rKTs


H79

(e-text produced by ACIP)

see text in transliteration
449a
རྒྱ་གར་སྐད་དུ། ཨཱརྱ་ཨ་ཙི་ན་ཏྱ་བུདྡྷ་བི་ཥ་ཡ་ནི་ར་དེ་ཤཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་ན་དགེ་སློང་སྟོང་དུ་ཚང་བའི་དགེ་འདུན་ཆེན་པོ་དང ། བྱང་ཆུབ་སེམས་དཔའ་ཁྲི་དང་ཐབས་གཅིག་ཏུ་བཞུགས་ཏེ། འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་རྣམས་དང ། གནས་གཙང་མའི་ལྷའི་བུ་རྣམས་དང་ཡང་ཐབས་གཅིག་གོ་།དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་
449b
ཡོངས་སུ་བསྐོར་ཏེ་མདུན་གྱིས་བལྟས་ནས་ཆོས་སྟོན་ནོ། །ཡང་དེའི་ཚེ་འཇམ་དཔལ་གཞོན་ནུར་གྱུར་པ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ་།ལྷའི་བུ་དཔལ་བཟང་ཡང་འཁོར་དེ་ཉིད་དུ་འདུས་པར་གྱུར་ཏེ་འདུག་གོ་།དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། ངས་ཁྱོད་ལ་བསྐུལ་གྱི། ཁྱོད་ཀྱིས་ཆོས་དང་ལྡན་པའི་གཏམ་ལས་བརྩམས་ཏེ། ལྷའི་འཁོར་འདི་དང ། བྱང་ཆུབ་སེམས་དཔའ་འདི་དག་ལ་སྤོབས་པར་གྱིས་ཤིག་།འཇམ་དཔལ་གྱིས་གསོལ་པ། བཅོམ་ལྡན་འདས། བདག་གིས་ཅི་ལས་བརྩམས་ཏེ། སྤོབས་པར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་སངས་རྒྱས་ཀྱི་ཡུལ་ལས་བརྩམས་ཏེ་སྤོབས་པར་གྱིས་ཤིག་།གསོལ་པ། བཅོམ་ལྡན་འདས། སངས་རྒྱས་ཀྱི་ཡུལ་ནི་གང་མིག་གི་ཡུལ་མ་ལགས་པ་དང ། གཟུགས་ཀྱི་ཡུལ་མ་ལགས་པ་དང ། རྣ་བའི་ཡུལ་མ་ལགས་པ་དང ། སྒྲའི་ཡུལ་མ་ལགས་པ་དང ། སྣའི་ཡུལ་མ་ལགས་པ་དང ། དྲིའི་ཡུལ་མ་ལགས་པ་དང ། ལྕེའི་ཡུལ་མ་ལགས་པ་དང ། རོའི་ཡུལ་མ་ལགས་པ་དང ། ལུས་ཀྱི་ཡུལ་མ་ལགས་པ་དང ། རེག་བྱའི་ཡུལ་མ་ལགས་པ་དང ། ཡིད་ཀྱི་ཡུལ་མ་ལགས་པ་དང ། ཆོས་ཀྱི་ཡུལ་མ་ལགས་པ་དེ་སངས་རྒྱས་ཀྱི་ཡུལ་ཞེས་བགྱིའོ། །བཅོམ་ལྡན་འདས། ཡུལ་ཁྱད་པར་མ་མཆིས་པ་ནི་སངས་རྒྱས་ཀྱི་ཡུལ་ལགས་ཏེ། བཅོམ་ལྡན་འདས། རིགས་ཀྱི་བུའམ།
450a
༄#། །རིགས་ཀྱི་བུ་མོ་སངས་རྒྱས་ཀྱི་ཡུལ་ཁོང་དུ་ཆུད་པར་འཚལ་བས་ཁོང་དུ་ཆུད་པ་མ་མཆིས་པའི་ཚུལ་དུ་སངས་རྒྱས་ཀྱི་ཡུལ་འདི་ལྟར་ཁོང་དུ་ཆུད་པར་བགྱིའོ། ། བཅོམ་ལྡན་འདས། དེ་བཞིན་གཤེགས་པས་བྱང་ཆུབ་བརྙེས་པའི་ཡུལ་ཅི་ལགས། བཀའ་སྩལ་པ། འཇམ་དཔལ། ལྟ་བར་འགྱུར་བ་མཉམ་པ་ཉིད་ཀྱི་ཕྱིར་སྟོང་པ་ཉིད་ནི་ངས་བྱང་ཆུབ་ཐོབ་པའི་ཡུལ་ལོ། །མཚན་མ་མཉམ་པ་ཉིད་ཀྱི་ཕྱིར་མཚན་མ་མེད་པ་ནི་ཡུལ་ལོ། །ཁམས་གསུམ་པ་མཉམ་པ་ཉིད་ཀྱི་ཕྱིར་སྨོན་པ་མེད་པ་ནི་ཡུལ་ལོ། །འདུ་བྱེད་མཉམ་པ་ཉིད་ཀྱི་ཕྱིར་མངོན་པར་འདུ་བྱ་བ་མེད་པ་ནི་ཡུལ་ལོ། །འདུས་བྱས་མཉམ་པ་ཉིད་ཀྱི་ཕྱིར་སྐྱེ་བ་མེད་པ་དང ། འབྱུང་བ་མེད་པ་དང ། འདུ་བྱེད་པ་མེད་པ་ནི་ཡུལ་ལོ། །གསོལ་པ། བཅོམ་ལྡན་འདས།་འདུས་མ་བགྱིས་ཀྱི་ཡུལ་གང་ལགས། བཀའ་སྩལ་པ། འཇམ་དཔལ། སེམས་མེད་པ་ནི་འདུས་མ་བྱས་ཀྱི་ཡུལ་ལོ། །གསོལ་པ། བཅོམ་ལྡན་འདས། སེམས་མ་མཆིས་པ་ནི་སངས་རྒྱས་ཀྱི་ཡུལ་ལགས་ཏེ། དེ་ལ་བརྗོད་པ་མ་མཆིས་ལགས་སོ། །བརྗོད་པ་མ་མཆིས་པ་ལ་བསྟན་པ་མ་མཆིས་པ་ལགས་སོ། །བསྟན་པ་མ་མཆིས་པ་ལ་མངོན་པར་བརྗོད་པ་མ་མཆིས་པ་ལགས་སོ། །བཅོམ་ལྡན་འདས། མངོན་པར་བརྗོད་པ་མ་མཆིས་པའི་ཡུལ་ནི་སངས་རྒྱས་ཀྱི་ཡུལ་ལགས་སོ། །བཀའ་སྩལ་པ། འཇམ་དཔལ། སངས་རྒྱས་ཀྱི་ཡུལ་
450b
གང་དུ་བཙལ་བར་བྱ། གསོལ་པ། བཅོམ་ལྡན་འདས། སངས་རྒྱས་ཀྱི་ཡུལ་ནི་སེམས་ཅན་ཐམས་ཅད་ཀྱི་ཉོན་མོངས་པ་རྣམས་ལས་ཡོངས་སུ་བཙལ་བར་བགྱི་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། འདི་ལྟ་སྟེ། སེམས་ཅན་ཐམས་ཅད་ཀྱི་ཉོན་མོངས་པ་ཡོངས་སུ་རྟོགས་པ་ནི་ཉན་ཐོས་དང ། རང་སངས་རྒྱས་ཐམས་ཅད་ཀྱི་ཡུལ་མ་ལགས་ཀྱི། གང་འདི་སེམས་ཅན་ཐམས་ཅད་ཀྱི་ཉོན་མོངས་པ་ཡོངས་སུ་རྟོགས་པ་དེ་ནི་སངས་རྒྱས་ཀྱི་ཡུལ་ལགས་པའི་སླད་དུའོ། །བཀའ་སྩལ་པ། འཇམ་དཔལ། སངས་རྒྱས་ཀྱི་ཡུལ་ལ་འཇུག་པའམ། ལྡོག་པ་ཡོད་དམ་ཅེ་ན། འདི་ལྟར་སངས་རྒྱས་ཀྱི་ཡུལ་སེམས་ཅན་ཐམས་ཅད་ཀྱི་ཉོན་མོངས་པ་རྣམས་ལས་ཡོངས་སུ་བཙལ། གསོལ་པ། བཅོམ་ལྡན་འདས། སངས་རྒྱས་ཀྱི་ཡུལ་ནི་འཇུག་པ་མ་མཆིས། ལྡོག་པ་མ་མཆིས་ལགས་སོ། །བཀའ་སྩལ་པ། འཇམ་དཔལ། གལ་ཏེ་སངས་རྒྱས་ཀྱི་ཡུལ་འཇུག་པ་མེད་ཅིང ། ལྡོག་པ་མེད་ན། སངས་རྒྱས་ཀྱི་ཡུལ་ཇི་ལྟར་སེམས་ཅན་ཐམས་ཅད་ཀྱི་ཉོན་མོངས་པ་རྣམས་ལས་ཡོངས་སུ་ཤེས། གསོལ་པ། བཅོམ་ལྡན་འདས། ཇི་ལྟར་སངས་རྒྱས་ཀྱི་ཡུལ་འཇུག་པ་མ་མཆིས་ཤིང ། ལྡོག་པ་མ་མཆིས་པ་དེ་བཞིན་དུ། ཉོན་མོངས་པ་དེ་དག་གི་རང་བཞིན་གང་ལགས་པ་དེ་ཡང་འཇུག་པ་མ་མཆིས་ཤིང ། ལྡོག་པ་མ་མཆིས་པ་ལགས་སོ། །བཀའ་སྩལ་པ། འཇམ་དཔལ། ཉོན་མོངས་པ་རྣམས་ཀྱི་རང་བཞིན་ཇི་ལྟ་བུ། གསོལ་པ། བཅོམ་ལྡན་འདས།
451a
༄#། །སངས་རྒྱས་ཀྱི་ཡུལ་གྱི་རང་བཞིན་གང་ལགས་པ་དེ་ཉིད་ཉོན་མོངས་པ་ཐམས་ཅད་ཀྱི་རང་བཞིན་ལགས་སོ། །བཅོམ་ལྡན་འདས། གལ་ཏེ་ཉོན་མོངས་པ་རྣམས་ཀྱི་རང་བཞིན་ཡང་གཞན་དུ་གྱུར་ལ། སངས་རྒྱས་ཀྱི་ཡུལ་གྱི་རང་བཞིན་ཡང་གཞན་ཞིག་ལགས་ན་ནི། དེ་བཞིན་གཤེགས་པས་ཆོས་ཐམས་ཅད་མཉམ་པ་ཉིད་དུ་མངོན་པར་རྫོགས་པར་སངས་རྒྱས་སོ། །ཞེས་ཀྱང་བསྟན་པར་མི་འགྱུར་བ་ཞིག་ལ། བཅོམ་ལྡན་འདས། འདི་ལྟར་ཉོན་མོངས་པ་རྣམས་ཀྱི་རང་བཞིན་གང་ལགས་པ་དེ་ཉིད་སངས་རྒྱས་ཀྱི་ཡུལ་གྱི་རང་བཞིན་ལགས་ཏེ། དེའི་སླད་དུ་དེ་བཞིན་གཤེགས་པས་ཆོས་ཐམས་ཅད་མཉམ་པ་ཉིད་དུ་མངོན་པར་རྫོགས་པར་སངས་རྒྱས་སོ། །ཞེས་སྟོན་ལགས་སོ། །བཀའ་སྩལ་པ། འཇམ་དཔལ། ཁྱོད་ཀྱིས་དེ་བཞིན་གཤེགས་པ་མཉམ་པ་ཉིད་དུ་གང་གིས་གནས་པ་ཤེས་སམ། གསོལ་པ། བཅོམ་ལྡན་འདས། འཚལ་ལགས་སོ། །བཀའ་སྩལ་པ། འཇམ་དཔལ། དེ་བཞིན་གཤེགས་པ་མཉམ་པ་ཉིད་གང་གིས་གནས། །གསོལ་པ། བཅོམ་ལྡན་འདས། བྱིས་པ་སོ་སོའི་སྐྱེ་བོ་རྣམས་མཉམ་པ་ཉིད་གང་ལ་གནས་ནས་འདོད་ཆགས་དང ། ཞེ་སྡང་དང ། གཏི་མུག་ཀུན་དུ་འབྱུང་བའི་མཉམ་པ་ཉིད་དེས་དེ་བཞིན་གཤེགས་པ་གནས་ལགས་སོ། །བཀའ་སྩལ་པ། འཇམ་དཔལ། བྱིས་པ་སོ་སོའི་སྐྱེ་བོ་རྣམས་མཉམ་པ་ཉིད་གང་ལ་གནས་ཏེ་འདོད་ཆགས་
451b
དང།་ཞེ་སྡང་དང ། གཏི་མུག་ཀུན་དུ་འབྱུང ། གསོལ་པ། སྟོང་པ་ཉིད་དང ། མཚན་མ་མ་མཆིས་པ་དང ། སྨོན་པ་མ་མཆིས་པ་མཉམ་པ་ཉིད་ལ་གནས་པ་རྣམས་ཀྱི་མཉམ་པ་ཉིད་དེས་དེ་བཞིན་གཤེགས་པ་གནས་ལགས་སོ། །བཀའ་སྩལ་པ། འཇམ་དཔལ། ཅི་སྟོང་པ་ཉིད་ལ་འདོད་ཆགས་དང ། ཞེ་སྡང་དང ། གཏི་མུག་ཡོད་དམ། གསོལ་པ། བཅོམ་ལྡན་འདས། མཆིས་པ་གང་གིས་སྟོང་པ་ཉིད་མཆིས་པའི་མཆིས་པ་དེས་འདོད་ཆགས་དང ། ཞེ་སྡང་དང ། གཏི་མུག་རྣམས་མཆིས་ལགས་སོ། །བཀའ་སྩལ་པ། འཇམ་དཔལ། ཡོད་པ་གང་གིས་སྟོང་པ་ཉིད་ཡོད་ཅིང ། ཡོད་པ་གང་གིས་འདོད་ཆགས་དང ། ཞེ་སྡང་དང ། གཏི་མུག་རྣམས་ཡོད། གསོལ་པ། བཅོམ་ལྡན་འདས། ཡི་གེ་དང ། སྐད་དང ། སྒྲ་དང ། བརྗོད་པའི་མཆིས་པས་སྟོང་པ་ཉིད་མཆིས་ལགས་སོ། །ཡི་གེ་དང ། སྐད་དང ། སྒྲ་དང ། བརྗོད་པ་མཆིས་པས་འདོད་ཆགས་དང ། ཞེ་སྡང་དང ། གཏི་མུག་རྣམས་མཆིས་ལགས་སོ། །གསོལ་པ། བཅོམ་ལྡན་འདས་ཀྱིས་འདི་སྐད་དུ། དགེ་སློང་དག་།མ་སྐྱེས་པ་དང ། མ་བྱུང་བ་དང ། མ་བྱས་པ་དང ། མངོན་པར་འདུས་མ་བྱས་པ་དང ། མངོན་པར་འདུ་མི་བྱེད་པ་ནི་ཡོད་དེ། དགེ་སློང་དག། མ་སྐྱེས་པ་དང ། མ་བྱུང་བ་དང ། མ་བྱས་པ་དང ། མངོན་བར་འདུས་མ་བྱས་པ་དང ། མངོན་པར་འདུ་མི་བྱེད་པ་ནི་མེད་པ་མ་ཡིན་ནོ། །དགེ་སློང་དག་།གལ་ཏེ་མ་སྐྱེས་པ་དང ། མ་བྱུང་བ་དང ། མ་བྱས་པ་དང །
452a
༄#། །མངོན་པར་འདུས་མ་བྱས་པ་དང ། མངོན་པར་འདུ་མི་བྱེད་པ་མེད་དུ་ཟིན་ན། སྐྱེས་པ་དང ། བྱུང་བ་དང ། བྱས་པ་དང ། མངོན་པར་འདུས་བྱས་པ་དང ། མངོན་པར་འདུ་བྱེད་པ་འདི་དག་ལ་འབྱུང་བར་གདགས་པར་མི་འགྱུར་བ་ཞིག་ན། དགེ་སློང་དག་།འདི་ལྟར་མ་སྐྱེས་པ་དང ། མ་བྱུང་བ་དང ། མངོན་པར་འདུས་མ་བྱས་པ་དང ། མངོན་པར་འདུ་མི་བྱེད་པ་ཡོད་དེ། དེའི་ཕྱིར་སྐྱེས་པ་དང ། བྱུང་བ་དང ། བྱས་པ་དང ། མངོན་པར་འདུས་བྱས་པ་དང ། མངོན་པར་འདུ་བྱེད་པ་འདི་དག་ལས་འབྱུང་བར་གདགས་སོ། ། ཞེས་བཀའ་སྩལ་པ་དེ་བཞིན་དུ། བཅོམ་ལྡན་འདས། གལ་ཏེ་སྟོང་པ་ཉིད་མ་མཆིས་སུ་ལགས་ན། འདོད་ཆགས་དང ། ཞེ་སྡང་དང ། གཏི་མུག་གི་ཉོན་མོངས་པ་འདི་དག་ལས་འབྱུང་བར་གདགས་པར་མི་འགྱུར་བ་ཞིག་ན། བཅོམ་ལྡན་འདས། འདི་ལྟར་སྟོང་པ་ཉིད་ནི་མཆིས་པ་དེའི་སླད་དུ་འདོད་ཆགས་དང ། ཞེ་སྡང་དང ། གཏི་མུག་གི་ཉོན་མོངས་པ་རྣམས་ལས་འབྱུང་བར་གདགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་ཇི་སྐད་བསྟན་པ་དེ་དེ་ལྟ་ཡིན་དུ་ཟིན་ན། གང་སུ་དག་སྟོང་པ་ཉིད་ལ་གནས་པ་དེ་དག་ཐམས་ཅད་འདོད་ཆགས་དང ། ཞེ་སྡང་དང ། གཏི་མུག་ལ་གནས་པར་འགྱུར་རོ། །གསོལ་པ། བཅོམ་ལྡན་འདས། རྣལ་འབྱོར་སྤྱོད་པ་གང་འདོད་ཆགས་དང ། ཞེ་སྡང་དང །
452b
གཏི་མུག་ལས་གུད་དུ་སྟོང་པ་ཉིད་འཚོལ་བ་དེ་ནི་རྣལ་འབྱོར་ལ་མི་སྤྱོད་པ་ལགས་ཏེ། རྣལ་འབྱོར་མ་ལགས་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། འདོད་ཆགས་དང ། ཞེ་སྡང་དང ། གཏི་མུག་ལས་གུད་དུ་སྟོང་པ་ཉིད་བཙལ་བར་བགྱིད་པ་མ་མཆིས་ཏེ། བཅོམ་ལྡན་འདས། འདོད་ཆགས་དང ། ཞེ་སྡང་དང ། གཏི་མུག་ཉིད་སྟོང་པ་ལགས་སོ། །བཀའ་སྩལ་པ། འཇམ་དཔལ། ཅི་ཁྱོད་འདོད་ཆགས་དང ། ཞེ་སྡང་དང ། གཏི་མུག་དང་བཅས་པ་ཡིན་ནམ། འོན་ཏེ་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བ་ཡིན། གསོལ་པ། བཅོམ་ལྡན་འདས། འདོད་ཆགས་དང ། ཞེ་སྡང་དང ། གཏི་མུག་རྣམས་ཀྱི་སྟོང་པ་ཉིད་གང་ལགས་པ་དེ་དང་བདག་མཉམ་སྟེ། གང་མཉམ་པ་ཉིད་དེ་ཐོབ་པ་དེ་ནི་འདོད་ཆགས་དང་བཅས་པ་ཡང་མ་ལགས། འདོད་ཆགས་དང་བྲལ་བ་ཡང་མ་ལགས། ཞེ་སྡང་དང་བཅས་པ་ཡང་མ་ལགས། ཞེ་སྡང་དང་བྲལ་བ་ཡང་མ་ལགས། གཏི་མུག་དང་བཅས་པ་ཡང་མ་ལགས། གཏི་མུག་དང་བྲལ་བ་ཡང་མ་ལགས་སོ། །བཅོམ་ལྡན་འདས། དགེ་སྦྱོང་དང་བྲམ་ཟེ་གང་དག་བདག་ལ་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བར་ཡང་དག་པར་རྗེས་སུ་ལྟ་ཞིང ། ཕ་རོལ་ལ་འདོད་ཆགས་དང་བཅས་པ་དང ། ཞེ་སྡང་དང་བཅས་པ་དང ། གཏི་མུག་དང་བཅས་པར་ཡང་དག་པར་རྗེས་སུ་ལྟ་བ་དེ་དག་ནི་ལྟ་བར་གྱུར་པ་གཉིས་ལ་ཆགས་པ་ལགས་སོ། །གཉིས་
453a
