rKTs


H94

(e-text produced by ACIP)

see text in transliteration
Ka1b
\ཌཌ\་༄##། །རྒྱ་གར་སྐད་དུ། ཨཱརྱ་\ཌཌ\་བུདྡྷ་ཨ་བ་ཏང་ས་ཀ་ནཱ་མ་མ་ཧཱ་བཻ་པུ་ལྱཾ་སཱུ་ཏྲ། བོད་སྐད་དུ། འཕགས་པ་སངས་རྒྱས་ཕལ་པོ་ཆེ་ཞེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་དང་པོ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཐོག་མ་མངོན་པར་སངས་རྒྱས་པ། སངས་རྒྱས་ཀྱི་\ཌཌ\་
Ka2a
\ཌཌ\་༄##། །ཆོས་ཐམས་ཅད་ཤིན་ཏུ་རྣམ་པར་སངས་རྒྱས་པའི་དགོངས་པ་མངའ་བ། དུས་གསུམ་མཉམ་པ་ཉིད་དུ་ཐུགས་སུ་ཆུད་པའི་ཡེ་ཤེས་ཀྱི་སྐུ་མངའ་བ། འཇིག་རྟེན་གྱི་ཁམས་ཐམས་ཅད་དུ་སྐུས་ཤིན་ཏུ་ཁྱབ་པ། སངས་རྒྱས་ཀྱི་ཞིང་ཐམས་ཅད་དུ་དབྱངས་ཀྱི་ཡན་ལག་དང ། གསུང་གི་ང་རོ་ཤིན་ཏུ་བསྒྲགས་པ། ནམ་མཁའ་དང ། ནམ་མཁའ་ལྟ་བུའི་མཚན་ཉིད་མཉམ་པ་ཉིད་དུ་རབ་ཏུ་སྣང་བའི་སྤྱོད་ཡུལ་ཅན། ནམ་མཁའ་ལྟར་འགྲོ་བ་ཐམས་ཅད་ཀུན་ཁྱབ་པའི་སྙིང་པོ་བྱང་ཆུབ་ཐམས་ཅད་ལ་བཞུགས་པའི་སྐུ། བྱང་ཆུབ་སེམས་དཔའ་རྒྱ་\ཌཌ\་
Ka2b
མཚོ་ཐམས་ཅད་ཀྱི་ནང་ན་རྣམ་པར་སྣང་བ། འཇིག་རྟེན་གྱི་ཁམས་ཐམས་ཅད་དུ་ཉི་མའི་དཀྱིལ་འཁོར་ལྟར་ཤར་བ། སངས་རྒྱས་ཀྱི་ཞིང་ཐམས་ཅད་དུ་ཡོངས་སུ་སྐྱེ་བ་བསྟན་པ་རབ་ཏུ་སྤྲོས་པ། དུས་གསུམ་གྱི་བསོད་ནམས་རྒྱ་ཆེན་པོ་རྒྱ་མཚོ་ལྟ་བུས་སྤྱོད་ཡུལ་ཡོངས་སུ་དག་པ། འོད་ཀྱི་དཀྱིལ་འཁོར་དང ། འོད་ཟེར་ཁ་དོག་མཐའ་ཡས་པ་མངའ་བ། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པའི་ཆོས་ཀྱི་སྤྲིན་ཐམས་ཅད་ཀྱིས་རྣམ་པར་འཕྲུལ་པ། འཇིག་རྟེན་གྱི་ཁམས་ཐམས་ཅད་དུ་བསྒྲིབས་པ་མེད་པ། སྐྲའི་རྩེ་མོ་ཐམས་ཅད་དུ་མཐའ་དང་དབུས་མེད་པར་རྣམ་པར་འཕྲུལ་བ་བྱིན་གྱིས་རློབ་པའི་མཐུ་མངའ་བ། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང ། གདུལ་བ་ལ་མངོན་དུ་གྱུར་པར་ཡོངས་སུ་སྟོན་པ། འཁོར་གྱི་དཀྱིལ་འཁོར་ཐམས་ཅད་དུ་འཕོས་པ་མེད་པར་གཤེགས་
Ka3a
༄##། །པ།་ཡོངས་སུ་སྟོན་པས་ཁྱབ་པར་མཛད་པ། དངོས་པོ་མེད་པའི་དབྱིངས་ཀྱི་མཚན་ཉིད་ཐམས་ཅད་ཐུགས་སུ་ཆུད་པ།་འོད་ཟེར་གྱི་སྒོ་ཐམས་ཅད་དུ་དུས་གསུམ་རྣམ་པར་སྤྲུལ་པའི་བྱིན་གྱི་རླབས་ཡོངས་སུ་སྟོན་པ། སངས་རྒྱས་ཀྱི་ཞིང་ཐམས་ཅད་དུ་བསྐལ་པ་རྒྱ་མཚོ་བསམ་གྱིས་མི་ཁྱབ་པར་བྱིན་གྱི་རླབས་ཤིན་ཏུ་བསྒྲུབས་པ། ཡུལ་མ་ག་དྷའི་ཆོས་ཀྱི་དགོན་པ་སྙིང་པོ་བྱང་ཆུབ་རྡོ་རྗེ་རིན་པོ་ཆེ་ཐམས་ཅད་ལྟར་གཞོམ་དུ་མི་ཆོམས་པར་སྲ་བའི་ས་ཕྱོགས་ནོར་བུ་རིན་པོ་ཆེ་ཐམས་ཅད་ཀྱི་མེ་ཏོག་གིས་ས་གཞི་བརྒྱན་པ། ནོར་བུའི་རྒྱལ་པོ་དྲི་མ་མེད་པར་འབར་བས་རབ་ཏུ་བསྒྲུབས་པ། རིན་པོ་ཆེ་མང་པོ་ཐམས་ཅད་ཀྱིས་རྣམ་པ་སྣ་ཚོགས་སུ་བརྒྱན་པ།་ཡོན་ཏན་རྒྱ་མཚོ་མཐའ་ཡས་པའི་རྒྱན་རྣམ་པ་སྣ་ཚོགས་ཡང་དག་པར་བསྟན་པ། ནོར་བུའི་རྒྱལ་པོ་འོད་ཟེར་དང ། སྒྲ་དབྱངས་
Ka3b
ཀྱི་རྒྱལ་མཚན་ཐམས་ཅད་ཀྱིས་རབ་ཏུ་བསྒྲུབས་པ། སྤོས་དང ། མེ་ཏོག་དང ། རིན་པོ་ཆེའི་ཕྲེང་བ་དང ། དྲ་བ་མང་པོ་ཐམས་ཅད་རྣམ་པར་བྲེས་པ། རིན་པོ་ཆེའི་ཁ་དོག་ཟད་མི་ཤེས་པའི་ཆར་རབ་ཏུ་འབབ་པའི་རྣམ་པར་འཕྲུལ་པ་ཡང་དག་པར་སྟོན་པའི་ནོར་བུའི་རྒྱལ་པོས་ཤིན་ཏུ་བསྒྲུབས་པ། མེ་ཏོག་སྣ་ཚོགས་ཆུ་བོའི་ཀློང་ལྟ་བུ་ཡོངས་སུ་བསྟན་པས་བརྒྱན་པ། རིན་པོ་ཆེའི་ཤིང་འོད་ཟེར་གྱི་ཁ་དོག་སྟུག་པོ་དང་ལྡན་པའི་ཡལ་གས་བརྒྱན་པ། རྒྱན་ཐམས་ཅད་དུ་སྣང་བ་ཤིན་ཏུ་འབར་བའི་བྱིན་གྱི་རླབས་ཀྱིས་རྣམ་པར་སྤྲུལ་པ། ཡང་དག་པར་བསྟན་པའི་སའི་སྙིང་པོ་རིན་པོ་ཆེའི་འབྲུ་ཐམས་ཅད་འབྱུང་བས་ཕྱོགས་ཀུན་ཏུ་དཔྱངས་ཤིང་བརྒྱན་པའི་སྙིང་པོ་བྱང་ཆུབ་ལ་བྱང་ཆུབ་ཆེན་པོའི་ཤིང་ནོར་བུ་རིན་པོ་ཆེ་རྡོ་རྗེའི་རྒྱན་སྣ་ཚོགས་ཀྱི་འབྲུས་བསྒྲུབས་པའི་སྡོང་པོ་དང་ལྡན་པ། བཻ་ཌཱུརྱ་དང་ནོར་བུ་ཐམས་ཅད་ཀྱི་རིགས་འབྱུང་བའི་སྙིང་པོ་དང་ལྡན་པའི་ལྷུན་ཅན། ཡོངས་སུ་ཡོན་ཏན་མང་པོ་མཐའ་ཡས་པའི་ནོར་བུ་རིན་པོ་ཆེ་མང་པོའི་འབྲུས་ཤིན་ཏུ་བརྒྱན་ཅིང་རབ་ཏུ་འཕེལ་བའི་ཡལ་ག་ཅན། རིན་པོ་ཆེ་ཐམས་ཅད་ཀྱི་ལོ་མ་ཤིན་ཏུ་འོད་གསལ་བས་ཕྱོགས་ཀྱི་སྤྲིན་དུ་གྱུར་པ། ཡལ་ག་ཐམས་ཅད་ཀྱི་རྩེ་མོ་ལས་མེ་ཏོག་དང་འབྲས་བུའི་དྲ་བ་ཡོན་ཏན་རྣམ་པ་སྣ་ཚོགས་ཅན་རབ་ཏུ་དཔྱངས་པ། རིན་པོ་ཆེའི་འབྲས་བུ་སྣ་ཚོགས་ཤིན་ཏུ་འབར་བའི་སྙིང་པོས་ཤིང་གི་རྒྱན་མེ་ཏོག་ཐམས་
Ka4a
༄#། །ཅད་ཤིན་ཏུ་རྒྱས་ཤིང་རྣམ་པར་གསལ་བ། ཕྱོགས་བཅུར་འོད་ཀྱི་དཀྱིལ་འཁོར་རིན་པོ་ཆེ་རྒྱ་ཆེ་ཞིང་མང་བའི་འོད་ཟེར་ལྟ་བུར་རྣམ་པར་སྣང་བ། ནོར་བུའི་ཡོན་ཏན་ཟད་མི་ཤེས་པའི་ཆར་ཆེན་པོ་རྣམ་པར་སྤྲུལ་པའི་འོད་ཡོངས་སུ་བསྟན་པ། ནོར་བུའི་སྒོ་ཐམས་ཅད་ནས་བྱང་ཆུབ་སེམས་དཔའི་སྤྲིན་འབྱུང་བ་ཤིན་ཏུ་བསྟན་པ། སངས་རྒྱས་ཀྱི་རྣམ་པར་འཕྲུལ་པ་དང ། བྱིན་གྱི་རླབས་ཀྱིས་ཟད་མི་ཤེས་པའི་དབྱངས་འབྱུང་བའི་དྲུང་ན་དེ་བཞིན་གཤེགས་པའི་གཞལ་མེད་ཁང་ཕྱོགས་ཐམས་ཅད་དུ་མངོན་པར་སྣང་བ་རབ་ཏུ་འཕེལ་བ། རིན་པོ་ཆེའི་རྒྱལ་པོ་སྣ་ཚོགས་ཡོན་ཏན་མཐའ་ཡས་པའི་ཀ་བ་བཀྱེ་བ། ལྷུན་རིན་པོ་ཆེའི་མེ་ཏོག་རྣམ་པ་སྣ་ཚོགས་ཐམས་ཅད་ཀྱི་རྒྱན་གྱིས་བརྒྱན་པ།་རྒྱན་མཐའ་ཡས་པས་ཤིན་ཏུ་ཀླུབས་པའི་འོད་ཟེར་སྣང་བས་སྤྲིན་ལྟར་ཁེབས་པ། ཕོ་བྲང་གི་མཚམས་ཐམས་ཅད་ནས་འོད་ཀྱི་རྒྱལ་མཚན་རབ་ཏུ་བཀྱེ་བ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་མཐའ་ཡས་པ་རྗེས་སུ་འདོད་པའི་སྙིང་པོ་ཅན། བསམ་གྱིས་མི་ཁྱབ་པའི་གསུང་རྒྱ་ཆེན་པོའི་དབྱངས་དང ། སངས་རྒྱས་ཀྱི་འོད་ནོར་བུའི་རྒྱལ་པོ་ལྟ་བུའི་དྲ་བས་ཐམས་ཅད་ཡོག་པ། སངས་རྒྱས་ཀྱི་བྱིན་གྱི་རླབས་ཀྱིས་རྣམ་པར་སྤྲུལ་པའི་འཕྲུལ་པ་དམིགས་པ་ཐམས་ཅད་དུ་བྱུང་བ། སེམས་ཅན་ཐམས་
Ka4b
ཅད་ཀྱི་ཁྱིམ་གྱི་གཟུགས་བརྙན་རབ་ཏུ་སྟོན་པ། སེམས་སྐད་ཅིག་གིས་སངས་རྒྱས་ཀྱི་བྱིན་གྱི་རླབས་ཐམས་ཅད་ཆོས་ཀྱི་དབྱིངས་འབྱམས་ཀླས་པར་ཁྱབ་པར་འཕྲོ་བའི་སྙིང་པོ་ཅན། སེངྒེའི་ཁྲི་ཆེན་པོ་སངས་རྒྱས་ཀྱི་གདན་དུ་གྱུར་པ། རིན་པོ་ཆེ་ཐམས་ཅད་དང ། ཡིད་དུ་འོང་བའི་སྤོས་སྣ་ཚོགས་ཀྱི་སྙིང་པོ་ཅན། པདྨོའི་དྲ་བ་འོད་ཟེར་མཐའ་ཡས་པ་འབྱུང་བས་བརྟན་པ། རིན་པོ་ཆེ་དྲི་མ་མེད་པའི་འཁོར་ལོའི་འོད་ཀུན་ཏུ་བདལ་བ། མེ་ཏོག་གི་ཕྲེང་བ་བཟང་ཞིང་ཡིད་དུ་འོང་བ། ཁ་དོག་མཐའ་ཡས་པས་ཀུན་ནས་ཀླུབས་པ། ནོར་བུའི་འབྲུ་སྣ་ཚོགས་ཀྱི་ཤིང་གི་ཡལ་ག་ལས་འོད་ཤིན་ཏུ་བཀྱེ་བ། རྟ་བབས་དང ། ཁྲི་འཕང་དང ། སྐར་ཁུང་དང ། ཁང་པ་བརྩེགས་པ་རྣམ་པ་སྣ་ཚོགས་མཐའ་ཡས་པས་ལེགས་པར་བརྒྱན་པ། ནོར་བུའི་རྒྱལ་པོ་འོད་ཟེར་འབར་བའི་སྙིང་པོའི་སྤྲིན་ཐམས་ཅད་དུ་འཕྲོས་པའི་རྒྱན་ཅན། བྱང་ཆུབ་སེམས་དཔའ་རྒྱ་མཚོ་རྒྱ་ཆེན་པོའི་གཙུག་གི་རིན་པོ་ཆེས་བཟུང་ཞིང་འོད་ཟེར་རྣམ་པར་སྣང་བ། ཕྱོགས་བཅུའི་མཚམས་ཐམས་ཅད་དུ་སངས་རྒྱས་ཀྱི་སྤྲུལ་པའི་འོད་ཀྱི་སྙིང་པོའི་ནོར་བུའི་རྒྱལ་པོས་ཤིན་ཏུ་བརྒྱན་པ། སངས་རྒྱས་ཀྱི་ཡུལ་གྱི་སྒྲ་དབྱངས་རྒྱ་ཆེན་པོས་ཆོས་ཀྱི་དབྱིངས་ཁྱབ་པའི་བྱིན་གྱི་རླབས་དང་ལྡན་པ་ལ་བཞུགས་ཤིང ། བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་དང ། བྱང་
Ka5a
༄#། །ཆུབ་སེམས་དཔའི་སྤྱོད་པ་ཐབས་ཅིག་ཏུ་སྤྱོད་སྤྱོད་པའི་དགེ་བའི་རྩ་བ་ཅན། སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང་ཐབས་ཅིག་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མ་མེད་པའི་གཟི་བརྗིད་ཀྱི་འོད་ཡིད་དུ་འོང་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་འོད་མཆོག་ཀུན་ཏུ་སྒྲོན་མ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་འབར་བ་སེངྒེའི་རྒྱལ་མཚན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་གྱི་འོད་ཟེར་ཀུན་ཏུ་འོད་འཕྲོ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རྒྱ་མཚོ་ཀུན་ཏུ་སྒྲ་དབྱངས་རྒྱལ་མཚན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྤྱོད་ཡུལ་ཡེ་ཤེས་ཀུན་ཏུ་སྣང་བའི་འོད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་ཆེན་ཀུན་ཏུ་རྒྱལ་མཚན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་བའི་གསུང་ཀུན་ཏུ་འཇམ་དབྱངས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་མི་ཟད་དྲི་མེད་ཀུན་ཏུ་གཟི་བརྗིད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཚན་གྱི་འོད་ཟེར་ཀུན་ཏུ་སྣང་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འོད་
Ka5b
ཟེར་རྒྱ་མཚོ་འོད་ཆེན་དཔལ་གྱི་ཟླ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་གྱི་ང་རོ་རྒྱ་མཚོ་དྲི་མེད་འོད་ཀྱི་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རིན་ཆེན་འབྱུང་བ་ཡེ་ཤེས་དཔལ་གྱི་གཙུག་ཕུད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱ་ཆེན་འོད་འབར་བློ་གྲོས་དབང་ཕྱུག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་པདྨོ་རྣམ་པར་གནོན་པ་འོད་ཟེར་གཙུག་ཕུད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་ཡེ་ཤེས་སྤྲིན་གྱི་ཉི་མའི་རྒྱལ་མཚན་སྣང་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་སྟོབས་བརྩོན་འགྲུས་རྡོ་རྗེ་ཡངས་པའི་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་འོད་འཕྲོ་ཤིན་ཏུ་འབར་བའི་འོད་ཀྱི་རྒྱལ་མཚན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་མཛད་ཡོན་ཏན་ཡངས་པའི་རྒྱལ་མཚན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་ཡངས་པ་ཤིན་ཏུ་འཕགས་པའི་འོད་མཆོག་ཡོན་ཏན་འབྱུང་བའི་བློ་གྲོས་དང ། དེ་དག་ལ་སོགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཀྱང་དེ་བཞིན་གཤེགས་པ་རྣམ་པར་སྣང་མཛད་དང་དགེ་བའི་རྩ་བ་རྒྱ་མཚོ་གཅིག་གིས་བྱུང་བ། ཕ་རོལ་ཏུ་ཕྱིན་པ་ཐམས་ཅད་ཀྱི་འཁོར་ཡོངས་སུ་རྒྱས་པས་སྣང་བ་
Ka6a
༄#། །གྱུར་པ།་ཡེ་ཤེས་ཀྱི་མིག་ཡོངས་སུ་དག་པ། དུས་གསུམ་གྱི་དབྱིངས་ཐམས་ཅད་དུ་སྣང་བས་གསལ་བར་གྱུར་པ། ཏིང་ངེ་འཛིན་གྱི་དཀྱིལ་འཁོར་ཐམས་ཅད་ཡོངས་སུ་དག་པས་སྣང་བར་གྱུར་པ། སོ་སོ་ཡང་དག་པར་རིག་པ་རྒྱ་མཚོ་ཡངས་ཤིང་ཟད་མི་ཤེས་པ་དང ། སངས་རྒྱས་ཀྱི་ཡོན་ཏན་དང་མཐུས་སྣང་བར་བྱས་པ། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང ། གདུལ་བར་བརྩམ་པའི་ཡེ་ཤེས་མཉམ་པ་ཉིད་ཀྱིས་སྣང་བར་བྱས་པ། ཆོས་ཀྱི་དབྱིངས་ཀྱི་སྙིང་པོ་གཅིག་ཏུ་ཐ་མི་དད་པའི་ཡེ་ཤེས་ཀྱིས་སྣང་བར་གྱུར་པ།་སངས་རྒྱས་ཀྱི་རྣམ་པར་ཐར་པ་ཟབ་མོའི་ཡུལ་ཡངས་པ་ལ་ཡེ་ཤེས་ཀྱི་སྤྱོད་ཡུལ་གྱིས་སྣང་བར་བྱས་པ། ས་གཅིག་ལས་བྱུང་བ་ཡོངས་སུ་གནོན་པའི་རྗེས་སུ་འབྲང་བས་ཤིན་ཏུ་སྣང་བར་བྱས་པ། སྨོན་ལམ་གྱི་རྒྱ་མཚོ་ལ་འཇུག་པ་ཕྱི་མའི་མཐའི་བྱིན་གྱི་རླབས་ཀྱི་ཡེ་ཤེས་ཐམས་ཅད་ཀྱི་གནས་པས་སྣང་བར་གྱུར་པ། དེ་བཞིན་གཤེགས་པའི་གསང་བ་རྨད་དུ་བྱུང་བའི་དཀྱིལ་འཁོར་ཡངས་པ་ཡོངས་སུ་ཤེས་པས་སྣང་བར་གྱུར་པ། སངས་རྒྱས་ཀྱི་ཆོས་ཐམས་ཅད་མཉམ་པ་ཉིད་ལ་རྗེས་སུ་བརྟགས་པའི་ཡེ་ཤེས་ཀྱིས་ཤིན་ཏུ་སྣང་བར་གྱུར་པ། དེ་བཞིན་གཤེགས་པའི་ས་ཀུན་ཏུ་འོད་ཀྱི་དབྱིངས་དང་གནས་སུ་རྣམ་པར་སྤྱོད་དུ་དབང་བ། ཏིང་ངེ་འཛིན་རྒྱ་མཚོ་མཐའ་ཡས་པའི་སྒོ་ཐམས་ཅད་དུ་རྣམ་པར་རྒྱུ་བས་སྣང་བར་གྱུར་པ།
Ka6b
ཡེ་ཤེས་སྣང་བ་ཐམས་ཅད་ཀྱི་རྗེས་སུ་སོང་ཞིང་འགྲོ་བ་ཐམས་ཅད་ཀྱི་སྤྱོད་པ་རྒྱ་མཚོ་ལ་ཤིན་ཏུ་གནས་པ། ཆོས་རྒྱ་མཚོ་ཐམས་ཅད་ཀྱི་གཟུངས་དང་སོ་སོ་ཡང་དག་པར་རིག་པ་བསྟན་པ་དང ། ཡོངས་སུ་བསྟན་པ་ལ་མཁས་པ། སངས་རྒྱས་ཀྱི་ཡོན་ཏན་རྒྱ་མཚོར་གཏོགས་པ་ཐམས་ཅད་ཀྱིས་ཁྱབ་པར་བྱེད་པའི་ལུས་ཅན། སྨོན་ལམ་རྒྱ་མཚོ་མངོན་པར་བསྒྲུབས་པས་སངས་རྒྱས་ཀྱི་ཞིང་འབྱམས་ཀླས་པ་ཐམས་ཅད་རྒྱས་པར་འགེངས་པ། སངས་རྒྱས་ཐམས་ཅད་མཆོད་པའི་སྦྱོར་བ་ལ་ཕྱི་མའི་མུར་ཐུག་པའི་བསྐལ་པར་དཔའ་བའི་ཤུགས་ཀྱི་སྣང་བ་རབ་ཏུ་ཐོབ་པ། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་ཅིང་སྙིང་པོ་བྱང་ཆུབ་ཏུ་ཉེ་བར་འདོང་བ་ཡང་དག་པར་སྟོན་པ། ཀུན་ཏུ་བཟང་པོའི་སྨོན་ལམ་རྒྱ་མཚོས་སེམས་ཅན་མ་ལུས་པ་ཐམས་ཅད་ཀྱི་ཤེས་པ་ཡོངས་སུ་རྒྱས་པར་འགྲེངས་པའི་ལུས་ཅན་རྣམས་དང་ཐབས་ཅིག་གོ། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་ལག་ན་རྡོ་རྗེ་དག་དང་ཡང་ཐབས་ཅིག་སྟེ། འདི་ལྟར་ལག་ན་རྡོ་རྗེ་མཐུ་ཆེན་ཁ་དོག་བཟང་པོའི་འོད་དང ། ལག་ན་རྡོ་རྗེ་ཉི་མའི་ཤུགས་ཀྱི་རྒྱལ་མཚན་དང ། ལག་ན་རྡོ་རྗེ་རི་རབ་མེ་ཏོག་འོད་དང ། ལག་ན་རྡོ་རྗེ་རྣམ་དག་སྤྲིན་གྱི་དབྱངས་དང ། ལག་ན་རྡོ་རྗེ་དབང་པོ་ཤིན་ཏུ་མང་བ་དང ། ལག་ན་རྡོ་རྗེ་རྡོ་རྗེའི་འོད་ཡིད་དུ་འོང་བ་དང ། ལག་ན་རྡོ་རྗེ་ཤིང་གི་སྒྲ་དབྱངས་དང ། ལག་ན་རྡོ་རྗེ་སེངྒེའི་འོད་ཀྱི་རྒྱལ་པོ་དང ། ལག་ན་རྡོ་རྗེ་འོད་འཕྲོ་
Ka7a
༄#། །སྟུག་པོའི་དཔལ་གྱི་མིག་དང ། ལག་ན་རྡོ་རྗེ་རིན་ཆེན་གཙུག་ཕུད་པདྨོ་འོད་དང ། དེ་དག་ལ་སོགས་པ་ལག་ན་རྡོ་རྗེ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་སྔོན་བསྐལ་པ་མཐའ་ཡས་པར་དེ་བཞིན་གཤེགས་པ་མཆོད་པར་སྨོན་པས་ཞམ་འབྲིང་ན་འབྲང་བར་གྱུར་པ། སངས་རྒྱས་བསྙེན་བཀུར་བའི་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པ། དགེ་བ་དང་བསོད་ནམས་ཀྱི་དཀྱིལ་འཁོར་མཐའ་ཡས་པ་ཡོངས་སུ་དག་པ། ཏིང་ངེ་འཛིན་གྱི་སྤྱོད་ཡུལ་ཡངས་པ་ལ་རྣམ་པར་སྤྱོད་པ། རྫུ་འཕྲུལ་དང ། སྟོབས་དང ། དེ་བཞིན་གཤེགས་པའི་སྤྱོད་ཡུལ་མཐའ་ཡས་པ་ཁོང་དུ་ཆུད་པ། བསམ་གྱིས་མི་ཁྱབ་པའི་རྣམ་པར་ཐར་པའི་ཡུལ་ལ་ཞུགས་པ། འཁོར་གྱི་དཀྱིལ་འཁོར་ཐམས་ཅད་ཀྱིས་ཟིལ་གྱིས་མི་ནོན་པའི་ལུས་ཅན། སེམས་ཅན་རྣམས་ཇི་ལྟར་འདུལ་བ་བཞིན་དུ་ལུས་ཤིན་ཏུ་སྟོན་པ། སངས་རྒྱས་ཀྱི་སྤྲུལ་པའི་སྐུ་ཐམས་ཅད་ཀྱི་འཕྲུལ་བ་རྗེས་སུ་རྟོགས་པ། སངས་རྒྱས་ཐམས་ཅད་ཀྱི་རྣམ་པར་སྤྱོད་པ་དང ། གནས་སྲུང་པ་ལ་ཤིན་ཏུ་བརྩོན་པ་རྣམས་དང་ཐབས་ཅིག་གོ། ལུས་ཀྱི་རིས་སུ་གཏོགས་པའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དག་དང་ཡང་ཐབས་ཅིག་སྟེ། འདི་ལྟར་ལྷ་ཁྲེལ་དང་དགེ་བས་རྒྱས་པའི་འོད་དང ། འོད་ཟེར་ཕྱོགས་སུ་སྣང་བ་དང་སྒྲས་འདུལ་བ་རྒྱ་མཚོའི་དཔལ་དང །
Ka7b
རྒྱན་བཟང་པོ་མེ་ཏོག་གཙུག་ཕུད་དང ། སྤྱོད་ཡུལ་མཐའ་ཡས་དཔལ་དང ། སྣང་བའི་ཕྲེང་བ་འཛིན་པའི་དཔལ་དང ། སྤོས་དྲི་མ་མེད་པའི་སྤྲིན་ལས་ཆར་འབབ་པའི་འོད་དང ། སྲུང་འཛིན་ཡོངས་སུ་སྡུད་པ་དང ། སྒོ་ཀུན་ནས་ཡོངས་སུ་གནོན་པ་ལ་མངོན་དུ་གྱུར་པའི་མིག་དང ། ཁྲེལ་དང་དཔལ་མི་གཡོ་བའི་འོད་དང ། ལུས་ཀྱི་རིས་སུ་གཏོགས་པའི་ལྷ་དེ་དག་ལ་སོགས་པ་ཀུན་ཀྱང་དེ་བཞིན་གཤེགས་པ་བསྙེན་བཀུར་བར་སྨོན་ལམ་བཏབ་པ་དང་ལྡན་པ། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དང་ཐབས་ཅིག་གོ་།རྐང་གིས་འགྲོ་བའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དག་དང་ཡང་ཐབས་ཅིག་སྟེ། འདི་ལྟར་རྐང་གིས་འགྲོ་རིན་ཆེན་དཔལ་གྱི་ཕྱག་རྒྱ་དང ། རྐང་གིས་འགྲོ་པདྨོ་སྣང་བའི་འོད་ཟེར་གྱི་འོད་དང ། རྐང་གིས་འགྲོ་མེ་ཏོག་གཙུག་ཕུད་ཀྱི་དཔལ་དྲི་མ་མེད་པ་དང ། རྐང་གིས་འགྲོ་ཤིན་ཏུ་མཛེས་པར་གནོན་པ་དང ། རྐང་གིས་འགྲོ་རིན་ཆེན་དཔལ་གྱི་རྒྱལ་མཚན་དང ། རྐང་གིས་འགྲོ་དགའ་བའི་དབྱངས་སྙན་པ་དང ། རྐང་གིས་འགྲོ་ཤིང་ཙནྡན་གྱི་འོད་དང ། རྐང་གིས་འགྲོ་པདྨོ་ཡིད་དུ་འོང་བའི་འོད་དང ། རྐང་གིས་འགྲོ་རྡུལ་གྱི་ཤུགས་ཀྱི་འོད་དང ། རྐང་གིས་འགྲོ་མེ་ཏོག་མང་པོའི་དཀྱིལ་འཁོར་དང ། དེ་དག་ལ་སོགས་པ་རྐང་གིས་འགྲོ་བའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་སྔོན་བསྐལ་པ་མཐའ་ཡས་པར་དེ་བཞིན་གཤེགས་པའི་
Ka8a
༄#། །རྗེས་སུ་འབྲང་བ་ཤ་སྟག་དང་ཐབས་ཅིག་གོ། སྙིང་པོ་བྱང་ཆུབ་ཀྱི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དག་དང་ཡང་ཐབས་ཅིག་སྟེ།་འདི་ལྟར་སྙིང་པོ་བྱང་ཆུབ་ཀྱི་ལྷ་དགེ་བ་དྲི་མ་མེད་པའི་རྒྱན་གྱིས་བརྒྱན་པའི་རྒྱལ་མཚན་དང ། སྙིང་པོ་བྱང་ཆུབ་ཀྱི་ལྷ་རི་རབ་སྤོའི་རིན་པོ་ཆེའི་འོད་དང ། སྙིང་པོ་བྱང་ཆུབ་ཀྱི་ལྷ་དབྱངས་ཀྱི་འབྲུག་སྒྲ་སྒྲོག་པའི་རྒྱལ་མཚན་དང ། མེ་ཏོག་གི་ཆར་སྣ་ཚོགས་འབབ་པའི་མིག་དང ། འོད་འཕྲོ་མང་པོ་ཤིན་ཏུ་དྲི་མ་མེད་པ་དང ། མེ་ཏོག་གི་ཕྲེང་བ་འོད་ཀྱི་གཙུག་ཕུད་དང ། རིན་པོ་ཆེའི་རྒྱན་གྱི་ཆར་རབ་ཏུ་འབེབས་པ་དང ། མཐུ་དམ་པ་སྤོས་ཀྱི་མིག་དང ། རྡོ་རྗེ་སྣ་ཚོགས་ཀྱི་སྤྲིན་དང ། པདྨོ་ཤིང་སྣང་བའི་འོད་དང ། སྙིང་པོ་བྱང་ཆུབ་ཀྱི་ལྷ་དགེ་བའི་ལྟ་བ་སྣ་ཚོགས་རྣམ་པར་སྟོན་པའི་འོད་དང ། དེ་དག་ལ་སོགས་པ་སྙིང་པོ་བྱང་ཆུབ་ཀྱི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་སྔོན་སངས་རྒྱས་རྒྱ་ཆེར་མཆོད་པའི་སྨོན་ལམ་གྱིས་ཡང་དག་པར་བྱུང་བ་ཤ་སྟག་དང་ཐབས་ཅིག་གོ་།ནམ་མཁའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དག་དང་ཡང་ཐབས་ཅིག་སྟེ། འདི་ལྟར་གྲོང་ཁྱེར་གྱི་ལྷ་རིན་ཆེན་རྩེ་མོའི་འོད་དང ། རྒྱན་རྣམ་པ་སྣ་ཚོགས་འབྱུང་བ་དང ། རིན་ཆེན་དྲི་མེད་ཤིན་ཏུ་དགའ་བ་དང ། སློས་པའི་མྱ་ངན་ཐམས་ཅད་སྤོང་བས་རྣམ་པར་སྣང་བ་དང །
Ka8b
སྒྲོན་མ་ཤིན་ཏུ་རྒྱས་པའི་མིག་དང ། འོད་འཕྲོ་བའི་དཔལ་མངོན་པར་འབར་བ་དང ། བསོད་ནམས་ཀྱི་ཤུགས་སྣང་བའི་འོད་དང ། ལུས་དྲི་མ་མེད་པས་མཉམ་པའི་འོད་དང ། སྤོས་ཀྱི་རྒྱལ་མཚན་གཙུག་ཕུད་ཀྱི་རྒྱན་དང ། གྲོང་ཁྱེར་གྱི་ལྷ་རིན་ཆེན་དཔལ་གྱི་འོད་དང ། དེ་དག་ལ་སོགས་པ་ནམ་མཁའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་བསྐལ་པ་བསམ་གྱིས་མི་ཁྱབ་པར་དེ་བཞིན་གཤེགས་པའི་གཞལ་མེད་ཁང་རབ་ཏུ་བརྒྱན་པ་ལ་བརྩོན་པ་ཤ་སྟག་དང་ཐབས་ཅིག་གོ་།སའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དག་དང་ཡང་ཐབས་ཅིག་སྟེ། འདི་ལྟར་སའི་ལྷ་དཔལ་གྱི་མེ་ཏོག་ཀུན་ནས་ཤིན་ཏུ་རྒྱས་པའི་དྲི་མ་མེད་པ་དང ། བསོད་ནམས་བརྟན་པ་ཤིན་ཏུ་བསགས་པའི་འོད་དང ། ཤིང་གི་ཡལ་ག་སྣ་ཚོགས་ཀྱི་རྒྱན་དང ། སེམས་རིན་པོ་ཆེ་རྒྱས་པ་དང ། དུས་དུས་སུ་དགེ་བའི་མིག་རབ་ཏུ་སྟོན་པ་དང ། གསེར་གྱི་མིག་གི་དཔལ་དང ། སྤུ་ལས་སྤོས་ཀྱི་འོད་རྣམ་པར་འགྱེད་པ་དང ། སྒྲ་དབྱངས་ཡིད་དུ་འོང་བ་སྒྲོག་པ་དང ། མེ་ཏོག་གི་གླང་པོ་སྣ་ཚོགས་ཀྱི་གཙུག་ཕུད་དང ། ཀུན་ནས་རྡོ་རྗེའི་རྡུལ་གྱི་རྒྱུན་དང ། སའི་ལྷ་ཁྱིམ་དྲི་མ་མེད་པའི་འོད་དང ། དེ་དག་ལ་སོགས་པ་སའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་བསོད་ནམས་ཀྱི་དབྱིངས་གཅིག་ཏུ་དེ་བཞིན་གཤེགས་པའི་སྔོན་གྱི་སྨོན་ལམ་དང་རབ་ཏུ་འབྲེལ་བ་ཤ་སྟག་
Ka9a
༄#། །དང་ཐབས་ཅིག་གོ་།རིའི་ལྷ་ཚད་མེད་པ་དག་དང་ཡང་ཐབས་ཅིག་སྟེ། འདི་ལྟར་རིའི་ལྷ་རིན་པོ་ཆེའི་རྩེ་མོ་མེ་ཏོག་ཤིན་ཏུ་རྒྱས་པར་གནས་པ་དང ། ནགས་ཚལ་སྣ་ཚོགས་མེ་ཏོག་ཤིན་ཏུ་རྒྱས་པའི་གཙུག་ཕུད་དང ། ཀུན་ནས་ཤིན་ཏུ་འཕགས་པས་རྣམ་པར་སྣང་བའི་རྒྱལ་མཚན་དང ། རྡུལ་ཐམས་ཅད་དང་མི་གནས་པས་དྲི་མ་མེད་པའི་གཙུག་ཕུད་དང ། སྣང་བས་ཕྱོགས་སུ་གསལ་བའི་འོད་དང ། སྟོབས་ལ་ཐུབ་པ་མེད་པས་སྣང་བའི་འོད་དང ། ཀུན་ནས་གཟི་བརྗིད་དཔལ་གྱི་དཀྱིལ་འཁོར་དང ། སྣང་བའི་རྡུལ་ཆུ་བོའི་དཀྱིལ་འཁོར་དང ། ཀུན་ཏུ་མངོན་པར་ལྟ་བའི་མིག་དང ། རིའི་ལྷ་ཀུན་ནས་སྲ་བ་རྡོ་རྗེའི་མཚམས་ཀྱི་མིག་དང ། དེ་དག་ལ་སོགས་པ་རིའི་ལྷ་ཚད་མེད་པ་ཀུན་ཀྱང་ཚུལ་དྲི་མ་མེད་པའི་མིག་གི་སྒོ་རབ་ཏུ་ཐོབ་པ་ཤ་སྟག་དང་ཐབས་ཅིག་གོ་།ནགས་ཚལ་གྱི་ལྷ་བསམ་གྱིས་མི་ཁྱབ་པ་དག་དང་ཡང་ཐབས་ཅིག་སྟེ། འདི་ལྟར་ནགས་ཚལ་གྱི་ལྷ་ཡལ་ག་སྣ་ཚོགས་ཀྱི་སྤྲིན་དང ། ནགས་ཚལ་གྱི་ལྷ་འོད་ཀྱི་ཕུང་པོ་སྣ་ཚོགས་ཀྱི་མིག་ཡིད་དུ་འོང་བའི་འོད་དང ། ལོ་མ་དྲི་མ་མེད་པའི་ཕྲེང་བའི་དཔལ་དང ། ཡན་ལག་རབ་ཏུ་འཕྱང་བའི་གཟི་བརྗིད་དང ། དགེ་བའི་འོད་སྣ་ཚོགས་དང ། སྒྲ་སྐད་ཡིད་དུ་འོང་བའི་དབྱངས་དང ། ཀུན་ནས་སྤོས་མང་པོ་ལྡང་བའི་འོད་དང ། ཀུན་ནས་དཔལ་གྱི་འོད་རབ་ཏུ་འབྱུང་བའི་དཀྱིལ་
Ka9b
འཁོར་དང ། ནགས་ཚལ་གྱི་ལྷ་མེ་ཏོག་དང་འབྲས་བུ་དང་རོའི་འོད་དང ། དེ་དག་ལ་སོགས་པ་ནགས་ཚལ་གྱི་ལྷ་བསམ་གྱིས་མི་ཁྱབ་པ་ཀུན་ཀྱང་དགའ་བའི་ཤུགས་མཐའ་ཡས་པས་གསལ་བར་གྱུར་པ་ཤ་སྟག་དང་ཐབས་ཅིག་གོ་།སྨན་གྱི་ལྷ་མཐའ་ཡས་པ་དག་དང་ཡང་ཐབས་ཅིག་སྟེ། འདི་ལྟར་སྨན་གྱི་ལྷ་ཕུན་སུམ་ཚོགས་པ་དང ། ཙནྡན་གྱི་ནགས་ཚལ་གྱི་ཤུགས་འཆང་བ་དང ། འོད་རྡུལ་མེད་པ་དང ། མིང་ཀུན་ཏུ་གྲགས་པ་གླང་པོའི་རྒྱལ་མཚན་དང ། སྤུའི་ཀློང་ཀུན་ནས་འོད་འབྱུང་བ་དང ། མུན་པ་རྣམ་པར་སེལ་ཅིང་རྣམ་པར་སྦྱོང་བ་དང ། སྒྲ་དབྱངས་ཀུན་ཏུ་འབྱུང་བ་དང ། ཉི་མའི་འོད་འགྲོ་བའི་མཆོག་གི་རྒྱལ་མཚན་དང ། ཕྱོགས་བཅུར་རྨོངས་པ་མེད་པར་ལྟ་བ་དང ། སྨན་གྱི་ལྷ་མདངས་བཟང་པོ་ཀུན་ཏུ་འགྱེད་པའི་མིག་དང ། དེ་དག་ལ་སོགས་པ་སྨན་གྱི་ལྷ་མཐའ་ཡས་པ་ཀུན་ཀྱང་སྙིང་རྗེ་དྲི་མ་མེད་པའི་དཀྱིལ་འཁོར་གྱིས་རབ་ཏུ་སྣང་བར་གྱུར་པ་ཤ་སྟག་དང་ཐབས་ཅིག་གོ་།ལོ་ཏོག་གི་ལྷ་མཐའ་ཡས་པ་དག་དང་ཡང་ཐབས་ཅིག་སྟེ། འདི་ལྟར་ལོ་ཏོག་གི་ལྷ་འཇམ་པའི་དཔལ་དང ། དུས་ཀྱི་མེ་ཏོག་རྣམ་པར་མཛེས་པའི་འོད་དང ། རྩལ་དམ་པའི་སྟོབས་དང ། མདངས་ཀྱི་ངད་མཐའ་ཡས་པ་རབ་ཏུ་འགྱེད་པ་དང ། ས་ཀུན་གྱི་རྩ་བ་འབྲས་བུ་དང ། གཙུག་ཕུད་ཁ་དོག་སྣ་ཚོགས་དང ། ཡལ་ག་དྲི་མ་མེད་པར་གྲུབ་པ་དང ། སྤོས་སྣ་ཚོགས་ཤིན་ཏུ་གྲུབ་པ་དང །
Ka10a
༄#། །བཟང་ཞིང་ཡིད་དུ་འོང་བར་སྣང་བ་དང ། ལོ་ཏོག་གི་ལྷ་ཁ་དོག་རྣམ་པར་དག་ཅིང་འོད་དྲི་མ་མེད་པ་དང ། དེ་དག་ལ་སོགས་པ་ལོ་ཏོག་གི་ལྷ་མཐའ་ཡས་པ་ཀུན་ཀྱང་དགའ་བ་དང ། མགུ་བ་དང ། རངས་པ་ཤིན་ཏུ་ཐོབ་པ་ཤ་སྟག་དང་ཐབས་ཅིག་གོ་།ཆུ་ཀླུང་གི་ལྷ་མུ་མེད་པ་དག་དང་ཡང་ཐབས་ཅིག་སྟེ། འདི་ལྟར་ཆུ་ཀླུང་གི་ལྷ་ཆུ་བོ་ཀུན་དང་ལྡན་པ་དང ། རི་དང་ཆུ་ཀུན་ལ་བརྟེན་པ་དང ། རྡུལ་ཐམས་ཅད་དྲི་མ་མེད་པར་རྣམ་པར་དག་པའི་མིག་དང ། ང་རོས་ཁྱབ་པར་བྱེད་པ་དང ། སྲོག་ཆགས་ཀྱི་རྒྱུད་མཐའ་ཡས་པ་སྐྱོབ་པ་དང ། གདུང་བ་མེད་པ་རྒྱ་མཚོ་གདུང་བ་མེད་པའི་འོད་དྲི་མ་མེད་པ་དང ། དགའ་བདེ་ཀུན་ནས་འབྱུང་བ་དང ། ཡོན་ཏན་གྱི་ཤུགས་ཡངས་པའི་རྒྱལ་མཚན་དང ། འཇིག་རྟེན་ཐམས་ཅད་ཀྱི་དཔལ་རྣམ་པར་སྣང་བ་དང ། ཆུ་ཀླུང་གི་ལྷ་ཚོགས་ཆེན་པོ་རྒྱ་མཚོའི་དཔལ་གྱི་འོད་དང ། དེ་དག་ལ་སོགས་པ་ཆུ་ཀླུང་གི་ལྷ་མུ་མེད་པ་ཀུན་ཀྱང་འགྲོ་བ་ཐམས་ཅད་ལ་ཕན་པའི་དོན་དུ་ཡིད་ལ་བྱེད་པ་ལ་བརྩོན་པ་ཤ་སྟག་དང་ཐབས་ཅིག་གོ་།རྒྱ་མཚོའི་ལྷ་བསམ་གྱིས་མི་ཁྱབ་པ་དག་དང་ཡང་ཐབས་ཅིག་སྟེ། འདི་ལྟར་རྒྱ་མཚོའི་ལྷ་རིན་པོ་ཆེའི་འོད་འབྱུང་བའི་དཔལ་དང ། རྡོ་རྗེ་ཀུན་ནས་སྲ་ཞིང་མི་ཆོམས་པའི་རྒྱལ་མཚན་དང་ལྡན་པ་དང ། རྡུལ་དང་དྲི་མ་མེད་པའི་གནས་དང་ལྡན་པ་དང ། ཀུན་ནས་ཆུ་དང ། རི་བོ་དང ། ཁྱིམ་གྱི་དཀྱིལ་འཁོར་དང ། སྐྱབས་
Ka10b
རིན་པོ་ཆེའི་མིག་གི་ཟླ་བའི་དཔལ་དང ། ཀླུའི་དཔལ་པདྨོ་སྣ་ཚོགས་ཀྱི་གཙུག་ཕུད་དང ། ཆུ་ལྟ་བུར་རོ་མཐུན་པ་འཛིན་པའི་འོད་དང ། རིན་པོ་ཆེའི་འོད་འཕྲོ་བའི་མེ་ཏོག་གི་ཚོན་གྱི་འོད་དང ། རི་རབ་སྲ་བའི་རྡོ་རྗེ་སྣ་ཚོགས་དང ། རྒྱ་མཚོའི་ལྷ་འབྲུག་སྒྲ་སྒྲོག་པའི་རྒྱ་མཚོའི་ཤུགས་ཀྱི་དབྱངས་དང ། དེ་དག་ལ་སོགས་པ་རྒྱ་མཚོའི་ལྷ་བསམ་གྱིས་མི་ཁྱབ་པ་ཀུན་ཀྱང་སངས་རྒྱས་ཀྱི་ཡོན་ཏན་རྒྱ་མཚོའི་མཐར་ཕྱིན་པར་རྒྱས་པར་བྱེད་པ་ཤ་སྟག་དང་ཐབས་ཅིག་གོ་།མེའི་ལྷ་གྲངས་མེད་པ་དག་དག་ཡང་ཐབས་ཅིག་སྟེ། འདི་ལྟར་མེའི་ལྷ་གཟི་བརྗིད་འབར་ཞིང་འཕྲོ་བའི་འོད་དང ། ཀུན་ཏུ་འབར་ཞིང་འཕྲོ་བའི་རྒྱལ་མཚན་གྱི་དཀྱིལ་འཁོར་དང ། འོད་རྒྱ་ཆེན་པོས་ཕྱོགས་རྒྱས་པར་བྱེད་པ་དང ། རྒྱལ་མཚན་གྱི་རྡུལ་གྱི་སྒོས་རྒྱས་པར་བྱེད་པ་དང ། གཟི་བརྗིད་མི་ཟད་པའི་གཙུག་ཕུད་དང ། དཀའ་ཐུབ་སྣ་ཚོགས་ཀྱི་མིག་གི་དཔལ་དང ། ཕྱོགས་ཁྱིམ་དུ་གྱུར་པའི་རི་རབ་ཀྱི་སྤོ་དང ། འོད་དྲག་ཤུལ་ཅན་གྱི་དབང་ཕྱུག་དང ། མུན་པ་དང་རབ་རིབ་སེལ་ཅིང་ཕྱོགས་རྣམ་པར་སྣང་བར་བྱེད་པ་དང ། མེའི་ལྷ་འོད་འཕྲོ་བའི་སྤྲིན་གྱི་དབང་ཕྱུག་དང ། དེ་དག་ལ་སོགས་པ་མེའི་ལྷ་གྲངས་མེད་པ་ཀུན་ཀྱང་སེམས་ཅན་ཐམས་ཅད་ཀྱི་གདུང་བ་སེལ་བའི་སྣང་བ་སྟོན་པ་ཤ་སྟག་དང་ཐབས་ཅིག་གོ་།ཆུའི་ཕུང་པོའི་ལྷ་ཚད་མེད་པ་དག་དང་ལང་ཐབས་ཅིག་སྟེ། འདི་ལྟར་ཆུའི་ཕུང་པོའི་ལྷ་སྤྲིན་དང་ན་བུན་ཀུན་ཏུ་གྲུབ་པའི་རྒྱལ་མཚན་
Ka11a
༄#། །དང ། སྤྲིན་སྒྲའི་ཤུགས་རྒྱ་མཚོའི་སྤྲིན་དང་ཆུ་སྣ་ཚོགས་ཀྱི་གཙུག་ཕུད་དང ། བཟང་པོར་འཁྱིལ་བ་གྲུབ་པའི་དཔལ་དང ། ཀུན་ནས་སྤོས་དྲི་མ་མེད་པའི་མྱུ་གུའི་དཔལ་དང ། དབའ་རླབས་ཀྱི་སྒྲ་བསོད་ནམས་སྟེགས་ཀྱི་འོད་དང ། ཚིམ་པར་བྱ་བ་ལ་དབང་བྱེད་པ་ཡོངས་སུ་སྒྲུབ་པ་དང ། སའི་རྡུལ་སྙེད་ཀྱི་སྒོ་ནས་དབྱངས་འབྱུང་བ་དང ། འོད་ཀུན་ཏུ་འགྲོ་ཞིང་རྒྱས་པར་བྱེད་པ་དང ། ཆུའི་ཕུང་པོའི་ལྷ་རྒྱ་མཚོའི་དབྱངས་ཀྱི་ང་རོའི་འོད་དང ། དེ་དག་ལ་སོགས་པ་ཆུའི་ཕུང་པོའི་ལྷ་ཚད་མེད་པ་ཀུན་ཀྱང་འགྲོ་བ་ཐམས་ཅད་ལ་ཕན་པ་དང ། བདེ་བའི་སྐྱབས་སུ་བརྩོན་པ་ཤ་སྟག་དང་ཐབས་ཅིག་གོ་།རླུང་གི་ཕུང་པོའི་ལྷ་ཚད་མེད་པ་དག་དང་ཡང་ཐབས་ཅིག་སྟེ། འདི་ལྟར་རླུང་གི་ཕུང་པོའི་ལྷ་ཆགས་པ་མེད་པར་འགྲོ་བའི་འོད་དང ། ཀུན་ཏུ་རྒྱས་པར་འབྱུང་བའི་མཐུའི་དཔལ་དང ། ཀུན་ཏུ་རེག་པར་བྱེད་པའི་སྤྲིན་གྱི་རྒྱལ་མཚན་དང ། རྒྱན་ཡིད་དུ་འོང་ཞིང་བཟང་པོའི་འོད་དང ། ཆུ་དྲག་པོའི་སྙིང་པོ་སྐེམ་པ་དང ། སྒྲ་ཆེན་པོས་འགྲོ་བའི་དབྱངས་དང ། ཤིང་གི་རྩེ་མོའི་མེ་ཏོག་རབ་ཏུ་འཕྱང་བའི་གཙུག་ཕུད་དང ། ཐོགས་པ་མེད་པར་ཕྱོགས་ཀུན་ཏུ་རྒྱས་པར་འགྲོ་བ་དང ། རླུང་གི་ཕུང་པོ་རྣམ་པ་སྣ་ཚོགས་འབྱུང་བའི་སྤྲིན་གྱི་དཀྱིལ་འཁོར་དང ། རླུང་གི་ཕུང་པོའི་ལྷ་འཇིག་རྟེན་གྱི་ཁམས་ཐམས་ཅད་ཀྱི་མུན་པ་ཀུན་ནས་སྣང་བར་བྱེད་པ་དང ། དེ་དག་ལ་སོགས་
Ka11b
པ་རླུང་གི་ཕུང་པོའི་ལྷ་ཚད་མེད་པ་ཀུན་ཀྱང་སེམས་ཅན་ཐམས་ཅད་ཀྱི་སྔོན་གྱི་མཐའི་ང་རྒྱལ་རྣམ་པར་གཏོར་བ་ལ་བརྩོན་པ་ཤ་སྟག་དང་ཐབས་ཅིག་གོ་།ནམ་མཁའི་ལྷ་མུ་མེད་པ་དག་དང་ཡང་ཐབས་ཅིག་སྟེ། འདི་ལྟར་ནམ་མཁའི་ལྷ་ཀུན་ནས་སྣང་བ་དྲི་མ་མེད་པའི་འོད་དང ། མཐའ་ཡས་ཤིང་ཟབ་པ་ཀུན་ཏུ་རྒྱས་པར་བྱེད་པ་དང ། རླུང་ཀུན་ནས་འབྱུང་བའི་དཔལ་དང ། བསྒྲིབས་པ་ཐམས་ཅད་དང་མི་གནས་པའི་དཀྱིལ་འཁོར་དང ། རྒྱ་ཆེན་པོ་ཀུན་ཏུ་གནོན་པ་སྣ་ཚོགས་ཀྱི་གཙུག་ཕུད་དང ། འོད་ཟེར་སྣང་བའི་འོད་ཐོགས་པ་མེད་པ་དང ། སྟོབས་ཀྱི་རྒྱུན་ཐོགས་པ་མེད་པའི་དཔལ་དང ། ཕྱོགས་དྲི་མ་མེད་པར་སྣང་བའི་འོད་དང ། དབྱངས་ཤིན་ཏུ་འཕགས་ཤིང་ཟབ་པ་དང ། ནམ་མཁའི་ལྷ་ཕྱོགས་བཅུར་མངོན་དུ་སྟོན་པའི་འོད་དང ། དེ་དག་ལ་སོགས་པ་ནམ་མཁའི་ལྷ་མུ་མེད་པ་ཐམས་ཅད་ཀྱང་སེམས་རྒྱ་མཚོ་དྲི་མ་མེད་ཅིང་ཡོངས་སུ་དག་པ་ཤ་སྟག་དང་ཐབས་ཅིག་གོ་།ཕྱོགས་ཀྱི་ལྷ་མུ་མེད་པ་དག་དང་ཡང་ཐབས་ཅིག་སྟེ།་འདི་ལྟར་ཕྱོགས་ཀྱི་ལྷ་ཕྱོགས་ཀྱི་དབྱིངས་ན་རབ་ཏུ་གནས་ཤིང་ཀུན་ཏུ་རྒྱས་པར་འགེངས་པ་དང ། མཉས་པ་ཉིད་ལ་མངོན་དུ་ལྟ་བ་དང ། སྣང་བ་སྤྱོད་པའི་རྒྱན་དང ། ཀུན་ཏུ་རྒྱུ་ཞིང་རྗེས་སུ་འབྲང་བ་དང ། རྨོངས་པ་མེད་པའི་གཙུག་ཡོངས་སུ་འགྲུབ་པ་དང ། ནམ་མཁའི་རྒྱུད་ཀུན་ཏུ་སྤྱོད་པ་དང ། རྣམ་པར་སྤྱོད་པའི་སྤྲིན་རྒྱ་ཆེན་པོའི་རྒྱལ་མཚན་དང །
Ka12a
༄#། །མིག་ཐ་དད་པ་མེད་པའི་གཙུག་ཕུད་དང ། འཇིག་རྟེན་གྱི་བྱ་བ་ཀུན་ནས་སྤྱོད་པ་དང ། ཕྱོགས་ཀྱི་ལྷ་ཕྱོགས་སུ་རྣམ་པར་ལྟ་བ་ཕྲེང་བའི་འོད་དང ། དེ་དག་ལ་སོགས་པ་ཕྱོགས་ཀྱི་ལྷ་མུ་མེད་པ་ཀུན་ཀྱང་སེམས་ཅན་གྱི་རྒྱུད་ཀྱི་ཕྱོགས་སྣང་བར་བྱ་བ་ལ་བརྩོན་པ་ཤ་སྟག་དང་ཐབས་ཅིག་གོ་།མཚན་མོའི་ལྷ་ཚད་མེད་པ་དག་དང་ཡང་ཐབས་ཅིག་སྟེ།་འདི་ལྟར་མཚན་མོའི་ལྷ་དཔལ་དྲི་མ་མེད་ཅིང་ཀུན་ནས་ཟབ་པའི་འོད་དང ། ཀུན་ནས་སྐྱོབ་པའི་མདངས་ཀྱི་དཔལ་དང ། རབ་ཏུ་དགའ་བའི་མིག་གིས་འགྲོ་བ་ལ་རྣམ་པར་ལྟ་བ་དང ། སྒྲས་ཞི་བ་རྒྱ་མཚོ་དང་ལྡན་པ་དང ། མཚན་མོ་ཐམས་ཅད་འབྱུང་བའི་དཔལ་དང ། ཤིང་ཐམས་ཅད་རབ་ཏུ་རྒྱས་པར་བྱེད་པའི་འོད་དང ། ཀུན་ནས་སྐྱོང་ཞིང་སྲུང་བའི་དཔལ་དང ། དགེ་བ་ཐམས་ཅད་ཀྱི་དགའ་བ་ལ་དབང་སྒྱུར་བ་དང ། མདུད་པར་འཛིན་པ་ཐམས་ཅད་ཞི་བར་བྱ་བས་དབང་པོ་རབ་ཏུ་དགའ་བ་དང ། མཚན་མོའི་ལྷ་དགེ་བའི་བསོད་ནམས་འབྱུང་བའི་དཔལ་སྟོན་པ་དང ། དེ་དག་ལ་སོགས་པ་མཚན་མོའི་ལྷ་ཚད་མེད་པ་ཀུན་ཀྱང་ཆོས་ཀྱི་དགའ་བ་འབྱུང་བ་ལ་མོས་པར་གནས་པ་ལ་བརྩོན་པ་ཤ་སྟག་དང་ཐབས་ཅིག་གོ་།ཉིན་མོའི་ལྷ་གཞལ་དུ་མེད་པ་དག་དང་ཡང་ཐབས་ཅིག་སྟེ། འདི་ལྟར་ཉིན་མོའི་ལྷ་ཁྱིམ་དང་གཞལ་མེད་ཁང་གི་གཟུགས་ཤིན་ཏུ་སྟོན་པ་དང ། བརྩམས་
Ka12b
པའི་བློ་གྲོས་མཚམས་སྦྱོར་བའི་དཀྱིལ་འཁོར་དང ། ཀུན་ནས་དགའ་བའི་དཔལ་གྱི་རྒྱན་དང ། མེ་ཏོག་དང་སྤོས་ཡིད་དུ་འོང་བའི་འོད་དང ། ཀུན་ནས་ཡིད་དུ་འོང་བའི་སྨན་སྟེན་པ་སྒྲུབ་པའི་དཔལ་དང ། དགའ་བའི་མིག་བཟང་པོས་ཚིམ་པར་བྱེད་པ་དང ། ཚུལ་རྒྱ་ཆེན་པོའི་ཕྱོགས་ཀུན་ནས་བྱུང་བའི་དཔལ་དང ། སྙིང་རྗེ་རྒྱ་ཆེན་པོའི་གཟི་བརྗིད་ཀྱི་འོད་དང ། སྣང་བ་རྒྱ་ཆེན་པོའི་དགེ་བའི་རྩ་བ་དང་མི་འབྲལ་བའི་འོད་དང ། ཉིན་མོའི་ལྷ་མེ་ཏོག་གི་ཕྲེང་བ་ཀུན་ནས་འཕྱང་བའི་དཔལ་དང ། དེ་དག་ལ་སོགས་པ་ཉིན་མོའི་ལྷ་གཞལ་དུ་མེད་པ་ཀུན་ཀྱང་མོས་པའི་ཆོས་གཞལ་དུ་མེད་པའི་རྒྱན་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།ལྷ་མ་ཡིན་གྱི་དབང་པོ་མཐའ་ཡས་པ་དག་དང་ཡང་ཐབས་ཅིག་སྟེ། འདི་ལྟར་ལྷ་མ་ཡིན་གྱི་དབང་པོ་སྒྲ་གཅན་དང ། ལྷ་མ་ཡིན་གྱི་དབང་པོ་ཐག་བཟང་རིས་དང ། ལྷ་མ་ཡིན་གྱི་དབང་པོ་བདེ་བའི་མཆོག་དང ། ལྷ་མ་ཡིན་གྱི་དབང་པོ་མཚོན་ཆ་ཆེན་པོ་དང ། ལྷ་མ་ཡིན་གྱི་དབང་པོ་སྟོབས་ཅན་དང ། ལྷ་མ་ཡིན་གྱི་དབང་པོ་རྣམ་པར་སྣང་བ་དང ། ལྷ་མ་ཡིན་གྱི་དབང་པོ་རྡོ་རྗེ་སྲ་བ་སྣ་ཚོགས་ཀྱི་ཡན་ལག་དང ། ལྷ་མ་ཡིན་གྱི་དབང་པོ་སྟོབས་རྒྱ་ཆེན་པོའི་རྒྱུའི་བློ་གྲོས་དང ། ལྷ་མ་ཡིན་གྱི་དབང་པོ་དཔལ་གྱི་བེའུ་རབ་ཏུ་འབྱུང་བ་དང ། ལྷ་མ་ཡིན་གྱི་དབང་པོ་བརྟུལ་ཞུགས་བཟང་པོའི་དབྱངས་དང ། དེ་དག་ལ་སོགས་པ་ལྷ་མ་ཡིན་གྱི་དབང་པོ་ཀུན་ཀྱང་
Ka13a
༄#། །སྒྱུ་དང ། ང་རྒྱལ་དང ། ཀུན་ནས་ཉོན་མོངས་པ་རབ་ཏུ་ཞི་བར་བྱ་བ་ལ་བརྩོན་པ་ཤ་སྟག་དང་ཐབས་ཅིག་གོ་།ནམ་མཁའ་ལྡིང་གི་དབང་པོ་བསམ་གྱིས་མི་ཁྱབ་པ་དག་དང་ཡང་ཐབས་ཅིག་སྟེ། འདི་ལྟར་ནམ་མཁའ་ལྡིང་གི་དབང་པོ་མཐུ་སྟོབས་ཆེན་པོའི་ཤུགས་དང ། ནམ་མཁའ་ལྡིང་གི་དབང་པོ་མི་ཤིགས་པའི་སེམས་རིན་ཆེན་གཙུག་ཕུད་དང ། ནམ་མཁའ་ལྡིང་གི་དབང་པོ་ཤུགས་དྲི་མ་མེད་པའི་དཔལ་དང ། ནམ་མཁའ་ལྡིང་གི་དབང་པོ་ཕྱིར་མི་ལྡོག་པའི་སེམས་ཀྱི་རྒྱན་དང ། ནམ་མཁའ་ལྡིང་གི་དབང་པོ་རྒྱ་མཚོ་ཆེན་པོའི་འོད་ཀྱི་ཚུལ་འཆང་བ་དང ། ནམ་མཁའ་ལྡིང་གི་དབང་པོ་ཆོས་བརྟན་པ་དྲི་མ་མེད་པའི་འོད་དང ། ནམ་མཁའ་ལྡིང་གི་དབང་པོ་ཅོད་པན་སྣ་ཚོགས་དཔལ་གྱི་གཙུག་ཕུད་དང ། ནམ་མཁའ་ལྡིང་གི་དབང་པོ་བཞིན་ཀུན་ཏུ་ཁྱབ་པར་སྟོན་པའི་ཤུགས་དང ། ནམ་མཁའ་ལྡིང་གི་དབང་པོ་དགེ་བའི་རྒྱ་མཚོ་ཀུན་ནས་ལྟ་བ་དང ། ནམ་མཁའ་ལྡིང་གི་དབང་པོ་ཀླུའི་སྒྲ་ཡངས་པ་ཀུན་ཏུ་ལྟ་བའི་དཀྱིལ་འཁོར་དང ། དེ་དག་ལ་སོགས་པ་ནམ་མཁའ་ལྡིང་གི་དབང་པོ་མཐའ་ཡས་པ་ཀུན་ཀྱང་སེམས་ཅན་ཐམས་ཅད་ཡོངས་སུ་བསྡུ་བའི་ཐབས་ཡངས་པ་རབ་ཏུ་ཐོབ་པ་ཤ་སྟག་དང་ཐབས་ཅིག་གོ་།མིའམ་ཅིའི་དབང་པོ་དུ་མ་དག་དང་ཡང་ཐབས་ཅིག་སྟེ། འདི་ལྟར་མིའམ་ཅིའི་དབང་པོ་ལྷའི་བློ་གྲོས་འོད་དང ། མིའམ་ཅིའི་དབང་པོ་མེ་
Ka13b
ཏོག་དཔལ་གྱི་དཀྱིལ་འཁོར་དང ། མིའམ་ཅིའི་དབང་པོ་རྒྱན་རྣམ་པ་སྣ་ཚོགས་དང ། མི་འམ་ཅིའི་དབང་པོ་ང་རོ་ཡིད་དུ་འོང་བའི་དབྱངས་དང ། མི་འམ་ཅིའི་དབང་པོ་ཤིང་རིན་པོ་ཆེའི་ཡལ་གའི་འོད་དང ། མི་འམ་ཅིའི་དབང་པོ་མཐོང་ན་དགའ་ཞིང་སྤྲོ་བར་བྱེད་པ་དང ། མི་འམ་ཅིའི་དབང་པོ་རྒྱན་གྱི་དཔལ་གྱི་འོད་དང ། མི་འམ་ཅིའི་དབང་པོ་མེ་ཏོག་ཚོན་བཟང་པོའི་རྒྱལ་མཚན་དང ། མི་འམ་ཅིའི་དབང་པོ་སའི་གཞིའི་དཔལ་དང ། མི་འམ་ཅིའི་དབང་པོ་དྲག་ཤུལ་གྱི་བདག་པོ་དང ། དེ་དག་ལ་སོགས་པ་མི་འམ་ཅིའི་དབང་པོ་དུ་མ་ཀུན་ཀྱང་ཆོས་ཐམས་ཅད་ལ་དགེ་བའི་རྩ་བ་ཡང་དག་པར་སྐྱེད་པ་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།ལྟོ་འཕྱེ་ཆེན་པོའི་དབང་པོ་འཕྲུལ་པོ་ཆེ་ས་མཚམས་མེད་པ་དག་དང་ཡང་ཐབས་ཅིག་སྟེ། འདི་ལྟར་ལྟོ་འཕྱེ་ཆེན་པོའི་དབང་པོ་བློ་གྲོས་བཟང་པོའི་གཟི་བརྗིད་དང ། ལྟོ་འཕྱེ་ཆེན་པོའི་དབང་པོ་གཟི་བརྗིད་ཀྱི་དབྱངས་ལ་རྡུལ་མེད་པ་དང ། ལྟོ་འཕྱེ་ཆེན་པོའི་དབང་པོ་བློ་གྲོས་སྣ་ཚོགས་མཆོག་གི་གཙུག་ཕུད་དང ། ལྟོ་འཕྱེ་ཆེན་པོའི་དབང་པོ་མིག་བཟང་པོའི་བདག་པོ་དང ། ལྟོ་འཕྱེ་ཆེན་པོའི་དབང་པོ་སྒྲོན་མའི་སྐྱབས་ཀྱི་རྒྱལ་པོ་དང ། ལྟོ་འཕྱེ་ཆེན་པོའི་དབང་པོ་སྣང་བ་ཤུགས་བཟང་པོའི་རྒྱལ་མཚན་དང ། ལྟོ་འཕྱེ་ཆེན་པོའི་དབང་པོ་སེངྒེའི་ཕྲུ་གུ་དང ། ལྟོ་འཕྱེ་ཆེན་པོའི་དབང་པོ་རྒྱན་སྣ་ཚོགས་ཀྱི་དབྱངས་དང ། ལྟོ་འཕྱེ་ཆེན་པོའི་དབང་པོ་རི་
Ka14a
༄#། །རབ་ཀྱི་བུ་དང ། ལྟོ་འཕྱེ་ཆེན་པོའི་དབང་པོ་ཡིད་དུ་འོང་བ་འབྱུང་བ་དང ། དེ་དག་ལ་སོགས་པ་ལྟོ་འཕྱེ་ཆེན་པོའི་དབང་པོ་ས་མཚམས་མེད་པ་ཀུན་ཀྱང་སེམས་ཅན་གྱི་གཏི་མུག་གི་དྲ་བ་ཆེན་པོ་བསལ་བ་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།དྲི་ཟའི་བདག་པོ་ཚད་མེད་པ་དག་དང་ཡང་ཐབས་ཅིག་སྟེ། འདི་ལྟར་དྲི་ཟའི་རྒྱལ་པོ་གནས་སྲུང་པོ་དང ། དྲི་ཟའི་རྒྱལ་པོ་ཤིང་མི་འམ་ཅིའི་འོད་དང ། དྲི་ཟའི་རྒྱལ་པོ་མིག་གཙང་མ་དགའ་བ་རབ་ཏུ་སྐྱེ་བ་དང ། དྲི་ཟའི་རྒྱལ་པོ་མེ་ཏོག་དང ། དྲི་ཟའི་རྒྱལ་པོ་ཤིང་ཤིན་ཏུ་རྒྱས་པའི་ཅོད་པན་དང ། དྲི་ཟའི་རྒྱལ་པོ་དགའ་བས་སྤྱོད་པ་ཀུན་ཏུ་སྒྲོག་པ་དང ། དྲི་ཟའི་རྒྱལ་པོ་རབ་ཏུ་དགའ་བ་རྒྱུན་དུ་གནས་པའི་མིག་བཟང་པོ་དང ། དྲི་ཟའི་རྒྱལ་པོ་ཡིད་དུ་འོང་བའི་དབྱངས་སེངྒེའི་རྒྱལ་མཚན་དང ། དྲི་ཟའི་རྒྱལ་པོ་འོད་ཟེར་ཀུན་ཏུ་འགྱེད་པའི་འོད་དང ། དྲི་ཟའི་རྒྱལ་པོ་རྡོ་རྗེ་ཤིང་གི་ཡལ་གའི་རྒྱལ་མཚན་དང ། དྲི་ཟའི་རྒྱལ་པོ་རྒྱན་ཐམས་ཅད་ལ་དགའ་བའི་རང་བཞིན་གྱི་ཚུལ་སྟོན་པ་དང ། དེ་དག་ལ་སོགས་པ་དྲི་ཟའི་བདག་པོ་ཚད་མེད་པ་ཀུན་ཀྱང་མོས་པ་དང ། དགའ་བ་རྒྱ་ཆེན་པོ་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།གྲུལ་བུམ་གྱི་བདག་པོ་ཚད་མེད་པ་དག་དང་ཡང་ཐབས་ཅིག་སྟེ། འདི་ལྟར་གྲུལ་བུམ་གྱི་བདག་པོ་འཕགས་སྐྱེས་པོ་དང ། གྲུལ་བུམ་གྱི་བདག་པོ་ཀླུ་
Ka14b
བདག་དང ། གྲུལ་བུམ་གྱི་དབང་པོ་ལེགས་པར་སྤྱད་པའི་རྒྱལ་མཚན་དང ། གྲུལ་བུམ་གྱི་དབང་པོ་ཕན་པར་སྤྱོད་པར་འཕར་བ་དང ། གྲུལ་བུམ་གྱི་དབང་པོ་འཇིགས་པ་ལས་སྒྲོལ་བ་དང ། གྲུལ་བུམ་གྱི་དབང་པོ་སཱ་ལ་སྣ་ཚོགས་བཟང་པོ་དང ། གྲུལ་བུམ་གྱི་དབང་པོ་རི་རབ་ལེགས་པར་བྱུང་བ་དང ། གྲུལ་བུམ་གྱི་དབང་པོ་སྡེ་དཔའ་བ་དང ། གྲུལ་བུམ་གྱི་དབང་པོ་དགེ་བའི་མིག་གི་འོད་ཟེར་མཐའ་ཡས་པ་དང ། གྲུལ་བུམ་གྱི་དབང་པོ་ལྷ་དང་ལྷ་མ་ཡིན་གྱི་སྒོ་མཐའ་ཡས་པའི་མིག་དང ། དེ་དག་ལ་སོགས་པ་གྲུལ་བུམ་གྱི་བདག་པོ་ཚད་མེད་པ་ཀུན་ཀྱང་ཆགས་པ་མེད་པའི་ཆོས་སྣང་བ་མངོན་པར་སྒྲུབ་པ་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།ཀླུའི་བདག་པོ་མཐའ་ཡས་པ་དག་དང་ཡང་ཐབས་ཅིག་སྟེ། འདི་ལྟར་ཀླུའི་དབང་པོ་མིག་མི་བཟང་དང ། ཀླུའི་དབང་པོ་རྒྱ་མཚོ་དང ། ཀླུའི་དབང་པོ་སྤྲིན་སྒྲ་སྣ་ཚོགས་ཀྱི་རྒྱལ་མཚན་དང ། ཀླུའི་དབང་པོ་འོད་འཕྲོ་བའི་སྒོ་རྒྱ་མཚོ་རབ་ཏུ་སྣང་བ་དང ། ཀླུའི་དབང་པོ་ཀུན་ནས་རིའི་སྤྲིན་གྱི་རྒྱལ་མཚན་དང ། ཀླུའི་དབང་པོ་འཇོག་པོ་དང ། ཀླུའི་དབང་པོ་མཐའ་ཡས་པར་འགྲོ་བ་དང ། ཀླུའི་དབང་པོ་མཛོད་སྤུའི་གཟི་བརྗིད་དྲི་མ་མེད་པའི་ཤུགས་དང ། ཀླུའི་དབང་པོ་ཀུན་ཏུ་སྤྱོད་པ་རྒྱ་ཆེན་པོའི་དབྱངས་དང ། ཀླུའི་དབང་པོ་མ་དྲོས་པ་དང ། དེ་དག་ལ་སོགས་པ་ཀླུའི་དབང་པོ་མཐའ་ཡས་པ་ཀུན་ཀྱང་སེམས་ཅན་གྱི་ཉོན་མོངས་པས་
Ka15a
༄#། །གདུང་བའི་ཚ་བ་ཆེན་པོ་ཆར་པའི་སྤྲིན་གྱིས་ཤིན་ཏུ་ཞི་བར་བྱ་བ་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།གནོད་སྦྱིན་གྱི་བདག་པོ་ཀུན་ཏུ་མཐའ་ཡས་པ་དག་དང་ཡང་ཐབས་ཅིག་སྟེ། འདི་ལྟར་གནོད་སྦྱིན་གྱི་དབང་པོ་ངལ་བསོ་པོ་དང ། གནོད་སྦྱིན་གྱི་དབང་པོ་དབྱངས་ཆེན་དབང་ཕྱུག་དང ། གནོད་སྦྱིན་གྱི་དབང་པོ་ས་ལ་ཤིན་ཏུ་གཏུམ་པའི་མཚོན་ཆ་དང ། གནོད་སྦྱིན་གྱི་དབང་པོ་བློ་གྲོས་ཆེན་པོ་དང ། གནོད་སྦྱིན་གྱི་དབང་པོ་མིག་འོད་འཕྲོ་བའི་བདག་པོ་དང ། གནོད་སྦྱིན་གྱི་དབང་པོ་མིག་རྡོ་རྗེ་ལྟར་བརྟན་པ་དང ། གནོད་སྦྱིན་གྱི་དབང་པོ་སྡེ་མཆོག་ཏུ་དཔའ་བ་དང ། གནོད་སྦྱིན་གྱི་དབང་པོ་སྡེའི་རྒྱན་ཆེན་པོས་རབ་ཏུ་གནོན་པ་དང ། གནོད་སྦྱིན་གྱི་དབང་པོ་དགེ་བའི་ཚོགས་དང ། གནོད་སྦྱིན་གྱི་དབང་པོ་རི་བོའི་སྟོབས་རབ་ཏུ་འཇོམས་པ་དང ། དེ་དག་ལ་སོགས་པ་གནོད་སྦྱིན་གྱི་དབང་པོ་ཀུན་ཏུ་མཐའ་ཡས་པ་ཀུན་ཀྱང་སེམས་ཅན་ཐམས་ཅད་ལ་ཕན་པ་དང ། ཡོངས་སུ་སྲུང་བར་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།ཟླ་བའི་རིས་སུ་གཏོགས་པའི་ལྷ་དུ་མ་དག་དང་ཡང་ཐབས་ཅིག་སྟེ། འདི་ལྟར་ལྷའི་བུ་ཟླ་བ་དང ། ལྷའི་བུ་འོད་ཀྱི་མེ་ཏོག་རྒྱལ་པོའི་གཙུག་ཕུད་དང ། ལྷའི་བུ་དཔལ་གྱི་ཚོགས་སྣ་ཚོགས་ཀྱི་འོད་དང ། ལྷའི་བུ་འཇིག་རྟེན་དགའ་བའི་བདེ་བ་སྣ་ཚོགས་དང ། ལྷའི་བུ་ཤིང་གི་དབང་པོའི་མིག་གི་འོད་
Ka15b
དང ། ལྷའི་བུ་འོད་བཟང་པོ་སྟོན་པ་དང ། ལྷའི་བུ་ཀུན་ནས་སྤྱོད་པ་མི་སྒུལ་བའི་འོད་དང ། ལྷའི་བུ་སྐར་མའི་རྒྱལ་པོའི་བདག་པོ་དང ། ལྷའི་བུ་བློ་དྲི་མ་མེད་པའི་ཟླ་བ་དང ། ལྷའི་བུ་གཟི་བརྗིད་ཆེན་པོའི་འོད་ཟེར་མཛེས་པ་དང ། དེ་དག་ལ་སོགས་པ་ལྷའི་བུ་ཟླ་བའི་རིས་སུ་གཏོགས་པ་དུ་མ་ཀུན་ཀྱང་སེམས་ཅན་ཐམས་ཅད་ཀྱི་སེམས་རིན་པོ་ཆེ་སྣང་བར་བྱ་བ་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།ཉི་མའི་རིས་སུ་གཏོགས་པའི་ལྷའི་བུ་མེད་པ་དག་དང་ཡང་ཐབས་ཅིག་སྟེ། འདི་ལྟར་ལྷའི་བུ་ཉི་མ་དང ། ལྷའི་བུ་གཟི་བརྗིད་ཀྱི་འོད་ཟེར་འབར་བའི་མིག་དང ། རི་བོའི་རྒྱལ་མཚན་གྱི་འོད་དང ། རིན་ཆེན་དྲི་མེད་རྨད་དུ་བྱུང་བ་དང ། ཕྱིར་མི་ལྡོག་པ་རབ་ཏུ་གནོན་པ་དང ། མེ་ཏོག་གི་ཕྲེང་བའི་འོད་ཀྱི་དཔལ་དང ། འོད་ཀྱི་དཔལ་སྣང་བའི་རྒྱལ་མཚན་དང ། རིན་ཆེན་གཙུག་ཕུད་རྣམ་པར་སྣང་བ་དང ། མིག་ཀུན་ཏུ་སྣང་བ་དང ། སའི་དཔལ་གྱི་བེའུ་འཛིན་པ་དང ། ལྷའི་བུ་སྒོ་ཐམས་ཅད་སྐྱོབ་པའི་དཔལ་གྱི་འོད་དང ། དེ་དག་ལ་སོགས་པ་ལྷའི་བུ་ཉི་མའི་རིས་སུ་གཏོགས་པ་མུ་མེད་པ་ཀུན་ཀྱང་དགེ་བའི་རྩ་བ་ཤིན་ཏུ་སྦྱངས་པ། འགྲོ་བ་ཐམས་ཅད་ལ་ཕན་པར་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།སུམ་ཅུ་རྩ་གསུམ་གྱི་རིས་སུ་གཏོགས་པ་བརྒྱ་བྱིན་ལྷའི་དབང་པོ་ལ་སོགས་པ་ཚད་མེད་པ་དག་དང་ཡང་ཐབས་ཅིག་སྟེ། འདི་ལྟར་ལྷའི་དབང་པོ་བརྒྱ་བྱིན་དང ། ལྷའི་བུ་སྒྲ་ཀུན་ཏུ་གྲགས་པའི་དབང་
Ka16a
༄#། །ཕྱུག་དཀྱིལ་འཁོར་དང ། བྱམས་པར་ལྟ་བའི་གཙུག་ཕུད་དང ། རིན་པོ་ཆེའི་འོད་ཀུན་ཏུ་གྲགས་པའི་རྒྱལ་མཚན་དང ། དགའ་བདེ་འབྱུང་བའི་གཙུག་ཕུད་དང ། དྲན་པ་ཡིད་དུ་འོང་བ་དང ། རི་བོའི་སྒྲའི་དཔལ་དང ། དྲན་པ་དང་ལྡན་པ་དང ། མེ་ཏོག་དྲི་མ་མེད་ཅིང་ཡིད་དུ་འོང་བའི་འོད་དང ། ཡེ་ཤེས་ཉི་མའི་མིག་དང ། ལྷའི་བུ་ཡང་དག་པར་སྐུལ་བའི་འོད་ཀྱི་དབང་ཕྱུག་དང ། དེ་དག་ལ་སོགས་པ་སུམ་ཅུ་རྩ་གསུམ་གྱི་རིས་སུ་གཏོགས་པའི་ལྷའི་བུ་ཚད་མེད་པ་ཀུན་ཀྱང་ཆོས་རྒྱ་ཆེན་པོའི་རང་བཞིན་དང ། འགྲོ་བ་ཐམས་ཅད་དུ་སྐྱེས་ཤིང་ཡང་དག་པར་བསྐུལ་བ་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།རབ་མཚེ་མ་ལ་སོགས་པ་མཚེ་མའི་ལྷའི་རྒྱལ་པོ་གྲངས་མེད་པ་དག་དང་ཡང་ཐབས་ཅིག་སྟེ།་འདི་ལྟར་ལྷའི་རྒྱལ་པོ་རབ་མཚེ་མ་དང ། དགའ་བ་བདེ་བའི་འོད་དང ། བློ་གྲོས་མི་ཟད་པའི་ཡོན་ཏན་དཔལ་དང ། འཕྲུལ་བ་བཟང་ཞིང་དགེ་བ་དང ། ས་དང་རི་བོའི་འོད་དང ། བསམ་གྱིས་མི་ཁྱབ་པའི་བློ་གྲོས་དང ། འཁོར་ལོའི་གཙུག་དང ། གཟི་བརྗིད་འོད་འཕྲོ་བ་དང ། འོད་རྣམ་པར་སྣང་བ་དང ། ལྷའི་རྒྱལ་པོ་གྲགས་པའི་ཕྱོགས་སུ་རྣམ་པར་ལྟ་བ་དང ། དེ་དག་ལ་སོགས་པ་མཚེ་མའི་ལྷའི་རྒྱལ་པོ་གྲངས་མེད་པ་ཀུན་ཀྱང་དགའ་བ་དང ། སྤྲོ་བ་རྒྱ་ཆེན་པོ་མངོན་པར་སྒྲུབ་པ་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།ལྷའི་
Ka16b
བུ་རྒྱལ་པོ་རབ་དགའ་ལྡན་ལ་སོགས་པ་བསམ་གྱིས་མི་ཁྱབ་པ་དག་དང་ཡང་ཐབས་ཅིག་སྟེ། འདི་ལྟར་ལྷའི་རྒྱལ་པོ་རབ་དགའ་ལྡན་དང ། དགའ་བ་རྒྱ་མཚོའི་གཙུག་ཕུད་དང ། ཡོན་ཏན་མཆོག་གི་རྒྱལ་མཚན་དང ། འོད་ཟེར་ཞི་བའི་འོད་དང ། རབ་ཏུ་དགའ་བའི་མིག་དང ། རིན་ཆེན་འོད་ཟེར་ཟླ་བ་དང ། རྣམ་པར་གནོན་པས་རབ་ཏུ་བརྩོན་པ་དང ། རྡོ་རྗེའི་མདོག་གི་འོད་བཟང་པོ་དང ། སྐར་མས་བརྒྱན་པའི་དཔལ་དང ། ལྷའི་བུ་དགའ་བ་བཟང་པོ་སྣ་ཚོགས་དང ། དེ་དག་ལ་སོགས་པ་དགའ་ལྡན་གྱི་ལྷའི་རྒྱལ་པོ་བསམ་གྱིས་མི་ཁྱབ་པ་ཀུན་ཀྱང་སངས་རྒྱས་གཅིག་ནས་གཅིག་ཏུ་བྱུང་བ་ཐམས་ཅད་རྗེས་སུ་དྲན་པར་ཡིད་ལ་བྱ་བ་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།འཕྲུལ་དགའི་ལྷའི་རྒྱལ་པོ་མུ་མེད་པ་དག་དང་ཡང་ཐབས་ཅིག་སྟེ།་འདི་ལྟར་ལྷའི་རྒྱལ་པོ་རབ་འཕྲུལ་དགའ་དང ། སྒྲས་ཞི་བའི་འོད་དང ། སྟོབས་ཀྱི་འཕྲུལ་བའི་སྒྲའི་འོད་དང ། དབང་ཆེན་སྣ་ཚོགས་དང ། སྤྲིན་སྒྲ་ཤིན་ཏུ་འཕགས་པ་དང ། སྣང་བ་སྤྱོད་པའི་དཔལ་དང ། གཙུག་ཕུད་ཡིད་དུ་འོང་བའི་འོད་དང ། དགའ་བའི་བློ་གྲོས་དང ། མེ་ཏོག་འོད་ཀྱི་གཙུག་ཕུད་དང ། ལྷའི་རྒྱལ་པོ་ཕྱོགས་ཤིན་ཏུ་སྣང་བ་དང ། དེ་དག་ལ་སོགས་པ་འཕྲུལ་དགའི་ལྷའི་རྒྱལ་པོ་མུ་མེད་པ་ཀུན་ཀྱང་རྣམ་པར་ཐར་པ་རབ་ཏུ་ཞི་བས་སེམས་ཅན་ཐམས་ཅད་གདུལ་བ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ་།ལྷའི་རྒྱལ་པོ་དབང་སྒྱུར་
Ka17a
༄#། །ལ་སོགས་པ་བགྲང་དུ་མེད་པ་དག་དང་ཡང་ཐབས་ཅིག་སྟེ། འདི་ལྟར་ལྷའི་རྒྱལ་པོ་དབང་སྒྱུར་དང ། ལྷའི་རྒྱལ་པོ་མིག་བཟང་པོའི་བློ་གྲོས་དང ། ཅོད་པན་སྣ་ཚོགས་ཀྱི་རྒྱལ་མཚན་དང ། བརྩོན་པའི་བློ་གྲོས་དང ། གོ་འཕང་རྣམ་པར་གནོན་པའི་སྒྲ་དབྱངས་སྣ་ཚོགས་དང ། འོད་ཡིད་དུ་འོང་བའི་རྒྱལ་མཚན་དང ། སྤྱོད་ཡུལ་ཞི་བའི་སྒོ་དང ། འཁོར་ལོ་རི་མོ་བཟང་པོའི་རྒྱལ་མཚན་དང ། མེ་ཏོག་བློ་གྲོས་སེངྒེའི་དབང་ཕྱུག་དང ། ལྷའི་རྒྱལ་པོ་དབང་པོའི་སྟོབས་རི་མོ་བཟང་པོའི་འོད་དང ། དེ་དག་ལ་སོགས་པ་དབང་སྒྱུར་གྱི་ལྷའི་རྒྱལ་པོ་བགྲང་དུ་མེད་པ་ཀུན་ཀྱང་ཆོས་ཀྱི་དབང་རྒྱ་ཆེན་པོ་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་གོ་།བསམ་གྱིས་མི་ཁྱབ་པའི་ཚངས་པ་ཆེན་པོ་དག་དང་ཡང་ཐབས་ཅིག་སྟེ། འདི་ལྟར་ཚངས་པ་ཆེན་པོ་རབ་ཏུ་སྣང་བ་དང ། བློ་གྲོས་ཀྱི་འོད་དང ། བློ་གྲོས་བཟང་པོའི་སེམས་སྣང་བ་དང ། ཀུན་ཏུ་དབྱངས་ཀྱི་སྤྲིན་དང ། འཇིག་རྟེན་དབང་པོའི་སྒྲ་དང ། མིག་རབ་ཏུ་ཞི་ཞིང་འོད་ཤིན་ཏུ་ཟབ་པ་དང ། ཕྱོགས་སུ་སྣང་བ་འགྱེད་པ་དང ། སྤྲུལ་པའི་སྒྲ་དབྱངས་དང ། མིག་གི་འོད་ཟེར་མངོན་པར་སྣང་བ་དང ། ཚངས་པ་ཆེན་པོའི་དབྱངས་རྒྱ་མཚོ་ཡིད་དུ་འོང་བ་དང ། དེ་དག་ལ་སོགས་པ་ཚངས་པ་ཆེན་པོ་བསམ་གྱིས་མི་ཁྱབ་པ་ཀུན་ཀྱང་སེམས་ཅན་ཐམས་ཅད་ཀྱི་སེམས་སྣང་བར་བྱ་བ་དང ། སིམ་པར་བྱ་བར་བྱམས་པ་ཆེན་
Ka17b
པོ་ལ་གནས་པ་ཤ་སྟག་དང་ཐབས་ཅིག་གོ་།ལྷའི་བུ་གྱ་ནོམ་སྣང་བའི་རིས་སུ་གཏོགས་པ་ཚད་མེད་པ་དག་དང་ཡང་ཐབས་ཅིག་སྟེ། འདི་ལྟར་ལྷའི་བུ་སྣང་བས་དགའ་བ་དང ། དགེ་བ་སྣ་ཚོགས་ཀྱི་འོད་དང ། དབང་པོའི་དབྱངས་དང ། དྲན་པའི་བློ་དམ་པ་དང ། དགའ་བ་སྣ་ཚོགས་རྣམ་པར་དག་པའི་དབྱངས་དང ། ལེགས་པར་བསམ་པའི་དབྱངས་དང ། འོད་འགྱེད་པའི་དབྱངས་རྣམ་པར་སྣང་བ་དང ། དབྱངས་ཟབ་མོའི་འོད་དང ། གྲགས་པ་དྲི་མ་མེད་པའི་འོད་དང ། ལྷའི་བུ་འོད་དྲི་མ་མེད་པས་ཤིན་ཏུ་འཕགས་པ་དང ། དེ་དག་ལ་སོགས་པ་གྱ་ནོམ་སྣང་བའི་རིས་སུ་གཏོགས་པའི་ལྷའི་བུ་ཚད་མེད་པ་ཀུན་ཀྱང་ཞི་བ་དང ། དགའ་བ་རྒྱ་ཆེན་པོའི་རྣམ་པར་ཐར་པ་ལ་གནས་པ་ཤ་སྟག་དང་ཐབས་ཅིག་གོ་།དགེ་རྒྱས་ཀྱི་ལྷའི་བུ་གྲངས་མེད་པ་དག་དང་ཡང་ཐབས་ཅིག་སྟེ། འདི་ལྟར་ལྷའི་བུ་དགེ་བར་གྲགས་པའི་བློ་གྲོས་དང་མཆོག་ཏུ་སྣང་བ་དང ། རབ་ཏུ་ཞི་བའི་དཔལ་དང ། དབྱངས་ཀྱི་རི་བོ་དང ། དྲན་པ་དགེ་བའི་མིག་དང ། དགའ་བ་དམ་པ་རྣམ་པར་སྣང་བ་དང ། འཇིག་རྟེན་དབྱངས་ཀྱི་བློ་གྲོས་དང ། གཟི་བརྗིད་འབར་བའི་བདག་པོ་དང ། ཆོས་ཀྱི་དགའ་བས་འཕྲུལ་བའི་སེམས་དང ། འཕྲུལ་བས་ཤིན་ཏུ་འཕགས་པ་དང ། དེ་དག་ལ་སོགས་པ་དགེ་རྒྱས་ཀྱི་རིས་སུ་གཏོགས་པའི་ལྷའི་བུ་གྲངས་མེད་པ་ཀུན་ཀྱང་སྒོ་ཡངས་པ་ལ་གནས་པས་འགྲོ་བར་འགྱུར་ཞིང་རྣམ་པར་འདུལ་བ་ལ་རབ་ཏུ་བརྩོན་པ་ཤ་
Ka18a
༄#། །སྟག་དང་ཐབས་ཅིག་གོ་།ལྷའི་བུ་འབྲས་བུ་ཆེན་པོའི་རིས་སུ་གཏོགས་པ་ཚད་མེད་པ་དག་དང་ཡང་ཐབས་ཅིག་སྟེ། འདི་ལྟར་ལྷའི་བུ་ཆོས་ཀྱི་དཔལ་གཟི་བརྗིད་དགའ་བ་དང ། དྲི་མེད་སྣ་ཚོགས་རྒྱ་མཚོ་དང ། ཤེས་རབ་མཆོག་གི་འོད་དང ། ཡེ་ཤེས་དབང་པོའི་དཔལ་དང ། དགའ་བ་ཞི་བ་དང ། སྒོ་ཀུན་ནས་ཤེས་པའི་མིག་དང ། དགའ་བའི་གཙུག་གི་བློ་གྲོས་དང ། ཡོན་ཏན་བློ་གྲོས་བཟང་པོའི་འོད་དང ། འོད་ཞི་ཞིང་དྲི་མ་མེད་པ་དང ། ལྷའི་བུ་སྣང་བ་ཆེན་པོ་དྲི་མ་མེད་པ་དང ། དེ་དག་ལ་སོགས་པ་འབྲས་བུ་ཆེན་པོའི་རིས་སུ་གཏོགས་པའི་ལྷའི་བུ་ཚད་མེད་པ་ཀུན་ཀྱང་ཞི་བའི་ཆོས་ཀྱི་གཞལ་མེད་ཁང་ལ་ཀུན་ནས་རབ་ཏུ་གནས་པ་ཤ་སྟག་དང་ཐབས་ཅིག་གོ་།ལྷའི་བུ་དབང་ཕྱུག་ཆེན་པོའི་རིས་སུ་གཏོགས་པ་གྲངས་མེད་པ་དག་དང་ཡང་ཐབས་ཅིག་སྟེ། འདི་ལྟར་ལྷའི་བུ་ཤིན་ཏུ་འོད་འཕྲོ་རྒྱ་མཚོ་དང ། ལྷའི་བུ་དབང་ཕྱུག་གྲགས་པ་རབ་ཏུ་སྣང་བ་དང ། ལྷའི་བུ་དགེ་བའི་མིག་དྲི་མ་མེད་པ་དང ། ལྷའི་བུ་ཤེས་རབ་ཆེན་པོས་དགའ་ཞིང་སྤྲོ་བ་དང ། ལྷའི་བུ་འོད་མི་སྒུལ་བའི་དབང་ཕྱུག་དང ། ལྷའི་བུ་མིག་ཤིན་ཏུ་མཉམ་པར་བཞག་པ་དང ། ལྷའི་བུ་སྣང་བ་ཤིན་ཏུ་སེམས་པ་དང ། ལྷའི་བུ་ཡེ་ཤེས་ཆེན་པོས་དགའ་བ་དང ། ལྷའི་བུ་སྣ་ཚོགས་ཀུན་ཏུ་དབྱངས་ཀྱི་རྒྱལ་མཚན་དང ། ལྷའི་བུ་གྲགས་པ་རྣམ་པར་སྣང་བའི་བརྟུལ་ཞུགས་བཟང་པོ་དང ། དེ་
Ka18b
དག་ལ་སོགས་པ་དབང་ཕྱུག་ཆེན་པོའི་རིས་སུ་གཏོགས་པའི་ལྷའི་བུ་གྲངས་མེད་པ་ཀུན་ཀྱང་སྤྱོད་ཡུལ་མཚན་མ་མེད་པའི་མཉམ་པ་ཉིད་ལ་རབ་ཏུ་བརྩོན་པ་ཤ་སྟག་དང་ཐབས་ཅིག་སྟེ། དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་དེ་ནི། སེམས་ཅན་གྱི་རིས་ཐམས་ཅད་ཡང་དག་པར་གཞོལ་བའོ། །སེམས་ཅན་ཡོན་ཏན་མཐའ་ཡས་པ་འདུས་པ་ལས་ཡོངས་སུ་བྱུང་བའོ། །ཕྱོགས་ཀྱི་དབྱིངས་ཀུན་ན་ཤིན་ཏུ་གནས་པའོ། །འཁོར་གྱི་དཀྱིལ་འཁོར་སྣ་ཚོགས་ཀྱི་དབྱིངས་སུ་རྣམ་པར་གནས་པའོ། །ཕན་ཚུན་འདྲེས་པ་མེད་ཅིང་ཇི་ལྟར་འོངས་པའི་ཕྱོགས་ཀྱི་དབྱིངས་ལ་རབ་ཏུ་གནས་པའོ། །དེ་བཞིན་གཤེགས་པ་བལྟ་བ་ལ་མངོན་པར་ཕྱོགས་པའོ། །ཉོན་མོངས་པའི་བག་ཆགས་དང་སེམས་ཀྱི་དྲི་མ་ཐམས་ཅད་དང་བྲལ་བའོ། ། སྒྲིབ་པ་ཐམས་ཅད་ཀྱི་རི་རྣམ་པར་འཐོར་བའོ། །སངས་རྒྱས་ལྟ་བ་ལ་སྒྲིབ་པ་མེད་པས་སྣང་བར་གྱུར་པ་སྟེ། དེ་ནི། འདི་ལྟར་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱིས་སྔོན་བསྐལ་པ་རྒྱ་མཚོ་ནས་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་བསྡུ་བའི་དངོས་པོ་བཞིས་ཡོངས་སུ་བསྡུས་ཏེ། དེ་བཞིན་གཤེགས་པ་དེ་དང་དེ་དག་གི་དྲུང་དུ་བཞུད་པའི་ཚེ་དགེ་བའི་རྩ་བ་ཡོངས་སུ་བཟུང་ཞིང་ཐབས་ཀྱི་སྒོ་དེ་དག་གིས་ཡོངས་སུ་སྨིན་པར་བྱས་ཏེ། ཐམས་ཅད་མཁྱེན་པ་ཉིད་ཀྱི་ལམ་ལ་རབ་ཏུ་བཀོད་ཅིང་དགེ་བའི་རྩ་བ་ཚད་མེད་པ་རབ་ཏུ་བསྐྱེད་པས།
Ka19a
༄#། །བསོད་ནམས་ཆེན་པོའི་སྟོབས་དང ། ཤུགས་རབ་ཏུ་ཐོབ་པ་དག་གོ་།སྨོན་ལམ་གྱི་ཚུལ་རྒྱ་མཚོ་གཞན་དང་གཞན་ལ་རབ་ཏུ་ཞུགས་ཤིང་སྤྱོད་པའི་དཀྱིལ་འཁོར་གཞན་དང་གཞན་ཡོངས་སུ་དག་པས་ཡང་དག་པར་བྱུང་བ་འབྱུང་བའི་ལམ་གཞན་དང་གཞན་གྱིས་ཤིན་ཏུ་འབྱུང་བའི་དེ་བཞིན་གཤེགས་པ་གཞན་དང་གཞན་མཐོང་བས་སྣང་བར་གྱུར་པ་དག་སྟེ། དེ་དག་ནི། མོས་པའི་སྟོབས་གཞན་དང་གཞན་གྱིས་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་གོ་།སངས་རྒྱས་ལྟ་བའི་རྣམ་པར་ཐར་པའི་སྒོ་གཞན་དང་གཞན་གྱིས་རྣམ་པར་འཕྲུལ་ལོ། །དེ་ནི། འདི་ལྟ་སྟེ། ལྷའི་བུ་དབང་ཕྱུག་ཆེན་པོའི་རིས་སུ་གཏོགས་པ་ཤིན་ཏུ་འོད་འཕྲོ་རྒྱ་མཚོའི་རྣམ་པར་ཐར་པ་ནི། ཆོས་ཀྱི་དབྱིངས་ནམ་མཁའ་ལྟར་ཞི་བའི་ཚུལ་གྱི་མཐུ་ཞེས་བྱའོ། །ལྷའི་བུ་དབང་ཕྱུག་གྲགས་པ་རབ་ཏུ་སྣང་བའི་རྣམ་པར་ཐར་པ་ནི། ཆོས་ཐམས་ཅད་ལ་དབང་བའི་སྟོབས་ལ་ཡང་དག་པར་གཞོལ་ཞིང་ཀུན་ནས་རྗེས་སུ་འགྲོ་བའི་རྣམ་པར་སྤྱོད་པ་ཞེས་བྱའོ། །ལྷའི་བུ་དགེ་བའི་མིག་དྲི་མ་མེད་པའི་རྣམ་པར་ཐར་པ་ནི། ཆོས་ཐམས་ཅད་འབྱུང་བ་མེད་པ་དང ། འགྲོ་བ་མེད་པ་དང ། བརྗོད་དུ་མེད་ཅིང་སྦྱར་བ་མེད་པ་ཞེས་བྱའོ། །ལྷའི་བུ་ཤེས་རབ་ཆེན་པོ་དགའ་ཞིང་སྤྲོ་བའི་རྣམ་པར་ཐར་པ་ནི། ཆོས་ཀྱི་ཚུལ་ཐམས་ཅད་ལ་མངོན་སུམ་དུ་གྱུར་པའི་ཤེས་
Ka19b
རབ་རྒྱ་མཚོས་རྣམ་པར་དཔྱོད་པ་ལ་རབ་ཏུ་སྣང་བ་ཞེས་བྱའོ། །ལྷའི་བུ་འོད་མི་སྒུལ་བའི་དབང་ཕྱུག་གི་རྣམ་པར་ཐར་པ་ནི། སེམས་ཅན་ལ་བསམ་གཏན་གྱི་དགའ་བ་དང ། བདེ་བ་མཐའ་ཡས་པ་ལ་མོས་པ་བསྟན་པ་རྒྱ་ཆེན་པོའི་ཚུལ་ཡང་དག་པར་འབྱུང་བ་ཞེས་བྱའོ། །ལྷའི་བུ་མིག་ཤིན་ཏུ་མཉམ་པར་བཞག་པའི་རྣམ་པར་ཐར་པ་ནི། མི་ཤེས་པའི་མུན་ནག་དང ། འཇིགས་པ་རྣམ་པར་ཟློག་པའི་སྤྱོད་པ་རབ་ཏུ་ཞི་བ་ཞེས་བྱའོ། །ལྷའི་བུ་སྣང་བ་ཤིན་ཏུ་སེམས་པའི་རྣམ་པར་ཐར་པ་ནི། བསམ་པའི་ཡུལ་མཐའ་ཡས་པའི་ལས་སྲིད་པ་ཐམས་ཅད་དུ་མི་འབྱུང་བ་ལ་འཇུག་པ་ཞེས་བྱའོ། །ལྷའི་བུ་ཡེ་ཤེས་ཆེན་པོས་དགའ་བའི་རྣམ་པར་ཐར་པ་ནི། ཆོས་ཐམས་ཅད་ཀྱི་ཕྱོགས་སུ་འགྲོ་ཞིང་ཡོངས་སུ་ནོན་པ་དང ། རྟེན་པའི་ཕྱོགས་ཀྱི་མཐུ་ཞེས་བྱའོ། །ལྷའི་བུ་སྣ་ཚོགས་ཀུན་ཏུ་དབྱངས་ཀྱི་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ཀྱི་ཡུལ་རབ་ཏུ་ཞི་བ་ལ་འཇུག་པ་ཀུན་ནས་ཁོང་དུ་ཆུད་པའི་གཙུག་རབ་ཏུ་སྣང་བ་ཞེས་བྱའོ།། ལྷའི་བུ་གྲགས་པ་རྣམ་པར་སྣང་བའི་བརྟུལ་ཞུགས་བཟང་པོའི་རྣམ་པར་ཐར་པ་ནི། རང་གི་གཞལ་མེད་ཁང་དང ། བློའི་ཡུལ་ནས་དམིགས་པ་ཚད་མེད་པའི་སངས་རྒྱས་ཀྱི་ཡུལ་རྒྱ་ཆེན་པོ་འབྱུང་བ་ཞེས་བྱའོ། །དེ་ནས་དབང་ཕྱུག་ཆེན་པོའི་རིས་སུ་གཏོགས་པའི་ལྷ་ཤིན་ཏུ་འོད་འཕྲོ་རྒྱ་མཚོས་སངས་རྒྱས་ཀྱི་མཐུས་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་
Ka20a
༄#། །ལ་རྣམ་པར་བལྟས་ཏེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མི་ཟད་ཆོས་ཀྱི་དབྱིངས་ནི་མཐའ་ཡས་ཏེ། །ཀུན་ཀྱང་སངས་རྒྱས་སྐུ་ལ་རབ་ཏུ་གསལ། །དེ་ནི་གཟུང་མེད་དངོས་མེད་རབ་ཏུ་ཞི། །འགྲོ་བའི་སྐྱབས་སུ་རང་བྱུང་སྐྱེས་ཤིང་བྱུང ། །ཆོས་ཀྱི་སྒྲོན་མ་སངས་རྒྱས་ཤིན་ཏུ་སྟོན། །ཆོས་ལ་མངའ་རབ་མཛད་པ་འཇིག་རྟེན་བྱུང ། །དེ་ཡི་སྤྱོད་ཡུལ་མཐའ་ཡས་མི་ཟད་དེ། །དབང་ཕྱུག་གྲགས་པ་འདི་འདྲའི་མོས་ལ་འཇུག་།བསམ་གྱིས་མི་ཁྱབ་སངས་རྒྱས་སྣང་བ་བྱེད། །དེ་ཡི་མཚན་ཉིད་ཕྱོགས་ན་མེད་པ་སྟེ། །རྣམ་དག་ལམ་ནི་སྐྱེ་བོ་དག་ལ་སྟོན། །ཤིན་ཏུ་དྲི་མེད་མིག་གིས་འདི་འདྲ་མཐོང ། །འགྲོ་བ་ཀུན་གྱིས་བསམ་དུ་མི་ནུས་ཏེ། །རྒྱལ་བའི་ཤེས་རབ་མཐའ་ཡས་གང་མངའ་བ།། གཏི་མུག་སྒྲིབ་པའི་སེམས་ཅན་རྣམ་པར་སྦྱོང ། །དེ་ལ་ཤེས་རབ་ཆེན་པོ་རྣམ་པར་གནས། །སྐྱེ་རྒུ་ཀུན་གྱིས་སངས་རྒྱས་བསམ་མི་ཁྱབ། །མཐོང་བ་ཙམ་གྱིས་ཉོན་མོངས་ཞི་བར་འགྱུར། །འགྲོ་བའི་དགའ་བ་རྒྱ་ཆེན་རབ་ཏུ་བསྐྱེད། །མི་སྒུལ་དབང་ཕྱུག་ལྷ་ཡིས་དེ་མཐོང་ངོ ། །སེམས་ཅན་རྒྱ་མཚོ་གཏི་མུག་མུན་བསྒྲིབས་ལ། །སངས་རྒྱས་ཆོས་ཉིད་རབ་ཏུ་ཞི་བ་སྟོན། །ཤེས་རབ་སྒྲོན་མ་འགྲོ་བ་འདི་བརྗོད་དེ། །དགེ་བའི་མིག་ནི་འདི་ཡི་ཚུལ་ལ་འཇུག་།སངས་རྒྱས་རྣམས་ཀྱི་རྣམ་དག་སྐུ་སྟོན་ཅིང ། །ཐམས་ཅད་ཕྱོགས་སུ་ཤིན་ཏུ་འཕགས་
Ka20b
པའི་སྐུ། །དེ་ཡང་དངོས་མེད་འཇིག་རྟེན་མི་གནས་ཏེ། །ཀུན་ཏུ་སྣང་བ་སེམས་པ་འདི་ལྟར་ལྟ། །མཐའ་ཡས་ཆགས་མེད་རྒྱལ་བ་རྣམས་ཀྱི་གསུང ། །སྣོད་དུ་གྱུར་པའི་སེམས་ཅན་དེ་དག་ཉན། སངས་རྒྱས་རྣམས་ལས་འཕོ་བར་མི་སྣང་སྟེ། །འདི་ནི་ཤེས་པས་དགའ་བའི་རྣམ་ཐར་ཏོ། །ཐམས་ཅད་ཕྱོགས་སྒོ་ཀུན་ནས་སངས་རྒྱས་ཏེ། །མི་ཡི་དབང་པོ་རྣམ་ཐར་ཞི་ལ་བཞུགས། །སངས་རྒྱས་འཇིག་རྟེན་སྣང་ཞིང་རྣམ་པར་མཛེས། །འདི་ནི་སྣ་ཚོགས་རྒྱལ་མཚན་རྣམ་ཐར་ཏོ། །རྒྱལ་བ་བསྐལ་པ་རྒྱ་མཚོ་མཐའ་ཡས་སུ། །འགྲོ་བ་ཀུན་དོན་རྣམ་པར་བྱང་ཆུབ་ཅིང ། །སྣ་ཚོགས་རྣམ་པར་འཕྲུལ་བས་སེམས་ཅན་འདུལ། །རྣམ་པར་སྣང་བས་རྣམ་ཐར་འདི་མཐོང་ངོ ། །དེ་ལ་ལྷའི་རྒྱལ་པོ་ཆོས་ཀྱི་དཔལ་གཟི་བརྗིད་དགའ་བའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་དབང་པོ་དང ། ཐེ་ཚོམ་རྣམ་པར་ལྟ་བའི་སེམས་ཀྱི་སྤྲིན་ལ་རབ་ཏུ་གཞོལ་བ་ཞེས་བྱའོ། །ལྷའི་རྒྱལ་པོ་དྲི་མེད་སྣ་ཚོགས་རྒྱ་མཚོའི་རྣམ་པར་ཐར་པ་ནི། སངས་རྒྱས་རྗེས་སུ་དྲན་པའི་རྣམ་པ་ཐམས་ཅད་ཡིད་ལ་བྱེད་པ་སྟོན་པ་སྦྱོར་བ་ཞེས་བྱའོ། །ལྷའི་རྒྱལ་པོ་ཤེས་རབ་མཆོག་གི་འོད་ཀྱི་རྣམ་པར་ཐར་པ་ནི། ཆོས་ཀྱི་རང་བཞིན་མཉམ་པ་ཉིད་ལ་གནས་པའི་ལུས་ཀྱི་རྒྱན་ཅེས་བྱའོ། །ལྷའི་རྒྱལ་པོ་ཡེ་ཤེས་དབང་པོའི་དཔལ་གྱི་རྣམ་པར་ཐར་པ་ནི། འཇིག་རྟེན་གྱི་ཆོས་ཐམས་ཅད་རྣམ་པར་སྒོམ་པའི་སེམས་སྐད་ཅིག་ཏུ་བསམ་གྱིས་མི་ཁྱབ་
Ka21a
༄#། །པའི་རྒྱན་རྒྱ་མཚོ་ལ་རབ་ཏུ་གནས་པ་ཞེས་བྱའོ། །ལྷའི་རྒྱལ་པོ་དགའ་བ་ཞི་བའི་རྣམ་པར་ཐར་པ་ནི། སྐྲའི་སྦུབས་གཅིག་ཏུ་སངས་རྒྱས་ཀྱི་ཞིང་བསམ་གྱིས་མི་ཁྱབ་པ་ཡོད་རྒུ་འཛུད་པ་ཞེས་བྱའོ། །ལྷའི་རྒྱལ་པོ་སྒོ་ཀུན་ནས་ཤེས་པའི་མིག་གི་རྣམ་པར་ཐར་པ་ནི། ཆོས་ཀྱི་དབྱིངས་ལ་སྒོ་ཀུན་ནས་རྣམ་པར་ལྟ་བས་འཇུག་པ་ཞེས་བྱའོ། །ལྷའི་རྒྱལ་པོ་དགའ་བའི་གཙུག་གི་བློ་གྲོས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་སྐྱེ་བ་དང ། བྱེད་པ་བསྐལ་པ་མཐའ་ཡས་པར་མངོན་པར་འབྱིན་པ་ཞེས་བྱའོ། །ལྷའི་རྒྱལ་པོ་ཡོན་ཏན་བློ་གྲོས་བཟང་པོའི་འོད་ཀྱི་རྣམ་པར་ཐར་པ་ནི། དམིགས་པ་ཐམས་ཅད་དང ། འཇིག་རྟེན་གྱི་དགོས་པ་ཐམས་ཅད་ཆོས་གཞལ་དུ་མེད་ཅིང ། བསམ་གྱིས་མི་ཁྱབ་པས་རྣམ་པར་དཔྱོད་པ་ཞེས་བྱའོ། །ལྷའི་བུ་འོད་ཞི་ཞིང་དྲི་མ་མེད་པའི་རྣམ་པར་ཐར་པ་ནི། སེམས་ཅན་དང ། ཆོས་དང ། འབྱུང་བ་ཐམས་ཅད་ཀྱི་སྒོ་ལ་མངོན་སུམ་དུ་ཡང་དག་པར་སྤྱོད་པ་འབྱུང་བ་ཞེས་བྱའོ། །ལྷའི་རྒྱལ་པོ་སྣང་བ་ཆེན་པོ་དྲི་མ་མེད་པའི་རྣམ་པར་ཐར་པ་ནི། སེམས་ཅན་སྣོད་དུ་གྱུར་པ་ཐམས་ཅད་ལ་རྣམ་པར་ལྟ་ཞིང ། སངས་རྒྱས་སྐྱེ་བའི་ཆོས་ཉིད་ལ་འཇུག་པ་ཞེས་བྱའོ། །དེ་ནས་ལྷའི་རྒྱལ་པོ་ཆོས་ཀྱི་དཔལ་རབ་ཏུ་སྣང་བ་ལ་མོས་པས་སངས་རྒྱས་ཀྱི་མཐུས་ཆེ་བ་དང ། ཅུང་ཟད་ཆེ་བ་དང ། ཚད་མེད་ཆེ་བ་དང །
Ka21b
འབྲས་བུ་ཆེ་བའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཡུལ་རྣམས་ཀུན་ཀྱང་བསམ་མི་ཁྱབ།། སེམས་ཅན་ཀུན་གྱིས་བསམ་པར་ནུས་པ་མིན། །སེམས་ཅན་མོས་དང་བསམ་པ་ཡངས་པ་ནི། །མི་ཟད་པ་དག་སངས་རྒྱས་བསྐྱེད་པ་མཛད། །སངས་རྒྱས་བལྟ་བར་སེམས་ཅན་སྣོད་གྱུར་ལ། །རྒྱལ་བ་རྣམས་ནི་བྱིན་གྱིས་བརླབས་མཛད་དེ། །དེ་དག་རྟག་ཏུ་སངས་རྒྱས་མངོན་སུམ་མཐོང ། །འདི་ལྟར་སྣ་ཚོགས་རྒྱ་མཚོ་མཐོང་བ་ཡིན། །སངས་རྒྱས་ཆོས་ཉིད་གནས་པ་མེད་པ་དག་།འགྲོ་བ་བཀང་ཞིང་སངས་རྒྱས་སྟོན་པ་མཛད། །རྒྱལ་བ་འབྱུང་མེད་གནས་པ་ཡོད་པ་མིན། །ཤེས་རབ་མཆོག་གི་འོད་ནི་འདི་སྒོམ་མོ། །སེམས་ཅན་སྙེད་ཀྱི་ཚུལ་དང་བསམ་པ་ཡང ། །བསམ་གྱིས་མི་ཁྱབ་གཞན་དང་གཞན་གྱི་སྒོར། །སངས་རྒྱས་རྣམ་པར་འཕྲུལ་པས་ཚུལ་སྟོན་ཏེ། །དབང་པོ་དཔལ་གྱི་རྣམ་ཐར་རྒྱ་མཚོ་འོ། །དེ་བཞིན་གཤེགས་པའི་རྫུ་འཕྲུལ་ཡུལ་རྣམས་དང ། །མི་ཟད་འདས་པའི་ཞིང་རྣམས་ཐམས་ཅད་ཀྱང ། །དེ་དག་སྤུ་ཡི་དཀྱིལ་འཁོར་གཅིག་ཏུ་སྟོན། །ཆོས་ཀྱི་དཀྱིལ་འཁོར་སྒོ་མོ་གཅིག་ལ་ཡང ། །ཆོས་ཀྱི་སྒོ་མོ་མི་ཟད་རྒྱ་མཚོ་དག་།སངས་རྒྱས་ཆོས་ཉིད་རབ་ཏུ་དེས་སྒྲོག་སྟེ། །ཤེས་པའི་མིག་ནི་འདི་ཡི་ཚུལ་ལ་འཇུག་།ཕྱོགས་བཅུ་དག་ན་ཞིང་དབྱིངས་ཇི་སྙེད་པ། །དེ་དག་ཀུན་ཏུ་སངས་
Ka22a
༄#། །རྒྱས་ཆོས་སྟོན་ཀྱང ། །རྒྱལ་བ་དེ་ནི་གར་ཡང་འཕོ་མི་མཛད། །དགའ་བའི་གཙུག་གི་བློ་གྲོས་སྤྱོད་ཡུལ་ལོ། །དེ་བཞིན་གཤེགས་པའི་གཟུགས་བརྙན་འདྲ་བ་སྟེ། །མགོན་པོ་ཆོས་ཀྱི་གཞལ་མེད་ཁང་སྣང་བ། །ཆོས་ཉིད་རབ་ཏུ་ཞི་བ་ཡང་དག་སྟོན། །ཡོན་ཏན་བློ་གྲོས་བཟང་པོས་འདི་མཐོང་ངོ ། །རང་བྱུང་རྣམས་ཀྱི་སྤྱོད་ཡུལ་རྣམས་ལ་ལྟོས། །སེམས་ཅན་ཀུན་གྱི་དབང་པོའི་ཚུལ་བཞིན་དུ། །བསམ་ཡས་འབྱུང་བའི་སྒོ་མོས་ཆོས་ཆར་འབེབས། །འདི་ནི་ཞི་བའི་འོད་ཀྱི་ལྷ་སྟོན་ཏོ། །ཐུགས་རྗེ་རྒྱ་ཆེན་རབ་ཏུ་བསྐྱེད་བྱས་ཤིང ། །སེམས་ཅན་ཕན་ཕྱིར་མགོན་པོ་རྣམས་འབྱུང་སྟེ། །སྣོད་ཀྱི་ཚུལ་བཞིན་ཆོས་ཀྱི་ཆར་ཡང་འབེབས། །སྣང་བ་ཆེན་པོའི་བློ་གྲོས་འདི་སྟོན་ཏོ། །བམ་པོ་གཉིས་པ། དེ་ལ་ལྷའི་རྒྱལ་པོ་དགེ་བར་གྲགས་པའི་བློ་གྲོས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་རྣམ་པར་ཐར་པའི་ཚོགས་ཀྱི་ཚུལ་ལ་རྣམ་པར་བལྟར་འཛུད་པ་ཞེས་བྱའོ། །ལྷའི་རྒྱལ་པོ་མཆོག་ཏུ་སྣང་བའི་རྣམ་པར་ཐར་པ་ནི། རང་བཞིན་རྣམ་པར་རིག་པའི་འོད་ཅེས་བྱའོ། །ལྷའི་བུ་རབ་ཏུ་ཞི་བའི་དཔལ་གྱི་རྣམ་པར་ཐར་པ་ནི། ཐབས་ཀྱི་ཚུལ་དང ། སྒོ་ཐམས་ཅད་ཀྱིས་སངས་རྒྱས་ཀྱི་ཡུལ་ཡོངས་སུ་སྦྱོང་བ་ཞེས་བྱའོ། །ལྷའི་བུ་དབྱངས་ཀྱི་རི་བོའི་རྣམ་པར་ཐར་པ་ནི། འཁོར་བའི་རྒྱ་མཚོའི་ཕྱི་མའི་མཐའ་ཐམས་ཅད་དུ་འགྲོ་བ་ཡོངས་སུ་སྒྱུར་བ་ཞེས་བྱའོ། །
Ka22b
ལྷའི་བུ་དྲན་པ་དགེ་བའི་མིག་གི་རྣམ་པར་ཐར་པ་ནི། དེ་བཞིན་གཤེགས་པའི་ཚུལ་རྗེས་སུ་དྲན་ཞིང་སེམས་ཅན་འདུལ་བའི་བྱིན་གྱི་རླབས་ཞེས་བྱའོ། །ལྷའི་བུ་དགའ་བ་དམ་པས་རྣམ་པར་སྣང་བའི་རྣམ་པར་ཐར་པ་ནི། གཟུངས་རྒྱ་མཚོ་ལ་སྒོ་ཀུན་ནས་རབ་ཏུ་བརྟན་པ་རྒྱ་མཚོའི་རྗེས་སུ་འགྲོ་བ་ཞེས་བྱའོ། །ལྷའི་བུ་འཇིག་རྟེན་དབྱངས་ཀྱི་བློ་གྲོས་ཀྱི་རྣམ་པར་ཐར་པ་ནི། སངས་རྒྱས་སྐྱེ་བ་ཤིན་ཏུ་དཀོན་པའི་བསམ་པ་སྐྱེད་པས་མོས་པ་སྦྱོང་བའི་སྙིང་པོ་ཞེས་བྱའོ། །ལྷའི་བུ་གཟི་བརྗིད་འབར་བའི་བདག་པོའི་རྣམ་པར་ཐར་པ་ནི། སེམས་ཅན་ཐམས་ཅད་ལ་ཆོས་ཀྱི་ཤུགས་ཀྱིས་དགའ་བ་སྐྱེད་ཅིང་སྒྲོལ་བ་ཞེས་བྱའོ། །ལྷའི་བུ་ཆོས་ཀྱི་དགའ་བས་འཕྲུལ་བའི་སེམས་ཀྱི་རྣམ་པར་ཐར་པ་ནི། བྱང་ཆུབ་སེམས་དཔའི་འདུལ་བ་མཐའ་ཡས་པ་ཐམས་ཅད་ནམ་མཁའ་ལྟར་ཟད་མི་ཤེས་པའི་སྒོར་རབ་ཏུ་འཇུག་པ་ཞེས་བྱའོ། །ལྷའི་བུ་འཕྲུལ་བས་ཤིན་ཏུ་འཕགས་པའི་རྣམ་པར་ཐར་པ་ནི། སེམས་ཅན་གྱི་ཉོན་མོངས་པ་མཐའ་ཡས་པའི་སྙིང་རྗེ་དང ། ཡེ་ཤེས་ཀྱི་རྒྱས་པར་འགེངས་པ་ཞེས་བྱའོ། །དེ་ནས་ལྷའི་རྒྱལ་པོ་དགེ་བར་གྲགས་པའི་བློ་གྲོས་ཀྱིས་སངས་རྒྱས་ཀྱི་མཐུས་དགེ་ཆུང་དང ། ཚད་མེད་དགེ་བ་དང ། དགེ་རྒྱས་ཀྱི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆགས་མེད་སྤྱོད་པའི་ཆོས་ཉིད་འདི་ལ་ལྟོས། །མི་ཟད་
Ka23a
