rKTs


H66

(e-text produced by ACIP)

see text in transliteration
102a
།།རྒྱ་གར་སྐད་དུ། ཨཱརྱ་མ་ཧཱ་པྲ་ཏི་ཧཱརྱ་ནི་ར་དེ་ཤ་ནཱ་མ་མ་ཧཱ་ཡ་ན་སཱུ་ཏྲ། བོད་སྐད་དུ། འཕགས་པ་ཆོ་འཕྲུལ་ཆེན་པོ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་བརྒྱད་སྟོང་དང་ཐབས་གཅིག་ཏུ་བཞུགས་སོ། །དེ་ནས་ལྷའི་བུ་དེད་དཔོན་ཞེས་བྱ་
102b
བ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ་།འཇམ་དཔལ་གཞོན་ནུར་གྱུར་པ་ཡང་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། དེ་ནས་བཅོམ་ལྡན་འདས་ལ་ལྷའི་བུ་དེད་དཔོན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་ཆོ་འཕྲུལ་དུ་ཞིག་གིས་སེམས་ཅན་རྣམས་འདུལ་བར་མཛད་ལགས། བཅོམ་ལྡན་འདས་ཀྱིས་བཀའ་སྩལ་པ།་ལྷའི་བུ། ང་ནི་ཆོ་འཕྲུལ་རྣམ་པ་གསུམ་གྱིས་སེམས་ཅན་རྣམས་འདུལ་བར་བྱེད་དོ། །གསུམ་གང་ཞེ་ན། འདི་ལྟ་སྟེ། ཀུན་བརྗོད་པའི་ཆོ་འཕྲུལ་དང ། རྗེས་སུ་བསྟན་པའི་ཆོ་འཕྲུལ་དང།་རྫུ་འཕྲུལ་གྱི་ཆོ་འཕྲུལ་ལོ། །དེ་ལ་དེ་བཞིན་གཤེགས་པའི་ཀུན་བརྗོད་པའི་ཆོ་འཕྲུལ་དེ་གང་ཞེ་ན། ཐོགས་པ་མེད་པའི་ཡེ་ཤེས་ཀྱིས་མ་འོངས་པའི་དུས་གཟིགས་པ་གང་ཡིན་པ་དང ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་མཁྱེན་ཅིང་གཟིགས་པ་དང ། དཀོན་མཆོག་གསུམ་པོ་དག་ལ་མ་དད་པ་རྣམས་དད་པར་མཛད་པ་དང ། ལས་ཀྱི་རྣམ་པར་སྨིན་པ་ལ་འཇུག་པ་མཁྱེན་པ་དང།་དེ་བཞིན་གཤེགས་པས་གང་ཟག་གང་ལ་ད་ལྟར་བྱུང་བ་ན་ཉེས་པར་སྤྱད་པའི་གཞི་ངན་སོང་དང ། ངན་འགྲོ་གང་ཡང་རུང་བ་དག་ཏུ་སྐྱེ་བར་འགྱུར་བ་དེ་དག་ནི་དེ་ཁོ་ན་བཞིན་དུ་འགྱུར་གྱི།་གཞན་དུ་མ་ཡིན་ནོ་ཞེས་ཀུན་བརྗོད་པར་མཛད་པ་དང ། གང་ཟག་དེ་སྔོན་དགེ་བའི་རྩ་བ་ཡང་དག་པར་བླངས་པའི་རྒྱུས་ངན་སོང་རྣམས་ལས་ཐར་ནས་ལྷ་དང་མི་དག་ཏུ་སྐྱེ་བར་འགྱུར་
103a
༄#། །ཞིང་ཐེག་པ་གང་གིས་ངེས་པར་འབྱུང་བར་འགྱུར་བ་དང ། ཡང་ན་ཉན་ཐོས་ཀྱི་ཐེག་པའམ། ཡང་ན་རང་སངས་རྒྱས་ཀྱི་ཐེག་པའམ། ཡང་ན་ཐེག་པ་ཆེན་པོས་ངེས་པར་འབྱུང་བར་འགྱུར་བ་དང ། དེ་བཞིན་དུ་བདེ་བ་དང་སྡུག་བསྔལ་མྱོང་བར་འགྱུར་བ་དང ། བསྐལ་པ་ཇི་སྙེད་གཅིག་གིས་ངེས་པར་འབྱུང་བར་འགྱུར་བ་དང ། སྤྱོད་པ་ཇི་ལྟ་བུས་སངས་རྒྱས་བཅོམ་ལྡན་འདས་ཇི་སྙེད་ཅིག་མཐོང་བར་འགྱུར་ཞིང ། མཉེས་པར་བྱེད་པར་འགྱུར་བ་དེ་དག་ཐམས་ཅད་དེ་བཞིན་གཤེགས་པས་རབ་ཏུ་མཁྱེན་ཏོ། །མཁྱེན་ནས་ཀྱང་དེ་ནི་དེ་ཁོ་ན་བཞིན་དུ་འགྱུར་གྱི། གཞན་དུ་མ་ཡིན་ནོ་ཞེས་དེ་ཁོ་ན་བཞིན་དུ་ཀུན་བརྗོད་པར་མཛད་པ་དང ། གང་ཟག་གང་དགེ་བའི་རྩ་བ་ཡང་དག་པར་བླངས་པའི་རྒྱུས་འདོད་པའི་ཁམས་རྣམས་སུ་སྐྱེ་བར་འགྱུར་བ་དང ། གཟུགས་ཀྱི་ཁམས་དང ། གཟུགས་མེད་པའི་ཁམས་ཀྱི་སྐྱེ་མཆེད་གང་ཡང་རུང་བ་དག་ཏུ་སྐྱེ་བར་འགྱུར་བ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ཐེག་པ་གང་གིས་ངེས་པར་འབྱུང་བར་འགྱུར་བ་དང ། བསྐལ་པ་ཇི་སྙེད་ཅིག་གིས་ངེས་པར་འབྱུང་བར་འགྱུར་བ་དང ། སྤྱོད་པ་ཇི་ལྟ་བུས་སངས་རྒྱས་བཅོམ་ལྡན་འདས་ཇི་སྙེད་ཅིག་མཐོང་བར་འགྱུར་ཞིང ། མཉེས་པར་བྱེད་པར་འགྱུར་བ་དེ་དག་ཐམས་ཅད་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །མཁྱེན་ནས་ཀྱང་དེ་ཁོ་ན་བཞིན་དུ་ཀུན་བརྗོད་ཅིང་ལུང་སྟོན་པར་
103b
མཛད་པ་དང ། དགེ་བའམ། མི་དགེ་བའམ། དམན་པའམ། བར་མའམ། མཆོག་གམ། ཐ་ན་སེམས་བསྐྱེད་པ་གཅིག་ཀྱང་མི་འདའ་སྟེ། དེ་ནི་དེ་བཞིན་གཤེགས་པའི་ཀུན་བརྗོད་པའི་ཆོ་འཕྲུལ་ཡིན་ནོ། །དེ་ལ་དེ་བཞིན་གཤེགས་པའི་རྗེས་སུ་བསྟན་པའི་ཆོ་འཕྲུལ་གང་ཞེ་ན། བསླབ་པ་བསྲུང་བའི་དོན་གྱི་ཕྱིར་རྗེས་སུ་སྟོན་པར་མཛད་པ་གང་ཡིན་པ་སྟེ། འདི་ནི་བྱ་བའོ། །འདི་ནི་བྱ་བ་མ་ཡིན་པའོ། །འདི་ནི་བསྟེན་པར་བྱ་བ་མ་ཡིན་པའོ། །འདི་ནི་བསྒྲུབ་པའོ། །འདི་ནི་ལོག་པར་བསྒྲུབ་པའོ། །ཆོས་འདི་དག་ནི་ཀུན་ནས་ཉོན་མོངས་པའི་ཆ་དང་མཐུན་པའོ། །ཆོས་འདི་དག་ནི་རྣམ་པར་བྱང་བའི་ཆ་དང་མཐུན་པའོ་ཞེས་དེ་ལྟར་ཡོན་ཏན་ཐམས་ཅད་ཡང་དག་པར་བླང་བ་རྗེས་སུ་སྟོན་པ་དང ། མི་དགེ་བ་ཐམས་ཅད་སྤང་བ་རྗེས་སུ་སྟོན་པ་དང ། དགེ་བའི་ལམ་གྱི་ཚོགས་ཐམས་ཅད་རྗེས་སུ་སྟོན་པ་དང ། ལམ་འདི་ནི་ཉན་ཐོས་ཀྱི་ཐེག་པ་ཡོངས་སུ་རྫོགས་པར་འགྱུར་བའོ། །ལམ་འདི་ནི་རང་སངས་རྒྱས་ཀྱི་ཐེག་པ་ཡོངས་སུ་རྫོགས་པར་འགྱུར་བའོ། །ལམ་འདི་ནི་ཐེག་པ་ཆེན་པོ་ཡོངས་སུ་རྫོགས་པར་འགྱུར་བའོ་ཞེས་རྗེས་སུ་སྟོན་པ་གང་ཡིན་པ་སྟེ། དེ་དག་ཇི་སྐད་བསྟན་པ་བཞིན་དུ་བསྒྲུབས་ན་གནས་གང་ཡིན་པ་དེ་རྗེས་སུ་འཐོབ་པར་མི་འགྱུར་བ་ནི་གནས་མ་ཡིན། སྐབས་མ་ཡིན་ཏེ། དེ་ནི་གནས་མེད་དོ། །ལས་འདི་ཡང་དག་པར་བླངས་ན་ནི་སེམས་ཅན་དམྱལ་བ་རྣམས་སུ་ཁྲིད་པར་བྱེད་དོ། །ལས་འདི་ཡང་དག་པར་
104a
༄#། །བླངས་ན་ནི་དུད་འགྲོའི་སྐྱེ་གནས་རྣམས་སུ་ཁྲིད་པར་བྱེད་དོ། །ལས་འདི་ཡང་དག་པར་བླངས་ན་ནི་གཤིན་རྗེའི་འཇིག་རྟེན་རྣམས་སུ་ཁྲིད་པར་བྱེད་དོ། །ལས་འདི་ཡང་དག་པར་བླངས་ན་ནི་ལྷ་རྣམས་སུ་ཁྲིད་པར་བྱེད་དོ། །ལས་འདི་གང་དག་པར་བླངས་ན་ནི་མི་རྣམས་སུ་ཁྲིད་པར་བྱེད་དོ། །དེ་ལ་གང་དག་མི་དགེ་བ་སྤངས་ན་དགེ་བ་ཡང་དག་པར་བླང་བའི་ཕྱིར་འཇུག་པ་དང ། འཕགས་པའི་ལམ་དུ་འཇུག་པ་དེ་དག་ནི་ལྷ་དང་མི་རྣམས་སུ་སྐྱེས་ནས་རིམ་གྱིས་ཡོངས་སུ་མྱ་ངན་ལས་འདས་པའི་ཆོས་ཅན་དུ་འགྱུར་བ་དང ། ཚུལ་དེ་ལྟ་བུས་ཁ་ན་མ་ཐོ་བ་མེད་པ་དང ། རྨོངས་པ་མེད་པའི་རྗེས་སུ་སྟོན་པར་མཛད་པ་གང་ཡིན་པ་སྟེ། དེ་ནི་དེ་བཞིན་གཤེགས་པའི་རྗེས་སུ་བསྟན་པའི་ཆོ་འཕྲུལ་ཡིན་ནོ། །དེ་ལ་དེ་བཞིན་གཤེགས་པའི་རྫུ་འཕྲུལ་གྱི་ཆོ་འཕྲུལ་གང་ཞེ་ན། གང་དག་རྫུ་འཕྲུལ་གྱིས་འདུལ་བའི་སེམས་ཅན་ང་རྒྱལ་དང ། རྒྱགས་པ་དང ། དྲེགས་པས་བཅོམ་པ་རྣམས་ལ་རྫུ་འཕྲུལ་གྱི་ཆོ་འཕྲུལ་ཀུན་ཏུ་སྟོན་པར་མཛད་དེ། འདི་ལྟ་སྟེ། གཅིག་ཏུ་གྱུར་ནས་དུ་མར་འགྱུར་རོ། །དུ་མར་གྱུར་ནས་གཅིག་ཏུ་འགྱུར་རོ། །སྣང་བར་འགྱུར་ཞིང་མི་སྣང་བར་འགྱུར་རོ། །རྩིག་པ་ལ་ཡང་ཐད་ཀར་འགྲོའོ། །ར་བ་ལ་ཡང་མི་ཐོགས་པར་ཐད་ཀར་འགྲོའོ། །རི་ལ་ཡང་མི་ཐོགས་པར་ཐད་ཀར་འགྲོའོ། །ས་ལ་སྟེང་དུ་འབྱུང་བ་དང་བྱེའུ་ཟུལ་བྱེད་དེ། དཔེར་ན། ཆུ་ལ་
104b
བྱ་བ་བཞིན་ནོ། །ཆུ་ལ་ཡང་མི་ནུབ་པར་འགྲོ་སྟེ། དཔེར་ན། ས་ལ་བྱ་བ་བཞིན་ནོ། །ནམ་མཁའ་ལ་ཡང་འགྲོ་སྟེ། དཔེར་ན། འདབ་ཆགས་བྱ་བཞིན་ནོ། །ལུས་ཀྱི་སྟོད་ནས་མེ་འབར་བར་བྱེད་ཅིང་ལུས་ཀྱི་སྨད་ནས་ཆུའི་རྒྱུན་འབབ་པར་བྱེད་དོ། །ལུས་ཀྱི་སྨད་ནས་མེ་འབར་བར་བྱེད་ཅིང་ལུས་ཀྱི་སྟོད་ནས་ཆུའི་རྒྱུན་འབབ་པར་བྱེད་དོ། །ཉི་མ་དང ། ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་བ།་འདི་ལྟར་མཐུ་ཆེ་བ། འདི་ལྟར་གཟི་བརྗིད་ཆེ་བ་ལ་ཡང་ལག་པས་འཛིན་ཅིང་ཀུན་ཏུ་ཉུག་པར་བྱེད་དོ། །ཚངས་པའི་འཇིག་རྟེན་གྱི་བར་དུ་ཡང་ལུས་ཀྱིས་དབང་བསྒྱུར་རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་ཀུན་ཏུ་འབར་བར་སྟོན་ཏེ། སེམས་ཅན་ཡོངས་སུ་སྨིན་པར་བྱ་བའི་ཕྱིར་རྫུ་འཕྲུལ་གྱི་རྣམ་པར་འཕྲུལ་བའི་ཁྱད་པར་ཅི་དང་ཅི་ལྟ་བུས་སེམས་ཅན་རྣམས་འདུལ་བར་འགྱུར་བ་དེ་དང་དེ་ལྟ་བུའི་རྫུ་འཕྲུལ་གྱི་རྣམ་པ་དག་མངོན་པར་སྒྲུབ་པར་བྱེད་དེ། དེ་ནི་དེ་བཞིན་གཤེགས་པའི་རྫུ་འཕྲུལ་གྱི་ཆོ་འཕྲུལ་ཡིན་ནོ། །ལྷའི་བུ། ང་ནི་ཆོ་འཕྲུལ་གསུམ་པོ་དེ་དག་གིས་སེམས་ཅན་རྣམས་འདུལ་བར་བྱེད་དོ། །དེ་ནས་བཅོམ་ལྡན་འདས་ལ་ལྷའི་བུ་དེད་དཔོན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོ་འཕྲུལ་དེ་དག་མ་ལགས་པའི་ཆོ་འཕྲུལ་དམ་པ་གཞན་ཅི་ཞིག་མངའ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ། ཡོད་དོ། །དེ་ནས་བཅོམ་ལྡན་འདས་ཀྱིས་འཇམ་དཔལ་
105a
༄#། །གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ། ཆོ་འཕྲུལ་བསྟན་པའི་ཆོས་ཀྱི་རྣམ་གྲངས་གང་ཐོས་ན་ཟབ་མོ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བཟོད་པ་ཐོབ་པར་འགྱུར་བ་དང ། བདུད་ཀྱི་ཕྱོགས་ཀྱང་ཤིན་ཏུ་ཚར་གཅད་པར་འགྱུར་བ་དང ། དེ་བཞིན་གཤེགས་པ་རྣམས་ཀྱི་བྱང་ཆུབ་འདི་ཡང་ཡུན་རིང་དུ་གནས་པར་འགྱུར་བའི་ཆོ་འཕྲུལ་བསྟན་པ་ཞེས་བྱ་བའི་ཆོས་ཀྱི་རྣམ་གྲངས་ལ་ཁྱོད་སྤོབས་པར་གྱིས་ཤིག། དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་ནི་བཞེད་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྒྱ་མཚོ་ཆེན་པོའི་ཆབ་ཀྱི་ཕུང་པོ་གང་ལགས་པ་དེ་ཐམས་ཅད་ཕྱག་གི་ཁྱོར་བ་ཡ་གཅིག་ཏུ་སྩལ་ཀྱང་ཆབ་ཀྱི་སེམས་ཅན་རྣམས་ལ་ཡང་གནོད་པར་མི་འགྱུར་ཏེ། བཅོམ་ལྡན་འདས་དེ་བཞིན་གཤེགས་པ་ལ་ནི་ཆོ་འཕྲུལ་འདི་མངའ་ལགས་སོ། །ཡང་འདི་ནི་ཆོ་འཕྲུལ་དམ་པ་ལགས་ཏེ། གང་དེ་བཞིན་གཤེགས་པས་བརྗོད་དུ་མ་མཆིས་པ་དང ། ཡི་གེ་མ་མཆིས་པ་དང ། བསྙད་དུ་མ་མཆིས་པ་དང ། སྐྱེ་བ་མ་མཆིས་པ་དང ། འབྱུང་བ་མ་མཆིས་པ་དང ། མིང་མ་མཆིས་པ་དང ། མཚན་མ་མ་མཆིས་པ་དང ། སྒྲ་མ་མཆིས་པ་དང ། དབྱངས་
105b
མ་མཆིས་པ་དང ། ཚིག་གི་ལམ་མ་མཆིས་པ་དང ། རྒྱུ་མཚན་མ་མཆིས་པ་དང ། མཚན་ཉིད་མ་མཆིས་པ་དང ། སྤྱོད་པ་མ་མཆིས་པ་དང ། རྒྱུ་བ་མ་མཆིས་པ་དང ། ཀུན་ཏུ་འབྱུང་བ་མ་མཆིས་པ་དང ། རྣམ་པར་རིག་པ་མ་མཆིས་པ་དང ། འདུས་མ་བགྱིས་པ་དང ། སེམས་དང་ཡིད་དང་རྣམ་པར་ཤེས་པ་དང་བྲལ་བ་དང ། ཐ་སྙད་ཐམས་ཅད་ཡང་དག་པར་ཆད་པ་དང ། ཞི་བ་དང ། བྱང་བ་དང ། ཕྲ་བ་དང ། མཐོང་བར་དཀའ་བ་དང ། རྟག་ཏུ་མ་མཆིས་པ་དང ། རྟོག་གེའི་སྤྱོད་ཡུལ་མ་ལགས་པའི་ཆོས་མངོན་པར་རྫོགས་པར་སངས་རྒྱས་ནས། ཡི་གེ་དང།་ངེས་པའི་ཚིག་དང ། བརྡ་དང ། ཐ་སྙད་ཀྱི་ལམ་དེ་དང་དེ་དག་གིས་ཆོས་དེ་དག་གཞན་དག་ལ་རྣམ་པར་རིག་པར་མཛད་པ་དེ་ནི་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་སོ། །ལྷ་དང་བཅས་པའི་འཇིག་རྟེན་གྱིས་དེའི་གཏིང་མི་རྟོགས་ཤིང ། དམིགས་པ་དང ། མཚན་མ་དང ། ཡོངས་སུ་རྟོག་པ་དང་བཅས་པའི་དགེ་སྦྱོང་དང ། བྲམ་ཟེ་ཐམས་ཅད་དངང་ཞིང་འཇུག་པར་མི་འགྱུར་བ་དེ་ཡང་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་སོ། །བཅོམ་ལྡན་འདས། གཞན་ཡང་དེ་བཞིན་གཤེགས་པ་ནི་བཞེད་ན་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་འདི་ཞལ་གྱི་སྒོར་སྩལ་ཀྱང་གླིང་ཆེན་པོ་བཞི་པའི་སེམས་ཅན་རྣམས་དང ། དགུང་ཟླ་དང ། གདུགས་དག་དང ། ཁོར་ཡུག་རྣམས་དང ། རི་དང ། ཤིང་གེལ་
106a
༄#། །པ་དང ། སྨན་དང ། ནགས་ཚལ་རྣམས་ལ་ཡང་སྒྲིབ་པར་མི་འགྱུར་བ་དང ། སླར་ཕྱུང་སྟེ་གནས་ཇི་ལྟ་བ་བཞིན་དུ་བཀོད་ཀྱང་སེམས་ཅན་རྣམས་ཀྱང་འདི་ལྟར་བདག་ཅག་ཡུལ་གང་དུ་བཀོད་པ་དང ། བདག་ཅག་ཡུལ་གང་ནས་བཏོན་པ་ཡང་མི་འཚལ་ཏེ། བཅོམ་ལྡན་འདས། དེ་ཡང་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་སོ། ། འདི་ནི་ཆོ་འཕྲུལ་ཆེན་པོ་དམ་པ་ལགས་ཏེ། གང་དེ་བཞིན་གཤེགས་པས་བརྗོད་དུ་མ་མཆིས་པ་དང ། ཡི་གེ་མ་མཆིས་པ་དང ། བསྙད་དུ་མ་མཆིས་པ་དང ། མིང་མ་མཆིས་པ་དང ། མཚན་མ་མ་མཆིས་པ་དང ། དེ་བཞིན་དུ་སྦྱར་ཏེ། སེམས་དང་ཡིད་དང་རྣམ་པར་ཤེས་པ་དང་བྲལ་བ་དང ། ཐ་སྙད་ཐམས་ཅད་ཡང་དག་པར་ཆད་པ་དང ། ཞི་བ་དང ། བྱང་བ་དང།་ཕྲ་བ་དང ། མཐོང་བར་དཀའ་བ་དང ། བརྟག་ཏུ་མ་མཆིས་པ་དང ། རྟོག་གེའི་སྤྱོད་ཡུལ་མ་ལགས་པའི་བར་གྱི་ཆོས་ཐམས་ཅད་མངོན་པར་རྫོགས་པར་སངས་རྒྱས་ནས། ཡི་གེ་དང ། ངེས་པའི་ཚིག་དང ། བརྡ་དང ། ཐ་སྙད་ཀྱི་ལམ་དེ་དང་དེ་དག་གིས་ཆོས་དེ་བསྟན་པ་དེ་ཡང་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་སོ། །བཅོམ་ལྡན་འདས། གཞན་ཡང་གང་དག་དེ་བཞིན་གཤེགས་པའི་སྐུ་དང་ལྡན་པའི་ཆོ་འཕྲུལ་དེ་དག་ཐམས་ཅད་ནི་མཚན་མའི་དངོས་པོ་དང་བཅས་པའི་སེམས་ཅན་རྣམས་ཀུན་ནས་འདྲེན་པར་མཛད་
106b
པ་ལགས་སོ། །འདི་ཡང་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་ཏེ། འདི་ལྟ་སྟེ། བདག་མ་མཆིས་པ་ལ་བདག་ཏུ་ཐ་སྙད་འདོགས་པ་དང ། སེམས་ཅན་མ་མཆིས་པ་ལ་སེམས་ཅན་དུ་ཐ་སྙད་འདོགས་པ་དང ། སྲོག་མ་མཆིས་པ་ལ་སྲོག་ཏུ་ཐ་སྙད་འདོགས་པ་དང ། གསོ་བ་མ་མཆིས་པ་ལ་གསོ་བར་ཐ་སྙད་འདོགས་པ་དང ། གང་ཟག་མ་མཆིས་པ་ལ་གང་ཟག་ཏུ་ཐ་སྙད་འདོགས་པ་དང།་ཤེད་ལས་སྐྱེས་པ་མ་མཆིས་པ་ལ་ཤེད་ལས་སྐྱེས་སུ་ཐ་སྙད་འདོགས་པ་དང ། ཤེད་བུ་མ་མཆིས་པ་ལ་ཤེད་བུར་ཐ་སྙད་འདོགས་པ་དང ། མིང་མ་མཆིས་པ་ལ་མིང་དུ་ཐ་སྙད་འདོགས་པ་དང ། གཟུགས་མ་མཆིས་པ་ལ་གཟུགས་སུ་ཐ་སྙད་འདོགས་པ་དང ། ཚོར་བ་མ་མཆིས་པ་ལ་ཚོར་བར་ཐ་སྙད་འདོགས་པ་དང ། འདུ་ཤེས་མ་མཆིས་པ་ལ་འདུ་ཤེས་སུ་ཐ་སྙད་འདོགས་པ་དང ། འདུ་བྱེད་རྣམས་མ་མཆིས་པ་ལ་འདུ་བྱེད་རྣམས་སུ་ཐ་སྙད་འདོགས་པ་དང ། རྣམ་པར་ཤེས་པ་མ་མཆིས་པ་ལ་རྣམ་པར་ཤེས་པར་ཐ་སྙད་འདོགས་པ་དང ། ཕུང་པོ་མ་མཆིས་པ་ལ་ཕུང་པོར་ཐ་སྙད་འདོགས་པ་དང ། ཁམས་མ་མཆིས་པ་ལ་ཁམས་སུ་ཐ་སྙད་འདོགས་པ་དང ། སྐྱེ་མཆེད་མ་མཆིས་པ་ལ་སྐྱེ་མཆེད་དུ་ཐ་སྙད་འདོགས་པ་དང ། མིག་སྟོང་ཞེས་བགྱི་བ་ཐ་སྙད་འདོགས་ཀྱང་མིག་ནི་འདི་སྙམ་དུ་བདག་སྟོང་ངོ་སྙམ་དུ་མི་སེམས་པ་དང ། གཟུགས་སྟོང་ངོ་ཞེས་བགྱི་བར་ཐ་སྙད་འདོགས་ཀྱང་གཟུགས་ནི་འདི་སྙམ་དུ་བདག་སྟོང་ངོ་སྙམ་དུ་མི་སེམས་
107a
༄#། །པ་དང ། མིག་གི་རྣམ་པར་ཤེས་པ་སྟོང་ཞེས་བགྱི་བར་ཐ་སྙད་འདོགས་ཀྱང་མིག་གི་རྣམ་པར་ཤེས་པ་ནི་འདི་སྙམ་དུ་བདག་སྟོང་ངོ་སྙམ་དུ་མི་སེམས་པ་དང ། དེ་བཞིན་དུ་རྣ་བ་དང ། སྒྲ་དང ། རྣ་བའི་རྣམ་པར་ཤེས་པ་དང ། སྣ་དང ། དྲི་དང ། སྣའི་རྣམ་པར་ཤེས་པ་དང ། ལྕེ་དང ། རོ་དང ། ལྕེའི་རྣམ་པར་ཤེས་པ་དང ། ལུས་དང ། རེག་བྱ་དང ། ལུས་ཀྱི་རྣམ་པར་ཤེས་པ་དང ། ཡིད་སྟོང་ཞེས་བགྱི་བར་ཐ་སྙད་འདོགས་ཀྱང་ཡིད་ནི་འདི་སྙམ་དུ་བདག་སྟོང་ངོ་སྙམ་དུ་མི་སེམས་པ་དང ། ཆོས་རྣམས་སྟོང་ཞེས་བགྱི་བར་ཐ་སྙད་འདོགས་ཀྱང་ཆོས་རྣམས་ནི་འདི་སྙམ་དུ་བདག་སྟོང་ངོ་སྙམ་དུ་མི་སེམས་པ་དང ། ཡིད་ཀྱི་རྣམ་པར་ཤེས་པ་སྟོང་ངོ་ཞེས་བགྱི་བར་ཐ་སྙད་འདོགས་ཀྱང་ཡིད་ཀྱི་རྣམ་པར་ཤེས་པ་ནི་འདི་སྙམ་དུ་བདག་སྟོང་ངོ་སྙམ་དུ་མི་སེམས་ཏེ། འདི་ལྟར་བེམ་པོ་དང ། སེམས་པ་མ་མཆིས་པ་དང ། དངོས་པོ་མ་མཆིས་པ་དང ། མིང་མ་མཆིས་པ་དང ། མཚན་མ་མ་མཆིས་པའི་ཆོས་འདི་ལྟ་བུ་འདི་དག་སེམས་ཅན་གཞན་དང་གང་ཟག་གཞན་དག་ལ་ཡང་དག་པར་གོ་བར་མཛད་པ་གང་ལགས་པ་འདི་ནི་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་ཏེ།་ཆོ་འཕྲུལ་དེ་ནི་མིག་དང་ལྡན་པ་ཡང་མ་ལགས། གཟུགས་དང་ལྡན་པ་ཡང་མ་ལགས། མིག་གི་རྣམ་པར་ཤེས་པ་དང་ལྡན་པ་ཡང་མ་ལགས། རྣ་བ་དང་ལྡན་པ་ཡང་མ་
107b
ལགས། སྒྲ་དང་ལྡན་པ་ཡང་མ་ལགས། རྣ་བའི་རྣམ་པར་ཤེས་པ་དང་ལྡན་པ་ཡང་མ་ལགས། སྣ་དང་ལྡན་པ་ཡང་མ་ལགས། དྲི་དང་ལྡན་པ་ཡང་མ་ལགས། སྣའི་རྣམ་པར་ཤེས་པ་དང་ལྡན་པ་ཡང་མ་ལགས། ལྕེ་དང་ལྡན་པ་ཡང་མ་ལགས། རོ་དང་ལྡན་པ་ཡང་མ་ལགས། ལྕེའི་རྣམ་པར་ཤེས་པ་དང་ལྡན་པ་ཡང་མ་ལགས། ལུས་དང་ལྡན་པ་ཡང་མ་ལགས། རེག་བྱ་དང་ལྡན་པ་ཡང་མ་ལགས། ལུས་ཀྱི་རྣམ་པར་ཤེས་པ་དང་ལྡན་པ་ཡང་མ་ལགས། ཡིད་དང་ལྡན་པ་ཡང་མ་ལགས། ཆོས་རྣམས་དང་ལྡན་པ་ཡང་མ་ལགས། ཡིད་ཀྱི་རྣམ་པར་ཤེས་པ་དང་ལྡན་པ་ཡང་མ་ལགས་ཏེ། དེ་ལྟ་བུའི་ཆོ་འཕྲུལ་དེ་ནི་ཡུལ་མ་མཆིས་པའི་ཆོ་འཕྲུལ་ལགས་སོ། །དེ་ནི་ཡུལ་དང་བྲལ་བའི་ཆོ་འཕྲུལ་ལགས་ཏེ། ཆོ་འཕྲུལ་དེ་ནི་ལུས་དང་ལྡན་པར་ལྟ་བ་མ་ལགས། སེམས་དང ། ཡིད་དང ། རྣམ་པར་ཤེས་པ་དང་ལྡན་པར་ལྟ་བ་མ་ལགས་ཏེ། དེའི་སླད་དུ་ཆོ་འཕྲུལ་དེ་ནི་འཇིག་རྟེན་ཐམས་ཅད་གློ་བ་མི་ཆེས་པར་འགྱུར་བ་ལགས་སོ། །དེ་ཅིའི་སླད་དུ་ཞེ་ན། འཇིག་རྟེན་ཞེས་བགྱི་བ་ནི་ཕུང་པོ་ལྔ་པོ་དག་ལགས་ཏེ། ཕུང་པོ་ལྔ་པོ་མི་རྟག་པ་དེ་ལ་བྱིས་པ་རྣམས་མངོན་པར་ཞེན་ཅིང།་དེ་དག་གི་ཕུང་པོ་ལྔ་པོ་དག་རྟག་པར་བཟུང་བའི་སླད་དུ་སྟེ། དེའི་སླད་དུ་ཆོ་འཕྲུལ་དེ་ནི་འཇིག་རྟེན་ཐམས་ཅད་གློ་བ་མི་ཆེས་པར་འགྱུར་བ་ལགས་སོ། །འཇིག་རྟེན་གྱི་ཕུང་པོ་ལྔ་
108a
༄#། །པོ་དག་རྟག་ཅེས་བགྱི་བར་གློ་བ་ཆེས་པས་ན། དེ་དག་མི་རྟག་གོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་པ་ལགས་སོ། །འཇིག་རྟེན་ནི་ཕུང་པོ་ལྔ་པོ་དག་བདེ་ཞེས་བགྱི་བར་གློ་བ་ཆེས་པས་ན། དེ་དག་སྡུག་བསྔལ་ལོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་པ་ལགས་སོ། །འཇིག་རྟེན་ནི་ཕུང་པོ་ལྔ་པོ་དག་བདག་ཅེས་བགྱི་བར་གློ་བ་ཆེས་པས་ན་དེ་དག་བདག་མ་མཆིས་སོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་ལགས་སོ། །འཇིག་རྟེན་ནི་ཕུང་པོ་ལྔ་པོ་དག་སྡུག་ཅེས་བགྱི་བར་གློ་བ་ཆེས་པས་ན།་དེ་དག་མི་སྡུག་གོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་ལགས་སོ། །འཇིག་རྟེན་ནི་ཕུང་པོ་ལྔ་པོ་དག་བདག་གི་ཞེས་བགྱི་བར་གློ་བ་ཆེས་པས་ན། དེ་དག་བདག་པོ་མ་མཆིས་སོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་ལགས་སོ། །འཇིག་རྟེན་ནི་ཕུང་པོ་ལྔ་པོ་དག་ཡང་དག་པར་ཞེས་བགྱི་བར་གློ་བ་ཆེས་པས་ན། དེ་དག་ཡང་དག་པ་མ་ལགས་སོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་པ་ལགས་ཏེ། དེའི་སླད་དུ་དེ་བཞིན་གཤེགས་པའི་ཆོ་འཕྲུལ་དེ་ནི། འཇིག་རྟེན་ཐམས་ཅད་གློ་བ་མི་ཆེས་པར་འགྱུར་བ་ལགས་སོ། །ཆོ་འཕྲུལ་དེ་ལ་ནི་སེམས་རངས་པར་མི་འགྱུར་ལགས་ཏེ། ཆོ་འཕྲུལ་དེ་ནི་བསམ་གྱིས་མི་ཁྱབ་པ་ལགས་སོ། །ཆོ་འཕྲུལ་དེ་ནི་མིག་ཏུ་བགྲང་བ་མ་ལགས། གཟུགས་སུ་བགྲང་བ་
