rKTs


H788

(e-text produced by ACIP)

see text in transliteration
424a
རྒྱ་གར་སྐད་དུ། ཤྲཱི་བཛྲ་ཧྲྀ་ད་ཡ་ཨ་ལཾ་ཀཱ་ར་ཏནྟྲ་ནཱ་མ། བོད་སྐད་དུ། དཔལ་རྡོ་རྗེ་
424b
སྙིང་པོ་རྒྱན་གྱི་རྒྱུད་ཅེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་ཀྱི་སྙིང་པོ་བུད་མེད་བཅུའི་དཀྱིལ་ན་ཆ་ཤས་ལྔ་པའི་ཚུལ་དུ་བཞུགས་སོ། །བརྗོད་དུ་མེད་པའི་ཡང་བརྗོད་དུ་མེད་པའི་འཁོར་རྡོ་རྗེ་དང་པདྨར་སྦྱོར་བ་ལ་བཞུགས་པ་འདི་ལྟ་སྟེ། དམ་ཚིག་ཡོངས་སུ་སྤྱོད་པ་ཞེས་བྱ་བའི་རྡོ་རྗེ་མཁའ་འགྲོ་དང ། ཡེ་ཤེས་ཀྱི་ལུས་ཡོངས་སུ་འགྲུབ་པ་ཞེས་བྱ་བའི་རྡོ་རྗེ་མཁའ་འགྲོ་དང ། སྒྲ་བརྙན་ལྟ་བུའི་རྡོ་རྗེའི་གསུང་འབྱུང་བ་ཞེས་བྱ་བའི་རྡོ་རྗེ་མཁའ་འགྲོ་དང ། གཞན་གྱིས་ཤེས་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང ། རྩེ་གཅིག་ཏུ་འདྲིས་པ་ཞེས་བྱ་བའི་རྡོ་རྗེ་མཁའ་འགྲོ་དང ། གཞན་ལས་འཕགས་པ་ཞེས་བྱ་བའི་རྡོ་རྗེ་མཁའ་འགྲོ་དང ། རྟེན་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང ། རླན་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང ། སྨིན་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང ། སྐྱོད་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང ། གོ་འབྱེད་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང ། ཧཱ་ར་ནུ་པཱུ་ར་ལ་སོགས་བས་མཛེས་པ་ཞེས་བྱ་བའི་རྡོ་རྗེ་མཁའ་འགྲོ་དང ། གཱི་ཏ་ཨ་\?\་ལ་སོགས་པའི་གླུ་མཁན་མ་ཞེས་བྱ་བའི་རྡོ་རྗེ་མཁའ་འགྲོ་དང ། སྦྲུལ་གྱི་སྙིང་པོ་ལ་སོགས་པའི་དྲི་ལྡན་མ་ཞེས་བྱ་བའི་རྡོ་རྗེ་མཁའ་འགྲོ་དང ། ཚོད་མ་སྣ་ཚོགས་ཟ་བའི་ཟོ་ལྡན་མ་ཞེས་
425a
༄#། །བྱ་བའི་རྡོ་རྗེ་མཁའ་འགྲོ་དང ། རྩེན་པ་སྣ་ཚོགས་ཀྱིས་འཁྱུད་མཁན་མ་ཞེས་བྱ་བའི་རྡོ་རྗེ་མཁའ་འགྲོ་དང ། གསུམ་རིག་པར་བྱེད་པ་དངོས་མེད་མ་ཞེས་བྱ་བའི་རྡོ་རྗེ་མཁའ་འགྲོ་མ་ལ་སོགས་པ་རི་རབ་ཀྱི་རྡུལ་དང་མཉམ་པའི་རྡོ་རྗེ་མཁའ་འགྲོ་ཐམས་ཅད་དང ། རྡོ་རྗེ་མཁའ་འགྲོ་ཆེན་མོ་ནམ་མཁའི་དབྱིངས་དང་མཉམ་པ་འདི་ལྟ་སྟེ། གཟུགས་ཀྱི་མཚན་ཉིད་ཞུ་བ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང ། ཚོར་བའི་མཚན་ཉིད་སིམ་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང ། འདུ་ཤེས་ཀྱི་མཚན་ཉིད་ནུབ་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང ། འདུ་བྱེད་ཀྱི་མཚན་ཉིད་ལ་རྟོག་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང ། རྣམ་པར་ཤེས་པའི་མཚན་ཉིད་བསྡུས་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་ལ་སོགས་པ་ནམ་མཁའི་དབྱིངས་དང་མཉམ་པ་རྣམས་ཀྱིས་སངས་རྒྱས་ཀྱི་ཞིང་འདི་ཏིལ་གྱི་གང་བུ་ལྟ་བུར་གང་བར་སྣང་ངོ ། །དེ་ནས་རྡོ་རྗེ་མཁའ་འགྲོ་དེ་དག་ཐམས་ཅད་གཅིག་ཏུ་འདུས་ནས་མཁའ་འགྲོ་ཆེན་པོ་རྡོ་རྗེ་འཛིན་པ་ཆེན་པོ་ལ་མཆོད་པའི་སྤྲིན་སྤྲོས་པ་དུ་མ་ཡིད་ལས་བྱུང་བ་ལྷ་དང་མིའི་མཆོད་པ་ལས་ཁྱད་པར་དུ་འཕགས་པས་མཆོད་ནས་ཕྱག་འཚལ་ཏེ། འདི་སྐད་ཅེས་གསོལ་ཏོ། །དེ་བཞིན་གཤེགས་རྣམས་ཐམས་ཅད་ཀྱི། །གསང་གསུམ་བསྡུས་པའི་སྤྱོད་པའི་མཆོག་།རྡོ་རྗེ་སྙིང་པོའི་རྒྱན་གྱི་རྒྱུད། །འདྲེན་པ་མཆོག་གིས་བཤད་དུ་གསོལ། །དེ་ནས་
425b
རྡོ་རྗེ་ཆེན་པོས་གསོལ་བ་བཏབ་པའི་ཚིག་གསན་ནས་མཁའ་འགྲོ་ཐམས་ཅད་ལ་རྣམ་པར་བལྟས་ཏེ་ཅང་མི་གསུང་བར་བཞུགས་སོ། །དེ་ནས་བྱང་ཆུབ་སེམས་དཔའི་རྡོ་རྗེ་མཁའ་འགྲོ་དེ་དག་ཐམས་ཅད་ཀྱིས་ཀྱང་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གི་ཡོན་ཏན་ཁྱད་པར་དུ་འཕགས་པའི་རྡོ་རྗེ་མཁའ་འགྲོ་ཆེན་པོ་ལ་སོགས་པའི་འཁོར་དུ་འཆད་དུ་མི་བཞེད་པ་དེ་བདག་ཅག་ལ་མི་དགྱེས་སུ་མ་མཛད་ཅིག་།དེ་ནས་དེ་བཞིན་གཤེགས་པའི་བདག་པོ་རྡོ་རྗེ་འཛིན་པ་ཆེན་པོས་འཁོར་གྱི་དཀྱིལ་འཁོར་ལ་རྣམ་པར་བལྟས་ཏེ་ཚིགས་སུ་བཅད་པ་གསུངས་པ། སེམས་དཔའ་ཆེན་པོས་ཞུས་པ་ལེགས། །ས་འོག་མ་ཡི་སངས་རྒྱས་ཀྱང ། །འདི་ཡི་གཞུང་གིས་སེམས་རྨོངས་ན། །སེམས་དཔའ་གཞན་ནི་སྨོས་ཅི་དགོས། །སངས་རྒྱས་ཆོས་ཉིད་དག་པ་འདི། །བྱིས་པ་རྣམས་ཀྱིས་མི་རྟོགས་ཕྱིར། །བྱིན་གྱིས་བརླབས་ནས་འཆད་པ་ནི། །སྟོན་པ་རྣམས་ཀྱི་ཆོས་ཉིད་དོ། །དེ་ནས་རྡོ་རྗེ་མཁའ་འགྲོ་དེ་དག་ཐམས་ཅད་རབ་ཏུ་དགའ་ནས་ཡང་མཆོད་པའི་ཚོགས་ཀྱིས་མཆོད་དེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གིས་བདག་ཅག་བྱིན་གྱིས་བརླབ་པར་མཛད་དུ་གསོལ། དེ་བཞིན་གཤེགས་པ་ཐམས་ཅད་ཀྱི་གསང་བ་ཐུན་མོང་མ་ཡིན་པ་བསྟན་ཅིང་རྣམ་པ་ཐམས་ཅད་ཀྱི་དབང་ཕྱུག་གིས་བདག་ཅག་བྱིན་གྱིས་
426a
༄#། །བརླབ་པར་མཛད་དུ་གསོལ། དེ་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གིས་རྡོ་རྗེ་མཁའ་འགྲོ་དེ་དག་གིས་གསོལ་བ་བཏབ་པ་མཁྱེན་ནས་སེམས་དཔའ་ཐམས་ཅད་བྱིན་གྱིས་རློབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་བསྡུས་པ་ཞེས་བྱ་བའི་སྙིང་པོ་འདི་རང་གི་ཐུགས་ལས་བྱུང་ངོ ། །ོཾ་ཨཱཿ ཧཱུཾ་ས་མ་ཡ་བཛྲ། དེ་ནས་བྱུང་མ་ཐག་ཏུ་དེའི་འོད་ཟེར་གྱིས་རྡོ་རྗེ་མཁའ་འགྲོའི་འཁོར་དེ་དག་ཐམས་ཅད་བསྡུས་ནས་རང་གི་སྙིང་གར་བཙུད་ནས་བུད་མེད་ཀྱི་དཀྱིལ་ན་ཐམས་ཅད་བརྒྱལ་བ་ལྟར་གནས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གིས་དེ་བསླང་བའི་ཕྱིར་མཁའ་འགྲོ་ཐམས་ཅད་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་དེ་དག་དྲན་པ་སླར་ཐོབ་ཅིང་ཇི་ལྟ་བ་བཞིན་དུ་གནས་སོ། །དེ་ནས་དེ་བཞིན་གཤེགས་ཐམས་ཅད་ཀྱི་དབང་ཕྱུག་གིས་འཁོར་ལོ་རྣམ་པར་དགོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སྙོམས་པར་ཞུགས་མ་ཐག་ཏུ་རྡོ་རྗེ་མཁའ་འགྲོ་དེ་དག་ཐམས་ཅད་རང་རང་གི་གནས་ཇི་ལྟ་བ་བཞིན་དུ་འཁོད་པར་གྱུར་ཏོ། །དེའི་ཚེ་བཅོམ་ལྡན་འདས་རྡོ་རྗེ་འཛིན་པ་ཆེན་པོའི་བྱིན་གྱིས་བརླབས་ཀྱིས་ནམ་མཁའི་དབྱིངས་ན་གནས་པ་ཇི་སྙེད་པ་དེ་དག་
426b
ཐམས་ཅད་ཀྱང་བདེ་བ་དང་ཡིད་བདེ་བ་མྱོང་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གིས་རྡོ་རྗེ་སྙིང་པོ་རྒྱན་གྱི་རྒྱུད་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སེམས་ཅན་གྱི་ཁམས་ཐམས་ཅད་མཉམ་པ་ཉིད་དུ་དམིགས་ཏེ། དབུགས་རྔུབ་པར་མི་མཛད། དབྱུང་བར་མི་མཛད། ལུས་འགྱུར་བར་ཡང་མི་མཛད། ལུས་གནས་པར་ཡང་མི་མཛད། དུས་གསུམ་གྱི་དེ་བཞིན་གཤེགས་པ་ཐམས་ཅད་ལ་མི་གཟིགས་མི་དགོངས་ཉེ་བར་མི་འཇིག་གོ་།ཐབས་དང་ཤེས་རབ་སྟོང་པར་ཡང་མི་མཛད། ཤིན་ཏུ་འགལ་བ་ཅན་ཡང་དག་པར་འཛུད་པར་མི་མཛད། མཐོ་རིས་ལ་ཡང་མི་འཇོག་།མ་དད་པ་རྣམས་དད་པར་ཡང་མི་མཛད། མདུལ་བ་རྣམས་དུལ་བར་ཡང་མི་མཛད། ཉེ་བར་འཚེ་བ་ཞི་བར་ཡང་མི་མཛད། མ་འགགས་པ་རྣམས་འགག་པར་ཡང་མི་མཛད། མ་བསྐུལ་བ་རྣམས་བསྐུལ་བར་ཡང་མི་མཛད། མ་རྒྱས་པ་རྣམས་རྒྱས་པར་ཡང་མི་མཛད། རྣམ་པར་རྨོངས་བ་རྣམས་རྨོངས་པ་སེལ་བར་ཡང་མི་མཛད། དགའ་བར་གྱུར་པ་རྣམས་མི་དགའ་བར་ཡང་མི་མཛད། མི་དགའ་བ་རྣམས་དགའ་བར་ཡང་མི་མཛད། མ་ཁྲོས་པ་རྣམས་ཁྲོས་པར་ཡང་མི་མཛད། མི་སྡུག་པ་རྣམས་སྡུག་པར་ཡང་མི་མཛད། དྲག་པོ་མ་རུངས་པ་ཆེན་པོ་དང ། གཏུམ་པོ་ཆེན་པོ་དང ། ལྷ་དང་ལྷ་མ་ཡིན་དང་ལོག་འདྲེན་དང་གདུག་པ་ཆེན་པོ་དང་ཡི་
427a
༄#། །དྭགས་དང་ཤ་ཟ་དང་གནོད་སྦྱིན་དང་སྲིན་པོ་དང་ཤིན་ཏུ་གདུག་པའི་དུག་ཆེན་པོ་དང་ཚ་བའི་གདོན་དང་ནད་དང་སྦྲུལ་དང་སེམས་ཅན་ཐམས་ཅད་ལ་འཚེ་བར་བྱེད་པ་རྣམས་ཉེ་བར་ཞི་བར་ཡང་མི་མཛད་དོ། །རྣམ་པར་དུལ་བར་ཡང་མི་མཛད་དོ། །དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ཏེ་བརྗིད་པ་དང་བཅས་པར་གར་མཛད་ཅིང་ཞལ་འཛུམ་པ་དང་འདོར་བ་དང་བསྐུམ་པ་དང ། འགྱེད་པ་དང་སྤྱན་མཛེས་པས་སྨིན་རིངས་བསྐྱོད་ཅིང་བསྒྱུར་བ་དང ། པདྨའི་ཕྱག་གི་སོར་མོ་གཡས་གཡོན་གར་གྱི་ཕྲེང་བའི་ཚུལ་གྱིས་སའི་ངོས་ལ་ཞབས་འཕེན་ཞིང་སྒྱུར་བ་དང ། འདོར་ཞིང་བསྐུལ་བ་དང་འཇོག་ཅིང་འདེགས་པའི་རྣམ་པར་གནོན་པས་ནམ་མཁའི་དབྱིངས་འདི་ཐམས་ཅད་ཀུན་དུ་ཁྱབ་པར་མཛད་དེ། རླུང་གི་ཁམས་ཆེན་པོར་ཀུན་ཏུ་ཁྱབ་པར་མཛད། དེ་ལ་ཁྱབ་ནས་མེའི་ཁམས་ཆེན་པོར་ཀུན་དུ་ཁྱབ་པར་མཛད་དེ། དེ་ནས་ཆུའི་ཁམས་ཆེན་པོར་ཀུན་དུ་ཁྱབ་པར་མཛད། དེ་ནས་སའི་ཁམས་ཆེན་པོར་ཀུན་དུ་ཁྱབ་པར་མཛད་དོ། །དེ་ཡང་ཀུན་དུ་ཁྱབ་ནས་བཅོམ་ལྡན་འདས་བྱང་ཆུབ་ཀྱི་སེམས་ལ་ཀུན་དུ་ཁྱབ་པར་མཛད་དོ། །རི་དང་སེམས་ཅན་ཐམས་ཅད་དང ། །སྣ་ཚོགས་ཕྲ་བ་སྤོམ་པོ་དང ། །བུད་མེད་གཞོན་ནུ་རྒན་པོ་དང ། །སྐྱེས་པ་དང་ནི་མ་ནིང་དང ། །ལྷ་དང་ཀླུ་དང་གནོད་སྦྱིན་དང ། །གདོན་དང་སྐར་མ་གཤིན་རྗེ་དང ། །
427b
ཆུ་བདག་བརྒྱ་བྱིན་ལ་སོགས་དང ། །འབྱུང་དང་འབྱུང་འགྱུར་ཐམས་ཅད་ལ། །བཅོམ་ལྡན་འདས་ནི་བདེ་ཆེན་པོ། །ཀུན་དུ་བཟང་པོ་རྡོ་རྗེ་འཛིན། །ཀུན་དུ་ཁྱབ་པར་བྱས་ཏེ་གནས། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རྡོ་རྗེ་མཁའ་འགྲོ་བྱིན་གྱིས་རློབ་པའི་ལེའུ་སྟེ་དང་པོའོ།། །།དེ་ནས་གཞན་ཡང་བཤད་བྱ་བ། །ལས་ཀྱི་མཆོག་རྣམས་འགྲུབ་བྱེད་པའི། །གསང་སྔགས་རྣམས་ནི་བཤད་པར་བྱ། །རྩེ་གཅིག་སེམས་ཀྱིས་མཉན་པར་བྱའོ། །ོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱཱ་ནུཏྤནྣ་ཏྭཱཏ། གཏོར་མའི་སྔགས་སོ། ། ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨཾ་ཨཿ ། བུད་མེད་དོ། །རྀ་རཱྀ། ལྀ་ལཱྀ། མ་ནིང་ངོ ། །ཀ་ཁ་ག་གྷ་ང ། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། སྐྱེས་པའིའོ། །ཡ་ར་ལ་ཝ་འབྱུང་བའི་འོ། །ཤ་ཥ་ས་ཧ་འཇིགས་པ་ལ་སོགས་པའོ། ། ཀྵཿ ་ཆོས་ཀྱི་དབྱིངས་ཀྱི་ས་བོན་ནོ། །བཛྲ་དྷརྀཀ་ཧཱུཾ། ཛི་ན་ཛིཀ་བྷྲཱུཾ། རཏྣ་དྷརྀ་ཀ་ཨཾ། ཨཱ་རོ་ལི་ཀ་ཛྲཱིཾ། པྲཛྙཱ་དྷརྀཀ་ཁཾ། མཁའ་འགྲོ་ཆེན་པོ་ལྔའིའོ། །དྭེ་ཥ་ར་ཏི་མཱཾ། མོ་ཧ་ར་ཏི་ལཱཾ། རཱ་ག་ར་ཏི་བཱཾ། བཛྲ་ར་ཏི་ཏཱཾ། རྡོ་ཛ་མཁའ་འགྲོ་བརྟན་པར་བྱེད་པ་ལ་སོགས་པའིའོ། །ཀྵི་ཏི་གརྦྷ་ཀྵིཾ། བཛྲ་པཱ་ཎི་ཛྲཱིཾ། ག་ག་ན་གརྦྷ་ཁཾ། ལོ་ཀི་ཤཝ་ར་བཾ། ནི་བ་ར་ཎ་བིཥྐམྦྷི་ནི་ཀཾ་།ས་མནྟ་བྷ་དྲ་སཾ། རྡོ་རྗེ་མཁའ་འགྲོ་དམ་ཚིག་སྤྱོད་པ་ལ་སོགས་པའིའོ། །རཱུ་པ་བཛྲ་ཛཿ ། ཤབད་བཛྲ་ཧཱུཾ། གནྡྷེ་བཛྲ་བཾ། ར་ས་བཛྲ་ཧོཿ ། སྤཪྴ་བཛྲ་ཁཾ། དྷརྨཱ་དྷཱ་ཏུ་བཛྲ་རཾ། རྡོ་རྗེ་མཁའ་འགྲོ་མཛེས་པར་བྱེད་པ་ལ་སོགས་པའིའོ། །ཡ་མཱནྟ་ཀྲྀཏ། པྲ་ཛྙཱནྟ་ཀྲྀཏ།
428a