༄#། །ཕྱོགས་རྣམས་རབ་ཏུ་རྒྱས་བཀང་སྟེ། །བསམ་གྱིས་མི་ཁྱབ་སངས་རྒྱས་ཡུལ་ཡང་སྟོན། །རྣམ་ཐར་ཚུལ་གྱི་རྒྱ་མཚོ་ཟད་མི་ཤེས། །བདེ་གཤེགས་འཇིག་རྟེན་ཀུན་ལ་མི་གནས་ཏེ། །ཆོས་དབྱིངས་དམ་པ་ཀུན་ནས་འབྱུང་བ་མེད། །མིག་ཡོར་སྤྱོད་ཡུལ་ཞིང་རྣམས་ཐམས་ཅད་དེ། །ཚུལ་འདི་མཆོག་ཏུ་སྣང་བའི་ལྷ་ཡི་འོ། །བསྐལ་པ་རྒྱ་མཚོར་ཐབས་ལ་གནས་པས་ན། །སངས་རྒྱས་འཇིག་རྟེན་ཀུན་ན་རྣམ་པར་མཛེས། །ཆོས་དབྱིངས་དེ་བཞིན་ཉིད་ལ་རབ་ཏུ་གནས། །དེ་ལ་རབ་ཞི་དཔལ་གྱི་ལྷ་འཇུག་གོ་།སེམས་ཅན་གཏི་མུག་རབ་རིབ་སྒྲིབ་པས་བསྒྲིབས། །འཁོར་བའི་སྤྱོད་ཡུལ་མདོངས་གྱུར་དེ་དག་ལ། །རྒྱལ་བ་དགེ་བའི་ལམ་རྣམས་རབ་སྟོན་ཏེ། །རྣམ་ཐར་དེ་ལ་དབྱངས་ཀྱི་རི་བོ་འཇུག། དེ་བཞིན་གཤེགས་པའི་བླ་ན་མེད་པའི་ཚུལ། །སེམས་ཅན་ཀུན་གྱིས་བསམ་པར་མི་ནུས་ཏེ། །རྣམ་པ་ཐམས་ཅད་རྒྱལ་བ་རབ་ཏུ་སྟོན། །དེ་ནི་དྲན་པ་དགེ་བའི་མིག་གིས་མཐོང ། །ཞིང་རྣམས་རྒྱ་མཚོ་རྡུལ་དང་མཉམ་པ་ཡི། །གཟུངས་ཀྱི་སྒོ་རྣམས་མི་མགོན་རྟག་ཏུ་གསུང ། །སེམས་ཅན་ཐམས་ཅད་འདུལ་བ་རྣམ་པར་སྟོན། །དགའ་བ་རྣམ་པར་སྣང་བས་དེ་མཐོང་ངོ ། །སངས་རྒྱས་སྐྱེ་བ་ཤིན་ཏུ་དཀོན་པ་སྟེ། །བསྐལ་པ་རྒྱ་མཚོ་དག་ན་བར་འགའ་སྣང ། །དེ་ལ་མོས་པའི་དཀྱིལ་འཁོར་རབ་ཏུ་སྐྱེད། །འཇིག་རྟེན་དབྱངས་ཀྱི་བློ་གྲོས་དེ་ལ་འཇུག་།རྒྱལ་བ་ཆོས་མཐུ་
Ka23b
རྒྱ་ཆེ་བསམ་ཡས་དག་།སེམས་ཅན་ཀུན་ལ་རྣམ་པར་སྦྱོང་བ་མཛད། །དངོས་མེད་ཆོས་ཉིད་རྒྱལ་བ་སྟོན་པར་མཛད། །གཟི་བརྗིད་འབར་བའི་ལྷས་ནི་དེ་མཐོང་ངོ ། །དུས་གསུམ་བདེ་གཤེགས་ཕུན་སུམ་ཚོགས་པ་དག་།དེ་དག་སེམས་ཅན་ཡུལ་དུ་བསམ་མི་ཁྱབ། །དྲན་ནས་བདག་གི་དགའ་བ་རབ་སྐྱེས་ཏེ། །དེ་དག་ཆོས་དགའ་སེམས་པ་རབ་ཏུ་སྟོན། །འགྲོ་བ་རྣམས་ནི་ཉོན་མོངས་རྒྱ་མཚོ་ལ། །གཏི་མུག་ལྟས་བརྙོགས་འཇིགས་པ་ཆེན་པོར་བྱིང ། །སྙིང་རྗེ་བསྐྱེད་ཅིང་འགྲོ་བ་འགྲེལ་བ་ནི། །འཕྲུལ་བས་འཕགས་པ་སྤྱོད་ཡུལ་དེ་ལ་ལྟ། །འོད་ཟེར་དྲ་བ་རྒྱལ་བ་རྟག་ཏུ་འགྱེད། །འོད་ཟེར་སྒོ་ཀུན་རྒྱལ་བ་མི་ཟད་པ། །སེམས་ཅན་དབྱིངས་རྣམས་འདུལ་བར་རབ་ཏུ་འཇུག་།སྣ་ཚོགས་དབྱངས་ཀྱི་ལྷས་ནི་དེ་མཐོང་ངོ ། །དེ་ལ་གྱ་ནོམ་སྣང་བའི་ལྷའི་རྒྱལ་པོ་སྣང་བས་དགའ་བའི་རྣམ་པར་ཐར་པ་ནི། དགའ་བ་དང་བདེ་བ་རབ་ཏུ་ཞི་བ་མྱོང་བར་བྱེད་ཅིང་འགྲོ་བའི་སྡུག་བསྔལ་རབ་ཏུ་གཞིལ་བ་ལ་གཞོལ་བ་ཞེས་བྱའོ། ། ལྷའི་བུ་དགེ་བ་སྣ་ཚོགས་ཀྱི་འོད་ཀྱི་རྣམ་པར་ཐར་པ་ནི། སེམས་ཤིན་ཏུ་ཡངས་པ་དང ། འགྲོ་བ་ཐམས་ཅད་ཀྱི་རྣལ་འབྱོར་ཡངས་པ་རྒྱ་མཚོ་སྙིང་རྗེ་དང ། དགའ་བའི་སྙིང་པོ་ཞེས་བྱའོ། ། ལྷའི་བུ་དབང་པོའི་དབྱངས་ཀྱི་རྣམ་པར་ཐར་པ་ནི། བསྐལ་པ་མཐའ་ཡས་པའི་སྤྱོད་པ་དང ། སེམས་ཅན་ཐམས་ཅད་ཀྱི་བསོད་ནམས་ཀྱི་མཐུ་སེམས་ཀྱི་སྐད་ཅིག་གཅིག་གིས་མངོན་པར་
Ka24a
༄#། །སྒྲུབ་པ་ཞེས་བྱའོ། །ལྷའི་བུ་དྲན་པའི་བློ་དམ་པའི་རྣམ་པར་ཐར་པ་ནི། འཇིག་རྟེན་འབྱུང་བ་དང ། འཇིག་པ་དང ། གནས་པ་དང ། བསོད་ནམས་སྣ་ཚོགས་ནམ་མཁའ་ལྟ་བུ་ཡོངས་སུ་སྦྱོང་བ་ཞེས་བྱའོ། །ལྷའི་བུ་དགའ་བ་སྣ་ཚོགས་རྣམ་པར་དག་པའི་དབྱངས་ཀྱི་རྣམ་པར་ཐར་པ་ནི། འཕགས་པའི་ཆོས་ཐམས་ཅད་ལ་དགའ་བ་མཚུངས་པ་མེད་པའི་ཤུགས་རྣམ་པར་སྤེལ་བས་རབ་ཏུ་ཚིམ་པར་བྱེད་པ་ཞེས་བྱའོ། །ལྷའི་བུ་ལེགས་པར་བསམ་པའི་དབྱངས་ཀྱི་རྣམ་པར་ཐར་པ་ནི། ཚུལ་གྱིས་ཐམས་ཅད་རྣམ་པར་དགོད་ཅིང་ཤིན་ཏུ་བསྟན་པའི་དོན་དུ་ཡང་དག་པར་གནས་པ་ཞེས་བྱའོ། །ལྷའི་བུ་འོད་འགྱེད་པའི་དབྱངས་ཀྱི་རྣམ་པར་ཐར་པ་ནི། དགའ་ལྡན་གྱི་ཕོ་བྲང་ནས་འཕོ་བའི་མཆོད་པ་ཤིན་ཏུ་རྒྱས་པ་མངོན་པར་སྒྲུབ་པ་ཞེས་བྱའོ། །ལྷའི་བུ་དབྱངས་ཟབ་མོའི་འོད་ཀྱི་རྣམ་པར་ཐར་པ་ནི། རྫུ་འཕྲུལ་ལ་རྨོངས་པ་མེད་པའི་ཤེས་རབ་རྒྱ་མཚོ་ལ་རྣམ་པར་སྤྱོད་པ་ཞེས་བྱའོ། །ལྷའི་བུ་གྲགས་པ་དྲི་མ་མེད་པའི་འོད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཡོན་ཏན་རྒྱ་མཚོ་ཡོངས་སུ་ཐོབ་ཅིང་འགྲོ་བ་ལ་སྟོན་པའི་སྦྱོར་བ་ཞེས་བྱའོ། །ལྷའི་བུ་འོད་དྲི་མ་མེད་པས་ཤིན་ཏུ་འཕགས་པའི་རྣམ་པར་ཐར་པ་ནི། སྔོན་གྱི་སྨོན་ལམ་གྱི་བྱིན་གྱི་རླབས་ཀྱིས་དགའ་བ་འབྱུང་བའི་ཤུགས་ཀྱི་སྙིང་པོ་ཞེས་བྱའོ། །དེ་ནས་གྱ་ནོམ་སྣང་བའི་ལྷའི་རྒྱལ་པོ་སྣང་བས་དགའ་བས་སངས་
Ka24b
རྒྱས་ཀྱི་མཐུས་དགའ་བ་དང ། སྣང་བ་དང ། འོད་ཆུང་དང ། འོད་གསལ་དང ། གྱ་ནོམ་སྣང་བའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྔོན་གྱི་རྒྱལ་བའི་སྤྱོད་པ་བདག་གིས་དྲན། །རྒྱལ་བ་མཐའ་ཡས་གྲགས་པ་ཅིས་མཆོད་དང ། །ཇི་ལྟར་སྔོན་ཆད་དགའ་ཤུགས་ཡོངས་དག་པ། །དེ་ནི་རྒྱལ་བའི་མཐུ་ཡིས་བདག་གིས་མཐོང ། །རྒྱལ་བ་དྲི་མེད་མཚན་ཉིད་མེད་པའི་སྐུ། །འགྲོ་བའི་མྱ་ངན་མང་པོ་རྣམ་པར་བཟློག། བྱམས་དང་ཐུགས་བརྩེ་ཐུགས་རྗེའི་ས་ལ་བཞུགས། །རྣམ་ཐར་འདི་ཚུལ་སྣ་ཚོགས་འོད་འཇུག་གོ་།སངས་རྒྱས་ཆོས་ཉིད་འདི་ནི་རྒྱ་ཆེ་སྟེ། །ཞིང་རྣམས་རྒྱ་མཚོ་མང་པོ་ཇི་ལྟ་བུར། །ཇི་ལྟར་འབྱུང་དང་ཇི་ལྟར་འཇིག་པ་སྟོན། །རྣམ་ཐར་འདི་ནི་དབང་པོའི་དབྱངས་ཀྱི་ཡིན། །རྒྱལ་བའི་རྫུ་འཕྲུལ་མཉམ་མེད་ཕྱོགས་ཀུན་གྱི། །ཞིང་གི་དབྱིངས་སུ་ཡངས་པ་ཤིན་ཏུ་བསྟན། །ད་ལྟར་བྱུང་བའི་རྒྱལ་བའི་དགེ་བ་དག་།དྲན་པ་དམ་པའི་རྣམ་ཐར་ཚུལ་འདི་འོ། །ཞིང་རྣམས་རྒྱ་མཚོ་མང་པོའི་རྡུལ་སྙེད་ཀྱི། །བདེ་གཤེགས་དེ་དག་དགའ་བའི་ཡིད་ཀྱིས་མཆོད། །དེ་ཕྱིར་མཉན་པ་རྡུལ་མེད་དོན་ཀྱང་ཡོད། །སྣ་ཚོགས་དབྱངས་ཀྱི་རྣམ་ཐར་འདི་ཡིན་ནོ། །བསྐལ་པ་རྒྱ་མཚོ་མང་པོ་ཡངས་པར་ཡང ། །ཚུལ་གྱི་ས་ནི་རྒྱལ་བ་རྒྱ་ཆེན་གསུང ། །རྒྱལ་བ་ཀུན་ལ་ཟད་མེད་མཐའ་ཡང་ཡས། །ལེགས་བསམ་དབྱངས་ཀྱི་རྣམ་ཐར་
Ka25a
༄#། །འདི་ཡིན་ནོ། །སངས་རྒྱས་རྣམ་འཕྲུལ་མཐའ་ཡས་དབྱིངས་ཀྱི་རྣམས། །འཕོ་དང་རྣམ་པར་འཚང་རྒྱ་ཚུལ་ཡང་དག་།སེམས་ཀྱི་སྐད་ཅིག་ཀུན་ལ་རབ་ཏུ་སྟོན།། འོད་འགྱེད་དབྱངས་ཀྱི་རྣམ་ཐར་སྒོ་འདི་ཡིན། །སངས་རྒྱས་བྱིན་རླབས་རྒྱ་ཆེན་བཤད་པ་ཡི། །རྫུ་འཕྲུལ་ཡུལ་ནི་བདེ་བར་གཤེགས་པ་སྟོན། །དབང་པོ་བསམ་པ་ཀུན་ཀྱང་རྣམ་པར་སྦྱོང། །དབྱངས་ཟབ་འོད་ནི་འདི་ལ་རབ་ཏུ་འཇུག་།རྒྱལ་བ་རྣམས་ཀྱི་ཡེ་ཤེས་མཐའ་ཡས་ཏེ། །མཉམ་མེད་ཆགས་མེད་སངས་རྒྱས་འཇིག་རྟེན་སྤྱོད། །སེམས་ཅན་ཀུན་ལ་མཆོག་སྦྱིན་མངོན་པར་གཟིགས། །གྲགས་པ་དྲི་མེད་ཚུལ་འདིར་རབ་ཏུ་འཇུག་།རྒྱལ་བ་སྔོན་ཆད་བྱང་ཆུབ་སྤྱོད་མཛད་ཚེ། །སངས་རྒྱས་རྒྱ་མཚོ་ཡང་དག་མཆོད་པ་རྣམས། །དེ་དག་ཀུན་གྱི་སྨོན་ལམ་རབ་སྒྲུབ་པ། །དེ་ནི་འོད་འཕགས་དགའ་བར་རབ་ཏུ་ཉན། །དེ་ལ་ཚངས་པ་ཆེན་པོ་རབ་ཏུ་སྣང་བའི་རྣམ་པར་ཐར་པ་ནི། ཆོས་དྲི་མ་མེད་པའི་སྤྱོད་ཡུལ་ལ་གནས་ཤིང་ཕྱོགས་བཅུར་ཐོགས་པ་མེད་པའི་དབྱངས་ཀྱི་དཀྱིལ་འཁོར་གྱིས་རྒྱས་པར་འགེངས་པ་དྲི་མ་མེད་པ་ཞེས་བྱའོ། །ཚངས་པ་ཆེན་པོ་བློ་གྲོས་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་བསམ་གཏན་དང ། སྙོམས་པར་འཇུག་པ་ལ་རབ་ཏུ་གནས་པ་ཞེས་བྱའོ། །ཚངས་པ་ཆེན་པོ་བློ་གྲོས་བཟང་པོའི་སེམས་སྣང་བའི་རྣམ་པར་ཐར་པ་ནི། ཆོས་ཀྱི་སྣང་བ་བསམ་
Ka25b
གྱིས་མི་ཁྱབ་པ་ཐམས་ཅད་ལ་ཡང་དག་པར་གཞོལ་བའི་འོད་ཅེས་བྱའོ། །ཚངས་པ་ཆེན་པོ་ཀུན་ཏུ་དབྱངས་ཀྱི་སྤྲིན་གྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་གསུང་གི་ཡན་ལག་རྒྱ་མཚོའི་དཀྱིལ་འཁོར་ལ་འཇུག་ཅིང་རྟོགས་པར་བྱེད་པ་ཞེས་བྱའོ། །ཚངས་པ་ཆེན་པོ་འཇིག་རྟེན་དབང་པོའི་སྒྲའི་རྣམ་པར་ཐར་པ་ནི། བྱང་ཆུབ་སེམས་དཔའི་སྤྱོད་པ་ཡང་དག་པར་འབྱུང་ཞིང་སེམས་ཅན་ཐམས་ཅད་བསྡུ་བ་དང ། གདུལ་བ་རྗེས་སུ་དྲན་པའི་སྦྱོར་བ་ཞེས་བྱའོ། །ཚངས་པ་ཆེན་པོ་མིག་རབ་ཏུ་ཞི་ཞིང་འོད་ཤིན་ཏུ་ཟབ་པའི་རྣམ་པར་ཐར་པ་ནི། ལས་ཀྱིས་རྣམ་པར་ཕྱེ་བའི་འཇིག་རྟེན་གྱི་ཁམས་འབྱུང་བའི་དབྱིངས་ཤིན་ཏུ་སྟོན་པ་ཞེས་བྱའོ། །ཚངས་པ་ཆེན་པོ་ཕྱོགས་སུ་སྣང་བ་འགྱེད་པའི་རྣམ་པར་ཐར་པ་ནི། རྣམ་པ་ཐམས་ཅད་དུ་སེམས་ཅན་འདུལ་བ་ལ་མངོན་པར་ཕྱོགས་པ་ཞེས་བྱའོ། །ཚངས་པ་ཆེན་པོ་སྤྲུལ་པའི་སྒྲ་དབྱངས་ཀྱི་རྣམ་པར་ཐར་པ་ནི། ཆོས་ཐམས་ཅད་དགེ་བའི་མཚན་ཉིད་ཀྱི་སྒོ་དང ། རབ་ཏུ་ཞི་བའི་ཆོས་ལ་དཔྱོད་པའི་དཀྱིལ་འཁོར་ལ་ཤིན་ཏུ་གནས་པ་ཞེས་བྱའོ། །ཚངས་པ་ཆེན་པོ་མིག་གི་འོད་ཟེར་མངོན་པར་སྣང་བའི་རྣམ་པར་ཐར་པ་ནི། དངོས་པོ་ཐམས་ཅད་ལ་ཆགས་པ་མེད་ཅིང་མཐའ་ཡས་པའི་བརྩམ་པ་ལ་བརྩོན་པ་ཞེས་བྱའོ། །ཚངས་པ་ཆེན་པོ་དབྱངས་རྒྱ་མཚོ་ཡིད་དུ་འོང་བའི་རྣམ་པར་ཐར་པ་ནི། མི་ཟད་པའི་ཆོས་གཞལ་དུ་མེད་པ་ལ་རྗེས་སུ་སྤྱད་པར་རྟག་ཏུ་ཕྱོགས་ཤིང་རྣམ་པར་བལྟ་
Ka26a
༄#། །བ་དང ། རྣམ་པར་ཤེས་པ་ཞེས་བྱའོ། །དེ་ནས་ཚངས་པའི་དབང་པོ་ཆེན་པོ་ཡིད་དུ་འོང་བས་སངས་རྒྱས་ཀྱི་མཐུས་ཚངས་རིས་དང ། ཚངས་ལྷ་ཉེ་ཕན་དང ། ཚངས་པ་ཀུན་འཁོར་དང ། ཚངས་ཆེན་གྱི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་སྐུ་ནི་ཞི་ལ་རབ་ཏུ་ཞི། །འཇིག་རྟེན་ཀུན་ཏུ་དྲི་མེད་སྣང་ཞིང་མཛེས། །མཚན་ཉིད་མེད་ཅིང་གཟུགས་བརྙན་མེད་པའི་ཡུལ། །སྤྲིན་དང་མཉམ་པར་དེ་བཞིན་གཤེགས་པ་སྣང ། །འགྲོ་བ་ཀུན་གྱིས་བསམ་དུ་མི་ནུས་ཏེ། །སངས་རྒྱས་སྐུ་དང་དེ་བཞིན་བསམ་གཏན་ཡུལ། །ཐམས་ཅད་ཚུལ་གྱི་སྒོ་ཡིས་བསམ་དུ་མེད། །ཚངས་པ་བློ་གྲོས་འོད་ཀྱིས་འདི་མཐོང་ངོ ། །རྒྱ་མཚོའི་ཆོས་རྣམས་ཞིང་གི་རྡུལ་སྙེད་ཀྱང ། །སངས་རྒྱས་གསུང་གཅིག་ཡང་དག་བཀའ་སྩལ་ཏེ། །བསྐལ་པ་རྒྱ་མཚོར་གསུངས་ཀྱང་ཟད་པ་མེད། །སྣང་བ་སེམས་པའི་རྣམ་ཐར་འདི་ཡིན་ནོ། །སྔོན་གྱི་རྒྱལ་བའི་གསུང་གི་ཡན་ལག་ཀྱང ། །འགྲོ་བ་སྙེད་དེ་རྒྱུད་ཀུན་སེམས་ཅན་ཤེས། །རྒྱལ་བ་དེ་ལ་རྟོག་དང་དབྱངས་མི་མངའ། །ཚངས་པ་ཀུན་ཏུ་སྒྲ་དབྱངས་འདི་ལ་འཇུག་།དེ་བཞིན་གཤེགས་པ་དུས་གསུམ་གཤེགས་པ་དག་།བྱང་ཆུབ་སྤྱོད་པའི་ཚུལ་ལ་གང་བཞུགས་པ། །དེ་དག་རྒྱལ་བའི་སྐུ་ལ་ཐམས་ཅད་སྣང ། །རྣམ་ཐར་འདི་ལ་འཇིག་རྟེན་དབང་པོ་འཇུག་།སེམས་ཅན་
Ka26b
ཀུན་གྱི་ལས་དབང་གང་ཡིན་དང ། །སྣ་ཚོགས་རྒྱུ་ཡི་སྒོ་ཡིས་རྣམ་གྲོལ་བ། །འགྲོ་བ་བཀང་ཞིང་སངས་རྒྱས་ཡང་དག་སྟོན། །ཞི་བ་ཟབ་མོའི་མིག་ནི་འདི་ལ་འཇུག་།རྣམ་པ་མཐའ་ཡས་སྒོ་ཡིས་རང་བྱུང་རྣམས། །ཕྱོགས་རྣམས་མ་ལས་ཀུན་ཏུ་སེམས་ཅན་འདུལ། །སངས་རྒྱས་རྟོག་དང་རྣམ་རྟོག་མི་མངའ་སྟེ། །སྣང་བ་འགྱེད་པའི་སྤྱོད་ཡུལ་འདི་ཡིན་ནོ། །རྒྱལ་བའི་སྐུ་ནི་མི་ཟད་ནམ་མཁའ་བཞིན། །མཚན་ཉིད་མི་མངའ་ཕྱོགས་ལ་ཆགས་པ་མེད། །སྒྱུ་མར་གཏོགས་པའི་ཆོས་ཉིད་རབ་ཏུ་སྟན། །ཀུན་ཏུ་འཕྲུལ་དགའི་སྤྱོད་ཡུལ་འདི་ཡིན་ནོ། །བདེ་གཤེགས་སྐུ་དང་ཡེ་ཤེས་རྣམ་པ་དང ། །དེ་བཞིན་དབྱངས་ཀྱི་དཀྱིལ་འཁོར་མཐའ་མེད་དེ། །ཆགས་མེད་སེམས་ཅན་སངས་རྒྱས་མངོན་དུ་ལྟ། །འོད་ཟེར་ཡིད་འོང་རྣམ་ཐར་འདི་ལ་འཇུག་།ཆོས་རྗེ་ཆོས་ཀྱི་གཞལ་མེད་ཁང་བཞུགས་ཤིང ། །ཆོས་ཀྱི་སྐུ་ཡི་སངས་རྒྱས་རབ་ཏུ་སྣང ། །ཆོས་ཀྱི་རང་བཞིན་གཞལ་ཡས་མཚན་ཉིད་མེད། །རྣམ་ཐར་འདི་ལ་རྒྱ་མཚོའི་འོད་འཇུག་གོ་།དེ་ལ་ལྷའི་རྒྱལ་པོ་དབང་སྒྱུར་གྱི་རྣམ་པར་ཐར་པ་ནི། མཐའ་ཡས་པའི་སེམས་ཅན་ཡོངས་སུ་སྨིན་པར་བྱ་བའི་སྒོའི་དབང་དང ། སྤྱོད་པའི་སྙིང་པོ་ཞེས་བྱའོ། །ལྷའི་བུ་མིག་བཟང་པོའི་བློ་གྲོས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་དགའ་བ་དང་བདེ་བ་ལ་རྣམ་པར་ལྟ་བ་འཕགས་པའི་སྤྱོད་ཡུལ་གྱི་རྗེས་སུ་འཇུག་པ་ཞེས་བྱའོ། །ལྷའི་བུ་ཅོད་པན་སྣ་ཚོགས་ཀྱི་རྒྱལ་མཚན་གྱི་རྣམ་པར་
Ka27a
༄#། །ཐར་པ་ནི། སེམས་ཅན་ཐམས་ཅད་ཀྱི་འབྱུང་བ་སྣ་ཚོགས་དོན་ཐ་དད་པའི་དབྱིངས་སུ་ཡང་དག་པར་གཞོལ་བ་ཞེས་བྱའོ། །ལྷའི་བུ་གོ་འཕང་རྣམ་པར་གནོན་པའི་སྒྲ་དབྱངས་སྣ་ཚོགས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་བྱམས་པའི་སྒོ་རྗེས་སུ་དྲན་ཞིང ། རང་གི་ཡུལ་ལ་རྣམ་པར་བྱ་བ་ཞེས་བྱའོ། །ལྷའི་བུ་འོད་ཡིད་དུ་འོང་བའི་རྒྱལ་མཚན་གྱི་རྣམ་པར་ཐར་པ་ནི། ང་རྒྱལ་གྱི་རྒྱལ་མཚན་རབ་ཏུ་བསྙལ་བ་དང ། སྙིང་རྗེ་ཆེན་པོའི་སྒོ་ནས་རབ་ཏུ་ཞི་བ་འབྱུང་བ་ཞེས་བྱའོ། །ལྷའི་བུ་སྤྱོད་ཡུལ་ཞི་བའི་སྒོའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་ཁོང་ཁྲོ་བ་ཡང་དག་པར་འདུལ་བ་རབ་ཏུ་བརྗོད་པ་ཞེས་བྱའོ། །ལྷའི་བུ་འཁོར་ལོ་རི་མོ་བཟང་པོའི་རྒྱལ་མཚན་གྱི་རྣམ་པར་ཐར་པ་ནི། ཕྱོགས་བཅུ་མཐའ་ཡས་པའི་སངས་རྒྱས་ཡིད་ལ་བྱ་བ་མུ་མེད་པར་ཁེབས་པར་འགེངས་པ་ཞེས་བྱའོ། །ལྷའི་བུ་མེ་ཏོག་བློ་གྲོས་སེངྒེའི་དབང་ཕྱུག་གི་རྣམ་པར་ཐར་པ་ནི། དེ་བཞིན་གཤེགས་པའི་རྣམ་པར་འཕྲུལ་བ་རྣམ་པ་ཐམས་ཅད་རྗེས་སུ་དྲན་པ་མངོན་པར་འཚང་རྒྱ་བས་རྒྱས་པར་བྱེད་པ་ཞེས་བྱའོ། །ལྷའི་བུ་དབང་པོའི་སྟོབས་རི་མོ་བཟང་པོའི་འོད་སྣ་ཚོགས་ཀྱི་རྣམ་པར་ཐར་པ་ནི།་འཇིག་རྟེན་གྱི་དབང་པོ་ཐམས་ཅད་ཀྱི་ཆོས་ཉིད་ལ་ཡང་དག་པར་གཞོལ་བའི་བྱིན་རླབས་ཀྱི་ཁྱད་པར་ཞེས་བྱའོ། །དེ་ནས་ལྷའི་རྒྱལ་པོ་དབང་བྱེད་ཀྱིས་སངས་རྒྱས་ཀྱི་མཐུས་
Ka27b
ལྷའི་བུ་དབང་བྱེད་ཀྱི་རིས་སུ་གཏོགས་པའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆོས་དབྱིངས་མཐར་ཐུགས་བདེ་བར་གཤེགས་པའི་སྐུ། །འགྲོ་བ་ཀུན་ན་མངོན་པར་རབ་ཏུ་སྣང ། །འབྱམས་ཀླས་ཐམས་ཅད་ཆོས་ཀྱིས་སེམས་ཅན་འདུལ། །ཆོས་ཀྱི་མངའ་བདག་རྒྱལ་བ་འགྲོ་ལ་སྟོན། །འཇིག་རྟེན་བདེ་བ་སྣ་ཚོགས་མ་ལུས་པ། །ཇི་སྙེད་དེ་ན་འཕགས་བདེ་ཞི་མཆོག་ཡིན། །ཆོས་ཉིད་ཡངས་པ་རྒྱལ་བའི་གནས་ཡིན་ཏེ། །མིག་བཟང་བདག་པོ་འདི་ལ་རྣམ་པར་ལྟ། །འཇིག་རྟེན་ཕྱོགས་རྣམས་བཀང་ཞིང་སངས་རྒྱས་ཀྱིས། །བསམ་པའི་དབྱིངས་ཀྱི་ཚུལ་བཞིན་ཆོས་སྟོན་པས། །སེམས་ཅན་ཀུན་གྱི་ནེམ་ནུར་དོགས་པ་གཅོད། །ཅོད་པན་སྣ་ཚོགས་རྒྱལ་མཚན་རྣམ་ཐར་ཏོ། །རྒྱལ་བའི་གསུང་གཅིག་མ་ལུས་གསུང་བ་ནི། །བསྐལ་པ་རྒྱ་མཚོར་ཡངས་པའི་ཆོས་སྒྲོག་སྟེ། །འགྲོ་བ་བཀང་ཞིང་སངས་རྒྱས་གསུང་བརྗོད་པ། །འདི་ནི་བརྩོན་པའི་བློ་གྲོས་རྣམ་ཐར་ཏོ། །འཇིག་རྟེན་བྱམས་པ་འབྱམས་ཀླས་རྒྱ་ཆེན་ཀུན། །བདེ་གཤེགས་པ་སྤུ་གཅིག་གི་དཔེར་མི་རུང ། །རྒྱལ་བའི་བྱམས་པ་མཁའ་བཞིན་ཟད་མི་ཤེས། །བཤད་པ་སྣ་ཚོགས་བློ་གྲོས་རྣམ་ཐར་ཏོ།། ང་རྒྱལ་རི་དང་མུན་སྤྲིན་སྒོ་འཇོམས་ཤིང ། སྟོབས་བཅུས་འགྲོ་བ་ཀུན་ཏུ་ཁྱབ་བྱས་ནས། །རྒྱལ་བའི་ཐུགས་རྗེའི་འོད་ཟེར་རབ་ཏུ་འགྱེད། །རྣམ་ཐར་འདི་ནི་འོད་བཟང་རྒྱལ་མཚན་གྱིའོ། །བདེ་
Ka28a
༄#། །གཤེགས་མཐོང་བས་གཏི་མུག་རབ་ཏུ་འཇོམས། །འགྲོ་ལ་ཤེས་རབ་དཀྱིལ་འཁོར་དགེ་བ་སྟོན། །དེ་དག་ངན་འགྲོའི་ཚུལ་རྣམས་རྣམ་འདུལ་ཏེ། །ཞི་བ་སྤྱོད་ཡུལ་སྒོ་ཡི་རྣམ་ཐར་ཏོ། །སངས་རྒྱས་སྤུ་ཡི་ཁུང་ནས་འོད་བརྗོད་པ། །སེམས་ཅན་ཀུན་དང་མཐུན་པར་བདེ་གཤེགས་མཚན། །དེ་དག་བསམ་པ་ཇི་བཞིན་མཚན་ཀྱང་ཐོས། ། འཁོར་ལོ་སྣ་ཚོགས་རྒྱལ་མཚན་རྣམ་ཐར་ཡིན། །རྒྱལ་བའི་རྣམ་པར་འཕྲུལ་པ་ཚད་མེད་པ། །དེ་དག་ཐམས་ཅད་འཁོར་འདིར་ཕྱིར་སྣང་ཞིང ། །ཆོས་དབྱིངས་ནམ་མཁའ་རྒྱལ་བས་རབ་རྒྱས་པ། །མེ་ཏོག་སེངྒེ་དཔལ་གྱི་རྣམ་ཐར་ཏོ། །བསྐལ་པ་རྒྱ་མཚོ་མང་པོ་ཚད་མེད་པར། །ཞིང་རྣམས་ཀུན་ཏུ་རྒྱལ་བའི་ཡུལ་བརྗོད་ཀྱང ། །སངས་རྒྱས་གཤེགས་དང་བཞུད་པར་གྱུར་པ་མེད། །དབང་པོ་དཔལ་སྟོབས་རྣམ་ཐར་འདི་ཡིན་ནོ། །དེ་ལ་ལྷའི་རྒྱལ་པོ་རབ་འཕྲུལ་དགའི་རྣམ་པར་ཐར་པ་ནི། ཆོས་ཀྱི་རང་བཞིན་སྤྲུལ་པར་རྣམ་པར་སྒོམ་པའི་སྦྱོར་བ་ཞེས་བྱའོ། །ལྷའི་བུ་སྒྲས་ཞི་བའི་འོད་ཀྱི་རྣམ་པར་ཐར་པ་ནི། འཇིགས་པ་ཐམས་ཅད་རྣམ་པར་སྒོམ་པའི་རང་བཞིན་གྱི་སྦྱོར་བ་ཞེས་བྱའོ། །ལྷའི་བུ་སྟོབས་ཀྱིས་འཕྲུལ་པའི་སྒྲའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་གཏི་མུག་གིས་ཡོངས་སུ་མི་ཟད་ཅིང་རྨོངས་པ་མེད་པའི་དཀྱིལ་འཁོར་ཅེས་བྱའོ། །ལྷའི་བུ་དབང་ཆེན་སྣ་ཚོགས་ཀྱི་
Ka28b
རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་གསུང་ལ་ཡང་དག་པར་འཇུག་ཅིང་དགའ་བ་ཚད་མེད་པས་རྣམ་པར་སྣང་བ་ཞེས་བྱའོ། །ལྷའི་བུ་དྲན་པའི་འོད་ཀྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་མཚན་ཉིད་དང ། བསོད་ནམས་ཀྱི་ཚོགས་ལ་འཇུག་པ་ཟད་མི་ཤེས་པ་ཤིན་ཏུ་བསྟན་པ་ཞེས་བྱའོ། །ལྷའི་བུ་སྤྲིན་སྒྲ་ཤིན་ཏུ་འཕགས་པའི་རྣམ་པར་ཐར་པ་ནི། འདས་པའི་བསྐལ་པ་གཅིག་ནས་གཅིག་ཏུ་བརྒྱུད་པ་རྗེས་སུ་དྲན་ཞིང་སྤྱོད་པའི་བློ་གྲོས་ཞེས་བྱའོ། །ལྷའི་བུ་སྣང་བ་སྤྱོད་པའི་དཔལ་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཤེས་རབ་ཆད་དང་བྲལ་བ་རྟོགས་པར་བྱེད་པའི་ཡེ་ཤེས་ལ་ཡང་དག་པར་འཇུག་པ་ཞེས་བྱའོ། །ལྷའི་བུ་གཙུག་ཕུད་ཡིད་དུ་འོང་བའི་འོད་ཀྱི་རྣམ་པར་ཐར་པ་ནི། ནམ་མཁའི་དབྱིངས་ཀྱི་མཐར་ཉི་མའི་ཤུགས་ཀྱིས་རྒྱུ་བས་ཀུན་ཏུ་འགྲོ་བ་ཞེས་བྱའོ། །ལྷའི་བུ་དགའ་བའི་བློ་གྲོས་ཀྱི་རྣམ་པར་ཐར་པ་ནི། བརྩམས་པ་ཐམས་ཅད་ཟད་མི་ཤེས་པ་ལ་བརྩོན་འགྲུས་ཀྱི་སྟོབས་ཡང་དག་པར་འབྱུང་བ་ཞེས་བྱའོ། །ལྷའི་བུ་མེ་ཏོག་འོད་ཀྱི་གཙུག་ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ལས་ལ་ལྟ་ཞིང་བདེ་བ་དང་སྡུག་བསྔལ་བས་ཀུན་ཏུ་རྣམ་པར་ལྟ་བ་ཞེས་བྱའོ། །ལྷའི་བུ་ཕྱོགས་ཤིན་ཏུ་སྣང་བའི་རྣམ་པར་ཐར་པ་ནི། སེམས་ཅན་གྱི་ཚོགས་བསམ་གྱིས་མི་ཁྱབ་པའི་རྣམ་པར་སྒྲུབ་པ་སྣ་ཚོགས་ཀྱི་དྲན་པས་མངོན་དུ་སྒྲུབ་པ་ཞེས་བྱའོ། །དེ་ནས་
Ka29a
༄#། །ལྷའི་རྒྱལ་པོ་རབ་འཕྲུལ་དགས་སངས་རྒྱས་ཀྱི་མཐུས་འཕྲུལ་དགའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་ལས་ཀྱི་རང་བཞིན་བསམ་མི་ཁྱབ། །ཐམས་ཅད་འགྲོ་བ་འདིར་ཡང་ཤིན་ཏུ་བསྟན། །རྒྱུ་དང་རང་བཞིན་རྒྱལ་བ་སེམས་ཅན་ཚུལ། །འཇིག་རྟེན་འདི་ཀུན་ལས་ཀྱི་རྣམ་པར་བྲིས། །ཐམས་ཅད་ཚུལ་དུ་རང་བྱུང་དངོས་པོ་མེད། །ཕྱོགས་རྣམས་ཀུན་ནའང་གཟུང་བ་ཡོད་པ་མིན། །ཆོས་ཀྱི་སྐུ་ལ་དངོས་མེད་དེ་ཡང་བསྟན། །སྒྲ་ཞི་འོད་ཀྱིས་རྣམ་ཐར་འདི་མཐོང་ངོ ། །རྒྱལ་བས་བསྐལ་པ་རྒྱ་མཚོར་སྤྱད་པའི་ཚེ། །འཇིག་རྟེན་གཏི་མུག་མུན་པ་རྣམ་པར་བཟློག་།དེ་བས་སངས་རྒྱས་ཤིན་ཏུ་དྲི་མེད་སྣང ། །རྣམ་ཐར་འདི་ནི་སྟོབས་ཀྱི་འོད་ཀྱིས་ཤེས། །ཇི་སྙེད་འཇིག་རྟེན་སྒྲ་དབྱངས་ཞི་བའི་རྣམས། །ཀུན་ཀྱང་སངས་རྒྱས་སྒྲ་ལས་ཉེ་བར་འབྱུང ། །ཕྱོགས་རྣམས་ཞིང་དབྱིངས་སྣ་ཚོགས་རྣམ་པར་སྒྲོག་།འདི་ནི་སྣ་ཚོགས་དབང་གི་རྣམ་ཐར་ཏོ། །འགྲོ་བའི་བསོད་ནམས་མཐུ་རྣམས་ཀུན་བསགས་ཀྱང ། །རྒྱལ་བའི་མཚན་རབ་གཅིག་ཏུ་མི་འགྱུར་ཏེ། །རྒྱལ་བའི་བསོད་ནམས་ནམ་མཁའི་དཔེ་ལྟ་བུ། །དྲན་པའི་འོད་ཀྱིས་རྣམ་ཐར་འདི་མཐོང་ངོ ། །དུས་གསུམ་བསྐལ་པ་མཐའ་དང་མུ་མེད་པ། །སྤུ་གཅིག་རྩེ་ལ་རང་བྱུང་རྣམས་སྟོན་ཏེ། །དེ་དག་འབྱུང་འཇིག་ཇི་ལྟ་བ་ཡང་སྟོན། །འདི་ནི་འཕགས་
Ka29b
པའི་དབྱངས་ཀྱིས་རབ་ཏུ་ཤེས། །ཕྱོགས་རྣམས་ནམ་མཁའི་མཐའ་ནི་རྙེད་པར་རུང ། །རྒྱལ་བའི་སྤུ་གཅིག་མཐའ་ནི་ཐུག་པ་མེད། །དེ་ལྟར་སངས་རྒྱས་ཆགས་མེད་བསམ་མི་ཁྱབ། །ཡིད་འོང་འོད་ཀྱི་གཙུག་གིས་དེ་མཐོང་ངོ ། །སྔོན་གྱི་རྒྱལ་བས་བསྐལ་པ་བསམ་ཡས་པར། །མི་སྐྱོའི་ཐུགས་ཀྱིས་བརྩོན་འགྲུས་རབ་བསྐྱེད་དེ། །ཕ་རོལ་ཕྱིན་པ་རྒྱ་ཆེན་རབ་ཏུ་བསྐངས། །དེ་ནི་དགའ་དང་ལྡན་པའི་རྣམ་ཐར་ཏོ། །འགྲོ་བ་རྣམས་ཀྱི་ལས་ཀྱི་རང་བཞིན་རྒྱུ། །བསམ་གྱིས་མི་ཁྱབ་སངས་རྒྱས་མ་ལུས་གསུང ། །དྲི་མེད་རྣམ་དག་ཆོས་ཉིད་དེ་ཡང་སྟོན། །དེ་ལ་མེ་ཏོག་འོད་ཀྱི་གཙུག་ཕུད་འཇུག་།རྒྱལ་བའི་སྤུ་གཅིག་རྩེ་ལ་འགྲོ་བ་རྣམས། །ཐམས་ཅད་སྙེད་ཀྱི་གཟུགས་ཀྱི་སྐུ་ལ་ལྟོས། །འོན་ཀྱང་འགྲོ་ཞིང་འོང་བ་དེ་ལ་མེད། །རྣམ་ཐར་དེ་ནི་ཕྱོགས་སུ་སྣང་བས་མཐོང ། ། དེ་ལ་ལྷའི་རྒྱལ་པོ་རབ་དགའ་ལྡན་གྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་མཚན་གྱི་འཁོར་ལོ་ཕུན་སུམ་ཚོགས་པ་མངོན་པར་སྒྲུབ་པ་ལ་འཇུག་པ་ཞེས་བྱའོ། །ལྷའི་བུ་དགའ་བ་རྒྱ་མཚོའི་གཙུག་ཕུད་ཀྱི་རྣམ་པར་ཐར་པ་ནི། ནམ་མཁའི་དབྱིངས་དྲི་མ་མེད་པའི་འོད་ཅེས་བྱའོ། །ལྷའི་བུ་ཡོན་ཏན་མཆོག་གི་རྒྱལ་མཚན་གྱི་རྣམ་པར་ཐར་པ་ནི། སྨོན་ལམ་རྒྱ་མཚོའི་དྲི་མ་མེད་པས་འགྲོ་བ་རབ་ཏུ་ཞི་བར་བྱེད་པ་ལ་འཇུག་པ་ཞེས་བྱའོ། །ལྷའི་བུ་འོད་ཟེར་ཞི་བའི་འོད་ཀྱི་རྣམ་པར་ཐར་པ་ནི། ཆོས་རྗེས་སུ་སྲུང་བའི་སྒོ་ཀུན་ཏུ་བསྟན་པས་རྣམ་པར་
Ka30a
༄#། །སྣང་བ་ཞེས་བྱའོ། །ལྷའི་བུ་རབ་ཏུ་དགའ་བའི་མིག་གི་རྣམ་པར་ཐར་པ་ནི། ཀུན་ནས་ཉོན་མོངས་པའི་ཁམས་ནམ་མཁའི་དབྱིངས་ལྟར་དྲི་མ་མེད་པར་ཡོངས་སུ་སྦྱོང་བ་ཞེས་བྱའོ། །ལྷའི་བུ་རིན་ཆེན་འོད་ཟེར་ཟླ་བའི་རྣམ་པར་ཐར་པ་ནི། འགྲོ་བ་རྣམ་པར་གདུལ་བ་ཟད་མི་ཤེས་པ་མངོན་པར་སྒྲུབ་པའི་སྙིང་པོ་ཞེས་བྱའོ། །ལྷའི་བུ་རྣམ་པར་གནོན་པས་རབ་ཏུ་བརྩོན་པའི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་ཡུལ་ལ་བརྩོན་ཞིང་ཡང་དག་པར་བྱང་ཆུབ་མངོན་པར་སྒྲུབ་པ་ཞེས་བྱའོ། །ལྷའི་བུ་རྡོ་རྗེ་མདོག་གི་འོད་བཟང་པོའི་རྣམ་པར་ཐར་པ་ནི། བྱང་ཆུབ་ཀྱི་སེམས་བསྐྱེད་པ་མི་ཤིགས་པར་བརྟན་པའི་རྒྱུན་ཐམས་ཅད་དགའ་བས་ཡང་དག་པར་སྡུད་པ་ཞེས་བྱའོ། །ལྷའི་བུ་སྐར་མས་བརྒྱན་པའི་དཔལ་གྱི་རྣམ་པར་ཐར་པ་ནི། སངས་རྒྱས་འབྱུང་བ་ཐམས་ཅད་ཀྱི་དྲུང་དུ་ཉེ་བར་འགྲོ་ཞིང ། ཕྱོགས་བཅུའི་སེམས་ཅན་རྩལ་གྱིས་རྣམ་པར་གནོན་པའི་འདུལ་བ་ཞེས་བྱའོ། །ལྷའི་བུ་དགའ་བ་བཟང་པོ་སྣ་ཚོགས་ཀྱི་རྣམ་པར་ཐར་པ་ནི། བསམ་པ་རྒྱ་མཚོ་མཐའ་དང་དབུས་མེད་པ། སེམས་སྐད་ཅིག་གིས་ཡོངས་སུ་བསྟན་པ་ལ་མངོན་པར་ཕྱོགས་པའི་སྣོད་ཡང་དག་པར་སྟོན་པ་ཞེས་བྱའོ། །དེ་ནས་ལྷའི་རྒྱལ་པོ་རབ་དགའ་ལྡན་གྱིས་སངས་རྒྱས་ཀྱི་མཐུས་དགའ་ལྡན་གྱི་རིས་སུ་གཏོགས་པའི་ལྷའི་བུའི་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་
Ka30b
སུ་བཅད་པ་འདི་དག་སྨྲས་སོ། །ཆོས་དབྱིངས་དམ་པ་དེ་བཞིན་གཤེགས་པ་སྟེ། །སེམས་ཅན་ཀུན་དང་མཉམ་ཉིད་མཉམ་པར་འགྱུར། །བསམ་པ་སྣ་ཚོགས་རྒྱལ་བའི་ཆོས་ཉིད་དེ། །དྲི་མེད་བསམ་གྱིས་མི་ཁྱབ་རབ་ཏུ་འཇུག་།སངས་རྒྱས་སྐུ་ནི་ཕྱོགས་ལ་ཐོགས་པ་མེད། །གཟུང་བ་མེད་ཅིང་ཆགས་པ་གང་ཡང་མེད། །འགྲོ་བའི་གཟུགས་ཀྱི་སྒོ་རྣམས་ཀུན་ལ་སྣང ། །རྣམ་ཐར་དེ་ལ་དགའ་བའི་གཙུག་ཕུད་འཇུག་།སྨོན་ལམ་རྒྱ་མཚོས་ཇི་ལྟར་རྣམ་སྦྱངས་པའི། །སྔོན་གྱི་རྒྱལ་བའི་སྤྱོད་པ་རྣམས་ལ་ལྟོས། །ཐམས་ཅད་ཆོས་ཀྱི་དཀྱིལ་འཁོར་ཡོངས་སུ་རྒྱས། །དེ་ཡི་ཚུལ་ལ་ཡོན་ཏན་རྒྱ་མཚོ་འཇུག་།བདེ་གཤེགས་ཆོས་སྐུ་བསམ་གྱིས་མི་ཁྱབ་སྟེ། །ཆོས་ཀྱི་དབྱིངས་ནི་མིག་ཡོར་མཚན་ཉིད་དོ། །ཐམས་ཅད་ཆོས་ཀྱི་འོད་ཟེར་སྣང་བ་གཏོང ། །ཞི་བའི་འོད་ཟེར་སྣང་བས་འདི་ལྟར་མཐོང ། །འགྲོ་བ་ཉོན་མོངས་ལས་ཀྱི་མུན་པས་བསྒྲིབས། །འཇིགས་དོགས་བག་མེད་དྲེགས་པའི་ཡུལ་ཅན་ལ། །རྒྱལ་བ་ཞི་བའི་ཆོས་ཉིད་རབ་ཏུ་སྟོན། །དགའ་བ་བཟང་པོའི་མིག་གིས་དགའ་བར་མཐོང ། །མགོན་པོ་འཇིག་རྟེན་ཐམས་ཅད་སྐྱབས་གྱུར་ཅིང ། །གནས་དང་མགོན་དུ་གྱུར་པ་རང་འབྱུང་སྟེ། །རྒྱལ་བ་སེམས་ཅན་ཀུན་ལ་བདེ་བ་སྟོན།། དེ་ཡི་ཚུལ་ལ་རྩེ་མོའི་ཟླ་བ་འཇུག་།སངས་རྒྱས་ཐམས་ཅད་སྤྱོད་ཡུལ་བསམ་མི་ཁྱབ། །ཆོས་དབྱིངས་དམ་པ་དེ་བཞིན་གཤེགས་པ་སྟེ། །ཐམས་ཅད་ཆོས་དབྱིངས་ཕ་རོལ་ཕྱིན་པ་བརྙེས། །དེ་
Ka31a
༄#། །ནི་བརྩོན་པའི་བློ་གྲོས་དགའ་བ་འོ། །ཕྱོགས་བཅུ་དག་ན་སེམས་ཅན་སྣོད་གྱུར་ཅིང ། །བསོད་ནམས་རྒྱ་མཚོས་རྣམ་དག་སྤྱོད་ཡུལ་ཅན། །སངས་རྒྱས་ཡོན་ཏན་ཐོས་ཤིང་བྱང་ཆུབ་འཇུག་།རྡོ་རྗེ་རྡུལ་གྱི་འོད་ནི་འདི་ལྟར་སེམས། །ཞིང་རྣམས་རྒྱ་མཚོའི་རྡུལ་དང་མཉམ་པ་ཡི། །ཕྱོགས་བཅུའི་རྒྱལ་སྲས་རྟག་ཏུ་ཀུན་འདུ་ཞིང ། །རྒྱལ་བ་མཆོད་ཅིང་ཆོས་ཉིད་ཉན་པར་བྱེད། །བརྒྱན་པའི་དཔལ་ནི་རྣམ་ཐར་འདི་ལ་འཇུག་།འགྲོ་བ་རྒྱ་མཚོའི་སེམས་ནི་བསམ་མི་ཁྱབ། །གནས་མེད་གཡོ་བ་མེད་ཅིང་རྟེན་པ་མེད། །ཐམས་ཅད་སྐད་ཅིག་གཅིག་ལ་རྒྱལ་བས་མཁྱེན། །དགའ་བ་སྣ་ཚོགས་དགའ་བས་འདི་མཐོང་ངོ ། །དེ་ལ་ལྷའི་རྒྱལ་པོ་རབ་མཚེ་མའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་མྱ་ངན་བསལ་བ་དགེ་བའི་སྒོ་ཡང་དག་པར་འབྱུང་བ་ཞེས་བྱའོ། །ལྷའི་བུ་དགའ་བ་བདེ་བའི་འོད་ཀྱི་རྣམ་པར་ཐར་པ་ནི། དམིགས་པ་ཐམས་ཅད་ཁྱབ་པར་བྱེད་པའི་ཡུལ་ཞེས་བྱའོ། །ལྷའི་བུ་བློ་གྲོས་མི་ཟད་པའི་ཡོན་ཏན་དཔལ་གྱི་རྣམ་པར་ཐར་པ་ནི། ནད་ཐམས་ཅད་རྣམ་པར་སེལ་ཅིང་ཕན་པར་སྙིང་རྗེ་བའི་དཀྱིལ་འཁོར་ཞེས་བྱའོ། །ལྷའི་བུ་འཕྲུལ་བ་བཟང་ཞིང་དགེ་བའི་རྣམ་པར་ཐར་པ་ནི།་བུད་མེད་ཐམས་ཅད་འདུལ་བའི་བསམ་པ་རྗེས་སུ་རྟོགས་པའི་ཚུལ་ལ་འཇུག་པ་ཞེས་བྱའོ། །ལྷའི་བུ་ས་དང་རི་བོའི་འོད་ཀྱི་རྣམ་པར་ཐར་པ་ནི། ཆོས་ཐམས་ཅད་གཟུང་བ་ལ་རྨོངས་
Ka31b
པ་མེད་པའི་གཟུངས་ཀྱི་སྒོ་བདེ་བར་སྣང་བ་ཞེས་བྱའོ། །ལྷའི་བུ་བསམ་གྱིས་མི་ཁྱབ་པའི་བློ་གྲོས་ཀྱི་རྣམ་པར་ཐར་པ་ནི། དམིགས་པའི་ཡུལ་ཐམས་ཅད་ལས་ཀྱི་རང་བཞིན་བསམ་གྱིས་མི་ཁྱབ་པའི་ཚུལ་ལ་འཇུག་པ་ཞེས་བྱའོ། །ལྷའི་བུ་འཁོར་ལོའི་གཙུག་གི་རྣམ་པར་ཐར་པ་ནི། ཆོས་ཀྱི་འཁོར་ལོའི་ཤུགས་ཀྱིས་སེམས་ཅན་ཡོངས་སུ་སྨིན་པར་བྱ་བ་བགྲང་བའི་ཚུལ་ལ་འཇུག་པ་ཞེས་བྱའོ། །ལྷའི་བུ་གཟི་བརྗིད་འོད་འཕྲོའི་རྣམ་པར་ཐར་པ་ནི། ཁམས་ཐམས་ཅད་ཀྱི་མཐར་འགྲོ་བས་མིག་ཤིན་ཏུ་ཡངས་པའི་དཀྱིལ་འཁོར་གྱིས་ཀུན་ཏུ་བལྟ་བ་ཞེས་བྱའོ། ། ལྷའི་བུ་འོད་རྣམ་པར་སྣང་བའི་རྣམ་པར་ཐར་པ་ནི། ལས་ཀྱི་དམིགས་པ་དང་འགྲོགས་པའི་བདུད་ཀྱི་ལས་ཐམས་ཅད་ཟློག་པ་ཞེས་བྱའོ། །ལྷའི་བུ་གྲགས་པའི་ཕྱོགས་སུ་རྣམ་པར་ལྟ་བའི་རྣམ་པར་ཐར་པ་ནི། ལྷའི་གནས་ཐམས་ཅད་ཀྱི་འཁོར་དུ་དགོས་པ་མྱོང་བར་བྱ་བ་ལ་སེམས་རབ་ཏུ་དང་བ་ཞེས་བྱའོ། །དེ་ནས་ལྷའི་རྒྱལ་པོ་རབ་མཚེ་མས་སངས་རྒྱས་ཀྱི་མཐུས་རབ་མཚེ་མའི་ལྷའི་བུའི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསྐལ་པ་རྒྱ་མཚོ་ཡངས་པ་རྒྱ་ཆེན་དུ། །འགྲོ་བའི་ཉོན་མོངས་རྒྱ་མཚོ་ཡོངས་སྦྱངས་པའི། །དྲི་མེད་ལམ་ནི་ཡེ་ཤེས་དཀྱིལ་འཁོར་རྣམས། །ཡང་དག་བརྙེས་པའི་སྒྲོན་མས་རབ་ཏུ་བསྟན། །རྒྱལ་བའི་སྐུ་ནི་མཐའ་ཡས་རྒྱ་ཆེ་སྟེ། །ཕྱོགས་བཅུར་མུ་མཐའ་རྙེད་པར་ཡོང་མི་རུང །
Ka32a
༄#། །ཚུལ་རྣམས་ཀུན་གྱིས་སངས་རྒྱས་ཚད་མེད་དེ། །དེ་ལ་དགའ་བ་བདེ་བའི་འོད་འཇུག་གོ་།ནད་དག་རྒ་བ་འཆི་བ་མྱ་ངན་གྱིས། །འཇིག་རྟེན་གཙེས་ཤིང་རབ་ཏུ་གདུངས་པ་རྣམས། །དེ་དག་ཀུན་ལ་ཐུགས་རྗེའི་དཀྱིལ་འཁོར་ཅན། །སངས་རྒྱས་བློ་གྲོས་ཟད་པ་མེད་པས་མཐོང ། །ཡེ་ཤེས་སྒྱུ་མ་སངས་རྒྱས་ཐུགས་སུ་ཆུད། །དུས་གསུམ་ཀུན་ལ་ཆགས་པ་མི་མངའ་སྟེ། །འགྲོ་བ་ཐམས་ཅད་སྤྱོད་པ་རབ་ཏུ་མཁྱེན། །འདི་ནི་འཕྲུལ་པ་དགེ་བའི་སྤྱོད་ཡུལ་ལོ། །སངས་རྒྱས་དབུས་དང་མཐའ་མེད་གཟུགས་རྣམས་དང ། །ཐ་དད་ཡང་དག་ཤེས་པ་རྒྱ་མཚོ་གསུང ། །ཆོས་ཀྱི་འཁོར་ལོ་ཡང་དག་རབ་ཏུ་བསྐོར། །འདི་ནི་ས་ཡི་རི་འོད་རྣམ་ཐར་ཏོ། །སངས་རྒྱས་ཆོས་ཀྱི་རང་བཞིན་རྒྱ་ཆེན་སྟོན། །ཆོས་རྣམས་ཐུགས་སུ་ཆུད་པས་རྣམ་པར་དག་།ཐམས་ཅད་ཆོས་ཀྱི་ཡུལ་ནི་བསམ་ཡས་ཏེ། །བློ་གྲོས་བསམ་ཡས་ཚུལ་ལས་འདི་ཡིན་ནོ། །སེམས་ཅན་ཐམས་ཅད་སྡུག་བསྔལ་ཞི་བྱེད་པའི། །བསམ་གྱིས་མི་ཁྱབ་ཚུལ་གྱི་འཁོར་ལོ་བསྐོར། །བྱང་ཆུབ་སྤྱོད་པ་རྒྱ་ཆེན་རྣམས་ཀྱང་སྟོན། །འཁོར་ལོ་ལྟ་བ་འདི་ཡི་ས་ལ་འཇུག་།རྒྱལ་བའི་སྐུ་འདི་སེམས་ཅན་གྲངས་བཞིན་དུ། །སྤྲུལ་པས་འཇིག་རྟེན་ཡོངས་སུ་ཁྱབ་མཛད་དེ། །འགྲོ་བ་ཀུན་ལ་མངོན་པར་ཀུན་ན་གནས། །གཟི་བརྗིད་འོད་འཕྲོའི་སྤྱོད་ཡུལ་འདི་ཡིན་ནོ། །སངས་རྒྱས་མཐོང་བ་ཙམ་གྱིས་འགྲོ་བ་ཡི། །ལས་ཀྱི་སྒྲིབ་པ་ཐམས་
Ka32b
ཅད་བཟློག་པར་འགྱུར། །བདུད་ཀྱི་ལས་རྣམས་ཀུན་ཀྱང་དེ་བཞིན་སྤོང ། །རྣམ་སྣང་འོད་ཀྱི་སྤྱོད་ཡུལ་འདི་ཡིན་ནོ། །རྒྱ་མཚོའི་འཁོར་རྣམས་ཐམས་ཅད་ཀུན་ཏུ་ཡང ། །རྒྱལ་བ་བཞུགས་པས་མངོན་པར་རབ་ཏུ་མཛེས། །ཆོས་ཀྱི་སྤྲིན་ཆེན་ཆར་ཡང་རབ་འབེབས་ཏེ། །གྲགས་པ་ཀུན་ཏུ་གྲགས་པའི་རྣམ་ཐར་ཏོ། །དེ་ལ་ལྷའི་དབང་པོ་བརྒྱ་བྱིན་གྱི་རྣམ་པར་ཐར་པ་ནི། དུས་གསུམ་དུ་གཤེགས་པའི་དེ་བཞིན་གཤེགས་པ་སྐྱེ་བ་འབྱུང་བ་དང ། རྣམ་པར་འཇིག་པ་རྒྱ་ཆེན་པོ་རྗེས་སུ་དྲན་པ་ཡིད་ལ་བྱ་བ་ལ་དགའ་བ་ཆེན་པོའི་ཤུགས་ཞེས་བྱའོ། །ལྷའི་བུ་སྒྲ་ཀུན་ཏུ་གྲགས་པའི་དབང་ཕྱུག་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་གཟུགས་དེ་བཞིན་གཤེགས་པའི་གཟུགས་ཀྱི་སྐུའི་ཡོན་ཏན་ཡོངས་སུ་སྤྱོད་པའི་ཤུགས་ཀྱི་སྙིང་པོ་ཞེས་བྱའོ། །ལྷའི་བུ་བྱམས་པར་ལྟ་བའི་གཙུག་ཕུད་ཀྱི་རྣམ་པར་ཐར་པ་ནི། བྱམས་པའི་སྤྲིན་གྱིས་ཀུན་ཏུ་ཁེབས་པར་བྱེད་པའི་བྱིན་གྱི་རླབས་ཀྱིས་ཁྱབ་པར་བྱེད་པ་ཞེས་བྱའོ། ། ལྷའི་བུ་རིན་པོ་ཆེའི་འོད་ཀུན་ཏུ་གྲགས་པའི་རྒྱལ་མཚན་གྱི་རྣམ་པར་ཐར་པ་ནི། འཇིག་རྟེན་ཐམས་ཅད་ཀྱི་ཡོན་ཏན་དང ། མཐུ་དང ། སེམས་ཅན་གྱི་རྣམ་པ་སངས་རྒྱས་རྗེས་སུ་དྲན་པའི་སྒོ་ཀུན་ནས་འཇུག་པ་ཞེས་བྱའོ། །ལྷའི་བུ་དགའ་བདེ་འབྱུང་བའི་གཙུག་ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་གཞལ་མེད་ཁང་རྣམ་པར་ལྟ་བའི་བསོད་ནམས་ཡང་
Ka33a
༄#། །དག་པར་འབྱུང་བའི་བྱིན་གྱི་རླབས་ཞེས་བྱའོ། །ལྷའི་བུ་དྲན་པ་ཡིད་དུ་འོང་བའི་རྣམ་པར་ཐར་པ་ནི། སངས་རྒྱས་སྐྱེ་བ་འབྱུང་བ་དང ། སེམས་ཅན་ཡོངས་སུ་སྨིན་པར་བྱ་བ་རྗེས་སུ་དྲན་པ་རྣམ་པར་སྒོམ་པ་ཞེས་བྱའོ། །ལྷའི་བུ་རི་བོ་སྒྲའི་དཔལ་གྱི་རྣམ་པར་ཐར་པ་ནི། འཇིག་རྟེན་འཇིག་པ་དང ། འདུ་བ་དང ། བསྐལ་པའི་མེ་ཡོངས་སུ་འཕོ་བའི་ཡེ་ཤེས་ཀྱི་རྒྱན་ཅེས་བྱའོ། །ལྷའི་བུ་དྲན་པ་དང་ལྡན་པའི་རྣམ་པར་ཐར་པ་ནི། མ་འོངས་པའི་བྱང་ཆུབ་སེམས་དཔའི་སྤྱོད་པ་འབྱུང་བ་སེམས་ཅན་གདུལ་བའི་རྒྱུ་དྲན་པའི་རིམ་པ་ཞེས་བྱའོ། །ལྷའི་བུ་མེ་ཏོག་དྲི་མ་མེད་ཅིང་ཡིད་དུ་འོང་བའི་འོད་ཀྱི་རྣམ་པར་ཐར་པ་ནི། ལྷའི་བུ་དགའ་བ་ཐམས་ཅད་ལ་བརྩེ་བ་རྗེས་སུ་དྲན་པའི་རིམ་པ་ཞེས་བྱའོ། །ལྷའི་བུ་ཡེ་ཤེས་ཉི་མའི་མིག་གི་རྣམ་པར་ཐར་པ་ནི། ལྷའི་བུ་ཐམས་ཅད་སྐྱེ་བར་རབ་ཏུ་བརྗོད་པའི་དགེ་བ་ལ་རྨོངས་པ་མེད་པ་ཞེས་བྱའོ། །ལྷའི་བུ་ཡང་དག་པར་སྐུལ་བའི་འོད་ཀྱི་དབང་ཕྱུག་གི་རྣམ་པར་ཐར་པ་ནི། ལྷའི་འཁོར་ཐམས་ཅད་ཡང་དག་པར་སྐུལ་ཞིང་ཕན་ཚུན་དགོས་པའི་ཐེ་ཚོམ་རྣམ་པར་གདོན་མི་ཟ་བར་གཅོད་པ་ཞེས་བྱའོ། །དེ་ནས་ལྷའི་དབང་པོ་བརྒྱ་བྱིན་གྱིས་སངས་རྒྱས་ཀྱི་མཐུས་སུམ་ཅུ་རྩ་གསུམ་རིས་ཀྱི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དུས་གསུམ་བདེ་བར་
Ka33b
གཤེགས་པ་ཐམས་ཅད་དང ། །དེ་དག་སྤྱོད་ཡུལ་རྒྱ་ཆེན་དེ་དག་དང ། །དེ་དག་ཞིང་འབྱུང་འཇིག་པ་ཇི་བཞིན་དྲན། །རྒྱལ་བའི་མཐུ་ཡིས་དེ་དག་དྲི་མེད་སྣང ། །སངས་རྒྱས་སྐུ་མང་ཕྱོགས་སུ་རྒྱས་བྱས་ཤིང ། །མཉམ་མེད་གཟུགས་ཀུན་འགྲོ་ལ་ཕན་པའི་ཕྱིར། །རྒྱལ་བ་ཀུན་ནས་ལྷམ་མེ་ལྷང་ངེ་སྟེ། །གྲགས་པའི་དཀྱིལ་འཁོར་འོད་ཀྱིས་འདི་མཐོང་ངོ ། །བྱམས་པ་རྒྱ་མཚོའི་ཚུལ་ནི་རྒྱ་ཆེ་ཞིང ། །ཤིན་ཏུ་ཡངས་པས་འགྲོ་བ་ཀུན་བཀང་ནས། །སྔོན་བསྒོམས་སེམས་ཅན་མཐའ་ཡས་ཁམས་ཀྱང་བཏུལ། །དྲི་མེད་མིག་གི་གཙུག་ཕུད་འདི་མཐོང་ངོ ། །བདེར་གཤེགས་ཡོན་ཏན་རྒྱ་མཚོ་དེ་དྲན་ནས། །བདག་གི་དགའ་བ་ཡང་དག་འབྱུང་སྐྱེས་ཏེ། །སངས་རྒྱས་འཇིག་རྟེན་ཀུན་ན་མཉམ་མེད་མཆོག་།འདི་ནི་གྲགས་རྒྱལ་དྲི་མེད་རྣམ་ཐར་ཏོ། །ལས་དགེ་རྒྱ་མཚོས་འགྲོ་བ་ཀུན་བཀང་ཞིང ། །དྲི་མེད་མ་ལུས་རྒྱལ་བས་བསྟན་པ་མཛད། །དེ་ལས་བསོད་ནམས་ཡངས་པ་ཀུན་བྱུང་སྟེ། །དགའ་བདེ་གཙུག་ཕུད་ཚུལ་ནི་འདི་ཡིན་ཏོ། །སངས་རྒྱས་སྐྱེ་བ་ཡངས་པས་ཕྱོགས་བཀང་ཞིང ། །བདེར་གཤེགས་འགྲོ་བ་རྒྱས་པར་མངོན་དུ་འགྱུར། །དེ་དག་རྒྱ་ཆེན་སེམས་ཅན་འདུལ་ལ་ལྟོས། །དེ་ཡི་ཚུལ་ལ་དྲན་པའི་རྒྱན་འཇུག་གོ་།བདེར་གཤེགས་ཡེ་ཤེས་སྐུ་མངའ་སྤྱན་ཡངས་པ། །འབྱམས་ཀླས་ཞིང་རྣམས་ཐམས་ཅད་ཀུན་བཞུགས་པ། །འབྱམས་ཀླས་ཞིང་གི་རྡུལ་ལ་ཀུན་ཀྱང་བསྟན། །རྣམ་ཐར་འདི་ལ་སྤྲིན་གྱི་དབྱངས་འཇུག་གོ །
Ka34a
༄#། །རྒྱལ་བའི་སྲས་ཀྱི་བྱང་ཆུབ་སྤྱོད་པ་དག་།ཇི་བཞིན་ཡངས་པ་སྦུ་ཡི་རྩེ་མོ་ལ། །རྒྱལ་བས་དེ་དག་ཚད་མེད་ཕུན་སུམ་བསྟན། །དྲན་པའི་བློ་གྲོས་འདི་ཡི་ཚུལ་མཐོང་ངོ ། །འགྲོ་བ་འདི་ནི་རྩེ་དགའ་གང་བདེ་བ། །དེ་དག་ཐམས་ཅད་རྒྱལ་བའི་མཐུ་ཡིས་བྱུང ། །བསོད་ནམས་མཉམ་མེད་རྒྱལ་བ་བྱུང་ལ་ལྟོས། །འདི་ནི་མེ་ཏོག་སྣ་ཚོགས་དྲི་མེད་ཀྱིའོ།། སེམས་གཅིག་རྒྱུད་ལ་རྒྱལ་བའི་ཡོན་ཏན་གྱིས། །བདེར་གཤེགས་ཤིན་ཏུ་རྒྱ་ཆེན་སུས་དྲན་པ། །དེ་ལ་ངན་སོང་ཀུན་གྱི་འཇིགས་པ་མེད། །ཡེ་ཤེས་ཉི་མེའི་མིག་གི་རྣམ་ཐར་ཏོ། །རྒྱལ་བའི་རྫུ་འཕྲུལ་ཆོས་ཉིད་རྒྱ་ཆེ་ཞིང ། །བསམ་པའི་ལམ་རྣམས་ཐམས་ཅད་ཀུན་ནས་གནས། །དེ་དག་ཐེ་ཚོམ་ནེམ་ནུར་ཐམས་ཅད་སེལ། །རྣམ་ཐར་འདི་ནི་བརྗོད་དབང་བློ་གྲོས་ཀྱིའོ། །དེ་ལ་ལྷའི་བུ་ཟླ་བའི་རྣམ་པར་ཐར་པ་ནི། འགྲོ་བ་ཐམས་ཅད་བསྡུ་ཞིང་རྣམ་པར་གདུལ་བའི་སྣང་བས་ཆོས་ཀྱི་དབྱིངས་ཀུན་ནས་དྲི་མ་མེད་པའི་དཀྱིལ་འཁོར་ཞེས་བྱའོ། །ལྷའི་བུ་འོད་ཀྱི་མེ་ཏོག་རྒྱལ་པོའི་གཙུག་ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཡུལ་རྣམ་པར་ལྟ་བ་དང ། མཐའ་ཡས་པའི་ཆོས་འབྱམས་ཀླས་པ་ལ་ཡང་དག་པར་འཇུག་པ་ཞེས་བྱའོ།། ལྷའི་བུ་དཔལ་གྱི་ཚོགས་སྣ་ཚོགས་ཀྱི་རྒྱན་གྱི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སེམས་རྒྱ་མཚོ་ཡོངས་སུ་བཟློག་ཅིང་ཕན་ཚུན་གྱི་ཡུལ་དང ། དམིགས་པ་ལ་ཡང་དག་
Ka34b
པར་སྤྱོད་པ་ཞེས་བྱའོ། །ལྷའི་བུ་འཇིག་རྟེན་དགའ་བའི་བདེ་བ་སྣ་ཚོགས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བདེ་བ་བསམ་གྱིས་མི་ཁྱབ་པ་དང ། དགའ་བ་དང ། རངས་པ་རྒྱ་ཆེན་པོ་བསྐྱེད་པ་ཞེས་བྱའོ། །ལྷའི་བུ་ཤིང་གི་དབང་པོའི་མིག་གི་འོད་ཀྱི་རྣམ་པར་ཐར་པ་ནི། ལོ་ཏོག་ཐམས་ཅད་ཀྱི་མྱུ་གུ་དང ། ས་བོན་སྲུང་བ་དང ། དུས་ཡོངས་སུ་བསྒྱུར་བ་ཡང་དག་པར་སྟོན་པ་ཞེས་བྱའོ། །ལྷའི་བུ་འོད་བཟང་པོ་སྟོན་པའི་རྣམ་པར་ཐར་པ་ནི། འགྲོ་བ་ཐམས་ཅད་བདེ་བ་དང ། སྡུག་བསྔལ་གྱི་ཚོར་བ་མྱོང་བ་ལ་བྱམས་པ་དང་སྙིང་རྗེའི་སྒོས་ཡོངས་སུ་སྐྱོབ་པ་ཞེས་བྱའོ། །ལྷའི་བུ་ཀུན་ནས་སྤྱོད་པ་མི་སྒུལ་བའི་འོད་ཀྱི་རྣམ་པར་ཐར་པ་ནི། ཟླ་བ་དྲི་མ་མེད་པ་འཛིན་ཅིང་སྤྱོད་པས་ཕྱོགས་ཡོངས་སུ་འདུས་པ་ཞེས་བྱའོ། །ལྷའི་བུ་སྐར་མའི་རྒྱལ་པོའི་བདག་པོའི་རྣམ་པར་ཐར་པ་ནི། ཆོས་ཐམས་ཅད་སྒྱུ་མ་ལྟ་བུ་ནམ་མཁའི་རང་བཞིན་ལྟར་དངོས་པོ་མེད་པ། མཚན་ཉིད་མེད་པ་ཞེས་བྱའོ། །ལྷའི་བུ་བློ་དྲི་མ་མེད་པའི་ཟླ་བའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་སྐྱེ་བ་ཀུན་ཀྱང་ལས་ཀྱི་རང་བཞིན་དུ་ཡང་དག་པར་འཇུག་པ་ཞེས་བྱའོ། །ལྷའི་བུ་གཟི་བརྗིད་ཆེན་པོའི་འོད་ཟེར་མཛེས་པའི་རྣམ་པར་ཐར་པ་ནི།་ལྷའི་དགོས་པ་ཐམས་ཅད་ལ་ཐེ་ཚོམ་ཡང་དག་པར་གཅོད་པ་བརྗོད་པ་ལ་འཇུག་པ་ཞེས་བྱའོ། །དེ་ནས་ལྷའི་བུ་ཟླ་བས་སངས་རྒྱས་ཀྱི་མཐུས་ཟླ་བའི་གཞལ་མེད་ཁང་དུ་གཏོགས་པའི་
Ka35a
༄#། །ལྷའི་བུའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འགྲོ་བ་ཐམས་ཅད་ཀུན་ཏུ་འོད་བཀྱེ་ཞིང ། །ཕྱོགས་བཅུའི་ཞིང་རྣམས་ཀུན་ཏུ་སངས་རྒྱས་སྣང ། །མུན་པ་ཆེན་པོས་རྨོངས་པའི་འཇིག་རྟེན་དུ། །བསམ་ཡས་རྒྱ་ཆེན་ཆོས་ཀྱི་སྣང་བ་འགྱོད། །སངས་རྒྱས་ཡུལ་ནི་མི་ཟད་མཐའ་ཡས་ཏེ། །འགྲོ་བ་ཐམས་ཅད་མཚུངས་མེད་བསྐལ་པར་འཇུག་།རང་བྱུང་དེ་དག་སེམས་ཅན་ཀུན་ལ་མངོན། །རྒྱལ་བ་དེ་ལྟར་སྣང་བའི་གཙུག་གིས་མཐོང ། །རྒྱལ་བའི་ཡེ་ཤེས་རྒྱ་ཆེན་དེ་ལ་ལྟོས། །སེམས་ཀྱི་རྒྱ་མཚོ་ཚད་མེད་སྐད་ཅིག་ལ། །ཆོས་ཀྱི་འཁོར་ལོས་ཐམས་ཅད་ཚིམ་པར་མཛད། །ཆུ་བོ་དཔལ་གྱི་རྣམ་ཐར་འདི་ཡིན་ནོ། །འཕགས་པའི་བདེ་བ་མེད་པའི་འཇིག་རྟེན་རྣམས། །མཐའ་ཡས་སྡུག་བསྔལ་ཉམ་ངས་རྨོངས་པ་ལ། །རྒྱལ་བའི་ཆོས་ཉིད་རྣམ་པར་དག་པ་སྟོན། །དགའ་བདེ་སེམས་པས་རྣམ་ཐར་འདི་མཐོང་ངོ ། །རྒྱལ་བའི་ཐུགས་རྗེ་རྣམ་དག་ངོ་མཚར་ཆེ། །སྲིད་པའི་རྒྱུད་དུ་འགྲོ་ལ་ཕན་ཕྱིར་འཁོར། །དགེ་བ་རྣམ་པར་མི་འཇིགས་སྟོན་མཛད་དེ། །ཤིང་གི་མིག་གི་འོད་ཀྱིས་འདི་མཐོང་ངོ ། །རྒྱལ་བའི་ཆོས་ཀྱི་འོད་རྣམས་རབ་བཀྱེ་བ། །འཇིག་རྟེན་ལས་ཀྱི་རང་བཞིན་རྣམ་པར་འབྱེད། །དགེ་དང་མི་དགེའི་ལམ་རྣམས་འཇིག་པ་མེད། །འོད་བཟང་མཐོང་བ་རྣམ་ཐར་འདི་ལ་འཇུག་།འཇིག་རྟེན་ཀུན་ཏུ་རང་བྱུང་ས་ལྟ་བུ། །སེམས་
Ka35b
ཅན་ཐམས་ཅད་བསོད་ནམས་གཞིས་བཟུང་ཞིང ། །ཆོས་ཀྱི་ཕྱོགས་རྣམས་མྱ་ངན་མེད་པ་སྟོན། །སྤྱོད་པ་མི་སྒུལ་ཚུལ་ནི་འདི་ཡིན་ནོ། །ཆོས་དབྱིངས་ཐུག་པ་མེད་པར་རྒྱལ་བས་ཁྱབ། །འགྲོ་དང་མཉམ་པར་བསམ་ཡས་སྐུ་བཀྱེ་སྟེ། །ཆོས་ཀྱི་ཚུལ་ནི་སེམས་ཅན་ཀུན་ལ་སྟོན། །འདི་ཡི་ཚུལ་ལ་གཟི་བརྗིད་བདག་པོ་འཇུག་།ནམ་མཁའི་དངོས་ལྟར་དངོས་མེད་འགྲོ་བ་ན། །གཟུགས་བརྙན་མཉམ་པའི་སངས་རྒྱས་རྣམས་སྣང་བ། །འགྲོ་བ་ཀུན་ལ་ཕན་པའི་དོན་དུ་བྱུང ། །དགེ་བའི་དཔལ་གྱིས་རྣམ་ཐར་འདི་མཐོང་ངོ ། །སངས་རྒྱས་སྐུ་ཡི་སྤུ་རྩེ་ཀུན་ནས་ཀྱང ། །འགྲོ་བ་ཀུན་ལ་ཆོས་སྤྲིན་མ་ལུས་གསུང ། །ཐོས་ནས་དགའ་བ་རྒྱ་ཆེན་རབ་ཏུ་སྐྱེད། །རྣམ་ཐར་འདི་ལ་དག་པའི་སེམས་འཇུག་གོ་།དེ་ལ་ལྷའི་བུ་ཉི་མའི་རྣམ་པར་ཐར་པ་ནི། སེམས་ཅན་གྱི་དགོས་པ་ཐམས་ཅད་ལ་ཕྱི་མའི་མཐར་ཐུག་པའི་བསྐལ་པར་དྲི་མ་མེད་པའི་སྣང་བས་ཕྱོགས་བཅུ་རྒྱས་པར་བྱེད་པའི་རྒྱན་ཅེས་བྱའོ། །ལྷའི་བུ་གཟི་བརྗིད་ཀྱི་འོད་ཟེར་འབར་བའི་མིག་གི་རྣམ་པར་ཐར་པ་ནི། སེམས་ཅན་ཀུན་ལ་དབང་སྒྱུར་བ་རྗེས་སུ་བསྙེགས་པའི་ཡོན་ཏན་ཡོངས་སུ་སྦྱངས་པས་ཤིན་ཏུ་འཕགས་པ་ཞེས་བྱའོ། །ལྷའི་བུ་རི་བོའི་རྒྱལ་མཚན་གྱི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་དབང་སྒྱུར་པའི་ཡོན་ཏན་མཐའ་ཡས་པ་ཡོངས་སུ་སྦྱངས་པས་ཤིན་ཏུ་འཕགས་པ་ཞེས་བྱའོ། །ལྷའི་བུ་རིན་ཆེན་དྲི་མེད་རྨད་དུ་བྱུང་བའི་རྣམ་པར་ཐར་པ་ནི། བརྟུལ་ཞུགས་དང་དཀའ་ཐུབ་
Ka36a
༄#། །ཐམས་ཅད་ལ་བདེ་བར་འཇུག་པ་ཞེས་བྱའོ། །ལྷའི་བུ་ཕྱིར་མི་ལྡོག་པ་རབ་ཏུ་གནོན་པའི་རྣམ་པར་ཐར་པ་ནི། ཉི་མའི་འོད་ཆགས་པ་མེད་པས་ཀུན་ཏུ་རྒྱས་པར་བྱེད་ཅིང་འགྲོ་བ་ཐམས་ཅད་ཀྱི་མདངས་ཡང་དག་པར་འབྱུང་བ་ཞེས་བྱའོ། །ལྷའི་བུ་མེ་ཏོག་གི་ཕྲེང་བའི་འོད་ཀྱི་དཔལ་གྱི་རྣམ་པར་ཐར་པ་ནི། ཉི་མའི་འོད་དྲི་མ་མེད་པས་སེམས་ཅན་གྱི་དགོས་པ་ལ་སྣང་བ་རྒྱ་ཆེན་པོ་དང ། དགའ་བའི་ཤུགས་དང ། མོས་པ་རྒྱ་མཚོ་ཡང་དག་པར་འབྱུང་བ་ཞེས་བྱའོ། །ལྷའི་བུ་འོད་ཀྱི་དཔལ་སྣང་བའི་རྒྱལ་མཚན་གྱི་རྣམ་པར་ཐར་པ་ནི།་འཇིག་རྟེན་ཐམས་ཅད་ཀྱི་འོད་རྣམ་པ་སྣ་ཚོགས་བསོད་ནམས་ཀྱི་ཚོགས་རྣམ་པ་ཐ་དད་པས་ཡང་དག་པར་འགྲུབ་པ་ཞེས་བྱའོ། །ལྷའི་བུ་རིན་ཆེན་གཙུག་ཕུད་རྣམ་པར་སྣང་བའི་རྣམ་པར་ཐར་པ་ནི། རྒྱ་མཚོའི་དབྱིངས་སུ་རིན་པོ་ཆེ་སྣ་ཚོགས་ཐམས་ཅད་འགྲོ་མ་ཞིང་ཡུལ་དུ་མའི་གཟུགས་ཡང་དག་པར་སྟོན་པ་ཞེས་བྱའོ། །ལྷའི་བུ་མིག་ཀུན་ཏུ་སྣང་བའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་མིག་གི་དབང་པོ་ཡོངས་སུ་སྦྱོང་ཞིང་རྣམ་པར་ལྟ་བའི་ཆོས་ཀྱི་དབྱིངས་ཀྱི་སྙིང་པོ་ཞེས་བྱའོ། །ལྷའི་བུ་དཔལ་གྱི་བེའུ་འཛིན་པའི་རྣམ་པར་ཐར་པ་ནི།་ཆུའི་རྒྱུད་ཐམས་ཅད་ཡོངས་སུ་སྦྱོང་ཞིང་རྣམ་པར་འཇིག་པ་མེད་པ་འབྱུང་བ་ཞེས་བྱའོ། །ལྷའི་བུ་སྒོ་ཐམས་ཅད་དུ་སྐྱོབ་པའི་དཔལ་གྱི་འོད་ཀྱི་རྣམ་པར་ཐར་པ་ནི། ཉི་མའི་
Ka36b
གཞལ་མེད་ཁང་གིས་ཕྱོགས་སུ་འཇུག་པ་དང ། སེམས་ཅན་ཐམས་ཅད་ཀྱི་དགོས་པ་ལ་སྣང་བས་ཡོངས་སུ་སྐྱོབ་པ་ཞེས་བྱའོ། །དེ་ནས་ལྷའི་བུ་ཉི་མས་སངས་རྒྱས་ཀྱི་མཐུས་ཉི་མའི་རིས་སུ་གཏོགས་པའི་ལྷའི་བུའི་འཁོར་དུ་གཏོགས་པའི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བདེར་གཤེགས་ཡེ་ཤེས་ཤིན་ཏུ་ཡངས་པའི་འོད། །ཕྱོགས་རྣམས་ཀུན་ཏུ་ཐམས་ཅད་ཞིང་བཀང་ཞིང ། །འགྲོ་བ་ཐམས་ཅད་སངས་རྒྱས་མངོན་བསྟན་ཏེ། །ཐབས་ཀྱི་སྒོ་ནས་སེམས་ཅན་རྣམ་པར་འདུལ། །རྒྱལ་བའི་ཡོན་ཏན་རྒྱ་མཚོ་རྣམ་ཡངས་པ། །བསམ་པ་ཐམས་ཅད་ཡོངས་སུ་བཀང་བསྟན་ཅིང ། །འགྲོ་བ་འདིར་ནི་ཤེས་རབ་མཉམ་མེད་བརྗོད། །གཟི་བརྗིད་འོད་ཀྱིས་རྣམ་ཐར་འདི་མཐོང་ངོ ། །རྒྱལ་བ་སངས་རྒྱས་ཀུན་ཏུ་རབ་འཕགས་པ། །ཕྱོགས་རྣམས་རྒྱས་པར་ཀུན་ནས་མཛེས་ཤིང་སྣང ། །རྒྱལ་བའི་སྐུ་ནི་མི་མཉམ་དཔག་ཏུ་མེད། །རི་རབ་འོད་མཆོག་རྣམ་ཐར་འདི་ཡིན་ནོ། །མཐའ་ཡས་སྲིད་པར་བསྐལ་པ་རྒྱ་མཚོར་ཡང ། །རྒྱལ་བས་འགྲོ་དོན་བརྟུལ་ཞུགས་སྤྱད་པས་ན། །དེ་ཕྱིར་སངས་རྒྱས་འོད་ནི་ནམ་མཁའ་བཞིན། །ཟླ་བའི་དཔལ་གྱིས་རྒྱལ་བའི་སྐུ་མཐོང་ངོ ། ། རྒྱལ་བའི་གསུང་མཆོག་ཆགས་མེད་རྣམ་གྲོལ་བས། །ཕྱོགས་དང་ཞིང་རྣམས་ཐམས་ཅད་མ་ལུས་བརྒྱན། །འགྲོ་བར་ཆོས་ཀྱི་རོ་རྣམས་བསགས་པ་ཡི། །རྒྱུ་འདི་བརྩོན་འགྲུས་བཟང་པོས་རབ་
Ka37a
༄#། །ཏུ་ཤེས། །འོད་ཀྱི་དྲ་བ་བསམ་ཡས་བཏང་བས་ན། །ཕྱོགས་རྣམས་ཀུན་ཏུ་སེམས་ཅན་རྣམ་པར་སྦྱོང ། །མོས་པ་རྒྱ་ཆེན་ཡངས་པ་རབ་ཏུ་བསྐྱེད། །ཕྲེང་བ་སྣང་བའི་དཔལ་གྱི་རྣམ་ཐར་ཏོ། །འགྲོ་བ་དག་ན་ཇི་སྙེད་འོད་ཡོད་པ། །དེ་དག་རྒྱལ་བའི་སྤུ་གཅིག་དཔེར་མི་རུང ། །སངས་རྒྱས་འོད་རྣམས་དེ་ལྟར་བསམ་མི་ཁྱབ། །འདི་ནི་སྣང་བའི་འོད་ཀྱི་རྣམ་ཐར་ཏོ། །རྒྱལ་བ་ཀུན་གྱི་ཆོས་ཉིད་འདི་འདྲ་སྟེ། །ཐམས་ཅད་ཕྱོགས་སུ་བྱང་ཆུབ་ཤིང་དབང་དྲུང ། །ལམ་ངན་སོང་ལ་ལམ་རྣམས་མངོན་དུ་སྟོན། །གཙུག་ཕུད་སྣ་ཚོགས་རྣམ་པར་སྣང་བས་མཐོང ། །འགྲོ་བ་གཏི་མུག་མུན་པར་ནུབ་གྱུར་པས། །སྡུག་བསྔལ་ཅན་ལ་རྒྱལ་བ་མིག་སྐྱེས་ཤིང ། །དེ་དག་ཡེ་ཤེས་སྒྲོན་མས་རབ་ཏུ་བསྟན། །རྣམ་ཐར་འདི་ནི་མིག་བཟང་སྣང་བས་མཐོང ། །ཐམས་ཅད་ཚུལ་གྱིས་རྣམ་ཐར་རང་བྱུང་བས། །གང་དུ་གང་ཚེ་མཆོད་པ་གཟིགས་པ་ན། །ཐར་པའི་འབྲས་བུ་རིམ་གྱིས་རབ་ཏུ་སྟོན། །འདི་ནི་སྣང་བའི་དཔལ་གྱི་ཚུལ་དང་ས། །ཆོས་རྣམས་གཅིག་གི་སྒོ་ནས་མཐའ་ཡས་པའི། །བསྐལ་པ་སྟོང་དུ་མི་མགོན་རབ་ཏུ་སྣང ། །ཆོས་ཀྱི་དོན་ཡངས་ཕྱོགས་རྣམས་ཀུན་ཏུ་སྟོན། །འདི་ནི་ཀུན་ཏུ་དཔལ་གྱི་རྣམ་ཐར་ཏོ། །དེ་ལ་དྲི་ཟའི་རྒྱལ་པོ་གནས་སྲུང་པོའི་རྣམ་པར་ཐར་པ་ནི། ཀུན་ཏུ་རྩེ་བའི་ཐབས་ཐམས་ཅད་ཀྱིས་སེམས་ཅན་སྡུད་པའི་སྦྱོར་བ་ཞེས་བྱའོ། །དྲི་ཟའི་
Ka37b
དབང་པོ་ཤིང་མི་འམ་ཅིའི་འོད་ཀྱི་རྣམ་པར་ཐར་པ་ནི། ཆགས་པ་ཐམས་ཅད་ཀྱི་ཡོན་ཏན་རྣམ་པར་བརྒྱན་པས་ཀུན་ཏུ་སྣང་བ་ཞེས་བྱའོ། །དྲི་ཟའི་དབང་པོ་མིག་གཙང་མ་དགའ་བ་རབ་ཏུ་སྐྱེ་བའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་མྱ་ངན་རྣམ་པར་བཟློག་པས་དགའ་བའི་སྙིང་པོ་ཞེས་བྱའོ། །དྲི་ཟའི་དབང་པོ་མེ་ཏོག་དང་ཤིང་ཤིན་ཏུ་རྒྱས་པའི་ཅོད་པན་གྱི་རྣམ་པར་ཐར་པ་ནི། འགྲོ་བའི་ལྟ་བ་དང ། ཉོན་མོངས་པ་ཐམས་ཅད་རྣམ་པར་འཇིལ་བ་ཞེས་བྱའོ། །དྲི་ཟའི་དབང་པོ་དགའ་བས་སྤྱོད་པ་ཀུན་ཏུ་སྒྲོག་པའི་རྣམ་པར་ཐར་པ་ནི། སེམས་ཅན་ཐམས་ཅད་དབུགས་དབྱུང་བ་ལ་ཁ་ན་མ་ཐོ་བ་མེད་པའི་སྤྲིན་གྱི་འོད་ཅེས་བྱའོ། །དྲི་ཟའི་དབང་པོ་རབ་ཏུ་དགའ་བ་རྒྱུན་དུ་གནས་པའི་མིག་བཟང་པོའི་རྣམ་པར་ཐར་པ་ནི། དགའ་བ་ཐམས་ཅད་རབ་ཏུ་གནས་པ་ཡངས་པ་ལ་མོས་པའི་སྙིང་པོ་ཞེས་བྱའོ། །དྲི་ཟའི་དབང་པོ་ཡིད་དུ་འོང་བའི་དབྱངས་སེངྒེའི་རྒྱལ་མཚན་གྱི་རྣམ་པར་ཐར་པ་ནི། རིན་པོ་ཆེ་དགྲམ་པས་ཕྱོགས་ཐམས་ཅད་དུ་ཁྱབ་པ་ཞེས་བྱའོ། །དྲི་ཟའི་དབང་པོ་འོད་ཟེར་ཀུན་ཏུ་འགྱེད་པའི་འོད་ཀྱི་རྣམ་པར་ཐར་པ་ནི། དགེ་བའི་ལུས་ཐམས་ཅད་ཡང་དག་པར་བསྟན་པས་དགའ་བ་ཤིན་ཏུ་རྒྱས་པའི་འོད་ཅེས་བྱའོ། །དྲི་ཟའི་དབང་པོ་རྡོ་རྗེའི་ཤིང་གི་ཡལ་གའི་རྒྱལ་མཚན་གྱི་རྣམ་པར་ཐར་པ་ནི། ཤིང་ཐམས་ཅད་ཀྱི་མདངས་འབྱུང་བས་རབ་ཏུ་དགའ་བའི་མིག་ཀུན་ཏུ་སྣང་བ་ཞེས་བྱའོ། །དྲི་ཟའི་
Ka38a
༄#། །དབང་པོ་རྒྱན་ཐམས་ཅད་ལ་དགའ་བའི་རང་བཞིན་གྱི་ཚུལ་སྟོན་པའི་རྣམ་པར་ཐར་པ་ནི། སངས་རྒྱས་ཀྱི་ཡུལ་ཐམས་ཅད་རྣམ་པར་དཔྱོད་ཅིང ། སེམས་ཅན་གྱི་སྒོ་རབ་ཏུ་བརྗོད་པ་ཞེས་བྱའོ། །དེ་ནས་དྲི་ཟའི་དབང་པོ་གནས་སྲུང་པོས་སངས་རྒྱས་ཀྱི་མཐུས་དྲི་ཟའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྤྱོད་ཡུལ་མཐའ་ཡས་སྒོ་ཅན་ཡང ། །འགྲོ་བ་ཀུན་གྱིས་འཇུག་པར་ནུས་པ་མིན། །བདེར་གཤེགས་ནམ་མཁའི་རང་བཞིན་དྲི་མ་མེད། ། རྒྱལ་བ་འགྲོ་བ་ཀུན་ཏུ་ལམ་ཡང་སྟོན། །རྒྱལ་བའི་ཡོན་ཏན་རྒྱ་མཚོ་ཚད་མེད་དེ། །བ་སྤུའི་ཁུང་བུ་ཀུན་ནའང་ཤིན་ཏུ་ཡངས། །འགྲོ་བ་ཀུན་ལ་ཕན་དང་བདེ་དོན་མཛད། །ཡིད་འོང་ཤིང་གི་འོད་ནི་འདི་སྟོན་ཏོ། །འགྲོ་བའི་དོན་ནི་རྒྱ་མཚོ་ཡངས་མང་དང ། །སྡུག་བསྔལ་མ་ལུས་རྒྱལ་བས་ཟློག་པར་མཛད། །ཐབས་དང་ཐུགས་རྗེ་རྣམ་པ་སྣ་ཚོགས་མངའ། །དགེ་བའི་མིག་ནི་རྣམ་ཐར་འདི་སྟོན་ཏོ། །ཕྱོགས་རྣམས་རྒྱ་མཚོ་མཐའ་ཡས་ཞིང་གི་རྣམས། །ཀུན་ཏུ་རྒྱལ་བའི་འོད་རབ་སྣང་བར་འཆར། །སེམས་ཅན་ལྟ་བའི་དྲི་མ་རྣམ་པར་སྦྱོང ། །མེ་ཏོག་ཤིང་གི་གཙུག་ཕུད་ཅོད་པན་ཚུལ། །སྔོན་ཆད་བསྐལ་པ་རྒྱ་མཚོ་རབ་མང་བར། །བྱམས་པའི་ཚུལ་ཡངས་ཡོངས་སུ་བསྒོམས་པས་ན། །རྒྱལ་བ་འགྲོ་བ་ཀུན་གྱི་དབུགས་ཀྱང་འབྱིན། །ཀུན་ཏུ་སྒྲ་
Ka38b
དབྱངས་འདི་ཡི་ཚུལ་ལ་འཇུག་།རྒྱལ་བ་མཐོང་བས་དགའ་བ་ཀུན་དགེ་དང ། །འགྲོ་བ་འདིར་ནི་མི་ཟད་བདེ་བ་འབྱུང ། །ཐར་པའི་འབྲས་བུ་རྒྱུ་རྣམས་རིམ་གྱིས་སྟོན། །མུ་ཏིག་ཅོད་པན་རྣམ་ཐར་འདི་སྟོན་ཏོ། །སྒྲིབ་དང་རབ་རིབ་གཏི་མུག་སྟུག་པོར་ནི། །སེམས་ཅན་འཁོར་ཚེ་རྟག་ཏུ་ཤིན་ཏུ་རྨོངས། །དེ་ལ་རྒྱལ་བ་ཆོས་ཉིད་ཡངས་པ་སྟོན། །སེངྒེའི་རྒྱལ་མཚན་འདི་ལ་རབ་ཏུ་འཇུག ། འགྲོ་བ་ཀུན་དང་མཉམ་པ་མཐའ་ཡས་ཀྱང ། །བདེར་གཤེགས་གཟུགས་རྣམས་རབ་ཏུ་ཡངས་པ་སྟོན། །འགྲོ་བར་ཐབས་རྣམས་སྣ་ཚོགས་སྒོ་ནས་སྣང ། །དེ་ལྟར་སྒྲ་དབྱངས་སྙན་པས་བདེར་གཤེགས་མཐོང ། །ཐམས་ཅད་མཁྱེན་པའི་ཚུལ་གྱི་ཕྱོགས་མཐའ་ཡས། །སེམས་ཅན་དག་ལ་རྒྱས་པར་རྒྱལ་བས་བསྟན། །བྱང་ཆུབ་སྤྱོད་མཆོག་འཇུག་པའི་ཚུལ་ཡིན་ཏེ། །རྡོ་རྗེ་ཤིང་གི་རྒྱལ་མཚན་རྣམ་པར་སེམས། །སྐད་ཅིག་གཅིག་གིས་བསྐལ་པ་བརྒྱ་མང་བ། །སངས་རྒྱས་སྟོན་ཀྱང་འཕོ་བ་ཡོད་མེད་དེ། །སེམས་ཅན་རྣམས་ཀྱི་བདེ་བ་ཐམས་ཅད་བསྐྱེད། །དགའ་བ་མཐོང་བའི་རྣམ་ཐར་ཚུལ་འདི་ཡིན། །དེ་ལ་གྲུལ་བུམ་གྱི་དབང་པོ་འཕགས་སྐྱེས་པོའི་རྣམ་པར་ཐར་པ་ནི། མདུད་པར་འཛིན་པ་བྱུང་བ་ཐམས་ཅད་རབ་ཏུ་ཞི་བར་བྱེད་པའི་འོད་ཅེས་བྱའོ། ། གྲུལ་བུམ་གྱི་དབང་པོ་ཀླུ་བདག་གི་རྣམ་པར་ཐར་པ་ནི། སྒོ་མཐའ་ཡས་པར་སྤྱོད་པ་རྒྱ་མཚོ་ལ་སྤྱོད་པ་ཞེས་བྱའོ། །གྲུལ་བུམ་གྱི་དབང་པོ་ལེགས་པར་སྤྱད་པའི་རྒྱལ་མཚན་གྱི་རྣམ་པར་
Ka39a
༄#། །ཐར་པ་ནི། རྒྱུད་ཐམས་ཅད་དུ་འཇིག་རྟེན་གྱི་བསམ་པ་རྒྱ་མཚོ་སྙེད་ཀྱི་སྒོ་ཞེས་བྱའོ། །གྲུལ་བུམ་གྱི་དབང་པོ་ཕན་པར་སྤྱོད་པར་འཕར་བའི་རྣམ་པར་ཐར་པ་ནི། སྣང་བ་དྲི་མ་མེད་པའི་བྱ་བ་ལ་ཀུན་ནས་སྤྱོད་པར་གནས་པ་ཞེས་བྱའོ། །གྲུལ་བུམ་གྱི་དབང་པོ་འཇིགས་པ་ལས་སྒྲོལ་བའི་རྣམ་པར་ཐར་པ་ནི། འགྲོ་བ་ཐམས་ཅད་གདོན་པའི་ལམ་འཇིགས་པ་མེད་པའི་རྒྱན་ཅེས་བྱའོ། །གྲུལ་བུམ་གྱི་དབང་པོ་རྩལ་སྣ་ཚོགས་བཟང་པོའི་རྣམ་པར་ཐར་པ་ནི། འགྲོ་བ་མཐའ་ཡས་པའི་སྲེད་པ་རྒྱ་མཚོས་ཡོངས་སུ་གདུང་བ་ཞི་བར་བྱེད་པ་ཞེས་བྱའོ། །གྲུལ་བུམ་གྱི་དབང་པོ་རི་རབ་ལེགས་པར་བྱུང་བའི་རྣམ་པར་ཐར་པ་ནི། འགྲོ་བ་རྒྱུད་ཐམས་ཅད་དུ་སྣང་བའི་སྤྲིན་ཡང་དག་པར་འབྱུང་བ་ཞེས་བྱའོ། །གྲུལ་བུམ་གྱི་དབང་པོ་སྡེ་དཔའ་བའི་རྣམ་པར་ཐར་པ་ནི། ཀུན་ཏུ་སྣང་བས་སྒྲིབ་པའི་རི་ཡང་དག་པར་འཇོམས་པ་ཞེས་བྱའོ། །གྲུལ་བུམ་གྱི་དབང་པོ་དགེ་བའི་མིག་གི་འོད་ཟེར་མཐའ་ཡས་པའི་རྣམ་པར་ཐར་པ་ནི། སྙིང་རྗེ་ཆེན་པོ་ཕྱིར་མི་ལྡོག་པའི་སྙིང་པོ་འབྱུང་བ་ཞེས་བྱའོ། །གྲུལ་བུམ་གྱི་དབང་པོ་ལྷ་དང་ལྷ་མ་ཡིན་སྒོ་མཐའ་ཡས་པའི་མིག་གི་རྣམ་པར་ཐར་པ་ནི།་རྒྱུད་ཀུན་ཏུ་ལུས་ཡང་དག་པར་སྟོན་པར་འགྲོ་བའི་ཡུལ་ཞེས་བྱའོ། །དེ་ནས་གྲུལ་བུམ་གྱི་དབང་པོ་འཕགས་སྐྱེས་པོས་སངས་རྒྱས་ཀྱི་མཐུས་གྲུལ་བུམ་གྱི་འཁོར་གྱི་དཀྱིལ་
Ka39b
འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་མགོན་པོ་བཟོད་པའི་སྟོབས་དང་ལྡན། །འགྲོ་ལ་ཕན་དོན་བསྐལ་པ་བསམ་ཡས་སྤྱོད། །ང་རྒྱལ་དྲེགས་མྱོས་སྤངས་པས་འཇིག་རྟེན་ཁམས། །ཀུན་ན་རྒྱལ་བའི་སྐུ་གསལ་རབ་ཏུ་མཛེས། །སྔོན་ཆད་རྒྱལ་བས་སྤྱོད་པ་རྒྱ་མཚོ་དག་།སྤྱད་དེ་ཐབས་མང་ཚོགས་པས་ཕན་བསྐྱེད་ནས། །ཕྱོགས་བཅུར་མཐའ་ཡས་སེམས་ཅན་སྨིན་པར་མཛད། །རྣམ་ཐར་མཐའ་ཡས་འདི་ནི་ཀླུ་བདག་གིའོ། །སངས་རྒྱས་ཡེ་ཤེས་ཡངས་པ་འགྲོ་བའི་མགོན། །དེས་ནི་སེམས་ཅན་བསམ་པ་ཀུན་ཀྱང་གསལ། །སྣ་ཚོགས་འཕྲུལ་སྒོས་སེམས་ཅན་རྣམ་པར་འདུལ། །རྒྱལ་བ་མཐོང་བས་སྣ་ཚོགས་རྒྱལ་མཚན་དགའ། །སངས་རྒྱས་རྫུ་འཕྲུལ་ཡུལ་བདག་གཟུགས་བརྙན་འདྲ། །འཇིག་རྟེན་ཀུན་ན་ཕྱི་མཐའི་བསྐལ་པར་གནས། །ཆོས་ཀྱི་འཁོར་ལོ་མཁའ་འདྲ་ཡང་དག་དངོས། །དེ་ནི་ཕྱིན་སྤྱོད་རྒྱུ་བས་མཐོང་བ་ཡིན། །མི་བཟད་རབ་རིབ་བསྒྲིབས་པའི་འཇིག་རྟེན་དུ། །རྒྱལ་བའི་འོད་སྟོན་རྣམ་ཐར་ལམ་དགེ་སྟོན། །མགོན་དང་སྐྱབས་གྱུར་སྡུག་བསྔལ་ཐམས་ཅད་སྤོང ། །འཇིགས་ལས་སྒྲོལ་བས་རྣམ་ཐར་འདི་མཐོང་ངོ ། །སྲེད་པ་རྒྱ་མཚོས་གདུངས་འགྲོ་སྡུག་བསྔལ་བ། །རྒྱལ་བའི་ཡེ་ཤེས་འོད་ཀྱིས་མ་ལུས་ཞི། །སྦྱངས་ཤིང་རྒྱལ་བ་སངས་རྒྱས་ཆོས་ཉིད་སྟོན། །སྣ་ཚོགས་ཁྱིམ་ནི་རྣམ་ཐར་འདི་ལ་འཇུག་།འགྲོ་བ་འབྱམས་ཀླས་ཀུན་
Ka40a
༄#། །ན་སངས་རྒྱས་སྐུ། །ཐབས་སྒོ་ཚོགས་པས་སེམས་ཅན་འདུལ་བ་སྣང ། །ཆོས་སྤྲིན་ཆར་འབེབས་གསུང་གི་འབྲུག་སྒྲ་སྒྲོག་།རྣམ་ཐར་འདི་ནི་རི་རབ་བློ་གྲོས་ཀྱིའོ། །སངས་རྒྱས་འོད་ནི་དྲི་མེད་འགྲོ་ཀུན་ཏུ། །དོན་ཡོད་འགྲོ་བའི་སྒྲིབ་ཀུན་ཀུན་ནས་སེལ། །སངས་རྒྱས་ཡོན་ཏན་སྣང་མཛད་སྒྲ་ཡང་འབྱིན། །རྣམ་ཐར་མཐའ་ཡས་ཚུལ་འདི་དཔའ་སྡེས་མཐོང ། །བསྐལ་པ་སྔ་ཚེ་ཐུགས་རྗེའི་སྒོ་མང་བ། །འགྲོ་ཀུན་ཕན་བདེའི་དོན་དུ་རྒྱལ་བས་བསྒོམས། །འབྱམས་ཀླས་སྣ་ཚོགས་ཐབས་ཀྱིས་སྡུག་བསྔལ་བསལ། །དེ་ནི་མཐའ་ཡས་དགེ་བའི་ཟེར་གྱིས་མཐོང ། །རྒྱལ་བའི་སྐུ་ནི་མཐའ་ཡས་ཀུན་ཏུ་རྒྱུ། །འཇིག་རྟེན་ཀུན་ཏུའང་བྱོན་དང་བཞུད་མི་མངའ། །ཀུན་ནའང་རང་བྱུང་རྣམ་པར་འཕྲུལ་བ་སྣང ། །དེ་ནི་ལྷ་དབང་མཐའ་ཡས་སྒོ་ཡིས་མཐོང ། །དེ་ལ་ཀླུའི་དབང་པོ་མིག་མི་བཟང་གི་རྣམ་པར་ཐར་པ་ནི། ཀླུའི་འགྲོ་བའི་རྒྱུར་ཐམས་ཅད་ཀྱི་འབར་བ་ཞི་བར་བྱ་བས་ཡོངས་སུ་སྐྱོབ་པ་ཞེས་བྱའོ། ཀླུའི་རྒྱལ་པོ་རྒྱ་མཚོའི་རྣམ་པར་ཐར་པ་ནི། སེམས་སྐད་ཅིག་གིས་བསམ་གྱིས་མི་ཁྱབ་པའི་སེམས་ཅན་དང་ཀླུ་རབ་ཏུ་ཞི་བར་བྱ་བའི་ལུས་དང་ཁ་དོག་རབ་ཏུ་སྟོན་པ་ཞེས་བྱའོ། ཀླུའི་རྒྱལ་པོ་སྤྲིན་སྒྲ་སྣ་ཚོགས་ཀྱི་རྒྱལ་མཚན་གྱི་རྣམ་པར་ཐར་པ་ནི། སྲིད་པའི་རྒྱུད་ཐམས་ཅད་དུ་མིང་གི་འཁོར་ལོ་རྒྱ་མཚོ་མཐའ་ཡས་པ་དགེ་བའི་ང་རོར་སྒྲོག་པ་ཞེས་བྱའོ། །
Ka40b
ཀླུའི་རྒྱལ་པོ་འོད་འཕྲོ་བའི་སྒོ་རྒྱ་མཚོ་རབ་ཏུ་སྣང་བའི་རྣམ་པར་ཐར་པ་ནི། འཇིག་རྟེན་གྱི་ཁམས་རབ་ཏུ་དགོད་ཅིང་རྣམ་པར་དབྱེ་བ་དང ། སངས་རྒྱས་ཀྱི་ཞིང་མཐའ་ཡས་པ་ལ་དམིགས་པ་ཡང་དག་པར་སྟོན་པའི་སྦྱོར་བ་ཞེས་བྱའོ། །ཀླུའི་རྒྱལ་པོ་ཀུན་ནས་རིའི་སྤྲིན་གྱི་རྒྱལ་མཚན་གྱི་རྣམ་པར་ཐར་པ་ནི། འགྲོ་བ་ཐམས་ཅད་ལ་བསོད་ནམས་རྒྱ་མཚོ་ཡང་དག་པར་བསྟན་པའི་དགའ་བའི་ཤུགས་ཤིན་ཏུ་ཡངས་པ་ཞེས་བྱའོ། །ཀླུའི་རྒྱལ་པོ་འཇོག་པོའི་རྣམ་པར་ཐར་པ་ནི། འཇིགས་པའི་སྒྲ་སྐད་ཐམས་ཅད་ཡོངས་སུ་སྐེམ་པའི་སྐྱབས་དྲི་མ་མེད་པ་ཞེས་བྱའོ། །ཀླུའི་རྒྱལ་པོ་མཐའ་ཡས་པར་འགྲོ་བའི་རྣམ་པར་ཐར་པ་ནི། གཟུགས་ཀྱི་སྤྲིན་རྒྱ་ཆེན་པོ་ཤིན་ཏུ་སྟོན་ཅིང་བསྐལ་པར་བྱིན་གྱིས་རློབ་པའི་བརྩོན་འགྲུས་ཞེས་བྱའོ། །ཀླུའི་རྒྱལ་པོ་མཛོད་སྤུའི་གཟི་བརྗིད་དྲི་མ་མེད་པའི་ཤུགས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་དགའ་བའི་ཤུགས་ཡངས་པ་དང་ཡང་དག་པར་མོས་པ་རྒྱ་མཚོ་ཤིན་ཏུ་འབྱུང་བ་ཞེས་བྱའོ། །ཀླུའི་རྒྱལ་པོ་ཀུན་ཏུ་སྤྱོད་པ་རྒྱ་ཆེན་པོའི་དབྱངས་ཀྱི་རྣམ་པར་ཐར་པ་ནི། སྒྲ་ཐམས་ཅད་འབྱུང་བ་ལ་ཡང་དག་པར་གཞོལ་ཞིང་ཡིད་དུ་འོང་བས་ཐོགས་པ་མེད་པར་ཀུན་ཏུ་རྒྱས་པར་བྱེད་པ་ཞེས་བྱའོ། །ཀླུའི་རྒྱལ་པོ་མ་དྲོས་པའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྡུག་བསྔལ་རྒྱ་མཚོ་ལ་སྙིང་རྗེའི་སྒོ་ཀུན་ནས་སྤྲིན་གྱིས་འགེངས་ཤིང་རབ་ཏུ་ཞི་བ་
Ka41a
༄#། །དང་ཡོངས་སུ་དག་པར་བྱེད་པ་ཞེས་བྱའོ། །དེ་ནས་ཀླུའི་རྒྱལ་པོ་ཆེན་པོ་མིག་མི་བཟང་གིས་སངས་རྒྱས་ཀྱི་མཐུས་ཀླུའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བ་ཀུན་གྱི་ཆོས་ཉིད་དེ་དག་ལྟོས། །དྲང་སྲོང་ཆེན་པོ་འགྲོ་བ་ཀུན་གྱི་སྐྱབས། །མི་བཟད་ཀླུ་ཡི་རྒྱུད་དུ་ལྷུང་བ་རྣམས། །བྱམས་པའི་སྟོབས་ཀྱིས་རིམ་གྱིས་འདོན་པ་མཛད། །འགྲོ་བ་ཀུན་སྙེད་གཟུགས་ཀྱི་སྒོ་རྣམས་ཀྱང ། །རྒྱལ་བས་སྤུ་གཅིག་རྩེ་ལ་མངོན་པར་བསྟན། །ཐམས་ཅད་རྡུལ་ལ་འཕྲུལ་གྱིས་མངོན་པར་འཕྲུལ། །རྒྱལ་བའི་རྣམ་ཐར་རྒྱ་མཚོའི་ཀླུ་ཡིས་མཐོང ། །རྒྱལ་བ་དེ་ཡི་རྫུ་འཕྲུལ་མཐའ་ཡས་ཏེ། །སངས་རྒྱས་མཚན་ཀྱང་འགྲོ་སྙེད་རྒྱ་མཚོ་འོ། །དེ་དག་སེམས་ཅན་བསམ་པ་ཇི་བཞིན་ཉན། །སྤྲིན་སྒྲའི་རྒྱལ་མཚན་དེ་འདྲའི་རྣམ་ཐར་ལྡན། །ཁྲོ་བ་རྒྱ་མཚོར་འགྲོ་བ་འདི་དག་ཀུན། །བསྒྲིབས་ཤིང་གཡོགས་པའང་ཁྲོ་བའི་རྒྱ་མཚོར་ཏེ། །དེ་ལ་རང་བྱུང་བྱམས་དང་ཐུགས་རྗེས་འཛིན། །འདི་ནི་འོད་འཕྲོ་སྒོ་ཡི་ཀླུ་ཡིས་མཐོང ། །འགྲོ་བ་ཀུན་གྱི་བསོད་ནམས་མཐུ་ཡི་རྣམས། །སངས་རྒྱས་སྤུ་གཅིག་རྩེ་ལ་མངོན་པར་སྟོན། །བསོད་ནམས་འཇུག་པ་རྒྱ་མཚོ་ཀུན་ཀྱང་བསྟན། །འདི་ནི་རི་སྤྲིན་རྒྱལ་མཚན་ཀླུ་ཡིས་མཐོང ། །འཇིགས་པ་ཆེས་མནར་སེམས་ཅན་སྡུག་
Ka41b
བསྔལ་བ། །རྒྱལ་བའི་འོད་ཆེན་ཤིན་ཏུ་ཡངས་པས་བསྐྱབས། །བ་སྤུའི་སྒོ་ནས་ཡིད་འོང་སྒྲ་ཡང་འབྱུང ། །རྣམ་ཐར་འདི་ནི་འཇོག་པོ་ཀླུ་ཡིས་མཐོང ། །དུས་གསུམ་གཤེགས་པ་རྒྱལ་བ་ཐམས་ཅད་ཀྱི། །སྐུ་ནི་སངས་རྒྱས་ཉིད་ཀྱི་སྐུ་ལ་བསྟན། །དེ་བཞིན་བསྐལ་པ་བརྒྱུད་པའི་ཞིང་མང་ཡང ། །མཐའ་ཡས་གོམས་པའི་ཀླུ་ཡིས་དེ་མཐོང་ངོ ། །རྒྱལ་བའི་སྤུ་གཅིག་རྫུ་འཕྲུལ་མཐའ་ཡས་བཀང ། །ཞིང་མང་མཐའ་ཡས་ཀུན་ཀྱང་དེར་ཞུགས་ཏེ། །དེ་ན་བཞུགས་པར་རྒྱལ་བ་འཁོར་གྱིས་མཐོང ། །རྣམ་ཐར་དེ་ནི་འོད་འབར་ཀླུ་ཡི་འོ། །ཇི་སྙེད་རྒྱལ་བ་རྒྱ་མཚོ་མཆོད་བྱས་པའི། །སྔོན་གྱི་རྒྱལ་བའི་ཆོས་ཉིད་རབ་མཐོང་ཞིང ། །དེ་ལ་དགའ་བ་རྒྱ་མཚོ་རྣམ་པར་བསྐྱེད། །ཤུགས་ལམ་ཀླུ་ནི་འདི་ལ་རབ་ཏུ་འཇུག། རང་བྱུང་གསུང་གི་ཡན་ལག་ཐམས་ཅད་ཀྱིས། །འགྲོ་བ་ཐམས་ཅད་ཆོས་ཀྱིས་ངོམས་པར་མཛད། །རྒྱལ་བའི་གསུང་ནི་ཞི་ཞིང་དགའ་འགྱུར་བ། །དེ་ནི་ཀུན་ཏུ་སྤྱོད་པའི་ཀླུས་ཐོས་སོ། །སྲིད་པ་ཀུན་ཏུ་སྡུག་བསྔལ་གཟིར་མཐོང་ནས། །ཉོན་མོངས་ལས་ཀྱིས་འཁོར་ཞིང་མགོན་མེད་པ། །སངས་རྒྱས་ཐུགས་རྗེ་ཆེན་པོས་རབ་ཏུ་འགྲེལ། །རྣམ་ཐར་འདི་ནི་མ་དྲོས་ཀླུས་མཐོང་ངོ ། ། བམ་པོ་གསུམ་པ། དེ་ལ་རྒྱལ་པོ་ཆེན་པོ་ངལ་བསོ་པོའི་རྣམ་པར་ཐར་པ་ནི། དགའ་བའི་སྒོ་རྣམ་པར་ལྟ་བའི་ཡུལ་གྱི་རྒྱུད་ཀྱིས་ཕན་པར་སྦྱོར་བ་ཞེས་བྱའོ། །གནོད་སྦྱིན་གྱི་དབང་
Ka42a
༄#། །པོ་དབྱངས་ཆེན་དབང་ཕྱུག་གི་རྣམ་པར་ཐར་པ་ནི། སྒོ་ཐམས་ཅད་ལ་དབང་བྱེད་པས་རྣམ་པར་ལྟ་ཞིང ། སེམས་ཅན་ཕན་པར་སྦྱོར་བས་ཡོངས་སུ་སྐྱོབ་པ་ཞེས་བྱའོ། །གནོད་སྦྱིན་གྱི་དབང་པོ་རྩལ་ཤིན་ཏུ་གཏུམ་པའི་མཚོན་ཆའི་རྣམ་པར་ཐར་པ་ནི། གཏུམ་པ་དང་དྲག་ཤུལ་གྱི་རྒྱུད་ལས་སྲུང་བ་ཀུན་ནས་མང་པོ་འབྱུང་བ་ཞེས་བྱའོ། །གནོད་སྦྱིན་གྱི་དབང་པོ་བློ་གྲོས་ཆེན་པོའི་རྣམ་པར་ཐར་པ་ནི། འཕགས་པའི་ཡོན་ཏན་གྱི་དཀྱིལ་འཁོར་ཐམས་ཅད་ཀྱི་རྗེས་སུ་སོང་བ་ལ་རྣམ་པར་བལྟ་བས་དགའ་བ་དང ། མོས་པར་སྦྱོར་བ་ཞེས་བྱའོ། །གནོད་སྦྱིན་གྱི་དབང་པོ་མིག་འོད་འཕྲོ་བའི་བདག་པོའི་རྣམ་པར་ཐར་པ་ནི། སེམས་ཅན་ཐམས་ཅད་ལ་ཤེས་རབ་དང་ཡེ་ཤེས་དང་སྙིང་རྗེས་རྣམ་པར་ལྟ་བ་ཞེས་བྱའོ། །གནོད་སྦྱིན་གྱི་དབང་པོ་མིག་རྡོ་རྗེ་ལྟ་བརྟན་པའི་རྣམ་པར་ཐར་པ་ནི། འགྲོ་བ་ཐམས་ཅད་ལ་ཕན་པ་དང་བདེ་བ་སྣ་ཚོགས་སུ་སྦྱོར་བ་དང་སྲུང་བ་མངོན་པར་སྒྲུབ་པ་ཞེས་བྱའོ། །གནོད་སྦྱིན་གྱི་དབང་པོ་སྡེ་མཆོག་དཔའ་བའི་རྣམ་པར་ཐར་པ་ནི། ཆོས་ཐམས་ཅད་ཀྱི་དོན་གྱི་དབྱིངས་ལ་ཡང་དག་པར་འཇུག་པའི་མཐུ་ཞེས་བྱའོ། །གནོད་སྦྱིན་གྱི་དབང་པོ་སྡེའི་རྒྱན་ཆེན་པོས་རབ་ཏུ་གནོན་པའི་རྣམ་པར་ཐར་པ་ནི། འགྲོ་བ་ཐམས་ཅད་ལམ་ལ་དགོད་པར་གཏི་མུག་མེད་པས་བསྲུང་བ་ཕུན་
Ka42b
སུམ་ཚོགས་པ་ཞེས་བྱའོ། །གནོད་སྦྱིན་གྱི་དབང་པོ་དགེ་བའི་ཚོགས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བསོད་ནམས་ཀྱི་དཀྱིལ་འཁོར་རྣམ་པར་སྤེལ་བས་ཀུན་ཏུ་དགའ་བ་མྱོང་བ་ཞེས་བྱའོ། །གནོད་སྦྱིན་གྱི་དབང་པོ་རི་བོའི་སྟོབས་རབ་ཏུ་འཇོམས་པའི་རྣམ་པར་ཐར་པ་ནི། སངས་རྒྱས་ཀྱི་སྟོབས་ཡང་དག་པར་འབྱུང་བའི་རྗེས་ཡེ་ཤེས་ཀྱི་འོད་ཅེས་བྱའོ། །དེ་ནས་རྒྱལ་པོ་ཆེན་པོ་ངལ་བསོ་པོས་སངས་རྒྱས་ཀྱི་མཐུས་གནོད་སྦྱིན་གྱི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ལྷ་དབང་སེམས་ཅན་མ་རུངས་གང་དག་གིས། །བསྐལ་པ་བརྒྱ་མང་སངས་རྒྱས་མི་མཐོང་ཞིང ། །སྲིད་པ་དག་ན་འཁོར་ཞིང་སྡུག་བསྔལ་བ། །དེ་དག་ཡོངས་སུ་དགྲོལ་བར་སངས་རྒྱས་བྱུང ། །སངས་རྒྱས་སེམས་ཅན་ཕན་དང་བསྐྱབ་པའི་ཕྱིར། །འགྲོ་བ་ཀུན་ལ་མངོན་པར་ཀུན་ན་བཞུགས། །ཉམ་ང་འགྲོ་བའི་འཁོར་ལོ་དག་ནས་འདོན། །འདི་ལ་དབྱངས་ཀྱི་དབང་ཕྱུག་གནོད་སྦྱིན་འཇུག་།མི་བཟད་ལས་ཀྱིས་བསྒྲིབས་པའི་སེམས་ཅན་ལ། །རྒྱལ་བས་ཞི་བའི་ཚུལ་རྣམས་ཤིན་ཏུ་བསྟན། །འགྲོ་བ་རྣམས་ལ་ཆོས་ཀྱི་སྒྲོན་མ་འཛིན། །རྣམ་ཐར་འདི་ནི་གཏུམ་པའི་མཚོན་ཆས་མཐོང ། །རང་བྱུང་བསྐལ་པ་རྒྱ་མཚོར་སྤྱོད་པའི་ཚེ། །རྒྱལ་བའི་ཡོན་ཏན་ཕྱོགས་བཅུ་ཀུན་ཏུ་བསྒྲགས། །དེ་བས་རྒྱལ་བའི་གྲགས་
Ka43a
༄#། །པ་ཀུན་ཏུ་གྲགས། །འདི་ནི་བློ་ཆེན་གནོད་སྦྱིན་བདག་པོས་མཐོང ། །རྒྱལ་བའི་ཤེས་རབ་མཁའ་འདྲ་མཐའ་ཡས་ཏེ། །སངས་རྒྱས་ཆོས་སྐུ་བསམ་གྱིས་མི་ཁྱབ་བོ། །དེ་བས་ཐམས་ཅད་ཕྱོགས་སུ་རྣམ་པར་མཛེས། །འོད་འཕྲོ་མིག་གི་བདག་པོའི་རྣམ་ཐར་ཏོ། །མི་ཡི་དབང་པོ་འགྲོ་བ་ཐམས་ཅད་དུ། །ཡིད་འོང་དབྱངས་སྒྲོག་སྡུག་བསྔལ་ཞི་བར་མཛད། །ཕན་དོན་སྐྱབས་མཛད་ཆོས་རྣམས་ཤིན་ཏུ་བསྟན། །ཚུལ་འདི་རྡོ་རྗེའི་མིག་ལེགས་རབ་ཏུ་འཇུག་།དོན་དབྱིངས་རྒྱ་ཆེན་ཇི་སྙེད་དེ་དག་ཀུན། །རྒྱ་མཚོའི་མདོ་ཚུལ་འགྲོ་བའི་གྲངས་སྙེད་རྣམས། །མི་ཡི་དབང་པོས་དབྱངས་གཅིག་སྒོ་ནས་བསྟན། །འདི་ནི་བློ་གྲོས་དཔའ་བོའི་རྣམ་ཐར་ཏོ། །འགྲོ་བ་ལམ་ངན་གནས་པ་ཐམས་ཅད་ལ། །སངས་རྒྱས་བསམ་གྱིས་མི་ཁྱབ་ལས་སྟོན་ཏེ། །སྣོད་དུ་གྱུར་པའི་འགྲོ་བ་ཀུན་ན་བཞུགས། །འདི་ལ་སློབ་པ་སྡེ་ཡི་རྒྱན་ཡིན་ནོ། །འགྲོ་བའི་བསོད་ནམས་རྒྱུ་བ་ཇི་སྙེད་པ། ། རྒྱལ་བའི་འོད་ལ་ཐམས་ཅད་རབ་ཏུ་སྣང ། །སངས་རྒྱས་ཡེ་ཤེས་རྒྱ་མཚོ་བསམ་མི་ཁྱབ། །རྣམ་ཐར་འདི་ནི་གནོད་སྦྱིན་ནོར་བདག་མཐོང ། །རྒྱལ་བའི་སྟོབས་རྣམས་གང་དུ་ཡོངས་དག་སྟེ། །བདེར་གཤེགས་སྟོབས་རྣམས་ཡོངས་སུ་རྫོགས་གྱུར་པའི། །སྔོན་གྱི་བསྐལ་པ་བསམ་གྱིས་མི་ཁྱབ་དྲན། །འདི་ནི་རི་བོའི་སྟོབས་འཇོམས་རྣམ་ཐར་ཏོ། །དེ་
Ka43b
ལ་མི་འམ་ཅིའི་དབང་པོ་ལྷའི་བློ་གྲོས་འོད་ཀྱི་རྣམ་པར་ཐར་པ་ནི། བྱ་བ་ཐམས་ཅད་ལ་ཡང་དག་པར་རྫོགས་པར་འཇུག་པས་དགའ་བ་འབྱུང་བ་ཞེས་བྱའོ། །མི་འམ་ཅིའི་དབང་པོ་མེ་ཏོག་དཔལ་གྱི་དཀྱིལ་འཁོར་གྱི་རྣམ་པར་ཐར་པ་ནི། དགའ་བ་ཐམས་ཅད་ཀྱི་བདེ་བ་མྱོང་བ་ལས་བླ་ན་མེད་པའི་ཆོས་ཀྱི་དགའ་བ་འབྱུང་བ་ཞེས་བྱའོ། །མི་འམ་ཅིའི་དབང་པོ་རྒྱན་རྣམ་པ་སྣ་ཚོགས་ཀྱི་རྣམ་པར་ཐར་པ་ནི། ཡོན་ཏན་ཐམས་ཅད་ཀྱིས་ཡང་དག་པར་ངོམས་པས་མོས་པ་རྒྱ་ཆེན་པོ་སྦྱོང་བའི་སྙིང་པོ་ཞེས་བྱའོ། །མི་འམ་ཅིའི་དབང་པོ་ང་རོ་ཡིད་དུ་འོང་བའི་དབྱངས་ཀྱི་རྣམ་པར་ཐར་པ་ནི། སྒྲ་སྙན་ཅིང་ཡིད་དུ་འོང་བ་ལ་ཐོགས་པ་མེད་པས་ཀུན་ཏུ་བསྒྲུབ་པ་ཞེས་བྱའོ། །མི་འམ་ཅིའི་དབང་པོ་ཤིང་རིན་པོ་ཆེའི་ཡལ་གའི་འོད་ཀྱི་རྣམ་པར་ཐར་པ་ནི། སྙིང་རྗེའི་རྒྱུད་ལ་འགྲོ་བ་འགོད་ཅིང་སེམས་ཅན་ཐམས་ཅད་ཡང་དག་པར་བསྐུལ་བ་ལ་དམིགས་པ་ཞེས་བྱའོ། །མི་འམ་ཅིའི་དབང་པོ་མཐོང་ན་དགའ་ཞིང་སྤྲོ་བར་བྱེད་པའི་རྣམ་པར་ཐར་པ་ནི། གཟུགས་ཀྱི་ལུས་དགེ་བ་ཐམས་ཅད་མངོན་པར་སྒྲུབ་པ་ཞེས་བྱའོ། །མིའམ་ཅིའི་དབང་པོ་རྒྱན་གྱི་དཔལ་གྱི་འོད་ཀྱི་རྣམ་པར་ཐར་པ་ནི། ཁྱུ་མཆོག་གི་མཐུ་ཕྱུང་བའི་རྒྱན་ཐམས་ཅད་ཀྱིས་མདངས་རབ་ཏུ་བསྐྱེད་པའི་རང་བཞིན་གྱིས་དགའ་བའི་འོད་ཅེས་བྱའོ། །མི་འམ་ཅིའི་དབང་པོ་མེ་ཏོག་ཚོན་བཟང་པོའི་རྒྱལ་མཚན་
Ka44a
