་དེའི་མིང་འཕགས་སྐྱེས་པོ་ཞེས་བྱ་བར་བཏགས་སོ། །གང་གི་ཉིན་པར་གཞོན་ནུ་འཕགས་
Tha122a
༄#། །སྐྱེས་པོ་བཙས་པ་དེ་ཉིད་ཀྱི་ཉི་མ་ལ་མདུན་ན་འདོན་གྱི་བུ་བཙས་ནས་དེའི་ཉེ་དུ་དག་ཀྱང་འོངས་ཤིང་འདུས་ནས་ཞག་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུ་འདིའི་མིང་ཅིར་གདགས་ཞེས་མིང་འདོགས་པར་བྱེད་པ་ན། དེ་ན་ཁ་ཅིག་གིས་སྨྲས་པ། འདི་གང་གི་ཉི་མ་ལ་མའི་མངལ་དུ་ཞུགས་པ་དེའི་ཉིན་མོ་ཉིད་ནས་མ་སྡུག་བསྔལ་གྱིས་ཉེན་ཅིང ། སྐྱེས་ནས་ཀྱང་སྡུག་བསྔལ་བ་ཁོ་ན་ཡིན་པས། དེའི་ཕྱིར་ཁྱེའུའི་མིང་མ་ལ་གནོད་ཅེས་གདགས་སོ། །ཞེས་དེའི་མིང་མ་ལ་གནོད་ཅེས་བྱ་བར་བཏགས་སོ། །གཞོན་ནུ་འཕགས་སྐྱེས་པོ་མ་མ་བརྒྱད་པོ། ནུ་མ་བསྣུན་པའི་མ་མ་གཉིས་དང ། པང་ན་འཚོ་བའི་མ་མ་གཉིས་དང ། དྲི་མ་འཕྱི་བའི་མ་མ་གཉིས་དང ། རྩེ་གྲོགས་ཀྱི་མ་མ་གཉིས་ལ་གཏད་དེ། མ་མ་བརྒྱད་པོ་དེ་དག་གིས། འོ་མ་དང ། ཞོ་དང ། མར་དང ། ཞུན་མར་དང ། མར་གྱི་སྙིང་ཁུ་དང ། གཞན་ཡང་ཡོ་བྱད་ཀྱི་ཁྱད་པར་གཙོ་བོ་གཙོ་བོ་དག་གིས་རྫིང་ན་གནས་པའི་པདྨ་བཞིན་དུ་བསྲིངས་ཤིང་བསྐྱེད་དོ། །གང་གི་ཚེ་དེ་ཆེན་པོར་གྱུར་པ་དེའི་ཚེ་ཡི་གེ་བསླབ་སྟེ་ཡི་གེ་མཐར་ཕྱིན་ནས་བརྟག་པ་བརྒྱད་པོ། འདི་ལྟ་སྟེ། རིན་པོ་ཆེ་བརྟག་པ་དང ། ཤིང་བརྟག་པ་དང ། གཞི་བརྟག་པ་དང ། གོས་བརྟག་པ་དང ། གླང་པོ་ཆེ་བརྟག་པ་དང ། རྟ་བརྟག་པ་དང ། བུད་མེད་བརྟག་པ་དང ། སྐྱེས་པ་བརྟག་པ་
Tha122b
ལ་མཁས་བར་གྱུར་ཅིང ། དབྱེ་བ་དང ། བཀླག་པ་ལ་མཁས་ཤིང ། སྤྱོད་པ་གསལ་བ། རྣམ་པ་ཐམས་ཅད་ཀྱི་ཚུལ་ལ་མཁས་ཏེ། དེ་རྒྱལ་བུ་རྒྱལ་རིགས་སྤྱི་བོ་ནས་དབང་བསྐུར་བ། ཡུལ་གྱི་དབང་ཕྱུག་མཐུ་དང་བརྩོན་འགྲུས་ཐོབ་པ། སའི་དཀྱིལ་འཁོར་ཆེན་པོ་ཚན་དུ་ཕབ་སྟེ་གནས་པ་རྣམས་ཀྱི་བཟོའི་གནས་དང ། ལས་ཀྱི་གནས་གང་དག་ཡིན་པ་འདི་ལྟ་སྟེ། གླང་པོ་ཆེའི་གཉར་ཞོན་པ་དང ། རྟ་ལ་ཞོན་པ་དང ། ཤིང་རྟའི་ཐབས་དང ། རལ་གྲིའི་ཐབས་དང ། གཞུ་བཟུང་བ་དང ། མདུན་དུ་བསྣུར་བ་དང ། ཕྱིར་བསྣུར་བ་དང ། ལྕགས་ཀྱུས་བསྒྱུར་ཐབས་དང ། ཞགས་པ་གདབ་པ་དང ། མདའ་བོ་ཆེའི་འཕེན་ཐབས་དང ། འཛིན་སྟངས་དང ། གོམ་སྟབས་དང ། ཐོར་ཚུགས་དང ། རྒྱང་ནས་ཕོག་པ་དང ། སྒྲ་གྲགས་པར་ཕོག་པ་དང ། གནད་དུ་ཕོག་པ་དང ། མི་འཚོར་བར་ཕོག་པ་དང ། ཚབས་ཆེ་བ་དང ། དྲལ་བ་དང ། དབུག་པ་དང ། གཅད་པའི་གནས་ལྔ་པོ་དག་ལ་མཁས་པར་གྱུར་ཏོ། །ཁྱེའུ་མ་ལ་གནོད་ཀྱང་མ་མ་བརྒྱད་པོ་དག་ལ་གཏད་དེ་ཞེས་བྱ་བ་ནས་རྫིང་ན་གནས་པའི་པདྨ་བཞིན་དུ་ཞེས་བྱ་བའི་བར་སྔ་མ་བཞིན་ནོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་བསླབ་སྟེ། བྲམ་ཟེའི་ལྟ་བ་དང ། སྤྱོད་ལམ་དང ། ཚུལ་དང ། གཙང་སྦྲ་དང ། སྤྱོད་ཚུལ་དང ། རིལ་བ་བཟུང་བ་དང ། ས་བླང་བ་དང ། ཐལ་བ་བླང་བ་དང ། ོཾ་ཞེས་བྱ་བ་དང ། བྷོ་ཞེས་བྱ་བ་དང ། ངེས་བརྗོད་ཀྱི་རིག་བྱེད་དང ། མཆོད་སྦྱིན་གྱི་རིག་བྱེད་
Tha123a
༄#། །དང ། སྙན་ཚིག་གི་རིག་བྱེད་དང ། སྲིད་སྲུང་གི་རིག་བྱེད་དང ། དྲང་སྲོང་གརྒས་བྱས་པ་དང ། མ་ཋ་རས་བྱས་པ་དང ། ས་གཡོ་བའི་དཔྱད་དང ། བར་སྣང་གི་དཔྱད་དང ། བྲམ་ཟེའི་ལས་ཀྱི་མཐའ་དྲུག་པོ། མཆོད་སྦྱིན་བྱེད་པ་དང ། མཆོད་སྦྱིན་བྱེད་དུ་འཇུག་པ་དང ། ཀློག་པ་དང ། ཀློག་ཏུ་འཇུག་པ་དང ། སྦྱིན་པ་དང ། ལེན་པ་དག་ལ་མཁས་པར་གྱུར་ཏོ། །ཇི་ཙམ་དུས་གཞན་ཞིག་ན་འཕགས་སྐྱེས་པོ་དང ། མ་ལ་གནོད་ལྷན་ཅིག་རི་དྭགས་བཤོར་བའི་ཕྱིར་དོང་བ་དང ། དེ་རྟས་ཁ་ཁྱེར་ཏེ་སེར་སྐྱའི་གནས་སུ་ཕྱིན་ནས་དེ་དང་དེ་དག་ན་འཁྱམས་ཞིང ། སེར་སྐྱ་ན་གནས་པའི་ཤཱཀྱ་རྣམས་ཀྱི་སྐྱེད་མོས་ཚལ་དུ་སོང་ངོ ། །སྐྱེད་མོས་ཚལ་སྲུང་བའི་མིས་སེར་སྐྱ་ན་གནས་པའི་ཤཱཀྱ་རྣམས་ལ་སྨྲས་པ། ཤེས་ལྡན་དག་།འཕགས་སྐྱེས་པོ་རྟས་ཁ་ཁྱེར་ཏེ་ཁྱོད་ཀྱི་སྐྱེད་མོས་ཚལ་དུ་འོངས་སོ། །དེ་རྣམས་མི་བཟོད་པ་སྐྱེས་ནས་སྨྲས་པ། ཤེས་ལྡན་དག་།གལ་ཏེ་དེ་ལྟ་ན། དུས་ལ་བབ་པ་འདི་ཡིན་གྱི། འདོང ། དེ་གསད་དོ། །དེ་བཞིན་བྱའོ། །ཞེས་དེ་རྣམས་གོ་བགོས་ཏེ་དོང་བ་དང ། ཤཱཀྱ་རྒན་རབས་རྣམས་ཀྱིས་མཐོང་ནས་དེ་དག་གིས་སྨྲས་པ། གཞོན་ནུ་དག་གར་དོང ། དེ་རྣམས་ཀྱིས་སྨྲས་པ། འཕགས་སྐྱེས་པོ་བདག་ཅག་གི་སྐྱེད་མོས་ཚལ་དུ་མཆིས་ཏེ། དེ་འགུམ་དུ་མཆིའོ། །ཤཱཀྱ་རྒན་རབས་རྣམས་ཀྱིས་སྨྲས་པ། གཞོན་ནུ་དག་།དེ་གློ་བུར་བ་ཡིན་པས། དེའི་ཉེས་
Tha123b
པ་འགའ་བཟོད་པ་གྱིས་ལ་ཕྱིར་ལོག་ཅིག་།དེ་རྣམས་ཕྱིར་ལོག་པ་དང ། ཇི་ཙམ་ན་འཕགས་སྐྱེས་པོའི་དཔུང་གི་ཚོགས་ཡན་ལག་བཞི་པས་གཅིག་ནས་གཅིག་ཏུ་ཐོས་ནས་ཚོལ་ཞིང་སྐྱེད་མོས་ཚལ་དུ་འོངས་ནས་དཔུང་གི་ཚོགས་ཡན་ལག་བཞི་པས། སྐྱེད་མོས་ཚལ་ཀུན་ནས་ཁྱབ་པར་གྱུར་པ་དང ། སྐྱེད་མོས་ཚལ་སྲུང་བའི་མིས་སེར་སྐྱ་ན་གནས་པའི་ཤཱཀྱ་རྣམས་ལ་སྨྲས་པ། ཤེས་ལྡན་དག ། འཕགས་སྐྱེས་པོའི་དཔུང་གི་ཚོགས་ཡན་ལག་བཞི་པ་རྣམས་སྐྱེད་མོས་ཚལ་དུ་ལྷགས་ཏེ། གླང་པོ་ཆེ་དང ། རྟའི་མི་གཙང་བ་དག་གིས་སྐྱེད་མོས་ཚལ་ཐམས་ཅད་མ་རུང་བར་བྱས་སོ། །དེ་རྣམས་ཤིན་ཏུ་མི་བཟོད་པ་སྐྱེས་ནས་ཤཱཀྱ་རྒན་པོའི་ཚིག་བཅག་སྟེ་འཕགས་སྐྱེས་པོ་གསད་པའི་ཕྱིར་དོང་བ་དང ། འཕགས་སྐྱེས་པོས་འདི་ལྟར་སེར་སྐྱ་ན་གནས་པའི་ཤཱཀྱ་རྣམས་བདག་གསོད་དུ་འོང་ངོ ། །ཞེས་ཐོས་ནས་དེས་མི་ཞིག་བཞག་སྟེ་སྨྲས་པ། ཀྱེ་སྐྱེས་བུ། གུད་དུ་འགྲོའི། ཁྱོད་ཀྱིས་སེར་སྐྱ་ན་གནས་པའི་ཤཱཀྱ་རྣམས་ཅི་ཟེར་བ་དེ། ང་ལ་ཟློས་ཤིག་།སེར་སྐྱ་ན་གནས་པའི་ཤཱཀྱ་རྣམས་སྐྱེད་མོས་ཚལ་དུ་འོངས་པ་ན། འཕགས་སྐྱེས་པོ་མི་སྣང་ནས་དེ་རྣམས་ཀྱིས་མི་དེ་ལ་བྲན་མོའི་བུ་དེ། གར་སོང་ཞེས་དྲིས་པ་དང ། དེས་སྨྲས་པ། བྲོས་ཏེ་མཆིས་སོ། །དེ་དག་ལས་ཁ་ཅིག་གིས་སྨྲས་པ། དེ་གལ་ཏེ་བདག་ཅག་གིས་མཐོང་བར་གྱུར་ན། བདག་ཅག་གིས་དེའི་ལག་པ་གཅད་པར་འགྱུར་རོ། །གཞན་དག་གིས་སྨྲས་པ། གལ་ཏེ་བྲོས་པར་མ་གྱུར་ན། དེ་ཁོ་བོ་ཅག་གིས་
Tha124a
༄#། །རྐང་པ་གཅད་པར་འགྱུར་རོ། །ཁ་ཅིག་གིས་སྨྲས་པ། ཁོ་བོ་ཅག་གིས་ནི། ཐམས་ཅད་ཀྱི་ཐམས་ཅད་དུ་སྲོག་དང་ཕྲལ་བར་འགྱུར་བ་ཞིག་ན། གལ་ཏེ་བྲོས་ན། དེ་ཇི་ལྟར་བྱ། དེ་དག་གིས་གླ་མི་རྣམས་ལ་བསྒོ་བ། སྐྱེད་མོས་ཚལ་ཕྱག་དར་བྱོས་ལ་བྲན་མོའི་བུས་ཕྱོགས་གང་དུ་བཅགས་པའི་ཕྱོགས་དེའི་ས་དག་འོ་ར་ལ། ས་གཞན་གྱིས་ཁོངས་ཤིག་།རྩིག་པའི་ཕྱོགས་གང་ལ་བརྟེན་པ་དེ་དག་ཀྱང་ཞལ་ཞལ་ཁོགས་ལ། གཞན་གྱིས་ཡུགས་ཤིག་།འོ་མའི་ཆུས་ཆག་ཆག་ཐོབ་ལ། སྤོས་ཆུས་བཏབ་སྟེ། དྲི་དང་མེ་ཏོག་ལ་སོགས་པས་ཀྱང་ཤིན་ཏུ་ཕུན་སུམ་ཚོགས་པར་བྱོས་ཤིག་།དེས་དེ་བཞིན་དུ་བྱས་སོ། །དེ་ནས་མི་དེས་ཇི་ལྟར་གྱུར་པ་དག་མཐོང་ནས་འཕགས་སྐྱེས་པོའི་གན་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་མཐའ་གཅིག་ཏུ་འདུག་གོ་།འཕགས་སྐྱེས་པོས་སྨྲས་པ། ཀཝའི་སྐྱེས་བུ། སེར་སྐྱ་ན་གནས་པའི་ཤཱཀྱ་རྣམས་ཅི་ཟེར། ལྷ། ཇི་སྐད་མཆི་བ་ལྷ་ལ་གསོལ་བའི་རྔོ་མི་ཐོགས་ཏེ། དེ་ནི། དེ་དག་ཉིད་ལ་གྱུར་ཅིག་།ཀཝའི་སྐྱེས་བུ། དེ་ཡང་ཤེས་པ་ཙམ་དུ་བྱའི། སྨྲོས་ཤིག་།དེས་དེ་དུས་ཀྱིས་འཆུ་བར་རྟོགས་ནས་རྒྱས་པར་བསྙད་པ་དང ། དེས་ནང་མི་རྣམས་ལ་སྨྲས་པ། ཤེས་ལྡན་དག་།གང་གི་ཚེ་ང་ཡབ་འདས་ཏེ་རྒྱལ་པོར་གྱུར་པ་དེའི་ཚེ། ངས་དེ་དག་སྲོག་དང་བྲལ་བ་གང་ཡིན་པ་དེ་ཁོ་ན་ཐོག་མར་བྱ་དགོས་ཀྱི། ཁྱོད་ཀྱིས་ཇི་ལྟར་གྱུར་པ་འདི་ཐམས་ཅད་
Tha124b
སྐུལ་ཅིག་དང ། ངས་སེར་སྐྱ་ན་གནས་པའི་ཤཱཀྱ་རྣམས་ཁ་གདག་གོ་།དེ་རྣམས་ཀྱིས་ཀྱང་ཁས་བླངས་སོ། །མ་ལ་གནོད་ཀྱིས་སྨྲས་པ། ལེགས་སོ། །ལེགས་སོ། །ལྷ། ཁྱོད་ཀྱིས་ཀྱང་དེ་ནི། གདོན་མི་འཚལ་བར་བགྱིད་འཚལ་ཏེ། དགེ་བ་རྣམས་ནི། དམ་བཅས་པ་ལ་བརྟན་པ་ལགས་སོ། །དེས་སྨྲས་པ། ང་དུས་ཇི་ཙམ་ཞིག་ན་རྒྱལ་པོར་འགྱུར་བ་དེ་མི་ཤེས་སོ། །མ་ལ་གནོད་ཀྱིས་སྨྲས་པ། དེ་ལྟར་མ་དགོངས་ཤིག་།རྒྱལ་པོ་བགྲེས་པོ་ནི། རིང་པོ་མི་ཐོགས་པར་ལྷ་ཉིད་དུ་གཤེགས་པས། ཁྱོད་ཉིད་རྒྱལ་པོར་འགྱུར་རོ། །འདོད་པ་བསྟེན་པས་ནི། སྡིག་པའི་ལས་མི་བྱ་བ་ཅི་ཡང་མེད་བས། ཀོ་ས་ལའི་རྒྱལ་པོ་གསལ་རྒྱལ་ལ་བློན་པོ་ལྔ་བརྒྱ་ཡོད་པ་ལས་འཕགས་སྐྱེས་པོས་བློན་པོ་རྣམས་དང་དབྱེ་བར་བརྩམས་པ་དང ། སྤྱོད་པའི་བུ་རིང་པོ་མ་གཏོགས་པ་ཐམས་ཅད་ཁ་ཕྱིན་ཏོ། །བློན་པོའི་མཆོག་དེ་ནི། རྗེ་བོ་ལ་སྙིང་ཉེ་བ་ཡིན་པས་ཁ་མ་ཕྱིན་ཏོ། །ཇི་ཙམ་དུས་གཞན་ཞིག་ན་སྤྱོད་པའི་བུ་རིང་པོ་བྱ་བ་ཞིག་གི་ཕྱིར་འཕགས་སྐྱེས་པོའི་གན་དུ་སོང་བ་དང ། འཕགས་སྐྱེས་པོས། རྒྱལ་པོ་གསལ་རྒྱལ་གསོད་པའི་སྦྱོར་བས། སྤྱོད་པའི་བུ་རིང་པོ་ལ་སེར་སྐྱ་ན་གནས་པའི་ཤཱཀྱ་རྣམས་ལ་ངས་ཤ་གླན་པར་བྱ་ན། ང་ནམ་རྒྱལ་པོར་འགྱུར་བ་སྨྲོས་ཤིག་།དེས་སྨྲས་པ། ལྷ། ཅིའི་སླད་དུ་བསོད་ནམས་མ་ལགས་པ་སྐྱེད་པར་མཛད། རྒྱལ་པོ་བགྲེས་པོ་ནི། རིང་པོ་མི་ཐོགས་པར་ལྷ་ཉིད་དུ་གཤེགས་ཏེ། རྒྱལ་པོར་གཞན་མི་འགྱུར་གྱི། ཁྱོད་ཉིད་འགྱུར་རོ། །
Tha125a
༄#། །སྤྱོད་པའི་བུ་རིང་པོ། དེ་ནི། ངས་བགམ་པར་ཁྱོད་ཁོ་ན་ལ་སྨྲས་ཀྱི། ཁྱོད་ཀྱིས་སུ་ལ་ཡང་སྨྲ་བར་མི་བྱའོ། །ལྷ། བདག་གིས་མ་འཚལ་ཏམ་ཅི། སུ་ལ་ཡང་ཇི་ལྟར་བརྗོད་པར་བགྱི་ཞེས་སྨྲས་ཏེ་སོང་ངོ ། །དེའི་ཚེ་བཅོམ་ལྡན་འདས་ཤཱཀྱ་རྣམས་ཀྱི་ནང་ན། ཤཱཀྱ་རྣམས་ཀྱི་གྲོང་རྡལ་མེ་ཙུ་རུ་དི་ཞེས་བྱ་བ་ན་བཞུགས་ཏེ། དེ་ནས་ཀོ་ས་ལའི་རྒྱལ་པོ་གསལ་རྒྱལ་བཞོན་པ་བཟང་པོ་ལ་ཞོན་ཏེ་ཁ་ལོ་སྒྱུར་བ་སྤྱོད་པའི་བུ་རིང་པོ་དང་ལྗོངས་རྒྱུ་ཞིང་འགྲོ་བ་ན། གྲོང་ཁྱེར་ཞིག་ཏུ་ཕྱིན་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་དགོན་པའི་ནགས་འདབ་བས་མཐའི་གནས་མལ། དབེན་པ། སྐྱེ་བོ་སྡིག་ཅན་དང་བྲལ་བ། མི་ཆིག་རྐྱ་ཐུབ་པས་སོ་སོར་བསྟེན་པ། ནང་དུ་ཡང་དག་འཇོག་དང་མཐུན་པ་མཐོང་ངོ ། །མཐོང་ནས། ཡང་སྤྱོད་པའི་བུ་རིང་པོ་ལ་སྨྲས་པ། སྤྱོད་པའི་བུ་རིང་པོ། བཅོམ་ལྡན་འདས་དེ། དགོན་པ། ནགས་འདབ། བས་མཐའི་གནས་མལ། དབེན་པ། སྐྱེ་བོ་སྡིག་པ་ཅན་རྣམས་དང་བྲལ་བ། མི་ཆིག་རྐྱ་ཐུབ་པས་སོ་སོར་བསྟེན་པ། ནང་དུ་ཡང་དག་འཇོག་དང་མཐུན་པ་འདི་ལྟ་བུ་ན་བཞུགས་ཏེ། དེར་ངས་བཅོམ་ལྡན་འདས་དེ་ལ་རེས་འགའ་བསྙེན་བཀུར་བྱས་ན། རིང་པོ། བཅོམ་ལྡན་འདས་དེ་ལྟར་གང་ན་བཞུགས། ཇི་ག་ཁྱོད་ཀྱི་ཐོས་སམ། ལྷ། བདག་གིས་ཐོས་ཏེ། བཅོམ་ལྡན་འདས་ནི། ཤཱཀྱ་རྣམས་ཀྱི་ནང་ན་ཤཱཀྱ་རྣམས་ཀྱི་གྲོང་རྡལ་མེ་ཙུ་རུ་དི་ཞེས་བགྱི་བ་ན་བཞུགས་སོ། །རིང་
Tha125b
པོ། ཤཱཀྱ་རྣམས་ཀྱི་གྲོང་རྡལ་མེ་ཙུ་རུ་དི་ཞེས་བྱ་བར་ཐག་ཇི་སྲིད་ཡོད། ལྷ། རྒྱང་གྲགས་གསུམ་ལྷག་ཙམ་མཆིས་སོ། །དེས་རིང་པོ། ཤཱཀྱ་རྣམས་ཀྱི་གྲོང་རྡལ་མེ་ཙུ་རུ་དི་ག་ལ་བ་དེར་ཤིང་རྟ་དྲོངས་ཤིག་།ལྷ། དེ་བཞིན་འཚལ་ལོ། །ཞེས་སྤྱོད་པའི་བུ་རིང་པོས་ཀོ་ས་ལའི་རྒྱལ་པོ་གསལ་རྒྱལ་གྱི་ལྟར་མཉན་ནས་ཤཱཀྱ་རྣམས་ཀྱི་གྲོལ་རྡལ་མེ་ཙུ་རུ་དི་ག་ལ་བ་དེར་ཤིང་རྟ་ཁྲིད་དེ་བཞོན་པས་འགྲོ་བའི་ས་ཇི་སྲིད་པ་དེ་སྲིད་དུ་ཞོན་ཏེ་སོང་ནས་བཞོན་པ་ལས་བབས་ཏེ་རྐང་པས་ཀུན་དགའ་ར་བར་ཞུགས་སོ། །དེའི་ཚེ་བཅོམ་ལྡན་འདས་གཙུག་ལག་ཁང་ཆེན་པོ་སྒོ་བཅད་པ་ཞིག་ན་ཉིན་མོ་གནས་པས་བཞུགས་སོ། །དགེ་སློང་མང་པོ་རྣམས་ནི། གཙུག་ལག་ཁང་གི་ཕྱི་རོལ་བླ་གབ་མེད་པའི་འཆག་ས་ན་འཆག་པར་བྱེད་པ། ཀོ་ས་ལའི་རྒྱལ་པོ་གསལ་རྒྱལ་གྱིས་མཐོང་ངོ ། །དགེ་སློང་མང་པོ་དག་ཐག་རིང་པོ་ཉིད་ནས་མཐོང་ནས་ཀྱང་དགེ་སློང་མང་པོ་དག་ག་ལ་བ་དེར་སོང་སྟེ་ཕྱིན་ནས་དགེ་སློང་མང་པོ་དག་ལ་འདི་སྐད་ཅེས་སྨྲས་སོ། །བཙུན་པ་དག་།བཅོམ་ལྡན་འདས་ག་ལ་བཞུགས་རྒྱལ་པོ་ཆེན་པོ། བཅོམ་ལྡན་འདས་ནི། གཙུག་ལག་ཁང་ཆེན་པོ་ཆབ་སྒོ་བཀུམ་པ་འདི་ན་ཉིན་མོ་གནས་པས་བཞུགས་ཏེ། རྒྱལ་པོ་ཆེན་པོ། ཁྱེད་བཞེད་ན། གཙུག་ལག་ཁང་ཆེན་པོ་སྒོ་བཀུམ་པ་ག་ལ་བར་བཞུད་དེ། དེར་བྱོན་པ་དང ། ཁད་ཀྱིས་དལ་བུས་སྒོ་གླེགས་ལ་རྡུངས་ཤིག་དང ། བཅོམ་ལྡན་འདས་ཆབ་སྒོ་འབྱེད་པར་འགྱུར་རོ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་
Tha126a
༄#། །གྱིས་རྒྱལ་པོའི་རྟགས་ལྔ་པོ། གཙུག་ཏོར་དང ། གདུགས་དང ། རལ་གྲི་དང ། རྔ་ཡབ་ནོར་བུའི་ཡུ་བ་ཅན་དང ། ལྷམ་ཁྲ་བོ་དག་ཕུད་དེ་སྤྱོད་པའི་བུ་རིང་པོ་ལ་བྱིན་ནས་ཁ་ཕྱིར་ལྟའོ། །དེ་ནས་སྤྱོད་པའི་བུ་རིང་པོ་འདི་སྙམ་དུ་སེམས་ཏེ། ལྷས་རྒྱལ་པོའི་རྟགས་ལྔ་པོ། གཙུག་ཏོར་དང ། གདུགས་དང ། རལ་གྲི་དང ། རྔ་ཡབ་ནོར་བུའི་ཡུ་བ་ཅན་དང ། ལྷམ་ཁྲ་བོ་དག་བདག་ལ་བཞག་སྟེ་ཞལ་ཕྱིར་གཟིགས་པ་ལས་ན། ལྷ་ནི། འཕྲིན་ལས་གསང་བ་ཞིག་མཛད་པར་བཞེད་པས། བདག་འདི་ཉིད་དུ་འདུག་པར་བྱའོ། །སྙམ་མོ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་གཙུག་ལག་ཁང་ཆེན་པོ་སྒོ་གཅད་པ་ག་ལ་བ་དེར་སོང་སྟེ་ཕྱིན་ནས་ཁད་ཀྱིས་དལ་བུ་དལ་བུས་སྒོ་གླེགས་ལ་བརྡབས་པ་དང ། དེ་ལ་བཅོམ་ལྡན་འདས་ཀྱིས་སྒོ་ཕྱེའོ། །དེ་ནས་ཀོ་ས་ལའི་རྒྱལ་པོ་གསལ་རྒྱལ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་གདོང་དང ། ཁ་ཕྱིས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རིང་མོ་ཞིག་ལགས་ནས་མཐོང་ངོ ། །བདེ་བར་གཤེགས་པ་བདག་གིས་རིང་མོ་ཞིག་ལགས་ནས་མཐོང་ངོ ། །དེ་ནས་བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ། ཁྱོད་ཅིའི་ཕྱིར་དེ་བཞིན་གཤེགས་པ་ལ་ཤིན་ཏུ་དམན་པ་བས་ཀྱང་ཆེས་དམན་
Tha126b
པ་བྱེད། བཙུན་པ། བཅོམ་ལྡན་འདས། བདག་ལ་ཆོས་ལས་བྱུང་བའི་དད་པ་མཆིས་ཏེ། དེས་ན། བདག་འདི་སྙམ་དུ། བཅོམ་ལྡན་འདས་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ། །ཁྱོད་ཀྱི་ཆོས་འདུལ་བ་ནི། ལེགས་པར་གསུངས་པའོ། །ཉན་ཐོས་ཀྱི་དགེ་འདུན་ནི། ལེགས་པར་ཞུགས་པའོ། །སྙམ་མོ། །རྒྱལ་པོ་ཆེན་པོ། ཁྱོད་ང་ལ་ཆོས་ལས་བྱུང་བའི་དད་པ་ཇི་ལྟ་བུ་ཞིག་ཡོད། བཙུན་པ། བདག་གིས་འདི་ན་དགེ་སྦྱོང་དང ། བྲམ་ཟེ་མཁས་པ། མཁས་པའི་ང་རྒྱལ་ཅན་སྨྲ་བ་དང ། ཕས་ཀྱི་རྒོལ་བ་ལ་གོམས་པར་བགྱིས་པ། སྐྱེ་བོ་ཕལ་པོ་ཆེ་ལ་བྱིས་པའི་དང་བས་འབིགས་པའི་ངོ་བོར་བཀུར་བ་ཁ་ཅིག་མཐོང་སྟེ། དེ་དག་རང་གི་ཤེས་རབ་དང་སྤོབས་པས། གཞན་གྱི་ལྟ་བའི་རྣམ་པ། འདྲེན་མའི་ངོ་བོ་དག་འཇིག་ཅིང ། དེ་དག་ཞུ་བ་རྩོམ་པར་བགྱིད་དེ། བདག་ཅག་ཤེས་ལྡན་གོའུ་ཏ་མ་དེའི་དྲུང་དུ་དོང་ལ། དྲི་བ་འདི་དང་འདི་ལྟ་བུ་དག་དྲི་སྟེ། གལ་ཏེ་ལུང་སྟོན་པར་མི་བྱེད་ན་ནི། བརྩད་པར་བྱའོ། །གལ་ཏེ་འདི་ལྟ་བུ་དང་འདི་ལྟ་བུ་ཡིན་ནོ། །ཞེས་ལུང་སྟོན་པར་བྱེད་ན། དེ་ལྟ་བུ་དེ་ལ་འདི་སྐད་ཅེས་བརྗོད་པར་བྱ་སྟེ། ཀྱེ་གོའུ་ཏ་མ། ཁྱོད་ཀྱི་འདི་ནི། མི་རིགས་སོ། །འདི་ནི། མི་འདྲའོ། །འདི་ནི། མི་འཐད་དོ། །ཞེས་བརྗོད་པར་བྱའོ། །ཞེས་དེ་རྣམས་ཀྱིས་ཞུ་བ་དེ་དག་བསྡོགས་ནས། བཅོམ་ལྡན་འདས་ཀྱི་སྤྱན་སྔར་བབ་པར་མཆིས་པའི་རྔོ་ཡང་མ་ཐོགས་ན། སྨྲ་བར་ལྟ་ག་ལ་རྔོ་ཐོགས་ཏེ། བཙུན་པ། བདག་བཅོམ་ལྡན་
Tha127a
༄#། །འདས་ལ་ཆོས་ལས་བྱུང་བའི་དད་པ་དེ་ལྟ་བུ་མཆིས་ཏེ། དེས་ན། བདག་འདི་སྙམ་དུ། བཅོམ་ལྡན་འདས་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལགས། ཁྱོད་ཀྱི་ཆོས་འདུལ་བ་ནི། ལེགས་པར་གསུངས་པ་ལགས། ཉན་ཐོས་ཀྱི་དགེ་འདུན་ནི། ལེགས་པར་ཞུགས་པ་ལགས་སོ། །སྙམ་བགྱིད་དོ། ། བཙུན་པ། བདག་ལ་བཅོམ་ལྡན་འདས་ལ་ཆོས་ལས་བྱུང་བའི་དད་པ་གཞན་ཡང་མཆིས་ཏེ། བཙུན་པ། འདི་ན་བདག་གིས་དགེ་སྦྱོང་དང ། བྲམ་ཟེ་མཁས་པ་མཁས་པའི་ང་རྒྱལ་ཅན་ཞེས་བྱ་བ་ནས་ཁ་ཅིག་མཐོང་སྟེ་ཞེས་བྱ་བའི་བར་སྔ་མ་བཞིན་ནོ། །དེ་རྣམས་ཀྱིས་ཞུ་བ་དེ་དག་བསྡོགས་ནས་བཅོམ་ལྡན་འདས་ག་ལ་བ་དེར་མཆིས་ཏེ་ཕྱིན་ནས་བཅོམ་ལྡན་འདས་ལ་ཞུ་བ་ཞུ་བའི་རྔོ་མི་ཐོགས་ཀྱི། གཞན་དུ་ན། བཅོམ་ལྡན་འདས་ཁོ་ནའི་ཞལ་དུ་ལྟ་པ་དང ། ཞལ་དུ་རྟོག་པར་བགྱིད་ཅིང ། བཅོམ་ལྡན་འདས་གོའུ་ཏ་མ་འདི་ཁོ་ནས་ཤེས་པར་བྱ་བ་མཁྱེན་ཏོ། ། གཟིགས་པར་བྱ་བ་གཟིགས་སོ། །སྙམ་སྟེ། བཙུན་པ། འདི་ཡང་བདག་བཅོམ་ལྡན་འདས་ལ་ཆོས་ལས་བྱུང་བའི་དད་པ་ལགས་ཏེ་ཞེས་བྱ་བ་སྔ་མ་བཞིན་ནོ། །བཙུན་པ། བདག་ལ་ཆོས་ལས་བྱུང་བའི་དད་པ་གཞན་ཡང་མཆིས་ཏེ། བཙུན་པ། འདི་ན་བདག་གིས་དགེ་སྦྱོང་དང ། བྲམ་ཟེ་མཁས་པ། མཁས་པའི་ང་རྒྱལ་ཅན་ཞེས་བྱ་བ་ནས་ཁ་ཅིག་མཐོང་སྟེ་ཞེས་བྱ་བའི་བར་
Tha127b
སྔ་མ་བཞིན་ནོ། །དེས་ཞུ་བ་དེ་དག་བསྡོགས་ནས་བཅོམ་ལྡན་འདས་ག་ལ་བ་དེར་མཆིས་ཏེ་ཕྱིན་ནས་བཅོམ་ལྡན་འདས་ལ་ཞུ་བ་ཡོངས་སུ་མ་རྫོགས་པར་ཞུས་པ་དང ། བཅོམ་ལྡན་འདས་ཀྱིས་དེ་དག་ལ་ཞུ་བ་ཡོངས་སུ་མ་རྫོགས་པར་ཞུས་བཞིན་ཡོངས་སུ་རྫོགས་པར་ལུང་བསྟན་པ་དང ། དེ་དག་ཞུ་བ་ལུང་བསྟན་པ་དེས། ཡིད་རངས་ཤིང་མགུ་ནས་སངས་རྒྱས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ཞིང ། བསླབ་པའི་གནས་དག་ཀྱང་ལེན་པར་བགྱིད་དེ། བཙུན་པ། འདི་ཡང་བདག་བཅོམ་ལྡན་འདས་ལ་ཆོས་ལས་བྱུང་བའི་དད་པ་ལགས་སོ། །ཞེས་པའི་བར་སྔ་མ་བཞིན་ནོ། །བཙུན་པ། བདག་ལ་བཅོམ་ལྡན་འདས་ལ་ཆོས་ལས་བྱུང་བའི་དད་པ་གཞན་ཡང་མཆིས་ཏེ། འདི་ན་བདག་གིས་བྲམ་ཟེ་དང ། ཁྱིམ་བདག་མཁས་པ། མཁས་པའི་ང་རྒྱལ་ཅན་ཞེས་བྱ་བ་ནས་ཁ་ཅིག་མཐོང་ཞེས་བྱ་བའི་བར་སྔ་མ་བཞིན་ནོ། །དེ་དག་གིས་ཞུ་བ་དེ་དག་བསྡོགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་ཞུ་བ་རྫོགས་པར་ཞུས་པ་དང ། བཅོམ་ལྡན་འདས་ཀྱིས་དེ་དག་ལ་ཆོས་ཡོངས་སུ་རྫོགས་པར་ལུང་བསྟན་ནས་དེ་དག་ལུང་བསྟན་པ་དེས་ཡིད་རངས་ཤིང་མགུ་ནས་བཅོམ་ལྡན་འདས་ལ་རབ་ཏུ་འབྱུང་བ་དང ། བསྙེན་པར་རྫོགས་པ་དགེ་སློང་གི་དངོས་པོ་གསོལ་ཞིང ། བཅོམ་ལྡན་འདས་ཀྱིས་རབ་ཏུ་བྱུང་བར་མཛད། བསྙེན་པར་རྫོགས་པར་མཛད་དེ། རབ་ཏུ་བྱུང་ཞིང་བསྙེན་པར་རྫོགས་པ། དགྲ་བཅོམ་པ་ཉིད་