༄#། །པདྨཱནྟ་ཀྲྀཏ། བིགྷྣཱནྟ་ཀྲྀཏ། ཊཀྐི་རཱ་ཛ། ནཱི་ལ་དཎྜ། མཧཱ་བ་ལ། ཨ་ཙ་ལེ་ཀ་ཎ་ཧཱུཾ། སུཾ་བྷ་ནི་ཧཱུཾ། ཙཀྲ་བརྟི་ནི་ཧཱུཾ་བྷྲཱུཾ། རྡོ་རྗེ་མཁའ་འགྲོ་གཤིན་རྗེའི་གཤེད་ལ་སོགས་པའིའོ། །ཝ་རི་ཛི་ན་བྷྲཱུཾ། ཏེ་ཛོ་སྐནྡྷ་བྷྲཱུཾ། མནྟྲ་ཙཀྲ་བྷྲཱུཾ། བར་དྷན་བྷྲཱུཾ། བི་ས་ར་ཎ་བྷྲཱུཾ། བི་ར་ཛི་ན་བྷྲཱུཾ། ཀ་རོ་བྷ་བ་བྷྲཱུཾ། རྡོ་རྗེ་མཁའ་འགྲོ་གཙུག་ཏོར་རྒྱལ་པ་ལ་སོགས་པའི་འོ། །ཧཱུཾ་ཧྲཱིཿ ཁ་རྡོ་རྗེ་མཁའ་འགྲོའིའོ། །ོཾ་མེ་དི་ནེ་བཛྲཱི་བྷ་བ་བཛྲ་བྷ་བནྡྷ་ཧཱུཾ། སའིའོ། །ོཾ་བཛྲ་པྲཱ་ཀཱ་ར་ཎ་ཧཱུཾ་བཾ་ཧཱུཾ། ར་བའིའོ། །ོཾ་བཛྲ་བཉྫ་ར་ཧཱུཾ་ཡཾ་ཧཱུཾ། དྲ་བའིའོ། །ོཾ་བཛྲ་བི་ཏཱ་ན་ཧཱུཾ་ཁཾ་ཧཱུཾ། གུར་གྱིའོ། །ོཾ་བཛྲ་ཤ་ར་ཛ་ལ་ཏྲཱཾ་སཾ་ཏྲཱཾ། མདའིའོ། །ོཾ་བཛྲ་ཛྭཱ་ལཱ་ན་ལཱརྐ་ཧཱུཾ་ཧཱུཾ་ཧཱུཾ། འོད་ཀྱིའོ། །ོཾ་ཤཱུ་ནྱ་ཏཱ་ཛྙཱ་ན་བཛྲ་སཝ་བྷཱ་བ་ཨཱཏྨ་ཀོཉཧཾ། སྟོང་པ་ཉིད་ཀྱི་སྔགས་སོ། །ོཾ་དྷརྨ་དྷཱ་ཏུ་སཝ་བྷཱ་ཝ་ཨཱཏྨ་ཀོཉཧཾ། ཆོས་ཀྱི་དབྱིངས་ཀྱི་སྔགས་སོ། །ོཾ་སརྦ་ཏ་ཐཱ་ག་ཏཱ་ཀཱ་ཡ་ཝཱ་ཀྩིཏྟ་བཛྲ་སཝ་བྷཱ་བ་ཨཱཏྨ་ཀོཉཧཾ། སྐུ་ལ་སོགས་པ་བྱིན་གྱིས་བརླབ་པའིའོ། །བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ། ཐིག་གདབ་པའོ། །བཛྲ་ཙི་ཏྲ་ས་མ་ཡ་ཧཱུཾ། ཚོན་དགྱེ་བའི་འོ། །ཧཱུཾ་ཧཾཿ ཱ་ཛྙཻཿ ། དབབ་པའི་འོ། །བཛྲ་ཀཱི་ལ་ཡ་མུངྒ་ར་ཨཱ་ཀོ་ཊ་ཡ་ཧཱུཾ་ཕཊ། ཕུར་བུས་བརྡུང་བའིའོ། །དེ་ལ་སོགས་པའི་མཐའ་ཡས་པ། ། འཇིག་རྟེན་གསུམ་དུ་རྙེད་དཀའ་བའི། །སྔགས་ཀྱི་ཚོགས་རྣམས་ཇི་སྙེད་པ། །དེ་ཀུན་སྔོན་དུ་རྒྱས་པ་རུ། །གསང་བ་དང་ནི་འཇིགས་བྱེད་དང ། །བདེ་མཆོག་སོགས་ལ་ང་ཡིས་ནི། །
428b
ལས་དང་བཅས་པར་རབ་བཤད་པ། །རྣལ་འབྱོར་རྟོགས་པས་ཤེས་བྱའོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་སྔགས་ཀྱི་ལེའུ་སྟེ་གཉིས་པའོ།། །།དེ་ནས་མཁའ་འགྲོའི་གྲོང་ཁྱེར་མཆོག་།དཀྱིལ་འཁོར་འཇིགས་པ་བྲི་བར་བྱ། །ལས་ཀྱི་ཆོ་ག་ཤེས་པ་ཡིས། །ཅི་རིགས་པར་ནི་ལས་རྣམས་བྱ། །ཉི་ཤུ་རྩ་ལྔའི་སྲད་བུ་ནི། །སེམས་མེད་ལས་བྱུང་བྱས་ནས་སུ། །བྱིན་རླབས་མི་བསྐྱོད་རྟག་པ་རུ། །བྱས་ཏེ་ཐིག་ནི་གདབ་པའོ། །གྲུ་བཞི་པ་ལ་སྒོ་བཞི་པ། །ཏྭེ་ར་ཎ་བཞིས་བརྒྱན་པ་སྟེ། །དར་དང་མེ་ཏོག་ཕྲེང་བས་བཀླུབས། །སྲད་བུ་བཞི་དང་རབ་ལྡན་པ། །ཟུར་གྱི་ཆ་ནི་ཐམས་ཅད་དུ། །ཟླ་བ་རིན་ཆེན་རྡོ་རྗེ་དགོད། །ལས་ཀྱི་བྱེ་བྲག་ཤེས་པ་ཡིས། །བློ་དང་ལྡན་པས་ཕྱག་རྒྱ་དགོད། །ིནྡྲ་ནཱི་ལ་ལྟ་བུ་ཡི། །འཇིགས་བྱེད་རྡོ་རྗེ་དབུས་སུ་བྲི། །ཤར་དུ་རྩིབས་བརྒྱད་འཁོར་ལོ་དཀར། །ལྷོ་རུ་རིན་ཆེན་ཟུར་དགུ་ལྗང ། །ནུབ་ཏུ་འདབ་བརྒྱད་པདྨ་དམར། །བྱང་དུ་རལ་གྲི་སྔོན་པོ་བྲི། །མེ་ཡི་མཚམས་སུ་འཁོར་ལོ་སྔོན། །བདེན་བྲལ་ཨུཏྤལ་དམར་པོ་དང ། །རླུང་གི་མཚམས་སུ་པདྨ་དམར། །དབང་ལྡན་ཨུཏྤལ་སེར་པོ་སྟེ། །རྡོ་རྗེ་ཐོ་བ་ཤར་གྱི་སྒོ། །ལྷོ་ཡི་སྒོ་རུ་རྡོ་རྗེ་དབྱུག་།པདྨའི་སྡོང་བུ་ནུབ་ཀྱི་སྒོ། །བྱང་སྒོ་རྡོ་རྗེ་ཁ་བྱེ་བ། །སྦྱོར་བ་ལྡན་པས་དགོད་པར་བྱ། །རྣམ་པ་ཉི་ཤུ་རྩ་ལྔར་ནི། །ཚོན་རྩི་དག་ཀྱང་བསྒོམ་བྱ་སྟེ། །རྡུལ་ཅོན་ལྔ་ལ་སོགས་པ་རྣམས། །རིམ་པ་བཞིན་དུ་གདབ་པར་བྱ། །དེ་ནས་བུམ་པ་གཟུང་བྱ་བ། །རྩ་བ་ནག་ནོག་མེད་པ་ཡི། །ཞབས་བརྟན་མགྲིན་
429a
༄#། །རིང་མཆུ་འཕྱང་བ། །ལྷ་ཡི་གྲངས་ཙམ་སྟ་གོན་གནས། །མགུལ་བར་རས་ཀྱིས་ཡང་དག་དཀྲིས། །ལྡུམ་པུ་ཡིས་ནི་ཁ་མཛེས་པ། །རིན་ཆེན་སྨན་འབྲུ་སྣ་ལྔ་དང ། །སྤོས་ཆུ་ཡིས་ནི་རབ་བཀང་ནས། །བུམ་པ་མངོན་པར་བསྔགས་པར་བྱ། །རྣམ་རྒྱལ་བུམ་པ་དཀྱིལ་འཁོར་གྱི། །བདག་པོ་ལྷ་མོ་རྣམས་ཀྱི་བཞི། །ལྷ་རྣམས་ཀྱི་ནི་བུམ་པ་བཞི། ། སྒོ་ཡི་ཕྱོགས་ཀྱི་བུམ་པ་ནི། །ལས་ཀུན་བྱེད་པས་བཟླས་བྱས་ཏེ། །ཀུ་ཤའི་ཆུན་པོས་སེམས་ཅན་ཆེ། །འཇུག་པ་ཀུན་ལ་གཏོར་བར་བྱ། །ཡོན་དང་གཏོར་མ་མཆོད་ཕུལ་ནས། །དེ་དག་ཕྱི་གྲཝར་རབ་བཀོད་དེ། །གཡས་སུ་རྒྱལ་བ་སྤྱན་དྲང་ངོ ། །དེ་ནས་ལྷ་རྣམས་རབ་གནས་པའི། །བསམ་པའི་སྦྱོར་བས་བསམ་བྱ་སྟེ། །ཕྱག་རྒྱ་བྲལ་བའི་སྦྱོར་བ་ནི། །ལུས་ཅན་བྱིན་གྱིས་མི་རློབ་པས། །བུ་མོ་གཟུགས་བཟང་ལང་ཚོས་བརྒྱན། །དབང་ཐོབ་ལུས་རྒྱས་ཐོབ་པ་མོ། །གཡོན་མ་རྒྱན་གྱིས་རབ་བརྒྱན་ཏེ། །དེ་ཡི་འཁོར་ལོ་སྤྲུལ་བར་བྱ། །དེ་ལ་མར་མེ་བརྒྱ་སོགས་པའི། །མཆོད་པ་ཕུལ་ནས་བསྟོད་བྱ་སྟེ། །བཤད་གཅི་ཁུ་བ་ཁྲག་རྣམས་ནི། །དུང་ཆེན་པོ་རུ་བཞག་བྱས་ཏེ། །ལྷ་རྣམས་ལ་ནི་དབུལ་བར་བྱ། །དེ་ནས་མཁའ་འགྲོ་གྲོང་མཆོག་ཏུ། །སློབ་མ་རྣམས་ནི་གཞུག་བྱ་སྟེ། །རྡོ་རྗེ་ཡེ་ཤེས་རབ་ཐོབ་པའི། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་དཀྱིལ་འཁོར་དམ་པ་འདིར། །བདག་གིས་སློབ་མ་གཞུག་
429b
པར་བྱ། །དེ་ནས་སློབ་མ་དེ་ཡིས་ཀྱང ། །མེ་ཏོག་སྔགས་འདིས་གཏོར་བའོ། །ོཾ་པྲ་ཏཱིཙྪ་བཛྲ་ཧོཿ ། །དེ་ནས་ཚིག་འདིས་གདོང་གཡོགས་དགྲོལ། །དེ་རིང་དད་པའི་ཤུགས་ཀྱིས་ནི། །དཀྱིལ་འཁོར་དེང་འདིར་བལྟ་བར་བྱ། །སངས་རྒྱས་རིགས་སུ་ཁྱོད་སྐྱེས་སོ། །སྔགས་དང་ཕྱག་རྒྱས་ཁྱོད་བྱིན་བརླབ། །དངོས་གྲུབ་ཐམས་ཅད་ཕུན་སུམ་ཚོགས། །དམ་ཚིག་མཆོག་ཏུ་འགྲུབ་པར་བྱེད། །རྡོ་རྗེ་པདྨོ་རོལ་པའི་མཆོག་།སྔགས་ཀྱི་བདག་ཉིད་ཤེས་པར་བྱ། །པཱ་ཤྱ་བཛྲ། གང་དག་མེ་ཏོག་གསང་བ་སྟེ། །དེ་དེ་དེ་ཡི་ལྷ་ཡང་དག་།དེ་ཡི་སྦྱོར་བ་རབ་སྦྱིན་ཏེ། །དེ་ཡི་ནན་ཏན་དུ་སྒྲུབ་བོ། །དུང་ཆེན་བདུད་རྩི་ལྔ་བླུད་དེ། །དམྱལ་བའི་ཆུ་འདིས་ཁྱོད་ལ་ནི། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་པའི། །འཐུང་ཤིག་རྡོ་རྗེ་བདུད་རྩིའི་ཆུ། །བཛྲ་ཨུངྐ་ཋ། །དེ་ནས་སངས་རྒྱས་ཐམས་ཅད་ཀྱི། །དམ་ཚིག་དང་ནི་སྡོམ་པ་རྣམས། །བླ་མས་སློབ་མ་སྡིག་བྲལ་ལ། །ཅི་ལྟ་བ་བཞིན་བསྒྲག་པར་བྱ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རི་མོའི་དཀྱིལ་འཁོར་གྱི་ལེའུ་སྟེ་གསུམ་པའོ།། །།དེ་ནས་གཞན་ཡང་བཤད་བྱ་བ། །དབང་བསྐུར་བ་ཡི་ཆོ་གའི་མཆོག་།གང་གིས་ལེགས་པར་བྱེད་འགྱུར་ན། །དེ་ནི་སངས་རྒྱས་ཉིད་དུ་འགྲུབ། །སློབ་དཔོན་མཚན་ཉིད་ཐམས་ཅད་ལྡན། །ཡང་དག་ཤེས་ཤིང་རྒྱུད་ཤེས་པ། །དེ་ཉིད་བཅུ་ལ་སོགས་པ་ཡི། །གསང་རིག་ཆོ་ག་ཤེས་པ་པོས། །བསྒྲིམས་ཏེ་སློབ་མ་ཡང་
430a
༄#། །དག་གཟུང ། །བླ་མ་ལ་གུས་དད་པའོ། །དགེ་བསྒོམ་ལྷ་རྣམས་མཆེད་བྱེད་པ། །གཏོང་ཕོད་ཡོན་ཏན་ལྡན་པའོ། །དེ་ནས་སློབ་མ་དེ་ཡིས་ཀྱང ། །ལངས་ཏེ་ཞབས་ལ་མགོས་གཏུགས་ནས། །རྒྱལ་པོ་དབང་ཕྱུག་བདེ་དམ་པ། །གོས་དང་རྒྱན་གྱིས་ལེགས་པར་བགོས། །སྟེང་དུ་བླ་རེ་བྲེ་བར་བྱ། །གདུགས་དང་རྒྱལ་མཚན་བ་དན་དང ། །ལྷམ་དང་ཚངས་པའི་སྐུད་པ་དང ། །གདུ་བུ་དག་དང་སྐ་རགས་དང ། །བཀྲ་ཤིས་ཚིགས་བཅད་སྣ་ཚོགས་ཀྱིས། །སློབ་མ་སྡིག་དང་བྲལ་བ་ལ། །སློབ་དཔོན་གྱིས་ནི་དབང་བསྐུར་རོ། །དང་པོ་རྣམ་རྒྱལ་བུམ་པ་དང ། །དེ་ནས་ལྷ་མོ་བཞི་རྣམས་དང ། །ལྷ་རྣམས་ཀུན་གྱི་བཞི་པོ་ཡིས། །བཀྲ་ཤིས་ཚིགས་བཅད་གླུ་སྒྲ་དང ། །རྡོ་རྗེ་དྲིལ་བུ་གསིལ་བ་ཡིས། །སྐྱོབ་པའི་དཀྱིལ་འཁོར་མངོན་སུམ་དུ། །ཏིལ་གྱི་གང་བུ་བཞིན་གང་བའི། །རྒྱལ་བས་བུམ་པ་བཟུང་ནས་ནི། །དེ་ཉིད་ལ་ནི་དབང་བསྐུར་བར། །དཀྱིལ་འཁོར་དེ་ཉིད་རིག་པར་བསམ། ། དེ་ལྟ་བུ་ནི་བསམས་ནས་ཀྱང ། །ཆོས་ཀྱི་མཚན་ཉིད་བསྟན་པར་བྱ། །དེ་ནས་ཡིད་འོང་བུ་མོ་ནི། །ལེགས་པར་གོམས་པ་དབང་ཐོབ་པ། །རྒྱན་གྱིས་རབ་བརྒྱན་རབ་མཛེས་པ། ། བཙལ་ཏེ་བླ་མ་ལ་ཕུལ་ནས། །དེ་ནས་རྒྱལ་དབང་སློབ་མ་དེ། །ནང་གི་སྦས་པ་བཏུས་བ་ཡི། །གསང་བ་མཉམ་པར་འཇུག་པ་ཡི། །སྦྱོར་དང་ལྡན་པས་དབང་བསྐུར་བྱ། །རྡོ་རྗེ་པདྨོ་
430b
ལས་དྲང་བ། །སྦོམ་པོ་མཐའ་ལྟག་རྩེ་སྦྱར་ནས། །རྐན་དུ་རྡོ་རྗེ་གཞག་པར་བྱ། །ཀྱེ་མའོ་བདེ་བ་བདེ་བ་ཆེ། །ཀྱེ་མའོ་དམ་ཚིག་བདེ་བརྗོད་ཅིང ། །ཀྱེ་མའོ་བདེ་པ་བླང་བར་བྱའོ། །འདི་ནི་གསང་བ་ཞེས་བྱ་བའི། །དེ་དབང་བསྐུར་བའི་ཐབས་མཆོག་གོ་།ཡང་ན་ཤིན་ཏུ་དད་ལྡན་བ། །གཟུགས་བཟང་སྒྲུབ་ལ་དགའ་བ་དང ། །སྦྱོར་གོམས་བླ་མ་ལ་ནི་དབུལ། །བླ་མས་བྱིན་བརླབས་ལྷ་མོ་དང ། །སྒྲུབ་པ་དེ་ལ་སྦྱིན་པར་བྱ། །དེ་ཡིས་བླངས་ནས་བརྩོན་པའི་ཚོགས། །ཅི་སྐད་གསུངས་བཞིན་རབ་བྱས་ནས། །རང་གི་ལྷ་དང་སངས་རྒྱས་དང ། །བྱང་ཆུབ་སེམས་དཔའི་ཚོགས་རྣམས་ཀུན། །མཉེས་བྱེད་ཆོ་གས་སེམས་བརྟགས་ཏེ། །མངོན་སུམ་བདེ་བ་རང་འབྱུང་བ། །གཞན་གྱིས་གང་དུ་བསྒྲག་མི་ནུས། །གོ་བའི་ཡུལ་དེ་བདེ་བ་ཆེ། །བླ་མ་དེ་ལ་དབུལ་བར་བྱ། །བླ་མ་གཞན་ལ་དེ་བཞིན་དུ། །ཅི་དགའ་བར་ནི་ཡོན་ཡང་དབུལ། །སློབ་དཔོན་ཅུང་ཟད་ཅི་འདོད་པ། །ཡིད་ལ་བསམས་པ་དབུལ་བར་བྱ། །དམ་ཚིག་འདའ་པས་འཇིགས་པའི་ཕྱིར། །བསྒྲིམས་ཏེ་དེ་བཞིན་དབུལ་བར་བྱ། །སློབ་དཔོན་གྱི་ནི་ཡུལ་གྱི་མཆོག་།རིགས་ཀྱི་ཁྱད་པར་གྱིས་ནི་ལྔ། །བུམ་པའི་དབང་སོགས་དབྱེབ་ཡིས། །ཡང་ན་གསུམ་དུ་འགྱུར་བ་ཡིན། །རང་གི་མ་དང་སེང་གེ་གདན། །ཡོན་གྱི་མཆོག་སྟེ་སངས་རྒྱས་རིགས། །གསེར་དང་གླང་པོ་རིན་ཆེན་དང ། །སྲིང་མོ་བླ་མ་ལ་དབུལ་བ། །རྡོ་རྗེ་སེམས་དཔའི་རིགས་ཡིན་ཏེ། །ཡོན་
431a
༄#། །དེ་ཡོན་གྱི་མཆོག་ཡིན་ནོ། །ཤིང་རྟ་རྟ་ནི་ཤིན་ཏུ་བརྒྱན། །རང་གི་ཆུང་མ་དབུལ་བྱ་སྟེ། །རིན་ཆེན་སྣ་ཚོགས་རྣམ་དག་པ། །ཡོན་དེ་རིན་པོ་ཆེ་ཡི་རིགས། ། མུ་ཏིག་ཕྲེང་བ་ཤིན་ཏུ་མཛེས། །བུ་མོ་རིན་ཆེན་འདྲ་བ་ཡིས། །བརྒྱན་ཏེ་བླ་མ་ལ་དབུལ་བ། །ཡོན་དེ་པདྨའི་རིགས་ཡིན་ནོ། །རྒྱལ་པོ་དང་ནི་དབང་ཕྱུག་དང ། །ཆུང་མ་འཕྲུལ་གྱི་བཞོན་པ་སོགས། །གླང་པོ་རྟ་ནི་ཤིན་ཏུ་བརྒྱན། །དེ་བཞིན་གཤེགས་པ་ཀུན་གྱི་རྗེ། །ནན་ཏན་བླ་མ་དབུལ་བྱ་བ། །སྣ་ཚོགས་རྡོ་རྗེའི་རིགས་ཡིན་ནོ། །དེ་རྣམས་བཞི་དང་འགྱུར་བ་དང ། །མི་འགྱུར་བ་ཡི་བྱེ་བྲག་གིས། །གསུམ་དུ་ཤེས་བྱ་བླ་མ་ལ། །བློ་ལྡན་རྡོ་རྗེ་སློབ་མ་ཡིས། །ཅི་སྟེ་བདེ་བ་ཀུན་འདོད་ན། །དད་མོས་སེམས་ཀྱིས་དབུལ་བར་བྱ། །ཡིད་ལ་གང་བསམས་མ་ཕུལ་ལམ། །ཁས་བླངས་དེ་ནི་མ་ཕུལ་ན། །ཡི་དྭགས་དམྱལ་བ་རྣམ་གཉིས་སུ། །ངེས་པར་སྐྱེས་ཏེ་བརླག་པར་འགྱུར། །དེ་བས་དེ་རྣམས་རབ་ཕུལ་ནས། །གསོལ་བ་དག་ནི་རབ་ཏུ་གདབ། །རྡོ་རྗེ་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་ཞུགས་སོ། །སྦྱོར་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་ཞུགས་སོ། །སྦྱོར་བའི་དཀྱིལ་འཁོར་ཆེན་པོ་ཡི། ། དཀྱིལ་འཁོར་བདག་གིས་དེ་རིང་མཐོང ། །གསང་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་དབང་བསྐུར། །དེ་ནས་བླ་མ་དེ་ཡིས་ཀྱང ། །དེ་ལ་དབང་བསྐུར་སྦྱིན་བྱ་སྟེ། །
431b
དྲི་དང་མེ་ཏོག་ཕྲེང་བས་བརྒྱན། །བསྒྲིམས་ཏེ་ཡང་དག་བརྟག་པར་བྱ། །དང་པོ་ལ་ནི་བུམ་པའི་དབང ། །གཉིས་པ་ལ་ནི་གསང་བའི་དབང ། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་ཡི་ཡེ་ཤེས་ཏེ། །བླ་མ་ལས་ནི་ཐོབ་པའོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ཕན་ཡོན་དང་བཅས་པར་དབང་བསྐུར་བའི་ལེའུ་སྟེ་བཞི་པའོ།། །།གང་གི་ཐབས་ཀྱིས་རིགས་ལྔའི་དོན། །རང་གི་དོན་གྱུར་ཀུན་ཏུ་བཟང ། །འདི་དག་གཞན་ལ་རབ་བདེའི་ཕྱིར། །རྡོ་རྗེ་སེམས་དཔའི་སྒྲུབ་ཐབས་བཤད། །ཡིད་འོང་དབེན་པའི་ས་ཕྱོགས་སུ། །ཅི་བདེར་གནས་ལ་ནམ་མཁའ་ཀུན། ། སེམས་ཀྱིས་ཁྱབ་པར་བྱས་ནས་སུ། །རྣམ་བརྟགས་ཨེ་མའོ་འཇིག་རྟེན་ཀུན། །སྡུག་བསྔལ་ཆོས་ཀྱིས་ཀུན་ནས་གཙེས། །བྱང་ཆུབ་སེམས་ཉམས་སེམས་ཅན་རྣམས། །ཀུན་ལས་འབྱུང་ཞེས་དམ་བཅས་པའི། །སྔགས་པས་སྤྱི་བོར་བཞག་པ་ནི། །ཱཿ སེམྶ་ཀྱི་རྡུལ་ཕྲན་ཆ་དྲུག་རྣམས། །ཕྱོགས་བཅུ་དག་ཏུ་ཕྱེ་ནས་སུ། །ཆོས་ཀྱི་དོན་རྣམས་དེས་བསལ་ནས། །ཤིན་ཏུ་དྲི་མེད་སེམས་དག་པ། །འདས་དང་མ་འོངས་པ་ཡི་སེམས། །ད་ལྟར་ཡང་ནི་དམིགས་སུ་མེད། །གཉིས་མེད་དེ་ལ་གཉིས་མེད་མེད། །ནམ་མཁར་ཞེས་པའང་གནས་པ་མེད། །དེ་ལྟར་ཀུན་ཏུ་བརྟགས་ནས་སུ། འགྲོ་བ་ཐམས་ཅད་ཤིན་ཏུ་སྟོང ། །དྲི་མེད་རྣལ་འབྱོར་ཉིད་ཀྱི་ཡིན། །དངོས་པོ་མེ་པར་རང་སེམས་བསམ། །འགྲོ་བ་འདི་ནི་དེ་ལྟ་བུའི། །དངོས་པོ་གང་དག་ཡོད་མིན་ན། །སྡུག་བསྔལ་སྣ་ཚོགས་