༄#། །གང་ལགས་ཤེ་ན། ཆད་པར་ལྟ་བ་དང ། རྟག་པར་ལྟ་བ་ལགས་སོ། །དེ་ཅིའི་སླད་དུ་ཞེ་ན། གང་བདག་ལ་འདོད་ཆགས་དང་བྲལ་བ་དང ། ཞེ་སྡང་དང་བྲལ་བ་དང ། གཏི་མུག་དང་བྲལ་བར་ཡང་དག་པར་རྗེས་སུ་ལྟ་བ་དེ་ནི་དེ་དག་གི་ཆད་པར་ལྟ་བ་ལགས་སོ། །གང་ཕ་རོལ་ལ་འདོད་ཆགས་དང་བཅས་པ། ཞེ་སྡང་དང་བཅས་པ། གཏི་མུག་དང་བཅས་པར་ཡང་དག་པར་རྗེས་སུ་ལྟ་བ་དེ་ནི་དེ་དག་གི་རྟག་པར་ལྟ་བ་ལགས་སོ། །ཡང་བཅོམ་ལྡན་འདས། ཡང་དག་པར་ཞུགས་པའི་དགེ་སློང་ནི་ཕ་རོལ་དམན་པ་དང ། བདག་ཁྱད་པར་དུ་འཕགས་པར་ཡང་དག་པར་རྗེས་སུ་མི་ལྟ་ལགས་སོ། །བཀའ་སྩལ་པ། འཇམ་དཔལ། གང་ཡང་དག་པར་ཞུགས་པ་དེ་གང་དུ་ཞུགས་པ་ཡིན། གསོལ་པ། བཅོམ་ལྡན་འདས། གང་ཡང་དག་པར་ཞུགས་པ་དེ་ནི་གང་དུ་ཡང་ཞུགས་པ་མ་ལགས་སོ། །བཀའ་སྩལ་པ། འཇམ་དཔལ། གང་ཡང་དག་པར་ཞུགས་པ་དེ་ལམ་ལ་ཞུགས་པ་མ་ཡིན་ནམ། གསོལ་པ། བཅོམ་ལྡན་འདས། གང་ལམ་ལ་ཞུགས་པ་དེ་ནི་འདུས་བགྱིས་ལ་ཞུགས་པ་ལགས་ཏེ། གང་འདུས་བགྱིས་ལ་ཞུགས་པ་དེ་མཉམ་པ་ཉིད་དུ་ག་ལ་འགྱུར་ལགས། དེ་ཅིའི་སླད་དུ་ཞེ་ན། བཅོམ་ལྡན་འདས། འདུས་བགྱིས་པ་ནི་སྐྱེ་བ་དང་འཇིག་པ་དང་གནས་པ་དང་ལྡན་པའི་སླད་དུའོ། །བཀའ་སྩལ་པ། འཇམ་དཔལ། འདུས་མ་བྱས་ལ་གྲངས་གང་ཡང་ཡོད་དམ།
453b
གསོལ་པ། བཅོམ་ལྡན་འདས། འདུས་མ་བགྱིས་ལ་གྲངས་གང་ཡང་མ་མཆིས་ལགས་སོ། །བཅོམ་ལྡན་འདས། གལ་ཏེ་འདུས་མ་བགྱིས་ལ་གྲངས་མཆིས་པར་གྱུར་ན་དེ་འདུས་བགྱིས་པ་ཉིད་དུ་འགྱུར་གྱི། འདུས་མ་བགྱིས་མ་ལགས་སོ། །བཀའ་སྩལ་པ། འཇམ་དཔལ། གང་འདུས་མ་བྱས་ཐོབ་པའི་འཕགས་པ་ཐམས་ཅད་ལ་གྲངས་གང་ཡང་ཡོད་པར་འགྱུར་བའི་རྣམ་གྲངས་ཡོད་དམ། གསོལ་པ། བཅོམ་ལྡན་འདས། འཕགས་པ་རྣམས་ལ་གྲངས་གང་ཡང་མ་མཆིས་ཏེ། བཅོམ་ལྡན་འདས། འཕགས་པ་རྣམས་ནི་གྲངས་མ་མཆིས་པ། གྲངས་དང་བྲལ་བ་ལགས་སོ། །བཀའ་སྩལ་པ། འཇམ་དཔལ། ཅི་ཁྱོད་འཕགས་པའི་ཆོས་དང་ལྡན་པ་ཡིན་ནམ། འོན་ཏེ་འཕགས་པ་མ་ཡིན་པའི་ཆོས་དང་ལྡན་པ་ཡིན། གསོལ་པ། བཅོམ་ལྡན་འདས། བདག་ནི་འཕགས་པའི་ཆོས་དང་ལྡན་པ་ཡང་མ་ལགས་སོ། །འཕགས་པ་མ་ལགས་པའི་ཆོས་དང་ལྡན་པ་ཡང་མ་ལགས་སོ། །ཅི་ལགས། བཅོམ་ལྡན་འདས་ཀྱིས་སྤྲུལ་པ་དེ་འཕགས་པའི་ཆོས་དང་ལྡན་པ་ལགས་སམ། འཕགས་པ་མ་ལགས་པའི་ཆོས་དང་ལྡན་པ་ལགས། བཀའ་སྩལ་པ། འཇམ་དཔལ། སྤྲུལ་པ་ནི་འཕགས་པའི་ཆོས་དང་ལྡན་པ་ཡང་མ་ཡིན། འཕགས་པ་མ་ཡིན་པའི་ཆོས་དང་ལྡན་པ་ཡང་མ་ཡིན་ནོ། །གསོལ་པ། ཆོས་ཐམས་ཅད་སྤྲུལ་པ་ལྟ་བུའོ་ཞེས་བཅོམ་ལྡན་འདས་ཀྱིས་མ་བསྟན་ལགས་སམ། བཀའ་
454a
༄#། །སྩལ་པ། འཇམ་དཔལ། དེ་ལྟའོ། །གསོལ་པ། བཅོམ་ལྡན་འདས། ཆོས་ཐམས་ཅད་སྤྲུལ་པའི་རང་བཞིན་གྱི་མཚན་ཉིད་ལགས་ལ། བདག་ཀྱང་དེའི་རང་བཞིན་གྱི་མཚན་ཉིད་ལགས་ཏེ། དེའི་སླད་དུ་བདག་འཕགས་པའི་ཆོས་དང་ལྡན་པ་ཡང་མ་ལགས། འཕགས་པ་མ་ལགས་པའི་ཆོས་དང་ལྡན་པ་ཡང་མ་ལགས་སོ། །བཀའ་སྩལ་པ། འཇམ་དཔལ་ཁྱོད་ཅི་དང་ལྡན། གསོལ་པ། བཅོམ་ལྡན་འདས། བདག་ནི་སངས་རྒྱས་ཀྱི་ཡུལ་མཉམ་པ་ཉིད་དང་མི་འགལ་བ་དང་ལྡན་པ་ལགས་སོ། །བཀའ་སྩལ་པ། འཇམ་དཔལ་ཁྱོད་ཀྱིས་སངས་རྒྱས་ཀྱི་ཡུལ་རྙེད་དམ། གསོལ་པ། གལ་ཏེ་བཅོམ་ལྡན་འདས་ཀྱིས་བརྙེས་ན་བདག་གིས་ཀྱང་རྙེད་ལགས་སོ། །དེ་ནས་ཚེ་དང་ལྡན་པ་རབ་འབྱོར་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། དེ་བཞིན་གཤེགས་པས་སངས་རྒྱས་ཀྱི་ཡུལ་མ་བརྙེས་སམ། སྨྲས་པ། གནས་བརྟན་གྱིས་ཉན་ཐོས་ཀྱི་ཡུལ་གང་ཡང་རྙེད་དམ། སྨྲས་པ། འཇམ་དཔལ། འཕགས་པའི་རྣམ་པར་གྲོལ་བའི་ཡུལ་ཡང་མེད། ཡུལ་རྙེད་པ་ཡང་མེད་དོ། །སྨྲས་པ། བཙུན་པ་རབ་འབྱོར། དེ་བཞིན་དུ་དེ་བཞིན་གཤེགས་པའི་རྣམ་པར་གྲོལ་བའི་ཡུལ་ཡང་མེད། ཡུལ་བརྙེས་པ་ཡང་མེད་དོ། །སྨྲས་པ། འཇམ་དཔལ་ཁྱོད་ནི་རྗེས་སུ་བསྲུང་བ་མེད་པར་ཆོས་སྟོན་ཏེ། ཁྱོད་ནི་ལས་དང་པོ་པ་རྣམས་རྗེས་སུ་མི་བསྲུང་ངོ ། །སྨྲས་
454b
པ།་དེ་བས་ན་གནས་བརྟན་ཉིད་ལ་ཡོངས་སུ་དྲིའི། ཁྱེད་ཀྱིས་ཇི་ལྟར་བཟོད་པ་དེ་བཞིན་དུ་ལན་ཐོབ་ཅིག་།བཙུན་པ་རབ་འབྱོར། འདི་ཇི་སྙམ་དུ་སེམས། གང་སྨན་པ་མཁས་པས་ནད་པ་ཡོངས་སུ་བསྲུང་ཞིང་ཁ་བ་དང ། སྐྱུར་བ་དང ། ཚ་བའི་སྨན་མ་བྱིན་པ་ན། ཅི་དེས་ནད་པ་དེ་ལ་ནད་མེད་པའི་བདེ་བ་བྱིན་པ་ཡིན་ནམ། སྨྲས་པ། འཇམ་དཔལ། དེ་ནི་མ་ཡིན་ནོ། །སྨྲས་པ། བཙུན་པ་རབ་འབྱོར། དེ་བཞིན་དུ་གང་ཆོས་སྨྲ་བས་ལས་དང་པོ་པ་ཡོངས་སུ་བསྲུང་ཞིང་ཟབ་མོའི་གཏམ་བཅབས་ཏེ། གཏམ་སྣ་ཚོགས་བསྟན་ན་དེས་དེ་ཡང་དང་ཡང་དུ་འཆི་བ་ལས་ཐར་པར་བྱས་པར་མི་འགྱུར་ཞིང ། ཤིན་ཏུ་བདེ་བ་མྱ་ངན་ལས་འདས་པ་ལ་རབ་ཏུ་བཞག་པར་མི་འགྱུར་རོ། །བསྟན་པ་འདི་བཤད་པ་ན་དགེ་སློང་ལྔ་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ལྷའི་བུ་བརྒྱད་བརྒྱ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།ལྷའི་བུ་བདུན་བརྒྱས་འཇམ་དཔལ་གཞོན་ནུར་གྱུར་པའི་སྤོབས་པ་ཐོས་ནས། འདོད་ཅིང་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཡང་ཚེ་དང་ལྡན་པ་རབ་འབྱོར་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཉན་ཐོས་ཀྱི་ཐེག་པས་སེམས་ཅན་རྣམས་འདུལ་ན། ཅི་ཁྱོད་ཉན་ཐོས་ཀྱི་ཐེག་པས་རྣམ་པར་གྲོལ་བ་ཡིན་ནམ། སྨྲས་པ། བཙུན་པ་རབ་འབྱོར། ཁོ་
455a
༄#། །པོ་ནི་ཐེག་པ་ཐམས་ཅད་ཀྱིས་རྣམ་པར་གྲོལ་ཏེ། བཙུན་པ་རབ་འབྱོར། ཁོ་བོ་ནི་ཉན་ཐོས་ཀྱི་ཐེག་པས་རྣམ་པར་གྲོལ་བ་ཡང་ཡིན་ནོ། །ཁོ་བོ་ནི་རང་སངས་རྒྱས་ཀྱི་ཐེག་པས་རྣམ་པར་གྲོལ་བའང་ཡིན་ནོ། །བཙུན་པ་རབ་འབྱོར། ཁོ་བོ་ནི་ཐེག་པ་ཆེན་པོས་རྣམ་པར་གྲོལ་བའང་ཡིན་ནོ། །སྨྲས་པ། འཇམ་དཔལ་ཁྱོད་ཅི་ཉན་ཐོས་སམ། འོན་ཏེ་རང་སངས་རྒྱས་སམ། འོན་ཏེ་ཡང་དག་པར་རྫོགས་པའི་སངས་རྒྱས་ཡིན། སྨྲས་པ། བཙུན་པ་རབ་འབྱོར། ཁོ་བོ་ནི་ཉན་ཐོས་ཡིན་ཏེ། ཕ་རོལ་ལས་མཉན་པའི་སྒྲ་ལ་སྦྱོར་བར་བརྩོན་པ་ནི་མ་ཡིན་ནོ། ཁོ་བོ་ནི་རང་སངས་རྒྱས་ཡིན་ཏེ། སྙིང་རྗེ་ཆེན་པོ་དང ། མི་འཇིགས་པ་དང་བྲལ་བ་ནི་མ་ཡིན་ནོ། །ཁོ་བོ་ནི་ཡང་དག་པར་རྫོགས་པའི་སངས་རྒྱས་ཡིན་ཏེ། བྱ་བའི་རྒྱུན་བཅད་པ་ནི་མ་ཡིན་ནོ། །སྨྲས་པ། འཇམ་དཔལ་ཁྱོད་ཇི་ལྟར་ཉན་ཐོས་ཡིན། །སྨྲས་པ། ཆོས་མ་ཐོས་པ་མཉན་པ་སེམས་ཅན་ཐམས་ཅད་ཐོས་པར་བྱེད་དེ། དེས་ན་ཁོ་བོ་ནི་ཉན་ཐོས་ཡིན་ནོ། །སྨྲས་པ། འཇམ་དཔལ་ཁྱོད་ཇི་ལྟར་རང་སངས་རྒྱས་ཡིན། སྨྲས་པ། ཁོ་བོས་ཆོས་ཐམས་ཅད་རྟེན་ཅིང་འབྲེལ་བར་འབྱུང་བར་རྟོགས་ཏེ། དེས་ན་ཁོ་བོ་རང་སངས་རྒྱས་ཡིན་ནོ། །སྨྲས་པ། འཇམ་དཔལ་ཁྱོད་ཇི་ལྟར་ན་ཡང་དག་པར་རྫོགས་པའི་སངས་རྒྱས་ཡིན། སྨྲས་པ། ཁོ་བོས་ཆོས་ཐམས་ཅད་ཆོས་ཀྱི་དབྱིངས་སུ་མཉམ་པ་ཉིད་ཀྱིས་མཉམ་པར་ཁོང་དུ་ཆུད་དེ། དེས་ན་ཁོ་བོ་ཡང་དག་པར་
455b
རྫོགས་པའི་སངས་རྒྱས་སོ། །སྨྲས་པ། འཇམ་དཔལ་ཁྱོད་ཉན་ཐོས་ཀྱི་སའམ། རང་སངས་རྒྱས་ཀྱི་སའམ། འོན་ཏེ་ཡང་དག་པར་རྫོགས་པའི་སངས་རྒྱས་ཀྱི་སའམ། ས་གང་ལ་ངེས་པ་ཡིན་པར་གཟུང་བར་བྱ། སྨྲས་པ། བཙུན་པ་རབ་འབྱོར། ཁོ་བོ་ནི་ས་ཐམས་ཅད་ལ་ངེས་པ་ཡིན་པར་གཟུང་ཞིག། སྨྲས་པ། འཇམ་དཔལ་ཁྱོད་སོ་སོའི་སྐྱེ་བོའི་ས་ལ་ཡང་ངེས་པར་གཟུང་བར་བྱའམ། སྨྲས་པ། བཙུན་པ་རབ་འབྱོར། དེ་དེ་བཞིན་ནོ། །དེ་ཅིའི་ཕྱིར་ཞེ་ན། བཙུན་པ་རབ་འབྱོར། ཆོས་ཐམས་ཅད་ནི་ཡང་དག་པ་ཉིད་དུ་ངེས་པར་ངེས་པའོ། །ངེས་པ་དེར་སེམས་ཅན་ཐམས་ཅད་ཀྱང་ངེས་པ་སྟེ། ཁོ་བོ་ཡང་ངེས་པར་དེར་ངེས་པ་ཉིད་དོ། །དེས་ན་ཁོ་བོ་སོ་སོའི་སྐྱེ་བོ་ས་ལ་ཡང་ངེས་པར་གཟུང་བར་བྱའོ། །སྨྲས་པ། འཇམ་དཔལ། གལ་ཏེ་ཆོས་ཐམས་ཅད་ཡང་དག་པ་ཉིད་དུ་ངེས་པར་ངེས་པ་ཡིན་ནམ། འདི་ནི་སོ་སོའི་སྐྱེ་བོའི་སའོ། །འདི་ནི་ཉན་ཐོས་ཀྱི་སའོ། །འདི་ནི་རང་སངས་རྒྱས་ཀྱི་སའོ། །འདི་ནི་བྱང་ཆུབ་སེམས་དཔའི་སའོ། །འདི་ནི་སངས་རྒྱས་ཀྱི་སའོ། །ཞེས་ས་རྣམ་པར་བཞག་པ་གདགས་པར་ག་ལ་འགྱུར། སྨྲས་པ། བཙུན་པ་རབ་འབྱོར། འདི་ལྟ་སྟེ། དཔེར་ན། ཕྱོགས་བཅུའི་ནམ་མཁའ་ལ་འདི་ནི་ཤར་ཕྱོགས་ཀྱི་ནམ་མཁའོ། །འདི་ནི་ལྷོ་ཕྱོགས་ཀྱིའོ། །འདི་ནི་ནུབ་ཕྱོགས་ཀྱིའོ། །འདི་ནི་བྱང་ཕྱོགས་ཀྱིའོ། །འདི་ནི་ཤར་ལྷོའི་འོ། །འདི་ནི་ལྷོ་ནུབ་ཀྱིའོ། །འདི་ནི་ནུབ་བྱང་གིའོ། །འདི་ནི་བྱང་ཤར་གྱིའོ། །འདི་ནི་འོག་གིའོ། །འདི་ནི་
456a
༄#། །སྟེང་གི་ཕྱོགས་ཀྱི་ནམ་མཁའོ། །ཞེས་བརྗོད་ཀྱང་ཕྱོགས་ཆ་ལ་ཐ་དད་པ་ཡོད་ཀྱི། ནམ་མཁའ་ལ་ནི་ཐ་དད་པ་མེད་དོ། །བཙུན་པ་རབ་འབྱོར། དེ་བཞིན་དུ་ཆོས་ཐམས་ཅད་ཡང་དག་པ་ཉིད་དུ་ངེས་པར་ངེས་པ་ལ། དེ་བཞིན་གཤེགས་པ་ལ་ཐབས་མཁས་པས་འདི་ནི་སོ་སོའི་སྐྱེ་བོའི་སའོ། །འདི་ནི་ཉན་ཐོས་ཀྱི་སའོ། །འདི་ནི་རང་སངས་རྒྱས་ཀྱི་སའོ། །འདི་ནི་བྱང་ཆུབ་སེམས་དཔའི་སའོ། །འདི་ནི་སངས་རྒྱས་ཀྱི་སའོ། །ཞེས་ས་རྣམ་པར་འཇོག་ཀྱང ། ས་རྣམ་པར་བཞག་པ་ལ་ཐ་དད་པ་ཡོད་ཀྱི། །ཡང་དག་པ་ཉིད་དུ་ངེས་པ་ལ་ནི་ཐ་དད་པ་མེད་དོ། །སྨྲས་པ། འཇམ་དཔལ་ཁྱོད་ཡང་དག་པ་ཉིད་དུ་ངེས་པ་ལ་ཞུགས་སམ། སྨྲས་པ། ཞུགས་པ་ཡང་ཡིན་ལ། བྱུང་བ་ཡང་ཡིན་ནོ། །སྨྲས་པ། འཇམ་དཔལ། ཇི་ལྟར་ན་ཁྱོད་ཞུགས་པ་ཡང་ཡིན་ལ། བྱུང་བ་ཡང་ཡིན།་སྨྲས་པ། བཙུན་པ་རབ་འབྱོར། འདི་ལ་བྱང་ཆུབ་སེམས་དཔའ་རྣམས་ཀྱི་ཐབས་དང ། ཤེས་རབ་དང ། ཡེ་ཤེས་བལྟ་བར་བྱ་སྟེ། བཙུན་པ་རབ་འབྱོར། འདི་ནི་སྐྱེས་བུ་མཁས་པ་ཁ་ཅིག་བཤད་པའི་དོན་དཔེས་ཤེས་པར་འགྱུར་བ་ཡོད་དེ། དེའི་ཕྱིར་ཁྱོད་ལ་དཔེ་བསྟན་པར་བྱའོ། །བཙུན་པ་རབ་འབྱོར། འདི་ལྟ་སྟེ། དཔེར་ན། འཕོང་གི་སློབ་དཔོན་ཆེན་པོ་ཞིག་ལ་སྡུག་པ། མཛེས་པ་ཡིད་དུ་འོང་བ། བལྟ་ན་སྡུག་པའི་བུ་གཅིག་པ་ཞིག་ཀྱང་ཡོད། དེ་ལ་མི་སྡུག་པ་ཡིད་དུ་མི་འོང་བ་ཕྱིར་རྒོལ་བ་ཞིག་ཀྱང་ཡོད་པ་ལས། དེས་བུ་གཅིག་པ་དེ་ཐག་རིང་པོ་ལམ་གོལ་བའི་ཕྱོགས་ཤིག་ན་འདུག་
456b