༄#། །གྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་ལས་ཀྱི་རིགས་ལ་རྣམ་པར་ལྟ་ཞིང་ཡང་དག་པར་སྒྲུབ་པའི་འོད་ཅེས་བྱའོ། །མི་འམ་ཅིའི་དབང་པོས་གཞིའི་དཔལ་གྱི་རྣམ་པར་ཐར་པ་ནི། འགྲོ་བ་ཐམས་ཅད་རྩལ་གྱིས་མངོན་པར་བསྒྲུབ་པ་ལ་རབ་ཏུ་བརྩོན་པ་ཞེས་བྱའོ། །མི་འམ་ཅིའི་དབང་པོ་དྲག་ཤུལ་གྱི་བདག་པོའི་རྣམ་པར་ཐར་པ་ནི། མི་འམ་ཅིའི་འཁོར་ཐམས་ཅད་ཀྱི་སེམས་ལ་རྣམ་པར་ལྟ་ཞིང་འདྲེན་པའི་འོད་ཅེས་བྱའོ། །དེ་ནས་མི་འམ་ཅིའི་དབང་པོ་ལྷའི་བློ་གྲོས་འོད་ཀྱིས་སངས་རྒྱས་ཀྱི་མཐུས་མི་འམ་ཅིའི་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཇི་སྙེད་འགྲོ་བ་དག་ན་བདེ་འབྱུང་བ། །དེ་དག་ཐམས་ཅད་རྒྱལ་བ་མཐོང་བས་འབྱུང ། ། མགོན་པོ་དེ་ནི་སྐྱབས་དང་མགོན་ཡིན་ཏེ། །སེམས་ཅན་ཐམས་ཅད་གནས་ཡིན་ཕན་མཛད་པའོ། །སེམས་ཅན་ཀུན་གྱི་མི་ཟད་བདེ་བའི་རྣམས། །ཇི་སྙེད་འབྱུང་བ་རབ་ཏུ་ཡོད་པ་ཀུན། །དེ་དག་ཀུན་ལ་འདྲེན་པ་དོན་ཡོད་དོ། །དེ་ནི་དཔལ་གྱི་དཀྱིལ་འཁོར་མི་ཅིས་ཐོང ། །སངས་རྒྱས་ཡོན་ཏན་རྒྱ་མཚོ་མི་ཟད་པ། །དེ་ཡི་མཐའ་ནི་འགྲོ་བས་མི་རྙེད་དོ། །ཕྱོགས་རྣམས་ཀུན་ཏུ་རྣམ་པར་མཛེས་ཤིང་འབར། །སྣ་ཚོགས་རྒྱན་གྱི་རྣམ་ཐར་འདི་འདྲའོ། །སེམས་ཅན་ཀུན་གྱི་ཡིད་དུ་འོང་བ་ཡི། །སྒྲ་དབྱངས་སངས་རྒྱས་ཡང་དག་རྣམ་སྒྲོག་ཅིང ། །
Ka44b
མྱ་ངན་མེད་པའི་ཆོས་ཉིད་སྟོན་པ་ནི། །སྒྲ་སྙན་ཡིད་དུ་འོང་བའི་མི་ཅིས་ཐོས། །སྔོན་ཆད་དེ་བཞིན་གཤེགས་པས་སྤྱད་པ་ཡི། །རྒྱལ་བའི་རྣམ་པར་འཕྲུལ་པ་བདག་གིས་མཐོང ། །རྒྱ་ཆེན་ཐུགས་རྗེས་རྣམ་པར་ཤིན་ཏུ་སྦྱངས། །ཤིང་གི་འོད་ཀྱི་མི་འམ་ཅི་ཡིས་མཐོང ། །དེ་བཞིན་གཤེགས་པ་མཐོང་ཞིང་ཐོས་པ་ནི། །འགྲོ་བ་རྣམས་ལ་བསྐལ་པ་བྱེ་བར་དཀོན། །སངས་རྒྱས་མཚན་གྱིས་ཀུན་ནས་ཤིན་ཏུ་བརྒྱན། །དགའ་བདེ་མོས་པར་བྱེད་པས་འདི་མཐོང་ངོ ། །བདེ་བར་གཤེགས་པའི་ཡེ་ཤེས་འབྱུང་བ་ནི། །སེམས་ཅན་ཀུན་གྱི་བསམ་པ་ཞལ་མཛད་དེ། ། ཐམས་ཅད་མཁྱེན་པ་ཉིད་ཀྱི་ལམ་ཡང་སྟོན། །འདི་ནི་རྒྱན་དབང་མི་འམ་ཅི་ཡིས་མཐོང ། །འབྱམས་ཀླས་ལས་ནི་བསམ་གྱིས་མི་ཁྱབ་སྟེ། །དེ་ཕྱིར་སེམས་ཅན་བདེ་དང་སྡུག་བསྔལ་ཀུན། ། བདེ་བར་གཤེགས་པས་ཐམས་ཅད་རབ་ཏུ་བསྟན། །མེ་ཏོག་རྒྱལ་མཚན་མི་འམ་ཅི་ཡིས་མཐོང ། །སངས་རྒྱས་གཤེགས་ཐབས་རྣམ་པར་འཕྲུལ་པ་ཡང ། །སེམས་ཅན་ཀུན་གྱིས་ཤེས་པར་མི་ནུས་ཏེ། །ས་རྣམས་ཐམས་ཅད་གཅིག་ཏུ་འདུས་པར་འགྱུར། །དེ་ལྟར་ས་ཡི་འོད་ཀྱི་མི་ཅིས་མཐོང ། །འཁོར་དུ་རྒྱལ་བ་རྣམ་པར་འཕྲུལ་མཛད་ཅིང ། །རྒྱལ་བའི་སྤྱོད་ཡུལ་ཐམས་ཅད་སྟོན་མཛད་དེ། །འོད་ཟེར་འཁོར་གྱིས་བསྐུལ་བའང་དེ་བཞིན་མཛད། །འདི་ནི་དྲག་ཤུལ་བདག་པོའི་སྤྱོད་ཡུལ་ལོ། །དེ་ལ་ལྟོ་འཕྱེ་ཆེན་པོའི་དབང་པོ་བློ་གྲོས་བཟང་པོའི་གཟི་བརྗིད་ཀྱི་རྣམ་པར་
Ka45a
༄#། །ཐར་པ་ནི། རྫུ་འཕྲུལ་གྱི་དབྱིངས་ཐམས་ཅད་རབ་ཏུ་གནོན་པའི་ཡོན་ཏན་གྱི་རྒྱན་ཅེས་བྱའོ། །ལྟོ་འཕྱེ་ཆེན་པོའི་དབང་པོ་གཟི་བརྗིད་ཀྱི་དབྱངས་ལ་རྡུལ་མེད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པ་རྣམ་པར་བྱང་བས་སིམ་པར་བྱེད་ཅིང་ཡོངས་སུ་སྦྱོང་བ་འབྱུང་བའི་རྒྱན་ཅེས་བྱའོ། །ལྟོ་འཕྱེ་ཆེན་པོའི་དབང་པོ་བློ་གྲོས་སྣ་ཚོགས་མཆོག་གི་གཙུག་ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་རྣམ་པར་དཔྱོད་པ་དགེ་བ་ལ་ཀུན་ནས་ཡང་དག་པར་གཞོལ་བས་མོས་པར་བྱེད་པ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་མིག་བཟང་པོའི་བདག་པོའི་རྣམ་པར་ཐར་པ་ནི། ཆགས་པའི་བསོད་ནམས་ཕུན་སུམ་ཚོགས་པ་ཐམས་ཅད་མཉམ་པ་ཉིད་ཀྱི་མཚན་ཉིད་དུ་རྣམ་པར་སྒོམ་པ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་སྒྲོན་མའི་སྐྱབས་ཀྱི་རྒྱལ་པོའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་མུན་པ་རྣམ་པར་ལྡོག་ཅིང་ལམ་གྱི་ཕྱོགས་ཡང་དག་པར་སྟོན་པ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་སྣང་བ་ཤུགས་བཟང་པོའི་རྒྱལ་མཚན་གྱི་རྣམ་པར་ཐར་པ་ནི། དེ་བཞིན་གཤེགས་པ་ཐམས་ཅད་ཀྱི་བསྟན་པ་དང ། འཕགས་པའི་ཡོན་ཏན་ལ་འཇུག་པས་དགའ་བ་འབྱུང་བ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་སེངྒེའི་ཕྲུ་གུའི་རྣམ་པར་ཐར་པ་ནི། སྟོབས་དང་བརྩོན་པ་ཁ་ན་མ་ཐོ་བ་མེད་པས་སེམས་ཅན་
Ka45b
སྐྱོབ་པའི་བདག་པོ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་རྒྱན་སྣ་ཚོགས་ཀྱི་དབྱངས་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་བདེ་བ་དང་དགའ་བ་མཐའ་ཡས་པ་རྗེས་སུ་དྲན་པ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་རི་རབ་ཀྱི་བུའི་རྣམ་པར་ཐར་པ་ནི། སྒྲིབ་པ་ཐམས་ཅད་རབ་ཏུ་རྟོགས་པ་མི་སྒུལ་བའི་ཕ་རོལ་ཏུ་འགྲོ་ཞིང་དགའ་བ་ཀུན་ནས་འབྱུང་བ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་འོད་ཡིད་དུ་འོང་བ་འབྱུང་བའི་རྣམ་པར་ཐར་པ་ནི། སེམས་ཅན་གྱི་རྒྱུད་མཉམ་པ་དང་མི་མཉམ་པ་ལ་མཉམ་པ་ཉིད་ཀྱི་ལམ་གྱི་ཕྱོགས་སྟོན་པ་ཞེས་བྱའོ། །དེ་ནས་ལྟོ་འཕྱེ་ཆེན་པོའི་དབང་པོ་བློ་གྲོས་བཟང་པོའི་གཟི་བརྗིད་ཀྱིས་སངས་རྒྱས་ཀྱི་མཐུས་ལྟོ་འཕྱེ་ཆེན་པོའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཆོས་ཉིད་རྒྱ་ཆེན་ཡངས་ལ་ལྟོས། །སེམས་ཅན་ཀུན་གྱི་མདངས་དང་བདེ་བ་འབྱུང ། །ནད་མེད་འཆི་མེད་ལམ་ཡང་ཤིན་ཏུ་སྟོན། །སྡུག་བསྔལ་ཐམས་ཅད་རབ་ཞི་གནས་ཀྱང་མེད། །རྒྱལ་བའི་རྫུ་འཕྲུལ་ཆོས་ཉིད་དེ་ཡང་ལྟོས། །ཕྱོགས་རྣམས་ཀུན་ཏུ་མངོན་པར་རབ་ཏུ་འཕགས། །འཇིག་རྟེན་ཀུན་ཏུ་ཐུབ་པ་མངོན་པར་མཛེས། །ལྟོ་འཕྱེ་ཆེན་པོ་འོད་མཛེས་འདི་ལ་འཇུག་།ཉོན་མོངས་ལས་ཀྱི་སྒྲིབ་པས་སྟུག་བསྒྲིབས་ཤིང ། །སྲིད་པའི་རྒྱ་མཚོ་གཏིང་རིང་ནུབ་པ་ཡི། །སེམས་
Ka46a
༄#། །ཅན་རྣམས་ལ་ཞི་བའི་སྤྱོད་ཡུལ་སྟོན། །གཟི་བརྗིད་རྡུལ་མེད་དབྱངས་ཀྱིས་འདི་མཐོང་ངོ ། །སངས་རྒྱས་ཡེ་ཤེས་མཉམ་མེད་བསམ་མི་ཁྱབ། །འགྲོ་བའི་བསམ་པ་མ་ལུས་ཐུགས་སུ་ཆུད། །དེ་དག་ཀུན་ལ་རྣམ་དག་ཆོས་ཉིད་སྟོན། །ལྟོ་འཕྱེ་ཆེན་པོ་སྣ་ཚོགས་གཙུག་ཕུད་འཇུག་།བསམ་གྱིས་མི་ཁྱབ་བསོད་ནམས་རྒྱ་མཚོའི་དབྱིངས། མཐའ་ཡས་ཡང་དག་འབྱུང་བ་རྒྱལ་བས་གཟིགས། །དེ་བཞིན་གཤེགས་པ་འཇིག་རྟེན་བསོད་ནམས་ཞིང ། །མིག་བཟང་བདག་པོ་ལྟོ་འཕྱེ་ཆེན་པོས་མཐོང ། །སེམས་ཅན་ཀུན་གྱི་སྡུག་བསྔལ་འཇིགས་པ་རྣམས། །ཇི་སྙེད་དེ་དག་རྒྱལ་བས་ཀུན་ནས་བསྐྱབས། །རྒྱལ་བ་ཆོས་དབྱིངས་ནམ་མཁའ་ལྟ་བུ་སྟེ། །དེ་ནི་སྒྲོན་མ་སྐྱབས་ཀྱི་སྤྱོད་ཡུལ་ལོ། །སངས་རྒྱས་བ་སྤུ་རེ་རེའི་ཡོན་ཏན་ཡང ། །འཇིག་རྟེན་ཀུན་གྱིས་ཤེས་པར་མི་ནུས་ཏེ། །མགོན་པོ་རྣམས་ནི་མི་ཟད་ནམ་མཁའ་བཞིན། །འདི་ནི་ཤུགས་ཀྱི་རྒྱལ་མཚན་རྣམ་པར་མཐོང ། །ཐམས་ཅད་ཆོས་དང་སྟོབས་ཀྱི་མཐར་ཕྱིན་པས། །སངས་རྒྱས་རི་བོ་ལྟ་བུར་བསྐྱོད་མི་ནུས། །དེ་ཡི་ཆོས་ཉིད་རྒྱལ་བ་རབ་ཏུ་མཛེས། །སེངྒེའི་ཕྲུག་པ་དཔལ་ནི་འདི་ལ་འཇུག་།རྒྱལ་བ་རྣམས་ཀྱི་རྣམ་ཐར་ལ་དགའ་བ། །བསྐལ་པ་སྔ་ཚེ་རྒྱ་ཆེར་སྤེལ་བས་ན། །དེ་ཕྱིར་འགྲོ་བ་ཀུན་བལྟས་ཡིད་དུ་འོང ། །སྣ་ཚོགས་སྒྲ་དབྱངས་རྣམ་ཐར་འདི་ལ་འཇུག་།རྒྱལ་བས་ཕ་རོལ་ཕྱིན་པ་
Ka46b
རྒྱ་མཚོ་རྣམས། །ཡོངས་བསྐངས་ཆོས་དབྱིངས་སྐུ་དང་སྤྱོད་ཡུལ་མེད། །འཇིག་རྟེན་ཐམས་ཅད་སྐྱབས་གྱུར་སྒྲོན་མ་སྟེ། །རི་རབ་བུ་ནི་ཚུལ་བཟང་འདི་ལ་འཇུག་།དེ་ལ་ནམ་མཁའ་ལྡིང་གི་དབང་པོ་མཐུ་སྟོབས་ཆེན་པོའི་ཤུགས་ཀྱི་རྣམ་པར་ཐར་པ་ནི། ཐོགས་པ་མེད་པའི་མིག་ལ་སྒྲིབ་པ་མེད་པས་སེམས་ཅན་གྱི་ཁམས་རྣམ་པར་ལྟ་བ་ཞེས་བྱའོ། །ནམ་མཁའ་ལྡིང་གི་དབང་པོ་མི་ཤིགས་པའི་སེམས་རིན་ཆེན་གཙུག་ཕུད་ཀྱི་རྣམ་པར་ཐར་པ་ནི། ཕྱོགས་བཅུའི་སེམས་ཅན་ཡོངས་སུ་སྨིན་པར་བྱ་བས་ཆོས་ཀྱི་དབྱིངས་ལ་རབ་ཏུ་གནས་པ་ཞེས་བྱའོ།། ནམ་མཁའ་ལྡིང་གི་དབང་པོ་ཤུགས་དྲི་མ་མེད་པའི་དཔལ་གྱི་རྣམ་པར་ཐར་པ་ནི། སྒོ་ཀུན་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རབ་ཏུ་འབྱུང་བ་ཞེས་བྱའོ། །ནམ་མཁའ་ལྡིང་གི་དབང་པོ་ཕྱིར་མི་ལྡོག་པའི་སེམས་ཀྱི་རྒྱན་གྱི་རྣམ་པར་ཐར་པ་ནི། དེ་བཞིན་གཤེགས་པའི་ཤུགས་ཀྱི་མཐུས་འཇུག་པའི་འོད་ཅེས་བྱའོ། །ནམ་མཁའ་ལྡིང་གི་དབང་པོ་ཆོས་བསྟན་པ་དྲི་མ་མེད་པའི་འོད་ཀྱི་རྣམ་པར་ཐར་པ་ནི། སེམས་ཅན་མཐའ་ཡས་པ་ཡོངས་སུ་སྨིན་པར་བྱ་བའི་ཡེ་ཤེས་རབ་ཏུ་ཕྱེ་བ་ཞེས་བྱའོ། །ནམ་མཁའ་ལྡིང་གི་དབང་པོ་ཅོད་པན་སྣ་ཚོགས་དཔལ་གྱི་གཙུག་ཕུད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཆོས་ཀྱི་གྲོང་ཁྱེར་རབ་ཏུ་བརྒྱན་པ་ཡང་དག་པར་སྟོན་པ་ཞེས་བྱའོ། །ནམ་མཁའ་ལྡིང་གི་དབང་པོ་གཞི་ཀུན་ཏུ་ཁྱབ་
Ka47a
༄#། །བར་སྟོན་པའི་ཤུགས་ཀྱི་རྣམ་པར་ཐར་པ་ནི། སྟོབས་ཀུན་ནས་ཡང་དག་པར་སྒྲུབ་པས་ཐུབ་པ་མེད་པའི་རྒྱན་ཅེས་བྱའོ། །ནམ་མཁའ་ལྡིང་གི་དབང་པོ་དགེ་བ་རྒྱ་མཚོ་ཀུན་ནས་ལྟ་བའི་རྣམ་པར་ཐར་པ་ནི། སེམས་ཅན་གྱི་རིས་ཐམས་ཅད་རྣམ་པར་སྒོམ་པའི་ཚུལ་མངོན་པར་སྒྲུབ་པ་ཞེས་བྱའོ། །ནམ་མཁའ་ལྡིང་གི་དབང་པོ་ཀླུའི་སྒྲ་ཡངས་པ་ཀུན་ཏུ་ལྟ་བའི་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་མཐའ་ཡས་པ་སྐྱེ་བ་དང ། འཆི་འཕོ་བ་ཤེས་པའི་ཡེ་ཤེས་ལ་ཡང་དག་པར་འཇུག་པ་ཞེས་བྱའོ།། དེ་ནས་ནམ་མཁའ་ལྡིང་གི་དབང་པོ་མཐུ་སྟོབས་ཆེན་པོའི་ཤུགས་ཀྱིས་སངས་རྒྱས་ཀྱི་མཐུས་འདབ་མ་བཟང་པོའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཕྱོགས་བཅུའི་ཞིང་རྣམས་མ་ལུས་དབྱིངས་བཀང་ཞིང ། །འཇིག་རྟེན་མགོན་པོ་རྒྱ་ཆེན་སྤྱན་གྱིས་གཟིགས། །སེམས་ཅན་འདུལ་བ་དེ་ལ་ཚད་ཀྱང་མེད། །རང་བྱུང་རྣམ་ཐར་རྒྱ་ཆེན་ཤིན་ཏུ་ཡངས། །འཇིག་རྟེན་མགོན་གྱི་འཕྲུལ་སྟོབས་ཆགས་པ་མེད། །ཕྱོགས་བཅུའི་སྙིང་པོ་བྱང་ཆུབ་ཀུན་ན་བཞུགས། །རྒྱལ་བའི་མདོ་སྡེ་སྤྲིན་རྣམས་ཐམས་ཅད་ཀྱང ། །རིན་ཆེན་སྣ་ཚོགས་གཙུག་ཕུད་མཁའ་ལྡིང་ཉན། །སྔོན་གྱི་བདེ་བར་གཤེགས་པའི་སྤྱོད་པ་རྣམས། །ཕ་རོལ་ཕྱིན་པ་རྒྱ་ཆེན་བྱང་བ་
Ka47b
མཐོང ། །སངས་རྒྱས་ཀུན་ལ་མཆོད་པ་ཡང་དག་བྱེད། །འདབ་མ་བཟང་པོ་ཤུགས་བཟང་དེ་བརྗོད་དོ། །སྐད་ཅིག་སེམས་ལ་བྱང་ཆུབ་སྤྱོད་མཐའ་ཡས། །ཐམས་ཅད་རྒྱལ་བའི་སྤུ་རྩེ་ཀུན་ན་སྣང ། །རྒྱལ་བའི་སྤྱོད་ཡུལ་ཚད་མེད་ཅི་འདྲ་བ། །དེ་ནི་རྒྱན་བཟང་ནམ་མཁའ་ལྡིང་གིས་མཐོང ། །རྒྱལ་བའི་སྤྱོད་ཡུལ་ཡངས་པ་བསམ་མི་ཁྱབ། །འགྲོ་བ་ཀུན་གྱིས་བསམ་པར་སླ་བ་མིན། །ཡེ་ཤེས་ཡོན་ཏན་རྒྱ་མཚོ་འཇིག་རྟེན་མགོན། །རྣམ་ཐར་འདི་ནི་མཁའ་ལྡིང་འགྲོ་འཛིན་གྱིའོ། །དེ་བཞིན་གཤེགས་པའི་ཡེ་ཤེས་མཐའ་ཡས་འོད། །འགྲོ་བའི་གཏི་མུག་དྲ་བ་མ་ལུས་སེལ། །རྒྱལ་བ་འཇིག་རྟེན་ཐམས་ཅད་ཀུན་གྱི་མགོན། །དེ་འདྲ་ཆོས་བརྟན་འཛིན་པའི་འདབ་བཟང་སྟོན། །ཆོས་ཀྱི་གྲོང་ཁྱེར་མི་ཟད་ཐམས་ཅད་ནས། །སངས་རྒྱས་རྒྱ་ཆེན་འཇིག་རྟེན་ཀུན་ཏུ་སྟོན། །མཐའ་ཡས་ཆོས་ཀྱི་སྒོ་མོ་དུ་མ་ནས། །འདབ་བཟང་སྣ་ཚོགས་གཙུག་ཕུད་འདི་ལ་འཇུག་།ཐམས་ཅད་སྟོབས་ལ་རང་བྱུང་རབ་ཏུ་བཞུགས། །རྒྱལ་བ་ཀུན་དང་སྐུ་གཅིག་ཆོས་ཀྱི་སྐུ། །དེ་བཞིན་ཉིད་དངོས་རྣམ་པར་རྟོག་མི་མངའ། །ཀུན་ཏུ་རྒྱུ་བའི་འདབ་བཟང་འདི་བརྗོད་དོ། །རྒྱལ་བའི་འོད་ཟེར་འཇིག་རྟེན་ཀུན་བཀྱེ་བ། །སྣ་ཚོགས་ཐབས་ཀྱིས་སེམས་ཅན་ཁམས་ཀྱང་འདུལ། །སྲིད་པ་སྔ་ཚེ་བསྡུས་པ་རྣམ་པར་སྤྱོད། །རྣམ་ཐར་འདི་ནི་མིག་བཟང་དམ་པའིའོ། །དྲི་མེད་རྒྱ་མཚོའི་ལས་ལ་གནས་པ་ཡི། །ཞིང་གི་དབྱིངས་རྣམས་
Ka48a
༄#། །མ་ལུས་སངས་རྒྱས་གཟིགས། །དེ་དག་ཀུན་ཏུ་རྒྱལ་བས་ཆོས་ཆར་འབེབས། །རྒྱ་མཚོ་རྒྱུ་བའི་མཁའ་ལྡིང་འདི་ལྟར་ལྟ། །དེ་ལ་ལྷ་མ་ཡིན་གྱི་དབང་པོ་སྒྲ་གཅན་གྱི་རྣམ་པར་ཐར་པ་ནི། དབང་ཆེན་པོས་ཤིན་ཏུ་འཕགས་ཤིང་ཟིལ་གྱིས་མི་ནོན་པ་ཞེས་བྱའོ། །ལྷ་མ་ཡིན་གྱི་དབང་པོ་ཐག་བཟང་རིས་ཀྱི་རྣམ་པར་ཐར་པ་ནི། སྒོ་ཀུན་ནས་བྱིན་གྱིས་རློབ་པ་རྣམ་པར་གཞོག་པ་རབ་ཏུ་འབྱུང་བ་ཞེས་བྱའོ། །ལྷ་མ་ཡིན་དབང་པོ་བདེ་བའི་མཆོག་གི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྡུག་བསྔལ་ཞི་བར་བྱེད་པ་རྡུལ་མེད་པ་ཞེས་བྱའོ། །ལྷ་མ་ཡིན་གྱི་དབང་པོ་མཚོན་ཆ་ཆེན་པོའི་རྣམ་པར་ཐར་པ་ནི། བརྟུལ་ཞུགས་དང་དཀའ་ཐུབ་ཐམས་ཅད་ལ་གནས་པའི་རྒྱན་ཅེས་བྱའོ། ། ལྷ་མ་ཡིན་གྱི་དབང་པོ་སྟོབས་ཅན་གྱི་རྣམ་པར་ཐར་པ་ནི། ཕྱོགས་བཅུ་རབ་ཏུ་བསྒུལ་བའི་ཡུལ་མཐའ་ཡས་པ་ཞེས་བྱའོ། །ལྷ་མ་ཡིན་གྱི་དབང་པོ་རྣམ་པར་སྣང་བའི་རྣམ་པར་ཐར་པ་ནི། འཇིག་རྟེན་ཐམས་ཅད་རབ་ཏུ་དགོད་པའི་སྦྱོར་བ་རྣམ་པ་སྣ་ཚོགས་ཞེས་བྱའོ། །ལྷ་མ་ཡིན་གྱི་དབང་པོ་རྡོ་རྗེ་སྲ་བ་སྣ་ཚོགས་ཀྱི་ཡན་ལག་གི་རྣམ་པར་ཐར་པ་ནི། དགེ་བའི་རྩ་བ་ཆགས་པ་ཐམས་ཅད་ཀྱིས་མི་ཤིགས་པའི་དཀྱིལ་འཁོར་ཡོངས་སུ་སྦྱོང་བ་ལ་ཡང་དག་པར་འཇུག་པ་ཞེས་བྱའོ། །ལྷ་མ་ཡིན་གྱི་དབང་པོ་སྟོབས་རྒྱ་ཆེན་པོའི་རྒྱུའི་བློ་
Ka48b
གྲོས་ཀྱི་རྣམ་པར་ཐར་པ་ནི། སྙིང་རྗེ་ཆེན་པོ་མངོན་དུ་བྱ་བའི་སྟོབས་ལ་གཏི་མུག་མེད་པ་ཞེས་བྱའོ། །ལྷ་མ་ཡིན་གྱི་དབང་པོ་དཔལ་གྱི་བེའུ་རབ་ཏུ་འབྱུང་བའི་རྣམ་པར་ཐར་པ་ནི། དགེ་བའི་རྩ་བ་ཐམས་ཅད་ཀྱི་དཀྱིལ་འཁོར་རྣམ་པར་སྦྱོང་ཞིང་སངས་རྒྱས་མཉེས་པར་བྱེད་པ་ཞེས་བྱའོ། །ལྷ་མ་ཡིན་གྱི་དབང་པོ་བརྟུལ་ཞུགས་བཟང་པོའི་དབྱངས་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་འཁོར་ལོ་ལ་ཡང་དག་པར་འཇུག་ཅིང་གཏི་མུག་མེད་པ་ལ་ཡང་དག་པར་སྤྱོད་པ་ཞེས་བྱའོ། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་གྱིས་སངས་རྒྱས་ཀྱི་མཐུས་ལྷ་མ་ཡིན་གྱི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཕྱོགས་རྣམས་རྒྱ་ཆེ་དེ་དག་ཐམས་ཅད་དུ། །རྒྱལ་བའི་ཟིལ་གྱིས་འབྱམས་ཀླས་འཁོར་ཀྱང་གནོན། །ནམ་མཁའི་མཚན་ཉིད་ཀུན་ཏུ་འོད་འཕྲོ་སྟེ། །ཐམས་ཅད་སྒོ་ནས་འགྲོ་བར་མངོན་པར་མཛེས། །སྐད་ཅིག་སེམས་ཀྱིས་བསྐལ་པ་བརྒྱ་མང་གི་།སངས་རྒྱས་ཡུལ་རྣམས་མ་ལུས་ཐམས་ཅད་སྟོན། །འདུལ་བ་ཀུན་ལ་འོད་རྣམས་རབ་ཏུ་འགྱེད། །རྣམ་ཐར་དེ་ནི་ཐག་བཟང་རིས་ཀྱིས་མཐོང ། །སངས་རྒྱས་སྤྱོད་ཡུལ་གཞལ་མེད་བདག་གིས་མཐོང ། །སྣ་ཚོགས་སྒོ་ནས་སེམས་ཅན་དོན་ཀྱང་མཛད། །སྡུག་བསྔལ་ཐམས་ཅད་བདེར་གཤེགས་ཞིར་མཛད་དེ། །རྣམ་ཐར་འདི་ལ་བདེ་བའི་མཆོག་འཇུག་གོ་།འགྲོ་བའི་དོན་དུ་
Ka49a
༄#། །བརྟུལ་ཞུགས་དཀའ་ཐུབ་རྣམས། །དགེ་བ་རྒྱལ་བས་བསྐལ་པ་བརྒྱར་སྤྱད་དེ། །དེ་ཕྱིར་རྒྱལ་བའི་ཡེ་ཤེས་ཀུན་ཏུ་སྒོ། །དྲ་བ་བཟང་པོས་སངས་རྒྱས་འདི་ལྟར་བརྗོད། །ཞིང་དབྱིངས་ཐམས་ཅད་རྒྱལ་བ་གཡོ་བར་མཛད། །འཇིགས་པ་མི་སྟོན་སྐྲག་པ་ཡོད་མ་ཡིན། །བདེ་གཤེགས་རྫུ་འཕྲུལ་ཆགས་མེད་གཞལ་དུ་མེད། །ལྷ་མིན་དབང་པོ་སྟོབས་ཅན་དེ་ལྟར་སྟོན། །སངས་རྒྱས་སྐྱེ་བ་བདེ་བར་འབྱུང་བ་རྣམས། །འགྲོ་བ་ཀུན་གྱི་སྡུག་བསྔལ་ཞི་བར་མཛད། །ཐམས་ཅད་མཁྱེན་གྱི་ཡེ་ཤེས་ཕྱོགས་ཀྱང་སྟོན། ། རྣམ་པར་སྣང་བ་འདི་ནི་རབ་ཏུ་བརྗོད། །འགྲོ་བའི་བསོད་ནམས་རྒྱ་ཆེན་དང ། །བ་དག་།རྒྱལ་བའི་མཐུ་ཡིས་དེ་དག་བྱུང་བ་སྟེ། །ཐར་པའི་ཕྱོགས་ཀྱི་ལམ་ཡང་རྒྱལ་བ་སྟོན། །ཆོས་དཔལ་འདི་མཐོང་འདི་ལ་རབ་ཏུ་འཇུག་།བདེར་གཤེགས་ཐུགས་རྗེའི་སྐུ་ནི་མཉམ་པ་མེད། །ཆགས་མེད་སྤྱོད་པ་ཐམས་ཅད་ཀུན་ཏུ་སྣང ། །འགྲོ་བ་ཐམས་ཅད་མིག་ཡོར་མཚན་ཉིད་དེ། །རྒྱུ་ཡི་བློ་གྲོས་སངས་རྒྱས་ཡོན་ཏན་བརྗོད། །སངས་རྒྱས་ཡུལ་ན་ངོ་མཚར་མཉམ་པ་མེད། །སངས་རྒྱས་རྫུ་འཕྲུལ་ཆོས་ཀྱི་དབྱིངས་ཀྱི་ཀློང ། །བྱང་ཆུབ་ཤིང་དྲུང་ཀུན་ན་རབ་ཏུ་བཞུགས། །དཔལ་གྱི་བེའུ་ལྷ་མིན་བདག་པོས་མཐོང ། །འགྲོ་བ་ཀུན་གྱི་འཁོར་ལོ་དབྱིངས་དག་ཏུ། །སྔོན་ཆད་བདེར་གཤེགས་སྤྱོད་པ་སྤྱོད་པའི་ཚེ། །འགྲོ་བའི་སྡུག་
Ka49b
བསྔལ་མ་ལུས་རབ་ཏུ་བཀྲོལ། །དེ་ལྟར་ལྷ་མིན་དབྱངས་སྙན་རབ་ཏུ་བརྗོད། །དེ་ལ་ཉིན་མོའི་ལྷ་ཁྱིམ་དང་གཞལ་མེད་ཁང་གི་གཟུགས་ཤིན་ཏུ་སྟོན་པའི་རྣམ་པར་ཐར་བ་ནི། འགྲོ་བ་ཐམས་ཅད་ཀྱི་རྒྱུད་ལ་ཡང་དག་པར་འཇུག་པ་ཞེས་བྱའོ། །ཉིན་མོའི་ལྷ་བརྩམ་པའི་བློ་གྲོས་མཚམས་སྦྱོར་བའི་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་གྱི་དོན་ཐམས་ཅད་ཡོངས་སུ་རྒྱས་པར་བྱ་བས་ཤིན་ཏུ་ཚིམ་པར་བྱ་བ་ལ་རྣམ་པར་དཔྱོད་པ་ཞེས་བྱའོ། །ཉིན་མོའི་ལྷ་ཀུན་ནས་དགའ་བའི་དཔལ་གྱི་རྒྱན་གྱི་རྣམ་པར་ཐར་པ་ནི། དགའ་བ་དང་མགུ་བ་མཐའ་ཡས་པའི་ཆོས་ཀྱི་སྣང་བ་ཞེས་བྱའོ། །ཉིན་མོའི་ལྷ་མེ་ཏོག་དང་སྤོས་ཡིད་དུ་འོང་བའི་འོད་ཀྱི་རྣམ་པར་ཐར་པ་ནི། སེམས་ཅན་མཐའ་ཡས་པའི་མོས་པ་ཡང་དག་པར་རྒྱས་པ་ལ་རྣམ་པར་ལྟ་བ་ཞེས་བྱའོ། །ཉིན་མོའི་ལྷ་ཀུན་ནས་ཡིད་དུ་འོང་བའི་སྨན་སྟོན་པ་སྒྲུབ་པའི་དཔལ་གྱི་རྣམ་པར་ཐར་པ་ནི། ཀུན་ཏུ་འོད་ཀྱི་སྟོབས་ཡང་དག་པར་སྒྲུབ་པ་རྣམ་པར་སྟོན་པའི་རྒྱན་ཅེས་བྱའོ། །ཉིན་མོའི་ལྷ་ལྷག་པའི་མིག་བཟང་པོས་ཚིམ་པར་བྱེད་པའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་བདེ་བ་དང་སྡུག་བསྔལ་ཆོས་ཀྱི་དགའ་བས་སྣང་བར་བྱེད་པ་ཞེས་བྱའོ། །ཉིན་མོའི་ལྷ་ཚུལ་རྒྱ་ཆེན་པོའི་ཕྱོགས་ཀུན་ནས་བྱུང་བའི་དཔལ་གྱི་རྣམ་པར་ཐར་པ་ནི། ཆོས་ཀྱི་དབྱིངས་ཀྱི་ཕྱོགས་ཐ་མི་དད་པའི་སྙིང་པོ་ཞེས་བྱའོ། །ཉིན་མོའི་ལྷ་
Ka50a
༄#། །སྙིང་རྗེ་རྒྱ་ཆེན་པོའི་གཟི་བརྗིད་ཀྱི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་བདེ་བ་ཡང་དག་པར་སྟོན་ཅིང་སྐྱོབ་པའི་སྟོབས་ལ་ཤིན་ཏུ་བརྩོན་པ་ཞེས་བྱའོ། །ཉིན་མོའི་ལྷ་སྣང་བ་རྒྱ་ཆེན་པོའི་དགེ་བའི་རྩ་བ་དང་མི་འབྲལ་བའི་འོད་ཀྱི་རྣམ་པར་ཐར་པ་ནི། མཉམ་པ་ཉིད་ཀྱིས་དགའ་བའི་ཡོན་ཏན་ཀུན་ནས་རབ་ཏུ་འབྱུང་བ་ཞེས་བྱའོ། །ཉིན་མོའི་ལྷ་མེ་ཏོག་གི་ཕྲེང་བ་ཀུན་ནས་འཕྱང་བའི་དཔལ་གྱི་རྣམ་པར་ཐར་པ་ནི། འགྲོ་བས་མཐོང་ན་དོན་ཡོད་པའི་གྲགས་པའི་དཀྱིལ་འཁོར་ཅེས་བྱའོ། །དེ་ནས་ཉིན་མོའི་ལྷ་ཁྱིམ་དང་གཞལ་མེད་ཁང་གི་གཟུགས་ཤིན་ཏུ་སྟོན་པས་སངས་རྒྱས་ཀྱི་མཐུས་ཉིན་མོའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སེམས་ཅན་ཀུན་གྱི་སྤྱོད་པ་རྒྱལ་བས་མཁྱེན། །རྒྱལ་བ་དུས་གསུམ་མཉམ་པ་ཉིད་ལ་བཞུགས། །རྒྱལ་བའི་ཡེ་ཤེས་མི་ཟད་ནམ་མཁའ་བཞིན། །རྒྱལ་བའི་འོད་ཀྱིས་ཕྱོགས་རྒྱས་ཤིན་ཏུ་སྣང ། །འགྲོ་བ་ཀུན་གྱི་བསམ་པ་ཐུགས་ཆུད་ནས། །དོན་གྱི་ཚིག་རྣམས་གཞན་དང་གཞན་དག་ཀྱང། །རྣམ་ཕྱེ་རྒྱ་ཆེན་ཚིག་གིས་རྒྱལ་བ་གསུང ། །ཕུན་སུམ་ཚོགས་པའི་བློ་གྲོས་ལྷ་ཡིས་མཐོང ། །རྒྱལ་བའི་འོད་ཀྱིས་སེམས་ཅན་ཀུན་དགའ་སྟེ། །རྒྱལ་བ་མཐོང་ཐོས་དོན་
Ka50b
དུ་འགྱུར་བ་ཡིན། །གོ་འཕང་དམ་པ་རྒྱ་ཆེན་ཞི་བ་སྟོན། །དཔལ་གྱི་འོད་ནི་དེ་ཡིས་རབ་ཏུ་དགའ། །སངས་རྒྱས་མཐོང་བས་འགྲོ་བ་རྒྱ་ཆེན་གྱི། །དགའ་བ་ཚད་མེད་དགེ་ཆོས་ཀུན་ཀྱང་འབྱུང ། །ཆོས་སྤྲིན་གཞལ་མེད་རྒྱལ་བ་ཆར་འབེབས་ཏེ། །དེ་ལ་མེ་ཏོག་བརྒྱན་པའི་ལྷ་དགའ་འོ། །ཆོས་ཀྱི་དཀྱིལ་འཁོར་སྟོབས་ལ་འཇུག་པ་རྣམས། །སེམས་ཅན་བསྡུ་བའི་སྒོ་ལ་རྣམ་དཔྱོད་ཅིང ། །རབ་ཡངས་སྤྱད་པ་སྤྱོད་ཚེ་རྒྱལ་བས་སྦྱངས། །འདི་ནི་ཡིད་འོང་འབྱུང་བའི་ལྷས་མཐོང་ངོ ། །རྒྱལ་བ་མཐོང་ཞིང་ཐོས་པ་དོན་མེད་མིན། །དགའ་དང་བདེ་བ་སྤྲོ་བ་ཡངས་པ་སྐྱེད། །འབྱམས་ཀླས་ཐབས་རྣམས་ཀུན་གྱིས་སེམས་ཅན་འདུལ། །དེས་ནི་མིག་བཟང་དེ་ཡི་དགའ་སྐྱེད་བྱེད། །ཆོས་དབྱིངས་འབྱམས་ཀླས་ཕྱོགས་སུ་རབ་འཇུག་པ། །འགྲོ་བར་སྟོབས་བཅུས་མ་ལུས་བསྟན་མཛད་དེ། །བདེར་གཤེགས་དངོས་ཡོད་མ་ཡིན་དངོས་མེད་མིན། །འཕགས་པའི་དཔལ་གྱི་ཉིན་མོའི་ལྷ་ཡིས་མཐོང ། །སེམས་ཅན་མི་བདེ་ཐིབས་པོར་ནུབ་པ་རྣམས། །གཟིགས་ནས་རྒྱལ་བ་འཇིག་རྟེན་མཆོད་པ་མཛད། །སྡུག་བསྔལ་རྒྱུ་རྣམས་ཐམས་ཅད་རྒྱལ་བས་བསལ། །འདི་ལ་སྙིང་རྗེའི་གཟི་བརྗིད་ལྷ་འཇུག་གོ་།འགྲོ་བ་འདི་དག་ཉོན་མོངས་ལས་བསྒྲིབས་པར། །དགའ་བ་འབྱུང་བའི་བདེ་བ་རྒྱལ་བ་གསུང ། །ཆོས་ཀྱི་དགའ་བ་རབ་ཀྱིས་སྡུག་བསྔལ་འཇིལ། །བསོད་ནམས་ཤུགས་ནི་རྣམ་ཐར་འདི་ལ་འཇུག་།མཁའ་
Ka51a
༄#། །འདྲ་རྒྱལ་བའི་བསོད་ནམས་དཀྱིལ་འཁོར་རྣམས། །འཇིག་རྟེན་དགེ་བས་གཙོ་བོ་མཆོག་བྱུང་སྟེ། །ཆོས་རྣམས་ཀུན་ལ་བདེར་གཤེགས་འཁྲུལ་མི་མངའ། །མེ་ཏོག་ཕྲེང་གི་རྣམ་ཐར་འདི་ཡིན་ནོ། །དེ་ལ་མཚན་མོའི་ལྷ་དཔལ་དྲི་མ་མེད་ཅིང་ཀུན་ནས་ཟབ་པའི་འོད་ཀྱི་རྣམ་པར་ཐར་པ་ནི། བསམ་གཏན་རབ་ཏུ་ཞི་བའི་བདེ་བ་ཀུན་ནས་རྣམ་པར་གནོན་པ་ཞེས་བྱའོ། །མཚན་མོའི་ལྷ་ཀུན་ནས་སྐྱོབ་པའི་མདངས་ཀྱི་དཔལ་གྱི་རྣམ་པར་ཐར་པ་ནི། སྣང་བ་འཇིག་རྟེན་ཐམས་ཅད་ལ་མངོན་དུ་ལྟ་ཞིང་འགྲོ་བ་འདུལ་བ་སྟོན་པ་ཞེས་བྱའོ། །མཚན་མོའི་ལྷ་རབ་ཏུ་དགའ་བའི་མིག་གིས་འགྲོ་བ་ལ་རྣམ་པར་ལྟ་བའི་རྣམ་པར་ཐར་པ་ནི། ཀུན་ནས་དགའ་བ་རྒྱ་ཆེན་པོ་དྲི་མ་མེད་པའི་མཚན་ཉིད་ཅེས་བྱའོ། །མཚན་མོའི་ལྷ་སྒྲས་ཞི་བ་རྒྱ་མཚོ་དང་ལྡན་པའི་རྣམ་པར་ཐར་པ་ནི། དགའ་བ་ཡངས་པ་འབྱུང་བའི་སེམས་ཀྱི་མཚན་ཉིད་ཀྱི་རྒྱན་ཅེས་བྱའོ། །མཚན་མོའི་ལྷ་མཚན་མོ་ཐམས་ཅད་འབྱུང་བའི་དཔལ་གྱི་རྣམ་པར་ཐར་པ་ནི། ཡིད་དུ་འོང་བའི་སྒྲ་ཟབ་མོས་རྣམ་པར་འཕྲུལ་པ་ལ་འཇུག་པ་ཞེས་བྱའོ། །མཚན་མོའི་ལྷ་ཤིང་ཐམས་ཅད་རབ་ཏུ་རྒྱས་པར་བྱེད་པའི་འོད་ཀྱི་རྣམ་པར་ཐར་པ་ནི། དགའ་བ་དང་སྨོན་ལམ་དང་མོས་པ་རྒྱ་ཆེན་པོའི་འོད་ཅེས་བྱའོ། །མཚན་མོའི་ལྷ་ཀུན་ནས་སྐྱོང་ཞིང་སྲུང་བའི་དཔལ་གྱི་རྣམ་
Ka51b
པར་ཐར་པ་ནི། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་དགེ་བའི་རྩ་བ་ཡང་དག་པར་བརྗོད་པ་ཞེས་བྱའོ། །མཚན་མོའི་ལྷ་དགེ་བ་ཐམས་ཅད་ཀྱིས་དགའ་བར་རྩེ་བ་ལ་དབང་བསྒྱུར་བའི་རྣམ་པར་ཐར་པ་ནི། བྱམས་པ་མཐའ་ཡས་པས་འགྲོ་བ་ཡོངས་སུ་སྐྱོབ་པ་ཞེས་བྱའོ། །མཚན་མོའི་ལྷ་མདུད་པར་འཛིན་པ་ཐམས་ཅད་ཞི་བར་བྱ་བས་དབང་པོ་རབ་ཏུ་དགའ་བའི་རྣམ་པར་ཐར་པ་ནི། སྙིང་རྗེའི་སྒོ་ནས་ཆར་འབེབས་པའི་རྒྱན་ཅེས་བྱའོ། །མཚན་མོའི་ལྷ་དགེ་བའི་བསོད་ནམས་འབྱུང་བའི་དཔལ་སྟོན་པའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་བསམ་པ་ཡོངས་སུ་ཚིམ་པར་བྱ་བས་ཀུན་ཏུ་རྒྱས་པར་འགེངས་པ་ཞེས་བྱའོ། །དེ་ནས་མཚན་མོའི་ལྷ་དཔལ་དྲི་མ་མེད་ཅིང་ཀུན་ནས་ཟབ་པའི་འོད་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་མཚན་མོའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྤྱོད་ཡུལ་ཤིན་ཏུ་ཡངས་ལ་ལྟོས། །སྟོང་པ་ཞི་བ་ནམ་མཁའི་མཚན་ཉིད་དེ། །དགའ་བ་རྒྱ་མཚོ་རྣམ་པར་སྦྱངས་བྱས་ཤིང ། །རྒྱལ་བ་དྲི་མེད་ཕྱོགས་སུ་རྣམ་པར་མཛེས། །ཐུབ་པ་འཇིག་རྟེན་ཀུན་བལྟ་དཀའ་བ་སྟེ། །བསྐལ་པ་རྒྱ་མཚོ་དག་ན་བར་འགའ་སྣང ། །ཐུགས་རྗེས་ཀུན་ཏུ་རྒྱས་བྱས་མགོན་པོ་བྱུང ། །འགྲོ་བ་ལྟ་བའི་ལྷ་ཡིས་འདི་མཐོང་ངོ ། །འདྲེན་པ་འགྲོ་བའི་སྐྱབས་སུ་གྱུར་པ་སྟེ།།
Ka52a
༄#། །འགྲོ་བ་དག་ནི་མངོན་དུ་ཀུན་ན་སྣང ། །ལམ་གྱི་རྒྱུད་ནི་ཐམས་ཅད་རྣམ་པར་སྦྱོང ། །སྐྱོབ་པའི་མདངས་ཀྱི་དཔལ་ནི་འདི་ལ་སེམས། །དགའ་བ་རྒྱ་མཚོ་བསམ་གྱིས་མི་ཁྱབ་པ། །རབ་ཏུ་ཡངས་པ་སྔོན་ཆད་བསྒོམས་པས་ན། །དེ་ཕྱིར་རྒྱལ་བ་འཇིག་རྟེན་བལྟ་ན་མཛེས། །ཞི་དབྱངས་མཚན་མོའི་ལྷས་ནི་འདི་མཐོང་ངོ ། །སངས་རྒྱས་སྤྱོད་ཡུལ་བསམ་གྱིས་མི་ཁྱབ་སྟེ། །ཕྱོགས་རྣམས་བཀང་ཞིང་ཞི་བའི་འབྲུག་སྒྲ་སྒྲོག། སེམས་ཅན་བསམ་པ་རྒྱ་ཆེན་རྣམ་པར་སྤྱོད། །མཚན་མོ་འབྱུང་བའི་དཔལ་ནི་འདི་ལ་དགའ། །དེ་བཞིན་གཤེགས་པ་འགྲོ་བའི་བསོད་ནམས་སྐྱེད། །བསོད་ནམས་དཀྱིལ་འཁོར་རྣམ་པར་ཡངས་པ་སྟོན། །དྲི་མེད་ཞི་བའི་ས་ཡང་སྟོན་མཛད་དེ། །འདི་ལ་རྒྱས་པའི་འོད་ནི་རབ་ཏུ་འཇུག་།སངས་རྒྱས་འཕྲུལ་གྱིས་ཕྱོགས་རྣམས་རབ་བཀང་སྟེ། །སེམས་ཅན་ཐམས་ཅད་རྣམ་པར་འདུལ་བ་སྟོན། །ཐམས་ཅད་གཟུགས་སུ་སངས་རྒྱས་འཇིག་རྟེན་སྣང ། །མཚན་མོའི་ལྷ་ནི་དཔལ་གྱིས་འདི་མཐོང་ངོ ། །འདྲེན་པས་སེམས་ཀྱི་སྐད་ཅིག་ཀུན་ལ་སྣང ། །བྱམས་པ་རྒྱ་མཚོའི་ཚུལ་རྣམས་རྣམ་སྦྱངས་ཏེ། །འཇིག་རྟེན་ཐམས་ཅད་མ་ལུས་རྒྱས་པར་མཛད། །བསོད་ནམས་བརྩེ་བ་མཚན་མོའི་ལྷས་མཐོང་ངོ ། །སེམས་ཅན་གཏི་མུག་ཐིངས་པོས་འཁྲུགས་པ་དང ། །གཏུམ་སེམས་འཁོན་
Ka52b
འཛིན་དམ་པོས་བསྒྲིགས་གཟིགས་ཤིང ། །ཐུགས་རྗེ་བསྐྱེད་ནས་རྒྱལ་བ་བྱུང་བར་གྱུར། །འཁོན་འཛིན་ཞི་བ་མཚན་མོའི་ལྷ་དགའ་འོ། །སེམས་ཅན་ཀུན་གྱི་བསམ་པ་རྫོགས་བྱས་ཤིང ། །མགོན་པོ་སྔོན་ཆད་སྤྱོད་པ་སྤྱད་པས་ན། །དེ་ཕྱིར་རྒྱལ་བ་ཡོན་ཏན་མཚན་རྒྱས་སོ། །བསོད་ནམས་ལྟ་བའི་བདག་པོའི་སྤྱོད་ཡུལ་ཡིན། །དེ་ལ་ཕྱོགས་ཀྱི་ལྷ་ཕྱོགས་ཀྱི་དབྱིངས་ན་རབ་ཏུ་གནས་ཤིང་ཀུན་ཏུ་རྒྱས་པར་འགེངས་པའི་རྣམ་པར་ཐར་པ་ནི། ཀུན་ཏུ་སྐྱོབ་པས་འགྲོ་བའི་རྒྱན་བྱེད་པ་ཞེས་བྱའོ། །ཕྱོགས་ཀྱི་ལྷ་མཉམ་པ་ཉིད་ལ་མངོན་དུ་ལྟ་བའི་རྣམ་པར་ཐར་པ་ནི། དགོས་པ་ཐམས་ཅད་དང་རྫུ་འཕྲུལ་གྱི་ཚོགས་ཀྱི་འོད་ཅེས་བྱའོ། །ཕྱོགས་ཀྱི་ལྷ་སྣང་བ་སྤྱོད་པའི་རྒྱན་གྱི་རྣམ་པར་ཐར་པ་ནི། ཆགས་པའི་མུན་པ་ཐམས་ཅད་རྣམ་པར་སེལ་བའི་སྣང་བས་དགའ་བ་དང་བདེ་བ་འབྱུང་བ་ཞེས་བྱའོ། །ཕྱོགས་ཀྱི་ལྷ་ཀུན་ཏུ་རྒྱུ་ཞིང་རྗེས་སུ་འབྲང་བའི་རྣམ་པར་ཐར་པ་ནི། ཐམས་ཅད་ཀྱི་རྗེས་སུ་སོང་བའི་སངས་རྒྱས་ཀྱི་ཡོན་ཏན་རྗེས་སུ་དྲན་པ་དོན་ཡོད་པ་སྟོན་པ་ཞེས་བྱའོ། །ཕྱོགས་ཀྱི་ལྷ་རྨོངས་པ་བྱེད་པའི་གཙུག་ཡོངས་སུ་གྲུབ་པའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་མིང་གི་ཕྱོགས་ཀྱི་འཁོར་ལོ་ལ་རྣམ་པར་ལྟ་བའི་འོད་ཅེས་བྱའོ། །ཕྱོགས་ཀྱི་ལྷ་ནམ་མཁའི་རྒྱུད་ཀུན་ཏུ་སྤྱོད་པའི་རྣམ་པར་ཐར་པ་ནི། སྒྲ་དབྱངས་ཡིད་དུ་འོང་བ་ཐམས་
Ka53a
༄#། །ཅད་མྱོང་བར་བྱེད་པས་དགའ་བ་རྣམ་པར་སྒོམ་པ་ཞེས་བྱའོ། །ཕྱོགས་ཀྱི་ལྷ་རྣམ་པར་དཔྱོད་པའི་སྤྲིན་རྒྱ་ཆེན་པོའི་རྒྱལ་མཚན་གྱི་རྣམ་པར་ཐར་པ་ནི། ཀླུའི་སྤྲིན་འབྱུང་བ་དཀའ་བ་སྦྱོར་བ་ཞེས་བྱའོ། །ཕྱོགས་ཀྱི་ལྷ་མིག་ཐ་དད་པ་མེད་པའི་གཙུག་ཕུད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་ལས་ཐ་དད་པ་མེད་པ་ལ་ཡང་དག་པར་ལྟ་བའི་བདག་པོའི་རྒྱན་ཅེས་བྱའོ། །ཕྱོགས་ཀྱི་ལྷ་འཇིག་རྟེན་གྱི་བྱ་བ་ཀུན་ནས་སྤྱོད་པའི་རྣམ་པར་ཐར་པ་ནི། སྐྱེ་བ་སྣ་ཚོགས་དང ། ལས་རྣམ་པ་ཐ་དད་པ་ལ་རྣམ་པར་ལྟ་བ་ཞེས་བྱའོ། །ཕྱོགས་ཀྱི་ལྷ་ཕྱོགས་སུ་རྣམ་པར་ལྟ་བའི་ཕྲེང་བའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་དགོས་པའི་ཕ་རོལ་ཏུ་ཕྱིན་པར་བྱ་བས་རབ་ཏུ་དགའ་བ་རྩོམ་པ་འབྱུང་བ་ཞེས་བྱའོ། །དེ་ནས་ཕྱོགས་ཀྱི་ལྷ་ཕྱོགས་ཀྱི་དབྱིངས་ན་རབ་ཏུ་གནས་ཤིང་ཀུན་ཏུ་རྒྱས་པར་འགེངས་པས་སངས་རྒྱས་ཀྱི་མཐུས་ཕྱོགས་ཀྱི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འགྲོ་བ་ཐམས་ཅད་ཡོངས་སུ་སྨིན་བྱའི་ཕྱིར། །སངས་རྒྱས་རང་བྱུང་འཇིག་རྟེན་སྤྱོད་པ་བྱུང ། །ཐམས་ཅད་མཁྱེན་པར་ཡོངས་སུ་སྨིན་བྱའི་ཕྱིར། །ཆོས་ཀྱི་ཕྱོགས་ལ་རབ་ཏུ་འཇུག་པ་སྟོན། །རྫུ་འཕྲུལ་སྟོབས་ནི་འགྲོ་བ་ཀུན་དང་མཉམ། །རྣམ་པ་དུ་མ་
Ka53b
སེམས་ཅན་བསམ་པ་སྟོན། །རྒྱལ་བ་མཐོང་བས་འགྲོ་བའི་སྡུག་བསྔལ་འགྲོལ། །ཀུན་ཏུ་མངོན་པར་ལྟ་བའི་སྤྱོད་ཡུལ་ལོ། །སེམས་ཅན་རྒྱ་མཚོ་མུན་པས་བསྒྲིབས་པ་ལ། །སངས་རྒྱས་ཆོས་ཀྱི་སྒྲོན་མ་སྣང་བ་སྟོན། །རྣམ་པར་སྣང་བའི་སངས་རྒྱས་འོད་ཀྱང་མཐོང ། །སྣང་བ་སྤྱོད་པ་རྣམ་ཐར་འདི་ལ་དགའ། །ཆོས་ཀྱི་འཁོར་ལོ་ཐམས་ཅད་ཀུན་ཏུ་བསྐོར། །སེམས་ཅན་ཉོན་མོངས་ཞི་མཛད་ཐོགས་པ་མེད། །དབྱངས་ཀྱི་ཡན་ལག་ཐམས་ཅད་ཡོངས་སུ་རྒྱས། །ཀུན་ནས་འཁྱིལ་བའི་དཔལ་གྱིས་རབ་ཏུ་འཐོབ། །འགྲོ་བའི་མིང་གི་འཁོར་ལོ་ཇི་སྙེད་པ། །སངས་རྒྱས་མཚན་གྱིས་དེ་དག་ཐམས་ཅད་འཐོན། །སེམས་ཅན་རྣམས་ཀྱི་གཏི་མུག་རྣམ་པར་ཟློག་།འདི་ནི་གཏི་མུག་རྣམ་དག་སྤྱོད་ཡུལ་ལོ། །སངས་རྒྱས་མངོན་སུམ་སེམས་ཅན་གང་འགྲོ་བ། །དེ་དག་ཐམས་ཅད་སངས་རྒྱས་གསུང་སྙན་ཉན། །དགའ་བ་རྒྱ་ཆེན་ཤིན་ཏུ་ཡངས་པ་འཐོབ། །འདི་ནི་ནམ་མཁའི་རྒྱུད་ཀྱི་རྣམ་ཐར་ཏོ། །སྐད་ཅིག་སེམས་རྒྱུད་ཀུན་ལ་ཚད་མེད་པའི། །ཆོས་ཀྱི་སྤྲིན་ཆར་རྒྱལ་བ་འབེབས་པ་མཛད། །འགྲོ་བའི་ཉོན་མོངས་ཐམས་ཅད་རབ་ཏུ་འཇིལ། །འདི་ལ་སྤྲིན་གྱི་རྒྱལ་མཚན་ལྷ་འཇུག་གོ་།སེམས་ཅན་ཀུན་གྱི་རྒྱ་མཚོའི་ལས་རྣམས་ཀུན། །སངས་རྒྱས་རྣམ་པ་གཞན་མིན་ཡང་དག་སྟོན། །སེམས་ཅན་ཉོན་མོངས་ལས་ལས་རབ་ཏུ་བཀྲོལ། །འཇིག་རྟེན་བྱ་བ་སྤྱོད་བདག་སྤྱོད་ཡུལ་ལོ། །སངས་
Ka54a
༄#། །རྒྱས་སྔོན་ཆད་སྤྱད་པ་སྤྱོད་པའི་ཚེ། །སེམས་ཅན་དོན་དུ་ཐུགས་རྗེ་རབ་བསྐྱེད་དེ། །ཕ་རོལ་ཕྱིན་པ་ཐམས་ཅད་རྒྱས་པར་བཀང ། །སྣ་ཚོགས་ཕྲེང་བའི་འོད་ནི་འདི་ལ་དགའ། །ཕྱོགས་རྣམས་སེམས་ཅན་རྒྱལ་བས་སྣང་མཛད་པས། །བསམ་པ་རྒྱ་མཚོ་རྣམ་པ་སྣ་ཚོགས་ཀྱིས། །དེ་དག་མཐའ་ཡས་ཕྱོགས་ཀྱི་ཆོས་འཇུག་གོ། མིག་བཟང་གཙུག་ཕུད་ཚུལ་འདིར་རབ་ཏུ་འཇུག་།དེ་ལ་ནམ་མཁའི་ལྷ་ཀུན་ནས་སྣང་བ་དྲི་མ་མེད་པའི་འོད་ཀྱི་རྣམ་པར་ཐར་པ་ནི། འགྲོ་བ་རྒྱ་མཚོ་མཐའ་ཡས་པའི་བསམ་པ་ལ་རྣམ་པར་ལྟ་བ་ཞེས་བྱའོ། །ནམ་མཁའི་ལྷ་མཐའ་ཡས་ཤིང་ཟབ་པ་ཀུན་ཏུ་རྒྱས་པར་བྱེད་པའི་རྣམ་པར་ཐར་པ་ནི། ཆོས་ཀྱི་དབྱིངས་རྒྱ་ཆེན་པོ་དང ། སངས་རྒྱས་ཀྱི་ཡེ་ཤེས་ཟབ་མོ་ལ་ཡང་དག་པར་འཇུག་པ་ཞེས་བྱའོ། །ནམ་མཁའི་ལྷ་རླུང་ཀུན་ནས་འབྱུང་བའི་དཔལ་གྱི་རྣམ་པར་ཐར་པ་ནི། ཡུལ་མཐའ་ཡས་པ་རྣམ་པར་སྒོམ་པའི་མཚན་ཉིད་ཀྱི་ལུས་ཞེས་བྱའོ། །ནམ་མཁའི་ལྷ་སྒྲིབ་པ་ཐམས་ཅད་དང་མི་གནས་པའི་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ལས་དང་ཉོན་མོངས་པའི་སྒྲིབ་པ་ཡོངས་སུ་སྦྱངས་པའི་རྒྱན་ཅེས་བྱའོ། །ནམ་མཁའི་ལྷ་རྒྱ་ཆེན་པོ་ཀུན་ཏུ་གནོན་པ་སྣ་ཚོགས་ཀྱི་གཙུག་བུད་ཀྱི་རྣམ་པར་ཐར་པ་ནི། འགྲོ་བ་རྒྱ་མཚོ་རྒྱ་ཆེན་པོ་ལ་རྣམ་པར་ལྟ་ཞིང་
Ka54b
རྣམ་པར་སྤྱོད་པ་ཞེས་བྱའོ། །ནམ་མཁའི་ལྷ་འོད་ཟེར་སྣང་བའི་འོད་ཐོགས་པ་མེད་པའི་རྣམ་པར་ཐར་པ་ནི། འགྲོ་བ་ལོག་པར་ལྷུང་བ་ཐམས་ཅད་སྙིང་རྗེའི་འོད་ཀྱིས་སྐྱོབ་པ་ཞེས་བྱའོ། །ནམ་མཁའི་ལྷ་སྟོབས་ཀྱི་རྒྱུན་ཐོགས་པ་མེད་པའི་དཔལ་གྱི་རྣམ་པར་ཐར་པ་ནི། བསོད་ནམས་ཐམས་ཅད་ཀྱི་སྟོབས་དང་དགའ་བ་བསྡུ་བ་ལ་ཡང་དག་པར་གཞོལ་བ་ཞེས་བྱའོ། །ནམ་མཁའི་ལྷ་ཕྱོགས་དྲི་མ་མེད་པར་སྣང་བའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་དྲི་མ་མེད་པའི་སེམས་ཀྱིས་སྒྲིབ་པ་རྣམ་པར་ཟློག་པར་གནས་པའི་དབང་པོ་ཞེས་བྱའོ། །ནམ་མཁའི་ལྷ་དབྱངས་ཤིན་ཏུ་འཕགས་ཤིང་ཟབ་པའི་རྣམ་པར་ཐར་པ་ནི། ཡེ་ཤེས་ཀྱི་དཀྱིལ་འཁོར་གྱི་འོད་རབ་ཏུ་འཕགས་པས་ཕྱོགས་ཀུན་ཏུ་རྣམ་པར་ལྟ་བ་ཞེས་བྱའོ། །ནམ་མཁའི་ལྷ་ཕྱོགས་བཅུར་མངོན་དུ་སྟོན་པའི་འོད་ཀྱི་རྣམ་པར་ཐར་པ་ནི། སྒོ་ཐམས་ཅད་ནས་ཕྱོགས་ཐམས་ཅད་དུ་འཕོ་བ་མེད་པའི་དཀྱིལ་འཁོར་ཅེས་བྱའོ། ། དེ་ནས་ནམ་མཁའི་ལྷ་ཀུན་ནས་སྣང་བ་དྲི་མ་མེད་པའི་འོད་ཀྱིས་སངས་རྒྱས་ཀྱི་མཐུས་ནམ་མཁའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་སྤྱན་ནི་རྒྱ་ཆེན་ཡངས་པ་ཡིས། །སེམས་ཅན་རྒྱ་མཚོ་མ་ལུས་ཀུན་གཟིགས་ཏེ། །འགྲོ་བ་ཀུན་ལ་མངོན་པར་རབ་ཏུ་བཞུགས།།
Ka55a
༄#། །སངས་རྒྱས་དྲི་མེད་ནམ་མཁའ་རབ་ཏུ་འདྲ། །སངས་རྒྱས་སྐུ་ཡི་རྒྱ་ཆེན་འོད་ཀྱི་རྣམས། །ཕྱོགས་བཅུའི་འགྲོ་ཀུན་ཁྱབ་ཅིང་རྣམ་པར་མཛེས། །ཐམས་ཅད་ཕྱོགས་སུ་མངོན་པར་རབ་ཏུ་གནས། །ཀུན་ཏུ་རྒྱས་པའི་འོད་ཀྱིས་འདི་མཐོང་ངོ ། །རྒྱལ་བ་ནམ་མཁའི་མཚན་ཉིད་འབྱུང་བ་མེད། །འདི་ལ་གཟུང་བ་སྣང་བ་གང་ཡང་མེད། །ཐོགས་པ་མེད་ཅིང་རང་བཞིན་མེད་པ་སྟེ། །རླུང་གི་འོད་ཀྱིས་རྣམ་ཐར་འདི་མཐོང་ངོ ། །བསྐལ་པ་རྒྱ་མཚོ་བརྒྱ་ཕྲག་མང་པོར་ཡང ། །སངས་རྒྱས་སེམས་ཅན་སྒྲིབ་པ་སེལ་བར་མཛད། །ལམ་ཡངས་རྣམ་པར་ཐར་པ་རབ་ཏུ་སྟོན། །འདི་ནི་དཔའ་བོ་དཀྱིལ་འཁོར་འོད་ཀྱི་འོ། །སྔོན་ཆད་སངས་རྒྱས་བྱང་ཆུབ་སྤྱོད་པའི་རྣམས། །འགྲོ་བ་ཀུན་ལ་ཕན་དང་བདེ་དོན་དུ། །ཇི་ལྟར་བྱུང་བ་དེ་དག་བདག་གིས་མཐོང ། །འདི་ནི་སྣ་ཚོགས་གཙུག་ཕུད་སྤྱོད་ཡུལ་ལོ། །འཁོར་བ་རྒྱ་མཚོ་ཀུན་ཏུ་རྒྱུ་བ་ཡི། །སེམས་ཅན་ལོག་པར་ལྷུང་ཞིང་འཁོར་བ་ལ། །སངས་རྒྱས་འོད་ནི་སྡུག་བསྔལ་ཞི་བའི་རྒྱུ། །སྣང་བའི་འོད་ཀྱིས་རྣམ་ཐར་འདི་མཐོང་ངོ ། །བསོད་ནམས་དགེ་བ་ཐམས་ཅད་སྙིང་པོ་སྟེ། ། ཆགས་མེད་སྟོབས་དང་ཡེ་ཤེས་རྒྱ་ཆེན་མཁྱེན། །འགྲོ་བ་ཐམས་ཅད་བསོད་ནམས་ཞིང་གྱུར་པ། །སངས་རྒྱས་དེ་ལྟར་ཆགས་མེད་སྟོབས་སེམས་སོ། །མུན་པ་སྟུག་
Ka55b
པོའི་སྤྱོད་ཡུལ་རྣམ་རྒྱུ་བའི། །སེམས་ཅན་སྒྲིབ་པས་རབ་ཏུ་བློང་བ་ལ། །དེ་བཞིན་གཤེགས་པ་སྣང་བ་རབ་འགྱེད་དེ། །དྲི་མེད་ཕྱོགས་སྣང་ལྷས་ནི་དེ་མཐོང་ངོ ། །སངས་རྒྱས་ཡེ་ཤེས་ཤིན་ཏུ་འཕགས་པ་ཡི། །མཐའ་དང་དབུས་ཡང་དམིགས་པར་མི་རུང་སྟེ། །ཞིང་ཀུན་འགྲོ་ལ་མངོན་པར་འོད་ཀྱང་སྣང ། །ཟབ་མོའི་འོད་ཀྱིས་དེ་ལྟར་སངས་རྒྱས་མཐོང ། ། ཕྱོགས་རྣམས་རྒྱ་མཚོ་ཀུན་ན་སྤྱོད་པ་ཡི། །སེམས་ཅན་ཐམས་ཅད་ཡོངས་སུ་དགྲོལ་བའི་ཕྱིར། །སངས་རྒྱས་སྨོན་ལམ་རྒྱ་ཆེན་ཤིན་ཏུ་ཡངས། །མངོན་པར་ལྟ་བས་རྣམ་ཐར་འདི་མཐོང་ངོ ། །དེ་ལ་རླུང་གི་ཕུང་པོའི་ལྷ་ཆགས་པ་མེད་པར་འགྲོ་བའི་འོད་ཀྱི་རྣམ་པར་ཐར་པ་ནི། འཇིག་རྟེན་གྱི་བྱ་བ་ཐམས་ཅད་སངས་རྒྱས་ཀྱི་ཆོས་སུ་ཡང་དག་པར་འཇུག་པ་ཞེས་བྱའོ། །རླུང་གི་ལྷ་ཀུན་ཏུ་རྒྱས་པར་འབྱུང་བའི་མཐུའི་དཔལ་གྱི་རྣམ་པར་ཐར་པ་ནི། སངས་རྒྱས་མཆོད་པའི་ཡུལ་མཐའ་ཡས་པ་རྒྱ་ཆེན་པོ་མངོན་པར་སྒྲུབ་པ་སྟོན་པ་ཞེས་བྱའོ། །རླུང་གི་ལྷ་ཀུན་ཏུ་རེག་པར་བྱེད་པའི་སྤྲིན་གྱི་རྒྱལ་མཚན་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ནད་རབ་ཏུ་ཞི་བར་བྱེད་པ་ཞེས་བྱའོ། །རླུང་གི་ལྷ་རྒྱན་ཡིད་དུ་འོང་ཞིང་བཟང་བའི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྒྲིབ་པའི་རི་འཇོམས་པའི་དགེ་བའི་རྩ་བ་རབ་ཏུ་འབྱུང་བ་ཞེས་བྱའོ། །རླུང་གི་ལྷ་ཆུ་དྲག་པོའི་སྙིང་
Ka56a
༄#། །པོ་སྐེམ་པའི་རྣམ་པར་ཐར་པ་ནི། བདུད་ཀྱི་འཁོར་ལོ་སྒོ་ཀུན་ནས་འཇོམས་པ་ཞེས་བྱའོ། །རླུང་གི་ལྷ་སྒྲ་ཆེན་པོས་འགྲོ་བའི་དབྱངས་ཀྱི་རྣམ་པར་ཐར་པ་ནི། སེམས་ཅན་མཐའ་ཡས་པའི་འཇིགས་པ་རྣམ་པར་ཟློག་ཅིང་ཞི་བར་བྱེད་པ་ཞེས་བྱའོ། །རླུང་གི་ལྷ་ཤིང་གི་རྩེ་མོའི་མེ་ཏོག་རབ་ཏུ་འཕྱང་བའི་གཙུག་ཕུད་ཀྱི་རྣམ་པར་ཐར་པ་ནི། ཆོས་ཐམས་ཅད་ཀྱི་ཚུལ་ཐ་དད་པ་མེད་པར་ཡང་དག་པར་ཤེས་པ་རྒྱ་མཚོ་ལ་འཇུག་པ་ཞེས་བྱའོ། །རླུང་གི་ལྷ་ཐོགས་པ་མེད་པར་ཕྱོགས་ཀུན་ཏུ་རྒྱས་པར་འགྲོ་བའི་རྣམ་པར་ཐར་པ་ནི། འགྲོ་བ་ཐམས་ཅད་མཉམ་པར་དགོད་པའི་ཚུལ་གྱིས་འདུལ་བའི་སྙིང་པོ་ཞེས་བྱའོ། །རླུང་གི་ལྷ་རླུང་གི་ཕུང་པོ་རྣམ་པ་སྣ་ཚོགས་འབྱུང་བའི་སྤྲིན་གྱི་དཀྱིལ་འཁོར་གྱི་རྣམ་པར་ཐར་པ་ནི། བསམ་གཏན་གྱི་སྒོ་རབ་ཏུ་ཞི་བའི་ཤུགས་ཀྱིས་གཏི་མུག་རབ་ཏུ་ཞི་བར་བྱེད་པ་ཞེས་བྱའོ། །རླུང་གི་ལྷ་འཇིག་རྟེན་ཐམས་ཅད་ཀྱི་མུན་པ་ཀུན་ནས་སྣང་བར་བྱེད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་སྤྱོད་པའི་རྗེས་སུ་བསྙེགས་པས་ཐོགས་པ་མེད་པའི་རྒྱན་ཅེས་བྱའོ། །དེ་ནས་རླུང་གི་ལྷ་ཆགས་པ་མེད་པར་འགྲོ་བའི་འོད་ཀྱིས་སངས་རྒྱས་ཀྱི་མཐུས་རླུང་གི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བ་
Ka56b
ཀུན་གྱི་ཆོས་ཉིད་ཟབ་མོ་འཛིན་པ་སྟེ། །ཆགས་མེད་ཐམས་ཅད་ཚུལ་གྱིས་དེ་ལ་འཇུག་།འགྲོ་བ་ཀུན་ལ་སངས་རྒྱས་མངོན་དུ་བཞུགས། །དེ་ནི་མཚན་མེད་གཟུགས་བརྙན་ཡོད་པ་མིན། །སངས་རྒྱས་ཐམས་ཅད་མཐུ་ལ་རྣམ་པར་ལྟོས། །བྱང་ཆུབ་སྤྱད་པ་མཐའ་ཡས་སྤྱོད་པའི་ཚེ། །སྐད་ཅིག་གཅིག་གིས་སངས་རྒྱས་མཆོད་ཅིང་བསྟོད། །དེ་ལ་རྒྱས་བྱེད་འོད་ཀྱི་ལྷ་འཇུག་གོ་།སངས་རྒྱས་བསམ་གྱིས་མི་ཁྱབ་འགྲོ་བའི་མགོན། །ཚུལ་རྣམས་ཀུན་གྱིས་སྦྱོར་བ་ཆུད་ཟ་མེད། །སྡུག་བསྔལ་ཀུན་ལས་སེམས་ཅན་མ་ལུས་སྐྱོབ། །རྒྱལ་མཚན་རེག་པས་རྣམ་ཐར་འདི་མཐོང་ངོ ། །འགེབས་དང་སྒྲིབ་པ་ཤིན་ཏུ་སྟུག་པོ་ཡི། །མི་བདེས་བསྒྲིབས་ཤིང་བསོད་ནམས་མེད་པ་ཡི། །སེམས་ཅན་སྡུག་བསྔལ་ཀུན་ལས་མ་ལུས་བཀྲོལ།། རྒྱན་གྱིས་བརྒྱན་པའི་ལྷས་ནི་འདི་མཐོང་ངོ ། །རྒྱལ་བའི་རྫུ་འཕྲུལ་རྣམ་པར་འཕྲུལ་ལ་ལྟོས། །རྣམ་པ་ཀུན་གྱིས་བདུད་རྣམས་ཤིན་ཏུ་འཇོམས། །ཚུལ་གྱིས་འདུལ་བ་དེ་ལ་རབ་ཏུ་སྒྲོག་།གཟི་བརྗིད་དྲག་པོའི་མཐུས་ནི་འདི་མཐོང་ངོ ། །རྒྱལ་བའི་བ་སྤུའི་སྒོ་རྣམས་ཐམས་ཅད་ནས། །འགྲོ་བ་ཀུན་འགེངས་སྒྲ་ཡི་དབྱངས་འབྱུང་བ། །དེ་དག་སྡུག་བསྔལ་འཇིགས་པ་ཐམས་ཅད་མེད། །འདི་ནི་སྒྲ་སྒྲོག་ལྷ་ཡིས་རབ་ཏུ་ཤེས། །འགྲོ་བ་ཀུན་མཉམ་རྒྱ་མཚོའི་ཞིང་རྣམས་སུ། །སོ་སོ་ཡང་དག་རིག་པས་བདེར་གཤེགས་སོ། །མཐའ་ཡས་བསྐལ་པར་
Ka57a
༄#། །རང་བྱུང་ཡང་དག་སྟོན། །ཤིང་གི་གཙུག་ཕུད་འཕྱང་བ་དེ་ལ་འཇུག་།རྒྱལ་བའི་ཡེ་ཤེས་ཐབས་རྣམས་ཀུན་སྒོ་ནས། །ཀུན་ཏུ་ཆགས་ཤིང་ཐོགས་པ་མེད་པ་སྟེ། །སྤྱོད་ཡུལ་གཞལ་ཡས་ཀུན་ཏུ་མཐའ་ཡང་མེད། །འདི་ནི་ཆགས་མེད་འགྲོ་བའི་རྣམ་ཐར་ཏོ། །རྒྱལ་བའི་སྤྱོད་ཡུལ་མཐའ་ཡས་དག་ལ་ལྟོས། །རབ་ཞི་སྐུ་མངའ་མཚན་མེད་སངས་རྒྱས་ཏེ། །ཐབས་སྒོ་ཀུན་ནས་འོན་ཀྱང་རབ་ཏུ་སྣང ། །ཕུང་པོ་སྣ་ཚོགས་བདག་པོའི་རྣམ་ཐར་ཏོ། །མི་མགོན་བསྐལ་པ་མཐའ་ཡས་སྤྱོད་པའི་ཚེ། །དེ་འདྲའི་ཆོས་ཀྱིས་འགྲོ་ཀུན་ཚིམ་མཛད་པས། །ཐམས་ཅད་སྟོབས་ལ་སངས་རྒྱས་རབ་ཏུ་བཞུགས། །འཇིག་རྟེན་སྟོབས་འཛིན་ལྷ་ཡིས་འདི་མཐོང་ངོ ། །དེ་ལ་མེའི་ལྷ་གཟི་བརྗིད་འབར་ཞིང་འཕྲོ་བའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པའི་དབའ་རླབས་ཐམས་ཅད་དང ། མུན་པ་ཐམས་ཅད་དང་མི་གནས་པ་ཞེས་བྱའོ། །མེའི་ལྷ་ཀུན་ཏུ་འབར་ཞིང་འཕྲོ་བའི་རྒྱལ་མཚན་གྱི་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པའི་དབའ་རླབས་དང ། རབ་ཏུ་གདུང་བ་རྣམ་པར་ཟློག་པ་ཞེས་བྱའོ། །མེའི་ལྷ་འོད་རྒྱ་ཆེན་པོས་ཕྱོགས་རྒྱས་པར་བྱེད་པའི་རྣམ་པར་ཐར་པ་ནི། བསོད་ནམས་ཀྱི་སྟོབས་མི་སྒུལ་བ་དང ། སྙིང་རྗེ་བ་དང་བྱམས་པའི་
Ka57b
སྙིང་པོ་ཞེས་བྱའོ། །མེའི་ལྷ་རྒྱལ་མཚན་གྱ་རྡུལ་གྱི་སྒོས་རྒྱས་པར་བྱེད་པའི་རྣམ་པར་ཐར་པ་ནི། ཉོན་མོངས་པའི་རྡུལ་གྱིས་གཡོག་པ་རྣམ་པར་སེལ་བ་ཞེས་བྱའོ། །མེའི་ལྷ་གཟི་བརྗིད་མི་ཟད་པའི་གཙུག་ཕུད་ཀྱི་རྣམ་པར་ཐར་པ་ནི། ནམ་མཁའ་མཐའ་ཡས་པ་སྣང་བས་གསལ་བར་བྱེད་པའི་འོད་ཅེས་བྱའོ། །མེའི་ལྷ་དཀའ་ཐུབ་སྣ་ཚོགས་ཀྱི་མིག་གི་དཔལ་གྱི་རྣམ་པར་ཐར་པ་ནི། དགེ་བ་དང་བསོད་ནམས་སྣ་ཚོགས་རྣམ་པར་སྣང་བའི་འོད་རབ་ཏུ་ཞི་བ་ཞེས་བྱའོ། །མེའི་ལྷ་ཕྱོགས་ཁྱིམ་དུ་གྱུར་པའི་རི་རབ་ཀྱི་སྤོའི་རྣམ་པར་ཐར་པ་ནི། འཇིག་རྟེན་གྱི་རྒྱུད་ཐམས་ཅད་མེ་ལྟར་འབར་བའི་སེམས་ཅན་གྱི་སྡུག་བསྔལ་རབ་ཏུ་ཞི་བར་བྱེད་པ་ཞེས་བྱའོ། །མེའི་ལྷ་འོད་དྲག་ཤུལ་ཅན་གྱི་དབང་ཕྱུག་གི་རྣམ་པར་ཐར་པ་ནི། འཇིག་རྟེན་ཐམས་ཅད་ལ་དབང་སྒྱུར་བའི་རྩོམ་པས་རབ་ཏུ་གནོན་པ་ཞེས་བྱའོ། །མེའི་ལྷ་མུན་པ་དང་རབ་རིབ་སེལ་ཅིང་ཕྱོགས་རྣམ་པར་སྣང་བར་བྱེད་པའི་རྣམ་པར་ཐར་པ་ནི། ཆགས་པར་ལྟ་བའི་གཏི་མུག་ཐམས་ཅད་རྣམ་པར་སྤོང་བའི་འོད་སྣང་བ་ཞེས་བྱའོ། །མེའི་ལྷ་འོད་འཕྲོ་བའི་སྤྲིན་གྱི་དབང་ཕྱུག་གི་རྣམ་པར་ཐར་པ་ནི། ཆགས་པ་ཐམས་ཅད་ལ་མི་གནས་པའི་སྟོབས་འབྱུང་བ་ཡང་དག་པར་སྒྲུབ་པའི་ང་རོ་ཞེས་བྱའོ། །དེ་ནས་མེའི་ལྷ་གཟི་བརྗིད་འབར་ཞིང་འཕྲོ་བའི་འོད་ཀྱིས་སངས་རྒྱས་ཀྱི་མཐུས་མེའི་ལྷའི་འཁོར་གྱི་དཀྱིལ་འཁོར་ཐམས་
Ka58a
༄#། །ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་བརྩོན་འགྲུས་སྟོབས་ལ་རྣམ་པར་ལྟོས། །བསྐལ་པ་བྱེ་བ་རྒྱ་ཆེན་བསམ་ཡས་པར། །འགྲོ་བའི་དོན་དུ་ཕན་པ་རབ་བརྩམས་ཏེ། །སེམས་ཅན་ཀུན་གྱི་མུན་པ་རྣམ་པར་བསལ། །ཉོན་མོངས་དབའ་རླབས་ལྡན་པའི་འགྲོ་བ་རྣམས། །ལྟ་ལ་གནས་ཤིང་གཏི་མུག་བསྒྲིབས་པ་ཡི། །ཉོན་མོངས་མེ་ནི་མགོན་པོས་ཞི་བར་མཛད། །དེ་ལ་རྒྱལ་མཚན་དཀྱིལ་འཁོར་རབ་ཏུ་དགའ། །རྒྱལ་བའི་སྤྱོད་ཡུལ་རྒྱ་ཆེན་བདག་གིས་མཐོང ། །ཕྱི་མའི་མཐའ་ཡི་བསྐལ་པ་རྒྱ་མཚོར་ཡང ། །རྒྱལ་བའི་བྱིན་གྱིས་བརླབས་རྣམས་རབ་ཏུ་འཇུག་།མཐོང་ནས་སྣང་བའི་འོད་ནི་རབ་ཏུ་དགའ། །རྒྱལ་བའི་བསོད་ནམ་མི་ཟད་ནམ་མཁའ་བཞིན། །དེ་ཡི་མཐའ་ནི་ཀུན་ཏུ་མི་རྙེད་དེ། །རྒྱལ་བའི་ཐུགས་རྗེ་བསྐྱེད་དུ་ཡོང་མི་ནུས། །འདི་ལ་དཔལ་གྱི་སྤྲིན་སྒྲ་རབ་ཏུ་འཇུག་།བསྐལ་པ་བྱེ་བར་སྤྱད་པ་སྤྱོད་པའི་ཚེ། །ཆོས་ཚུལ་གང་རྣམས་བསྟན་པ་དེ་དག་གི་།མཐའ་ནི་ནམ་ཡང་རྙེད་པར་སླ་བ་མིན། །རྣམ་ཐར་འདི་ནི་གཟི་བརྗིད་གཙུག་ཕུད་ཀྱིའོ། །ཕྱོགས་བཅུའི་འཁོར་རྣམས་ཤིན་ཏུ་ཡངས་པ་དག་།སངས་རྒྱས་མགོན་པོ་ཐམས་ཅད་མངོན་དུ་ལྟ། །འགྲོ་བ་ཀུན་ལ་ཐུབ་པ་རྣམ་པར་མཛེས། །འདི་ལ་དཀའ་ཐུབ་འོད་འཕྲོ་དཔལ་འཇུག་
Ka58b
གོ་།འགྲོ་བ་ཀུན་ན་ཐུབ་པ་རབ་ཏུ་འཕགས། །ཁང་ཁྱིམ་ཐམས་ཅད་དག་ན་བཞུགས་པར་སྣང ། །རྣམ་པར་ཡངས་པའི་ཆོས་ཀྱི་ཆར་ཡང་འབེབས། །འདི་ནི་ཕྱོགས་སྣང་བྱེད་པའི་སྤྱོད་ཡུལ་ལོ། །རྒྱལ་བ་ཉིད་ཀྱི་ཆོས་རྣམས་ཟབ་པ་སྟེ། །ཐམས་ཅད་ཆོས་ཀྱི་འགྲོ་བར་རང་བྱུང་ཞིང ། །ངོ་བོ་ཉིད་ཀྱི་ཆོས་ཉིད་སྟོན་པ་མཛད། །དེ་ལ་དྲག་ཤུལ་འོད་ནི་རབ་ཏུ་དགའ། ། ལྟ་བའི་མུན་ནག་གཏི་མུག་བསྒྲིབས་པ་ཡི། །འཇིག་རྟེན་བག་མེད་འཁྲུགས་པ་ཐམས་ཅད་ལ། །རྒྱལ་བས་ཆོས་ནི་རབ་ཏུ་བསྟན་མཛད་དེ། །དེ་ལ་རྣམ་པར་སྣང་བའི་ལྷ་དགའ་འོ། །རྒྱལ་བའི་སྨོན་ལམ་སྔོན་ཆད་བྱུང་བའི་རྣམས། །ཅི་འདྲ་བསམ་གྱིས་ཁྱབ་པར་མི་རུང་སྟེ། །སྟོབས་དང་ཕ་རོལ་ཕྱིན་པས་རྣམ་པར་སྦྱངས། །འོད་འཕྲོའི་སྤྲིན་ནི་འདི་ལ་འདི་ལྟར་འཇུག་།དེ་ལ་ཆུའི་ལྷ་སྤྲིན་དང་ན་བུན་ཀུན་ཏུ་གྲུབ་པའི་རྒྱལ་མཚན་གྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་བྱམས་པའི་ཚུལ་ལ་ཡང་དག་པར་འཇུག་པ་ཞེས་བྱའོ། ། ཆུའི་ལྷ་སྤྲིན་སྒྲའི་ཤུགས་རྒྱ་མཚོའི་སྤྲིན་གྱི་རྣམ་པར་ཐར་པ་ནི། ཆོས་ཀྱི་སྤྲིན་མཐའ་ཡས་པ་འབྱུང་བའི་རྒྱན་ཅེས་བྱའོ། །ཆུའི་ལྷ་ཆུ་སྣ་ཚོགས་ཀྱི་གཙུག་ཕུད་ཀྱི་རྣམ་པར་ཐར་པ་ནི། འགྲོ་བ་སྣོད་དུ་གྱུར་པ་ཐམས་ཅད་ལ་རྣམ་པར་ལྟ་ཞིང་སྡུད་པའི་སྦྱོར་བ་ཞེས་བྱའོ། །ཆུའི་ལྷ་བཟང་པོར་འཁྱིལ་བ་གྲུབ་པའི་དཔལ་གྱི་རྣམ་པར་ཐར་པ་ནི། སངས་རྒྱས་ཀྱི་ཡུལ་ཟབ་མོའི་
Ka59a
༄#། །འོད་ཀྱི་ཆར་པའི་བྱིན་གྱིས་བརླབས་ཞེས་བྱའོ། །ཆུའི་ལྷ་ཀུན་ནས་སྤོས་དྲི་མ་མེད་པའི་མྱུ་གུའི་དཔལ་གྱི་རྣམ་པར་ཐར་པ་ནི། སངས་རྒྱས་ཀྱི་འོད་དྲི་མ་མེད་པ་རྣམ་པར་ལྟ་བ་ལ་ཡང་དག་པར་འཇུག་པའི་བྱིན་གྱིས་བརླབས་ཞེས་བྱའོ། །ཆུའི་ལྷ་དཔའ་རླབས་ཀྱི་སྒྲ་བསོད་ནམས་སྟེགས་ཀྱི་འོད་ཀྱི་རྣམ་པར་ཐར་པ་ནི། ཆོས་ཀྱི་དབྱིངས་མཚན་ཉིད་མེད་ཅིང་དྲི་མ་མེད་པ་ཞེས་བྱའོ། །ཆུའི་ལྷ་ཚིམ་པར་བྱ་བ་ལ་དབང་བྱེད་པ་ཡོངས་སུ་སྒྲུབ་པའི་རྣམ་པར་ཐར་པ་ནི། སྙིང་རྗེ་རྒྱ་མཚོ་མི་ཟད་པའི་སྒོར་འཇུག་པ་ཞེས་བྱའོ། །ཆུའི་ལྷ་སའི་རྡུལ་སྙེད་ཀྱི་སྒོ་ནས་དབྱངས་འབྱུང་བའི་རྣམ་པར་ཐར་པ་ནི། སངས་རྒྱས་དང ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དུ་དགའ་བའི་ཤུགས་འབྱུང་བའི་སྙིང་པོ་ཞེས་བྱའོ། །ཆུའི་ལྷ་འོད་ཀུན་ཏུ་འགྲོ་ཞིང་རྒྱས་པར་བྱེད་པའི་རྣམ་པར་ཐར་པ་ནི། བསོད་ནམས་ཆགས་པ་མེད་པ་ཤིན་ཏུ་རྒྱས་པས་ཀུན་ཏུ་སྣང་བར་བྱེད་པའི་དཀྱིལ་འཁོར་ཅེས་བྱའོ། །ཆུའི་ལྷ་རྒྱ་མཚོའི་དབྱིངས་ཀྱི་ང་རོའི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་འདུལ་བའི་སྦྱོར་བ་ནམ་མཁའ་ལྟ་བུས་འདུལ་བར་སྤྱོད་པ་ཞེས་བྱའོ། །དེ་ནས་ཆུའི་ལྷ་སྤྲིན་དང་ན་བུན་ཀུན་ཏུ་གྲུབ་པའི་རྒྱལ་མཚན་གྱིས་སངས་རྒྱས་ཀྱི་མཐུས་ཆུའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་
Ka59b
ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་མཚན་རྣམས་རེ་རེ་ཐམས་ཅད་ཀྱང ། །སངས་རྒྱས་ཞིང་གི་རྡུལ་དང་མཉམ་པ་ཡི། །བྱམས་པ་མངོན་དུ་གྱུར་པས་བྱུང་བ་བཟང ། ། སེམས་ཅན་ཀུན་གྱིས་བལྟ་ཞིང་མི་ངོམས་སོ། །འགྲོ་བ་ཀུན་ཏུ་རྒྱལ་བ་རྣམས་དྲུང་དུ། །སྐྱོ་བ་མེད་པར་སྤྱད་ཅིང་རྣམ་སྦྱངས་ཏེ། །རྣམ་པ་སྣ་ཚོགས་ཆོས་ཀྱི་སྒོ་ཡང་སྟོན། །རྒྱ་མཚོའི་ཤུགས་ནི་འདི་ཡི་ཚུལ་ལ་འཇུག་།རྒྱལ་བ་རྣམས་ནི་འཕོ་བར་མི་སྣང་སྟེ། །ཕྱོགས་རྣམས་བཅུ་ནས་བྱོན་པར་སྣང་བ་མེད། །སྣོད་ཀྱི་ཚུལ་བཞིན་སེམས་ཅན་རྣམས་ཀྱང་ལྟ། །ཆུ་ཡི་གཙུག་ཕུད་དཀྱིལ་འཁོར་དེ་ལ་ལྟ། །དེ་བཞིན་གཤེགས་པའི་ཡུལ་ནི་གཞལ་དུ་མེད། །སེམས་ཅན་ཀུན་གྱིས་བསམ་པར་མི་ནུས་ཏེ། །ཕྱོགས་རྣམས་ཀུན་ཏུ་ཁྱབ་པར་སྒྲ་སྒྲོག་གོ་།འདི་ནི་སྙན་པའི་གཙུག་ཕུད་ཡུལ་ཡིན་ནོ། །སངས་རྒྱས་འོད་ནི་མི་ཟད་གནས་པ་སྟེ། །བསམ་གྱིས་མི་ཁྱབ་ཆོས་ཀྱི་དབྱིངས་ཀྱིས་ཀླས། །སེམས་ཅན་ཐམས་ཅད་འདུལ་བ་རབ་ཏུ་སྟོན། །སྤོས་ཀྱི་ཕུང་པོ་སྣ་ཚོགས་ལྷ་ཡིས་མཐོང ། །དེ་བཞིན་གཤེགས་པ་ནམ་མཁའ་མཉམ་པ་སྟེ། །ཕྱོགས་རྣམས་ཀུན་ཏུ་དྲི་མེད་མཚན་ཉིད་མེད། །ཕྱོགས་རྣམས་ཀུན་ནའང་བཞུགས་པར་རབ་ཏུ་སྣང ། །དབའ་རླབས་སྒྲ་ཡི་བསོད་ནམས་འོད་ཀྱིས་མཐོང ། །སྙིང་རྗེའི་སྒོ་ནི་རྒྱ་མཚོ་ལྟ་བུ་སྟེ། །སེམས་ཅན་ཀུན་དང་མཉམ་པར་སྔོན་བཤད་དོ། །སྤྲིན་དང་འདྲ་བར་འགྲོ་བ་མངོན་སུམ་
Ka60a
༄#། །མོ། །དེ་ལྟར་དེ་ནི་དགའ་བ་འབྱུང་བས་མཐོང ། །ཕྱོགས་རྣམས་བཅུ་ན་ཞིང་རྣམས་གང་ཡོད་པ། །དེ་དག་ཀུན་ན་སངས་རྒྱས་གདན་བཞུགས་སྣང ། །ཤིན་ཏུ་རྒྱས་པའི་བྱང་ཆུབ་མངོན་སངས་རྒྱས། །དགའ་བ་རྡུལ་མེད་དབྱངས་ཀྱིས་དེ་མཐོང་ངོ ། །སངས་རྒྱས་སྤྱོད་ཡུལ་ཆགས་པ་མེད་པ་སྟེ། །ཤིན་ཏུ་རྒྱ་ཆེ་ཕྱོགས་རྣམས་ཀུན་ཏུ་གནས། །རྣམ་པར་འཕྲུལ་པ་རྒྱལ་བ་སྟོན་མཛད་དེ། །དེ་ལ་འཕྲོ་བའི་འོད་ཀྱི་ལྷ་འཇུག་གོ་།སྦྱོར་བའི་སྤྱོད་པ་རྣམས་ལ་མཐའ་མེད་དེ། །འགྲོ་བ་ཀུན་དབྱངས་ཐུབ་པ་མེད་པར་འཇུག་།རྒྱལ་བའི་བྱིན་གྱི་རླབས་ནི་འདི་འདྲ་སྟེ། །ང་རོས་འགེངས་པ་རྣམ་ཐར་འདི་ལ་འཇུག་།བམ་པོ་བཞི་པ། དེ་ལ་རྒྱ་མཚོའི་ལྷ་རིན་པོ་ཆེའི་འོད་འབྱུང་བའི་དཔལ་གྱི་རྣམ་པར་ཐར་པ་ནི།་འགྲོ་བ་ཐམས་ཅད་དང་མཉམ་པའི་བསོད་ནམས་རྒྱ་མཚོ་རིན་པོ་ཆེ་འབྱུང་བའི་རྒྱན་ཅེས་བྱའོ། །རྒྱ་མཚོའི་ལྷ་རྡོ་རྗེ་ཀུན་ནས་སྲ་ཞིང་མི་ཆོམས་པའི་རྒྱལ་མཚན་དང་ལྡན་པའི་རྣམ་པར་ཐར་པ་ནི། དགེ་བའི་རྩ་བ་ཐམས་ཅད་སྲུང་བའི་སྦྱོར་བ་ཞེས་བྱའོ། །རྒྱ་མཚོའི་ལྷ་རྡུལ་དང་དྲི་མ་མེད་པའི་གནས་དང་ལྡན་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པ་རྒྱ་མཚོ་མང་པོ་རྣམ་པར་སེལ་བ་ཞེས་བྱའོ། །རྒྱ་མཚོའི་ལྷ་ཀུན་ནས་ཆུ་དང ། རི་བོ་དང ། ཁྱིམ་གྱི་དཀྱིལ་འཁོར་གྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་
Ka60b
ངན་སོང་དང ། ངན་འགྲོའི་ལམ་རྣམ་པར་ཟློག་པ་ཞེས་བྱའོ། །རྒྱ་མཚོའི་ལྷ་སྐྱབས་རིན་པོ་ཆེ་མིག་གི་ཟླ་བའི་དཔལ་གྱི་རྣམ་པར་ཐར་པ་ནི། ཤུགས་ཆེན་པོས་གཏི་མུག་རྣམ་པར་སེལ་བ་ཞེས་བྱའོ། །རྒྱ་མཚོའི་ལྷ་ཀླུའི་དཔལ་པདྨོ་སྣ་ཚོགས་ཀྱི་གཙུག་ཕུད་ཀྱི་རྣམ་པར་ཐར་པ་ནི། རྒྱུད་ཐམས་ཅད་ཀྱི་སྡུག་བསྔལ་རབ་ཏུ་ཞི་བར་བྱེད་ཅིང ། བདེ་བ་འབྱུང་བར་བྱེད་པ་ཞེས་བྱའོ། །རྒྱ་མཚོའི་ལྷ་ཆུ་ལྟ་བུར་རོ་མཐུན་པ་འཛིན་པའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ལྟ་བ་དང ། རྨོངས་པའི་རང་བཞིན་དྲི་མ་མེད་པ་ཞེས་བྱའོ། །རྒྱ་མཚོའི་ལྷ་རིན་པོ་ཆེའི་འོད་འཕྲོ་བའི་མེ་ཏོག་གི་ཚོན་གྱི་འོད་ཀྱི་རྣམ་པར་ཐར་པ་ནི། རིན་པོ་ཆེའི་རིགས་ཐམས་ཅད་འབྱུང་ཞིང་བྱང་ཆུབ་ཀྱི་སེམས་རབ་ཏུ་སྐྱེ་བ་ཞེས་བྱའོ། །རྒྱ་མཚོའི་ལྷ་རི་རབ་སྲ་བའི་རྡོ་རྗེ་སྣ་ཚོགས་ཀྱི་རྣམ་པར་ཐར་པ་ནི། སེམས་རྒྱ་མཚོ་མི་སྒུལ་བའི་བསོད་ནམས་ལ་རྣམ་པར་ལྟ་བ་ཞེས་བྱའོ། །རྒྱ་མཚོའི་ལྷ་འབྲུག་སྒྲ་སྒྲོག་པ་རྒྱ་མཚོའི་ཤུགས་ཀྱི་དབྱངས་ཀྱི་རྣམ་པར་ཐར་པ་ནི། ཏིང་ངེ་འཛིན་གྱི་དཀྱིལ་འཁོར་ཐམས་ཅད་ཆོས་ཀྱི་དབྱིངས་སུ་ཡང་དག་པར་འཇུག་པའི་རྒྱལ་མཚན་ཞེས་བྱའོ། །དེ་ནས་རྒྱ་མཚོའི་ལྷ་རིན་པོ་ཆེའི་འོད་འབྱུང་བའི་དཔལ་གྱིས་སངས་རྒྱས་ཀྱི་མཐུས་རྒྱ་མཚོའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །
Ka61a
༄#། །བསྐལ་པ་རྒྱ་མཚོ་བསམ་གྱིས་མི་ཁྱབ་པར། །སངས་རྒྱས་རྒྱ་མཚོ་རྒྱ་ཆེན་མང་མཆོད་ཅིང ། །འགྲོ་བ་དག་ལ་བསོད་ནམས་མཚོས་སྤེལ་བས། །དེ་ཕྱིར་རྒྱལ་བ་ལྷམ་མེ་ལྷང་ངེ་འོ། །འགྲོ་བ་ཀུན་ཏུ་རྒྱལ་བ་མངོན་པར་མཛེས། །སེམས་ཅན་ཀུན་གྱི་དབང་པོ་བསམ་རྒྱུད་དུ། །ཆོས་ཀྱི་རྒྱ་མཚོ་རྒྱ་ཆེན་སྟོན་པ་མཛད། །རྡོ་རྗེ་སེམས་དཔའ་སྲ་བའི་དཔལ་དགའ་འོ། །འགྲོ་བ་ཀུན་ཏུ་འཇིག་རྟེན་མགོན་པོ་ནི། །ཆོས་ཀྱི་སྤྲིན་ལས་ཆར་ཆེན་ཡངས་པ་འབེབས། །སྡུག་བསྔལ་རྒྱ་མཚོ་ཞི་མཛད་ཟད་མི་ཤེས། །རྡུལ་དང་དྲི་མེད་འདི་ཡི་མཚན་ལ་འཇུག་།སེམས་ཅན་ཐམས་ཅད་མཉམ་མེད་ཉོན་མོངས་བསྒྲིབས། །ལམ་རྒྱུད་རྒྱ་མཚོའི་སྡུག་བསྔལ་ནང་ན་འཁོར། །དེ་དག་ལ་ནི་རྒྱལ་བའི་ཡུལ་སྟོན་ཏེ། །དཔལ་བཅུའི་ལྷ་ནི་འདི་ལ་རབ་ཏུ་དགའ། །བསྐལ་པ་རྒྱ་མཚོ་མང་པོ་བསམ་ཡས་སུ། །རྒྱལ་བས་སྤྱོད་པ་མི་ཟད་རྣམས་སྤྱད་དེ། །འགྲོ་བའི་གཏི་མུག་དཀྱིལ་འཁོར་རྣམ་པར་བཟློག་།རིན་ཆེན་ཟླ་བའི་དཔལ་ནི་འདི་ལ་འཇུག་།འཁོར་བའི་རྒྱ་མཚོ་སྡུག་བསྔལ་ཆེན་པོ་ན། །སེམས་ཅན་འཁོར་ཞིང་མི་བདེ་ཀུན་གཟིགས་ནས། །རྒྱལ་བས་བླ་ན་མེད་པའི་ལམ་ཡང་བསྟན། །ཀླུ་དཔལ་པདྨོ་གཙུག་ཕུད་འདི་ལ་དགའ། །སངས་རྒྱས་སྤྱོད་ཡུལ་བསམ་གྱིས་མི་ཁྱབ་ལྟོས། །ཆོས་ཀྱི་དབྱིངས་དང་ནམ་མཁའི་མཚན་ཉིད་དེ། །
Ka61b
འགྲོ་བའི་གཏི་མུག་དྲ་བ་རྣམ་པར་སྦྱོང ། །དེ་སྐད་ཆུ་འཛིན་ཤུགས་ནི་སྨྲ་ཞིང་བརྗོད། །སངས་རྒྱས་དྲ་མེད་བསམ་གྱིས་མི་ཁྱབ་ཅན། །འཇིག་རྟེན་ཀུན་གྱི་ཡུལ་དུ་རྣམ་པར་མཛེས། ། སྤྱོད་པའི་དཀྱིལ་འཁོར་འགྲོ་བ་ཀུན་ལ་སྟོན། །སྣ་ཚོགས་དཔལ་གྱི་མེ་ཏོག་སྤྱོད་ཡུལ་ལོ། །བདུད་ཀྱི་དཀྱིལ་འཁོར་མི་ཟད་རྒྱ་ཆེ་བའང ། །འབྱམས་ཀླས་ཐུགས་ཀྱི་སྐད་ཅིག་གཅིག་གིས་བཏུལ། །རྒྱལ་བ་བསམ་གྱིས་མི་ཁྱབ་མི་གཡོ་སྟེ། །རྡོ་རྗེ་རྡུལ་འཛིན་ཚུལ་ནི་འདི་ཡིན་ནོ། །ཆོས་ཀྱི་དབྱིངས་ནི་འབྱམས་ཀླས་ཀུན་བཀང་ཞང ། །ཕྱོགས་བཅུ་རྣམས་སུ་རྒྱལ་བའི་གསུང་ཡང་གྲག་།སངས་རྒྱས་སྤྱོད་ཡུལ་ཏིང་ངེ་འཛིན་ལས་སྐྱེས། །འདི་ལྟར་འདི་ལ་སྤྲིན་འབྱུང་རབ་ཏུ་འཇུག་།དེ་ལ་ཆུ་ཀླུང་གི་ལྷ་ཆུ་བོ་ཀུན་དང་ལྡན་པའི་རྣམ་པར་ཐར་པ་ནི། ཆོས་ཀྱི་ཆུ་བོ་མཐའ་མེད་པ་རྒྱས་པར་འགེངས་པ་ཞེས་བྱའོ། །ཆུ་ཀླུང་གི་ལྷ་རི་དང་ཆུ་ཀུན་ལ་བརྟེན་པའི་རྣམ་པར་ཐར་པ་ནི། ཉོན་མོངས་པ་ཐམས་ཅད་སྤང་བ་ལ་ཡང་དག་པར་འཇུག་པ་ཞེས་བྱའོ། །ཆུ་ཀླུང་གི་ལྷ་རྡུལ་ཐམས་ཅད་དྲི་མ་མེད་པར་རྣམ་པར་དག་པའི་མིག་གི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པའི་རྡུལ་དང་འགྲོགས་པའི་སྙིང་རྗེའི་ཚུལ་གྱིས་ཀུན་ཏུ་རྒྱས་པར་འགེངས་པ་ཞེས་བྱའོ། །ཆུ་ཀླུང་གི་ལྷ་ང་རོས་ཁྱབ་པར་བྱེད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་སྒྲ་ཡིད་དུ་མི་
Ka62a
༄#། །འོང་བ་ཟློག་ཅིང་ཕན་པ་སྐྱེད་པ་ཞེས་བྱའོ། །ཆུ་ཀླུང་གི་ལྷ་སྲོག་ཆགས་ཀྱི་རྒྱུད་མཐའ་ཡས་པ་སྐྱོབ་པའི་རྣམ་པར་ཐར་པ་ནི། སེམས་ཅན་ཐམས་ཅད་ལ་འཚེ་བ་མེད་པའི་བྱམས་པ་འབྱུང་བ་ཞེས་བྱའོ། །ཆུ་ཀླུང་གི་ལྷ་གདུང་བ་མེད་པ་རྒྱ་མཚོ་གདུང་བ་མེད་པའི་འོད་དྲི་མ་མེད་པའི་རྣམ་པར་ཐར་པ་ནི། དགེ་བའི་རྩ་བ་ཐམས་ཅད་གདུང་བར་མི་ནུས་པའི་སྒོ་ཀུན་ནས་སྟོན་པ་ཞེས་བྱའོ། །ཆུ་ཀླུང་གི་ལྷ་དགའ་བདེ་ཀུན་ནས་འབྱུང་བའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་འཇུངས་པ་སེལ་ཅིང་གཏོང་བ་ཕུན་སུམ་ཚོགས་པ་ཡོངས་སུ་སྦྱོང་བ་ཞེས་བྱའོ། །ཆུ་ཀླུང་གི་ལྷ་ཡོན་ཏན་གྱི་ཤུགས་ཡངས་པའི་རྒྱལ་མཚན་གྱི་རྣམ་པར་ཐར་པ་ནི། ཐམས་ཅད་ཚིམ་པར་བྱེད་པའི་བསོད་ནམས་ཀྱི་ཞིང་རབ་ཏུ་འབྱུང་བ་ཞེས་བྱའོ། །ཆུ་ཀླུང་གི་ལྷ་འཇིག་རྟེན་ཐམས་ཅད་ཀྱི་དཔལ་རྣམ་པར་སྣང་བའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པ་རྣམ་པར་བྱང་བར་བྱེད་ཅིང་འཁོན་དུ་འཛིན་པ་དམ་པོ་དང ། ཁྲོ་བའི་ཤུགས་དང་བར་བྱེད་པ་ཞེས་བྱའོ། །ཆུ་ཀླུང་གི་ལྷ་ཚོགས་ཆེན་པོ་རྒྱ་མཚོའི་དཔལ་གྱི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་བདེ་བ་ཕུན་སུམ་ཚོགས་པ་མྱོང་བར་བྱེད་ཅིང་ཐར་པ་རྒྱ་མཚོ་ལ་འཛུད་པ་ཞེས་བྱའོ། །དེ་ནས་ཆུ་ཀླུང་གི་ལྷ་ཆུ་བོ་ཀུན་དང་ལྡན་པས །
Ka62b
སངས་རྒྱས་ཀྱི་མཐུས་ཆུ་ཀླུང་གི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆོས་རྣམས་རྒྱ་མཚོ་མཐའ་ཡས་སྤྱོད་པ་དག་།སྔོན་ཆད་རྒྱལ་བས་སེམས་ཅན་དོན་དུ་སྦྱངས། །འཇིག་རྟེན་བཀང་ཞིང་ཉོན་མོངས་གདུངས་པ་རྣམས། །སྤྲིན་ཆེན་ཆར་བཞིན་རབ་ཏུ་ཞི་བར་མཛད། ། བསྐལ་པ་བརྗོད་དུ་མེད་པར་རྒྱལ་བས་སྔོན། །སྨོན་ལམ་འོད་ཀྱིས་སེམས་ཅན་དབྱིངས་སྦྱངས་ཤིང ། །འགྲོ་བ་ཡོངས་སྨིན་དབང་པོ་ཆོས་ཀྱང་མཁྱེན། །འཁྱིལ་བ་ཞེས་བྱ་ཆུ་ཀླུང་ལྷ་དགའ་འོ། །འགྲོ་དང་མཉམ་པའི་སྙིང་རྗེའི་ཚུལ་བསྒོམས་ཤིང ། །མགོན་པོ་སེམས་ཅན་ཉོན་མོངས་དྲི་མ་སྦྱོང ། །ཡོངས་སྨིན་སེམས་ཅན་རྒྱལ་བ་མངོན་དུ་བལྟ། །དེ་ལ་དྲི་མེད་མིག་གི་ལྷ་ཡང་མོས། །དེ་བཞིན་གཤེགས་པའི་དབྱངས་སྙན་རྒྱ་ཆེན་ནི། །ཀུན་ཏུ་བསྒྲགས་པས་འགྲོ་བའི་སྡུག་བསྔལ་ཞི། །སངས་རྒྱས་དབྱངས་སྙན་ཐོས་ནས་དགའ་མགུའི་ཡིད། ། རྣམ་ཐར་འདི་ནི་སྒྲོ་དབྱངས་སྒྲོག་པས་ཐོས། །བསྐལ་པ་རྒྱ་མཚོ་འགྲོ་ལ་ཕན་དོན་དུ། །སྔོན་ཆད་བྱང་ཆུབ་སྤྱོད་པ་སྤྱད་པ་མཐོང ། །དེ་ཕྱིར་དེ་ནི་ཕྱོགས་བཀང་འཇིག་རྟེན་མཛེས། ། ལམ་རྒྱུད་སྐྱོབ་པ་རྗེས་སུ་དྲན་ཞིང་དགའ། །རྒྱལ་བ་སྔོན་ཆད་སྤྱད་པ་སྤྱོད་པའི་ཚེ། །སྣ་ཚོགས་སྒོ་ནས་སེམས་ཅན་སྨིན་པར་མཛད། །དེ་དག་བསོད་ནམས་རྒྱ་མཚོ་སྡུག་བསྔལ་འཇིལ། །ཞི་
Ka63a
༄#། །བྱེད་ཆུ་ཀླུང་ལྷ་ནི་དེས་དགའ་འོ། །སྦྱིན་པའི་སྒོ་མོ་ཚད་མེད་མི་ཟད་མང ། །འགྲོ་བ་འདོད་པ་ཀུན་ལ་ཡོངས་བཏང་ཞིང ། །རྒྱལ་བས་འགྲོ་བའི་འཇུངས་པ་ཡོངས་སུ་བསལ། །ཀུན་ནས་དགའ་དཔལ་རྣམ་ཐར་དེ་མཐོང་ངོ ། །ཐབས་ཚུལ་རྒྱ་མཚོ་ཐམས་ཅད་བསྒོམས་པས་ན། །ཡོན་ཏན་མང་པོ་བརྒྱ་ཕྲག་མང་པོས་བྱུང ། །རྒྱལ་བས་འགྲོ་བ་ཐམས་ཅད་ཚིམ་མཛད་དེ། །རྒྱ་ཆེན་སྒྲ་དབྱངས་ཤུགས་ལྡན་ལྷ་ཡང་དགའ། །སྒྲིབ་པའི་ཀློང་དང་འགྲོ་བའི་ཉོན་མོངས་དྲི། །འགྲོ་བ་རྣམས་ལ་བྱམས་པ་བསྐྱེད་སྦྱངས་པས། །མཁའ་མཉམ་འོད་ཀྱིས་སངས་རྒྱས་རྣམ་པར་མཛེས། །རྣམ་པར་མཛེས་པའི་ཆུ་ཀླུང་ལྷ་དགའ་འོ། །སངས་རྒྱས་རང་བྱུང་ཡོན་ཏན་རྒྱ་མཚོ་སྟེ། །བསོད་ནམས་ཞིང་ནི་འདུས་བྱས་སྡུག་བསྔལ་འདོར། །བྱང་ཆུབ་ལམ་ལ་རིམ་གྱིས་ཡོངས་སྨིན་མཛད། །རྒྱ་མཚོའི་ཚོགས་དཔལ་རྣམ་ཐར་འདི་ཡིན་ནོ། །དེ་ལ་ལོ་ཏོག་གི་ལྷ་ངད་འཇམ་པའི་དཔལ་གྱི་རྣམ་པར་ཐར་པ་ནི། རོ་དང་མདངས་ཐམས་ཅད་སྐྱེད་ཅིང ། སེམས་ཅན་ཐམས་ཅད་སངས་རྒྱས་ཀྱི་གཟུགས་ཀྱི་སྐུ་རབ་ཏུ་འཐོབ་པ་སྟོན་པ་ཞེས་བྱའོ། །ལོ་ཏོག་གི་ལྷ་དུས་ཀྱི་མེ་ཏོག་རྣམ་པར་མཛེས་པའི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཉེ་བར་འཚོ་བས་དགའ་བ་ཆེན་པོའི་ཤུགས་ཀྱི་ཚིམ་པ་སྐྱེད་པ་ཞེས་བྱའོ། །ལོ་ཏོག་
Ka63b
གི་ལྷ་རྩལ་དམ་པའི་སྟོབས་ཀྱི་རྣམ་པར་ཐར་བ་ནི། ཆོས་ཐམས་ཅད་ཀྱི་དབྱིངས་ཡོངས་སུ་རྒྱས་པས་ཤིན་ཏུ་དག་པའི་སྤྱོད་ཡུལ་ཞེས་བྱའོ། །ལོ་ཏོག་གི་ལྷ་མདངས་ཀྱི་ངད་མཐའ་ཡས་པ་རབ་ཏུ་འགྱེད་པའི་རྣམ་པར་ཐར་པ་ནི། སྙིང་རྗེ་མཐའ་ཡས་པའི་སྒོ་ནས་སངས་རྒྱས་ཀྱི་རྣམ་པར་འཕྲུལ་བ་རབ་ཏུ་འགྱེད་ཅིང་རྗེས་སུ་དྲན་པ་ཞེས་བྱའོ། །ལོ་ཏོག་གི་ལྷ་ཀུན་གྱི་རྩ་བ་འབྲས་བུའི་རྣམ་པར་ཐར་པ་ནི། སངས་རྒྱས་ཐམས་ཅད་མངོན་དུ་ལྟ་ཞིང ། སངས་རྒྱས་རྣམས་ལ་ཡོན་ཏན་ཡང་དག་པར་སྐྱེད་པ་སྟོན་པ་ཞེས་བྱའོ། །ལོ་ཏོག་གི་ལྷ་གཙུག་ཕུད་ཁ་དོག་སྣ་ཚོགས་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་མོས་པའི་མེ་ཏོག་ཡོངས་སུ་སྦྱོང་བ་ཞེས་བྱའོ། །ལོ་ཏོག་གི་ལྷ་ཡལ་ག་དྲི་མ་མེད་པར་གྲུབ་པའི་རྣམ་པར་ཐར་པ་ནི། སེམས་ཅན་ལ་ཕན་པའི་བྱམས་པ་དང ། བསོད་ནམས་རྒྱ་མཚོ་རྒྱ་ཆེན་པོ་རྣམ་པར་འཕེལ་བར་བྱེད་པ་ཞེས་བྱའོ། །ལོ་ཏོག་གི་ལྷ་སྤོས་སྣ་ཚོགས་ཤིན་ཏུ་གྲུབ་པའི་རྣམ་པར་ཐར་པ་ནི། ཆོས་ཐམས་ཅད་ལ་སྤྱོད་པ་ཀུན་ཏུ་གནོན་པས་རྩོམ་པ་ཞེས་བྱའོ། །ལོ་ཏོག་གི་ལྷ་བཟང་ཞིང་ཡིད་དུ་འོང་བར་སྣང་བའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་ཞུམ་པ་དང ། ཡིད་དུ་མི་འོང་བ་རྣམ་པར་ཟློག་ཅིང ། ཆོས་ཀྱི་དབྱིངས་ཐམས་ཅད་ཡོངས་སུ་དག་པར་བྱེད་པ་ཞེས་བྱའོ། །ལོ་ཏོག་གི་ལྷ་ཁ་དོག་རྣམ་པར་དག་
Ka64a
༄#། །ཅིང་འོད་དྲི་མ་མེད་པའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་དགེ་བའི་རྩ་བ་ལ་རྣམ་པར་ལྟ་ཞིང་ཆོས་ཀྱིས་འཁོར་གྱི་དབང་པོ་ཚིམ་པར་བྱེད་པ་ཞེས་བྱའོ། །དེ་ནས་ལོ་ཏོག་གི་ལྷ་དང་འཇམ་པའི་དཔལ་གྱིས་སངས་རྒྱས་ཀྱི་མཐུས་ལོ་ཏོག་གི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ་།དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རང་བྱུང་ཡེ་ཤེས་སྒྲོན་མ་སྐྱེས་པ་ནི། །འགྲོ་བ་ཀུན་གྱི་སྐྱབས་དང་མགོན་གྱུར་ཏེ། །མ་ལུས་འགྲོ་བའི་བདེ་བ་ཡང་དག་སྐྱེད། །བསོད་ནམས་རྒྱ་མཚོ་སངས་རྒྱས་བླ་ན་མེད། །སངས་རྒྱས་མཉན་ན་དོན་ཡོད་ཡོན་ཏན་སྤྲིན། །འགྲོ་བ་ཀུན་གྱི་སྡུག་བསྔལ་ཞི་བར་མཛད། །ཆོས་རྒྱ་ཆེན་པོ་མི་ཟད་རབ་ཏུ་སྐྱེད། །དུས་ཀྱི་དཀྱིལ་འཁོར་ལྷ་ནི་འདི་ལ་འཇུག་།བདེར་གཤེགས་སྟོབས་ནི་མ་ལུས་ཡོངས་སུ་རྒྱས། །འགྲོ་བ་དག་ནི་ཆོས་ཀྱི་ལེགས་པས་མཛེས། །འགྲོ་བ་ཀུན་འདུལ་ཀུན་ཏུ་རྣམ་པར་སྣང ། །སྟོབས་དང་གཟུགས་ཀྱི་མཐུ་ཡིས་དེ་མཐོང་ངོ ། །སེམས་ཀྱི་སྐད་ཅིག་ཀུན་ལ་འགྲོ་མཉམ་པའི། །ཐུགས་རྗེ་རྒྱ་མཚོ་སྔོན་ཆད་རྣམ་སྦྱངས་པས། །དེ་ཕྱིར་རྫུ་འཕྲུལ་རྣམས་ནི་མཐའ་ཡས་སོ། །དེ་ནི་མདངས་མཐོང་ལྷ་ཡིས་རབ་ཏུ་མཐོང ། །ཐབས་རྣམས་ཀུན་གྱི་སྒོ་རྣམས་དོན་ཡོད་པར། །སངས་རྒྱས་འཇིག་རྟེན་ཀུན་ཏུ་ཁྱབ་
Ka64b
གྱུར་ཅིང ། །འགྲོ་བ་ཀུན་གྱི་ཉོན་མོངས་དག་པར་མཛད། །འདི་ནི་ཐམས་ཅད་སྒོ་མོའི་རྣམ་ཐར་ཏོ། །འགྲོ་བ་འདི་ན་མོས་ཡངས་གང་ཡོད་པ། །དེ་དག་ཐམས་ཅད་རྒྱལ་བའི་མཐུས་བྱུང་སྟེ། །དེ་བཞིན་གཤེགས་པའི་ཡེ་ཤེས་རྒྱ་མཚོ་འོ། །ནགས་ཚལ་རྒྱན་གྱི་གཙུག་ཕུད་དེ་ལ་འཇུག་།འཇིག་རྟེན་རྣམས་ལ་བྱམས་པ་ཆེ་བསྐྱེད་དེ། །སེམས་ཅན་རྣམས་ལ་ཕན་ཕྱིར་རང་བྱུང་སྐྱེས། །ལམ་རབ་དགེ་བ་ཞི་ལ་རབ་ཏུ་སྟོན། །ཞི་བ་སྣ་ཚོགས་དཔལ་གྱི་རྣམ་ཐར་ཏོ། །ཕྱོགས་སུ་སེམས་ཅན་ཡོངས་སྨིན་བྱེད་པའི་ཚེ། །བདེར་གཤེགས་སྤྱོད་པ་ཇི་ལྟར་རྣམ་དག་པ། །བྱང་ཆུབ་ཤིང་ལས་དེ་དག་སྒྲ་ཡང་འབྱུང ། །སྤོས་ཞིམ་དཔལ་གྱི་ལྷ་ཡིས་དེ་ཐོས་སོ། །རྒྱལ་བས་འཇིག་རྟེན་ཡིད་དུ་འོང་བ་སྤོང ། །དགེ་བ་མ་ལུས་རྣམས་ཀྱང་རབ་ཏུ་སྐྱེད། །འགྲོ་བ་ཀུན་གྱི་དབང་པོ་རྣམ་པར་སྦྱོང ། །དགེ་བར་སྣང་བའི་ལྷ་ཡིས་དེ་མཐོང་ངོ ། །འགྲོ་བ་ཀུན་ན་སངས་རྒྱས་ཤིན་ཏུ་འཕགས། །སྐྱེ་བོ་ཀུན་གྱི་བསམ་པ་དེས་མཁྱེན་ཏེ། །སྣ་ཚོགས་སྒོ་ནས་འགྲོ་བ་ཡོངས་སྨིན་མཛད། །རྣམ་དག་ཁ་དོག་འོད་ཀྱི་རྣམ་ཐར་ཏོ། །དེ་ལ་སྨན་གྱི་ལྷ་ཕུན་སུམ་ཚོགས་པའི་རྣམ་པར་ཐར་པ་ནི། བསམ་པ་ཀུན་ནས་རྣམ་པར་ལྟ་བའི་གནོན་པས་འགྲོ་བ་རབ་ཏུ་གནོན་པ་ཞེས་བྱའོ། །སྨན་གྱི་ལྷ་ཙནྡན་གྱི་ནགས་ཚལ་གྱི་ཤུགས་འཆང་བའི་རྣམ་པར་ཐར་པ་ནི། བལྟ་བ་དོན་ཡོད་པས་
Ka65a
༄#། །སེམས་ཅན་འདྲེན་པའི་འོད་ཅེས་བྱའོ། །སྨན་གྱི་ལྷ་འོད་རྡུལ་མེད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པ་རབ་ཏུ་ཞི་བས་རྡུལ་དང་བྲལ་པའི་སྦྱོར་བ་ཞེས་བྱའོ། །སྨན་གྱི་ལྷ་མིང་ཀུན་ཏུ་གྲགས་པ་གླང་པོའི་རྒྱལ་མཚན་གྱི་རྣམ་པར་ཐར་པ་ནི། མིང་བསྒྲགས་པས་དགེ་བའི་རྩ་བ་རྒྱ་མཚོ་ཡང་དག་པར་འཕེལ་བ་ཞེས་བྱའོ། །སྨན་གྱི་ལྷ་སྤུའི་ཀློང་ཀུན་ནས་འོད་འབྱུང་བའི་རྣམ་པར་ཐར་པ་ནི། ནད་ཐམས་ཅད་ལ་སྙིང་རྗེའི་དཀྱིལ་འཁོར་གྱི་ཤུགས་ཀྱི་རྒྱལ་མཚན་ཞེས་བྱའོ།། སྨན་གྱི་ལྷ་མུན་པ་རྣམ་པར་སེལ་ཅིང་རྣམ་པར་སྦྱོང་བའི་རྣམ་པར་ཐར་པ་ནི། འགྲོ་བ་ལྡོངས་པ་ལྟ་བུ་ཐམས་ཅད་ཀྱི་ཡེ་ཤེས་ཀྱི་མིག་རྣམ་པར་དག་པར་བྱེད་པ་ཞེས་བྱའོ། ། སྨན་གྱི་ལྷ་སྒྲ་དབྱངས་ཀུན་ཏུ་འབྱུང་བའི་རྣམ་པར་ཐར་པ་ནི། སངས་རྒྱས་ཀྱི་ཆོས་རབ་ཏུ་བསྒྲགས་པས་དོན་གྱི་དབྱིངས་འབྱུང་བ་ཞེས་བྱའོ། །སྨན་གྱི་ལྷ་ཉི་མའི་འོད་འཕྲོ་བའི་མཆོག་གི་རྒྱལ་མཚན་གྱི་རྣམ་པར་ཐར་པ་ནི། འགྲོ་བ་ཐམས་ཅད་ལ་དགེ་བའི་བཤེས་སུ་སྟོན་ཅིང་དགེ་བའི་རྩ་བས་ཡང་དག་པར་བསྐུལ་བ་ཞེས་བྱའོ། །སྨན་གྱི་ལྷ་ཕྱོགས་བཅུར་རྨོངས་པ་མེད་པར་ལྟ་བའི་རྣམ་པར་ཐར་པ་ནི། མོས་པའི་ཚུལ་གྱིས་རྣམ་པར་དག་པའི་སྙིང་རྗེའི་སྙིང་པོ་ཞེས་བྱའོ། །སྨན་གྱི་ལྷ་མདངས་དང་འོད་ཀུན་ཏུ་
Ka65b