Tha128a
༄#། །ཐོབ་པ། རྣམ་པར་གྲོལ་བའི་དགའ་བ་དང ། བདེ་བ་ཉམས་སུ་མྱོང་པ་དེ་དག་འདི་སྙམ་དུ་སེམས་ཏེ། བདག་ཅག་དེའུ་མ་རུང་ངོ ། །བདག་ཅག་རབ་ཏུ་དེའུ་མ་རུང་ངོ ། ། བདག་ཅག་སྔོན་དགེ་སྦྱོང་མ་ཡིན་བཞིན་དུ་བདག་ཅག་དགེ་སྦྱོང་ངོ ། །སྙམ་དུ་ཁས་འཆེས། བདག་ཅག་བྲམ་ཟེ་དང ། དགྲ་བཅོམ་པ་མ་ཡིན་བཞིན་དུ་བདག་ཅག་དགྲ་བཅོམ་པའོ། །སྙམ་དུ་ཁས་འཆེའི། ད་ནི། བདག་ཅག་དགེ་སྦྱོང་དང ། བྲམ་ཟེ་དང ། དགྲ་བཅོམ་པ་ཡིན་ནོ། །སྙམ་སྟེ། བཙུན་པ། འདི་ཡང་བདག་བཅོམ་ལྡན་འདས་ལ་ཆོས་ལས་བྱུང་བའི་དད་པ་ལགས་ཏེ་ཞེས་བྱ་བ་སྔ་མ་བཞིན་ནོ། །བཙུན་པ། བདག་ལ་བཅོམ་ལྡན་འདས་ལ་ཆོས་ལས་བྱུང་བའི་དད་པ་གཞན་ཡང་མཆིས་ཏེ། བཙུན་པ། འདི་ན་བདག་གིས་དགེ་སྦྱོང་དང ། བྲམ་ཟེ་སྐྱ་བོ། སེང་སེང་བོ། ཤ་བྲི་སྲབ་པ། ཉམ་ཆུང་བ། མདོག་ངན་པ། དབང་པོ་ཉམས་པ། སྐྱེ་བོ་མང་པོའི་མིག་གིས་བལྟར་མི་ཆགས་པ་དག་ཅིག་མཐོང་ངོ ། །མཐོང་ནས་ཀྱང་བདག་འདི་སྙམ་དུ་སེམས་ཏེ།་ཤེས་ལྡན་འདི་དག་མི་འདོད་བཞིན་དུ་ཚངས་པར་སྤྱོད་པའམ། ནད་ཡུན་རིང་པོ་འགའ་ཞིག་གིས་ཐེབས་སམ། སྡིག་པ་མི་དགེ་བའི་ལས་འགའ་ཞིག་ལྐོག་ཏུ་བྱས་ནས་བཅབས་པར་མ་གྱུར་གྲང ། འདི་ལྟར་ཤེས་ལྡན་འདི་དག་སྐྱ་བོ། སེང་སེང་པོ། ཤ་བྲི་ངན་པ། ཉམ་ཆུང་བ། དབང་པོ་ཉམས་པ། སྐྱེ་བོ་མང་པོའི་མིག་གིས་བལྟར་མི་ཆགས་སོ། །སྙམ་མོ། །དེ་དག་གི་
Tha128b
དྲུང་དུ་མཆིས་ཤིང་མཆིས་ནས་འདི་སྐད་ཅེས་བགྱིས་ཏེ། ཤེས་ལྡན་དག་།ཅིའི་ཕྱིར་སྐྱ་བོ་སེང་སེང་པོ། ཤ་བྲི་ངན་པ། ཉམ་ཆུང་བ། དབང་པོ་ཉམས་པ། སྐྱེ་བོ་མང་པོའི་མིག་གིས་བལྟར་མི་ཆགས་པར་གྱུར། དེ་དག་གི་མཆིད་ནས་རྒྱལ་པོ་ཆེན་པོ། འདོད་ཆགས་ཀྱིས་གནོད་དོ། །བཙུན་པ། དེ་ལ་བདག་འདི་སྙམ་དུ་སེམས་ཏེ། གལ་ཏེ་འདོད་པ་རྣམས་རྙེད་པ་དང ། བསྟེན་པ་དང ། བསགས་པས། གཟུགས་བཟང་བའམ། བལྟ་ན་སྡུག་པའམ། མཛེས་པ་ཞིག་ཏུ་འགྱུར་ན་ནི། ད་ལྟ་ཀོ་ས་ལའི་རྒྱལ་པོ་གསལ་རྒྱལ་བདག། གཟུགས་ཆེས་བཟང་བ་དང ། ཆེས་བལྟ་ན་སྡུག་པ། ཆེས་མཛེས་པར་འགྱུར་རོ། །དེ་ཅིའི་ཕྱིར་ཞེ་ན། ཀོ་ས་ལའི་རྒྱལ་པོ་གསལ་རྒྱལ་བདག་ནི། འདོད་པའི་ཡོན་ཏན་ལྔ་པོ་རྣམས་འདོད་རྒུར་རྙེད་པ་དང ། ཚེགས་མེད་པར་རྙེད་པ་ལགས་སོ། །གང་གི་ཕྱིར་འདོད་པ་རྣམས་རྙེད་པ་དང ། བསྟེན་པ་དང ། བསགས་པས་གཟུགས་ཆེས་བཟང་བ་དང ། ཆེས་བལྟ་ན་སྡུག་པ་དང ། ཆེས་མཛེས་པར་མི་འགྱུར་བ་དེའི་ཕྱིར་བདག་གིས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་གཟུགས་ཤིན་ཏུ་བཟང་བ། དབང་པོ་རྒྱས་པ། བཞིན་གྱི་མདངས་གསལ་བ། པགས་པའི་མདོག་ཡོངས་སུ་དག་པ། སེམས་ཁྲལ་ཆུང་བ། འཚོ་བ་གཞན་ལ་རག་མ་ལུས་པ་མཐོང་སྟེ། དེས་ན་ཇི་སྲིད་འཚོའི་བར་དུ་ཚངས་པར་སྤྱོད་པ། མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་སྤྱོད་པར་ནུས་སོ། །སྙམ་སྟེ། བཙུན་པ། འདི་ཡང་བདག་
Tha129a
༄#། །བཅོམ་ལྡན་འདས་ལ་ཆོས་ལས་བྱུང་བའི་དད་པ་ལགས་ཏེ། ཞེས་བྱ་བ་སྔ་མ་བཞིན་ནོ། །བཙུན་པ། བདག་ལ་བཅོམ་ལྡན་འདས་ལ་ཆོས་ལས་བྱུང་བའི་དད་པ་གཞན་ཡང་མཆིས་ཏེ། བཙུན་པ། འདི་ན་བདག་གིས་ནོར་གྱི་སླད་དུ་མཆིས་པ་རྣམས་འདོད་པའི་རྒྱུ་དང ། འདོད་པའི་གཞི་དང ། འདོད་པའི་ཆེད་ཀྱི་སླད་དུ་མ་ནི། བུ་དང་ལྷན་ཅིག་རྩོད། བུ་ནི། ཕ་དང ། ཕ་ནི། བུ་དང ། བུ་ནི། མ་དང ། མིང་པོ་ནི། སྲིང་མོ་དང ། སྲིང་མོ་ནི། མིང་པོ་དང ། གྲོགས་ནི། གྲོགས་དང་རྩོད་པ་དག་མཐོང་ན། སྐྱེ་བོ་དང་སྐྱེ་བོར་ལྟ་སྨོས་ཀྱང་ཅི་འཚལ། དེ་དག་རྩོད་ཅིང་འགྱེད་པར་གྱུར་པ་ན། མ་ནི། བུའི་མི་སྙན་པ་སྨྲ། བུ་ནི། མའི། ཕ་ནི། བུའི། བུ་ནི། ཕའི། མིང་པོ་ནི། སྲིང་མོའི། སྲིང་མོ་ནི། མིང་པོའི། གྲོགས་ནི། གྲོགས་ཀྱི་མི་སྙན་པ་སྨྲ་ན། སྐྱེ་བོ་སྐྱེ་བོའི་ལྟ་སྨོས་ཀྱང་ཅི་འཚལ། ཡང་འདི་ན་བདག་གིས་མཐོང་བ། དགེ་སློང་གཉིས་ཤིག་དགེ་སློང་དག་དང་ལྷན་ཅིག་གཞི་འགའ་ཞིག་གི་སླད་དུ་རྩོད་ནས་བསླབ་པ་ཕུལ་ཏེ་བབས་བར་གྱུར་ན། དེ་དག་རྣམ་གྲངས་གང་གིས་ཀྱང་སངས་རྒྱས་ལ་མི་སྙན་པ་བརྗོད་པའམ། ཆོས་དང ། དགེ་འདུན་ལ་མི་སྙན་པ་བརྗོད་པར་མི་བགྱིད་ཀྱི། གཞན་དུ་ན་བདག་ཉིད་ཁོ་ན་ལ་ཡོངས་སུ་སྨོད་པར་བགྱིད། བདག་ཅག་གཉིས་ནི། འདི་ན་དམན་པ་དང ། མ་རབས་དང ། དཔལ་མེད་པ་སྟེ། བདག་ཅག་གིས་བཅོམ་ལྡན་འདས་ཀྱི་སྤྱན་སྔར་ཇི་སྲིད་འཚོ་བའི་བར་དུ་ཚངས་པར་
Tha129b
སྤྱོད་པ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་སྤྱད་པར་མ་ནུས་སོ། །ཞེས་མཆི་སྟེ། བཙུན་པ། འདི་ཡང་བདག་བཅོམ་ལྡན་འདས་ལ་ཆོས་ལས་བྱུང་བའི་དད་པ་ལགས་སོ། །ཞེས་བྱ་བ་སྔ་མ་བཞིན་ནོ། །བཙུན་པ། བདག་ལ་བཅོམ་ལྡན་འདས་ལ་ཆོས་ལས་བྱུང་བའི་དད་པ་གཞན་ཡང་མཆིས་ཏེ། བཙུན་པ། འདི་ན་ཀོ་ས་ལའི་རྒྱལ་པོ་གསལ་རྒྱལ་བདག་དགུ་མ་པར་བགྱི་བ་མ་ལགས་པ་རྣམས་ཀྱང་འགུམས། དགུམ་པར་བགྱི་བ་རྣམས་ནི། གཏོང་བར་དབང་ན། བདག་དོན་གྱི་ཆེད་དུ་མཆིས་པ་ལས། རྒྱལ་རིགས་རྒྱ་ཆེན་པོ་ཤིང་སཱ་ལ་ཆེན་པོ་ལྟ་བུ་དག་དང།་བྲམ་ཟེ་རྒྱ་ཆེན་པོ་ཤིང་སཱ་ལ་ཆེན་པོ་ལྟ་བུ་དག་དང ། ཁྱིམ་བདག་རྒྱ་ཆེན་པོ་ཤིང་སཱ་ལ་ཆེན་པོ་ལྟ་བུ་དག་གཏམ་མཇུག་ཏུ་ཕྱིན་པ་ལ་མི་སྡོད་པར་བར་སྐབས་བར་སྐབས་སུ་བཀའ་མཆིད་མཆི་ཞིང་མ་གུས་པ་དང ། ཞེ་ས་མ་མཆིས་པར་སྨྲ་བར་བགྱི་བར་སེམས་ལགས་སོ། །བཙུན་པ། དུས་གཅིག་ཅིག་ན་བཅོམ་ལྡན་འདས་འཁོར་བརྒྱ་ཕྲག་དུ་མའི་གུང་ལ་བཞུགས་ཤིང་ཆོས་སྟོན་པར་མཛད་པ་དེ་ན་ལུད་པའི་སྒྲ་ཡང་མི་གདའ། སྦྲིད་པའི་སྒྲ་ཡང་མི་གདའོ། །དེ་ནས་མི་ཞིག་གིས་ལུད་པའི་སྒྲ་ཕྱུང་བ་དང ། ཡང་མི་ཞིག་གིས། མི་དེ་ལ་འདི་སྐད་ཅེས། ཀྱེ་སྐྱེས་བུ། ཁྱོད་ཁ་རོག་པར་འདུག་།བཅོམ་ལྡན་འདས་སྦྲང་མའི་རྩིས་ཚིམ་པར་མཛད་པ་ལྟ་བུའི་ཆོས་སྙན་པ་སྟོན་པར་མཛད་པ་མ་མཐོང་ངམ་ཞེས་སྨྲས་ལགས་སོ། །དེ་སྐད་ཅེས་བགྱིས་པ་དང ། མི་དེ་ཅང་མི་མཆི་བར་
Tha130a
༄#། །མཆིས་སོ། །དེ་ལ་བདག་འདི་སྙམ་བགྱིད་དེ། བཅོམ་ལྡན་འདས་ནི། དེ་ཙམ་དུ་མཐུ་ཆེ་ཞིང་རྫུ་འཕྲུལ་ཆེ་བ་ལགས་ན། འདི་ན་ད་ལྟར་ཆད་པ་མེད་པ་དང ། མཚོན་ཆ་མེད་པའི་ཆོས་མཉན་པས། འཁོར་བཏུལ་བ་ངོ་མཚར་ཏོ། །སྙམ་སྟེ། བཙུན་པ། འདི་ཡང་བདག་བཅོམ་ལྡན་འདས་ལ་ཆོས་ལས་བྱུང་བའི་དད་པ་ལགས་ཏེ་ཞེས་བྱ་བའི་བར་སྔ་མ་བཞིན་ནོ། །བཙུན་པ། བདག་བཅོམ་ལྡན་འདས་ལ་ཆོས་ལས་བྱུང་བའི་དད་པ་གཞན་འདི་ཡང་མཆིས་ཏེ། བཙུན་པ། འདི་ན་བདག་གིས་དགེ་སྦྱོང་དང ། བྲམ་ཟེ་ཁ་ཅིག་མཐོང་ན། ནོར་མེད་པར་བགྱིས་ཏེ་ཚངས་པར་སྤྱད་པ་སྤྱོད་པ་ལས། དེས་ཟླ་བ་དགུའམ་ཟླ་བ་བརྒྱད་འདས་པ་དང ། རྣམ་པ་དེ་དག་དང ། རྟགས་དེ་དག་དང ། མཚན་མ་དེ་དག་བོར་ཏེ་ཕྱིར་འདོད་པའི་ཡོན་ཏན་ལྔ་པོ་དག་འབྱོར་ཅིང་ལྡན་པར་གྱུར་ཅིང ། རྩེ་བར་བགྱིད། དགའ་བར་བགྱིད། དགའ་མགུར་སྤྱོད་པར་བགྱིད་དོ། །བཙུན་པ། འདི་ན་བདག་གིས་མཐོང་བ། བཅོམ་ལྡན་འདས་ཀྱི་ཉན་ཐོས་དག་།ཇི་སྲིད་འཚོའི་བར་དུ་ཚངས་པར་སྤྱོད་པ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་སྤྱོད་ཅིང་ཞེས་བྱ་བ་ནས་སྲོག་གི་མཐའི་བར་ཞེས་བྱ་བ་དང ། བཙུན་པ། འདི་ཡང་བཅོམ་ལྡན་འདས་ལ་ཆོས་ལས་བྱུང་བའི་དད་པ་ལགས་སོ། །ཞེས་བྱ་བའི་བར་སྔ་མ་བཞིན་ནོ།། །།འདུལ་བ་ཕྲན་ཚེགས་ཀྱི་གཞི། བམ་པོ་བརྒྱད་པ། བཙུན་པ།
Tha130b
བདག་ལ་བཅོམ་ལྡན་འདས་ལ་ཆོས་ལས་བྱུང་བའི་དད་པ་གཞན་འདི་ཡང་མཆིས་ཏེ། བཙུན་པ། འདི་ན་བདག་དྲང་སྲོང་སྦྱིན་པ་དང ། རྙིང་པ་དེ་དག་ལ་ཡིད་རྟོན་ཅིང་དེ་དག་ལ་ལོངས་སྤྱོད་རྣམས་ཀྱང་སྩོལ། གྲགས་པ་ཡང་སྩོལ་བ་ནས་དེ་དག་གི་སྲོག་གི་བར་ཡང་སྩོལ་ན། དེ་དག་བཅོམ་ལྡན་འདས་ལ་ཇི་ལྟ་བ་དེ་ལྟར་བགྱི་བ་བགྱིད་པར་མི་སེམས་ཏེ། བཙུན་པ། དུས་གཅིག་ཅིག་ན་བདག་དྲང་སྲོང་ཡིད་བརྟན་པ་སྦྱིན་པ་དང ། རྙིང་པ་དག་བརྟག་པར་འཚལ་ནས་འཁོར་གྱི་ནང་ནས་བྱུང་སྟེ་ཕྱོགས་དོག་པ་ཞིག་ཏུ་མཆིས་ནས་འདི་ལྟར་འདི་དག་བཅོམ་ལྡན་འདས་དང ། བདག་གང་ལོགས་སུ་རྐང་པ་སྟོན་བལྟའོ། །སྙམ་ན། དེ་དག་གིས་རྣམ་གྲངས་དུ་མར་སངས་རྒྱས་ཀྱི་བསྔགས་པ་བརྗོད། ཆོས་དང ། དགེ་འདུན་གྱི་བསྔགས་པ་བརྗོད་ནས་བཅོམ་ལྡན་འདས་གང་ན་བ་དེ་ལོགས་སུ་ནི། མགོ་བསྟན། བདག་ག་ལ་བ་དེ་ལོགས་སུ་ནི། རྐང་པ་བསྟན་ཏོ། །དེ་ལ་བདག་འདི་སྙམ་བགྱིད་དོ། །བཅོམ་ལྡན་འདས་ནི། དེ་ཙམ་དུ་རྫུ་འཕྲུལ་ཆེ་ཞིང་མཐུ་ཆེ་སྟེ། འདི་ན་ད་ལྟར་བདག་འདི་དག་ལ་ལོངས་སྤྱོད་རྣམས་ཀྱང་སྦྱིན། གྲགས་པ་ཡང་སྦྱིན་པ་ནས་སྲོག་གི་བར་ཡང་སྩོལ་ན། འདི་དག་བཅོམ་ལྡན་འདས་ཇི་ལྟ་བ་དེ་ལྟར་བདག་ལ་བྱ་བ་བྱེད་པར་མི་སེམས་པ་ནི། ངོ་མཚར་ཏོ། །སྙམ་སྟེ་ཞེས་བྱ་བ་ནས་བཙུན་པ། འདི་ཡང་བདག་བཅོམ་ལྡན་འདས་ལ་ཆོས་ལས་བྱུང་བའི་དད་པ་ལགས་སོ། །ཞེས་བྱ་བའི་བར་སྔ་མ་བཞིན་ནོ། །བཙུན་པ། བདག་ལ་ཆོས་ལས་བྱུང་བའི་དད་
Tha131a
༄#། །པ་གཞན་ཡང་མཆིས་ཏེ། བཙུན་པ། བདག་ཀྱང་ཡུལ་ཀོ་ས་ལ་པ་ལགས། བཅོམ་ལྡན་འདས་ཀྱང་ཀོ་ས་ལ་པ་ལགས། བདག་གི་རིགས་ཀྱང་རྒྱལ་རིགས་ལགས་བཅོམ་ལྡན་འདས་ཀྱི་རིགས་ཀྱང་རྒྱལ་རིགས་ལགས། བདག་ཀྱང་རྒས་པ། འཁོགས་པ། གཏུགས་པ། ན་ཚོད་ལོ་བརྒྱད་ཅུ་ལོན་པ་ལགས། བཅོམ་ལྡན་འདས་ཀྱང་བགྲེས་པ། འཁོགས་པ།་གཏུགས་པ། སྐུ་ན་ཚོད་ལོ་བརྒྱད་ཅུ་ལོན་པ་ལགས། བཙུན་པ། བདག་ཀྱང་རྒྱལ་པོ་རྒྱལ་རིགས་སྤྱི་བོ་ནས་དབང་སྐུར་བ་ལགས། བཅོམ་ལྡན་འདས་ཀྱང་བླ་ན་མེད་པའི་ཆོས་ཀྱི་རྒྱལ་པོ་ལགས་པས། བཙུན་པ། འདི་ཡང་བདག་བཅོམ་ལྡན་འདས་ལ་ཆོས་ལས་བྱུང་བའི་དད་པ་ལགས་ཏེ། དེས་ན་བདག་འདི་སྙམ་དུ། བཅོམ་ལྡན་འདས་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ། །ཁྱོད་ཀྱི་ཆོས་འདུལ་བ་ནི། ལེགས་པར་གསུངས་པའོ། །ཉན་ཐོས་ཀྱི་དགེ་འདུན་ནི། ལེགས་པར་ཞུགས་པའོ། །སྙམ་དུ་སེམས་ལགས་སོ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱི་སྤྱན་སྔར་ཆོས་སྣ་ཚོགས་རྒྱ་ཆེར་བཤད་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་སོང་ངོ ། །ད་ནས་བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་སོང་ནས་རིང་པོ་མ་ལོན་པར་མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་།ཁྱོད་ཀྱིས་ཆོས་སྣ་ཚོགས་པའི་ཆོས་ཀྱི་རྣམ་
Tha131b
གྲངས་ཟུངས་ཤིག་།ཆོངས་ཤིག་།ལྷོགས་ཤིག་།དེ་ཅིའི་ཕྱིར་ཞེ་ན། དགེ་སློང་དག་།ཆོས་སྣ་ཚོགས་པའི་ཆོས་ཀྱི་རྣམ་གྲངས་ནི། དོན་དང་ལྡན་པ། ཆོས་དང་ལྡན་པ། ཚངས་པར་སྤྱོད་པ་དང་ལྡན་པ་སྟེ།་མངོན་པར་ཤེས་པར་བྱེད་པ་དང ། རྫོགས་པར་བྱང་ཆུབ་པར་བྱེད་པ་དང ། མྱ་ངན་ལས་འདས་པར་བྱེད་པ་ཡིན་ནོ། །དེ་ལྟ་བས་ན། རིགས་ཀྱི་བུ་དད་པས་རབ་ཏུ་བྱུང་བས། ཆོས་སྣ་ཚོགས་པའི་ཆོས་ཀྱི་རྣམ་གྲངས་བླངས་ཏེ་ཀུན་ཆུབ་པར་བྱས་ནས་དེ་ལྟ་དེ་ལྟར་གཟུང་བར་བྱ། བཅང་བར་བྱ། བཀླག་པར་བྱའོ། །ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱི་སྤྱན་སྔར་ཆོས་ཉན་པ་ལ་རིང་ཞིག་ཐོགས་པ་དང ། སྤྱོད་པའི་བུ་རིང་པོ་ཡང་ཅུང་ཞིག་བསྡད་ནས་ཤིང་རྟར་ཞུགས་ཏེ་མཉན་ཡོད་དུ་སོང་ནས་དེས་འཕགས་སྐྱེས་པོ་རྒྱལ་སྲིད་ལ་བཞག་གོ་།ཕྲེང་ལྡན་མ་དང ། དབྱར་ཚུལ་མས་སྤྱོད་པའི་བུ་ལ་དྲིས་པ། སྤྱོད་པའི་བུ། ལྷ་ག་ལ་བཞུགས། གྲོང་རྡལ་མེ་ཙུ་རུ་དི་ན་བཞུགས་སོ། །དེ་དག་རྐང་གིས་གྲོང་རྡལ་མེ་ཙུ་རུ་དིར་ཆས་སོ། །ཀོ་ས་ལའི་རྒྱལ་པོ་གསལ་རྒྱལ་ཡང་བཅོམ་ལྡན་འདས་ལས་ཆོས་མཉན་ནས་གཙུག་ལག་ཁང་ནས་བྱུང་ན། སྤྱོད་པའི་བུ་རིང་པོ་མི་སྣང་ནས་དེས་དགེ་སློང་རྣམས་ལ་དྲིས་པ། འཕགས་པ་དག་།སྤྱོད་བྱེད་ཀྱི་བུ་རིང་པོ་གར་མཆིས། དེ་དག་གིས་སྨྲས་པ། དེ་ལྷ་ནང་དུ་གཤེགས་མ་ཐག་ཏུ་ཤིང་རྟར་ཞུགས་ནས་མཆིས་སོ། །ཞེས་བྱས་པ་དང ། རྒྱལ་པོ་རྐང་གིས་སོང་ངོ ། །བཅོམ་ལྡན་འདས་ཀྱང་ཆེས་སྔ་བ་ཞིག་ཏུ་
Tha132a
༄#། །རྒྱལ་པོའི་ཁབ་ཏུ་གཤེགས་སོ། །ཇི་ཙམ་ན་རྒྱལ་པོས་ལམ་གར་ཕྲེང་ལྡན་མ་དང ། དབྱར་ཚུལ་མ་མཐོང་ནས་དེས་དེ་དག་ལ་དྲིས་པ། ཁྱེད་ཅི་ཕྱིར་རྐང་གིས་འདིར་འོངས། དེ་དག་གིས་སྨྲས་པ། ལྷ། སྤྱོད་པའི་བུ་རིང་པོས་འཕགས་སྐྱེས་པོ་རྒྱལ་སྲིད་ལ་བཞག་སྟེ། དེ་ནས་བདག་ཅག་ལྷའི་གན་དུ་མཆིས་མོད། བདག་ཅག་གཞན་གར་མཆི། རྒྱལ་པོས་སྨྲས་པ། ཕྲེང་ལྡན་མ། ཁྱོད་ཀྱིས་ཁྱོའི་རྒྱལ་སྲིད་ཉམས་སུ་མྱོང་ཟིན་གྱི། སོང་ལ་ད་བུའི་རྒྱལ་སྲིད་ཉམས་སུ་མྱོང་བར་གྱིས་ཤིག་།ང་ཡང་དབྱར་ཚུལ་མ་དང་ལྷན་ཅིག་རྒྱལ་པོའི་ཁབ་ཏུ་འགྲོ་འོ། །ཞེས་བྱས་པ་དང ། དེར་ཕྲེང་ལྡན་མ་སྙིང་རྗེ་རྗེ་སྐད་དུ་སྨྲེ་སྔགས་འདོན་ཅིང་ངུ་བཞིན་ཕྱིར་ལོག་གོ་།ཀོ་ས་ལའི་རྒྱལ་པོ་གསལ་རྒྱལ་ཡང་དབྱར་ཚུལ་མ་དང་ལྷན་ཅིག་རྒྱལ་པོའི་ཁབ་ཏུ་ཆས་ཏེ་རིམ་གྱིས་རྒྱལ་པོའི་ཁབ་ཏུ་ཕྱིན་ནས་ཕན་ཚུན་འཁྱམས་འཁྱམས་པ་ལས་མ་སྐྱེས་དགྲའི་སྐྱེད་མོས་ཚལ་དུ་འདུག་སྟེ། དེས་དབྱར་ཚུལ་མ་ལ་སྨྲས་པ། དབྱར་ཚུལ་མ། སོང་ལ་རྒྱལ་པོ་མ་སྐྱེས་དགྲ་ལ་ཀོ་ས་ལའི་རྒྱལ་པོ་གསལ་རྒྱལ་སྐྱེད་མོས་ཚལ་ན་འདུག་གོ་།ཞེས་གྱིས་ཤིག་།དེས་རྒྱལ་པོ་མ་སྐྱེས་དགྲ་ལ་སྨྲས་པ། ལྷ། ཀོ་ས་ལའི་རྒྱལ་པོ་གསལ་རྒྱལ་ཁྱོད་ཀྱི་སྐྱེད་མོས་ཚལ་ན་བཞུགས་ཏེ་ལྷ་གཟིགས་པར་བཞེད་དོ། །དེས་ཐོས་ནས་སྡངས་ཏེ་སྨྲས་པ། ཤེས་ལྡན་དག་།རྒྱལ་པོ་དེ་དམག་མང་པོ་ཅན་ཡིན་ནོ། །གློ་བུར་ཁོ་ནར་འོངས་ན། ཁྱེད་སུས་ཀྱང་མ་
Tha132b
ཚོར་རམ། དབྱར་བྱེད་མས་སྨྲས་པ། ལྷ། དེ་ལ་དམག་ག་ལ་མཆིས། བུས་རྒྱལ་སྲིད་ལས་ཕྱུང་ནས་དེ་གཡོག་དང་གཉིས་སུ་འདིར་མཆིས་སོ། །དེས་སྨྲས་པ། དེ་རྒྱལ་པོ་བྱེད་པ་ལེགས་ཏེ། བདག་ནི། གཞོན་ནུའི་གནས་ན་གནས་སོ། །ཞེས་སྨྲས་ནས་བློན་པོ་རྣམས་ལ་སྨྲས་པ། ཤེས་ལྡན་དག་།གང་ངས་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ། བཀུར་སྟི་མེད་པར་སྤྱན་དྲང་བ་ནི།་ང་ལ་རིགས་པ་མ་ཡིན་པར་འགྱུར་བས། དེངས་ལ་གྲོང་ཁྱེར་མཛེས་པ་དང ། ལམ་མཛེས་པར་གྱིས་ཤིག་།དེ་དག་གིས་གྲོང་ཁྱེར་དེ་རྡོ་དང ། གསེག་མ་དང ། གྱོ་མོ་མེད་པར་བྱས་ཞེས་བྱ་བ་ནས་ལྷ་རྣམས་ཀྱི་སྐྱེད་མོས་ཚལ། དགའ་བའི་ཚལ་བཞིན་དུ་ཞེས་བྱ་བའི་བར་སྔ་མ་བཞིན་ནོ། །དེ་ནས་ལམ་མཛེས་པ་དང ། གྲོང་ཁྱེར་མཛེས་པ་སོ་སོར་ཁྱད་པར་དུ་འཕགས་པར་བྱས་ནས་དྲིལ་བསྒྲགས་པ། ཤེས་ལྡན་རྒྱལ་པོའི་ཁབ་ན་གནས་པ་དང ། ཕོ་བྲང་འཁོར་བ་དང ། ཡུལ་སྣ་ཚོགས་ནས་ལྷགས་པའི་སྐྱེ་བོའི་ཚོགས་དག་ཉོན་ཅིག་།ཀོ་ས་ལའི་རྒྱལ་པོ་གསལ་རྒྱལ་སྐྱེད་མོས་ཚལ་ན་འདུག་གི་།དེ་ཁྱེད་ལྷ་དང་ལྷན་ཅིག་ཏུ་གདུགས་དང ། རྒྱལ་མཚན་དང ། བ་དན་དག་གིས་བསུ་བར་བྱའོ། །དེ་ནས་རྒྱལ་པོ་མ་སྐྱེས་དགྲ་ཤིང་རྟ་སྟོང་ཕྲག་དུ་མ་ཕྱི་བཞིན་དུ་ཁྲིད་དེ་དཔུང་གི་ཚོགས་ཡན་ལག་བཞི་པ་དང ། ཀོ་ས་ལའི་རྒྱལ་པོ་གསལ་རྒྱལ་བསུར་དོང་ངོ ། །དེ་ཡང་མ་སྐྱེས་དགྲ་རིང་དུ་ཐོགས་པས། བྲུ་བས་བསྐྱེད་པའི་སྡུག་བསྔལ་བར་གྱུར་ཏོ། །སྐྱེད་མོས་ཚལ་དང་ཧ་ཅང་ཡང་མི་རིང་བ་ཞིག་
Tha133a
༄#། །ན།་ལ་ཕུག་གི་ར་བ་ཞིག་ཡོད་པ་དེར་སོང་བ་དང ། དེ་ལ་ལྡུམ་པས། ལ་ཕུག་སྦར་གང་བྱིན་ནོ། །དེ་ནས་དེས་ལ་ཕུག་གི་རྡོག་མ་དང ། ལོ་མ་དག་ཟོས་པ་དང ། སྐོམ་རབ་ཏུ་གྱུར་ནས་རྫིང་དྲུང་དུ་སོང་སྟེ་ཆུ་ངོམས་པར་འཐུངས་ནས་ལངས་པ་དང ། ལག་པ་རེངས་ཤིང་མ་ཞུ་བས་ཐེབས་ནས་ཤིང་རྟའི་ལམ་དུ་འགྱེལ་བ་དང ། དེ་འཁོར་ལོ་དྲིལ་བའི་རྡུལ་གྱིས་ཁ་གང་ནས་དུས་ལས་འདས་སོ། །རྒྱལ་པོ་མ་སྐྱེས་དགྲ་སྐྱེད་མོས་ཚལ་དུ་སོང་སྟེ་ཕན་ཚུན་བཙལ་བར་བསམ་ན། མ་རྙེད་དོ། །དེས་ཕྱོགས་བཞིར་ཕོ་ཉ་རྟ་པ་བཀྱེ་སྟེ་ཚོལ་ཅིག་ཅེས་བྱས་པ་དང ། དེ་ན་ཕོ་ཉ་གཅིག་ལ་ཕུག་གི་ར་བར་ཕྱིན་ནས་དེས་ལྡུམ་པ་དེ་ལ་དྲིས་པ། ཀྱེ་སྐྱེས་བུ། སྐྱེད་མོས་ཚལ་འདིར་འོངས་པ་འགའ་ལྟ་ཡོད་དམ། འོངས་སོ། །དེ་གར་སོང ། ལ་ཕུག་སྦར་གང་ཁྱེར་ནས་ལམ་འདི་ནས་རྫིང་བུར་སོང་ངོ ། །དེ་དེའི་རྗེས་བཞིན་དུ་སོང་ན། ཤིང་རྟའི་ལམ་ན་དུས་ལས་འདས་པར་མཐོང་ངོ ། །དེས་རྒྱལ་པོ་མ་སྐྱེས་དགྲ་ལ་སྨྲས་པ། ལྷ། ཤིང་རྟའི་ལམ་ག་གེ་མོ་ཞིག་གི་ཕྱོགས་སུ་དུས་ལས་འདས་སོ། །རྒྱལ་པོས་ཀྱེ་མ་ཀྱེ་ཧུད་ཅེས་སྨྲས་ནས་སྐྱེ་བོ་བརྒྱ་སྟོང་དུ་མས་བསྐོར་ཏེ་ཕྱོགས་དེར་སོང་བ་དང ། ཇི་ཙམ་ན་ཤི་བའི་རོ་ཤིན་ཏུ་མི་སྡུག་པ་མཐོང་ནས་ཡང་བློན་པོ་རྣམས་ལ་སྨྲས་པ། ཤེས་ལྡན་དག་།རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་འདི། ངའི་ཡུལ་དུ་དུས་ལ་འདས་པ། ང་ལ་སྙན་པ་མ་ཡིན་པར་འགྱུར་གྱི། ཁྱེད་ཀྱིས་འདི་བཀུར་
Tha133b