432a
༄#། །གང་དག་ལགས། །སེམས་ཉམས་སེམས་ཅན་འབྱུང་བར་བསྒོམ། །འོན་ཀྱང་སྔོན་གྱི་སྨོན་ལམ་ཤུགས། །དབྱངས་ཡིག་སྤེལ་བའི་གླུ་ལྡན་བྱ། །རིན་ཆེན་སེམས་ནི་བླུགས་པ་ལ། །བདེ་གཤེགས་རྣམས་ཀྱིས་བསྐུལ་བར་སྣང ། །ཤཱུ་ནྱ་ཏཱ་ཏི་ཡོ་ག་པཱ་དཾ་སཝཱཧཱ། པྲ་བྷ་བཱི་ཨཱ་ཀཱ་ཤ་ཏ་མཱ་པ་ག་ཏཱ་ས་མ་ཡ། ཨུ་པ་ཏ་པ་ཡནྟི་སུ་ག་ཏ་སུ་ག་ཏེ་ག་ཏི་ཤྲཱི་བཛྲ་སཝཱཧཱ། པཱུ་པུ་སྟཱཾ་ཧཱཾ། རྣམ་རྟོག་ཀུན་སྤངས་དྲི་མེད་པའི། །རྣམ་པར་མི་རྟོག་སྒོམ་པའི་སེམས། །སྔགས་ཀྱི་དེ་ཉིད་བསྐྱོད་བྱས་ལ། །ཧཱུཾ་ཞེས་པ་ཡི་གཟུགས་སུ་བརྟག་།ཏིང་ངེ་འཛིན་གྱིས་དབང་བསྒྱུར་ན། །གང་ཕྱིར་དེ་ནི་བསྒོམས་པས་ཐོབ། །དམ་པ་ནམ་མཁའི་དབྱིངས་ལ་གནས། །བྱང་ཆུབ་སེམས་ཚོགས་དེར་བཅས་ལ། །རྣལ་འབྱོར་ཡིད་ཀྱིས་ཀུན་བསམས་ནས། །རྒྱས་པར་རྣམ་པར་བརྟག་པར་བྱ། །ཡི་གེ་བྷྲཱུཾ་གྱིས་ལྷ་ཡི་གནས། །རྡོ་རྗེ་རིན་ཆེན་གྱིས་ནི་བརྒྱན། །སྒོ་ཁྱུད་རྟ་བབས་ཀ་བ་དག་།དར་གྱི་ཕྲེང་བས་རྣམ་པར་བཀླུབས། །གྲུ་བཞི་པ་ལ་སྒོ་བཞི་པ། ། དྲིལ་བུའི་དྲ་བདག་གིས་བརྒྱན། །རྟག་པར་དོ་ཤལ་མེ་ལོང་དང ། །མེ་ཏོག་ཕྲེང་བས་རྒྱན་རྣམས་བྲེས། །དེ་ཡི་དབུས་སུ་སེངྒེའི་གདན། །སེངྒེ་བརྒྱད་ཀྱིས་རྣམ་པར་བརྒྱན། །སྨོན་ལམ་དབང་གིས་དེ་དག་ཀུན། །བྱང་ཆུབ་སེམས་དཔའ་མཐུ་བོ་ཆེ། །ཤར་ཕྱོགས་བ་གླང་ཤིན་ཏུ་རྒྱས། །ལྷོ་ཕྱོགས་རྟ་ཡི་གདན་བཟང་སྟེ། །ནུབ་ཕྱོགས་སུ་ནི་རྨ་བྱ་བཤད། །དེ་བཞིན་བྱང་ཕྱོགས་ནམ་
432b
མཁའ་ལྡིང ། །མི་བསྐྱོད་ཁྲོ་བོ་བསམ་པ་ནི། །མཐིང་ག་དཀར་པོ་དམར་པོའི་ཞལ། །རྡོ་རྗེ་ཕྱག་རྒྱ་ཐུགས་ཀ་ན། །མཐིང་ག་ཁ་དོག་གསལ་ལ་བཟང ། །གཡས་ན་རིན་ཆེན་འཁོར་ལོ་སྟེ། །རལ་གྲི་པདྨ་གཡོན་པ་ན། །འཇིག་རྟེན་ཁམས་ནི་ཀུན་འཁྲུག་པའོ། །བརྟུལ་ཞུགས་ཅན་གྱིས་ཞལ་གསུམ་བསམ། །དང་པོ་ཡི་ནི་སྟོང་པ་ཉིད། །གཉིས་པ་དེ་བཞིན་མཚན་མ་མེད། །གསུམ་པ་སྨོན་པ་མེད་པ་ཡི། །ཞལ་དུ་མཁས་པས་རིག་པར་བྱ། །ཕྱག་དྲུག་རྟག་ཏུ་འབར་བར་བསྒོམ། །མཚོན་ཆ་སྣ་ཚོགས་རྣམས་དང་ལྡན། །པདྨ་ལ་ནི་མཉམ་གཞག་ནས། །ཡེ་ཤེས་ཕྱག་རྒྱ་སྙིང་ག་ནང ། ། དབུས་ཀྱི་གནས་སུ་བསམ་པ་ནི། །རྡོ་རྗེ་སྐྱིལ་མོ་ཀྲུང་དུ་གནས། །ཤར་གྱི་གནས་སུ་བསམ་པ་ནི། །སྔགས་པ་རྣམ་སྣང་ཐུབ་པ་སྟེ། །དཀར་དང་མཐིང་ག་དམར་བའི་ཞལ། །འཁོར་ལོ་ཕྱག་རྒྱ་སྙིང་ག་ན། །རྡོ་རྗེ་འབར་སོགས་འོད་གསལ་བ། །རིན་ཆེན་རྡོ་རྗེ་གཡས་པ་ན། །རལ་གྲི་པདྨ་གཡོན་པ་ན། །རྣལ་འབྱོར་ཅན་གྱིས་རྟག་པར་བསམ། །ཐོར་ཚུགས་དབུ་རྒྱན་དག་གིས་བརྒྱན། ། རིན་ཆེན་མགོན་པོ་ལྷོ་ཕྱོགས་ན། །སེར་དང་མཐིང་ག་དཀར་བའི་ཞལ། །རིན་ཆེན་ཕྱག་རྒྱ་སྙིང་གནས། །མ་རྒད་ལྟ་བུར་སྣང་བའོ། །གཡས་ན་འཁོར་ལོ་རལ་གྲི་སྟེ། །རྡོ་རྗེ་པདྨ་གཡོན་ནའོ། ། རྟག་པར་རྣལ་འབྱོར་པས་བསམ་པ། །རིན་ཆེན་ཆར་དུ་འབེབས་པའོ། །ནུབ་ཕྱོགས་གནས་སུ་དགོད་བྱ་བ། །སྣང་བ་མཐའ་ཡས་བསམ་པ་ནི། །དམར་དང་མཐིང་ག་དཀར་བའི་ཞལ། །པདྨ་
433a
༄#། །རཱ་གའི་མདོག་ལྟ་བུ། །པདྨའི་ཕྱག་རྒྱ་སྙིང་ག་ན། །རྡོ་རྗེ་རིན་ཆེན་གཡས་པ་ན། །འཁོར་ལོ་རལ་གྲི་གཡོན་པ་ན། །པདྨ་ལ་ནི་མཉམ་གཞག་བསམ། །བྱང་ཕྱོགས་གནས་སུ་དོན་གྲུབ་ནི། །ལྗང་གུ་མཐིང་ག་དཀར་བའི་ཞལ། །རལ་གྲི་ཕྱག་རྒྱ་སྙིང་ག་ན། །འབར་བའི་ཕྲེང་བས་མཉམ་པའི་འོ། །པདྨ་རྡོ་རྗེ་གཡས་པ་ན། །འཁོར་ལོ་རིན་ཆེན་གཡོན་པ་ན། །ཟླ་བའི་དཀྱིལ་འཁོར་དབུས་གནས་པ། །བྱང་གི་གནས་སུ་བསམ་པར་བྱ། །སྔགས་པས་ཕྱག་དྲུག་བསམ་པ་ནི། །སྤྱན་དེ་ཞལ་གསུམ་དཀར་མོ་ཡི། །རྣམ་པར་སྣང་མཛད་ཕྱག་རྒྱ་བཞིན། །དེ་ཡི་དོན་དུ་རྣམ་པར་བསྒོམ། །མཱ་མ་ཀཱི་ཡང་བསམ་པ་ནི། །ུཏྤལ་དང་ནི་མཐིང་འདྲ་བ། །ཞལ་གསུམ་ཕྱག་དྲུག་ཆགས་པ་སྟེ། །མི་བསྐྱོད་ཕྱག་རྒྱ་མཆོག་འཛིན་པའོ།། ཆགས་པས་ཆགས་བ་རིགས་ཀྱི་སྔགས། །ཞལ་གསུམ་ཕྱག་དྲུག་དགེ་བ་སྟེ། །སྦྱོར་བའི་ས་ནི་དཀར་མོ་བསམ། །པདྨ་རཱ་གའི་ཕྱག་རྒྱའོ། །སྒྲོལ་མ་ཁ་དོག་སེར་མོ་སྟེ། །འཁྲིལ་བག་རྒྱན་གྱིས་རབ་ཏུ་བརྒྱན། །ཞལ་གསུམ་ཕྱག་དྲུག་རབ་ཏུ་བསམ། །ཐོགས་མེད་རྒྱལ་པོའི་ཕྱག་རྒྱའོ། །སྒོ་བཞི་སྒོ་སྲུང་དགོད་བྱ་བ། །སྒོ་རྣམས་སུ་ནི་ཁྲོ་བོ་བསམ། །ཁྲོ་བོ་ཆེན་པོ་གཤིན་རྗེའི་གཤེད། །གཞན་གྱིས་མི་ཐུབ་དེ་བཞིན་ཏེ། །ཐུབ་པར་དཀའ་བ་རྟ་མགྲིན་དང ། །ཁྲོ་བོ་བ་དུད་རྩི་འཁྱིལ་བ་བསམ། །དེ་དག་ཀུན་ཀྱང་ཞལ་གསུམ་པ། །དྲག་ཅིང་དྲག་པོར་གནོན་
433b
བའོ། །མཐིང་གསེར་པོ་དེ་བཞིན་དམར། །ལྗང་གུ་དག་ནི་ཁ་དོག་ཏུ་འོ། །མཚོན་ཆ་སྣ་ཚོགས་འཛིན་པ་སྟེ། །ཐོད་པའི་ཕྲེང་ཐོགས་དེ་བཞིན་ནོ། །གདོན་རྣམས་ཐམས་ཅད་སྐྲག་བྱེད་པ། །གནོད་སྦྱིན་སྲིན་པོ་ཕྲ་མེན་མ། །མ་ཧེ་སེངྒེ་སྟག་རྣམས་དང ། །བ་ལང་ཞོན་པ་རྣམས་བཞིའོ། །རྣམ་པར་འགྱུར་བའི་ཁྲོ་གཉེར་ཅན། །ཁྲོ་བོ་སྦྱན་ནི་ཀུན་ནས་བསྡུས། །སྔགས་འདི་རྣམས་ཀྱིས་བསམ་པ་ནི། །གཤིན་རྗེའི་གཤེད་ལ་སོགས་པའོ། །སྔགས་ཀྱི་དེ་ཉིད་རྗེས་མཐུན་པར། །སྔགས་པའི་དཀྱིལ་འཁོར་བསྒྲུབས་ནས་སུ། །ས་ཡི་སྙིང་པོ་ལ་སོགས་པ། །སེམས་དཔའ་རྣམས་ནི་དེར་གནས་བསམ། །ལུས་དང་ངག་དང་སེམས་དེ་ཉིད། །ཧཱུཾ་ཞེས་བྱ་བའི་ཡི་གེ་མཆོག་།སེམས་ནི་དེ་རུ་ཞུགས་པར་བསམ། །མི་བསྐྱོད་པ་ནི་བདག་ཉིད་ཆེ། །དབང་པོའི་ལམ་དུ་གྱུར་ནས་སུ། །དང་བའི་དཀྱིལ་འཁོར་གྱིས་ནི་བརྒྱན། །བདག་ཉིད་གཅིག་ཅིང་གཅིག་འགྱུར་བ། །སྐད་ཅིག་གིས་ནི་བརྟག་པར་བྱ། །ཁྱོད་ནི་རྡོ་རྗེ་སེམས་ཞེས་བྱ། །དེ་ལ་སོགས་པས་བསྟོད་པར་བྱེད། །དེ་ནས་རྣམ་སྣང་མཛད་ལ་སོགས། །རང་གི་སྙིང་གར་རབ་ཏུ་གཟུང ། །གཟུགས་རྣམས་ཀྱི་ནི་རང་བཞིན་དུ། །རྣམ་པར་སྣང་མཛད་ཐུབ་པ་བཞུགས། །ཚོར་བ་རིན་ཆེན་མགོན་པོ་ཡིན། །མཐའ་ཡས་འོད་ནི་འདུ་ཤེས་སུའོ། །འདུ་བྱེད་ཀུན་ཏུ་གདོན་མ་ཟ། །མི་བསྐྱོད་པ་ནི་ཕུང་པོ་ལྔར། །དེ་བཞིན་གཤེགས་པ་ལྔ་རྣམས་ནི། །སྔགས་འདི་རྣམས་ཀྱིས་བཞུགས་པར་
434a
༄#། །བསམ། །ས་ཡི་ཁམས་གྱི་རང་བཞིན་དུ། །དེ་ནས་སྤྱན་ནི་གཞུག་བྱ་སྟེ། །རྣལ་འབྱོར་ཡིད་ཀྱིས་བསམ་པ་ནི། །དེ་ཡང་སྤྲོ་བར་གནས་བར་བསམ། །མཱ་མ་ཀཱི་ཡང་ཆུ་ཡི་ཁམས། །བརླན་ཞིང་ཁྲག་ནི་རྒྱུ་བའི་ཕྱིར། །རྣལ་འབྱོར་པས་ནི་ཡིད་ཀྱིས་བསམ། །དེ་ཡི་ལུས་ནི་རྒྱས་པར་འགྱུར། །མེ་ཡི་ཁམས་ཀྱི་རང་བཞིན་དུ། །གོས་དཀར་མོ་ཡང་གཞུག་པར་བྱ། །ཀུན་ཏུ་ཁྱབ་པར་བཞུགས་པ་ཡི། །འོད་རྣམས་སུ་ནི་དེར་འགྱུར་རོ། །སྒྲོལ་མ་རླུང་གི་རང་བཞིན་དུ། །བཞུགས་པར་དེ་ནི་བསམ་པར་བྱ། །རླུང་གི་རྣམ་པ་ལྔ་རུ་འགྱུར། །དེ་བཞིན་ཡིད་མགྱོགས་རྫུ་འཕྲུལ་འགྲུབ། །རྡོ་རྗེ་དབྱིངས་ཀྱི་དབང་ཕྱུག་མ། །ནམ་མཁའི་རང་བཞིན་དག་ཏུ་འཇུག་།དེ་ལུས་ཁོང་སྟོང་ཉིད་ལ་ནི། །རང་སེམས་ཡོན་ཏན་བསྒོམ་པའི་སེམས། །ནམ་མཁའི་དབྱིངས་ཀྱི་རྣལ་འབྱོར་གྱིས། །སངས་རྒྱས་སྒྱུ་མའི་སྦྱོར་བས་སུ། །དག་པའི་བདང་ཉིད་ཅི་འདོད་པར། །དེ་ནས་རི་རབ་ཕུལ་ནས་འགྲོ། །ས་ཡི་སྙིང་པོ་བདག་ཉིད་ཆེ། །སངས་རྒྱས་སྤྱན་ནི་བདག་ཉིད་དེ། །མིག་གི་ཕྱོགས་སུ་ཞུགས་ནས་ནི། །འཕྲུལ་གྱི་མིག་ཏུ་རྟ་ཏུ་འགྱུར། །ཕྱག་ན་རྡོ་རྗེ་བདག་ཉིད་ཆེ། །རྣ་བའི་རྣམ་ཤེས་སྦྱོར་བས་ན། །སྒྲ་རྣམས་ཐམས་ཅད་ཤེས་པ་དེ། །རྣ་བའི་རྣམ་ཤེས་དེ་བཞིན་འགྱུར། །ནམ་མཁའི་སྙིང་པོ་བདག་ཉིད་ཆེ། །སྣ་ཡི་རྣམ་ཤེས་སྦྱོར་བས་ན། །
434b
སངས་རྒྱས་ཤངས་ནི་བདག་ཉིད་ཤེས། །དེ་ཡང་དེ་ཡི་ངོ་བོར་འགྱུར། །འཇིག་རྟེན་དབང་པོར་རབ་ཆགས་པ། །རྡོ་རྗེ་ལྕེ་ཡི་སྦྱོར་བས་སུ། །རོ་ཡི་དངོས་པོ་མྱོང་བ་དེས། །སྐད་ཅིག་གཅིག་ལ་དེ་རུ་འགྱུར། །བློ་ལྡན་སྒྲིབ་པ་ཐམས་ཅད་ནི། །རྣམ་པར་སེལ་བའི་མིང་དང་ལྡན། །ཉོན་མོངས་ཐམས་ཅད་རྣམ་པར་སེལ། །ཉེ་བའི་ཉོན་མོངས་པ་ཡང་འཇིག་།མེ་ལོང་གི་ནི་རྣམ་པ་ལྟར། །རྟེན་པའི་ཚུལ་གྱིས་འབྱུང་བ་ནི། །གཟུགས་བརྙན་གྱི་ནི་སྦྱོར་བས་སུ། །སྐད་ཅིག་གིས་ནི་དེ་རུ་འགྱུར། །བཅོམ་ལྡན་རྡོ་རྗེ་སེམས་དཔའ་ལ། །རྣམ་པ་བཅུ་དང་དྲུག་ཏུ་ཡང ། །སྦྱོར་བ་དེ་ནི་བྱིན་རླབས་གནས། །སྔགས་པས་དེ་ནི་སེམས་ལ་གཞུག་།ཁྲོ་བོ་ལྕགས་ཀྱུ་དཔུང་པ་ཡིས། །ཞགས་པ་ལྟ་བུ་གཉིས་པའོ། །ལུ་གུ་རྒྱུད་ཀྱི་ཁ་སྤྲད་གསུམ། །རྒྱལ་མཚན་གཞུག་པར་ཁྱབ་པར་བཞུག་།དེ་ལྟར་དོན་རྣམས་རབ་ཏུ་ཞུགས། །སངས་རྒྱས་ཀུན་གྱི་ངོ་བོར་བདག་།རྡོ་རྗེ་ཕྱག་རྒྱ་དང་ལྡན་པ། །གཡོན་པ་དྲིལ་བསྣམས་སྟ་ཟུར་བརྟེན། །རྡོ་རྗེ་སེམས་དཔའ་དེ་གནས་འགྱུར། །རྣལ་འབྱོར་ཆེན་པོ་དཀར་བའི་གཟུགས། །དཀར་དང་མཐིང་ག་དམར་པོའི་དབུ། །སྟོང་ཉིད་ལ་སོགས་བདག་སྦྱོར་བ། །རྡོ་རྗེ་སེམས་དཔའ་ཞེས་སུ་སྨྲ། །རྡོ་རྗེ་ཕྱག་རྒྱ་རྗེས་སུ་ཆགས་པ་ལ། །ོཾ་སརྦ་ཏ་ཐཱ་ག་ཏཱ་ཨ་ནུ་རཱ་ག་ཎ་བཛྲ་སཝ་བྷཱ་ཝ་ཨཱཏྨ་ཀོ་ཉ་ཧཾ། །སངས་རྒྱས་མཆོད་པ་ལ། ཨོཾ་སརྦ་ཏ་ཐཱ་ག་ཏ་བཱུ་ཛ་བཛྲ་སཝ་བྷཱ་ཝ་ཨཱཏྨ་ཀོཉ་ཧཾ། རང་གི་དཀྱིལ་འཁོར་
435a
༄#། །སྔ་མ་བཞིན། །མདུན་དུ་བསམས་ནས་ནམ་མཁའ་ལ། །ཁྱབ་པའི་སྦྱོར་བས་གཅིག་བྱས་ཏེ། །དཀྱིལ་འཁོར་སྔ་མ་བཞིན་བསམས་བཟླས། །བཅོམ་ལྡན་མི་མཉམ་གཞུག་བཅེང་བཞུགས། །རྡོ་རྗེ་ཕྱག་རྒྱ་ཐུགས་ཀར་བསྣམས། །གཡས་པར་འཁོར་ལོ་རིན་པོ་ཆེ། །པདྨ་རལ་གྲི་གཡོན་པའོ། །དེ་ཉིད་གསུམ་གྱི་ཚུལ་གྱིས་ནི། །ཅི་ཙམ་ནུས་པར་བཟླས་པར་བྱ། །སྤྲོན་ཡིད་ཀྱིས་དྲངས་ནས་ནི། །དེ་དག་ཐམས་ཅད་སྙིང་གར་གཞུག་།མཉམ་པ་ཉིད་ཀྱི་གནས་འདུག་ན། །ལུས་ཀྱིས་ཇི་ཙམ་བསྐྱོད་པ་དང ། །ཚིག་ཏུ་རབ་ཏུ་འགྲོ་བའི་རྣམས། །དེ་དག་སྔགས་དང་ཕྱག་རྒྱར་འགྱུར། །རྟག་ཏུ་བསྒོམ་པའི་སྦྱོར་བས་ནི། །དེ་ལ་སེམས་དཔའི་གཞན་མ་ཡིན། །རྣལ་འབྱོར་ངོ་བོ་གཟུགས་ཅན་ལ། ། ལྷ་མོ་རྣམས་ཀྱང་དེ་ལ་འཛིན། །དབང་པོ་ལམ་དུ་གང་གྱུར་པ། །དེ་དང་དེ་ཡི་ངོ་བོ་དག་།ཤིན་ཏུ་མཉམ་གཞག་སྦྱོར་བས་སུ། །བདག་ཉིད་ལྷག་པའི་ལྷར་བྱའོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ལྷའི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་སྐུ་དང་གསུང་དང་ཐུགས་རྡོ་རྗེའི་དེ་བཞིན་གཤེགས་པ་ལ་དེ་བཞིན་གཤེགས་པ་ཐམས་ཅད་དང ། །བྱང་ཆུབ་སེམས་དཔའ་ཐམས་ཅད་ཀྱིས་ཚིག་མཐུན་བར་སྒྲ་དབྱངས་གཅིག་གིས་གསོལ་བ་བཏབ་པ། བཅོམ་ལྡན་དེ་བཞིན་གཤེགས་
435b
