rKTs


H672

(e-text produced by ACIP)

see text in transliteration
37a
།རྒྱ་གར་སྐད་དུ། ཨཱརྱཱ་བ་ལོ་ཀི་ཏེ་ཤཝ་རཱ་ཡ་སིཾ་ཧ་ནཱ་ད་ནཱ་མ་དྷཱ་ར་ཎི། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་སེངྒེ་སྒྲའི་གཟུངས་ཞེས་བྱ་བ། བཅོམ་ལྡན་འདས་རྡོ་རྗེ་འཆང་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་
37b
ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་ཕོ་བྲང་རི་བོ་ཊ་ལའི་རྩེ་མོ་ན་རིན་པོ་ཆེའི་ཁང་བཟང་རིན་པོ་ཆེ་དང ། མུ་ཏིག་དང ། ནོར་བུ་དཔག་མེད་ཀྱིས་སྤྲས་པ། འོད་ཀྱིས་སྟོང་གསུམ་ཁྱབ་པ། མེ་ཏོག་དྲི་ཞིམ་པོ་སྣ་ཚོགས་ཀྱིས་ཀུན་ནས་བརྒྱན་པའི་ས་ཕྱོགས་དེ་ན་བྱམས་པ་ལ་སོགས་པའི་བྱང་ཆུབ་སེམས་དཔའ་དཔག་ཏུ་མེད་པ་དང ། ཉན་ཐོས་ཆེན་པོ་ཤཱ་ར་དྭ་ཏིའི་བུ་ལ་སོགས་པ་དགེ་སློང་རབ་ཏུ་མང་པོས་ཡོངས་སུ་བསྐོར་ཞིང ། བཅོམ་ལྡན་འདས་སེངྒེའི་གདན་བཤམས་པ་ལ་བཞུགས་སོ། །འཁོར་དེར་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ཞེས་བྱ་བ་འདུས་ཏེ་འདུག་པར་གྱུར་པ་དེ་རང་གི་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཡུལ་མ་ག་དྷ་ན་རྒྱལ་པོ་དབང་ཕྱུག་འོད་ཅེས་བགྱི་བ་འཁོར་དང ། བཙུན་མོ་དང ། ལོངས་སྤྱོད་ཕུན་སུམ་ཚོགས་པ་དང་ལྡན་པ་ལས། རྒྱལ་པོ་དེ་མཛེ་དང ། ཕོལ་མིག་དང ། དབུགས་མི་བདེ་བ་སྙིང་ནད་འབར་བ་བྱུང་སྟེ། དེ་
38a
༄#། །ཇི་ལྟར་བསལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ། སྔོན་འཇིག་རྟེན་གྱི་ཁམས་འདི་ཉིད་ན་འཇམ་དཔལ་ཁྱེད་ཉིད་བྱང་ཆུབ་སེམས་དཔའ་ཤེས་རབ་ཆེན་པོ་ཞེས་བྱ་བ་ཡིན་ལ། འཕགས་པ་སྤྱན་རས་གཟིགས་དབང་ཕྱུག་སེངྒེ་སྒྲ་འདི་ཉིད་བྱང་ཆུབ་སེམས་དཔའ་སྙིང་རྗེའི་མཆོག་ཅེས་བྱ་བ་ཡིན་པས། བྱང་ཆུབ་སེམས་དཔའ་དེ་གཉིས་སྟོང་གསུམ་དུ་སེམས་ཅན་གྱི་དོན་ལ་གཤེགས་པ་ལ་སེངྒེ་དཀར་པོ་གཅིག་དབང་དུ་བསྡུས་ཏེ་ཆིབས་པ་བྱས། སྐུ་ལ་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན། མདུང་རྩེ་གསུམ་པ་དང ། རལ་གྲི་དང ། པདྨ་དང ། ུཏྤ་ལ་ཐོགས་ནས་ཕྱིན་པ་ལ་རྒྱ་མཚོ་ཆེན་པོ་ལ་རྒལ་བའི་དུས་སུ་སེངྒེ་བཞག་ནས་འཁུར་རེས་བྱས་ཤིང་བྱོན་པ་ལ།་བྱང་ཆུབ་སེམས་དཔའ་ཤེས་རབ་ཆེན་པོ་ཁྱོད་ཉིད་ནི། གྲོགས་ལ་ཕན་པའི་སེམས་ཀྱིས་རང་གི་རལ་གྲིས་རང་བཀུམ་མོ། །བྱང་ཆུབ་སེམས་དཔའ་སྙིང་རྗེ་མཆོག་གི་བསམ་པ་ལ་སྟེང་འོག་བར་སྣང་གི་ཀླུ་དང ། ལྷ་ལ་སོགས་པས་བསད་དམ་སྙམ་ནས་བཏུང་བའི་སྣོད་བྲམ་ཟེའི་ཐོད་པ་ལག་ན་ཐོགས་
38b