སྟི་ཆེན་པོས་བསིལ་བའི་ཚལ་གྱི་དུར་ཁྲོད་དུ་སྐྱོལ་ཅིག་།ང་ཡང་འདིའི་ཁོག་པ་ལ་མཆོད་པ་ལྷག་པར་བྱ་བའི་ཕྱིར་བཅོམ་ལྡན་འདས་ལ་ཞུའོ། །དེ་དག་གིས་ཀྱང་དེ་བཀུར་སྟི་ཆེན་པོས་བསིལ་ཚལ་གྱི་དུར་ཁྲོད་ཆེན་པོར་བསྐྱལ་ཏོ། །རྒྱལ་པོ་མ་སྐྱེས་དགྲ་ཡང་བཅོམ་ལྡན་འདས་ག་ལ་བདེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ། ། བཙུན་པ། ཀོ་ས་ལའི་རྒྱལ་པོ་གསལ་རྒྱལ་བདག་གི་ཡུལ་དུ་དུས་ལས་འདས་ན། དེའི་ཁོག་པ་ལ་བདག་གིས་མཆོད་པ་ཇི་ལྟ་བུ་ཞིག་བགྱི། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། ཅི་ནུས་ཅི་ཕོད་ཀྱིས་ལུས་ལ་མཆོད་པ་རྒྱ་ཆེར་གྱིས་ཤིག་།དེ་ནས་རྒྱལ་པོས་དེའི་ཁོག་པ་ལ་མཆོད་པ་ཆེན་པོ་བྱས་ནས་ཡང་བཅོམ་ལྡན་འདས་ཀྱི་སྤྱན་སྔར་སོང་སྟེ་བཅོམ་ལྡན་འདས་ལ་ཞུས་པ། བཙུན་པ། ཀོ་ས་ལའི་རྒྱལ་པོ་གསལ་རྒྱལ་གྱིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས། ལ་ཕུག་གི་རྡོག་མ་དང་ལོ་མ་དག་འཚལ་ནས་སུག་པ་རེངས་ཤིང་མ་ཞུ་བས་ཐེབས་ཏེ་དུས་ལས་འདས་ལགས། བཅོམ་ལྡན་འདས་ཀྱིས་བཀའ་སྩལ་པ། ཀོ་ས་ལའི་རྒྱལ་པོ་གསལ་རྒྱལ་ཉིད་ཀྱིས་ལས་བྱས་ཤིང་བསགས་པ། ཚོགས་རྙེད་པ། རྐྱེན་ཡོངས་སུ་བསྒྱུར་བ། དཔའ་རྒལ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བ་དག་།གཞན་སུ་ཞིག་གིས་མྱོང་བར་འགྱུར་ཏེ། རྒྱལ་པོ་ཆེན་པོ། ལས་བྱས་ཤིང་བསགས་པ་རྣམས་ནི། ཕྱི་རོལ་གྱི་སའི་ཁམས་ལ་སྨིན་པར་མི་
Tha134a
༄#། །འགྱུར། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི། འོན་ཀྱང་ལས་དགེ་བ་དང ། མི་དགེ་བ་བྱས་ཤིང་བསགས་པ་རྣམས་ནི།་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་རོ། །བསྐལ་པ་བརྒྱ་ཕྲག་རྣམས་སུ་ཡང ། །ལས་རྣམས་ཆུད་ཟར་མི་འགྱུར་ཏེ། །ཚོགས་ཤིང་དུས་དང་ལྡན་པ་ན། ལུས་ཅན་རྣམས་ལ་འབྲས་བུར་སྨིན། །རྒྱལ་པོ་ཆེན་པོ། སྔོན་བྱུང་བ་རི་བྲག་ཅིག་ན་བྲམ་ཟེ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ནས་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས། བུ་ཕོ་ཞིག་བཙས་ཏེ། ཇི་ཙམ་ན་བསྐྱེད་བསྲིངས་ནས་ཆེན་པོར་གྱུར་ཏོ། །དེས་དུས་གཞན་ཞིག་ན་སློང་མོ་ལ་སོང་བ་དང ། ལ་ཕུག་སྦར་གང་ཞིག་རྙེད་དོ། །དེས་མ་ལ་འདི་རེ་ཞིག་ཁྲུས་བྱས་ཏེ་འོང་ངོ ། །ཞེས་གཏམས་སོ། །དེས་དེ་དེ་ལ་གཏམས་ནས་ཁྲུས་བྱེད་དུ་སོང་ངོ ། །སངས་རྒྱས་རྣམས་མ་བྱུང་བའི་ཚེ་འཇིག་རྟེན་དུ་རང་སངས་རྒྱས་ངན་པ་དང་དམན་པ་ལ་ཐུགས་བརྩེ་བ་ཅན། བས་མཐའི་གནས་མལ་ལ་དད་པ། འཇིག་རྟེན་གྱི་ཡོན་གནས་གཅིག་པུ་དག་འབྱུང་བར་འགྱུར་རོ། །ཇི་ཙམ་ན་རང་སངས་རྒྱས་ཤིག་ལྗོངས་རྒྱུ་ཞིང་འགྲོ་བ་ན། རི་བྲག་དེར་ཕྱིན་ཏེ། དེ་ཕྱོགས་ཤིག་ཏུ་ཞག་ལོན་ནས་སྔ་དྲོ་
Tha134b
ཤམ་ཐབས་དང ། ཆོས་གོས་བགོས། ལྷུང་བཟེད་བླངས་ཏེ་རི་བྲག་ཏུ་བསོད་སྙོམས་ལ་ཞུགས་པ་དང ། རིམ་གྱིས་ཁྱིམ་དེར་ཕྱིན་ཏོ། །བྲམ་ཟེ་མོ་དེས་དེ་ལུས་མཛེས་པ་དང ། སེམས་མཛེས་པ་ལ་སོགས་པ་མཐོང་སྟེ། དེ་སེམས་དང་བ་སྐྱེས་པ་དེས་ལ་ཕུག་སྦར་གང་རང་སངས་རྒྱས་དེ་ལ་ཕུལ་ལོ། །བདག་ཉིད་ཆེན་པོ་དེ་དག་ནི། ལུས་ཀྱི་ཆོས་སྟོན་གྱི། ཚིག་གིས་མ་ཡིན་པས། དེས་དང་པའི་རྒྱལ་པོ་འདབ་མ་བརྐྱང་བ་བཞིན་དུ་ནམ་མཁའི་དབྱིངས་ལ་འཕགས་ཏེ། ཆོ་འཕྲུལ་སྣ་ཚོགས་དག་བསྟན་པར་བརྩམས་སོ། །སོ་སོའི་སྐྱེ་བོ་ནི། རྫུ་འཕྲུལ་ལ་མྱུར་དུ་དད་པར་བྱེད་པ་ཡིན་པས། དེས་ཤིང་རྩ་བ་ནས་བཅད་པ་བཞིན་དུ་རྐང་པ་ལ་གཏུགས་པ་དང ། དེས་དེ་ལ་སྙིང་བརྩེ་བར་བྱས་ནས་སོང་ངོ ། །ཇི་ཙམ་ན་བྲམ་ཟེའི་ཁྱེའུ་དེ་འོངས་ནས་སྨྲས་པ། ཡུམ། ལ་ཕུག་སྦར་གང་པོ་དེ་སྩོལ་ཅིག་།དེས་སྨྲས་པ། བུ། རྗེས་སུ་ཡི་རང་བ་གྱིས་ཤིག་།ངས་དེ་རབ་ཏུ་བྱུང་བ་ཞི་བའི་བདག་ཉིད་ཅན། བསོད་སྙོམས་དོན་དུ་གཉེར་བ་བྱོན་ནས་དེ་ལ་ཕུལ་ལོ། །ཞེས་བྱས་པ་དང ། དེ་བཀྲེས་པས་སྡུག་བསྔལ་དང ། ཡིད་མི་བདེ་བ་སྐྱེས་ཏེ་སྨྲས་པ། རབ་ཏུ་བྱུང་བ་དེས་དེ་ཟོས་ནས་ཅི་སྟེ་ལག་པ་རེངས་ཤིང་གསུད་དེ་དུས་བྱས་པར་མ་གྱུར། རྒྱལ་པོ་ཆེན་པོ། ཇི་སྙམ་དུ་སེམས། བྲམ་ཟེའི་བུ་གང་ཡིན་པ་དེ་ནི། ཀོ་ས་ལའི་རྒྱལ་པོ་གསལ་རྒྱལ་འདི་ཉིད་ཡིན་ཏེ། དེའི་ཚེ་དེའི་དུས་ན་འདིས། རང་སངས་རྒྱས་ལ་ཚིག་རྩུབ་མོ་སྨྲས་པའི་ལས་དེའི་རྣམ་པར་སྨིན་པས། ལོ་མང་པོ་ལོ་བརྒྱ་ཕྲག་
Tha135a
༄#། །མང་པོ། ལོ་སྟོང་ཕྲག་མང་པོ། ལོ་བརྒྱ་སྟོང་ཕྲག་མང་པོར་དམྱལ་བ་རྣམས་སུ་སྐྱེས་སོ། །ལས་ཀྱི་ལྷག་མ་དེ་ཉིད་ཀྱིས་ལན་དྲུག་ཏུ་ལག་པ་རེངས་ཤིང་གསུང་པས་དུས་ལས་འདས་ཏེ། ད་ལྟའི་དུས་ཀྱི་བར་འདི་དང་ལན་བདུན་དུ་ལག་པ་རེངས་ཤིང་གསུད་པ་ཁོ་ནས་དུས་ལས་འདས་སོ། །དེ་ལྟ་བས་ན། རྒྱལ་པོ་ཆེན་པོ། ལས་གཅིག་ཏུ་ནག་པ་རྣམས་ཀྱི་ཞེས་བྱ་བ་ནས་ལས་གཅིག་ཏུ་དཀར་བ་རྣམས་ཁོ་ན་ལ་འབད་པར་བྱ་སྟེ། རྒྱལ་པོ་ཆེན་པོ། ཁྱོད་ཀྱིས་དེ་ལྟ་བུ་ལ་བསླབ་པར་བྱའོ། །ཞེས་བྱ་བའི་བར་སྔ་མ་བཞིན་ནོ། །དེ་ནས་རྒྱལ་པོ་མ་སྐྱེས་དགྲ། བཅོམ་ལྡན་འདས་ཀྱིས་གསུངས་པ་ལ་མངོན་པར་དད་ནས་རྗེས་སུ་ཡི་རང་སྟེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔར་ནས་སོང་ངོ ། །ཇི་ཙམ་ན་མ་ལ་གནོད་ཀྱིས་འཕགས་སྐྱེས་པོ་ལ་འདི་སྐད་ཅེས་སྨྲས་སོ། །ལྷ། ཡབ་རྒྱལ་པོ་མཛད་ཅིང ། ལྷ་དབང་མ་བསྐུར་པ་ན། གང་གི་ཚེ་ང་རྒྱལ་པོར་གྱུར་པ་དེའི་ཚེ་ངས་ཤཱཀྱ་རྣམས་ཁ་བདག་སྟེ། དེ་ནི། ངས་དང་པོར་བྱ་བ་ཡིན་ནོ། །ཞེས་དེ་ལྟ་བུའི་ཁྱུ་མཆོག་གི་ཚིག་རླབས་པོ་ཆེ་གསུངས་ནས་གཅིག་ཏུ་ཆད་པར་མཛད་དེ། འཁོར་གྱི་ནང་དུ་སེངྒེའི་སྒྲ་ཡང་དག་པར་བསྒྲགས་པ་གང་ལགས་པ་དེ་དགོངས་སམ། ད་ནི། དེའི་དུས་ལ་བབ་ལགས་སོ། །དེས་སྨྲས་པ། མ་ལ་གནོད། ཅི། ཇི་སྙེད་སྨྲས་པ་དེ་ཐམས་ཅད་བྱའམ། དོན་དེ་འདས་པ་ཡིན་པས་
Tha135b
ཐོང ། རྒྱལ་པོའི་བྱ་བ་དག་དང ། རྒྱལ་པོའི་བྱེད་པ་དག་ཡོངས་སུ་ཉམས་པར་འགྱུར་རོ། །དེས་སྨྲས་པ། ལྷ། དགེ་བ་རྣམས་ནི། དམ་བཅས་པ་ལ་བརྟན་པ་ལགས་པས་ཇི་ལྟར་དམ་བཅས་པ་བཞིན་སྒྲུབ་ཏུ་གསོལ། མ་ལ་གནོད། རེ་ཞིག་ཞོག་ཅིག་དང ། དེ་ཡང་མི་དགའ་བར་འགྱུར་རོ། །དེས་སྨྲས་པ། ལྷ། འདི་ནི། ཐོག་མར་དམ་བཅས་པ་ལགས་པས། གདོན་མི་འཚལ་བར་བགྱི་འཚལ་ཏེ། དེང་ཁོ་ན་གདུགས་ཀྱང་བཟང ། ཡུད་ཙམ་ཡང་བཟང ། སྐར་མ་ཡང་བཟང ། བསོད་ནམས་ཀྱི་གདུགས་ཀྱང་བཟང་བས། ལྷ། དེ་དག་གིས་ངོ་ལོན་མ་བཤམས་པར་དེང་ཉིད་གཤེགས་པའི་རིགས་སོ། །དེ་ནས་འཕགས་སྐྱེས་པོ་མ་ལ་གནོད་ཀྱིས་བསླུས་པས། དཔུང་གི་ཚོགས་ཡན་ལག་བཞི་པ། གླང་པོ་ཆེའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དབུང་བུ་ཆུང་གི་ཚོགས་གོ་བསྐོན་ནས་སེར་སྐྱའི་གཞི་ན་གནས་པའི་ཤཱཀྱ་རྣམས་གསད་པའི་ཕྱིར་མཉན་ཡོད་ནས་སེར་སྐྱའི་གཞིར་ཆས་སོ། །སྐབས་དེ་ལྟ་བུ་ལ། སངས་རྒྱས་བཅོམ་ལྡན་འདས་རྣམས་ལ་མི་མཁྱེན་པའམ། མི་གཟིགས་པའམ། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་སྟེ། དེ་སེར་སྐྱ་ན་གནས་པའི་ཤཱཀྱ་རྣམས་ཀྱི་ལས་ཆུད་མི་ཟ་བར་མཁྱེན་ནས་ཆེས་སྔར་མཉན་ཡོད་ནས་སེར་སྐྱའི་གཞིར་གཤེགས་སོ། །དེ་ནས་བཅོམ་ལྡན་འདས་ལམ་ཀར་ཤིང་ཤ་ཀོ་ཊ་ཀ་ཤུན་པར་རི་འཆུས་ཤིང ། མི་སྡུག་པ། ལོ་མ་སྲབ་པ། གྲིབ་མ་ཆུང་ངུ་ཞིག་གི་དྲུང་
Tha136a
༄#། །དུ་སྐྱིལ་མོ་ཀྲུང་བཅས་ཏེ་ཉིན་མོའི་གནས་པས་བཞུགས་སོ། །རྒྱལ་པོ་འཕགས་སྐྱེས་པོས། བཅོམ་ལྡན་འདས་ཐག་རིང་པོ་ནས་མཐོང་ངོ ། །མཐོང་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། ཤིང་ལོ་མ་མི་སྡུག་ཅིང ། གྲིབ་མ་ཆུང་ངུ་མ་ལགས་པ་གཞན་དག་མཆིས་ན། ཅིའི་སླད་དུ་བཅོམ་ལྡན་འདས་དེ་དག་སྤངས་ཏེ་ཤིང་ཤ་ཀོ་ཊ་ཀ་ཤུན་པ་འཆུས་ཤིང ། མི་སྡུག་པ། ལོ་མ་སྲབ་པ། གྲིབ་མ་ཆུང་ངུ་འདིའི་དྲུང་ན་བཞུགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གཉེན་བཤེས་རྣམས་ལ་ནི། གཉེན་བཤེས་ཀྱི་གྲིབ་མ་བསིལ་ལོ། །འཕགས་སྐྱེས་པོས་བསམ་པ། བཅོམ་ལྡན་འདས་ལ་གཉེན་རྣམས་ལ་གཟིགས་ཤིང་ཐུགས་བརྩེ་བ་མངའ་སྟེ། ཀྱེ་མ། བཅོམ་ལྡན་འདས་ནི་གཉེན་རྣམས་ལ་ཐུགས་བརྩེ་བ་མཛད་དོ། །སྙམ་དུ་རིག་ནས་དེ་ཉིད་ནས་སླར་ལོག་གོ་།བཅོམ་ལྡན་འདས་ཀྱིས་དགོངས་པ། གལ་ཏེ་སེར་སྐྱ་ན་གནས་པའི་ཤཱཀྱ་རྣམས་ཀྱིས་བདེན་པ་མ་མཐོང་བར་འཕགས་སྐྱེས་པོའི་དམག་གིས་ཐེབས་ན། བདེན་པ་དག་མཐོང་བའི་སྣོད་དུ་མི་འགྱུར་རོ། །སྙམ་དུ་མཁྱེན་ནས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ལས། སེར་སྐྱའི་གཞིར་བྱོན་ཏེ་སེར་སྐྱའི་གཞིའི་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །སེར་སྐྱ་ན་གནས་པའི་ཤཱཀྱ་རྣམས་བཅོམ་
Tha136b
ལྡན་འདས། ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ལས་འདིར་བྱོན་ཏེ། ནྱ་གྲོ་དྷའི་ཀུན་དགའ་ར་བ་འདི་ཁོ་ན་ན་བཞུགས་སོ། །ཞེས་ཐོས་སོ། །ཐོས་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང ། བག་ལ་ཉལ་བ་དང ། ཁམས་དང ། རང་བཞིན་མཁྱེན་ནས་འཕགས་པའི་བདེན་པ་བཞི་རྟོགས་པར་འགྱུར་བའི་ཆོས་དེ་ལྟ་བུ་སྟོན་པར་མཛད་པ་དང ། དེ་ཐོས་ནས་སྲོག་ཆགས་བརྒྱ་སྟོང་ཕྲག་དུ་མས་ཁྱད་པར་ཆེན་པོ་ཐོབ་སྟེ། ཁ་ཅིག་གིས་ནི། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི། ལན་གཅིག་ཕྱིར་འོང་བའི་འབྲས་བུ་ཞེས་བྱ་བ་ནས་དགེ་འདུན་ལ་འབབ་པ་ལ་བཀོད་དོ། །ཞེས་བྱ་བའི་བར་སྔ་མ་བཞིན་ནོ། །མ་ལ་གནོད་ཀྱིས་འཕགས་སྐྱེས་པོ་མཐོང་ནས་དེས་སྨྲས་པ། ལྷ། ཅི་སྟེ་སླར་ལོག་།དེས་སྨྲས་པ། མ་ལ་གནོད། བཅོམ་ལྡན་འདས་ཉེ་དུ་རྣམས་ལ་གཟིགས་ཤིང་ཐུགས་བརྩེ་བ་མངའ་སྟེ། ཀྱེ་མ། བཅོམ་ལྡན་འདས་ཉེ་དུ་རྣམས་ལ་ཐུགས་བརྩེ་བ་མངའ་བས། རྒྱལ་པོ་ཆེན་པོ། ཉེ་དུ་རྣམས་ལ་ནི། ཉེ་དུའི་གྲིབ་མ་བསིལ་ལོ། །ཞེས་དེ་ལྟ་བུའི་གསུང་འདི་བཀའ་སྩལ་ཏོ། །དེ་ནི། ངའི་སྙིང་ལ་ལྷང་ཞེས་བྱེད་ཀྱི། སེར་སྐྱ་ན་གནས་པའི་ཤཱཀྱ་རྣམས་གསད་པ་ཐོང་ཞིག་།དེས་སྨྲས་པ། ལྷ། དགེ་སྦྱོང་གོའུ་ཏ་མ་ནི། འདོད་ཆགས་དང་
Tha137a
༄#། །བྲལ་བ་ལགས་ཏེ། འདོད་ཆགས་དང་བྲལ་བ་རྣམས་ནི། ཉེ་དུ་ལ་མི་ལྟ་བས། དེང་ཁོ་ན་ལྷའི་ཉི་མ་ཡང་བཟང ། ཡུད་ཙམ་ཡང་བཟང ། སྐར་མ་ཡང་བཟང ། བསོད་ནམས་ཀྱི་གདུགས་ཀྱང་བཟང་བས། ལྷ། དེང་ཉིད་སེར་སྐྱའི་གཞིར་གཤེགས་ཤིག་།དེ་མི་དགེ་བའི་གྲོགས་པོས་ལོག་པར་བཟུང་བས། དཔུང་གི་ཚོགས་ཡན་ལག་བཞི་པ། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ནས་སེར་སྐྱའི་གཞིར་སོང་སྟེ་ཧ་ཅང་མི་རིང་བ་ཞིག་ཏུ་ཕྲུ་མ་བཏབ་ནས་འདུག་གོ་།དེ་ནས་ཚེ་དང་ལྡན་པ་མོའུ་འགལ་གྱི་བུ་ཆེན་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་མོའུ་འགལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཙུན་པ། བདག་གིས་སྐྱེས་བུ་གཏི་མུག་ཅན་འཕགས་སྐྱེས་པོ་དཔུང་གི་ཚོགས་ཡན་ལག་བཞི་པ། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ནས་སེར་སྐྱ་ན་གནས་པའི་ཤཱཀྱ་རྣམས་དགུམ་པའི་སླད་དུ་སེར་སྐྱའི་གཞིར་མཆིས་ཞེས་ཐོས་ཏེ། དེའི་སླད་དུ་བདག་དེ་དཔུང་དང་བཞོན་པ་དང་བཅས་ཏེ་འཇིག་རྟེན་གྱི་ཁམས་གཞན་དུ་བཀུར་བའམ། ཁོར་ཡུག་གི་སླད་རོལ་
Tha137b
ཏུ་འཕངས་པའམ། སེར་སྐྱའི་གཞིའི་གྲོང་ཁྱེར་ལྕགས་ཀྱི་ར་བས་བསྐོར་བའམ། ལྕགས་ཀྱི་དྲ་བས་བསྐོར་བ་སྤྲོ་ལགས་སོ། །མོའུ་འགལ་གྱི་བུ། དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་སྔ་མ་བཞིན་དུ་བསྐོར་བ་ཞེས་བྱ་བའི་བར་ནུས་མོད་ཀྱི། འོན་ཀྱང་སེར་སྐྱའི་གཞི་ན་གནས་པའི་ཤཱཀྱ་རྣམས་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། དཔའ་རྒལ་བཞིན་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་།བྱས་ཤིང་བསགས་པ་རྣམས་གཞན་སུ་ཞིག་གིས་མྱོང་བར་འགྱུར་ཏེ། དགེ་སློང་དག་།ལས་བྱས་ཤིང་བསགས་པ་རྣམས་ནི། ཕྱིའི་སའི་ཁམས་ལ་རྣམ་པར་སྨིན་པར་མི་འགྱུར། མེའི་ཁམས་ལ་མ་ཡིན། ཆུའི་ཁམས་ལ་མ་ཡིན། རླུང་གི་ཁམས་ལ་མ་ཡིན། འོན་ཀྱང་ལས་དགེ་བ་དང ། མི་དགེ་བ་བྱས་ཤིང་བསགས་པ་རྣམས་ནི། ཟིན་པའི་ཕུང་པོ་དང ། ཁམས་དང ། སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་ཏེ། བསྐལ་པ་བརྒྱ་ཕྲག་རྣམས་སུ་ཡང ། །ལས་རྣམས་ཆུད་ཟར་མི་འགྱུར་ཏེ། །ཚོགས་ཤིང་དུས་དང་ལྡན་པ་ན། །ལུས་ཅན་རྣམས་ལ་འབྲས་བུར་སྨིན། །མོའུ་འགལ་གྱི་བུ། འཇིག་རྟེན་ནི། ལས་བདག་གིར་བྱ་བ། ལས་ཀྱི་སྐྱེ་གནས་པ། ལས་ཀྱི་བསྒོ་སྐལ་ལ་སྤྱོད་པ། ལས་ལ་རྟོན་པ་ཡིན་པས། གང་གིས་ལས་དགེ་བའམ་སྡིག་པ་བྱས་པ་དེ་ནི། ལས་དེའི་སྐལ་པ་ཅན་དུ་འགྱུར་རོ། །མོའུ་འགལ་གྱི་བུ། དེ་ལྟ་བས་ན། ལས་ལ་གཞོལ་བར་བྱའོ། །དེ་ནས་ཚེ་དང་ལྡན་པ་
Tha138a
༄#། །མོའུ་འགལ་གྱི་བུ་ནི། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་སོང་ངོ ། །སེར་སྐྱའི་གཞི་ན་གནས་པའི་ཤཱཀྱ་རྣམས་ཀྱིས། སྐྱེས་བུ་གཏི་མུག་ཅན་འཕགས་སྐྱེས་པོ་དཔུང་གི་ཚོགས་ཡན་ལག་བཞི་པ། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་པའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ནས། བདག་ཅག་གསོད་དུ་འོངས་སོ། །ཞེས་ཐོས་སོ། །ཐོས་ནས་དེ་དག་གིས་ཀྱང་དཔུང་གི་ཚོགས་ཡན་ལག་བཞི་པ། གླང་པོ་ཆེ་པའི་ཚོགས་དང ། རྟ་པའི་ཚོགས་དང ། ཤིང་རྟ་བའི་ཚོགས་དང ། དཔུང་བུ་ཆུང་གི་ཚོགས་གོ་བསྐོན་ནས་གཡུལ་སྤྲད་པའི་ཕྱིར་འཕགས་སྐྱེས་པོ་ལོགས་སུ་སྤགས་སོ། །དེ་དག་བདེན་པ་མཐོང་བ་ཡིན་པས། གསོད་པར་ནི། ཅུང་ཟད་ཀྱང་མི་བྱེད་ཀྱི། གཞན་དུ་ན་དེའི་ཚེ་དབྱུག་པ་དང ། ལྕག་དག་གིས་སྣུན་ཅིང་གཞུ་རྒྱུད་དང ། རྒྱུན་དང ། འབྲེང་བ་རྣམས་གཅོད་པ་དང ། རྣ་རྒྱན་དག་ལ་མདའ་འཕེན་པར་བྱེད་དོ། །འཕགས་སྐྱེས་པོའི་དཔུང་གོ་ཆ་ཞིག་པར་བྱས་ནས་སེར་སྐྱའི་གནས་སུ་ཞུགས་ཏེ་སྒོ་དག་བཅད་ནས་ར་བ་ལ་སྦྲེངས་ཏེ་འཁོད་དོ། །དེ་དག་གིས་ཕ་རོལ་གནོན་པའི་མཐུ་ཉེ་བར་བཅོམ་པ་དང ། མ་ལ་གནོད་ལ་སྨྲས་པ། མ་ལ་གནོད། མཐོང་ངམ། ཤཱཀྱ་རྣམས་ཀྱིས་བདག་ཅག་བརླག་པར་བྱས་སུ་འོང་གི་།ཐོང་ལ་འདོང ། དེས་སྨྲས་པ། ལྷ། ཐུགས་མ་ཆད་
Tha138b
ཅིག་།སེར་སྐྱ་ན་གནས་པའི་ཤཱཀྱ་རྣམས་ནི། བདེན་པ་མཐོང་བ་ལགས་པས། འདི་རྣམས་སྲོག་ཆགས་གྲོག་སྦུར་ཡང་སྲོག་དང་འབྲལ་བའི་ཐུགས་མི་ཐུབ་སྟེ། དེ་ནི། འདི་དག་གིས་བདག་ཅག་གི་སེམས་ཅན་གཅིག་ཀྱང་མ་བསད་པ་ལས་མངོན་ནོ། །དེ་དེས་བསླུས་ནས་ཅང་མི་སྨྲ་བར་འདུག་གོ། ཤཱཀྱ་རྣམས་ཀྱིས་ཀྱང་ཁྲིམས་སུ་བཅས་པ། ཤེས་ལྡན་དག་།བདག་ཅག་ལས་སུས་ཀྱང་འཕགས་སྐྱེས་པོའམ། འཕགས་སྐྱེས་པོའི་དཔུང་ལ་བསྣུན་པར་མི་བྱ་སྟེ། གང་ཞིག་སྣུན་པ་དེ་ནི། བདག་གི་ཉེ་དུ་ཡང་མ་ཡིན། ཤཱཀྱ་ཡང་མ་ཡིན་ནོ། །དེའི་ཚེ་དེའི་དུས་ན་ཤཱཀྱ་ཤམྦྷ་ཀ་ཞེས་བྱ་བ་ཞིག་རི་བྲག་ཅིག་ན་རང་ཞལ་ཏ་བྱེད་ཅིང་ལས་ཀྱི་མཐའ་བྱེད་པ་དེས། ཤཱཀྱ་རྣམས་ཀྱིས་ཁྲིམས་སུ་བཅས་པ་མ་ཐོས་སོ། །དེ་ཡང་སོ་སོའི་སྐྱེ་བོ་ཞིག་ཡིན་ཏེ། དེས་འཕགས་སྐྱེས་པོ་བདག་ཅག་གསད་པའི་ཕྱིར་སེར་སྐྱའི་གནས་སུ་འོངས་ནས་ཕྱོགས་ཆེ་གེ་མོ་ཞིག་ན་འདུག་གོ་།ཞེས་ཇི་ལྟ་བུ་ཡིན་པ་ཐོས་སོ། །ཐོས་ནས་ཀྱང་ཁྲོ་བས་ཀུན་ནས་དཀྲིས་པས་བསྐྱེད་པའི་ཡིད་མི་བདེ་བས། མོད་ལ་འཕགས་སྐྱེས་པོའི་དཔུང་གི་ཐོག་ཏུ་དྲངས་ནས་དེས་དེར་སྐྱེ་བོའི་ཚོགས་མང་པོ་ཞིག་ནི། ཁ་བཏག་།ཁ་ཅིག་ནི། ཐ་མ་མ་ཤི་ཙམ་དུ་བྱས་སོ། །དེ་ནས་འཕགས་སྐྱེས་པོ་ཡིད་མི་བདེ་ནས་སྨྲས་པ། མ་ལ་གནོད། ཁྱོད་ཀྱིས་མཐོང་ངམ། ཁྱོད་ཅིག་ན་རེ། འདི་དག་བདེན་པ་མཐོང་བ་ཡིན་པས་སྲོག་ཆགས་གྲོག་སྦུར་ཡང་སྲོག་དང་འབྲལ་བར་མི་བྱེད་དོ། །ཞེ་ན།
Tha139a
༄#། །རེ་ཞིག་འདི་དག་གཅིག་གིས་ཀྱང་བདག་ཅག་གི་སྐྱེ་བོ་མང་པོ་འདི་ལྟ་བུ་བསད་ན། གལ་ཏེ་ཐམས་ཅད་ལྷགས་པར་གྱུར་ན། བདག་ཅག་གི་སེམས་ཅན་འགའ་ཡང་མི་འཚོ་བར་འགྱུར་བ་ལྟ་སྨོས་ཀྱང་ཅི་དགོས། དུས་ཀྱིས་བཅུས་པས་ཆོག་གི་།སླར་འདོང ། དེས་སྨྲས་པ། ལྷ། ཤཱཀྱ་རྣམས་ཀྱིས་འདི་ལྟ་བུའི་ཁྲིམས་སུ་བཅའ་བ་བགྱིས་ཏེ། བདག་ཅག་ལས་གང་གིས་ཀྱང་འཕགས་སྐྱེས་པོའམ། འཕགས་སྐྱེས་པོའི་དཔུང་ལ་བསྣུན་པར་མི་བྱ་སྟེ། གང་ཞིག་སྣུན་པ་དེ་ནི། བདག་ཅག་གི་ཉེ་དུ་ཡང་མ་ཡིན། ཤཱཀྱ་ཡང་མ་ཡིན་ནོ། །ཞེས་དམ་བཅས་ན། དེ་འདིས་མ་ཐོས་པས། ད་ནི། འདི་ནང་དུ་ཡང་མི་ཆུད་པའི་གནས་གང་ལགས་པ་དེ་མཆིས་སོ། །དེ་སེར་སྐྱའི་གནས་ཀྱི་སྒོར་སོང་སྟེ་འདུག་ནས་སྨྲས་པ། ཤེས་ལྡན་དག་།ནང་དུ་འོང་གི་།སྒོ་ཕྱེ་ཞིག་།དེ་དག་གིས་སྨྲས་པ། ཁྱོད་ཀྱིས་ཁོ་བོ་ཅག་གི་ཁྲིམས་སུ་བཅའ་བ་དྲལ་བས་ད་ཕྱིན་ཆད་ཁྱོད་ཁོ་བོ་ཅག་གི་གཉེན་ཡང་མ་ཡིན། ཤཱཀྱ་ཡང་མ་ཡིན་ནོ། །ཁྱོད་ནང་དུ་ལྟ་ག་ལ་གཏང ། སོང་ཞིག་།དེས་སྨྲས་པ། བདག་གིས་ཁྱོད་ཀྱི་ཁྲིམས་སུ་བཅའ་བ་མ་ཐོས་ཏེ། འོན་ཀྱང་མང་དུ་སྨྲ་ཅི་དགོས། གལ་ཏེ་བདག་གིས་ཁྱེད་ཀྱི་ཁྲིམས་སུ་བཅའ་བ་དྲལ་ན། བདག་གི་འཁོར་ཕྱིར་ཕྱུང་ཞིག་དང ། གཞན་དུ་འགྲོའོ། །དེ་དག་གིས་དེའི་འཁོར་ཕྱིར་ཕྱུང་བ་དང ། དེས་དེ་དག་ཁྲིད་ནས་བཅོམ་
Tha139b
ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཤཱཀྱ་ཤམྦྷ་ཀས་འདི་སྐད་ཅེས་གསོལ་ཏོ། །བཙུན་པ། བདག་གིས་བཅོམ་ལྡན་འདས་ལ་གང་ལ་བགྱི་བ་བགྱི་བའི་མཚན་མ་ཅུང་ཟད་ཅིག་བདག་ལ་སྩལ་དུ་གསོལ། བཅོམ་ལྡན་འདས་ཀྱིས་དེ་ལ་རྫུ་འཕྲུལ་གྱིས་དབུ་སྐྲ་དང ། སེན་མོ་དང ། ཚེམས་དག་ཅིག་གནང་བ་དང ། དེས་དེ་དག་ཁྱེར་ནས་ཡུལ་བ་ཀུ་དར་ཆས་སོ། །དེ་རྣམས་ཀྱིས་ཤཱཀྱ་ཤམྦྷ་ཀ་ཞེས་བྱ་བ་བརྩོན་པ་དང ། སྟོབས་དང ། ཕ་རོལ་གནོན་པ་ཆེན་པོ་ཕུན་སུམ་ཚོགས་པ་ཞིག་བདག་ཅག་གི་ཡུལ་དུ་རྒྱལ་སྲིད་འདོད་དུ་འོང་ངོ ། །ཞེས་ཐོས་སོ། །ཐོས་ནས་ཀྱང་གྲོགས་བྱ་བར་བརྩམས་པ། ཤེས་ལྡན་དག་།ཤཱཀྱ་ཤམྦྷ་ཀ་ཞེས་བྱ་བ་བརྩོན་པ་དང ། སྟོབས་དང ། ཕ་རོལ་གནོན་པ་ཆེན་པོ་ཕུན་སུམ་ཚོགས་པ་ཞིག་།བདག་ཅག་གི་ཡུལ་དུ་འོང་ངོ ། །ཞེས་གྲག་གི་།དེའི་ཕྱིར་རེ་ཞིག་ཚུར་ཤོག་།འདུས་ཤིག་།ཅི། དེ་དང་ཕྲད་ཅིང་འདོང་ངམ་མི་འདོང ། དེ་དག་ཐམས་ཅད་རེ་ཞིག་གི་དྲུང་དུ་འདུས་ཏེ་རེ་ཞིག་འདུག་པ་དེའི་བར་དུ་ཤམྦྷ་ཀས་འཁོར་རྣམས་ཕྱོགས་གཅིག་ཏུ་བཞག་ནས་བང་ཆེན་གྱི་ཆ་ལུགས་སུ་བྱས་ཏེ། དེ་དག་གི་དྲུང་དུ་སོང་བ་དང ། དེ་དག་གིས་འོངས་པ་ལེགས་སོ། །ཞེས་བྱ་བའི་སྨྲ་བ་ཀུན་ཏུ་སྤྱད་ནས་དྲིས་པ། ཁྱོད་ག་ལས་འོང ། དེས་སྨྲས་པ།
Tha140a
༄#། །ཤཱཀྱ་ཤམྦྷ་ཀ་ཞེས་བྱ་བ་བརྩོན་པ་དང ། སྟོབས་དང ། ཕ་རོལ་གནོན་པ་ཆེན་པོ་ཕུན་སུམ་ཚོགས་པ་དེ། རྒྱལ་སྲིད་འདོད་ཅིང་འདིར་འོང་བར་འདོད་དེ། དེས་སྤྲིང་ཡིག་འདི་བསྐུར་གྱི། འཁོད་ལ་ལྷོགས་ཤིག་།དེ་དག་གིས་སྨྲས་པ། སྟན་ཡང་མེད་ན་གང་དུ་འཁོད། དེས་རལ་གྲི་ཤུབས་ནས་ཕྱུང་ནས་ཕ་བོང་དུམ་བུ་དུམ་བུར་གཤེགས་ཏེ་འདི་ལ་འཁོད་ཅིག་ཅེས་བྱས་པ་དང ། དེ་དག་གིས་མཐོང་ནས་ངོ་མཚར་གྱི་མིག་གདངས་ཏེ་སྨྲས་པ། ཀྱེ་སྐྱེས་བུ། དེ་ལ་ཁྱོད་འདྲ་བ་དེ་ལྟ་བུའི་མི་ཇི་ཙམ་ཡོད། དེས་སྨྲས་པ། ཤེས་ལྡན་དག་།ཁོ་བོ་ནི། དེའི་བང་ཆེན་ཏེ། ཁོ་བོས་ལྟ་ཅི་ཞིག་ནུས། དེ་ལ་སྐྱེས་བུ་དཔའ་བོ་གཞན་མང་དུ་ཡོད་དོ། །དེ་དག་གིས་ཐོས་ནས་སྡངས་ཏེ་ཕན་ཚུན་སྨྲས་པ། ཤེས་ལྡན་དག ། གང་གིས་བང་ཆེན་འདི་འདྲ་བ་དེའི་མི་གཞན་ཅི་འདྲ་བ་ཞིག་ཡོད། ཚུར། དེ་ཡོང་བདག་ཅག་གི་རྒྱལ་པོར་གཞུག་གོ། ཞེས་དེ་དག་གིས་སྤྲིང་ཡིག་བཀླགས་ནས་དེ་ལ་སྤྲིང་ཡིག་གི་ལན་བྱིན་པ། བྱོན་པ་ལེགས་སོ། །སྨན་བཏགས་ཏེ། བདག་ཅག་བཀའ་བཞིན་བགྱིད་པ་ལགས་སོ། །དེས་སྤྲིང་ཡིག་གི་ལན་ཁྱེར་ནས་འཁོར་དང་བཅས་ཏེ་འབྱོར་པ་མཆོག་དང ། ཡུལ་བ་ཀུ་དར་འོངས་པ་དང ། དེ་དག་གིས་དེ་བཀུར་སྟི་ཆེན་པོས་བསུས་ནས་རྒྱལ་སྲིད་ལ་བཞག་གོ་།ཡུལ་བ་ཀུ་ད་པ་རྣམས་ཀྱིས་ཤཱཀྱ་ཤམྦྷ་ཀ་ཞེས་བྱ་བ་རྒྱལ་སྲིད་ལ་དབང་བསྐུར་རོ། །ཞེས་
Tha140b
ཀུན་ཏུ་སྒྲ་གྲགས་ཏེ། རྒྱལ་པོ་ཤམྦྷ་ཀ། རྒྱལ་པོ་ཤམྦྷ་ཀ་ཞེས་བྱ་བར་མིང་ཆགས་སོ། །དེས་དེར་བཅོམ་ལྡན་འདས་ཀྱི་དབུ་སྐྲ་དང ། སེན་མོའི་མཆོད་རྟེན་བྱེད་དུ་བཅུག་སྟེ་ཤམྦྷ་ཀའི་མཆོད་རྟེན། ཤམྦྷ་ཀའི་མཆོད་རྟེན་ཞེས་བྱ་བར་མིང་ཆགས་སོ། །དེའི་ཆུང་མ་དད་པ་མེད་པ་ཞིག་ནི། དེ་ཡང་དེའི་བཙུན་མོ་དམ་པ་ཡིན་པས། དེས་དེའི་ངོ་ཅུང་ཟད་ཀྱང་མི་ཆོད་པས། དེས་བློན་པོ་རྣམས་ལ་བསྒོ་བ། དགོན་པ་སྲུང་བ་གྱིས་ཤིག་།དེ་དག་གིས་དགོན་པ་སྲུང་བ་བྱས་པས། ད་དུང་ཡང་དེ་ན་རི་དྭགས་དག་མི་གསོད་དོ། །འཕགས་སྐྱེས་པོས་མ་ལ་གནོད་ལ་སྨྲས་པ། མལ་གནོད་ད་ནི། ཤཱཀྱ་རྣམས་ཀྱིས་སྒོ་རྣམས་བཅད་དེ་ར་བ་རྣམས་སུ་སྦྲེངས་ནས་བག་བརྐྱང་སྟེ་འཁོད་ན། ངེས་པའི་དུས་ཀྱིས་འཆུ་བས་ཅི་ཞིག་བྱ། འདོང ། དེས་སྨྲས་པ། ལྷ། ཅི། གྲོང་ཁྱེར་ཐམས་ཅད་ཕ་རོལ་གནོན་པ་གཅིག་བུས་ཆོམས་སམ། བདག་རྒྱལ་པོའི་ཕོ་བྲང་ན་སྤྱོད་པས་ཐོས་པ་ནི། མཁས་པ་རྣམས་ནི་བཞམས་པ་དང ། །རབ་ཏུ་སྦྱིན་དང་བསླུ་བ་དང ། ཀུན་ཏུ་སྤྱད་པ་ལྔ་པ་ནི། ། དཔུང་གིས་དོན་རྣམས་སྒྲུབ་པར་བྱེད། །ཅེས་བགྱི་སྟེ། དེ་ལྟ་བས་ན། དེ་དག་ལ་དབྱེན་བགྱི་བ་དགོངས་ཤིག་།འཕགས་སྐྱེས་པོས་དེ་དག་ལ་སྤྲིང་པ། ཤེས་ལྡན་དག་།ང་ནི། ཁྱེད་ལ་རྗེས་སུ་ཆགས་པ་ཡང་མེད། ཁོང་ཁྲོ་བ་ཡང་མེད་ཀྱི། འོན་ཀྱང ། ངའོ་ནིར་བྱ་བ་ཅུང་ཞིག་ཡོད་དེ། དེངས་བྱས་ཤིང་ཐོབ་ནས་མྱུར་བ་མྱུར་བར་འགྲོའི། །སྒོ་ཕྱེ་ཞིག་།ཤཱཀྱ་རྣམས་ཀྱིས་སྨྲས་པ།
Tha141a
༄#། །ཤེས་ལྡན་དག། འདུས་ལ་ཅི་སྒོ་དབྱེའམ། འོན་ཏེ་མི་དབྱེ་བ་དཔྱད་པར་བྱའོ། །ཞེས་དེ་དག་ཐམས་ཅད་འདུས་པ་དང ། དེ་ན་ཁ་ཅིག་གིས་སྨྲས་པ། དབྱེ་བར་བྱའོ། །གཞན་དག་གིས་སྨྲས་པ། གལ་ཏེ་ཕྱེ་ན། མ་ལེགས་སོ། །ཁ་ཅིག་གིས་སྨྲས་པ། ཤེས་ལྡན་དག་།ཁ་ཅིག་ནི། དབྱེའོ། །ཞེས་ཟེར། གཞན་དག་ནི། ཕྱེ་ན་མ་ལེགས་སོ། ། ཞེས་ཟེར་བས། དེའི་ཕྱིར་གལ་ཏེ་ཁྱོད་འདོད་ན། ཚུལ་ཤིང་བྲིམས་ཤིག་དང ། སྐྱེ་བོ་མང་པོའི་འདོད་པ་གང་ཡིན་པ་དེ་བྱའོ། །ཞེས་དེ་རྣམས་ཀྱི་ཚུལ་ཤིང་བྲིམ་པར་བརྩམས་སོ། ། སྐབས་དེར་བདུད་སྡིག་ཅན་འདི་སྙམ་དུ་སེམས་ཏེ། བདག་གིས་ལན་དུ་མ་ཞིག་དགེ་སྦྱོང་གོའུ་ཏ་མ་ལ་གླགས་བཙལ་ཞིང་གླན་ཀ་བཙལ་ཏེ་ཕྱི་བཞིན་ཕྱི་བཞིན་དུ་འབྲངས་ཀྱང་གླགས་མ་རྙེད་ཀྱི། མ་ལ་ད་བདག་གིས་འདིའི་ཉེ་དུ་རྣམས་ཁ་བཏག་གོ་།སྙམ་དུ་རིག་ནས་བདག་ཉིད་ཤཱཀྱ་རྒན་པོ་ཞིག་ཏུ་མངོན་པར་སྤྲུལ་ཏེ་རྒན་པའི་མཐར་འདུག་ནས་དེས་ཐོག་མར་ཚུལ་ཤིང་བླངས་པ་དང ། ཤཱཀྱ་རྒན་པོས་ཚུལ་ཤིང་བླངས་སོ། །ཞེས་ཐམས་ཅད་ཀྱིས་བླངས་སོ། །དེ་ནས་བློ་གཅིག་པས་འཕགས་སྐྱེས་པོ་ལ་སྤྲིངས་པ་།ནང་དུ་ཞུགས་ཤིག་།དེ་དཔུང་གི་ཚོགས་ཡན་ལག་བཞི་པ་དང་ནང་དུ་ཞུགས་ཏེ་ཞུགས་ནས་སྨྲས་པ། ངས་ཤཱཀྱ་རྣམས་ཁ་གདག་གོ་།ངས་ཤཱཀྱ་རྣམས་ཡོངས་སུ་སྤངས་སོ། །ཞེས་སྨྲས་པའི་ཚིག་རྗེས་ཆད་མ་ཐག་ཏུ། སྐྱེས་བུ་
Tha141b
མཚོན་གཟས་པ་རྣམས་ཀྱིས་ཤཱཀྱ་རྣམས་ཀུན་ནས་གསད་པར་བརྩམས་པ་དང ། ཀུ་ཅོ་ཆེན་པོ་འདོན་ཏོ། །ཤཱཀྱ་མིང་ཆེན་གྱིས་སྒྲ་དེ་ཐོས་ནས་ཉེ་དུ་ལ་བྱམས་པས་བསྐྱེད་པའི་ཡིད་མི་བདེ་བས། རིངས་པ་རིངས་པར་འཕགས་སྐྱེས་པོའི་དུང་དུ་སོང་སྟེ་དེས་སྨྲས་པ། ལྷ། དམ་པ་འོས་པ་བདག་ལ་དམ་པ་སྩོལ་ཅིག་།དེས་སྨྲས་པ། ཁྱོད་དམ་པ་ཅི་སློང་སྨྲོས་ཤིག་།དེས་སྨྲས་པ། ལྷ། བདག་གི་ཉེ་དུ་རྣམས་ལ་མི་འཇིགས་པ་སྩོལ་ཅིག་།འཕགས་སྐྱེས་པོས་སྨྲས་པ། ངས་ཁྱོད་ཀྱི་ཉེ་དུ་རྣམས་ལ་ནི། མི་འཇིགས་པ་མི་སྦྱིན་ནོ། །འོན་ཀྱང་ཁྱོད་འཁོར་དང་བཅས་ཏེ་ཕྱིར་ཕྱུང་ཞིག་།དེས་སྨྲས་པ། ལྷ། ཇི་སྲིད་བདག་ཆུའི་ནང་དུ་ནུབ་སྟེ་འདུག་པ་དེ་སྲིད་དུ་གང་དག་ཕྱིར་འབྱུང་བ་དེ་དག་ལ་མི་འཇིགས་པ་སྩོལ་ཅིག་།དེས་བློན་པོ་རྣམས་ཀྱི་གདོང་དུ་བལྟ་བར་བརྩམས་པ་དང ། དེ་དག་གིས་སྨྲས་པ། ལྷ། མིང་ཆེན་འདི་ནི། ཁྱོད་ཀྱི་ཡུམ་མེས་ཀྱང་ལགས། ཡབ་ཀྱི་གྲོགས་པོ་ཡང་ལགས་པས། འདི་ལ་ནི། དམ་པ་དེ་སྩལ་བའི་རིགས་སོ། །དེས་སྨྲས་པ། གལ་ཏེ་དེ་ལྟ་ན། དེ་སྐད་ཅིག་བྱིན་ཏོ། །ཤཱཀྱ་མིང་ཆེན་ཉེ་དུ་ལ་ཆགས་པས་བསྐྱེད་པའི་ཡིད་མི་བདེ་བ། སྙིང་རྗེས་བརླན་པའི་སེམས་ཀྱིས་ཆུའི་རྫིང་དུ་སོང་སྟེ་དེའི་འགྲམ་ན་ཤིང་སཱ་ལ་ཞིག་ཡོད་པ་དེའི་ཡལ་ག་རྫིང་གི་ཆུའི་ནང་དུ་ནུབ་པ་དེ་ལ། དེས་གཙུག་ཕུད་བཏགས་ནས་ནམ་སྲོག་དང་བྲལ་བ་དེའི་བར་དུ་ནུབ་སྟེ་འདུག་གོ་།དེ་ན་སེར་སྐྱའི་གནས་ན་གནས་པའི་ཤཱཀྱ་གང་དག་གིས་ཚོགས་པ་
Tha142a
༄#། །ཅན་གྱི་ལས་མ་བྱས་པ་དེ་དག་ལས་ཁ་ཅིག་ནི། སེར་སྐྱའི་གནས་ནས་བྱུང་སྟེ་གྱད་རྒྱུ་བར་སོང་ངོ ། །ཁ་ཅིག་ནི། བལ་ཡུལ་དུ་དོང་ངོ ། །ཁ་ཅིག་ནི། གྲོང་དང ། གྲོང་རྡལ་དང ། རྒྱལ་པོའི་ཡུལ་འཁོར་དང ། ཕོ་བྲང་དེ་དང་དེ་དག་ཏུ་སོང་ངོ ། །གང་དག་གིས་ཚོགས་པ་ཅན་གྱི་ལས་བྱས་པ་དེ་དག་ནི། སེར་སྐྱའི་གཞིའི་ཤར་སྒོར་བྱུང་ནས་ལྷོ་ནས་འཇུག་།ལྷོ་ནས་བྱུང་ནས་ནུབ་ནས་འཇུག་།ནུབ་ནས་བྱུང་ནས་བྱང་ནས་འཇུག་།བྱང་ནས་བྱུང་ནས་ཤར་ནས་འཇུག་པ་དང ། བློན་པོ་རྣམས་ཀྱིས་སྨྲས་པ། ལྷ། ཀྱེ་མ་ཤཱཀྱ་རྣམས་ནི། ཚིག་གོ་།ཀྱེ་མ་ཤཱཀྱ་རྣམས་ནི། ཚིག་སྟེ། འདི་ན་ད་ལྟར་ཤར་སྒོ་ནས་ནང་དུ་ཞུགས་ནས་ལྷོར་འབྱུང ། ལྷོ་ནས་ཞུགས་ནས་ནུབ་ཏུ་འབྱུང ། ནུབ་ནས་ཞུགས་ནས་བྱང་དུ་འབྱུང ། བྱང་ནས་ཞུགས་ནས་ལྷོར་འབྱུང་ངོ ། །འཕགས་སྐྱེས་པོས་སྨྲས་པ། ཤེས་ལྡན་དག་།མེས་པོ་དེ་ཆུར་ནུབ་ནས་རིང་ཞིག་ལོན་གྱི། ལྟོས་ཤིག་།བློན་པོ་རྣམས་ཀྱིས་རིངས་པར་ཆུའི་རྫིང་དུ་སོང་ནས་བརྟག་པར་བརྩམས་པ་ལས། དེ་ཙམ་ན་དུས་ལས་འདས་སོ། །དེ་དག་འོངས་ཏེ། ལྷ། དུས་ལས་འདས་སོ། །ཞེས་བྱས་པ་དང ། དེ་ཆེ་ཐང་དུ་ཀུན་ནས་དཀྲིས་པས་སྨྲས་པ། ཤེས་ལྡན་དག་།སྟན་ཤོམས་ཤིག་།ཇི་སྲིད་དུ་ལམ་པོ་ཆེར་ཁྲག་གི་འོད་པ་བབ་པར་མ་བྱུར་པ་དེ་སྲིད་དུ་ཕྱོགས་འདི་ནས་མི་འགྲོའོ། །སྐྱེས་བུ་དཔའ་བོ་རྣམས་བསད་ན། ཁྲག་ཉུང་ངུ་འབྱུང་བ་
Tha142b
འདི་ནི། ཆོས་ཉིད་ཡིན་པས་བློན་པོ་རྣམས་ཕན་ཚུན་བགྲོ་བར་བརྩམས་པ། ཤེས་ལྡན་དག་།སེམས་ཅན་འདི་ནི། སྡིག་པའི་ལས་བྱེད་པ་དང ། དམ་བཅས་པ་ལ་བརྟན་པ་ཡིན་ན། འདིར་འདི་སྙེད་ཀྱི་ཁྲག་ཅིག་ག་ལས་འབྱུང ། རྒྱ་སྐྱེགས་དག་ཅིག་ལེན་དུ་གཞུག་གོ། ཞེས་དེ་རྣམས་ཀྱིས་རྒྱ་སྐྱེགས་བླངས་ནས་རྒྱ་སྐྱེགས་ཀྱི་ཆུ་བུམ་པ་བརྒྱ་སྟོང་དུ་མ་ལམ་པོ་ཆེར་ཕབ་པ་དང ། འཕགས་སྐྱེས་པོས་བསམ་པ། བདག་གི་དམ་བཅས་པ་རྫོགས་པས་འགྲོའོ། །སྙམ་མོ། །དེ་ནས་སྐྱེས་བུ་གཏི་མུག་འཕགས་སྐྱེས་པོས་ཤཱཀྱ་བདུན་ཁྲི་བདུན་སྟོང་བསད་དེ། ཕལ་ཆེར་ནི། བདེན་པ་མཐོང་བ་ཤ་སྟག་གོ་།དེས་སེམས་ཅན་དེ་སྙེད་བསད་ནས་གཞོན་ནུ་ལྔ་བརྒྱ་དང ། བུ་མོ་ལྔ་བརྒྱ་ཁྲིད་དེ། གཞན་མུ་སྟེགས་ཅན་ཀུན་ཏུ་རྒྱུ་རྣམས་ཀྱི་ཀུན་དགའ་ར་བ་ཕག་མོའི་གནས་ཞེས་བྱ་བ་ག་ལ་བ་དེར་སོང་བ་དང ། མ་ལ་གནོད་ཀྱིས་སྨྲས་པ། ལྷ། ཁྱོད་ཀྱིས་དགྲ་ཡོངས་སུ་བསྐྱངས་སོ། །དགྲ་འདི་དག་ཅི་སྟེ་ཡལ་བར་གཞག་།སོད་ཅིག་།འཕགས་སྐྱེས་པོས་གཤེད་མའི་མི་རྣམས་ལ་གཏད་དེ། འདི་རྣམས་གླང་པོ་ཆེ་དག་གིས་རྫིར་ཆུག་ཅིག་།ཅེས་བསྒོའོ། །དེ་རྣམས་ཀྱིས་གླང་པོ་དག་གིས་རྫིར་གཞུག་པར་བརྩམས་པ་དང ། དེ་དག་གིས་གླང་པོ་ཆེ་དེ་དག་གན་རྐྱལ་དུ་མནན་ཏེ་ལག་པ་ནས་ལག་པར་སྦེད་པར་བརྩམས་སོ། །མ་ལ་གནོད་ཀྱིས་སྨྲས་པ། ལྷ། ཁྱོད་ཀྱིས་འདི་དག་གི་ཕ་རོལ་གནོན་པ་གཟིགས་སམ། མཐོང་ངོ ། །ལྷ། འདི་
Tha143a
༄#། །དག་ཡལ་བར་བཞག་ན། ལྷ་ལ་གནོད་པ་བགྱིད་པར་མི་འགྱུར་རམ། མ་ལ་གནོད། དེ་དེ་བཞིན་ཏེ། འདི་དག་ཇི་ལྟར་གསད་པར་བྱ་བ་དྲིའི། སྨྲོས་ཤིག་།དེས་སྨྲས་པ། ལྷ། དོང་དུ་སྩོལ་ལ་སྟེང་ནས་ལྕགས་ཀྱི་ཤལ་བས་བཤལ་དུ་སྩོལ་ཅིག་།དེ་བཞིན་བྱེད་དུ་ཆུག་ཅིག་།དེས་དེ་དག་དོང་དུ་བཅུག་ནས་སྟེང་ནས་ལྕགས་ཀྱི་ཤལ་བས་མནན་ཏོ། ། དེ་ནས་གཉིས་ཤིག་བྲོས་ཏེ་བཅོམ་ལྡན་འདས་ཀྱི་སྤྱན་སྔར་སོང་ངོ ། །སོང་ནས་དེ་གཉིས་བཅོམ་ལྡན་འདས་ཀྱིས་ལྷུང་བཟེད་ཀྱིས་བཀབ་པ་དང་དེ་ཉིད་དུ་ཤིའོ། །ཤཱཀྱ་རྣམས་བསད་པ་ན། བཅོམ་ལྡན་འདས་ཀྱི་དབུ་ཤིན་ཏུ་བསྙུང་པར་གྱུར་ཏོ། །དེ་ནས་སྐྱེས་བུ་གཏི་མུག་འཕགས་སྐྱེས་པོས་མི་ཞིག་ལ་སྨྲས་པ། ཀྱེ་སྐྱེས་བུ། ཁྱོད་ཚུར། དེ་བཞིན་གཤེགས་པའི་སྤྱན་སྔར་སོང་སྟེ་འདུག་ལ་བཅོམ་ལྡན་འདས་ཅི་གསུང་བ་དེ་ཁྱོད་ཀྱིས་ཉོན་ལ། ང་ལ་ཟློས་ཤིག་།ཅེས་སྨྲས་ནས་སོང་ངོ་།མི་དེ་བཅོམ་ལྡན་འདས་ཀྱི་སྤྱན་སྔར་སོང་སྟེ་འདུག་གོ་།དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ང་ལ་ཆུ་ལྷུང་བཟེད་གང་བྱིན་ཅིག་།དེས་བཅོམ་ལྡན་འདས་ལ་ཆུ་ལྷུང་བཟེད་གང་ཕུལ་ལོ། །བཅོམ་ལྡན་འདས་ཀྱིས་དེར་ཆུའི་ཐིགས་པ་གཉིས་གསུམ་ཙམ་བླུགས་པ་དང ། དེ་དག་ཆུའི་ནང་དེ་ནས་དུ་བར་ཐུལ་ཞིང་ཙི་རི་རི་ཟེར་ལ་སྒྲ་ཡང་འབྱིན་ཏོ། །དགེ་སློང་རྣམས་ཆོ་འཕྲུལ་དེ་མཐོང་ནས་ཡིད་དད་ཅིང །
Tha143b
སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། བཅོམ་ལྡན་འདས་ཀྱིས་འཕྲིན་ལས་ཅི་ཞིག་མཛད་ན། འཕྲིན་ལས་དེའི་རྣམ་པར་སྨིན་པས། བཅོམ་ལྡན་འདས་དབུ་བསྙུང་བར་གྱུར། སེར་སྐྱ་ན་གནས་པའི་ཤཱཀྱ་རྣམས་ཀྱིས་སུག་ལས་ཅི་ཞིག་བགྱིས་ན། དེས་ནོངས་པ་ཡང་མ་མཆིས། གནོད་པ་བགྱིས་པ་ཡང་མ་མཆིས་པར་སྐྱེས་བུ་གཏི་མུག་འཕགས་སྐྱེས་པོས་བཀུམ་པ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།ཚུར། གཞན་མུ་སྟེགས་ཅན་ཀུན་ཏུ་རྒྱུ་རྣམས་ཀྱི་ཀུན་དགའ་ར་བ་ཕག་མོའི་གནས་གང་དུ་སྐྱེས་བུ་གཏི་མུག་འཕགས་སྐྱེས་པོས་ཤཱཀྱ་རྣམས་བསད་པ་ག་ལ་བ་དེ་ཁོ་ནར་དེ་རྣམས་དང ། བདག་ཉིད་ཀྱི་ལས་ཀྱི་རྒྱུ་བ་ལུང་བསྟན་པར་བྱའོ། །བཙུན་པ། དེ་ལྟར་འཚལ་ལོ། །ཞེས་དགེ་སློང་དེ་རྣམས་བཅོམ་ལྡན་འདས་ཀྱི་ལྟར་ཉན་ཏོ། །དེ་ནས་བཅོམ་ལྡན་འདས་དགེ་སློང་རབ་ཏུ་མང་པོ་དང་ཐབས་ཅིག་གཞན་མུ་སྟེགས་ཅན་ཀུན་ཏུ་རྒྱུ་རྣམས་ཀྱི་ཀུན་དགའ་ར་བ་ཕག་མོའི་གནས་གལ་བ་དེར་གཤེགས་སོ། །བྲེ་བོ་དང་རུས་མཐུན་པའི་བྲམ་ཟེ་ཞིག་གིས་བཅོམ་ལྡན་འདས་ཐག་རིང་པོ་ཁོ་ན་ནས་མཐོང་སྟེ། མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གོའུ་ཏ་མ། གང་གི་སླད་དུ་སྐྱེས་བུ་གཏི་མུག་འཕགས་སྐྱེས་པོས། སེར་སྐྱ་ན་གནས་པའི་ཤཱཀྱ་ནོངས་པ་ཡང་མ་མཆིས། གནོད་པ་བགྱིས་པ་ཡང་མ་མཆིས་པ་རྣམས་སྲོག་དང་ཕྲལ་བ་ནི། བསོད་ནམས་མ་ལགས་པ་མང་པོ་
Tha144a
༄#། །ཞིག་བསྐྱེད་དོ། །བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ། དེ་དེ་བཞིན་ནོ། །དེ་དེ་བཞིན་ཏེ། གང་གི་ཕྱིར་སྐྱེས་བུ་གཏི་མུག་འཕགས་སྐྱེས་པོས། སེར་སྐྱ་ན་གནས་པའི་ཤཱཀྱ་ཉེས་པ་ཡང་མེད། གནོད་པ་བྱས་པ་ཡང་མེད་པ་རྣམས་སྲོག་དང་བྲལ་བ་ནི། བསོད་ནམས་མ་ཡིན་པ་མང་པོ་ཞིག་བསྐྱེད་དོ། །དེ་ནས་བཅོམ་ལྡན་འདས་གཞན་མུ་སྟེགས་ཅན་ཀུན་ཏུ་རྒྱུ་རྣམས་ཀྱི་ཀུན་དགའ་ར་བ་ཕག་མོའི་གནས་ག་ལ་བ་དེར་གཤེགས་པ་དང ། དེ་ན་སེར་སྐྱ་ན་གནས་པའི་ཤཱཀྱ་ལྕགས་ཀྱི་ཤལ་བས་བཤལ་བ་ལས་སྲོག་གི་ལྷག་མ་ཅུང་ཟད་ལུས་པ་གང་དག་ཡིན་པ་དེ་དག་གིས་བཅོམ་ལྡན་འདས་མཐོང་ནས་སྐད་ངན་བཏོན་ཏོ། །དེ་ནས་བཅོམ་ལྡན་འདས་ཕྱོགས་གཅིག་ཏུ་གཤེགས་ནས་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག། སེར་སྐྱ་ན་གནས་པའི་ཤཱཀྱ་འདི་རྣམས་ཀྱིས་འདི་དང་ལན་གསུམ་གྱི་བར་དུ་སྒྲ་ཆེན་པོ་ཕྱུང་སྟེ། སྔོན་ཉ་པ་བྱེད་པའི་ཚེ། ཉ་འདོད་པའི་ཕྱིར་གང་ཡིན་པ་དང ། ཆོམ་རྐུན་པ་བྱེད་པའི་ཚེ་གྲོང་འཇོམས་པའི་ཕྱིར་གང་ཡིན་པ་དང ། ད་ལྟ་སེར་སྐྱ་ན་གནས་པའི་ཤཱཀྱ་བྱེད་པའི་ཚེ་སྐྱེས་བུ་གཏི་མུག་འཕགས་སྐྱེས་པོས་སྲོག་གི་ལྷག་མ་ཅུང་ཟད་ཙམ་ལུས་པར་བྱས་ཏེ་འཆི་བ་ལ་མངོན་དུ་ཕྱོགས་པའི་ཚེ་གང་ཡིན་པའོ། །འདི་དག་
Tha144b
ཐམས་ཅད་ཀྱི་བརྡོལ་བ་ལ་ནི་ཁྱད་པར་རམ། བསམ་པའམ། ཐ་དད་དུ་བྱ་བ་ཅུང་ཟད་ཀྱང་མེད་དེ། མཚུངས་སོ། །དགེ་སློང་དག་།ཇི་སྙམ་དུ་སེམས། ཤན་པ་འདི། ལས་དེ་དང ། བཟོ་དེ་དང ། འཚོ་བ་དེས་གླང་པོ་ཆེ་ལ་ཞོན་ཏེ་འགྲོ་བའམ། རྟ་ལ་ཞོན་ཏེ་འགྲོ་བའམ། ཤིང་རྟར་ཞུགས་ཏེ་འགྲོ་བའམ། དཔུང་བུ་ཆུང་དང་ཆས་ཏེ་འགྲོ་བའམ། ནོར་གྱི་ཕུང་པོ་རྒྱ་ཆེན་པོ་མང་པོ་གྲུབ་ནས་གནས་པ་ལྟ་ཅི་ག་ལ་མཐོང་ངམ། ཐོས་སམ། བཙུན་པ། མ་ལགས་སོ། །དགེ་སློང་དག། ལེགས་སོ། །ལེགས་སོ། །ངས་ཀྱང་ཤན་པ་འདི། ལས་དེ་དང་ཞེས་བྱ་བ་ནས་ནོར་གྱི་ཕུང་པོ་རྒྱ་ཆེན་པོ་མང་པོ་བསྒྲུབས་ནས་གནས་པ་ཞེས་བྱ་བའི་བར་སྔ་མ་བཞིན་ཏེ། མ་མཐོང ། མ་ཐོས་སོ། །དེ་ཅིའི་ཕྱིར་ཞེ་ན། འདི་ལྟར་ཤན་པ་རྣམས་ནི། སྡིག་པའི་བསམ་པས་རྟོག་པར་བྱེད་དེ། དེས་ན་འདི་གླང་པོ་ཆེ་ལ་ཞོན་ཏེ་འགྲོ་བའམ། རྟ་ལ་ཞོན་ཏེ་འགྲོ་བའམ། ཤིང་རྟར་ཞུགས་ཏེ་འགྲོ་བའམ། དཔུང་བུ་ཆུང་དང་ཆས་ཏེ་འགྲོ་བར་ཡང་མི་འགྱུར་ལ། ནོར་གྱི་ཕུང་པོ་རྒྱ་ཆེན་པོ་མང་པོ་བསྒྲུབས་ཏེ་གནས་པར་ཡང་མི་འགྱུར་རོ། །གཞན་ཡང་དགེ་སློང་དག་།ཇི་སྙམ་དུ་སེམས། ཁྱོད་ཀྱིས་བྱ་གག་གསོད་པའམ། ཕག་གསོད་པའམ། ཉ་པའམ། རི་དྭགས་བཤོར་བའམ། བྱ་བའམ། བོང་བུ་རྒྱས་འཚོར་བའམ། བ་ལང་གསོད་པ་དག་ལས་དེ་དང་ཞེས་བྱ་བ་ནས་ནོར་གྱི་ཕུང་པོ་རྒྱ་ཆེན་པོ་མང་པོ་བསྒྲུབས་ཏེ་གནས་པ་དེ་མཐོང་ངམ། ཐོས་སམ་ཞེས་བྱ་
Tha145a
༄#། །བའི་བར་སྔ་མ་བཞིན་ནོ། །དེ་ཅིའི་ཕྱིར་ཞེ་ན། འདི་ལྟར་བ་ལང་གསོད་པ་དེ། སྡིག་པའི་བསམ་པས་རྟོག་པར་བྱེད་དེ། དེས་ན་དེ་གླང་པོ་ཆེ་ལ་ཞོན་ཏེ་འགྲོ་བར་མི་འགྱུར་ཞེས་བྱ་བ་ནས་ནོར་གྱི་ཕུང་པོ་རྒྱ་ཆེན་པོ་མང་པོ་བསྒྲུབས་ཏེ་གནས་པར་མི་འགྱུར་ཞེས་བྱ་བའི་བར་སྔ་མ་བཞིན་ནོ། །དགེ་སློང་དག་།རེ་ཞིག་བྱོལ་སོང་གི་སྐྱེ་གནས་སུ་སོང་བའི་སྲོག་ཆགས་རྣམས་ཀྱིས་ཀྱང་སྡིག་པའི་བསམ་པས་བརྟགས་ན། གླང་པོ་ཆེ་ལ་ཞོན་ཏེ་འགྲོ་བའམ། རྟ་ལ་ཞོན་ཏེ་འགྲོ་བའམ། ཤིང་རྟར་ཞུགས་ཏེ་འགྲོ་བའམ། དཔུང་བུ་ཆུང་དང་ཆས་ཏེ་འགྲོ་བར་ཡང་མི་འགྱུར་ལ། ནོར་གྱི་ཕུང་པོ་རྒྱ་ཆེན་པོ་མང་པོ་བསྒྲུབས་ཏེ་གནས་པར་ཡང་མི་འགྱུར་ན། སྐྱེས་བུ་གཏི་མུག་འཕགས་སྐྱེས་སོ། སློབ་པས་ལོངས་ཞེས་སྨྲས་པ། ཚུལ་ཁྲིམས་ཀྱི་གཟི་བརྗིད་ཀྱི་ཉེ་བར་བཅོམ་པ་ལྟ་ཞིག་གླང་པོ་ཆེ་ལ་ཞོན་ཏེ་འགྲོ་བའམ། རྟ་ལ་ཞོན་ཏེ་འགྲོ་བའམ། ཤིང་རྟར་ཞུགས་ཏེ་འགྲོ་བའམ། དཔུང་བུ་ཆུང་དང་ཆས་ཏེ་འགྲོ་བའམ། ནོར་གྱི་ཕུང་པོ་རྒྱ་ཆེན་པོ་མང་པོ་བསྒྲུབས་ཏེ་གནས་པ་ལྟ་ཞིག་སྨོས་ཀྱང་ཅི་དགོས་ཏེ། དེ་ནི། གནས་མེད་དོ། །དགེ་སློང་དག་།ཀོ་ས་ལའི་རིགས་འདི་ནས་ཞག་བདུན་ན་སྦྲུལ་གྱིས་བལྟས་པ་བཞིན་དུ་རབས་ཆད་པར་འགྱུར་རོ། །སྐྱེས་བུ་གཏི་མུག་འཕགས་སྐྱེས་པོ་ཡང་མ་ལ་གནོད་དང་བཅས་ཏེ་ཞག་བདུན་ན་མེས་ཚིག་ནས་ཆོ་ངེས་འདོན་བཞིན་དམྱལ་བ་
Tha145b