ཀུན་གྱི། །ཡེ་ཤེས་གཅེས་པ་དྲི་མེད་པ། །བྱང་ཆུབ་སེམས་ནི་རིན་པོ་ཆེ། །བླ་ན་མེད་པ་བཤད་དུ་གསོལ། །དེ་ནས་བཅོམ་ལྡན་འདས་ལ་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པར་ཐུགས་སུ་ཆུད་ནས། བྱང་ཆུབ་སེམས་དཔའ་རྣམས་ལ་འདི་སྐད་ཅེས་བཀའ་སྩལ་ཏོ། །སེམས་ནི་ལུས་ཀྱི་རྣམ་པ་ཡིན་ལ། །ལུས་ཀྱང་སེམས་ཀྱི་རྣམ་པ་ཡིན་ཞིང་སེམས་ཀྱང་ཚིག་གིས་རབ་ཏུ་བརྗོད་པ་ཡིན་ནོ། །དེ་ནས་བྱང་ཆུབ་སེམས་དཔའ་དེ་དག་གིས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་སྦྱོར་བ་ཐོབ་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཀྱེ་མ་ཀུན་ཏུ་བཟང་པོ་འདི། །སྐུ་གསུང་ཐུགས་ཀྱི་རྡོ་རྗེ་ཅན། །ཆོས་རྣམས་སྐྱེ་བ་མེད་པ་སྟེ། །གཡོ་བ་མེད་ཅིང་གནས་པ་མེད། །རྟོག་པའི་དྲི་མ་སྤངས་པ་ཡིན། །བསྐྱེད་པར་བྱ་ཞེས་རབ་ཏུ་གསུངས། །དེ་ནས་བཅོམ་ལྡན་འདས་མི་འཁྲུགས་པ་དེ་བཞིན་གཤེགས་པ་གསུང་སྤྲོས་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་མ་སྐྱེས་ཏེ། །ཆོས་ཅན་མེད་ཅིང་ཆོས་ཉིད་མེད། །ནམ་མཁའ་བཞིན་དུ་དམིགས་མེད་པའི། །བྱང་ཆུབ་སེམས་ནི་བརྟན་པ་ཡིན། །བཅོམ་ལྡན་འདས་དེ་བཞིན་གཤེགས་པ་རྡོ་རྗེ་མི་འཁྲུགས་པས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རིན་ཆེན་འབྱུང་གནས་ཀྱི་ས་དེ་བཞིན་གཤེགས་པ་ཐམས་ཅད་དམིགས་སུ་མེད་པ་
436a
༄#། །ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་དངོས་མེད་དེ། །ཆོས་ཀྱི་མཚན་ཉིད་སྤངས་པ་ཡིན། །བདག་མེད་ཆོས་ལས་ལེགས་བྱུང་བའི། །བྱང་ཆུབ་སེམས་ནི་བརྟན་པ་ཡིན། །ཞེས་བཅོམ་ལྡན་འདས་རིན་ཆེན་ཏོག་གིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་ཀྱིས་རྡོ་རྗེ་མེ་ལྕེ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་སྐྱེ་བ་མེད་པ་སྟེ། །དངོས་པོ་ངོ་བོ་ཡོད་མིན་པས། །ནམ་མཁའི་གོ་འཕང་འཐོབ་བོ་ཞེས། །དངོས་རྣམས་རབ་ཏུ་བརྗོད་པ་ཡིན། །ཞེས་བཅོམ་ལྡན་འདས་འོད་དཔག་མེད་ཀྱིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དོན་ཡོད་གྲུབ་ཀྱིས་དེ་བཞིན་གཤེགས་པ་ཐམས་ཅད་ཀྱི་བླ་མའི་ཡང་བླ་མའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། ། ཆོས་རྣམས་རང་བཞིན་འོད་གསལ་བ། །གཟོད་ནས་དག་ཅིང་རྙོག་པ་མེད། །སེམས་ཅན་མེད་ཅིང་སྲོག་ཀྱང་མེད། །སངས་རྒྱས་ཉིད་དང་བྱང་ཆུབ་མེད། །རྨི་ལམ་སྒྱུ་མ་ལྟར་སྣང་བའི། །བྱང་ཆུབ་སེམས་ནི་བརྟན་པ་ཡིན། །ཞེས་བཅོམ་ལྡན་འདས་དོན་ཡོད་གྲུབ་ཀྱིས་གསུངས་སོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་དེ་བཞིན་
436b
གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་པའི་བྱང་ཆུབ་ཀྱི་སེམས་རྣམ་པར་དག་པ་ཐོབ་ནས་ངོ་མཚར་སྐྱེས་པར་གྱུར་ཏེ་ཆེད་དུ་བརྗོད་བ་འདི་ཆེད་དུ་བརྗོད་དོ། །ཀྱེ་མའོ་སངས་རྒྱས་ཀྱེ་མའོ་དགེ་།ཀྱེ་མའོ་ཆོས་ནི་བསྟན་པ་རྣམ། །བདག་མེད་ཆོས་ལས་ལེགས་བྱུང་བ། །བྱང་ཆུབ་སེམས་ཁྱོད་ཕྱག་འཚལ་ལོ། །བྱང་ཆུབ་སེམས་ཀྱི་བསྒོམ་པ་ཡི། ། མི་གཡོ་ཡི་གེ་ལས་བྱུང་ཞིང ། །རྨི་ལམ་ལ་སོགས་མ་སྐྱེས་པ། །བྱང་ཆུབ་སེམས་ཁྱོད་ཕྱག་འཚལ་ལོ། །གནས་དང་བསྟན་ནི་རྣམ་བསམས་ཏེ། །སེམས་དཔའི་སྐྱིལ་མོ་ཀྲུང་བཅས་ནས། །དང་པོར་རང་བཞིན་དག་གོ་ཞེས། །དག་པའི་ཆོས་ཀྱི་ཚུལ་ལ་གནས། །ཡིད་ཀྱིས་ཧཱུཾ་བྱས་རྡོ་རྗེ་ཅན། །རྡོ་རྗེ་སེམས་མས་བྱིན་གྱིས་བརླབ། །རིན་ཆེན་ལུས་སུ་ང་རྒྱལ་བྱ། །ལག་པ་བསྟོད་དེ་བསྐོར་བ་ན། །ལྕགས་ཀྱུ་ཡིས་ནི་སྤྱན་ཡང་དྲང ། །བྱོན་ནས་དྲང་པོར་ཕྱོགས་བཅིང་སྟེ། །དམ་ཚིག་མཆོག་ཀྱང་དབུལ་བར་བྱ། །གདན་རྣམས་སོ་སོར་ཕུལ་ནས་སུ། །མཆོད་ཡོན་འབུལ་བའི་སྦྱོར་བ་བྱ། །དབང་བསྐུར་མཚོན་ཆ་གོ་ཆ་སོགས། །སིལ་སྙན་མཆོད་སོགས་ངོ་བོ་བྱ། །རྣམ་པ་ཀུན་གྱིས་མཉེས་བྱ་བ། །རྣལ་འབྱོར་བདག་ཉིད་ཅན་གྱི་བདག་།རྣལ་འབྱོར་རྣམ་གསུམ་ཤེས་བྱ་སྟེ། །བྱིན་གྱིས་བརླབས་དང་ཡོངས་བརྟགས་དང ། །གཟུགས་ཉིད་ཡོངས་སུ་རྫོགས་པ་དག་།རྣལ་འབྱོར་ཡིན་ཞེས་སངས་རྒྱས་གསུངས། །སྔགས་ཀྱི་བྱིན་རླབས་ང་རྒྱལ་
437a
༄#། །བསྐྱེད། །རྣལ་འབྱོར་བྱིན་རླབས་ཡིན་པར་གསུངས། །བྱང་ཆུབ་སེམས་ནི་དག་པ་དང ། །གསང་སྔགས་ས་བོན་སྐྱེ་བ་ཆེ། །ཕྱག་རྒྱ་ཚོགས་སུ་བརྟག་པ་ཡི། ། རིམ་གྱིས་གཟུགས་ཀྱིས་རྫོགས་བྱ་བ། །དེ་ནི་བརྟགས་པས་བརྗོད་པ་སྟེ། །རྣལ་འབྱོར་ཆོག་ཡིན་པར་གསུངས། །བསྡུ་དང་སྤྲོ་བར་བྱ་བ་ལས། །རྣམ་པའི་མཆོག་ཀུན་ལྡན་པ་དང ། ། སྐད་ཅིག་ཡེ་ཤེས་ཀྱིས་རྫོགས་པ། །རྫོགས་པའི་རྣལ་འབྱོར་ཞེས་བརྗོད་དོ། །དང་པོར་དམ་ཚིག་བྱིན་བརླབས་པར། །རྣལ་འབྱོར་རིག་པ་དག་གིས་བརྟན། །རབ་ཏུ་རྫོགས་པར་བྱ་བདག་།འདི་ནི་རྣལ་འབྱོར་ཆོ་གར་བཤད། །ཉོན་མོང་ས་དྲི་མར་བཅས་པའི་སེམས། །བྱང་ཆུབ་སེམས་ཀྱིས་དག་བྱ་སྟེ། །དེ་ནི་རང་བཞིན་དག་པའོ་ཞེས། །བརྗོད་ཅིང་ཐལ་མོ་གསུམ་གྱིས་སྦྱར། །དག་གྱུར་དེ་ནས་བློ་ཡིས་ནི། །སེམས་ལ་སོ་སོར་བརྟག་པར་བྱ། །སེམས་ལ་སོ་སོར་བརྟགས་ནས་ཀྱང ། །ཕྱི་རོལ་རང་བཞིན་སྟོང་བར་བྱ། །སེམས་ཙམ་ལ་ནི་གནས་ནས་སུ། །བྱང་ཆུབ་ཚོགས་ཀྱི་བག་ཆགས་དེས། །བསྒོམ་པར་བྱ་བའི་ངོ་བོ་དག་།ཟླ་བའི་གཟུགས་སུ་རྣམ་པར་བརྟག་།དག་པའི་པདྨ་ལ་གནས་པ། །ོཾ་གྱི་མྱུ་གུས་བསྐྲུན་པ་ཡི། །ཡན་ལག་ཀུན་གྱི་མཚན་ཉིད་གཟུགས། །རྡོ་རྗེ་སྐུ་ནི་བསྒོམས་པར་བྱ། །ཱཿ ཞེས་བྱ་བའི་སྤྲོས་མེད་གསུང ། །སེམས་ནི་ཧཱུཾ་ཞེས་བྱ་བར་སྤྲུལ། །ཡི་གེ་གསུམ་
437b
གྱིས་བྱིན་བརླབས་ལུས། །སྙིང་ལ་གནས་པ་ཟླ་བའི་གཟུགས། །དེ་ལ་རང་གི་ཡི་གེ་ནི། །མདོག་གཟུགས་འོང་མི་བྱེད་བསམས་ཏེ། །ང་རྒྱལ་བསྐྱེད་ནས་དེ་ལ་ནི། །རྡོ་རྗེའི་བདག་ཉིད་བདག་ཉིད་བརྗོད། ། རྒྱན་ཀུན་ཡོངས་སུ་རྫོགས་པ་དང ། །འོད་གྱི་དཀྱིལ་འཁོར་གྱིས་བརྒྱན་པ། །ཆ་ཤས་ཀྱི་ནི་དྲ་བ་ཅན། །ཡེ་ཤེས་སེམས་དཔའ་རྫོགས་པར་བརྟག་།དེ་འོག་ལག་པའི་ཕྱག་རྒྱ་ཡི། །གོ་ཆ་མཚོན་ཆ་ལ་སོགས་བྱ། །རྫོགས་སངས་རྒྱས་ལྔ་དབང་བསྐུར་ཏེ། །ཅོད་པན་ཕྲེང་བ་རྣམས་ཀྱིས་བཀླུབས། །ད་ནས་དེ་འོག་སངས་རྒྱས་ཀྱི། །སྤྲུལ་པ་མཛད་པའི་སྒྱུ་མ་འཕྲོ། །ཡན་ལག་བཞི་པ་དཔུང་ལྡན་པའི། །ཕྱོགས་བཅུར་ཁྲོ་བོ་བཅུ་དག་དན། །བསྙེམས་མ་དང་ནི་ཏོག་ལྡན་མ། །མཚོན་ཆ་མ་དང་རྩེད་མོ་ཅན། །སྒྱུ་མའི་ཆ་བྱད་རྣམ་པའོ། །རྣམ་པར་འཕྲུལ་པ་བྱིན་གྱིས་བརླབ། །ཀུན་ལ་ཁྱབ་པར་བྱེད་པ་ཡི། །སྣ་ཚོགས་དབུས་སུ་བཞག་ནས་ནི། །དེ་ཉིད་ཆེན་པོ་བདག་ཉིད་ལྔས། །ཕྱོགས་བཞི་འཁོར་ལ་ཁྱབ་བྱ་སྟེ། །དགའ་བས་དགའ་བྱེད་བཞི་ཡང་སྤྲོ། །ཏིང་འཛིན་ཀུན་གྱི་དགའ་བ་ལ། །འོས་པར་བྱེད་པའི་སྔགས་པ་ཡི། །འཁོར་ལོ་དང་ནི་རྡོ་རྗེའི་གཟུགས། །པདྨའི་གཟུགས་ལ་དེ་དག་ནི། །འཁོར་ལོ་ཀུན་ལ་པདྨ་ཡི། །ངོ་བོ་ཡིས་ནི་རོལ་པ་དང ། །ེ་ཞེས་བྱ་བ་འཕྲོ་བ་ལས། །མདོག་ལྡན་བདག་ཉིད་གཟུགས་སུ་བྱ། །མཛེས་པའི་རྒྱན་རྣམས་ཀུན་ལྡན་པའི། །ཉིད་ཀྱི་གདན་ལ་བཞུགས་
438a
༄#། །པར་བལྟ། །སྒེག་དང་གླུ་དང་གར་རྣམས་དང ། །རྒྱལ་མཚན་ལ་སོགས་ཚོན་དགྱེ་དང ། །སིལ་སྙན་མཆོད་པའི་རྣམ་པ་ནི། །སྣ་ཚོགས་རྣམས་ཀྱིས་མཆོད་པ་བྱ། །རྣམ་པ་ཀུན་དང་ལྡན་པར་ནི། །བདག་ཉིད་ཀྱི་ནི་ལུས་བསྒོམས་ནས། །མྱུར་ཆེས་བྱ་བ་ཕུལ་བ་དང ། །མི་གསལ་གུག་སྐྱེད་ཉམས་པ་དང ། །རྟོག་པ་ངན་པ་རྣམ་པར་སྤངས། །དེ་ནས་གསང་སྔགས་བཟླས་བརྗོད་བྱ། །བཟླས་པས་སྐྱོ་ན་ལག་གཡས་ཀྱིས། །བསྒྲིམས་ནས་རྡོ་རྗེ་གསོར་ནས་སུ། །གཡོན་པས་དྲིལ་བུ་ལ་གསིལ་ཞིང ། །རྡོ་རྗེ་གླུ་ཚུལ་སྣ་ཚོགས་དང ། ། བ་དན་ཚུལ་དུ་བྱས་པས་མཆོད། །བཟླས་པ་ཡིས་ནི་འཇུག་བརྟུལ་ནས། །གཤེགས་སུ་གསོལ་དང་རང་ཉིད་འགྲུབ། །ལུས་དང་ངག་དང་སེམས་བསྒོམས་ཏེ། །བརྟན་པོར་ཅི་བདེར་འགྲོ་བར་བྱ། །བར་ཆད་དུ་ནི་གྱུར་ན་ཡང ། །ཡི་གེ་བརྒྱ་པས་བྱིན་གྱིས་བརླབ། །དེ་ལྟར་བསྒོམས་པས་སྒོམ་བྱེད་པ། །རྡོ་རྗེ་ཐེག་པས་རབ་རྫོགས་པའི། །བྱང་ཆུབ་དེ་ནི་མྱུར་ཐོབ་ནས། ། ཟླ་ཉི་དཀྱིལ་འཁྲོ་ལྟ་བུར་སྣང ། །སྣ་ཚོགས་ལས་ཀྱི་ཐོག་འདྲེན་ཅིང ། །རིན་ཆེན་རྒྱལ་མཚན་རབ་དགའ་བྱེད། །རྒྱལ་བྱེད་པདྨའི་གདུང་བརྒྱུད་ཅན། །གནས་ཆེན་འཇིག་རྟེན་དབང་ཕྱུག་འགྱུར། །དཔལ་ལྡན་རིག་སྔགས་ཀུན་གྱི་གཙོ། །དགའ་ཆེན་འདོད་དགུར་ལྕགས་ཀྱུར་འགྱུར། །སྒྱུ་མ་བཞིན་དུ་ཀུན་ཤེས་ཤིང ། །དྲེགས་པ་འཇོམས་བྱེད་ཁྲོ་བར་འགྱུར། །
438b
དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་བྱང་ཆུབ་ཀྱི་སེམས་བསྒོམས་པའི་ཡེ་ཤེས་བསྒྲུབ་པའི་ལེའུ་སྟེ་དྲུག་པའོ།། །།སྦྱིན་སྲེག་དེ་ཉིད་ལ་གནས་པའི། །མེ་ནི་ལྷ་ཡི་ཞལ་ཡིན་པས། །སྣ་ཚོགས་ལས་རྣམས་གྲུབ་བྱེད་པའི། །སྦྱིན་སྲེག་ལས་ནི་རབ་ཏུ་བཤད། །སྦྱིན་སྲེག་གིས་ནི་ལྷ་རྣམས་ཚིམ། །ཚིམ་པར་གྱུར་ནས་དངོས་གྲུབ་སྟེར། །གསང་སྔགས་ལྷག་ཆད་གང་ཡིན་པ། །ཐམས་ཅད་སྦྱིན་སྲེག་དག་གིས་བསྐོངས། །དེ་ཕྱིར་སྐུ་གསུམ་ཆོས་མཆོག་གིས། །སྦྱིན་སྲེག་རབ་ཏུ་བསྔགས་པར་མཛད། །གཙུབ་ཤིང་ལས་ནི་བྱུང་བའི་མེ། །དགེ་བ་ཡི་ནི་ལས་རྣམས་བྱེད། །གདོལ་པའམ་དུར་ཁྲོད་བྱུང་བ་ཡི། །མེ་ནི་ལས་རྣམས་རབ་ཏུ་བསྒྲུབ། །ཐབ་ཁུང་ཟླུམ་པོ་གྲུ་བཞི་དང ། །ཟླ་གམ་དང་ནི་ཟུར་གསུམ་དང ། །དཀྱིལ་འཁོར་གྱི་ནི་ཁ་ཁྱེར་ལ། །རྡོ་རྗེ་མཚན་མ་དག་གིས་བརྒྱན། །སྦྱིན་སྲེག་དེ་ཉིད་ཚུལ་རིག་པས། །ཐབ་ཁུང་རྣམས་ཀྱི་དབུས་སུ་ནི། །པདྨའི་སྟེང་གནས་གཙུག་ཏོར་དང ། །རྡོ་རྗེ་རིན་ཆེན་པདྨ་བཞག་།ཇི་ལྟར་དམིགས་པས་བདུགས་ནས་སུ། །ལག་གཉིས་པུས་མོའི་བར་བཞག་སྟེ། །དགང་གཟར་མར་གྱིས་བཀང་ནས་ནི། །བླུགས་གཟར་བཀང་སྟེ་དེ་བཞིན་བསྲེག་།སྦྱིན་སྲེག་ལ་དགོས་གཡས་སུ་བཞག་།གཡོན་དུ་ཆུ་ཡི་སྣོད་དགོད་དོ། །ལས་ཀུན་བྱེད་པས་བཟླས་ནས་སུ། །བསང་གཏོར་དང་ནི་འཐོར་འཐུང་བྱ། །ཀུ་ཤ་རྩེ་མོ་རྣོན་པོ་ཡིས། །ཐབ་ཁུང་ཁོར་ཡུག་བསྐོར་བར་བྱ། །མེ་ནི་
439a
༄#། །འབར་བར་ཤེས་པ་དང ། །གཡས་པ་མི་འཇིགས་ཐོབ་སྤྱོད་ཅིང ། །གསང་སྔགས་འདིས་ནི་ཆོ་ག་བཞིན། །མེ་ཡི་ལྷ་ནི་སྦྱར་དྲང་ངོ ། །ཚུར་སྤྱོན་ཚུར་སྤྱོན་འབྱུང་བོ་ཆེ། །ལྷ་ཡི་དྲང་སྲོང་བྲམ་ཟེ་མཆོག་།སྲེག་བླུགས་ཞལ་ཟས་བཞེས་ནས་ཀྱང ། །འདི་ཉིད་དུ་ནི་བཞུགས་སུ་གསོལ། །ོཾ་ཨགྣ་ཡེ་ཨཱ་དི་བྱ་ཨཱ་བཱི་ཤི་ཨཱ་བཱི་ཤི་མཧཱ་ཤྲི་ཡེ་ཧཱ་བྱ་ཀཱ་བྱ་བཱ་ཧཱནཱ་ཡེ་སཝཱཧཱ། ཕྱག་གཡོན་རྡོ་རྗེ་བསང་གཏོར་ཏེ། །མཆོད་ཡོན་མཆོད་པ་རྣམ་ལྔ་དབུལ། །མེ་ཡི་ཕྱོགས་ནས་བོད་བ་ནི། །གསུས་པོ་ཆེ་ལ་མིག་གསུམ་པ། །གདོང་བཞི་པ་ལ་ལག་བཞིར་ལྡན། །མདོག་དམར་རལ་པའི་ཐོར་ཚུགས་ཅན། །མེ་ཡི་དཀྱིལ་འཁྲོ་ལ་གནས་ཤིང ། །ལས་ཀྱི་འོད་ཟེར་རྣམས་ཀྱིས་བརྒྱན། །ལག་པ་དང་པོ་མཆོག་སྦྱིན་ལ། །གཉིས་པ་ན་ནི་སྔགས་ནོར་ཕྲེང ། །གཡོན་པ་རིལ་བ་སྤྱི་བླུགས་ཏེ། །གཉིས་པ་ན་ནི་བེ་ཅོན་ཉིད། །མདོག་དམར་རྒྱན་ནི་མེད་པ་ལ། །དྲང་སྲོང་རྣམས་ཀྱིས་ཡོངས་བསྐོར་བ། །འདི་ལྟའི་གཟུགས་ནི་བསམས་ནས་ཀྱང ། །ཐབ་ཀྱི་དབུས་སུ་བཞུགས་སུ་གསོལ། །དེ་ལ་སྦྱིན་སྲེག་ལ་དགོས་པ། །ཀུན་ལ་ལན་གསུམ་བསྲེག་བླུགས་དབུལ། །དེ་ནས་འཐོར་འཐུང་བྱས་ནས་སུ། །འབར་བའི་རྣམ་པར་བསྒྱུར་བར་བྱ། །རིམ་པ་འདི་ཡི་ཚུལ་གྱིས་ནི། །མཁས་པས་ལྷ་རྣམས་ཚིམ་པར་བྱ། །ལེགས་པར་ཚིམ་བྱས་བཟོད་གསོལ་ཏེ། །འདོད་པའི་དངོས་གྲུབ་གསོལ་བ་
439b