108b
མ་ལགས་ཏེ། ཆོ་འཕྲུལ་དེ་ནི་མིག་དང་གཟུགས་ཀྱི་ཡུལ་ལས་ཡང་དག་པར་འདས་པ་ལགས་སོ། །ཆོ་འཕྲུལ་དེ་ནི་རྣ་བར་བགྲང་བ་མ་ལགས། སྒྲར་བགྲང་བ་མ་ལགས་ཏེ། ཆོ་འཕྲུལ་དེ་ནི་རྣ་བ་དང་སྒྲའི་ཡུལ་ལས་ཡང་དག་པར་འདས་པ་ལགས་སོ། །དེ་བཞིན་དུ་སྦྱར་ཏེ། ཆོ་འཕྲུལ་དེ་ནི་ཡིད་དུ་བགྲང་བ་མ་ལགས། ཆོས་སུ་བགྲང་བ་མ་ལགས་ཏེ། ཆོ་འཕྲུལ་དེ་ནི་ཡིད་དང ། ཆོས་ཀྱི་ཡུལ་ལས་ཡང་དག་པར་འདས་པ་ལགས་སོ། །ཆོ་འཕྲུལ་དེ་ནི་ཤེས་པའི་སྤྱོད་ཡུལ་མ་ལགས། རངས་པར་བགྱིད་པ་མ་ལགས་ཏེ། ཆོ་འཕྲུལ་དེ་ནི་རྣམ་པར་རིག་པར་བགྱི་བ་མ་ལགས་སོ། །སྟོང་པ་ཉིད་ནི་བརྗོད་དུ་མ་མཆིས་པ་ལགས་ན། སྟོང་པ་ཉིད་བརྗོད་པ་དེ་ནི་ཆོ་འཕྲུལ་ལགས་སོ། །མཚན་མ་མ་མཆིས་པ་ནི་བརྗོད་དུ་མ་མཆིས་པ་ལགས་ན། མཚན་མ་མ་མཆིས་པ་བརྗོད་པ་དེ་ནི་ཆོ་འཕྲུལ་ལགས་སོ། །སྨོན་པ་མ་མཆིས་པ་ནི་བརྗོད་དུ་མ་མཆིས་པ་ལགས་ན། སྨོན་པ་མ་མཆིས་པ་བརྗོད་པ་དེ་ནི་ཆོ་འཕྲུལ་ལགས་སོ། །མངོན་པར་འདུ་བགྱི་བ་མ་མཆིས་པ་ནི་བརྗོད་དུ་མ་མཆིས་པ་ལགས་ན། མངོན་པར་འདུ་བགྱི་བ་མ་མཆིས་པ་བརྗོད་པ་དེ་ནི་ཆོ་འཕྲུལ་ལགས་སོ། །སྐྱེ་བ་མ་མཆིས་པ་ནི་བརྗོད་དུ་མ་མཆིས་པ་ལགས་ན། སྐྱེ་བ་མ་མཆིས་པ་བརྗོད་པ་དེ་ནི་ཚེ་འཕྲུལ་ལགས་སོ། །འབྱུང་བ་མ་མཆིས་པ་ནི་བརྗོད་དུ་མ་མཆིས་པ་ལགས་ན། འབྱུང་བ་མ་མཆིས་པ་བརྗོད་པ་དེ་ནི་ཆོ་འཕྲུལ་ལགས་སོ། །དངོས་པོ་
109a
༄#། །མ་མཆིས་པ་ནི་བརྗོད་དུ་མ་མཆིས་པ་ལགས་ན། དངོས་པོ་མ་མཆིས་པ་བརྗོད་པ་དེ་ནི་ཆོ་འཕྲུལ་ལགས་སོ། །མཚན་ཉིད་མ་མཆིས་པ་ནི་བརྗོད་དུ་མ་མཆིས་པ་ལགས་ན། མཚན་ཉིད་མ་མཆིས་པ་བརྗོད་པ་དེ་ནི་ཆོ་འཕྲུལ་ལགས་སོ། །འགག་པ་མ་མཆིས་པ་ནི་བརྗོད་དུ་མ་མཆིས་པ་ལགས་ན། འགག་པ་མ་མཆིས་པ་བརྗོད་པ་དེ་ནི་ཆོ་འཕྲུལ་ལགས་སོ། །མྱ་ངན་ལས་འདས་པ་ནི་བརྗོད་དུ་མ་མཆིས་པ་ལགས་ན། མྱ་ངན་ལས་འདས་པ་བརྗོད་པ་དེ་ནི་ཆོ་འཕྲུལ་ལགས་སོ། །འདི་ལྟ་སྟེ། བདག་ཏུ་དམིགས་པ་མ་མཆིས་པ་དང ། སེམས་ཅན་དུ་ཀུན་འབྱུང་བ་མ་མཆིས་པ་དང ། བྱང་ཆུབ་ལ་རློམས་སེམས་མ་མཆིས་པའི་འཁོར་གསུམ་ཡོངས་སུ་དག་པའི་སྦྱིན་པ་དེ་ནི་ཆོ་འཕྲུལ་ལགས་སོ། །འདི་ལྟ་སྟེ། ལུས་གཡོ་བ་མ་མཆིས་པ་དང ། ངག་བརྗོད་པ་མ་མཆིས་པ་དང ། སེམས་རྒྱུ་བ་མ་མཆིས་པའི་འཁོར་གསུམ་ཡོངས་སུ་དག་པའི་ཚུལ་ཁྲིམས་དེ་ནི་ཆོ་འཕྲུལ་ལགས་སོ། །འདི་ལྟ་སྟེ།་སྲེད་པར་སྒྲོ་འདོགས་པ་མ་མཆིས་པ་དང ། སེམས་སྐད་ཅིག་ཏུ་འཇིག་པ་དང ། ལུས་དང་སེམས་རྣམ་པར་མི་རྟོག་པའི་འཁོར་གསུམ་ཡོངས་སུ་དག་པའི་བཟོད་པ་དེ་ནི་ཆོ་འཕྲུལ་ལགས་སོ། །འདི་ལྟ་སྟེ། བླང་བ་མ་མཆིས་པ་དང ། དོར་བ་མ་མཆིས་པ་དང ། གནས་པ་མ་མཆིས་པའི་འཁོར་གསུམ་ཡོངས་སུ་དག་པའི་བརྩོན་འགྲུས་དེ་ནི་ཆོ་འཕྲུལ་
109b
ལགས་སོ། །འདི་ལྟ་སྟེ། ནང་ཉེ་བར་ཞི་བ་དང ། ཕྱི་རོལ་དུ་རྒྱུ་བ་མ་མཆིས་པ་དང ། སེམས་བསམ་པ་མ་མཆིས་པའི་འཁོར་གསུམ་ཡོངས་སུ་དག་པའི་བསམ་གཏན་དེ་ནི་ཆོ་འཕྲུལ་ལགས་སོ། །འདི་ལྟ་སྟེ། ངར་འཛིན་པ་རྣམ་པར་སྤངས་པ་དང ། ང་ཡི་བ་རྣམ་པར་སྤངས་པ་དང ། ང་ཡི་ར་འཛིན་པ་བོར་བ་དང ། ལྟ་བའི་རྣམ་པ་ཐམས་ཅད་དང་བྲལ་བའི་འཁོར་གསུམ་ཡོངས་སུ་དག་པའི་ཤེས་རབ་དེ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་རྣམ་པར་བྲལ་བ་མ་མཆིས་པ་ལགས་ན། དེ་དག་རྣམ་པར་བྲལ་བར་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་དངོས་པོ་མ་མཆིས་པ་ལགས་ན། རང་གི་ངོ་བོ་དང་བྲལ་བར་བཤད་པ་དེ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་དབྱེར་མ་མཆིས་པ་ལགས་ན། ཡི་གེས་ཀུན་ཏུ་ཕྱེ་སྟེ་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་འོང་བ་མ་མཆིས་པ་དང ། འགྲོ་བ་མ་མཆིས་པ་ལགས་ན། འོང་བ་དང་འགྲོ་བར་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་འབྱུང་བ་མ་མཆིས་པ་ལགས་ན། འབྱུང་བར་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་མངོན་པར་རྟོགས་པ་གཅིག་པ་ལགས་ན། འབྲས་བུ་རྣམ་པར་དགོད་པ་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་རོ་གཅིག་པ་ལགས་ན། ཐེག་པ་གསུམ་དུ་རྣམ་པར་དགོད་པ་བཤད་པ་ནི་ཆོ་འཕྲུལ་ལགས་སོ། །ཆོས་ཀྱི་དབྱིངས་ནི་དབྱེར་མ་
110a
༄#། །མཆིས་པ་ལགས་ན། ཆོས་ཐམས་ཅད་རྣམ་པར་དགོད་པ་བཤད་པ་ནི་ཆོ་འཕྲུལ་ལགས་སོ། །སངས་རྒྱས་ཐམས་ཅད་ནི་སངས་རྒྱས་གཅིག་པ་ལགས་ན། སངས་རྒྱས་དཔག་ཏུ་མ་མཆིས་པར་བཤད་པ་ནི་ཆོ་འཕྲུལ་ལགས་སོ། །ཞིང་ཐམས་ཅད་ཞིང་གཅིག་པ་ལགས་ན། ཞིང་སྣ་ཚོགས་བཤད་པ་ནི་ཆོ་འཕྲུལ་ལགས་སོ། །སེམས་ཅན་ཐམས་ཅད་ནི་སེམས་ཅན་གཅིག་པ་ལགས་ན། སེམས་ཅན་གྱི་རིམ་པ་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་ཆོས་གཅིག་པ་ལགས་ན། ཐ་མ་དང་མཆོག་དང་བར་མར་བཤད་པའི་ཆོ་འཕྲུལ་ལགས་སོ། །ཆོས་ཐམས་ཅད་ནི་རྣམ་པར་བསྒྲུབས་པ་མ་མཆིས་པ་ལགས་ན། རྣམ་པར་བསྒྲུབས་པའི་མཚན་ཉིད་བཤད་པ་ནི་ཆོ་འཕྲུལ་ལགས་སོ། ། ཆོས་ཐམས་ཅད་ནི་རྣམ་པར་རིག་པ་མ་མཆིས་པ་ལགས་ན། གཞན་ལ་རྣམ་པར་རིག་པ་བཤད་པ་ནི་ཆོ་འཕྲུལ་ལགས་སོ། །དེ་ནས་ལྷའི་བུ་དེད་དཔོན་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་ཇི་སྐད་སྨྲས་པའི་དོན་ཁོ་བོས་ཤེས་པ་ལྟར་ན་ཇི་ཙམ་དུ་བརྗོད་པའི་ཆོས་དེ་དག་ཐམས་ཅད་ནི་ཆོ་འཕྲུལ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཆོས་ཐམས་ཅད་ནི་བརྗོད་དུ་མ་མཆིས་པ་ཡིན་པས་དེ་དག་བརྗོད་པ་གང་ཡིན་པ་དེ་ནི་ཆོ་འཕྲུལ་ཆེན་པོ་
110b
ཡིན་ནོ། །བསྟན་པ་འདི་བཤད་པ་ན་ལྷའི་བུ་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ལྔ་བརྒྱ་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་ཚེ་དང་ལྡན་པ་ཤཱ་རདྭ་ཏིའི་བུས་ལྷའི་བུ་དེད་དཔོན་ལ་འདི་སྐད་ཅེས་སྨྲས་སོ། །ལྷའི་བུ། ཅི་ཁྱོད་ཆོ་འཕྲུལ་བསྟན་པ་འདི་ཐོས་ནས་སྐྲག་པར་མི་འགྱུར་རམ། ལྷའི་བུས་སྨྲས་པ། བཙུན་པ་ཤཱ་རདྭ་ཏིའི་བུ། ཁོ་བོ་ཉིད་ཀྱང་ཆོ་འཕྲུལ་ཡིན་ན་དེ་ལ། ཁོ་བོ་སྐྲག་པར་འགྱུར་དུ་ཅི་ཡོད། ཤཱ་རདྭ་ཏིའི་བུས་སྨྲས་པ། ལྷའི་བུ། ཁྱོད་ཅི་ལས་བསམས་ཏེ་དེ་སྐད་སྨྲ། ལྷའི་བུས་སྨྲས་པ། བཙུན་པ་ཤཱ་རདྭ་ཏིའི་བུ། ཆོས་ཐམས་ཅད་ནི་འཕོ་བ་མེད་པ་ཡིན་ན། དེ་ལ་དགེ་བ་དང་མི་དགེ་བའི་ཆོས་འཕོ་བ་གང་ཡིན་པ་དེ་ནི་ཆོ་འཕྲུལ་ཆེན་པོ་ཡིན་ནོ། །བཙུན་པ་ཤཱ་རདྭ་ཏིའི་བུ། དགེ་བའི་ལས་མངོན་པར་འདུ་བྱ་བ་གང་གིས་ཁོ་བོ་ལྷ་རྣམས་ཀྱི་ནང་དུ་སྐྱེས་ཏེ། བདག་ཉིད་ཆེན་པོ་འདི་ཡང་ཐོབ་པའི་དགེ་བའི་ལས་མངོན་པར་འདུ་བྱ་བ་གང་ཡིན་པ་དེ་ནི་སེམས་པར་མི་བྱེད་ཅིང་རྣམ་པར་ཤེས་པར་མི་བྱེད་དོ། །དེ་ལྟ་བས་ན་སེམས་ཅན་ཐམས་ཅད་ཀྱི་འཆི་འཕོ་དང་སྐྱེ་བ་ཡང་སེམས་པར་མི་བྱེད་ཅིང ། རྣམ་པར་ཤེས་པར་མི་བྱེད་དེ། རྣམ་པར་ཤེས་པར་མི་བྱེད་པ་གང་ཡིན་པ་དེ་ནི་ཆོ་འཕྲུལ་ཆེན་པོ་ཡིན་ཏེ། བཅོམ་ལྡན་འདས་ཀྱིས་ཇི་སྐད་དུ་ལས་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་བོ། །ཀླུ་རྣམས་
111a
༄#། །ཀྱི་ཀླུའི་ཡུལ་ཡང་བསམ་གྱིས་མི་ཁྱབ་བོ། །བསམ་གཏན་པ་རྣམས་ཀྱི་བསམ་གཏན་གྱི་ཡུལ་ཡང་བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཡུལ་ཡང་བསམ་གྱིས་མི་ཁྱབ་བོ། །ཞེས་གསུངས་པ་ལྟ་བུ་སྟེ། དེ་ལྟ་བས་ན་ཆོས་ཐམས་ཅད་ནི་བསམ་གྱིས་མི་ཁྱབ་སྟེ། བསམ་གྱིས་མི་ཁྱབ་པ་གང་ཡིན་པ་དེ་ནི་ཆོ་འཕྲུལ་ཆེན་པོ་ཡིན་ནོ། །ཡང་གནས་བརྟན་ཤཱ་རདྭ་ཏིའི་བུས་འདི་སྐད་དུ། ལྷའི་བུ། ཅི་ཁྱོད་བཅོམ་ལྡན་འདས་ཀྱི་ཆོ་འཕྲུལ་བསྟན་པ་གང་ཡིན་པ་དེ་ཐོས་ན་སྐྲག་པར་མི་འགྱུར་རམ་ཞེས་ཟེར་བ་ནི། བཙུན་པ་ཤཱ་རདྭ་ཏིའི་བུ། ཅི་དེ་བཞིན་གཤེགས་པས་ཆོ་འཕྲུལ་བསྟན་པ་གང་ཡིན་པ་དེས་ནམ་མཁའི་ཁམས་སྐྲག་པར་འགྱུར་རམ། སྨྲས་པ། ལྷའི་བུ། དེ་ནི་མ་ཡིན་ནོ། །སྨྲས་པ། བཙུན་པ་ཤཱ་རདྭ་ཏིའི་བུ། གལ་ཏེ་དེ་བཞིན་གཤེགས་པས་ཆོ་འཕྲུལ་བསྟན་པ་དེས་ནམ་མཁའི་ཁམས་སྐྲག་པར་མི་འགྱུར་ན་ཁོ་བོ་ཡང་སྐྲག་པར་མི་འགྱུར་རོ། །སྨྲས་པ། ལྷའི་བུ། ཅི་ཁྱོད་ནམ་མཁའ་ཡིན་ནམ། སྨྲས་པ། བཙུན་པ་ཤཱ་རདྭ་ཏིའི་བུ། ཁོ་བོ་ནི་ནམ་མཁའ་ཡིན་ནོ། །སྨྲས་པ། ལྷའི་བུ། ཁྱོད་ཅི་ལས་བསམས་ཏེ་དེ་སྐད་སྨྲ། སྒྲས་པ། བཙུན་པ་ཤཱ་རདྭ་ཏིའི་བུ། ཅི་བཅོམ་ལྡན་འདས་ཀྱིས་ནང་གི་ནམ་མཁའི་ཁམས་སུ་གསུངས་པ་གང་ཡིན་པ་དང ། ཕྱི་རོལ་གྱི་ནམ་མཁའི་ཁམས་སུ་གསུངས་པ་གང་
111b
ཡིན་པ་དེ་ཉིད་ནམ་མཁའི་ཁམས་མ་ཡིན་ནམ། སྨྲས་པ། ལྷའི་བུ། དེ་ནི་ཡིན་ནོ། །སྨྲས་པ། བཙུན་པ་ཤཱ་རདྭ་ཏིའི་བུ། དེ་ལྟ་བས་ན་སེམས་ཅན་ཐམས་ཅད་ཀྱང་ནམ་མཁའི་ཁམས་ཀྱི་རང་བཞིན་ཅན་ཡིན་ནོ། །སྨྲས་པ། ལྷའི་བུ། ཇི་ལྟར་ཁྱོད་ཀྱིས་བསྟན་པ་བཞིན་དུ་ཁྱོད་ཉིད་ཀྱང་རིང་པོ་མ་ཐོགས་པར་ཆོ་འཕྲུལ་དེ་དག་ཉིད་ཉེ་བར་སྟོན་པར་འགྱུར་རོ། །སྨྲས་པ། བཙུན་པ་ཤཱ་རདྭ་ཏིའི་བུ། ཆོ་འཕྲུལ་དེ་དག་ནི་ཉེ་བར་བསྟན་པར་མི་ནུས་སོ། །དེ་ཅིའི་སླད་དུ་ཞེ་ན། ཆོ་འཕྲུལ་དེ་དག་ནི་ཡུལ་ཐམས་ཅད་ལས་ཡང་དག་པར་འདས་པ་ཡིན་པའི་ཕྱིར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རདྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། ལྷའི་བུ་དེད་དཔོན་འདི་དེ་ལྟ་བུར་སྟོན་པ་ལས་ན་འདི་ནི་སྔོན་གྱི་རྒྱལ་བ་ལ་ལྷག་པར་བགྱི་བ་བགྱིས་ཤིང ། འཇམ་དཔལ་གཞོན་ནུར་གྱུར་པ་ལ་ཡང་བསྙེན་བཀུར་བགྱིས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རདྭ་ཏིའི་བུ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཤཱ་རདྭ་ཏིའི་བུ། ལྷའི་བུ་དེད་དཔོན་འདི་ནི་འཇམ་དཔལ་གཞོན་ནུར་གྱུར་པས་ཡོངས་སུ་སྨིན་པར་བྱས་པ་ཡིན་ནོ། །ཤཱ་རདྭ་ཏིའི་བུ། སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ་འདས་པར་གྱུར་པ་དེའི་ཚེ་དེའི་དུས་ན། བསྐལ་པ་མངོན་པར་དགའ་བ་ཞེས་བྱ་བ་ལ་འཇིག་རྟེན་གྱི་ཁམས་བདེ་བ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་
112a
༄#། །ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རི་རབ་ལྟ་བུ་ཞེས་བྱ་བ་འཇིག་རྟེན་དུ་བྱུང་བར་གྱུར་ཏོ། །ཤཱ་རདྭ་ཏིའི་བུ། འཇིག་རྟེན་གྱི་ཁམས་བདེ་བ་ཞེས་བྱ་བ་དེ་ཡང་འཇིག་རྟེན་གྱི་ཁམས་དེ་ན་སེམས་ཅན་རྣམས་བདེ་བ་ཐམས་ཅད་དང་ལྡན་པར་གནས་ཤིང ། སྡུག་བསྔལ་བ་དང ། ཡིད་མི་བདེ་བའི་སྒྲ་འགའ་ཙམ་ཡང་མེད་ལ། འཇིག་རྟེན་གྱི་ཁམས་དེ་ཡང་རིན་པོ་ཆེ་སྣ་བཞི་གསེར་དང ། དངུལ་དང ། བཻ་ཌཱུརྱ་དང ། ཤེལ་ལས་གྲུབ་ཅིང ། ལག་མཐིལ་ལྟར་མཉམ་ལ། ཀ་ཙ་ལིན་དའི་གོས་ལྟར་རེག་ན་འཇམ་ཞིང ། མི་ཁོམ་པ་དང ། ངན་སོང་རྣམས་དང་བྲལ་ལ། ལྷ་དང་མི་རྣམས་ཀྱིས་ཀུན་ཏུ་གང་ཞིང ། ཡིད་ལ་བསམས་པ་ཙམ་གྱིས་བཟའ་བ་དང་བཏུང་བ་དག་འབྱོར་ལ། བདེ་བ་ཚད་མེད་པ་དང་ལྡན་པས་ན་དེའི་ཕྱིར་འཇིག་རྟེན་གྱི་ཁམས་དེ་བདེ་བ་ཞེས་བྱའོ། །དེ་བཞིན་གཤེགས་པ་དེའི་དགེ་འདུན་ནི་བྱང་ཆུབ་སེམས་དཔའ་འབའ་ཞིག་སྟེ། བརྩོན་འགྲུས་འབར་བ། ཤེས་རབ་ཀྱི་སྣང་བ་ཐོབ་པ། གཟུངས་དང་མདོ་སྡེའི་རྒྱལ་པོ་ཐོབ་པ། སྤོབས་པ་མི་ཆོད་པ། ཚིག་ཐམས་ཅད་རབ་ཏུ་འབྱེད་ཅིང་སྟོན་པའི་ཤེས་པ་ལ་མཁས་པ། མངོན་པར་ཤེས་པས་རྣམ་པར་
112b
ཤེས་པ་ཁོང་དུ་ཆུད་པ། བདུད་དང་ཕྱིར་རྒོལ་བ་ངེས་པར་བཅོམ་པ། སྒྲིབ་པ་མེད་པའི་རྣམ་པར་ཐར་པའི་ཡེ་ཤེས་ཀྱི་བཟོད་པ་དང་ལྡན་པ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ལ་ཇི་ལྟར་རིགས་པ་བཞིན་དུ་ཆོས་ཀྱི་སྨན་སྦྱོར་བ་ལ་མཁས་པ། བསོད་ནམས་དང་ཡེ་ཤེས་ཀྱི་ཚོགས་ཆེན་པོ་བསགས་པ། གསོལ་བ་མ་བཏབ་པར་སེམས་ཅན་ཐམས་ཅད་ཀྱི་དགེ་བའི་བཤེས་གཉེན་བྱེད་པ། རྫུ་འཕྲུལ་གྱིས་སངས་རྒྱས་ཀྱི་ཞིང་ཐམས་ཅད་དུ་འགྲོ་བའི་ཤེས་པ་ལ་མཁས་པ། དྲན་པ་དང ། བློ་གྲོས་དང ། རྟོགས་པ་དང ། ངོ་ཚ་ཤེས་པ་དང ། བརྟན་པ་དང ། བློ་རྒྱ་མཚོའི་རྗེས་སུ་ཞུགས་པ། སྦྱིན་པ་དང ། དུལ་བ་དང ། ལེགས་པར་སྡོམ་པ་དང ། ཚུལ་ཁྲིམས་དང ། ཐོས་པ་དང ། ཤེས་རབ་ལ་ཤིན་ཏུ་གནས་པ། ཐབས་མཐའ་ཡས་པས་དགེ་བའི་རྩ་བ་ཡོངས་སུ་བསྔོ་བ་ལ་མཁས་པ། སྟོབས་དང ། མི་འཇིགས་པ་དང ། སངས་རྒྱས་ཀྱི་ཆོས་ཐམས་ཅད་ལ་ལྷག་པའི་བསམ་པས་ཤིན་ཏུ་ཞུགས་པ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པས་རྣམ་པར་རྩེ་བའི་བྱང་ཆུབ་སེམས་དཔའ་ཤ་སྟག་གོ། ཤཱ་རདྭ་ཏིའི་བུ། དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེའི་གསུང་རབ་ལ་འཁོར་ལོས་བསྒྱུར་བའི་རྒྱལ་པོ་དགེ་བའི་བཀོད་པ་ཞེས་བྱ་བ་ཆོས་དང་ལྡན་པ། ཆོས་
113a
༄#། །ཀྱི་རྒྱལ་པོ་གླིང་བཞིའི་དབང་ཕྱུག། རིན་པོ་ཆེ་སྣ་བདུན་དང་ལྡན་པ། མིའི་དབང་པོར་གྱུར་པ་ལྟ་བུ་ཞིག་བྱུང་བར་གྱུར་ཏོ། །དེའི་བུ་སྟོང་དུ་ཚང་བར་གྱུར་ཏེ། དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་ཤ་སྟག་གོ། ཤཱ་རདྭ་ཏིའི་བུ། རྒྱལ་པོ་དགེ་བའི་བཀོད་པ་དེ་ཡང་བཙུན་མོའི་ཚོགས་རྣམས་དང་ལྷན་ཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེའི་སྐུ་ཚེའི་ཚད་དང ། མི་དག་གི་ཚེ་ཚད་ནི་ལོ་དུང་ཕྱུར་ཕྲག་བདུན་དུ་གྱུར་ཏོ། །དེ་ནས་རྒྱལ་པོ་དགེ་བའི་བཀོད་པ་བུ་སྟོང་དང་ལྷན་ཅིག། བཙུན་མོའི་འཁོར་དང་ལྷན་ཅིག་ཏུ་ཆོས་ལ་དགའ་བ་དང ། མཆོག་ཏུ་དགའ་བ་དང ། དད་པ་ཐོབ་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་བྱང་ཆུབ་སེམས་དཔའི་དགེ་འདུན་དང་བཅས་པ་དེ་ལ་ལོ་འབུམ་ཚང་བར་ཐུགས་ལ་དགོངས་པ་བཞིན་དུ་ན་བཟའ་དང ། ཞལ་ཟས་དང ། གཟིམས་ཆ་དང།་གདན་དང ། སྙུན་གྱི་གསོས་སྨན་དང ། ཡོ་བྱད་རྣམས་དང ། བདེ་བར་སྦྱར་བ་ཐམས་ཅད་ཀྱིས་བསྙེན་བཀུར་བྱས་སོ། །རྒྱལ་པོ་དགེ་བའི་བཀོད་པ་འཁོར་དང་བཅས་པས་
113b
རྟག་པར་རྒྱུན་དུ་དེ་བཞིན་གཤེགས་པ་དེ་ལ་མངོན་སུམ་དུ་ཉིན་གཅིག་མི་འཆད་པར་རང་གི་ལག་ནས་གུས་པར་ཕུལ་ཞིང ། རྟག་ཏུ་རྒྱུན་མི་འཆད་པར་ཆོས་ཉན་པ་ལ་ཡང་འཇུག་པར་གྱུར་ཏོ། ། དེ་བུ་དང་བཅས། བཙུན་མོའི་འཁོར་དང་བཅས་པས་ལོ་འབུམ་འདས་ནས་ཀྱང་ཡང་དང་ཡང་དུ་སངས་རྒྱས་མཐོང་ཞིང ། ཡང་དང་ཡང་དུ་དེ་ལ་ཆོས་ཉན་པས་རྗེས་སུ་དྲན་པ་བཞི་ཐོབ་པར་གྱུར་ཏོ། །བཞི་གང་ཞེ་ན། སངས་རྒྱས་རྗེས་སུ་དྲན་པ་དང ། ཆོས་རྗེས་སུ་དྲན་པ་དང ། དགེ་འདུན་རྗེས་སུ་དྲན་པ་དང ། སྦྱིན་པ་དང་ལྡན་ཞིང་བྱང་ཆུབ་ཀྱི་སེམས་མི་བརྗེད་པའི་ཚུལ་ཁྲིམས་རྗེས་སུ་དྲན་པ་སྟེ། རྗེས་སུ་དྲན་པ་བཞི་པོ་དེ་དག་ཐོབ་པར་གྱུར་ཏོ། །དེ་རྗེས་སུ་དྲན་པ་བཞི་པོ་དེ་དག་དང་ལྡན་པས་ཉིན་མཚན་དུ་སངས་རྒྱས་མཐོང་བ་དང ། ཆོས་ཡང་དག་པར་བགྲོ་བ་དང ། བྱང་ཆུབ་སེམས་དཔའི་དགེ་འདུན་མཐོང་བ་དང་བྲལ་བར་མ་གྱུར་ཏོ། །དེ་ནས་དུས་གཞན་ཞིག་ན་རྒྱལ་པོ་དགེ་བའི་བཀོད་པ་བུ་དང་བཅས། བཙུན་མོའི་འཁོར་དང་བཅས་པ་དེ་ཆོས་མཉན་པའི་ཕྱིར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེ་ག་ལ་བ་དེར་སོང་ངོ ། །དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེས་བྱང་ཆུབ་སེམས་དཔའ་དེ་དག་ལ་ཆོ་འཕྲུལ་རྣམ་པ་དུ་མས་རྗེས་སུ་གདམས་པ་མཛད་པར་གྱུར་ཏོ། །དེ་ནས་བཅོམ་ལྡན་
114a
༄#། །འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེ་ལ་རྒྱལ་པོ་དགེ་བའི་བཀོད་པ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོ་འཕྲུལ་དེ་དག་མ་ལགས་པའི་ཆོ་འཕྲུལ་དམ་པ་གཞན་མ་མཆིས་ལགས་སམ། དེ་སྐད་ཅེས་གསོལ་པ་དང ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེས་རྒྱལ་པོ་དགེ་བའི་བཀོད་པ་དེ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ། ཆོ་འཕྲུལ་དེ་དག་མ་ཡིན་པའི་ཆོ་འཕྲུལ་དམ་པ་གཞན་ཡང་ཡོད་དོ། །དེ་ཡང་གང་ཞེ་ན། འདི་ལྟ་སྟེ། སེམས་དང་སེམས་ལས་བྱུང་བ་གཟུགས་ཅན་མ་ཡིན་པ་རྣམས་བཤད་པ་དང ། སེམས་དང་སེམས་ལས་བྱུང་བ་འགགས་པ་རྣམས་བཤད་པ་དང ། ད་ལྟར་བྱུང་བའི་སེམས་དང་སེམས་ལས་བྱུང་བ་མི་གནས་པ་རྣམས་སྨོས་པ་དང ། མ་སྐྱེས་མ་བྱུང་བའི་ལམ་བཤད་པ་དང ། རྣམ་པར་ཐར་པའི་སྒོ་རོ་གཅིག་པ་རྣམས་ལ་ཡན་ལག་གསུམ་དུ་སྨོས་པ་དང ། མངོན་པར་རྟོགས་པ་གཅིག་ཏུ་འདུས་པ་ལ་བདེན་པ་བཞིར་ཡོངས་སུ་བརྗོད་པ་དང ། མཚན་མ་མེད་པ་དང ། རྣམ་པ་མེད་པ་དང།་འདུས་མ་བྱས་པའི་བྱང་ཆུབ་ལ་ཡོངས་སུ་སྒྲུབ་པར་བྱེད་པ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་ཆོས་རྣམས་བཤད་པ་དང ། ཕྱིན་ཅི་
114b
ལོག་དང་ཉོན་མོངས་པས་གྲུབ་པའི་སེམས་ཅན་རྣམས་ཡོངས་སུ་སྨིན་པར་བྱེད་པ་དང ། བླང་བ་མེད་པ་དང ། དོར་བ་མེད་པའི་ཆོས་རྣམས་ལ་སྦྱིན་པའི་ཕ་རོལ་ཏུ་ཕྱིན་པ་ཡོད་པ་དང ། མངོན་པར་འདུ་བྱེད་པ་མེད་པ་དང ། བྱས་པ་མེད་པའི་ཆོས་རྣམས་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོད་པ་དང ། འབྱུང་བ་མེད་ཅིང་སྐད་ཅིག་མའི་ཆོས་རྣམས་ལ་བཟོད་པའི་ཕ་རོལ་ཏུ་ཕྱིན་པ་ཡོད་པ་དང ། ལུས་དང་སེམས་དབེན་པའི་ཆོས་རྣམས་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོད་པ་དང ། བསྡུས་པ་དང ། རྣམ་པར་གཡེངས་པ་མེད་པའི་ཆོས་རྣམས་ལ་བསམ་གཏན་གྱི་ཕ་རོལ་ཏུ་ཕྱིན་པ་ཡོད་པ་དང ། ཕ་རོལ་དང ། ཚུ་རོལ་མེད་པའི་ཆོས་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོད་པ་དང ། བརྟག་པ་དང ། བསལ་བ་མེད་པའི་ཆོས་རྣམས་ལ་ཐབས་མཁས་པ་ཡོད་པ་དང ། སྐྱོབ་པ་མེད་པ་དང ། རྟོན་པ་མེད་པའི་ཆོས་རྣམས་ལ་བྱམས་པ་བསྒོམ་པ་དང ། བྱ་བ་མེད་པ་དང ། གཞིག་པ་མེད་པའི་ཆོས་རྣམས་ལ་སྙིང་རྗེས་སྦྱོར་བ་དང ། དགའ་བ་མེད་པའི་ཆོས་རྣམས་ལ་དགའ་བ་མངོན་པར་སྒྲུབ་པ་དང ། གནས་པ་མེད་པའི་ཆོས་རྣམས་ལ་བཏང་སྙོམས་བསྒོམ་པ་དང ། ཤེས་པ་མེད་པ་དང ། མཐོང་བ་མེད་པའི་ཆོས་རྣམས་ལ་ལྷའི་མིག་མངོན་པར་སྒྲུབ་པ་དང ། ཐོས་པ་མེད་པ་དང ། རྣམ་པར་རིག་པ་མེད་པའི་ཆོས་རྣམས་ལ་ལྷའི་རྣ་བ་མངོན་པར་སྒྲུབ་པ་དང ། དམིགས་