ཆེན་པོ་མནར་མེད་པར་སྐྱེ་བར་འགྱུར་རོ། །དགེ་སློང་དག་།དེ་ལྟ་བས་ན། འདི་ལྟར་བསླབ་པར་བྱ་སྟེ། གང་མགལ་དུམ་ལ་ཡང་ངན་སེམས་མི་བྱ་ན། རྣམ་པར་ཤེས་པ་དང་བཅས་པའི་ལུས་ལ་ལྟ་སྨོས་ཀྱང་ཅི་དགོས། དགེ་སློང་དག་།ཁྱེད་ཀྱིས་དེ་ལྟ་བུར་བསླབ་པར་བྱའོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པར་མཛད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། ཤཱཀྱ་ལྔ་བརྒྱ་པོ་འདི་རྣམས་ཀྱིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ནོངས་པ་ཡང་མ་མཆིས། གནོད་པ་བགྱིས་པ་ཡང་མ་མཆིས་པར་སྐྱེས་བུ་གཏི་མུག་འཕགས་སྐྱེས་པོས་སྲོག་དང་ཕྲལ། བཅོམ་ལྡན་འདས་ཀྱང་ཤཱཀྱ་རྣམས་བཀུམ་པའི་ཚེ་དབུ་སྙུན་ཚབས་ཆེན་པོས་ཐེབས་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ།་དགེ་སློང་དག། འདི་དག་ཉིད་དང ། ངས་ལས་བྱས་ཤིང་བསགས་པ། ཚོགས་རྙེད་པ། རྐྱེན་ཡོངས་སུ་བསྒྱུར་བ། དཔའ་རྒལ་བཞིན་ཉེ་བར་གནས་པ། གདོན་མི་ཟ་བར་འབྱུང་བ་དག་ཡིན་ཏེ། འདི་དག་དང ། ངས་ལས་བྱས་ཤིང་བསགས་པ་གཞན་སུ་ཞིག་གིས་མྱོང་བར་འགྱུར། དགེ་སློང་དག། ལས་བྱས་ཤིང་བསགས་པ་རྣམས་ནི། ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི། འོན་ཀྱང་ལས་དགེ་བ་དང ། མི་དགེ་བ་བྱས་ཤིང་བསགས་པ་རྣམས་ནི། ཟིན་པའི་
Tha146a
༄#། །ཕུང་པོ་དང ། ཁམས་དང ། སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་ཏེ། བསྐལ་པ་བརྒྱ་ཕྲག་རྣམས་སུ་ཡང ། །ལས་རྣམས་ཆུད་ཟར་མི་འགྱུར་ཏེ། །ཚོགས་ཤིང་དུས་ལ་བབ་པ་ན། །ལུས་ཅན་རྣམས་ལ་འབྲས་བུར་སྨིན། །དགེ་སློང་དག་།སྔོན་བྱུང་བ། ཆུ་བོ་ཞིག་གི་འགྲམ་ན་ཉ་པ་ལྔ་བརྒྱ་གནས་སོ། །དེ་རྣམས་ཀྱིས་ཉ་གཉིས་ཤིག་རྒྱ་མཚོ་ཆེན་པོ་ན་ཕན་ཚུན་རྒྱུ་རྒྱུ་བ་ལས་ཆུ་བོ་དེར་ཞུགས་པ་མཐོང་བ་དང ། དེ་རྣམས་རབ་ཏུ་དགའ་བ་སྐྱེས་ནས་དེ་དག་ཉ་རྒྱ་ཆེན་པོས་བཅུས་སོ། །དེ་རྣམས་ཀྱིས་དེ་གཉིས་ཀྱི་ལུས་མཐོང་ནས་གྲོས་བྱ་བར་བརྩམས་པ། ཤེས་ལྡན་དག་།འདི་ལྟ་ཇི་ལྟར་བསྒྲུབ་པར་བྱ། འདི་དག་ལུས་ཆེ་ཆེས་པས། གལ་ཏེ་བསད་ན། ཤ་ལྡོམ་པར་མི་འགྱུར་ཏེ། དེ་འདྲུལ་བར་འགྱུར་རོ། །དེ་ནས་ཁ་ཅིག་གིས་སྨྲས་པ། འདི་ལ་ཅི་ཞིག་སྒྲུབ་ཏུ་ཡོད། གཅིག་ནི། བསད་ལ། གཅིག་ནི། བཏགས་ཏེ་གཞག་མོད། གཞན་དག་གིས་སྨྲས་པ། འདི་ཡང་ཆེ་སྟེ། འདི་ཡང་ལྡོམ་པར་མི་འགྱུར་པས། སྡོང་པོ་ལ་བཏགས་ལ་གསོན་པོར་ཤ་བཅད་ཅིང་བཅད་ཅིང་བཙོང་ངོ ། །དེ་རྣམས་ཀྱིས་སྨྲས་པ། ལེགས་ཏེ། དེ་ལྟར་བྱའོ། །དེ་དག་གིས་དེ་ལྟར་བྱ་བར་བརྩམས་པ་དང ། དེ་དག་དེ་ལྟར་གཅོད་པ་ན་རང་གི་སྐད་དུ་འོ་དོད་འབོད་པར་བརྩམས་སོ། །དེ་དག་མི་བདེ་བ་དེ་ཉ་པའི་ཁྱེའུ་ཞིག་གིས་ཐོས་ནས་རབ་ཏུ་དགའ་བ་སྐྱེད་པར་བྱེད་དོ། །དེ་
Tha146b
ནས་ཉ་དེ་གཉིས་དེ་ལྟར་བཅད་པའི་ཚེ་དེ་རྣམས་ལ་འདི་ལྟ་བུའི་སེམས་བསྐྱེད་དེ། གང་བདག་ཅག་གིས་ཉེས་པ་ཡང་མེད། གནོད་པ་བྱས་པ་ཡང་མེད་པར་འདི་དག་གིས་འདི་ལྟར་བསད། དེའི་ཕྱིར་བདག་ཅག་ཀྱང་གང་དུ་འདི་དག་ཉེས་པ་ཡང་མེད། གནོད་པ་བྱས་པ་ཡང་མེད་པར་གསོད་པར་འགྱུར་བ་དེར་སྐྱེ་བར་གྱུར་ཅིག་།དགེ་སློང་དག་།ཇི་སྙམ་དུ་སེམས། ཉ་གཉིས་པོ་གང་དག་ཡིན་པ་དེ་དག་ནི། འཕགས་སྐྱེས་པོ་དང ། མ་ལ་གནོད་འདི་དག་ཁོ་ན་ཡིན་ནོ། །ཉ་པ་ལྔ་བརྒྱ་གང་དག་ཡིན་པ་དེ་དག་ནི། ཤཱཀྱ་ལྔ་བརྒྱ་པོ་འདི་དག་ཁོ་ན་ཡིན་ཏེ། གང་འདི་གཉིས་ཀྱིས་ཉ་དེ་དག་དེ་ལྟར་བསད་པའི་ལས་དེའི་རྣམ་པར་སྨིན་པས། ད་ལྟར་འཕགས་སྐྱེས་པོ་དང ། མ་ལ་གནོད་དག་གིས་ཤཱཀྱར་གྱུར་པ་ཉེས་པ་ཡང་མེད། གནོད་པ་བྱས་པ་ཡང་མེད་པ་རྣམས་ལྕགས་ཀྱིས་ཤལ་བས་མནན་ཅིང ། འོ་དོད་འབོད་བཞིན་བསད་དོ། །ཉ་པའི་ཁྱེའུ་གང་ཡིན་པ་དེ་ནི། ང་ཉིད་དེའི་ཚེ་དེའི་དུས་ན་དེ་ཡིན་ཏེ། གང་ངས་ཉ་བསད་པ་ན། རབ་ཏུ་དགའ་བ་བསྐྱེད་པའི་ལས་དེའི་རྣམ་པར་སྨིན་པས། ད་ལྟར་ང་མངོན་པར་རྫོགས་པར་སངས་རྒྱས་ཀྱང་དབུ་སྙུན་ཚབས་ཆེན་པོས་ཐེབས་པར་གྱུར་ཏོ། །གལ་ཏེ་ངས་ཡོན་ཏན་གྱི་ཚོགས་འདི་ལྟ་བུ་ཐོབ་པར་མ་གྱུར་ན།་ང་ཡང་ལས་འདི་ལྟ་བུ་དག་ཐོབ་པར་འགྱུར་རོ། །དགེ་སློང་དག་།གཞན་ཡང་སེར་སྐྱ་ན་གནས་པའི་ཤཱཀྱ་རྣམས་ཀྱིས་ལས་གང་བྱས་པ་དེ་ཉོན་ཅིག་།དགེ་སློང་དག་།སྔོན་བྱུང་བ་ཆོམ་
Tha147a
༄#། །རྐུན་ལྔ་བརྒྱ་ཞིག་གིས་ལམ་དུ་འགྲོ་བ་དག་བཅོམ་ནས། འཕྲོག་པའི་རྫས་དག་ཁྱེར་ཏེ། རི་བྲག་ཅིག་ཏུ་འཇོམས་སུ་སོང་ངོ ། །དེ་དག་གིས་རི་བྲག་ན་གནས་པའི་སྐྱེ་བོའི་ཚོགས་དེ་ཐམས་ཅད་བཅོམ་ནས་འཕྲོག་གོ་།ཁྱིམ་བདག་གཉིས་ཤིག་།ཡང་ཐོག་ཏུ་འཛེག་སྟེ་འདུག་པ་དང ། རྐུན་པོ་རྣམས་ཀྱིས་སྨྲས་པ། ཤེས་ལྡན་དག་།གང་དག་འདིར་འཛེག་པ་དེ་དག་བོབས་ཤིག་།ཐམས་ཅད་ཀྱི་ཐམས་ཅད་དུ་མེད་པར་གྱུར་ཏ་རེ། དེ་གཉིས་ཀྱིས་སྨྲས་པ། ཇི་སྲིད་འཚོ་བ་དེ་སྲིད་དུ་མི་འབབ་བོ། །དེ་རྣམས་ཀྱིས་རྩཝ་དང ། ཤིང་ཕལ་མོ་ཆེ་བཅེར་ནས་ཡང་ཏོག་དེ་མེ་བཏང་བ་དང ། དེ་གཉིས་ཚ་བས་སྡུག་བསྔལ་བསྐྱེད་པས་གདུངས་ཏེ་འདི་ལྟ་བུའི་སེམས་བསྐྱེད་དོ། །བདག་ཅག་ཉེས་པ་ཡང་མེད། གནོད་པ་བྱས་པ་ཡང་མེད་པར་འདི་རྣམས་ཀྱིས་བསད་པས། བདག་ཅག་ཀྱང་འདི་རྣམས་ཉེས་པ་ཡང་མེད། གནོད་པ་བྱས་པ་ཡང་མེད་པར་གསོད་པར་གྱུར་ཅིག་།དགེ་སློང་དག་།ཇི་སྙམ་དུ་སེམས། ཁྱིམ་བདག་གཉིས་པོ་གང་དག་ཡིན་པ་དེ་དག་ནི། འཕགས་སྐྱེས་པོ་དང ། མ་ལ་གནོད་འདི་དག་ཁོ་ན་ཡིན་ནོ། །གཡོན་ཅན་ལྔ་བརྒྱ་པོ་གང་དག་ཡིན་པ་དེ་དག་ནི། ཤཱཀྱ་ལྔ་བརྒྱ་པོ་འདི་དག་ཁོ་ན་ཡིན་ཏེ། གང་འདི་རྣམས་ཆོམ་རྐུན་པར་གྱུར་པས་དེ་དག་ཉེས་པ་ཡང་མེད། གནོད་པ་བྱས་པ་ཡང་མེད་པར་སྲོག་དང་ཕྲལ་བའི་ལས་དེའི་རྣམ་པར་སྨིན་པས། ད་ལྟར་འཕགས་སྐྱེས་པོས་མ་ལ་
Tha147b
གནོད་དང་བསྡོངས་ནས་ཤཱཀྱ་ལྔ་བརྒྱ་པོ་དག་ཉེས་པ་ཡང་མེད། གནོད་པ་བྱས་པ་ཡང་མེད་པར་སྲོག་དང་ཕྲལ་ལོ། །དགེ་སློང་དག་།དེ་ལྟ་བས་ན། ལས་གཅིག་ཏུ་ནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་ནག་ལ། གཅིག་ཏུ་དཀར་བ་རྣམས་ཀྱི་ཡང་གཅིག་ཏུ་དཀར། འདྲེན་མ་རྣམས་ཀྱི་ཡང་འདྲེན་མ་ཡིན་ནོ། །དགེ་སློང་དག་།དེ་ལྟ་བས་ན། ལས་གཅིག་ཏུ་ནག་པ་དང ། འདྲེན་མ་རྣམས་སྤངས་ནས་ལས་གཅིག་ཏུ་དཀར་བ་དག་ལ་བརྩལ་བར་བྱ་སྟེ། དགེ་སློང་རྣམས་ཀྱིས་དེ་ལྟ་བུར་བསླབ་པར་བྱའོ། །འཕགས་སྐྱེས་བོས་ཤཱཀྱ་རྣམས་དེ་ལྟར་བསད་ནས་མཉན་ཡོད་དུ་སོང་ངོ ། །དེ་ནང་དུ་ཞུགས་པ་དང ། རྒྱལ་པོའི་གཞོན་ནུ་རྒྱལ་བུ་རྒྱལ་བྱེད་སྟེང་གི་ཁང་བཟང་དུ་སོང་ནས་སྐྱེས་པ་མེད་པར་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ། འཕགས་སྐྱེས་པོས་ཐོས་ནས། དེས་སྨྲས་པ། ཤེས་ལྡན་དག་།རྩེ་བའོ་ནི་སུ་ཞིག་།བློན་པོ་རྣམས་ཀྱིས་སྨྲས་པ། གཞོན་ནུ་རྒྱལ་བུ་རྒྱལ་བྱེད་ལགས་སོ། །དེས་སྨྲས་པ། ཤེས་ལྡན་དག་།དེ་བོས་ཤིག་།དེ་རྣམས་ཀྱིས་དེ་བོས་པ་དང ། འཕགས་སྐྱེས་པོས་སྨྲས་པ། རྒྱལ་བུ་རྒྱལ་བྱེད། ང་ནི། དག་བསད་ནས་འོངས་ན། ཁྱོད་རྩེ་ཞིང་འདུག་གམ། དེས་སྨྲས་པ། ལྷའི་དགྲ་སུ་དག་ཅིག་ལགས། ཤཱཀྱ་རྣམས་སོ། །གལ་ཏེ་ཤཱཀྱ་རྣམས་ཁྱོད་ཀྱི་དགྲ་ལགས་ན། མཛའ་བོ་ཇི་ལྟ་བུ་དག་ཅི་ལགས། དེས་སྨྲས་པ། ཤེས་ལྡན་དག་།འདི་ཡང་དེ་དག་གི་
Tha148a
༄#། །ཕྱོགས་ཁོ་ན་ཡིན་པས། འདི་གསད་པར་བྱའོ། །ཞེས་དེ་དག་གིས་དེ་བསད་དེ་དུས་ལས་འདས་ནས་ལྷ་གྱ་ནོམ་པ་སུམ་ཅུ་རྩ་གསུམ་པ་རྣམས་ཀྱི་ནང་དུ་སྐྱེས་ནས་དེའི་མིའི་རོལ་མོའི་སྒྲ་མ་ཞི་བར་ལྷའི་སྒྲ་བྱུང་ངོ ། །དེ་ནས་བཅོམ་ལྡན་འདས་ཀྱིས་བྱུང་བ་དེ་ལ་ཚིགས་སུ་བཅད་པ་དག་བཀའ་སྩལ་པ། བསོད་ནམས་བྱས་པ་འདིར་དགའ་ཕྱི་མར་དགའ། །གཉི་གར་དགའ་སྟེ་དེ་ནི་བདག་ཉིད་ཀྱི། །ལས་རྣམས་སྨིན་མཐོང་དེ་དགའ་རབ་ཏུ་དགའ། །འགྲོ་བ་བཟང་པོར་སོང་བ་ཕྱིར་ཞིང་དགའ། །བསོད་ནམས་བྱས་པ་འདིར་མགུ་ཕྱི་མར་མགུ་།གཉི་གར་མགུ་སྟེ་དེ་ནི་བདག་ཉིད་ཀྱི། །ལས་རྣམས་སྨིན་མཐོང་དེ་མགུ་རབ་ཏུ་མགུ་།འགྲོ་བ་བཟང་པོར་སོང་བ་ཕྱིར་ཞིང་མགུ་།དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ། ཚིགས་སུ་བཅད་པ་འདིའི་དོན་མ་འཇལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། གཞོན་ནུ་རྒྱལ་བུ་རྒྱལ་བྱེད་དེ། ཉེས་པ་མེད་ཅིང་གནོད་པ་མེད་པར་སྐྱེས་བུ་གཏི་མུག་འཕགས་སྐྱེས་པོས་སྲོག་དང་བྲལ་ཏེ། དེའི་མིའི་རོལ་མོའི་སྒྲ་མ་ཞི་བར་ལྷའི་སྒྲ་བྱུང་ངོ ། །ངས་དེ་ལས་དགོངས་ནས་འདི་སྐད་དུ། བསོད་ནམས་བྱས་པ་འདིར་དགའ་ཕྱི་མར་དགའ། །ཞེས་བྱ་བ་ནས། འགྲོ་བ་བཟང་པོར་སོང་བ་ཕྱིར་ཞིང་མགུ་།ཞེས་བྱ་བའི་བར་དུ་གསུངས་སོ། །ཞེས་གསུངས་
Tha148b
པ་དང ། དེ་ཅང་མི་སྨྲ་བར་འདུག་གོ་།ཇི་ཙམ་དུས་གཞན་ཞིག་ན་འཕགས་སྐྱེས་པོ་བཙུན་མོའི་འཁོར་གྱི་ནང་དུ་ངོམ་ཞིང་རྣམ་པར་ངོམ་སྟེ། ང་རྒྱལ་ཅན། མཐུ་དང་ལྡན་པ། དཔའ་བོ། བརྩོན་འགྲུས་དང ། ཕ་རོལ་གནོན་པ་ཅན་གང་དག་ཡིན་པ་དེ་དག་ངས་རྨེག་མེད་པར་བྱས་ཏེ། ང་དང་འདྲ་བ་སུ་ཞིག་ཡོད་ཅེས་ཟེར་རོ། །དེ་ནས་འཕགས་སྐྱེས་པོས་ཤཱཀྱའི་བུ་མོ་ལྔ་བརྒྱ་ཁྲིད་པ་དེ་དག་གིས་ཀྱང་ཚིགས་སུ་བཅད་དེ་སྨྲས་སོ། །ཁྱོད་ཀྱིས་གང་དག་རྨེད་མེད་བྱས། །དེ་དག་རྒྱལ་སྲས་ཤཱཀྱའི་སྲས། །བསླབ་པའི་སྡོམ་པས་བསྡམས་པ་ཡིན། །ཁྱོད་ཀྱིས་འདིར་སྨྲས་ཅི་ཞིག་རུང ། །དེ་སྐད་ཅེས་སྨྲས་པ་དང ། ཁྲོས་ནས་བློན་པོ་རྣམས་ལ་ཚིགས་སུ་བཅད་པས་བསྒོ་བ། ཀླུ་རྣམས་བསད་ན་ཀླུ་ཡི་བུ་མོ་དག་།དུག་གིས་གང་བ་སྤྲིན་གྱིས་ཁེབས་པ་ལྟར། །འདི་དག་ལ་གོར་རྐང་ལག་རྣམས་ཆོད་ལ། །ཉེ་དུ་དེ་དག་ཉིད་རྗེས་མྱུར་དུ་ཐོང ། །བློན་པོ་རྣམས་ཀྱིས་ཤཱཀྱའི་བུ་མོ་ལྔ་བརྒྱ་པོ་དེ་དག་དམར་བུ་ཅན་གྱི་རྫིང་འགྲམ་དུ་ལག་པ་དང ། རྐང་པ་དག་བཅད་དེ། དེ་ལག་པའི་དོང ། ལག་པའི་དོང་ཞེས་བྱ་བར་མིང་ཆགས་ནས་གནས་བརྟན་རྣམས་ཀྱིས་ཀྱང་དེ་བཞིན་དུ་མདོ་སྡེའི་མགོ་ལ་བཅོམ་ལྡན་འདས་མཉན་ཡོད་ན། ལག་པའི་དོང་གི་རྫིང་འགྲམ་ན་བཞུགས་སོ། །ཞེས་བྲིས་སོ།། །།འདུལ་བ་ཕྲན་ཚེགས་ཀྱི་གཞི། བམ་པོ་དགུ་པ། དེ་རྣམས་སྡུག་བསྔལ་མི་བཟད་པ། རྩུབ། ཚ་བ། ཡིད་དུ་མི་འོང་བའི་ཚོར་
Tha149a
༄#། །བ་ཉམས་སུ་མྱོང་བ་ན་བསམ་པ། བདག་ཅག་མི་བཟད་པ། དོག་པ། ཉམ་ང་བར་གྱུར་ན། བཅོམ་ལྡན་འདས་ཀྱིས་མ་དགོངས་པ་ལྟ་སྙམ་མོ། །སྐབས་དེ་ལྟ་བུ་ལ། སངས་རྒྱས་བཅོམ་ལྡན་འདས་རྣམས་ལ་མི་མཁྱེན་པའམ། མི་གཟིགས་པའམ། ཐུགས་སུ་མ་ཆུད་པའམ། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་སྟེ། དེ་ནས་བཅོམ་ལྡན་འདས་ཐུགས་རྗེ་ཆེན་པོས་བསྐུལ་ནས་ཕྱོགས་དེར་གཤེགས་པ་དང ། ཇི་ཙམ་ན་བུད་མེད་དེ་དག་ཐམས་ཅད་སྒྲེན་མོར་འདུག་པ་གཟིགས་སོ། །གཟིགས་ནས་ཀྱང་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་འཇིག་རྟེན་པའི་ཐུགས་བསྐྱེད་པ་དེའི་ཚེ་སྲོག་ཆགས་གྲོག་སྦུར་རྣམས་ཀྱིས་ཀྱང་བཅོམ་ལྡན་འདས་ཀྱི་ཐུགས་སེམས་ཀྱིས་ཤེས་སོ། །གང་གི་ཚེ་འཇིག་རྟེན་ལས་འདས་པའི་ཐུགས་བསྐྱེད་པ་དེའི་ཚེ་ནི། ཉན་ཐོས་དང ། རང་སངས་རྒྱས་རྣམས་ཀྱིས་ཀྱང་བཅོམ་ལྡན་འདས་ཀྱི་ཐུགས་སེམས་ཀྱིས་མི་ཤེས་ན། དུད་འགྲོའི་སྐྱེ་གནས་སུ་སོང་བའི་སྲོག་ཆགས་རྣམས་ཀྱིས་ལྟ་སྨོས་ཀྱང་ཅི་དགོས། བཅོམ་ལྡན་འདས་ཀྱིས་དགོངས་པ། ཀྱེ་མ། ལྷའི་བུ་མོ་བདེ་སོགས་ཀྱིས་གོས་དག་དང ། ཆུ་ཁྱེར་ཏེ་འོངས་ཀྱང་བླ་ན་སྙམ་དུ་བཅོམ་ལྡན་འདས་ཀྱིས་ཐུགས་བསྐྱེད་མ་ཐག་ཏུ་ལྷའི་བུ་མོ་བདེ་སོགས་ཀྱིས་རས་ཟུང་ལྔ་བརྒྱ་དང ། མཚོ་ཆེན་
Tha149b
པོ་མ་དྲོས་པ་ནས་ཆུ་བླངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཙུན་པ། རས་ཡུག་ལྔ་བརྒྱ་འདི་དག་དང ། ཆབ་འཚལ་ཏེ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། སོང་ལ་ཤཱཀྱའི་བུ་མོ་འོ་ནི་རྣམས་དབུགས་ཕྱུང་སྟེ། དབུགས་ཕྱུང་ནས་རྐང་པ་དང ། ལག་པ་དག་ཁྲུས་ལ་གོས་རྣམས་སྐོན་ཅིག་།བཙུན་པ། དེ་ལྟར་འཚལ་ལོ། །ཞེས་སྨྲས་ནས་དེས་དེ་རྣམས་ཀྱི་རྐང་པ་དང ། ལག་པ་དག་བཀྲུས་ནས་གོས་རྣམས་བསྐོན་ནོ། །དེ་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔར་འཁོད་དོ། །དེ་ནས་བཅོམ་ལྡན་འདས་ཀྱི་རྫུ་འཕྲུལ་གྱིས་ཤཱཀྱའི་བུ་མོ་ལྔ་བརྒྱ་པོ་དེ་རྣམས་ཀྱི་སྡུག་བསྔལ་རྒྱུན་བཅད་དོ། །རྒྱུན་བཅད་ནས་བཀའ་སྩལ་པ། སྲིང་མོ་དག་།ཁྱེད་ཉིད་ཀྱིས་ལས་འདི་དག་བྱས་ཤིང་བསགས་པ། ཚོགས་རྙེད་པ། རྐྱེན་ཡོངས་སུ་བསྒྱུར་བ། དཔའ་རྒལ་བཞིན་ཉེ་བར་གནས་པ། གདོན་མི་ཟ་བར་འབྱུང་བ་ཡིན་ཏེ། ཁྱེད་ཀྱིས་ལས་བྱས་ཤིང་བསགས་པ་རྣམས་གཞན་སུ་ཞིག་གིས་མྱོང་བར་འགྱུར། སྲིང་མོ་དག་།ལས་ལ་གཞོལ་བར་གྱིས་ཤིག་།ཅེས་གསུངས་ནས་བཅོམ་ལྡན་འདས་གཤེགས་སོ། །དེ་དག་ཀྱང་བཅོམ་ལྡན་འདས་ལ་སེམས་རབ་ཏུ་དང་བར་བྱས་ནས་དུས་ལས་འདས་ཏེ་རྒྱལ་ཆེན་བཞིའི་ལྷ་རྣམས་ཀྱི་ནང་དུ་སྐྱེས་སོ། །ཆོས་ཉིད་ཀྱིས་ལྷའི་
Tha150a
༄#། །བུའམ། ལྷའི་བུ་མོ་སྐྱེས་ནས་རིང་པོ་མ་ལོན་པ་ལ་སེམས་གསུམ་སྐྱེ་སྟེ། གང་ནས་ཤི་འཕོས་པ་དང ། གང་དུ་སྐྱེས་པ་དང ། ལས་གང་གིས་ཡིན་པའོ། །དེ་རྣམས་ཀྱིས་མི་རྣམས་ཀྱི་ནང་ནས་ཤི་འཕོས་པ་དང ། རྒྱལ་ཆེན་བཞི་པའི་ལྷ་རྣམས་ཀྱི་ནང་དུ་སྐྱེས་པ་དང ། ལས་གང་གིས་ཤེ་ན། བཅོམ་ལྡན་འདས་ལ་སེམས་རབ་ཏུ་དང་བར་བྱས་པས་ཡིན་པར་མཐོང་ངོ ། །དེ་ནས་སྔོན་ཤཱཀྱའི་བུ་མོ་བྱེད་བྱེད་པའི་ལྷ་ལྔ་བརྒྱ་པོ་དེ་རྣམས་འདི་སྙམ་དུ་སེམས་ཏེ། བདག་ཅག་ཞག་ཏུ་འདུག་ནས་བཅོམ་ལྡན་འདས་བལྟ་བའི་ཕྱིར་འདོང་བ་ནི། ཆ་མ་ཡིན་གྱི། མ་ལ་བདག་ཅག་ཞག་མ་ལོན་པ་ཉིད་དུ་བཅོམ་ལྡན་འདས་བལྟ་བའི་ཕྱིར་འདོང་ངོ ། །སྙམ་མོ། །དེ་ནས་སྔོན་ཤཱཀྱའི་བུ་མོ་བྱེད་བྱེད་པའི་ལྷ་རྣམས་རྣ་ཆ་གདུབ་ཀོར་དྲི་མ་མེད་པ།་གཡོ་བ་ཐོགས་ཤིང ། ལུས་དོ་ཤལ་དང་སེ་མོ་དོས་བརྒྱན་ནས་དེ་ཉིད་ཀྱི་མཚན་མོ་ལྷ་རྫས་ཀྱི་མེ་ཏོག་ཨུཏྤ་ལ་དང ། པདྨ་དང ། ཀུ་མུ་ད་དང ། པདྨ་དཀར་པོ་དང ། མན་དཱ་ར་བ་རྣམས་ཀྱིས་ཐུ་བ་བཀང་ནས་རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་སྣང་བ་རྒྱ་ཆེན་པོས་སྣང་བར་བྱས་ཏེ་བཅོམ་ལྡན་འདས་ལ་མེ་ཏོག་རྣམས་ཀྱིས་གཏོར་ནས་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ་།བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང ། བག་ལ་ཉལ་བ་དང ། ཁམས་དང ། རང་བཞིན་མཁྱེན་ནས་འཕགས་པའི་བདེན་པ་བཞི་རྟོགས་
Tha150b
པར་འགྱུར་བ་དེ་ལྟ་བུའི་ཆོས་བསྟན་པ་མཛད་པ་དང ། དེ་རྣམས་ཀྱིས་དེ་ཐོས་ནས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ། ཡེ་ཤེས་ཀྱིས་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །དེ་རྣམས་ཀྱིས་བདེན་པ་མཐོང་ནས་ཆེད་དུ་བརྗོད་པ་ལན་གསུམ་བརྗོད་པ། བཅོམ་ལྡན་འདས་ཀྱིས་གང་བདག་ཅག་ལ་སྨན་བཏགས་པ་འདི་ལྟ་བུ་ནི། བདག་ཅག་ལ་མས་མ་བགྱིས་།ཕས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། རང་གི་སྐྱེ་བོ་དང་གཉེན་སྡུག་པའི་ཚོགས་ཀྱིས་མ་ལགས། སྔོན་གྱི་མེས་པོ་རྣམས་ཀྱིས་མ་ལགས། དགེ་སྦྱོང་དང ། བྲམ་ཟེ་རྣམས་ཀྱིས་མ་ལགས་ཏེ། ཁྲག་དང་མཆི་མའི་རྒྱ་མཚོ་ནི། བསྐམས། རུས་པའི་རི་ལས་ནི། བསྒྲལ། ངན་སོང་གི་སྒོ་རྣམས་ནི། བཅད། མཐོ་རིས་དང ། ཐར་པའི་སྒོ་རྣམས་ནི།་ཕྱེ། ལྷ་དང ། མི་རྣམས་ལ་ནི། བཀོད་དོ། །ཡང་སྨྲས་པ། ཁྱོད་ཀྱི་མཐུ་ཡིས་ངན་སོང་ལམ་དག་ནི། །ཤིན་ཏུ་མི་བཟད་ཉེས་མང་ལྡན་པ་བཅད། །མཐོ་རིས་སྒོ་ཕྱེ་བདག་གི་བསོད་ནམས་ནི། ཤིན་ཏུ་བཟང་དང་མྱ་ངན་འདས་ལམ་ཐོབ། །ཁྱོད་བརྟེན་དེ་རིང་བདག་གི་སྐྱོན་བྲལ་ཞིང ། །ཤིན་ཏུ་རྣམ་པར་དག་མིག་དག་པ་ཐོབ། །འཕགས་པ་དགྱེས་པའི་གོ་འཕང་ཞི་བའང་ཐོབ། །སྡུག་བསྔལ་རྒྱ་མཚོའི་ཕ་རོལ་མཆོག་ཏུ་བརྒལ། །འགྲོ་བ་ལྷ་མིན་ལྷ་དང་མིས་མཆོད་ཅིང ། །སྐྱེ་རྒ་འཆི་བའི་སྐྱོན་དང་བྲལ་བ་པོ། །སྲིད་པ་སྟོང་དུ་མཐོང་རབ་རྙེད་དཀའ་བ། །ཐུབ་པ་ཁྱོད་དེང་མཐོང་བ་འབྲས་བུ་
Tha151a
༄#། །མཆིས། །དེ་ནས་སེ་མོ་དོ་འཕྱང་དགའ་སྐྱེས་རྣམས། །ཞབས་གཉིས་ལ་ནི་འདུད་པ་བྱས་ནས་ཀྱང ། །དགྲ་ཐུལ་པ་ལ་ཡོངས་སུ་བསྐོར་བྱས་ནས། །སླར་ཡང་ལྷ་ཡི་འཇིག་རྟེན་མངོན་ཕྱོགས་དོང ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པར་མཛད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། ཤཱཀྱའི་བུ་མོ་ལྔ་བརྒྱ་པོ་དག་གིས་ལས་ཅི་ཞིག་བགྱིས་ན། དེས་ལག་པ་དང ། རྐང་པ་དག་བཀུམ། ལས་ཅི་ཞིག་བགྱིས་ན། དེས་ལྷ་རྣམས་ཀྱི་ནང་དུ་སྐྱེས། ལས་ཅི་ཞིག་བགྱིས་ན། དེས་བཅོམ་ལྡན་འདས་ཀྱི་སྤྱན་སྔར་བདེན་པ་མཐོང་བར་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།འདི་དག་ཉིད་ཀྱིས་ལས་བྱས་ཤིང་བསགས་པ། ཚོགས་རྙེད་པ་ཞེས་བྱ་བ་ནས། ལུས་ཅན་རྣམས་ལ་འབྲས་བུར་སྨིན། །ཅེས་བྱ་བའི་བར་སྔ་མ་བཞིན་ནོ། །དགེ་སློང་དག། སྔོན་བྱུང་བ་བསྐལ་པ་བཟང་པོ་ཉིད་ལ་སྐྱེ་རྒུའི་ཚེ་ལོ་ཉི་ཁྲི་ཐུབ་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བ་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སྟོན་པ་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེའི་གསུང་རབ་ལ་འདི་རྣམས་རབ་ཏུ་བྱུང་
Tha151b