ཏྲི་ཤཱུ་ལ་རྩེ་གསུམ་པ་ལག་ན་ཐོགས། སེངྒེ་དཀར་པོ་ལ་ཞོན། མྱ་ངན་དུ་རལ་པ་ཐོད་དུ་བཅིངས་ནས་སྟེང་གི་ལྷ་ལ་བསྡིགས་ཏེ། སྙིང་རྗེའི་སྟོབས་ཀྱིས་སེམས་ཅན་དོན་བྱས་པས། །རང་གི་གྲོགས་པོས་སྤངས་ནས་གཅིག་པུ་ལུས། །ལྷ་རྣམས་ཀུན་གྱིས་ཉེས་ན་ཆད་པའི་ལས། །གྲོང་ཁྱེར་འཇོམས་ཤིང་ལྷ་རྣམས་འགུམ་པར་བགྱིད། །ཅེས་སྨྲས་ཏེ་ལྷ་རྣམས་ལ་ཏྲི་ཤཱུ་ལ་གདེངས་པ་དང ། རྒྱལ་པོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དང ། ཁམས་གསུམ་གྱི་ལྷ་དགའ་བའི་མདངས་ཕྱུང་སྟེ་ལྷའི་མེ་ཏོག་པདྨ་དང ། ཀུ་མུ་ད་དང ། པུཎྜ་རཱི་ཀ་དང ། ཙམ་པ་ཀ་ལ་སོགས་པ་ཕུལ་ཏེ་ཐོད་པ་བཀང་ངོ ། དེ་ནས་བར་སྣང་གི་ལྷ་དང ། ཀླུ་དང ། དྲི་ཟ་དང ། གནོད་སྦྱིན་དང ། ལྷ་མ་ཡིན་དང ། གྲུལ་བུམ་དང ། ནམ་མཁའ་ལྡིང་དང ། མིའམ་ཅི་ལ་སོགས་པ་ལ་བསྡིགས་པ། ཏྲི་ཤཱུ་ལ་གདེངས་ནས། སྙིང་རྗེའི་སྟོབས་ཀྱིས་སེམས་ཅན་དོན་བྱས་པས། །རང་གི་གྲོགས་པོས་སྤངས་ནས་གཅིག་པུ་ལུས། །སྡེ་བརྒྱད་ཚོགས་ཀྱིས་ཉེས་ན་ཆད་པའི་ལས། །གྲོང་ཁྱེར་འཇོམས་ཤིང་སྡེ་བརྒྱད་འགུམ་པར་བགྱིད། །ཅེས་སྨྲས་ཏེ། སྡེ་བརྒྱད་ལ་ཏྲི་ཤཱུ་ལ་གདེངས་པ་དང ། ཀླུའི་རྒྱལ་པོ་
39a
༄#། །གཙུག་ན་རིན་ཆེན་དང ། དྲི་ཟའི་རྒྱལ་པོ་ཟུར་ཕུད་ལྔ་པ་དང ། གནོད་སྦྱིན་གྱི་རྒྱལ་པོ་རྣམ་ཐོས་ཀྱི་བུ་དང ། ལྷ་མ་ཡིན་གྱི་རྒྱལ་པོ་ཐགས་བཟང་རིས་དང ། མིའམ་ཅིའི་རྒྱལ་པོ་ལྗོན་པ་རྟ་མགོ་ཅན་དང ། གྲུལ་བུམ་གྱི་རྒྱལ་པོ་སྦྲུལ་མགོ་དགུ་པ་དང ། ནམ་མཁའ་ལྡིང་གི་རྒྱལ་པོ་གསེར་མིག་ཅན་ལ་སོགས་པ་འཁོར་མང་པོ་དང་བཅས་པ་དགའ་བའི་མདངས་ཕྱུང་སྟེ་སེངྒེ་ལ་རིན་པོ་ཆེའི་རྒྱན་ཕུལ་ལོ། །དེ་ནས་སའི་འོག་ན་གནས་པའི་ཀླུ་ལ་བསྡིགས་ཏེ། སྙིང་རྗེའི་སྟོབས་ཀྱིས་སེམས་ཅན་དོན་བྱས་པས། །རང་གི་གྲོགས་པོས་སྤངས་ནས་གཅིག་པུ་ལུས། །ཀླུ་ཚོགས་རྣམས་ཀྱིས་ཉེས་ན་ཆད་པའི་ལས། གྲོང་ཁྱེར་འཇོམས་ཤིང་ཀླུ་རྣམས་འགུམ་པར་བགྱིད། །ཅེས་སྨྲས་ཏེ། རྒྱ་མཚོ་ཆེན་པོ་ཏྲི་ཤཱུ་ལས་དཀྲུགས་པ་དང ། ཀླུའི་རྒྱལ་པོ་མ་དྲོས་པ་དང ། ཀླུའི་རྒྱལ་པོ་ཝ་ར་ཎ་དང ། ཀླུའི་རྒྱལ་པོ་འཇོག་པོ་དང ། དེ་དག་ལ་སོགས་པ་རྫུ་འཕྲུལ་དང་ལྡན་པ། འོད་དང་ལྡན་པ། ལྷ་དང་ལྷ་མ་ཡིན་གྱི་གཡུལ་མྱོང་བར་བྱེད་པ། ཀླུའི་རྒྱལ་པོ་འབུམ་ཕྲག་དྲུག་གཡོག་དང་འཁོར་དུ་བཅས་པ་འདུས་ཏེ་དགའ་བའི་མདངས་ཕྱུང་ནས་ཀླུའི་རྒྱལ་པོ་ཝ་རུ་ན་སྦྲུལ་དཀར་
39b
པོ་གཅིག་ཏུ་བྱས་ནས་ཕྱག་འཚལ་བསྐོར་བ་ལན་གསུམ་བྱས་ཏེ། བྱང་ཆུབ་སེམས་དཔའ་སྙིང་རྗེ་ཅན། །ཁྱོད་ལ་བདག་ནི་སྐྱབས་སུ་མཆི། །ཀླུ་རྣམས་ཀུན་གྱི་མགོན་མཛོད་ཅིག་།ཉམས་ན་ཀླུ་ཡི་གཤེད་མ་མཛོད། །ཅེས་སྨྲས་ནས་ཏྲི་ཤཱུ་ལ་ལ་ལན་གསུམ་དཀྲིས། ཁ་བྱང་ཆུབ་སེམས་དཔའ་ལ་བསྒྱུར། །ཕུཿ ་ཕུཿ ་ཞེས་བརྗོད་ཅིང་གུས་པས་ཁ་ནས་ཁྲག་འབྱིན་ཅིང་གནས་སོ། །ཀླུའི་རྒྱལ་པོ་གཞན་རྣམས་ཀྱང་ཐལ་མོ་སྦྱར་ནས་བསྐོར་བ་ལན་གསུམ་གསུམ་བྱས་ནས། བྱང་ཆུབ་སེམས་དཔའ་སྙིང་རྗེ་ཅན། །ཁྱོད་ལ་བདག་ཅག་སྐྱབས་སུ་མཆིའོ། །ཀླུ་རྣམས་ཐམས་ཅད་སྐྱབས་སུ་ཟུངས། །ཉམས་ན་ཀླུ་ཡི་གཤེད་མ་མཛོད། །ཅེས་སྨྲས་ནས་ཀླུ་ཆེན་པོ་བརྒྱད་སྦྲུལ་དཀར་པོ་གཅིག་ཏུ་བྱས་ནས་ཚངས་སྐུད་ལ་འཁྲིས་སོ། །ཀླུའི་རྒྱལ་པོ་དེ་རྣམས་ཀྱང་བདག་ཅག་ནི། བྲན་བགྱིད་དོ། །ཅི་བཀའ་སྩལ་པ་ཉན་ནོ། །ཞེས་སྨྲས་ནས་ཀླུ་རྣམས་སོ་སོའི་གནས་སུ་དེངས་སོ། །འཇམ་དཔལ། བྱང་ཆུབ་སེམས་དཔའ་དེ་ནི། སྙིང་རྗེ་ཀླུ་འདུལ་ཞེས་བྱའོ། ། སྙིང་ནད་སེལ་བ་ཞེས་བྱའོ། །འཇམ་དཔལ། དེ་ལྟར་སྔོན་གྱི་བྱང་ཆུབ་སེམས་དཔའ་ཤེས་རབ་ཆེན་པོ་དེ་འཇམ་དཔལ་སྨྲ་བའི་སེངྒེ་ཁྱོད་ཉིད་ཡིན་ནོ། །དེའི་