115a
༄#། །པ་དང ། སེམས་པ་དང ། རྣམ་པར་བྲལ་བའི་ཆོས་རྣམས་ལ་ཕ་རོལ་གྱི་སེམས་ཤེས་པ་ཡོད་པ་དང ། སྔོན་གྱི་མཐའ་དང་བྲལ་བའི་ཆོས་རྣམས་ལ་སྔོན་གྱི་གནས་རྗེས་སུ་དྲན་པ་ཤེས་པ་ཡོད་པ་དང ། སེམས་དང ། ལུས་དང ། སྒྲ་དང ། བརྩོན་འགྲུས་དང་བྲལ་བའི་ཆོས་རྣམས་ལ་རྫུ་འཕྲུལ་གྱི་རྐང་པ་འཐོབ་པ་དང ། གནས་པ་མེད་པའི་ཆོས་རྣམས་ལ་དྲན་པ་ཉེ་བར་གཞག་པ་བསྒོམ་པ་དང ། སྐྱེ་བ་མེད་པ་དང ། འགག་པ་མེད་པའི་ཆོས་རྣམས་ལ་ཡང་དག་པའི་སྤོང་བ་བསྒོམ་པ་དང ། དབང་པོ་མེད་པའི་ཆོས་རྣམས་ལ་དབང་པོ་བསྟན་པ་དང ། སྟོབས་མེད་པ་དང ། ཉམ་ཆུང་བའི་ཆོས་རྣམས་ལ་སྟོབས་ཡོངས་སུ་བརྗོད་པ་དང ། ཉེ་བར་ཞི་བའི་ཆོས་རྣམས་ལ་བྱང་ཆུབ་ཀྱི་ཡན་ལག་བཤད་པ་དང ། ཁྱད་པར་མེད་པའི་ཆོས་རྣམས་ལ་ལམ་སྨོས་པ་དང ། ཞི་བའི་མཐར་སོང་བའི་ཆོས་རྣམས་ལ་ཞི་གནས་བསྐྱེད་པ་དང ། རྣམ་པར་གྲོལ་བའི་མཚན་ཉིད་ཀྱི་ཆོས་རྣམས་ལ་ལྷག་མཐོང་ལ་མཁས་པ་དང ། རང་བཞིན་གྱིས་ཡོངས་སུ་མྱ་ངན་ལས་འདས་པའི་ཆོས་རྣམས་ལ་མྱ་ངན་ལས་འདས་པར་སྨོན་པའོ། །ཞེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེས་རྒྱལ་པོ་དགེ་བའི་བཀོད་པ་དེ་དང ། བུ་སྟོང་པོ་དེ་དག་དང ། བཙུན་མོའི་ཚོགས་
115b
དེ་དག་ལ་ཆོ་འཕྲུལ་བསྟན་པའི་ཆོས་ཀྱི་རྣམ་གྲངས་དེ་ཉིད་ལས་བརྩམས་ཏེ། དེ་ལྟ་དེ་ལྟར་ཆོས་བསྟན་པ་དང་སྲོག་ཆགས་བརྒྱད་ཁྲི་བཞི་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །རྒྱལ་པོ་དགེ་བའི་བཀོད་པ་དང ། དེའི་བུ་སྟོང་གིས་ནི་ཆོས་རྣམས་ལ་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །དེ་དག་གིས་བཟོད་པ་ཐོབ་ནས་སངས་རྒྱས་ཀྱི་མཐུ་དང ། རང་གི་སྤོབས་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཇི་ལྟར་རྒྱ་མཚོའི་དབུས་ན་ནི། །ལྷུན་པོའི་རྒྱལ་པོ་མཛེས་པ་ལྟར། །དེ་བཞིན་དགེ་འདུན་དབུས་ན་ནི། །ཆོས་ཀྱི་རྒྱལ་པོ་རྣམ་པར་མཛེས། །ཇི་ལྟར་ཉི་མ་འཆར་བ་ཡིས། །མུན་པ་ཐམས་ཅད་སེལ་བ་ལྟར། །དེ་བཞིན་སངས་རྒྱས་མཛོད་སྤུ་ཡང ། །སངས་རྒྱས་ཞིང་རྣམས་སྣང་བར་བགྱིད། །ཇི་ལྟར་ཟླ་བ་ཉ་བ་ཡིས། །ཟླ་བ་ཡོངས་རྫོགས་ལྷང་ངེ་ལྟར། །སངས་རྒྱས་ཆོས་རྣམས་རྫོགས་པ་ཡི། །འཇིག་རྟེན་མགོན་ཡང་ལྷང་ངེ་ལགས། །ཇི་ལྟར་མེ་ཏོག་པདྨ་ནི། །ཆབ་ཀྱི་ནང་དུ་མི་གོས་ལྟར། །དེ་བཞིན་འཇིག་རྟེན་མགོན་པོ་ཡང ། །འཇིག་རྟེན་ཆོས་ཀྱིས་མི་གོས་ལགས། །ཇི་ལྟར་སེང་གེ་རི་དྭགས་རྒྱལ། །ནགས་ན་སྒྲ་སྐད་སྒྲོགས་པ་ལྟར། །དེ་བཞིན་སྐྱེས་བུ་སེང་གེ་ཡང ། །སྟོང་པ་ཉིད་ཀྱི་
116a
༄#། །སྒྲ་སྐད་སྒྲོགས། །མཆིས་སམ་ཡང་ན་མ་མཆིས་དང ། །མཆིས་དང་མ་མཆིས་ཐམས་ཅད་དང ། །མཐར་ལྟ་བ་ལ་རྣམ་འདས་པས། །ངེས་པར་སེང་གེ་སྒྲ་ཞེས་བགྱི། །སྐྱེ་བའམ་ཡང་ན་འཇིག་པའང་རུང ། །དེ་དག་མཚན་མར་བསྟན་འཛིན་ཅིང ། །མི་སྐྱེ་འགག་པ་མ་མཆིས་པ། །ངེས་པར་སེང་གེའི་སྒྲ་ཞེས་བགྱི། །ཕ་རོལ་དང་ནི་ཚུ་རོལ་དག།་དེ་དག་རྣམ་པར་རྟོག་པར་བསྟན། །ཆོས་རྣམས་ཀུན་ལ་མི་གནས་པ། །ངེས་པར་སེང་གེའི་སྒྲ་ཞེས་བགྱི། །ཀུན་ནས་ཉོན་མོངས་རྣམས་བྱང་བ། །དེ་གཉིས་མཚན་ཉིད་མ་མཆིས་ཏེ། །ཤིན་ཏུ་དྲི་མ་མ་མཆིས་ཆོས། །ངེས་པར་སེང་གེའི་སྒྲ་ཞེས་བགྱི། །འདོད་ཆགས་ཞེ་སྡང་གཏི་མུག་ནི། །ཡོངས་སུ་རྟོག་ལས་བྱུང་བ་སྟེ། །རྟོག་བྲལ་རྣམ་རྟོག་མ་མཆིས་པ། །ངེས་པར་སེང་གེའི་སྒྲ་ཞེས་བགྱི། །འཁོར་བ་དག་ནི་མྱ་ངན་འདས། །དེ་དག་ལམ་དུ་གཞུག་པ་སྟེ། །ཆོས་རྣམས་ཤིན་ཏུ་གསོག་ལགས་པ། །ངེས་པ་སེང་གེའི་སྒྲ་ཞེས་བགྱི། །སྐྱེ་དང་འཆི་དང་འཁོར་བ་ནི། །ཕྱིན་ཅི་ལོག་ལས་བྱུང་བ་སྟེ། །མི་རྟག་སྡུག་བསྔལ་བདག་མེད་དོན། །ངེས་པར་སེང་གེའི་སྒྲ་ཞེས་བགྱི། །ལྟ་དང་དམིགས་པ་གནས་ལགས་ཏེ། །དེ་དག་གིས་ནི་འཇིག་རྟེན་འཇུག། ཆོས་རྣམས་སྟོང་པར་རབ་བཤད་པ། །ངེས་པར་སེང་གེའི་སྒྲ་ཞེས་བགྱི། །འཇིག་རྟེན་མགོན་པོས་ཆོ་འཕྲུལ་ནི། །གང་དག་ཇི་སྙེད་
116b
བསྟན་མཛད་པ། །དེ་དག་ཐམས་ཅད་བཤད་པ་ནི། །ངེས་པར་སེང་གེའི་སྒྲ་ཞེས་བགྱི། །སེམས་ནི་མཉམ་པ་ཉིད་སླད་དུ། །རྗེས་སུ་མཐུན་དང་མི་མཐུན་པའི། །གང་ལའང་སེམས་ནི་མི་འཇུག་པ། །དེ་ནི་རྗེས་མཐུན་བཟོད་པ་ལགས། །སངས་རྒྱས་རྣམས་ཀྱིས་བཤད་པ་ཡི། །ཟབ་ཅིང་ཞི་ལ་མཐུན་བགྱིད་ཅིང ། །དེ་ལ་རྩོད་པར་མི་བགྱིད་པ། །དེ་ནི་རྗེས་མཐུན་བཟོད་པ་ལགས། །མི་དགེ་ཐམས་ཅད་མ་གཏོགས་པར། །དགེ་ཆོས་རྣམས་ལ་འཇུག་འགྱུར་ཞིང ། །དེ་ལའང་གནས་པར་མི་བགྱིད་པ། །དེ་ནི་རྗེས་མཐུན་བཟོད་པ་ལགས། །སྟོང་པའི་སྒྲ་དང་སེམས་ཅན་སྒྲ། །དེ་བཞིན་ལྟ་བའི་སྒྲ་དང་ནི། །སྒྲ་རྣམས་ཀུན་ལ་མ་ཆགས་པ། །དེ་ནི་རྗེས་མཐུན་བཟོད་པ་ལགས། །སངས་རྒྱས་སྒྲ་དང་ཉོན་མོངས་སྒྲ། །རྣམ་མང་ཆོས་ཀྱི་སྒྲ་རྣམས་དང ། །གང་གི་སྒྲའང་མི་རྟོག་པ། །དེ་ནི་རྗེས་མཐུན་བཟོད་པ་ལགས། །སྦྱིན་དང་ཚུལ་ཁྲིམས་ཐོས་པ་དང ། །བརྩོན་འགྲུས་བསམ་གཏན་ཤེས་རབ་དང ། །དེ་བཞིན་ཀུན་ལ་བརྩོན་བགྱིད་པ། །དེ་ནི་རྗེས་མཐུན་བཟོད་པ་ལགས། །ཐམས་ཅད་བདག་ལ་སེམས་མཉམ་ཞིང ། །བྱང་ཆུབ་སེམས་ནི་མི་སྤོང་ལ། །བྱང་ཆུབ་ལམ་ནི་སྟོན་བགྱིད་པ། ། དེ་ནི་རྗེས་མཐུན་བཟོད་པ་ལགས། །རྫོགས་སངས་རྒྱས་ཀྱིས་བདག་ཅག་ལ། །དེ་འདྲའི་ཆོས་ནི་སྟོན་མཛད་དེ། །དེ་ལ་སོམ་ཉི་མ་མཆིས་པ། །དེ་ནི་རྗེས་མཐུན་བཟོད་པ་ལགས །
117a
༄#། །བདག་ཀྱང་བྱང་ཆུབ་སངས་རྒྱས་ཤིང ། །སེང་གེའི་སྒྲ་སྐད་བསྒྲགས་ནས་ནི། །ཇི་ལྟར་འདྲེན་པས་བསྟན་མཛད་པའི། །ཆོ་འཕྲུལ་ངེས་པར་བསྟན་པར་བགྱི། །ཞིང་འདི་བསམ་གྱིས་མི་ཁྱབ་སྟེ། །བླ་མེད་བསོད་ནམས་ཞིང་དེ་ལ། །བདག་གིས་ས་བོན་བཏབ་པས་ན། །བདག་ནི་སླར་མདོག་མ་མཆིས་ལགས། །དོག་ས་ཐམས་ཅད་རྡོལ་འགྱུར་ཞིང ། །རྒྱ་མཚོའང་བས་པར་འགྱུར་བ་བཞིན། །རྫོགས་སངས་རྒྱས་ལ་བསྐྲུན་པ་ཡི། །ས་བོན་ནམ་ཡང་ཆབ་མི་འཚལ། །སེམས་ཅན་རྣམས་ཀྱི་སེམས་འཚལ་ཅིང། །ནམ་མཁའ་གཞལ་བར་རྔོ་ཐོགས་ཀྱི། བྱང་ཆུབ་ཏུ་ནི་བསྐྲུན་པའི་སེམས། །དེ་ནི་བསོད་ནམས་ཚད་མ་མཆིས། །བདག་གི་བསམ་བ་ཅི་འདྲ་བའི། །དབང་དག་ལྷ་དང་དྲི་ཟ་དང ། །མི་རྣམས་གཞན་དག་མ་མཆིས་ཏེ། །བཅོམ་ལྡན་འདས་ཉིད་བདག་གི་དབང ། །འདྲེན་པ་བདག་ནི་ལོངས་སྤྱོད་དང ། །གཟུགས་དང་མཐོ་རིས་མི་འཚལ་གྱི། ། མི་མཆོག་ཁྱོད་ཀྱི་མཁྱེན་པ་ནི། །ཅི་འདྲ་དེ་ལྟར་བདག་གྱུར་ཅིག་།བྱང་ཆུབ་ལམ་ནི་དམིགས་བགྱིས་ནས། །བདག་གིས་དགུང་ལོ་འབུམ་དུ་ནི། །མ་ཆགས་སྡང་བ་མ་མཆིས་པར། །བདག་གིས་བདེ་གཤེགས་བསྙེན་བཀུར་བགྱིས། །བདག་གིས་བྱིས་པ་སྟོང་རྣམས་དང ། །མཆིས་འབྲང་ཡོངས་སུ་སྨིན་བགྱིས་པ། །གང་ལགས་འདི་
117b
དག་སངས་རྒྱས་ཀྱི། །བྱང་ཆུབ་སླད་དུ་སྤྲོ་བར་མཛད། །བདག་གིས་བདེ་གཤེགས་ལམ་མཐོང་ཞིང ། །ཆོས་འདི་ལེགས་པར་ཐོས་པ་དང ། །བྱང་ཆུབ་ལ་ནི་རྟག་དགའ་བ། ། བདག་གིས་རྙེད་པ་ལེགས་པར་རྙེད། །གང་ཞིག་བྱང་ཆུབ་དགའ་བགྱིད་པ། །དེ་ནི་ཆོས་ལའང་རྟག་ཏུ་དགའ། །ཆོས་རྣམས་སྤོང་བར་མི་བགྱིད་པ། །སེམས་ཅན་ཀུན་ལ་རྟག་དགའ་ལགས། །དེ་ནས་འཁོར་དེ་ཉིད་དུ་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ཞེས་བྱ་བ་ཞིག་འདུས་ཏེ་འདུག་པར་གྱུར་པ་དེས། །རྒྱལ་པོ་དགེ་བའི་བཀོད་པ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ཀྱིས་ནི་དེ་བཞིན་གཤེགས་པའི་ཆོ་འཕྲུལ་དེ་དག་དང་མཐུན་པར་མ་བྱས་ཀྱི། མི་མཐུན་པར་བྱས་པས་ན། ཁྱོད་ནི་གནས་མ་ཡིན་པ་ལ་གནས་པ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། བྱང་ཆུབ་ནི་ཆོས་ཀྱི་དབྱིངས་ཀྱི་གནས་ལ་གནས་པས་འཇུག་པ་མེད་པའོ། །རྒྱལ་པོ་ཆེན་པོ། བྱང་ཆུབ་ནི་ཚོར་བ་ཐམས་ཅད་མེད་པས་ཤེས་པ་མེད་པའི་མཚན་ཉིད་ཡིན་ནོ། །རྒྱལ་པོ་ཆེན་པོ། བྱང་ཆུབ་ནི་བླང་པ་མེད་ཅིང་དོར་བ་མེད་པས། བླང་བ་མེད་ལ་དོར་བ་མེད་པ་ཡིན་ནོ། །རྒྱལ་པོ་ཆེན་པོ། བྱང་ཆུབ་ནི་ནམ་མཁའ་ལ་བྲིས་པ་དང་འདྲ་བས་གཟུགས་མེད་པ། ཁ་དོག་མེད་པ། རྟགས་མེད་པ། དབྱིབས་མེད་པ་ཡིན་ནོ། །རྒྱལ་པོ་ཆེན་པོ། བྱང་ཆུབ་ནི་རང་
118a
༄#། །བཞིན་གྱིས་ཡོངས་སུ་དག་ཅིང་གཉེན་པོ་མེད་པ་ཡིན་ནོ། །རྒྱལ་པོ་ཆེན་པོ། བྱང་ཆུབ་ནི་ཆོས་ཐམས་ཅད་དང་མཉམ་པས་ཐམས་ཅད་ཀྱི་རྗེས་སུ་སོང་བ་ཡིན་ནོ། །རྒྱལ་པོ་ཆེན་པོ། བྱང་ཆུབ་ནི་མཚན་མ་ཐམས་ཅད་དང་བྲལ་བས་གཡོ་བ་མེད་པ་ཡིན་ནོ། །རྒྱལ་པོ་ཆེན་པོ། བྱང་ཆུབ་ནི་རབ་ཏུ་ཞི་བའི་མཚན་ཉིད་ཡིན་པས་ཞི་བའོ། །རྒྱལ་པོ་ཆེན་པོ། བྱང་ཆུབ་ནི་བརྟག་པ་དང ། བསལ་བ་དང་བྲལ་བས་ཉེ་བར་ཞི་བའོ། །རྒྱལ་པོ་ཆེན་པོ། བྱང་ཆུབ་ནི་མི་མཐུན་པ་མེད་པས་ལྷག་པར་གཡོ་བ་མེད་པའོ། །རྒྱལ་པོ་ཆེན་པོ། བྱང་ཆུབ་ནི་ཡོངས་སུ་གྲུབ་པ་མེད་པས་སེམས་མཉམ་པའོ། །རྒྱལ་པོ་ཆེན་པོ། བྱང་ཆུབ་ནི་གཟོད་མ་ནས་མ་སྐྱེས་པས་སེམས་ཅན་དང་མཚུངས་པའོ། །རྒྱལ་པོ་ཆེན་པོ། བྱང་ཆུབ་ནི་རྣམ་པར་རིག་པའི་མཚན་ཉིད་མ་ཡིན་པས་སྐྱེ་བ་མེད་པས་རབ་ཏུ་ཕྱེ་བའོ། །རྒྱལ་པོ་ཆེན་པོ། བྱང་ཆུབ་ནི་སེམས་དང ། ཡིད་དང།་རྣམ་པར་ཤེས་པ་དང་བྲལ་བས་རྣམ་པར་རིག་པ་མེད་པའོ། །རྒྱལ་པོ་ཆེན་པོ། བྱང་ཆུབ་ནི་ཡུལ་ཐམས་ཅད་ལས་ཡང་དག་པར་འདས་པས་རྒྱུ་བ་མེད་པའོ། །རྒྱལ་པོ་ཆེན་པོ། བྱང་ཆུབ་ནི་རྣམ་པར་རྟོག་པ་ཐམས་ཅད་དང་བྲལ་བས་སྤྲོས་པ་མེད་པའོ། །རྒྱལ་པོ་ཆེན་པོ། བྱང་ཆུབ་ནི་སྟོང་པ་ཉིད་ཀྱི་མཚན་ཉིད་ཡིན་པས་སྟོང་པའོ། །རྒྱལ་
118b
པོ་ཆེན་པོ། བྱང་ཆུབ་ནི་མཚན་མ་ཐམས་ཅད་དང་བྲལ་བས་མཚན་མ་མེད་པའོ། །རྒྱལ་པོ་ཆེན་པོ། བྱང་ཆུབ་ནི་སྨོན་པ་དང་བྲལ་བས་སྨོན་པ་མེད་པའོ། །རྒྱལ་པོ་ཆེན་པོ། བྱང་ཆུབ་ནི་ལས་ཀྱི་རྣམ་པར་སྨིན་པ་མེད་པས་མངོན་པར་འདུ་བྱེད་པ་མེད་པའོ། །རྒྱལ་པོ་ཆེན་པོ། བྱང་ཆུབ་ནི་མཚན་ཉིད་གསུམ་དང་བྲལ་བས་འདུས་མ་བྱས་པ་སྟེ། རྒྱལ་པོ་ཆེན་པོ། གང་དག་བྱང་ཆུབ་ཀྱི་མཚན་ཉིད་དེ་ལྟ་བུ་དང ། ངོ་བོ་ཉིད་དེ་ལྟ་བུ་ལ་སྒྲུབ་པར་བྱེད་པ་དང ། གང་དག་སྨོན་ལམ་འདེབས་པར་བྱེད་པ་དང ། གང་དག་མངོན་པར་དགའ་བར་བྱེད་པ་དང།་གང་དག་འདོད་པར་བྱེད་པ་དེ་དག་ཐམས་ཅད་ནི་ལོག་པར་རྩོལ་བ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། བྱང་ཆུབ་ཅི་འདྲ་བར་བྱང་ཆུབ་སེམས་དཔའི་སྤྱོད་པ་ཡང་དེ་འདྲ་བ་ཡིན་པས་ན། གང་དག་དེ་ལྟར་སྤྱོད་པ་དེ་དག་ནི་ཡང་དག་པར་སྤྱོད་པ་ཡིན་པའི་ཕྱིར་རོ།། །།བམ་པོ་གཉིས་པ། དེ་ནས་རྒྱལ་པོ་དགེ་བའི་བཀོད་པས་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་བྱང་ཆུབ་སེམས་དཔའ་རྣམས་ཀྱི་ཡང་དག་པ་ཉིད་ཀྱི་སྤྱོད་པ་ལ་སྤོབས་པར་གྱིས་ཤིག་།དེ་སྐད་ཅེས་སྨྲས་པ་དང ། ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་གྱིས་རྒྱལ་པོ་དགེ་བའི་བཀོད་པ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། སེམས་ཅན་ཐམས་ཅད་ལ་རློམ་སེམས་
119a
༄#། །མེད་པ་མཉམ་པ་ཉིད་ཀྱིས་བདོག་པ་ཐམས་ཅད་ཡོངས་སུ་གཏོང་བའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཚུལ་ཁྲིམས་ཀྱིས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་ཚུལ་ཁྲིམས་དང ། བསླབ་པ་དང ། སྦྱངས་པའི་ཡོན་ཏན་ཐམས་ཅད་ཡང་དག་པར་ལེན་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །བཟོད་པས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་ཐ་བ་དང ། ཁྲོ་བ་དང ། གནོད་སེམས་དང ། འཆབ་པའི་ཡོངས་སུ་གདུང་བ་དང ། ཞེ་སྡང་གི་ཡོངས་སུ་གདུང་བ་ཐམས་ཅད་འབྱིན་པར་བྱེད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །བརྩོན་འགྲུས་ཀྱིས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་བརྩོན་འགྲུས་བརྟན་ཞིང་འབར་བ་དང ། ཞུམ་པ་མེད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །བསམ་གཏན་གྱིས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་སྒྲུབ་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཤེས་རབ་ཀྱིས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་མཉམ་པའི་ཤེས་རབ་ཚོགས་ཡོངས་སུ་ཚོལ་བ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །གཉིས་དང་བྲལ་བའི་བཏང་སྙོམས་མཉམ་པ་
119b
ཉིད་ཀྱིས་ཚངས་པའི་གནས་པ་བསྐྱེད་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། མངོན་པར་ཤེས་པས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་མངོན་པར་ཤེས་པ་བསྐྱེད་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །དོན་དང་ཆོས་ལ་ངེས་པར་སེམས་པ་མཉམ་པ་ཉིད་ཀྱིས་སོ་སོ་ཡང་དག་པར་རིག་པ་ལ་འཇུག་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཆོས་ཀྱི་དབྱིངས་གཡོ་བ་མེད་པ་མཉམ་པ་ཉིད་ཀྱིས་རྟོན་པ་ལ་མོས་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཡང་དག་པར་སྐྱེ་བ་མེད་པའི་སེམས་ཀྱིས་ངེས་པར་སེམས་མཉམ་པ་ཉིད་ཀྱིས་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་སྡུད་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། ། དོན་མཐུན་པ་མཉམ་པ་ཉིད་ཀྱིས་བསྡུ་བའི་དངོས་པོ་བཞིས་ཡང་དག་པར་འཛིན་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སེམས་ཀྱིས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་སེམས་ཅན་ཐམས་ཅད་ལ་སེམས་མཉམ་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ནམ་མཁའ་ཡོངས་སུ་དག་པ་དང ། སེམས་ཡོངས་སུ་དག་པ་དང ། ཞིང་ཡོངས་སུ་དག་པ་མཉམ་པ་ཉིད་ཀྱིས་སངས་རྒྱས་ཀྱི་ཞིང་ཡོངས་སུ་དག་པར་བྱེད་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །མཚན་ཉིད་
120a
༄#། །མེད་པའི་ཆོས་ལ་སོ་སོར་རྟོག་པ་མཉམ་པ་ཉིད་ཀྱིས་མཚན་སུམ་ཅུ་རྩ་གཉིས་ཀྱི་ཚོགས་ཡང་དག་པར་སྡུད་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ལུས་དང ། ངག་དང ། སེམས་མཉམ་པ་ཉིད་ཀྱིས་ལུས་དང ། ངག་དང ། སེམས་བརྒྱན་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སེམས་ཅན་ཐམས་ཅད་ལ་བདག་མེད་པར་མཉམ་པ་ཉིད་ཀྱིས་སེམས་ཅན་ཐམས་ཅད་ལ་ཅི་ཞིག་བྱ་སྙམ་དུ་སྤྲོ་བ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །རྨི་ལམ་གྱི་རང་བཞིན་ལྟ་བུར་མོས་པ་མཉམ་པ་ཉིད་ཀྱིས་འཁོར་བས་ཡོངས་སུ་མི་སྐྱོ་བ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ལས་དང་ལས་ཀྱི་རྣམ་པར་སྨིན་པ་ལ་མོས་པ་མེད་པ་མཉམ་པ་ཉིད་ཀྱིས་ལེགས་པར་སྤྱོད་པའི་ལས་བྱེད་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཆོས་སྒྱུ་མ་ལྟ་བུར་སོ་སོར་རྟོག་པ་མཉམ་པ་ཉིད་ཀྱིས་བརྟུལ་ཞུགས་དང་དཀའ་ཐུབ་ཀྱི་གོ་ཆ་བགོས་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སྡུག་བསྔལ་སྐྱེ་བ་མེད་པར་ཤེས་པ་མཉམ་པ་ཉིད་ཀྱིས་སྡུག་བསྔལ་ཐམས་ཅད་བཟོད་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །མཛའ་བཤེས་དང ། མཛའ་བཤེས་མ་ཡིན་པ་ལ་སེམས་སྙོམས་པ་མཉམ་པ་ཉིད་ཀྱིས་མཛའ་བ་
120b
བརྟན་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ལན་ལ་རེ་བ་མེད་པ་མཉམ་པ་ཉིད་ཀྱིས་ལྷག་པའི་བསམ་པ་ལ་སྦྱོར་བ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཐོས་པ་དང་སྒྲུབ་པ་མཉམ་པ་ཉིད་ཀྱིས་ཐོས་པ་ཚོལ་བས་མི་ངོམས་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཟང་ཟིང་མེད་པའི་ཆོས་སྟོན་པ་མཉམ་པ་ཉིད་ཀྱིས་ཆོས་ལ་སློབ་དཔོན་གྱི་དཔེ་མཁྱུད་མེད་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཆོས་དབེན་པ་མཉམ་པ་ཉིད་ཀྱིས་དམ་པའི་ཆོས་ཡོངས་སུ་འཛིན་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །དོན་དམ་པའི་བདེན་པ་མཉམ་པ་ཉིད་ཀྱིས་བདེན་པའི་ཤེས་པ་ཡོངས་སུ་ཚོལ་བ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སེམས་ཅན་ལ་ཤིན་ཏུ་འདུད་པ་མཉམ་པ་ཉིད་ཀྱིས་ང་རྒྱལ་ངེས་པར་བཅོམ་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཡོན་ཏན་ཐམས་ཅད་ཡང་དག་པར་བླངས་པས་རློམ་སེམས་སུ་མེད་པ་མཉམ་པ་ཉིད་ཀྱིས་ཡོན་ཏན་ཐམས་ཅད་ཡང་དག་པར་བསྡུ་བ་ཡོངས་སུ་ཚོལ་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །དེ་ནས་རྒྱལ་པོ་དགེ་བའི་བཀོད་པས། བྱང་ཆུབ་སེམས་དཔའ་རྣམས་ཀྱི་ཡང་དག་པ་ཉིད་ཀྱི་སྤྱོད་པ་དེ་དག་ཐོས་ནས། དགའ་བ་དང ། མགུ་བ་དང ། ཡི་
121a