བར་གྱུར་ཏོ། །དེ་ན་འདི་རྣམས་ཀྱིས་སློབ་པ་དང ། མི་སློབ་པའི་དགེ་སློང་རྣམས་ལ་ལག་རྡུམ། རྐང་རྡུམ་ཞེས་བྱ་བའི་ཚིག་ཀུན་ཏུ་སྤྱོད་པ་ཀུན་ཏུ་སྤྱད་དེ། ལས་དེའི་རྣམ་པར་སྨིན་པས། ལོ་མང་པོར་དམྱལ་བ་རྣམས་ཀྱི་ནང་དུ་སྐྱེས་སོ། །ལས་དེ་ཉིད་ཀྱི་ལྷག་མས་འདི་རྣམས་ཚེ་རབས་ལྔ་བརྒྱར་ལག་པ་དང ། རྐང་པ་དག་བཅད་དེ། ད་ལྟའི་བར་དུ་ཡང་ལག་པ་དང ། རྐང་པ་དག་བཅད་པ་ཡིན་ནོ། །གང་ང་ལ་སེམས་རབ་ཏུ་དང་བར་བྱས་པའི་ལས་དེའི་རྣམ་པར་སྨིན་པས་ནི། ལྷ་རྣམས་ཀྱི་ནང་དུ་སྐྱེས་སོ། །གང་འདི་རྣམས་ཀྱིས་དེ་ན་ལུང་མ་ནོས་པ་དང ། བཀླགས་པ་དང ། ཁ་ཏོན་བྱས་པ་དེས་ངའི་སྤྱན་སྔར་བདེན་པ་མཐོང་བར་བྱས་པ་ཡིན་ནོ། །དགེ་སློང་དག་།དེ་ལྟར་ན། ལས་གཅིག་ཏུ་ནག་པ་རྣམས་ཀྱི་ཞེས་བྱ་བ་ནས་བརྩལ་བར་བྱ་སྟེ་དགེ་སློང་དག་།ཁྱེད་ཀྱིས་དེ་ལྟ་བུ་བསླབ་པར་བྱའོ། །ཞེས་བྱ་བའི་བར་སྔ་མ་བཞིན་ནོ། །དེ་ནས་མི་དེ་འཕགས་སྐྱེས་པོའི་དྲུང་དུ་འོངས་པ་དང ། འཕགས་སྐྱེས་པོས་སྨྲས་པ། ཀྱེ་སྐྱེས་བུ། བཅོམ་ལྡན་འདས་ཅི་གསུང ། དེས་སྨྲས་པ། ལྷ། བཅོམ་ལྡན་འདས་ཀྱི་ཞལ་ནས། འདི་ནས་ཞག་བདུན་ན། ཀོ་ས་ལའི་རིགས་སྦྲུལ་གྱིས་བལྟས་པ་བཞིན་དུ་རབས་ཆད་པར་འགྱུར་རོ། །འཕགས་སྐྱེས་པོ་ཡང་མ་ལ་གནོད་དང་བཅས་ཏེ་མེས་ཚིག་བཞིན་སེམས་ཅན་དམྱལ་བ་ཆེན་པོ་མནར་མེད་པར་ལྟུང་བར་འགྱུར་རོ། །ཞེས་གསུང་ངོ ། །འཕགས་སྐྱེས་པོས་ཐོས་ནས་ལག་པ་འགྲམ་པ་ལ་གཏད་ནས་སེམས་
Tha152a
༄#། །ཁོང་དུ་ཆུད་དེ་འདུག་གོ་།མ་ལ་གནོད་ཀྱིས་སྨྲས་པ། ལྷ། ཁྱོད་ཅིའི་ཕྱིར་ཕྱག་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་བཞུགས། དེས་སྨྲས་པ། མ་ལ་གནོད། འདི་ལྟར་བཅོམ་ལྡན་འདས་འདི་སྐད་ཅེས། ཞག་བདུན་ན། འཕགས་སྐྱེས་པོ་མ་ལ་གནོད་དང་བཅས་ཏེ་མེས་ཚིག་བཞིན་སེམས་ཅན་དམྱལ་བ་ཆེན་པོ་མནར་མེད་པར་ལྟུང་བར་འགྱུར་རོ། །ཞེས་གསུངས་ན། ང་ཇི་ལྟར་སེམས་ཁོང་དུ་ཆུད་ཅིང་མི་འདུག་།དེས་སྨྲས་པ། ལྷ། གང་ཞིག་བྲམ་ཟེ་འོངས་པ་ལ་འཚལ་མ་མི་སྩོལ་པ་དེ་ཡང་ཕུང་པོ་བརྒྱ་སྟོང་དུ་སེམས་ན།་ལྷས་དགེ་སྦྱོང་གོའུ་ཏ་མའི་གཉེན་བཤེས་དེ་སྙེད་ཅིག་བཀུམ་པ་ལྟ་སྨོས་ཀྱང་ཅི་འཚལ། དེ་དེ་སྐད་གསུངས་ཀྱང་རུང ། གཞན་གསུངས་ཀྱང་རུང་སྟེ། འོན་ཀྱང་ལྷ་སྐྱེད་མོས་ཚལ་དུ་ཆབ་ཀྱི་ནང་དུ་ཁང་བཟང་ཀ་བ་གཅིག་པ་ཞིག་བགྱིད་དུ་སྩལ་ཏེ། ལྷ་དེར་གཤེགས་ནས་དགུང་བདུན་དུ་བཞུགས་ལ་དགུང་བདུན་འདས་པ་དང ། སླར་མཉན་ཡོད་དུ་གཤེགས་པར་མཛད་ཅིག་།དེས་སྨྲས་པ། དེ་ལྟར་བྱས་འགྲོའོ། །ཞེས་དེ་བཙུན་མོའི་འཁོར་དང་བཅས་ཏེ་དེར་སོང་ནས་འདུག་གོ་།ཉིན་ཞག་གཅིག་ཐལ་པ་དང ། མ་ལ་གནོད་ཀྱིས་སྨྲས་པ། ལྷ། དགུང་ཞག་བདུན་ལས་གཅིག་ནི། ཐལ་ལགས། ལྷག་མ་དགུང་ཞག་དྲུག་མཆིས་ཏེ། དགུང་ཞག་དྲུག་འདས་ནས་མཉན་ཡོད་དུ་གཤེགས་པར་མཛད་དོ། །ཞེས་བྱ་བ་ནས་ཉིན་ཞག་
Tha152b
གཉིས་དང ། གསུམ་ནས་བདུན་པ་ལ། ལྷ། དེང་ཁོ་ན་ལ་མཉན་ཡོད་དུ་གཤེགས་པར་མཛད་དོ། །ཞེས་བྱ་བའི་བར་དེ་བཞིན་དུ་བྱས་སོ། །དེ་ན་ཡུལ་ངན་ཞིག་ཀྱང་བྱུང་བར་གྱུར་ཏོ། །བུད་མེད་ནི། རྒྱན་ལ་དགའ་བ་ཡིན་པས། བཙུན་མོའི་འཁོར་རྣམས་ཀྱིས་སྨྲས་པ། ཕུ་ནུ་མོ་ཕྱག་།བདག་ཅག་དེང་མཉན་ཡོད་དུ་འདོང་དགོས་པས། རྒྱན་ཐོགས་པར་བྱའོ། །ཞེས་དེ་རྣམས་ཀྱིས་རྒྱན་ཐོགས་པར་བརྩམས་སོ། །དེ་ན་བཙུན་མོའི་འཁོར་ཞིག་གིས་སྔས་ནང་ཚངས་ཅན་གྱི་སྟེང་དུ་ནོར་བུ་མེ་ཤེལ་བཞག་ནས་རྒྱན་ཐོགས་པར་བརྩམས་སོ། །ཇི་ཙམ་ན་ཡུལ་ངན་སངས་པ་དང ། ཉི་མའི་འོད་ཟེར་གྱིས་མེ་ཤེལ་གྱི་ཐོག་ཏུ་བབ་ནས་མེ་བྱུང་བ་དེ། སྔས་ནང་ཚངས་ཅན་ལ་མཆེད་དོ། །དེ་ལས་ཀྱང་ཁང་བཟང་ལ་མཆེད་ནས། བཙུན་མོའི་འཁོར་རྣམས་ནི། བྲོས་སོ། །འཕགས་སྐྱེས་པོ་དང ། མ་ལ་གནོད་ཚིག་བཞིན་འབྲོས་པར་བརྩམས་པ་དང ། ཇི་ཙམ་ན་མི་མ་ཡིན་པ་དག་གིས་སྒོ་རྣམས་བཅད་ནས་འཕགས་སྐྱེས་པོས་ཚིག་བཞིན་དུ་སྨྲས་པ། མ་ལ་གནོད་ཚིག་གོ་།དེས་སྨྲས་པ། ལྷ། ཚོས་སོ། །ཞེས་དེ་དག་དེ་སྐད་དུ་འོ་དོད་འབོད་ཅིང་དམྱལ་བ་ཆེན་པོ་མནར་མེད་པར་སྐྱེས་སོ། །དེ་ནས་བཅོམ་ལྡན་འདས་ཀྱིས་བྱུང་བ་དེ་ལ་ཚིགས་སུ་བཅད་པ་དག་བཀའ་སྩལ་པ། སྡིག་པ་བྱས་པས་འདིར་ཚིག་ཕྱི་མར་ཚིག་།གཉིས་ཀར་ཚིག་སྟེ་དེ་ནི་བདག་ཉིད་ཀྱི། ལས་རྣམས་སྨིན་མཐོང་དེ་ཚིག་རབ་ཏུ་ཚིག་།འགྲོ་བ་ངན་པར་སོང་བ་ཕྱིར་ཞིང་
Tha153a
༄#། །ཚིག་།སྡིག་པ་བྱས་པ་འདིར་སྨྲེ་ཕྱི་མར་སྨྲེ། །གཉིས་ཀར་སྨྲེ་སྟེ་དེ་ནི་བདག་ཉིད་ཀྱི། །ལས་རྣམས་སྨིན་མཐོང་དེ་སྨྲེ་རབ་ཏུ་སྨྲེ། །འགྲོ་བ་ངན་པར་སོང་བ་ཕྱིར་ཞིང་སྨྲེ། །ཞེས་གསུངས་པ་དང ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་གསོལ་ཏོ། །བཙུན་པ། ཚིགས་སུ་བཅད་པ་འདི་བདག་གིས་མ་འཚལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། སྐྱེས་བུ་གཏི་མུག་འཕགས་སྐྱེས་པོ་དེ་མ་ལ་གནོད་དང་བཅས་ཏེ་མེས་ཚིག་བཞིན་དམྱལ་བ་མནར་མེད་པར་སོང་སྟེ། ངས་དེ་ལས་དགོངས་ནས།་སྡིག་པ་བྱས་པ་འདིར་ཚིག་ཕྱི་མར་ཚིག་།ཅེས་བྱ་བ་ནས། འགྲོ་བ་ངན་པར་སོང་བ་ཕྱིར་ཞིང་སྨྲེ། །ཞེས་བྱ་བའི་བར་གསུངས་པ་ཡིན་ནོ། །གང་གི་ཚེ་འཕགས་སྐྱེས་པོས་ཤཱཀྱ་རྣམས་བསད་པ་དེའི་ཚེ་ཤཱཀྱའི་བུ་མོ་རྣམས་ཀྱིས་དེ་རྣམས་ཀྱི་རྒྱན་དག་མཐོང་ནས་ངུ་བར་བརྩམས་ཏེ་དེ་རྣམས་ཀྱིས་བསམ་པ། ཤཱཀྱ་རྣམས་ནི། འཕགས་པ་རྣམས་ལ་མངོན་པར་དད་པ་ཡིན་པས། རྒྱན་འདི་དག། འཕགས་པ་རྣམས་ལ་དབུལ་ལོ། །ཞེས་དེ་རྣམས་ཀྱིས་རྒྱན་དེ་དག་དགེ་སློང་རྣམས་ལ་ཕུལ་ལོ། །དྲུག་སྡེ་རྣམས་ཀྱིས་རྒྱན་དེ་དག་ཐོགས་ནས་སེར་སྐྱའི་གནས་སུ་ཞུགས་པ་དང ། ཤཱཀྱའི་བུ་མོ་རྣམས་ཀྱིས་དེ་དག་མཐོང་ནས། དེ་བཞིན་དུ་ངུ་བར་གྱུར་ཅིང་སྨྲས་པ། འཕགས་པ་དག་།བདག་ཅག་གིས་དེའི་སླད་དུ་འདི་དག་ཕུལ་ན། ཉེས་
Tha153b
དམིགས་དེ་ཉིད་བྱུང་བར་གྱུར་ཏོ། །ཞེས་བྱས་པ་དང ། དེ་དག་ཅང་མི་སྨྲ་བར་འདུག་གོ་།སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ།་ཉེས་དམིགས་གང་ཅུང་ཟད་བྱུང་བ་ནི། དགེ་སློང་རྣམས་རྒྱན་ཐོགས་པ་ལས་གྱུར་གྱི། དེ་ལྟ་བས་ན། དགེ་སློང་གིས་རྒྱན་སྤེལ་མ་དང ། འཕྱང་འཕྲུལ་ཅན་དང ། ཟླ་གམ་ཅན་དང ། གསེར་སྐུད་དང ། རྒྱན་སྣ་ཚོགས་གཞན་ཅི་ཡང་རུང་བ་ཡང་ཐོགས་པར་མི་བྱ་སྟེ། ཐོགས་ན། འགལ་ཚབས་ཅན་དུ་འགྱུར་རོ། །སྡོམ་ནི། བླངས་པ་དང་ནི་བསླབ་པ་དང ། །དུ་བའི་རི་ལུ་སྨན་གཅེའུ་བཅས། །ལྷུང་བཟེད་སྣོད་དང་ཟུངས་དང་ནི། །མར་དཀར་འབྲུ་མར་བྱུག་པའོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རི་བྲག་ཅིག་ཏུ་ཁྱིམ་བདག་ཅིག་གནས་པ་དེས། རིགས་མཉམ་པ་ལས་ཆུང་མ་བླངས་ནས་དེ་དེ་དང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དུས་གཞན་ཞིག་ན་དེ་ཉེ་དུ་རྣམས་ཀྱང་ཟད་པར་གྱུར། ནོར་ཡང་ཟད། ལོངས་སྤྱོད་དག་ཀྱང་ཟད་ནས་དེས་བསམ་པ། ད་ནི། བདག་རྒས་པས་ནོར་བསྒྲུབ་པར་བྱ་ཡང་མི་ནུས། བདག་ལ་ལོངས་སྤྱོད་ཀྱང་མེད། བདག་གི་ཉེ་དུ་རྣམས་ཀྱང་དུས་ལས་འདས་པས། སོང་ལ་རབ་ཏུ་འབྱུང་ངོ ། །སྙམ་དུ་རིག་ནས་དེས་ཆུང་མ་ལ་སྨྲས་པ། བཟང་མོ། ད་ནི། ང་རྒས་པས། ནོར་བསྒྲུབ་པར་བྱ་ཡང་
Tha154a
༄#། །མི་ནུས། ང་ལ་ལོངས་སྤྱོད་དག་ཀྱང་མེད། ངའི་ཉེ་དུ་རྣམས་ཀྱང་དུས་ལས་འདས་པས། ཁྱོད་ལ་དྲིས་ཏེ་སོང་ལ་རབ་ཏུ་འབྱུང་ངོ ། །ཁྱིམ་བདག་དེ་དྲང་པོ་ཞིག་ན། དེ་ནི། གཡོ་ཀུན་ཏུ་སྤྱོད་ཅིང་རྟག་ཏུ་སྐྱེས་པ་གཞན་ལ་ལྟ་བ་ཞིག་པས། དེས་སྨྲས་པ། རྗེའི་སྲས། དེ་བཞིན་དུ་མཛོད་ཅིག་།འོན་ཀྱང་དུས་དུས་སུ་བལྟར་སྤྱོན་ཅིག་།དེས་དེ་བཞིན་བྱའོ། །ཞེས་དམ་བཅས་ནས་རྒྱལ་བུ་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་ཞིག་གི་དྲུང་དུ་ཕྱིན་ནས་སྨྲས་པ། འཕགས་པ། རབ་ཏུ་འབྱུང་བར་འཚལ་ལོ། །དེས་སྨྲས་པ། བཞིན་བཟང ། ཁྱོད་འཇིགས་པ་མེད་པ། སྤོབས་པ་དགེ་སྟེ། ལེགས་སོ། །བཅོམ་ལྡན་འདས་ཀྱིས་ཀྱང་ཕན་ཡོན་ལྔ་ཡང་དག་པར་མཐོང་བའི་མཁས་པས་ནི། རབ་ཏུ་འབྱུང་བར་མོས་པར་བྱ་བ་ཉིད་དུ་འོས་ཏེ། ལྔ་གང་ཞེ་ན། བདག་གིས་རང་གི་དོན་མ་འདྲེས་པ་ཐོབ་པར་འགྱུར་བར་ཡང་དག་པར་མཐོང་བའི་མཁས་པས་རབ་ཏུ་འབྱུང་བར་མོས་པར་བྱ་བར་འོས་པ་ཉིད་དང ། བདག་གང་དག་གི་བྲན་དང ། མངག་གཞུག་པ་དང ། བཀོལ་བ་དང ། རང་དབང་མེད་པ་དང ། དགའ་མགུར་འགྲོར་མེད་པ་ཡིན་པ་དེ་དག་གིས་མཆོད་པར་བྱ་བར་འགྱུར་བ་དང ། བསྟོད་པར་བྱ་བར་འགྱུར་བར་ཡང་དག་པར་མཐོང་བའི་མཁས་པས་རབ་ཏུ་འབྱུང་བར་མོས་པར་བྱ་བར་འོས་པ་ཉིད་དང ། མྱ་ངན་ལས་འདས་པ་གྲུབ་པ་དང ། བདེ་བ་བླ་ན་མེད་པ་
Tha154b
ཐོབ་པར་ཡང་དག་པར་མཐོང་བའི་མཁས་པས་རབ་ཏུ་འབྱུང་བར་མོས་པར་བྱ་བར་འོས་པ་ཉིད་དང ། བདག་མྱ་ངན་ལས་ཅངས་པ་གྲུབ་པ་དང ། བདེ་བ་བླ་ན་མེད་པ་མ་ཐོབ་པ་ལས་ཡོངས་སུ་ཉམས་ཀྱང་ལྷ་རྣམས་ཀྱི་ནང་དུ་སྐྱེ་བར་འགྱུར་བར་ཡང་དག་པར་མཐོང་བའི་མཁས་པས་རབ་ཏུ་འབྱུང་བར་མོས་པར་བྱ་བར་འོས་པ་ཉིད་དང ། སངས་རྒྱས་རྣམས་དང ། སངས་རྒྱས་ཀྱི་ཉན་ཐོས་སྐྱེས་བུ་དམ་པ་ཡང་དག་པར་སོང་བ་མཆོག་རྣམས་ཀྱིས་རྣམ་གྲངས་དུ་མར་རབ་ཏུ་འབྱུང་བ་བསྔགས་པར་ཡང་དག་པར་མཐོང་བའི་མཁས་པས་རབ་ཏུ་འབྱུང་བར་མོས་པར་བྱ་བར་འོས་པ་ཉིད་དོ། །ཞེས་བཀའ་སྩལ་ཏེ། ཁྱོད་ཀྱིས་སེམས་བསྐྱེད་པ་དགེའི། ལེགས་པར་གསུངས་པའི་ཆོས་འདུལ་བ་འདི་ལ་རབ་ཏུ་བྱུང་ཞིག་།ཅེས་དེས་དེ་རབ་ཏུ་ཕྱུང ། བསྙེན་པར་རྫོགས་པར་བྱས་སོ། ། དེ་ནས་ཞག་གཉིས་གསུམ་ཞིག་ཀུན་སྤྱད་པའི་ཆོས་བསླབ་ནས་སྨྲས་པ། བཞིན་བཟང ། རི་དྭགས་ཀྱིས་རི་དྭགས་མི་སོས་ཀྱི། མཉན་ཡོད་རྒྱ་ཆེན་པོར་རང་གི་སྤྱོད་ཡུལ་དུ་ཕའི་ཡུལ་དུ་བསོད་སྙོམས་ལ་རྒྱུ་ཞིང་འཚོ་བར་གྱིས་ཤིག་།དེ་ཕྱི་དེ་ཉིན་སྔ་དྲོ་ཤམ་ཐབས་དང ། ཆོས་གོས་བགོས། ལྷུང་བཟེད་ཐོགས་ཏེ་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་སོ། །དེ་བསོད་སྙོམས་ལ་རྒྱུ་བ་ན་རང་གི་ཆུང་མ་འདྲ་བའི་བུད་མེད་ཅིག་མཐོང་ནས་དེས་བསམ་པ། བདག་གི་སྔོན་གྱི་ཆུང་མ་དེ་ལ་རབ་ཏུ་བྱུང་ནས་བལྟར་འོང་ངོ ། །ཞེས་དམ་བཅས་ཀྱི། དེའི་ཕྱིར་བདག་ད་གཟོད་རབ་
Tha155a
༄#། །ཏུ་བྱུང་བ་ཡིན་པས་དུས་ཅུང་ཟད་ཅིག་བསྡད་ལ། དེ་མི་དགའ་བར་མི་འགྱུར་བར་དེ་བལྟར་འགྲོའོ། །སྙམ་ནས་བསོད་སྙོམས་ལ་རྒྱུས་ཏེ་རྒྱལ་བུ་རྒྱལ་བྱེད་ཀྱི་ཚལ་དུ་སོང་ངོ ། །དེས་དུས་ཅུང་ཞིག་བསྡད་ནས་མཁན་པོ་ལ་སྨྲས་པ། མཁན་པོ། བདག་ལ་སྔོན་གྱི་མཆིས་བྲང་ཞིག་མཆིས་ཏེ། དེ་ལ་བདག་གིས་རབ་ཏུ་བྱུང་ནས་བལྟར་མཆིའོ། ། ཞེས་དམ་བཅས་པས། དེའི་སླད་དུ་གནང་བར་མཛོད་ཅིག་དང ། མཆིའོ། །དེས་སྨྲས་པ། བུ། སོང་ལ་ཁྱོད་ཀྱིས་སེམས་སྲུངས་ཤིག་།དེས་སྨྲས་པ། བསྲུང་བར་བགྱིའོ། །ཞེས་སྨྲས་ནས་ཆས་པ་དང ། རིམ་གྱིས་རི་བྲག་དེར་ཕྱིན་ནོ། །དེས་དེ་རྒྱང་རིང་པོ་ཁོ་ན་ནས་མཐོང་བ་དང ། དེ་དགའ་བ་དང་བཅས་ཤིང་མྱུར་བ་མྱུར་བས་བསུ་ནས་སྨྲས་པ། རྗེའི་སྲས། བྱོན་པ་དེ་ལེགས་སོ།། བྱོན་པ་ལགས་ཏེ། རིང་མོ་ཞིག་ལོན་ནས་མཐོང་ངོ ། །ཞེས་སྨྲས་ནས་རེག་པར་བརྩམས་པ་དང ། དེས་སྨྲས་པ། ཅི་བྱེད། ཆོས་གོས་དག་བླངས་ནས་མཉེལ་བསོར་གཞུག་མོད། དེས་སྨྲས་པ། མ་རེག་ཅིག་།ཅིའི་སླད་དུ། མཁན་པོས་ང་ལ་ཁྱོད་ཀྱིས་སེམས་སྲུངས་ཤིག་།ཅེས་བསྒོའོ། །དེས་སྨྲས་པ། རྗེའི་སྲས། ཁྱོད་སེམས་སྲུང་ལ་རག་མོད། བདག་གིས་བཀག་གམ་ཅི་ཞེས་དེས་དེའི་ཆོས་གོས་དག་བླངས་ནས་སྟན་བཏིང་སྟེ་རྐང་པ་བཀྲུས་ནས་བསྐུས་སོ། །དེ་ནས་ཁྲུས་བྱས་ནས་ཟན་བྱིན་ཏེ། དེ་ཡང་དེ་ཉིད་དུ་ཟན་བཟའ་བར་འདུག་པ་དང ། དེས་སྨྲས་པ།
Tha155b
ཅི་བྱེད། དེས་སྨྲས་པ། རྗེའི་སྲས། ཁྱོད་དང་ལྷན་ཅིག་ཟན་ཟོས་ནས་རིང་མོ་ཞིག་ལོན་ནོ། །དེས་སྨྲས་པ། མཁན་པོས་ང་ལ་ཁྱོད་ཀྱིས་སེམས་སྲུངས་ཤིག་།ཅེས་བསྒོའོ། །དེས་སྨྲས་པ། རྗེའི་སྲས། ཁྱོད་སེམས་སྲུང་ལ་རག་མོད། བདག་གིས་བཀག་གམ་ཅི། བདག་ཁྱོད་དང་ལྷན་ཅིག་ཟན་ཟོས་ནས་རིང་མོ་ཞིག་ལོན་པས། གདོན་མི་ཟ་བར་བཟའོ། །ཞེས་དེས་དེ་དང་ལྷན་ཅིག་ཟན་ཟོས་སོ། །དེ་ནས་མལ་བཤམས་ནས་སྨྲས་པ། རྗེའི་སྲས། གཟིམས་མལ་འདིར་ཤུལ་གྱིས་མཉེལ་བའི་མཉེལ་སོས་ཤིག་།དེས་རྐང་པ་བཀྲུས་ནས་ཉལ་བ་དང ། དེ་ཡང་དེ་ཉིད་དུ་ཉལ་བར་བརྩམས་སོ། །དེས་སྨྲས་པ། ཅི་བྱེད། དེས་སྨྲས་པ། རྗེའི་སྲས། ཁྱོད་དང་ལྷན་ཅིག་ཉལ་ནས་རིང་མོ་ཞིག་ལགས་པས། མ་བཀྱོན་ཅིག་།དེས་སྨྲས་པ། མཁན་པོས་ང་ལ་ཁྱོད་ཀྱིས་སེམས་སྲུངས་ཤིག་ཅེས་བསྒོའོ། །དེས་སྨྲས་པ། རྗེའི་སྲས། ཁྱོད་སེམས་སྲུང་ལ་རག་མོད། བདག་གིས་བཀག་གམ་ཅི། ཁྱོད་དང་བདག་ལྷན་ཅིག་ཉལ་ནས་རིང་མོ་ཞིག་ལགས་པས། གདོན་མི་ཟ་བར་ཉལ་བར་བགྱིའོ། །དེ་མ་བཏུབ་པ་དང ། དེས་བསམ་པ། མགུལ་ནས་འཇུས་ན། བདག་གི་དབང་དུ་འགྱུར་རོ། །སྙམ་ནས་དེས་དེའི་མགུལ་ནས་འཇུས་པ་དང ། བུད་མེད་ནི། རེག་པའི་དུག་ཅན་ཡིན་པས་རེག་པ་ཙམ་གྱིས་ལོག་པར་སྤྱད་དོ། །དུས་རིང་ཞིག་འདུག་ནས་སྨྲས་པ། བཟང་མོ། འགྲོའོ། །དེས་བསམ་པ། འདི་དང་བདག་ལྷན་ཅིག་གསང་བ་བྱས་པ་གང་ཡིན་པ་དེ་
Tha156a
༄#། །དགེ་སློང་རྣམས་ཀྱིས་མི་ཤེས་པས། སྐྱེ་བོ་མང་པོས་ཤེས་པར་བྱའོ། །དེས་ན་དེ་དག་གིས་བསྐྲད་པས་སླར་འོང་བར་འགྱུར་རོ། །སྙམ་དུ་བསམ་ནས་དེས་སྨྲས་པ། རྗེའི་སྲས། དེ་བཞིན་དུ་ཇི་ལྟར་བཞུད། ལམ་རྒྱགས་ཀྱི་ཟོང་ཀཪྴ་པ་ཎ་དག་སྣོམས་ཤིག་།དེས་སྨྲས་པ། བཟང་མོ། དགེ་སློང་རྣམས་དབྱིག་ལ་མི་རེག་ན། ཇི་ལྟར་བླང ། དེས་སྨྲས་པ། རྗེའི་སྲས། བདག་གིས་ཅི་ནས་ཀྱང་མི་རེག་པ་དེ་ལྟར་བགྱིའི། སྣོམས་ཤིག་།ཅེས་དེས་དབྱིག་ཐུམ་པོར་བཅུག་ནས་བཅིངས་ཏེ་འཁར་གསིལ་གྱི་རྩ་བ་ལ་བཏགས་སོ། །དྲེགས་པས་ལྡོངས་པ་དང ། སྲེད་པས་ལྡོངས་པ་རྣམས་ནི། མི་བྱེད་པ་ཅུང་ཟད་ཀྱང་མེད་པས། དེས་དེ་ཁྱེར་ཏེ་སོང་བ་དང ། རིམ་གྱིས་མཉན་ཡོད་དུ་ཕྱིན་ནོ། །དྲུག་སྡེ་རྣམས་ཀྱི་ཀུན་ཏུ་སྤྱོད་པ་ནི། དྲུག་སྡེ་གང་ཡང་རུང་བ་ཞིག་གིས་རྒྱལ་བུ་རྒྱལ་བྱེད་ཀྱི་ཚལ་གྱི་སྒོ་མི་སྟོང་པ་ཡིན་པས། ཚེ་དང་ལྡན་པ་ཉེ་དགའ་བོ་རྒྱལ་བུ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་པ་དེས། དེ་ཐག་རིང་པོ་ནས་མཐོང་ནས་སྐྲ་སྤྲ་བའི་མེ་ཏོག་ལྟ་བུ། སྨིན་མ་རབ་ཏུ་འཕྱང་བ་ཞིག་ནས་དེས་བསམ་པ། འདི་དགེ་སློང་གནས་བརྟན་ཞིག་འོང་གི། །བསུར་འགྲོའོ། །ཞེས་དེ་བསུར་སོང་སྟེ། གནས་བརྟན་།བྱོན་པ་ལེགས་སོ། །བྱོན་པ་ལེགས་སོ། །ཞེས་བྱས་པ་དང ། དེ་སློབ་དཔོན་ཕྱག་འཚལ་ལོ། །ཕྱག་འཚལ་ལོ། །ཞེས་ཟེར་ནས། ཚེ་དང་ལྡན་པ་ཉེ་དགས་
Tha156b
བསམ་པ། ཀྱེ་མ་འདི་ནི། རྒན་ཞུགས་ཤིག་སྟེ། སློབ་དཔོན་ཡང་མི་ཤེས། མཁན་པོ་ཡང་མི་ཤེས་སོ། །རེ་ཞིག་འདི་ག་ལས་འོངས་པ་འདྲིའོ། །སྙམ་དུ་བསམ་ནས་སྨྲས་པ། རྒན་ཞུགས། ཁྱོད་ག་ལས་འོངས། དེས་སྨྲས་པ། སློབ་དཔོན། བདག་སྔོན་གྱི་མཆིས་བྲང་ཞིག་མཆིས་པ་བལྟར་མཆིས་ཏེ། བདག་དེ་ནས་མཆིས་སོ། །རྒན་ཞུགས། ལེགས་ཏེ། ཁྱོད་ནི། བྱས་པ་གཟོ་བ་ཞིག་གོ།་བྱས་པ་གཟོ་བ་ནི། མཁས་པ་རྣམས་ཀྱིས་བསྔགས་ཏེ། བཅོམ་ལྡན་འདས་ཀྱིས་ཀྱང་དགེ་སློང་དག་།དེ་ལྟ་བས་ན། འདི་ལྟར་བསླབ་པར་བྱ་སྟེ། འདི་ལྟར་བྱས་པ་གཟོ་བ་དང ། བྱས་པ་ཚོར་བར་བྱ་ཞིང ། བྱས་པ་ཆུང་ངུ་ཡང་ཆུད་གཟན་པར་མི་བྱ་ན། ཆེན་པོ་ལྟ་སྨོས་ཀྱང་ཅི་དགོས་ཞེས་བཀའ་སྩལ་ཏོ། །སྔོན་གྱི་ཆུང་མ་མཐོང་ངམ། མཐོང་ལགས་སོ། །དེ་ཁམས་བདེའམ། ཁམས་བདེ་ལགས་སོ། །རྒན་ཞུགས། དེ་ནི། གོ་ན། འཁར་གསིལ་གྱི་རྩ་བ་ལ་འཕྱང་བའོ་ནི་ཅི་ཡིན། སློབ་དཔོན། དེས་ཤུལ་རྒྱགས་ཀྱི་ཟོང་དུ་ཀཪྴ་པ་ཎ་དག་ཅིག་སྩལ་བ་ལགས་སོ།། རྒན་ཞུགས། ཁྱོད་ལྟ་བསོད་ནམས་བྱས་པ་ཞིག་སྟེ། སྔོན་གྱི་ཆུང་མ་ཡང་མཐོང་ལ། རྙེད་པ་ཡང་གྲུབ་བོ། །སློབ་དཔོན། ཁྱོད་ཀྱི་བཀའ་དྲིན་ལགས་སོ། །དེས་བསམ་པ། འདི་ལས་གཞན་ཡང་འབྱུང་གི། རེ་ཞིག་འདི་ལ་དྲི་བར་བྱའོ། །སྙམ་ནས་དེས་དེ་ལ་ཚིག་འཇམ་པོ་བརྗོད་པའི་ཚུལ་གྱིས་ཐམས་ཅད་དྲིས་པ་དང ། རྒན་ཞུགས་དེ་དྲང་པོའི་རང་བཞིན་ཅན་ཞིག་པས། དེས་ཇི་ལྟར་
Tha157a
༄#། །གྱུར་པ་བསྙད་དོ། །དེས་སྨྲས་པ། རྒན་ཞུགས། དེ་ཐམས་ཅད་མཁན་པོ་ལ་སྨྲོས་ཤིག་དང ། ཁྱོད་ཀྱི་མཁན་པོ་ཡིད་དགའ་བར་འགྱུར་རོ། །དེ་དེ་ལྟར་བསླུས་པས་ཇི་ལྟར་གྱུར་པ་མཁན་པོ་ལ་བསྙད་པ་དང ། དེས་ཀྱང་དགེ་སློང་རྣམས་ལ་བསྙད། དགེ་སློང་རྣམས་ཀྱིས་ཀྱང་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ།་དགེ་སློང་དག་།སྐྱེས་བུ་གཏི་མུག་འདི་སྦྱོར་བ་ཉམས་ཀྱི། བསམ་པ་ནི། མ་ཉམས་སོ། །འདི་ཕས་ཕམ་པ་བྱུང་སྟེ། དེ་ལྟ་བས་ན། གནང་གི། རབ་ཏུ་བྱུང་མ་ཐག་ཏུ་ཕས་ཕམ་པར་འགྱུར་བའི་ཆོས་བཞི་རྒྱས་པར་ཤོད་ཅིག་དང ། ཉེས་པ་འདིར་མི་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་དགའ་བ་ཅན་ཞེས་བྱ་བ་ཞིག་གནས་པ་དེ། རྟག་ཏུ་དགོན་པ་ནགས་མཐའི་གནས་མལ་དག་ན་བསམ་གཏན་བྱེད་པ་ཞིག་པས། དེའི་མིང་བསམ་གཏན་པ་དགའ་བ་ཅན་ཞེས་བྱ་བར་ཆགས་སོ། །དེ་གང་གི་ཚེ་སྐྱིལ་མོ་ཀྲུང་བཅས་ནས་བསམ་གཏན་བྱེད་པའི་ཚེ་བདུད་ཀྱི་རིས་ཀྱི་ལྷ་དག་གིས་གཙེས་སོ། །དེ་དུས་གཞན་ཞིག་ན་སྐྱིལ་མོ་ཀྲུང་བཅས་ཏེ་འདུག་པ་དང་བདུད་ཀྱི་རིས་ཀྱི་ལྷ་མོ་ཞིག་གིས། དེའི་སྐྱིལ་མོ་ཀྲུང་གི་སྟེང་དུ་འདུག་པ་དང ། བུད་མེད་ནི། རེག་པའི་དུག་ཅན་ཡིན་པས། དེས་དེ་དང་ལྷན་ཅིག་ལོག་
Tha157b