40a
༄#། །དུས་ཀྱི་བྱང་ཆུབ་སེམས་དཔའ་སྙིང་རྗེ་མཆོག་དེ་ནི། ད་ལྟའི་འཕགས་པ་སྤྱན་རས་གཟིགས་དབང་ཕྱུག་སེངྒེ་སྒྲ་ཀླུའི་དེད་དཔོན་ཆེན་པོ་འདི་ཉིད་ཡིན་ནོ། །འཇམ་དཔལ། ངས་རྒྱལ་པོ་ཆེན་པོ་དེའི་དོན་དུ་ཐུགས་རྗེ་ཆེན་པོའི་སྔགས་བརྗོད་པར་བྱའོ། །ཡིད་ལ་ཟུངས་ཤིག་།ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤཝ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊེ། ཙི་ཏི་ཛྭ་ལ་ཀ་རོ་ཏི་བིརྱ་སཝཱ་ཧཱ། གཟུངས་འདི་ནི། སངས་རྒྱས་བྱེ་བ་ཕྲག་བརྒྱད་ཅུས་གསུངས་ལ། ད་ལྟར་ང་ཉིད་ཀྱིས་བརྗོད་པའོ། །འདིའི་ཆོ་ག་ནི། མི་དགོས་པས་ལས་ཐམས་ཅད་འགྲུབ་པའོ། །བཅོམ་ལྡན་འདས་སྤྱན་རས་གཟིགས་དབང་ཕྱུག་སེངྒེ་སྒྲའི་སྐུ་ལུགས་མའམ། བྲིས་སྐུའི་སྤྱན་སྔར་བའི་ལྕི་བ་ས་ལམ་ལྷུང་བས་སོ་སོར་མ་འདྲེས་པར་མཎྜལ་བརྒྱད་བྱས་ཏེ། མཎྡལ་རེ་རེ་ལ་མེ་ཏོག་ཚོམ་བུ་ལྔ་ལྔ་བཀྲམ་སྟེ་མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། ཕྱེ་མ་རྣམས་ཀྱིས་མཆོད་ནས་མཎྜལ་རེ་རེ་ལ་གཟུངས་ལན་བཅུ་གསུམ་བཅུ་གསུམ་གྱི་བར་དུ་བཟླས་ལ་ལྕི་བ་དེ་བསྡུས་ཏེ། ལྕི་བ་ལྷག་མ་ལ་བསྔགས་
40b
ཤིང་ནད་པ་ལ་བྱུགས་ན། ནད་ཐམས་ཅད་ཉེ་བར་ཞི་བར་འགྱུར་རོ། །ལྷ་དང་ཀླུ་ལ་སོགས་པའི་དུག་གི་ནད་ཐམས་ཅད་ཞི་བར་འགྱུར་རོ། །ཞག་ཉི་ཤུ་རྩ་གཅིག་ལ་གྲུབ་པར་མ་གྱུར་ན། འཇམ་དཔལ། ཐུགས་རྗེ་ཆེན་པོ་ཉིད་ཀྱིས་མཚམས་མེད་པ་ལྔའི་ལས་བྱས་པ་ཡིན་ནོ། །འཇམ་དཔལ། ཐུགས་རྗེ་ཆེན་པོ་ཉིད་ཀྱིས་དམ་བཅས་པའི་ཚིག་གོ་།འཇམ་དཔལ། རྒྱལ་པོ་ཆེན་པོའི་གནོད་པ་ནི། གཟུངས་འདིས་སྙིང་ནད་འབར་བ་ལས་གྲོལ་ནས་སྐྱེ་བ་ཕྱི་མ་ལ་བདེ་བ་ཅན་གྱི་ཞིང་ཁམས་སུ་སྐྱེ་བར་འགྱུར་རོ། །འཇམ་དཔལ། ཉོན་ཅིག་།སངས་རྒྱས་འོད་དཔག་མེད་ལ་སོགས་པ་སངས་རྒྱས་བྱེ་བ་ཕྲག་དགུ་བཅུ་རྩ་དགུས་སྙིང་པོ་འདི་གསུངས་སོ། ། ོཾ་ཨཱཿ ་ཧྲཱིཿ ་སིཾ་ཧ་ནཱ་ད་ཧཱུཾ་ཕཊ། ད་ལྟར་ང་ཉིད་ཀྱིས་བརྗོད་དེ། རིག་སྔགས་ཀྱི་སྙིང་པོ་འདི་ལན་གཅིག་བརྗོད་པས་སྡིག་པ་ཀུན་ལས་གྲོལ་བར་འགྱུར་རོ། །སྲིད་པ་ཉམ་ངར་འགྲོ་མི་འགྱུར། །ལུས་ལ་མཚོན་གྱིས་ཚུགས་མི་འགྱུར། །དགྲ་དང་ཆོམ་པོས་མི་ཚུགས་ཅིང ། །ཀླུ་ལ་སོགས་པས་འཚེ་མི་འགྱུར། །རྟག་ཏུ་དཔལ་དང་ལྡན་པར་འགྱུར། །བུད་མེད་ལུས་སུ་མི་འགྱུར་ཞིང ། །རྟག་ཏུ་སྐྱེ་བ་དྲན་པར་འགྱུར། །ཤི་ནས་བདེ་བ་ཅན་དུ་འགྲོ། །འཇམ་དཔལ། དེ་ ་གཤེགས་པ་རྣམ་
41a