པ་མཐོང་ནས། དེ་འདི་སྙམ་དུ་དེ་ནི་བདག་ལ་ཕྱིར་རྒོལ་བ་ཡིན་ནོ་སྙམ་དུ་སེམས་སྐྱེས་ཏེ། དེས་དེ་གསད་པའི་ཕྱིར་མདའ་འཕངས་ནས་འཕངས་མ་ཐག་ཏུ་བུ་གཅིག་པ་ཡིན་པའི་འདུ་ཤེས་སྐྱེས་ཏེ།་དེ་སྔོན་གོམས་པར་བྱས་པས་ཤིན་ཏུ་བརྒྱུགས་ཏེ་མདའ་དེ་བུ་གཅིག་པའི་ལུས་ལ་མ་ཕོག་པ་ཉིད་དུ་ལག་གིས་འཛིན་པ་འདི་ནི་དོན་རྣམ་པར་ཤེས་པར་བྱ་བའི་ཕྱིར་དཔེར་བྱས་པའོ། །འདི་ལ་དོན་དུ་ལྟ་བ་གང་ཞེ་ན། བཙུན་པ་རབ་འབྱོར། འཕོང་གི་སློབ་དཔོན་ཞེས་བྱ་བ་དེ་ནི་བྱང་ཆུབ་སེམས་དཔའི་ཚིག་བླ་དྭགས་སོ། །བཙུན་པ་རབ་འབྱོར། བུ་གཅིག་པ་ཞེས་བྱ་བ་ནི་སེམས་ཅན་ཐམས་ཅད་ལ་བྱང་ཆུབ་སེམས་དཔའ་བུ་གཅིག་པའི་འདུ་ཤེས་ཉེ་བར་འཇོག་པ་ཡིན་ནོ། །གསོད་པ་ཕྱིར་རྒོལ་བ་ཞེས་བྱ་བ་འདི་ནི་ཉོན་མོངས་པ་ཐམས་ཅད་ཀྱི་ཚིག་བླ་དྭགས་སོ། ། བཙུན་པ་རབ་འབྱོར། མདའ་ཞེས་བྱ་བ་འདི་ནི་འཕགས་པའི་ཤེས་རབ་ཀྱི་དབང་པོའི་ཚིག་བླ་དྭགས་སོ། །བཙུན་པ་རབ་འབྱོར། འདི་ལྟ་སྟེ། དཔེར་ན། འཕོང་གི་སློབ་དཔོན་གྱིས་མདའ་འཕངས་ལ་བུ་གཅིག་པའི་ལུས་ལ་མ་ཕོག་པར་ཤིན་ཏུ་བརྒྱུགས་ཏེ་འཛིན་པ་དེ་བཞིན་དུ། བཙུན་པ་རབ་འབྱོར། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པའི་སྟོབས་བསྐྱེད་པས་འདུ་བྱེད་ཐམས་ཅད་སྐྱེ་བ་མེད་པར་སོ་སོར་རྟོག་གོ་།ཡང་དག་པ་ཉིད་དུ་ངེས་པ་ལ་རྣམ་པར་བལྟས་ནས་སྙིང་རྗེ་ཆེན་པོ་དང་ཐབས་ལ་མཁས་པའི་སྟོབས་བསྐྱེད་པས་ཡང་དག་པའི་
457a
༄#། །མཐའ་མངོན་སུམ་དུ་བྱེད་ཀྱང ། ཉན་ཐོས་དང་རང་སངས་རྒྱས་ཀྱི་ས་ལ་མི་གནས་ཀྱི། བྱང་ཆུབ་སེམས་དཔའི་ས་ལ་གནས་སོ། །སངས་རྒྱས་ཀྱི་ས་ལ་ཡང་འཇུད་དེ། ། སྨྲས་པ། འཇམ་དཔལ། འདི་བྱང་ཆུབ་སེམས་དཔའ་གང་དག་གི་ཡུལ་ཡིན། སྨྲས་པ། བཙུན་པ་རབ་འབྱོར། འདི་ནི་བྱང་ཆུབ་སེམས་དཔའ་གང་དག་འཇིག་རྟེན་ན་ཡང་སྤྱོད་ལ།འཇིག་རྟེན་གྱི་ཆོས་རྣམས་ཀྱིས་ཀྱང་མི་གོས་ཤིང ། འཇིག་རྟེན་ན་ཡང་སྣང་ལ་ཆོས་ཐམས་ཅད་ལ་སྣང་བ་མེད་པས་རབ་ཏུ་ཕྱེ་བའི་བྱང་ཆུབ་སེམས་དཔའ་དེ་དག་གི་ཡུལ་ལོ། །བཙུན་པ་རབ་འབྱོར། འདི་ནི་བྱང་ཆུབ་སེམས་དཔའ་གང་དག་ས་ཐམས་ཅད་ལ་ཡང་སྣང་ལ། ས་ངན་པ་ལ་ཡང་མི་གནས་པ་དང ། བཙུན་པ་རབ་འབྱོར། བྱང་ཆུབ་སེམས་དཔའ་གང་དག་སེམས་ཅན་ཐམས་ཅད་ཀྱི་ཉོན་མོངས་པ་སྤང་པའི་ཕྱིར་ཡང་བརྩོན་ལ། ཆོས་ཀྱི་དབྱིངས་ཟད་པར་ནི་ཡང་དག་པར་རྗེས་སུ་མི་ལྟ་བ་དང ། བཙུན་པ་རབ་འབྱོར། བྱང་ཆུབ་སེམས་དཔའ་གང་དག་འདུས་བྱས་ལས་ཀྱང་བསྐྱོད་ལ། འདུས་མ་བྱས་ཀྱང་ཡང་དག་པར་མ་རྙེད་པ་དང ། བཙུན་པ་རབ་འབྱོར། བྱང་ཆུབ་སེམས་དཔའ་གང་དག་འཁོར་བ་ལ་སྐྱེད་མོས་ཚལ་དང་གཞལ་མེད་ཁང་དུ་ཡང་འདུ་ཤེས་ལ།་མྱ་ངན་ལས་འདས་པ་ཡང་དོན་དུ་མི་གཉེར་ཞིང་བསམ་པ་ཡོངས་སུ་མ་རྫོགས་པ་དང ། བཙུན་པ་རབ་འབྱོར། བྱང་ཆུབ་སེམས་དཔའ་གང་དག་བདག་མེད་པའི་བཟོད་པ་ཡང་ཐོབ་ལ།
457b
སེམས་ཅན་ཡོངས་སུ་སྨིན་པར་བྱ་བའི་ཕྱིར་ཡང་བརྩོན་པ་དང ། བཙུན་པ་རབ་འབྱོར། བྱང་ཆུབ་སེམས་དཔའ་གང་དག་ཆོས་ཐམས་ཅད་ཀྱི་རང་བཞིན་ནམ་མཁའི་རང་བཞིན་དུ་ཡང་ཤེས་ལ།་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་ལ་ཡང་བརྩོན་པ་དང ། བཙུན་པ་རབ་འབྱོར། བྱང་ཆུབ་སེམས་དཔའ་གང་དག་སངས་རྒྱས་ཐམས་ཅད་ཆོས་ཀྱི་དབྱིངས་དང་མཚུངས་པར་ཡང་མཐོང་ལ། སངས་རྒྱས་ཀྱི་སྐུ་དང་གསུང་དང་ཐུགས་ཀྱི་རྒྱན་གྱི་ཕྱིར་བརྩོན་འགྲུས་ཀྱང་མི་གཏོང་བའི་བྱང་ཆུབ་སེམས་དཔའ་དེ་དག་གི་ཡུལ་ལོ། །སྨྲས་པ། འཇམ་དཔལ། བྱང་ཆུབ་སེམས་དཔའི་སྤྱོད་པ་འདི་ནི་འཇིག་རྟེན་ཐམས་ཅད་དང་མི་མཐུན་པའོ། །སྨྲས་པ། བཙུན་པ་རབ་འབྱོར། འདི་ལྟར་བྱང་ཆུབ་སེམས་དཔའ་རྣམས་འཇིག་རྟེན་གྱི་ཆོས་ཡོངས་སུ་ཤེས་པ་དང་ལྡན་ཡང་འཇིག་རྟེན་གྱི་ཆོས་ལས་ཡང་དག་པར་འདའ་བའི་ཕྱིར་སེམས་ཅན་རྣམས་ལ་ཆོས་སྟོན་ཏོ། །སྨྲས་པ། འཇམ་དཔལ་ཁྱོད་འཇིག་རྟེན་གྱི་ཆོས་ལས་ཡང་དག་པར་འདའ་བ་ལ་བརྩམས་ཏེ་སྤོབས་པར་གྱིས་ཤིག་།ཇི་ལྟར་བྱང་ཆུབ་སེམས་དཔའ་རྣམས་འཇིག་རྟེན་གྱི་ཆོས་ལས་ཡང་དག་པར་འདའ། སྨྲས་པ། བཙུན་པ་རབ་འབྱོར། འཇིག་རྟེན་ཞེས་བྱ་བ་ནི་ཕུང་པོ་ལྔའོ། །ལྔ་གང་ཞེ་ན། གཟུགས་ཀྱི་ཕུང་པོ་དང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་ཕུང་པོའོ། །དེ་ལ་གཟུགས་ནི་དབུ་བ་རྡོས་པ་ལྟ་བུའོ།
458a
༄#། །ཚོར་བ་ནི་ཆུའི་ཆུ་བུར་ལྟ་བུའོ། །འདུ་ཤེས་ནི་སྨིག་རྒྱུ་ལྟ་བུའོ། །འདུ་བྱེད་ཐམས་ཅད་ནི་ཆུ་ཤིང་ལྟ་བུའོ། །རྣམ་པར་ཤེས་པ་ནི་སྒྱུ་མ་ལྟ་བུའོ། །དབུ་བ་དང།་ཆུའི་ཆུ་བུར་དང ། སྨིག་རྒྱུ་དང ། ཆུ་ཤིང་དང ། སྒྱུ་མ་གང་ཡིན་པ་དེ་ལ་འཇིག་རྟེན་ཡང་མེད། འཇིག་རྟེན་དུ་གདགས་པ་ཡང་མེད། །ཕུང་པོ་རྣམས་ཀྱང་མེད། ཕུང་པོར་གདགས་པ་ཡང་མེད་པར་གང་ཕུང་པོའི་རང་བཞིན་ལ་དེ་ལྟར་མོས་པ་དེ་ནི་ཡང་དག་པར་བཞུགས་པའོ། །གང་ཡང་དག་པར་ཞུགས་པ་དེ་འཇིག་རྟེན་གྱི་ཆོས་རྣམས་དང་མ་འདྲེས་པའོ། ། གང་འཇིག་རྟེན་གྱི་ཆོས་རྣམས་དང་མ་འདྲེས་པ་དེ་འཇིག་རྟེན་གྱི་ཆོས་རྣམས་ལས་ཡང་དག་པར་འདའོ། །བཙུན་པ་རབ་འབྱོར། གཞན་ཡང་ཕུང་པོ་ལྔ་ནི་རང་བཞིན་གྱིས་སྟོང་ངོ ། །གང་རང་བཞིན་གྱིས་སྟོང་པ་དེ་ལ་གཉིས་སུ་མེད་དོ། །གང་གཉིས་སུ་མེད་པ་དེ་ལ་ངར་འཛིན་པ་མེད། ང་ཡིར་འཛིན་པ་མེད་དོ། །གང་ལ་ངར་འཛིན་པ་མེད་པ་དང ། ང་ཡིར་འཛིན་པ་མེད་པ་དེ་ལ་ཆགས་པ་མེད་དེ། ཆགས་པ་མེད་པ་རྙེད་པ་དེ་ནི་འཇིག་རྟེན་ལས་ཡང་དག་པར་འདའ་འོ། །བཙུན་པ་རབ་འབྱོར། གཞན་ཡང་ཕུང་པོ་ལྔ་ནི་རྐྱེན་ལ་རག་ལུས་པའོ། །གང་དག་རྐྱེན་ལ་རག་ལུས་པ་དེ་དག་རག་ལུས་པ་མེད་པའོ། །གང་དག་རག་ལུས་པ་མེད་པ་དེ་དག་བདག་པོ་མེད་པའོ། །གང་བདག་པོ་མེད་པ་དེ་དག་བདག་གི་བ་མེད་པའོ། །གང་དག་བདག་གི་
458b
བ་མེད་པ་དེ་དག་ཡོངས་སུ་འཛིན་པ་མེད་པའོ། །གང་དག་ཡོངས་སུ་འཛིན་པ་མེད་པ་དེ་ལ་འཐབ་པ་མེད་པའོ། །གང་ལ་འཐབ་པ་མེད་པ་དེ་ལ་རྩོད་པ་མེད་དོ། །གང་ལ་རྩོད་པ་མེད་པ་དེ་དག་དགེ་སྦྱོང་གི་ཆོས་རྩོད་པ་མེད་པའོ། །གང་དག་དགེ་སྦྱོང་གི་ཆོས་མི་རྩོད་པ་དེ་དག་ནམ་མཁའ་ལ་ལག་པ་དང་མཚུངས་ཏེ། ཆོས་ཐམས་ཅད་ཀྱང་ནམ་མཁའ་ལ་ལག་པ་དང་མཚུངས་པར་ཤེས་ནས་འཇིག་རྟེན་ལས་ཡང་དག་པར་འདའོ། །བཙུན་པ་རབ་འབྱོར། གཞན་ཡང་ཕུང་པོ་ལྔ་ནི་ཆོས་ཀྱི་དབྱིངས་དང་མཉམ་པའོ། །ཆོས་ཀྱི་དབྱིངས་ཀྱང་དབྱིངས་མེད་པ་སྟེ། གང་ཁམས་མེད་པ་དེ་ལ་མིག་གི་ཁམས་མེད་དོ། །གཟུགས་ཀྱི་ཁམས་མེད་དོ། །མིག་གི་རྣམ་པར་ཤེས་པའི་ཁམས་མེད་དོ། །རྣ་བའི་ཁམས་མེད་དོ། །སྒྲའི་ཁམས་མེད་དོ། །རྣ་བའི་རྣམ་པར་ཤེས་པའི་ཁམས་མེད་དོ། །སྣའི་ཁམས་མེད་དོ། །དྲིའི་ཁམས་མེད་དོ། །སྣའི་རྣམ་པར་ཤེས་པའི་ཁམས་མེད་དོ། །ལྕེའི་ཁམས་མེད་དོ། །རོའི་ཁམས་མེད་དོ། །ལྕེའི་རྣམ་པར་ཤེས་པའི་ཁམས་མེད་དོ། །ལུས་ཀྱི་ཁམས་མེད་དོ། །རེག་བྱའི་ཁམས་མེད་དོ། །ལུས་ཀྱི་རྣམ་པར་ཤེས་པའི་ཁམས་མེད་དོ། །ཡིད་ཀྱི་ཁམས་མེད་དོ། །ཆོས་ཀྱི་ཁམས་མེད་དོ། །ཡིད་ཀྱི་རྣམ་པར་ཤེས་པའི་ཁམས་མེད་དོ། །གང་ཁམས་མེད་པ་དེ་ལ་སའི་ཁམས་མེད་དོ། །ཆུའི་ཁམས་མེད་དོ། །མེའི་ཁམས་མེད་དོ། །རླུང་གི་ཁམས་མེད་དོ། །ནམ་མཁའི་ཁམས་མེད་
459a
༄#། །དོ། །རྣམ་པར་ཤེས་པའི་ཁམས་མེད་དོ། །འདོད་པའི་ཁམས་མེད་དོ། །གཟུགས་ཀྱི་ཁམས་མེད་དོ། །གཟུགས་མེད་པའི་ཁམས་མེད་དོ། །འདུས་བྱས་ཀྱི་ཁམས་མེད་དོ། །འདུས་མ་བྱས་ཀྱི་ཁམས་མེད་དོ། །གང་ཁམས་མེད་པ་དེ་ལ་བདག་མེད། སེམས་ཅན་མེད། །སྲོག་མེད། གསོ་བ་མེད། གང་ཟག་མེད། ཤེད་ལས་སྐྱེས་པ་མེད། ཤེད་བུ་མེད་དོ། །གང་གིས་དེ་དག་རྗེས་སུ་རྟོགས་པའི་ཚུལ་གྱིས་མཉམ་པ་ཉིད་དུ་རྟོགས་པ་དེ་འཇིག་རྟེན་ལས་ཡང་དག་པར་འདའོ། །བསྟན་པ་འདི་བཤད་པ་ན་འཁོར་དེ་ནས་དགེ་སློང་སྟོང་ཉིས་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་དག་སེམས་རྣམ་པར་གྲོལ་ནས་རང་རང་གི་བླ་གོས་ཀྱིས་འཇམ་དཔལ་གཞོན་ནུར་གྱུར་པ་ལ་བཀབ་སྟེ།་ཚིག་འདི་སྐད་དུ་གང་དག་ཆོས་ཟབ་མོ་བསྟན་པ་འདི་ལ་མོས་པ་མེད་པའི་སེམས་ཅན་དེ་དག་ནི་ཐོབ་པ་ཡང་མེད། མངོན་པར་རྟོགས་པ་ཡང་མེད་དོ་ཞེས་འཛེར་ཏོ། །དེ་ནས་ཚེ་དང་ལྡན་པ་རབ་འབྱོར་གྱིས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་གིས་ཅི་ཞིག་ཐོབ་ཅིང་ཅི་ཞིག་མངོན་པར་རྟོགས། དགེ་སློང་དེ་དག་གིས་འདི་སྐད་ཅེས་སྨྲས་སོ། །བཙུན་པ་རབ་འབྱོར། དགེ་སྦྱོང་ནི་ཐོབ་པ་མེད་པ་མངོན་པར་རྟོགས་པ་མེད་པའོ། །དེ་ཅིའི་ཕྱིར་ཞེ་ན། ཐོབ་པ་ཞེས་བྱ་བ་དེ་ནི་གཡོ་བ་ཉིད་དོ། །མངོན་པར་རྟོགས་པ་ཞེས་བྱ་བ་དེ་ནི་
459b
རློམ་སེམས་ཉིད་དོ། །གཡོ་བ་དང་རློམ་སེམས་གང་ཡིན་པ་དེ་ནི་བདུད་ཀྱི་ལས་སོ། །ལྷག་པའི་ང་རྒྱལ་ཅན་དག་ནི་བདག་གིས་ཐོབ་བོ། །བདག་གིས་མངོན་པར་རྟོགས་སོ་ཞེས་འདི་ལྟ་བུ་འདི་དག་གི་ཚུལ་དུ་རྣམ་པར་རྟོགས་པར་འགྱུར་རོ། །སྨྲས་པ། ཚེ་དང་ལྡན་པ་དེ་དག་གིས་ལྷག་པའི་ང་རྒྱལ་ཅན་རྣམས་ཤེས་སམ། སྨྲས་པ། བཅོམ་ལྡན་འདས། མཁྱེན་པ་དང་ལྡན་པས་མཁྱེན་ཏེ། བདག་ཅག་ནི་ཇི་ལྟར་སྡུག་བསྔལ་གྱི་མཚན་ཉིད་མི་ཤེས་པར་བདག་གིས་སྡུག་བསྔལ་ཡོངས་སུ་ཤེས་སོ་ཞེས་སྨྲ་བ། ལྷག་པའི་ང་རྒྱལ་ཅན་དུ་རིག་པར་བྱ་ཞེས་ཀུན་འབྱུང་བའི་མཚན་ཉིད་དང ། འགོག་པའི་མཚན་ཉིད་དང ། ལམ་གྱི་མཚན་ཉིད་མི་ཤེས་པར་བདག་གི་ལམ་བསྒོམས་སོ་ཞེས་སྨྲ་བ། ལྷག་པའི་ང་རྒྱལ་ཅན་དུ་རིག་པར་བྱའོ་སྙམ་མོ། །དེ་ཅིའི་ཕྱིར་ཞེ་ན། སྡུག་བསྔལ་གྱི་མཚན་ཉིད་དང ། ཀུན་འབྱུང་བའི་མཚན་ཉིད་དང ། འགོག་པའི་མཚན་ཉིད་དང ། ལམ་གྱི་མཚན་ཉིད་གང་ཡིན་པ་དེ་ནི་སྐྱེ་བ་མེད་པའི་མཚན་ཉིད་དེ། སྐྱེ་བ་མེད་པའི་མཚན་ཉིད་ནི་མཚན་ཉིད་མེད་པའོ། །མཚན་ཉིད་མེད་པ་ནི་འཕགས་པ་རྣམས་ཀྱི་རྣམ་པར་གྲོལ་བའོ། །ཆོས་ཐམས་ཅད་ཀྱང་རྣམ་པར་གྲོལ་བའི་མཚན་ཉིད་དེ། དེ་ལ་ནི་གང་སྡུག་བསྔལ་ཡོངས་སུ་ཤེས་སོ། །གང་ཀུན་འབྱུང་བ་སྤོང་ངོ ། །གང་འགོག་པ་མངོན་དུ་བྱེད་དོ། །གང་ལམ་བསྒོམ་མོ་ཞེས་བྱ་བ་གང་ཡང་མི་དམིགས་ཏེ། ཆོས་ཐམས་ཅད་མཉམ་པ་ཉིད་འདི་ཐོས་ནས་སྐྲག་པ་
460a
༄#། །དེ་ལྷག་པའི་ང་རྒྱལ་ཅན་ཡིན་པར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་དགེ་སློང་དེ་དག་ལ་ལེགས་སོ། །ཞེས་བྱ་བ་བྱིན་ཏེ། གནས་བརྟན་རབ་འབྱོར་ལ་བཀའ་སྩལ་པ། རབ་འབྱོར། དགེ་སློང་འདི་དག་གིས་ཇི་སྐད་བསྟན་པ་དེ་དེ་བཞིན་ནོ། །རབ་འབྱོར། དགེ་སློང་འདི་དག་གིས་དེ་བཞིན་གཤེགས་པ་འོད་སྲུང་གི་གསུང་རབ་ལ་འཇམ་དཔལ་གཞོན་ནུར་གྱུར་པ་ཉིད་ལས་ཟབ་མོའི་ཆོས་བསྟན་པ་འདི་ལྟ་བུ་ཐོས་ཏེ། ཆོས་ཟབ་མོ་མཉམ་པ་དེ་ཉིད་ཀྱིས་རྒྱུས་འདི་ལྟར་མངོན་པར་ཤེས་པ་མྱུར་བར་གྱུར་ཏོ། །ཟབ་མོའི་ཆོས་བསྟན་པ་འདི་ལ་ཡང་རྗེས་སུ་མཐུན་པར་གྱུར་ཏེ། མི་མཐུན་པ་ཡིན་ནོ། །རབ་འབྱོར། རྣམ་གྲངས་དེས་ནི་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་མ་གཏོགས་པར་གང་དག་ངའི་གསུང་རབ་འདི་ལ་ཆོས་ཟབ་མོ་བསྟན་པ་འདི་ཉན་ཅིང་ཐོས་ནས་ཀྱང་ལྷག་པར་མོས་པ་དེ་དག་ཐམས་ཅད་ནི་དེ་བཞིན་གཤེགས་པ་བྱམས་པའི་གསུང་རབ་ལ་འདུས་པ་གསུམ་གྱི་གྲངས་སུ་གཏོགས་པར་རིག་པར་བྱའོ། །གང་ཡང་ཐེག་པ་ཆེན་པོ་ལ་ཡང་དག་པར་ཞུགས་པ་དེ་དག་ནི་བཟོད་པ་གང་ཡང་རུང་བ་འཐོབ་པར་འགྱུར་རོ། །དེ་ནས་ལྷའི་བུ་དཔལ་བཟང་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་རྒྱུན་དུ་འཛམ་བུའི་གླིང་ན་ཆོས་སྟོན་ཏམ། འཇམ་དཔལ། དགའ་