གདབ། །བུམ་པ་རྒྱལ་མཚན་རྡོ་རྗེ་གདུགས། །པདྨའི་ལྕགས་ཀྱུའི་རྣམ་པ་དང ། །མེ་ལྕེ་མདོག་དཀར་སྣང་བ་དང ། །འཁྱིལ་པའི་མཚན་མས་མཁས་པས་བརྟག་།དེས་ནི་མྱུར་དུ་འབྱུང་འགྱུར་བ། །བསྒོམ་དང་བཟླས་ལ་འབད་པར་བྱ། །ཞི་དང་རྒྱས་དང་དབང་ལ་ནི། །ོཾ་ཞེས་པ་དང་སཝཱ་ཧཱ་མཐར། །དབྱངས་ཀྱི་རྒྱུད་ཀྱི་བསྲིང་བ་ནི། །བར་ཆད་མེད་པའི་དབྱངས་ཀྱིས་སྦྱར། །ཞི་བའི་སེམས་ནི་ཞི་བ་ལ། །འབྱོར་པས་རྒྱས་པ་མངོན་པར་སྤེལ། །དྲེགས་བདེ་སྟབས་ཚུལ་བཅས་པ་དང ། །དབང་དུ་གྱུར་པས་དབང་དུ་བྱའོ། །དྲག་ཤུལ་སྤྱོད་ཚུལ་ལ་གནས་པ། །ཧཱུཾ་ཞེས་པ་དང་ཕཊ་དང་བཅས། །ལུས་ནི་མེ་ལྕེ་འབར་བ་དང ། །འཇིག་རྟེན་གསུམ་པོ་བཟར་བསམས་ནས། །བསྐུལ་བའི་ཚིག་དར་སྤེལ་བ་ཡི། །གསང་སྔགས་ཡི་གེ་ངེས་པར་སྦྱོར། །སྔགས་གྲུབ་ཆོ་ག་ཤེས་པ་ཡིས། །སྦྱིན་སྲེག་ཆོ་ག་ཐམས་ཅད་ལ། །སྣ་ཚོགས་ལས་དང་ལྡན་པ་ཡི། །ཡང་དག་ཡིན་པ་མཆོད་པར་བྱ། །སྦྱིན་སྲེག་དེ་ཉིད་ལ་བསྐུལ་ཞིང ། །དང་པོར་དགང་བླུགས་བསྲེག་ཅིང་དབུལ། །ཕྱིས་ནི་རིམ་བཞིན་རྣམ་པར་སྤེལ། །ཞི་དང་རྒྱས་དང་དབང་རྣམས་ལ། །དགེ་བའི་རྫས་རྣམས་སྦྱིན་སྲེག་བྱ། །བཤད་གཅི་ཁྲག་རྐང་རུས་པ་དང ། །ཤ་ཆེན་དག་ཀྱང་སྦྱིན་སྲེག་བྱ། །ཅི་སྟེ་ཡེ་ཤེས་སེམས་དཔའི་ཞལ། །མི་གཙང་བ་ཡིས་བཀང་ན་ཀོ་།ཇི་ལྟར་སྡིག་པ་སྐྱེ་མི་འགྱུར། །གལ་ཏེ་སྡིག་འགྱུར་འབྲས་བུ་གང ། །སེམས་ཅན་མི་ཤེས་པས་
440a
༄#། །རྨོངས་པ། །ཐབས་དང་ཤེས་རབ་རྣམ་སྤངས་ཤིང ། །ཕྱི་རོལ་དངོས་ལ་མངོན་ཞེན་པ། །རྣམ་རྟོག་དྲ་བ་ས་བླུགས་བྱས་གང ། །དེ་དག་གིས་ནི་དགེ་སྡིག་གི ། ཕུང་པོ་གཉིས་སུ་རྣམ་པར་བརྟགས། །ཆོས་འདི་རང་བཞིན་གྱིས་དག་ཏེ། །སྐྱེ་བ་མེད་ཅིང་གནས་མེད་ཀྱང ། །སེམས་ཅན་ཤེས་པ་སྤེལ་བའི་ཕྱིར། །སངས་རྒྱས་རྣམས་ཀྱིས་ཐབས་སུ་བསྟན། །དམ་པའི་དོན་དུ་དགེ་སྤངས་ནས། །བསོད་ནམས་མིན་པ་ཅི་ཞིག་སྨོས། །དཔེར་ན་མི་གང་ཆུ་ཀླུང་གི་།ཕ་རོལ་འགྲོ་བའི་སེམས་ཅན་དག་།རྩཝ་དང་ཤིང་ལ་སོགས་བསྡུས་ནས། །ཆུ་ལ་རྒལ་བའི་གཟིངས་བྱས་ཏེ། །དེ་ལ་འཇུག་སྟེ་ལེགས་བརྒལ་ནས། །བོར་ཏེ་བདེ་བར་འགྲོ་བ་ལྟར། །དེ་བཞིན་འཁོར་བའི་ཕ་རོལ་གྱི། །ཆོས་ཀྱི་ལམ་ནི་བསྐྱེད་བྱས་ཀྱང ། །ཆོས་དང་ཆོས་མིན་རྣམ་སྤངས་ནས། །བྱང་ཆུབ་བདེ་བ་ཐོབ་པ་ནི། །དེ་ཕྱིར་རྣམ་རྟོག་རྣམ་སྤངས་ལ། །ཟབ་མོ་ཡི་ནི་ཆོས་སྤེལ་ཏེ། །དེ་བཞིན་གཤེགས་པས་གསུངས་རྣམས་ལ། །སྔགས་རིག་རྣམ་རྟོག་མ་བྱེད་ཅིག་།རྣམ་རྟོག་རྨོངས་པ་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་པས། །ནམ་མཁའ་ལྟ་བུར་དྲི་མེད་པའི། །རྣམ་པར་མི་རྟོག་ཏིང་འཛིན་གནས། །དབང་པོ་གཉིས་ནི་མཉམ་སྦྱར་ཏེ། །ལུས་དང་ངག་དང་སེམས་བསྡུས་ནས། །ངའོ་སྙམ་པས་གཟི་བསྐྱེད་ལུས། །རྣམ་པ་ཀུན་གྱིས་
440b
རྣམ་བརྒྱན་ན། །རྣལ་འབྱོར་ལྡན་པས་ཚེ་འདི་ལ། །ཡེ་ཤེས་རྫོགས་པ་ཉིད་དུ་འགྱུར། །ལས་ལས་བྱུང་བར་བསྟན་པ་ཡི། །སྐྱེས་བ་བུད་མེད་གཟུགས་མང་ལ། །མཉེས་པ་ཉིད་དུ་མི་བྱ་འདི། །རྡོ་རྗེ་ལུས་ཅན་དམ་ཚིག་ཡིན། །ངན་རྟོག་བཟང་རྟོག་དྲ་བ་ཡི། །སེམས་ཀྱིས་སེམས་ཅན་རྣམས་ལ་ནི། །སྣ་ཚོགས་གདུང་བས་སུན་མི་འབྱུང ། །རྡོ་རྗེ་དང་ལྡན་དམ་ཚིག་ཡིན། །སྲེད་པས་བསྐྱེད་རྩུབ་ཕྲ་མ་ཡི། །ཚིག་དག་རྣམ་པར་མི་སྨྲ་ཞིང ། །མཉན་ན་བདེ་བ་བྱེད་པ་འདི། །རྡོ་རྗེ་ངག་ཅན་དམ་ཚིག་ཡིན། །རྣམ་པར་སྣང་མཛད་ཆེན་འཁྲུག་མཆོག ། ཤ་ཡི་ཁམས་ལ་གནས་པ་ཡིན། །རྐང་ལ་མི་འཁྲུགས་རྒྱས་པ་སྟེ། །ཁྲག་ལ་རིན་ཆེན་འབྱུང་བ་གཙོ། །སེམས་ཅན་རྣམས་ཀྱི་རུས་ཕུང་གི་།རུས་གོང་ལ་ནི་འོད་དཔག་མེད། །རྩ་ཡི་ཚོགས་རྣམས་རྣམ་འགྲེལ་ལ། །ཐུབ་པ་སྐྱེས་མྖྒོ་དོན་ཡོད་ལ། །དམ་ཚིག་ཤེས་པ་རྣམས་ལ་ནི། །གསང་ཆེན་པ་ཡིས་བསྟན་པ་འདི། །བློ་ལྡན་རྡོ་རྗེ་རྣམས་ཀྱིས་ནི། །རྟག་ཏུ་བརྟེན་ཅིང་བསྒོམ་པར་བྱ། །འདོད་ཆགས་དེ་བཞིན་གཏི་མུག་རྨོངས། །སྲེད་དང་འདུ་བྱེད་རྣམ་སེལ་བའི། །ཆོས་ནི་རྣམ་པ་ལྔ་པོ་འདི། །ཐུབ་པ་སྐྱེས་མྖྒོ་རྣམས་ཀྱིས་གསུངས། ། བཤང་གཅི་ཁུ་ཆུ་མཆིལ་མ་ཁྲག་།འཛག་པ་འབྱུང་བ་བཞིས་བསྡུས་པ། །བསྒོམ་པའི་བློ་གྲོས་རྟོགས་པ་ཡིས། །དམ་ཚིག་བརྟན་པར་བྱ་བ་སྟེ། །རྟག་ཏུ་བཟའ་ཞིང་སྦྱིན་པར་བྱ། །
441a
༄#། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་སྦྱིན་སྲེག་གི་ལེའུ་སྟེ་བདུན་པའོ།། །།དེ་ནས་གཞན་ཡང་བཤད་བྱ་བ། །འགྲོ་བ་མི་ཤེས་མུན་བསལ་ཕྱིར། །ཡེ་ཤེས་ཉི་མ་ཤར་བ་ལས། །ཀེག་བུ་མུན་པ་བསལ་ཚུལ་གསུངས། །གཤིན་རྗེའི་གཤེད་ལ་སོགས་པ་ཡི། །མདོག་དང་ཕྱག་མཚན་ལ་སོགས་པ། །དེ་ཀུན་སྔོན་དུ་རྒྱས་པ་རུ། །བྱེ་བྲག་གིས་ནི་རྒྱས་པར་བསྟན། །དེ་ནི་ལས་ཀྱི་ཁྱད་པར་གྱི། །དབང་དུ་བྱས་པ་ཁྲོ་བོའི་ཚོགས། །གཞན་དུ་མ་གསུངས་གང་ཡིན་པ། །དེ་དག་འདི་རུ་བཤད་པར་བྱ། །བྲུཾ་གྱི་ཡེ་ཤེས་ལས་བྱུང་བ། །གཙུག་ཏོར་གཟི་བརྗིད་ཕུང་པོ་སྟེ། །ཞལ་གསུམ་སེར་པོ་མདངས་དང་ལྡན། །ཕྱག་དྲུག་ཉི་མ་ལ་སོགས་པ། །འཛིན་ཅིང་སྐྱིལ་མོ་ཀྲུང་བཅས་པ། །རལ་བའི་གཙུག་ཏོར་གྱིས་བརྒྱན་ཅིང ། །འཇིག་རྟེན་ཁམས་ཀུན་འཁྲུག་བྱེད་པའི། །གཟུགས་ཀྱི་འཕྲོས་པས་ནམ་མཁའ་གང ། ། རིག་མས་སྐུ་ལ་རབ་འཁྱུད་པས། །ཆགས་ཕྱིར་སྤྲོ་བའི་རྩོལ་བ་ཅན། །འདི་འདྲ་སྒོམ་པར་བྱེད་པ་ལ། །བགེགས་ཀྱིས་གནོད་པ་ཡོང་མི་གོས། །སྐྱོན་མེད་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཡང་ནི་བྲུཾ་གྱིས་ཡེ་ཤེས་ལས། །བྱུང་བ་སྔགས་ཀྱི་འཁོར་ལོ་ཅན། །ཞལ་གསུམ་གསེར་འདྲ་མདངས་པོ་ཆེ། །ཕྱག་དྲུག་འཁོར་ལོ་ལ་
441b
སོགས་པ། །རལ་བའི་གཙུག་ཏོར་གྱིས་བརྒྱན་པ། །འཛིན་ཅིང་སྟག་གི་སྨད་གཡོགས་ཏེ། །ཐོད་པའི་ཕྲེང་བས་སྐུ་ལ་བརྒྱན། །རིག་མ་དང་ལྡན་ཆགས་པ་པོ། །འཇོལ་སྒྲེག་ཉམས་ཀྱི་སྦྱོར་བ་མཛད། །འདི་བསྒོམ་སྤྲོ་བར་བྱེད་པ་ལ། །ཉིན་དང་མཚན་དུ་རྡོ་རྗེ་སེམས། །འཁོར་བཅས་གནས་སུ་བྱོན་ནས་སུ། །རྟག་ཏུ་སྲུང་བ་ཉིད་དུ་བྱེད། །བཀའ་བཞིན་བྱེད་པས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་བཞིན་བྲུཾ་གྱི་ཡེ་ཤེས་ལས། །བྱུང་བའི་ཁྲོ་བོ་གཙུག་ཏོར་རྒྱལ། །ཞལ་གསུམ་སེར་པོ་མདངས་དང་ལྡན། །ཕྱག་དྲུག་ལྕགས་ཀྱུ་ལ་སོགས་པ། །འཇིན་ཅིང་སྦྲུལ་གྱིས་ཡང་དག་བརྒྱན། །འོག་ཏུ་བགེགས་ཀྱི་གཙོ་མནན་ནས། །གད་མོའི་སྒྲས་ནི་འདེབས་པར་བྱེད། །རལ་པའི་གཙུག་ཏོར་གྱིས་བརྒྱན་པ། །ཁྲོ་བོ་འདི་འདྲ་སྒོམ་བྱེད་པའི། །རྣལ་འབྱོར་གང་ལ་སངས་རྒྱས་ཀྱི། །སྤྲུལ་པའི་བགེགས་ཀྱང་རླག་བྱེད་ན། །གཞན་མ་རྣམས་ནི་སྨོས་ཅི་དགོས། །སྙིང་འགུགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བྲུཾ་ལས་ཡང་ནི་བྱུང་བ་ཡི། །གཙུག་ཏོར་དམ་ཚིག་ཅོད་པན་ཅན། །ཞལ་གསུམ་གསེར་ཞུན་མདངས་ལྡན་པ། །ཕྱག་དྲུག་ཀ་པཱ་ལ་སོགས་པ། ། འཛིན་ཅིང་སྣ་ཚོགས་རབ་ཏུ་འབར། །རལ་པའི་གཅུག་ཏོར་གྱིས་བརྒྱན་པ། །ཞབས་རྣམས་བསྒྱུར་ཞིང་རྣམ་པར་འཕེན། །སྤྲོ་དང་བསྡུ་བའི་བློ་གྲོས་ཅན། །འདི་འདྲ་གང་
442a
༄#། །ཞིག་བསྒོམ་པ་ལ། །བི་ནཱ་ཡ་ཀ་ལ་སོགས་པའི། །བགེགས་ཀྱིས་སྐབས་ནི་མི་རྙེད་ཕྱིར། །ཇི་བཞིན་རབ་ཏུ་བསྒོམ་པར་བྱ། །གཞན་གྱིས་མི་ཐུབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བྲུཾ་གྱི་ཡི་གེ་ལས་ཀྱང་བྱུང ། །མིང་གི་གཙུག་ཏོར་རྣམ་པར་འཐོར། །ཞལ་གསུམ་གསེར་ནི་བཙོ་མ་འདྲ། །ཕྱག་དྲུག་ཏྲི་ཤཱུ་ལ་སོགས་པ། །འཛིན་ཅིང་སྲོག་སོང་སྟེང་ན་གནས། །རོལ་པའི་སྟོབས་ཀྱིས་བགེགས་མཆུ་བཅིངས། །རལ་པའི་གཙུག་ཏོར་གྱིས་བརྒྱན་པ། །སངས་རྒྱས་སྤྲིན་ནི་སྤྲོ་བའོ། །གང་ཞིག་དེ་འདྲ་སྒོམ་བྱེད་པའི། །རྣལ་འབྱོར་དེ་ཡིས་གོ་ཆ་དགོས། །སྲ་བའི་ངང་ཚུལ་ཅན་ཡིན་པས། །བགེགས་ལུས་གང་གིས་མི་གཡོའོ། །བགེགས་ལས་རྒྱལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བྲུཾ་གྱི་ཡེ་ཤེས་མཐུ་ལས་བྱུང ། །གཙུག་ཏོར་རྣམ་པར་འཇོམས་པའི་མཆོག་།ཞལ་གསུམ་གསེར་འདྲའི་ཉི་འོད་མཚུངས། །ཕྱག་དྲུག་རྡོ་རྗེ་ལ་སོགས་པ། །འཛིན་ཅིང་ཚེམས་ཀྱིས་སྒྲོས་མནན་ཏེ། །ཆགས་ལྡན་རིག་མས་འཁྱུད་པའོ། །རལ་པའི་གཙུག་ཏོར་གྱིས་བརྒྱན་པ། །ཁྲག་ཅན་ལྗགས་ཀྱང་འདྲིལ་བ་སྟེ། །བླ་མེད་བྱང་ཆུབ་ཐོབ་འདོད་པ། །འདི་འདྲ་སྒོམ་པར་བྱེད་པ་ལ། །བསྐལ་པ་བརྒྱད་བཅུའི་བར་དུ་ཡང ། །བགེགས་ཀྱི་གནོད་པ་ཡོད་མི་འོང ། །བགེགས་ཀྱི་
442b
སྟོང་པ་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཡང་ནི་བྲུཾ་གྱི་ཡེ་ཤེས་ལས། །ཡང་དག་བྱུང་བའི་སྐབས་དཀར་པོ། །ཞལ་གསུམ་གསེར་ཞུན་ལྟ་བུར་གནས། །ཕྱག་དྲུག་གདུགས་ལ་སོགས་འཛིན་ཅིང ། །སྐྱབས་མེད་ཕོངས་པའི་སྐྱབས་མཛད་ཅིང ། །མ་ནིང་རྣམས་དང་ཟ་མ་ལ། །བུ་ནི་སྦྱིན་པར་བྱེད་པ་པོ། །རལ་པའི་གཙུག་ཏོར་གྱིས་བརྒྱན་པ། །རིག་མ་དང་ལྡན་སྐུ་ཆེན་འདི། །རྣལ་འབྱོར་གང་གིས་སྒོམ་བྱེད་ཅིང ། །བཟླས་པ་རྩེ་གཅིག་ཏུ་བྱེད་ན། །བགེགས་ཀྱི་གནོད་པས་དེ་མི་བརྫི། །རིན་ཆེན་གྱི་སྐྱབས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །རྣལ་འབྱོར་ཁྱད་པར་ཅན་གྱིས་ནི། །འདི་རྣམས་བྱང་ཆུབ་བསྲུང་བའི་ཕྱིར། །འཁོར་ལོ་གཙོ་བོར་རབ་བསྒོམས་ན། །ནང་གི་བགེགས་ཀྱིས་ཡོང་མི་ཚུགས། །བྱང་ཆུབ་སྙིང་པོ་དོན་གཉེར་བས། །འདི་འདྲའི་འཁོར་ལོ་ཅན་བསྒོམས་ན། །བསྒྲིམས་ནས་རྣལ་འབྱོར་བསྒོམས་པ་ཡིས། །རིང་པོར་མི་ཐོགས་འདོད་པ་ཐོབ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་བྱང་ཆུབ་ཀྱི་སྙིང་པོའི་རྒྱན་གཙུག་ཏོར་འབྱུང་བའི་ལེའུ་སྟེ་བརྒྱད་པའོ།། །།དེ་ནས་ཡང་རྡོ་རྗེ་མཁའ་འགྲོ་མ་ཐམས་ཅད་འདུས་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་རྡོ་རྗེ་འཛིན་པ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །འདི་ཡི་
443a
༄#། །དཔལ་ནི་གང་ཞིག་ལགས། །རྡོ་རྗེ་དང་ནི་སྙིང་པོ་དང ། །དེ་བཞིན་རྒྱན་གྱི་དོན་ནི་ཅི། །ཀྱེ་ཧོ་མཆོག་དེ་བསྟན་དུ་གསོལ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་རྡོ་རྗེ་འཛིན་པས་དེ་དག་ལ་འདི་སྐད་ཅེས་བཀའ་སྩལ་ཏོ། །འདི་ནི་ཐུན་མོང་མ་ཡིན་པའི། །གསང་བའི་རྒྱུད་དུ་རབ་སྦས་པ། །ཇི་བཞིན་གནས་པའི་དེ་ཁོ་ན། །ཡང་དག་བསྟན་གྱིས་རྩེ་གཅིག་ཉོན། །ལུས་ངག་ཡིད་གསུམ་བདེ་དམ་པས། །ལྷ་མོ་ལས་ནི་བསྐྱོད་བྱ་སྟེ། །བྱང་ཆུབ་ཆེན་པོ་བདེ་བ་ཡིས། །ཆུལ་བཞིན་དུ་ནི་སྔགས་པས་བྱ། །བསྐུལ་བའི་སྙིང་པོས་འདི་སྨྲ་སྟེ། །ཛྫ་ཞེས་སྐད་ཅིག་སྐད་ཅིག་ཏུ། །རང་གི་གནས་ན་གནས་པ་ཡིན། །དེ་ཉིད་ལྷ་ཉིད་བསྐྱེད་པར་བྱ། །བཅུ་དྲུག་ཆ་དང་ཡང་དག་ལྡན། །རྩ་བ་གསང་བའི་ཐིག་ལེ་ལ། །མེ་ཏོག་དང་ནི་དྲ་བ་ཉིད། །རླུང་གིས་ཕུལ་བས་བསྐྱོད་པར་བྱ། །དེ་བཞིན་བསྐྱོད་པས་བསྒྲུབ་པར་བྱ། །དེ་བཞིན་དུ་ཡང་བསྐུལ་བྱ་བ། །རྒྱུད་ཀྱི་ཕྲེང་ནི་འོད་གསལ་བཞིན། །སྟེང་དང་མདུན་དུ་རྩ་གཉིས་ལས། །བཅུ་དྲུག་གནས་སུ་ཡང་དག་གནས། །དེ་ལས་སྙིང་དབུས་རབ་ཞུགས་ཏེ། །རླུང་གི་སྦྱོར་བས་ཕུལ་བྱས་པས། །སྟེང་དང་མདོག་རབ་མཛེས་རྫོགས་སྐུ། །བདག་གི་དཔལ་དུ་ཤེས་པར་བྱ། །དེ་ལས་བྱུང་བའི་དངོས་གྲུབ་ཆེ། །ནོར་བུ་ལ་གནས་རྟོག་བྲལ་བ། །ཐིག་ལེ་ཡིག་མེད་བསྡུས་པའི་སྐུ། །ལྷན་ཅིག་སྐྱེས་པར་ཤེས་པར་བྱ། །དེ་ལ་དེ་ཡི་གཟུགས་ཀྱི་སྐུ། །ནམ་མཁའི་ཁམས་ཀུན་གང་བ་ཡི། །བྲལ་བའི་ཤེས་པས་དོན་བྱེད་པ། །གཞན་གྱི་དཔལ་དུ་ཤེས་པར་