༄#། །པར་གཟིགས་དང ། གཙུག་ཏོར་ཅན་དང ། ཐམས་ཅད་སྐྱོབ་དང ། ལོག་པར་དད་སེལ་དང ། གསེར་ཐུབ་དང ། འོད་སྲུང་གིས་ཀྱང་གསང་སྔགས་འདི་གསུངས་ལ། ད་ལྟར་ཤཱཀྱ་ཐུབ་པ་ངས་ཀྱང་བརྗོད་པ་སྟེ། ན་མོ་རཏྣ་ཏྲ་ཡཱ་ཡ། ན་མ་ཧ་ཡ་གྲི་བཱ་ཡ། ན་མོ་ལོ་ཀེ་ཤཝ་རཱ་ཡ། ཏདྱ་ཐཱ། ཨོཾ་ཧྲཱིཿ ་ཀུ་ལུ་ཀུ་ལུ་ནཱི་ལ་ཀཎྛ། ཧུ་ལུ་ཧུ་ལུ། ཏིཥྛ། ཏིཥྛ། བནྡྷ་བནྡྷ། མཱ་ར་ཡ་མཱ་ར་ཡ། ཧཱ་ཧཱ་ཧཱ་ཧཱ། བཛྲ་ཀྲོ་དྷ་ཧ་ཡ་གྲི་བ་ཧྲཱིཿ ་ཧཱུཾ་ཕཊ། འཇམ་དཔལ། གཟུངས་འདི་འཕགས་པ་སྤྱན་རས་གཟིགས་དབང་ཕྱུག་ཉིད་པདྨ་ཧ་ཡ་གྲི་བའི་སྔགས་ཡིན་ཏེ། ལན་གཅིག་ཀློག་པར་བྱེད་པའི་མི། །སྡིག་པ་ཀུན་ལས་གྲོལ་འགྱུར་ཞིང ། །ངན་སོང་སྒོ་རྣམས་གཅོད་པར་འགྱུར། །ཀླུ་སོགས་གདོན་གྱིས་འཚེ་མི་འགྱུར། །བྱད་དང་དུག་ལས་གྲོལ་འགྱུར་ཞིང ། །སངས་རྒྱས་ཀུན་གྱི་གསུང་ཡིན་ནོ། །བྱེ་བ་གྲངས་མེད་མཐུ་ལས་བྱུང ། །དེ་ཡི་ཡོན་ཏན་དཔག་ཏུ་མེད། །ལན་གཅིག་བཀླགས་ན་སྡིག་པ་སེལ། །ལན་གཉིས་བཀླགས་པས་དཔལ་དང་ལྡན། །གསུམ་གྱིས་ཚེ་རྣམས་རིང་བར་འགྱུར། །འབུམ་ཕྲག་བཅུ་ཡིས་ཞལ་མཐོང་འགྱུར། །པདྨ་ཅན་གྱི་ཞིང་དེར་འགྲོ། །འཇམ་དཔལ། མི་གཞན་དག་
41b
ལ་ནི། ཁྲག་དང་མཁྲིས་པ་ལས་གྱུར་པ་དང ། རླུང་དང་གྲང་བ་ལས་གྱུར་པ་དང ། ཀླུ་རྒྱལ་རིགས་ཀྱིས་ཟིན་པ་དང ། ཀླུ་བྲམ་ཟེའི་རིགས་ཀྱིས་ཟིན་པ་དང ། ཀླུ་གདོལ་པ་དང་དམངས་རིགས་ཀྱིས་ཟིན་པ་ནི། སྙིང་མི་དགའ་བ་དང ། སྙིང་ན་བ་དང ། དབུགས་མི་བདེ་བ་དང ། ལྟོ་རྒྱབ་ཏུ་ན་བ་དང ། ཀླད་ཀོར་དུ་ན་བ་དང ། གཞོགས་ཕྱེད་དུ་ན་བ་དང ། མ་ཞུ་བ་དང ། སྦོས་པ་དང ། ཞ་གྲུམ་གྱིས་བཏབ་པ་དང ། སྦྲུམ་པ་ལྟ་བུར་ན་བ་དང ། སྲོག་ཆགས་སུ་ན་བ་དང ། ཚིགས་དང་ཤ་ཁོལ་བུར་ན་བ་དང ། ཟ་ཁུ་ཅན་དང ། ལུད་པ་གློ་ཅན་དང ། རུས་ཁོལ་དུ་ན་བ་དང ། འཕྲེས་པ་དང ། ཞ་བ་དང ། ཡི་ག་མི་བདེ་བ་དང ། ཐོར་པ་ལྟ་བུའི་ནད་དང ། སྐྲན་ཅན་དང ། དམུ་ཆུ་ཅན་དང ། འབྲས་དང ། མེ་དཔལ་དང ། ལྷོག་པ་དང ། གག་པ་དང ། ཆུ་ཐིག་ཅན་དང ། གྲང་ལྷང་ལྷང་དང ། ཚ་ཙག་ཙག་ལ་སོགས་པའི་མཛེ་རིགས་ཅན་དང ། ཕོལ་མིག་དང་བཅས་པ་དང ། ལྷ་དང ། བདུད་དང ། ཚངས་པ་དང ། གཤིན་རྗེ་དང ། བྲག་སྲིན་དང ། སེམས་འཁྲུག་གི་གདོན་དང ། ཐབ་གཞོབ་དང ། མཚོ་སྨན་དང ། ཀླུ་ལ་སོགས་པས་ཟིན་པ་དང ། གནོད་སྦྱིན་དང ། འབྱུང་པོ་དང ། ལོག་འདྲེན་དང ། ཤ་ཟའི་གདོན་རྣམས་ཀྱིས་ཟིན་
42a
༄#། །པ་དང ། ནད་སྣ་ཚོགས་འབྱུང་སྟེ། དེ་ཡང་མི་དགེ་བ་ལས་སྡུག་བསྔལ་འབྱུང་བ་ཡིན་ནོ། །བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ཉོན་ཅིག་།སྙིང་པོ་གཟུངས་ཀྱི་ཆོ་ག་འདི། །དང་པོ་ཐུགས་རྗེ་ཆེན་པོ་ལ། །གུས་ཤིང་དད་པའི་སེམས་བསྐྱེད་ནས། །སྣུམ་པའི་ས་ལ་དཀྱིལ་འཁོར་བྱ། །ལྕི་བ་དྲིར་བཅས་བྱུགས་ནས་ནི། །ཚོན་རྩི་ཁ་དོག་སྣ་ལྔ་ཡིས། །དཀྱིལ་འཁོར་པདྨ་ལྟ་བུར་བྲི། ། བུམ་པ་གང་བ་ལྔ་དག་ཀྱང ། །ཕྱོགས་བཞི་དབུས་དང་ལྔ་རུ་གཞག་།གང་བའི་གཏོར་མ་ལྔ་ཡང་བཤམས། །སེང་ལྡེང་ཕུར་བུ་ལྔ་ཡང་དགོད། །དར་གྱིས་དཀྲིས་པའི་མདའ་བཞི་དགོད། །ཚོན་སྐུད་ལྔ་ཡི་དྲ་བ་བྲེ། །འཕགས་པ་སྤྱན་རས་གཟིགས་དབང་ཕྱུག་སེངྒེ་སྒྲ་ལ་ཕྱག་འཚལ་ལོ། །ཁྲོ་བོའི་རྒྱལ་པོ་རྟ་མགྲིན་ལ་ཕྱག་འཚལ་ལོ། །བཅོམ་ལྡན་འདས་མ་གོས་དཀར་མོ་ལ་ཕྱག་འཚལ་ལོ། །བཅོམ་ལྡན་འདས་མ་སྒྲོལ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀླུའི་རྒྱལ་པོ་ཝ་རུ་ཎ་ལ་ཕྱག་འཚལ་ལོ། །ཱཿ ་ཧྲཱིཿ ་ཧྲི་པཾ་ཏཾ་ནཾ། ཡི་གེ་དྲུག་པའི་སྔགས་འདི་ནི། །བརྗོད་པས་སྡིག་པ་སྡུག་བསྔལ་སེལ་སཝཱ་ཧཱ། སངས་རྒྱས་
42b
མཆོད་ལ་བརྩོན་པར་བྱ། མེ་ཏོག་དང ། བདུག་པ་དང ། སྤོས་དང ། མེ་ཏོག་གི་ཕྲེང་བ་དང ། བྱུག་པ་དང ། གདུགས་དང ། རྒྱལ་མཚན་དང ། བ་དན་དང ། ཕྱེ་མ་དང ། རྒྱན་ཐམས་ཅད་ཀྱིས་མཆོད་ནས། སེང་ལྡེང་རྒྱ་ཤུག་མེ་བཏང་ལ། །ཚོན་སྐུད་བཅང་ཞིང་འབྲུ་རྣམས་བསྲེག་།རྨ་བྱ་རྨག་ཤད་ལྕུག་མ་ཡིས། །ཀླུ་ཡི་དུག་རྣམས་སེལ་བར་བྱེད། །ཧྲཱིཿ ་ན་ག་ལེ་ལེ། ནཱ་ག་དུམ་བ་ལེ་ལེ། ནཱ་ག་ཕུད་ཕུད། ཧ་ལེ་ཧ་ལེ། ཧཱ་ལ་ཧཱ་ལ། སྥུ་ཊ་སྥུ་ཊ། ནཱ་ག་ཁྲོལ་ཁྲོལ་ཤིག་ཤིག་སཝཱ་ཧཱ། ཀླུ་དང ། ལོག་འདྲེན་ཐམས་ཅད་ཀྱི་ཡིད་ཀྱི་དུག་དང ། མཐོང་བའི་དུག་དང ། བཅིངས་པའི་དུག་དང ། ཁ་རླངས་ཀྱི་དུག་དང ། རེག་པའི་དུག་དང ། དུག་ཐམས་ཅད་ཕྱིར་ཁུད་ཅིག་སཝཱ་ཧཱ། དུག་འདིར་མ་འདུག་ཅིག་།སྦྱིན་པར་བྱེད་པའི་གན་དུ་སོང་ཞིག་།འཛིན་པའི་ནང་དུ་སོང་ཞིག་།མེའི་ནང་དུ་སོང་ཞིག་།ཆུའི་ནང་དུ་སོང་ཞིག་།ཞི་བར་གྱུར་ཅིག་སཝཱ་ཧཱ། འཇམ་དཔལ། འདི་དག་ནི། དེ་བཞིན་གཤེགས་པས་སྤྱི་བོ་ནས་དབང་བསྐུར་བའོ། །ཧྲཱིཿ ་བྷྲུཾ་ཨཾ་ཧཱུཾ་ཁཾ། རིགས་ལྔས་དབང་བསྐུར་བའོ། །རྡོ་རྗེ་སྲུང་བའི་མཆོག་ཏུ་འགྱུར། །བཀྲ་ཤིས་ལྷ་མོ་དཔལ་དང་ལྡན། །བསྙེན་གནས་ལ་ནི་གནས་གྱུར་ནས། །དཀོན་མཆོག་རྗེས་དྲན་སེམས་བསྐྱེད་ནས། །བུམ་ཆུ་དག་
43a
༄#། །པས་ལས་སྒྲིབ་སེལ། །ལུས་ངག་སེམས་ཀྱིས་དག་པ་ཐོབ། །ཕ་རོལ་ཕྱིན་དྲུག་གནས་གྱུར་ཅིང ། །སངས་རྒྱས་སེམས་ཅན་མཁྱེན་པར་གྱུར། །ཏིང་འཛིན་ཐམས་ཅད་མངོན་དུ་འགྱུར། །བུ་མོ་གཞོན་ནུས་བཀལ་པ་ཡི། །སྐུད་པ་དཀར་པོ་སུམ་བསྒྲིལ་ལ། །བཟླས་བརྗོད་ཉི་ཤུ་བརྒྱད་བྱས་ནས། ། མགུལ་དུ་བཏགས་ན་ནད་ལས་གྲོལ། །ནད་ལ་ཕན་པའི་སྨན་རྣམས་ལ། །གཟུངས་སྔགས་བཟླས་ཤིང་བཏབ་གྱུར་ན། །ནད་རྣམས་ཀུན་ལས་གྲོལ་བར་འགྱུར། །ཆུ་ལ་གཟུངས་སྔགས་མང་བཟླས་ན། །ཀླུ་ནད་ཁོང་དུ་སེལ་བར་འགྱུར། །ལོ་ཏོག་ཟ་བ་ཁ་བཅིང་ན། །བྱེ་མ་ས་དང་ཐལ་བས་སེལ། །ཧ་ཅང་ཆར་པ་ཆེས་པ་ན། །ལྷ་ལ་ཕུལ་བའི་རྙིང་པ་ལ། །ཁམ་ཕོར་གསར་པའི་ནང་དུ་ཡང ། །མེ་ཏོག་གཙང་མ་བླངས་ནས་ནི། །བསྲེགས་ན་ཆར་པ་འཆད་པར་འགྱུར། ། སེར་བ་དྲག་པོ་འོངས་པ་ན། །ཐལ་ཆེ་ཡུངས་ཀར་བཟླས་བརྗོད་ཀྱིས། །སེར་བ་ཉ་ལྕིབ་ལྕུག་མ་དང ། །ལྕུམ་པོ་བཏགས་ཏེ་བཙུགས་གྱུར་ན། །སེར་བ་འཆད་པར་འགྱུར་བ་ཡིན། །ལྷ་ཀླུ་དྲི་ཟ་ལ་སོགས་པའི། །གདོན་ནི་གནོད་པར་གྱུར་པ་ལ། །དཀྱིལ་འཁོར་འདོམ་གང་གྲུ་བཞི་ལ། །བུམ་པ་གཙང་མ་ལྔ་བཞག་སྟེ། །