460b
ལྡན་གྱི་གནས་སུ་བཞུད་དོ། །དེར་དགའ་ལྡན་གྱི་རིས་ཀྱི་ལྷ་རྣམས་ལ་ཆོས་བསྟན་དུ་གསོལ། དེ་ལ་ལྷའི་བུ་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ་དགེ་བའི་རྩ་བ་བསྐྱེད་པ་དག་ཡོད་དེ། དེ་དག་ཡུལ་ཕུན་སུམ་ཚོགས་པས་བག་མེད་པའི་དབང་གིས་བཅོམ་ལྡན་འདས་དང ། ཁྱོད་ལ་ཆོས་ཉན་དུ་མི་འོང་བས་ན། དེ་དག་ཆོས་མི་ཉན་པས་ཡོངས་སུ་ཉམས་པར་གྱུར་ཏེ། དེ་དག་ཁྱོད་ལས་ཆོས་ཐོས་ནས་དགེ་བའི་རྩ་བ་ཆེན་པོ་འཕེལ་བར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་གང་གིས་ལྷའི་བུ་དཔལ་བཟང་དང ། ཐམས་ཅད་དང་ལྡན་པའི་འཁོར་དེ་དག་དགའ་ལྡན་གྱི་གནས་སུ་ཞུགས་པར་བདག་ཉིད་ཀྱིས་ཤེས་པ་དང ། ཉམས་དགའ་བའི་ཀུན་དགའི་ར་བ་དང ། ཉམས་དགའ་བའི་ཚལ་དང ། ཉམས་དགའ་བའི་རྫིང་དང།་ཉམས་དགའ་བའི་སྐྱེད་མོས་ཚལ་དང ། རིམ་པ་བདུན་དང ། བརྒྱད་དང ། བཅུ་དང ། ཉི་ཤུ་པའི་ཁང་པ་བརྩེགས་པ། བསིལ་ཁང་དང ། བ་གམ་དང ། སྟེགས་བུ་དང ། རྟ་བབས་དང།་སྐར་ཁུང་དང་ལྡན་པ་དེ་དག་ཀྱང་སྣང་བ་དང ། ལྷའི་བུ་མོ་རྐང་ལག་འཇམ་ཞིང་མཉེན་པ་གསེར་གྱི་དྲ་བ་ལྟར་འོད་རྣམ་པར་དག་པ། སྨིན་མ་ལེགས་པ། དཔྲལ་བ་ལེགས་པ། བཞིན་ལེགས་པ། མིག་པདྨ་འདབ་མ་བརྒྱ་པ་སྔོན་པོ་ལྟ་བུར་མཛེས་ཤིང་དྲི་མ་མེད་པ་ཤིན་ཏུ་ཡངས་པ་འདོད་པའི་སེམས་བསྐྱེད་པ། ཟླ་བ་ཚེས་པ་ལྟར་མངོན་པར་དགའ་བ། བཞིན་འཛུམ་པ་
461a
༄#། །དང་བཅས་པ། དེ་དག་རྒྱུད་གཅིག་པ་དང ། པི་ཝང་དང ། སྒྲ་སྙན་དང ། འཁར་བའི་སིལ་ཁྲོལ་དང ། ཕེག་རྡོབ་པ་དང ། རྔ་ཟླུམ་དང ། རྫ་རྔ་དང ། རྔ་མཉམ་པ་དང ། གླིང་བུ་དང ། གླུ་དབྱངས་དང ། རོལ་མོའི་སྒྲ་དབྱངས་དང ། གར་དང ། བཞད་གད་དང ། འཇོ་བ་དང ། སྒེག་པ་དང ། རྩེ་བས་རྒྱགས་ཤིང་དགའ་བ་དང ། རྩེ་བ་དང་དགའ་མགུར་སྤྱོང་པ་དག་ཀྱང་སྣང་བ་དེ་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་བྱས་སོ། །དེ་འདྲ་བའི་བྱིན་གྱི་རླབས་ཀྱིས་བྱིན་གྱིས་བརླབས་སོ། །དེ་ནས་ལྷའི་བུ་དཔལ་བཟང་གིས། རང་གི་གནས་རྒྱན་ཐམས་ཅད་ཀྱིས་བརྒྱན་པ་ཡང་མཐོང ། རང་གི་གཡོག་འཁོར་རྣམས་ཀྱང་མཐོང་ངོ ། །མཐོང་ནས་ཀྱང་ངོ་མཚར་དུ་གྱུར་ཏེ། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བདག་ཅག་འདི་ལྟར་མྱུར་དུ་དགའ་ལྡན་གྱི་གནས་སུ་ཕྱིན་ཏེ། ཉམས་དགའ་བའི་ཀུན་དགའ་ར་བ་འདི་དག་དང་ཞེས་བྱ་བ་ནས། དགའ་བ་དང ། རྩེ་བ་དང ། དགའ་མགུར་སྤྱོད་པ་དང ། བདག་གི་རང་གི་གནས་འདི་དང ། རང་གི་གཡོག་ཅེས་བྱ་བའི་བར་དུ་སྦྱར་ཏེ་འདི་དག་སྣང་བ་ངོ་མཚར་ཏོ། །དེ་ནས་ཚེ་དང་ལྡན་པ་རབ་འབྱོར་གྱིས་ལྷའི་བུ་དཔལ་བཟང་ལ་འདི་སྐད་ཅེས་སྨྲས་སོ། །ལྷའི་བུ་ཁྱོད་ནི་འཁོར་གྱི་དཀྱིལ་འཁོར་འདི་ནས་གང་དུ་ཡང་མ་གཡོས་ལ། དགའ་ལྡན་གྱི་གནས་སུ་ཡང་མ་ཕྱིན་ཏེ། ལྷའི་
461b
བུ།་འོན་ཀྱང་ཐམས་ཅད་དང་ལྡན་པའི་འཁོར་འདི་དག་དགའ་ལྡན་གྱི་གནས་སུ་ཞུགས་པར་བདག་ཉིད་ཀྱིས་ཤེས་པ་དང ། ལྷའི་བུ། ཁོ་བོ་ཅག་ཀྱང་དགའ་ལྡན་གྱི་གནས་སུ་ཞུགས་པར་བདག་ཉིད་ཀྱིས་ཤེས་པ་དེ་ནི། འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་བའི་ཆོ་འཕྲུལ་དང ། ཏིང་ངེ་འཛིན་གྱི་བྱིན་གྱི་རླབས་ཀྱི་སྟོབས་སོ། །དེ་ནས་བཅོམ་ལྡན་འདས་ལ་ལྷའི་བུ་དཔལ་བཟང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་བའི་སྟོབས་དང ། ཏིང་ངེ་འཛིན་གྱི་བྱིན་གྱི་རླབས་ཀྱི་སྟོབས་འདི་ནི་བསམ་གྱིས་མི་ཁྱབ་སྟེ། འདི་ལྟར་ཐམས་ཅད་དང་ལྡན་པའི་འཁོར་འདིས་ཕྱོགས་འདི་ནས་གང་དུ་ཡང་མ་གཡོས་པར་འདི་སྙམ་དུ་བདག་ཅག་དགའ་ལྡན་གྱི་གནས་སུ་ཕྱིན་ཏོ་སྙམ་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ། འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པ་ཇི་སྙེད་ཅིག་ངས་ཤེས་པ་ལས་ཁྱེད་ཀྱིས་ཇི་ཙམ་ཞིག་ཤེས་ཏེ། ལྷའི་བུ། འཇམ་དཔལ་གཞོན་ནུར་གྱུར་པ་ནི་འདོད་ན། སངས་རྒྱས་ཀྱི་ཞིང་གི་ཡོན་ཏན་བཀོད་པ་གངྒཱའི་ཀླུང་གི་བྱེ་མ་སྙེད་གང་དག་ཡོད་པ་དེ་དག་ཐམས་ཅད་ཞིང་གཅིག་ཏུ་ཡང་དག་པར་སྟོན་ཏོ། །སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་གང་དག་ཡོད་པ་དེ་དག་གཙུག་ཕུད་ཀྱིས་ཕུག་སྟེ། སྟེང་གི་བར་སྣང་གི་ནམ་མཁའ་ལ་འཇོག་གོ་།སངས་རྒྱས་
462a
༄#། །ཀྱི་ཞིང་དེ་དག་ན། རྒྱ་མཚོ་ཆེན་པོར་འགྱུར་བའི་ཆུའི་ཕུང་པོ་གང་དག་ཡོད་པ་དེ་དག་ཐམས་ཅད་སྤུའི་ཁུང་བུ་གཅིག་ཏུ་བླུགས་ཀྱང་ཆུ་ཡིས་སེམས་ཅན་རྣམས་ལ་གནོད་པ་མེད་དེ། ཐམས་ཅད་ཀྱང་རང་རང་གི་རྒྱ་མཚོ་ཆེན་པོ་ན་གནས་པར་བདག་ཉིད་ཀྱིས་ཤེས་སོ། །སངས་རྒྱས་ཀྱི་ཞིང་དེ་དག་ན་རིའི་རྒྱལ་པོ་རི་རབ་གང་དག་ཡོད་པ་དེ་དག་ཐམས་ཅད་རི་གཅིག་ཏུ་བྱིན་གྱིས་བརླབས་ཏེ། རི་དེ་དག་ཡུངས་ཀར་གྱི་འབྲུའི་ནང་དུ་བཅུག་ཀྱང་རི་རབ་ལ་གནས་པའི་ལྷ་དེ་དག་ལ་ཡང་གནོད་པ་མེད་དེ། ཐམས་ཅད་ཀྱང་རང་རང་གི་གནས་ན་འཁོད་པར་བདག་ཉིད་ཀྱིས་ཤེས་སོ། །སངས་རྒྱས་ཀྱི་ཞིང་དེ་དག་ན་འགྲོ་བ་ལྔར་སྐྱེས་པའི་སེམས་ཅན་གང་དག་ཡོད་པ་དེ་དག་ཐམས་ཅད་ལག་པ་གཡས་པའི་མཐིལ་དུ་བཞག་སྟེ། འཇིག་རྟེན་གྱི་ཁམས་བདེ་བ་ཐམས་ཅད་ཀྱིས་རབ་ཏུ་བརྒྱན་པའི་སེམས་ཅན་རྣམས་ཀྱི་བདེ་བར་སྦྱར་བ་ཅི་འདྲ་བ་དེ་ལྟ་བུ་དག་དེ་དག་ལ་བསྒྲུབ་བོ། །གང་ཡང་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་སྲེག་པར་བྱེད་པའི་མེ་དེ་དག་ཐམས་ཅད་མར་མེའི་སྙིང་པོ་གཅིག་གིས་མེ་ལྕེ་ཙམ་གྱི་མེར་བྱིན་གྱིས་རློབ་སྟེ། དེས་བྱ་བ་བྱེད་པ་གང་ཡིན་པ་དེ་བྱེད་དོ། སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ན་ཉི་མ་དང་ཟླ་བའི་འོད་གང་དག་ཡོད་པ་དེ་དག་ཐམས་ཅད་སྤུའི་ཁུང་བུ་གཅིག་གི་འོད་ཀྱིས་ཟིལ་དུ་རླག་པར་བྱེད་དོ། །ལྷའི་བུ། འཇམ་
462b
དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པའི་ཆོ་འཕྲུལ་ལས་བརྩམས་ནས་ང་བསྐལ་པའམ། བསྐལ་པ་ལས་ལྷག་པར་ཡང་ཆོས་སྟོན་ཏེ། འཇམ་དཔལ་གཞོན་ནུར་གྱུར་པ་ནི། རྫུ་འཕྲུལ་དང་བྱིན་གྱི་རླབས་ཀྱི་སྟོབས་བསམ་གྱིས་མི་ཁྱབ་པ་འདི་ལྟ་བུ་དང་ལྡན་ནོ།། །།བམ་པོ་གཉིས་པ་སྟེ་ཐ་མ། དེ་ནས་བདུད་སྡིག་ཅན་འཁོར་དེ་ཉིད་དུ་འདུས་པར་གྱུར་ནས་འདུག་སྟེ། དེས་བདག་ཉིད་དགེ་སློང་གི་གཟུགས་སུ་བྱིན་གྱིས་བརླབས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་བའི་ཆོ་འཕྲུལ་དེ་བདག་གིས་བལྟ་བར་བགྱིའོ། །བཅོམ་ལྡན་འདས། ཚིག་ཙམ་དུ་གསུངས་པས་ཅི་སྨན་གྱི། བདག་ལ་མངོན་སུམ་དུ་གྱུར་ཅིག་།དེ་ནས་བཅོམ་ལྡན་འདས་ཀྱིས་བདུད་སྡིག་ཅན་དུ་མཁྱེན་བཞིན་དུ་སེམས་ཅན་ཚད་མེད་པ་དེ་དག་གིས་དགེ་བའི་རྩ་བ་རྣམ་པར་སྤེལ་བའི་ཕྱིར། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། ངས་ཁྱོད་ལ་བསྐུལ་གྱི། ཁྱོད་ཀྱིས་འཁོར་འདི་དག་ལ་རང་གི་རྫུ་འཕྲུལ་གྱི་སྟོབས་དང་ཆོ་འཕྲུལ་སྟོན་ཅིག་དང ། སེམས་ཅན་ཚད་མེད་པ་རྣམས་ཀྱི་དགེ་བའི་རྩ་བ་རྣམ་པར་འཕེལ་བར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པ་བཅོམ་ལྡན་འདས་ཀྱིས་བསྐུལ་བར་ཤེས་ནས། ཆོས་ཐམས་ཅད་སེམས་ཀྱིས་དབང་བསྒྱུར་བ་རྣམ་པར་འཕྲུལ་
463a
༄#། །པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །འཇམ་དཔལ་གཞོན་ནུར་གྱུར་པས་ཆོས་ཐམས་ཅད་སེམས་ཀྱིས་དབང་བསྒྱུར་བ་རྣམ་པར་འཕྲུལ་པའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ། དེ་ནས་དེའི་མོད་ལ་ཐམས་ཅད་དང་ལྡན་པའི་འཁོར་དེས་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པའི་ཆོས་འཕྲུལ་བཅོམ་ལྡན་འདས་ཀྱིས་ཇི་སྐད་གསུངས་པ་དེ་བཞིན་དུ་མ་ཆད་པ་དང ། མ་ལྷག་པ་དང ། མི་མང་བར་མཐོང་ངོ ། །དེ་ནས་ཐམས་ཅད་དང་ལྡན་པའི་འཁོར་གྱིས་ཆོ་འཕྲུལ་དེ་མཐོང་ནས་ངོ་མཚར་དུ་གྱུར་ཏེ། སངས་རྒྱས་འབྱུང་བ་ལེགས་སོ། །ལེགས་སོ། །སངས་རྒྱས་བྱུང་བ་ནི་སེམས་ཅན་རྣམས་ལ་དོན་ཆེན་པོར་ཉེ་བར་གནས་སོ། །དེ་བྱུང་བས་སྐྱེས་བུ་དམ་པ་འདི་ལྟ་བུ་འདི་དག་ཀྱང་འཇིག་རྟེན་དུ་བྱུང་བ་ཡིན་ནོ། །ཆོ་འཕྲུལ་བསམ་གྱིས་མི་ཁྱབ་པ་འདི་ཡང་འཇིག་རྟེན་ན་སྣང་བ་ཡིན་ནོ། །ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་བདུད་སྡིག་ཅན་གྱིས་ཆོ་འཕྲུལ་དེ་མཐོང་སྟེ་ངོ་མཚར་དུ་གྱུར་ནས་ཐལ་མོ་སྦྱར་ཏེ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ཞིང་ཚིག་འདི་སྐད་ཅེས་སྨྲས་སོ། །འཇམ་དཔལ་གཞོན་ནུར་གྱུར་པའི་རྫུ་འཕྲུལ་གྱི་ཆོ་འཕྲུལ་བསམ་གྱིས་མི་ཁྱབ་སྟེ་ངོ་མཚར་ཏོ། །སེམས་ཅན་གང་དག་ཆོ་འཕྲུལ་བཤད་པ་འདི་ཐོས་ནས་མོས་པ་དེ་དག་ངོ་མཚར་ཆེ་བར་བདག་གིས་བསམ་སོ། །བཅོམ་ལྡན་
463b
འདས། གལ་ཏེ་བདུད་སྡིག་ཅན་གངྒཱའི་ཀླུང་གི་བྱེ་མ་སྙེད་དུ་གྱུར་ཀྱང་དེ་ལྟར་མོས་པའི་སེམས་ཅན་དེ་ལ་བར་ཆད་བགྱི་བའི་རྔོ་མི་ཐོགས་ལགས་སོ། །བཅོམ་ལྡན་འདས་བདུད་སྡིག་ཅན་བདག་ནི་རྟག་ཏུ་རྒྱུན་མི་འཆད་པར་དེ་བཞིན་གཤེགས་པ་ལ་གླགས་ལྟ་ཞིང་སྐབས་ཚོལ་བ་དང ། སེམས་ཅན་རྣམས་ལ་ཡང་གཙེ་བར་སེམས་པ་དང ། བརྩོན་པའི་གང་ཟག་རྣམས་ཀྱི་དགེ་བའི་རྩ་བའི་བར་ཆད་བགྱི་བའི་སླད་དུ་ཡང་ཞུགས་པ་ལགས་ཏེ། བཅོམ་ལྡན་འདས། དེང་སླན་ཆད་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། ཕོ་བྲང་འཁོར་གང་ན་ཆོས་ཀྱི་རྣམ་གྲངས་འདི་རབ་ཏུ་སྤྱོད་པ་དེ་ཁོར་ཁོར་ཡུག་ཏུ་དཔག་ཚད་བརྒྱ་ཚུན་ཆད་དུ་མིག་གིས་མི་རྩོལ་བར་བགྱི་བའི་སླད་དུ་བདག་ཅག་མི་མཆི་བར་བདག་གི་ཡི་དམ་དེ་ལྟ་བུ་བླངས་པར་བགྱིའོ། །གང་དག་འཆང་བ་དང ། འཆད་པ་དང ། སྟོན་པ་དང ། སོ་སོར་རྟོགས་པ་དང ། བསྒྲུབ་པ་དེ་ལ་སྟོན་པ་ལ་བགྱི་བ་ལྟར་གུས་པ་བསྐྱེད་པར་བགྱིའོ། །བཅོམ་ལྡན་འདས། འོན་དུ་ལགས་ཀྱང ། བདག་གི་འཁོར་གང་དེ་བཞིན་གཤེགས་པའི་བསྟན་པའི་བར་ཆད་བགྱི་བ་དང་བརྩོན་པ་རྣམས་གཡེངས་པར་བགྱི་བའི་སླད་དུ་ཞུགས་པ་དག་མཆིས་ཏེ། དེ་དག་ཆད་པས་དགུམ་པའི་སླད་དུ་རིགས་ཀྱི་བུའམ། རིགས་ཀྱི་བུ་མོ་དེ་དག་གིས་གསང་སྔགས་ཀྱི་ཚིག་འདི་དག་དྲན་པར་བགྱིའོ། །ཏདྱ་ཐཱ། ཨ་མ་ལེ། བི་མ་ལེ། སྠི་ཏ་ཏྭེ། ཨ་ག་ལ་མ་ནི་རྫི་ཏ་ཤ་