པར་སྤྱད་དོ། །ལོག་པར་སྤྱད་མ་ཐག་ཏུ་ཟུག་རྔུས་ཟུག་པ་བཞིན་དུ་གནོད་ནས། སེམས་བསྐྱེད་པ། བདག་གི་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པས། བདག་སོང་ལ་འབབ་བོ། ། སྙམ་མོ། །ཡང་བསམ་པ། བདག་གིས་བཅབ་པའི་སེམས་གཅིག་གིས་ཀྱང་མ་བཅབས་པས། རེ་ཞིག་བཅོམ་ལྡན་འདས་ཀྱི་སྤྱན་སྔར་སོང་སྟེ། གལ་ཏེ་སྐལ་པ་ཡོད་པ་ཞིག་ཏུ་གྱུར་ན། གནས་སོ། །འོན་ཏེ་མེད་ན་ནི། དགའ་མགུར་སྤྱད་པར་བྱའོ། །སྙམ་དུ་བསམ་ནས། ལག་པ་གཡས་པས་ནི། ཆོས་གོས་རྣམས་ཁྱེར། ལག་པ་གཡོན་པས་ནི། ཡན་ལག་སྐྱེས་བཀབ་ནས། ངོམ་ཟུང་གནག་ཅིང་མཆི་མ་དང་བཅས་བཞིན་བཅོམ་ལྡན་འདས་ག་ལ་བ་དེར་སོང་ངོ ། །དེའི་ཚེ་བཅོམ་ལྡན་འདས་འཁོར་དགེ་སློང་བརྒྱ་སྟོང་དུ་མའི་གུང་ལ་གདན་བཤམས་པ་ལ་བཞུགས་ཏེ་ཆོས་སྟོན་ཏོ། །བཅོམ་ལྡན་འདས་ཀྱིས་ཚེ་དང་ལྡན་པ་དགའ་བ་ཅན་རྒྱང་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་དགོངས་པ། གལ་ཏེ་དགའ་བ་ཅན་ལ་མ་སྨྲས་ན། གང་ན་ཁྲག་དྲོན་པོར་སྐྱུགས་ནས་དུས་བྱེད་པར་འགྱུར་བའི་གནས་དེ་ཡོད་དོ། །སྙམ་དུ་དགོངས་ནས། ཚེ་དང་ལྡན་པ་དགའ་བ་ཅན་ལ་འདི་སྐད་ཅེས་བཀའ་སྩལ་ཏོ། །དགའ་བ་ཅན་འོངས་པ་ལེགས་སོ། ། ཁྱོད་ཅི་སྟེ་ངོམ་ཟུང་གནག་།དེས་གསོལ་པ། བཙུན་པ། བདག་སྔོན་ནི། དགའ་བ་ཅན་ལགས་ཀྱི། ད་ནི། མི་དགའ་བ་ཅན་ལགས་སོ། །དགའ་བ་ཅན། ཅི་སྟེ་དེ་སྐད་ཅེས། ཁྱོད་ཀྱིས་
Tha158a
༄#། །ཅི་ཞིག་བྱས། བཙུན་པ། བདག་གིས་བསླབ་པ་མ་ཕུལ་བར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཏེ། དེ་ནི། བཅབ་པའི་སེམས་གཅིག་གིས་ཀྱང་མ་བཅབ་ལགས་སོ། །དགའ་བ་ཅན། ཁྱོད་ཇི་སྲིད་འཚོའི་བར་དུ་བསླབ་པ་ལ་སློབ་པར་སྤྲོའམ། བཅོམ་ལྡན་འདས། སྤྲོ་ལགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།དགེ་སློང་དགའ་བ་ཅན་གྱིས་སྤྱད་པར་བྱ་བ་མ་ཡིན་པ་སྤྱད་ཀྱང་སེམས་གཅིག་གིས་ཀྱང་མ་བཅབས་པས། འདི་ཕས་ཕམ་པར་མ་གྱུར་གྱི། དགེ་སློང་དགའ་བཅན་དང ། གཞན་ཡང་རུང ། འདི་ལྟ་བུ་གང་ཡིན་པ་ལ་ཇི་སྲིད་འཚོའི་བར་དུ་བསླབ་པའི་སྡོམ་པ་བྱིན་ཅིག་།སྦྱིན་པ་ཡང་འདི་ལྟར་བྱ་སྟེ། གནས་མལ་བཤམས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་བསྒོ་ནས་དགེ་འདུན་ཐམས་ཅད་འདུས་ཏེ་འདུག་པ་དང ། དགེ་སློང་དགའ་བ་ཅན་གྱིས་རྒན་རིམ་ཇི་ལྟ་བ་བཞིན་དུ་འདུད་པ་བྱས་ལ།་རྒན་པའི་མཐར་ཙོག་ཙོག་པོར་འདུག་སྟེ། ཐལ་མོ་སྦྱར་ནས་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་དགའ་བ་ཅན་ཞེས་བགྱི་བས། བསླབ་པ་མ་ཕུལ་བར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཏེ། དེ་ནི། བཅབ་པའི་སེམས་གཅིག་གིས་ཀྱང་མ་བཅབས་ནས། བདག་དགེ་སློང་དགའ་བ་ཅན་དགེ་
Tha158b
འདུན་ལས་ཇི་སྲིད་འཚོའི་བར་དུ་བསླབ་པ་གསོལ་ན། དགེ་འདུན་ཐུགས་བརྩེ་བ་ཅན་བཙུན་པ་རྣམས་ཀྱིས་ཐུགས་བརྩེ་བས་ཉེ་བར་བཟུང་སྟེ། བདག་དགེ་སློང་དགའ་བ་ཅན་ལ་ཇི་སྲིད་འཚོའི་བར་དུ་བསླབ་པ་སྩལ་དུ་གསོལ། དེ་བཞིན་དུ་ལན་གཉིས་ལན་གསུམ་གྱི་བར་དུའོ། །དེའི་འོག་ཏུ་དགེ་སློང་དགའ་བ་ཅན་ཐོས་པའི་ཉེན་ཀོར་ནས་བཀར་ཏེ་མཐོང་བའི་ཉེན་ཀོར་དུ་བཞག་ལ། དགེ་སློང་གཅིག་གིས་གསོལ་བ་བྱས་ནས་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་དགའ་བ་ཅན་འདིས་བསླབ་པ་མ་ཕུལ་བར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཏེ། དེ་ནི། འདིས་བཅབ་པའི་སེམས་གཅིག་གིས་ཀྱང་མ་བཅབས་ནས། དགེ་སློང་དགའ་བ་ཅན་འདི་དགེ་འདུན་ལས་ཇི་སྲིད་འཚོའི་བར་དུ་བསླབ་པ་གསོལ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང ། འདི་ལྟར་དགེ་འདུན་གྱིས་དགེ་སློང་དགའ་བ་ཅན་ལ་ཇི་སྲིད་འཚོའི་བར་དུ་བསླབ་པ་སྩོལ་ཏོ། །འདི་ནི། གསོལ་བའོ། །ལས་ནི། འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་དགའ་བ་ཅན་འདིས་བསླབ་པ་མ་ཕུལ་བར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ཏེ།་དེ་ནི། འདིས་བཅབ་པའི་སེམས་གཅིག་གིས་ཀྱང་མ་བཅབས་ནས། དགེ་སློང་དགའ་བ་ཅན་འདི་དགེ་འདུན་ལས་ཇི་སྲིད་འཚོའི་བར་དུ་བསླབ་པ་གསོལ་ཏེ། དེའི་སླད་དུ་དགེ་འདུན་གྱིས་
Tha159a
༄#། །དགེ་སློང་དགའ་བ་ཅན་ལ་ཇི་སྲིད་འཚོའི་བར་དུ་བསླབ་པ་སྩོལ་ན། དགེ་སློང་དགའ་བ་ཅན་ལ་ཇི་སྲིད་འཚོའི་བར་དུ་བསླབ་པ་སྩལ་པར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུངས་ཤིག་།གང་དག་མི་བཟོད་པ་དེ་དག་ནི། གསུངས་ཤིག་།འདི་ནི། ལས་བརྗོད་པ་དང་པོ་སྟེ། ལས་བརྗོད་པ་གཉིས་པ་དང ། གསུམ་པ་ཡང་དེ་བཞིན་དུ་བྱའོ། །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་དགའ་བ་ཅན་ལ་ཇི་སྲིད་འཚོའི་བར་དུ་བསླབ་པ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ངས་བསླབ་པ་བྱིན་པའི་དགེ་སློང་གི་ཀུན་ཏུ་སྤྱད་པའི་ཆོས་བཅའ་བར་བྱ་སྟེ། བསླབ་པ་བྱིན་པའི་དགེ་སློང་གིས་རང་བཞིན་དུ་གནས་པའི་དགེ་སློང་གི་གུས་པར་སྨྲ་བ་དང ། ཕྱག་འཚལ་བ་དང ། མངོན་དུ་ལྡང་བ་དང ། ཐལ་མོ་སྦྱོར་བ་དང ། འདུད་པའི་ལས་བདག་གིར་མི་བྱ། སྟན་གཅིག་ལ་འདུག་པར་མི་བྱ། གལ་ཏེ་འདུག་ན་ཡང་སྟན་ཆེས་དམའ་བ་ལོངས་ཤིག་།འཆག་ས་གཅིག་ཏུ་བཅག་པར་མི་བྱ། གལ་ཏེ་འཆག་ན་ཡང་གོམ་པ་བསྲིའོ། །ཕྱི་བཞིན་འབྲང་བའི་དགེ་སྦྱོང་རང་བཞིན་དུ་གནས་པའི་དགེ་སློང་དང ། བྲམ་ཟེ་དང་ཁྱིམ་བདག་གི་ཁྱིམ་དག་ཏུ་འགྲོ་བར་མི་བྱ། གལ་ཏེ་འགྲོ་ན། དགེ་སྦྱོང་མདུན་དུ་གཏང་བར་བྱ། སྟེང་གཡོགས་གཅིག་པར་ཉལ་བར་མི་བྱ། རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་
Tha159b
བྱ།་གནས་སྦྱིན་པར་མི་བྱ། དགེ་སློང་གི་ཆེད་དུ་གཞག་པར་མི་བྱ། གསོལ་བའི་ལས་མི་བྱ། གསོལ་བ་དང་གཉིས་མ་ཡིན། གསོལ་བ་དང་བཞི་མི་བྱའོ། །ལས་བྱེད་པར་བསྐོ་བར་མི་བྱ། དགེ་སློང་མའི་སྟོན་པ་མི་བྱ། སྔོན་བསྐོས་པ་ཞིག་ན་ཡང་དེས་དགེ་སློང་མ་ལ་གདམས་པར་མི་བྱ། དགེ་སློང་ལ་ཚུལ་ཁྲིམས་ཉམས་པ་དང ། ལྟ་བ་ཉམས་པ་དང ། སྤྱོད་པ་ཉམས་པ་དང ། འཚོ་བ་ཉམས་པས་གླེང་བར་མི་བྱ། དེས་གདམས་ངག་དགག་པར་མི་བྱ། གསོ་སྦྱོང་མ་ཡིན། དགག་དབྱེ་མ་ཡིན། གསོལ་བའི་ལས་མ་ཡིན། གསོལ་བ་དང་གཉིས་མ་ཡིན། གསོལ་བ་དང་བཞི་མ་ཡིན། ནང་པར་སྔར་ལངས་ཏེ་སྒོ་དབྱེ་བར་བྱ། མར་མེའི་སྣོད་བསལ་བར་བྱ། གཙུག་ལག་ཁང་ཆག་ཆག་གདབ་པར་བྱ། ཕྱག་དར་བྱ། བ་ལང་གི་ལྕི་བ་གསར་པ་བཟང་པོས་བྱུག་པར་བྱ། བཤང་གཅི་ཁང་ཕྱག་དར་བྱ། ས་དང ། ལོ་མ་དག་དང ། ཆུ་གྲང་མོའམ། དྲོན་མོ་དུས་དང་མཐུན་པར་གཞག་པར་བྱ། དེ་ནས་ཝའི་ཁ་ཕྱག་པར་བྱ། དུས་ཤེས་པར་བྱ་སྟེ།་སྟན་བཤམ་པར་བྱ། བདུག་པའི་སྣོད་དང ། བདུག་པ་ཉེ་བར་གཞག་པར་བྱ། གལ་ཏེ་སྟོན་པའི་ཡོན་ཏན་སྒྲོག་པར་ནུས་ན། བདག་ཉིད་ཀྱིས་བྱ། ཅི་སྟེ་མི་ནུས་ན། སྨྲ་བ་པོ་ལ་གསོལ་བར་བྱའོ། །ཟས་ཀྱི་བསྐོས་ལ་བརྟག་པར་བྱ་ཞིང ། ཟས་བསྐོས་ཟིན་ནས་ཁང་སྟེང་དུ་སོང་སྟེ་གཎྜཱི་བརྡུང་བར་བྱ། ཚ་བའི་དུས་སུ་དགེ་སློང་རྣམས་ལ་བསིལ་ཡབ་ཀྱིས་གཡབ་པར་བྱ། དེ་
Tha160a
༄#། །ནས་བསྙེན་པར་རྫོགས་པ་ཐམས་ཅད་ཀྱི་ནི། འོག། བསྙེན་པར་མ་རྫོགས་པ་རྣམས་ཀྱི་ནི། གོང་དུ་སྤྱོད་ལམ་ཞི་བས་དགེ་སློང་གི་འདུ་ཤེས་ཉེ་བར་བཞག་སྟེ་ཟས་བཟའ་བར་བྱ། ཟས་ཀྱི་བྱ་བ་བྱས་ནས་གནས་མལ་ཕུག་ཏུ་བརྟུལ་བར་བྱ། ལྷུང་བཟེད་ཀྱི་གཞི་དོར་བར་བྱ། དུས་ཤེས་པར་བྱས་ནས་དེ་བཞིན་གཤེགས་པའི་དབུ་སྐྲ་དང ། སེན་མོའི་མཆོད་རྟེན་དག་ཕྱག་དར་བྱ་ཞིང ། བ་ལང་གི་ལྕི་བ་གསར་པ་བཟང་པོས་བྱུག་པར་བྱ། འདུ་བའི་དུས་སུ་གནས་མལ་བཤམ་པར་བྱ་ཞིང ། བདུག་པ་དང ། བདུག་པའི་སྣོད་གཞག་པར་བྱ། སྟོན་པའི་ཡོན་ཏན་བསྒྲག་པར་བྱ། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱིས་ཚེས་གཅིག་ལགས་ཏེ། གཙུག་ལག་ཁང་གི་བདག་པོ་དང ། གཙུག་ལག་ཁང་གི་ལྷ་རྣམས་ཀྱི་དོན་དུ་ཚིགས་སུ་བཅད་པ་གསུངས་ཤིག་།ཅེས་ཉི་མ་བརྗོད་པར་བྱ། ཅི་སྟེ་མི་ནུས་ན། དགེ་སློང་ལ་བཅོལ་བར་བྱའོ། །དགེ་སློང་རྣམས་དེའི་གནས་ཁང་སྐོ་བར་མི་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། གནས་ཁང་བསྐོ་བར་བྱའོ། །རྙེད་པ་ཡང་མི་སྟེར་ནས་བཅོམ་ལྡན་འདས་ཀྱིས་བཀའ་སྩལ་པ། རྙེད་པ་སྦྱིན་པར་བྱའོ། །དེ་དགེ་བའི་ཕྱོགས་ལ་བརྩོན་པར་མི་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་བའི་ཕྱོགས་ལ་བརྩོན་པར་བྱའོ། །དེའི་སྤྱད་པ་ནི། འདི་ཡིན་ཏེ། ཇི་སྲིད་ལམ་དུ་མ་ཞུགས་ཀྱི་བར་
Tha160b
དུའོ། །དེ་ལ་ལམ་དུ་ཞུགས་པ་ནི། འདི་ཡིན་ཏེ། ཟག་པ་ཟད་པའོ། །དེས་འབད། བརྩལ། བསྒྲིམས་པས་འཁོར་བའི་འཁོར་ལོ་གཡོ་བ་དང ། མི་གཡོ་བ་ཆ་ལྔ་པ་འདི་ཉིད་རྟོགས་ནས་འདུས་བྱས་ཀྱི་རྣམ་པ་ཐམས་ཅད་ཆོས་ཉིད་ཀྱིས་འཇིག་པ། ལྟུང་བ། འགྱེས་པ། རྣམ་པར་འཇིག་པར་བསྒོམས་ཏེ་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་སུམ་དུ་བྱས་ཏེ། ཁམས་གསུམ་གྱི་འདོད་ཆགས་དང་བྲལ་བ། གསེར་དང་བོང་བར་མཉམ་པ། ནམ་མཁའ་དང་ལག་མཐིལ་དུ་མཚུངས་པ། ཙནྡན་དང་སྟེའུར་འདྲ་བ། མ་རིག་པའི་སྒོ་ངའི་སྦུབས་བཅོམ་པ། རིག་པ་དང ། མངོན་པར་ཤེས་པ་དང ། སོ་སོ་ཡང་དག་པར་རིག་པ་ཐོབ་པ། སྲིད་པའི་རྙེད་པ་ལ་ཆགས་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དུ་བཅས་པའི་ལྷ་རྣམས་ཀྱིས་མཆོད་པ་དང ། རྗེད་པ་དང ། གུས་པར་སྨྲ་བར་བྱ་བའི་དགྲ་བཅོམ་པར་གྱུར་ཏོ། །དགྲ་བཅོམ་པ་ཉིད་ཐོབ་ཀྱང་དེ་བཞིན་དུ་འདུག་ཅིང་ལས་ཀྱང་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དེ་རྒན་རིམ་བཞིན་འདུག་པར་བྱ་ཞིང་ཇི་ལྟར་བཀག་པ་ཡང་རང་བཞིན་དུ་གནས་པའི་དགེ་སློང་རྣམས་ཀྱིས་བྱའོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལནད་ཀ་གནས་པ་ན་བཞུགས་སོ། །ཚེ་དང་ལྡན་པ་པི་ལིནདའི་བུ་རབ་ཏུ་བྱུང་ཚུན་ཆད་དེ་རྟག་ཏུ་ན་ནས་ཚངས་པ་མཚུངས་པར་སྤྱད་པ་རྣམས་ཀྱིས་དེའི་དྲུང་དུ་སོང་སྟེ་དྲིས་པ། གནས་བརྟན། བདེའམ།
Tha161a
༄#། །དེས་སྨྲས་པ། ཚེ་དང་ལྡན་པ་དག་།བདག་ན་སྟེ། མི་བདེའོ། །གནས་བརྟན། ཁྱོད་ཅི་ན། ཚེ་དང་ལྡན་པ་དག་།བདག་གློ་ལུ་ཞིང་ནའོ། །གནས་བརྟན། སྨན་ཅུང་ཟད་མཛོད་ཅིག་།ཚེ་དང་ལྡན་པ་དག་།བདག་གིས་སྔོན་རེང་བུའི་དུ་བ་བསྟེན་ཏོ། །གནས་བརྟན། ད་ཅི་སྟེ་མི་སྟེན། བཅོམ་ལྡན་འདས་ཀྱིས་མ་གནང་ངོ ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི་།དགེ་སློང་ནད་པས་རེང་བུའི་དུ་བ་བརྔུབ་པར་བྱའོ། །བཅོམ་ལྡན་འདས་ཀྱིས་དགེ་སློང་ནད་པས་རེང་བུའི་དུ་བ་བརྔུབ་པར་བྱའོ། །ཞེས་བཀའ་སྩལ་པ་དང ། དགེ་སློང་རྣམས་དེ་བཞིན་དུ་བརྔུབས་པ་དང་མ་ལེགས་ནས་བཅོམ་ལྡན་འདས་ཀྱིས་བཀའ་སྩལ་པ། ཁམ་ཕོར་བུ་ཁ་ཕུག་ལ་ཁམ་ཕོར་ཁ་སྦྱར་ནས་རྔུབས་ཤིག་།འོན་ཀྱང་མ་ལེགས་ནས་བཅོམ་ལྡན་འདས་ཀྱིས་བཀའ་སྩལ་པ། སྦུ་གུ་ཅན་གྱིས་རྔུབས་ཤིག་།དེ་རྣམས་ཀྱིས་སྨྱུག་མའི་སྦུ་གུས་བརྔུབས་པ་དང ། ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། སྨྱུག་མའི་སྦུ་གུས་བརྔུབ་པར་མི་བྱའི། འོན་ཀྱང་ལྕགས་ཀྱི་སྨན་གཅེའུ་བྱའོ། །ཧ་ཅང་ཐུང་བ་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ཧ་ཅང་ཐུང་ངུར་མི་བྱའོ། །ཧ་ཅང་རིང་པོར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ཧ་ཅང་རིང་པོར་མི་བྱའོ། །འོན་
Tha161b
ཀྱང་སོར་བཅུ་གཉིས་ཀྱི་ཚད་དུ་བྱའོ། །དེ་དག་རྣོན་པོར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། རྣོན་པོར་མི་བྱའོ། །རྩུབ་པོར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། རྩུབ་པོར་མི་བྱའོ། །དེ་བབ་བབ་ཏུ་འཇོག་ནས་བཅོམ་ལྡན་འདས་ཀྱིས་བཀའ་སྩལ་པ། བབ་བབ་ཏུ་གཞག་པར་མི་བྱའོ། །འོན་ཀྱང་སྣོད་དུ་བཅུག་སྟེ་གཞག་པར་བྱའོ། །དེ་རྣམས་ཀྱི་སྣོད་དུ་བཅུག་སྟེ་ས་ལ་འཇོག་པ་དང་བཅོམ་ལྡན་འདས་ཀྱིས་བཀའ་སྩལ་པ། སྣོད་ས་ལ་གཞག་པར་མི་བྱའོ། །འོན་ཀྱང་ཟུང་ངའམ། གོས་ཀྱི་གདང་ལ་གདགས་པར་བྱའོ། །དེ་བཙས་ཁྱེར་ནས་བཅོམ་ལྡན་འདས་ཀྱིས་བཀའ་སྩལ་པ། མར་དཀར་རམ། འབྲུ་མར་གྱིས་བཀྲུས་ཏེ་གཞག་པར་བྱའོ། །དགོས་པ་བྱུང་བའི་ཚེ་དེས་བཀྲུས་པ་དང་བཅོམ་ལྡན་འདས་ཀྱིས་བཀའ་སྩལ་པ། བཀྲུ་བར་མི་བྱའི། འོན་ཀྱང་མེར་གཞུག་པར་བྱ་སྟེ། དེ་ཉིད་དེའི་བཀྲུ་བ་ཡིན་ནོ། །སྡོམ་ནི། བསགས་པ་དང་ནི་ཁྲུས་རྩི་དང ། །སྣར་བླུགས་སྤྱད་དང་བཏུང་ཕོར་དང ། །ཁྱོགས་དང་ཆབ་ཁུང་ས་དག་དང ། ། ཆུ་དང་བཀྲུ་བའི་ས་ཡིན་ནོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་ནད་པ་ཞིག་སྨན་པའི་དྲུང་དུ་སོང་ནས་བཞིན་བཟང ། སྨན་སྟོན་ཅིག་།ཅེས་བྱས་པ་དང ། དེས་སྨྲས་པ། འཕགས་པ། བསགས་པའི་ཁྲུས་ཀྱིས་ཁྲུས་མཛོད་ཅིག་དང་སོས་པར་འགྱུར་རོ། །དེས་སྨྲས་པ། བཞིན་
Tha162a
༄#། །བཟང ། བཅོམ་ལྡན་འདས་ཀྱིས་མ་གནང་ངོ ། །ཁྱེད་ཀྱི་སྟོན་པ་ནི། ཐུགས་རྗེ་ཅན་ཡིན་པས་གནང་བར་འགྱུར་རོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྨན་པས་བསྟན་ན། བསགས་པའི་ཁྲུས་ཀྱིས་ཁྲུས་བྱ་སྟེ། ཁྲུས་བྱ་བ་འདི་ལ་འགྱོད་པར་མི་བྱའོ། །བཅོམ་ལྡན་འདས་ཀྱིས་བསགས་པའི་ཁྲུས་ཀྱིས་ཁྲུས་བྱ་ཞེས་བཀའ་སྩལ་པ་དང ། དགེ་སློང་རྣམས་ཀྱིས་བསགས་པའི་ཁྲུས་ཇི་ལྟ་བུ་ཡིན་པ་མ་ཤེས་ནས། དེ་རྣམས་ཡང་སྨན་པའི་དྲུང་དུ་སོང་སྟེ་དེ་རྣམས་ཀྱིས་སྨྲས་པ། བཞིན་བཟང ། བཅོམ་ལྡན་འདས་ཀྱིས་གནང་ན། བསགས་པའི་ཁྲུས་ཇི་ལྟ་བུ་ཡིན་པ་སྟོན་ཅིག་།དེས་སྨྲས་པ། འཕགས་པ། བདག་གིས་ཀྱང་མི་ཤེས་སྟེ།་བདག་གིས་འཁོར་ལོས་བསྒྱུར་བའི་གསོ་བའི་དཔྱད་ལས། བསགས་པའི་ཁྲུས་ཞེས་བྱ་བ་བཏོན་ན། དེ་ལྟ་བུ་ཡིན་པ་ནི། མི་ཤེས་སོ། །འོན་ཀྱང་ཁྱོད་ཀྱི་སྟོན་པ་ཐམས་ཅད་མཁྱེན་པ་ཡིན་པས། དེ་ཉིད་ཀྱིས་མཁྱེན་གྱི། སོང་ལ་དེ་ཉིད་ལ་ཞུས་ཤིག་།སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། རླུང་འབྱིན་པའི་རྩ་བ་དང ། སྡོང་བུ་དང ། མེ་ཏོག་དང ། འབྲས་བུ་གང་དག་ཡིན་པ་དེ་དག་བསྐོལ་ནས་ཁྲུས་བྱའོ། །དགེ་སློང་རྣམས་ཀྱིས་དེ་དག་བསྐོལ་ཏེ་ཁྲུས་བྱས་པ་དང་
Tha162b
དེ་རྣམས་རྩུབ་པར་གྱུར་ཏོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྣུམ་བསྐུ་བར་བྱའོ། །དེ་རྣམས་ཀྱིས་བསྐུས་པ་དང ། ཧ་ཅང་སྣུམ་ཆེས་པས་གནས་མལ་དག་མ་རུང་བར་གྱུར་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཁྲུས་རྩིས་བཀྲུ་བར་བྱའོ། །དེ་རྣམས་དེ་བཞིན་དུ་རྩུབ་བོར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཆུའི་བུམ་པ་ཐ་མའི་ནང་དུ་འབྲུ་མར་ཐིགས་པ་གསུམ་མམ་གཉིས་བླུག་པར་བྱའོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ག་ལནད་ཀ་གནས་པ་ན་བཞུགས་སོ། །ཚེ་དང་ལྡན་པ་པི་ལིན་དའི་བུ་གང་ནས་རབ་ཏུ་བྱུང་བ་དེ་ཚུན་ཆད་རྟག་ཏུ་ན་ནས་ཚངས་པ་མཚུངས་པར་སྤྱོད་པ་རྣམས་དེའི་དྲུང་དུ་སོང་སྟེ། གནས་བརྟན། བདེའམ་ཞེས་དྲིས་པ་དང ། ཚེ་དང་ལྡན་པ་དག་།བདག་ན་སྟེ། མི་བདེའོ། །གནས་བརྟན། ཁྱོད་ཅི་ན། ཚེ་དང་ལྡན་པ་དག་།བདག་ཆམ་པ་བདའོ། །གནས་བརྟན། སྨན་ཅུང་ཟད་མཛོད་ཅིག་།ཚེ་དང་ལྡན་པ་དག་།སྔོན་བདག་གིས་སྣར་བླུགས་པའི་ལས་བྱས་སོ། །གནས་བརྟན། ད་ཅི་སྟེ་མི་བྱེད། བཅོམ་ལྡན་འདས་ཀྱིས་མ་གནང་ངོ ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི་།སྣར་བླུགས་པའི་ལས་བྱའོ། །བཅོམ་ལྡན་འདས་ཀྱིས་སྣར་བླུགས་པའི་ལས་བྱའོ། །ཞེས་བཀའ་
Tha163a
༄#། །སྩལ་བ་དང ། དགེ་སློང་རྣམས་དེ་བཞིན་དུ་སྣར་བླུགས་པ་དང་བོ་ནས་བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་སྣར་བླུག་པར་མི་བྱའོ། ། དགེ་སློང་རྣམས་ཀྱིས་ལོ་མའི་ཕུར་མས་བླུགས་པ་དང་ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ལོ་མའི་ཕུར་མས་བླུག་པར་མི་བྱའོ། །དགེ་སློང་རྣམས་ཀྱིས་ཆོས་གོས་ཀྱི་གྲས་བླུགས་པ་དང ། ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཆོས་གོས་ཀྱི་གྲཝས་བླུག་པར་མི་བྱའོ། འོན་ཀྱང་སྣར་བླུག་པའི་སྤྱད་ཀྱིས་བླུག་པར་བྱའོ། །དགེ་སློང་རྣམས་སྣར་བླུག་པའི་སྤྱད་མཆུ་གཅིག་པ་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། སྣར་བླུག་པའི་སྤྱད་མཆུ་གཉིས་པ་བྱའོ། །དགེ་སློང་རྣམས་མཆུ་རྣོན་པོར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། མཆུ་རྣོན་པོར་མི་བྱའོ། །དགེ་སློང་རྣམས་ལག་པ་མ་བཀྲུས་པར་ལྡུགས་ནས་བཅོམ་ལྡན་འདས་ཀྱིས་བཀའ་སྩལ་པ། ལག་པ་དག་བཀྲུས་ཏེ་བྱིན་ལེན་བྱས་ནས་བླུག་པར་བྱའོ། །སངས་རྒྱས་བཅོམ་ལྡན་འདས་རྒྱལ་ཕོའི་ཁབ་ན་འོད་མའི་ཚལ་བྱ་ཀ་ལནད་ཀ་གནས་པ་ན་བཞུགས་སོ། །ཚེ་དང་ལྡན་པ་པི་ལིན་དའི་བུ་གང་ནས་རབ་ཏུ་བྱུང་བ་དེ་ཚུན་ཆད་རྟག་ཏུ་ན་ནས་ཚངས་པ་མཚུངས་པར་སྤྱོད་པ་རྣམས་དེའི་དྲུང་དུ་སོང་སྟེ་གནས་བརྟན། བདེའམ་ཞེས་དྲིས་པ་དང ། དེས་སྨྲས་པ། བདག་ན་སྟེ། མི་བདེའོ། །
Tha163b
གནས་བརྟན། ཁྱོད་ཅི་ན། ཚེ་དང་ལྡན་པ་དག་།གནང་ངོ ། །གནས་བརྟན། སྨན་ཅུང་ཟད་མཛོད་ཅིག་།ཚེ་དང་ལྡན་པ་དག། བདག་གིས་སྔོན་ཕུལ་བའི་བཏུང་ཕོར་བཅངས་སོ། །གནས་བརྟན། ད་ཅི་སྟེ་མི་བཅང ། བཅོམ་ལྡན་འདས་ཀྱིས་མ་གནང་ངོ ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི་།ཕུལ་པའི་བཏུང་ཕོར་བཅང་བར་བྱའོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལནད་ཀ་གནས་པ་ན་བཞུགས་སོ། །ཆེ་དང་ལྡན་པ་པི་ལིན་དའི་བུའི་གཉེན་དག་འོང་བ་དང ། དེས་འོངས་པ་དེ་དག་ལ་ཆོས་བསྟན་ནས་དེ་རྣམས་ཁྱིམ་དུ་སོང་སྟེ་ཆུང་མ་དག་ལ་སྨྲས་པ། འཕགས་པ་པི་ལན་དའི་བུས་ཆོས་སྙན་ཅིང་སྙན་པ་དག་བཤད་དེ། བདག་ཅག་གིས་དེ་མཉན་ནས་འོངས་སོ། །དེ་དག་གིས་སྨྲས་སོ། །ཁྱོད་ནི། སངས་རྒྱས་བྱུང་བ་འབྲས་བུ་དང་བཅས་པ་ཡིན་ནོ། །ཅིའི་ཕྱིར། དེ་དག་གིས་སྨྲས་པ། ཁྱེད་ཀྱིས་འཕགས་པ་པི་ལིན་དའི་བུ་ལ་ཆོས་སྙན་ཅིང་སྙན་པ་དག་མཉན་པས་སོ། །ཁྱོད་ཀྱང་ཅིའི་ཕྱིར་མི་ཉན། བདག་ཅག་ནི། ངོ་དམན་པ་སྟེ། ངོ་ཚའོ། །འོན་ཀྱང་གལ་ཏེ་འཕགས་པ་འདིར་གཤེགས་ཏེ་བཤད་ན། བདག་ཅག་གིས་ཀྱང་མཉན་ཏོ། །གལ་ཏེ་དེ་ལྟ་ན། འཕགས་པ་ལ་བྱའོ། །དེ་དག་གིས་སྨྲས་པ། ལེགས་སོ། །དེ་རྣམས་ཀྱིས་དེའི་དྲུང་དུ་སོང་ནས་འཕགས་པ། བུད་མེད་དག་ཆོས་ཉན་པར་འཚལ་