༄#། །རངས་པ་དང ། རབ་ཏུ་དགའ་བ་དང ། དགའ་ཞིང་ཡིད་བདེ་བ་སྐྱེས་ནས། གོས་དང་རྒྱན་ཅི་གྱོན་པ་རྣམས་ཀྱིས་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ལ་མངོན་པར་བཀབ་བོ། །བུ་སྟོང་པོ་དེ་དག་གིས་ཀྱང་རང་རང་གི་རྒྱན་དག་གིས་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ལ་བཀབ་ནས། ཚིག་འདི་སྐད་དུ། གང་བདག་ཅག་གིས་སྐྱེས་བུ་དམ་པ་འདི་ལྟ་བུ་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བ་དག་རྙེད་པ་ནི། བདག་ཅག་གིས་རྙེད་པ་ལེགས་པར་རྙེད་དོ། །སེམས་ཅན་ཐམས་ཅད་ཀྱིས་ཀྱང་བྱང་ཆུབ་སེམས་དཔའི་སྤྱོད་པ་དེ་ལྟ་བུ་དང ། སྤོབས་པ་དེ་ལྟ་བུ་དག་ཐོབ་པར་གྱུར་ཅིག་།ཅེས་སྨྲས་སོ། །དེ་ནས་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་གྱིས་རྒྱལ་པོ་དགེ་བའི་བཀོད་པ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། འདི་ལྟ་སྟེ། གོས་དང་རྒྱན་ཙམ་གྱིས་མཆོད་པ་དེ་ནི། མཆོད་པ་ཆེན་པོ་མ་ཡིན་གྱི། དེ་ལས་གཞན་པའི་མཆོད་པ་ཁྱད་པར་དུ་འཕགས་པ་དག་ཀྱང་ཡོད་ཀྱི། དེ་དག་ཁྱོད་ཀྱིས་སྒྲུབས་ཤིག་།དེ་ཡང་གང་ཞེ་ན། དེ་ནས་དེའི་ཚེ་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་གྱིས་ཚིགས་སུ་བཅད་པ་འདི་དག་སྨྲས་སོ། །གང་དག་སྟོང་ཆེན་སེམས་ཅན་དེ་དག་ཀུན། །བྱང་ཆུབ་ཕྱིར་ནི་རབ་ཏུ་ཞུགས་གྱུར་ཅིང ། །མ་ཞུམ་སེམས་
121b
ཀྱིས་བསྐལ་པ་རྫོགས་པར་ནི། །བུ་དང་ཆུང་མའི་སྦྱིན་པ་བྱས་པ་བས། །གང་གིས་བྱང་ཆུབ་ཕྱིར་ནི་སེམས་བསྐྱེད་ནས། །དེ་བཞིན་དུ་ནི་རྗེས་སུ་བསླབས་པ་དང ། །རབ་བྱུང་སེམས་ཀྱི་གོམ་པ་གཅིག་བོར་བ། །དེ་ནི་དེ་བས་བསོད་ནམས་ཁྱད་པར་འཕགས། །གང་དག་སྔོན་ཆད་བྱུང་བའི་སངས་རྒྱས་དང ། །གང་དག་མ་བྱོན་བྱུང་དང་བཞུགས་པ་རྣམས། ། དེ་དག་སྐྱོན་མང་ཁབ་ནི་མ་སྤངས་པར། །བླ་མེད་བྱང་ཆུབ་ཞི་བ་ཐོབ་པ་མེད། །རབ་བྱུང་དེ་བཞིན་གཤེགས་པ་ཐམས་ཅད་ཀྱིས། །རབ་ཏུ་བསྟོད་ཅིང་བསྔགས་ལ་བཀུར་བ་སྟེ། ། གང་ཞིག་སངས་རྒྱས་ཀུན་ལ་མཆོད་འདོད་པ། །རྒྱལ་བའི་བསྟན་ལ་རབ་བྱུང་གཟུང་བར་གྱིས། །གང་ཞིག་ཁྱིམ་གནས་རིན་ཆེན་ཁྱིམ་བརྒྱན་པའི། །གངྒཱའི་བྱེ་སྙེད་སངས་རྒྱས་ཞིང་བྱིན་དང ། །གང་ཞིག་རབ་བྱུང་ཉིད་དང་མཚན་གཅིག་ཏུ། །མི་རྟག་སྡུག་བསྔལ་བདག་མེད་སེམས་བྱེད་ན། །གང་ཞིག་རབ་བྱུང་བག་ཡོད་གྱུར་པ་ཡི། །བྱང་ཆུབ་སེམས་དཔའ་བྱང་ཆུབ་ཉེ་བ་དང ། །བདུད་ཀྱི་དཀྱིལ་འཁོར་ཤིན་ཏུ་བཅོམ་བྱས་ཤིང ། །དགེ་བའི་ཕྱོགས་ཀྱང་མི་འགྲིབ་འཕེལ་བ་ཡིན། །རབ་བྱུང་དེ་ནི་ལམ་ངན་སྤངས་པ་དང ། །ལས་ཀྱི་རྗེས་མཐུན་འཕགས་པའི་སྐྱེ་བོས་བསྟོད། །དེ་ན་དགེ་བ་ཆུད་ཟ་མ་ཡིན་ཞིང ། །དེ་ནི་ཡོངས་སུ་འཛིན་པ་སྤངས་པ་ཡིན། །ཁྱིམ་ལས་གྲོལ་བ་ཉོན་མོངས་མི་འཕེལ་ཞིང ། །
122a
༄#། །ཉོན་མོངས་རྣམ་གྲོལ་བདུད་ཀྱི་འཆིང་བ་མེད། །རྣམ་གྲོལ་སེམས་ནི་བྱང་ཆུབ་སྤྱད་པ་སྤྱོད། །སྤྱོད་པ་དག་པས་བྱང་ཆུབ་རྙེད་མི་དཀའ། །དེ་ནས་རྒྱལ་པོ་དགེ་བའི་བཀོད་པས་ཚིགས་སུ་བཅད་པ་དེ་དག་ཐོས་པ་དང ། འདོད་པའི་དགའ་བ་དང ། ལོངས་སྤྱོད་དང ། རྒྱལ་སྲིད་ཀྱི་དབང་ཕྱུག་དག་ལ་མི་ལྟ་བར་གྱུར་ཅིང ། སྐྱོ་ལ་འདོད་ཆགས་དང་བྲལ་བ་སྐྱེས་པར་གྱུར་ཏེ། རབ་ཏུ་འབྱུང་བ་ལ་སེམས་གཞོལ་བར་གནས་ནས། བཅོམ་ལྡན་འདས་དེ་བཞིན་གཤེགས་པ་རི་རབ་ལྟ་བུ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་འཐོབ་ལགས་སམ། བཅོམ་ལྡན་འདས་དེ་བཞིན་གཤེགས་པ་རི་རབ་ལྟ་བུ་དེས་བཀའ་སྩལ་པ། རྒྱལ་པོ་ཆེན་པོ། རབ་ཏུ་བྱུང་བ་ནི་དགག་པ་མེད་པ་སྟེ། སེམས་ཅན་ཐམས་ཅད་ལ་ཡང་བར་དུ་མི་གཅོད་ཅིང་སྐབས་ཡོད་དོ། །ཁྱིམ་ན་གནས་པ་ནི་ཉོན་མོངས་པའི་ནང་ན་གནས་པ་ཡིན་གྱི། གལ་ཏེ་འདོད་ན་ངས་ཁྱོད་ལ་གདམས་ཤིང་རྗེས་སུ་བསྟན་གྱི། ཁྱོད་ཀྱིས་ཀྱང་གདམས་ཤིང་རྗེས་སུ་བསྟན་པ་བཞིན་དུ་བསྒྲུབ་པར་བྱའོ། །དེ་ནས་བཅོམ་ལྡན་འདས་དེས་རབ་ཏུ་འབྱུང་བའི་སྐབས་ཕྱེ་བ་དང ། རྒྱལ་པོ་དགེ་བའི་བཀོད་པས་བུ་སྟོང་པོ་དེ་
122b
དག་ལ་སྨྲས་པ། ཁྱེད་ཅག་ལས་རྒྱལ་སྲིད་གྲུབ་པ་དང ། སེམས་ཅན་རྣམས་ཆོས་ཡང་དག་པར་འཛིན་དུ་འཇུག་པར་སྤྲོ་བ་སུ་ཡོད། དེ་དག་ཐམས་ཅད་ཀྱིས་སྨྲས་པ། ཡབ། བདག་ཅག་ཀྱང་དད་པས་ཁྱིམ་ནས་ཁྱིམ་མ་མཆིས་པར་རབ་ཏུ་འབྱུང་ལགས་ཀྱི། བདག་ཅག་མི་དོར་བར་གསོལ། རྒྱལ་པོས་སྨྲས་པ། གལ་ཏེ་ཁྱེད་ཐམས་ཅད་རབ་ཏུ་བྱུང་ན་གླིང་བཞི་པའི་འཇིག་རྟེན་གྱི་ཁམས་ཐམས་ཅད་ཀྱི་སྐྱེ་བོའི་ཚོགས་ཐམས་ཅད་རབ་ཏུ་ཆུད་ཟོས་པར་འགྱུར་གྱི། ཁྱེད་ཅག་ལས་གང་སེམས་ཅན་རྣམས་ལ་བརྟན་པའི་སྙིང་རྗེ་ཆེན་པོ་འཇུག་པར་འགྱུར་བ་དེས། རྒྱལ་སྲིད་བསྒྲུབས་ལ། སེམས་ཅན་རྣམས་ལ་ཆོས་ཡང་དག་པར་འཛིན་དུ་ཆུག་ཅིག་།དེ་ནས་རྒྱལ་བུ་གཞོན་ནུ་དེ་དག་གི་ནང་ནས། རྒྱལ་བུ་གཞོན་ནུ་སྙིང་རྗེ་ཆེར་སེམས་ཞེས་བྱ་བ་དེས། རང་གི་ཕ་དེ་དང ། རྒན་རབས་དེ་དག་ལ་ཚིགས་སུ་བཅད་དེ་སྨྲས་པ། རབ་བྱུང་ཡོན་ཏན་དུ་མ་བསགས་པ་ཞེས། །དེ་བཞིན་གཤེགས་པ་རྣམས་ཀྱིས་གསུངས་མོད་ཀྱི། །དེ་ལྟར་ལགས་ཀྱང་སྙིང་རྗེར་གྱུར་པ་ན། །འགྲོ་ལ་ཕན་ཕྱིར་རྒྱལ་སྲིད་བདག་གིས་བསྒྲུབ། །ཇི་སྲིད་འཚོ་བར་བདག་ནི་ཚངས་སྤྱོད་ཅིང ། །གསོ་སྦྱོང་ཡན་ལག་བརྒྱད་པ་བླང་བར་བགྱི། །མེ་ཏོག་རྣམས་དང་དྲི་དང་བྱུག་པ་དང ། །དེ་བཞིན་ཆང་ཡང་མྱང་བར་མི་བགྱིའོ། །ལུས་ལ་རྒྱན་རྣམས་ཀྱང་ནི་མི་
123a
༄#། །འདོགས་ཤིང ། །མཆིལ་ལྷམ་མི་འཚལ་རིན་ཆེན་གཙུག་ཕུད་མིན། །ཁྲི་རྐང་གསེར་ལས་བགྱིས་པར་མི་ཉལ་ཤིང ། །རྒྱལ་པོའི་རྐྱེན་གྱི་གོས་ཀྱང་མི་འཚལ་ལོ། །སིལ་སྙན་གླུ་དབྱངས་སྒྲ་ལ་མི་དགའ་ཞིང ། །རྨ་བྱ་ངང་པའི་སྒྲ་ལའང་དགའ་མི་བགྱིད། །སྐྱེ་བོས་མདུན་བདར་བུད་མེད་གནས་སྤོང་ཞིང ། །གཅིག་པུ་མལ་ན་མཆིས་ཉལ་རླུང་མི་གཡབ། །བདག་ནི་གླིང་ནས་གླིང་དུ་མཆི་བགྱི་ཞིང ། །དགེ་བ་བཅུ་རྣམས་རབ་ཏུ་བཤད་པར་བགྱི། །ཁྱིམ་ན་གནས་པའི་ནོངས་པ་བསྟན་བགྱི་ཞིང ། །རབ་ཏུ་འབྱུང་བའི་བསྔགས་པའང་བརྗོད་པར་བགྱི། །གཟུགས་དང་དབང་ཕྱུག་ལོངས་སྤྱོད་དྲེགས་པ་ཡིས། །སངས་རྒྱས་ཆོས་དང་དགེ་འདུན་བགྲོད་མི་བགྱི། །བྱང་ཆུབ་སེམས་ནི་བསྐྱུད་པར་མི་བགྱི་ཞིང ། །རྟག་ཏུ་ཡིད་བྱུང་སྲིད་གསུམ་སྤྱད་པར་བགྱི། །སྦྱིན་དང་སྙན་སྨྲ་དོན་སྤྱོད་དོན་མཐུན་པས། །སེམས་ཅན་བསྡུ་བ་ལ་ནི་བརྩོན་བགྱི་ཞིང ། །བླ་མེད་ཐེག་ཆེན་དམ་པ་འདི་ལ་ཡང ། །སྲོག་ཆགས་བྱེ་བ་མང་པོ་ཡོངས་སྨིན་བགྱི། །ཆོས་དོན་མཉན་ཅིང་བཤད་པར་བྱའི་སླད་དུ། །ཉིན་མོ་དུས་གསུམ་མཚན་མོ་དུས་གསུམ་དུ། །རི་རབ་ལྟ་བུའི་སྤྱན་སྔར་ཉེར་མཆི་ཞིང ། །དེ་བཞིན་གཤེགས་པ་ལ་ནི་མཆོད་པའང་བགྱི། །དེ་ནས་བཅོམ་ལྡན་འདས་དེ་བཞིན་གཤེགས་པ་རི་རབ་ལྟ་བུ་དེས། རྒྱལ་བུ་གཞོན་ནུ་སྙིང་རྗེ་ཆེར་
123b
སེམས་ལ་ལེགས་སོ། །ཞེས་བྱ་བ་བྱིན་ཏེ། སྐྱེས་བུ་དམ་པ། ལེགས་སོ། །ལེགས་སོ། །བསླབ་པ་བརྒྱད་ཀྱི་ཚུལ་ཁྲིམས་ཡང་དག་པར་བླངས་པའི་ཆོས་ཀྱི་ཡོན་ཏན་དེས་ན་ཁྱིམ་པར་གྱུར་པའི་བྱང་ཆུབ་སེམས་དཔའ་ཡང་རབ་ཏུ་བྱུང་བ་དང་ཡོན་ཏན་མཚུངས་པ་ཡིན་ནོ། །ཁྱོད་ཀྱི་སྙིང་རྗེ་ཆེན་པོ་དེས་ན་རབ་ཏུ་བྱུང་བའི་ཡོན་ཏན་བསྒྲུབ་པའང་སྒྲུབ་པར་བྱེད་པ་ཡིན་ནོ། །དེ་ནས་རྒྱལ་པོ་དགེ་བའི་བཀོད་པས། རྒྱལ་པོ་གཞོན་ནུ་སྙིང་རྗེ་ཆེར་སེམས་རྒྱལ་སྲིད་ལ་བཞག་ནས། བུ་སྟོང་དུ་གཅིག་གིས་མ་ཚང་བ་དང་ལྷན་ཅིག་ཏུ་བཅོམ་ལྡན་འདས་དེའི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ཏོ། །དེ་དག་རབ་ཏུ་བྱུང་ནས་ཀྱང ། དེ་བཞིན་གཤེགས་པ་དེས་ཆོ་འཕྲུལ་བསྟན་པ་འདི་ཉིད་ཀྱིས་དེ་ལྟ་དེ་ལྟར་གདམས་ཤིང་རྗེས་སུ་བསྟན་པས། དེ་དག་གིས་རིང་པོ་མི་ཐོགས་པར་མངོན་པར་ཤེས་པ་ལྔ་བསྐྱེད་པར་གྱུར་ཏོ། །གཟུངས་དང ། དྲན་པ་དང ། ཆོས་མཉན་པའི་ཤེས་པ་ཡང་སྐྱེས་པར་གྱུར་ཏོ། །རྒྱལ་བུ་གཞོན་ནུ་སྙིང་རྗེ་ཆེར་སེམས་ཀྱང་རྒྱལ་སྲིད་ལ་དབང་བསྐུར་ནས་ཟླ་བ་ཉའོ་ཅོག་ལ་གླིང་ཆེན་པོ་བཞི་པོ་དག་ཏུ་རྗེས་སུ་སྟོན་པར་བྱེད་དེ། ཅི་ནས་ཀྱང་སྲོག་ཆགས་དུང་ཕྱུར་ཕྲག་དགུ་དང ། བྱེ་བ་ཕྲག་གཉིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་དང ། དེ་ལྟ་དེ་ལྟར་སེམས་ཅན་རྣམས་ལ་ཆོས་སྟོན་པར་གྱུར་ཏོ། །དེ་དག་ཐམས་ཅད་
124a
༄#། །ཀྱང་བཅོམ་ལྡན་འདས་དེ་བཞིན་གཤེགས་པ་རི་རབ་ལྟ་བུ་དེའི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས། ཐེག་པ་ཆེན་པོ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤ་སྟག་ཏུ་གྱུར་ཏོ། །ཤཱ་རདྭ་ཏིའི་བུ་ཁྱོད་ཀྱིས་ཅི་ཙམ་དུ་དགེ་བའི་རྩ་བ་བསྐྱེད་པ་དང ། ཡོངས་སུ་སྦྱང་བ་བྱས་པའི་སེམས་ཅན་རྣམས་ཀྱི་རྟེན་དུ་གྱུར་ཅིང ། དད་པ་བསྐྱེད་པར་གྱུར་པའི་གསུང་རབ་དེ་ལ་ལྟོས། ཤཱ་རདྭ་ཏིའི་བུ། དེའི་ཚེ་དེའི་དུས་ན། འཁོར་ལོས་བསྒྱུར་བའི་རྒྱལ་པོ་དགེ་བའི་བཀོད་པ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉི་དང་ཡིད་གཉིས་ཟ་བར་གྱུར་ན། ཤཱ་རདྭ་ཏིའི་བུ་ཁྱོད་ཀྱིས་དེ་ལྟར་མི་བལྟ་སྟེ། ལྷའི་བུ་དེད་དཔོན་འདི་ཉིད་དེའི་ཚེ་དེའི་དུས་ན། འཁོར་ལོས་བསྒྱུར་བའི་རྒྱལ་པོ་དགེ་བའི་བཀོད་པ་ཞེས་བྱ་བར་གྱུར་ཏོ། །ཤཱ་རདྭ་ཏིའི་བུ། དེའི་ཚེ་དེའི་དུས་ན། ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་ཡིད་གཉིས་དང་སོམ་ཉི་ཟ་བར་གྱུར་ན། ཤཱ་རདྭ་ཏིའི་བུ་ཁྱོད་ཀྱིས་དེ་ལྟར་མི་བལྟ་སྟེ། འཇམ་དཔལ་གཞོན་ནུར་གྱུར་པ་འདི་ཉིད་དེའི་ཚེ་དེའི་དུས་ན་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ཞེས་བྱ་བར་གྱུར་ཏོ། །ཤཱ་རདྭ་ཏིའི་བུ། དེའི་ཚེ་དེའི་དུས་ན། རྒྱལ་པོ་དགེ་བའི་བཀོད་
124b
པ་དེའི་བུ་སྟོང་ཐམ་པར་གྱུར་པ་དེ་དག་གཞན་ཞིག་ཡིན་པ་སྙམ་དུ་ཁྱོད་སོམ་ཉི་དང་ཡིད་གཉིས་ཟ་བར་གྱུར་ན། ཤཱ་རདྭ་ཏིའི་བུ་ཁྱོད་ཀྱིས་དེ་ལྟར་མི་བལྟ་སྟེ། བསྐལ་པ་བཟང་པོ་འདི་ཉིད་ཀྱི་སངས་རྒྱས་སྟོང་པོ་དེ་དག་དེའི་ཚེ་དེའི་དུས་ན། རྒྱལ་པོ་དགེ་བའི་བཀོད་པ་དེའི་བུ་སྟོང་ཐམ་པར་གྱུར་ཏོ། །ཤཱ་རདྭ་ཏིའི་བུ། དེའི་ཚེ་དེའི་དུས་ན། རྒྱལ་བུ་གཞོན་ནུ་སྙིང་རྗེ་ཆེར་སེམས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉི་དང་ཡིད་གཉིས་ཟ་བར་གྱུར་ན། ཤཱ་རདྭ་ཏིའི་བུ་ཁྱོད་ཀྱིས་དེ་ལྟར་མི་བལྟ་སྟེ། ང་ཉིད་དེའི་ཚེ་དེའི་དུས་ན་རྒྱལ་བུ་གཞོན་ནུ་སྙིང་རྗེ་ཆེར་སེམས་ཞེས་བྱ་བར་གྱུར་ཏོ། །ཤཱ་རདྭ་ཏིའི་བུ། དེ་ལྟར་ན་སྔོན་གྱི་བྱང་ཆུབ་སེམས་དཔའ་བག་ཡོད་པ་རྣམས་ནི། ལྷག་པའི་བསམ་པ་དང ། ཤེས་བཞིན་གྱི་སྤྱོད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་བྱུང་བ་ཡིན་ནོ། །བཅོམ་ལྡན་འདས་ཀྱིས་སྔོན་གྱི་ཚུལ་དང་ལྡན་པའི་གཏམ་འདི་བཤད་པ་ན། ལྷ་དང་མི་རྣམས་ཀྱི་སྐྱེ་དགུ་ལས། སྲོག་ཆགས་སུམ་ཁྲི་ཉིས་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་ནས་ཚེ་དང་ལྡན་པ་ཤཱ་རདྭ་ཏིའི་བུས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ནི་ལྷའི་བུ་དེད་དཔོན་འདི་དང་ལྷན་ཅིག་ཏུ་ཡུན་རིང་པོ་ནས། ཚངས་པར་སྤྱོད་པ་སྤྱད་པ་དང ། སངས་རྒྱས་མང་
125a
༄#། །པོ་ལ་བསྙེན་བཀུར་བྱས་ཤིང ། དགེ་བའི་རྩ་བ་བསྐྱེད་པ་ཡིན་ནོ། །འཇམ་དཔལ་གྱིས་སྨྲས་པ། བཙུན་པ་ཤཱ་རདྭ་ཏིའི་བུ། ཚངས་པར་སྤྱོད་པ་ཞེས་བྱ་བ་དེ་ནི་འཕགས་པའི་ལམ་ཡན་ལག་བརྒྱད་པའི་ཚིག་བླ་དྭགས་ཡིན་ལ། ལམ་ནི་འདུས་བྱས་ཡིན་གྱི། ཁོ་བོ་ནི་འདུས་མ་བྱས་སུ་རྟོགས་པ་ཡིན་པས། དེའི་ཕྱིར་ཁོ་བོ་ནི་ཡུན་རིང་པོ་ནས་ཚངས་པར་སྤྱོད་པ་མ་ཡིན་ནོ། །བཙུན་པ་ཤཱ་རདྭ་ཏིའི་བུ། ཚངས་པར་སྤྱོད་པ་ཞེས་བྱ་བ་དེ་ནི་སྤྱོད་པའི་མཚན་ཉིད་ཡིན་གྱི། ཁོ་བོ་ནི་སྤྱོད་པ་མེད་པ་དང ། རབ་ཏུ་སྤྱོད་པ་མེད་པ་ཡིན་ཏེ། དེའི་ཕྱིར་ཁོ་བོ་ནི་ཡུན་རིང་པོ་ནས་ཚངས་པར་སྤྱད་པ་མ་ཡིན་ནོ། །བཙུན་པ་ཤཱ་རདྭ་ཏིའི་བུ། ཚངས་པར་སྤྱོད་པ་ཞེས་བྱ་བ་དེ་ནི་གཉིས་སུ་སྦྱོར་བ་ཡིན་གྱི། ཁོ་བོ་ནི་གཉིས་སུ་སྦྱོར་བ་ཡང་མ་ཡིན་ལ། གཉིས་སུ་མེད་པར་སྦྱོར་བ་ཡང་མ་ཡིན་ཏེ། དེའི་ཕྱིར་ཁོ་བོ་ནི་ཡུན་རིང་པོ་ནས་ཚངས་པར་སྤྱད་པ་མ་ཡིན་ནོ། །བཙུན་པ་ཤཱ་རདྭ་ཏིའི་བུ། ཚངས་པར་སྤྱོད་པ་ཞེས་བྱ་བ་དེ་ནི་ཉོན་མོངས་པའི་གཉེན་པོ་ཡིན་གྱི། ཁོ་བོ་ནི་གཉེན་པོས་རབ་ཏུ་ཕྱེ་བ་མ་ཡིན་ཏེ། དེའི་ཕྱིར་ཁོ་བོ་ནི་ཡུན་རིང་པོ་ནས་ཚངས་པར་སྤྱད་པ་མ་ཡིན་ནོ། །བཙུན་པ་ཤཱ་རདྭ་ཏིའི་བུ། ཚངས་པར་སྤྱོད་པ་ཞེས་བྱ་བ་དེ་ནི། གཟུགས་དང ། སྒྲ་དང ། དྲི་དང ། རོ་དང ། རེག་བྱ་དང ། ཆོས་ལས་འབྱོལ་བ་ཡིན་གྱི། ཁོ་བོ་ནི་གཟུགས་དང ། སྒྲ་དང ། དྲི་
125b
དང ། རོ་དང ། རེག་བྱ་དང ། ཆོས་ལས་འབྱོལ་བ་མ་ཡིན་ཏེ། དེའི་ཕྱིར་ཁོ་བོ་ནི་ཡུན་རིང་པོ་ནས་ཚངས་པར་སྤྱད་པ་མ་ཡིན་ནོ། །བཙུན་པ་ཤཱ་རདྭ་ཏིའི་བུ། ཚངས་པར་སྤྱོད་པ་ཞེས་བྱ་བ་ནི།་བདུད་ཀྱི་ལམ་ལས་ཡང་དག་པར་འདའ་བ་ཡིན་གྱི། ཁོ་བོ་ནི་བདུད་ཀྱི་ལམ་ལས་ཡང་དག་པར་འདའ་བ་མ་ཡིན་ཏེ། དེའི་ཕྱིར་ཁོ་བོ་ནི་ཡུན་རིང་པོ་ནས་ཚངས་པར་སྤྱད་པ་མ་ཡིན་ནོ། །བཙུན་པ་ཤཱ་རདྭ་ཏིའི་བུ། ཚངས་པར་སྤྱོད་པ་ཞེས་བྱ་བ་དེ་ནི་དགེ་བའི་བཤེས་གཉེན་ཐམས་ཅད་ཡིན་གྱི། ཁོ་བོ་ནི་དགེ་བ་དང་སྡིག་པ་ལ་ངེས་པར་སྦྱོར་བ་མི་བྱེད་དེ། དེའི་ཕྱིར་ཁོ་བོ་ནི་ཡུན་རིང་པོ་ནས་ཚངས་པར་སྤྱད་པ་མ་ཡིན་ནོ། །བཙུན་པ་ཤཱ་རདྭ་ཏིའི་བུ། ཚངས་པར་སྤྱོད་པ་ཞེས་བྱ་བ་དེ་ནི་ཉན་ཐོས་དང ། རང་སངས་རྒྱས་ཀྱི་སྐྱོན་མེད་པ་ཐོབ་པ་ཡིན་གྱི། ཁོ་བོ་ནི་ཉན་ཐོས་དང ། རང་སངས་རྒྱས་ཀྱི་སྐྱོན་མེད་པ་ཐོབ་པ་མ་ཡིན་ཏེ། དེའི་ཕྱིར་ཁོ་བོ་ནི་ཡུན་རིང་པོ་ནས་ཚངས་པར་སྤྱད་པ་མ་ཡིན་ནོ། །བཙུན་པ་ཤཱ་རདྭ་ཏིའི་བུ། ཚངས་པར་སྤྱོད་པ་ཞེས་བྱ་བ་དེ་ནི་འཁོར་བ་ལས་འབྱོལ་བ་ཡིན་གྱི། ཁོ་བོ་ནི་འཁོར་བ་ལས་འབྱོལ་བ་མ་ཡིན་ཏེ། དེའི་ཕྱིར་ཁོ་བོ་ནི་ཡུན་རིང་པོ་ནས་ཚངས་པར་སྤྱད་པ་མ་ཡིན་ནོ། །བཙུན་པ་ཤཱ་རདྭ་ཏིའི་བུ། ཚངས་པར་སྤྱོད་པ་ཞེས་བྱ་བ་དེ་ནི་མྱ་ངན་ལས་འདའ་བའི་ལམ་དུ་འགྲོ་བ་ཡིན་གྱི། ཁོ་བོ་ནི་མྱ་ངན་ལས་འདའ་བ་དོན་དུ་གཉེར་བ་མ་ཡིན་ཏེ། དེའི་ཕྱིར་ཁོ་བོ་ནི་ཡུན་རིང་
126a
༄#། །པོ་ནས་ཚངས་པར་སྤྱད་པ་མ་ཡིན་ནོ། །བཙུན་པ་ཤཱ་རདྭ་ཏིའི་བུ། གང་ཡང་ཁྱོད་འདི་སྐད་དུ་འཇམ་དཔལ་ཁྱོད་ནི་སངས་རྒྱས་མང་པོ་ལ་བསྙེན་བཀུར་བྱས་པ་ཡིན་ནོ་ཞེས་ཟེར་བ་ནི། བཙུན་པ་ཤཱ་རདྭ་ཏིའི་བུ། དེ་བཞིན་གཤེགས་པ་ལ་ནི་བསྙེན་བཀུར་བྱ་བར་མི་ནུས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་གཟུགས་མེད་ཅིང་བསྟན་དུ་མེད་པ་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ཚོར་བ་མེད་ཅིང་ཚོར་བ་ཐམས་ཅད་རྒྱུན་བཅད་པ་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་འདུ་ཤེས་མེད་ཅིང་འདུ་ཤེས་ཀྱི་མདུད་པ་ཐམས་ཅད་དང་བྲལ་བ་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་འདུ་བྱེད་རྣམས་མེད་ཅིང་འདུས་མ་བྱས་བརྙེས་པ་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་རྣམ་པར་ཤེས་པ་མེད་ཅིང་ཡིད་གནས་པ་མེད་པ་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་མིག་དང་གཟུགས་ཀྱི་ཡུལ་མ་ཡིན་ཞིང ། སྟོང་པ་ཉིད་ཀྱི་སྤྱོད་ཡུལ་མ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་རྣ་བ་དང་སྒྲའི་ཡུལ་མ་ཡིན་ཞིང ། མཚན་མ་མེད་པའི་ཡུལ་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་
126b
དང།་དེ་བཞིན་གཤེགས་པ་ནི་སྣ་དང་དྲིའི་ཡུལ་མ་ཡིན་ཞིང ། གཉིས་དང་བྲལ་བ་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ལྕེ་དང་རོའི་ཡུལ་མ་ཡིན་ཞིང།་རྣམ་པར་རིག་པ་མེད་པའི་མཚན་ཉིད་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ལུས་དང་རེག་བྱའི་ཡུལ་མ་ཡིན་ཞིང ། ཐོགས་པ་མེད་པའི་མཚན་ཉིད་ཡིན་པས་དེ་ལ་བསྙེན་བཀུར་བྱ་བ་མ་ནུས་པ་དང ། དེ་བཞིན་གཤེགས་པ་ནི་ཡིད་དང་ཆོས་ཀྱི་ཡུལ་མ་ཡིན་ཞིང ། ཆོས་ཀྱི་དབྱིངས་སུ་ཡང་དག་འདུ་བ་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་དེ་བཞིན་ཉིད་ལ་གནས་པ་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ཡང་དག་པའི་མཐའ་དང་མཐུན་པར་ཞུགས་པ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ཆོས་ཀྱི་དབྱིངས་ཀྱིས་རབ་ཏུ་ཕྱེ་བ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ཆེན་པོ་སྟོང་པ་ཉིད་ལ་ཞུགས་པ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་རང་བཞིན་མཉམ་པ་ཉིད་ཡིན་པས་དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་སྤྲོས་པ་ཐམས་ཅད་ཡང་དག་པར་ཆད་པ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་
127a
༄#། །གཤེགས་པ་ནི་དམིགས་པ་མེད་པ་ལ་ཞུགས་པ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་རྣམ་པར་ཤེས་པ་ལ་མི་གནས་པ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ཁམས་གསུམ་ན་མི་གནས་པ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ཟག་པ་མེད་པ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་འཇིག་རྟེན་འདི་དང ། འཇིག་རྟེན་ཕ་རོལ་ལ་མི་གནས་པ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ཞི་ཞིང་རབ་ཏུ་ཞི་ལ་ཉེ་བར་ཞི་བ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ལུས་དང ། ངག་དང ། ཡིད་དང་བྲལ་བ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ཁ་དོག་དང ། གཟུགས་དང ། དབྱིབས་དང་བྲལ་བ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་ཐམས་ཅད་དུ་མ་སྨད་ཅིང་ཁ་ན་མ་ཐོ་བ་མེད་པ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། དེ་བཞིན་གཤེགས་པ་ནི་སྤྱོད་ལམ་ཐམས་ཅད་ལ་ཡང་དག་པར་མི་གནས་པ་ཡིན་པས། དེ་ལ་བསྙེན་བཀུར་བྱ་བར་མི་ནུས་པ་དང ། བཙུན་པ་ཤཱ་རདྭ་
127b