464a
༄#། །ཏྲུ།་ཛ་ཡེ་ཛ་ཡ་བ་ཏི་བྷུ་ཏ་མ་ཏི་མ་ཏི། ཤ་མེ་ཤནྟེ། ཨ་ཕུ་མེ། ཕུ་ཕུ་མེ། དྷི་རི། ཨ་ཁེ། མ་ཁེ། ཁ་ཁེ། མི་སི་ལི། ཨ་ག་མེ། ཕུ་ལ་ཏེ། ཕུ་ལ། ཕུ་ལེ། ཕ་ཤུ་མེ། ཤུ་ཤུ་མེ། དྷི་དྷི་རེ། ཨ་ན་བ་ན་ཏེ། སྠི་ཏ་ཏྭེ། ཀྲྀ་ཏྭ་ར་ཏེ། ཀྲྀ་ད་ཏ་བིདྱ། བཻ་རོ་ཙ་ན། ས་ད་དྷརྨ་བྷཱ་ཎ་ཀོ་སྱ། སཱུ་ཏྲ་སྱ་དྷཱ་ར་ཀ། ཨ་བྷྲ་མུ་གུ་ཏ། ཨི་བྷ་སཱུ་རྱ་སཝཱཧཱ། བཅོམ་ལྡན་འདས། ཆོས་སྨྲ་བ་གང་གསང་སྔགས་ཀྱི་ཚིག་འདི་རྣམས་ཀྱི་ཀུན་དུ་གསུངས་པ་དེ་ལ་བདུད་ཀྱི་རིས་ཀྱི་ལྷའི་བུ་རྣམས་ཀྱིས་བར་ཆད་བགྱི་བ་ནི་གནས་མ་ལགས་ཤིང་སྐབས་མ་ལགས་ཏེ། དེ་ནི་གནས་མ་མཆིས་ཀྱི་སྟེང་དུ་དེ་ལ་གོས་དང ། ཟས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་ཉེ་བར་བསྒྲུབ་པ་དང ། སྤྲོ་བར་བགྱི་བ་དང ། སྤོབས་པར་བགྱི་བར་སྤྲོ་བར་འགྱུར་ལགས་སོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་དག་གསང་སྔགས་ཀྱི་ཚིག་འདི་དག་བརྗོད་ནས་གཡེང་བ་མ་མཆིས་པའི་རྒྱུད་ཀྱིས་གདུགས་མཚན་འདས་པར་བགྱིད་པ་དེ་དག་ལྷ་རྣམས་ཀྱིས་བསྲུངས་པར་འགྱུར། ལྷ་ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང་མི་ལགས་པ་རྣམས་ཀྱིས་བསྲུངས་པར་འགྱུར་ཏེ། དེ་དག་ལ་སླར་རྒོལ་བའམ། མི་མཛའ་བ་གང་གིས་གླགས་བལྟས་ཀྱང་གླགས་བརྙེད་པར་མི་འགྱུར་
464b
ལགས་སོ། །དེ་ནས་བཅོམ་ལྡན་འདས་ཀྱིས་བདུད་སྡིག་ཅན་ལ་ལེགས་སོ། །ཞེས་བྱ་བ་བྱིན་ཏེ། སྡིག་ཅན། ལེགས་སོ། །ལེགས་སོ། །འདི་ལྟར་ཁྱོད་ཀྱིས་གསང་སྔགས་ཀྱི་ཚིག་བསྟན་པ་བརྗོད་པས་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་རྣམ་པ་དྲུག་ཏུ་གཡོས་ཏེ། ཁྱོད་ཀྱི་སྤོབས་པ་དེ་ཐམས་ཅད་ནི་འཇམ་དཔལ་གཞོན་ནུར་གྱུར་པའི་བྱིན་གྱིས་བརླབས་སུ་རིག་པར་བྱའོ། །འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པའི་ཆོ་འཕྲུལ་དང ། བྱིན་གྱི་རླབས་འདི་བསྟན་པ་དང ། བདུད་ཀྱི་གསང་སྔགས་ཀྱི་སྟོབས་དང ། རིག་སྔགས་ཀྱི་སྟོབས་བསྟན་པ་ན་སྲོག་ཆགས་ཉི་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་རྫུ་འཕྲུལ་བསྡུས་ནས་ལྷའི་བུ་དཔལ་བཟང་ལ་འདི་སྐད་ཅེས་སྨྲས་སོ། །ལྷའི་བུ་ཁྱོད་དགའ་ལྡན་གྱི་གནས་སུ་སོང་ལ། དགའ་ལྡན་གྱི་རིས་ཀྱི་ལྷའི་བུ་རྣམས་སྡུས་ཤིག་དང ། ཁོ་བོ་ཡང་དེར་འོང་ངོ ། །དེ་ནས་ལྷའི་བུ་དཔལ་བཟང་གིས་འཇམ་དཔལ་གཞོན་ནུར་གྱུར་པའི་ལྟར་མཉན་ཏེ། བཅོམ་ལྡན་འདས་དང ། འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའི་དགེ་འདུན་ཐམས་ཅད་དང ། ཉན་ཐོས་ཀྱི་དགེ་འདུན་གྱི་དགེ་འདུན་ལ་བསྐོར་བ་བྱས་ནས་འཁོར་དང་བཅས་པས་འཁོར་དེ་ནས་མི་སྣང་བར་གྱུར་ཏེ། དགའ་ལྡན་གྱི་གནས་སུ་ཕྱིན་ཏོ། །དེ་ནས་ལྷའི་བུ་དཔལ་བཟང་གིས་
465a
༄#། །དགའ་ལྡན་གྱི་རིས་ཀྱི་ལྷའི་བུ་རྣམས་ལ་སྨྲས་པ། གྲོགས་པོ་དག། ཤེས་པར་གྱིས་ཤིག་།འཇམ་དཔལ་གཞོན་ནུར་གྱུར་པ་འུ་བུ་ཅག་ལ་སྙིང་བརྩེ་བའི་ཕྱིར་འདིར་འོང་གི། དེ་ལ་དགའ་ལྡན་གྱི་རིས་ཀྱི་ལྷའི་བུ་ཁྱེད་དགའ་བ་དང་རྩེ་བ་ལ་བག་མེད་པར་དོར་ཏེ། བག་ཡོད་པར་གྱིས་ལ་འཇམ་དཔལ་གཞོན་ནུར་གྱུར་པ་ལ་ཆོས་ཉན་དུ་ཤོགས་ཤིག་།དེ་ནས་ལྷའི་བུ་དཔལ་བཟང་གིས་འཇམ་དཔལ་གཞོན་ནུར་གྱུར་པ་ལ་མཆོད་པའི་ལས་ཀྱི་ཕྱིར་དགའ་ལྡན་གྱི་གནས་ཀྱི་དབུས་སུ་ལྷའི་ཡིད་ལས་བྱུང་བ། རིན་པོ་ཆེ་ཐམས་ཅད་ལས་བྱས་པའི་འཁོར་གྱི་ཁྱམས་ཆུར་ཤར་ནུབ་ཏུ་དཔག་ཚད་སུམ་ཁྲི་ཉིས་སྟོང་ཡོད་ལ། ཞེང་ལྷོ་བྱང་དུ་དཔག་ཚད་ཁྲི་དྲུག་སྟོང་ཡོད་པ་བྱས་ཏེ། དེར་སེང་གེའི་ཁྲི་སྣ་ཚོགས་བལྟ་ན་སྡུག་པའི་ལྷའི་རས་བཅོས་བུ་བརྒྱ་སྟོང་དུ་མ་བཏིང་བ་སྟོང་ཕྲག་དུ་མ་བྱས་སོ། །དེ་ནས་ལྷའི་བུ་དཔལ་བཟང་གིས་རྣམ་པ་འདི་ལྟ་བུའི་འཁོར་གྱི་ཁྱམས་བཀོད་པ་དེ་དག་དང།་སེང་གེའི་ཁྲི་རྣམས་ཀྱང་བྱས་ནས་ཐལ་མོ་སྦྱར་ཏེ། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། འཁོར་གྱི་ཁྱམས་བཀོད་པ་དང ། སེང་གེའི་ཁྲི་བཀོད་པ་བགྱིད་ལགས་ན། ད་དེའི་དུས་ལ་བབ་པར་མཁྱེན་ན་གཤེགས་སུ་གསོལ། དེ་ནས་འཇམ་དཔལ་གཞོན་ནུར་གྱུར་བ་བྱང་ཆུབ་སེམས་དཔའ་ཁྲི་ཉིས་སྟོང་དང ། ཉན་
465b
ཐོས་ཀྱི་མཆོག་ལྔ་བརྒྱ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་སྟོང་ཕྲག་དུ་མ་དག་དང་ལྷན་ཅིག་ཏུ་ཡོངས་སུ་བསྐོར་ཅིང་མདུན་དུ་བདར་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་དྲུང་ནས་མི་སྣང་བར་གྱུར་ནས་སྐད་ཅིག་ཐང་ཅིག་ཡུད་ཙམ་དེ་ལ་དགའ་ལྡན་གྱི་གནས་སུ་ཕྱིན་ཏོ། །དེ་ནས་འཇམ་དཔལ་གཞོན་ནུར་གྱུར་པ་རིན་པོ་ཆེ་བཀོད་པའི་འཁོར་གྱི་ཁྱམས་དེར་རང་གི་ཁྲི་ཇི་ལྟར་བཤམས་པ་ལ་འདུག་གོ་།བྱང་ཆུབ་སེམས་དཔའ་རྣམས་དང ། ཉན་ཐོས་ཆེན་པོ་རྣམས་དང ། ཐམས་ཅད་དང་ལྡན་པའི་འཁོར་རྣམས་ཀྱང་སྟན་ཅི་རིགས་པ་ལ་འཁོད་དོ། །རྒྱལ་ཆེན་བཞིའི་རིས་ཀྱི་ལྷ་རྣམས་དང ། སུམ་ཅུ་རྩ་གསུམ་དང ། འཐབ་བྲལ་དང།་དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་དང ། བདུད་ཀྱི་རིས་རྣམས་དང ། གཟུགས་ན་སྤྱོད་པ་ཚངས་རིས་ཀྱི་ལྷ་ནས་བཟུང་སྟེ། འོག་མིན་གྱི་བར་གྱི་ལྷ་རྣམས་ཀྱིས་གཅིག་གནས་གཅིག་ཏུ་སྒྲ་ཐོས་པ། འདི་ལྟར་འཇམ་དཔལ་གཞོན་ནུར་གྱུར་པ་དགའ་ལྡན་གྱི་གནས་སུ་འབྲེལ་བའི་ཆོས་ཀྱི་གཏམ་ཆེན་པོ་སྨྲ་བར་འགྱུར་གྱི། བདག་ཅག་ཀྱང་ཆོས་ཉན་པའི་ཕྱིར་ངེས་པར་དེར་འདོང་བར་བྱའོ། །སྐྱེས་བུ་དམ་པ་དེ་ལྟ་བུ་དག་མཐོང་བ་ནི་ལེགས་པར་མཐོང་བའོ། །དེ་དག་ལས་ཆོས་ཐོས་པ་ནི་ལེགས་པར་ཐོས་པའོ། །ཞེས་སྒྲ་ཐོས་ནས། སྐད་ཅིག་
466a
༄#། །ཐང་ཅིག་ཡུད་ཙམ་དེ་ལ་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་ཚད་མེད་གྲངས་མེད་པ་དག་རང་རང་གི་གནས་ནས་མི་སྣང་བར་གྱུར་ཏེ། དགའ་ལྡན་གྱི་གནས་སུ་ཕྱིན་ཏོ། །དེ་ནས་འཇམ་དཔལ་གཞོན་ནུར་གྱུར་པས་དེ་ལྟ་བུའི་བྱིན་གྱི་རླབས་ཀྱིས་བྱིན་གྱིས་བརླབས་པས་དེས་ལྷའི་འཁོར་དེ་ཙམ་དུ་ཚད་མེད་པ་དག་རིན་པོ་ཆེ་བཀོད་པའི་ཁྱམས་ཀྱི་འཁོར་དེ་ཉིད་དུ་གོ་སྐབས་ཡངས་པར་གནས་པར་གྱུར་ཏོ། །དེ་ནས་ལྷའི་བུ་དཔལ་བཟང་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ལྷའི་འཁོར་ཆེན་པོ་འདི་འདུས་ལགས་ན་ཆོས་ཀྱི་བཀའ་མཆིད་ལས་བརྩམས་ཏེ་སྤོབས་པར་མཛད་དུ་གསོལ། དེ་སྐད་ཅེས་སྨྲས་པ་དང ། འཇམ་དཔལ་གཞོན་ནུར་གྱུར་པས་ལྷའི་བུ་དཔལ་བཟང་དང ། ཐམས་ཅད་དང་ལྡན་པའི་འཁོར་དེ་ལ་འདི་སྐད་ཅེས་སྨྲས་སོ། །གྲོགས་པོ་དག་།ཆོས་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་ཆོས་ཐམས་ཅད་སྡུད་པར་འགྱུར་བ་བདག་གོ་།བཞི་གང་ཞེ་ན། འདི་ལྟ་སྟེ། ཚུལ་ཁྲིམས་ལ་གནས་པའི་ཐོས་པ་དང ། བསམ་གཏན་ལ་གནས་པའི་ཤེས་རབ་དང ། མངོན་པར་ཤེས་པ་ལ་གནས་པའི་ཡེ་ཤེས་དང ། ཐབས་ལ་གནས་པའི་བག་ཡོད་པ་སྟེ། གྲོགས་པོ་དག་།ཆོས་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་ཆོས་ཐམས་ཅད་སྡུད་པར་འགྱུར་བའོ།།
466b
གྲོགས་པོ་དག་།དེ་ལ་ཡོངས་སུ་དག་པ་རྣམ་པ་བརྒྱད་ཀྱིས་ཚུལ་ཁྲིམས་ལ་འཇུག་སྟེ། ཡོངས་སུ་དག་པ་རྣམ་པ་བརྒྱད་ཀྱིས་ཇི་ལྟར་འཇུག་ཅེ་ན། འདི་ལྟ་སྟེ། ལུས་དག་པའི་རྣམ་པས་འཇུག་པ་དང།་ངག་དག་པའི་རྣམ་པས་འཇུག་པ་དང ། སེམས་དག་པའི་རྣམ་པས་འཇུག་པ་དང ། བསམ་པ་དག་པའི་རྣམ་པས་འཇུག་པ་དང ། འཚོ་བ་དག་པའི་རྣམ་པས་འཇུག་པ་དང ། སྦྱངས་པའི་ཡོན་ཏན་དང་ཡོ་བྱད་བསྙུངས་པ་དག་པའི་རྣམ་པས་འཇུག་པ་དང ། ཚུལ་འཆོས་པ་དང ། ཁ་གསག་དང ། གཞོགས་སློང་དང ། ཐོབ་ཀྱིས་འཇལ་བ་ཐམས་ཅད་རྣམ་པར་སྤོང་བའི་རྣམ་པས་འཇུག་པ་དང ། བྱང་ཆུབ་ཀྱི་སེམས་མི་བརྗེད་པའི་རྣམ་པས་འཇུག་པ་སྟེ། གྲོགས་པོ་དག། དེ་ལྟར་ཡོངས་སུ་དག་པ་རྣམ་པ་བརྒྱད་ཀྱིས་ཚུལ་ཁྲིམས་ལ་འཇུག་གི་།གྲོགས་པོ་དག་།དེ་ལ་ཡོངས་སུ་དག་པ་རྣམ་པ་བརྒྱད་ཀྱིས་ཐོས་པ་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། བླ་མ་ལ་གུས་པས་ཡོངས་སུ་དག་པ་དང ། ང་རྒྱལ་བཅོམ་པས་ཡོངས་སུ་དག་པ་དང ། བརྩོན་འགྲུས་དང་ཏིང་ངེ་འཛིན་ཐོབ་པས་ཡོངས་སུ་དག་པ་དང ། དྲན་པ་མི་གཡེང་བས་ཡོངས་སུ་དག་པ་དང ། བསྟན་པ་དང་རབ་ཏུ་བཤད་པས་ཡོངས་སུ་དག་པ་དང ། བདག་ལ་མི་བསྟོད་ཅིང་གཞན་ལ་མི་སྨོད་པས་ཡོངས་སུ་དག་པ་དང ། ཚུལ་བཞིན་དུ་སོ་སོར་རྟོག་པས་ཡོངས་སུ་དག་པ་དང ། ཇི་ལྟར་ཐོས་པའི་ཆོས་བསྒྲུབ་པས་ཡོངས་སུ་དག་པ་སྟེ། གྲོགས་པོ་དག་།དེ་ལྟར་རྣམ་པ་
467a
༄#། །བརྒྱད་ཀྱིས་ཐོས་པ་ཡོངས་སུ་དག་གོ་།གྲོགས་པོ་དག་།དེ་ལ་རྣམ་པ་བརྒྱད་ཀྱིས་བསམ་གཏན་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། དགོན་པ་ལ་གནས་ཤིང་དབེན་པ་ལ་དགའ་བས་ཡོངས་སུ་དག་པ་དང ། འདུ་འཛི་སྤོང་བས་ཡོངས་སུ་དག་པ་དང ། ཡུལ་དང་མི་འདྲེ་བས་ཡོངས་སུ་དག་པ་དང ། ལུས་དང་སེམས་ལས་སུ་རུང་བས་ཡོངས་སུ་དག་པ་དང ། ཁ་ཟས་བསྙུངས་ཏེ་ལུས་འཚོ་བས་ཡོངས་སུ་དག་པ་དང ། དམིགས་པ་ལ་འཇོག་པས་ཡོངས་སུ་དག་པ་དང ། སྒྲ་དང་མཚན་མ་ཐམས་ཅད་རྣམ་པར་འཇིགས་པས་ཡོངས་སུ་དག་པ་དང ། འཕགས་པའི་བདེན་པ་དང་ཟང་ཟིང་མེད་པར་སོ་སོར་ཡང་དག་པར་འགེད་པས་ཡོངས་སུ་དག་པ་སྟེ། གྲོགས་པོ་དག་།དེ་ལྟར་རྣམ་པ་བརྒྱད་ཀྱིས་བསམ་གཏན་ཡོངས་སུ་དག་གོ་།གྲོགས་པོ་དག། །དེ་ལ་རྣམ་པ་བརྒྱད་ཀྱིས་ཤེས་རབ་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། ཕུང་པོ་ལ་མཁས་པའི་རྣམ་པས་ཡོངས་སུ་དག་པ་དང ། ཁམས་ལ་མཁས་པའི་རྣམ་པས་ཡོངས་སུ་དག་པ་དང ། སྐྱེ་མཆེད་ལ་མཁས་པའི་རྣམ་པས་ཡོངས་སུ་དག་པ་དང ། རྟེན་ཅིང་འབྲེལ་པར་འབྱུང་བ་ལ་མཁས་པའི་རྣམ་པས་ཡོངས་སུ་དག་པ་དང ། བདེན་པ་ལ་མཁས་པའི་རྣམ་པས་ཡོངས་སུ་དག་པ་དང ། དབང་པོ་ལ་མཁས་པའི་རྣམ་པས་ཡོངས་སུ་དག་པ་དང ། རྣམ་པར་ཐར་
467b