43b
སྨན་སྦྱར་ཆུས་ནི་གང་བ་ལ། །བཟླས་བརྗོད་བརྒྱ་ནི་རྩ་བརྒྱད་བཟླས། །སློབ་མ་གོས་ཟས་དཀར་པོ་སྦྱར། །དཀྱིལ་འཁོར་དེ་ཡི་ནང་དུ་གཞུག་།བུམ་པའི་ཆུ་ཡིས་བཀྲུ་བར་བྱ། །ནད་དང་གནོད་པ་ཀུན་ལས་ཐར། །ཀླུ་སོགས་གདོན་རྣམས་དཔག་མེད་ཀྱིས། །གླགས་ཀྱང་རྙེད་པར་མི་འགྱུར་རོ། །བུས་པ་གདོན་གྱིས་འཇིགས་པ་ལས། །གི་ཝང་གིས་ནི་སྲུང་འཁོར་བྲི། །ཡུངས་ཀར་དག་དང་བཅས་ཏེ་གདགས། །བྱིས་པ་གདོན་དང་ནད་ལས་ཐར། །ལམ་དུ་ཞུགས་ཏེ་འགྲོ་བ་ན། །ཐུ་བ་གཡས་པའི་གོས་ཀྱི་གྲར། །བཟླས་བརྗོད་བདུན་བྱས་མདུད་པ་བོར། །སོང་ན་བདེ་ཞིང་དོན་ཡང་འགྲུབ། །རྟ་ལ་སོགས་པའི་ཕྱུག་རྣམས་ལ། །ཆུ་དང་ཡུངས་ཀར་བཅས་པ་ལ། །བཟླས་ནས་གཏོར་ན་བདེ་བར་འགྱུར། །མི་ནད་ཕྱུགས་ནད་ཐམས་ཅད་ལ། །ཡུངས་ཀར་དང་ནི་བུམ་པའི་ཆུས། །བཀྲུ་ཞིང་བཏགས་ན་མི་ནད་ཞི། ། མྲ་རི་ཡི་གཟུངས་སེལ་ལྟར། །ལས་རྣམས་ཐམས་ཅད་འགྲུབ་པར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ། །རྒྱལ་པོ་འདིའི་ཁོང་ན་ཀླུའི་དུག་གིས་གང་ནས་འདུག་སྟེ། འདི་ནི། ཀླུའི་རྒྱལ་པོ་ཝ་རུ་ཎ་འདིས་ཀླུ་ཐམས་ཅད་ལ་དབང་
44a
༄#། །བྱེད་པ་ཡིན་པས་འདིས་དབྱུང་བར་བྱའོ། །བཅོམ་ལྡན་འདས་འཇིག་རྟེན་དབང་ཕྱུག་སེངྒེ་སྒྲ་ལ་ཕྱག་འཚལ་ལོ། །ཀླུའི་རྒྱལ་པོ་ཝ་རུ་ཎ་ལ་ཕྱག་འཚལ་ལོ། །ཀླུའི་རྒྱལ་པོ་ཏཀྵ་ཀ་ལ་ཕྱག་འཚལ་ལོ། །ཀླུའི་རྒྱལ་པོ་མཐའ་ཡས་ལ་ཕྱག་འཚལ་ལོ། །ཀླུའི་རྒྱལ་པོ་པདྨ་ལ་ཕྱག་འཚལ་ལོ། །ཀླུའི་རྒྱལ་པོ་པདྨ་ཆེན་པོ་ལ་ཕྱག་འཚལ་ལོ། །ཀླུའི་རྒྱལ་པོ་དུང་སྐྱོང་ལ་ཕྱག་འཚལ་ལོ། །ཀླུའི་རྒྱལ་པོ་རིགས་ལྡན་ལ་ཕྱག་འཚལ་ལོ། །ཀླུའི་རྒྱལ་པོ་དགའ་བོ་ལ་ཕྱག་འཚལ་ལོ། །ཀླུའི་རྒྱལ་པོ་ནོར་རྒྱས་ལ་ཕྱག་འཚལ་ལོ། །ོཾ་ཝ་རུ་ཎཱ་ཡ་སཝཱ་ཧཱ། ཨོཾ་ཨ་ནནྟཱ་ཡ་སཝཱ་ཧཱ། ཨོཾ་བཱ་སུ་ཀཱ་ཡ་སཝཱ་ཧཱ། ཨོཾ་ཏཀྵ་ཀཱ་ཡ་སཝཱ་ཧཱ། ཨོཾ་ཀརྐོ་ཊཱ་ཡ་སཝཱ་ཧཱ། ཨོཾ་པདྨཱ་ཡ་སཝཱ་ཧཱ། ཨོཾ་མ་ཧཱ་པདྨཱ་ཡ་སཝཱ་ཧཱ། ཨོཾ་ཤཾ་ཁ་པཱ་ལཱ་ཡ་སཝཱ་ཧཱ། ཨོཾ་ཀུ་ལི་ཀཱ་ཡ་སཝཱ་ཧཱ། ཀླུ་ཡི་གཟུགས་ནི་མང་པོ་ཡང ། །དཀར་གསུམ་མངར་གསུམ་འབྲས་ཟན་ལ། །ལེགས་བྱས་ཁ་དོག་བསྒྱུར་བྱས་ལ། །མེ་ཏོག་སྤོས་དང་བྱུག་པ་དང ། མར་མེ་ཞལ་ཟས་སྒྲ་སྙན་དང ། །གདུགས་དང་རྒྱལ་མཚན་མེ་ཏོག་ཕྲེང ། །ཚངས་པའི་སྐུད་པས་མཉེས་པར་བྱ། །རྩ་བ་ལོ་མ་སྡོང་བུ་དང ། །མེ་ཏོག་འབྲས་བུ་སྨན་གྱིས་མཆོད། །རྨ་བྱ་གཟུངས་མོ་མེ་ལོང་གིས།།
44b
རྒྱལ་པོའི་ཁོང་གི་དུག་ཐོན་ཅིག་།རིན་ཆེན་རྨག་ཤད་མཆོད་པའི་རྟེན། །མི་ལྡོག་པ་ཡི་རྫས་སུ་ཆོངས། །བུམ་པ་གཏེར་གྱིས་གང་བ་མཛེས། །སྲོག་ཆགས་ཡིད་འོང་གཟུགས་ཀྱིས་མཆོད། །ཞི་འགྱུར་འདི་ལ་ཐེ་ཚོམ་མེད། །ཀླུ་ཡི་རྒྱལ་པོ་འཇོག་པོ་ཡིས། །ཟིན་ཀྱང་སྐད་ཅིག་གཅིག་ལ་ཐོན། །འཇམ་དཔལ། །འདི་གཞན་གྱི་མཐུ་མ་ཡིན་ཏེ། འཕགས་པ་སྤྱན་རས་གཟིགས་དབང་ཕྱུག་དེའི་མཐུའོ། །སྟོབས་སོ། །བྱིན་གྱི་རླབས་སོ། །ཐུགས་རྗེ་དང་ལྡན་པ་འདིའི་ཡོན་ཏན་བརྗོད་ཀྱིས་མི་ལང་ཡང་བདག་གིས་ཆ་ཤས་ཙམ་ཞིག་བརྗོད་ན། ཨོཾ་བཅོམ་ལྡན་འདས། །བྱ་བ་བྱས་ཤིང་བྱེད་པ་བྱས། །ཁུར་བོར་བདག་དོན་རྗེས་སུ་བརྙེས། །སྲིད་པར་སྦྱོར་བ་ཡོངས་སུ་ཟད། །ཡང་དག་བཀའ་ལས་རྣམ་པར་གྲོལ། །སེམས་དཔའ་དབང་སྒྱུར་ཐམས་ཅད་ཀྱི། །མཆོག་ཏུ་ཕ་རོལ་ཕྱིན་ཐོབ་པ། །སྲིད་ལས་རྒལ་ཞིང་ཚོགས་གཉིས་རྫོགས། །ཱཿ ། གཞན་ལ་ཕན་བརྩོན་ཐུགས་བརྩེ་ཅན། །སེམས་ཅན་ཀུན་ལ་མཆོག་ཏུ་བྱམས། །ཁམས་གསུམ་ཀུན་གྱི་གཉེན་གཅིག་པུ། །མཐའ་ཡས་སེམས་ཅན་སྒྲོལ་ལ་མཁས། །ཧྲཱིཿ ། འགྲོ་བ་ཉམ་ཐག་ཀུན་ཏུ་སྐྱོབ། །དྲི་མ་གསུམ་སྤངས་ཕ་རོལ་ཕྱིན། །མངོན་ཤེས་དྲུག་བརྙེས་ནྱ་གྲོ་བུ། །སྐྱེས་བུ་ཆེན་པོའི་
45a
༄#། །མཚན་རྣམས་ནི། །སུམ་ཅུ་རྩ་གཉིས་དག་དང་ལྡན། །དཔེ་བྱད་བཟང་པོ་བརྒྱད་ཅུས་མཛེས། །སྐུ་མདོག་ཤེལ་གྱི་ཁ་དོག་འདྲ། །གངས་རི་ཉི་ཤར་ལྟ་བུར་མཚོན། །སྐུ་ཚད་ཆེ་ལ་འོད་ཟེར་འབར། །རིགས་ལྔ་སངས་རྒྱས་སྐུ་ལ་འཕྲོ། །དབུ་སྐྲ་ཐོར་ཚུགས་གྱེན་ལ་བརྫེས། །དབུ་ལ་འོད་དཔག་མེད་པ་བཞུགས། །ཀླུ་རྣམས་ཐམས་ཅད་འདུལ་མཛད་པ། །རྩེ་གསུམ་སྦྲུལ་གྱིས་རབ་ཏུ་དཀྲིས། །རིགས་གསུམ་མགོན་པོའི་བྱིན་རླབས་འཛིན། །དུག་གསུམ་རྩད་ནས་གཅོད་ལ་བསྟོད། །སྐྱོན་གྱིས་མ་གོས་པདྨ་བསྣམས། །ཤེས་རབ་ཕུན་སུམ་རལ་གྲི་འབར། །ཉོན་མོངས་དག་པ་བྲམ་ཟེའི་མགོ་།མེ་ཏོག་དྲི་ཞིམ་ཚོགས་ཀྱིས་བཀང ། །ཀླུ་རྣམས་ཀུན་ནས་དབང་བསྡུས་པས། །སྦྲུལ་གྱི་ཚངས་སྐུད་མཛེས་ལ་བསྟོད། །སིཾ་ཧ། པདྨ་དག་གི་གདན་ལ་བཞུགས། །བདུད་བཞི་ཟིལ་གྱིས་གནོན་མཛད་པ། །སེངྒེ་དཀར་པོའི་གདན་ལ་བཞུགས། །འདོད་པའི་དོན་རྣམས་སྒྲུབ་པའི་ཕྱིར། །རིན་ཆེན་སྣ་ཚོགས་རྒྱན་གྱིས་བརྒྱན། །བ་སྤུ་ཉ་ག་མ་རེ་རེ་ཡང ། །སེམས་ཅན་ཀུན་གྱི་མཆོག་ཏུ་འགྱུར། །ཕྱག་འཚལ་ཐུགས་རྗེ་ཅན་ལ་བསྟོད།། ཏཱ། །དམ་ཆོས་རྒྱལ་ཚབ་དབང་བསྐུར་བ། །ལྷ་མོ་སྒྲོལ་མ་རྗེས་སུ་འབྲང ། །འཇིགས་པ་བརྒྱད་སྐྱོབ་སྐུ་མདོག་ལྗང ། །གནོད་
45b
པ་སེལ་བ་མི་འཇིགས་སྦྱིན། །ུཏྤལ་ཐུགས་རྗེའི་བདག་ཉིད་ཅན། །བཏུད་དེ་སྤྲུལ་པ་མང་པོ་འགྱེད། །ཧཱུཾ། གོས་དཀར་མོ་ནི་བཀའ་བཞིན་བྱེད། །ཡིད་བཞིན་འཁོར་ལོ་བདེ་བར་བསྐོར། །འདོད་པའི་དོན་ཡོད་སྡུག་བསྔལ་ཞི། །འཇིགས་པ་བརྒྱད་པོ་སེལ་བ་ལ་བསྟོད། །ཕཊ། ཧ་ཡ་གྲི་བ་ཁྲོ་བོའི་སྐུ། །འཕགས་པ་རྟ་མགྲིན་བདུད་བཞི་འཇོམས། །ཀྲོ་དྷ་མགྲིན་སྔོན་གདུག་པ་འདུལ། །ཀླུ་བདུད་འདུལ་མཛད་ཧཱུཾ་གིས་བསྟོད། །ནཱ། ནམ་མཁའ་ཀླུ་རྒྱལ་ཝ་རུ་ཎ། །ཆུ་ལྷ་སྟོན་པའི་ཞལ་མཐོང་ཞིང ། །བསྟན་ལ་རབ་དགའ་ཀླུ་རྣམས་འདུལ། །ས་དང་པོ་ཡི་བདེན་པ་མཐོང ། །བདེ་བར་གཤེགས་པའི་རིང་བསྲེལ་འཛིན། །ཀླུ་རྒྱལ་བྱང་ཆུབ་སེམས་ལ་བསྟོད། །ོཾ་ཏཱ་རེ་ཏུཏྟཱ་རེ་ཏུ་རེ་སཝཱ་ཧཱ། ཨོཾ་ཀ་ཊེ་བི་ཀ་ཊེ་ནི་ཀ་ཊེ། ཀ་ཏཾ་ཀ་ར་སཝཱ་ཧཱ། གང་གིས་བསྟོད་ཅིང་ཟློས་པ་དེ་མཚམས་མེད་པ་ལྔ་བྱས་པའི་ལས་ཀྱི་སྒྲིབ་པ་ཡང་ཡོངས་སུ་བྱང་བར་འགྱུར་རོ། །དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །གསང་སྔགས་ཐམས་ཅད་བཟླས་པར་འགྱུར་རོ། །བསྐལ་པ་སྟོང་གི་བར་དུ་ངན་སོང་དུ་མི་སྐྱེའོ། །བུད་མེད་ཀྱི་ལུས་སུ་མི་སྐྱེའོ། །སུ་ཞིག་ནང་པར་ལངས་ནས་ཆུ་དྲི་ཞིམ་པོས་ཁྲུས་བྱས་ཏེ་གཙང་སྦྲ་ལ་གནས་ནས་ཐུགས་