འགྱེད་པའི་མིག་གི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ནད་རབ་ཏུ་ཞི་བར་བྱེད་ཅིང་སངས་རྒྱས་རྗེས་སུ་དྲན་པར་སྦྱོར་བ་ཞེས་བྱའོ། །དེ་ནས་སྨན་གྱི་ལྷ་ཕུན་སུམ་ཚོགས་པས་སངས་རྒྱས་ཀྱི་མཐུས་སྨན་གྱི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཡེ་ཤེས་བསམ་གྱིས་མི་ཁྱབ་ལྟོས། །འགྲོ་བ་ཀུན་གྱི་བསམ་པ་རབ་ཏུ་མཁྱེན། །ཐབས་ཀྱི་རྣམ་པ་སྣ་ཚོགས་སྒོ་དག་ནས། །སྡུག་བསྔལ་ཀུན་ལས་སེམས་ཅན་རབ་ཏུ་འགྲོལ། །སངས་རྒྱས་ཆོས་ཉིད་དེ་ལྟར་བསམ་མི་ཁྱབ། །དེ་ཡི་མཐུ་ནི་ཐམས་ཅད་དོན་ཀྱང་ཡོད། །སྐྱེ་རྒུ་རྣམས་ནི་སྡུག་བསྔལ་ཞི་བར་མཛད། །ཙནྡན་ཤུགས་དང་ལྡན་པའི་རྣམ་ཐར་ཏོ། །སྔོན་ཆད་རྒྱལ་བའི་ཆོས་ཉིད་དག་ལ་ལྟོས། །བསྐལ་པ་རྒྱ་མཚོ་མཐའ་མེད་སྤྱོད་པ་ནའང ། །སྲིད་པ་ཀུན་ལ་ཆགས་པ་གང་ཡང་མེད། །དེ་ལ་རྡུལ་མེད་འོད་ཀྱི་ལྷ་འཇུག་གོ་།རྒྱལ་བ་བསྐལ་པ་སྟོང་ཕྲག་བརྒྱ་དག་ཏུ། །མཐོང་ཞིང་མཚན་ཐོས་དེ་བཞིན་ཤིན་ཏུ་དཀོན། །ཚུལ་རྣམས་ཀུན་ཏུ་རང་བྱུང་དོན་ཡོད་དེ། །དེ་ལ་རྒྱལ་མཚན་མཆོག་ནི་དེ་ལྟར་འཇུག་།རྒྱལ་བའི་སྤུ་ཡི་སྒོ་རྣམས་ཀུན་ནས་ཀྱང ། །ནད་ལས་རབ་ཏུ་འགྲེལ་བའི་འོད་བཀྱེ་བས། །འཇིག་རྟེན་ཉོན་མོངས་མ་ལུས་ཞི་བར་མཛད། །སྦུ་མདངས་རྒྱུན་གྱི་རྣམ་ཐར་འདི་ཡིན་ནོ། །སྡུག་བསྔལ་ལས་དང་ཉོན་མོངས་སྣ་ཚོགས་པས། །
Ka66a
༄#། །འགྲོ་བ་རྟག་ཏུ་ལྡོངས་ཤིང་རྨོངས་གྱུར་རྣམས། །སངས་རྒྱས་ཡེ་ཤེས་འོད་ཀྱིས་རྣམ་པར་སྦྱོང ། །དེ་ནི་མུན་དང་བྲལ་བའི་ལྷས་མཐོང་ངོ ། །རྒྱལ་བའི་གསུང་དབྱངས་གཅིག་ལས་མཐའ་ཡས་པའི། །ཆོས་ཀྱི་སྒོ་མོ་ཐམས་ཅད་ཀུན་ཀྱང་འབྱུང ། །དེ་ནི་སེམས་ཅན་མ་ལུས་ཀུན་ཀྱང་ཤེས། །འདི་ནི་སྒྲ་དང་ལྡན་པའི་རྣམ་ཐར་ཏོ། །རྒྱལ་བའི་ཡེ་ཤེས་བསམ་གྱིས་མི་ཁྱབ་ལྟོས། །སྲིད་པར་སེམས་ཅན་ཡོངས་སུ་སྨིན་བྱས་པ། །དེ་ལ་འགྲོ་ཀུན་མི་མགོན་མངོན་དུ་སྣང ། །ཉི་འོད་ཞི་བའི་ལྷ་ཡིས་དེ་མཐོང་ངོ ། །སངས་རྒྱས་ཐུགས་རྗེའི་ཚུལ་ནི་རྒྱ་མཚོ་སྟེ། །འགྲོ་བ་ཀུན་ཕན་དོན་དུ་དེ་སྐྱེས་སོ། །འགྲོ་བ་ཀུན་ལ་ལམ་རྣམས་ཤིན་ཏུ་སྟོན། །དེ་ནི་ཕྱོགས་སུ་སྣང་བའི་ལྷས་ཤེས་སོ། །སངས་རྒྱས་འགྲོ་དབང་རྣམས་ཀྱི་འོད་ཡངས་པ། །ཕྱོགས་རྣམས་ཐམས་ཅད་མ་ལུས་ཀུན་ཏུ་གང ། །སངས་རྒྱས་རྗེས་སུ་དྲན་པའི་གཟི་བརྗིད་སྐྱེད། །མདངས་དང་འོད་དུ་ལྡན་པའི་རྣམ་ཐར་ཏོ། །དེ་ལ་ནགས་ཚལ་གྱི་ལྷ་ཡལ་ག་སྣ་ཚོགས་ཀྱི་སྤྲིན་གྱི་རྣམ་པར་ཐར་པ་ནི། ཡེ་ཤེས་ཀྱི་རྒྱ་མཚོ་ཡངས་ཤིང་མཐའ་ཡས་པའི་སྙིང་པོ་ཞེས་བྱའོ། །ནགས་ཚལ་གྱི་ལྷ་འོད་ཀྱི་ཕུང་པོ་སྣ་ཚོགས་ཀྱི་མིག་ཡིད་དུ་འོང་བའི་འོད་ཀྱི་རྣམ་པར་ཐར་པ་ནི། དགེ་བ་རྒྱ་ཆེན་པོ་ཀུན་ནས་སྤུངས་པའི་ཤུགས་ཞེས་བྱའོ། །ནགས་ཚལ་གྱི་ལྷ་མྱུ་གུ་ཡིད་
Ka66b
དུ་འོང་བའི་འོད་ཀྱི་རྣམ་པར་ཐར་པ་ནི། མོས་པ་སྣ་ཚོགས་ཀྱི་མྱུ་གུ་རྣམ་པར་འཕེལ་བ་དང་ཡོངས་སུ་དག་པར་བྱེད་པ་ཞེས་བྱའོ། །ནགས་ཚལ་གྱི་ལྷ་ལོ་མ་དྲི་མ་མེད་པའི་ཕྲེང་བའི་དཔལ་གྱི་རྣམ་པར་ཐར་པ་ནི། ཡོན་ཏན་གྱི་དཀྱིལ་འཁོར་ཐམས་ཅད་ཀྱི་རྒྱན་ཡོངས་སུ་སྦྱོང་ཞིང་རྣམ་པར་སྒོམ་པ་ཞེས་བྱའོ། །ནགས་ཚལ་གྱི་ལྷ་ཡན་ལག་རབ་ཏུ་འཕྱང་བའི་གཟི་བརྗིད་ཀྱི་རྣམ་པར་ཐར་པ་ནི། ཤེས་རབ་དྲི་མ་མེད་པའི་སྒོ་ཀུན་ནས་ཆོས་ཀྱི་དབྱིངས་ལ་དམིགས་ཤིང་ཀུན་ནས་རྣམ་པར་དམིགས་པས་རྒྱས་པར་འགེངས་པ་ཞེས་བྱའོ། །ནགས་ཚལ་གྱི་ལྷ་སྒྲ་སྐད་ཡིད་དུ་འོང་བའི་དབྱངས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་སྤྱོད་པ་རྒྱ་མཚོ་ལ་ཡང་དག་པར་འཇུག་པའི་ཆོས་ཀྱི་སྤྲིན་མངོན་པར་སྒྲུབ་པ་ཞེས་བྱའོ། །ནགས་ཚལ་གྱི་ལྷ་སྒྲ་སྐད་ཡིད་དུ་འོང་བའི་དབྱངས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཡིད་དུ་མི་འོང་བའི་སྒྲ་ལ་བཟོད་པ་རབ་ཏུ་ཐོབ་པས་ཆོས་ཀྱི་སྣང་བ་དྲི་མ་མེད་པ་ཞེས་བྱའོ། །ནགས་ཚལ་གྱི་ལྷ་ཀུན་ནས་སྤོས་མང་པོའི་ངད་ལྡང་བའི་འོད་ཀྱི་རྣམ་པར་ཐར་པ་ནི། སྤྱོད་པ་རྒྱ་ཆེན་པོའི་དཀྱིལ་འཁོར་སྤྱོད་པས་ཡོངས་སུ་དག་པར་བྱེད་ཅིང་ཕྱོགས་ཀུན་ཏུ་རྣམ་པར་སྣང་བ་ཞེས་བྱའོ། །ནགས་ཚལ་གྱི་ལྷ་ཀུན་ནས་དཔལ་གྱི་འོད་རབ་ཏུ་འབྱུང་བའི་དཀྱིལ་འཁོར་གྱི་རྣམ་པར་ཐར་པ་ནི། འགྲོ་བ་ལ་ཕན་པའི་དོན་ཆོས་ཐམས་ཅད་
Ka67a
༄#། །ཀྱི་ཡོན་ཏན་གྱིས་རྒྱས་པར་ཡང་དག་པར་སྦྱོར་བ་ཞེས་བྱའོ། །ནགས་ཚལ་གྱི་ལྷ་མེ་ཏོག་དང ། འབྲས་བུ་དང ། རོའི་འོད་ཀྱི་རྣམ་པར་ཐར་པ་ནི། སངས་རྒྱས་སྐྱེ་བ་ཐམས་ཅད་ལ་དགའ་བར་ལྟ་ཞིང་རྗེས་སུ་དྲན་པའི་ཡོན་ཏན་གྱི་རྒྱན་གྱི་སྙིང་པོ་ཞེས་བྱའོ། །དེ་ནས་ནགས་ཚལ་གྱི་ལྷ་ཡལ་ག་སྣ་ཚོགས་ཀྱི་སྤྲིན་གྱིས་སངས་རྒྱས་ཀྱི་མཐུས་ནགས་ཚལ་གྱི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསོད་ནམས་སྟོབས་དང་ཡེ་ཤེས་སྟོབས་རྣམས་དང ། །སྔོན་ཚེ་བྱང་ཆུབ་སྤྱོད་པས་སངས་རྒྱས་བྱུང ། །སྟོབས་རྣམས་ཀུན་གྱིས་རང་བྱུང་ཕ་རོལ་ཕྱིན། །འགྲོ་བ་ཀུན་ན་འཕགས་ཤིང་རྣམ་པར་མཛེས། །འགྲོ་བ་ཐམས་ཅད་སྙེད་ཀྱི་ཐུགས་རྗེའི་སྒོ། །དེ་བཞིན་གཤེགས་པས་སྔོན་ཚེ་རབ་ཏུ་སྦྱངས། །རང་བྱུང་དེ་བས་འགྲོ་བའི་དོན་མཛད་དོ། །སྣ་ཚོགས་སྤུངས་འོད་རྣམ་ཐར་འདི་ལ་འཇུག། སེམས་ཅན་ཀུན་གྱིས་བདེ་གཤེགས་མཐོང་མ་ཐག་།མོས་པ་རྒྱ་མཚོ་རྣམ་པར་དག་པར་འགྱུར། །རྒྱལ་བ་ཀུན་གྱི་ལམ་ཡང་ཡང་དག་སྟོན། །མྱུ་གུ་ཡིད་འོང་འོད་ཀྱི་རྣམ་ཐར་ཡིན། །རྒྱལ་བ་ཀུན་གྱི་བ་སྤུའི་ཡོན་ཏན་འཁོར། །བསྐལ་པ་རྒྱ་མཚོར་ཟད་པར་མི་ནུས་ཏེ། །འགྲོ་བ་ཀུན་གྱིས་སངས་རྒྱས་བསམ་མི་ཁྱབ། །རྣམ་ཐར་འདི་ནི་ཕྲེང་བའི་དཔལ་
Ka67b
གྱིས་མཐོང ། །སྔོན་ཆད་རྒྱལ་བས་སངས་རྒྱས་གང་གི་རྣམས། །ཞིང་མང་རྡུལ་སྙེད་མཆོད་པ་དེ་དག་དྲན། །ཀུན་ཏུ་ཤེས་རབ་དཀྱིལ་འཁོར་རྣམ་པར་སྦྱངས། །ཡལ་ག་འོད་ཀྱི་བརྗིད་ཀྱིས་འདི་མཐོང་ངོ ། །འགྲོ་བ་ཀུན་གྱི་སྤྱོད་པ་རྒྱ་མཚོ་དག་།སྐད་ཅིག་གཅིག་གིས་སངས་རྒྱས་ཐུགས་སུ་ཆུད། །རྒྱལ་བའི་ཡེ་ཤེས་ཆགས་མེད་ཤིན་ཏུ་ཡངས། །སྣ་ཚོགས་རྒྱན་གྱི་འོད་ཀྱིས་འདི་མཐོང་ངོ ། །བདེར་གཤེགས་གསུང་ནི་ཞི་བ་རབ་ཞིར་གསུང ། །དགའ་བ་ཡངས་པ་ཆེན་པོ་རྣམ་པར་སྐྱེད། །སེམས་ཅན་མོས་པ་ཇི་བཞིན་དེ་དག་ཤེས། །འདི་ནི་སྒྲ་རྣམས་སྒྲོག་པའི་དབྱངས་ཀྱིས་ཐོས། །ཕྱོགས་བཅུའི་ཞིང་གི་དབྱིངས་རྣམས་རྒྱས་བྱས་ཤིང ། །སངས་རྒྱས་བྱིན་རླབས་རྒྱ་ཆེན་རབ་ཏུ་འབྱུང ། །རྒྱལ་བའི་སྔོན་གྱི་སྤྱོད་པ་དག་ཀྱང་སྟོན། ། ཀུན་ཏུ་དྲི་ཞིམ་འོད་དཔལ་འདི་ལ་འཇུག་།མ་རུངས་སེམས་ཅན་ཡོན་ཏན་མེད་པའི་རྣམས། །མྱོས་ཤིང་འཁོར་བ་ཀུན་ཏུ་འཁོར་བ་དག་།དེ་དག་ལ་ནི་ཐམས་ཅད་མཁྱེན་ལམ་སྟོན། ། འཕགས་པའི་འོད་ཀྱི་འཁོར་གྱིས་འདི་མཐོང་ངོ ། །སེམས་ཅན་མ་རུངས་སྦྱོར་བ་སྤྱོད་པ་རྣམས། །བསྐལ་པ་བྱེ་བས་སངས་རྒྱས་མཐོང་བར་འགྱུར། །གཞན་ནི་བདེར་གཤེགས་སྐད་ཅིག་གཅིག་གིས་ལྟ། །རོ་ཡི་འོད་ཀྱི་ལྷ་ཡིས་འདི་མཐོང་ངོ ། །དེ་ལ་རིའི་ལྷ་རིན་པོ་ཆེའི་རྩེ་མོ་མེ་ཏོག་ཤིན་ཏུ་རྒྱས་པར་གནས་པའི་རྣམ་པར་ཐར་པ་ནི། བསམ་གཏན་ཞི་ཞིང་ཡངས་
Ka68a
༄#། །ལ་དབེན་པའི་སྣང་བ་ལ་རབ་ཏུ་འཇུག་པ་ཞེས་བྱའོ། །རིའི་ལྷ་ནགས་ཚལ་སྣ་ཚོགས་མེ་ཏོག་ཤིན་ཏུ་རྒྱས་པའི་གཙུག་ཕུད་ཀྱི་རྣམ་པར་ཐར་པ་ནི།་འགྲོ་བ་བསམ་གྱིས་མི་ཁྱབ་པའི་དགེ་བའི་རྩ་བ་ཡོངས་སུ་སྨིན་པར་བྱེད་པའི་བྱམས་པ་སྒོམ་པའི་རྒྱན་ཅེས་བྱའོ། །རིའི་ལྷ་ཀུན་ནས་ཤིན་ཏུ་འཕགས་པས་རྣམ་པར་སྣང་བའི་རྒྱལ་མཚན་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བསམ་པ་རྣམ་པར་ལྟ་བའི་དབང་པོ་ལ་འཇུག་པས་མངོན་པར་སྣང་བ་ཞེས་བྱའོ། །རིའི་ལྷ་རྡུལ་ཐམས་ཅད་དང་མི་གནས་པས་དྲི་མ་མེད་པའི་གཙུག་ཕུད་ཀྱི་རྣམ་པར་ཐར་པ་ནི། བསྐལ་པ་རྒྱ་མཚོ་མཐའ་ཡས་པར་མི་སྐྱོ་བའི་བརྩོན་འགྲུས་ཀྱིས་རབ་ཏུ་སྦྱོར་བ་ཞེས་བྱའོ། །རིའི་ལྷ་སྣང་བས་ཕྱོགས་སུ་གསལ་བའི་འོད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཡོན་ཏན་མཐའ་ཡས་པའི་སྣང་བ་རྣམ་པར་བསྟན་པ་སྟོན་པ་ཞེས་བྱའོ། །རིའི་ལྷ་སྟོབས་ལ་ཐུབ་པ་མེད་པའི་སྣང་བའི་འོད་ཀྱི་རྣམ་པར་ཐར་པ་ནི། སེམས་ཅན་ཡོངས་སུ་སྨིན་པར་བྱ་བའི་ཕྱིར་གཏི་མུག་ཡོངས་སུ་སེལ་བའི་འོད་ཅེས་བྱའོ། །རིའི་ལྷ་ཀུན་ནས་གཟི་བརྗིད་དཔལ་གྱི་དཀྱིལ་འཁོར་གྱི་རྣམ་པར་ཐར་པ་ནི། ཆགས་པ་ཐམས་ཅད་དང་མཉམ་པའི་རྒྱན་གྱིས་སྡུག་བསྔལ་ཡང་དག་པར་འཇོམས་པ་ཞེས་བྱའོ། །རིའི་
Ka68b
ལྷ་སྣང་བའི་རྡུལ་ཆུ་བོའི་དཀྱིལ་འཁོར་གྱི་རྣམ་པར་ཐར་པ་ནི། དེ་བཞིན་གཤེགས་པ་ཐམས་ཅད་ཀྱི་བསྟན་པའི་ཡོན་ཏན་སྣང་བ་ཡང་དག་པར་སྟོན་པ་ཞེས་བྱའོ། །རིའི་ལྷ་ཀུན་ཏུ་མངོན་པར་ལྟ་བའི་མིག་གི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་རྨི་ལམ་གྱི་མཐར་ཡང་དགེ་བའི་རྩ་བ་རྣམ་པར་འཕེལ་བར་བྱེད་པ་ཞེས་བྱའོ། །རིའི་ལྷ་ཀུན་ནས་སྲ་བའི་རྡོ་རྗེའི་མཚམས་ཀྱི་མིག་གི་རྣམ་པར་ཐར་པ་ནི། དོན་རྒྱ་མཚོ་རྒྱ་ཆེན་པོ་མཐའ་ཡས་པ་དང་འགྲོགས་པ་ཞེས་བྱའོ། །དེ་ནས་རིའི་ལྷ་རིན་པོ་ཆེ་རྩེ་མོ་མེ་ཏོག་ཤིན་ཏུ་རྒྱས་པར་གནས་བས་སངས་རྒྱས་ཀྱི་མཐུས་རིའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་རྣམ་འཕྲུལ་མི་ཟད་ཚད་མེད་ལྟོས། །སྔོན་ཚེ་སྤྱོད་རབ་མཐའ་ཡས་རྒྱལ་བས་སྤྱོད། །རྣམ་ཐར་ཞིང་གི་རྡུལ་སྙེད་བསྒོམས་མཛད་པས། །འགྲོ་བ་མ་ལུས་དགའ་བའི་ཤུགས་ཀྱང་བསྐྱེད། །སངས་རྒྱས་སྤུ་ནས་དྲི་མེད་དཔལ་བཀྱེ་བ། །ཡན་ལག་མཚན་རྒྱན་འགྲོ་བ་ཀུན་བཀང་ཞིང ། །བྱམས་ཚུལ་མཐའ་ཡས་འཇིག་རྟེན་ཀུན་ལ་སྟོན། །ནགས་ཚལ་རྒྱས་པའི་གཙུག་གི་རྣམ་ཐར་ཏོ། །སངས་རྒྱས་སྐུ་ནི་མཐའ་ཡས་འགྲོ་བར་མངོན། །འཇིག་རྟེན་ཀུན་ཏུ་ཕྱོགས་བཅུ་བཀང་ཞིང་འཕགས། །དབང་པོ་དང་བའི་སེམས་ཅན་རངས་ཤིང་དགའ། །རྣམ་ཐར་འདི་ལ་
Ka69a
༄#། །འཕགས་པའི་རྒྱལ་མཚན་འཇུག་།རང་བྱུང་མཁའ་མཉམ་འཇིག་རྟེན་ཆོས་མ་ཆགས། །བསྐལ་པ་ཀུན་སྤྱོད་བརྩོན་འགྲུས་སྟོབས་མི་སྐྱོ། །སྣ་ཚོགས་ཁམས་འགྲོ་སྦྱོར་བ་མ་ལུས་འདུལ། །དགའ་བ་དྲི་མེད་གཙུག་ཕུད་རྣམ་ཐར་ཏོ། །འཇིག་རྟེན་ཀུན་ནི་ལྡོངས་གྱུར་མུན་སྟུག་ཞུགས། །ཐུགས་རྗེ་དེར་བསྐྱེད་སངས་རྒྱས་འོད་བཀྱེ་ཞིང ། །འགྲོ་ཁམས་ཡུན་རིང་ཉལ་བ་སད་པར་མཛད། །རིག་ནས་དགའ་འོད་ལྷ་ཡི་རྣམ་ཐར་ཏོ། །སྲིད་པའི་རྒྱ་མཚོར་སྤྱད་པ་སྔོན་སྤྱོད་ཚེ། །ཞིང་རྡུལ་མཉམ་པའི་སེམས་ཅན་གཙོ་མཆོད་པས། །དེ་དག་དགྱེས་བཞིན་སེམས་ཅན་བྱང་ཆུབ་བཀོད། །ཞི་བའི་ས་འདི་སྟོབས་འཆང་ལྷ་འཇུག་གོ་།ལས་ཀྱི་སྤྲིན་སྒྲིབ་གཡོགས་ཤིང་བསྒྲིབས་པ་རྣམས། །སྲིད་པར་སེམས་ཅན་སྡུག་བསྔལ་འཁོར་གཟིགས་ནས། །དེ་དག་མུན་པ་ཡེ་ཤེས་འོད་ཀྱིས་བསལ། །གཟི་བརྗིད་དཔལ་འོད་རྣམ་ཐར་འདི་སེམས་སོ། །རྒྱལ་བའི་སྤུ་ལས་སངས་རྒྱས་ཡོན་ཏན་ཀུན། །ཕྱོགས་དབྱིངས་སེམས་ཅན་བསམ་པ་བཞིན་དུ་གྲག་།རྫུ་འཕྲུལ་རྣམ་པ་བསྐལ་པ་ཀུན་ཏུ་གནས། །འོད་མང་རྡུལ་གྱི་ཆུ་བོའི་ལྷ་འཇུག་གོ་།སེམས་ཅན་ཀུན་སྤྱོད་དགེ་བ་རྒྱ་མཚོ་ཀུན། །དེ་ལ་ཕྱོགས་བཀང་སངས་རྒྱས་མངོན་པར་སྣང ། །སྣ་ཚོགས་ཐབས་ཀྱིས་འཇིག་རྟེན་ཆོས་ཀྱང་སྟོན། །
Ka69b
ཚུལ་མངོན་མིག་གི་ལྷ་ཡིས་དེ་ཐོས་སོ། །ཆོས་སྒོ་རྒྱ་མཚོ་མི་ཟད་ཚད་མེད་པ། །སངས་རྒྱས་གསུང་གཅིག་སེམས་ཅན་ཀུན་ལ་གསུང ། །བསྐལ་པ་ཀུན་བརྗོད་འཇིག་རྟེན་མང་ལ་སྟོན། །རྡོ་རྗེ་ཚུལ་མིག་འདི་ཡི་གནས་ལ་འཇུག་།དེ་ལ་སའི་ལྷ་དཔལ་གྱི་མེ་ཏོག་ཀུན་ནས་ཤིན་ཏུ་རྒྱས་པ་དྲི་མ་མེད་པའི་རྣམ་པར་ཐར་པ་ནི། སྐད་ཅིག་སྐད་ཅིག་ཅིང་སེམས་ཅན་ཐམས་ཅད་ལ་བྱམས་པ་དང་སྙིང་རྗེའི་དཀྱིལ་འཁོར་གྱིས་རྣམ་པར་ལྟ་བ་ཞེས་བྱའོ། །སའི་ལྷ་བསོད་ནམས་བརྟན་པ་ཤིན་ཏུ་བསགས་པའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བསོད་ནམས་ཀྱི་སྟོབས་དང་ཤུགས་ཀྱི་རྒྱན་ཅེས་བྱའོ། །སའི་ལྷ་སེམས་རིན་པོ་ཆེས་རྒྱས་པའི་རྣམ་པར་ཐར་པ་ནི། ཏིང་ངེ་འཛིན་སྣ་ཚོགས་སྒོམ་པ་རྣམ་པར་འབྱེད་པ་དྲི་མ་མེད་པ་ཞེས་བྱའོ། །སའི་ལྷ་དུས་དུས་སུ་དགེ་བའི་མིག་རབ་ཏུ་སྟོན་པའི་རྣམ་པར་ཐར་པ་ནི། སེམས་ཅན་ཐམས་ཅད་དགའ་ཞིང་བདེ་བ་དང་རྩེ་བའི་སྦྱོར་བ་ཞེས་བྱའོ། ། སའི་ལྷ་གསེར་གྱི་མིག་གི་དཔལ་གྱི་རྣམ་པར་ཐར་པ་ནི། ལུས་ཐམས་ཅད་ཡོངས་སུ་དག་པར་བྱེད་པའི་ཚུལ་སྟོན་པ་ཞེས་བྱའོ། །སའི་ལྷ་སྤུ་ལས་སྤོས་ཀྱི་འོད་རྣམ་པར་འགྱེད་པའི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་ཡོན་ཏན་རྒྱ་མཚོ་ཐམས་ཅད་རྣམ་པར་སྒོམ་པ་བརྗོད་པ་ཞེས་བྱའོ། །སའི་ལྷ་སྒྲ་དབྱངས་ཡིད་དུ་འོང་བ་སྒྲོག་པའི་རྣམ་པར་
Ka70a
༄#། །ཐར་པ་ནི། འགྲོ་བ་ཐམས་ཅད་སྨྲ་བའི་སྒྲ་རྒྱ་མཚོའི་བྱིན་གྱིས་རློབ་པ་ཞེས་བྱའོ། །སའི་ལྷ་མེ་ཏོག་གི་གླང་པོ་སྣ་ཚོགས་ཀྱི་གཙུག་ཕུད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཞིང་ཕུན་སུམ་ཚོགས་པའི་རང་བཞིན་དྲི་མ་མེད་པ་ཞེས་བྱའོ། །སའི་ལྷ་ཀུན་ནས་རྡོ་རྗེའི་རྡུལ་གྱི་རྒྱན་གྱི་རྣམ་པར་ཐར་པ་ནི་།སངས་རྒྱས་ཀྱི་ཆོས་ཐམས་ཅད་ཀྱི་འཁོར་ལོའི་བྱིན་གྱི་རླབས་ཀུན་ནས་རྒྱུ་ཞིང་འབྱུང་བ་ཞེས་བྱའོ། །སའི་ལྷ་ཁྱིམ་དྲི་མ་མེད་པའི་འོད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཞིང་ཐམས་ཅད་ཀྱི་ཚུལ་ལ་ཡང་དག་པར་འཇུག་པའི་ཆོས་ཀྱི་རྒྱུན་སྒོམ་པ་འབྱུང་བ་ཞེས་བྱའོ། །དེ་ནས་སའི་ལྷ་དཔལ་གྱི་མེ་ཏོག་ཀུན་ནས་ཤིན་ཏུ་རྒྱས་པ་དྲི་མ་མེད་པས་སངས་རྒྱས་ཀྱི་མཐུས་སའི་ལྷའི་དཔལ་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྔོན་ཆད་སྐད་ཅིག་སྐད་ཅིག་བདེར་གཤེགས་ཀྱིས། །བརྗོད་དུ་མེད་པའི་སྙིང་རྗེའི་སྒོ་རྣམས་དང ། །བྱམས་པའི་སྒོ་ཡང་མི་ཟད་བསྒོམས་པས་ན། །དེ་ཕྱིར་སངས་རྒྱས་སྐུ་ནི་མི་ཤིགས་སྲ། །དུས་གསུམ་གཏོགས་པའི་སེམས་ཅན་བསོད་ནམས་དང ། །ཇི་སྙེད་བྱང་ཆུབ་སེམས་དཔའི་བསོད་ནམས་དག་།རྒྱལ་བའི་སྤུ་གཅིག་དེ་སྙེད་བསོད་ནམས་འོད། །བསོད་ནམས་དེ་མཐོང་རབ་ཏུ་དགའ་
Ka70b
བར་འགྱུར། །འབྱུང་བ་མེད་ཅིང་བྱོན་པ་གང་ཡང་མེད། །ཏིང་འཛིན་ཞི་བ་རྒྱ་མཚོར་རབ་ཏུ་ཞུགས། །སེམས་ཅན་རྒྱན་གྱི་ས་འདི་རབ་ཏུ་སྟོན། །འདི་ནི་སྣ་ཚོགས་ཤིང་གི་ཟེ་བའི་ས་ཡིན་ནོ། །སྔོན་ཆད་ཐུབ་པས་སྤྱོད་པ་སྤྱད་པ་དང ། །འགྲོ་བའི་སྒྲིབ་པ་རྣམ་པར་ཟློག་པ་ནི། །རིན་ཆེན་བཀྲམ་པའི་འོད་ཀྱི་ས་ཡིན་ཏེ། །རྣམ་ཐར་དེ་ལ་དགའ་བར་ལྷ་ལྟའོ། །དེ་བཞིན་གཤེགས་པའི་ས་ནི་མཐའ་ཡས་ཏེ། །འཇིག་རྟེན་ཀུན་ཏུ་སྐད་ཅིག་སྐད་ཅིག་སྟོན། །དུས་ཚོད་ཡང་དག་སྟོན་པའི་ས་ཡི་ལྷ། །དགའ་བར་སངས་རྒྱས་ཡུལ་ལ་རྣམ་པར་ལྟ། །སངས་རྒྱས་གསུང་ནི་མཐའ་ཡས་བསམ་མི་ཁྱབ། །སེམས་ཅན་ཀུན་བསྒྲགས་ཉོན་མོངས་ཞི་བར་མཛད། །གསེར་འོད་མིག་གི་དཔལ་ནི་རབ་དགའ་བར། །སངས་རྒྱས་ཡོན་ཏན་མཐའ་ཡས་མངའ་བ་སྟེ། །སངས་རྒྱས་སྤྲུལ་པས་རྣམ་པ་ཀུན་གཟུགས་སུ། །ཕྱོགས་ཀུན་ཆོས་ཀྱི་དབྱིངས་སུ་རྒྱས་པར་མཛད། །སྤུ་ལས་དྲི་ཞིམ་འོད་ཀྱི་ས་ཡི་ལྷ། །སངས་རྒྱས་སེམས་ཅན་འདུལ་བ་དེ་ལ་ལྟ། །ཕྱོགས་རྣམས་ཡིད་འོང་དབྱངས་ཀྱིས་གང་བྱས་ཤིང ། །འགྲོ་བ་འདི་ནི་ཕྱི་མཐའི་བསྐལ་པར་བརྗོད། །ཡིད་དུ་འོང་བའི་སྒྲ་དབྱངས་ས་ཡི་ལྷ། ། རབ་ཏུ་དགའ་བར་སངས་རྒྱས་དབྱངས་ལ་ཉན། །རྒྱལ་བའི་སྤུ་ལས་སེམས་ཅན་མཉམ་པ་ཡི། །སྤོས་ཀྱི་འོད་བཀྱེ་འཇིག་རྟེན་ཀུན་བཀང་ཞིང ། །སེམས་ཅན་མ་ལུས་ཡོངས་
Ka71a
༄#། །སུ་སྨིན་མཛད་པ། །མེ་ཏོག་གཙུག་ཕུད་འཕྱང་བས་ཡང་དག་མཐོང ། །དེ་བཞིན་གཤེགས་སྐུ་རྡོ་རྗེ་ལྟ་བུ་སྟེ། །མཚམས་སུ་མི་ཕྱེད་སྲ་བའི་རི་བོ་འདྲ། ། འགྲོ་བ་ཀུན་གྱིས་སངས་རྒྱས་བསྐྱོད་མི་ནུས། །རྡོ་རྗེ་རྡུལ་གྱི་ལྷ་ནི་དེས་དགའ་འོ། །དེ་ལ་གྲོང་ཁྱེར་གྱི་ལྷ་རིན་ཆེན་རྩེ་མོའི་འོད་ཀྱི་རྣམ་པར་ཐར་པ་ནི། སེམས་ཅན་ལ་ཕན་པ་ཡང་དག་སྦྱར་བ་འབྱུང་བ་ཞེས་བྱའོ། །གྲོང་ཁྱེར་གྱི་ལྷ་རྒྱན་རྣམ་པ་སྣ་ཚོགས་འབྱུང་བའི་རྣམ་པར་ཐར་པ་ནི། འགྲོ་བའི་དབང་པོ་ཡོངས་སུ་སྨིན་པར་བྱེད་པའི་འདུལ་བ་འབྱུང་བ་ཞེས་བྱའོ། །གྲོང་ཁྱེར་གྱི་ལྷ་རིན་ཆེན་དྲི་མེད་ཤིན་ཏུ་དགའ་བའི་རྣམ་པར་ཐར་པ་ནི། སེམས་ཅན་ཐམས་ཅད་བསོད་ནམས་དང་དགའ་བ་མྱོང་བར་བྱེད་པ་ཞེས་བྱའོ། ། གྲོང་ཁྱེར་གྱི་ལྷ་སློས་པའི་མྱ་ངན་ཐམས་ཅད་སྤོང་བའི་རྣམ་པར་ཐར་པ་ནི། སྐྱོབ་པ་དང ། མི་འཇིགས་པ་དང ། སྙིང་རྗེ་ཆེན་པོ་ཞེས་བྱའོ། །གྲོང་ཁྱེར་གྱི་ལྷ་སྒྲོན་མ་ཤིན་ཏུ་རྒྱས་པའི་མིག་གི་རྣམ་པར་ཐར་པ་ནི། ཤེས་རབ་ཀྱིས་ཀུན་ཏུ་རྣམ་པར་འབྱེད་པ་ཞེས་བྱའོ། །གྲོང་ཁྱེར་གྱི་ལྷ་འོད་འཕྲོ་བའི་དཔལ་མངོན་པར་འབར་བའི་རྣམ་པར་ཐར་པ་ནི།་ཐབས་ཀྱི་སྒོ་ཀུན་ནས་སྟོན་པའི་མཐུ་ཞེས་བྱའོ། །གྲོང་ཁྱེར་གྱི་ལྷ་བསོད་ནམས་ཀྱི་ཤུགས་སྣང་བའི་འོད་ཀྱི་རྣམ་པར་ཐར་པ་ནི། འགྲོ་བ་ཀུན་གྱི་བསོད་ནམས་
Ka71b
འབྱུང་བས་སྣང་བ་ཞེས་བྱའོ། །གྲོང་ཁྱེར་གྱི་ལྷ་ལུས་དྲི་མ་མེད་པས་མཉམ་པའི་འོད་ཀྱི་རྣམ་པར་ཐར་པ་ནི། སེམས་ཅན་རྨོངས་པ་ཐམས་ཅད་ལ་རྨི་ལམ་རྣམ་པར་སྟོན་པའི་འོད་ཅེས་བྱའོ། །གྲོང་ཁྱེར་གྱི་ལྷ་སྤོས་ཀྱི་རྒྱལ་མཚན་གཙུག་ཕུད་ཀྱི་རྒྱན་གྱི་རྣམ་པར་ཐར་པ་ནི། ཉོན་མོངས་པ་དང་མི་དགེ་བའི་དྲི་མ་རྣམ་པར་སེལ་ཅིང་ཐམས་ཅད་མཁྱེན་པ་ཉིད་ཀྱི་དྲི་ཡང་དག་པར་སྐྱེད་པ་ཞེས་བྱའོ། །གྲོང་ཁྱེར་གྱི་ལྷ་རིན་ཆེན་དཔལ་གྱི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྒྲིབ་པའི་རི་རྣམ་པར་འཇོམས་པའི་འོད་ཅེས་བྱའོ། །དེ་ནས་གྲོང་ཁྱེར་གྱི་ལྷ་རིན་པོ་ཆེའི་རྩེ་མོའི་འོད་ཀྱིས་སངས་རྒྱས་ཀྱི་མཐུས་གྲོང་ཁྱེར་གྱི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མགོན་པོའི་ཆོས་ཉིད་བསམ་གྱིས་མི་ཁྱབ་སྟེ། །སྣང་བ་བརྙེས་ཤིང་ཕྱོགས་སུ་རྣམ་པར་མཛེས། །སེམས་ཅན་མཐའ་ཡས་ཡོངས་སུ་སྨིན་མཛད་པའི།། སངས་རྒྱས་འགྲོ་བ་ཀུན་ལ་མངོན་དུ་སྣང ། །སེམས་ཅན་ཐམས་ཅད་དབང་པོ་སྣ་ཚོགས་ཏེ། །དེ་དག་མ་ལུས་རྒྱལ་བས་འགྲོ་བར་མཁྱེན། །རྣམ་ཐར་འདི་ནི་རབ་ཏུ་ཐོབ་པའི་ཕྱིར། །སྣ་ཚོགས་འོད་འབྱུང་ལྷ་ཡང་རབ་ཏུ་དགའ། །རྒྱལ་བས་བསྐལ་པ་མཐའ་ཡས་ཡང་དག་སྤྱད། །སྔོན་ཆད་རྒྱལ་བས་ཆོས་ཀྱང་ཡང་དག་བཟུང ། །དགའ་བའི་ཡིད་ཀྱིས་རྟག་ཏུ་དེ་དག་
Ka72a
༄#། །བླངས། །རྣམ་ཐར་འདི་ནི་དགའ་བའི་འོད་ཀྱིས་ཐོབ། །འགྲོ་བ་འདིར་ནི་ཐུགས་རྗེ་བྱམས་བསྐྱེད་ཅིང ། །དེ་བཞིན་གཤེགས་པས་སྔོན་ཆད་སེམས་ཅན་རྣམས། །ཀུན་གྱི་མྱ་ངན་མཐའ་ཡས་རྣམ་པར་བཟློག་།ཉོན་མོངས་ཡོངས་སུ་སྦྱོང་བ་འདི་ལ་དགའ། །རྒྱལ་བའི་ཤེས་རབ་རྒྱ་ཆེ་མཐའ་ཡས་ཏེ། །ཚད་མེད་ནམ་མཁའ་འདྲ་ཞིང་མཚུངས་པ་ཡིན། །དེ་བཞིན་གཤེགས་པའི་ཤེས་རབ་རྣམ་སྤྱོད་པས། །མར་མེ་མེ་ཏོག་འོད་ཀྱི་ལྷ་དགའ་འོ། །དེ་བཞིན་གཤེགས་པས་འགྲོ་མཉམ་སྐུ་གཟུགས་རྣམས། །འགྲོ་བ་ཀུན་གྱི་བསམ་པ་རྣམས་ལ་བསྟན། །དེ་འདྲའི་ཚུལ་ལ་རབ་ཏུ་སྒོམ་པ་ཡིས། །མངོན་དུ་འོད་འཕྲོའི་ལྷ་དེ་རབ་ཏུ་དགའ། །བསོད་ནམས་རྒྱ་མཚོ་རྒྱ་ཆེན་མཐའ་ཡས་པ། །སྔོན་ཆད་དེ་བཞིན་གཤེགས་པས་ཡོངས་སུ་སྦྱངས། །དེ་འདྲའི་རྣམ་པར་ཐར་ལ་རྣམ་ལྟ་བས། །བསོད་ནམས་དཔལ་གྱི་འོད་དེ་རབ་ཏུ་དགའ། །སྲིད་པར་རབ་ཏུ་རྨོངས་པའི་སེམས་ཅན་རྣམས། །འཁོར་གྱུར་རབ་རིབ་ལྡོངས་པ་གཟིགས་པས་ན། །དེ་དག་ཕན་ཕྱིར་སངས་རྒྱས་མངོན་དུ་བྱུང ། །དྲི་མེད་འོད་ཀྱིས་རྣམ་ཐར་འདི་ཐོབ་བོ། །དེ་བཞིན་གཤེགས་པའི་རྫུ་འཕྲུལ་སྟོབས་ལ་ལྟོས། །འགྲོ་ལ་སྤྲིན་འདྲ་མཐའ་དང་དབུས་ཀྱང་མེད། །དེ་དག་བསྟན་ཅིང་འགྲོ་བ་རྣམ་པར་འདུལ། །སྤོས་ཀྱི་རྒྱལ་མཚན་འོད་ཀྱིས་འདི་མཐོང་ངོ ། །སེམས་
Ka72b
ཅན་རྨོངས་པ་མུན་པས་ལྡོངས་གྱུར་ཅིང ། །རྣམ་པ་སྣ་ཚོགས་སྒྲིབ་པས་བསྒྲིབས་གྱུར་པ། །སངས་རྒྱས་འོད་ཀྱིས་རྣམ་པར་ཀུན་ཤེས་འགྱུར། །རྩེ་མོའི་འོད་ཀྱི་ལྷ་ནི་འདི་ལ་འཇུག ། དེ་ལ་སྙིང་པོ་བྱང་ཆུབ་ཀྱི་ལྷ་དགེ་བ་དྲི་མ་མེད་པའི་རྒྱན་གྱིས་བརྒྱན་པའི་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་མང་པོ་མཆོད་པ་ཡང་དག་པར་འབྱུང་ཞིང་སྔོན་གྱི་སྨོན་ལམ་གྱི་རྒྱན་སྟོན་པ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་རི་རབ་སྤོའི་རིན་པོ་ཆེའི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་དང་མངོན་སུམ་དུ་བྱང་ཆུབ་ཀྱི་སྤྱོད་པ་ཡང་དག་པར་སྒྲུབ་ཅིང་འབྱུང་བ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་དབྱངས་ཀྱི་འབྲུག་སྒྲ་སྒྲོག་པའི་རྒྱལ་མཚན་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བསམ་པ་ལ་སངས་རྒྱས་སྟོན་ཅིང ། རྨི་ལམ་གྱི་མཐར་སངས་རྒྱས་ཀྱི་ཆོས་ཀྱི་འབྲུག་སྒྲ་སྒྲོག་པ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་མེ་ཏོག་གི་ཆར་སྣ་ཚོགས་འབབ་པའི་མིག་གི་རྣམ་པར་ཐར་པ་ནི། དཀའ་བ་ཐམས་ཅད་ཡོངས་སུ་གཏོང་ཞིང ། རིན་པོ་ཆེའི་ཆར་འབེབས་པའི་རྒྱན་ཅེས་བྱའོ། །སྙིང་པོ་བྱང་ཆུབ་ཀྱི་ལྷ་འོད་འཕྲོ་མང་པོ་ཤིན་ཏུ་དྲི་མ་མེད་པའི་རྣམ་པར་ཐར་པ་ནི། འདུལ་བའི་སེམས་ཅན་ཡོངས་སུ་སྨིན་པར་བྱེད་ཅིང ། སྙིང་པོ་བྱང་ཆུབ་ཕུན་སུམ་ཚོགས་པ་རྣམ་པ་སྣ་ཚོགས་སྟོན་པ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་མེ་ཏོག་གི་ཕྲེང་བ་འོད་ཀྱི་གཙུག་
Ka73a
༄#། །ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་དབང་པོ་བཞིན་དུ་ཆོས་ཚུལ་ཟབ་མོ་དྲན་པ་སྟོན་པ་འབྱུང་བ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་རིན་པོ་ཆེའི་རྒྱན་གྱི་ཆར་རབ་ཏུ་འབེབས་པའི་རྣམ་པར་ཐར་པ་ནི། དགའ་བ་ཡང་དག་པར་མྱོང་བ་མཐའ་ཡས་པ་ལ་ཡང་དག་པར་འཇུག་པ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་མཐུ་དམ་པ་སྤོས་ཀྱི་མིག་གི་རྣམ་པར་ཐར་པ་ནི། སངས་རྒྱས་ཀྱི་ཡོན་ཏན་དང་ལེགས་པ་རབ་ཏུ་བརྗོད་པའི་བྱིན་གྱི་རླབས་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་རྡོ་རྗེ་སྣ་ཚོགས་ཀྱི་སྤྲིན་གྱི་རྣམ་པར་ཐར་པ་ནི། སྙིང་པོ་བྱང་ཆུབ་ཀྱི་ལྷ་རྣམ་པ་མཐའ་ཡས་པ་ཡང་དག་པར་སྟོན་པའི་རྒྱན་ཅེས་བྱའོ། །སྙིང་པོ་བྱང་ཆུབ་ཀྱི་ལྷ་པདྨོའི་ཤིང་སྣང་བའི་འོད་ཀྱི་རྣམ་པར་ཐར་པ་ནི། བྱང་ཆུབ་ཀྱི་ཤིང་ཡོངས་སུ་ཞི་བས་ཕྱོགས་རྒྱས་པར་བྱེད་པ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་དགེ་བའི་ལྟ་བ་སྣ་ཚོགས་རྣམ་པར་སྟོན་པའི་འོད་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་སྟོབས་སྣ་ཚོགས་ཡང་དག་པར་རྒྱུ་བ་ཞེས་བྱའོ། །དེ་ནས་སྙིང་པོ་བྱང་ཆུབ་ཀྱི་ལྷ་དགེ་བ་དྲི་མ་མེད་པའི་རྒྱན་གྱིས་བརྒྱན་པའི་རྒྱལ་མཚན་གྱིས་སངས་རྒྱས་ཀྱི་མཐུས་སྙིང་པོ་བྱང་ཆུབ་ཀྱི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསྐལ་
Ka73b
པ་མང་པོ་མཐའ་དང་དབུས་མེད་པར། །དེ་བཞིན་གཤེགས་པས་ཇི་ལྟར་སྔོན་སྤྱད་དྲན། །སངས་རྒྱས་ཐམས་ཅད་མཆོད་ཅིང་བསྒྲུབས་པས་ན། །དེ་ཕྱིར་དེ་ཡི་བསོད་ནམས་ནམ་མཁའི་ཚད། །ཞིང་རྣམས་མཐའ་ཡས་ཚད་མེད་འདྲ་མེད་པར། །མི་ཟད་གཏོང་བའི་སྒོ་ནས་སྔོན་བཏང་བས། །རི་བོའི་སྤོ་ཡི་འོད་ཀྱི་ལྷ་དེ་ནི། །བདེར་གཤེགས་དྲན་ཞིང་རབ་ཏུ་དགའ་བར་འགྱུར། །བདེར་གཤེགས་སྤྲུལ་པ་རྣམ་པ་མཐའ་ཡས་པ། །དེ་དག་ཞིང་རྣམས་ཀུན་ཏུ་རབ་ཏུ་རྒྱུ། །འགྲོ་བར་སངས་རྒྱས་རྨི་ལམ་བཞིན་སྟོན་ཅིང ། །སྤྲིན་གྱི་སྒྲ་དབྱངས་ལྷ་དེ་རབ་ཏུ་དགའ། །མཐའ་ཡས་བསྐལ་པར་དཀའ་བ་རབ་སྤྱད་དེ། །དང་བའི་སྤྱན་གྱིས་འགྲོ་ལ་ཕན་པའི་ཕྱིར། །རྒྱ་མཚོའི་སྤྱན་ཡང་ཡོངས་སུ་སྔོན་བཏང་སྟེ། །དེ་ལ་མེ་ཏོག་མིག་གི་ལྷ་དགའ་འོ། །ཡོན་ཏན་རིན་ཆེན་འོད་འཕྲོ་མཐའ་ཡས་སྤྲིན། །འགྲོ་བ་ཀུན་ཏུ་སྙིང་པོ་བྱང་ཆུབ་ནས། །རབ་ཏུ་བཀྱེ་བའི་སངས་རྒྱས་རྫུ་འཕྲུལ་གྱིས། །འོད་འཕྲོ་འགྱེད་པའི་ལུས་ཀྱི་ལྷ་ཡང་དགའ། །སེམས་ཅན་རྣམས་ཀྱི་སྤྱོད་པ་རྒྱ་མཚོ་སྟེ། །དེ་ལ་རྒྱལ་བ་ཆོས་ཀྱི་ཆར་ཡང་འབེབས། །ཇི་ལྟར་མོས་པར་ནེམ་ནུར་རྣམ་པར་སེལ། །དེ་ཡིས་གཙུག་ཕུད་འཕྱང་བ་དགའ་བ་ཐོབ། །རྒྱན་གྱི་ཆར་འབེབས་མིག་བཟང་ལྷ་དེ་ནི། །སེམས་ཀྱི་སྐད་ཅིག་གཅིག་གིས་ཚད་མེད་པའོ། །ཆོས་དོན་དབྱིངས་ཀྱི་བྱེ་བྲག་མཐའ་ཡས་པ། །རྒྱ་མཚོར་ཐ་དད་ཡང་དག་
Ka74a
༄#། །ཤེས་པས་འཇུག་།ཞིང་རྣམས་བརྗོད་དུ་མེད་པ་ཐམས་ཅད་དུ། །འགྲོ་བ་ཀུན་ལ་སངས་རྒྱས་ལེགས་བརྗོད་པས། །དེ་ཕྱིར་ཡོན་ཏན་སངས་རྒྱས་ཞིང་ཀུན་གྲགས། །དེ་ནི་རྗེས་སུ་སྤོས་མིག་ལྷ་ཡང་དྲན། །མཐའ་ཡས་ཤིང་གི་རྣམ་པ་སྣ་ཚོགས་གཟུགས། །བྱང་ཆུབ་ཤིང་ལ་ཀུན་ཀྱང་མ་ལུས་བསྟན། །རྡོ་རྗེ་སྣ་ཚོགས་སྤྲིན་གྱི་ལྷ་དེ་ནི། །བྱང་ཆུབ་ཤིང་ལ་དགའ་བར་རྣམ་པར་ལྟ། །སངས་རྒྱས་ཡེ་ཤེས་སྙིང་པོ་བྱང་ཆུབ་ལ། །ཕྱོགས་རྣམས་ཀུན་ཏུ་མཐའ་དང་མུ་མེད་དེ། །པདྨོ་སྣང་ཞིང་གསལ་བའི་ལྷ་དེ་ནི། །རྣམ་ཐར་རྣམ་ཡངས་འདི་ལ་རབ་དགའ་འོ། །སངས་རྒྱས་སྟོབས་རྣམས་ཡོངས་དག་བསམ་མི་ཁྱབ། །སྙིང་པོ་བྱང་ཆུབ་འདིར་ནི་ཀུན་ཀྱང་གྲག་།ཡང་དག་བསྒྲུབས་པས་བྱུང་བ་དེ་དག་ནི། །ཐམས་ཅད་སྣ་ཚོགས་སྣང་བའི་འོད་ཉན་ཏོ། །དེ་ལ་རྐང་གིས་འགྲོ་རིན་ཆེན་དཔལ་གྱི་ཕྱག་རྒྱའི་རྣམ་པར་ཐར་པ་ནི། དགའ་བ་ཡངས་པ་རིན་པོ་ཆེའི་ཆར་གྱིས་ཀུན་ཏུ་ཁྱབ་པ་ཞེས་བྱའོ། །རྐང་གིས་འགྲོ་པདྨོ་སྣང་བའི་འོད་ཟེར་གྱི་འོད་ཀྱི་རྣམ་པར་ཐར་པ་ནི། སངས་རྒྱས་ཀྱི་སྐུ་འོད་ཟེར་གྱི་ཁ་དོག་པདྨོའི་དྲ་བ་ཐམས་ཅད་དུ་སྟོན་པས་དགའ་བར་བྱེད་པ་ཞེས་བྱའོ། །རྐང་གིས་འགྲོ་མེ་ཏོག་གཙུག་ཕུད་ཀྱི་དཔལ་དྲི་མ་མེད་པའི་རྣམ་པར་ཐར་པ་ནི། སེམས་ཀྱི་སྐད་ཅིག་ཐམས་ཅད་ལ་དེ་བཞིན་གཤེགས་
Ka74b
པའི་འཁོར་གྱི་དཀྱིལ་འཁོར་གྱི་དབྱིབས་དང ། རྒྱན་འབྱུང་བ་ཞེས་བྱའོ། །རྐང་གིས་འགྲོ་ཤིན་ཏུ་མཛེས་པར་གནོན་པའི་རྣམ་པར་ཐར་པ་ནི། གོམ་པ་འདོར་བ་ཐམས་ཅད་དུ་སེམས་ཅན་མཐའ་ཡས་པ་འདུལ་བའི་རྒྱན་ཅེས་བྱའོ། །རྐང་གིས་འགྲོ་རིན་ཆེན་དཔལ་གྱི་རྒྱལ་མཚན་གྱི་རྣམ་པར་ཐར་པ་ནི། སྐད་ཅིག་གཅིག་གིས་པདྨོའི་དྲ་བ་སྣ་ཚོགས་སྤྲུལ་པ་བྱེད་ཅིང་རིན་པོ་ཆེའི་ཆར་པ་དང ། དབྱངས་དང ། སྣང་བ་ཀུན་ཏུ་འགྱེད་པ་ཞེས་བྱའོ། །རྐང་གིས་འགྲོ་དགའ་བའི་དབྱངས་སྙན་པའི་རྣམ་པར་ཐར་པ་ནི། དགའ་བའི་ཤུགས་དང་ཉམས་བདེ་བ་རྒྱ་མཚོ་མཐའ་ཡས་པ་འབྱུང་བ་ཞེས་བྱའོ། །རྐང་གིས་འགྲོ་ཤིང་ཙནྡན་གྱི་འོད་ཀྱི་རྣམ་པར་ཐར་པ་ནི། འཁོར་གྱི་དཀྱིལ་འཁོར་ཐམས་ཅད་དུ་སྤོས་ཀྱི་ངད་སྤྲིན་དུ་ལྡང་བ་ཞེས་བྱའོ། །རྐང་གིས་འགྲོ་པདྨོ་ཡིད་དུ་འོང་བའི་འོད་ཀྱི་རྣམ་པར་ཐར་པ་ནི། པདྨོའི་གསེབ་ཐམས་ཅད་ནས་ཡིད་དུ་འོང་བའི་ཆོས་ཀྱི་དབྱངས་འབྱུང་བས་སྣང་བ་སྐྱེད་པ་ཞེས་བྱའོ། །རྐང་གིས་འགྲོ་རྡུལ་གྱི་ཤུགས་ཀྱི་འོད་ཀྱི་རྣམ་པར་ཐར་པ་ནི། ལུས་ཀྱི་འོད་ཟེར་རྣམ་པ་སྣ་ཚོགས་ཐམས་ཅད་ཀྱི་དྲ་བས་སྣང་བ་འབྱེད་པ་ཞེས་བྱའོ། །རྐང་གིས་འགྲོ་མེ་ཏོག་མང་པོའི་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་དགེ་བའི་རྩ་བ་རྒྱ་མཚོས་ཡང་དག་པར་བསྐུལ་བ་འབྱུང་བ་ཞེས་བྱའོ། །དེ་ནས་རྐང་གིས་
Ka75a
༄#། །འགྲོ་རིན་ཆེན་དཔལ་གྱི་ཕྱག་རྒྱས་སངས་རྒྱས་ཀྱི་མཐུས་རྐང་གིས་འགྲོའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དགའ་བ་རྒྱ་མཚོའི་ཚུལ་གྱི་ཤུགས་བསྐྱེད་ཅིང ། །བསྐལ་པ་མཐའ་ཡས་སྔོན་ཆད་སྤྱོད་པ་མཛད། །ཞིང་རྣམས་ཀུན་རྡུལ་ཤིན་ཏུ་ཕྲ་མཉམ་པའི། །སངས་རྒྱས་རྣམས་ཀྱང་དགྱེས་པའི་ཐུགས་ཀྱིས་མཆོད། །སྐད་ཅིག་སེམས་ལ་པདྨོ་བརྗོད་ཡོངས་པ། །དྲི་ཞིམ་སྣ་ཚོགས་མངོན་པར་སྦྲུལ་མཛད་ནས། །ཞིང་རྣམས་ཀུན་ཏུ་རྒྱལ་བ་གཤེགས་མཛད་པ། །སྣང་བའི་འོད་ཟེར་ལྷ་དེས་རབ་ཏུ་མཐོང ། །འདྲེན་པ་རྣམས་ཀྱི་ཆོས་ཉིད་བསམ་མི་ཁྱབ། །འཁོར་རྣམས་ཀུན་ཏུ་འབྱམས་ཀླས་མཐའ་ཡས་པའི། །རྣམ་པར་འཕྲུལ་པ་མི་ཟད་རབ་ཏུ་སྟོན། །མེ་ཏོག་གཙུག་ཕུད་ལྷ་དེས་དེ་མཐོང་ངོ ། །ཕྱོགས་བཅུའི་ཞིང་གི་དབྱིངས་རྣམས་མ་ལུས་པ། ། ཐམས་ཅད་ཀུན་ཏུ་གཤེགས་ཤིང་བཞུད་པ་ཡིས། །སེམས་ཅན་མཐའ་ཡས་ཡོངས་སུ་སྨིན་པར་མཛད། །ཤིན་ཏུ་མཛེས་པས་དགའ་བར་དེ་མཐོང་ངོ ། །སེམས་ཅན་སྙེད་ཀྱི་སྤྲུལ་པ་ཀུན་འཕྲོས་པ། །རེ་རེའི་སྐུ་ཡིས་ཆོས་ཀྱི་དབྱིངས་ཀྱང་འགེངས། །རིན་ཆེན་དྲི་མེད་འོད་ཀྱང་རབ་ཏུ་གཏོང ། །རྐང་འགྲོ་དཔལ་གྱི་མཚན་གྱིས་འདི་མཐོང་ངོ ། །
Ka75b
དེ་བཞིན་གཤེགས་པའི་སྤྱོད་ཡུལ་མཐའ་ཡས་ཏེ། །འཁོར་དུ་རྒྱལ་བ་ཆོས་ཀྱི་ཆར་ཡང་འབེབས། །བདེར་གཤེགས་དེ་ཡི་འཁོར་ན་དགར་གནས་ཤིང ། །དགའ་སྒྲ་དབྱངས་ཀྱིས་རྣམ་ཐར་དེ་མཐོང་ངོ ། །སངས་རྒྱས་དབྱངས་ནི་མཁའ་དང་མཉམ་པ་སྟེ། །དབྱངས་ཀྱི་ཡན་ལག་ཡོན་ཏན་ཀུན་དང་ལྡན། །འཇིག་རྟེན་ཀུན་བཀང་སེམས་ཅན་རྣམ་པར་འདུལ། །ཙནྡན་ཤིང་གི་འོད་ནི་དེ་ལ་ཉན། །སྤུ་རྩེ་ཀུན་ནས་རྒྱལ་བ་རྣམ་འཕྲུལ་དང ། །དུས་གསུམ་གཤེགས་པའི་རྒྱལ་བའི་མཚན་གྱི་རྣམས། །སྒྲ་བསྒྲགས་ཐོས་ཤིང་དགའ་བ་སྐྱེར་འགྱུར་ཏེ། ། དེ་ནི་རྡོ་རྗེ་འོད་ཀྱི་ལྷས་མཐོང་ངོ ། །དེ་བཞིན་གཤེགས་སྐུ་བསམ་གྱིས་མི་ཁྱབ་སྟེ། །གོམ་པ་གོམ་པར་ཡོན་ཏན་རྒྱ་མཚོ་སྟོན། །དེ་དག་སེམས་ཅན་ཇི་ལྟར་མོས་པས་མཐོང ། །རྡུལ་གྱི་འོད་ཀྱི་ལྷས་ནི་དེ་མཐོང་ངོ ། །འཇིག་རྟེན་མགོན་པོ་རྣམ་འཕྲུལ་རྣམ་མང་གིས། །ཕྱོགས་བཅུར་སེམས་ཅན་ཡང་དག་སྐུལ་བར་མཛད། །མེ་ཏོག་འཁོར་མང་རྐང་པས་འགྲོ་བའི་ལྷ། །མཐོང་ཞིང་དགའ་བ་ཡངས་པ་རབ་ཏུ་ཐོབ། །དེ་ལ་ལུས་ཀྱི་རིས་སུ་གཏོགས་པའི་ལྷ་ཁྲེལ་དང་དགེ་བས་རྒྱས་པའི་འོད་ཀྱི་རྣམ་པར་ཐར་པ་ནི། དེ་བཞིན་གཤེགས་པ་རྣམས་ཀྱི་སྔོན་གྱི་སྨོན་ལམ་རྗེས་སུ་དྲན་པས་རྣམ་པར་དཔྱོད་པ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་འོད་ཟེར་ཕྱོགས་སུ་སྣང་བའི་རྣམ་པར་ཐར་པ་ནི། འཇིག་རྟེན་གྱི་
Ka76a
༄#། །ཁམས་མུ་མེད་པར་སངས་རྒྱས་ཀྱི་འོད་རྣམ་པར་སྟོན་པའི་རྒྱན་ཅེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྒྲས་འདུལ་བ་རྒྱ་མཚོའི་དཔལ་གྱི་རྣམ་པར་ཐར་པ་ནི། སངས་རྒྱས་ཀྱི་གསུང་འདུལ་བའི་སེམས་ཅན་ཐམས་ཅད་ལ་བརྗོད་ཅིང་ཡང་དག་པར་བསྐུལ་བས་དགའ་བ་འབྱུང་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་རྒྱན་བཟང་པོའི་མེ་ཏོག་གཙུག་ཕུད་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་སྐུ་ནམ་མཁའི་མཚན་ཉིད་ཀྱི་བྱིན་གྱི་རླབས་ཀུན་ནས་རབ་ཏུ་གནས་པ་འབྱུང་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྤྱོད་ཡུལ་མཐའ་ཡས་དཔལ་གྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་ཡུལ་འགྲོ་བ་རྣམས་ལ་ཡང་དག་པར་སྟོན་པའི་མཐུ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྣང་བའི་ཕྲེང་བ་འཛིན་པའི་དཔལ་གྱི་རྣམ་པར་ཐར་པ་ནི། སེམས་ཅན་ཐམས་ཅད་གསོ་བ་དང་འདྲེས་པའི་མདངས་ཀྱིས་དགའ་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྤོས་དྲི་མ་མེད་པའི་སྤྲིན་ལས་ཆར་འབེབས་པའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པའི་དྲི་མ་མངོན་པར་སེལ་བའི་སྦྱོར་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྲུང་འཛིན་ཡོངས་སུ་སྡུད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བདུད་ཀྱི་ལས་དང་
Ka76b
རྨོངས་པ་རྣམ་པར་ཟློག་པ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྒོ་ཀུན་ནས་ཡོངས་སུ་གནོན་པ་ལ་མངོན་དུ་གྱུར་པའི་མིག་གི་རྣམ་པར་ཐར་པ་ནི། འཇིག་རྟེན་གྱི་དབང་པོ་ཐམས་ཅད་ཀྱི་གནས་སུ་རྒྱལ་བ་རྣམ་པར་དམིགས་པར་མངོན་དུ་སྟོན་པའི་རྒྱན་ཅེས་བྱའོ། །ལུས་ཀྱི་རིས་སུ་གཏོགས་པའི་ལྷ་ཁྲེལ་དང་དཔལ་མི་གཡོ་བའི་འོད་ཀྱི་རྣམ་པར་ཐར་པ་ནི།་སེམས་ཅན་ཐམས་ཅད་ཀྱི་དགེ་བའི་རྩ་བའི་ཤུགས་ཐམས་ཅད་ཡང་དག་པར་འཛིན་ཅིང་ཡང་དག་པར་སྦྱོང་བ་ཞེས་བྱའོ། །དེ་ནས་ལུས་ཀྱི་རིས་སུ་གཏོགས་པའི་ལྷ་ཁྲེལ་དང་དགེ་བས་རྒྱས་པའི་འོད་ཀྱིས་སངས་རྒྱས་ཀྱི་མཐུས་ལུས་ཀྱི་རིས་སུ་གཏོགས་པའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རི་རབ་རྡུལ་ཕྲན་ཤིན་ཏུ་ཕྲ་སྙེད་ཀྱི། །བསྐལ་པ་དེ་དག་ཕ་སྔའི་བསྐལ་པ་ནི། །རྡུལ་ཅེས་བྱ་བར་འོད་མཛེས་འོད་ཟེར་རྒྱལ། །མཆོད་དེ་སྨོན་ལམ་བཏབ་པ་བདག་གིས་དྲན། །སངས་རྒྱས་སྐུ་ལས་འོད་འཕྲོ་རབ་བཀྱེ་བ། །དེ་ཡི་འོད་ཟེར་ཆོས་ཀྱི་དབྱིངས་སུ་རྒྱུ། །རྒྱལ་བའི་འོད་ཟེར་དྲ་བ་སེམས་ཅན་འདུལ། །འོད་འཕྲོ་འོད་ཟེར་ལྷ་ཡིས་དེ་མཐོང་ངོ ། །དབྱངས་ཀྱི་ཡན་ལག་ཡོན་ཏན་ཀུན་རྒྱས་པའི། །སངས་རྒྱས་གསུང་ནི་ཞིང་རྣམས་ཀུན་ཏུ་སྒྲོག། །འགྲོ་བ་མ་ལུས་ཐམས་ཅད་ཡང་དག་སྐུལ། །དབྱངས་ཀྱིས་འདུལ་བ་
Ka77a
༄#། །དེ་ལ་དགའ་བར་ཉན། །རྒྱལ་བའི་སྐུ་ནི་རབ་ཏུ་ཞི་ལ་ལྟོས། །སྐུ་གཟུགས་དུ་མའང་མཚན་ཉིད་མི་མངའ་སྟེ། །འགྲོ་བ་ཀུན་ནའང་བཞུགས་པར་རབ་ཏུ་སྣང ། །མེ་ཏོག་གཙུག་གིས་ཇི་བཞིན་ཉིད་དུ་མཐོང ། །འདྲེན་པའི་ཆོས་ཉིད་བསམ་གྱིས་མི་ཁྱབ་སྟེ། །སེམས་ཅན་དེ་དག་དད་པ་ཇི་བཞིན་དུ། །ལ་ལ་བཞུགས་དང་བཞེངས་དང་གཤེགས་པར་མཐོང ། །དེ་ཡང་སྤྱོད་ལམ་འབྱུང་བའི་ལྷས་མཐོང་ངོ ། །རྒྱལ་བའི་ཚེམས་ཀྱི་མཚམས་རྣམས་ཐམས་ཅད་ནས། །དྲི་ཞིམ་འོད་འཕྲོ་སྒྲོན་མའི་སྤྲིན་བཀྱེ་བས། །འགྲོ་བ་ཀུན་གྱི་ཉོན་མོངས་ཞི་བར་འགྱུར། །དྲི་མེད་སྤོས་ཀྱི་སྤྲིན་གྱིས་དེ་མཐོང་ངོ ། །སངས་རྒྱས་མགོན་པོ་འགྲོ་བའི་སྐྱབས་སུ་བྱུང ། །ཉོན་མོངས་རྨོངས་ཤིང་སྡུག་བསྔལ་གཟིར་བ་རྣམས། །མགུ་བར་མཛད་ཅིང་ཉོན་མོངས་ཐམས་ཅད་བཅིལ། །སྣང་བའི་ཕྲེང་བ་འཆང་བས་འདི་མཐོང་ངོ ། །འདྲེན་པ་བསྐལ་པ་བརྒྱར་ཡང་ཤིན་ཏུ་དཀོན།། རང་བྱུང་འཇིག་རྟེན་དོན་མཛད་སྐྱེས་པ་ནི། །འཇིག་རྟེན་ཀུན་གྱི་དབུལ་བ་རྣམ་པར་སེལ། །ཁྲེལ་ཡོད་དཔལ་གྱི་འོད་སྣང་དེ་སྐད་སྨྲ། །སེམས་ཅན་ཉོན་མོངས་སྒྲིབ་པས་ཉོན་མོངས་ཤིང ། །བདུད་ཀྱི་ལས་ཀྱིས་དཀྲུགས་ཏེ་འཕྱན་པའི་རྣམས། །དེ་དག་རྒྱལ་བ་རྣམ་ཐར་ལམ་སྟོན་ཏེ། །སྲུང་ཞིང་སྐྱོང་བའི་དཔལ་གྱིས་དེ་མཐོང་ངོ ། །དེ་བཞིན་
Ka77b
གཤེགས་པའི་རྣམ་པར་འཕྲུལ་བ་ལྟོས། །སངས་རྒྱས་སྤྲིན་གྱིས་ཆོས་ཀྱི་དབྱིངས་མནན་ཅིང ། །འཇིག་རྟེན་དབང་པོ་གནས་སུ་སེམས་ཅན་འདུལ། །ཀུན་སྒོའི་མིག་གི་དཔལ་གྱི་སྤྱོད་ཡུལ་ལོ། །དེ་ལ་ལག་ན་རྡོ་རྗེ་མཐུ་ཆེན་ཁ་དོག་བཟང་པོའི་འོད་ཀྱི་རྣམ་པར་ཐར་པ་ནི། ཡོན་ཏན་མཐའ་ཡས་པ་དང་གཟུགས་ཀྱི་སྐུ་རྣམ་པར་དཔྱོད་པ་ཡང་དག་པར་སྟོན་པ་ཞེས་བྱའོ། །ལག་ན་རྡོ་རྗེ་ཉི་མའི་ཤུགས་ཀྱི་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་བ་སྤུ་ལས་ཉི་མའི་དཀྱིལ་འཁོར་གྱི་སྤྲིན་སྣ་ཚོགས་ཀྱི་རྒྱན་འབྱུང་བ་ཞེས་བྱའོ། །ལག་ན་རྡོ་རྗེ་རི་རབ་མེ་ཏོག་འོད་ཀྱི་རྣམ་པར་ཐར་པ་ནི། རྣམ་པར་འཕྲུལ་བ་རྒྱ་ཆེན་པོ་བསྟན་པས་ཡོན་ཏན་མཐའ་ཡས་པའི་ལུས་སུ་འཕྲུལ་བ་ཞེས་བྱའོ། །ལག་ན་རྡོ་རྗེ་རྣམ་དག་སྤྲིན་གྱི་དབྱངས་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་དབྱངས་མཐའ་ཡས་ཚད་མེད་པའི་རྗེས་སུ་སོང་བ་ཞེས་བྱའོ། །ལག་ན་རྡོ་རྗེ་དབང་པོ་ཤིན་ཏུ་མང་བའི་རྣམ་པར་ཐར་པ་ནི། འཇིག་རྟེན་གྱི་དབང་པོ་ཐམས་ཅད་ཀྱི་རྣམ་པར་འཕྲུལ་པ་སྟོན་ཅིང ། སངས་རྒྱས་ཀྱི་བྱིན་གྱི་རླབས་ཀྱིས་ཡང་དག་པར་བསྐུལ་བ་ཞེས་བྱའོ། །ལག་ན་རྡོ་རྗེ་རྡོ་རྗེའི་འོད་ཡིད་དུ་འོང་བའི་རྣམ་པར་ཐར་པ་ནི། སངས་རྒྱས་ཀྱི་ཆོས་ཀྱི་དབྱིངས་རབ་ཏུ་ཕྱེ་བ་ཐམས་ཅད་མ་ལུས་པ་ལ་ཡང་དག་པར་སྤྱོད་པ་ཞེས་བྱའོ། །ལག་ན་རྡོ་རྗེ་ཤིང་གི་སྒྲ་དབྱངས་ཀྱི་རྣམ་པར་ཐར་པ་ནི།
Ka78a
༄#། །ཤིང་གི་ལྷ་ཐམས་ཅད་འདྲེན་པའི་རྒྱན་ཡིད་དུ་འོང་བས་བརྒྱན་པ་ཞེས་བྱའོ། །ལག་ན་རྡོ་རྗེ་སེངྒེའི་འོད་ཀྱི་རྒྱལ་པོའི་རྣམ་པར་ཐར་པ་ནི། དེ་བཞིན་གཤེགས་པའི་བསོད་ནམས་ཀྱི་དཀྱིལ་འཁོར་ཡངས་པའི་ཚོགས་ཀྱི་རྗེས་སུ་འབྲང་བའི་འོད་ཅེས་བྱའོ། །ལག་ན་རྡོ་རྗེ་འོད་འཕྲོ་སྟུག་པོ་དཔལ་གྱི་མིག་གི་རྣམ་པར་ཐར་པ་ནི། སེམས་ཅན་མི་རུངས་པའི་རྒྱུད་ལ་ལུས་འཇིགས་འཇིགས་ལྟར་རབ་ཏུ་སྟོན་ཅིང་ཀུན་ཏུ་རྣམ་པར་ལྟ་བ་ཞེས་བྱའོ། །ལག་ན་རྡོ་རྗེ་རིན་ཆེན་གཙུག་ཕུད་པདྨོ་འོད་ཀྱི་རྣམ་པར་ཐར་པ་ནི། བྱང་ཆུབ་སེམས་དཔའི་རྒྱན་ཐམས་ཅད་ཀྱིས་བརྒྱན་པའི་གཙུག་གི་ནོར་བུ་རིན་པོ་ཆེ་ཐམས་ཅད་ཀྱི་ཆར་མངོན་པར་འབེབས་པ་ཞེས་བྱའོ། །དེ་ནས་ལག་ན་རྡོ་རྗེ་མཐུ་ཆེན་ཁ་དོག་བཟང་པོའི་འོད་ཀྱིས་སངས་རྒྱས་ཀྱི་མཐུས་ལག་ན་རྡོ་རྗེའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆོས་རྒྱལ་ཆོས་ཀྱིས་མཛེས་པ་ཡི། །ཆོས་ཉིད་དེ་ལ་རྣམ་པར་ལྟོས། །ཡོན་ཏན་མཐའ་ཡས་སྐུ་གཟུགས་ཀྱིས། །འཇིག་རྟེན་ཀུན་ཏུ་རྣམ་པར་མཛེས། །སངས་རྒྱས་བ་སྤུ་ཐམས་ཅད་ནས། །འོད་ཟེར་དྲ་བ་བསམ་མི་ཁྱབ། །ཉི་མའི་དཀྱིལ་འཁོར་འདྲ་བ་སྟེ། །ཕྱོགས་བཅུ་ཀུན་ཏུ་རྣམ་པར་མཛེས། །སངས་རྒྱས་རྣམ་འཕྲུལ་དེ་དག་གིས། །ཆོས་ཀྱི་དབྱིངས་སུ་ཁྱབ་
Ka78b
བྱས་ཤིང ། །འགྲོ་བ་ཀུན་གྱི་མངོན་སུམ་དུ། །མི་ཟད་སྐུ་ནི་ཤིན་ཏུ་སྟོན། །སངས་རྒྱས་གསུང་གི་དཀྱིལ་འཁོར་ནི། །ཞིང་རྣམས་ཀུན་ཏུ་རབ་ཏུ་སྒྲོག་།གསུང་གི་སེམས་ཅན་ཐམས་ཅད་ཀྱི། །བསམ་པ་ཐམས་ཅད་རབ་ཏུ་འགེངས། །འཇིག་རྟེན་དབང་པོ་ཀུན་གནས་ན། །ཐུབ་པ་རབ་ཏུ་བཞུགས་པར་སྣང ། །དེ་དག་ཐམས་ཅད་འཁོར་རྣམས་ལ། །འདྲེན་པ་དག་ནི་ཆོས་སྟོན་མཛད། །རྒྱ་མཚོ་ཆོས་ཀྱི་སྒོ་བསྐུལ་བས། །གཞན་དང་གཞན་གྱི་ཚུལ་དག་གིས། །ཐམས་ཅད་ཆོས་ཀྱི་བྱེ་བྲག་དོན། །རྒྱལ་བ་ཟད་མེད་རབ་ཏུ་སྟོན། །རྒྱ་ཆེན་མཐའ་མེད་ཚུལ་དག་ལ། །རྒྱ་མཚོ་འཁོར་རྣམས་རབ་ཏུ་འཇུག། སངས་རྒྱས་འོད་ཟེར་རབ་འདྲེས་པས། །ཀུན་གྱིས་འདྲེན་པ་མཐོང་བར་འགྱུར། །ཞིང་རྣམས་བྱེ་བའི་རྡུལ་སྙེད་དུ། །རྫོགས་པའི་སངས་རྒྱས་ཀུན་མཆོད་པས། །བསོད་ནམས་རྒྱ་ཆེན་ནམ་མཁའ་བཞིན། །ཀུན་གྱིས་འདྲེན་པ་རབ་ཏུ་མཐོང ། །སངས་རྒྱས་རྫུ་འཕྲུལ་མ་འདྲེས་པ། །ཐམས་ཅད་ཞིང་དུ་སྟོན་པ་མཛད། །འགྲོ་ལ་སངས་རྒྱས་མངོན་སུམ་དུ། །བྱང་ཆུབ་སྙིང་པོར་རྣམ་པར་མཛེས། །འོད་ཟེར་སྣ་ཚོགས་དཀྱིལ་འཁོར་གྱི། །འོད་འཕྲོ་སྤྲིན་ནི་ཀུན་ཏུ་སྣང ། །ཆོས་དབྱིངས་ཀུན་ཏུ་ཁྱབ་བྱས་ཤིང ། །སངས་རྒྱས་སྤྱོད་ཡུལ་རབ་ཏུ་སྟོན། ། བམ་པོ་ལྔ་པ། དེ་ལ་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ནི། ཚུལ་གྱི་རྒྱ་མཚོ་བསམ་གྱིས་མི་ཁྱབ་པས་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་
Ka79a
༄#། །སྟེ།་འདི་ལྟར་སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བ་དང ། འགྲོ་བ་འདུལ་བ་ལ་མཐར་ཐུག་པར་མངོན་པར་སྒྲུབ་པ་ཞེས་བྱ་བའི་རྣམ་པར་ཐར་པ་དང ། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་པས་ཡོན་ཏན་གྱི་ཚོགས་ཐམས་ཅད་ཀྱི་ཡུལ་ཞེས་བྱ་བའི་རྣམ་པར་ཐར་པ་དང ། བྱང་ཆུབ་སེམས་དཔའ་ཐམས་ཅད་ཀྱི་ས་ནས་སར་སྨོན་ལམ་རྒྱ་མཚོས་རབ་ཏུ་གནས་པ་འབྱུང་བ་ཞེས་བྱ་བའི་རྣམ་པར་ཐར་པ་དང ། སྒོ་ཐམས་ཅད་ནས་ཆོས་ཀྱི་དབྱིངས་སུ་བདག་གི་ལུས་ཀྱི་སྤྲིན་རྡུལ་སྙེད་མཐའ་ཡས་པས་རྒྱས་པར་འགེངས་པ་ཞེས་བྱ་བའི་རྣམ་པར་ཐར་པ་དང ། ཞིང་ཐམས་ཅད་དུ་རང་གི་མིང་བསམ་གྱིས་མི་ཁྱབ་པའི་འཁོར་ལོ་སྒྲོག་པའི་བྱིན་གྱི་རླབས་ཞེས་བྱ་བའི་རྣམ་པར་ཐར་པ་དང ། རྡུལ་ཤིན་ཏུ་ཕྲ་བ་ཐམས་ཅད་ཀྱི་སྦུབས་སུ་བྱང་ཆུབ་སེམས་དཔའི་ཡུལ་དང ། རྣམ་པར་འཕྲུལ་པ་མཐའ་དང་དབུས་མེད་པ་ཡང་དག་པར་སྟོན་པ་ཞེས་བྱ་བའི་རྣམ་པར་ཐར་པ་དང ། དུས་གསུམ་གྱི་བསྐལ་པ་སྐད་ཅིག་གཅིག་ཏུ་སྟོན་པས་འབྱུང་བ་དང་འཇིག་པ་རབ་ཏུ་འབྱུང་བ་ཞེས་བྱ་བའི་རྣམ་པར་ཐར་པ་དང ། བྱང་ཆུབ་སེམས་དཔའ་ཐམས་ཅད་ཀྱི་དབང་པོ་རྒྱ་མཚོའི་ཡུལ་ཕན་ཚུན་དུ་འཇུག་པ་ཡང་དག་པར་སྟོན་པ་ཞེས་བྱ་བའི་རྣམ་པར་
Ka79b
ཐར་པ་དང ། གང་འདི་ཆོས་ཀྱི་དབྱིངས་མཐའ་དང་དབུས་མེད་པར་རང་གི་ལུས་ཀྱི་སྤྲུལ་པས་རྒྱས་པར་རྣམ་པར་འཕྲུལ་པའི་བྱིན་གྱི་རླབས་ཞེས་བྱ་བའི་རྣམ་པར་ཐར་པ་དང ། གང་འདི་བྱང་ཆུབ་སེམས་དཔའི་ཆོས་ཐམས་ཅད་ཀྱི་ཚུལ་ཕན་ཚུན་དུ་སྟོན་པ་རྒྱ་ཆེན་པོས་ཐམས་ཅད་མཁྱེན་པ་ཉིད་ཀྱི་ཚུལ་ལ་འཇུག་པ་ཞེས་བྱ་བའི་རྣམ་པར་ཐར་པ་བདག་གོ་།དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་རྣམ་པར་ཐར་པའི་ཚུལ་རྒྱ་མཚོ་བསམ་གྱིས་མི་ཁྱབ་པ་དག་གིས་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་ཅིང ། སངས་རྒྱས་ཀྱི་མཐུས་འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་རྒྱལ་བས་དྲི་མེད་རྣམ་པར་སྦྱངས། །མཁའ་ཡངས་རྡུལ་བཞིན་ཡོན་ཏན་ཚད་ཀྱང་མེད། །སྔོན་གྱི་རྒྱལ་བའི་སྲས་པོ་དྲི་མེད་པ། །དེ་ལ་བསམ་ཡས་ཆོས་སྤྲིན་ཆར་ཡང་ཕབ། །ཇི་ལྟར་རྒྱལ་བ་གདན་ལ་བཞུགས་སྣང་བ། །དེ་བཞིན་རྡུལ་སྦུབས་མ་ལུས་ཀུན་ནའང་སྟེ། །འོན་ཀྱང་བདེར་གཤེགས་གཤེགས་དང་འཕོ་བ་མེད། །ཞིང་རྣམས་ཀུན་ཏུ་ཡུལ་མེད་རབ་ཏུ་སྟོན། །ས་ཡི་ཚུལ་ལ་འཇུག་པ་ཚད་མེད་དེ། ། སྤྱོད་པ་ཐུབ་པས་བྱང་ཆུབ་སེམས་དཔའ་བསྟན། །བསམ་གྱིས་མི་ཁྱབ་ཚུལ་ནི་ཀུན་གསུངས་པས། །རྒྱལ་སྲས་རྣམས་ནི་ཆོས་ཀྱི་དབྱིངས་ལ་འཇུག། །ཆོས་དབྱིངས་འཇུག་ཚུལ་རྣམ་
Ka80a
༄#། །པ་རྒྱ་ཆེ་སྟེ། །མཐའ་ཡས་ཕྱོགས་སུ་མཐའ་དང་དབུས་མེད་སྒོ། །རྡུལ་ཕྲན་སྦུབས་སུ་རྒྱལ་བ་འཕྲུལ་བ་སྤྲོས། །འགྲོ་བའི་བསམ་པ་ཀུན་ཀྱང་རབ་ཏུ་མཁྱེན། ། ཕྱོགས་རྣམས་ཐམས་ཅད་ཞིང་རྣམས་ཀུན་ཏུ་ཡང ། །འཇིག་རྟེན་གཙོ་མཚན་འགྲོ་དང་མཉམ་པར་བྱུང ། །ཐམས་ཅད་ཚུལ་སྒོར་སངས་རྒྱས་དོན་ཡོད་དེ། །འདུལ་བས་སེམས་ཅན་ཐམས་ཅད་རྣམ་པར་སྦྱོང ། །རྡུལ་སྦུབས་ཀུན་ཏུ་མཐའ་དང་དབུས་མེད་པའི། །རྣམ་འཕྲུལ་ཡངས་པ་རང་བྱུང་ཤིན་ཏུ་སྟོན། །སྔོན་ཆང་ཐུབ་པའི་བྱང་ཆུབ་སྤྱོད་པ་རྣམས། ། ཇི་བཞིན་ཀུན་ཀྱང་སྙིང་པོ་བྱང་ཆུབ་བརྗོད། །ཡངས་དུས་བསྐལ་པ་ཇི་སྙེད་ཡོད་པའི་རྣམས། །སྐད་ཅིག་སྐད་ཅིག་སངས་རྒྱས་མ་ལུས་སྟོན། །དེར་ནི་སེམས་ཅན་འབྱུང་ཞིང་འཇིག་པའང་བསྟན། །འཇིག་རྟེན་གཙོ་བོའི་ཡེ་ཤེས་བསམ་ཡས་ལྟོས། །འབྱམས་ཀླས་མི་ཟད་མཐའ་ཡས་ལོ་གྲངས་པས། །རྒྱལ་སྲས་ཐམས་ཅད་སངས་རྒྱས་ས་ལྟ་སྟེ། །ཐམས་ཅད་སྒོར་ཡང་སངས་རྒྱས་མཐའ་དབུས་མེད། །རྒྱལ་སྲས་ཀུན་གྱིས་ཤེས་པར་སྨྲ་བ་མིན། །སངས་རྒྱས་མཁན་འདྲ་རྣམ་པར་མི་རྟོག་སྟེ། །ཆོས་ཉིད་མི་གནས་ཆོས་ཀྱི་སྤྲིན་དག་གིས། །སྤྲུལ་པས་སྤྱོད་ཚེ་ཀུན་ཏུ་རྒྱས་མཛད་ཅིང ། །ཤིང་མཆོག་ཀུན་དྲུང་བྱང་ཆུབ་འཚང་རྒྱ་བསྟན། །སངས་རྒྱས་གསུང་དེ་རབ་ཏུ་བརྗོད་པས་ན། །ཆོས་གནས་
Ka80b
ཐམས་ཅད་མ་ལུས་བརྗོད་པ་ཡིན། །འགྲོ་བ་ཐམས་ཅད་རེ་རེའི་སྒོ་དག་ནས། །སངས་རྒྱས་ཆོས་རྣམས་ཀུན་ལ་རབ་ཏུ་འཇུག་།དེ་ལ་བྱང་ཆུབ་སེམས་དཔའ་དགེ་བ་དྲི་མ་མེད་པའི་གཟི་བརྗིད་ཀྱི་འོད་ཡིད་དུ་འོང་བའི་རྣམ་པར་ཐར་པ་ནི། ཆོས་ཀྱི་དབྱིངས་ཐམས་ཅད་དུ་མངོན་པར་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དུ་འགྲོ་བའི་རྒྱན་བྱེད་པ་ཞེས་བྱའོ། ། བྱང་ཆུབ་སེམས་དཔའ་ཡོན་ཏན་འོང་མཆོག་ཀུན་ཏུ་སྒྲོན་མའི་རྣམ་པར་ཐར་པ་ནི། སེམས་སྐད་ཅིག་གིས་མངོན་པར་རྫོགས་པར་བྱང་ཆུབ་པའི་སྒོ་ཟད་མི་ཤེས་པ་སྟོན་ཅིང་ཆོས་ཀྱི་དབྱིངས་བསམ་གྱིས་མི་ཁྱབ་པས་ཡོངས་སུ་སྨིན་པ་དང ། རྣམ་པར་འདུལ་བར་བྱེད་པའི་འོད་ཅེས་བྱའོ། །བྱང་ཆུབ་སེམས་དཔའ་ཀུན་ཏུ་འབར་བ་སེངྒེའི་རྒྱལ་མཚན་གྱི་རྣམ་པར་ཐར་པ་ནི། བྱང་ཆུབ་སེམས་དཔའ་ཐམས་ཅད་ཀྱི་བསོད་ནམས་ཀྱི་ཚོགས་དང ། ཞིང་ཡང་དག་པར་འབྱུང་བ་ལ་རྣམ་པར་ལྟ་བ་ཞེས་བྱའོ། །བྱང་ཆུབ་སེམས་དཔའ་དཔལ་གྱི་འོད་ཟེར་ཀུན་ཏུ་འོད་འཕྲོ་བའི་རྣམ་པར་ཐར་པ་ནི། རྫུ་འཕྲུལ་གྱི་ཡུལ་གྱིས་རྣམ་པར་སྤྱོད་པ་དོན་ཡོད་པ་ཞེས་བྱའོ། །བྱང་ཆུབ་སེམས་དཔའ་ཡོན་ཏན་རྒྱ་མཚོ་ཀུན་ཏུ་སྒྲ་དབྱངས་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ཀྱི་ཞིང་གི་རྒྱན་ཐམས་ཅད་འཁོར་གྱི་དཀྱིལ་འཁོར་དུ་ཡང་དག་པར་སྟོན་པ་ཞེས་བྱའོ། །བྱང་ཆུབ་སེམས་དཔའ་དེ་བཞིན་གཤེགས་
Ka81a
༄#། །པའི་སྤྱོད་ཡུལ་ཡེ་ཤེས་ཀུན་ཏུ་སྣང་བའི་འོད་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་རྗེས་སུ་ཀུན་ནས་སོང་ཞིང་ཆོས་ཀྱི་དབྱིངས་ལ་རྣམ་པར་སྤྱོད་པའི་སྤྲིན་ཆེན་པོའི་སྙིང་པོ་ཞེས་བྱའོ། །བྱང་ཆུབ་སེམས་དཔའ་གཙུག་ན་རིན་ཆེན་ཀུན་ཏུ་རྒྱལ་མཚན་གྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྤྱོད་པ་ལ་རབ་ཏུ་ཞུགས་ཤིང་བྱང་ཆུབ་སེམས་དཔའི་སྤྱོད་པ་མཐའ་ཡས་པ་ཤིན་ཏུ་འབྱུང་བ་ཞེས་བྱའོ། །བྱང་ཆུབ་སེམས་དཔའ་རྒྱལ་བའི་གསུང་ཀུན་ཏུ་འཇམ་དབྱངས་ཀྱི་རྣམ་པར་ཐར་པ་ནི། སངས་རྒྱས་ཐམས་ཅད་བསྙེན་བཀུར་ཞིང་མཆོད་པར་ཉེ་བར་འགྲོ་བའི་སྙིང་པོ་ཞེས་བྱའོ། །བྱང་ཆུབ་སེམས་དཔའ་བསོད་ནམས་མི་ཟད་དྲི་མེད་ཀུན་ཏུ་གཟི་བརྗིད་ཀྱི་རྣམ་པར་ཐར་པ་ནི། རྫུ་འཕྲུལ་དང་རྣམ་པར་འཕྲུལ་པ་ཐམས་ཅད་ཀྱི་བྱིན་གྱི་རླབས་རྒྱ་ཆེན་པོ་འབྱུང་བ་ཞེས་བྱའོ། །བྱང་ཆུབ་སེམས་དཔའ་མཚན་གྱི་འོད་ཟེར་ཀུན་ཏུ་སྣང་བའི་རྣམ་པར་ཐར་པ་ནི། དེ་བཞིན་གཤེགས་པ་སྐུ་མེད་པ་ལས་སངས་རྒྱས་ཀྱི་ཡུལ་ཐམས་ཅད་འབྱུང་བ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མ་མེད་པའི་གཟི་བརྗིད་ཀྱི་འོད་ཡིད་དུ་འོང་བས་སངས་རྒྱས་ཀྱི་མཐུས་བྱང་ཆུབ་སེམས་དཔའི་རྣམ་པར་ཐར་པ་རྒྱ་མཚོའི་ཕྱོགས་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་
Ka81b
བཅད་པ་འདི་དག་སྨྲས་སོ། །ཇི་སྙེད་གང་དག་ཕྱོགས་རྣམས་ཀུན་གྱི་ཞིང ། །རྒྱལ་བས་དེ་ཀུན་སྐད་ཅིག་དགོངས་པས་སྦྱངས། །འགྲོ་བར་ཀུན་ཏུ་ཞི་བ་མེད་པའི་གསུང ། །སངས་རྒྱས་ཆོས་ཀྱི་འཁོར་ལོ་རྒྱ་ཆེན་བསྐོར། །སྐད་ཅིག་དགོངས་པས་ཆོས་དབྱིངས་ཀུན་བཀང་སྟེ། །མཐའ་ཡས་སྤྱོད་ཡུལ་དབྱངས་རྣམས་རྒྱལ་བ་སྟོན། །འགྲོ་བ་ཀུན་ལམ་སྙིང་པོ་བྱང་ཆུབ་ཏུ། ། བྱང་ཆུབ་འཚང་རྒྱ་རྣམ་པར་འཕྲུལ་བ་མཛད། །བསྐལ་པ་བརྒྱ་ཕྲག་སྟོང་རྣམས་ཚད་མེད་དུ། །དེ་བཞིན་གཤེགས་པས་སྔོན་ཆད་སྤྱོད་སྤྱད་དེ། །ནམ་མཁའ་འདྲ་བར་བྱས་ནས་རབ་བཀྱེ་ཞིང ། །སངས་རྒྱས་ཞིང་འདི་སྔོན་ཚེ་རབ་ཏུ་སྦྱངས། །མཐའ་དང་དབུས་མེད་བསྐལ་པར་ལ་ལ་ཡིས། །སྐྱོ་བ་མེད་པར་རྒྱལ་བའི་ཡུལ་བསམ་ཡང ། །སངས་རྒྱས་རྫུ་འཕྲུལ་སྟོབས་ལ་མཐའ་དབུས་མེད། །ཕྱི་མའི་མཐའ་ཡི་བསྐལ་པ་ཀུན་ཏུ་འགེངས། །རྒྱལ་བའི་རྫུ་འཕྲུལ་ཡུལ་ལ་རྣམ་པར་ལྟོས། །ཕྱོགས་བཅུའི་ཞིང་རྒྱན་དེ་དག་རྣམ་དག་པ། །རྒྱལ་བས་འདིར་ནི་ཀུན་ཀྱང་རབ་ཏུ་བསྟན། །སྐད་ཅིག་སྐད་ཅིག་སྣ་ཚོགས་གཟུགས་ཀྱང་སྣང ། །བསྐལ་པ་བརྒྱ་སྟོང་ཚད་མེད་པ་དག་ཏུ། །རྒྱལ་བའི་བ་སྤུ་གཅིག་མཐའ་ཤེས་པར་དཀའ། །ཚུལ་རྣམས་ཀུན་སྒོར་སངས་རྒྱས་ཆགས་པ་མེད། །འགྲོ་བ་འདི་ན་རྒྱ་ཆེན་བསམ་ཡས་མཛེས། །སྔོན་ཚེའི་བསྐལ་པར་རྒྱལ་བས་འགྲོ་ཀུན་ཏུ། །སངས་རྒྱས་རྒྱ་མཚོ་རྒྱ་
Ka82a
༄#། །ཆེན་བསྙེན་བཀུར་བས། །དེ་བས་འཇིག་རྟེན་གཙོ་ལ་ཆོས་དབྱིངས་རྣམས། །ཀུན་ནས་མཆོད་པ་མང་པོ་རྒྱ་ཆེན་འབྱུང ། །ཕྱོགས་རྣམས་བཀང་སྟེ་སངས་རྒྱས་བྱུང་བ་དག་།རྡུལ་གྱི་སྦུབས་སུ་ཚད་མེད་ཞིང་ཡང་སྟོན། །དེ་དག་ཡུལ་དུ་མི་ཟད་མཐའ་ཡས་པའི། །བསྐལ་པ་རྒྱ་མཚོར་བྱིན་གྱིས་རློབ་པ་མཛད། །སྔོན་ཚེའི་བསྐལ་པར་རྒྱལ་བས་འགྲོ་དོན་སྤྱད། །ཐུགས་རྗེའི་རྒྱ་མཚོ་ཚད་མེད་རབ་བསྐྱེད་ཅིང ། །འགྲོ་བ་རྒྱ་མཚོ་ཀུན་ནས་འཁོར་བ་ཡི། །འཁོར་རྣམས་རྒྱ་མཚོ་མཐའ་ཡས་ཀུན་ཀྱང་སྦྱངས། ། སངས་རྒྱས་མཚན་མེད་སྐུ་མེད་རྡུལ་དང་བྲལ། །དེ་བཞིན་ཉིད་གནས་ཆོས་དབྱིངས་སྙིང་པོ་སྟེ། །འགྲོ་བ་ཀུན་ན་མཐའ་ཡས་གཟུགས་སུ་སྣང ། །འགྲོ་བ་ཀུན་གྱི་སྡུག་བསྔལ་ཀུན་ཞི་མཛད། །དེ་ལ་བྱང་ཆུབ་སེམས་དཔའ་འོད་ཟེར་རྒྱ་མཚོ་འོད་ཆེན་དཔལ་གྱི་ཟླ་བའི་རྣམ་པར་ཐར་པ་ནི། ཕ་རོལ་ཏུ་ཕྱིན་པ་དང་སའི་ཤུགས་ཀྱིས་སེམས་ཅན་གྱི་ཁམས་ཀྱི་ཚུལ་དང ། སངས་རྒྱས་ཀྱི་ཞིང་རྣམ་པར་དག་པར་འབྱུང་བ་ཞེས་བྱའོ། །བྱང་ཆུབ་སེམས་དཔའ་སྤྲིན་གྱི་ང་རོ་རྒྱ་མཚོ་དྲི་མེད་འོད་ཀྱི་སྙིང་པོའི་རྣམ་པར་ཐར་པ་ནི་།བྱང་ཆུབ་སེམས་དཔའ་ཐམས་ཅད་ཀྱི་སེམས་སྐད་ཅིག་ལ་ཆོས་ཀྱི་དབྱིངས་ཀྱི་ཚུལ་གྱིས་ཁྱིམ་སྣ་ཚོགས་ལ་རྣམ་པར་ལྟ་བ་ཞེས་བྱའོ། །བྱང་ཆུབ་སེམས་དཔའ་ཡོན་ཏན་རིན་ཆེན་
Ka82b
འབྱུང་བ་ཡེ་ཤེས་དཔལ་གྱི་གཙུག་ཕུད་ཀྱི་རྣམ་པར་ཐར་པ་ནི། བསྐལ་པ་བསམ་གྱིས་མི་ཁྱབ་པར་འགྲོ་བ་རྣམས་ལ་མངོན་སུམ་དུ་ཡོན་ཏན་དྲི་མ་མེད་པས་ཡོངས་སུ་དག་པ་སྒྲུབ་པ་ཞེས་བྱའོ། །བྱང་ཆུབ་སེམས་དཔའ་རྒྱ་ཆེན་འོད་འབར་བློ་གྲོས་དབང་ཕྱུག་གི་རྣམ་པར་ཐར་པ་ནི། བྱང་ཆུབ་སེམས་དཔའ་ཐམས་ཅད་ཀྱི་སྙིང་པོ་བྱང་ཆུབ་ཏུ་ཐོག་མ་འགྲོ་བའི་ཡེ་ཤེས་ཀྱི་ཕྱོགས་ཡང་དག་པར་འབྱུང་བའི་རྒྱན་ཅེས་བྱའོ། །བྱང་ཆུབ་སེམས་དཔའ་པདྨོ་རྣམ་པར་གནོན་པ་འོད་ཟེར་གཙུག་ཕུད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཆོས་ཐམས་ཅད་དང་ཐ་མི་དད་པར་འགྲོ་བ་ཐམས་ཅད་ཀྱི་དབང་པོ་དང་མོས་པ་རྒྱ་མཚོའི་འོད་ཅེས་བྱའོ། །བྱང་ཆུབ་སེམས་དཔའ་ཀུན་ཏུ་ཡེ་ཤེས་སྤྲིན་གྱི་ཉི་མའི་རྒྱལ་མཚན་སྣང་བའི་རྣམ་པར་ཐར་པ་ནི། སངས་རྒྱས་ཀྱི་ཡེ་ཤེས་སྒྲུབ་པར་བསྐལ་པ་མཐའ་ཡས་པ་དག་ཏུ་བྱིན་གྱིས་རློབ་ཅིང་རྣམ་པར་སྤྱོད་པ་ཞེས་བྱའོ། །བྱང་ཆུབ་སེམས་དཔའ་མཐུ་སྟོབས་བརྩོན་འགྲུས་རྡོ་རྗེ་ཡངས་པའི་སྙིང་པོའི་རྣམ་པར་ཐར་པ་ནི། ཆོས་ཐམས་ཅད་ཀྱི་ཕྱག་རྒྱ་མཐའ་དང་དབུས་མེད་པ་ལ་ཡང་དག་པར་འཇུག་པ་ཞེས་བྱའོ། །བྱང་ཆུབ་སེམས་དཔའ་སྤོས་ཀྱི་འོད་འཕྲོ་ཤིན་ཏུ་འབར་བའི་འོད་ཀྱི་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ད་ལྟར་བྱུང་བ་ཐམས་ཅད་ཀྱི་ཐོག་མའི་བྱང་ཆུབ་སེམས་དཔའི་སྤྱོད་པ་ཤེས་པའི་དཀྱིལ་
Ka83a
༄#། །འཁོར་ཡང་དག་པར་སྒྲུབ་པ་ཞེས་བྱའོ། །བྱང་ཆུབ་སེམས་དཔའ་རྣམ་པར་སྣང་མཛད་ཡོན་ཏན་ཡངས་པའི་རྒྱལ་མཚན་གྱི་རྣམ་པར་ཐར་པ་ནི། རྣམ་པར་སྣང་མཛད་ཀྱི་སྨོན་ལམ་རྒྱ་མཚོ་ཐམས་ཅད་ཀྱི་དབྱིངས་ལ་རབ་ཏུ་གནས་པ་ཞེས་བྱའོ། །བྱང་ཆུབ་སེམས་དཔའ་བསོད་ནམས་ཡངས་པ་ཤིན་ཏུ་འཕགས་པའི་འོད་མཆོག་ཡོན་ཏན་འབྱུང་བའི་བློ་གྲོས་ཀྱི་རྣམ་པར་ཐར་པ་ནི། སངས་རྒྱས་ཀྱི་ཡུལ་ཟབ་མོ་ཆོས་ཀྱི་དབྱིངས་ཐམས་ཅད་ལ་ཀུན་ནས་རབ་ཏུ་གནས་པར་རྣམ་པར་སྤྱོད་པ་ཞེས་བྱའོ། །དེ་ནས་བྱང་ཆུབ་སེམས་དཔའ་འོད་ཟེར་རྒྱ་མཚོ་འོད་ཆེན་དཔལ་གྱི་ཟླ་བས་སངས་རྒྱས་ཀྱི་མཐུས་བྱང་ཆུབ་སེམས་དཔའ་རྣམ་པར་ཕྱེ་བ་རྒྱ་མཚོ་མཐའ་ཡས་པ་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཕ་རོལ་ཕྱིན་པ་རྒྱ་མཚོ་བསམ་ཡས་དང ། །ས་ཡི་དཀྱིལ་འཁོར་རྒྱ་ཆེན་ཀུན་ཀྱང་ཡོངས་སུ་རྒྱས། །ཚད་མེད་སེམས་ཅན་རྣམ་པར་འདུལ་བའི་ཚེ། །སངས་རྒྱས་ཞིང་ཡངས་རྣམས་ཀྱང་རྣམ་པར་སྦྱངས། །ཕྱོགས་བཅུའི་སངས་རྒྱས་ཞིང་ཀུན་རྒྱས་བྱས་ཏེ། །སངས་རྒྱས་སེམས་ཅན་ཁམས་སྦྱིན་འདུལ་མཛད་པ། །སྐད་ཅིག་དགོངས་པས་ཆོས་ཀྱི་འཁོར་ལོ་དག་།མཐའ་ཡས་འགྲོ་མཉམ་བསམ་པ་ཚིམ་པར་གསུངས། །བསྐལ་པ་རྒྱ་ཆེ་མི་ཟད་མུ་མེད་པར། །རྒྱལ་བ་འགྲོ་ལ་མངོན་
Ka83b
སུམ་ཀུན་ནས་བཞུགས། །མགོན་པོས་སྔོན་ཆད་ཇི་ལྟར་སྦྱངས་ཚུལ་དུ། །རྒྱལ་བས་སྤྱོད་ཡུལ་རྣམ་དག་རབ་ཏུ་བསྟན། །ཆོས་རྒྱལ་དེ་དག་ཇི་ལྟར་རྣམ་འཕྲུལ་བ། །ཕྱོགས་རྣམས་རྒྱ་མཚོ་མ་ལུས་ཀུན་ན་སྣང ། །སྙིང་པོ་བྱང་ཆུབ་ཀུན་ནའང་རྒྱལ་བ་དག། འཁོར་གྱིས་བསྐོར་ཅིང་ཆོས་རྣམས་གསུང་བ་སྣང ། །འགྲོ་བའི་བསམ་པ་ཐམས་ཅད་ཚིམ་མཛད་ཅིང ། །འཇིག་རྟེན་དག་ན་སངས་རྒྱས་ཚུལ་ཀུན་མཛེས། །དབང་པོ་ཇི་བཞིན་ཆོས་ཀྱི་ཆར་པ་འབེབས། །སངས་རྒྱས་ཆོས་སྐུ་ཡངས་པ་རྣམ་པར་མཛེས། །དེ་བཞིན་ཉིད་ལྟར་མཚན་ཉིད་ལུས་མེད་དེ། །རྒྱལ་བ་དྲི་མེད་འོད་གསལ་ཆོས་ཀྱི་སྐུ། །ཡེ་ཤེས་ཞི་བའི་སྐུ་ནི་ཚད་མེད་དེ། །ཕྱོགས་དབྱིངས་ཀུན་བཀང་ཆོས་ཀྱི་ཆར་ཡང་འབེབས། །ཆོས་རྗེ་ཐམས་ཅད་སྟོབས་ཀྱིས་རྣམ་པར་དག་།བདེར་གཤེགས་ཡེ་ཤེས་མཁའ་འདྲ་མཐའ་ཡས་ཏེ། །རྒྱ་ཆེན་འགྲོ་བ་མཐའ་དབུས་མེད་བཀང་ཞིང ། །རྒྱལ་བ་སྟོབས་ལ་འཇུག་པ་རབ་ཏུ་སྟོན། །སངས་རྒྱས་འོད་ཀྱིས་ཆོས་དབྱིངས་ཀུན་བཀང་ཞིང ། །སངས་རྒྱས་སྤྱོད་པ་ཐམས་ཅད་རྫོགས་པར་བསྟན། །རྒྱལ་བས་སྔོན་ཚེ་ཇི་ལྟར་རྣམ་སྦྱངས་པ། །དེ་བཞིན་ཡེ་ཤེས་ས་རྣམས་རྒྱལ་བས་བསྟན། །ཕྱོགས་རྣམས་ཀུན་ཏུ་རང་བྱུང་རྣམ་པར་མཛེས། །སྨོན་ལམ་རྣམ་པར་འཕྲུལ་པ་མ་ལུས་སྟོན། །ཇི་ལྟར་སྔོན་ཚེ་རྒྱལ་བས་ཡོངས་སྦྱངས་པ། །རྒྱལ་བའི་འོད་ཟེར་དྲ་བ་ཀུན་ནས་སྒྲོག་།སངས་རྒྱས་ཡུལ་ནི་
Ka84a
༄#། །ཕྱོགས་སུ་ཟད་པ་མེད། །དབུས་དང་མཐའ་མེད་གཞལ་མེད་མཐའ་ཡས་དབྱིངས། །ཆོས་དབྱིངས་ཀུན་ཏུ་ཆགས་མེད་བརྙས་པ་ནི། །སངས་རྒྱས་ཞིང་རྣམས་ཀུན་ན་ཤིན་ཏུ་མཛེས། །དེའི་ཚེ་བཅོམ་ལྡན་འདས་ཀྱི་སེངྒེའི་ཁྲི་དང ། པདྨོའི་ཟེ་བའི་དྲི་ཐམས་ཅད་དང ། ནོར་བུའི་རྒྱལ་པོ་ཐམས་ཅད་ཀྱི་ངོས་དང ། འཁོར་ལོའི་ལྟེ་བ་ཐམས་ཅད་དང ། མེ་ཏོག་གི་ཟེ་བའི་དྲི་ཐམས་ཅད་དང ། སྟེགས་བུའི་ངོས་ཐམས་ཅད་དང ། རྟ་བབས་ཀྱི་སྒོ་ཐམས་ཅད་དང ། ནོར་བུའི་གཟུགས་ཀྱི་ངོས་ཐམས་ཅད་དང ། རིན་པོ་ཆེ་འོད་འཕྲོ་བའི་སྒོ་ཐམས་ཅད་དང ། འོད་ཟེར་སྒྲོན་མའི་སྒོ་ཐམས་ཅད་དང ། སེངྒེའི་ཁྲིའི་རྒྱན་གྱི་སྒོ་ཐམས་ཅད་ནས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་མང་པོ་ཐོན་པར་གྱུར་ཏེ། འདི་ལྟར་བྱང་ཆུབ་སེམས་དཔའ་རྒྱ་མཚོའི་བློ་གྲོས་རྣམ་པར་རོལ་པའི་ཡེ་ཤེས་མངོན་པར་ཤེས་པའི་རྒྱལ་པོ་ཞེས་བྱ་བ་དང ། བྱང་ཆུབ་སེམས་དཔའ་སྒྲ་དབྱངས་ཀུན་ཏུ་སྒྲོག་པ་དང ། བྱང་ཆུབ་སེམས་དཔའ་ནོར་བུ་རིན་པོ་ཆེ་སྣ་ཚོགས་ཀྱི་འོད་ཀྱི་དཀྱིལ་འཁོར་གྱི་གཙུག་ཕུད་དང ། བྱང་ཆུབ་སེམས་དཔའ་ཡེ་ཤེས་ཆེན་པོའི་ཉི་མས་རབ་ཏུ་གནོན་པའི་བློ་གྲོས་དང ། བྱང་ཆུབ་སེམས་དཔའ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པ་ཡེ་ཤེས་རྒྱ་མཚོའི་དཔལ་དང ། བྱང་ཆུབ་སེམས་དཔའ་མིག་བརྒྱ་པདྨོ་
Ka84b
སྣ་ཚོགས་ཀྱི་གཙུག་ཕུད་དང ། བྱང་ཆུབ་སེམས་དཔའ་ནམ་མཁའི་ཚུལ་པདྨོ་སྣ་ཚོགས་ཀྱི་གཙུག་ཕུད་དང ། བྱང་ཆུབ་སེམས་དཔའ་གསེར་གྱི་འོད་འཕྲོ་གཟི་བརྗིད་དཀྱིལ་འཁོར་གྱི་འོད་དང ། བྱང་ཆུབ་སེམས་དཔའ་ཀུན་ཏུ་སྒྲ་ཆོས་ཀྱི་དབྱིངས་ཀྱི་དབྱངས་དང ། བྱང་ཆུབ་སེམས་དཔའ་སྤྲིན་ཡིད་དུ་འོང་བ་དྲི་མ་མེད་པའི་ཟླ་བ་དང ། དེ་དག་ལ་སོགས་པ་བྱང་ཆུབ་སེམས་དཔའ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་མཆོད་པའི་སྤྲིན་རྣམ་པ་སྣ་ཚོགས་རབ་ཏུ་འགྱེད་ཅིང་འདི་ལྟར་ནོར་བུ་རིན་པོ་ཆེའི་མེ་ཏོག་གི་སྤྲིན་ཐམས་ཅད་ནི། རབ་ཏུ་འབྱིན། སྤོས་ཀྱི་སྤྲིན་ཐམས་ཅད་ནི། ཤིན་ཏུ་འགྱེད། རིན་པོ་ཆེའི་འོད་ཀྱི་དཀྱིལ་འཁོར་གྱི་སྤྲིན་ཐམས་ཅད་ནི། མངོན་པར་འབྱིན། ཡུལ་མཐའ་ཡས་པའི་སྤོས་ཀུན་ཏུ་འཕྲོ་བའི་བདུག་པའི་སྤྲིན་ནི།་རྣམ་པར་འགྱེད་ཅིང ། ནོར་བུ་ཉི་མའི་སྙིང་པོའི་འཁོར་ལོའི་འོད་ཀྱི་དཀྱིལ་འཁོར་གྱི་སྤྲིན་ནི། རབ་ཏུ་གཏོང ། སིལ་སྙན་གྱི་སྒྲ་དབྱངས་ཡིད་དུ་འོང་བའི་སྤྲིན་ནི། རབ་ཏུ་སྒྲོག། རིན་པོ་ཆེའི་འོད་འཕྲོ་བ་ཁ་དོག་མཐའ་ཡས་པའི་སྒྲོན་མའི་སྤྲིན་གྱིས་ནི། རབ་ཏུ་སྣང་བར་བྱེད། ནོར་བུ་སྣ་ཚོགས་ཀྱི་ཤིང་གི་ཡལ་ག་ལས་མེ་ཏོག་གི་དོག་པ་ནི། རྣམ་པར་སྤྱོད། རིན་པོ་ཆེའི་འོད་དྲི་མ་མེད་པ་ཟད་མི་ཤེས་པའི་ནོར་བུའི་རྒྱལ་པོའི་ཆར་ནི། རབ་ཏུ་འབེབས་།རྒྱན་མཛེས་པ་ཐམས་ཅད་ཡང་དག་པར་སྟོན་པའི་ནོར་བུའི་རྒྱལ་པོའི་སྤྲིན་གྱི་ཆར་ནི།
Ka85a
༄#། །རབ་ཏུ་འབེབས་ཤིང ། དེ་ལྟ་བུ་དག་ལ་སོགས་པ་བྱང་ཆུབ་སེམས་དཔའ་རེ་རེ་ཞིང་ཡང་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་མཆོད་པའི་སྤྲིན་གྱི་ཆར་རབ་ཏུ་འབེབས་པར་བྱེད་ཅིང་ལྷགས་པར་གྱུར་ཏེ། བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ་འཁོར་གྱི་དཀྱིལ་འཁོར་རྒྱ་མཚོ་ཡོད་པ་ཐམས་ཅད་དུ་མཆོད་པའི་སྤྲིན་རྒྱུན་མི་འཆད་པའི་ཆར་མངོན་པར་ཕབ་ནས་གང་ནས་འོངས་པའི་ཕྱོགས་སུ་བརྟེན་ཏེ། དེ་བཞིན་གཤེགས་པ་ལ་མངོན་དུ་བལྟས་ནས་སེངྒེའི་ཁྲི་རིན་པོ་ཆེ་སྣ་ཚོགས་དུ་མའི་པདྨོའི་སྙིང་པོ་ཅན་དག་མངོན་པར་སྤྲུལ་ཏེ་སྐྱིལ་མོ་ཀྲུང་བཅས་ནས་འཁོད་པར་གྱུར་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་སྤྱོད་ཡུལ་རྒྱ་མཚོ་རྒྱ་ཆེན་པོ་ཡོངས་སུ་དག་པ་རྣམས་སོ། །སྒོ་ཀུན་ནས་ཆོས་ཀྱི་སྣང་བ་རབ་ཏུ་ཐོབ་པ་རྣམས་སོ། །དེ་བཞིན་གཤེགས་པའི་སྤྱོད་ཡུལ་ཆགས་པ་མེད་པའི་རྗེས་སུ་འབྲང་བ་རྣམས་སོ། །སོ་སོ་ཡང་དག་པར་རིག་པ་ཐམས་ཅད་ཀྱིས་ཆོས་རྒྱ་མཚོ་ལ་ཞུགས་པ་རྣམས་སོ། །རྣམ་པར་ཐར་པ་བསམ་གྱིས་མི་ཁྱབ་པའི་སྣང་བ་རབ་ཏུ་ཐོབ་པ་རྣམས་སོ། །སྒོ་ཀུན་ནས་དེ་བཞིན་གཤེགས་པའི་སའི་དབྱིངས་རབ་ཏུ་ཐོབ་པ་རྣམས་སོ། །གཟུངས་ཀྱི་སྒོ་རྒྱ་མཚོ་ཐམས་ཅད་ཀྱིས་ཆོས་རྒྱ་མཚོ་རབ་ཏུ་འཛིན་པ་རྣམས་སོ། །དུས་གསུམ་
Ka85b
མཉམ་པ་ཉིད་ཀྱི་ཡེ་ཤེས་ཀྱི་ས་ལ་རབ་ཏུ་གནས་པ་རྣམས་སོ། །དགའ་བའི་ཤུགས་རྒྱ་ཆེན་པོའི་རབ་ཏུ་ཐོབ་པ་རྣམས་སོ། །བསོད་ནམས་ཀྱི་དཀྱིལ་འཁོར་མུ་མེད་པ་ཡོངས་སུ་དག་པ་རྣམས་ཏེ། ཆོས་ཀྱི་དབྱིངས་དང་ནམ་མཁའ་ལ་རྣམ་པར་རྒྱུ་ཞིང ། སངས་རྒྱས་ཐམས་ཅད་མཆོད་པ་མངོན་པར་སྒྲུབ་པ་ལ་རབ་ཏུ་བརྩོན་པ་ཤ་སྟག་གོ་།དེ་ནས་བྱང་ཆུབ་སེམས་དཔའ་རྒྱ་མཚོའི་བློ་གྲོས་རྣམ་པར་རོལ་བའི་ཡེ་ཤེས་མངོན་པར་ཤེས་པའི་རྒྱལ་པོས་སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་རྒྱ་མཚོ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་རྣམ་པར་སངས་རྒྱས་མཉམ་ཉིད་མཁྱེན། །ཆགས་མེད་བརྙེས་པས་ནམ་མཁའ་ལྟ་བུ་སྟེ། །ཕྱོགས་རྣམས་ཞིང་ཀུན་རབ་ཏུ་སྣང་བྱས་ནས། །འབྱམས་ཀླས་འཁོར་ན་བཞུགས་པ་རྣམ་པར་མཛེས། །བདེར་གཤེགས་རང་བྱུང་མཐའ་དང་དབུས་མེད་དེ། །ཐམས་ཅད་ཕྱོགས་ཀྱི་ཆོས་དབྱིངས་ཀུན་རྒྱས་པར། ། དབང་ཕྱུག་ཆེན་པོ་ཀུན་གྱིས་མཆོད་བསྐོར་ཅིང ། །ཤིང་གི་རྒྱལ་པོ་ཀུན་གྱི་དྲུང་ན་བཞུགས། །དེ་བཞིན་གཤེགས་པའི་རྫུ་འཕྲུལ་སྟོབས་དག་གིས། །སྐད་ཅིག་སེམས་ལ་མི་ཟད་ཡོན་ཏན་གཟུགས། །རྣམ་ཐར་གཞན་དང་གཞན་དག་ཐོབ་པས་མཐོང ། །དེ་བཞིན་གཤེགས་པའི་ཡུལ་ནི་མཐའ་ཡས་སོ། །བསྐལ་པ་རྒྱ་མཚོར་སྔོན་ཆད་སྤྱོད་པའི་ཚེ། །དེ་
Ka86a
༄#། །བཞིན་གཤེགས་པས་སྲིད་པ་རྒྱ་མཚོ་འདིར། །སྣ་ཚོགས་ཐབས་ཀྱིས་སེམས་ཅན་སྨིན་བྱས་པ། །དེ་དག་རྒྱལ་བ་དེ་ཡི་ཆོས་འཛིན་ཏོ། །ཡོངས་དག་དྲི་མེད་འཁོར་རྣམས་འཁོད་པ་དག་།ཐམས་ཅད་སངས་རྒྱས་ལྟ་ཞིང་རྣམ་པར་གནས། །པདྨོའི་སྙིང་པོ་པདྨོའི་གདན་བཞུགས་པ། །ཚོགས་ཀྱི་ནང་ན་རྒྱལ་བ་མངོན་པར་མཛེས། ། སངས་རྒྱས་གང་ལ་བཞུགས་པའི་སེངྒེའི་ཁྲི། །རིན་ཆེན་ནོར་བུའི་རྒྱལ་པོའི་འོད་འཕྲོ་ཞིང ། །སྤོས་འཕྲོའི་སྤྲིན་རྣམས་མཐའ་ཡས་རབ་ཏུ་འབྱུང ། །སྙིང་པོ་དུ་མའི་མེ་ཏོག་ཕྲེང་དཔྱངས་པའོ། །རིན་ཆེན་འོད་འཕྲོའི་སྤྲིན་ནི་རྟག་ཏུ་འགྱེད། །འོད་ཟེར་སྒྲོན་མ་རྒྱ་ཆེན་རབ་ཏུ་འབར། །རྟ་བབས་རྣམ་པ་སྣ་ཚོགས་རྣམས་ཀྱིས་བརྒྱན། །ཐུབ་པ་དེ་བཞུགས་མངོན་པར་རབ་ཏུ་མཛེས། །སྒྲ་དབྱངས་ཡིད་དུ་འོང་བ་རབ་ཏུ་འགྱེད། །རིན་ཆེན་ཚོན་དུ་སྣ་ཚོགས་པདྨོ་འཕྱང ། །ནོར་བུའི་རྒྱལ་པོས་སྐར་ཁུང་ཀུན་ནས་བརྒྱན། །སངས་རྒྱས་དེ་བཞུགས་རྣམ་པར་རབ་ཏུ་མཛེས། །ཟླ་གམ་རིན་ཆེན་མང་པོས་ཡོངས་སུ་བཟུང ། །རྡོ་རྗེ་འོད་འཕྲོ་སྣང་བའི་སྙིང་པོས་བརྒྱན། །གཙུག་ན་ནོར་བུའི་བྱང་ཆུབ་སེམས་དཔས་བཟུང ། །སངས་རྒྱས་དེ་བཞུགས་རྣམ་པར་ཤིན་ཏུ་མཛེས། །ཕྱོགས་བཅུར་སྤྲུལ་པའི་དྲ་བ་རབ་བཀྱེ་ཞིང ། །དེ་བཞིན་གཤེགས་པའི་སྨོན་ལམ་སྒྲ་ཡང་སྒྲོག་།གཟུགས་བརྙན་བཞིན་དུ་ཞིང་རྣམས་
Ka86b
ཀུན་ན་སྣང ། །ཐུབ་པ་དེ་འདྲའི་སེངྒེའི་གདན་ལ་བཞུགས། །དེ་ནས་བྱང་ཆུབ་སེམས་དཔའ་སྒྲ་དབྱངས་ཀུན་ཏུ་སྒྲོག་པས་སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདི་ནི་བདེར་གཤེགས་སངས་རྒྱས་བྱིན་རླབས་ཏེ། །བྱང་ཆུབ་སྤྱོད་པ་སྔོན་ཆད་སྤྱད་པ་དང ། །སངས་རྒྱས་མཆོད་པའི་མཆོད་པ་དུ་མ་དག་།རྒྱལ་བའི་གདན་ལས་དེ་དག་ཐམས་ཅད་སྣང ། །སྤོས་འོད་སྣང་བ་ནོར་བུའི་རྒྱལ་པོ་ཅན། །མེ་ཏོག་སྙིང་པོ་སེངྒེའི་གདན་གྱི་འཁོར། །རྒྱན་རྣམས་ཐམས་ཅད་གཟུགས་བརྙན་གྱུར་པ་དང ། །འཁོར་རྣམས་དེ་དག་ཐམས་ཅད་ཀུན་བཀང་སྟེ། །སྐད་ཅིག་སྐད་ཅིག་རྒྱན་གྱི་ཁ་དོག་ཀུན། །རྣམ་པ་དུ་མར་སངས་རྒྱས་གདན་ལས་སྣང ། །སེམས་ཅན་ཇི་ལྟར་མོས་པ་དེ་དག་ཀྱང ། །འཁོད་ཅིང་སངས་རྒྱས་ཚད་མེད་གདོན་ལ་ལྟ། །རིན་ཆེན་ལྡ་ལྡི་པདྨོ་མང་བཏགས་པ། །ཕྱེ་ཞིང་བྱང་ཆུབ་སེམས་དཔའ་མང་པོ་རྣམས། །སྒྲ་དབྱངས་ཡིད་དུ་འོང་བ་རབ་འབྱིན་ཅིང ། །སངས་རྒྱས་གདན་ལ་བཞུགས་ལ་བསྟོད་པ་བྱེད། །སངས་རྒྱས་བསོད་ནམས་ཚད་མེད་ནམ་མཁའ་བཞིན། །འདི་དག་རྒྱན་ཀུན་དེ་ལས་རབ་ཏུ་བྱུང ། །ས་རྣམས་རེ་རེའི་རྒྱན་རྣམས་གང་ཡོད་པ། །འགྲོ་བ་ཀུན་གྱིས་དེ་དག་བསམ་མི་ནུས། །མི་ཕྱེད་མཚམས་ཀྱི་རྡོ་རྗེ་སྣ་ཚོགས་པ། །འཁོར་ཡངས་རྣམ་དག་ཤིན་ཏུ་
Ka87a