Tha164a
༄#། །ལོ། །ཞེས་བྱས་པ་དང ། དེས་སྨྲས་པ། ཤེས་ལྡན་དག་།ཉན་ལ་རག་མོད། ཅི་ཁོ་བོས་བཀག་གམ། དེ་རྣམས་ཀྱིས་སྨྲས་པ། འཕགས་པ། བུད་མེད་ཀྱི་མཆིད་ནས་བདག་ཅག་ངོ་ཚ་སྟེ། གལ་ཏེ་འཕགས་པ་འདིར་གཤེགས་ནས་བཤད་ན། བདག་ཅག་ཀྱང་ཉན་ཏོ། །ཞེས་མཆིའོ། །དེ་སྨྲས་པ། ཞེས་ལྡན་དག་།བདག་ན་བས་སོང་སྟེ་བཤད་མི་ནུས་སོ། །འཕགས་པ། ཁྱོགས་འཚལ་ཏེ་མཆིའི། དེས་གཤེགས་ཤིག་།བཞིན་བཟང ། བཅོམ་ལྡན་འདས་ཀྱིས་མ་གནང་ན། ཇི་ལྟར་འགྲོ། སྐབས་དེ། དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི། བཞོན་པས་འགྲོ་བར་བྱའོ། །བཅོམ་ལྡན་འདས་ཀྱིས་བཞོན་པས་འགྲོ་བར་བྱའོ། །ཞེས་བཀའ་སྩལ་པ་དང ། ཚེ་དང་ལྡན་པ་པི་ལིན་དའི་བུ་ལྷན་ཅིག་གནས་པ་དང ། ཉེ་གནས་དག་གིས་བསྐོར་ཏེ་ཁྱོགས་སུ་ཞུགས་ནས་ཆོས་སྟོན་ཏུ་ཆས་པ་དྲུག་སྡེ་རྣམས་ཀྱིས་མཐོང་ནས་དེ་རྣམས་ཀྱིས་དེའི་ལྷན་ཅིག་གནས་པ་དང ། ཉེ་གནས་དག་ལ་དྲིས་པ། ཤེས་ལྡན་དག་།འགྲོ་བ་འདི་སུ་ཞིག་།དེ་རྣམས་ཀྱིས་སྨྲས་པ། མཁན་པོའོ། །ཅི། བཅོམ་ལྡན་འདས་ཀྱིས་ཁྱོགས་གནང་ངམ། གནང་ངོ ། །བཅོམ་ལྡན་འདས་ཀྱིས་དགོངས་པ་ནི། བཟང་སྟེ། ཤཱཀྱ་སྐྱིད་དེ་བ་འདི་རྣམས་རྐང་གིས་འགྲོ་བར་མི་ནུས་
Tha164b
པས།་རྣམ་པ་ཐམས་ཅད་དུ་བདག་ཅག་ལ་བརྩེ་བར་མཛད་དོ། །དེ་དག་སོང་བ་དང ། དྲུག་སྡེ་རྣམས་ཀྱིས་སྨྲས་པ། དགའ་བོ་ཉེ་དགའ་བོ། བདག་ཅག་ཅི་སྟེ་འཁོད། ཁྱོགས་བྱའོ། །ལེགས་ཏེ།་དེ་བཞིན་བྱའོ། །ཞེས་དེ་རྣམས་ཀྱིས་རྔ་མ་དང ། དྲིལ་བུ་ལ་སོགས་པས་མཛེས་པར་བྱས་པའི་ཁྱོགས་བྱས་སོ། །དེ་ནས་དེ་རྣམས་ཞུགས་ནས་སྲང་གི་ནང་དུ་འཇུག་རྟེན་ལ་བུ་བཞིན་དུ་རློམ་ཞིང་ཆས་པ་དང ། བྲམ་ཟེ་དང ། ཁྱིམ་བདག་རྣམས་ཀྱིས་སྨྲས་པ། ཤེས་ལྡན་དག་།འདི་ཅི་ཞིག་།བཅོམ་ལྡན་འདས་ཀྱིས་བཞོན་པ་གནང་ངོ ། །འཕགས་པ། ཅི། དགེ་སྦྱོང་ཁྱེད་ཀྱང་འདོད་པའི་ཡོན་ཏན་དག་གིས་གནོད་དམ། དེ་དག་ཅང་མི་སྨྲ་བར་འདུག་གོ་།སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མིན་པ་བཞོན་པས་འགྲོ་བར་མི་བྱའོ། །དགེ་སློང་མི་ན་བ་བཞོན་པས་འགྲོ་ན། འགལ་ཚབས་ཅན་དུ་འགྱུར་རོ། །འོན་ཀྱང་བཞོན་པས་འགྲོ་བ་ནི། གཉིས་ཏེ། རྒས་འཁོགས་པ་ཉམ་ཆུང་བ་དང ། ནད་པ་སྦྱོར་མི་བཟོད་པའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་དད་པ་ཅན་ཞིག་འདུག་པ་དེ། བྲམ་ཟེ་མ་དད་པ་ཞིག་དང་ལྷན་ཅིག་རྒྱལ་བུ་རྒྱལ་བྱེད་ཀྱི་ཚལ་དུ་སོང་སྟེ་དད་པ་ཅན་གྱིས་དེ་ལ་ཉེ་བའི་ཚལ་བསྟན་པར་བརྩམས་སོ། །དེ་
Tha165a
༄#། །ཕན་ཚུན་འཁྱམས་འཁྱམས་ཤིང་དྲུང་ན་ངན་སྐྱུགས་ཤིག་མཐོང་ནས་དེས་སྨྲས་པ། གྲོགས་པོ། དགེ་སྦྱོང་ཤཱཀྱའི་བུ་རྣམས་ནི། གཙང་སྤྲ་མེད་པ་སྟེ། མེ་ཏོག་དང ། འབྲས་བུའི་ཤིང་གི་དྲུང་དུ་བཤང་བ་དང ། གཅི་བ་བྱེད་དོ། །དེས་སྨྲས་པ། གྲོགས་པོ། བདག་ཉིད་ཆེན་པོ་དེ་དག་ནི། དེ་ལྟར་མི་བྱེད་ཀྱི། གདོན་མི་ཟ་བར་ཁྱིམ་པ་དགའ་ཞིག་གིས་བྱས་སོ། །དེ་དག་དེ་སྐད་དུ་སྨྲས་པ་ན། རྒན་ཞུགས་ཤིང་མགོ་གོས་ཀྱི་དཀྲིས་ནས་ཤིང་དྲུང་དུ་བཤང་བ་བྱ་བར་བརྩམས་པ་དང ། དེ་བྲམ་ཟེ་མ་དད་པ་དེས་མཐོང་ནས་སྨྲས་པ། གྲོགས་པོ། ཁྱོད་ན་རེ། ཁྱིམ་པས་བྱས་སོ། །ཞེས་མི་ཟེར་རམ། དགེ་སྦྱོང་མགོ་གོས་ཀྱིས་དཀྲིས་ཏེ་ཤིང་དྲུང་ན་བཤང་བ་བྱེད་པ་འོ་ནི་ལ་ལྟོས་ཞེས་བྱས་པ་དང ། དེ་སྐྱེངས་ནས་ཅང་མི་སྨྲ་བར་འདུག་གོ་།དེས་སྐབས་དེ། དགེ་སློང་རྣམས་ལ་བསྙད་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་བྱུང་བ་ནི། དགེ་སློང་རྣམས་ཤིང་དྲུང་དུ་བཤང་བ་བྱེད་པ་ལས་གྱུར་གྱི། དེ་ལྟ་བས་ན། དགེ་སློང་གིས་ཤིང་དྲུང་དུ་བཤང་བ་དང ། གཅི་བ་མི་བྱའོ། །བྱེད་ན། འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་ཤིང་དྲུང་དུ་བཤང་བ་དང ། གཅི་བ་མི་བྱའོ། །ཞེས་བཀའ་སྩལ་པ་དང ། དགེ་སློང་དག་ལམ་དུ་ཞུགས་ཏེ་དོང་བ་དང ། ཇི་ཙམ་ན་འབྲོག་ཅིག་
Tha165b
ཏུ་ཕྱིན་ཏོ། །དེ་ན་དགེ་སློང་ཁ་ཅིག་ནི། བཤང་པ་བྲོའོ། །ཁ་ཅིག་ནི། གཅི་བ་བྲོ་ན། དེ་རྣམས་ཤིང་འདི་དག་འདབ་ཆགས་པའོ། །སྙམ་ནས་བཤང་བ་ཡང་མ་བྱས། གཅི་བ་ཡང་མ་བྱས་བས་དེ་རྣམས་ན་བར་གྱུར་ཏོ། །སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགོན་པའི་ཤིང་འདབ་ཆགས་པ་གང་ཡིན་པ་དེར་ནི། བཤང་བ་དང ། གཅི་བ་བྱ་སྟེ། འདི་ལ་འགྱོད་པར་མི་བྱའོ། །བཅོམ་ལྡན་འདས་ཀྱིས་དགོན་པར་བཤང་བ་དང ། གཅི་བ་དག་བྱའོ། །ཞེས་བཀའ་སྩལ་པ་དང ། གྲོང་མཐའ་པའི་དགེ་སློང་རྣམས་མི་བྱེད་དེ། ཇི་ཙམ་ན་དཔྱིད་ཀྱི་དུས་ལ་བབ་པ་དང་བཤང་བ་དང ། གཅི་བ་བྱེད་ཅིང ། ཉི་མ་ལ་བཤང་བ་དང ། གཅི་བ་བྱེད་པས་རྨྱ་བར་གྱུར་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི་ཤིང་ཚེར་མ་ཅན་གང་དག་ཡིན་པ་དེ་དག་གི་དྲུང་དུ་བཤང་བ་དང ། གཅི་བ་བྱ་སྟེ།་འདི་ལ་འགྱོད་པར་མི་བྱའོ། །གང་གི་ཚེ་ཉེ་དགས་ལ་ཕུག་གི་ར་བ་བཤང་པས་མ་རུང་བར་བྱས་པ་དེའི་ཚེ་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་རྩཝ་སྔོན་པོ་ཡོད་པར་བཤང་པ་དང ། གཅི་བ་མི་བྱའོ། །དགེ་སློང་རྣམས་རྩཝ་སྔོན་པོ་མེད་པའི་ཕྱོགས་སུ་བཤང་བ་དང ། གཅི་བ་བྱས་པས། དེ་མི་གཙང་བས་གང་བར་གྱུར་པ་དང ། བྲམ་ཟེ་དང ། ཁྱིམ་བདག་རྣམས་ཀྱིས་
Tha166a
༄#། །མཐོང་ནས་འཕྱ་བར་བྱེད། སྨོད་པར་བྱེད་དེ། དགེ་སྦྱོང་ཤཱཀྱའི་བུ་འདི་རྣམས་ཀྱི་ཆོས་རེ་བཟང ། ཇི་ལྟར་གཅིག་ཏུ་འདུས་ནས་ཟ་བ་དེ་ཁོ་ན་བཞིན་དུ་བཤང་བ་དང ། གཅི་བ་བྱེད་དོ། །ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། གནང་གི་།བཤད་བའི་ས་བྱའོ། །དགེ་སློང་རྣམས་ཀྱིས་བྱད་དང་ནུབ་ཀྱི་ངོས་སུ་བཤད་བའི་ཁང་པ་བྱ་བར་བརྩམས་པ་དང ། དེ་དག་གིས་ཇི་ལྟ་བུ་བྱ་བ་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཆབ་ཁུངས་ནི། རྣམ་པ་གཉིས་སུ་བྱ་སྟེ། ཁང་བུ་ལྟ་བུ་དང ། བ་གམ་ལྟ་བུའོ། །དེ་ལ་ཁང་བུ་ལྟ་བུ་ནི། གྲུ་བཞིར་བྱས་ལ་དབུས་སུ་གདུང་བྲེས་ནས་ཁུང་བུ་གདོད་ཅིང་ཝ་གཞུག་པར་བྱའོ། །བ་གམ་ལྟ་བུ་ཡང་གདུང་ཕྱིར་ཕྱུང་ལ་བྱ་སྟེ། དེའི་འོག་ཏུ་ཚེར་མ་ཅན་བསྐྱེད་དོ། །ཆབ་ཁུང་སར་ཆབ་ཁུང་སའི་ཁུང་བུའི་སྟེང་དུ་ཆབ་ཁུང་སའི་རྐང་རྟེན་གཞག་པར་བྱ། རིལ་པ་སྤྱི་བླུགས་གཞག་པའི་གནས་བྱ་ཞིང ། སྒོ་སྣོལ་མར་གཏོད་ལ་སྒོ་འཕར་དང་སྒོ་གཏན་དག་ཀྱང་གཞུག་པར་བྱའོ། །གལ་ཏེ་གཅིག་ནང་དུ་ཞུགས་པར་གྱུར་ན། གཅིག་ཤོས་ཀྱིས་སྒྲ་དབྱུང་བར་བྱ་ཞིང ། གལ་ཏེ་སྡོད་ན། ནང་དུ་འཇུག་པར་བྱའོ། །ནང་ན་གནས་པས་ཀྱང་སྒྲ་དབྱུང་བར་བྱའོ། །དྲི་མི་ཞིམ་པར་གྱུར་ན། ཁང་སྐྱོང་གིས་
Tha166b
ཉིན་གཅིག་བཞིན་སྦྱང་བར་བྱ་ཞིང ། ས་དང ། ལོ་མ་དག་ཀྱང་གཞག་པར་བྱ་སྟེ། དེ་ལྟ་བས་ན། ཆབ་ཁུང་འཁོར་དང་བཅས་པ་རྗེས་སུ་གནང་ངོ་།། །།འདུལ་བ་ཕྲན་ཚེགས་ཀྱི་གཞི། བམ་པོ་བཅུ་པ། སྡོམ་ནི། གཅི་བའི་ས་དང་སྣོད་སྤྱད་དང ། །སྟོན་པ་ལ་ནི་དགའ་ཉིད་དང ། །བཟའ་བ་ལྔ་དང་འོ་མ་དང ། །ཞོ་དང་ཟས་དང་གནང་བའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་ཆབ་ཁུང་འཁོར་དང་བཅས་པ་བྱའོ། །ཞེས་བཀའ་སྩལ་པ་དང ། དགེ་སློང་དག་དེ་ཉིད་དུ་གཅི་བར་བྱེད་པ་ན། དགེ་སློང་གཞན་དག་བཤད་བ་བྲོ་བས་མི་བདེ་ཞིང་དེ་དག་བགགས་བས་ན་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གཅི་བའི་གནས་ལོགས་ཤིག་ཏུ་བྱའོ། །དགེ་སློང་དག་ཕྱོགས་གང་དུ་ཇི་ལྟ་བུར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ཉིད་དང་ཉེ་བར་བ་གམ་ལྟ་བུ་བྱ་སྟེ། ཝ་བཅུག་ལ་སྒོ་གདོད་ཅིང་སྒོ་འཕར་དང་སྒོ་གཏན་གཞུག་པར་བྱ་སྟེ། ཆབ་ཁུང་ས་ཇི་ལྟ་བར་ཐམས་ཅད་སྔ་མ་བཞིན་དུ་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སོ་གའི་དུས་ཀྱི་ཚེ་བྲམ་ཟེ་ཞིག་སྐོམ་པས་ཉམ་ཐག་སྟེ་ཆུ་འདོད་ནས་གཙུག་ལག་ཁང་དུ་ཞུགས་ཏེ་དགེ་སློང་ཞིག་གི་གན་དུ་སོང་ནས་དེས་སྨྲས་
Tha167a
༄#། །པ། དགེ་སློང ། བདག་སྐོམ་ན། ཆབ་སྩལ་དུ་གསོལ། དེས་རིལ་བ་བླངས་ནས་སོང་སྟེ་དེས་སྨྲས་པ། བྲམ་ཟེ། འཐུངས་ཤིག་།དེས་སྨྲས་པ། འཕགས་པ། གཙང་སྦྲ་ནི། ཐ་དད་པ་ལགས་ན། ཀྱེ་མའོ། །ཁྱོད་ཀྱི་ཆབ་སྣོད་བཞག་ལ། དེ་ནས་དགེ་སྦྱོང་ངམ། བྲམ་ཟེ་དག་བླུད་ན། ཅི་ནོངས། ཁྱོད་བསོད་ནམས་ལ་མི་སྦྱོར་རམ། སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཆུ་སྣོད་གཞག་པར་བྱའོ། །བཅོམ་ལྡན་འདས་ཀྱིས་དགེ་འདུན་གྱི་ཆུ་སྣོད་གཞག་པར་བྱའོ། །ཞེས་བཀའ་སྩལ་པ་དང ། ཁྱིམ་བདག་ཅིག་གིས་བཅོམ་ལྡན་འདས་ཀྱིས་དགེ་འདུན་གྱི་ཆུ་སྣོད་གཞག་པར་གནང་ངོ ། །ཞེས་ཐོས་ནས་དེས་རྫ་མཁན་གྱིས་བྱས་པའི་སྣོད་སྤྱད་གཙུག་ལག་ཁང་གི་ནང་དུ་སྤུངས་ཏེ་དེ་ལས་ཀུན་དགའ་ར་བ་པ་དང ། ཁྱིམ་པ་གཞན་དག་གིས་ཀྱང་གང་དང་གང་འདོད་པ་ཁྱེར་ནས་དོང་སྟེ་དགེ་སློང་རྣམས་ཀྱིས་མ་བཀག་པས་སྣོད་སྤྱད་དེ་དག་ཟད་ནས་དགེ་སློང་དག་གིས་ཁྱིམ་བདག་དེ་ལ་སྨྲས་པ། བཞིན་བཟང ། སྣོད་སྤྱད་དེ་དག་ཟད་ཀྱི། གཞན་དག་བྱིན་ཅིག་།དེས་སྨྲས་པ། འཕགས་པ་དག་།བདག་གིས་མང་པོ་རབ་ཏུ་ཕུལ་ན། ཅིའི་སླད་དུ་རིང་པོར་མ་ཐོགས་པ་ཁོ་ནར་བས་པར་གྱུར། དེ་དག་གིས་ཇི་ལྟར་གྱུར་པ་བརྗོད་པ་དང ། དེས་སྨྲས་པ། འཕགས་པ་དག །
Tha167b
ཡལ་བར་བོར་བ་གང་ལགས་པ་དེ་ནི། མ་ལེགས་པ་ཞིག་བགྱིས་ཏེ། དེ་དག་བདག་གིས་ཁྱིམ་པ་རྣམས་ལ་ནི། མ་སྩལ་ཏོ། །ཞེས་ཟེར་བའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་ཡལ་བར་དོར་བར་མི་བྱའི། འོན་ཀྱང་གནོད་སྤྱད་འབྲུབ་པ་བསྐོ་བར་བྱའོ། །དགེ་སློང་རྣམས་ཀྱིས་བྱེ་བྲག་མེད་པར་བསྐོས་ནས་བཅོམ་ལྡན་འདས་ཀྱིས་བཀའ་སྩལ་པ། སྣོད་སྤྱད་འབྲུབ་པ་ཆོས་ལྔ་དང་ལྡན་པ་ནི། མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན། འདུན་པས་འགྲོ་བ་དང ། ཞེ་སྡང་གིས་འགྲོ་བ་དང ། གཏི་མུག་གིས་འགྲོ་བ་དང ། འཇིགས་པས་འགྲོ་བ་དང ། གནོད་སྤྱད་བྲུབས་པ་དང་མ་བྲུབས་པ་མི་ཤེས་པའོ། །སྣོད་སྤྱད་འབྲུབ་པ་ཆོས་ལྔ་དང་ལྡན་པ་ནི། མ་བསྐོས་པ་ཡང་བསྐོ་བར་བྱ་ལ། བསྐོས་པ་ཡང་དབྱུང་བར་མི་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང ། ཞེ་སྡང་གིས་མི་འགྲོ་བ་དང ། གཏི་མུག་གིས་མི་འགྲོ་བ་དང ། འཇིགས་བས་མི་འགྲོ་བ་དང ། སྣོད་སྤྱད་བྲུབས་པ་དང་མ་བྲུབས་པ་ཤེས་པའོ། །བསྐོ་བ་ཡང་འདི་ལྟར་བྱ་སྟེ། གནས་མལ་བཤམས་པ་བྱས་ལ་གཎྜཱི་བརྡུངས་ནས་ཞེས་བྱ་བ་ནས་སྤྲོ་བར་བྱ་སྟེ་ཞེས་བྱ་བའི་བར་སྔ་མ་བཞིན་ནོ། །མིང་འདི་ཞེས་བྱ་བ་ཁྱོད་དགེ་འདུན་གྱི་སྣོད་སྤྱད་འབྲུབ་པར་སྤྲོའམ། གལ་ཏེ་སྤྲོ་ན། དེས་སྤྲོའོ། །ཞེས་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་
Tha168a
༄#། །བྱས་ནས་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་དགེ་འདུན་གྱི་སྣོད་སྤྱད་འབྲུབ་པར་སྤྲོ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང ། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི། དགེ་འདུན་གྱི་སྣོད་སྤྱད་འབྲུབ་པར་བསྐོ་བར་བགྱི་སྟེ། དགེ་སློང་མིང་འདི་ཞེས་བགྱི་བ་འདི། དགེ་འདུན་གྱི་སྣོད་སྤྱད་འབྲུབ་བོ། །འདི་ནི། གསོལ་བའོ། །ལས་ཀྱང་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི། དགེ་འདུན་གྱི་སྣོད་སྤྱད་འབྲུབ་པར་སྤྲོ་སྟེ། དེའི་སླད་དུ་དགེ་སློང་མིང་འདི་ཞེས་བགྱི་བ་འདི། དགེ་འདུན་གྱི་སྣོད་སྤྱད་འབྲུབ་པར་བསྐོ་ན། ཚེ་དང་ལྡན་པ་གང་དག་།དགེ་སློང་མིང་འདི་ཞེས་བགྱི་བ་འདི། དགེ་འདུན་གྱི་སྣོད་སྤྱད་འབྲུབ་པར་བསྐོ་བར་བཟོད་པ་དེ་དག་ནི། ཅང་མ་གསུངས་ཤིག་།གང་དག་མི་བཟོད་པ་དེ་དག་ནི། གསུངས་ཤིག་།དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི། དགེ་འདུན་གྱི་སྣོད་སྤྱད་འབྲུབ་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེས་དགེ་སློང་རྣམས་ལ་ནི། སྣོད་སྤྱད་རྙིང་བ་དག་སྦྱིན་ཞིང ། ཁྱིམ་པ་རྣམས་ལ་ནི། གསར་པ་དག་སྦྱིན་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་
Tha168b
བ། དགེ་སློང་རྣམས་ལ་གསར་པ་དག་སྦྱིན་པར་བྱ་ཞིང ། ཁྱིམ་པ་རྣམས་ལ་ནི། རྙིང་པ་དག་སྦྱིན་པར་བྱའོ། །དེ་ཁྱིམ་པ་རྣམས་ལ་བྱིན་པ་ནི། ཕྱིར་ལེན་པར་མི་བྱེད་ཅིང ། དགེ་སློང་རྣམས་ལ་ནི། ཕྱིར་ལེན་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པ་རྣམས་ལ་བྱིན་པ་ནི། བླང་བར་བྱའི། དགེ་སློང་རྣམས་ལ་ནི། མ་ཡིན་ནོ། །ཕྱི་རོལ་ཏུ་བཞག་པས་དེ་དག་འཁྱམས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། སྣོད་སྤྱད་ཀྱི་མཛོད་ཅིག་བྱས་ལ་དེར་རྫ་མཁན་གྱིས་བྱས་པའི་སྣོད་སྤྱད་རྣམས་གཞག་པར་བྱའོ། །བཅོམ་ལྡན་འདས་ཀྱིས་སྣོད་སྤྱད་ཀྱི་མཛོད་ཅིག་བྱས་ལ་དེར་རྫ་མཁན་གྱིས་བྱས་པའི་སྣོད་སྤྱད་རྣམས་གཞག་པར་བྱའོ། །ཞེས་བཀའ་སྩལ་པ་དང ། ཇི་ཙམ་ན་བྱང་ཕྱོགས་ནས་འགྲོན་པོ་ཞིག་འོངས་ནས་དེས་དགེ་འདུན་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྟབས་ཏེ་དེས་བསམ་པ། བདག་གིས་དགེ་འདུན་ལ་ཡོ་བྱད་བརྙན་པོས་ཅིའི་ཕྱིར་བསྙེན་བཀུར་བྱ། མ་ལ་བདག་ཉིད་ཀྱི་སྣོད་སྤྱད་ཀྱིས་བསྙེན་བཀུར་བྱའོ། །སྙམ་ནས་དེས་ཟངས་ཀྱི་སྣོད་སྤྱད་མང་པོ་ཉེ་བར་བཞག་གོ་།དེ་ནས་ཡོ་བྱད་མང་པོས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཟླ་བ་གསུམ་དུ་སྟོན་མོ་གསོལ་ནས་མཇུག་གཅོད་ཀྱི་སྟོན་མོ་བྱས་ནས་ཆས་སོ། །དེ་འགྲོ་བའི་ཚེ་ཟངས་ཀྱི་སྣོད་སྤྱད་དེ་དག་ཐམས་ཅད་དགེ་འདུན་ལ་ཕུལ་ནས་དགེ་སློང་དག་གིས་མཛོད་དེ་ཉིད་དུ་རྫ་མཁན་གྱིས་བྱས་པའི་སྣོད་སྤྱད་དང་ལྷན་
Tha169a
༄#། །ཅིག་བཞག་པ་དང ། ཟངས་ཀྱི་སྣོད་སྤྱད་ཀྱིས་བསྡོས་ཏེ་རྫ་མཁན་གྱིས་བྱས་པའི་སྣོད་སྤྱད་རྣམས་ཆག་ནས་བཅོམ་ལྡན་འདས་ཀྱིས་བཀའ་སྩལ་པ། ཟངས་ཀྱི་སྣོད་སྤྱད་རྣམས་གུད་དུ་བཞག་ཅིང ། རྫ་མཁན་གྱིས་བྱས་པའི་སྣོད་སྤྱད་རྣམས་གུད་དུ་གཞག་པར་བྱའོ། །ཇི་ཙམ་ན་བྲམ་ཟེ་ཞིག་སྐོམ་པས་ཉེན་ནས་ཛེ་ཏའི་ཚལ་དུ་སོང་སྟེ། དེ་དགེ་སློང་ཞིག་གི་གན་དུ་ཕྱིན་ནས་སྨྲས་པ། ཀྱེ་དགེ་སློང ། བདག་སྐོམ་ན། བདག་ལ་ཆབ་སྩལ་དུ་གསོལ། དེས་དེ་ལ་བུམ་པ་དང ། སྲད་བུ་དག་བྱིན་པ་དང ། དེས་སྨྲས་པ། འཕགས་པ། འདིས་ཅི་བགྱི། ཆབ་སྩལ་དུ་གསོལ། དེས་སྨྲས་པ། བྲམ་ཟེ། ཆུ་བཅུས་ཟིན་པ་མེད་དོ། །འཕགས་པ། ཁྱེད་ནི། སེམས་ཅན་ཐམས་ཅད་ལ་ཕན་པར་ཞུགས་པ་ལགས་པས། ཀྱེ་མའོ། །ཁྱེད་ཀྱིས་ཆབ་ཉེ་བར་བཞག་ཀྱང་ཅི་མ་རུང ། དེས་སྨྲས་པ། བཅོམ་ལྡན་འདས་ཀྱིས་མ་གནང་ངོ ། །སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱིས་ཆུ་ཉེ་བར་གཞག་པར་བྱའོ། །དགེ་སློང་དག་གིས་ཁྱམས་དང ། གནས་ཁང་དང ། གཙུག་ལག་ཁང་གི་ནང་དང ། སྒོ་ཁང་དང ། བང་རིམ་དག་ཏུ་བབ་བབ་ཏུ་བཞག་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱམས་དང ། གནས་ཁང་དང ། གཙུག་ལག་ཁང་གི་ནང་དང ། སྒོ་ཁང་
Tha169b
དང ། བང་རིམ་དག་ཏུ་བབ་བབ་ཏུ་གཞག་པར་མི་བྱའི། འོན་ཀྱང་ཆུའི་ཁང་པ་བྱའོ། །བཅོམ་ལྡན་འདས་ཀྱིས་ཆུའི་ཁང་པ་བྱའོ། །ཞེས་བཀའ་སྩལ་པ་དང ། དགེ་སློང་དག་གིས་ཕྱོགས་གང་དུ་ཇི་ལྟ་བུ་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། གཙུག་ལག་ཁང་གི་ནང་གི་ལྷོ་དང ། ནུབ་ཀྱི་ངོས་སུ་ཆུའི་ཁང་པ་བྱའོ། །མུན་གནག་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། སྐར་ཁུང་གདོད་པར་བྱའོ། །རྫབ་ཆགས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། སོ་ཕག་གི་གཅལ་དགྲམ་པར་བྱ་ཞིང་སྟོར་ཁུང་གདོད་བར་བྱའོ། །སྒོ་གདོད་པར་བྱ་ཞིང་སྒོ་གླེགས་དང ། ཡང་མིག་ཀྱང་གཞུག་པར་བྱའོ། །ཆུ་ས་ལ་འཇོག་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ཤིང་ཁྲི་ལ་གཞག་པར་བྱའོ། ། ཤིང་དག་མེད་ནས་བཅོམ་ལྡན་འདས་ཀྱིས་བཀའ་སྩལ་པ། སོ་ཕག་གི་སྟེགས་བུ་བྱས་ལ་དེའི་སྟེང་དུ་རྟེན་མ་བྱ་ཞིང་བུམ་པ་གཞག་པར་བྱའོ། །བུམ་པའི་ནང་གི་ཆུ་རུལ་ནས་བཅོམ་ལྡན་འདས་ཀྱིས་བཀའ་སྩལ་པ། དུས་དུས་སུ་བུམ་པ་བཀྲུ་བར་བྱའོ། །བཅོམ་ལྡན་འདས་ཀྱིས་དུས་དུས་སུ་བུམ་པ་བཀྲུ་བར་བྱའོ། །ཞེས་བཀའ་སྩལ་པ་དང ། དགེ་སློང་དག་ཅིས་བཀྲུ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཤིང་ལ་བུ་ཤེལ་ཙིའི་ཁྲུས་ཤིང་ངམ། ལོ་མ་སྦམ་པའམ། རས་མའི་ཐུམ་བུ་བཅིང་ནས་རུང་བར་བྱས་ཏེ་བཀྲུ་བར་བྱའོ། །འོན་ཀྱང་ཆུ་རུལ་བ་
Tha170a
༄#། །ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། བུམ་པ་དག་ལ་ཕྱེད་ནི། བཀྲུ་བར་བྱ་ཞིང ། ཕྱེད་དུ་ཆུ་བླུག་པར་བྱའོ། །བཅོམ་ལྡན་འདས་ཀྱིས་ཆུ་བླུག་པར་བྱའོ། །ཞེས་བཀའ་སྩལ་