ཏིའི་བུ།་དེ་བཞིན་གཤེགས་པ་ནི་ཐམས་ཅད་དུ་སྐུར་པ་གདབ་ཏུ་མེད་ཅིང་ནམ་མཁའ་ལ་བྲིས་པ་ལྟ་བུ་ཡིན་པས། དེ་ལ་བསྙེན་བཀུར་བྱ་བར་མི་ནུས་པའི་ཕྱིར་རོ། །བཙུན་པ་ཤཱ་རདྭ་ཏིའི་བུ། གང་ཡང་ཁྱོད་འདི་སྐད་དུ་འཇམ་དཔལ་ཁྱོད་ནི་དགེ་བའི་རྩ་བ་བསྐྱེད་པ་ཡིན་ནོ་ཞེས་ཟེར་བ་ལ། བཙུན་པ་ཤཱ་རདྭ་ཏིའི་བུ། དགེ་བའི་རྩ་བ་དེ་ནི་འཇིག་ཚོགས་རྩ་བ་མ་ཡིན་པ་དང ། མ་རིག་པ་དང་སྲིད་པའི་སྲེད་པ་རྩ་བ་མ་ཡིན་པ་དང ། འདོད་ཆགས་དང ། ཞེ་སྡང་དང ། གཏི་མུག་རྩ་བ་མ་ཡིན་པ་དང ། ཕྱིན་ཅི་ལོག་བཞི་རྩ་བ་མ་ཡིན་པ་དང ། ཕུང་པོ་ལྔ་རྩ་བ་མ་ཡིན་པ་དང ། སྐྱེ་མཆེད་དྲུག་རྩ་བ་མ་ཡིན་པ་དང ། རྣམ་པར་ཤེས་པའི་གནས་བདུན་རྩ་བ་མ་ཡིན་པ་དང ། ལོག་པ་བརྒྱད་རྩ་བ་མ་ཡིན་པ་དང ། ཀུན་ནས་མནར་སེམས་ཀྱི་དངོས་པོ་དགུ་རྩ་བ་མ་ཡིན་པ་དང ། སེམས་ཅན་གྱི་གནས་དགུ་རྩ་བ་མ་ཡིན་པ་དང ། མི་དགེ་བ་བཅུའི་ལས་ཀྱི་ལམ་རྩ་བ་མ་ཡིན་པ་དེ་གང་ཡིན་པ་ནི་དགེ་བའི་རྩ་བ་ཡིན་ནོ། །བཙུན་པ་ཤཱ་རདྭ་ཏིའི་བུ། བགྲོད་པ་གཅིག་པའི་ལམ་ལ་མངོན་པར་ཞེན་པ་རྩ་བ་མ་ཡིན་པ་དང ། རིག་པ་དང་རྣམ་པར་གྲོལ་བ་ལ་ཡོངས་སུ་རྟོག་པ་རྩ་བ་མ་ཡིན་པ་དང ། ལྷག་པའི་ཚུལ་ཁྲིམས་ཀྱི་བསླབ་པ་དང ། ལྷག་པའི་སེམས་ཀྱི་བསླབ་པ་དང ། ལྷག་པའི་ཤེས་རབ་ཀྱི་བསླབ་པས་རློམ་སེམས་སུ་བྱེད་པ་རྩ་བ་མ་ཡིན་པ་དང ། བདེན་པ་བཞི་པོ་དག་
128a
༄#། །ལ་ཡོངས་སུ་རྟོག་པ་རྩ་བ་མ་ཡིན་པ་དང ། དབང་པོ་ལྔར་འདུ་ཤེས་པ་རྩ་བ་མ་ཡིན་པ་དང ། མངོན་པར་ཤེས་པ་དྲུག་ལ་དམིགས་པ་རྩ་བ་མ་ཡིན་པ་དང ། བྱང་ཆུབ་ཀྱི་ཡན་ལག་བདུན་ལ་སྒྲོ་འདོགས་པ་རྩ་བ་མ་ཡིན་པ་དང ། འཕགས་པའི་ལམ་ཡན་ལག་བརྒྱད་པས་རློམ་སེམས་སུ་བྱེད་པ་རྩ་བ་མ་ཡིན་པ་དང ། མཐར་གྱིས་གནས་པའི་སྙོམས་པར་འཇུག་པ་དགུ་ལ་ལྟ་བ་སྐྱེད་པ་རྩ་བ་མ་ཡིན་པ་དང ། མི་སློབ་པའི་ཆོས་བཅུ་ལ་མངོན་པར་ཞེན་པ་རྩ་བ་མ་ཡིན་པ་གང་ཡིན་པ་དེ་ནི་དགེ་བའི་རྩ་བ་ཡིན་ནོ། །ཕུང་པོའི་བདུད་རྩ་བ་མ་ཡིན་པ་དང ། ཉོན་མོངས་པའི་བདུད་རྩ་བ་མ་ཡིན་པ་དང ། འཆི་བདག་གི་བདུད་རྩ་བ་མ་ཡིན་པ་དང ། ལྷའི་བུའི་བདུད་རྩ་བ་མ་ཡིན་པ་གང་ཡིན་པ་དེ་ནི་དགེ་བའི་རྩ་བ་ཡིན་ནོ། །སྒྲིབ་པ་རྩ་བ་མ་ཡིན་པ་དང ། ཆོད་པ་དང ། ཀུན་ནས་ལྡང་བ་རྩ་བ་མ་ཡིན་པ་དང ། འགྱོད་པ་རྩ་བ་མ་ཡིན་པ་གང་ཡིན་པ་དེ་ནི་དགེ་བའི་རྩ་བ་ཡིན་ནོ། ། བདག་ཏུ་ལྟ་བ་རྩ་བ་མ་ཡིན་པ་དང ། སེམས་ཅན་དུ་ལྟ་བ་རྩ་བ་མ་ཡིན་པ་དང ། སྲོག་ཏུ་ལྟ་བ་རྩ་བ་མ་ཡིན་པ་དང ། གསོ་བ་དང ། གང་ཟག་ཏུ་ལྟ་བ་རྩ་བ་མ་ཡིན་པ་གང་ཡིན་པ་དེ་ནི་དགེ་བའི་རྩ་བ་མ་ཡིན་ནོ། །འབྱུང་བར་ལྟ་བ་རྩ་བ་མ་ཡིན་པ་དང ། འཇིག་པར་ལྟ་བ་རྩ་བ་མ་ཡིན་པ་དང ། ཆད་པར་ལྟ་བ་རྩ་བ་མ་ཡིན་པ་དང ། རྟག་པར་ལྟ་བ་རྩ་བ་མ་
128b
ཡིན་པ་གང་ཡིན་པ་དེ་ནི་དགེ་བའི་རྩ་བ་ཡིན་ནོ། །ཚུལ་བཞིན་མ་ཡིན་པ་རྩ་བ་མ་ཡིན་པ་དང ། མ་རིག་པ་རྩ་བ་མ་ཡིན་པ་དང ། འདུ་བྱེད་རྩ་བ་མ་ཡིན་པ་དང ། རྣམ་པར་ཤེས་པ་རྩ་བ་མ་ཡིན་པ་དང ། མིང་དང་གཟུགས་རྩ་བ་མ་ཡིན་པ་དང ། སྐྱེ་མཆེད་དྲུག་རྩ་བ་མ་ཡིན་པ་དང ། རེག་པ་རྩ་བ་མ་ཡིན་པ་དང ། ཚོར་བ་རྩ་བ་མ་ཡིན་པ་དང ། སྲེད་པ་རྩ་བ་མ་ཡིན་པ་དང ། ལེན་པ་རྩ་བ་མ་ཡིན་པ་དང ། སྲིད་པ་རྩ་བ་མ་ཡིན་པ་དང ། སྐྱེ་བ་རྩ་བ་མ་ཡིན་པ་དང ། རྒ་ཤི་རྩ་བ་མ་ཡིན་པ་དང ། ནད་དང་སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྩ་བ་མ་ཡིན་པ་གང་ཡིན་པ་དེ་ནི་དགེ་བའི་རྩ་བ་ཡིན་ནོ། །འདོད་པའི་ཁམས་རྩ་བ་མ་ཡིན་པ་དང ། གཟུགས་ཀྱི་ཁམས་རྩ་བ་མ་ཡིན་པ་དང ། གཟུགས་མེད་པའི་ཁམས་རྩ་བ་མ་ཡིན་པ་གང་ཡིན་པ་དེ་ནི་དགེ་བའི་རྩ་བ་ཡིན་ནོ། །སྦྱིན་པས་རློམ་སེམས་སུ་བྱེད་པ་རྩ་བ་མ་ཡིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་ཀྱིས་རློམ་སེམས་སུ་བྱེད་པ་རྩ་བ་མ་ཡིན་པ་གང་ཡིན་པ་དེ་ནི་དགེ་བའི་རྩ་བ་ཡིན་ནོ། །བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་ཀྱིས་རློམ་སེམས་སུ་བྱེད་པ་རྩ་བ་མ་ཡིན་པ་གང་ཡིན་པ་དེ་ནི་བྱང་ཆུབ་སེམས་དཔའི་དགེ་བའི་རྩ་བ་ཡིན་ནོ། །ཉན་ཐོས་དང ། རང་སངས་རྒྱས་འདོད་པ་རྩ་བ་མ་ཡིན་པ་གང་ཡིན་པ་དེ་ནི་བྱང་ཆུབ་སེམས་དཔའི་དགེ་བའི་རྩ་བ་ཡིན་ནོ། །བྱམས་
129a
༄#། །པ་ཆེན་པོའི་རྩ་བ་དང ། སྙིང་རྗེ་ཆེན་པོའི་རྩ་བ་དང ། ཐམས་ཅད་མཁྱེན་པ་ཉིད་ཀྱི་སེམས་མི་འདོར་བའི་རྩ་བ་དང ། སེམས་ཅན་ཡོངས་སུ་སྨིན་པར་བྱེད་པའི་རྩ་བ་དང ། དམ་པའི་ཆོས་ཡོངས་སུ་འཛིན་པའི་རྩ་བ་དང ། བདོག་པ་ཐམས་ཅད་ཡོངས་སུ་གཏོང་བའི་རྩ་བ་དང ། རྣམ་པར་སྨིན་པ་ལ་རེ་བ་མེད་པའི་རྩ་བ་དང ། ཚུལ་ཁྲིམས་དང་བསླབ་པ་ཐམས་ཅད་ཡང་དག་པར་ལེན་པའི་རྩ་བ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་ཡང་མི་འདོད་པའི་རྩ་བ་དང ། བཟོད་པ་དང ། ཞི་བ་དང ། དུལ་བ་དང ། ངེས་པའི་རྩ་བ་དང ། བདག་དང་གཞན་ལ་ཡང་མི་གནོད་པའི་རྩ་བ་དང ། བརྟན་པའི་བརྩོན་འགྲུས་ཆེན་པོ་རྩོམ་པའི་རྩ་བ་དང ། དམན་པའི་ཆོས་ཡང་དག་པར་མི་སྡུད་པའི་རྩ་བ་དང ། བསམ་གཏན་གྱི་རྩ་བ་དང ། བསམ་གཏན་གྱི་རོ་མྱོང་བར་མི་བྱེད་པའི་རྩ་བ་དང ། ཤེས་རབ་ཀྱི་རྩ་བ་དང ། བཏང་སྙོམས་ཀྱང་མ་ཡིན་པའི་རྩ་བ་དང ། ཐབས་ཀྱི་རྩ་བ་དང ། ཐམས་ཅད་ཀྱི་རྗེས་སུ་འཇུག་པའི་རྩ་བ་གང་ཡིན་པ་དེ་ནི་བྱང་ཆུབ་སེམས་དཔའི་དགེ་བའི་རྩ་བ་ཡིན་ནོ། །དཀོན་མཆོག་གསུམ་གྱི་གདུང་རྒྱུན་མི་གཅོད་པའི་རྩ་བ་དང ། སྟོབས་བཅུ་དང ། མི་འཇིགས་པའི་རྩ་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་སྒྲུབ་པའི་རྩ་བ་གང་ཡིན་པ་དེ་ནི་བྱང་ཆུབ་སེམས་དཔའི་དགེ་བའི་རྩ་བ་ཡིན་ནོ། །
129b
ལུས་དང་ངག་དང་སེམས་ཀྱི་རྒྱུན་གྱི་རྩ་བ་གང་ཡིན་པ་དེ་ནི་བྱང་ཆུབ་སེམས་དཔའི་དགེ་བའི་རྩ་བ་ཡིན་ནོ། །གཟུངས་ཀྱི་ཤེས་པ་ཐོབ་པ་གང་ཡིན་པ་དེ་ནི་བྱང་ཆུབ་སེམས་དཔའི་དགེ་བའི་རྩ་བ་ཡིན་ནོ། །སྤོབས་པ་མི་ཆོད་པའི་རྩ་བ་གང་ཡིན་པ་དེ་ནི་བྱང་ཆུབ་སེམས་དཔའི་དགེ་བའི་རྩ་བ་ཡིན་ནོ། །མངོན་པར་ཤེས་པ་དང ། རིག་པ་ཐོབ་པའི་རྩ་བ་གང་ཡིན་པ་དེ་ནི་བྱང་ཆུབ་སེམས་དཔའི་དགེ་བའི་རྩ་བ་ཡིན་ནོ། །སངས་རྒྱས་ཀྱི་ཞིང་ཡོངས་སུ་དག་པར་བྱེད་པའི་རྩ་བ་གང་ཡིན་པ་དེ་ནི་བྱང་ཆུབ་སེམས་དཔའི་དགེ་བའི་རྩ་བ་ཡིན་ནོ། །བྱང་ཆུབ་ཀྱི་སྙིང་པོར་འགྲོ་བ་བྱིན་གྱིས་རློབ་པའི་རྩ་བ་གང་ཡིན་པ་དང ། ལན་གསུམ་དུ་བཟླས་ཏེ། ཆོས་ཀྱི་འཁོར་ལོ་རྣམ་པ་བཅུ་གཉིས་སུ་བསྐོར་བའི་རྩ་བ་གང་ཡིན་པ་དེ་ནི་བྱང་ཆུབ་སེམས་དཔའི་དགེ་བའི་རྩ་བ་ཡིན་ནོ། །འཇམ་དཔལ་གཞོན་ནུར་གྱུར་པས་དོན་གྱི་གཞི་རྣམ་པར་ངེས་པར་བསྟན་པ་གསུམ་པོ་འདི་བཤད་པ་ན། ཐམས་ཅད་དང་ལྡན་པའི་འཁོར་དེས་ལེགས་སོ། །ཞེས་བྱ་བ་བྱིན་ནས་ཐམས་ཅད་དང་ལྡན་པའི་འཁོར་དེས་བཅོམ་ལྡན་འདས་དང ། འཇམ་དཔལ་གཞོན་ནུར་གྱུར་པ་ལ། མེ་ཏོག་རྣམ་པ་སྣ་ཚོགས་དག་གིས་མངོན་པར་གཏོར་ནས། ཚིག་འདི་སྐད་དུ་སངས་རྒྱས་ཀྱི་ཞིང་གང་ན། འཇམ་དཔལ་གཞོན་ནུར་གྱུར་པ་གནས་པ་དེར་ནི་དེ་བཞིན་གཤེགས་པ་གཉིས་བྱུང་བ་ཡིན་པར་རིག་པར་བྱའོ། །སེམས་ཅན་གང་དག་
130a
༄#། །འཇམ་དཔལ་གཞོན་ནུར་གྱུར་པས་བསྟན་པ་འདི་ཐོས་ནས། མི་སྐྲག། མི་དངང་ཞིང ། དངང་བར་མི་འགྱུར་བ་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ཡིན་ནོ། །དེ་དག་གིས་ནི་བདུད་ཀྱི་ལས་ཐམས་ཅད་བཀག་པ་ཡིན་ནོ། །དེ་དག་ནི་ཐེག་པ་ཆེན་པོ་ལ་སྣང་བ་ཐོབ་པ་ཡིན་ནོ་ཞེས་ཀྱང་སྨྲས་སོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་དེས་སྨྲས་པ་ལ་རྗེས་སུ་ཐུགས་རངས་པ་མཛད་ནས། ལྷའི་བུ་དེད་དཔོན་ལ་འདི་སྐད་ཅེས་བཀའ་སྩལ་ཏོ། །ལྷའི་བུ། གང་དག་འཇམ་དཔལ་གཞོན་ནུར་གྱུར་པས་བཤད་པ་དེ་ཐོས་ནས་མོས་པར་འགྱུར་བ་དེ་ཡང་ཆོ་འཕྲུལ་ཆེན་པོ་ཡིན་ཏེ། དེ་དག་ནི་དེ་ལས་གཞན་པའི་ཆོ་འཕྲུལ་རྣམས་ཀྱིས་སྐྲག་པར་མི་འགྱུར་རོ། །དེ་ཅིའི་ཕྱིར་ཞེ་ན། ལྷའི་བུ། འདི་ལྟ་སྟེ། རྟག་པར་འདུ་ཤེས་པའི་སེམས་ཅན་རྣམས་ལ་མི་རྟག་པར་བཤད་པ་དང ། བདེ་བར་འདུ་ཤེས་པ་རྣམས་ལ་སྡུག་བསྔལ་བར་བཤད་པ་དང ། བདག་ཏུ་འདུ་ཤེས་པ་རྣམས་ལ་བདག་མེད་པར་བཤད་པ་དང ། སྡུག་པར་འདུ་ཤེས་པ་རྣམས་ལ་མི་སྡུག་པར་བཤད་པ་དང ། དངོས་པོར་འདུ་ཤེས་པ་རྣམས་ལ་དངོས་པོ་མེད་པར་བཤད་པ་དང ། ལྟ་བར་འདུ་ཤེས་པ་རྣམས་ལ་སྟོང་པར་བཤད་པ་དང ། མཚན་མར་འདུ་ཤེས་པ་རྣམས་ལ་མཚན་མ་མེད་པར་བཤད་པ་དང ། ཁམས་གསུམ་པར་འདུ་ཤེས་པ་རྣམས་
130b
ལ་སྨོན་པ་མེད་པར་བཤད་པ་དང ། ངར་འཛིན་པ་དང ། ང་ཡིར་འཛིན་པ་འདུ་ཤེས་པ་རྣམས་ལ་ལྟ་བའི་རྣམ་པ་ཐམས་ཅད་དང་བྲལ་བར་བཤད་པ་དེ་ནི་འཇིག་རྟེན་གྱི་འཇིགས་པ་ཆེན་པོ་ཡིན་ཏེ། གང་དག་དེ་ལ་སྐྲག་པར་མི་འགྱུར་བ་དེ་དག་ནི་ཡང་དག་པར་དུལ་བ་ཡིན་པས་ན། ཡང་དག་པར་དུལ་བ་རྣམས་ནི་གང་ལ་ཡང་སྐྲག་པར་མི་འགྱུར་བའི་ཕྱིར་རོ། །དེ་ཅིའི་ཕྱིར་ཞེ་ན། དེ་གང་ལས་སྐྲག་པར་འགྱུར་བའི་ཆོས་འདི་ལྟ་སྟེ། ངར་འཛིན་པ་ཡོངས་སུ་འཛིན་པ་དང ། ང་ཡིར་འཛིན་པ་ཡོངས་སུ་འཛིན་པ་དེ་དག་དེས་ཡོངས་སུ་མ་བཟུང་བས། ཡོངས་སུ་མ་བཟུང་བ་ལ་རྟེན་མེད་པ་དང ། རྟེན་མེད་པ་ལ་གཡོ་བ་མེད་པ་དང ། གཡོ་བ་མེད་པ་ལ་འགུལ་བ་མེད་པ་དང ། འགུལ་བ་མེད་པ་ལ་བླང་བ་མེད་པ་དང ། བླང་བ་མེད་པ་ལ་དོར་བ་མེད་པ་དང ། དོར་བ་མེད་པ་ལ་འཛིན་པ་མེད་པ་དང ། འཛིན་པ་མེད་པ་ལ་མཆོག་ཏུ་འཛིན་པ་མེད་པ་དང ། མཆོག་ཏུ་འཛིན་པ་མེད་པ་ལ་ཕྱིན་ཅི་ལོག་མེད་པ་དང ། ཕྱིན་ཅི་ལོག་མེད་པ་ལ་ལོག་པ་ཉིད་མེད་པ་དང ། ལོག་པ་ཉིད་དང་བྲལ་བ་ནི་ཡང་དག་པར་བསྒྲུབ་པ་ཡིན་པ་དང ། ཡང་དག་པར་བསྒྲུབ་པ་ནི་ཡང་དག་པར་ལྟ་བ་ཡིན་པ་དང ། ཡང་དག་པར་ལྟ་བ་ནི་ཡང་དག་པའི་ཏིང་ངེ་འཛིན་གྱི་བར་དག་ཡིན་པ་དང ། ཡང་དག་པའི་ཏིང་ངེ་འཛིན་ལ་གནས་པ་ལ་རྣམ་པར་གཡེང་བ་མེད་པ་དང ། སེམས་རྣམ་པར་མི་གཡེང་བ་ལ་གནས་པ་མེད་པ་དང །
131a
༄#། །སེམས་མི་གནས་པ་ལ་གནས་མེད་པ་དང ། སེམས་ཀྱི་གནས་མེད་པ་ལ་རྣམ་པར་ཤེས་པའི་གནས་མེད་པ་དང ། རྣམ་པར་རིག་པ་མེད་པ་ལ་བརྟག་ཅིང་བསལ་བ་མེད་པ་དང ། བརྟག་ཅིང་བསལ་བ་དང་བྲལ་བས་དམིགས་པ་མེད་པར་གནས་པ་ལ་སྒྲིབ་པ་མེད་པ་དང ། སྒྲིབ་པ་མེད་པར་གནས་པ་ལ་རློམ་སེམས་མེད་པ་དང ། གང་གི་ཚེ་རློམ་སེམས་མེད་པ་དེའི་ཚེ་ལྷག་པར་རློམ་སེམས་མེད་པ་དང ། གང་གི་ཚེ་ལྷག་པར་རློམ་སེམས་མེད་པ་དེའི་ཚེ་བདག་དང་གཞན་དུ་མཐོང་བ་མེད་པ་དང ། མཐོང་བ་མེད་པ་ལ་ཡོངས་སུ་གདུང་བ་མེད་པ་དང ། ཡོངས་སུ་གདུང་བ་མེད་པ་ལ་སྒྱིད་ལུག་པ་མེད་པ་དང ། སྒྱིད་ལུག་པ་མེད་པ་ལ་ཉོན་མོངས་པའི་རྒྱུ་མེད་པ་དང ། ཉོན་མོངས་པ་ཅན་མ་ཡིན་པའི་སེམས་ལ་གསལ་བ་སྣང་བ་དང ། གསལ་བ་ཐོབ་པས་ཡེ་ཤེས་མཐོང་བ་དང ། ཡེ་ཤེས་མཐོང་བ་ལ་གནས་པའི་སེམས་ཀྱི་ཤེས་པ་རྒྱ་ཆེ་བ། སེམས་ཀྱི་ཤེས་པ་རྒྱ་ཆེན་པོ་ལ་གནས་པ་ལ་བདུད་ཀྱིས་གླགས་མི་རྙེད་པ་དང ། བདུད་དང་ཕྱིར་རྒོལ་བ་ངེས་པར་བཅོམ་པ་ལ་སྒྲིབ་པ་མེད་པ་མངོན་དུ་གྱུར་བ་དང ། སྒྲིབ་པ་མེད་པ་ལ་གནས་པ་ལ། སངས་རྒྱས་ཀྱི་ཆོས་ཐམས་ཅད་མངོན་དུ་གྱུར་བའི་ཕྱིར་རོ། །ལྷའི་བུ། གང་བྱས་པ་མེད་ཅིང་སྐྱེ་བ་མེད་པའི་ཆོས་རྣམས་ལ། ཆོས་ཀྱི་གོ་རིམ་གྱི་མཚམས་སྦྱར་བ་དེ་ལྟར་སྟོན་པ་དེ་ཡང་ཆོ་འཕྲུལ་ཆེན་པོ་
131b
ཡིན་ནོ། །དེ་ནས་ཚེ་དང་ལྡན་པ་ཤཱ་རདྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །ཁོ་བོ་ཅག་འཇམ་དཔལ་གཞོན་ནུར་གྱུར་པ་ལ་ཅི་དང་ཅི་འདྲི་བ་དེ་དང་དེ་ཉིད་ཀྱི་ཚིག་གི་མཚམས་ལས། སངས་རྒྱས་ཀྱི་ཆོས་ཐམས་ཅད་སྣང་ངོ ། །འཇམ་དཔལ་གྱིས་སྨྲས་པ། བཙུན་པ་ཤཱ་རདྭ་ཏིའི་བུ། ཆོས་ཐམས་ཅད་ནི་བདག་པོ་མེད་པ་སྟེ། དེ་དག་ནི་ཇི་ལྟར་འདོད་པ་དེ་བཞིན་དུ་སྒྲུབ་པར་བྱེད་དོ། །བཙུན་པ་ཤཱ་རདྭ་ཏིའི་བུ། ཆོས་ཐམས་ཅད་ནི་མི་ཟད་པ་སྟེ། དེ་དག་ནི་ཇི་ལྟར་འདོད་པ་དེ་བཞིན་དུ་སྟོན་པར་བྱེད་དོ། །བཙུན་པ་ཤཱ་རདྭ་ཏིའི་བུ། ཆོས་ཐམས་ཅད་ནི་བེམ་པོ་སྟེ། དེ་དག་ནི་ཇི་ལྟར་འདོད་པ་དེ་བཞིན་དུ་རྗོད་པར་བྱེད་དོ། །བཙུན་པ་ཤཱ་རདྭ་ཏིའི་བུ། ཆོས་ཐམས་ཅད་ནི་ཐེར་ཟུག་ཏུ་གནས་པ་མ་ཡིན་པ་སྟེ། དེ་དག་ནི་ཇི་ལྟར་འདོད་པ་དེ་བཞིན་དུ་རྣམ་པར་འཇོག་པར་བྱེད་དོ། །བཙུན་པ་ཤཱ་རདྭ་ཏིའི་བུ། ཆོས་ཐམས་ཅད་ནི་མཐོང་བ་མེད་པ་སྟེ། དེ་དག་ནི་ཇི་ལྟར་འདོད་པ་དེ་བཞིན་དུ་རྣམ་པར་དགོད་པར་བྱེད་དོ། ། བཙུན་པ་ཤཱ་རདྭ་ཏིའི་བུ། ཆོས་ཐམས་ཅད་བཏང་སྙོམས་པ་སྟེ། དེ་དག་ནི་ཇི་ལྟར་འདོད་པ་དེ་བཞིན་དུ་འཆད་པར་བྱེད་དོ། །བཙུན་པ་ཤཱ་རདྭ་ཏིའི་བུ། ཆོས་དེ་དག་ནི་གང་ནས་ཀྱང་མ་བླངས།་གང་དུ་ཡང་མ་ཁྲིད་པ་སྟེ། དེ་དག་ནི་བསགས་པ་ཡང་མ་ཡིན། སྤུངས་པ་ཡང་མ་ཡིན་ནོ། །དེ་དག་ནི་བཤད་ཀྱང་རུང ། མ་བཤད་ཀྱང་རུང་སྟེ། ཆོས་ཀྱི་དེ་བཞིན་དེ་མི་འདོར་
132a
༄#། །བ་ཡིན་ནོ། །སེམས་ཅན་ཐམས་ཅད་ཀྱི་ཡི་གེ་འབྱུང་བ་གང་ཡིན་པ་དང ། སངས་རྒྱས་ཐམས་ཅད་ཀྱི་ཆོས་བསྟན་པའི་ཡི་གེ་འབྱུང་བ་གང་ཡིན་པའི་ཡི་གེ་དེ་དག་ཐམས་ཅད་ནི། ལུས་ལས་ཀྱང་མ་བྱུང ། སེམས་ལས་ཀྱང་མ་བྱུང་བ་སྟེ། རྒྱུ་དང་རྐྱེན་ཉིད་ལས་བྱུང་བ་ཡིན་ནོ། །ཇི་ལྟར་ཡི་གེ་རྣམས་ལ་བསགས་པ་མེད་པ་དེ་བཞིན་དུ།་སེམས་དང་སེམས་ལས་བྱུང་བའི་ཆོས་རྣམས་ལ་ཡང་བསགས་པ་མེད་དོ། །ཇི་ལྟར་སེམས་དང་སེམས་ལས་བྱུང་བའི་ཆོས་རྣམས་ལ་བསགས་པ་མེད་པ་དེ་བཞིན་དུ ། ཉོན་མོངས་པའི་དམིགས་པ་ཐམས་ཅད་ལ་ཡང་བསགས་པ་མེད་དོ། །ཇི་ལྟར་ཉོན་མོངས་པའི་དམིགས་པ་ཐམས་ཅད་ལ་བསགས་པ་མེད་པ་དེ་བཞིན་དུ། ཤེས་པ་གང་གིས་ཉོན་མོངས་པ་རྣམས་སྤངས་པའི་ཤེས་པ་དེ་ལ་ཡང་བསགས་པ་མེད་དེ། བཙུན་པ་ཤཱ་རདྭ་ཏིའི་བུ། གང་མི་གནས་པའི་ཤེས་པས་མི་གནས་པའི་ཉོན་མོངས་པ་རྣམས་སྤངས་པ་དེ་ཡང་ཆོ་འཕྲུལ་ཆེན་པོ་ཡིན་ནོ། །དེ་ནས་ལྷའི་བུ་དེད་དཔོན་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བྱང་ཆུབ་སེམས་དཔའ་རྣམས་ཀྱི་ཤེས་པ་གང་ཡིན། འཇམ་དཔལ་གྱིས་སྨྲས་པ། ལྷའི་བུ། སྡུག་བསྔལ་ཡོངས་སུ་ཤེས་པའི་ཤེས་པ་དང ། ཕུང་པོ་ཡོངས་སུ་སྤངས་པ་ལ་ཡོངས་སུ་སྐྱོ་བ་མེད་པའི་ཤེས་པ་
132b
དང ། ཀུན་འབྱུང་བ་ཤེས་པ་དང ། དགེ་བའི་རྩ་བ་ཡང་དག་པར་བསྡུ་བ་ཤེས་པ་དང ། འགོག་པ་ཤེས་པ་དང ། སྐྱེ་བ་ཤེས་པ་དང ། འབྱུང་བ་ཤེས་པ་དང ། ལམ་ཤེས་པ་དང ། ལམ་ངན་པ་རྣམ་པར་བཅད་པ་ཤེས་པ་དང ། རྒྱུ་ཤེས་པ་དང ། ཆུད་མི་ཟ་བ་ཤེས་པ་དང ། འབྲས་བུ་ཤེས་པ་དང ། མངོན་སུམ་དུ་བྱ་བ་སྤངས་པ་ཤེས་པ་དང ། རྐྱེན་ཤེས་པ་དང ། ཚོགས་བསགས་པ་ཤེས་པ་དང ། བདེན་པ་ཤེས་པ་དང ། སངས་རྒྱས་ཀྱི་ཡེ་ཤེས་ལ་ལྟ་ཞིང་ཐོབ་པར་བྱ་བ་ཤེས་པ་དང ། རྟེན་ཅིང་འབྲེལ་བར་འབྱུང་བ་ཤེས་པ་དང ། འབྱུང་བ་ལ་མངོན་པར་ཞེན་པ་མེད་པ་ཤེས་པ་དང ། ཕུང་པོ་ལྔ་ཤེས་པ་དང ། ཕུང་པོའི་བདུད་སྤངས་པ་ཤེས་པ་དང ། ཁམས་ཤེས་པ་དང ། ཆོས་ཀྱི་དབྱིངས་དབྱེར་མེད་པ་ཤེས་པ་དང ། སྐྱེ་མཆེད་ཤེས་པ་དང ། གྲོང་སྟོང་པ་ལྟ་བུ་སོ་སོར་རྟོག་པ་ཤེས་པ་དང ། སྦྱིན་པ་ཤེས་པ་དང ། དུས་དང་དུས་མ་ཡིན་པ་ལས་མི་འདའ་བ་ཤེས་པ་དང ། ཚུལ་ཁྲིམས་ཤེས་པ་དང ། ཚུལ་ཁྲིམས་འཆལ་བའི་སེམས་ཅན་ཡོངས་སུ་སྨིན་པར་བྱ་བ་ཤེས་པ་དང ། བཟོད་པ་ཤེས་པ་དང ། སེམས་ཅན་རྗེས་སུ་བསྲུང་བ་ཤེས་པ་དང ། བརྩོན་འགྲུས་ཤེས་པ་དང ། ལེགས་པར་བྱ་བའི་ལས་བྱ་བ་ཤེས་པ་དང ། བསམ་གཏན་ཤེས་པ་དང ། བསམ་གཏན་ལས་ལྡོག་པ་ཤེས་པ་དང ། ཤེས་རབ་ཤེས་པ་དང ། ལྟ་བ་ཡོངས་སུ་ཤེས་པ་དང ། ཐབས་ཤེས་པ་དང ། སེམས་ཅན་ཡོངས་སུ་སྨིན་པར་
133a
༄#། །བྱ་བ་ཤེས་པ་དང ། བྱམས་པ་ཤེས་པ་དང ། སེམས་ཅན་བསྐྱབ་པ་ཤེས་པ་དང ། སྙིང་རྗེ་ཤེས་པ་དང ། ཡོངས་སུ་མི་སྐྱོ་བ་ཤེས་པ་དང ། དགའ་བ་ཤེས་པ་དང ། ཆོས་ལ་དགའ་ཞིང་རབ་ཏུ་དགའ་ལ་མཆོག་ཏུ་དགའ་བ་ཤེས་པ་དང ། བཏང་སྙོམས་ཤེས་པ་དང ། སངས་རྒྱས་ཀྱི་ཆོས་ཡོངས་སུ་བསྒྲུབ་པ་ཤེས་པ་དང ། སེམས་ཅན་གཞུག་པ་ཤེས་པ་དང ། ཐ་སྙད་ཤེས་པ་དང ། དྲན་པ་ཉེ་བར་གཞག་པ་ཤེས་པ་དང ། གནས་མེད་པ་ལ་གནས་པ་ཤེས་པ་དང ། ཡང་དག་པར་སྤོང་བ་ཤེས་པ་དང ། མཉམ་པ་ཉིད་དང་མི་འགལ་བ་ཤེས་པ་དང ། རྫུ་འཕྲུལ་གྱི་རྐང་པ་ཤེས་པ་དང ། མངོན་པར་འདུ་བྱ་བ་མེད་པར་སོ་སོར་རྟོག་པ་ཤེས་པ་དང ། དད་པའི་དབང་པོ་དང ། སྟོབས་ཤེས་པ་དང།་ཆགས་པ་ཐམས་ཅད་ལས་ཡང་དག་པར་འདའ་བ་ཤེས་པ་དང ། བརྩོན་འགྲུས་ཀྱི་དབང་པོ་དང ། སྟོབས་ཤེས་པ་དང ། ཉོན་མོངས་པ་ཐམས་ཅད་ཀྱིས་མི་ཚུགས་པ་ཤེས་པ་དང།་དྲན་པའི་དབང་པོ་དང ། སྟོབས་ཤེས་པ་དང ། ཆོས་ཐམས་ཅད་མི་བརྗེད་པ་ཤེས་པ་དང ། ཏིང་ངེ་འཛིན་གྱི་དབང་པོ་དང ། སྟོབས་ཤེས་པ་དང ། ཆོས་ཐམས་ཅད་མཉམ་པ་ཉིད་དུ་ཤེས་པ་དང ། ཤེས་རབ་ཀྱི་དབང་པོ་དང ། སྟོབས་ཤེས་པ་དང ། སེམས་ཅན་ཐམས་ཅད་ཀྱི་དབང་པོ་མཆོག་དང ། མཆོག་མ་ཡིན་པ་ཤེས་པ་དང ། བྱང་ཆུབ་ཀྱི་ཡན་
133b
ལག་ཤེས་པ་དང ། རང་བྱུང་གི་ཡེ་ཤེས་རྗེས་སུ་རྟོགས་པ་ཤེས་པ་དང ། ལམ་ཤེས་པ་དང ། ལམ་ངན་པ་ཐམས་ཅད་ལས་ཡང་དག་པར་འདའ་བ་ཤེས་པ་དང ། སྙིང་རྗེ་ཆེན་པོ་ལ་ལྷག་པར་དམིགས་པ་ཤེས་པ་དང ། ཟད་པ་ཤེས་པ་དང ། དགེ་བའི་རྩ་བ་ཐམས་ཅད་མི་ཟད་པ་ཤེས་པ་དང ། སྐྱེ་བ་མེད་པ་ཤེས་པ་དང ། མི་སྐྱེ་བའི་ཆོས་ལ་བཟོད་པ་ཐོབ་པ་ཤེས་པ་དང ། སངས་རྒྱས་རྗེས་སུ་དྲན་པ་ཤེས་པ་དང ། སངས་རྒྱས་ཀྱི་སྐུ་ཡོངས་སུ་གྲུབ་པ་ཤེས་པ་དང ། ཆོས་རྗེས་སུ་དྲན་པ་ཤེས་པ་དང ། ཆོས་ཀྱི་འཁོར་ལོ་རབ་ཏུ་བསྐོར་བ་ཤེས་པ་དང ། དགེ་འདུན་རྗེས་སུ་དྲན་པ་ཤེས་པ་དང ། ཕྱིར་མི་ལྡོག་པའི་བྱང་ཆུབ་སེམས་དཔའི་དགེ་འདུན་ཡང་དག་པར་འདུ་བ་ཤེས་པ་དང ། གཏོང་བ་རྗེས་སུ་དྲན་པ་ཤེས་པ་དང ། སེམས་ཅན་ཐམས་ཅད་ཡོངས་སུ་མི་གཏོང་བ་ཤེས་པ་དང ། ཚུལ་ཁྲིམས་རྗེས་སུ་དྲན་པ་ཤེས་པ་དང ། སྨོན་ལམ་ཐམས་ཅད་ཡོངས་སུ་རྫོགས་པར་བྱ་བ་ཤེས་པ་དང ། ལྷ་རྗེས་སུ་དྲན་པ་ཤེས་པ་དང ། སྡིག་པ་ཐམས་ཅད་མི་བྱ་བར་ཤེས་པ་དང ། སེམས་ཅན་གྱི་དབང་པོ་ཤེས་པ་དང ། རིམ་པ་རྗེས་སུ་རྟོགས་པ་ཤེས་པ་དང ། ཐོས་པའི་ཚོགས་ཡོངས་སུ་རྫོགས་པར་བྱ་བ་ཤེས་པ་དང ། ཚོགས་ཐམས་ཅད་ཀྱིས་མི་ངོམས་པ་ཤེས་པ་དང ། སྨན་ཐམས་ཅད་ཤེས་པ་དང ། རྐྱེན་ཇི་ལྟ་བ་བཞིན་དུ་སྦྱོར་བ་ཤེས་པ་དང ། གནས་དང་གནས་མ་ཡིན་པ་ཤེས་པ་དང ། གནས་མ་ཡིན་པ་མི་བྱ་བར་ཤེས་པ་དང ། སྟོབས་བཅུ་ཤེས་པ་དང ། ཉན་ཐོས་དང ། རང་
134a
༄#། །སངས་རྒྱས་ཐམས་ཅད་ཀྱི་ཐེག་པ་དང་རྗེས་སུ་མཐུན་པ་ཤེས་པ་དང ། མི་འཇིགས་པ་ཤེས་པ་དང ། བར་དུ་གཅོད་པ་དང་བར་དུ་གཅོད་པ་མ་ཡིན་པའི་ཆོས་རྗེས་སུ་རྟོགས་པ་ཤེས་པ་དང ། འདས་པའི་དུས་ལ་མ་ཐོགས་པའི་ཤེས་པ་དང ། རྣམ་པར་ཤེས་པ་མི་གནས་པར་ཤེས་པ་དང ། མ་འོངས་པའི་དུས་ལ་མ་ཐོགས་པའི་ཤེས་པ་དང ། ཆོས་ཐམས་ཅད་ལས་ཡང་དག་པར་མི་འདའ་བ་ཤེས་པ་དང ། ད་ལྟར་བྱུང་བའི་དུས་ལ་མ་ཐོགས་པའི་ཤེས་པ་དང ། གནས་པ་མེད་པ་དང ། རབ་ཏུ་གནས་པ་མེད་པ་ཤེས་པ་དང ། ལུས་སྔོན་དུ་འགྲོ་བ་ཤེས་པ་དང ། སེམས་ཅན་ཐམས་ཅད་ཀྱི་ལུས་ལ་འཇུག་པ་ཤེས་པ་དང ། ངག་སྔོན་དུ་འགྲོ་བ་ཤེས་པ་དང ། སེམས་ཅན་ཐམས་ཅད་ཀྱི་སྒྲ་རབ་ཏུ་དབྱེ་བ་ཤེས་པ་དང ། ཡིད་སྔོན་དུ་འགྲོ་བ་ཤེས་པ་དང ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་རྣམ་པར་གཡོ་བ་རྗེས་སུ་རྟོགས་པའི་ཤེས་པ་དང ། འཁྲུལ་པ་མེད་པའི་ཤེས་པ་དང ། སེམས་ཅན་ཐམས་ཅད་ཀྱི་འཁྲུལ་པ་རྗེས་སུ་རྟོགས་པའི་ཤེས་པ་དང ། ཉོན་མོངས་པ་དང་བྲལ་བ་ཤེས་པ་དང ། སེམས་ཅན་ཐམས་ཅད་ཀྱི་ཉོན་མོངས་པ་དང ། རྩོད་པ་ཉེ་བར་ཞི་བར་བྱ་བ་ཤེས་པ་དང ། མི་བརྗེད་པའི་ཤེས་པ་དང ། སེམས་རྣམ་པར་གཡེངས་པའི་སེམས་ཅན་དྲན་པ་ལ་འཇོག་པ་ཤེས་པ་དང ། དགོངས་པ་རབ་ཏུ་
134b
འཛིན་པ་ཤེས་པ་དང ། སེམས་ཅན་ལེ་ལོ་ཅན་ཡོངས་སུ་བཟུང་བ་ཤེས་པ་དང ། སངས་རྒྱས་ཀྱི་ཆོས་མ་འདྲེས་པ་ཤེས་པ་དང ། གདུལ་བའི་སེམས་ཅན་འདུལ་བ་རྗེས་སུ་རྟོགས་པའི་ཤེས་པ་དང ། ཐབས་ཤེས་པ་དང ། ཤེས་རབ་ཤེས་པ་སྟེ། ལྷའི་བུ། དེ་ནི་བྱང་ཆུབ་སེམས་དཔའི་ཤེས་པ་ཡིན་ཏེ། ཤེས་པ་དེ་དང་ལྡན་པའི་བྱང་ཆུབ་སེམས་དཔའ་ནི་སངས་རྒྱས་ཀྱི་ཡེ་ཤེས་ཆགས་པ་མེད་པ་འཐོབ་བོ། །ལྷའི་བུས་སྨྲས་པ། འཇམ་དཔལ། ཇི་ཙམ་དུ་བྱང་ཆུབ་སེམས་དཔའ་རྣམས་ཀྱི་ཤེས་པ་བསམ་གྱིས་མི་ཁྱབ་པ་དེ་དང ། འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་ཤེས་པ་དེ་ནི་ངོ་མཚར་ཏེ། ཤེས་པ་དེ་ནི་གོ་ཆ་ངན་ངོན་དང་ལྡན་པས་ཡང་དག་པར་བསྡུ་བར་མི་ནུས་སོ། །འཇམ་དཔལ་གང་དེ་ལྟ་བུའི་ཤེས་པ་སྐྱེད་པར་བྱེད་པ་དེ་ཡང་ཆོ་འཕྲུལ་ཆེན་པོ་ཡིན་ནོ།། །།བམ་པོ་གསུམ་པ་སྟེ་ཐ་མ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་གོ་ཆ་ལེགས་པར་བགོས་པ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་རང་བཞིན་གྱིས་ཡོངས་སུ་མྱ་ངན་ལས་འདས་པའི་སེམས་ཅན་རྣམས་ལ་སྐྲག་པར་མི་འགྱུར་བ་དེ་ལྟ་བུ་ནི་བྱང་ཆུབ་སེམས་དཔའ་ནི་གོ་ཆ་ལེགས་པར་བགོས་པ་ཡིན་ནོ། །སྨྲས་པ། འཇམ་དཔལ། ཅིའི་ཕྱིར་བྱང་ཆུབ་སེམས་དཔའ་ཞེས་བྱ།
135a
༄#། །སྨྲས་པ།་ལྷའི་བུ། བྱང་ཆུབ་ཀྱི་གནས་རྗེས་སུ་འཇུག་པས་བྱང་ཆུབ་སེམས་དཔའ་ཞེས་བྱའོ། །སྨྲས་པ། འཇམ་དཔལ། ཅིའི་ཕྱིར་སེམས་དཔའ་ཆེན་པོ་ཞེས་བྱ། སྨྲས་པ། ལྷའི་བུ། རྩོམ་པ་ཆེན་པོ་ཉམས་འོག་ཏུ་ཆུད་པར་བྱེད་པ་དང ། ཡེ་ཤེས་ཆེན་པོ་ཡོངས་སུ་རྫོགས་པར་བྱེད་པས་ན་སེམས་དཔའ་ཆེན་པོ་ཞེས་བྱའོ། །སྨྲས་པ། འཇམ་དཔལ།་ཅིའི་ཕྱིར་སེམས་ཅན་མཆོག་ཅེས་བྱ། སྨྲས་པ། ལྷའི་བུ། ཤེས་རབ་ཀྱིས་གཟུང་བ་མེད་པའི་ཆོས་ལ་འཇུག་པ་དང ། ཐབས་ཀྱིས་ཆོས་ཐམས་ཅད་ཡང་དག་པར་བསྡུས་པས་དེའི་ཕྱིར་སེམས་ཅན་མཆོག་ཅེས་བྱའོ། །སྨྲས་པ། འཇམ་དཔལ། ཅིའི་ཕྱིར་སེམས་ཅན་དག་པ་ཞེས་བྱ། སྨྲས་པ། ལྷའི་བུ། གང་ཉོན་མོངས་པའི་དྲི་མ་རྣམས་དང་ལྷན་ཅིག་མི་གནས་ཤིང ། སེམས་ཅན་ཐམས་ཅད་ཀྱི་ཉོན་མོངས་པ་སྤང་བའི་ཕྱིར་བརྩོན་འགྲུས་རྩོམ་པར་ཡང་བྱེད་པས། དེའི་ཕྱིར་སེམས་ཅན་དག་པ་ཞེས་བྱའོ། །སྨྲས་པ། འཇམ་དཔལ། ཅིའི་ཕྱིར་སེམས་ཅན་རྣམ་པར་དག་པ་ཞེས་བྱ། སྨྲས་པ། ལྷའི་བུ། འདི་ལྟར་སེམས་ཅན་ཐམས་ཅད་ངེས་པར་འབྱུང་བའི་ལམ་རྣམ་པར་སྦྱོང་བར་བྱེད་པས། དེའི་ཕྱིར་སེམས་ཅན་རྣམ་པར་དག་པ་ཞེས་བྱའོ། །སྨྲས་པ། འཇམ་དཔལ། ཅིའི་ཕྱིར་འདྲེན་པ་ཞེས་བྱ། སྨྲས་པ། ལྷའི་བུ། འདི་ལྟར་ལམ་དེ་ལ་གནས་ནས། སེམས་ཅན་གྲངས་མེད་དཔག་ཏུ་མེད་པ་དག་ཡོངས་སུ་སྨིན་
135b
པར་བྱེད་པས། དེའི་ཕྱིར་འདྲེན་པ་ཞེས་བྱའོ། །སྨྲས་པ། འཇམ་དཔལ། ཅིའི་ཕྱིར་རྣམ་པར་འདྲེན་པ་ཞེས་བྱ། སྨྲས་པ། ལྷའི་བུ། འདི་ལྟར་གདུལ་བའི་སེམས་ཅན་རྣམས་ཤིན་ཏུ་འདུལ་བ་ལ་རབ་ཏུ་འགོད་པར་བྱེད་པས། དེའི་ཕྱིར་རྣམ་པར་འདྲེན་པ་ཞེས་བྱའོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་དཔའ་བ་ཡིན། སྨྲས་པ། ལྷའི་བུ། ཇི་ཙམ་གྱིས་བདུད་དང་ཕྱིར་རྒོལ་བ་ངེས་པར་བཅོམ་ཞིང་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྲེད་པ་ལེན་པར་བྱེད་པ་དེ་ཙམ་གྱིས་ན། བྱང་ཆུབ་སེམས་དཔའ་དཔའ་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཐུལ་བར་དཀའ་བ་ཡིན། སྨྲས་པ། ལྷའི་བུ། འདི་ལྟར་སྔོན་དམ་བཅས་པ་དང ། སྔོན་གྱི་བསམ་པ་ཡོངས་སུ་རྫོགས་པར་བྱེད་པས། ཉན་ཐོས་དང་རང་སངས་རྒྱས་ཀྱི་ཐེག་པ་དག་ལ་འདོད་པར་མི་བྱེད་པ་དེ་ལྟ་བུ་ནི་ཐུལ་བར་དཀའ་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་མངོན་པར་འཕགས་པ་ཡིན། སྨྲས་པ། ལྷའི་བུ། གང་གི་ཚེ་འཕགས་པའི་ཤེས་རབ་དང ། ཐབས་ཀྱིས་སེམས་ཅན་ཡོངས་སུ་སྨིན་པར་བྱ་བ་དང ། དམ་པའི་ཆོས་ཡོངས་སུ་གཟུང་བའི་ཕྱིར་ཀུན་དུ་སྣང་བ་དེ་ཙམ་གྱིས་ན། བྱང་ཆུབ་སེམས་དཔའ་མངོན་པར་འཕགས་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཆོས་སྨྲ་བ་ཡིན། སྨྲས་པ། ལྷའི་བུ། གང་
136a
༄#། །གི་ཚེ་སངས་རྒྱས་ཀྱིས་ཡོངས་སུ་བཟུང་བའི་ཚིག་གིས། སེམས་ཅན་ཐམས་ཅད་ཀྱི་ཉེས་པར་སྨྲ་བ་ཟིལ་གྱིས་གནོན་པར་བྱེད་པ་དེ་ལྟ་བུ་ནི། ཆོས་སྨྲ་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་འདུལ་བ་སྨྲ་བ་ཡིན། སྨྲས་པ། ལྷའི་བུ། གང་གི་ཚེ་བདག་ཚུལ་ཁྲིམས་ལ་གནས་ལ། སེམས་ཅན་ཐམས་ཅད་ཀྱི་འགྱོད་པ་དང ། ཀུན་ནས་ལྡང་བ་རྣམ་པར་བསལ་བའི་ཕྱིར། ཆོས་སྟོན་པར་བྱེད་པ་དེ་ལྟ་བུ་ནི་འདུལ་བ་སྨྲ་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་དོན་སྨྲ་བ་ཡིན། སྨྲས་པ། ལྷའི་བུ།་གང་གི་ཚེ་ཐོས་པ་ཐམས་ཅད་ལ་ནན་ཏན་སྙིང་པོར་བྱེད་ཅིང་དོན་རྗེས་སུ་རྟོགས་པ་དེ་ལྟ་བུ་ནི་དོན་སྨྲ་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ལ་ཕན་པའི་གཞི་ཕུན་སུམ་ཚོགས་པ་ཡིན། སྨྲས་པ། ལྷའི་བུ། གང་གི་ཚེ་དགེ་བའི་རྩ་བ་ཡང་དག་པར་བསྒྲུབས་པ་ཐམས་ཅད་སེམས་ཅན་རྣམས་ལ་སྟོབ་པར་བྱེད་པ་དེ་ལྟ་བུ་ནི། སེམས་ཅན་ཐམས་ཅད་ལ་ཕན་པའི་གཞི་ཕུན་སུམ་ཚོགས་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་དྲང་པོ་ཡིན། སྨྲས་པ། ལྷའི་བུ། གང་གི་ཚེ་བདག་གི་ཉེས་པ་མི་འཆབ་པ་དེ་ལྟ་བུ་ནི་དྲང་པོ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་དམ་པ་ཡིན། སྨྲས་པ། ལྷའི་བུ།
136b
གང་གི་ཚེ་སེམས་ཅན་འདོད་ཆགས་དང ། ཞེ་སྡང་དང ། གཏི་མུག་གི་གྱ་གྱུ་ཅན་རྣམས་ལ་ཁོང་ཁྲོ་བར་མི་བྱེད་པ་དེའི་ཕྱིར་དམ་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་གཡོ་བ་མེད་པ་ཡིན།་སྨྲས་པ། ལྷའི་བུ། གང་གི་ཚེ་ཇི་སྐད་སྨྲས་པའི་ཚིག་ལས་འདའ་བ་མེད་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་སྒྱུ་མེད་པ་ཡིན། སྨྲས་པ། ལྷའི་བུ། གང་གི་ཚེ་ཇི་ལྟར་སེམས་ཀྱིས་མངོན་པར་བསྒྲུབས་པ་དེ་བཞིན་དུ་ཚིག་ཏུ་བརྗོད་པ་དེ་ལྟ་བུ་ནི་སྒྱུ་མེད་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་ང་རྒྱལ་མེད་པ་ཡིན། སྨྲས་པ། ལྷའི་བུ། གང་གི་ཚེ་སེམས་ཅན་ཐམས་ཅད་ལ་འདུད་པར་བྱེད་ཅིང་མི་དགེ་བ་མི་བྱེད་པ་དེ་ལྟ་བུ་ནི་ང་རྒྱལ་མེད་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སྦྱིན་བདག་ཡིན། སྨྲས་པ། གང་གི་ཚེ་ཡོངས་སུ་བསྡུས་པའི་བྱང་ཆུབ་ཀྱང་གཏོང་བར་བྱེད་ན། དངོས་པོ་གཞན་དག་ལྟ་སྨོས་ཀྱང་ཅི་དགོས་པའོ། །སྨྲས་པ། འཇམ་དཔལ། ཇི་ལྟར་ན་ཚུལ་ཁྲིམས་དང་ལྡན་པ་ཡིན། སྨྲས་པ།་ལྷའི་བུ། གང་ཚུལ་ཁྲིམས་འཆལ་པ་མཐོང་ན། སྲོག་གི་ཕྱིར་ཡང་བྱང་ཆུབ་ཀྱི་སེམས་མི་གཏོང་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བཟོད་པ་སྨྲ་བ་ཡིན། སྨྲས་པ། ལྷའི་བུ། གང་གི་ཚེ་གནོད་པ་བཟོད་ཅིང ། གཞན་ལ་གནོད་པར་མི་བྱེད་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བརྩོན་འགྲུས་དང་ལྡན་པ་ཡིན། སྨྲས་པ། ལྷའི་བུ། གང་རྣམ་པར་བསམས་
137a
༄#། །ན།་ཆོས་འགའ་ཡང་མི་དམིགས་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བསམ་གཏན་ལ་བསམ་གཏན་པ་ཡིན། སྨྲས་པ། ལྷའི་བུ། གང་འདོད་པའི་ཁམས་སུ་ཕྱིས་མི་སྣང་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་ཤེས་རབ་དང་ལྡན་པ་ཡིན། སྨྲས་པ། ལྷའི་བུ། གང་ཤེས་རབ་ཀྱིས་བྱ་བ་སྦྱིན་པར་མི་བྱེད་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱམས་པ་ལ་གནས་པ་ཡིན། སྨྲས་པ། ལྷའི་བུ། གང་གི་ཚེ་སེམས་ཅན་གྱི་ཁམས་ལ་སྟོང་པ་ཉིད་དུ་རྣམ་པར་ལྟ་བ་ཡིན་ནོ། ། སྨྲས་པ། འཇམ་དཔལ། ཇི་ལྟར་ན་སྙིང་རྗེ་ལ་གནས་པ་ཡིན། སྨྲས་པ། ལྷའི་བུ། གང་གི་ཚེ་ཆོས་ཐམས་ཅད་ནམ་མཁའ་ལྟ་བུར་ཤེས་ནས། བྱང་ཆུབ་ལ་བརྩོན་འགྲུས་མི་འདོར་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་དགའ་བ་ལ་གནས་པ་ཡིན། སྨྲས་པ། ལྷའི་བུ། གང་གི་ཚེ་ཐུབ་ཅིང་ཞི་ལ་རབ་ཏུ་ཞི་བ་ཐོབ་ཅིང་ཆོས་ཡོངས་སུ་ཚོལ་བ་ལ་དགའ་བ་མི་ངོམས་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བཏང་སྙོམས་ལ་གནས་པ་ཡིན། སྨྲས་པ། ལྷའི་བུ། སེམས་ཅན་ཡོངས་སུ་བསྐྱབ་པའི་ཕྱིར་འཇིག་རྟེན་ན་སྤྱོད་ཀྱང ། འཇིག་རྟེན་གྱི་ཆོས་རྣམས་ཀྱིས་མི་འཕྲོགས་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ལུས་ཡོངས་སུ་དག་པ་ཡིན། སྨྲས་པ། ལྷའི་བུ། གང་
137b
གི་ཚེ་ཡིད་ལས་བྱུང་བའི་ལུས་ཀྱིས་སེམས་ཅན་ཐམས་ཅད་ཀྱི་ལུས་དང་མཐུན་པར་སྟོན་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་ངག་ཡོངས་སུ་དག་པ་ཡིན། སྨྲས་པ། ལྷའི་བུ། གང་གི་ཚེ་སེམས་ཅན་ཐམས་ཅད་ཀྱི་སྒྲ་ཡོངས་སུ་རྫོགས་པས། འབྲས་བུ་ཡོད་པར་ཆོས་སྟོན་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་སེམས་ཡོངས་སུ་དག་པ་ཡིན། སྨྲས་པ། ལྷའི་བུ། གང་གི་ཚེ་སེམས་གཅིག་གིས་སེམས་ཅན་ཐམས་ཅད་ཀྱི་སེམས་རྣམས་རབ་ཏུ་ཤེས་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའི་ལྷའི་མིག་དང་ལྡན་པ་ཡིན། སྨྲས་པ། ལྷའི་བུ། གང་གི་ཚེ་གཟུགས་སྣང་བ་ཐམས་ཅད་ཀྱང་མཐོང་ལ། གཟུགས་དབེན་པར་ཡང་སྟོན་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་ལྷའི་རྣ་བ་ཐོབ་པ་ཡིན། སྨྲས་པ། ལྷའི་བུ། གང་གི་ཚེ་སྒྲ་ཐམས་ཅད་ཐོས་ལ། སྒྲ་དབེན་པར་ཡང་སྟོན་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་ཕ་རོལ་གྱི་སེམས་ལ་མཁས་པ་ཡིན་སྨྲས་པ།་ལྷའི་བུ། གང་གི་ཚེ་སེམས་སྐྱེས་པ་ཞིག་པར་གྱུར་པ་རྣམས་ཀྱི་སེམས་ཀྱི་རྒྱུན་རབ་ཏུ་ཤེས་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་སྔོན་གྱི་གནས་ལ་མཁས་པ་ཡིན་སྨྲས་པ།་ལྷའི་བུ། གང་གི་ཚེ་སྔོན་གྱི་མཐའི་མུ་རྗེས་སུ་དྲན་ཞིང ། ཡང་དག་པའི་མཐའ་ལས་ཀྱང་མི་གཡོ་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་རྫུ་འཕྲུལ་གྱི་བྱ་བ་ཤེས་པ་
138a
༄#། །ཡིན།་སྨྲས་པ། ལྷའི་བུ། གང་བདུད་ཐམས་ཅད་ཀྱང་སྟོན་ལ། བདུད་ཀྱི་ལས་རྣམས་ཀྱིས་ཀྱང་མི་གོས་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་དུལ་བ་ཡིན། སྨྲས་པ། ལྷའི་བུ། གང་གི་ཚེ་མ་དུལ་བ་རྣམས་འདུལ་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བསྲུངས་པ་ཡིན། སྨྲས་པ། ལྷའི་བུ། དབང་པོ་ཐམས་ཅད་མི་གཡེང་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་རྣམ་པར་དུལ་བ་ཡིན། སྨྲས་པ། ལྷའི་བུ། གང་གི་ཚེ་མི་འཁྲུགས་པའི་ཆོས་སུ་གྱུར་པ་ཡིན་ནོ། །སྨྲས་པ ། འཇམ་དཔལ། ཇི་ལྟར་ན་ཞི་བ་ཡིན། སྨྲས་པ། ལྷའི་བུ། ཉོན་མོངས་པའི་ཡོངས་སུ་གདུང་བ་ཐམས་ཅད་ཀྱིས་གདུང་བ་མེད་ལ། སེམས་ཅན་ཐམས་ཅད་ཀྱི་ཉོན་མོངས་པ་སྡང་བའི་ཕྱིར་ཡང་ཆོས་སྟོན་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་དད་པ་ཡིན། སྨྲས་པ། ལྷའི་བུ། གང་སངས་རྒྱས་ཀྱི་སྐུའི་གཟུགས་ཀྱིས་ཕྱེ་ཡང་མི་ཕྱེད་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཐབས་ལ་མཁས་པ་ཡིན། སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་ཅན་ཐམས་ཅད་ལ་བྱང་ཆུབ་ལ་རག་ལས་པར་མཐོང་བ་ཡིན་ནོ། །བསྟན་པ་འདི་བཤད་པ་ན། སྲོག་ཆགས་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །
138b
བྱང་ཆུབ་སེམས་དཔའ་ལྔ་བརྒྱ་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ། །ཞེས་བྱ་བ་བྱིན་ཏེ། འཇམ་དཔལ། ལེགས་སོ། །ལེགས་སོ། །ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་མིང་བཤད་པ་དེ་དང ། སྐྱེས་བུ་དམ་པ་དེ་དག་གི་ཡོན་ཏན་དེ་དག་ལེགས་པར་སྨྲས་ཏེ། གཞན་ཡང་དཔག་ཏུ་མེད་པ་དག་ཡོད་དོ། །ལྷའི་བུ། དེད་དཔོན་གྱིས་འཇམ་དཔལ་གཞོན་ནུར་གྱུར་པ་ལ་གཞན་ཡང་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་སྔོན་གྱི་དེ་བཞིན་གཤེགས་པ་ཇི་སྙེད་ཅིག་ལ་བསྙེན་བཀུར་བྱས་ན། ཁྱོད་སྤོབས་པ་འདི་ལྟ་བུ་དང་ལྡན། འཇམ་དཔལ་གྱིས་སྨྲས་པ། ལྷའི་བུ། སྤྲུལ་པའི་སྒྱུ་མའི་སྐྱེས་བུའི་སེམས་ཅན་སེམས་ལས་བྱུང་བ་ཇི་སྙེད་འགག་པ་དེ་སྙེད་ལའོ། །སྨྲས་པ། འཇམ་དཔལ་སྤྲུལ་པ་ཉིད་ལ་ཡང་སེམས་དང་སེམས་ལས་བྱུང་བ་དག་མེད་ན་སྒྱུ་མ་སྤྲུལ་པ་ལ་ལྟ་ཅི་སྨོས། སྨྲས་པ། ལྷའི་བུ། དེ་བཞིན་གཤེགས་པ་དེ་དག་ཀྱང་ངོ་བོ་ཉིད་དེ་ལྟ་བུའི་མཚན་ཉིད་ཡིན་ལ། དེ་དག་ལ་བསྙེན་བཀུར་བྱ་བའི་མཚན་ཉིད་ཀྱང་དེ་ལྟ་བུ་ཡིན་ནོ། །སྨྲས་པ། འཇམ་དཔལ་ཁྱོད་ཀྱིས་ཡུན་རིང་པོ་ཇི་སྲིད་ཅིག་ནས། སྦྱིན་པའི་ཕ་རོལ་ཏུ་ཕྱིན་པ་ལ་སྤྱད། སྨྲས་པ། ལྷའི་བུ། གལ་ཏེ་དེ་བཞིན་གཤེགས་པའི་སྤྲུལ་པ་ཞིག་ལ་ཁྱོད་ཀྱིས་ཡུན་རིང་པོ་ཇི་སྲིད་ཅིག་ནས་སྦྱིན་པའི་ཕ་རོལ་ཏུ་ཕྱིན་པ་ལ་སྤྱད་ཅེས་དྲིས་ན། ཅི་དེ་ལ་ལན་
139a
༄#། །ལྡོན་པར་བྱེད་དམ། སྨྲས་པ། འཇམ་དཔལ། དེ་ནི་ཅུང་ཟད་ཀྱང་ལན་ལྡོན་པར་མི་བྱེད་དོ། །སྨྲས་པ། ལྷའི་བུ། ཁོ་བོ་ཡང་སྤྲུལ་པ་དེ་ཉིད་ཀྱི་མཚན་ཉིད་ཡིན་པས་ན། ཁོ་བོས་ཇི་སྐད་དུ། ཁོ་བོ་ཡུན་རིང་པོ་འདི་ཙམ་ཞིག་ནས་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་དོ་ཞེས་ལན་གདབ་པར་བྱ། སྨྲས་པ། འཇམ་དཔལ། འོ་ན་ཅི་ཁྱོད་སེར་སྣ་ཅན་ཡིན་ནམ། སྨྲས་པ། ལྷའི་བུ། དེ་བཞིན་ཏེ། ཁོ་བོ་ནི་སེར་སྣ་ཅན་ཡིན་ནོ། །སྨྲས་པ། འཇམ་དཔལ་ཁྱོད་ཅི་ལས་བསམས་ཏེ་དེ་སྐད་སྨྲ། སྨྲས་པ། ལྷའི་བུ། གང་ཡོངས་སུ་མི་གཏོང་བ་དེ་སེར་སྣ་ཅན་མ་ཡིན་ནམ། སྨྲས་པ། འཇམ་དཔལ་ཁྱོད་ཅི་ཞིག་ཡོངས་སུ་མི་གཏོང ། སྨྲས་པ། ལྷའི་བུ། ཁོ་བོ་ནི་སངས་རྒྱས་ཀྱི་ཆོས་ཐམས་ཅད་དང ། སེམས་ཅན་ཐམས་ཅད་ཡོངས་སུ་མི་གཏོང་བ་ཡིན་ཏེ། དེའི་ཕྱིར་ཁོ་བོ་ནི་སེར་སྣ་ཅན་ཡིན་ནོ། །སྨྲས་པ། འཇམ་དཔལ་ཁྱོད་ཀྱིས་ཇི་སྐད་སྨྲས་པའི་དོན་ཁོ་བོས་ཤེས་པ་ལྟར་ན། ཁྱོད་ནི་ཚུལ་ཁྲིམས་འཆལ་བ་ཡིན་ནོ། །སྨྲས་པ། ལྷའི་བུ། དེ་བཞིན་ཏེ། ཁོ་བོ་ནི་ཚུལ་ཁྲིམས་འཆལ་བ་ཡིན་ནོ། །སྨྲས་པ། འཇམ་དཔལ་ཁྱོད་ཅི་ལས་བསམས་ཏེ་དེ་སྐད་སྨྲ། སྨྲས་པ། ལྷའི་བུ། གང་ཚུལ་ཁྲིམས་འཆལ་བ་དེ་ངན་སོང་གསུམ་པོ་དེ་དག་ཏུ་ལྟུང་བ་མ་ཡིན་ནམ། སྨྲས་པ། འཇམ་དཔལ། དེ་བཞིན་ནོ། །སྨྲས་པ། ལྷའི་བུ་ཁོ་བོ་ཡང་སེམས་ཅན་ཡོངས་སུ་སྨིན་པར་བྱ་
139b
བའི་ཕྱིར་བསམས་བཞིན་དུ་ངན་སོང་རྣམས་སུ་འགྲོ་སྟེ། དེའི་ཕྱིར་ཁོ་བོ་ནི་ཚུལ་ཁྲིམས་འཆལ་བ་ཡིན་ནོ། །སྨྲས་པ། འཇམ་དཔལ། ཅི་ཁྱོད་གནོད་སེམས་ཀྱི་སེམས་དང་ལྡན་པ་ཡིན་ནམ་སྨྲས་པ། ལྷའི་བུ། དེ་བཞིན་ཏེ། ཁོ་བོ་ནི་གནོད་སེམས་དང་ལྡན་པ་ཡིན་ནོ། །སྨྲས་པ། འཇམ་དཔལ་ཁྱོད་ཅི་ལས་བསམས་ཏེ་དེ་སྐད་སྨྲ། སྨྲས་པ། ལྷའི་བུ། གང་གནོད་སེམས་ཀྱི་སེམས་དང་ལྡན་པ་དེ་རྗེས་སུ་ཆགས་པ་མེད་པ་མ་ཡིན་ནམ། སྨྲས་པ། འཇམ་དཔལ། དེ་བཞིན་ནོ། །སྨྲས་པ། ལྷའི་བུ། ཁོ་བོ་ཡང་ཉོན་མོངས་པ་ཐམས་ཅད་དང ། བྱིས་པ་ཐམས་ཅད་དང ། ཉན་ཐོས་དང ། རང་སངས་རྒྱས་ཀྱི་ས་ཐམས་ཅད་ལ་རྗེས་སུ་ཆགས་པ་མེད་དེ། དེའི་ཕྱིར་ཁོ་བོ་ནི་གནོད་སེམས་ཀྱི་སེམས་དང་ལྡན་པ་ཡིན་ནོ། །སྨྲས་པ། འཇམ་དཔལ། ཅི་ཁྱོད་ལེ་ལོ་ཅན་ཡིན་ནམ། སྨྲས་པ། ལྷའི་བུ། དེ་བཞིན་ཏེ། ཁོ་བོ་ལེ་ལོ་ཅན་ཡིན་ནོ། །སྨྲས་པ། འཇམ་དཔལ་ཁྱོད་ཅི་ལས་བསམས་ཏེ་དེ་སྐད་སྨྲ། སྨྲས་པ། ལྷའི་བུ། ལེ་ལོ་ཅན་ཞེས་བྱ་བ་ནི་གང་ལུས་དང ། ངག་དང ། ཡིད་ཀྱིས་མི་རྩོམ་པ་ཡིན་ལ། ཁོ་བོ་ཡང་རྩོམ་པ་མེད་ཅིང་བརྟུལ་བར་མི་བྱེད་པ་དང ། ལེན་པ་མེད་པ་དང ། འདོར་བ་མེད་པ་ཡིན་ཏེ། དེའི་ཕྱིར་ཁོ་བོ་ནི་ལེ་ལོ་ཅན་ཡིན་ནོ། །སྨྲས་པ། འཇམ་དཔལ། ཅི་ཁྱོད་སེམས་རྣམ་པར་གཡེངས་པ་ཡིན་ནམ། སྨྲས་པ། ལྷའི་བུ། དེ་བཞིན་ཏེ། ཁོ་བོ་ནི་སེམས་རྣམ་པར་གཡེངས་པ་ཡིན་ནོ། །སྨྲས་པ།
140a