༄#། །མཉམ་པ་སྟེ། །ནོར་བུའི་དྲ་བ་སྣ་ཚོགས་ཀུན་ཏུ་བཀྲམ། །བྱང་ཆུབ་ཤིང་གི་ས་ཡི་འཁོར་ཀུན་ཏོ། །ས་ཕྱོགས་གང་ན་རྒྱལ་བའི་གདན་ཡོད་པ། །ཁ་དོག་མཐའ་ཡས་རྒྱ་ཆེན་སྣ་ཚོགས་ཏེ། །མེ་ཏོག་མངོན་གཏོར་རིན་ཆེན་རྣམ་པར་བཀྲམ། །གསེར་ཚོན་མཛེས་པས་དེ་ནི་རབ་ཏུ་བརྒྱན། །ས་ཡི་ལྷ་མོ་དེ་དག་རབ་དགའ་ཞིང ། ། སྐད་ཅིག་སེམས་ཀྱིས་མི་ཟད་ས་ཡང་སྟོན། །ཀུན་ཀྱང་རྒྱལ་བའི་ཞལ་དུ་མངོན་ལྟ་ཞིང ། །ཁ་དོག་ཐམས་ཅད་རྒྱན་གྱི་སྤྲིན་གཏོང་ངོ ། །རིན་ཆེན་སྒྲོན་མ་མང་པོ་གསལ་བར་འབར། །སྤོས་མང་དྲི་ཞིམ་མང་པོ་རྟག་ཏུ་འབྱུང ། །དུས་དང་ཚོད་ཀྱི་རྣམ་པ་མང་སྟོན་ཅིང ། །ལྷ་རྣམས་ཀུན་ཀྱང་སངས་རྒྱས་མཆོད་པ་བྱེད། །ཕྱོགས་རྣམས་བཅུ་ན་ཞིང་རྣམས་ཇི་སྙེད་པ། །དེ་དག་ས་རྒྱན་ཕུན་སུམ་ཚོགས་ཡོད་པ། །དེ་དག་ཀུན་ཀྱང་ས་དཀྱིལ་འདི་ན་སྣང ། །སངས་རྒྱས་བྱིན་རླབས་མཉམ་པ་མེད་པས་བྱུང ། །དེ་ནས་བྱང་ཆུབ་སེམས་དཔའ་ནོར་བུ་རིན་པོ་ཆེ་སྣ་ཚོགས་ཀྱི་འོད་ཀྱི་དཀྱིལ་འཁོར་གཙུག་ཕུད་ཀྱིས་སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྔོན་ཆད་སྤྱད་པ་སྤྱོད་པའི་ཚེ་དག་ཏུ། །ཞིང་ཀུན་ཕུན་སུམ་ཚོགས་པ་མཐོང་བ་རྣམས། །སྙིང་པོ་བྱང་ཆུབ་འཁོར་གྱི་ས་འདི་ལ། །མི་
Ka87b
ཟད་ས་དང་དེ་དག་རབ་ཏུ་སྣང ། །རྣམ་ཐར་ཡངས་པ་གང་ན་སྣང་བ་ཡི། །ས་ལ་རིན་ཆེན་མཛེས་ཀུན་རྣམ་པར་བཀྲ་མ། །རིན་ཆེན་མང་པོས་དཀྱིལ་འཁོར་ཀུན་ཏུ་གཏོར། །སངས་རྒྱས་འོད་ཀྱིས་སྤྲིན་ཀྱང་རབ་ཏུ་སྣང ། །ས་རྣམས་ཀུན་བརྒྱན་ཤིང་གི་དམ་པའི་དྲུང ། །ཀུན་ནས་ནོར་བུའི་རྒྱལ་པོས་བརྒྱན་བྱས་ལས། །བསོད་ནམས་འོད་ཀྱི་དབྱངས་ཀྱི་འབྲུག་སྒྲ་འབྱུང ། ། སངས་རྒྱས་རྫུ་འཕྲུལ་ཚུལ་ཡང་རབ་ཏུ་བརྗོད། །རིན་ཆེན་མང་པོ་སྒྲོན་མའི་ཆར་ཕབ་ཅིང ། །རིན་ཆེན་མཛེས་པར་བཀོད་པ་རྣམ་པར་མཛེས། །སྒྲ་དབྱངས་ཀུན་གྱི་འབྲུག་སྒྲ་ཤིན་ཏུ་སྒྲོག་།ས་ཡི་ལྷ་རྣམས་ས་ཡང་ཡང་དག་སྟོན། །རིན་ཆེན་འོད་འཕྲོ་སྒྲོན་མ་རྣམ་པར་སྣང ། །འོད་ཟེར་སྤྲིན་ནི་ས་ལས་རབ་ཏུ་འབྱུང ། །ནོར་བུ་དྲ་བ་སིལ་མ་ཀུན་ནས་བཀྲམ། །རིན་ཆེན་སྣ་ཚོགས་རིགས་ཀྱིས་ཡན་ལག་བརྒྱན། །ས་རྣམས་ཀུན་ནས་མཛེས་པ་འདི་དག་ལྟོས། །རིན་ཆེན་མང་པོ་ཚོན་བཟང་རྒྱན་དུ་བཀྱེ། །འགྲོ་པ་དག་ལ་ཆོས་ཀྱི་རྒྱ་མཚོ་སྒྲོག་།དེ་དག་ཆོས་ཉིད་རྣམ་པར་དག་པ་མཐོང ། །མ་ལུས་ཕྱོགས་ན་སངས་རྒྱས་ཐམས་ཅད་ཀྱི། །བྱང་ཆུབ་ཤིང་གི་ཕུན་སུམ་ཚོགས་པ་དག་།ས་ཡི་དཀྱིལ་འཁོར་འདི་ན་ཀུན་སྣང་སྟེ། །དེ་དག་ཆོས་ཉིད་རྣམ་པར་དག་པ་བརྗོད། །སངས་རྒྱས་གདན་ལས་ཆོས་རྣམས་རྒྱ་མཚོ་ཡི། །ཆོས་སྒོ་བདེ་བར་གཤེགས་པས་གང་གསུངས་པ། །སེམས་ཅན་ཀུན་གྱི་བསམ་པ་ཇི་བཞིན་
Ka88a
༄#། །དུ། །ས་འཁོར་རྣམས་ཀྱང་ཀུན་ནས་རབ་ཏུ་འབྱུང ། །དྲི་ཞིམ་འོད་རྣམས་རྟག་ཏུ་འབྱུང་བས་ན། །དེ་དག་ཇི་བཞིན་སྣོད་ཀྱི་འགྲོ་བ་འགེངས། །སྲོག་ཆགས་རྣམས་ཀྱི་ཉོན་མོངས་ཞི་བར་བྱེད། །ས་འཁོར་དེ་ནས་དེ་འདྲ་རབ་ཏུ་སྒྲོག་།སངས་རྒྱས་རྫུ་འཕྲུལ་ཕུན་སུམ་གང་དག་དང ། །དྲི་མེད་ས་ནི་གང་གིས་མཛེས་གྱུར་པའི། །ཕུན་སུམ་ཚོགས་པའི་རྒྱན་རྣམས་རེ་རེ་ཞིང ། །བསྐལ་པ་བྱེ་བ་དག་ཏུའང་བརྗོད་མི་ནུས། །དེ་ནས་བྱང་ཆུབ་སེམས་དཔའ་ཡེ་ཤེས་ཆེན་པོའི་ཉི་མས་རབ་ཏུ་གནོན་པའི་བློ་གྲོས་ཀྱིས་སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་ཀུན་གྱི་བསམ་པ་ཚིམ་མཛད་ཅིང ། །སངས་རྒྱས་ཆོས་ཀྱི་གཞལ་མེད་ཁང་ན་མཛེས། །འབྱམས་ཀླས་ཕྱོགས་རྣམས་ཀུན་ཏུ་མངོན་སུམ་དུ། །སངས་རྒྱས་འགྲོ་གཙོ་གཞལ་མེད་ཁང་ན་སྣང ། །རིན་ཆེན་ཀུན་གྱིས་སྙིང་པོ་རབ་ཏུ་བརྒྱན། །རྒྱན་རྣམས་ཀུན་གྱིས་དེ་བཞིན་མཛེས་ཤིང་འབར། །སངས་རྒྱས་ཕོ་བྲང་འོད་ནི་བསམ་མི་ཁྱབ། །དེ་ན་བཞུགས་ཤིང་སངས་རྒྱས་རབ་ཏུ་མཛེས། །ཀ་བའི་རྒྱན་ནི་ནོར་བུ་སྣ་ཚོགས་ཏེ། །ཕྱོགས་རྣམས་ཀུན་སྒོར་རྟ་བབས་སྤྲིན་ཀྱང་བྲེས། །སྟེགས་བུའི་ཕྲེང་བ་ཀུན་ནས་རྒྱན་དུ་བཀོད། །གསེར་གྱི་དྲིལ་བུའི་སྤྲིན་ཀྱང་
Ka88b
རྣམ་པར་བརྒྱུས། །མེ་ཏོག་བླ་རེ་རྣམ་པ་སྣ་ཚོགས་ལྟོས། །རིན་ཆེན་ཤིང་སྡོང་དར་གྱི་བླ་རེ་བྲེས། །ནོར་བུ་ཐམས་ཅད་སྒོ་ནས་ཕྲེང་བ་འབུལ། །དེ་ན་ཡེ་ཤེས་རྒྱ་མཚོ་རབ་ཏུ་མཛེས། །སྤོས་དྲི་རྒྱལ་མཚན་རིན་ཆེན་དྲ་བ་སྟེ། །འོད་ཟེར་སྒྲོན་མའི་སྤྲིན་གྱིས་ཀུན་ཏུ་གཡོག། རྒྱན་རྣམས་སྣ་ཚོགས་ཀུན་ནས་ཤིན་ཏུ་བྲེས། །དེ་ན་སངས་རྒྱས་རབ་ཏུ་འཕགས་པ་བཞུགས། །ཕྱོགས་རྣམས་ཀུན་སྒོ་སྤྲུལ་པའི་སྤྲིན་གྱི་རྣམས། །དབྱངས་ཀྱིས་འཇིག་རྟེན་ཁྱབ་པར་གྲགས་བྱེད་ཅིང ། །འབྱམས་ཀླས་ཕྱོགས་ཀྱི་སེམས་ཅན་རྣམས་འདུལ་བ། །སངས་རྒྱས་ཕོ་བྲང་འདི་ན་དེ་དག་གྲག་།མེ་ཏོག་ཤིང་དང་རིན་ཆེན་སྤུངས་སྤེལ་བ། །འཕགས་པར་ཕྱོགས་རྣམས་ཀུན་ཏུ་མངོན་པར་མཛེས། །དེ་ལ་དུས་གསུམ་ཞིང་རྣམས་ཐམས་ཅད་ཀྱང ། །གཟུགས་བརྙན་གྱུར་པར་དེ་དག་རབ་ཏུ་སྣང ། །ཕྱོགས་རྣམས་ཀུན་ཏུ་རིན་ཆེན་མང་བཀྱེ་བ། །དེ་དག་སྣ་ཚོགས་མཛེས་པར་རྣམ་པར་འབར། །ཕྱོགས་རྣམས་ཀུན་ཏུ་སྐར་ཁུང་མཛེས་པར་བརྒྱན། །རྟ་བབས་མདའ་ཡབ་སྣ་ཚོགས་མང་པོས་བརྒྱན། །དེ་ལ་དྲི་མེད་འོད་ཟེར་ཀུན་ནས་སྣང་བ་ཡི། །སངས་རྒྱས་ཕོ་བྲང་རྣམ་པ་བསམ་ཡས་ཏེ། །གཞལ་མེད་ཁང་མང་ཐམས་ཅད་དེ་ལ་སྣང ། །དེ་དག་ཀུན་ནའང་རྒྱལ་བ་བཞུགས་ཤིང་མཛེས། །ཕྱོགས་རྣམས་ཀུན་ན་འཁོར་རྣམས་ཇི་སྙེད་པ། །རྒྱལ་བའི་ཕོ་བྲང་འདིར་ནི་ཀུན་ཞུགས་ཀྱང ། །
Ka89a
༄#། །མཐའ་དང་དབུས་མེད་མུ་ཡང་དེ་བཞིན་མེད། །རང་བྱུང་སངས་རྒྱས་ཕོ་བྲང་དེ་ན་བཞུགས། །དེ་ནས་བྱང་ཆུབ་སེམས་དཔའ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པ་ཡེ་ཤེས་རྒྱ་མཚོའི་དཔལ་གྱིས་སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་རྒྱ་མཚོ་ཡོད་པ་དེ་དག་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཞིང་རྡུལ་ཤིན་ཏུ་ཕྲ་སྙེད་ཀྱི། །བསོད་ནམས་རྒྱ་མཚོ་རྣམ་པར་རབ་སྦྱངས་ཏེ། །སངས་རྒྱས་རྫུ་འཕྲུལ་སྨོན་ལམ་ཡང་དག་བྱུང ། །སྙིང་པོ་བྱང་ཆུབ་དྲི་མེད་རྣམ་པར་མཛེས། །སྤོས་ཞིམ་ཐམས་ཅད་རྩ་ནས་ཡང་དག་རྒྱུ། །ཡིད་བཞིན་ནོར་མཆོག་རྒྱལ་པོས་ཀུན་ནས་བརྒྱན། །རྡོ་རྗེ་ཕྱེ་མའི་ནོར་བུ་རྒྱལ་པོས་བྲིས།། ཤིང་སྡོང་རྩ་བ་རིན་ཆེན་ཀུན་ལས་བྱས། །རྡོ་རྗེ་ཕྱེ་མའི་ནོར་བུ་འཁོར་ལོ་འབྱུང ། །ལྷུན་རྣམས་ཐམས་ཅད་རིན་ཆེན་རྒྱན་གྱིས་བརྒྱན། །ཡལ་ག་སྟུག་པོ་སྤྲིན་ལྟར་ཀུན་ནས་འཁྱིལ། །སྙིང་པོ་བྱང་ཆུབ་དེ་ན་རྒྱལ་བ་མཛེས། །ཡལ་ག་དོག་པ་ཀུན་ནས་མངོན་པ་སྟེ། །འཁོར་རྣམས་སྣུམ་འཇམ་ཕྱོགས་རྣམས་ཀུན་ཏུ་འཕགས། །མེ་ཏོག་འབྲས་བུ་རྒྱུན་རྣམས་ཀུན་ཀྱང་འགྱེད། །སྙིང་པོ་བྱང་ཆུབ་རྒྱ་ཆེ་བསམ་མི་ཁྱབ། །འོད་རྣམས་བཀྱེ་བ་ཕྱོགས་སུ་རྣམ་པར་མཛེས། །དྲི་མ་མེད་པའི་འོད་འབར་ཟད་མི་ཤེས། །ཡལ་གའི་
Ka89b
སྒོ་ནས་སྤྲིན་ཀུན་ཆར་ཡང་འབེབས། །སྙིང་པོ་བྱང་ཆུབ་སྨོན་ལམ་ཡངས་པས་བྱུང ། །མེ་ཏོག་ནོར་དང་རིན་ཆེན་མི་ཟད་ནོར། །མུ་ཏིག་ནོར་བུ་ཕྱོགས་རྣམས་ཀུན་ནས་བརྒྱུས། །ཕྱེ་མ་ནོར་གྱི་གནས་ཀྱི་སྤྲིན་འགྱེད་དེ། །སྙིང་པོ་བྱང་ཆུབ་ཕྱོགས་རྣམས་ཀུན་ཏུ་འབྱིན། །བདེ་གཤེགས་སྙིང་པོ་བྱང་ཆུབ་འདི་ལ་ལྟོས། །པདྨོའི་དྲ་བ་ནོར་བུ་དྲི་མེད་མང ། །རིན་ཆེན་འོད་ཟེར་དཀྱིལ་འཁོར་ཀུན་ནས་འཕྲོ། །དྲིལ་བུའི་དྲ་བའི་སྤྲིན་གྱི་སྒྲ་དབྱངས་འབྱིན། །ཕྱོགས་བཅུའི་ཤིང་བཟང་གཟུགས་རྣམས་གང་ཡོད་པ། །འབྱམས་ཀླས་ཞིང་གི་མ་ལུས་ཐམས་ཅད་དག་།བྱང་ཆུབ་ཤིང་ལ་དེ་དག་ཀུན་ནས་སྣང ། །དེ་དྲུང་སངས་རྒྱས་དྲི་མེད་རྣམ་པར་མཛེས། །ཡལ་ག་ཀུན་ནས་རིན་ཆེན་མི་ཟད་ནོར། །བྱང་ཆུབ་སེམས་དཔའ་དག་ཀྱང་རྟག་འབྱུང་ཞིང ། །བསོད་ནམས་རྒྱ་ཆེན་དཀྱིལ་འཁོར་ཆར་ཕབ་སྟེ། །ཕྱོགས་བཅུར་རྒྱལ་བ་མཆོད་ཕྱིར་དེ་དག་འདོང ། །དེ་བཞིན་གཤེགས་པ་སྔོན་ཆད་ཅིར་གྱུར་དང ། །བྱང་ཆུབ་སྤྱོད་ལས་བྱུང་བ་འདི་དག་ལྟོས། །ཡལ་ག་ཀུན་ལས་རིན་ཆེན་ནོར་མི་ཟད། །སངས་རྒྱས་ཡུལ་ཀུན་བསམ་གྱིས་མི་ཁྱབ་བོ། །དེ་ནས་བྱང་ཆུབ་སེམས་དཔའ་མིག་བརྒྱ་བ་པདྨོ་སྣ་ཚོགས་ཀྱི་གཙུག་ཕུད་ཀྱིས་སངས་རྒྱས་ཀྱི་མཐུས་འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དུས་གསུམ་གཤེགས་
Ka90a
༄#། །པའི་རྒྱལ་བའི་རྣམ་འཕྲུལ་བ། །དེ་དག་རིན་ཆེན་སྒོ་ནས་ཀུན་ཀྱང་གྲག་།དེ་ནི་མཐའ་དང་དབུས་ཀྱང་མེད་པ་སྟེ། །སྙིང་པོ་བྱང་ཆུབ་འདི་ལ་ཀུན་སྣང་ངོ ། །མེ་ཏོག་མང་པོའི་ཕྲེང་བ་དབྱངས་བཀྱེ་ཞིང ། །འོད་ཟེར་སྤྲིན་གྱིས་ཕྱོགས་རྣམས་ཀུན་བཀང་སྟེ། །བྱང་ཆུབ་ཤིང་ལ་གནས་པའི་ལྷ་ཚོགས་རྣམས། །སངས་རྒྱས་ལྟ་ཞིང་རྟག་ཏུ་མཆོད་པ་བྱེད། །སྤོས་ཀྱི་རྒྱལ་མཚན་ནོར་བུ་སྣ་ཚོགས་འབར། །སྤོས་ཀྱི་འོད་འཕྲོ་བདུག་སྤོས་རྟག་ཏུ་འབྱུང ། །འཁོར་གྱི་རྒྱ་མཚོ་ཀུན་ལ་ཁྱབ་པར་ཞིམ། །ཤིང་གི་རྒྱལ་པོ་དེ་ཕྱིར་ཕྱོགས་སུ་མཛེས། །པདྨོ་འཕྲུལ་བ་སྟུག་ཅིང་གསེར་མདོག་འདྲ། །རྒྱལ་བའི་སྤྲིན་སྒྲ་རྟག་པར་རབ་ཏུ་འགྱེད། །ཕྱོགས་བཅུའི་ཞིང་རྣམས་མ་ལུས་ཁྱབ་བྱས་ཤིང ། །སེམས་ཅན་རྣམས་ཀྱི་ཉོན་མོངས་གདུང་བ་སེལ། །རྒྱལ་བའི་འཁོར་ནི་ཚད་མེད་རྒྱ་ཆེ་སྟེ། །ཕྱོགས་རྣམས་ཀུན་ནས་སྙིང་པོ་བྱང་ཆུབ་ལ། །གཟུགས་བརྙན་སྣང་ཞིང་དྲི་མེད་འོད་མཆོག་འགྱེད། །བྱང་ཆུབ་ཤིང་གི་རྣམ་འཕྲུལ་འདི་དག་ལྟོས། །སྨོན་ལམ་སྒྲ་དང་དབྱངས་ཀྱི་མར་མེ་རྣམས། །རིན་ཆེན་སྣ་ཚོགས་ཡལ་ག་ཀུན་ལས་འབར། །སྲིད་པ་རྒྱ་མཚོ་ཀུན་ན་སྔོན་ཆད་དུ། །རྒྱལ་བའི་སྤྱོད་པ་ཇི་ལྟར་བྱུང་བ་སྟོན། །བྱང་ཆུབ་ལྷ་རྣམས་ཞིང་གི་རྡུལ་སྙེད་དོ། །དེ་དག་ཐམས་ཅད་སྙིང་པོ་བྱང་ཆུབ་གནས། །ཐུབ་པའི་བྱང་ཆུབ་
Ka90b
ཤིང་ལ་སྐད་ཅིག་ཅིང ། །རྣམ་ཐར་གཞན་དང་གཞན་མང་དེ་དག་སྟོན། །རང་བྱུང་སྤྱད་པ་ཐམས་ཅད་སྤྱོད་པའི་ཚེ། །སྔོན་ཆད་དེ་བཞིན་གཤེགས་པ་གང་མཆོད་པ། །དེ་དག་མཚན་བཅས་སྔོན་གྱི་སྦྱོར་བཅས་པ། །ཐམས་ཅད་རིན་ཆེན་སྒོ་ནས་རབ་ཏུ་སྣང ། །ཕྱོགས་བཅུའི་སེམས་ཅན་ཇི་སྙེད་སྣོད་གྱུར་པ། །དེ་དག་ཐམས་ཅད་འདི་ལས་སྒྲ་འབྱུང་སྟེ། །དེ་དག་ཅིས་འདུལ་རྣམ་དག་ཅི་འདྲ་བའང ། །སྙིང་པོ་བྱང་ཆུབ་འདི་ལས་ཀུན་བརྗོད་དོ། །བྱང་ཆུབ་ཤིང་རྣམས་མཐའ་ཡས་ཕྱོགས་ཀུན་ན། །བསམ་གྱིས་མི་ཁྱབ་རྒྱན་གྱི་སྤྲིན་ཅན་དག་།མཐའ་ཡས་སྣ་ཚོགས་རྒྱན་ཅན་ཐམས་ཅད་ཀྱང ། །སྔོན་ཆད་དེ་བཞིན་གཤེགས་པས་ཡོངས་སྦྱངས་པའོ། །དེ་ནས་བྱང་ཆུབ་སེམས་དཔའ་གསེར་གྱི་འོད་འཕྲོ་གཟི་བརྗིད་དཀྱིལ་འཁོར་གྱི་འོད་ཀྱིས་སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྲིད་པའི་རྒྱ་མཚོར་བྱང་ཆུབ་སྤྱོད་མཛད་ཚེ། །མོས་པའི་དཀྱིལ་འཁོར་ཡོངས་སུ་སྨོན་དག་ཅིང ། །གནས་དང་གནས་མིན་སྟོབས་རྣམས་ཐུགས་ཆུད་པའི། །བདེར་གཤེགས་ས་སྟོབས་རྣམ་པར་དག་པ་མཐོང ། །བསྐལ་པ་ཀུན་ཏུ་རྒྱ་མཚོ་ལས་སྦྱངས་ཏེ། །མཉམ་ཉིད་ཆོས་བསྒོམས་ཇི་ལྟར་བསྒྲུབས་པའི་རྣམས། །སངས་རྒྱས་འོད་ལས་དེ་བཞིན་ཕྱོགས་བཀང་ཞིང ། །ལས་
Ka91a
༄#། །རྣམས་རྒྱ་མཚོ་དེ་བཞིན་རབ་ཏུ་བརྗོད། །སྣ་ཚོགས་ཐབས་ཀྱིས་འབྱམས་ཀླས་སྟོབས་སྤྱོད་ཚེ། །བསྐལ་པ་སྔ་མར་འགྲོ་བའི་དབང་པོ་བཞིན། །ཡོངས་སུ་སྨིན་བྱས་དེ་བས་འཁོར་ཀུན་ཀྱང ། །སེམས་དག་སངས་རྒྱས་དབང་པོའི་སྟོབས་ལ་འཇུག་།འཇིག་རྟེན་ཀུན་གྱི་མོས་པ་སྣ་ཚོགས་དང ། །བསམ་པ་ཇི་བཞིན་སྦྱོར་བ་རྣམ་སྤྱོད་པ། །དེ་དག་ཇི་བཞིན་རྒྱལ་པ་ཆོས་སྟོན་ཏེ། །རང་བྱུང་མོས་པ་མཁྱེན་པའི་སྟོབས་སྟོན་ཏོ། །ཕྱོགས་རྣམས་མ་ལུས་ཞིང་རྣམས་རྒྱ་མཚོ་དང ། །འབྱམས་ཀླས་སེམས་ཅན་ཁམས་དང་ཆོས་ཀྱི་ཁམས། །ནམ་མཁའི་ཁམས་རྣམས་མཉམ་ཉིད་མཁྱེན་མི་རྟོག་།རང་བྱུང་སྤུ་རྩེར་ཁམས་མཁྱེན་སྟོབས་ཀྱང་སྟོན། །བདེར་གཤེགས་ཡེ་ཤེས་རྒྱ་ཆེན་ཀུན་ཏུ་འགྲོ། སྐད་ཅིག་གཅིག་གིས་དུས་གསུམ་མ་ལུས་འགེངས། །ཕྱོགས་དང་ཞིང་དང་བསྐལ་པ་འགྲོ་བཀང་ཞིང ། །སེམས་ཅན་ཀུན་ལ་སྟོབས་འཇུག་མངོན་པར་བསྟན། །བསམ་གཏན་རྣམ་ཐར་སྟོབས་མཐའ་དབུས་མེད་པ། །ཏིང་འཛིན་རྒྱ་མཚོའི་ཚུལ་ནི་འགྲོ་ཀུན་སྙེད། །ཐམས་ཅད་རྒྱལ་བའི་སྐུ་ལ་བསྟན་པས་ན། །སེམས་ཅན་བསམ་པའི་གནས་ཀྱི་ཉོན་མོངས་སེལ། །སངས་རྒྱས་ཡེ་ཤེས་དུས་གསུམ་བསྒྲིབས་པ་མེད། །སྐད་ཅིག་ཀུན་ལ་དུས་གསུམ་སྤུ་རྩེར་སྟོན། །ཞིང་དང་
Ka91b
སེམས་ཅན་སངས་རྒྱས་དེ་བཞིན་ཆོས། །དེ་ལྟར་རྒྱལ་བས་རྗེས་སུ་དྲན་སྟོབས་བསྟན། །ཐུབ་པའི་སྤྱན་ནི་ནམ་མཁའ་མཉམ་པ་སྟེ། །དེས་ནི་ཆོས་དབྱིངས་མ་ལུས་གསལ་བར་གཟིགས། ཐམས་ཅད་ཚུལ་གྱིས་ཆགས་མེད་གཞལ་ཡས་ས། །བརྙེས་པས་ཡེ་ཤེས་སྤྱན་ནི་རྣམ་མང་བསྟན། །འཇིག་རྟེན་ཀུན་གྱི་སྦྱོར་མང་ཇི་སྙེད་དང ། །འགྲོ་བའི་བག་ཆགས་བག་ཉལ་མ་ལུས་པར། །ཐབས་སྒོ་ཀུན་ནས་ཉོན་མོངས་ཞི་མཛད་ཅིང ། །རྒྱལ་བ་འཇིག་རྟེན་གང་བར་ཀུན་ནས་བྱུང ། །དེ་ནས་བྱང་ཆུབ་སེམས་དཔའ་ཆོས་ཀྱི་དབྱིངས་ཀུན་ནས་སྒྲོག་པས་སངས་རྒྱས་ཀྱི་མཐུས་འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱ་ཆེན་སངས་རྒྱས་བྱིན་རླབས་ཕྱོགས་ཀུན་ཏུ། །སངས་རྒྱས་སྟོན་ཀྱང་རྟོག་པ་མི་མངའ་སྟེ། །ཕ་རོལ་ཕྱིན་པ་རྒྱ་ཆེན་ཡོངས་བཀང་བ། །བྱང་ཆུབ་སྤྱོད་པ་རྒྱ་ཆེན་དེ་དག་སྣང ། །འགྲོ་བ་རྣམས་ལ་ཐུགས་རྗེ་ཆེ་བསྐྱེད་ཅིང ། །སྦྱིན་པའི་མཐར་ཕྱིན་སྔོན་ཆད་སྤྱད་པས་ན། །དེ་ཕྱིར་ཐུབ་པའི་སྐུ་ནི་མཚན་གྱིས་བརྒྱན། །འགྲོ་བ་ཀུན་གྱིས་བལྟ་ཞིང་དགའ་བ་སྐྱེ། །བསྐལ་པ་རྒྱ་མཚོ་མང་པོ་མཐའ་ཡས་སྔོན། །ཚུལ་ཁྲིམས་ཕ་རོལ་ཕྱིན་པ་ཡོངས་སྦྱངས་པས། །དེ་ཕྱིར་བསྐལ་པ་ཕྱོགས་སུ་དྲི་མེད་ཅིང ། །ཤིན་ཏུ་འཕགས་པར་འཇིག་རྟེན་སྡུག་བསྔལ་སེལ། །མ་ལོག་མཉམ་པ་ཉིད་ལ་དད་བསྐྱེད་དེ། །སྔོན་
Ka92a
༄#། །ཆད་བཟོད་པའི་དཀྱིལ་འཁོར་རྣམ་སྦྱངས་པས། །འགྲོ་དང་མཚུངས་མཉམ་ཡོན་ཏན་ཀུན་སྟོན་ཏེ། །དེ་བས་ཕྱོགས་སུ་འོད་རྣམས་ཤིན་ཏུ་འཕྲོ། །བསྐལ་པ་རྒྱ་མཚོ་མང་པོར་སྔོན་སྤྱོད་ཚེ། །འགྲོ་བ་རྣམས་ཀྱི་བསྒྲིབས་པ་ཐིབས་པོ་བསལ། །དེ་ཕྱིར་ཕྱོགས་བཅུའི་འགྲོ་བ་ཀུན་བཀང་སྟེ། །ཞིང་རབ་དྲུང་ན་རྒྱལ་བ་མངོན་པར་མཛེས།། བསམ་གཏན་ཡན་ལག་རྒྱ་མཚོ་སྦྱོང་བའི་ཚེ། །བསྐལ་པ་ཡངས་པར་རྒྱལ་བས་རབ་ཏུ་སྦྱངས། །དེ་བས་འགྲོ་བའི་གཞལ་མེད་དགའ་བ་སྐྱེད། །ཉོན་མོངས་དྲི་མ་འགྲིབ་པ་ཀུན་ཀྱང་སེལ། །སངས་རྒྱས་རྒྱ་མཚོའི་དྲུང་དུ་སྔོན་སྤྱོད་ཅིང ། །ཤེས་རབ་མཐར་ཕྱིན་རྒྱལ་བས་སྔོན་བཀང་སྟེ། །འགྲོ་བའི་གཏི་མུག་མུན་པ་ཡོངས་སུ་བསལ། །དེ་བས་རྒྱལ་བ་ཀུན་ཏུ་རྣམ་པར་མཛེས། །འགྲོ་བ་ཀུན་མཉམ་ཐབས་སྒོ་ཐམས་ཅད་ཀྱིས། །ཡང་དག་བྱུང་ཞིང་འགྲོ་བ་རྣམ་སྦྱངས་པས། །ཕྱོགས་རྣམས་ཀུན་ན་ཀུན་ལ་མངོན་པར་བཞུགས། །ཕྱི་མའི་བསྐལ་བར་འགྲོ་བ་མངོན་དུ་ལྟ། །སྨོན་ལམ་ཕ་རོལ་ཕྱིན་པ་རབ་སྦྱོང་ཚེ། །བསྐལ་པ་རྒྱ་མཚོ་ཤིན་ཏུ་རྒྱ་ཆེ་ཞིང ། །ཕྱི་མཐའི་བསྐལ་པར་འགྲོ་བའི་སྤྲིན་མཉམ་པར། །སྤྱད་པས་དེ་ཕྱིར་འགྲོ་བ་ཀུན་ན་མཛེས། །རྒྱལ་བས་ཆོས་ཀུན་སྟོབས་ཀྱི་མཐར་ཕྱིན་པ། །བསྐལ་པ་གཞལ་ཡས་མང་པོར་ཡོངས་སུ་སྦྱངས། །དེ་ཕྱིར་
Ka92b
རང་བྱུང་སྟོབས་ཀྱི་ཕ་རོལ་ཕྱིན། །ཕྱོགས་ཀྱི་ཞིང་རྣམས་ཀུན་ན་དེ་ཕྱིར་འཕགས། །ཐམས་ཅད་མཁྱེན་ཉིད་ནམ་མཁའ་མཚུངས་མཉམ་པའི། །ཡེ་ཤེས་ཀུན་གྱི་སྒོ་ནས་སྔོན་སྦྱངས་པས། །དེ་ཕྱིར་ཆགས་མེད་ཡེ་ཤེས་ཕ་རོལ་ཕྱིན། །ཕྱོགས་བཅུ་ཀུན་ན་རྒྱལ་བ་མངོན་པར་མཛེས། །དེ་ནས་བྱང་ཆུབ་སེམས་དཔའ་སྤྲིན་ཡིད་དུ་འོང་བ་དྲི་མ་མེད་པའི་ཟླ་བས་སངས་རྒྱས་ཀྱི་མཐུས་འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་རྫུ་འཕྲུལ་ཡུལ་ནི་ཕྱོགས་རྣམས་ཀྱི། །འགྲོ་བའི་རྒྱུད་དབྱིངས་ནམ་མཁའ་མཉམ་པར་སྣང ། །ས་རྣམས་ཡངས་པ་ཇི་ལྟར་སྔོན་བསྐྱེད་པ། །དེ་བཞིན་ཀུན་ཀྱང་རིན་ཆེན་སྒོ་ནས་བརྗོད། །དང་པོའི་ས་ནི་དགའ་བའི་ཤུགས་ཀྱི་ཡུལ། །ཕྱོགས་དབྱིངས་ཀུན་གྱི་བདེར་གཤེགས་རྣམས་མཐོང་ཞིང ། །གཞལ་མེད་བསྐལ་པར་དྲི་མེད་ཡོངས་སྦྱངས་པས། །ཆོས་དབྱིངས་ཡངས་ལ་ཡེ་ཤེས་རབ་ཏུ་བྱུང ། །ཐམས་ཅད་ཆོས་ལ་དྲི་མེད་ས་གཉིས་ཏེ། །བསྐལ་པ་རྒྱ་མཚོ་མང་པོར་རྣམ་སྤྱད་ཅིང ། །རྒྱལ་བ་ཚད་མེད་རྒྱ་མཚོ་མཆོད་བྱས་ནས། །འགྲོ་བ་ཚད་མེད་དྲི་མེད་སྦྱངས་པས་བྱུང ། །བསོད་ནམས་དཀྱིལ་འཁོར་འོད་ནི་ས་གསུམ་སྟེ། །སྙིང་པོ་བཟོད་པའི་དཀྱིལ་འཁོར་ལྷག་མཐོང་བརྟན། །གང་དུ་དེ་སྐྱེས་རིན་ཆེན་སྒོ་དག་ནས། །ཆོས་ཀྱི་སྤྲིན་ནི་རྒྱ་ཆེན་རབ་ཏུ་ཐོས། །འོད་འཕྲོ་རྒྱ་མཚོ་ལྡན་པ་གཞལ་མེད་ས། །མཐུ་ཡི་
Ka93a
༄#། །འཁོར་འོད་སྙིང་པོ་སྙིང་རྗེ་སྟེ། །ཞིང་རྣམས་ཀུན་ཏུ་སྒྲིབ་དང་མཉམ་པའི་ལུས། །འགྲོ་བའི་ཉོན་མོངས་ཀུན་ནས་རྣམ་སྦྱངས་པའོ། །དཀའ་རྒྱལ་སྙིང་པོ་མཉམ་དབྱིངས་མཉམ་ཉིད་དེ། །ཞིང་རྣམས་ཀུན་ཏུ་འགྲོ་ཞིང་ཞི་ལ་གཞོལ། །ས་རྣམས་ཆོས་ཡུལ་ཀུན་ནས་རབ་ཏུ་སྐྱེས། །དེ་ཡང་རྣམ་དག་ཇི་བཞིན་རྒྱལ་བས་བསྟན། །ཤེས་རབ་རྒྱ་མཚོ་ཡངས་པའི་སྤྲིན་ལ་སྤྱོད། །འབྱམས་ཀླས་ཆོས་ཀྱི་མཐར་ཐུག་རྣམ་པ་ཀུན། །ཞིང་རྣམས་ཀུན་ལ་མངོན་སུམ་ནམ་མཁའ་འདྲ། །དེ་འབྱུང་བྱང་ཆུབ་ཤིང་ཆེན་འདི་ལས་གྲག ། ཆོས་དབྱིངས་མཁའ་དང་འདྲ་བའི་ལུས་ཅན་ཏེ། །འགྲོ་བ་ཀུན་འགེངས་འགྲོ་བ་ཀུན་སྣང་བྱེད། །འབྱམས་ཀླས་ཐབས་ཀྱི་སྒོ་ནས་རྣམ་པར་དག་།རིང་དུ་སོང་མཆོག་དེ་ནི་རྒྱལ་བས་བསྟན། །ཐམས་ཅད་ཆོས་དང་སྨོན་ལམ་སྤྱོད་མང་དང ། །ཞིང་རྣམས་རྒྱ་མཚོའི་དབྱིངས་ཀྱང་མཉམ་རྟོགས་པས། །བསྐལ་བ་ཀུན་ཏུ་འགྲོ་མཆོག་མི་གཡོ་སྟེ། །གཞལ་མེད་ས་དེའི་སྤྲིན་ཀྱང་རབ་ཏུ་སྒྲོག་།ཚད་མེད་ཡུལ་ཅན་སྟོབས་ཀྱིས་རབ་ཏུ་སྣང ། །རྫུ་འཕྲུལ་སྟོབས་ཀྱིས་འགྲོ་ཞིང་སྟོབས་ལ་འཇུག་།འདི་ནི་རྡུལ་མེད་དགེ་བའི་བློ་གྲོས་ས། །བསྐལ་པ་རྒྱ་མཚོར་བྱང་ཆུབ་ཤིང་ལས་བརྗོད། །ཆོས་ཀྱི་སྤྲིན་ནི་རྒྱ་ཆེན་ས་བཅུ་སྟེ། །དུས་རྣམས་ཀུན་འགེངས་ནམ་མཁའི་རང་བཞིན་འདྲ། །སངས་རྒྱས་ཡུལ་གྱི་སྒྲ་དང་དབྱངས་ཀུན་ཏུ། །རྒྱལ་
Ka93b
བའི་བྱིན་གྱིས་འདི་ལས་རབ་ཏུ་གྲག་།དེ་ནས་བྱང་ཆུབ་སེམས་དཔའ་རྣམ་པར་གནོན་པ་གཏི་མུག་མེད་པའི་འོད་ཟེར་གྱི་རྒྱལ་མཚན་གྱིས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྣམ་པ་དུ་མར་འཁོར་རྣམས་གནས་པ་ནི། །དད་པ་སྣ་ཚོགས་ཡོངས་སུ་དག་པའི་སེམས། །རྒྱན་དང་ཡུལ་རྣམས་ཀུན་ལ་རབ་ཏུ་ཞུགས། །དེ་དག་སངས་རྒྱས་ཡེ་ཤེས་འཇུག་པར་འགྱུར། །ཕན་ཚུན་སྨོན་ལམ་རྣམ་དག་སྤྱོད་ཡུལ་ཏེ། །དག་པ་མཐའ་ཡས་བྱ་བ་རབ་ཏུ་བྱས། །དེ་བཞིན་གཤེགས་པའི་རྣམ་འཕྲུལ་ཐམས་ཅད་ཀྱང ། །གཞན་དང་གཞན་གྱི་སྒོ་ནས་རབ་ཏུ་མཐོང ། །བདེར་གཤེགས་ཆོས་ཀྱི་སྐུ་ལ་ཞུགས་པ་དག་།ལ་ལས་རྒྱལ་བའི་ཆོས་སྐུ་དེ་ཉིད་ལ། །ཀུན་ཏུ་སྤྲིན་འདྲ་གཞལ་མེད་ཆགས་མེད་པའི། །མཐའ་ཡས་ཆོས་ཀྱི་རང་བཞིན་ཆོས་ཉིད་མཐོང ། །ལ་ལས་རྒྱལ་བའི་གཟུགས་སྐུ་དེ་ཉིད་ལ། །ཕྱོགས་བཅུ་ཀུན་ཏུ་རྣམ་པར་འཕྲུལ་མཛད་ཅིང ། །ཡོན་ཏན་མཐའ་ཡས་འོད་སྤྲིན་རབ་འབར་བ། །འགྲོ་བ་དང་ཚུལ་སྤྲིན་དུ་གྱུར་པར་མཐོང ། །ལ་ལ་རྒྱལ་བའི་ཡེ་ཤེས་ཆགས་མེད་འཇུག་།དུས་གསུམ་མཉམ་ཉིད་མཁའ་དང་འདྲ་བའི་སྐུ། །འགྲོ་བ་ཀུན་གྱི་བསམ་པའི་ཚུལ་འབྱུང་བའི། །སངས་རྒྱས་སྟོབས་ལ་རབ་ཏུ་འཇུག་པར་མཐོང ། །སངས་རྒྱས་གསུང་ནི་ཐོགས་པ་མེད་འབྱུང་སྟེ། །ཕྱོགས་ཀུན་ཞིང་རྣམས་མ་ལུས་རྒྱས་འགྱུར་ཞིང ། །འགྲོ་བ་
Ka94a
༄#། །སྣོད་ཡིན་སྐུལ་བར་བྱེད་པ་ཡི། །དེ་བཞིན་གཤེགས་པའི་གསུང་ལ་ལ་ལ་འཇུག་།ལ་ལ་སངས་རྒྱས་སྣང་བ་སྣ་ཚོགས་འཇུག་།སྣ་ཚོགས་སྣང་བས་འགྲོ་བ་ཀུན་བཀང་ཞིང ། །རྒྱལ་བའི་རྫུ་འཕྲུལ་ཀུན་ཏུ་སྣང་མཛད་པའི། །སངས་རྒྱས་འོད་ནི་ལ་ལས་དེར་ཡང་མཐོང ། །བ་སྤུའི་སྒོ་ནས་འོད་ཟེར་རབ་བཀྱེ་བའི། །འོད་ཟེར་རྒྱ་མཚོའི་སྤྲིན་ལ་ལ་ལ་འཇུག་།སྔོན་ཆད་རྒྱལ་བའི་སྤྱོད་པ་བསྟན་པ་ལ། །ལ་ལ་དགའ་ཞིང་རྒྱལ་བ་ཤེས་པར་བྱེད། །ལ་ལས་བསོད་ནམས་སྣ་ཚོགས་མཚན་གྱི་རྣམས། །བདེར་གཤེགས་བསོད་ནམས་འབྱུང་བ་ཇི་བཞིན་མཐོང ། །ཕ་རོལ་ཕྱིན་པ་རྒྱ་མཚོ་སྦྱོང་བའི་ཚེ། །ཇི་ལྟར་དག་གྱུར་མཚན་ཀྱང་ལ་ལས་མཐོང ། །སྒོ་རྣམས་ཀུན་ནས་རྒྱལ་བ་ཚད་མེད་དེ། །མཐའ་དང་དབུས་མེད་ཆོས་ཀྱི་དབྱིངས་བཀང་ཞིང ། །སངས་རྒྱས་བྱིན་རླབས་རབ་ཏུ་བརྗོད་པ་ཀུན། །རྣམ་འཕྲུལ་སངས་རྒྱས་ཡུལ་ནི་ལ་ལས་མཐོང ། །དེ་ནས་སངས་རྒྱས་ཀྱི་བྱིན་གྱི་རླབས་ཀྱིས་འཇིག་རྟེན་གྱི་ཁམས་མེ་ཏོག་གི་རྒྱན་གྱིས་བརྒྱན་པའི་གཞི་དང་སྙིང་པོ་རྒྱ་མཚོ་ཐམས་ཅད་རྣམ་པ་དྲུག་ཏུ་གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ། །རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ་།རབ་ཏུ་ལྡེག་གོ་།ཀུན་ཏུ་ལྡེག་གོ་།ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར། རབ་ཏུ་
Ka94b
འུར་འུར། ཀུན་ཏུ་འུར་འུར་རོ། །ཤིག་ཤིག་།རབ་ཏུ་ཤིག་ཤིག་།ཀུན་ཏུ་ཤིག་ཤིག་གོ་།འཇིག་རྟེན་གྱི་དབང་པོ་དེ་དག་ཐམས་ཅད་རེ་རེས་ཀྱང་མཆོད་པ་མངོན་པར་སྒྲུབ་པའི་སྤྲིན་བསམ་གྱིས་མི་ཁྱབ་པའི་ཆར་དེ་བཞིན་གཤེགས་པའི་འཁོར་གྱི་དཀྱིལ་འཁོར་དུ་མངོན་པར་རབ་ཏུ་ཕབ་བོ། །འདི་ལྟར་སྤོས་ཀྱི་མེ་ཏོག་སྣ་ཚོགས་ཀྱི་སྤྲིན་གྱི་ཆར་ཐམས་ཅད་རབ་ཏུ་ཕབ་བོ། །རིན་པོ་ཆེ་སྣ་ཚོགས་ཐམས་ཅད་ཀྱི་སྤྲིན་དང་རིན་པོ་ཆེའི་འོད་འཕྲོ་བའི་པདྨོའི་དྲ་བ་ཐམས་ཅད་ཀྱི་སྤྲིན་དང ། ནོར་བུ་རིན་པོ་ཆེའི་འོད་ཀྱི་དཀྱིལ་འཁོར་ཁ་དོག་མཐའ་ཡས་པའི་སྤྲིན་དང ། རིན་པོ་ཆེ་ཁ་དོག་སྣ་ཚོགས་དང ། མུ་ཏིག་ཐམས་ཅད་ཀྱི་སྤྲིན་དང ། སྤོས་དང ། ཙནྡན་རིན་པོ་ཆེ་ཐམས་ཅད་ཀྱི་སྤྲིན་དང ། རིན་པོ་ཆེའི་གདུགས་ཐམས་ཅད་ཀྱི་སྤྲིན་དང ། ནོར་བུའི་རྒྱལ་པོ་སྒྲ་དབྱངས་བཟང་པོ་ཡིད་དུ་འོང་བའི་སྤྲིན་དང ། ནོར་བུ་ཉི་མའི་འོད་ཟེར་གྱི་ཕྲེང་བ་མང་པོའི་སྤྲིན་དང ། རིན་པོ་ཆེའི་འོད་ཟེར་གྱི་མཛོད་ཐམས་ཅད་ཀྱི་སྤྲིན་དང ། རང་རང་གི་ལུས་ལས་རྒྱན་ཐམས་ཅད་འཕྱང་བའི་སྤྲིན་དང ། དེ་ལྟ་བུ་དག་ལ་སོགས་པ་འཇིག་རྟེན་གྱི་དབང་པོ་རེ་རེས་ཀྱང་མཆོད་པ་མངོན་པར་སྒྲུབ་པའི་སྤྲིན་བསམ་གྱིས་མི་ཁྱབ་པའི་ཆར་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་ཐམས་ཅད་དུ་མངོན་པར་ཕབ་བོ། །ཇི་ལྟར་འཇིག་རྟེན་གྱི་ཁམས་འདིར་འཇིག་རྟེན་གྱི་དབང་པོ་རྣམས་
Ka95a
༄#། །རབ་ཏུ་དགའ་བར་གྱུར་པ་དེ་བཞིན་དུ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་རྒྱ་མཚོའི་འཇིག་རྟེན་གྱི་དབང་པོ་རེ་རེས་ཀྱང་མཆོད་པ་མངོན་པར་སྒྲུབ་པའི་སྤྲིན་གྱི་ཆར་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་དག་ཏུ་རབ་ཏུ་ཕབ་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ན་ཡང་འཇིག་རྟེན་གྱི་དབང་པོ་རྣམས་མོས་པ་གཞན་དང་གཞན་དང ། དམིགས་པ་གཞན་དང་གཞན་དང ། ཏིང་ངེ་འཛིན་གྱི་ཚུལ་གྱི་སྒོ་རྒྱ་མཚོ་གཞན་དང་གཞན་དང ། ཚོགས་གཞན་དང་གཞན་དང ། ཡང་དག་པར་སྒྲུབ་པ་གཞན་དང་གཞན་དང ། དགའ་བའི་ཤུགས་ཀྱིས་སྤྱོད་པ་གཞན་དང་གཞན་དང ། ཕྱོགས་ཀྱི་ཚུལ་གཞན་དང་གཞན་དང ། ཆོས་ཀྱི་ཚུལ་ལ་འཇུག་པ་གཞན་དང་གཞན་དང ། དེ་བཞིན་གཤེགས་པའི་ཡུལ་དང་བྱིན་གྱི་རླབས་ལ་འཇུག་པ་གཞན་དང་གཞན་དང ། ཡུལ་དང་སྟོབས་ལ་འཇུག་པ་གཞན་དང་གཞན་དང ། རྣམ་པར་ཐར་པའི་ཚུལ་རྒྱ་མཚོའི་སྒོ་གཞན་དང་གཞན་གྱིས་དེ་བཞིན་གཤེགས་པའི་སྙིང་པོ་བྱང་ཆུབ་ལ་བཞུགས་པ་ཁོང་དུ་ཆུད་པར་བྱེད་དོ། །འདི་ན་ཇི་ལྟ་བ་བཞིན་ཕྱོགས་བཅུའི་ཆོས་ཀྱི་དབྱིངས་རྒྱ་མཚོའི་ནམ་མཁའི་དབྱིངས་ཀྱི་མཐས་ཀླས་པའི་འཇིག་རྟེན་གྱི་ཁམས་རྒྱ་མཚོ་ཐམས་ཅད་ན་
Ka95b
ཡང་དེ་བཞིན་ནོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། འཇིག་རྟེན་གྱི་དབང་པོ་ཐམས་ཅད་ཀྱི་རྒྱན་གྱི་ཚུལ་རབ་ཏུ་བྱུང་བ་ཞེས་བྱ་བ་སྟེ། ལེའུ་དང་པོའོ།། །།བམ་པོ་དྲུག་པ། དེ་ནས་བྱང་ཆུབ་སེམས་དཔའ་དེ་དག་དང ། འཇིག་རྟེན་གྱི་དབང་པོ་དེ་དག་འདི་སྙམ་དུ་སེམས་པར་གྱུར་ཏེ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ས་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ཡུལ་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་བྱིན་གྱི་རླབས་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྤྱོད་ཡུལ་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྟོབས་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་མི་བསྙེངས་པ་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ཏིང་ངེ་འཛིན་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་རྣམ་པར་འཕྲུལ་པ་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་མངའ་ཆེན་པོ་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་མི་འཕྲོག་པ་ནི། ཇི་ལྟ་
Ka96a
༄#། །བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྤྱན་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྙན་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ཤངས་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ལྗགས་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྐུ་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་དགོངས་པ་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་འོད་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་འོད་ཟེར་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་གསུང་ནི། ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ཡེ་ཤེས་ནི། ཇི་ལྟ་བུ་ཞིག་མངའ། ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་དག་ཏུ་སངས་རྒྱས་བཅོམ་ལྡན་འདས་ཐམས་ཅད་བྱང་ཆུབ་སེམས་དཔའ་ཐམས་ཅད་ལ་སྨོན་ལམ་རྒྱ་མཚོ་ཐམས་ཅད་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་རབ་ཏུ་འཇུག་པ་
Ka96b
རྒྱ་མཚོ་ཐམས་ཅད་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་ཚོགས་རྒྱ་མཚོ་ཐམས་ཅད་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་ཐེག་པ་རྒྱ་མཚོ་རྣམས་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་རབ་ཏུ་གནས་པ་རྒྱ་མཚོ་ཐམས་ཅད་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་སྤྱོད་པ་རྒྱ་མཚོ་རྣམས་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་འབྱུང་བ་རྒྱ་མཚོ་རྣམས་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་མངོན་པར་ཤེས་པ་རྒྱ་མཚོ་རྣམས་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་ཕ་རོལ་ཏུ་ཕྱིན་པ་རྒྱ་མཚོ་རྣམས་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་ས་རྒྱ་མཚོ་རྣམས་ནི། ཇི་ལྟ་བུ་ཞིག་ཏུ་ཡོངས་སུ་སྟོན།་བྱང་ཆུབ་སེམས་དཔའ་ཐམས་ཅད་ལ་སྨོན་ལམ་རྒྱ་མཚོ་རྣམས་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་རྣམས་ལ་ཡེ་ཤེས་རྒྱ་མཚོ་རྣམས་ནི། ཇི་ལྟ་བུ་ཞིག་ཏུ་ཡོངས་སུ་སྟོན། བཅོམ་ལྡན་འདས་ཀྱིས་བདག་ཅག་ལ་ཡང་ཐུགས་བརྩེ་བ་ཉེ་བར་བཟུང་སྟེ་བྱང་ཆུབ་སེམས་དཔའ་རྣམས་ཀྱི་བསམ་པ་ཇི་ལྟ་བ་བཞིན་དུ་
Ka97a
༄#། །འཇིག་རྟེན་གྱི་ཁམས་རྒྱ་མཚོ་རྣམས་ཀྱང་བསྟན་པ་མཛད་གྲང ། སེམས་ཅན་རྒྱ་མཚོ་རྣམས་ཀྱང་བསྟན་པ་མཛད་གྲང ། སངས་རྒྱས་རྒྱ་མཚོ་རྣམས་ཀྱང་བསྟན་པ་མཛད་གྲང ། སངས་རྒྱས་ཀྱི་ཕ་རོལ་ཏུ་ཕྱིན་པ་རྒྱ་མཚོ་རྣམས་ཀྱང་བསྟན་པ་མཛད་གྲང ། སངས་རྒྱས་ཀྱི་རྣམ་པར་ཐར་པ་རྒྱ་མཚོ་རྣམས་ཀྱང་བསྟན་པ་མཛད་གྲང ། སངས་རྒྱས་ཀྱི་རྣམ་པར་འཕྲུལ་བ་རྒྱ་མཚོ་རྣམས་ཀྱང་བསྟན་པ་མཛད་གྲང ། སངས་རྒྱས་ཀྱི་སྤྲུལ་པ་རྒྱ་མཚོ་རྣམས་ཀྱང་བསྟན་པ་མཛད་གྲང ། སངས་རྒྱས་ཀྱི་ཤིན་ཏུ་བསྟན་པ་རྒྱ་མཚོ་རྣམས་ཀྱང་བསྟན་པར་མཛད་གྲང ། སངས་རྒྱས་ཀྱི་མཚན་རྒྱ་མཚོ་རྣམས་ཀྱང་བསྟན་པ་མཛད་གྲང ། སངས་རྒྱས་ཀྱི་སྐུ་ཚེའི་ཚད་རྒྱ་མཚོ་རྣམས་ཀྱང་བསྟན་པ་མཛད་གྲང་སྙམ་པ་དང ། དེ་ནས་བྱང་ཆུབ་སེམས་དཔའ་དེ་དག་གི་བྱིན་གྱི་རླབས་ཀྱིས་མཆོད་པའི་དཀྱིལ་འཁོར་གྱི་སྤྲིན་དེ་དག་ལས་ཚིགས་སུ་བཅད་པ་འདི་དག་བྱུང་ངོ ། །མཐའ་ཡས་རྒྱ་ཆེན་བསྐལ་པར་རབ་སྤྱད་དེ། །བྱང་ཆུབ་ཤིང་དྲུང་རང་བྱུང་ཡང་དག་སྐྱེས། །ཕྱི་མཐའི་བསྐལ་པར་འགྲོ་བའི་སྤྲིན་གྱུར་པ། །དེ་བཞིན་གཤེགས་པས་སྐུ་ནི་བྱིན་གྱིས་བརླབས། །འགྲོ་བ་མ་ལུས་ཀུན་གྱི་ཐེ་ཚོམ་གཅོད། །མོས་པའི་སྟོབས་ནི་ཡངས་པ་རབ་ཏུ་སྐྱེད། །སེམས་ཅན་སྡུག་བསྔལ་མཐའ་ཡས་
Ka97b
ཞི་བར་མཛད། །སངས་རྒྱས་བདེ་ལ་འགྲོ་བ་ཐམས་ཅད་འགོད། །བྱང་ཆུབ་སེམས་དཔའ་མཐའ་ཡས་ཞིང་རྡུལ་སྙེད། །དེ་བཞིན་གཤེགས་ལ་ལྟ་ཞིང་ཀུན་ནས་གནས། །དེ་དག་བསམ་པ་སྤྱོད་ཡུལ་ཇི་བཞིན་དུ། །ཐེ་ཚོམ་བསལ་བར་ཆོས་རྣམས་རབ་བསྟན་གསོལ། །རྒྱལ་བ་ཀུན་གྱི་ས་ནི་ཇི་ལྟ་བུ། །དེ་བཞིན་གཤེགས་པའི་ཡུལ་གྱི་རྒྱུད་རྣམས་དང ། །སངས་རྒྱས་བྱིན་རླབས་མཐའ་དང་དབུས་མེད་པ། །དེ་དག་ཚུལ་ནི་རྣམ་དག་བསྟན་དུ་གསོལ། །དེ་བཞིན་གཤེགས་པའི་སྤྱོད་ཡུལ་ཅི་ཡིས་འཇུག་།རྒྱལ་བའི་མཁྱེན་ལ་ཇི་ལྟར་འཇུག་པ་དང ། །རྒྱ་ཆེན་མཐའ་ཡས་སྟོབས་རྣམས་རྣམ་སྦྱང་བ། །རྒྱལ་སྲས་ཀུན་ལ་ཡང་དག་བསྟན་དུ་གསོལ། །སངས་རྒྱས་ཏིང་འཛིན་ཇི་ལྟར་མཐའ་ཡས་དང ། །མི་བསྙེངས་ཆོས་ཉིད་ཇི་ལྟར་རྣམ་སྦྱངས་དང ། །རྫུ་འཕྲུལ་མཐུ་ཡང་མཐའ་དང་དབུས་མེད་པ། །འགྲོ་བའི་བསམ་པ་རྣམས་ལ་བསྒྲག་ཏུ་གསོལ། །ཇི་ལྟར་ཆོས་རྒྱལ་ཕོ་བྲང་མངའ་མཛད་ཅིང ། །རྒྱལ་བའི་སྤྱོད་ཡུལ་ཇི་ལྟར་མི་འཕྲོག་དང ། །སངས་རྒྱས་ཆོས་གཞན་རྒྱ་ཆེན་དེ་དག་ཀྱང ། །ཐུགས་བརྩེའི་སླད་དུ་ཡང་དག་བསྟན་དུ་གསོལ། །རྒྱལ་བའི་སྤྱན་ནི་ཇི་ལྟར་ཚད་མེད་ཅིང ། །སྙན་དང་ཤངས་དང་དེ་བཞིན་ལྗགས་དང་སྐུ། །སངས་རྒྱས་ཐུགས་ཀྱང་ཇི་ལྟར་མཐའ་ཡས་པ། །འདི་དག་ཚུལ་ལ་འཇུག་པ་བསྟན་དུ་གསོལ། །ཞིང་རྣམས་རྒྱ་མཚོ་ཇི་ལྟར་
Ka98a
༄#། །སེམས་ཅན་ཁམས། །ཆོས་དབྱིངས་ཚུལ་རྣམས་རྒྱ་མཚོ་དེ་དག་དང ། །སངས་རྒྱས་རྒྱ་མཚོ་མཐའ་དང་དབུས་མེད་པ། །འདི་དག་རྒྱལ་བའི་སྲས་ལ་བསྟན་དུ་གསོལ། །ཕ་རོལ་ཕྱིན་པ་རྒྱ་མཚོ་བསམ་ཡས་དང ། །རྣམ་པར་ཐར་ལ་འཇུག་ཚུལ་རྒྱ་མཚོ་དང ། །ཆོས་རྣམས་ཀུན་གྱི་ཚུལ་རྣམས་རྒྱ་མཚོ་དག་།བྱང་ཆུབ་སྙིང་པོར་ཐམས་ཅད་བསྟན་དུ་གསོལ། །དེ་ནས་བཅོམ་ལྡན་འདས་ཀྱིས་དེའི་ཚེ་བྱང་ཆུབ་སེམས་དཔའ་དེ་དག་གི་སེམས་ཀྱི་ཡོངས་སུ་རྣམ་པར་རྟོག་པ་ཐུགས་ཀྱིས་ཐུགས་སུ་ཆུད་ནས་ཞལ་གྱི་སྒོ་ཚམས་ཀྱི་མཚམས་ཀྱི་གསེབ་ནས་འོད་ཟེར་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་རབ་ཏུ་བཀྱེ་བ་འདི་ལྟ་སྟེ། རིན་པོ་ཆེའི་ཟེ་བ་རྣམ་པར་སྣང་བ་ཞེས་བྱ་བའི་འོད་ཟེར་དང ། འདི་ལྟ་སྟེ། ཆོས་ཀྱི་དབྱིངས་སུ་དབྱངས་སྣ་ཚོགས་ཀྱིས་རྒྱན་བྱེད་པ་ཞེས་བྱ་བའི་འོད་ཟེར་དང ། འདི་ལྟ་སྟེ། འོད་ཤིན་ཏུ་ཕྲ་བའི་སྤྲིན་ཀུན་ནས་ལྡིང་བ་ཞེས་བྱ་བའི་འོད་ཟེར་དང ། འདི་ལྟ་སྟེ། ཕྱོགས་བཅུའི་སངས་རྒྱས་ཀྱི་རྫུ་འཕྲུལ་དང ། སྙིང་པོ་བྱང་ཆུབ་ཀྱི་འོད་ཅེས་བྱ་བའི་འོད་ཟེར་དང ། འདི་ལྟ་སྟེ། རིན་པོ་ཆེ་ཐམས་ཅད་འོད་འཕྲོ་བའི་གདུགས་ཀྱི་སྤྲིན་ཅེས་བྱ་བའི་འོད་ཟེར་དང ། འདི་ལྟ་སྟེ། རྣམ་པར་སྣང་བས་ཆོས་ཀྱི་དབྱིངས་རབ་ཏུ་སྣང་བའི་འོད་ཅེས་བྱ་བའི་འོད་ཟེར་དང ། འདི་ལྟ་སྟེ། སངས་རྒྱས་ཀྱི་ཞིང་ཐམས་
Ka98b
ཅད་དུ་འབྱུང་ཞིང་འཁྱིལ་བའི་རྒྱན་ཅེས་བྱ་བའི་འོད་ཟེར་དང ། འདི་ལྟ་སྟེ། རིན་པོ་ཆེའི་རྡོ་རྗེ་དྲི་མ་མེད་པ་མང་པོའི་རྒྱལ་མཚན་ཞེས་བྱ་བའི་འོད་ཟེར་དང ། འདི་ལྟ་སྟེ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དུ་ཉེ་བར་འགྲོ་བའི་རྒྱན་ཅེས་བྱ་བའི་འོད་ཟེར་དང ། འདི་ལྟ་སྟེ། སངས་རྒྱས་ཐམས་ཅད་ཀྱི་མཚན་གྱི་འཁོར་ལོའི་སྒྲ་རབ་ཏུ་སྒྲོག་པ་ཞེས་བྱ་བའི་འོད་ཟེར་དང ། དེ་དག་ལ་སོགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འོད་ཟེར་རབ་ཏུ་བཀྱེ་སྟེ། འོད་ཟེར་དེ་དག་རེ་རེ་ཞིང་ཡང་འཁོར་གྱི་འོད་ཟེར་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དོ། །འོད་ཟེར་དེ་དག་རེ་རེ་ཞིང་ཡང་རིན་པོ་ཆེ་ཐམས་ཅད་ཀྱི་ཁ་དོག་ཤིན་ཏུ་སྟོན་པ་དག་སྟེ། དེ་དག་རབ་ཏུ་འཕྲོས་ནས་ཕྱོགས་བཅུར་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་རབ་ཏུ་སྣང་བར་བྱས་ཏེ། བྱང་ཆུབ་སེམས་དཔའ་དེ་དག་གིས་ཀྱང་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་ནས་འོད་ཟེར་གྱི་སྒོ་དེ་དག་ཐམས་ཅད་ཀྱི་མཐུས་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་རྒྱ་མཚོ་དང ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་མཐོང་བར་གྱུར་ཏོ། །འོད་ཟེར་དེ་དག་ཐམས་ཅད་ཀྱི་སྒོ་ནས་ཀྱང་སངས་རྒྱས་ཀྱི་བྱིན་གྱི་རླབས་ཀྱིས་ཚིགས་སུ་བཅད་
Ka99a
༄#། །པ་འདི་དག་བྱུང་བར་གྱུར་ཏོ། །བསྐལ་པ་རྒྱ་མཚོ་མཐའ་ཡས་སྤྱོད་སྤྱད་དེ། །ཕྱོགས་རྣམས་རྒྱ་མཚོར་སངས་རྒྱས་ཀུན་ཀྱང་མཆོད། །སེམས་ཅན་རྒྱ་མཚོ་རྣམ་པར་དག་བྱས་ནས། །རྣམ་པར་སྣང་མཛད་བྱང་ཆུབ་མངོན་སངས་རྒྱས། །ཕྱོགས་རྣམས་ཀུན་ཏུ་སྣང་ཞིང་མངོན་པར་མཛེས། །སྤུ་རྣམས་ཀུན་ནས་སྤྲུལ་པའི་སྤྲིན་རྣམས་འགྱེད། །དེས་ནི་སེམས་ཅན་སྣོད་བཞིན་བསྐུལ་བྱས་ནས། །བྱང་ཆུབ་སྦྱོར་བ་ཆགས་མེད་རྣམ་པར་དག་།སྲིད་པའི་རྒྱུད་ན་སྔོན་ཆད་འཁོར་བའི་ཚེ། །རྒྱལ་བས་སེམས་ཅན་ཡོངས་སུ་སྨིན་མཛད་པ། །དེ་དག་སྐད་ཅིག་གཅིག་གིས་རབ་ཏུ་བཀྲོལ། །སངས་རྒྱས་རྣམ་འཕྲུལ་འདི་དག་མཐའ་ཡས་སོ། །རྒྱན་རྣམས་སྣ་ཚོགས་ཀུན་ཏུ་འོད་ཀྱང་སྣང ། །བྱང་ཆུབ་ཤིང་ནི་ཡལ་ག་རིན་ཆེན་འཕྱང ། །འོད་རྣམས་བཀྱེ་བ་ཀུན་ཏུ་རྣམ་པར་བརྒྱན། །བྱང་ཆུབ་བསམ་གྱིས་མི་ཁྱབ་དེར་སངས་རྒྱས། །ཕྱོགས་རྣམས་ཀུན་ཏུ་སྒྲ་ནི་རབ་ཏུ་སྒྲོག་།སེམས་ཅན་ཀུན་གྱི་སེམས་བཞིན་ཚིམ་བྱས་ཏེ། །སྣ་ཚོགས་ཐབས་ཀྱི་སྒོ་ནས་རྣམ་པར་འདུལ། །དེ་ལས་ཆོས་ཉིད་ཞི་སྒྲ་རབ་ཏུ་འབྱུང ། །ཞིང་རྣམས་སྟོང་གི་རྡུལ་སྙེད་སྔོན་ཆད་དུ། །སྤྱོད་ཚེ་ཕ་རོལ་ཕྱིན་ཀུན་རྒྱས་པར་མཛད། །སྟོབས་རྣམས་ཀུན་ལ་སངས་རྒྱས་རབ་བཞུགས་ཀྱི། །རྒྱལ་བ་དེ་
Ka99b
ཡི་ཞལ་བལྟར་ཀུན་ཀྱང་དེང ། །ཞིང་གི་རྡུལ་སྙེད་ཕྱོགས་རྣམས་ཐམས་ཅད་ནས། །རྒྱལ་སྲས་མང་པོ་རབ་ཏུ་དགའ་སྟེ་ལྷགས། །མཆོད་པ་སྣ་ཚོགས་ཆར་པ་རབ་འབེབས་ཤིང ། ། ཐམས་ཅད་འཁོད་དེ་རྒྱལ་བ་མངོན་སུམ་ལྟ། །གསུང་དབྱངས་གཅིག་ལས་མཐའ་ཡས་མདོ་ཡི་རྣམས། །རྒྱ་མཚོ་དག་ཀྱང་སངས་རྒྱས་ཤིན་ཏུ་སྟོན། །འགྲོ་ཀུན་ཡིད་བཞིན་ཆོས་ཀྱི་ཆར་འབེབས་ཀྱི། །རྐང་གཉིས་གཙོ་བོ་དེ་ལ་བལྟར་ཡང་དེང ། །དུས་གསུམ་རྒྱལ་བའི་སྨོན་ལམ་གང་ཡོད་པ། །སྐད་ཅིག་ཐུགས་ལ་དེ་དག་མངོན་སུམ་སྟེ། །རྒྱལ་བ་བྱང་ཆུབ་ཤིང་དྲུང་སྟོན་མཛད་ཀྱི། །རྒྱལ་བའི་དྲུང་དུ་སྨྱུར་ཏེ་འདོད་བར་གྱིས། །སངས་རྒྱས་རྣམ་པར་སྣང་མཛད་ཡེ་ཤེས་མཚོ། །འོད་ཟེར་ཀུན་གྱི་སྒོ་ནས་རབ་ཏུ་སྣང ། །དེ་ཡི་ཆོས་ཉིད་ཇི་ལྟར་ཇི་འདྲ་དེ་དག་ལྟོས། །སངས་རྒྱས་འགྲོ་ཀུན་མངོན་སུམ་ཆོས་སྟོན་ཏོ། །དེའི་ཚེ་འཇིག་རྟེན་གྱི་ཁམས་རྒྱ་མཚོ་དེ་དག་ནས་དེ་བཞིན་གཤེགས་པའི་འོད་ཟེར་གྱིས་ཡང་དག་པར་བསྐུལ་བའི་རྣམས་བྱང་ཆུབ་སེམས་དཔའ་རང་རང་གི་འཁོར་གྱི་དཀྱིལ་འཁོར་རྒྱ་མཚོ་དང་ལྷན་ཅིག་ཏུ་འཕགས་ཏེ། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་གང་ན་བ་དེར་འོངས་པར་གྱུར་ཏེ། འདི་ལྟར་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདི་དང་འདབས་ཆགས་སུ་
Ka100a
༄#། །ཤར་ཕྱོགས་ལོགས་ན་འཇིག་རྟེན་གྱི་ཁམས་རྒྱ་མཚོ་པདྨོའི་དཔལ་དྲི་མ་མེད་པར་སྣང་བའི་རྒྱན་ཅེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་རིན་པོ་ཆེའི་ཕྲེང་བ་རྡོ་རྗེའི་སྙིང་པོ་ཞེས་བྱ་བ་ན་དེ་བཞིན་གཤེགས་པའི་ཆོས་ཀྱི་ཆུ་བོ་རྣམ་པར་སངས་རྒྱས་པ། ནམ་མཁའ་མཐའ་ཡས་པའི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་ཆོས་ཀྱི་དཔལ་པདྨོ་རྣམ་པར་ལྟ་བའི་རྒྱལ་མཚན་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ་བཅོམ་ལྡན་འདས་གང་ན་བ་དེར་འོང་བར་གྱུར་ཏེ། བྱང་ཆུབ་སེམས་དཔའི་ལུས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་རིན་པོ་ཆེའི་ཆར་གྱི་འོད་ཟེར་པདྨོའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་རི་བོའི་ཟོམ་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ཉི་མའི་འཁོར་ལོའི་ལུས་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་མེ་ཏོག་གི་ཕྲེང་བའི་སྤྲིན་བཅུས་ནམ་མཁའ་ཀུན་
Ka100b
ནས་ཡོག་པར་བྱིན་གྱིས་བརླབས་པ་དང ། སིལ་སྙན་སྒྲ་ཐམས་ཅད་འབྱིན་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ཕྱེ་མའི་ཤིང་གི་མཛོད་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སྤོས་དང ། བདུག་སྤོས་གཟུགས་ཐམས་ཅད་ཡོངས་སུ་སྟོན་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སྤོས་ཐམས་ཅད་ཀྱི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དེ་དག་ལ་སོགས་པ་མཆོད་པའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པར་བྱེད་ཅིང ། བཅོམ་ལྡན་འདས་གང་ན་བ་དེར་ཕྱིན་ཏེ་བཅོམ་ལྡན་འདས་ལ་ཕྱག་འཚལ་ནས་ཤར་ཕྱོགས་སུ་བརྟེན་ཏེ་མེ་ཏོག་སྣང་བ་སྣ་ཚོགས་ཀྱི་སྙིང་པོ་ཅན་གྱི་སེངྒེའི་ཁྲི་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབས་ཆགས་སུ་ལྷོ་ཕྱོགས་ལོགས་ན་འཇིག་རྟེན་གྱི་ཁམས་རྒྱ་མཚོ་རིན་པོ་ཆེ་ཐམས་ཅད་སྣང་བས་རྣམ་པར་བརྒྱན་པའི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་འོད་མཐའ་ཡས་པའི་དཀྱིལ་འཁོར་གྱི་རྒྱན་ན་དེ་བཞིན་གཤེགས་པ་ཀུན་ནས་མཁྱེན་པའི་འོད་དཔལ་གྱི་རིའི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་
Ka101a
༄#། །ཆུབ་སེམས་དཔའ་ཆོས་རྒྱ་མཚོ་རྣམ་པར་སྣང་བའི་བློ་གྲོས་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཁོར་གྱི་དཀྱིལ་འཁོར་དེ་ནས་འཕགས་ཏེ། བཅོམ་ལྡན་འདས་གང་ན་བ་དེར་འོང་བར་འགྱུར་ཏེ། ནོར་བུའི་རྒྱལ་པོ་རྒྱན་གྱི་ཡུལ་ཐམས་ཅད་ཀྱིས་རྣམ་པར་གསལ་བར་བྱས་པའི་སྙིང་པོའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང ། ནོར་བུའི་རྒྱལ་པོ་ཀུན་ནས་སྣང་བ་རིན་པོ་ཆེའི་རྒྱན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་རིན་པོ་ཆེ་འོད་འཕྲོ་བ་རབ་ཏུ་འབར་ཞིང ། སངས་རྒྱས་ཀྱི་མཚན་ཤིན་ཏུ་སྒྲོག་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་ཀུན་ནས་སྒྲ་འབྱིན་ཅིང་སངས་རྒྱས་ཀྱི་ཆོས་ཐམས་ཅད་སྒྲོག་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་ཤིང་གི་ཡལ་ག་སྣ་ཚོགས་ཀྱིས་སྙིང་པོ་བྱང་ཆུབ་ཀྱི་རྒྱན་བྱེད་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་སྒོ་ཀུན་ནས་རིན་པོ་ཆེའི་འོད་ཟེར་དང ། སངས་རྒྱས་ཀྱི་སྤྲུལ་པས་སྣང་བར་བྱེད་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་རྒྱན་ཐམས་ཅད་དང་མ་འདྲེས་པར་འཁོར་གྱི་དཀྱིལ་འཁོར་དུ་
Ka101b
གཟུགས་བརྙན་སྟོན་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་འོད་འཕྲོ་ཤིན་ཏུ་སྡུག་པའི་སྒྲོན་མས་སངས་རྒྱས་ཐམས་ཅད་ཀྱི་ཡུལ་རྗེས་སུ་སྒྲོག་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་སངས་རྒྱས་ཀྱི་ཞིང་བསམ་གྱིས་མི་ཁྱབ་པ་དང ། དེ་བཞིན་གཤེགས་པའི་གཞལ་མེད་ཁང་གི་གཟུགས་བརྙན་ཡང་དག་པར་སྟོན་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་རིན་པོ་ཆེ་སྣ་ཚོགས་ཀྱི་ཚོན་གྱི་དུས་གསུམ་གྱི་སངས་རྒྱས་ཀྱི་སྐུའི་གཟུགས་བརྙན་རྣམ་པར་སྣང་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དེ་དག་ལ་སོགས་པ་ནོར་བུའི་རྒྱལ་པོའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཕྲ་མོ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པར་བྱེད་ཅིང ། བཅོམ་ལྡན་འདས་གང་ན་བ་དེར་ཕྱིན་ཏེ་བཅོམ་ལྡན་འདས་ལ་ཕྱག་འཚལ་ནས་ལྷོ་ཕྱོགས་སུ་བརྟེན་ཏེ་ཨིནྡྲ་ནཱི་ལ་དང ། འཛམ་བུ་ནཱ་ད་དང ། པདྨ་རཱ་ག་སྣ་ཚོགས་ཀྱི་སྙིང་པོ་ཅན་གྱི་སེངྒེའི་ཁྲི་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབས་ཆགས་སུ་ནུབ་ཕྱོགས་ན་འཇིག་རྟེན་གྱི་ཁམས་རྒྱ་མཚོ་རིན་པོ་ཆེའི་འོད་ཡིད་དུ་འོང་བར་སྣང་བ་ཞེས་བྱ་བ་ཡོད་དེ། འཇིག་རྟེན་གྱི་ཁམས་དེ་དག་ལས་འཇིག་རྟེན་
Ka102a
༄#། །གྱི་ཁམས་གོས་ཀྱི་སྟན་ཡོངས་སུ་འབྱུང་བ་ན་དེ་བཞིན་གཤེགས་པ་སྤོས་མངོན་དུ་སྣང་བའི་ཡོན་ཏན་རིན་པོ་ཆེས་བརྒྱན་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་སྤོས་འོད་འཕྲོ་བའི་རྒྱན་ཟླ་བའི་འོད་ཅེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་གང་ན་བ་དེར་འོངས་པར་གྱུར་ཏེ། རིན་པོ་ཆེ་དང ། སྤོས་དང ། མེ་ཏོག་སྣ་ཚོགས་ཐམས་ཅད་ཀྱི་ཁང་པ་བརྩེགས་པའི་སྤྲིན་གྱིས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང ། ནོར་བུའི་རྒྱལ་པོ་ཁ་དོག་མཐའ་ཡས་པས་བརྒྱན་པར་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་སྒྲོན་མ་དང ། སྤོས་འོད་འཕྲོ་བའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། མུ་ཏིག་ཐམས་ཅད་ཀྱི་ཁང་བ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེ་ཐམས་ཅད་ཀྱི་མེ་ཏོག་གི་ཟེ་བའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་ཕྲེང་བས་ཡོངས་སུ་བརྒྱན་པའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། འོད་ཟེར་གྱི་སྣང་བ་ཕྱོགས་ཀུན་ཏུ་འཕྲོ་བའི་སྙིང་པོ་དང་ལྡན་པའི་ཁང་པ་བརྩེགས་པ་རྒྱན་
Ka102b
ཐམས་ཅད་འབྱུང་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་ཚོན་ཐམས་ཅད་ཀྱིས་རབ་ཏུ་བརྒྱན་ཅིང་རྒྱན་དུ་མ་ཡང་དག་པར་སྟོན་པའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ཕྱོགས་ཐམས་ཅད་རྒྱན་གྱིས་རབ་ཏུ་བརྒྱན་པར་ཀུན་ཏུ་རྒྱས་པར་འགེངས་པའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སྒོ་ཀུན་ཏུ་མེ་ཏོག་གི་རྟ་བབས་དང ། དྲིལ་བུའི་དྲ་བ་བྲེས་པའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དེ་དག་ལ་སོགས་པ་ཁང་པ་བརྩེགས་པའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པར་བྱེད་ཅིང ། བཅོམ་ལྡན་འདས་གང་ན་པ་དེར་ཕྱིན་ཏེ་བཅོམ་ལྡན་འདས་ལ་ཕྱག་འཚལ་ནས་ནུབ་ཕྱོགས་སུ་བརྟེན་ཏེ་སེངྒེའི་ཁྲི་རིན་པོ་ཆེའི་པདྨོ་ཆེན་པོ་ལོ་མ་སྣ་ཚོགས་གསེར་ལས་བྱས་པའི་སྙིང་པོ་ཅན་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབས་ཆགས་སུ་བྱང་ཕྱོགས་ན་འཇིག་རྟེན་གྱི་ཁམས་རྒྱ་མཚོ་བཻ་ཌཱུརྱ་པདྨོའི་འོད་ཀྱི་དཀྱིལ་འཁོར་གྱི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་ཁམས་ཀྱི་རྒྱུད་དེ་དག་ལས་འཇིག་རྟེན་གྱི་ཁམས་མེ་ཏོག་ཨུཏྤ་ལའི་རྒྱན་ན་དེ་བཞིན་གཤེགས་པ་ཡེ་ཤེས་ཀྱི་དཔལ་ཀུན་ཏུ་དབྱངས་ཀྱི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་
Ka103a
༄#། །ཆུབ་སེམས་དཔའ་སེངྒེའི་འོད་ཟེར་སྣང་བས་མཐུ་འབྱིན་པའི་བློ་གྲོས་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ནས་བཅོམ་ལྡན་འདས་གང་ན་བ་དེར་འོངས་པར་གྱུར་ཏེ། སྤོས་དང་ནོར་བུ་སྣ་ཚོགས་ཐམས་ཅད་ཀྱི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང ། སྒོ་ཐམས་ཅད་ནས་ལོ་མའི་དོག་པའི་སྤྲིན་འབྱུང་བའི་སྤོས་ཀྱི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ཤིང་གི་གཟུགས་ཐམས་ཅད་ལས་རྒྱན་མཐའ་ཡས་པ་ཡོངས་སུ་སྟོན་པའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། མེ་ཏོག་ཐམས་ཅད་ཀྱི་སྤྲིན་རབ་ཏུ་ནར་པའི་མེ་ཏོག་གི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་འོད་འཕྲོ་བའི་དཀྱིལ་འཁོར་ཐམས་ཅད་ཀྱིས་རྣམ་པར་སྣང་བར་བྱས་པའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ཙནྡན་གྱི་ཕྱེ་མ་ཐམས་ཅད་དང ། བྱང་ཆུབ་སེམས་དཔའི་ལུས་ཕྱེད་ཡང་དག་པར་སྟོན་པའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སྔོན་གྱི་སྙིང་པོ་བྱང་ཆུབ་ཀྱི་རྒྱན་བསམ་གྱིས་མི་ཁྱབ་པ་རབ་ཏུ་སྟོན་པའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ཁ་དོག་མཐའ་ཡས་པའི་གོས་ཀྱི་མཛོད་
Ka103b
ཀྱི་ཉི་མས་རྣམ་པར་སྣང་བར་བྱས་པའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སྒྲ་དབྱངས་ཐམས་ཅད་རབ་ཏུ་སྒྲོག་ཅིང་ཡིད་དུ་འོང་བའི་སྒྲ་ཀུན་ཏུ་གཏོང་བའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དེ་དག་ལ་སོགས་པ་ཤིང་གི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པར་བྱེད་ཅིང ། བཅོམ་ལྡན་འདས་གང་ན་བ་དེར་ཕྱིན་ཏེ་བཅོམ་ལྡན་འདས་ལ་ཕྱག་འཚལ་ནས་བྱང་ཕྱོགས་སུ་བརྟེན་ཏེ་སེངྒེའི་ཁྲི་ནོར་བུ་སྒྲོན་མའི་པདྨོའི་སྙིང་པོ་ཅན་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་འཇིག་རྟེན་གྱི་ཁམས་རྒྱ་མཚོ་འདི་དང་འདབས་ཆགས་སུ་བྱང་དང ། ཤར་གྱི་ཕྱོགས་མཚམས་ན་འཇིག་རྟེན་གྱི་ཁམས་རྒྱ་མཚོ་འཛམ་བུ་ཆུ་ཀླུང་དང ། ཤེལ་གྱི་ཁ་དོག་ཚོན་གྱི་རྒྱལ་མཚན་ཞེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་རིན་པོ་ཆེའི་རྒྱན་སྣ་ཚོགས་ཀྱི་སྙིང་པོ་ན་དེ་བཞིན་གཤེགས་པ་ཆོས་ཐམས་ཅད་ལ་མི་འཇིགས་པའི་སྒྲོན་མ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་ཆོས་ཀྱི་ཡོན་ཏན་གྱི་མཛོད་མི་ཟད་པའི་དཔལ་གྱི་གཟི་བརྗིད་མར་མེ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ནས་བཅོམ་ལྡན་འདས་གང་ན་བ་དེར་འོངས་པར་གྱུར་ཏེ། སེངྒེའི་
Ka104a
༄#། །ཁྲི་རིན་པོ་ཆེ་ཁ་དོག་མཐའ་ཡས་པའི་པདྨོའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང ། སེངྒེའི་ཁྲི་ནོར་བུའི་རྒྱལ་པོ་ཀུན་ཏུ་མངོན་པས་རྣམ་པར་སྣང་བར་བྱས་པའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སེངྒེའི་ཁྲི་རྒྱན་མང་པོ་ཐམས་ཅད་ཀྱིས་རབ་ཏུ་བརྒྱན་པའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སེངྒེའི་ཁྲི་རིན་པོ་ཆེ་འོད་འཕྲོ་བའི་སྒྲོ་ན་མ་སྣ་ཚོགས་ཀྱི་ཕྲེང་བའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སེངྒེའི་ཁྲི་ཕྱོགས་ཀུན་ནས་ཕྲེང་བ་རིན་པོ་ཆེའི་ཆར་འབེབས་པའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སེངྒེའི་ཁྲི་སྤོས་ཀྱི་མེ་ཏོག་པདྨོའི་ཕྲེང་བ་རིན་པོ་ཆེ་ཐམས་ཅད་ཀྱི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སེངྒེའི་ཁྲི་སངས་རྒྱས་ཀྱི་གདན་ཐམས་ཅད་ཀྱི་རྒྱན་ཡང་དག་པར་སྟོན་པའི་ནོར་བུའི་རྒྱལ་པོའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སེངྒེའི་ཁྲི་རྒྱན་དང་ཕྲེང་བ་ཐམས་ཅད་འཕྱང་ཞིང་རྟ་བབས་དང་སྟེགས་བུས་རབ་ཏུ་བརྒྱན་པའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སེངྒེའི་ཁྲི་ཤིང་ཐམས་ཅད་ཀྱི་ཡལ་ག་ལས་ནོར་བུ་རིན་པོ་ཆེ་དང་ཕྱེ་མ་འབྱུང་བའི་
Ka104b
སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སེངྒེའི་ཁྲི་སྤོས་དང་རིན་པོ་ཆེའི་ཚོགས་སྣ་ཚོགས་ཀྱིས་ཀུན་ནས་བརྒྱན་པའི་ཉི་མས་རྣམ་པར་སྣང་བར་བྱས་པའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དེ་དག་ལ་སོགས་པ་སེངྒེའི་ཁྲིའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པར་བྱེད་ཅིང ། བཅོམ་ལྡན་འདས་གང་ན་བ་དེར་ཕྱིན་ཏེ་བཅོམ་ལྡན་འདས་ལ་ཕྱག་འཚལ་ནས་བྱང་དང ། ཤར་གྱི་ཕྱོགས་མཚམས་སུ་བརྟེན་ཏེ་སེངྒེའི་ཁྲི་ནོར་བུ་རིན་པོ་ཆེ་སྣང་བའི་རྒྱལ་མཚན་གྱི་པདྨོ་སྣ་ཚོགས་ཀྱི་སྙིང་པོ་ཅན་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབས་ཆགས་སུ་ཤར་དང ། ལྷོའི་ཕྱོགས་མཚམས་ན་འཇིག་རྟེན་གྱི་ཁམས་རྒྱ་མཚོ་བཻཌཱུརྱའི་འོད་ཟེར་ཀུན་ཏུ་སྣང་བ་གསེར་གྱི་རྒྱན་ཅེས་བྱ་བ་ཡོད་དེ། འཇིག་རྟེན་གྱི་ཁམས་ཀྱི་རྒྱུད་དེ་དག་ལས་འཇིག་རྟེན་གྱི་ཁམས་སྤོས་ཀྱི་དཔལ་དྲི་མ་མེད་པར་སྣང་བ་ན་དེ་བཞིན་གཤེགས་པ་ཀུན་ཏུ་དགའ་བའི་ཤུགས་དཔལ་གྱི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་ཡེ་ཤེས་ཀྱི་འོད་ཟེར་ཤེས་རབ་ཀུན་ནས་སྒྲོན་མའི་བློ་གྲོས་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ཏེ་བཅོམ་ལྡན་འདས་གང་ན་བ་དེར་འོངས་པར་གྱུར་ཏེ། ནོར་བུ་ཡིད་བཞིན་གྱི་
Ka105a
༄#། །རྒྱལ་པོ་ཐམས་ཅད་ཀྱི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེ་ཨིནྡྲ་ནཱི་ལའི་ཟེ་བ་ཅན་གྱི་མེ་ཏོག་ཐམས་ཅད་ཀྱི་རྒྱན་གྱི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སྤོས་རིན་པོ་ཆེའི་བླ་རེ་ཐམས་ཅད་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེ་འོད་འཕྲོ་བ་སྒྲོན་མའི་གཟུགས་ཀྱི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་སངས་རྒྱས་ཀྱི་རྫུ་འཕྲུལ་དང ། འོད་དང ། སྒྲ་དབྱངས་རབ་ཏུ་སྟོན་པའི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུ་དང ། གོས་དང ། རྒྱན་ཐམས་ཅད་ཀྱི་གཟུགས་བརྙན་ཡང་དག་པར་སྟོན་པའི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། མེ་ཏོག་ཐམས་ཅད་ཀྱི་དོག་པ་ལྟ་བུ་རིན་པོ་ཆེའི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དྲིལ་བུ་སྣ་ཚོགས་ཀུན་ཏུ་སྒྲས་ཁྱབ་པར་བྱེད་པའི་དྲ་བའི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། པདྨོའི་དྲ་བ་མཐའ་ཡས་པ་སྣ་ཚོགས་རིན་པོ་ཆེའི་སྙིང་པོ་ཅན་གྱི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། གསེར་གྱི་ཟེ་བ་འོད་འཕྲོ་ཞིང་སྣང་བའི་རྒྱལ་མཚན་གྱི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་
Ka105b
པར་བྱིན་གྱིས་བརླབས་པ་དང ། རྒྱན་བསམ་གྱིས་མི་ཁྱབ་པའི་གཟུགས་བརྙན་རབ་ཏུ་སྟོན་པའི་རྒྱན་ཐམས་ཅད་ཀྱིས་བརྒྱན་པའི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དེ་དག་ལ་སོགས་པ་བླ་རེའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པར་བྱེད་ཅིང ། བཅོམ་ལྡན་འདས་གང་ན་བ་དེར་ཕྱིན་ནས་བཅོམ་ལྡན་འདས་ལ་ཕྱག་འཚལ་ཏེ། ཤར་དང ། ལྷོའི་ཕྱོགས་མཚམས་སུ་བརྟེན་ཏེ་སེངྒེའི་ཁྲི་པདྨོ་སྣ་ཚོགས་རིན་པོ་ཆེས་རབ་ཏུ་བརྒྱན་པའི་སྙིང་པོ་ཅན་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་དོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབས་ཆགས་སུ་ལྷོ་དང ། ནུབ་ཀྱི་ཕྱོགས་མཚམས་ན་འཇིག་རྟེན་གྱི་ཁམས་རྒྱ་མཚོ་ཉི་མའི་འོད་ཟེར་རབ་ཏུ་འབར་བས་ཀུན་ཏུ་སྣང་བའི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་ཉི་མ་དང་སེངྒེ་ལྟར་སྣང་བ་ན་དེ་བཞིན་གཤེགས་པ་སྒོ་ཀུན་ནས་ཡེ་ཤེས་རྣམ་པར་སྣང་བའི་དབྱངས་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་མེ་ཏོག་ཀུན་ནས་འོད་འཕྲོ་གཙུག་ཕུད་རབ་ཏུ་འཕྱང་བ་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ཏེ་བཅོམ་ལྡན་འདས་གང་ན་བ་དེར་འོངས་པར་གྱུར་ཏེ་སྣ་ཚོགས་ཐམས་ཅད་ཀྱིས་བརྒྱན་པའི་རིན་པོ་ཆེའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་
Ka106a
༄#། །བྱིན་གྱིས་རློབ་ཅིང ། འོད་ཟེར་སྣང་བའི་རྒྱན་གྱིས་བརྒྱན་པའི་མེ་ཏོག་གི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། མུ་ཏིག་མང་པོ་ཁ་དོག་མཐའ་ཡས་པ་ཐམས་ཅད་ཀྱི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་བྱང་ཆུབ་སེམས་དཔའ་ཐམས་ཅད་ཀྱི་སྙིང་རྗེའི་སྒོ་ནས་རབ་ཏུ་སྒྲོག་པའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་འོད་འཕྲོ་བ་སྣ་ཚོགས་ཀྱི་ཕྲེང་བའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་ཚོན་རྣམས་པ་སྣ་ཚོགས་ཀྱི་འོད་ཀྱིས་རབ་ཏུ་བརྒྱན་ཅིང་དྲིལ་བུའི་དྲ་བ་བྲེས་པའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་ཤིང་གི་ཡལ་ག་ཐམས་ཅད་ཀྱིས་བརྒྱན་པའི་གཟུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་ཉི་མ་རྣམ་པར་སྣང་བའི་ལྟེ་བའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སྤོས་དང་བདུག་པ་ཐམས་ཅད་ཀྱི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ཙནྡན་གྱི་ཕྱེ་མ་མང་པོས་ཀུན་ཏུ་རྒྱས་པར་འགེངས་པའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སངས་རྒྱས་ཀྱི་ཡུལ་རྒྱ་ཆེན་པོ་རྣམ་པར་བསྟན་པས་ཀུན་ཏུ་རྒྱན་གྱིས་ཁྱབ་པར་བྱེད་པའི་
Ka106b
གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དེ་དག་ལ་སོགས་པ་གདུགས་ཀྱི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པར་བྱེད་ཅིང ། བཅོམ་ལྡན་འདས་གང་ན་བ་དེར་ཕྱིན་ཏེ་བཅོམ་ལྡན་འདས་ལ་ཕྱག་འཚལ་ནས་ལྷོ་དང ། ནུབ་ཀྱི་ཕྱོགས་མཚམས་སུ་བརྟེན་ཏེ་སེངྒེའི་ཁྲི་ཨིནྡྲ་ནཱི་ལ་ཡིད་དུ་འོང་བར་འབར་བའི་འོད་ཟེར་གྱི་སྙིང་པོ་ཅན་དག་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་དོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབས་ཆགས་སུ་ནུབ་དང ། བྱང་གི་ཕྱོགས་མཚམས་ན་འཇིག་རྟེན་གྱི་ཁམས་རྒྱ་མཚོ་རིན་པོ་ཆེའི་འོད་ཟེར་འབར་བའི་སྐར་མདའ་འོད་ཀྱི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་ཁམས་པར་མའི་རྒྱུད་དེ་དག་ལས་འཇིག་རྟེན་གྱི་ཁམས་སྤོས་ཀྱི་རྒྱན་ཡིད་དུ་འོང་བའི་སྙིང་པོ་ན་དེ་བཞིན་གཤེགས་པ་ཡོན་ཏན་རྒྱ་མཚོ་ཚད་མེད་པའི་འོད་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་འོད་ཟེར་དང ། གཟི་བརྗིད་མི་ཟད་པའི་རྒྱལ་པོའི་བློ་གྲོས་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ཏེ་བཅོམ་ལྡན་འདས་གང་ན་བ་དེར་འོངས་པར་གྱུར་ཏེ། རིན་པོ་ཆེ་ཐམས་ཅད་དུ་སྣང་བའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང ། རིན་པོ་ཆེ་འོད་འཕྲོ་བའི་གཟུགས་ཀྱི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་
Ka107a
༄#། །ནས་ཡོག་པར་བྱིན་གྱིས་བརླབས་པ་དང ། མེ་ཏོག་གི་སྤྲིན་གྱིས་རྣམ་པར་སྣང་བར་བྱས་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། འོད་ཟེར་གྱི་སྒོ་ནས་སངས་རྒྱས་ཀྱི་སྤྲུལ་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ཕྱོགས་བཅུའི་སངས་རྒྱས་ཀྱི་ཞིང་གཟུགས་བརྙན་གྱི་ཁོངས་སུ་ཆུད་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་ཡལ་གའི་སྒོ་ཀུན་ནས་སངས་རྒྱས་ཀྱི་ཡུལ་རབ་ཏུ་སྒྲོག་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་རིན་པོ་ཆེ་བཻཌཱུརྱའི་རིགས་ཀྱི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སེམས་སྐད་ཅིག་གིས་སེམས་ཅན་མཐའ་ཡས་པའི་གཟུགས་ཡོངས་སུ་སྟོན་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སེམས་སྐད་ཅིག་གཅིག་གིས་སེམས་ཅན་མཐའ་ཡས་པའི་གཟུགས་ཡོངས་སུ་སྟོན་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སངས་རྒྱས་ཐམས་ཅད་ཀྱི་སྨོན་ལམ་འབྱུང་བའི་སྒྲ་ཡིད་དུ་འོང་བ་རབ་ཏུ་གཏོང་བའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་
Ka107b
ཡོག་པར་བྱིན་གྱིས་བརླབས་པ་དང ། འཁོར་གྱི་དཀྱིལ་འཁོར་ཐམས་ཅད་དུ་སེམས་ཅན་འདུལ་བའི་སྒྲ་སྒྲོག་པ་ནོར་བུའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དེ་དག་ལ་སོགས་པ་འོད་ཀྱི་དཀྱིལ་འཁོར་གྱི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པར་བྱེད་ཅིང ། བཅོམ་ལྡན་འདས་གང་ན་བ་དེར་ཕྱིན་ཏེ་བཅོམ་ལྡན་འདས་ལ་ཕྱག་འཚལ་ནས་ནུབ་དང ། བྱང་གི་ཕྱོགས་མཚམས་སུ་བརྟེན་ཏེ་སེངྒེའི་ཁྲི་འོད་ཟེར་འབར་བ་མི་ཟད་པའི་གཟི་བརྗིད་ཀྱི་སྙིང་པོ་ཅན་དག་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་དོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབས་ཆགས་སུ་འོག་གི་ཕྱོགས་ན་འཇིག་རྟེན་གྱི་ཁམས་རྒྱ་མཚོ་པདྨོ་དྲི་ཞིམ་དཔལ་གྱི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་ལས་འཇིག་རྟེན་གྱི་ཁམས་རིན་པོ་ཆེའི་སེངྒེ་སྣང་ཞིང་འབར་བ་ན་དེ་བཞིན་གཤེགས་པ་ཆོས་ཀྱི་དབྱིངས་སྣང་བར་མཛད་པའི་འོད་ཟེར་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་ཆོས་ཀྱི་དབྱིངས་སུ་འོད་འཕྲོ་བ་རྣམ་པར་སྣང་བ་འབྱུང་བའི་བློ་གྲོས་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ནས་བཅོམ་ལྡན་འདས་གང་ན་བ་དེར་འོངས་པར་གྱུར་ཏེ། རིན་པོ་ཆེ་
Ka108a
༄#། །ཐམས་ཅད་ཀྱི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང ། སྤོས་ཐམས་ཅད་ཀྱི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེའི་འོད་འཕྲོ་བ་ཐམས་ཅད་ཀྱི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སངས་རྒྱས་ཀྱི་ཆོས་ཐམས་ཅད་བརྗེད་པས་ཁྱབ་པར་བྱེད་པའི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སངས་རྒྱས་ཀྱི་ཞིང་ཐམས་ཅད་ཀྱི་རྒྱན་གྱིས་རྣམ་པར་སྣང་བར་བྱས་པའི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། མེ་ཏོག་གི་ཁང་པ་བརྩེགས་པ་ཐམས་ཅད་ཀྱི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། བསྐལ་པ་ཐམས་ཅད་གཅིག་ནས་གཅིག་ཏུ་བརྒྱུད་པར་སངས་རྒྱས་ཡང་དག་པར་འབྱུང་ཞིང་སེམས་ཅན་ཡོངས་སུ་སྨིན་པར་བྱ་བར་བརྗོད་པའི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རིན་པོ་ཆེ་ཟད་མི་ཤེས་པ་ཐམས་ཅད་དང ། མེ་ཏོག་ཐམས་ཅད་ཀྱི་ཟེ་བའི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དེ་དག་ལ་སོགས་པ་འོད་ཟེར་གྱི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པར་བྱེད་ཅིང །
Ka108b
བཅོམ་ལྡན་འདས་གང་ན་བ་དེར་ཕྱིན་ནས་བཅོམ་ལྡན་འདས་ལ་ཕྱག་འཚལ་ཏེ་འོག་གི་ཕྱོགས་སུ་བརྟེན་ནས་སེངྒེའི་ཁྲི་རིན་པོ་ཆེའི་སྒྲོན་མ་རབ་ཏུ་འབར་བ་འབྱུང་བའི་སྙིང་པོ་ཅན་དག་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་དོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདི་དང་འདབས་ཆགས་སུ་སྟེང་གི་ཕྱོགས་ན་འཇིག་རྟེན་གྱི་ཁམས་རྒྱ་མཚོ་ནོར་བུ་རིན་པོ་ཆེ་སྣ་ཚོགས་ཀྱི་འོད་རྒྱ་མཚོའི་རྒྱན་ཅེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་མཚན་ཡིད་དུ་འོང་བ་རྣམ་པར་སྣང་བ་ཞེས་བྱ་བ་ན་དེ་བཞིན་གཤེགས་པ་ཡོན་ཏན་དང་གྲགས་པ་ཐོགས་པ་མེད་པའི་རྣམ་པར་ཐར་པ་རབ་ཏུ་སྣང་བའི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་སྟོབས་དང ། བརྩོན་འགྲུས་ཆགས་པ་མེད་པའི་བློ་གྲོས་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ནས་བཅོམ་ལྡན་འདས་གང་ན་བ་དེར་འོངས་པར་གྱུར་ཏེ། རིན་པོ་ཆེ་ཁ་དོག་མཐའ་ཡས་པར་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརློབ་ཅིང ། ནོར་བུ་རིན་པོ་ཆེ་ཀུན་ནས་འོད་ཀྱི་དྲ་བ་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སངས་རྒྱས་ཀྱི་ཞིང་གི་རྒྱན་རྒྱ་ཆེན་པོས་རྣམ་པར་སྣང་བར་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སྤོས་
Ka109a
༄#། །ཐམས་ཅད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རྒྱན་ཐམས་ཅད་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། སངས་རྒྱས་ཐམས་ཅད་ཀྱི་རྫུ་འཕྲུལ་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ཤིང་དང་ཟ་བ་རྣམ་པ་སྣ་ཚོགས་སུ་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། རྡོ་རྗེ་སྣ་ཚོགས་འོད་འཕྲོ་བའི་སྤྲིན་བཅུས་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། ནོར་བུའི་རྒྱལ་པོ་བྱང་ཆུབ་སེམས་དཔའི་སྤྱོད་པ་མཐའ་ཡས་པ་བརྗོད་ཅིང་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། མུ་ཏིག་གི་སྒྲོན་མ་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པ་དང ། དེ་དག་ལ་སོགས་པ་འོད་འཕྲོ་བའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབས་པར་བྱེད་ཅིང ། བཅོམ་ལྡན་འདས་གང་ན་པ་དེར་ཕྱིན་ཏེ་བཅོམ་ལྡན་འདས་ལ་ཕྱག་འཚལ་ནས་སྟེང་གི་ཕྱོགས་སུ་བརྟེན་ཏེ་སེངྒེའི་ཁྲི་སངས་རྒྱས་ཀྱི་གསུང་སྒྲོག་པའི་འོད་ཟེར་འབྱུང་བའི་པདྨོའི་སྙིང་པོ་ཅན་དག་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་དོ། །དེ་དག་ལ་སོགས་པ་འཇིག་རྟེན་གྱི་ཁམས་རྒྱ་མཚོའི་སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་