443b
བྱ། །དེ་རྣམས་རྒྱུད་ལས་བྱུང་བ་ཡི། །ཡེ་ཤེས་ཤེས་རབ་ཤིན་ཏུ་གསང ། །གསང་བ་རྣམ་པར་འགྲུབ་པ་ཡི། །རྡོ་རྗེ་སྙིང་པོའི་རྒྱན་ཞེས་བྱ། །ལྷ་མོ་ལས་བྱུང་བདེ་དང་ལྡན། །འཇའ་ཚོན་ལྟར་གསལ་རྒྱུད་དག་པ་སྣང་བའི་སྐུ་དེ་མི་ཤིགས་པ། །རྡོ་རྗེ་ང་ཡིས་ཡང་དག་བསྒྲགས། །སྣང་ཞིང་སྲིད་པའི་ཆོས་རྣམས་ཀུན། །བསྡུས་ཕྱིར་བརྩེགས་པའི་སྐུ་དམ་པ། །རྟོག་བྲལ་རྒྱུད་དུ་སིམ་གནས་པ། །འབྱུང་ཕྱིར་སྙིང་པོ་ཞེས་སུ་བསྒྲགས། །དག་དང་མ་དག་ཐམས་ཅད་ལ། །འཁོར་བ་ཇི་སྲིད་བར་སྣང་བ། །གཉིས་ཀ་མཛེས་པར་བྱེད་པས་ན། །རྒྱན་དུ་ཡང་དག་བསྒྲགས་པ་ཡི། །དཔལ་དང་རྡོ་རྗེ་སྙིང་པོ་དང ། །རྒྱན་ཞེས་བྱ་བ་བཞི་པོ་ནི། །འབྲེལ་ཅིང་གྲུབ་པར་བྱེད་པའི་ཕྱིར། །རྒྱུད་ཅེས་བྱ་བར་བཤད་པའོ། །ཆོས་ཀྱི་ཕུང་པོ་བརྒྱད་ཁྲི་དང ། །བཞི་སྟོང་གི་ནི་གྲངས་སྙེད་ཀྱི། །མཚན་གྱི་དོན་ནི་འདི་དོན་དུ། །ཡང་དག་འདུས་བར་ངས་བཤད་དོ། །གཞན་དུ་དོན་ནི་མ་བསྒྲགས་པ། །བླ་མ་ལ་ནི་གུས་པ་ཡི། །སློབ་མ་ལ་ནི་མ་རྟོགས་པའི། །རྒྱུད་གཞན་དག་ཏུ་སྦས་པའོ། །དོན་འདི་ཡང་དག་མ་ཤེས་ན། །ཇི་སྙེད་དོན་ནི་བསམ་ཡས་པ། །ཤེས་ཀྱང་དེ་ཡི་འབྲས་བུ་མེད། །དེ་འདོད་མཉེས་བྱས་ཡང་དག་བླང ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ཡེ་ཤེས་གསུམ་གྱི་མཚན་འབྱུང་བ་ཞེས་བྱ་བའི་ལེའུ་སྟེ་དགུ་པའོ།། །།རྟག་པར་མི་ཕྱོགས་སྨྲ་བ་དང ། །བླ་མ་སྨོད་བྱེད་བརྩོན་པ་ལ། །དམ་ཚིག་ཕྱིར་ནི་ཡོངས་བསྒྲལ་བྱ། །དེ་ཡི་ཤ་ཁྲག་ཀླད་པ་རྣམས། །
444a
༄#། །དྲངས་ཏེ་ཆོས་ཀྱི་སྟོན་མོ་བྱ། །དེ་ལྟར་མ་བྱས་སྡུག་བསྔལ་ཚོགས། །གཏི་མུག་ཅན་དེས་ཐོབ་པར་འགྱུར། །ནད་ཐམས་ཅད་དང་ཁྲོས་ཆེན་དང ། །འཇིགས་དང་ཉེ་བར་འཚེ་བ་ཡི། །བསྐལ་པ་གྲངས་མེད་བྱེ་བ་རུ། །སྡུག་བསྔལ་ཆེན་པོར་རབ་སྙེད་ཅིང ། །འོ་དོད་འབོད་པས་སྦྲུལ་གྱིས་བརྒྱན། །བསྟིར་མེད་ཆེན་པོར་རྟག་པར་འགྲོ། །དེ་བས་ལས་འདིས་རྒྱས་གདབ་བོ། །བདག་ཉིད་རྡོ་རྗེ་མཁའ་འགྲོ་ཡི། །ཁྲོ་བོ་གཟུགས་ཅན་ཉིད་གྱུར་ནས། །ུཏྤལ་མཐིང་ག་འདྲ་བ་ཡི། །ཞལ་གསུམ་པ་ལ་ཕྱག་དྲུག་པ། །རྡོ་རྗེ་ཏྲི་ཤཱུལ་ཕུར་བུ་དང ། །ཐོད་བ་གྲི་གུག་འཁོར་ལོ་འཛིན། །མི་སྡུག་ཁྲོས་པ་ལྕེ་ལྔ་པ། །བསམས་ནས་དེ་འོག་ནམ་མཁའ་ལ། །བསྒྲུབ་བྱ་རྒྱས་པར་དམིགས་ནས་སུ། །རྡོ་རྗེ་ཕུར་པ་ལ་སོགས་པ། ། སེམས་ཅན་དཀྱིལ་འཁོར་གནས་པ་ལ། །སྒྲུབ་པོས་དེ་ཡི་ཉེས་པ་བསྒོ། །དེ་ནས་ཕྱག་མཚན་ཏྲི་ཤུལ་དང ། །ཕུར་བུ་དྲག་པོ་མཆོག་དག་གིས། །མགོ་དང་སྙིང་ག་ལྟ་བ་དང ། །རྐང་པ་གཉིས་དང་ལྟེ་བ་དང ། །རྐང་པ་གཉིས་དང་ལག་པ་ཡི། །ག་ནས་ལྔ་རབ་ཏུ་ཕུག་བྱ་སྟེ། །ལྕེ་ལྔའི་འོད་ཟེར་ལྔ་པོ་ཡིས། །སྲིན་བུ་འཛའ་ལུ་ཀ་བཞིན་དུ། །ཁྲག་ཀུན་སྔགས་ཀྱིས་དྲངས་ནས་སུ། །ཐོད་པར་ཕབ་ནས་བཏུང་བར་བྱ། །དེ་བཞིན་ཤ་རྣམས་ཡང་བསྡུས་ནས། །བཟའ་བ་རུ་ནི་རབ་ཏུ་བརྟག་།རུས་པ་རྣམས་ཀྱང་འཆོས་བྱས་ནས། །ཤེས་པ་རྡོ་རྗེ་པདྨར་སྦྱར། །འདི་ནི་དོན་སྒྲུབ་
444b
རབ་བྱེད་པས། །ཟླ་བ་ཕྱེད་ནི་ཚུན་ཆད་ཀྱི། །རྡོ་རྗེ་འཛིན་པ་ཆེན་པོ་ཡང ། །འཆི་བར་འགྱུར་བར་གདོན་མི་ཟ། །རྡོ་རྗེ་གསང་བ་འདི་ལྟ་བུ། །བསྒྲུབ་བྱ་ལེགས་པར་བསྒྲུབ་བྱས་ནས། །ལས་ངན་དག་གིས་དེ་མི་འཁོལ། །སངས་རྒྱས་སུ་ནི་སྐྱེ་བར་འགྱུར། །རྣལ་འབྱོར་དེ་ཡང་དེ་ཡི་མཐུས། །ཁྲོ་བོ་མཁའ་འགྲོ་ཞེས་འགྱུར་ཏེ། །ཁམས་གསུམ་བསད་དང་གསོབ་དང ། །སེམས་ཀྱིས་རྡོ་རྗེ་བརྟན་བྱས་ནས། །སྐད་ཅིག་ཙམ་དུ་བྱེད་པར་འགྱུར། །གསལ་བར་ནུས་པ་གདོན་མི་ཟ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རྡོ་རྗེ་མཁའ་འགྲོ་ཁྲོ་བོའི་སྦྱོར་བས་དགྲ་བསད་པའི་ལེའུ་སྟེ་བཅུ་པའོ།། །།དེ་ནས་གཞན་ཡང་བཤད་བྱ་བ། །འདོད་ཆགས་ཐབས་ཆེན་པོ་ཡི་རྒྱུད། །གང་གིས་ལེགས་པར་ཤེས་ན་ནི། །ཚེ་འདིས་དངོས་གྲུབ་སྦྱིན་པར་བཤད། །གསང་བ་འདུས་པ་སྟོང་ཕྲག་གཅིག་།རྡོ་རྗེ་ཕྲེང་བ་འབུམ་ཕྲག་གསུམ། །དགོངས་པ་ལུང་སྟོན་སྟོང་ཕྲག་བཞི། །ལྷ་མོ་བཞིས་ཞུས་བརྒྱ་བདུན་ཅུ། །ུཏྤ་ཏནྟྲཱ་ཉིས་བརྒྱ་བརྒྱད། །དེ་ཡི་ཉེ་བར་བཤད་པའི་རྒྱུད། །དམ་ཚིག་ཆེན་པོ་ལྔ་བཅུ་ལྔ། །རྡོ་རྗེ་ལྔ་འབུམ་སྟོང་ཕྲག་གཅིག་།ཀུན་ལས་བཏུས་པ་འབུམ་ཕྲག་གཅིག་།མཉམ་ཉིད་རྣམ་རྒྱལ་ཉིས་བརྒྱ་བཅུ། །ཟླ་གསང་ཐིག་ལེ་སྟོང་ཕྲག་བདུན། །རྡོ་རྗེ་ས་འོག་བརྒྱ་ཉི་ཤུ། །ཅོད་པན་རྡོ་རྗེ་བདུན་བརྒྱ་ལྔ། །ཁྲོ་ཟླ་ཐིག་ལེ་འབུམ་ཕྲག་ལྔ། །རྡོ་རྗེ་རྣམ་རྒྱལ་བརྒྱ་དགུ་བཅུ། །མཉམ་ཉིད་གསང་བ་སྟོང་ཕྲག་ལྔ། །རྡོ་རྗེ་གསང་རྒྱན་སྟོང་ཕྲག་ལྔ། །རྡོ་རྗེ་གསང་མཛེས་སྟོང་ཕྲག་
445a
༄#། །བདུན། །ནོར་བུ་གསང་ཐིག་འབུམ་ཕྲག་བཅུ། །སྣང་མཛད་རྫུ་འཕྲུལ་སྟོང་དང་བརྒྱ། །རྡོ་རྗེ་གསང་རྒྱན་སྟོང་ཕྲག་གཅིག་།རྡོ་རྗེ་ཐོད་པ་ཉིས་བརྒྱ་བརྒྱ། །དེ་ཉིད་བརྒྱ་སྟོང་བརྒྱ་སྟོང་བདུན། །དམ་ཚིག་མངོན་བརྒྱན་སྟོང་ཕྲག་གསུམ། །འཇམ་དཔལ་དཔའ་བོ་འབུམ་ཕྲག་གཅིག་།གསང་ཆེན་འདུས་པ་བརྒྱ་ལྔ་བཅུ། ། རིན་ཆེན་སྡོང་པོ་དགུ་བརྒྱ་བདུན། །དུས་ཀྱི་ཐིག་ལེ་བརྒྱ་བརྒྱད་ཅུ། །ལྷ་མོ་བསྟན་ཆོས་ལྔ་བརྒྱ་བདུན། །འདི་རྣམས་དགོངས་པའི་བྱེ་བྲག་གིས། །ང་ཡིས་ཡང་དག་བསྟན་པར་བྱ། ། འདི་ནི་གཉིས་གཉིས་འཁྱུད་པ་ཡིས། །རྒྱུད་ཀྱི་དབྱེ་བ་བསྟན་པའོ། །དེ་བཞིན་དུ་ནི་ཡན་ལག་བཅིངས། །རྒོད་དང་བལྟས་པས་ཤེས་པར་བྱ། །དེ་བཞིན་ཞེ་སྡང་གཏི་མུག་གིས། །རྒྱུད་རྣམས་ཀུན་ཀྱང་ཤེས་པར་བྱ། །མཁའ་འགྲོ་མ་ཡི་རྒྱུད་ཀུན་ཡང ། །འདི་ཡི་རིམ་པས་ཤེས་པར་བྱ། །ཕྱི་ནང་དབྱེ་བར་ཤེས་པ་ཡིས། །རྒྱུད་ཀྱི་དབྱེ་བ་ཤེས་པར་བྱ། །ནང་དུ་བསྟན་པའི་བླ་མ་ལས། །ཡང་དག་བླངས་ཏེ་བསྒྲུབ་པར་བྱ། །ཅི་བཞིན་གནས་པ་ལ་དགོངས་ཏེ། །བདེ་བར་གཤེགས་པས་རྒྱུད་ཀུན་བསྟན། །རྡོ་རྗེ་སྙིང་པོའི་རྒྱན་གྱི་རྒྱུད། །འདི་ཡི་རྒྱུད་ནི་མཁའ་འགྲོ་བ། །རྒྱུད་རྣམས་ཀུན་གྱི་ཕྱི་མོ་སྟེ། །གཞན་དུ་མ་བསྒྲགས་དོན་གང་ཞིག་།འདི་རུ་ཡང་དག་བསྟན་པ་སྟེ། །རྣལ་འབྱོར་གང་ཞིག་ལེན་པའམ། །
445b
སྒོམ་པར་བྱེད་དམ་འཆད་པ་འམ། །གྲོག་པར་བྱེད་པ་རྣལ་འབྱོར་ཆེ། །དེ་ཡང་ང་དང་འདྲ་བར་འགྱུར། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རྒྱུད་ཐམས་ཅད་དབྱེ་བའི་ལེའུ་སྟེ་བཅུ་གཅིག་པའོ།། །།དེ་ནས་གཞན་ཡང་བཤད་བྱ་བ། །སྣ་ཚོགས་མདོ་དང་རྒྱུད་རྣམས་ཀྱིས། །སྡོམ་པ་ཡང་དག་ཤེས་འགྱུར་ན། །མཁའ་འགྲོ་ཆེན་པོར་འགྱུར་བར་བཤད། ། གང་གིས་ཉན་ཐོས་རབ་འབྱིན་པ། །སྤོང་བ་ལྟུང་བའི་བྱེ་བྲག་བཤད། །བསྒྲུབ་པ་དང་ནི་རྫས་གྲགས་ཀྱིས། །འདི་རུ་དེས་ཀྱང་ཡོངས་རྫོགས་བྱེད། །ཚུལ་ཁྲིམས་ཀྱིས་ནི་བསླབ་པ་གསུམ། ། དགེ་བའི་ཆོས་ནི་སྡུད་པ་དང ། །སྡོམ་པ་ཉི་ཤུ་ལ་སོགས་དང ། །སེམས་ཅན་དོན་བྱེད་པའི་ཚུལ་ཁྲིམས། །བྱང་ཆུབ་སེམས་དཔའ་རབ་སྦྱིན་པ། །ལུས་ངག་ཡིད་གསུམ་རབ་འབྱུང་བའི། ། སྡོམ་པ་དེས་ཀྱང་མཁའ་འགྲོ་ཡི། །རྒྱུད་རྣམས་ཡང་དག་སྦྱོར་བར་བྱེད། །ཟླ་བ་སྨྱུང་དང་གཙང་སྤྲ་བསྡམ། །གྲོང་དང་གནག་ལྷས་ཐང་པའམ། །ལུས་དང་ངག་དང་ཡིད་ཀྱིས་ནི། །གནོད་པ་དང་ནི་ཡོད་མི་བྱེད། །དེ་བཞིན་གཤེགས་པའི་སྡོམ་པ་མཆོག་།བླ་ན་མེད་པའི་བྱང་ཆུབ་སེམས། །འགྲོ་བའི་དོན་བྱེད་བྱང་ཆུབ་སེམས། །བྱང་ཆུབ་སེམས་ནི་རབ་ཏུ་བཟུང ། །རྡོ་རྗེ་མི་བསྐྱོད་རིགས་ཆེན་པོ། །རྡོ་རྗེ་ཆེ་དང་དྲིལ་བུ་དང ། །སློབ་དཔོན་ཡང་ནི་བཟུང་བྱས་ལ། །དེ་ཡི་ཡོན་ཏན་ཐོབ་པར་བྱེད། །རིན་ཆེན་ཏོག་གི་རིགས་མཐོན་པོ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས།།
446a
༄#། །བྱིན་པས་དེ་ཡི་ཡོན་ཏན་ཐོབ། །པདྨོ་སྣང་བའི་རིགས་དག་ལ། །ཕྱི་དང་ནང་དང་གསང་བ་ཡི། །དམ་ཚིག་རབ་ཏུ་བཟུང་བ་ཡིས། །བླ་མེད་བྱང་ཆུབ་ཐོབ་པར་བྱེད། །རྔ་སྦྲ་ལས་ཀྱི་རིགས་མང་པོ། །དམ་ཚིག་དང་ནི་སྡོམ་པར་ལྡན། །བསྙེན་བཀུར་མཆོད་པ་སེམས་ཅན་དོན། །བྱས་པས་དེ་ཡི་ཡོན་ཏན་ཐོབ། །སྲོག་མི་གཅོད་ཅིང་གཡེམ་མི་བྱ། །མ་བྱིན་མི་ལེན་རྫུན་མི་སྨྲ། །ཕྲ་དང་ཀྱལ་ཚིག་རྩུབ་པོ་དང ། །སྨྲ་བ་མི་བྱ་བ་རྣབ་སེམས་དང ། །གནོད་སེམས་ལོག་པར་ལྟ་བ་རྣམས། །ནམ་ཡང་བྱ་བ་མ་ཡིན་ནོ། །དཀོན་མཆོག་གསུམ་ནི་ཡོང་མི་སྤང ། །ལྷ་དང་བླ་མ་དེ་བཞིན་ནོ། །ཉེས་པ་ཀུན་གྱི་རྩ་བའི་ཕྱིར། །ཆང་ཡང་རྣམ་པར་སྤང་བར་བྱ། །ཕྱག་རྒྱ་བཞོན་པ་མཚོན་ཆ་སོགས། །མཚན་མ་འམ་ནི་ལྷ་ཡི་གྲིབ། །འགོམ་དང་བཟའ་བར་མི་བྱ་བ། །དེ་ལ་སོགས་པ་མཐའ་ཡས་པའི། །སྡོམ་པ་གང་དེ་གསུངས་པ་རྣམས། །འདི་རུ་དང་པོའི་ལས་ཅན་ལ། །དེ་ཡིས་ཡང་དག་འཇུག་པར་བྱེད། །ཐུན་མོང་མ་ཡིན་པས་ཕམ་པ། །བཅུ་བཞིར་གྲགས་པ་གང་འདི་ནི། །སྔགས་པས་དོན་ཀུན་འགྲུབ་བྱེད་པས། །སྤང་ཞིང་དོར་བར་མི་བྱའོ། །སློབ་དཔོན་སྙིང་ནས་སྨོད་པ་དང ། །བདེ་གཤེགས་བཀའ་ལས་འདའ་བྱེད་དང ། །ཞེས་སྡང་གིས་ནི་མཆེད་སུན་འབྱིན། །བྱམས་སེམས་མེད་པར་སེམས་ཅན་སྤངས། །བྱང་ཆུབ་སེམས་ཆེན་འདོར་བ་དང ། །བདག་གཞན་གྲུབ་པའི་མཐའ་སྨོད་བྱེད། །སྣོད་མི་རུང་ལ་གསང་བ་བསྟན། །རྒྱལ་བའི་བདག་ཉིད་ཕུང་པོ་སྨོད། །དག་པའི་ཆོས་ལ་སོམ་
446b
ཉི་བྱེད། །གསུམ་ལྡན་ཁྲོ་ལ་བྱམས་ལྡན་ཏེ། །སྟོང་པ་ཐལ་བྱུང་ལ་རྟོག་པ། །དད་ལྡན་སེམས་ནི་སུན་འབྱིན་བྱེད། །དམ་ཚིག་དང་ལྡན་རྩེ་མི་བྱེད། །ཤེས་ལྡན་བུད་མེད་སྨོད་པར་བྱེད། །སྔགས་པས་དེ་དག་ཡོང་སྤངས་ནས། །ངེས་པར་དངོས་གྲུབ་ཐོབ་པར་བྱེད། །དེ་ལ་སྔགས་པ་ཡོང་འདས་ནས། །ངེས་པར་བདུད་དང་ཕྲད་པར་འགྱུར། །ནད་དང་སྡུག་བསྔལ་འཕེལ་འགྱུར་ཏེ། །བསྟིར་མེད་སྤྱིའུ་ཚུགས་དམྱལ་བར་འགྲོ། །སྦོམ་པོ་ལྟུང་བྱེད་ཉེས་དམིགས་ཀྱང ། །དེ་དང་འདྲ་བར་ཤེས་པར་བྱ། །དམ་ཚིག་མི་ལྡན་རིག་མར་བསྟེན། །ཚོགས་ཀྱི་འཁོར་ལོར་རྩོད་པར་བྱེད། །གསང་བའི་ཆོས་ནི་སྟོན་པ་དང ། །དད་ལྡན་རྣམས་ལ་གཞན་དུ་སྟོན། །ཉན་ཐོས་ནང་དུ་ཡུན་རིང་གནས། །སྣོད་མི་རུང་ལ་གསང་བ་བསྟན། །ཁ་ན་མ་ཐོ་སྦོམ་འགྱུར་ཏེ། །སྔགས་པ་དེ་ཡི་དམ་སྡོམ་ཟད། །ཟད་པས་འགྲུབ་པར་ཡོད་མི་འགྱུར། །དེ་བས་ཉིན་རེ་ལན་གསུམ་དུ། །ཁ་ཏོན་གྱིས་ཀྱང་བཀླག་པར་བྱ། །དཀྱིལ་འཁོར་མཐོང་དང་ཞུགས་པ་དང ། །དབང་བསྐུར་བ་ལ་སོགས་ཚུལ་ཀྱི། །རྡོ་རྗེ་མཁའ་འགྲོ་ཐོབ་པ་གཞན། །བྱང་ཆུབ་སེམས་དང་ཉན་ཐོས་དང ། །བྱ་དང་གཉིས་ཀ་རྣལ་འབྱོར་རྒྱུད། །དགོངས་གསུངས་རྣམས་ཀྱིས་དེ་ལྟ་མིན། །དེ་ལྟ་བས་ན་སྡོམ་པའི་མཆོག་།ང་ཡིས་ཡང་དག་བསྟན་པར་བྱ། །དྲི་ཆེན་དྲི་ཆུ་རཀྟ་དང ། །ཤེས་དང་བྱང་ཆུབ་སེམས་རྣམས་ནི། །བཟའ་བའི་སྦྱོར་བས་ཡང་དག་བཟའ། །ལྟོ་ཡི་ཡེ་ཤེས་མིས་སྦྱངས་ཕྱིར། །ཕྱི་རོལ་ཟས་ལས་ཁྱད་པར་འགྱུར། །དེ་བཞིན་གླད་
447a