བའི་སྒོ་གསུམ་ལ་མཁས་པའི་རྣམ་པས་ཡོངས་སུ་དག་པ་དང ། བག་ལ་ཉལ་དང་ཀུན་ནས་དཀྲིས་པ་དང་བལྟ་བ་ཐམས་ཅད་ཡང་དག་པར་འཇོམས་པ་ལ་མཁས་པའི་རྣམ་པས་ཡོངས་སུ་དག་པ་སྟེ། གྲོགས་པོ་དག་།དེ་ལྟར་རྣམ་པ་བརྒྱད་ཀྱིས་ཤེས་རབ་ཡོངས་སུ་དག་གོ་།གྲོགས་པོ་དག་།དེ་ལྟར་རྣམ་པ་བརྒྱད་ཀྱིས་མངོན་པར་ཤེས་པ་ཡོངས་སུ་དག་སྟེ། བརྒྱད་གང་ཞེ་ན།་འདི་ལྟ་སྟེ། སྒྲིབ་པ་མེད་པར་གཟུགས་ཐམས་ཅད་མཐོང་བས་ལྷའི་མིག་ཡོངས་སུ་དག་པ་དང ། སྒྲིབ་པ་མེད་པར་སྒྲ་ཐམས་ཅད་ཐོས་པས་ལྷའི་རྣ་བ་ཡོངས་སུ་དག་པ་དང ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ལ་རྣམ་པར་ལྟ་བས་ཕ་རོལ་གྱི་སེམས་ཤེས་པ་ཡོངས་སུ་དག་པ་དང ། སྒྲིབ་པ་མེད་ཅིང་ཆགས་པ་མེད་པར་སྔོན་གྱི་མཐའ་རྗེས་སུ་དྲན་པས་སྔོན་གྱི་གནས་རྗེས་སུ་དྲན་པའི་ཤེས་པ་ཡོངས་སུ་དག་པ་དང ། སངས་རྒྱས་ཀྱི་ཞིང་མཐའ་ཡས་པར་འགྲོ་བས་རྫུ་འཕྲུལ་གྱི་བྱ་བ་ཡོངས་སུ་དག་པ་དང ། ཟག་པ་ཐམས་ཅད་ཟད་པ་ཤེས་པས་བསལ་ཅིང་དུས་མ་ཡིན་པ་ཡོངས་སུ་སྤངས་པས་ཟག་པ་ཟད་པ་ཡོངས་སུ་དག་པ་དང ། གཡོ་བ་དང་རློམ་སེམས་ཐམས་ཅད་དང་བྲལ་བས་དགེ་བའི་རྩ་བས་མངོན་པར་ཤེས་པ་ཡོངས་སུ་དག་པ་དང ། ཇི་ལྟར་སྔོན་དམ་བཅས་པ་ཉམས་འོག་ཏུ་ཆུད་པར་བྱེད་པས་བཤེས་པ་བརྟེན་པ་ཡོངས་སུ་དག་པ་སྟེ། གྲོགས་པོ་དག་།དེ་ལྟར་རྣམ་པ་བརྒྱད་ཀྱིས་མངོན་པར་ཤེས་པ་ཡོངས་སུ་དག་གོ་།གྲོགས་པོ་དག། དེ་
468a
༄#། །ལ་རྣམ་པ་བརྒྱད་ཀྱིས་ཡེ་ཤེས་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། ཕུང་པོ་ལྔ་ཡོངས་སུ་ཤེས་པས་སྡུག་བསྔལ་ཤེས་པ་ཡོངས་སུ་དག་པ་དང།་སྲེད་པ་ཤིན་ཏུ་སྤོང་བས་ཀུན་འབྱུང་བ་ཤེས་པ་ཡོངས་སུ་དག་པ་དང ། རྟེན་ནས་སྐྱེས་པ་ལ་སྐྱེ་བ་མེད་པར་སོ་སོར་རྟོག་པས་འགོག་པ་ཤེས་པ་ཡོངས་སུ་དག་པ་དང ། འདུས་བྱས་དང་འདུས་མ་བྱས་མཉམ་པ་ཉིད་དུ་འཇུག་པས་ལམ་ཤེས་པ་ཡོངས་སུ་དག་པ་དང ། ལས་དང་བྱ་བ་དང་མི་འགལ་བས་རྒྱུ་ཤེས་པ་ཡོངས་སུ་དག་པ་དང ། བདག་མེད་པ་དང་སེམས་ཅན་མེད་པ་དང།་སྲོག་མེད་པ་དང ། གསོ་བ་མེད་པས་རྐྱེན་ཤེས་པ་ཡོངས་སུ་དག་པ་དང ། འཁོར་གསུམ་ཡོངས་སུ་གཅོད་པས་དུས་གསུམ་ཤེས་པ་ཡོངས་སུ་དག་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ཡེ་ཤེས་ཐམས་ཅད་ལ་འཇུག་པས་ཐམས་ཅད་མཁྱེན་པའི་ཡེ་ཤེས་ཡོངས་སུ་དག་པ་སྟེ། གྲོགས་པོ་དག་།དེ་ལྟར་རྣམ་པ་བརྒྱད་ཀྱིས་ཡེ་ཤེས་ཡོངས་སུ་དག་གོ་།གྲོགས་པོ་དག་།དེ་ལ་རྣམ་པ་བརྒྱད་ཀྱིས་ངེས་པར་སེམས་པ་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། ནང་ཉེ་བར་ཞི་བས་ཡོངས་སུ་དག་པ་དང ། ཕྱི་རོལ་དུ་མི་རྒྱུ་བས་ཡོངས་སུ་དག་པ་དང ། ཁམས་གསུམ་ལ་མི་གནས་པས་ཡོངས་སུ་དག་པ་དང ། རྟེན་ཅིང་འབྲེལ་བར་འབྱུང་བ་དང་མཐུན་པས་ཡོངས་སུ་དག་པ་དང ། སྐྱེ་བ་མེད་པ་དང་འབྱུང་བ་མེད་པས་ཡོངས་སུ་དག་པ་དང ། མངོན་
468b
པར་འདུ་བྱེད་པ་མེད་པས་སོ་སོར་རྟོག་པས་ཡོངས་སུ་དག་པ་དང ། ཆོས་ཐམས་ཅད་བདག་མེད་པར་སོ་སོར་རྟོག་པས་ཡོངས་སུ་དག་པ་དང ། ཉོན་མོངས་པ་ཐམས་ཅད་ཀྱིས་ཤིན་ཏུ་མི་འཁྲུགས་པས་ཡོངས་སུ་དག་པ་སྟེ། གྲོགས་པོ་དག་།འདི་ནི་རྣམ་པ་བརྒྱད་ཀྱིས་ངེས་པར་སེམས་པ་ཡོངས་སུ་དག་པའོ། །གྲོགས་པོ་དག་།དེ་ལ་རྣམ་པ་བརྒྱད་ཀྱིས་བག་ཡོད་པ་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། ཚུལ་ཁྲིམས་མཆོག་ཏུ་འཛིན་པ་མེད་པས་ཡོངས་སུ་དག་པ་དང ། ཐོས་པ་ཡོངས་སུ་བྱང་བས་ཡོངས་སུ་དག་པ་དང ། བསམ་གཏན་དེ་ལ་མ་ཆགས་པས་ཡོངས་སུ་དག་པ་དང ། ཤེས་རབ་དང་གསུང་རབ་ཀྱིས་ཡོངས་སུ་དག་པ་དང ། མངོན་པར་ཤེས་པ་ལས་མ་ཉམས་པས་ཡོངས་སུ་དག་པ་དང ། ཡེ་ཤེས་ཀྱི་རློམ་སེམས་མེད་པས་ཡོངས་སུ་དག་པ་དང ། ངེས་པར་སེམས་པས་རྩོད་པ་མེད་པས་ཡོངས་སུ་དག་པ་དང ། དགེ་བའི་ཆོས་ཆུད་མི་ཟ་བས་ཡོངས་སུ་དག་པ་སྟེ། གྲོགས་པོ་དག་།རྣམ་པ་བརྒྱད་པོ་དེ་དག་གིས་བག་ཡོད་པ་ཡོངས་སུ་དག་གོ་།གྲོགས་པོ་དག་།དེ་ལྟ་བས་ན་ཁྱེད་བག་ཡོད་པར་གྱིས་ཤིག་།བག་ཡོད་པ་ལ་བརྟེན་པའི་བྱང་ཆུབ་སེམས་དཔའ་རྣམས་ནི་བདེ་བ་གསུམ་ལས་ཡོངས་སུ་ཉམས་པར་མི་འགྱུར་རོ། །གསུམ་གང་ཞེ་ན། འདི་ལྟ་སྟེ། ལྷའི་བདེ་བ་དང ། བསམ་གཏན་གྱི་བདེ་བ་དང ། མྱ་ངན་ལས་འདས་པའི་བདེ་བའོ། །ངན་སོང་གསུམ་ལས་ཡོངས་
469a
༄#། །སུ་ཐར་བར་འགྱུར་ཏེ། གསུམ་གང་ཞེ་ན། འདི་ལྟ་སྟེ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དང་གསུམ་པོ་དེ་དག་གོ་།སྡུག་བསྔལ་གསུམ་གྱིས་འཕྲོགས་པར་མི་འགྱུར་ཏེ། གསུམ་གང་ཞེ་ན། སྐྱེ་བའི་སྡུག་བསྔལ་དང ། རྒ་བའི་སྡུག་བསྔལ་དང ། འཆི་བའི་སྡུག་བསྔལ་ཏེ་གསུམ་པོ་དེ་དག་གོ་།འཇིགས་པ་གསུམ་ལས་ཡང་དག་པར་འདའ་བར་འགྱུར་ཏེ། གསུམ་གང་ཞེ་ན། འཚོ་བ་མེད་པའི་འཇིགས་པ་དང ། ཚིགས་སུ་བཅད་པ་མེད་པའི་འཇིགས་པ་དང ། འཁོར་བ་ལ་བག་ཚ་བའི་འཇིགས་པ་སྟེ་གསུམ་པོ་དེ་དག་གོ་།སྲིད་པ་གསུམ་ལས་ཡང་དག་པར་འདའ་བར་འགྱུར་ཏེ། འདོད་པའི་སྲིད་པ་དང ། གཟུགས་ཀྱི་སྲིད་པ་དང ། གཟུགས་མེད་པའི་སྲིད་པའོ། །དྲི་མ་གསུམ་སྦྱོངས་ཏེ། འདོད་ཆགས་ཀྱི་དྲི་མ་དང ། ཞེ་སྡང་གི་དྲི་མ་དང ། གཏི་མུག་གི་དྲི་མའོ། །བསླབ་པ་གསུམ་ཡོངས་སུ་རྫོགས་པར་བྱེད་དེ། ལྷག་པའི་ཚུལ་ཁྲིམས་དང།་ལྷག་པའི་སེམས་དང ། ལྷག་པའི་ཤེས་རབ་བོ། །ཡོངས་སུ་དག་པ་གསུམ་འཐོབ་པར་འགྱུར་ཏེ། ལུས་ཡོངས་སུ་དག་པ་དང ། ངག་ཡོངས་སུ་དག་པ་དང ། སེམས་ཡོངས་སུ་དག་པའོ། །བསོད་ནམས་བྱ་བ་ལས་བྱུང་བའི་དངོས་པོ་གསུམ་པོ་ཡོངས་སུ་རྫོགས་པར་བྱེད་དེ། སྦྱིན་པ་ལས་བྱུང་བ་དང ། ཚུལ་ཁྲིམས་ལས་བྱུང་བ་དང ། བསྒོམ་པ་ལས་བྱུང་བའོ། །
469b
རྣམ་པར་ཐར་པའི་སྒོ་གསུམ་སྒོམ་པར་བྱེད་དེ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའོ། །རིགས་གསུམ་རྒྱུན་མི་གཅོད་དེ། སངས་རྒྱས་ཀྱི་རིགས་དང ། ཆོས་ཀྱི་རིགས་དང།་དགེ་འདུན་གྱི་རིགས་སོ། །ཕ་རོལ་ཏུ་ཕྱིན་པ་རྣམས་ཀྱི་མི་མཐུན་པའི་ཕྱོགས་གསུམ་གསུམ་རབ་ཏུ་སྤོང་སྟེ། སེར་སྣའི་དྲི་མ་དང ། སེར་སྣའི་ཀུན་དུ་སྦྱོར་བ་དང ། གཏོང་བ་དང་ལྡན་པ་རྣམས་ལ་སྡང་བ་དང ། འཆལ་བའི་ཚུལ་ཁྲིམས་དང ། ཚུལ་ཁྲིམས་ལས་བཟློག་པ་དང ། ཚུལ་ཁྲིམས་དང་ལྡན་པ་རྣམས་ལ་སྡང་བ་དང ། གནོད་སེམས་དང ། བཟོད་པ་ལས་བཟློག་པ་དང ། བཟོད་པ་དང་ལྡན་པ་རྣམས་ལ་སྡང་བ་དང ། ལེ་ལོ་དང ། བརྩོན་འགྲུས་ལས་བཟློག་པ་དང ། བརྩོན་འགྲུས་དང་ལྡན་པ་རྣམས་ལ་སྡང་བ་དང ། རྣམ་པར་གཡེང་བ་དང ། བསམ་གཏན་ལས་བཟློག་པ་དང ། བསམ་གཏན་དང་ལྡན་པ་རྣམས་ལ་སྡང་བ་དང ། འཆལ་པའི་ཤེས་རབ་དང ། ཤེས་རབ་ལས་བཟློག་པ་དང ། ཤེས་རབ་དང་ལྡན་པ་རྣམས་ལ་སྡང་བའོ། །ཕ་རོལ་ཏུ་ཕྱིན་པ་རྣམས་ཀྱི་རྟོན་པ་གསུམ་གསུམ་གྱིས་ཉེ་བར་རྟོན་ཏེ། གསུམ་གང་ཞེ་ན། འདི་ལྟ་སྟེ། བདོག་པ་ཐམས་ཅད་ཡོངས་སུ་གཏོང་བ་དང ། རྣམ་པར་སྨིན་པ་ལ་མི་རེག་པ་དང ། བྱང་ཆུབ་ཏུ་ཡོངས་སུ་བསྔོ་བ་དང ། ཚུལ་ཁྲིམས་ཡང་དག་པར་ལེན་པ་དང ། ཚུལ་ཁྲིམས་མཆོག་ཏུ་འཛིན་པ་མེད་པ་དང ། བྱང་ཆུབ་ཏུ་ཡོངས་སུ་བསྔོ་བ་དང ། བཟོད་ཅིང་དེས་པ་དང ། བདག་དང་གཞན་རྗེས་
470a
༄#། །སུ་བསྲུངས་པ་དང ། བྱང་ཆུབ་ཏུ་ཡོངས་སུ་བསྔོ་བ་དང ། བརྩོན་འགྲུས་གཅེས་པ་མི་འདོར་བ་དང ། བླང་བ་མེད་ཅིང་དོར་བ་མེད་པ་དང ། བྱང་ཆུབ་ཏུ་ཡོངས་སུ་བསྔོ་བ་དང ། བསམ་གཏན་ཉེ་བར་ལེན་པ་དང ། མི་གནས་པར་བསམ་གཏན་བྱེད་པ་དང ། བྱང་ཆུབ་ཏུ་ཡོངས་སུ་བསྔོ་བ་དང ། ཤེས་རབ་ཀྱི་སྣང་བ་དང ། སྤྲོས་པ་མེད་པ་དང།་བྱང་ཆུབ་ཏུ་ཡོངས་སུ་བསྔོ་བ་སྟེ། གྲོགས་པོ་དག་།བག་ཡོད་པའི་བྱང་ཆུབ་སེམས་དཔའ་རྣམས་ནི་ཕ་རོལ་ཏུ་ཕྱིན་པ་རྣམས་ཀྱི་རྟོན་པ་འདི་གསུམ་གྱིས་ཉེ་བར་རྟོན་ཏེ། ། གྲོགས་པོ་དག་།དེ་ལྟ་བས་ན་ཁྱོད་ཅག་བག་ཡོད་པར་གྱིས་ཤིག་།སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་དང ། དེ་ལས་གཞན་པའི་དགེ་བའི་བྱང་ཆུབ་ཀྱི་ཕྱོགས་ཀྱི་ཆོས་གང་ཡང་ཡིན་པ་དག་ཀྱང་བག་ཡོད་པས་ཐོབ་བོ། །གྲོགས་པོ་དག་།བག་ཡོད་པའི་བྱང་ཆུབ་སེམས་དཔའ་ནི་ཚེགས་ཆུང་དུས་དྲན་པ་ཉེ་བར་གཞག་པ་བཞི་བསྒོམ་པ་ཡོངས་སུ་རྫོགས་པར་འགྱུར་ཏེ།་དྲན་པ་ཉེ་བར་གཞག་པ་བཞི་བསྒོམ་པ་གང་ཞེ་ན། གང་ལ་ལུས་ཀྱི་གནས་མེད་པ་དང ། ཚོར་བའི་གནས་མེད་པ་དང ། སེམས་ཀྱི་གནས་མེད་པ་དང ། ཆོས་ཀྱི་གནས་མེད་པ་སྟེ།་ཆོས་ཐམས་ཅད་ཀྱི་གནས་མེད་ཅིང་རྟེན་མེད་པ་འདི་ནི་དྲན་པ་ཉེ་བར་གཞག་པ་བསྒོམ་པ་ཞེས་བྱའོ། །ཚེགས་ཆུང་དུས་ཡང་དག་པའི་སྤོང་བ་བཞི་བསྒོམ་པ་ཡོངས་སུ་རྫོགས་པར་
470b
འགྱུར་ཏེ། ཡང་དག་པའི་སྤོང་བ་བཞི་བསྒོམ་པ་གང་ཞེ་ན། གང་ཆོས་ཐམས་ཅད་ནམ་མཁའ་དང་མཚུངས་པ་དང ། གཟོད་མ་ཉིད་ནས་མ་སྐྱེས་པ་དང ། མ་བྱུང་བ་དང ། མ་འཐོན་པ་དང ། མངོན་པར་མ་གྲུབ་པར་ཡང་སོ་སོར་རྟོག་ཅིང ། སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་སྐྱེ་བར་བྱ་བའི་ཕྱིར་འདུན་པ་བསྐྱེད་ཅིང་འབད་ལ་བརྩོན་འགྲུས་རྩོམ་ཞིང་སེམས་རབ་ཏུ་འཛིན་ཏེ། ཡང་དག་པར་རབ་ཏུ་འཇུག་པ་དང ། ཆོས་ཐམས་ཅད་ལས་ཀྱི་རྣམ་པར་སྨིན་པ་མེད་པར་ཡང་སོ་སོར་རྟོག་ཅིང་སེམས་ཅན་གཞན་དག་དང ། གང་ཟག་གཞན་རྣམས་ཀྱི་མི་དགེ་བའི་ཆོས་ཐམས་ཅད་སྤང་བའི་ཕྱིར་འདུན་པ་བསྐྱེད་ཅིང་འབད་ལ། བརྩོན་འགྲུས་རྩོམ་ཞིང་སེམས་རབ་ཏུ་འཛིན་ཏེ་ཡང་དག་པར་རབ་ཏུ་འཇོག་པ་དང ། སྡིག་པ་མི་དགེ་བའི་ཆོས་སྐྱེས་པ་རྣམས་སྤང་པའི་ཕྱིར་འདུན་པ་བསྐྱེད་ཅིང་འབད་ལ། བརྩོན་འགྲུས་རྩོམ་ཞིང་སེམས་རབ་ཏུ་འཛིན་ཏེ་ཡང་དག་པར་རབ་ཏུ་འཇོག་པ་དང ། ཆོས་ཐམས་ཅད་ལ་སྟོང་པ་ཉིད་དུ་ཡང་མོས་ལ། དགེ་བའི་ཆོས་མ་སྐྱེས་པ་རྣམས་བསྐྱེད་པའི་ཕྱིར་འདུན་པ་བསྐྱེད་ཅིང་འབད་ལ། བརྩོན་འགྲུས་རྩོམ་ཞིང་སེམས་རབ་ཏུ་འཛིན་ཏེ་ཡང་དག་པར་རབ་ཏུ་འཇོག་པ་དང ། ཆོས་ཐམས་ཅད་རྣམ་པར་གྲོལ་བར་ཡང་ཡིད་ཆེས་ལ། དགེ་བའི་ཆོས་སྐྱེས་པ་རྣམས་གནས་པར་བྱ་བ་དང ། ཉམས་པར་མི་འགྱུར་བར་བྱ་བ་དང ། ཕྱིར་ཞིང་འཕེལ་བར་བྱ་བའི་ཕྱིར་འདུན་པ་བསྐྱེད་ཅིང་འབད་ལ། བརྩོན་འགྲུས་རྩོམ་
471a