༄#། །འཇམ་དཔལ་ཁྱོད་ཅི་ལས་བསམས་ཏེ་དེ་སྐད་སྨྲ། སྨྲས་པ། ལྷའི་བུ། གང་གི་སེམས་རྣམ་པར་གྲོལ་བ་ལ་མི་གནས་པ་དེ། སེམས་རྣམ་པར་གཡེངས་པ་མ་ཡིན་ནམ། སྨྲས་པ། འཇམ་དཔལ། དེ་བཞིན་ནོ། །སྨྲས་པ། ལྷའི་བུ། ཁོ་བོ་ཡང་འཕགས་པ་རྣམས་ཀྱི་རྣམ་པར་གྲོལ་བ་ལ་སེམས་མི་གནས་པ་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་རྣམ་པར་གཡེངས་པ་ཡིན་ཏེ། དེའི་ཕྱིར་ཁོ་བོ་ནི་སེམས་རྣམ་པར་གཡེངས་པ་ཡིན་ནོ། །སྨྲས་པ། འཇམ་དཔལ། ཅི་ཁྱོད་ཤེས་རབ་འཆལ་བ་ཡིན་ནམ། སྨྲས་པ། ལྷའི་བུ། དེ་བཞིན་ཏེ། ཁོ་བོ་ནི་ཤེས་རབ་འཆལ་པ་ཡིན་ནོ། །སྨྲས་པ། འཇམ་དཔལ་ཁྱོད་ཅི་ལས་བསམས་ཏེ་དེ་སྐད་སྨྲ། སྨྲས་པ། ལྷའི་བུ། གང་འཁོར་བས་མི་སྐྲག་ཅིང་སེམས་ཅན་རྨོངས་པ་རྣམས་དང་ལྷན་ཅིག་ན་དགའ་བ་དེ་ཤེས་རབ་འཆལ་བ་མ་ཡིན་ནམ། སྨྲས་པ། འཇམ་དཔལ། དེ་བཞིན་ནོ། །སྨྲས་པ། ལྷའི་བུ། ཁོ་བོ་ཡང་འཁོར་བས་མི་སྐྲག་ཅིང ། དེ་དག་ཉིད་ཡོངས་སུ་སྨིན་པར་བྱ་བའི་ཕྱིར། སེམས་ཅན་རྨོངས་པ་རྣམས་དང་ལྷན་ཅིག་ན་དགའ་བ་ཡིན་ཏེ། དེའི་ཕྱིར་ཁོ་བོ་ནི་ཤེས་རབ་འཆལ་བ་ཡིན་ནོ། སྨྲས་པ། འཇམ་དཔལ། འཇིག་རྟེན་ན་སྦྱིན་གནས་སུ་ཡིན། སྨྲས་པ། ལྷའི་བུ། གང་དག་བསད་པ་གསོད་པའི་སེམས་སྐྱེས་པ་རྣམས་སོ། །སྨྲས་པ། འཇམ་དཔལ་ཁྱོད་ཅི་ལས་
140b
བསམས་ཏེ་དེ་སྐད་སྨྲ། སྨྲས་པ། ལྷའི་བུ། གསོད་པ་ཞེས་བྱ་བ་ནི་འདོད་ཆགས་དང ། ཞེ་སྡང་དང ། གཏི་མུག་རྣམས་ཏེ། གང་དེ་དག་གསོད་པར་བྱེད་པ་དེ་ནི། བསད་པ་གསོད་པར་བྱེད་པ་ཡིན་པས། དེ་ནི་འཇིག་རྟེན་ན་སྦྱིན་གནས་ཡིན་ནོ། །སྨྲས་པ། འཇམ་དཔལ་ཁྱོད་ཀྱིས་བཤད་པ་དེ་ལྟ་བུ་ནི་འཇིག་རྟེན་གནས་པ་སྐྲག་པར་འགྱུར་བ་ཡིན་ནོ། །སྨྲས་པ། ལྷའི་བུ། གལ་ཏེ་ཡང་དག་པའི་མཐའ་སྐྲག་པར་འགྱུར་ན་ནི། འཇིག་རྟེན་གནས་པ་ཡང་སྐྲག་པར་འགྱུར་རོ། །དེ་ཅིའི་ཕྱིར་ཞེ་ན། འཇིག་རྟེན་ནི་ཡང་དག་པའི་མཐའ་ལ་གནས་པ་ཡིན་པའི་ཕྱིར་རོ། །སྨྲས་པ།་འཇམ་དཔལ། གང་དག་ཁྱོད་ཀྱིས་བཤད་པ་འདི་སྤོང་བར་འགྱུར་བ་དེ་དག་གང་དུ་འགྲོ་བར་འགྱུར། སྨྲས་པ། ལྷའི་བུ། དེ་དག་ནི་མྱ་ངན་ལས་འདས་པར་འགྲོ་བར་འགྱུར་རོ། ། སྨྲས་པ། འཇམ་དཔལ། ཁྱོད་ཅི་ལས་བསམས་ཏེ་དེ་སྐད་སྨྲ། སྨྲས་པ། ལྷའི་བུ། ཕ་རོལ་གྱི་སྒྲ་ཉན་པ་མ་སྤངས་པར་ནི། འཕགས་པའི་རྣམ་པར་གྲོལ་བ་འཐོབ་པར་མི་ནུས་སོ། །དེ་ཅིའི་ཕྱིར་ཞེ་ན། སྐྱོན་མེད་པར་ཞུགས་པ་ལ་ནི་ཡི་གེའི་འཇུག་པ་མེད་པས་ན། གང་དག་མོས་པར་འགྱུར་བ་དེ་དག་ནི། རྣམ་པར་གྲོལ་བར་མི་འགྱུར་བའི་ཕྱིར་རོ། །སྨྲས་པ། འཇམ་དཔལ་ཁྱོད་ཅི་ལས་བསམས་ཏེ་དེ་སྐད་སྨྲ། སྨྲས་པ། ལྷའི་བུ། རྣམ་པར་གྲོལ་བ་ནི། ཡང་རྣམ་པར་གྲོལ་བར་འགྱུར་བ་མེད་དོ། །སྨྲས་པ། འཇམ་དཔལ། དམ་པའི་ཆོས་སྤོང་བ་རྣམས་
141a
༄#། །ནི་སེམས་ཅན་དམྱལ་བར་འགྲོ་བ་ཡིན་ནོ། །སྨྲས་པ། ལྷའི་བུ། གང་དག་རྣམ་པར་གྲོལ་བ་དེ་དག་ཐམས་ཅད་སེམས་ཅན་དམྱལ་བར་འགྲོ་བ་ཡིན་ནམ།་སྨྲས་པ། འཇམ་དཔལ་ཁྱོད་ཀྱིས་ཆོས་བསྟན་པ་ནི་གཉེན་པོ་མེད་པ་ཡིན་ནོ། །སྨྲས་པ། ལྷའི་བུ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ལ་ནི་གཉེན་པོ་བརྗོད་པར་མི་ནུས་སོ། །སྨྲས་པ། འཇམ་དཔལ། སྟོང་པ་ཉིད་ལ་གནས་པ་ནི་ཅི་ཞིག་ལ་གནས་པ་ཡིན། སྨྲས་པ། ལྷའི་བུ། སྟོང་པ་ཉིད་ལ་གནས་པ་ནི་སེམས་ཅན་ཐམས་ཅད་ལ་བྱམས་པར་གནས་པ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་མ་གཏོགས་པར་སྟོང་པ་ཉིད་མེད་པའི་ཕྱིར་རོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་ཅན་གྱི་ཁམས་ཀྱི་མཐའ་ཁོང་དུ་ཆུད་པ་ཡིན། སྨྲས་པ། ལྷའི་བུ། གང་གི་ཚེ་སེམས་ཅན་ཐམས་ཅད་རྟེན་ཅིང་འབྲེལ་པར་འབྱུང་བ་མཐོང་ཞིང་དེ་ལ་རྟག་པ་དང ། ཆད་པའི་མཐར་ལྟ་བར་ཡང་མི་ལྟུང་བ་དེ་ལྟ་བུ་ནི། བྱང་ཆུབ་སེམས་དཔའ་སེམས་ཅན་གྱི་ཁམས་ཀྱི་མཐའ་ཁོང་དུ་ཆུད་པ་ཡིན་ནོ། །སྨྲས་པ། འཇམ་དཔལ། སེམས་ཅན་གྱི་ཁམས་གང་དང་ལྡན་པ་ཡིན། སྨྲས་པ། ལྷའི་བུ། སེམས་ཅན་གྱི་ཁམས་ནི། ཆོས་ཀྱི་དབྱིངས་ཀྱི་ཁམས་དང་ལྡན་པ་ཡིན་ནོ། །སྨྲས་པ། འཇམ་དཔལ། ཆོས་ཀྱི་དབྱིངས་ཁམས་གང་
141b
དང་ལྡན་པ་ཡིན། སྨྲས་པ། ལྷའི་བུ། ནམ་མཁའི་ངོ་བོ་ཉིད་ཀྱི་ཁམས་དང་ལྡན་པ་ཡིན་ནོ། །སྨྲས་པ། འཇམ་དཔལ། ནམ་མཁའི་ཁམས་གང་དང་ལྡན་པ་ཡིན། སྨྲས་པ། ལྷའི་བུ། ཡུལ་ཐམས་ཅད་ལས་ཡང་དག་པར་འདས་པའི་ཁམས་དང་ལྡན་པ་ཡིན་ནོ། །སྨྲས་པ། འཇམ་དཔལ། ཡུལ་གང་སངས་རྒྱས་ཀྱི་ཡུལ་ཡིན། སྨྲས་པ། ལྷའི་བུ། མིག་གི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་མིག་དང ། གཟུགས་དང ། རྣམ་པར་ཤེས་པའི་ཡུལ་མ་ཡིན་ནོ། །རྣ་བའི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་རྣ་བ་དང ། སྒྲ་དང ། རྣམ་པར་ཤེས་པའི་ཡུལ་མ་ཡིན་ནོ། །སྣའི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་སྣ་དང ། དྲི་དང ། རྣམ་པར་ཤེས་པའི་ཡུལ་མ་ཡིན་ནོ། །ལྕེའི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་ལྕེ་དང ། རོ་དང ། རྣམ་པར་ཤེས་པའི་ཡུལ་མ་ཡིན་ནོ། །ལུས་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་ལུས་དང ། རེག་བྱ་དང ། རྣམ་པར་ཤེས་པའི་ཡུལ་མ་ཡིན་ནོ། །ཡིད་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་ཡིད་དང ། ཆོས་དང ། རྣམ་པར་ཤེས་པའི་ཡུལ་མ་ཡིན་ནོ། །གཟུགས་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་གཟུགས་སུ་རུང་བའི་ཡུལ་མ་ཡིན་ནོ། །ཚོར་བའི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་
142a
༄#། །ཀྱི་ཡུལ་ནི་མྱོང་བའི་ཡུལ་མ་ཡིན་ནོ། །འདུ་ཤེས་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་ཀུན་ཏུ་གཡོ་བའི་ཡུལ་མ་ཡིན་ནོ། །འདུ་བྱེད་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་མངོན་པར་འདུ་བྱེད་པའི་ཡུལ་མ་ཡིན་ནོ། །རྣམ་པར་ཤེས་པའི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་རྣམ་པར་རིག་པའི་ཡུལ་མ་ཡིན་ནོ། །མ་རིག་པའི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་རྒྱུ་དང་རྐྱེན་གྱི་ཡུལ་མ་ཡིན་ནོ། །རྒ་ཤིའི་བར་དག་གི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་ཉིད་མཚམས་སྦྱོར་བའི་ཡུལ་མ་ཡིན་ནོ། །འདོད་པའི་ཁམས་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་འདོད་ཆགས་སོ་སོར་རྣམ་པར་རིག་པའི་ཡུལ་མ་ཡིན་ནོ། །གཟུགས་ཀྱི་ཁམས་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་འདོད་ཆགས་ཀྱི་གཉེན་པོའི་ཡུལ་མ་ཡིན་ནོ། །གཟུགས་མེད་པའི་ཁམས་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་ལྟ་བའི་ལམ་རྣམ་པར་གྲོལ་བའི་ཡུལ་མ་ཡིན་ནོ། །འདུས་མ་བྱས་ཀྱི་ཁམས་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་གཉིས་སུ་སྦྱོར་བའི་ཡུལ་མ་ཡིན་ནོ། །འདུས་བྱས་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཏེ། སངས་རྒྱས་ཀྱི་ཡུལ་ནི་
142b
མཚན་ཉིད་གསུམ་དང་ལྡན་པའི་ཡུལ་མ་ཡིན་ནོ། །ལྷའི་བུ། དེ་ནི་སངས་རྒྱས་ཀྱི་ཡུལ་ཡིན་ཏེ། མཐའ་དང་མཐའ་མ་ཡིན་པའི་ཡུལ་ཡིན་པའི་ཕྱིར། ཡུལ་དེར་ནི་ཡུལ་ཐམས་ཅད་འདུས་ཤིང་ཁོངས་སུ་ཆུད་པ་ཡིན་ནོ། །ལྷའི་བུ། བྱང་ཆུབ་སེམས་དཔའ་ནི་ཡུལ་དེ་ལྟ་བུར་ཞུགས་ཤིང ། དོན་གྱི་ཡུལ་ཐམས་ཅད་ལ་རྣམ་པར་སྤྱོད་ཀྱང་བདུད་ཀྱི་ཡུལ་ཐོབ་པ་མ་ཡིན་ཏེ།་དེ་ནི་བདུད་ཀྱི་ཡུལ་དང ། སངས་རྒྱས་ཀྱི་ཡུལ་ཡང་མཉམ་ཞིང་དབེན་པའི་ཡུལ་དུ་མངོན་པར་རྫོགས་པར་ཁོང་དུ་ཆུད་དོ། །ལྷའི་བུ། གང་མཉམ་པ་དང་མི་མཉམ་པས་སེམས་ཅན་རྣམས་ཡོངས་སུ་སྨིན་པར་བྱེད་ཀྱང ། མཉམ་པ་ཉིད་ལས་ཀྱང་མི་འདའ་བ་འདི་ཡང་ཆོ་འཕྲུལ་ཆེན་པོ་ཡིན་ནོ། །དེ་ལ་མཉམ་པ་ཉིད་ནི་གང ། མི་མཉམ་པ་ཉིད་ནི་གང་ཞེ་ན། འདི་ལྟར་ཆོས་ཐམས་ཅད་སྟོང་པ་ཉིད་དུ་མཉམ་པ་དེ་ནི་མཉམ་པ་ཉིད་ཡིན་ནོ། །གང་དག་སྟོང་པ་ཉིད་ལ་མི་འཇུག་པ་དེ་དག་ནི་མི་མཉམ་པར་གནས་པ་ཡིན་ཏེ། བྱང་ཆུབ་སེམས་དཔའ་དེ་དག་ཡོངས་སུ་སྨིན་པར་བྱེད་ཀྱང་སྟོང་པ་ཉིད་ཀྱི་མཉམ་པ་ཉིད་ལས་ཀྱང་མི་གཡོའོ། །ཆོས་ཐམས་ཅད་མཚན་མ་མེད་པར་མཉམ་པ་ཉིད་དུ་མཉམ་པ་དེ་ནི་མཉམ་པ་ཉིད་ཡིན་ནོ། །གང་དག་མཉམ་པ་ཉིད་དེ་ལ་མི་འཇུག་པ་དེ་དག་ནི་མི་མཉམ་པར་གནས་པ་ཡིན་ཏེ། བྱང་ཆུབ་སེམས་དཔའ་ནི་དེ་དག་ཡོངས་སུ་སྨིན་ཀྱང་མཚན་མ་མེད་པའི་མཉམ་པ་ཉིད་ལས་ཀྱང་མི་གཡོའོ། །ཆོས་
143a
༄#། །ཐམས་ཅད་སྨོན་པ་མེད་པར་མཉམ་པ་ཉིད་དུ་མཉམ་པ་དེ་ནི་མཉམ་པ་ཉིད་ཡིན་ནོ། །གང་དག་མཉམ་པ་ཉིད་དེ་ལ་མི་འཇུག་པ་དེ་དག་ནི་མི་མཉམ་པར་གནས་པ་ཡིན་ཏེ། བྱང་ཆུབ་སེམས་དཔའ་ནི་དེ་དག་ཡོངས་སུ་སྨིན་པར་བྱེད་ཀྱང ། སྨོན་པ་མེད་པའི་མཉམ་པ་ཉིད་ལས་ཀྱང་མི་གཡོའོ། །ཆོས་ཐམས་ཅད་མངོན་པར་འདུ་བྱེད་པ་མེད་པར་མཉམ་པ་ཉིད་དུ་མཉམ་པ་དེ་ནི་མཉམ་པ་ཉིད་ཡིན་ནོ། །གང་དག་མཉམ་པ་ཉིད་དེ་ལ་མི་འཇུག་པ་དེ་དག་ནི་མི་མཉམ་པར་གནས་པ་ཡིན་ཏེ། བྱང་ཆུབ་སེམས་དཔའ་ནི་དེ་དག་ཡོངས་སུ་སྨིན་པར་བྱེད་ཀྱང་མངོན་པར་འདུ་བྱེད་པ་མེད་པའི་མཉམ་པ་ཉིད་ལས་ཀྱང་མི་གཡོའོ། །ཆོས་ཐམས་ཅད་སྐྱེ་བ་མེད་པར་མཉམ་པ་ཉིད་དང ། འབྱུང་བ་མེད་པར་མཉམ་པ་ཉིད་དང ། འགག་པ་མེད་པར་མཉམ་པ་ཉིད་དང ། འདོད་ཆགས་དང་བྲལ་བར་མཉམ་པ་ཉིད་དང ། དབེན་པར་མཉམ་པ་ཉིད་དང ། དངོས་པོ་མེད་པར་མཉམ་པ་ཉིད་དང ། འགོག་པར་མཉམ་པ་ཉིད་དང ། ཆོས་ཐམས་ཅད་མྱ་ངན་ལས་འདས་པར་མཉམ་པ་ཉིད་དུ་མཉམ་པ་དེ་ནི་མཉམ་པ་ཉིད་ཡིན་ནོ། །གང་དག་མཉམ་པ་ཉིད་དེ་ལ་མི་འཇུག་པ་དེ་དག་ནི་མི་མཉམ་པར་མཉམ་པ་ཡིན་ཏེ། བྱང་ཆུབ་སེམས་དཔའ་ནི་དེ་དག་ཡོངས་སུ་སྨིན་པར་བྱེད་ཀྱང་མྱ་ངན་ལས་འདས་པའི་མཉམ་པ་ཉིད་ལས་ཀྱང་མི་གཡོ་སྟེ། ལྷའི་
143b
བུ།་དེ་ལྟར་མཉམ་པ་དང་མི་མཉམ་པ་ལ་སྤྱོད་པའི་བྱང་ཆུབ་སེམས་དཔའ་ནི། བྱང་ཆུབ་སེམས་དཔའི་སྤྱད་པ་སྤྱོད་པ་ཡིན་ནོ། །དེ་ནས་ལྷའི་བུ་དེད་དཔོན་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་བྱང་ཆུབ་སེམས་དཔའ་རྣམས་ཀྱི་སྤྱོད་པ་ལ་སྤོབས་པར་གྱིས་ཤིག་།འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་བསམ་གྱིས་མི་ཁྱབ་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་རྣམས་ཀྱི་སྤྱོད་པ་བསམ་གྱིས་མི་ཁྱབ་པ་ཡིན། སྨྲས་པ། ལྷའི་བུ།་འདོད་ཆགས་ཀྱི་སྤྱོད་པ་བསམ་གྱིས་མི་ཁྱབ་པའི་ཕྱིར། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡང་བསམ་གྱིས་མི་ཁྱབ་པ་སྟེ། འདོད་ཆགས་དང་བྲལ་བའི་སྤྱོད་པ་ནི་མ་ཡིན་ནོ། །ཞེ་སྡང་གི་སྤྱོད་པ་བསམ་གྱིས་མི་ཁྱབ་པའི་ཕྱིར། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡང་བསམ་གྱིས་མི་ཁྱབ་པ་སྟེ། ཞེ་སྡང་དང་བྲལ་བའི་སྤྱོད་པ་ནི་མ་ཡིན་ནོ། །གཏི་མུག་གི་སྤྱོད་པ་བསམ་གྱིས་མི་ཁྱབ་པའི་ཕྱིར། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡང་བསམ་གྱིས་མི་ཁྱབ་པ་སྟེ། ཤེས་རབ་ཀྱི་བྱ་བ་སྒྲུབ་པར་བྱེད་པའི་སྤྱོད་པ་ནི་མ་ཡིན་ནོ། །སེར་སྣ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ཏེ། སྦྱིན་པས་རློམ་སེམས་སུ་བྱེད་པའི་སྤྱོད་པ་ནི་མ་ཡིན་ནོ། །འཆལ་བའི་ཚུལ་ཁྲིམས་དང་བྲལ་བའི་སྤྱོད་པ་ནི །
144a
༄#། །བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ཏེ། ཚུལ་ཁྲིམས་ཀྱིས་རློམ་སེམས་སུ་བྱེད་པའི་སྤྱོད་པ་ནི་མ་ཡིན་ནོ། །གནོད་སེམས་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ཏེ། བཟོད་པས་རློམ་སེམས་སུ་བྱེད་པའི་སྤྱོད་པ་ནི་མ་ཡིན་ནོ། །ལེ་ལོ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ཏེ། བརྩོན་འགྲུས་ཀྱིས་རློམ་སེམས་སུ་བྱེད་པའི་སྤྱོད་པ་ནི་མ་ཡིན་ནོ། །རྣམ་པར་གཡེང་བ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ཏེ། བསམ་གཏན་གྱིས་རློམ་སེམས་སུ་བྱེད་པའི་སྤྱོད་པ་ནི་མ་ཡིན་ནོ། །འཆལ་བའི་ཤེས་རབ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ཏེ། ཤེས་རབ་ཀྱིས་རློམ་སེམས་སུ་བྱེད་པའི་སྤྱོད་པ་ནི་མ་ཡིན་ནོ། །ཉོན་མོངས་པ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ཏེ། ཉོན་མོངས་པ་མེད་པས་རློམ་སེམས་སུ་བྱེད་པའི་སྤྱོད་པ་ནི་མ་ཡིན་ནོ། །ནང་དང་ཕྱིའི་དངོས་པོ་ཡོངས་སུ་གཏོང་བས་བརྩེ་བ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །བུ་དང ། བུ་མོ་དང ། ཆུང་མ་ཡོངས་སུ་གཏོང་བས་མངོན་པར་དགའ་བ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །འདོད་པའི་ཡོན་ཏན་ལ་སྨོད་པས་རྟག་ཏུ་གནོད་སེམས་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་
144b
ཀྱི་སྤྱོད་པ་ཡིན་ནོ། །དགེ་བའི་རྩ་བ་ཡང་དག་པར་བསྡུས་པས་མི་ལྟ་བའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ལུས་དང་སྲོག་ལ་མི་ལྟ་བས་ལྟ་བ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སྡུག་པ་དང་མི་སྡུག་པ་ཡོངས་སུ་གཏོང་བས་ཚམ་ཚོམ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །འཁོར་བ་དཔག་ཏུ་མེད་པས་མི་སྐྲག་པས་འཇིགས་པ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སེམས་ཅན་ཐམས་ཅད་ཀྱི་ཁུར་སྒྲོལ་བས་ཁུར་ཆེན་པོ་སྒྲོལ་བའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སྔར་དམ་བཅས་པ་ཉམས་སུ་ལེན་པར་བྱེད་པས་ཕྱིར་མི་ལྡོག་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །རྗེས་སུ་འགྱོད་པ་མེད་པས་ཡིད་ལ་གཅགས་པ་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཐེག་པ་ཐམས་ཅད་ཟིལ་གྱིས་མནན་པས་མངོན་པར་འཕགས་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཡི་དམ་མ་ཞིག་པས་གོ་ཆ་རྡོ་རྗེ་ལྟ་བུའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སེམས་ཅན་ཐམས་ཅད་ཀྱི་སེམས་ལ་ངེས་པར་སེམས་པས་རང་གི་སེམས་ལ་ངེས་པར་སེམས་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ལས་བྱས་པ་ཆུད་མི་ཟ་བས་ཆུད་མི་ཟ་བའི་སྤྱོད་པ་ནི་བྱང་ཆུབ་སེམས་དཔའ་རྣམས་
145a
༄#། །ཀྱི་སྤྱོད་པ་ཡིན་ནོ། །སེམས་ཅན་ཐམས་ཅད་ལ་སེམས་མཉམ་པས་ཐ་དད་མེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །དགྲ་ཐམས་ཅད་ངེས་པར་བཅོམ་པས་དཔའ་བའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སྐལ་པ་མཉམ་པའི་སྐྱེ་བོ་དང་མཐུན་པར་འཇུག་པས་མ་འདྲེས་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །གཤེ་བ་དང ། སྡང་བ་ཐམས་ཅད་རབ་ཏུ་དགའ་བར་བྱེད་པས། རབ་ཏུ་དགའ་བར་བྱེད་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སངས་རྒྱས་ལྟ་བ་དང ། ཆོས་མཉན་པ་དང ། བླ་མ་ལ་བསྙེན་བཀུར་བྱ་བ་ལ་མཆོག་ཏུ་དགའ་བས་དགའ་བ་དང ། རབ་ཏུ་དགའ་བ་དང ། མཆོག་ཏུ་དགའ་བའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ལུས་དང ། ངག་དང ། སེམས་དང ། སངས་རྒྱས་ཀྱི་ཞིང་རྒྱན་པར་བྱེད་པས་རྒྱན་གྱི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །མཉམ་པ་དང ། མི་མཉམ་པའི་གཉེན་པོར་གྱུར་པས་ཟིལ་གྱིས་མི་ནོན་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སྐྱེ་བོ་མཁས་ཤིང་མཛངས་པ་རྣམས་ཀྱིས་རབ་ཏུ་བསྔགས་པས་ངན་པ་མ་ཡིན་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཚུལ་བཞིན་གྱིས་ཉོན་མོངས་པ་རྣམས་ཤིན་ཏུ་ངེས་པར་བརྟགས་པས་མི་རྩི་
145b
བའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཁུར་བླངས་པ་ཉམས་སུ་ལོན་པས་སྐྱེས་བུ་དམ་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །བརྩོན་འགྲུས་བརྟན་པོས་ཕྱིར་མི་ལྡོག་པས་ཁྱད་པར་དུ་འགྲོ་བའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །བྱང་ཆུབ་ཀྱི་ཕྱོགས་ཀྱི་ཆོས་ཡང་དག་པར་སྡུད་པས་ཆོས་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སངས་རྒྱས་ཀྱི་གདུང་རྒྱུན་མི་གཅོད་པས་བྱས་པ་ཤེས་ཤིང་བྱས་པ་གཟོ་བའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །དཀོན་མཆོག་གསུམ་འདྲི་བར་མི་བྱེད་པས་དཀོན་མཆོག་གི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སྡུད་པ་དང་ཡོངས་སུ་གཅོད་པས་ཤེས་རབ་དང་ཐབས་ཀྱི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །བྱང་ཆུབ་སེམས་དཔའ་རྣམས་ཀྱི་སྤྱོད་པ་བསྟན་པ་འདི་བཤད་པ་ན། སྤྱོད་པ་ལ་ཞུགས་པའི་བྱང་ཆུབ་སེམས་དཔའ་ལྔ་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་ལྷའི་བུ་དེད་དཔོན་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་སྤྱོད་པ་དེ་ནི་ལེགས་པར་སྨྲས་སོ། །བྱང་ཆུབ་སེམས་དཔའ་གང་དག་སྤྱོད་པ་དེ་དང་མ་བྲལ་བ་དེ་དག་ནི། དེ་ཉིད་ཀྱིས་ལུང་བསྟན་པ་ཡིན་ནོ། །བཅོམ་ལྡན་
146a