༄#། །ཆེན་རྟ་ཤ་དང ། །བ་གླང་ཁྱི་ཤ་ཤ་ཆེན་རྣམས། །ཡེ་ཤེས་ལྔ་ཡི་ངོ་བོའི་ཕྱིར། །དགའ་བའི་སེམས་ཀྱིས་བཟའ་བར་བྱ། །དེ་བཞིན་སེམས་ཅན་གསད་པར་བྱ། །མ་བྱིན་པར་ཡང་བླང་བར་བྱའོ། །བུད་མེད་ཐམས་ཅད་འདོད་པ་སྤྱོད། །བརྫུན་ཚིག་དག་ཀྱང་སྨྲ་བར་བྱ། །དེ་ལྟར་བྱས་པས་སངས་རྒྱས་དང ། །བྱང་ཆུབ་སེམས་དཔའ་མཉེས་པར་འགྱུར། །སེམས་ཅན་རྣམས་ཀྱང་ཚིམ་ཞིང་དགའ། །དེ་བཞིན་རྣལ་འབྱོར་སྙིང་པོ་ཡིས། །སངས་རྒྱས་དང་ནི་བྱང་ཆུབ་སེམས། །རང་འདྲེན་ཉན་ཐོས་སྐུ་གཟུགས་སོགས། །རང་ཉིད་དག་པ་གསུམ་སྦྱོར་བས། །ཕྱག་བྱས་ན་ནི་མི་རུང་འགྱུར། །ཀུན་དུ་རྡོ་རྗེ་སེམས་དཔའ་ཡི། །ལུས་ངག་ཡིད་ཀྱི་དཀྱིལ་འཁོར་ལས། །རང་ཉིད་བསམ་གཏན་གསུམ་སྦྱོར་བས། །དབྱེར་མེད་བློ་ཡིས་མི་བྱའོ། །དཀྱིལ་འཁོར་དག་ཀྱང་མི་བྲིའོ། །གླེགས་བམ་དག་ཀྱང་མི་བཀླག་གོ་།མཆོད་རྟེན་ལས་ཀྱང་ཡོང་མི་བྱ། །ལག་པའི་ཕྱག་རྒྱ་རྣམས་ཀྱང་སྤང ། །ཉིན་རེ་ཞིང་ནི་དུས་བཞི་རུ། །བུ་མོ་ལེགས་པར་གོམས་པ་ལས། །ག་བུར་ཙནྡན་ཁས་བླངས་ཏེ། །ཆོ་ག་བཞིན་དུ་ལུས་འཁོར་མཆོད། །རོལ་མོའི་ཐབས་ནི་སྣ་ཚོགས་པ། །ང་མི་རྒྱུད་ལས་རབ་བསྟན་པས། །བཅུ་དྲུག་ཐིག་ལེ་ངལ་སོ་ལས། །སྔགས་ཀྱི་སྙིང་པོ་བརྟག་པར་བྱ། །བླ་མ་དམ་པ་ཐུགས་རྗེ་ཆེས། །ཡང་དག་བསྟན་པ་ལ་
447b
དམིགས་ནས། །ཕྱིན་ཅི་ལོག་ཁུར་ཡོངས་འདོར་ཏེ། །རྡོ་རྗེ་འཛིན་པ་ང་འདྲར་འགྱུར། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་དམ་ཚིག་དང་སྡོམ་པ་དབྱེ་བའི་ལེའུ་སྟེ་བཅུ་གཉིས་པའོ།། །། དེ་ནས་རོ་ལངས་ཆེན་མོ་ཡི། །སྒྲུབ་པ་ཡང་དག་བཤད་པར་བྱ། །སྒྲུབ་པོས་ལེགས་པར་ཤེས་གྱུར་ན། །དངོས་གྲུབ་ཐོབ་པར་འགྱུར་བའོ། །ནག་པོ་ཡི་ནི་ཚེས་བརྒྱད་དང ། །ཡང་ན་བཅུ་བཞི་གང་ཡང་རུང ། །ཤིང་གཅིག་དུར་ཁྲོད་མ་མོའམ། །ཡང་ན་མི་མེད་གྲོང་བར་དུ། །སྔོན་དུ་སྒྲུབ་པའི་བདག་ཉིད་ཅན། །ལས་ཀུན་འགྲུབ་པར་བྱེད་པར་སྒྲུབ། །མདའ་མཁན་མ་དང་སྨེ་ཤ་ཅན། །གདོལ་པ་མོ་དང་གར་མཁན་སོགས། །མདུན་གྱི་སོ་ལ་ལྷག་ཡོད་པ། །བྱད་དང་མདངས་ལྡན་རྨ་མེད་མ། །ལོ་ནི་སུམ་ཅུ་རྩ་གཉིས་བྶྤགྶ། །ཡང་ན་ཉི་ཤུ་རྩ་ལྔའོ། །ཡང་ན་ཆུ་དང་དང་པོར་སྐྱེས། །སྦྱངས་ནས་ཤི་བ་མ་སྦགས་པ། །ཡང་དག་བླངས་ཏེ་ཕ་བོང་སྟེང ། །གཞན་ཡང་བུ་མོ་སྐྲ་བཟུང་སྟེ། །ལྷ་བཞད་དང་ནི་དབང་པོ་ལག་།དཀར་པོ་དང་ནི་རི་སྒྲ་དང ། །གྲུ་གནོན་ཆུ་ཡིས་བཀྲུ་བར་བྱ། །དེ་ནས་ཙནྡན་དཀར་པོ་ཡིས། །བུ་མོ་ལུས་བྱུགས་རྒྱན་དང་གོས། །ཡང་དག་བརྒྱན་ཏེ་མདུན་བཞག་ནས། །དཀྱིལ་འཁོར་འཇིགས་པ་བྲི་བྱ་སྟེ། །རྩ་སོགས་གསང་སྔགས་རབ་ཏུ་བཟླ། །འབྱུང་པོའི་གཏོར་མ་ཡང་བྱིན་ཏེ། །ཤན་ནག་པོ་མདངས་དང་ལྡན། །མྱོས་བྱེད་བསྲེགས་པ་རོ་ཡི་ཁར། །མཚན་གཅིག་ཐོག་ཐག་སྦྱིན་སྲེག་བྱ། །དེ་ནས་
448a
༄#། །ཐོ་རས་དུས་སུ་ཡང ། །ཁྲག་ཆེན་ཕྱོགས་བཞིར་གཏོར་བྱས་ནས། །མར་ཁུ་ཆེན་པོ་རོ་ལ་བསྐུ། །དེ་ནས་རོ་དེ་ལངས་གྱུར་ཏེ། །ཁྲོ་དང་ལྡན་བའི་ཨག་ཙར་གྱིས། །ས་གསུམ་མོ་ཡི་སྒྲས་འགེངས་བྱེད། །དེ་ཚེ་སྒྲུབ་པོ་སྐྲག་མི་བྱ། །མཱ་མ་ཀི་ཡི་སྦྱོར་བ་སོགས། །སྲུང་བའི་འཁོར་ལོས་བསྲུང་བར་བྱ། །སྐྲག་ན་དེ་མ་ཐག་ཏུ་གསོད། །དེ་ཚེ་བསྲུང་བས་བསྲུངས་བྱས་ནས། །བདག་ཉིད་ལངས་ཏེ་དེ་ཡི་མགོར། །ཡུངས་ཀར་གྱིས་ནི་བརྡེག་པར་བྱ། །དེ་ནས་དེ་ནི་བབས་གྱུར་ཏེ། །སྒྲུབ་པ་པོ་ཡི་མདུན་གནས་ནས། །བཀའ་ནོད་འདི་སྐད་སྨྲ་བར་བྱེད། །སེམས་ཅན་ཆེན་པོ་ཁྱོད་ཅི་འདོད། །བདག་ལ་ཡང་དག་བཀའ་སྩོལ་ཅིག་།རལ་གྲ་མིག་སྨ་ནས་འོག་གམ། །རྐང་མགྱོགས་དེ་བཞིན་བཅུད་ཀྱིས་ལེན། །མི་སྣང་འགུགས་པ་ལས་གང་དག་།བདག་གིས་གཅིག་ཅིག་སྦྱར་བར་བྱ། །དེ་ནས་སྒྲུབ་པོ་དེ་ཡིས་ཀྱང ། །གང་འདོད་སྨྲས་ནས་ཅང་ཏེའུ་བརྡུང ། །དེ་ནས་རོ་ལངས་ཁ་དེ་ནས།། དུ་བ་འཐུལ་ཞིང་མེ་འབར་བ། །དེ་ནས་སྦྲུལ་ནག་ལྟ་བུ་རུ། །རོ་ཡི་ཁ་ནས་འབྱུང་བར་བྱེད། །དེ་དེ་སྒྲུབ་པོས་ཁ་ཡིས་བླང ། །བྱུང་སྟེ་གསེར་གྱི་རལ་གྲིར་འགྱུར། །དེ་ཐོགས་ཚངས་པའི་འཇིག་རྟེན་ཁམས། །སྟེང་དུ་ངེས་པར་འགྲོ་བར་བྱེད། །དེ་བཞིན་ཀུན་དུ་འགྲོ་བར་བྱེད། །དེ་བཞིན་རྫས་ཀུན་གང་ལ་བསྟན། །ཐམས་ཅད་གསེར་འགྱུར་རྩི་ལྟ་བུ། །དེ་བཞིན་
448b
ཐབས་སྒྲུབ་དེ་བྱ་ན། །རོ་ནི་སྔ་མཁོ་བཞིན་འགྱུར་ཏེ། །དེ་ཡིས་སྤྱིན་སྲེག་རབ་བྱས་ནས། །དཀྱིལ་འཁོར་ཡང་དག་ཚིམ་པར་བྱ། །དེ་བས་འདི་ནི་སྒྲུབ་པའི་མཆོག་།དོན་ཀུན་ཡང་དག་འགྲུབ་བྱེད་པ། ། ལས་ཐམས་ཅད་ཀྱི་གཙོ་བོ་སྟེ། །བཅོམ་ལྡན་རྡོ་རྗེ་སེམས་དཔས་གསུངས། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རོ་ལངས་ཆེན་མོའི་ལེའུ་སྟེ་བཅུ་གསུམ་པའོ།། །།དེ་ནས་ང་ཡིས་སྒྲུབ་པོ་ཡི། །དངོས་གྲུབ་སློབ་དཔོན་ལས་བྱུང་ཕྱིར། །རྒྱུད་རྣམས་ཀུན་ལས་གསུངས་པ་ཡི། །སློབ་དཔོན་བཀུར་པའི་ཆོ་ག་བཤད། །སློབ་དཔོན་མེད་པར་གྱུར་ན་ནི། །དངོས་གྲུབ་ཐོབ་པར་མི་འགྱུར་བས། །སློབ་དཔོན་གྲངས་དང་མཚན་ཉིད་ནི། །ཡིད་གཅིག་བསྡུས་ལ་མཉན་པར་གྱིས། །དམ་སྡོམ་གྱི་ནི་སྣོད་གཙང་ལ། །སློབ་དཔོན་མཚན་ཉིད་ཡོངས་རྫོགས་པར། །བྱེད་ཅིང་དང་པོ་ལས་འཇུག་པར། །བྱེད་པ་རྒྱུ་ཡི་སློབ་དཔོན་ནོ། །རི་བོང་འཛིན་པ་སྐུལ་བྱེད་ཅིང ། །དེ་ཡི་སྒྲུབ་པོ་ཞིང་དག་ཅིང ། །ཡེ་ཤེས་སྒྱུ་མའི་སྣོད་རུང་བྱེད། །རྐྱེན་ཀྱི་སློབ་དཔོན་ཆེན་པོའོ། །ལྷན་ཅིག་ཉན་པར་གང་གྱུར་པ། ། དེ་ལས་དགའ་བ་ཡང་དག་ཐོབ། །ཐོབ་པས་ཡང་དག་རབ་མཐར་ཕྱིན། །ལྷན་ཅིག་བྱེད་པའི་སློབ་དཔོན་ནི། །མི་འགྱུར་བྱམས་ལྡན་ཤེས་རབ་ཅན། །སྔགས་རྒྱུད་སྦྱོར་ཤེས་དཀྱིལ་འཁོར་མཁས། །དེ་ཉིད་བཅུ་ཤེས་ཐེག་ཆེན་དགའ། །གསང་བ་ཟུངས་ཐུབ་སློབ་དཔོན་ཡིན། །མིག་བཟང་ཡ་སོ་བཅུ་དྲུག་པ། །ཁུ་འཕྲིག་རྟོག་པ་ཡང་དག་སྤངས། །བླ་མ་དགའ་བ་དད་མོས་ཅན། །ཤིན་ཏུ་རྒྱན་གྱིས་རབ་བརྒྱན་པ།།
449a
༄#། །དད་ལྡན་སྦྱོར་བ་ལ་གོམས་པ། །གཟུགས་བཟང་འདོད་ཆགས་ཀྱིས་མྱོས་བྱེད། །ཤིན་ཏུ་དུལ་བ་ཁྱད་པར་ཅན། །བཀུར་བའི་གནས་སུ་ཡང་དག་བླངས། །དགེ་དང་བསྒོམ་པ་ལ་དགའ་བ། །རྟག་ཏུ་བླ་མ་ལ་གུས་པའི། །སློབ་མས་བླ་མ་འདི་ལྟར་བལྟ། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང ། །དེ་བཞིན་གཤེགས་པ་རིན་ཆེན་འབྱུང ། །དེ་ནི་ཡེ་ཤེས་རྒྱ་མཚོ་ཆེ། །ཡིད་བཞིན་ནོར་བུ་རིན་ཆེན་སྦྱིན། །དེ་ཡི་ཡོན་ཏན་ཐམས་ཅད་གཟུང ། །སྐྱོན་ཀུན་སེམས་ཀྱིས་ཀྱང་མི་བསམ། །ཡོན་ཏན་བཟུང་ནས་དངོས་གྲུབ་འཐོབ། །སྐྱོན་གྱིས་དངོས་གྲུབ་ཉམས་པར་བྱེད། །མཆོད་རྟེན་བཤིག་དང་སྡིག་འདྲའི་ཕྱིར། །དེ་ཡི་གྲིབ་མའང་མི་འགོམ་སྟེ། །སྟན་དང་ལྷམ་དང་བཞོན་པ་དང ། །འགོམ་པར་བྱ་བ་སྨོས་ཅི་དགོས། །རྒྱུ་བ་དང་ནི་མི་རྒྱུ་བའི། །མཆོག་ཀུན་དེ་ཡིས་སྦངས་པར་འགྱུར། །སློབ་དཔོན་སྨོད་པར་བྱེད་པ་དེ། །རྨི་ལམ་དུ་ཡང་མཐོང་མི་བྱ། །ད་ནི་བགེགས་དང་ལོག་འདྲེན་འཛིན། །རིམས་དང་སྤྱུག་དང་གཤིན་རྗེས་འཛིན། ། འཆི་བར་རབ་ཏུ་འགྱུར་བ་སྟེ། །ངན་པ་གཏུམ་པོ་བླུན་ཆེན་ཏེ། །ཕྱོགས་བཞི་དག་ཏུ་སོང་གྱུར་ཡང ། །བློ་ལྡན་རྣམས་ཀྱིས་མི་བསྲུང་བར། །མདུང་ལ་སོགས་པའི་མཚོན་ཆ་ཡིས། །ཁན་མཐོ་བྱེད་པ་བསད། །མདོ་སོགས་བསྟན་པའི་དམྱལ་བ་རུ། །སློབ་དཔོན་སྨོད་པར་བྱེད་པ་དེ། །གནས་པར་འགྱུར་བར་ང་ཡིས་བསྟན། །དེ་བས་བླ་མའི་ཞབས་དྲུང་དུ། །བག་མ་བཞིན་དུ་ངོ་ཚ་བསྲུང ། །གླལ་
449b
དང་དགོད་དང་ལུད་པ་སོགས། །ཁ་ལ་ལག་བས་བཀབ་ནས་སུ། །ཤིན་ཏུ་འཇམ་པར་སྨྲ་བར་བྱ། །མགོ་ཐོད་བཅིང་དང་མཚོན་བྱུག་པ། །བླ་མའི་དྲུང་དུ་མི་བྱའོ། །བྲོ་བརྡུང་བ་དང་བརྐམ་ཚིག་དག། །ཐོས་པའི་ཡུལ་ནས་མི་བྱའོ། །མདུན་འགྲོ་བ་དང་རྐང་པ་བརྐྱང ། །ཡང་དག་ཉིད་དུ་མི་བྱའོ། །ལས་ནི་གང་དག་བྱེད་པའམ། །མཉན་པ་ལ་སོགས་འདོད་པ་ལ། །གཟུང་ཕྱིར་ཐལ་མོ་མ་བཤིག་པར། །གནས་ནས་ལངས་ཏེ་མཐོང་ཡུལ་དུ། །རྒྱབ་ཀྱིས་ཕྱོགས་པར་མི་བྱ་སྟེ། །མཚན་མོ་དང་ནི་ཆུ་བརྒལ་དང ། །གཅོང་རོང་དག་ཏུ་གནས་གྱུར་ན། །བཀའ་ལུང་གཉེར་དུ་དགུམ་པའི་ཕྱིར། །མདུན་དུ་འགྲོ་བ་ཉེས་མི་འགྱུར། །དེ་བས་ཐབས་ནི་ཐམས་ཅད་ཀྱིས། །རྡོ་རྗེ་འཛིན་པ་བླ་མ་མཆོག་།རྗེས་སུ་མཐུན་པས་མཉེས་པར་བྱ། །དེ་མཉེས་སངས་རྒྱས་ཐམས་ཅད་མཉེས། །གང་གིས་སློབ་དཔོན་ཡང་དག་སྨད། ། དེ་ཡིས་རྒྱུད་ཀུན་བསྒྲུབ་པའི་མཆོག་།གཉིད་དང་འདུ་འཛི་རྣམ་སྤངས་ཏེ། །བསྐལ་པ་སྟོང་དུ་ལེགས་བསྒྲུབས་ཀྱང ། །དམྱལ་སོགས་སྒྲུབ་པར་བྱེད་པའོ། །དེ་ཕྱིར་ཀུན་གྱིས་རབ་བསྒྲིམས་ཏེ། ། བསམ་པ་འབྲས་བུ་སྨིན་བྱེད་པའི། །སངས་རྒྱས་འབྲས་བུ་འདོད་པ་ཡིས། །སེམས་ཅན་དད་དང་ལྡན་པས་མཆོད། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་བླ་མ་བཀུར་བའི་ལེའུ་སྟེ་བཅུ་བཞི་པའོ།། །། རྡོ་རྗེ་པདྨོ་སྦྱོར་བ་ལས། །ཡང་དག་ཡེ་ཤེས་སྐྱེ་འགྱུར་བས། །སྒྱུ་མའི་མཆོག་ནི་བུད་མེད་དེ། །དེ་ཡི་མིང་དང་མཚན་ཉིད་བསྟན། །ཧ་སྟི་ནི་དང་ཤངྐི་ནི། །ཀ་མ་ལ་དང་ཙི་ཏྲ་མ། །ཐམས་ཅད་རིགས་ནི་
450a
༄#། །བཞིར་འགྱུར་ཏེ། །ཧ་སྟི་རཀྟ་རོ་ཚ་བ། །སྦོམ་མོ་འདོད་ཆགས་ཡང་དག་ཆ། །པད་ཡངས་ཁ་ནས་ཤ་རུལ་བྲོ། །དཀར་འཆང་མཐའ་ཕྲ་གོ་སྦོམ་བྱེད། །ཤངྐི་རཀྟ་རོ་སྐྱུར་བ། །རྐེད་ཕྲ་སྣ་ལེགས་ཅུང་ཟད་ཁྲོ། །ཁ་ནས་དུད་བྲོ་འགྲོས་དལ་ལེགས། །དཀར་འཆང་དཔལ་གྱི་འབྲས་བུ་འདྲ། །ཀ་མའི་རཀྟའི་རོ་མངར་ཞིང ། །ཤངྐི་རཀྟ་རོ་སྐྱུར་བ། །ཕྲ་སྦོམ་རན་པ་དམར་མོ་སྟེ། །འདོད་ཆགས་མིག་ནི་མི་འཛུམས་ལྟ། །དཀར་འཆང་ཨ་རི་ཤ་འདྲ་བ། །ཙི་ཏྲ་རཀྟ་རོ་མངར་ཞིང ། །ཐུན་རུང་ཁྲོ་བག་དང་བཅས་པ། །ཆགས་མིན་ལྟ་བྱེད་ངོ་གང་པ། །དཀར་འཆང་གཡས་གཡོན་དགྱེ་བ་སྟེ། །འདི་རྣམས་ཡང་དག་ཕྲད་གྱུར་ན། །སྒྲུབ་པ་པོ་ལ་ཚེ་འདི་རུ། །དངོས་གྲུབ་ཡང་དག་སྟེར་བ་སྟེ། །དེ་བས་འདི་རྣམས་འབད་པས་བཙལ། །ཡང་དག་རྙེད་ནས་གང་རུང་དུ། །བ་ལང་བཟའ་ནི་མདའ་ཡི་ནང ། །བཏུང་བས་ཤེལ་ཁམས་རྣམ་པར་འཕེལ། །དེ་ནི་ཐབས་ཀྱིས་སྟེར་བ་ཡིས། །ཡང་དག་ཏུ་ནི་རང་བཞིན་བརྟག་།རང་བཞིན་ནམ་མཁའ་ལྟ་བུ་སྟེ། །དངོས་པོ་ཐམས་ཅད་ཟད་པ་སྟེ། །རྣམ་པར་རྟོག་པ་ཐམས་ཅད་དང ། །བྲལ་བའི་དགའ་བ་ཡང་དག་ཟབ། །བསམ་མེད་ཟད་མེད་ཕྲ་མོ་སྟེ། །དམ་པ་ཞི་བ་རྣམ་དག་པ། །འཆི་མེད་རྡོ་རྗེ་བདུད་རྩི་བརྗོད།། གང་གི་དབུས་སུ་འདབ་བརྒྱད་པ། །སྙིང་པོ་ལྔ་ཡིས་ཡང་དག་བརྒྱན། །དེ་དབུས་དེ་གནས་ཆ་ནས་ལྔ། །ཆ་གཉིས་པ་ནི་བརྒྱད་མཐར་དབྱུང ། །སུམ་ཅུ་བཅུ་པ་ལྔ་ཡི་ནི། །ཆ་གཉིས་ལྔ་པ་དྲུག་པ་
450b
ཡི། །ཐིག་ལེ་རུ་ནི་གཞུག་པ་སྟེ། །སྐྱེས་བུ་གང་གིས་དེ་ལ་ནི། །མིག་གི་འོད་ཟེར་གྱིས་བལྟ་བ། །དེ་ལ་ཅི་བཞིན་གནས་པ་ཡི། །ཡེ་ཤེས་སྐྱེ་བར་ཐེ་ཚོམ་མེད། །ནམ་ཞིག་འགོག་པའི་སེམས་གྱུར་ན། །སངས་རྒྱས་ཀུན་གྱི་མཆོག་འཛིན་པ། །དཔལ་ལྡན་མཁའ་འགྲོ་འདྲ་བར་འགྱུར། །དེ་རིང་ཕན་ཆད་བུ་ཁྱོད་ནི། །དཀྱིལ་འཁོར་ཡང་དག་འདྲི་བ་དང ། །སྒྲུབ་པོ་རྒྱུད་ལ་སྦྱོར་བ་ཡི། །སློབ་དཔོན་ཆེན་པོ་ཉིད་དུ་འགྱུར།། འདི་ནི་སངས་རྒྱས་ཀུན་གྱིས་ཀྱང ། །དབང་བསྐུར་བར་ནི་རབ་བསྔགས་ཏེ། །ཐམས་ཅད་སྔགས་ནི་སྒྲུབ་འགྱུར་ཏེ། །ལས་མཆོག་ཁྱད་པར་ཅན་ཡང་འགྲུབ། །བུ་མོ་འདི་ནི་ཁྱོད་དང་མཐུན། །སེམས་ཅན་ཁྱོད་ཀྱིས་འདོད་པ་གྱིས། །ཡིད་དུ་འོང་བའི་རིག་མ་འདི། །བདེ་གཤེགས་ཀུན་གྱིས་ཁྱོད་སྤྱོད་གནས། །སྟོང་པ་ལ་ནི་སེམས་སྦྱོར་ན། །ཁྱོད་ནི་ཡང་དག་དམ་པར་འགྱུར། །འདི་ནི་བདེ་གཤེགས་བདེ་མཛད་པ། །ཁྱོད་ནི་འདི་ལས་རབ་བྱུང་ངོ ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་དམིགས་པ་དང་བཅས་པའི་ཤེས་རབ་ཀྱི་མཚན་ཉིད་བརྟག་པའི་ལེའུ་སྟེ་བཅོ་ལྔ་པའོ།། །།དེ་ནས་ཡང་ནི་བཤད་བྱ་བ། །དངོས་ཀུན་ཆོ་ག་ཤེས་མེད་ན། །སྒྲུབ་པོ་དངོས་གྲུབ་འབྱུང་མི་འགྱུར། །དེ་ཕྱིར་འདིར་ནི་བརྟུལ་ཞུགས་བསྟན། །སྦྱོར་བའི་རྩོལ་བ་ཐམས་ཅད་ནི། །དེ་ཉིད་རིག་པས་སྤང་བར་བྱ། །རྡོ་རྗེ་སེམས་དང་ངེས་འདུག་པ། །སྤངས་ནས་གཞན་དུ་མི་བྱའོ། །དག་པ་དེ་ཉིད་ལ་གནས་པས། །སྦྱོར་བ་རྣམས་ཀྱང་མི་བྱ་སྟེ། །བདག་མེད་གནས་པའི་སྦྱོར་བ་ཡིས། །ཅི་སྲིད་བར་དུ་སོ་སོར་བརྟག་།དངོས་