༄#། །ཞིང་སེམས་རབ་ཏུ་འཛིན་ཏེ་ཡང་དག་པར་རབ་ཏུ་འཇོག་ལ། ཆོས་ཐམས་ཅད་ལ་རྩོམ་པ་མེད་ཅིང་རྟུལ་བ་མེད་པར་ཡང་མཐོང་སྟེ། ཡང་མཉམ་པ་ཉིད་གང་ཡིན་པ་དེ་ལ་ཆོས་གང་གི་སྐྱེ་བ་ཡང་མེད། འགོག་པ་ཡང་མེད་པ་འདི་ནི་ཡང་དག་པའི་སྤོང་བ་བསྒོམ་པའོ། །རྫུ་འཕྲུལ་གྱི་རྐང་པ་བཞི་བསྒོམ་པ་ཡོངས་སུ་རྫོགས་པར་འགྱུར་ཏེ། རྫུ་འཕྲུལ་གྱི་རྐང་པ་བཞི་བསྒོམ་པ་གང་ཞེ་ན། གང་ལུས་དང་སེམས་ལས་སུ་རུང་བ་སྟེ། དེ་སེམས་ལས་སུ་རུང་བས་དགེ་བའི་ཆོས་ལས་འདུན་པ་ཡང་མི་འདོར་ལ་འདོད་པའི་འདོད་ཆགས་སྤང་པའི་ཕྱིར་ཡང་མངོན་པར་བརྩོན་པ་དང ། སེམས་ཅན་ཐམས་ཅད་ཡོངས་སུ་སྨིན་པའི་ཕྱིར་བརྩོན་འགྲུས་ཀྱང་རྩོམ་ལ་བརྟགས་ནས་ཀྱང་ཆོས་ཐམས་ཅད་མི་དམིགས་པ་དང ། སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་བྱང་ཆུབ་པར་བྱ་བའི་ཕྱིར་བྱང་ཆུབ་ཀྱི་སེམས་ཀྱང་མི་འདོར་རོ། །སེམས་སྒྱུ་མ་ལྟ་བུར་ཡང་རབ་ཏུ་ཤེས་པ་དང ། ཇི་ལྟར་ཐོས་པའི་ཆོས་ལ་ཚུལ་བཞིན་དུ་ཡང་སྤྱོད་ལ། ཆོས་རྣམས་ལ་གནས་པར་ཡང་མི་བྱེད་ཅིང་མངོན་པར་ཞེན་པ་ཡང་མེད་པའོ། །དེ་དབང་པོ་ལྔ་བསྒོམ་པ་ཡོངས་སུ་རྫོགས་པར་འགྱུར་ཏེ། དབང་པོ་དྲུག་ལ་བརྟེན་པར་མི་བྱེད་ཅིང ། སེམས་ཅན་ཐམས་ཅད་ཀྱི་དབང་པོ་ཡོངས་སུ་སྨིན་པར་བྱ་བའི་ཕྱིར་ཤེས་པ་ཡང་གཏོད་ལ་གཅིག་ཏུ་གནས་པ་ཡང་ཐོབ་པར་འགྱུར་ཞིང ། གཞན་གྱི་
471b
དད་པས་ཀྱང་མི་འགྲོ་བ་དང ། ཐམས་ཅད་ཀྱང་ཡོངས་སུ་ཐོབ་ལ། བླངས་པ་ཡང་མེད་ཅིང་དོར་བ་ཡང་མེད་པ་དང ། ཐམས་ཅད་དུ་འགྲོ་བའི་ལམ་ལ་ཡང་རྨོངས་པ་མེད་ལ། དྲན་པ་ཡང་མེད་ཅིང་ཡིད་ལ་བྱེད་པ་ཡང་མེད་པ་དང ། ཆོས་ཐམས་ཅད་ཀྱི་རྗེས་སུ་ཡང་སོང་ལ། རྟག་ཏུ་མཉམ་པར་ཡང་གཞག་པར་གྱུར་ཅིང ། ཆོས་ཐམས་ཅད་ཀྱིས་མཉམ་པ་ཉིད་ལ་སྙོམས་པར་ཞུགས་པ་དང ། རབ་རིབ་མེད་པའི་ཡེ་ཤེས་ཀྱི་སྣང་བ་ཡང་ཐོབ་པར་གྱུར་ལ། སྤྲོས་པ་དང་ལྟ་བ་ཡང་ཡང་དག་པར་ཆད་པ་འདི་ནི་དེའི་དབང་པོ་བསྒོམ་པ་ཡོངས་སུ་རྫོགས་པའོ། །དེ་སྟོབས་ལྔ་བསྒོམ་པ་ཡོངས་སུ་རྫོགས་པར་འགྱུར་ཏེ། དད་པའི་སྟོབས་དང་ལྡན་པས་ཕས་ཀྱི་རྒོལ་བ་ཐམས་ཅད་ཀྱིས་མི་རྫི་བ་དང ། བརྩོན་འགྲུས་ཀྱི་སྟོབས་ཀྱིས་བདུད་ཐམས་ཅད་ཀྱི་ཐུབ་པར་དཀའ་བ་དང ། དྲན་པའི་སྟོབས་ཀྱིས་ཉན་ཐོས་དང ། རང་སངས་རྒྱས་ཀྱིས་ཐམས་ཅད་དུ་མི་འཕྲོགས་པ་དང ། ཏིང་ངེ་འཛིན་གྱི་སྟོབས་ཀྱིས་སྒྲིབ་པ་རྣམས་ཀྱིས་ཟིལ་གྱིས་མི་གནོན་པ་དང ། ཤེས་རབ་ཀྱི་སྟོབས་དང་ལྡན་པས་ལྟ་བར་གྱུར་པ་རྣམས་ཀྱིས་མངོན་པར་ཞེན་པ་མེད་པ་སྟེ། དེ་ལྟར་སྟོབས་ལྔ་བསྒོམ་པ་ཡོངས་སུ་རྫོགས་པར་འགྱུར་རོ། །དེ་བྱང་ཆུབ་ཀྱི་ཡན་ལག་བདུན་ལ་བསྒོམ་པ་ཡོངས་སུ་རྫོགས་པར་འགྱུར་ཏེ། བྱང་ཆུབ་ཀྱི་ཡན་ལག་བསྒོམ་པ་གང་ཞེ་ན། འདི་ལྟ་སྟེ། དགེ་བའི་ཆོས་ཐམས་ཅད་མི་བརྗེད་པར་བྱ་བའི་ཕྱིར་དྲན་པ་ཡང་དག་བྱང་ཆུབ་ཀྱི་ཡན་ལག་བསྒོམ་པ་དང ། རྟེན་ཅིང་འབྲེལ་བར་འབྱུང་བ་དང་
472a
༄#། །མཐུན་པར་བྱ་བའི་ཕྱིར་ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་བསྒོམ་པ་དང ། བྱང་ཆུབ་ཀྱི་ལམ་ལས་ཕྱིར་མི་ལྡོག་པར་བྱ་བའི་ཕྱིར་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་བསྒོམ་པ་དང ། ཟང་ཟིང་མེད་པའི་ཆོས་ལ་དགའ་བ་རབ་ཏུ་མྱོང་བར་བྱ་བའི་ཕྱིར་དགའ་བ་ཡང་དག་བྱང་ཆུབ་ཀྱི་ཡན་ལག་བསྒོམ་པ་དང ། ལུས་དང་སེམས་མི་གཡོ་བ་དང་བྲལ་བའི་ཕྱིར་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་བསྒོམ་པ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པས་མངོན་པར་བསྒྲུབས་པའི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་བསྒོམ་པ་དང ། མཐོ་དམའ་མེད་པའི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་བསྒོམ་པ་སྟེ། འདི་ནི་བྱང་ཆུབ་ཀྱི་ཡན་ལག་བསྒོམ་པ་ཞེས་བྱའོ། །གྲོགས་པོ་དག་།བག་ཡོད་པའི་བྱང་ཆུབ་སེམས་དཔའ་ནི་ཚེགས་ཆུང་དུས་འཕགས་པའི་ལམ་ཡན་ལག་བརྒྱད་པ་བསྒོམ་པ་ཡོངས་སུ་རྫོགས་པར་འགྱུར་ཏེ། ལམ་བསྒོམ་པ་གང་ཞེ་ན། གང་འདི་རྟག་པ་དང་ཆད་པ་དང་བྲལ་བའི་ཡང་དག་པའི་ལྟ་བ་བསྒོམ་པ་དང ། འདོད་པ་དང ། གནོད་སེམས་དང ། རྣམ་པར་འཚེ་བའི་རྣམ་པར་རྟོག་པ་དང་བྲལ་བའི་ཡང་དག་པའི་རྟོག་པ་བསྒོམ་པ་དང ། བདག་དང་གཞན་ལ་གཏོང་བ་མེད་པའི་ཡང་དག་པའི་ངག་བསྒོམ་པ་དང ། ཚུལ་འཆོས་པ་དང ། ཁ་གསག་དང ། གཞོགས་སློང་དང ། ཐོབ་ཀྱིས་
472b
འཇལ་བ་དང་བྲལ་བའི་ཡང་དག་པའི་འཚོ་བ་བསྒོམ་པ་དང ། ལུས་དང་སེམས་ཉམ་ཆུང་བ་དང་བྲལ་བའི་ཡང་དག་པའི་ལས་ཀྱི་མཐའ་བསྒོམ་པ་དང ། བདག་ལ་བསྟོད་པ་དང་གཞན་ལ་སྨོད་པ་དང་བྲལ་བའི་ཡང་དག་པའི་རྩོལ་བ་བསྒོམ་པ་དང ། གཏི་མུག་དང་རྨོངས་པ་དང་བྲལ་བའི་ཡང་དག་པའི་དྲན་པ་བསྒོམ་པ་དང ། རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་བའི་ཡང་དག་པའི་ཏིང་ངེ་འཛིན་བསྒོམ་པ་སྟེ། འདི་ནི་འཕགས་པའི་ལམ་ཡན་ལག་བརྒྱད་པ་བསྒོམ་པ་ཞེས་བྱའོ། །དེ་ནས་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་དང ། དེ་ལས་གཞན་པའི་དགེ་བ་བྱང་ཆུབ་ཀྱི་ཕྱོགས་ཀྱི་ཆོས་གང་ཡིན་པ་དག་ཀྱང་བག་ཡོད་པས་ཐོབ་ཅེས་བྱའོ། །གྲོགས་པོ་དག་།དེ་ལྟར་ན་བག་ཡོད་པ་བྱང་ཆུབ་སེམས་དཔའ་དེ་ལྟར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་ལ་འཇུག་གོ་།ཞུགས་ནས་འདུ་བྱེད་ཐམས་ཅད་ཀྱི་འདམས་བརྒལ་ཏེ། །བརྒལ་ནས་ཀྱང་རྣམ་པར་ལྟ་སྟེ། རྣམ་པར་བལྟས་ནས་མི་མཐོང་ངོ ། །མི་འབར་རོ། །ཤིན་ཏུ་ཉེ་བར་ཞི་སྟེ། རྣམ་པར་འཁྲུགས་པར་མི་བྱེད་དོ། །ཤིན་ཏུ་ཉེ་བར་ཞི་བ་གང་ཡིན་ཞེ་ན། གང་ཉེ་བར་མ་བསྒྲུབས་པ་དེས་མ་བྱས་སོ། །གང་མ་བྱས་པ་དེ་མྱོང་བ་མེད་པའོ། །གང་མྱོང་བ་མེད་པ་དེ་ལ་གདགས་པ་མེད་དོ། །གང་གདགས་པ་མེད་པ་དེ་ནི་ཤིན་ཏུ་ཉེ་བར་ཞི་བའོ། །བསྟན་པ་འདི་བཤད་པ་ན་ལྷའི་བུ་ཁྲི་ཉིས་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་
473a
༄#། །བྲལ་བ་རྣམ་པར་དག་གོ་།ལྷའི་བུ་དཔལ་བཟང་གིས་གཞན་ཡང་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བྱང་ཆུབ་སེམས་དཔའ་ལམ་ཇི་ལྟར་བསྒོམ། སྨྲས་པ། ལྷའི་བུ། བྱང་ཆུབ་སེམས་དཔའ་ནི་འཁོར་བ་ཡང་མི་སྤོང་ལ། འཁོར་བའི་ཉེས་པ་རྣམས་ཀྱིས་ཀྱང་མི་གོས་སོ། །འདུས་མ་བྱས་སུ་ཡང་མི་ལྟུང་ལ། འདུས་མ་བྱས་ཀྱི་ཡོན་ཏན་རྣམས་ཀྱང་མྱོང་ངོ ། །ཕ་རོལ་ཏུ་ཕྱིན་པ་དྲུག་གི་ལམ་ཡང་བསྒོམ་ལ། ཉན་ཐོས་དང་རང་སངས་རྒྱས་ཀྱི་ཡུལ་ལ་ཡང་སྣང་ངོ ། །ལྷའི་བུ། གཞན་ཡང་བྱང་ཆུབ་སེམས་དཔའ་རྣམས་ཀྱི་ལམ་ནི་སྟོང་པ་ཉིད་ཀྱིས་རྣམ་པར་དག་པ་ཡང་ཡིན་ལ། ལྟ་བར་གྱུར་པ་ལ་ཡང་མཁས་ཤིང ། ལྟ་བར་གྱུར་པ་ལ་མངོན་པར་ཞེན་པ་ཡང་མེད་དོ། །མཚན་མ་མེད་པས་རྣམ་པར་དག་པར་ཡང་ཡིན་ལ། མཚན་མ་ལ་ཡང་མཁས་ཤིང ། མཚན་མ་ལ་མངོན་པར་ཞེན་པ་ཡང་མེད་དོ། །སྨོན་པ་མེད་པས་རྣམ་པར་དག་པ་ཡང་ཡིན་ལ། ཁམས་གསུམ་པ་ལ་ཡང་མཁས་ཤིང ། ཁམས་གསུམ་པ་ལ་མངོན་པར་ཞེན་པ་ཡང་མེད་དོ། །སྐྱེ་བ་མེད་པ་དང་འབྱུང་བ་མེད་པས་རྣམ་པར་དག་པ་ཡང་ཡིན་ལ། སྐྱེ་བ་དང་འཇིག་པ་ལ་ཡང་མཁས་ཤིང ། སྐྱེ་བ་དང་འཇིག་པ་ལ་མངོན་པར་ཞེན་པ་ཡང་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་ངེས་པར་སེམས་པ་དེ་དག་རྣམས་ནི་སེམས་ཅན་ཆོས་ཐམས་ཅད་སྟོང་པའོ་སྙམ་པའི་ལྟ་བར་གྱུར་
473b
བར་ཞུགས་པ་ལྟ་བར་གྱུར་པ་བག་ལ་ཉལ་བར་བྱས་པ་རྣམས་ཀྱི་ལྟ་བར་གྱུར་པ་སྤང་པའི་ཕྱིར་ཆོས་ཀྱང་སྟོན་ལ། ལྟ་བར་གྱུར་པ་དེ་དག་ཀྱང་སྟོང་པ་ཉིད་དུ་མཐོང་ངོ ། །དེ་བཞིན་དུ་སྦྱར་ཏེ། བྱང་ཆུབ་སེམས་དཔའ་སེམས་ངེས་པར་སེམས་པ་ནི་མཚན་མ་མེད་པ་དང ། སྨོན་པ་མེད་པ་དང ། མངོན་པར་འདུ་བྱེད་པ་མེད་པ་དང ། སྐྱེ་བ་མེད་པ་དང ། བྱུང་བ་མེད་པའི་ཆོས་ཐམས་ཅད་ལ་འབྱུང་བ་དང་འཇིག་པའི་རྗེས་སུ་མཐུན་པར་འབྱུང་བ་དང ། འཇིག་པ་བག་ལ་ཉལ་བ་བྱས་པ་རྣམས་ཀྱི་འབྱུང་བ་དང ། འཇིག་པར་ལྟ་བ་སྤང་པའི་ཕྱིར་ཆོས་ཀྱང་སྟོན་ལ། འབྱུང་བ་དང་འཇིག་པ་དེ་ཡང་འབྱུང་བ་དང་འཇིག་པ་མེད་པ་ཉིད་དུ་མཐོང་སྟེ། འདི་ནི་བྱང་ཆུབ་སེམས་དཔའ་རྣམས་ཀྱི་ལམ་བསྒོམ་པ་ཞེས་བྱའོ། །ལྷའི་བུ། གཞན་ཡང་བྱང་ཆུབ་སེམས་དཔའ་རྣམས་ཀྱི་ལམ་ནི་འགྲོ་བ་དང་འོང་བ་ཞེས་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་འགྲོ་བ་ནི་སེམས་ཅན་གྱི་བསམ་པ་རྣམས་ལའོ། །འོང་བ་ནི་སོ་སོ་ཅི་རིགས་པར་ཆོས་སྟོན་པའི་ཕྱིར་རོ། །བྱང་ཆུབ་སེམས་དཔའི་འགྲོ་བ་ནི་སྙོམས་པར་འཇུག་པ་བསྐྱེད་པའི་ཕྱིར་རོ། །འོང་བ་ནི་འདོད་པའི་ཁམས་ཀྱི་སེམས་ཅན་གྱི་ནང་དུ་སྐྱེ་བའི་ཕྱིར་རོ། །བྱང་ཆུབ་སེམས་དཔའི་འགྲོ་བ་ནི་འཕགས་པའི་ལམ་དུའོ། །འོང་བ་ནི་འཕགས་པ་མ་ཡིན་པའི་སེམས་ཅན་ཡོངས་སུ་སྨིན་པར་བྱེད་པའི་ཕྱིར་རོ། །འགྲོ་བ་ནི་མི་སྐྱེ་བའི་ཆོས་ལ་བཟོད་པ་ཐོབ་པར་བྱེད་པའི་ཕྱིར་རོ། །འོང་བ་ནི་བཟོད་པ་དེ་སེམས་ཅན་གྱི་ཁོང་དུ་ཆུད་
474a
༄#། །པར་བྱེད་པའི་ཕྱིར་རོ། །བྱང་ཆུབ་སེམས་དཔའི་འགྲོ་བ་ནི་འབྱུང་བ་ལ་མཁས་པའོ། །འོང་བ་ནི་འབྱུང་བ་མ་ཡིན་པར་འབྱུང་བའི་ཕྱིར་རོ། །བྱང་ཆུབ་སེམས་དཔའི་འགྲོ་བ་ནི་མྱ་ངན་ལས་འདས་པར་འགྲོ་བའི་ཕྱིར་རོ། །འོང་བ་ནི་འཁོར་བ་ན་སེམས་ཅན་ཡོངས་སུ་སྨིན་པར་བྱེད་པའི་ཕྱིར་རོ། །འགྲོ་བ་ནི་གང་དུ་ཡང་འགྲོ་བ་དང་འོང་བ་མེད་པར་སོ་སོར་རྟོག་པའི་ཕྱིར་རོ། །བྱང་ཆུབ་སེམས་དཔའ་རྣམས་ཀྱི་འོང་བ་ནི་ཆོས་ཁོང་དུ་ཆུད་པར་བྱེད་པའི་ཕྱིར་རོ། །འགྲོ་བ་ནི་རྣམ་པར་ཐར་པའི་སྒོ་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་བསྒོམ་པའི་ཕྱིར་རོ། །འོང་བ་ནི་རྣམ་པར་རྟོག་པ་གསུམ་སྤང་བར་ཆོས་སྟོན་པའི་ཕྱིར་རོ། །འགྲོ་བ་ནི་དམ་བཅས་པ་བརྟན་པར་བྱེད་པའི་ཕྱིར་རོ། །འོང་བ་ནི་དམ་བཅས་པ་ཉམས་འོག་ཏུ་ཆུད་པར་བྱེད་པའི་ཕྱིར་རོ། །བྱང་ཆུབ་སེམས་དཔའི་འགྲོ་བ་ནི་བྱང་ཆུབ་སྙིང་པོར་འགྲོ་བའི་ཕྱིར་རོ། །བྱང་ཆུབ་སེམས་དཔའི་འོང་བ་ནི་བྱང་ཆུབ་ཀྱི་སྤྱད་པ་སྤྱོད་པའི་ཕྱིར་ཏེ། ལྷའི་བུ། འདི་ནི་བྱང་ཆུབ་སེམས་དཔའ་རྣམས་ཀྱི་ལམ་འགྲོ་བ་དང་འོང་བ་ཞེས་བྱ་བའོ། །བསྟན་པ་འདི་བཤད་པ་ན་བྱང་ཆུབ་སེམས་དཔའ་ལྔ་བརྒྱ་མི་སྐྱེ་བའི་ཆོས་ལ་བཟོད་པ་སྐྱེས་སོ། །དེ་ནས་ལྷའི་བུ་དཔལ་བཟང་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བདག་གིས་འཇིག་རྟེན་གྱི་ཁམས་ཡོན་ཏན་ཐམས་ཅད་ཀྱི་འོད་ཅེས་བགྱི་བ་ཞིག་ཐོས་
474b