Ka109b
ཤིན་ཏུ་ཕྲ་བ་སྙེད་ནས་ཀྱང་བྱང་ཆུབ་སེམས་དཔའ་སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་བྱང་ཆུབ་སེམས་དཔའ་རེ་རེ་ཞིང་ཡང་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་བྱང་ཆུབ་སེམས་དཔའ་རེ་རེ་ཞིང་ཡང་རྒྱན་རྣམ་པ་སྣ་ཚོགས་ཀྱི་མཆོད་པའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་འོངས་པར་གྱུར་ཏེ་གང་ནས་འོངས་པའི་ཕྱོགས་སུ་བརྟེན་ཏེ་སེངྒེའི་ཁྲི་རིན་པོ་ཆེ་སྣ་ཚོགས་ཀྱི་རྒྱན་གྱི་སྙིང་པོ་ཅན་དག་མངོན་པར་སྤྲུལ་ཅིང་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །འཁོད་པའི་རྗེས་ལ་བྱང་ཆུབ་སེམས་དཔའ་དེ་དག་གི་བ་སྤུའི་ཁུང་བུ་ཐམས་ཅད་རེ་རེ་ནས་འོད་ཟེར་གྱི་སྤྲིན་རིན་པོ་ཆེ་ཐམས་ཅད་ལྟར་ཁ་དོག་སྣ་ཚོགས་པ་འཇིག་རྟེན་གྱི་ཁམས་རྒྱ་མཚོ་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་བྱུང་བར་གྱུར་ཏོ། །རིན་པོ་ཆེ་རེ་རེའི་སྒོ་ནས་ཀྱང་བྱང་ཆུབ་སེམས་དཔའ་སེངྒེའི་ཁྲི་པདྨོའི་སྙིང་པོ་ཅན་ལ་འཁོད་པ་འཇིག་རྟེན་གྱི་ཁམས་རྒྱ་མཚོ་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་བྱུང་བར་གྱུར་ཏོ། །བྱང་ཆུབ་སེམས་དཔའ་རེ་རེས་ཀྱང་ཆོས་ཀྱི་དབྱིངས་ཀྱི་ཚུལ་རྒྱ་མཚོའི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཐམས་ཅད་ཀྱི་སྦུབས་གང་བར་བྱས་ནས་རྡུལ་ཤིན་ཏུ་ཕྲ་བ་རེ་རེ་ལ་ཡང་ཞིང་འབྱམས་ཀླས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དུ་རབ་ཏུ་འཇུག་པར་གྱུར་ཏོ། །ཞིང་རེ་རེར་ཡང་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་ཐམས་ཅད་
Ka110a
༄#། །མཐོང་ཞིང་ཤེས་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་ཡང་རྨི་ལམ་ལྟ་བུའི་རྣམ་པར་འཕྲུལ་པ་ཡང་དག་པར་བསྟན་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་ཡང་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་རེ་རེའི་ལྷའི་གནས་ཐམས་ཅད་དུ་སྐྱེ་བ་དང ། འཆི་འཕོ་བ་ཡང་དག་པར་བསྟན་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་ཡང་འཇིག་རྟེན་གྱི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཤིན་ཏུ་བསྟན་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་ཞིང་འབྱམས་ཀླས་པ་ཐམས་ཅད་རབ་ཏུ་བསྐྱོད་པ་དང ། སངས་རྒྱས་ཀྱི་ཡོན་ཏན་རབ་ཏུ་བརྗོད་ཅིང་རྣམ་པར་འཕྲུལ་བའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བ་དང ། སྨོན་ལམ་རྒྱ་མཚོ་ཐམས་ཅད་རབ་ཏུ་བསྒྲགས་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་འགྲོ་བ་ཐམས་ཅད་ཀྱི་ངེས་པའི་ཚིག་དང ། སངས་རྒྱས་ཀྱི་གསུང་གི་ཡན་ལག་རྣམ་པར་བསྟན་ཅིང་བརྗོད་པའི་སྒོ་དག་ནས་ཡང་
Ka110b
དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཆོས་ཀྱི་སྤྲིན་ཐམས་ཅད་ཀྱི་ཆར་དབབ་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་ཕྱོགས་བཅུའི་འཇིག་རྟེན་གྱི་ཁམས་སུ་ཆོས་ཀྱི་དབྱིངས་སྣང་བས་རྒྱས་པར་རྣམ་པར་འཕྲུལ་པའི་མཐུའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་སྐུས་ཆོས་ཀྱི་དབྱིངས་གང་བར་བྱ་བ་དང ། སངས་རྒྱས་ཀྱི་རྣམ་པར་ཐར་པ་དང ། འོད་ཐམས་ཅད་ཀྱི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱི་དཀྱིལ་འཁོར་རྒྱ་མཚོ་ཐམས་ཅད་ན་བྱང་ཆུབ་སེམས་དཔའ་ཀུན་ཏུ་བཟང་པོ་རབ་ཏུ་གནས་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །དེ་ལྟ་བུའི་ཆོས་ཀྱི་དབྱིངས་རྒྱས་པར་བཀང་སྟེ་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་ཡང་དག་པར་བསྐུལ་བ་བྱེད་ཅིང ། འཇིག་རྟེན་གྱི་ཁམས་འབྱམས་ཀླས་པ་དག་ཏུ་རབ་ཏུ་བདལ་ཏེ་ཞིང་རེ་རེ་ཡང་སེམས་ཀྱི་སྐད་ཅིག་རེ་རེ་ལ་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ངན་སོང་གི་རྒྱུད་དུ་གཏོགས་པའི་སྡུག་བསྔལ་ཐམས་ཅད་ནི། རབ་ཏུ་ཞི་བར་བྱེད་དོ། །
Ka111a
༄#། །སེམས་ཅན་ཕྱིན་ཅི་ལོག་ལ་ངེས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི། ཡང་དག་པར་ངེས་པའི་ཕུང་པོ་རབ་ཏུ་འགོད་དོ། །སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི། དགེ་བ་དང ། ཡིད་དུ་འོང་བ་དང ། མཐོ་རིས་སུ་སྐྱེ་བ་ལ་རབ་ཏུ་འགོད་དེ། །སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི། ཉན་ཐོས་དང ། རང་སངས་རྒྱས་ཀྱི་ས་ལ་རབ་ཏུ་འགོད་དོ། །སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི། དགེ་བའི་བཤེས་བསྙེན་བཀུར་བའི་བསོད་ནམས་ཀྱི་ཚིགས་ལ་རབ་ཏུ་འགོད་དོ། །ཞིང་དེ་དག་རེ་རེར་ཡང་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི། སྔོན་ཆད་མ་བསྐྱེད་པའི་བྱང་ཆུབ་ཀྱི་སེམས་སྐྱེ་བར་བྱེད་དོ། །ཞིང་དེ་དག་རེ་རེར་ཡང་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི། བྱང་ཆུབ་སེམས་དཔའི་ས་ཕྱིར་མི་ལྡོག་པ་ཡང་དག་པར་ཐོབ་པ་ལ་ཡང་དག་པར་སྐུལ་ལོ། །ཞིང་དེ་དག་རེ་རེར་ཡང་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་དེ་བཞིན་གཤེགས་པའི་ཡེ་ཤེས་ཀྱི་སྤྱན་ཆོས་ཐམས་ཅད་ཀུན་ནས་སྣང་ཞིང་གཟིགས་པ་ལ་ཡོངས་སུ་སྦྱངས་ཏེ་རབ་ཏུ་འགོད་དོ། །ཞིང་དེ་དག་རེ་རེར་ཡང་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་སྟོབས་ཐམས་ཅད་ཀྱིས་རབ་ཏུ་གནས་པ་དང ། ཡེ་ཤེས་ཀྱི་ཚོགས་ཟད་མི་ཤེས་པ་དང ། སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་སྨོན་ལམ་རྒྱ་མཚོ་ལ་རབ་ཏུ་འགོད་དོ། །ཞིང་དེ་དག་རེ་རེར་ཡང་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་
Ka111b
བ་སྙེད་དེ་བཞིན་གཤེགས་པ་རྣམ་པར་སྣང་མཛད་ཀྱི་གདུང་དང་རྒྱུད་ཡང་དག་པར་འབྱུང་བའི་གནས་རྒྱ་མཚོ་རྣམ་པར་སྤྱོད་པ་ལ་རབ་ཏུ་འགོད་དོ། །བྱང་ཆུབ་སེམས་དཔའ་དེ་དག་གི་འོད་ཟེར་གྱི་སྒོ་ཐམས་ཅད་ནས་ཀྱང་ཚིགས་སུ་བཅད་པ་འདི་ལྟ་བུ་དག་བྱུང་བར་གྱུར་ཏོ། །འོད་ཟེར་ཐམས་ཅད་སྒོ་ནས་སྒྲ་འབྱུང་སྟེ། །ཇི་སྙེད་བྱང་ཆུབ་སྤྱོད་པར་འཇུག་པ་དང ། །རྒྱལ་སྲས་ཡོན་ཏན་ཕུན་སུམ་གང་ཡོད་པའི། ། དབྱངས་ཀྱིས་ཕྱོགས་རྣམས་ཀུན་ཏུ་བཀང་ཞིང་སྒྲོག་།བསྐལ་པ་རྒྱ་མཚོར་སྐྱེ་མེད་སྤྱད་པ་སྤྱོད། །སྡུག་བསྔལ་ཀུན་ལས་འགྲོ་བ་ཀུན་འགྲོལ་ཀྱང ། །ཡིད་ལ་སྐྱེ་མེད་ཞུམ་པ་གང་ཡང་མེད། །འདི་ཡི་ཚུལ་ལ་རྒྱལ་སྲ་རབ་ཏུ་ཞུགས། །ཆོས་ཀྱི་སྒོ་རྣམས་ཀུན་ལ་རབ་སྤྱོད་ཅིང ། །ཚུལ་འདིར་བསྐལ་པ་རྒྱ་མཚོ་ཟད་པར་བྱེད། །མཐའ་མེད་དབུས་མེད་ལྷག་མ་གང་ཡང་མེད། །དེ་དག་ཆོས་ཉིད་ཞི་བ་རབ་ཏུ་སྒྲོག་།དུས་གསུམ་རྒྱལ་བའི་སྨོན་ལམ་གང་ཡོད་པ། །རྒྱལ་སྲས་དེ་དག་འགྲོ་ལ་ཕན་དོག་ཏུ། །དེ་དག་ཐམས་ཅད་མ་ལུས་ཡོངས་སུ་སྤྱོད། །དེ་དག་སྤྱོད་པའི་རྒྱན་ནི་འདི་འདྲ་འོ། །རྒྱལ་བ་ཀུན་གྱི་འཁོར་དུ་ཉེར་ཕྱིན་ཏེ། །ཕྱོགས་རྣམས་ཀུན་ན་གཟུགས་བརྙན་ལུས་འཆང་ཞིང ། །རྒྱལ་སྲས་ཡེ་ཤེས་རྒྱ་མཚོའི་བློ་གྲོས་ཅན། །དེ་དག་ཆོས་ཉིད་ཞིར་འཇུག་འདི་འདྲའོ། །འོད་ཟེར་སྒོ་རྣམས་རེ་རེར་མཐའ་པའི། །བསམ་ཡས་ཞིང་རྣམས་དེ་དག་རབ་ཏུ་འཇུག་།སྤྱོད་པས་མིག་ནི་ཀུན་ནས་ཡོངས་དག་སྟེ། །རྒྱལ་སྲས་དེ་དག་སྤྱོད་ཡུལ་འདི་ཡིན་ནོ། །སྐྲ་རྩེ་གཅིག་ཏུ་དེ་དག་རབ་
Ka112a
༄#། །གནས་ཤིང ། །ཞིང་རྣམས་དབྱིངས་ཀུན་ཀུན་ནས་བསྐྱོད་བྱས་ཀྱང ། །སེམས་ཅན་རྣམས་ལ་འཇིགས་པ་མི་བྱེད་དོ། །ས་འདི་རྣམ་དག་ཚུལ་འཆང་དག་གི་འོ།། ཚུལ་རྣམས་ཀུན་ལ་བསམ་གྱིས་མི་ཁྱབ་ལུས། །དེ་དག་ཀུན་ཏུ་ཞིང་རྣམས་སྣ་ཚོགས་སྤྲུལ། །སྐད་ཅིག་སེམས་ལ་འཆི་འཕོ་སྐྱེ་བ་སྣང ། །རྒྱན་འདི་སེམས་ལ་ཆགས་མེད་རྣམས་ཀྱི་འོ།། དུས་གསུམ་བསྐལ་པ་གང་ཡོང་མ་ལུས་པར། །སྐད་ཅིག་གཅིག་གིས་ཐམས་ཅད་རབ་ཏུ་སྟོན། །སྒྱུ་མ་ལྟ་བུ་ལུས་མེད་དངོས་ཀྱང་མེད། །དེ་འདྲའི་ཆོས་ཉིད་ཆགས་མེད་བློས་རྟོགས་སོ། །བཟང་པོའི་སྤྱོད་པ་མཆོག་ལ་ཞུགས་པ་རྣམས། །འགྲོ་བ་ཀུན་ལ་ཡིད་དུ་འོང་བའི་ལུས། །རྒྱལ་སྲས་དེ་དག་ཆོས་ཉིད་འདི་ཡིན་ཏེ། །འོད་ཟེར་ཀུན་གྱི་སྒོ་ནས་དབྱངས་ཀྱང་སྒྲོག། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཐའ་དང་དབུས་མེད་པ་དེ་དག་དེ་བཞིན་གཤེགས་པའི་ཡུལ་ལ་རྣམ་པར་སྤྱོད་པས་རྣམ་པར་འཕྲུལ་བ་ཐོབ་པར་བྱ་བའི་ཕྱིར་སྨིན་མཚམས་ཀྱི་མཛོད་སྤུ་ནས་འོད་ཟེར་ཆེན་པོ་བྱང་ཆུབ་སེམས་དཔའ་ཐམས་ཅད་ཡེ་ཤེས་ཀྱི་སྣང་བ་ཕྱོགས་རྣམ་པར་སྟོན་པའི་སྙིང་པོ་ཞེས་བྱ་བ་རབ་ཏུ་བཀྱེའོ། །འོད་ཟེར་རིན་པོ་ཆེ་ཐམས་ཅད་ཀྱི་ཁ་དོག་སྒྲོན་མའི་སྤྲིན་དུ་བརྡལ་བ། སངས་རྒྱས་ཀྱི་ཞིང་ཐམས་ཅད་དུ་རབ་ཏུ་སྣང་བ་དེ་བྱུང་ནས་ཚུལ་ཐམས་ཅད་ཀྱི་ཕྱོགས་འབྱམས་ཀླས་པ་རབ་ཏུ་སྣང་བར་བྱས་ཏེ་ཕྱོགས་ཐམས་
Ka112b
ཅད་ཀྱི་དབྱིངས་རྒྱ་མཚོ་རྣམས་རབ་ཏུ་སྣང་བར་བྱས་ནས་སེམས་ཅན་རྒྱ་མཚོ་རྣམས་རབ་ཏུ་སྣང་བར་བྱས་ཏེ། འཇིག་རྟེན་གྱི་ཁམས་རྒྱ་མཚོ་ཐམས་ཅད་རབ་ཏུ་བསྟན་ནས་སངས་རྒྱས་ཀྱི་ཞིང་མང་པོ་ཐམས་ཅད་རབ་ཏུ་བསྐྱོད་པའི་རྒྱན་གྱི་ཚུལ་ཐམས་ཅད་ཀྱིས་རབ་ཏུ་བསྐྱོད་ནས་སངས་རྒྱས་ཀྱི་སྤྲིན་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་རྡུལ་ཤིན་ཏུ་ཕྲ་བ་ཐམས་ཅད་དང་མཉམ་པ་དག་ཏུ་རབ་ཏུ་སྤྲོས་ནས་སེམས་ཅན་ཐམས་ཅད་ཀྱི་བསམ་པ་དང་མོས་པ་ཇི་ལྟ་བ་རྒྱ་མཚོ་དག་ཏུ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་སྤྲིན་གྱི་ཆར་དུས་གསུམ་གྱི་རྡུལ་ཤིན་ཏུ་ཕྲ་བ་དང་མཉམ་པ་ཕབ་སྟེ། དུས་གསུམ་གྱི་སངས་རྒྱས་ཐམས་ཅད་ཀྱི་ཕ་རོལ་ཏུ་ཕྱིན་པ་རྒྱ་མཚོ་རབ་ཏུ་བསྟན་ནས་སེམས་ཅན་ཐམས་ཅད་མ་ལུས་པར་འཁོར་བ་ཐམས་ཅད་ལས་རབ་ཏུ་གདོན་པར་བྱ་བའི་ཕྱིར་མོས་པ་ཇི་བཞིན་དུ་འབྱུང་བ་དང་མཐུན་པའི་སྤྲིན་གྱི་ཆར་རབ་ཏུ་དབབ་པ་དང ། དེ་བཞིན་གཤེགས་པ་ཐམས་ཅད་ཀྱི་སྨོན་ལམ་མ་ལུས་པའི་སྤྲིན་གྱི་ཆར་རབ་ཏུ་དབབ་པ་དང ། འཇིག་རྟེན་གྱི་ཁམས་ཐམས་ཅད་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་འཁོར་དག་ཏུ་དགའ་བར་ཕྲད་པར་བྱས་ནས་བཅོམ་ལྡན་འདས་ལ་གཡས་ཕྱོགས་སུ་བསྐོར་བ་བྱས་ཏེ་བཅོམ་ལྡན་འདས་ཀྱི་སྤྱན་སྔར་པདྨོ་ཆེན་པོ་ཆུ་བ་རིན་པོ་ཆེ་ཐམས་ཅད་ལས་བསྒྲུབས་པ། ནང་རིམ་ནོར་བུའི་རྒྱལ་པོའི་མཛོད་སྣ་ཚོགས་ལས་བྱས་པ། ལོ་མ་རིན་པོ་ཆེ་ཐམས་ཅད་ཀྱི་རིགས་ཀྱི་ཆར་འབེབས་པ།
Ka113a
༄#། །ཟེ་བའི་ཕྲེང་བའི་རྒྱན་སྤོས་རིན་པོ་ཆེ་ཐམས་ཅད་ལས་བྱས་པ། སྙིང་པོ་འཛམ་བུ་ཆུ་ཀླུང་གི་གསེར་གྱི་ཚོན་གྱིས་རབ་ཏུ་མཛེས་པར་བྲིས་པ། འོད་ཀྱི་འཁོར་རྣམ་པར་དག་ཅིང་འོད་ཟེར་གྱི་དྲ་བས་རྣམ་པར་སྣང་བས་བྱས་པའི་སྤྲིན་དང་ལྡན་པ། རྒྱན་ཐམས་ཅད་རབ་ཏུ་འབྱུང་བ། སེམས་ཀྱི་སྐད་ཅིག་ལ་སངས་རྒྱས་ཀྱི་རྣམ་པར་འཕྲུལ་བ་མཐའ་ཡས་པ་སྟོན་པའི་སྒྲ་རབ་ཏུ་འབྱུང་བ། ནོར་བུའི་རྒྱལ་པོ་མཐའ་ཡས་པ་དང ། སངས་རྒྱས་ཀྱི་སྐུའི་གཟུགས་བརྙན་གྱི་སྤྲིན་གྱིས་ཐམས་ཅད་དུ་གང་བར་བྱེད་པ། བྱང་ཆུབ་སེམས་དཔའི་སྤྱོད་པ་དང ། སྨོན་ལམ་ཐམས་ཅད་རབ་ཏུ་སྟོན་པའི་དབྱངས་འབྱིན་པར་གྱུར་ཏེ་བྱུང་ངོ ། །པདྨོ་ཆེན་པོ་དེ་བྱུང་བའི་རྗེས་ལ་བྱང་ཆུབ་སེམས་དཔའ་ཆོས་ཐམས་ཅད་ལ་ཕམ་པ་མེད་པའི་དབྱངས་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་ཀྱིས་མཛོད་སྤུ་དེ་ཉིད་ནས་བྱུང་བ་སྟེ་བཅོམ་ལྡན་འདས་ལ་ལན་དུ་མར་གཡས་ཕྱོགས་སུ་བསྐོར་བ་བྱས་ནས་བཅོམ་ལྡན་འདས་ལ་ཕྱག་འཚལ་ཏེ་པདྨོ་ཆེན་པོ་དེའི་སྙིང་པོ་ལ་འདུག་གོ་།བྱང་ཆུབ་སེམས་དཔའ་འཇིག་རྟེན་གྱ་\་GYཱི?\་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་པོ་དེ་དག་ཀྱང་ཟེ་བའི་ཕྲེང་བ་དེ་དག་ལ་འཁོད་དོ། །དེ་ནས་བྱང་ཆུབ་སེམས་དཔའ་ཆོས་ཐམས་ཅད་ལ་ཕམ་པ་མེད་པའི་དབྱངས་ཆོས་ཀྱི་དབྱིངས་རྒྱ་ཆེ་ཞིང་ཚད་མེད་པས་རབ་ཏུ་དགའ་བའི་ཤུགས་ཤིན་ཏུ་སྐྱེས་པ་
Ka113b
དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་གྱི་རྗེས་སུ་སོང་བའི་ཡེ་ཤེས་ཅན། སངས་རྒྱས་ཀྱི་ཆོས་ཀྱི་སྐུ་རྒྱ་མཚོ་བསམ་གྱིས་མི་ཁྱབ་པ་ལ་རབ་ཏུ་ཞུགས་པའི་མཐུ་དང་ལྡན་པ། ཞིང་འབྱམས་ཀླས་པ་ཐམས་ཅད་ཀྱི་དེ་བཞིན་གཤེགས་པ་རྣམས་ཀྱི་ཞབས་ཀྱི་དྲུང་དུ་ཕྱིན་པ་དང་བ་སྤུ་ཐམས་ཅད་ལས་སྤྲུལ་པའི་སྤྲིན་ཟད་མི་ཤེས་པས་ཀུན་ཏུ་ཁེབས་པར་བྱེད་པ། སེམས་ཀྱི་སྐད་ཅིག་ཐམས་ཅད་ལ་དམིགས་པ་ཐམས་ཅད་ཆོས་ཀྱི་དབྱིངས་ཀུན་ཏུ་སྒྱུར་བ། ཆོས་ཀྱི་དབྱིངས་ཐམས་ཅད་ལ་དུས་གསུམ་ཁྱབ་པར་བྱེད་པའི་སྤྱོད་ཡུལ་གྱིས་རྣམ་པར་སྤྱོད་པ། ཕྱོགས་ཐམས་ཅད་ཀྱི་དེ་བཞིན་གཤེགས་པའི་བྱིན་གྱིས་རླབས་འཆང་བ། ཏིང་ངེ་འཛིན་ཐམས་ཅད་ལ་རབ་ཏུ་འཇོག་ཅིང་ཕྱི་མའི་མཐའི་བསྐལ་པའི་མུར་ཐུག་པར་ཏིང་ངེ་འཛིན་དང ། རྣམ་པར་ཐར་པ་ལ་རྣམ་པར་སྤྱོད་པ། སངས་རྒྱས་ཀྱི་ཡོན་ཏན་རྒྱ་མཚོ་མཐའ་ཡས་པ་ཐམས་ཅད་དང ། ཆོས་ཀྱི་དབྱིངས་ཀྱི་ལུས་དང་ལྡན་པས་དེ་བཞིན་གཤེགས་པའི་རྫུ་འཕྲུལ་དང ། རྣམ་པར་འཕྲུལ་པ་མཐའ་དང་དབུས་མེད་པ་ལ་རྣམ་པར་བལྟས་ཏེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྐུ་ནི་ཆོས་ཀྱི་དབྱིངས་ཀྱིས་གསལ། །འགྲོ་བ་ཀུན་ལ་རྒྱལ་བ་མངོན་སུམ་སྟེ། །ཇི་ལྟར་མོས་པའི་སེམས་ཅན་རྒྱས་བཀང་ནས། །སྙིང་པོ་བྱང་ཆུབ་དེ་ལ་རྒྱལ་བ་བཞུགས། །ཞིང་རྣམས་ཀུན་གྱི་རྡུལ་ཕྲན་མཆོག་སྙེད་ཀྱི། །རྒྱལ་བ་སྤུ་རྩེ་ཀུན་ལ་རབ་བཞུགས་ཏེ། །བྱང་ཆུབ་སེམས་དཔའི་འཁོར་གྱིས་ཀུན་ནས་བསྐོར། །ཀུན་ཀྱང་བཟང་པོའི་སྤྱོད་པ་མཆོག་སྟོན་ཏོ། །
Ka114a
༄#། །སྤུ་གཅིག་རྩེ་ལ་ཞིང་མང་རྒྱ་མཚོ་སྟེ། །བྱང་ཆུབ་སྙིང་པོར་པདྨོའི་གདན་ལ་བཞུགས། །ཆོས་དབྱིངས་རྒྱ་ཆེན་ཐམས་ཅད་ཀུན་བཀང་སྟེ། །སྤུ་རྣམས་ཀུན་ལ་རྣམ་པར་འཕྲུལ་པ་སྟོན། །ཞིང་རྣམས་རེ་རེ་དག་ན་རབ་བཞུགས་ཤིང ། །ཞིང་རྣམས་འབྱམས་ཀླས་ཀུན་ཏུ་རྒྱས་མཛད་པས། །ཕྱོགས་བཅུའི་བྱང་ཆུབ་སེམས་དཔའི་སྤྲིན་གྱི་རྣམས། ཀུན་ཀྱང་སྙིང་པོ་བྱང་ཆུབ་དྲུང་དུ་འདོད། །ཞིང་རྣམས་ཀུན་གྱི་རྡུལ་ཕྲན་མཆོག་སྙེད་ཀྱི། །བྱང་ཆུབ་སེམས་དཔའི་ཡོན་ཏན་རྒྱ་མཚོའི་འོད། །སངས་རྒྱས་ཀུན་གྱི་འཁོར་དུ་ཉེ་བར་འདོད། །ཆོས་དབྱིངས་འབྱམས་ཀླས་རྟག་ཏུ་རྒྱས་པར་འགེངས། །ཞིང་རྣམས་ཐམས་ཅད་གཟུགས་བརྙན་རབ་ཏུ་སྟོན། །ཆོས་དབྱིངས་རྡུལ་རྣམས་ཡེ་ཤེས་སྤྱོད་ཡུལ་ཅན། །ཀུན་ཀྱང་བཟང་པོའི་སྤྱོད་ལ་རབ་ཏུ་གནས། །སངས་རྒྱས་ཀུན་གྱི་འཁོར་དུ་ཡང་དག་བྱུང ། །བྱང་ཆུབ་སེམས་དཔའ་ཡེ་ཤེས་མཆོག་ཡུལ་ཅན། །སངས་རྒྱས་ཆོས་སྤྲིན་ཉན་ཅིང་རབ་ཏུ་མཁས། །སངས་རྒྱས་ཀུན་གྱི་འཁོར་རྣམས་ཀུན་ན་གནས། །ཞིང་རྣམས་ཀུན་ཏུ་བསྐལ་པ་རྒྱ་མཚོར་སྤྱོད། །རྒྱ་མཚོའི་ཆོས་ལ་རྣམ་པར་སྣང་བར་སྤྱོད། །དེ་དག་རྒྱལ་བའི་ས་རྣམས་རྒྱ་མཚོ་ཞུགས། །སངས་རྒྱས་ཆོས་རྣམས་གཞན་དང་གཞན་འབྱུང་བ། །དེ་དག་སྨོན་ལམ་རྒྱ་མཚོར་རབ་ཏུ་འཇུག། །སངས་རྒྱས་ཡོན་ཏན་ལེགས་པ་རྒྱ་མཚོ་དང ། །ཀུན་ཏུ་བཟང་པོའི་སྤྱོད་པ་དེ་དག་ཤེས། །སངས་རྒྱས་ཆོས་ཀྱི་དབྱིངས་རྣམས་ཀུན་བཀང་ཞིང ། །དེ་དག་རྣམ་
Ka114b
འཕྲུལ་རྒྱ་ཆེན་ཀུན་ལ་ཞུགས། །ཞིང་རྣམས་ཀུན་གྱི་རྡུལ་ཕྲན་མང་སྙེད་ཀྱི། །ལུས་ཀྱི་སྤྲིན་ནི་རྟག་པར་རབ་ཏུ་སྟོན། །སེམས་ཅན་ཀུན་བཀང་འོད་ཀྱིས་ཀུན་ལ་སྐྱོབ། །བསམ་པ་ཡིད་བཞིན་ཆོས་ཀྱི་ཆར་ཡང་འབེབས། །དེ་ནས་བྱང་ཆུབ་སེམས་དཔའ་ཆོས་ཀྱི་དཔལ་པདྨོ་རྣམ་པར་ལྟ་བའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཡེ་ཤེས་ཤིན་ཏུ་ཟབ། །དུས་རྣམས་ཀུན་ཏུ་དེ་འབྱུང་སྟེ། །ཆོས་དབྱིངས་ཐུགས་སུ་ཆུད་པས་ན། །འཇིག་རྟེན་མགོན་ཞེས་རབ་ཏུ་བརྗོད། །ཡང་དག་སངས་རྒྱས་ཆོས་ཀྱི་སྐུ། ། འདྲེས་པ་མེད་ཅིང་གནས་པ་མེད། །སེམས་ཅན་ཐམས་ཅད་ཡིད་བཞིན་དུ། །གཟུགས་ཀྱི་སྐུར་ཡང་རབ་ཏུ་མཐོང ། །ཆོས་རྣམས་ཐམས་ཅད་མངོན་སངས་རྒྱས། །ཆོས་རྣམས་ཀུན་ལ་རབ་ཏུ་ཞུགས། ། ཐམས་ཅད་མཁྱེན་པ་ཐམས་ཅད་གཟིགས། །ཞིང་རྣམས་ཀུན་ན་རྣམ་པར་མཛེས། །ཁ་དོག་བསམ་གྱིས་མི་ཁྱབ་པར། །སེམས་ཅན་ཐམས་ཅད་ཡིད་བཞིན་དུ། །སེམས་ཅན་མཆོག་གི་འོད་རྣམས་དང ། །དེ་བཞིན་སྐུ་ཡི་སྤྲིན་ཀྱང་མཐོང ། །དེ་བཞིན་གཤེགས་པའི་སྐུ་དག་ལས། །མི་ཟད་སངས་རྒྱས་སྤྲུལ་བ་རྣམས། །ཞིང་རྣམས་ཀུན་ཏུ་རབ་སྒྲོག་ཅིང ། །ཆོས་ཀྱི་རྒྱ་མཚོ་ཤིན་ཏུ་སྟོན། །སྤུ་རྣམས་རེ་རེ་ཀུན་ནས་ཀྱང ། །ཕྱོགས་བཅུར་འོད་ཟེར་དྲ་བ་དག། སངས་རྒྱས་གསུང་ནི་རབ་འབྱིན་ཅིང ། །གདུལ་དཀའ་ཐམས་ཅད་རྣམ་པར་འདུལ། །སངས་རྒྱས་འོད་ཟེར་སྒོ་རྣམས་ནས། །སྒྲ་དབྱངས་ཟབ་མོ་རྟག་ཏུ་
Ka115a
༄#། །འབྱུང ། །སངས་རྒྱས་ཡོན་ཏན་རྒྱ་མཚོ་ནི། །བྱང་ཆུབ་སེམས་དཔའི་སྤྱོད་ཡུལ་ལོ། །སངས་རྒྱས་ཆོས་ཀྱི་འཁོར་ལོ་དག་།མཐའ་དང་དབུས་མེད་རབ་ཏུ་བསྐོར། ། ཡེ་ཤེས་ཟབ་མོ་ཞེས་བྱ་བ། །རྒྱ་ཆེན་ཕྱོགས་སུ་རབ་ཏུ་སྟོན། །འཇིག་རྟེན་ཁམས་རྣམས་ཐམས་ཅད་དུ། །རྣམ་པར་འཕྲུལ་པ་གཞན་དང་གཞན། །ཆོས་ཀྱི་དབྱིངས་རྣམས་ཀུན་བཀང་ཞིང ། །ཡང་དག་སངས་རྒྱས་སྟོན་པ་མཛད། །སྐུ་རྣམས་རེ་རེ་ཀུན་ལས་ཀྱང ། །ཞིང་རྣམས་ཀུན་གྱི་རྡུལ་མཉམ་པ། །སངས་རྒྱས་སེམས་ཅན་མཉམ་ཕྱུང་ཞིང ། །རྣམ་པར་འཕྲུལ་བ་རབ་ཏུ་སྟོན། །དེ་ནས་བྱང་ཆུབ་སེམས་དཔའ་ཆོས་རྒྱ་མཚོ་རྣམ་པར་སྣང་བའི་བློ་གྲོས་ཀྱིས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། ། ཆོས་ཀྱི་དབྱིངས་རྣམས་ཀུན་ཁྱབ་པར། །སངས་རྒྱས་སྐུ་ནི་རྣམ་པར་མཛེས། །རྒྱ་ཆེན་གསུང་ནི་རང་བྱུང་བ། །ཞིང་རྣམས་རྒྱ་མཚོར་ཤིན་ཏུ་སྒྲོག་།འཇིག་རྟེན་ཐམས་ཅད་ཀུན་འཇུག་པར། ། འཇིག་རྟེན་མགོན་པོ་ཤིན་ཏུ་མཛེས། །འགྲོ་བ་ཀུན་གྱི་བསམ་མཁྱེན་ཅིང ། །བྱིན་གྱི་རླབས་ནི་རབ་ཏུ་སྟོན། །སངས་རྒྱས་འཇིག་རྟེན་ཀུན་ལ་མངོན། །སེམས་ཅན་ཐམས་ཅད་བསམ་པ་བཞིན།། ཐམས་ཅད་གཟིགས་པས་སངས་རྒྱས་ཀྱི། །རྣམ་པར་འཕྲུལ་པ་ཐམས་ཅད་མཐོང ། །མཐའ་ཡས་འོད་མངའ་སངས་རྒྱས་སྤྲིན། །ཆོས་རྣམས་རྒྱ་མཚོའི་འབྲུག་ཀྱང་སྒྲོག་།ཡེ་ཤེས་རྣམ་
Ka115b
རྒྱུའི་ཚུལ་བཞིན་དུ། །རྒྱལ་བའི་སྲས་རྣམས་དེ་ལ་འཇུག་།འཇུག་པ་རྣམས་ལ་འབྱུང་བ་མེད། །འབྱུང་བ་ཡོད་པར་རྣམ་པར་བསྟན། །གང་ལ་སངས་རྒྱས་བཞུགས་པ་ཡི། །ཆོས་རྣམས་འབྱུང་བ་ནམ་མཁའ་བཞིན། །འཕོ་དང་གནས་པ་མི་མངའ་སྟེ། །འོན་ཀྱང་རྒྱལ་བ་ཀུན་ན་སྣང ། །སངས་རྒྱས་ཆོས་ཀྱི་དབྱིངས་ལས་བྱུང ། །དེ་ཕྱིར་སངས་རྒྱས་རབ་ཏུ་བརྗོད། །ཡུལ་ན་བཞུགས་མེད་རང་བཞིན་མེད། །དེ་ལ་འབྱུང་བ་མི་མངའ་སྟེ། །སྐུ་དང་མཚན་ཀྱང་དེ་བཞིན་མེད། །རྒྱལ་བ་གཟུགས་བརྙན་འདྲ་བའོ། །འགྲོ་བ་ཀུན་ཏུ་ཆོས་ཀྱི་སྤྲིན། །བསམ་པ་ཀུན་ལ་རབ་ཏུ་བྱུང ། །ཡང་དག་སངས་རྒྱས་རྣམ་ཀུན་ཏུ། །སེམས་ཅན་རྒྱ་མཚོ་འདུལ་བ་མཛད། །འཇིག་རྟེན་ཁམས་རྣམས་ཐམས་ཅད་ཀྱི། །སྙིང་པོ་བྱང་ཆུབ་ཀུན་ན་སྣང ། །འཁོར་གྱི་རྒྱ་མཚོ་ཐམས་ཅད་ན། །ཞིང་རྣམས་ཀུན་གྱིས་རྣམ་པར་མཛེས། ། སངས་རྒྱས་ཀུན་གྱི་སྐུ་དག་ལ། །ཡོན་ཏན་རྒྱ་མཚོ་ཟད་མི་ཤེས། །སངས་རྒྱས་ཡོན་ཏན་མཐའ་ཡས་ཏེ། །དེ་དག་ཡོན་ཏན་ཟད་པ་མེད། །དེ་ནས་བྱང་ཆུབ་སེམས་དཔའ་སྤོས་འོད་འཕྲོ་བའི་རྒྱན་ཟླ་བའི་འོད་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསམ་གྱིས་མི་ཁྱབ་སངས་རྒྱས་སར། །བྱང་ཆུབ་སེམས་དཔའ་གང་བཞུགས་པ།། དེ་དང་དེ་དག་སངས་རྒྱས་ཀྱི། །སངས་རྒྱས་རྣམ་འཕྲུལ་ཐམས་ཅད་མཐོང ། །ཡེ་ཤེས་ལུས་ཀྱིས་ཞུགས་པ་རྣམས། །ཞིང་ཀུན་རྡུལ་གྱི་སྦུབས་སུ་ཡང ། །དེ་བཞིན་གཤེགས་པ་ཐམས་ཅད་དང ། །བདག་
Ka116a
༄#། །ཉིད་ལུས་ཀྱང་དེར་མཐོང་ངོ ། །གཟུགས་བརྙན་ཞིང་རྣམས་ཐམས་ཅད་དང ། །སངས་རྒྱས་ཀུན་གྱི་སྤྱན་སྔར་འབྱུང ། །ཀུན་ཏུ་བྱིན་གྱི་རླབས་རྣམས་དང ། །རྣམ་པར་འཕྲུལ་པ་རབ་ཏུ་སྟོན། །ཀུན་ཏུ་བཟང་པོའི་སྨོན་ལམ་དང ། །སྤྱོད་པ་གང་གིས་རྣམ་སྦྱངས་པ། །དེ་དག་ཞིང་རྣམས་ཐམས་ཅད་དུ། །སངས་རྒྱས་ཀུན་གྱི་རྣམ་འཕྲུལ་མཐོང ། །ཀུན་ཏུ་མཉམ་པ་ཉིད་གྱུར་ཅིང ། །ཀུན་ཏུ་ལུས་ཀྱིས་རབ་གནས་ཏེ། །ཡེ་ཤེས་ཀུན་གྱི་རྗེས་སོང་ནས། །སངས་རྒྱས་སྤྱོད་ཡུལ་ཞུགས་པའོ། །སངས་རྒྱས་ཡེ་ཤེས་ཞུགས་པའི་རྣམས། །ཆོས་ཀྱི་དབྱིངས་ལ་རྣམ་པར་མཛེས། །སངས་རྒྱས་ཀུན་གྱི་སྤུ་དག་ཏུ། །རྒྱ་མཚོའི་ཞིང་ལ་རབ་ཏུ་འཇུག་།སངས་རྒྱས་ཀུན་གྱི་ཞིང་དག་ཏུ། །བྱིན་གྱི་རླབས་རྣམས་རབ་བསྟན་པས། །གཞན་དང་གཞན་གྱི་ལུས་དག་དང ། །མིང་གིས་ཀུན་ནི་རབ་ཏུ་གནས། །བྱང་ཆུབ་སྙིང་པོར་རྣམ་འཕྲུལ་དང ། །བྱང་ཆུབ་མངོན་པར་འཚང་རྒྱ་ཞིང ། །ཆོས་ཀྱི་འཁོར་ལོ་བསྐོར་བ་དག་།སྐད་ཅིག་སེམས་ཀྱིས་སྟོན་པ་བྱེད།། ཞིང་རྣམས་འབྱམས་ཀླས་ཐམས་ཅད་དང ། །བསྐལ་པ་བྱེ་བ་བསམ་ཡས་དག་།བྱང་ཆུབ་སེམས་དཔའ་མཉམ་གཞག་རྣམས། །སྐད་ཅིག་སེམས་ཀྱིས་རྣམ་པར་སྟོན། །སངས་རྒྱས་ཞིང་རྣམས་ཐམས་ཅད་ན། །བྱང་ཆུབ་སེམས་དཔའི་སྤྲུལ་པ་རྣམས། །སངས་རྒྱས་སྐུ་ལ་རྣམ་སྤྱོད་ཀྱང ། །མཐའ་མ་རྙེད་པར་མི་རུང་ངོ ། །དེ་ནས་བྱང་ཆུབ་སེམས་དཔའ་སེངྒེའི་འོད་ཟེར་སྣང་
Ka116b
བའི་མཐུ་འབྱིན་པའི་བློ་གྲོས་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་རྣམ་པར་སྣང་མཛད་ཀྱིས། །ཆོས་ཀྱི་འཁོར་ལོ་རབ་ཏུ་འཁོར། །ཆོས་དབྱིངས་ཚུལ་རྣམས་ཐམས་ཅད་ཀྱང ། །སངས་རྒྱས་སྤྲིན་གྱིས་མངོན་དུ་ཡོག་།འཇིག་རྟེན་ཁམས་རྣམས་རྒྱ་མཚོ་དང ། །ཕྱོགས་བཅུ་ཀུན་ན་གང་ཡོད་པ། ། ཐམས་ཅད་ཀུན་ཏུ་འཁོར་ལོ་འཁོར། །དེ་ནི་སྨོན་ལམ་རྣམ་འཕྲུལ་བའོ། །འཁོར་རྣམས་རྒྱ་མཚོ་རྒྱ་ཆེ་བ། །གཞན་དང་གཞན་གྱི་མིང་དག་གིས། །ཞིང་རྣམས་གནས་པ་ཀུན་ཏུ་ཡང ། །ཆོས་ཀྱི་འཁོར་ལོ་ཀུན་ཏུ་འཁོར། །རྣམ་པར་སྣང་མཛད་བྱིན་རླབས་ཀྱིས། །ཞིང་རྣམས་རྒྱ་མཚོ་ཀུན་ཏུ་ཡང ། །ཀུན་ཏུ་བཟང་པོའི་སྨོན་ལམ་དག་།རྗོད་ཅིང་ཞིང་རྣམས་ཀུན་ཏུ་འབྱུང ། །ཞིང་ཀུན་རྡུལ་ལ་སྐུ་ཡི་རྣམས། །ཐམས་ཅད་ཆོས་ཆར་རབ་ཏུ་འབེབས། །འདྲེས་པ་མེད་ཅིང་འབྱུང་བ་མེད། །འཇིག་རྟེན་དག་ན་རྣམ་པར་མཛེས། །བསྐལ་པ་བྱེ་བ་གྲངས་མེད་པར། །ཞིང་ཀུན་རྡུལ་ཕྲན་སྦུབས་དག་ཏུ། །རྣམ་པར་སྣང་བ་མཛད་པའི་གསུང ། །སྔོན་གྱི་སྤྱོད་པ་རབ་ཏུ་སྒྲོག་།ཞིང་རྣམས་ཐམས་ཅད་རྡུལ་སྙེད་ཀྱི། །འོད་ཟེར་དྲ་བ་ཕྱོགས་བཅུ་ན། །སངས་རྒྱས་འོད་ཟེར་ཀུན་སྒོ་ནས། །བྱང་ཆུབ་མཆོག་ཕྱིར་སེམས་ཅན་འདུལ། །ཀུན་ཏུ་མ་འདྲེས་སྐུ་དག་གིས། །ཆོས་དབྱིངས་ཡོངས་སུ་རབ་གསལ་ཏེ། །འགྲོ་རྣམས་འདུལ་བ་ཇི་བཞིན་དུ། །གཟུགས་ཀྱི་སྐུར་ཡང་རབ་ཏུ་མཐོང ། །དུས་
Ka117a
༄#། །གསུམ་ཞིང་རྣམས་ཐམས་ཅད་ཀྱི། །མགོན་པོ་ཇི་སྙེད་བཞུགས་པ་རྣམས། །དེ་དག་ཀུན་གྱི་མཚན་ཀྱང་སྒྲོག་།སངས་རྒྱས་རྣམ་པར་འཕྲུལ་ལ་ལྟོས། །ད་ལྟར་བྱུང་དང་འདས་པ་དང ། །སངས་རྒྱས་གང་རྣམས་མ་བྱོན་པ། །དེ་དག་ཀུན་གྱི་བསམ་ཡས་པ། །ཆོས་ཀྱི་འཁོར་ལོ་རབ་ཏུ་གྲག་།དེ་ནས་བྱང་ཆུབ་སེམས་དཔའ་ཆོས་ཀྱི་ཡོན་ཏན་གྱི་མཛོད་མི་ཟད་པའི་དཔལ་གྱི་གཟི་བརྗིད་མར་མེས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་གིས་བྱང་ཆུབ་སེམས་དཔའ་ཡི། །ཡེ་ཤེས་ཚོགས་འདི་ཀུན་ནོན་ཅིང ། །ཡེ་ཤེས་རྟོགས་པ་རྙེད་པ་རྣམས། །དེ་དག་འདི་ཡི་ཚུལ་ལ་ཞུགས། །ཆོས་ཀྱི་དབྱིངས་དང་མཉམ་པའི་དབྱངས། །ཞིང་རྣམས་ཀུན་ཏུ་རབ་ཏུ་འབྱུང ། ། སངས་རྒྱས་ཀུན་གྱི་སྤྱོད་ཡུལ་ཏེ། །བྱང་ཆུབ་སེམས་དཔའི་ཆེད་དུ་བརྗོད། །སྐད་ཅིག་རེ་རེའི་སེམས་ཀུན་ལ། །ཆོས་ཀྱི་དབྱིངས་སུ་རྣམ་པར་རྒྱུ། །དེ་བཞིན་ཉིད་ལ་གནས་ཤིང་བརྟེན། །ཆོས་རྣམས་རྒྱ་མཚོ་ཀུན་ལ་ཞུགས། །རྒྱན་གྱི་ཕ་རོལ་ཕྱིན་པ་རྣམས། །བསྐལ་པ་བྱེ་བ་བསམ་ཡས་སུ། །སངས་རྒྱས་ཐམས་ཅད་སྐུ་དག་ཏུ། །ཞིང་རྣམས་ཀུན་ན་གནས་ཤིང་སྤྱོད། །རྡུལ་རྣམས་རེ་རེའི་སྟེང་ནས་ཀྱང ། །ཆོས་རྣམས་ཀུན་ནི་རབ་ཏུ་འབྱུང ། །ཞིང་རྣམས་ཀུན་ཀྱང་ཁྱབ་པར་བྱེད། །ཡེ་ཤེས་ཆགས་མེད་སྤྱོད་ཡུལ་ལོ། །སངས་རྒྱས་ཐམས་ཅད་སྤྱོད་ཡུལ་དུ། །ལུས་པ་
Ka117b
མེད་པར་ཀུན་བཀང་ཞིང ། །རྣམ་པར་འཕྲུལ་བའི་རྣམ་སྤྱོད་པས། །སངས་རྒྱས་སྤྱོད་ཡུལ་རྣམས་ལ་ཞུགས། །སངས་རྒྱས་ཀུན་གྱི་རྗེས་སྙེགས་དབྱངས། །ཆོས་ཀྱི་དབྱིངས་ནི་རབ་སྒྲོག་པ། །ཆོས་དབྱིངས་རྗེས་སུ་ཤེས་པ་རྣམས། །དབྱངས་ཀྱི་རྒྱ་མཚོ་རྣམས་ལ་སྤྱོད། །བསྐལ་པ་རྒྱ་མཚོར་མ་འདྲེས་པར། །སྒྲ་དང་དབྱངས་རྣམས་ཤིན་ཏུ་སྒྲོག་།དུས་རྣམས་ཐམས་ཅད་ཤེས་པས་གསལ། །དབྱངས་ཀྱིས་དེ་དག་ས་ལ་ཞུགས། །སྒྲ་ཡི་ཤེས་ལ་རྨོངས་པ་མེད། །སེམས་ཅན་སྒྲ་ཡང་སྤྱོད་ཡུལ་ཏེ། །ཐམས་ཅད་མཁྱེན་པ་ཀུན་གྱི་ཡང ། །རྣམ་པར་འཕྲུལ་བའི་དབྱངས་ཤེས་སོ། །ས་ནས་སར་ཡང་ཕྱིན་གྱུར་ཅིང ། །སྟོབས་ཀྱི་ས་ལ་རབ་གནས་ཏེ། །བསྐལ་པ་བྱེ་བར་སྤྱད་པས་ན། །ཆོས་ཉིད་འདི་ལ་རབ་ཏུ་འཇུག་།དེ་ནས་བྱང་ཆུབ་སེམས་དཔའ་ཡེ་ཤེས་ཀྱི་འོད་ཟེར་ཤེས་རབ་ཀུན་ནས་སྒྲོན་མའི་བློ་གྲོས་ཀྱིས་སངས་རྒྱས་ཀྱི་བྱིན་གྱིས་བརླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་ལ་སངས་རྒྱས་བཞུགས་པ་ཡི། །ཆོས་རྣམས་དེ་དག་མཚན་ཉིད་མེད། །ཡེ་ཤེས་ས་ནི་ཐོབ་པ་རྣམས། །འཇིག་རྟེན་གཙོ་བོ་རབ་ཏུ་མཐོང ། །ཤེས་རབ་སྣང་བའི་ཀུན་འོད་ཅན། །བྱང་ཆུབ་སེམས་དཔའ་མཉམ་བཞག་རྣམས། །སངས་རྒྱས་ཐམས་ཅད་ཀུན་གྱི་ཡང ། །སྐུ་ཡི་རྣམ་པར་འཕྲུལ་ལ་ཞུགས། །ཆོས་ཀྱི་དབྱིངས་ལ་རྣམ་སྤྱད་ཅིང ། །ལུས་ཀྱི་དངོས་ལ་རབ་འཇུག་སྟེ། །ཟབ་མོའི་
Ka118a
༄#། །ཆོས་རྣམས་རྟོགས་གྱུར་ནས། །སྨོན་ལམ་དག་གིས་ཡང་དག་བྱུང ། །བསོད་ནམས་རྒྱ་མཚོས་བྱུང་གྱུར་ཅིང ། །ཡེ་ཤེས་ས་ལ་རྣམ་པར་གནས། །ཆོས་ལ་རྣམ་སྤྱོད་ཁོང་དུ་ཆུད། །སྤྱོད་པའི་མཆོག་ལ་རབ་ཏུ་སྤྱོད། །སངས་རྒྱས་ཞིང་རྣམས་ཐམས་ཅད་ཀྱི། །སངས་རྒྱས་ཀུན་གྱི་དྲུང་དག་ཏུ། །ཆོས་ཀྱི་དབྱིངས་ལ་སྤྱད་པས་ན། །རང་བཞིན་ལུས་ནི་རབ་ཏུ་མཐོང ། །ཞིང་རྣམས་འབྱམས་ཀླས་ཐམས་ཅད་དུ། །བསྐལ་པ་བྱེ་བ་བསམ་ཡས་སུ། །ཐམས་ཅད་གཟིགས་པའི་ཆོས་ཀྱི་རྣམས། །རྒྱ་མཚོ་ཀུན་ལ་རབ་ཏུ་སྤྱོད། །བདག་མཐོང་བས་ནི་ལུས་དང་རྡུལ། །གཅིག་ཏུ་འདྲེས་པར་མངོན་པར་བྱས། །མ་སྐྱེས་མཚན་ཉིད་མེད་པ་སྟེ། །ཞིང་རྣམས་ཀུན་ཏུའང་རྣམ་པར་མཛེས། །འཇིག་རྟེན་ཀུན་གྱི་བསམ་མཐུན་པར། ། སེམས་ཅན་ཀུན་ལ་མངོན་སུམ་དུ། །ལུས་ཀྱི་སྤྲིན་ནི་བསྟན་བྱས་ཤིང ། །བྱང་ཆུབ་དོན་དུ་སེམས་ཅན་འདུལ། །སངས་རྒྱས་ཐམས་ཅད་མཐུ་ཡིས་ནི། །བྱང་ཆུབ་སེམས་དཔར་བརྗོད་པ་སྟེ། །གང་གིས་མགོན་པོ་མཐོང་བ་ཡི། །རྒྱལ་བའི་བྱིན་རླབས་ཤིན་ཏུ་ཟབ། །མགོན་པོ་ཇི་སྙེད་གང་བཞུགས་པའི། །བྱིན་རླབས་མཐའ་དང་དབུས་མེད་དེ། །ཆོས་དབྱིངས་རབ་ཏུ་གང་བྱས་ནས། །བྱང་ཆུབ་སེམས་དཔའ་རྣམ་འཚང་རྒྱ། །དེ་ནས་བྱང་ཆུབ་སེམས་དཔའ་མེ་ཏོག་ཀུན་ནས་འོད་འཕྲོ་གཙུག་ཕུད་རབ་ཏུ་འཕྱང་བས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་
Ka118b
བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་ཀུན་ཏུ་སངས་རྒྱས་ཀྱི། །གསུང་གི་དཀྱིལ་འཁོར་སྒྲ་འབྱིན་ཏེ། །ཆོས་ཀྱི་དབྱིངས་རྣམས་གང་བྱས་ནས། ། ཡོན་ཏན་སྤྲིན་ནི་རབ་ཏུ་བརྗོད། །ཡང་དག་སངས་རྒྱས་ཆོས་ཀྱི་སྐུ། །རྣམ་དག་ནམ་མཁའ་འདྲ་བ་སྟེ། །གཟུགས་ཀྱི་སྐུ་ཡང་རབ་སྟོན་ཅིང ། །ཆོས་ཉིད་འདི་ལ་ཤིན་ཏུ་འཇུག་།དགའ་དང་མོས་པའི་ཤུགས་རྣམས་དང ། །སངས་རྒྱས་སྟོབས་རྣམས་ཐམས་ཅད་ལ། །རབ་ཏུ་གནས་ཤིང་དེ་དག་ནི། །དེ་བཞིན་གཤེགས་པའི་ཡེ་ཤེས་འཇུག་།ཤེས་རབ་ཆུང་ངུས་ཆོས་འདི་དག་།ཀུན་ནས་ཤེས་པར་མི་ནུས་ཏེ། །ཡེ་ཤེས་མིག་ནི་རབ་སྦྱངས་ཤིང ། །འདི་ཡི་ཚུལ་ལ་འཇུག་པར་འགྱུར། །རབ་ཏུ་གནས་དང་བྱིན་རླབས་དང ། །ཆོས་ཀུན་རྣམ་པར་སྤྱད་པ་དང ། །རབ་ཏུ་འཇུག་དང་ལྡན་པ་ཡི། །མཉམ་པ་ཉིད་ལ་རབ་ཏུ་ཞུགས། །ཆོས་རྣམས་མཐའ་ཡས་ཀློང་གི་རྣམས། །ཆོས་ཀུན་མཚན་ཉིད་རྣམས་ལ་སྟེ། །ཀུན་མཁྱེན་ཉིད་ལ་རབ་ཞུགས་ཤིང ། །ཆོས་ཀྱི་རྒྱ་མཚོ་ཀུན་ལ་སྤྱོད། །སངས་རྒྱས་ཞིང་ན་ཀུན་འཁོད་ཅིང ། །ཐམས་ཅད་ཀུན་ན་རྣམ་པར་མཛེས། །འོང་བ་མེད་ཅིང་འཕོས་པ་མེད། །སངས་རྒྱས་ཆོས་ཉིད་དེ་འདྲའོ། །གཟུགས་བརྙན་འདྲ་བའི་སྐུ་རྣམས་ནི། །སེམས་ཅན་རྒྱ་མཚོའི་ནང་ན་སྣང ། །མོས་པ་ཅི་འདྲ་ཡོད་པའི་རྣམས། །དེ་བཞིན་མགོན་པོ་ཀུན་གྱིས་མཐོང ། །ཀུན་ཏུ་བཟང་པོའི་སྨོན་ལམ་དང ། །སྤྱོད་པ་མང་པོ་སུས་
Ka119a
༄#། །སྦྱངས་པ། །དེ་དག་ཐམས་ཅད་བ་སྤུ་ལའང ། །རྣམ་འཕྲུལ་གཞན་དང་གཞན་དག་མཐོང ། །ལུས་ཀྱི་རྣམས་ནི་རེ་རེས་ཀྱང ། །ཆོས་ཀྱི་དབྱིངས་རྣམས་ཀུན་ཏུ་ཁྱབ།། འཁོར་ལོ་ཀུན་ན་འཁོར་བ་སྟེ། །ཆོས་ཀྱི་འཁོར་ལོ་བསམ་མི་ཁྱབ། །དེ་ནས་བྱང་ཆུབ་སེམས་དཔའ་འོད་ཟེར་དང ། །གཟི་བརྗིད་མི་ཟད་པའི་རྒྱལ་པོ་བློ་གྲོས་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྐུ་ནི་ཐམས་ཅད་ནས། །འོད་ཟེར་སྤྲིན་མང་ཕྱོགས་རྣམས་བཅུར། །ཁ་དོག་མཐའ་ཡས་འབར་བའི་འོད། །སེམས་ཅན་བསམ་པ་ཀུན་ལ་འཕྲོ། །སངས་རྒྱས་ཞིང་རྣམས་ཐམས་ཅད་ཀྱི། །སྙིང་པོ་བྱང་ཆུབ་ཀུན་ན་བཞུགས། །བདུད་རྣམས་ཐམས་ཅད་རབ་བཏུལ་ཏེ།། འཁོར་གྱི་ནང་ན་རྣམ་པར་མཛེས། །ཐམས་ཅད་རྡུལ་ནའང་མ་འདྲེས་པར། །འོད་ཟེར་དཀྱིལ་འཁོར་རྒྱས་པར་འགེངས། །ཕྱོགས་རྣམས་གཞན་དང་གཞན་ལམ་དུ། །ཞིང་གི་རྒྱུད་རྣམས་རབ་ཏུ་སྟོན། །ཞིང་གི་རྣམས་ནི་རྒྱ་མཚོའི་ཀློང ། །ཕྱོགས་ཀྱི་རྣམས་ཀྱང་ཀུན་ཏུ་གནོན། །ཞིང་རྣམས་ཐང་ཆེན་མཉམ་ཞིང་དག། ཨིནྡྲ་ནཱི་ལར་ཀུན་ནས་གནས། །སྤྱིའི་ཚུགས་དག་དང་སྣརེལ་ཞི་དང ། །པདྨོའི་དབྱིབས་དང་ཁྱད་ཁྱུད་དང ། །དཀྱིལ་འཁོར་འཁོར་ལོའི་ཁྱད་པར་དུ། །གཟུགས་རྣམས་ཀུན་གྱིས་རབ་ཏུ་གནས། །ཆོས་ཀྱི་དབྱིངས་རྣམས་གར་ཕྱིན་པར། །ཐུག་པ་
Ka119b
མེད་པར་གྲམ་བརྡལ་བ། །དེ་དག་ཀུན་གྱི་འཁོར་རྣམས་སུ། །ཤིན་ཏུ་བསྟན་པའི་ཆོས་འབྱུང་ངོ ། །དེ་བཞིན་གཤེགས་པའི་སྐུ་དབྱིངས་ན། །འཁོད་པའི་ཞིང་རྣམས་བསམ་མི་ཁྱབ། །དེ་དག་ཀུན་ཏུ་ཆོས་ཉིད་འདི། །འཇིག་རྟེན་མགོན་པོ་རྣམས་ཀྱང་སྟོན། །ཐ་དད་མེད་པའི་ཆོས་ཀྱི་དབྱིངས། །ཆོས་ཀྱི་འཁོར་ལོ་རབ་ཏུ་འཁོར། །གཅིག་གི་ཚུལ་གྱི་རྣམ་པ་ཡིས། །ཆོས་བསྟན་པ་ནི་ཀུན་ཏུ་འབྱུང ། །སངས་རྒྱས་གསུང་གི་དཀྱིལ་འཁོར་ནི། །ཚུལ་རྣམས་ཐམས་ཅད་རབ་ཏུ་བརྗོད། །དད་པ་རྒྱ་མཚོའི་ཚུལ་དག་གིས། །མི་ཟད་ཚུལ་རྣམས་རབ་ཏུ་བསྟན། །སངས་རྒྱས་ཞིང་རྣམས་ཀུན་ན་ཡང ། །རྒྱལ་བ་རྣམས་ནི་མིག་ཡོར་འདྲ། །སྙིང་པོ་བྱང་ཆུབ་རྣམས་ན་སྣང ། །འབྱུང་བ་དག་ཀྱང་ཡོད་པ་མིན། །དེ་ནས་བྱང་ཆུབ་སེམས་དཔའ་ཆོས་ཀྱི་དབྱིངས་སུ་འོད་འཕྲོ་བའི་རྣམ་པར་སྣང་བ་འབྱུང་བའི་བློ་གྲོས་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བལྟ་ཞིང་བལྟ་ཞིང་སངས་རྒྱས་རྣམས། །སྐུ་གཟུགས་བསམ་གྱིས་མི་ཁྱབ་སྟེ། །དགའ་བ་རྒྱ་མཚོ་ཀུན་ཀྱང་འབྱུང ། །ཆོས་ཀྱི་ཤུགས་ནི་རབ་ཏུ་འཕེལ། །མཚན་རབ་ཀུན་ནས་སངས་རྒྱས་རྣམས། །ཕྱོགས་བཅུ་ཀུན་ཏུ་རབ་ཏུ་འབྱུང ། །རྡུལ་རྣམས་ཀུན་ཏུ་འཇུག་པ་ཡིས། །སངས་རྒྱས་སྤྲིན་ཀྱང་དེ་བཞིན་བསྟན། །སྐད་ཅིག་སྐད་ཅིག་སེམས་ཀུན་ལ། །སངས་རྒྱས་འོད་ནི་དཔལ་གྱིས་འབར། །རྣམ་འཕྲུལ་གཞན་དང་གཞན་དག་གིས། །ཞིང་
Ka120a
༄#། །རྣམས་རྒྱ་མཚོ་ཀུན་ན་སྣང ། །བྱང་ཆུབ་སེམས་དཔའ་ཤེས་རབ་ཆེ། །རྒྱ་མཚོ་ཆོས་ལས་བྱུང་བ་རྣམས། །སངས་རྒྱས་ཀུན་གྱིས་བྱིན་རླབས་པ། །འདི་ཡི་ཡུལ་ལ་རྣམ་པར་སྤྱོད། །ཀུན་ཏུ་བཟང་པོའི་སྨོན་ལམ་ལ། །གང་རྣམས་ཤིན་ཏུ་གནས་གྱུར་པ། །དེ་དང་དེ་རྣམས་ཞིང་དག་ཏུ། །སངས་རྒྱས་རྣམ་འཕྲུལ་ཀུན་ལ་ལྟ། །ཡེ་ཤེས་ཟབ་མོ་རྣམ་གནོན་ཅིང་།། ཆོས་ཀྱི་དབྱིངས་ལ་གཞོལ་བ་ནི། །མོས་པ་རྒྱ་མཚོ་ཤེས་པ་སྟེ། །སྨོན་ལམ་ཀུན་གྱིས་བྱུང་བའོ། །སངས་རྒྱས་ཀུན་གྱི་སྐུ་དང་གསུང ། །ཆགས་པ་མེད་ལ་རབ་ཏུ་ཞུགས། །སྤྱོད་པ་གཞན་དང་གཞན་དག་གིས། །སྤྱོད་ཡུལ་ཀུན་ཀྱང་ཁོང་དུ་ཆུད། །སངས་རྒྱས་ཀུན་གྱི་སྐུ་གནས་ཤིང ། །ཡེ་ཤེས་སྤྱོད་ཡུལ་གྱུར་པ་རྣམས། །ཆོས་ཀྱི་དབྱིངས་ལ་རབ་བརྩོན་པ། །རྒྱལ་བ་རྣམས་ཀྱི་ས་གནོན་ཏོ། །སྐད་ཅིག་སེམས་ཀྱིས་ཞིང་གི་རྣམས། །སངས་རྒྱས་ཞིང་གི་རྡུལ་མཉམ་པ། །དེ་དག་ཆོས་ཉིད་ཇི་བཞིན་དུ། །རྡུལ་གཅིག་སྟེང་དུ་རྣམ་པར་སྤྱོད། །ཞིང་རྣམས་ཇི་སྙེད་ཐམས་ཅད་ན། །ཞིང་གི་རྣམ་འཕྲུལ་གང་ཡོད་པ། །ཆོས་ཉིད་འདི་ལ་ཞུགས་པ་རྣམས། །ཞིང་གཅིག་ཏུ་ནི་སྡུད་པ་བྱེད། །དེ་ནས་བྱང་ཆུབ་སེམས་དཔའ་སྟོབས་དང ། བརྩོན་འགྲུས་ཆགས་པ་མེད་པའི་བློ་གྲོས་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་རྒྱ་མཚོ་ཐམས་ཅད་དུ། །དེ་དག་གསུང་ནི་ཟབ་མོ་འབྱུང ། །
Ka120b
དབྱངས་ཀྱི་ཡན་ལག་ཀུན་རྒྱས་པ། །ཆོས་ཀྱི་སྤྲིན་གྱི་ཆར་འབེབས་སོ། །བརྗོད་པ་རྒྱ་མཚོ་ཐམས་ཅད་ཀྱིས། །སེམས་ཅན་ཀུན་གྱི་སྐད་དག་ཏུ། །སངས་རྒྱས་ཞིང་རྣམས་ཀུན་ཏུ་ཡང ། །ཆོས་རྣམས་བསྟན་པ་རབ་ཏུ་འབྱུང ། །ཞིང་རྣམས་ཀུན་ཏུ་མ་ལུས་པར། །སངས་རྒྱས་རྣམས་པར་འཕྲུལ་མཐོང་ཞིང ། །སངས་རྒྱས་གསུང་རྣམས་ཐོས་པ་དང ། །བྱང་ཆུབ་མཆོག་ཕྱིར་ཀུན་ཀྱང་འཇུག། རྡུལ་རྣམས་རེ་རེའི་སྟེང་ནས་ཀྱང ། །ཆོས་ཀྱི་དབྱིངས་ཀྱི་ཕྱོགས་ཚུལ་གྱིས། །སངས་རྒྱས་ཞིང་རྣམས་ཀུན་བཀང་ཞིང ། །སངས་རྒྱས་རྣམ་འཕྲུལ་སྟོན་པ་བྱེད། །ཆོས་ཀྱི་སྐུ་ནི་ཐ་དད་མིན། །ནམ་མཁའ་བཞིན་ཏེ་ཆགས་པ་མེད། །གཟུགས་ཀྱི་སྐུར་ནི་རྣམ་དམིགས་པ། །མིག་ཡོར་སྣང་བའི་མཚན་ཉིད་དོ། །མིག་ཡོར་ཡུལ་ལ་མི་གནས་ཏེ། །ནམ་མཁའ་བཞིན་དུ་དངོས་པོ་མེད། །མཉམ་པ་ཉིད་འདི་རྟོགས་གྱུར་ནས། །ཡེ་ཤེས་རྒྱ་མཚོ་མཐོང་བར་འགྱུར། །སངས་རྒྱས་སྐུ་ནི་མ་སྐྱེས་ཏེ། །གཟུང་བ་མེད་ཅིང་འབྱུང་བ་མེད། །ནམ་མཁའ་མཉམ་པ་ཉིད་དང་མཚུངས། །གཟུང་དུ་མེད་ལས་འདི་བསྟན་ཏོ། །ཞིང་རྣམས་ཀུན་གྱི་སངས་རྒྱས་རྣམས། །དེ་དག་སྤུ་གཅིག་རྩེ་ལ་ཚོགས། །ཡེ་ཤེས་མིག་དང་ལྡན་པ་ཡིས། །སྤུ་རྣམས་ཀུན་ཏུ་རྣམ་འཕྲུལ་མཐོང ། །རྣམ་པར་སྣང་མཛད་སྨོན་ལམ་སྟེ། །ཆོས་ཀྱི་དབྱིངས་ནི་ཀུན་བཀང་ཞིང་།། བླ་མེད་ཆོས་ཀྱི་འཁོར་ལོ་དག་།ཞིང་རྣམས་ཀུན་ན་རྟག་ཏུ་འཁོར། །ཇི་སྟེ་བསྐལ་པ་བསམ་ཡས་པར། །སྤུ་རྩེ་གཅིག་ཏུ་རྣམ་སྤྲུལ་པ། །སངས་རྒྱས་ཀུན་གྱིས་བཤད་མཛད་ཀྱང ། །དེ་ཡི་མཐའ་ནི་རྙེད་པར་
Ka121a
༄#། །དཀའ། །ཇི་ལྟར་གླིང་བཞི་པ་འདིར་དེ་བཞིན་གཤེགས་པས་རྣམ་པར་སྤྲུལ་པའི་སྙིང་པོ་བྱང་ཆུབ་ཏུ་ཕྱོགས་བཅུ་ནས་བྱང་ཆུབ་སེམས་དཔའ་རྣམས་འདུས་པར་གྱུར་པ་དེ་བཞིན་དུ་འཇིག་རྟེན་གྱི་ཁམས་རྒྱ་མཚོའི་གླིང་བཞི་པ་ཐམས་ཅད་ཀྱི་གླིང་བཞི་པ་རེ་རེར་ཡང་དེ་བཞིན་གཤེགས་པས་རྣམ་པར་སྤྲུལ་པའི་སྙིང་པོ་བྱང་ཆུབ་དག་ཏུ་བྱང་ཆུབ་སེམས་དཔའ་ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་བྱེད་པའི་རྡུལ་ཤིན་ཏུ་ཕྲ་བ་སྙེད་ཀུན་ནས་འདུས་པར་གྱུར་ཏོ། །འདི་ན་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་སྙིང་པོ་བྱང་ཆུབ་དེ་བཞིན་གཤེགས་པས་རྣམ་པར་སྤྲུལ་པ་དག་ཏུ་ཀུན་ནས་འདུས་པའི་བྱང་ཆུབ་སེམས་དཔའ་དེ་དག་ཀྱང་ཆོས་ཉིད་འདི་ཁོ་ན་རབ་ཏུ་སྟོན་ཏོ།། །།ཤིན་ཏུ་རྒྱས་པ་ཆེན་པོའི་མདོ།་སངས་རྒྱས་ཕལ་པོ་ཆེ་ཞེས་བྱ་བ་ལས། དེ་བཞིན་གཤེགས་པའི་ལེའུ་སྟེ། གཉིས་པའོ།། །།བམ་པོ་བདུན་པ། དེ་ནས་བཅོམ་ལྡན་འདས་ཀྱི་སྤྱན་སྔར་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་སེངྒེའི་ཁྲི་པདྨོའི་སྙིང་པོ་ཅན་དེ་ཉིད་ལ་འདུག་སྟེ། དེའི་ཚེ་སངས་རྒྱས་ཀྱི་མཐུས་ཏིང་ངེ་འཛིན་སངས་རྒྱས་ཐམས་ཅད་དེ་བཞིན་གཤེགས་པ་རྣམ་པར་སྣང་མཛད་ཀྱི་སྐུའི་སྙིང་པོ་ཞེས་བྱ་བ་དེ་བཞིན་གཤེགས་པ་ཐམས་ཅད་མཉམ་པ་ཉིད་ཀྱི་རྗེས་སུ་སོང་བའི་རང་བཞིན། ཆོས་ཀྱི་དབྱིངས་ཀྱི་གཟུགས་བརྙན་རྣམ་པར་
Ka121b
བཏགས་པའི་ཚོགས། ནམ་མཁའི་དབྱིངས་ཆགས་པ་མེད་ཅིང་རྒྱ་ཆེ་བ་ཁྱབ་པར་བྱེད་པའི་རང་བཞིན། ཆོས་ཀྱི་དབྱིངས་རྒྱ་མཚོའི་ཀློང་མཉམ་པ་ཉིད་ཀྱི་རྗེས་སུ་སོང་ཞིང་ཤིན་ཏུ་བརྡལ་བའི་ཚོགས་ཆོས་ཐམས་ཅད་ཀྱི་སྒོའི་ཏིང་ངེ་འཛིན་གྱི་དཀྱིལ་འཁོར་ཡང་དག་པར་འབྱུང་བས་རྒྱས་པར་འགེངས་པ། ཕྱོགས་ཐམས་ཅད་དུ་ཡང་དག་པར་ཞུགས་པའི་ཆོས་ཀྱི་དབྱིངས་ཀྱི་ལུས་ཀྱིས་ཀུན་ནས་ཡོག་པར་བྱས་པའི་རང་བཞིན་གྱི་སྙིང་པོ་ཅན། དུས་གསུམ་གྱི་སངས་རྒྱས་འབྱུང་བའི་ཡེ་ཤེས་སྣང་བ་རྒྱ་མཚོའི་ཀློང ། ཕྱོགས་ཐམས་ཅད་དུ་སྒོ་ཀུན་ནས་ཚུལ་རྒྱ་མཚོ་རྣམ་པར་རིག་པར་བྱ་བས་མངོན་དུ་ཡང་དག་པར་སྟོན་པ། སངས་རྒྱས་ཐམས་ཅད་ཀྱི་སྟོབས་དང་རྣམ་པར་ཐར་བས་བྱང་ཆུབ་སེམས་དཔའི་ཡེ་ཤེས་ཀྱི་ལུས་རྒྱས་པར་འགེངས་པའི་སྙིང་པོ་ཅན། ཞིང་འབྱམས་ཀླས་པ་ཐམས་ཅད་མ་ལུས་པར་ཆོས་ཀྱི་དབྱིངས་སུ་འཇུག་པས་རྒྱས་པར་འགེངས་པའི་ཡེ་ཤེས་དང་ལྡན་པ། སངས་རྒྱས་ཀྱི་ཡོན་ཏན་རྒྱ་མཚོ་ཐམས་ཅད་ཡོངས་སུ་གྲུབ་པར་བྱེད་པ། བསྐལ་པ་ཐམས་ཅད་དུ་སྨོན་ལམ་རྒྱ་མཚོས་རྣམ་པར་སྣང་བར་བྱེད་པའི་འོད་ཅན། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་སྟོན་ཅིང་རྗོད་པའི་བྱིན་གྱི་རླབས་ལ་མཉམ་པར་བཞག་པར་གྱུར་ཏོ། །ཇི་ལྟར་བྱང་ཆུབ་སེམས་དཔའ་ཀུན་ཏུ་བཟང་པོས་བཅོམ་ལྡན་འདས་ཀྱི་ཞབས་ཀྱི་དྲུང་དུ་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཐམས་ཅད་དེ་བཞིན་གཤེགས་པ་རྣམ་པར་སྣང་མཛད་ཀྱི་སྐུའི་
Ka122a
༄#། །སྙིང་པོ་ཞེས་བྱ་བ་འདི་ལ་མཉམ་པར་བཞག་པ་དེ་བཞིན་དུ། འཇིག་རྟེན་གྱི་ཁམས་འབྱམས་ཀླས་པ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་དབྱིངས་ཀྱི་མཐས་གཏུགས་པ།་ཕྱོགས་རྒྱ་མཚོ་ཐམས་ཅད་ཀྱི་ཁོངས་སུ་གཏོགས་པ། དུས་གསུམ་ཐམས་ཅད་ན་ཡོད་པའི་སངས་རྒྱས་ཀྱི་ཞིང་འབྱུང་བའི་ཁམས་ཆོས་ཀྱི་དབྱིངས་རྒྱ་ཆེན་པོས་ནོན་པའི་རིགས་སུ་གཏོགས་པ།་ཤིན་ཏུ་ཕྲ་ཞིང་བསྒྲིབས་པ་མེད་པ་དང ། ཕྱོགས་རྒྱ་ཆེན་པོ་རྒྱ་མཚོ་ཐམས་ཅད་སྣང་བ་འཇིག་རྟེན་གྱི་ཁམས་རྒྱ་མཚོའི་རིས་སུ་གཏོགས་པས་རྣམ་པར་ནོན་པ། དེ་བཞིན་གཤེགས་པའི་སྤྱན་གྱིས་རྣམ་པར་གཟིགས་པ། སངས་རྒྱས་ཀྱི་སྟོབས་ཐོགས་པ་མེད་པས་ཆུད་པ། ཆོས་ཀྱི་དབྱིངས་དང་སངས་རྒྱས་ཀྱི་སྐུ་ཐམས་ཅད་ཀྱི་གཟུགས་བརྙན་རབ་ཏུ་སྣང་བས་ཆོས་ཀྱི་དབྱིངས་ཀྱི་རྡུལ་མ་ལུས་པ་ཀུན་ཏུ་གཏོགས་པ། ཆོས་ཀྱི་དབྱིངས་མ་ལུས་པ་ཐམས་ཅད་དུ་རྒྱས་པར་གང་བའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་དང་མཉམ་པ་དག་ཏུ་རྡུལ་ཕྲ་མོ་རེ་རེ་ལའང་ཞིང་འཇིག་རྟེན་གྱི་ཁམས་རྒྱ་མཚོ་རྡུལ་ཤིན་ཏུ་ཕྲ་བ་སྙེད་ལ་རབ་ཏུ་ཞུགས་ནས་ཞིང་རེ་རེ་ཞིང་ཡང་དེ་བཞིན་གཤེགས་པ་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ལ་རབ་ཏུ་ཞུགས་ཏེ། དེ་བཞིན་གཤེགས་པ་རེ་རེའི་ཞབས་ཀྱི་དྲུང་དུ་ཡང་ལུས་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ཏིང་ངེ་འཛིན་སངས་རྒྱས་ཐམས་ཅད་དེ་བཞིན་
Ka122b
གཤེགས་པ་རྣམ་པར་སྣང་མཛད་ཀྱི་སྐུའི་སྙིང་པོ་ཞེས་བྱ་བ་འདི་ལ་མཉམ་པར་བཞག་གོ་།བྱང་ཆུབ་སེམས་དཔའ་ཀུན་ཏུ་བཟང་པོས་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཐམས་ཅད་དེ་བཞིན་གཤེགས་པ་རྣམ་པར་སྣང་མཛད་ཀྱི་སྐུའི་སྙིང་པོ་ཞེས་བྱ་བ་དེ་ལ་མཉམ་པར་བཞག་པའི་རྗེས་ལ་དེའི་ཚེ་ཕྱོགས་བཅུའི་སངས་རྒྱས་ཀྱི་ཞིང་འབྱམས་ཀླས་པ་ཐམས་ཅད་ནས་དེ་བཞིན་གཤེགས་པ་ཐམས་ཅད་ཀྱིས་ཞལ་བསྟན་ཏོ། །ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་དེ་དག་གིས་འདི་སྐད་ཅེས་ཀྱང་བཀའ་སྩལ་ཏོ། །རིགས་ཀྱི་བུ། ཁྱོད་དེ་ལྟར་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཐམས་ཅད་དེ་བཞིན་གཤེགས་པ་རྣམ་པར་སྣང་མཛད་ཀྱི་སྐུའི་སྙིང་པོ་འདི་ལ་མཉམ་པར་གཞག་པ་ལེགས་སོ། །ལེགས་སོ། །ཀྱེ་རྒྱལ་བའི་སྲས། ཁྱོད་ལ་ཕྱོག་\་Pཿ YཱོGཥ?\་བཅུའི་དེ་བཞིན་གཤེགས་པ་འདི་དག་ཐམས་ཅད་ཀྱང་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་འདིའི་སྔོན་གྱི་སྨོན་ལམ་གྱི་བྱིན་གྱི་རླབས་དང ། ཁྱོད་ཀྱི་སངས་རྒྱས་ཐམས་ཅད་ཀྱི་སྨོན་ལམ་དང ། སྤྱོད་པ་ཡོངས་སུ་དག་པའི་ཡང་མཐུས་འདི་ལྟ་སྟེ། སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་རབ་ཏུ་བསྐོར་བ་དང ། དེ་བཞིན་གཤེགས་པའི་ཡེ་ཤེས་རྒྱ་མཚོ་ཐམས་ཅད་ཀྱི་རྣམ་པར་དབྱེ་བ་དང ། ཆོས་ཐམས་ཅད་ཀྱི་ཚུལ་གྱིས་ཕྱོགས་རྒྱ་མཚོ་མ་ལུས་པར་སྣང་བར་བྱ་བ་དང ། སེམས་ཅན་གྱི་ཁམས་ཐམས་ཅད་ཀྱི་ཀུན་ནས་ཉོན་མོངས་པ་དང ། རྣམ་པར་བྱང་བ་དང །
Ka123a
༄#། །ཆགས་པ་མེད་པར་འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་ཡོངས་སུ་གནོན་པ་དང ། སངས་རྒྱས་ཀྱི་ཡུལ་ཐམས་ཅད་ལ་ཆགས་པ་མེད་པར་འཇུག་པར་བྱ་བ་དང ། སངས་རྒྱས་ཀྱི་འཁོར་ཐམས་ཅད་སྒོ་ཀུན་ནས་རབ་ཏུ་བརྗོད་པ་དང ། ཆོས་ཀྱི་ཚུལ་གྱི་དཀྱིལ་འཁོར་ཐམས་ཅད་ལ་ཞུགས་པས་ཐམས་ཅད་མཁྱེན་པ་ཉིད་ཡོངས་སུ་གཟུང་བ་དང ། ཆོས་ཀྱི་སྣང་བ་ཐམས་ཅད་ཀྱི་ཚུལ་རྣམ་པར་བལྟ་བ་དང ། སེམས་ཅན་གྱི་དབང་པོ་རྒྱ་མཚོ་ཐམས་ཅད་ཡོངས་སུ་ཤེས་པར་བྱ་བ་དང ། དེ་བཞིན་གཤེགས་པ་ཐམས་ཅད་ཀྱི་གསུང་གི་ཡན་ལག་རྒྱ་མཚོའི་དབྱངས་ཡོངས་སུ་གཟུང་བའི་ཕྱིར་བྱིན་གྱིས་རློབ་པ་མཛད་དོ། །དེ་ནས་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཐམས་ཅད་མཁྱེན་པ་ཉིད་ཀྱི་སྟོབས་ལ་རབ་ཏུ་འཇུག་པའི་ཡེ་ཤེས་ཀྱང་ཉེ་བར་བསྒྲུབས་སོ། །ཆོས་ཀྱི་དབྱིངས་མཐའ་དང་དབུས་མེད་པ་ལ་རབ་ཏུ་འཇུག་པའི་ཡེ་ཤེས་ཀྱང་ཉེ་བར་བསྒྲུབས་སོ། ། དུས་གསུམ་གྱི་སངས་རྒྱས་ཀྱི་དཀྱིལ་འཁོར་ཐམས་ཅད་ཡང་དག་པར་འབྱུང་བའི་ཡེ་ཤེས་ཀྱང་ཉེ་བར་བསྒྲུབས་སོ། །འཇིག་རྟེན་གྱི་ཁམས་རྒྱ་མཚོ་ཐམས་ཅད་འཇིག་པ་དང་འདུ་བའི་ཡེ་ཤེས་ཀྱང་ཉེ་བར་བསྒྲུབས་སོ། །ཆོས་ཀྱི་དབྱིངས་འབྱམས་ཀླས་པ་མཐའ་དང་དབུས་མེད་པའི་ཡེ་ཤེས་ཀྱང་ཉེ་བར་བསྒྲུབས་སོ། །སངས་རྒྱས་ཀྱི་རྣམ་པར་ཐར་པ་ཟབ་མོ་ཐ་མི་དད་པ་དང ། ཏིང་ངེ་འཛིན་
Ka123b
ཐམས་ཅད་ལ་རྣམ་པར་གནས་པའི་ཡེ་ཤེས་ཀྱང་ཉེ་བར་བསྒྲུབས་སོ། །བྱང་ཆུབ་སེམས་དཔའ་ཐམས་ཅད་ཀྱི་དབང་པོ་རྒྱ་མཚོ་ལ་རབ་ཏུ་འཇུག་པའི་ཡེ་ཤེས་ཀྱང་ཉེ་བར་བསྒྲུབས་སོ། །སེམས་ཅན་ཐམས་ཅད་ཀྱི་སྐད་རྒྱ་མཚོ་དང ། ཆོས་ཀྱི་འཁོར་ལོའི་ངེས་པའི་ཚིག་གི་ཡེ་ཤེས་ཀྱང་ཉེ་བར་བསྒྲུབས་སོ། །འཇིག་རྟེན་གྱི་ཁམས་མང་པོ་ཐམས་ཅད་ཀྱི་རྗེས་སུ་སོང་ཞིང་ཆོས་ཀྱི་དབྱིངས་ཐམས་ཅད་དུ་ལུས་ཡང་དག་པར་གཞོལ་བའི་ཡེ་ཤེས་ཀྱང་ཉེ་བར་བསྒྲུབས་སོ། །སངས་རྒྱས་ཀྱི་གསུང་གི་ཡན་ལག་དང་སྒྲ་དབྱངས་ཀྱང་ཉེ་བར་བསྒྲུབས་སོ། །ཇི་ལྟར་འཇིག་རྟེན་གྱི་ཁམས་འདིའི་བཅོམ་ལྡན་འདས་ཀྱི་ཞབས་ཀྱི་དྲུང་ན་འདུག་པ་ལ་ཉེ་བར་བསྒྲུབས་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། འཇིག་རྟེན་གྱི་ཁམས་རྒྱ་མཚོ་དག་དང་རྡུལ་ཤིན་ཏུ་ཕྲ་བའི་ཁོངས་ན་ལུས་འཁོད་པ་ཐམས་ཅད་ལ་ཡང་ཉེ་བར་བསྒྲུབས་སོ། །དེ་ཅིའི་ཕྱིར་ཞེ་ན། དེ་ནི། འདི་ལྟར་ཏིང་ངེ་འཛིན་དེ་ཉིད་ཀྱི་ཆོས་ཉིད་ཐོབ་པའི་ཕྱིར་རོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་སྤྲུལ་པའི་སངས་རྒྱས་བཅོམ་ལྡན་འདས་དེ་དག་གིས་ཕྱག་གཡས་པ་མཚན་དང་དཔེ་བྱད་བཟང་པོས་རྣམ་པར་མཛེས་པར་བརྒྱན་པ། འོད་ཟེར་གྱི་དྲ་བའི་མེ་ཏོག་སྣ་ཚོགས་ཤིན་ཏུ་རྒྱས་པ། འོད་ཀྱི་དཀྱིལ་འཁོར་རྣམ་པར་དག་པའི་སྤྲིན་འགྱེད་པ། རིན་པོ་ཆེ་འོད་འཕྲོ་བ་ཐམས་ཅད་ཀྱི་སྤྲིན་གྱིས་རྣམ་པར་གསལ་བར་གྱུར་པ། ཕྱོགས་ཐམས་ཅད་དུ་སྤོས་འོད་འཕྲོ་བའི་སྤྲིན་གྱི་འོད་ཀྱིས་རྣམ་པར་སྣང་
Ka124a
༄#། །པ།་སངས་རྒྱས་ཐམས་ཅད་ཀྱི་གསུང་གི་ཡན་ལག་གི་དཀྱིལ་འཁོར་གྱི་རྗེས་སུ་སྒྲ་འབྱིན་པ། སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་དང ། ཁྱུ་མཆོག་གི་མཐུ་ཕྱུང་བ་ཡང་དག་པར་སྟོན་པ། བྱང་ཆུབ་སེམས་དཔའ་འདས་པ་དང ། མ་འོངས་པ་དང ། ད་ལྟར་བྱུང་བ་རྣམས་ཀྱི་ཀུན་ཏུ་བཟང་པོའི་སྨོན་ལམ་གྱི་དཀྱིལ་འཁོར་རབ་ཏུ་སྣང་བ་རྣམ་པར་སྟོན་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་སྣང་བ་ཡང་དག་པར་སྟོན་པ། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་གཟུགས་བརྙན་འབྱུང་བ་རྣམས་བརྐྱངས་ཏེ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱི་བོར་བཞག་གོ་།འདིར་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་རྒྱ་མཚོ་ཐམས་ཅད་དང་རྡུལ་ཤིན་ཏུ་ཕྲ་བའི་ཁོངས་ན་ཡོད་པ་ཐམས་ཅད་དུ་ཡང་དེ་བཞིན་གཤེགས་པའི་ཞབས་ཀྱི་དྲུང་དག་ཏུ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱི་བོ་ལ་ཕྱག་རྒྱ་མཚོའི་སྤྲིན་རྣམས་རབ་ཏུ་བཞག་གོ། བྱང་ཆུབ་སེམས་དཔའ་ཀུན་ཏུ་བཟང་པོ་ལ་སངས་རྒྱས་བཅོམ་ལྡན་འདས་དེ་དག་གིས་རེག་མ་ཐག་ཏུ་དེ་ནས་དེའི་མོད་ལ་ཏིང་ངེ་འཛིན་དེ་ལས་ལྡང་བའི་སྒོ་རྒྱ་མཚོ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུས་གསུམ་ཐམས་ཅད་དུ་སེམས་ཀྱི་སྐད་ཅིག་རེ་རེ་ལ་ཏིང་ངེ་འཛིན་ལས་ལྡང་བའི་ཡེ་ཤེས་མ་འདྲེས་པ་ལ་མཁས་པ་དང ། ཏིང་ངེ་འཛིན་ལས་ལྡང་བའི་བྱིན་གྱི་རླབས་ཀྱི་སྒོ་ཆོས་ཀྱི་དབྱིངས་དང ། དུས་གསུམ་དུ་མཉམ་
Ka124b
པའི་རྡུལ་ཐམས་ཅད་ཀྱི་སྒོ་དང ། སངས་རྒྱས་ཀྱི་ཞིང་འདས་པ་དང ། མ་འོངས་པ་དང ། ད་ལྟར་བྱུང་བ་ཐམས་ཅད་ཀྱི་སྒོ་དང ། སེམས་ཅན་མ་ལུས་པའི་གནས་ཐམས་ཅད་དང་མཉམ་ཞིང་སེམས་ཅན་ཐམས་ཅད་ཀྱི་སེམས་རྒྱ་མཚོ་ལ་འཇུག་པའི་སྒོ་དང ། སེམས་ཅན་ཐམས་ཅད་ཀྱི་ལུས་དང་མིང་གི་འཁོར་ལོ་ལས་ལྡང་བའི་སྒོ་དང ། ཕྱོགས་མཚམས་ཐམས་ཅད་དུ་ཆོས་ཀྱི་དབྱིངས་རྣམ་པར་འབྱེད་པའི་སྒོ་དང ། རྡུལ་ཤིན་ཏུ་ཕྲ་བ་ཐམས་ཅད་དུ་སངས་རྒྱས་ཀྱི་སྐུའི་སྤྲིན་མཐའ་དང་དབུས་མེད་པར་འབྱམས་ཀླས་པའི་སྒོ་དང ། ཆོས་ཀྱི་ཚུལ་རྒྱ་མཚོ་ཐམས་ཅད་རབ་ཏུ་བསྟན་པའི་སྒོ་དག་ནས་ལངས་པར་གྱུར་ཏེ། བྱང་ཆུབ་སེམས་དཔའ་ཀུན་ཏུ་བཟང་པོ་ཏིང་ངེ་འཛིན་ལས་ལངས་མ་ཐག་ཏུ་དེའི་ཚེ་བྱང་ཆུབ་སེམས་དཔའ་དེ་དག་ཀྱང་སོ་སོར་རེ་ཞིང་ཏིང་ངེ་འཛིན་རྒྱ་མཚོའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ལ་རབ་ཏུ་ཞུགས་པར་གྱུར་ཏོ། །གཟུངས་རྒྱ་མཚོའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ལ་ཡང་རབ་ཏུ་ཞུགས་པར་གྱུར་ཏོ། ། ཆོས་ཀྱི་ཚུལ་རྒྱ་མཚོའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ལ་ཡང་རབ་ཏུ་ཞུགས་པར་གྱུར་ཏོ། །སོ་སོ་ཡང་དག་པར་རིག་པའི་ཚུལ་རྒྱ་མཚོའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ལ་ཡང་རབ་ཏུ་ཞུགས་པར་གྱུར་ཏོ། །སྤྱོད་པ་རྒྱ་མཚོའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ལ་ཡང་རབ་ཏུ་ཞུགས་པར་གྱུར་ཏོ། །ཆོས་ཀྱི་དབྱིངས་ཀྱི་
Ka125a
༄#། །ཕྱོགས་སུ་རྣམ་པར་སྣང་ཞིང་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་སྣང་བའི་ཡོན་ཏན་གྱི་སྙིང་པོ་ཅན་རྒྱ་མཚོའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ལ་ཡང་རབ་ཏུ་ཞུགས་པར་གྱུར་ཏོ། །དེ་བཞིན་གཤེགས་པའི་སྟོབས་དང ། ཡེ་ཤེས་མ་འདྲེས་པའི་ཚུལ་རྒྱ་མཚོའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ལ་ཡང་རབ་ཏུ་ཞུགས་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་བ་སྤུའི་རྩེ་མོ་ཐམས་ཅད་ལ་ཞིང་གཞན་དང་གཞན་རྒྱ་མཚོའི་སྤྲིན་འཇིག་རྟེན་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ལ་ཡང་རབ་ཏུ་ཞུགས་པར་གྱུར་ཏོ། །བྱང་ཆུབ་སེམས་དཔའ་རེ་རེ་ཞིང་དགའ་ལྡན་གྱི་གནས་ནས་འཕོ་བ་དང ། འབྱུང་བ་དང ། བྱང་ཆུབ་ཏུ་རྣམ་པར་འཚང་རྒྱ་བ་དང ། མྱ་ངན་ལས་འདས་པ་བསྟན་པ་རྒྱ་མཚོའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ལའང་རབ་ཏུ་ཞུགས་པར་གྱུར་ཏོ། །འདིར་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་རྒྱ་མཚོ་ཐམས་ཅད་ན་ཡང་དེ་བཞིན་གཤེགས་པ་ཐམས་ཅད་ཀྱི་འཁོར་རྒྱ་མཚོ་རྣམས་དང་རྡུལ་ཤིན་ཏུ་ཕྲ་བ་ཐམས་ཅད་ཀྱི་ཁོངས་ན་ཡོད་པ་ཀུན་ཏུ་ཡང་བྱང་ཆུབ་སེམས་དཔའ་རྒྱ་མཚོ་རྣམས་རབ་ཏུ་ཞུགས་པར་གྱུར་ཏེ། སངས་རྒྱས་ཀྱི་མཐུ་དང ། བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་ངེ་འཛིན་གྱི་ཆོས་ཉིད་རབ་ཏུ་ཐོབ་པས་ཕྱོགས་བཅུའི་འཇིག་རྟེན་
Ka125b
གྱི་ཁམས་རྒྱ་མཚོ་ཐམས་ཅད་མ་ལུས་པར་བག་ལངས་པ་ཙམ་དུ་གཡོས་ཏེ། རིན་པོ་ཆེ་ཐམས་ཅད་ཀྱིས་རབ་ཏུ་བརྒྱན་པར་གནས་ཤིང ། ཆོས་རྒྱ་མཚོ་ཐམས་ཅད་ཀྱི་སྒྲ་ཡང་ཤིན་ཏུ་གྲག་པར་གྱུར་ཏེ།་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་ཐམས་ཅད་དུ་ཡང་ནོར་བུའི་རྒྱལ་པོ་ཆེན་པོ་བཅུའི་སྤྲིན་གྱི་ཆར་མངོན་པར་བབ་པར་གྱུར་ཏེ། བཅུ་གང་ཞེ་ན། འདི་ལྟ་སྟེ། ནོར་བུའི་རྒྱལ་པོ་མཚན་དང་ལྡན་པའི་གསེར་དཔལ་གྱི་རྒྱལ་མཚན་གྱི་དཔལ་གྱི་སྤྲིན་ཆར་མངོན་པར་བབ་བོ། །འདི་ལྟ་སྟེ། ནོར་བུའི་རྒྱལ་པོ་འོད་ཀྱིས་རྣམ་པར་གསལ་བར་བྱེད་པའི་སྤྲིན་གྱི་ཆར་མངོན་པར་བབ་བོ། །འདི་ལྟ་སྟེ། ནོར་བུའི་རྒྱལ་པོ་ཕྱོགས་བཅུར་རིན་པོ་ཆེའི་འཁོར་ལོ་རབ་ཏུ་འགྲེམ་པའི་སྤྲིན་གྱི་ཆར་མངོན་པར་བབ་བོ། །འདི་ལྟ་སྟེ། ནོར་བུའི་རྒྱལ་པོ་བྱང་ཆུབ་སེམས་དཔའི་གཟུགས་བརྙན་རིན་པོ་ཆེའི་སྙིང་པོའི་སྤྲིན་གྱི་ཆར་མངོན་པར་བབ་བོ། །འདི་ལྟ་སྟེ། ནོར་བུའི་རྒྱལ་པོ་སངས་རྒྱ་ཐམས་ཅད་ཀྱི་མཚན་གྱི་འཁོར་ལོ་རབ་ཏུ་སྒྲོག་པའི་སྤྲིན་གྱི་ཆར་མངོན་པར་བབ་བོ། །འདི་ལྟ་སྟེ། ནོར་བུའི་རྒྱལ་པོ་ཞིང་རྣམ་པར་སྣང་བར་བྱེད་ཅིང་སྙིང་པོ་བྱང་ཆུབ་ཏུ་དཔལ་རབ་ཏུ་འབར་བའི་སྤྲིན་གྱི་ཆར་མངོན་པར་བབ་བོ། །འདི་ལྟ་སྟེ། ནོར་བུའི་རྒྱལ་པོ་ཕྱོགས་བཅུར་སྣང་བའི་སྤྲུལ་པ་འགྱེད་པའི་སྤྲིན་གྱི་ཆར་མངོན་པར་བབ་བོ། །འདི་ལྟ་སྟེ། ནོར་བུའི་རྒྱལ་པ་བྱང་ཆུབ་སེམས་དཔའ་ཐམས་ཅད་ཀྱི་ཡོན་ཏན་གྱི་འཁོར་ལོ་དང་མཐུ་རབ་ཏུ་གྲག་པར་བྱེད་པའི་སྤྲིན་གྱི་ཆར་
Ka126a
༄#། །མངོན་པར་བབ་བོ། །འདི་ལྟ་སྟེ། ནོར་བུའི་རྒྱལ་པོ་ཉི་མའི་དཔལ་གྱི་གཟི་བརྗིད་ཀྱི་སྤྲིན་གྱི་ཆར་མངོན་པར་བབ་བོ། །འདི་ལྟ་སྟེ། ནོར་བུའི་རྒྱལ་པོ་རོལ་མོའི་སྒྲ་ཡིད་དུ་འོང་བས་ཕྱོགས་ཐམས་ཅད་ཁྱབ་པར་བྱེད་པའི་སྤྲིན་གྱི་ཆར་མངོན་པར་བབ་སྟེ། ནོར་བུའི་རྒྱལ་པོའི་སྤྲིན་གྱི་ཆར་བཅུ་པོ་འདི་དག་མངོན་པར་བབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་བ་སྤུའི་སྒོ་ཐམས་ཅད་དང ། འོད་ཟེར་གྱི་སྒོ་ཐམས་ཅད་ནས་ཀྱང་ཚིགས་སུ་བཅད་པ་འདི་དག་བྱུང་བར་གྱུར་ཏོ། །ཞིང་རྣམས་འབྱམས་ཀླས་ཀུན་ན་ཀུན་ཏུ་བཟང་པོ་དེ། །པདྨོ་ཡིད་དུ་འོང་ལ་རབ་ཏུ་འདུག་པ་མཐོང ། །ཀུན་ཏུ་རྣམ་འཕྲུལ་རྣམ་པ་འདི་འདྲ་སྟོན་བྱེད་པ། །ཏིང་འཛིན་ཡུལ་ལ་འཇུག་པ་མཐའ་དང་དབུས་མེད་དོ། །ལུས་རྣམས་ཐམས་ཅད་ནས་ཀྱང་ཀུན་ཏུ་བཟང་པོ་དེ། ། སྤྲུལ་པ་རབ་ཏུ་འགྱེད་ཅིང་ཆོས་དབྱིངས་རྟག་པར་འགེངས། །ཏིང་འཛིན་ཀུན་གྱི་ཚུལ་དང་མིང་དང་རྣམ་འཕྲུལ་བ། །ཐམས་ཅད་དབྱངས་ཀྱིས་ཆགས་པ་བྱེད་པར་རྒྱ་ཆེ་སྒྲོག། ཏིང་འཛིན་ཐམས་ཅད་གཞན་དང་གཞན་གྱི་རྣམ་འཕྲུལ་གྱིས། །དེ་བཞིན་གཤེགས་པ་ཐམས་ཅད་ཞབས་ཀྱི་དྲུང་དག་ཏུ། །རྒྱལ་བ་ཀུན་གྱི་སྤྱོད་ཡུལ་ཡངས་པ་གང་བྱས་ཏེ། །ཞིང་རྣམས་ཀུན་ཏུ་རྣམ་པར་འཕྲུལ་བ་མང་པོ་སྟོན། །ཞིང་ཀུན་རྒྱལ་བ་ཀུན་གྱི་ཞབས་དྲུང་ཇི་བཞིན་དུ། །དེ་ལྟར་ཞིང་ཀུན་ཤིན་ཏུ་ཕྲ་བའི་རྡུལ་ཕྲན་ལ། །ཏིང་འཛིན་རྣམ་པར་འཕྲུལ་པ་ཐམས་ཅད་མ་ལུས་སྟོན། །རྣམ་པར་སྣང་
Ka126b
མཛད་སྨོན་ལམ་དབྱིངས་ལ་རབ་ཏུ་ཞུགས། །ཀུན་ཏུ་བཟང་པོའི་ལུས་ནི་ནམ་མཁའི་མཚན་ཉིད་དོ། །ཐམས་ཅད་ཞིང་ལ་མི་གནས་དེ་བཞིན་ཉིད་ལ་གནས། །ལུས་ཀྱི་སྤྲིན་ནི་འགྲོ་བ་ཀུན་དང་མཉམ་པར་ཀུན་བཀྱེ་ཞིང ། །སེམས་ཅན་ཀུན་ལ་བསམ་པ་བཞིན་དུ་དེ་དག་སྟོན། །སངས་རྒྱས་སྐུ་རྣམས་ཀུན་ལ་ཞིང་རྣམས་གང་ཡོད་པ། །མཐའ་དང་དབུས་མེད་ཀུན་ལ་རབ་ཏུ་ཞུགས་པ་རྣམས། །ཀུན་ཏུ་བཟང་པོའི་སྨོན་ལམ་གནས་པ་དག་ལ་བསྟན། །རྣམ་པར་འཕྲུལ་པ་འདི་འདྲ་དམ་པ་ཚད་ཀྱང་མེད། །འཁོར་རྣམས་རྒྱ་མཚོ་རྡུལ་བྲལ་མཐའ་དང་དབུས་མེད་པ། །ཚད་མེད་ཐམས་ཅད་ལུས་ཀྱི་ནང་དུ་ཀུན་ཆུབ་ཅིང ། །དབྱངས་ལ་ཞིང་མང་དྲ་བར་རྣམ་འཚང་རྒྱ་བསྟོད། །སྐད་ཅིག་སེམས་ལ་བསྐལ་པ་མང་པོ་དེ་བཞིན་སྟོན། །ཞིང་རྣམས་ཐམས་ཅད་འབྱམས་ཀླས་པ་ན་རྣམ་གྲགས་ཤིང ། ། རྣམ་པར་འཕྲུལ་པ་དམ་པ་བསྟན་པར་རབ་ཏུ་སྣང ། །ཕྱོགས་རྣམས་ཀུན་གྱི་ཞིང་གི་དབྱིངས་རྣམས་མ་ལུས་སྤྱོད། །ཀུན་ཏུ་བཟང་པོ་དེ་ལ་རྣམ་ལྟ་ཀུན་ཀྱང་མཐོང ། །རྒྱལ་བ་ཀུན་གྱི་ཡོན་ཏན་ཡེ་ཤེས་སྟོབས་ལ་ཞུགས། །ཏིང་འཛིན་ས་ནི་ཚུལ་རྣམས་ཀུན་གྱིས་རབ་ཏུ་མནན། །ཆོས་རྣམས་འབྱམས་ཀླས་གཞན་དང་གཞན་ལ་རབ་ཏུ་ཞུགས། །རང་གི་བྱང་ཆུབ་སྤྱོད་པ་སྔོན་ཆད་སྤྱད་པ་སྟོན། །དེ་ལྟར་ཞིང་རྣམས་ཀུན་ཏུ་བསམ་ཡས་རྣམ་འཕྲུལ་བ། །ཕྱོགས་རྣམས་རྒྱ་ཆེ་ཀུན་ཏུ་བཀང་སྟེ་རབ་ཏུ་བསྟན། །ཏིང་ངེ་འཛིན་རྣམས་འཇུག་པ་རབ་ཏུ་བསྟན་པའི་ཕྱིར། །རྒྱལ་བའི་འོད་ཟེར་སྤྲིན་ལས་ཡོན་
Ka127a
༄#། །ཏན་ལེགས་སྒྲ་འབྱུང ། །དེ་ནས་བྱང་ཆུབ་སེམས་དཔའི་འཁོར་ཡོད་པ་ཐམས་ཅད་སངས་རྒྱས་ཀྱི་མཐུས་ཐལ་མོ་སྦྱར་ཏེ་བྱང་ཆུབ་སེམས་དཔའ་ཀུན་ཏུ་བཟང་པོ་ལ་ལྟ་ཞིང་དབྱངས་ཀྱི་ང་རོག་ཅིག་ཏུ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བ་ཐམས་ཅད་ཆོས་ལས་སྐྱེས་པ་སྟེ། །སྨོན་ལམ་ཀུན་གྱིས་སངས་རྒྱས་རབ་ཏུ་འབྱུང ། །དེ་བཞིན་ཉིད་མཉམ་ནམ་མཁའི་སྙིང་པོ་སྟེ། །ཆོས་ཀྱི་སྐུ་ཡིས་རྣམ་པར་རབ་ཏུ་མཛེས། །ཞིང་རྣམས་འབྱམས་ཀླས་ཀུན་ལ་བཞུགས་མེད་ཀྱང ། །ཀུན་ཏུ་བཟང་པོའི་འཁོར་རྣམས་ཀུན་ན་སྣང ། །ཕྱོགས་བཅུ་ཀུན་ཏུ་ཡོན་ཏན་གྲགས་པས་ཁྱབ། །ཡེ་ཤེས་རྒྱ་མཚོ་རབ་ཏུ་སྣང་བ་མངའ། །རྒྱལ་བ་ཐམས་ཅད་སྐུ་ཐོབ་ཕྱིར་སྤྱོད་པ། །ཕྱོགས་བཅུའི་ཡོན་ཏན་རྒྱ་མཚོ་ཡོད་པ་རྣམས། །རྡུལ་སྦུབས་ཀུན་ཏུ་དེ་དག་ཆུད་བྱས་ཤིང ། །ཞིང་རྣམས་ཀུན་ཏུ་རྣམ་པར་རབ་ཏུ་མཛེས། །ཞིང་རྣམས་ཀུན་གྱི་རྒྱལ་བའི་ཞབས་དྲུང་ན། །རྒྱལ་སྲས་ཏིང་ངེ་འཛིན་དང་སྤྱད་པ་དང ། །ཆོས་རྣམས་ཀུན་ལ་སྤྱོད་ཅིང་གནས་པ་རྣམས། །རྡུལ་དང་མཉམ་པའི་བསྐལ་པར་ཀུན་ཀྱང་སྣང ། །ཆོས་ཀྱི་དབྱིངས་རྣམས་ལུས་ཀྱིས་ཁྱབ་བྱས་ཤིང ། །ཞིང་རྣམས་འབྱམས་ཀླས་ཀུན་ལ་ཤིན་ཏུ་བཞུགས། ། སེམས་ཅན་རྒྱ་མཚོའི་དོན་དུ་དེ་སྤྱོད་ཅིང ། །རྡུལ་ཕྲན་ཀུན་ལ་ཆོས་ཀྱི་དབྱིངས་སུ་ཞུགས། །ཆོས་ཀྱི་དབྱིངས་ལ་དེ་ལྟར་ཞུགས་ནས་ཀྱང ། །རྡུལ་ཕྲན་ཀུན་ལ་མི་ཟད་ཐ་མི་དད། །ནམ་མཁའི་
Ka127b
དབྱིངས་ནི་ལུས་ཀྱིས་གང་བྱས་ཤིང ། །རྒྱལ་བའི་ཆོས་རྣམས་ཡངས་པ་རབ་ཏུ་སྟོན། །ཡོན་ཏན་རྒྱ་མཚོ་འོད་ཀུན་གཞལ་དུ་མེད། །རྣམ་ཡངས་སྟོབས་ཆེན་འོད་ཟེར་ཡོན་ཏན་སྤྲིན། །འགྲོ་བ་རྒྱ་མཚོའི་དོན་དུ་སྤྱོད་བྱེད་ཅིང ། །རྒྱལ་བའི་སྤྱོད་ལམ་གཞལ་དུ་མེད་པ་སྟོན། །གང་གི་དོན་དུ་བསྐལ་པ་རྒྱ་མཚོ་དག་།མཐའ་ཡས་པར་ནི་བཟང་པོའི་སྤྱོད་སྤྱད་པ། །དེ་དག་ཆོས་ཀྱི་དབྱིངས་རྣམས་གང་བྱས་ནས། །ཐམས་ཅད་ཆོས་ཀྱི་སྤྲིན་ལས་རབ་ཏུ་བརྗོད། །ཞིང་རྣམས་ཇི་ལྟར་འབྱུང་བར་འགྱུར་བ་དང ། །སྟོབས་བཅུ་རྣམས་ཀྱང་ཇི་ལྟར་འབྱུང་འགྱུར་དང ། །སེམས་ཅན་རྒྱ་མཚོ་ཇི་ལྟར་འབྱུང་འགྱུར་བ། །སེམས་ཅན་རྣམས་ལ་སྒྲ་དབྱངས་གཏོང་ཞིང་སྟོན། །འཁོར་རྣམས་ཡངས་པ་འདི་དག་ཐམས་ཅད་ཀྱང ། །ཀུན་ཏུ་གཟང་པོ་ཁྱོད་ལ་མངོན་སུམ་གནས། །སངས་རྒྱས་ཀུན་གྱིས་གནང་བར་གྱུར་པ་ཡི། །ཆོས་ཀྱི་འཁོར་ལོ་དེ་རིང་ཁྱོད་ཀྱིས་བསྐོར། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། ཀུན་ཏུ་བཟང་པོའི་ཏིང་ངེ་འཛིན་དང ། རྣམ་པར་འཕྲུལ་པ་རབ་ཏུ་འབྱུང་བ་ཞེས་བྱ་སྟེ། ལེའུ་གསུམ་པའོ།། །།དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་སངས་རྒྱས་ཀྱི་བྱིན་གྱི་རླབས་ཀྱིས་འཇིག་རྟེན་གྱི་ཁམས་ཐམས་ཅད་ལ་རྣམ་པར་བལྟས། སེམས་ཅན་གྱི་ཁམས་རྒྱ་མཚོ་ལ་རྣམ་པར་ལྟས། ཆོས་ཀྱི་དབྱིངས་རྒྱ་མཚོ་ལ་རྣམ་པར་བལྟས། སེམས་ཅན་གྱི་ཁམས་རྒྱ་མཚོ་ལ་རྣམ་པར་བལྟས།
Ka128a
༄#། །སེམས་ཅན་ཐམས་ཅད་ཀྱི་བསམ་པ་དང་དབང་པོ་རྒྱ་མཚོ་ལ་རྣམ་པར་བལྟས། སངས་རྒྱས་ཐམས་ཅད་ཀྱི་ཆོས་ཀྱི་རྒྱ་མཚོ་ལ་རྣམ་པར་བལྟས། དུས་རྒྱ་མཚོ་ལ་རྣམ་པར་བལྟས། སངས་རྒྱས་ཐམས་ཅད་ཀྱི་ཡང་དག་པར་འབྱུང་བའི་སྨོན་ལམ་རྒྱ་མཚོ་ལ་རྣམ་པར་བལྟས། སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་རྒྱ་མཚོ་ལ་རྣམ་པར་བལྟས་ནས་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་སྨྲས་པ། ཀྱེ་རྒྱལ་བའི་སྲས་དག་།སངས་རྒྱས་བཅོམ་ལྡན་འདས་རྣམས་ཀྱི་འཇིག་རྟེན་གྱི་ཁམས་ཐམས་ཅད་འདུ་ཞིང་འཇིག་པ་ཡོངས་སུ་དག་པ་འབྱུང་བའི་ཡེ་ཤེས་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་ཐམས་ཅད་ཀྱི་ལས་འབྱུང་བ་རྒྱ་མཚོ་མཁྱེན་པ་ནི།་བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ལ་རྣམ་པར་གནས་པའི་ཡེ་ཤེས་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་དེ་བཞིན་གཤེགས་པ་རྒྱ་མཚོ་ཐམས་ཅད་མཐའ་དང་དབུས་མེད་པར་བསྟན་པའི་ཡེ་ཤེས་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་ཐམས་ཅད་ཀྱི་ལས་རྒྱ་མཚོ་རྣམ་པར་དགོད་པའི་ཡེ་ཤེས་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་བསམ་པ་དང ། དད་པ་དང ། དབང་
Ka128b
པོ་རྒྱ་མཚོ་ལ་འཇུག་པའི་ཡེ་ཤེས་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་ཐུགས་ཀྱི་སྐད་ཅིག་གཅིག་ལ་དུས་ཐམས་ཅད་ཀྱི་མཉམ་པ་ཉིད་ཐུགས་སུ་ཆུད་པའི་ཡེ་ཤེས་ནི།་བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་རྒྱ་མཚོ་ཡང་དག་པར་བསྟན་པའི་ཡེ་ཤེས་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་འཁོར་ལོ་རབ་ཏུ་བསྐོར་བའི་ཡེ་ཤེས་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་རྣམ་པར་དགོད་པ་རབ་ཏུ་བསྟན་པ་རྒྱ་མཚོ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་སྐུ་རབ་ཏུ་བསྟན་པ་ཡོངས་སུ་དག་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་ཡོན་ཏན་རྒྱ་མཚོ་མཐའ་དང་དབུས་མེད་པས་རྣམ་པར་སྣང་བ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་མཚན་དང་དཔེ་བྱད་བཟང་པོ་ཡོངས་སུ་དག་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་འོད་ཀྱི་དཀྱིལ་འཁོར་ཡོངས་སུ་དག་པ་མཐའ་ཡས་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་འོད་ཟེར་རྒྱ་མཚོ་ཁ་དོག་སྣ་ཚོགས་ཀྱི་སྤྲིན་རབ་ཏུ་འགྱེད་པ་མཛད་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་དཔལ་རིན་པོ་
Ka129a
༄#། །ཆེའི་འོད་འཕྲོ་བ་རྒྱ་མཚོ་རྣམ་པར་རྒྱུ་བ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་གསུང་དང་དབྱངས་རྒྱ་མཚོ་རབ་ཏུ་འགྲུབ་པ་ནི།་བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་ཆོ་འཕྲུལ་རྣམ་པ་གསུམ་ཡོངས་སུ་བསྟན་པས་སེམས་ཅན་རྒྱ་མཚོ་ཡོངས་སུ་སྨིན་པར་མཛད་པ་དང ། འདུལ་བ་མཛད་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་འདུལ་བ་རྒྱ་མཚོ་ཐམས་ཅད་ལ་བརྩོན་པ་དོན་ཡོད་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ས་ལ་རབ་ཏུ་བཞུགས་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་དེ་བཞིན་གཤེགས་པའི་ཡུལ་ལ་འཇུག་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་བྱིན་གྱི་རླབས་ཀྱི་མཐུ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཡེ་ཤེས་ཀྱི་སྤྱོད་ཡུལ་རྣམ་པར་རྒྱུ་བ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སྟོབས་ལ་ཐུབ་པ་མེད་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་མི་བསྙེངས་པ་ཟིལ་གྱིས་མི་ནོན་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཏིང་ངེ་འཛིན་ལ་ཐ་མི་དད་པར་སྤྱོད་པ་ནི། བསམ་གྱིས་མི་ཁྱབ་བོ། །སངས་རྒྱས་
Ka129b
བཅོམ་ལྡན་འདས་རྣམས་ཀྱི་དེ་བཞིན་གཤེགས་པའི་རྫུ་འཕྲུལ་དང་རྣམ་པར་འཕྲུལ་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་མངའ་བ་ཆེན་པོའི་ཡེ་ཤེས་རྣམ་པར་དག་པ་ནི། བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཆོས་མི་འཕྲོག་པ་ནི། བསམ་གྱིས་མི་ཁྱབ་སྟེ། དེ་དག་ཐམས་ཅད་སངས་རྒྱས་ཀྱི་མཐུ་དང ། དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་དུ་བརླབས་པས་སེམས་ཅན་ཐམས་ཅད་སངས་རྒྱས་ཀྱི་ཡེ་ཤེས་རྒྱ་མཚོ་ལ་གཟུད་པ་དང ། བྱང་ཆུབ་སེམས་དཔའ་ཐམས་ཅད་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་རབ་ཏུ་འགོད་པ་དང ། འཇིག་རྟེན་གྱི་ཁམས་རྒྱ་མཚོ་ཐམས་ཅད་སངས་རྒྱས་ཀྱི་རྣམ་པར་འཕྲུལ་པ་ཐམས་ཅད་ཀྱིས་རྣམ་པར་བརྒྱན་པ་དང ། བསྐལ་པ་རྒྱ་མཚོ་ཐམས་ཅད་དུ་དེ་བཞིན་གཤེགས་པའི་གདུང་རྗེས་སུ་བསབ་པ་དང ། འཇིག་རྟེན་གྱི་ཁམས་རྒྱ་མཚོ་ཐམས་ཅད་དུ་ཆོས་ཀྱི་རང་བཞིན་གྱི་དཀྱིལ་འཁོར་རབ་ཏུ་བརྗོད་པ་དང ། སེམས་ཅན་ཐམས་ཅད་ཀྱི་དད་པ་རྒྱ་མཚོ་ཐ་དད་པ་ཇི་ལྟ་བ་བཞིན་དུ་རབ་ཏུ་བསྟན་པ་དང ། སེམས་ཅན་ཐམས་ཅད་ཀྱི་དབང་པོ་རྒྱ་མཚོ་ལ་སངས་རྒྱས་ཀྱི་ཆོས་ཀྱི་ཚུལ་ཀུན་ཏུ་སྣང་བ་ཡང་དག་པར་བསྐྱེད་པ་དང ། སེམས་ཅན་ཐམས་ཅད་ཀྱི་བསམ་པ་རྒྱ་མཚོའི་སྒྲིབ་པའི་རི་ཐམས་ཅད་རྣམ་པར་གཞོམ་པ་དང ། སེམས་ཅན་ཐམས་ཅད་ཀྱི་སེམས་དང་སྤྱོད་པ་རྒྱ་མཚོ་ལ་འབྱུང་བའི་ལམ་རྣམ་པར་སྦྱང་བ་དང ། བྱང་ཆུབ་སེམས་