451a
༄#། །མེད་གོ་འཕང་ལ་གནས་དང ། །ཐབས་བཟང་དག་དང་ལྡན་པ་ཡིས། །རྒྱུད་ལས་གང་ཅི་འབྱུང་བ་རྣམས། །མ་བརྟགས་པས་ནི་འབྱུང་བར་འགྱུར། །སྒོམ་པའི་སྦྱོར་བའི་སྟོབས་ཀྱིས་ནི། །དངོས་གྲུབ་མཚན་ཉིད་གང་ཡང་རུང ། །དེ་ཀུན་སྐད་ཅིག་ཙམ་ལ་ནི། །རང་ཉིད་གནས་པར་གྱུར་པ་ཡིན། །དེ་བས་དགེ་སློང་དངོས་གནས་དང ། །དེ་བཞིན་རྟོག་གེ་རྒན་པོ་དང ། རང་གི་བུ་དང་རྒྱལ་པོ་ལ། །དེ་ཉིད་ཡང་དག་བཤད་མི་བྱ། །ཇི་ལྟར་མར་མེ་བུམ་ནང་གནས། །ཕ་རོལ་དུ་ནི་འོད་མི་གསལ། །བུམ་པ་དེ་ཉིད་ཆག་གྱུར་ན། །དེ་འོག་མར་མེ་གསལ་བར་འགྱུར། །དེ་བཞིན་རང་ལུས་བུམ་པ་ཉིད། །བླ་མའི་ཁ་ཡིས་ལེགས་བཅག་ནས། །དེ་ཉིད་མར་མེ་ཉིད་ལྟ་བུ། །སྦྱོར་བའི་དེ་ཉིད་སྟོན་པ་ཡིན། །སྦྱོར་བ་དེ་ཉིད་ལ་གནས་ན། །གང་ཚེ་བསྟན་པ་མི་རྟག་ལ། །གནས་ཤིང་འཇིག་རྟེན་པ་སྤངས་ཏེ། །སྤྱོད་པ་ཐམས་ཅད་བྱས་ན་ནི། །དེ་ལ་དེ་ཚེ་སངས་རྒྱས་གཟིགས། །ཀུན་ཏུ་ཐེ་ཚོམ་གཅོད་པ་ཡིས། །རིག་པས་བྱིས་པ་བཞིན་དུ་སྤྱད། །གང་ཚེ་ཆགས་མེད་རྣལ་འབྱོར་པ། །དེ་ཚེ་ཕུན་སུམ་ཚོགས་འཕེལ་འགྱུར། །སྡིག་པ་མ་ལུས་ལྡན་པ་དང ། །གཏི་མུག་སྒྲིབ་པ་རབ་གནས་པ། །སྨྱོན་པའི་རྣལ་འབྱོར་སྦྱོར་བ་ཡིས། །ཟླ་དྲུག་གིས་ནི་དོན་ཡོད་གྲུབ། །རང་ཉིད་སངས་རྒྱས་ཀུན་མཐོང་ཞིང ། །འདོད་པ་ཀུན་གྱིས་རབ་ཏུ་འགེངས། །ཟད་མེད་གཞོམ་དུ་མེད་པ་དང ། །དང་བའི་སྐུ་ཚ་འབྱུང་བར་འགྱུར། །བླ་ན་མེད་པའི་བྱང་ཆུབ་མཆོག་།འབད་པ་མེད་
451b
པར་ཡང་དག་འཐོབ། །འདོད་པ་ཀུན་གྱི་དགའ་མོས་རྣམས། །འབད་བྲལ་བས་ནི་འགྲུབ་པར་འགྱུར། །འགྲོ་དང་འདུག་དང་གནས་པ་ན། །མཆོག་ཏུ་ཟབ་པའི་གནས་ལ་བརྟག་།འོད་གསལ་ཡེ་ཤེས་ལམ་མཁན་པ། །མཚན་ཉིད་རྟོག་པའི་རྣལ་འབྱོར་པའི། །བསམ་གཏན་སྦྱོར་བ་འདི་ཡིས་ནི། །སེམས་ཀྱི་རིན་ཆེན་བརྟན་པར་འགྱུར། །སངས་རྒྱས་བྱང་ཆུབ་རབ་ཞུགས་པ། །བྱིན་གྱིས་བརླབ་པའང་མཛད་པར་འགྱུར། །དེ་ལྟར་གྱུར་པས་ཞུགས་ནས་ཀྱང ། །ཇི་སྲིད་སེམས་ནི་མི་སྐྱོ་བར། །མཉམ་བཞག་ཡིད་ནི་བཟང་པོ་ཡིས། །དེ་ལ་འབད་པས་བསྒོམ་པར་བྱ། །དེ་འོག་ལ་ནི་ཅི་དགའ་བའི། །སྤྱད་པ་ཡིས་ནི་གཅིག་བྱས་ན། །ཅུང་ཟད་སྤྱན་ཕྱེ་བ་ཡི་མཚན། །བྱང་ཆུབ་རྒྱ་ཆེན་འཐོབ་པར་འགྱུར། །དགོད་དམ་སྨྲའམ་འདུག་པའམ། །ལ་ལར་རབ་ཏུ་གར་བྱེད་པར། །ཇི་སྲིད་སྐྱོ་བར་མི་འགྱུར་བར། །བསྒོམ་པའི་སེམས་ལ་ཞེན་པར་བྱ། །དེ་ལྟའི་དམ་ཚིག་ལྡན་གྱུར་ཅིག་།རྣམ་པར་མི་རྟོག་སྔགས་པ་ཡིས། །དུས་ཀྱི་ངེས་པས་ཡོངས་སྤངས་ནས། །བླ་མེད་བྱང་ཆུབ་འཐོབ་པར་འགྱུར། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ཤེས་བྱེད་ཀུན་ཏུ་སྤྱོད་པའི་ལེའུ་སྙེ་བཅུ་དྲུག་པའོ།། །།དེ་ནས་མཁའ་འགྲོ་དེ་དག་ཐམས་ཅད་གཅིག་ཏུ་འདུས་ནས་བཅོམ་ལྡན་འདས་རྡོ་རྗེ་འཛིན་པ་ལ་ཚིགས་སུ་བཅད་པས་བསྟོད་པ། སངས་རྒྱས་ཀུན་གྱི་རང་བཞིན་ལས། །བྱུང་བའི་ལྷ་སྟེ་ཁྱོད་མཆོག་པས། །སེམས་དཔའ་ཀུན་གྱི་ཕྱག་རྒྱ་ཆེ། །མཁའ་འགྲོ་ཆེན་པོ་ཕྱག་འཚལ་ལོ། །གཏི་མུག་
452a
༄#། །ཐམས་ཅད་འོད་གསལ་བ། །མཁའ་འགྲོ་སངས་རྒྱས་ཆེན་པོ་སྟེ། །གཟུགས་སྣང་ཆོས་ནི་རྣམ་དག་པ། །བདེ་གཤེགས་མཁའ་འགྲོ་ཁྱོད་ཕྱག་འཚལ། །ང་རྒྱལ་ཐམས་ཅད་འོད་གསལ་བ། །མཁའ་འགྲོ་རེ་འདོད་སྐོང་བ་སྟེ། །ཐིམ་སོགས་ཆོས་ནི་རྣམ་དག་པ། །རིན་ཆེན་མཁའ་འགྲོ་ཁྱོད་ཕྱག་འཚལ། །འདོད་ཆགས་ཐམས་ཅད་འོད་གསལ་བ། །སྐྱོན་གྱིས་གོས་མེད་མཁའ་འགྲོ་ཆེ། །མཚན་མར་འཛིན་པ་རྣམ་དག་པ། །པདྨ་མཁའ་འགྲོ་ཁྱོད་ཕྱག་འཚལ། །ཕྲག་དོག་ཆོས་ནི་འོད་གསལ་བ། །མཁའ་འགྲོ་སྣ་ཚོགས་ལས་བྱེད་པ། །མངོན་པར་འདུ་བྱེད་ཆོས་ཀུན་དག་།སྣ་ཚོགས་མཁའ་འགྲོ་ཕྱག་འཚལ་བསྟོད། །མཚན་མཆོག་འདི་ཡིས་ཁྱོད་བསྟོད་པས། །གང་ཟག་དེ་ཡང་བསོད་ནམས་ཚོགས། །ཡེ་ཤེས་ཚོགས་ཆེན་ཡོངས་རྫོགས་ནས། །སངས་རྒྱས་འགྱུར་བར་ཐེ་ཚོམ་མེད། །དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས་ཀུན་ཏུ་བཟང་པོའི་བདེ་བ་ཆེན་པོ་ནམ་མཁའི་དབྱིངས་ཐམས་ཅད་དུ་ཁྱབ་པའི་བདག་ཉིད་ཆེན་པོས། དེ་བཞིན་གཤེགས་པ་ཐམས་ཅད་ཀྱི་སྙིང་པོ་མི་ཤིགས་པའི་ཟླ་བ་སྐུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རང་གི་ཐུགས་ཀའི་མི་ཤིགས་པའི་ཐིག་ལེ་ལས་ཤིན་ཏུ་དགྱེས་པ་ཆེན་པོ་ཞེས་བྱ་བའི་འོད་ཟེར་གྱི་ཚོགས་ཕྱུང་སྟེ། དེ་བཞིན་གཤེགས་པ་ཐམས་ཅད་ཀྱི་གསང་བའི་སྙིང་པོ་ཟླ་བའི་ཐིག་ལེའི་དབུས་སུ་རྒྱས་པར་བྱས་ཏེ། ནམ་མཁའི་
452b
དབྱིངས་ཐམས་ཅད་དུ་ཡང་སྣང་བར་བྱས་ནས་སྟེང་འོག་ཏུ་ཡང་བཞུགས་ཏེ། མ་ལུས་ཤིང་ལུས་པ་མེད་པའི་རི་དང་སེམས་ཅན་ཐམས་ཅད་ལ་གསལ་བར་བྱས་ནས་ཤིན་ཏུ་དགྱེས་པ་ཆེན་པོ་\?\་མཉེས་པར་བྱས་ཏེ་སླར་ལོག་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་བདེ་བའི་བདག་པོའི་སྙིང་པོའི་མཆོག་གི་ཟླ་བའི་ཐིག་ལེའི་དབུས་ན་བདེ་བར་ཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འོད་ཟེར་གྱི་ཚོགས་ཀྱི་ཕྲེང་བ་མཆོག་ཏུ་བདེ་བར་གྱུར་པའི་སྙིང་པོ་དེས་བསྐུལ་བ་ན་གར་མཛད་ཅིང་རང་རང་གི་ཏིང་ངེ་འཛིན་དུ་དམིགས་ནས་བཅོམ་ལྡན་འདས་དཔལ་ཀུན་ཏུ་བཟང་པོའི་ཐུགས་ཀའི་ཟླ་བའི་ཐིག་ལེའི་དབུས་སུ་གསང་བའི་དགྱེས་པ་ཆེན་པོའི་བདེ་བར་གཅིག་ཏུ་བསྡུས་པར་གྱུར་ཏེ། རང་རང་གི་སྐུ་བུད་མེད་ཀྱི་ཚུལ་དུ་བསྐྱེད་ནས་བཅོམ་ལྡན་འདས་ཀྱི་ཐུགས་ཀ་ནས་མངོན་པར་བྱུང་བར་གྱུར་ཏོ། །དེ་ནས་མཁའ་འགྲོའི་ཚོགས་དེ་དག་ཐམས་ཅད་རབ་ཏུ་དགའ་ནས་ཅ་ཅོའི་སྒྲ་ཡང་དག་པར་འབྱིན་ཅིང་དབྱངས་ཆེན་པོ་བརྗོད་པར་གྱུར་ཏོ། །ཀྱེ་མའོ་རྡོ་རྗེ་སེམས་དཔའ་ཡི། །རྡོ་རྗེ་ཤིན་ཏུ་དགྱེས་ཆེན་པོ། །ཀྱེ་མའོ་སྣ་ཚོགས་ཐབས་ནི་བདེ་བྱེད་ཆེ། །སྣ་ཚོགས་ཡེ་ཤེས་བདེ་བ་ཆེ། །ཀྱེ་མའོ་ཀུན་ཏུ་བཟང་པོ་ཡི། །དགེ་བའི་ཡེ་ཤེས་བདེ་བྱེད་ཆེ། ། གང་བདེའི་ཕྱིར་ནི་རིག་མ་ཡི། །པདྨ་ལ་ནི་གནས་པར་མཛོད། །ཀྱེ་མའོ་རེག་པ་ཤིན་ཏུ་ཟབ། །ཤེས་རབ་ཕ་རོལ་ཕྱིན་མ་འདི། །སེམས་ཅན་ཀུན་ལ་ཤེས་རབ་ཀྱི། །མུན་པ་ཐིབས་པོ་སེལ་བར་མཛད།།
453a
༄#། །ཀྱེ་མའོ་ཐམས་ཅད་ངོ་མཚར་ཆེ། །མཁའ་འགྲོ་འདྲ་བར་གར་མཛད་ཅིང ། །རྣམ་པར་སྣང་མཛད་མྱང་བ་དང ། །མཉེ་བ་དང་ནི་འཕྲོག་པ་མཆོག་།ཀྱེ་མའོ་ཤིན་ཏུ་རབ་ཏུ་དགྱེས། །སྐལ་ལྡན་སྐལ་སྤྱོད་པ་དང་ནི། །སྣ་ཚོགས་སྐལ་བས་བདེ་བྱེད་ཆེ། །སྣ་ཚོགས་རྡོ་རྗེ་ཤིན་ཏུ་མཛེས། །དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཆང་ཆེན་པོས་ཏིང་ངེ་འཛིན་ལས་བཞེངས་ཏེ་འཁོར་གྱི་དཀྱིལ་འཁོར་ལ་རྣམ་པར་བལྟས་ཏེ་འདི་སྐད་ཅེས་བཀའ་སྩལ་ཏོ། །ཱ་ལི་དང་ནི་ཀཱ་ལི་དང ། །དེ་བྱུང་ཟླ་བ་རྣམ་པ་གཉིས། །མེ་ལོང་ལྟ་བུའི་ཡེ་ཤེས་ཏེ། །གཅིག་ཏུ་གྱུར་པ་མཉམ་ཉིད་དོ། །ས་བོན་མཚན་མར་གྱུར་པ་ནི། །སོ་སོར་རྟོག་པར་ངས་བཤད་དོ། །དེ་བྱུང་སངས་རྒྱས་ཐམས་ཅད་ཀྱིས། །འགྲོ་དོན་བྱེད་པ་བྱ་ནན་ཏན། ། གཟུགས་བརྙན་རྫོགས་པ་ཆོས་དབྱིངས་ཏེ། །ལྷ་ཡི་དབང་པོ་སངས་རྒྱས་བསྐྱེད། །དེ་ལ་བར་མས་ཁུ་བས་བསྐྱེད། །བསྐུར་བས་རང་གི་ལྷར་བསྐྱེད་ནས། །བྱིན་གྱིས་བརླབ་པ་བྱ་བ་ནི། །རྒྱུད་རྣམས་ཀྱི་ནི་ཐུན་མོང་ངོ ། །གསང་དང་གསང་ཆེན་ཤིན་ཏུ་གསང ། །རྣལ་འབྱོར་རྣལ་འབྱོར་ཆེན་པོ་དང ། །རྗེས་སུ་རྣལ་འབྱོར་ཞེས་བྱ་དང ། །སྟོང་བ་དང་ནི་ཤིན་ཏུ་སྟོང ། །ཆེན་པོ་སྟོང་པ་ཞེས་བྱ་དང ། །དགའ་དང་དགའ་བ་བར་མ་དང ། །དགའ་བྲལ་གྱི་ནི་དགའ་བ་རྣམས། །རྒྱུད་རྣམས་ཀུན་གྱི་སྤྱི་བོའོ། །ཕྱིར་བཟློག་གཉིས་ཀྱི་ཆོ་ག་དང ། །གསང་དང་ཤེས་རབ་ཡེ་ཤེས་དང ། །
453b
ཁ་སྦྱོར་འབྱེད་པའི་ཆོ་ག་དང ། །གཏོར་མ་རྡོ་རྗེའི་བཟླས་པ་དང ། །དྲག་ཤུལ་སྒྲུབ་པའི་ཆོ་ག་དང ། །རབ་ཏུ་གནས་དང་དཀྱིལ་འཁོར་སྒྲུབ། །གསང་བའི་དེ་ཉིད་བཅུ་ཡིན་ན། །དཀྱིལ་འཁོར་ཏིང་འཛིན་ཕྱག་རྒྱ་དང ། །སྟང་སྟབས་འདུག་སྟངས་བཟླས་བརྗོད་དང ། །སྦྱིན་སྲེག་མཆོད་པ་ལས་སྦྱོར་དང ། །སླར་སྡུད་པ་ཡི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཡང་དག་དེ་ཉིད་དངོས་པོ་མི་ཤེས་པར། །གསང་སྔགས་སྨྲ་བ་པོ་ཡིན་ཞེས་བརྗོད་པ། །དེ་དག་མངོན་པའི་ང་རྒྱལ་གསང་སྔགས་ཆོ་ག་འཆད། །དེ་ནི་དམ་ཉམས་འདི་དང་ཕ་རོལ་བརླག་།ཉམས་པས་བདུད་ཀྱིས་བཟུང་ནས་ཤི་ནས་དམྱལ་བར་འགྲོ། །སེམས་ཅན་རྣམས་ལ་རབ་བརྟེན་ཏོ། །བྱང་ཆུབ་དམ་པ་ཐོབ་འགྱུར་བ། །སེམས་ཅན་སླུ་བར་མི་བྱ་སྟེ། །བདེ་གཤེགས་ལས་ལ་སེམས་ཅན་སྦྱར། །གང་ཞིག་སྦྱོར་འདི་མི་བརྩོན་པས། །རྐང་ལག་མིག་སོགས་སྦྱིན་པ་དང ། །དཀའ་ཐུབ་ཅི་འདྲ་སྤྱད་བྱས་ཀྱང ། །བདུད་རྩི་རོ་ཐོབ་མི་ནུས་སོ། །རྣལ་འབྱོར་གཅིག་ཅིག་ཤེས་བྱས་ནས། །དབེན་པར་སོང་སྟེ་རབ་འབད་ན། །སྡིག་དག་ཚེ་འདིར་སངས་རྒྱས་འགྲུབ། །ཆོས་བདག་མེད་པར་རབ་བསྒོམས་པས། །ཐམས་ཅད་མཁྱེན་པ་ཁོང་དུ་ཆུད། །ཐབས་ཤེས་གཉིས་ཀྱི་འཇོ་སྒེག་གིས། །གསང་བ་ལྔ་ཡི་བདག་ཉིད་མཆོད། །དངོས་པོ་ཐམས་ཅད་དངོས་མེད་པར། །བཞི་བཅུའི་དོན་ནི་རྟོགས་པ་དང ། །རྡོ་རྗེ་པདྨའི་དབང་བསྐུར་བས། །བདུད་རྩི་ཡིས་ནི་དགའ་བར་བྱེད། །གསང་བར་བྱ་བའི་ཆོས་
454a
༄#། །གསང་བས། །གསང་ཞིང་སྦས་ཏེ་སྤྱད་པར་བྱ། །འདོད་པའི་ཡོན་ཏན་ལྔ་ལས་ནི། །རྣལ་འབྱོར་སེམས་པས་སྤྱད་བྱ་ཞིང ། །དེ་བཞིན་བཟའ་དང་བཏུང་བྱས་ནས། །སེམས་ཅན་ཐམས་ཅད་དབང་དུ་བྱེད། །འདི་ལ་ཁྲུས་དང་གཙང་སྦྲ་མེད་དེ་མཆོད་ཕྱིར་ཐོགས་པའང་མེད། །དཀྱིལ་འཁོར་སྦྱིན་སྲེག་མེད་དེ་དུས་དང་གཟའ་ཚེས་མེད། །གཏོར་མ་ལ་སོགས་བྱ་བར་བྱ་བ་མེད་དེ་མཆོག་གི་རབ་མཆོག་དང་པོའོ།། །།རྡོ་རྗེ་སེམས་དཔའི་སྒྲུབ་པ་ཡང་དག་འདི་ཉིད་ཡིན་ཏེ་བརྩོན་བར་བྱ། དེ་ནས་མཁའ་འགྲོ་དེ་དག་ཐམས་ཅད་རབ་ཏུ་དགའ་ནས། བཅོམ་ལྡན་འདས་རྡོ་རྗེ་འཛིན་པ་ཆེན་པོ་ལ་ལེགས་སོ་ཞེས་གསོལ་ཏེ། ལེགས་སོ་ལེགས་སོ་བདེ་བྱེད་ཆེ། །ལེགས་སོ་ལེགས་སོ་ཡེ་ཤེས་ཆེ། །ལེགས་སོ་ལེགས་སོ་བདེ་བ་ཆེ།། ལེགས་སོ་ལེགས་སོ་སྣ་ཚོགས་ཆེ། །ལེགས་སོ་ལེགས་སོ་ཤེས་རབ་ཆེ། །ལེགས་སོ་ལེགས་སོ་དགྱེས་པ་ཆེ། །དེ་ནས་བཅོམ་ལྡན་འདས་རྡོ་རྗེ་འཛིན་བ་ཆེན་པོས། ཐུགས་རྗེ་ཆེན་པོའི་ཐུགས་རང་གི་ཐུགས་ཡང་དག་པ་ལ་དམིགས་ནས་ཅང་མི་གསུང་བར་བཞུགས་སོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་རྣལ་འབྱོར་ཆེན་པོའི་དེ་ཁོ་ན་ཉིད་ངེས་པ་ཞེས་བྱ་བ། དཔལ་ཨཽ་ཌྱཱན་གྱི་གསང་བའི་དགོན་པ་ནས་བྱུང་བ་རྫོགས་སོ།། །།རྒྱ་གར་གྱི་མཁན་པོ་ཀ་མ་ལ་གུཔྟ་དང ། བོད་ཀྱི་ལོཙྪ་བ་ཆེན་པོ་མངའ་བདག་ལྷ་ཡེ་ཤེས་རྒྱལ་མཚན་གྱིས་
454b
བསྒྱུར་ཅིང་ཞུས་ཏེ་གཏན་ལ་ཕབ་པ།། །།