46a
༄#། །རྗེ་ཆེན་པོ་སེངྒེ་སྒྲའི་སྤྱན་སྔར་གཟུངས་འདི་ཀློག་གམ། འབྲི་འམ། འཆང་ངམ། ཀློག་ཏུ་འཇུག་གམ། ཁ་ཏོན་དུ་བཏོན་ནས་སྙིང་པོ་དང ། གཟུངས་སྔགས་ཟློས་ན་ནི། དེའི་ལུས་ལ་མཛེ་དང ། ཤུ་བ་དང ། ཕོལ་མིག་དང ། འབྲས་དང ། བས་ལྡགས་དང ། མེ་དབལ་དང ། གཡན་པ་དང ། ལྷོག་པ་དང ། གག་པ་དང ། སྦོས་པ་དང ། དམུ་ཆུ་དང ། སྐེམ་པ་དང ། མཁལ་མ་རྡོལ་བ་དང ། དོན་སྣོད་དུ་འདུས་པ་དང ། བྱད་ཀྱི་དཀྱིལ་འཁོར་ལ་ནད་སྣ་ཚོགས་འདུས་པ་དང ། གློ་བ་ན་བ་དང ། དབུགས་མི་བདེ་བ་དང ། རླུང་མཁྲིས་བད་ཀན་འདུས་པ་ཐམས་ཅད་ལས་ཐར་པར་འགྱུར་རོ། །འཇམ་དཔལ། གཟུངས་འདི་ནི། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའོ། །སུ་ཞིག་གམ་རྒྱལ་པོ་ཆེན་པོ་དེས་གཟུངས་འདི་གླེགས་བམ་ལ་བྲིས་ཏེ་འཆང་བ་དང ། ཀློག་པ་དང ། ཀུན་ཆུབ་པར་བྱེད་པ་དང ། མཆོད་པ་དང ། ཡི་གེར་འབྲི་བ་དང ། གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། རྒྱལ་པོ་ཡུལ་འཁོར་དང་བཅས་པའམ། གཙུག་ལག་ཁང་དུ་གླེགས་བམ་འདི་འཆང་ན། དཔལ་ནག་པོ་ཆེན་པོ་དང ། རྒྱལ་པོ་ཆེན་པོ་བཞི་དང ། ཀླུའི་རྒྱལ་པོ་ཝ་རུ་
46b
ཎ་དང ། ཀླུ་ཆེན་པོ་བརྒྱད་རྣམས་སླད་བཞིན་འབྲང་ཞིང་དཔག་ཚད་སྟོང་ཚུན་ཆད་དུ་སླར་རྒོལ་བ་དང ། ལྷ་དང ། ཀླུ་དང ། གནོད་སྦྱིན་དང ། གདོན་མ་རུངས་པ་ཐམས་ཅད་དང ། ལོག་པར་འདྲེན་པ་དང ། ཕྱིར་རྒོལ་བ་ཐམས་ཅད་འཇོམས་པར་འགྱུར་རོ། །སྒོམ་ཉེས་པ་དང ། བྲི་ཉེས་པ་དང ། སྔགས་ནོར་པ་དང ། ཕྱག་རྒྱ་ནོར་བ་དང ། བཤད་ཉེས་པ་དང ། ཉན་པ་ནོར་བ་ཡང་གཟུངས་འདི་བཀླགས་པས་དག་པར་འགྱུར་རོ། །གཟུངས་འདིས་སུ་ལ་སྲུང་བ་བྱས་པ་དང ། ཡོངས་སུ་བསྐྱབ་པ་བྱས་པ་དང ། བསྐྱང་བ་དང ། ཞི་བ་དང ། བདེ་ལེགས་སུ་བྱས་པ་དེ་ལ་མཚོན་དང ། དུག་དང ། དབྱིག་དུག་དང ། བྱད་དང ། གཤེད་མ་དང ། རིམས་དང ། གནོད་པ་ཐམས་ཅད་དང ། དུས་མ་ཡིན་པར་འཆི་བས་མི་ཚུགས་སོ། །གནོད་པར་བྱེད་པ་ཚར་གཅོད་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་བྱང་ཆུབ་སེམས་དཔའ་འཇམ་དཔལ་དང ། ཉན་ཐོས་ཆེན་པོ་ཤཱ་ར་དྭ་ཏིའི་བུ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྤྱན་རས་གཟིགས་དབང་ཕྱུག་སེངྒེ་སྒྲ་ཞེས་བྱ་བའི་གཟུངས་རྫོགས་སོ།། །།
47a
༄#། །ཁ་ཆེའི་ཡུལ་དུར་ཁྲོད་འབྲི་ས་ཀ་རང་བྱུང་གི་མཆོད་རྟེན་རྩར་དངོས་གྲུབ་བརྙེས་པའི་རྗེ་བཙུན་མ་རྡོ་རྗེ་སེམས་མ་དང ། སྒྲ་སྒྱུར་གྱི་ལོཙྪ་བ་མགར་ཤེས་རབ་འབྱུང་གནས་ཞེས་བྱ་བས་བསྒྱུར་ཅིང་ཞུས་ཏེ་གཏན་ལ་ཕབ་པ།