ན།་འཇམ་དཔལ། འཇིག་རྟེན་གྱི་ཁམས་ཡོན་ཏན་ཐམས་ཅད་ཀྱི་འོད་དེ་ཕྱོགས་གང་ན་མཆིས། དེ་ན་དེ་བཞིན་གཤེགས་པའི་མཚན་ཇི་སྐད་ཅེས་བགྱི་བ་ཞིག་ཆོས་སྟོན། འཇམ་དཔལ་གྱིས་སྨྲས་པ། ལྷའི་བུ། སྟེང་གི་ཕྱོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གངྒཱའི་ཀླུང་བཅུ་གཉིས་ཀྱི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་ཡོན་ཏན་ཐམས་ཅད་ཀྱི་འོད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོ་ཞེས་བྱ་བ་ཆོས་སྟོན་ཏོ། །སྨྲས་པ། འཇམ་དཔལ། བདག་གིས་འཇིག་རྟེན་གྱི་ཁམས་ཡོན་ཏན་ཐམས་ཅད་ཀྱི་འོད་དེ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོ་དེ་བལྟ་བར་བགྱིའོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་དྲི་མ་མེད་པའི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །འཇམ་དཔལ་གཞོན་ནུར་གྱུར་པ་སྙོམས་པར་ཞུགས་མ་ཐག་ཏུ་ལུས་ལས་དེ་དང་མཐུན་པའི་འོད་བྱུང་སྟེ། འོད་དེས་སངས་རྒྱས་ཀྱི་ཞིང་གངྒཱའི་ཀླུང་བཅུ་གཉིས་ཀྱི་བྱེ་མ་སྙེད་པོ་དེ་དག་སྣང་བར་བྱས་ནས། འཇིག་རྟེན་གྱི་ཁམས་ཡོན་ཏན་ཐམས་ཅད་ཀྱི་འོད་དེ་ཡང་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཀུན་ཏུ་བཟང་པོ་དེའི་སངས་རྒྱས་ཀྱི་ཞིང་དུ་བྱང་ཆུབ་སེམས་དཔའ་གང་དག་སྐྱེས་པ་དེ་དག་གིས་འོད་དེ་མཐོང་ནས་ངོ་མཚར་དུ་གྱུར་ཏེ། ཐལ་མོ་སྦྱར་ནས་
475a
༄#། །བཅོམ་ལྡན་འདས་ལ་ཞུས་པ། བཅོམ་ལྡན་འདས། འོད་འདི་ལྟར་འོད་ཡོངས་སུ་དག་པ་འདི་གང་ནས་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་།འོག་གི་ཕྱོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གངྒཱའི་ཀླུང་བཅུ་གཉིས་ཀྱི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་སོ། །འཚོའོ། །གཞེས་སོ། །ཆོས་ཀྱང་སྟོན་ཏོ། །དེ་ན་ཕྱིར་མི་ལྡོག་པའི་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ཞེས་བྱ་བ་དྲི་མ་མེད་པའི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེའི་ལུས་ཀྱི་འོད་ཀྱིས་ཕྱོགས་བཅུའི་སངས་རྒྱས་ཀྱི་ཞིང་ཚད་མེད་གྲངས་མེད་པ་དག་སྣང་བ་ཆེན་པོས་ཁྱབ་བོ། །དེས་འཇིག་རྟེན་གྱི་ཁམས་འདི་ཡང་སྣང་བ་ཆེན་པོས་ཁྱབ་བོ། །གསོལ་པ། བཅོམ་ལྡན་འདས། བདག་ཅག་གིས་འཇིག་རྟེན་གྱི་ཁམས་མི་མཇེད་དེ་དང ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་དང ། འཇམ་དཔལ་གཞོན་ནུར་གྱུར་པ་བལྟ་བར་བགྱིའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཀུན་ཏུ་བཟང་པོས་ཞབས་ཀྱི་འོག་གི་མཐིལ་གྱི་འཁོར་ལོ་རྩིབས་སྟོང་དང་ལྡན་པ་ལས་འོད་ཟེར་སྟོང་ཕྱུང་སྟེ། འོད་ཟེར་དེ་དག་སངས་རྒྱས་ཀྱི་ཞིང་གངྒཱའི་ཀླུང་བཅུ་གཉིས་ཀྱི་བྱེ་མ་སྙེད་ལས་འདས་
475b
ཏེ།་འཇིག་རྟེན་གྱི་ཁམས་མི་མཇེད་འདིར་སྣང་བ་ཆེན་པོས་ཁྱབ་པར་བྱས་སོ། །དེ་ནས་བྱང་ཆུབ་སེམས་དཔའ་དེ་དག་གིས་འཇིག་རྟེན་གྱི་ཁམས་མི་མཇེད་འདི་མཐོང་ཞིང ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང ། འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའི་ཚོགས་ཐམས་ཅད་ཀྱང་མཐོང་ངོ ། ། བྱང་ཆུབ་སེམས་དཔའ་འདི་དག་གིས་ཀྱང་འཇིག་རྟེན་གྱི་ཁམས་ཡོན་ཏན་ཐམས་ཅད་ཀྱི་འོད་དེ་མཐོང་ཞིང ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོ་དེ་དང ། བྱང་ཆུབ་སེམས་དཔའ་དེ་དག་ཀྱང་མཐོང་ངོ ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཀུན་ཏུ་བཟང་པོས་བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག་།དེར་ཆོས་ཀྱི་གཏམ་ཆེན་པོ་འབྱུང་བར་འགྱུར་ན་ཁྱེད་ཀྱི་ནང་ནས་འཇིག་རྟེན་གྱི་ཁམས་མི་མཇེད་དེར་འགྲོ་བར་སྤྲོ་བ་སུ་ཡོད། བྱང་ཆུབ་སེམས་དཔའ་ཡེ་ཤེས་སྒྲོན་མ་འཛིན་ཞེས་བྱ་བ་དེར་འདུས་ཏེ་འདུག་པར་གྱུར་པ་དེས་བཅོམ་ལྡན་འདས་དེ་ལ་གསོལ་པ། བཅོམ་ལྡན་འདས། བདག་འཇིག་རྟེན་གྱི་ཁམས་མི་མཇེད་དེར་མཆི་བར་སྤྲོ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ད་དེའི་དུས་ལ་བབ་པར་ཤེས་ན་སོང་ཞིག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་སྒྲོན་མ་
476a
༄#། །འཛིན་བྱང་ཆུབ་སེམས་དཔའ་བྱེ་བ་ཕྲག་བཅུས་ཡོངས་སུ་བསྐོར་ཅིང་མདུན་དུ་བདར་ཏེ་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་དེ་ལ་ལན་བདུན་བསྐོར་བ་བྱས་ཏེ། དཔེར་ན། སྐྱེས་བུ་སྟོབས་དང་ལྡན་པས་ལག་པ་བསྐུམ་པ་ལས་བརྐྱང་བ་དང ། བརྐྱང་པ་ལས་བསྐུམ་པ་ཙམ་གྱིས་སྐད་ཅིག་ཐང་ཅིག་ཡུད་ཙམ་དེ་ལ་སངས་རྒྱས་ཀྱི་ཞིང་དེ་ནས་མི་སྣང་བར་གྱུར་ནས། འཇིག་རྟེན་གྱི་ཁམས་མི་མཇེད་འདིར་དགའ་ལྡན་གྱི་གནས་སུ་འཇམ་དཔལ་གཞོན་ནུར་གྱུར་པའི་མདུན་གྱི་སྟེང་གི་བར་སྣང་ལ་གནས་པའི་ཁང་པ་བརྩེགས་པར་ཕྱིན་ཏེ། དེའི་གཡོག་འཁོར་དེ་དག་ཀྱང་ཁང་པ་བརྩེགས་པ་ལེགས་པར་ངས་པ་རྣམས་སུ་ཕྱིན་ཏོ། །དེ་དག་རང་རང་གི་སྟན་ལས་ལངས་ནས་ཐལ་མོ་སྦྱར་ཏེ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ཞིང་ཚིག་འདི་སྐད་ཅེས་ཀྱང་སྨྲས་སོ། །འཇམ་དཔལ། བདག་ཅག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོ་དེས་ཁྱོད་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་འདིར་བཏང་ངོ ། །ཁྱོད་ཀྱིས་འོད་བཀྱེ་བ་དེ་ཡང་འཇིག་རྟེན་གྱི་ཁམས་དེར་ཕྱིན་ཏོ། །དེ་ནས་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་དེ་དག་གིས་བྱང་ཆུབ་སེམས་དཔའ་དེ་དག་མཐོང་ནས་ངོ་མཚར་དུ་གྱུར་ཏེ། ཀྱེ་
476b
མ་ཇི་ཙམ་དུ་འདི་ལྟར་མྱུར་བར་འོད་ཟེར་འདི་འཇིག་རྟེན་གྱི་ཁམས་དེར་ཕྱིན་པ་དང ། འདི་ལྟར་མྱུར་བར་བྱང་ཆུབ་སེམས་དཔའ་འདི་དག་འཇིག་རྟེན་གྱི་ཁམས་མི་མཇེད་འདིར་ཕྱིན་པ་འདི་ནི་སྐྱེས་བུ་དམ་པ་དེ་དག་གིས་མངོན་པར་ཤེས་པའི་རྣམ་པར་འཕྲུལ་པའི་སྟོབས་དང ། ཏིང་ངེ་འཛིན་གྱི་བྱིན་གྱི་རླབས་ཀྱི་སྟོབས་བསམ་གྱིས་མི་ཁྱབ་བོ། །ཞེས་ཆེད་དུ་བརྗོད་པ་ཆེད་དུ་བརྗོད་དོ། ། དེ་ནས་འཇམ་དཔལ་གཞོན་ནུར་གྱུར་པས་ལྷའི་འཁོར་ཆེན་པོ་འདུས་པ་དེ་ལ་ཅི་ནས་ཀྱང་ལྷ་ཁྲག་ཁྲིག་ཕྲག་བདུན་ཅུ་རྩ་གཉིས་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ལྟ་དེ་ལྟར་ཆོས་སྟོན་ཏོ། །དེ་ནས་འཇམ་དཔལ་གཞོན་ནུར་གྱུར་པ་ཇི་སྲིད་དུ་དགའ་ལྡན་གྱི་གནས་སུ་ལྷ་རྣམས་ཀྱི་དོན་བྱ་བ་དེ་སྲིད་དུ་བྱས་ནས། བྱང་ཆུབ་སེམས་དཔའ་བྱེ་བ་ཕྲག་བཅུ་པོ་དེ་དག་དང་ལྷན་ཅིག་།རང་གི་འཁོར་དང་ལྷན་ཅིག་།བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བའི་ལྷའི་བུ་དང་བཅས་པ་དང་ལྷན་ཅིག་ཏུ་དགའ་ལྡན་གྱི་གནས་ནས་མི་སྣང་བར་གྱུར་ཏེ། སེམས་ཀྱི་འགྱུར་བ་ཙམ་གྱིས་བཅོམ་ལྡན་འདས་ཀྱི་སྤྱན་སྔར་ཕྱིན་ནས། དེ་དག་གིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།་བཅོམ་ལྡན་འདས་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་ཀྱིས་གནང་སྟེ། ཕྱོགས་གཅིག་ཏུ་རང་རང་གི་སྟན་ལ་འཁོད་དེ། དེ་ནས་བྱང་ཆུབ་སེམས་དཔའ་ཡེ་ཤེས་
477a
༄#། །སྒྲོན་མ་འཛིན་དང་ལྷན་ཅིག་ལྷགས་པའི་བྱང་ཆུབ་སེམས་དཔའ་བྱེ་བ་ཕྲག་བཅུ་པོ་དེ་དག་གིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་བདུན་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལ། བཅོམ་ལྡན་འདས་དེ་བཞིན་གཤེགས་པ་ཀུན་ཏུ་བཟང་པོས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བ་ལ་རེག་པར་གནས་སམ། ཞེས་བསྙུན་གསོལ་ལོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་དང ། ཐམས་ཅད་དང་ལྡན་པའི་འཁོར་དེ་ཆོས་ཀྱི་གཏམ་གྱིས་ཡང་དག་པར་དགའ་བར་མཛད། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དོ། །ཡང་དག་པར་དགའ་བར་མཛད་ཅིང ། ཡང་དག་པར་འཛིན་དུ་བཅུག་ལ། ཡང་དག་པར་གཟེངས་བསྟོད་དེ། ཡང་དག་པར་རབ་ཏུ་དགའ་བར་མཛད་ནས་ཀྱང ། ཐམས་ཅད་དང་ལྡན་པའི་འཁོར་དེ་ལ་བཀའ་སྩལ་པ། གྲོགས་པོ་དག་།སྐྱེས་བུ་དམ་པ་འདི་དག་དང ། འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའ་ཡེ་ཤེས་སྒྲོན་མ་འཛིན་གྱི་མངོན་པར་ཤེས་པའི་རྣམ་པར་འཕྲུལ་པ་དང ། བྱིན་གྱི་རླབས་ཀྱི་སྟོབས་དང ། སེམས་ཅན་སྡུད་པ་དང ། ཡོངས་སུ་སྨིན་པར་བྱེད་
477b
པ་དང ། ཐབས་དང་རིག་པ་དང ། ཡེ་ཤེས་དང ། ཤེས་རབ་ཀྱི་རབ་ཏུ་དབྱེ་བ་དང ། སྤོབས་པ་ལ་ལྟོས། གྲོགས་པོ་དག་།བྱང་ཆུབ་སེམས་དཔའ་འདི་དག་ནི་བསྐལ་པ་གྲངས་མེད་པ་ནས་བཟུང་སྟེ།་སངས་རྒྱས་ཀྱི་མཛད་པས་སེམས་ཅན་རྣམས་ལ་ཉེ་བར་གནས་པ་དག་གོ་།སེམས་ཅན་གང་དག་གི་དབང་པོ་དྲུག་པོ་དག་ལ་སྐྱེས་བུ་དམ་པ་འདི་དག་མངོན་པར་གྱུར་པ་དེ་དག་ནི། ཕྱིས་བདུད་ཀྱི་ཡུལ་ལ་གནས་པར་མི་འགྱུར་རོ། །ཞེས་བརྗོད་པར་བྱའོ། །དེ་ནས་བྱང་ཆུབ་སེམས་དཔའ་གང་དག་བྱང་ཆུབ་སེམས་དཔའ་ཡེ་ཤེས་སྒྲོན་མ་འཛིན་དང་ལྷན་ཅིག་ཏུ་འཇིག་རྟེན་གྱི་ཁམས་མི་མཇེད་འདིར་ཕྱིན་པ་དེ་དག་།བཅོམ་ལྡན་འདས་ཤཱཀྱ་ཐུབ་པ་ལས་ཆོས་ཐོས་ནས། མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཡེ་ཤེས་སྒྲོན་མ་འཛིན་དང་ལྷན་ཅིག་ལྷགས་པའི་བྱང་ཆུབ་སེམས་དཔའ་བྱེ་བ་ཕྲག་བཅུ་པོ་དེ་དག་གིས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་བདུན་བསྐོར་བ་བྱས་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རབ་ཏུ་གཡོས་པར་བྱས་ཏེ། བཅོམ་ལྡན་འདས་ཀྱི་དྲུང་ནས་མི་སྣང་བར་གྱུར་ནས། སྐད་ཅིག་ཐང་ཅིག་ཡུད་ཙམ་དེ་ལ་འཇིག་རྟེན་གྱི་ཁམས་དེར་ཕྱིན་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་གཟུང་ཞིག་།ཆོངས་ཤིག་།ལྷོགས་ཤིག་།ཀུན་
478a
༄#། །ཆུབ་པར་གྱིས་ཤིག་།གཞན་དག་ལ་ཡང་རྒྱ་ཆེར་རབ་ཏུ་སྟོན་ཅིག་།གསོལ་པ། བཅོམ་ལྡན་འདས། བདག་གིས་ཆོས་ཀྱི་རྣམ་གྲངས་འདི་ནི་བཟུང་ལགས་ན། འདིའི་མིང་ཇི་སྐད་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེ་བས་ན་ཁྱོད་ཀྱིས་ཆོས་ཀྱི་རྣམ་གྲངས་འདི་འཇམ་དཔལ་གྱི་ལེའུ་དང ། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་བསྟན་པ་ཞེས་བྱ་བར་གཟུང་ཞིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ལྷའི་བུ་དཔལ་བཟང་དང ། ཚེ་དང་ལྡན་པ་ཀུན་དགའ་བོ་དང ། ཐམས་ཅད་དང་ལྡན་པའི་འཁོར་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་ལྷའི་བུ་དཔལ་བཟང་གིས་ཞུས་པ་ཞེས་བྱ་བའི་ལེའུ་སྟེ། འདུས་པ་སུམ་ཅུ་རྩ་ལྔ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དྷ་ན་ཤཱི་ལ་དང ། མུ་ནེ་ཝརྨ་དང ། ཞུ་ཆེན་གྱི་ལོ་ཙྪ་བ་ཞང་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།