Ka130a
༄#། །དཔའ་རྒྱ་མཚོ་ཐམས་ཅད་བྱང་ཆུབ་སེམས་དཔའི་སྨོན་ལམ་རྒྱ་མཚོ་ལ་རབ་ཏུ་དགོད་པའི་ཕྱིར་ཡང་དག་པར་བསྟན་པར་བྱའོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་འཁོར་གྱི་དཀྱིལ་འཁོར་རྒྱ་མཚོ་རྣམས་དེ་བས་ཀྱང་ཤིན་ཏུ་དགའ་བར་བྱ་བ་དང ། ཆོས་ལ་དགའ་བའི་ཤུགས་ཐམས་ཅད་རྣམ་པར་འཕེལ་བར་བྱ་བ་དང ། མོས་པའི་ཚུལ་ཡངས་པ་རྒྱ་མཚོ་ཡང་དག་པར་འབྱུང་བར་བྱ་བ་དང ། ཆོས་ཀྱི་དབྱིངས་ཀྱི་རང་བཞིན་དང ། སྙིང་པོ་སྒོ་ཀུན་དང་ལྡན་པ་རྣམ་པར་དག་པར་བྱ་བ་དང ། ཀུན་ཏུ་བཟང་པོའི་སྨོན་ལམ་རྒྱ་མཚོ་ལ་རབ་ཏུ་དགོད་པར་བྱ་བ་དང ། ཡེ་ཤེས་ཀྱི་མིག་དུས་གསུམ་གྱི་རྗེས་སུ་སོང་བ་ཡོངས་སུ་སྦྱང་བ་དང ། འཇིག་རྟེན་ཐམས་ཅད་ཀུན་ནས་སྣང་བར་བྱེད་པའི་སྙིང་པོ་ཤེས་རབ་ཆེན་པོའི་རྒྱ་མཚོ་རྣམ་པར་འཕེལ་བར་བྱ་བ་དང ། ཆོས་ཀྱི་འཁོར་ལོ་ཐམས་ཅད་ཡོངས་སུ་གཟུང་བའི་གཟུངས་ཀྱི་སྟོབས་ཡང་དག་པར་བསྐྱེད་པ་དང ། སྙིང་པོ་བྱང་ཆུབ་ཐམས་ཅད་དུ་སངས་རྒྱས་ཀྱི་ཡུལ་ཐམས་ཅད་རབ་ཏུ་བརྗོད་པ་དང ། དེ་བཞིན་གཤེགས་པའི་ཆོས་ཀྱི་ཚུལ་སྣང་བའི་འོད་ཆོས་ཀྱི་དབྱིངས་རྒྱ་ཆེན་པོ་དང ། ཐམས་ཅད་མཁྱེན་པ་ཉིད་ལ་དགའ་བའི་ཤུགས་རྒྱ་མཚོ་རྣམ་པར་འཕེལ་བར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཡོན་ཏན་རྒྱ་མཚོ་རྣམས་ཀྱི་ཡེ་ཤེས་ཟབ། །མཐའ་དང་དབུས་མེད་དེས་ནི་ཞིང་རྣམས་ཁྱབ། །སེམས་ཅན་བསམ་ལ་སྦྱོར་བ་ཇི་བཞིན་སྣང ། །
Ka130b
རྣམ་པར་སྣང་མཛད་ཆོས་ཀྱི་འཁོར་ལོའོ། །བསམ་གྱིས་མི་ཁྱབ་རྒྱ་མཚོའི་ཞིང་ཡོད་པ། །བསྐལ་པ་རྒྱ་མཚོར་རྒྱལ་བས་རྣམ་སྦྱངས་པས། །སེམས་ཅན་རྒྱ་མཚོ་ཡོངས་སུ་སྨིན་བྱའི་ཕྱིར། །སེམས་ཅན་ནང་ན་རྒྱལ་བ་རྣམ་པར་མཛེས། །སེམས་ཅན་རྒྱ་མཚོ་འབྱུང་བ་བསམ་མི་ཁྱབ། །སངས་རྒྱས་ཡུལ་ལ་འཇུག་པ་ཤིན་ཏུ་ཟབ། །སྲིད་པའི་གནས་ཅད་དད་པ་ཆུང་བ་ཡིས། །སངས་རྒྱས་བྱང་ཆུབ་ཤེས་པར་མི་ནུས་སོ། །གཞན་དུ་གང་རྣམས་ཤིན་ཏུ་སེམས་བརྟན་ཅིང ། །དགེ་བའི་བཤེས་ཀྱིས་ཡོངས་སུ་བཟུང་བ་དང ། །སངས་རྒྱས་ཀུན་གྱིས་བྱིན་གྱིས་བརླབས་པ་དག་།སངས་རྒྱས་ཡེ་ཤེས་འདི་ལ་རབ་ཏུ་འཇུག་།གང་རྣམས་སེམས་དག་གཡོ་མེད་སྒྱུ་མེད་ཅིང ། །སྙིང་རྗེའི་བསམ་ཅན་ཁོང་ནས་བྱམས་དགའ་དང ། དད་པ་ཆེ་ཞིང་རླབས་ཆེན་དེ་དག་ནི། །འདི་དག་ཐོས་ཤིང་དགའ་བ་ཐོབ་པར་འགྱུར། །ཀུན་ཏུ་བཟང་པོའི་སྨོན་ལམ་ས་དག་དང ། །ཆོས་དབྱིངས་ནམ་མཁའི་དབྱིངས་སུ་ཁྱབ་པ་ལ། །གནས་ཤིང་སྤྱོད་པ་རབ་ཏུ་སུས་སྤྱོད་པ། །དེ་དག་རྒྱལ་བའི་སྤྱོད་ཡུལ་འདི་ཤེས་སོ། །གང་གིས་རྒྱལ་བའི་རྣམ་འཕྲུལ་འདི་མཐོང་བའི། །བྱང་ཆུབ་སེམས་དཔས་ཐོབ་བྱ་ལེགས་པར་ཐོབ། །གཞན་གྱི་ཡུལ་གྱིས་ཤེས་པར་མི་ནུས་ཏེ། །འདི་ནི་ཀུན་ཏུ་བཟང་པོས་རྟོགས་པའོ། །དེ་བཞིན་གཤེགས་པ་ཀུན་གྱིས་བྱིན་བརླབས་ཤིང ། །འགྲོ་བ་མཐའ་དང་དབུས་མེད་འདི་དག་ན། །ཀུན་ཏུ་ཆོས་ཀྱི་འཁོར་ལོ་རབ་འཁོར་བ། །རྣམ་པར་སྣང་མཛད་
Ka131a
༄#། །ཡུལ་དང་མཐུ་ཡིན་ནོ། །བདག་གི་ལུས་སུ་ཞིང་རྣམས་ཐམས་ཅད་ཀྱང ། །རབ་ཏུ་ཞུགས་ཤིང་དེ་ཞུགས་ཤིང་རྣམས་ཀུན། །དེ་དག་སྤུ་རྩེ་ཀུན་ཏུ་བལྟ་བར་གྱིས། །རྒྱལ་བའི་སྤྱོད་ཡུལ་ཤིན་ཏུ་བཤད་པར་བྱ། །ཀུན་ཏུ་བཟང་པོའི་སྨོན་ལམ་སྤྱོད་པ་རྣམས། །མཐའ་དང་དབུས་མེད་མངོན་པར་སྒྲུབ་པ་དང ། །ཀུན་ཏུ་མིག་གི་ཡུལ་དང་ལུས་ལྡན་པ། །དེ་དག་མགོན་པོའི་སྤྱོད་ཡུལ་འདི་ཉན་ཏོ། །ཀྱེ་རྒྱལ་བའི་སྲས་དག་།བཅུ་པོ་འདི་དག་ནི། འཇིག་རྟེན་གྱི་ཁམས་རྒྱ་མཚོ་ཤིན་ཏུ་བསྟན་པ་སྟེ། སངས་རྒྱས་བཅོམ་ལྡན་འདས། འདས་པ་དང ། མ་བྱོན་པ་དང ། ད་ལྟར་བྱུང་བ་རྣམས་ཀྱིས་གསུངས་སོ། །གསུང་ངོ ། །གསུང་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། འཇིག་རྟེན་གྱི་ཁམས་ཡོངས་སུ་འབྱུང་བའི་ཚོགས་ཀྱི་རྒྱུ་རྐྱེན་ཤིན་ཏུ་བསྟན་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་གནས་པ་ཤིན་ཏུ་བསྟན་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོའི་དབྱིབས་དང་རྣམ་པ་ཤིན་ཏུ་བསྟན་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོའི་ལྷུན་ཤིན་ཏུ་བསྟན་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོའི་རྒྱན་ཤིན་ཏུ་བསྟན་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་ཡོངས་སུ་དག་པར་བྱ་བའི་ཚུལ་ཤིན་ཏུ་བསྟན་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་དག་ཏུ་སངས་རྒྱས་འབྱུང་བ་ཤིན་ཏུ་བསྟན་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོའི་བསྐལ་
Ka131b
བའི་བྱིན་གྱི་རླབས་ཤིན་ཏུ་བསྟན་པ་དང ། འདི་ལྟ་སྟེ། བསྐལ་པ་མཐའ་ཡས་པའི་རྒྱུད་རྒྱ་མཚོ་ཤིན་ཏུ་བསྟན་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་ཐ་མི་དད་པ་ཤིན་ཏུ་བསྟན་པའོ། །ཀྱེ་རྒྱལ་བའི་སྲས་དག་།འཇིག་རྟེན་གྱི་ཁམས་རྒྱ་མཚོ་བཅུ་པོ་འདི་དག་ལ་སོགས་པ་འཇིག་རྟེན་གྱི་ཁམས་རྒྱ་མཚོ་ཤིན་ཏུ་བསྟན་པ། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་སངས་རྒྱས་བཅོམ་ལྡན་འདས། འདས་པ་དང ། མ་བྱོན་པ་དང ། ད་ལྟར་བྱུང་བ་རྣམས་ཀྱིས་གསུངས་སོ། །གསུང་ངོ ། །གསུང་བར་འགྱུར་རོ། །ཀྱེ་རྒྱལ་བའི་སྲས་དག་།དེ་ལ་འཇིག་རྟེན་གྱི་ཁམས་རྒྱ་མཚོ་ཐམས་ཅད་ནི། རྒྱུ་དང་རྐྱེན་ལ་དམིགས་པའི་སྒོ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཕྲག་བཅུས་བྱུང་ངོ ། །བྱུང་ངོ ། །འབྱུང་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པའི་བྱིན་གྱི་རླབས་དང་ཆོས་ཉིད་རབ་ཏུ་ཐོབ་པ་དང ། སེམས་ཅན་རྣམས་ཀྱི་ལས་ཀྱི་ཚོགས་དང ། བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་ཡང་དག་པར་སྒྲུབ་པའི་ཆོས་ཉིད་དང ། སེམས་ཅན་རྣམས་ཀྱིས་ཀྱང་བྱང་ཆུབ་སེམས་དཔའ་དག་དང ། བསོད་ནམས་ཀྱི་རྩ་བ་སྐལ་བ་མཐུན་པ་བསགས་པ་དང ། བྱང་ཆུབ་སེམས་དཔའ་རྣམས་ཀྱི་ཞིང་ཡོངས་སུ་དག་པའི་སྨོན་ལམ་གྱི་ཁྱད་པར་དང ། བྱང་ཆུབ་སེམས་དཔའ་རྣམས་ཀྱི་སྤྱོད་པས་རྣམ་པར་བསྒྲུབས་པའི་སྨོན་ལམ་གྱིས་མངོན་པར་བསྒྲུབས་པ་དང ། བྱང་ཆུབ་སེམས་
Ka132a
༄#། །དཔའ་རྣམས་ཀྱི་མོས་པའི་དབང་རྣམ་པར་དག་པ་དང ། དེ་བཞིན་གཤེགས་པ་རྣམས་ཀྱི་དགེ་བའི་རྩ་བ་འཇིག་རྟེན་ལས་འདས་པ་དང་རྒྱུ་མཐུན་པས་མངོན་པར་འཚང་རྒྱ་ཞིང་སངས་རྒྱས་ཀྱི་རྣམ་པར་འཕྲུལ་བ་ཁྱུ་མཆོག་གི་མཐུ་དབྱུང་བ་དང ། བྱང་ཆུབ་སེམས་དཔའ་ཀུན་ཏུ་བཟང་པོ་རྣམས་ཀྱི་སྨོན་ལམ་གྱིས་རྣམ་པར་འཕྲུལ་བའི་སྒོའོ། ། ཀྱེ་རྒྱལ་བའི་སྲས་དག། དེ་ལྟར་རྒྱུ་དང་རྐྱེན་ལ་དམིགས་པའི་སྒོ་བཅུ་པོ་འདི་དག་ལ་སོགས་པ་རྒྱུ་དང་རྐྱེན་ལ་དམིགས་པ། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་འཇིག་རྟེན་གྱི་ཁམས་རྒྱ་མཚོ་ཐམས་ཅད་བྱུང་ངོ ། །བྱུང་ངོ ། །འབྱུང་བར་འགྱུར་རོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་འཇིག་རྟེན་གྱི་ཁམས་རྒྱ་མཚོའི་འབྱུང་བ་ཤིན་ཏུ་བསྟན་པ་འདི་ཉིད་གསལ་བར་བརྗོད་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཡེ་ཤེས་ཡུལ་ནི་བསམ་ཡས་པས། །བྱིན་རླབས་རྣམ་འཕྲུལ་དེ་དག་འདི་ལྟ་བུ། ཞིང་རྣམས་རྒྱ་མཚོ་བསྟན་པ་མཐའ་དབུས་མེད། །རྣམ་པར་སྣང་མཛད་ཆོས་ཀྱིས་ཡོངས་སུ་སྦྱངས། །བྱང་ཆུབ་སེམས་དཔའ་ཀུན་གྱིས་བསམ་པ་བཞིན། ། སྨོན་ལམ་རྒྱ་མཚོ་བསམ་ཡས་རྣམ་སྦྱངས་ཤིང ། །སེམས་ཅན་ལས་རྣམས་རྒྱ་མཚོ་བསམ་ཡས་པས། །ཕྱོགས་ཀུན་ཤིང་རྣམས་རྒྱ་མཚོ་ཐམས་ཅད་འབྱུང ། །བྱང་ཆུབ་སེམས་དཔའ་ཀུན་
Ka132b
གྱི་རྣམ་འཕྲུལ་དང ། །ཐམས་ཅད་མཁྱེན་པ་ཉིད་ལ་འཇུག་པའི་སྒོས། །སྨོན་ལམ་རྒྱ་མཚོ་ཐམས་ཅད་མངོན་བསྒྲུབས་ཤིང ། །ནམ་མཁའི་དབྱིངས་ལ་འབྱམས་ཀླས་ཞིང་འབྱུང་ངོ ། །སྤྱོད་པ་རྒྱ་མཚོ་མཐའ་དང་དབུས་མེད་རྣམས། །སྤྱོད་ཅིང་ཚད་མེད་བདེ་གཤེགས་ཡུལ་ལ་འཇུག། ཕྱོགས་ཀྱི་ཞིང་རྣམས་རྒྱ་མཚོ་ཀུན་སྤྱོད་ཞིང ། །བསྐལ་པ་མཐའ་ཡས་ཞིང་རྣམས་རེ་རེར་སྤྱོད། །སེམས་ཅན་བསམ་དབྱིངས་བསམ་གྱིས་མི་ཁྱབ་པའི། །ལས་ཀྱི་ཞིང་རྣམས་རྒྱ་མཚོ་ཐམས་ཅད་བྱུང ། །ཉོན་མོངས་ལས་ཀྱིས་དེ་དག་ཉོན་མོངས་བཅས། །མོས་དང་བསམ་པས་རྣམ་པ་སྣ་ཚོགས་གཟུགས། །ཞིང་རྣམས་རྒྱ་མཚོ་རྣམ་དག་རྒྱན་ཅན་རྣམས། །རིན་ཆེན་རྒྱུས་བྱུང་སྣ་ཚོགས་དྲི་མེད་པ། །དད་པ་རྒྱ་མཚོ་རྣམ་པར་སྤེལ་བའི་ཕྱིར། །རྒྱལ་སྲས་རྣམས་ནི་ཕྱོགས་བཅུའི་ཞིང་རྣམས་སྦྱོང ། །ཆོས་དབྱིངས་རྡུལ་གྱི་ཁོངས་སུ་རྒྱལ་སྲས་རྣམས། །ཀུན་ཏུ་བཟང་པོའི་སྤྱད་པ་སྤྱོད་པ་དག་།རྡུལ་གྱི་ཁོངས་སུ་མཐའ་ཡས་ཞིང་སྟོན་ཏེ། །རྣམ་དག་མཁའ་བཞིན་མཐའ་དང་དབུས་ཀྱང་མེད། །ནམ་མཁའི་དབྱིངས་འདྲའི་རྣམ་འཕྲུལ་འདི་འདྲ་སྟེ། །སྙིང་པོ་བྱང་ཆུབ་རྒྱལ་བའི་ཞབས་དྲུང་ན། །པདྨོའི་སྟན་འཁོད་ཁ་དོག་མཐའ་ཡས་ཀུན། །དེ་དག་ཞིང་བཅས་ལུས་ཀྱི་ནང་ན་འཁོད། །སྐད་ཅིག་སེམས་ཀྱིས་དུས་གསུམ་བྱུང་བ་ཡི། །ཞིང་འབྱུང་ཚུལ་དང་འཇུག་པ་ཀུན་ཀྱང་སྟོན། །སངས་རྒྱས་རྣམས་ཀྱི་དུས་གསུམ་ཞིང་བསྟན་པ། །རྣམ་པར་སྣང་མཛད་རྒྱ་མཚོའི་ཞིང་མི་ཟད། །ཚུལ་གྱི་ཁྱད་
Ka133a
༄#། །པར་མཐའ་ཡས་སྣ་ཚོགས་པས། །རྡུལ་རྣམས་ཀུན་ལ་མཐའ་ཡས་རྒྱན་གྱིས་རྣམས། །སངས་རྒྱས་སྐད་ཅིག་གཅིག་ལ་བྱིན་གྱིས་རློབ། །རྒྱན་གྱི་རྣམ་པ་ཚུལ་ཀུན་རབ་ཏུ་མཁྱེན། །ཀྱེ་རྒྱལ་བའི་སྲས་དག་།དེ་ལ་གནས་པ་ཤིན་ཏུ་བསྟན་པ་ནི། འཇིག་རྟེན་གྱི་ཁམས་རྒྱ་མཚོ་རེ་རེ་ཞིང་ཡང་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དེ། འདི་ལྟར་འཇིག་རྟེན་གྱི་ཁམས་རྒྱ་མཚོ་ལ་ལ་ནི། རྒྱན་ཐམས་ཅད་ཀྱི་རྒྱ་མཚོ་ཀུན་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། ནམ་མཁའི་དབྱིངས་ཀྱི་གནས་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། རིན་པོ་ཆེ་ཐམས་ཅད་ཀྱི་འོད་ཟེར་གྱི་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། སངས་རྒྱས་ཐམས་ཅད་ཀྱི་འོད་ཀྱི་དཀྱིལ་འཁོར་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། རིན་པོ་ཆེ་ཐམས་ཅད་ཀྱི་ཁ་དོག་གི་མདོག་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། སངས་རྒྱས་ཐམས་ཅད་ཀྱི་དབྱངས་ཀྱི་དཀྱིལ་འཁོར་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། སྒྱུ་མ་ལྟ་བུའི་ལས་ཀྱིས་བྱུང་པ་ལྷ་མ་ཡིན་དང་མཐུ་བོ་ཆེ་ལྟ་བུའི་ལག་ན་རྡོ་རྗེ་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། འཇིག་རྟེན་གྱི་དབང་པོ་ཐམས་ཅད་ཀྱི་ལུས་ཀྱི་གཟུགས་བརྙན་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་
Ka133b
རྒྱ་མཚོ་ལ་ལ་ནི། བྱང་ཆུབ་སེམས་དཔའ་ཐམས་ཅད་ཀྱི་ལུས་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་གྱིས་བྱུང་བའི་རྒྱན་རྣམ་པ་ཐམས་ཅད་དང་ལྡན་པའི་རྒྱ་མཚོ་ལ་རབ་ཏུ་གནས་ཏེ། དེ་དག་ལ་སོགས་པ་འཇིག་རྟེན་གྱི་ཁམས་རབ་ཏུ་གནས་བ་ཤིན་ཏུ་བསྟན་པ་ནི། འཇིག་རྟེན་གྱི་ཁམས་རྒྱ་མཚོ་རེ་རེ་ཞིང་ཡང་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་རྒྱ་མཚོ་རབ་ཏུ་གནས་པ་ཤིན་ཏུ་བསྟན་པའི་དོན་འདི་ཉིད་ཡོངས་སུ་བསྟན་པའི་ཕྱི་སངས་རྒྱས་ཀྱི་མཐུས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཀུན་ཀྱང་ཞིང་རྣམས་རྒྱ་མཚོ་འདི་དག་རིན་ཆེན་རང་བཞིན་དྲི་མེད་པ། །རྣམ་དག་སྣ་ཚོགས་ནོར་བུ་ཀུན་འབར་འོད་ཟེར་རྒྱ་མཚོའི་འོད་ལྡན་ལྟོས། །འདི་དག་རྒྱལ་བའི་བྱིན་རླབས་རྒྱུ་ཡིས་དབྱིབས་ལེགས་འཁོར་བར་རྣམ་པ་སྣང ། །དེ་དག་གིས་ནི་ཕྱོགས་བཅུའི་ནམ་མཁའི་དབྱིངས་རྣམས་གཞི་ཀུན་རབ་ཏུ་ཁྱབ། །ཞིང་རྣམས་རྒྱ་མཚོ་ལ་ལ་དྲི་མེད་འོད་ཅན་ནམ་མཁའི་དབྱིངས་ལ་གནས། །སྣང་བའི་སྙིང་པོ་འོད་ཅན་ནོར་བུའི་རྒྱ་མཚོ་དག་ལ་ལེགས་པར་གནས། །འགྲོ་བ་དེ་དབུས་རྒྱལ་བ་འཁོར་ལ་ཆོས་ཀྱི་འཁོར་ལོ་བཟང་པོ་བསྐོར། །འདི་ནི་སངས་རྒྱས་ཡུལ་ཡིན་སེམས་ཅན་རྒྱ་ཆེན་ཤིན་ཏུ་མགུ་བྱེད་པའོ། །ལ་ལ་མེ་ཏོག་སྒྲོན་མ་ཀུན་ཏུ་རྒྱས་པའི་མུ་ཏིག་ནོར་བུས་བརྒྱན། །འོད་ཟེར་དྲ་
Ka134a
༄#། །བའི་ཀུན་ནས་སྤྲིན་འབར་སྤོས་འཕྲོ་སྤྲིན་གྱི་འོད་ཅན་ཏེ། །ཞིང་མང་མཐའ་དང་དབུས་མེད་རྒྱ་ཆེན་པདྨོའི་རྒྱ་མཚོ་དག་ལ་གནས། །སངས་རྒྱས་རྣམས་ཀྱིས་རབ་བརྒྱན་ཞིང་རྣམས་འབྱམས་ཀླས་ཀུན་ཀྱང་རབ་ཏུ་མཛེས། །ཞིང་རྣམས་རྒྱ་མཚོ་དཀྱིལ་འཁོར་དབྱིངས་རྣམས་ལ་ལ་སངས་རྒྱས་བྱིན་ལ་གནས། །ཡངས་ཤིང་རིན་ཆེན་མང་ལྡན་རྒྱ་ཆེ་དེ་དག་བྱང་ཆུབ་སེམས་དཔས་གང ། །ལག་ན་རྡོ་རྗེ་རྒྱ་མཚོ་མང་ཚོགས་ལྷ་དབང་ལུས་ལ་དེ་བཞིན་གནས། །དེ་ནས་བཅོམ་ལྡན་རྣམ་པར་སྣང་བ་མཛད་ཀྱི་འཁོར་ལོ་རྟག་ཏུ་འཁོར། ། ནོར་བུའི་ཤིང་དང་སྤོས་ཀྱི་འོད་འཕྲོའི་སྤྲིན་རྣམས་མཉམ་པའི་དབྱིངས་ལ་གནས། །ཆུ་ཡི་ཕུང་པོ་དག་དང་རྡོ་རྗེ་རྒྱ་མཚོ་བརྟན་ལའང་དེ་བཞིན་གནས། །ལ་ལ་གོས་དང་བྲག་དང་རྒྱལ་མཚན་མེ་ཏོག་སྣ་ཚོགས་རྒྱ་མཚོ་དག་ལ་གནས། །ཀུན་ནའང་རྣམ་འཕྲུལ་འདི་དག་རྒྱ་ཆེན་རྣམ་པར་སྣང་མཛད་སྟོན་པ་མཛད། །ཞིང་རྣམས་རིང་དང་ཐུང་དང་གླང་གི་གཟུགས་དང་རྣམ་པ་སྣ་ཚོགས་ཏེ། །སྣ་ཚོགས་རྒྱན་ཅན་སྙིང་པོ་དྲི་མ་བྲལ་བ་ཡོངས་དག་དྲི་མེད་སྣང ། །རྣམ་པ་སྣ་ཚོགས་དེ་དག་སྨོན་ལམ་རྒྱ་མཚོའི་དབྱིངས་ལ་རབ་ཏུ་གནས། །སངས་རྒྱས་སྤྲིན་གྱིས་ཀུན་ནས་ཡོག་པར་རྟག་ཏུ་ནམ་མཁའི་དབྱིངས་ལ་གནས། །ཞིང་རྣམས་རྒྱ་མཚོ་འབྱམས་ཀླས་ལ་ལ་སྤྱིའུ་ཚུགས་ཡོད་དང་མེད་ལ་གནས། །བྱང་ཆུབ་སེམས་དཔའི་ཅོད་པ་ན་རིན་ཆེན་འཁོར་ལོས་བཟུང་བས་
Ka134b
དག་པར་གནས། །དེ་ནས་སངས་རྒྱས་རྣམ་འཕྲུལ་རྒྱ་ཆེན་ཐམས་ཅད་ཀུན་ནས་རབ་ཏུ་སྣང ། །རིན་ཆེན་སངས་རྒྱས་གསུང་རྣམས་ཀུན་ཏུ་གཏོང་ལྡན་ལས་ཀྱིས་དེ་དག་སྤྲུལ། །ཆོས་ཀྱི་དབྱིངས་མཉམ་ཞིང་རྣམས་འབྱམས་ཀླས་མིག་ཡོར་སྒྱུ་མ་དང་ཡང་འདྲ། །མིག་འཕྲུལ་རྣམ་ཕྱེ་རྣམས་དག་དྲི་མེད་སེམས་ཀྱིས་ཤིན་ཏུ་བསྐྱེད་པ་སྟེ། །ནམ་མཁའི་དབྱིངས་རྣམས་སྣ་ཚོགས་རྒྱན་གྱི་སྙིང་པོ་གནས་འགྱུར་འདི་ལ་སྣང ། །ལས་ཀྱི་ཡུལ་ནི་བསམ་གྱིས་མི་ཁྱབ་འདི་དག་བདེ་བར་གཤེགས་པས་བསྟན། །སྐད་ཅིག་སེམས་ཀྱིས་ཞིང་རྣམས་འབྱམས་ཀླས་འགྲོ་བ་ཀུན་དང་མཉམ་པའི་རྣམས། །ཞིང་རྡུལ་ཀུན་ལ་ཀུན་ཏུ་བཟང་པོ་རྟག་པར་རབ་ཏུ་སྒྲུབ་བྱེད་ཅིང ། །དེ་ན་བསྐལ་པ་རྒྱ་མཚོར་འགྲོ་བ་སྨིན་པར་བྱ་ཕྱིར་སྤྱད་པ་སྤྱོད། །ཆོས་དབྱིངས་རྒྱས་པར་བཀང་སྟེ་དེ་དག་ཀུན་ཏུ་རྣམ་འཕྲུལ་རྒྱ་ཆེ་སྟོན། ། རྡུལ་རྣམས་ཀུན་ན་ཆོས་དབྱིངས་ཡངས་པའི་ཞིང་རྣམས་རྒྱ་མཚོ་ཀུན་ཀྱང་གནས། །སངས་རྒྱས་སྤྲིན་གྱིས་བྱིན་གྱིས་བརླབས་པས་ཀུན་ཀྱང་ཡོག་ཅིང་ཡོངས་སུ་རྒྱས། །ཇི་ལྟར་རྡུལ་ཕྲན་གཅིག་ལ་རྣམ་སྤྲུལ་དེ་བཞིན་འགྲོ་བ་ཀུན་ནའོ། །རྣམ་པར་སྣང་བའི་སངས་རྒྱས་རྣམ་འཕྲུལ་རྒྱ་ཆེན་རབ་ཏུ་སྟོན་པ་མཛད། །ཞིང་རྣམས་འབྱམས་ཀླས་ཐམས་ཅད་མིག་ཡོར་ལྟ་བུ་སྒྱུ་མ་སྨིག་རྒྱུ་འདྲ། །སྣང་བ་མེད་ཅིང་འབྱུང་མེད་ཕྱོགས་བཅུ་དག་ནི་འགྲོ་དང་འོང་བ་མེད། །མཁའ་ལ་གནས་པ་དེ་དག་རྟག་པར་འབྱུང་ཞིང་འཇིག་པར་དེ་བཞིན་འགྱུར། །ཤིན་ཏུ་ཡངས་པ་དེ་དག་སྨོན་ལམ་རྣམ་སྦྱངས་ལས་
Ka135a
༄#། །ཀྱིས་ཡོངས་སུ་བཟུང ། །ཀྱེ་རྒྱལ་བའི་སྲས་དག་།དེ་ལ་འཇིག་རྟེན་གྱི་ཁམས་རྒྱ་མཚོ་རྣམས་ཀྱི་དབྱིབས་ནི། རྣམ་པ་སྣ་ཚོགས་ཏེ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། ཀུན་ནས་ཟླུམ་པོའོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། ཀུན་ནས་གྲུ་བཞིའོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི།་ནམ་མཁའི་རྣམ་པ་དུ་མར་རྣམ་པར་ཕྱེ་བའོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། ཀུན་ནས་འཁྱིལ་པའི་དབྱིབས་སུ་འདུག་གོ། འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། འོད་འཕྲོ་བའི་རིའི་དབྱིབས་སུ་འདུག་གོ་།འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། ཤིང་སྣ་ཚོགས་ཀྱི་ལྷུན་གྱི་དབྱིབས་སུ་འདུག་གོ ། འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། མེ་ཏོག་སྣ་ཚོགས་ཀྱི་དབྱིབས་སུ་འདུག་གོ་།འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། ཁྱིམ་སྣ་ཚོགས་ཀྱི་དབྱིབས་སུ་འདུག་གོ་།འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། སེམས་ཅན་སྣ་ཚོགས་ཀྱི་ལུས་ཀྱི་དབྱིབས་སུ་འདུག་གོ་།འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི།་མཚན་སྣ་ཚོགས་ཀྱི་དབྱིབས་སུ་འདུག་སྟེ། དེ་དག་ལ་སོགས་པ་འཇིག་རྟེན་གྱི་ཁམས་ཀྱི་དབྱིབས་ཤིན་ཏུ་བསྟན་པ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་
Ka135b
དོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་འཇིག་རྟེན་གྱི་ཁམས་རྒྱ་མཚོའི་དབྱིབས་ཀྱི་ཚུལ་རྒྱ་མཚོ་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྣམ་པ་སྣ་ཚོགས་རྒྱ་མཚོའི་ཞིང་ལ་ལྟོས། །རྣམ་ཕྱེ་སྣ་ཚོགས་མཐའ་ཡས་དབྱིབས་སུ་གནས། །དབྱིབས་ཀྱིས་རྣམ་པར་ཕྱེ་བ་སྣ་ཚོགས་ཏེ། །ཕྱོགས་རྣམས་ཀུན་ན་ཞིང་རྣམས་རྒྱ་མཚོ་སྣང ། །ལ་ལ་ཟླུམ་པོ་ལ་ལ་ཟུར་གསུམ་སྟེ། །དེ་དག་ལ་ལ་ཕྱོགས་ན་གྲུ་བཞིར་གནས། །ནོར་བུ་པདྨོ་འཁོར་ལོ་ཡན་ལག་བརྒྱད། །ཀུན་ཀྱང་ལས་རྣམས་རྒྱ་མཚོས་རྣམ་པར་བྲིས། །རྡུལ་མེད་འོད་ཀྱི་དབྱིབས་དང་ཚུལ་འཛིན་ཅིང ། །གསེར་ལས་གྲུབ་པ་རྣམ་ཕྱེ་སྣ་ཚོགས་ཏེ། །སྒོ་མང་མཐའ་ཡས་པ་ནས་རྒྱུ་ཞིང་འཇུག། ལས་རྣམས་རྒྱ་མཚོ་བསམ་པ་དག་པས་གནས། །ཞིང་རྣམས་རྒྱ་མཚོ་སྣ་ཚོགས་སྙིང་པོ་ཅན། །ནམ་མཁའ་འདི་ལ་ཇི་ལྟར་སྤྲིན་གནས་བཞིན། །དེ་དག་རིན་ཆེན་མང་གཞི་རྣམ་པར་ཕྱེ། །དེ་དག་ཀུན་ན་སངས་རྒྱས་རྣམ་པར་མཛེས། །ཞིང་རྣམས་འདི་ཀུན་སེམས་ཀྱིས་རྣམ་པར་བརྟགས། །སྣ་ཚོགས་རྒྱན་དང་སྣང་བས་ཀུན་ན་གནས། ། རྣམ་པར་འཕྲུལ་པ་གཞན་དང་གཞན་དག་གིས། །ཞིང་རྣམས་རྒྱ་མཚོ་སངས་རྒྱས་སྟོན་པ་མཛད། །བདེ་དང་སྡུག་བསྔལ་མྱོང་བར་གྱུར་པ་ནི། །རྣམ་པར་དག་དང་ཉོན་མོངས་ཚུལ་བཞིན་
Ka136a
༄#། །ཏེ། །ཆོས་ཉིད་འདི་ནི་རྟག་ཏུ་ཡོད་པ་ཡིན། །དེ་ལྟར་ལས་རྣམས་རྒྱ་མཚོ་བསམ་མི་ཁྱབ། །སྐྲ་གཅིག་རྩེ་ལ་བསམ་གྱིས་མི་ཁྱབ་ཞིང ། །ཐམས་ཅད་རྡུལ་སྙེད་སྣ་ཚོགས་དབྱིབས་སུ་གནས། །ཀུན་ན་སངས་རྒྱས་རྣམ་པར་སྣང་མཛད་བཞུགས། །འཁོར་རྣམས་རྒྱ་མཚོ་ཆོས་རྣམས་རབ་ཏུ་སྟོན། །རྡུལ་གཅིག་རྩེ་ལ་ཕྲ་དང་ཡངས་པའི་རྣམས། །ཐམས་ཅད་རྡུལ་སྙེད་ཁ་དོག་ཀུན་དང་ལྡན། །ཁ་དོག་དབྱིབས་རྣམས་ཀུན་ཀྱང་རྣམ་པར་བརྟགས། །དེ་དག་ཀུན་ན་རྒྱལ་བའི་འཁོར་ལོ་འཁོར། །རྡུལ་རྣམས་ཀུན་ལ་རབ་ཏུ་ཞིང་བསྟན་པ།། དེ་དག་སྨོན་ལམ་རྣམ་པར་སྤྲུལ་པ་ཡིན། །ནམ་མཁའི་དབྱིངས་སུ་ལས་ཀྱི་སྤྲུལ་པ་ནི། །སྣ་ཚོགས་སེམས་དང་བསམ་པས་རྣམ་པར་བརྟགས། །སེམས་ཅན་ཀུན་མཉམ་རྡུལ་རྣམས་ཐམས་ཅད་ལ། །སངས་རྒྱས་རྣམ་པར་འཕྲུལ་པ་སྤྲུལ་པ་དག་།རྣམ་པར་སྣང་མཛད་ཆོས་ཉིད་དེ་ཡིན་ཏེ། །རྡུལ་ཕྲན་ཀུན་ལ་ཞིང་རྣམས་ཤིན་ཏུ་གནས། །ཀྱེ་རྒྱལ་བའི་སྲས་དག། དེ་ལ་འཇིག་རྟེན་གྱི་ཁམས་རྒྱ་མཚོའི་ལྷུན་དག་ནི། གཞན་དང་གཞན་དུ་ཤེས་པར་བྱ་སྟེ། འདི་ལྟར་འཇིག་རྟེན་གྱི་ཁམས་རྒྱ་མཚོ་ལ་ལ་ནི། རིན་པོ་ཆེའི་རྒྱན་ཐམས་ཅད་ཀྱི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། རིན་པོ་ཆེ་གཅིག་ལས་རྣམ་པ་སྣ་ཚོགས་སུ་བཀོད་པའི་རྒྱན་གྱི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། རིན་པོ་ཆེ་ཐམས་ཅད་ཀྱི་འོད་ཟེར་གྱི་ལྷུན་ཅན་ནོ། །འཇིག་
Ka136b
རྟེན་གྱི་ཁམས་རྒྱ་མཚོ་ལ་ལ་ནི། འོད་ཁ་དོག་སྣ་ཚོགས་ཀྱི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། རྒྱན་ཐམས་ཅད་ཀྱི་མདོག་གི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི།་རྡོ་རྗེའི་གཞི་མི་ཤིགས་པའི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། སངས་རྒྱས་ཀྱི་རྫུ་འཕྲུལ་དང་བྱིན་གྱི་རླབས་ཀྱི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི།་རིན་པོ་ཆེའི་མཚན་ཉིད་ཀྱི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། སངས་རྒྱས་ཀྱི་སྤྲུལ་པའི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། ཉི་མའི་ནོར་བུའི་དཀྱིལ་འཁོར་གྱི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། རིན་པོ་ཆེ་ཤིན་ཏུ་ཕྲ་བ་འཛིན་པའི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། སྣང་བའི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། །རིན་པོ་ཆེ་ཐམས་ཅད་ཀྱི་ཁ་དོག་འོད་འཕྲོ་བའི་རྣམ་པའི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། །དྲི་དང་ཁ་དོག་སྣ་ཚོགས་ཀྱི་སྤོས་ཀྱི་ལྷུན་ཅན་ནོ།། འཇིག་རྟེན་གྱི་ཁམས་རྒྱ་མཚོ་ལ་ལ་ནི། རིན་པོ་ཆེ་ཐམས་ཅད་ཀྱི་མེ་ཏོག་གི་ཅོད་པན་གྱི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། རིན་པོ་ཆེ་ཐམས་ཅད་ཀྱི་འོད་ཀྱི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། རྒྱན་ཐམས་ཅད་ཤིན་ཏུ་བསྟན་པའི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། སེམས་ཀྱི་རྣམ་པར་རྟོག་པ་སྐད་ཅིག་གིས་དམིགས་པ་ཐམས་ཅད་
Ka137a
༄#། །ཡོངས་སུ་བསྟན་པའི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། བྱང་ཆུབ་སེམས་དཔའི་ལུས་ཀྱི་རིན་པོ་ཆེའི་དབྱིངས་ཀྱི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། རིན་པོ་ཆེ་ཐམས་ཅད་ཀྱི་མེ་ཏོག་གི་ཟེ་བའི་ལྷུན་ཅན་ནོ། །འཇིག་རྟེན་གྱི་ཁམས་རྒྱ་མཚོ་ལ་ལ་ནི། སངས་རྒྱས་ཐམས་ཅད་ཀྱི་གསུང་དཔྱངས་རྣམ་པར་དམིགས་པའི་ལྷུན་ཅན་ནོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་རྒྱ་མཚོའི་ལྷུན་ཤིན་ཏུ་བསྟན་པ་རྒྱ་མཚོ་འདི་ཉིད་ལ་རབ་ཏུ་གཟུད་པར་བྱ་བའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་རྒྱ་མཚོ་ལ་ལ་ནི། །རིན་ཆེན་རང་བཞིན་ཀུན་ནས་གནས། །རྡོ་རྗེ་བཞིན་དུ་མི་ཤིགས་སྲ། །རིན་ཆེན་པདྨོ་རྣམས་ལ་གནས། །ལ་ལ་འོད་ཟེར་རང་བཞིན་ཏེ། །དག་ཅིང་གཟུང་མེད་འོད་ཟེར་འབྱུང ། །རྒྱན་རྣམས་ཀུན་གྱི་འོད་ཟེར་གྱིས། །སྣ་ཚོགས་མཁའ་བཞིན་དྲི་མ་མེད། །ལ་ལ་འོད་ཀྱི་རང་བཞིན་ཏེ། །དག་ཅིང་འོད་གསལ་ཟེར་ལ་གནས། །འོད་ཀྱི་སྤྲིན་ཅན་སྣ་ཚོགས་འོད། །བྱང་ཆུབ་སེམས་དཔའ་རྣམས་ཀྱི་གནས། །ཞིང་རྣམས་རྒྱ་མཚོ་ལ་ལ་ནི། །མིག་ཡོར་ལྟ་བུར་གནས་པ་སྟེ། །བརྗོད་དུ་མེད་ཅིང་གཟུང་དུ་མེད། །སྨོན་ལམ་དབང་གིས་རབ་ཏུ་བྱུང ། །ལ་ལ་ནོར་བུ་མུ་ཏིག་
Ka137b
རྒྱུ། །སྙིང་པོ་ཐམས་ཅད་རྣམ་པར་འབར། །མུ་ཏིག་འཁོར་ལོའི་གཞི་དག་ལ། །བྱང་ཆུབ་སེམས་དཔས་ཡོངས་སུ་གང ། །རིན་ཆེན་འོད་འཕྲོ་བྱུང་བའི་ཞིང ། །འོད་འཕྲོའི་སྤྲིན་གྱིས་མངོན་ཁེབས་ཤིང ། །རིན་ཆེན་ཐམས་ཅད་སྣ་ཚོགས་ལྡན། །ཐམས་ཅད་ལས་ཀྱིས་སྤྲུལ་པ་ཡིན། །ལ་ལ་མཚན་ལས་བྱུང་བ་སྟེ། །གཞི་ཀུན་མཚན་གྱིས་ཀུན་ཏུ་བྲིས། །ཅོད་པན་རྣམ་པ་སྣ་ཚོགས་བཀོད། ། སངས་རྒྱས་ཀུན་གྱིས་མངོན་པར་སྤྲུལ། །རྒྱ་མཚོའི་སེམས་ལས་བྱུང་བ་ཡི། །ཞིང་རྣམས་མོས་པ་ཉིད་ལ་གནས། །ཡུལ་ན་མི་གནས་སྒྱུ་མ་བཞིན། །ཡོངས་སུ་རྟོག་པས་ཡང་དག་བསྐྱེད། ། སངས་རྒྱས་སྐུ་ཡི་འོད་ཟེར་གྱི། །ནོར་བུ་སྣ་ཚོགས་ཀུན་ཏུ་གནས། །སངས་རྒྱས་སྤྲིན་རྣམས་རྣམ་པར་སྣང ། །སངས་རྒྱས་ཀུན་གྱིས་རབ་ཏུ་སྤྲུལ། །ལ་ལ་ཀུན་ཏུ་བཟང་པོ་ཡིས། །ཞིང་རྣམས་རྒྱ་མཚོ་ཤིན་ཏུ་སྤྲུལ། །ནམ་མཁའི་རྒྱན་རྣམས་ཐམས་ཅད་དང ། །སྨོན་ལམ་རྣམས་ཀྱིས་རྣམ་པར་བྲིས། །ཀྱེ་རྒྱལ་བའི་སྲས་དག། དེ་ལ་འཇིག་རྟེན་གྱི་ཁམས་རྒྱ་མཚོའི་རྒྱན་ཤིན་ཏུ་བསྟན་པ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་པར་བྱ་སྟེ། འདི་ལྟར་དམིགས་པ་རྣམ་པ་སྣ་ཚོགས་ཐམས་ཅད་ཀྱི་སྤྲིན་རབ་ཏུ་འཕྲོས་པའི་རྒྱན་དང ། འདི་ལྟ་སྟེ། བྱང་ཆུབ་སེམས་དཔའ་ཐམས་ཅད་ཀྱི་ཡོན་ཏན་གྱི་འཁོར་ལོ་རྗེས་སུ་བརྗོད་ཅིང་རབ་ཏུ་འབྱུང་བའི་རྒྱན་དང ། འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་ལས་རྣམ་པར་སྨིན་པ་
Ka138a
༄#། །རྒྱ་མཚོ་ལས་རབ་ཏུ་བྱུང་བའི་རྒྱན་དང ། འདི་ལྟ་སྟེ། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་རྒྱ་མཚོའི་ཀློང་ཡོངས་སུ་སྟོན་པའི་རྒྱན་དང ། འདི་ལྟ་སྟེ།་དུས་གསུམ་གྱི་སངས་རྒྱས་ཐམས་ཅད་ཀྱི་གཟུགས་བརྙན་སྣ་ཚོགས་རྣམ་པར་དམིགས་པའི་རྒྱན་དང ། འདི་ལྟ་སྟེ། སེམས་ཀྱི་སྐད་ཅིག་ལ་བསྐལ་པ་མཐའ་ཡས་པར་རྣམ་པར་འཕྲུལ་བའི་ཡུལ་ཡོངས་སུ་སྟོན་པའི་རྒྱན་དང ། འདི་ལྟ་སྟེ། རྒྱན་གྱི་དམིགས་པ་ཐམས་ཅད་ལ་སངས་རྒྱས་ཀྱི་སྐུ་རབ་ཏུ་འབྱུང་བའི་རྒྱན་དང ། འདི་ལྟ་སྟེ། རིན་པོ་ཆེ་དང ། སྤོས་ཐམས་ཅད་ཀྱི་སྤྲིན་རབ་ཏུ་འབྱུང་བའི་རྒྱན་དང ། འདི་ལྟ་སྟེ། སྙིང་པོ་བྱང་ཆུབ་ཀྱི་རྒྱན་དང ། འོད་ཀྱི་དཀྱིལ་འཁོར་གྱིས་རྣམ་པར་སྟོན་པའི་རྒྱན་དང ། འདི་ལྟ་སྟེ། བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་དང ། སྤྱོད་པ་ཡོངས་སུ་སྟོན་པའི་རྒྱན་དག་སྟེ། ཀྱེ་རྒྱལ་བའི་སྲས་དག། དེ་དག་ལ་སོགས་པ་འཇིག་རྟེན་གྱི་ཁམས་རྒྱ་མཚོའི་རྒྱན་ཤིན་ཏུ་བསྟན་པ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་རྒྱ་མཚོའི་རྒྱན་ཤིན་ཏུ་བསྟན་པ་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་རྒྱ་མཚོ་རྒྱ་ཆེ་མཐའ་ཡས་ཏེ། །རྣམ་དག་ལས་ཀྱི་རྣམ་པ་
Ka138b
སྣ་ཚོགས་གནས། །ཕྱོགས་བཅུའི་ཞིང་རྣམས་རྒྱ་མཚོ་རྣམས་ཀུན་ཀྱང ། །སྣ་ཚོགས་རྒྱན་ཅན་ཡངས་པར་ཀུན་ནས་གནས། །ཁ་དོག་སྣ་ཚོགས་ཡངས་པའི་ཞིང་གི་རྣམས། །རྒྱ་མཚོ་རྟག་པར་ཕྱོགས་རྣམས་ཀུན་ཏུ་འབྱུང ། །རྒྱན་དང་རིན་ཆེན་འོད་འཕྲོ་སྣ་ཚོགས་སྤྲིན། །སྒྲ་འབྱིན་ཞིང་གི་དབྱིངས་རྣམས་ཁེབས་པར་བྱེད། །བྱང་ཆུབ་སེམས་དཔའི་ཡོན་ཏན་རྒྱ་མཚོ་རྣམས། །དེ་དག་ཀུན་ཀྱང་རྒྱ་མཚོའི་ཞིང་ན་གྲག་།སྣ་ཚོགས་རྒྱན་དང་སྨོན་ལམ་སྤྲིན་གྱི་རྣམས། །དེ་དག་ཞིང་མང་རྒྱ་མཚོར་སྒྲ་ཡང་འབྱིན། །འགྲོ་བའི་ལས་རྣམས་རྒྱ་མཚོ་ཡངས་པ་དག་།རྒྱན་གྱི་སྤྲིན་རྣམས་ཀུན་ནས་སྒྲར་འབྱིན་ཏེ། ། སེམས་ཅན་དེ་དག་རྣམ་སྨིན་ཇི་འདྲ་བ། །སངས་རྒྱས་བྱིན་གྱིས་ཀུན་ནས་སྒྲ་ཡང་སྒྲོག་།དུས་གསུམ་འབྱུང་བའི་དེ་བཞིན་གཤེགས་པ་ཡི། །རྣམ་འཕྲུལ་ཞིང་རྣམས་རྒྱ་མཚོ་ཀུན་ན་སྣང ། །དམིགས་པ་རེ་རེ་ལ་ཡང་སངས་རྒྱས་ཀུན། །དེ་འདྲའི་ཞིང་མང་རྒྱ་མཚོའི་རྒྱན་ལ་ལྟོས། །འདས་པའི་བསྐལ་པ་དེ་བཞིན་མ་འོངས་དང ། །ཕྱོགས་བཅུའི་ད་ལྟར་བྱུང་བ་ཇི་སྙེད་པའི། །བསྐལ་པ་དེ་དག་རྒྱན་མང་ཡངས་པ་ཡང ། །ཞིང་རྣམས་རྒྱ་མཚོ་རེ་རེ་དག་ན་སྣང ། །དམིགས་པ་ཀུན་ལ་སངས་རྒྱས་སྤྲིན་གྱི་རྣམས། །འགྲོ་དང་མཉམ་པས་འཇིག་རྟེན་ཀུན་ཏུ་འགེངས། །རྣམ་པར་འཕྲུལ་ཞིང་སེམས་ཅན་རྣམ་པར་འདུལ། །འདི་ནི་ཞིང་རྣམས་རྒྱ་མཚོའི་རྣམ་ཐར་ཏོ། །སྤོས་འོད་སྤྲིན་དང་དེ་བཞིན་མེ་ཏོག་ཀློང ། །རྒྱན་རྣམས་སྣ་ཚོགས་ཐམས་ཅད་ཀུན་ནས་ཀྱང ། །རྟག་པར་ཀུན་ཏུ་ཁྱབ་པར་རབ་ཏུ་འབྱུང་།།
Ka139a
༄#། །འདི་ནི་ཞིང་རྣམས་རྒྱ་མཚོའི་རྣམ་ཐར་ཏོ། །ཕྱོགས་བཅུ་ཀུན་གྱི་སྙིང་པོ་བྱང་ཆུབ་རྣམས། །སྣ་ཚོགས་རྒྱན་ཅན་ཀུན་ཀྱང་མ་ལུས་པར། །ཐམས་ཅད་རྒྱ་མཚོའི་ཞིང་འདི་དབྱིངས་དག་ན། །ནམ་མཁའི་སྤྲིན་བཞིན་རྣམ་པར་སྟོན་པ་སྣང ། །རྒྱལ་སྲས་ཀུན་ཏུ་བཟང་པོ་ཐམས་ཅད་ཀྱི། །ཞིང་རྣམས་མཐའ་ཡས་འབྱམས་ཀླས་རྒྱན་གྱི་རྣམས། །འགྲོ་བའི་གྲངས་སྙེད་བསྐལ་པ་རྒྱ་མཚོར་རྣམ་སྦྱངས་པ། །ཞིང་རྣམས་རྒྱ་མཚོ་ཀུན་ན་རབ་ཏུ་སྣང ། །ཀྱེ་རྒྱལ་བའི་སྲས་དག། འཇིག་རྟེན་གྱི་ཁམས་རྒྱ་མཚོ་ཡོངས་སུ་དག་པར་བྱ་བའི་ཚུལ་རྒྱ་མཚོ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་པར་བྱ་སྟེ། འདི་ལྟར་བྱང་ཆུབ་སེམས་དཔའ་རྣམས་ཀྱི་དགེ་བའི་བཤེས་གཉེན་ཐམས་ཅད་ལ་བརྟེན་པའི་དགེ་བའི་རྩ་བས་སྐལ་བ་མཉམ་པ་དང ། བྱང་ཆུབ་སེམས་དཔའ་རྣམས་ཀྱི་ཆོས་ཀྱི་དབྱིངས་ཀྱི་བསོད་ནམས་རྒྱ་ཆེན་པོའི་སྤྲིན་རྣམ་པར་འཕེལ་བར་བྱ་བ་དང ། བྱང་ཆུབ་སེམས་དཔའ་རྣམས་ཀྱི་མོས་པའི་དཀྱིལ་འཁོར་རྒྱ་ཆེན་པོ་རྣམ་པར་དག་པ་དང ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའ་ཐམས་ཅད་རབ་ཏུ་བརྟན་པའི་ཡུལ་ལ་རྣམ་པར་སྤྱོད་པ་དང ། བྱང་ཆུབ་སེམས་དཔའ་རྣམས་ཀྱི་ཕ་རོལ་ཏུ་ཕྱིན་པ་རྒྱ་མཚོ་ཐམས་ཅད་ཡོངས་སུ་རྫོགས་པར་བྱ་བ་དང ། ཡོངས་སུ་སྦྱང་བ་དང་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ས་ཐམས་
Ka139b
ཅད་ཀྱི་དབྱིངས་ལ་རབ་ཏུ་དགོད་ཅིང་གཟུད་པའི་རྣམ་པར་སྤྱོད་པ་དང ། བྱང་ཆུབ་སེམས་དཔའ་རྣམས་ཀྱི་སྤྱོད་པ་དང ། འབྱུང་བ་རྒྱ་མཚོ་ལ་རྣམ་པར་སྤྱོད་པ་དང ། བྱང་ཆུབ་སེམས་དཔའ་རྣམས་ཀྱི་སྨོན་ལམ་རྒྱ་མཚོ་ཐམས་ཅད་མངོན་པར་སྒྲུབ་པ་རྣམ་པར་དག་པ་དང ། བྱང་ཆུབ་སེམས་དཔའ་རྣམས་ཀྱི་རྒྱ་མཚོ་ཐམས་ཅད་མངོན་པར་སྒྲུབ་པ་རྣམ་པར་དག་པ་ལ་རབ་ཏུ་འཇུག་པ་དང ། འདི་ལྟ་སྟེ།་བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཚུལ་ཡང་དག་པར་སྒྲུབ་པ་རྣམ་པར་དག་པ་དང ། དེ་དག་ལ་སོགས་པ་འཇིག་རྟེན་གྱི་ཁམས་རྒྱ་མཚོ་ཡོངས་སུ་དག་པར་བྱ་བའི་ཚུལ་རྒྱ་མཚོ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་པར་བྱའོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་རྒྱ་མཚོ་ཡོངས་སུ་དག་པར་བྱ་བའི་ཚུལ་རྒྱ་མཚོ་འདི་ཉིད་རྣམ་པར་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་རྒྱ་མཚོ་ཐམས་ཅད་སྣ་ཚོགས་རྒྱན། །སྨོན་ལམ་ཚུལ་རྣམས་རྒྱ་མཚོ་ཀུན་གྱིས་བྱུང ། །ཁ་དོག་མཐའ་ཡས་ལས་ཀྱི་རྒྱ་མཚོ་དག་།ཞིང་རྣམས་རྒྱ་མཚོ་རྟག་ཏུ་འོད་མང་འགྱེད། །སྔོན་ཆད་དགེ་བའི་བཤེས་གཉེན་བསྙེན་བཀུར་ཅིང ། །སྐལ་བ་མཉམ་པའི་ལས་དགེ་ཡོངས་སྦྱངས་ཏེ། །སྙིང་རྗེ་བྱམས་པས་འགྲོ་ཡངས་ཀུན་བཟང་ཞིང ། །ཞིང་རྣམས་རྒྱ་མཚོ་ཡངས་པ་འདི་ཀུན་སྦྱངས། །ཆོས་སྒོ་ཀུན་ཏུ་ཏིང་འཛིན་
Ka140a
༄#། །ས་ཀུན་གྱིས། །སངས་རྒྱས་ཡོན་ཏན་རྒྱ་མཚོ་ཡོངས་སྦྱངས་ཏེ། །བསམ་གཏན་ཚུལ་དང་རྣམ་ཐར་ས་སྦྱངས་ཤིང ། །ཞིང་རྣམས་རྒྱ་མཚོ་སྣ་ཚོགས་ཡངས་པ་བྱུང་།། མོས་པའི་དཀྱིལ་འཁོར་མཐའ་ཡས་སྟོབས་བསྐྱེད་ཅིང ། །རྒྱལ་བའི་མཉམ་ཉིད་མ་ནོར་རྟོགས་བྱས་ནས། །བཟོད་པ་རྒྱ་མཚོའི་ཚུལ་རྣམས་ཡོངས་སྦྱངས་ཤིང ། །རྣམ་དག་ཁ་དོག་མཐའ་ཡས་ཞིང་རྣམས་བྱུང ། །བསོད་ནམས་སྤྲིན་ནི་ནམ་མཁའ་མཉམ་བསྐྱེད་ཅིང ། །འགྲོ་བ་ཀུན་ཕན་བདེ་དོན་སྤྱོད་སྤྱད་དེ། །བསོད་ནམས་རྒྱ་མཚོ་སེམས་ཅན་ཀུན་བསྟན་པས། །འཇིག་རྟེན་ཁམས་རྣམས་རྒྱ་མཚོ་ཀུན་ཀྱང་འབྱུང ། །ཞིང་རྣམས་རྒྱ་མཚོའི་རྡུལ་སྙེད་ཚད་མེད་པའི། །ཕ་རོལ་ཕྱིན་པ་མ་ལུས་ཀུན་སྦྱངས་ཏེ། །སྨོན་ལམ་མཐར་ཕྱིན་མི་ཟད་གོམས་བྱམས་པས།། དྲི་མེད་རྒྱ་མཚོའི་ཞིང་རྣམས་ཡངས་པ་འབྱུང ། །འབྱུང་བའི་སྤྱོད་པ་གང་ཡོད་ཚད་མེད་དང ། །ཆོས་རྣམས་ཐམས་ཅད་ཡངས་པ་ཡོངས་སྦྱངས་ཏེ། །སྣ་ཚོགས་ཐབས་སྒོས་སེམས་ཅན་སྦྱངས་པས་ན། །འདི་འདྲའི་ཡིད་འོང་རྒྱ་མཚོའི་ཞིང་རྣམས་འབྱུང ། །རྒྱན་རྣམས་ཀུན་གྱི་ཚུལ་དང་ས་སྦྱངས་ཤིང ། །རྒྱལ་བའི་ཡོན་ཏན་རྒྱ་མཚོ་ཀུན་ཞུགས་ནས། །འགྲོ་བ་ཀུན་གྱི་སྡུག་བསྔལ་མཚོ་བསྐམས་པས། །ཞིང་གི་མཚོ་ཡངས་འདི་ཀུན་དག་པར་འགྱུར། །སྟོབས་རྣམས་རྒྱ་མཚོ་གཞལ་མེད་ཡོངས་སྦྱངས་ཤིང ། །འགྲོ་བ་འདི་འདྲ་ཚད་མེད་རྣམ་སྦྱངས་ཏེ། །སངས་རྒྱས་རྒྱ་
Ka140b
མཚོ་ཡངས་ཀུན་བསྙེན་བཀུར་བས། །ཞིང་རྣམས་རྒྱ་མཚོ་རྣམ་མང་རྣམ་པར་དག་།ཀྱེ་རྒྱལ་བའི་སྲས་དག་།དེ་ལ་འཇིག་རྟེན་གྱི་ཁམས་རྒྱ་མཚོ་རེ་རེར་སངས་རྒྱས་འབྱུང་བའི་ཚུལ་རྒྱ་མཚོ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་པར་བྱ་སྟེ། འདི་ལྟར་སངས་རྒྱས་འབྱུང་བ་ལ་ལ་ནི། སྐུ་ཆུང་ངུར་ཀུན་ཏུ་སྟོན་ཏོ། །འདི་ལྟ་སྟེ། སངས་རྒྱས་འབྱུང་བ་ལ་ལ་ནི། ཆོས་ཀྱི་དབྱིངས་ཐམས་ཅད་གཟུགས་ཀྱི་སྐུས་གང་བར་སྟོན་ཏོ། །སངས་རྒྱས་འབྱུང་བ་ལ་ལ་ནི། སྐུ་ཚེའི་ཚད་མི་རིང་ངོ ། །སངས་རྒྱས་འབྱུང་བ་ལ་ལ་ནི། སྐུ་ཚེའི་ཚད་རིང་ངོ ། །སངས་རྒྱས་འབྱུང་བ་ལ་ལ་ནི།་སངས་རྒྱས་ཀྱི་ཞིང་གཅིག་ཡོངས་སུ་དག་པར་བྱིན་གྱིས་རློབ་བོ། །སངས་རྒྱས་འབྱུང་བ་ལ་ལ་ནི། འཇིག་རྟེན་གྱི་ཁམས་རྒྱ་མཚོ་ཐམས་ཅད་ཡོངས་སུ་དག་པར་བྱིན་གྱིས་རློབ་བོ། །སངས་རྒྱས་འབྱུང་བ་ལ་ལ་ནི། ཚུལ་གཅིག་གིས་བསྟན་པའི་ཆོས་ཀྱི་འཁོར་ལོ་བྱིན་གྱིས་རློབ་བོ། །སངས་རྒྱས་འབྱུང་བ་ལ་ལ་ནི། ཚུལ་བསམ་གྱིས་མི་ཁྱབ་པར་བསྟན་པའི་ཆོས་ཀྱི་འཁོར་ལོ་བྱིན་གྱིས་རློབ་བོ། །སངས་རྒྱས་འབྱུང་བ་ལ་ལ་ནི། སེམས་ཅན་གྱི་ཁམས་ཉུང་ངུ་རྣམ་པར་གདུལ་བ་བྱིན་གྱིས་རློབ་བོ། །སངས་རྒྱས་འབྱུང་བ་ལ་ལ་ནི། སེམས་ཅན་རྒྱ་མཚོ་མཐའ་ཡས་པ་རྣམ་པར་གདུལ་བ་བྱིན་གྱིས་རློབ་སྟེ། དེ་དག་ལ་སོགས་པ་འཇིག་རྟེན་གྱི་ཁམས་རྒྱ་མཚོ་རེ་རེར་སངས་རྒྱས་འབྱུང་བའི་ཚུལ་རྒྱ་མཚོ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་
Ka141a
༄#། །པར་བྱའོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་སངས་རྒྱས་འབྱུང་བའི་ཚུལ་རྒྱ་མཚོའི་ཕྱོགས་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བ་འབྱུང་བ་ཐབས་རྣམས་སྣ་ཚོགས་ཀྱི། །སྒོ་ནས་ཞིང་རྣམས་རྒྱ་མཚོར་རབ་ཏུ་འབྱུང ། །དེ་དག་སེམས་ཅན་བསམ་པ་ཇི་བཞིན་མཁྱེན། །སངས་རྒྱས་ཐབས་ཀྱི་སྒོ་མང་རྒྱ་མཚོ་འོ། །སངས་རྒྱས་ཆོས་སྐུ་བསམ་གྱིས་མི་ཁྱབ་སྟེ། །མིག་ཡོར་མ་ཡིན་མཚན་ཉིད་མེད་པའི་གཟུགས། །གཟུགས་ཀྱི་ཁྱད་པར་འགྲོ་བ་འདི་དག་ཏུ། །སེམས་ཅན་བསམ་པའི་ཕྱོགས་བཞིན་སྟོན་ལ་ལྟོས། །སྐུ་ཚེ་ཐུང་བར་ལ་ལ་རྣམ་པར་སྟོན། །ལ་ལ་བསྐལ་པ་བསམ་ཡས་བྱིན་གྱིས་རློབ། །ཆོས་ཀྱི་སྐུ་ནི་ཕྱོགས་རྣམས་ཀུན་གྱི་སྒོ། །རབ་ཏུ་མཛེས་པར་འགྲོ་ནང་འདི་ན་བཞུགས། །ལ་ལ་ཞིང་རྣམས་རྒྱ་མཚོ་བསམ་ཡས་དག་།སྦྱོང་ཞིང་འབྱམས་ཀླས་ཕྱོགས་བཅུ་ཀུན་ན་ཡང ། ། ལ་ལ་ཞིང་གཅིག་རྣམ་པར་སྦྱོང་བར་མཛད། །སྨོན་ལམ་མ་ལུས་ཀུན་ཀྱང་ཚུལ་གཅིག་གོ་།ལ་ལ་བསམ་གྱིས་མི་ཁྱབ་ཐེག་པའི་རྒྱན། །སེམས་ཅན་ཡིད་བཞིན་སངས་རྒྱས་སྟོན་པ་མཛད། ། ལ་ལ་ཐེག་པ་གཅིག་ཀྱང་རབ་སྟོན་ཏེ། །རྒྱལ་བའི་ཐབས་ནི་གཅིག་ཀྱང་མཐའ་ཡས་སོ། །རང་བྱུང་ལ་ལ་བྱང་ཆུབ་སངས་རྒྱས་ནས། །སེམས་ཅན་མི་མང་ལམ་ལ་གཞོག་པ་མཛད། །ལ་ལ་སྐད་
Ka141b
ཅིག་གཅིག་གིས་སེམས་ཅན་རྣམས། །རྒྱ་མཚོ་བསམ་ཡས་བྱང་ཆུབ་དོན་དུ་འདུལ། །ལ་ལ་སྤུ་ཡི་སྒོ་ནས་བསམ་ཡས་པའི། །སངས་རྒྱས་སྤྲུལ་བའི་སྤྲིན་རྣམས་རབ་ཏུ་འགྱེད། །འགྲོ་བ་ཀུན་ཏུ་དེ་དག་མངོན་བཀང་ཞིང ། །ཐབས་ཀྱི་སྒོ་ནས་སེམས་ཅན་འདུལ་བ་མཛད། །ལ་ལ་སངས་རྒྱས་གསུང་གིས་ཀུན་བཀང་ཞིང ། །ཞིང་དུ་སེམས་ཅན་ཡིད་བཞིན་རབ་ཏུ་སྒྲོག་།བསམ་ཡས་བསྐལ་པར་དེ་དག་གསུང་སྒྲོག་ཅིང ། །སེམས་ཅན་རྒྱ་མཚོ་མཐའ་ཡས་རྣམ་པར་འདུལ། །ལ་ལ་ཞིང་རྒྱན་བསམ་གྱིས་མི་ཁྱབ་སྟེ། །འཁོར་རྣམས་ཡོངས་དག་ཀུན་ནས་འཁོད་བཅས་པས། །ཞིང་མང་རྒྱ་མཚོ་ཕྱོགས་སུ་གང་བྱས་ཤིང ། །སངས་རྒྱས་མཁའ་ལ་སྤྲིན་ལྟར་ཁྱབ་པར་བཞུགས། །དེ་ལྟར་སངས་རྒྱས་ཐབས་ནི་བསམ་མི་ཁྱབ། །ཞིང་རྣམས་རྒྱ་མཚོ་ཀུན་ཏུ་རྒྱས་བཀང་ཞིང ། །འགྲོ་བ་ཀུན་ལ་སངས་རྒྱས་མངོན་སུམ་སྟེ། །སྣ་ཚོགས་རྒྱན་མང་དུ་མའི་ཚུལ་དང་ལྡན། །ཀྱེ་རྒྱལ་བའི་སྲས་དག་།དེ་ལ་འཇིག་རྟེན་གྱི་ཁམས་རྒྱ་མཚོའི་བསྐལ་པའི་བྱིན་གྱི་རླབས་ཀྱི་ཚུལ་ཤིན་ཏུ་བསྟན་པ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་པར་བྱ་སྟེ། འདི་ལྟར་ཞིང་རྒྱ་མཚོ་ལ་ལ་ནི། བསྐལ་པ་གྲངས་མེད་པར་བྱིན་གྱིས་བརླབས་པའོ། །ཞིང་རྒྱ་མཚོ་ལ་ལ་ནི། བསྐལ་པ་ཚད་མེད་པར་བྱིན་གྱིས་བརླབས་པའོ། །ཞིང་རྒྱ་མཚོ་ལ་ལ་ནི། བསྐལ་པ་དཔག་ཏུ་མེད་པར་བྱིན་གྱིས་བརླབས་པའོ། །ཞིང་རྒྱ་མཚོ་ལ་ལ་ནི། བསྐལ་པ་བསམ་གྱིས་མི་ཁྱབ་པར་བྱིན་གྱིས་བརླབས་པའོ། །ཞིང་རྒྱ་མཚོ་
Ka142a
༄#། །ལ་ལ་ནི།་བསྐལ་པ་མཚུངས་པ་མེད་པར་བྱིན་གྱིས་བརླབས་པའོ། །ཞིང་རྒྱ་མཚོ་ལ་ལ་ནི། བསྐལ་པ་ཀུན་ནས་མཐའ་ཡས་པར་བྱིན་གྱིས་བརླབས་པའོ། །ཞིང་རྒྱ་མཚོ་ལ་ལ་ནི། བསྐལ་པ་ཀུན་ནས་མུ་མེད་པར་བྱིན་གྱིས་བརླབས་པའོ། །ཞིང་རྒྱ་མཚོ་ལ་ལ་ནི། བསྐལ་པ་གཞལ་དུ་མེད་པར་བྱིན་གྱིས་བརླབས་པའོ། །ཞིང་རྒྱ་མཚོ་ལ་ལ་ནི། བསྐལ་པ་བརྗོད་དུ་མེད་པར་བྱིན་གྱིས་བརླབས་པ་སྟེ། དེ་དག་ལ་སོགས་པ་འཇིག་རྟེན་གྱི་ཁམས་རྒྱ་མཚོའི་བསྐལ་པ་བྱིན་གྱི་རླབས་ཀྱི་ཚུལ་ཤིན་ཏུ་བསྟན་པ་རྒྱ་མཚོ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་འཇིག་རྟེན་གྱི་ཁམས་རྒྱ་མཚོའི་བསྐལ་པའི་བྱིན་གྱི་རླབས་ཀྱི་ཚུལ་ཤིན་ཏུ་བསྟན་པ་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན་གྱིས་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་རྒྱ་མཚོ་བསྐལ་པ་ཐ་དད་དེ། །སྣ་ཚོགས་ཚུལ་འཇུག་རྒྱན་རྣམས་གཞན་དང་གཞན། །ཕྱོགས་བཅུའི་ཞིང་རྣམས་རྒྱ་མཚོ་ཀུན་ན་སྣང ། །བསྐལ་པའི་ཚུལ་ནི་རྒྱ་མཚོ་གྲངས་ཀྱང་མེད། །བསྐལ་པ་མི་མཐུན་འགྲོ་བ་ཀུན་དང་མཉམ། །ཕྱོགས་དབྱིངས་འཇིག་རྟེན་རྒྱ་མཚོའི་ཁམས་ན་སྣང ། །བསྐལ་པ་མཐའ་ཡས་ལ་ལ་རིང་དང་ཐུང ། །བསྐལ་པ་སྣ་ཚོགས་རྒྱལ་བའི་སྒྲས་ཀྱང་བསྒྲགས། །རྒྱ་མཚོའི་ཞིང་རྣམས་འདི་དག་ཕྱོགས་
Ka142b
དབྱིངས་སྣང ། །བྱིན་རླབས་བསྐལ་པ་ཞིང་རྡུལ་སྙེད་དང་ལྡན། །ལ་ལ་གཞན་རྣམས་བསྐལ་པ་གཅིག་གིས་འཇུག་།ལ་ལ་བསྐལ་གྲངས་སྨོན་ལམ་དུ་མས་བྱུང ། །བསྐལ་པ་ལ་ལ་དྲི་མེད་ལ་ལ་ཉོན་མོངས་ཅན། །ལ་ལ་རྣམ་དག་ལ་ལ་ཉོན་མོངས་རྣམ་པར་གནས། །བསྐལ་པའི་མིང་ནི་སྨོན་ལམ་རྒྱ་མཚོའི་ཚུལ་གྱིས་བྱུང ། །སེམས་ཅན་འདུ་ཤེས་རྣམ་པས་ཐ་དད་ཚུལ་ལ་འཇུག་།བསྐལ་པ་ཞིང་གི་རྡུལ་སྙེད་སྔོན་ཆད་སྤྱོད་སྤྱད་པས། །འཇིག་རྟེན་ཁམས་རྣམས་རྒྱ་མཚོ་ཤིན་ཏུ་ཡངས་ཤིང་དག། དེ་དག་ཀུན་ནས་སངས་རྒྱས་ཡུལ་རྒྱན་ཚད་ཀྱང་མེད། །འདི་དག་རྒྱ་ཆེན་བསྐལ་པའི་འཇིག་རྟེན་རྒྱ་མཚོའི་ཁམས། །བསྐལ་པའི་འོད་དང་འོད་ཟེར་རིན་ཆེན་མིང་སྣ་ཚོགས། །བཅོམ་ལྡན་འདས་དང་འོད་མཉམ་འོད་འཕྲོའི་མིག་སྣང་བ། །སྣང་དང་དྲི་མེད་བཟང་པོ་བསྐལ་པའི་མིག་ལ་འཇུག ། བསྐལ་པ་འདི་དག་རྣམ་དག་བསྐལ་པ་ཀུན་ལས་བྱུང ། །དྲི་མེད་བསྐལ་པ་ལ་ལར་སངས་རྒྱས་གཅིག་སྐྱེའོ། །བསྐལ་པ་ལ་ལར་མི་ཡི་གཙོ་བོ་མཐའ་ཡས་འབྱུང ། །བསྐལ་པའི་ཚུལ་རྣམས་ཐམས་ཅད་ས་ཚུལ་ཟད་མི་ཤེས། །སྨོན་ལམ་སྟོབས་མཐུས་བསྐལ་པ་སྣ་ཚོགས་འཇུག་པར་འགྱུར། །བསྐལ་པ་ལ་ལ་མཐའ་ཡས་རྣམས་ཀྱང་བསྐལ་པ་གཅིག་ཏུ་འདུས། །བསྐལ་པ་ལ་ལ་གཅིག་ཀྱང་བསྐལ་པ་བྱེ་བའི་མཐུ། །བསྐལ་པ་རྒྱ་མཚོ་ཀུན་ཀྱང་སྣ་ཚོགས་སྒོ་ནས་འཇུག་།ཕྱོགས་བཅུའི་འཇིག་རྟེན་ཁམས་ཀྱི་ནང་ནས་སྒྲ་ཡང་འབྱིན། །བསྐལ་པ་ལ་ལར་བསྐལ་པ་ཀུན་གྱི་རྐྱེན་ཀྱང་
Ka143a
༄#། །འབྱུང ། །མིང་གི་རྒྱན་རྣམས་རྣམ་པར་དག་པའང་དེ་ལ་ཡིན། །བསྐལ་པ་ལ་ལ་སངས་རྒྱས་རྫུ་འཕྲུལ་མཐུ་ཡིས་བྱུང ། །བསྐལ་པའི་ཚུལ་རྣམས་ཀུན་གྱི་འདི་ནི་རྒྱན་ཡངས་ཡིན། །ཞིང་དང་བསྐལ་པ་རྒྱ་མཚོ་ཚུལ་ནི་གཅིག་གིས་དག་།ཞིང་གི་རྡུལ་རྣམས་ཀུན་ཀྱང་ཚད་མེད་གཞལ་དུ་མེད། །སྐད་ཅིག་ཡུད་ཙམ་ཉི་མའི་གྲངས་ཀྱི་བསྐལ་པར་འགྱུར། ། འདི་དག་ཐམས་ཅད་སེམས་ཅན་འདུ་ཤེས་རྣམ་པར་འབྱུང ། །ཀྱེ་རྒྱལ་བའི་སྲས་དག། དེ་ལ་འཇིག་རྟེན་གྱི་ཁམས་རྒྱ་མཚོ་བསྐལ་པ་མཐའ་ཡས་པའི་རྒྱུད་ཀྱི་ཚུལ་རྒྱ་མཚོ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་པར་བྱ་སྟེ། འདི་ལྟར་ཆོས་ཉིད་རབ་ཏུ་ཐོབ་པས་འཇིག་རྟེན་གྱི་ཁམས་རྒྱ་མཚོ་དག་བསྐལ་པས་འཇིག་ཅིང་འདུ་བ་ལ་རབ་ཏུ་འཇུག་པར་གནས་པ་དང ། འཇིག་རྟེན་གྱི་ཁམས་རྒྱ་མཚོར་གཏོགས་པའི་སེམས་ཅན་རྣམས་ཀྱི་ཉོན་མོངས་པས་བསྐལ་པ་མཐའ་ཡས་པ་ཀུན་ནས་གནས་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོར་གཏོགས་པའི་སེམས་ཅན་རྣམས་ཀྱི་བསོད་ནམས་རྒྱ་མཚོ་རྒྱ་ཆེན་པོ་གསོག་པ། རྣམ་པར་དག་པས་འཇིག་རྟེན་གྱི་ཁམས་རྒྱ་མཚོ་ཀུན་ནས་ཉོན་མོངས་ལ་རྣམ་པར་དག་པར་གནས་པ་དང ། འདི་ལྟ་སྟེ། བྱང་ཆུབ་སེམས་དཔའ་མོས་པ་སྣ་ཚོགས་ཀྱིས་སྤྱོད་པ་རྣམས་སྐྱེ་བས་འཇིག་རྟེན་གྱི་ཁམས་རྒྱ་མཚོ་རྣམ་པར་དག་ལ་ཀུན་ནས་ཉོན་མོངས་པར་གནས་པ་དང །
Ka143b
འདི་ལྟ་སྟེ། སེམས་ཅན་རྒྱ་མཚོ་རྒྱ་ཆེན་པོ་བྱང་ཆུབ་ཀྱི་སེམས་ལ་གནས་པས་འཇིག་རྟེན་གྱི་ཁམས་རྒྱ་མཚོ་ཤིན་ཏུ་དག་པར་གནས་པ་དང ། འདི་ལྟ་སྟེ། བྱང་ཆུབ་སེམས་དཔའ་རྣམས་འཇིག་རྟེན་གྱི་ཁམས་གཞན་དང་གཞན་དུ་འདོང་བས་བསྐལ་པ་རྒྱན་ཐ་དད་པའི་ཚུལ་དུ་གནས་པ་དང ། འདི་ལྟ་སྟེ། ཕྱོགས་བཅུའི་བྱང་ཆུབ་སེམས་དཔའ་རྣམས་འཇིག་རྟེན་གྱི་ཁམས་རྒྱ་མཚོར་འདུས་པས་བསྐལ་པ་མཐའ་ཡས་པ་རྒྱན་ཤིན་ཏུ་མང་པོར་ཀུན་ནས་གནས་པ་དང ། འདི་ལྟ་སྟེ། དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བས་འཇིག་རྟེན་གྱི་ཁམས་རྒྱ་མཚོ་དག་གི་རྒྱན་ནུབ་པར་འགྱུར་བ་དང ། འདི་ལྟ་སྟེ། སངས་རྒྱས་འབྱུང་བའི་ཚེ་འཇིག་རྟེན་གྱི་ཁམས་རྒྱ་མཚོ་རྣམས་རྒྱན་གྱིས་བརྒྱན་པར་ཀུན་ནས་གནས་པ་དང ། འདི་ལྟ་སྟེ། དེ་བཞིན་གཤེགས་པ་རྣམ་པར་འཕྲུལ་བས་འཇིག་རྟེན་གྱི་ཁམས་རྒྱ་མཚོའི་བསྐལ་པ་མཐའ་ཡས་པ་ཡོངས་སུ་དག་པར་གནས་པ་དང ། དེ་དག་ལ་སོགས་པ་འཇིག་རྟེན་གྱི་ཁམས་རྒྱ་མཚོའི་བསྐལ་པ་རྒྱ་མཚོ་མཐའ་ཡས་པའི་རྒྱུད་ཀྱི་ཚུལ་རྒྱ་མཚོ་ཀུན་ནས་གནས་པའི་ཚུལ་ནི། འཇིག་རྟེན་གྱི་ཁམས་རྒྱ་མཚོ་རྡུལ་ཤིན་ཏུ་ཕྲ་བ་སྙེད་དུ་ཤེས་པར་བྱའོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་རྒྱ་མཚོའི་བསྐལ་པ་མཐའ་ཡས་པའི་ཚུལ་རྒྱ་མཚོ་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་
Ka144a
༄#། །བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་རྒྱ་མཚོའི་ཆོས་ཉིད་འདི་དག་ལྟོས། །ཆོས་ཀྱིས་བྱུང་སྟེ་ཇི་ལྟར་གནས་པ་ལྟར། །དེ་དག་འབྱུང་ཞིང་འཇིག་པར་འགྱུར་བར་ཡང ། །ཞིང་རྣམས་རྒྱ་མཚོ་ཐམས་ཅད་རབ་ཏུ་སྣང ། །སེམས་ཅན་ཉོན་མོངས་མི་བཟད་ལྡན་པ་དང ། ལས་དང་ཉོན་མོངས་ངན་པས་བསྒྲིབས་པའི་རྣམས། །དེ་དག་བསམ་ལ་ཞིང་གི་རྒྱ་མཚོ་རྣམས། །ཀུན་ནས་ཉོན་མོངས་ལྡན་པར་གྱུར་པ་ཡིན། །སེམས་ཅན་རྣམ་དག་བསམ་པ་ལྡན་པ་དང ། །བསོད་ནམས་བརྟན་དང་རྣམ་དག་སྤྱོད་ཡུལ་ཅན། །རྣམ་དག་ཡུལ་ལ་ཉོན་མོངས་ལྡན་གྱུར་རྣམས། །དེ་དག་མོས་པ་སྣ་ཚོགས་སྤྱོད་ཡུལ་གྱི། །བྱང་ཆུབ་སེམས་དཔའ་སྐྱེ་བའི་དུས་དག་ན། བསྐལ་པ་དེ་ནི་རྣམ་པར་དག་པར་སྣང ། །སེམས་ཅན་ཉོན་མོངས་ལྡན་པར་གྱུར་པ་ཡང ། །དེ་ཡི་ཆོས་ཉིད་བསམ་ཡས་ཡངས་པ་ཡི། །བྱང་ཆུབ་བསམ་པ་ཇི་ལྟར་བསྐྱེད་པ་དང ། ། དེ་དག་བསམ་པ་ཇི་ལྟར་རྣམ་འཕེལ་བས། །དེ་བཞིན་བསྐལ་པ་རྒྱ་མཚོ་མང་པོ་དག་།བསམ་གྱིས་མི་ཁྱབ་ཞིང་རྒྱན་ཡོངས་སུ་སྦྱོང ། །བྱེ་བ་མང་པོ་མཐའ་ཡས་མི་ཟད་པའི། །བྱང་ཆུབ་སེམས་དཔའ་ཕྱོགས་བཅུ་ཀུན་རྒྱུ་ཡང ། །རྒྱན་ལ་རྣམ་པ་ཐ་དད་ཡོད་པ་མིན། །བསྐལ་པ་ཐ་དད་ཚུལ་གྱི་བྱེ་ཕྲག་སྣང ། །རྡུལ་རྣམས་རེ་རེ་སྦུབས་སུ་དུས་ཀུན་ཏུ། །སངས་རྒྱས་ཞིང་གི་
Ka144b
རྡུལ་དང་མཉམ་པ་ཡི། །རྒྱལ་སྲས་ཇི་ཚུལ་འདོད་པ་དེ་བཞིན་དུ། །ཞིང་རྣམས་རྒྱ་མཚོ་དེ་ཚུལ་དག་པར་གྱུར། །གལ་ཏེ་རྒྱལ་བ་རྣམས་ནི་སྐྱེ་འགྱུར་ན། །ཞིང་རྣམས་རྒྱན་གྱིས་ཤིན་ཏུ་བརྒྱན་པར་འགྱུར། །བསམ་པ་ཡོངས་དག་དེ་བཞིན་རྒྱས་འགྱུར་ཏེ། །འདི་ནི་ཞིང་རྒྱན་ཕུན་སུམ་ཚོགས་པའོ། །གལ་ཏེ་རྒྱལ་བ་མྱ་ངན་འདས་གྱུར་ན། །དེ་ཚེ་དེ་ཞིང་རྒྱན་རྣམས་འགྲིབ་པར་འགྱུར། ། སེམས་ཅན་རྣམས་ཀྱང་སྣོད་དུ་རུང་བ་མིན། །ཞིང་གི་རྒྱ་མཚོ་དེ་ཡང་ཉོན་མོངས་ལྡན། །སངས་རྒྱས་རྫུ་འཕྲུལ་རྣམ་འཕྲུལ་ཡངས་པ་དག་།བསམ་གྱིས་མི་ཁྱབ་གང་ཚེ་སྟོན་པ་ན། །དེ་ཚེ་ཞིང་རྣམས་རྒྱ་མཚོ་མང་པོ་དག་།ཀུན་ཀྱང་རྒྱན་གྱིས་རྣམ་པར་བརྒྱན་པར་འགྱུར། །ཀྱེ་རྒྱལ་བའི་སྲས་དག། དེ་ལ་འཇིག་རྟེན་གྱི་ཁམས་རྒྱ་མཚོ་ཐ་མི་དད་པའི་ཚུལ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་པར་བྱ་སྟེ། དེ་དག་ནི། སངས་རྒྱས་བཅོམ་ལྡན་འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་སོ། །གསུང་ངོ ། །གསུང་བར་འགྱུར་རོ། །དེ་ནི། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་གཅིག་ཏུ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་ཐ་མི་དད་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་དག་ཏུ་སངས་རྒྱས་སྐྱེ་ཞིང་འབྱུང་བ་ཐ་མི་དད་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་དག་གི་སྙིང་པོ་བྱང་
Ka145a
༄#། །ཆུབ་ཐམས་ཅད་ནས་ཆོས་ཀྱིས་དབྱིངས་ཀྱིས་ཕྱོགས་རྒྱས་པར་འགེངས་པ་ཐ་མི་དད་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་དག་གི་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཐ་མི་དད་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་དག་གི་སངས་རྒྱས་ཐམས་ཅད་ཀྱི་འོད་ཀྱི་དཀྱིལ་འཁོར་ཆོས་ཀྱི་དབྱིངས་རྒྱས་པར་འགེངས་པ་ཐ་མི་དད་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་དག་ཏུ་སངས་རྒྱས་ཐམས་ཅད་ཀྱི་སྤྲུལ་པའི་སྤྲིན་དང ། མཚན་གྱི་འཁོར་ལོ་ཐ་མི་དད་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་དག་ཏུ་སངས་རྒྱས་ཐམས་ཅད་ཀྱི་དབྱངས་ཀྱི་དཀྱིལ་འཁོར་བསྐལ་པ་མཐའ་ཡས་པར་བརྗོད་ཅིང་རྒྱས་པར་བྱ་བའི་བྱིན་གྱི་རླབས་ཐ་མི་དད་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་དག་ཏུ་ཆོས་ཀྱི་འཁོར་ལོའི་ཚུལ་ཐ་མི་དད་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་དག་ཏུ་རྡུལ་ཤིན་ཏུ་ཕྲ་བ་གཅིག་ལ་འཇིག་རྟེན་གྱི་ཁམས་རྒྱ་མཚོ་ཐམས་ཅད་ཡོངས་སུ་འདུ་བ་ཐ་མི་དད་པ་དང ། འདི་ལྟ་སྟེ། འཇིག་རྟེན་གྱི་ཁམས་རྒྱ་མཚོ་དག་ཏུ་རྡུལ་འབྱམས་ཀླས་པ་ཐམས་ཅད་ལ་དུས་གསུམ་གྱི་སངས་རྒྱས་ཀྱི་ཡུལ་རྒྱ་ཆེན་པོ་སྟོན་ཅིང་རྗོད་པ་ཐ་མི་དད་པ་དག་སྟེ། ཀྱེ་རྒྱལ་བའི་སྲས་དག། དེ་དག་ལ་སོགས་པ་འཇིག་རྟེན་གྱི་ཁམས་རྒྱ་མཚོ་ཐ་མི་དད་པའི་ཚུལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་པར་
Ka145b
བྱའོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་རྒྱ་མཚོ་ཐ་དད་པའི་ཚུལ་རྒྱ་མཚོ་ཤིན་ཏུ་བསྟན་པ་འདི་ཉིད་གསལ་བར་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྡུལ་གཅིག་སྟེང་ན་ཞིང་མང་རྒྱ་མཚོ་སྟེ། །ཀུན་ན་རྒྱན་མང་རྣམ་དག་ཀུན་ཡོད་ཀྱང ། ། གནོད་པ་མེད་ཅིང་འདྲ་བ་གང་ཡང་མེད། །འཇུག་པ་བསམ་གྱིས་མི་ཁྱབ་འདི་ལ་ལྟོས། །རྡུལ་རྣམས་ཀུན་ལ་བསམ་ཡས་སངས་རྒྱས་བཞུགས། །སེམས་ཅན་ཀུན་གྱི་བསམ་པ་ཡིད་བཞིན་དུ། །ཞིང་རྣམས་རྒྱ་མཚོ་ཐམས་ཅད་ཁྱབ་བྱས་ཀྱང ། །དེ་དག་ཐབས་ལ་ཐ་དད་གང་ཡང་མེད། །རྡུལ་རྣམས་ཀུན་ལ་ཤིང་དབང་མཐའ་ཡས་པ། །སྣ་ཚོགས་རྒྱན་ཕྱུང་ཀུན་ནས་བྲེས་སྦྱངས་ཏེ། །ཕྱོགས་རྣམས་ཀུན་གྱི་ཞིང་དུ་མངོན་བཀང་ཡང ། །དེ་དག་ཐ་དད་འགྱུར་བ་ནམ་ཡང་མེད། །རྡུལ་ཕྲན་རྒྱ་མཚོ་རྡུལ་ཕྲན་རེ་རེ་ལ། །མི་ཡི་གཙོ་བོ་འཁོར་རྣམས་ཀུན་བསྐོར་ཅིང ། །འཇིག་རྟེན་ཀུན་ཏུ་བཀང་སྟེ་འཕགས་བཞུགས་ཀྱང ། །གནོད་པ་དག་དང་འདྲ་བའི་ཉེས་པ་མེད། །རྡུལ་གཅིག་ལ་ནི་མཐའ་ཡས་འོད་ཀྱི་སྤྲིན། །ཕྱོགས་བཅུའི་ཞིང་རྣམས་རྒྱ་མཚོ་ཀུན་བཀང་ཞིང ། ། བདེ་གཤེགས་རྣམས་ཀྱི་བྱང་ཆུབ་སྤྱོད་བསྟན་ཀྱང ། །རྒྱ་མཚོའི་ཞིང་རྣམས་ཐ་དད་གང་ཡང་མེད། །རྡུལ་རྣམས་ཀུན་ལ་ཁ་དོག་བསམ་མི་ཁྱབ། །སྤྲུལ་པའི་སྤྲིན་གྱིས་ཀུན་ཏུ་གང་བྱས་ཏེ། །
Ka146a
༄#། །སངས་རྒྱས་སྤྲུལ་པས་སེམས་ཅན་རྣམས་འདུལ་ཡང ། །འབྱམས་ཀླས་ཕྱོགས་ན་ཐ་དད་གང་ཡང་མེད། །རྡུལ་རྣམས་ཀུན་ལ་རྒྱ་མཚོའི་ཆོས་བརྗོད་དོ། །དེ་དག་འཁོར་ལོའི་ཚུལ་བཞིན་འཁོར་མཛད་ཅིང ། །ཐབས་དང་མཐུ་ཡི་སྒོ་མོ་སྣ་ཚོགས་ཀྱིས། །ཐམས་ཅད་བརྗོད་ཀྱང་དེ་ལ་ཐ་དད་མེད། །རྡུལ་གཅིག་ལ་ནི་རྒྱལ་བ་ཀུན་གྱིས་གསུང ། །འགྲོ་བ་སྣོད་དུ་གྱུར་ལ་དེ་དག་བརྗོད་བྱས་ཏེ། །རྒྱ་མཚོའི་ཞིང་དུ་བསྐལ་པར་བྱིན་བརླབས་ཀྱང ། །དེ་དག་གསུང་གི་ཡན་ལག་ཐ་མི་དད། །ཞིང་རྣམས་རྒྱ་མཚོ་མཐའ་ཡས་རྒྱན་གྱི་རྣམས། །ཐམས་ཅད་རྡུལ་སྦུབས་གཅིག་ཏུ་རབ་ཏུ་འཛུད། །རྒྱལ་བ་རྣམས་ཀྱི་རྫུ་འཕྲུལ་མཐུ་ལ་ལྟོས། །ལས་ཀྱི་དངོས་ལས་དེ་དག་སྐྱེས་པ་མིན། །རྡུལ་གཅིག་ལ་ནི་དུས་གསུམ་རྒྱལ་བ་དག་།ཇི་ལྟར་བྱུང་བ་དེ་དག་ཐམས་ཅད་སྣང ། །དེ་དག་གཤེགས་དང་བྱོན་པ་གང་ཡང་མེད། །འགྲོ་བ་ཀུན་ན་སངས་རྒྱས་རྣམ་པར་འཕྲུལ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། འཇིག་རྟེན་གྱི་ཁམས་རྒྱ་མཚོ་ཤིན་ཏུ་བསྟན་པའི་ཕྱོགས་གསལ་བར་བྱ་བ་ཡང་དག་པར་བསྒྲུབས་པ་ཞེས་བྱ་བ་སྟེ། ལེའུ་བཞི་པའོ།། །།བམ་པོ་བརྒྱད་པ། ཀྱེ་རྒྱལ་བའི་སྲས་དག། དེ་ལ་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གིས་བརྒྱན་གྱིས་བརྒྱན་པ་འདི་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་
Ka146b
མཛད་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་བསྐལ་པ་རྒྱ་མཚོའི་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ཡོངས་སུ་དག་པར་བྱས་ཏེ། བསྐལ་པ་རེ་རེ་ཞིང་ཡང་དེ་བཞིན་གཤེགས་པ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་ཞབས་ཀྱི་དྲུང་དུ་སྨོན་ལམ་རྒྱ་མཚོ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ཡོངས་སུ་དག་པར་བྱས་སོ། །ཀྱེ་རྒྱལ་བའི་སྲས་དག། འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་དེ་ནི། རླུང་གི་དཀྱིལ་འཁོར་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཤིན་ཏུ་བཟུང་བ་སྟེ། དེ་ལ་རླུང་གི་དཀྱིལ་འཁོར་ཐམས་ཅད་ཀྱི་འོག་མ་ནི། གཞི་ཀུན་ནས་རྟོན་པ་ཞེས་བྱ་སྟེ། རིན་པོ་ཆེ་ཐམས་ཅད་ཀྱི་འོད་འཕྲོ་བ་འབར་བས་བརྒྱན་པའི་གཞིས་རྟེན་ཏོ། །དེའི་སྟེང་ན་རླུང་གི་དཀྱིལ་འཁོར་རིན་པོ་ཆེ་སྣ་ཚོགས་ཀྱི་རྒྱན་འབྱུང་བ་ཞེས་བྱ་བ་ཡོད་དེ། ནོར་བུའི་རྒྱལ་པོ་འོད་རྣམ་པར་དག་པའི་རྒྱལ་མཚན་གྱི་གཞིས་རྟོན་ཏོ། །དེའི་སྟེང་ན་རླུང་གྱི་དཀྱིལ་འཁོར་རིན་པོ་ཆེའི་མཐུ་ཞེས་བྱ་བ་ཡོད་དེ། རིན་པོ་ཆེ་ཐམས་ཅད་ཀྱི་དྲིལ་བུའི་གཞིས་རྟོན་ཏོ། །དེའི་སྟེང་ན་རླུང་གི་དཀྱིལ་འཁོར་འོད་འཕྲོ་བ་མཉམ་པར་རྟོན་པ་ཞེས་བྱ་བ་ཡོད་དེ། ནོར་བུའི་རྒྱལ་པོ་ཉི་མ་སྣང་བའི་རྒྱལ་མཚན་གྱི་འཁོར་ལོའི་གཞིས་རྟོན་ཏོ། །དེའི་སྟེང་ན་རླུང་གི་དཀྱིལ་འཁོར་རྒྱན་ཀུན་ནས་རྣམ་པར་བྲེས་པ་ཞེས་བྱ་བ་ཡོད་དེ། འོད་ཟེར་གྱི་འོད་ཀྱི་དཀྱིལ་
Ka147a
༄#། །འཁོར་གྱི་མེ་ཏོག་གི་གཞིས་རྟོན་ཏོ། །དེའི་སྟེང་ན་རླུང་གི་དཀྱིལ་འཁོར་གཞི་ཀུན་ནས་དྲི་མ་མེད་ཅིང་ཡོངས་སུ་དག་པ་ཞེས་བྱ་བ་ཡོད་དེ། མེ་ཏོག་ཐམས་ཅད་འོད་འཕྲོ་བའི་སེངྒེའི་ཁྲིའི་གཞིས་རྟོན་ཏོ། །དེའི་སྟེང་ན་རླུང་གི་དཀྱིལ་འཁོར་ཕྱོགས་སུ་སྒྲ་སྒྲོག་ཅིང་ཀུན་ཏུ་རྒྱུ་བ་ཞེས་བྱ་བ་ཡོད་དེ། མུ་ཏིག་དང་མན་ཤེལ་གྱི་རྒྱལ་མཚན་སྣ་ཚོགས་ཀྱི་གཞིས་རྟོན་ཏོ། །དེའི་སྟེང་ན་རླུང་གི་དཀྱིལ་འཁོར་རིན་པོ་ཆེ་ཐམས་ཅད་འཛིན་པ་ཞེས་བྱ་བ་ཡོད་དེ། ནོར་བུའི་རྒྱལ་པོའི་ཤིང་དང་མེ་ཏོག་སྣ་ཚོགས་ཀྱི་གླང་གི་གཞིས་རྟོན་ཏོ། །དེའི་སྟེང་ན་རླུང་གི་དཀྱིལ་འཁོར་ཀུན་ནས་འཛིན་པའི་ཤུགས་ཞེས་བྱ་བ་ཡོད་དེ། སྤོས་ཀྱི་ནོར་བུ་ཐམས་ཅད་ཀྱི་རི་རབ་ཀྱི་སྤྲིན་གྱི་གཞིས་རྟོན་ཏོ། །དེའི་སྟེང་ན་རླུང་གི་དཀྱིལ་འཁོར་ཁྱིམ་ཀུན་ཏུ་རྒྱུ་པ་ཞེས་བྱ་བ་ཡོད་དེ། རིན་པོ་ཆེ་ཐམས་ཅད་ཀྱི་ཁ་དོག་དང ། སྤོས་ཀྱི་ཁང་པ་བརྩེགས་པའི་སྤྲིན་གྱི་གཞིས་རྟོན་ཏོ། །ཀྱེ་རྒྱལ་བའི་སྲས་དག། རླུང་གི་དཀྱིལ་འཁོར་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་དེ་དག་ཐམས་ཅད་ཀྱི་སྟེང་མ་ནི། རླུང་གི་དཀྱིལ་འཁོར་གཟི་བརྗིད་བཟང་པོ་དཔལ་གྱི་སྙིང་པོ་ཞེས་བྱ་སྟེ། ནོར་བུ་ཀུན་ནས་སྣང་བའི་རྒྱན་དང་ལྡན་པའི་སྤོས་ཀྱི་ཆུ་རྒྱ་མཚོའི་གཞིས་རྟོན་ཏོ། །སྤོས་ཀྱི་ཆུ་རྒྱ་མཚོ་ནོར་བུ་ཀུན་ནས་སྣང་བའི་གཞིས་བརྒྱན་པའི་སྙིང་པོ་ཞེས་བྱ་བ་དེ་ལས་པདྨོ་ཆེན་པོ་སྤོས་ཀྱི་རྒྱལ་མཚན་ཁྱེར་བའི་འོད་ཟེར་དང ། ཟེ་བ་སྣ་ཚོགས་
Ka147b
ཞེས་བྱ་བ་མངོན་པར་འབྱུང་སྟེ། པདྨོ་ཆེན་པོ་དེ་ལ་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ། ཀུན་ནས་གྲུ་བཞིར་འདུག་པ། རྣམ་པར་དག་པ། ཤིན་ཏུ་བརྟན་པ།་རྡོ་རྗེ་དང་ནོར་བུ་ཐམས་ཅད་ཀྱི་ཁོར་ཡུག་གིས་བསྐོར་བ། རིམ་གྱིས་གཞོལ་བར་གནས་པ། ཤིང་གི་རྒྱུད་རྒྱ་མཚོ་ས་ལ་རབ་ཏུ་གནས་པ་འདི་འདུག་གོ་།དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདི་ཉིད་ཀྱི་ཡོན་ཏན་རྒྱ་མཚོ་ཡོངས་སུ་དག་པའི་ཕྱོགས་འདི་ཉིད་བརྗོད་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གཞི་རྒྱན་མེ་ཏོག་འཇིག་རྟེན་ཁམས་ཀྱི་རྒྱ་མཚོ་དེ། །རིན་ཆེན་ཀུན་གྱི་སྙིང་པོ་ཁ་དོག་སྣ་ཚོགས་ཏེ། །རྡུལ་རྣམས་ཀུན་དང་མཉམ་པའི་སྔོན་ཆད་སངས་རྒྱས་ཀྱི། །དྲུང་དུ་སྔོན་ཚེ་རྒྱ་མཚོར་སྦྱངས་པས་དྲི་མ་མེད། །རྒྱ་ཆེན་སྙིང་རྗེའི་སྤྲིན་གྱིས་ཁམས་རྣམས་ཀུན་བཀང་ཞིང ། །ཞིང་གི་རྡུལ་དང་མཉམ་པའི་ལུས་ཀྱང་ཀུན་བཏང་ནས། །སྔོན་གྱི་བསྐལ་པ་རྒྱ་མཚོར་སྤྱོད་པ་སྤྱད་པས་ན། །འཇིག་རྟེན་རྒྱ་མཚོའི་ཁམས་དེ་ཡངས་ཤིང་རྣམ་པར་དག ། སངས་རྒྱས་རྣམ་པར་སྣང་བས་སྨོན་ལམ་ཆེ་མཛད་དེ། །འོད་སྣང་བཏང་བ་མཁའ་ཡི་དཀྱིལ་ན་གནས་པ་ནི། །རླུང་གི་ཕུང་པོས་བཏབ་ཀྱང་མི་བསྐྱོད་མི་གཡོ་སྟེ། །ནོར་བུ་ཀུན་བརྒྱན་སངས་
Ka148a
༄#། །རྒྱས་གཟུགས་བརྙན་སྙིང་པོའོ། །མེ་ཏོག་མཛོད་བཀྱེ་གཏོར་བ་རིན་ཆེན་ཡིད་འོང་བཞིན། །སྔོན་གྱི་སྨོན་ལམ་དབང་གིས་མཁའ་ཡི་དབྱིངས་ལ་གནས། །རྒྱ་མཚོའི་རྒྱན་རྣམས་ཐམས་ཅད་སྣ་ཚོགས་བརྟན་པར་གནས། །ཕྱོགས་དང་ཕྱོགས་མཚམས་ཀུན་ཏུ་འོད་ཀྱི་སྤྲིན་ཀྱང་གཏོང ། །ནོར་བུ་ཐམས་ཅད་སྒོ་ནས་བྱང་ཆུབ་སེམས་དཔའི་རྣམས། །བྱུང་ཞིང་འོད་ཟེར་སྤྲིན་འབར་ཕྱོགས་རྣམས་ཀུན་ཏུ་འདོང ། །འོད་ཟེར་མེ་ཏོག་ཚོན་དང་འོད་ཟེར་འཁོར་ལོའི་ཚོགས། །ཕྱོགས་རྣམས་མ་ལུས་ཀུན་གྱི་ཆོས་དབྱིངས་ཁྱབ་པར་བྱེད། །རིན་ཆེན་ཀུན་གྱིས་འོད་ཟེར་སྤྲིན་རྣམས་བཀྱེ་བ་ནི། །ཕྱོགས་དང་ཕྱོགས་མཚམས་ཀུན་གྱི་ཞིང་རྣམས་ཁྱབ་པར་བྱེད། །སྡུག་བསྔལ་ཐམས་ཅད་བཅིལ་ཞིང་བྱང་ཆུབ་མཆོག་ལ་བགྲོད། །འཇིག་རྟེན་རྒྱ་མཚོ་ཐམས་ཅད་འོད་འཕྲོ་རབ་ཏུ་འབར། །འགྲོ་བ་ཀུན་དང་མཉམ་པའི་སྤྲུལ་པ་སྣ་ཚོགས་རྣམས། །རིན་ཆེན་ཀུན་དང་སྤུ་རྣམས་ཀུན་ནས་རྒྱལ་བ་འགྱེད། །བརྒྱ་བྱིན་དག་དང་ཚངས་པ་འང་འཁོར་ལོ་སྒྱུར་འདྲ་དང ། །འགྲོ་བ་ཀུན་གྱི་ལུས་སུ་ལུས་རྣམས་ཀུན་ཀྱང་གནས། །སྤྲུལ་པས་འོད་བཀྱེ་ཆོས་ཀྱི་དབྱིངས་ཀྱི་ཚད་མཉམ་པ། ། འོད་ཟེར་སྒོ་ནས་སངས་རྒྱས་ཐམས་ཅད་མཚན་ཀྱང་སྒྲོག་།འགྲོ་བ་མ་ལུས་ཀུན་གྱི་བསམ་པ་ཚིམ་བྱས་ནས། །ཚུལ་རྣམས་སྣ་ཚོགས་སྒོ་ནས་སེམས་ཅན་རྣམ་པར་འདུལ། །འཇིག་
Ka148b
རྟེན་རྒྱ་མཚོ་མེ་ཏོག་སྙིང་པོ་དེ་ནང་ན། །རྡུལ་ཕྲན་ཀུན་གྱི་ཁོངས་ན་ཆོས་དབྱིངས་ཐམས་ཅད་ཀྱི། །རིན་ཆེན་འོད་བཀྱེ་སངས་རྒྱས་སྤྲིན་རྣམས་འབར་བར་སྣང ། །རྣམ་པར་སྣང་མཛད་རྣམ་པར་འཕྲུལ་བའི་ཞིང་ལ་ལྟོས། །བསྐལ་པ་རྒྱ་མཚོར་འགྲོ་བའི་སྡུག་བསྔལ་སངས་བྱས་ཏེ། །སྨོན་ལམ་ཡངས་པའི་སྤྲིན་ནི་ཆོས་ཀྱི་དབྱིངས་མཉམ་དང ། །བཟང་པོའི་སྤྱོད་པ་བརྙེས་ཤིང་ཡེ་ཤེས་ས་ལྡན་པའི། །དགོངས་པ་ལས་ནི་རྒྱན་མཛེས་དེ་དག་བྱུང་བ་ཡིན། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་ཡོན་ཏན་རྒྱ་མཚོ་ཡོངས་སུ་དག་པས་སྣང་བ་ཞེས་བྱ་བ་སྟེ། ལེའུ་ལྔ་པའོ།། །།ཀྱེ་རྒྱལ་བའི་སྲས་དག་།དེ་ལ་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་ཁོར་ཡུག་ཆེན་པོ་ནི། ནོར་བུ་རྒྱལ་པོ་པདྨོ་ཉི་མའི་གཞི་ལ་བརྟེན་པ་སྟེ། ནོར་བུའི་རིགས་རྒྱ་མཚོ་སྤོས་ཀྱི་ཙནྡན་ཐམས་ཅད་ལས་གྲུབ་པ། ནོར་བུའི་རྒྱལ་པོ་རྒྱན་གྱི་ཡུལ་ཐམས་ཅད་ཀྱིས་ལྷུན་ཤིན་ཏུ་འཕགས་ཤིང་ཟིལ་གྱིས་གནོན་པ། ནོར་བུའི་སྤོས་ཞིམ་པོ་གཟི་བརྗིད་ཀྱི་འཁོར་ལོ་རྣམ་པར་སྣང་བའི་སྙིང་པོ་ཅན། ནོར་བུའི་རྒྱལ་པོ་རྡོ་རྗེ་སྲ་ཞིང་མི་ཤིགས་པ་ལྟར་ཤིན་ཏུ་མཁྲེགས་ཤིང་སྲ་བ། རིན་པོ་ཆེའི་ཆུ་ཐམས་ཅད་ཀུན་ནས་འབྱུང་བ། རིན་པོ་ཆེའི་ཤིང་གི་ནགས་ཚལ་གྱི་རྒྱན་ཐམས་ཅད་མེ་ཏོག་ཤིན་ཏུ་རྒྱས་པ། སྤོས་
Ka149a
༄#། །ཀྱི་རྩི་མཆོག་བཟང་པོ་ཐམས་ཅད་ཀྱི་རྒྱན་གྱིས་བརྒྱན་པ། སྤོས་ཀྱི་མེ་ཏོག་དཔལ་ཅན་ཤིན་ཏུ་བཟང་བས་རྣམ་པར་བརྒྱན་པ། ནོར་བུའི་རྒྱལ་པོ་འཇིག་རྟེན་གྱི་ཁམས་ཐམས་ཅད་ཀྱི་དབྱིངས་ལྟ་བུའི་དྲ་བས་ཀུན་ནས་བྲེས་པ་སྟེ། དེ་དག་ལ་སོགས་པ་རྒྱན་བཟང་པོའི་རྣམ་པ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་རབ་ཏུ་བརྒྱན་པའོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཁོར་ཡུག་གི་རྒྱན་དང ། ཡོན་ཏན་ཡོངས་སུ་དག་པ་འདི་ཉིད་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་གྱི་ཁམས་རྣམས་རྒྱ་མཚོ་གང་ཡོད་པ། །མཐའ་དང་དབུས་མེད་སྣ་ཚོགས་རྣམ་པ་ཅན། །ནོར་བུ་མང་པོས་རྣམ་དག་མཐའ་ཡས་མདོག། །དེ་དག་སངས་རྒྱས་རྣམ་པར་འཕྲུལ་པས་བྱུང ། །དྲི་མེད་ཁོར་ཡུག་རྒྱན་གྱིས་བརྒྱན་པ་ནི། །ནོར་བུ་མང་པོ་དེ་བཞིན་སྤོས་མང་དང ། །མུ་ཏིག་གསལ་བའི་ཚོགས་ལ་རབ་ཏུ་གནས། །ཁ་དོག་མཐའ་ཡས་རིན་ཆེན་རྣམས་ཀྱིས་བརྟན། །སྙིང་པོ་ནོར་བུའི་སྤྲིན་ཅན་སྣ་ཚོགས་སྲ། །འཛམ་བུ་ཆུ་ཀླུང་འོད་འཕྲོ་སྙིང་པོའི་ཚོགས། །འོད་འཕྲོ་དམ་པ་ཕྱོགས་སུ་སྣང་ཞིང་འཚེར། །ཁོར་ཡུག་དྲི་མ་མེད་པ་རྣམས་པར་མཛེས། །ནོར་བུ་རྡོ་རྗེས་ཤིང་ཏུ་སྲ་ཤིང་བརྟན། །མཚམས་རྣམས་མི་ཕྱེད་ནོར་བུ་སྣ་ཚོགས་འབྲུལ། །མཚན་
Ka149b
ལྡན་ནོར་བུ་རིན་ཆེན་རྣམ་བཀོད་པ། །རྒྱན་རྣམས་ཀུན་གྱིས་ཡོངས་སུ་དག་པར་སྣང ། །སྤོས་ཆུའི་སྤྲིན་གྱིས་ཁ་དོག་མཐའ་ཡས་ཏེ། །རིན་ཆེན་ཙནྡན་མེ་ཏོག་ཀུན་ཏུ་བཀྲམ། །པདྨོ་སྣ་ཚོགས་གོས་ཀྱིས་ཀུན་ནས་ཡོག་།རིན་ཆེན་རྩི་མཆོག་དྲི་ཞིམ་རྣམས་དང་ལྡན། །སྣ་ཚོགས་ཤིང་གི་སྤྲིན་གྱིས་ཀུན་ནས་བརྒྱན། །ནོར་བཟང་ཀུན་གྱིས་ཀུན་ནས་གཟི་བརྗིད་འབར། །འོད་ཟེར་སྤྲིན་གྱི་འོད་ཀྱི་དཀྱིལ་འཁོར་ཅན། །གོས་ཀྱི་མཛོད་ཀྱིས་ཤིན་ཏུ་འབར་བར་གནས། །སྤོས་ཀྱི་འོད་འཕྲོ་བདུག་པའི་གདུགས་འཆང་བའི། །བྱང་ཆུབ་སེམས་དཔའ་མང་པོས་ཆོས་དབྱིངས་གང ། ། སྒྲ་དབྱངས་མང་པོ་རྒྱ་མཚོ་ཐམས་ཅད་འབྱིན། །འདི་ནི་རྣམ་པར་སྣང་མཛད་ཆོས་འཁོར་ལོ། །རིན་ཆེན་མཛེས་པ་དེ་དག་ཐམས་ཅད་དང ། །ནོར་བུ་དག་དང་ཀུན་ནས་འོད་འཕྲོའི་ཤིང ། །ཀུན་ལ་རྣམ་པར་སྣང་མཛད་སྐུ་གསལ་བ། །གཟུགས་བརྙན་ཚུལ་དུ་ནང་ན་ཡོད་པ་སྣང ། །ཐམས་ཅད་གཟུགས་སུ་སྐུ་རྣམས་མཐའ་ཡས་ཏེ། །སངས་རྒྱས་སྤྲུལ་མང་ཁ་དོག་མུ་མེད་པ། ། ཐམས་ཅད་ཕྱོགས་དང་ཆོས་ཀྱི་དབྱིངས་བཀང་ཞིང ། །སེམས་ཅན་མང་པོ་ཚད་མེད་རྣམ་པར་འདུལ། །ཐམས་ཅད་རྒྱན་ལས་སྒྲ་དབྱངས་ཀུན་འབྱུང་སྟེ། །རྣམ་པར་སྣང་མཛད་སྨོན་ལམ་འཁོར་ལོ་ཡིས། །ཞིང་རྣམས་རྒྱ་མཚོ་ཡོངས་སུ་དག་བྱས་པ། །དེ་ཀུན་དེ་ལས་རྣམ་པར་འཕྲུལ་ཞིང་གྲག་།ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་
Ka150a
༄#། །ལས།་འཇིག་རྟེན་གྱི་ཁམས་རྒྱ་མཚོའི་ཁོར་ཡུག་གི་རྒྱན་རྒྱ་མཚོ་ཤིན་ཏུ་བསྟན་པ་ཞེས་བྱ་བ་སྟེ། ལེའུ་དྲུག་པའོ།། །།ཀྱེ་རྒྱལ་བའི་སྲས་དག་།དེ་ལ་ཁོར་ཡུག་ཆེན་པོ་དེའི་ནང་ནི་འཇིག་རྟེན་གྱི་ཁམས་རྒྱ་མཚོའི་ས་ཆེན་པོའི་གཞི་ནི། ནོར་བུ་མང་པོའི་བརྒྱན་ཐམས་ཅད་ཀྱིས་བརྒྱན་པ། རྡོ་རྗེ་ལྟར་ཤིན་ཏུ་མཁྲེགས་ཤིང་སྲ་ལ་བརྟན་པ། རིན་པོ་ཆེའི་རིགས་ཐམས་ཅད་ལས་གྲུབ་པ། རྒྱ་མཚོས་རྣམ་པར་ཕྱེ་བ་མི་ཤིགས་པའི་སྙིང་པོ་ཅན། མི་མཐོ་བ་མི་དམའ་བའི་ཐང་མཉམ་ཞིང་རྣམ་པར་དག་པ། ནོར་བུ་རིན་པོ་ཆེ་ཐམས་ཅད་ཀྱི་ཁ་དོག་དང་འོད་ཐམས་ཅད་ཀྱིས་རབ་ཏུ་བརྒྱན་པ། སེམས་ཅན་ཐམས་ཅད་ཀྱི་ལུས་ཀྱི་དབྱིབས་ལྟ་བུའི་ནོར་བུའི་གཟུགས་སྣ་ཚོགས་ཀྱིས་རབ་ཏུ་བསྒྲུབས་པ། རིན་པོ་ཆེའི་ཚོན་ཐམས་ཅད་ཀྱི་བརྒྱན་གྱིས་བརྒྱན་པ། རིན་པོ་ཆེ་ཡིད་དུ་འོང་བའི་པདྨོ་ཐམས་ཅད་ཀྱིས་གཞི་བྱས་པ། དམིགས་པ་ཐམས་ཅད་དུ་སྣ་ཚོགས་སུ་གྱུར་པའི་སྤྲིན་གྱིས་ཀུན་ནས་ཡོག་པ། ནོར་བུའི་རྒྱལ་པོ་སྤོས་ཀྱི་མཛོད་ཐམས་ཅད་ཀྱིས་ས་གཞི་མཉམ་པར་བདལ་བ། ནོར་བུའི་རྒྱལ་པོ་དུས་གསུམ་གྱི་དེ་བཞིན་གཤེགས་པའི་ཞིང་གི་རྒྱན་གྱིས་སྤྲིན་གྱི་དྲ་བ་རྣམ་པར་བྲེས་པ། དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་གྱི་འོད་དང ། ནོར་བུའི་དྲ་བ་མིག་འཕྲུལ་ལྟ་བུ་