༄#། །འདས་ཀྱིས་བཀའ་སྩལ་པ། ལྷའི་བུ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ལྷའི་བུ། གང་གི་ཚེ་ང་སྤྱོད་པ་དེ་དང་མ་བྲལ་བར་གྱུར་པ་དེའི་ཚེ་དེ་བཞིན་གཤེགས་པ་མར་མེ་མཛད་ཀྱིས། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། དེར་ངས་མི་སྐྱེ་བའི་ཆོས་ལ་བཟོད་པ་ཐོབ་བོ། །ལྷའི་བུ། གང་སྤྱོད་པ་རྣམ་པར་དག་པའི་མཚན་ཉིད་ཀྱི་ཆོས་རྣམས་ལ། བྱང་ཆུབ་སེམས་དཔའ་རྣམས་ཀྱི་སྤྱོད་པ་དེ་ལྟ་བུ་དེ་དག་རབ་ཏུ་འབྱེད་པར་བྱེད་པ་དེ་ཡང་དེ་བཞིན་གཤེགས་པའི་ཆོ་འཕྲུལ་ཆེན་པོ་ཡིན་ནོ། །དེ་ནས་བཅོམ་ལྡན་འདས་ལ་ལྷའི་བུ་དེད་དཔོན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། མི་སྐྱེ་བ་ཞེས་བྱ་བ་ནི་ཅི་ལགས། འཇུག་པ་གང་གིས་ནི་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ། མི་སྐྱེ་བ་ཞེས་བྱ་བ་དེ་ནི། གཟོད་མ་ནས་མ་སྐྱེས་པའི་མུའི་མཚན་ཉིད་ཀྱི་ཚིག་བླ་དྭགས་ཡིན་ཏེ། དེ་ནི་སྔོན་བྱུང་བར་གྱུར་ལ། ཕྱིས་མ་བྱུང་བར་གྱུར་པ་མ་ཡིན་ཏེ། དེ་ནི་གཟོད་མ་ནས་མ་བྱུང་བ་ཉིད་ཡིན་ནོ། །དེ་ནི་སྔོན་སྲིད་པར་གྱུར་ལ། ཕྱིས་མི་སྲིད་པར་གྱུར་པ་མ་ཡིན་ཏེ། དེ་ནི་གཟོད་མ་ནས་མི་སྲིད་པ་ཉིད་ཡིན་ནོ། །དེ་ནི་སྔོན་སྐྱེས་པར་གྱུར་ལ། ཕྱིས་མ་སྐྱེས་པར་གྱུར་པ་མ་ཡིན་ཏེ། དེ་ནི་གཟོད་མ་ནས་མ་སྐྱེས་པ་ཉིད་ཡིན་
146b
ནོ། །དེ་ནི་སྔོན་མངོན་པར་འདུས་བྱས་པ་ཡིན་ལ། ཕྱིས་མངོན་པར་འདུས་མ་བྱས་པ་མ་ཡིན་ཏེ། དེ་ནི་གཟོད་མ་ནས་མངོན་པར་འདུས་མ་བྱས་པ་ཉིད་ཡིན་ནོ། །དེ་ནི་སྔོན་ཡོད་པར་གྱུར་ལ། ཕྱིས་མེད་པར་གྱུར་པ་མ་ཡིན་ཏེ། དེ་ནི་གཟོད་མ་ནས་འགྱུར་བ་མེད་པ་ཉིད་ཡིན་ནོ། །དེ་ནི་སྔོན་གང་ཟག་ཏུ་བགྲང་བར་གྱུར་ལ། ཕྱིས་གང་ཟག་ཏུ་མི་བགྲང་བར་གྱུར་པ་མ་ཡིན་ཏེ། དེ་ནི་གཟོད་མ་ནས་སྟོང་པ་ཉིད་ཡིན་ནོ། །དེ་ནི་སྔོན་མཚན་མར་བགྲང་བར་གྱུར་ལ། ཕྱིས་མཚན་མར་མི་བགྲང་བར་གྱུར་པ་མ་ཡིན་ཏེ། དེ་ནི་གཟོད་མ་ནས་མཚན་མ་མེད་པ་ཉིད་ཡིན་ནོ། །གང་གིས་དེ་ལྟར་རྗེས་སུ་རྟོགས་པ་དང ། སེམས་ཀྱི་སྐྱེ་བ་དང ། འཇིག་པ་ལ་མངོན་པར་ཞེན་པ་མེད་པར་རྟོགས་པ་དེ་ནི་མི་སྐྱེ་བ་ཞེས་བྱའོ། །དེ་ལ་བཟོད་པ་གང་ཞེ་ན། དེ་དག་ཇི་ལྟར་མི་སྐྱེ་བ་དེ་བཞིན་དུ་སེམས་ཅན་ཐམས་ཅད་ལ་ཡང་བཟོད་པ་དེ་ནི་བཟོད་པ་ཞེས་བྱའོ། །དེ་དག་ཇི་ལྟར་མི་སྐྱེ་བ་དེ་བཞིན་དུ་ཞིང་ཐམས་ཅད་ལ་ཡང་བཟོད་པ་དེ་ནི་བཟོད་པ་ཞེས་བྱའོ། །དེ་དག་ཇི་ལྟར་མི་སྐྱེ་བ་དེ་བཞིན་དུ་སློབ་པ་དང ། མི་སློབ་པ་དང ། རང་སངས་རྒྱས་ཐམས་ཅད་ལ་ཡང་བཟོད་པ་དེ་ནི་བཟོད་པ་ཞེས་བྱའོ། །དེ་དག་ཇི་ལྟར་མི་སྐྱེ་བ་དེ་བཞིན་དུ། སངས་རྒྱས་ཀྱི་ཆོས་ཐམས་ཅད་དང ། བྱང་ཆུབ་སེམས་དཔའི་སྤྱོད་པ་ཐམས་ཅད་དང ། སངས་རྒྱས་ཐམས་ཅད་ལ་ཡང་བཟོད་པ་དེ་ནི་བཟོད་པ་ཞེས་བྱའོ། །དེ་དག་ཇི་ལྟར་མི་སྐྱེ་བ་དེ་བཞིན་དུ། ཆོས་ཐམས་ཅད་
147a
༄#། །ལ་ཡང་བཟོད་པ་དེ་ནི་བཟོད་པ་ཞེས་བྱའོ། །བཟོད་པ་དེ་ཡང་སྐད་ཅིག་པ་ཡིན་ཏེ། གང་གིས་སྐད་ཅིག་པ་ཡིན་ཞེ་ན། སྐད་ཅིག་པ་ཉིད་ཀྱིས་སྐད་ཅིག་པ་ཡིན་ནོ། །སྟོང་པ་ཉིད་ནི་སྟོང་པ་ཉིད་ཀྱིས་སྐད་ཅིག་པ་ཡིན་ནོ། །མཚན་མ་མེད་པ་ནི་མཚན་མ་མེད་པས་སྐད་ཅིག་པ་ཡིན་ནོ། །ཇི་ལྟར་སྟོང་པ་ཉིད་དང ། མཚན་མ་མེད་པ་སྟོང་པ་ཉིད་དང ། མཚན་མ་མེད་པས་སྐད་ཅིག་པ་ཡིན་པ་དེ་ནི་དེ་བཞིན་དུ། གཟུགས་ཀྱང་གཟུགས་ཀྱི་མཚན་ཉིད་ཀྱིས་སྐད་ཅིག་པ་ཡིན་ནོ། །ཇི་ལྟར་སྟོང་པ་ཉིད་དང་མཚན་མ་མེད་པ་སྟོང་པ་ཉིད་དང ། མཚན་མ་མེད་པས་སྐད་ཅིག་པ་ཡིན་པ་དེ་བཞིན་དུ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ཡང་རྣམ་པར་ཤེས་པའི་མཚན་ཉིད་ཀྱིས་སྐད་ཅིག་པ་ཡིན་ནོ། །ཇི་ལྟར་སྟོང་པ་ཉིད་དང ། མཚན་མ་མེད་པ་སྟོང་པ་ཉིད་དང ། མཚན་མ་མེད་པས་སྐད་ཅིག་པ་ཡིན་པ་དེ་བཞིན་དུ། ཆོས་ཐམས་ཅད་ཀྱི་ཁམས་ཀྱང་ཆོས་ཀྱི་ཁམས་ཀྱི་མཚན་ཉིད་ཀྱིས་སྐད་ཅིག་པ་ཡིན་ནོ། །ཇི་ལྟར་སྟོང་པ་ཉིད་དང ། མཚན་མ་མེད་པ་སྟོང་པ་ཉིད་དང ། མཚན་མ་མེད་པས་སྐད་ཅིག་པ་ཡིན་པ་དེ་བཞིན་དུ། སྐྱེ་མཆེད་ཐམས་ཅད་ཀྱང་སྐྱེ་མཆེད་རྣམས་ཀྱི་མཚན་ཉིད་ཀྱིས་སྐད་ཅིག་པ་ཡིན་ཏེ། སྐད་ཅིག་པ་གང་ཡིན་པ་དེ་ནི་ཡ་མ་རླ་ཡིན་
147b
ནོ། །ཡ་མ་རླ་གང་ཡིན་པ་དེ་ནི་གསོག་ཡིན་ནོ། །གསོག་གང་ཡིན་པ་དེ་ནི་གསོ་བ་ཡིན་ནོ། །གསོ་བ་གང་ཡིན་པ་དེ་ནི་འདོད་ཆགས་མེད་པ་ཡིན་ནོ། །འདོད་ཆགས་མེད་པ་གང་ཡིན་པ་དེ་ནི་འདོད་ཆགས་དང་བྲལ་བ་ཡིན་ནོ། །འདོད་ཆགས་དང་བྲལ་བ་གང་ཡིན་པ་དེ་ནི་ངོ་བོ་ཉིད་མེད་པ་ཡིན་ནོ། །ངོ་བོ་ཉིད་མེད་པ་གང་ཡིན་པ་དེ་ནི་དངོས་པོ་མེད་པ་ཡིན་ཏེ། དེ་ནི་ཆོས་ཐམས་ཅད་སྟོང་པ་ཉིད་དང ། སྐད་ཅིག་པ་དང ། ཡ་མ་རླ་དང ། དབེན་པ་དང ། གསོག་ཅེས་བྱ་སྟེ། ཆོས་ཐམས་ཅད་ལ་དེ་ལྟར་བཟོད་པ་གང་ཡིན་པ་དེ་ནི་བཟོད་པ་ཞེས་བྱའོ། །བཟོད་པ་དེ་ཡང་བཟོད་པ་ཉིད་ཀྱིས་སྐད་ཅིག་པ་ཡིན་ཏེ། དེ་ལྟར་མཉམ་པ་ཉིད་ཐོབ་པའི་བྱང་ཆུབ་སེམས་དཔའ་ནི་ལུང་བསྟན་པ་དང ། མི་སྐྱེ་བའི་ཆོས་ལ་བཟོད་པ་ཐོབ་པ་ཡིན་ནོ། །བཟོད་པ་དེ་ཡང་དམིགས་པས་རབ་ཏུ་ཕྱེ་བ་མ་ཡིན་ཏེ། དེ་ལ་དམིགས་པ་གང་ཞེ་ན། གང་གི་ཚེ་བདག་དང ། བཟོད་པ་གཉི་གར་དམིགས་ན། དེ་ནི་དམིགས་པ་ཞེས་བྱའོ། །སེམས་ཅན་དང ། སྲོག་དང ། གསོ་བ་དང།་གང་ཟག་དང ། བཟོད་པ་གཉི་གར་དམིགས་ན་དེ་ནི་དམིགས་པ་ཞེས་བྱའོ། །དེ་ལ་དམིགས་པ་མེད་པ་གང་ཞེ་ན། གང་གི་ཚེ་བདག་དང ། བཟོད་པ་གཉི་གར་མི་དམིགས་པ་དེ་ནི་དམིགས་པ་མེད་པ་ཞེས་བྱའོ། །སེམས་ཅན་དང ། སྲོག་དང ། གསོ་བ་དང ། གང་ཟག་དང ། བཟོད་པ་གཉི་གར་མི་དམིགས་པ་དེ་ནི་དམིགས་པ་མེད་པ་ཞེས་བྱའོ། །དེ་བཞིན་དུ་སྦྱར་ཏེ། ཕུང་
148a
༄#། །པོ་དང ། ཁམས་དང ། སྐྱེ་མཆེད་རྣམས་ཀྱི་ཆོས་ཐམས་ཅད་ཀྱི་ངོ་བོ་ཉིད་གང་ཡིན་པ་དེ་ནི། ངོ་བོ་ཉིད་གཏན་མེད་པ་ཡིན་ནོ། །ངོ་བོ་ཉིད་གཏན་མེད་པ་གང་ཡིན་པ་དེ་ནི་འདུས་མ་བྱས་པ་ཡིན་ཏེ། ངོ་བོ་ཉིད་དེ་དང ། བཟོད་པ་དེ་ལ་གཉིས་སུ་རྗེས་སུ་རྟོག་པར་མི་བྱེད་པ་གང་ཡིན་པ་དེ་ནི་དམིགས་པ་མེད་པ་ཞེས་བྱའོ། །ལྷའི་བུ། བཟོད་པ་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་བསྐལ་པ་གྲངས་མེད་པར་སྤྱོད་པ་དེ་ཡང་དེ་བཞིན་གཤེགས་པའི་ཆོ་འཕྲུལ་ཆེན་པོ་བསྟན་པ་ཡིན་ནོ། །བཟོད་པ་བསྟན་པ་འདི་བཤད་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་སོ། །འཇིག་རྟེན་འདི་སྣང་བ་ཆེན་པོས་ཀྱང་ཁྱབ་པར་གྱུར་ཏོ། །སིལ་སྙན་བརྒྱ་སྟོང་ཡང་མ་དཀྲོལ་བར་སྒྲ་འཁྲོལ་བར་གྱུར་ཏོ། །མེ་ཏོག་གི་ཆར་པ་དག་ཀྱང་རབ་ཏུ་བབ་བོ། །སྲོག་ཆགས་བཞི་ཁྲི་ཉིས་སྟོང་གིས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་ཆུབ་སེམས་དཔའ་དགུ་ཁྲི་དྲུག་སྟོང་གིས་ནི། ཆོས་རྣམས་ལ་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །འཇིག་རྟེན་གྱི་ཁམས་མི་མཇེད་འདིར་ཇི་ལྟར་དེ་བཞིན་གཤེགས་པ་མར་མེ་མཛད། རྒྱལ་པོའི་ཕོ་བྲང་པདྨ་ཅན་དུ་ཞུགས་པར་གྱུར་པ་དེ་ལྟ་བུ་ཡང་ཀུན་ཏུ་སྣང་བར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་
148b
འཛུམ་པ་མཛད་དོ། །གང་གི་ཚེ་སངས་རྒྱས་བཅོམ་ལྡན་འདས་འཛུམ་པ་མཛད་པ་དེའི་ཚེ། ཆོས་ཉིད་ཀྱིས་བཅོམ་ལྡན་འདས་ཀྱིས་ཞལ་གྱི་སྒོ་ནས་འོད་ཟེར་ཁ་དོག་དུ་མ། ཁ་དོག་སྣ་ཚོགས་ཁ་དོག་འབུམ་ཕྲག་དུ་མ་འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོད་ཀ་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་བར་གྱུར་ཏེ། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་སྣང་བས་ཁྱབ་པར་བྱས་ནས། ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ། ཉི་མ་དང་ཟླ་བ་དག་གི་འོད་ཀྱང་ཟིལ་གྱིས་མནན་ནས་ཡང་ཕྱིར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དབུའི་གཙུག་ཏུ་ནུབ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། ཆོས་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་དེའི་ཚེ་བཅོམ་ལྡན་འདས་ལ་མངོན་སུམ་དུ་ཚུལ་དང་འདྲ་བའི་ཚིགས་སུ་བཅད་པ་འདི་དག་གསོལ་ཏོ། །ཐུབ་པ་ཅི་སླད་འཛུམ་པ་མཛད་གྱུར་པ། །མི་མཉམ་གཟི་བརྗིད་མངའ་བ་ཁྱོད་ལ་ཞུ། །འོད་ཀྱི་བཀོད་པ་མཛད་པ་ཁྱོད་ལ་ཞུ། །རབ་རིབ་ཉོན་མོངས་སྤོང་བ་ཁྱོད་ལ་ཞུ། །བདེ་གཤེགས་ཅི་སླད་འཛུམ་པ་བསྟན་མཛད་པ། །ཕ་རོལ་ཚོགས་རྣམས་འཇོམས་པ་ཁྱོད་
149a
༄#། །ལ་ཞུ། །བདུད་དཔུང་ཕམ་པར་མཛད་པ་ཁྱོད་ལ་ཞུ། །སྟོབས་བཅུའི་སྟོབས་དང་ལྡན་པ་ཁྱོད་ལ་ཞུ། །རྒྱལ་བ་ཅི་སླད་འཛུམ་པ་སྟོན་མཛད་པ། །སུམ་ཅུ་རྩ་གཉིས་ཡོན་ཏན་མཚན་བརྒྱན་པ། །བདེ་གཤེགས་རབ་དགའ་འཛུམ་པ་མཛད་པ་པོ། །གཟུགས་ཀྱི་དམ་པ་མངའ་བ་ཁྱོད་ལ་ཞུ། །བཅོམ་ལྡན་ཅི་སླད་འཛུམ་པ་བསྟན་མཛད་པ། །མཁྱེན་པ་མཐའ་ཡས་ཡོན་ཏན་སྟོན་པ་པོ། །ཡེ་ཤེས་འབྱུང་གནས་འགྲོ་བ་ཤེས་མཛད་པ། །ཡེ་ཤེས་ལྗོན་ཤིང་མཁྱེན་པ་མཆོག་ལ་ཞུ། །འཇིག་རྟེན་གསུམ་གྲགས་གྲགས་པ་མཐའ་ཡས་པ། །གསུམ་རིག་དྲི་གསུམ་མཐའ་མར་མཛད་པ་པོ། །འཇིག་རྟེན་གསུམ་རིག་རྣམ་ཐར་གསུམ་མཐར་བྱོན། །ཅི་ཡི་སླད་དུ་འཛུམ་པ་བསྟན་པ་མཛད། །སྨན་པ་དམ་པ་སྐྱེ་རྒ་མཐར་མཛད་པ། །བཅོམ་ལྡན་ཞབས་ལ་དྲི་མཆོག་འཁོར་ལོ་མངའ། །སྲེད་མེད་སྲས་པོ་རྡོ་རྗེ་མཁྲེགས་པ་པོ། །ཐུབ་པ་འཛུམ་མཛད་སྦྱོར་བ་བཀའ་སྩལ་གསོལ། །གང་གིས་སྤྱོད་པ་དེ་ནི་རྣམ་སྦྱངས་སམ། །གང་འདིར་བཟོད་པ་དེ་དག་ཡོངས་རྫོགས་སམ། །གང་སེམས་སངས་རྒྱས་ཡོན་ཏན་ངེས་གྱུར་ཏམ། །ཅི་ཡི་སླད་དུ་ཐུབ་ཆེན་འཛུམ་པ་མཛད། །བདེ་གཤེགས་བླ་མེད་རྒྱུ་ཞིག་མི་མངའ་བར། །བཅོམ་ལྡན་འདྲེན་པ་འཛུམ་པ་མི་སྟོན་པས། །དེ་ཐོས་སེམས་ཅན་གློ་བ་རངས་འགྱུར་གྱི། །ཚངས་པའི་དབྱངས་ཅན་ལེགས་པར་གསུང་དབྱུང་
149b
གསོལ། །དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། ཆོས་ཀྱི་རྣམ་གྲངས་འདི་བཤད་པ་ན། སྲོག་ཆགས་བདུན་ཁྲི་ཉིས་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་ཆུབ་སེམས་དཔའ་སུམ་ཁྲི་ཉིས་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཀུན་དགའ་བོ། གཞན་ཡང་ཁྱོད་ཀྱིས་ལྷའི་བུ་དེད་དཔོན་འདི་མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ།་ཀུན་དགའ་བོ། ལྷའི་བུ་དེད་དཔོན་གྱིས་ནི་དེ་བཞིན་གཤེགས་པ་བགྲང་བ་ལས་ཡང་དག་པར་འདས་པ་དག་ལ་བསྟི་སྟང་དུ་བྱས། བླ་མར་བྱས། རིམ་གྲོར་བྱས། མཆོད་པར་བྱས ། ཡོངས་སུ་ཞུ་བ་བྱས། ཡོངས་སུ་དྲི་བ་བྱས་ཤིང ། སེམས་ཅན་དཔག་ཏུ་མེད་པ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་གོ་།ཀུན་དགའ་བོ། ལྷའི་བུ་དེད་དཔོན་འདི་ནི་བསྐལ་པ་གྲངས་མེད་པ་སུམ་བརྒྱ་འདས་པའི་འོག་ཏུ་བསྐལ་པ་དྲི་མ་མེད་པ་ཞེས་བྱ་བ་ལ་འཇིག་རྟེན་གྱི་ཁམས་ཡོངས་སུ་དག་པ་ཞེས་བྱ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་
150a
༄#། །བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡོན་ཏན་རྒྱལ་པོ་འོད་ཅེས་བྱ་བར་འཇིག་རྟེན་དུ་འབྱུང་བར་འགྱུར་རོ། །ཀུན་དགའ་བོ། འཇིག་རྟེན་གྱི་ཁམས་ཡོངས་སུ་དག་པ་དེ་ཡང ། རིན་པོ་ཆེ་སྣ་བདུན་འདི་ལྟ་སྟེ། གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། རྡོའི་སྙིང་པོ་དང ། སྤུག་དང ། མུ་ཏིག་དམར་པོ་ལས་གྲུབ་ཅིང ། ལག་མཐིལ་ལྟར་མཉམ་ལ། རིན་པོ་ཆེའི་དྲ་བ་སྣ་ཚོགས་ཀྱིས་མིག་མང་རིས་སུ་ཀུན་ནས་བཀབ་པར་གྱུར་ཏེ། འཇིག་རྟེན་གྱི་ཁམས་དེར་ཉན་ཐོས་དང ། རང་སངས་རྒྱས་དག་གི་མིང་ཡང་འབྱུང་བར་མི་འགྱུར་རོ། །གཞན་ཡང་མུ་སྟེགས་ཅན་སྤྱོད་པ་པ་དང ། ཀུན་ཏུ་རྒྱུ་དག་དང།་བདུད་རྣམས་དང ། དམ་པའི་ཆོས་སྤོང་བའི་སེམས་ཅན་རྣམས་ཀྱི་མིང་ཡང་མེད་ཅིང་མི་འབྱུང་བར་འགྱུར་རོ། །སངས་རྒྱས་ཀྱི་ཞིང་དེ་ན་མི་ཁོམ་པ་བརྒྱད་པོ་དག་ཀྱང་མེད་ལ། བཟའ་བ་དང ། བཏུང་བ་དག་ཀྱང་ཡིད་ལ་བསམས་པ་ཙམ་གྱིས་འགྲུབ་པར་འགྱུར་རོ། །སངས་རྒྱས་ཀྱི་ཞིང་དེ་ན་ལྟུང་བ་དང ། འཁྲུལ་པའི་ཉེས་པ་དག་དང ། སྡུག་བསྔལ་གྱི་སྒྲ་ཡང་འབྱུང་བར་མི་འགྱུར་རོ། །སེམས་ཅན་དེ་དག་གི་ལོངས་སྤྱོད་དང ། ཉེ་བར་སྤྱོད་པ་ཡང་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ལོངས་སྤྱོད་དང ། ཉེ་བར་སྤྱོད་པ་ཅི་འདྲ་བ་དེ་ལྟ་བུར་འགྱུར་
150b
རོ། །སེམས་ཅན་དེ་དག་ཐམས་ཅད་ཀྱང་གསེར་གྱི་མདོག་འདྲ་ཞིང ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པར་འགྱུར་རོ། །ཕལ་ཆེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་ཤ་སྟག་འབྱུང་བར་འགྱུར་བས། དེའི་ཕྱིར་འཇིག་རྟེན་གྱི་ཁམས་དེ་ནི་ཡོངས་སུ་དག་པ་ཞེས་བྱའོ། །བཅོམ་ལྡན་འདས་དེ་བཞིན་གཤེགས་པ་ཡོན་ཏན་རྒྱལ་པོ་འོད་དེའི་སྐུ་ཚེའི་ཚད་ནི། བར་གྱི་བསྐལ་པ་བཞི་བཅུར་འགྱུར་རོ། །བྱང་ཆུབ་སེམས་དཔའ་དེ་དག་ཀྱང་སྨོན་ལམ་གྱི་དབང་གིས་བར་མ་དོར་འཆི་བའི་དུས་བྱེད་པར་མི་འགྱུར་རོ། །དེ་བཞིན་གཤེགས་པ་དེའི་བྱང་ཆུབ་སེམས་དཔའི་དགེ་འདུན་ནི་དུང་ཕྱུར་ཕྲག་དྲུག་དང་བྱེ་བ་ཕྲག་གཉིས་སུ་འགྱུར་ཏེ། ཀུན་དགའ་བོ། བྱང་ཆུབ་སེམས་དཔའ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་དང ། གང་དག་གིས་མི་སྐྱེ་བའི་ཆོས་ལ་བཟོད་པ་འཐོབ་པར་འགྱུར་བ་དེ་དག་།འཇིག་རྟེན་གྱི་ཁམས་ཡོངས་སུ་དག་པ་དེར་སྐྱེ་བར་འགྱུར་རོ། །དེ་དག་ཐམས་ཅད་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་རྒྱལ་པོ་འོད་ཀྱིས། སངས་རྒྱས་ཀྱི་ཞིང་དེར་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་རོ། །དེ་ནས་འཁོར་དེ་ཉིད་དུ་ལྷའི་བུ་སྤྱན་རས་གཟིགས་ཞེས་བྱ་བ་
151a
༄#། །ཞིག་འདུས་ཏེ་འདུག་པར་གྱུར་པ་དེས། བཅོམ་ལྡན་འདས་ལ་ལྷའི་མེ་ཏོག་མན་ད་ར་བ་དག་གིས་མངོན་པར་གཏོར་ནས། ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས་བདག་ཀྱང་གང་གི་ཚེ། བཅོམ་ལྡན་འདས་དེ་བཞིན་གཤེགས་པའི་ཡོན་ཏན་རྒྱལ་པོ་འོད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ། འཇིག་རྟེན་གྱི་ཁམས་ཡོངས་སུ་དག་པ་དེར་སྐྱེ་ཞིང་འཁོར་ལོས་བསྒྱུར་བའི་རྒྱལ་པོར་གྱུར་ནས། དེ་བཞིན་གཤེགས་པའི་བྱང་ཆུབ་སེམས་དཔའི་དགེ་འདུན་དང་བཅས་པ་དེ་ལ་བསྙེན་བཀུར་བགྱི་ཞིང ། བཅོམ་ལྡན་འདས་དེ་ཡོངས་སུ་མྱ་ངན་ལས་འདས་པའི་འོག་ཏུ་བདག་ཀྱང་འཇིག་རྟེན་གྱི་ཁམས་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱིའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ།་ལྷའི་བུ་སྤྱན་རས་གཟིགས་འདི་ནི་གང་གི་ཚེ། བཅོམ་ལྡན་འདས་དེ་བཞིན་གཤེགས་པ་ཡོན་ཏན་རྒྱལ་པོ་འོད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ། འདི་ཡང་དེར་འཁོར་ལོས་བསྒྱུར་བའི་རྒྱལ་པོ་ལེགས་མཐོང་ཞེས་བྱ་བར་གྱུར་ཏེ། དེས་བཅོམ་ལྡན་འདས་དེ་ལ་མཆོད་པ་དཔག་ཏུ་
151b
མེད་པ་བྱས་ཤིང ། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱས་ནས། བཅོམ་ལྡན་འདས་དེ་ཡོངས་སུ་མྱ་ངན་ལས་འདས་པའི་འོག་ཏུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ།་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཀུན་ཏུ་འོད་ཅེས་བྱ་བར་འཇིག་རྟེན་དུ་འབྱུང་བར་འགྱུར་རོ། །ཀུན་དགའ་བོ། རྒྱལ་པོ་ལེགས་མཐོང་དེ་ཡང་དུས་གཞན་ཞིག་ན། བུ་ཐུ་བོ་རྒྱལ་སྲིད་ལ་བཞག་ནས། བཅོམ་ལྡན་འདས་དེའི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་རོ། །དེ་བཞིན་གཤེགས་པ་དེ་ཡང་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ། བྱང་ཆུབ་སེམས་དཔའ་དེ་ལ་བྱང་ཆུབ་སེམས་དཔའ་ལེགས་མཐོང་འདི་ནི། ང་ཡོངས་སུ་མྱ་ངན་ལས་འདས་པའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་ལུང་བསྟན་ནས་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ནས་ཚེ་དང་ལྡན་པ་ཤཱ་རདྭ་ཏིའི་བུས་ལྷའི་བུ་དེད་དཔོན་ལ་འདི་སྐད་ཅེས་སྨྲས་སོ། །ལྷའི་བུ་ཁྱོད་དེ་བཞིན་གཤེགས་པས་ལུང་བསྟན་ཏམ། སྨྲས་པ། བཙུན་པ་ཤཱ་རདྭ་ཏིའི་
152a
༄#། །བུ།་ཁོ་བོ་ནི་ཇི་ལྟར་དེ་བཞིན་གཤེགས་པའི་སྤྲུལ་པ་ལུང་བསྟན་པ་ལྟར་ལུང་བསྟན་ཏེ། ད་ལྟར་གྱི་དེ་བཞིན་ཉིད་ཇི་ལྟ་བ་དེ་བཞིན་དུ། མ་འོངས་པའི་དེ་བཞིན་ཉིད་ཀྱང་དེ་ལྟ་བུ་ཡིན་པས། དེ་བཞིན་ཉིད་དེ་ལ་ནི་འཕེལ་བ་ཡང་མེད་ལ། ཡོངས་སུ་འགྲིབ་པ་མེད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཁྱོད་ཀྱིས་ཆོས་ཀྱི་རྣམ་གྲངས་འདི་གཟུང་ཞིག་།ཆོངས་ཤིག་།ལྷོགས་ཤིག་།ཤོད་ཅིག་།ཀུན་ཆུབ་པར་གྱིས་ཤིག་།སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། ད་ལྟར་དང་མ་འོངས་པའི་བྱང་ཆུབ་སེམས་དཔའ་རྣམས་ལ་ཕན་པ་དང ། བདེ་བ་རྗེས་སུ་ཡོངས་སུ་གཟུང་བའི་ཕྱིར། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག་།ཀུན་དགའ་བོས་གསོལ་པ། བཅོམ་ལྡན་འདས། བདག་གིས་བཟུང་ལགས་ན། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཆོས་ཀྱི་རྣམ་གྲངས་འདི་ནི། ཆོ་འཕྲུལ་ཆེན་པོ་བསྟན་པ་ཞེས་བྱ་བར་གཟུང་ཞིག་།འདི་ནི་འཇམ་དཔལ་གཞོན་ནུར་གྱུར་པས་བསྟན་པ་ཞེས་བྱ་བ་དང ། རིན་པོ་ཆེ་ཐམས་ཅད་ཀྱི་ལེའུ་ཞེས་བྱ་བར་ཡང་གཟུང་ཞིག་།ཀུན་དགའ་བོ། རིགས་ཀྱི་བུའམ། རིགས་ཀྱི་བུ་མོ་གང་དག་ཆོས་ཀྱི་རྣམ་གྲངས་འདི་འཛིན་པ་
152b
དང།་མོས་པ་དང ། མོས་ནས་ཀྱང་ཡི་གེར་འདྲི་བ་དང ། ཀློག་པ་དང ། རབ་ཏུ་འདོན་པ་དང ། གཞན་དག་ལ་ཡང་རྒྱ་ཆེར་ཡང་དག་པར་སྟོན་པར་བྱེད་པ་དེ་དག་ནི། བསོད་ནམས་ཐམས་ཅད་ཀྱིས་ཡོངས་སུ་ཟིན་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང ། ལྷའི་བུ་དེད་དཔོན་དང ། འཇམ་དཔལ་གཞོན་ནུར་གྱུར་པ་དང ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། ཆོ་འཕྲུལ་ཆེན་པོ་བསྟན་པ་ལྷའི་བུ་དེད་དཔོན་གྱིས་ཞུས་པའི་ལེའུ་སྟེ་ཉི་ཤུ་རྩ་གཉིས་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། སུ་རེན་དྲ་བོ་དྷི་དང ། པྲ་ཛྙཱ་ཝརྨ་དང ། ལོ་ཙྪ་བ་ཞང་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།།