Ka150b
རྣམ་པར་ཕྱེ་བ་སྟེ། ཀྱེ་རྒྱལ་བའི་སྲས་དག་།དེ་དག་ལ་སོགས་པ་སའི་དཀྱིལ་འཁོར་དེའི་རྒྱན་ཤིན་ཏུ་བསྟན་པ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་དྲ་བ་སྙེད་དོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་རྒྱ་མཚོའི་གཞིའི་རྒྱན་རྒྱ་མཚོ་འདི་ཉིད་ཡོངས་སུ་བརྗོད་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ས་ཡི་དཀྱིལ་འཁོར་གཞི་ནི་རྣམ་པར་དག་མཉམ། །འཁོར་ལོའི་དྲ་བས་བསྒྲུབས་པ་མི་ཤིགས་སྲ། །རིན་ཆེན་སྣ་ཚོགས་མཉམ་པའི་གཞིར་གནས་ཤིང ། །རིན་ཆེན་སྣ་ཚོགས་ཀུན་གྱིས་ཀུན་ཏུ་གང ། །ཡིད་འོང་ས་ནི་རྡོ་རྗེ་གསེར་གྱི་གཞི། །རིན་ཆེན་ཆུ་བོ་རི་བོའི་འཁོར་ལོས་བསྒྲུབས། ། པདྨོའི་དཀྱིལ་འཁོར་གཞི་ཡིན་མེ་ཏོག་ས། །ཙནྡན་ཕྱེ་མ་རིན་ཆེན་ཀུན་ཏུ་བཀྲམ། །འོད་ཟེར་སྣ་ཚོགས་རིན་ཆེན་མེ་ཏོག་རྣམས། །འོད་འཕྲོ་འགྱེད་པས་ཕྱོགས་སུ་སྤྲིན་ཀྱང་འབར། །སངས་རྒྱས་འོད་སྣང་ནོར་བུ་རྣམ་པར་བཀྲམ། །ས་ཀུན་མེ་ཏོག་ཡིད་དུ་འོང་བས་ཡོག་།ཐམས་ཅད་སྤྲིན་ནི་ཕྱོགས་ན་སྟུག་ལྡིང་བས། །མི་ཟད་ཡངས་པ་ཀུན་ནས་ཁེབས་པར་འདུག་།ཞིང་རྣམས་ཐམས་ཅད་ཕྱོགས་རྣམས་ཀུན་བཀང་ཞིང ། །སངས་རྒྱས་ཆོས་ནི་སྙན་པར་རབ་ཏུ་སྒྲོག་།རིན་ཆེན་ནང་སྣང་སངས་རྒྱས་སྨོན་ལམ་ཀུན། །ཤིན་ཏུ་དུས་རིང་རྟག་ཏུ་ཀུན་ཏུ་སྟོན། །སྔོན་ཆད་
Ka151a
༄#། །སྤྱོད་པ་ཇི་འདྲ་སྤྱོད་པ་དག་།ཀུན་ཀྱང་ནོར་བུའི་འབྲུ་ལས་གསལ་བར་སྣང ། །དེ་ཡི་རྒྱ་མཚོ་ནོར་བུ་སྣ་ཚོགས་གཏིང ། །དེ་ཡི་ནང་ན་སངས་རྒྱས་སྤྱོད་ཡུལ་སྣང ། ། སངས་རྒྱས་སྤྱོད་ཡུལ་དེ་དག་ཞིང་གི་རྣམས། །རྒྱ་མཚོ་ཀུན་གྱི་རྡུལ་ཕྲན་རེ་རེར་སྣང ། །མེ་ཏོག་སྙིང་པོ་ཚོན་གྱི་འཁོར་ལོས་བསྒྲུབས། །དེར་ནི་བྱང་ཆུབ་སེམས་དཔའ་རྟག་འདོང་ཞིང ། ། བྱང་ཆུབ་སེམས་དཔའི་སྨོན་ལམ་ཀུན་ཀྱང་སྒྲོག། སྙིང་པོ་བྱང་ཆུབ་འཁོར་དུ་རྣམ་འཕྲུལ་ལོ། །རིན་ཆེན་འོད་ཟེར་འོད་དང་ལྡན་པ་དག་།ས་ཡི་ནོར་བུ་རྒྱན་ལས་རབ་ཏུ་འབྱུང ། །སངས་རྒྱས་ཆོས་ཉིད་འདི་ཡང་རྟག་ཏུ་སྟོན། །ཆོས་དབྱིངས་ནམ་མཁའ་ལྟ་བུ་ཀུན་ཏུ་འགེངས། །སངས་རྒྱས་ཀུན་ཡུལ་ཡེ་ཤེས་རྒྱ་ཆེན་དང ། །ཀུན་ཏུ་བཟང་པོའི་སྨོན་ལམ་སུས་ཤེས་པ། །དེ་དག་ཕྱོགས་རྣམས་རྒྱ་མཚོ་ཀུན་ཏུ་ཡང ། །ཞིང་རྣམས་རྒྱ་མཚོ་དབྱིངས་ཀྱི་འཕྲུལ་ལ་འཇུག། ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། འཇིག་རྟེན་གྱི་ཁམས་རྒྱ་མཚོའི་ས་གཞིའི་རྒྱན་ཤིན་ཏུ་བསྟན་པ་ཞེས་བྱ་བ་སྟེ། ལེའུ་བདུན་པའོ།། །།ཀྱེ་རྒྱལ་བའི་སྲས་དག་།དེ་ལ་འཇིག་རྟེན་གྱི་ཁམས་རྒྱ་མཚོའི་གཞི་སའི་དཀྱིལ་འཁོར་དེ་ལ་སྤོས་ཆུའི་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཡོད་དེ། དེ་དག་ཀུན་ཀྱང་གཞི་རིན་པོ་ཆེ་ཐམས་ཅད་ཀྱི་རྒྱན་གྱིས་བརྒྱན་པའོ། །ནོར་བུའི་རྒྱལ་
Ka151b
པོ་དང་སྤོས་ཐམས་ཅད་ཀྱིས་ཀླུང་རབ་ཏུ་བསྒྲུབས་པའོ། །ནོར་བུའི་རྒྱལ་པོ་བཟང་ཞིང་ཡིད་དུ་འོང་བའི་འོད་རྣམ་པར་སྣང་བའི་དྲ་བས་ཀུན་ནས་བྲེས་པའོ། །རིན་པོ་ཆེ་ཐམས་ཅད་ཀྱི་ཁ་དོག་དང་མཆོག་ཏུ་སྣང་བའི་སྤོས་ཀྱི་ཆུས་ཡོངས་སུ་རྒྱས་པའོ། །རིན་པོ་ཆེ་ཐམས་ཅད་ཀྱི་མེ་ཏོག་སྣ་ཚོགས་ཀློང་དུ་འཁྱིལ་པའོ། །ཙནྡན་གྱི་ཕྱེ་མ་དང་འདྲེས་པའོ། །སངས་རྒྱས་ཐམས་ཅད་ཀྱི་གསུང་གི་དཀྱིལ་འཁོར་དང ། སྨོན་ལམ་རྒྱ་མཚོའི་སྒྲ་འབྱིན་པའོ། །རིན་པོ་ཆེ་ཐམས་ཅད་ཀྱི་འོད་ཟེར་གྱི་དཀྱིལ་འཁོར་གྱི་སྤྲིན་རྣམ་པར་སྣང་བའོ། །བྱང་ཆུབ་སེམས་དཔའི་ལུས་ཀྱི་སྤྲིན་མེ་ཏོག་སྣ་ཚོགས་ཀྱི་ཁ་དོག་ལྟ་བུར་རབ་ཏུ་འགྱེད་པའོ། །ཁ་དོག་དང་དབྱིབས་མཐའ་ཡས་པའི་གདུགས་ཀྱིས་ཁེབས་པར་རྣམ་པར་འཕྲུལ་པས་བརྒྱན་པའོ། །དམིགས་པ་ཐམས་ཅད་ལ་འཇིག་རྟེན་གྱི་ཁམས་མང་པོ་རྒྱ་ཆེན་པོ་ཐམས་ཅད་སྣང་བའོ། །ཕྱོགས་ཀུན་ནས་རིན་པོ་ཆེའི་ཐེམ་སྐས་ཀྱི་ཕྲེང་བ་བཅུར་རབ་ཏུ་བཀྱེ་བའོ། །མུ་ཏིག་རིན་པོ་ཆེ་ཐམས་ཅད་ཀྱི་ཁ་དོག་ལྟ་བུའི་མུ་ཁྱུད་ཀྱིས་ཀུན་ནས་བསྐོར་བའོ། །རིན་པོ་ཆེ་ཤེལ་གྱི་རྒྱལ་མཚན་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་བཅུས་ཀུན་ནས་བརྒྱན་པའོ། །འདི་ལྟ་སྟེ། ནོར་བུ་དང ། མེ་ཏོག་གི་ཁང་པ་བརྩེགས་པ་ཆུ་ཀླུང་གངྒཱའི་ཀླུང་གི་བྱེ་མ་སྙེད་ཁ་དོག་མཐའ་ཡས་པ་བཅུས་ཀུན་ནས་བསྐོར་བའོ། །འདི་ལྟ་སྟེ། ནོར་བུ་ཐམས་ཅད་ཀྱི་པདྨོ་ཡིད་དུ་འོང་བའི་གྲོང་ཁྱེར་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུས་ཀུན་ནས་
Ka152a
༄#། །བསྐོར་བའོ། །འདི་ལྟ་སྟེ། ནོར་བུ་རྡོ་རྗེ་ཤིན་ཏུ་སྲ་བའི་གླིང་བཞིའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་རབ་ཏུ་བསྒྲུབས་པའོ། །རིན་པོ་ཆེ་ཐམས་ཅད་ཀྱི་མེ་ཏོག་པུཎྜ་རཱི་ཀ་དང ། སྤོས་ཀྱི་ཆུ་ཡོངས་སུ་རྒྱས་པས་ཀུན་ནས་བསྐོར་བའོ། །འདི་ལྟ་སྟེ། རིན་པོ་ཆེའི་ཤིང་གི་ཕྲེང་བ་རིན་པོ་ཆེ་འབར་ཞིང་ཀུན་ནས་འཕྱང་བའི་ནོར་བུའི་དྲ་བ་ཅན་གླིང་བཞིའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་བསྐོར་བའོ། །ཙནྡན་དང ། སྤོས་དང ། ནོར་བུ་མང་པོ་སྒྲ་ཐམས་ཅད་དང ། སངས་རྒྱས་ཀྱི་འོད་ཀྱི་དཀྱིལ་འཁོར་གྱི་ཕྱག་གིས་རྣམ་པར་སྣང་བར་བྱས་པ། ཆུ་ཀླུང་གངྒཱའི་ཀླུང་གི་བྱེ་མ་སྙེད་ཀྱིས་འགྲམ་ཤིན་ཏུ་བརྒྱན་པའོ། །འདི་ལྟ་སྟེ། རིན་པོ་ཆེ་དང ། གོས་དང ། རྒྱལ་མཚན་དང ། དྲིལ་བུ་མང་པོ་ཐམས་ཅད་ཀྱི་སྒྲ་འབྱུང་བས་རྒྱན་ཤིན་ཏུ་རྒྱས་པའོ། །རིན་པོ་ཆེ་ཡིད་དུ་འོང་བའི་ནོར་བུ་ཐམས་ཅད་ཀྱི་ར་བ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པས་ཀུན་ནས་བསྐོར་བའོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་སྤོས་ཆུ་རྒྱ་མཚོའི་རྒྱན་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱིས་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ས་སྟེང་དེ་ན་སྤོས་ཀྱི་ཆུ་བོ་ཡིས། །རྒྱ་མཚོ་ནོར་བུས་བརྒྱན་པ་རྣམ་བརྗོད་དེ། །གཞི་རྣམས་རིན་ཆེན་གོས་ཀྱིས་ཀུན་
Ka152b
བཏིང་བ། །མི་ཤིགས་རྡོ་རྗེ་ལྟ་བུ་སྲ་ཞིང་མཛེས། །སྤོས་དང་ནོར་བུའི་རྒྱལ་པོ་མང་པོ་དང ། །ཉི་མའི་ནོར་བུ་འོད་འཕྲོ་སྟུག་སྤྲིན་དང ། །པདྨོ་རིན་ཆེན་ཕྲེང་བའང་ཀུན་ནས་བྲེས། །གཞི་རྣམས་དྲི་མེད་ཡིད་དུ་འོང་བའོ། །སྤོས་ཀྱི་ཆུ་ཡིས་ཡོངས་སུ་རྒྱས་པ་སྟེ། །རིན་ཆེན་འོད་ཟེར་སྣ་ཚོགས་མེ་ཏོག་ཀློང ། །སྒྲ་དབྱངས་རབ་ཏུ་གཏོང་བའི་དབྱངས་ཀྱིས་ཀྱང ། །སངས་རྒྱས་རྣམ་པར་འཕྲུལ་བ་རབ་ཏུ་སྒྲོག་།ཐེམ་སྐས་ཕྲེང་བ་ཡིད་དུ་འོང་དང་ལྡན། །གཞི་ནི་རིན་ཆེན་ནོར་བུ་མང་པོས་བརྒྱན། །སྟེགས་བུ་ཀུན་བཀོད་རིན་ཆེན་པདྨོ་ཡི། །སྤྲིན་སྟུག་དྲ་བ་རྣམ་པར་བྲེས་པ་སྟེ། །རིན་ཆེན་ནོར་བུའི་ཤིང་གི་ཕྲེང་བ་དག། རིན་ཆེན་གསེར་གྱི་ཁ་དོག་ཡིད་འོང་འབར། །འོད་ཀྱི་ཚོགས་དང་རོལ་མོའི་སྒྲ་དག་ཀྱང ། །རྣམ་པར་འཕྲུལ་མང་དབྱངས་སུ་རབ་ཏུ་སྒྲོག་།སྤོས་ཆུས་ཡོངས་གང་རིན་ཆེན་བསྒྲུབས་པ་སྟེ། །མེ་ཏོག་པུཎྜ་རཱི་ཀས་ཀུན་ནས་བསྐོར། །སྤོས་དང་འོད་དང་བདུག་སྤོས་འོད་ཟེར་འགྱེད། །དེ་དག་འོད་ཀྱི་དཀྱིལ་འཁོར་རྣམ་པར་ཡངས། ། རིན་ཆེན་རྒྱལ་མཚན་མུ་ཏིག་འབར་བ་ཅན། །གོས་དང་ནོར་བུ་སྣ་ཚོགས་ཀུན་འཕྱང་ཞིང ། །རིན་ཆེན་ནོར་བུའི་དྲིལ་བུ་དྲ་བ་དག ། ཐམས་ཅད་མཁྱེན་པར་འཇུག་པའི་སྒྲ་ཡང་སྒྲོག་།པདྨོའི་གྲོང་ཁྱེར་རྣམས་ཀྱིས་ཀུན་ནས་བསྐོར། །ཁ་དོག་མཐའ་ཡས་ནོར་བུས་རྣམ་པར་བརྒྱན། །ཕྱོགས་རྣམས་ཀུན་ནས་མུ་ཏིག་སྤྲིན་བཀྱེ་ཞིང ། །གྲོང་ཁྱེར་རྒྱ་མཚོས་དེ་དག་རབ་ཏུ་བརྒྱན། །
Ka153a
༄#། །དྲ་བ་བཟང་པོས་ཀུན་ནས་བསྐོར་བ་སྟེ། །རིན་ཆེན་བྱས་པའི་གཟུགས་བཟང་ཁྱབ་ཀྱི་བར། །རྣམ་པ་དུ་མར་འབར་ཞིང་ཡིད་འོང་བའི། །རྒྱ་མཚོས་བཟང་ཞིང་མཛེས་པར་རབ་ཏུ་བརྒྱན། །སྔོན་ཆད་སངས་རྒྱས་རྣམ་པར་སྣང་མཛད་ཀྱིས། །སྣ་ཚོགས་རྒྱ་མཚོའི་ཞིང་རྣམས་ཡོངས་སྦྱངས་པ། །ཤིན་ཏུ་རྒྱ་ཆེ་མཐའ་དང་དབུས་མེད་པའང ། །དེ་དག་ཀུན་ན་རྣམ་པར་འཕྲུལ་པ་བྱེད། །སྤོས་ཆུ་རྒྱ་མཚོ་དེ་དག་རེ་རེ་ཞིང་ཡང་སྤོས་ཆུའི་ཆུ་ཀླུང་གཡས་ཕྱོགས་སུ་འཁོར་ཞིང་འབབ་པ། གླིང་བཞིའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་འཁོར་བར་བྱས་པ་སྟེ། སྤོས་ཆུའི་ཆུ་ཀླུང་དེ་དག་ཐམས་ཅད་ཀྱང་འཁོར་ཀུན་ནས་རྡོ་རྗེའི་པདྨོ་ཁ་དོག་དང་དྲི་མཐའ་ཡས་པས་བསྒྲུབས་པའོ། །ནོར་བུའི་འཁོར་ལོ་དང།་ནོར་བུའི་འོད་རྣམ་པར་དག་པ་སྣ་ཚོགས་ཀྱིས་མཐའ་ཀུན་ནས་དཀྲིས་པའོ། །སངས་རྒྱས་ཀྱི་འོད་ཀྱི་དཀྱིལ་འཁོར་རིན་པོ་ཆེ་ཐམས་ཅད་ཀྱི་ཁ་དོག་ལྟ་བུས་རྣམ་པར་སྣང་བར་བྱས་པའི་འོད་ཟེར་གྱི་སྤྲིན་དང་ལྡན་པའོ། །སེམས་ཅན་ཐམས་ཅད་ཀྱི་སྒྲ་དབྱངས་སྒྲོག་པའི་དྲིལ་བུའི་དྲ་བ་རིན་པོ་ཆེ་ཐམས་ཅད་ཀྱི་ཁ་དོག་ཏུ་འདུག་པས་ཀུན་ནས་ཁེབས་པའོ། །སྤྱོད་པའི་འོད་ཀྱི་ཀློང་སངས་རྒྱས་ཐམས་ཅད་ཀྱི་མཚན་གྱི་དབྱིབས་ལྟ་བུ་རབ་ཏུ་འབྱུང་བའོ། །ནོར་བུའི་རྒྱལ་པོ་རྒྱན་ཐམས་ཅད་ནང་ན་སྣང་ཞིང་འོད་ཤིན་ཏུ་འབར་བ།
Ka153b
འཇིག་རྟེན་གྱི་ཁམས་རྒྱ་མཚོ་ལྟ་བུར་སྣང་བ་ཐམས་ཅད་ཀྱིས་ཤིན་ཏུ་ཡོག་པར་བྱས་པའོ། །ནོར་བུའི་རྒྱལ་པོ་ཕྱོགས་བཅུའི་སངས་རྒྱས་ཀྱི་སྤྲུལ་པ་རྣམ་པར་སྣང་པ་དང ། སངས་རྒྱས་ཐམས་ཅད་ཀྱི་རྣམ་པར་འཕྲུལ་བའི་སྙིང་པོའི་མེ་ཏོག་ཤིན་ཏུ་རྒྱས་པས་ཀུན་ནས་ཁེབས་པའོ། །དུས་གསུམ་དུ་གཤེགས་པའི་སངས་རྒྱས་དང་བྱང་ཆུབ་སེམས་དཔའི་མཚན་གྱི་འཁོར་ལོ་དབྱངས་སུ་སྒྲོག་པའོ། །སྤོས་ཀྱི་ཆུ་དང་རིན་པོ་ཆེ་འོད་འཕྲོ་བ་ཐམས་ཅད་ཀྱི་འོད་དང ། འོད་ཟེར་གྱི་སྤྲིན་རབ་ཏུ་འབྱུང་བ་སྟེ། ཆུ་ཀླུང་དེ་དག་རེ་རེ་ཞིང་ཡང་རྒྱན་ཤིན་ཏུ་བསྟན་པ། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་སྤོས་ཆུའི་ཆུ་ཀླུང་གི་རྒྱན་དང ། ཡོན་ཏན་རྒྱ་མཚོ་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆུ་ཀླུང་དྲི་མ་མེད་པའི་ཆུས་རྒྱས་ཤིང་།། གཞི་ནི་ནོར་བུའི་རྡོ་རྗེ་པདྨོས་བྱས། །རིན་ཆེན་མང་པོ་སིལ་བུས་གཞི་བཀྲམ་ཞིང ། །ཀུན་ནས་བརྒྱན་པ་སྣ་ཚོགས་ཡིད་དུ་འོང ། །ཐེམ་སྐས་ཕྲེང་བས་དེ་དག་ཀུན་ནས་བསྐོར། །པདྨོའི་ཕྱང་བའི་མུ་ཁྱུད་འཁོར་ཅན་ཏེ། །མེ་ཏོག་བརྒྱན་པའི་མུ་ཏིག་ཕྲེང་བ་དང ། །མེ་ཏོག་ལྡ་ལྡིས་སྣ་ཚོགས་ཀུན་ནས་བྲེས། །ནོར་བུའི་ཆུ་བོ་སྤོས་ཆུ་འབྱུང་བ་ནི། །རིན་ཆེན་ཀུན་གྱི་ཁ་དོག་མདོག་
Ka154a
༄#། །ལྟར་འབབ། །རིན་ཆེན་ནོར་བུ་མེ་ཏོག་མཛེས་པར་བཀོད། །སིལ་སྙན་སྒྲ་ནི་སངས་རྒྱས་གསུང་སྐད་བརྗོད། །དེ་དག་རྙོག་པ་ནོར་བུ་ཟླ་བ་སྟེ། །རིན་ཆེན་སྣ་ཚོགས་ཐམས་ཅད་དབའ་ཀློང་ངོ ། །ཕྱོགས་རྣམས་བཅུ་པོ་ཀུན་ཏུ་རྟག་པར་ཡང ། །སྤོས་དང་བདུག་པ་འོད་འཕྲོའི་རྒྱན་འབྱུང་ངོ ། །ཆུ་བོ་རྣམས་ལས་རིན་ཆེན་ཐམས་ཅད་ཀྱི། །འོད་ཟེར་འཕྲོ་བ་ཀུན་ཏུ་རབ་ཏུ་འབྱུང ། །མེ་ཏོག་ནོར་བུའི་ཕུང་པོ་གདུགས་རྣམས་ཀྱང ། །རིན་ཆེན་ཀུན་གྱི་གཟེར་དུ་རབ་ཏུ་འབར། །ཕྱོགས་བཅུའི་ཞིང་གི་གཟུགས་བརྙན་མང་པོ་དང ། །སངས་རྒྱས་གཟུགས་བརྙན་རིན་ཆེན་རྣམས་ལས་སྣང ། །རིན་ཆེན་འཁོར་ལོའི་གཞི་རྟེན་ཡིད་འོང་ལས། །སྤོས་ཆུས་རྒྱས་པའི་ཆུ་ཀླུང་རྣམས་ཀྱང་འབབ། །རིན་ཆེན་གསེར་གྱི་དྲིལ་བུའི་དྲ་བ་ཡིས། །ཡོག་ཅིང་སངས་རྒྱས་གསུང་དུ་སྒྲ་སྒྲོག་འབབ། །རྒྱལ་བ་ཀུན་གྱི་བྱང་ཆུབ་སྤྱོད་པ་དང ། །ཀུན་ཏུ་བཟང་པོའི་སྤྱོད་མཆོག་རབ་ཏུ་འཛུད། །སངས་རྒྱས་སྨོན་ལམ་སྒྲ་དབྱངས་རྣམ་པ་དང ། །སངས་རྒྱས་ཐམས་ཅད་སྔོན་གྱི་སྦྱོར་བ་དག་།རྣམ་དག་ནོར་བུའི་ངོས་དང་ངོགས་ཀུན་ནས། །སྒྲ་རྣམས་སྒྲོག་པ་ཀུན་ན་རབ་ཏུ་སྣང ། །ཆུ་བོ་ཐམས་ཅད་དབའ་ཀློང་དག་ལས་ཀྱང ། །བྱང་ཆུབ་སེམས་དཔའི་སྤྲིན་ཆེན་འབར་བདག་།ཆོས་ཀྱི་དབྱིངས་རྣམས་རབ་ཏུ་རྒྱས་བྱེད་པ། །འབྱམས་ཀླས་ཕྱོགས་རྣམས་ཀུན་ན་རབ་ཏུ་སྣང ། །ཆུ་ཀླུང་དེ་དག་ཐམས་ཅད་དྲི་མེད་ཅིང ། །ནོར་བུའི་རྒྱལ་པོ་སྤྲིན་གྱིས་ཀུན་ཁྱབ་པ།།
Ka154b
མཛོད་སྤུའི་དཔལ་དང་སངས་རྒྱས་གཟི་བརྗིད་འབར། །ནོར་བུའི་རྒྱལ་པོ་སངས་རྒྱས་གཟུགས་བརྙན་སྣང ། །སྤོས་ཆུའི་ཆུ་ཀླུང་དེ་དག་གི་བར་དག་ཀྱང་ས་སྣ་ཚོགས་ལ་རིན་པོ་ཆེ་ཐམས་ཅད་ཀྱིས་རབ་ཏུ་བརྒྱན་པ་སྟེ། ཆུ་ཀླུང་གི་བར་དེ་དག་རེ་རེ་ཞིང་ཡང་རིན་པོ་ཆེའི་མེ་ཏོག་པུཎྜ་རཱི་ཀའི་ཕྲེང་བ་གླིང་བཞིའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་བསྐོར་བའོ། །ཆུ་ཀླུང་གི་བར་དེ་དག་རེ་རེ་ཞིང་ཡང་རིན་པོ་ཆེའི་ཤིང་གི་ཕྲེང་བ་གླིང་བཞིའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་རྣམ་པར་ཕྱེ་བའོ། །ཤིང་གི་གསེབ་ཐམས་ཅད་ནས་ཀྱང་རྒྱན་ཐམས་ཅད་ཀྱི་སྤྲིན་རྟག་པར་རབ་ཏུ་འབྱུང་སྟེ། ནོར་བུའི་རྒྱལ་པོ་བྱང་ཆུབ་སེམས་དཔའི་དཔལ་འབྱུང་བའི་སྤྲིན་དང ། འོད་རྣམས་ཀྱང་རབ་ཏུ་འབྱུང་ངོ ། །ཤིང་གི་བར་དེ་དག་ཐམས་ཅད་ཀྱང་འོད་ཤིན་ཏུ་འབར་བ་སྟེ། སྤོས་དང ། མེ་ཏོག་སྣ་ཚོགས་ཀྱིས་རབ་ཏུ་གང་བའོ། །ནོར་བུའི་རྒྱལ་པོ་སངས་རྒྱས་ཐམས་ཅད་ཀྱིས་སྨོན་ལམ་བསྐལ་པ་ཐམས་ཅད་དུ་བྱིན་གྱིས་རློབ་པའི་སྒྲ་སྒྲོག་པའི་སྤྲིན་གྱིས་ཡོངས་སུ་གང་བའོ། །སྤོས་འོད་འཕྲོ་བའི་སྤྲིན་གྱི་འོད་ཟེར་གྱིས་རྣམ་པར་སྣང་བར་བྱེད་པའི་སྤྲིན་གྱིས་མངོན་པར་ཁྱབ་པའོ། །སྤོས་ཀྱི་རྒྱལ་པོ་ཡིད་དུ་འོང་བ་སྣ་ཚོགས་ཀྱིས་རྣམ་པར་རྒྱས་པའོ། །ནོར་བུའི་རྒྱལ་པོ་རྒྱན་བསམ་གྱིས་མི་ཁྱབ་པའི་ཁ་དོག་ཡང་དག་པར་སྟོན་པས་མཉམ་པ་ཉིད་དུ་མངོན་པར་གང་བའོ། །གོས་ཀྱི་ཚོགས་སྣ་ཚོགས་སྤྲིན་ལྟ་བུས་མངོན་པར་ཡོག་པའོ། །
Ka155a
༄#། །ནོར་བུའི་རྒྱལ་པོ་ཕྱོགས་བཅུར་འོད་ཟེར་གྱི་དྲ་བའི་སྤྲིན་གྱིས་ཡོག་པར་བྱེད་པས་རྣམ་པར་རྒྱས་པའོ། །ནོར་བུའི་རྒྱལ་པོ་སངས་རྒྱས་ཐམས་ཅད་ཀྱི་རྣམ་པར་འཕྲུལ་པའི་འོད་ཀྱིས་མངོན་པར་གང་བའོ། །ནོར་བུའི་རྒྱལ་པོ་སེམས་ཅན་ཐམས་ཅད་ཀྱི་ལས་རྣམ་པར་སྨིན་པ་རྒྱ་མཚོའི་གཟུགས་བརྙན་ཤིན་ཏུ་སྟོན་པས་རྒྱས་པ་སྟེ། དེ་དག་ལ་སོགས་པ་ཆུ་ཀླུང་གི་བར་དེ་དག་རེ་རེ་ཞིང་ཡང་རྒྱན་ཤིན་ཏུ་བསྟན་པ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་སྤོས་ཆུའི་ཆུ་ཀླུང་གི་བར་གྱི་རྒྱན་ཡོངས་སུ་དག་པ་རྒྱ་མཚོ་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆུ་ཀླུང་བར་རྣམས་ཤིན་ཏུ་རྣམ་པར་དག་།རིན་ཆེན་རྒྱན་ཅན་གསེར་གྱིས་རྣམ་པར་བྲེས། །ཡལ་ག་མེ་ཏོག་སྤྲིན་རྣམས་འཕྱང་ལྡིང་བའི། །ཤིང་གི་ཕྲེང་བས་ཀུན་ནས་མངོན་པར་ཁྱབ། །ཤིང་གི་ཡལ་གའི་དཀྱིལ་འཁོར་སྒོ་དག་ནས། །རིན་ཆེན་མང་པོའི་སྤྲིན་རྣམས་ཀུན་ཀྱང་འབྱུང ། །མེ་ཏོག་འོད་མང་རིན་ཆེན་སྙིང་པོ་ཅན། །ཕྱོགས་རྣམས་ཀུན་སྒོར་འགྲོ་བ་ཁྱབ་པར་བྱེད། །གཞི་རྣམས་ནོར་བུ་མངོན་པར་བཀྲམ་པ་སྟེ། །མེ་ཏོག་རྣམ་བྲེས་རིན་ཆེན་འབྲུ་དང་ལྡན། །ཀུན་ནས་རིན་ཆེན་སྤྲིན་གྱིས་ཁྱབ་པ་སྟེ། །རྒྱན་དང་སེམས་ཅན་
Ka155b
ཐམས་ཅད་གཟུགས་བརྙན་སྣང ། །སངས་རྒྱས་འོད་ཀྱི་ནོར་བུའི་རྒྱལ་པོ་ཡིས། །ས་རྣམས་ཐམས་ཅད་ཀུན་ནས་རྣམ་པར་གང ། །ཕྱོགས་རྣམས་ཐམས་ཅད་འབར་ཞིང་སྣང་བའི་སྤྲིན། །རྡུལ་ཕྲན་ཀུན་ལ་གཟུགས་བརྙན་གྱུར་བར་སྣང ། །ནོར་བུའི་རྒྱན་གྱིས་ཤིན་ཏུ་རྣམ་པར་རྒྱས། །མུ་ཏིག་གསལ་བའི་དྲ་བས་རྣམ་པར་ཕྱེ། །ནོར་བུའི་འཁོར་ལོ་ཀུན་ནས་རབ་ཏུ་བཀོད། །ཀུན་ན་རྒྱལ་བ་རྣམ་པར་འཕྲུལ་བ་སྣང ། །འབྱམས་ཀླས་འོད་ཟེར་ལྡན་པའི་རིན་ཆེན་གྱིས། །སངས་རྒྱས་སྤྲུལ་པ་བཀྱེ་བ་ཀུན་ན་སྣང ། །སངས་རྒྱས་མང་པོས་ཕྱོགས་རྣམས་ཀུན་ཁྱབ་ཅིང ། །སྟོབས་བཅུ་མངའ་བའི་ཆོས་ཉིད་རབ་ཏུ་སྒྲོག་།རིན་ཆེན་སྣ་ཚོགས་པུཎྜ་རཱི་ཀ་ཡིས། །ཆུ་རྣམས་ཀུན་རྒྱས་སྙྀང་པོ་ནོར་བུ་སྤོས། །དེ་ལས་མི་ཟད་འོད་ཟེར་རྒྱ་མཚོའི་རྣམས། །རབ་ཏུ་འབྱུང་བའི་པདྨོ་སྣ་ཚོགས་འབྱུང ། །དུས་རྣམས་གསུམ་པོའི་རྒྱན་རྣམས་ཐམས་ཅད་ཀྱང ། །ནོར་བུ་དེ་དག་འབྲུ་ཡི་ནང་ན་སྟེ། །འབྱུང་བ་མེད་ཅིང་གཟུང་དུའང་ཡོད་པ་མིན། །དེ་ནི་སངས་རྒྱས་རྣམ་པར་འཕྲུལ་བའི་མཐུ། །རྒྱལ་བ་རྣམ་པར་སྣང་མཛད་ཐམས་ཅད་དུ། །རྒྱན་དང་སྤྲུལ་པ་ཐམས་ཅད་རབ་ཏུ་འགྱེད། །སྔོན་ཆད་སངས་རྒྱས་སྨོན་ལམ་མཐུ་དག་གིས། །དེ་དག་འགྲོ་ཞིང་འོང་བར་སྣང་བ་མེད། །རྡུལ་རྣམས་རྒྱ་མཚོ་ཐམས་ཅད་དག་ལ་ཡང ། །རྒྱལ་སྲས་ཐམས་ཅད་སྤྱད་པ་རབ་སྤྱོད་དེ། །རང་གི་ཞིང་དང་ལུང་བསྟན་ས་ཡི་རྣམས། །བསམ་པ་རྣམ་དག་ཚུལ་བཞིན་དེ་དག་མཐོང་།།
Ka156a
༄#། །ཀྱེ་རྒྱལ་བའི་སྲས་དག་།སངས་རྒྱས་བཅོམ་ལྡན་འདས་རྣམས་ཀྱི་འཇིག་རྟེན་གྱི་ཁམས་རྒྱ་མཚོའི་རྒྱན་ཤིན་ཏུ་བསྟན་པ་ནི། བསམ་གྱིས་མི་ཁྱབ་སྟེ། ཀྱེ་རྒྱལ་བའི་སྲས་དག་།དེ་ཅིའི་ཕྱིར་ཞེ་ན། འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་དམིགས་པ་དག་ལའང་དམིགས་པ་རེ་རེ་ཞིང་ཡོངས་སུ་དག་པའི་ཡོན་ཏན་དང ། རྒྱན་ཤིན་ཏུ་བསྟན་པ་རྒྱ་མཚོ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་པར་བྱའོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་རྒྱ་མཚོ་ཡོངས་སུ་དག་ཅིང ། ཡོན་ཏན་མཐའ་དང་དབུས་མེད་པས་ཡོན་ཏན་རྣམ་པར་དག་པའི་རྒྱན་ཤིན་ཏུ་བསྟན་པ་རྒྱ་མཚོ་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་གི་རྒྱ་མཚོ་འདི་རྣམས་ཐམས་ཅད་ཀྱང ། །རིན་ཆེན་རྒྱན་ཅན་འོད་ཟེར་གནས་པ་སྟེ། །སྟུག་ཅིང་གསལ་བའི་སྤྲིན་གྱིས་ཀུན་ནས་ཡོག་།རིན་ཆེན་ཐམས་ཅད་འོད་ཀྱང་རྣམ་པར་འབར། །མུ་ཏིག་ནོར་བུའི་སྤྲིན་མང་ཟད་མི་ཤེས། །སངས་རྒྱས་གཟུགས་བརྙན་ཕྱོགས་སུ་རྣམ་པར་སྣང ། །ཞིང་ན་ཡོད་པའི་རྣམ་པར་འཕྲུལ་པ་རྣམས། །བྱང་ཆུབ་སེམས་དཔའ་རྣམས་ལ་རྟག་ཏུ་སྟོན་པ་བྱེད། །སངས་རྒྱས་གསུང་གི་སྤྲིན་ནི་བསམ་གྱིས་མི་ཁྱབ་སྟེ། །
Ka156b
ནོར་བུའི་རྒྱལ་པོ་ཐམས་ཅད་སྙན་པར་སྒྲོག་།རྣམ་པར་སྣང་མཛད་སྔོན་གྱི་སྤྱོད་པ་རྣམས། །རིན་ཆེན་རྣམས་ལ་རྟག་པར་སྣང་ཞིང་གྲགས། །སངས་རྒྱས་རྣམ་པར་སྣང་མཛད་དྲི་མེད་འོད། །རྒྱན་རྣམས་ཐམས་ཅད་ནང་ན་རྣམ་པར་སྣང ། །འཁོར་རྣམས་གཟུགས་བརྙན་མཚན་ཉིད་འཆང་བ་དང ། །སྤྲུལ་པ་རྣམས་ཀྱི་ཞིང་གི་རྒྱ་མཚོ་གང ། །སངས་རྒྱས་སྤྲུལ་པ་རྣམས་ནི་སྒྱུ་མ་འདྲ། དེ་དག་ལ་ནི་བྱོན་པ་གང་ཡང་མེད། །སངས་རྒྱས་ཡུལ་རྣམས་བྱིན་གྱིས་བརླབས་པ་ཡི། །ཞིང་རྣམས་ཀུན་ནས་སངས་རྒྱས་རྣམ་པར་འཕྲུལ། །ཞིང་རྣམས་འབྱམས་ཀླས་པར་ནི་རྣམ་འཕྲུལ་ཞིང ། ། ཇི་སྙེད་ཞིང་དུ་དེ་དག་ཀུན་རྒྱུ་བ། །དེ་དག་ནོར་བུ་ཀུན་ལ་རབ་ཏུ་སྣང ། །དེ་ལྟར་ཞིང་རྣམས་རྒྱ་མཚོ་རྣམ་པར་སྦྱངས། །སྤྲུལ་པ་རྣམས་ནི་མིག་ཡོར་འདྲ་བ་སྟེ། །ཐམས་ཅད་དག་ན་ཆོས་ཉིད་འདི་ཡང་སྣང ། །འདི་ནི་རྣམ་པར་སྣང་མཛད་སྤྱོད་ཡུལ་ཏེ། །སྨོན་ལམ་རྣམ་པར་འཕྲུལ་ལས་བྱུང་བའོ། །བཟང་པོའི་སྤྱོད་པས་གང་རྣམས་བྱུང་གྱུར་པའི། །བྱང་ཆུབ་སེམས་དཔའ་ཤེས་མཆོག་རྒྱ་མཚོ་ཅན། །དེ་དག་རྡུལ་ཕྲན་ཀུན་ལ་རང་རང་གིས། །རང་གི་ཞིང་རྣམས་རྒྱ་མཚོ་དག་པར་བྱེད། །དེ་བཞིན་གཤེགས་པ་ཀུན་གྱི་ཞམ་རིང་དུ། །བསྐལ་པ་བྱེ་བ་རྒྱ་ཆེན་བསམ་ཡས་སུ། །དེ་དག་སྤྱོད་ཡུལ་ཐམས་ཅད་མཐོང་བས་ན། །སྐད་ཅིག་སེམས་ལ་དེ་དག་ཐམས་ཅད་སྟོན། །ཞིང་རྣམས་མཉམ་མེད་འབྱུང་བ་མེད་པ་སྟེ། །དེ་དག་མཐའ་འདྲ་མཉམ་ཞིང་མཚན་ཉིད་མེད། །སྨོན་ལམ་
Ka157a
༄#། །སྟོབས་ཀྱིས་ཀུན་ཏུ་གནས་པ་སྟེ། །སེམས་ཅན་རྣམས་ལ་ཕན་ཕྱིར་རབ་ཏུ་སྦྱངས། །ཀྱེ་རྒྱལ་བའི་སྲས་དག། དེ་ལ་འཇིག་རྟེན་གྱི་ཁམས་རྣམ་པར་དགོད་པ་ཤིན་ཏུ་བསྟན་པ་གང་ཞེ་ན། ཀྱེ་རྒྱལ་བའི་སྲས་དག། འཇིག་རྟེན་གྱི་ཁམས་སྤོས་ཆུའི་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པ་བཅུའི་རྡུལ་ཤིན་ཏུ་ཕྲ་བ་སྙེད་པོ་དེ་དག་ལ་འཇིག་རྟེན་གྱི་ཁམས་ཀྱི་རྒྱུད་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རབ་ཏུ་གནས་ཏེ། འཇིག་རྟེན་གྱི་ཁམས་ཀྱི་རྒྱུད་དེ་དག་རེ་རེ་ཞིང་ཡང་འཇིག་རྟེན་གྱི་ཁམས་འབྱམས་ཀླས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བའོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་དེ་དག་ཐམས་ཅད་ཀྱང་གཞན་དང་གཞན་ལ་གནས་པ། དབྱིབས་གཞན་དང་གཞན་དུ་འདུག་པ། ཕྱོགས་གཞན་དང་གཞན་ལ་ལྟ་བ། རྣམ་པ་གཞན་དང་གཞན་གྱིས་འཇུག་པ། རྒྱན་གཞན་དང་གཞན་ཡོད་པ། གཞན་དང་གཞན་གྱིས་རྒྱས་པར་འགེངས་པ། གཞན་དང་གཞན་དུ་འདུ་བ་རྣམ་པ་གཞན་དང་གཞན་དུ་མ་འདྲེས་པ། རྣམ་པར་འཕྲུལ་པ་དང ། བྱིན་གྱི་རླབས་གཞན་དང་གཞན་ཡོད་པ་དག་སྟེ།་ཀྱེ་རྒྱལ་བའི་སྲས་དག་།དེ་ལ་འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། པདྨོའི་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་
Ka157b
ལ་ལ་ནི།་རིན་པོ་ཆེ་ཁ་དོག་མཐའ་ཡས་པའི་མེ་ཏོག་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། རིན་པོ་ཆེའི་ཕྲེང་བ་མུ་ཏིག་གི་འབྲུའི་སྙིང་པོ་ཅན་གྱི་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། སྤོས་ཆུའི་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི།་མེ་ཏོག་ཐམས་ཅད་ཀྱི་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། ནོར་བུ་རིན་པོ་ཆེའི་དྲ་བའི་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། འོད་ཟེར་གྱི་རྒྱ་མཚོ་ཀློང་དུ་གྱུར་པའི་ཆུ་བོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། བྱང་ཆུབ་སེམས་དཔའི་ནོར་བུའི་ཅོད་པན་སྣ་ཚོགས་ཀྱི་རྒྱན་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། སེམས་ཅན་གྱི་ལུས་སྣ་ཚོགས་རྒྱ་མཚོ་ལ་རབ་ཏུ་གནས་སོ། །འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། སངས་རྒྱས་ཐམས་ཅད་ཀྱི་གསུང་ནོར་བུའི་རྒྱལ་པོ་ལ་རབ་ཏུ་གནས་སོ། །དེ་དག་ལ་སོགས་པ་འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པའི་གནས་ཤིན་ཏུ་བསྟན་པ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དོ། །འཇིག་རྟེན་གྱི་ཁམས་རྒྱ་མཚོ་ཐམས་ཅད་ཀྱང་དབྱིབས་གཞན་དང་གཞན་དུ་
Ka158a
༄#། །འདུག་པ་ཤ་སྟག་སྟེ། འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་ལ་ལ་ནི། རི་རབ་ཀྱི་དབྱིངས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། ཆུ་ཀླུང་གི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། ཀུན་ཏུ་འཁོར་བའི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། ཀུན་ནས་འཁྱིལ་བའི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། འཁོར་བའི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། མིག་མང་རིས་ཀྱི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། ཤིང་གི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། ཁང་པ་བརྩེགས་པའི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། རྡོའི་རྒྱལ་མཚན་གྱི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། ཕྱོགས་འབྱམས་ཀླས་པའི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། ཁང་པའི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། པདྨོའི་དབྱིབས་ལྟ་བུའོ། ། འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། རྟ་བབས་ཀྱི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། སེམས་ཅན་གྱི་ལུས་ཀྱི་དབྱིབས་ལྟ་བུའོ། །འཇིག་
Ka158b
རྟེན་གྱི་ཁམས་འབྱམས་ཀླས་པ་ལ་ལ་ནི། སྤྲིན་གྱི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། སངས་རྒྱས་ཀྱི་མཚན་གྱི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། འོད་ཀྱི་དཀྱིལ་འཁོར་གྱི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། དྲ་བ་སྣ་ཚོགས་བཀྱེ་བའི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། སྒོ་ཀུན་ནས་ཡོག་པའི་དབྱིབས་ལྟ་བུའོ། །འཇིག་རྟེན་གྱི་ཁམས་འབྱམས་ཀླས་པ་ལ་ལ་ནི། དམིགས་པ་ཐམས་ཅད་ཀྱི་དབྱིབས་ལྟ་བུ་སྟེ། ཀྱེ་རྒྱལ་བའི་སྲས་དག་།དེ་དག་ལ་སོགས་པ་འཇིག་རྟེན་གྱི་ཁམས་འབྱམས་ཀླས་པའི་དབྱིབས་རྣམ་པར་ཕྱེ་བ་ཤིན་ཏུ་བསྟན་པ་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དོ། ། ཀྱེ་རྒྱལ་བའི་སྲས་དག་།འཇིག་རྟེན་གྱི་ཁམས་རྒྱ་མཚོའི་ཚུལ་དེ་དག་ནི། ལྷུན་གཞན་དང་གཞན་དུ་བསྟན་པ་སྟེ། འཇིག་རྟེན་གྱི་ཁམས་ཀྱི་ཚུལ་ལ་ལ་ནི། ཕྱོགས་ཐམས་ཅད་ཀྱི་ནོར་བུའི་སྤྲིན་གྱི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། འོད་ཀྱི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། རིན་པོ་ཆེ་དང་སྤོས་འོད་འཕྲོ་བ་ཐམས་ཅད་ཀྱི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། རིན་པོ་ཆེ་ཐམས་ཅད་ཀྱི་མེ་ཏོག་ཁ་སྤྲོད་ལས་བསྒྲུབས་པའི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། བྱང་ཆུབ་སེམས་
Ka159a
༄#། །དཔའི་ལུས་ཀྱི་གཟུགས་བརྙན་གྱི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། སངས་རྒྱས་ཀྱི་འོད་ཀྱི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི།་རིན་པོ་ཆེའི་འོད་ཀྱི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། སངས་རྒྱས་ཀྱི་ཁ་དོག་གི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། རིན་པོ་ཆེ་ཐམས་ཅད་ཀྱི་ཁ་དོག་གི་འོད་ཀྱི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། སེམས་ཅན་ཐམས་ཅད་ཀྱི་བསོད་ནམས་རྒྱ་མཚོ་ཡང་དག་པར་འབྱུང་བའི་སྒྲའི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། སེམས་ཅན་ཐམས་ཅད་ཀྱི་ལས་རྒྱ་མཚོ་ཡང་དག་པར་འབྱུང་བའི་སྒྲའི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། སངས་རྒྱས་ཐམས་ཅད་ཀྱི་སྤྱོད་པའི་དཀྱིལ་འཁོར་ཡོངས་སུ་དག་པའི་སྒྲའི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱི་རྒྱ་མཚོའི་སྒྲའི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། སངས་རྒྱས་ཀྱི་ཚུལ་ཐམས་ཅད་མངོན་པར་སྒྲུབ་པའི་སྒྲའི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། ཞིང་གི་རྒྱན་ཐམས་ཅད་འབྱུང་བ་དང་འཇིག་པའི་སྒྲའི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། སངས་རྒྱས་ཀྱི་གསུང་དང་དབྱངས་མཐའ་དང་དབུས་མེད་པའི་ལྷུན་ཅན་ནོ། །འཇིག་རྟེན་གྱི་ཁམས་
Ka159b
ཀྱི་ཚུལ་ལ་ལ་ནི། སངས་རྒྱས་ཐམས་ཅད་ཀྱི་སྤྲུལ་པའི་འཁོར་ལོའི་སྒྲའི་ལྷུན་ཅན་ནོ། །འཇིག་རྟེན་གྱི་ཁམས་ཀྱི་ཚུལ་ལ་ལ་ནི། སེམས་ཅན་ཐམས་ཅད་ཀྱི་དགེ་བ་འབྱུང་བའི་སྒྲའི་ལྷུན་ཅན་ནོ། ། འཇིག་རྟེན་གྱི་ཁམས་ཀྱི་ཚུལ་ལ་ལ་ནི། སངས་རྒྱས་ཐམས་ཅད་ཀྱི་ཡོན་ཏན་རྒྱ་མཚོ་ཡོངས་སུ་དག་པའི་སྒྲའི་ལྷུན་ཅན་ནོ། །ཀྱེ་རྒྱལ་བའི་སྲས་དག། དེ་དག་ལ་སོགས་པ་འཇིག་རྟེན་གྱི་ཁམས་ཀྱི་རྒྱུད་འབྱམས་ཀླས་པའི་ཚུལ་གྱིས་ལུས་ནི། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དུ་ཤེས་པར་བྱའོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་འཇིག་རྟེན་གྱི་ཁམས་ཀྱི་རྒྱུད་འབྱམས་ཀླས་པའི་ཚུལ་གྱིས་ལུས་རྣམ་པར་དགོད་པ་ཤིན་ཏུ་བསྟན་པ་འདི་ཉིད་གསལ་བར་བརྗོད་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ།་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་གི་རྒྱུད་རྒྱན་ཤིན་ཏུ་བརྟན་པར་གྲུབ། །དྲི་མེད་དྲི་བྲལ་འོད་འགྱེད་སྙིང་པོ་ཅན། །ནོར་བུ་པདྨོ་རྒྱ་མཚོ་ཀུན་ལ་གནས། །ལ་ལ་གངྒཱའི་རྒྱ་མཚོ་དག་ལ་གནས། །རྣམ་པ་སྣ་ཚོགས་ཚུལ་གྱི་གཞི་གནས་ཤིང ། །དབྱིབས་ཀྱང་སྣ་ཚོགས་ཁ་དོག་གཟུགས་ཀྱང་མང ། །རི་རབ་གྲོང་ཁྱེར་ཤིང་གི་དཀྱིལ་འཁོར་དང ། །ཞིང་རྒྱུད་ཐམས་ཅད་ལ་ལ་ཕྱོགས་ཀུན་ལྟ། །ལ་ལ་འོད་ལུས་མེ་ཏོག་སྙིང་པོ་ཅན། །ནོར་བུས་བྱས་པ་ཀུན་ནས་སྤྲིན་དང་ཆུ། །ལ་ལའི་རྒྱུད་གསལ་མུ་ཏིག་འོད་ཟེར་ལུས། །ནོར་བུའི་གཞི་གནས་ཀུན་ཀྱང་མི་ཤིགས་སྲ། །འབྱམས་
Ka160a
༄#། །ཀླས་ལ་ལ་ཁ་དོག་སྣ་ཚོགས་གསལ། །འོད་འདྲ་འོད་འཕྲོ་མེ་མར་སྤྲིན་གྱི་མདོག་།ལ་ལའི་རྒྱུད་ནི་སྒྲ་དང་སྐད་ཀྱི་ལུས། །དེ་ལས་སངས་རྒྱས་གསུང་དབྱངས་མཐའ་ཡས་འབྱུང ། །ལ་ལའི་རྒྱུད་ནི་སྨོན་ལམ་སྒྲ་ཡི་ལུས། །སྤྱོད་པ་རྣམ་འཕྲུལ་སྤྲིན་གྱི་སྒྲ་ཡི་ལུས། །ལ་ལ་བསོད་ནམས་ཡངས་དང་ལས་ཀྱི་སྒྲ། །ལ་ལའི་ལུས་ནི་རྒྱལ་བའི་ཡོན་ཏན་སྒྲ། །ཞིང་གི་རྒྱུད་རྣམས་རྒྱ་མཚོ་བསམ་ཡས་པ། །ཀུན་ནས་མི་ཟད་དུ་མའི་སྒོ་ནས་འཇུག། རྣམ་འཕྲུལ་ཡངས་པ་མི་ཟད་རྒྱན་གྱི་རྣམས། །ཚད་མེད་ཀུན་གྱིས་ཕྱོགས་ཀུན་རྒྱས་པར་འགེངས། །ཕྱོགས་རྣམས་ཀུན་ཏུ་ཞིང་རྣམས་འདུ་འགྱུར་ཏེ། །ཡངས་པའི་ཚུལ་གྱིས་ཞིང་གི་རྒྱུད་ཞུགས་པར། །ཕྱོགས་བཅུ་ཀུན་ཏུ་འདུ་བར་སྣང་བ་ཡང ། །འགྲོ་བ་མེད་ཅིང་འཇུག་པ་ཡོད་པ་མིན། །ཚུལ་གཅིག་གིས་ནི་རྒྱུད་རྣམས་ཀུན་ཀྱང་འགེངས། །ཐམས་ཅད་མ་ལུས་རེ་རེར་རབ་ཏུ་འདུག། དེ་ལ་ཐ་དད་གང་ཡང་མི་དམིགས་ཏེ། །གཞི་མེད་ཀུན་འགེངས་མཐའ་དང་དབུས་ཀྱང་མེད། །ཞིང་རྣམས་ཚུལ་གྱི་རྒྱུད་ལ་རྣམ་འཕྲུལ་བ། །སངས་རྒྱས་རྣམ་སྣང་མཛད་པ་ཀུན་ནས་སྣང ། །སྨོན་ལམ་སྒྲ་ནི་རྒྱ་མཚོར་རབ་བརྗོད་ཅིང ། །ཞིང་གི་དབྱིངས་ན་སེམས་ཅན་ཀུན་ཀྱང་འདུལ། །ཞིང་རྣམས་སངས་རྒྱས་སྐུ་ཡིས་ཀུན་ཁྱབ་སྣང ། །བསམ་གྱིས་མི་ཁྱབ་བྱང་ཆུབ་སེམས་དཔས་གང ། །སངས་རྒྱས་རྣམ་འཕྲུལ་མི་མཉམ་སྟོབས་སྟོན་
Ka160b
ཅིང ། །སེམས་ཅན་མང་པོ་ཚད་མེད་རྣམ་པར་འདུལ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། ཞིང་གི་རྒྱུད་ཀྱི་གནས་ཤིན་ཏུ་བསྟན་པ་ཞེས་བྱ་བ་སྟེ། ལེའུ་བརྒྱད་པའོ།། །།བམ་པོ་དགུ་པ། ཀྱེ་རྒྱལ་བའི་སྲས་དག། དེ་ལ་འཇིག་རྟེན་གྱི་ཁམས་རྒྱ་མཚོ་གང་ཆེན་མཚོའི་དབྱིངས་དེ་ན་སྤོས་ཆུའི་རྒྱ་མཚོ་མིག་འཕྲུལ་གྱི་རྣམ་པས་རྣམ་པར་ཕྱེ་བ་གཞི་ཀུན་ལ་རབ་ཏུ་གནས་པ་ནི། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དེ། ཀྱེ་རྒྱལ་བའི་སྲས་དག་།དེ་ལ་གང་ཆེན་མཚོའི་དབྱིངས་ཀྱི་སྤོས་ཆུའི་རྒྱ་མཚོའི་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ནང་ན་སྤོས་ཆུའི་རྒྱ་མཚོ་དབུས་མ་ནི། ཟེ་བ་ཡིད་དུ་འོང་ཞིང་འོད་ཟེར་མཐའ་ཡས་པ་ཞེས་བྱ་སྟེ། དེའི་ནང་ནས་ནོར་བུའི་རྒྱལ་པོ་བྱང་ཆུབ་སེམས་དཔའ་ཐམས་ཅད་ཀྱི་ལུས་རྣམ་པར་དམིགས་པའི་གཟུགས་བརྙན་གྱི་རྒྱལ་མཚན་གྱི་པདྨོ་ཆེན་པོ་གཞི་སྤོས་དང ། ནོར་བུའི་རྒྱལ་པོ་ཐམས་ཅད་ཀྱིས་བརྒྱན་པའི་རྒྱན་ཅན་ཞེས་བྱ་བ་མངོན་པར་བྱུང་སྟེ། དེ་ལ་འཇིག་རྟེན་གྱི་ཁམས་ཀྱི་རྒྱུད་ཕྱོགས་ཀུན་ནས་རིན་པོ་ཆེ་འབར་བའི་འོད་རྣམ་པར་སྣང་བ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། དམིགས་པ་ཐམས་ཅད་ཀྱི་རྒྱན་གྱིས་བརྒྱན་པའི་ལྷུན་ཅན་རབ་ཏུ་གནས་ཏེ། དེ་དག་ལས་ཐམས་ཅད་ཀྱི་འོག་མ་ནི།
Ka161a
༄#། །དཔལ་འབྱུང་བའི་འོད་ཟེར་རྣམ་པར་སྣང་བ་ཞེས་བྱ་བའི་འཇིག་རྟེན་གྱི་ཁམས་ཏེ། དེ་ནི། རྡོ་རྗེ་ཐམས་ཅད་ཀྱི་རྒྱུན་དང ། འོད་ཀྱི་འཁོར་ལོའི་ས་མཚམས་ནོར་བུ་རིན་པོ་ཆེའི་ཟེ་བ་མང་པོ་ལ་རབ་ཏུ་གནས་པ། ནོར་བུའི་འཁོར་ཐམས་ཅད་དང ། རིན་པོ་ཆེའི་མེ་ཏོག་གི་རྒྱན་ཐམས་ཅད་ཀྱིས་རབ་ཏུ་ཡོག་པར་གྱུར་པ་སྟེ། འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། འཇིག་རྟེན་གྱི་ཁམས་དེ་དག་ཀྱང་གཞན་དང་གཞན་ལ་གནས་པ། རྒྱན་གཞན་དང་གཞན་ཅན་དག་སྟེ། དེ་ན་དེ་བཞིན་གཤེགས་པ་ཚུལ་རྣམ་པར་དག་ཅིང་དྲི་མ་མེད་པའི་མར་མེ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་སྤོས་སྣ་ཚོགས་ཀྱི་པདྨོ་དཔལ་གྱི་རྒྱན་ཅེས་བྱ་བ་རྒྱན་ཐམས་ཅད་ཀྱི་ས་མཚམས་ཅན། རིན་པོ་ཆེའི་པདྨོ་ཤིན་ཏུ་མང་བ་ལ་རབ་ཏུ་གནས་པ། སེངྒེའི་ཁྲིའི་དབྱིབས་ལྟར་འདུག་པ། མུ་ཏིག་གི་འབྲུ་རིན་པོ་ཆེ་ཐམས་ཅད་ཀྱི་ཁ་དོག་ལྟ་བུའི་བླ་རེའི་སྤྲིན་གྱིས་ཀུན་ནས་ཡོག་པ། ཀུན་ནས་ཉོན་མོངས་ཤིང་རྣམ་པར་དག་པ། འཇིག་རྟེན་གྱི་ཁམས་སངས་རྒྱས་ཀྱི་ཞིང་གཉིས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ་ཡོད་དེ། དེ་ན་དེ་བཞིན་གཤེགས་པ་སེངྒེའི་འོད་ཟེར་མཆོག་གི་འོད་ཅེས་བྱ་བ་བཞུགས་སོ། །དེའི་སྟེང་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་
Ka161b
སྙེད་ཀྱི་འཇིག་རྟེན་གྱི་ཁམས་འདས་པ་ན་འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱི་རྒྱན་ཀུན་ཏུ་སྣང་བ་ཞེས་བྱ་བ་སྤོས་ཀྱི་རླུང་གི་དཀྱིལ་འཁོར་གྱི་ས་མཚམས་ཅན། རིན་པོ་ཆེའི་མེ་ཏོག་གི་ཕྲེང་བ་སྣ་ཚོགས་ལ་རབ་ཏུ་གནས་པ་ནོར་བུའི་འཁོར་ལོ་གཟི་བརྗིད་བཟང་པོའི་ཉི་མའི་སྤྲིན་གྱིས་ཀུན་ནས་ཡོག་པ། ཡན་ལག་བརྒྱད་དུ་དམའ་བའི་དབྱིབས་ཅན། འཇིག་རྟེན་གྱི་ཁམས་སངས་རྒྱས་ཀྱི་ཞིང་གསུམ་གྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། རྣམ་པར་དག་ཅིང་ཀུན་ནས་ཉོན་མོངས་པ་ཡོད་དེ། དེ་ན་དེ་བཞིན་གཤེགས་པ་འོད་དྲི་མ་མེད་པའི་ཡེ་ཤེས་ཀྱི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་འོད་ཟེར་སྣ་ཚོགས་ཀྱི་ཡིད་དུ་འོང་བ་ཞེས་བྱ་བ་རིན་པོ་ཆེའི་རྒྱལ་པོ་ཐམས་ཅད་ཀྱི་ས་མཚམས་ཅན། ཁ་དོག་སྣ་ཚོགས་དང་ལྡན་པའི་རྡོ་རྗེ་བྲག་གི་རྒྱ་མཚོ་ལ་རབ་ཏུ་གནས་པ། རིན་པོ་ཆེ་པདྨོའི་དབྱིབས་ལྟར་འདུག་པ། རྡོ་རྗེའི་འོད་ཟེར་དང ། རིན་པོ་ཆེ་འབར་བ་མཐའ་ཡས་པར་སྣང་བའི་འོད་ཀྱི་ནོར་བུའི་རྒྱ་མཚོའི་སྤྲིན་གྱིས་ཀུན་ནས་ཡོག་པ། གཅིག་ཏུ་དག་པ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བཞིའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ་ཡོད་དེ། དེ་ན་དེ་བཞིན་གཤེགས་པ་རྡོ་རྗེའི་འོད་ཟེར་སྟོབས་དང་བརྩོན་འགྲུས་མཐའ་ཡས་པ་ཡང་དག་པར་འབྱུང་བ་ཞེས་བྱ་བ་བཞུགས་སོ། །དེའི་
Ka162a
༄#། །སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་འོད་ཤིན་ཏུ་བཀྱེ་བའི་མེ་ཏོག་སིལ་མའི་འཁོར་ལོ་ཞེས་བྱ་བ་རིན་པོ་ཆེ་ཐམས་ཅད་ཀྱི་དྲིལ་བུའི་དྲ་བའི་རྒྱན་གྱི་ས་མཚམས་ཅན། ཤིང་དང་ནགས་ཚལ་གྱི་རྒྱན་ཐམས་ཅད་འབྱུང་བའི་རིན་པོ་ཆེའི་འཁོར་ལོ་མང་པོའི་རྒྱ་མཚོ་ལ་རབ་ཏུ་གནས་པ། ཕྱོགས་ཐམས་ཅད་ནས་གྲ་དུ་མའི་དབྱིབས་སུ་འདུག་པ། ནོར་བུའི་རྒྱལ་པོ་ཚངས་པའི་དབྱངས་སུ་སྒྲོག་པས་ཀུན་ནས་ཡོག་པ། ཀུན་ནས་ཉོན་མོངས་ཤིང་རྣམ་པར་དག་པ།་འཇིག་རྟེན་གྱི་ཁམས་སངས་རྒྱས་ཀྱི་ཞིང་ལྔའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ་ཡོད་དེ། དེ་ན་དེ་བཞིན་གཤེགས་པ་སྤོས་ཀྱི་འོད་ཟེར་དགའ་བའི་སྟོབས་རྒྱ་མཚོ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་དགེ་བ་སྣ་ཚོགས་ཀྱི་རྣམ་པ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་དྲུག་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། རྣམ་པར་དག་ཅིང་ཀུན་ནས་ཉོན་མོངས་པ་རིན་པོ་ཆེ་ཤི་ལའི་རྒྱལ་མཚན་གྱི་ས་མཚམས་ཅན། རྡོ་རྗེའི་ཁྱིམ་གཞལ་མེད་ཁང་རྒྱ་མཚོ་ལ་རབ་ཏུ་གནས་པ། ཀུན་ནས་གྲུ་བཞིའི་དབྱིབས་སུ་འདུག་པ། འཁོར་ལོ་ནོར་བུ་གཙུག་གི་བླ་རེའི་སྤྲིན་གྱིས་ཀུན་ནས་
Ka162b
ཡོག་པ་ཡོད་དེ། དེ་ན་དེ་བཞིན་གཤེགས་པ་ཀུན་ཏུ་སྣང་བའི་འོད་ཀྱི་དབང་པོའི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་རྒྱན་གྱི་འོད་ཟེར་མེ་ཏོག་ཤིན་ཏུ་རྒྱས་པའི་དཀྱིལ་འཁོར་ཅེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བདུན་གྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། གཅིག་ཏུ་དག་པ། ཁང་པ་བརྩེགས་པའི་དབྱིབས་སུ་འདུག་པ། མེ་ཏོག་པདྨོ་སྣ་ཚོགས་ཀྱི་རྒྱན་གྱི་ས་མཚམས་ཅན། རིན་པོ་ཆེ་ཐམས་ཅད་ཀྱི་འོད་ཟེར་དང ། རིན་པོ་ཆེའི་ཁ་དོག་རྒྱ་མཚོ་ལ་རབ་ཏུ་གནས་པ། ཁ་དོག་ཐམས་ཅད་ཀྱི་གོས་དང ། མུ་ཏིག་དང ། སྟེགས་བུས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་དགའ་བ་རྒྱ་མཚོའི་ཤུགས་དང ། ཡོན་ཏན་གྲགས་པའི་དབང་ཕྱུག་འོད་ཟེར་ཅེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་ཡང་དག་པར་འབྱུང་བའི་གཟི་བརྗིད་ཅེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྒྱད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཀུན་ནས་ཉོན་མོངས་ཤིང་རྣམ་པར་དག་པ་ནོར་བུའི་རྒྱལ་པོ་སྒྲ་ཐམས་ཅད་གཏོང་བའི་རྒྱན་གྱི་ས་མཚམས་ཅན། རིན་པོ་ཆེ་སྣ་ཚོགས་ཀྱི་ཁ་དོག་ལྟ་བུའི་པདྨོ་ལ་འདུག་ཅིང ། ནམ་མཁའི་རྒྱ་མཚོ་ལ་རབ་ཏུ་གནས་པ། མིག་འཕྲུལ་
Ka163a
༄#། །གྱི་དབྱིབས་ལྟ་བུར་འདུག་པ། འོད་ཀྱི་མེ་ཏོག་གི་དྲ་བའི་སྤྲིན་ཁ་དོག་མཐའ་ཡས་པས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་གྲགས་པ་ཆེན་པོའི་ཡེ་ཤེས་རྒྱ་མཚོའི་རྒྱལ་མཚན་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་སྒྲ་དབྱངས་རབ་ཏུ་སྒྲོག་པ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་དགུའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། རྣམ་པར་དག་ཅིང་ཀུན་ནས་ཉོན་མོངས་པ། རིན་པོ་ཆེ་ཡིད་བཞིན་གྱི་རྒྱལ་པོའི་འཁོར་ལོའི་ཤིང་གི་རྒྱན་གྱི་ས་མཚམས་ཅན། ནོར་བུའི་རྒྱལ་པོ་རྒྱན་ཐམས་ཅད་ཀྱི་སྤྲིན་འབར་བའི་སྒྲའི་རྒྱ་མཚོའི་གཞི་ལ་རབ་ཏུ་གནས་པ། ཚངས་པའི་ལུས་ཀྱི་དབྱིབས་ལྟར་འདུག་པ། སེངྒེའི་ཁྲིའི་སྤྲིན་རིན་པོ་ཆེ་ཡིད་དུ་འོང་བ་མཐའ་ཡས་པའི་རྒྱན་ཅན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་མཚན་གྱི་གཟི་བརྗིད་ཐུབ་པ་མེད་པའི་ཟླ་བ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་རྡོ་རྗེའི་རྒྱལ་མཚན་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། གཅིག་ཏུ་དག་པ། རྒྱན་མཐའ་ཡས་པ་དང ། མུ་ཏིག་གི་འབྲུ་རབ་ཏུ་འཕྱང་བ་དང །
Ka163b
རིན་པོ་ཆེའི་ཕྲེང་བའི་རྒྱན་གྱི་ས་མཚམས་ཅན། རིན་པོ་ཆེ་སེངྒེའི་ཁྲིའི་རྒྱན་དང ། མུ་ཏིག་གི་ཕྲེང་བ་དང ། རྒྱན་ཐམས་ཅད་ཀྱིས་བརྒྱན་པའི་ནོར་བུའི་རྒྱ་མཚོ་ལ་རབ་ཏུ་གནས་པ། ཀུན་ནས་ཟླུམ་པའི་དབྱིབས་སུ་འདུག་པ། སྤོས་དང ། ནོར་བུ་དང ། མེ་ཏོག་སྣ་ཚོགས་ཀྱི་རི་རབ་ཀྱི་སྤྲིན་རི་རབ་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱིས་ཤིན་ཏུ་འཕགས་པའི་རྒྱལ་པོ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་མདོག་རྣམ་པར་སྣང་བ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་གཅིག་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཀུན་ནས་ཉོན་མོངས་ཤིང་རྣམ་པར་དག་པ། རྡོ་རྗེ་ལྟར་མི་ཤིགས་ཤིང་སྲ་བའི་རྒྱན་གྱི་ས་མཚམས་ཅན། མེ་ཏོག་སྣ་ཚོགས་རྣམ་པ་མང་པོའི་རྒྱ་མཚོ་ལ་རབ་ཏུ་གནས་པ། ཟླ་བ་ཁམ་པའི་དབྱིབས་ལྟར་འདུག་པ། ལྷ་རྫས་རིན་པོ་ཆེའི་བླ་རེས་ཀུན་ནས་ཡོག་བ་ཡོད་དེ། དེ་ན་དེ་བཞིན་གཤེགས་པ་རྒྱལ་བའི་ཡོན་ཏན་ཆོས་ཉིད་ཚད་མེད་པ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་སྣང་བའི་མདོག་ཅེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་གཉིས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ།
Ka164a
༄#། །རྣམ་པར་དག་ཅིང་ཀུན་ནས་ཉོན་མོངས་པ། འོད་ཟེར་གྱི་རྒྱན་ཀུན་ནས་སྣང་བའི་ས་མཚམས་ཅན། སྤོས་ཀྱི་ཆུའི་རྒྱ་མཚོ་མེ་ཏོག་གི་ཀློང་ཅན་གྱི་གང་ཆེན་མཚོ་ལ་རབ་ཏུ་གནས་པ། མེ་ཏོག་འཁྱིལ་པའི་དབྱིབས་ལྟར་འདུག་པ། གོས་སྣ་ཚོགས་ཀྱི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་ཚངས་པའི་དབང་པོའི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་གསུམ་གྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཀུན་ནས་ཉོན་མོངས་ལ་རྣམ་པར་དག་པ། རྡོ་རྗེའི་གཞིའི་ས་མཚམས་ཅན། རླུང་གི་དཀྱིལ་འཁོར་ཁ་དོག་སྣ་ཚོགས་ཅན་གྱི་ཤིན་ཏུ་གཟུང་བ། པདྨོའི་དྲ་བ་ལ་རབ་ཏུ་གནས་པ་ཀུན་ནས་ཟླུམ་པའི་དབྱིབས་སུ་གནས་པ། ནམ་མཁའ་ལྷའི་ཁང་པ་ཅན་གྱིས་བརྒྱན་པ་འདི་ཡོད་དེ། དེ་ན་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་འདི་བཞུགས་སོ། །སངས་རྒྱས་ཀྱི་ཞིང་འདིའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་མཉམ་ལ་རྡུལ་མེད་པའི་འོད་ཅེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་བཞིའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། རྣམ་པར་དག་ཅིང་ཀུན་ནས་
Ka164b
ཉོན་མོངས་པ། རིན་པོ་ཆེ་ཐམས་ཅད་ཀྱི་རྒྱན་གྱི་ས་མཚམས་ཅན། རིན་པོ་ཆེའི་གོས་སྣ་ཚོགས་རྒྱ་མཚོ་ལ་རབ་ཏུ་གནས་པ། རྡོ་རྗེའི་དབྱིབས་ལྟར་འདུག་པ། རྡོ་རྗེའི་སྤྲིན་ཁ་དོག་མཐའ་ཡས་པས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་ཆོས་ཀྱི་དབྱིངས་ཤིན་ཏུ་འཕགས་པའི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་འོད་སྣ་ཚོགས་ཡིད་དུ་འོང་བའི་མར་མེ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅོ་ལྔའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། གཅིག་ཏུ་དག་པ། རྒྱན་མང་པོ་ཐམས་ཅད་ཀྱི་བླ་རེའི་ས་མཚམས་ཅན། མེ་ཏོག་གི་དྲ་བ་རྒྱ་མཚོ་རྣམ་པར་དག་པ་ལ་རབ་ཏུ་གནས་པ། དབྱིབས་དཔལ་གྱི་བེའུ་ལྟར་འདུག་པ། ནོར་བུའི་ཤིང་དང་སྤོས་ཆུའི་སྤྲིན་རྒྱ་མཚོས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་སྟོབས་ལ་ཐུབ་པ་མེད་པས་ཀུན་ཏུ་སྣང་བའི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན། འཇིག་རྟེན་གྱི་ཁམས་འོད་འཕྲོ་སྣང་བ་དྲི་མ་མེད་པ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་དྲུག་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཉོན་མོངས་ཤིང་རྣམ་པར་དག་པ། ནོར་བུའི་རྒྱལ་པོ་རིན་པོ་ཆེ་མི་ཟད་པ་འགྱེད་པའི་ས་མཚམས་ཅན།
Ka165a
༄#། །སྤོས་དང་འོད་འཕྲོ་བ་སྣ་ཚོགས་ཅན་གྱི་པདྨོའི་རྒྱ་མཚོ་ལ་རབ་ཏུ་གནས་པ། དབྱིབས་རུས་སྦལ་གྱི་མགོ་ལྟར་འདུག་པ། ནོར་བུ་འོད་ཀྱི་དཀྱིལ་འཁོར་རྣམ་པར་སྣང་བའི་འཁོར་ལོའི་ཙནྡན་གྱི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་ཡོན་ཏན་གྱི་ཉི་མ་དྲི་མ་མེད་པའི་སྤྱན་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་རིན་པོ་ཆེའི་འབྱུང་གནས་ཀྱིས་རབ་ཏུ་བརྒྱན་པའི་སྙིང་པོ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་བདུན་གྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། རྣམ་པར་དག་ཅིང་ཀུན་ནས་ཉོན་མོངས་པ། དབྱིབས་སེམས་ཅན་ཐམས་ཅད་ཀྱི་ལུས་ལྟར་འདུག་པ། ནོར་བུའི་རྒྱལ་པོའི་རྒྱན་གྱི་ས་མཚམས་ཅན། ནོར་བུའི་རྒྱལ་པོ་འོད་ཀྱི་སྙིང་པོ་འབྱུང་བའི་རྒྱ་མཚོ་ལ་རབ་ཏུ་གནས་པ། དབྱིབས་ཡན་ལག་བརྒྱད་དུ་འདུག་པ། ཁོར་ཡུག་ཐམས་ཅད་ཀྱི་རིན་པོ་ཆེའི་རྒྱན་དང ། མེ་ཏོག་དང་ཤིང་གི་དྲ་བས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་ཆགས་པ་མེད་པའི་ཡེ་ཤེས་ཕྱོགས་ཀུན་ཏུ་རྣམ་པར་སྣང་བའི་འོད་ཅེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན། འཇིག་རྟེན་གྱི་ཁམས་རྡུལ་དང་བྲལ་བ་ཞེས་བྱ་བ། འཇིག་རྟེན་གྱི་ཁམས་སངས་
Ka165b
རྒྱས་ཀྱི་ཞིང་བཅོ་བརྒྱད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། གཅིག་ཏུ་དག་པ། རྒྱན་གྱི་རྣམ་པ་ཐམས་ཅད་ཀྱི་ས་མཚམས་ཅན། མེ་ཏོག་གི་སེངྒེའི་ཁྲི་རྒྱ་མཚོ་ལ་རབ་ཏུ་གནས་པ། དབྱིབས་མུ་ཏིག་གི་ཕྲེང་བ་བསྐྱིལ་བ་ལྟ་བུར་འདུག་པ། ནོར་བུའི་རྒྱལ་པོ་རིན་པོ་ཆེ་ཐམས་ཅད་ཀྱི་སྤོས་ཀྱི་འོད་ཀྱི་དཀྱིལ་འཁོར་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་དཔལ་ཚད་མེད་པའི་ཚུལ་དཔལ་གྱི་རྒྱལ་མཚན་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་ཕྱོགས་ཡོངས་སུ་དག་ཅིང་སྣང་བ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་དགུའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཀུན་ནས་ཉོན་མོངས་ཤིང་རྣམ་པར་དག་པ། ནོར་བུའི་རྒྱལ་པོ་རིན་པོ་ཆེའི་སྤྲིན་མི་ཟད་པ་རབ་ཏུ་འགྱེད་པའི་ས་མཚམས་ཅན། སྤོས་དང་འོད་འཕྲོ་བ་ཁ་དོག་མཐའ་ཡས་པའི་རི་རབ་ཀྱི་རྒྱ་མཚོ་ལ་རབ་ཏུ་གནས་པ། དབྱིབས་ནོར་བུའི་ཟེ་བ་འཁྱིལ་བ་ལྟར་འདུག་པ། ནོར་བུའི་རྒྱལ་པོའི་དབང་པོའི་འོད་ཀྱི་དཀྱིལ་འཁོར་འབར་བ་ཁ་དོག་མཐའ་ཡས་པ་རབ་ཏུ་འབར་བའི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་ཆོས་ཀྱི་དབྱིངས་དང་ནམ་མཁའ་ཀུན་ཏུ་སྣང་བའི་འོད་ཅེས་བྱ་བ་བཞུགས་སོ། །དེའི་སྟོང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་
Ka166a
༄#། །ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་རིན་པོ་ཆེའི་འོད་འཕྲོ་འཁྱིལ་བའི་དཔལ་ཡང་དག་པར་འབྱུང་བ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་ཉི་ཤུའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། གཅིག་ཏུ་རྣམ་པར་དག་པ། རིན་པོ་ཆེའི་ཉི་ཟླ་རྣམ་པར་སྣང་བའི་ས་མཚམས་ཅན། དབྱིབས་ལྷའི་དབང་པོ་ཐམས་ཅད་ལྟར་འདུག་པ། ནོར་བུའི་རྒྱལ་པོའི་རྒྱ་མཚོ་ལ་རབ་ཏུ་གནས་པ། རྒྱན་གྱི་རྣམ་པ་དུ་མ་དང ། རིན་པོ་ཆེ་སྣ་ཚོགས་ཐམས་ཅད་དང ། རྡོ་རྗེའི་རྒྱལ་མཚན་གྱི་སྤྲིན་གྱིས་ཀུན་ནས་ཡོག་པ། ནོར་བུ་སྒྲོན་མའི་འབྲུའི་དྲ་བས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་མཚན་བསོད་ནམས་ཀྱི་སྤྲིན་གྱིས་ཤིན་ཏུ་འཕགས་པའི་གཟི་བརྗིད་ཅེས་བྱ་བ་བཞུགས་སོ། །འཇིག་རྟེན་གྱི་ཁམས་ཀྱི་རྒྱུད་ཕྱོགས་ཀུན་ནས་རིན་པོ་ཆེ་འབར་བའི་འོད་རྣམ་པར་སྣང་བ་ཞེས་བྱ་བ་དེ་ནི། འཇིག་རྟེན་གྱི་ཁམས་འབྱམས་ཀླས་པ་གཞན་དང་གཞན་ལ་རབ་ཏུ་གནས་པ། དབྱིབས་གཞན་དང་གཞན་དུ་འདུག་པ། ལྷུན་གཞན་དང་གཞན་ཅན། ཕྱོགས་འབྱམས་ཀླས་པ། གཞན་དང་གཞན་ལ་ལྟ་བ། རྣམ་པ་གཞན་དང་གཞན་གྱིས་འཇུག་པ། རྒྱན་གཞན་དང་གཞན་ཅན། གཞན་དང་གཞན་གྱིས་རྒྱས་པར་འགེངས་པ། གཞན་དང་གཞན་དུ་ཡོངས་སུ་འདུ་བ། གཞན་དང་གཞན་གྱི་རྣམ་པར་མ་འདྲེས་པ།
Ka166b
རྣམ་པར་འཕྲུལ་པ་དང ། བྱིན་གྱི་རླབས་གཞན་ཅན། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཀུན་ནས་ཡོངས་སུ་བསྐོར་བ་སྟེ། འདི་ལྟར་འཇིག་རྟེན་གྱི་ཁམས་ཀུན་ནས་བསྐོར་བ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་ཡོངས་སུ་བསྐོར་བའོ། །འཇིག་རྟེན་གྱི་ཁམས་ཀྱི་ཆུ་ཀླུང་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་ཡོངས་སུ་བསྐོར་བའོ། །འཇིག་རྟེན་གྱི་ཁམས་ཀུན་ནས་བསྐོར་བ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཀུན་ནས་འཁྱིལ་བ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཀྱི་འཁོར་ལོ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཀྱི་དཀྱིལ་འཁོར་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཀྱི་ཤིང་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཀྱི་ཕུང་པོ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཀྱི་རྡོ་རྗེའི་རྒྱལ་མཚན་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཕྱོགས་འབྱམས་ཀླས་པས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཁང་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང །
Ka167a
༄#། །འཇིག་རྟེན་གྱི་ཁམས་པདྨོ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཁྱད་ཁྱུད་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་འབྱམས་ཀླས་པ་སེམས་ཅན་སྣ་ཚོགས་ཀྱི་གཟུགས་དང་ལུས་ཀྱི་དབྱིབས་ལྟར་འདུག་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་འབྱམས་ཀླས་པ་སངས་རྒྱས་ཀྱི་མཚན་གྱི་དབྱིབས་ལྟར་འདུག་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་འོད་ཀྱི་དཀྱིལ་འཁོར་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཀྱི་སྤྲིན་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་ཀྱི་དྲ་བ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་འབྱམས་ཀླས་པ་ས་ལ་མངོན་པར་ལྟ་བའི་དབྱིབས་ལྟར་འདུག་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང ། འཇིག་རྟེན་གྱི་ཁམས་འབྱམས་ཀླས་པ་དམིགས་པ་ཐམས་ཅད་ཀྱི་དབྱིབས་ལྟར་འདུག་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་ཡོངས་སུ་བསྐོར་བ་སྟེ།་དེ་དག་ལ་སོགས་པ་འཇིག་རྟེན་གྱི་ཁམས་འབྱམས་ཀླས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་ཡོངས་སུ་བསྐོར་བའོ། །འཇིག་རྟེན་གྱི་
Ka167b
ཁམས་འབྱམས་ཀླས་པ་དེ་དག་རེ་རེ་ཞིང་ཡང་འཇིག་རྟེན་གྱི་ཁམས་འབྱམས་ཀླས་པ་རྣམ་པར་གདགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་ཡོངས་སུ་བསྐོར་བའོ། །འཇིག་རྟེན་གྱི་ཁམས་འབྱམས་ཀླས་པ་སངས་རྒྱས་ཀྱི་ཞིང་བརྗོད་དུ་མེད་པ་བཅུའི་རྡུལ་ཤིན་ཏུ་ཕྲ་བ་སྙེད་པོ་དེ་དག་རེ་རེ་ཞིང་ཡང་འཇིག་རྟེན་གྱི་ཁམས་འབྱམས་ཀླས་པའི་རྣམ་པར་གདགས་པ་ཤིན་ཏུ་བསྟན་པ་ནི། སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དེ། སྤོས་ཆུའི་རྒྱ་མཚོ་ཟེ་བ་མཐའ་ཡས་པའི་འོད་ཟེར་ཡིད་དུ་འོང་བ་ཞེས་བྱ་བ་ཆུ་ཀླུང་གི་འཁོར་དང་བཅས་པ། ཆུ་ཀླུང་གི་གློང་དང་བཅས་པའི་ཁོངས་ན་འདུག་གོ་།སྤོས་ཆུའི་རྒྱ་མཚོ་ཟེ་བ་མཐའ་ཡས་པའི་འོད་ཟེར་ཡིད་དུ་འོང་བ་དེ་དང་འདབས་ཆགས་སུ་ཤར་ཕྱོགས་ལོགས་ན་སྤོས་ཆུའི་རྒྱ་མཚོ་གང་ཆེན་མཚོ་དྲི་མ་མེད་པའི་འོད་ཟེར་གྱི་སྙིང་པོ་ཞེས་བྱ་བ་ཡོད་དེ། དེ་ན་འཇིག་རྟེན་གྱི་ཁམས་ཀྱི་རྒྱུད་ཞིང་ཀུན་ནས་འཁྱིལ་བ་རྣམ་པར་སྣང་བ་ཞེས་བྱ་བ་སྤོས་དང ། རིན་པོ་ཆེའི་རྒྱལ་པོ་ཐམས་ཅད་ལ་རབ་ཏུ་གནས་པའི་རྒྱན་དང་ལྡན་པའི་པདྨོ་ཆེན་པོ་ལ་རབ་ཏུ་གནས་པ། བྱང་ཆུབ་སེམས་དཔའི་སྤྱོད་པའི་སྒྲ་རྒྱ་མཚོ་མངོན་པར་སྒྲུབ་པའི་ང་རོའི་ལྷུན་ཅན་ཡོད་དོ། །དེ་དག་ཐམས་ཅད་ཀྱི་འོག་ན་འཇིག་རྟེན་གྱི་ཁམས་ཁྱིམ་གྱི་རྒྱན་གྱིས་བརྒྱན་པའི་རྒྱལ་མཚན་ཞེས་བྱ་བ། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་
Ka168a
༄#། །ཀྱི་འཁོར་གྱིས་བསྐོར་བ། གཅིག་ཏུ་དག་པ། རིན་པོ་ཆེ་ཐམས་ཅད་ཀྱི་རྒྱན་གྱི་གང་ཆེན་མཚོ་ལ་རབ་ཏུ་གནས་པ། འཁོར་ཀུན་ནས་གྲུ་བཞིར་འདུག་པ། པདྨོ་འོད་ཟེར་གྱི་དྲ་བའི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་དཔལ་རྣམ་པར་སྣང་བའི་མཛོད་སྤུའི་འོད་ཅེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་ཟེ་བའི་དཔལ་གྱི་སྙིང་པོ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་གཉིས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། རིན་པོ་ཆེ་ཐམས་ཅད་ཀྱི་མེ་ཏོག་གི་ཟེ་བ་རྒྱ་མཚོ་ལ་རབ་ཏུ་གནས་པ། དབྱིབས་ཀུན་ནས་དཀྱིལ་འཁོར་དུ་འདུག་པ་མུ་ཏིག་གྲོང་ཁྱེར་དཔལ་གྱི་དཔལ་གྱི་སེངྒེའི་ཁྲིའི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་ཆོས་ཐམས་ཅད་རྒྱ་མཚོ་མཐའ་ཡས་པའི་བློ་གྲོས་ཞེས་བྱ་བ་བཞུགས་སོ།། དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་སྤྲུལ་པའི་སྤོས་ཞིམ་པོ་དཔལ་གྱི་དཀྱིལ་འཁོར་ཅེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་གསུམ་གྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། རྣམ་པར་དག་ཅིང་ཀུན་ནས་ཉོན་མོངས་པ། རིན་པོ་ཆེ་ཐམས་ཅད་ཀྱི་རྒྱན་དང་དྲིལ་བུའི་
Ka168b
དྲ་བ་རྒྱ་མཚོ་ལ་རབ་ཏུ་གནས་པ། རྡོ་རྗེའི་དབྱིབས་ལྟར་འདུག་པ། རྒྱན་སྣ་ཚོགས་ཀྱི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་ཆོས་ཀྱི་མཚན་ཉིད་སྤྲུལ་པ་མེད་པར་ཀུན་ནས་སྣང་བ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་ས་གཞིའི་ཁ་དོག་དང་འོད་ཡིད་དུ་འོང་བ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་གཞིའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། གཅིག་ཏུ་དག་པ། སྤོས་ཆུ་ཁ་དོག་མཐའ་ཡས་པ་རིན་པོ་ཆེའི་ཚོན་དང་ལྡན་པའི་རྒྱ་མཚོ་ལ་རབ་ཏུ་གནས་པ། དབྱིབས་ནོར་བུའི་འཁོར་ལོ་ལྟར་འདུག་པ། མུ་ཏིག་ཉི་མའི་ཚུལ་ཀུན་ཏུ་སྣང་བའི་འོད་ཀྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་འཁོར་ལེགས་པར་བྱུང་བ་རྣམ་པར་སྣང་མཛད་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་དགེ་བའི་ལས་ཀྱིས་ཁྱབ་པ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་ལྔའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཀུན་ནས་ཉོན་མོངས་ཤིང་རྣམ་པར་དག་པ། སྤོས་དང་རྡོ་རྗེ་རྒྱ་མཚོ་ལ་རབ་ཏུ་གནས་པ། པདྨོའི་དབྱིབས་ལྟར་འདུག་པ། འོད་ཟེར་རྡུལ་དང་བྲལ་བ།
Ka169a
༄#། །དང ། སྤོས་ཆུའི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་ཆོས་ཀྱི་ཤུགས་ཀྱིས་དགྱེས་པ་མི་ཟད་པའི་བློ་གྲོས་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་མེ་ཏོག་དཔལ་གྱི་གཟི་བརྗིད་ཀྱི་དཀྱིལ་འཁོར་ཅེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་དྲུག་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ་དག་ཅིང་ཀུན་ནས་ཉོན་མོངས་པ། ནོར་བུ་རིན་པོ་ཆེ་ཐམས་ཅད་ཀྱིས་བརྟན་པར་བསྒྲུབས་པའི་རྒྱ་མཚོ་ལ་རབ་ཏུ་གནས་པ། ཟུར་གསུམ་གྱི་དབྱིབས་སུ་འདུག་པ། བྱང་ཆུབ་སེམས་དཔའི་ནོར་བུའི་ཅོད་པན་གྱི་འོད་དང་འོད་ཟེར་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་དགེ་བ་དྲི་མ་མེད་པ་ཀུན་ཏུ་སྣང་བ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་རིན་པོ་ཆེའི་པདྨོས་བརྒྱན་པ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བདུན་གྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། གཅིག་ཏུ་དག་པ། པདྨོའི་རྒྱན་ཐམས་ཅད་ཀྱི་རྒྱ་མཚོ་ལ་རབ་ཏུ་གནས་པ། ཟླ་བ་ཁམ་པའི་དབྱིབས་ལྟར་འདུག་པ། རིན་པོ་ཆེ་ཐམས་ཅད་ཀྱི་མེ་ཏོག་གི་དཀྱིལ་
Ka169b
འཁོར་གྱི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་སྤྱན་རྣམ་པར་དག་པ་མེ་ཏོག་གི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་འོད་འཕྲོ་བའི་དབྱིངས་དྲི་མ་མེད་པས་ཡང་དག་པར་བསགས་པ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྒྱད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཀུན་ནས་ཉོན་མོངས་ཤིང་རྣམ་པར་དག་པ། རིན་པོ་ཆེའི་འོད་མང་པོའི་རྒྱ་མཚོ་ལ་རབ་ཏུ་གནས་པ། རིན་པོ་ཆེ་རིམ་གྱིས་གཞོལ་བའི་འོད་འཕྲོ་བ་སྣང་བའི་དབྱིབས་ལྟར་འདུག་པ། རྟག་ཏུ་སྤོས་ཀྱི་ཆར་འབེབས་པའི་ལུས་སྣ་ཚོགས་ཀྱི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་སྟོབས་ལ་ཐུབ་པ་མེད་པའི་བློ་གྲོས་ཤིན་ཏུ་འབྱུང་བ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་ཚངས་པའི་འོད་བཟང་པོ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་དགུའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། རྣམ་པར་དག་ཅིང་ཀུན་ནས་ཉོན་མོངས་པ་རིན་པོ་ཆེའི་གོས་ཀྱི་རྒྱལ་མཚན་གྱི་རྒྱ་མཚོ་ལ་རབ་ཏུ་གནས་པ། དགའ་བ་འཁྱིལ་བའི་དབྱིབས་ལྟར་འདུག་པ། མེ་ཏོག་ཐམས་ཅད་ཀྱི་རྒྱན་གྱི་བླ་རེའི་སྤྲིན་གྱིས་ཀུན་ནས་ཡོག་
Ka170a
༄#། །པ་ཡོད་དེ། དེ་ན་དེ་བཞིན་གཤེགས་པ་ནམ་མཁའ་ཡངས་པའི་སྤྱན་ཟླ་བ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་དབྱངས་རྡུལ་དང་མཉམ་པ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། གཅིག་ཏུ་དག་པ། རིན་པོ་ཆེ་སྣ་ཚོགས་ཀྱི་ཆུའི་རྒྱ་མཚོ་ལ་རབ་ཏུ་གནས་པ། མིག་འཕྲུལ་གྱི་དབྱིབས་ལྟར་འདུག་པ། སིལ་སྙན་ཐམས་ཅད་ཀྱི་སྒྲ་དང ། ནོར་བུའི་རྒྱལ་པོའི་གདུགས་ཀྱི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་གསེར་ཤིན་ཏུ་འབར་བའི་རི་རབ་མར་མེ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་རིན་པོ་ཆེའི་ཁ་དོག་གིས་བརྒྱན་པ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་གཅིག་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཀུན་ནས་ཉོན་མོངས་ཤིང་རྣམ་པར་དག་པ། བརྒྱ་བྱིན་གྱི་ལུས་ཀྱི་དབྱིབས་ལྟར་འདུག་པ། ནོར་བུའི་རྒྱལ་པོའི་རྒྱ་མཚོ་ལ་རབ་ཏུ་གནས་པ། ཉི་མའི་སྤྲུལ་པའི་མེ་ཏོག་གི་རྒྱལ་མཚན་གྱི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་ཡེ་ཤེས་
Ka170b
ཀྱི་དཔལ་ཤིན་ཏུ་འཕགས་པས་ཆོས་ཀྱི་དབྱིབས་སུ་རབ་ཏུ་སྣང་བ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་འོད་བཟང་པོ་གསེར་གྱི་ཁ་དོག་ཅེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་གཉིས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། རྣམ་པར་དག་ཅིང་ཀུན་ནས་ཉོན་མོངས་པ། རིན་པོ་ཆེའི་རྒྱན་ཐམས་ཅད་ཀྱི་རྒྱ་མཚོ་ལ་རབ་ཏུ་གནས་པ། མཁར་གྱི་དབྱིབས་ལྟར་འདུག་པ། སྙིང་པོ་བྱང་ཆུབ་ཀྱི་མེ་ཏོག་རིན་པོ་ཆེ་ཤིན་ཏུ་རྒྱས་པའི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་རིན་པོ་ཆེའི་སྒྲོན་མ་ཀུན་ཏུ་སྣང་བའི་དཔལ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་འཁོར་ལོ་ཞེས་བྱ་བ་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་གསུམ་གྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། གཅིག་ཏུ་དག་པ། རིན་པོ་ཆེའི་གོས་ཀྱི་གློང་གི་རྒྱ་མཚོ་ལ་རབ་ཏུ་གནས་པ། མེ་ཏོག་གི་ཟེ་བའི་དབྱིབས་ལྟར་འདུག་པ། ནོར་བུའི་རྒྱལ་པོ་སངས་རྒྱས་ཀྱི་གསུང་དང་དབྱངས་སྒྲོག་པའི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་དཔལ་འབར་བའི་པདྨོ་ལ་རྣམ་པར་རོལ་པས་ཤིན་ཏུ་རྣམ་
Ka171a
༄#། །པར་སྣང་བ་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་རིན་པོ་ཆེའི་སྙིང་པོས་བསྒྲུབས་པའི་དམ་པ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་བཞིའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཀུན་ནས་ཉོན་མོངས་ཤིང་རྣམ་པར་དག་པ། རིན་པོ་ཆེའི་ཕྲེང་བའི་རྒྱ་མཚོ་ལ་རབ་ཏུ་གནས་པ། གླིང་བཞིའི་དབྱིབས་ལྟར་འདུག་པ། རིན་པོ་ཆེའི་འོད་འཕྲོ་བ་རབ་ཏུ་སྟུག་པོ་འབྱུང་བའི་ནོར་བུའི་རྒྱལ་པོའི་སྤྲིན་གྱིས་ཀུན་ནས་ཡོག་པ་ཡོད་དེ། དེ་ན་དེ་བཞིན་གཤེགས་པ་བསོད་ནམས་མི་ཟད་པའི་མེ་ཏོག་ཤིན་ཏུ་རྒྱས་པའི་གཟི་བརྗིད་ཅེས་བྱ་བ་བཞུགས་སོ། ། དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་མེ་ལོང་གི་མདོག་ལྟར་རྣམ་པར་སྣང་བ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅོ་ལྔའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། རྣམ་པར་དག་ཅིང་ཀུན་ནས་ཉོན་མོངས་པ། རྡོ་རྗེའི་པདྨོ་རྒྱ་མཚོ་ལ་རབ་ཏུ་གནས་པ། ལྷ་མ་ཡིན་གྱི་ལུས་ཀྱི་དབྱིབས་ལྟར་འདུག་པ། བྱང་ཆུབ་སེམས་དཔའི་ལུས་མིག་ཡོར་གྱི་སྤྲིན་རིན་པོ་ཆེའི་ཅོད་པན་རབ་ཏུ་འབར་བའི་ལུས་ཅན་གྱིས་ཀུན་ནས་ཡོག་པ་ཡོད་དེ། དེ་
Ka171b
ན་དེ་བཞིན་གཤེགས་པ་སྤྱོད་པའི་སྟོབས་བདུད་རྩིའི་སྒྲ་དབྱངས་ཞེས་བྱ་བ་བཞུགས་སོ། །དེའི་སྟེང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པ་ན་འཇིག་རྟེན་གྱི་ཁམས་ཙནྡན་མཆོག་ལྟར་ཡིད་དུ་འོང་བའི་ཟླ་བས་བརྒྱན་པ་ཞེས་བྱ་བ། འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུ་དྲུག་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར