rKTs


H96

(e-text produced by ACIP)

see text in transliteration
1b
༄##། །རྒྱ་གར་སྐད་དུ། ཨཱརྱ་ལ་ལི་ཏ་བིསྟཱ་ར་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་
2a
༄##། །གྱི་ཀུན་དགའ་ར་བ་ན་དགེ་སློང་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་ལ་འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽཎྜི་ནྱ་དང ། ཚེ་དང་ལྡན་པ་རྟ་ཐུལ་དང ། ཚེ་དང་ལྡན་པ་རླངས་པ་དང ། ཚེ་དང་ལྡན་པ་མིང་ཆེན་དང ། ཚེ་དང་ལྡན་པ་བཟང་པོ་དང ། ཚེ་དང་ལྡན་པ་གྲགས་སྦྱིན་དང ། ཚེ་དང་ལྡན་པ་དྲི་མ་མེད་དང ། ཚེ་དང་ལྡན་པ་ལག་བཟང་དང ། ཚེ་དང་ལྡན་པ་གང་པོ་དང ། ཚེ་དང་ལྡན་པ་བ་ལང་བདག་དང ། ཚེ་དང་ལྡན་པ་ལྟེང་རྒྱས་འོད་སྲུང་དང ། ཚེ་དང་ལྡན་པ་ཆུ་ཀླུང་འོད་སྲུང་དང ། ཚེ་དང་ལྡན་པ་ག་ཡ་འོད་སྲུང་དང ། ཚེ་དང་ལྡན་པ་ཤཱ་རིའི་བུ་དང །
2b
ཚེ་དང་ལྡན་པ་མཽ་དགལ་གྱི་བུ་ཆེན་པོ་དང ། ཚེ་དང་ལྡན་པ་འོད་སྲུང་ཆེན་པོ་དང ། ཚེ་དང་ལྡན་པ་ཀཱ་ཏྱཱའི་བུ་ཆེན་པོ་དང ། ཚེ་དང་ལྡན་པ་ཀ་པི་ན་ཆེན་པོ་དང ། ཚེ་དང་ལྡན་པ་གསུས་པོ་ཆེ་དང ། ཚེ་དང་ལྡན་པ་སྐུལ་བྱེད་དང ། ཚེ་དང་ལྡན་པ་བྱམས་མའི་བུ་གང་པོ་དང ། ཚེ་དང་ལྡན་པ་མ་འགགས་པ་དང ། ཚེ་དང་ལྡན་པ་དགའ་བྱེད་དང ། ཚེ་དང་ལྡན་པ་འུག་པ་དང ། ཚེ་དང་ལྡན་པ་རབ་འབྱོར་དང ། ཚེ་དང་ལྡན་པ་ནམ་གྲུ་དང ། ཚེ་དང་ལྡན་པ་སེང་ལྡེང་ནགས་པ་དང ། ཚེ་དང་ལྡན་པ་དོན་ཡོད་རྒྱལ་པོ་དང ། ཚེ་དང་ལྡན་པ་ཕ་རོལ་ཏུ་འགྲོ་བ་ཆེན་པོ་དང ། ཚེ་དང་ལྡན་པ་བ་ཀུ་ལ་དང ། ཚེ་དང་ལྡན་པ་དགའ་བོ་དང ། ཚེ་དང་ལྡན་པ་སྒྲ་གཅན་ཟིན་དང ། ཚེ་དང་ལྡན་པ་ལེགས་འོངས་དང ། ཚེ་དང་ལྡན་པ་ཀུན་དགའ་བོ་དང ། དེ་དག་ལ་སོགས་པ་དགེ་སློང་ཁྲི་ཉིས་སྟོང་དང་ཐབས་ཅིག་ཏུ་བཞུགས་སོ། །
3a
༄##། །བྱང་ཆུབ་སེམས་དཔའ་སུམ་ཁྲི་ཉིས་སྟོང་ཐམས་ཅད་ཀྱང་སྐྱེ་བ་གཅིག་གིས་ཐོགས་པ། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཐམས་ཅད་ལས་ངེས་པར་སྐྱེས་པ། བྱང་ཆུབ་སེམས་དཔའི་མངོན་པར་ཤེས་པ་ཐམས་ཅད་ཀྱིས་རྣམ་པར་རྩེ་བ།་བྱང་ཆུབ་སེམས་དཔའི་གཟུངས་ཐམས་ཅད་ཐོབ་པ། བྱང་ཆུབ་སེམས་དཔའི་སྤོབས་པ་ཐམས་ཅད་ཐོབ་པ། བྱང་ཆུབ་སེམས་དཔའི་སྨོན་ལམ་ཐམས་ཅད་ཤིན་ཏུ་ཡོངས་སུ་རྫོགས་པ། བྱང་ཆུབ་སེམས་དཔའི་སོ་སོ་ཡང་དག་པར་རིག་པ་ཐམས་ཅད་རྟོགས་པར་ཁོང་དུ་ཆུད་པ། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ལ་དབང་ཐོབ་པ། བྱང་ཆུབ་སེམས་དཔའི་དབང་ཐམས་ཅད་ཐོབ་པ།་བྱང་ཆུབ་སེམས་དཔའི་བཟོད་པ་ཐམས་ཅད་ལ་ཞུགས་པ། བྱང་ཆུབ་སེམས་དཔའི་ས་ཐམས་ཅད་རབ་ཏུ་རྫོགས་པ་ཤ་སྟག་
3b
སྟེ།་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཀྱི་དབང་ཕྱུག་རྒྱལ་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སེངྒེའི་ཏོག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དོན་གྲུབ་བློ་གྲོས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་རབ་ཏུ་ཞི་བའི་བློ་གྲོས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོ་ཡང་དག་པར་རིག་པ་ཐོབ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་རྟག་པར་སྦྱོར་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེར་སེམས་དང ། དེ་དག་ལ་སོགས་པ་བྱང་ཆུབ་སེམས་དཔའ་སུམ་ཁྲི་ཉིས་སྟོང་དང་ཡང་ཐབས་ཅིག་གོ། དེའི་ཚེ་བཅོམ་ལྡན་འདས་མཉན་ཡོད་ཀྱི་གྲོང་ཁྱེར་ཆེན་པོ་ན་འཁོར་བཞི་དང ། རྒྱལ་པོ་དང ། རྒྱལ་པོའི་སྲས་དང ། རྒྱལ་པོའི་བློན་པོ་ཆེན་པོ་དང ། ཆགས་འོག་གི་རྒྱལ་ཕྲན་དང ། རྒྱལ་པོའི་ཞབས་འབྲིང་བ་དང ། རྒྱལ་རིགས་དང ། བྲམ་ཟེ་དང ། ཚོང་དཔོན་དང ། ཁྱིམ་བདག་དང ། བློན་པོ་དང ། འཁོར་གྱི་མི་དང ། གྲོང་ཁྱེར་པ་དང ། ཡུལ་གྱི་མི་དང ། མུ་སྟེགས་ཅན་དང ། དགེ་སྦྱོང་དང ། བྲམ་ཟེ་དང ། དཔྱོད་པ་པ་དང ། ཀུན་ཏུ་རྒྱུ་སྣ་ཚོགས་ཀྱིས་རིམ་
4a
༄#། །གྲོར་བྱས། བླ་མར་བྱས། བསྟི་སྟང་དུ་བྱས།་མཆོད་པ་བྱས་སོ། །བཅོམ་ལྡན་འདས་ནི།་བཟའ་བ་དང ། བཅའ་བ་དང ། མྱང་བ་བསོད་ཅིང་མང་བ་དང ། ན་བཟའ་དང ། བསོད་སྙོམས་དང ། གཟིམས་ཆ་དང ། སྙུན་གྱི་གསོས་སྨན་དང ། ཡོ་བྱད་རུང་བ་བརྙེས་ཤིང ། བཅོམ་ལྡན་འདས་ནི་བརྙེས་པ་དམ་པ་དང ། གྲགས་པ་དམ་པ་བརྙེས་ཀྱང་པདྨ་ལ་ཆུས་མི་གོས་པ་ལྟར་ཐམས་ཅད་དུ་མ་ཆགས་མ་གོས་པར་བཞུགས་སོ། །བཅོམ་ལྡན་འདས་ཀྱི་གྲགས་པ་དང ། སྒྲ་དང་སྙན་པ་ནི་འདི་སྐད་དུ། བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།་བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཞེས་བྱ་བར་འཇིག་རྟེན་དུ་མངོན་པར་གྲགས་པར་གྱུར་ཏོ། །དེ་ནི་སྤྱན་ལྔ་དང་ལྡན་པ་སྟེ། འཇིག་རྟེན་འདི་དང ། འཇིག་རྟེན་ཕ་རོལ་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེར་བཅས་པའི་སྐྱེ་རྒུ་ལྷ་དང་མིར་བཅས་པ་དག་རང་གིས་མངོན་པར་མཁྱེན་པས་མངོན་དུ་མཛད་
4b
ནས་ཉེ་བར་བསྒྲུབས་ཏེ་རབ་ཏུ་སྟོན་ཏོ། །དེ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་དཀར་བའི་ཆོས་སྟོན་ཏེ། ཚངས་པའི་སྤྱོད་པ་ཡང་དག་པར་སྟོན་ཏོ། །དེའི་ཚེ་བཅོམ་ལྡན་འདས་ཀྱིས་ནམ་གྱི་གུང་ཐུན་ལ་སངས་རྒྱས་ཀྱི་རྒྱན་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པར་གྱུར་ཏོ། །བཅོམ་ལྡན་འདས་ཀྱིས་སངས་རྒྱས་ཀྱི་རྒྱན་བཀོད་པ་ཞེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་སྐད་ཅིག་དེ་ཉིད་ལ་བཅོམ་ལྡན་འདས་ཀྱི་དབུའི་གཙུག་གི་གཙུག་ཏོར་གྱི་གསེབ་ནས་སྔོན་གྱི་སངས་རྒྱས་རྗེས་སུ་དྲན་པར་བྱ་བ་ལ་ཆགས་པ་མེད་པའི་ཡེ་ཤེས་སྣང་བ་ཞེས་བྱ་བའི་འོད་ཟེར་བྱུང་སྟེ། དེས་གནས་གཙང་མའི་ལྷའི་གནས་ཐམས་ཅད་སྣང་བར་བྱས་ནས་ལྷའི་བུ་དབང་ཕྱུག་ཆེན་པོ་ལ་སོགས་པ་ལྷའི་བུ་ཚད་མེད་པ་དག་ཡང་དག་པར་བསྐུལ་ཏོ། །དེ་བཞིན་གཤེགས་པའི་འོད་ཟེར་གྱི་ཚོགས་དེ་ལས་སྐུལ་བའི་ཚིགས་སུ་བཅད་པ་འདི་དག་ཀྱང་བྱུང་ངོ ། །ཡེ་ཤེས་འོད་ལྡན་མུན་བཅོམ་འོད་མཛད་པ། །འོད་བཟང་གཟི་བརྗིད་དམ་པ་དྲི་མེད་པ། །སྐུ་ལུས་རབ་ཞི་ཐུགས་དགེ་ཞི་བ་པོ། །ཤཱཀྱའི་སེངྒེ་ཐུབ་དང་ཕྲད་པར་གྱིས། །ཡེ་ཤེས་རྒྱ་མཚོ་མཐུ་ཆེན་དག་པ་སྟེ། །ཆོས་ཀྱི་མངའ་བདག་
5a
༄#། །ཀུན་མཁྱེན་ཐུབ་པའི་དབང ། །མི་དང་ལྷས་མཆོད་ལྷ་ཡི་ལྷར་གྱུར་པ། །ཆོས་ལ་རང་བྱུང་མངའ་དབང་མཛད་ལ་རྟོན། །གང་ཞིག་གདུལ་ཀའི་སེམས་ལ་མངའ་མཛད་དེ། །གང་ཞིག་བདུད་ཀྱི་རྙི་ལས་གྲོལ་བའི་ཐུགས། །དེ་འདིར་མཐོང་ཐོས་དོན་མེད་མ་ཡིན་གྱི། །རྣམ་གྲོལ་མཐར་ཕྱིན་ཞི་བའི་དྲུང་དུ་དེངས། །མཚུངས་མེད་ཆོས་ལ་སྣང་བར་གྱུར་པ་སྟེ། །མུན་སེལ་ཚུལ་བཟང་སྟོན་པར་རབ་མཛད་པ། །སངས་རྒྱས་སྤྱོད་ཞི་མཁྱེན་པ་དཔག་མེད་པ། །དེ་ཡི་དྲུང་དུ་དད་པ་མཆོག་གིས་དེངས།། དེ་ནི་སྨན་པའི་རྒྱལ་པོ་བདུད་རྩི་གཏོང ། །དེ་ནི་སྨྲ་བ་དཔའ་བོ་ཚོགས་ངན་འཇོམས། །དེ་ནི་ཆོས་ཀྱི་རྩ་ལག་དོན་དམ་མཁས། །དེ་ནི་འདྲེན་པ་བླ་མེད་ལམ་སྟོན་པའོ། །གནས་གཙང་མའི་རིས་ཀྱི་ལྷའི་བུ་དེ་དག་སྔོན་གྱི་སངས་རྒྱས་རྗེས་སུ་དྲན་པར་བྱ་བ་ལ་ཆགས་པ་མེད་པའི་ཡེ་ཤེས་སྣང་བའི་འོད་ཟེར་དེས་ཕོག་ཅིང་ཚིགས་སུ་བཅད་པ་རྣམ་པ་དེ་ལྟ་བུ་དེ་དག་གིས་ཀྱང་བསྐུལ་མ་ཐག་ཏུ་རབ་ཏུ་ཞི་བའི་ཏིང་ངེ་འཛིན་དེ་ལས་ལངས་ནས་སངས་རྒྱས་ཀྱི་མཐུས་བསྐལ་པ་གྲངས་མེད། ཚད་མེད། བགྲང་བ་ལས་ཤིན་ཏུ་འདས་པ་དག་ལས་འདས་པའི་སངས་རྒྱས་བཅོམ་ལྡན་འདས་རྣམས་རྗེས་སུ་དྲན་ཞིང ། སངས་རྒྱས་བཅོམ་ལྡན་འདས་དེ་དག་གི་སངས་རྒྱས་ཀྱི་ཞིང་གི་ཡོན་ཏན་
5b
བཀོད་པ་གང་ཡིན་པ་དག་དང ། འཁོར་གྱི་དཀྱིལ་འཁོར་གང་ཡིན་པ་དག་དང ། ཆོས་བསྟན་པ་གང་ཡིན་པ་དེ་དག་ཐམས་ཅད་ཀྱང་རྗེས་སུ་དྲན་པར་གྱུར་ཏོ། །དེ་ནས་དེའི་ནུབ་མོ་མི་ཉལ་ཙམ་ན་གནས་གཙང་མའི་རིས་ཀྱི་ལྷའི་བུ་དབང་ཕྱུག་ཅེས་བྱ་བ་དང ། དབང་ཕྱུག་ཆེན་པོ་དང ། དགའ་བོ་དང ། ཤིན་ཏུ་དགའ་བོ་དང ། ཙནྡན་དང ། མཆོད་བྱས་དང ། རབ་ཞི་དང ། དུལ་བ་རབ་ཞི་དབང་ཕྱུག་ལ་སོགས་པ་དེ་དག་དང ། གནས་གཙང་མའི་རིས་ཀྱི་ལྷའི་བུ་གཞན་ཤིན་ཏུ་མང་པོ་ཁ་དོག་འཕགས་ཤིང་ཤིན་ཏུ་འཕགས་པ་དང་ལྡན་པ་དག་གིས་ལྷའི་སྣང་བས་རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་སྣང་བར་བྱས་ཏེ་བཅོམ་ལྡན་འདས་ག་ལ་པ་དེར་དོང་ནས་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་གནས་གཙང་མའི་རིས་ཀྱི་ལྷའི་བུ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རྒྱ་ཆེར་རོལ་པ་ཞེས་བགྱི་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བསྡུས་པ། བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡང་དག་པར་བསྟན་པ། དགའ་ལྡན་གྱི་ཕོ་བྲང་དམ་པ་ནས་འབབ་པ་དང ། ཆེད་དུ་དགོངས་ཏེ་ལྷུམས་སུ་འཇུག་པའི་རྣམ་པར་རོལ་པ་དང ། མངལ་གྱི་
6a
༄#། །གནས་ཀྱི་ཁྱད་པར་ཀུན་ཏུ་བསྟན་པ། རིགས་བཟང་པོར་སྐྱེ་བའི་སའི་མཐུ་ཀུན་ཏུ་བསྟན་པ། བྱིས་པའི་སྤྱོད་པ་ཐམས་ཅད་ལས་ཡོན་ཏན་གྱི་ཁྱད་པར་གྱིས་ཤིན་ཏུ་འདའ་བ་བསྟན་པ། འཇིག་རྟེན་པའི་བཟོའི་གནས་དང ། ལས་ཀྱི་གནས་དང ། ཡི་གེ་དང ། གྲངས་དང ། ལག་རྩིས་དང ། རྩིས་དང ། རལ་གྲིའི་ཐབས་དང།་འཕོང་དང ། སྟོབས་དང ། གྱད་ཀྱི་འཛིན་སྟངས་རྣམས་སེམས་ཅན་ཐམས་ཅད་ལས་ཁྱད་པར་དུ་འཕགས་པ་ཀུན་ཏུ་བསྟན་པ། བཙུན་མོའི་འཁོར་དང ། ཡུལ་གྱི་ལོངས་སྤྱོད་དང ། ཡོངས་སུ་སྤྱོད་པ་ཀུན་ཏུ་བསྟན་པ། བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་རྒྱུ་མཐུན་པས་ཡོངས་སུ་གྲུབ་པའི་འབྲས་བུ་བརྙེས་པ་ཡོངས་སུ་བརྗོད་པ། བྱང་ཆུབ་སེམས་དཔའི་རྣམ་པར་རོལ་པ་དང ། བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པ་བསྟན་པ། དེ་བཞིན་གཤེགས་པའི་སྟོབས་དང་མི་འཇིགས་པ་བསྡུས་པ། སངས་རྒྱས་ཀྱི་ཆོས་ཚད་མ་མཆིས་པ་ངེས་པར་བསྟན་པ། སྔོན་གྱི་དེ་བཞིན་གཤེགས་པ་རྣམས་ཀྱིས་སྔོན་ཆད་གསུངས་པ་མཆིས་ཏེ། འདི་ལྟ་སྟེ། བཅོམ་ལྡན་འདས་པདྨའི་བླ་མ་དང ། ཆོས་ཀྱི་ཏོག་དང ། མར་མེ་མཛད་དང ། ཡོན་ཏན་གྱི་ཏོག་དང ། ཡོན་ཏན་འབྱུང་གནས་དང ། འོད་ཟེར་ཆེན་པོ་དང ། དྲང་སྲོང་ལྷ་དང །
6b
དཔལ་གྱི་གཟི་བརྗིད་དང ། བདེན་པའི་ཏོག་དང ། རྡོ་རྗེ་མཁྲེགས་དང ། ཐམས་ཅད་ཟིལ་གྱིས་གནོན་དང ། གསེར་མདོག་དང ། ཤིན་ཏུ་མཐོར་གཤེགས་དང ། བྱི་རུའི་རྒྱ་མཚོ་དང ། མེ་ཏོག་གི་ཏོག་དང ། གཟུགས་བཟང་དང ། སྤྱན་བཟང་དང ། དྲང་སྲོང་སྦེད་དང ། དམག་ཚོགས་ལས་རྒྱལ་དང ། མཐོ་བ་དང ། མེ་ཏོག་རྒྱས་པ་དང ། མཛོད་སྤུ་གཟི་བརྗིད་དང ། ཤིན་ཏུ་རྒྱས་དང ། འོད་ཟེར་བཟང་པོ་དང ། བཀྲ་ཤིས་ལྡན་དང ། བལྟ་ན་བཟང་དང ། སེངྒེའི་གཟི་བརྗིད་ཆེན་པོ་དང ། བློ་གྲོས་བརྟན་པས་བྱིན་དང ། སོས་ཀའི་སྤོས་དྲི་དང ། བདེན་པའི་ཕྱོགས་གྲགས་རྒྱ་ཆེན་དང ། འོད་ལྡན་དང ། སྐར་རྒྱལ་དང ། འཇིག་རྟེན་མཛེས་དང ། འོད་རྒྱ་ཆེན་དང ། རིན་ཆེན་གྲགས་དང ། དྲག་ཤུལ་གཟི་བརྗིད་དང ། རིན་ཆེན་གཟི་བརྗིད་དང ། ཚངས་པའི་གཟི་བརྗིད་དང ། སྒྲ་སྙན་དང ། མེ་ཏོག་བཟང་པོ་དང ། རི་རབ་མེ་ཏོག་དང ། རབ་ཏུ་ཡིད་འོང་དབྱངས་དང ། དགེ་བ་ཚུལ་བཟང་དང ། རབ་ཏུ་འཛུམ་པའི་སྤྱན་དང ། ཡོན་ཏན་ཕུང་པོ་དང ། འབྲུག་སྒྲ་དང ། ཁ་དོག་མཛེས་དང ། ཚེའི་གཟི་བརྗིད་དང ། ངོམ་བག་གླང་པོའི་འགྲོས་དང ། འཇིག་རྟེན་མངོན་པར་སྨོན་དང ། དགྲ་ལས་རྒྱལ་དང ། ཡང་དག་མཆོད་དང ། རྣམ་པར་གཟིགས་དང ། གཙུག་ཏོར་ཅན་དང ། ཐམས་ཅད་སྐྱོབ་དང ། འཁོར་བ་འཇིག་དང །
7a
༄#། །གསེར་ཐུབ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཀྱང་སྔོན་ཆད་གསུངས་པ་ལགས་ན།་དེ་བཅོམ་ལྡན་འདས་ཀྱིས་ཀྱང་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེའི་དོན་དང ། ལྷ་དང་མི་རྣམས་ཀྱི་དོན་དུ་འགྱུར་བ་དང ། སྨན་པ་དང་བདེ་བར་འགྱུར་བ་དང ། ཐེག་པ་ཆེན་པོའི་འདིའང་བརྗོད་པ་དང ། ཕས་ཀྱི་རྒོལ་བ་ཐམས་ཅད་ཚར་གཅད་པ་དང ། བདུད་ཐམས་ཅད་ཟིལ་གྱིས་མནན་པ་དང ། བྱང་ཆུབ་སེམས་དཔའ་ཐམས་ཅད་ལ་བསྟན་པ་དང ། བྱང་ཆུབ་སེམས་དཔའི་ཐེག་པ་པའི་གང་ཟག་ཐམས་ཅད་ཀྱི་བརྩོན་འགྲུས་བརྩམ་པ་བསྐྱེད་པ་དང ། དམ་པའི་ཆོས་ཡོངས་སུ་གཟུང་བ་དང ། དཀོན་མཆོག་གསུམ་གྱི་གདུང་མི་གཅད་པ་དང ། སངས་རྒྱས་ཀྱི་མཛད་པ་ཡོངས་སུ་རྫོགས་པའང་ཀུན་ཏུ་བསྟན་པའི་སླད་དུ་ད་བསྟན་དུ་གསོལ་ཞེས་གསོལ་པ་དང ། བཅོམ་ལྡན་འདས་ཀྱིས་ལྷའི་བུ་དེ་དག་དང ། ལྷ་དང་བཅས་པའི་འཇིག་རྟེན་ལ་ཐུགས་བརྩེ་བའི་ཕྱིར་ཅང་མི་གསུང་བས་གནང་ངོ ། །དེ་ནས་ལྷའི་བུ་དེ་དག་ཀྱང་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་ཚིམ་ཞིང་མགུ་ལ་ཡིད་རངས་
7b
ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཙནྡན་གྱི་ཕྱེ་མ་དང ། ་ག་རུའི་ཕྱེ་མ་དང ། མེ་ཏོག་མནྡཱ་ར་བ་དག་གིས་ཀྱང་མངོན་པར་གཏོར་ཏེ། དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ནུབ་མོ་དེའི་ནམ་ནངས་པ་དང ། སྨྱིག་མའི་ལྡུམ་བུའི་འཁོར་གྱི་ཁྱམས་ག་ལ་བ་དེར་གཤེགས་ཏེ་བྱོན་ནས་བཅོམ་ལྡན་འདས་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཞིང་ཉན་ཐོས་ཀྱི་དགེ་འདུན་གྱིས་མདུན་གྱིས་བལྟས་ཏེ་གདན་བཤམས་པ་ལ་བཞུགས་སོ། །བཞུགས་ནས་ཀྱང་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ།་དགེ་སློང་དག། མདང་འདིར་ངའི་དྲུང་དུ་གནས་གཙང་མའི་རིས་ཀྱི་ལྷའི་བུ་དབང་ཕྱུག་ཅེས་བྱ་བ་དང ། དབང་ཕྱུག་ཆེན་པོ་དང ། དགའ་བོ་དང ། ཤིན་ཏུ་དགའ་བོ་དང ། ཙནྡན་དང ། མཆོད་བྱས་དང ། རབ་ཞི་དང ། དུལ་བ་རབ་ཞི་དབང་ཕྱུག་ལ་སོགས་པ་དེ་དག་དང ། གནས་གཙང་མའི་རིས་ཀྱི་ལྷའི་བུ་གཞན་ཤིན་ཏུ་མང་པོ་ཞེས་བྱ་བ་ནས། དེ་ཉིད་དུ་མི་སྣང་བར་གྱུར་ཅེས་བྱ་བའི་བར་དུ་སྔ་མ་བཞིན་དུ་གསུངས་སོ། །དེ་ནས་བྱང་ཆུབ་སེམས་དཔའ་དེ་དག་དང ། ཉན་ཐོས་ཆེན་པོ་དེ་དག་གིས་བཅོམ་ལྡན་འདས་
8a
༄#། །ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རྒྱ་ཆེར་རོལ་པའི་ཆོས་ཀྱི་རྣམ་གྲངས་ལེགས་པར་བསྟན་དུ་གསོལ། དེ་ནི་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བར་མཛད་པ་དང ། སྐྱེ་བོ་ཕལ་པོ་ཆེ་དང ། ལྷ་དང་མི་རྣམས་དང ། ད་ལྟར་དང་མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དོན་དང ། སྨན་པ་དང་བདེ་བར་འགྱུར་རོ། ཞེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང ། ཉན་ཐོས་ཆེན་པོ་དེ་དག་དང ། ལྷ་དང ། མི་དང ། ལྷ་མ་ཡིན་དང་བཅས་པའི་འཇིག་རྟེན་ལ་ཐུགས་བརྩེ་བའི་ཕྱིར་ཅང་མི་གསུང་བས་གནང་ངོ ། །དེ་ལ་འདི་སྐད་ཅེས་བྱ་སྟེ། དགེ་སློང་དག་ཀྱེ་ང་ནི་མདང་སུམ་འདིར། །གནས་པ་བཟང་པོས་བདེ་བར་གནས་གྱུར་ཅིང ། །ཉོན་མོངས་མེད་པར་རབ་ཏུ་གནས་གྱུར་ལ། །རྩེ་གཅིག་སེམས་སུ་མཉམ་པར་བཞག་དྲུང་དུ། །རྫུ་འཕྲུལ་ཆེ་ཞིང་ཁ་དོག་བཟང་ལྡན་ལ། །དྲི་མེད་དཔལ་འབར་ལྷ་ཡི་བུ་ལྷགས་ནས། །དཔལ་གྱིས་རྒྱལ་བྱེད་ཚལ་འདི་སྣང་བྱས་ཏེ། །དགའ་བས་ང་ཡི་གན་དུ་མངོན་པར་ལྷགས། །དབང་ཕྱུག་དབང་ཕྱུག་ཆེན་པོ་ཙནྡན་དང ། །དགའ་བོ་རབ་ཏུ་སེམས་
8b
ཞི་མཆོད་བྱས་དང ། །ཤིན་ཏུ་དགའ་བོ་ཞི་བ་ལྷ་ཡི་བུ། །བྱེ་བ་ལྷ་མང་དེ་དང་དེ་དག་རྣམས། །ང་ཡི་ཞབས་ལ་ཕྱག་འཚལ་བསྐོར་བྱས་ཏེ། །ང་ཡི་མདུན་དུ་འདིར་ནི་འཁོད་པར་གྱུར། །སོར་མོ་བཅུ་ཡི་ཐལ་སྦྱར་གུས་བཅས་པར། །དེ་དག་འདིར་ནི་ང་ལ་གསོལ་བ་བཏབ། །འཇིག་རྟེན་ཀུན་ལ་སྨན་པའི་དོན་སླད་དུ། །རྒྱལ་བ་ཀུན་གྱིས་སྔོན་ཆད་གང་གསུངས་པ། །ཤིན་ཏུ་རྒྱས་མདོ་གླེང་གཞི་ཆེན་པོ་འདི། །ཐུབ་པ་འདོད་ཆགས་བསལ་བས་དེ་རིང་ཡང ། །བྱང་ཆུབ་སེམས་དཔའི་ཚོགས་ཀུན་བཟུང་བཞེད་པས། །ཕས་ཀྱི་རྒོལ་དང་བདུད་རྣམས་འདུལ་མཛད་ལ། །ཐེག་པ་ཆེན་པོ་མཆོག་འདི་རབ་གསུང་ཞིང ། །ཐུབ་པ་དེ་སླད་ལེགས་པར་བཤད་དུ་གསོལ། །ལྷ་ཡི་ཚོགས་ཀྱིས་གསོལ་བ་དེ་སྣང་ཕྱིར། ། མི་གསུང་གྱུར་པས་གནང་བ་མཛད་པས་ན། །ཐམས་ཅད་ཚིམ་ཞིང་རབ་དགའ་མགུ་གྱུར་ནས། །དགའ་བ་ཐོབ་པས་མེ་ཏོག་སིལ་མ་གཏོར། །དེ་ཕྱིར་དགེ་སློང་ཤིན་ཏུ་རྒྱས་པའི་མདོ། །འཇིག་རྟེན་ཀུན་ལ་ཕན་པའི་དོན་གྱི་ཕྱིར། །དེ་བཞིན་གཤེགས་པ་ཀུན་གྱིས་སྔོན་བཤད་པ། །གླེང་གཞི་ཆེན་པོ་ཁྱེད་ཀུན་འདིར་ཉོན་ཅིག་།གླེང་གཞིའི་ལེའུ་སྟེ། དང་པོའོ།། །།དགེ་སློང་དག་།དེ་ལ་ཆོས་ཀྱི་རྣམ་གྲངས་ཤིན་ཏུ་རྒྱས་པ་ཆེན་པོའི་མདོ་རྒྱ་ཆེར་རོལ་པ་ཞེས་བྱ་བ་དེ་གང་ཞེ་ན། དགེ་སློང་དག་།འདི་ལ་བྱང་ཆུབ་སེམས་དཔའ་
9a
༄#། །དགའ་ལྡན་གྱི་གནས་མཆོག་ན་གནས་པ། མཆོད་པར་བྱ་བས་མཆོད་པ། དབང་བསྐུར་བ་ཐོབ་པ། ལྷ་བརྒྱ་སྟོང་གིས་བསྟོད་ཅིང་བཀུར་ཏེ་བརྗོད་ཅིང་བསྔགས་པ། བསམ་པ་ཐོབ་པ། སྨོན་ལམ་གྱིས་ཡང་དག་པར་འཕགས་པ། སངས་རྒྱས་ཀྱི་ཆོས་ཐམས་ཅད་ཡང་དག་པར་ཐོབ་པའི་བློ་དང་ལྡན་པ། ཡེ་ཤེས་ཀྱི་མིག་ཤིན་ཏུ་རྒྱས་ཤིང་ཡོངས་སུ་དག་པ་དང་ལྡན་པ། དྲན་པ་དང ། བློ་གྲོས་དང ། རྟོགས་པ་དང ། ཁྲེལ་ཡོད་པ་དང ། དགའ་བ་འབར་བའི་བློ་རླབས་པོ་ཆེ་དང་ལྡན་པ།་སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཐབས་ལ་མཁས་པ་ཆེན་པོའི་དམ་པའི་ཕ་རོལ་ཏུ་སོན་པ། ཚངས་པའི་ལམ་བྱམས་པ་ཆེན་པོ་དང ། སྙིང་རྗེ་ཆེན་པོ་དང ། དགའ་བ་ཆེན་པོ་དང ། བཏང་སྙོམས་ཆེན་པོ་ལ་མཁས་པ། མངོན་པར་ཤེས་པ་དང ། རིག་པ་ཆེན་པོས་སྒྲིབ་པ་མེད་ཅིང་ཆགས་པ་མེད་པའི་ཡེ་ཤེས་མཐོང་བ་མངོན་དུ་གྱུར་པ། དྲན་པ་ཉེ་བར་གཞག་པ་དང ། ཡང་དག་པར་སྤོང་བ་དང ། རྫུ་འཕྲུལ་གྱི་རྐང་པ་དང།་དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་དང ། ལམ་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཤིན་ཏུ་ཡོངས་སུ་རྫོགས་པའི་མཐར་ཕྱིན་པ། བསོད་
9b
ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པའི་མཚན་དང་དཔེ་བྱད་བཟང་པོས་ལུས་ལེགས་པར་བརྒྱན་པ། ཡུན་རིང་པོར་རྗེས་སུ་འབྲང་བ་དང་ལྡན་པ། ཇི་སྐད་དུ་སྨྲས་པ་དེ་ལྟར་བྱེད་པས་ལོག་པ་མེད་པའི་ཚིག་གི་ལམ་ཡང་དག་པར་སྨྲ་བ། དྲང་ཞིང་མ་ཡོ་ལ་གྱ་གྱུ་མེད་པའི་ཡིད་ཐོགས་པ་མེད་པ་དང་ལྡན་པ། ང་རྒྱལ་དང ། རྒྱགས་པ་དང ། དྲེགས་པ་དང ། འཇིགས་པ་དང ། ཞུམ་པ་ཐམས་ཅད་མེད་པ་དང ། སེམས་ཅན་ཐམས་ཅད་ལ་སེམས་མཉམ་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་ལ་བསྙེན་བཀུར་བྱས་པ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོས་ངོར་བལྟ་ཞིང་བལྟ་བའི་བཞིན་དང་ལྡན་པ། བརྒྱ་བྱིན་དང ། ཚངས་པ་དང ། དབང་ཕྱུག་ཆེན་པོ་དང ། འཇིག་རྟེན་སྐྱོང་བ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། སྲིན་པོ་རྣམས་ཀྱིས་མངོན་པར་དགའ་བར་བྱ་བའི་གྲགས་པ་དང་ལྡན་པ། ཚིག་ཐམས་ཅད་རབ་ཏུ་ཕྱེ་སྟེ་སྟོན་པ་ལ་ཐོགས་པ་མེད་པའི་སོ་སོ་ཡང་དག་པར་རིག་པ་ལ་འཇུག་པའི་ཤེས་པ་ལ་མཁས་པ། སངས་རྒྱས་ཐམས་ཅད་ཀྱིས་གསུངས་པ་གཟུང་བ་ལ་དྲན་པའི་སྣོད་འཁྲུལ་པ་མེད་པ་དང ། གཟུངས་མཐའ་ཡས་སུ་མེད་པ་རབ་ཏུ་ཐོབ་པ། དྲན་པ་ཉེ་བར་གཞག་པ་དང ། ཡང་དག་པར་
10a
༄#། །སྤོང་བ་དང ། རྫུ་འཕྲུལ་གྱི་རྐང་པ་དང ། དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་དང ། ལམ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་དང ། ཐབས་མཁས་པའི་ཆོས་རིན་པོ་ཆེ་དང ། བསོད་ནམས་ཀྱིས་ཡང་དག་པར་བསྒྲུབས་པའི་ཆོས་ཀྱི་གྲུ་ཆེན་པོའི་དེད་དཔོན་ཆེན་པོ། ཆུ་བོ་བཞིའི་ཕ་རོལ་ཏུ་འགྲོ་བའི་བསམ་པ་ཅན། བདུད་དང་ཕྱིར་རྒོལ་བ་བཅོམ་པ། ཕས་ཀྱི་རྒོལ་བ་ཐམས་ཅད་ཤིན་ཏུ་ཚར་བཅད་པ། གཡུལ་ངོའི་ཐོག་མ་ལ་རབ་ཏུ་འདུག་པ། ཉོན་མོངས་པའི་དགྲའི་ཚོགས་འཇོམས་པ། ཡེ་ཤེས་མཆོག་གི་རྡོ་རྗེའི་མཚོན་སྲ་བ་དང་ལྡན་པ། བྱང་ཆུབ་ཀྱི་སེམས་ཀྱི་རྩ་བ་ལས་སྙིང་རྗེ་ཆེན་པོའི་ཆུ་བ་ལྷག་པའི་བསམ་པས་སྐྱེས་པ་ཟབ་ཅིང་བརྟན་པ་དང ། བརྩོན་འགྲུས་ཀྱི་ཆོས་ཀྱི་ཆུས་མངོན་པར་བརླན་པ། ཐབས་མཁས་པའི་སྙིང་པོ་དང་ལྡན་པ། བྱང་ཆུབ་ཀྱི་ཡན་ལག་དང ། བསམ་གཏན་གྱི་ཟེ་བ་ཅན། ཏིང་ངེ་འཛིན་གྱི་ཟེའུ་འབྲུ་དང་ལྡན་པ། ཡོན་ཏན་གྱི་ཚོགས་རྒྱ་ཆེན་པོའི་མཚོ་ལས་སྐྱེས་པ། ང་རྒྱལ་དང་དྲེགས་པའི་གདུང་བ་མེད་པའི་ཟླ་བས་དྲི་མ་མེད་པའི་འདབ་མ་རྒྱས་པ། ཚུལ་ཁྲིམས་དང ། ཐོས་པ་དང ། བག་ཡོད་པའི་གསུང་གི་ངད་ཕྱོགས་བཅུར་ཐོགས་པ་མེད་པར་ལྡང་བ། འཇིག་རྟེན་ན་ཤེས་པས་ཐུ་བོར་གྱུར་པ། འཇིག་རྟེན་གྱི་ཆོས་བརྒྱད་ཀྱིས་མ་གོས་པ། སྐྱེས་བུ་ཆེན་པོའི་པདྨ།
10b
བསོད་ནམས་དང་ཡེ་ཤེས་ཀྱི་ཚོགས་ཀྱི་དྲི་ཞིམ་པོ་འབྱུང་བ། ཤེས་རབ་དང་ཡེ་ཤེས་ཀྱི་ཉི་མའི་འོད་ཟེར་གྱིས་མིག་ཤིན་ཏུ་རྣམ་པར་དག་པའི་པདྨ་འདབ་མ་བརྒྱ་པ་རྒྱས་པ། རྫུ་འཕྲུལ་གྱི་རྐང་པ་བཞི་མཆོག་ཏུ་མགྱོགས་པའི་ཤུགས་དང་ལྡན་པ། འཕགས་པའི་བདེན་པ་བཞིའི་སྡེར་མོ་དང་མཆེ་བ་ཤིན་ཏུ་རྣོ་བ། ཚངས་པའི་གནས་པ་བཞིའི་སོ་དྲང་བསྙེར་བ། བསྡུ་བའི་དངོས་པོ་བཞིས་ཤིན་ཏུ་བསྡུས་པའི་མགོ་དང་ལྡན་པ། རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་ཁོང་དུ་ཆུད་པས་རིམ་གྱིས་འཕགས་པའི་ལུས་དང་ལྡན་པ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡང་དག་པར་ཡོངས་སུ་རྫོགས་པས་རལ་པ་ཅན་དུ་བྱས་ཤིང ། རིག་པ་དང ། ཡེ་ཤེས་ཀྱི་ཟེ་བ་ཅན། རྣམ་པར་ཐར་པའི་སྒོ་གསུམ་གྱི་ཁ་གདངས་བ། ཞི་གནས་དང་ལྷག་མཐོང་ཤིན་ཏུ་རྣམ་པར་དག་པའི་མིག་དང་ལྡན་པ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་རི་སུལ་གྱི་ཕུག་ན་གནས་པ། སྤྱོད་ལམ་བཞི་དང ། འདུལ་བའི་ནགས་ཚལ་དང ། ནགས་འདབ་ནས་སྐྱེས་པའི་ལུས་དང་ལྡན་པ། སྟོབས་བཅུ་དང ། མི་འཇིགས་པ་བཞི་དང ། ཉེ་བའི་སྟོབས་དང་ལྡན་པ། སྐྱེ་བ་དང་འཇིག་པའི་འཇིགས་པ་དང་སྤུ་གཡོ་བ་མེད་པ། རྩལ་ལ་ཞུམ་པ་མེད་པ། མུ་སྟེགས་ཅན་གྱི་བོང་བུ་དང ། རི་དྭགས་མང་པོའི་ཚོགས་རབ་ཏུ་
11a
༄#། །འཇོམས་པ། བདག་མེད་པར་སྒྲ་བརྗོད་པའི་སེངྒེའི་ང་རོ་ཆེན་པོ་སྒྲོག་པ། སྐྱེས་བུ་སེངྒེ་དང ། རྣམ་པར་གྲོལ་བ་དང ། བསམ་གཏན་གྱི་དཀྱིལ་འཁོར་ལས་ཤེས་རབ་ཀྱི་འོད་དང ། འོད་ཟེར་གྱིས་མུ་སྟེགས་བྱེད་སྲིན་བུ་མེ་ཁྱེར་གྱི་ཚོགས་འོད་མེད་པར་བྱེད་པ། མ་རིག་པའི་མུན་པ་མུན་ནག་གི་ལིང་ཏོག་དང་རབ་རིབ་མེད་པར་བྱེད་པ། སྟོབས་དང་བརྩོན་འགྲུས་འབར་བ། ལྷ་དང་མིའི་ནང་དུ་བསོད་ནམས་ཀྱི་གཟི་བརྗིད་ཀྱི་གཟི་དང་ལྡན་པ། སྐྱེས་བུ་ཆེན་པོ་ཉི་མ། ནག་པོའི་ཕྱོགས་མེད་པ། དཀར་པོའི་ཕྱོགས་ཡོངས་སུ་རྫོགས་པ། བལྟ་ན་སྡུག་ཅིང་ཡིད་དུ་འོང་བས་མིག་གི་དབང་པོ་ལ་ཐོགས་པ་མེད་པ། ལྷ་བརྒྱ་སྟོང་གི་སྐར་མའི་ཚོགས་ཀྱིས་ཤིན་ཏུ་བརྒྱན་པ། བསམ་གཏན་དང ། རྣམ་པར་ཐར་པ་དང ། ཡེ་ཤེས་ཀྱི་དཀྱིལ་འཁོར་ཅན། བྱང་ཆུབ་ཀྱི་ཡན་ལག་གི་བདེ་བས་ཟླ་བའི་འོད་ཟེར་དུ་གྱུར་པ། མི་དང་ལྷ་མཁས་པའི་མེ་ཏོག་ཀུ་མུ་ད་ཁ་འབྱེད་པ་སྐྱེས་བུ་ཆེན་པོ་ཟླ་བ། འཁོར་གྱི་གླིང་བཞིར་སོང་བ། བྱང་ཆུབ་ཀྱི་ཡན་ལག་བདུན་གྱི་རིན་པོ་ཆེ་དང་ལྡན་པ། སེམས་ཅན་ཐམས་ཅད་ལ་སེམས་མཉམ་པར་སྦྱོར་བ། བློ་དཔྱད་ཐོགས་པ་མེད་པ། དགེ་བ་བཅུའི་ལས་ཀྱི་ལམ་གྱི་དཀའ་ཐུབ་དང་བརྟུལ་ཞུགས་ཤིན་ཏུ་ཕུན་སུམ་ཚོགས་ཤིང་རབ་ཏུ་རྫོགས་པའི་ཁྱད་པར་དུ་པོགས་དབྱུང་
11b
བར་བྱ་བའི་བསམ་པ་ཅན། ཆོས་ཀྱི་རྒྱལ་པོའི་ཆོས་ཀྱི་འཁོར་ལོ་རིན་པོ་ཆེ་མཆོག་དམ་པ་ཐོགས་པ་མེད་པར་བསྐོར་བ། འཁོར་ལོས་བསྒྱུར་བའི་རིགས་ཀྱི་རྒྱུད་དུ་བྱུང་བ། ཆོས་ཀྱི་འཁོར་ལོས་བསྒྱུར་བ་ཆེན་པོ། རྟེན་ཅིང་འབྲེལ་པར་འབྱུང་བ་ཟབ་ཅིང་གཏིང་དཔག་དཀའ་བ། ཆོས་རིན་པོ་ཆེ་ཐམས་ཅད་ཀྱིས་རབ་ཏུ་གང་བ། ཐོས་པས་མི་ངོམས་པས་ཡངས་ཤིང་རྒྱ་ཆེ་ལ་མཐའ་ཡས་པའི་ཡེ་ཤེས་དང་ཚུལ་ཁྲིམས་ཀྱི་ཚོད་ལས་མི་འདའ་བ། བློ་རྒྱ་མཚོ་དང་ས་ལྟར་རྒྱ་ཆེ་བའི་མཆོག་ཏུ་གྱུར་པ། ས་དང་ཆུ་དང་མེ་དང་རླུང་དང་མཉམ་པའི་སེམས་སུ་གྱུར་པ། རི་རབ་ལྟར་བརྟན་ཞིང་མི་གཡོ་ལ་བསྐྱོད་པར་མི་ནུས་པའི་ཡིད་དང་ལྡན་པ། རྗེས་སུ་ཆགས་པ་དང་ཁོང་ཁྲོ་བ་མེད་པ། ནམ་མཁའི་དཀྱིལ་ལྟར་དྲི་མ་མེད་ཅིང་ཡངས་ལ་འདྲ་བ་མེད་པར་རྒྱ་ཆེ་བའི་བློ་དང་ལྡན་པ། ལྷག་པའི་བསམ་པ་ཤིན་ཏུ་ཡོངས་སུ་དག་པ། སྦྱིན་པ་ལེགས་པར་བྱིན་པ། སྔོན་སྦྱོར་བ་ལེགས་པར་བྱས་པ། ལྷག་པའི་བྱ་བ་ལེགས་པར་བྱས་པ། བདེན་པའི་རྒྱན་གྱིས་ལེགས་པར་བརྒྱན་པ། དགེ་བའི་རྩ་བ་ཐམས་ཅད་ཡོངས་སུ་བཙལ་བ། གོས་པར་བྱ་བ་བསྒོས་པ། དགེ་བའི་རྩ་བ་ངེས་པར་བྱས་པ། བསྐལ་པ་གྲངས་མེད་པ་བདུན་དུ་དགེ་བའི་རྩ་བ་ཐམས་ཅད་ཡང་དག་པར་བསྒྲུབས་པ། སྦྱིན་པ་རྣམ་པ་བདུན་བྱིན་པ། བསོད་ནམས་བྱ་བའི་དངོས་པོ་ལྔ་ཤིན་ཏུ་
12a
༄#། །བསྟེན་པ། ལེགས་པར་སྤྱད་པ་ལུས་ཀྱི་རྣམ་གསུམ། ངག་གི་རྣམ་བཞི། ཡིད་ཀྱི་རྣམ་གསུམ་སྤྱད་པར་གྱུར་པ། དགེ་བ་བཅུའི་ལས་ཀྱི་ལམ་བསྟེན་པ་དང་ལྡན་པ། ཡང་དག་པའི་སྦྱོར་བ་ཡན་ལག་བཞི་བཅུ་དང་ལྡན་པ་བསྟེན་པར་གྱུར་པ། ཡང་དག་པའི་སྨོན་ལམ་ཡན་ལག་བཞི་བཅུ་དང་ལྡན་པའི་སྨོན་ལམ་བཏབ་པ། ལྷག་པའི་བསམ་པ་ཡན་ལག་བཞི་བཅུ་དང་ལྡན་པ་ལ་ཞུགས་པ། ཡང་དག་པའི་རྣམ་པར་ཐར་པ་ཡན་ལག་བཞི་བཅུ་དང་ལྡན་པ་ཡོངས་སུ་རྫོགས་པར་བྱས་པ།་ཡང་དག་པའི་མོས་པ་ཡན་ལག་བཞི་བཅུ་དང་ལྡན་པ་དྲང་པོར་བྱས་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བཞི་བཅུའི་རྗེས་སུ་རབ་ཏུ་བྱུང་བ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལྔ་བཅུ་རྩ་ལྔ་ལ་སྦྱིན་པ་ཕུལ་བར་གྱུར་པ། རང་སངས་རྒྱས་བྱེ་བ་བརྒྱ་ཕྲག་ཕྱེད་དང་བཞི་ལ་ལྷག་པར་བྱ་བ་བྱས་པ། སེམས་ཅན་ཚད་མེད་གྲངས་མེད་པ་དག་མཐོ་རིས་དང་ཐར་པའི་ལམ་དུ་བཙུད་པར་གྱུར་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ། ཚེ་གཅིག་གིས་ཐོགས་པ། འདི་ནས་ཤི་འཕོས་ནས་དགའ་ལྡན་གྱི་གནས་དམ་པ་ན་གནས་པ་ལྷའི་བུ་དམ་པ་ཏོག་དཀར་པོ་ཞེས་བྱ་བ། ལྷའི་ཚོགས་རྣམས་ཀྱིས་འདི་ནི་
12b
འདི་ནས་ཤི་འཕོས་ནས་མིའི་འཇིག་རྟེན་དུ་སྐྱེས་ཏེ་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་དེར་ཤིན་ཏུ་མཆོད་པ། གཞལ་མེད་ཁང་གནས་སུམ་ཁྲི་ཉིས་སྟོང་རབ་ཏུ་གནས་པ། སྟེགས་བུ་དང ། བ་གམ་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁྱམས་ཀྱིས་ལེགས་པར་བརྒྱན་པ། གདུགས་དང ། རྒྱལ་མཚན་དང ། བ་དན་སྒྲེང་བ། རིན་པོ་ཆེའི་དྲིལ་བུ་གཡེར་ཁའི་དྲ་བའི་བླ་བྲེ་བྲེས་པ། མེ་ཏོག་མནྡཱ་ར་བ་དང ། མནྡཱ་ར་བ་ཆེན་པོ་ཆལ་པར་བཀྲམ་པ། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་གླུ་དབྱངས་ལེན་པ། མེ་ཏོག་ཨ་ཏི་མུཀྟ་དང ། ཙམྤ་ཀ་དང ། སྐྱ་སྣར་དང ། ས་བརྟོལ་དང ། བཏང་བཟུང་དང ། བཏང་བཟུང་ཆེན་པོ་དང ། མྱ་ངན་འཚང་དང ། ནྱ་གྲོ་དྷ་དང ། ཏིནྡུ་ཀ་དང ། ་ས་ན་དང ། དོང་ཀའི་མེ་ཏོག་དང ། ཤིང་ཀེ་ས་ར་དང ། ཏ་མ་ལ་དང ། སཱ་ལ་དང ། རིན་པོ་ཆེའི་ཤིང་ལྗོན་པ་ཆེན་པོས་བརྒྱན་པ། གསེར་གྱི་དྲ་བས་གཡོགས་པ། གཞི་མཉམ་ཞིང་བཀོད་པས་མཛེས་པར་བྱས་པ། མེ་ཏོག་སྨད་འོད་དང ། མ་ལི་ཀ་དང ། སྣ་མའི་མེ་ཏོག་དང ། བཪྴི་ཀ་དང ། ཏ་ར་ནི་དང ། བ་ལི་དང ། ཀོ་ཏ་ར་ནི་དང ། མཆོག་ཏུ་དྲི་ཞིམ་དང ། ད་ནུ་སྐ་རི་དང ། ལྷའི་སྣ་མའི་མེ་ཏོག་དང ། ུཏྤལ་དང ། པདྨ་དང ། ཀུ་མུ་ད་
13a
༄#། །དང ། པདྨ་དཀར་པོ་དང ། དྲི་རབ་ཏུ་ཞིམ་པའི་བླ་བྲེ་ཆེན་པོ་ཕྱོགས་ཕྱོགས་སུ་བྲེས་པ། བྱ་འདབ་སྦེད་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ངང་པ་དང ། རྨ་བྱ་དང ། ངུར་བ་དང ། ཀུ་ན་ལ་དང ། ཀ་ལ་པིངྐ་དང ། ཤང་ཤང་ཏེའུ་ལ་སོགས་པ་བྱ་སྣ་ཚོགས་སྒྲ་སྙན་པ་འབྱིན་པ། ལྷ་བྱེ་བ་ཁྲག་ཁྲིག་བརྒྱ་སྟོང་གིས་མིག་མངོན་དུ་ཕྱོགས་ཏེ་བལྟ་ཞིང་ལྟད་མོར་བྱ་བ། ཆོས་རྒྱ་ཆེ་བ་ཆེན་པོ་ཡང་དག་པར་བརྗོད་པས་འདོད་པ་ལ་དགའ་བའི་ཤུགས་ཀྱི་ཉོན་མོངས་པ་ཐམས་ཅད་གཅོད་པ། ང་རྒྱལ་དང།་རྒྱགས་པ་དང ། དྲེགས་པ་དང ། ཁྲོ་བ་དང ། ཐ་བ་དང ། ཁོང་ཁྲོ་བ་མེད་པར་གྱུར་པ། དགའ་བ་དང ། མགུ་བ་དང ། མཆོག་ཏུ་དགའ་བ་དང ། དྲན་པ་རྒྱ་ཆེ་ཞིང་གསལ་བ། སྐྱེ་བའི་གཞལ་མེད་ཁང་ཆེན་པོ་དེ་ན་བདེ་བར་གནས་ཤིང་ཆོས་ཀྱི་ཡང་དག་པའི་གཏམ་བྱུང་བ་དང ། སིལ་སྙན་དང ། གླུ་དབྱངས་བརྒྱད་ཁྲི་བཞི་སྟོང་པོའི་སྒྲ་དེ་དག་ལས་བྱང་ཆུབ་སེམས་དཔའི་སྔོན་གྱི་ལས་དགེ་བའི་ཚོགས་ཀྱིས་ཡང་དག་པར་སྐུལ་བའི་ཚིགས་སུ་བཅད་པ་འདི་དག་བྱུང་ངོ ། །བསོད་ནམས་རྒྱ་ཆེན་ཚོགས་མངའ་དྲན་རྟོགས་དང ། །བློ་གྲོས་མཐའ་ཡས་ཤེས་རབ་འོད་མཛད་པ། །མཚུངས་མེད་སྟོབས་མངའ་སྒྱུ་རྩལ་རྒྱ་ཆེ་བ། །མར་མེ་མཛད་ཀྱིས་ལུང་བསྟན་དགོངས་པར་མཛོད། །རྒྱ་ཆེན་
13b
དྲི་མ་མེད་པའི་ཐུགས་མངའ་བ། །དྲི་མ་གསུམ་སྤངས་རྒྱགས་དང་སྐྱོན་ཞི་བ། །དགེ་བ་དྲི་མེད་རྣམ་པར་དག་པའི་ཐུགས། །སྔོན་ཆད་ཇི་ལྟར་སྦྱིན་སྤྱད་དགོངས་པར་མཛོད། །ཞི་གནས་ཚུལ་ཁྲིམས་བརྟུལ་ཞུགས་བཟོད་པ་དང ། །དུལ་དང་བརྩོན་འགྲུས་བསམ་གཏན་ཤེས་རབ་སྟོབས། །བསྐལ་པ་བྱེ་བ་ཁྲག་ཁྲིག་རྣམས་སྤྱད་པ། །སྤྱོད་རིགས་ཆེར་བྱུང་དགོངས་མཛོད་དགོངས་པར་མཛོད། །སེམས་ཅན་རྣམས་ལ་ཐུགས་བརྩེ་མཛད་གྱུར་ཅིང ། །སངས་རྒྱས་བྱེ་བ་ཁྲག་ཁྲིག་ཁྱེད་ཀྱིས་མཆོད། །དགོངས་མཛོད་དགོངས་པར་མཛོད་ཅིག་གྲགས་མཐའ་ཡས། །དེ་དུས་ལགས་ཀྱི་བཏང་སྙོམས་མ་མཛད་ཅིག་།རྒ་ཤི་ཉོན་མོངས་འཇིགས་མཛད་རྡུལ་བྲལ་བ། །ལྷ་དང་ཀླུ་དང་གནོད་སྦྱིན་དྲི་ཟ་དང ། །ལྷ་མིན་དབང་པོ་དག་ཀྱང་སྡོད་ལགས་ཀྱི། །འཆི་འཕོའི་ཚུལ་མཁྱེན་འཕོ་བ་བསྟན་པར་མཛོད། །བསྐལ་པ་སྟོང་དུ་དཀའ་བ་སྤྱད་གྱུར་ཀྱང ། །རྒྱ་མཚོ་ཆུ་ཡིས་ཇི་བཞིན་མི་ངོམས་ཀྱི། །ངོམས་པ་ཁྱོད་ཀྱི་ཐུགས་དམ་དགེ་བ་སྟེ། །ཡུན་རིང་སྐོམ་ཉེན་སྐྱེ་བོ་ཚིམ་པར་མཛོད། །སྨད་པ་མེད་པའི་གྲགས་བ་མངའ་བ་ཁྱོད། །ཆོས་ལ་དགྱེས་པར་ཁྱོད་དགྱེས་འདོད་མི་དགྱེས། །འོན་ཀྱང་དྲི་མ་མེད་པའི་སྤྱན་མངའ་བ། །ལྷར་བཅས་འཇིག་རྟེན་དག་ལ་ཐུགས་བརྩེ་མཛོད། །ལྷ་རྣམས་བྱེ་བ་ཁྱོད་ལས་ཆོས་ཐོས་པས། །ངོམས་པར་འགྱུར་བ་མ་ལགས་འོན་གྱིས་
14a
༄#། །ཀྱང ། །དལ་དང་མི་ལྡན་གྱུར་པའི་ངན་སོང་དུ། །གནས་པར་གྱུར་པ་དག་ལ་གཟིགས་སུ་གསོལ། །དྲི་མ་མེད་པའི་སྤྱན་མངའ་ཕྱོགས་བཅུ་ཡི། །འཇིག་རྟེན་དག་གི་སངས་རྒྱས་གཟིགས་གྱུར་ཅིང ། །དེ་དག་རྣམས་ལ་ཆོས་གསན་ཆོས་མཆོག་དེ། །འཇིག་རྟེན་དག་ལ་རྣམ་པར་དབྱེ་བ་མཛོད། །དཔལ་ལྡན་ཁྱོད་ཀྱི་བསོད་ནམས་དཔལ་གྱིས་ནི། །དགའ་ལྡན་ཕོ་བྲང་ཤིན་ཏུ་མཛེས་མོད་ཀྱི། །འོན་ཀྱང་ཐུགས་རྗེ་ཐུགས་དང་ལྡན་པས་ན། །ཛམྦུའི་རྒྱལ་མཚན་དུ་ནི་ཆར་པ་ཕོབ། །བརྟུལ་ཞུགས་གྲུབ་པ་བྱང་ཆུབ་རེག་ཅེས་ཏེ། །འདོད་པའི་ཁམས་ལས་རབ་ཏུ་འདས་པ་ཡི། །གཟུགས་ཀྱི་ཁམས་ན་ལྷ་རྣམས་གང་འཁོད་པ། །དུ་མ་ཐམས་ཅད་མངོན་པར་རབ་ཏུ་དགའ། །མགོན་པོ་ཁྱོད་ཀྱིས་བདུད་ཀྱི་ལས་རྣམས་བཅོམ། །ཁྱོད་གཞན་མུ་སྟེགས་ཅན་རྣམས་ཕམ་མཛད་དེ། །ཁྱོད་ནི་བྱང་ཆུབ་ཕྱག་མཐིལ་བཞག་དང་འདྲ། །དེ་དུས་ལགས་ཀྱི་བཏང་སྙོམས་མ་མཛད་ཅིག་།ཉོན་མོངས་རབ་ཏུ་འབར་བའི་འཇིག་རྟེན་ལ། །དཔའ་བོ་ཁྱོད་ཀྱིས་སྤྲིན་ལྟར་ཁྱབ་མཛད་དེ། །བདུད་རྩིའི་ཆར་བ་མངོན་པར་རབ་ཏུ་ཕོབ། །ལྷ་མི་རྣམས་ཀྱིས་ཉོན་མོངས་ཞི་བར་མཛོད། །ཁྱོད་ནི་སྨན་པ་ཁམས་པ་མཁས་པ་སྟེ། །ཡུན་རིང་ནད་པ་སྨན་པས་པོར་བ་ཡི། །སེམས་ཅན་རྣམ་ཐར་གསུམ་གྱི་སྦྱར་སྨན་གྱིས། །མྱ་ངན་འདས་
14b
པའི་བདེ་ལ་མྱུར་དུ་ཁོད། །སེངྒེའི་ང་རོ་ཐོས་པར་མ་གྱུར་པས། །ཝ་རྣམས་འཇིགས་པ་མེད་པར་སྒྲ་སྒྲོག་གི་།སངས་རྒྱས་སེངྒེའི་སྒྲ་ནི་རབ་བསྒྲགས་ཏེ། །མུ་སྟེགས་ཅན་གཞན་ཝ་རྣམས་སྐྲག་པར་མཛོད། །ས་ཡི་དཀྱིལ་ན་སྟོབས་དང་བརྩོན་འགྲུས་ཀྱི། །སྟོབས་ལྡན་ཕྱག་ན་ཤེས་རབ་སྒྲོན་མེ་བསྣམས། །ཕྱག་མཐིལ་དམ་པས་ས་ལ་བརྡབ་མཛད་དེ། །འདི་རྣམས་ཁྱོད་ཀྱིས་རབ་ཏུ་ཕམ་པར་མཛོད། །གང་དག་ཁྱོད་ལ་ལྷུང་བཟེད་འབུལ་བ་ཡི། །འཇིག་རྟེན་སྐྱོང་བ་བཞི་པོ་སྡོད་ཅིང་མཆིས། །ཁྱོད་བལྟམས་གང་དག་ལེན་པར་འགྱུར་བ་ཡི། །བརྒྱ་བྱིན་ཚངས་པ་ཁྲག་ཁྲིག་སྡོད་ཅིང་མཆིས། །བློ་གྲོས་བཟང་པོ་རིགས་ཆེན་རིགས་ལྡན་པ། །གང་ལ་གནས་ནས་བྱང་ཆུབ་སེམས་དཔའ་ཡི། །སྤྱོད་པ་སྟོན་འགྱུར་དམ་པ་རིགས་སྐྱེས་པ། །རིགས་ཀྱི་ནང་ན་བཙུན་པའི་རིགས་ལ་གཟིགས། །སྣོད་གྱུར་གང་དུ་ནོར་བུ་རིན་པོ་ཆེ། །བཞག་ན་དཔལ་དང་ལྡན་པར་འགྱུར་བ་བཞིན། །ནོར་བུ་རིན་ཆེན་ལྟ་བུར་དྲི་མེད་ཐུགས། །ཛམྦུའི་རྒྱལ་མཚན་དུ་ནི་ཆར་པ་ཕོབ། །གླུ་དབྱངས་སྒྲ་ལས་རྣམ་པ་འདི་ལྟ་ཡི། །ཚིགས་སུ་བཅད་པ་མང་པོ་བྱུང་གྱུར་ནས། །འདི་ནི་དུས་ལགས་བཏང་སྙོམས་མ་མཛད་ཅེས། །སྙིང་རྗེའི་ཡིད་དང་ལྡན་ལ་སྐུལ་བར་བྱེད། །ཡང་དག་པར་སྤྲོ་བར་བྱ་བའི་ལེའུ་སྟེ། གཉིས་པའོ།། །།དགེ་སློང་དག། དེ་ལྟར་བྱང་ཆུབ་སེམས་དཔའ་ཆོས་ཀྱི་དུས་
15a
༄#། །དེ་ལྟ་བུས་ཡང་དག་པར་བསྐུལ་བ་དང ། གཞལ་མེད་ཁང་ཆེན་པོ་དེ་ནས་བྱུང་སྟེ་ཆོས་ཀྱིས་མཐོ་བ་ཞེས་བྱ་བའི་ཁང་བཟང་ཆེན་པོ་གང་དུ་བྱང་ཆུབ་སེམས་དཔའ་འདུག་ཅིང་དགའ་ལྡན་གྱི་ལྷ་རྣམས་ལ་ཆོས་སྟོན་པ་དེར་བྱང་ཆུབ་སེམས་དཔའ་ཞུགས་སོ། །ཞུགས་ནས་ཀྱང་སེངྒེའི་ཁྲི་ཆོས་བཟང་པོ་ཞེས་བྱ་བ་ལ་འདུག་གོ་།དེ་ནས་ལྷའི་བུ་གང་དག་བྱང་ཆུབ་སེམས་དཔའ་དང་སྐལ་པ་མཉམ་པ་ཐེག་པ་མཚུངས་པ་ལ་ཞུགས་པ་དེ་དག་ཀྱང་ཁང་བཟང་དེ་ཉིད་དུ་ཞུགས་སོ། །གང་ཡང་བྱང་ཆུབ་སེམས་དཔའ་ཕྱོགས་བཅུ་ནས་འདུས་པ་བྱང་ཆུབ་སེམས་དཔའ་དང་སྤྱོད་པ་འདྲ་བ་དག་དང ། ལྷའི་བུ་དེ་དག་ཀྱང་ལྷའི་བུ་མོའི་ཚོགས་རྣམས་བསལ་ཅིང་ལྷའི་བུ་ཕལ་རྣམས་ཀྱང་བསལ་ནས་ལྷའི་བསམ་པ་མཐུན་པའི་འཁོར་ཅན་དུ་བྱས་ཏེ། འཁོར་བྱེ་བ་ཕྲག་དྲུག་ཅུ་རྩ་བརྒྱད་བརྒྱད་དང་ཁང་བཟང་དེར་ཞུགས་ནས་སོ་སོ་ཅི་རིགས་པར་རང་རང་གི་སེངྒེའི་ཁྲི་ལ་འཁོད་པར་གྱུར་ཏོ། །དགེ་སློང་དག་།དེ་ལྟར་བྱང་ཆུབ་སེམས་དཔའ་ལོ་བཅུ་གཉིས་ན་མའི་མངལ་དུ་འཇུག་པར་འགྱུར་རོ་ཞེས་བྱ་བ་དེའི་ཚེ་གནས་གཙང་མའི་རིས་ཀྱི་ལྷའི་བུ་དག་ཛམྦུའི་གླིང་དུ་ལྷགས་ནས་ལྷའི་ཁ་དོག་མི་སྣང་བར་བྱས་ཏེ་བྲམ་ཟེའི་ཆ་བྱད་དུ་བསྒྱུར་ནས་བྲམ་ཟེ་རྣམས་རིག་བྱེད་སློབ་ཏུ་འཛུད་དེ། གང་
15b
ཞིག་རྣམ་པ་འདི་ལྟ་བུར་མངལ་དུ་ཞུགས་པར་གྱུར་ན། དེ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པར་འགྱུར་ཏེ། དེ་དག་དང་ལྡན་ན། རྣམ་པ་གཉིས་སུ་འགྱུར་གྱི།་གསུམ་དུ་འགྱུར་བ་མེད་དོ། །དེ་གལ་ཏེ་ཁྱིམ་ན་གནས་ན་ནི་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ། ཆོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི་འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། བུད་མེད་རིན་པོ་ཆེ་དང ། ནོར་བུ་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་དང་བདུན་ནོ། །འཁོར་ལོས་སྒྱུར་བའི་རྒྱལ་པོ་འཁོར་ལོ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པར་འགྱུར་ཞེ་ན་འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་གསོ་སྦྱོང་གི་ཉི་མ་ཚེས་བཅོ་ལྔ་ལ་མགོ་ཁྲུས་བྱས་ཏེ་དབུ་ཟུངས་སུ་གནས་ཤིང་སྟེང་གི་ཁྱམས་ན་བུད་མེད་ཀྱི་ཚོགས་ཀྱིས་ཀུན་ནས་བསྐོར་ཅིང་འདུག་པའི་ཚེ་ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་རྩིབས་སྟོང་ཡོད་པ། མུ་ཁྱུད་དང་ལྡན་པ། ལྟེ་བ་དང་བཅས་པ། ཐམས་ཅད་གསེར་ལས་གྲུབ་པ།་མགར་བས་མ་བྱས་པ། འཕང་དུ་ཤིང་ཏ་ལ་བདུན་ཙམ་ནས་འབྱུང་སྟེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་ལྷའི་འཁོར་ལོ་རིན་པོ་ཆེ་དེ་མཐོང་ནས་འདི་སྙམ་
16a
༄#། །དུ་སེམས་ཏེ། བདག་གིས་ཐོས་པ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གསོ་སྦྱོང་གི་ཉི་མ་ཚེས་བཅོ་ལྔ་ལ་མགོ་ཁྲུས་བྱས་ཏེ་དབུ་ཟུངས་སུ་གནས་ཤིང་སྟེང་གི་ཁྱམས་ན་བུད་མེད་ཀྱི་ཚོགས་ཀྱིས་ཀུན་ནས་བསྐོར་ཅིང་འདུག་པའི་ཚེ་ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་བྱུང་བར་གྱུར་ན། དེ་ན་འཁོར་ལོས་བསྒྱུར་བའི་རྒྱལ་པོར་འགྱུར་རོ་ཞེས་ཐོས་ཏེ། བདག་གི་དྲུང་དུ་ལྷའི་འཁོར་ལོ་རིན་པོ་ཆེ་འོངས་པ་ལས་ན། བདག་ཀྱང་འཁོར་ལོས་སྒྱུར་བའི་རྒྱལ་པོ་ཡིན་དུ་ངེས་སོ་སྙམ་སྟེ། དེ་ནས་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ལག་པ་གཡས་བས་ལྷའི་འཁོར་ལོ་རིན་པོ་ཆེ་དེ་བསྐོར་ཞིང་འདི་སྐད་དུ། བཙུན་པ། ལྷའི་འཁོར་ལོ་རིན་པོ་ཆེ་ཆོས་ཀྱིས་བསྐོར་ཅིག་།ཆོས་མ་ཡིན་པས་ནི་མ་ཡིན་ནོ་ཞེས་བྱ་བའི་ཚིག་སྨྲས་པ་དང ། དེ་ནས་ལྷའི་འཁོར་ལོ་རིན་པོ་ཆེ་དེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་བསྐོར་བས་རྫུ་འཕྲུལ་གྱིས་ནམ་མཁའ་ལས་ཤར་ཕྱོགས་སུ་ལེགས་པར་འགྲོ་སྟེ། རྒྱལ་པོ་འཁོར་ལོས་སྒྱུར་བའང་དཔུང་གི་ཚོགས་ཡན་ལག་བཞི་བ་དང་ལྷན་ཅིག་རྗེས་སུ་འགྲོའོ། །སའི་ཕྱོགས་གང་དུ་ལྷའི་འཁོར་ལོ་རིན་པོ་ཆེ་དེ་གནས་
16b
པར་འགྱུར་བ་དེར་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེའང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་གནས་པར་འགྱུར་རོ། །དེ་ནས་ཤར་ཕྱོགས་ཀྱི་ཁམས་ཀྱི་རྒྱལ་པོ་གང་ཡིན་པ་དེ་དག་དངུལ་གྱི་སྣོད་ནི་གསེར་ཕྱེས་བཀང་སྟེ་ཐོགས། གསེར་གྱི་སྣོད་ནི་དངུལ་སིལ་མས་བཀང་སྟེ་ཐོགས་ནས་འཁོར་ལོས་སྒྱུར་བའི་རྒྱལ་པོ་བསུ་ཞིང་འདི་སྐད་དུ། ལྷ་འདིར་ལེགས་པར་གཤེགས་སོ། །ལྷ་ཚུར་གཤེགས་སུ་གསོལ། །ལྷའི་ཆབ་སྲིད་ནི་ཤིན་ཏུ་རྒྱས་ཤིང་འབྱོར་ལ་བདེ་སྟེ། ལོ་ལེགས་ཤིང་ཉམས་དགྱེས་ལ་སྐྱེ་བོ་མང་པོ་དང ། མིས་གཏམས་པ་ལགས་ཏེ། ལྷ་ཉིད་ཀྱི་ཡུལ་དུ་བྱོན་ནས་བཞུགས་སུ་གསོལ། དེ་སྐད་ཅེས་སྨྲས་པ་དང ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་རིམས་ཀྱི་རྒྱལ་པོ་དེ་དག་ལ་འདི་སྐད་དུ། ཁྱེད་རང་རང་གི་རྒྱལ་སྲིད་དག་ཆོས་ཀྱིས་གྱིས་ཤིག་།ཆོས་མ་ཡིན་པས་ནི་མ་ཡིན་ནོ། །ཁྱེད་སྲོག་ཆགས་མ་གསོད་ཅིག་།མ་བྱིན་པར་མ་ལེན་ཅིག་།འདོད་པ་ལ་ལོག་པར་གཡེམ་པར་མ་བྱེད་ཅིག་།བརྫུན་དུ་མ་སྨྲ་ཞིག་།ཕྲ་མ་མ་ཟེར་ཅིག་།ངག་རྩུབ་པོ་མ་སྨྲ་ཞིག་།ཚིག་ཀྱལ་པ་མ་སྨྲ་ཞིག་།བརྣབ་སེམས་ཅན་དུ་མ་གྱུར་ཅིག་།གནོད་སེམས་ཅན་དུ་མ་གྱུར་ཅིག་།ལོག་པར་ལྟ་བར་མ་གྱུར་ཅིག་།སྲོག་གཅོད་པ་ལ་བྱམས་པར་མ་གྱུར་ཅིག་།ལོག་པར་ལྟ་བ་ཅན་གྱི་བར་ལ་བྱམས་པར་མ་
17a
༄#། །གྱུར་ཅིག་།ངའི་ཡུལ་དུ་ཆོས་མ་ཡིན་པ་བྱུང་ང་རེ། ཆོས་མ་ཡིན་པར་སྤྱོད་པ་ལ་བྱམས་པར་མ་བྱེད་ཅིག་ཅེས་བསྒོས་ནས་རྒྱལ་པོ་རྒྱལ་རིགས་སྦྱི་བོ་ནས་དབང་བསྐུར་བས་དེ་ལྟར་ཤར་ཕྱོགས་སུ་རྣམ་པར་རྒྱལ་བར་བྱེད་དོ། །ཤར་ཕྱོགས་སུ་རྣམ་པར་རྒྱལ་བར་བྱས་ནས་ཤར་ཕྱོགས་ཀྱི་རྒྱ་མཚོ་ལ་འགྲོའོ། །ཤར་ཕྱོགས་ཀྱི་རྒྱ་མཚོ་ལ་སོང་ནས་ཤར་ཕྱོགས་ཀྱི་རྒྱ་མཚོ་ལས་རྒལ་ལོ། །རྒལ་ནས་ཀྱང་ལྷོ་ཕྱོགས་སུ་ནམ་མཁའ་ལས་རྫུ་འཕྲུལ་གྱིས་ལེགས་པར་འགྲོ་སྟེ། འཁོར་ལོས་བསྒྱུར་བའི་རྒྱལ་པོའང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་འགྲོའོ། །སྔ་མ་བཞིན་དུ་ལྷོ་ཕྱོགས་སུ་རྣམ་པར་རྒྱལ་བར་བྱེད་དོ། །ལྷོ་ཕྱོགས་སུ་ཇི་ལྟ་བ་དེ་བཞིན་དུ་ནུབ་ཕྱོགས་དང ། བྱང་ཕྱོགས་སུ་རྣམ་པར་རྒྱལ་བར་བྱེད་དོ། །བྱང་ཕྱོགས་སུ་རྣམ་པར་རྒྱལ་བར་བྱས་ནས་བྱང་ཕྱོགས་ཀྱི་རྒྱ་མཚོ་ལ་འགྲོའོ། །བྱང་ཕྱོགས་ཀྱི་རྒྱ་མཚོ་ལ་སོང་ནས་བྱང་ཕྱོགས་ཀྱི་རྒྱ་མཚོ་ལ་རྒལ་ལོ། །རྒལ་ནས་ཀྱང་ནམ་མཁའ་ལས་རྫུ་འཕྲུལ་གྱིས་རྒྱལ་པོའི་ཕོ་བྲང་དུ་ལེགས་པར་འོངས་ནས་བཙུན་མོའི་འཁོར་གྱི་སྒོའི་སྟེང་དུ་ཉམས་པ་མེད་པར་གནས་ཏེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ནི་འཁོར་ལོ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །འཁོར་ལོས་བསྒྱུར་བའི་
17b
རྒྱལ་པོ་གླང་པོ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་གླང་པོ་རིན་པོ་ཆེ་སྔ་མ་བཞིན་དུ་འབྱུང་སྟེ། ཐམས་ཅད་ཐལ་ཀར་གྱུར་པ། ཡན་ལག་བདུན་ཤིན་ཏུ་གནས་པ། གཙུག་གསེར་གྱིས་བརྒྱན་པ། གསེར་གྱི་རྒྱལ་མཚན་དང་ལྡན་པ། གསེར་གྱི་རྒྱན་གྱིས་བརྒྱན་པ། གསེར་གྱི་དྲ་བས་གཡོགས་པ།་རྫུ་འཕྲུལ་དང་ལྡན་པ། ནམ་མཁའ་ལས་འགྲོ་བ། རྣམ་པར་འཕྲུལ་པའི་ཆོས་ཅན་ཏེ། འདི་ལྟར་གླང་པོའི་རྒྱལ་པོ་བྱང་ཆུབ་ཅེས་བྱ་བའོ། །གང་གི་ཚེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གླང་པོ་རིན་པོ་ཆེ་དེ་བརྟག་པར་འདོད་པར་གྱུར་པའི་ཚེ་ཉི་མ་ཤར་ཁར་གླང་པོ་རིན་པོ་ཆེ་དེ་ལ་ཞོན་ཏེས་ཆེན་པོ་འདི་རྒྱ་མཚོའི་མཐའ་སྐོར་དང་བཅས་པ། རྒྱ་མཚོའི་མུར་ཐུག་པ་དང་བཅས་པ་ཀུན་ཏུ་བསྐོར་ཏེ་རྒྱལ་པོའི་ཕོ་བྲང་དུ་འོངས་ནས་ཁྱེའུ་སུས་ཀྱི་དགའ་བ་མྱོང་བར་བྱེད་དེ། འཁོར་ལོས་སྒྱུར་བའི་རྒྱལ་པོ་གླང་པོ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །འཁོར་ལོས་སྒྱུར་བའི་རྒྱལ་པོ་རྟ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་རྟ་རིན་པོ་ཆེ་སྔ་མ་བཞིན་དུ་འབྱུང་སྟེ། ཐམས་ཅད་སྔོན་པོར་གྱུར་བ། མགོ་ནག་པ། རྔོག་མ་ལྕང་ལོར་འདུག་པ། ཞོན་ན་གུས་པར་བྱེད་པ། གསེར་གྱི་རྒྱལ་མཚན་དང་བཅས་
18a
༄#། །པ།་གསེར་གྱི་རྒྱན་དང་ལྡན་པ། གསེར་གྱི་དྲ་བས་གཡོགས་པ། རྫུ་འཕྲུལ་དང་ལྡན་པ། ནམ་མཁའ་ལས་འགྲོ་བ། རྣམ་པར་འཕྲུལ་པའི་ཆོས་ཅན་ཏེ།་འདི་ལྟར་རྟའི་རྒྱལ་པོ་སྤྲིན་གྱི་ཤུགས་ཅན་ཞེས་བྱ་བའོ། །གང་གི་ཚེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྟ་རིན་པོ་ཆེ་བརྟག་པར་འདོད་པར་གྱུར་པ་དེའི་ཚེ་ཉི་མ་ཤར་ཁར་རྟ་རིན་པོ་ཆེ་དེ་ལ་ཞོན་ནས་ས་ཆེན་པོ་འདི་རྒྱ་མཚོའི་མཐའ་སྐོར་དང་བཅས་པ། རྒྱ་མཚོའི་མུར་ཐུག་པ་དང་བཅས་པ་ཀུན་ཏུ་བསྐོར་ཏེ་ཕྱིར་རྒྱལ་པོའི་ཕོ་བྲང་དུ་འཁོར་ནས་ཁྱེའུ་སུས་ཀྱི་བདེ་བ་མྱོང་བར་བྱེད་དེ། འཁོར་ལོས་སྒྱུར་བའི་རྒྱལ་པོ་ནི་རྟ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །འཁོར་ལོས་སྒྱུར་བའི་རྒྱལ་པོ་ནོར་བུ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་ནོར་བུ་རིན་པོ་ཆེ་སྔ་མ་བཞིན་དུ་འབྱུང་སྟེ། ཐམས་ཅད་དུ་སྔོ་བ། བཻ་ཌཱུརྱའི་རང་བཞིན་ཟུར་བརྒྱད་དུ་འདུག་པ། ཤིན་ཏུ་སྦྱངས་པ་འབྱུང་སྟེ། ནོར་བུ་རིན་པོ་ཆེ་དེའི་འོད་ཀྱིས་བཙུན་མོའི་འཁོར་ཐམས་ཅད་ཀྱང་སྣང་བས་ཁྱབ་པར་འགྱུར་རོ། །གང་གི་ཚེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ནོར་བུ་རིན་པོ་ཆེ་བརྟག་པར་འདོད་པར་གྱུར་པ་དེའི་ཚེ་མཚན་མོ་ནམ་གྱི་གུང་ལ་མུན་པ་མུན་ནག་གི་ནང་དུ་ནོར་བུ་རིན་
18b
རིན་པོ་ཆེ་དེ་རྒྱལ་མཚན་གྱི་རྩེ་མོ་ལ་བཏགས་ཏེ་སྐྱེད་མོས་ཚལ་གྱི་ས་བཟང་པོ་བལྟ་བའི་ཕྱིར་སོང་ན། ནོར་བུ་རིན་པོ་ཆེ་དེའི་འོད་ཀྱིས་ཐམས་ཅད་དང་ལྡན་པའི་དཔུང་གི་ཚོགས་ཡན་ལག་བཞི་པ་ཐམས་ཅད་དཔག་ཚད་ཁོ་ར་འཁོར་ཡུག་ཏུ་སྣང་བས་གསལ་བར་འགྱུར་རོ། །ནོར་བུ་རིན་པོ་ཆེའི་འཁོར་ན་གནས་པའི་མི་དེ་དག་ཀྱང་སྣང་བ་དེས་གསལ་བར་གྱུར་པ་དང ། གཅིག་གིས་གཅིག་མཐོང ། གཅིག་གིས་གཅིག་ཤེས་ནས་གཅིག་ལ་གཅིག་འདི་སྐད་སྨྲ་སྟེ། བཞིན་བཟང་དག་ལོངས། ལས་ཀྱི་མཐའ་དག་བྱོས་ཤིག། ཚོང་འདུས་དག་ཁྲོམ། ཉི་མ་ཤར་ཏེ་ཉིན་མོར་ཤེས་སོ་ཞེས་ཟེར་ཏེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་པ་དེ་ནོར་བུ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་བུད་མེད་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་རྒྱལ་པོ་རྒྱལ་རིགས་སྤྱི་པོ་ནས་དབང་བསྐུར་བའི་བུད་མེད་རིན་པོ་ཆེ་སྔ་མ་བཞིན་དུ་འབྱུང་སྟེ། ཚུལ་དང་མཐུན་པ། རྒྱལ་རིགས་སུ་སྐྱེས་པ། ཧ་ཅང་ཡང་མི་རིང་བ། ཧ་ཅང་ཡང་མི་ཐུང་བ། ཧ་ཅང་ཡང་མི་སྦོམ་པ། ཧ་ཅང་ཡང་མི་སྐེམ་པ། ཧ་ཅང་ཡང་མི་དཀར་བ། ཧ་ཅང་ཡང་མི་ནག་པ། གཟུགས་མཛེས་པ། ཚུལ་དུ་ཤིས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། དེའི་སྤུའི་ཁུང་
19a
༄#། །ཐམས་ཅད་ནས་ཙནྡན་གྱི་དྲི་འབྱུང་བ། ཁ་ནས་ཨུཏྤ་ལའི་ངད་ལྡང་བ། ཀ་ཙ་ལིནྡྲའི་གོས་ལྟར་རེག་ན་བདེ་བ། དེ་གྲང་བའི་དུས་ན་ནི་ལུས་ལ་རེག་ན་དྲོ་བ། དྲོ་བའི་དུས་ན། ལུས་ལ་རེག་ན་བསིལ་བ་སྟེ། དེ་འཁོར་ལོས་སྒྱུར་བའི་རྒྱལ་པོ་མ་གཏོགས་པར་གཞན་ལ་ཡིད་ཀྱིས་ཀྱང་འདོད་ཆགས་སུ་མི་བྱེད་ན། ལུས་ཀྱིས་ལྟ་ཅི་སྨོས་ཏེ། འཁོར་ལོས་སྒྱུར་བའི་རྒྱལ་པོ་ནི་བུད་མེད་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །འཁོར་ལོས་སྒྱུར་བའི་རྒྱལ་པོ་ཁྱིམ་བདག་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་ཁྱིམ་བདག་རིན་པོ་ཆེ་སྔ་མ་བཞིན་དུ་འབྱུང་སྟེ། མཁས་པ། གསལ་བ།་ཡིད་གཞུངས་པ། ལྷའི་མིག་དང་ལྡན་པ་འབྱུང་ངོ ། །དེ་ལྷའི་མིག་དེས་དཔག་ཚད་ཁོ་ར་ཁོར་ཡུག་ཏུ་བདག་པོ་དང་བཅས་པའི་གཏེར་དག་ཀྱང་མཐོང ། བདག་པོ་མེད་པའི་གཏེར་དག་ཀྱང་མཐོང་སྟེ། དེ་བདག་པོ་མེད་པའི་གཏེར་གང་ཡིན་པ་དེ་དག་གིས་འཁོར་ལོས་སྒྱུར་བའི་རྒྱལ་པོའི་ནོར་གྱི་དགོས་པ་བྱེད་དེ། འཁོར་ལོས་སྒྱུར་བའི་རྒྱལ་པོ་ནི་ཁྱིམ་བདག་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །འཁོར་ལོས་སྒྱུར་བའི་རྒྱལ་པོ་བློན་པོ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན།
19b
འདི་ལ་འཁོར་ལོས་སྒྱུར་བའི་རྒྱལ་པོའི་བློན་པོ་རིན་པོ་ཆེ་སྔ་མ་བཞིན་དུ་འབྱུང་སྟེ། མཁས་ཤིང་གསལ་ལ་ཡིད་གཞུངས་པའོ། །དེ་འཁོར་ལོས་བསྒྱུར་བའི་རྒྱལ་པོ་དེས་བསམ་པ་ཙམ་གྱིས་བསྐོ་བར་བྱ་བའི་དཔུང་རྣམས་སྐོའོ། །འཁོར་ལོས་སྒྱུར་བའི་རྒྱལ་པོ་ནི་བློན་པོ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ཏེ། འཁོར་ལོས་བསྒྱུར་བའི་རྒྱལ་པོ་ནི་རིན་པོ་ཆེ་སྣ་བདུན་དེ་དག་དང་ལྡན་པ་ཡིན་ནོ། །དེ་ལ་བུ་སྟོང་འབྱུང་སྟེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་ཤ་སྟག་སྟེ། དེས་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པ་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ་ཆོས་ཀྱིས་ལེགས་པར་ཕབ་སྟེ་གནས་སོ། །གལ་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ན། སངས་རྒྱས་སུ་འགྱུར་ཏེ། འདོད་པའི་འདོད་ཆགས་སྤངས་པ། འདྲེན་པ་གཞན་གྱི་དྲིང་མི་འཇོག་པ། ལྷ་དང་མི་རྣམས་ཀྱི་སྟོན་པར་འགྱུར་རོ་ཞེས་རིག་བྱེད་འདོན་དུ་འཛུད་དོ། །དེ་བཞིན་དུ་ལྷའི་བུ་གཞན་དག་ཀྱང་ཛམྦུའི་གླིང་དུ་ལྷགས་ཤིང་རང་སངས་རྒྱས་དག་ལ་སྐུལ་མ་འདེབས་ཏེ། འཕགས་པ་དག་།ད་སྟེ་ལོ་བཅུ་གཉིས་ན་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་གི་།སངས་རྒྱས་ཀྱི་ཞིང་འདི་འོར་
20a
༄#། །ཅིག་ཅེས་ཟེར་རོ། །དགེ་སློང་དག་།དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་མཇུག་མ་སྒྱུར་བ་ཞེས་བྱ་བའི་རི་ལ་རང་སངས་རྒྱས་གླང་པོ་ཞེས་བྱ་བ་འདུག་པས་སྒྲ་དེ་ཐོས་ནས་རྡོ་བའི་སྟེང་དུ་འཇིམ་པ་ལ་བྱ་བ་དེ་བཞིན་དུ་འདུག་སྟེ། ནམ་མཁའ་ལ་ཤིང་ཏ་ལ་བདུན་སྲིད་དུ་གྱེན་དུ་འཕགས་སོ། །གྱེན་དུ་འཕགས་ནས་ཀྱང་མེའི་ཁམས་ལ་སྙོམས་པར་ཞུགས་ཏེ་སྒྲོན་མ་བཞིན་དུ་མྱ་ངན་ལས་འདས་སོ། །དེའི་མཁྲིས་པ་དང ། བད་ཀན་དང ། ཆུ་རྒྱུས་དང ། རུས་པ་དང ། ཤ་དང ། ཁྲག་ཏུ་གྱུར་པ་གང་ཡིན་པ་ཐམས་ཅད་ནི་མེས་ཡོངས་སུ་ཟད་པར་གྱུར་ཏེ། རིང་བསྲེལ་འབའ་ཞིག་ས་ལ་ལྷགས་ནས་རྐང་རྗེས་དེ་དག་ནི་ད་དུང་ཡང་དྲང་སྲོང་གི་རྗེས་ཞེས་གྲག་སྟེ་ཡོད་དོ། །དགེ་སློང་དག་།དེའི་ཚེ་ཡུལ་ཝཱ་ར་ཎཱ་སིའི་རི་དྭགས་ཀྱི་ནགས་དྲང་སྲོང་ལྟུང་བ་ན་རང་སངས་རྒྱས་ལྔ་བརྒྱ་འཁོད་པ་དེ་དག་གིས་ཀྱང་སྒྲ་དེ་ཐོས་ནས་ནམ་མཁའ་ལ་ཤིང་ཏ་ལ་བདུན་སྲིད་དུ་གྱེན་དུ་འཕགས་ནས་མེའི་ཁམས་ལ་སྙོམས་པར་ཞུགས་ཏེ་སྒྲོན་མ་བཞིན་དུ་ཡོངས་སུ་མྱ་ངན་ལས་འདས་སོ། །དེ་དག་གི་མཁྲིས་པ་དང ། བད་ཀན་དང ། ཆུ་རྒྱུས་དང ། རུས་པ་དང ། ཤ་དང ། ཁྲག་ཏུ་གྱུར་པ་གང་ཡིན་པ་དེ་ཐམས་ཅད་ནི་མེས་ཡོངས་སུ་ཟད་པར་གྱུར་ཏེ། རིང་བསྲེལ་འབའ་ཞིག་ས་
20b
ལ་ལྷགས་སོ། །དེ་ལྟར་འདིར་དྲང་སྲོང་རྣམས་ལྷུང་ངོ་ཞེས་དེ་ཕྱིན་ཆད་དྲང་སྲོང་ལྷུང་བ་ཞེས་བྱ་བའང་དྲང་སྲོང་ལྷུང་པ་དྲང་སྲོང་པ་ཞེས་མིང་དུ་ཆགས་པར་གྱུར་ཏོ། །མི་འཇིགས་པ་བྱིན་པའི་རི་དྭགས་དག་ཀྱང་དེ་ན་གནས་པས་དེ་ཕྱིན་ཆད་རི་དྭགས་ཀྱི་ནགས་ཞེས་བྱ་བའང་རི་དྭགས་ཀྱི་ནགས་རི་དྭགས་ཀྱི་ནགས་ཞེས་མིང་དུ་ཆགས་པར་གྱུར་ཏོ། །དགེ་སློང་དག་།དེ་ལྟར་བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ན་འདུག་པ་ནི་རྣམ་པར་བལྟ་པ་ཆེན་པོ་བཞི་ལ་རྣམ་པར་ལྟ་སྟེ། བཞི་གང་ཞེ་ན། འདི་ལྟ་སྟེ། དུས་ལ་རྣམ་པར་ལྟ་བ་དང ། གླིང་ལ་རྣམ་པར་ལྟ་བ་དང ། ཡུལ་ལ་རྣམ་པར་ལྟ་བ་དང ། རིགས་ལ་རྣམ་པར་ལྟ་བའོ། །དགེ་སློང་དག་།ཅིའི་ཕྱིར་བྱང་ཆུབ་སེམས་དཔའ་དུས་རྣམ་པར་བལྟ་བ་ལ་རྣམ་པར་ལྟ་ཞེ་ན། བྱང་ཆུབ་སེམས་དཔའ་ནི་ཐོག་མའི་དུས་སེམས་ཅན་འདུ་བའི་ཚེ་མའི་མངལ་དུ་མི་འཇུག་གི་།གང་གི་ཚེ་འཇིག་རྟེན་གསལ་བར་ཀུན་ནས་གནས་པར་གྱུར་ཏེ། སྐྱེ་བ་སྣང་བར་གྱུར། རྒ་བ་སྣང་བར་གྱུར། ན་བ་སྣང་བར་གྱུར། འཆི་བ་སྣང་བར་གྱུར་པ་དེའི་ཚེ་བྱང་ཆུབ་སེམས་དཔའ་མའི་མངལ་དུ་འཇུག་གོ་།དགེ་སློང་དག་།ཅིའི་ཕྱིར་བྱང་ཆུབ་སེམས་དཔའ་གླིང་རྣམ་པར་བལྟ་བ་ལ་རྣམ་པར་ལྟ་ཞེ་ན། བྱང་ཆུབ་སེམས་དཔའ་ནི་མཐའ་འཁོབ་ཀྱི་གླིང་དུ་མི་སྐྱེ། ཤར་གྱི་ལུས་འཕགས་
21a
༄#། །པོར་མི་སྐྱེ། ནུབ་ཀྱི་བ་ལང་སྤྱོད་དུ་མི་སྐྱེ། བྱང་གི་སྒྲ་མི་སྙན་དུ་མི་སྐྱེའོ། །ལྷོའི་འྫམྦུ་གླིང་ཉིད་དུ་སྐྱེའོ། །དགེ་སློང་དག་།ཅིའི་ཕྱིར་བྱང་ཆུབ་སེམས་དཔའ་ཡུལ་རྣམ་པར་བལྟ་བ་ལ་རྣམ་པར་ལྟ་ཞེ་ན། བྱང་ཆུབ་སེམས་དཔའ་ནི་མཐའ་འཁོབ་ཀྱི་ཡུལ་གང་ན་མི་རྣམས་དབང་པོ་རྟུལ་ཞིང་བླུན་ལ་ལུག་ལྟར་ལྐུགས་པའི་རང་བཞིན་ཅན་ལེགས་པར་བསྟན་པ་དང ། ཉེས་པར་བསྟན་པའི་དོན་ཤེས་པར་བྱ་བའི་སྐལ་བ་མེད་པ་དག་ཡོད་པ་དག་ཏུ་མི་སྐྱེའི། བྱང་ཆུབ་སེམས་དཔའ་ནི་ཡུལ་གྱི་དབུས་ཉིད་དུ་སྐྱེའོ། །དགེ་སློང་དག་།ཅིའི་ཕྱིར་བྱང་ཆུབ་སེམས་དཔའ་རིགས་རྣམ་པར་བལྟ་བ་ལ་རྣམ་པར་ལྟ་ཞེ་ན། བྱང་ཆུབ་སེམས་དཔའ་ནི་རིགས་དམའ་བ་གདོལ་བའི་རིགས་སམ། སྨྱིག་མ་མཁན་གྱི་རིགས་སམ། ཤིང་རྟ་མཁན་གྱི་རིགས་སམ། གཡུང་རིགས་སུ་མི་སྐྱེའི། བྲམ་ཟེའི་རིགས་སམ། རྒྱལ་རིགས་ཁོ་ན་སྟེ། རིགས་གཉིས་སུ་སྐྱེའོ། །དེ་ལ་གང་གི་ཚེ་བྲམ་ཟེའི་རིགས་བཙུན་པར་བྱ་བ་དེའི་ཚེ་བྲམ་ཟེའི་རིགས་སུ་སྐྱེའོ། །གང་གི་ཚེ་རྒྱལ་རིགས་བཙུན་པར་བྱ་བ་དེའི་ཚེ་རྒྱལ་རིགས་སུ་སྐྱེ་སྟེ། དགེ་སློང་དག་།ད་ལྟར་ནི་རྒྱལ་རིགས་བཙུན་པར་བྱ་བས། དེའི་ཕྱིར་བྱང་ཆུབ་སེམས་དཔའ་རྒྱལ་རིགས་སུ་སྐྱེ་སྟེ། དགེ་སློང་དག་།དོན་གྱི་དབང་དེ་ལ་བརྟེན་
21b
ནས་བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ན་གནས་པ་རྣམ་པར་བལྟ་བ་ཆེན་པོ་བཞི་ལ་རྣམ་པར་ལྟ་སྟེ། དེ་ལྟར་བལྟས་ནས་ཅང་མི་ཟེར་བར་གྱུར་ཏོ། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ།། །།བམ་པོ་གཉིས་པ། དགེ་སློང་དག་།དེ་ལྟར་ལྷའི་བུ་དེ་དག་དང ། བྱང་ཆུབ་སེམས་དཔའ་དེ་དག་གཅིག་ལ་གཅིག་འདི་སྐད་དུ། བྱང་ཆུབ་སེམས་དཔའ་རིགས་རིན་པོ་ཆེ་ནི་ཇི་ལྟ་བུ་ཞིག་ཏུ་སྐྱེ་བར་འགྱུར། ཡུམ་ནི་ཇི་ལྟ་བུ་ཞིག་གི་ལྷུམས་སུ་འཇུག་པར་འགྱུར་ཞེས་འདྲིའོ། །དེ་ལ་ལ་ལ་ན་རེ། ཡུལ་མ་ག་དྷ་ན་ལུས་འཕགས་ཀྱི་རིགས་འདི་འབྱོར་ཅིང་རྒྱལ་ལ་ལོ་ལེགས་པ་དང ། བདེ་བ་དང་ལྡན་པ་ཡིན་ཏེ། དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ། དེ་ནི་ཚུལ་དང་མཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་དེ་ནི་མའི་རྒྱུད་ཀྱིས་དག་པའང་མ་ཡིན། ཕའི་རྒྱུད་ཀྱིས་དག་པའང་མ་ཡིན་ལ། བསོད་ནམས་ཆུང་དུས་བྱུང་གི་།བསོད་ནམས་རྒྱ་ཆེན་པོས་མངོན་པར་བྱུང་བ་མ་ཡིན་ཞིང ། རྒོད་ལ་མི་བརྟན་ཏེ་མི་གནས་པ་ཡིན་ལ། ཡུལ་དེའང་ཉེ་འཁོར་གསེག་མས་གང་བ། སྐྱེད་མོས་ཚལ་དང ། མཚོ་དང ། མཚེའུ་དག་ཀྱང་མི་མངལ། རི་བྲག་ལྟར་མཐའ་འཁོབ་ཀྱི་གནས་སུ་གྱུར་པ་སྟེ། དེའི་ཕྱིར་དེ་ནི་ཚུལ་དང་མཐུན་བ་མ་ཡིན་ནོ། །
22a
༄#། །ཞེས་ཟེར་རོ། །ལ་ལ་ན་རེ། ཀོ་ས་ལའི་རིགས་འདི་འཁོར་མང་ཞིང་བཞོན་པ་མང་ལ་ནོར་ཆེ་བ་སྟེ། དེ་ནི་བྱང་ཆུབ་སེམས་དཔའ་ཡུལ་གྱི་ལྷུངས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ། དེའང་ཚུལ་དང་མཐུན་པར་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་ཀོ་ས་ལའི་རིགས་ནི་གདོལ་བའི་རིགས་ལས་ཤི་འཕོས་ནས་སྐྱེས་པ་ཡིན་ཏེ། ཕ་དང་མས་དག་པའང་མ་ཡིན་ལ། དམའ་བ་ལ་མོས་པ་སྟེ། རིགས་མཐོ་བར་ཡང་མི་བྱ། ནོར་དང་རིན་པོ་ཆེའི་གཏེར་ཡང་ཚད་མེད་པར་ཕུན་སུམ་ཚོགས་པ་མ་ཡིན་ཏེ། དེའི་ཕྱིར་དེ་ནི་ཚུལ་དང་མཐུན་པ་མ་ཡིན་ནོ་ཞེས་ཟེར་རོ། །ལ་ལ་ན་རེ། རྒྱལ་པོ་བད་སའི་རིགས་འདི་འབྱོར་ཅིང་རྒྱས་ལ་ལོ་ལེགས་པ་དང ། བདེ་བ་དང་ལྡན་པ་ཡིན་ཏེ། དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ ། །ཞེས་ཟེར་རོ། །ལ་ལ་ན་རེ། དེའང་དེའི་ཚུལ་དང་མཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་རྒྱལ་པོ་བད་སའི་རིགས་ནི་ཕལ་པ་སྟེ། གཏུམ་ལ་གཟི་བརྗིད་འབར་བའང་མ་ཡིན་ཞིང ། སྐྱེས་པ་གཞན་ལས་སྐྱེ་བ་གྲུབ་པ། ཕ་མ་ཉིད་ཀྱི་གཟི་བརྗིད་ཀྱི་ལས་ཀྱིས་གྲུབ་པ་མ་ཡིན་ལ། དེའི་རྒྱལ་པོའང་ཆད་པར་སྨྲ་བ་སྟེ། དེའི་ཕྱིར་དེའང་ཚུལ་དང་མཐུན་པ་མ་ཡིན་ནོ་ཞེ་ཟེར་
22b
རོ། །ལ་ལ་ན་རེ། གྲོང་ཁྱེར་ཆེན་པོ་ཡངས་པ་ཅན་འདི་ནི་འབྱོར་ཅིང་རྒྱས་ལ་ལོ་ལེགས་པ་དང ། བདེ་བ་དང་ལྡན་པ་ཡིན་ཏེ། ཉམས་དགའ་ལ་སྐྱེ་བོ་མང་པོ་དང་མིས་ཀུན་ཏུ་གང་བ།་སྟེགས་བུ་དང ། བ་གམ་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁང་བཟང་དག་གིས་ལེགས་པར་བརྒྱན་པ་སྟེ། མེ་ཏོག་གི་ར་བ་དང ། ནགས་ཚལ་གྱི་ཕྲེང་བ་མེ་ཏོག་ཀུན་ཏུ་རྒྱས་པ་དང་ལྡན་པ་ཡིན་ལ། ལྷའི་ཕོ་བྲང་དང་འདྲ་བ་ཡིན་ཏེ། དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ ། །ཞེས་ཟེར་རོ། །ལ་ལ་ན་རེ། དེའང་ཚུལ་དང་མཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་དེ་དག་ལ་ནི་ཕན་ཚུན་དུ་རིགས་པར་སྨྲ་བ་མེད་དོ། །ཆོས་སྤྱོད་པ་མེད་དོ། །གོང་མ་དང ། བར་མ་དང ། རྒན་པ་དང ། གཙོ་བོ་དག་ལའང་རིམ་གྲོར་བྱ་བ་མེད་ཅིང ། རེ་རེ་ཞིང་ཡང་འདི་སྙམ་དུ་བདག་ནི་རྒྱལ་པོའོ། །བདག་ནི་རྒྱལ་པོའི་སྙམ་སུ་སེམས་པས་སློབ་མར་ཁས་ལེན་པ་མེད་ཅིང ། ཆོས་ཁམས་ལེན་པ་མེད་པ་སྟེ། དེའི་ཕྱིར་དེའང་ཚུལ་དང་མཐུན་པ་མ་ཡིན་ནོ་ཞེས་ཟེར་རོ། །ལ་ལ་ན་རེ། གྲོང་ཁྱེར་འཕགས་རྒྱལ་ན་རབ་སྣང་གི་རིགས་འདི་ནི་དཔུང་ཆེ་ཞིང་བཞོན་པ་མང་བ། ཕ་རོལ་གྱི་གཡུལ་ངོར་རྒྱལ་བ་ཐོབ་པ་ཡིན་ཏེ། དེ་ནི་བྱང་ཆུབ་སེམས་
23a
༄#། །དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ། དེའང་ཚུལ་དང་མཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་དེ་དག་ནི་ཁྲོ་ཞིང་གཏུམ་ལ་བརླང་ཞིང་གཟུ་ལུམས་ཅན་རྒོད་པ་སྟེ། ལས་ཡོད་པར་ལྟ་བའང་མ་ཡིན་པས། དེའི་ཕྱིར་དེའང་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་ཀྱི་འོས་མ་ཡིན་ནོ་ཞེས་ཟེར་རོ། །ལ་ལ་ན་རེ། གྲོང་ཁྱེར་བཅོམ་བརླག་འདི་འབྱོར་ཅིང་རྒྱས་ལ་ལོ་ལེགས་པ་དང ། བདེ་བ་དང་ལྡན་པ། སྐྱེ་བོ་མང་པོ་དང་མིས་ཀུན་ཏུ་གང་བ་ཡིན་པས། རྒྱལ་པོ་ལག་བཟང་སྡེ་དཔའ་བའི་བདག་པོའི་རྒྱལ་པོའི་ཕོ་བྲང་དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ། དེའང་ཚུལ་དང་མཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་རྒྱལ་པོ་དེ་ནི་ལོག་པར་ལྟ་བའི་རིགས་ཀྱི་རྒྱུད་དུ་སྐྱེས་པ་སྟེ། མི་རྒོད་དང་འདྲ་བའི་རྒྱལ་པོ་ཡིན་པས་བྱང་ཆུབ་སེམས་དཔའ་སྲིད་པ་ཐ་མ་པ་ནི་ལོག་པར་ལྟ་བའི་རིགས་སུ་སྐྱེ་བར་མི་རིགས་ཏེ། དེའི་ཕྱིར་དེའང་ཚུལ་དང་མཐུན་པ་མ་ཡིན་ནོ་ཞེས་ཟེར་རོ། །ལ་ལ་ན་རེ། གྲོང་ཁྱེར་ཧ་སྟི་ན་པུ་ར་འདིའི་རྒྱལ་པོ་ནི་སྐྱ་བ་སེང་གི་བུའི་རིགས་ཀྱི་རྒྱུད་ལས་སྐྱེས་པ། དཔའ་ཞིང་རྟུལ་ཕོད་པ་
23b
དང་ལྡན་པ། ཡན་ལག་མཆོག་གི་གཟུགས་ཕུན་སུམ་ཚོགས་པ་གཞན་གྱི་སྡེ་འཇོམས་པ་སྟེ། རིགས་དེ་ནི་བྱང་ཆུབ་སེམས་དཔའ་དེ་ཡུམ་གྱི་ལྷུམས་སུ་འཇུག་པའི་གནས་ཀྱི་འོས་ཡིན་ནོ་ཞེས་ཟེར་རོ། །ལ་ལ་ན་རེ། དེའང་ཚུལ་དང་མཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་སྐྱ་བསེང་གི་བུའི་རིགས་སུ་སྐྱེས་པ་དག་གིས་ནི་རིགས་ཀྱི་རྒྱུད་རྣམ་པར་འཁྲུགས་པར་བྱས་ཏེ། གཡུལ་ངོར་བརྟན་པ་ལ་ནི་ཆོས་ཀྱི་བུ་ཞེས་ཟེར། འཇིགས་སྡེ་ལ་ནི་རླུང་གི་བུ་ཞེས་ཟེར། སྲིད་སྒྲུབ་ལ་ནི་དབང་པོའི་བུ་ཞེས་ཟེར། རིགས་མེད་དང ། ལྷར་བཅས་ལ་ནི་ཐ་སྐར་གྱི་བུ་ཞེས་ཟེར་ཏེ། དེའི་ཕྱིར་རིགས་དེའང་བྱང་ཆུབ་སེམས་དཔའ་དེ་ལྷུམས་སུ་འཇུག་པའི་གནས་ཀྱི་འོས་མ་ཡིན་ནོ་ཞེས་ཟེར་རོ། །ལ་ལ་ན་རེ། གྲོང་ཁྱེར་བཅོམ་བརླག་འདི་ནི་ཤིན་ཏུའང་ཉམས་དགའ་ཞིང་ཕན་ཚུན་འབྱོར་གྱི་སྙེད་དུ་རྒྱལ་པོ་བཟང་པོའི་བཤེས་གཉེན་བཞུགས་པའི་སའང་ཡིན་ལ།་རྒྱལ་པོད་དེའང་གླང་པོ་དང ། རྟ་དང ། ཤིང་རྟ་དང ། དཔུང་བུ་ཆུང་དང ། དཔུང་གི་ཚོགས་མང་པོ་དང་ལྡན་པ། གསེར་དང ། དངུལ་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང ། མན་ཤེལ་དང ། བྱི་རུ་དང ། ས་ལེ་སྦྲམ་དང ། ནོར་དང ། ཡོ་བྱད་ཤིན་ཏུ་མང་བ། རྒྱལ་པོ་དང་བློན་པོ་ཐམས་ཅད་ཀྱིས་ཟིལ་གྱིས་མི་ནོན་པའི་སྟོབས་
24a
༄#། །དང ། ཕ་རོལ་གནོན་པ་དང་ལྡན་པ། མཛའ་བ་དང་ལྡན་ཞིང་ཆོས་ལ་དགའ་བ་སྟེ། རིགས་དེ་ནི་བྱང་ཆུབ་སེམས་དཔའ་དེ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ། དེའང་ཚུལ་དང་མཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། རྒྱལ་པོ་བཟང་པོའི་བཤེས་གཉེན་ཡོན་ཏན་དེ་ལྟ་བུ་དང་ལྡན་པ་དེ་ཡོད་མོད་ཀྱི།་དེ་ནི་ཤིན་ཏུ་རྒས་བས་བུ་སྐྱེད་པའི་མཐུའང་མེད་ལ། བུའང་མང་བས་དེའི་ཕྱིར་རིགས་དེའང་བྱང་ཆུབ་སེམས་དཔའ་དེ་ཡུམ་གྱི་ལྷུམས་སུ་འཇུག་པའི་གནས་ཀྱི་འོས་མ་ཡིན་ནོ་ཞེས་ཟེར་རོ། །དེ་ལྟར་བྱང་ཆུབ་སེམས་དཔའ་དེ་དག་དང ། ལྷ་དེ་དག་གིས་ཛམྦུའི་གླིང་གི་ཡུལ་ཆེན་པོ་བཅུ་དྲུག་པོ་ཐམས་ཅད་ན་རྒྱལ་པོའི་རིགས་མཐོན་པོ་མཐོན་པོའི་རིགས་གང་ཇི་སྙེད་ཅིག་ཡོད་པ་དེ་དག་ཐམས་ཅད་ལ་བལྟས་ན། ཐམས་ཅད་ཀྱང་ཉེས་པ་དང་བཅས་པར་མཐོང་སྟེ། དེ་དག་དེ་ལྟར་སེམས་པའི་ཡིད་ལ་བྱེད་པའི་ཚེ་ལྷའི་བུ་ཡེ་ཤེས་ཏོག་གི་རྒྱལ་མཚན་ཞེས་བྱ་བ་བྱང་ཆུབ་ལས་ཕྱིར་མི་ལྡོག་པ། ཐེག་པ་ཆེན་པོ་འདི་ལ་ངེས་པར་གྱུར་པ་ཞིག་ཡོད་པ་དེས་བྱང་ཆུབ་སེམས་དཔའི་འཁོར་དང ། ལྷའི་འཁོར་ཆེན་པོ་ཡོད་པ་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་ཚུར་ཤོག་།བྱང་ཆུབ་སེམས་དཔའ་དེ་ཉིད་ཀྱི་དྲུང་དུ་དོང་སྟེ། རིགས་རིན་པོ་ཆེ་ཡོན་ཏན་ཇི་ལྟ་
24b
བུར་ཕུན་སུམ་ཚོགས་པ་ཞིག་ཏུ་སྲིད་པ་ཐ་མ་པའི་བྱང་ཆུབ་སེམས་དཔའ་སྐྱེ་བར་འགྱུར་བ་དྲིའོ་ཞེས་སྨྲས་པ་དང ། ལེགས་སོ། །ཞེས་ཏེ། དེ་དག་ཐམས་ཅད་ཀྱང་ཐལ་མོ་སྦྱར་ནས་བྱང་ཆུབ་སེམས་དཔའི་དྲུང་དུ་ཕྱིན་ཏེ་དྲིས་པ། སྐྱེས་བུ་དམ་པ། རིགས་རིན་པོ་ཆེ་ཡོན་ཏན་ཕུན་སུམ་ཚོགས་པ་ཇི་ལྟ་བུ་ཞིག་ཏུ་བྱང་ཆུབ་སེམས་དཔའ་སྲིད་པ་ཐ་མ་པ་སྐྱེ་བར་འགྱུར། དེ་ནས་བྱང་ཆུབ་སེམས་དཔས་བྱང་ཆུབ་སེམས་དཔའི་ཚོགས་ཆེན་པོ་དང ། ལྷའི་ཚོགས་ཆེན་པོ་དེ་དག་ལ་རྣམ་པར་བལྟས་ཏེ་འདི་སྐད་ཅེས་སྨྲས་སོ། །གྲོགས་པོ་དག་།བྱང་ཆུབ་སེམས་དཔའ་སྲིད་པ་ཐ་མ་པ་གང་དུ་སྐྱེ་བར་འགྱུར་བའི་རིགས་དེ་ནི་རྣམ་པ་དྲུག་ཅུ་རྩ་བཞི་ཕུན་སུམ་ཚོགས་པ་ཡིན་ཏེ། དྲུག་ཅུ་རྩ་བཞི་གང་ཞེ་ན། འདི་ལྟ་སྟེ།་རིགས་དེ་ནི། བཙུན་པ་ཡིན། རིགས་དེ་ནི་ཀུན་གྱིས་མངོན་པར་ཤེས་པ་ཡིན། རིགས་དེ་ནི་ཕྲན་ཚེགས་མེད་ཅིང་གནོད་པར་བྱེད་པ་མེད་པ་ཡིན། རིགས་དེ་ནི་རྒྱུད་ཕུན་སུམ་ཚོགས་པ་ཡིན། རིགས་དེ་ནི་ཆོ་འབྲང་ཕུན་སུམ་ཚོགས་པ་ཡིན། རིགས་དེ་ནི་སྐྱེས་བུ་ཟུང་ཕུན་སུམ་ཚོགས་པ་ཡིན། རིགས་དེ་ནི་སྔོན་གྱི་སྐྱེས་བུ་ཟུང་ཕུན་སུམ་ཚོགས་པ་ཡིན། རིགས་དེ་ནི་བཙུན་པའི་སྐྱེས་བུ་ཟུང་ཕུན་སུམ་ཚོགས་པ་ཡིན། རིགས་དེ་ནི་ཀུན་གྱིས་མངོན་པར་ཤེས་པའི་སྐྱེས་བུ་ཟུང་ཕུན་སུམ་ཚོགས་པ་ཡིན།
25a
༄#། །རིགས་དེ་ནི་དབང་ཆེ་བར་གྲགས་པའི་སྐྱེས་བུ་ཟུང་ཕུན་སུམ་ཚོགས་པ་ཡིན། རིགས་དེ་ནི་སྐྱེས་པ་མང་བ་ཡིན། རིགས་དེ་ནི་བུད་མེད་མང་བ་ཡིན།་རིགས་དེ་ནི་འཇིགས་པ་མེད་པ་ཡིན། རིགས་དེ་ནི་དམན་པ་མེད་ཅིང་ཞུམ་པ་མེད་པ་ཡིན། རིགས་དེ་ནི་བརྐམ་པ་མེད་པ་ཡིན། རིགས་དེ་ནི་ཚུལ་ཁྲིམས་དང་ལྡན་བ་ཡིན། རིགས་དེ་ནི་ཤེས་རབ་དང་ལྡན་པ་ཡིན། རིགས་དེ་ནི་བློན་པོས་བལྟ་ཞིང་ལོངས་སྤྱོད་ལ་སྤྱོད་པ་ཡིན། རིགས་དེ་ནི་བཟོ་དོན་ཡོད་པས་བཤམས་ཤིང་ལོངས་སྤྱོད་ལ་སྤྱོད་པ་ཡིན། རིགས་དེ་ནི་མཛའ་བ་བརྟན་པ་ཡིན། རིགས་དེ་ནི་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་ཀྱི་སྲོག་ལ་ལྟ་བ་ཡིན། རིགས་དེ་ནི་བྱས་པ་གཟོ་བ་དང་ལྡན་པ་ཡིན། རིགས་དེ་ནི་བརྟུལ་ཞུགས་ཤེས་པ་ཡིན། རིགས་དེ་ནི་འདུན་པས་མི་འགྲོ་བ་ཡིན། རིགས་དེ་ནི་ཞེ་སྡང་གིས་མི་འགྲོ་བ་ཡིན། རིགས་དེ་ནི་གཏི་མུག་གིས་མི་འགྲོ་བ་ཡིན། རིགས་དེ་ནི་འཇིགས་པས་མི་འགྲོ་བ་ཡིན། རིགས་དེ་ནི་ཁ་ན་མ་ཐོ་བས་འཇིགས་པ་ཡིན། རིགས་དེ་ནི་གཏི་མུག་ལ་མི་གནས་པ་ཡིན། རིགས་དེ་ནི་ལག་སྦབས་ཆེ་བ་ཡིན། རིགས་དེ་ནི་བྱ་བ་ལ་མོས་པ་ཡིན། རིགས་དེ་ནི་གཏོང་བ་ལ་མོས་པ་ཡིན། རིགས་དེ་ནི་སྦྱིན་པ་ལ་མོས་
25b
བ་ཡིན།་རིགས་དེ་ནི་ཞོ་ཤ་ཤེས་པ་ཡིན། རིགས་དེ་ནི་རྩལ་བརྟན་པ་ཡིན། རིགས་དེ་ནི་མཐུ་རྩལ་དང་ལྡན་པ་ཡིན། རིགས་དེ་ནི་རྩལ་མཆོག་དང་ལྡན་པ་ཡིན། རིགས་དེ་ནི་དྲང་སྲོང་མཆོད་པ་ཡིན། རིགས་དེ་ནི་ལྷ་མཆོད་པ་ཡིན། རིགས་དེ་ནི་མཆོད་རྟེན་མཆོད་པ་ཡིན། རིགས་དེ་ནི་མཚུན་རྗེད་པ་ཡིན། རིགས་དེ་ནི་འཁོན་དུ་འཛིན་པ་མེད་པ་ཡིན། རིགས་དེ་ནི་ཕྱོགས་བཅུར་སྒྲ་གྲགས་པ་ཡིན། རིགས་དེ་ནི་འཁོར་ཆེན་པོ་དང་ལྡན་པ་ཡིན། རིགས་དེ་ནི་འཁོར་མི་ཕྱེད་པ་དང་ལྡན་པ་ཡིན། རིགས་དེ་ནི་བླ་ན་མེད་པའི་འཁོར་དང་ལྡན་པ་ཡིན། རིགས་དེ་ནི་རིགས་ཀྱི་ནང་ན་གཙོ་བོར་བྱ་བ་ཡིན། རིགས་དེ་ནི་རིགས་ལ་དབང་ཐོབ་པ་ཡིན། རིགས་དེ་ནི་དབང་ཆེ་བར་གྲགས་པ་ཡིན།་རིགས་དེ་ནི་ཕར་འཛིན་པ་ཡིན། རིགས་དེ་ནི་མར་འཛིན་པ་ཡིན། རིགས་དེ་ནི་དགེ་སྦྱོང་དུ་འཛིན་པ་ཡིན། རིགས་དེ་ནི་བྲམ་ཟེར་འཛིན་པ་ཡིན། རིགས་དེ་ནི་ནོར་དང་འབྲུའི་བང་མཛོད་མང་བ་ཡིན། རིགས་དེ་ནི་དབྱིག་དང ། གསེར་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང་མན་ཤེལ་དང ། བྱི་རུ་དང ། ས་ལེ་སྦྲམ་དང ། དངུལ་དང ། རྫས་དང ། ཡོ་བྱད་མང་བ་ཡིན། རིགས་དེ་ནི་གླང་པོ་ཆེ་དང ། རྟ་དང ། རྔ་མོང་དང ། བ་ལང་དང ། ལུག་ཤིན་ཏུ་མང་བ་ཡིན། རིགས་དེ་ནི་བྲན་ཕོ་དང །
26a
༄#། །བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་ཤིན་ཏུ་མང་བ་ཡིན། རིགས་དེ་ནི་ཐུབ་པར་དཀའ་བ་ཡིན། རིགས་དེ་ནི་དོན་ཐམས་ཅད་གྲུབ་པ་ཡིན།་རིགས་དེ་ནི་འཁོར་ལོས་སྒྱུར་བའི་རིགས་ཀྱི་རྒྱུད་དུ་སྐྱེས་པ་ཡིན། རིགས་དེ་ནི་སྔོན་གྱི་དགེ་བའི་རྩ་བའི་གྲོགས་ཀྱིས་བསྐྱེད་པ་ཡིན། རིགས་དེ་ནི་བྱང་ཆུབ་སེམས་དཔའི་རིགས་སུ་རིགས་བཙུན་པར་སྐྱེས་པ་ཡིན། རིགས་དེ་ནི་འཇིག་རྟེན་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེའི་སྐྱེ་རྒུ་དང་བཅས་པའི་ནང་ན་རིགས་ལས་སྨོས་པའི་སྐྱོན་གྱི་ཁ་ན་མ་ཐོ་བ་ཐམས་ཅད་དང་བྲལ་བ་སྟེ། གྲོགས་པོ་དག་།གང་དུ་བྱང་ཆུབ་སེམས་དཔའ་སྲིད་པ་ཐ་མ་པ་འབྱུང་བར་འགྱུར་བའི་རིགས་དེ་ནི།་རྣམ་པ་དྲུག་ཅུ་རྩ་བཞི་པོ་དེ་དག་དང་ལྡན་པ་ཡིན་ནོ། །གྲོགས་པོ་དག་།སྲིད་པ་ཐ་མ་པའི་བྱང་ཆུབ་སེམས་དཔའ་བུད་མེད་གང་གི་མངལ་དུ་འཇུག་པར་འགྱུར་བའི་བུད་མེད་དེ་ནི་ཡོན་ཏན་གྱི་རྣམ་པ་སུམ་ཅུ་རྩ་གཉིས་དང་ལྡན་པ་ཡིན་ཏེ། སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་སྲིད་པ་ཐ་མ་པ་ནི་ཀུན་གྱིས་མངོན་པར་ཤེས་པའི་བུད་མེད་ཀྱི་མངལ་དུ་འཇུག་གོ་།ཀུན་གྱིས་མངོན་པར་རིག་པ་དང ། སྤྱོད་པ་ལ་གླགས་མི་ཐོད་པ་དང ། རིགས་ཕུན་སུམ་ཚོགས་པ་
26b
དང ། ཆོ་འབྲང་ཕུན་སུམ་ཚོགས་པ་དང ། གཟུགས་ཕུན་སུམ་ཚོགས་པ་དང ། མིང་ཕུན་སུམ་ཚོགས་པ་དང ། ཆུ་ཞེང་ཕུན་སུམ་ཚོགས་པ་དང ། སྔོན་ཆད་མ་བཙས་པ་དང ། ཚུལ་ཁྲིམས་ཕུན་སུམ་ཚོགས་པ་དང ། གཏོང་བ་ཕུན་སུམ་ཚོགས་པ་དང ། བཞིན་འཛུམ་པ་དང ། མཐུན་པར་འཛིན་པ་དང ། གསལ་བ་དང ། དུལ་བ་དང ། འཇིགས་པ་མེད་པ་དང ། མང་དུ་ཐོས་པ་དང ། མཁས་པ་དང ། སྒྱུ་མེད་པ་དང ། གཡོ་མེད་པ་དང ། མི་ཁྲོ་བ་དང ། ཕྲག་དོག་མེད་པ་དང ། སེར་སྣ་མེད་པ་དང ། མི་རྒོད་པ་དང ། མི་གཡེང་བ་དང ། ཅ་ཅོ་མེད་པ་དང ། བཟོད་ཅིང་དེས་པ་དང་ལྡན་པ་དང ། ངོ་ཚ་ཤེས་ཤིང་ཁྲེལ་ཡོད་པ་དང ། འདོད་ཆགས་དང ། ཞེ་སྡང་དང ། གཏི་མུག་གི་ཤས་ཆུང་བ་དང ། བུད་མེད་ཀྱི་སྐྱོན་དང་བྲལ་བ་དང ། ཁྱིམ་ཐབ་ཀྱི་བརྟུལ་ཞུགས་དང་ལྡན་པ་དང ། ཡོན་ཏན་ཐམས་ཅད་ཕུན་སུམ་ཚོགས་པའི་བུད་མེད་ཀྱི་མངལ་དུ་བྱང་ཆུབ་སེམས་དཔའ་སྲིད་པ་ཐ་མ་པ་འཇུག་གོ་།གྲོགས་པོ་དག་།བྱང་ཆུབ་སེམས་དཔའ་སྲིད་པ་ཐ་མ་པ་བུད་མེད་གང་གི་མངལ་དུ་འཇུག་པའི་བུད་མེད་དེ་ནི་ཡོན་ཏན་གྱི་རྣམ་པ་སུམ་ཅུ་རྩ་གཉིས་པོ་དེ་དག་དང་ལྡན་པ་ཡིན་ནོ། །གྲོགས་པོ་དག་།བྱང་ཆུབ་སེམས་དཔའ་ནི་ཟླ་བ་མར་གྱི་ངོ་ལ་མའི་མངལ་དུ་མི་འཇུག་གི་།བྱང་ཆུབ་སེམས་དཔའ་སྲིད་པ་ཐ་མ་བ་ནི་ཟླ་བ་ཡར་གྱི་ཚེས་བཅོ་ལྔའི་ཟླ་བ་ཉ་སྟེ་རྒྱས་པ་ལ་
27a
༄#། །སྐར་མ་རྒྱལ་དང་ལྡན་པའི་ཚེ། མ་གསོ་སྦྱོང་བླངས་པའི་མངལ་དུ་འཇུག་གོ་།དེ་ནས་བྱང་ཆུབ་སེམས་དཔའ་དེ་དག་དང ། ལྷའི་བུ་དེ་དག་གིས་བྱང་ཆུབ་སེམས་དཔའ་ལས་རིགས་ཡོངས་སུ་དག་པ་དང ། མ་ཡོངས་སུ་དག་པའི་རྣམ་པ་དེ་ལྟ་བུ་དེ་དག་ཐོས་ནས་འདི་སྙམ་དུ་སེམས་ཏེ། སྐྱེས་བུ་དམ་པ་འདི་རྣམ་པ་ཇི་སྙེད་དུ་བསྟན་པ་དེ་ལྟ་བུའི་ཡོན་ཏན་དང་ལྡན་པའི་རིགས་དེ་གང་ཞིག་ལ་ཡོད་སྙམ་དུ་སེམས་སོ། །དེ་ལྟར་སེམས་ཤིང་ཡིད་ལ་བྱེད་པ་ལ་ཞུགས་བ་ན། དེ་དག་འདི་སྙམ་སྟེ། ཤཱཀྱའི་གྲོང་ཁྱེར་འདི་འབྱོར་ཅིང་རྒྱས་ལ་བདེ་ཞིང་ལོ་ལེགས་པ་དང་ལྡན་ཏེ། ཉམས་དགའ་ཞིང་སྐྱེ་བོ་མང་པོ་དང་མིས་གང་བ་ཡིན་ལ། རྒྱལ་པོ་ཟས་གཙང་མའང་མའི་རྒྱུད་ཀྱིས་དག་པ། ཕའི་རྒྱུད་ཀྱིས་དག་པ། ཆུང་མ་དག་པ་དང་ལྡན་པ། ལས་ཀྱི་མཐའ་ལ་ཉོན་མོངས་པ་མེད་པ། དཔེ་བྱད་བཟང་པ། ཤིན་ཏུ་མཛངས་པ། བསོད་ནམས་ཀྱི་གཟི་བརྗིད་དང་ལྡན་པ། གྲགས་པ་ཆེན་པོའི་རིགས་སུ་སྐྱེས་བ། འཁོར་ལོས་བསྒྱུར་བའི་རིགས་ཀྱི་རྒྱུད་དུ་སྐྱེས་པ། ནོར་དང ། གཏེར་དང ། རིན་པོ་ཆེ་དཔག་ཏུ་མེད་པ་དང་ལྡན་པ། ལས་ཡོད་པར་ལྟ་བ།་སྡིག་པའི་ལྟ་བ་མེད་པ། ཤཱཀྱའི་ཡུལ་ཀུན་ནའང་རྒྱལ་པོ་དེ་གཅིག་པུར་ཟད་དེ། ཚོང་དཔོན་དང ། ཁྱིམ་བདག་དང ། བློན་པོ་དང ། འཁོར་གྱི་མི་ཐམས་ཅད་ཀྱིས་རིམ་
27b
གྲོར་བྱ་ཞིང་མཆོད་པ། མཛེས་པ། བལྟ་ན་སྡུག་པ། ཧ་ཅང་ཡང་མི་རྒ་ན། ཧ་ཅང་ཡང་མི་གཞོན་ཞིང་གཟུགས་མཛེས་ལ་ཡོན་ཏན་ཐམས་ཅད་དང་ལྡན་པ། བཟོ་ཤེས་པ། དུས་ཤེས་པ།་བདག་ཤེས་པ། ཆོས་ཤེས་པ། སེམས་ཤེས་པ། འཇིག་རྟེན་ཤེས་པ། མཚན་ཤེས་པ། ཆོས་ཀྱི་རྒྱལ་པོ་ཆོས་ཀྱིས་རྗེས་སུ་སྟོན་པའོ། །སེར་སྐྱའི་གནས་ཀྱི་གྲོང་ཁྱེར་ཆེན་པོ་དེ་ནི་སེམས་ཅན་དགེ་བའི་རྩ་བ་སྐྱེད་པ་རྣམས་ཀྱི་གནས་ཏེ། གང་དག་དེར་སྐྱེས་པར་གྱུར་པ་དེ་དག་ཀྱང་དེ་དང་སྐལ་བ་འདྲ་བ་དག་གོ་།རྒྱལ་པོ་ཟས་གཙང་མ་དེ་ལ་ལྷ་མོ་སྒྱུ་འཕྲུལ་ཞེས་བྱ་བ་ཤཱཀྱའི་བདག་པོ་ཤིན་ཏུ་ལེགས་པར་རྟོགས་པ་ཞེས་བྱ་བའི་བུ་མོ་ཞིག་ཡོད་པའང་ཕྱུག་ཅིང་གཞོན་ཞིང་དར་ལ་བབ་པའི་གཟུགས་ཕུན་སུམ་ཚོགས་པ།་སྔོན་ཆད་མ་བཙས་པ། བུ་དང་བུ་མོ་མེད་པ། གཟུགས་མཛེས་པ། བུ་དོན་ལ་བྲིས་པ་ལྟར་བལྟ་ན་སྡུག་པ། ལྷའི་བུ་མོ་ལྟར་རྒྱན་ཐམས་ཅད་ཀྱིས་བརྒྱན་པ། བུད་མེད་ཀྱི་སྐྱོན་རྣམས་དང་བྲལ་བ། བདེན་པར་སྨྲ་བ། མི་དྲག་པ། མི་བརླང་བ། མི་གཅོར་བ། ཁ་ན་མ་ཐོ་བ་མེད་པ། གྱོ་མོའི་སྒྲ་ལྟ་བུ་མེད་པ། ཅ་ཅོ་མེད་པ། འཇམ་ཞིང་སྙན་ལ་ཡིད་དུ་འོང་བར་སྨྲ་བ། མི་དེས་པ་དང ། ཁོང་ཁྲོ་བ་དང ། ང་རྒྱལ་དང ། དྲེགས་པ་དང ། རྒྱགས་པ་དང ། ཁྲོ་བ་མེད་པ། ཕྲག་དོག་མེད་པ། དུས་སུ་སྨྲ་བ། གཏོང་བ་ཕུན་སུམ་ཚོགས་པ།
28a
༄#། །ཚུལ་ཁྲིམས་དང་ལྡན་པ། ཁྱོས་ཆོག་པར་འཛིན་པ། ཁྱིམ་ཐབ་ཀྱི་བརྟུལ་ཞུགས་ཅན། སྐྱེས་པ་གཞན་ལ་བསམ་པའི་ཡིད་ལ་བྱ་བ་དང་བྲལ་བ། མགོ་དང ། རྣ་བ་དང ། སྣ་གནས་སུ་ཕེབས་པ། བུང་བའི་མཆོག་གི་ཁ་དོག་ལྟ་བུའི་སྐྲ་དང་ལྡན་པ། དཔྲལ་བ་ལེགས་པ། སྨིན་ཚུགས་ལེགས་པ། ཁྲོ་གཉེར་མེད་པ། བཞིན་འཛུམ་པ། གསོད་པོར་སྨྲ་བ། འཇམ་ཞིང་སྙན་པའི་ཚིག་དང་ལྡན་པ། མཐུན་པར་འཛིན་པ། དྲང་བ། གྱ་གྱུ་མེད་པ། སྒྱུ་མེད་པ། གཡོ་མེད་པ། ཁྲེལ་ཡོད་ཅིང་ངོ་ཚ་ཤེས་པ།་མི་རྒོད་པ། མི་གཡེང་བ། ཁ་ངན་མི་སྨྲ་བ། འཆལ་བའི་ཚིག་མེད་པ། འདོད་ཆགས་དང ། ཞེ་སྡང་དང ། གཏི་མུག་གི་ཤས་ཆུང་བ། དང་དེས་ཤིང་བཟོད་པ་དང་ལྡན་པ། རྐང་ལག་དང ། མིག་དང ། བློ་ཤིན་ཏུ་བསྲུངས་པ། རྐང་ལག་ཤིན་ཏུ་འཇམ་པ། ཀ་ཙ་ལིནདའི་གོས་ལྟར་རེག་ན་བདེ་བ། པདྨ་གཞོན་ནུའི་འདབ་མ་ལྟར་མིག་ཤིན་ཏུ་རྣམ་པར་དག་པ།་སྣ་དབྱིབས་ལེགས་ཤིང་མདོག་སྡུག་པ། ཡན་ལག་ཤིན་ཏུ་བརྟན་པ། འཇའི་དབྱིབས་ལྟར་ཤིན་ཏུ་འདུད་པ། ཡན་ལག་དང ། ཉིང་ལག་ཤིན་ཏུ་འབྱེས་པ། ཡན་ལག་ལ་སྨད་དུ་མེད་པ། མཆུ་བིམ་པ་ལྟར་དམར་བ། བལྟ་ན་མཛེས་པ། མགུལ་རིམ་བཞིན་དུ་འདུག་པ། རྒྱན་དམ་པ་དང་ལྡན་པ། སྣ་མའི་མེ་ཏོག་དང་བྲྴི་ཀ་ལྟར་སོ་
28b
ཤིན་ཏུ་རྣམ་པར་དག་པ། ཕྲག་པ་ལེགས་པར་བྱིན་གྱིས་འཚམ་པ། རིམ་གྱིས་ལེགས་པར་གྲུབ་པའི་དཔུང་པ་དང་ལྡན་པ། རྐེད་པ་གཞུའི་འཆང་བཟུང་ལྟར་ཕྲ་བ། གཞོགས་ཉམས་པ་མེད་པ། ལྟེ་བ་ཁུང་ཟབ་པ། སྟ་ཟུར་འཇམ་ཞིང་ཡངས་ལ་ཟླུམ་ཞིང་བརྟན་པར་གྲུབ་པ། རྡོ་རྗེ་ལྟར་མཁྲེགས་ཤིང་མཚུངས་པར་མེད་པའི་ལུས་དང་ལྡན་པ། གླང་པོའི་སྣ་ལྟར་མཉམ་ཞིང་ལེགས་པའི་བརླ་དང་ལྡན་པ། བྱིན་པ་རི་དྭགས་ཨེ་ན་ཡའི་ལྟ་བུ། ལག་པ་དང་རྐང་པའི་མཐིལ་རྒྱ་སྐྱེགས་ཀྱི་ཁུ་བ་ལྟར་འདུག་པ། འགྲོ་བའི་མིག་ཏུ་སྡུག་པ།་མིག་གི་དབང་པོ་ཉམས་པ་མེད་པ། ཡིད་དུ་འོང་ཞིང་བལྟ་ན་སྡུག་པ། བུད་མེད་རིན་པོ་ཆེའི་གཟུགས་ལས་ཀྱང་ཁྱད་པར་འཕགས་པ། མཚུངས་པ་མེད་པ། སྒྱུ་འཕྲུལ་སྤྲུལ་པ་ལྟ་བུའི་གཟུགས་སུ་འདུག་པས་སྒྱུ་འཕྲུལ་ཞེས་མིང་གི་བརྡར་བཏགས་པ། སྒྱུ་རྩལ་ལ་མཁས་པ། དགའ་ཚལ་གྱི་ལྷའི་བུ་མོ་ལྟ་བུ་ཞིག་རྒྱལ་པོ་ཟས་གཙང་མའི་བཙུན་མོའི་འཁོར་གྱི་ནང་ན་འདུག་པ་དེ་ནི་བྱང་ཆུབ་སེམས་དཔའི་ཡུལ་དུ་ཚུལ་དང་མཐུན་གྱི། གང་བྱང་ཆུབ་སེམས་དཔས་རིགས་དག་པ་བསྟན་པ་དེ་ནི་ཤཱཀྱའི་རིགས་ཉིད་ལ་སྣང་གི། གཞན་ལ་ནི་མ་ཡིན་ནོ། །དེ་ལ་འདི་སྐད་ཅེས་བྱ་སྟེ། དག་པའི་སེམས་ཅན་ཆོས་མཐོ་ཁང་བཟང་ན། །ཆོས་བཟང་སེངྒེའི་ཁྲི་ལ་རབ་ཏུ་འདུག་།བྱང་ཆུབ་སེམས་
29a
༄#། །དཔའ་གྲགས་ཆེན་ལྡན་པ་དང ། །སྐལ་བ་མཉམ་པའི་ལྷ་རྣམས་དྲང་སྲོང་འཁོར། །དེ་ན་འདུག་ཅིང་དེ་ནི་འདི་སྙམ་སེམས། །རིགས་གང་རྣམ་དག་རབ་ཏུ་ཤེས་དང་ལྡན། །བྱང་ཆུབ་སེམས་དཔའ་སྐྱེ་དང་ཚུལ་མཐུན་གང ། །ཕ་མ་གང་ཞིག་དག་པའི་དངོས་དང་ལྡན། །ཛམྦུའི་གླིང་འདི་ཀུན་ཏུ་རྣམ་བལྟས་ན། །རྒྱལ་རིགས་རྒྱལ་རྒྱུད་ཆེ་བ་གང་ཡིན་པ། །ཀུན་ཀྱང་སྐྱོན་དང་བཅས་པར་རྗེས་བསམ་ནས། །ཤཱཀྱའི་རིགས་ནི་སྐྱོན་དང་བྲལ་བར་མཐོང ། །ཟས་གཙང་རྒྱལ་པོའི་རིགས་ནང་རིགས་དང་ལྡན། ། མི་དབང་རྒྱུད་ན་རྣམ་དག་ཆོ་རིགས་ཅན། །འབྱོར་ཅིང་རྒྱས་ལ་འཁྲུག་པ་མེད་པ་སྟེ། །སྐྱེ་བོ་དམ་པ་ཆོས་ལྡན་རིམ་གྲོ་ཅན། །སེར་སྐྱར་བརྗོད་པའི་གྲོང་ཁྱེར་སེམས་ཅན་གཞན། །ཀུན་ཀྱང་བསམ་པ་རབ་དག་ཆོས་དང་ལྡན། །སྐྱེད་མོས་ཀུན་དགའ་གཞལ་མེད་ཁང་གིས་བརྒྱན། །སྐྱེ་བའི་སར་ནི་སེར་སྐྱར་བརྗོད་པ་མཛེས། །ཀུན་ཀྱང་ཚན་ཆེན་སྟོབས་དང་ལྡན་པ་སྟེ། །གླང་པོ་གཉིས་སམ་གསུམ་གྱི་སྟོབས་ཀྱང་བདོག་།འཕོང་རྩལ་བསླབ་པའི་ཕ་རོལ་མཐར་ཕྱིན་ཀྱང ། །སྲོག་གི་དོན་དུ་གཞན་ལ་གནོད་མི་བྱེད། །ཟས་གཙང་རྒྱལ་པོའི་བུད་མེད་དབེན་པ་སྟེ། །བུད་མེད་དམ་པ་སྟོང་གི་མཆོག་ཏུ་ཕྱིན། །ཡིད་དུ་འོང་བ་སྒྱུ་འཕྲུལ་སྤྲུལ་པའི་གཟུགས། །དེ་ཡི་མིང་ཡང་ལྷ་མོ་སྒྱུ་འཕྲུལ་ཏེ། །
29b
མཛེས་པའི་གཟུགས་འཆང་ལྷ་ཡི་བུ་མོ་བཞིན། །འབྱེས་པའི་ལུས་ལྡན་ཡན་ལག་དྲི་མེད་སྡུག་།ལྷ་དང་མི་རྣམས་གང་ཡང་རུང་བ་དག་།སྒྱུ་འཕྲུལ་མཐོང་ན་གང་ངོམས་དེ་མེད་ཀྱང་འདོད་ཆགས་ཞེན་མེད་སྡང་བས་ཞེ་སྡང་མེད། །དེ་ནི་འཇམ་སྙན་དྲང་བའི་ངག་དང་ལྡན། །མི་བརླང་མི་རྩུབ་ཤིན་ཏུ་དེས་པ་སྟེ། །དེ་ནི་བཞིན་འཛུམ་ཁྲོ་གཉེར་རབ་ཏུ་སྤངས། །ངོ་ཚ་ཁྲེལ་ཡོད་ཆོས་སྤྱོད་ལྡན་པ་སྟེ། །ང་རྒྱལ་མེད་ཅིང་མ་ཁེངས་རྒོད་པ་མེད། །ཕྲག་དོག་མེད་ཅིང་སྒྱུ་དང་གཡོ་མེད་དེ། །གཏོང་ལ་དགའ་ཞིང་རྟག་ཏུ་བྱམས་སེམས་ལྡན། །ལས་ཡོད་ལྟ་ཞིང་ལོག་པའི་སྦྱོར་བ་སྤངས། །བདེན་ལ་གནས་ཤིང་ལུས་དང་ཡིད་རབ་བསྡམས། །ས་ལ་གང་ཡོད་བུད་མེད་སྐྱོན་མང་ཚོགས། །དེ་དག་ཐམས་ཅད་དེ་ལ་ཡོད་མ་ཡིན། །མི་ཡི་འཇིག་རྟེན་དྲི་ཟའི་འཇིག་རྟེན་ནམ། །ལྷ་ཡི་འཇིག་རྟེན་དག་ན་བུད་མེད་བཞིན། །ལྷ་མོ་སྒྱུ་འཕྲུལ་མཚུངས་མེད་ག་ལ་ལྷག་།དྲང་སྲོང་ཆེན་པོའི་མར་ནི་དེ་འོས་ཏེ། །ཚེ་རབས་ལྔ་བརྒྱ་ཁོ་ནར་ཚང་བར་ཡང ། །དེ་ནི་བྱང་ཆུབ་སེམས་དཔའི་མར་གྱུར་ཏོ། །དེ་དང་དེར་ནི་ཡབ་ཀྱང་ཟས་གཙང་སྟེ། །དེ་ཕྱིར་ཡོན་ཏན་ལྡན་པའི་མ་ཡི་འོས། །དཀའ་ཐུབ་ཅན་ལྟར་དེ་ནི་བརྟུལ་ཞུགས་གནས། །བརྟུལ་ཞུགས་རྗེས་སྤྱོད་རྟག་པར་ཆོས་ཀྱང་སྤྱོད། །རྒྱལ་པོས་གནང་སྟེ་མཆོག་སྦྱིན་ཐོབ་པས་ན། །འདོད་པ་མ་སྤྱད་ཟླ་བ་སུམ་ཅུ་གཉིས། །གང་གི་ཕྱོགས་ན་དེ་འདུག་
30a
༄#། །འགྲེང་བའམ། །ཉལ་ཞིང་འགྲོ་བར་གྱུར་བའི་གནས་དག་ཀྱང ། །དེ་ཡི་ལས་དགེ་གཞོལ་བའི་འོད་ཟེར་གྱིས། །ཤིན་ཏུ་སྣང་བར་འོད་ཀྱིས་གསལ་བར་གྱུར། །ལྷ་དང་ལྷ་མིན་མི་རྣམས་གང་ཡང་རུང ། །འདོད་ཆགས་སེམས་ཀྱིས་བལྟ་བར་ནུས་པ་མེད། །སྤྱོད་ལམ་རྣམས་སུ་འཕགས་པའི་ཡོན་ཏན་ལྡན། །དེ་ལ་ཀུན་ཀྱང་མ་དང་བུ་མོར་ལྟ། །སྒྱུ་འཕྲུལ་ལྷ་མོའི་དགེ་བའི་ལས་ཀྱི་རྒྱུས། །རྒྱལ་པོའི་སྲིད་ནི་རབ་ཡངས་རྣམ་པར་འཕེལ། །ཁམས་ཀྱི་རྒྱལ་པོའང་འཇུག་པར་མི་བྱེད་ཅིང ། །རྒྱལ་པོའི་གྲགས་དང་བརྗོད་པ་རྣམ་པར་འཕེལ། །དེ་ལྟར་སྒྱུ་འཕྲུལ་སྣོད་དུ་མཐུན་གྱུར་ཅིང ། །དེ་ལྟར་སེམས་ཅན་དམ་པ་མཆོག་མཛེས་པས། །དེ་གཉིས་ཡོན་ཏན་མཆོག་དང་ལྡན་པས་ན། །འདི་ནི་བུར་འགྱུར་དེ་ནི་མ་ཡི་འོས། །ལྷ་མོ་ཡོན་ཏན་མཆོག་དང་ལྡན་པ་སྟེ། །གླང་པོ་ཁྲི་ཡི་སྟོབས་བདོག་མ་གཏོགས་པར། །ཛམྦུའི་རྒྱལ་མཚན་འདི་ན་མི་མཆོག་དེ། །འཛིན་པར་ནུས་པའི་བུད་མེད་གང་ཡང་མེད། །དེ་སྐད་ཆེ་བའི་ལྷ་ཡི་བུ་རྣམས་དང ། །བྱང་ཆུབ་སེམས་དཔའ་ཤེས་རབ་རྒྱ་ཆེན་དག་།ཤཱཀྱའི་རིགས་རྣམས་དགའ་བར་མཛད་པ་ཡི། །ཡུམ་དུ་ལེགས་ལྡན་སྒྱུ་འཕྲུལ་འགྱུར་ཞེས་ཟེར། །རིགས་ཡོངས་སུ་དག་པའི་ལེའུ་སྟེ། གསུམ་པའོ།། །།དགེ་སློང་དག་།དེ་ལྟར་བྱང་ཆུབ་
30b
སེམས་དཔས་སྐྱེ་བའི་རིགས་ལ་རྣམ་པར་བལྟས་ནས་དགའ་ལྡན་གྱི་གནས་ཀྱི་གཞལ་མེད་ཁང་ཆེན་པོ་ཆུ་དང་རྒྱལ་དཔག་ཚད་དྲུག་ཅུ་རྩ་བཞི་ཡོད་པ་གང་དུ་བྱང་ཆུབ་སེམས་དཔའ་འདུག་སྟེ། དགའ་ལྡན་གྱི་ལྷ་རྣམས་ལ་ཆོས་སྟོན་པ་རྒྱལ་མཚན་མཐོན་པོ་ཞེས་བྱ་བ་ཡོད་དེ། བྱང་ཆུབ་སེམས་དཔའ་དེ་གཞལ་མེད་ཁང་ཆེན་པོ་དེར་སོང་ནས་ཕྱིན་པ་དང ། དགའ་ལྡན་གྱི་རིས་ཀྱི་ལྷའི་བུ་ཐམས་ཅད་ལ་སྨྲས་པ། ཁྱེད་རྣམས་འདིར་འདུ་བར་གྱིས་ཤིག་།ཤི་འཕོ་བའི་རྣམ་པར་སྦྱོར་བ་ཞེས་བྱ་བའི་ཆོས་རྗེས་སུ་དྲན་པ་རྗེས་སུ་བསྟན་པ་ཐ་མའི་ཆོས་མཉན་པ་བྱང་ཆུབ་སེམས་དཔའ་ལས་ཉོན་ཅིག་།དེ་སྐད་ཀྱི་ཚིག་ཐོས་ནས་དགའ་ལྡན་གྱི་རིས་ཀྱི་ལྷའི་བུ་ཐམས་ཅད་ལྷའི་བུ་མོའི་ཚོགས་དང་བཅས་ཏེ་གཞལ་མེད་ཁང་ཆེན་པོ་དེར་འདུས་སོ། །དེར་བྱང་ཆུབ་སེམས་དཔའ་འཁོར་གྱི་ཁྱམས་གླིང་བཞི་པ་ཆེན་པོའི་འཇིག་རྟེན་གྱི་ཁམས་ཀྱི་ཚད་ཙམ་དུ་ཡངས་པར་བྱིན་གྱིས་བརླབས་པར་གྱུར་ནས་དེ་དེ་ཙམ་དུ་བཟང་ཞིང་དེ་ཙམ་དུ་བལྟ་ན་སྡུག་ལ། དེ་ཙམ་དུ་རྒྱན་གྱིས་རྒྱས་ཤིང་དེ་ཙམ་དུ་ཡིད་དུ་འོང་བར་གྱུར་པ་དེས་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་ཐམས་ཅད་རང་རང་གི་ཁྱིམ་གྱི་བཀོད་པ་ལ་དུར་ཁྲོད་ལྟ་བུའི་འདུ་ཤེས་སྐྱེས་པར་གྱུར་ཏོ། །དེ་ལ་བྱང་ཆུབ་སེམས་དཔའ་རང་གི་བསོད་ནམས་ཀྱི་རྣམ་པར་
31a
༄#། །སྨན་པའི་རྒྱུ་མཐུན་པས་ཡོངས་སུ་བརྒྱན་པའི་སེངྒེའི་ཁྲི་ནོར་བུ་རིན་པོ་ཆེ་དུ་མས་རྩ་བ་སྤྲས་པ། ལྷའི་རས་བཅོས་བུའི་སྟན་དུ་མ་བཏིང་བ། ལྷའི་སྤོས་ཞིམ་པོ་དུ་མས་བསྒོམ་པ། བདུག་སྤོས་དམ་པ་མཆོག་ཏུ་བྱ་བ་དུ་མས་བདུགས་པ། ལྷའི་མེ་ཏོག་ཁ་དོག་དུ་མའི་དགྲ་མ་པ་བཀྲམ་པ། ནོར་བུ་རིན་པོ་ཆེའི་འོད་བརྒྱ་སྟོང་དུ་མ་འབར་བའི་གཟི་བརྗིད་ཅན། ནོར་བུ་རིན་པོ་ཆེ་དུ་མའི་དྲ་བས་གཡོགས་པ། རིན་པོ་ཆེའི་དྲིལ་བུ་གཡེར་ཁའི་དྲ་བ་དུ་མའི་སྒྲ་འབྱུང་བས་མངོན་པར་དགའ་བ་དང་ལྡན་པ། རིན་པོ་ཆེའི་དྲིལ་བུ་བརྒྱ་སྟོང་དུ་མ་མངོན་པར་དཀྲོལ་བའི་སྒྲ་དང་ལྡན་པ། རིན་པོ་ཆེའི་དྲ་བ་བརྒྱ་སྟོང་དུ་མས་ཡོངས་སུ་གསལ་བར་གྱུར་པ། རིན་པོ་ཆེའི་གདུགས་བརྒྱ་སྟོང་དུ་མས་ཀུན་ནས་བཀབ་པ། དར་བརྒྱ་སྟོང་དུ་མས་རབ་ཏུ་དཔྱངས་པ། དར་གྱི་ཕྲེང་བ་ལྔ་ལྡི་བརྒྱ་སྟོང་དུ་མས་ཤིན་ཏུ་བརྒྱན་པ། ལྷའི་བུ་མོ་བརྒྱ་སྟོང་དུ་མས་གླུ་བླངས་གར་བྱས། རོལ་མོ་བྱས་པ། ཡོན་ཏན་བརྒྱ་སྟོང་དུ་མ་ཀུན་ཏུ་བརྗོད་པ། འཇིག་རྟེན་སྐྱོང་བ་བརྒྱ་སྟོང་དུ་མས་རྗེས་སུ་བསྲུངས་པ། བརྒྱ་བྱིན་བརྒྱ་སྟོང་དུ་མས་ཕྱག་བྱས་པ། ཚངས་པ་བརྒྱ་སྟོང་དུ་མས་རབ་ཏུ་བཏུད་པ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བཟུང་བ། ཕྱོགས་བཅུའི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དུ་མ་
31b
མཐའ་ཡས་པས་དགོངས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་ཕ་རོལ་ཏུ་ཕྱིན་པ་ཚོགས་སུ་བྱས་པའི་བསོད་ནམས་ཀྱི་རྣམ་པར་སྨིན་པའི་རྒྱུ་མཐུན་པ་ལས་བྱུང་བ་དེ་ལྟ་བུ་ལ་འདུག་གོ་།དགེ་སློང་དག་།དེ་ལྟར་བྱང་ཆུབ་སེམས་དཔའ་སེངྒེའི་ཁྲི་ཆེན་པོ་ཡོན་ཏན་དེ་ལྟ་བུ་དང་ལྡན་པ་ལ་འདུག་ནས་ལྷའི་འཁོར་ཆེན་པོ་དེ་དག་ལ་སྨྲས་པ། གྲོགས་པོ་དག་།བྱང་ཆུབ་སེམས་དཔའི་ལུས་བསོད་ནམས་བརྒྱའི་མཚན་གྱིས་ལེགས་པར་བརྒྱན་པ་ལ་ལྟོས། ཤར་དང ། ལྷོ་དང ། ནུབ་དང ། བྱང་དང ། འོག་དང ། སྟེང་དང ། ཕྱོགས་བཅུ་ཀུན་ན་བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ན་འཁོད་ཅིང་ཐམས་ཅད་ཀྱང་སྲིད་པ་ཐ་མ་ལ་མངོན་དུ་ཕྱོགས་པ། ལྷའི་ཚོགས་ཀྱིས་ཡོངས་སུ་བསྐོར་བ། འཆི་འཕོའི་རྣམ་པས་ལྷ་རྣམས་དགའ་བར་བྱེད་པའི་ཆོས་སྣང་བའི་སྒོ་ཡང་དག་པར་སྟོན་པ་ཚད་མེད། གྲངས་མེད། བགྲང་བ་ལས་འདས་པ་དག་ལ་ལྟོས། དེ་ནས་ལྷའི་འཁོར་དེ་ཐམས་ཅད་ཀྱིས་བྱང་ཆུབ་སེམས་དཔའི་བྱིན་གྱི་རླབས་ཀྱིས་བྱང་ཆུབ་སེམས་དཔའ་དེ་དག་མཐོང་བར་གྱུར་ཏེ། མཐོང་བར་གྱུར་ནས་ཀྱང་བྱང་ཆུབ་སེམས་དཔའ་ག་ལ་བ་དེ་ལེགས་སུ་ཐལ་མོ་སྦྱར་བ་བཏུད་དེ་ཡན་ལག་ལྔས་ཕྱག་འཚལ་ནས་འདི་སྐད་དུ། འདི་ལྟར་བདག་ཅག་གིས་བལྟས་པ་ཙམ་གྱིས་བྱང་ཆུབ་སེམས་དཔའ་འདི་སྙེད་ཅིག་མཐོང་
32a
༄#། །བ་ནི་བྱང་ཆུབ་སེམས་དཔའི་བྱིན་གྱི་རླབས་བསམ་གྱིས་མི་ཁྱབ་སྟེ། ལེགས་སོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་བྱང་ཆུབ་སེམས་དཔས་ཡང་ལྷའི་འཁོར་ཆེན་པོ་དེ་དག་ལ་བོས་ནས་འདི་སྐད་ཅེས་སྨྲས་ཏེ། གྲོགས་པོ་དག་།དེ་བས་ན། བྱང་ཆུབ་སེམས་དཔའ་དེ་དག་ལྷའི་བུ་དེ་དག་ལ་གང་སྟོན་པ་འཆི་འཕོའི་རྣམ་པར་ལྷ་རྣམས་དགའ་བར་བྱེད་པའི་ཆོས་སྣང་བའི་སྒོ་ཉོན་ཅིག་།གྲོགས་པོ་དག་།ཆོས་སྣང་བའི་སྒོ་བརྒྱ་རྩ་བརྒྱད་པོ་འདི་དག་ནི་བྱང་ཆུབ་སེམས་དཔའ་འཆི་འཕོའི་དུས་ལ་བབ་པའི་ཚེ་ལྷའི་འཁོར་ལ་གདོན་མི་ཟ་བར་ཡང་དག་པར་བསྟན་པར་བྱ་བ་སྟེ། བརྒྱ་རྩ་བརྒྱད་གང་ཞེ་ན། འདི་ལྟ་སྟེ། གྲོགས་པོ་དག་།དད་པ་ནི་ཆོས་སྣང་བའི་སྒོ་སྟེ།་བསམ་པ་མི་ཕྱེད་པར་འགྱུར་རོ། །དང་བ་ནི་ཆོས་སྣང་བའི་སྒོ་སྟེ། སེམས་རྙོག་པ་ཅན་དང་བར་འགྱུར་རོ། །མཆོག་ཏུ་དགའ་བ་ནི་ཆོས་སྣང་བའི་སྒོ་སྟེ། ལུས་ཤིན་ཏུ་སྦྱངས་པར་འགྱུར་རོ། །དགའ་བ་ནི་ཆོས་སྣང་བའི་སྒོ་སྟེ། སེམས་རྣམ་པར་དག་པར་འགྱུར་རོ། །ལུས་ཀྱི་སྡོམ་པ་ནི་ཆོས་སྣང་བའི་སྒོ་སྟེ། ལུས་ཀྱི་ཉེས་པ་རྣམ་པ་གསུམ་ཡོངས་སུ་དག་པར་འགྱུར་རོ། །ངག་གི་སྡོམ་པ་ནི་ཆོས་སྣང་བའི་སྒོ་སྟེ། ངག་གི་ཉེས་པ་བཞི་ཡོངས་སུ་སྤོང་བར་འགྱུར་རོ། །ཡིད་ཀྱི་སྡོམ་པ་ནི་ཆོས་སྣང་
32b
བའི་སྒོ་སྟེ། ཡིད་ཀྱི་བརྣབ་སེམས་དང ། གནོད་སེམས་དང ། ལོག་པར་ལྟ་བ་སྤོང་བར་འགྱུར་རོ། །སངས་རྒྱས་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། སངས་རྒྱས་མཐོང་བ་རྣམ་པར་དག་པར་འགྱུར་རོ། །ཆོས་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། ཆོས་བསྟན་པ་རྣམ་པར་དག་པར་འགྱུར་རོ། །དགེ་འདུན་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། སྐྱོན་མེད་པར་འཇུག་པར་འགྱུར་རོ། །གཏོང་བ་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། རྫས་ཐམས་ཅད་རབ་ཏུ་སྤོང་བར་འགྱུར་རོ། །ཚུལ་ཁྲིམས་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། སྨོན་ལམ་ཡོངས་སུ་རྫོགས་པར་འགྱུར་རོ། །ལྷ་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། སེམས་རྒྱ་ཆེན་པོར་འགྱུར་རོ། །བྱམས་པ་ནི་ཆོས་སྣང་བའི་སྒོ་སྟེ། རྫས་ལས་བྱུང་བའི་བསོད་ནམས་བྱ་བའི་དངོས་པོ་ཐམས་ཅད་ཟིལ་གྱིས་གནོན་པར་འགྱུར་རོ། །སྙིང་རྗེ་ནི་ཆོས་སྣང་བའི་སྒོ་སྟེ། རྣམ་པར་འཚེ་བ་མེད་པ་ལྷུར་ལེན་པར་འགྱུར་རོ། ། དགའ་བ་ནི་ཆོས་སྣང་བའི་སྒོ་སྟེ། མི་དགའ་བ་ཐམས་ཅད་སེལ་བར་འགྱུར་རོ། །བཏང་སྙོམས་ནི་ཆོས་སྣང་བའི་སྒོ་སྟེ། འདོད་པ་ལ་སྨོད་པར་འགྱུར་རོ། །མི་རྟག་པར་སོ་སོར་རྟོག་པ་ནི་ཆོས་སྣང་བའི་སྒོ་སྟེ། འདོད་པ་དང ། གཟུགས་ཡོད་པ་དང ། གཟུགས་མེད་པའི་འདོད་ཆགས་ལས་ཡང་དག་པར་འདའ་བར་འགྱུར་རོ། །སྡུག་བསྔལ་དུ་སོ་སོར་རྟོག་པ་ནི་
33a
༄#། །ཆོས་སྣང་བའི་སྒོ་སྟེ། སྨོན་ལམ་ཀུན་ཏུ་ཆད་པར་འགྱུར་རོ། །བདག་མེད་པར་སོ་སོར་རྟོག་པ་ནི་ཆོས་སྣང་བའི་སྒོ་སྟེ། བདག་ལ་མངོན་པར་ཞེན་པ་མེད་པར་འགྱུར་རོ། །ཞི་བར་སོ་སོར་རྟོག་པ་ནི་ཆོས་སྣང་བའི་སྒོ་སྟེ། རྗེས་སུ་ཆགས་པ་འབར་བ་མེད་པར་འགྱུར་རོ། །ངོ་ཚ་ཤེས་པ་ནི་ཆོས་སྣང་བའི་སྒོ་སྟེ། ནང་ཉེ་བར་ཞི་བར་འགྱུར་རོ། །ཁྲེལ་ཡོད་པ་ནི་ཆོས་སྣང་བའི་སྒོ་སྟེ། ཕྱི་རོལ་ཉེ་བར་ཞི་བར་འགྱུར་རོ། །བདེན་པ་ནི་ཆོས་སྣང་བའི་སྒོ་སྟེ། ལྷ་དང་མི་རྣམས་ལ་མི་སླུ་བར་འགྱུར་རོ། ། ཡང་དག་པ་ནི་ཆོས་སྣང་བའི་སྒོ་སྟེ། བདག་ལ་སླུ་བ་མེད་པར་འགྱུར་རོ། །ཆོས་སྤྱད་པ་ནི་ཆོས་སྣང་བའི་སྒོ་སྟེ། ཆོས་ལ་རྟེན་པར་འགྱུར་རོ། །གསུམ་ལ་སྐྱབས་སུ་འགྲོ་བ་ནི་ཆོས་སྣང་བའི་སྒོ་སྟེ། ངན་སོང་གསུམ་ལས་ཡང་དག་པར་འདའ་བར་འགྱུར་རོ། །བྱས་པ་གཟོ་བ་ནི་ཆོས་སྣང་བའི་སྒོ་སྟེ། དགེ་བའི་རྩ་བ་བྱས་པ་རྣམས་ཆུད་མི་ཟ་བར་འགྱུར་རོ། །བྱས་པ་རིག་པ་ནི་ཆོས་སྣང་བའི་སྒོ་སྟེ། གཞན་ལ་བརྙས་པ་མེད་པར་འགྱུར་རོ། །བདག་ཤེས་པ་ནི་ཆོས་སྣང་བའི་སྒོ་སྟེ། བདག་ལ་བསྟོད་པ་མེད་པར་འགྱུར་རོ། ། སེམས་ཅན་ཤེས་པ་ནི་ཆོས་སྣང་བའི་སྒོ་སྟེ། གཞན་ལ་སྨོད་པ་མེད་པར་འགྱུར་རོ། །ཆོས་ཤེས་པ་ནི་ཆོས་སྣང་བའི་སྒོ་སྟེ། ཆོས་ཀྱི་རྗེས་སུ་མཐུན་པའི་ཆོས་ལ་ནན་ཏན་
33b
བྱེད་པར་འགྱུར་རོ། །དུས་ཤེས་པ་ནི་ཆོས་སྣང་བའི་སྒོ་སྟེ། མཐོང་བ་དོན་ཡོད་པར་འགྱུར་རོ། །ང་རྒྱལ་བཅོམ་པ་ནི་ཆོས་སྣང་བའི་སྒོ་སྟེ། ཡེ་ཤེས་ཡོངས་སུ་རྫོགས་པར་འགྱུར་རོ། ། ཞེ་འགྲས་པ་མེད་པའི་སེམས་ནི་ཆོས་སྣང་བའི་སྒོ་སྟེ། བདག་དང་གཞན་རྗེས་སུ་སྲུང་བར་འགྱུར་རོ། །འཁོན་དུ་མི་འཛིན་པ་ནི་ཆོས་སྣང་བའི་སྒོ་སྟེ། འགྱོད་པ་མེད་པར་འགྱུར་རོ། །མོས་པ་ནི་ཆོས་སྣང་བའི་སྒོ་སྟེ། ཐེ་ཚོམ་མེད་པ་ལྷུར་ལེན་པར་འགྱུར་རོ། །མི་སྡུག་པར་སོ་སོར་རྟོག་པ་ནི་ཆོས་སྣང་བའི་སྒོ་སྟེ། འདོད་པ་ལ་རྣམ་པར་རྟོག་པ་སྤོང་བར་འགྱུར་རོ། །གནོད་སེམས་མེད་པ་ནི་ཆོས་སྣང་བའི་སྒོ་སྟེ། གནོད་སེམས་ཀྱི་རྣམ་པར་རྟོག་པ་སྤོང་བར་འགྱུར་རོ། །གཏི་མུག་མེད་པ་ནི་ཆོས་སྣང་བའི་སྒོ་སྟེ། མི་ཤེས་པ་རྣམ་པར་སེལ་བར་འགྱུར་རོ། །ཆོས་དོན་དུ་གཉེར་བ་ནི་ཆོས་སྣང་བའི་སྒོ་སྟེ། དོན་ལ་རྟོན་པར་འགྱུར་རོ། །ཆོས་འདོད་པ་ནི་ཆོས་སྣང་བའི་སྒོ་སྟེ། ཆོས་སྣང་བ་ཐོབ་པར་འགྱུར་རོ། །ཐོས་པ་ཚོལ་བ་ནི་ཆོས་སྣང་བའི་སྒོ་སྟེ། ཚུལ་བཞིན་དུ་ཆོས་ལ་སོ་སོར་རྟོག་པར་འགྱུར་རོ། །ཡང་དག་པའི་སྦྱོར་བ་ནི་ཆོས་སྣང་བའི་སྒོ་སྟེ། ཡང་དག་པར་ནན་ཏན་བྱེད་པར་འགྱུར་རོ། ། མིང་དང་གཟུགས་ཡོངས་སུ་ཤེས་པ་ནི་ཆོས་སྣང་བའི་སྒོ་སྟེ། ཆགས་པ་ཐམས་ཅད་ལས་ཡང་དག་པར་འདའ་བར་འགྱུར་རོ། །རྒྱུར་ལྟ་བ་ཡང་དག་པར་འཇོམས་པ་ནི་ཆོས་སྣང་
34a
༄#། །པའི་སྒོ་སྟེ། རིག་པ་དང་རྣམ་པར་གྲོལ་བ་ཐོབ་པར་འགྱུར་རོ། །རྗེས་སུ་ཆགས་པ་དང་ཁོང་ཁྲོ་བ་སྤོང་བ་ནི་ཆོས་སྣང་བའི་སྒོ་སྟེ། མཐོ་བར་སེམས་པ་མེད་ཅིང་དམའ་བར་སེམས་པ་མེད་པར་འགྱུར་རོ། །ཕུང་པོ་ལ་མཁས་པ་ནི་ཆོས་སྣང་བའི་སྒོ་སྟེ། སྡུག་བསྔལ་ཡོངས་སུ་ཤེས་པར་འགྱུར་རོ། །ཁམས་མཉམ་པ་ཉིད་ནི་ཆོས་སྣང་བའི་སྒོ་སྟེ། ཀུན་འབྱུང་བ་སྤོང་བར་འགྱུར་རོ། །སྐྱེ་མཆེད་བསལ་བ་ནི་ཆོས་སྣང་བའི་སྒོ་སྟེ། ལམ་སྒོམ་པར་འགྱུར་རོ། །མི་སྐྱེ་བའི་བཟོད་པ་ནི་ཆོས་སྣང་བའི་སྒོ་སྟེ།་འགོག་པ་མངོན་དུ་བྱེད་པར་འགྱུར་རོ། །ལུས་ལ་སོང་བའི་དྲན་པ་ནི་ཆོས་སྣང་བའི་སྒོ་སྟེ། ལུས་དབེན་པར་འགྱུར་རོ། །ཚོར་བ་ལ་སོང་བའི་དྲན་པ་ནི་ཆོས་སྣང་བའི་སྒོ་སྟེ། ཚོར་བ་ཐམས་ཅད་རྒྱུན་ཆད་པར་འགྱུར་རོ། །སེམས་ལ་སོང་བའི་དྲན་པ་ནི་ཆོས་སྣང་བའི་སྒོ་སྟེ། སེམས་ལ་སྒྱུ་མ་ལྟ་བུར་སོ་སོར་རྟོག་པར་འགྱུར་རོ། །ཆོས་ལ་སོང་བའི་དྲན་པ་ནི་ཆོས་སྣང་བའི་སྒོ་སྟེ། རབ་རིབ་དང་བྲལ་བའི་ཡེ་ཤེས་སུ་འགྱུར་རོ། །ཡང་དག་པའི་སྤོང་བ་བཞི་ནི་ཆོས་སྣང་བའི་སྒོ་སྟེ། མི་དགེ་བའི་ཆོས་ཐམས་ཅད་སྤོང་བ་དང ། དགེ་བའི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །རྫུ་འཕྲུལ་གྱི་རྐང་པ་བཞི་ནི་ཆོས་སྣང་བའི་སྒོ་སྟེ། ལུས་དང་སེམས་ཡང་བར་འགྱུར་རོ། །དད་
34b
པའི་དབང་པོ་ནི་ཆོས་སྣང་བའི་སྒོ་སྟེ། གཞན་གྱི་དྲིང་མི་འཇོག་པར་འགྱུར་རོ། །བརྩོན་འགྲུས་ཀྱི་དབང་པོ་ནི་ཆོས་སྣང་བའི་སྒོ་སྟེ། ཤིན་ཏུ་རྟོགས་པའི་ཡེ་ཤེས་དང་ལྡན་པར་འགྱུར་རོ། །དྲན་པའི་དབང་པོ་ནི་ཆོས་སྣང་བའི་སྒོ་སྟེ། ལས་ལེགས་པར་བྱས་པར་འགྱུར་རོ། །ཏིང་ངེ་འཛིན་གྱི་དབང་པོ་ནི་ཆོས་སྣང་བའི་སྒོ་སྟེ། སེམས་རྣམ་པར་གྲོལ་བར་འགྱུར་རོ། །ཤེས་རབ་ཀྱི་དབང་པོ་ནི། ཆོས་སྣང་བའི་སྒོ་སྟེ། མངོན་སུམ་གྱི་ཡེ་ཤེས་སུ་འགྱུར་རོ། །དད་པའི་སྟོབས་ནི་ཆོས་སྣང་བའི་སྒོ་སྟེ། བདུད་ཀྱི་སྟོབས་ལས་ཡང་དག་པར་འདའ་བར་འགྱུར་རོ། །བརྩོན་འགྲུས་ཀྱི་སྟོབས་ནི་ཆོས་སྣང་བའི་སྒོ་སྟེ། ཕྱིར་མི་ལྡོག་པར་འགྱུར་རོ། །དྲན་པའི་སྟོབས་ནི་ཆོས་སྣང་བའི་སྒོ་སྟེ། མི་འཕྲོག་པར་འགྱུར་རོ། །ཏིང་ངེ་འཛིན་གྱི་སྟོབས་ནི་ཆོས་སྣང་བའི་སྒོ་སྟེ། རྣམ་པར་རྟོག་པ་ཐམས་ཅད་སྤོང་བར་འགྱུར་རོ། །ཤེས་རབ་ཀྱི་སྟོབས་ནི་ཆོས་སྣང་བའི་སྒོ་སྟེ། མི་ཐུལ་བར་འགྱུར་རོ། །དྲན་པ་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། ཆོས་ཇི་ལྟ་བ་བཞིན་དུ་རབ་ཏུ་ཤེས་པར་འགྱུར་རོ། །ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། ཤིན་ཏུ་རྟོགས་པའི་བློ་དང་ལྡན་པར་འགྱུར་རོ། །དགའ་བ་ཡང་དག་བྱང་ཆུབ་
35a
༄#། །ཀྱི་ཡན་ལག་ནི་ཆོས་སྣང་བའི་སྒོ་སྟེ། ཏིང་ངེ་འཛིན་སྒྲུབ་པར་འགྱུར་རོ། །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། བྱ་བ་བྱས་པར་འགྱུར་རོ། །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། ཆོས་ཐམས་ཅད་མཉམ་པ་ཉིད་དུ་ཁོང་དུ་ཆུད་པར་འགྱུར་རོ། །བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། སྐྱེ་བོ་ཐམས་ཅད་ལ་སྨོད་པར་འགྱུར་རོ། །ཡང་དག་པའི་ལྟ་བ་ནི་ཆོས་སྣང་བའི་སྒོ་སྟེ། སྐྱོན་མེད་པར་འཇུག་པར་འགྱུར་རོ། །ཡང་དག་པའི་རྟོག་པ་ནི་ཆོས་སྣང་བའི་སྒོ་སྟེ། རྟོག་པ་དང ། རྣམ་པར་རྟོག་པ་དང ། ཡོངས་སུ་རྟོག་པ་ཐམས་ཅད་སྤོང་བར་འགྱུར་རོ། །ཡང་དག་པའི་དག་ནི་ཆོས་སྣང་བའི་སྒོ་སྟེ། ཡི་གེ་དང ། སྒྲ་དང ། སྐད་དང ། ཚིག་གི་ལམ་ཐམས་ཅད་བྲག་ཅ་དང་མཉམ་པ་ཉིད་དུ་རྟོགས་པར་འགྱུར་རོ། །ཡང་དག་པའི་ལས་ཀྱི་མཐའ་ནི་ཆོས་སྣང་བའི་སྒོ་སྟེ། ལས་མེད་ཅིང་རྣམ་པར་སྨིན་པ་མེད་པར་འགྱུར་རོ། །ཡང་དག་པའི་འཚོ་བ་ནི་ཆོས་སྣང་བའི་སྒོ་སྟེ། ཚོལ་བ་ཐམས་ཅད་རྒྱུན་དུ་ཆད་པར་འགྱུར་རོ། །ཡང་དག་པའི་རྩོལ་བ་ནི་ཆོས་སྣང་བའི་སྒོ་སྟེ། ཕ་རོལ་གྱི་ངོགས་སུ་ཕྱིན་པར་འགྱུར་རོ། །ཡང་དག་པའི་དྲན་པ་ནི་ཆོས་སྣང་བའི་སྒོ་སྟེ། དྲན་པ་མེད་ཅིང་ཡིད་ལ་བྱེད་པ་མེད་པར་འགྱུར་རོ། །
35b
ཡང་དག་པའི་ཏིང་ངེ་འཛིན་ནི་ཆོས་སྣང་བའི་སྒོ་སྟེ། སེམས་མི་འཁྲུགས་པའི་ཏིང་ངེ་འཛིན་ཐོབ་པར་འགྱུར་རོ། །བྱང་ཆུབ་ཀྱི་སེམས་ནི་ཆོས་སྣང་བའི་སྒོ་སྟེ། དཀོན་མཆོག་གསུམ་གྱི་རིགས་རྒྱུན་མི་ཆད་པར་འགྱུར་རོ། །བསམ་པ་ནི་ཆོས་སྣང་བའི་སྒོ་སྟེ། ཐེག་པ་དམན་པ་ལ་འདོད་པ་མེད་པར་འགྱུར་རོ། །ལྷག་པའི་བསམ་པ་ནི་ཆོས་སྣང་བའི་སྒོ་སྟེ། སངས་རྒྱས་ཀྱི་ཆོས་རྒྱ་ཆེན་པོ་ལ་ལྷག་པར་དམིགས་པར་འགྱུར་རོ། །སྦྱོར་བ་ནི་ཆོས་སྣང་བའི་སྒོ་སྟེ། དགེ་བའི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །སྦྱིན་པའི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། མཚན་དང ། དཔེ་བྱད་བཟང་པོ་དང ། སངས་རྒྱས་ཀྱི་ཞིང་ཡོངས་སུ་དག་པར་འགྱུར་ཞིང་སེར་སྣ་ཅན་གྱི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། མི་ཁོམ་པ་དང ། ངན་འགྲོ་ཐམས་ཅད་ལས་ཡང་དག་པར་འདའ་ཞིང་ཚུལ་ཁྲིམས་འཚལ་བའི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །བཟོད་པའི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། གནོད་སེམས་དང ། ཐ་བ་དང ། ཞེ་སྡང་དང ། ང་རྒྱལ་དང ། དྲེགས་པ་དང ། རྒྱགས་པ་སྤོང་བར་འགྱུར་ཞིང་གནོད་སེམས་ཅན་གྱི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། དགེ་བའི་
36a
༄#། །ཆོས་བརྩམས་པ་ཐམས་ཅད་ཉམས་སུ་ལོན་པར་འགྱུར་ཞིང་ལེ་ལོ་ཅན་གྱི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །བསམ་གཏན་གྱི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། བསམ་གཏན་དང་མངོན་པར་ཤེས་པ་ཐམས་ཅད་བསྐྱེད་ཅིང་སེམས་གཡེང་པ་ཅན་གྱི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། མ་རིག་པ་དང ། གཏི་མུག་གི་མུན་པ་མུན་ནག་དང ། དམིགས་པའི་ལྟ་བ་སྤོང་ཞིང་ཤེས་རབ་ཀྱི་འཆལ་པའི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །ཐབས་མཁས་པ་ནི་ཆོས་སྣང་བའི་སྒོ་སྟེ། སེམས་ཅན་ཇི་ལྟར་མོས་པ་བཞིན་དུ་སྤྱོད་ལམ་སྟོན་ཅིང་སངས་རྒྱས་ཀྱི་ཆོས་ཐམས་ཅད་སྒྲུབ་པར་འགྱུར་རོ། །བསྡུ་བའི་དངོས་པོ་བཞི་ནི། ཆོས་སྣང་བའི་སྒོ་སྟེ། སེམས་ཅན་ཐམས་ཅད་སྡུད་ཅིང་བྱང་ཆུབ་བརྙེས་པ་ལས་ཆོས་ནོད་པར་འགྱུར་རོ། །སེམས་ཅན་ཡོངས་སུ་སྨིན་པར་བྱ་བ་ནི་ཆོས་སྣང་བའི་སྒོ་སྟེ། བདག་གི་བདེ་བ་ལ་མི་ཆགས་ཤིང་ཡོངས་སུ་སྐྱོ་བ་མེད་པར་འགྱུར་རོ། །དམ་པའི་ཆོས་ཡོངས་སུ་འཛིན་པ་ནི་ཆོས་སྣང་བའི་སྒོ་སྟེ། སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་སྤོང་བར་འགྱུར་རོ། །བསོད་ནམས་ཀྱི་ཚོགས་ནི་ཆོས་སྣང་བའི་སྒོ་སྟེ། སེམས་ཅན་ཐམས་ཅད་ཉེ་བར་འཚོ་
36b
བར་འགྱུར་རོ། །ཡེ་ཤེས་ཀྱི་ཚོགས་ནི་ཆོས་སྣང་བའི་སྒོ་སྟེ། སྟོབས་བཅུ་ཡོངས་སུ་རྫོགས་པར་འགྱུར་རོ། །ཞི་གནས་ཀྱི་ཚོགས་ནི་ཆོས་སྣང་བའི་སྒོ་སྟེ། དེ་བཞིན་གཤེགས་པ་ཏིང་ངེ་འཛིན་ཐོབ་པར་འགྱུར་རོ། །ལྷག་མཐོང་གི་ཚོགས་ནི་ཆོས་སྣང་བའི་སྒོ་སྟེ། ཤེས་རབ་ཀྱི་མིག་ཐོབ་པར་འགྱུར་རོ། །སོ་སོ་ཡང་དག་པར་རིག་པ་ལ་འཇུག་པ་ནི་ཆོས་སྣང་བའི་སྒོ་སྟེ། ཆོས་ཀྱི་མིག་ཐོབ་པར་འགྱུར་རོ། །རྟོན་པ་ལ་འཇུག་པ་ནི་ཆོས་སྣང་བའི་སྒོ་སྟེ། སངས་རྒྱས་ཀྱི་སྤྱན་ཡོངས་སུ་དག་པར་འགྱུར་རོ། །གཟུངས་ཐོབ་པ་ནི་ཆོས་སྣང་བའི་སྒོ་སྟེ།་སངས་རྒྱས་ཀྱིས་གསུངས་པ་ཐམས་ཅད་འཛིན་པར་འགྱུར་རོ། །སྤོབས་པ་ཐོབ་པ་ནི་ཆོས་སྣང་བའི་སྒོ་སྟེ། སེམས་ཅན་ཐམས་ཅད་ལེགས་པར་བཤད་པས་ཚིམ་པར་བྱེད་པར་འགྱུར་རོ། །རྗེས་སུ་མཐུན་པའི་ཆོས་ཀྱི་བཟོད་པ་ནི་ཆོས་སྣང་བའི་སྒོ་སྟེ། སངས་རྒྱས་ཀྱི་ཆོས་ཐམས་ཅད་དང་མཐུན་པར་འགྱུར་རོ། །མི་སྐྱེ་བའི་ཆོས་ལ་བཟོད་པ་ནི་ཆོས་སྣང་བའི་སྒོ་སྟེ། ལུང་བསྟན་པ་ཐོབ་པར་འགྱུར་རོ། །ཕྱིར་མི་ལྡོག་པའི་ས་ནི་ཆོས་སྣང་བའི་སྒོ་སྟེ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །ས་ནས་སར་འཕར་བའི་ཡེ་ཤེས་ནི་ཆོས་སྣང་བའི་སྒོ་སྟེ། ཐམས་ཅད་མཁྱེན་པའི་ཡེ་ཤེས་ཀྱིས་དབང་བསྐུར་བར་འགྱུར་རོ། །དབང་བསྐུར་བའི་ས་ནི་ཆོས་སྣང་བའི་སྒོ་སྟེ། མངལ་དུ་
37a
༄#། །འཇུག་པ་དང ། བཙས་པ་དང ། མངོན་པར་འབྱུང་བ་དང ། དཀའ་བ་སྤྱད་པ་དང ། བྱང་ཆུབ་ཀྱི་སྙིང་པོར་འགྲོ་བ་དང ། བདུད་གདུལ་བ་དང ། བྱང་ཆུབ་རྣམ་པར་འཚང་རྒྱ་བ་དང ། ཆོས་ཀྱི་འཁོར་ལོ་བསྐོར་བ་དང ། ཡོངས་སུ་མྱ་ངན་ལས་འདས་པ་ཆེན་པོ་སྟོན་པར་འགྱུར་རོ། །གྲོགས་པོ་དག་།འདི་དག་ནི་ཆོས་སྣང་བའི་སྒོ་བརྒྱ་རྩ་བརྒྱད་ཅེས་བྱ་བ་སྟེ། བྱང་ཆུབ་སེམས་དཔའ་འཆི་འཕོ་བའི་དུས་ཀྱི་ཚེ་ལྷའི་འཁོར་དུ་གདོན་མི་ཟ་བར་གང་བསྟན་པར་བྱ་བའོ། །དགེ་སློང་དག་།བྱང་ཆུབ་སེམས་དཔས་ཆོས་སྣང་བའི་སྒོའི་ལེའུ་འདི་བསྟན་པའི་ཚེ་ལྷའི་འཁོར་དེ་ལས་ལྷའི་བུ་བརྒྱད་ཁྲི་བཞི་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། ། ལྷའི་བུ་སྔོན་ཡོངས་སུ་སྦྱངས་པ་བྱས་པ་སུམ་ཁྲི་ཉིས་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ལྷའི་བུ་བྱེ་བ་སུམ་ཅུ་རྩ་དྲུག་ནི་ཆོས་རྣམ་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།དགའ་ལྡན་གྱི་གནས་ཐམས་ཅད་ཀྱང་ལྷའི་མེ་ཏོག་གིས་བུས་མོ་ནུབ་ཙམ་དུ་ཡོག་པར་གྱུར་ཏོ། །དགེ་སློང་དག་།དེ་ལྟར་བྱང་ཆུབ་སེམས་དཔས་ལྷའི་འཁོར་དེ་དག་རྒྱ་ཆེར་དགའ་བར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་གི་ཚེ་ན་དགའ་ལྡན་གནས་མཆོག་ནས། འདྲེན་པ་
37b
སྐྱེས་བུ་སེངྒེ་འཆི་འཕོའི་ཚེ། །ལྷ་རྣམས་དག་ལ་ཚིག་ཏུ་སྨྲ་བ་ནི། །བག་མེད་མཐའ་དག་རྣམ་པར་སྤོངས་ཞེས་སྨྲ། །ལྷ་ཡི་དགའ་བ་རྣམ་མང་ཇི་སྙེད་པ། །ཡིད་ཀྱིས་བསམ་པས་འབྱུང་བ་དཔལ་ལྡན་པ། །ཐམས་ཅད་ལས་དགེའི་རྒྱུ་ལས་བྱུང་བ་སྟེ། །དེ་ནི་དགེ་བའི་ལས་ཀྱི་འབྲས་བུ་ཡིན། །དེ་ལྟ་བས་ན་བྱས་པ་གཟོ་བར་གྱིས། །སྔོན་གྱི་དགེ་བསགས་འདི་ནི་ཟད་གྱུར་ཏེ། །གང་དུ་མི་བདེ་སྡུག་བསྔལ་མྱོང་འགྱུར་བ། །ངན་སོང་དག་ཏུ་སོང་བར་གྱུར་ཏ་རེ། །ང་ལ་གུས་པར་བྱ་བ་བསྐྱེད་ནས་ནི། །ཆོས་གང་ཐོས་པར་གྱུར་པ་དེ་དག་ལ། ། ནན་ཏན་གྱིས་ནི་རབ་ཏུ་སྒྲུབས་ཤིག་དང ། །བདེ་བ་མཐའ་ཡས་ངེས་པར་ཐོབ་པར་འགྱུར། །འདོད་པ་ཐམས་ཅད་མི་རྟག་བརྟན་པ་མིན། །ཐེར་ཟུག་མ་ཡིན་རྨི་ལམ་འདྲ་བ་སྟེ། །སྨིག་རྒྱུ་དང་ནི་སྒྱུ་མ་རྣམས་དང་འདྲ། །གློག་དང་དབུ་བ་འདྲ་ཞིང་འགྱུར་བ་ཡིན། །འདོད་པའི་ཡོན་ཏན་དག་གི་དགའ་བ་ནི། །ལན་ཚཝའི་ཆུ་འཐུངས་བཞིན་དུ་ངོམས་མི་འགྱུར། །གང་དག་རྡུལ་མེད་འཇིག་རྟེན་འདས་པ་ཡི། །ཤེས་རབ་ལྡན་པ་དེ་དག་ངོམས་པར་འགྱུར། །ལྷ་མོ་དག་དང་འགྲོགས་དང་གླུ་དབྱངས་ནི། །གར་གྱི་ལྟད་མོ་བ་དང་མཚུངས་ཤིང་འདྲ། །དཔེར་ན་འདུས་པ་དག་ནི་ཁྲི་ལས་སུ། །ཕན་ཚུན་འགྲོ་བར་སྦྱོར་བར་བྱེད་དང་མཚུངས། །དགེ་བའི་ལས་བྱས་རྗེས་སུ་འབྲང་བྱེད་ཅིང ། །ཕྱི་བཞིན་འགྲོ་བར་བྱེད་པ་མ་གཏོགས་པར། །
38a
༄#། །འདུས་བྱས་དག་ལ་གྲོགས་ཡོད་མ་ཡིན་ཏེ། །མཛའ་བཤེས་ཉེ་དུ་མེད་ཅིང་འཁོར་ཀྱང་མེད། །དེ་ལྟ་བས་ན་ལྷན་ཅིག་མཐུན་བྱོས་ལ། །ཕན་ཚུན་བྱམས་སེམས་ཕན་པའི་སེམས་བྱོས་ཏེ། །ཆོས་ཀྱི་སྤྱད་པ་དག་ནི་སྤྱད་པར་གྱིས། །སྤྱད་པ་ལེགས་པར་སྤྱད་ལ་གདུང་པ་མེད། །ཐོས་དང་ཚུལ་ཁྲིམས་སྦྱིན་ལ་དགའ་གྱུར་ཅིང ། །བཟོད་དང་དེས་པ་ཕུན་སུམ་ཚོགས་བགྱིས་ཏེ། །སངས་རྒྱས་དང་ནི་ཆོས་དང་དགེ་འདུན་དང ། །དེ་བཞིན་བག་ཡོད་པ་དག་དྲན་པར་གྱིས། །རྟག་པ་མེད་ཅིང་སྡུག་བསྔལ་བདག་མེད་ལ། ། རྒྱུ་དང་རྐྱེན་རྣམས་དང་ནི་ལྡན་གྱུར་ཅིང ། །བདག་པོ་མེད་ལ་བེམ་པོར་གྱུར་པ་ཡི། །ཆོས་འདི་དག་ལ་ཚུལ་བཞིན་བརྟག་པར་གྱིས། །ང་ལ་རྫུ་འཕྲུལ་དག་ནི་གང་ཡོད་དང་།། སྤོབས་པ་ཡེ་ཤེས་དབང་རྣམས་གང་མཐོང་བ། །ཀུན་ཀྱང་ལས་དགེའི་རྒྱུ་ལས་བྱུང་བ་སྟེ། །ཐོས་དང་ཚུལ་ཁྲིམས་བག་ཡོད་རྣམས་ལས་བྱུང ། །སེམས་ཅན་དོན་དང་ཕན་དང་བྱམས་དོན་དུ། །ང་ཡི་ཚུལ་ཁྲིམས་དང་ནི་ཐོས་པ་དང ། །བག་ཡོད་པ་དང་སྦྱིན་དང་དུལ་བ་དང ། །ཡང་དག་སྡོམ་པའི་རྗེས་སུ་བསླབ་པར་གྱིས། །ངག་དང་སྐད་དང་སྒྲ་རྣམས་ཙམ་གྱིས་ནི། །དགེ་བའི་ཆོས་རྣམས་སྒྲུབ་པར་མི་ནུས་ཀྱི། །ནན་ཏན་སྙིང་པོར་བྱ་བས་སྒྲུབ་བྱོས་ལ། །ཇི་ལྟར་སྨྲས་པ་དེ་བཞིན་བྱ་བར་བྱོས། །གཞན་གྱིས་གླེང་
38b
བའི་སྐབས་ནི་མ་དབྱེ་བར། །བདག་ནི་རྟག་ཏུ་སྒྲིམ་པས་འབད་པར་གྱིས། །ལ་ལས་བྱས་ཤིང་སྦྱིན་པ་ཡོད་མ་ཡིན། །མ་བྱས་པར་ཡང་འགྲུབ་པར་འགྱུར་བ་མེད། །སྔོན་ཆད་འཁོར་བར་འཁོར་ཚེ་སྡུག་བསྔལ་དག་།མྱོང་པར་གང་གྱུར་དེ་ནི་དྲན་པར་གྱིས། །ཁྱེད་ཅག་ལོག་པ་ཉིད་དུ་ངེས་པས་ན། །མྱ་ངན་འདས་དང་འདོད་ཆགས་བྲལ་མ་ཐོབ། །དེ་ལྟ་བས་ན་དལ་དང་བཤེས་གཉེན་དང ། །ཚུལ་དང་མཐུན་པའི་ཡུལ་དུ་གནས་པ་དང ། །ཆོས་མཉན་དམ་པ་ཐོབ་པར་བྱས་ནས་ནི། །འདོད་ཆགས་ལ་སོགས་ཉོན་མོངས་ཞི་བར་གྱིས། །ང་རྒྱལ་དང་ནི་རྒྱགས་དང་དྲེགས་ཐོངས་ལ། །རྟག་ཏུ་མཉེན་ཞིང་དྲང་ལ་གཡོ་མེད་ཅིང ། །མྱ་ངན་འདས་པར་འགྲོ་ལ་གཞོལ་བྱོས་ཏེ། །ལམ་རྟོགས་བྱ་བའི་ཕྱིར་ནི་སྦྱོར་བར་གྱིས། །གཏི་མུག་རྙོག་པའི་མུན་པ་ཐམས་ཅད་ཀྱང ། །ཤེས་རབ་སྒྲོན་མས་རྣམ་པར་བསལ་བར་གྱིས། །བག་ལ་ཉལ་བཅས་སྐྱོན་གྱི་དྲ་བ་རྣམས། །ཡེ་ཤེས་རྡོ་རྗེ་ཡིས་ནི་རྣམ་པར་ཁྲོལ། །ཤིན་ཏུ་མང་པོར་སྨྲ་བ་ཅི་དགོས་ཏེ། །དོན་དང་ཡང་དག་ལྡན་པའི་ཆོས་དེ་ལ། །ཁྱེད་ཅག་གནས་པར་བྱས་པར་མ་གྱུར་ན། །དེ་ལ་ཆོས་ཀྱིས་ལན་པ་མ་ཡིན་ནོ། །གང་ཚེ་ངས་ནི་བྱང་ཆུབ་ཐོབ་གྱུར་ཏེ། །འཆི་མེད་འགྲོ་བའི་ཆོས་ཆར་འབེབས་པའི་ཚེ། །རྣམ་པར་དག་པའི་སེམས་དང་ལྡན་པ་ཁྱེད། །ཆོས་ཀྱི་དམ་པ་མཉན་པའི་ཕྱིར་ཤོག་ཅིག་།ཆོས་སྣང་བའི་སྒོའི་ལེའུ་སྟེ། བཞི་
39a
༄#། །པའོ།། །།དགེ་སློང་དག་།དེ་ལྟར་བྱང་ཆུབ་སེམས་དཔའ་ལྷའི་འཁོར་ཆེན་པོ་དེ་དག་ལ་ཆོས་ཀྱི་གཏམ་འདི་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་དགའ་བར་བྱས། བཟོད་པར་བྱས་ནས་ལྷའི་འཁོར་བཀྲ་ཤིས་དང་ལྡན་པ་རྣམས་ལ་སྨྲས་པ། གྲོགས་པོ་དག་།ཁོ་བོ་ནི་ཛམྦུའི་གླིང་དུ་འགྲོའོ། །ཁོ་བོ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་ཅན་རྣམས་བསྡུ་བའི་དངོས་པོ་སྦྱིན་པ་དང ། སྙན་པར་སྨྲ་བ་དང ། དོན་སྤྱད་པ་དང ། དོན་མཐུན་པར་བྱ་བ་བཞི་ལ་མགྲོན་དུ་བོས་ལ། གྲོགས་པོ་དག་།ད་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་བར་འདུག་པ་དེ་ནི་ཁོ་བོས་བྱས་པ་མ་ཤེས་ཤིང་རིགས་པ་མ་ཡིན་པར་འགྱུར་རོ། །དེ་དག་དགའ་ལྡན་གྱི་རིས་ཀྱི་ལྷའི་བུ་དེ་དག་དུ་ཞིང་བྱང་ཆུབ་སེམས་དཔའི་རྐང་པ་གཉིས་ལ་འཇུས་ཏེ་འདི་སྐད་ཅེས་འཛེར་ཏོ། །སྐྱེས་བུ་དམ་པ་ཁྱོད་མི་བཞུགས་ན། དགའ་ལྡན་གྱི་གནས་འདི་མཛེས་པར་མི་འགྱུར་རོ། །དེ་ནས་བྱང་ཆུབ་སེམས་དཔས་ལྷའི་འཁོར་ཆེན་པོ་དེ་དག་ལ་འདི་སྐད་དུ། བྱང་ཆུབ་སེམས་དཔའ་བྱམས་པ་འདི་ཁྱེད་ལ་ཆོས་སྟོན་པར་འགྱུར་རོ་ཞེས་
39b
དེ་སྐད་སྨྲས་ཏེ། དེ་ནས་བྱང་ཆུབ་སེམས་དཔའ་རང་གི་མགོ་ལས་ཐོད་དང་ཅོད་པན་ཕོག་སྟེ་བྱང་ཆུབ་སེམས་དཔའ་བྱམས་པའི་མགོ་ལ་བཞག་ནས་འདི་སྐད་དུ། སྐྱེས་བུ་དམ་པ་ཁྱོད་ནི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་དེ་སྐད་སྨྲས་ཏེ། དེ་ནས་བྱང་ཆུབ་སེམས་དཔས་བྱང་ཆུབ་སེམས་དཔའ་བྱམས་པ་དགའ་ལྡན་གྱི་གནས་དམ་པར་དབང་བསྐུར་ནས་ཡང་ལྷའི་འཁོར་ཆེན་པོ་དེ་དག་ལ་སྨྲས་པ། གྲོགས་པོ་དག་།ཁོ་བོས་ཇི་ལྟ་བུའི་གཟུགས་ཀྱིས་མའི་མངལ་དུ་འགྲོ་བར་བྱ། དེ་ལ་ཁ་ཅིག་ན་རེ། བྲམ་ཟེའི་ཁྱེའུའི་གཟུགས་སུ་གཤེགས་པའི་རིགས་སོ་ཞེས་ཟེར་རོ། །ལ་ལ་ན་རེ། བརྒྱ་བྱིན་གྱི་གཟུགས་སུ། ལ་ལ་ན་རེ། ཚངས་པའི་གཟུགས་སུ། ལ་ལ་ན་རེ། རྒྱལ་པོ་ཆེན་པོའི་གཟུགས་སུ། ལ་ལ་ན་རེ། རྣམ་ཐོས་ཀྱི་བུའི་གཟུགས་སུ། ལ་ལ་ན་རེ། སྒྲ་གཅན་གྱི་གཟུགས་སུ། ལ་ལ་ན་རེ། དྲི་ཟའི་གཟུགས་སུ། ལ་ལ་ན་རེ། མིའམ་ཅིའི་གཟུགས་སུ། ལ་ལ་ན་རེ། ལྟོ་འཕྱེ་ཆེན་པོའི་གཟུགས་སུ། ལ་ལ་ན་རེ། དབང་ཕྱུག་ཆེན་པོའི་གཟུགས་སུ། ལ་ལ་ན་རེ། ཟླ་བའི་གཟུགས་སུ།་ལ་ལ་ན་རེ། ཉི་མའི་གཟུགས་སུ། ལ་ལ་ན་རེ། ནམ་མཁའ་ལྡིང་གི་དབང་པོའི་གཟུགས་སུ་བཞུད་པའི་རིགས་སོ་ཞེས་ཟེར་རོ། །དེ་ནས་ཚངས་རིས་ཀྱི་ལྷའི་བུ་གཟི་བརྗིད་
40a
༄#། །དམ་པ་ཞེས་བྱ་བ་སྔོན་དང་སྲོང་ལས་ཤི་འཕོས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཞིག་འདུག་པ་དེས་འདི་སྐད་ཅེས་སྨྲས་སོ། །བྲམ་ཟེ་རྣམས་ཀྱི་གསང་སྔགས་ཀྱི་རིག་བྱེད་ཀྱི་བསྟན་བཅོས་ལས་ཇི་སྐད་འབྱུང་བ་དེ་ལྟ་བུའི་གཟུགས་སུ་བྱང་ཆུབ་སེམས་དཔའ་ཡུམ་གྱི་ལྷུམས་སུ་བཞུད་པའི་རིགས་སོ། །དེའང་ཅི་འདྲ་ཞེ་ན། གླང་པོ་དམ་པ་ལུས་ཆེན་མཆོག་གྱུར་པ། །མཆེ་བ་དྲུག་ཅན་གསེར་གྱི་དྲ་བས་གཡོགས། །མགོ་བོ་རབ་ཏུ་དམར་ཞིང་ཤིན་ཏུ་མཛེས། །འགྲམ་ནས་ཟག་ཅིང་གཟུགས་ལྡན་དཔལ་ལྡན་པའོ། །རིག་བྱེད་བསྟན་བཅོས་ཡང་དག་མཁས་པ་ཡི། །བྲམ་ཟེས་རྣམ་པ་དེ་འདྲ་དེ་ཤེས་ནས། །སུམ་ཅུ་རྩ་གཉིས་མཚན་དང་ལྡན་འགྱུར་ཞེས། །ཡང་དག་ཉིད་དུ་ལུང་ནི་སྟོན་པར་འགྱུར། །དགེ་སློང་དག་།དེ་ལྟར་བྱང་ཆུབ་སེམས་དཔས་སྐྱེ་བའི་དུས་ལ་བལྟས་ནས་དགའ་ལྡན་གྱི་གནས་དམ་པ་ན་གནས་བཞིན་དུ་རྒྱལ་པོ་ཟས་གཙང་མའི་ཁྱིམ་དམ་པ་དེར་སྔ་ལྟས་བརྒྱད་བསྟན་ཏོ། །བརྒྱད་གང་ཞེ་ན། འདི་ལྟ་སྟེ། ཁྱིམ་དེ་རྩཝ་དང ། སྡོང་དུམ་དང ། ཚེར་མ་དང ། གསེག་མ་དང ། གྱོ་མོ་མེད་ཅིང ། དྲི་མ་མེད་ལ་ཆག་ཆག་ལེགས་པར་བཏབ་པ་དང ། ཕྱག་དར་ལེགས་པར་བྱས་ཤིང ། རླུང་རྡུལ་ཅན་དང ། མུན་པ་དང ། རྡུལ་དང་བྲལ་བ་དང ། སྦྲང་མ་དང ། ཤ་སྦྲང་དང ། སྦྲང་
40b
བུ་དང ། ཕྱེ་མ་ལེབ་དང ། སྡེག་སྦྲུལ་མེད་ཅིང་མེ་ཏོག་གིས་ཀུན་ཏུ་གང་བ། ལག་མཐིལ་ལྟར་མཉམ་པར་གནས་པར་གྱུར་ཏེ། འདི་ནི་སྔ་ལྟས་བྱུང་བ་དང་པོའོ། །རིའི་རྒྱལ་པོ་གངས་རི་ལ་བྱ་འདབ་སྦེད་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ངང་པ་དང ། རྨ་བྱ་དང ། ངུར་པ་དང ། ཀུན་ལ་དང ། ཀ་ལ་པིངྐ་དང ། ཤང་ཤང་ཏེའུ་ལ་སོགས་པ་སྒྲོ་གཤོག་སྣ་ཚོགས་མཛེས་པ་ཡིད་དུ་འོང་ཞིང་སྙན་པའི་སྒྲ་འབྱིན་པའི་བྱའི་ཚོགས་གང་དག་གནས་པ་དེ་དག་དེར་འོངས་ནས་རྒྱལ་པོ་ཟས་གཙང་མའི་ཁྱིམ་དམ་པ་དེའི་སྟེགས་བུ་དང ། བ་གམ་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁང་བཟང་གི་སྟེང་དག་ཏུ་གནས་ཤིང་དགའ་བ་དང ། མགུ་བ་དང ། ཡིད་བདེ་བ་སྐྱེས་ནས་རང་རང་གི་སྒྲ་སྐད་དག་འབྱིན་ཏེ། འདི་ནི་སྔ་ལྟས་བྱུང་བ་གཉིས་པའོ། །གང་ཡང་རྒྱལ་པོ་ཟས་གཙང་མ་དེའི་ཀུན་དགའ་རབ་ཉམས་དགའ་བ་དང ། ནགས་ཚལ་ཉམས་དགའ་བ་དང ། སྐྱེད་མོས་ཚལ་ཉམས་དགའ་བ་དག་ན་མེ་ཏོག་དང ། འབྲས་བུའི་ཤིང་ལྡོན་པ་སྣ་ཚོགས་དུས་ཐ་དད་པར་འབྱུང་བ་དེ་ཐམས་ཅད་ཀྱང་ཁ་འབུས་ཤིང་མེ་ཏོག་རྒྱས་པར་གྱུར་ཏེ། འདི་ནི་སྔ་ལྟས་བྱུང་བ་གསུམ་པའོ། །རྒྱལ་པོ་ཟས་གཙང་མའི་ཆུའི་ལོངས་སྤྱོད་ཀྱི་རྐྱེན་རྫིང་ལ་སོགས་པ་གང་དག་ཡོད་པ་དེ་དག་ཐམས་ཅད་ཀྱང་པདྨ་
41a
༄#། །འདབ་མ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ལྡན་པ་ཚད་ཤིང་རྟའི་འཕང་ལོ་ཙམ་དག་གིས་ཁེབས་པར་གྱུར་ཏེ། འདི་ནི་སྔ་ལྟས་བྱུང་བ་བཞི་པའོ། །རྒྱལ་པོ་ཟས་གཙང་མའི་ཁྱིམ་དམ་པ་དེ་ན་མར་དང ། འབྲུ་མར་དང ། སྦྲང་རྩི་དང ། བུ་རམ་གྱི་དབུ་བ་དང ། ཤ་ཁ་ར་ལ་སོགས་པ་བཟའ་བའི་རྣམ་པ་གང་དག་ཡོད་པ་དེ་དག་ཀྱང་ཡོངས་སུ་སྤྱད་པས་ཟད་པར་མི་འགྱུར་ཞིང ། ཡོངས་སུ་གང་བར་སྣང་སྟེ། འདི་ནི་སྔ་ལྟས་བྱུང་བ་ལྔ་པའོ། །རྒྱལ་པོ་ཟས་གཙང་མའི་ཁྱིམ་མཆོག་དམ་པ་དང ། བཙུན་མོའི་འཁོར་ཆེན་པོ་དག་ན་རྔ་བོ་ཆེ་དང ། རྫ་རྔ་དང ། འཁར་རྔ་དང ། རྒྱུད་གཅིག་པ་དང ། པི་ཝང་དང ། གླིང་བུ་དང ། རྒྱུད་གསུམ་པ་དང ། འཁར་བའི་སིལ་ཁྲོལ་དང ། ཕེག་རྡོབ་ལ་སོགས་པ་རོལ་མོའི་ཆ་བྱད་གང་དག་ཡོད་པ་དེ་དག་ཐམས་ཅད་ཀྱང་མ་བླངས་མ་དཀྲོལ་བར་ཡིད་དུ་འོང་བའི་སྒྲ་རང་སྒྲོག་པར་གྱུར་ཏེ། འདི་ནི་སྔ་ལྟས་བྱུང་བ་དྲུག་པའོ། །རྒྱལ་པོ་ཟས་གཙང་མའི་ཁྱིམ་མཆོག་དམ་པ་ན་གསེར་དང ། དངུལ་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང ། མན་ཤེལ་དང ། བྱི་རུ་ལ་སོགས་པ་རིན་པོ་ཆེ་སྣ་ཚོགས་ཀྱི་སྣོད་གང་དག་ཡོད་པ་དེ་དག་ཐམས་ཅད་ཀྱང་ཁ་བྱེ་ཞིང་དྲི་མ་མེད་ལ་རྣམ་པར་དག་ཅིང་རབ་ཏུ་གང་བར་སྣང་སྟེ། འདི་ནི་སྔ་ལྟས་བྱུང་བ་
41b
བདུན་པའོ། །ཉི་ཟླའི་འོད་ཟིལ་གྱིས་རླག་པར་བྱེད་ཅིང ། ལུས་དང་སེམས་དགའ་བསྐྱེད་པའི་འོད་དག་ཅིང་དྲི་མ་མེད་པས་སྣང་བར་གྱུར་ཏེ། འདི་ནི་སྔ་ལྟས་བྱུང་བ་བརྒྱད་པའོ། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་གསུམ་པ། ལྷ་མོ་སྒྱུ་འཕྲུལ་ཡང་ཁྲུས་བྱས། ལུས་བྱུག་པས་བྱུགས། རྒྱན་སྣ་ཚོགས་ཀྱིས་ལག་པ་ཤིན་ཏུ་བརྒྱན་ཏེ། གོས་ཤིན་ཏུ་འཇམ་པ་མཆོག་བགོས་ཤིང་བཙུན་སྤུ་དང་བཅས་ལ། དགའ་བ་དང ། མཆོག་ཏུ་དགའ་བ་དང ། རངས་པ་ཐོབ་ནས་བུད་མེད་སྟོང་ཕྲག་བཅུས་བསྐོར་ཅིང་མདུན་དུ་བདར་ཏེ་ལྷན་ཅིག་ཏུ་རྒྱལ་པོ་ཟས་གཙང་མ་རོལ་མོ་བྱ་བའི་ཁང་བཟང་ན་བདེ་བར་གནས་པའི་དྲུང་དུ་ཕྱིན་ཏེ། གཡས་རོལ་ན་ཁྲི་བཟང་པོ་རིན་པོ་ཆེའི་དྲ་བས་བརྒྱན་པ་ལ་འདུག་ནས་འཛུམ་པའི་བཞིན་ཁྲོ་གཉེར་མེད་ཅིང་རབ་ཏུ་དང་བའི་མདོག་གིས་རྒྱལ་པོ་ཟས་གཙང་མ་ལ་ཚིགས་སུ་བཅད་པ་འདི་དག་སྨྲས་སོ། །རྒྱལ་པོ་ས་བདག་ལེགས་པར་བདག་ལ་གསན་དུ་གསོལ། །རྒྱལ་པོ་ཁྱོད་ལ་གསོལ་གྱིས་བདག་ལ་ད་གནོད་ཞིག། བདག་གི་བསམ་པ་ཡིད་ལ་ཅི་མཆིས་ཅིར་དགའ་བ། །དེ་དག་བདག་ལ་གསན་ཅིང་ཐུགས་དགྱེས་རངས་པར་མཛོད། །ལྷ་བདག་བསྙེན་གནས་ཚུལ་ཁྲིམས་བརྟུལ་ཞུགས་ལེན་པར་གསོལ། །བདག་ནི་འགྲོ་ལ་བྱམས་པས་ཡན་ལག་བརྒྱད་ལེན་ཏེ། །སྲོག་ཆགས་གནོད་པ་སྤངས་
42a
༄#། །ཤིང་བསམ་པ་རྟག་དག་པས། །ཇི་ལྟར་བདག་ལ་བྱམས་པ་དེ་ལྟར་གཞན་ལ་བགྱི། །རྐུ་སེམས་རྣམ་པར་སྤངས་ཏེ་འདོད་དང་དྲེགས་པ་སྤངས། ། རྒྱལ་པོ་འདོད་པ་རྣམས་ལ་ལོག་པར་གཡེམ་མི་བགྱིད། །བདེན་ལ་གནས་ཤིང་ཕྲ་མ་མཆིས་ཞེ་གཅོད་སྤང ། །མི་དགེ་ཀྱལ་པའི་ཚིག་ཀྱང་ཡོངས་སུ་མི་སྤྱོད་དོ། །གནོད་སེམས་ཞེ་སྡང་ཐ་བ་གཏི་མུག་རྒྱས་པ་དང ། །བརྣབ་སེམས་ཀུན་སྤངས་རང་གི་ནོར་གྱིས་འཚལ་བར་བགྱི། །ཡང་དག་སྦྱོར་བས་ཁ་གསག་ཚུལ་འཆོས་ཕྲག་དོག་སྤང ། ། དགེ་བཅུའི་ལས་ལམ་འདི་དག་བདག་གིས་སྤྱད་པར་བགྱི། །བདག་ནི་ཚུལ་ཁྲིམས་བརྟུལ་ཞུགས་མངོན་དགའ་རབ་བསྡམས་ཀྱིས། །མི་ཡི་དབང་པོ་བདག་ལ་བཞེད་པས་སྲེད་མ་མཛད། །རྒྱལ་པོ་ཁྱོད་ལ་ཡུན་རིང་མི་དགེར་འགྱུར་དུ་མཆི། །བདག་གི་ཚུལ་ཁྲིམས་བརྟུལ་ཞུགས་ཉེར་གནས་དགྱེས་པར་མཛོད། །རྒྱལ་པོ་བདག་གི་འཚལ་བ་འདི་ལགས་དེང་མྱུར་སྩོལ། །ཁང་བཟང་བསིལ་ཁང་ལྡན་པ་དང་སྐྱ་ལྡན་པའི་ནང ། །མེ་ཏོག་བཀྲམ་པའི་མཆིས་མལ་འཇམ་ཞིང་དྲི་བདའ་བར། །གྲོགས་མོས་རྟག་ཏུ་བསྐོར་ཅིང་བདེ་དགར་གནས་སྙམ་བགྱིད། །སྐྱེས་པ་ཉུག་རུམ་རྣམས་དང་དེ་བཞིན་ཁྱེའུ་དག་དང ། །བུད་མེད་པ་ལ་པ་རྣམས་ཀྱང་མདུན་ན་མཆིས་མི་འཚལ། །སྙན་ཅིང་ཡིད་མཆི་སྒྲ་སྙན་
42b
ཉན་པ་མ་གཏོགས་པར། །གཟུགས་དང་སྒྲ་བསུང་ཡིད་དུ་མི་མཆི་བདག་མི་འཚལ། །བཅིངས་དང་བཙོན་རར་སྩལ་བ་ཐམས་ཅད་དགྱེ་བར་གསོལ། །ནོར་གྱིས་བྲེལ་བའི་མི་རྣམས་ནོར་དང་ལྡན་པར་མཛོད། །ཟས་སྐོམ་རད་པ་ཤིང་རྟ་ཁྱོགས་དང་བཞོན་པ་རྟ། །འགྲོལ་བདེ་བའི་སླད་དུ་དགུང་བདུན་སྩལ་བ་མཛོད། །ཕོ་བྲང་འདི་ན་སྐྱེས་པ་ཁྱེའུ་དང་བུད་མེད་དག ། ཇི་སྙེད་མཆིས་པ་འཐབ་རྩོད་ཁྲོ་བའི་ཚིག་བྲལ་ཞིང ། །ཕན་ཚུན་བྱམས་པའི་ཡིད་ལྡན་ཕན་དང་ངེས་སེམས་ཀྱིས། །དགའ་ཚལ་གནས་པའི་ལྷ་ལྟར་མཐུན་ཞིང་བདེ་སྤྱོད་མཛོད། །རྒྱལ་པོའི་ཆད་པ་ཆེ་ཕྲ་གཉེར་གྱིས་བདའ་བ་དང ། །གནོད་པ་བགྱིད་དང་རྡེག་བཙོག་སྡིགས་རུ་མི་མཛད་པར། །ཀུན་ལའང་དང་བའི་ཐུགས་ཀྱིས་བྱམས་དང་ཕན་དགོངས་ཏེ། །ལྷ་ཡིས་སྐྱེ་བོ་རྣམས་ལ་སྲས་གཅིག་བཞིན་དུ་གཟིགས། །རྒྱལ་པོས་དེ་སྐད་ཚིག་ཐོས་རབ་ཏུ་དགར་གྱུར་ནས། །སྨྲས་པ་ཁྱོད་ནི་ཅི་འདོད་དེ་ཀུན་དེ་བཞིན་བྱ། །ཁྱོད་ཀྱི་བསམ་པ་ཡིད་ཀྱིས་གང་རྣམས་རྗེས་བསམ་ཞིང ། །ཁྱོད་ཀྱིས་མཆོག་བླངས་གང་ཡིན་དེ་ནི་ངས་སྦྱིན་ནོ། །རྒྱལ་པོའི་དམ་པས་རང་གི་འཁོར་ལ་བསྒོ་བ་ནི། །ཁང་བཟང་དམ་པའི་སྟེང་དུ་ཕུན་སུམ་ཚོགས་པ་ཤོམས། །མེ་ཏོག་མཛེས་པ་ཁྲོམ་ལ་བདུག་སྤོས་མཆོག་གིས་བདུགས། །གདུགས་དང་བ་དན་ཏ་ལའི་ཕྲེང་བའི་རྒྱན་ཀྱང་གྱིས། །འཐབ་ཕོད་སྟོང་ཕྲག་
43a
༄#། །ཉི་ཤུ་སྣ་ཚོགས་གོ་ཆ་ཅན། །མདའ་མདུང་ལྕགས་མདའ་མདུད་ཐུང་རལ་གྲི་ཐོགས་པ་དག། ཡིད་འོང་སྒྲ་གཅན་ངང་སྐྱ་ལྡན་པ་བསྐོར་བགྱིས་ཏེ། ། ལྷ་མོ་འཇིགས་པ་མེད་པ་བྱ་ཕྱིར་སྲུང་ཞིང་གནས། །ཁྲུས་བྱས་སྤོས་བྱུགས་གོས་མཆོག་དག་གིས་ཡན་ལག་བརྒྱན། །བུད་མེད་རྣམས་ཀྱིས་དེ་བསྐོར་ལྷ་ཡི་བུ་མོ་འདྲ། །ཡིད་དུ་འོང་བའི་སྒྲ་ལྡན་སིལ་སྙན་སྟོང་བླངས་ཏེ། །ལྷ་མོ་དེར་ཞུགས་ལྷ་ཡི་བུ་མོ་བཞིན་དུ་གནས། །ལྷ་ཡི་རིན་ཆེན་རིན་ཐང་ཆེན་པོས་རྩ་སྤྲས་པ། །ཁྲི་ལ་གོས་མཆོག་མང་པོས་ཡིད་འོང་མ་ལ་བཤམས་ཏེ། །མལ་ཕྱིན་གཙུག་གི་ནོར་བུ་རིན་ཆེན་ཀློང་བྱས་ནས། །འདྲེས་པའི་ནགས་ཚལ་ལྷ་ཡི་བུ་མོ་བཞིན་དུ་གནས། །དགེ་སློང་དག་།དེ་ནས་རྒྱལ་པོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། ལྷའི་བུ་རབ་འཐབ་བྲལ་དང ། ཡོངས་སུ་དགའ་ལྡན་དང ། རབ་འཕྲུལ་དགའ་དང ། གཞན་འཕྲུལ་དབང་བྱེད་དང ། བདུད་ཀྱི་བུ་དེད་དཔོན་དང ། མི་མཇེད་ཀྱི་བདག་པོ་ཚངས་པ་དང ། མདུན་ན་འདོན་ཚངས་མཆོག་དང ། མདུན་ན་འདོན་ཚངས་བཟང་དང ། འོད་བཀོད་པ་དང ། འོད་གསལ་དང ། གནས་གཙང་མའི་རིས་ཀྱི་དབང་ཕྱུག་ཆེན་པོ་དང ། མཐར་ཐུག་དང ། འོག་མིན་པ་དང ། དེ་དག་ལ་སོགས་པ་དང ། གཞན་ཡང་ལྷ་བརྒྱ་སྟོང་
43b
མང་པོ་འདུས་ཏེ་གཅིག་ལ་གཅིག་འདི་སྐད་ཅས་སྨྲས་སོ། །གྲོགས་པོ་དག་།བདག་ཅག་གིས་བྱང་ཆུབ་སེམས་དཔའ་གཅིག་བུ་གཉིས་སུ་མེད་པར་གཤེགས་སུ་གསོལ་ན། བདག་ཅག་གིས་བྱས་པ་མ་ཤེས་པར་འགྱུར་ཏེ། བདག་ཅག་ལ་མི་ཆའི། གྲོགས་པོ་དག་།ཁྱེད་ཀྱི་ནང་ནས་བྱང་ཆུབ་སེམས་དཔའ་ཐོག་མ་ཡུམ་གྱི་ལྷུམས་སུ་གཤེགས་པ་དང ། ལྷུམས་ན་བཞུགས་པ་དང ། བལྟམས་པ་དང ། ཐོར་བུ་དང ། བྱིས་པའི་ནང་ན་རོལ་པ་དང ། བཙུན་མོའི་འཁོར་གྱི་ནང་ན་བཞུགས་པ་དང ། རོལ་མོ་གཟིགས་པ་དང ། མངོན་པར་འབྱུང་བ་དང ། དཀའ་བ་སྤྱོད་པ་དང ། བྱང་ཆུབ་ཀྱི་སྙིང་པོར་གཤེགས་པ་དང ། བདུད་འདུལ་བ་དང ། བྱང་ཆུབ་མངོན་པར་རྫོགས་པར་འཚང་རྒྱ་བ་དང ། ཆོས་ཀྱི་འཁོར་ལོ་བསྐོར་བ་དང ། མྱ་ངན་ལས་འདས་པ་ཆེན་པོ་བསྟན་གྱི་བར་དུ་ཕན་པའི་སེམས་དང ། དགའ་བའི་སེམས་དང ། ཕངས་པའི་སེམས་དང ། བྱམས་པའི་སེམས་དང ། མཉེན་པའི་སེམས་ཀྱིས་རྟག་པར་རྒྱུན་དུ་བྱང་ཆུབ་སེམས་དཔའི་ཞབས་འབྲིང་ན་འཁོད་པར་སུ་དག་སྤྲོ། །དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ཁྱེད་ལས་སུ་ཞིག་རྟག་ཏུ་དགའ་ཡིད་ཀྱིས།། གཟུགས་མཆོག་མངའ་བའི་ཞབས་འབྲིང་བྱེད་པར་སྤྲོ། །སུ་དག་རང་གི་བསོད་ནམས་གཟི་བརྗིད་དང ། །སྟོབས་དང་གྲགས་པ་རྣམ་པར་སྤེལ་བར་འདོད། །གང་ཞིག་ལྷ་ཡི་ཕོ་
44a
༄#། །བྲང་འདི་དག་ན། །ལྷ་མོ་དག་དང་འདོད་པའི་ཡོན་ཏན་གྱི། །ལྷ་ཡི་བདེ་བས་དགའ་བར་འདོད་པ་དག་།དྲི་མེད་ཟླ་བའི་ཞལ་གྱིས་ཞབས་འབྲིང་གྱིས། །དེ་བཞིན་འདྲེས་པའི་ནགས་ཚལ་མཛེས་པ་མཆོག་།ལྷ་ཡི་འབྱུང་གནས་ལྷ་ཡི་ཕོ་བྲང་ན། །གསེར་མདོག་མེ་ཏོག་རྒྱས་པར་དགའ་འདོད་ན། །དྲི་མེད་གཟི་བརྗིད་མངའ་བའི་ཞབས་འབྲིང་གྱིས། །གང་གིས་སྣ་ཚོགས་ཤིང་རྟ་དེ་བཞིན་དུ། །དགའ་ཚལ་མེ་ཏོག་མནྡཱར་འདབ་རྒྱས་སུ། །ལྷ་མོ་ལྷན་ཅིག་རྩེ་བར་འདོད་པ་དག་།སྐྱེས་བུ་ཆེན་པོ་འདི་ཡི་ཞབས་འབྲིང་གྱིས། །འཐབ་བྲལ་བདག་པོའམ་དགའ་ལྡན་བདག་པོའམ། །ཡང་ན་དབང་ཕྱུག་འགྱུར་བར་འདོད་པ་དང ། །འགྲོ་བ་ཀུན་གྱི་མཆོད་འོས་འདོད་པ་དག་།གྲགས་པ་མཐའ་ཡས་འདི་ཡི་ཞབས་འབྲིང་གྱིས། །གང་ཞིག་འཕྲུལ་དགའི་ཁང་པ་མཛེས་པ་དང ། །དབང་སྒྱུར་ལྷ་ཡི་གནས་སུ་རྩེ་འདོད་ཅིང ། །ཡིད་ཀྱི་འཕྲུལ་གྱིས་ཐམས་ཅད་སྤྱོད་འདོད་པ། ། ཡོན་ཏན་མཆོག་མངའ་འདི་ཡི་ཞབས་འབྲིང་གྱིས། །བདུད་ཀྱི་དབང་པོ་ཞེ་སྡང་ཡིད་མེད་པ། །རྫུ་འཕྲུལ་དབང་ཕྱུག་ཀུན་གྱི་མཐར་ཕྱིན་པའི། །འདོད་པའི་དབང་ཕྱུག་དབང་མཐར་ཕྱིན་འདོད་ན། །ཕན་པ་མཛད་པ་འདི་དང་ལྷན་ཅིག་དང ། །དེ་བཞིན་འདོད་པའི་ཁམས་ལས་འདའ་བྱས་ཏེ། །ཚངས་པའི་གནས་སུ་གནས་པར་སུ་འདོད་པ། །དེ་ནི་ཚད་མེད་བཞི་
44b
ཡི་གཟི་མངའ་བ། །སྐྱེས་བུ་ཆེན་པོའི་ཞབས་འབྲིང་དེང་ནས་གྱིས། །འོན་ཏང་གང་ཞིག་མི་ཡི་ནང་དག་ཏུ། །འཁོར་ལོས་བསྒྱུར་ཡུལ་ཡངས་པར་སྐྱེ་འདོད་ན། །རིན་ཆེན་འབྱུང་གནས་མི་འཇིགས་བདེན་སྦྱིན་པ། །བསོད་ནམས་ཡངས་པ་མངའ་བའི་ཞབས་འབྲིང་གྱིས། །གང་ཞིག་ས་བདག་དེ་བཞིན་ཚོང་དཔོན་བུ། །ཕྱུག་ཅིང་སྐྱིད་ལ་ནོར་མང་ཚོགས་ཆེན་དང ། །དགྲ་ཡི་དཔུང་བཅོམ་འཁོར་དང་ལྡན་འདོད་པ། །དེ་ནི་ཕན་མཛད་འདི་དང་ལྷན་ཅིག་དེངས། །གཟུགས་དང་ལོངས་སྤྱོད་དེ་བཞིན་དབང་ཕྱུག་དང ། །སྙན་པ་གྲགས་དང་སྤོབས་དང་ཡོན་ཏན་དང ། །གཟུང་འོས་ཚིག་དང་མཉན་པའི་ཚིག་འདོད་པ། །དེ་ནི་ཚངས་དབྱངས་མཁས་པའི་གན་དུ་སོང ། །ལྷ་དང་མི་ཡི་འདོད་པ་གང་ཡིན་དང ། །སྲིད་པ་གསུམ་གྱི་བདེ་བ་ཐམས་ཅད་དང ། །བསམ་གཏན་བདེ་དང་དབེན་པའི་བདེ་འདོད་པ། །དེ་ནི་ཆོས་ཀྱི་དབང་ཕྱུག་ཞབས་འབྲིང་གྱིས། །འདོད་ཆགས་དང་ནི་ཞེ་སྡང་སྤང་བ་དང ། །ཉོན་མོངས་མུན་པ་སེལ་བར་སུ་འདོད་ཅིང ། །ཞི་བ་རབ་ཞི་ཉེར་ཞི་ཡིད་ལྡན་པ། །དེ་ནི་ཐུགས་དུལ་ཞབས་འབྲིང་མྱུར་དུ་སོང ། །གང་ཞིག་སློབ་དང་མི་སློབ་རང་རྒྱལ་དང ། །ཐམས་ཅད་མཁྱེན་པའི་ཡེ་ཤེས་ཐོབ་འདོད་ཅིང ། ། སྟོབས་བཅུས་སེངྒེའི་སྒྲ་སྒྲོག་སུ་འདོད་པ། །དེ་ནི་ཡོན་ཏན་རྒྱ་མཚོ་མཁས་དྲུང་སོང ། །གང་ཞིག་ངན་སོང་རྣམས་ཀྱི་ལམ་གཅོད་ཅིང ། །བཟང་འགྲོ་འཆི་བ་མེད་པའི་ལམ་དབྱེ་དང ། །
45a
༄#། །ཡན་ལག་བརྒྱད་ལམ་འགྲོ་བས་འགྲོ་འདོད་ན། །འགྲོ་ལམ་མཐར་འབྱིན་འདི་ཡི་ཞབས་འབྲིང་གྱིས། །གང་ཞིག་བདེ་གཤེགས་ཡོངས་སུ་མཆོད་པ་དང ། ། ཐུགས་རྗེ་མངའ་བ་དེ་ལས་ཆོས་ཉན་དང ། །དགེ་འདུན་ཡོན་ཏན་ཐོབ་པར་འདོད་པ་ནི། །ཡོན་ཏན་རྒྱ་མཚོ་འདི་ཡི་ཞབས་འབྲིང་གྱིས། །སྐྱེ་རྒ་ན་འཆིའི་སྡུག་བསྔལ་ཟད་པ་དང ། ། འཁོར་བའི་བཅིངས་པ་རྣམ་པར་དགྲོལ་བ་དང ། །ནམ་མཁའི་མཐའ་མཉམ་རྣམ་དག་སྤྱོད་འདོད་པ། །དེ་ནི་སེམས་ཅན་དག་པའི་ཞབས་འབྲིང་གྱིས། །འགྲོ་བ་ཀུན་ན་ཡིད་འོང་སྡུག་མཛེས་ཤིང ། །གཟུགས་མཆོག་མཚན་དང་ཡོན་ཏན་རྒྱས་པ་དང ། །བདག་དང་དེ་བཞིན་གཞན་ཡང་འགྲེལ་འདོད་པ། །དེ་ནི་བལྟ་སྡུག་མཁས་པའི་གན་དུ་སོང ། ། ཚུལ་ཁྲིམས་ཏིང་འཛིན་དེ་བཞིན་ཤེས་རབ་དང ། །ཟབ་ཅིང་བལྟ་དཀའ་གཏིང་དཔག་དཀའ་བ་ཡི། །རྣམ་གྲོལ་ཐོབ་འདོད་མཁས་པ་གང་ཡིན་དེ། །སྨན་པའི་རྒྱལ་པོའི་གན་དུ་མྱུར་དུ་སོང ། །ཡོན་ཏན་འདི་དང་གཞན་ཡང་རྣམ་མང་དང ། །སྲིད་པའི་བདེ་དང་དེ་བཞིན་མྱ་ངན་འདས། །ཡོན་ཏན་ཐམས་ཅད་རབ་ཏུ་རྫོགས་འདོད་པ། །དེ་ནི་བརྟུལ་ཞུགས་གྲུབ་མཁས་གན་དུ་སོང ། །ཚིག་དེ་ཐོས་ནས་རྒྱལ་ཆེན་བཞིའི་རིས་ཀྱི་ལྷ་འབུམ་ཕྲག་བརྒྱད་ཅུ་རྩ་བཞི་དང ། སུམ་ཅུ་རྩ་གསུམ་གྱི་ལྷ་འབུམ་དང ། འཐབ་བྲལ་གྱི་ལྷ་འབུམ་
45b
དང ། དགའ་ལྡན་གྱི་ལྷ་འབུམ་དང ། འཕྲུལ་དགའི་ལྷ་འབུམ་དང ། བདུད་ཀྱི་རིས་ཀྱི་ལྷ་སྔོན་གྱི་དགེ་བའི་ལས་ཀྱིས་བྱུང་བ་དྲུག་ཁྲི་དང ། ཚངས་རིས་ཀྱི་ལྷ་དྲུག་ཁྲི་བརྒྱ་སྟོང་དང ། འོག་མིན་གྱི་བར་གྱི་ལྷ་བརྒྱ་སྟོང་མང་པོ་དག་འདུས་པར་གྱུར་པ་དང ། གཞན་ཡང་ཤར་ཕྱོགས་དང ། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་ནས་ལྷའི་བུ་བརྒྱ་སྟོང་མང་པོ་འདུས་པར་གྱུར་པ་དེ་དག་ལས་གང་དག་མཆོག་ཏུ་བྱ་བའི་ལྷའི་བུ་དག་གིས་ལྷའི་འཁོར་ཆེན་པོ་དེ་དག་ལ་ཚིགས་སུ་བཅད་པ་འདི་དག་སྨྲས་སོ། །བདག་ཅག་རྣམས་ཀྱི་བསམ་པ་ཡང་དག་ཅི་འདྲ་ཡི། །ཚིག་འདི་ལྷ་ཡི་དབང་པོ་དག་གིས་གསན་དུ་གསོལ། །འདོད་པའི་དགའ་འབྱོར་བསམ་གཏན་བདེ་བ་མཆོག་སྤངས་ཏེ། །སེམས་ཅན་དག་པ་དམ་པ་འདི་ཡི་ཞབས་འབྲིང་བགྱི། །ལྷུམས་སུ་གཤེགས་དང་ལྷུམས་ན་བཞུགས་དང་བལྟམས་པའི་ཚེ། །བདག་ཉིད་ཆེན་པོ་མཆོད་འོས་ཤིན་ཏུ་མཆོད་པར་བགྱི། །བསོད་ནམས་དག་གིས་བསྲུངས་པའི་དྲང་སྲོང་ཡོངས་བསྲུངས་ན། །ཞེ་སྡང་སེམས་ཀྱིས་སུས་ཀྱང་གླགས་རྙེད་འགྱུར་མ་མཆིས། །གླུ་དབྱངས་སིལ་སྙན་རོལ་མོའི་དབྱངས་སྒྲ་ལེགས་བསྒྲགས་པས། །ཡོན་ཏན་རྒྱ་མཚོ་མངའ་བའི་ཡོན་ཏན་བསྔགས་བརྗོད་དེ། །གང་ཐོས་སྐྱེ་བོ་བྱང་ཆུབ་མཆོག་ཏུ་སེམས་བསྐྱེད་པར། །ལྷ་དང་མི་རྣམས་ཐམས་ཅད་རབ་ཏུ་དགའ་བར་བགྱི། །རྒྱལ་པོའི་
46a
༄#། །ཕོ་བྲང་མེ་ཏོག་སིལ་མས་རྒྱས་པར་དགང ། ། ག་རུ་མཆོག་ནག་པོས་བདུགས་ཏེ་དྲི་ཞིམ་བགྱི། །དེ་ཡི་དྲི་ཚོར་ལྷ་མི་རབ་ཏུ་དགའ་འགྱུར་ཞིང ། །ནད་མེད་རིམས་ནད་བྲལ་ཞིང་བདེ་བར་འགྱུར་བར་བགྱི། །མེ་ཏོག་མནད་ར་དང་ཀུན་ནས་འདུ་བ་དང ། །སིམ་བྱད་རབ་ཏུ་སིམ་བྱེད་སྠ་ལ་རྣམ་སྣང་དང ། །མེ་ཏོག་བཟང་པོས་འཕྲིན་ལས་དགེ་ལས་བྱུང་བ་དེ། །མཆོད་པའི་སླད་དུ་སེར་སྐྱའི་གྲོང་ཀུན་དགང་བར་བགྱི། །ཇི་སྲིད་ཡུམ་གྱི་ལྷུམས་ན་དྲི་གསུམ་མ་གོས་བཞུགས། །ཇི་སྲིད་རྒ་ཤི་མཐར་འབྱིན་བལྟམས་པར་གྱུར་གྱི་བར། །དེ་སྲིད་དུས་སུ་དང་བའི་ཡིད་ཀྱིས་ཞབས་འབྲིང་བགྱི། །བློ་གྲོས་ཆེ་མངའ་མཆོད་པར་བགྱི་བར་བདག་ཅག་སེམས། །བལྟམས་ནས་གོམ་པ་བདུན་གཤེགས་བརྒྱ་བྱིན་ཚངས་པ་ཡིས། །ལག་ཏུ་བླངས་ཏེ་སྤོས་ཆུ་དག་གིས་སྐུ་བསིལ་བ། །སེམས་ཅན་རྣམ་པར་དག་པ་དེ་ནི་མཐོང་བ་ཡི། །ལྷ་མི་དེ་དག་ཐོབ་པ་རྒྱ་ཆེན་ལེགས་པར་ཐོབ། །ཇི་སྲིད་བར་དུ་འཇིག་རྟེན་རྗེས་སུ་མཐུན་མཛད་ཅིང ། །འདོད་པའི་ཉོན་མོངས་འཇོམས་མཛད་བཙུན་མོའི་ནང་བཞུགས་ལ། །ཇི་སྲིད་ཅིག་ན་རྒྱལ་སྲིད་ཀུན་སྤངས་ཁབ་ནས་འབྱུང ། །དེ་སྲིད་དུས་སུ་དང་བའི་སེམས་ཀྱིས་ཞབས་འབྲིང་བགྱི། །ཇི་སྲིད་ཅིག་ན་རིན་བསྣམས་བྱང་ཆུབ་སྙིང་པོར་གཤེགས། །ཇི་སྲིད་ཅིག་ན་བདུད་བཅོམ་བྱང་ཆུབ་
46b
རེག་འགྱུར་ཅིང ། །ཚངས་པ་ཁྲག་ཁྲིག་འཁོར་ལོ་བསྐོར་བར་གསོལ་བཏབ་པ། །དེ་སྲིད་བདེ་བར་གཤེགས་ལ་མཆོད་པ་རྒྱ་ཆེན་བགྱི། །སེམས་ཅན་བྱེ་བ་ཁྲག་ཁྲིག་འཆི་མེད་བཏུལ་གྱུར་ཏེ། །སྟོང་གསུམ་འདིར་ནི་སངས་རྒྱས་འཕྲིན་ལས་ནམ་ལགས་ནས། །ཞི་ཞིང་བསལ་བའི་མྱ་ངན་འདས་པར་གཤེགས་གྱུར་པ། །དེ་སྲིད་ཀུན་གྱིས་དྲང་སྲོང་གྲགས་ཆེན་གཏང་མི་བགྱི། །དགེ་སློང་དག་།དེ་ནས་འདོད་པ་ན་སྤྱོད་པའི་ལྷའི་བུ་མོ་དག་གིས་བྱང་ཆུབ་སེམས་དཔའི་ལུས་གཟུགས་ཕུན་སུམ་ཚོགས་པ་མཐོང་ནས་འདི་སྙམ་དུ་སེམས་ཏེ། སེམས་ཅན་དག་པ་མཆོག་དམ་པ་འདི་ལྟ་བུ་འཛིན་པར་འགྱུར་བའི་ན་ཆུང་དེ་ནི་ཇི་ལྟ་བུ་ཞིག་ཡོད་སྙམ་ནས་དེ་དག་ངོ་མཚར་དུ་གྱུར་ཏེ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་མཆོག་ཏུ་བྱ་བ་དག་ཁྱེར་ནས་ལྷའི་ལུས་ཡིད་ལས་གྲུབ་པ་ཐོབ་ཅིང་བསོད་ནམས་ཀྱི་རྣམ་པར་སྨིན་པའི་རྫུ་འཕྲུལ་གྱིས་བྱིན་གྱིས་བརླབས་པ་དེ་དག་སྐད་ཅིག་དེ་ཉིད་ལ་ལྷའི་ཕོ་བྲང་དེ་ནས་མི་སྣང་བར་གྱུར་ཏེ། སེར་སྐྱའི་གྲོང་ཁྱེར་ཆེན་པོ་དམ་པ་སྐྱེད་མོས་ཚལ་བརྒྱ་སྟོང་གིས་བརྒྱན་པ། རྒྱལ་པོ་ཟས་གཙང་མའི་ཁྱིམ་མཆོག་ཁང་བཟང་ཆེན་པོ་དང་སྐྱ་ལྡན་ཞེས་བྱ་བ་ལྷའི་དབང་པོའི་ཕོ་བྲང་ལྟ་བུ་དེར་ཕྱིན་ནས་ལྷའི་བུ་མོ་གོས་ལྷུག་ལྷུག་པོ་གྱོན་པ། དགེ་བ་དྲི་མ་མེད་པའི་བསོད་ནམས་ཀྱི་གཟི་བརྗིད་ཀྱིས་རབ་ཏུ་བརྒྱན་པ། ལྷའི་རྒྱན་གྱིས་ལག་པ་ཤིན་ཏུ་
47a
༄#། །བརྒྱན་པ་དེ་དག་གིས་ལྷ་མོ་སྒྱུ་འཕྲུལ་མལ་མཆོག་གི་སྟེང་ན་འདུག་པ་མཐོང་ནས་ཕན་ཚུན་མཛུབ་མོས་སྟོན་ཅིང ། ནམ་མཁའི་དཀྱིལ་ན་འཁོད་དེ་གཅིག་ལ་གཅིག་ཚིགས་སུ་བཅད་དེ་སྨྲས་པ། ལྷ་གནས་འཁོད་པའི་ལྷ་ཡི་བུ་མོ་རྣམས། །ཡིད་འོང་བྱང་ཆུབ་སེམས་དཔའི་སྐུ་མཐོང་ནས། །དེ་ཚེ་དེ་དག་འདི་སྙམ་སེམས་གྱུར་ཏེ། །བྱང་ཆུབ་སེམས་དཔའི་ཡུམ་གྱུར་ཇི་འདྲ་སྙམ། །ལག་ན་མེ་ཏོག་ཕྲེང་ཅན་དེ་དག་རྣམས། །ཐེ་ཚོམ་སྐྱེས་ནས་རྒྱལ་པོའི་ཕོ་བྲང་དུ། །མེ་ཏོག་དེ་བཞིན་བྱུག་པ་ཐོགས་ནས་སུ། །སོར་བཅུ་ཐལ་མོ་སྦྱར་ཏེ་འདུད་ཅིང་ལྷགས། །ལྷུག་ལྷུག་གོས་གྱོན་འཇོ་བག་གཟུགས་འཆང་བས། །ལྷ་མོ་སྒྱུ་འཕྲུལ་མལ་སྟེང་གནས་མཐོང་ནས། ། ལག་པ་གཡས་པའི་སོར་མོས་ཕྱག་བྱས་ཏེ། །མི་ཡི་བུད་མེད་གཟུགས་ལ་ལེགས་ལྟོས་འཛེར། །བདག་ཅག་ང་རྒྱལ་སེམས་ཀྱིས་མངོན་སེམས་པ། །ལྷ་ཡི་བུ་མོ་གཟུགས་མཆོག་ཡིད་འོང་སྙམ། །རྒྱལ་པོའི་བཙུན་མོ་འདི་ཡི་གཟུགས་མཐོང་ན། །ལྷ་ཡི་ལུས་ཀྱང་ཟིལ་གྱིས་ནོན་པར་མཐོང ། །འདི་ནི་གང་ཟག་མཆོག་གི་ཡུམ་འགྱུར་དུ། །ཡོན་ཏན་ལྡན་པས་ཤིན་ཏུ་གཤའ་ཞིང་འོས། །ནོར་བུ་རིན་ཆེན་སྣོད་བཟང་གནས་པ་ལྟར། །ལྷ་མོ་འདི་ནི་ལྷ་ཡི་ལྷ་སྣོད་ཡིན། །རྐང་ལག་མཐིལ་དང་སྤྱི་བོ་མན་ཆད་དུ། །ཡན་ལག་
47b
ཡིད་འོང་ལྷ་ལས་ལྷག་པ་སྟེ། །མིག་གིས་བལྟ་ན་ངོམས་པར་འགྱུར་མ་ཡིན། །ཡིད་དང་སེམས་ནི་ཕྱིར་ཞིང་དགའ་བར་འགྱུར། །འདི་ཡི་ཁ་བཞིན་ལུས་མཛེས་སྡུག་པ་ནི། །ནམ་མཁའི་དཀྱིལ་ན་ཟླ་བ་མཛེས་པ་འདྲ། །ཉི་ལྟར་དྲི་མེད་མེ་ལྟར་འབར་བ་སྟེ། །འདི་ཡི་ལུས་ལས་འོད་གསལ་བཟང་པོ་འབྱུང ། །གསེར་སྦྲམ་བཙོམ་བཟང་པོའི་གསེར་བཞིན་དུ། །ལྷ་མོ་འདི་ཡི་ཁ་དོག་རྣམ་པར་མཛེས། །འདི་ཡི་སྐྲ་ནི་འཇམ་གཙང་དྲི་ཞིམ་སྟེ། །བུང་བ་མཆོག་གི་མདོག་འདྲ་ལྕང་ལོར་འཁྱིལ། །འདི་ཡི་མིག་ནི་པདྨའི་འདབ་མ་འདྲ། །རྣམ་དག་སོ་ནི་ནམ་མཁའི་སྐར་མ་བཞིན། །རྐེད་པ་གཞུ་ལྟར་ཕྲ་ཞིང་སྟ་ཟུར་ཡངས། །ཕྲག་པ་ཟླུམ་ཞིང་ཚིགས་རྣམས་མངོན་པ་མེད། །བརླ་ལེགས་གླང་པོ་མཆོག་གི་སྣ་འདྲ་སྟེ། །བྱིན་པ་ཤིན་ཏུ་ལེགས་པ་བྱིན་གྱིས་ཕྲ། །རྐང་ལག་མཐིལ་མཉམ་ཤིན་ཏུ་དམར་བ་སྟེ། །འདི་ནི་གཞན་མིན་ལྷ་ཡི་བུ་མོར་ངེས། །དེ་ལྟར་རྣམ་མང་དུ་མར་བལྟས་བྱས་ནས། །མེ་ཏོག་གཏོར་ཏེ་བསྐོར་བ་བྱས་ནས་ནི། །གྲགས་ལྡན་རྒྱལ་བའི་ཡུམ་ལ་བསྟོད་བྱས་ཏེ། །སྐད་ཅིག་གཅིག་གིས་ཕྱིར་ཡང་ལྷ་གནས་དོང ། །དེ་ནས་ཕྱོགས་བཞི་སྐྱོང་བ་བཞི་པོ་དང ། །འཐབ་བྲལ་རབ་དང་བརྒྱ་བྱིན་འཕྲུལ་བ་དང ། །ལྷ་ཚོགས་ལྷ་མིན་གྲུལ་བུམ་སྲིན་པོ་དང ། །མི་འམ་ཅི་དང་ལྟོ་འཕྱེ་ཆེས་སྨྲས་པ། །སྐྱེས་བུ་མཆོག་གི་མདུན་དུ་ཁྱེད་དེངས་ལ། །སྐྱེས་བུ་དམ་པ་
48a
༄#། །དེ་ལ་སྲུང་བ་གྱིས། །འགྲོ་བ་དག་ལ་ཡིད་ཀྱིས་སྡང་མ་བྱེད། །མི་རྣམས་ལ་ཡང་གཙེ་བ་མ་བྱེད་ཅིག་།ལྷ་མོ་སྒྱུ་འཕྲུལ་ཁྱིམ་མཆོག་གང་གནས་པ། །དེར་ནི་མཐུན་པར་འཁོར་དང་ལྷན་ཅིག་ཀུན། །མདའ་གཞུ་རལ་གྲི་མདུད་ཐུང་མཚོན་ཐོགས་ལ། །ནམ་མཁའི་དཀྱིལ་ན་གནས་ཏེ་བལྟ་པར་གྱིས། །དེ་ལྟར་ཤི་འཕོའི་དུས་ཤེས་ལྷའི་བུ་རྣམས། །མེ་ཏོག་དེ་བཞིན་བྱུག་པ་ཐོགས་ནས་ནི། །སོར་བཅུ་ཐལ་མོ་སྦྱར་ཏེ་འདུད་བྱོས་ལ། །དགའ་བའི་སེམས་ཀྱིས་སྒྱུ་འཕྲུལ་དྲུང་དུ་དེངས། །སྨྲ་བའི་སེངྒེ་དུས་ནི་དེང་ལེགས་ཀྱི། །འཇིག་རྟེན་ཀུན་ལ་ཐུགས་རྗེ་བརྩེ་བསྐྱེད་དེ། །མི་དབང་སེམས་ཅན་དག་པ་འཆི་འཕོ་སྟོན། །མཆོད་སྦྱིན་དོན་དུ་བདག་ཅག་གསོལ་བ་འདེབས། །དགེ་སློང་དག ། དེ་ནས་བྱང་ཆུབ་སེམས་དཔའ་འཆི་འཕོ་བའི་དུས་ཀྱི་ཚེ་ཤར་ཕྱོགས་ནས་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ། དགའ་ལྡན་གྱི་གནས་དམ་པ་ན་གནས་པ་བརྒྱ་སྟོང་ཕྲག་མང་པོ་དག་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར་བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་བཞིན་དུ་ཕྱོགས་བཅུའི་ཕྱོགས་རེ་རེ་ནས་ཀྱང་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ། དགའ་ལྡན་གྱི་གནས་དམ་པ་ན་གནས་པ་བརྒྱ་སྟོང་ཕྲག་མང་པོ་དག་བྱང་ཆུབ་སེམས་དཔའ་ལ་མཆོད་པ་བྱ་བའི་
48b
ཕྱིར་བྱང་ཆུབ་སེམས་དཔའ་ག་ལ་བ་དེར་ལྷགས་སོ། །རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་ནས་ལྷའི་བུ་མོ་འབུམ་ཕྲག་བརྒྱད་ཅུ་རྩ་བཞི་སིལ་སྙན་དང་གླུ་དབྱངས་སྣ་ཚོགས་ལེན་ཅིང་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར་བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་བཞིན་དུ་སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ནང་ནས་ལྷའི་བུ་མོ་འབུམ་ཕྲག་བརྒྱད་ཅུ་རྩ་བཞི་སིལ་སྙན་དང་གླུ་དབྱངས་སྣ་ཚོགས་ལེན་ཅིང ། བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར་བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་ནས་བྱང་ཆུབ་སེམས་དཔའ་ཁང་པ་བརྩེགས་པ་ཆེན་པོ་བསོད་ནམས་ཐམས་ཅད་ཀྱིས་ཡང་དག་པར་བྱུང་བ་དཔལ་གྱི་སྙིང་པོ་ལྷ་རྣམས་ཀྱིས་ཀུན་ནས་བལྟ་བའི་ནང་དུ་འདུག་སྟེ་བྱང་ཆུབ་སེམས་དཔའ་དེ་དག་དང ། ལྷ་བྱེ་བ་ཁྲག་ཁྲིག་བརྒྱ་ཕྲག་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་དགའ་ལྡན་གྱི་གནས་དམ་པ་ནས་བསྐྱོད་པར་བརྩམས་སོ། །དགེ་སློང་དག་།དེ་ལྟར་བསྐྱོད་པར་བརྩམས་པའི་ཚེ་བྱང་ཆུབ་སེམས་དཔས་འོད་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལྟར་རྒྱ་ཆེ་ཞིང་ཡངས་ལ་ཐ་གྲུ་ཆེ་བ་འདིར་སྔོན་ཆད་མ་བྱུང་བའི་འོད་སྣང་བ་ལྷའི་འོད་ལས་
49a
༄#། །ཤིན་ཏུ་འདས་པས་ཡོངས་སུ་གསལ་ཞིང་སྣང་བར་གྱུར་ཏོ། །འཇིག་རྟེན་གྱི་བར་གང་སྡིག་པ་སྡིག་པས་ཁེབས་ནས་མུན་པ་མུན་ནག་སྨག་ཏུ་གྱུར་པ། སྣང་བ་མེད་པ་གང་དུ་ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་ལ་འདི་ལྟར་དབང་ཆེ་བར་གྲགས་པས་ཀྱང་འོད་དང ། ཁ་དོག་དང ། གཟི་བརྗིད་ཀྱིས་ལམ་མེར་མ་གྱུར། ཐལ་ལེར་མ་གྱུར། ལྷང་ངེར་མ་གྱུར་པ་དེར་སེམས་ཅན་གང་དག་སྐྱེས་བ་དེ་དག་རང་རང་གིས་ལག་པ་བརྐྱང་པའང་མི་མཐོང་བ་དེ་དག་ཏུའང་དེའི་ཚེ་སྣང་བ་ཆེན་པོས་རྒྱས་པར་ཁྱབ་པར་གྱུར་ཅིང ། དེར་སྐྱེས་པའི་སེམས་ཅན་དེ་དག་སྣང་བ་དེས་ཁྱབ་པར་གྱུར་ནས་གཅིག་གིས་གཅིག་མཐོང་ཞིང་གཅིག་གིས་གཅིག་ཤེས་ཏེ་འདི་སྐད་དུ་ཀྱེ་གྲོགས་པོ་དག་།སེམས་ཅན་གཞན་དག་ཀྱང་འདིར་སྐྱེས་སོ། །ཀྱེ་གྲོགས་པོ་དག་།སེམས་ཅན་གཞན་དག་ཀྱང་འདིར་སྐྱེས་སོ་ཞེས་ཟེར་བར་གྱུར་པ་དེ་ལྟ་བུའི་འོད་ལུས་ལས་བཀྱེའོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་རྣམ་པ་དྲུག་དང ། ལྟས་ཆེན་པོ་བཅོ་བརྒྱད་དུ་གཡོས ། རབ་ཏུ་གཡོས། ཀུན་ཏུ་རབ་ཏུ་གཡོས་སོ། །འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །ལྡེག་།རབ་ཏུ་ལྡེག་།ཀུན་ཏུ་རབ་ཏུ་ལྡེག་གོ་།འཁྲུགས། རབ་ཏུ་འཁྲུགས། ཀུན་ཏུ་
49b
རབ་ཏུ་འཁྲུགས་སོ། །འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར་རོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །མཐའ་དམའ་ན་དབུས་མཐོ་བར་གྱུར་ཏོ། །དབུས་དམའ་ན་མཐའ་མཐོ་བར་གྱུར་ཏོ། །ཤར་ཕྱོགས་དམའ་ན་ནུབ་ཕྱོགས་མཐོ་བར་གྱུར་ཏོ། །ནུབ་ཕྱོགས་དམའ་ན་ཤར་ཕྱོགས་མཐོ་བར་གྱུར་ཏོ། །ལྷོ་ཕྱོགས་དམའ་ན་བྱང་ཕྱོགས་མཐོ་བར་གྱུར་ཏོ། །བྱང་ཕྱོགས་དམའ་ན་ལྷོ་ཕྱོགས་མཐོ་བར་གྱུར་ཏོ། །དེའི་ཚེ་སྒྲ་དགའ་བར་འགྱུར་བ། ཚིམ་པར་འགྱུར་བ། མགུ་བར་འགྱུར་བ། དང་བར་འགྱུར་བ། སིམ་པར་འགྱུར་བ། མཉན་པར་འོས་པ། བསྔགས་པར་འོས་པ། མཚུངས་པ་མེད་པ། མཉན་ན་བཏང་མི་བྲ་བ། མི་མཐུན་པ་མེད་པ། སྡང་བར་འགྱུར་བ་མེད་པ་དག་ཀྱང་གྲག་པར་གྱུར་ཏོ། །སྐད་ཅིག་དེ་ལ་སེམས་ཅན་གང་ལའང་གནོད་པའམ། འཇིགས་པའམ། སྡང་བའམ། བག་ནོན་པ་མེད་པར་གྱུར་ཏོ། །སྐད་ཅིག་དེ་ལ་ཉི་ཟླ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དག་གི་འོད་ཀྱང་མི་སྣང་བར་གྱུར་ཏོ། །སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་ཐམས་ཅད་ཀྱང་སྐད་ཅིག་དེ་ལ་སྡུག་བསྔལ་དང་བྲལ་ཞིང་བདེ་བ་ཐམས་ཅད་དང་ལྡན་པར་གྱུར་ཏེ། སེམས་ཅན་གང་ལའང་འདོད་ཆགས་ཀྱིས་གནོད་པར་མི་འགྱུར། ཞེ་སྡང་གིས་
50a
༄#། །གནོད་པར་མི་འགྱུར། གཏི་མུག་གིས་གནོད་པར་མི་འགྱུར་ཞིང ། ཕྲག་དོག་གམ། སེར་སྣའམ། ང་རྒྱལ་ལམ། འཆབ་པའམ། རྒྱགས་པའམ། ཁྲོ་བའམ།་གནོད་སེམས་སམ། ཡོངས་སུ་གདུང་བས་གནོད་པར་འགྱུར་བ་མེད་པར་གྱུར་ཏེ། སེམས་ཅན་ཐམས་ཅད་ཀྱང་སྐད་ཅིག་དེ་ལ་ཕན་ཚུན་ཕ་མ་ཙམ་དུ་སེམས་པའི་འདུ་ཤེས་སུ་གྱུར་ནས་བྱམས་པའི་སེམས་དང ། ཕན་པའི་སེམས་དང་ལྡན་པར་གྱུར་ཏོ། །ལྷ་དང་མིའི་རོལ་མོ་སིལ་སྙན་བྱེ་བ་ཁྲག་ཁྲིག་བརྒྱ་སྟོང་དག་ཀྱང་མ་དཀྲོལ་མ་བླངས་པར་ཡིད་དུ་འོང་བའི་སྒྲ་འབྱིན་པར་གྱུར་ཏོ། །ལྷ་བྱེ་བ་ཁྲག་ཁྲིག་བརྒྱ་སྟོང་དག་ཀྱང་ལག་པ་དང ། ཕྲག་པ་དང ། སྤྱི་བོས་གཞལ་མེད་ཁང་ཆེན་པོ་དེ་འདེགས་ཤིང་ཁྱེར་བར་གྱུར་ཏོ། ། ལྷའི་བུ་མོ་བརྒྱ་སྟོང་དག་གིས་ཀྱང་རང་རང་གི་གླུ་དབྱངས་བླངས་ཏེ་མདུན་དང ། རྒྱབ་དང ། གཡས་གཡོན་དག་ནས་བྱང་ཆུབ་སེམས་དཔའ་ལ་གླུ་དབྱངས་ཀྱི་སྒྲ་སྐད་ཀྱིས་མངོན་པར་བསྟོད་པ། ཁྱོད་ཀྱིས་སྔོན་ཆད་དགེ་ལས་བསགས་པ་དང ། །ཡུན་རིང་དུས་ཀྱི་དགེ་བས་བྱུང་བ་དང ། །ཁྱོད་ཀྱིས་ཆོས་རྣམས་ཀུན་གྱི་ཚུལ་སྦྱངས་པས། །དེ་རིང་མཆོད་པ་རྒྱ་ཆེན་བྱུང་བར་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །སྲས་མོ་སྲས་སྡུག་སྦྱིན་པ་མཛད་པས་ན། །ལྷ་ཡི་མེ་ཏོག་ཆར་དུ་བབ་པ་འདི། །སྦྱིན་པ་སྤྱད་པ་དེ་ཡི་འབྲས་
50b
བུ་ལགས། །གཙོ་བོ་ཁྱོད་ཀྱིས་རང་གི་ཤ་བཅད་དེ། །སྲང་ལ་བཅལ་ནས་ཐུགས་བྱོན་བྱ་ཕྱིར་བཏང ། །སྦྱིན་པ་དེ་སྤྱད་པ་ཡི་འབྲས་བུ་དེས། །ཡི་དྭགས་འཇིག་རྟེན་རྣམས་ཀྱང་ཟས་སྐོམ་ཐོབ། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཚུལ་ཁྲིམས་མ་ཞིག་མ་ཉམས་བསྲུངས་པས་ན། །ཚུལ་ཁྲིམས་དེ་སྤྱད་པ་ཡི་འབྲས་བུ་དེས། །མི་ཁོམ་ངན་སོང་ཡོངས་སུ་དག་བར་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །བྱང་ཆུབ་བསྒྲུབ་པའི་གཞིར་ནི་བཟོད་པ་བསྒོམས། །བཟོད་པ་དེ་སྤྱད་པ་ཡི་འབྲས་བུ་དེས། །ལྷ་དང་མི་ཀུན་བྱམས་པའི་སེམས་སུ་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །བརྩོན་འགྲུས་མ་གོད་དམ་པ་བསྒོམས་པས་ན། །བརྩོན་འགྲུས་དེ་སྤྱད་པ་ཡི་འབྲས་བུ་དེས། །སྐུ་ནི་རི་རབ་བཞིན་དུ་མཛེས་པར་གྲུབ། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཉོན་མོངས་སྦྱང་སླད་བསམ་གཏན་བསྒོམས་མཛད་པས། །བསམ་གཏན་དེ་སྤྱད་པ་ཡི་འབྲས་བུ་དེས། །འགྲོ་བ་དག་ལ་ཉོན་མོངས་གནོད་མི་འགྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཉོན་མོངས་གཅོད་པའི་ཤེས་རབ་བསྒོམས་མཛད་པའི། །ཤེས་རབ་དེ་སྤྱད་པ་ཡི་འབྲས་བུ་དེས། །འོད་གསལ་དམ་པ་རྣམ་པར་སྣང་ཞིང་མཛེས། །བྱམས་པའི་གོ་མན་བས་ཉོན་མོངས་འཇོམས་མཛད་ཅིང ། །སེམས་ཅན་ཀུན་ལ་ཐུགས་རྗེ་ཆེས་བྱུང་བ། །དགྱེས་པ་
51a
༄#། །མཆོག་བརྙེས་བཏང་སྙོམས་མཆོག་ལྡན་པ། །བདེ་གཤེགས་ཚངས་གྱུར་ཁྱོད་ལ་ཕྱག་འཚལ་ལོ། །ཤེས་རབ་སྒྲོན་མའི་འོད་དང་གཟིས་འཕགས་ཤིང ། ། གཏི་མུག་སྐྱོན་གྱི་མུན་པ་ཀུན་སེལ་པ། །འདྲེན་པ་སྟོང་གསུམ་དག་ན་མིག་གྱུར་པའི། །ཐུབ་པ་ལམ་སྟོན་ཁྱོད་ལ་ཕྱག་འཚལ་ལོ། །རྫུ་འཕྲུལ་རྐང་པ་མངོན་ཤེས་མཆོག་ལ་མཁས། །བདེན་པ་གཟིགས་ཤིང་དམ་པའི་དོན་བསླབ་པ། །རྒལ་ནས་སྲོག་ཆགས་གཞན་དག་སྒྲོལ་མཛད་པ། །བདེ་གཤེགས་སྒྲོལ་གྱུར་ཁྱོད་ལ་ཕྱག་འཚལ་ལོ། །ཐབས་དང་མངོན་ཤེས་དམ་པ་ཀུན་ལ་མཁས། །འཆི་འཕོ་འཆི་འཕོ་མེད་པའི་འཕོ་བ་སྟོན། །འཇིག་རྟེན་ཆོས་ཀྱི་རྗེས་སུ་མཐུན་མཛད་ཀྱང ། །འཇིག་རྟེན་གང་དུའང་ཆགས་པ་ཁྱོད་མི་མངའ། །གང་དག་ཁྱོད་ནི་ཉན་ཏམ་བལྟར་ལྷགས་པ། །དེ་དག་ཐོབ་པ་དམ་པ་བསམ་མི་ཁྱབ། །ཁྱོད་ལ་ཆོས་ཉིད་ཐོས་ཏེ་གང་དད་ཅིང ། །དགའ་བ་ཡངས་པ་སྐྱེས་པ་སྨོས་ཅི་འཚལ། །དགའ་ལྡན་གནས་རྣམས་ཀུན་ནི་མོག་མོག་གྱུར། །ཛམྦུའི་གླིང་དུ་ཉི་མ་མངོན་དུ་ཤར། །སྲོག་ཆགས་བྱེ་བ་ཁྲག་ཁྲིག་བསམ་མི་ཁྱབ། །ཉོན་མོངས་གཉིད་ཀྱིས་ལོག་ལས་སད་པར་མཛད། །དེང་ནི་ཕོ་བྲང་འབྱོར་ཅིང་རྒྱས་གྱུར་ལ། །བྱེ་བ་ཁྲག་ཁྲིག་ལྷ་རྣམས་ལང་ལོང་གྱུར། །ལྷ་ཡི་བུ་མོས་སིལ་སྙན་སྒྲ་ཕྱུང་བས། །རྒྱལ་པོའི་
51b
ཁབ་ན་སྒྲ་སྙན་གྲག་པར་འགྱུར། །བསོད་ནམས་གཟི་བརྗིད་རྫོགས་ཤིང་ལས་དགེ་བ། །བུད་མེད་གཟུགས་ཀྱི་མཆོག་དང་ལྡན་གྱུར་པ། །དེ་ཡི་སྲས་གྱུར་དེ་ནི་དེ་ལྟར་འབྱོར། །དཔལ་གྱིས་འཇིག་རྟེན་གསུམ་ནི་ཟིལ་གྱིས་གནོན། །མི་མཆོག་འབྱུང་བ་དེ་ཡི་གཟི་བརྗིད་ཀྱིས། །དེ་ཕྱི་ཕྱིན་ཆད་ཕོ་བྲང་དམ་པ་འདིར། །ལུས་ཅན་རྣམས་ལ་འདོད་སྡང་འཐབ་རྩོད་མེད། །ཀུན་ཀྱང་བྱམས་པའི་སེམས་ཀྱིས་སྲི་ཞུར་བཅས། །འཁོར་ལོས་བསྒྱུར་བའི་རིགས་རྒྱལ་བྱུང་པས་ན། །རྒྱལ་པོའི་རིགས་ནི་རབ་ཏུ་འཕེལ་བར་འགྱུར། །སེར་སྐྱའི་གྲོང་འདི་ཤིན་ཏུ་ཕུན་སུམ་ཚོགས། །རིན་ཆེན་མཛོད་ཀྱིས་རབ་ཏུ་གང་བར་འགྱུར། །གནོད་སྦྱིན་སྲིན་པོ་གྲུལ་བུམ་གསང་བ་པ། །ལྷ་དང་ལྷ་མིན་ཚོགས་རྣམས་དབང་པོར་བཅན། །མི་མཆོག་སྲུང་བ་གང་དག་གནས་པ་རྣམས། །དེ་དག་རིང་པོར་མི་ཐོགས་ཐར་པ་འཐོབ། །གུས་དང་སྲི་ཞུ་ལ་ནི་གནས་ནས་སུ། །འདྲེན་པ་ཁྱོད་བསྟོད་བསོད་ནམས་གང་བསགས་པ། །ཀུན་ཀྱང་བྱང་ཆུབ་ཏུ་ནི་ཡོངས་སུ་བསྔོ། །མི་ཡི་དམ་པ་ཁྱོད་ལྟར་མྱུར་དུ་ཤོག་།བསྐྱོད་པར་བརྩམས་པའི་ལེའུ་སྟེ། ལྔ་པའོ།། །།དགེ་སློང་དག། དེ་ལྟར་དགུན་འདས་ཏེ་དཔྱིད་ཀྱི་དུས་ལ་དཔྱིད་ཟླ་ཐ་ཆུང་གི་ཚེ་སྐར་མ་ས་ག་ལ་བབ་པ་དུས་ཀྱི་དམ་པ་ལ་ཤིང་རྣམས་ཀྱི་ལོ་མ་རྒྱས་ཤིང་མེ་ཏོག་མཆོག་ཏུ་རྒྱས་ནས་གྲང་དྲོ་དང ། མུན་པ་དང ། རྡུལ་མེད་ཅིང་སའི་གཞི་སྔོ་གཞོན་ནུ་
52a
༄#། །སྐྱེས་པས་ཁེབས་པར་གནས་པའི་ཚེ་འཇིག་རྟེན་གསུམ་གྱི་གཙོ་བོ་འཇིག་རྟེན་གྱིས་མཆོད་པས་དུས་ལ་བབ་པའི་ཚོད་ལ་རྣམ་པར་གཟིགས་ནས་ཚེས་བཅོ་ལྔའི་ཟླ་བ་ཉ་ལ་སྐར་མ་རྒྱལ་གྱི་དུས་སུ་ཡུམ་གསོ་སྦྱོང་བླངས་པའི་རུམ་དུ་བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ནས་འཕོས་ཏེ་དྲན་ཞིང་ཤེས་བཞིན་དུ་གླང་པོའི་ཕྲུག་གུ་ཐལ་དཀར་མཆེ་བ་དྲུག་དང་ལྡན་པ། མགོའི་ཁ་དོག་སྲིན་བུ་ལྷམ་བུ་ཆུ་གཤེར་གྱི་མདོག་ལྟ་བུ། མཆེ་བ་ལ་གསེར་འཚིག་པ། ཡན་ལག་དང་ཉིང་ལག་ཐམས་ཅད་དང་ལྡན་པ། དབང་པོ་ཉམས་པ་མེད་པར་བྱས་ཏེ་མའི་གློ་གཡས་པ་ནས་ཞུགས་སོ། །ཞུགས་ནས་ཀྱང་གློ་གཡས་པ་ལོགས་སུ་བརྟེན་ཏེ་གནས་ཀྱི། གློ་གཡོན་པ་ལོགས་སུ་ནམ་ཡང་མ་བརྟེན་ཏོ། །ལྷ་མོ་སྒྱུ་འཕྲུལ་མལ་བདེ་བ་ན་ཉལ་བ་དེས་ཀྱང་རྨི་ལམ་འདི་ལྟ་བུ་མཐོང་ངོ ། །གླང་པོ་ཁ་བ་དངུལ་མདོག་མཆེ་བ་དྲུག་།རྐང་ལག་རབ་མཛེས་མགོ་བོ་དམར་སྡུག་པ། །འགྲོས་བཟང་ལུས་ཚིགས་རྡོ་རྗེ་བཞིན་བརྟན་པ། །གླང་པོ་མཆོག་ཅིག་ཁོང་དུ་སོང་སྙམ་བྱེད། །དེས་ནི་དེ་འདྲའི་བདེ་བ་བརྒྱ་ལམ་ནའང ། །མ་མཐོང་མ་ཐོས་མྱོང་བར་མ་གྱུར་ཏེ། །ལུས་ཀྱང་བདེ་ཞིང་སེམས་ཀྱང་བདེར་གྱུར་ནས། །བསམ་གཏན་མཉམ་པར་བཞག་པ་བཞིན་དུ་གྱུར། །དེ་ནས་ལྷ་མོ་སྒྱུ་འཕྲུལ་རྒྱན་དང་གོས་
52b
ལྷུག་ལྷུག་པོར་གྱོན་ཅིང་ཐོགས་པ་ལས་ལུས་དང ། སེམས་བདེ་བར་གྱུར་ཏེ། དགའ་བ་དང ། རངས་པ་དང ། ཉམས་བདེ་བ་ཐོབ་ནས་མལ་དམ་པ་དེ་ལས་ལངས་ཏེ་བུད་མེད་ཀྱི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་ཁང་བཟང་དེའི་སྟེང་ནས་བབས་ཏེ། ཤིང་མྱ་ངན་འཚང་གི་ནགས་ཚལ་ག་ལ་བ་དེར་སོང་ནས་དེ་མྱ་ངན་འཚང་གི་གནས་ཚལ་དུ་བདེ་བར་འདུག་སྟེ། རྒྱལ་པོ་ཟས་གཙང་མའི་དྲུང་དུ་ཕོ་ཉ་བཏང་ནས་རྒྱལ་པོ་གཤེགས་སུ་གསོལ། ལྷ་མོས་ཁྱོད་ཀྱི་ཞལ་མཐོང་བར་བཞེད་དོ་ཞེས་བྱས་པ་དང ། རྒྱལ་པོ་ཟས་གཙང་མས་ཚིག་དེ་ཐོས་ནས་རབ་ཏུ་དགའ་བར་གྱུར་ཏེ་ལུས་གཡོས་ནས་ཁྲི་བཟང་པོ་ལས་ལངས་ཏེ་བློན་པོ་དང ། གྲོང་རྡལ་བ་དང ། འཁོར་དང ། གཉེན་པའི་སྐྱེ་བོ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ་མྱ་ངན་འཚང་གི་ནགས་ཚལ་ག་ལ་བ་དེར་སོང་ངོ ། །སོང་ནས་ཀྱང་བདག་གི་ལུས་ཤིན་ཏུ་ལྕི་བ་སྙམ་བྱེད་ནས་མྱ་ངན་འཚང་གི་ནགས་ཚལ་དུ་འགྲོ་མ་ནུས་ཏེ། དེ་མྱ་ངན་འཚང་གི་ནགས་ཚལ་གྱི་སྒོར་འདུག་ནས་ཅུང་ཟད་ཅིག་བསམ་སྟེ། དེའི་ཚེ་ཚིགས་སུ་བཅད་པ་འདི་སྨྲས་སོ། །བདག་ནི་གཡུལ་དུ་དཔའ་བའི་ཕུལ་ཕྱིན་པ། །དེང་ལྟར་ལུས་ལྕི་བདག་གིས་མྱོང་མི་དྲན། །བདག་གི་ཁྱིམ་དུའང་འགྲོ་བར་དེང་མ་ནུས། །ཀྱེ་མ་འདི་ཅི་སུ་ལ་དྲི་བར་བྱ། །གནས་གཙང་མའི་རིས་ཀྱི་ལྷ་དག་ནམ་མཁའི་དཀྱིལ་
53a
༄#། །ན་འཁོད་ནས་ལུས་ཕྱེད་མངོན་པར་སྤྲུལ་ཏེ་རྒྱལ་པོ་ཟས་གཙང་མ་ལ་ཚིགས་སུ་བཅད་དེ་སྨྲས་པ། དཀའ་ཐུབ་བརྟུལ་ཞུགས་ཡོན་ཏན་ལྡན་པ་འཇིག་རྟེན་གསུམ་གྱིས་མཆོད། །བྱམས་དང་སྙིང་རྗེ་ཐོབ་པས་བསོད་ནམས་ཡེ་ཤེས་དབང་བསྐུར་བའི། །བྱང་ཆུབ་སེམས་དཔའ་ཆེ་བ་དགའ་ལྡན་གནས་ནས་འཕོས་གྱུར་ཏེ། །རྒྱལ་པོ་ཁྱོད་ཀྱི་སྲས་གྱུར་ལྷ་མོ་སྒྱུ་འཕྲུལ་མངལ་དུ་ཞུགས། །དེ་ཚེ་རང་གི་མགོ་ཅོག་སོར་བཅུ་ཐལ་མོ་སྦྱར་བྱས་ཏེ། །རྒྱལ་པོ་རིམ་གྲོར་བྱ་བར་ལྡན་གྱུར་དེ་ཡི་ནང་དུ་ཞུགས། །ང་རྒྱལ་དྲེགས་པ་མེད་པས་ལྷ་མོ་སྒྱུ་འཕྲུལ་ངོར་བལྟས་ཏེ། །ངས་ནི་ཁྱོད་ལ་ཅི་བྱ་ཅི་སྦྱར་ཁྱོད་ཀྱིས་ང་ལ་སྨྲོས། །ལྷ་མོས་སྨྲས་པ། ཁ་བ་དངུལ་གྱི་མདོག་འདྲ་ཉི་ཟླའི་འོད་ལས་འཕགས་པ་སྟེ། །རྐང་ལག་ལེགས་ཤིང་རབ་འབྱེས་མཚེ་བ་དྲུག་ལྡན་ཆེ་བ་ཉིད། །གླང་པོའི་དམ་པ་རྡོ་རྗེ་བཞིན་དུ་ཚིགས་བརྟན་གཟུགས་བཟང་བ། །བདག་གི་རུམ་དུ་ཞུགས་ཀྱི་དེ་ཡི་ལོ་རྒྱུས་གསན་པར་གསོལ། །སྟོང་གསུམ་ཁམས་འདི་མཛེས་བར་རབ་རིབ་མ་མཆིས་བདག་གིས་མཐོང ། །བདག་ནི་ཉལ་ཞིང་མཆིས་ན་ལྷ་རྣམས་བྱེ་བས་རབ་ཏུ་བསྟོད།། འོན་ཀྱང་བདག་ལ་ཁྲོ་ཞིང་འཚིག་དང་ཞེ་སྡང་རྨོངས་མ་མཆིས། །ཞི་བའི་སེམས་སུ་གྱུར་ཅིང་བསམ་གཏན་བདེ་དང་ལྡན་སྙམ་བགྱིད། །བདག་གི་རྨི་ལམ་འདི་ནི་རིགས་ལ་
53b
དགེ་འམ་དོང་འམ་ཅི། །བདག་གི་རྨི་ལམ་འདི་ནི་ཡང་དག་ལྡན་པར་ལུང་སྟོན་པ། །རིག་བྱེད་རྨི་ལམ་གཞུང་ལ་མཁས་ཤིང་གཟའ་ཡི་ཆོ་ག་མཁན། །རྒྱལ་པོ་མྱུར་དུ་བྲམ་ཟེ་འདིར་ནི་ལེགས་པར་དགུག་ཏུ་གསོལ། །དེ་སྐད་ཚིག་ཐོས་རྒྱལ་པོས་དེ་ཡི་དུས་ཀྱི་སྐད་ཅིག་ལ། །བྲམ་ཟེ་རིག་བྱེད་བསྟན་བཅོས་གཞུང་ལ་ཤིན་ཏུ་མཁས་པ་གཉེར། །སྒྱུ་འཕྲུལ་བྲམ་ཟེ་རྣམས་ཀྱི་མདུན་དུ་འདུག་ནས་འདི་སྐད་སྨྲས། །ཁོ་མོས་རྨི་ལམ་འདི་འདྲ་མཐོང་ན་དེ་ཡི་ལོ་རྒྱུས་གསོན། །བྲམ་ཟེ་རྣམས་ཀྱིས་སྨྲས་པ། ལྷ་མོ་བཀའ་སྩལ་དུ་གསོལ། ཁྱོད་ཀྱིས་རྨི་ལམ་ཅི་འདྲ་བ་ཞིག་གཟིགས། ཐོས་ནས་ཀྱང་དཔྱད་པར་བགྱིའོ། །ལྷ་མོས་སྨྲས་པ། ཁ་བ་དངུལ་གྱི་མདོག་འདྲ་ཉི་ཟླའི་འོད་ལས་འཕགས་པ་སྟེ། །རྐང་ལག་ལེགས་ཤིང་རབ་འབྱེས་མཆེ་བ་དྲུག་ལྡན་ཆེ་བ་ཉིད། །གླང་པོ་དམ་པ་རྡོ་རྗེ་བཞིན་དུ་ཚིགས་བརྟན་གཟུགས་བཟང་བ། །བདག་གི་རུམ་དུ་ཞུགས་པ་དེ་ཡི་ལོ་རྒྱུས་མཉན་པར་གྱིས། །དེ་སྐད་ཚིག་ཐོས་ནས་ནི་བྲམ་ཟེ་རྣམས་ཀྱིས་འདི་སྐད་སྨྲས། །རིགས་ལ་དངོ་བ་མ་མཆིས་དགྱེས་པ་རྒྱ་ཆེན་བརྙེས་པར་གྱུར། །ཁྱོད་ལ་སྲས་མངའ་མཚན་གྱིས་ཡན་ལག་བརྒྱན་པ་སྐྱེ་བར་འགྱུར། ། རྒྱལ་པོའི་རིགས་སུ་རིགས་ལྡན་འཁོར་ལོས་བསྒྱུར་བ་ཆེ་བ་ཉིད། །གལ་ཏེ་འདོད་པ་དག་དང་རྒྱལ་སྲིད་ཕོ་བྲང་སྤངས་གྱུར་ཏེ། །འཇིག་རྟེན་ཀུན་ལ་ཐུགས་བརྩེ་ཆགས་མེད་རབ་ཏུ་བྱུང་
54a
༄#། །གྱུར་ན། །དེ་ནི་འཇིག་རྟེན་གསུམ་ན་སྦྱིན་གནས་སངས་རྒྱས་འགྱུར་བ་སྟེ། །བདུད་རྩི་མཆོག་གི་རོ་ཡིས་འཇིག་རྟེན་ཐམས་ཅད་ཚིམ་མཛད་འགྱུར། །དེ་སྐད་ཚིག་སྙན་ལུང་བསྟན་ཏེ། །རྒྱལ་པོའི་ཕོ་བྲང་ཟན་ཟོས་ནས། །བྱ་དགའ་བྱིན་པ་བླངས་ནས་སུ། །བྲམ་ཟེ་དེ་དག་ཕྱིར་དོང་ངོ ། །དགེ་སློང་དག་།དེ་ལྟར་རྒྱལ་པོ་ཟས་གཙང་མས་བྲམ་ཟ་མཚན་དང་ལྟས་ཤེས་ཤིང་རྣམ་པར་འབྱེད་པ་དང ། རྨི་ལམ་གྱི་གཞུང་ཤེས་པ་དག་ལས་དེ་སྐད་ཀྱི་ཚིག་ཐོས་ནས་ཚིམ་ཞིང་མགུ་སྟེ་ཡིད་རངས་ལ་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་བྲམ་ཟེ་དེ་དག་བཟའ་བ་དང ། བཏུང་བ་དང ། མྱང་བ་མང་པོ་ཉམས་སུ་བསོད་པས་ཚིམ་ཞིང་ངོམས་པར་བྱས་ནས་བྱ་དགའ་བྱིན་ཏེ་བཀྱེའོ། །དེ་ཉིད་ཀྱི་ཚེ་གྲོང་ཁྱེར་ཆེན་པོ་སེར་སྐྱའི་གནས་ཀྱི་གྲོང་ཁྱེར་ཆེན་པོ་དེའི་སྒོ་བཞི་ན་གྲོང་ཁྱེར་གྱི་བཞི་མདོ་དང ། སུམ་མདོ་ཐམས་ཅད་དུ་སྦྱིན་པ་བྱིན་ཏེ། ཇི་ཙམ་དུ་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར་ཟས་འདོད་པ་རྣམས་ལ་ནི་ཟས། སྐོམ་འདོད་པ་རྣམས་ལ་ནི་སྐོམ། གོས་འདོད་པ་རྣམས་ལ་ནི་གོས། བཞོན་པ་འདོད་པ་རྣམས་ལ་ནི། བཞོན་པ། སྤོས་འདོད་པ་རྣམས་ལ་ནི་སྤོས།་ཕྲེང་བ་འདོད་པ་རྣམས་ལ་ནི་ཕྲེང་བ། བྱུག་བ་འདོད་པ་རྣམས་ལ་ནི་བྱུག་པ། མལ་ཆ་འདོད་པ་རྣམས་ལ་ནི་མལ་ཆ། གནས་འདོད་པ་
54b
རྣམས་ལ་ནི་གནས། འཚོ་བ་འདོད་པ་རྣམས་ལ་ནི་འཚོ་བ་བྱིན་ནོ། །དགེ་སློང་དག་།དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། ལྷ་མོ་སྒྱུ་འཕྲུལ་འདི་ཁྱིམ་གང་ན་འདུག་ན་བདེ་ཞིང་ཉོན་མོངས་པ་མེད་པར་འདུག་པར་འགྱུར་སྙམ་པ་དང ། དེ་ནས་སྐད་ཅིག་དེ་ཉིད་ལ་རྒྱལ་པོ་ཆེན་པོ་བཞི་རྒྱལ་པོ་ཟས་གཙང་མའི་དྲུང་དུ་འོངས་ཏེ་འདི་སྐད་ཅེས་སྨྲས་སོ། །ལྷ། ཐུགས་ལས་སུ་མ་མཛད་པར་བཏང་སྙོམས་སུ་བདེ་བར་བཞུགས་ཤིག་།བདག་ཅག་གིས་བྱང་ཆུབ་སེམས་དཔའི་ཕོ་བྲང་བཤམ་མོ། །དེ་ནས་ལྷའི་དབང་པོ་བརྒྱ་བྱིན་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །སྐྱོང་བའི་གཞལ་མེད་ཁང་རྣམས་ངན། །སུམ་ཅུ་རྩ་གསུམ་པ་ཡི་བཟང ། །བྱང་ཆུབ་སེམས་དཔའི་ཕོ་བྲང་ནི། །རྣམ་པར་རྒྱལ་ཙམ་བདག་གིས་དབུལ། །དེ་ནས་ལྷའི་བུ་རབ་འཐབ་བྲལ་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །ཁོ་བོའི་ཁང་ཁྱིམ་མཐོང་གྱུར་ནས། །བརྒྱ་བྱིན་བྱེ་བ་ངོ་མཚར་གྱུར། ། འཐབ་བྲལ་རབ་ཀྱི་དཔལ་ལྡན་ཁང ། །རྒྱལ་བའི་སྲས་ལ་བདག་འབུལ་ལོ། །དེ་ནས་ལྷའི་བུ་ཡོངས་སུ་དགའ་ལྡན་རྒྱལ་བོ་ཟས་གཙང་མའི་ག་ན་དུ་འོངས་ཏེ་འདི་སྐད་ཅེས་སྨྲས་སོ། ། གྲགས་པ་ཆེ་མངའ་སྔོན་ཆད་ནི། །དགའ་ལྡན་གང་དུ་བཞུགས་གྱུར་པ། །ཕོ་བྲང་དམ་པ་དགྱེས་པ་དེ། །རྒྱལ་བའི་སྲས་ལ་བདག་འབུལ་ལོ། །དེ་ནས་ལྷའི་བུ་རབ་འཕྲུལ་དགའ་རྒྱལ་པོ་
55a
༄#། །ཟས་གཙང་མའི་གན་དུ་འོངས་ཏེ་སྐད་ཅེས་སྨྲས་སོ། །དཔལ་ལྡན་ཡིད་ལས་གྲུབ་བའི་ཁང ། །དེ་ནི་རིན་ཆེན་རང་བཞིན་ཏེ། །བྱང་ཆུབ་སེམས་དཔའ་མཆོད་དོན་དུ། །རྒྱལ་པོ་བདག་གིས་དབུལ་བར་བགྱི། །དེ་ནས་ལྷའི་བུ་གཞན་འཕྲུལ་དབང་བྱེད་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །འདོད་པའི་ཁམས་གནས་ཇི་སྙེད་པ། །གཞལ་མེད་ཁང་མཛེས་གང་ཡོད་པ། །བདག་གི་གཞལ་མེད་ཁང་དྲུང་ན། །འོད་དང་མདོག་ཀྱང་སྟོར་བར་སྣང ། །དེ་བས་དཔལ་ལྡན་བདག་གིས་དབུལ། །བྱང་ཆུབ་སེམས་དཔའ་མཆོད་པའི་ཕྱིར། །རིན་ཆེན་རང་བཞིན་ཕོ་བྲང་བཟང ། །དེ་ནི་རྒྱལ་པོ་བླང་བར་གྱིས། །ལྷ་ཡི་མེ་ཏོག་རབ་བཀང་སྟེ། །ལྷ་ཡི་སྤོས་ཀྱི་ངད་ལྡང་བའི།། ཕོ་བྲང་ཡངས་པ་བདག་གིས་དབུལ། །དེར་ནི་ལྷ་མོ་བཞུགས་པར་གྱིས། །དགེ་སློང་དག་།དེ་ལྟར་འདོད་པ་ན་སྤྱོད་པའི་ལྷའི་དབང་པོ་ཐམས་ཅད་ཀྱིས་བྱང་ཆུབ་སེམས་དཔའ་ལ་མཆོད་པའི་ཕྱིར་སེར་སྐྱའི་གནས་ཀྱི་གྲོང་ཁྱེར་ཆེན་པོ་དམ་པ་དེར་རང་རང་གི་ཁྱིམ་ཕུལ་བར་གྱུར་ཏོ། །རྒྱལ་པོ་ཟས་གཙང་མས་ཀྱང་མིའི་ལས་ནི་འདས་ཀྱི། ལྷ་ཡིར་ནི་མ་གྱུར་པ་བཤམས་པར་གྱུར་ཏེ། དེ་ལ་བྱང་ཆུབ་སེམས་དཔས་བཀོད་པ་ཆེན་པོའི་ཏིང་ངེ་འཛིན་གྱི་མཐུས་ཁྱིམ་དེ་དག་ཐམས་ཅད་དུ་ལྷ་མོ་སྒྱུ་འཕྲུལ་མངོན་པར་བསྟན་ཏོ། །བྱང་
55b
ཆུབ་སེམས་དཔའ་ལྷ་མོ་སྒྱུ་འཕྲུལ་གྱི་རུམ་ན་འདུག་པའི་ཚེ་གློ་གཡས་ཕྱོགས་ལོགས་སུ་སྐྱིལ་མོ་ཀྲུང་བཅས་ཏེ་གནས་པར་གྱུར་ཏོ། །ལྷའི་དབང་པོ་དེ་དག་ཐམས་ཅད་ཀྱང་སོ་སོ་ནས་བདག་ཉིད་ཀྱི་ཁྱིམ་ན་བྱང་ཆུབ་སེམས་དཔའི་མ་འདུག་གི་།གཞན་མ་ཡིན་ནོ་ཞེས་དེ་ལྟར་ཤེས་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། ཏིང་འཛིན་བཀོད་པ་ཆེ་ལ་གནས་གྱུར་ཏེ། །སྤྲུལ་པ་བསམ་གྱིས་མི་ཁྱབ་སྤྲུལ་བྱས་ནས། །ལྷ་རྣམས་ཐམས་ཅད་བསམ་པ་རྫོགས་པར་བྱས། །རྒྱལ་པོའང་དེ་ལྟར་ཡིད་བཞིན་བསམ་པ་གྲུབ། །དེ་ནས་འཁོར་དེའི་ནང་ནས་ལྷའི་བུ་ཁ་ཅིག་འདི་སྙམ་དུ་སེམས་ཏེ། རྒྱལ་ཆེན་བཞིའི་རིས་ཀྱི་ལྷ་གང་ཡིན་པ་དེ་དག་ཀྱང་མིའི་ལུས་ཀྱི་དྲི་བྲོ་ན་སྐྱོ་ཞིང་འབྱོལ་ན། དེ་མ་ཡིན་པའི་ལྷ་གཞན་སུམ་ཅུ་རྩ་གསུམ་མམ། འཐའ་བྲལ་ལམ། དགའ་ལྡན་གྱི་ལྷའི་བུ་དག་ལྟ་སྨོས་ཀྱང་ཅི་དགོས་ན། ཇི་ལྟར་བྱང་ཆུབ་སེམས་དཔའ་གཙང་ཞིང་དྲི་ང་བ་དང་བྲལ་བ། འཇིག་རྟེན་ཐམས་ཅད་ལས་མངོན་པར་འཕགས་པ། སེམས་ཅན་རིན་པོ་ཆེ་དགའ་ལྡན་གྱི་ལྷའི་རིས་ནས་འཕོས་ཏེ་ཡུམ་གྱི་ལྷུམས་མིའི་ལུས་དྲི་མི་ཞིམ་པར་བཞུགས་པར་གྱུར་སྙམ་པ་དང ། དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ཙམ་དུ་བུད་མེད་ཀྱི་ལུས་ནི་སྨད་པ་ལགས་པ་དང །
56a
༄#། །འདོད་ཆགས་ལ་སྤྱོད་ཅེས་བགྱི་བའི་བར་དུ་དེ་བཞིན་གཤེགས་པས་གསུངས་པ་ངོ་མཚར་ཆེ་ན། བཅོམ་ལྡན་འདས། དེ་བས་ཀྱང་འཇིག་རྟེན་ཐམས་ཅད་ལས་མངོན་པར་འཕགས་པ། སྔོན་བྱང་ཆུབ་སེམས་དཔར་གྱུར་པ་འདི་ལྟར་དགའ་ལྡན་གྱི་ལྷའི་རིས་ནས་འཕོས་ཏེ་ཡུམ་གྱི་ལྷུམས་མིའི་ལུས་སུ་གློ་གཡས་ཕྱོགས་སུ་བརྟེན་ཏེ་བཞུགས་སོ། །ཞེས་བགྱི་བ་འདི་ནི་རབ་ཏུའང་ངོ་མཚར་ཆེ་སྟེ། བཅོམ་ལྡན་འདས། སྔོན་བཅོམ་ལྡན་འདས་ཀྱིས་དེ་ལྟར་མཛད་དོ། ཞེས་དེ་སྐད་དུ་སྨྲ་བར་ནི་བདག་ལ་སྤྲོ་བ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཁྱོད་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་ཞེས་བྱ་བ་གང་བྱང་ཆུབ་སེམས་དཔའ་མའི་རུམ་ན་གནས་པའི་ཡོངས་སུ་སྤྱད་པར་གྱུར་པ་མཐོང་བར་འདོད་དམ། གསོལ་པ། བཅོམ་ལྡན་འདས། དེའི་དུས་ནི་ད་ལགས་སོ། །བདེ་བར་གཤེགས་པ། དེའི་དུས་ནི་ད་ལགས་ཏེ། དེ་བཞིན་གཤེགས་པས་བྱང་ཆུབ་སེམས་དཔའི་ཡོངས་སུ་སྤྱད་པ་དེ་བསྟན་ཏེ་མཐོང་ན་གློ་བ་དགའོ། །དེ་ནས་བཅོམ་ལྡན་འདས་ཀྱིས་རྣམ་པ་དེ་ལྟ་བུའི་མཚན་མ་མཛད་དེ། དེས་མི་མཇེད་ཀྱི་བདག་པོ་ཚངས་པ་ཚངས་པ་འབུམ་ཕྲག་དྲུག་ཅུ་རྩ་བརྒྱད་དང་ལྷན་ཅིག་ཚངས་པའི་འཇིག་རྟེན་ནས་མི་སྣང་བར་གྱུར་ཏེ་བཅོམ་ལྡན་འདས་
56b
ཀྱི་སྤྱན་སྔར་ཕྱིན་ནས་དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བར་བྱས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདུད་ཅིང་ཕྱོགས་གཅིག་ཏུ་འདུག་གོ་།དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་མི་མི་མཇེད་ཀྱི་བདག་པོ་ཚངས་པ་ལ་བཀའ་སྩལ་པ། ཚངས་བ། ཁྱོད་ཀྱིས་སྔོན་ང་བྱང་ཆུབ་སེམས་དཔར་གྱུར་ཅིང་མའི་རུམ་ན་ཟླ་བ་བཅུར་འདུག་འདུག་པའི་བྱང་ཆུབ་སེམས་དཔའི་ཡོངས་སུ་སྤྱད་པ་བླངས་སམ། གསོལ་པ། བཅོམ་ལྡན་འདས། དེ་དེ་ལྟ་ལགས་སོ། །བདེ་བར་གཤེགས་པ།་དེ་དེ་ལགས་སོ། །བཀའ་སྩལ་པ། ཚངས་པ། ད་དེ་ག་ལ་ཡོད་སྟོན་ཅིག་།གསོལ་པ། བཅོམ་ལྡན་འདས། དེ་ནི་ཚངས་པའི་འཇིག་རྟེན་ན་མཆིས་སོ། །བཀའ་སྩལ་པ། ཚངས་པ། དེའི་ཕྱིར་ཟླ་བ་བཅུ་པའི་བྱང་ཆུབ་སེམས་དཔའི་ཡོངས་སུ་སྤྱད་པ་དེ་འདིར་ཁྱོད་ཀྱིས་སྟོན་ཅིག་དང ། ཇི་ཙམ་དུ་འདུས་བྱས་པ་ཤེས་པར་འགྱུར་རོ། །དེ་ནས་མི་མཇེད་ཀྱི་བདག་པོ་ཚངས་པས་ཚངས་པ་དག་ལ་འདི་སྐད་ཅེས་སྨྲས་སོ། །ཁོ་བོས་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་བླང་གི་།དེའི་བར་དུ་ཁྱེད་འཁོད་ཅིག་།དེ་ནས་མི་མཇེད་ཀྱི་བདག་པོ་ཚངས་པ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་མི་སྣང་བར་གྱུར་ནས་སྐད་ཅིག་དེ་ཉིད་ལ་ཚངས་པའི་འཇིག་རྟེན་དུ་ཕྱིན་ཏོ། །དེ་
57a
༄#། །ནས་མི་མཇེད་ཀྱི་བདག་པོ་ཚངས་པས་ལྷའི་བུ་ཚངས་པ་བཟང་པོ་ལ་འདི་སྐད་ཅེས་སྨྲས་སོ། །གྲོགས་པོ། ཁྱོད་སོང་ལ་ཚངས་པའི་འཇིག་རྟེན་འདི་མན་ཆད་སུམ་ཅུ་རྩ་གསུམ་གྱི་གནས་ཡན་ཆད་དུ་སྒྲ་བསྒྲགས་ཏེ་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་བདག་ཅག་གིས་དེ་བཞིན་གཤེགས་པའི་སྤྱན་སྔར་བཀུར་ན། ཁྱེད་ཀྱི་ནང་ནས་མཐོང་བར་སུ་དགའ་བ་མྱུར་དུ་ཤོག་ཅིག་ཅེས་སྒྲས་གོ་བར་གྱིས་ཤིག་།དེ་ནས་མི་མཇེད་ཀྱི་བདག་པོ་ཚངས་པས་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་དང་ལྷན་ཅིག་ཏུ་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་བླངས་ཏེ་ཚངས་པའི་གཞལ་མེད་ཁང་ཆེན་པོ་དཔག་ཚད་སུམ་བརྒྱ་པའི་སྟེང་དུ་བཞག་ནས་ལྷ་བྱེ་བ་ཁྲག་ཁྲིག་བརྒྱ་སྟོང་དུ་མས་ཀུན་ནས་བསྐོར་ཏེ་ཛམྦུའི་གླིང་དུ་ཕབ་བོ། །དེའི་ཚེ་བཅོམ་ལྡན་འདས་ཀྱི་ཞབས་འབྲིང་དུ་འདོད་པ་ན་སྤྱོད་པའི་ལྷའི་བུ་འདུས་པ་ཆེན་པོར་གྱུར་ཏེ།་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེའང་ལྷའི་གོས་དང ། ལྷའི་ཕྲེང་བ་དང ། ལྷའི་སྤོས་དང ། ལྷའི་མེ་ཏོག་དང ། ལྷའི་རོལ་མོའི་དབྱངས་སྒྲ་དང ། ལྷའི་ལོངས་སྤྱོད་རྣམས་ཀྱིས་མངོན་པར་འདུས་བྱས་པར་གྱུར་ཅིང་ལྷ་དབང་ཆེ་བར་གྲགས་པ་དག་གིས་ཡོངས་སུ་བསྐོར་བར་གྱུར་པ་ནི་འདི་ཙམ་སྟེ། ལྷའི་དབང་པོ་བརྒྱ་
57b
བྱིན་རྒྱ་མཚོ་ཆེན་པོའི་དབུས་སུ་འདུག་ནས་རྒྱང་རིང་པོ་ནས་གདོང་ཐལ་མོས་བསྐྱབས་ཏེ་མགོ་བྱོལ་ནས་བལྟས་ཀྱང་མཐོང་བར་མི་ནུས་སོ། །དེ་ཅིའི་ཕྱིར་ཞེ་ན། ལྷའི་ནང་ན་ཚངས་པ་དག་ནི་མཐུ་ཆེ་བ་སྟེ། སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷ་དག་ཀྱང་དེ་དག་གི་དྲུང་ན་དམའ་བ་ཡིན་ན།་ལྷའི་དབང་པོ་བརྒྱ་བྱིན་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཀྱིས་དེའི་ཚེ་ལྷའི་རོལ་མོའི་དབྱངས་སྒྲའི་སྒྲ་དེ་དག་ཞི་བར་མཛད་དོ། །དེ་ཅིའི་ཕྱིར་ཞེ་ན། དེ་ཐོས་པ་ཙམ་གྱིས་ཛམྦུའི་གླིང་གི་མི་རྣམས་མྱོ་མྱོ་བོར་འགྱུར་དུ་འོང་བའི་ཕྱིར་རོ། །དེ་ནས་རྒྱལ་པོ་ཆེན་པོ་བཞི་ལྷའི་དབང་པོ་བརྒྱ་བྱིན་གྱི་དྲུང་དུ་ལྷགས་ནས་འདི་སྐད་ཅེས་སྨྲས་སོ། །ལྷའི་དབང་པོ། བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་འདི་བདག་ཅག་གིས་མཐོང་བར་མི་ནུས་ན། ཇི་ལྟར་བགྱི། དེས་དེ་དག་ལ་སྨྲས་པ། གྲོགས་པོ་དག་།ཁོ་བོས་ཀྱང་ཇི་ལྟར་བྱ། ཁོ་བོ་ཉིད་ཀྱིས་ཀྱང་མཐོང་བར་མ་ནུས་སོ། །གྲོགས་པོ་དག་།འོན་ཀྱང་དེ་ནི་ནམ་བཅོམ་ལྡན་འདས་ཀྱི་སྤྱན་སྔར་ཕུལ་བ་དེའི་ཚེ་མཐོང་གྲང་ངོ ། །དེ་དག་གིས་སྨྲས་པ། ལྷའི་དབང་པོ། དེ་བས་ན། ཅི་ནས་ཀྱང་མྱུར་དུ་མཐོང་བར་འགྱུར་བ་དེ་ལྟར་མཛད་དུ་གསོལ། སྨྲས་པ། གྲོགས་པོ་དག་།ལྷའི་བུ་མངོན་པར་འཕགས་པ་མངོན་པར་འཕགས་
58a
༄#། །པ་དེ་དག་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ་དགའ་བར་བྱ་བའི་ཚིག་བརྗོད་པར་གྱུར་གྱི་བར་དུ་སྡོད་ཅིག་།དེ་ནས་དེ་དག་ཕྱོགས་གཅིག་ཏུ་འཁོད་དེ་མགོ་བྱོལ་ནས་བཅོམ་ལྡན་འདས་ལོགས་སུ་ལྟ་ཞིང་འཁོད་པར་གྱུར་ཏོ། །དེ་ནས་མི་མཇེད་ཀྱི་བདག་པོ་ཚངས་པ་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པོ་དེ་དག་དང་ལྷན་ཅིག་ཏུ་བྱང་ཆུབ་སེམས་དཔའི་ཡོངས་སུ་སྤྱད་པར་བྱ་བ་རིན་པོ་ཆེ་བཀོད་པ་དེ་ཁྱེར་ཏེ། དེ་བཞིན་གཤེགས་པ་ག་ལ་བ་དེར་ཕུལ་ལོ། །བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་ནི་གཟུགས་བཟང་བ། མཛེས་པ། བལྟ་ན་སྡུག་པ། གྲུ་བཞི་ལྷམ་པ། ཀ་བ་བཞི་ཟུག་པ། སྟེང་ཁོང་པ་བརྩེགས་པས་ལེགས་པར་བརྒྱན་པ་སྟེ།་དེའི་ཚད་ནི་འཕང་དུ་འདི་ལྟ་སྟེ། དཔེར་ན། བྱིས་པ་བཙས་ནས་ཟླ་བ་དྲུག་ལོན་པ་ཙམ་མོ། །ཁང་པ་བརྩེགས་པ་དེའི་ནང་དུ་ཁྲི་བཤམས་པ་ནི་འདི་ལྟ་སྟེ། དཔེར་ན། བྱིས་པ་བཙས་ནས་ཟླ་བ་དྲུག་ལོན་པ་འདུག་པའི་སྟེགས་བུ་ཙམ་མོ། །བྱང་ཆུབ་སེམས་དཔའི་ཡོངས་སུ་སྤྱད་པར་བྱ་བ་རིན་པོ་ཆེ་བཀོད་པ་དེའི་ཁ་དོག་དང ། དབྱིབས་ནི་འདི་ལྟ་བུ་སྟེ། ལྷ་དང་བཅས་པའི་འཇིག་རྟེན་ན་དེའི་དབྱིབས་དང་ཁ་དོག་འདྲ་བ་གང་ཡང་མེད་དོ། །ལྷ་རྣམས་ཀྱིས་དེ་མཐོང་ནའང་མིག་འཁྲུགས་ཤིང་ངོ་མཚར་དུ་འགྱུར་རོ། །དེ་དེ་
58b
བཞིན་གཤེགས་པའི་སྤྱན་སྔར་བཞག་ན་ལྷམ་མེ། ལྷན་ནེ། ལྷང་ངེ་སྟེ། དཔེར་ན། མགར་བ་མཁས་པས་ཤིན་ཏུ་བཞུས་ཏེ་ལེགས་པར་སྦྱངས་ནས་དྲི་མའི་སྐྱོན་མེད་པར་བྱས་པའི་གསེང་བཞིན་དུ་ཁང་པ་བརྩེགས་པ་དེ་རྣམ་པར་མཛེས་སོ། །བྱང་ཆུབ་སེམས་དཔའི་ཡོངས་སུ་སྤྱད་པ་དེའི་ནང་དུ་ཁྲི་བཤམས་པ་ནི་བྱང་ཆུབ་སེམས་དཔའི་དུང་མགྲིན་མ་གཏོགས་པ་ལྷ་དང་བཅས་པའི་འཇིག་རྟེན་ན་དེའི་དབྱིབས་དང ། ཁ་དོག་འདྲ་བ་གང་ཡང་མེད་དོ། །ཚངས་པ་ཆེན་པོས་གོས་བགོས་པ་དེའང་བྱང་ཆུབ་སེམས་དཔའི་ཁྲི་དེའི་དྲུང་ན་མཛེས་པར་མི་སྣང་སྟེ།་འདི་ལྟ་སྟེ། དཔེར་ན། རླུང་དང ། ཆར་གྱིས་བཏབ་པའི་ལཝ་བ་ནག་པོ་བཞིན་ནོ། །ཁང་པ་བརྩེགས་པ་དེ་ནི་ཙནྡན་སྤྲུལ་གྱི་སྙིང་པོ་ལས་བྱས་པ་སྟེ། དེའི་ཕྱེ་མ་ཞོ་གཅིག་ལའང་སྟོང་གི་འཇིག་རྟེན་གྱི་ཁམས་ཀྱིས་རིན་དུ་མི་ཆོག་གོ། །ཁང་པ་བརྩེགས་པ་དེ་ནི་ཙནྡན་སྤྲུལ་གྱི་སྙིང་པོ་དེ་ལྟ་བུས་ཀུན་ནས་བསྐོར་བ་སྟེ། ཁང་པ་བརྩེགས་པ་དེ་དང་འདྲ་བ་གཉིས་པ་ཞིག་ཀྱང་ཁང་པ་བརྩེགས་པ་དང་པོ་དེའི་ནང་ན་མ་ཆགས་མ་རེག་པར་འདུག་གོ། །ཁང་པ་བརྩེགས་པ་དེ་ཁོ་ན་དང་འདྲ་བ་གསུམ་པ་ཞིག་ཀྱང་ཁང་པ་བརྩེགས་པ་གཉིས་པ་དེའི་ནང་ན་མ་རེག་མ་ཆགས་པར་འདུག་གོ་།སྤོས་ཀྱི་ཁང་པ་བརྩེགས་པ་གསུམ་པ་དེའི་ནང་དུ་ཁྲི་དེ་བཞག་སྟེ་གདན་བཏིང་ངོ ། །ཙནྡན་སྤྲུལ་གྱི་སྙིང་པོ་དེའི་ཁ་དོག་ནི་རྣམ་པ་
59a
༄#། །འདི་ལྟ་བུ་སྟེ། དཔེར་ན། བཻ་ཌཱུརྱ་སྔོན་པོ་རིགས་དམ་པ་དང་ལྡན་པ་བཞིན་ནོ། །སྤོས་ཀྱི་ཁང་པ་བརྩེགས་པ་དེའི་འཁོར་ན་མེ་ཏོག་ལྷའི་ལས་འདས་པ་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་མ་བསྐྱེད་པར་བྱང་ཆུབ་སེམས་དཔའི་སྔོན་གྱི་དགེ་བའི་རྩ་བའི་རྣམ་པར་སྨིན་པས་ཁང་པ་བརྩེགས་པ་དེར་སྐྱེའོ། །བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་ནི་རྡོ་རྗེའི་རང་བཞིན་ཏེ། སྲ་ཞིང་བརྟན་ལ་མི་ཤིགས་པ་སྟེ། ཀ་ཙ་ལིནདའི་གོས་ལྟར་རེག་ན་བདེ་བའོ། །འདོད་པ་ན་སྤྱོད་པའི་ལྷ་རྣམས་ཀྱི་གནས་བཀོད་པ་གང་ཇི་སྙེད་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེར་ཀུན་ཏུ་སྣང་ངོ ། །གང་གི་ནུབ་མོ་བྱང་ཆུབ་སེམས་དཔའ་མའི་རུམ་དུ་འཇུག་པ་དེའི་ནུབ་མོ་འོག་གི་ཆུའི་ཕུང་པོ་ནས་བཟུང་སྟེ་ས་ཆེན་པོའི་རྔམས་དཔག་ཚད་འབུམ་ཕྲག་དྲུག་ཅུ་རྩ་བརྒྱད་བརྟོལ་ཏེ་པདྨ་བྱུང་བས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་སོ། །པདྨ་དེ་ནི་ཁ་ལོ་སྒྱུར་བ་སྐྱེས་བུའི་དམ་པ་དང ། ཚངས་པ་ཆེན་པོ་བརྒྱ་ཕྲག་བཅུའི་སྟོབས་ལ་དབང་བས་མཐོང་དུ་ཟད་ཀྱི། གཞན་སུས་ཀྱང་མཐོང་བ་མེད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཉིང་ཁུ་དང ། སྙིང་པོ་དང ། བཅུད་ཇི་སྙེད་ཡོད་པ་དེ་དག་ཐམས་ཅད་པདྨ་ཆེན་པོ་དེ་ལ་ཟིལ་དངར་གྱི་
59b
ཐིགས་པར་ཆགས་ཏེ་འདུག་ནས་དེ་ཚངས་པ་ཆེན་པོས་བཻ་ཌཱུརྱའི་སྣོད་བཟང་པོས་བླངས་ཤིང་བྱང་ཆུབ་སེམས་དཔའ་ལ་ཕུལ་ནས་བྱང་ཆུབ་སེམས་དཔས་ཀྱང་དེ་བླངས་ཏེ་ཚངས་པ་ཆེན་པོ་ལ་སྙིང་བརྩེ་བའི་ཕྱིར་འཐུངས་པར་གྱུར་ཏོ། །ཉིང་ཁུའི་ཐིགས་པ་དེ་འཐུངས་ན་བྱང་ཆུབ་སེམས་དཔའ་སྲིད་པ་ཐ་མ་པ་བྱང་ཆུབ་སེམས་དཔའི་ས་ཐམས་ཅད་ཡོངས་སུ་རྫོགས་པ་མ་གཏོགས་པར་དེ་ཡང་དག་པར་བདེ་བར་ཞུ་ནུས་པ་སེམས་ཅན་གྱི་ཁམས་ན་སེམས་ཅན་དེ་ལྟ་བུ་དེ་གང་ཡང་མེད་དོ། །ལས་གང་གི་རྣམ་པར་སྨིན་པས་སྙིང་ཁུའི་ཐིགས་པ་དེ་ལྟ་བུ་བྱང་ཆུབ་སེམས་དཔའ་ལ་ཡོད་པར་གྱུར་ཅེ་ན། བྱང་ཆུབ་སེམས་དཔས་སྔོན་ཡུན་རིང་པོར་བྱང་ཆུབ་སེམས་དཔའི་སྤྱོད་པ་སྤྱད་པའི་ཚེ་སེམས་ཅན་ནད་པ་དག་ལ་སྨན་བྱིན་པ་དང།་སེམས་ཅན་བསམ་པ་ལ་བརྟེན་པ་རྣམས་ཀྱི་བསམ་པ་ཡོངས་སུ་བསྐང་བ་དང ། སྐྱབས་སུ་འོངས་པ་རྣམས་ཡོངས་སུ་མ་བཏང་བ་དང ། རྟག་པར་མེ་ཏོག་གི་ཕུད་དང ། འབྲས་བུའི་ཕུད་དང ། རོའི་ཕུད་དེ་བཞིན་གཤེགས་པ་རྣམས་དང ། དེ་བཞིན་གཤེགས་པའི་མཆོད་རྟེན་རྣམས་དང ། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་རྣམས་དང ། ཕ་དང་མ་ལ་ཕུལ་ཞིང་ཕྱིས་བདག་ཉིད་ཡོངས་སུ་སྤྱོད་སྤྱོད་པས་ལས་དེའི་རྣམ་པར་སྨིན་པས་ཚངས་པ་ཆེན་པོ་ཟིལ་དངར་གྱི་ཐིགས་པ་དེ་བྱང་ཆུབ་སེམས་དཔའ་ལ་འབུལ་ལོ། །ཁང་པ་
60a
༄#། །བརྩེགས་པ་དེར་གནས་ཀྱི་ཁྱད་པར་དགའ་བ་དང ། རྩེད་མོ་དང ། ཕྲེང་བ་བརྒྱུས་པ་དང་ལྡན་པ་འཕགས་པ་འཕགས་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་སྔོན་གྱི་ལས་ཀྱི་རྣམ་པར་སྨིན་པས་དེར་བྱུང་བར་སྣང་ངོ ། །བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེར་གོས་སྟོང་ཕྲག་བརྒྱའི་རྒྱན་ཅེས་བྱ་བ་ཕྲུགས་ཤིག་བྱུང་སྟེ། དེའི་བྱུང་བ་ནི་བྱང་ཆུབ་སེམས་དཔའི་སྲིད་པ་ཐ་མ་པ་མ་གཏོགས་པར་སེམས་ཅན་གྱི་རིས་ན་སེམས་ཅན་དེ་ལྟ་བུ་དེ་གང་ཡང་མེད་དོ། །གཟུགས་དང ། སྒྲ་དང ། དྲི་དང ། རོ་དང ། རེག་མཆོག་ཏུ་བྱ་བ་དམ་པ་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཁང་པ་བརྩེགས་པ་དེ་ན་མེད་པ་གང་ཡང་མེད་དོ།། འཕགས་པ་རྒྱ་ཆེར་རོལ་པ་ཞེས་བྱ་བའི་མདོ། བམ་པོ་བཞི་པ། ཡོངས་སུ་སྤྱད་པར་བྱ་བ་ཁང་པ་བརྩེགས་པ་དེ་ནི་འདི་ལྟར་ཕྱི་ནང་ཤིན་ཏུ་གྲུབ་པ། འདི་ལྟར་ཤིན་ཏུ་ཡོངས་སུ་རྫོགས་པ་སྟེ། འདི་ལྟ་སྟེ། དཔེར་ན། ཡུལ་ཀ་ལིངྐ་ནས་བྱུང་བའི་དར་ལྟར་རེག་ན་བདེ་བའོ། །དེའང་འོལ་སྤྱིར་བསྟན་པར་ཟད་ཀྱི། དེ་ལ་དཔེ་མེད་དོ། །བྱང་ཆུབ་སེམས་དཔའི་སྔོན་གྱི་སྨོན་ལམ་གྱིས་འདི་ནི་བསམ་པས་འགྲུབ་སྟེ། གདོན་མི་ཟ་བར་བྱང་ཆུབ་སེམས་དཔའ་སེམས་དཔའ་ཆེན་པོ་མིའི་འཇིག་རྟེན་དུ་སྐྱེ་བ་དང ། མངོན་པར་བྱུང་ནས་བླ་
60b
ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་ཆོས་ཀྱི་འཁོར་ལོ་བསྐོར་བ་དང ། མ་གང་གི་རུམ་དུ་སྐྱེ་བར་འགྱུར་བ་དེའི་རུམ་གཡས་པར་ཁང་པ་བརྩེགས་པ་རིན་པོ་ཆེ་བཀོད་པ་དམ་པ་སྔར་མངོན་པར་འགྲུབ་ཅིང ། ཕྱིས་བྱང་ཆུབ་སེམས་དཔའ་དགའ་ལྡན་ནས་འཕོས་ཏེ་ཁང་པ་བརྩེགས་པ་དེར་སྐྱིལ་ཀྲུང་བཅས་ནས་འདུག་པར་འབྱུང་བ་དང ། བྱང་ཆུབ་སེམས་དཔའ་སྲིད་པ་ཐ་མ་པའི་ལུས་ནུར་ནུར་པོ་དང ། མེར་མེར་པོ་དང ། ལྟར་ལྟར་པོ་དང ། རེང་རེང་པོར་འགྱུར་བ་མེད་ཅིང ། ཡན་ལག་དང ། ཉིང་ལག་དང ། མཚན་ཐམས་ཅད་ཕུན་སུམ་ཚོགས་པར་འདུག་བཞིན་དུ་འབྱུང་ལ། ལྷ་མོ་སྒྱུ་འཕྲུལ་གྱི་རྨི་ལམ་དུ་གླང་པོ་ཆེན་པོ་འོངས་པར་མཐོང་བ་འདི་ནི་ཆོས་ཉིད་དོ། །དེ་དེ་ལྟར་འདུག་པ་ལ་ལྷའི་དབང་པོ་བརྒྱ་བྱིན་དང ། རྒྱལ་པོ་ཆེན་པོ་བཞི་དང ། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང ། གང་ལས་ལག་ན་རྡོ་རྗེ་སྐྱེས་པའི་གནོད་སྦྱིན་གྱི་རིགས་གསང་བ་པ་ཞེས་བྱ་བ་དེ་དག་བྱང་ཆུབ་སེམས་དཔའ་མའི་རུམ་དུ་ཞུགས་པར་ཤེས་ནས་རྟག་ཏུ་རྒྱུན་མི་འཆད་པར་ཕྱི་བཞིན་འབྲང་བར་གྱུར་ཏོ། །བྱང་ཆུབ་སེམས་དཔའ་ལ་རིམ་གྲོ་བྱེད་པའི་ལྷ་མོ་བཞི་ཡོད་དེ། ཨུ་ཁུ་ལི་ཞེས་བྱ་བ་དང ། མུ་ཁུ་ལི་ཞེས་བྱ་བ་དང ། རྒྱལ་མཚན་ལྡན་པ་ཞེས་བྱ་བ་དང ། འོད་དང་ལྡན་པ་ཞེས་བྱ་བ་སྟེ། བཞི་པོ་དེ་དག་ཀྱང་བྱང་ཆུབ་སེམས་
61a
༄#། །དཔའ་མའི་རུམ་དུ་ཞུགས་པར་ཤེས་ནས་རྟག་ཏུ་རྒྱུན་མི་འཆད་པར་སྲུང་ངོ ། །ལྷའི་དབང་པོ་བརྒྱ་བྱིན་ཡང་ལྷའི་བུ་ལྔ་བརྒྱ་ཙམ་དང་ལྷན་ཅིག་བྱང་ཆུབ་སེམས་དཔའ་མའི་རུམ་དུ་ཞུགས་པ་ཤེས་ནས་རྟག་ཏུ་རྒྱུན་མི་འཆད་པར་ཕྱི་བཞིན་འབྲང་པར་གྱུར་ཏོ། །བྱང་ཆུབ་སེམས་དཔའ་མའི་རུམ་དུ་ཞུགས་པའི་ལུས་ནི་རྣམ་པ་འདི་ལྟ་བུར་གྱུར་ཏེ།་དཔེར་ན། མཚན་མོ་མུན་པ་ཤིན་ཏུ་གནག་པའི་ནང་ན་རིའི་སྤོ་ལ་མེའི་ཕུང་པོ་ཆེན་པོ་འདུག་པ་ནི་དཔག་ཚད་གཅིག་ནས་ཀྱང་སྣང་ངོ ། །དཔག་ཚད་ལྔའི་བར་ནས་ཀྱང་སྣང་ངོ ། །དེ་བཞིན་དུ་བྱང་ཆུབ་སེམས་དཔའ་མའི་རུམ་དུ་ཞུགས་པའི་ལུས་མངོན་པར་གྲུབ་པའང་དེ་ལྟ་བུར་གྱུར་ཏེ། འོད་གསལ་ཞིང་གཟུགས་བཟང་ལ་མཛེས་ཤིང་བལྟ་ན་སྡུག་པར་གྱུར་པ་དེ། ཁང་པ་བརྩེགས་པ་དེའི་ནང་དུ་སྐྱིལ་མོ་ཀྲུང་དུ་འདུག་ན་གསེར་གྱི་ས་ལེ་སྦྲམ་རིགས་དང་ལྡན་པ་རིན་པོ་ཆེ་བཻ་ཌཱུརྱ་ས་བརྒྱན་པ་ལྟར་ཤིན་ཏུ་མཛེས་པར་གྱུར་ཏོ། །བྱང་ཆུབ་སེམས་དཔའི་མས་ཀྱང་བྱང་ཆུབ་སེམས་དཔའ་རུམ་ན་འདུག་པ་མཐོང་བར་གྱུར་ཏོ། །འདི་ལྟ་སྟེ། དཔེར་ན། སྤྲིན་གྱི་ཚོགས་ཆེན་པོའི་ནང་ནས་གློག་བྱུང་བ་ནི་སྣང་བ་ཆེན་པོ་བསྐྱེད་དོ། །དེ་བཞིན་དུ་བྱང་ཆུབ་སེམས་དཔའ་མའི་རུམ་ན་འདུག་པའང་དཔལ་དང ། གཟི་བརྗིད་དང ། ཁ་དོག་གིས་རིན་པོ་ཆེའི་ཁང་པ་བརྩེགས་པ་
61b
དང་པོ་དེ་སྣང་བར་བྱེད་དོ། །སྣང་བར་བྱས་ནས་སྤོས་ཀྱི་ཁང་པ་བརྩེགས་པ་གཉིས་པ་སྣང་བར་བྱེད་དོ། །སྤོས་ཀྱི་ཁང་པ་བརྩེགས་པ་གཉིས་པ་སྣང་བར་བྱས་ནས་སྤོས་ཀྱི་ཁང་བ་བརྩེགས་པ་གསུམ་པ་སྣང་བར་བྱེད་དོ། །སྤོས་ཀྱི་ཁང་པ་བརྩེགས་པ་གསུམ་པ་སྣང་བར་བྱས་ནས་མའི་ལུས་ཐམས་ཅད་སྣང་བར་བྱེད་དོ། །དེ་སྣང་བར་བྱས་ནས་དེ་སྟན་གང་ལ་འདུག་པ་དེ་སྣང་བར་བྱེད་དོ། །དེ་སྣང་བར་བྱས་ནས་ཁྱིམ་ཐམས་ཅད་སྣང་བར་བྱེད་དོ། །ཁྱིམ་ཐམས་ཅད་སྣང་བར་བྱས་ནས་འོད་འཕྲོ་བ་ཁྱིམ་གྱི་སྟེང་དུ་བྱུང་སྟེ་ཤར་ཕྱོགས་སྣང་བར་བྱེད་དོ། །དེ་བཞིན་དུ་ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་བཅུ་ཀུན་ཏུ་རྒྱང་གྲགས་ཙམ་དུ་ཕྱོགས་རེ་རེར་ཡང་བྱང་ཆུབ་སེམས་དཔའ་མའི་རུམ་ན་འདུག་པའི་དཔལ་དང ། གཟི་བརྗིད་དང ། ཁ་དོག་གིས་སྣང་བར་བྱས་པར་གྱུར་ཏོ། །དགེ་སློང་དག་།དེ་ལྟར་བྱང་ཆུབ་སེམས་དཔའ་དེ་བལྟ་བ་དང ། དེ་ལ་ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་རྒྱལ་པོ་ཆེན་པོ་བཞི་དང ། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་གནོད་སྦྱིན་ལྔ་བརྒྱ་ཙམ་དག་དང་ལྷན་ཅིག་ཏུ་སྔ་དྲོའི་དུས་ཀྱི་ཚེ་འོངས་ཏེ། དེའི་ཚེ་བྱང་ཆུབ་སེམས་དཔས་དེ་དག་འོངས་པར་རིག་ནས་ལག་པ་གཡས་པ་བརྐྱང་སྟེ་མཛུབ་མོ་བསྒྲེངས་ནས་སྟན་སྟོན་ཏོ། །འཇིག་རྟེན་སྐྱོང་
62a
༄#། །བ་ལ་སོགས་པ་དེ་དག་ཀྱང་ཇི་ལྟར་བཏིང་བའི་སྟན་ལ་འཁོད་པར་གྱུར་ཏེ། དེ་དག་གིས་བྱང་ཆུབ་སེམས་དཔའ་མའི་རུམ་ན་འདུག་བཞིན་དུ་སྐྱེས་ཟིན་པའི་གཟུགས་དང་འདྲ་བར་ལག་པ་བསྐྱོད་ཅིང་འདེག་ལ། རྣམ་པར་བསྐྱོད་ཅིང་གཞོག་པ་མཐོང་ནས་དེ་དག་དགའ་མགུ་ཞིང་ཉམས་བདེ་བ་ཐོབ་སྟེ་བྱང་ཆུབ་སེམས་དཔའ་ལ་ཕྱག་འཚལ་བར་གྱུར་ཏོ། །བྱང་ཆུབ་སེམས་དཔས་ཀྱང་དེ་དག་དེ་ལྟར་འཁོད་པ་མཐོང་ནས་ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག། ཡང་དག་པར་གཟེངས་བསྟོད། ཡང་དག་པར་དགའ་པར་བྱེད་དོ། །གང་གི་ཚེ་དེ་དག་འདོང་བར་འདོད་བར་གྱུར་པ་དེའི་ཚེའང་བྱང་ཆུབ་སེམས་དཔས་དེ་དག་གི་སེམས་སེམས་ཀྱིས་རྣམ་པར་ཤེས་ནས་ལག་པ་གཡས་པ་བརྐྱངས་ཏེ། དེ་དག་འདོད་པའི་བརྡ་སྟོན་ཏེ། །དེ་ལྟར་ལག་པ་བརྐྱངས་ཏེ་འདོང་བའི་བརྡ་བསྟན་ནས་ཕྱིར་བསྐུམ་པར་བྱེད་དེ། མལ་གནོད་པ་མེད་དོ། །དེའི་ཚེ་རྒྱལ་པོ་ཆེན་པོ་བཞི་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང་འདོང་བར་གནང་ངོ་སྙམ་སེམས་ཤིང ། དེ་དག་བྱང་ཆུབ་སེམས་དཔའ་དང ། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་དོང་བར་གྱུར་ཏོ། །དེ་ལྟར་བྱང་ཆུབ་སེམས་དཔའ་ནུབ་མོ་མི་ཉལ་ནས་ལག་པ་གཡས་པ་བརྐྱང་
62b
ཞིང་བརྐྱངས་ནས་ཀྱང་བསྐུམ་པ་དང ། བསྐུམས་ནས་ཀྱང་དྲན་ཞིང་ཤེས་བཞིན་དུ་ལག་བ་དེ་འཇོག་པའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །གཞན་ཡང་གང་གི་ཚེ་སྐྱེས་པའམ། བུད་མེད་དམ། ཁྱེའུ་འམ། བུ་མོ་སུའང་རུང་སྟེ། བྱང་ཆུབ་སེམས་དཔའ་བལྟ་བའི་ཕྱིར་འོངས་པ་དེའི་ཚེ་ཐོག་མར་ནི་བྱང་ཆུབ་སེམས་དཔའ་དགའ་བར་བྱ་བ་སྨྲའོ། །དེའི་འོག་ཏུ་བྱང་ཆུབ་སེམས་དཔའི་མ་དགའ་བར་བྱ་བ་སྨྲའོ། །དགེ་སློང་དག། དེ་ལྟར་བྱང་ཆུབ་སེམས་དཔའ་མའི་རུམ་ན་འདུག་པའི་ཚེ་སྔར་དགའ་བར་བྱ་བ་སྨྲ་བ་ལ་མཁས་པར་གྱུར་ཏེ། ལྷའམ། ཀུའམ། གནོད་སྦྱིན་ནམ། མིའམ། མི་མ་ཡིན་པ་སུའང་རུང་བྱང་ཆུབ་སེམས་དཔའ་ལ་སྔོན་དུ་དགའ་བར་བྱ་བའི་ཚིག་སྨྲ་བར་ནུས་པ་མེད་དོ། །བྱང་ཆུབ་སེམས་དཔའ་ཉིད་ཐོག་མར་དགའ་བར་བྱ་བ་སྨྲ་ཞིང་དེའི་འོག་ཏུ་བྱང་ཆུབ་སེམས་དཔའི་མ་དགའ་བར་བྱ་བ་སྨྲའོ། །དེ་ནས་སྔ་དྲོའི་དུས་ཟད་དེ་ཉི་མ་གུང་ལ་བབས་ནས་ལྷའི་དབང་པོ་བརྒྱ་བྱིན་དང ། སུམ་ཅུ་རྩ་གསུམ་པའི་ལྷའི་བུ་མངོན་པར་འཕགས་པ། མངོན་པར་འཕགས་པ་དག་བྱང་ཆུབ་སེམས་དཔའ་བལྟ་བ་དང ། དེ་ལ་བསྙེན་བཀུར་བྱ་བ་དང ། ཆོས་མཉན་པའི་ཕྱིར་འོང་བ་དང ། བྱང་ཆུབ་སེམས་དཔས་དེ་དག་རྒྱང་རིང་པོ་ནས་འོང་བ་མཐོང་ནས་གསེར་གྱི་མདོག་ཏུ་འདུག་པའི་ལག་པ་གཡས་པ་བརྐྱངས་ཏེ་ལྷའི་དབང་པོ་བརྒྱ་བྱིན་དང ། སུམ་ཅུ་རྩ་གསུམ་པའི་ལྷ་དག་
63a
༄#། །དགའ་བར་བྱེད་ཅིང་མཛུབ་མོ་བརྐྱངས་ཏེ་སྟན་སྟོན་ཏོ། །དགེ་སློང་དག། དེའི་ཚེའང་ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་ལ་ཕྱིར་བཟློག་མ་ནུས་ནས་ཇི་ལྟར་བཏིང་བའི་སྟན་དེ་དག་ལ་ལྷའི་དབང་པོ་བརྒྱ་བྱིན་དང ། དེ་མ་ཡིན་པའི་ལྷའི་བུ་གཞན་དག་ཀྱང་འཁོད་པར་གྱུར་ཏོ། །བྱང་ཆུབ་སེམས་དཔས་དེ་ལྟར་འཁོད་པར་རིག་ནས་ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག་།ཡང་དག་པར་གཟེངས་བསྟོད། ཡང་དག་པར་དགའ་བར་བྱེད་དོ། །བྱང་ཆུབ་སེམས་དཔས་ལག་པ་གང་དུ་བརྐྱངས་པ་དེ་ལོགས་སུ་བྱང་ཆུབ་སེམས་དཔའི་མའང་ལྟ་བར་གྱུར་ཏོ། །དེས་ན་ལྷ་དེ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔའ་དང་དགའ་བར་བྱ་བ་སྨྲའོ་སྙམ་མོ། །དེ་དག་རེ་རེ་ཞིང་ཡང་འདི་སྙམ་དུ་བྱང་ཆུབ་སེམས་དཔའ་ནི་བདག་འབའ་ཞིག་ལ་སྨྲ་སྟེ། བདག་འབའ་ཞིག་ལ་དགའ་བར་བྱ་བ་སྨྲའོ་སྙམ་མོ། །ཁང་པ་བརྩེགས་པ་དེར་ལྷའི་དབང་པོ་བརྒྱ་བྱིན་དང ། སུམ་ཅུ་རྩ་གསུམ་པའི་ལྷ་དེ་དག་གི་གཟུགས་བརྙན་སྣང་བར་གྱུར་ཏོ། །ཇི་ལྟར་བྱང་ཆུབ་སེམས་དཔའ་མའི་རུམ་ན་གནས་པའི་ལོངས་སྤྱོད་ཡོངས་སུ་དག་པར་གྱུར་པ་དེ་ལྟ་བུ་ནི་གཞན་དག་ན་མེད་དོ། །དགེ་སློང་དག་།གང་གི་ཚེ་ལྷའི་དབང་པོ་བརྒྱ་བྱིན་དང ། དེ་མ་ཡིན་པའི་ལྷའི་བུ་གཞན་དག་འདོང་
63b
པར་འདོད་པར་གྱུར་པ་དེའི་ཚེའང་བྱང་ཆུབ་སེམས་དཔས་དེ་དག་གི་སེམས་ཀྱི་རྟོག་པ་སེམས་ཀྱིས་ཡོངས་སུ་ཤེས་ནས་ལག་པ་གཡས་པ་བརྐྱངས་ཏེ་དེ་དག་འདོང་བའི་བརྡ་སྟོན་ཏོ། །བརྡ་བསྟན་ནས་ཕྱིར་བསྐུམ་པ་བྱས་ཏེ་དྲན་ཞིང་ཤེས་བཞིན་དུ་ལག་པ་བཞག་ཀྱང་མ་ལ་གནོད་པ་མེད་དོ། །དེའི་ཚེ་ལྷའི་དབང་པོ་བརྒྱ་བྱིན་དང ། དེ་མ་ཡིན་པའི་ལྷའི་བུ་སུམ་ཅུ་རྩ་གསུམ་པ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང་འདོད་བར་གནང་ངོ་སྙམ་དུ་སེམས་ཤིང ། དེ་དག་ཀྱང་བྱང་ཆུབ་སེམས་དཔའ་དང ། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་དོང་བར་གྱུར་ཏོ། །དགེ་སློང་དག། ཉི་མ་ཕྱེད་ཀྱི་དུས་འདས་ནས་ཕྱི་དྲོའི་དུས་ལ་བབས་པ་དང ། མི་མཇེད་ཀྱི་བདག་པོ་ཚངས་པ་ལྷའི་བུ་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ་ལྷ་ཡུལ་པའི་སྙིང་ཁུའི་ཐིགས་པ་དེ་ཁྱེར་ནས་བྱང་ཆུབ་སེམས་དཔའ་ག་ལ་བ་དེར་བྱང་ཆུབ་སེམས་དཔའ་དེ་བལྟ་བ་དང ། དེ་ལ་ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་འོང་བར་གྱུར་ཏོ། །དགེ་སློང་དག་།བྱང་ཆུབ་སེམས་དཔས་མི་མཇེད་ཀྱི་བདག་པོ་ཚངས་པ་འཁོར་དང་བཅས་ཏེ་འོངས་པར་ཤེས་ནས་བྱང་ཆུབ་སེམས་དཔས་ཡང་གསེར་གྱི་མདོག་ཏུ་འདུག་པའི་ལག་པ་གཡས་པ་བརྐྱངས་ཏེ་མི་མཇེད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷའི་བུ་དེ་དག་
64a
༄#། །ལ་དགའ་བར་བྱ་བ་སྨྲས་ཏེ་མཛུབ་མོ་བརྐྱངས་ནས་སྟན་སྟོན་ཏོ། །དགེ་སློང་དག་།མི་མཇེད་ཀྱི་བདག་པོ་ཚངས་པ་དེས་ཀྱང་བྱང་ཆུབ་སེམས་དཔའི་བཀའ་ལས་བཟློག་པར་མ་ནུས་ནས་ཇི་ལྟར་བཏིང་བའི་སྟན་དེ་དག་ལ་མི་མཇེད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷའི་བུ་གཞན་དག་ཀྱང་འཁོད་པར་གྱུར་ཏོ། །བྱང་ཆུབ་སེམས་དཔས་དེ་ལྟར་འཁོད་པར་རི་གནས་ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག། ཡང་དག་པར་གཟེངས་བསྟོད། ཡང་དག་པར་དགའ་བར་བྱེད་དོ། །བྱང་ཆུབ་སེམས་དཔས་ལག་པ་གང་དུ་བརྐྱངས་པ་དེ་ལོགས་སུ་ལྷ་མོ་སྒྱུ་འཕྲུལ་ཡང་ལྟ་བར་གྱུར་ཏོ། །དེ་ལྟར་ན་ལྷ་དེ་དག་ཀྱང་བདག་ཅག་ནི་བྱང་ཆུབ་སེམས་དཔའ་དང་དགའ་བར་བྱ་བའི་གཏམ་བྱེད་དོ་སྙམ་སྟེ། ལྷའི་བུ་དེ་དག་རེ་རེ་ཞིང་ཡང་འདི་སྙམ་དུ་བྱང་ཆུབ་སེམས་དཔའ་ནི་བདག་འབའ་ཞིག་ལ་སྨྲས་ཏེ། བདག་འབའ་ཞིག་ལ་དགའ་བའི་གཏམ་བྱེད་དོ་སྙམ་མོ། །དགེ་སློང་དག་།གང་གི་ཚེ་མི་མཇེད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷའི་བུ་དེ་དག་འདོང་བར་འདོད་པར་གྱུར་པ་དེའི་ཚེའང་བྱང་ཆུབ་སེམས་དཔས་དེ་དག་གི་སེམས་ཀྱི་རྟོག་པ་སེམས་ཀྱིས་ཡོངས་སུ་ཤེས་ནས་ལག་པ་གཡས་པ་བརྐྱངས་ཏེ་དེ་དག་འདོང་བའི་བརྡ་སྟོན་ཏོ། །དེ་ལྟར་འདོང་བའི་བརྡ་བསྟན་ནས་
64b
ཕྱིར་བསྐུམ་པ་བྱས་ཏེ་དྲན་ཞིང་ཤེས་བཞིན་དུ་ལག་པ་བཞག་ཀྱང་མ་ལ་གནོད་པ་མེད་དེ། །དེའི་ཚེ་མི་མཇེད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷ་དེ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང་འདོང་བར་གནང་ངོ་སྙམ་དུ་སེམས་ཤིང་དེ་དག་བྱང་ཆུབ་སེམས་དཔའ་དང ། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་དོང་བར་གྱུར་ཏོ། །བྱང་ཆུབ་སེམས་དཔའ་ཡང་དྲན་ཞིང་ཤེས་བཞིན་དུ་ལག་པ་འཇོག་གོ། དགེ་སློང་དག། ཤར་ཕྱོགས་དང ། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་བཅུ་ཀུན་ནས་ཀྱང་བྱང་ཆུབ་སེམས་དཔའ་བརྒྱ་སྟོང་མང་པོ་བྱང་ཆུབ་སེམས་དཔའ་དེ་བལྟ་བ་དང ། དེ་ལ་ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པ་དང ། ཆོས་ཡང་དག་པར་བརྗོད་པར་བྱ་བའི་ཕྱིར་འོང་བར་གྱུར་ཏེ། དེ་དག་དེ་ལྟར་འོངས་པ་དང ། བྱང་ཆུབ་སེམས་དཔས་ལུས་ལས་འོད་བཀྱེ་སྟེ། འོད་ཀྱི་བཀོད་པ་དེ་དག་སེངྒེའི་ཁྲིར་སྤྲུལ་ནས་དེ་ལྟར་སྤྲུལ་པའི་ཁྲི་དེ་དག་ལ་བྱང་ཆུབ་སེམས་དཔའ་དེ་དག་འཁོད་དུ་བཅུག་སྟེ། དེ་དག་དེ་ལྟར་འཁོད་པར་ཤེས་ནས་འདི་ལྟ་སྟེ། ཐེག་པ་ཆེན་པོ་འདི་ཉིད་རྒྱ་ཆེར་རྣམ་པར་དབྱེ་བའི་དོན་དུ་དྲིས་ཏེ་བརྟགས་ཀྱང་སྐལ་པ་མཉམ་པའི་ལྷ་རྣམས་མ་གཏོགས་པར་གཞན་སུས་ཀྱང་དེ་དག་མ་མཐོང་སྟེ། དགེ་སློང་དག། དེ་ལྟར་བྱང་ཆུབ་
65a
༄#། །སེམས་དཔས་ནུབ་མོ་མི་ཉལ་ནས་ལུས་ལས་འོད་བཀྱེ་བའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །དགེ་སློང་དག་།ལྷ་མོ་སྒྱུ་འཕྲུལ་གྱིས་ཀྱང་བྱང་ཆུབ་སེམས་དཔའ་མའི་རུམ་ན་འདུག་པའི་ཚེ་ལུས་ལྕི་བར་མ་ཚོར་ཏེ། གཞན་དུ་ན་ཡང་བ་དང ། འཇམ་པ་དང ། བདེ་བར་ཚོར་ཞིང་ལྟོ་མི་བདེ་བའི་སྡུག་བསྔལ་གང་ཡང་མྱོང་བར་མ་གྱུར་ཏོ། །འདོད་ཆགས་ཀྱིས་ཡོངས་སུ་གདུང་བའམ། ཞེས་སྡང་གིས་ཡོངས་སུ་གདུང་བའམ། གཏི་མུག་གིས་ཡོངས་སུ་གདུང་བས་ཀྱང་ཡོངས་སུ་གདུངས་པར་མ་གྱུར། འདོད་པའི་རྣམ་པར་རྟོག་པའམ། གནོད་སེམས་ཀྱི་རྣམ་པར་རྟོག་པའམ། གཙེ་བའི་རྣམ་པར་རྟོག་པ་དག་ལའང་རྣམ་པར་རྟོག་པར་མ་གྱུར་ཏེ། གྲང་བའམ། ཚ་བའམ། བཀྲེས་པའམ། སྐོམ་པའམ། མུན་པའམ། རྡུལ་ལམ། ངལ་བ་ཚོར་བའམ། མཐོང་བར་མ་གྱུར་ཏེ། དེ་ལ་གཟུགས་དང ། སྒྲ་དང ། དྲི་དང ། རོ་དང ། རེག་ཡིད་དུ་མི་འོང་བ་སྣང་བར་མ་གྱུར་ཏོ། །རྨི་ལམ་ངན་པའང་མཐོང་བར་མ་གྱུར་ཏོ། །དེ་ལ་བུད་མེད་ཀྱི་སྒྱུའམ། གཡོའམ། ཕྲག་དོག་གམ། བུད་མེད་ཀྱི་ཉོན་མོངས་པ་དག་ཀྱང་ཉམས་སུ་གནོད་པར་བྱེད་པར་མ་གྱུར་ཏོ། །དེའི་ཚེ་བྱང་ཆུབ་སེམས་དཔའི་མ་ནི་བསླབ་པའི་གཞི་ལྔ་ཡང་དག་པར་བླངས་ཏེ་ཚུལ་ཁྲིམས་དང་ལྡན་ཞིང་དགེ་བ་བཅུའི་ལས་ཀྱི་ལམ་ལ་གནས་པར་གྱུར་ཏོ། །བྱང་ཆུབ་
65b
སེམས་དཔའི་མའང་སྐྱེས་པ་གང་ལའང་འདོད་ཆགས་ཀྱི་སེམས་སྐྱེ་བར་མ་གྱུར་ལ། སྐྱེས་པ་གང་ཡང་བྱང་ཆུབ་སེམས་དཔའི་མ་ལ་འདོད་ཆགས་ཀྱི་སེམས་མི་སྐྱེའོ། །སེར་སྐྱའི་གྲོང་ཁྱེར་ཆེན་པོ་དེ་དང ། ཡུལ་གཞན་དག་ན་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་སུ་གང་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། འབྱུང་པོས་ནོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་མ་མཐོང་མ་ཐག་ཏུ་སོས་ཤིང་དྲན་པ་ཐོབ་པར་གྱུར་ཏོ། །མི་མ་ཡིན་པ་དེ་དག་ཀྱང་མྱུར་དུ་གནས་གཞན་དུ་དོང་བར་གྱུར་ཏོ། །སེམས་ཅན་གང་ལ་ལ་ཞིག་ནད་སྣ་ཚོགས་ཀྱིས་ཐེབས་པར་གྱུར་ཏེ། རླུང་དང ། མཁྲིས་པ་དང ། བད་ཀན་དང ། འདུས་པ་ལས་བྱུང་བའི་ནད་ཀྱིས་གནོད་པར་གྱུར་པ་དང ། མིག་གི་ནད་དམ། རྣ་བའི་ནད་དམ། སྣའི་ནད་དམ། ལྕེའི་ནད་དམ། མཆུའི་ནད་དམ། སོའི་ནད་དམ། ལྐོག་མའི་ནད་དམ། ཤུ་བའམ། འབྲས་སམ། མཛེའམ། ཤ་བཀྲའམ། སྐེམ་པའམ། བརྗེད་བྱེད་དམ། རིམས་སམ། ལྦ་བའམ། ཕོལ་མིག་གམ། མེ་དཔལ་ལམ། རྐང་ཤུ་ལ་སོགས་པའི་ནད་ཀྱིས་བཏབ་པར་གྱུར་པ་དེ་དག་ལ་བྱང་ཆུབ་སེམས་དཔའི་མས་ལག་པ་གཡས་པ་སྤྱི་བོར་བཞག་པ་ཙམ་གྱིས་ནད་དང་བྲལ་པར་གྱུར་ཅིང ། རང་རང་གི་གནས་སུ་དོང་བར་གྱུར་ཏོ། །ཐ་ན་ལྷ་མོ་སྒྱུ་འཕྲུལ་གྱིས་རྩཝ་ཉག་མ་འགའ་ཞིག་
66a
༄#། །ས་ལས་བླངས་ཏེ་སེམས་ཅན་ནད་པ་དག་ལ་བྱིན་ཡང་དེ་དག་དེ་བླངས་མ་ཐག་ཏུ་ནད་མེད་ཅིང་ཉམས་པ་མེད་པར་གྱུར་ཏོ། །གང་གི་ཚེ་ལྷ་མོ་སྒྱུ་འཕྲུལ་དེས་བདག་གི་ལྟོ་གཡས་པར་བལྟས་པ་དེའི་ཚེ་བྱང་ཆུབ་སེམས་དཔའ་མའི་རུམ་ན་འདུག་པ་དེ་འདི་ལྟ་སྟེ། དཔེར་ན། མེ་ལོང་གི་དཀྱིལ་འཁོར་ཤིན་ཏུ་དག་པ་ལ་གདོང་གི་དཀྱིལ་འཁོར་སྣང་བ་བཞིན་ཏེ། དེ་ལྟར་དེ་མཐོང་ནས་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ཞིང ། དགའ་བ་དང ། ཡིད་བདེ་བ་སྐྱེས་པར་གྱུར་ཏོ། །དགེ་སློང་དག། བྱང་ཆུབ་སེམས་དཔའ་མའི་རུམ་ན་གནས་པའི་བྱིན་གྱི་རླབས་ཀྱིས་ཉིན་མཚན་རྟག་ཏུ་རྒྱུན་མི་འཆད་པར་ལྷའི་རོལ་མོ་སིལ་སྙན་གྱི་སྒྲ་འབྱུང་ཞིང་ལྷའི་མེ་ཏོག་གི་ཆར་བབ་པར་གྱུར་ཏོ། །ཆར་ནི་དུས་བཞིན་དུ་འབབ། རླུང་ནི་དུས་བཞིན་དུ་ལྡང ། དུས་དང ། སྐར་མ་དག་ཀྱང་དུས་བཞིན་དུ་འགྱུར་ཞིང་འཕོ་བར་གྱུར་ཏོ། །རྒྱལ་སྲིད་ཀྱང་བདེ་ཞིང་ལོ་ལེགས་ལ་འཁྲུག་པ་མེད་ཅིང་དགྲ་མེད་པར་གྱུར་ཏོ། །སེར་སྐྱའི་གྲོང་ཁྱེར་ཆེན་པོ་དེ་ན་ཤཱཀྱའི་རིགས་དང ། སེམས་ཅན་གཞན་དག་འཁོད་པ་ཐམས་ཅད་ཀྱང་ཟ་ཞིང་འཐུང ། དགའ་ཞིང་རྩེ་ལ་དགའ་མགུར་སྤྱོད་དོ། །སྦྱིན་པ་དག་ཀྱང་གཏོང ། བསོད་ནམས་དག་ཀྱང་བྱེད་དེ། ཟླ་བ་བཞི་འདས་པའི་དུས་སྟོན་བཞིན་དུ་ཐམས་ཅད་ཀྱང་དགའ་བའི་མཆོག་གིས་རྩེ་ཞིང་
66b
བདེ་བར་གནས་པས་གནས་པར་གྱུར་ཏོ། །རྒྱལ་པོ་ཟས་གཙང་མའང་ཚངས་པའི་སྤྱོད་པ་ཡང་དག་པར་བླངས་ཏེ། རྒྱལ་པོའི་ལས་བཏང་ནས་དཀའ་ཐུབ་ཀྱི་ནགས་ཚལ་ཡོངས་སུ་དག་པ་ན་གནས་པ་བཞིན་དུ་ཐམས་ཅད་ཀྱང་དགའ་བའི་མཆོག་གིས་ཆོས་ཀྱི་རྗེས་སུ་འབྲང་བར་གྱུར་ཏོ། །དགེ་སློང་དག། བྱང་ཆུབ་སེམས་དཔའ་མའི་རུམ་ན་གནས་པ་ནི་རྣམ་པ་དེ་ལྟ་བུའི་རྫུ་འཕྲུལ་གྱི་ཚོ་འཕྲུལ་དང་ལྡན་པས་གནས་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཁྱོད་ཀྱིས་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་སྔོན་བྱང་ཆུབ་སེམས་དཔའ་མའི་རུམ་ན་གནས་པའི་ཚེ་གནས་གནས་པ་མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། །བདེ་བར་གཤེགས་པ། མཐོང་ལགས་སོ། །དེ་བཞིན་གཤེགས་པས་ཚེ་དང་ལྡན་པ་ཀུན་དགའ་བོ་དང ། ལྷའི་དབང་པོ་བརྒྱ་བྱིན་དང ། འཇིག་རྟེན་སྐྱོང་བ་བཞི་དང ། དེ་མ་ཡིན་པའི་ལྷ་དང ། མི་གཞན་དག་ཀྱང་བསྟན་ཏེ་མཐོང་ནས་དེ་དག་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་སོ། །མི་མཇེད་ཀྱི་བདག་པོ་ཚངས་པས་དེ་ཕྱིར་ཡང་ཚངས་པའི་འཇིག་རྟེན་དུ་མཆོད་པར་བྱ་བའི་ཕྱིར་བཏེག་སྟེ་ཁྱེར་ནས་བཞག་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་ཡང་དགེ་སློང་དག་ལ་བཀའ་
67a
༄#། །སྩལ་པ།་དགེ་སློང་དག་།དེ་ལྟར་བྱང་ཆུབ་སེམས་དཔའ་མའི་རུམ་ན་འདུག་པས་ལྷ་དང་མི་ཁྲག་ཁྲིག་ཕྲག་སུམ་ཅུ་རྩ་དྲུག་ཐེག་པ་གསུམ་ལ་ཡོངས་སུ་སྨིན་པར་བྱས་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། གང་ཚེ་རྒྱལ་སྲས་སེམས་ཅན་དམ་པ་མ་ཡི་རུམ་གནས་པ། །དེ་ཚེ་ས་འདི་ཚལ་དང་བཅས་པར་རྣམ་པ་དྲུག་ཏུ་གཡོས། །གསེར་མདོག་འོད་བཀྱེ་ངན་སོང་ཐམས་ཅད་རྣམ་པར་སྦྱངས་པར་གྱུར། །ཆོས་ཀྱི་རྒྱལ་པོར་འགྱུར་ཞེས་ལྷ་ཡི་ཚོགས་རྣམས་རབ་ཏུ་དགའ། །གཞལ་མེད་ཁང་ཆེན་དབྱིབས་ལེགས་རིན་ཆེན་དུ་མས་རྣམ་པར་སྤྲས། །དེར་ནི་དཔའ་བོ་རྣམ་པར་འདྲེན་པ་ཞུགས་པར་གྱུར་ནས་འདུག་།ཙནྡན་དྲི་ཞིམ་མཆོག་གིས་རབ་ཏུ་གང་ཞིང་རྣམ་པར་མཛེས། །སྟོང་གསུམ་རིན་ཆེན་ཡོངས་བཀད་དེ་ཡི་སྲང་བྱེད་རིན་མི་ཆོག་།སྟོང་ཆེན་འཇིག་རྟེན་ཁམས་ཀྱང་འོག་ནས་བརྟོལ་བ་བྱས་ནས་ནི། །ཡོན་ཏན་འབྱུང་བའི་གནས་ཀྱི་པདྨའི་ཉིད་ཁུའི་ཐིགས་པ་བྱུང ། །དེ་བཞིན་ཞག་བདུན་བསོད་ནམས་གཟི་བརྗིད་ཚངས་པའི་འཇིག་རྟེན་འཕགས། །དེ་ལས་ཉིད་ཁུའི་ཐིགས་བླངས་ཚངས་པ་རྒྱལ་བའི་སྲས་ལ་འབུལ། །བྱང་ཆུབ་སེམས་དཔའ་དཔའ་བོ་ཚངས་པ་འདྲ་བ་མ་གཏོགས་པར། །སེམས་ཅན་གང་གིས་དེ་ཟོས་འཇུར་འགྱུར་སེམས་ཅན་རིས་ན་མེད། །བསྐལ་པ་དུ་མའི་བསོད་
67b
ནམས་གཟི་བརྗིད་ཉིད་ཁུའི་ཐིགས་གནས་པ། །དེ་ཟོས་ལུས་དང་སེམས་དང་ཤེས་པ་རྣམ་པར་དག་པར་གྱུར། །འདྲེན་པ་མཆོད་ཕྱིར་བརྒྱ་བྱིན་ཚངས་པ་འཇིག་རྟེན་སྐྱོང་པ་རྣམས། ། བྱང་ཆུབ་སེམས་དཔའི་དྲུང་དུ་རྟག་པར་དུས་གསུམ་རྒྱུན་དུ་འོང ། །ཕྱག་བྱས་མཆོད་བྱས་ཆོས་ཀྱི་དམ་པ་དེ་དག་ཐོས་གྱུར་ནས། །བསྐོར་བ་བྱས་ཏེ་ཀུན་ཀྱང་གང་ནས་འོངས་པའི་གནས་སུ་འདོང ། །འཇིག་རྟེན་ཁམས་རྣམས་ཀུན་ནས་ཆོས་འདོད་བྱང་ཆུབ་སེམས་དཔའ་འོང ། །འོད་བཀོད་ཁྲིར་གྱུར་རྣམས་ལ་དེ་དག་གནས་པར་ཕན་ཚུན་སྣང ། །མཆོག་ཏུ་བྱ་བའི་ཐེག་པ་དམ་པའི་ཆོས་ནི་ཐོས་གྱུར་ནས། །ཀུན་ཀྱང་དགའ་བའི་སེམས་གྱུར་བསྟོད་པའི་ཕྲེང་བ་བརྗོད་ཅིང་འདོང ། །བུད་མེད་བྱིས་པ་གང་དག་སྡུག་བསྔལ་ལྡན་པར་གྱུར་པ་དང ། །འབྱུང་པོས་ནོད་དང་སེམས་འཁྲུགས་གོས་མེད་རྡུལ་གྱིས་ཡོག་པ་རྣམས། །དེ་ཀུན་ལྷ་མོ་སྒྱུ་འཕྲུལ་མཐོང་ནས་སེམས་ནི་རྙེད་གྱུར་ཏེ། །བློ་གྲོས་རྟོགས་དང་དྲན་པ་ལྡན་ཞིང་སོ་སོའི་ཁྱིམ་ཁྱིམ་འདོང ། །རླུང་དང་བད་ཀན་མཁྲིས་པའི་ནད་དང་འདུས་པའི་ནད་ཐེབས་དང ། །མིག་ནད་རྣ་ནད་དག་གིས་ལུས་སེམས་མི་བདེར་གྱུར་པ་དག། རྣམ་མང་ཐ་དད་ནད་ཀྱི་རྣམ་པས་གང་དག་གནོད་གྱུར་པ། །དེ་དག་སྒྱུ་འཕྲུལ་ལག་པ་མགོ་ལ་བཞག་པས་ནད་མེད་གྱུར། །ཡང་ན་རྩཝ་ཡི་ཉག་མ་འགའ་ཞིག་ས་ལས་བླངས་བྱས་ཏེ། །སྒྱུ་འཕྲུལ་ནད་པར་བྱིན་ན་ཐམས་ཅད་རིམས་ནད་
68a
༄#། །མེད་པར་གྱུར། །བདེ་བ་ཐོབ་ཅིང་ད་རོད་མ་ཉམས་སོ་སོའི་ཁྱིམ་དུ་འདོང ། །དེ་ནི་སྨན་གྱུར་སྨན་པའི་རྒྱལ་པོ་རུམ་ན་འདུག་ཕྱིར་རོ། །གང་ཚེ་ལྷ་མོ་སྒྱུ་འཕྲུལ་བདག་གི་ལུས་ལ་བརྟགས་བྱས་པ། །དེ་ཚེ་བྱང་ཆུབ་སེམས་དཔའ་རུམ་ན་འདུག་པ་མཐོང་བ་ནི། །ཇི་ལྟར་བར་སྣང་གནས་ཀྱི་ཟླ་བ་སྐར་མས་བསྐོར་གནས་པ། །དེ་བཞིན་བྱང་ཆུབ་སེམས་དཔའ་མཚན་གྱིས་ཀུན་ནས་བརྒྱན་པ་སྣང ། །དེ་ལ་འདོད་ཆགས་ཞེ་སྡང་གཏི་མུག་གནོད་པར་འགྱུར་བ་མེད། །འདོད་ལ་འདོད་པ་དེ་མེད་དེ་ལ་ཕྲག་དོག་འཚེ་བ་མེད། དགའ་བའི་སེམས་དང་མགུ་བའི་སེམས་དང་དགའ་དང་ཡིད་བདེར་གནས། །དེ་ལ་བཀྲེས་དང་སྐོམ་དང་ཚ་དང་གྲང་བའི་གནོད་པ་མེད། །ལྷ་ཡི་རོལ་མོ་སིལ་སྙན་དབྱངས་སྒྲ་མ་བྱས་རྟག་ཏུ་འབྱུང ། །ལྷ་ཡི་སྤོས་དྲི་མེ་ཏོག་དམ་པ་མཆོག་མཛེས་ཆར་ཡང་འབབ། །ལྷ་དང་མི་རྣམས་དེ་ལ་ལྟ་ཞིང་ལྷ་མི་ཐམས་ཅད་ཀྱང ། །དེ་དག་ཕན་ཚུན་གནོད་པ་མེད་ཅིང་འཚེ་བ་གང་ཡང་མེད། །སེམས་ཅན་དགའ་བདེར་རྩེ་ཞིང་ཟས་དང་སྐོམ་གྱི་སྦྱིན་པ་བྱེད། །དགའ་བའི་སྒྲ་སྒྲོག་དེ་དག་དགའ་ཞིང་མགུ་བའི་ཡིད་དང་ལྡན། །རྒྱལ་པོའི་སྲིད་བདེ་འཁྲུག་པ་མེད་ཅིང་ཆར་པ་དུས་བཞིན་འབབ། །རྩཝ་དང་སྨན་དང་མེ་ཏོག་རྣམ་ཀྱང་དེ་ཡི་དུས་སུ་སྐྱེ། །རྒྱལ་པོའི་ཁབ་ཏུ་ཞག་བདུན་རིན་ཆེན་ཆར་བ་བབ་གྱུར་
68b
བས། །སེམས་ཅན་དབུལ་པོ་དེ་ལས་ལེན་ཅིང་སྤྱིན་བྱེད་བདེ་བར་སྤྱོད། །སེམས་ཅན་དབུལ་ཞིང་སྡུག་བསྔལ་གྱུར་པ་དེ་ཚེ་གང་ཡང་མེད། །རི་རབ་ཟོམ་གྱི་དགའ་ཚལ་སེམས་ཅན་བཞིན་དུ་དགའ་དང་ལྡན། །ཤཱཀྱའི་རྒྱལ་པོ་དེ་ཡང་གསོ་སྦྱོང་རབ་ལ་ཉེར་གནས་ཤིང ། །དེ་ནི་རྒྱལ་པོའི་བྱ་བ་མི་བྱེད་ཆོས་ལ་རྟག་པར་སྤྱོད། །དེ་ནི་དཀའ་ཐུབ་ནག་འཚལ་སོང་ནས་ལྷ་མོ་སྒྱུ་འཕྲུལ་ལ། །སེམས་ཅན་མཆོག་སྲེལ་ཁྱོད་ཀྱི་ལུས་ལ་བདེ་བ་ཅི་འདྲ་རྨེད། །ལྷུམས་སུ་འཇུག་པའི་ལེའུ་སྟེ། དྲུག་པའོ།། །།དགེ་སློང་དག་།དེ་ལྟར་ཟླ་བ་བཅུ་འདས་ཏེ་བྱང་ཆུབ་སེམས་དཔའ་བཙའ་བའི་དུས་ལ་བབ་པ་དང ། རྒྱལ་པོ་ཟས་གཙང་མའི་སྐྱེད་མོས་ཚལ་དུ་སྔ་ལྟས་སུམ་ཅུ་རྩ་གཉིས་བྱུང་ངོ ། །སུམ་ཅུ་རྩ་གཉིས་གང་ཞེ་ན། མེ་ཏོག་ཐམས་ཅད་ཁ་འབུས་ནས་རྒྱས་པར་གྱུར་པ་དང ། རྫིང་དག་ན་མེ་ཏོག་ཨུཏྤ་ལ་དང ། པདྨ་དང ། ཀུ་མུ་ད་དང ། པདྨ་དཀར་པོ་ཡོད་པ་དག་ཀྱང་ཁ་འབུས་ནས་རྒྱས་པར་གྱུར་པ་དང ། མེ་ཏོག་དང་འབྲས་བུའི་ཤིང་ལྗོན་པ་གསར་པ་དག་ཀྱང་ལས་ཐོན་ཏེ་ཁ་འབུས་ནས་རྒྱུས་པར་མ་གྱུར་པ་དང ། རིན་པོ་ཆེའི་ཤིང་ལྗོན་པ་བརྒྱད་བྱུང་བ་དང ། གཏེར་ཆེན་པོ་ཉི་ཁྲི་འབུས་ཏེ་བྱུང་ནས་གནས་པར་སྣང་བ་དང ། ཁྱིམ་གྱི་ནང་དུའང་རིན་པོ་ཆེའི་མྱུ་གུ་ཐོན་པ་དང ། སྤོས་ཆུའི་དཔལ་གྱི་ཝ་འབྲུ་མར་དྲི་ཞིམ་པོས་སྤགས་པ་རྣམས་ཀྱང་ཟག་པར་གྱུར་
69a
༄#། །པ་དང ། གངས་ཀྱི་རིའི་ངོས་ལས་སེངྒེའི་ཕྲུག་གུ་དག་འོངས་ཏེ་དགའ་བར་རྩེ་ཞིང་སེར་སྐྱའི་གྲོང་ཁྱེར་དམ་པ་ལ་བསྐོར་བ་བྱས་ནས་སྒོ་ན་གནས་པར་གྱུར་ཀྱང་སེམས་ཅན་ཀུན་ལའང་འཚེ་བ་མེད་པར་གྱུར་པ་དང ། གླང་པོའི་ཕྲུག་གུ་ཐལ་གར་ལྔ་བརྒྱ་ལྷགས་ཏེ་རྒྱལ་པོ་ཟས་གཙང་མའི་རྐང་པ་ལ་སྣའི་རྩེ་མོས་ཉུག་ཅིང་གནས་པར་གྱུར་པ་དང ། ལྷའི་བྱིས་པ་རོགས་པ་སྐ་རགས་བཅིངས་པ་དག་ཀྱང་རྒྱལ་པོ་ཟས་གཙང་མའི་བཙུན་མོའི་འཁོར་གྱིས་པང་པ་ནས་པང་པ་དག་ཏུ་འགྲེ་ལྡོག་པར་སྣང་བར་གྱུར་པ་དང ། ཀླུའི་བུ་མོ་མཆོད་པ་སྣ་ཚོགས་ཀྱི་ཡོ་བྱད་ཐོགས་པ་དག་ཀྱང་ལུས་ཕྱེ་ཕྱུང་ཞིང་ནམ་མཁའ་ལ་རྒྱུ་བར་སྣང་བ་དང ། ལྷའི་བུ་མོ་ཁྲིའང་རྨ་བྱའི་མདོངས་ལག་ན་ཐོགས་ཤིང་ནམ་མཁའ་ལ་འཁོད་པར་སྣང་བ་དང ། བུམ་པ་གང་བ་ཁྲིའང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱེད་པར་སྣང་བ་དང ། ལྷའི་བུ་མོ་ཁྲིའང་སྤོས་ཆུའི་རིལ་བ་བྷྲིང་ག་ར་ཀླད་ལ་ཐོགས་ཤིང་འཁོད་པར་སྣང་བ་དང ། ལྷའི་བུ་མོ་ཁྲིའང་གདུགས་དང ། རྒྱལ་མཚན་དང ། བ་དན་ཐོགས་ཤིང་འཁོད་པར་སྣང་བ་དང ། ལྷའི་བུ་མོ་བརྒྱ་སྟོང་མང་པོ་དག་ཀྱང་དུང་དང ། རྔ་དང ། རྫ་རྔ་དང ། འཁར་རྔ་མགུལ་ནས་ད་ལྟར་ཏེ་སྡོད་ཅིང་འཁོད་པར་སྣང་བ་དང ། རླུང་ཐམས་ཅད་ཀྱང་མི་ལྡང་བར་གནས་པར་གྱུར་པ་
69b
དང ། ཆུ་ཀླུང་དང་ཆུ་བྲན་ཐམས་ཅད་ཀྱང་མི་འགུལ་ཞིང་མི་འབབ་པར་གྱུར་པ་དང ། ཉི་ཟླ་དང ། གཞལ་མེད་ཁང་དང ། རྒྱུ་སྐར་དང ། སྐར་མའི་ཚོགས་རྣམས་ཀྱང་མི་རྒྱུ་བར་གྱུར་པ་དང ། སྐར་མ་རྒྱལ་དང་ཡང་ལྡན་པར་གྱུར་པ་དང ། རྒྱལ་པོ་ཟས་གཙང་མའི་ཁྱིམ་ཡང་རིན་པོ་ཆེའི་དྲ་བ་ས་ཡོག་པར་གྱུར་པ་དང ། མེའང་མི་འབར་བར་གྱུར་པ་དང ། ཁང་པ་བརྩེགས་པ་དང ། ཁང་བཟང་དང ། ཡང་ཐོག་དང ། རྟ་བབས་དག་ལའང་ནོར་བུ་དང ། རིན་པོ་ཆེ་དག་འཕྱང་བར་སྣང་བར་གྱུར་པ་དང ། རས་བཅོས་བུའི་མཛོད་དང ། རིན་པོ་ཆེ་སྣ་ཚོགས་ཀྱི་མཛོད་རྣམས་ཀྱང་སྒོ་བྱེ་བར་སྣང་བ་དང ། བྱ་རོག་དང ། འུག་པ་དང ། བྱ་རྒོད་དང ། སྤྱང་ཀི་དང ། ཝའི་སྒྲ་དག་ཀྱང་མེད་པར་གྱུར་པ་དང ། སྒྲ་སྐར་སྙན་པའི་སྒྲ་དག་ཀྱང་བྱུང་བར་གྱུར་པ་དང ། སྐྱེ་བོ་ཐམས་ཅད་ཀྱི་ལས་ཀྱི་མཐའ་ཡང་རྒྱུན་ཆད་པར་གྱུར་པ་དང ། སའི་ཕྱོགས་མཐོན་དམན་དུ་འདུག་པ་རྣམས་ཀྱང་མཉམ་པར་གནས་པར་གྱུར་པ་དང ། ལམ་གྱི་བཞི་མདོ་དང ། སུམ་མདོ་དང ། སྲང་དང ། ཚོང་འདུས་ཀྱི་འཁོར་ཀྱང་ལག་མཐིལ་ལྟར་བཞི་མཉམ་ཞིང་འཇམ་ལ་མེ་ཏོག་སིལ་མས་གང་སྟེ་མཛེས་པར་སྣང་པ་དང ། སྦྲུམ་པ་ཐམས་ཅད་ཀྱང་བདེ་བ་དང ། ལེགས་པར་བཙའ་བར་གྱུར་པ་དང ། ཤིང་སཱ་ལའི་ནགས་ཚལ་གྱི་ལྷ་ཐམས་ཅད་ཀྱང་ཤིང་གི་ལོ་མའི་ནང་ནས་ལུས་ཕྱེད་ཕྱུང་སྟེ་ཕྱག་འཚལ་ཞིང་
70a
༄#། །གནས་པར་སྣང་སྟེ། སྔ་ལྟས་སུམ་ཅུ་རྩ་གཉིས་པོ་དེ་དག་བྱུང་བར་གྱུར་ཏོ། །དེ་ནས་ལྷ་མོ་སྒྱུ་འཕྲུལ་བྱང་ཆུབ་སེམས་དཔའ་ཉིད་ཀྱི་གཟི་བརྗིད་པར་མཐུས་བྱང་ཆུབ་སེམས་དཔའ་བཙའ་བའི་དུས་ལ་བབ་པར་ཤེས་ཏེ་ནམ་གྱི་སྲོད་ལ་རྒྱལ་པོ་ཟས་གཙང་མའི་དྲུང་དུ་འོངས་ནས་ཚིགས་སུ་བཅད་དེ་སྨྲས་པ། བདག་གི་བསམ་པ་གང་ལགས་གསོལ་གྱི་ལྷ་ནི་གསན་དུ་གསོལ། །ཡུན་རིང་རིང་པོ་འདས་ནས་སྐྱེད་མོས་ཚལ་གྱི་བློ་སྐྱེས་ཏེ། །གལ་ཏེ་ཁྱོད་མི་བཀྱོན་ཅིང་ཞེ་སྡང་ཕྲག་དོག་མི་མངའ་ན། ། བདག་ནི་རྩེ་ན་ས་སྐྱེད་མོས་ཚལ་དུ་མྱུར་དུ་མཆི་བར་བགྱི། །ཆོས་དགོངས་བརྩོན་པ་དཀའ་ཐུབ་སྤྱོད་པ་ཁྱོད་ཀྱང་སྐྱོ་མཁྱེན་གྲང ། །བདག་ཀྱང་སེམས་ཅན་དག་ལ་བསྲེལ་ནས་ཡུན་ནི་རིང་ལགས་ལ། །སཱ་ལའི་ཤིང་ལྗོན་སྡོང་པོ་མཆོག་ཀྱང་མེ་ཏོག་ཁ་འབུས་ཏེ། །སྐྱེད་མོས་ཚལ་གྱི་དོགས་སར་ང་ནི་མཆི་བའི་རིགས་སོ་ལྷ། །སོས་ཀའི་དུས་མཆོག་བུད་མེད་རྣམས་ཀྱི་རྒྱན་དུ་གྱུར་ལགས་ཏེ། །ནགས་རྒྱུ་ཁྱུ་བྱུག་དང་ནི་རྨ་བྱ་སྒྲ་རབ་སྙན་པ་འབྱིན། །གཙང་ཞིང་མཛེས་ལ་སྣ་ཚོགས་མེ་ཏོག་རྡུལ་གྱི་ངད་ཀྱང་ལྡང ། །ང་ནི་མཆི་ན་མ་ཐོགས་ལེགས་པར་བཀའ་ལུང་སྩལ་དུ་གསོལ། །རྒྱལ་པོའི་དབང་པོས་ལྷ་མོ་ལས་ནི་དེ་སྐད་ཚིག་ཐོས་ནས། །དགའ་ཞིང་རབ་ཏུ་མགུ་བའི་སེམས་ཀྱིས་འཁོར་
70b
ལ་སྨྲས་པ་ནི། །བཞོན་པ་བཞོན་ཆེ་མགྱོགས་པའི་ཤུགས་ལྡན་དག་ཀྱང་བསྟད་པར་གྱིས། །ཡོན་ཏན་ཕུན་སུམ་ཚོགས་ལྡན་ལུམྦི་ནི་ཚལ་བརྒྱན་པར་གྱིས། །རི་སྔོའི་མདོག་ལྡན་སྤྲིན་གྱི་ཁ་དོག་མཐུན་པར་གྱུར་པ་ཡི། །གླང་པོ་སྟོང་ཕྲག་ཉི་ཤུ་སྙེས་ཅིག་མྱུར་དུ་བསྟད་པར་གྱིས། །གླང་པོའི་དབང་པོ་མཆེ་བ་དྲུག་ལྡན་དྲིལ་མཛེས་གློ་ལ་བརྒྱུས། །གསེར་དང་ནོར་བུས་རྣམ་པར་སྤྲས་ཤིང་གསེར་གྱི་དྲ་བས་སྤུད། །རྒྱལ་པོའི་བཅིབས་པ་རླུང་ལྟར་མགྱོགས་པའི་ཤུགས་དང་ལྡན་པ་སྟེ། །དངུལ་དང་ཁ་བའི་མདོག་འདྲ་རྔ་རྔོ་ག་ལྕང་ལོ་བཟང་འཁྲིལ་བའི། །རྟ་མཆོག་སྟོང་ཕྲག་ཉི་ཤུ་བགྲངས་པ་མྱུར་དུ་སྟོང་གྱིས་ཏེ། །གསེར་དྲིལ་གཡེར་ཀའི་དྲ་བ་གློ་ནས་དབྱངས་པ་གྱིས། །སྐྱེས་བུ་རྟུལ་ཕོད་གཡུལ་ལ་མོས་ཤིང་འཐབ་འདོད་དཔའ་བོ་དག་།མདའ་གཞུ་རལ་གྲི་མདུང་ཐུང་ཞགས་པ་མཚོན་ཆ་རྣོ་ཐོགས་པ། །སྟོང་ཕྲག་ཉི་ཤུ་བགྲངས་པ་མྱུར་དུ་བཅོས་ཏེ་བཤམས་གྱིས་ལ། །སྒྱུ་འཕྲུལ་འཁོར་དང་བཅས་པ་བག་ཡོད་པར་ནི་སྲུང་བར་གྱིས། །ལུམྦི་ནི་དེར་གསེར་དང་ནོར་བུའི་རྒྱན་ཁྲོམས་བརྒྱན་པར་གྱིས། །གོས་དམར་རྣམ་པ་མང་པོས་ཤིང་རྣམས་ཐམས་ཅད་བརྒྱན་པར་གྱིས། །ལྷ་ཡི་དགའ་ཚལ་བཞིན་དུ་མེ་ཏོག་སྣ་ཚོགས་ཆལ་བར་ཁྲོམས། །དེ་ལྟར་ཐམས་ཅད་བཤམས་ཟིན་མྱུར་དུ་ང་ལ་སྦྲན་པར་གྱིས། །འཁོར་རྣམས་ཀྱིས་ནི་དེ་སྐད་
71a
༄#། །ཚིག་ཐོས་སྐད་ཅིག་ཏུ། །བཞོན་པ་ཀུན་བཤམས་དེ་བཞིན་ལུམྦི་ནི་ཡང་བརྒྱན་བྱས་ཏེ། །རྒྱལ་གྱུར་རྒྱལ་གྱུར་སྐུ་ཚེ་རིང་སྐྱོངས་རྒྱལ་པོ་གཤེགས་སུ་གསོལ། ཇི་སྐད་བཀའ་སྩལ་པ་དེ་བཞིན་ཀུན་བགྱིས་དུས་བབ་ལྷ་གཟིགས་ཤིག་།མི་ཡི་བདག་པོ་དམ་པ་དེ་ཡང་དགའ་བའི་སེམས་གྱུར་ཏམ། །ཁྱིམ་གྱི་དམ་པར་ཞུགས་ཏེ་བུད་མེད་རྣམས་ལ་འདི་སྐད་སྨྲས། གང་ཞིག་ང་ལ་སྙིང་ཉེ་ང་ལ་དགའ་བར་འདོད་པ་དག་།ང་ཡི་བཀའ་བཞིན་བགྱིས་ཏེ་བདག་གི་ལུས་ཀུན་བརྒྱན་པར་གྱིས། །སྤོས་མཆོག་ངད་ཀྱི་དྲི་ཞིམ་ཁ་དོག་སྣ་ཚོགས་སྡུག་པའི་གོས། །འཇམ་ཞིང་ཡིད་འོང་དགའ་བའི་སེམས་ཀྱིས་ལེགས་པར་བགོ་བར་གྱིས། །བྲང་ན་འཕྱང་བའི་མུ་ཏིག་སེ་མོ་དོ་ཡིས་བརྒྱན་པར་གྱིས། །རྒྱན་གྱི་ཁྱད་པར་ཐམས་ཅད་དེ་རིང་ཀུན་གྱིས་བསྟན་པར་གྱིས། །འཁར་རྔ་རྒྱུད་གཅིག་གླིང་བུའི་པི་ཝང་རྫ་རྔ་དུམ་དུམ་ཕེག། སིལ་སྙན་ཡིད་དུ་འོང་བ་བརྒྱ་སྟོང་དག་ཀྱང་བཤམ་པར་གྱིས། །སྒྲ་སྙན་ཐོས་ནས་ལྷ་རྣམས་རབ་ཏུ་དགའ་བ་སྐྱེ་འགྱུར་ཞིང ། །ལྷ་མོ་རྣམས་ཀྱང་དེ་བཞིན་དགའ་བར་འགྱུར་བ་ཁྱེད་ཀྱིས་གྱིས། །ཤིང་རྟའི་མཆོག་འདིར་ལྷ་མོ་སྒྱུ་འཕྲུལ་གཅིག་པུ་འདུག་པར་གྱིས། །བུད་མེད་སྐྱེས་པ་གཞན་དག་སུ་ཡང་ཤིང་རྟ་དེར་མ་འཁོད། །ན་ཆུང་སྣ་ཚོགས་གོ་ཅན་རྣམས་ཀྱིས་ཤིང་རྟ་དེ་དྲོངས་ཏེ། །གང་དུའང་ཡིད་
71b
དུ་མི་འོང་མི་མཐུན་སྒྲ་རྣམས་མི་གྲགས་གྱིས། །ལྷ་མོ་སྒྱུ་འཕྲུལ་ཁྱིམ་ནས་བྱུང་སྟེ་སྒོ་དྲུང་ཕྱིན་པའི་ཚེ། །རྟ་དང་གླང་པོ་ཤིང་རྟ་རྐང་ཐང་དཔལ་ལྡན་སྣ་ཚོགས་དཔུང ། །རྒྱལ་པོའི་སྒོ་དྲུང་ལྷགས་ཚེ་སྒྲ་ཆེན་མང་པོ་གྲག་པར་གྱུར། །རྒྱ་མཚོ་ཆེན་པོ་འཁྲུགས་པའི་སྒྲ་ལྟར་དེ་དག་ཡོངས་སུ་གྲག་།དེ་ཚེ་བཀྲ་ཤིག་དོན་དུ་དྲིལ་བུ་བརྒྱ་སྟོང་བཀྲོལ་བར་བྱས། །ཤིང་རྟ་དེ་ཡང་དེ་ལྟར་རྒྱལ་པོས་སྣ་ཚོགས་བརྒྱན་པ་ལ། །ལྷ་རྣམས་སྟོང་གིས་ལྷ་ཡི་ཁྲི་ཡང་ལེགས་པར་བཤམས་པ་བྱས། །རིན་ཆེན་ཤིང་ལྗོན་མེ་ཏོག་ལོ་མ་ལྡན་བཞིན་ལྡན་པར་བྱས། ། རྨ་བྱ་ཁྲུང་ཁྲུང་ངང་པ་ཡིད་དུ་འོང་བའི་སྒྲ་ཡང་འབྱིན། །གདུགས་དང་རྒྱལ་མཚན་བ་དན་ཆེ་ཕྲ་ཀུན་ནས་འཁོར་བར་བསྒྲེངས། །ལྷ་ཡི་གོས་དང་དྲིལ་བུ་གཡེར་ཀའི་དྲ་བ་མཆོག་གིས་བཀབ། །ལྷ་ཡི་བུ་མོ་ནམ་མཁའ་ལས་ནི་ཤིང་རྟ་དེ་ལ་ལྟ། །ལྷ་ཡི་སྒྲ་དབྱངས་སྙན་པ་སྒྲོག་ཅིང་བསྟོད་པའི་ཚིག་བརྗོད་དེ། །གང་ཚེ་ལྷ་མོ་སྒྱུ་འཕྲུལ་སེངྒེའི་ཁྲི་ལ་འདུག་གྱུར་པ། ། དེ་ཚེ་སྟོང་གསུམ་ས་འདི་རྣམ་པ་དག་ཏུ་རབ་ཏུ་གཡོས། །ལྷ་རྣམས་གོས་ཀྱི་གཡབ་མོ་འབྱིན་ཅིང་མེ་ཏོག་སྣ་ཚོགས་འཐོར། །དེ་རིང་ལུམྦི་ནི་འདིར་འགྲོ་བའི་དམ་པ་བལྟམས་གྱུར་ཏེ། །འཇིག་རྟེན་གྱི་སྐྱོང་བ་བཞི་ནི་ཤིང་རྟའི་མཆོག་དེ་འདྲེན་པར་བྱེད། །གསུམ་ཅུ་རྩ་གསུམ་བདག་པོ་དབང་པོའང་ལམ་གྱི་བྱི་དོར་བྱེད། །ཚངས་པ་སྐྱེ་བོ་མི་སྲུན་སེལ་ཅིང་སྔོན་དུ་འགྲོ་
72a
༄#། །བར་གྱུར། །ལྷ་རྣམས་བརྒྱ་ཕྲག་སྟོང་ཡང་ཐལ་མོ་སྦྱར་བས་ཕྱག་འཚལ་འདུད། །རྒྱལ་པོ་རབ་ཏུ་དགའ་བའི་སེམས་ཀྱིས་བཀོད་པ་དེ་ལ་ལྟ། །དེ་ནི་འདི་སྙམ་འདི་ནི་ལྷ་ཡི་ལྷ་ཞིག་ཡིན་སྙམ་བྱེད། །གང་ལ་སྐྱོང་བ་བཞི་དང་ཚངས་པ་དབང་པོར་བཅས་པའི་ལྷ། །མཆོད་པ་རྒྱ་ཆེན་བྱེད་པ་འདི་ནི་ངེས་པར་སངས་རྒྱས་འགྱུར། ། སྲིད་པ་གསུམ་ན་ལྷ་ཀླུ་བརྒྱ་བྱིན་ཚངས་པ་འཇིག་རྟེན་སྐྱོང ། །གང་ཡང་མཆོད་པ་འདི་འདྲ་བཟོད་པའི་སེམས་ཅན་དེ་མེད་དེ། །ཡང་ན་མགོ་འགས་ཡང་ན་དེ་དག་སྲོག་དང་བྲལ་བར་འགྱུར། །འདི་ནི་ལྷ་ཡི་དམ་པ་ཡིན་པས་མཆོད་པ་ཐམས་ཅད་བཟོད། །དགེ་སློང་དག་།དེ་ནས་ལྷ་མོ་སྒྱུ་འཕྲུལ་རྟའི་ཤིང་རྟ་རྒྱན་ཐམས་ཅད་ཀྱིས་བརྒྱན་པ་བརྒྱད་ཁྲི་བཞི་སྟོང་གིས་ནི་ཀུན་ནས་བསྐོར། གླང་པོ་ཆེའི་ཤིང་རྟ་རྒྱན་ཐམས་ཅད་ཀྱིས་བརྒྱན་པ་བརྒྱད་ཁྲི་བཞི་སྟོང་དང ། རྐང་ཐང་དཔའ་ཞིང་རྟུལ་ཕོད་པ་ཡན་ལག་དམ་པ་དང་ལྡན་པ།་གོ་ཆ་ལེགས་པར་བགོས་པ། སྲ་བའི་གོ་གྱོན་པ་བརྒྱད་ཁྲི་བཞི་སྟོང་གིས་ནི་ཡོངས་སུ་བསྲུངས། ཤཱཀྱའི་བུ་མོ་སྟོང་ཕྲག་དྲུག་ཁྲིས་ནི་མདུན་དུ་བདར། རྒྱལ་པོ་ཟས་གཙང་མའི་ཕུ་ནུའི་རིགས་སུ་སྐྱེས་པའི་ཤཱཀྱ་རྒན་པ་དང ། གཞོན་པ་དང ། བར་མ་བཞི་ཁྲིས་ནི་ཡོངས་སུ་བསྲུངས། རྒྱལ་པོ་ཟས་གཙང་མའི་སླས་གླུ་དང་རོལ་མའི་
72b
དབྱངས་སྒྲ་ནི་བྱེད། འཁར་བའི་སིལ་ཁྲོལ་དང ། ཕེག་རྡོབ་སིལ་སྙན་དང ། གླུ་དབྱངས་ལེན་པ་དྲུག་ཁྲིས་ནི་ཀུན་ནས་བསྐོར། ལྷའི་བུ་མོ་བརྒྱད་ཁྲི་བཞི་སྟོང་དང ། ཀླུའི་བུ་མོ་བརྒྱད་ཁྲི་བཞི་སྟོང་དང ། དྲི་ཟའི་བུ་མོ་བརྒྱད་ཁྲི་བཞི་སྟོང་དང ། མིའ་མྕིའི་བུ་མོ་བརྒྱད་ཁྲི་བཞི་སྟོང་དང ། ལྷ་མ་ཡིན་གྱི་བུ་མོ་བརྒྱད་ཁྲི་བཞི་སྟོང་བཀོད་པའི་རྒྱན་སྣ་ཚོགས་ཀྱིས་བརྒྱན་པ་ཤ་སྟག་གླུ་དང་རོལ་མོའི་དབྱངས་སྒྲ་སྣ་ཚོགས་ཀྱིས་བསྔགས་པ་བརྗོད་པ་རྗེས་སུ་འབྲང་བས་འགྲོའོ། །ལུམྦི་ནིའི་ནགས་ཚལ་དེ་ཐམས་ཅད་ཀྱང་སྤོས་ཆུའི་ཆག་ཆག་གིས་བཏབ་ཅིང་ལྷའི་མེ་ཏོག་གིས་གཏོང་བར་གྱུར་ཏོ། །ནགས་ཚལ་དམ་པ་དེའི་ནང་ན་ཤིང་ལྗོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་དུས་ལ་མ་བབ་པར་ལོ་མ་དང ། མེ་ཏོག་དང ། འབྲས་བུ་བསྐྱེད་པར་གྱུར་ཏོ། །ནགས་ཚལ་དེ་ནི་ལྷ་རྣམས་ཀྱིས་ཀྱང་ལེགས་པར་བརྒྱན་པར་གྱུར་ཏེ། འདི་ལྟ་སྟེ། དཔེར་ན། འདྲེས་པའི་ཚལ་ལྷ་རྣམས་ཀྱིས་ལེགས་པར་བརྒྱན་པ་བཞིན་ནོ། །དེ་ནས་ལྷ་མོ་སྒྱུ་འཕྲུལ་དུ་ལུམྦི་ནིའི་ནགས་ཚལ་དུ་ཕྱིན་ནས་ཤིང་རྟ་དམ་པ་དེ་ལས་བབས་ཏེ། མི་དང་ལྷའི་བུ་མོ་དགེ་གིས་ཡོངས་སུ་བསྐོར་ཅིང་ཤིང་དྲུང་ནས་ནི་ཤིང་དྲུང་དག་ཏུ་འགྲོ། ནགས་ཚལ་ནས་ནི་ནགས་ཚལ་དག་ཏུ་འཆག་།ལྗོན་པ་ནས་ནི་ལྗོན་པ་དག་ལ་ལྟ་ཞིང་དེ་རིམ་གྱིས་ཤིང་རིན་པོ་ཆེ་ཆེན་པོ་མཆོག་དང་ཕུལ་དུ་བྱ་བ། ཡལ་ག་ཤིན་ཏུ་
73a
༄#། །རྣམ་པར་འབྱེས་པ། ལོ་མ་དང ། དོག་པ་བཟང་པོ་དང་ལྡན་པ། མི་དང་ལྷའི་མེ་ཏོག་སྣ་ཚོགས་རབ་ཏུ་རྒྱས་པ། སྤོས་མཆོག་དང་ཕུལ་དུ་བྱ་བའི་དྲིའི་ངད་དང་ལྡན་པའི་གོས་ཁ་དོག་སྣ་ཚོགས་དཔྱངས་པ། ནོར་བུ་དང་རིན་པོ་ཆེ་སྣ་ཚོགས་ལྟ་བུའི་འོད་རྣམ་པ་ཐ་དད་པ་འབར་བ། རྩ་བ་དང ། སྡོང་པོ་དང ། ཡལ་ག་དང ། ལོ་མ་རྣམས་རིན་པོ་ཆེ་ཐམས་ཅད་ཀྱིས་ལེགས་པར་བརྒྱན་པ། ཡལ་ག་རིང་ཞིང་ཤིན་ཏུ་རྣམ་པར་འབྱེས་པ། བླག་ཤ་ཞེས་བྱ་བ་སའི་ཕྱོགས་ལག་མཐིལ་ལྟར་མཉམ་ཞིང་ཤིན་ཏུ་བཟང་ལ་ཡངས་པ། རྩཝ་སྔོན་པོ་རྨ་བྱའི་མགྲིན་པ་ལྟ་བུ་སྐྱེས་པ། ཀ་ཙ་ལིནདའི་གོས་ལྟར་རེག་ན་བདེ་བའི་ས་ལ་འདུག་པ། སྔོན་གྱི་རྒྱལ་བའི་ཡུམ་གྱིས་བརྟེན་པ། ལྷའི་གླུ་དབྱངས་བླངས་པ།་གནས་གཙང་མའི་ལྷ་བཟང་ཞིང་དྲི་མ་མེད་ལ་རྣམ་པར་དག་པ་རབ་ཏུ་ཞི་བའི་སེམས་དང་ལྡན་པ་རྣམས་ཀྱིས་ཐོར་ཚུགས་དང་ཅོད་ཕན་མངོན་པར་བཏུད་པའི་སྤྱི་བོས་མངོན་པར་ཕྱག་བྱ་བའི་ཤིང་ལྗོན་པ་བླག་ཤ་དེའི་དྲུང་དུ་ཕྱིན་ཏོ། །དེ་ནས་བྱང་ཆུབ་སེམས་དཔའི་གཟི་བརྗིད་དང་མཐུས་ཤིང་བླག་ཤ་དེས་མངོན་པར་བཏུད་དེ་ཕྱག་བྱས་སོ། །དེ་ནས་ལྷ་མོ་སྒྱུ་འཕྲུལ་མ་ནམ་མཁའི་དཀྱིལ་དུ་སྣང་བའི་གློག་གི་ཕྲེང་བ་ལྟ་བུའི་ལག་པ་གཡས་པ་བརྐྱངས་ནས་བླག་ཤའི་ཡལ་ག་ལས་བཟུང་སྟེ་ཚུལ་དུ་ཤིས་པར་ནམ་མཁའི་དཀྱིལ་
73b
དུ་བལྟས་ནས་བྱ་སྨྱང་བྱེད་ཅིང་འདུག་པར་གྱུར་ཏོ། །དེ་ནས་དེའི་ཚེ་འདོད་པ་ན་སྤྱོད་པའི་ལྷའི་ནང་ནས་ལྷའི་བུ་མོ་དྲུག་ཁྲི་ལྷགས་ཏེ། ལྷ་མོ་སྒྱུ་འཕྲུལ་ལ་རིམ་གྲོ་དང་བཀུར་སྟི་བྱེད་པར་གྱུར་ཏོ། །བྱང་ཆུབ་སེམས་དཔའ་མའི་རུམ་ན་འདུག་པའི་ཚེ་རྣམ་པར་དེ་ལྟ་བུའི་རྫུ་འཕྲུལ་གྱི་ཆོ་འཕྲུལ་དང་ལྡན་པར་གནས་སོ། །དེ་ཟླ་བ་བཅུ་ཚང་ནས་མའི་གློ་གཡས་པ་ནས་དྲན་ཞིང་ཤེས་བཞིན་དུ་མངལ་གྱི་དྲི་མས་མ་གོས་པར་བྱུང་སྟེ། གཞན་ལྟར་མ་ཡིན་ཞིང་གཞན་དག་ལ་མངལ་གྱི་དྲི་མ་ཞེས་བྱ་བ་བརྗོད་པ་དེ་ལྟ་བུ་མེད་པར་གྱུར་ཏོ། །དགེ་སློང་དག་།དེའི་ཚེ་ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་གཉིས་མདུན་ན་འཁོད་དེ། དེ་གཉིས་ཀྱིས་རིམ་གྲོ་དམ་པ་ཆེན་པོས་ལྷའི་གོས་ཀ་ཤི་བའི་ལྷེབ་མོས་ལུས་དང་ཡན་ལག་ཐམས་ཅད་ཀྱིས་དྲན་ཞིང་ཤེས་བཞིན་དུ་བྱང་ཆུབ་སེམས་དཔའ་བླངས་སོ། །བྱང་ཆུབ་སེམས་དཔའ་ཁང་པ་བརྩེགས་པ་གང་གི་ནང་ན་འདུག་ཅིང་མའི་རུམ་ན་གནས་གནས་པ་དེའང་མི་མཇེད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷ་རྣམས་ཀྱིས་ཚངས་པའི་འཇིག་རྟེན་དུ་གྱེན་དུ་བཏེག་སྟེ་མཆོད་རྟེན་དུ་བྱ་བ་དང ། མཆོད་པ་བྱ་བའི་ཕྱིར་ཁྱེར་རོ། །དེ་ལྟར་བྱང་ཆུབ་སེམས་དཔའ་དེ་ནི་མིར་གྱུར་པ་གང་གིས་ཀྱང་མ་བླངས་ཀྱི། བྱང་ཆུབ་སེམས་དཔའ་དེ་ནི་ལྷ་རྣམས་ཀྱིས་བླངས་སོ། །དེ་ནས་བྱང་ཆུབ་སེམས་དཔའ་བཙས་
74a
༄#། །མ་ཐག་ཏུ་ས་ལ་འབབ་སྟེ། བྱང་ཆུབ་སེམས་དཔའ་དེ་ས་ལ་བབས་པར་གྱུར་མ་ཐག་ཏུ་པདྨ་ཆེན་པོ་ཞིག་གིས་ས་འདིའང་བརྟོལ་ཏེ་བྱུང་ངོ ། །ཀླུའི་རྒྱལ་པོ་ཆེན་པོ་དགའ་བོ་དང ། ཉེ་དགའ་བོ་གཉིས་ཀྱང་ནམ་མཁའི་དཀྱིལ་ན་ལུས་ཕྱེད་ཕྱུང་སྟེ་འཁོད་ནས་བསིལ་བ་དང ། དྲོ་བའི་ཆུའི་རྒྱུན་གཉིས་མངོན་པར་སྤྲུལ་ནས་བྱང་ཆུབ་སེམས་དཔའི་ལུས་བཀྲུས་སོ། །བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་ལ་སོགས་པ་གཞན་ཡང་ལྷའི་བུ་བརྒྱ་སྟོང་མང་པོ་དག་བྱང་ཆུབ་སེམས་དཔའ་བཙས་མ་ཐག་ཏུ་སྤོས་ཆུ་སྣ་ཚོགས་དང ། མེ་ཏོག་སིལ་མས་ལུས་འཁྲུ་ཞིང་མངོན་པར་འཐོར་རོ། །བར་སྣང་ལས་ཀྱང་རྡུལ་ཡབ་ཀྱི་རྔ་མ་གཉིས་དང ། རིན་པོ་ཆེའི་གདུགས་བྱུང་བར་གྱུར་ཏེ། །དེ་པདྨ་ཆེན་པོ་དེ་ལ་འདུག་ནས་ཕྱོགས་བཞིར་རྣམ་པར་ལྟ་སྟེ། སེངྒེའི་ལྟ་སྟངས་དང ། སྐྱེས་བུ་ཆེན་པོའི་ལྟ་སྟངས་ཀྱིས་རྣམ་པར་ལྟའོ། །དེའི་ཚེ་བྱང་ཆུབ་སེམས་དཔས་སྔོན་གྱི་དགེ་བའི་རྩ་བའི་རྣམ་པར་སྨིན་པ་ལས་བྱུང་བ་ལྷའི་མིག་ཐོགས་པ་མེད་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། ཕོ་བྲང་འཁོར་དང་ལྗོངས་སུ་བཅས། ཡུལ་དུ་བཅས། མི་དང་ལྷར་བཅས་པ་རྣམས་མཐོང་བར་གྱུར་ཏོ། །སེམས་ཅན་ཐམས་ཅད་ཀྱི་སེམས་ཀྱི་
74b
སྤྱོད་པའང་རབ་ཏུ་ཤེས་ཏེ། ཤེས་ནས་ཀྱང་སེམས་ཅན་གང་ཚུལ་ཁྲིམས་སམ། ཏིང་ངེ་འཛིན་ནམ། ཤེས་རབ་བམ། དགེ་བའི་སྤྱོད་པས་བདག་དང་འདྲ་བ་དེ་ལྟ་བུ་གང་ལ་ལ་ཞིག་ཡོད་དམ་ཞེས་རྣམ་པར་ལྟའོ། །དེའི་ཚེ་བྱང་ཆུབ་སེམས་དཔས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བདག་དང་མཚུངས་པའི་སེམས་ཅན་གང་ཡང་མ་མཐོང་ནས་དེའི་ཚེ་བྱང་ཆུབ་སེམས་དཔའ་སེངྒེ་ལྟར་འཇིགས་པ་མེད་ཅིང་བག་ཚ་བ་མེད་དེ། ཞུམ་པ་དང་བག་འཆུམས་པ་མེད་པས་ལེགས་པར་བསམ་པ་དྲན་པར་བྱས་ཏེ། བསམས་བརྟགས་ནས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ཤེས་པར་བྱ་སྟེ། སུས་ཀྱང་བསྟན་པ་མེད་པར་བྱང་ཆུབ་སེམས་དཔའ་དགེ་བའི་རྩ་བའི་ཆོས་ཐམས་ཅད་ཀྱི་སྔོན་དུ་འགྲོ་བར་བྱའོ་ཞེས་ཤར་ཕྱོགས་ལོགས་སུ་གོམ་པ་བདུན་བོར་རོ། །དེ་ལྟར་བྱང་ཆུབ་སེམས་དཔའ་གང་དང་གང་དུ་གོམ་པ་བོར་བ་དེ་དང་དེ་དག་ཏུ་པདྨ་དག་ཀྱང་སྐྱེས་པར་གྱུར་ཏོ། །ལྷ་དང་མི་རྣམས་ཀྱི་སྦྱིན་པའི་གནས་སུ་འགྱུར་བར་བྱའོ་ཞེས་ལྷོ་ཕྱོགས་ལོགས་སུ་གོམ་པ་བདུན་བོར་རོ། །ནུབ་ཕྱོགས་ལོགས་སུ་གོམ་པ་བདུན་བོར་ནས་གོམ་པ་བདུན་པ་ལ་གནས་ཏེ་ང་ནི་འཇིག་རྟེན་ན་ཕུལ་དུ་ཕྱིན་པའོ། །འདི་ནི་ངའི་སྐྱེ་བ་ཐ་མ་སྟེ། སྐྱེ་བ་དང ། རྒ་བ་དང ། ན་བ་དང ། འཆི་བ་མཐར་དབྱུང་ངོ་ཞེས་སེངྒེ་ལྟར་
75a
༄#། །ཚིམ་པར་གྱུར་པའི་སྒྲ་བསྒྲགས་སོ། །སེམས་ཅན་ཐམས་ཅད་ཀྱི་ནང་ན་བླ་ན་མེད་པར་བྱའོ་ཞེས་བྱང་ཕྱོགས་ལོགས་སུ་གོམ་པ་བདུན་བོར་རོ། །བདུད་དང་བདུད་ཀྱི་སྡེ་ནི་གཞོམ་པར་བྱའོ། །སེམས་ཅན་དམྱལ་བ་པ་ཐམས་ཅད་ཀྱི་སེམས་ཅན་དམྱལ་བའི་མེ་གསད་པའི་ཕྱིར་ཆོས་ཀྱི་ཆར་སྤྲིན་ཆེན་པོའི་ཆར་ཕབ་སྟེ། དེ་དག་བདེ་བས་ཚིམ་པར་བྱའོ་ཞེས་འོག་གི་ཕྱོགས་ལོགས་སུ་གོམ་པ་བདུན་བོར་རོ། །སེམས་ཅན་ཐམས་ཅད་ཀྱི་གྱེན་དུ་བལྟ་བར་འགྱུར་བར་བྱའོ་ཞེས་སྟེང་གི་ཕྱོགས་ལོགས་སུ་གོམ་པ་བདུན་བོར་ནས་སྟེང་དུ་ལྟའོ། །བྱང་ཆུབ་སེམས་དཔས་ཚིག་དེ་བརྗོད་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སྒྲས་མངོན་པར་གོ་བར་གྱུར་ཏེ། དེ་ནི་བྱང་ཆུབ་སེམས་དཔའི་ལས་ཀྱི་རྣམ་པར་སྨིན་པ་ལས་བྱུང་བའི་མངོན་པར་ཤེས་པའི་ཆོས་ཉིད་དོ། །གང་གི་ཚེ་བྱང་ཆུབ་སེམས་དཔའ་སྲིད་པ་ཐ་མ་པ་བཙའ་བར་འགྱུར་བ་དང ། གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ་རྫུ་འཕྲུལ་གྱི་ཆོ་འཕྲུལ་གྱི་རྣམ་པ་དེ་ལྟ་བུ་དེ་དག་འབྱུང་ངོ ། །དགེ་སློང་དག་།དེའི་ཚེ་སེམས་ཅན་ཐམས་ཅད་ཀྱང་རབ་ཏུ་དགའ་ཞིང་སྤུ་གཡོས་པར་གྱུར་ཏོ། །འཇིག་རྟེན་དུ་ས་གཡོ་བ་ཆེན་པོ་
75b
ཤིན་ཏུ་འཇིགས་ཤིང་སྤུ་གཡོ་བར་འགྱུར་བའང་བྱུང་བར་གྱུར་ཏོ། །མི་དང་ལྷའི་སིལ་སྙན་དང ། རོལ་མོའི་དབྱངས་སྒྲར་བྱ་བ་ཐམས་ཅད་ཀྱང་མ་བླངས་པར་སྒྲ་འབྱིན་པར་གྱུར་ཏོ། ། དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་དུས་དང་དུས་མཚམས་སོ་སོའི་ཤིང་ཐམས་ཅད་ཀྱང་མེ་ཏོག་རྒྱས་ཤིང་འབྲས་བུ་ཆགས་པ་དང ། རྣམ་པར་དག་པར་གྱུར་ཏོ། །ནམ་མཁའི་དཀྱིལ་ནས་ཀྱང་སྤྲིན་གྱི་སྒྲ་གྲགས་ཏེ། སྤྲིན་མེད་པའི་ནམ་མཁའ་ལས་ཀྱང་དལ་བུ་དལ་བུས་ཕྲ་བའི་ཆར་ལྷ་ཡུལ་བའི་ཁ་དོག་དང་ལྡན་པའི་མེ་ཏོག་དང ། གོས་དང ། རྒྱན་དང ། སྤོས་ཀྱི་ཕྱེ་མ་དང་འདྲེས་པ་བབས་པར་གྱུར་ཏོ། །རླུང་རེག་ན་མཆོག་ཏུ་བདེ་བ། འཇམ་པ། དྲི་ཞིམ་པོ་དག་ཀྱང་ལྡང་བར་གྱུར་ཏོ། །ཕྱོགས་ཐམས་ཅད་ཀྱང་མུན་པ་དང ། རྡུལ་དང ། དུ་བ་དང ། ཁུག་རྣ་མེད་ཅིང ། རབ་ཏུ་དང་བས་རྣམ་པར་མཛེས་པར་གྱུར་ཏོ། །སྟེང་གི་བར་སྣང་ལས་ཀྱང་ཚངས་པའི་སྒྲ་ཆེན་པོ་མི་སྣང་ཞིང་ཟབ་པ་གྲག་པར་གྱུར་ཏོ། །ཉི་ཟླ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བའི་འོད་ཐམས་ཅད་ཀྱང་ཟིལ་གྱིས་མནན་ཏེ། འོད་ཁ་དོག་བརྒྱ་སྟོང་དང་ལྡན་པ། རེག་ན་མཆོག་ཏུ་བདེ་བ། སེམས་ཅན་ཐམས་ཅད་ཀྱི་ལུས་དང་སེམས་ལ་བདེ་བ་སྐྱེད་པ། འཇིག་རྟེན་ལས་འདས་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་གང་བར་གྱུར་
76a
༄#། །ཏོ། །བྱང་ཆུབ་སེམས་དཔའ་བཙས་མ་ཐག་ཏུ་སེམས་ཅན་ཐམས་ཅད་ཀྱང་བདེ་བས་ཤིན་ཏུ་ཚིམ་པར་གྱུར་ཏེ། འདོད་ཆགས་དང ། ཞེ་སྡང་དང ། གཏི་མུག་དང ། དྲེགས་པ་དང ། མི་དགའ་བ་དང ། ཞུམ་པ་དང ། འཇིགས་པ་དང ། ཆགས་པ་དང ། ཕྲག་དོག་དང ། སེར་སྣ་ཐམས་ཅད་དང་བྲལ་ཞིང་མི་དགེ་བའི་བྱ་བ་ཐམས་ཅད་སྤངས་པར་གྱུར་ཏོ། །སེམས་ཅན་ནད་པ་རྣམས་ཀྱི་ནད་ཀྱང་ཞི་བར་གྱུར་ཏོ། །བཀྲེས་ཤིང་སྐོམ་པའི་སེམས་ཅན་རྣམས་ཀྱང་བཀྲེས་པ་དང་སྐོམ་པ་མེད་པར་གྱུར་ཏོ། ། ཆང་གིས་ར་རོ་ཞིང་མྱོས་པ་རྣམས་ཀྱང་མྱོས་པ་མེད་པར་གྱུར་ཏོ། །སྨྱོས་པ་རྣམས་ཀྱང་དྲན་པ་ཐོབ་པར་གྱུར་ཏོ། །མིག་མེད་པ་རྣམས་ཀྱིས་ཀྱང་མིག་ཐོབ་པར་གྱུར་ཏོ། ། རྣ་བ་འོན་པ་རྣམས་ཀྱིས་ཀྱང་སྒྲ་ཐོས་པར་གྱུར་ཏོ། །ཡན་ལག་དང་ཉིད་ལག་ཉམས་པ་རྣམས་ཀྱང་དབང་པོ་ཉམས་པ་མེད་པར་གྱུར་ཏོ། །དབུལ་པོ་རྣམས་ཀྱིས་ཀྱང་ནོར་ཐོབ་པར་གྱུར་ཏོ། །བཙོན་ར་ན་འཁོད་པ་རྣམས་ཀྱང་བཙོན་ར་ནས་ཐར་པར་གྱུར་ཏོ། །མནར་མེད་པ་ལ་སོགས་པའི་སེམས་ཅན་དམྱལ་བ་པའི་སེམས་ཅན་ཐམས་ཅད་ཀྱི་ནད་དུ་བྱ་བ་དང་སྡུག་བསྔལ་ཐམས་ཅད་དེའི་ཚེ་རྒྱུན་ཆད་པར་གྱུར་ཏོ། །དུད་འགྲོའི་སྐྱེ་གནས་པ་རྣམས་ཀྱིས་གཅིག་ལ་གཅིག་ཟ་བ་ལ་སོགས་པའི་སྡུག་བསྔལ་ཡང་ཞི་བར་
76b
གྱུར་ཏོ། །གཤིན་རྗེའི་འཇིག་རྟེན་པའི་སེམས་ཅན་རྣམས་ཀྱི་བཀྲེས་པ་དང་སྐོམ་པ་ལ་སོགས་པའི་སྡུག་བསྔལ་ཡང་ཞི་བར་གྱུར་ཏོ། །གང་གི་ཚེ་བྱང་ཆུབ་སེམས་དཔའ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་སྤྱད་པ་ཤིན་ཏུ་སྤྱད་པ། བརྩོན་འགྲུས་ཆེན་པོ་དང་ལྡན་པ། མཐུ་ཆེན་པོ་དང་ལྡན་པ། བཙས་མ་ཐག་ཏུ་གོམ་པ་བདུན་འདོར་བའི་ཚེ་ཆོས་ཉིད་ཐོབ་པས་དེའི་ཚེ་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་རྣམས་སའི་ཕྱོགས་དེར་དེའི་ཚེ་ཞིག་པར་མི་འགྱུར་བར་བྱ་བའི་ཕྱིར་རྡོ་རྗེའི་རང་བཞིན་དུ་བྱིན་གྱིས་རློབ་པ་མཛད་དེ། དགེ་སློང་དག་།དེ་ཙམ་དུ་སྟོབས་ཀྱི་ཤུགས་དྲག་པོ་དང་ལྡན་པས་བྱང་ཆུབ་སེམས་དཔའ་བཙས་མ་ཐག་པ་གོམ་པ་བདུན་འདོར་བར་གྱུར་ཏོ། །འཇིག་རྟེན་གྱི་བར་ཐམས་ཅད་ཀྱང་དེའི་ཚེ་སྣང་བ་ཆེན་པོས་རྒྱས་པར་གང་བར་གྱུར་ཏོ། །དེའི་ཚེ་གླུའི་སྒྲ་ཆེན་པོའང་བྱུང་བར་གྱུར་ཏེ། གར་གྱི་སྒྲ་ཆེན་པོའང་བྱུང་བར་གྱུར་ཏོ། །དེའི་ཚེ་མེ་ཏོག་དང ། ཕྱེ་མ་དང ། སྤོས་དང ། ཕྲེང་བ་དང ། རིན་པོ་ཆེ་དང ། རྒྱན་དང ། གོས་ཀྱི་སྤྲིན་དཔག་ཏུ་མེད་པ་དག་ཀྱང་ཆར་དུ་མངོན་པར་བབ་པར་གྱུར་ཏོ། །སེམས་ཅན་ཐམས་ཅད་ཀྱང་བདེ་བའི་མཆོག་དང་ལྡན་པར་གྱུར་ཏེ། མདོར་ན་བྱང་ཆུབ་སེམས་དཔའ་འཇིག་རྟེན་ཐམས་ཅད་ལས་མངོན་པར་འཕགས་པ་
77a
༄#། །འཇིག་རྟེན་དུ་བྱུང་བའི་ཆེ་བྱ་བ་བསམ་གྱིས་མི་ཁྱབ་པ་བྱུང་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་ནི་སེམས་ཅན་ཐམས་ཅད་ལས་ངོ་མཚར་དུ་གྱུར་པ་སྟེ། བྱང་ཆུབ་སེམས་དཔའ་ཉིད་ཀྱང་རྨད་དུ་བྱུང་བའི་ཆོས་དང་ལྡན་པར་གྱུར་ན། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས། འདི་ལྟར་བདག་ནི་ལན་བཞིའམ། ལན་ལྔར་ཡང ། ལན་བཅུར་ཡང ། ལན་ལྔ་བཅུའི་བར་དུ་ཡང ། ལན་བརྒྱའི་བར་དུ་ཡང ། ལན་བརྒྱ་སྟོང་དུ་མའི་བར་དུའང་སངས་རྒྱས་བཅོམ་ལྡན་འདས་ལ་སྐྱབས་སུ་མཆིའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་པོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། མ་འོངས་པའི་དུས་ན་དགེ་སློང་ལ་ལ་ལུས་མ་བསྒོམས་པ། སེམས་མ་བསྒོམས་པ། ཚུལ་ཁྲིམས་མ་བསྒོམས་པ། ཤེས་རབ་མ་བསྒོམས་པ། བྱིས་པ། མི་མཁས་པ། ལྷག་
77b
པའི་ང་རྒྱལ་ཅན། རྒོད་པ། ཁེངས་པ། མ་བསྡམས་པ། སེམས་གཡེངས་པ། ནེམ་ནུར་གྱིས་འཁོར་བ། ཐེ་ཚོམ་མང་བ། དད་པ་མེད་པ། དགེ་སྦྱོང་གི་དྲི་མར་གྱུར་པ། དགེ་སྦྱོང་གི་ཚུལ་དང་མི་འདྲ་བ་དག་འབྱུང་སྟེ། དེ་དག་ནི་བྱང་ཆུབ་སེམས་དཔའ་རུམ་དུ་འགྲོ་བ་ཡོངས་སུ་དག་པ་འདི་ལྟ་བུ་ཐོས་ནས་ཡིད་མི་ཆེས་ཤིང་དེ་དག་ཕྱོགས་གཅིག་ཏུ་ཚོགས་ནས་གཅིག་ལ་གཅིག་འདི་སྐད་དུ། ཀྱེ་ཁྱེད་ཅག་འདི་ལྟ་བུའི་མི་རིགས་པ་ལ་ལྟོས། བྱང་ཆུབ་སེམས་དཔའ་མའི་མངལ་ན་འདུག་པ་བཙོག་པའི་ཁུ་ཤུགས་དང་འདྲེས་པ་ལའང་འདི་ལྟ་བུའི་ལོངས་སྤྱོད་ཡོད་ཅེས་བྱ་བ་དང ། དེ་འབྱུང་བའི་ཚེ་མའི་གློ་གཡས་པ་ནས་མངལ་གྱི་དྲི་མས་མ་གོས་པར་འབྱུང་ཞེས་བྱ་བ་འདི་རིགས་པར་ཇི་ལྟར་འགྱུར་ཞེས་ཟེར་བར་འགྱུར་ཏེ། སྐྱེས་བུ་གླེན་པ་དེ་དག་ནི་སེམས་ཅན་ལེགས་པར་བྱས་པའི་ལས་དང་ལྡན་པ་རྣམས་ཀྱི་ལུས་མི་གཙང་བའི་ཁུ་བའི་ནང་དུ་མི་འབྱུང་ངོ་ཞེས་བྱ་བར་མི་ཤེས་སོ། །དགེ་སློང་དག་།སེམས་ཅན་དམ་པ་དེ་ལྟ་བུ་དག་གི་མངལ་དུ་འགྲོ་བ་དང ། མངལ་ན་གནས་པ་ནི་ཤིན་ཏུའང་བཟང་བ་ཡིན་ནོ། །བྱང་ཆུབ་སེམས་དཔའ་རྣམས་ནི་སེམས་ཅན་རྣམས་ལ་སྙིང་བརྩེ་བས་མིའི་འཇིག་རྟེན་དུ་སྐྱེ་སྟེ། ལྷར་གྱུར་པ་ཉིད་ཀྱིས་ཆོས་ཀྱི་འཁོར་ལོ་མི་བསྐོར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། སེམས་ཅན་རྣམས་ཞུམ་པར་འགྱུར་ཞིང །
78a
༄#། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ནི་ལྷར་གྱུར་པ་ཡིན་གྱི། བདག་ཅག་ནི་མི་ཙམ་དུ་ཟད་པས་ན། བདག་ཅག་གིས་གནས་དེ་ལྟ་བུ་ཡོངས་སུ་རྫོགས་པར་བྱ་བར་མི་ནུས་སོ་ཞེས་ཞུམ་པར་འགྱུར་དུ་འོང་བའི་ཕྱིར་ཏེ། སྐྱེས་བུ་གླེན་པ་ཆོས་ཀྱི་རྐུན་པོར་གྱུར་པ་དེ་དག་འདི་སྙམ་དུ་སེམས་ཅན་དེ་ནི་བསམ་གྱིས་མི་ཁྱབ་པ་སྟེ། དེ་ནི་བདག་ཅག་གིས་ཚོད་གཟུང་བར་བྱ་བ་མ་ཡིན་ནོ་སྙམ་དུ་མི་སེམས་སོ། །ཀུན་དགའ་བོ། །དེ་དག་ནི། དེའི་ཚེ་སངས་རྒྱས་ཀྱི་ཆོ་འཕྲུལ་ལའང་ཡིད་མི་ཆེས་པར་འགྱུར་ན། དེ་བཞིན་གཤེགས་པ་བྱང་ཆུབ་སེམས་དཔར་གྱུར་པའི་བྱང་ཆུབ་སེམས་དཔའི་ཆོ་འཕྲུལ་ལྟ་སྨོས་ཀྱང་ཅི་དགོས་ཏེ། ཀུན་དགའ་བོ། དེ་ལྟར་སྐྱེས་བུ་གླེན་པ་རྙེད་པ་དང ། བཀུར་སྟི་དང ། ཚིགས་སུ་བཅད་པའི་ཟིལ་གྱིས་ནོན་པ། མི་གཙང་བར་བྱིང་བ། རིམ་གྲོའི་ཟིལ་གྱིས་ནོན་པ། མ་རབས་ཀྱི་ངང་ཚུལ་ཅན་དེ་དག་སངས་རྒྱས་ཀྱི་ཆོས་སྤོང་ཞིང་བསོད་ནམས་མ་ཡིན་པའི་མངོན་པར་འདུ་བྱ་བ་མང་པོ་ཇི་སྙེད་ཅིག་མངོན་པར་འདུ་བྱེད་པ་ལ་ལྟོས།། །། འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་ལྔ་པ། ཀུན་དགའ་བོས་གསོལ་པ། བཅོམ་ལྡན་འདས། མ་བྱུང་བའི་དུས་ན་འདི་ལྟ་བུའི་མདོ་སྡེ་
78b
བཟང་པོ་ལའང་སྤོང་ཞིང་མི་སྙན་པར་བརྗོད་པ་དེ་ལྟ་བུའི་དགེ་སློང་དག་ཀྱང་འབྱུང་ལགས་པ་ལྟ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེ་དག་ནི་མདོ་སྡེ་འདི་ལྟ་བུ་སྤོང་ཞིང་མི་སྙན་པ་བརྗོད་པར་ཡང་མ་ཟད་དེ། སྡིག་པ་རྣམ་པ་དུ་མ་མངོན་པར་འདུ་བྱ་བ་མངོན་པར་འདུ་བྱེད་ཅིང་དགེ་སྦྱོང་གི་དངོས་པོ་དོན་དུ་མི་གཉེར་བ་དག་ཀྱང་འབྱུང་བར་འགྱུར་རོ། །གསོལ་པ། བཅོམ་ལྡན་འདས། འོ་ན་སྐྱེས་བུ་དམ་པ་མ་ལགས་པ་དེ་འདྲ་བ་དེ་དག་གི་འགྲོ་བ་ནི་ཅི་འདྲ་བ་ཞིག་ཏུ་འགྱུར། ཚེ་རབས་འཕོས་ནས་ནི་ཅི་ལྟ་བུ་ཞིག་ཏུ་མཆི།་བཅོམ་ལྡན་འདས་ཀྱིས་བཀའ་སྩལ་པ། དེ་དག་ནི་སངས་རྒྱས་ཀྱི་བྱང་ཆུབ་མེད་པར་བྱས་ཏེ། འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མི་སྙན་པས་སྐུར་པ་བཏབ་པའི་འགྲོ་བ་གང་ཡིན་པའི་འགྲོ་བ་དེར་འགྲོ་བར་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོ་སྤུ་གཡོས་ནས་སངས་རྒྱས་ལ་ཕྱག་འཚལ་ལོ་ཞེས་བརྗོད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སྐྱེས་བུ་དམ་པ་མ་ལགས་པ་དེ་དག་གི་སྤྱོད་པ་འདི་ཐོས་ནས་བདག་ནི་བརྒྱལ་བ་དང་འདྲ་བར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེ་དག་གི་སྤྱོད་པ་ནི་མཉམ་པར་མི་འགྱུར་ཞིང ། སེམས་ཅན་དེ་དག་ནི་མི་མཉམ་པའི་སྤྱོད་
79a
༄#། །པ་ཅན་དུ་འགྱུར་རོ། །ཀུན་དགའ་བོ། དེ་དག་ཚུལ་དང་མི་འདྲ་བའི་སྤྱོད་པ་དེས་མནར་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་མདོ་སྡེ་འདི་ལྟ་བུ་འདི་དག་ཐོས་ནས་མ་མོས་ཤིང་ཡིད་མི་ཆེས་པ་དང ། སྤོང་བ་དེ་དག་ནི་ཤི་འཕོས་མ་ཐག་ཏུ་མནར་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །ཀུན་དགའ་བོ། དེ་བཞིན་གཤེགས་པ་ལ་ནི་ཚད་དུ་མ་བྱེད་ཅིག་།དེ་ཅིའི་ཕྱིར་ཞེ་ན། ཀུན་དགའ་པོ། དེ་བཞིན་གཤེགས་པ་ནི་ཚད་མེད་ཅིང་ཟབ་ལ་རྒྱ་ཆེ་ཞིང་གཏིང་དཔག་དཀའ་བའོ། །ཀུན་དགའ་བོ། ལ་ལ་ཞིག་གིས་མདོ་སྡེ་འདི་ལྟ་བུ་འདི་དག་ཐོས་ནས་དགའ་བ་དང ། མཆོག་ཏུ་དགའ་བ་དང ། དད་པ་སྐྱེ་བའི་སེམས་ཅན་དེ་དག་གིས་ནི་ཐོབ་པ་ལེགས་པར་ཐོབ་པ་ཡིན་ཏེ། དེ་དག་གིས་འཚོ་བ་ནི་དོན་ཡོད་པའོ། །དེ་དག་གི་མིའི་དངོས་པོ་ནི་དོན་ཡོད་པའོ། །དེ་དག་གི་སྤྱོད་པ་ནི་ལེགས་པར་སྤྱད་པའོ། །དེ་དག་གིས་ནི་སྙིང་པོ་བླངས་སོ། །དེ་དག་ནི་ངན་སོང་གསུམ་ལས་གྲོལ་བའོ། །དེ་དག་ནི་དེ་བཞིན་གཤེགས་པའི་སྲས་སུ་འགྱུར་རོ། །དེ་དག་གིས་ནི་དགོས་པ་ཐམས་ཅད་ཡོངས་སུ་ཐོབ་བོ། །དེ་དག་གིས་དད་པ་
79b
ཐོབ་པ་ནི་དོན་ཡོད་དོ། །དེ་དག་གིས་ནི་ཡུལ་འཁོར་གྱི་ཟས་ལེགས་པར་ཟོས་སོ། །དེ་དག་གིས་ནི་སེམས་ཅན་དམ་པ་རྣམས་ལ་ལེགས་པར་མོས་པ་ཡིན་ནོ། །དེ་དག་ནི། བདུད་ཀྱི་ཞགས་པ་གཏུབས་པ་ཡིན་ནོ། །དེ་དག་ནི་འཁོར་བའི་འབྲོག་དགོན་པ་ལས་བརྒལ་ཏོ། །དེ་དག་གིས་ནི་མྱ་ངན་གྱི་ཟུག་རྔུ་བྱུང་ངོ ། །དེ་དག་གིས་ནི་མཆོག་ཏུ་དགའ་བའི་དངོས་པོ་རྗེས་སུ་ཐོབ་བོ། །དེ་དག་གིས་ནི་སྐྱབས་སུ་འགྲོ་བ་ལེགས་པར་བླངས་སོ། །དེ་དག་ནི་སྦྱིན་པའི་གནས་ཡིན་ཏེ། མཆོད་པར་འོས་པའོ། །དེ་དག་ནི་འཇིག་རྟེན་ན་འབྱུང་བར་དཀོན་པའོ། །དེ་དག་ནི་འཇིག་རྟེན་ན་སྦྱིན་པའི་གནས་སུ་བཟུང་བའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་ཆོས་འཇིག་རྟེན་ཐམས་ཅད་དང་མི་མཐུན་པ་རྣམ་པ་འདི་ལྟ་བུ་འདི་ལ་དད་པའི་ཕྱིར་རོ། །ཀུན་དགའ་བོ། སེམས་ཅན་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ཡིན་ཏེ། ཀུན་དགའ་བོ། སེམས་ཅན་དེ་དག་ནི། ང་དང་ཚེ་རབས་འགའ་ཞིག་ཏུ་འགྲོགས་པར་གྱུར་པའི་གྲོགས་པོ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ། ལ་ལ་ནི་ཐོས་པ་ཙམ་གྱིས་དགའ་ཞིང་ཡིད་དུ་འོང་བ་ཡོད་ཀྱི།་མཐོང་ན་མ་ཡིན་ནོ། །ཀུན་དགའ་བོ། ལ་ལ་ནི་མཐོང་བས་དགའ་ཞིང་ཡིད་དུ་འོང་བ་ཡོད་ཀྱི། ཐོས་པས་མ་ཡིན་ནོ། །ཀུན་དགའ་བོ། ལ་ལ་ནི་མཐོང་ནའང་དགའ་
80a
༄#། །ཞིང་ཡིད་དུ་འོང་ལ་ཐོས་ནའང་དགའ་ཞིང་ཡིད་དུ་འོང་བ་ཡོད་དོ། །ཀུན་དགའ་བོ། གང་ཡང་རུང་སྟེ་ལ་ལ་ཞིག་མཐོང་ངམ། ཐོས་ནས་དགའ་ཞིང་ཡིད་དུ་འོང་བར་གྱུར་ན། ཁྱོད་ཀྱིས་དེ་ལ་འདི་ལྟར་དེ་དག་ནི་ང་དང་ཚེ་རབས་འགའ་ཞིག་ཏུ་འགྲོགས་པའི་གྲོགས་པོ་ཡིན་པར་ངེས་པར་རྟོགས་པར་བྱ་སྟེ། དེ་དག་ནི་དེ་བཞིན་གཤེགས་པས་གཟིགས་སོ། །དེ་དག་ནི་དེ་བཞིན་གཤེགས་པས་དགྲོལ་བར་བྱ་བའོ། །དེ་དག་ནི་དེ་བཞིན་གཤེགས་པ་དང་ཡོན་ཏན་གྱི་ཆ་མཉམ་པའོ། །དེ་དག་ནི་དེ་བཞིན་གཤེགས་པ་ལ་སྐྱབས་སུ་དོང་བའོ། །དེ་དག་ནི་དེ་བཞིན་གཤེགས་པས་བཟུང་བའོ། །ཀུན་དགའ་བོ། ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ཉིད་ཀྱི་ཚེའང་སེམས་ཅན་སུའང་རུང་སྟེ། འཇིགས་པས་ཉམ་ཐག་ཅིང་འོངས་ནས་མི་འཇིགས་པ་སློང་ན་སེམས་ཅན་དེ་དག་ལས་ངེས་མི་འཇིགས་པ་བྱིན་པར་གྱུར་ན། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པས་ལྟ་སྨོས་ཀྱང་ཅི་དགོས། ཀུན་དགའ་བོ། དད་པ་ལ་བརྩོན་པར་གྱིས་ཤིག་།འདི་ནི་དེ་བཞིན་གཤེགས་པས་བཅོལ་བའོ། །ཀུན་དགའ་བོ། ཁྱོད་ཀྱིས་བྱ་བ་ཅི་ཡོད་པ་དེ་དག་ནི་དེ་བཞིན་གཤེགས་པས་བྱས་སོ། །ང་རྒྱལ་གྱི་ཟུག་རྔུ་ནི་དེ་བཞིན་གཤེགས་པས་བསལ་ཏོ། །ཀུན་
80b
དགའ་བོ། གྲོགས་པོའི་གཏམ་ཐོས་པ་ཙམ་གྱིས་ཀྱང་དཔག་ཚད་བརྒྱའི་ལམ་དུའང་འགྲོ་སྟེ། ཐོས་པས་ཀྱང་དགའ་བར་འགྱུར་བ་ཡིན་ན། སྔར་མ་མཐོང་བ་ལས་མཛའ་བོ་མཐོང་བར་གྱུར་ན་སྨོས་ཀྱང་ཅི་དགོས་ཏེ། གང་ང་ལ་བརྟེན་ཅིང་དགེ་བའི་རྩ་བ་བསྐྱེད་པར་བྱེད་པ་དེ་དག་ནི་མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་མཁྱེན་ཅིང ། སེམས་ཅན་དེ་དག་ནི་དེ་བཞིན་གཤེགས་པ་རྣམས་ཀྱི་སྔོན་གྱི་མཛའ་པོ་སྟེ། དེ་དག་ནི་བདག་ཅག་གིའང་མཛའ་བོ་ཡིན་ནོ་སྙམ་དུ་དགོངས་སོ། །དེ་ཅིའི་ཕྱིར་ཞེ་ན། ཀུན་དགའ་བོ། མཛའ་བོ་གང་ཡིན་པ་དེ་ནི་མཛའ་བོ་ལ་སྡུག་ཅིང་ཡིད་དུ་འོང་བ་ཡིན་ནོ། །མཛའ་བོ་དེའི་གང་སྡུག་པའི་གྲོགས་པོ་དེའང་དེ་ལ་སྡུག་ཅིང་ཡིད་དུ་འོང་བ་ཡིན་ནོ། །ཀུན་དགའ་བོ། དེ་ལྟ་བས་ན། ཁྱོད་མོས་པར་བྱ་ཞིང་ཁོང་དུ་ཆུད་པར་བྱའི། དད་པ་ཙམ་ཡང་སྐྱེད་པར་གྱིས་ཤིག་།ངས་མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལའང་གཏད་དེ། དེ་དག་ཀྱང་འདི་དག་ནི་བདག་ཅག་གིའང་མཛའ་བོ་ཡིན་ནོ་ཞེས་བྱ་བར་མཁྱེན་ཅིང ། བསམ་པ་རྫོགས་པར་མཛད་པར་འགྱུར་རོ། །ཀུན་དགའ་བོ། འདི་ལྟ་སྟེ། དཔེར་ན། སྐྱེས་བུ་ལ་ལ་ཞིག་ལ་བུ་ངག་ཉན་ཅིང་མཐུན་པར་འཛིན་པ་གཅིག་པུ་ཞིག་བདོག་པར་གྱུར་ལ། སྐྱེས་བུ་དེའང་
81a
༄#། །མཛའ་བོ་མང་བ་ཞིག་ཡིན་ན། ཕ་དེ་ཤིར་ཟིན་ཀྱང་ཕའི་མཛའ་བོས་ཡོངས་སུ་བཟུང་བའི་བུ་དེ་ནི་ཕོངས་པར་མི་འགྱུར་རོ། །ཀུན་དགའ་བོ་དེ་བཞིན་དུ་གང་སུའང་རུང་སྟེ་པ་ལ་དད་ན། དེ་དག་ངས་བཟུང་བ་ཡིན་ཏེ། དེ་དག་ནི་ངའི་མཛའ་བོའོ། །དེ་དག་ནི་པ་ལ་སྐྱབས་སུ་དོང་བའོ། །དེ་བཞིན་གཤེགས་པ་ནི་མཛའ་བོ་མང་པོ་མངའ་བ་སྟེ། དེ་བཞིན་གཤེགས་པའི་མཛའ་བོ་དེ་དག་ཀྱང་ཡང་དག་པར་གསུང་ཞིང་བརྫུན་དུ་མི་གསུང་བས་དེ་བཞིན་གཤེགས་པའི་མཛའ་བོ་ཡང་དག་པར་གསུང་བ་མ་འོངས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དེ་དག་རྗེས་སུ་གཏད་ཀྱི། ཀུན་དགའ་བོ། དད་པ་ལ་བརྩོན་པར་གྱིས་ཤིག ། འདི་ནི་ངས་ཁྱོད་ལ་བཅོལ་བའོ། །དགེ་སློང་དག་།དེ་ལྟར་བྱང་ཆུབ་སེམས་དཔའ་བཙས་པའི་ཚེ་ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་མང་པོ་ངག་ནམ་མཁའི་དཀྱིལ་ན་གནས་ཤིང་ལྷ་མོ་སྒྱུ་འཕྲུལ་ལ་ལྷའི་མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། གོས་དང ། རྒྱན་གྱིས་མངོན་པར་འཐོར་བར་གྱུར་ཏོ། །དེ་ལ་འདི་སྐད་ཅེས་བྱ་སྟེ། དགེ་བ་དྲི་མེད་རྣམ་དག་གསེར་གྱི་འོད་ལྡན་ཉི་ཟླའི་འོད་ལྡན་པ། །ལྷ་ཡི་བུ་མོ་སྒྲ་དབྱངས་སྙན་བརྗོད་སྟོང་ཕྲག་དྲུག་ཅུ་དེ་ཡི་ཚེ། །སྐད་ཅིག་དེ་ལ་ལུམྦི་ནིར་ལྷགས་ལྷ་མོ་སྒྱུ་འཕྲུལ་དེ་ལ་སྨྲ།
81b
མི་དགྱེས་མ་མཛད་རབ་ཏུ་དགྱེས་མཛད་བདག་ཅག་ཁྱོད་ཀྱི་ཕྱག་རྗེད་ལགས། །བདག་ཅག་རྣམས་ཀྱིས་བགྱི་བ་ཅི་མཆི་ཅི་བགྱི་ཅི་འཚལ་བཀའ་སྩོལ་ཅིག་།བདག་ཅག་ཁྱོད་ཀྱི་ཕྱག་རྗེད་ནུས་ལྡན་ཉེ་བའི་སེམས་དང་ལྡན་པ་ལགས། །ཁྱོད་ཀྱིས་དགྱེས་ཤིང་བདེ་བའི་ཉམས་སྐྱེས་མི་དགྱེས་ཐམས་ཅད་སྤང་བར་གསོལ། །རྒ་ཤི་སེལ་བའི་སྨན་པ་དམ་པ་དེ་རིང་ལྷ་མོ་མྱུར་སྐྱེད་འགྱུར། །ཇི་ལྟར་ཞུགས་ཤིང་འདི་རྣམས་ཁ་འབུས་ས་ལ་མེ་ཏོག་རྒྱས་གྱུར་ཅིང ། །སྟོང་ཕྲག་བགྲངས་པའི་ལྷ་རྣམས་དྲུང་ན་གནས་ཤིང་ལག་པ་འདུད་པ་དང ། །ཇི་ལྟར་དོག་ས་རྒྱ་མཚོར་བཅས་ཏེ་རྣམ་པ་དྲུག་ཏུ་གཡོས་ལས་ན། །ཁྱོད་ལས་ལྷ་ཡུལ་མི་ཡུལ་སྒྲ་གྲགས་འཇིག་རྟེན་འདས་པའི་སྲས་བལྟམས་འགྱུར། །ཇི་ལྟར་རྣམ་དག་འོད་ཀྱིས་རྣམ་པར་མཛེས་ཤིང་གསེར་གྱི་ཁ་དོག་བཟང ། །ནམ་མཁའི་དཀྱིལ་ལས་ཡིད་འོང་སིལ་སྙན་བརྒྱ་དག་མ་དཀྲོལ་སྒྲ་འབྱིན་དང ། །ཇི་ལྟར་དག་ཅིང་གཙང་ལ་འདོད་ཆགས་བྲལ་བའི་ལྷ་རྣམས་བརྒྱ་སྟོང་ཡང ། །དགའ་སེམས་ཕྱག་འཚལ་བ་ལས་དེ་རིང་འཇིག་རྟེན་ཀུན་ཕན་བལྟམས་པར་འགྱུར། །བརྒྱ་བྱིན་ཚངས་པ་འཇིག་རྟེན་སྐྱོང་དང་དེ་བཞིན་ལྷ་རྣམས་གཞན་དག་ཀྱང ། ། དགའ་ཞིང་བྲོད་པའི་སེམས་ཀྱིས་དྲུང་དུ་གནས་ནས་ལག་པ་འདུད་པ་བགྱིད། །སྐྱེས་བུ་སེངྒེ་བརྟུལ་ཞུགས་གྲུབ་པ་དེ་ཡང་རྩིབ་ལོགས་གཡས་ནས་བྱུང ། །གསེར་གྱི་རི་དང་འདྲ་ཞིང་
82a
༄#། །འོད་དང་ལྡན་པའི་འདྲེན་པ་བལྟམས། །བརྒྱ་བྱིན་ཚངས་པ་གཉིས་ཀྱིས་ལག་པ་དང་ཏེ་ཐུབ་པ་དེ་ཡང་བླངས། །ཞིང་རྣམས་བརྒྱ་སྟོང་འོད་བཟང་བཀྱེ་བས་ཐམས་ཅད་རབ་ཏུ་གཡོས་པར་གྱུར། །ངན་སོང་གསུམ་གྱི་སེམས་ཅན་རྣམས་ཀྱང་བདེ་ཞིང་སྡུག་བསྔལ་མེད་གྱུར་ཏེ། །ལྷ་རྣམས་བརྒྱ་ཕྲག་སྟོང་གིས་མེ་ཏོག་གཏོར་ཏེ་གོས་ཀྱི་གཡབ་མོ་ཕྱུང ། །དེ་ཚེས་འདི་སྟོབས་མཐུ་ལྡན་ཞིང་རྡོ་རྗེའི་དངོས་གནས་པདྨ་མཛེས། །སྣ་ཚོགས་མངོན་ཐོན་དགེ་ལ་འདྲེན་པ་འཁོར་ལོའི་མཚན་རིས་ཞབས་བཞག་སྟེ། །གོམ་པ་བདུན་དུ་བཞུད་ནས་ཚངས་པའི་སྒྲ་དབྱངས་དམ་པ་གསུངས་པ་ནི། །རྒ་ཤི་སེལ་བའི་སྨན་པ་དམ་པ་སེམས་ཅན་མཆོག་ཏུ་བདག་འགྱུར་རོ། །ཚངས་པའི་མཆོག་དང་བརྒྱ་བྱིན་ལྷ་མཆོག་ནམ་མཁའི་དཀྱིལ་ནའི་ཁོད་གྱུར་ཏེ། །གཙང་ཞིང་དང་ལ་མཛེས་པའི་སྤོས་ཆུ་དག་གིས་འདྲེན་པའི་སྐུ་ཡང་བསིལ། །ཀླུ་ཡི་རྒྱལ་གཉིས་བར་སྣང་གནས་ནས་གྲང་དྲོའི་ཆུ་ཡི་རྒྱུན་ཀྱང་གཏོང ། །ལྷ་རྣམས་བརྒྱ་སྟོང་དག་ཀྱང་སྤོས་ཆུ་དག་གིས་འདྲེན་པའི་སྐུ་བསིལ་བྱེད། །འཇིག་རྟེན་སྐྱོང་བ་རྣམས་ཀྱང་རིམ་གྲོ་དམ་པར་ལག་པ་བཟང་པོས་ལེན། །སྟོང་གསུམ་འདིའང་རྒྱུ་དང་མི་རྒྱུ་བཅས་པར་རབ་ཏུ་གཡོས་པར་གྱུར། །མཛེས་པའི་འོད་རྣམས་བཀྱེ་བས་ངན་སོང་རྣམས་ཀྱང་རབ་ཏུ་ཞི་བར་གྱུར། །འཇིག་རྟེན་རྣམ་
82b
པར་འདྲེན་པ་བལྟམས་པས་ཉོན་མོངས་སྡུག་བསྔལ་དེ་དག་ཞི། །མི་ཡི་འདྲེན་པ་རྒྱལ་བ་ལ། །ལྷ་རྣམས་མེ་ཏོག་སིལ་མ་འཐོར། །སྟོབས་དང་བརྩོན་འགྲུས་ལྡན་པ་ཡི། །བརྟན་པ་གོམ་པ་བདུན་དུ་བཞུད། །ས་ཕྱོགས་གང་དུ་ཞབས་བཞག་པ། །དེར་ནི་པདྨ་བཟང་བའི་མཆོག་།རིན་ཆེན་ཀུན་གྱིས་བརྒྱན་པ་དག་།ས་ལས་མངོན་དུ་ཐོན་པར་གྱུར། །དེ་ལྟར་གོམ་པ་བདུན་བཞུད་ནས། །རྒ་དང་འཆི་བསེལ་བ་ཡི། །སྨན་པ་དམ་པ་འདིར་བྱུང་ཞེས། །ཚངས་པའི་དབྱངས་ཀྱིས་གསུང་བརྗོད་དོ། །འཇིགས་མེད་ཕྱོགས་སུ་རྣམ་གཟིགས་ཏེ། །དེ་ནས་དོན་ལྡན་གསུང་ཕྱུང་བ། །ང་ནི་འཇིག་རྟེན་ཀུན་གྱི་གཙོ། །འཇིག་རྟེན་ཕུལ་ཕྱིན་རྣམ་པར་འདྲེན། །ང་ཡི་སྐྱེ་མཐའ་འདི་ཡིན་ཞེས། །མི་ཡི་འདྲེན་པས་འཛུམ་པ་མཛད། །ལྷ་དབང་བཅས་དང་འཇིག་རྟེན་སྐྱོང་དག་རབ་ཏུ་དད་སེམས་སྐྱེས། །སྤོས་ཆུ་མཆོག་གིས་འཇིག་རྟེན་ཕན་པའི་དོན་མཛད་སྐུ་ཡང་བསིལ། །ཀླུ་ཡི་དབང་པོ་རྣམས་ཀྱང་ལྷན་ཅིག་མཐུན་པར་བྱས་ནས་ནི། །དྲི་ཞིམ་སྤོས་ཆུ་དག་གིས་རྒྱུན་གྱིས་སྐུ་ཡང་བསིལ་བ་བྱས། །ལྷ་གཞན་ཁྲག་ཁྲིག་དག་ཀྱང་བར་སྣང་བླ་ནི་གནས་ནས་སུ། །དྲི་ཞིམ་སྤོས་ཆུ་མཆོག་གི་རྒྱུན་གྱིས་རང་བྱུང་སྐུ་ཡང་བསིལ། ། གདུགས་དཀར་ཡངས་དང་རྔ་ཡབ་བཟང་པོ་དམ་པ་ཐོགས་ནས་ནི། །བར་སྣང་འཁོད་དེ་ལྷ་རྣམས་མི་ཡི་ཁྱུ་མཆོག་སྐུ་བསིལ་བྱེད། །སྐྱེས་བུ་གཅིག་ཅིག་རིངས་པར་འོངས་ནས་ཟས་
83a
༄#། །གཙང་དེ་ལ་དགར་སྨྲས་པ། །ལྷ་གཅིག་འབྱོར་པ་རྒྱས་གྱུར་ཁྱོད་ཀྱི་སྲས་ནི་མཚན་གྱིས་བརྒྱན་པ་བལྟམས། །དེ་ནི་ངེས་པར་འཁོར་ལོས་བསྒྱུར་བའི་དབང་ཕྱུག་གདུང་རབས་རིན་ཆེན་འཚོ་བ། །ཛམྦུའི་གླིང་འདི་གདུགས་མང་གཅིག་འགྱུར་ཕས་ཀྱི་དགྲ་ཡང་མ་མཆིས་འགྱུར། །དེ་ནས་སྐྱེས་བུ་གཉིས་འོངས་ཟས་གཙང་རྒྱལ་པོའི་མདུན་དུ་དེ་སོང་སྟེ། །ལྷ་གཅིག་འབྱོར་བ་རྒྱས་གྱུར་ཤཱཀྱའི་རིགས་སུ་རྒྱལ་བུ་སྐྱེས་གྱུར་ན། །ཤཱཀྱ་རྣམས་ཀྱི་གྲོང་དུ་རོགས་པ་འབུམ་ཕྲག་ལྔ་ནི་བཙས་པ་སྐྱེས་པར་གྱུར། ། ཀུན་ཀྱང་གཞན་གྱིས་མི་ཐུབ་སྟོབས་དང་ལྡན་ཞིང་ཚན་པོ་ཆེ་དང་འདྲ། །སྐྱེས་བུ་གཞན་འོངས་སྨྲས་པ་བདག་ལས་དགྱེས་པའི་སྒྲ་གསོན་ལྷ། །འདུན་པ་ཅན་ལ་སོགས་པ་འབངས་ཀྱི་བྱིས་པ་བརྒྱད་བརྒྱ་བཙས་པར་གྱུར། །བསྔགས་ལྡན་གྱིས་ནི་ཟླ་བོ་ཆིབས་རྟ་སྟོང་ཕྲག་བཅུ་དག་འབྲངས་གྱུར་ཏེ། །ཆིབས་མཆོག་དམ་པ་གསེར་གྱི་འོད་ལྡན་རྔ་རྔོག་ལྕང་ལོར་འཁྲིལ་བ་ལགས། །མཐའ་འཁོབ་ཁམས་ཀྱི་རྒྱལ་པོ་སྟོང་ཕྲག་ཉི་ཤུ་དག་ཀྱང་དེ་བཞིན་དུ། །རྒྱལ་པོ་ཁྱོད་ཀྱི་ཞབས་ཀྱི་དྲུང་དུ་མཆིས་ཀྱི་ལེགས་པར་རྒྱལ་གྱུར་ལྷ། །ད་ནི་བདག་མཆིས་སུག་ལས་ཅི་བགྱི་རྒྱལ་པོས་བདག་ལ་བཀའ་སྩལ་གསོལ། །རྒྱལ་པོ་ཁྱོད་འདིར་མངའ་བརྙེས་བདག་འབངས་ཇོ་བོ་ལྷ་གཅིག་རྒྱལ་བར་སྤྱོན། །གསེར་གྱི་དྲ་བས་
83b
མཛེས་པའི་གླང་པོ་དམ་པ་སྟོང་ཕྲག་ཉི་ཤུ་དག་།ནམ་མཁའ་ལས་ནི་སྒྲ་དག་འབྱིན་ཅིང་རྒྱལ་པོའི་ཁབ་ཏུ་མགྱོགས་སུ་མཆིས། །སྦྲུམ་མ་ལ་སོགས་ནག་གུ་ཟལ་ལུ་དག་དང་བེའུ་ནི་དྲུག་སྟོང་འབྲངས། །ལྷན་ཅིག་ལྷ་མཆོག་བལྟམས་ཤིང་དེ་དག་བཙས་པས་རྒྱལ་ཁབ་ཕུན་སུམ་ཚོགས། །རྗེ་གཅིག་རྒྱལ་པོར་གཤེགས་ཏེ་བསོད་ནམས་གཟི་འོད་ལྡན་པ་བལྟམས་པ་ཡི། །ཡོན་ཏན་དག་ནི་མཐོང་བར་གྱུར་ནས་ལྷ་དང་མི་རྣམས་སྟོང་བགྲངས་པ། །རབ་ཏུ་དགའ་བར་གྱུར་དང་ཀུན་ལ་ཉིད་ཀྱིས་ལེགས་པར་གཟིགས་སུ་གསོལ། །མྱུར་དུ་རྒྱལ་གྱུར་ཅིག་ཅེས་བྱང་ཆུབ་དམ་པ་མྱ་ངན་མེད་པར་ཞུགས། །དགེ་སློང་དག་།དེ་ལྟར་བྱང་ཆུབ་སེམས་དཔའ་བཙས་པ་དང ། སྐད་ཅིག་དེ་ལ་སྦྱིན་པའི་གཏོང་བའང་དེ་བས་རྒྱ་ཆེར་གྱུར་ཏོ། །ཡ་རབས་ཀྱི་རིགས་ལྔ་བརྒྱའང་བཙས་པར་གྱུར་ཏོ། །གྲགས་ལྡན་ལ་སོགས་པ་བུ་མོ་ཁྲི་དང ། བྲན་མོ་བརྒྱད་བརྒྱ་དང ། འདུན་པ་ལ་སོགས་པ་བྲན་ལྔ་བརྒྱ་དང ། རྟེའུ་མོ་ཁྲི་དང ། བསྔགས་ལྡན་ལ་སོགས་པ་རྟེའུ་ཕོ་ཁྲི་དང ། བ་ལང་གི་ཕྲུག་གུ་མོ་ལྔ་བརྒྱ་དང ། བ་ལང་གི་ཕྲུག་གུ་ཕོ་ལྔ་བརྒྱ་པོ་དག་ཀྱང་བཙས་ཤིང་འབྲངས་པར་གྱུར་ནས་དེ་དག་ཐམས་ཅད་རྒྱལ་པོ་ཟས་གཙང་མས་སྣ་གྲངས་ཡི་གེར་བྲིས་ཏེ་སྲས་ཕུ་གཞོན་ནུ་རྩེན་པའི་ཕྱིར་བྱིན་པར་གྱུར་ཏེ། །བྱང་ཆུབ་སེམས་དཔའི་ལོངས་སྤྱོད་ཀྱི་དོན་དུ་བྱང་ཆུབ་སེམས་
84a
༄#། །དཔའ་ཉིད་ཀྱི་མཐུས་གླིང་བྱེ་བ་བརྒྱ་ཕྲག་བཞིའི་དབུས་ཀྱིས་ཕྱོགས་ནས་ཨ་ཤཝདྠའི་སྡོང་པོ་སྐྱེས་པར་གྱུར་ཏོ། །གླིང་ཕྲ་མོ་རྣམས་སུའང་ཙནྡན་གྱི་ནགས་ཚལ་སྐྱེས་པར་གྱུར་ཏོ། །བྱང་ཆུབ་སེམས་དཔའི་ལོངས་སྤྱོད་ཀྱི་དོན་དུ་གྲོང་ཁྱེར་གྱི་ཁོར་ཡུག་ཏུའང་སྐྱེད་མོས་ཚལ་ལྔ་བརྒྱ་དག་བྱུང་བར་གྱུར་ཏོ། །གཏེར་ལྔ་སྟོང་ཡང་སའི་འོག་ནས་གྱེན་དུ་འབུས་ཏེ་སྒོ་སྟོན་པར་གྱུར་ཏོ། །དེ་ལྟར་རྒྱལ་པོ་ཟས་གཙང་མ་དེའི་དོན་བསམ་པ་གང་ཡིན་པ་དེ་དག་ཐམས་ཅད་ཕུན་སུམ་ཚོགས་པར་གྱུར་ནས་རྒྱལ་པོ་ཟས་གཙང་མ་འདི་སྙམ་དུ་བདག་གི་བུ་གཞོན་ནུ་དེའི་མིང་ཇི་སྐད་ཅིག་གདགས་པར་བྱ་སྙམ་པ་དང ། དེ་འདི་སྙམ་དུ་སེམས་ཏེ། བུ་འདི་སྐྱེས་མ་ཐག་ཏུ་བདག་གི་དོན་ཐམས་ཅད་ཡང་དག་པར་གྲུབ་པར་གྱུར་གྱི། འདིའི་མིང་ནི་དོན་ཐམས་ཅད་གྲུབ་པར་གདགས་སོ་སྙམ་སྟེ། དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་རིམ་གྲོ་ཆེར་བྱས་ནས་བུ་འདིའི་མིང་དོན་ཐམས་ཅད་གྲུབ་པ་ཞེས་བྱའོ་ཞེས་མིང་དུ་བཏགས་སོ། །དགེ་སློང་དག་།དེ་ལྟར་བྱང་ཆུབ་སེམས་དཔའ་བཙས་ནས་མའི་གློ་གཡས་པའང་མ་རལ་མ་ཉམས་ཤིང་སྔོན་བཞིན་དུ་གྱུར་ཏོ། །དེར་ཁྲོན་པ་ལན་གསུམ་ལྡུད་པ་དག་ཀྱང་བྱུང་བར་གྱུར། སྤོས་ཀྱི་འབྲུ་མར་གྱི་རྫིད་བུ་དག་ཀྱང་བྱུང་བར་གྱུར་ཏོ། །དེ་ནས་ལྷའི་བུ་མོ་ལྔ་སྟོང་དག་ལྷའི་སྤོས་
84b
ཀྱིས་བསྒོས་པའི་འབྲུ་མར་དྲི་ཞིམ་པོ་ཁྱེར་ཏེ་བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམས་སམ། སྐུ་ལ་མི་བདེ་བ་མ་མཆིས་སམ་ཞེས་དྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་བྱུག་པ་དང ། རྣམ་པར་བྱུག་པ་ཐོགས་ཏེ། བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམས་སམ། སྐུ་ལ་མི་བདེ་བ་མ་མཆིས་སམ་ཞེས་དྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་སྤོས་ཆུས་བཀང་བའི་བུམ་པ་ཐོགས་ཏེ་བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམས་སམ། སྐུ་ལ་མི་བདེ་བ་མ་མཆིས་སམ་ཞེས་དྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་བྱིས་པའི་གོས་ཐོགས་ཏེ་བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམས་སམ། སྐུ་ལ་མི་བདེ་བ་མ་མཆིས་སམ་ཞེས་དྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་བྱིས་པའི་རྒྱན་ཐོགས་ཏེ་བྱང་ཆུབ་སེམས་དཔའ་མའི་དྲུང་དུ་ལྷགས་ཏེ་བལྟམ་པ་ལེགས་པར་བལྟམས་སམ། སྐུ་ལ་མི་བདེ་བ་མ་མཆིས་སམ་ཞེས་དྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་གླུ་དབྱངས་ལེན་ཅིང་བྱང་ཆུབ་སེམས་དཔའི་མའི་དྲུང་དུ་ལྷགས་ཏེ་བལྟམས་པ་ལེགས་པར་བལྟམས་སམ། སྐུ་ལ་མི་བདེ་བ་མ་མཆིས་སམ་ཞེས་དྲི་བར་གྱུར་ཏོ། །ཛམྦུའི་གླིང་འདི་ན་ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་
85a
༄#། །དང་ལྡན་པ་ཇི་སྙེད་ཅིག་འཁོད་པ་དེ་དག་ཐམས་ཅད་ནམ་མཁའ་ལས་འོངས་ཏེ་རྒྱལ་པོ་ཟས་གཙང་མའི་མདུན་དུ་འཁོད་ནས་རྒྱལ་པོ་འཕེལ་བར་གྱུར་ཅིག་ཅེས་བྱ་བའི་སྒྲ་སྒྲོག་པར་གྱུར་ཏོ། །དགེ་སློང་དག་།དེ་ལྟར་བྱང་ཆུབ་སེམས་དཔའ་བཙས་ནས་ཞག་བདུན་དུ་ལུམྦི་ནིའི་ནགས་ཚལ་དུ་ལྷ་དང་མིའི་སིལ་སྙན་དང ། ཕེག་རྡོབ་པས་རིམ་གྲོར་བྱས་སོ། །བཀུར་སྟིར་བྱས་སོ། །བསྟི་སྟང་དུ་བྱས་སོ། །མཆོད་པར་བྱས་སོ། །བཟའ་བ་དང ། བཅའ་བ་དང ། མྱང་བ་དག་ཀྱང་དྲངས་པར་གྱུར་ཏོ། །ཤཱཀྱའི་ཚོགས་ཐམས་ཅད་ཀྱང་འདུས་ནས་ཀུན་དགའ་བའི་སྒྲ་བརྗོད་པར་གྱུར་ཏོ། །སྦྱིན་པ་དག་ཀྱང་བྱིན་ནོ། །བསོད་ནམས་དག་ཀྱང་བྱེད་དོ། །བྲམ་ཟེ་སུམ་ཁྲི་ཉིས་སྟོང་ཡང་ཉིན་གཅིག་བཞིན་དུ་ཚིམ་པར་བྱས་སོ། །སུ་དག་ཅི་འདོད་པ་དེ་དག་ལའང་དེ་བྱིན་པར་གྱུར་ཏོ། །བརྒྱ་བྱིན་དང་ཚངས་པའང་བྲམ་ཟེའི་འཁོར་དེར་བྲམ་ཟེའི་ཁྱེའུའི་གཟུགས་སུ་སྤྲུལ་ཏེ་གྲལ་གྱི་ཐོག་མ་ལ་འཁོད་ནས་བཀྲ་ཤིས་ཀྱི་ཚིགས་སུ་བཅད་པ་འདི་དག་བརྗོད་པར་གྱུར་ཏོ། །ཇི་ལྟར་ངན་སོང་རྣམས་ཞི་ཞིང ། །ཇི་ལྟར་འགྲོ་ཀུན་བདེ་ལས་ན། འགྲོ་ལ་བདེ་བ་འགོད་པ་ཡི། །བདེ་བ་མཛད་ཅིག་བལྟམས་པར་མངོན། །ཇི་ལྟར་རབ་རིབ་མེད་འོད་ཀྱིས། །ལྷ་དང་ཉི་ཟླའི་འོད་རྣམས་ཀྱང ། །མི་སྣང་ཟིལ་དུ་བརླག་པ་ལས། །བསོད་ནམས་འོད་ཅིག་བྱུང་བར་མངོན། །
85b
མིག་མེད་རྣམས་ཀྱང་མཐོང་གྱུར་ཅིང ། །རྣ་བ་འོན་པས་སྒྲ་ཐོས་ལ། །སྨྱོན་པ་རྣམས་ཀྱང་དྲན་ལྡན་ལས། །འཇིག་རྟེན་མཆོད་རྟེན་འགྱུར་བར་མངོན། །ཇི་ལྟར་ཉོན་མོངས་མི་གནོད་ཅིང ། ། འགྲོ་བ་བྱམས་པའི་ཡིད་གྱུར་པས། །ཚངས་པ་བྱེ་བས་མཆོད་འོས་སུ། །གདོན་མི་ཟ་བར་འགྱུར་བར་མངོན། །ས་ལ་མེ་ཏོག་རྒྱས་གྱུར་ཅིང ། །ས་ཡང་མཉམ་པར་གནས་པ་ལས། ། འགྲོ་བ་ཀུན་གྱིས་མཆོད་པ་ཡི། །ཐམས་ཅད་མཁྱེན་དུ་འགྱུར་བར་མངོན། །ཇི་ལྟར་འཇིག་རྟེན་འཁྲུག་མེད་ཅིང ། །པདྨ་ཆེན་པོ་ཐོན་པ་ལས། །ངེས་པར་གཟི་བརྗིད་ཆེན་པོ་འདི། ། འཇིག་རྟེན་མགོན་དུ་བྱོན་པར་འགྱུར། །ལྷ་ཡི་སྤོས་ཀྱིས་སྤགས་གྱུར་ལ། །འཇམ་པའི་རླུང་གི་ངད་ལྡང་ཞིང ། །སེམས་ཅན་ནད་རྣམས་ཞི་གྱུར་ལས། །འདི་ནི་སྨན་པའི་རྒྱལ་པོར་བྱོན། ། གཟུགས་ཁམས་གནས་པའི་ལྷ་བརྒྱ་པོ། །འདོད་ཆགས་བྲལ་བ་འདི་དག་ཀྱང ། །ཐལ་མོ་སྦྱར་ཞིང་འདུད་པ་ལས། །འདི་ནི་སྦྱིན་པའི་གནས་སུ་བྱོན། །མི་རྣམས་ཀྱིས་ནི་ལྷ་མཐོང་ཞིང ། །ལྷ་རྣམས་ཀྱིས་ནི་མི་མཐོང་ཡང ། །ཕན་ཚུན་འཚེ་བ་མེད་པ་ལས། །འདི་ནི་དེད་དཔོན་ཆེན་པོར་བྱོན། །མེ་རྣམས་ཞི་བར་གནས་གྱུར་ཅིང ། །ཆུ་ཀླུང་ཐམས་ཅད་མི་གཡོ་ལ། །ས་ཡང་དལ་བུས་གཡོ་བ་ལས། །འདི་ནི་ཡང་དག་གཟིགས་པར་འགྱུར། །དགེ་སློང་དག་།དེ་ལྟར་བྱང་ཆུབ་སེམས་དཔའ་བཙས་ནས་ཞག་བདུན་ལོན་པ་དང ། ལྷ་མོ་སྒྱུ་འཕྲུལ་ཤི་བའི་དུས་བྱས་པར་
86a
༄#། །གྱུར་ཏེ། དེ་ཤི་བའི་དུས་བྱས་ནས་སུམ་ཅུ་རྩ་གསུམ་གྱི་ལྷའི་ནང་དུ་སྐྱེས་སོ། །དགེ་སློང་དག་།ཁྱེད་འདི་སྙམ་དུ་བྱང་ཆུབ་སེམས་དཔའི་ལན་བོན་གྱིས་ལྷ་མོ་སྒྱུ་འཕྲུལ་འཆི་བའི་དུས་བྱས་སོ་སྙམ་ན། དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེའི་ཚེའི་ཚད་ནི་མཐར་ཐུག་པའི་ཕྱིར་རོ། །དགེ་སློང་དག་།འདས་པའི་བྱང་ཆུབ་སེམས་དཔའ་རྣམས་ཀྱང་བཙས་ཏེ་ཞག་བདུན་ལོན་ནས་མ་འཆི་བའི་དུས་བྱས་པར་གྱུར་ཏོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སྐྱེས་ཏེ་དབང་པོ་ཡོངས་སུ་རྫོགས་ནས་མངོན་པར་བྱུང་ནམ་སྙིང་འགས་སུ་འོང་བའི་ཕྱིར་རོ། །དགེ་སློང་དག་།དེ་ལྟར་ཞག་བདུན་ལོན་ནས་ཐོག་མ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་ལྷ་མོ་སྒྱུ་འཕྲུལ་བཀོད་པ་ཇི་ལྟ་བུས་སྐྱེད་མོས་ཚལ་གྱི་སར་ཞུགས་པར་གྱུར་པ་དེ་དག་ལས་བྱེ་བ་བརྒྱ་སྟོང་འགྱུར་བས་ཀྱང་ལྷག་པའི་བཀོད་པ་ཆེན་པོས་བྱང་ཆུབ་སེམས་དཔའ་གྲོང་ཁྱེར་ཆེན་པོ་སེར་སྐྱའི་གནས་སུ་ཞུགས་སོ། །དེ་ཞུགས་པ་དང ། བུམ་པ་སྤོས་ཆུས་གང་བ་ལྔ་སྟོང་གིས་མདུན་དུ་དྲངས་པར་གྱུར་ཏོ། །དེ་བཞིན་དུ་བུ་མོ་ལྔ་སྟོང་ནི་རྨ་བྱའི་མདོངས་ལག་ན་ཐོགས་ཏེ་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་ཤིང་ཏ་ལའི་ཡལ་ག་ཐོགས་ཤིང་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་སྤོས་ཆུའི་རིལ་བ་བྷྲིང་གར་ཐོགས་ཏེ་ལམ་ཆག་ཆག་གིས་འདེབས་
86b
ཤིང་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་ནགས་ཚལ་གྱི་མེ་ཏོག་གི་ཕྲེང་བ་འཕྱང་བ་ཁྱེའུ་ཚང་སྣ་ཚོགས་ཐོགས་ཏེ་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་བཟང་པོར་སྒྱུར་བའི་རིན་པོ་ཆེ་ཐོགས་ཏེ་ལམ་གྱི་བྱི་དོར་བྱེད་ཅིང་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་སྟན་བཟང་པོ་ཐོགས་ཤིང་མདུན་དུ་འདོང་བར་གྱུར་ཏོ། །བྲམ་ཟེ་ལྔ་སྟོང་ནི་དྲིལ་བུ་ཐོགས་ཏེ་བཀྲ་ཤིས་ཀྱི་སྒྲ་འབྱིན་ཅིང་མདུན་དུ་འདོང་བར་གྱུར་ཏོ། །གླང་པོ་ལྔ་སྟོང་ནི་རྒྱན་ཐམས་ཅད་ཀྱིས་བརྒྱན་ཏེ་མདུན་དུ་འདོང་བར་གྱུར་ཏོ། །རྟ་ཉི་ཁྲི་ནི་གསེར་གྱི་རྒྱན་གྱིས་བཀབ་ཅིང་རྒྱན་ཐམས་ཅད་ཀྱིས་བརྒྱན་ཏེ་མདུན་དུ་འདོང་བར་གྱུར་ཏོ། །ཤིང་རྟ་བརྒྱད་ཁྲི་ནི་གདུགས་དང ། རྒྱལ་མཚན་དང ། བ་དན་བསྒྲེང་ཞིང་དྲིལ་བུ་གཡེར་ཀའི་དྲ་བས་ལེགས་པར་བརྒྱན་ཏེ་བྱང་ཆུབ་སེམས་དཔའི་ཕྱི་བཞིན་འདོང་བར་གྱུར་ཏོ། །རྐང་ཐང་དཔའ་ཞིང་རྟུལ་ཕོད་པ། ཡན་ལག་དམ་པའི་གཟུགས་དང་ལྡན་པ། གོ་ཆ་སྲ་བ་བགོས་པ་བཞི་ཁྲི་ནི། བྱང་ཆུབ་སེམས་དཔའ་འགྲོ་བའི་ཕྱི་བཞིན་འདོང་བར་གྱུར་ཏོ། །འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷ་གྲགས་པ་གྲགས་པ་ཆེ་བ་བྱེ་བ་ཁྲག་ཁྲིག་བརྒྱ་སྟོང་ཚད་མེད་གྲངས་མེད་པ་དག་ནི་ནམ་མཁའི་དཀྱིལ་ནས་བཀོད་པ་རྣམ་པ་སྣ་ཚོགས་དུ་མས་བྱང་ཆུབ་སེམས་དཔའ་ལ་མཆོད་པ་བྱེད་ཅིང་ཕྱི་བཞིན་འདོང་བར་གྱུར་ཏོ། །ཤིང་རྟ་གང་ལ་
87a
༄#། །བྱང་ཆུབ་སེམས་དཔའ་འདུག་པར་གྱུར་པ་དེ་ཡང་འདོད་པ་ན་སྤྱོད་པའི་ལྷ་རྣམས་ཀྱིས་བཀོད་པ་ཆེན་པོ་དུ་མས་ལེགས་པར་བརྒྱན་པར་གྱུར་ཏོ། །ལྷའི་བུ་མོ་རྒྱན་ཐམས་ཅད་ཀྱིས་ཆས་པ་རིན་པོ་ཆེའི་ཕྲེང་བ་ཐོགས་པ་ཉི་ཁྲིས་ཤིང་རྟ་དེ་དྲངས་ཏེ་ལྷའི་བུ་མོ་གཉིས་ཀྱི་བར་དུ་ནི་མིའི་བུ་མོ་གཅིག་འདུག་།མིའི་བུ་མོ་གཉིས་ཀྱི་བར་དུ་ནི་ལྷའི་བུ་མོ་གཅིག་འདུག་ཀྱང་བྱང་ཆུབ་སེམས་དཔའི་མཐུས་ལྷའི་བུ་མོས་ཀྱང་མིའི་བུ་མོའི་དྲི་མི་ཞིམ་པ་མི་ཚོར། མིའི་བུ་མོས་ཀྱང་ལྷའི་བུ་མོའི་གཟུགས་མཐོང་ན་བག་མེད་པར་མ་གྱུར་ཏོ། །དགེ་སློང་དག་།སེར་སྐྱའི་གནས་ཀྱི་གྲོང་ཁྱེར་ཆེན་པོར་ཤཱཀྱ་ལྔ་བརྒྱ་ཙམ་གྱིས་བྱང་ཆུབ་སེམས་དཔའི་ཆེད་དུ་ཁྱིམ་ལྔ་བརྒྱ་ཕུབ་སྟེ། དེ་དག་བྱང་ཆུབ་སེམས་དཔའ་གྲོང་ཁྱེར་དེར་འཇུག་པའི་ཚེ་རང་རང་གིས་བྱས་པའི་ཁྱིམ་གྱི་སྒོར་འཁོད་དེ། ཐལ་མོ་སྦྱར་ནས་ལུས་གུས་པར་བཏུད་དེ་རིམ་གྲོ་དང་བཅས་པས་འདི་སྐད་དུ། ཀྱེ་དོན་ཐམས་ཅད་གྲུབ་པ་འདིར་གཤེགས་སུ་གསོལ། ཀྱེ་ལྷའི་ལྷ་འདིར་གཤེགས་སུ་གསོལ། ཀྱེ་སེམས་ཅན་དག་པ་འདིར་གཤེགས་སུ་གསོལ། ཀྱེ་ཁ་ལོ་སྒྱུར་པ་དམ་པ་འདིར་གཤེགས་སུ་གསོལ། ཀྱེ་དགའ་ཞིང་བདེ་བ་དང་མཆོག་ཏུ་དགའ་བ་མཛད་པ་འདིར་གཤེགས་སུ་གསོལ། ཀྱེ་སྨད་པ་མེད་པའི་གྲགས་པ་མངའ་བ་འདིར་གཤེགས་སུ་གསོལ། ཀྱེ་ཀུན་ནས་སྤྱན་
87b
མངའ་བ་འདིར་གཤེགས་སུ་གསོལ། ཀྱེ་མི་མཉམ་པ་དང་མཉམ་ཞིང་འདྲ་བ་མེད་པའི་ཡོན་ཏན་དང་གཟི་བརྗིད་མངའ་བ། མཚན་དང་དཔེ་བྱད་བཟང་པོས་ཡང་དག་པར་བརྒྱན་པའི་སྐུ་མངའ་བ་འདིར་གཤེགས་སུ་གསོལ་ཞེས་དེ་སྐད་འཛེར་ཏོ། །དེ་ནས་རྒྱལ་པོ་ཟས་གཙང་མས་དེ་དག་ཐམས་ཅད་དང་མཐུན་པར་བྱ་བའི་ཕྱིར་བྱང་ཆུབ་སེམས་དཔའ་ཁྱིམ་དེ་ཀུན་ཏུའང་ཞུགས་པར་བྱས་ཏེ་ཟླ་བ་བཞི་ལོན་པ་ནས་བྱང་ཆུབ་སེམས་དཔའ་ཉིད་ཀྱི་ཁྱིམ་དུ་ཞུགས་ཏེ་རིན་པོ་ཆེ་སྣ་ཚོགས་བཀོད་པ་ཞེས་བྱ་བའི་ཁང་བཟང་ཆེན་པོ་དེར་བྱང་ཆུབ་སེམས་དཔའ་ཞུགས་པར་གྱུར་ཏོ། །དེ་ན་ཤཱཀྱ་རྒན་རབས་རྒན་རབས་རྣམས་འདུས་ཏེ་བགྲོས་པ། ཕན་པའི་སེམས་དང ། བྱམས་པའི་སེམས་ཀྱིས་ཡོན་ཏན་དང་ལྡན་པ་དང ། འཇམ་པ་དང་ལྡན་པར་བྱང་ཆུབ་སེམས་དཔའ་བཙའ་བ་དང ། བྱི་དོར་བྱ་བ་དང ། ཉམས་སུ་བླང་བར་སུས་ནུས་ཞེས་བྱས་པ་དང ། དེ་ན་ཤཱཀྱའི་བུ་མོ་ལྔ་བརྒྱ་ཙམ་སོ་སོ་ནས་འདི་སྐད་དུ་བདག་གིས་གཞོན་ནུའི་རིམ་གྲོ་བགྱིའོ། ། བདག་གིས་གཞོན་ནུའི་རིམ་གྲོ་བགྱིའོ་ཞེས་ཟེར་རོ། །དེ་ན་ཤཱཀྱ་ཆེས་བགྲེས་ཆེས་བགྲེས་པ་དེ་དག་ན་རེ། བུ་མོ་འདི་དག་ཐམས་ཅད་ནི་བྱིས་པ་གཞོན་ནུ། ཐོར་བུ་གཞོན་ནུ་ལ་གཟུགས་དང་དར་ལ་བབ་པས་རྒྱགས་ཤིང་དྲེགས་པ་ཡིན་པས་འདི་དག་གིས་བྱང་ཆུབ་སེམས་དཔའ་ལ་དུས་དུས་སུ་རིམ་གྲོ་བྱ་བ་མི་ནུས་སོ། །སྐྱེ་རྒུའི་བདག་མོ་ཆེན་མོ་གཽ་ཏ་མཱི་ནི་གཞོན་ནུའི་
88a
༄#། །སྲུ་མོ་སྟེ། འདིས་ནི་གཞོན་ནུ་བདེ་བ་དང་ལགས་པར་བསྐྱེད་པར་ནུས་སོ། །རྒྱལ་པོ་ཟས་གཙང་མའང་མཉེས་པར་ནུས་སོ་ཞེས་ཐམས་ཅད་གྲོས་གཅིག་ཏུ་འདུས་ཏེ། སྐྱེ་རྒུའི་བདག་མོ་ཆེན་མོ་གཽ་ཏ་མཱི་དད་པར་བྱས་ནས་སྐྱེ་རྒུའི་བདག་མོ་ཆེན་མོ་གཽ་ཏ་མཱི་ས་གཞོན་ནུ་དེ་ལེགས་པར་བསྐྱེད་དོ། །དེའི་ཚེ་བྱང་ཆུབ་སེམས་དཔའི་རིམ་གྲོར་མ་མ་སུམ་ཅུ་རྩ་གཉིས་བཀོད་པར་གྱུར་ཏེ། དེ་ལ་བརྒྱད་ནི་པང་ན་འཚོ་བའི་མ་མའོ། །བརྒྱད་ནི་ནུ་མ་སྣུན་པའི་མ་མའོ། །བརྒྱད་ནི་རྩེན་གྲོགས་ཀྱི་མ་མའོ། །བརྒྱད་ནི་དྲི་མ་འཕྱི་བའི་མ་མའོ། །དེ་ནས་རྒྱལ་པོ་ཟས་གཙང་མས་ཤཱཀྱའི་ཚོགས་ཐམས་ཅད་བསགས་ཏེ་དཔྱད་པ། ཇི་ལྟར་གཞོན་ནུ་འདི་འཁོར་ལོས་བསྒྱུར་བའི་རྒྱལ་པོ་ཞིག་ཏུ་འགྱུར་རམ།་འོན་ཏེ་མ་ཡིན་གྱི། རབ་ཏུ་འབྱུང་བའི་ཕྱིར་མངོན་པར་འབྱུང་ཞེས་དཔྱད་པ་དང ། དེའི་ཚེ་རིའི་རྒྱལ་པོ་གངས་རིའི་ངོས་ལ་དྲང་སྲོང་ཆེན་པོ་ནག་པོ་ཞེས་བྱ་བ་མངོན་པར་ཤེས་པ་ལྔ་དང་ལྡན་པ་ཞིག་སྣག་གི་ཚ་བོ་མིས་བྱིན་ཞེས་བྱ་བ་དང་ལྷན་ཅིག་ཏུ་འདུག་འདུག་པ་ལས། དེས་བྱང་ཆུབ་སེམས་དཔའ་བཙས་པའི་ཚེ་ངོ་མཚར་རྨད་དུ་བྱུང་བའི་ཆོ་འཕྲུལ་མང་དུ་མཐོང་སྟེ། ནམ་མཁའི་དཀྱིལ་ནའང་ལྷའི་བུ་མོ་མང་པོ་སངས་རྒྱས་ཀྱི་སྒྲ་སྒྲོག་ཅིང་གོས་ཀྱི་གཡབ་མོ་གཡོབ་པ་དང ། དགའ་ཞིང་ཕན་ཚུན་འདོང་བ་མཐོང་ནས་
88b
དེས་བསམ་པ། མ་ལ་བདག་གིས་རྣམ་པར་བལྟ་བ་ཞིག་ཏུ་བྱའམ་སྙམ་ནས། དེས་ལྷའི་མིག་གིས་ཛམྦུའི་གླིང་ཐམས་ཅད་དུ་བལྟས་ན་སེར་སྐྱའི་གྲོང་ཁྱེར་ཆེན་པོ་དེ་ན་རྒྱལ་པོ་ཟས་གཙང་མའི་ཁྱིམ་དུ་གཞོན་ནུ་བསོད་ནམས་ཀྱི་གཟི་བརྗིད་ཀྱིས་གཟི་དང་ལྡན་པར་བྱས་པ། འཇིག་རྟེན་ཐམས་ཅད་ཀྱིས་མཆོད་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལུས་ལེགས་པར་བརྒྱན་པ་ཞིག་བཙས་པར་མཐོང་ནས་བྲམ་ཟེའི་ཁྱེའུ་མིས་བྱིན་ལ་སྨྲས་པ། བྲམ་ཟེའི་ཁྱེའུ་ཤེས་པར་གྱིས་ཤིག་།ཛམྦུའི་གླིང་དུ་རིན་པོ་ཆེ་ཆེན་པོ་བྱུང་སྟེ། སེར་སྐྱའི་གནས་ཀྱི་གྲོང་ཁྱེར་ཆེན་པོ་ན་རྒྱལ་པོ་ཟས་གཙང་མའི་ཁྱིམ་དུ་གཞོན་ནུ་བསོད་ནམས་ཀྱི་གཟི་བརྗིད་ཀྱིས་གཟི་དང་ལྡན་པར་བྱས་པ། འཇིག་རྟེན་ཐམས་ཅད་ཀྱིས་མཆོད་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་བཙས་སོ། །དེ་གལ་ཏེ་ཁྱིམ་ན་གནས་ན་ནི་མཐའ་བཞི་ལ་དབང་བའི་འཁོར་ལོས་བསྒྱུར་བའི་རྒྱལ་པོར་འགྱུར་ཏེ། རྣམ་པར་རྒྱལ་བ་དང་ལྡན་པ། ཆོས་དང་ལྡན་པ། ཆོས་ཀྱི་རྒྱལ་པོ་སྲིད་ཀྱི་མཐུ་སྟོབས་ཐོབ་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི། འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་དང་བདུན་འབྱུང་བར་འགྱུར་རོ། །དེ་ལ་བུ་སྟོང་
89a
༄#། །ཡོད་པར་འགྱུར་ཏེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་འཇོམས་པ་ཤ་སྟག་འབྱུང་བར་འགྱུར་རོ། །དེ་ནི་ས་ཆེན་པོའི་དཀྱིལ་འཁོར་འདི་རྒྱ་མཚོའི་མཐའ་སྐོར་དང་བཅས་པ་ཆད་པ་མེད་ཅིང་མཚོན་གྱིས་བདའ་བ་མེད་པ་དང ། ཆོས་དང་མཐུན་པར་རང་གི་མཐུས་ཟིལ་གྱིས་མནན་ཅིང་མངོན་པར་ཕབ་སྟེ། དབང་ཕྱུག་གི་དབང་གིས་རྒྱལ་སྲིད་བྱེད་པར་འགྱུར་རོ། །དེ་གལ་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ནའང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་ཏེ། སྟོན་པ་འདྲེན་པ་གཞན་གྱི་དྲིང་མི་འཇོག་པ་འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ། །དེ་ལྟ་བས་ན། ཚུར་ཤོག་དེ་བལྟར་འདོང་ངོ ། །དེ་ནས་དྲང་སྲོང་ཆེན་པོ་ནག་པོ་སྣག་གི་ཚ་བོ་མིས་བྱིན་དང་འགྲོགས་ཏེ་ངང་པའི་རྒྱལ་པོ་ལྟར་ནམ་མཁའི་དཀྱིལ་ནས་ལྡིང་སྟེ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ག་ལ་བ་དེར་སོང་ནས་ཕྱིན་པ་དང ། རྫུ་འཕྲུལ་བརྟུལ་ནས་རྐང་གིས་སེར་སྐྱའི་གནས་ཀྱི་གྲོང་ཁྱེར་ཆེན་པོར་དོང་སྟེ་རྒྱལ་པོ་ཟས་གཙང་མའི་ཁྱིམ་ག་ལ་བ་དེར་ཕྱིན་ནས་རྒྱལ་པོ་ཟས་གཙང་མའི་ཁྱིམ་གྱི་སྒོར་བསྡད་དོ། །དགེ་སློང་དག་།དེ་ལྟར་དྲང་སྲོང་ནག་པོ་དེས་རྒྱལ་པོ་ཟས་གཙང་མའི་ཁྱིམ་གྱི་སྒོ་དྲུང་དུ་སྲོག་ཆགས་བརྒྱ་སྟོང་མང་
89b
པོ་འདུས་པ་མཐོང་ངོ ། །དེ་ནས་དྲང་སྲོང་ནག་པོ་སྒོ་བའི་དྲུང་དུ་སོང་སྟེ་འདི་སྐད་ཅེས་སྨྲས་སོ། །ཀྱེ། མི་ཁྱོད་སོང་ལ་རྒྱལ་པོ་ཟས་གཙང་མ་ལ་ཆབ་སྒོ་ན་དྲང་སྲོང་ཞིག་མཆིས་སོ་ཞེས་གསོལ་ཅིག་།དེ་ནས་སྒོ་བ་དེས་དེ་ལྟར་བགྱིའོ་ཞེས་དྲང་སྲོང་ནག་པོའི་ལྟར་མཉན་ཏེ། རྒྱལ་པོ་ཟས་གཙང་མ་ག་ལ་བ་དེར་སོང་ནས་ཕྱིན་པ་དང་ཐལ་མོ་སྦྱར་ཏེ་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། ཆབ་སྒོ་ན་དྲང་སྲོང་རྒན་པོ་འཁོགས་པ་ནས། གཟེར་བ་ཞིག་མཆིས་ཏེ། འདི་སྐད་དུ་བདག་ནི། རྒྱལ་པོའི་ཞལ་མཐོང་བར་འཚལ་ལོ་ཞེས་མཆིའོ། །དེ་ནས་རྒྱལ་པོ་ཟས་གཙང་མས་དྲང་སྲོང་ནག་པོའི་སྟན་འདིང་དུ་བཅུག་སྟེ། མི་དེ་ལ་འདི་སྐད་ཅེས་སྨྲས་སོ། །དྲང་སྲོང་དེ་ནང་དུ་འོང་བར་གྱིས་ཤིག་།དེ་ནས་མི་དེ་རྒྱལ་པོའི་ཕོ་བྲང་ནས་བྱུང་ནས་དྲང་སྲོང་ནག་པོ་ལ་འདི་སྐད་ཅེས་སྨྲས་ཏེ། ནང་དུ་བཞུད་ཅིག་།དེ་ནས་དྲང་སྲོང་ནག་པོ་རྒྱལ་པོ་ཟས་གཙང་མ་ག་ལ་བ་དེར་སོང་སྟེ་ཕྱིན་པ་དང ། མདུན་དུ་འདུག་སྟེ་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། རྒྱལ་བར་སྤྱོན་ཅིག་།རྒྱལ་བར་སྤྱོན་ཅིག་།སྐུ་ཚེ་རིང་བར་སྲུངས་ཤིག་།ཆོས་བཞིན་དུ་རྒྱལ་པོ་མཛོད་ཅིག་།དེ་ནས་རྒྱལ་པོ་ཟས་གཙང་མས་དྲང་སྲོང་ནག་པོ་ལ་ཡོན་ཆུ་དང་རྐང་པ་ལ་གཏོར་བའི་ཆུས་མཆོད་པ་བྱས་ཏེ་ཤིན་ཏུ་ལེགས་པར་ཡོངས་སུ་བཀུར་ནས་སྟན་ལ་བདར་ཏེ། དེ་
90a
༄#། །སྟན་ལ་བདེ་བར་འདུག་པར་ཤེས་ནས་ཞེ་ས་དང་བཅས། གུས་པ་དང་བཅས་པར་འདི་སྐད་ཅེས་སྨྲས་སོ། །དྲང་སྲོང ། སྔོན་མཐོང་བར་མི་དྲན་ན་འདིར་ཅི་ལ་བྱོན་ཅི་ཞིག་བཞེད། དེ་སྐད་ཅེས་སྨྲས་པ་དང ། དྲང་སྲོང་ནག་པོས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། ཁྱོད་ཀྱི་སྲས་ཤིག་པ་བལྟམས་པར་གྱུར་པ་དེ་ལྟ་ཞིང་བདག་འདིར་མཆིས་སོ། །རྒྱལ་པོས་སྨྲས་པ། དྲང་སྲོང་ཆེན་པོ། གཞོན་ནུ་ཉལ་ཞིང་མཆིས་ཀྱི། ལངས་ཀྱི་བར་དུ་ཅུང་ཟད་ཅིག་ཞེས་ཤིག་།དྲང་སྲོང་གིས་སྨྲས་པ། རྒྱལ་པོ་ཆེན་པོ། སྐྱེས་བུ་ཆེན་པོ་དེ་ལྟ་བུ་ནི་རིང་པོར་མི་ཉལ་ཏེ། སྐྱེས་བུ་དམ་པ་དེ་ལྟ་བུ་དག་ནི་སད་པར་གནས་པའི་ངང་ཚུལ་ཅན་ནོ། །དགེ་སློང་དག་།དེ་ནས་བྱང་ཆུབ་སེམས་དཔས་དྲང་སྲོང་ནག་པོ་དེ་ལ་སྙིང་བརྩེ་བ་ཉེ་བར་བཟུང་སྟེ་སད་པའི་བརྡ་བྱས་སོ། །དེ་ནས་རྒྱལ་པོ་ཟས་གཙང་མས་གཞོན་ནུ་དོན་ཐམས་ཅད་གྲུབ་པ་ལག་པ་གཉིས་ཀྱིས་ཤིན་ཏུ་ལེགས་པར་བླངས་ཏེ་དྲང་སྲོང་ནག་པོའི་དྲུང་དུ་ཁྱེར་རོ། །དེ་ནས་དྲང་སྲོང་ནག་པོས་བྱང་ཆུབ་སེམས་དཔའ་བལྟས་ན། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ཞིང་དཔེ་བྱད་བཟང་པོ་བརྒྱད་ཅུས་ལེགས་པར་རྣམ་པར་སྤྲས་པའི་ལུས་དང་ལྡན་པ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་པ་ལས་འཕགས་པའི་ལུས་
90b
ཅན། ཉི་མ་བརྒྱ་ཕྲག་སྟོང་ལས་ཀྱང་ལྷག་པའི་གཟི་བརྗིད་དང་ལྡན་པ། ཡན་ལག་ཐམས་ཅད་དུ་མཛེས་པ་མཐོང་ནས་ཀྱེ་མ་འཇིག་རྟེན་དུ་ངོ་མཚར་གྱི་གང་ཟག་འདི་བྱུང་ངོ ། །ཀྱེ་མ་འཇིག་རྟེན་དུ་ངོ་མཚར་ཆེན་པོ་དང་ལྡན་པའི་གང་ཟག་འདི་བྱུང་ངོ་ཞེས་ཆེད་དུ་བརྗོད་པ་ཆེད་དུ་བརྗོད་ནས་སྟན་ལས་ལངས་ཏེ་ཐལ་མོ་སྦྱར་ནས་བྱང་ཆུབ་སེམས་དཔའི་རྐང་པ་གཉིས་ལ་ཕྱག་འཚལ་ཏེ་བསྐོར་བ་བྱས་ནས་བྱང་ཆུབ་སེམས་དཔའ་པང་དུ་བླངས་ཏེ་སེམས་ཤིང་འདུག་པར་གྱུར་ཏོ། །དེ་ནས་དེས་བྱང་ཆུབ་སེམས་དཔའི་ལུས་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཡོད་པ་མཐོང་སྟེ། དེ་དག་དང་ལྡན་པའི་སྐྱེས་བུ་གང་ཟག་དེ་རྣམ་པ་གཉིས་སུ་འགྱུར་གྱི། གཞན་དུ་མི་འགྱུར་རོ། །གལ་ཏེ་ཁྱིམ་ན་གནས་ན་ནི་མཐའ་བཞི་ལ་དབང་བའི་འཁོར་ལོས་བསྒྱུར་བའི་རྒྱལ་པོར་འགྱུར་ཏེ་ཞེས་བྱ་བ་ནས་སྔ་མ་བཞིན་དུ་དབང་ཕྱུག་གི་དབང་གིས་རྒྱལ་སྲིད་བྱེད་དོ་ཞེས་བྱ་བའི་བར་དུ་འགྱུར་བ་དང ། གལ་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པར་འགྱུར་ཏེ། ཡང་དག་པར་རྫོགས་པའི་སངས་རྒྱས་སུ་གྲགས་པ་འདྲེན་པ་གཞན་གྱི་དྲིང་མི་འཇོག་པར་འགྱུར་བ་མཐོང་ནས་དེས་དེ་ལྟ་བུ་མཐོང་བ་དང ། མཆི་མ་བླགས་ཏེ་དུས་ནས་ཤུགས་རིང་ཕྱུང་བ་དང ། རྒྱལ་པོ་ཟས་གཙང་མས་དྲང་སྲོང་དེ་མཆི་མ་བླགས་ཏེ་དུས་ནས་ཤུགས་རིང་འབྱིན་
91a
༄#། །པར་མཐོང་ནས་དངངས་ཏེ་མི་དགའ་ཞིང་རིངས་པར་རིངས་པ་དྲང་སྲོང་ཆེན་པོ་དེ་ལ་སྨྲས་པ། དྲང་སྲོང ། དེ་ལྟར་བཤུམས་མོ་བླགས་ཏེ་བཤུམས་པ་དང ། ཤུགས་རིང་འབྱིན་པ་ཅི་ཞིག་ནོངས། གཞོན་ནུ་འདི་ལ་མི་དགེ་བའམ་ཞིག་མི་གདའ་འམ། དེ་སྐད་ཅེས་སྨྲས་པ་དང ། དྲང་སྲོང་ཆེན་པོ་ནག་པོས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། བདག་ནི་གཞོན་ནུའི་སླད་དུ་དུ་བའང་མ་ལགས། འདི་ལ་མི་དགེ་བའང་གང་ཡང་མ་མཆིས་ཏེ། བདག་ཉིད་དུ་བར་བས་སོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ། བདག་ནི་རྒས་ཤིང་འཁོགས་ཏེ་ནས་གཟེར་ལ། གཞོན་ནུ་དོན་ཐམས་ཅད་འགྲུབ་པ་འདི་ནི་གདོན་མི་འཚལ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བླ་ན་མེད་པའི་ཆོས་ཀྱི་འཁོར་ལོ་དག་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། གཞན་སུས་ཀྱང་རུང་སྟེ། འཇིག་རྟེན་དུ་ཆོས་དང་མཐུན་པར་བསྐོར་བར་མི་ནུས་པ་བསྐོར་བར་འགྱུར་རོ། །ལྷ་དང་བཅས་པའི་འཇིག་རྟེན་ལ་སྨན་པ་དང་བདེ་བའི་སླད་དུ་ཆོས་སྟོན་པར་འགྱུར་ཏེ།་ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བའི་ཆོས། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ།
91b
ཡོངས་སུ་བྱང་བའི་མཐར་ཕྱིན་པའི་ཆོས་ཡང་དག་པར་སྟོན་པར་འགྱུར་རོ། །སེམས་ཅན་སྐྱེ་བའི་ཆོས་ཅན་དག་འདི་ལས་ཆོས་དེ་ཐོས་ནས་སྐྱེ་བ་ལས་ཡོངས་སུ་མ་གྲོལ་བ་རྣམས་གྲོལ་བར་འགྱུར་རོ། །དེ་བཞིན་དུ་སེམས་ཅན་རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པའི་ཆོས་ཅན་རྣམས་ནི་རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་ལས་ཡོངས་སུ་གྲོལ་བར་འགྱུར། སེམས་ཅན་འདོད་ཆགས་དང ། ཞེ་སྡང་དང ། གཏི་མུག་གི་མེས་གདུངས་པ་རྣམས་ལ་ནི་དམ་པའི་ཆོས་ཀྱི་ཆར་པས་སིམ་པར་མཛད་པར་འགྱུར། སེམས་ཅན་ལྟ་བ་ངན་པ་སྣ་ཚོགས་ཀྱི་ཐིབས་པོས་ཁེབས་པ་ལམ་གོལ་བར་ཞུགས་པ་རྣམས་ནི་ལམ་དྲང་པོས་མྱ་ངན་ལས་འདས་པར་འདྲེན་པར་འགྱུར། སེམས་ཅན་འཁོར་བའི་དྲ་བ་དང་བཙོན་རར་འཁོར་ཞིང་ཉོན་མོངས་པའི་འཆིང་བས་བཅིངས་པ་རྣམས་ནི་བཅིངས་པ་ལས་ཡོངས་སུ་གྲོལ་བར་མཛད་པར་འགྱུར། སེམས་ཅན་མི་ཤེས་པའི་མུན་པ་དང ། རབ་རིབ་དང ། ལིང་ཏོག་གིས་མིག་ལྡོངས་བ་རྣམས་ལ་ནི་ཤེས་རབ་ཀྱི་མིག་སྐྱེད་པར་འགྱུར། སེམས་ཅན་ཉོན་མོངས་པའི་ཟུག་རྔུས་ཟུག་པ་རྣམས་ལ་ནི་ཟུག་རྔུ་འབྱིན་པར་འགྱུར་ཏེ། རྒྱལ་པོ་ཆེན་
92a
༄#། །པོ།་འདི་ལྟ་སྟེ། དཔེར་ན། ཨུ་དུམ་ཝ་རའི་མེ་ཏོག་ནི་བརྒྱ་ལ་བརྒྱ་ལམ་ན་འཇིག་རྟེན་དུ་འབྱུང་ངོ ། །རྒྱལ་པོ་ཆེན་པོ། དེ་བཞིན་དུ་བསྐལ་པ་བྱེ་བ་ཁྲག་ཁྲིག་མང་པོར་བརྒྱ་ལ་བརྒྱ་ལམ་ན་སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་སྟེ། དེ་ལྟར་གཞོན་ནུ་འདི་ནི་ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་འཁོར་བའི་རྒྱ་མཚོའི་ཕ་རོལ་ཏུ་སྒྲོལ་བར་འགྱུར་ཞིང་འཆི་བ་མེད་པ་ལ་རབ་ཏུ་གཞོག་པར་འགྱུར་ལ། བདག་གིས་ནི་སངས་རྒྱས་དཀོན་མཆོག་དེ་མི་མཐོང་བ་དང ། བདག་གི་ནད་མ་མཆིས་པ་འདི་ལའང་འདོད་ཆགས་དང་བྲལ་བར་འགྱུར་ཏེ། རྒྱལ་པོ་ཆེན་པོ། བདག་ནི་དེའི་སླད་དུ་དུ་ཞིང་མི་དགའ་བས་ཤུགས་རིང་འབྱིན་པ་ལགས་སོ། །རྒྱལ་པོ་ཆེན་པོ། བདག་ཅག་གི་བསྟན་བཅོས་ལས་འབྱུང་བ་ལྟར་ན་ནི་གཞོན་ནུ་དོན་ཐམས་ཅད་གྲུབ་པའང་ཁབ་ན་བཞུགས་པར་མི་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་འདི་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་སྟེ། སུམ་ཅུ་རྩ་གཉིས་གང་ཞེ་ན། རྒྱལ་པོ་ཆེན་པོ། །འདི་ལྟ་སྟེ། གཞོན་
92b
ནུ་དོན་ཐམས་ཅད་གྲུབ་པ་ནི་དབུ་གཙུག་ཏོར་དང་ལྡན་པ་སྟེ། རྒྱལ་པོ་ཆེན་པོ། །གཞོན་ནུ་དོན་ཐམས་ཅད་གྲུབ་པ་ནི་སྐྱེས་བུ་ཆེན་པོའི་མཚན་དང་པོ་འདི་དང་ལྡན་ནོ། །རྒྱལ་པོ་ཆེན་པོ།་གཞོན་ནུ་དོན་ཐམས་ཅད་གྲུབ་པ་ནི་དབུ་སྟང་ཟིལ་བཅག་པའི་འཕྲོ་དང་རྨ་བྱའི་མགྲིན་པ་ལྟར་མཐོན་མཐིང་དུ་གྲུབ་ཅིང་ལྕང་ལོར་འཁྲིལ་ལ་གཡས་སུ་འཁྱིལ་བ་དང ། དཔྲལ་བའི་དབྱེས་མཉམ་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པའི་སྨིན་མཚམས་སུ་མཛོད་སྤུ་སྐྱེས་པ་ནི་ཁ་བ་དང་དངུལ་གྱི་མདོག་ལྟར་མཆིས་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་ནི་སྤྱན་གྱི་རྫི་མ་བའི་རྫི་མ་ལྟ་བུ་དང ། སྤྱན་དཀར་ནག་འབྱེས་པ་དང ། ཚེམས་བཞི་བཅུ་མཉམ་པ་དང ། ཚེམས་ཐགས་བཟང་བ་དང ། ཚེམས་ཤིན་ཏུ་དཀར་བ་དང་ལྡན་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་ནི་ཚངས་པའི་དབྱངས་དང ། རོ་བྲོ་བའི་མཆོག་དང་ལྡན་པ་དང ། ལྗགས་ཤིན་ཏུ་རིང་ཞིང་སྲབ་པ་དང ། འགྲམ་པ་སེངྒེའི་འདྲ་བ་དང ། དཔུང་མགོ་ཤིན་ཏུ་ཟླུམ་པ་དང ། མདུན་མཐོ་བ་དང ། ཐལ་གོང་རྒྱས་པ་དང ། པགས་པ་སྲབ་ཅིང་མདོག་གསེར་འདྲ་བ་དང ། བཞེངས་བཞིན་དུ་མ་བཏུད་པར་ཕྱག་བུས་མོར་སླེབ་པ་དང ། རོ་སྟོད་སེངྒེའི་ལྟ་བུ་དང་ལྡན་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་ནི་ཤིང་
93a
༄#། །ནྱ་གྲོ་དྷ་ལྟར་ཆུ་ཞེང་གབ་པ་དང ། སྤུ་རེ་རེ་ནས་སྐྱེས་པ་དང ། ཡན་ལག་གི་སྤུ་གཡས་ཕྱོགས་ནས་གྱེན་དུ་འཁྱིལ་བ་དང ། འདོམས་ཀྱི་སྦ་བ་སྦུབས་སུ་ནུབ་པ་དང ། བྲལ་ལེགས་པར་ཟླུམ་པ་དང ། བྱིན་པ་རི་དྭགས་ཀྱི་རྒྱལ་པོ་ཨེ་ན་ཡའི་ལྟ་བུ་དང ། སོར་མོ་རིང་བ་དང ། ཞབས་ཀྱི་རྟིང་པ་ཡངས་པ་དང ། ཞབས་ཀྱི་གོང་མཐོ་བ་དང ། ཕྱག་དང་ཞབས་ཀྱི་མཐིལ་འཇམ་པ་དང ། ཕྱག་དང་ཞབས་ཀྱི་སོར་མོ་དྲ་བས་འབྲེལ་བ་དང་ལྡན་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པའི་ཞབས་ཀྱི་འོག་གི་མཐིལ་གཉིས་ལ་འཁོར་ལོ་རེ་རེ་སྐྱེས་པ་ནི་བཟང་ཞིང་རྩིབས་སྟོང་དང་ལྡན་ལ། མུ་ཁྱུད་དང་བཅས། ལྟེ་བ་དང་བཅས་པ་ལགས་སོ། །རྒྱལ་པོ་ཆེན་པོ།་གཞོན་ནུ་དོན་ཐམས་ཅད་གྲུབ་པ་ནི་ཞབས་མཉམ་ཞིང་ཤིན་ཏུ་གནས་པ་དང་ལྡན་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་འདི་དག་དང་ལྡན་ནོ། །རྒྱལ་པོ་ཆེན་པོ། མཚན་གྱི་རྣམ་པ་དེ་ལྟ་བུ་དག་ནི། འཁོར་ལོས་བསྒྱུར་བའི་རྒྱལ་པོ་ལ་མི་འབྱུང་སྟེ། མཚན་དེ་ལྟ་བུ་དག་ནི་བྱང་ཆུབ་སེམས་དཔའ་རྣམས་ལ་འབྱུང་ངོ ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པའི་སྐུ་ལ་དཔེ་བྱད་བཟང་པོ་བརྒྱད་ཅུ་མཆིས་ཏེ། དེ་དག་དང་
93b
ལྡན་པས་གཞོན་ནུ་དོན་ཐམས་ཅད་གྲུབ་པ་ནི་ཁབ་ན་བཞུགས་པར་མི་འགྱུར་གྱི། གདོན་མི་འཚལ་བར་རབ་ཏུ་འབྱུང་བའི་དོན་དུ་མངོན་པར་འབྱུང་བར་འགྱུར་རོ། །རྒྱལ་པོ་ཆེན་པོ།་དཔེ་བྱད་བཟང་པོ་བརྒྱད་ཅུ་པོ་དེ་དག་གང་ཞེ་ན། འདི་ལྟ་སྟེ། རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་ནི་སེན་མོ་མཐོ་བ་དང ། སེན་མོ་ཟངས་ཀྱི་མདོག་ལྟ་བུ་དང ། སེན་མོ་མདོག་སྣུམ་པ་དང ། སོར་མོ་རྣམས་ཟླུམ་པ་དང ། སོར་མོ་རྣམས་རྒྱས་པ་དང ། སོར་མོ་བྱིན་གྱིས་ཕྲ་བ་དང ། རྩ་མི་མངོན་པ་དང ། ལོང་བུ་མི་མངོན་པ་དང ། ཚིགས་མི་མངོན་པ་དང ། ཞབས་མཉམ་ཞིང་མི་མཉམ་པ་མ་མཆིས་པ་དང ། ཞབས་ཀྱི་རྟིང་པ་ཡངས་པ་དང་ལྡན་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་ནི་ཕྱག་གི་རི་མོ་མཚུངས་པ་དང་ལྡན་ཞིང་ཕྱག་གི་རི་མོ་མདངས་ཡོད་པ་དང ། ཕྱག་གི་རི་མོ་ཟབ་པ་དང ། ཕྱག་གི་རི་མོ་ཡ་ཡོར་མ་གྱུར་པ་དང ། ཕྱག་གི་རི་མོ་རིམ་པར་འཚམ་པ་དང ། སྒྲོས་བིམ་པ་ལྟར་དམར་པ་དང ། སྒྲ་མི་དྲག་པའི་ཚིག་དང ། ལྗགས་མཉེན་ཞིང་འཇམ་ལ་ཟངས་ཀྱི་མདོག་ལྟར་འདུག་པ་དང ། གླང་པོ་ཆེའི་ང་རོ་དང ། འབྲུག་གི་སྒྲ་དང་ལྡན་པ་དང ། སྙན་ཞིང་འཇམ་པ་དང་ལྡན་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་ནི་དཔེ་བྱད་བཟང་པོ་ཡོངས་སུ་རྫོགས་པ་སྟེ། ཕྱག་རིང་བ་དང ། སྐུའི་ན་བཟའ་གཙང་
94a
༄#། །མ་ཕུན་སུམ་ཚོགས་པ་དང ། སྐུ་འཇམ་པ་དང ། བསྙེངས་བ་མི་མངའ་བའི་སྐུ་དང ། ཞུམ་པ་མི་མངའ་བའི་སྐུ་དང ། རིམ་པར་འཚམ་པའི་སྐུ་དང ། ཤིན་ཏུ་དཔའ་བར་མཛེས་པའི་སྐུ་དང ། རྣམ་པར་ལེགས་པར་གྲུབ་པའི་སྐུ་དང ། པུས་མོའི་ལྷ་ང་ཡངས་ཤིང་རྒྱ་ཆེ་ལ་ཤིན་ཏུ་གང་བ་དང་ལྡན་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་ནི་སྐུ་ཟླུམ་པ་དང་ལྡན་པ་སྟེ། སྐུ་ཤིན་ཏུ་འཇམ་པ་དང ། སྐུ་ཡ་ཡོ་མ་མཆིས་པ་དང ། སྐུ་རིམ་གྱིས་ལེགས་པར་གྲུབ་པ་དང ། ལྟེ་བ་ཟབ་པ་དང ། ལྟེ་བ་མ་ཡོ་བ་དང ། ལྟེ་བ་རིམ་གྱིས་གཞོལ་བ་དང ། དྲང་སྲོང་ལྟར་གཙང་སྦྲས་སྤྱོད་པ་དང ། ཀུན་ནས་མཛེས་པ་དང ། སྣང་བ་དམ་པ་ཤིན་ཏུ་རྣམ་པར་དག་ཅིང་རབ་རིབ་མ་མཆིས་པའི་འོད་ཀུན་ནས་འབྱུང་བ་དང་ལྡན་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་ནི་གླང་པོ་ལྟར་དལ་བའི་འགྲོས་དང ། སེངྒེའི་སྟབས་ལྟ་བུའི་འགྲོས་དང ། ཁྱུ་མཆོག་གི་སྟབས་ལྟ་བུའི་འགྲོས་དང ། ངང་པའི་སྟབས་ལྟ་བུའི་འགྲོས་དང ། གཡས་ཕྱོགས་སུ་མཛེས་པར་འཁོར་བའི་འགྲོས་དང ། དཀུ་ཟླུམ་པ་དང ། དཀུ་སྐབས་ཕྱིན་པ་དང ། དཀུ་མ་རྙོངས་པ་དང ། རྐེད་པ་གཞུའི་འཆང་བཟུང་ལྟར་ཕྲ་བ་དང ། མདོག་གི་སྙེས་པ་སྔོ་བའམ། ནག་པའི་སྐྱོན་དང་བྲལ་བའི་སྐུ་དང་ལྡན་པ་
94b
ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་ནི་མཆེ་བ་ཟླུམ་པ་དང ། མཆེ་བ་རྣོ་བ་དང ། མཆེ་བ་བྱིན་གྱིས་ཕྲ་བ་དང ། ཤངས་ལེགས་པར་མཐོ་བ་དང ། སྤྱན་གསལ་བ་དང ། སྤྱན་དྲི་མ་མེད་པ་དང ། འཛུམ་པའི་སྤྱན་དང་ལྡན་པ་དང ། སྤྱན་རིང་བ་དང ། སྤྱན་ཡངས་པ་དང ། ུཏྤ་ལ་སྔོན་པོ་ལྟ་བུའི་སྤྱན་དང་ལྡན་པ་ལགས་སོ། །རྒྱལ་པོ་ཆེན་པོ།་གཞོན་ནུ་དོན་ཐམས་ཅད་གྲུབ་པ་ནི་སྨིན་མའི་སྤུ་མཉམ་པ་དང ། སྨིན་མ་སྟུག་པ་དང ། སྨིན་མ་ནག་པ་དང ། སྨིན་མ་རྒྱུན་ཆགས་པ་དང ། སྨིན་མ་རིམ་གྱིས་གཞོལ་བ་དང ། མཁུར་བ་རྒྱས་པ་དང ། མཁུར་བ་མི་མཉམ་པ་མེད་པ་དང ། མཁུར་བ་སྐྱོན་དང་བྲལ་བ་དང ། སྡང་བ་དང་ཁྲོ་བའི་མདོག་མེད་པ་དང ། ཤིན་ཏུ་རིག་པའི་དབང་པོ་དང་ལྡན་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་དེ་ནི་མཛོད་སྤུ་ཡོངས་སུ་རྫོགས་པ་དང་ལྡན་པ་དང ། གདོང་དང་དཔྲལ་བ་རྐྱེན་དུ་འབབ་པ་དང ། དབུ་ཡོངས་སུ་རྒྱས་པ་དང ། དབུ་སྐྲ་ནག་པ་དང ། དབུ་སྐྲ་མཉམ་པ་དང ། དབུ་སྐྲ་དྲི་ཞིམ་པ་དང ། དབུ་སྐྲ་མི་གཤོར་བ་དང ། དབུ་སྐྲ་མི་འཛིང་པ་དང ། དབུ་སྐྲ་བྱིན་གྱིས་ཕྲ་བ་དང ། དབུ་སྐྲ་ལྕང་ལོར་འཁྲིལ་བ་དང་ལྡན་པ་ལགས་སོ། །རྒྱལ་པོ་ཆེན་པོ། གཞོན་ནུ་དོན་ཐམས་ཅད་གྲུབ་པ་དེ་ནི་དབུ་སྐྲ་དཔལ་གྱི་བེའུ་དང ། བཀྲ་ཤིས་དང ། གཡུང་དྲུང་འཁྱིལ་བ་དང ། སྡོང་
95a
༄#། །རིས་ཀྱི་དབྱིབས་ལྟ་བུའི་དབུ་སྐྲ་དང་ལྡན་པའོ། །རྒྱལ་པོ་ཆེན་པོ། འདི་དག་ནི་གཞོན་ནུ་དོན་ཐམས་ཅད་གྲུབ་པའི་དཔེ་བྱད་བཟང་པོ་བརྒྱད་ཅུ་སྟེ། དེ་དག་དང་ལྡན་པས་གཞོན་ནུ་དོན་ཐམས་ཅད་གྲུབ་པ་ནི་ཁབ་ན་བཞུགས་པར་མི་འགྱུར་གྱི། གདོན་མི་འཚལ་བར་རབ་ཏུ་འབྱུང་བའི་སླད་དུ་མངོན་པར་འབྱུང་བར་འགྱུར་རོ། །དེ་ནས་རྒྱལ་པོ་ཟས་གཙང་མས་དྲང་སྲོང་ཆེན་པོ་ནག་པོ་ལས་གཞོན་ནུའི་ལུང་བསྟན་པ་དེ་ཐོས་ནས་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་སྟན་ལས་ལངས་ཏེ་བྱང་ཆུབ་སེམས་དཔའི་རྐང་པ་གཉིས་ལ་ཕྱག་འཚལ་ནས་ཚིགས་སུ་བཅད་པ་འདི་སྨྲས་སོ། །ཁྱོད་ལ་ལྷ་ཀུན་ཕྱག་འཚལ་ཞིང ། །དྲང་སྲོང་རྣམས་ཀྱིས་མཆོད་གྱུར་ཏེ། །འཇིག་རྟེན་ཀུན་གྱི་མཆོད་རྟེན་པས། །བདག་ཀྱང་ཁྱོད་ལ་ཕྱག་འཚལ་ལོ། །དགེ་སློང་དག་།དེ་ལྟར་རྒྱལ་པོ་ཟས་གཙང་མས་དྲང་སྲོང་ཆེན་པོ་ནག་པོ་དང ། སྣག་གི་ཚ་བོ་མིས་བྱིན་དང་བཅས་ཏེ་ཁ་ཟས་ཚུལ་དང་འདྲ་བས་ཚིམ་པར་བྱས་ནས་གོས་བསྐོན་ཏེ་བསྐོར་བ་བྱས་སོ། །དེ་ནས་དྲང་སྲོང་ཆེན་པོ་ནག་པོ་གནས་དེ་ཉིད་ནས་རྫུ་འཕྲུལ་གྱིས་ནམ་མཁའ་ལས་རང་གི་གནས་ག་ལ་བ་དེར་སོང་ངོ ། །དེ་ནས་དྲང་སྲོང་ཆེན་པོ་ནག་པོས་བྲམ་ཟེའི་ཁྱེའུ་མིས་བྱིན་ལ་འདི་སྐད་ཅེས་སྨྲས་སོ། །མིས་བྱིན། ཁྱོད་ཀྱིས་ནམ་སངས་རྒྱས་
95b
འཇིག་རྟེན་དུ་བྱུང་ངོ་ཞེས་ཐོས་པ་དེའི་ཚེ་ཁྱོད་སོང་སྟེ་དེའི་བསྟན་པ་ལ་རབ་ཏུ་བྱུང་ཞིག་དང ། དེ་ནི་ཁྱོད་ཀྱི་ཡུན་རིང་པོའི་དོན་དང ། ཕན་པ་དང་བདེ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། ལྷ་ཡི་ཚོགས་རྣམས་ནམ་མཁའི་ངོས་ལ་གནས་ཏེ་སངས་རྒྱས་སྒྲ་སྒྲོག་པ། །ལྷ་ཡི་དྲང་སྲོང་ནག་པོ་རི་སུལ་གནས་པས་མཐོང་ནས་དགའ་མཆོག་ཐོབ། །འདི་ན་སྲོག་ཆགས་རྣམས་ཀྱི་དགའ་སྐྱེད་སངས་རྒྱས་ཞེས་བྱའི་ཚིག་འདི་ཅི། །བདག་གི་ལུས་ཀྱང་རབ་སིམ་གྱུར་ཅིང་སེམས་བདེ་མཆོག་ཏུ་ཞི་བར་གྱུར། །ལྷ་འམ་འོན་ཏེ་ལྷ་མི་ན་ཡང་ན་ནམ་མཁའ་ལྡིང་ངམ་མི་འམ་ཅི། །སངས་རྒྱས་ཞེས་བྱ་དགའ་དང་མོས་བྱེད་ཚིག་འདི་སྔོན་ཆད་མཐོས་ཅི། །ལྷ་ཡི་མིག་གི་ཕྱོགས་བཅུར་རི་དང་ས་དང་རྒྱ་མཚོ་རྣམས་ལ་བལྟས། །ཕྱིས་ཡངས་རི་མཚོ་ལ་རྨད་དུ་བྱུང་བ་རྣམ་པ་སྣ་ཚོགས་མཐོང ། །འོད་གསལ་མཛེས་པ་ལུས་ལ་སིམ་བྱེད་འདི་ནི་རབ་ཏུ་བཟང་སྣང་ཞིང ། །ཇི་ལྟར་རི་ཡི་རྩེ་མོ་རྣམས་སུ་བྱི་རུའི་མྱུ་གུ་ཐོན་གྱུར་ལ། །ཤིང་ལྗོན་རྣམས་ཀྱང་མེ་ཏོག་བཟང་རྒྱས་སྣ་ཚོགས་འབྲས་བུས་བརྒྱན་གྱུར་ལས། །སྲིད་པ་གསུམ་དུ་དཀོན་མཆོག་དམ་པ་མྱུར་དུ་འབྱུང་བར་ཤིན་ཏུ་གསལ། །ས་འདི་ཐམས་ཅད་མཉམ་ཤིང་དྲི་མེད་ལག་མཐིལ་བཞིན་དུ་སྣང་བ་དང ། །ལྷ་རྣམས་དགའ་ཞིང་ནམ་མཁའི་དཀྱིལ་ན་གོས་ཀྱི་གཡབ་མོ་འབྱིན་གྱུར་ལ། །ཀླུ་རྒྱལ་རྒྱ་མཚོའི་གནས་ཀྱི་སྟེང་ན་རིན་ཆེན་རྨད་
96a
༄#། །བྱུང་འཕྱོ་བ་ལས། །ཛམྦུའི་གླིང་དུ་རྒྱལ་བའི་དཀོན་མཆོག་ཆོས་ཀྱི་འབྱུང་གནས་ངེས་པར་འབྱུང ། །ངན་སོང་ཞི་ཞིང་སྡུག་བསྔལ་བྲལ་ཏེ་སེམས་ཅན་རྣམས་ནི་བདེར་ལྡན་ལ། །ལྷ་ཡི་ཚོགས་རྣམས་ནམ་མཁའི་དཀྱིལ་ལ་དགའ་དང་ལྡན་པར་རྒྱུ་བ་དང ། །ཇི་ལྟར་ལྷ་ཡི་གླུ་དབྱངས་སྒྲ་སྙན་ཡིད་དུ་འོང་བ་གྲགས་པ་ལས། །སྲིད་པ་གསུམ་འདིར་དཀོན་མཆོག་འབྱུང་འགྱུར་དེ་ཡི་ལྟས་སུ་གདོན་མི་ཟ། །ཛམྦུའི་གླིང་འདིར་དྲང་སྲོང་ནག་པོས་ལྷ་ཡི་མིག་གིས་རྣམ་བལྟས་ན། །སེར་སྐྱའི་གྲོང་ན་རྒྱལ་པོ་ཟས་གཙང་གྲོང་ཁྱེར་དམ་པ་ཡོད་པ་དེར། །མཐུ་ཆེན་མཐུ་ལྡན་མཚན་དང་བསོད་ནམས་གཟི་བརྗིད་རྒྱས་པ་བཙས་པ་མཐོང ། །མཐོང་ནས་དགའ་མགུ་རངས་ཤིང་བདེ་བའི་ཡིད་སྐྱེས་མཐུ་ཡང་སྐྱེས་པར་གྱུར། །དེ་ནས་ངོ་མཚར་རྙེད་དེ་རང་གི་སློབ་མ་ལྷན་ཅིག་རིངས་སུ་དོང ། །ཕྱིན་ནས་སེར་སྐྱར་བརྗོད་པའི་རྒྱལ་པོའི་གྲོང་ཁྱེར་མཆོག་གི་སྒོར་འདུག་སྟེ། །ཞབས་འབྲིང་སྲོག་ཆགས་བྱེ་བ་ཁྲག་ཁྲིག་མང་པོ་དྲང་སྲོང་དེས་མཐོང་ནས། །སྒོ་བ་དེ་ལ་སྨྲས་པ་ཆབ་སྒོར་དྲང་སྲོང་ཕྱིན་ཅེས་མྱུར་དུ་གསོལ། །དེ་མཉན་མྱུར་དུ་ཕོ་བྲང་ནང་ཕྱིན་རྒྱལ་པོ་ལ་ནི་དེ་བསྙད་པ། །ལྷ་གཅིག་དྲང་སྲོང་རྒས་འཁོགས་དཀའ་ཐུབ་ཆེན་པོ་ཅན་ཞིག་ཆབ་སྒོར་མཆིས། །དྲང་སྲོང་མཆོག་དེ་རྒྱལ་པོའི་ཕོ་བྲང་ནང་དུ་མཆི་བར་དགའ་ཞེས་མཆི། །
96b
རྒྱལ་པོ་ཆེན་པོ་ནང་དུ་གཏང་ངམ་མི་གཏང་བདག་ལ་བཀའ་སྩལ་གསོལ། །དེ་ནས་དེ་ཡི་སྟན་བཏིང་རྒྱལ་པོས་ཁྱོད་སོང་ནང་དུ་བོས་ཞེས་བསྒོ། །དྲང་སྲོད་ནག་པོས་སྒོ་བའི་ཚིག་ཐོས་དགའ་མགུ་བདེ་དང་ལྡན་པར་གྱུར། །སྐོམ་པ་བསིལ་བའི་ཆུ་འདོད་བཀྲེས་པས་གདུངས་པ་ཟས་ལ་མོས་པ་ལྟར། །དྲང་སྲོང་དམ་པ་དེ་ཡང་སེམས་ཅན་མཆོག་དེ་མཐོང་དུ་མངོན་པར་དགའ། །རྒྱལ་པོ་རྒྱལ་གྱུར་སྐུ་ཚེ་རིང་སྲུང་གསོལ་ཞེས་དགའ་བས་དེ་སྐད་སྨྲས། །སྙན་པར་བརྗོད་ནས་ཡིད་དུལ་དབང་པོ་ཞི་ཞིང་དེས་པ་སྟན་ལ་འདུག། རྒྱལ་པོས་གུས་པར་སྨྲ་བྱས་དྲང་སྲོང་ཐུབ་པ་དེ་ལ་ཚིག་བརྗོད་པ། །རྒྱལ་པོའི་ཕོ་བྲང་འདིར་བྱོན་རྒྱུ་ཅི་ཐུབ་པས་བདག་ལ་མྱུར་དུ་གསུངས། །ཁྱོད་ཀྱི་སྲས་བལྟམས་གཟུགས་མཆོག་ཕ་རོལ་ཕྱིན་ཅིང་གཟི་བརྗིད་ཆེ་དང་ལྡན། །མཐུ་ཆེན་མཚན་རབ་སུམ་ཅུ་གཉིས་ཀྱིས་ཀུན་ནས་བརྒྱན་མངའ་བ། །རྒྱལ་པོ་ཁྱོད་སྲས་ཐམས་ཅད་དོན་གྲུབ་དེ་ནི་མཐོང་བར་བདག་དགའ་སྟེ། །དེ་སླད་འདིར་མཆིས་རྒྱལ་པོ་བདག་ལ་འཚལ་བ་གཞན་ནི་ཡོང་མ་མཆིས། །ལེགས་སོ་ལེགས་པར་བྱོན་ཏེ་མཉེལ་ཏམ་མ་མཉེལ་ཁྱོད་མཐོང་བདག་དགའ་འོ། །མཆོག་སྦྱིན་གཞོན་ནུ་དེ་ཉལ་དེ་ལྟར་བལྟ་བའི་སྐབས་ནི་མ་མཆིས་ཀྱི། །རེ་ཞིག་ཡུད་ཙམ་གཞེས་དང་འདི་ནི་ཟླ་བ་ཉ་བ་དྲི་མེད་པ། །སྐར་མའི་ཚོགས་ཀྱིས་བརྒྱན་པ་འདྲ་བའི་དྲི་མེད་གཟིགས་བར་
97a
༄#། །འགྱུར། །གང་ཚེ་ཁ་ལོ་སྒྱུར་མཆོག་ཟླ་བ་རྒྱས་པའི་འོད་མངའ་དེ་སད་བ། །དེ་ཚེ་རྒྱལ་པོས་འོད་འབར་གཟུགས་འཆང་ཉི་ལས་འཕགས་འོད་པང་བླངས་ཏེ། ། འདི་ལྟར་དྲང་སྲོང་ལྷ་མིས་མཆོད་པ་གསེར་མཆོག་གཟུགས་ལྡན་དེ་གཟུགས་ཤིག་།དྲང་སྲོང་ནག་པོས་དེ་ཡི་རྐང་པ་མཛེས་པ་འཁོར་ལོའི་མཚན་ཅན་མཐོང ། །དེ་ནས་ལངས་ཏེ་ཐལ་མོ་སྦྱར་ནས་རྐང་པ་གཉིས་ལ་ཕྱག་འཚལ་ཏེ། །བདག་ཉིད་ཆེན་པོ་བསྟན་བཅོས་མཁས་པས་པང་དུ་བླངས་ནས་བསམ་ཞིང་བལྟས། །དེས་ནི་མཐུ་ཆེན་མཐུ་ལྡན་མཚན་གྱི་མཆོག་གིས་བརྒྱན་པ་མཐོང་གྱུར་ནས། །མགོ་ལྕོགས་རིག་བྱེད་བསྟན་བཅོས་མཁས་པ་དེས་ནི་དེ་ལ་རྣམ་གཉིས་མཐོང ། །སྟོབས་ལྡན་འཁོར་ལོས་བསྒྱུར་བའི་རྒྱལ་པོའམ་སངས་རྒྱས་འཇིག་རྟེན་གཙོ་བོར་འགྱུར། །ཤིན་ཏུ་མི་དགའ་ལུས་དང་སེམས་ཀྱི་མཆི་མ་བླགས་ཏེ་ཤུགས་རིང་ཕྱུང ། །རྒྱལ་པོ་མཆོག་ཀྱང་དངངས་པར་གྱུར་ནས་བྲམ་ཟེ་ཅི་སླད་བཤུམས་ཞེས་སྨྲ། །དྲང་སྲོང་ནག་པོས་བདག་གི་དོན་གྲུབ་བ་གེགས་ཤིག་མ་གཟིགས་སམ། །དྲང་སྲོང་ཅི་སླད་བཤུམས་མཛད་དགེ་སྡིག་གང་གཟིགས་བདག་ལ་མེད་པར་གསུངས། །ཁྱོད་སྲས་དོན་ཀུན་གྲུབ་ལ་བར་ཆད་སྡིག་ཏུ་འགྱུར་བ་མ་མཆིས་ཏེ། །བདག་ལ་བདག་ཉིད་རྒས་ཤིང་འདི་ལྟར་འཁོགས་པར་གྱུར་ཅེས་མྱ་ངན་བགྱིད། །འདི་ནི་སངས་
97b
རྒྱས་འཇིག་རྟེན་མཆོག་འགྱུར་ཆོས་ཀྱང་ཡང་དག་སྟོན་པར་འགྱུར། །བདག་གིས་དགའ་བ་ཐོབ་པས་ཡིད་ཀྱིས་མི་མཐོང་ངོ་ཞེས་དེ་སླད་དུ། །འདི་ཡི་སྐུ་ལ་མཚན་རབ་སུམ་ཅུ་རྩ་གཉིས་དྲི་མེད་མངའ་བ་ལས། །རྣམ་པ་གཉིས་སུ་འགྱུར་ཏེ་གསུམ་དུ་མ་མཆིས་རྒྱལ་པོ་མཁྱེན་པར་མཛོད། །འཁོར་ལོས་བསྒྱུར་བའི་རྒྱལ་འགྱུར་ཡང་ན་སངས་རྒྱས་འཇིག་རྟེན་གཙོ་པོར་བྱོན། །འདི་ནི་འདོད་པའི་ཡོན་ཏན་བཞེད་པར་མི་འགྱུར་ངེས་པར་སངས་རྒྱས་འགྱུར། །དྲང་སྲོང་ལུང་བསྟན་དེ་ཐོས་རྒྱལ་པོ་དགའ་ཞིང་བདེ་བ་ཐོབ་པར་གྱུར། །དེ་ནས་ལངས་ཏེ་ཐལ་མོ་སྦྱར་ནས་རྐང་པ་གཉིས་ལ་ཕྱག་ཀྱང་བྱས། །སྟོབས་མཆོག་ལྡན་པ་ཁྱོད་ནི་ལྷས་མཆོད་དྲང་སྲོང་རྣམས་ཀྱིས་བསྔགས་པ་སྟེ། །སྲིད་གསུམ་ཀུན་གྱི་འགྲོ་བའི་དེད་དཔོན་མཆོག་གྱུར་ཁྱོད་ལ་ཕྱག་འཚལ་ལོ། །དྲང་སྲོང་དགའ་བས་ཚ་བོ་དེ་ལ་སྨྲས་པ་ང་ཡི་གདམས་ངག་ཉོན། །གང་ཚེ་འདི་ནི་བྱང་ཆུབ་སངས་རྒྱས་འགྲོ་ལ་འཁོར་ལོ་བསྐོར་ཐོས་པ། །དེ་ཚེ་མྱུར་དུ་ཐུབ་པའི་བསྟན་ལ་རབ་བྱུང་མྱ་ངན་འདས་པ་འཐོབ། །དང་སྲོང་དམ་པ་དེ་ཡི་རྐང་ལ་ཕྱག་འཚལ་བསྐོར་བ་བྱས་ནས་ནི། །འདི་འདྲའི་སྲས་མངའ་ཁྱོད་ཀྱི་ཐོབ་པ་རྒྱ་ཆེན་ལེགས་པར་ཐོབ་ཅེས་སྨྲས། །འདི་ནི་འཇིག་རྟེན་ལྷ་དང་མིར་བཅས་ཆོས་ཀྱིས་ཚིམ་པར་མཛད་པར་འགྱུར། །དྲང་སྲོང་མཆོག་དེ་སེར་སྐྱའི་གནས་ནས་བྱུང་ནས་བདག་གནས་དགོན་པར་ཕྱིན།། །།
98a
༄#། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། །བམ་པོ་དྲུག་པ། དགེ་སློང་དག་།དེ་ལྟར་བྱང་ཆུབ་སེམས་དཔའ་བཙས་མ་ཐག་ཏུ་ལྷའི་བུ་དབང་ཕྱུག་ཆེན་པོས་གནས་གཙང་མའི་རིས་ཀྱི་ལྷའི་བུ་རྣམས་ལ་བོས་ཏེ་འདི་སྐད་ཅེས་སྨྲས་སོ། །གྲོགས་པོ་དག་།བྱང་ཆུབ་སེམས་དཔའ་སེམས་དཔའ་ཆེན་པོ་གང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་ཡོངས་སུ་སྦྱང་བ་བྱས་པ། སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཐབས་དང ། ཐོས་པ་དང ། སྤྱོད་པ་དང ། བརྟུལ་ཞུགས་དང ། དཀའ་ཐུབ་ཅན། སྤྱད་པ་ལེགས་པར་སྤྱད་པ། བྱམས་པ་ཆེན་པོ་དང ། སྙིང་རྗེ་ཆེན་པོ་དང ། དགའ་བ་ཆེན་པོ་དང་ལྡན་པ། བཏང་སྙོམས་ཀྱིས་ཡང་དག་པར་འཕགས་པའི་བློ་ཅན། སེམས་ཅན་ཐམས་ཅད་ལ་ཕན་པར་བརྩོན་པ། བརྩོན་འགྲུས་བརྟན་པའི་གོ་ཆ་ལེགས་པར་བགོས་པ། སྔོན་གྱི་རྒྱལ་བ་ལ་དགེ་བའི་རྩ་བ་སྐྱེད་པས་བྱུང་བ། བསོད་ནམས་བརྒྱ་པའི་མཚན་གྱིས་ཡང་དག་པར་བརྒྱན་པ། རྟུལ་བ་ངེས་པར་བྱས་པ་དང་ལྡན་པ། ཕ་རོལ་གྱི་དམག་ཚོགས་རབ་ཏུ་འཇོམས་པ། དགའ་བའི་བསམ་པ་ཤིན་ཏུ་དྲི་མ་མེད་པ་ཕུན་སུམ་ཚོགས་པ། ཡེ་ཤེས་ཆེན་པོའི་ཏོག་གི་རྒྱལ་མཚན་ཅན། བདུད་ཀྱི་སྟོབས་མཐར་
98b
འབྱིན་པ། སྟོང་གསུམ་གྱི་དེད་དཔོན་ཆེན་པོ། །ལྷ་དང་མིས་མཆོད་པ། མཆོད་སྦྱིན་ཆེན་པོའི་མཆོད་སྦྱིན་བྱས་པ། བསོད་ནམས་ཀྱི་ཚོགས་ཤིན་ཏུ་ཕུན་སུམ་ཚོགས་པ་དང་ལྡན་པ། འབྱུང་བའི་བསམ་པ་ཅན། སྐྱེ་བ་དང ། རྒ་བ་དང ། འཆི་བ་མཐར་འབྱིན་པ། ལེགས་པར་སྐྱེ་བས་སྐྱེས་པ། འགྲོ་བ་རྣམ་པར་བྱང་ཆུབ་པར་བྱེད་པ། བུ་རམ་ཤིང་པའི་རྒྱལ་པོའི་རིགས་སུ་སྐྱེས་ནས་མིའི་འཇིག་རྟེན་དུ་བྱུང་སྟེ། དེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའི། ཚུར་ཤོག་།བདག་ཅག་དེ་ལ་ཕྱག་འཚལ་ཞིང་རིམ་གྲོར་བྱ་བ་དང ། བཀུར་སྟིར་བྱ་བ་དང ། མངོན་པར་བསྟོད་པར་བྱ་བའི་ཕྱིར་འདོང་ངོ ། །ལྷའི་བུ་ང་རྒྱལ་གྱི་ཟིལ་གྱིས་ནོན་པ་གཞན་དག་ཀྱང་བདག་ཅག་བྱང་ཆུབ་སེམས་དཔའ་ལ་ཕྱག་འཚལ་བ་མཐོང་བ་དང ། དེ་དག་ཀྱང་ང་རྒྱལ་དང ། དྲེགས་པ་དང ། རྒྱགས་པ་གཏོང་བར་འགྱུར་ཏེ། བྱང་ཆུབ་སེམས་དཔའ་ལ་ཕྱག་འཚལ་ཞིང་རིམ་གྲོ་དང་བཀུར་སྟི་བྱེད་པར་བྱ་བའི་ཕྱིར་འདོང་ངོ ། །དེ་ནི་ལྷའི་བུ་དེ་དག་ལ་ཡུན་རིང་པོའི་དོན་དང ། ཕན་པ་དང ། བདེ་བ་དང ། འཆི་བ་མེད་པ་འཐོབ་པའི་བར་དུ་འགྱུར་རོ། །རྒྱལ་པོ་ཟས་གཙང་མ་རྒྱལ་བ་འཕེལ་བའང་རྗེས་སུ་བསྒྲགས་པར་འགྱུར་རོ། །བྱང་ཆུབ་སེམས་དཔའ་ཡང་དེ་ཁོ་ནའི་ལུང་བསྟན་པས་ལུང་བསྟན་ཏེ་བདག་ཅག་ཕྱིར་འོང་བར་བྱའོ། །དེ་སྐད་ཅེས་བསྒོ་ནས་ལྷའི་བུ་དབང་
99a
༄#། །ཕྱུག་ཆེན་པོ་ལྷའི་བུ་བརྒྱ་སྟོང་ཕྲག་བཅུ་གཉིས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་འོད་ཀྱིས་རྒྱས་པར་བཀང་སྟེ་རྒྱལ་པོ་ཟས་གཙང་མའི་ཕོ་བྲང་ག་ལ་བ་དེར་སོང་ནས་ཕྱིན་པ་དང ། སྒོ་བས་རྒྱལ་པོ་ལ་གསོལ་ཏེ། རྒྱལ་པོས་གནང་ནས་རྒྱལ་པོའི་ཕོ་བྲང་དུ་ཕྱིན་ཏེ་བྱང་ཆུབ་སེམས་དཔའི་རྐང་པ་ལ་མགོ་བོས་ཕྱག་འཚལ་ནས་བླ་གོས་ཕྲག་པ་གཅིག་ཏུ་གཟར་ཏེ་ལན་བརྒྱ་སྟོང་ཕྲག་དུ་མར་བསྐོར་བ་བྱས་ནས་བྱང་ཆུབ་སེམས་དཔའ་པང་དུ་བླངས་ཏེ་རྒྱལ་པོ་ཟས་གཙང་མ་ལ་དགའ་བར་བྱ་བའི་ཕྱིར་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། དགྱེས་པའི་དམ་པར་དགྱེས་པར་མཛོད་ཅིག་།དེ་ཅིའི་སླད་དུ་ཞེ་ན། རྒྱལ་པོ་ཆེན་པོ།་བྱང་ཆུབ་སེམས་དཔའི་སྐུ་མཚན་དང་དཔེ་བྱད་བཟང་པོས་ལེགས་པར་བརྒྱན་པ་དང ། གཞོན་ནུས་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་ཁ་དོག་དང ། གཟི་བརྗིད་དང ། གྲགས་པ་དང ། དཔལ་གྱིས་ཟིལ་གྱིས་ནོན་པ་ལས་ན། རྒྱལ་པོ་ཆེན་པོ། བྱང་ཆུབ་སེམས་དཔའ་ནི་གདོན་མི་འཚལ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དགེ་སློང་དག་།དེ་ལྟར་ལྷའི་བུ་དབང་ཕྱུག་ཆེན་པོ་གནས་གཙང་མའི་རིས་ཀྱི་ལྷའི་བུ་མང་པོ་དང་ལྷན་ཅིག་ཏུ་
99b
བྱང་ཆུབ་སེམས་དཔའ་ལ་མཆོད་པ་དང ། རིམ་གྲོ་ཆེན་པོ་བྱས་ཏེ། དེ་ཁོ་ནའི་ལུང་བསྟན་པས་བྱང་ཆུབ་སེམས་དཔའ་ལུང་བསྟན་ནས་ཕྱིར་བདག་གི་གནས་སུ་སོང་ངོ ། །དེ་ལ་འདི་སྐད་ཅེས་བྱ་སྟེ། ཡོན་ཏན་རྒྱ་མཚོའི་ཕ་རོལ་ཕྱིན་པ་དེ་བལྟམས་པ། །ལྷ་ཡི་དབང་པོས་ཤེས་ནས་དགའ་སྟེ་ལྷ་ལ་སྨྲས། །དེ་ཐོས་འགྱུར་བའང་བསྐལ་པ་བྱེ་མང་ཤིན་ཏུ་དཀའ། །ཚུར་ཤོག་མི་ཡི་དབང་པོ་དེ་ལ་མཆོད་དུ་འདེང ། །རིན་ཆེན་ནོར་བུས་གཙུག་ནི་ལེགས་བརྒྱན་སྤྱོད་ལམ་ལྡན། །གཙུག་ཕུད་མཛེས་པ་འཕྱང་བ་རྣམ་པར་དག་པའི་ལྷ། །སྟོང་ཕྲག་བཅུ་གཉིས་ཚང་བ་སེར་སྐྱའི་གནས་མཆོག་ཏུ། །མྱུར་དུ་ལྷགས་ནས་རྒྱལ་པོའི་སྒོ་ཡི་དྲུང་ན་སྡོད། །དེ་དག་རྣམས་ཀྱིས་སྒོ་བ་ལ་ནི་ཡིད་འོང་སྨྲས། །རྒྱལ་པོའི་ཕོ་བྲང་སོང་སྟེ་ཐུགས་སུ་ཆུད་པར་གསོལ། ། ཆབ་སྒོ་བས་ཀྱང་ཆིག་དེ་མཉན་ནས་ནང་དུ་སོང ། །ཐལ་མོ་སྦྱར་ནས་རྒྱལ་པོ་དེ་ལ་འདི་སྐད་སྨྲས། །ལྷ་གཅིག་རྟག་ཏུ་རྒྱལ་གྱུར་སྐུ་ཚེ་རིང་དུ་སྲུངས། །བསོད་ནམས་ཡངས་པ་རྣམ་དག་འོད་ཅན་ཆབ་སྒོར་མཆིས། །རིན་ཆེན་ནོར་བུས་གཙུག་ནི་ལེགས་བརྒྱན་སྤྱོད་ལམ་ལྡན། །ཟླ་བ་ཉ་ལྟར་བཞིན་བཟང་ཟླ་ལྟར་དྲི་མེད་འོད། །རྒྱལ་པོ་ད་དག་གང་དུ་མཆི་ཡང་གྲིབ་མི་གདའ། །སུག་པ་འདོར་ཡང་གོམ་པའི་སྒྲ་དག་ཐོས་མི་འགྱུར། །དོག་སར་རྒྱུ་བ་བགྱིད་ཀྱང་རྡུལ་ནི་ཡོང་མི་ལྡང ། །སྐྱེ་བོ་རྣམས་ཀྱང་དེ་དག་མཐོང་ན་ངོམས་མི་འགྱུར། །དེ་དག་ལུས་
100a
༄#། །ཀྱི་འོད་ནི་ཤིན་ཏུ་རྒྱ་ཆེན་གསོལ། །ཚིག་ཀྱང་ཡིད་དུ་མཆིས་ཏེ་མི་ལ་དཔེ་མ་མཆིས། །ཟབ་ཅིང་འཇམ་མཉེན་སྙན་པ་འབྱུང་བའི་གནས་ལས་ན། །དེ་དག་མི་མ་ལགས་ཀྱི་ལྷ་ཚོགས་ལགས་སྙམ་བགྱིད། །མེ་ཏོག་མཆོག་ཕྲེང་ཕྱུག་པ་དར་གྱི་ལྡ་ལྡི་དག་།ཀུན་གྱི་ལག་ན་ཐོགས་ནས་གུས་དང་བཅས་པར་སྡོད། །རྒྱལ་པོ་ལྷ་རྣམས་དེ་དག་གཞོན་ནུ་ལྷ་ཡི་ལྷ། །བལྟ་བར་འཚལ་ཞིང་མཆོད་པའི་སླད་དུ་མཆིས་སུ་ངེས། །རྒྱལ་པོས་དེ་སྐད་ཚིག་ཐོས་རབ་ཏུ་དགར་གྱུར་ནས། །སོང་སྟེ་ཀུན་ཀྱང་ཕོ་བྲང་ནང་དུ་གཤེགས་ཞེས་གྱིས། །དེ་དག་ཡོན་ཏན་སྤྱོད་ལམ་ཁྱོད་ཀྱིས་སྨྲས་ལྟར་ན། །རྫུ་འཕྲུལ་དེ་འདྲ་བ་ནི་མི་ལ་གང་ཡང་མེད། །སྒོ་བས་ཐལ་མོ་སྦྱར་ཏེ་ལྷ་ལ་འདི་སྐད་སྨྲས། །རྒྱལ་པོས་གནང་གི་ཁྱེད་ཅག་ནང་དུ་བཞུད་དུ་གསོལ། །ལག་ན་ཕྲེང་ཐོགས་དེ་དག་དགའ་མགུ་ཡིད་རངས་ཏེ། །ལྷ་ཡི་གནས་དང་འདྲ་བའི་རྒྱལ་པོའི་ཁྱིམ་དུ་ཞུགས། །ལྷ་མཆོག་དེ་དག་ཁྱིམ་དུ་ཕྱིན་པར་མཐོང་ནས་ནི། །རྒྱལ་པོ་སྟན་ལས་ལངས་ཏེ་ཐལ་མོ་སྦྱར་བྱས་ནས། །རིན་ཆེན་རྩ་བ་ཅན་གྱི་ཁྲི་གདན་བཤམས་པ་འདིར། །ཐུགས་བརྩེ་མཛད་པའི་ཐུགས་ཀྱིས་ཁྱེད་ཅག་བཞུགས་སུ་གསོལ། །ང་རྒྱལ་དྲེགས་མེད་དེ་དག་སྟན་ལ་འཁོད་པར་གྱུར། །བདག་ཅག་ཅི་སླད་འདིར་མཆིས་རྒྱལ་པོ་གསན་དུ་གསོལ། །ཁྱོད་སྲས་རྣམ་དག་སྐུ་
100b
མངའ་བསོད་ནམས་ཆེན་པོ་བལྟམས། །ཤིན་ཏུ་ལེགས་པའི་ཞབས་ལྡན་བདག་ཅག་མཐོང་བར་འཚལ། །གང་གི་འགྲོ་བ་གང་དང་སྦྱོར་བ་གང་ཅིར་འགྱུར། །མཚན་བཟང་མཚན་གྱི་ཆོ་ག་དག་ནི་བདག་ཅག་འཚལ། །དེ་བས་རྒྱལ་པོའི་དམ་པ་མི་དགྱེས་སྤང་བར་མཛོད། །སྣ་ཚོགས་མཚན་གྱི་ཡན་ལག་བརྒྱན་པ་བལྟ་བར་འཚལ། །རྒྱལ་པོ་བུད་མེད་ཚོགས་ཀྱིས་བསྐོར་བ་དེ་རབ་དགའ། །གཞོན་ནུ་མེ་ཡི་འོད་ལྟར་འབར་བ་པང་དུ་བླངས། །ལྷ་མཆོག་གཙུག་ཕུད་འཕྱང་བ་དག་ནི་ཉེ་བར་བསྙེན། །ཐོག་མ་སྒོར་བྱུང་སྟོང་གསུམ་འདི་དག་ཀུན་ཏུ་གཡོས། ། ལྷ་མཆོག་དེ་དག་འདྲེན་པའི་ཞབས་དང་སེན་མོ་ནི། །ཟངས་མདོག་དྲི་མེད་རྣམ་དག་གཟི་བརྗིད་ལྡན་མཐོང་ནས། །གཙུག་ཕུད་འཕྱང་བ་དེ་དག་མྱུར་དུ་ལངས་པར་གྱུར། །དྲི་མ་མེད་པའི་འོད་ཀྱི་ཞབས་ལ་མགོས་ཕྱག་འཚལ། །འདི་འདྲའི་མཚན་དང་འདི་འདྲར་ལྟ་བ་དཔལ་ཅན་དང ། །འདི་འདྲའི་བསོད་ནམས་གཟི་བརྗིད་སྤྱི་གཙུག་མི་མཐོང་དང ། །མཛོད་སྤུ་ནས་ནི་རྒྱ་ཆེན་འོད་འབྱུང་འདི་འདྲ་ལས། །བདུད་རྣམས་ཕམ་མཛད་བྱང་ཆུབ་བརྙེས་འགྱུར་གདོན་མི་འཚལ། །མུན་སེལ་ཉོན་མོངས་བྲལ་བའི་ཡོན་ཏན་བརྟགས་ནས་སུ། །ཡང་དག་ཡོན་ཏན་ཇི་ལྟར་དོན་མཐོང་དེ་ལ་བསྟོད། །སྐྱེ་དང་རྒ་དང་འཆི་དང་ཉོན་མོངས་དགྲ་བསལ་བའི། །སེམས་ཅན་རིན་ཆེན་འདི་ནི་རིང་པོར་མི་ཐོགས་འབྱུང ། །ཡོངས་རྟོག་འདོད་ཆགས་ཡུལ་གྱི་
101a
༄#། །གཙུབ་མས་བསྐྱེད་པ་ཡི། །རྣམ་གསུམ་མེས་ནི་སྲིད་གསུམ་ཀུན་འབར་ཡོངས་གདུངས་པར། །དཔའ་ཁྱོད་ཆོས་ཀྱི་སྤྲིན་གྱིས་སྟོང་གསུམ་བཀད་ནས་ནི། །འཆི་མེད་ཆར་གྱིས་ཉོན་མོངས་གདུང་བ་ཞི་མཛད་འགྱུར། །བྱམས་པའི་གསུང་མངའ་ཐུགས་རྗེ་ལྡན་པ་འཇམ་པའི་གསུང ། །ཚངས་པའི་སྒྲ་དབྱངས་ཡིད་འོང་གསུང་དུ་སྒྲོག་མཛད་པ། ། སྟོང་གསུམ་ཀུན་ཏུ་གོ་ཞིང་འགྲོ་བ་གོར་འགྱུར་བ། །བཅོམ་ལྡན་ཁྱོད་ཀྱིས་སངས་རྒྱས་གསུང་ཆེན་མྱུར་དུ་སྒྲོག་།སྲིད་པའི་འདོད་ཆགས་བཅིངས་བྱིང་སྲིད་པའི་རྩེར་གནས་པ། །མུ་སྟེགས་ཅན་གྱི་ཚོགས་དན་ལོག་པར་ལྟ་བ་བཅོམ། །ཁྱོད་ཀྱི་རྒྱུ་ལ་བརྟེན་དང་སྟོང་པའི་ཆོས་ཐོས་ནས། །སེངྒེས་ཝ་ཚོགས་བཞིན་དུ་དེ་དག་འབྱེར་བར་འགྱུར། །ཉོན་མོངས་ཆེན་པོའི་དུ་བ་མ་རིག་བསྒྲིབས་བསལ་ཏེ། །ཀུན་ཏུ་བྱུང་བ་སྐྱེ་བོ་ངེས་པར་སྣང་བྱེད་པའི། །ཡེ་ཤེས་འོད་འཕྲོ་ཤེས་རབ་འོད་རིག་གཟིགས་པ་ཡིས། །འགྲོ་བ་ཀུན་གྱི་མུན་པ་ཆེན་པོ་བསལ་བར་གསོལ། །གང་དུ་སེམས་ཅན་དག་པ་རྨད་བྱུང་འདི་འདྲ་བྱུང ། །ལྷ་དང་མི་རྣམས་ཀྱིས་ནི་རྙེད་པ་རྒྱ་ཆེན་ཐོབ། །རྣམ་པར་རྟོགས་པར་མཛད་པའི་སེམས་ཅན་རིན་ཆེན་འདིས། །ངན་སོང་ལམ་བཅད་ལྷ་ཡི་ལམ་ནི་གཏོད་པར་འགྱུར། །སེར་སྐྱའི་གནས་སུ་ལྷ་ཡི་མེ་ཏོག་ཆར་ཕབ་ནས། །བསྐོར་བ་བྱས་ཏེ་གུས་པར་བསྟོད་པ་བྱས་ནས་ནི། །སངས་རྒྱས་
101b
སངས་རྒྱས་ལེགས་ཞེས་དེ་དག་ཚིག་བརྗོད་ཅིང ། །ལྷ་ཚོགས་དེ་དག་ཚུལ་དུ་ཤིས་པར་མཁའ་ལས་དོང ། །བལྟམས་པའི་ལེའུ་སྟེ། བདུན་པའོ།། །།དགེ་སློང་དག་།དེ་ལྟར་བྱང་ཆུབ་སེམས་དཔའ་གང་གི་ནུབ་མོ་བཙས་པ་དེ་ཉིད་ཀྱི་ནུབ་མོ་རྒྱལ་རིགས་དང ། བྲམ་ཟེ་དང ། ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུ་རྣམས་སུ་བུ་མོ་ཉི་ཁྲི་བཙས་པར་གྱུར་ཏེ།་དེ་དག་ཐམས་ཅད་ཀྱང་དེ་དག་གི་ཕ་མ་རྣམས་ཀྱིས་བྱང་ཆུབ་སེམས་དཔའ་ལ་རིམ་གྲོ་བྱ་བ་དང ། བསྙེན་བཀུར་བྱ་བའི་ཕྱིར་ཕུལ་ལོ། །རྒྱལ་པོ་ཟས་གཙང་མས་ཀྱང་བུ་མོ་ཉི་ཁྲི་བྱང་ཆུབ་སེམས་དཔའ་ལ་རིམ་གྲོ་བྱ་བ་དང ། བསྙེན་བཀུར་བྱ་བའི་ཕྱིར་ཕུལ་ལོ། །མཛའ་བཤེས་དང ། བློན་པོ་དང ། ཉེ་དུ་དང ། སྣག་གི་གཉེན་མཚམས་དག་གིས་ཀྱང་བྱང་ཆུབ་སེམས་དཔའ་ལ་རིམ་གྲོ་བྱ་བ་དང ། བསྙེན་བཀུར་བྱ་བའི་ཕྱིར་བུ་མོ་ཉི་ཁྲི་ཕུལ་ལོ། །བློན་པོའི་འཁོར་རྣམས་ཀྱིས་ཀྱང་བྱང་ཆུབ་སེམས་དཔའ་ལ་རིམ་གྲོ་དང ། བསྙེན་བཀུར་བྱ་བའི་ཕྱིར་བུ་མོ་ཉི་ཁྲི་ཕུལ་ལོ། །དགེ་སློང་དག་།དེའི་ཚེ་ཤཱཀྱ་རྒན་རབས་རྒན་རབས་རྣམས་འདུས་ནས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། གཞོན་ནུ་འདི་ནི་ལྷ་ཁང་དུ་བཀུར་བར་བགྱིའོ། །རྒྱལ་པོས་སྨྲས་པ། གཞོན་ནུ་དེ་ལྟར་བཀུར་བ་ལེགས་ཀྱི། དེ་བས་ན་གྲོང་ཁྱེར་ནི་བརྒྱན་པར་གྱིས་ཤིག །
102a
༄#། །སྲང་དང ། ལམ་གྱི་བཞི་མདོ་དང ། སུམ་མདོ་དང ། ཚོང་དུས་དག་ནི་མཛེས་པར་གྱིས་ཤིག་།བཀྲ་མི་ཤིས་པ་སྒུར་པོ་དང ། ཞར་བ་དང ། འོན་པ་དང ། ལྐུགས་པ་དང ། དབྱིབས་མི་མཛེས་པ་དང ། གཟུགས་མི་མཛེས་པ་དང ། དབང་པོ་མ་ཚང་བ་རྣམས་ནི་སོལ་ཅིག་།བཀྲ་ཤིས་པ་རྣམས་ཀྱང་སོགས་ཤིག་།བསོད་ནམས་ཀྱི་རྔ་ནི་རྡུངས་ཤིག་།བཀྲ་ཤིས་ཀྱི་དྲིལ་ནི་དཀྲོལ་ཅིག་།གྲོང་ཁྱེར་དམ་པའི་སྒོ་ནི་རྒྱན་གྱིས་ལེགས་པར་སྤུད་ཅིག་།རོལ་མོ་སིལ་སྙན་དང་ཕེག་རྡོབ་པ་ཤིན་ཏུ་ཡིད་དུ་འོང་བ་དག་ནི་ལེན་ཞིང་རྡོབས་ཤིག་།ཁམས་ཀྱི་རྒྱལ་པོ་ཐམས་ཅད་ནི་སོགས་ཤིག་།ཚོང་དཔོན་དང ། ཁྱིམ་བདག་དང ། བློན་པོ་དང ། སྒོ་བ་དང ། འཁོར་གྱི་མི་དག་ནི་གཅིག་ཏུ་སྡུད་ཤིག་།བུ་མོའི་ཤིང་རྟ་ནི་ཤོམས་ཤིག་།བུམ་པ་གང་བ་རྣམས་ནི་སྙེན་ཅིག་།བྲམ་ཟེ་ཁ་ཏོན་པ་རྣམས་ནི་སྡུས་ཤིག་།ལྷ་ཁང་རྣམས་ནི་ཤིན་ཏུ་བརྒྱན་པར་གྱིས་ཤིག་།དགེ་སློང་དག་།དེ་ནས་རྒྱལ་པོས་ཇི་སྐད་བསྒོ་བ་དེ་བཞིན་དུ་ཐམས་ཅད་སྦྱར་བ་དང ། དེ་ནས་རྒྱལ་པོ་ཟས་གཙང་མ་རང་གི་ཁྱིམ་དུ་སོང་ནས་སྐྱེ་རྒུའི་བདག་མོ་ཆེན་མོ་གོའུ་ཏ་མཱི་ལ་བོས་ཏེ་འདི་སྐད་ཅེས་སྨྲས་སོ། །གཞོན་ནུ་ལྷ་ཁང་དུ་བཀུར་གྱི། རྒྱན་གྱིས་ལེགས་པར་བརྒྱན་པར་གྱིས་ཤིག་།ལེགས་སོ་ཞེས་སྐྱེ་
102b
རྒུའི་བདག་མོ་ཆེན་མོ་གོའུ་ཏ་མཱིས་དེ་ལྟར་མཉན་ཏེ་གཞོན་ནུ་རྒྱན་གྱིས་བརྒྱན་ཏོ། །དེ་ནས་གཞོན་ནུ་དེ་རྒྱན་གྱིས་བརྒྱན་པའི་ཚེ་བཞིན་འཛུམ་ཞིང་ཁྲོ་གཉེར་མེད་པས་ཤིན་ཏུ་ཡིད་དུ་འོང་བའི་ཚིག་གིས་སྲུ་མོ་ལ་སྨྲས་པ། མ། བདག་གང་དུ་བཀུར། སྨྲས་པ། བུ། ལྷ་ཁང་དུ་བཀུར་རོ། །དེ་ནས་གཞོན་ནུས་བཞིན་འཛུམ་སྟེ་བགད་ནས་སྲུ་མོ་ལ་ཚིགས་སུ་བཅད་དེ་སྨྲས་པ། བདག་བཙས་དེ་ཚེ་སྟོང་གསུམ་འདི་ནི་གཡོས་པར་གྱུར། །བརྒྱ་བྱིན་ཚངས་པ་ལྷ་མིན་ལྟོ་འཕྱེ་ཆེན་པོ་དང ། །ཉི་ཟླ་དེ་བཞིན་རྣམ་ཐོས་བུ་དང་གཞོན་ནུ་ཡང ། །སྤྱི་བོ་རྐང་པ་གཉིས་ལ་གཏུགས་ཏེ་ཕྱག་འཚལ་ན། །དེ་རིང་མ་ཡིས་གང་དུ་བདག་བཀུར་བགྱི་བ་ཡི། །ལྷ་གཞན་བདག་གི་གོང་ན་འཕགས་པ་གང་ཞིག་མཆིས། །ལྷ་རྣམས་ཀུན་ལས་བདག་འཕགས་ལྷ་ཡི་ལྷ་ལགས་ཏེ། །བདག་འདྲའི་ལྷ་ཡང་མ་མཆིས་གོང་མ་ག་ལ་མཆིས། །འོན་ཀྱང་འཇིག་རྟེན་རྗེས་བསྙེགས་ཙམ་དུ་བདག་མཆིའོ། །བདག་གི་རྣམ་འཕྲུལ་སྐྱེ་བོས་མཐོང་ན་དགར་འགྱུར་ཞིང ། །རིམ་གྲོ་བཀུར་སྟི་ཤིན་ཏུ་ཆེ་བར་བགྱིད་འགྱུར་ལ། །ལྷ་མིས་འདི་ནི་ལྷ་ཡི་ལྷ་ཞེས་རིག་པར་འགྱུར། །དགེ་སློང་དག་།དེ་ལྟར་གྲོང་ཁྱེར་དུ་གཞོན་ནུའི་ཤིང་རྟ་བཤམས་ཏེ་རྒྱན་གྱིས་བརྒྱན་ནས་བཀྲ་ཤིས་ཐམས་ཅད་བཤམས་ཏེ་རྒྱལ་པོ་ཟས་གཙང་མས་གཞོན་ནུ་པང་དུ་བླངས་ནས་བྲམ་ཟེ་དང ། གྲོང་
103a
༄#། །རྡལ་བ་དང ། ཚོང་དཔོན་དང ། ཁྱིམ་བདག་དང ། བློན་པོ་དང ། ཁམས་ཀྱི་རྒྱལ་པོ་དང ། སྒོ་བ་དང ། འཁོར་གྱི་མི་དང ། མཛའ་བཤེས་དང ། ཉེ་དུས་བསྐོར་ཏེ་སྲང་དང ། ལམ་གྱི་བཞི་མདོ་དང ། སུམ་མདོ་དང ། ཚོང་དུས་རྒྱན་ཚད་མེད་པས་བརྒྱན་པ་དག་ནས་བདུག་སྤོས་དྲི་ཞིམ་པོས་ནི་བདུགས། མེ་ཏོག་སིལ་མ་ནི། གཏོར། རྟ་དང ། གླང་པོ་ཆེ་དང ། ཤིང་རྟ་དང ། རྐང་ཐང་གི་བུན་ལོང་ནི་ཆེར་གྱུར། གདུགས་དང ། རྒྱལ་མཚན་དང ། བ་དན་ནི་བསྒྲེང ། སིལ་སྙན་སྣ་ཚོགས་ཀྱི་སྒྲ་ནི་ཕྱུང་སྟེ་སོང་བར་གྱུར་ཏོ། །དེའི་ཚེ་ལྷ་བརྒྱ་སྟོང་དག་གིས་བྱང་ཆུབ་སེམས་དཔའི་ཤིང་རྟ་དྲངས་ཏེ་ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་དུ་མས་ནམ་མཁའི་དཀྱིལ་ནས་མེ་ཏོག་གི་ཆར་ཕབ་སྟེ། སིལ་སྙན་སྒྲ་འབྱིན་པར་གྱུར་ཏོ། །དགེ་སློང་དག་།དེ་ལྟར་རྒྱལ་པོ་ཟས་གཙང་མས་རྒྱལ་པོའི་བཀོད་པ་ཆེན་པོ་དང ། རྒྱལ་པོའི་ཕུན་སུམ་ཚོགས་པ་ཆེན་པོ་དང ། རྒྱལ་པོའི་བྱིན་ཆེན་པོས་གཞོན་ནུ་དེ་ཁྱེར་ཏེ་ལྷ་ཁང་དུ་ཕྱིན་ཏོ། །དེ་ནས་བྱང་ཆུབ་སེམས་དཔས་ལྷ་ཁང་དེར་རྐང་པ་གཡས་པའི་མཐིལ་བཞག་པ་དང ། དེ་ནས་ལྷའི་གཟུགས་སེམས་མེད་པ་དེ་དག་འདི་ལྟ་སྟེ། གུ་ལང་དང ། སྐེམ་བྱེད་དང ། ལུས་ངན་དང ། ཟླ་བ་དང ། ཉི་མ་དང ། རྣམ་ཐོས་ཀྱི་བུ་དང ། བརྒྱ་བྱིན་དང ། ཚངས་
103b
པ་དང ། འཇིག་རྟེན་སྐྱོང་བ་ལ་སོགས་པའི་གཟུགས་ཐམས་ཅད་ཀྱང་རང་རང་གི་གནས་ནས་ལངས་ཏེ་བྱང་ཆུབ་སེམས་དཔའི་རྐང་པ་ལ་ཕྱག་འཚལ་བར་གྱུར་ཏོ། །དེའི་ཚེ་ལྷ་དང་མི་བརྒྱ་སྟོང་ནི་ཀྱེ་མ་ཨ་ལ་ལ་ཞེས་བྱ་བ་དང ། ཅ་ཅོ་དང ། ག་ཞའི་སྒྲ་བརྒྱ་སྟོང་མང་པོ་འབྱིན་པར་གྱུར་ཏོ། །སེར་སྐྱའི་གནས་ཀྱི་གྲོང་ཁྱེར་ཆེན་པོ་དམ་པ་དེ་ཐམས་ཅད་ཀྱང་རྣམ་པ་དྲུག་ཏུ་གཡོས་སོ། །ལྷའི་མེ་ཏོག་གི་ཆར་ཡང་མངོན་པར་བབ་བོ། །ལྷའི་སིལ་སྙན་བརྒྱ་སྟོང་དུམ་དག་ཀྱང་མ་དཀྲོལ་བར་སྒྲ་འབྱིན་པར་གྱུར་ཏོ། །ལྷ་གང་དག་གི་གཟུགས་གང་ཡིན་པ་དེ་དག་ཐམས་ཅད་ཀྱང་རང་རང་གི་གཟུགས་བསྟན་ནས་ཚིགས་སུ་བཅང་པ་འདི་དག་སྨྲ་བར་གྱུར་ཏོ། །རི་རྒྱལ་རི་མཆོག་རི་རབ་ནམ་ཡང་ཡུངས་ཀར་འབྲུ་ལ་ཕྱག་མི་འཚལ། རྒྱ་མཚོ་ཀླུ་རྗེ་གནས་ནི་ནམ་ཡང་བ་རྗེས་ཆུ་ལ་ཕྱག་མི་འཚལ། །ཉི་ཟླ་འོད་བྱེད་སྲིན་བུ་མེ་ཁྱེར་འོད་བྱེད་དེ་ལ་ཕྱག་མི་འཚལ། །བསོད་ནམས་ཤེས་རབ་རིགས་བྱུང་ལེགས་ལྡན་ལྷ་རྣམས་གང་ལའང་ཕྱག་མི་བཞེས། །ཡུངས་འབྲུ་བ་རྗེས་ཆུ་དང་སྲིན་བུ་མེ་ཁྱེར་འདྲ་བར་གྱུར་པ་ནི། །སྟོང་གསུམ་འདི་ན་ལྷ་མི་གང་ཡང་རུང་སྟེ་ང་རྒྱལ་གནས་པ་ལགས། །རི་རབ་རྒྱ་མཚོ་ཉི་ཟླ་འདྲ་བ་འཇིག་རྟེན་རང་བྱུང་དམ་པ་སྟེ། །དེ་ལ་འཇིག་རྟེན་ཕྱག་འཚལ་བ་ནི་མཐོ་རིས་མྱ་ངན་འདས་པ་འཐོབ། །བྱང་ཆུབ་སེམས་དཔའ་ལྷ་ཁང་དུ་ཞུགས་པ་དེ་བསྟན་པའི་ཚེ་
104a
༄#། །ལྷའི་བུ་བརྒྱ་སྟོང་ཕྲག་སུམ་ཅུ་རྩ་གཉིས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དགེ་སློང་དག་།བྱང་ཆུབ་སེམས་དཔའ་ལྷ་ཁང་དུ་ཁྱེར་བའི་ཚེ་བཏང་སྙོམས་སུ་བཞག་པའི་རྐྱེན་ནི། དེ་ཡིན། རྒྱུ་ནི་དེ་ཡིན་ནོ། །ལྷ་ཁང་དུ་ཁྱེར་པའི་ལེའུ་སྟེ། བརྒྱད་པའོ།། །།དགེ་སློང་དག་།དེ་ནས་བྲམ་ཟེ་མདུན་ན་འདོན་འཆར་པོ་ཞེས་བྱ་བ་འཆར་འགྲོའི་ཕ་བྲམ་ཟེ་ལྔ་བརྒྱ་ཙམ་གྱིས་བསྐོར་ཏེ་སྐར་མ་མེ་བཞི་འདས་ནས་ནག་པ་ལ་བབ་པའི་ཚེ་རྒྱལ་པོ་ཟས་གཙང་མའི་དྲུང་དུ་ཕྱིན་ནས་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། ད་ནི་གཞོན་ནུའི་རྒྱན་མཛད་པའི་རིགས་སོ། །རྒྱལ་པོས་སྨྲས་པ། ལེགས་ཀྱིས་བྱེད་དུ་ཆུག་ཅིག་།དེའི་ཚེ་རྒྱལ་པོ་ཟས་གཙང་མ་དང ། ཤཱཀྱ་ལྔ་བརྒྱ་ཙམ་གྱིས་རྒྱན་གྱི་རྣམ་པ་ལྔ་བརྒྱ་ཙམ་བྱེད་དུ་བཅུག་སྟེ། འདི་ལྟར་ལག་པའི་རྒྱན་དག་དང ། རྐང་པའི་རྒྱན་དག་དང ། མགོའི་རྒྱན་དག་དང ། མགུལ་གྱི་རྒྱན་དག་དང ། སོར་གདུབ་དག་དང ། རྣ་རྒྱན་དག་དང ། དཔུང་རྒྱན་དག་དང ། གསེར་གྱི་སྐ་རགས་དག་དང ། གསེར་སྐུད་དག་དང ། དྲིལ་བུ་གཡེར་ཀའི་དྲ་བ་དག་དང ། རིན་པོ་ཆེའི་དྲ་བ་དག་དང ། ལྷམ་རིན་པོ་ཆེས་སྤྲས་པ་དག་དང ། དོ་ཤལ་རིན་པོ་ཆེ་སྣ་ཚོགས་ཀྱིས་བརྒྱན་པ་དག་དང ། གདུ་བུ་རྒྱན་ཅན་དག་དང ། མགུལ་གདུབ་དག་
104b
དང ། ཅོད་པན་དག་ཀྱང་བྱེད་དུ་བཅུག་སྟེ་ཟིན་ནས་སྐར་མ་རྒྱལ་དང་ལྡན་པའི་ཚེ་ཤཱ་ཀྱ་དེ་དག་རྒྱལ་པོ་ཟས་གཙང་མས་དྲུང་དུ་དོང་ནས་འདི་སྐད་ཅེས་སྨྲས་སོ། །ལྷ། གཞོན་ནུ་བརྒྱན་དུ་གསོལ་རྒྱལ་པོས་སྨྲས་པ། ཁྱེད་ཀྱིས་གཞོན་ནུ་ལ་བརྒྱན་པ་དང ། མཆོད་པ་བྱས་པས་ཆོག་གི་།ངས་གཞོན་ནུའི་རྒྱན་ཐམས་ཅད་བྱེད་དུ་བཅུག་གོ་།སྨྲས་པ། བདག་ཅག་གི་རྒྱན་འདི་དག་གཞོན་ནུའི་སྐུ་ལ་གདུགས་མཚན་བདུན་ཞིག་གདགས་སུ་གསོལ། དེ་ལྟར་གནང་ན་བདག་ཅག་གིས་སུག་ལས་བགྱིས་པའང་དོན་མཆིས་པར་འགྱུར་རོ། །དེའི་ཚེ་ནམ་ལངས་ཏེ་ཉི་མ་ཤར་བ་དང ། བྱང་ཆུབ་སེམས་དཔའ་སྐྱེད་མོས་ཚལ་བཀོད་པ་དྲི་མ་མེད་པ་ཞེས་བྱ་བ་དེར་ཞུགས་སོ། །དེའི་ཚེ་སྐྱེ་རྒུའི་བདག་མོ་ཆེན་མོ་གཽ་ཏ་མཱིས་བྱང་ཆུབ་སེམས་དཔའ་པང་དུ་བླངས་སོ། །བུད་མེད་བརྒྱད་ཁྲིས་ཀྱང་བྱང་ཆུབ་སེམས་དཔའ་བསུ་སྟེ་གདོང་དུ་ལྟ་ཞིང་འཁོད་པར་གྱུར་ཏོ། །བུ་མོ་སྟོང་ཕྲག་བཅུས་བྱང་ཆུབ་སེམས་དཔའ་བསུ་སྟེ་གདོང་དུ་ལྟ་ཞིང་འཁོད་པར་གྱུར་ཏོ། །ཤཱཀྱ་སྟོང་ཕྲག་བཅུས་བྱང་ཆུབ་སེམས་དཔའ་བསུ་སྟེ་གདོང་དུ་ལྟ་ཞིང་འཁོད་པར་གྱུར་ཏོ། །བྲམ་ཟེ་ལྔ་སྟོང་ཡང་ལྷགས་ནས་བྱང་ཆུབ་སེམས་དཔའི་གདོང་དུ་ལྟ་ཞིང་འཁོད་པར་གྱུར་ཏོ། །དེ་ནས་ཤཱཀྱའི་རྒྱལ་པོ་བཟང་པོ་ཞེས་བྱ་བས་རྒྱན་ཇི་སྙེད་ཅིག་བྱས་པ་དེ་དག་བྱང་ཆུབ་སེམས་དཔའི་ལུས་ལ་བཏགས་ཏེ། དེ་དག་ལུས་ལ་བཏགས་མ་
105a
༄#། །ཐག་ཏུ་བྱང་ཆུབ་སེམས་དཔའི་ལུས་ཀྱི་འོད་ཀྱིས་མོག་མོག་པོར་གྱུར་ནས་ལྷམ་མེར་མ་གྱུར། ལྷན་ནེར་མ་གྱུར། ལྷང་ངེར་མ་གྱུར་ཏེ། འདི་ལྟ་སྟེ། དཔེར་ན། ཛམྦུའི་ཆུ་བོའི་གསེར་གྱི་གན་དུ་སྣག་ཚའི་ཡུག་གཞག་ན་ལྷམ་མེར་མི་རུང ། ལྷན་ནེར་མི་རུང ། ལྷང་ངེར་མི་རུང་ངོ ། །དེ་བཞིན་དུ་རྒྱན་དེ་དག་ཀྱང་བྱང་ཆུབ་སེམས་དཔའི་ལུས་ཀྱི་འོད་ཀྱིས་ཕོག་ན་ལྷམ་མེར་མི་རུང ། ལྷན་ནེར་མི་རུང ། ལྷང་ངེར་མི་རུང་ངོ ། །དེ་བཞིན་དུ་རྒྱན་གྱི་རྣམ་པ་གང་དང་གང་བྱང་ཆུབ་སེམས་དཔའི་ལུས་ལ་བཏགས་པ་དེ་དང་དེ་དག་མོག་མོག་པོར་གྱུར་ཏེ། འདི་ལྟ་སྟེ། དཔེར་ན། ཛམྦུའི་ཆུ་བོའི་གསེར་གྱི་གན་དུ་སྣག་ཚའི་ཡུག་བཞག་པ་བཞིན་ནོ། །དེའི་ཚེ་སྐྱེད་མོས་ཚལ་གྱི་ལྷ་མོ་དྲི་མ་མེད་པ་ཞེས་བྱ་བ་འདུག་པ་དེས་ལུས་ཆེན་པོ་བསྟན་ནས་མདུན་དུ་འདུག་སྟེ་རྒྱལ་པོ་ཟས་གཙང་མ་དང ། ཤཱཀྱའི་ཚོགས་དེ་དག་ལ་ཚིགས་སུ་བཅད་དེ་སྨྲས་པ། སྟོང་གསུམ་ས་འདི་གྲོང་ཁྱེར་གྲོང་རྡལ་བཅས་པ་ཀུན། །གལ་ཏེ་གསེར་གྱིས་གང་ཁྱབ་དྲི་མེད་མཛེས་གྱུར་ཀྱང ། །ཛམྦུའི་ཆུ་བོའི་གསེར་ཟེགས་གཅིག་གིས་ཟིལ་བརླག་སྟེ། །གསེར་གཞན་དག་ནི་དཔལ་དང་བྲལ་ཞིང་གསལ་མི་འགྱུར། །ས་འདི་མཐའ་དག་ཛམྦུའི་ཀླུང་གི་གསེར་ཁེབས་ཀྱང ། །འདྲེན་པ་དཔལ་རྒྱས་སྤུ་ཁུང་འོད་ཕྱུང་ཟིལ་གྱིས་ནོན། །མི་སྣང་མི་གསལ་
105b
མི་མཛེས་འོད་ཀྱང་ཉམས་གྱུར་ཅིང ། །བདེ་གཤེགས་སྐྱོབ་པའི་དྲུང་ན་སྣག་ཚ་བཞིན་དུ་འགྱུར། །ཡོན་ཏན་བརྒྱས་གང་འདི་ནི་རང་གི་གཟི་ཡིས་བརྒྱན། །དེ་ནི་རྒྱན་གྱིས་མཛེས་མིན་ཤིན་ཏུ་དྲི་མེད་སྐུ། །ཉི་ཟླའི་འོད་དང་སྐར་མ་ནོར་བུ་མ་དག་དང ། །བརྒྱ་བྱིན་ཚངས་པའི་འོད་ཀྱང་དཔའ་སྟུག་མདུན་མི་གསལ། །གང་སྐུ་སྔོན་གྱི་དགེ་བའི་འབྲས་བུས་མཚན་སྤྲས་པ། །དེ་ལ་གཞན་གྱིས་བྱས་པའི་རྒྱན་ཕལ་ཅི་ཞིག་དགོས། །རྒྱན་རྣམས་ཕྲོལ་འོར་མི་མཁས་མཁས་མཛད་མ་གཙེ་ཞིག་།བློ་གྲོས་མཆོག་མཛད་འདི་ནི་བཅོས་མའི་རྒྱན་མི་བཞེད། ། འདུན་པ་དེ་ནི་རྒྱལ་ཁབ་སྲས་དང་ལྷན་ཅིག་བཙས། །དྲི་མེད་རབ་ཏུ་མཛེས་པའི་རྒྱན་རྣམས་འབུངས་དེ་སྩོལ། །ཤཱཀྱའི་རིགས་ནི་རྒྱ་ཆེན་མཆོག་ཏུ་འགྱུར་སྙམ་ནས། །ཤཱཀྱ་དག་ནི་ཡིད་དགའ་མགུ་ཞིང་ངོ་མཚར་གྱུར། །ལྷ་མོ་དེས་དེ་སྐད་ཅེས་སྨྲས་ནས་ལྷའི་མེ་ཏོག་དག་གིས་བྱང་ཆུབ་སེམས་དཔའ་དེ་ལ་མངོན་པར་གཏོར་ཏེ་དེ་ཉིད་དུ་མི་སྣང་བར་གྱུར་ཏོ། །རྒྱན་གྱི་ལེའུ་སྟེ།་དགུ་པའོ།། །།དགེ་སློང་དག་།དེ་ལྟར་གཞོན་ནུ་དེ་ཡ་ཟད་སྐྱེས་པ་དང ། བཀྲ་ཤིས་བརྒྱ་སྟོང་བྱས་ནས་ཁྱེའུ་སྟོང་ཕྲག་བཅུ་དང ། བུ་མོ་སྟོང་ཕྲག་བཅུས་ཡོངས་སུ་བསྐོར་ཅིང་མདུན་དུ་བདར་ཏེ་ཡི་གེའི་གྲར་འཇུག་པར་བྱས་སོ། །བཟའ་བ་དང ། བཅའ་བ་དང ། མྱང་བས་གང་བའི་ཤིང་རྟ་སྟོང་ཕྲག་བཅུ་དང ། གསེར་དངུལ་དང་དབྱིག་གིས་གང་
106a
༄#། །བའི་ཤིང་རྟ་སྟོང་ཕྲག་བཅུ་དྲངས་ཏེ། སེར་སྐྱའི་གནས་ཀྱི་གྲོང་ཁྱེར་ཆེན་པོའི་སྲང་དང ། གྲོང་བར་དང ། ཚོང་དུས་ཀྱི་ཕྱོགས་གང་ཡིན་པ་དག་ཏུ་གཏོར་ཏོ། །མངོན་པར་བྱིན་ནོ། །སིལ་སྙན་འབུམ་ཕྲག་བརྒྱད་ཀྱི་སྒྲའང་ཕྱུང་ཞིང་མེ་ཏོག་གི་ཆར་ཆེན་པོའང་བབ་བོ། །སྟེགས་བུ་དང ། སྒོ་གང་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁང་བཟང་དག་གི་སྟེང་ནས་བུ་མོ་བརྒྱ་སྟོང་རྒྱན་ཐམས་ཅད་ཀྱིས་བརྒྱན་པ་དག་བྱང་ཆུབ་སེམས་དཔའ་ལ་ལྟ་ཞིང་མེ་ཏོག་དག་འཐོར་བར་གྱུར་ཏོ། །ལྷའི་བུ་མོ་སྟོང་ཕྲག་བརྒྱད་ནི་རྒྱན་རྣམས་ཀྱིས་ལྷུག་ལྷུག་པོར་བརྒྱན་ཏེ། རིན་པོ་ཆེ་བཟང་བྱེད་ཐོགས་ནས་ལམ་འཕྱག་ཅིང་བྱང་ཆུབ་སེམས་དཔའི་མདུན་ནས་འདོད་བར་གྱུར་ཏོ། །ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་རྣམས་ཀྱང་ལུས་ཕྱེད་ཕྱུང་ཞིང་ནམ་མཁའི་དཀྱིལ་ནས་མེ་ཏོག་དང ། དར་གྱི་ལྡ་ལྡི་བྲེ་བར་གྱུར་ཏོ། །ཤཱཀྱའི་ཚོགས་ཐམས་ཅད་ཀྱང་རྒྱལ་པོ་ཟས་གཙང་མའི་མདུན་དུ་བདར་ནས་བྱང་ཆུབ་སེམས་དཔའི་མདུན་ནས་འདོང་བར་གྱུར་ཏེ།་བཀོད་པའི་རྣམ་པ་འདི་ལྟ་བུ་འདིས་བྱང་ཆུབ་སེམས་དཔའ་ཡི་གེའི་གྲཝར་ཞུགས་པར་གྱུར་ཏོ། །བྱང་ཆུབ་སེམས་དཔའ་ཡི་གེའི་གྲཝར་ཞུགས་མ་ཐག་ཏུ་དེ་ནས་བྱིས་
106b
པའི་སློབ་དཔོན་ཀུན་གྱི་བཤེས་གཉེན་ཞེས་བྱ་བས་བྱང་ཆུབ་སེམས་དཔའི་དཔལ་དང་གཟི་བརྗིད་མ་བཟོད་དེ་ཁས་བུབ་ཏུ་འགྱེལ་ཏོ། །དེ་ལྟར་འགྱེལ་བ་དང ། དགའ་ལྡན་གྱི་རིས་ཀྱི་ལྷའི་བུ་ཡན་ལག་བཟང་པོ་ཞེས་བྱ་བས་མཐོང་ནས་ལག་པ་གཡས་པས་བཏེག་སྟེ་བསླང་ངོ ། །བསླེངས་ནས་ཀྱང་དེ་ནམ་མཁའི་དཀྱིལ་ན་འདུག་སྟེ། རྒྱལ་པོ་ཟས་གཙང་མ་དང་སྐྱེ་བོ་ཕལ་པོ་ཆེ་དེ་དག་ལ་ཚིགས་སུ་བཅད་དེ་སྨྲས་པ། མི་ཡི་འཇིག་རྟེན་འདི་ན་བསྟན་བཅོས་གང་ཡོད་པ། །གྲངས་དང་ཡི་གེ་རྩིས་དང་ཁམས་ཀྱི་རྒྱུད་དག་དང ། །འཇིག་རྟེན་བཟོ་ཡི་སྦྱོར་བ་ཚད་མེད་མང་བ་དག་།བསྐལ་པ་བྱེ་མང་སྔོན་ཆད་འདིས་ནི་དེ་དག་བསླབ། །འོན་ཀྱང་སྐྱེ་བོའི་རྗེས་སུ་མཐུན་པ་ཙམ་མཛད་དེ། །བྱིས་པ་མང་པོ་ཐེག་པ་མཆོག་ལ་སྨིན་མཛད་དང ། །སེམས་ཅན་ཁྲག་ཁྲིག་གཞན་ཡང་འཆི་མེད་དགོད་པའི་ཕྱིར། །ཤིན་ཏུ་ལོབས་པའང་བསླབ་ཕྱིར་ཡི་གེའི་གྲཝར་ཞུགས་སོ། །འཇིག་རྟེན་འདས་པའི་བདེན་བཞི་ལམ་གྱི་ཚུལ་མཁྱེན་ཅིང ། །རྒྱུ་ལ་བརྟེན་ནས་ཇི་ལྟར་འབྱུང་བ་དེ་ལའང་མཁས། །ཇི་ལྟར་འདུས་བྱས་འགགས་ཟད་བསིལ་འགྱུར་དེ་ཚུལ་ཡང ། །མཁྱེན་ན་ཡི་གེའི་བསྟན་བཅོས་ཙམ་ལྟ་ཅིས་མི་མཁྱེན། །འཇིག་རྟེན་གསུམ་ན་འདི་ཡི་སློབ་དཔོན་གང་ན་མེད། །ལྷ་དང་མིར་བཅས་ནང་ན་འདི་ཉིད་གཙོ་བོ་སྟེ། །བསྐལ་པ་བྱེ་མང་སྔོན་ཆད་གང་ལ་འདིས་བསླབ་པའི། །
107a
༄#། །ཡི་གེ་དེ་དག་མིང་ཡང་ཁྱེད་ཀྱིས་ཤེས་མི་འགྱུར། །འགྲོ་བ་རྣམས་ཀྱི་སེམས་རྒྱུད་སྣ་ཚོགས་གང་འབྱུང་བ། །སྐད་ཅིག་གཅིག་གིས་སེམས་ཅན་དག་པ་འདིས་མཁྱེན་ཏེ། །གཟུགས་མེད་བལྟར་མི་སྣང་བའི་ཚུལ་ཡང་རབ་མཁས་ན། །ཡི་གེ་གཟུགས་ཡོད་བལྟར་སྣང་དག་ལྟ་སྨོས་ཅི་དགོས། །དེ་སྐད་ཅེས་སྨྲས་པ་དང ། ལྷའི་བུ་དེས་བྱང་ཆུབ་སེམས་དཔའ་ལ་ལྷའི་མེ་ཏོག་མང་པོས་གཏོར་ཏེ་དེ་ཉིད་དུ་མི་སྣང་བར་གྱུར་ཏོ། །དེ་ནས་མ་མ་དང་བྲན་མོའི་འཁོར་བཀོད་དེ་རྒྱལ་པོ་ཟས་གཙང་མ་ལ་སོགས་པ་ཤཱཀྱ་གཞན་ནི་ཕྱིར་དོང་ངོ ། །དེ་ནས་བྱང་ཆུབ་སེམས་དཔའ་ཙནྡན་སྦྲུལ་གྱི་སྙིང་པོ་ལས་བྱས་པའི་ཡི་གེ་ཤིང་ལྷའི་ཚོན་གྱིས་བྱུག་པ། གསེར་གྱི་ཡང་མིག་གིས་བཏགས་པ།་མཐའ་མ་ནོར་བུ་རིན་པོ་ཆེས་ཀུན་ནས་བརྒྱན་པ་ཐོགས་ཏེ་སློབ་དཔོན་ཀུན་གྱི་བཤེས་གཉེན་ལ་འདི་སྐད་ཅེས་སྨྲས་སོ། །ཀྱེ་མཁན་པོས་བདག་ལ་ཡི་གེ་གང་ཞིག་བསླབ། ཚངས་པའི་ཡི་གེའམ། ཁ་རོ་སྟིའི་ཡི་གེའམ། པདྨའི་སྙིང་པོའི་ཡི་གེའམ། ཨངྒའི་ཡི་གེའམ། མངྒའི་ཡི་གེའམ། ཡུལ་མ་ག་དྷའི་ཡི་གེའམ། བཀྲ་ཤིས་པའི་ཡི་གེའམ། སོར་མོ་པའི་ཡི་གེའམ། ཤ་ཀ་ནིའི་ཡི་གེའམ། ཡ་བ་ནའི་ཡི་གེའམ། བག་ལེ་བའི་ཡི་གེའམ། པ་རུ་ཤའི་ཡི་གེའམ། འགྲོ་ལྡིང་བའི་ཡི་གེའམ། ཀི་ར་ཏའི་ཡི་གེའམ། ལྷོ་
107b
ཕྱོགས་པའི་ཡི་གེའམ། དྲག་ཤུལ་ཅན་གྱི་ཡི་གེའམ། གྲངས་ཀྱི་ཡི་གེའམ། སྤྱིའུ་ཚུགས་པའི་ཡི་གེའམ། རྗེས་སུ་མཐུན་པའི་ཡི་གེའམ། བྲུ་ཤའི་ཡི་གེའམ། ཀ་ཤའི་ཡི་གེའམ། རྒྱའི་ཡི་གེའམ། ཕུ་ནའི་ཡི་གེའམ། ཧུ་ནའི་ཡི་གེའམ། ཡི་གེ་འབྲིང་དང་རྒྱས་པར་བྲི་བའི་ཡི་གེའམ། རྒྱལ་གྱི་ཡི་གེའམ། ལྷའི་ཡི་གེའམ། ཀླུའི་ཡི་གེའམ། གནོད་སྦྱིན་གྱི་ཡི་གེའམ། དྲི་ཟའི་ཡི་གེའམ། མི་འམ་ཅིའི་ཡི་གེའམ། ལྟོ་འཕྱེ་ཆེན་པོའི་ཡི་གེའམ། ལྷ་མ་ཡིན་གྱི་ཡི་གེའམ། ནམ་མཁའ་ལྡིང་གི་ཡི་གེའམ། རི་དྭགས་ཀྱི་འཁོར་ལོ་པའི་ཡི་གེའམ།་ཁཝ་སྐད་ཤེས་པའི་ཡི་གེའམ། ས་བླའི་ལྷའི་ཡི་གེའམ། བར་སྣང་གི་ལྷའི་ཡི་གེའམ། ནུབ་ཀྱི་བ་གླང་སྤྱོད་ཀྱི་ཡི་གེའམ། བྱང་གི་སྒྲ་མི་སྙན་གྱི་ཡི་གེའམ། ཤར་གྱི་ལུས་འཕགས་པོའི་ཡི་གེའམ། གདེག་པའི་ཡི་གེའམ། གཞག་པའི་ཡི་གེའམ། བསྣན་པའི་ཡི་གེའམ། རྒྱ་མཚོའི་ཡི་གེའམ། རྡོ་རྗེའི་ཡི་གེའམ། སྤྲིང་ཡིག་དང ། ལན་གྱི་ཡི་གེའམ།་རྣམ་འཐོར་གྱི་ཡི་གེའམ། རིངས་མེད་ཀྱི་ཡི་གེའམ། བསྟན་བཅོས་བསྐོར་བའི་ཡི་གེའམ། རྩིས་བསྐོར་བའི་ཡི་གེའམ། གདེག་པ་བསྐོར་བའི་ཡི་གེའམ། གཞག་པ་བསྐོར་བའི་ཡི་གེའམ། རྐང་པས་བསྐོར་བའི་ཡི་གེའམ། ཚིག་ལན་ལན་གཉིས་སུ་གདབ་པའི་ཚིག་གི་མཚམས་ཀྱི་ཡི་གེའམ། ཚིག་གི་མཚམས་བཅུར་བརྒྱུད་པའི་བར་
108a
༄#། །གྱི་ཡི་གེའམ། བླ་ཐབས་སུ་བསྣན་པའི་ཡི་གེའམ། སྒྲ་ཐམས་ཅད་ཀུན་ཏུ་སྡུད་པའི་ཡི་གེའམ། རིག་པ་དང་མཐུན་པའི་ཡི་གེའམ། རྣམ་པར་འདྲེས་པའི་ཡི་གེའམ། དྲང་སྲོང་གི་དཀའ་ཐུབ་སྤྱད་པའི་ཡི་གེའམ། ལྷ་ངེས་པའི་ཡི་གེའམ། ས་བལྟ་བའི་ཡི་གེའམ། ནམ་མཁའ་བལྟ་བའི་ཡི་གེའམ། སྨན་ཐམས་ཅད་ཀྱི་རྒྱུ་མཐུན་པའི་ཡི་གེའམ། སྙིང་པོ་ཐམས་ཅད་ཀུན་ཏུ་སྡུད་པའི་ཡི་གེའམ། འབྱུང་པོ་ཐམས་ཅད་ཀྱི་སྒྲ་སྡུད་པའི་ཡི་གེའམ། ཀྱེ་སློབ་དཔོན། ཡི་གེ་དྲུག་ཅུ་རྩ་བཞི་པོ་དེ་དག་གི་ནང་ནས་བདག་ལ་གང་བསླབ། དེ་ནས་བྱིས་པའི་སློབ་དཔོན་ཀུན་གྱི་བཤེས་གཉེན་ངོ་མཚར་དུ་གྱུར་ནས་བཞིན་གྱི་འཛུམ་ཕྱུང་སྟེ་ང་རྒྱལ་དང ། དྲེགས་པ་དང ། རྒྱགས་པ་མེད་པར་བྱས་ནས་ཚིགས་སུ་བཅད་པ་འདི་དག་སྨྲས་སོ། །སེམས་ཅན་དག་པ་ངོ་མཚར་ཆེ། །བསྟན་བཅོས་ཀུན་ལ་བསླབ་གྱུར་ཀྱང ། །འཇིག་རྟེན་འཇིག་རྟེན་རྗེས་བསྙེག་ཕྱིར། །ཡི་གེའི་གྲཝར་ནི་བྱོན་པར་གྱུར། །ཡི་གེ་གང་གི་མིང་དག་ཀྱང ། །བདག་གིས་ཤེས་པར་མ་གྱུར་པ། །དེ་ལ་འདི་ལྟ་བྱང་གྱུར་ཀྱང ། །ཡི་གེ་སློབ་པའི་གྲཝར་བྱོན་ཏོ། །འདི་ཡི་ཞལ་ནི་མཐོང་མོད་ཀྱི། །སྤྱི་གཙུག་འཕགས་པ་བལྟར་མི་སྣང ། །ཡི་གེའི་ཤེས་རབ་མཐར་ཕྱིན་ན། །བདག་གིས་འདི་ཀོ་ཇི་ལྟར་བསླབ། །ལྷ་ཡི་ལྷ་ཆེན་ལྷ་འདི་ནི། །ལྷ་རྣམས་ཀུན་གྱི་
108b
མཆོག་མཁས་པ། །ཁྱད་པར་འཕགས་ཤིང་མཉམ་པ་མེད། །འཇིག་རྟེན་གང་ཟག་དོ་ཟླ་མེད། །བདག་ཀྱང་འདི་ཉིད་མཐུ་ཡིས་ན། །ཤེས་རབ་ཐབས་ཀྱི་ཁྱད་པར་གྱིས། །འཇིག་རྟེན་ཀུན་གྱི་དཔུང་གཉེན་པོ། །ལོབས་པ་འདི་ནི་བསླབ་པར་བྱ། །དགེ་སློང་དག་།དེ་ལྟར་བྱིས་པ་སྟོང་ཕྲག་བཅུ་པོ་དེ་དག་བྱང་ཆུབ་སེམས་དཔའ་དང་ལྷན་ཅིག་ཏུ་ཡི་གེ་སློབ་པའི་ཚེ་བྱང་ཆུབ་སེམས་དཔའི་བྱིན་གྱི་རླབས་ཀྱིས་བྱིས་པ་དེ་དག་ཡི་གེའི་ཕྱི་མོ་སློབ་ཅིང་གང་གི་ཚེ་ཨ་ཞེས་བརྗོད་པ་དེའི་ཚེ་འདུ་བྱེད་ཐམས་ཅད་མི་རྟག་པའི་སྒྲ་བྱུང་ངོ ། །ཱ་ཞེས་བརྗོད་པ་དང་བདག་མེད་པའི་སྒྲ་བྱུང་ངོ ། །ི་ཞེས་བརྗོད་པ་དང་དབང་པོ་ཤིན་ཏུ་ཡངས་པའི་སྒྲ་བྱུང་ངོ ། །ཱི་ཞེས་བརྗོད་པ་དང་འགྲོ་བ་ནི་ཡམས་ཀྱི་ནད་མང་བ་ཞེས་བྱ་བའི་སྒྲ་བྱུང་ངོ ། །ུ་ཞེས་བརྗོད་པ་དང་འགྲོ་བ་ནི་འཚེ་བ་མང་ངོ་ཞེས་བྱ་བའི་སྒྲ་བྱུང་ངོ ། །ཱུ་ཞེས་བརྗོད་པ་དང་འགྲོ་བ་ནི་དམའ་བའོ་ཞེས་བྱ་བའི་སྒྲ་བྱུང་ངོ ། །ེ་ཞེས་བརྗོད་པ་དང་ཉེས་པ་ནི་བཙལ་བ་ལས་བྱུང་ངོ་ཞེས་བྱ་བའི་སྒྲ་བྱུང་ངོ ། །ཻ་ཞེས་བརྗོད་པ་དང་འཕགས་པའི་ལམ་ནི་དགེའོ་ཞེས་བྱ་བའི་སྒྲ་བྱུང་ངོ ། །ོ་ཞེས་བརྗོད་པ་དང་ཆུ་བོ་ལས་རྒལ་བའི་སྒྲ་བྱུང་ངོ ། །ཽ་ཞེས་བརྗོད་པ་དང་རྫུབ་པའི་སྒྲ་བྱུང་ངོ ། །ཾ་ཞེས་བརྗོད་པ་དང་བདག་གི་བ་མི་འབྱུང་ཞེས་བྱ་བའི་སྒྲ་བྱུང་ངོ ། །ཿ ་ཞེས་བརྗོད་པ་དང་ནུབ་པ་ཞེས་བྱ་བའི་སྒྲ་བྱུང་ངོ ། །ཀ་
109a
༄#། །ཞེས་བརྗོད་པ་དང་ལས་ཀྱི་རྣམ་པར་སྨྲིན་པ་ལ་འཇུག་པ་ཞེས་བྱ་བའི་སྒྲ་བྱུང་ངོ ། །ཁ་ཞེས་བརྗོད་པ་དང་ཆོས་ཐམས་ཅད་ནམ་མཁའ་དང་མཉམ་ཞེས་བྱ་བའི་སྒྲ་བྱུང་ངོ ། །ག་ཞེས་བརྗོད་པ་དང་ཆོས་ཟབ་ཅེས་བྱ་བའི་སྒྲ་བྱུང་ངོ ། །གྷ་ཞེས་བརྗོད་པ་དང་མ་རིག་པ་དང ། གཏི་མུག་གི་མུན་པ་དང ། ལིང་ཏོག་སྟུག་པོ་བསལ་ཞེས་བྱ་བའི་སྒྲ་བྱུང་ངོ ། །ང་ཞེས་བརྗོད་པ་དང་ཡན་ལག་རྣམ་པར་དག་པ་ཞེས་བྱ་བའི་སྒྲ་བྱུང་ངོ ། །ཙ་ཞེས་བརྗོད་པ་དང་འཕགས་པའི་བདེན་པ་བཞིའི་སྒྲ་བྱུང་ངོ ། །ཚ་ཞེས་བརྗོད་པ་དང་འདོད་པའི་འདོད་ཆགས་སྤངས་པའི་སྒྲ་བྱུང་ངོ ། །ཛ་ཞེས་བརྗོད་པ་དང་རྒ་ཤི་ལས་ཡང་དག་པར་འདས་པའི་སྒྲ་བྱུང་ངོ ། །ཛྷ་ཞེས་བརྗོད་པ་དང་འཆི་བྱེད་ཀྱི་རྒྱལ་མཚན་ཅན་གྱི་དཔུང་ཚར་བཅད་པའི་སྒྲ་བྱུང་ངོ ། །ཉ་ཞེས་བརྗོད་པ་དང་ཤེས་པར་བྱེད་པའི་སྒྲ་བྱུང་ངོ ། །ཊ་ཞེས་བརྗོད་པ་དང་ལམ་ཤིན་ཏུ་ཆད་པའི་སྒྲ་བྱུང་ངོ ། །ཋ་ཞེས་བརྗོད་པ་དང་དྲི་བ་བཞག་པའི་སྒྲ་བྱུང་ངོ ། །ང་ཞེས་བརྗོད་པ་དང་དཀྲུགས་མ་དང་བདུད་ཚར་གཅད་པའི་སྒྲ་བྱུང་ངོ ། །ཌྷ་ཞེས་བརྗོད་པ་དང་ཡུལ་མི་གཙང་བའི་སྒྲ་བྱུང་ངོ ། །ཎ་ཞེས་བརྗོད་པ་དང་ཉོན་མོངས་པ་ནི་ཕྲ་བ་ཞེས་བྱ་བའི་སྒྲ་བྱུང་ངོ ། །ཏ་ཞེས་བརྗོད་པ་དང་དེ་བཞིན་ཉིད་ནི་འདྲེས་པ་མེད་ཅེས་བྱ་བའི་སྒྲ་བྱུང་ངོ ། །ཐ་ཞེས་བརྗོད་པ་དང་མཐུ་སྟོབས་དང ། ཤུགས་
109b
དང ། མི་འཇིགས་པའི་སྒྲ་བྱུང་ངོ ། །དེ་ཞེས་བརྗོད་པ་དང་སྦྱིན་པ་དང ། དུལ་བ་དང ། ཡང་དག་པར་སྡོམ་པ་དང ། དེས་པའི་སྒྲ་བྱུང་ངོ ། །དྷ་ཞེས་བརྗོད་པ་དང་འཕགས་པ་རྣམས་ཀྱི་ནོར་ནི་རྣམ་པ་བདུན་ནོ་ཞེས་བྱ་བའི་སྒྲ་བྱུང་ངོ ། །ན་ཞེས་བརྗོད་པ་དང་མིང་དང་གཟུགས་ཡོངས་སུ་ཤེས་པར་བྱ་བའི་སྒྲ་བྱུང་ངོ ། །པ་ཞེས་བརྗོད་པ་དང་དོན་དམ་པའི་སྒྲ་བྱུང་ངོ ། །ཕ་ཞེས་བརྗོད་པ་དང་འབྲས་བུ་རྙེད་པ་མངོན་དུ་བྱ་བའི་སྒྲ་བྱུང་ངོ ། །བ་ཞེས་བརྗོད་པ་དང་བཅིངས་པ་ལས་རྣམ་པར་ཐར་པའི་སྒྲ་བྱུང་ངོ ། །བྷ་ཞེས་བརྗོད་པ་དང་སྲིད་པ་འཇིགས་པའི་སྒྲ་བྱུང་ངོ་མ་ཞེས་བརྗོད་པ་དང་ང་རྒྱལ་དང་རྒྱགས་པ་ཞི་བར་བྱ་བའི་སྒྲ་བྱུང་ངོ ། །ཡ་ཞེས་བརྗོད་པ་དང་ཆོས་ཇི་ལྟ་བ་བཞིན་དུ་རྟོགས་པར་བྱ་བའི་སྒྲ་བྱུང་ངོ ། །ར་ཞེས་བརྗོད་པ་དང་དགའ་བ་ལ་དགའ་བ་མེད་པ་ནི། དོན་དམ་པར་དགའ་བ་ཞེས་བྱ་བའི་སྒྲ་བྱུང་ངོ ། །ལ་ཞེས་བརྗོད་པ་དང་འཁྲི་ཤིང་ཆད་པའི་སྒྲ་བྱུང་ངོ ། །ཝ་ཞེས་བརྗོད་པ་དང་ཐེག་པ་མཆོག་གི་སྒྲ་བྱུང་ངོ ། །ཤ་ཞེས་བརྗོད་པ་དང་ཞི་གནས་དང་ལྷག་མཐོང་གི་སྒྲ་བྱུང་ངོ ། །ཥ་ཞེས་བརྗོད་པ་དང་སྐྱེ་མཆེད་དྲུག་གཞོམ་ཞིང་མངོན་པར་ཤེས་པ་དྲུག་དང་ཡེ་ཤེས་ཐོབ་པའི་སྒྲ་བྱུང་ངོ ། །ས་ཞེས་བརྗོད་པ་དང་ཐམས་ཅད་མཁྱེན་པའི་ཡེ་ཤེས་མངོན་པར་རྫོགས་པར་བྱང་ཆུབ་པར་བྱ་བའི་སྒྲ་བྱུང་ངོ ། །ཧ་ཞེས་བརྗོད་པ་དང་ཉོན་མོངས་པ་བཅོམ་ཞིང་འདོད་ཆགས་དང་བྲལ་བའི་སྒྲ་བྱུང་ངོ ། །
110a
༄#། །ཀྵ་ཞེས་བརྗོད་པ་དང་ཡི་གེའི་མཐར་ཕྱིན་ཏེ། ཆོས་ཐམས་ཅད་བརྗོད་དུ་མེད་པའོ་ཞེས་བྱ་བའི་སྒྲ་བྱུང་ངོ ། །དེ་ལྟར་བྱིས་པ་དེ་དག་ཡི་གེའི་ཕྱི་མོ་སློབ་པའི་ཚེ་བྱང་ཆུབ་སེམས་དཔའི་མཐུས་དེ་དག་ལ་སོགས་པ་ཆོས་ཀྱི་སྒོ་བརྒྱ་སྟོང་གྲངས་མེད་པ་གྱུང་བར་གྱུར་ཏེ། བྱང་ཆུབ་སེམས་དཔའ་ཡི་གེའི་གྲཝ་ན་འདུག་པའི་ཚེ་བྱིས་པ་སུམ་ཁྲི་ཉིས་སྟོང་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །བྱང་ཆུབ་སེམས་དཔའ་ལོབས་པར་གྱུར་ཀྱང་ཡི་གེའི་གྲཝར་འཇུག་པའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །ཡི་གེ་བསྟན་པའི་ལེའུ་སྟེ། བཅུ་པའོ།། །།དགེ་སློང་དག་།གཞོན་ནུ་དེ་དེ་བས་ཀྱང་ཡ་ཟད་སྐྱེས་ནས་དུས་གཞན་ཞིག་ན་གཞོན་ནུ་དེ་གཞོན་ནུ་གཞན་དག་དང ། ཞང་བློན་གྱི་བུ་དག་དང་ལྷན་ཅིག་ཏུ་ཞིང་པའི་གྲོང་ལྟ་ཞིང་དོང་སྟེ། གྲོང་བལྟས་ནས་ཞིང་བླས་ཀྱི་མཐའི་སྐྱེད་མོས་ཚལ་ཞིག་ཏུ་ཕྱིན་ཏོ། །དེ་ན་བྱང་ཆུབ་སེམས་དཔའ་གཅིག་པུ་གཉིས་སུ་མེད་པར་ཕ་ཟད་འཁྱམ་ཞིང་སོང་སོང་བ་དང ། ཛམྦུའི་ཤིང་ལྗོན་པ་མཛེས་པ་བལྟ་ན་སྡུག་པ་ཞིག་མཐོང་ནས་བྱང་ཆུབ་སེམས་དཔའ་དེའི་གྲིབ་མ་ལ་སྐྱིལ་མོ་ཀྲུང་བཅས་ཏེ་འདུག་གོ། འདུག་ནས་བྱང་ཆུབ་སེམས་དཔས་སེམས་རྩེ་གཅིག་པ་རྙེད་དེ་རྙེད་ནས་ཀྱང་སྡིག་པ་མི་དགེ་བའི་ཆོས་རྣམས་ལས་དབེན་པ།
110b
རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་བསྒྲུབས་ཏེ་གནས་སོ། །དེ་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དང་སྟེ་སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང ། བདེ་བ་ཅན་བསམ་གཏན་གཉིས་པ་བསྒྲུབས་ཏེ་གནས་སོ། །དེ་དགའ་བའི་འདོད་ཆགས་དང་བྲལ་བའི་བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་ལ་འཕགས་པ་རྣམས་ཀྱིས་གང་དེ་དྲན་པ་དང་ལྡན་པ། བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ། དགའ་བ་མེད་པའི་བསམ་གཏན་གསུམ་པ་བསྒྲུབས་ཏེ་གནས་སོ། །དེ་བདེ་བའང་སྤངས་ཏེ་སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང ། ཡིད་མི་བདེ་བའང་ནུབ་པས་བདེ་བའང་མ་ཡིན། སྡུག་བསྔལ་བའང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་བསྒྲུབས་ཏེ་གནས་སོ། །དེའི་ཚེ་ཕྱིར་རོལ་གྱི་དྲང་སྲོང་མངོན་པར་ཤེས་པ་ལྔ་ཡོད་པ། རྫུ་འཕྲུལ་དང་ལྡན་པ་ནམ་མཁའ་ལས་དོང་བ་ལྔ་ཞིག་ལྷོ་ཕྱོགས་ནས་བྱང་ཕྱོགས་ལོགས་སུ་དོང་དོང་པ་ལས་དེ་དག་ཚལ་སྟུག་པོ་དེའི་སྟེང་དུ་ཕྱིན་པ་དང ། ཕྱིར་ཕུལ་བ་ལྟར་འདོང་མ་ནུས་ནས་དེ་དག་མི་དགའ་ཞིང་བ་སྤུ་གཡོས་ཏེ་ཚིགས་སུ་བཅད་པ་འདི་
111a
༄#། །སྨྲས་སོ། །བདག་ཅག་འདི་ན་རི་རབ་ནོར་བུ་རྡོ་རྗེ་བརྩེགས་རི་ཤིན་ཏུ་རྔམས་སྟུག་པ་ཡང་ཐལ་ཕྱུང་སྟེ། །གླང་པོ་ཨ་མྲའི་ཤིང་རློན་ཡལ་གས་གཟིངས་པ་མང་པོ་བཅོམ་ནས་འགྲོ་བཞིན་དོང་དོང་ལ། །བདག་ཅག་འདི་ན་ལྷ་ཡི་ཁྱིམ་ལའང་ཐོགས་མེད་གནོད་སྦྱིན་དྲི་ཟའི་ཁྱིམ་སྟེང་ནམ་མཁར་གནས་གནས་ན། །ཚལ་སྟུག་འདིར་ཕྱིན་ནས་ནི་སྒྱིད་ལུག་གྱུར་པ་སུ་ཡི་མཐུ་ཞིག་གིས་ན་རྫུ་འཕྲུལ་སྟོབས་བཟློག་གྱུར། །དེ་ནས་ཚལ་སྟུག་པོ་དེ་ན་ལྷ་མོ་ཞིག་གནས་པ་དེས་དྲང་སྲོང་དེ་དག་ལ་ཚིགས་སུ་བཅད་དེ་སྨྲས་པ་རྒྱལ་པོའི་གཙོ་བོའི་རིགས་བྱུང་ཤཱཀྱའི་རྒྱལ་སྲས་ཉི་མ་ཤར་བ་ལྟ་བུར་རབ་ཏུ་སྣང་བའི་འོང ། །འཇིག་རྟེན་གཙོ་བོ་མཁས་པ་ཟླ་ཞལ་པདྨ་རྒྱས་པའི་སྙིང་པོའི་ཁ་དོག་ལྟ་བུར་རབ་མཛེས་པ། །ལྷ་དང་ཀླུ་དབང་གནོད་སྦྱིན་དྲི་ཟས་མཆོད་པ་དེ་ནི་བསམ་གཏན་དགོངས་ཤིང་ཚལ་སྟུག་འདི་ན་བཞུགས། །སྲིད་པ་བྱེ་བ་བརྒྱ་དག་ཏུ་ནི་བསོད་ནམས་སྤེལ་བ་དེ་ཡི་མཐུ་ཡིས་རྫུ་འཕྲུལ་སྟོབས་བཟློག་གོ་།དེ་ནས་དེ་དག་གིས་འོག་ལོགས་སུ་བལྟས་པ་དང ། གཞོན་ནུ་ཞིག་དཔལ་དང་གཟི་བརྗིད་ཀྱིས་འབར་བ་མཐོང་ནས་འདི་དག་འདི་སྙམ་དུ་སུ་ཞིག་འདི་ལྟར་གནས། ནོར་གྱི་བདག་པོ་རྣམ་ཐོས་ཀྱི་བུའམ་ཞིག་མ་ཡིན་ནམ། འོན་ཏེ་འདོད་པའི་དབང་པོ་བདུད་ལྟའམ། ཡང་ན་ལྟོ་འཕྱེ་ཆེན་པོའི་དབང་པོའམ། འོན་
111b
ཏེ་དབང་པོ་རྡོ་རྗེ་འཆང་བའམ། ཡང་ན་གུ་ལང་ངམ། གྲུལ་བུམ་གྱི་བདག་པོའམ། འོན་ཏེ་སྤྲོ་བ་ཆེན་པོ་དང་ལྡན་པ་ནག་པོའམ། འོན་ཏེ་ལྷའི་བུ་ཟླ་བའམ། འོན་ཏེ་འོད་ཟེར་སྟོང་དང་ལྡན་པའི་ཉི་མའམ། འོན་ཏེ་འཁོར་ལོས་བསྒྱུར་བའི་རྒྱལ་པོ་ཞིག་ཡིན་ནམ། སུ་ཞིག་སྙམ་མོ། །དེའི་ཚེ་ཚིགས་སུ་བཅད་པ་འདིའང་སྨྲས་སོ། །གཞོན་ནུ་འདི་ནི་རྣམ་ཐོས་བུ་ཡི་གཟུགས་ལས་འཕགས་པར་གསལ་བར་སྣང་བས་ན། །འདི་ནི་སྒྲ་གཅན་ཡིན་ནམ་འོན་ཏེ་རྡོ་རྗེ་འཆང་གི་གཟུགས་སམ་ཉི་ཟླའི་གཟུགས། །འདོད་མཆོག་དབང་པོའི་གཟུགས་སམ་གུ་ལང་གཟུགས་སམ་འོན་ཏེ་ནག་པོའི་གཟུགས་ཡིན་ནམ། །ཡང་ན་འདི་ནི་དཔལ་ལྡན་ཡན་ལག་མཚན་སྒྲས་སྡིག་མེད་སངས་རྒྱས་འགྱུར་བ་ཞིག་།དེ་ནས་ཚལ་གྱི་ལྷ་མོ་དེས་དྲང་སྲོང་དེ་དག་ལ་ཚིགས་སུ་བཅད་དེ་སྨྲས་པ། རྣམ་ཐོས་བུ་དང་མིག་སྟོང་བདོག་ལ་དཔལ་ནི་གང་ཡོད་གྱུར་པ་དང ། །འཇིག་རྟེན་སྐྱོང་བ་བཞི་དང་ལྷ་མིན་དབང་ལ་དཔལ་ནི་གང་ཡོད་དང ། །མི་མཇེད་བདག་པོ་ཚངས་དང་གཟའ་རྣམས་ལ་ཡང་དཔལ་ནི་གང་ཡོད་པ། །དཔལ་དེ་ཤཱཀྱའི་སྲས་པོ་འདི་དྲུང་ཕྱིན་ན་གང་གི་ཆར་མི་ཕོད། །དེ་ནས་དྲང་སྲོང་དེ་དག་གིས་ལྷ་མོ་དེའི་ཚིག་ཐོས་ནས་ས་ལ་བབས་པ་དང ། དེ་དག་གིས་བྱང་ཆུབ་སེམས་དཔའ་མི་གཡོ་བའི་ལུས་ཀྱིས་བསམ་གཏན་བྱེད་ཅིང ། མེའི་ཕུང་པོ་ལྟར་འབར་བ་མཐོང་ནས་དེ་དག་བྱང་ཆུབ་སེམས་
112a
༄#། །དཔའ་ལ་སེམས་ཤིང་ཚིགས་སུ་བཅད་པས་བསྟོད་དེ། དེ་ལ་གཅིག་གིས་སྨྲས་པ། འཇིག་རྟེན་ཉོན་མོངས་མེས་གདུངས་པ། །མཚོ་འདི་རབ་ཏུ་བྱུང་གྱུར་ཏེ། །གང་གིས་འཇིག་རྟེན་སིམ་འགྱུར་བའི། །ཆོས་དེ་འདི་ཡིས་བརྙེས་པར་གྱུར། །ཡང་གཅིག་གིས་སྨྲས་པ། མི་ཤེས་རབ་རིབ་འཇིག་རྟེན་དུ། །སྒྲོན་མ་འདི་ནི་རབ་ཏུ་བྱུང ། །གང་གིས་འགྲོ་བ་སྣང་འགྱུར་བའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་པ། མྱ་ངན་རྒྱ་མཚོ་འདལ་བ་ལ། །གྲུ་ཡི་དམ་པ་འདི་བྱུང་སྟེ། །གང་གིས་འགྲོ་བ་སྒྲོལ་འགྱུར་པའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་པ། །ཉོན་མོངས་འཆིང་བས་བཅིངས་པ་ལ། །འགྲོལ་བར་མཛད་པ་འདི་བྱུང་སྟེ། །གང་གིས་འགྲོ་བ་འགྲོལ་འགྱུར་བའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་པ། རྒ་དང་ནད་ཀྱིས་གཟིར་བ་ལ། །སྨན་པ་དམ་པ་འདི་བྱུང་སྟེ། །གང་གིས་རྒ་ཤི་ཐར་བྱ་བའི། །ཆོས་དེ་འདི་ཡིས་བརྙེས་པར་འགྱུར། །དེ་ནས་དྲང་སྲོང་དེ་དག་གིས་བྱང་ཆུབ་སེམས་དཔའ་ལ་ཚིགས་སུ་བཅད་པ་དེ་དག་གིས་བསྟོད་དེ་ལན་གསུམ་བསྐོར་བ་བྱས་ནས་ནམ་མཁའ་ལས་དོང་ངོ ། །རྒྱལ་པོ་ཟས་གཙང་མའང་བྱང་ཆུབ་སེམས་དཔའ་མི་མཐོང་ཞིང་བྱང་ཆུབ་སེམས་དཔའ་མེད་པས་མི་དགའ་སྟེ། དེས་སྨྲས་པ། གཞོན་ནུ་དེ་མི་སྣང་ན་གར་སོང ། དེའི་ཚེ་
112b
སྐྱེ་བོ་ཕལ་པོ་ཆེ་གཞོན་ནུ་ཚོལ་དུ་དོང་དོང་བ་དང ། དེའི་ཚེ་བློན་པོ་གཅིག་ཅིག་གིས་བྱང་ཆུབ་སེམས་དཔའ་ཛམྦུའི་ཤིང་གི་གྲིབ་མ་ལ་སྐྱིལ་མོ་ཀྲུང་བཅས་ཏེ་བསམ་གཏན་བྱེད་ཅིང་འདུག་པ་མཐོང་ངོ ། །དེས་དེའི་ཚེ་ཤིང་ཐམས་ཅད་ཀྱི་གྲིབ་མ་ཡོལ་ན། ཛམྦུའི་ཤིང་གི་གྲིབ་མ་ནི་བྱང་ཆུབ་སེམས་དཔའི་ལུས་མི་གཏོང་བར་འདུག་པར་མཐོང་ནས་ངོ་མཚར་དུ་གྱུར་ཏེ། ཚིམ་ཞིང་མགུ་ལ་ཡིད་རངས་ནས་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་རིངས་ཤིང་མྱུར་བ་མྱུར་བའི་གཟུགས་ཀྱིས་རྒྱལ་པོ་ཟས་གཙང་མའི་ཐད་དུ་ཕྱིན་ཏེ་ཚིགས་སུ་བཅད་པ་འདི་དང ། སྨྲས་སོ། །རྒྱལ་པོ་གཞོན་ནུ་དེ་ལ་གཟིགས། །ཛམྦུའི་ཤིང་གྲིབ་བསམ་གཏན་མཛད། །བརྒྱ་བྱིན་ཚངས་པ་ཇི་བཞིན་དུ། །གཟི་བརྗིད་དཔལ་གྱིས་རབ་ཏུ་མཛེས། །ཞུགས་ཤིང་གང་གི་གྲིབ་མ་ལ། །མཚན་རབ་མངའ་བ་དེ་བཞུགས་པའི། །གྲིབ་མ་དེ་ནི་དེས་མ་བཏང ། །སྐྱེས་མཆོག་བསམ་གཏན་མཛད་ལ་སྒྲིབ། །དེ་ནས་རྒྱལ་པོ་ཟས་གཙང་མ་ཛམྦུའི་ཤིང་ལྗོན་པ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་དཔལ་དང་གཟི་བརྗིད་ཀྱིས་འབར་བ་དེ་མཐོང་བ་དང ། ཚིགས་སུ་བཅད་པ་འདི་སྨྲས་སོ། །རི་ཡི་སྤོ་ལ་མེ་འབར་འདྲ་བ་སྟེ། །ཟླ་བ་སྐར་མའི་ཚོགས་ནང་འདུག་འདྲ་ཞིང ། །གཟི་བརྗིད་སྒྲོན་འདྲ་བསམ་གཏན་བྱེད་མཐོང་ན། །ང་ཡིས་ལུས་འདི་ཤིན་ཏུ་འདར་བར་གྱུར། །དེ་སྐད་ཅེས་
113a
༄#། །སྨྲས་ནས་དེས་བྱང་ཆུབ་སེམས་དཔའི་རྐང་པ་ལ་ཕྱག་བྱས་ཏེ་ཚིགས་སུ་བཅད་པ་འདི་སྨྲས་སོ། །ཐུབ་པ་གང་ཚེ་བལྟམས་པ་དང ། །གང་ཚེ་འོད་ལྡན་བསམ་གཏན་མཛད། །འདྲེན་པ་འདི་ལྟར་ལན་གཉིས་སུ། །མགོན་པོ་ཁྱོད་ཞབས་ཕྱག་འཚལ་ལོ། །དེའི་ཚེ་བྱིས་པ་ཁྲིའུ་ཐོགས་པ་དག་ཅ་ཅོའི་སྒྲ་འབྱིན་པར་གྱུར་ནས་དེ་དག་ལ་བློན་པོ་དག་གིས་སྒྲ་མ་ཆེ་སྒྲ་མ་ཆེ་ཞེས་བྱས་པ་དང ། དེ་དག་ཅི་ཞིག་ནོངས་ཞེས་ཟེར་རོ། །བློན་པོ་དག་གིས་སྨྲས་པ། རྒྱལ་པོའི་སྲས་དོན་ཐམས་ཅད་གྲུབ་པ་དགེ་བའི་མཚན་བཟང་པོ་མཆོག་དམ་པ་དང་ལྡན་ཞིང་འོད་འདོམ་གང་པ་མངའ་བ་འདི་རི་ལྟར་མི་གཡོ་ཞིང་བསམ་གཏན་མཛད་པའི་ཚེ་ཉི་མའི་དཀྱིལ་འཁོར་ཡོལ་ཏེ་སོང་ཡང་ཤིང་གི་གྲིབ་མ་དེ་མ་ཡོལ་ཞིང་སྒྲིབ་པར་གནས་སོ། །དེ་ལ་འདི་སྐད་ཅེས་བྱ་སྟེ། དཔྱིད་འདས་དབྱར་གྱི་དུས་བབ་དབྱར་ཟླ་རབ་ལ། །མེ་ཏོག་རྒྱས་ཤིང་མེ་ཏོག་ཡལ་གས་ཁེབས་གྱུར་ཏེ། །ཁྲུང་ཁྲུང་རྨ་བྱ་ནེ་ཙོ་རི་སྐེགས་སྐད་འབྱིན་པ། །ཤཱཀྱའི་བུ་དག་ཕལ་ཆེར་མངོན་དུ་འདོད་བར་གྱུར། །འདུན་པ་ཅན་གྱིས་སྨྲས་པ། གཞོན་ནུ་ནགས་ཚལ་དག་ནི་གཟིགས་པ་མཛད་སླད་དུ། །བྱིས་པ་རྣམས་ཀྱིས་ཡོངས་སུ་བསྐོར་ཏེ་གཤེགས་པའི་རིགས། །བྲམ་ཟེ་ལྟ་བུར་ཁྱིམ་ན་བཞུགས་པས་ཅི་ཞིག་བགྱི། །བདག་ཅག་རྣམས་ནི་བུ་མོའི་ཚོགས་རྣམས་སྦྲོན་དུ་མཆི། །ཉི་མའི་གུང་ལ་
113b
སེམས་ཅན་རྣམ་པར་དག་པ་དེ། །བྱིས་པ་ལྔ་བརྒྱ་དག་གིས་བསྐོར་ནས་ལྷན་ཅིག་ཏུ། །ཡབ་ལ་མ་གསོལ་ཡུམ་ལ་མ་གསོལ་མ་ཚོར་བར། །དེ་ནི་བྱུང་ནས་ཞིང་པ་རྣམས་ཀྱི་གྲོང་དུ་སོང ། །རྒྱལ་པོ་དམ་པའི་ཞིང་བ་དག་གི་གྲོང་དེ་ན། །ཛམྦུའི་སྡོང་ཆེན་ཡལ་ག་མང་པོ་རྒྱས་ཡོད་པ། །གཞོན་ནུས་མཐོང་ན་ཉམ་ཐག་སྡུག་བསྔལ་ཕག་གྱུར་ཏེ། །འདུས་བྱས་ཅི་རུང་སྡུག་བསྔལ་མང་ཞེས་སྙིང་རྗེ་བྱེད། །དུལ་བའི་སེམས་དང་ལྡན་པ་ཛམྦུའི་གྲིབ་མར་སོང ། །རྩཝ་དག་བསྡུས་ཏེ་བདག་གིས་གདིང་བ་བཏིང་ནས་ནི། །སྐྱིལ་མོ་ཀྲུང་འདུག་དྲང་པོར་ལུས་སྲང་བསམ་གཏན་བཞི། །དགེ་བ་དག་ལ་བྱང་ཆུབ་སེམས་དཔའ་བསམ་གཏན་བྱེད། །དྲང་སྲོང་ལྔ་ཞིག་ནམ་མཁའི་དཀྱིལ་ནས་དོང་དོང་ན། །ཛམྦུའི་ཤིང་གི་སྟེང་དུ་ཕྱིན་ནས་འདོང་མ་ནུས། །དེ་དག་ཐོགས་ནས་ང་རྒྱལ་དྲེགས་པ་སྤང་བྱ་ཞིང ། །དེ་དག་ཐམས་ཅད་མཐུན་པར་ལྷན་ཅིག་ལྟ་བར་བྱེད། །བདག་ཅག་རི་མཆོག་རི་རབ་དེ་བཞིན་ཁོར་ཡུག་དག། ཐལ་ཕྱུང་ཐགས་ཐོགས་མེད་པར་ཤུགས་ཀྱིས་དོང་དོང་ན། །བདག་ཅག་དེ་རིང་ཛམྦུའི་ཤིང་ལྗོན་འདི་ལས་ནི། །འདའ་བར་མ་ནུས་འདི་ལ་རྒྱུ་རྐྱེན་ཅི་ཞིག་ཡོད། །བབས་ཏེ་ས་སྟེང་འདུག་ནས་ཛམྦུའི་ཤིང་དྲུང་ན། །ཤཱཀྱའི་བུ་ཕོ་བྱང་ཆུབ་སེམས་དཔའ་གཟི་བརྗིད་ཅན། །འཛམ་ཀླུང་གསེར་གྱི་འོད་འཕྲོ་འདྲ་བ་འོད་ཟེར་ལྡན། །སྐྱིལ་མོ་ཀྲུང་བཅས་བསམ་གཏན་བྱེད་པ་དེ་ཚེ་
114a
༄#། །མཐོང ། །དེ་དག་རྨད་གྱུར་སྤྱི་བོར་སོར་བཅུ་ཐལ་སྦྱར་ཏེ། །ཐལ་མོ་སྦྱར་བ་རྐང་པར་གཏུགས་ནས་ཕྱག་འཚལ་ཏོ། །འགྲོ་བ་ཤིན་ཏུ་བདེ་མཛད་ལེགས་པར་བལྟམས་པ་ལེགས། །མྱུར་དུ་རྣམ་སངས་རྒྱས་ཏེ་བདུད་རྩིར་སེམས་ཅན་ཐུལ། །སྡོང་པོ་མཆོག་ནི་པདྨ་འདྲ་བའི་སྤྱན་ལ་འདུད། །གདུགས་ཡོལ་གྱུར་ཀྱང་གྲིབ་མས་བདེ་བར་གཤེགས་མི་གཏོང ། །ལྷ་རྣམས་སྟོང་ཕྲག་མང་པོ་གནས་པ་ཐལ་སྦྱར་ནས། །ངེས་པར་བྱས་པ་དེ་ཡི་རྐང་པར་ཕྱག་ཀྱང་འཚལ། །ཟས་གཙང་རྒྱལ་པོ་བདག་གི་ཁྱིམ་ན་ཡོངས་ཚོལ་ཞིང ། །ངའི་བུ་གཞོན་ནུ་དེ་ནི་གང་དུ་སོང་ཞེས་རྨེད། །སྲུ་མོས་སྨྲས་པ་བདག་གིས་བཙལ་ཀྱང་མ་རྙེད་ན། །གཞོན་ནུ་དེ་ནི་གར་བཞུད་རྒྱལ་པོས་རྨ་བར་གསོལ། །ཟས་གཙང་རྒྱལ་པོས་ཉུག་རུམ་དག་ལ་རིངས་པར་རྨས། །ང་ཡི་གཞོན་ནུ་འདི་ནས་བྱུང་བར་ལ་ལས་མཐོང་ངམ་ཞེས། །སྒོ་བ་རྣམས་དང་དེ་བཞིན་ནང་མི་ཀུན་ལའང་རྨས། །ལྷ་གཅིག་ཁྱོད་གསོན་མཆོག་དེ་ཞིང་པའི་གྲོང་དུ་བཞུད། །དེ་ནི་རིངས་པར་ཤཱཀྱ་རྣམས་དང་ལྷན་ཅིག་ཏུ། །བྱུང་ནས་དཔལ་ཞུགས་གྱུར་བའི་ཞིང་བའི་གྲོང་དུ་བལྟས། །ཇི་ལྟར་ཉི་མ་བྱེ་བ་ཁྲག་ཁྲིག་ཤར་བ་ལྟར། །དེ་ལྟར་དཔལ་གྱིས་འབར་ཞིང་ཕན་བྱེད་འདུག་པ་མཐོང ། །ཅོད་པན་རལ་གྲི་ལྷམ་དག་ཕ་ཟད་ཕོག་ཕུད་དེ། །མགོ་བོར་སོར་བཅུ་ཐལ་མོ་སྦྱར་ནས་ཕྱག་
114b
ཀྱང་འཚལ། །དྲང་སྲོང་བདག་ཉིད་ཆེན་པོ་ལེགས་པར་ཡང་དག་སྨྲ། །གཞོན་ནུ་བྱང་ཆུབ་དོན་དུ་མངོན་པར་འབྱུང་དུ་ངེས། །རབ་ཏུ་དད་ལྷ་བརྒྱ་ཕྲག་བཅུ་གཉིས་ཚང་བ་དང ། །དེ་བཞིན་ཤཱཀྱ་ལྔ་བརྒྱ་ཉེ་བར་འོངས་པ་དང ། །བདེ་གཤེགས་ཡོན་ཏན་རྒྱ་མཚོ་ལྡན་པའི་རྫུ་འཕྲུལ་མཐོང ། །བསམ་པ་བརྟན་པས་རྫོགས་པའི་བྱང་ཆུབ་སེམས་ཀྱང་བསྐྱེད། །དེས་ནི་སྟོང་གསུམ་མ་ལུས་ས་རྣམས་རབ་བསྐྱོད་ནས། །དྲན་དང་ཤེས་བཞིན་ཏིང་ངེ་འཛིན་ལས་ལངས་གྱུར་ཏེ། །མདོག་བཟང་ལྡན་པས་ཡབ་ལ་ཚངས་པའི་ཚིག་བརྗོད་པ། །ཡབ་ཅིག་ཞིང་བླས་ཐོང་ལ་གཞན་ལས་ཚོལ་མ་མཛད། །གལ་ཏེ་གསེར་ཞིག་འཚལ་ནའང་བདག་གིས་གསེར་ཆར་དབབ། །དེ་སྟེ་ན་བཟའ་འཚལ་ནའང་བདག་གིས་ན་བཟའ་དབུལ། །འོན་ཏེ་འབྲུ་ཞིག་འཚལ་ནའང་བདག་གིས་འབྲུ་ཆར་དབབ། །མི་དབང་ཁྱོད་ཀྱིས་འགྲོ་བ་ཀུན་ལ་ཡང་དག་སྦྱོར། །ཡབ་དང་དེ་བཞིན་སྐྱེ་བོ་འཁོར་ལ་བསྟན་བྱས་ནས། །སྐད་ཅིག་དེ་ལ་དེ་སླར་གྲོང་ཁྱེར་མཆོག་ཏུ་ཞུགས། །འགྲོ་དང་མཐུན་པ་ཙམ་དུ་གྲོང་ཁྱེར་དེར་གནས་ཀྱི། །སེམས་ཅན་རྣམ་དག་མངོན་པར་འབྱུང་བའི་ཡིད་དང་ལྡན། །ཞིང་པའི་གྲོང་གི་ལེའུ་སྟེ། བཅུ་གཅིག་པའོ།། །། འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བདུན་པ། དགེ་སློང་དག་།དེ་ལྟར་གཞོན་ནུ་དེ་དེ་བས་ཀྱང་ཡ་ཟད་སྐྱེས་པ་དང ། དུས་གཞན་ཞིག་ན་རྒྱལ་པོ་
115a
༄#། །ཟས་གཙང་མ་ཤཱཀྱའི་ཚོགས་དང་ལྷན་ཅིག་ཏུ་འདུན་ས་ན་འདུག་འདུག་པ་དེའི་ཚེ་ཤཱཀྱ་རྒན་རབས་རྒན་རབས་ཁ་ཅིག་གིས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། གཞོན་ནུ་དོན་ཐམས་ཅད་གྲུབ་པ་འདི་ནི་བྲམ་ཟེ་ལྟས་མཁན་རྣམས་དང ། བློ་ངེས་པ་དང་ལྡན་པའི་ལྷ་མང་པོས་འདི་སྐད་དུ་བསྟན་ཏེ། གཞོན་ནུ་འདི་གལ་ཏེ་མངོན་པར་བྱུང་བར་གྱུར་ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ། །ཅི་སྟེ་མངོན་པར་མ་བྱུང་ན་ནི། འཁོར་ལོས་བསྒྱུར་བའི་རྒྱལ་པོ་མཐའ་བཞི་ལས་རྣམ་པར་རྒྱལ་བ་ཆོས་ཀྱི་རྒྱལ་པོ་ཆོས་དང་ལྡན་ཞིང་རིན་པོ་ཆེ་སྣ་བདུན་དང་ལྡན་པར་འགྱུར་རོ། །དེའི་རིན་པོ་ཆེ་སྣ་བདུན་ནི། འདི་དག་སྟེ། འདི་ལྟར་འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་དང་བདུན་ནོ། །དེ་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། གཞན་གྱི་སྡེ་རབ་ཏུ་འཇོམས་པ་སྟོང་ཚང་བ་འབྱུང་ངོ ། །དེ་གནོད་པར་བྱ་བ་དང ། མཚན་ཆ་མེད་པར་ཆོས་དང་མཐུན་པས་སའི་དཀྱིལ་འཁོར་འདི་ལས་མངོན་པར་རྒྱལ་བར་བྱས་ཏེ་གཅིག་པུ་གནས་པར་འགྱུར་
115b
རོ་ཞེས་མཆིན། དེའི་སླད་དུ་གཞོན་ནུ་དེའི་བཙུན་མོ་བླང་བར་བགྱིའོ། །དེ་ལྟར་མཛད་དང་བུད་མེད་ཀྱི་ཚོགས་ཀྱིས་ཡོངས་སུ་བསྐོར་ཏེ་དགེས་བ་ལ་ལོངས་སྤྱོད་ཅིང་མངོན་པར་འབྱུང་བར་ཡང་མི་འགྱུར་ཏེ། དེ་ལྟར་གྱུར་བ་དང་བདག་ཅག་གི་འཁོར་ལོས་བསྒྱུར་བའི་གདུང་ཡང་མི་འཆད། ཁམས་ཀྱི་རྒྱལ་པོ་ཐམས་ཅད་ཀྱིས་ཀྱང་མི་སྙན་པར་མི་བརྗོད་ཅིང་རིམ་གྲོར་བགྱི་བར་འགྱུར་རོ། །དེ་ནས་རྒྱལ་པོ་ཟས་གཙང་མས་སྨྲས་པ། གལ་ཏེ་དེ་ལྟར་བྱ་ན། དེའི་ཕྱིར་གཞོན་ནུའི་ཚུལ་དང་མཐུན་པའི་བུ་མོ་གང་ཞིག་ཡོད་ཁྱེད་ཀྱིས་ལྟོས་ཤིག་།དེའི་ཚེ་ཤཱཀྱ་ལྔ་བརྒྱ་ཙམ་སོ་སོ་ནས་འདི་སྐད་དུ་བདག་གི་བུ་མོ་ནི་གཞོན་ནུའི་ཚུལ་དང་མཐུན་ནོ། །བདག་གི་བུ་མོ་ནི་གཞོན་ནུའི་ཚུལ་དང་མཐུན་ནོ། །ཞེས་ཟེར་རོ། །རྒྱལ་པོས་སྨྲས་པ། གཞོན་ནུ་དེ་ནི་ཤིན་ཏུ་ཕུལ་ཆེ་བ་ཡིན་གྱི། གཞོན་ནུ་ཉིད་ལ་ཁྱོད་བུ་མོ་གང་འདོད་ཅེས་དྲི་བར་བྱའོ་ཞེས་དེ་དག་ཀུན་ཀྱང་འདུས་ཏེ་གཞོན་ནུ་ལ་དངོས་པོ་དེ་བརྗོད་དོ། །གཞོན་ནུས་སྨྲས་པ། ད་སྟེ་དགུང་བདུན་ན་འདིའི་ལན་གསན་པར་གསོལ། དེ་ནས་བྱང་ཆུབ་སེམས་དཔའ་འདི་སྙམ་དུ་བསམ་སྟེ། འདོད་པའི་སྐྱོན་ནི་བདག་གིས་མཐའ་ཡས་རིག་།འཐབ་མོ་འཁོན་ཅེས་མྱ་ངན་སྡུག་བསྔལ་རྩ། །འཇིགས་བྱེད་དུག་གི་ལོ་མ་འདྲ་བ་སྟེ། །མེ་དང་འདྲ་ཞིང་རལ་གྲིའི་སོ་དང་འདྲ། །འདོད་པའི་ཡོན་ཏན་བདག་འདོད་མ་ཡིན་ཏེ། །བདག་ནི་བུད་མེད་ཚོགས་དང་མཛེས་
116a
༄#། །མ་ཡིན། །བསམ་གཏན་ཏིང་འཛིན་བདེ་བས་ཞི་སེམས་སུ། །བདག་ནི་མི་སྨྲ་ནགས་ཚལ་གནས་པར་བྱ། །ཡང་དེས་བརྟགས་ནས་ཐབས་མཁས་པ་མངོན་དུ་བྱས་ཏེ་སེམས་ཅན་ཡོངས་སུ་སྨིན་པར་བྱ་བ་ལ་བལྟས་ནས་སྙིང་རྗེ་ཆེན་པོ་བསྐྱེད་དེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདམ་དང་ལྕག་ལྕིག་ཁྲོད་ནས་པདྨ་རྣམ་པར་འཕེལ།། མི་རྣམས་གང་བའི་ནང་ན་རྒྱལ་པོ་མཆོད་པ་འཐོབ། །གང་ཚེ་བྱང་ཆུབ་སེམས་དཔའ་འཁོར་མཆོག་ཐོབ་གྱུར་པ། །དེ་ཚེ་སེམས་ཅན་བྱེ་བ་ཁྲག་ཁྲིག་འཆི་མེད་འདུལ། །སྔོན་གྱི་བྱང་ཆུབ་སེམས་དཔའ་མཁས་པ་གང་བྱུང་བ། །དེ་དག་ཀུན་གྱིས་བཙུན་མོ་སྲས་དང་སླས་ཀྱང་བསྟན། །འོན་ཀྱང་འདོད་པས་ཆགས་མེད་བསམ་གཏན་བདེ་མ་ཉམས། །བདག་ཀྱང་དེ་དག་ཡོན་ཏན་རྗེས་སུ་བསླབ་པར་བྱ། །གང་ལ་སྤྱོད་ལམ་ཡོན་ཏན་བདེན་པའི་ཚིག་མེད་པ། །བུད་མེད་ཕལ་པ་གང་ཡང་བདག་གི་ཚུལ་མཐུན་མིན། །གང་ཞིག་བདག་གི་སེམས་ནི་མངོན་པར་དགའ་བྱེད་ཅིང ། །བག་ཡོད་གཟུགས་དང་ན་ཚོད་རུས་རིགས་དག་པ་འོས། །དེས་ནི་ཡོན་ཏན་ཚིགས་སུ་བཅད་དེ་ཡི་གེར་བྲིས། །འདི་འདྲའི་བུ་མོ་མཆིས་ན་བདག་ལ་བཀའ་སྩོལ་ཅིག་།སྐྱེ་པོ་ཕལ་བ་མ་བསྡམས་བདག་ལ་མཁོ་མ་ལགས། །ཡོན་ཏན་བརྗོད་པ་འདི་ལྡན་མཆིས་ན་བདག་སྩོལ་ཅིག་།དར་ཅིང་གཟུགས་བཟང་ལྡན་ཡང་
116b
གཟུགས་ཀྱི་དྲེགས་དང་བྲལ། །ཕུ་ནུ་མ་ལ་བྱམས་ལྟར་བྱམས་པའི་སེམས་ལྡན་ཞིང ། །གཏོང་ལ་དགའ་སྟེ་དགེ་སྦྱོང་བྲམ་ཟེ་སྦྱིན་ཚུལ་ཅན། །དེ་འདྲའི་བུ་མོ་མཆིས་ན་ཡབ་ཀྱིས་བདག་སྩོལ་ཅིག་།གང་ལ་ང་རྒྱལ་ཁེངས་དང་ཞེ་སྡང་མ་མཆིས་ཤིང ། །གཡོ་དང་ཕྲག་དོག་སྒྱུ་སྤངས་དྲང་བའི་དང་ཚུལ་ཅན། །རྨི་ལམ་ན་ཡང་སྐྱེས་པ་གཞན་ལ་ཆགས་དང་བྲལ། ། བདག་གི་ཁྱོས་ནི་ཆོག་འཚལ་རྟག་སྡོམ་བག་མཆིས་ལ། །རྒྱགས་པ་མ་མཆིས་མི་གཡེང་ཟུང་ཐུབ་ཚུལ་འཆང་ཞིང ། །ང་རྒྱལ་མ་མཆིས་འགྱིང་དང་བྲལ་བས་བྲན་མོ་བཞིན། །སྒྲ་དྲི་རོ་ལ་མ་ཆགས་ཆང་ལ་མ་ཆགས་ཏེ། །འདོད་བྲལ་བརྣབ་སེམས་མ་མཆིས་རང་གི་ནོར་གྱིས་འཚལ། །བདེན་ལ་གནས་ཤིང་མི་འཕྱར་གཡེང་བ་མ་ལགས་པ། །ངོ་ཚའི་གོས་འཚལ་རྒོད་དང་ཁེངས་པ་མ་མཆིས་གནས། །ལྷ་དང་བཀྲ་ཤིས་མ་ཆགས་རྟག་ཏུ་ཆོས་ལ་བརྩོན། །ལུས་དང་དག་དང་ཡིད་ཀྱི་དངོས་པོ་རབ་དག་པ། །གཉིད་དང་རྨུགས་པ་མི་མངའ་ང་རྒྱལ་གླེན་བྲལ་ཞིང ། །རྟོག་དང་ལྡན་ལ་ལེགས་པའི་ལས་རྣམས་རྟག་སྤྱོད་དེ། །གྱོས་སྒྱུག་གཉིས་ལའང་སྟོན་པ་བཞིན་གྱི་རིམ་གྲོར་ལྡན། །བྲན་དང་བྲན་མོ་ཀུན་ལའང་བདག་བཞིན་བྱམས་སྲེལ་བ། །སྨད་འཚོང་བཞིན་དུ་བསྟན་བཅོས་ཆོ་ག་འཚལ་ཅིང་མཁས། །སླད་ཀྱིས་ཉལ་ཞིང་སྔོན་དུ་མ་ལ་ནས་ལྡང་བགྱིད་པ། །བྱམས་པས་རྗེས་སྙེགས་མ་བཞིན་ཚུལ་འཆོས་མ་མཆིས་
117a
༄#། །པ། །དེ་འདྲའི་བུད་མེད་མཆིས་ན་ཡབ་ཀྱིས་བདག་སྩོལ་ཅིག་།དགེ་སློང་དག་།དེ་ནས་རྒྱལ་པོ་ཟས་གཙང་མས་ཚིགས་སུ་བཅད་པ་འདི་དག་ཐོས་ནས་མདུན་ན་འདོན་ལ་སྨྲས་པ། བྲམ་ཟེ་ཆེན་པོ། ཁྱོད་སེར་སྐྱའི་གནས་ཀྱི་གྲོང་ཁྱེར་ཆེན་པོར་སོང་ལ་ཁྱིམ་ཐམས་ཅད་དུའང་སོང་སྟེ། བུ་མོ་དག་ལྟོས་ལ་གང་ལའང་རུང་སྟེ་ཡོན་ཏན་དེ་ལྟ་བུ་དག་ཡོད་ན། རྒྱལ་རིགས་ཀྱི་བུ་མོའང་རུང ། བྲམ་ཟེའི་བུ་མོའང་རུང ། རྗེའི་རིགས་ཀྱི་བུ་མོའང་རུང ། དམངས་རིགས་ཀྱི་བུ་མོའང་རུང་གི་།བུ་མོ་དེ་དག་འདིར་འོན་ཅིག་།དེ་ཅིའི་ཕྱིར་ཞེ་ན། གཞོན་ནུ་འདི་ནི་རིགས་དོན་དུ་གཉེར་བ་མ་ཡིན་གྱི། གཞོན་ནུ་འདི་ནི་ཡོན་ཏན་དོན་དུ་གཉེར་བ་ཡིན་ནོ། །དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །རྒྱལ་རིགས་བྲམ་ཟེའི་བུ་མོ་དང་།། རྗེའུ་རིགས་དམངས་རིགས་དེ་བཞིན་ཏེ། །སུ་ལ་ཡོན་ཏན་འདི་ཡོད་པའི། །བུ་མོ་དེ་ནི་འདིར་འོན་ཅིག་།ང་ཡི་བུ་འདི་རིགས་དག་དང ། །རུས་ལ་ངོ་མཚར་འཛིན་མ་ཡིན། །ཡོན་ཏན་བདེན་པ་ཆོས་ཀྱི་རྣམས། །དེ་ལ་འདི་ཡི་ཡིད་དགའ་འོ། །དགེ་སློང་དག་།དེ་ནས་བྲམ་ཟེ་མདུན་ན་འདོན་དེས་ཚིགས་སུ་བཅད་པ་ཡི་གེར་བྲིས་པ་དེ་ཁྱེར་ཏེ་སེར་སྐྱའི་གནས་ཀྱི་གྲོང་ཁྱེར་ཆེན་པོར་སོང་ནས་ཁྱིམ་ནས་ཁྱིམ་དུ་ཡོན་ཏན་དེ་ལྟ་བུ་དང་ལྡན་པའི་བུ་མོ་ལྟ་ཞིང་ཚོལ་དུ་སོང་སོང་བ་ལས། ཡོན་ཏན་དེ་ལྟ་བུ་དང་ལྡན་པའི་བུ་མོ་མ་མཐོང་སྟེ། དེ་ནས་རིམ་གྱིས་
117b
ཤཱཀྱ་ལག་ན་བེ་ཅོན་ཅན་གྱི་ཁྱིམ་དུ་ཕྱིན་ནས་དེར་བལྟས་ན་བུ་མོ་གཟུགས་མཛེས་ཤིང་བལྟ་ན་སྡུག་ལ་ཡིད་དུ་འོང་བ། མདོག་བཟང་པོ་རྒྱས་པ་མཆོག་དང་ལྡན་པ། ཧ་ཅང་ཡང་མི་རིང་བ།་ཧ་ཅང་ཡང་མི་ཐུང་བ། ཧ་ཅང་ཡང་མི་སྦོམ་པ། ཧ་ཅང་ཡང་མི་སྐེམ་པ། ཧ་ཅང་ཡང་མི་དཀར་བ། ཧ་ཅང་ཡང་མི་ནག་པ། བཟོད་མ་དར་ལ་བབ་པ། བུད་མེད་རིན་པོ་ཆེ་ལྟར་སྣང་བ་ཞིག་མཐོང་བ་དང ། བུ་མོ་དེས་བྲམ་ཟེ་མདུན་ན་འདོན་དེའི་རྐང་པ་གཉིས་ནས་བཟུང་སྟེ་འདི་སྐད་ཅེས་སྨྲས་སོ། །བྲམ་ཟེ་ཆེན་པོ། ཁྱོད་ལ་དགོས་བ་ཅི་ཞིག་མཆིས། བྲམ་ཟེ་མདུན་ན་འདོན་གྱིས་ཚིགས་སུ་བཅད་དེ་སྨྲས་པ། ཟས་གཙང་སྲས་པོ་གཟུགས་ནི་མཆོག་ཏུ་མཛེས་གྱུར་ཅིང ། །སུམ་ཅུ་རྩ་གཉིས་མཚན་ལྡན་ཡོན་ཏན་གཟི་བརྗིད་ཅན། །དེ་ཡིས་བུད་མེད་རྣམས་ཀྱི་ཡོན་ཏན་ཡི་གེར་བྲིས། །སུ་ལ་ཡོན་ཏན་འདི་ཡོད་དེ་ཡི་ཆུང་མར་འོས། །ཞེས་སྨྲས་ཏེ། དེས་དེ་ལ་ཡི་གེ་དེ་བྱིན་ནོ། །དེ་ནས་བུ་མོ་དེས་ཚིགས་སུ་བཅད་པའི་ཡི་གེ་དེ་བཀླགས་ནས་བཞིན་འཛུམ་བ་བསྟན་ཏེ་བྲམ་ཟེ་མདུན་ན་འདོན་དེ་ལ་ཚིགས་སུ་བཅད་དེ་སྨྲས་པ། བྲམ་ཟེ་ཡོན་ཏན་འདི་དག་བདག་ལ་ཀུན་ཚང་གི་།དེས་བའི་གཟུགས་ཅན་དེ་ནི་བདག་གི་ཁྱིམ་ཐབ་བོ། །གལ་ཏེ་གཞོན་ནུ་བཞེད་ན་ཕྱི་བཤོལ་མ་མཛད་གསུངས། །བརྒྱ་ལ་སྐྱེ་བོ་ཕལ་དང་བཞུགས་པར་འགྱུར་ཡང་གདའ། །དེ་ནས་བྲམ་ཟེ་མདུན་ན་འདོན་དེ། རྒྱལ་པོ་ཟས་གཙང་མའི་
118a
༄#། །དྲུང་དུ་སོང་སྟེ་དོན་དེ་བརྗོད་པ། རྒྱལ་པོ་ཆེན་པོ། བདག་གིས་གཞོན་ནུའི་ཚུལ་དང་མཐུན་པའི་བུ་མོ་མཐོང་ངོ ། །རྒྱལ་པོས་སྨྲས་པ། སུ་ལ་དེ་ལྟ་བུ་ཞིག་ཡོད། སྨྲས་པ།་ལྷ། ཤཱཀྱ་ལག་ན་བེ་ཅོན་ཅན་ལ་བུ་མོ་དེ་ལྟ་བུ་ཞིག་མཆིས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། གཞོན་ནུ་དེ་ནི་ཤིན་ཏུ་ཕུལ་ཆེ་ཞིང་བཟང་བ་ལ་མོས་པ་ཡིན་ལ། བུད་མེད་དག་ནི་ཕལ་ཆེར་ཡོན་ཏན་མེད་པ་དག་ཀྱང་བདག་ལ་ཡོན་ཏན་ཡོད་པར་ཁས་ལེན་གྱི། བདག་གིས་ཡིད་དུ་འོང་བའི་ཡོ་བྱད་དག་ཅིག་བྱས་ཏེ་གཞོན་ནུ་འདི་བུ་མོ་ཐམས་ཅད་ལ་སྦྱིན་པ་བྱེད་དུ་གཞུག་གོ་།བུ་མོ་དེ་དག་གི་ནང་ནས་གང་ལ་གཞོན་ནུ་མིག་མངོན་པར་ཆགས་པར་གྱུར་པ་དེ་གཞོན་ནུ་ལ་སྦྱིན་པར་བྱའོ་སྙམ་མོ། ། དེ་ནས་རྒྱལ་པོ་ཟས་གཙང་མས་ཡིད་དུ་འོང་བའི་ཡོ་བྱད་གསེར་དང ། དངུལ་དང ། རིན་པོ་ཆེ་སྣ་ཚོགས་ལས་བྱེད་དུ་བཅུག་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོར་དྲིལ་གྱི་སྒྲ་བསྒྲགས་ཏེ། དེང་ནས་ཞག་བདུན་ན་ཀུན་གྱིས་ཀྱང་གཞོན་ནུ་མཐོང་བར་འགྱུར་ཏེ། ཡིད་དུ་འོང་བའི་ཡོ་བྱད་དག་ཀྱང་བུ་མོ་དག་ལ་སྦྱིན་པ་བྱེད་ཀྱི། བུ་མོ་ཐམས་ཅད་ཀྱང་འདུན་ཁང་དུ་ཤོག་ཅིག་ཅེས་བསྒོའོ། །དགེ་སློང་དག་།དེ་ནས་ཞག་བདུན་ལོན་པ་དང ། བྱང་ཆུབ་སེམས་དཔའ་འདུན་ཁང་དུ་སོང་སྟེ་སེངྒེའི་ཁྲི་ལ་འདུག་གོ་།དེའི་ཚེ་རྒྱལ་པོ་ཟས་གཙང་
118b
མས་བྱ་ར་བ་དག་བཀོད་ནས་གཞོན་ནུ་འདི་བུ་མོ་གང་ལ་མིག་ཆགས་པ་དེ་ང་ལ་གྱིས་ཤིག་ཅེས་བསྒོའོ། །དགེ་སློང་དག་།དེ་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོ་དེ་ན་བུ་མོ་གང་ཇི་སྙེད་ཅིག་ཡོད་པ་དེ་དག་ཐམས་ཅད་འདུན་ཁང་ག་ལ་བ་དེ་དང ། བྱང་ཆུབ་སེམས་དཔའ་ག་ལ་བ་དེར་བྱང་ཆུབ་སེམས་དཔའ་བལྟ་བ་དང ། ཡིད་དུ་འོང་བའི་ཡོ་བྱད་བླང་བའི་ཕྱིར་དེར་དོང་ངོ ། །དགེ་སློང་དག་།དེ་ནས་བྱང་ཆུབ་སེམས་དཔས་བུ་མོ་ཇི་ལྟར་འོངས་པ་དེ་དག་ལ་ཡིད་དུ་འོང་བའི་ཡོ་བྱད་རྣམས་བྱིན་ནོ། །དེ་ནས་བུ་མོ་དེ་དག་གིས་བྱང་ཆུབ་སེམས་དཔའི་དཔལ་དང་གཟི་བརྗིད་མ་བཟོད་ནས་ཡིད་དུ་འོང་བའི་ཡོ་བྱད་དེ་དག་བླངས་ཤིང་མྱུར་བ་མྱུར་བར་ཕྱིར་དོང་ངོ ། །དེ་ནས་ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་ཞེས་བྱ་བ། བྲན་མོའི་ཚོགས་ཀྱིས་བསྐོར་ཅིང་མདུན་དུ་བདར་ཏེ་འདུན་ཁང་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་པ་དང ། མིག་མི་འཛུམ་པར་བྱང་ཆུབ་སེམས་དཔའ་ལ་བལྟ་ཞིང་ཕྱོགས་གཅིག་ཏུ་འདུག་པར་གྱུར་ཏོ། །གང་གི་ཚེ་བྱང་ཆུབ་སེམས་དཔས་ཡིད་དུ་འོང་བའི་ཡོ་བྱད་དེ་དག་བྱིན་ཟིན་པར་གྱུར་པ་དེའི་ཚེ་བྱང་ཆུབ་སེམས་དཔའི་དྲུང་དུ་འོངས་ནས་འཛུམ་དམུལ་ཏེ་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །གཞོན་ནུ། བདག་གིས་ཁྱོད་ལ་ནོངས་པ་ཅི་ཞིག་བགྱིས་ན། བདག་ལ་དེ་ལྟར་དངན་སྡང་མཛད། སྨྲས་པ།
119a
༄#། །ངས་ནི་ཁྱོད་ལ་དངན་སྡང་བྱས་པའང་མེད་ན། ཁྱོད་ནི་ཤིན་ཏུ་འཕྱིས་ཏེ་འོངས་སོ་ཞེས་སྨྲས་ནས་དེས་སོར་གདུབ་སྲང་བརྒྱ་སྟོང་དུ་མ་རི་བ་ཕུད་དེ་དེ་ལ་བྱིན་ནོ། །བུ་མོ་དེས་སྨྲས་པ། གཞོན་ནུ་ཁྱོད་ལ་བདག་གིས་འདི་ལྟ་ཞིག་འཚལ་བ་འོས་སམ། སྨྲས་པ། འོ་ན་རྒྱན་གཞན་དང་གཞན་དག་ཡོད་པ་འདི་དག་ཀྱང་ཁྱོད་ཁྱེར་ཅིག་།དེས་སྨྲས་པ། གཞོན་ནུ་བདག་ནི་རྒྱན་མ་མཆིས་པར་བགྱིད་པ་མ་ལགས་ཀྱི། རྒྱན་དང་ལྡན་པར་བགྱིད་པ་ལགས་སོ་ཞེས་སྨྲས་ནས་བུ་མོ་དེ་སོང་ངོ ། །དེ་ནས་བྱ་ར་བར་བཀོད་པའི་མི་དེ་དག་རྒྱལ་པོ་ཟས་གཙང་མའི་དྲུང་དུ་སོང་ནས་ལོ་རྒྱུས་དེ་དག་སྨོས་ཏེ་སྨྲས་པ། ལྷ། ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་ཞེས་བགྱི་བ་དེ་ལ་གཞོན་ནུ་སྤྱན་ཆགས་པར་གྱུར་ལ་ཅུང་ཟད་ཅིག་ཏུ་བཀའ་མཆིད་ཀྱང་བགྱིས་སོ། །དེ་ནས་རྒྱལ་པོ་ཟས་གཙང་མས་ཚིག་དེ་ཐོས་ནས་ཤཱཀྱ་ལག་ན་བེ་ཅོན་ཅན་གྱི་གན་དུ་བྲམ་ཟེ་མདུན་ན་འདོན་ཕོ་ཉར་བཏང་སྟེ། ཁྱོད་ཀྱི་བུ་མོ་ཞིག་ཡོད་པ་དེ་ངའི་གཞོན་ནུ་ལ་བྱིན་ཅིག་ཅེས་སྤྲིང་ངོ ། །ལག་ན་བེ་ཅོན་ཅན་གྱིས་སྨྲས་པ། འཕགས་པ་གཞོན་ནུ་དེ་ནི་ཕོ་བྲང་ན་སྐྱིད་དེ་བར་འཁྲུངས་པ་ལགས་ལ། བདག་ཅག་གི་རིགས་ཀྱི་ཆོས་ནི་འདི་ལྟ་བུ་ལགས་ཏེ། སྒྱུ་རྩལ་ཤེས་པ་ལ་བུ་མོ་གཏོང་གི་།སྒྱུ་རྩལ་མི་ཤེས་པ་ལ་
119b
མི་གཏོང་བ་ལགས་ན། གཞོན་ནུ་དེ་ནི་སྒྱུ་རྩལ་ཤེས་པའང་མ་ལགས་ལ། རལ་གྲིའི་ཐབས་དང ། འཕོངས་དང ། སྟོབས་དང་གྱད་ཀྱི་འཛིན་སྟངས་ཀྱི་ཚུལ་ཤེས་པའང་མ་ལགས་ན།་བདག་གིས་སྒྱུ་རྩལ་ཤེས་པ་མ་ལགས་པ་ལ་བུ་མོ་ཇི་ལྟར་གཏོང ། ཚིག་དེ་རྒྱལ་པོ་ལ་བཟླས་པ་དང ། དེ་ནས་རྒྱལ་པོ་འདི་སྙམ་དུ་སེམས་ཏེ། ང་ལ་དེས་འདི་དང་ལན་གཉིས་སུ་བསྡོས་ཏེ། གང་གི་ཚེ་ངས་ཤཱཀྱ་གཞོན་ནུ་དག་གཞོན་ནུའི་རིམ་གྲོ་བྱེད་དུ་ཅིའི་ཕྱིར་མི་འོང་ཞེས་བྱས་པ་དེའི་ཚེ་ཡང ། ཅི་ངེད་ལུག་གི་རིམ་གྲོ་བྱེད་དུ་འོང་ངམ་ཞེས་ཟེར་ལ། དེའང་འདི་སྐད་ཟེར་རོ་སྙམ་དུ་སེམས་ཤིང་འདུག་པར་གྱུར་ཏོ། །བྱང་ཆུབ་སེམས་དཔས་ཀྱང་གཏམ་དེ་ཐོས་ནས་རྒྱལ་པོ་ཟས་གཙང་མ་ག་ལ་བ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། ། ཅི་ནོངས་ཏེ་དེ་ལྟར་ཞལ་ཟུང་གནག་པར་བཞུགས། རྒྱལ་པོས་སྨྲས་པ། གཞོན་ནུ། དེ་དྲི་བས་ཅི་ཞིག་བྱ། གཞོན་ནུས་སྨྲས་པ། ལྷ། དེ་ནི་བཀའ་མི་སྩལ་དུ་མི་རུང་ངོ་ཞེས་ལན་གསུམ་གྱི་བར་དུ་བྱང་ཆུབ་སེམས་དཔས་རྒྱལ་པོ་ཟས་གཙང་མ་ལ་དྲིས་པ་དང ། དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་དངོས་པོ་དེ་དག་བརྗོད་དོ། །བྱང་ཆུབ་སེམས་དཔས་སྨྲས་པ། ལྷ། གྲོང་ཁྱེར་འདི་ན་བདག་དང་སྒྱུ་རྩལ་གྱིས་འགྲན་པར་ནུས་པ་འགའ་མཆིས་སམ། དེ་ནས་རྒྱལ་པོ་ཟས་གཙང་མས་བགད་ནས་བྱང་ཆུབ་སེམས་དཔའ་ལ་
120a
༄#། །འདི་སྐད་ཅེས་སྨྲས་སོ། །བུ་ཁྱོད་ཀྱིས་སྒྱུ་རྩལ་བསྟན་པར་ནུས་སམ། སྨྲས་པ། ལྷ་དེ་ནི། བདག་གིས་ལེགས་པར་རྡོ་ཐོགས་སོ། །དེ་བས་ན། སྒྱུ་རྩལ་འཚལ་བ་རྣམས་ཀུན་ཀྱང་གསོག་ཏུ་གསོལ། དེ་དག་གི་མདུན་དུ་བདག་གིས་སྒྱུ་རྩལ་བསྟན་པར་བགྱིའོ། །དེ་ནས་རྒྱལ་པོ་ཟས་གཙང་མས་སེར་སྐྱའི་གནས་ཀྱི་གྲོང་ཁྱེར་ཆེན་པོར་དྲིལ་གྱི་སྒྲ་བསྒྲགས་ཏེ། དེང་ནས་ཞག་བདུན་ན་གཞོན་ནུ་རང་གི་སྒྱུ་རྩལ་སྟོན་གྱི། དེར་སྒྱུ་རྩལ་ཤེས་པ་ཐམས་ཅད་ཤོག་ཅིག་ཅེས་བསྒོའོ། །དེ་ནས་ཞག་བདུན་ལོན་པ་དང ། ཤཱཀྱ་གཞོན་ནུ་ལྔ་བརྒྱ་ཙམ་ཚོགས་པར་གྱུར་ཏོ། །དེ་ནས་ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་རྒྱལ་བའི་རུ་མཚོན་དུ་བཞག་སྟེ། འདིར་རལ་གྲིའི་ཐབས་དང ། འཕོངས་དང ། སྟོབས་དང ། གྱད་ཀྱི་འཛིན་སྟངས་ཀྱིས་སུ་རྒྱལ་བ་དེ་ནི་འདི་ཁྱེར་ཅིག་ཅེས་དམ་བཅས་ནས་དེའི་ཚེ་ཐམས་ཅད་ཀྱི་ཐོག་མ་ལ་གཞོན་ནུ་ལྷ་སྦྱིན་གྲོང་ཁྱེར་ནས་བྱུང་ངོ ། །དེའི་ཚེ་བྱང་ཆུབ་སེམས་དཔའི་བཞོན་པར་གླང་པོ་དཀར་པོ་བོང་ཤིན་ཏུ་ཆེ་བ་ཞིག་གྲོང་ཁྱེར་དུ་ཁྲིད་པ་གཞོན་ནུ་ལྷ་སྦྱིན་གྱིས་མཐོང་ནས་ཕྲག་དོག་དང ། ཤཱཀྱའི་ང་རྒྱལ་དང ། སྟོབས་ཀྱི་ང་རྒྱལ་གྱིས་དྲེགས་ནས་དེས་གླང་པོ་དེ་ལག་པ་གཡོན་པས་སྣ་ནས་བཟུང་སྟེ་ལག་པ་གཡས་པས་ཐལ་མོ་ལན་གཅིག་བསྣུན་པས་བསད་པར་གྱུར་ཏོ། །དེའི་
120b
འོག་ཏུ་གཞོན་ནུ་མཛེས་དགའ་པོ་བྱུང་བ་དང ། དེས་གླང་པོ་ཆེན་པོ་དེ་གྲོང་ཁྱེར་གྱི་སྒོར་བསད་པ་མཐོང་ནས་སུས་བསད་ཅེས་དྲིས་པ་དང ། སྨྲས་པ། ལྷ་སྦྱིན་གྱིས་བསད་དོ། །སྨྲས་པ། ལྷ་སྦྱིན་གྱིས་དེ་ནི་མ་ལེགས་པ་ཞིག་བྱས་སོ་ཞེས་དེས་གླང་པོ་དེའི་མཇུག་མ་ནས་བཟུང་སྟེ་གྲོང་ཁྱེར་གྱི་སྒོ་ནས་གུད་དུ་བོར་རོ། །དེའི་འོག་ཏུ་བྱང་ཆུབ་སེམས་དཔའ་ཤིང་རྟ་ལ་ཞོན་ཏེ་བྱུང་བ་དང ། བྱང་ཆུབ་སེམས་དཔས་གླང་པོ་དེ་ལྟར་བསད་པ་མཐོང་ངོ ། །མཐོང་ནས་ཀྱང་སུས་བསད་ཅེས་དྲིས་པ་དང ། སྨྲས་པ། ལྷ་སྦྱིན་གྱིས་བསད་དོ། །སྨྲས་པ། ལྷ་སྦྱིན་གྱིས་དེ་ནི་མ་ལེགས་པ་ཞིག་བྱས་སོ། །གྲོང་ཁྱེར་འདིའི་སྒོ་ནས་སུས་བོར་ཞེས་དྲིས་པ་དང ། སྨྲས་པ། མཛེས་དགའ་བོས་བོར་རོ། །སྨྲས་པ། མཇེས་དགའ་བོས་དེ་ལྟར་བྱས་པའང་ལེགས་ན། སེམས་ཅན་འདི་ནི་ལུས་ཆེན་པོ་དང་ལྡན་པ་སྟེ། རུལ་ན་གྲོང་ཁྱེར་ཐམས་ཅད་དྲི་མི་ཞིམ་པས་གང་བར་འགྱུར་རོ་ཞེས་ནས། དེ་ནས་བྱང་ཆུབ་སེམས་དཔས་ཤིང་རྟ་ལ་འདུག་བཞིན་དུ་རྐང་པ་ཡ་གཅིག་ས་ལ་བརྐྱང་སྟེ་རྐང་པའི་མཐེ་བོས་གླང་པོ་དེ་བླངས་ཏེ་ར་བ་བདུན་རིམ་དང ། འོབས་བདུན་རིམ་འདས་ནས་གྲོང་ཁྱེར་གྱི་ཕྱི་རོལ་རྒྱང་གྲགས་གཅིག་ཙམ་དུ་འཕངས་སོ། །གླང་པོ་དེ་ཕྱོགས་གང་དུ་ལྷུང་བའི་ཕྱོགས་དེ་གཤོང་ཆེན་པོ་ཞིག་ཏུ་གྱུར་ནས་ད་ལྟར་གླང་པོའི་གཤོང་ཞེས་བྱ་བ་ཡིན་ནོ། །དེའི་ཚེ་ལྷ་དང་མི་བརྒྱ་
121a
༄#། །སྟོང་མང་པོ་ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང ། ག་ཞའི་སྒྲ་བརྒྱ་སྟོང་འབྱིན་ལ་གོས་ཀྱི་གཡབ་མོ་འབྱིན་བར་གྱུར་ཏོ། །ནམ་མཁའི་དཀྱིལ་ནས་ལྷའི་བུ་དག་གིས་ཀྱང་ཚིགས་སུ་བཅད་པ་འདི་དག་སྨྲས་སོ། །གླང་པོའི་དབང་པོ་བདོ་བ་བཞིན་བཞུད་པ། །ཞབས་ཀྱི་མཐེ་བོས་གླང་པོའི་དབང་པོ་བླངས། །ར་བ་བདུན་དང་འོབས་བདུན་ཡོངས་བཟླས་ནས། །གྲོང་ཁྱེར་འདི་ཡི་ཕྱི་རོལ་རྒྱང་རིང་འཕངས། །མཁྱེན་པ་མཆོག་མངའ་འདིས་ནི་གདོན་མི་ཟར། །ང་རྒྱལ་སྟོབས་ཀྱིས་མཐོ་བའི་ལུས་ཅན་རྣམས། །འཁོར་བའི་གྲོང་ནས་ཕྱི་རོལ་རྒྱང་རིང་དུ། །ཤེས་རབ་སྟོབས་ཀྱིས་འདིས་ནི་འཕེན་པར་འགྱུར། །དགེ་སློང་དག་།དེ་ནས་ཤཱཀྱ་གཞོན་ནུ་ལྔ་བརྒྱ་ཙམ་གྲོང་ཁྱེར་ནས་ཐོན་ནས་སའི་ཕྱོགས་གང་དུ་ཤཱཀྱ་གཞོན་ནུ་དག་སྒྱུ་རྩལ་སྟོན་པ་དེར་དོང་ངོ ། །རྒྱལ་པོ་ཟས་གཙང་མ་དང ། ཤཱཀྱ་རྒན་རབས་རྒན་རབས་དག་དང ། སྐྱེ་བོ་ཕལ་པོ་ཆེ་དག་ཀྱང་བྱང་ཆུབ་སེམས་དཔའ་དང ། ཤཱཀྱ་གཞོན་ནུ་གཞན་དག་གི་སྒྱུ་རྩལ་གྱི་ཁྱད་པར་མཐོང་བར་འདོད་དེ་སའི་ཕྱོགས་དེར་དོང་ངོ ། །དེ་ནས་ཐོག་མར་ཤཱཀྱ་གཞོན་ནུ་ཡི་གེ་མཁས་ཤིང་ཡི་གེའི་ཆོ་ག་ཤེས་པ་དེ་དག་དང ། བྱང་ཆུབ་སེམས་དཔར་ཡི་གེ་འགྲན་ཏོ། །དེའི་ཚེ་ཤཱཀྱ་དེ་དག་གིས་སློབ་དཔོན་ཀུན་གྱི་བཤེས་གཉེན་དཔང་དུ་བཞག་སྟེ། གཞོན་ནུ་འདི་དག་གི་ནང་ནས་ཡི་
121b
གེའི་འབྲུའམ། ཡི་གེའི་སྣ་གྲངས་ཀྱི་མཐར་ཕྱིན་པས་ཁྱད་པར་དུ་འཕགས་པ་གང་ཡིན་ཁྱོད་ཀྱིས་བྱེ་བྲག་ཕྱེ་ཞིག་།དེ་ནས་སློབ་དཔོན་ཀུན་གྱི་བཤེས་གཉེན་བྱང་ཆུབ་སེམས་དཔའ་ཡི་གེ་ལ་མཁས་པ་མངོན་དུ་མཐོང་བས་བཞིན་འཛུམ་པ་བསྟན་ཏེ་ཚིགས་སུ་བཅད་པ་འདི་དག་སྨྲས་སོ། །མི་ཡི་འཇིག་རྟེན་ལྷ་ཡི་འཇིག་རྟེན་ནམ། །ལྷ་མིན་འཇིག་རྟེན་དྲི་ཟའི་འཇིག་རྟེན་ནམ། །འཇིག་རྟེན་ཀུན་གྱི་ཡི་གེ་ཇི་སྙེད་གང ། །དེ་ལ་སེམས་ཅན་དག་པ་འདིས་མཐར་ཕྱིན། །མི་ཡི་ཟླ་བ་འདི་ཡིས་གང་མཁྱེན་པའི། །ཡི་གེ་དག་དང་ཡི་གེའི་སྣ་གྲངས་ཀྱི། ། མིང་ཡང་ཁྱེད་དང་ངས་ནི་ཡོང་མི་ཤེས། །འདི་ལ་མངོན་སུམ་ངས་ཤེས་འདི་རྒྱལ་འགྱུར། །ཤཱཀྱ་རྣམས་ཀྱིས་སྨྲས་པ། གཞོན་ནུ་འདི་ཡི་གེའི་ཤེས་པ་ལ་ཁྱད་པར་དུ་འཕགས་པ་ལྟའང་འཕགས་པར་ཆུག་སྟེ། གཞོན་ནུ་འདི་གྲངས་ཀྱིས་ཤེས་པ་ལ་ཁྱད་པར་ཅི་ཡོད་འགྲན་པར་བྱའོ། །དེ་ནས་ཤཱཀྱ་སྲིད་སྒྲུབ་ཅེས་བྱ་བ་རྩིས་པ་ཆེན་པོ་བྱེད་པ། བགྲང་པ་དང་རྩིས་ཀྱི་ཕ་རོལ་ཏུ་ཕྱིན་པ་ཞིག་ཡོད་པ་དེ་དཔང་དུ་བཞག་སྟེ། གཞོན་ནུ་འདི་དག་གི་ནང་ནས་གྲངས་ཀྱི་ཤེས་པ་ལ་ཁྱད་པར་དུ་གང་འཕགས་ཁྱོད་ཀྱིས་ལྟོས་ཤིག་ཅེས་བྱས་ཏེ། དེ་ནས་དེའི་ཚེ་བྱང་ཆུབ་སེམས་དཔས་ནི་རྩིས་མགོ་ཕོག་།ཤཱཀྱ་གཞོན་ནུ་གཅིག་གིས་ནི་བརྩིས་པ་དང ། བྱང་ཆུབ་སེམས་དཔའ་ལ་སླེབ་པར་མ་ནུས་སོ། །དེ་ནས་ཤཱཀྱ་གཞོན་ནུ་གཉིས་དང ། གསུམ་
122a
༄#། །དང ། བཞི་དང ། ལྔ་དང ། བཅུ་དང ། ཉི་ཤུ་དང ། སུམ་ཅུ་དང ། བཞི་བཅུ་དང ། ལྔ་བཅུ་དང ། བརྒྱ་ནས་ཤཱཀྱ་གཞོན་ནུ་ལྔ་བརྒྱའི་བར་གྱིས་དུས་གཅིག་ཏུ་བརྩིས་ཀྱང་བྱང་ཆུབ་སེམས་དཔའ་ལ་མ་སླེབ་བོ། །དེ་ནས་བྱང་ཆུབ་སེམས་དཔས་སྨྲས་པ། ཁྱེད་ཀྱིས་ནི་རྩིས་མགོ་ཕོག་ཅིག་།ཁོ་བོས་ནི་བརྩིའོ། །དེའི་ཚེ་ཤཱཀྱ་གཞོན་ནུ་གཅིག་གིས་རྩིས་མགོ་ཕོག་ན། བྱང་ཆུབ་སེམས་དཔས་རྩིས་ཀྱིས་ཆོད་པ་ལ་མ་སླེབ་བོ། །དེ་ནས་ཤཱཀྱ་གཞོན་ནུ་གཉིས་དང ། གསུམ་དང ། བཞི་དང ། ལྔ་དང ། བཅུ་དང ། ཉི་ཤུ་དང ། སུམ་ཅུ་དང ། བཞི་བཅུ་དང ། ལྔ་བཅུ་དང ། བརྒྱ་ནས་ཤཱཀྱ་གཞོན་ནུ་ལྔ་བརྒྱའི་བར་གྱིས་དུས་གཅིག་ཏུ་རྩིས་མགོ་ཕོག་ཀྱང་བྱང་ཆུབ་སེམས་དཔས་རྩིས་ཀྱིས་ཆོད་པ་ལ་མ་སླེབ་བོ། །བྱང་ཆུབ་སེམས་དཔས་སྨྲས་པ། འདི་ལ་བརྩད་དེའང་ཅི་རུང་གི་།ཁྱེད་ཐམས་ཅད་གཅིག་ཏུ་འདུས་ཏེ་རྩིས་མགོ་ཕོག་ཅིག་དང ། ཁོ་བོས་བརྩིའོ། །དེ་ནས་ཤཱཀྱ་གཞོན་ནུ་ལྔ་བརྒྱས་ཚིག་གཅིག་ཏུ་བརྗོད་པས་སྔ་ཕྱི་མེད་པར་རྩིས་མགོ་ཕོག་ན། བྱང་ཆུབ་སེམས་དཔས་རྨོངས་པ་མེད་པར་བརྩིས་ཏེ། དེ་ལྟར་ཤཱཀྱ་གཞོན་ནུ་དེ་དག་ཐམས་ཅད་ནི་ཕུག་ཐུག་པར་གྱུར། བྱང་ཆུབ་སེམས་དཔའ་ལ་ནི་ཐུག་པའི་མཐའ་མེད་པར་གྱུར་ཏོ། །དེ་ནས་རྩིས་པ་ཆེན་པོ་སྲིད་སྒྲུབ་ངོ་མཚར་དུ་གྱུར་ཏེ་ཚིགས་སུ་བཅད་པ་འདི་དག་སྨྲས་
122b
སོ། །ལེགས་པའི་བློ་མངའ་འདི་དྲིས་ན། །མཁྱེན་པ་ཤིན་ཏུ་མྱུར་བ་སྟེ། །ཤཱཀྱ་གཞོན་ནུ་ལྔ་བརྒྱ་ཙམ། །ཀུན་ཀྱང་རྩིས་ཀྱི་ལམ་ལ་ཐུག་།དེ་ཡི་ཤེས་རབ་འདི་འདྲ་སྟེ། །ཡེ་ཤེས་བློ་གྲོས་དྲན་ལྡན་ཡང ། །རྩིས་ཀྱི་མཁྱེན་པ་རྒྱ་མཚོ་དེ། །ད་དུང་སྦྱོང་ཞིང་སློབ་པ་མཛད། །དེ་ནས་ཤཱཀྱའི་ཚོགས་ཐམས་ཅད་ངོ་མཚར་དུ་གྱུར་ཏེ་ཤིན་ཏུ་རྨད་དུ་བྱུང་བར་སེམས་ཤིང ། དེའི་ཚེ་ཐམས་ཅད་མགྲིན་གཅིག་ཏུ་ཚིག་འདི་སྐད་ཅེས་སྨྲས་སོ། །ཀྱེ་དོན་གྲུབ་གཞོན་ནུ་ཁྱོད་ནི་རྒྱལ་ལོ་རྒྱལ་ལོ། །ཞེས་ཐམས་ཅད་སྟན་ལས་ལངས་ཏེ། ཐལ་མོ་སྦྱར་ནས་བྱང་ཆུབ་སེམས་དཔའ་ལ་ཕྱག་འཚལ་ཏེ་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། ཁྱོད་ལ་སྲས་དེ་ལྟར་དྲིས་པ་ལ་སྤོབས་པ་མྱུར་ཞིང་མགྱོགས་ལ། ཡང་ཞིང་ཤུགས་དང་ལྡན་པ་ཅན་མངའ་བ་ནི་བརྙེས་པ་ལེགས་པར་བརྙེས་སོ། །དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །བུ། རྩིས་པ་ཆེན་པོ་སྲིད་སྒྲུབ་གྲངས་ཀྱི་ཤེས་པ་ལ་མཁས་པ་དང ། རྩིས་ཀྱི་ལུགས་འགྲན་ནུས་སམ། སྨྲས་པ། ལྷ། རྡོ་ཐོགས་སོ། །སྨྲས་པ། འོ་ན་རྩིས་ཤིག་།དེ་ནས་རྩིས་པ་ཆེན་པོ་སྲིད་སྒྲུབ་ཀྱིས་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །གཞོན་ནུ་ཁྱོད་བྱེ་བ་ལས་བརྒྱར་གོང་དུ་བསྒྲེས་པ་ཞེས་བགྱི་བའི་རྩིས་ཀྱི་ལུགས་མཁྱེན་ཏམ། སྨྲས་པ། ཤེས་སོ། །སྨྲས་པ། འོ་ན་བྱེ་བ་ལས་བརྒྱར་གོང་དུ་
123a
༄#། །བསྒྲེས་པའི་རྩིས་ཀྱི་ལུགས་ལ་ཇི་ལྟར་རྗེས་སུ་འཇུག་པར་བགྱི། བྱང་ཆུབ་སེམས་དཔས་སྨྲས་པ། བྱེ་བ་ཕྲག་བརྒྱ་ན་ཐེར་འབུམ་ཞེས་བྱའོ། །ཐེར་འབུམ་ཕྲག་བརྒྱ་ན་ཁྲག་ཁྲིག་ཅེས་བྱའོ། །ཁྲག་ཁྲིག་ཕྲག་བརྒྱ་ན་གཏམས་པ་ཞེས་བྱའོ། །གཏམས་པ་ཕྲག་བརྒྱ་ན་དཀྲིགས་པ་ཞེས་བྱའོ། །དཀྲིགས་པ་ཕྲག་བརྒྱ་ན་མི་འཁྲུགས་ཞེས་བྱའོ། །མི་འཁྲུགས་ཕྲག་བརྒྱ་ན་ཁྱད་ཕྱིན་ཅེས་བྱའོ། །ཁྱད་ཕྱིན་ཕྲག་བརྒྱན་ཕང་སྟེང་ཞེས་བྱའོ། །ཕང་སྟེང་ཕྲག་བརྒྱ་ན་མང་འཛིན་ཅེས་བྱའོ། །མང་འཛིན་ཕྲག་བརྒྱ་ན་གླང་པོའི་སྟོབས་ཞེས་བྱའོ། །གླང་པོའི་སྟོབས་ཕྲག་བརྒྱ་ན་ངོགས་ཐོབ་ཅེས་བྱའོ། །ངོགས་ཐོབ་ཕྲག་བརྒྱ་ན་རྣམ་པར་བཞག་པ་གདགས་པ་ཞེས་བྱའོ། །རྣམ་པར་བཞག་པ་གདགས་པ་ཕྲག་བརྒྱ་ན་རྒྱུ་རིག་ཅེས་བྱའོ། །རྒྱུ་རིག་ཕྲག་བརྒྱ་ན་ལག་སྦྱིན་ཞེས་བྱའོ། །ལག་སྦྱིན་ཕྲག་བརྒྱ་ན་རྒྱུ་དབང་ཞེས་བྱའོ། །རྒྱུ་དབང་ཕྲག་བརྒྱ་ན་རྫོགས་ཐོབ་ཅེས་བྱའོ། །རྫོགས་ཐོབ་ཕྲག་བརྒྱ་ན་བགྲང་རྟོགས་ཞེས་བྱའོ། །བགྲང་རྟོགས་ཕྲག་བརྒྱ་ན་སྒྲིབ་པ་ཞེས་བྱའོ། །སྒྲིབ་པ་ཕྲག་བརྒྱ་ན་སྟོབས་ཞེས་བྱའོ། །སྟོབས་ཕྲག་བརྒྱ་ན་ཀུན་སྟོབས་ཞེས་བྱའོ། །ཀུན་སྟོབས་ཕྲག་བརྒྱ་ན་རྣམ་པར་བརྡ་ཤེས་ལྡན་ཞེས་བྱའོ། །རྣམ་པར་བརྡ་ཤེས་ལྡན་ཕྲག་བརྒྱ་ན་བརྡ་ཤེས་ཀུན་ཞེས་བྱའོ། །བརྡ་ཤེས་ཀུན་ཕྲག་
123b
བརྒྱ་ན་རྣམ་འབྱུང་ཞེས་བྱའོ། །རྣམ་འབྱུང་ཕྲག་བརྒྱ་ན་དེའི་མཚན་ཉིད་ཅེས་བྱ་སྟེ། འདི་ལྟར་དེའི་མཚན་ཉིད་ཅེས་བྱ་བའི་རྩིས་ཀྱིས་ནི་རིའི་རྒྱལ་པོ་རི་རབ་བརྩི་བའི་གཞིར་བྱས་ཀྱང་ཆོད་པར་རུང་ངོ ། །དེའི་ཡང་གོང་ན་རྒྱལ་མཚན་གྱི་རྩེ་མོའི་ནོར་བུ་ཞེས་བྱ་བའི་གྲངས་ཡོད་དེ། གྲངས་དེས་ནི་གངྒཱའི་ཀླུང་གི་བྱེ་མ་སྙེད་བརྩི་བའི་གཞིར་བྱས་ཀྱང་ཆོད་པར་རུང་ངོ ། །དེའི་ཡང་གོང་ན་རྒྱལ་མཚན་གྱི་རྩེ་མོ་ངེས་པར་སྒྲོག་པ་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་དེད་འདྲེན་གདགས་པ་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་གཏན་ལ་འབེབས་པ་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་གཅོད་རྟོགས་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་གཅོད་རྟོགས་ལྡན་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་ཐམས་ཅད་རྣམ་པར་འབྱེད་པ་ཞེས་བྱ་བའི་གྲངས་ཡོད་དེ། གྲངས་དེས་ནི་གངྒཱའི་ཀླུང་བཅུའི་བྱེ་མ་བརྩི་བའི་གཞིར་བྱས་ཀྱང་ཆོད་པར་རུང་ངོ ། །དེའི་ཡང་གོང་ན་སྙིང་པོ་མཆོག་ཅེས་བྱ་བའི་གྲངས་ཡོད་དེ། གྲངས་དེས་ནི་གངྒཱའི་ཀླུང་བྱེ་བ་ཕྲག་བརྒྱའི་བྱེ་མ་དང་མཉམ་པ་བརྩི་བའི་གཞིང་བྱས་ཀྱང་ཆོད་པར་རུང་ངོ ། །དེའི་ཡང་གོང་ན་རྡུལ་ཕྲ་རབ་ལ་འཇུག་པའི་རྗེས་སུ་སོང་བ་ཞེས་བྱ་བའི་གྲངས་ཡོད་དེ། གྲངས་དེ་ལ་ནི་དེ་བཞིན་གཤེགས་པ་དང ། བྱང་ཆུབ་ཀྱི་སྙིང་པོ་མཆོག་དམ་པར་གནས་པའི་
124a
༄#། །བྱང་ཆུབ་སེམས་དཔའ་དང ། ཆོས་ཐམས་ཅད་ལ་དབང་བསྐུར་བ་མངོན་དུ་གྱུར་པའི་བྱང་ཆུབ་སེམས་དཔའ་མ་གཏོགས་པར་སེམས་ཅན་གྱི་རིས་ན་གྲངས་དེ་ཤེས་པ་ནི་ང་དང ། གཞན་ཡང་ང་དང་འདྲ་བ་སྲིད་པ་ཐ་མ་པར་གྱུར་པ་ཁྱིམ་གྱི་གནས་ནས་མངོན་པར་མ་བྱུང་བའི་བྱང་ཆུབ་སེམས་དཔའ་མ་གཏོགས་པར་གང་ཡང་མེད་དོ།། སྲིད་སྒྲུབ་ཀྱིས་སྨྲས་པ། གཞོན་ནུ། རྡུལ་ཕྲ་རབ་ལ་འཇུག་པའི་རྗེས་སུ་སོང་བའི་གྲངས་ལ་ཇི་ལྟར་རྗེས་སུ་འཇུག་པར་བགྱི། བྱང་ཆུབ་སེམས་དཔས་སྨྲས་པ། རྡུལ་ཕྲ་རབ་ཀྱི་རྡུལ་བདུན་ལ་ནི་རྡུལ་ཕྲ་མོ་གཅིག་གོ་།རྡུལ་ཕྲ་མོ་བདུན་ལ་ནི་ཆུང་དུ་གཅིག་གོ་།རྡུལ་ཆུང་ངུ་བདུན་ལ་ནི་ཉི་ཟེར་གྱི་རྡུལ་གཅིག་གོ་།ཉི་ཟེར་གྱི་རྡུལ་བདུན་ལ་ནི་རི་བོང་རྡུལ་གཅིག་གོ་།རི་བོང་རྡུལ་བདུན་ལ་ནི་ལུག་རྡུལ་གཅིག་གོ་།ལུག་རྡུལ་བདུན་ལ་ནི་གླང་རྡུལ་གཅིག་གོ་།གླང་རྡུལ་བདུན་ལ་ནི་སྲོ་མ་གཅིག་གོ་།སྲོ་མ་བདུན་ལ་ནི་ཡུངས་འབྲུ་གཅིག་གོ་།ཡུངས་འབྲུ་བདུན་ལ་ནི་ནས་གཅིག་གོ་།ནས་བདུན་ལ་ནི་སོར་གཅིག་གོ་།སོར་བཅུ་གཉིས་ལ་ནི་མཐོ་གང་ངོ ། །མཐོ་དོ་ལ་ནི་ཁྲུ་གང་ངོ ། །ཁྲུ་བཞི་ལ་ནི་གཞུ་གང་ངོ ། །གཞུ་སྟོང་ལ་ནི་ཡུལ་མ་ག་དྷའི་རྒྱང་གྲགས་གཅིག་གོ་།རྒྱང་གྲགས་བཞི་ལ་ནི་དཔག་ཚད་གཅིག་གོ་།དེ་ལ་ཁྱེད་ཀྱི་ནང་ནས་དཔག་ཚད་ལ་རྡུལ་ཕྲ་རབ་དེ་ལྟ་
124b
བུ་དུ་ཡོད་སུས་ཤེས། སྲིད་སྒྲུབ་ཀྱིས་སྨྲས་པ། གཞོན་ནུ། བདག་ཉིད་ཀྱང་དེ་ལ་མགོ་རྨོངས་ན། གཞན་བློ་ཆུང་ངུ་དང་ལྡན་པ་ལྟ་སྨོས་ཀྱང་ཅི་འཚལ། དེ་བས་ན། གཞོན་ནུས་དཔག་ཚད་ལ་རྡུལ་ཕྲ་རབ་དེ་ལྟ་བུ་དུ་མཆིས་བཤད་དུ་གསོལ། བྱང་ཆུབ་སེམས་དཔས་སྨྲས་པ། དེ་ལ་དཔག་ཚད་ལ་ནི་རྡུལ་ཕྲ་རབ་མི་འཁྲུགས་ཁྲག་ཁྲིག་གཅིག་དང ། བྱེ་བ་ཁྲག་ཁྲིག་འབུམ་ཕྲག་སུམ་ཅུ་དང ། བྱེ་བ་དྲུག་ཅུ་ཕྲག་བརྒྱ་དང ། བྱེ་བ་ཕྲག་སུམ་ཅུ་རྩ་གཉིས་དང ། འབུམ་ཕྲག་ལྔ་དང ། ཁྲི་ཉིས་སྟོང་ཡོད་དེ། དཔག་ཚད་ལ་ནི་རྡུལ་ཕྲ་རབ་དེ་སྙེད་ཅིག་ཡོད་དོ། །དེ་ལྟར་འཇུག་པ་དེས་ཛམྦུའི་གླིང་འདི་ལ་ནི་དཔག་ཚད་བདུན་སྟོང་ཡོད་དོ། །ནུབ་ཀྱི་བ་ལང་སྤྱོད་ལ་ནི་དཔག་ཚད་བརྒྱད་སྟོང་ཡོད་དོ། །ཤར་གྱི་ལུས་འཕགས་ལ་ནི་དཔག་ཚད་དགུ་སྟོང་ཡོད་དོ། །བྱང་གི་སྒྲ་མི་སྙན་ལ་ནི་དཔག་ཚད་ཁྲི་ཡོད་དེ། དེ་ལྟར་འཇུག་པ་དེས་གླིང་བཞི་པའི་འཇིག་རྟེན་གྱི་ཁམས་འདི་ལ་སོགས་པ་གླིང་བཞི་པ་ཆེན་པོའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་དང ། རྒྱ་མཚོ་ཆེན་པོ་བྱེ་བ་ཕྲག་བརྒྱ་དང ། ཁོར་ཡུག་དང་ཁོར་ཡུག་ཆེན་པོ་བྱེ་བ་ཕྲག་བརྒྱ་དང ། རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང ། རྒྱལ་ཆེན་བཞིའི་རིས་ཀྱི་ལྷ་བྱེ་བ་ཕྲག་བརྒྱ་དང ། སུམ་ཅུ་རྩ་གསུམ་བྱེ་བ་ཕྲག་བརྒྱ་དང ། འཐབ་བྲལ་བྱེ་བ་ཕྲག་བརྒྱ་དང ། དགའ་ལྡན་བྱེ་བ་ཕྲག་བརྒྱ་དང ། འཕྲུལ་
125a
༄#། །དགའ་བྱེ་བ་ཕྲག་བརྒྱ་དང ། གཞན་འཕྲུལ་དབང་བྱེད་བྱེ་བ་ཕྲག་བརྒྱ་དང ། ཚངས་རིས་བྱེ་བ་ཕྲག་བརྒྱ་དང ། ཚངས་པའི་མདུན་ན་འདོན་བྱེ་བ་ཕྲག་བརྒྱ་དང ། ཚངས་འཁོར་བྱེ་བ་ཕྲག་བརྒྱ་དང ། ཚངས་ཆེན་བྱེ་བ་ཕྲག་བརྒྱ་དང ། འོད་ཆུང་བྱེ་བ་ཕྲག་བརྒྱ་དང ། ཚད་མེད་འོད་བྱེ་བ་ཕྲག་བརྒྱ་དང ། འོད་གསལ་བྱེ་བ་ཕྲག་བརྒྱ་དང ། དགེ་ཆུང་བྱེ་བ་ཕྲག་བརྒྱ་དང ། ཚད་མེད་དགེ་བྱེ་བ་ཕྲག་བརྒྱ་དང ། དགེ་རྒྱས་བྱེ་བ་ཕྲག་བརྒྱ་དང ། སྤྲིན་མེད་བྱེ་བ་ཕྲག་བརྒྱ་དང ། བསོད་ནམས་སྐྱེས་བྱེ་བ་ཕྲག་བརྒྱ་དང ། འབྲས་བུ་ཆེ་བ་བྱེ་བ་ཕྲག་བརྒྱ་དང ། སེམས་ཅན་འདུ་ཤེས་མེད་པ་བྱེ་བ་ཕྲག་བརྒྱ་དང ། མི་ཆེ་བ་བྱེ་བ་ཕྲག་བརྒྱ་དང ། མི་གདུང་བ་བྱེ་བ་ཕྲག་བརྒྱ་དང ། གྱ་ནོམ་སྣང་བྱེ་བ་ཕྲག་བརྒྱ་དང ། ཤིན་ཏུ་མཐོང་བྱེ་བ་ཕྲག་བརྒྱ་དང ། འོག་མིན་གྱི་ལྷའི་རིས་བྱེ་བ་ཕྲག་བརྒྱ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་ཅེས་བྱ་སྟེ། ཡངས་ཤིང་རྒྱ་ཆེ་བའོ། །དེ་ལ་དཔག་ཚད་དུ་ཡོད་པ་དང ། དཔག་ཚད་བརྒྱ་ཕྲག་དུ་ཡོད་པ་དང ། དཔག་ཚད་སྟོང་ཕྲག་དུ་ཡོད་པ་དང ། དཔག་ཚད་བྱེ་བ་ཕྲག་དུ་ཡོད་པ་དང ། དཔག་ཚད་ཐེར་འབུམ་ཕྲག་དུ་ཡོད་པ་དང ། དཔག་ཚད་ཁྲག་ཁྲིག་ཕྲག་དུ་ཡོད་པ་དང ། དེ་བཞིན་དུ་སྦྱར་ཏེ་དཔག་ཚད་སྙིང་པོ་དམ་པའི་རྩིས་ཀྱི་བར་དུ་ཐུག་པ་ལ་རྡུལ་ཕྲ་རབ་དེ་ལྟ་བུ་དུ་ཡོད་
125b
ཅེས་བྱ་བའི་རྩིས་དེ་ནི་གྲངས་དང་བགྲང་བ་ལས་འདས་པ་སྟེ། དེ་ནི་གྲངས་མེད་པ་ཞེས་བྱའོ། །དེ་བས་ཀྱང་ཤིན་ཏུ་གྲངས་མེད་པ་དེ་སྙེད་ཀྱི་རྡུལ་ཕྲ་རབ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཡོད་དོ། །བྱང་ཆུབ་སེམས་དཔས་རྩིས་ཀྱི་ལེའུ་འདི་བསྟན་པའི་ཚེ་རྩིས་པ་ཆེན་པོ་སྲིད་སྒྲུབ་དང ། ཤཱཀྱའི་ཚོགས་ཐམས་ཅད་ཀྱང་ཚིམ་ཞིང་མགུ་ལ་ཡིད་རངས་ཏེ་ངོ་མཚར་རྨད་དུ་བྱུང་བ་ཐོབ་ནས་དེ་དག་ཐམས་ཅད་ཀྱང་གོས་རེ་རེ་ཞིག་བཞག་སྟེ་གོས་དང་རྒྱན་ལྷག་མ་གཞན་བྱང་ཆུབ་སེམས་དཔའ་ལ་ཡོན་དུ་ཕུལ་ལོ། །དེ་ནས་རྩིས་པ་ཆེན་པོ་སྲིད་སྒྲུབ་ཀྱིས་ཚིགས་སུ་བཅད་པ་འདི་དག་སྨྲས་སོ། །བྱེ་བ་བརྒྱ་ན་ཐེར་འབུམ་ཐེར་འབུམ་དེ་བཞིན་དུ། །ཁྲག་ཁྲིག་དང་ནི་གཏམས་པའི་རྒྱུད་དང་དེ་བཞིན་དུ། །དཀྲིགས་པ་མི་འཁྲུགས་བདག་གི་ཤེས་ཐུག་དེ་གོང་མིན། །མཚུངས་པ་མེད་ཀྱི་མཁྱེན་བརྩིས་ལ་དེ་བས་ལྷག། ཡང་ཀྱེ་ཤཱཀྱ་དག་།སྟོང་གསུམ་དག་གི་རྡུལ་དང་རྩཝ་དང་ནགས་ཚལ་དང ། །སྨན་དང་ཆུ་ཡི་ཐིགས་པ་ཇི་སྙེད་ཡོད་པ་དང ། །ཧུ་ཞེས་བྱ་བ་གཅིག་ལ་འདི་ཡིས་རྩི་ནུས་ན། །ལྔ་བརྒྱ་ཙམ་དག་གི་ལྟ་ངོ་མཚར་ཅི་ཞིག་ཆེ། །དེ་ནས་ལྷ་དང་མི་བརྒྱ་སྟོང་དག་ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང ། གཞའི་སྒྲ་བརྒྱ་སྟོང་འབྱིན་པར་གྱུར་ཏོ། །ནམ་མཁའི་དཀྱིལ་ནས་ལྷའི་བུ་དག་གིས་ཀྱང་ཚིགས་སུ་བཅད་པ་འདི་དག་བརྗོད་དོ། །དུས་གསུམ་སེམས་ཅན་མ་
126a
༄#། །ལུས་ཇི་སྙེད་གང་ཡོད་པའི། །སེམས་དང་སེམས་བྱུང་འདུ་ཤེས་རྣམ་པར་རྟོག་པ་དག་།མཆོག་དང་ཐ་མ་དེ་བཞིན་རྒྱ་ཆུང་ཡངས་པ་དག་།ཐམས་ཅད་སེམས་ཀྱི་འགྱུར་བ་གཅིག་གིས་རབ་ཏུ་མཁྱེན། །དགེ་སློང་དག་།དེ་ལྟར་ཤཱཀྱ་གཞོན་ནུ་དེ་དག་ཐམས་ཅད་ཟིལ་གྱིས་ནོན་པར་གྱུར་ཏེ་བྱང་ཆུབ་སེམས་དཔའ་འབའ་ཞིག་ཁྱད་པར་དུ་འཕགས་པར་གྱུར་ཏོ། །དེའི་རྗེས་ལ་མཆོད་པ་དང ། རྐྱལ་དང ། བང་ལ་སོགས་པ་ཐམས་ཅད་ལའང་བྱང་ཆུབ་སེམས་དཔའ་ཉིད་ཁྱད་པར་དུ་འཕགས་པར་གྱུར་ནས་ནམ་མཁའི་དཀྱིལ་ནས་ལྷའི་བུ་དག་གིས་ཚིགས་སུ་བཅད་པ་འདི་དག་སྨྲས་སོ། །བརྟུལ་ཞུགས་དཀའ་ཐུབ་སྡོམ་པའི་ཡོན་ཏན་དང ། །བསྐལ་པ་བྱེ་བར་བཟོད་དུལ་བྱམས་སྟོབས་ཀྱིས། །ལུས་དང་སེམས་ནི་ཅི་ནས་ཡང་མཛད་པས། །དེ་ཡི་ཤུགས་ཀྱི་ཁྱད་པར་མཉམ་པར་གྱིས། །སེམས་ཅན་མཆོག་འདི་གྲོང་ཁྱེར་འདི་ན་བཞུགས་པ་ཁྱེད་ཀྱིས་མཐོང ། །འོན་ཀྱང་འདི་ནི་ཕྱོགས་བཅུའི་འཇིག་རྟེན་ཁམས་རྣམས་ཐམས་ཅད་དུ། །སྐད་ཅིག་གཅིག་ལ་རིན་ཆེན་གསེར་དང་མཆོད་པ་སྣ་ཚོགས་ཀྱིས། །རྒྱལ་བ་དཔག་ཏུ་མེད་པ་དག་ལ་མཆོད་པ་མཛད་དུ་བཞུད། །འོན་ཀྱང་རྫུ་འཕྲུལ་དེ་འདྲ་བརྙེས་པ་དེ། །བྱོན་ཏམ་བཞུད་པར་ཁྱེད་ཀྱིས་ཡོང་མི་ཤེས། །ཇི་ཙམ་ཞུགས་ཤེས་དེ་ལ་ཅི་ཞིག་བསྐྱེད། །འདི་ནི་མཚུངས་པ་མེད་
126b
ཀྱི་རིམ་གྲོ་སྐྱེད། །དེ་ལྟར་བྱང་ཆུབ་སེམས་དཔའ་དེ་གཅིག་པུ་ཁྱད་པར་དུ་འཕགས་པར་གྱུར་ཏོ། །དེ་ནས་ཤཱཀྱ་དེ་དག་གིས་སྨྲས་པ། གཞོན་ནུ་འདི་ལ་སྟོབས་ཀྱི་ཁྱད་པར་ཅི་ཡོད་པའང་སད་པར་བྱའོ། །དེ་ནས་བྱང་ཆུབ་སེམས་དཔའ་ཕྱོགས་གཅིག་ཏུ་འདུག་ནས་ཤཱཀྱ་གཞོན་ནུ་ལྔ་བརྒྱ་པོ་དེ་དག་ཀྱང་དུས་གཅིག་ཏུ་སོ་སོ་ནས་སྟོབས་འགྱེད་པར་གྱུར་ཏེ། ཤཱཀྱ་གཞོན་ནུ་སུམ་ཅུ་རྩ་གཉིས་ཤིག་འཚོགས་ནས་བྱང་ཆུབ་སེམས་དཔའ་ལ་རྒོལ་བ་ལྟར་ཆས་ཏེ་འཁོད་དོ། །དེའི་ནང་ནས་དགའ་བོ་དང ། ཀུན་དགའ་བོ་གཉིས་ཀྱིས་བྱང་ཆུབ་སེམས་དཔའ་ལ་སྟོབས་བརྒལ་བའི་ཕྱིར་དྲུང་དུ་ཕྱིན་པ་དང ། བྱང་ཆུབ་སེམས་དཔའི་ལག་གིས་རེག་མ་ཐག་ཏུ་དེ་གཉིས་ཀས་ཀྱང་བྱང་ཆུབ་སེམས་དཔའི་མཐུ་དང་གཟི་བརྗིད་མ་བཟོད་དེ་ས་ལ་འགྱེལ་ཏོ། །དེའི་འོག་ཏུ་ཤཱཀྱ་གཞོན་ནུ་ལྷ་སྦྱིན་ང་རྒྱལ་ཅན་མཐུ་སྙེམས་པ་དེ་སྟོབས་ཀྱི་ང་རྒྱལ་དང ། ཤཱཀྱའི་ང་རྒྱལ་གྱིས་སྙེམས་ལ། བྱང་ཆུབ་སེམས་དཔའ་ལ་བསྔོ་ཞིང་ཐམས་ཅད་དང་ལྡན་པའི་ལྟད་མོ་པའི་དཀྱིལ་འཁོར་ལ་བསྐོར་ཏེ་བསྒྱིངས་ནས་བྱང་ཆུབ་སེམས་དཔའ་ལ་སྟོབས་བརྒལ་ཏོ། །དེ་ནས་བྱང་ཆུབ་སེམས་དཔས་མ་སྟབས་ཤིང་མི་རིངས་པར་སྟངས་བཟང་པོར་གཞོན་ནུ་ལྷས་བྱིན་ལག་པ་གཡས་པས་བཏེག་སྟེ་གསད་པའི་བློས་མ་ཡིན་གྱི། ང་རྒྱལ་བཅག་པའི་ཕྱིར་བྱམས་པའི་སེམས་ཀྱིས་
127a
༄#། །ནམ་མཁའ་ལས་བསྐོར་བསྐོར་ཏེ་སའི་སྟེང་དུ་བོར་ཡང་དེའི་ལུས་ལ་གནོད་པར་གྱུར་པ་མེད་དོ། །དེ་ནས་བྱང་ཆུབ་སེམས་དཔས་སྨྲས་པ། དེ་ལྟ་བུ་གནོད་པར་འགྱུར་བས་ཆོག་གི་།ཐམས་ཅད་གཅིག་ཏུ་འདུས་ཏེ་བརྒལ་བར་གྱིས་ཤིག་།དེ་ནས་དེ་དག་ཐམས་ཅད་ང་རྒྱལ་གྱིས་རློམ་ཞིང་བྱང་ཆུབ་སེམས་དཔའ་ལ་རུབ་པར་གྱུར་ཏོ། །དེ་ནས་དེ་དག་བྱང་ཆུབ་སེམས་དཔའ་ལ་རེག་མ་ཐག་ཏུ་བྱང་ཆུབ་སེམས་དཔའི་དཔལ་དང་གཟི་བརྗིད་དང་ལུས་ཀྱི་མཐུ་མ་བཟོད་དེ། བྱང་ཆུབ་སེམས་དཔས་རེག་པ་ཙམ་གྱིས་ས་ལ་འགྱེལ་བར་གྱུར་ཏོ། །དེ་ནས་ལྷ་དང་མི་བརྒྱ་སྟོང་དེ་དག་ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང ། ག་ཞའི་སྒྲ་བརྒྱ་སྟོང་ཕྱུང་ངོ ། །ནམ་མཁའི་དཀྱིལ་ན་འཁོད་པའི་ལྷའི་བུ་དག་གིས་ཀྱང་མེ་ཏོག་གི་ཆར་ཆེན་པོ་མངོན་པར་ཕབ་སྟེ་དབྱངས་གཅིག་ཏུ་ཚིགས་སུ་བཅད་པ་འདི་དག་སྨྲས་སོ། །ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་གྱད་ཆེན་སྟོབས་པོ་ཆེ་འདྲ་ལ། །གཅིག་ཅར་སྐྱེས་བུའི་མཆོག་ལ་རུབ་གྱུར་ཀྱང ། །རེག་པ་ཙམ་གྱིས་ས་ལ་འགྱེལ་བར་འགྱུར། །ལྷུན་པོ་རི་རབ་རྡོ་རྗེའི་ཁོར་ཡུག་དང ། །ཕྱོགས་བཅུ་དག་ན་རི་གཞན་གང་ཡོད་པ། །ལག་པས་མཉེས་ཤིང་རྨེག་མེད་ཕྱིར་རློག་ན། །མི་ལུས་སྙིང་པོ་མེད་པ་མཚར་ཅི་ཆེ། །འདི་ནི་ཤིང་དབང་མཆོག་དྲུང་སྡང་པའི་
127b
གྱད། །དཔུང་བཅས་བདུད་རྣམས་རྒྱལ་མཚན་སྡེར་བཅས་པ། །ནག་པོའི་རྩ་ལག་བྱམས་པའི་སྟོབས་ཀྱིས་འཇོམས། །བླ་མེད་བྱང་ཆུབ་ཞི་བར་འཚང་ཡང་རྒྱ། །དེ་ལྟར་བྱང་ཆུབ་སེམས་དཔའ་དེ་གཅིག་པུ་ཁྱད་པར་དུ་འཕགས་པར་གྱུར་ཏོ། །དེ་ནས་ཤཱཀྱ་ལག་ན་བེ་ཅོན་ཅན་གྱིས་ཤཱཀྱ་གཞོན་ནུ་དེ་དག་ལ་འདི་སྐད་ཅེས་སྨྲས་སོ། །འདི་དག་ནི་སད་ཀྱང་ཟིན། མཐོང་ཡང་ཟིན་གྱི། །ད་ནི་འཕོང་ཞིག་བསྟན་པར་གྱིས་ཤིག་།དེའི་ཚེ་ཀུན་དགའ་བོས་རྒྱང་གྲགས་གཉིས་ཀྱི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེའི་འོག་ཏུ་ལྷ་སྦྱིན་གྱིས་རྒྱང་གྲགས་བཞིའི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེའི་འོག་ཏུ་མཛེས་དགའ་བོས་རྒྱང་གྲགས་དྲུག་གི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེའི་འོག་ཏུ་ཤཱཀྱ་ལག་ན་བེ་ཅོན་ཅན་གྱིས་དཔག་ཚད་གཉིས་ཀྱི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེ་ནས་བྱང་ཆུབ་སེམས་དཔས་རྒྱང་གྲགས་བཅུའི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་ཏེ། དེའི་དྲུང་དུ་ཤིང་ཏ་ལ་བདུན་དངར་ནས་དེའི་ཕ་རོལ་ཏུ་ལྕགས་ཀྱི་ཕག་རྒོད་ཀྱི་གཟུགས་འཁྲུལ་འཁོར་དུ་བྱས་པ་གཅིག་བཙུགས་སོ། །དེ་ནས་ཀུན་དགའ་པོས་རྒྱང་གྲགས་གཉིས་ཀྱི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། དེ་ཕན་ཆོད་ཀྱི་ལ་ཕོག་པར་མ་ནུས་སོ། །ལྷ་སྦྱིན་གྱིས་
128a
༄#། །རྒྱང་གྲགས་བཞིའི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། དེ་ཕན་ཆད་ཀྱི་ལ་ཕོག་པར་མ་ནུས་སོ། །མཛེས་དགའ་བོས་རྒྱང་གྲགས་དྲུག་གི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། དེ་ཕན་ཆད་ཀྱི་ལ་ཕོག་པར་མ་ནུས་སོ། །ལག་ན་བེ་ཅོན་ཅན་གྱིས་དཔག་ཚད་གཉིས་ཀྱི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། ཐལ་བྱུང་དུ་ཕྱིན་ནས་དེ་ཕན་ཆད་ཀྱི་ལ་ཕོག་པར་མ་ནུས་སོ། །དེ་ནས་བྱང་ཆུབ་སེམས་དཔའ་ལ་གཞུ་གང་དང་གང་བྱིན་པ་དེ་དག་ལ་ལ་ནི་གཞུ་རྒྱུད་ཆད། ལ་ལ་ནི་ཆག་ནས་བྱང་ཆུབ་སེམས་དཔས་སྨྲས་པ། གྲོང་ཁྱེར་འདི་ན་གཞུ་གཞན་ལ་ལ་བདག་གིས་བརྡུང་བཟོད་པའམ། ལུས་ཀྱི་སྟོབས་དང་མཐུ་བཟོད་པ་མཆིས་སམ། རྒྱལ་པོས་སྨྲས་པ། བུ། ཡོད་དོ། །གཞོན་ནུས་སྨྲས་པ། ལྷ། དེ་ལྟ་བུ་གང་ན་མཆིས། རྒྱལ་པོས་སྨྲས་པ། བུ། ཁྱོད་ཀྱི་མེས་སེངྒེའི་འགྲམ་ཞེས་བྱ་བ་བྱུང་སྟེ། དེའི་གནམ་རུ་ད་ལྟར་ལྷ་ཁང་ན་སྤོས་དང་ཕྲེང་བས་མཆོད་དེ། དེ་ནི་སུས་ཀྱང་བདུང་བར་ཡང་མི་ནུས་ན། དགང་པར་ལྟ་སྨོས་ཀྱང་ཅི་དགོས་པ་ཞིག་ཡོད་དོ། །བྱང་ཆུབ་སེམས་དཔས་སྨྲས་པ། ལྷ། དེ་བླང་དུ་གསོལ། སད་པར་བགྱིའོ། །དེ་ནས་གཞུ་དེ་བླངས་ཏེ་འོངས་པ་དང ། ཤཱཀྱ་གཞོན་ནུ་ཐམས་ཅད་ཀྱིས་ནན་ཏན་གྱི་མཆོག་
128b
གིས་བསྒྲིམས་ཀྱང་གཞུ་དེ་བདུང་བར་ཡང་མ་ནུས་ན། དགང་པར་ལྟ་སྨོས་ཀྱང་ཅི་དགོས་ཏེ་མ་ནུས་སོ། །དེ་ནས་གཞུ་དེ་ཤཱཀྱ་ལག་ན་བེ་ཅོན་ཅན་གྱིས་ལུས་ཀྱི་མཐུ་སྟོབས་ཐམས་ཅད་ཕྱུང་སྟེ་གཞུ་དེ་བདུང་བར་བརྒལ་ན་མ་བདུངས་སོ། །དེ་ནས་གཞུ་དེ་བྱང་ཆུབ་སེམས་དཔའ་ལ་བྱིན་ནོ། །དེ་ནས་བྱང་ཆུབ་སེམས་དཔས་གཞུ་དེ་བླངས་ཏེ་སྟན་ལས་མ་ལངས་པར་སྐྱིལ་མོ་ཀྲུང་ཕྱེད་བཅས་ཏེ་ལག་པ་གཡོན་པས་བཟུང་ནས་ལག་པ་གཡས་པའི་སོར་མོ་གཅིག་གིས་བདུངས་སོ། །གཞུ་དེ་དེ་ལྟར་བདུངས་པའི་ཚེ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་དུ་སྒྲ་མངོན་པར་གྲག་པར་གྱུར་ཏོ། །གྲོང་ཁྱེར་གྱི་མི་ཐམས་ཅད་ཀྱང་སྐྲག་སྐྲག་པོར་གྱུར་ཏེ། གཅིག་ལ་གཅིག་འདྲི་ཞིང་འདི་ལྟ་ཅིའི་སྒྲ་ཞིག་ཅེས་ཟེར་རོ། །དེ་ལ་ལ་ལ་ན་རེ།་གཞོན་ནུ་དོན་གྲུབ་ཀྱིས་མེས་ཀྱི་གནམ་རུ་བདུངས་ནས་དེའི་སྒྲ་བྱུང་བ་འདི་ཡིན་ནོ། །ཞེས་ཟེར་རོ། །དེ་ནས་ལྷ་དང་མི་བརྒྱ་སྟོང་དག་ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང ། ག་ཞའི་སྒྲ་བརྒྱ་སྟོང་འབྱིན་པར་གྱུར་ཏོ། །ནམ་མཁའི་དཀྱིལ་ན་འཁོད་པའི་ལྷའི་བུ་དག་གིས་ཀྱང་རྒྱལ་པོ་ཟས་གཙང་མ་དང ། སྐྱེ་བོའི་ཚོགས་ཕལ་པོ་ཆེ་དེ་དག་ལ་ཚིགས་སུ་བཅད་དེ་སྨྲས་པ།་གདན་ལས་མ་བཞེངས་བརྩལ་བ་མ་མཆིས་སུ། །ཐུབ་པས་གནམ་རུ་འདི་འདྲ་བ་དུངས་པ་ལས། །གདོན་མི་འཚལ་བར་དགོངས་པ་རྫོགས་གྱུར་ཏེ། །བདུད་ཀྱི་སྡེ་བཅོམ་མྱུར་
129a
༄#། །དུ་ཐུབ་པར་འབྱོན། །དགེ་སློང་དག་།དེ་ལྟར་བྱང་ཆུབ་སེམས་དཔས་མདའ་བླངས་ནས་གཞུ་དེ་དང་སྦྱར་ཏེ་བཀང་ནས་འཕགས་པའི་མཐུ་སྟོབས་ཀྱིས་ཀུན་དགའ་བོའི་འབེན་དུ་རྔ་བཙུགས་པ་དང ། ལྷ་སྦྱིན་གྱི་འབེན་དུ་རྔ་བཙུགས་པ་དང ། མཛེས་དགའ་བོའི་འབེན་དུ་རྔ་བཙུགས་པ་དང ། ལག་ན་བེ་ཅོན་ཅན་གྱི་འབེན་དུ་རྔ་བཙུགས་པ་དེ་དག་ཐམས་ཅད་ལས་ཐལ་ནས་རྒྱང་གྲགས་བཅུའི་ཕ་རོལ་ཏུ་བདག་གི་འབེན་ལྕགས་ཀྱི་རྔ་བཙུགས་པ་དང ། ཤིང་ཏ་ལ་བདུན་དངར་བ་དང ། ཕག་རྒོད་ཀྱི་གཟུགས་འཁྲུལ་འཁོར་དུ་བྱས་པ་ལས་ཀྱང་ཐལ་ཏེ་མདའ་དེ་ས་ལ་ཟུག་ནས་མི་སྣང་བར་གྱུར་ཏོ། །ས་ཕྱོགས་གང་དུ་མདའ་དེ་ཟུག་སྟེ་ནུབ་པའི་ས་ཕྱོགས་དེར་ཁྲོན་པ་ལྟ་བུའི་ཁུང་ཞིག་བྱུང་ནས་ད་ལྟར་ཡང་མདའི་ཁྲོན་པ་ཞེས་བྱ་བ་ཡིན་ནོ། །དེའི་ཚེ་ལྷ་དང་མི་བརྒྱ་སྟོང་དག་ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང ། ག་ཞའི་སྒྲ་བརྒྱ་སྟོང་འབྱིན་པར་གྱུར་ཏོ། །ཤཱཀྱའི་ཚོགས་དེ་དག་ཐམས་ཅད་ཀྱང་ངོ་མཚར་རྨད་དུ་བྱུང་བ་ཐོབ་སྟེ། ཀྱེ་ངོ་མཚར་ཏོ། །འདིས་ནི་བསླབ་ཀྱང་མ་བསླབ་པར་རྩལ་གྱི་ཤེས་པ་དེ་ལྟ་བུ་དང་ལྡན་པ་ནི་ངོ་མཚར་ཆེའོ་ཞེས་ཟེར་རོ། །ནམ་མཁའི་དཀྱིལ་ན་འཁོད་པའི་ལྷའི་བུ་དག་གིས་ཀྱང་རྒྱལ་པོ་ཟས་གཙང་མ་དང ། སྐྱེ་བོའི་ཚོགས་ཕལ་པོ་ཆེ་དེ་དག་ལ་འདི་སྐད་ཅེས་སྨྲས་སོ། །དེ་ལྟར་ངོ་མཚར་ཡང་
129b
ཅི་ཆེ་སྟེ། དེ་ཅིའི་ཕྱིར་ཞེ་ན། འདི་ནི་ས་ཡི་སྙིང་པོ་སྔོན་གྱི་སངས་རྒྱས་གདན་ལ་བཞུགས། །ཞི་གནས་གནམ་རུ་ཐོགས་ཤིང་སྟོང་པ་བདག་མེད་མདའ་རྣམས་ཀྱིས། །ཉོན་མོངས་དགྲ་རྣམས་བཅོམ་སྟེ་ལྟ་བའི་དྲ་བ་དྲལ་ནས་སུ། །བྱང་ཆུབ་དམ་པ་ཞི་བ་རྡུལ་མེད་མྱ་ངན་མེད་པ་འཐོབ། །དེ་སྐད་ཅེས་སྨྲས་ནས་ལྷའི་བུ་དེ་དག་གིས་བྱང་ཆུབ་སེམས་དཔའ་ལ་ལྷའི་མེ་ཏོག་དག་གིས་མངོན་པར་གཏོར་ཏེ་དོང་ངོ ། །དེ་བཞིན་དུ་མཆོང་པ་དང ། ཡི་གེ་དང ། ལག་རྩིས་དང ། རྩིས་དང ། གྲངས་དང ། གྱད་ཀྱི་འཛིན་སྟངས་དང ། རྒྱང་ནས་ཕོག་པ་དང ། བང་དང ། ཚར་དང ། རྐྱལ་དང ། འཕོང་དཔྱད་དང ། གླང་པོ་ཆེའི་གཉར་ཞོན་པ་དང ། རྟ་རྩལ་དང ། ཤིང་རྟའི་ཐབས་དང ། མདའ་གཞུའི་ཐབས་དང ། བརྟན་པ་དང ། མཐུ་དང ། དཔའ་བ་དང ། འགྱེད་སྟོབས་དང ། ལྕགས་ཀྱུས་སྒྱུར་ཐབས་དང ། ཞགས་པའི་ཐབས་དང ། མདུན་དུ་བསྣུར་བ་དང ། ཕྱིར་བསྣུར་བ་དང ། བཟུར་བ་དང ། འཛིན་སྟངས་དང ། གོམ་སྟོབས་དང ། ཐོར་ཚུགས་དང ། གཅད་པ་དང ། དྲལ་བ་དང ། དབུག་པ་དང ། གཞིག་པ་དང ། གཤེགས་པ་དང ། མི་ཚོར་བར་འཕོག་པ་དང ། གནད་དུ་འཕོག་པ་དང ། སྒྲ་གྲགས་པར་འཕོག་པ་དང ། ཚབས་ཆེ་བ་དང ། ཆོ་ལོའི་རྩད་མོ་དང ། སྙན་དངགས་སྦྱར་བ་དང ། ལམ་དང ། རི་མོ་དང ། གཟུགས་དང ། གཟུགས་ཀྱི་ལས་དང ། ཐབས་ཀྱི་དཔྱད་དང ། མེའི་ལས་དང །
130a
༄#། །རོལ་མོའི་དབྱངས་སྒྲ་དང ། གར་དང ། གླུ་དང ། ཡི་གེ་བཀླག་པའི་མིག་འོར་དང ། གཏམ་དང ། བཞད་གད་དང ། རྩེད་མོ་དང ། བྲོ་དང ། སྒེག་པ་དང ། ཕྲེང་བ་བརྒྱུ་བ་དང ། རླུང་ཡབ་གཡབ་པ་དང ། ནོར་བུ་ཚོན་གྱིས་བསྒྱུར་བ་དང ། གོས་ཚོན་གྱིས་བསྒྱུར་བ་དང ། མིག་འཕྲུལ་གྱི་ཆོ་ག་དང ། རྨི་ལམ་གྱི་དཔྱད་དང ། བྱའི་སྐད་དང ། བུད་མེད་ཀྱི་མཚན་དང ། སྐྱེས་པའི་མཚན་དང ། གླང་པོ་ཆེའི་མཚན་དང ། རྟའི་མཚན་དང ། བ་ལང་གི་མཚན་དང ། རའི་མཚན་དང ། ལུག་གི་མཚན་དང ། ཁྱིའི་མཚན་དང ། ཤེས་གསལ་དང ། སྒྲ་ངེས་པར་སྦྱོར་བ་དང ། ང་རོ་སྒྱུར་བ་དང ། སྔོན་གྱི་རབས་དང ། སྔོན་བྱུང་བ་དང ། རིག་བྱེད་དང ། ལུང་བསྟན་པ་དང ། ངེས་པའི་ཚིག་དང ། ཡི་གེ་ལྕི་ཡང་དང ། ཚིག་སྡེབ་པ་དང ། མཆོད་སྦྱིན་གྱི་ཆོ་ག་དང ། སྐར་མའི་ལུགས་དང ། གྲངས་ཅན་གྱི་ལུགས་དང ། རྣལ་འབྱོར་གྱི་ལུགས་དང ། ལས་ཀྱི་ཚོགས་དང ། བྱེ་བྲག་པའི་ལུགས་དང ། ནོར་གྱི་རིག་པ་དང ། ཕུར་བུའི་ལུགས་དང ། ཆུའི་ལུགས་དང ། ལྷ་མ་ཡིན་གྱི་ལུགས་དང ། བྱ་དང་རི་དྭགས་ཀྱི་སྐད་དང ། གཏན་ཚིགས་ཀྱི་རིག་པ་དང ། རྒྱ་སྐྱེགས་ཀྱི་འཁྲུལ་འཁོར་དང ། སྤྲ་ཚིལ་གྱི་ལས་དང ། འདྲུབ་ཤུར་དང ། བརྐོ་གཞོག་དང ། ལོ་མ་དྲ་བ་དང ། སྤོས་སྦྱར་བ་ལ་སོགས་པའི་སྒྱུ་རྩལ་འཇིག་རྟེན་པ་དང་ལྷའི་
130b
དང་མིའི་ལས་འདས་པ་ཐམས་ཅད་ལའང་བྱང་ཆུབ་སེམས་དཔའ་འབའ་ཞིག་ཁྱད་པར་དུ་འཕགས་པར་གྱུར་ཏོ། །དེའི་ཚེ་ཤཱཀྱ་ལག་ན་བེ་ཅོན་ཅན་གྱིས་རང་གི་བུ་མོ་ས་འཚོ་མ་བྱང་ཆུབ་སེམས་དཔའ་ལ་ཕུལ་ལོ། །རྒྱལ་པོ་ཟས་གཙང་མས་ཀྱང་དེ་རིམ་གྱིས་བག་མར་བླངས་ཏེ་བྱང་ཆུབ་སེམས་དཔའ་ལ་ཕུལ་ལོ། །དེ་ན་བྱང་ཆུབ་སེམས་དཔས་འཇིག་རྟེན་དང་མཐུན་པ་ཙམ་དུ་བྱ་བའི་ཕྱིར་བུད་མེད་བརྒྱད་ཁྲི་བཞི་སྟོང་གི་ནང་དུ་འདུག་སྟེ། དགའ་ཞིང་རྩེ་ལ་ཡོངས་སུ་སྤྱོད་པ་སྟོན་ཏོ། །བུད་མེད་བརྒྱད་ཁྲི་བཞི་སྟོང་དེ་དག་ཐམས་ཅད་ཀྱི་ནང་ནས་ཤཱཀྱའི་བུ་མོ་ས་འཚོ་མ་བཙུན་མོའི་མཆོག་ཏུ་དབང་བསྐུར་བར་གྱུར་ཏོ། །དེ་ནས་ཤཱཀྱའི་བུ་མོ་ས་འཚོ་མ་གྱོས་སྒྱུག་གམ། ནང་མི་གང་མཐོང་ཡང་རུང་སྟེ། གདོང་མི་སྦེད་དོ། །དེ་དག་ཀྱང་དེ་ལ་བག་གསར་མོ་ནི་ཞུམ་ཞུམ་པོར་འདུག་པའི་རིགས་ན། འདི་ནི་རྟག་ཏུ་མ་གཡོགས་སོ་ཞེས་འཕྱ་སྨོད་ཅིང་མི་སྙན་པར་ཟེར་རོ། །དེའི་ཚེ་ཤཱཀྱའི་བུ་མོ་ས་འཚོ་མས་གཏམ་དེ་ཐོས་ནས་ནང་མི་རྣམས་ཀྱི་མདུན་དུ་འདུག་སྟེ་ཚིགས་སུ་བཅད་པ་འདི་དག་སྨྲས་སོ། །འདུག་དང་འགྲེང་དང་འཆག་པ་ལ། །འཕགས་པ་དག་ནི་མ་གཡོགས་མཛེས། །ནོར་བུ་རིན་ཆེན་འོད་གསལ་བ། །རྒྱལ་མཚན་རྩེ་མོར་གསལ་ན་མཛེས། །འཕགས་པ་འགྲོ་ནའང་མཛེས་པ་སྟེ། །འོད་ནའང་དེ་བཞིན་མཛེས་པ་ཡིན། །འགྲེང་བའམ་དེ་བཞིན་འདུག་པ་དང ། །ཐམས་
131a
༄#། །ཅད་དུའང་འཕགས་པ་མཛེས། །འཕགས་པ་སྨྲ་ནའང་མཛེས་པ་སྟེ། །མི་སྨྲར་འདུག་ཀྱང་དེ་བཞིན་མཛེས། །དཔེར་ན་ཀ་ལ་པིངྐ་ནི། །མཐོང་དང་སྒྲ་ཐོས་དེ་བཞིན་ནོ། །ཀུ་ཤའི་གོས་ནི་གྱོན་པ་དང ། །གོས་ངན་གྱོན་དང་ལུས་རིད་པ། །དེ་ནི་རང་གི་གཟི་ཡིས་མཛེས། །ཡོན་ཏན་ལྡན་པ་ཡོན་ཏན་བརྒྱན། །གང་ལ་སྡིག་པ་མེད་གྱུར་པ། །འཕགས་པ་ཀུན་ཏུ་དགེ་བ་ཡིན། །བྱིས་པ་སྡིག་པ་བྱེད་པ་ནི། །ཇི་སྙེད་བརྒྱན་ཀྱང་མཛེས་མ་ཡིན། །གང་དག་སྙིང་ལ་སྡིག་པ་ཡོད་ཅིང་ཚིག་འཇམ་པ། །དེ་དག་དུག་གི་བུམ་པར་བདུད་རྩི་བླུགས་པ་བཞིན། །བྲག་གི་སེར་ག་རྩུབ་པ་ལྟ་བུར་ནང་ཡང་རྩུབ། །དེ་འདྲ་དེ་དག་སྤྲུལ་གྱི་ཁ་ལ་ཉུག་པ་བཞིན། །དེས་པ་དེ་དག་གན་དུ་ཀུན་འོང་ཀུན་ཕྱག་འཚལ། །འབབ་སྟེགས་ཐམས་ཅད་ལྟ་བུར་འགྲོ་བ་ཀུན་གྱི་གསོས། །འཕགས་པ་དག་ནི་རྟག་ཏུ་འོ་ཞེས་བཀང་བུམ་འདྲ། །བདག་ཉིད་དག་པ་དེ་འདྲ་མཐོང་ན་བཀྲ་ཤིས་དགེ།་གང་དག་སྡིག་པའི་གྲོགས་པོ་ཡུན་རིང་ཡོངས་སྤོང་ཞིང ། །དགེ་བའི་བཤེས་གཉེན་རིན་པོ་ཆེས་ནི་ཡོངས་བཟུང་ལ། །སྡིག་པ་རྣམ་སྤོང་སངས་རྒྱས་ཆོས་ལ་མངོན་ཆགས་པ། །དེ་ལྟ་བུ་དག་མཐོང་བ་བཀྲ་ཤིས་འབྲས་བུ་ཡོད། །གང་དག་ལུས་བསྡམས་ལུས་ཀྱི་སྐྱོན་རྣམས་རབ་བསྡམས་དང ། །གང་དག་ཚིག་བསྡམས་རྟག་ཏུ་ཚིག་
131b
འཆལ་མེད་གྱུར་ལ། །དབང་པོ་སྦས་ཤིང་ཤིན་ཏུ་བསྡམས་ལ་ཡིད་དང་བ། །དེ་ལྟ་བུ་དག་གདོང་གཡོགས་དེས་ནི་ཅི་ཞིག་བྱ། །གལ་ཏེ་ལུས་ལ་གོས་ནི་སྟོང་གིས་གཡོགས་གྱུར་ཀྱང ། ། གང་དག་སེམས་བཤུས་ངོ་ཚ་མེད་ཅིང་ཁྲེལ་མེད་དང ། །གང་དག་འདི་འདྲའི་ཡོན་ཏན་མེད་ཅིང་བདེན་ཚིག་མེད། །དེ་དག་སྒྲེན་མོ་བས་ཀྱང་སྒྲེན་མོར་འཇིག་རྟེན་རྒྱུ། །གང་ཞིག་སེམས་སྤས་རྟག་ཏུ་དབང་པོ་བསྡམས་གྱུར་ཅིང ། །བདག་གིས་ཁྱོས་ཆོག་སེམས་ཅན་གཞན་ལ་མི་སེམས་པ། །དེ་འདྲ་བ་དག་ཉི་ཟླ་བཞིན་དུ་མ་གཡོགས་སྣང ། །དེ་འདྲ་བ་དག་གདོང་གཡོགས་དེས་ནི་ཅི་ཞིག་བྱ། །གཞན་ཡང་དྲང་སྲོང་བདག་ཉིད་ཆེ་དང་གཞན་སེམས་བློ་མཁས་དང ། །དེ་བཞིན་ལྷ་ཚོགས་དག་གིས་ཁོ་མོའི་བསམ་པ་དང ། ཁོ་མོའི་ཚུལ་ཁྲིམས་ཡོན་ཏན་སྡོམ་དང་བག་ཡོད་མཁྱེན། །དེ་ལྟ་བསན་ཁོ་མོས་གདོང་བཀབ་ཅི་ཞིག་དགོས། །དགེ་སློང་དག། རྒྱལ་པོ་ཟས་གཙང་མས་ཤཱཀྱའི་བུ་མོ་ས་འཚོ་མའི་སྤོབས་པ་དང་བསྟན་པའི་ཚིགས་སུ་བཅད་པ་རྣམ་པ་འདི་ལྟ་བུ་འདི་ཐོས་སོ། །ཐོས་ནས་ཀྱང་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་རས་བཅོས་བུ་བཟང་པོ་རིན་པོ་ཆེ་དུ་མས་སྤྲས་པ་ཟུང་གཅིག་དང ། མུ་ཏིག་གི་དོ་ཤལ་སྲང་བྱེ་བ་བརྒྱ་སྟོང་རི་བ་དང ། མུ་ཏིག་དམར་པོ་བཟང་པོས་སྤྲས་པའི་གསེར་གྱི་ཕྲེང་བས་ཤཱཀྱའི་བུ་མོ་ས་
132a
༄#། །འཚོ་མ་ལ་བཀབ་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཁོ་བོའི་བུ་ནི་ཡོན་ཏན་ཅི་འདྲས་བརྒྱན་པ་དང ། །མནའ་མ་རང་གི་ཡོན་ཇི་ལྟར་རབ་སྨྲ་བ། །སེམས་ཅན་དག་པ་དེ་གཉིས་ཕྲད་པར་གྱུར་པ་ནི། །མར་དང་མར་གྱི་ཉིང་ཁུ་ཇི་ལྟར་འདྲ་བ་བཞིན། །སྒྱུ་རྩལ་བསྟན་པའི་ལེའུ་སྟེ། བཅུ་གཉིས་པའོ།། །། འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བརྒྱད་པ། དགེ་སློང་དག། དེ་ལྟར་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འདུག་པ་ན་གང་དག་བྱང་ཆུབ་སེམས་དཔའ་ལ་མཆོད་པའི་ལས་བྱེད་པ་ལ་སྤྲོ་བར་གྱུར་པ་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང།་མི་འམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དུ་མ་དེ་དག་རང་རང་གི་དགའ་བའི་སྒྲ་འབྱིན་ཅིང་ལྷགས་པར་གྱུར་ཏོ། །དེ་ལ་དགེ་སློང་དག་།དུས་གཞན་ཞིག་ན་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་མང་པོ་དག་འདི་སྙམ་དུ་སེམས་པར་གྱུར་ཏེ། མ་ལ་སྐྱེས་བུ་དམ་པ་འདི་བཙུན་མོའི་འཁོར་
132b
གྱི་ནང་དུ་ཧ་ཅང་ཡུན་རིང་དུ་ཐོགས་པར་གྱུར་ན། སེམས་ཅན་གང་དག་འདིས་ཡུན་རིང་པོ་ནས་བསྡུ་བའི་དངོས་པོ་བཞི་པོ་སྦྱིན་པ་དང ། སྙན་པར་སྨྲ་བ་དང ། དོན་སྤྱད་པ་དང ། དོན་མཐུན་པས་ཡོངས་སུ་སྨིན་པར་བྱས་པ་དང ། གང་དག་འདིས་བྱང་ཆུབ་ཐོབ་ནས་ཆོས་བསྟན་པ་ཤེས་པར་འགྱུར་བ་ཆོས་ཀྱི་སྣོད་དུ་གྱུར་པའི་སེམས་ཅན་དེ་དག་མེད་པར་གྱུར་ནས་ཕྱིས་བྱང་ཆུབ་སེམས་དཔའ་མངོན་པར་བྱུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བའམ་གཅིག་ཏུ་མི་འགྱུར་གྲང་སྙམ་མོ། །དེ་ནས་དེ་དག་གུས་པ་དང་བཅས། ཞེ་ས་དང་བཅས་པར་ཐལ་མོ་སྦྱར་ཏེ་བྱང་ཆུབ་སེམས་དཔའ་ལ་ཕྱག་འཚལ་ནས། ནམ་ཞིག་ན་བདག་ཅག་གིས་བྱང་ཆུབ་སེམས་དཔའ་དམ་པ་མཆོག་རབ་དག་པ་འདི་མངོན་པར་བྱུང་བ་དང ། མངོན་པར་བྱུང་ནས་ཀྱང་ཤིང་གི་རྒྱལ་པོ་ཆེན་པོ་དེའི་དྲུང་དུ་འདུག་སྟེ་བདུད་དཔུང་དང་བཅས་པ་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པའི་སྟོབས་བཅུ་དང་ལྡན་པ་དང ། དེ་བཞིན་གཤེགས་པའི་མི་འཇིགས་པ་བཞི་དང་ལྡན་པ་དང ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་ལྡན་པ་དང ། ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའི་ཆོས་ཀྱི་འཁོར་ལོ་བླ་ན་མེད་པ་བསྐོར་ཞིང་
133a
༄#། །སངས་རྒྱས་ཀྱི་རྣམ་པར་རོལ་པ་ཆེན་པོས་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་མོས་པ་ཇི་ལྟ་བ་བཞིན་དུ་ལེགས་པར་བཤད་པས་ཚིམ་པར་བྱེད་པ་མཐོང་བར་འགྱུར་སྙམ་པའི་བསམ་པ་དེ་ལྟ་བུས་སྡོད་ཅིང་འཁོད་པར་གྱུར་ཏོ། །དགེ་སློང་དག་།དེ་ལ་བྱང་ཆུབ་སེམས་དཔའ་ནི་བསྐལ་པ་གྲངས་མེད་པའི་ཡང་གྲངས་མེད་པ་ནས་བཟུང་སྟེ་ཡུན་རིང་པོར་རྟག་པར་རྒྱུན་དུ་འཇིག་རྟེན་པ་དང ། འཇིག་རྟེན་ལས་འདས་པའི་ཆོས་ཐམས་ཅད་ལ་གཞན་གྱི་དྲིང་མི་འཇོག་པར་གྱུར་ཅིང ། དགེ་བའི་ཆོས་སྤྱོད་པ་ཐམས་ཅད་ལ་བདག་ཉིད་སློབ་དཔོན་དུ་གྱུར་པ་ཡིན་ལ། ཡུན་རིང་པོ་ནས་དུས་ཤེས་པ་དང ། ཚོང་ཤེས་པ་དང ། རན་པ་ཤེས་པར་གྱུར་པ་དང ། མངོན་པར་ཤེས་པ་ལས་མ་ཉམས་པ་དང ། མངོན་པར་ཤེས་པ་ལྔ་དང་ལྡན་པ་དང ། རྫུ་འཕྲུལ་གྱི་རྐང་པས་རྣམ་པར་རྩེ་བ་དང ། སེམས་ཅན་གྱི་བསམ་པ་དང་དབང་པོ་ལ་མཁས་པ་དང ། དུས་དང་དུས་མ་ཡིན་པ་ཤེས་པ་དང ། དུས་ལ་ལྟ་ཞིང་རྒྱ་མཚོ་ཆེན་པོ་ལྟར་དུས་རན་པ་ལས་མི་ཡོལ་བར་གྱུར་པའོ། །དེ་མངོན་པར་ཤེས་པའི་ཡེ་ཤེས་ཀྱི་སྟོབས་དང་ལྡན་པས་འདི་ནི་རབ་ཏུ་གཟུང་བའི་དུས་སོ། །འདི་ནི་ཚར་གཅད་པའི་དུས་སོ། །
133b
འདི་ནི་བསྡུ་བའི་དུས་སོ། །འདི་ནི་ཕན་གདགས་པའི་དུས་སོ། །འདི་ནི་བཏང་སྙོམས་སུ་གཞག་པའི་དུས་སོ། །འདི་ནི་སྨྲ་བའི་དུས་སོ། །འདི་ནི་མི་སྨྲ་བར་བྱ་བའི་དུས་སོ། །འདི་ནི་ཁྱིམ་ནས་འབྱུང་བའི་དུས་སོ། །འདི་ནི་རབ་ཏུ་འབྱུང་བའི་དུས་སོ། །འདི་ནི་ཁ་ཏོན་བྱ་བའི་དུས་སོ། །འདི་ནི་ཚུལ་བཞིན་ཡིད་ལ་བྱ་བའི་དུས་སོ། །འདི་ནི་རབ་ཏུ་དབེན་པར་བྱ་བའི་དུས་སོ། །འདི་ནི་རྒྱལ་རིགས་ཀྱི་འཁོར་གྱི་ནང་དུ་འགྲོ་བའི་དུས་སོ། །ཞེས་བྱ་བ་ནས། འདི་ནི་བྲམ་ཟེ་དང་ཁྱིམ་བདག་གི་བར་གྱི་འཁོར་གྱི་ནང་དུ་འགྲོ་བའི་དུས་སོ། །འདི་ནི་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མའི་འཁོར་གྱི་ནང་དུ་འགྲོ་བའི་དུས་སོ། །འདི་ནི་ཆོས་བསྟན་པའི་དུས་སོ། །འདི་ནི་ནང་དུ་ཡང་དག་གཞག་པའི་དུས་སོ་ཞེས་བྱ་བ་ཐམས་ཅད་བདག་ཉིད་ཀྱིས་ཤེས་སོ། །བྱང་ཆུབ་སེམས་དཔའ་དུས་ཐམས་ཅད་དུ་རྟག་པར་དུས་ཤེས་པར་གྱུར་ཅིང ། དུས་ལ་བལྟ་བ་ཡིན་ཡང་དགེ་སློང་དག་།འདི་ནི་ཆོས་ཉིད་ཀྱིས་ཐོབ་པ་ཡིན་ཏེ། སྲིད་པ་ཐ་མ་པའི་
134a
༄#། །བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འཁོད་པ་རྣམས་ལ་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་རྣམས་གླུ་དབྱངས་དང་སིལ་སྙན་གྱི་སྒྲ་ལས་ཆོས་ཀྱི་སྒོ་རྣམ་པ་འདི་ལྟ་བུ་འདི་དག་གིས་ཡང་དག་པར་བསྐུལ་བ་མཛོད་དོ། །དེ་ལ་འདི་སྐད་ཅེས་བྱ་སྟེ། སེམས་ཅན་མཆོག་གང་ཕྱོགས་བཅུའི་འཇིག་རྟེན་བཞུགས། །དེ་དག་མཐུ་ཡིས་སིལ་སྙན་སྒྲ་དག་ལས། །ཚིགས་བཅད་སྒྲ་སྙན་འདི་དག་བྱུང་བ་ཡིས། །མི་མཆོག་དམ་པ་རྣམས་ལ་ཡང་དག་སྐུལ། །སྡུག་བསྔལ་བརྒྱས་གང་སེམས་ཅན་མཐོང་ནས་ནི། །འགྲོ་བའི་མགོན་དང་སྐྱབས་དང་གནས་འགྱུར་ཞིང ། ཕན་བྱེད་མཆོག་དང་དཔུང་གཉེན་གྱུར་ཅིག་ཅེས། །ཁྱོད་ཀྱིས་སྔོན་ནི་སྨོན་ལམ་དེ་སྐད་བཏབ། །དགེ་བ་དཔའ་བོ་སྔོན་གྱི་སྤྱོད་པ་དང ། །འགྲོ་ཕན་བྱ་ཞེས་སྨོན་བཏབ་དྲན་པར་བྱོས། །འདི་ནི་ཁྱོད་ཀྱིས་དུས་མན་ཚོད་ཡིན་གྱི། །དྲང་སྲོང་མཆོག་རབ་མངོན་པར་འབྱུང་བར་བྱོས། །སངས་རྒྱས་ལྷ་མི་འདུལ་བྱེད་འཇིག་རྟེན་མཆོག་།ཡོན་ཏན་བརྒྱས་གང་བར་ནི་གྱུར་ཅིག་ཅེས། །དེའི་ཕྱིར་ཁྱོད་སྔོན་མགོ་དང་རྐང་ལག་དང ། །ནོར་གྱི་དམ་པ་སྣ་ཚོགས་རྣམས་ཀྱང་བཏང ། །ཁྱོད་ནི་ཁྲིམས་ཀྱིས་བརྟུལ་ཞུགས་
134b
དཀའ་ཐུབ་སྤྱད། །ཁྱོད་ནི་བཟོད་པས་འགྲོ་ལ་ཕན་པ་བྱེད། །ཁྱོད་ནི་བརྩོན་པས་ཡོན་ཏན་བརྒྱ་ཡིས་གང ། །བསམ་གཏན་ཤེས་རབ་སྲིད་གསུམ་མཉམ་པ་མེད། །ཁྲོ་བས་ནོན་ཅིང་ཐ་བའི་དྲི་མང་བ། །དེ་དག་བདེ་གཤེགས་ཁྱོད་ཀྱི་བྱམས་པས་ཁྱབ། །དགེ་བའི་ཡོན་ཏན་བྲལ་བ་ལོག་ངེས་པ། །མི་མཁས་རྣམ་མང་དག་ལ་ཁྱོད་སྙིང་རྗེ། །བསོད་ནམས་ཡེ་ཤེས་དགེ་བའི་ལུས་ཁྱབ་ཅིང ། །རྡུལ་བྲལ་བསམ་གཏན་མངོན་ཤེས་ལམ་མེར་འདུག་།ཕྱོགས་བཅུ་འདི་དག་རྣམས་སུ་རབ་ཏུ་གསལ། །སྤྲིན་མེད་ཟླ་བ་དྲི་མ་མེད་པ་འདྲ། །འདི་དང་གཞན་ཡང་སྙན་པ་རྣམ་མང་གིས། །སིལ་སྙན་དག་ལས་རྒྱལ་བས་སྒྲ་བསྒྲགས་ཏེ། །མངོན་པར་ཁྱོད་འབྱུང་དུས་ནི་འདི་ཡིན་ཞེས། །ལྷ་མིས་མཆོད་པར་འོས་ལ་སྐུལ་མ་འདེབས། །དགེ་སློང་དག་།བྱང་ཆུབ་སེམས་དཔའ་ཁྱིམ་དམ་པ་མཆོག་ཡོ་བྱད་ཕུན་སུམ་ཚོགས་པ་ཐམས་ཅད་དང་ལྡན་པ། བསམ་པ་ཇི་ལྟ་བ་བཞིན་དུ་བདེ་བར་གནས་པ་དང་མཐུན་པ། ལྷའི་ཁང་ཁྱིམ་ལྟ་བུ་སྟེགས་བུ་དང ། སྒོ་གང་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁང་བཟང་མཆོག་དང ། རིན་པོ་ཆེ་སྣ་ཚོགས་ཀྱི་རྒྱན་རྣམ་པ་ཐ་དད་པ་དབྱེ་བ་ཤིན་ཏུ་རྣམ་པར་ཕྱེ་བ། གདུགས་དང ། རྒྱལ་མཚན་དང །
135a
༄#། །བ་དན་བསྒྲེང་བ། རིན་པོ་ཆེའི་དྲིལ་བུ་གཡེར་ཀའི་དྲ་བ་དུ་མས་ལེགས་པར་བརྒྱན་པ། དར་གྱི་ལྔ་ལྡི་བརྒྱ་སྟོང་དུ་མས་མངོན་པར་དབྱངས་པ། རིན་པོ་ཆེ་སྣ་ཚོགས་ཀྱིས་སྤྲས་པའི་མུ་ཏིག་གི་རྒྱན་ཕྲེང་རབ་ཏུ་དཔྱངས་པ། རིན་པོ་ཆེ་སྣ་ཚོགས་ཀྱི་སྤང་ལེབ་ཅན་གྱི་ཟམ་པས་མཛེས་པར་བྱས་པ། མེ་ཏོག་གི་ཕྲེང་བ་དང་ཆུན་པོ་མང་པོ་དཔྱངས་པ། པོག་སྣོད་ནས་སྤོས་ཀྱིས་བདུགས་པ། དར་ལའི་བླ་བྲེ་བྲེས་པ། དུས་ཐམས་ཅད་པའི་མེ་ཏོག་དྲི་མཆོག་ཏུ་ཞིམ་ཞིང་ཤིན་ཏུ་མཛེས་པ་དག་བཀྲམ་པ། རྫིང་མེ་ཏོག་པདྨ་དཀར་པོ་དང ། པདྨ་དང་ལྡན་པའི་ཆུའི་གནས་ཡོངས་སུ་སྤྱད་པར་བྱ་བ་མང་བ། བྱ་འདབ་སྐྱོབ་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ངང་པ་དང ། རྨ་བྱ་དང ། ངུར་བ་དང ། ཀུ་ན་ལ་དང ། ཀ་ལ་པིངྐ་དང ། ཤང་ཤང་ཏེའུ་ལ་སོགས་པ་བྱ་རྣམ་པ་ཐ་དད་པའི་ཚོགས་སྒྲ་སྙན་པ་འབྱིན་པ། བཻ་ཌཱུརྱ་སྔོན་པོའི་ས་གཞི་གནས་ཡོངས་སུ་སྤྱད་པར་བྱ་བ། གཟུགས་ཐམས་ཅད་ཀྱི་གཟུགས་བརྙན་ཀུན་ཏུ་སྟོན་པ། བལྟ་བས་མི་ངོམས་པར་ཉམས་དགའ་བ། དགའ་བ་དང་མཆོག་ཏུ་དགའ་བ་དམ་པ་བསྐྱེད་པའི་ཁྱིམ་དམ་པ་མཆོག་དེ་ན་འདུག་སྟེ། བྱང་ཆུབ་སེམས་དཔའ་ཁང་པ་ཡངས་
135b
པ་ཆེན་པོ་མཆོག་ན་གནས་པ། དྲི་མ་མེད་པ། དྲི་མ་དང་བྲལ་བ། ཡན་ལག་དྲི་མ་མེད་པ། ཕྲེང་བ་དང་རྒྱན་མ་བོར་བ། དྲི་མཆོག་ཏུ་ཞིམ་པ་དམ་པའི་བྱུག་པས་ལུས་བསྐུས་པ། དཀར་ཞིང་བཟང་ལ་དྲི་མ་མེད་ཅིང་རྣམ་པར་དག་ལ་དྲི་མ་དང་བྲལ་བའི་གོས་གྱོན་པའི་ལུས་དང་ལྡན་པ། མལ་ཆ་ལྷའི་རས་བཅོས་བུ་བཟང་པོ་ཕྲ་བ་དུ་མ་བཏིང་བ། འཇམ་པ། ཀ་ཙ་ལིནདའི་གོས་ལྟར་རེག་ན་བདེ་བ། ཡན་ལག་དམ་པའི་སྤྲས་པས་མལ་བཟང་པོའི་སྟེང་ན་འདུག་པ། བཙུན་མོའི་འཁོར་དམ་པ། ལྷའི་བུ་མོ་དང་འདྲ་བ། ཐམས་ཅད་དུ་ཁ་ན་མ་ཐོ་བ་མེད་པ། ལྟ་བ་དང་མཐུན་པ། སྤྱོད་པ་བཟང་པོས་མཛེས་པར་བྱས་པ། གཟུགས་བཟང་བའི་ནང་ན་འདུག་པ། དུང་དང ། རྔ་དང ། རྫ་རྔ་དང ། འཁར་རྔ་དང ། པི་ཝང་དང ། རྒྱུད་གསུམ་པ་དང ། འཁར་བའི་སིལ་ཁྲོལ་དང ། ཕེག་དང ། ཀིམྤ་ལ་དང ། ན་ཀུ་ལ་དང ། སྒྲ་སྙན་དང ། གླིང་བུ་སྙན་པའི་སྒྲ་འབྱུང་བའི་སྒྲ་དབྱངས་དང ། སིལ་སྙན་དང ། གླུ་དབྱངས་སྣ་ཚོགས་དང་ལྡན་པས་བསླང་བ་ལ་བུད་མེད་ཀྱི་ཚོགས་ཀྱིས་ཀྱང་སྒྲ་མཉེན་ཞིང་འཇམ་པ་སྙན་ལ་ཡིད་དུ་འོང་བ་དང ། གླིང་བུ་འབུད་པའི་སྒྲ་དབྱངས་ཀྱིས་བྱང་ཆུབ་སེམས་དཔའ་སློང་ངོ ། །ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་
136a
༄#། །འདས་དེ་དག་གི་བྱིན་གྱི་རླབས་ཀྱིས་སིལ་སྙན་སྒྲ་བྱུང་བའི་སྒྲ་སྐད་དེ་དག་ལས་བྱང་ཆུབ་སེམས་དཔའ་ལ་སྐུལ་བའི་ཚིགས་སུ་བཅད་པ་འདི་དག་བྱུང་ངོ ། །བུད་མེད་གང་དག་རབ་ཏུ་ཡིད་དགའ་སེམས་དང་བས། །སིལ་སྙན་ཡིད་དུ་འོང་ཞིང་སྙན་པའི་སྒྲ་འབྱིན་ཚེ། །ཕྱོགས་བཅུའི་རྒྱལ་བ་དམ་པ་དག་གི་མཐུ་ཡིས་ན། །ཚིགས་བཅད་རྣམ་པ་སྣ་ཚོགས་རྣམ་མང་འདི་དག་བྱུང ། །རྟག་ཏུ་མགོན་མེད་གྱུར་པའི་འགྲོ་བ་འདི་མཐོང་ནས། །གོ་འཕང་མྱ་ངན་མེད་མཆོག་རྡུལ་མེད་སངས་རྒྱས་ཏེ། །སྐྱེ་དང་རྒ་དང་སྡུག་བསྔལ་དག་ལས་དགྲོལ་ལོ་ཞེས། །དཔའ་བོ་ཁྱོད་སྔོན་སྨོན་ལམ་དེ་སྐད་བཏབ་པར་གྱུར། །དེ་ཕྱིར་དགེ་མྱུར་གྲོང་ཁྱེར་མཆོག་འདི་ནས། །བྱུང་ལ་སྔོན་གྱི་དྲང་སྲོང་ཞབས་བཅགས་པ། །ས་ཕྱོགས་དེ་ནི་རབ་ཏུ་མནན་ནས་སུ། །རྒྱལ་བའི་ཡེ་ཤེས་མཚུངས་མེད་འཚང་རྒྱར་གྱིས། །ཁྱོད་ཀྱིས་སྔོན་ཆད་སྣ་ཚོགས་རིན་ཆེན་ནོར། །རྐང་ལག་ཕངས་པའི་ལུས་ཀྱང་བཏང་བར་གྱུར། །དྲང་སྲོང་ཆེན་པོ་དེ་རིང་ཁྱོད་དུས་འདི། །ཆོས་ཀྱི་ཆུ་བོ་མཐའ་ཡས་འགྲོ་ལ་ཕྱེ། །ཁྱོད་ཀྱི་ཚུལ་ཁྲིམས་མ་ཉམས་དྲི་མེད་དགེ། །སྔོན་ཆད་ཁྱོད་ནི་རྟག་ཏུ་མཆོག་གིས་བརྒྱན། །དྲང་སྲོང་ཆེན་པོ་ཁྱོད་ཁྲིམས་འདྲ་བ་མེད། །འགྲོ་བ་ཉོན་མོངས་རྣམ་
136b
པ་མང་ལས་ཁྲོལ། །ཁྱོད་ཀྱིས་སྲིད་པ་བརྒྱར་ནི་བཟོད་པ་སྤྱད། །ཁྱོད་ནི་འགྲོ་བས་ངན་བརྗོད་རྣམ་མང་བཟོད། །བཟོད་པས་བཟོད་ཅིང་དུལ་བས་དེས་པའི་བདག་།རྐང་གཉིས་དབང་པོ་མངོན་པར་འབྱུང་བློ་གྱིས། །ཁྱོད་བརྩོན་བརྟན་ཞིང་མི་གཡོ་གཡོ་བ་མེད། །བདེ་བར་གཤེགས་པ་སྔོན་མཐར་རྒྱ་ཆེན་གྱུར། །གཡོན་ཅན་བདུད་ནི་སྡེ་དང་བཅས་བཏུལ་ཏེ། །ངན་སོང་གསུམ་པོ་མཐའ་དག་སྐམ་པར་གྱིས། །གང་ཕྱིར་ཁྱོད་ཀྱིས་བརྟུལ་ཞུགས་དཀའ་ཐུབ་སྤྱད། །དུས་ངན་ཉོན་མོངས་སྙིགས་མ་བསྲེགས་གྱིས་ལ། །ཁྱོད་ཀྱིས་བདུད་རྩི་ཆུ་བོའི་ཆར་ཕབ་སྟེ། ། མགོན་མེད་རིང་ནས་སྐོམ་པ་ཚིམ་པར་གྱིས། །འཆི་མེད་མྱ་ངན་མེད་གནས་སངས་རྒྱས་ཏེ། །སྐོམ་པས་ཉམ་ཐག་བདུད་རྩིས་ཚིམ་བྱ་ཞེས། །ཁྱོད་ཀྱིས་སྔོན་སྨྲས་ཚིག་མཆོག་དྲན་བྱོས་ཏེ། ། གྲོང་ཁྱེར་དམ་པ་འདི་ནས་མྱུར་དུ་བྱུང ། །ཁྱོད་ནི་ཤེས་རབ་མཆོག་གི་སྤྱོད་པ་མཁས། །ཁྱོད་ཀྱི་ཡེ་ཤེས་མཐའ་ཡས་དྲི་མེད་ཆེ། །རྨོངས་པ་ཡིད་གཉིས་ལམ་ལ་གནས་རྣམས་ལ། །ཤེས་རབ་འོད་དགེ་དམ་པ་མཛེས་པ་གྱིས། །ཁྱོད་ཀྱིས་སྲིད་པ་བརྒྱར་ནི་བྱམས་པ་སྤྱད། །སྙིང་རྗེ་དང་ནི་དགའ་མཆོག་བཏང་སྙོམས་དང ། །ཁྱོད་ཀྱིས་སྤྱོད་པ་དམ་པ་གང་སྤྱད་པ། །སྤྱོད་པ་དེ་ཉིད་འགྲོ་ལ་རྣམ་པར་ཕྱེ། །ཕྱོགས་བཅུའི་རྒྱལ་བ་དག་གིས་གཟི་བརྗིད་ཀྱིས། །ཡོན་ཏན་མེ་ཏོག་སྣ་ཚོགས་ཚིགས་བཅད་འདི། །སིལ་སྙན་དག་ལས་རྣམ་མང་ཡིད་འོང་གྲག་།མལ་ན་
137a
༄#། །འདུག་པའི་གཞོན་ནུ་དེ་ལ་སྐུལ། །གང་གི་ཚེ་ན་དགའ་བྱེད་བུད་མེད་རབ་ཏུ་དགའ་བ་རྣམས། །ཤིན་ཏུ་མཛེས་ཤིང་རབ་ཏུ་སྙན་པའི་སིལ་སྙན་སྒྲོག་པའི་ཚེ། །ཕྱོགས་བཅུ་དག་གི་རྒྱལ་བ་ལྷ་མི་འདུལ་བ་མཛད་རྣམས་ཀྱང ། །སིལ་སྙན་དག་ལས་གསུང་མཆོག་ཧ་ཅང་མི་ཆེ་རྗེས་སུ་སྒྲོག་།འགྲོ་ལ་ཕན་བྱེད་ཡོན་ཏན་མང་པོ་ལྡན་ཁྱོད་འགྲོ་རྣམས་སུ། །རྣམ་པར་རྒྱུ་བའི་ཚེ་ན་རྒྱལ་བའི་ཡོན་ཏན་གཉུག་མར་བྱས། །སྔོན་གྱི་བརྟུལ་ཞུགས་དཀའ་ཐུབ་སྤྱད་པ་དེ་དག་དྲན་གྱིས་ཏེ། །ཤིང་མཆོག་དྲུང་དུ་མྱུར་སོང་འཆི་མེད་གོ་འཕང་ཐོབ་པར་གྱིས། །ལྷ་མི་དག་ནི་ཤིན་ཏུ་སྐོམ་ཞིང་རྒྱལ་བའི་ཡོན་ཏན་བྲལ། །ཁྱོད་ནི་ཤིན་ཏུ་སྟོབས་ལྡན་བདུད་རྩིའི་རོ་བྲོ་རྟག་ཏུ་སྦྱིན།། སྟོབས་བཅུའི་རོ་བྲོ་དམ་པ་མཁས་པ་རྣམས་ཀྱིས་མཆོད་བྱས་པ། །བདུད་རྩི་དེ་ནི་མི་བདག་ཁྱོད་ཀྱིས་མྱུར་དུ་རྣམ་པར་ཕྱེ། །རྒྱལ་བའི་ཡོན་ཏན་འགྲོ་ལ་ཕན་པ་བྱེད་ལ་དགའ་བ་བོ། །ཁྱོད་ཀྱིས་སྔོན་གྱི་སྲིད་པར་ནོར་དང་ནོར་བུ་གསེར་རྣམས་བཏང ། །ཆུང་མ་བུ་སྡུག་དག་དང་གྲོང་ཁྱེར་གྲོང་རྡལ་བཅས་པ་དང ། །རང་གི་མགོ་དང་མིག་དང་ལག་པ་དག་དང་རྐང་པའང་བཏང ། །མི་མཆོག་ཁྱོད་ནི་གནའ་སྔོན་རྒྱལ་པོ་དགེ་བར་གྱུར་པའི་ཚེ། །མི་ཞིག་ཁྱོད་ལ་མངོན་དུ་ཕྱོགས་ནས་འདི་སྐད་ཚིག་
137b
སྨྲས་ཏེ། །གྲོང་ཁྱེར་རྡལ་བཅས་པའི་ས་འདི་ཁོ་བོར་བྱིན་ཞེས་བྱས། །དེ་ཡི་ཚེ་ན་རབ་ཏུ་དགའ་ཞིང་འཁྲུགས་པར་གྱུར་པ་མེད། །གནའ་སྔོན་ཁྱོད་ནི་རྒྱལ་པོའི་བྲམ་ཟེ་དགེ་བར་གྱུར་པའི་ཚེ། །སྐྱེ་བོ་བླ་མ་བསྙེན་བཀུར་བྱེད་ཅིང་གཞན་ལ་འཁུ་མི་བྱེད། །བྲམ་ཟེ་དམ་པ་དག་དང་སྐྱེ་བོ་མང་པོ་དགེ་ལ་བཀོད། །དེ་ནས་ཤི་འཕོས་སྲིད་པའི་འགྲོ་བ་ལྷ་ཡི་གནས་སུ་སྐྱེས། །སྔོན་ཁྱོད་རྒྱལ་པོའི་བུ་ལས་དྲང་སྲོང་དམ་པར་གྱུར་པའི་ཚེ། །རྒྱལ་པོ་ངན་པ་ཁྲོས་པས་ཁྱོད་ཀྱི་ཡན་ལག་བཅད་པ་ན། །ཁྱོད་ནི་ཡིད་འཁྲུགས་གྱུར་པ་མེད་པར་འཆི་བའི་དུས་བྱས་ཏེ། །དེ་ཡི་ཚེ་ན་ཁྱོད་ཀྱི་རྐང་ལག་དག་ལས་འོ་མ་ཟག་།ཁྱོད་སྔོན་དྲང་སྲོང་སྔོ་སངས་ཞེས་བྱར་གང་ཚེ་གྱུར་པ་ན། །རི་མཆོག་གནས་ན་བརྟུལ་ཞུགས་དགའ་ཞིང་བླ་མ་ལ་ཡང་དགའ། །མི་ཡི་བདག་པོས་དུག་མདའ་དག་གིས་ཁྱོད་ལ་བསྣུན་པ་ན། །ཁྱོད་ནི་རྒྱལ་པོ་དེ་ལ་ཡིད་འཁྲུགས་མེད་ཅིང་སྙིང་བརྩེར་གྱུར། །ཁྱོད་སྔོན་རི་དྭགས་བདག་པོ་ཡོན་ཏན་ཅན་དུ་གྱུར་པའི་ཚེ། །རི་གཟར་འབབ་ཆུ་ཆེན་པོས་མི་ཞིག་ཁྱེར་བར་གྱུར་པ་ན། །ཕན་དང་ལྡན་པ་ཁྱོད་ཀྱིས་མི་དེ་ཕྱུང་སྟེ་ཐང་ལ་བཞག། ཁྱོད་ཀྱི་དགྲ་བོ་ཁྲིད་དེ་འོངས་པ་ན་ཡང་ཡིད་མ་འཁྲུགས། །མི་མཆོག་ཁྱོད་སྔོན་བྲམ་ཟེའི་བུར་ནི་གང་ཚེ་གྱུར་པ་ན། །ཁྱོད་ཀྱི་ནོར་བུ་རྒྱ་མཚོ་ཆེན་པོ་ཡངས་པར་ལྷུང་བའི་ཚེ། །ཁྱོད་ཀྱིས་རྒྱ་
138a
༄#། །མཚོ་ཆེན་པོ་ཟད་པར་བྱ་བར་བརྩམས་པ་དང ། །སྟོབས་བརྟན་ཁྱུ་མཆོག་ཁྱོད་ཀྱི་ནོར་བུ་དེ་ཚེ་ཕྱིར་ཡང་རྙེད། །སྐྱེས་བུ་མཆོག་ཁྱོད་གནའ་སྔོན་དྲང་སྲོང་དམ་པར་གྱུར་པའི་ཚེ། །བྲམ་ཟེ་ཞིག་གིས་བདག་གི་སྐྱབས་གྱུར་ཤོག་ཅེས་ཁྱོད་གན་འོངས། །སྨྲས་པ་བྲམ་ཟེ་དམ་པ་ཁོ་བོ་དགྲ་ལས་བྱུང་ཞེས་བྱས། །ཁྱོད་ཀྱིས་རང་ལུས་བཏང་གི་བྲམ་ཟེ་དེ་ནི་མ་བཏང་ངོ ། །གནའ་སྔོན་ཤིང་གི་གནས་སུ་དྲང་སྲོང་སྔོ་བསངས་དྲུང་འོངས་ཏེ། །འདོད་པས་སྨྲས་པ་ཤིང་འདི་ལོ་མ་དུ་ཡོད་གྲོངས་ཞེས་བྱ། །ཤིང་དེ་ལོ་མ་ཇི་སྙེད་ཡོད་པ་རབ་བགྲངས་རབ་མཁས་པས། །ཁྱོད་ཀྱིས་དེ་བཞིན་ནོར་པ་མེད་ཅིང་མཐུན་པར་ཚིག་ཏུ་བརྗོད། །ཁྱོད་སྔོན་ནེ་ཙོ་ཡོན་ཏན་ལྡན་གྱུར་ཤིང་ལ་གནས་པའི་ཚེ། །ཟད་པར་གྱུར་ཀྱང་སྔོན་གྱི་དྲིན་ལ་བསམ་སྟེ་དེ་མ་སྤངས། །ལྷ་ཡི་བདག་པོས་ཁྱོད་ཀྱི་ཡོན་ཏན་དྲན་ནས་རབ་ཏུ་དགའ། །སྔ་མཁོ་བཞིན་དུ་ཤིང་མཆོག་དེ་ནི་དཔལ་དང་ལྡན་པར་བྱས། །ཁྱོད་ཀྱི་བརྟུལ་ཞུགས་དཀའ་ཐུབ་སྤྱད་པ་དེ་དག་མཚུངས་མེད་དེ། །ཡོན་ཏན་ལྡན་པ་ཡོན་ཏན་ལམ་ལ་སྤྱད་པ་ཡོན་ཏན་མང ། །ཁྱོད་ཀྱི་དུས་ལ་ད་བབ་གྲོང་ཁྱེར་བཅས་པའི་ས་ཡང་ཐོང ། །འགྲོ་བ་དག་ནི་རྒྱལ་བའི་ཡོན་ཏན་སྤྱོད་ལ་མྱུར་དུ་ཁོད། །གང་གི་ཚེ་ན་བུད་མེད་རིན་ཆེན་བཟང་
138b
པོའི་གོས་ཀྱིས་ལུས་བརྒྱན་ཏེ། །སིལ་སྙན་དམ་པ་མཆོག་རབ་ཡིད་དུ་འོང་བའི་སྒྲ་ནི་རབ་སྒྲོག་པ། །དེ་ཚེ་ཕྱོགས་བཅུའི་རྒྱལ་བའི་གཟི་ཡིས་ཚིགས་སུ་བཅད་པ་སྣ་ཚོགས་པ། །སྒྲ་དབྱངས་སྙན་པ་འདི་དག་སིལ་སྙན་དག་གི་སྒྲ་ལས་རབ་ཏུ་བྱུང ། །རྒ་དང་ཤི་བས་ཟིན་པའི་འཇིག་རྟེན་དག་ལ་བདག་ནི་སྐྱབས་གྱུར་ཅེས། །འཇིག་རྟེན་སྒྲོན་མ་ཁྱོད་ཀྱིས་བསྐལ་མང་སྔ་རོལ་སྨོན་ལམ་དེ་སྐད་བཏབ། །མི་ཡི་སེངྒེ་ཁྱོད་ཀྱིས་སྔོན་གྱི་སྨོན་ལམ་དག་ནི་དྲན་གྱིས་ཤིག་།རྐང་གཉིས་དབང་པོ་ཁྱོད་ད་མངོན་པར་འབྱུང་བའི་དུས་ནི་འདི་ཡིན་ནོ། །ཁྱོད་འདིར་སྲིད་པ་ཁྲག་ཁྲིག་དག་ཏུ་སྦྱིན་པ་མང་པོ་དུ་མ་བྱིན། །ནོར་དང་རིན་པོ་ཆེ་དང་གསེར་དང་གོས་བཟང་རིན་ཆེན་སྤྲས་པ་དང ། །རྐང་ལག་དག་དང་མིག་དང་ཕངས་པའི་བུ་དང་རྒྱལ་སྲིད་འབྱོར་བ་དག་།ཁྱོད་ཀྱིས་བཏང་ཡང་ཁྱོད་ནི་སློང་བ་རྣམས་ལ་ཐ་བ་ཞེ་སྡང་མེད། །ཁྱོད་འདིར་ཟླ་བའི་ཏོག་དང་མཚེ་བ་བཟང་དང་རྒྱལ་པོ་ཞི་བར་གྱུར། །སྙིང་བརྩེ་སྙིང་རྗེའི་ཡིད་དང་ཟླ་བའི་སྒྲོན་དང་གཙུག་ན་ནོར་བུར་གྱུར། །རྒྱལ་པོ་དཔའ་བོ་བརྟན་དང་མིག་བཟང་དང་ནི་དེ་ལ་སོགས་པ་བྱས། །རྒྱལ་པོ་ཁྲག་ཁྲིག་མང་པོ་སྦྱིན་དགའ་རྣམ་པར་འཕྲུལ་པ་དེ་ཉིད་ཁྱོད། །བདེ་བར་གཤེགས་པ་ཁྱོད་ཀྱིས་བསྐལ་བ་མང་པོར་ཚུལ་ཁྲིམས་སྤྱོད་པ་སྤྱད། །ནོར་བུ་རིན་ཆེན་དྲི་མ་མེད་པ་
139a
༄#། །ལྟ་བུར་ཚུལ་ཁྲིམས་རྣམ་དག་གྱུར། །ཁྱོད་ཀྱིས་འབྲི་ཡི་རྔ་མ་ཅི་འདྲ་དེ་འདྲར་ཚུལ་ཁྲིམས་བསྲུངས་ཤིང་སྤྱད། །ཚུལ་ཁྲིམས་དགའ་བས་ཁྱོད་ཀྱིས་འདིར་ནི་འགྲོ་ལ་རྒྱ་ཆེར་དོན་ཡང་བྱས། །འདིར་ཁྱོད་གླང་པོ་མཆོག་ཏུ་གྱུར་ཏེ་རྔོན་པ་དགྲ་ཡིས་མདས་བསྣུན་ཚེ། །གཏུམ་པོ་དགྲ་ལ་སྙིང་བརྩེ་སྙིང་རྗེ་བསྐྱེད་ནས་དེ་ནི་ཁྱོད་ཀྱིས་བསྐྱབས། །བཟང་ཞིང་མཛེས་པའི་མཆེ་བ་ཡོངས་སུ་བཏང་སྟེ་ཚུལ་ཁྲིམས་ཡོང་མ་བཏང ། །ཁྱོད་ཀྱིས་དེ་ལ་སོགས་པ་ཚུལ་ཁྲིམས་རྣམ་པར་འཕྲུལ་པ་མང་པོ་བྱས། །བཟོད་ལ་དགའ་བས་ཁྱོད་ཀྱིས་འགྲོ་བའི་མི་ཕན་སྡུག་བསྔལ་སྟོང་མང་དང ། །ཚིག་རྩུབ་དག་དང་བསད་པ་དང་ནི་བཅིང་བ་མང་པོ་བཟོད་པར་བྱས། །ཁྱོད་ཀྱིས་གནའ་སྔོན་མི་གང་དག་ལ་བདེ་བ་ཀུན་གྱིས་རིམ་གྲོ་བྱས། །དེ་དག་ཕྱི་ནས་ཁྱོད་ཀྱི་གཤེད་མར་གྱུར་ཀྱང་ཁྱོད་ཀྱིས་དེ་དག་བཟོད། །མགོན་པོ་ཁྱོད་ནི་རི་མཆོག་གནས་ན་གང་ཚེ་དྲེད་མོར་གྱུར་པའི་ཚེ། །ཁ་བ་བབ་ཅིང་ཆུ་ཕྲུགས་པས་ནི་འཇིགས་ཤིང་སྐྲག་པའི་མི་བཟུང་སྟེ། །རྩ་བ་འབྲས་བུ་རྣམ་པ་མང་དང་བདེ་བ་ཀུན་གྱིས་རིམ་གྲོ་བྱས། །དེ་ཡིས་མྱུར་དུ་ཁྱོད་ལ་གསོད་པ་ཁྲིད་འོངས་ཁྱོད་ཀྱིས་དེ་ལ་བཟོད། །བྱང་ཆུབ་བཙལ་ཕྱིར་བརྟུལ་ཞུགས་དཀའ་ཐུབ་ཡོན་ཏན་རྣམ་མང་ཡེ་ཤེས་ལ། །
139b
ཁྱོད་ཀྱིས་བརྩོན་འགྲུས་ཤིན་ཏུ་བརྟན་པར་གནས་ཤིང་མི་གཡོ་གཡོ་བ་མེད། །དབང་སྒྱུར་བདུད་ཀྱང་ཁྱོད་ཀྱིས་བརྩོན་འགྲུས་སྟོབས་ཀྱིས་སྟོབས་ནི་མེད་པར་བྱས། །མི་ཡི་སེངྒེ་ཁྱོད་འདིར་མངོན་པར་འབྱུང་བའི་དུས་ལ་ད་བབ་བོ། །ཁྱོད་འདིར་གནའ་སྔོན་ཁ་བའི་ཁ་དོག་འདྲ་བའི་རྟ་མཆོག་གྱུར་པའི་ཚེ། །སྙིང་རྗེ་བསྐྱེད་ནས་ནམ་མཁའ་ལས་ནི་སྲིན་པོའི་གླིང་དུ་མྱུར་དུ་སོང ། །དེ་ཚེ་ཕོངས་ཤིང་འདུག་པའི་མི་དེ་བླངས་ཏེ་བདེ་ལ་རབ་ཏུ་བཞག། ཁྱོད་ཀྱིས་འདི་ལ་སོགས་པ་བརྩོན་འགྲུས་རྣམ་པར་འཕྲུལ་བ་མང་པོ་བྱས། །མྱུར་དུ་འགྱུར་ཞིང་གཡོ་ལ་ཡུལ་ལ་དགའ་ཞིང་རྒོད་པའི་སེམས་བརྟུལ་ཏེ། །བསམ་གཏན་པར་གྱུར་རྡུལ་དེས་ཞི་གནས་རྣམས་ཀྱིས་ཉོན་མོངས་གཙོ་བོ་བཅོམ། ། ཁྱོད་འདིར་བསམ་གཏན་དགའ་བས་རང་གི་ཡོན་ཏན་དག་གིས་འགྲོ་དོན་བྱས། །ད་འདིར་སེམས་ཅན་མཆོག་ཁྱོད་བསམ་གཏན་རྣམས་འཕྲུལ་བྱ་བའི་དུས་ལ་བབ། ། གནའ་སྔོན་ཁྱོད་ནི་དྲང་སྲོང་བསམ་གཏན་དགའ་ཞིང་རབ་ཏུ་གནས་པར་གྱུར། །རྒྱལ་པོ་མེད་པའི་མི་དག་གིས་ནི་ཁྱོད་ཁྲིད་རྒྱལ་སྲིད་དབང་ཡང་བསྐུར། །ཁྱོད་ཀྱིས་སྐྱེ་བོ་དག་ནི་དགེ་བ་བཅུ་དང་ཚངས་པའི་ལམ་ལ་བཀོད། །དེ་ཡི་ཚེ་ན་མི་ལས་ཤི་འཕོས་ཐམས་ཅད་ཚངས་པའི་གནས་སུ་དོང ། །ཕྱོགས་དང་ཕྱོགས་མཚམས་འགྲོ་བ་རྣམ་
140a
༄#། །མང་ཤེས་པའི་ཆོ་ག་ཁྱོད་རབ་མཁས། །གཞན་གྱི་སྤྱོད་དང་འགྲོ་བའི་སྐད་ཤེས་པ་དང་དབང་པོ་ཤེས་པ་དང ། །ཚུལ་དང་འདུལ་དང་བློ་གྲོས་རྣམ་མང་རྒྱུ་བའི་ཕ་རོལ་ཁྱོད་ཕྱིན་གྱུར། །རྒྱལ་པོའི་སྲས་ཁྱོད་འདིར་ནི་མངོན་པར་འབྱུང་བའི་དུས་ལ་ད་བབ་བོ། །ཁྱོད་ཀྱིས་གནའ་སྔོན་སྐྱེ་བོ་ལྟ་བ་ལོག་པར་ཞུགས་པར་གྱུར་པ་དག་།རྒ་ཤི་སྡུག་བསྔལ་རྣམ་པ་མང་པོས་ཉམ་ཐག་འཁོད་པ་འདི་མཐོང་ནས། །སྲིད་པ་རྣམ་པར་གཞིག་པའི་དྲང་ལམ་ཉིད་ཀྱིས་ཁོང་དུ་ཆུད་བྱས་ཏེ། །མུན་པ་བཅོམ་པ་ཁྱོད་ཀྱིས་འཇིག་རྟེན་དག་ལ་དོན་ཆེན་རབ་ཏུ་བྱས། །ཚིགས་བཅད་རྣམ་པ་མང་པོ་མཛེས་པ་ཡོན་ཏན་ལྡན་པ་སྣ་ཚོགས་འདིས། །སིལ་སྙན་སྒྲ་བསྒྲགས་དེ་ལས་རྒྱལ་བའི་གཟི་ཡིས་དཔའ་པོ་བསྐུལ་བར་གྱུར། །བློ་མཆོག་ལྡན་པ་ཁྱོད་འདིར་མངོན་པར་འབྱུང་བའི་དུས་ནི་ད་བབ་ཀྱི། །སྡུག་བསྔལ་གང་བའི་སྐྱེ་བོ་འདི་དག་མཐོང་ནས་བཏང་སྙོམས་མ་བྱེད་ཅིག་།བུད་མེད་གོས་དང་རིན་པོ་ཆེ་དང་དོ་ཤལ་སྤོས་ཕྲེང་སྣ་ཚོགས་ཀྱིས། །བརྒྱན་པ་དག་ཀྱང་སེམས་དང་ཕངས་པ་སྐྱེས་ནས་རབ་ཏུ་དགའ་བ་རྣམས། །སེམས་ཅན་མཆོག་ལ་སིལ་སྙན་རབ་ཏུ་སྒྲོག་ཅིང་སློང་བར་བྱེད་པ་ན། །རྒྱལ་བའི་མཐུ་ཡིས་སིལ་སྙན་དག་ལས་ཚིགས་སུ་བཅད་པ་འདི་
140b
འདྲ་བྱུང ། །གང་གི་དོན་དུ་ཁྱོད་ཀྱིས་འགྲོ་ལ་ཕན་ཕྱིར་བསྐལ་པ་དུ་མར་ནི། །གཏང་བར་དཀའ་བ་བཏང་ཞིང་ཚུལ་ཁྲིམས་བཟོད་པ་བརྩོན་འགྲུས་ཤིན་ཏུ་སྤྱད། །བསམ་གཏན་ཤེས་རབ་ཤིན་ཏུ་བསྒོམས་པ་ཁྱོད་ཀྱི་དུས་ལ་ད་བབ་ཀྱི། །འདྲེན་པ་མངོན་པར་འབྱུང་བའི་བློ་ལ་མྱུར་སོམས་ཕྱི་བཤོལ་མ་བྱེད་ཅིག་།སྔོན་ཆད་རིན་ཆེན་མཛོད་དང་གསེར་དང་དངུལ་དང་རྒྱན་རྣམས་རབ་ཏུ་བཏང ། །སྐྱེ་བོ་དེ་དང་དེ་དག་ཏུ་ནི་མཆོད་སྦྱིན་རྣམ་པ་མང་པོ་བྱས། །ཁྱོད་ཀྱི་ཆུང་མ་བུ་ཕོ་བུ་མོ་ལུས་དང་རྒྱལ་སྲིད་སྲོག་བཏང་སྟེ། ། བྱང་ཆུབ་དོན་དུ་གཏང་བར་དཀའ་བ་དཔག་ཏུ་མེད་པ་ཁྱོད་ཀྱིས་བཏང ། །ཁྱོད་ནི་རྒྱལ་པོ་མི་དམན་བསོད་ནམས་དཔལ་གྱིས་རྣམ་པར་གྲགས་པར་གྱུར། །མུ་ཁྱུད་འཛིན་དང་མུ་ཁྱུད་ནག་པོ་ཚངས་པས་བྱིན་དང་རལ་པ་ཅན། །མཆོད་སྦྱིན་སྟོང་ལྡན་དང་ནི་ཆོས་སེམས་འོད་འཕྲོ་ཅན་དང་ནོར་བརྟན་དང ། །ཤིན་ཏུ་དོན་བསམ་གྱུར་ཏེ་སེམས་ཅན་དམན་ལ་གཏང་བར་དཀའ་བ་བཏང ། །ཟླ་བའི་བུ་དང་བརྩོན་འགྲུས་འབར་དང་བསོད་ནམས་འོད་ཟེར་ཅན་དུ་གྱུར། །གཏོང་བ་ཆེ་དང་ལྡན་ཞིང་མཐུ་ལྡན་ཁྱོད་ནི་བྱས་པ་གཟོ་བར་གྱུར། ། རྒྱལ་པོ་དྲང་སྲོང་ཟླ་བ་གཟུགས་ལྡན་དཔའ་བོ་བདེན་པ་འཕེལ་བ་དང ། །རྒྱལ་པོ་ལེགས་པར་སྨྲ་བ་ཚོལ་དང་བློ་གྲོས་བཟང་དང་ངེས་པར་གྱུར། །ཟླ་བའི་འོད་དང་ཁྱད་པར་འགྲོ་
141a
༄#། །དང་རྡུལ་དང་ཕྱོགས་ཀྱི་བདག་པོར་གྱུར། །རབ་སྦྱིན་དཔའ་བོ་ཀ་ཤིའི་རྒྱལ་པོ་རིན་ཆེན་གཙུག་ཕུང་ཞི་བ་བསྟོད། །མི་དབང་དེ་དག་རྣམས་དང་གཞན་དུ་གྱུར་ཏེ་གཏང་བར་དཀའ་བ་བཏང ། །ཁྱོད་ཀྱིས་ཇི་ལྟར་གཏོང་བའི་ཆར་ཕབ་དེ་བཞིན་ཆོས་ཀྱི་ཆར་པ་ཕོབ། །ཁྱོད་ཀྱིས་སྔོན་ཆད་སེམས་ཅན་སྙིང་པོ་གངྒཱའི་བྱེ་མ་སྙེད་ཅིག་མཐོང ། །སེམས་ཅན་ཐར་པར་བྱ་ཕྱིར་བྱང་ཆུབ་དམ་པའི་མཆོག་ནི་ཚོལ་བ་ན། །ཁྱོད་ཀྱིས་མཆོད་པ་དཔག་མེད་བསམ་མི་ཁྱབ་པས་སངས་རྒྱས་དེ་དག་མཆོད། །དཔའ་བོ་གྲོང་ཁྱེར་དམ་པ་འདི་ནས་འབྱུང་བའི་དུས་ལ་ད་བབ་བོ། །ཐོག་མར་ཁྱོད་ཀྱིས་དོན་ཡོད་མཐོང་ལ་སཱ་ལའི་མེ་ཏོག་གིས་ནི་མཆོད། །རྣམ་པར་སྣང་མཛད་ལ་ནི་དང་བའི་སེམས་ཀྱིས་སྐད་ཅིག་བར་དུ་བལྟས། །རྔ་དབྱངས་ལྡན་པ་ལ་ནི་ཁྱོད་ཀྱིས་ཨ་རུ་ར་ཡི་འབྲུ་གཅིག་ཕུལ། །ཙནྡན་མཐོང་ནས་ཁྱོད་ཀྱིས་རྩཝ་ཡི་མེ་སྒྲོན་བླངས་ཏེ་ཁྱིམ་དུ་བཟུང ། །རྟུལ་པོ་གྲོང་ཁྱེར་འཇུག་པ་མཐོང་ནས་ཕྱེ་མ་སྤར་གང་རབ་ཏུ་གཏོར། །ཆོས་ཀྱི་དབང་ཕྱུག་ཆོས་འཆད་པ་ན་ལེགས་ཞེས་བྱ་བ་རབ་ཏུ་བྱིན། །ཀུན་ཏུ་གཟིགས་པ་མཐོང་ནས་ཕྱག་འཚལ་ཕྱག་འཚལ་ལོ་ཞེས་ཚིག་ཏུ་བརྗོད། །འོད་འཕྲོ་ཆེན་པོའི་ཕུང་པོ་ལ་ནི་ཁྱོད་ཀྱིས་དགའ་བས་གསེར་ཕྲེང་གཏོར། །འོད་ཟེར་རྒྱལ་མཚན་ལ་ནི་ཁ་ཚར་ཕུལ་ཞིང་གསལ་
141b
ལ་བལ་སྲན་གཏོར། །ཡེ་ཤེས་ཏོག་ལ་མྱ་ངན་མེད་པའི་མེ་ཏོག་ཁ་ལོ་སྒྱུར་ལ་འཇམ། །རིན་ཆེན་གཙུག་ཏོར་ཅན་ལ་མར་མེ་པདྨ་ལྡན་ལ་སྨན་ཡང་ཕུལ། །ཐམས་ཅད་ཟིལ་གནོན་མུ་ཏིག་དོ་ཤལ་རྒྱ་མཚོ་ལ་ནི་པདྨ་ཕུལ། །པདྨའི་སྙིང་པོ་ལ་ནི་བླ་བྲེ་སེངྒེ་ལ་ནི་ཆར་གདིང་ཕུལ། །སཱ་ལའི་དབང་པོ་རྒྱལ་ལ་མར་ཕུལ་མེ་ཏོག་རྒྱས་ལ་འོ་མ་ཕུལ། །གྲགས་སྦྱིན་ཀུནདའི་མེ་ཏོག་ཕུལ་ཏེ་བདེན་པ་གཟིགས་ལ་ཞལ་ཟས་ཕུལ། །ཡེ་ཤེས་ལྷུན་ལ་ལུས་བཏུད་ཀླུས་བྱིན་ལ་ནི་ན་བཟའ་དབུལ་བ་བྱས། །རབ་འཐོང་གཤེགས་དང་ཙནྡན་མཆོག་དང་འོད་ལྡན་ལ་ནི་ཚཝ་སྤར་རེ། །བཀོད་པ་ཆེ་ལ་པདྨ་དབུལ་བྱས་འོད་ཟེར་རྒྱལ་ལ་རིན་ཆེན་ཕུལ། །ཤཱཀྱ་ཐུབ་ལ་སྤར་གང་གསེར་ཕུལ་དབང་པོའི་ཏོག་ལ་བསྟོད་པ་བྱས། །ཉི་མའི་ཞལ་ལ་མེ་ཏོག་རྣ་རྒྱན་བློ་གྲོས་བཟང་ལ་གསེར་ཅོད་པ་ན། །ཀླུ་ཟིལ་གནོན་ལ་ནོར་བུ་ཕུལ་ཏེ་རྒྱལ་ལ་རས་བཅོས་གདིང་བ་ཕུལ། །སྨན་གྱི་རྒྱལ་ལ་རིན་ཆེན་གདུགས་ཕུལ་སེངྒེའི་ཏོག་ལ་ཁྲི་གདན་ཕུལ། །ཡོན་ཏན་མཆོག་ལྡན་རིན་ཆེན་དྲ་བ་འོད་སྲུང་ལ་ནི་གླུ་དབྱངས་ཀུན། །སྤོས་མཆོག་མེ་ཏོག་ཕུལ་ཞིང་འོད་འཕྲོའི་ཏོག་ལ་རྟག་ཏུ་མེ་ཏོག་ཕུལ། །མི་འཁྲུགས་རྒྱལ་ལ་ཁང་བརྩེགས་ཕུལ་ཞིང་འཇིག་རྟེན་མཆོད་ལ་ཕྲེང་བ་ཕུལ། །རྒྱ་སྤོས་གཙུག་ལག་རྒྱལ་སྲིད་དབུལ་བྱས་རྒྱལ་བར་དཀའ་ལ་སྤོས་ཀུན་ཕུལ། །སྒྲོན་མ་ཆེ་ལ་བདག་ཕུལ་
142a
༄#། །པདྨའི་མཆོག་ལ་རྒྱན་རྣམས་དབུལ་བ་བྱས། །ཆོས་ཀྱི་ཏོག་ལ་མེ་ཏོག་སྣ་ཚོགས་སྒྲོན་མ་མཛད་ལ་ཨུཏྤ་ལ། །མཆོད་པ་རྣམ་པ་སྣ་ཚོགས་ཐ་དད་གཞན་དང་གཞན་དག་བྱེད་པ་ན། །ཁྱོད་ཀྱིས་སེམས་ཅན་སྙིང་པོ་དེ་དག་རྣམས་དང་གཞན་ཡང་སྔོན་ཆད་མཆོད། །འདས་པའི་སངས་རྒྱས་རྣམས་དང་སྟོན་པ་དེ་དག་ཁྱོད་མཆོད་དྲན་པར་གྱིས། །སེམས་ཅན་མགོན་མེད་མྱ་ངན་གང་བ་ཡལ་བར་མ་དོར་མངོན་པར་ཕྱུང ། །མར་མེ་མཛད་པ་མཐོང་བ་ཙམ་གྱིས་ཁྱོད་ཀྱིས་བཟོད་པ་མཆོག་ཐོབ་སྟེ། །རྗེས་སུ་མཐུན་པའི་མངོན་པར་ཤེས་པ་ལྔ་པོ་ཉམས་པ་མེད་པ་ཐོབ། །དེ་ནས་རབ་ཏུ་དགའ་བས་བསྐལ་པ་གྲངས་མེད་འཇིག་རྟེན་ཁམས་ཀུན་ཏུ། །སངས་རྒྱས་དག་ནི་རེ་རེ་ལ་ཡང་མཆོད་པ་བསམ་གྱིས་མི་ཁྱབ་བྱས། །བསྐལ་པ་དཔག་མེད་དེ་དག་ཟད་གྱུར་སངས་རྒྱས་དེ་དག་མྱ་ངན་འདས། །ཁྱོད་ཀྱི་ལུས་རྣམས་ཐམས་ཅད་དང་ནི་དེ་དག་མིང་ཡང་གང་དུ་སོང ། །དངོས་པོ་ཐམས་ཅད་ཐ་མར་ཟད་པའི་ཆོས་ཏེ་འདུས་བྱས་རྟག་པ་མེད། །འདོད་པ་རྒྱལ་སྲིད་ལོངས་སྤྱོད་རྟག་པ་མིན་གྱི་གྲོང་ཁྱེར་མཆོག་ནས་བྱུང ། །བསྐལ་བ་ཟད་པར་འགྱུར་ཚེ་གཟི་བརྗིད་དྲག་པོ་འཇིགས་པའི་མེ་འོད་ལྟར། །རྒ་དང་ན་དང་འཆི་བ་མི་ཟད་འཇིགས་པ་ཆེན་པོ་འོང་བར་འགྱུར། །དངོས་པོ་ཐམས་ཅད་ཐ་མར་ཟད་པའི་ཆོས་ཏེ་འདུས་བྱས་རྟག་
142b
པ་མེད། །ཤིན་ཏུ་སྡུག་བསྔལ་སེམས་ཅན་ལྟོས་ལ་ཡོན་ཏན་ལྡན་པ་མངོན་པར་ཕྱུང ། །རྒྱལ་པོ་བདེ་བའི་མལ་ན་ཉལ་གྱུར་ཅིང ། །གང་ཚེ་མོ་ཚོགས་གླིང་བུ་རྒྱུད་གཅིག་དང ། །སིལ་སྙན་སྣ་ཚོགས་སྒྲ་ཡིས་སློང་བྱེད་པ། །དེ་ཚེ་སིལ་སྙན་སྒྲ་ལས་འདི་དག་བྱུང ། །སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འཆི་མེ་རབ་འབར་འདི་ནི་མགོན་མེད་པ། །སྲིད་ལས་འབྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པས་བུང་བ་འཁོར་བ་བཞིན། །སྲིད་གསུམ་མི་བརྟན་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་ལྟ་དང་མཚུངས། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་ལྟ་བུར་མྱུར་མགྱོགས་འགྲོ། །སྲིད་སྲེད་མ་རིག་དབང་གིས་སྐྱེ་བོ་རྣམས། །མི་དང་ལྷ་གནས་ངན་སོང་ལམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་ཕང་ལོ་བསྐོར་བ་བཞིན། །རྟག་ཏུ་གཟུགས་སྡུག་མཆོག་དང་སྒྲ་སྙན་དང ། །དྲི་ཞིམ་རོ་མཆོག་རེག་པ་བདེ་བྱེད་པ། །དུས་ངན་རྙི་ལ་འགྲོ་བ་འདི་དག་ཐོགས། །དཔེར་ན་རྔོན་པའི་རྙི་ལ་སྤྲེའུ་ཐོགས་བཞིན། །འདོད་པའི་ཡོན་ཏན་མྱ་ངན་གནོད་པ་མང ། །འཇིགས་བཅས་རྟག་ཏུ་དགྲ་བྱེད་ཉོན་མོངས་བཅས། །རལ་གྲིའི་སོ་འདྲ་དུག་སྡོང་ལོ་མ་མཚུངས། །ངན་སྐྱུག་སྣོད་ལྟར་འཕགས་པའི་སྐྱེ་བོས་སྤངས། །འདོད་པའི་ཡོན་ཏན་འཇིགས་བཅས་ཉོན་མོངས་བཅས། །རྟག་ཏུ་བརྗེད་པར་
143a
༄#། །བྱེད་པ་མུན་པ་འདྲ། །རྟག་ཏུ་འཇིགས་པའི་རྒྱུ་བྱེད་སྡུག་བསྔལ་རྩ། །སྲིད་པའི་སྲེད་པའི་འཁྲི་ཤིང་འཕེལ་བར་བྱེད། །ཇི་ལྟར་མེ་འབར་འོབས་ནི་འཇིགས་བཅས་པ། །དེ་ལྟར་འདོད་འདི་འཕགས་པའི་སྐྱེ་བོས་རིག་།འདམ་རྫབ་ཆེ་འདྲ་རལ་གྲི་གཤེགས་གནས་འདྲ། །རལ་གྲིའི་སོ་ལ་སྦྲང་རྩིས་བསྐུས་དང་མཚུངས། །ཇི་ལྟར་སྦྲུལ་གྱི་མགོ་དང་ངན་སྐྱུག་སྣོད། །དེ་ལྟར་འདོད་འདི་མཁས་པ་རྣམས་ཀྱིས་རིག་།བྱ་ཤ་ཁམ་བུ་འདྲ་ཞིང་གསལ་ཤིང་འདྲ། །རོ་ལ་ཁྱི་ལྟར་དགྲ་དང་བཅས་པ་ཡིན། ། འདོད་པའི་ཡོན་ཏན་འདི་དག་ཆུ་ཟླ་འདྲ། །གཟུགས་བརྙན་མཚུངས་ཤིང་བྲག་ཅ་འདྲ་བ་དང ། །མིག་ཡོར་འདྲ་ཞིང་གར་ལ་ལྟ་འདྲ་དང ། །རྨི་ལམ་མཉམ་པ་འཕགས་པས་སྐྱེ་བོས་རིག་།འདོད་པའི་ཡོན་ཏན་སྐད་ཅིག་ཡ་མ་བྲལ། །སྒྱུ་མ་སྨིག་སྒྱུ་འདྲ་ཞིང་རྫུན་པ་ཅན། །ཆུ་བུར་དབུ་བ་ལྟ་བུ་ཡང་དག་མིན། །ཡོངས་སུ་བརྟགས་ལས་བྱུང་བར་མཁས་པས་རྟོགས། །ན་ཚོད་ཐོག་མར་གཟུགས་མཆོག་འཛིན་པའི་ཚེ། །ཕངས་ཤིང་སྡུག་འདོད་འདི་ནི་བྱིས་པའི་སྤྱོད། །རྒ་ན་སྡུག་བསྔལ་གཟི་བརྗིད་ལུས་བཅོམ་ནས། །རྣམ་པར་སྤོང་སྟེ་རི་དྭགས་ཀླུང་སྐམ་བཞིན། །ནོར་འབྲུ་དམ་པ་རྫས་མང་སྟོབས་ལྡན་ཚེ། །ཕངས་ཤིང་སྡུག་འདོད་འདི་ནི་བྱིས་པའི་སྤྱོད། །ནོར་ཉམས་སྡུག་བསྔལ་བར་ནི་གྱུར་
143b
པའི་ཚེ། །རྣམ་པར་སྤོང་སྟེ་མི་ཡིས་འབྲོག་སྟོང་བཞིན། །ཇི་ལྟར་མེ་ཏོག་ཤིང་དང་འབྲས་བཅས་ཤིང ། །དེ་ལྟར་སྦྱིན་འདོད་མི་ལ་དགའ་བར་བྱེད། །ནོར་ཉམས་རྒ་བས་ཉེན་ཅིང་སྦྲང་བ་ན། །དེ་ཚེ་དགའ་བར་མི་འགྱུར་བྱ་རྒོད་བཞིན། །རྫས་ལྡན་གཟུགས་མཆོག་ལྡན་ཚེ་དཔོན་པོ་བཞིན། །ཕྲད་ན་སྡུག་ཅིང་དབང་པོ་དགའ་བར་བྱེད། །རྒ་ན་སྡུག་བསྔལ་ཉེན་ཅིང་ནོར་ཟད་ན། །དེ་ཚེ་འདོད་པར་མི་འགྱུར་འཆི་བདག་བཞིན། །རྒ་བས་རྒ་བྱས་ན་ཚོད་ཡོལ་གྱུར་ན། །སྡོང་པོ་གནམ་ལྕགས་ཀྱིས་ནི་བཅོམ་པ་བཞིན། །རྒ་བས་ཁོག་ན་འཇིགས་བཅས་ཁང་རུལ་འདྲ། །རྒ་ལས་བྱུང་བ་ཐུབ་པ་མྱུར་དུ་སྨྲོས། །བུད་མེད་སྐྱེས་པའི་ཚོགས་རྣམས་རྒ་བས་སྐེམ། །མ་ལུའི་འཁྲི་ཤིང་སཱ་ལའི་ནགས་སྟུག་བཞིན། །རྒ་བས་བརྩོན་འགྲུས་རྩལ་དང་ཤུགས་འཕྲོག་སྟེ། །དཔེར་ན་སྐྱེས་བུ་འདམ་དུ་བྱིང་བ་བཞིན། །རྒ་བས་གཟུགས་སྡུག་གཟུགས་ནི་མི་སྡུག་བྱེད། །རྒ་བས་གཟི་བརྗིད་འཕྲོག་ཅིང་མཐུ་སྟོབས་འཕྲོག་།རྒ་བས་བདེ་བ་འཕྲོག་ཅིང་བརྙས་པར་བྱེད། །རྒ་བས་འཆི་བྱེད་རྒ་བས་མདངས་ཀྱང་འཕྲོག་།ནད་བརྒྱ་མང་དང་ནད་ཐིབས་སྡུག་བསྔལ་གྱིས། །འགྲོ་བ་གཙེས་ཏེ་མི་ཡིས་རི་དྭགས་བཞིན། །རྒ་དང་ན་བས་བཅོམ་པའི་འགྲོ་ལྟོས་ལ། །སྡུག་བསྔལ་ལས་ནི་འབྱུང་བ་མྱུར་ཤོད་ཅིག་།དཔེར་ན་དགུན་སྨད་རླུང་དང་ཁ་བ་ཆེ། །རྩཝ་
144a
༄#། །ཤིང་གེལ་པ་ནགས་སྨན་མདངས་ཀྱང་འཕྲོག། དེ་ལྟར་ནད་འདི་འགྲོ་བའི་མདངས་འཕྲོག་ཅིང ། །དབང་པོ་གཟུགས་དང་སྟོབས་ནི་ཉམས་པར་བྱེད། །ནོར་འབྲུ་ནོར་ཆེན་ཐ་མར་ཟད་པར་བྱེད། །ནད་ནི་རྟག་ཏུ་འགྲོ་བ་བརྙས་པར་བྱེད། །གནོད་པ་བྱེད་ཅིང་སྡུག་ལ་སྡང་པར་བྱེད། །ཡོངས་སུ་གདུང་བྱེད་མཁའ་ལས་ཉི་མ་བཞིན། །འཆི་དང་འཕོ་དང་འཆི་འཕོ་དུས་བྱེད་པ། །ཕངས་ཤིང་སྡུག་པའི་སྐྱེ་བོ་རྟག་ཏུ་འབྲལ། །ཕྱིར་མི་འོང་ཞིང་འཕྲད་པར་འགྱུར་མ་ཡིན། །ཤིང་ལས་ལོ་འབྲུ་འདྲ་ཞིང་ཀླུ་ཡི་རྒྱན་དང་མཚུངས། །འཆི་བ་དབང་ཡོད་པ་དག་དབང་མེད་བྱེད། །འཆི་བ་འཕྲོག་བྱེད་ཆུ་བོས་ཤིང་དེད་བཞིན། །མི་ནི་གཉིས་མིན་གྲོགས་མེད་གཅིག་པུར་འགྲོ་།རང་ལས་འབྲས་བུ་ལྡན་པས་དབང་ཡང་མེད། །འཆི་བས་སྲོག་ཆགས་བརྒྱ་ཕྲག་མང་འཛིན་ཏེ། །འབྱུང་པོའི་ཚོགས་ལ་རྒྱ་མཚོའི་ཆུ་སྲིན་བཞིན། །ཀླུ་ལ་མཁའ་ལྡིང་གླང་ཆེན་སེངྒེ་འདྲ། །རྩ་རྩི་འབྱུང་བོའི་ཚོགས་ལ་མེ་དང་མཚུངས། །སྐྱོན་བརྒྱ་མང་པོ་འདི་འདྲ་འདི་དག་ལས། །འགྲོ་བ་དགྲོལ་ཞེས་ཁྱོད་ཀྱིས་སྨོན་ལམ་བཏབ། །སྔོན་གྱི་སྨོན་ལམ་སྤྱོད་པ་དེ་དྲན་བྱོས། །ཁྱོད་ནི་མངོན་པར་འབྱུང་བའི་དུས་ལ་བབ། །གང་ཚེ་བུད་མེད་ཚོགས་ནི་རབ་དགའ་ཞིང ། །སིལ་སྙན་དག་གིས་ཐུབ་ཆེན་སློང་བྱེད་པ། །དེ་ཚེ་བདེ་བར་གཤེགས་པ་རྣམས་ཀྱི་མཐུས། །
144b
ཚིགས་བཅད་སྣ་ཚོགས་སིལ་སྙན་སྒྲ་ལས་བྱུང ། །འདུས་བྱས་ཐམས་ཅད་མྱུར་དུ་འཇིག་པ་སྟེ། །མཁའ་ལ་གློག་རྒྱུན་རིང་དུ་མི་གནས་བཞིན། །ཁྱོད་ཀྱི་དུས་འདི་ཉེ་བར་གནས་གྱུར་གྱི། །བརྟུལ་ཞུགས་བཟང་པོ་མངོན་འབྱུང་དུས་ལ་བབ། །འདུ་བྱེད་མི་རྟག་བརྟན་པ་མ་ཡིན་ཏེ། །རྫ་སོ་མ་བཏང་ལྟ་བུར་འཇིག་པའི་བདག་།གཞན་གྱི་རྫས་ནི་བརྙན་པོ་བྱས་དང་མཚུངས། །བྱེ་མའི་གྲོང་ཁྱེར་ལྟ་བུར་རིང་མི་ཐོགས། །འདུ་བྱེད་འདི་དག་འཇིག་པའི་ཆོས་ཅན་ཏེ། །དབྱར་གྱི་ཞལ་ཞལ་ཇི་ལྟར་འགོགས་པ་བཞིན། །ཆུ་ངོགས་བྱེ་མ་ཡོད་པ་འདྲ་པ་སྟེ། །རྐྱེན་ལ་རག་ལས་རང་བཞིན་ཉམ་ཆུང་བ། །འདུ་བྱེད་མར་མེའི་འོད་འཕྲོ་འདྲ་བ་སྟེ། །མྱུར་དུ་འབྱུང་ཞིང་འགག་པའི་ཆོས་ཅན་ཡིན། །རླུང་དང་མཚུངས་པར་རིང་དུ་མི་གནས་ལ། །དབུ་བ་ལྟ་བུར་ཉམ་ཆུང་སྙིང་པོ་མེད། །འདུ་བྱེད་གཡོ་བ་མེད་ཅིང་སྟོང་པ་སྟེ། །བརྟགས་ན་ཆུ་ཤིང་དག་གི་ཕུང་པོ་འདྲ། །སྒྱུ་མ་ལྟ་བུར་སེམས་ནི་རྨོངས་པར་བྱེད། ། ལག་བཅངས་སྟོང་པས་བྱིས་བ་བྲིད་དང་མཚུངས། །འདུས་བྱས་གྱུར་པ་ཐམས་ཅད་རྒྱུ་དག་དང ། །རྐྱེན་རྣམས་ཀྱིས་ནི་རབ་ཏུ་འབྱུང་བ་སྟེ། །གཅིག་གིས་གཅིག་རྒྱུ་བྱས་ཏེ་བརྟེན་ནས་བྱུང ། །བྱིས་པའི་སྐྱེ་བོས་འདི་འདྲ་འདི་མ་རྟོགས། །དཔེར་ན་གྲེས་མ་མུན་ཛ་རྟེན་བྱས་ལ། །བཙལ་བའི་སྟོབས་ཀྱིས་ཐག་པར་འགྱུར་བ་དང ། །ཟོ་ཆུན་རྒྱུད་མོ་འཁོར་ལོར་
145a
༄#། །བཅས་པ་ཡང ། །དེ་དག་རེ་རེས་འགྲུབ་པར་འགྱུར་བ་མེད། །དེ་ལྟར་སྲིད་པའི་ཡན་ལག་ཀུན་གྲུབ་པ། །གཞན་དང་གཞན་ཚོགས་པ་ལ་བརྟེན་ནས་ནི། །དེ་དག་སོ་སོ་རེ་རེར་འགྲུབ་པར་འགྱུར། །སྔོན་གྱི་མཐའ་དང་ཕྱི་མའི་མཐའ་མི་དམིགས། །ས་བོན་ཡོད་ན་མྱུ་གུ་ཇི་བཞིན་ཏེ། །ས་བོན་གང་ཡིན་མྱུ་གུ་དེ་ཉིད་མིན། །དེ་ལས་གཞན་མིན་དེ་ཡང་མ་ཡིན་ཏེ། །དེ་ལྟར་རྟག་མིན་ཆད་མིན་ཆོས་ཉིད་དོ། །མ་རིག་པ་ཡི་འདུ་བྱེད་རྐྱེན་ཡིན་ཏེ། །འདུ་བྱེད་དེ་ཡང་ཡང་དག་ཉིད་དུ་མེད། །མ་རིག་པ་དང་འདུ་བྱེད་དེ་དག་ཀྱང ། །རང་བཞིན་སྟོང་སྟེ་གཡོ་བ་མེད་པ་ཡིན། །རྒྱ་ལས་རྒྱ་ཡི་འབུར་ནི་སྣང་མོད་ཀྱི། །རྒྱ་དེ་འཕོས་པར་གྱུར་པའང་ཡོད་མ་ཡིན། །དེ་ལ་དེ་མེད་གཞན་ལས་མ་ཡིན་ཏེ། །དེ་ལྟར་འདུས་བྱས་རྟག་མེད་ཆད་པ་མེད། །མིག་དང་གཟུགས་ལ་བརྟེན་པ་བྱས་ནས་སུ། །མིག་གི་རྣམ་པར་ཤེས་པ་འདིར་འབྱུང་ཡང ། །མིག་ནི་གཟུགས་ལ་བརྟེན་པ་མ་ཡིན་ལ། །གཟུགས་ཀྱང་མིག་ལ་འཕོ་བ་ཡོད་མ་ཡིན། །འདི་དག་བདག་མེད་མི་སྡུག་ཆོས་ཅན་ཡང ། །དེ་དག་བདག་དང་སྡུག་པར་བརྟགས་པ་སྟེ། །ནོར་པ་ཡང་དག་མ་ཡིན་བཏགས་ཡིན་ཡང ། །དེ་ལས་མིག་གི་རྣམ་པར་ཤེས་པ་འབྱུང ། །རྣམ་པར་ཤེས་པ་འགགས་ནས་འབྱུང་འགྱུར་ཏེ། །མཁས་པས་སྐྱེ་དང་འཇིག་པ་རྣམ་པར་མཐོང ། །གང་དུ་མ་སོང་གང་ནས་འོངས་པ་མིན། །རྣལ་
145b
འབྱོར་པས་ནི་སྟོང་པ་སྒྱུ་ལྟར་མཐོང ། །དཔེར་ན་གཙུབ་ཤིང་དང་ནི་གཙུབ་སྟན་དང ། །ལག་པས་རྩོལ་བ་བྱས་པ་གསུམ་ཚོགས་པ། །དེ་ལ་བརྟེན་ནས་མེ་ནི་འབྱུང་འགྱུར་ཏེ། །བྱུང་ནས་རིང་པོར་མི་ཐོགས་འགག་པར་འགྱུར། །དེ་ནས་མཁས་པ་ལ་ལས་བརྟགས་བྱས་ཏེ། །འདི་ནི་གང་ནས་འོངས་ལ་གར་སོང་ཞེས། །ཕྱོགས་དང་ཕྱོགས་མཚམས་ཀུན་ཏུ་བརྟགས་བྱས་ནས། །དེ་ཡི་འོང་བའམ་འགྲོ་བ་མི་དམིགས་སོ། །ཕུང་པོ་དག་དང་སྐྱེ་མཆེད་ཁམས་རྣམས་ཀྱི། །རྐྱེན་ནི་མ་རིག་པ་དང་སྲེད་དང་ལས། །དེ་དག་ཚོགས་པ་སེམས་ཅན་ཞེས་བརྗོད་ཀྱང ། །དེ་ནི་དམ་པའི་དོན་དུ་དམིགས་སུ་མེད། །མཆུ་དང་ལྐོག་མ་རྐན་ལ་བརྟེན་ནས་ནི། །ལྕེ་བསྒྱུར་བ་ལས་ཡི་གེའི་སྒྲ་འབྱུང་ཡང ། །ལྐོག་མར་བརྟེན་ནས་མ་ཡིན་རྐན་ལས་མིན། །རེ་རེ་ལ་ནི་ཡི་གེ་དམིགས་སུ་མེད། །ཚོགས་པ་དེ་ལ་བརྟེན་ནས་ངག་དེ་ནི། །ཡིད་ཀྱི་བློ་ཡི་དབང་གིས་འབྱུང་མོད་ཀྱི། །ཡིད་དང་ངག་ནི་མི་སྣང་གཟུགས་མེད་དེ། ། ནང་དང་ཕྱི་རོལ་ན་ཡང་དམིགས་སུ་མེད། །མཁས་པས་ངག་སྐད་སྒྲ་དང་དབྱངས་རྣམས་ཀྱི། སྐྱེ་དང་འཇིག་ལ་རྣམ་པར་བརྟགས་བྱས་ན། །དེ་ཚེ་ངག་ཀུན་བྲག་ཅ་ལྟ་བུ་དང ། ། སྐད་ཅིག་པ་དང་སྙིང་པོ་མེད་པར་མཐོང ། །དཔེར་ན་ཤིང་དང་རྒྱུད་ལ་བརྟེན་བྱས་ལ། །ལག་པས་རྩོལ་བ་བྱས་པ་གསུམ་ཚོགས་ན། །སྒྲ་སྙན་པི་ཝང་གླིང་བུ་ལ་སོགས་པ། །
146a
༄#། །དེ་དག་ལས་ནི་སྒྲ་ཡང་འབྱུང་བར་འགྱུར། །དེ་ནས་མཁས་པ་ལ་ལས་བརྟགས་བྱས་ཏེ། །འདི་ནི་གང་ནས་འོངས་ལ་གར་སོང་ཞེས། །ཕྱོགས་དང་ཕྱོགས་མཚམས་ཀུན་ཏུ་བརྟགས་བྱས་ན། །སྒྲ་ཡི་འོང་བ་འམ་འགྲོ་བ་མི་དམིགས་སོ། །དེ་ལྟར་རྒྱུ་དག་དང་ནི་རྐྱེན་རྣམས་ལས། །འདུ་བྱེད་གྱུར་པ་ཐམས་ཅད་བྱུང་བ་སྟེ། །ཡང་དག་མཐོང་བའི་རྣལ་འབྱོར་པ་ཡིས་ནི། །འདུ་བྱེད་སྟོང་པ་གཡོ་བ་མེད་པར་མཐོང ། །ཕུང་པོ་དག་དང་སྐྱེ་མཆེད་ཁམས་རྣམས་ནི། །ནང་ཡང་སྟོང་ལ་ཕྱི་རོལ་སྟོང་པ་སྟེ། །ཐམས་ཅད་བདག་གིས་དབེན་ཞིང་གནས་མེད་ལ། །ཆོས་ཀྱི་མཚན་ཉིད་ནམ་མཁའི་ངོ་བོ་ཉིད། །ཆོས་ཀྱི་མཚན་ཉིད་འདི་འདྲ་འདི་དག་ནི། །མར་མེ་མཛད་པ་མཐོང་ནས་ཁྱོད་ཀྱིས་རྟོགས། །ཇི་ལྟར་ཉིད་ཀྱིས་རྗེས་སུ་རྟོགས་པ་ལྟར། །དེ་བཞིན་ལྷ་མིར་བཅས་པ་རྟོགས་པར་གྱིས། །གནོད་པ་ཡང་དག་མ་ཡིན་བཏགས་པ་ཡི། །འདོད་ཆགས་ཞེ་སྡང་དག་གིས་འགྲོ་བ་གདུངས། །སྙིང་རྗེའི་སྤྲིན་ལས་ཞི་བ་བསིལ་བའི་ཆུ། །འདྲེན་པ་བདུད་རྩིའི་རྒྱུན་ནི་རབ་ཏུ་ཕོབ། །བྱང་ཆུབ་དམ་པ་ཡང་དག་ཐོབ་ནས་ནི། །འཕགས་པའི་ནོར་གྱིས་སྲོག་ཆགས་བསྡུ་འོ་ཞེས། །མཁས་པ་ཁྱོད་ཀྱིས་གང་གི་ཆེད་ཀྱི་ཕྱིར། །བསྐལ་པ་བྱེ་བ་མང་པོ་སྦྱིན་པ་བྱིན། །སྔོན་གྱི་སྤྱོད་དེ་རྗེས་སུ་དྲན་གྱིས་ཏེ། །འཕགས་པའི་ནོར་གྱིས་དམན་དབུལ་
146b
སྡུག་བསྔལ་ལ། །སེམས་ཅན་ཁ་ལོ་སྒྱུར་བ་མ་གཡེལ་བར། །འཕགས་པའི་ནོར་གྱིས་དེ་དག་བསྡུ་བ་གྱིས། །ངན་སོང་ས་ཡི་ལམ་ནི་གཅད་པ་དང ། མཐོ་རིས་བདུད་རྩིའི་སྒོ་མོ་མཆོག་དེ་ནི། །སེམས་ཅན་བྱེ་བ་མང་ལ་བསྟན་ཞེས་ཏེ། །ཁྱོད་ཀྱིས་རྟག་ཏུ་ཚུལ་ཁྲིམས་ཤིན་ཏུ་བསྲུངས། །ཚུལ་ཁྲིམས་ལྡན་པས་བསམས་པ་འགྲུབ་འགྱུར་གྱི། །སྔོན་གྱི་སྤྱོད་དེ་རྗེས་སུ་དྲན་གྱིས་ལ། །ངན་སོང་གསུམ་པོའི་ས་ཡི་སྒོ་བཅད་དེ། །མཐོ་རིས་བདུད་རྩིའི་སྒོ་ནི་དབྱེ་བར་གྱིས། །སྲོག་ཆགས་རྣམས་ཀྱི་ཁོང་ཁྲོ་ཁྲོ་གཞིལ་དང ། །སྲིད་པའི་མཚོ་ལས་སེམས་ཅན་བསྒྲལ་བྱས་ཏེ། །ཞི་བདེ་རིམས་ནད་མེད་ལ་དགོད་དོ་ཞེས། །ཁྱོད་ཀྱིས་རྟག་ཏུ་བཟོད་པ་ཤིན་ཏུ་བསྒོམས། །སྔོན་གྱི་སྤྱོད་དེ་རྗེས་སུ་དྲན་གྱིས་ཏེ། །དགྲ་དང་གནོད་སེམས་འཚེ་བས་དཀྲུགས་པ་ཡི། །འཚེ་བ་སྤྱོད་ལ་ཡལ་བར་མ་དོར་བར། །འགྲོ་བ་འདི་དག་བཟོད་པའི་ས་ལ་ཁོད། །ཆོས་ཀྱི་གྲུ་ནི་ལེགས་པར་སྦྱར་བྱས་ལ། །སྲིད་པའི་མཚོ་ལས་འགྲོ་བ་རྣམས་བསྒྲལ་ཏེ། །ཞི་བདེ་རིམས་ནད་མེད་ལ་དགོད་དོ་ཞེས། །གང་གི་དོན་དུ་ཁྱོད་ཀྱིས་བརྩོན་འགྲུས་བསྟེན། །སྔོན་གྱི་སྤྱོད་དེ་རྗེས་སུ་དྲན་གྱིས་ལ། །འགྲོ་བ་ཆུ་བོ་བཞི་ཡིས་ཁྱེར་གྱུར་པ། །སེམས་ཅན་མགོན་མེད་པ་དག་བརྩོན་སྟོབས་དང ། །བརྟུལ་བའི་ཤུགས་ཀྱིས་མྱུར་དུ་འདི་དག་ཐོན། །དབང་པོ་འཁྲུལ་དང་ཕལ་བའི་དབང་པོ་
147a
༄#། །དང ། །སྤྲེའུ་འདྲའི་སེམས་ལས་ཞི་གནས་ངས་དགོད་ཅེས། །འདྲེན་པ་ཁྱོད་ཀྱིས་གང་གི་ཆེད་ཀྱི་ཕྱིར། །ཉོན་མོངས་གཞིལ་བའི་བསམ་གཏན་བསྒོམས་གྱུར་པ། །སྔོན་གྱི་སྤྱོད་དེ་རྗེས་སུ་དྲན་གྱིས་ཏེ། །ཉོན་མོངས་དྲ་བས་དཀྲུགས་པར་གྱུར་པ་ཡི། །འགྲོ་ལ་མ་གཡེལ་ཉོན་མོངས་གཙེས་པ་ལས། །བསམ་གཏན་མཆོག་ལ་སྐྱེ་རྒུ་འདི་དག་ཁོད། །གཏི་མུག་མ་རིག་མུན་པས་བསྒྲིབས་པ་ཡི། །འགྲོ་ལ་ཆོས་བརྒྱ་མང་པོ་མཐོང་བྱེད་པ། །ཡང་དག་མཐོང་བའི་མིག་ནི་སྦྱིན་ནོ་ཞེས། །ཁྱོད་ཀྱིས་སྔོན་ཆད་ཤེས་རབ་ཤིན་ཏུ་བསྒོམས། །སྔོན་གྱི་སྤྱོད་དེ་རྗེས་སུ་དྲན་གྱིས་ལ། །གཏི་མུག་མ་རིག་མུན་པས་བསྒྲིབས་པ་ཡི། །འགྲོ་ལ་ཤེས་རབ་དམ་པ་འོད་བཟང་བ། །ཆོས་མིག་དྲི་མེད་ཉོན་མོངས་མེད་པ་བྱིན། །བུད་མེད་རྣམས་ཀྱི་སིལ་སྙན་གླུ་དབྱངས་ལས། །ཚིགས་སུ་བཅད་པ་འདི་འདྲ་འདི་བྱུང་སྟེ། །དེ་ཐོས་ནས་ནི་རྒྱགས་པ་རྣམས་སྤངས་ནས། །བྱང་ཆུབ་དམ་པ་མཆོག་ཏུ་སེམས་བཏང་ངོ ། །དགེ་སློང་དག། དེ་ལྟར་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འདུག་པའི་ཚེའང་ཆོས་མཉན་པ་དང་བྲལ་བར་མ་གྱུར་ཏོ། །ཆོས་ཡིད་ལ་བྱེད་པ་དང་བྲལ་བར་མ་གྱུར་ཏོ། །དེ་ཅིའི་ཕྱིར་ཞེ་ན། དགེ་སློང་དག་།འདི་ལྟར་བྱང་ཆུབ་སེམས་དཔའ་ནི་ཡུན་རིང་པོ་ནས་ཆོས་དང་ཆོས་སྨྲ་བ་རྣམས་ལ་གུས་པ་དང་བཅས་
147b
པར་གྱུར་ཅིང ། བསམ་པ་ཐག་པ་ནས་ཆོས་དོན་དུ་གཉེར་བ། ཆོས་འདོད་པ། ཆོས་ཀྱི་ཀུན་དགའ་ལ་དགའ་ཞིང་མོས་པར་གྱུར་པ། ཆོས་ཚོལ་བས་ངོམས་མི་ཤེས་པ། ཇི་ལྟར་ཐོས་པའི་ཆོས་ཡང་དག་པར་སྟོན་པ། བླ་ན་མེད་པའི་ཆོས་ཆེན་པོའི་སྦྱིན་བདག་ཏུ་གྱུར་པ། ཟང་ཟིང་མེད་པར་ཆོས་སྟོན་པ། ཆོས་སྦྱིན་པ་ལ་སེར་སྣ་མེད་པ། ཆོས་ལ་སློབ་དཔོན་གྱི་དཔེ་མ་ཁྱུད་དང་བྲལ་བ། ཆོས་ཀྱི་རྗེས་སུ་མཐུན་པའི་ཆོས་སྒྲུབ་པ། ཆོས་ལ་ནན་ཏན་བྱེད་པ་ལ་དཔའ་བ། ཆོས་ལ་གནས་སུ་འཛིན་པ། ཆོས་ལ་སྐྱབས་སུ་འཛིན་པ། ཆོས་ལ་དཔུང་གཉེན་དུ་འཛིན་པ།་ཆོས་ལ་རྟོན་པ། ཆོས་ལ་ངེས་པར་སེམས་པའི་བཟོད་པས་ངེས་པར་བྱུང་བ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པ་སྟེ། ཐབས་ལ་མཁས་པར་རྟོགས་པར་ཁོང་དུ་ཆུད་པ་ཡིན་ནོ། །དགེ་སློང་དག་།དེ་ལ་བྱང་ཆུབ་སེམས་དཔའ་ཐབས་མཁས་པ་ཆེན་པོས་རྣམ་པར་རྩེ་ཞིང་བཙུན་མོའི་འཁོར་ཐམས་ཅད་ཀྱི་མོས་པ་ཇི་ལྟ་བ་བཞིན་དུ་སྤྱོད་ལམ་ནི་བསྟན། སྔོན་གྱི་བྱང་ཆུབ་སེམས་དཔའ་འཇིག་རྟེན་གྱི་ཡུལ་ཐམས་ཅད་ལས་ཡང་དག་པར་འདས་པ་རྣམས་ཀྱི་འཇིག་རྟེན་དང་མཐུན་པར་བྱ་བའི་ཆོས་ཉིད་དང་མཐུན་པར་ནི་བྱས། ཡུན་རིང་པོ་ནས་འདོད་པའི་སྐྱོན་ཤིན་ཏུ་རྟོགས་པ་ཡིན་ཡང་སེམས་ཅན་ཡོངས་སུ་སྨིན་པར་བྱ་བའི་དབང་གིས་འདོད་པའི་ལོངས་སྤྱོད་ནི་ཀུན་ཏུ་བསྟན། དགེ་བའི་རྩ་བ་དཔག་ཏུ་མེད་
148a
༄#། །པ་བསགས་པའི་བསོད་ནམས་ཀྱི་སྟོབས་ཀྱི་ཚོགས་ཀྱི་ཁྱད་པར་གྱིས་འཇིག་རྟེན་གྱི་དབང་དུ་བྱ་བ་མཚུངས་པ་མེད་པ་ནི་ཀུན་ཏུ་བསྟན། ལྷའི་དང་མིའི་ལས་ཤིན་ཏུ་འདས་པ་སྙིང་པོ་དང་ལྡན་ཞིང་རྒྱ་ཆེ་ལ་རྣམ་པ་ཐ་དད་པ་རྣམ་པ་སྣ་ཚོགས་ཀྱི་གཟུགས་དང ། སྒྲ་དང ། དྲི་དང ། རོ་དང ། རེག་མཆོག་ཏུ་དགའ་བ་ཉམས་དགའ་བའི་འདོད་པའི་དགའ་བའི་བདེ་བ་ནི་བསྟན། འདོད་པའི་དགའ་བའི་ཡུལ་ཐམས་ཅད་ལ་འཛིན་པ་མེད་པར་རང་གི་སེམས་ལ་དབང་སྒྱུར་བ་ནི་བསྟན། སྔོན་གྱི་སྨོན་ལམ་གྱི་སྟོབས་ཀྱིས་གྲོགས་སུ་གྱུར་པ། དགེ་བའི་རྩ་བ་བསགས་པའི་སེམས་ཅན་རྣམས་ནི་མཚུངས་པར་གནས་པས་ཡོངས་སུ་སྨིན་པར་བྱས་ནས་འཇིག་རྟེན་གྱི་ཀུན་ནས་ཉོན་མོངས་པའི་དྲི་མ་ཐམས་ཅད་ཀྱིས་ནི་སེམས་ལ་ཀུན་ནས་ཉོན་མོངས་པ་མེད་པར་བཙུན་མོའི་འཁོར་གྱི་ནང་ན་གནས་ཏེ། ཇི་ལྟར་མགྲོན་དུ་གཉེར་བའི་སེམས་ཅན་གྱི་ཁམས་ཡོངས་སུ་སྨིན་པར་བྱ་བའི་དུས་ལ་ལྟ་ཞིང ། དེའི་ཚེ་བྱང་ཆུབ་སེམས་དཔའ་ཤིན་ཏུ་རྒྱ་ཆེར་སྔོན་གྱི་དམ་བཅས་པ་རྗེས་སུ་དྲན་ནོ། །སངས་རྒྱས་དང་ཆོས་ཀྱང་མངོན་དུ་བྱེད་དོ། །སྨོན་ལམ་གྱི་སྟོབས་ཀྱང་མངོན་པར་སྒྲུབ་པོ། །སེམས་ཅན་རྣམས་ལའང་སྙིང་རྗེ་ཆེན་པོ་གཏོང་ངོ ། །སེམས་ཅན་རབ་ཏུ་ཐར་པར་བྱ་བར་ཡང་སེམས་སོ། །འབྱོར་པ་ཐམས་ཅད་ཀྱི་མཐའ་ནི་རྒུད་པ་ཡིན་པར་
148b
ཡང་སོ་སོར་རྟོག་གོ། འཁོར་བ་ལ་གནོད་པ་དང ། འཇིགས་པ་མང་པོ་དུ་མ་ཡོད་པར་ཡང་རྟོག་གོ། བདུད་དང་ཉེས་པའི་ཞགས་པ་ཡང་དག་པར་གཅོད་དོ། །འཁོར་བའི་རྒྱུད་ལས་ཀྱང་བདག་ཉིད་འདའ་བར་བྱེད་དོ། །མྱ་ངན་ལས་འདས་པ་ལའང་སེམས་ཡང་དག་པར་གཏོང་ངོ་།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དགུ་པ།་དགེ་སློང་དག་།དེ་ལ་བྱང་ཆུབ་སེམས་དཔའ་ནི་སྔོན་གྱི་མཐའ་ཉིད་ནས་ཀྱང་འཁོར་བའི་སྐྱོན་ཤིན་ཏུ་རིག་པ་ཡིན། འདུས་བྱས་ལ་བསམ་པ་ཐག་པ་ནས་དོན་དུ་མི་གཉེར་བ་ཡིན།་ཉེ་བར་ལེན་པ་ཡོངས་སུ་འཛིན་པ་ཐམས་ཅད་དོན་དུ་མི་གཉེར་བ་ཡིན། སངས་རྒྱས་ཀྱི་ཆོས་དོན་དུ་གཉེར་བ་ཡིན། མྱ་ངན་ལས་འདས་པ་ལ་མངོན་དུ་ཕྱོགས་པ་ཡིན། འཁོར་བ་ལ་རྒྱབ་ཀྱིས་བལྟས་པ་ཡིན། དེ་བཞིན་གཤེགས་པའི་སྤྱོད་ཡུལ་ལ་མངོན་དུ་དགའ་བ་ཡིན། བདུད་ཀྱི་སྤྱོད་ཡུལ་དང་མ་འདྲེས་པ་ཡིན། སྲིད་པ་ལ་འབར་བར་སྐྱོན་དུ་མཐོང་བ་ཡིན།་ཁམས་གསུམ་པ་ལས་བྱུང་བའི་བསམ་པ་ཅན་ཡིན། འཁོར་བའི་སྐྱོན་དང་ཉེས་དམིགས་དང་འབྱུང་བ་ལ་མཁས་པ་ཡིན། རབ་ཏུ་འབྱུང་བར་འདོད་པ་ཡིན། མངོན་པར་འབྱུང་བའི་བསམ་པ་ཅན་ཡིན། དབེན་པ་ལ་གཞོལ་བ་ཡིན། དབེན་པ་ལ་འབབ་པ་ཡིན། དབེན་པ་ལ་བབ་པ་ཡིན། དགོན་པ་དང་བས་མཐར་མངོན་པར་དགའ་བ་ཡིན། རབ་
149a
༄#། །ཏུ་དབེན་པས་རབ་ཏུ་ཞི་བར་འདོད་པ་ཡིན། བདག་དང་གཞན་ལ་ཕན་པར་ཞུགས་པ་ཡིན། བླ་ན་མེད་པའི་ནན་ཏན་ལ་དཔའ་བ་ཡིན། འཇིག་རྟེན་གྱི་དོན་དུ་འདོད་པ་ཡིན། ཕན་པར་འདོད་པ་ཡིན་བདེ་བར་འདོད་པ་ཡིན། གྲུབ་པ་དང་བདེ་བར་འདོད་པ་ཡིན། འཇིག་རྟེན་ལ་སྙིང་བརྩེ་བ་ཅན་ཡིན། ཕན་པར་འདོད་པ་ཅན་ཡིན། བྱམས་པ་ལ་གནས་པ་ཅན་ཡིན། སྙིང་རྗེ་ཆེན་པོ་དང་ལྡན་པ་ཡིན། བསྡུ་བའི་དངོས་པོ་ལ་མཁས་པ་ཡིན། རྟག་ཏུ་ཡིད་ཡོངས་སུ་མི་སྐྱོ་བ་ཡིན། སེམས་ཅན་ཡོངས་སུ་སྨིན་པར་བྱ་བ་དང་འདུལ་བ་ལ་མཁས་པ་ཡིན། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་སྡུག་པར་སེམས་པ་ཡིད་ལ་བྱེད་པ་དང་ལྡན་པ་ཡིན། དངོས་པོ་ཐམས་ཅད་ལ་མི་ལྟ་བར་ཡོངས་སུ་བཏང་བ་ཡིན། སྦྱིན་པ་བགེད་པ་ལ་དགའ་བ་ཡིན། ལྷུག་པར་གཏོང་བ་ཡིན། ལག་པ་བརྐྱང་བ་ཡིན། གཏོང་བ་ལ་དཔའ་བ་ཡིན། མཆོད་སྦྱིན་བྱས་པ་ཡིན། བསོད་ནམས་ཤིན་ཏུ་ཕུན་སུམ་ཚོགས་པ་ཡིན། བསོད་ནམས་ཀྱི་ཡོ་བྱད་ཤིན་ཏུ་བཟུང་བ་ཡིན། དྲི་མ་དང་སེར་སྣ་དང་བྲལ་བ་ཡིན། སེམས་ཀུན་ཏུ་མ་བཟུང་བ་ཡིན། བླ་ན་མེད་པའི་སྦྱིན་བདག་ཆེན་པོ་ཡིན། བྱིན་ནས་ཀྱང་རྣམ་པར་སྨིན་པ་ལ་མི་རེ་བ་ཡིན། སྦྱིན་པ་ལ་དཔའ་བ་ཡིན། འདོད་པ་དང ། འདོད་པ་ཆེ་བ་དང །
149b
ཆགས་པ་དང ། ཞེ་སྡང་དང ། རྒྱགས་པ་དང ། ང་རྒྱལ་དང ། གཏི་མུག་དང ། སེར་སྣ་ལ་སོགས་པ་ཉོན་མོངས་པའི་དགྲའི་ཚོགས་ཕྱིར་རྒོལ་བ་ཐམས་ཅད་ཚར་གཅད་པའི་ཕྱིར་མངོན་པར་བྱུང་བ་ཡིན། ཐམས་ཅད་མཁྱེན་པའི་སེམས་བསྐྱེད་པའི་རྒྱུན་ལས་མི་གཡོ་བ་ཡིན། གཏོང་བ་ཆེན་པོའི་སེམས་ཀྱི་གོ་ཆ་ཤིན་ཏུ་བགོས་པ་ཡིན། འཇིག་རྟེན་ལ་སྙིང་བརྩེ་བ་ཅན་ཡིན། ཕན་པར་འདོད་པ་ཅན་ཡིན། ཡ་ལད་བགོས་པ་ཡིན། གོ་ཆ་བགོས་པ་ཡིན། སེམས་ཅན་རབ་ཏུ་ཐར་པར་བྱ་བ་ལ་དམིགས་པ་ཡིན། སྙིང་རྗེ་ཆེན་པོའི་སྟོབས་དང ། རྣམ་པར་གནོན་པ་དང ། ཕ་རོལ་གནོན་པ་དང་ལྡན་པ་ཡིན། ཕྱིར་མི་ལྡོག་པ་ཡིན། སེམས་ཅན་ཐམས་ཅད་ལ་སེམས་མཉམ་པ་ཡིན། གཏོང་བའི་ལག་ཆ་ཅན་ཡིན། སེམས་ཅན་གྱི་བསམ་པ་དང་རེ་བ་ཇི་ལྟ་བ་བཞིན་དུ་ཚིམ་པར་བྱེད་པ་ཡིན། བྱང་ཆུབ་ཀྱི་སྣོད་དུ་གྱུར་པ་ཡིན། དུས་དང་ཕྱེད་པར་ཆོས་རྟོགས་པ་ཡིན། སྨོན་ལམ་བྱང་ཆུབ་ཏུ་ཡོངས་སུ་བསྔོས་པ་ཡིན། རྒྱལ་མཚན་མ་བསྙལ་བ་ཡིན། འཁོར་གསུམ་ཡོངས་སུ་དག་པའི་སྦྱིན་པ་ཡོངས་སུ་གཏོང་བ་དང་ལྡན་པ་ཡིན། ཡེ་ཤེས་མཆོག་གི་རྡོ་རྗེའི་མཚོན་ཆ་སྲ་བ་དང་ལྡན་པ་ཡིན། ཉོན་མོངས་པའི་ཕྱིར་རྒོལ་བ་ཤིན་ཏུ་ཚར་གཅོད་པ་ཡིན། ཚུལ་ཁྲིམས་དང ། ཡོན་ཏན་དང ། སྤྱོད་པ་ལ་ཞུགས་པ་ཡིན། ལུས་དང ། ངག་དང ། ཡིད་ཀྱི་ལས་ཀྱི་
150a
༄#། །མཐའ་ལེགས་པར་བསྲུངས་པ་ཡིན། ཁ་ན་མ་ཐོ་བ་ཕྲ་རབ་ཙམ་ལའང་འཇིགས་པར་ལྟ་བ་ཡིན། ཚུལ་ཁྲིམས་ཡོངས་སུ་དག་པ་ཡིན། དྲི་མ་མེད་ཅིང་དྲི་མ་དང་བྲལ་ལ་དྲི་མ་སྤངས་པའི་སེམས་དང་ལྡན་པ་ཡིན། ངན་དུ་སྨྲས་པ་དང ། ངན་དུ་བརྗོད་པའི་ཚིག་གི་ལམ་དང ། བརྒྱད་པ་དང ། སྤྱོ་བ་དང ། སྨད་པ་དང ། བཤུང་བ་དང ། བརྡེག་པ་དང ། བསྡིགས་པ་དང ། བསད་པ་དང ། བཅིང་བ་དང ། གཟུང་བའི་ཉོན་མོངས་པ་ཐམས་ཅད་ཀྱིས་སེམས་མ་བརྙོགས་པ་ཡིན། སེམས་མ་འཁྲུགས་པ་ཡིན།་བཟོད་པ་དང་དེས་པ་ཕུན་སུམ་ཚོགས་པ་ཡིན། གནོད་པར་མི་སེམས་པ་ཡིན། གནོད་པ་མི་བྱེད་པ་ཡིན། གནོད་སེམས་མེད་པའི་སེམས་དང་ལྡན་པ་ཡིན། སེམས་ཅན་ཐམས་ཅད་ལ་ཕན་པར་བྱ་བའི་བརྩོན་འགྲུས་འབད་པ་བརྩམས་པ་ཡིན། ཡི་དམ་ལ་བརྟན་པ་ཡིན། དགེ་བའི་ཆོས་ཐམས་ཅད་ཡང་དག་པར་སྒྲུབ་པ་ལ་ཕྱིར་མི་ལྡོག་པ་ཡིན།་དྲན་པ་དང་ལྡན་པ་ཡིན། ཤེས་བཞིན་ཅན་ཡིན། ཤིན་ཏུ་མཉམ་པར་བཞག་པ་ཡིན། སེམས་མ་གཡེངས་པ་ཡིན། བསམ་གཏན་ལ་རྩེ་གཅིག་ཏུ་ཡིད་ལ་བྱེད་པ་ཡིན།་ཆོས་རབ་ཏུ་རྣམ་པར་འབྱེད་པ་ལ་མཁས་པ་ཡིན། སྣང་བ་ཐོབ་པ་ཡིན། མུན་པ་མུན་ནག་དང་བྲལ་བ་ཡིན། མི་རྟག་པ་དང ། སྡུག་བསྔལ་བ་དང ། བདག་མེད་པ་དང །
150b
མི་སྡུག་པའི་རྣམ་པར་སེམས་ཡོངས་སུ་བསྒོམས་པ་ཡིན། དྲན་པ་ཉེ་བར་བཞག་པ་དང ། ཡང་དག་པའི་སྤོང་བ་དང ། རྫུ་འཕྲུལ་གྱི་རྐང་པ་དང ། དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་དང ། ལམ་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཤིན་ཏུ་ཡོངས་སུ་སྦྱང་བ་བྱས་པའི་ཡིད་ལ་བྱེད་པ་དང་ལྡན་པ་ཡིན། ཞི་གནས་དང་ལྷག་མཐོང་གིས་ཤིན་ཏུ་དཀར་བར་བྱས་པའི་བློ་དང་ལྡན་པ་ཡིན། རྟེན་ཅིང་འབྲེལ་བར་འབྱུང་བར་ལྟ་བ་ཡིན། བདེན་པ་རྗེས་སུ་རྟོགས་པས་གཞན་གྱི་དྲིང་མི་འཇོག་པ་ཡིན། རྣམ་པར་ཐར་པའི་སྒོ་གསུམ་གྱིས་རྣམ་པར་རྩེ་བ་ཡིན། ཆོས་ཐམས་ཅད་ཀྱི་ཚུལ་སྒྱུ་མ་དང ། སྨིག་རྒྱུ་དང ། ཆུ་ཟླ་དང ། བྲག་ཅ་དང ། མིག་ཡོར་ལྟ་བུར་རྟོགས་པ་ཡིན་ནོ། །དགེ་སློང་དག་།བྱང་ཆུབ་སེམས་དཔའ་དེ་ནི་དེ་ལྟར་རང་བཞིན་གྱིས་ཆོས་ལ་གནས་པ་ཡིན། དེ་ལྟར་ཡེ་ཤེས་ལ་གནས་པ་ཡིན། དེ་ལྟར་ཡོན་ཏན་གྱི་ཆེ་བ་ཉིད་ལ་གནས་པ་ཡིན། དེ་ལྟར་སེམས་ཅན་གྱི་དོན་ལ་བརྩོན་པར་གནས་པ་ཡིན་ཏེ། ཕྱོགས་བཅུའི་སངས་རྒྱས་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པས་སིལ་སྙན་དང་གླུ་དབྱངས་ལས་བྱུང་བའི་ཚིགས་སུ་བཅད་པ་དེ་དག་གིས་རྒྱ་ཆེར་བསྐུལ་བ་དང ། དེའི་ཚེ་སྔོན་གྱི་བྱང་ཆུབ་སེམས་དཔའ་སྲིད་པ་ཐ་མ་པར་གྱུར་པ་རྣམས་ཀྱི་བཙུན་མོའི་འཁོར་ཡོངས་སུ་སྨིན་པར་བྱ་བའི་ཕྱིར་ཆོས་ཀྱི་སྒོ་བཞི་
151a
༄#། །མངོན་དུ་བྱེད་དོ། །བཞི་གང་ཞེ་ན། འདི་ལྟ་སྟེ། སྦྱིན་པ་དང ། སྙན་པར་སྨྲ་བ་དང ། དོན་བྱ་བ་དང ། དོན་མཐུན་པ་བསྡུ་བའི་དངོས་པོ་བཞི་ལ་སྦྱོང་བ་སྒྲུབ་པ་རྣམ་པར་དག་པ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པ་དང ། དཀོན་མཆོག་གསུམ་གྱི་རིགས་ཡང་དག་པར་འཛིན་པའི་བསམ་པ་ཆུད་མི་ཟ་བའི་ཐམས་ཅད་མཁྱེན་པའི་སེམས་སྨོན་ལམ་གྱི་སྟོབས་བསྐྱེད་པའི་ཕྱིར་མི་ལྡོག་པའི་ཡུལ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པ་དང ། སེམས་ཅན་ཐམས་ཅད་ཡོངས་སུ་མི་གཏང་བའི་ལྷག་པའི་བསམ་པ་སྙིང་རྗེ་ཆེན་པོའི་སྟོབས་ལ་ཞུགས་པ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པ་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་དང ། དོན་ལ་རྣམ་པར་ངེས་པའི་ཡེ་ཤེས་ཀྱི་ཚོགས་ཀྱི་སྟོབས་ཀྱི་ཁྱད་པར་ཡང་དག་པར་སྒྲུབ་པ་བཀོད་པ་ཆེན་པོ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པའོ། །བྱང་ཆུབ་སེམས་དཔས་ཆོས་ཀྱི་སྒོ་བཞི་པོ་དེ་དག་མངོན་དུ་བྱས་ནས་བཙུན་མོའི་འཁོར་ཐམས་ཅད་ཡོངས་སུ་སྨིན་པར་བྱ་བའི་ཕྱིར་དེའི་ཚེ་རྣམ་པ་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་པས་བྱང་ཆུབ་སེམས་དཔའ་མཐུས་སིལ་སྙན་དང་གླུ་དབྱངས་དེ་དག་ལས་ཆོས་ཀྱི་སྒོ་རྣམ་པ་འདི་ལྟ་བུ་བརྒྱ་སྟོང་འབྱུང་བ་དེ་ལྟ་བུའི་རྫུ་འཕྲུལ་
151b
མངོན་པར་འདུ་བྱ་བ་མངོན་པར་བྱེད་དོ། །མོས་པ་རྒྱ་ཆེན་དང་ནི་བསམ་པ་དང ། །ལྷག་པའི་བསམ་དང་སྲོག་ཆགས་སྙིང་རྗེ་བས། །བྱང་ཆུབ་དམ་པ་མཆོག་ཏུ་སེམས་སྐྱེ་ཞེས། ། དེ་འདྲའི་སྒྲ་དག་སིལ་སྙན་རྣམས་ལས་བྱུང ། །དང་ཞིང་དད་དང་མོས་དང་གུས་པ་དང ། །ང་རྒྱལ་མེད་ཅིང་བླ་ལ་འདུད་པ་དང ། །དྲི་དང་དགེ་བ་ཅི་ཞེས་ཚོལ་བ་དང ། །རྗེས་སུ་དྲན་པ་བསྒོམས་པའི་སྒྲ་བྱུང་ངོ ། །སྦྱིན་དང་དུལ་དང་སྡོམ་དང་ཚུལ་ཁྲིམས་སྒྲ། །བཟོད་པའི་སྒྲ་དང་དེ་བཞིན་བརྩོན་འགྲུས་སྒྲ། །བསམ་གཏན་མངོན་པར་སྒྲུབ་དང་ཏིང་འཛིན་སྒྲ། ། ཤེས་རབ་དང་ནི་ཐབས་ཀྱི་སྒྲ་ཡང་བྱུང ། །བྱམས་པའི་སྒྲ་དང་དེ་བཞིན་སྙིང་རྗེའི་སྒྲ། །དགའ་དང་བཏང་སྙོམས་མངོན་པར་ཤེས་པའི་སྒྲ། །བསྡུ་བའི་དངོས་པོ་བཞི་པོ་རྣམ་ངེས་པས།། སེམས་ཅན་ཡོངས་སུ་སྨིན་བྱའི་སྒྲ་ཡང་བྱུང ། །དྲན་པ་ཉེ་བར་གཞག་པ་རབ་དབྱེ་སྒྲ། །ཡང་དག་སྤོང་དང་དེ་བཞིན་རྫུ་འཕྲུལ་དང ། །དབང་པོ་ལྔ་དང་སྟོབས་ལྔ་རབ་དབྱེ་དང ། །བྱང་ཆུབ་ཡན་ལག་སྒྲ་ནི་སིལ་སྙན་བྱུང ། །ཡན་ལག་བརྒྱད་པའི་འཕགས་ལམ་མཆོག་དབྱེ་དང ། །ཞི་གནས་སྒྲ་དང་དེ་བཞིན་ལྷག་མཐོང་དང ། །མི་རྟག་པ་དང་སྡུག་བསྔལ་བདག་མེད་སྒྲ། །མི་སྡུག་སྒྲ་ཡང་སིལ་སྙན་རྣམས་ལས་བྱུང ། །འདོད་ཆགས་བྲལ་སྒྲ་དེ་བཞིན་དབེན་པའི་སྒྲ། །ཟད་པ་ཤེས་པའི་སྒྲ་དང་མི་སྐྱེ་སྒྲ། །འགོག་པའི་སྒྲ་དང་དེ་བཞིན་
152a
༄#། །གནས་མེད་སྒྲ། །མྱ་ངན་འདས་པའི་སྒྲ་ཡང་སིལ་སྙན་བྱུང ། །རྫོགས་པའི་བྱང་ཆུབ་སེམས་དཔའི་མཐུ་ཡིས་ནི། །སིལ་སྙན་དག་ལས་འདི་འདྲའི་སྒྲ་བྱུང་སྟེ།། སྒྲ་དེ་ཐོས་ནས་བུད་མེད་ཐམས་ཅད་ཀྱིས། །སེམས་ཅན་མཆོག་རབ་རྗེས་བསླབ་བྱང་ཆུབ་སྨོན། །དགེ་སློང་དག་།དེ་ལྟར་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འདུག་པས་བུད་མེད་བརྒྱད་ཁྲི་བཞི་སྟོང་དང ། ལྷའི་བུ་བརྒྱ་སྟོང་མང་པོ་གང་དག་དེར་འདུས་པར་གྱུར་པ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་པར་གྱུར་ཏོ། །དེ་ནས་བྱང་ཆུབ་སེམས་དཔའ་མངོན་པར་འབྱུང་བའི་དུས་ལ་བབ་པ་དང ། དགའ་ལྡན་གྱི་རིས་ཀྱི་ལྷའི་བུ་ཁྲེལ་ཡོད་པའི་ལྷ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དེས་མཚན་མོ་མི་ཉལ་ཙམ་ན་ལྷའི་བུ་འབུམ་ཕྲག་སུམ་ཅུ་རྩ་གཉིས་ཀྱིས་བསྐོར་ཅིང་མདུན་དུ་བདར་ཏེ་བྱང་ཆུབ་སེམས་དཔའ་ལ་རིམ་གྲོ་བྱ་བའི་ཁང་བཟང་ག་ལ་བ་དེར་སོང་སྟེ་ཕྱིན་ནས་ནམ་མཁའི་དཀྱིལ་ན་འདུག་སྟེ་བྱང་ཆུབ་སེམས་དཔའ་ལ་ཚིགས་སུ་བཅད་དེ་སྨྲས་པ། ཤི་འཕོ་བ་ནི་ཤིན་ཏུ་བསྟན། །སྐྱེས་བུ་སེངྒེས་ཚེ་ཡང་བསྟན། །བཙུན་མོའི་འཁོར་ཡང་བསྟན་པ་མཛད། །ཁྱོད་ཀྱིས་འཇིག་རྟེན་རྗེས་མཐུན་མཛད། །འཇིག་རྟེན་ཆོས་ནི་
152b
རྗེས་ཐོབ་པས། །ལྷ་མི་མང་པོ་ཡོངས་སྨིན་མཛད། །མངོན་པར་འབྱུང་བའི་བློ་དགོངས་པའི། །དེ་ཡི་དུས་ལ་དེང་བབ་བོ། །མ་གྲོལ་བས་ནི་དགྲོལ་མི་ནུས། །ལོང་བས་ལམ་ཡང་སྟོན་མི་ནུས། །གྲོལ་བས་དགྲོལ་བར་བྱེད་པར་ནུས། །མིག་ལྡན་ལོང་བ་ལམ་སྟོན་ནུས། །སེམས་ཅན་གང་དག་འདོད་པས་འཁོལ། །ཁྱིམ་ནོར་བུ་དང་ཆུང་མ་ཆགས། །དེ་དག་ཁྱོད་ཀྱི་རྗེས་སློབ་ཅིང ། །མངོན་པར་འབྱུང་བར་བཞེད་པར་མཛོད། །དབང་ཕྱུག་འདོད་པས་རྩེ་བ་དང ། །གླིང་བཞི་རིན་ཆེན་བདུན་སྤངས་ཏེ། །ཁྱོད་ནི་མངོན་པར་འབྱུང་རིག་ནས། །ལྷ་མིར་བཅས་པའི་འཇིག་རྟེན་མོས། །ཁྱོད་ནི་འདོད་ལ་མི་དགྱེས་ཏེ། །བསམ་གཏན་བདེ་བས་གནས་མཛད་ཀྱང ། །ལྷ་མི་བརྒྱ་ཕྲག་མང་པོ་དག་།གཉིད་ཀྱིས་ལོག་ལས་སད་པར་མཛད། །དར་ལ་བབ་འདི་ཤིན་ཏུ་འདའ། །རི་གཟར་འབབ་ཆུ་མགྱོགས་འགྲོ་བཞིན། །དར་ལ་བབ་པ་ཡལ་གྱུར་ནས། །མངོན་པར་འབྱུང་བ་མཛེས་མ་ལགས། །དེ་སླད་ཐོག་མར་གཞོན་པའི་ཚེ། །དར་བབ་དམ་པར་མངོན་བྱུང་སྟེ། །ཐུགས་དམ་ཉམས་འོག་ཆུད་མཛོད་ལ། །ལྷ་མིའི་དོན་ནི་མཛད་པའི་རིགས། །འདོད་པའི་ཡོན་ཏན་མི་ངོམས་ཏེ། །དཔེར་ན་ལན་ཚཝའི་ཆུ་དང་མཚུངས་འཕགས་པ་རྡུལ་མེད་འཇིག་རྟེན་འདས། །ཤེས་རབ་གང་ལྡན་དེ་དག་ངོམས། །ཁྱོད་འདིར་རྒྱལ་པོ་ཟས་གཙང་དང ། །ཡུལ་འཁོར་རྣམས་ཀྱི་ཡིད་འོང་སྡུག་།འདབ་མ་བརྒྱ་
153a
༄#། །པའི་ཞལ་འདྲ་བ། །མངོན་པར་འབྱུང་བར་དགོངས་སུ་གསོལ། །ཉོན་མོངས་གདུང་བས་རབ་གདུངས་ཤིང ། །འབྱུང་མེད་བཅིང་བས་དམ་བཅིངས་རྣམས། ། དཔའ་བོས་མྱུར་དུ་མཚུངས་མེད་པ། །ཐར་ལམ་ཞི་ལ་དགོད་དུ་གསོལ། །ཁྱོད་ནི་སྨན་པ་ཁམས་ལ་མཁས། །སེམས་ཅན་ཡུན་རིང་ན་རྣམས་ལ། །ཆོས་ཀྱི་སྨན་ནི་སྦྱོར་མཛད་དེ། །མྱ་ངན་འདས་བདེ་མྱུར་དུ་འཁོད། །མིག་མེད་མུན་པ་གཏི་མུག་གླགས། །ལྟ་བའི་དྲ་བས་དཀྲིས་པ་ཡི། །ལྷ་རྣམས་དང་ནི་མི་ཡི་མིག་།ཤེས་རབ་སྒྲོན་མས་མྱུར་དུ་སྦྱོངས། །བྱང་ཆུབ་ཐོབ་པ་བལྟ་བྱ་ཞིང ། །བླ་ན་མེད་པའི་ཆོས་མཉན་ཅེས། །ལྷ་དང་ལྷ་མིན་ཀླུ་དག་དང ། །གནོད་སྦྱིན་དྲི་ཟ་མང་པོ་སྡོད། །ཀླུ་ཡི་རྒྱལ་པོས་རང་གི་གནས།། ཁྱོད་ཀྱི་དཔལ་གྱིས་སྣང་བར་མཐོང ། །མཆོད་པ་དག་ནི་མཐའ་ཡས་བགྱིད། །དེ་ཡི་བརྟུལ་ཞུགས་བསམ་པ་སྐོངས། །བྱང་ཆུབ་ཤིང་དྲུང་ཡིད་རྫོགས་ལ། །ལྷུང་བཟེད་བཞི་ནི་དབུལ་ལོ་ཞེས། །འཇིག་རྟེན་སྐྱོང་བཞི་སྡེར་བཅས་པ། །དེ་དག་ཁྱོད་ལ་སྡོད་ཅིང་མཆིས། །ཚངས་པ་རབ་ཏུ་ཞི་སྤྱོད་པ། །བྱམས་ལྡན་སྙིང་རྗེ་ཐོབ་པ་ཡང ། །བླ་མེད་འཁོར་ལོ་རབ་བསྐོར་བར། །མི་དབང་གསོལ་སྙམ་སྡོད་ཅིང་མཆིས། །བྱང་ཆུབ་བསྙེན་བཀུར་བྱེད་པའི་ལྷ། །བྱང་ཆུབ་སྙིང་པོར་གནས་རྣམས་ཀྱང ། །བྱང་ཆུབ་རྣམ་པར་འཚང་
153b
རྒྱ་བ། །བལྟའོ་ཞེས་ཏེ་སྡོད་ཅིང་མཆིས། །བྱང་ཆུབ་སེམས་དཔའ་བཙུན་མོའི་ནང ། །བྱེ་བ་སྟོན་པ་གཞན་ཡང་མཆིས། །དེ་དག་ཐོག་མར་ཁྱོད་གྱུར་མཛོད། །དེ་དག་འོག་ཏུ་ལུས་ས་རེ། །དབྱངས་སྙན་ཅིང་ནི་དབྱངས་འཇམ་པ། །མར་མེ་མཛད་ཀྱིས་ལུང་བསྟན་དགོངས། །ཡང་དག་དེ་བཞིན་མ་ནོར་བ། །རྒྱལ་བའི་སྒྲ་དབྱངས་བསྒྲག་ཏུ་གསོལ། །བསྐུལ་བའི་ལེའུ་སྟེ།་བཅུ་གསུམ་པའོ།། །།དགེ་སློང་དག་།དེ་ལྟར་ལྷའི་བུ་དེས་བྱང་ཆུབ་སེམས་དཔའ་བསྐུལ་མ་ཐག་ཏུ་རྒྱལ་པོ་ཟས་གཙང་མ་ལ་རྨི་ལམ་འདི་བསྟན་ཏོ། །རྒྱལ་པོ་ཟས་གཙང་མ་གཉིད་ཀྱིས་ལོག་པའི་རྨི་ལམ་དུ་རྨིས་པ། བྱང་ཆུབ་སེམས་དཔའ་མཚན་མོ་མི་ཉལ་ཙམ་ན་ལྷའི་ཚོགས་ཀྱིས་བསྐོར་ཏེ་མངོན་པར་འབྱུང་ཞིང་མངོན་པར་བྱུང་ནས་ཀྱང་རབ་ཏུ་བྱུང་སྟེ་གོས་ངུར་སྨྲིག་གྱོན་པ་རྨིས་སོ། །དེ་ནས་དེ་སད་པ་དང ། རིངས་པ་རིངས་པར་ཉུག་རུམ་ལ་དྲིས་པ། གཞོན་ནུ་བཙུན་མོའི་འཁོར་གྱི་ནང་ན་འདུག་གམ། དེས་སྨྲས་པ།་ལྷ། བཞུགས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ། གཞོན་ནུ་ནི་གདོན་མི་ཟ་བར་མངོན་པར་འབྱུང་བར་འགྱུར་ཏེ། སྔ་ལྟས་སུ་སྣང་བ་ནི། འདི་དག་ཡིན་སྙམ་ནས་ཁོང་པའི་སྙིང་ལ་མྱ་ངན་གྱི་ཟུག་རྔུས་ཟུག་པར་གྱུར་ཏོ། །དེའང་འདི་སྙམ་དུ་སེམས་ཏེ། བདག་གི་གཞོན་ནུ་ནི་སྐྱེད་མོས་ཚལ་གྱི་སར་ཡང་ནམ་ཡང་འགྲོ་བར་མི་འགྱུར་
154a
༄#། །ཏེ།་བུད་མེད་ཀྱི་ཚོགས་ཀྱི་ནང་ན་མངོན་པར་དགའ་བས་འདི་ཉིད་དུ་ཆགས་པར་འགྱུར་ཏེ། མངོན་པར་འབྱུང་བར་ནི་མི་འགྱུར་རོ་སྙམ་མོ། །དེ་ནས་རྒྱལ་པོ་ཟས་གཙང་མ་གཞོན་ནུའི་ལོངས་སྤྱོད་ཀྱི་ཕྱིར་དཔྱིད་དང ། དབྱར་དང ། སྟོན་གྱི་དུས་ཇི་ལྟ་བ་བཞིན་དུ་ཁང་བཟང་གསུམ་བྱེད་དུ་བཅུག་གོ། དེ་ལ་དཔྱིད་ས་གང་ཡིན་པ་དེ་ནི་གྲང་དྲོ་རན་པའོ། །དབྱར་ས་གང་ཡིན་པ་དེ་ནི་ཤིན་ཏུ་བསིལ་བའོ། །དགུན་ས་གང་ཡིན་པ་དེ་ནི་རང་བཞིན་གྱིས་དྲོ་བའོ། །ཁང་བཟང་རེ་རེའི་གྲུ་སྐས་རྣམས་ཀྱང་མི་ལྔ་བརྒྱ་ལྔ་བརྒྱས་འཛུགས་ཤིང་འབེབས་པའོ། །དེ་དག་དེ་ལྟར་འཛུགས་ཤིང་འབེབས་པ་ན་གཞོན་ནུ་སུས་ཀྱང་མ་ཚོར་བར་མངོན་པར་བྱུང་བར་འགྱུར་དུ་འོང་ངོ་ཞེས་སྒྲ་དཔག་ཚད་ཕྱེད་དུ་གྲག་པ་བྱུང་ངོ ། །ལྟས་པ་དང་མཚན་མཁན་ཀུན་གྱིས་ཀྱང་གཞོན་ནུ་ནི་ཆབ་སྒོ་བཀྲ་ཤིས་པ་ནས་མངོན་པར་འབྱུང་བར་འགྱུར་རོ་ཞེས་ལུང་བསྟན་ཏོ། དེ་ནས་རྒྱལ་པོས་བཀྲ་ཤིས་ཀྱི་སྒོའི་སྒོ་འཕར་ཆེན་པོ་བྱེད་དུ་བཅུག་སྟེ། སྒོ་འཕར་རེ་རེའང་མི་ལྔ་བརྒྱ་ལྔ་བརྒྱས་འབྱེད་ཅིང་གཅོད་དོ། །དེ་དག་གི་སྒྲའང་དཔག་ཚད་ཕྱེད་དུ་གྲག་གོ་།དེ་ལ་འདོད་པའི་ཡོན་ཏན་མཚུངས་པ་མེད་པའང་སྦྱོར་རོ། །གླུ་དང་རོལ་མོའི་སྒྲ་དབྱངས་ལེན་པ་དང ། གར་བྱེད་པའི་ན་ཆུང་དག་ཀྱང་རྟག་ཏུ་བཞག་པར་གྱུར་ཏོ། །དགེ་
154b
སློང་དག་།དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་སྨྲས་པ། དེང་སྐྱེད་མོས་ཚལ་གྱི་སར་འགྲོའི། ཤིང་རྟ་མྱུར་དུ་སྦྱོར་ཅིག་།དེ་ནས་ཁ་ལོ་སྒྱུར་བ་རྒྱལ་པོ་ཟས་གཙང་མའི་གན་དུ་སོང་སྟེ་འདི་སྐད་ཅེས་སྨྲས་སོ། །ལྷ། གཞོན་ནུ་སྐྱེད་མོས་ཚལ་གྱི་སར་འབྱུང་ངོ་ཞེས་གསུང་ངོ ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། བདག་གིས་གཞོན་ནུ་སྐྱེད་མོས་ཚལ་གྱི་སར་ནམ་ཡང་མ་ཕྱུང་བས་ས་བཟང་པོ་བལྟ་བར་བྱ་བའི་ཕྱིར་བདག་གིས་གཞོན་ནུ་སྐྱེད་མོས་ཚལ་གྱི་སར་ཕྱུང་ན། འོན་ཏང་གཞོན་ནུ་བུད་མེད་ཀྱི་ཚོགས་ཀྱིས་བསྐོར་ཏེ་དགའ་བ་མྱོང་བར་འགྱུར་བས་མངོན་པར་མི་འབྱུང་ངོ་སྙམ་མོ། །དེ་ནས་རྒྱལ་པོ་ཟས་གཙང་མ་བྱང་ཆུབ་སེམས་དཔའ་ལ་བྱམས་པ་དང ། རིམ་གྲོ་བྱེད་པས་ད་སྟེ་ཞག་བདུན་ན་གཞོན་ནུ་ས་བཟང་པོ་བལྟ་བའི་ཕྱིར་སྐྱེད་མོས་ཚལ་གྱི་སར་འབྱུང་གི་།དེར་ཁྱེད་ཀྱིས་གཞོན་ནུའི་མིག་ཏུ་མི་འོང་བ་མཐོང་བར་མི་འགྱུར་བར་ཡིད་དུ་མི་འོང་བ་ཐམས་ཅད་ནི་སོལ་ཅིག། ཡིད་དུ་འོང་བ་དང ། ཡུལ་ཉམས་དགའ་བ་ཐམས་ཅད་ནི་སྦྱོར་ཅིག་ཅེས་གྲོང་ཁྱེར་དུ་དྲིལ་བསྒྲགས་སོ། །དེ་ནས་ཞག་བདུན་གྱི་ཉིན་པར་གྲོང་ཁྱེར་ཐམས་ཅད་བརྒྱན་ཏོ། །སྐྱེད་མོས་ཚལ་ཡང་མཛེས་པར་བྱས་ཏེ། རས་བཅོས་བུ་ཁ་དོག་ཐ་དད་པའི་བླ་བྲེ་ནི་བྲེས། གདུགས་དང ། རྒྱལ་མཚན་དང ། བ་དན་གྱིས་ནི།
155a
༄#། །ལེགས་པར་བརྒྱན་ཏོ། །བྱང་ཆུབ་སེམས་དཔའ་ལམ་གང་ནས་འགྲོ་བའི་ལམ་དེའང་ཆག་ཆག་བཏབ་སྟེ་ཕྱགས་ནས་སྤོས་ཆུའི་ཆག་ཆག་བཏབ་སྟེ་མེ་ཏོག་སིལ་མ་ནི་ཆལ་པར་བཀྲམ། ཕོག་ཕོར་ནས་ནི་བདུགས། བུམ་པ་གང་བས་ནི་མཛེས་པར་བྱས། ཆུ་ཤིང་ལྗོན་པ་ནི་བསྒྲེང ། དར་ཐ་དད་པ་སྣ་ཚོགས་ཀྱི་བླ་བྲེ་ནི་བྲེས། རིན་པོ་ཆེའི་དྲིལ་བུ་གཡེར་ཀའི་དྲ་བ་དང ། རྒྱན་ཕྲེང་དང ། ཆུན་པོ་ནི་དབྱངས། དཔུང་བཞིའི་བཀོད་པ་ནི་བྱས་སོ། །གཡོག་འཁོར་ཀྱང་གཞོན་ནུའི་བཙུན་མོའི་འཁོར་བརྒྱན་པའི་ཕྱིར་བརྩོན་པར་གྱུར་ཏོ། །དེ་ནས་བྱང་ཆུབ་སེམས་དཔའ་བཀོད་པ་ཆེན་པོས་གྲོང་ཁྱེར་གྱི་ཤར་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་བྱུང་ངོ ། །དེ་ནས་བྱང་ཆུབ་སེམས་དཔའ་ཉིད་ཀྱི་མཐུས་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་མི་རྒན་པོ་གཏུགས་པ། འཁོགས་པ། ལུས་ལས་རྩ་རྒྱུས་ཐོན་པ། སོ་རྒལ་བ། ལུས་གཉེར་མས་གང་བ། སྐྲ་བྱི་བ། སྒུར་བ། གདུང་རྟེན་ལྟར་དགུ་བ། ཞོམ་པ། འཁར་བ་ལ་བརྟེན་པ། མཐུ་ཟད་པ། དར་ཡལ་བ། མིད་པ་ནས་སྒྲ་ངར་ངར་པོ་འབྱུང་བ། ལུས་དགུ་བས་འཁར་བ་ལ་བརྟེན་ནས་ཡན་ལག་དང་ཉིད་ལག་ཐམས་ཅད་འདར་བ་ཞིག་ལམ་གར་བསྟན་པར་གྱུར་ཏོ། །དེ་ནས་བྱང་ཆུབ་སེམས་དཔས་ཤེས་བཞིན་དུ་ཁ་
155b
ལོ་སྒྱུར་བ་ལ་འདི་སྐད་ཅེས་སྨྲས་སོ། །ཁ་ལོ་སྒྱུར་བ་མི་རིད་ཉམ་ཆུང་ཞིང ། །ཤ་ཁྲག་བསྐམས་ལ་རྒྱུས་ལྤགས་ཉི་ཆོས་དཀྲིས། །མགོ་དཀར་སོ་རྒལ་ལུས་ནི་རབ་སྐེམ་ལ། །འཁར་བ་བརྟེན་ཅིང་མི་བདེ་འཁྱོར་འགྲོས་སུ། །ཁ་ལོ་སྒྱུར་བས་སྨྲས་པ། ལྷ་གཅིག་མི་འདི་རྒ་བས་ཟིལ་གྱིས་ནོན། །དབང་པོ་ཉམས་ཤིང་སྡུག་བསྔལ་བརྩོན་སྟོབས་ཉམས། །གཉེན་གྱི་སྐྱེ་བོས་བརྙས་ཤིང་མགོན་མེད་གྱུར། །དོན་བགྱིད་མི་ནུས་ནགས་ཁྲོད་ཤིང་ལྟར་བོར། །བྱང་ཆུབ་སེམས་དཔས་སྨྲས་པ། འདི་ཡི་ཆོས་འདི་རིགས་ཀྱི་ཡིན་ནམ་འོན་ཏམ་ནི། ། འགྲོ་བ་འདི་ཀུན་ལ་ཡང་འདི་སྲིད་དེ་སྨྲོས་ཤིག་།ཚིག་འདི་ཡང་དག་ཇི་བཞིན་མྱུར་དུ་སྨྲོས་ཤིག་དང ། །ཐོས་ནས་དེ་བཞིན་དོན་ལ་འདིར་ནི་ཚུལ་བཞིན་བསམ། །ཁ་ལོ་སྒྱུར་བས་སྨྲས་པ། ལྷ་འདི་རིགས་ཆོས་མ་ལགས་ཡུལ་འཁོར་ཆོས་མ་ལགས། །སྐྱེ་བོ་ཀུན་གྱི་དར་ལ་བབ་པ་རྒ་བས་འཇོམས། །ཁྱོད་ཀྱི་ཡབ་དང་ཡུམ་དང་ཉེ་དུ་གཉེན་ཚོགས་ཀྱང ། རྒ་ལས་ཐར་འགྲོ་བ་ཡི་ཐབས་ནི་གཞན་མ་མཆིས། །བྱང་ཆུབ་སེམས་དཔས་སྨྲས་པ། ཁ་ལོ་སྒྱུར་བ་བྱིས་པའི་སྐྱེ་བོ་མི་མཁས་པའི། །བློ་ངན་གཞོན་པས་རྒྱགས་ཤིང་མྱོས་པས་རྒ་མ་མཐོང ། །ང་ནི་སླར་འགྲོ་ང་ཡི་ཤིང་རྟ་མྱུར་དུ་སྒྱུར། །ང་ཡང་རྒ་ལ་གནས་པས་རྩེ་དགས་ཅི་ཞིག་བྱ། །དེ་ནས་བྱང་ཆུབ་སེམས་དཔའ་ཤིང་རྟའི་མཆོག་དེ་སླར་
156a
༄#། །བསྒྱུར་ཏེ་ཕྱིར་གྲོང་ཁྱེར་དུ་ཞུགས་སོ། །དགེ་སློང་དག། དེ་ལྟར་བྱང་ཆུབ་སེམས་དཔའ་འདུས་གཞན་ཞིག་ན་བཀོད་པ་ཆེན་པོས་གྲོང་ཁྱེར་གྱི་ལྷོ་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་ཞུགས་པ་དང ། དེས་ལམ་ག་ན་མི་ནད་ཀྱིས་ཉེན་པ། དམུ་རྫིང་ཅན། ལུས་ཉམ་ཆུང་བ། རང་གི་གཅིན་སྐྱག་ཏུ་བྱིང་བ། མགོན་མེད་པ། སྐྱབས་མེད་པ། ཤིན་ཏུ་ཤ་ཐང་པར་དབུགས་དབྱུང་ཞིང་རྔུབ་དགོས་པ་ཞིག་མཐོང་ངོ ། །མཐོང་ནས་ཀྱང་ཡང་བྱང་ཆུབ་སེམས་དཔས་ཤེས་བཞིན་དུ་ཁ་ལོ་སྒྱུར་བ་ལ་འདི་སྐད་ཅེས་སྨྲས་སོ། །ཁ་ལོ་སྒྱུར་བ་མི་རྩུབ་ལུས་ཀྱི་མདོག་ངན་ལ། །དབང་པོ་ཐམས་ཅད་ཉམས་ཤིང་དབུགས་དབྱུང་རབ་ཏུ་དཀའ། །ཡན་ལག་ཀུན་བསྐམས་ལྟོ་བས་དཀྲུགས་ཤིང་ཉམ་ཐག་གྱུར། །རང་གི་གཅིན་རྟུག་སྨད་པའི་གནས་ན་འདུག་འདི་སུ། །ཁ་ལོ་སྒྱུར་བས་སྨྲས་པ། ལྷ་གཅིག་མི་འདི་ཤིན་ཏུ་ནད་ཀྱིས་བཏབ་པ་སྟེ། ནད་ཀྱི་འཇིགས་པ་ཉེ་བར་མ་མཆིས་པས་འགུམ་པ་ཐུག། ནད་མེད་གཟི་བརྗིད་མ་མཆིས་སྟོབས་ཀྱང་རྣམ་པར་ཉམས། །མགོན་དང་སྐྱབས་དང་གླིང་དང་དཔུང་གཉེན་མ་མཆིས་ལགས། །བྱང་ཆུབ་སེམས་དཔས་སྨྲས་པ། ནད་མེད་པ་ཡང་རྨི་ལམ་ན་ནི་རྩེ་དང་མཚུངས། །ནད་ཀྱི་འཇིགས་པ་འདི་ལྟར་ཤིན་ཏུ་མི་བཟད་པ། །སྐྱེས་བུ་མཁས་པས་གནས་
156b
འདི་མཐོང་ནས་ཇི་ལྟ་བུར། །རྩེ་ལ་དགའ་དང་སྡུག་པའི་འདུ་ཤེས་སྐྱེད་པར་འགྱུར། །དགེ་སློང་དག་།དེ་ནས་བྱང་ཆུབ་སེམས་དཔའ་ཤིང་རྟ་མཆོག་དེ་སླར་བསྒྱུར་ཏེ་ཕྱིར་ཡང་གྲོང་ཁྱེར་དུ་ཞུགས་སོ། །དགེ་སློང་དག། དེ་ལྟར་བྱང་ཆུབ་སེམས་དཔའ་དུས་གཞན་ཞིག་ན་བཀོད་པ་ཆེན་པོས་གྲོང་ཁྱེར་གྱི་ནུབ་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་ཞུགས་པ་དང ། དེས་ལམ་ག་ན་མི་ཤི་བར་གྱུར་པ། ཁྱོགས་ལ་བཞག་པ། རས་ཀྱི་བླ་བྲེ་ཕུབ་པ། ཉེ་དུའི་ཚེགས་ཀྱིས་བསྐོར་ཏེ་ཀུན་ཀྱང་ངུ་ཞིང་སྐད་ཕྱུང་སྟེ་ངུ་ལ་སྨྲེ་སྔགས་འདོན་ཅིང་སྐྲ་བཤིག་ལ་མགོ་ལ་ས་འཐོར་ཞིང་བྲང་རྡུང་ལ་ཆོ་ངེ་འདོན་ཅིང་ཕྱི་བཞིན་འབྲང་བར་གྱུར་བ་མཐོང་ངོ ། །མཐོང་ནས་ཀྱང་ཡང་བྱང་ཆུབ་སེམས་དཔས་ཤེས་བཞིན་དུ་ཁ་ལོ་སྒྱུར་བ་ལ་འདི་སྐད་ཅེས་སྨྲས་སོ། །ཁ་ལོ་སྒྱུར་བ་མི་འདི་ཁྱོགས་ལ་བཞག་ནས་ནི། །མི་དག་སྐྲ་བཤིག་མགོ་ལ་ས་ཡིས་འཐོར་བྱེད་ཅིང ། །སྣ་ཚོགས་དག་གི་ཚིག་ནི་བརྗོད་ལ་བྲང་རྡུང་བས། །ཀུན་ནས་བསྐོར་བ་བྱས་ཏེ་ཁྱེར་བ་སུ་ཞིག་ཡིན། །ཁ་ལོ་སྒྱུར་བས་སྨྲས་པ། ལྷ་གཅིག་མི་འདི་ཛམྦུའི་གླིང་དུ་གུམ་པ་སྟེ། །སླན་ཆད་ཕ་མ་མཆིས་བྲང་བུ་རྣམས་མཐོང་མི་འགྱུར། །ལོངས་སྤྱོད་ཁྱམ་དང་མཛའ་གཉེན་ཚོགས་རྣམས་སྤངས་ནས་ནི། །འཇིག་རྟེན་ཕ་རོལ་མཆིས་ཏེ་སླན་ཆད་གཉེན་མི་མཐོང ། །བྱང་ཆུབ་སེམས་དཔས་སྨྲས་པ།
157a
༄#། །རྒ་བས་གནོད་པར་འགྱུར་བའི་གཞོན་པ་ཅིར་མི་རུང ། །སྣ་ཚོགས་ནད་ཀྱིས་གནོད་འགྱུར་ནད་མེད་ཅིང་མི་རུང ། །རིང་དུ་མི་གསོན་གསོན་པ་མཁས་ལ་ཅིར་མི་རུང ། །རྒ་ལ་ཆགས་པ་སྐྱེས་བུ་མཁས་ལ་ཅིར་མི་རུང ། །གལ་ཏེ་རྒ་མེད་ནད་མེད་འཆི་བ་མེད་གྱུར་ཀྱང ། །འོན་ཀྱང་ཕུང་པོ་ལྔ་འཛིན་སྡུག་བསྔལ་ཆེ་ཡིན་ན། ། རྒ་ན་འཆི་བ་རྟག་ཏུ་འབྲང་བ་སྨོས་ཅི་དགོས། །ལེགས་པར་སླར་ཟློག་རབ་ཏུ་ཐར་པར་བྱས་བ་བསམ། །དགེ་སློང་དག་།དེ་ནས་བྱང་ཆུབ་སེམས་དཔའ་ཤིང་རྟ་མཆོག་དེ་སླར་བཟློག་སྟེ་ཕྱིར་ཡང་གྲོང་ཁྱེར་དུ་ཞུགས་སོ། །དགེ་སློང་དག་།དེ་ལྟར་བྱང་ཆུབ་སེམས་དཔའ་དུས་གཞན་ཞིག་ན་གྲོང་ཁྱེར་གྱི་བྱང་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་ཞུགས་པ་དང ། བྱང་ཆུབ་སེམས་དཔའི་མཐུས་ལྷའི་བུ་དེ་དག་ཉིད་ཀྱིས་ལམ་ག་དེར་དགེ་སློང་ཞིག་མངོན་པར་སྤྲུལ་པ་དང ། བྱང་ཆུབ་སེམས་དཔའ་དགེ་སློང་ཞི་བ། དུལ་བ། ཡང་དག་པར་བསྡམས་པ། ཚངས་པར་སྤྱོད་པ། མིག་ཕབ་པ། གཉའ་ཤིང་གང་ཙམ་དུ་ལྟ་བ། སྤྱོད་ལམ་མཛེས་པ་ཕུན་སུམ་ཚོགས་པ། འགྲོ་བ་དང་ལྡོག་པ་མཛེས་པ་ཕུན་སུམ་ཚོགས་པ། མདུན་དུ་ལྟ་བ་དང ། གཡས་གཡོན་སུ་ལྟ་བ་མཛེས་པ། བསྐུམ་པ་དང་སྨྱང་བ་མཛེས་པ། ཆོས་གོས་སྣམ་སྦྱར་དང་ལྷུང་
157b
བཟེད་དང་ཆོས་གོས་ཐོགས་པ་མཛེས་པ་ཞིག་ལམ་ག་ན་འདུག་པ་དེ་མཐོང་ངོ ། །མཐོང་ནས་ཀྱང་བྱང་ཆུབ་སེམས་དཔས་ཤེས་བཞིན་དུ་ཁ་ལོ་སྒྱུར་བ་ལ་འདི་སྐད་ཅེས་སྨྲས་སོ། ། ཁ་ལོ་སྒྱུར་བ་སྐྱེས་བུ་སེམས་ཞི་རབ་ཞི་ཞིང ། །མིག་ཕབ་འགྲོ་ལ་གཉའ་ཤིང་གང་ཙམ་ལྟ་བྱེད་ཅིང ། །དུར་སྨྲིག་གོས་གྱོན་ཤིན་ཏུ་རབ་ཏུ་ཞི་བ་སྤྱོད། །ལྷུང་བཟེད་ཐོགས་ནས་མི་རྒོད་མ་ཁེངས་སུ་ཞིག་ཡིན། །ཁ་ལོ་སྒྱུར་བས་སྨྲས་པ། ལྷ་གཅིག་མི་འདི་དགེ་སློང་ཞེས་ནི་བགྱི་བ་ལགས། །འདོད་པའི་དགའ་བ་སྤངས་ཤིང་ཤིན་ཏུ་དུལ་བར་སྤྱོད། །བདག་ཉིད་ཞི་བ་ཚོལ་ཞིང་རབ་ཏུ་བྱུང་བར་གྱུར། །འདོད་ཆགས་ཞེ་སྡང་བྲལ་བར་བསོད་སྙོམས་སྤྱོད་ཅིང་རྒྱུ། །བྱང་ཆུབ་སེམས་དཔས་སྨྲས་པ། །འདི་ནི་དགེ་བར་ལེགས་སྨྲས་ང་ཡང་འདོད་པ་སྟེ། །རབ་ཏུ་བྱུང་བ་མཁས་པ་རྣམས་ཀྱིས་རྟག་ཏུ་བསྔགས། །དེ་ནི་བདག་ལ་ཕན་ཞིང་སེམས་ཅན་གཞན་ལའང་ཕན། །འཚོ་བ་བདེ་ཞིང་ཉམས་མཐུན་འཆི་མེད་འབྲས་བུར་འགྱུར། །དགེ་སློང་དག། དེ་ནས་བྱང་ཆུབ་སེམས་དཔས་ཤིང་རྟ་མཆོག་དེ་སླར་བསྒྱུར་ཏེ་ཕྱིར་ཡང་གྲོང་ཁྱེར་དུ་ཞུགས་སོ། །དགེ་སློང་དག། དེ་ལྟར་བྱང་ཆུབ་སེམས་དཔའ་ལ་སྐུལ་བ་རྣམ་པ་འདི་ལྟ་བུ་འདི་དག་རྒྱལ་པོ་ཟས་གཙང་མས་མཐོང་ཞིང་ཐོས་ནས་བྱང་ཆུབ་སེམས་དཔའ་ཡོངས་སུ་བསྲུང་བའི་ཕྱིར་ར་བ་རྒྱ་ཆེན་པོ་བྱེད་དུ་བཅུག་སྟེ། འོབས་ཀྱང་རྐོར་
158a
༄#། །བཅུག་།སྒོ་གཏན་དམ་པོའང་འཛུགས་སུ་བཅུག་།སྲུང་མའང་བཀོད། དཔའ་བོ་རྣམས་ཀྱང་སྦྲན། བཞོན་པའང་སྟ་གོན་བྱས། གོ་ཆའང་གྱོན་དུ་བཅུག་གོ། བྱང་ཆུབ་སེམས་དཔའ་བསྲུང་བའི་ཕྱིར་གྲོང་ཁྱེར་ཆེན་པོའི་སྒོ་བཞིའི་ལམ་གྱི་སུམ་མདོ་རྣམས་སུ་དཔུང་ཆེན་པོའི་བཀོད་པ་བཞག་སྟེ། བྱང་ཆུབ་སེམས་དཔའ་མངོན་པར་འབྱུང་ང་རེ་ཞེས་དེ་དག་དེ་སྲུང་དུ་བཅུག་གོ། བཙུན་མོའི་འཁོར་ལའང་རེས་འགའ་ཙམ་ཡང་གླུ་དབྱངས་ཀྱི་རྒྱུན་ཆད་ད་རེ། དགའ་བ་དང་རྩེ་བ་ཐམས་ཅད་ཀྱང་སྦྱོར་ཅིག་།ཅི་ནས་ཀྱང་གཞོན་ནུ་ཆགས་ནས་རབ་ཏུ་འབྱུང་བར་མི་འགྱུར་བ་དང ། མགུ་བར་འགྱུར་བར་བུད་མེད་ཀྱི་སྒྱུའང་སྟོན་ཅིག་ཅེས་བསྒོའོ། །དེ་ལ་འདི་སྐད་ཅེས་བྱ་སྟེ། འཐབ་མོར་མོས་པའི་སྐྱེས་བུ་ལག་ན་རལ་གྲི་མཚོན་ཐོགས་སྒོ་གར་བཀོད། །གོ་བགོས་མི་རྟ་གླང་པོ་ཤིང་རྟ་མི་བསྐྱོན་གླང་པོའི་ཕྲེང་བའང་བཀོད། །འོབས་དང་ཤིང་ཐགས་དག་དང་རྟ་བབས་ཕྱིར་ཐོན་པོ་ཡང་བྱེད་དུ་བཅུག་།སྒོ་མོ་རྒྱང་གྲགས་གྲག་པའི་སྒྲ་འབྱུང་བར་ཡང་གཏན་པ་དམ་པོ་བཅུག་།ཤཱཀྱའི་ཚོགས་རྣམས་ཐམས་ཅད་ཡིད་མི་དགའ་ཞིང་ཉིན་མཚན་སྲུང་བར་བྱེད། །དཔུང་ཆེན་དེ་དག་རྣམས་ཀྱང་སྒྲ་སྐད་ཆེན་པོ་ཤིན་ཏུ་གྲག་པར་བྱེད། །དེས་པ་འདི་ནས་འབྱུང་དུ་འོང་ཞེས་གྲོང་ཁྱེར་
158b
འཁྲུགས་ཤིང་ཡིད་དངངས་སྐྲག་།ཤཱཀྱའི་རིགས་སྐྱེས་སོང་ན་རིགས་འདི་ཆད་པར་མི་འགྱུར་གྲང་སྙམ་བྱེད། །སྐྱེ་བོ་བུད་མེད་དག་ལ་བསྒོ་བ་རྟག་ཏུ་གླུ་དབྱངས་རྒྱུན་མ་བཅད། ། བརྩེ་བས་དགའ་བ་རྣམས་ཀྱི་བསྙེན་བཀུར་བགྱིས་ཤིང་ཡིད་ཀྱང་མགུ་བར་གྱིས། །བུད་མེད་སྒྱུ་ཐབས་སྤྱོད་པ་གང་ཡིན་རྣམ་པ་དུ་མ་མང་པོ་སྟོན། །དེས་པ་འགྲོར་མི་འགྱུར་བར་སྲུང་བར་བྱོས་ལ་བགེགས་ཀྱང་རབ་ཏུ་བྱོས། །ཁ་ལོ་སྒྱུར་བ་མཆོག་དེ་མངོན་པར་འབྱུང་བའི་སྔ་ལྟས་འདི་དག་སྟེ། །ངང་པ་ཁྲུང་ཁྲུང་དག་དང་རྨ་བྱ་རི་སྐེགས་དག་དང་ནེ་ཙོ་རྣམས། །ཁང་བཟང་སྐར་ཁུང་རྟ་བབས་མཆོག་དང་ཡང་ཐོག་ཁྲི་ལ་འཁོད་ནས་ནི། །དམན་ཞིང་དམན་ལ་མི་དགའ་མི་བདེ་མགོ་སྨད་སེམས་ཤིང་སྒྲ་མི་འབྱིན། །རྫིང་དང་རྫིང་ཆེན་དག་གིས་པདྨ་དག་ཀྱང་རྙིས་ཤིང་རྙིས་པར་གྱུར། །ཤིང་ལྗོན་བསྐམས་ཤིང་ཡལ་ག་མེ་ཏོག་ལྷགས་ལ་མེ་ཏོག་སླར་མི་འཆགས། །པི་ཝང་གླིང་བུ་རྒྱུད་གསུམ་རྒྱུད་ཀྱིས་བརྒྱན་པ་དེ་ཚེ་གློ་བུར་ཆད། །རྔ་དང་རྫ་རྔ་དག་ཀྱང་ལག་པས་བརྡུངས་ན་འཆག་ཅིང་སྒྲ་མི་འབྱུང ། །གྲོང་ཁྱེར་དེ་དག་ཐམས་ཅད་འཁྲུགས་པར་གྱུར་ཅིང་ཤིན་ཏུ་གཉིད་ཀྱིས་ནོན། །གང་གི་ཡིད་ཀྱང་གར་བྱེད་པ་དང་གླུ་ལེན་པ་ལ་དགའ་བ་མེད། །རྒྱལ་པོའང་མཆོག་ཏུ་རབ་ཏུ་ཡོད་དམན་གྱུར་ཏེ་སེམས་ཁོང་ཆུད་ཅིང་འདུག་།ེ་མ་
159a
༄#། །མ་རུངས་ཤཱཀ་རིགས་རྫུ་འཕྲུལ་རྒྱ་ཆེན་མི་ཚིག་གྲང་སྙམ་བྱེད། །ས་འཚོ་མ་དང་རྒྱལ་བུ་མལ་གཅིག་ན་ནི་ཉལ་ཞིང་འཁོད་པའི་ཚེ། །ནམ་ཕྱེད་ཙམ་ན་ས་འཚོ་མ་ཡི་རྨི་ལམ་དུ་ནི་འདི་དག་རྨིས། །ས་འདི་ཐམས་ཅད་རྩེ་མོར་ལྡན་པའི་རི་དང་བཅས་ཏེ་གཡོས་པར་གྱུར། །ཤིང་ལྗོན་རྣམས་ཀྱང་རླུང་གིས་བསྐྱོད་ནས་རྩ་ནས་ཐོན་ཏེ་ས་ལ་འགྱེལ། །ཉི་མ་ཟླ་བ་སྐར་མའི་རྒྱན་དང་བཅས་ཏེ་མཁའ་ལས་ས་ལ་ལྷུང ། །ལག་པ་གཡོན་པས་སྐྲ་ཡང་རབ་ཏུ་འབལ་ཞིང་ཅོད་པན་ལྷུང་བ་མཐོང ། །ལག་པ་ཆད་ལ་དེ་བཞིན་རྐང་པའང་ཆད་ཅིང་བདག་ནི་སྒྲེན་མོར་མཐོང ། །བདག་གི་མུ་ཏིག་དོ་ཤལ་ནོར་བུ་གསེར་གྱི་འོག་དཔག་ཆད་པར་མཐོང ། །ཉལ་ཁྲི་དེ་ཡི་རྐང་པ་བཞི་ཆག་ས་ཡི་སྟེང་ན་ཉལ་བ་མཐོང ། །རྒྱལ་པོའི་གདུགས་ཀྱི་ཡུ་བ་སྤྲས་པ་དཔལ་ལྡན་མཛེས་པ་ཆག་པར་མཐོང ། །རྒྱན་རྣམས་ཀུན་ཀྱང་རྣམ་པར་འཐོར་ཅིང་ཆུ་ཡིས་ཁྱེར་བར་གྱུར་པ་དང ། །ཁྱིམ་ཐབ་རྒྱན་ཡང་གོས་དང་ཅོད་པན་བཅས་ཏེ་མལ་སྟེང་འཐོར་བར་མཐོང ། །གྲོང་ཁྱེར་དག་ནས་མེ་སྒྲོན་ཕྱིར་བྱུང་གྲོང་ཁྱེར་མུན་པས་ནོན་པ་དང ། །རིན་པོ་ཆེ་ལས་བྱས་པའི་དྲ་བ་མཛེས་པའང་ཆད་པར་གྱུར་པ་རྨིས། །མུ་ཏིག་དོ་ཤལ་འཕྱང་བ་ལྷུང་ནས་རྒྱ་མཚོ་ཆེན་པོས་དཀྲུགས་པ་དང ། །
159b
དེ་ཡི་ཚེ་ནི་རི་ཡི་རྒྱལ་པོ་རི་རབ་གནས་ནས་གཡོས་པ་རྨིས། །ཤཱཀྱའི་བུ་མོའི་རྨི་ལམ་དུ་ནི་འདི་འདྲ་འདི་དག་རྨིས་གྱུར་ནས། །དེ་སད་མིག་ནས་མཆི་མ་ཟག་ཅིང་རང་གི་ཁྱོ་ལ་འདི་སྐད་སྨྲས། །ལྷ་གཅིག་རྨི་ལམ་འདི་འདྲ་རྨིས་པ་ཅིར་འགྱུར་པ་ནི་བཀའ་སྩོལ་ཅིག། བདག་ནི་དྲན་པ་འཁྲུལ་ཅིང་མིག་ཀྱང་འཁྲུལ་ལ་ཡིད་ནི་མྱ་ངན་ནོན།། དེ་ཡིས་དེ་ཐོས་ཀ་ལ་པིངྐ་རྔ་སྒྲ་ཚངས་དབྱངས་སྒྲ་སྙན་པས། །ས་འཚོ་མ་ལ་སྨྲས་པ་ཁྱོད་ནི་རབ་ཏུ་དགར་འགྱུར་སྡིག་པ་མེད། །སེམས་ཅན་གང་དག་བསོད་ནམས་སྔོན་སྤྱད་དེ་དག་རྨི་ལམ་འདི་འདྲ་རྨི། །སྡུག་བསྔལ་དུ་མས་ཉེན་པ་རྨི་ལམ་འདི་འདྲ་རྨི་བ་ག་ལ་ཡོད། །ཁྱོད་ཀྱིས་ས་ནི་རབ་ཏུ་གཡོས་པ་དང ། །རི་རྩེར་བཅས་ཏེ་ས་ལ་ལྷུང་རྨིས་པ། །ལྷ་དང་ཀླུ་དང་སྲིན་པོ་འབྱུང་པོའི་ཚོགས། །ཀུན་གྱིས་ཁྱོད་མཆོད་གཙོ་མོར་བྱེད་པར་འགྱུར། །ཁྱོད་ཀྱིས་ཤིང་རྣམས་རྩ་ནས་ཐོན་རྨིས་ཤིང ། །ལག་པ་གཡོན་པས་སྐྲ་འབལ་རྨིས་པ་ནི། །ས་འཚོ་མྱུར་དུ་ཉོན་མོངས་དྲ་བ་བཅད། །འདུས་བྱས་དག་ལས་ལྟ་བའི་དྲ་བ་འབྱིན། །ཁྱོད་ཀྱིས་ཉི་ཟླ་ས་ལ་ལྷུང་རྨིས་ཤིང ། །སྐར་མ་རྣམས་ཀྱང་ལྷུང་བར་རྨིས་པ་ནི། །ས་འཚོ་མྱུར་དུ་ཉོན་མོངས་དགྲ་བཅོམ་སྟེ། །ཁྱོད་ནི་འཇིག་རྟེན་མཆོད་པ་བསྔགས་པར་འགྱུར། །ཁྱོད་ཀྱིས་མུ་ཏིག་དོ་ཤལ་འཐོར་རྨིས་
160a
༄#། །ཤིང ། །ལུས་ཀུན་ཆད་དང་སྒྲེན་མོ་རྨིས་པ་ནི། །ས་འཚོ་མྱུར་དུ་བུད་མེད་ལུས་སྤངས་ཏེ། །རིང་པོར་མི་ཐོགས་སྐྱེས་པའི་ལུས་སུ་འགྱུར། །ཁྱོད་ཀྱིས་ཁྲི་རྐང་ཆག་པར་རྨིས་པ་དང ། །གདུགས་ཡུ་རིང་ཆེན་སྤྲས་པ་ཆག་རྨིས་པ། །ས་འཚོ་མྱུར་དུ་ཆུ་བོ་བཞི་རྒལ་ཅིང ། །ང་ནི་འཇིག་རྟེན་གདུགས་གཅིག་འགྱུར་བ་མཐོང ། །ཁྱོད་ཀྱིས་རྒྱན་རྣམས་ཆུ་ས་ཁྱེར་རྨིས་པ་དང ། །ང་ཡི་གོས་དང་ཅོད་པན་ཁྲི་སྟེང་རྨིས། །ས་འཚོ་མྱུར་དུ་མཚན་གྱིས་བརྒྱན་ནས་ནི། །འཇིག་རྟེན་ཀུན་གྱིས་ང་ལ་བསྟོད་པ་མཐོང ། །ཁྱོད་ཀྱིས་མར་མེ་བརྒྱ་ཕྲག་བྱེ་བ་དག་།གྲོང་ཁྱེར་བྱུང་ནས་མུན་ནག་གྱུར་རྨིས་པ། །ས་འཚོ་མྱུར་དུ་མ་རིག་རྨོངས་པའི་མུན། །འཇིག་རྟེན་ཀུན་ལ་ཤེས་རབ་སྣང་བྱེད་འགྱུར། །ཁྱོད་ཀྱིས་མུ་ཏིག་དོ་ཤལ་ཆད་པ་དང ། །གསེར་གྱི་ཚོང་ཚོང་སྤྲས་པ་ཆད་རྨིས་པ། །ས་འཚོ་མྱུར་དུ་ཉོན་མོངས་དྲ་བཅད་དེ། ། འདུས་བྱས་དག་ལས་འདུ་ཤེས་སྐུད་པ་འབྱིན། །ས་འཚོ་གང་ཕྱིར་ང་ལ་གུས་པར་ནི། །རྟག་ཏུ་རིམ་གྲོ་མཆོག་གིས་མཆོད་བྱེད་ན། །ཁྱོད་ལ་ངན་འགྲོ་མེད་ཅིང་མྱ་ངན་མེད། །མྱུར་དུ་དགའ་ཞིང་མཆོག་ཏུ་དགའ་བ་འཐོབ། །ངས་ནི་སྔོན་ཆད་སྦྱིན་པ་གྱ་ནོམ་བྱིན། །ཚུལ་ཁྲིམས་བསྲུངས་དང་རྟག་ཏུ་བཟོད་པ་བསྒོམས། །དེ་བས་
160b
ང་ལ་དད་པ་གང་རྙེད་པ། །དེ་དག་ཐམས་ཅད་དགའ་ཞིང་རབ་དགའ་རྙེད། །འཁོར་བར་བསྐལ་པ་བྱེ་བ་མཐའ་ཡས་སུ། །ངས་ནི་བྱང་ཆུབ་ལམ་མཆོག་རྣམ་པར་སྦྱངས། ། དེ་བས་ང་ལ་དད་པ་གང་བྱེད་པ། །དེ་དག་ཐམས་ཅད་ངན་སོང་གསུམ་པོ་ཆད། །དགའ་བ་འཐོབ་ཀྱི་མི་དགའ་མ་སྐྱེད་ཅིག་།ཚིམ་པ་ཐོབ་པར་གྱིས་ལ་མགུ་སྐྱེད་ཅིག ། དགའ་དང་མཆོག་ཏུ་དགའ་བ་མྱུར་འཐོབ་སྟེ། །ཁྱོད་ཀྱི་རྨི་ལྟས་བཟང་གིས་འཚོ་ཉོལ། །སྔོན་ཆད་དགེ་བའི་ལས་ནི་ཡང་དག་བསགས་གྱུར་པ། །མི་མཆོག་རྣམས་ནི་མངོན་པར་འབྱུང་བའི་དུས་བབ་ཚེ། །མཚན་མ་འདི་དག་བསོད་ནམས་གཟི་བརྗིད་བསགས་པ་དང ། །དཔལ་གྱི་གཟི་བརྗིད་སྙིང་པོ་ཅན་དེས་རྨི་བར་འགྱུར། །དེ་ནི་རྐང་པ་དག་དང་ལག་པ་ཆེན་པོ་ཡིས། །རྒྱ་མཚོ་ཆེན་པོ་བཞི་པོ་དག་གིས་ཆུ་དཀྲུགས་དང ། །ས་འདི་ཐམས་ཅད་སྣ་ཚོགས་མལ་ཆར་གྱུར་པ་དང ། །རི་བོ་ལྷུན་པོ་མཆོག་ཀྱང་སྔས་སུ་གྱུར་པ་རྨི། །རྨི་ལམ་ན་ནི་འོད་རབ་བཀྱེ་བས་འཇིག་རྟེན་ན། །མུན་པ་མུན་ནག་ཆེན་པོ་རྣམ་པར་བསལ་བ་དང ། །ས་ལས་གདུགས་ཤིག་བྱུང་བས་འཇིག་རྟེན་གསུམ་ཁྱབ་དང ། །འོད་ཀྱིས་རེག་པས་ལོག་ལྷུང་སྡུག་བསྔལ་རབ་ཞི་རྨི། །དཀར་ནག་སྲོག་ཆགས་བཞི་ཞིག་རྐང་པ་ལྡག་པ་དང ། །ཁ་དོག་བཞི་པའི་བྱ་འོངས་ཁ་དོག་གཅིག་གྱུར་དང་
161a
༄#། །མཆོག་ཏུ་ངན་པ་སྨད་པ་ངན་སྐྱུག་རི་ལ་ཡང ། །འཇེགས་ནས་འགྲོ་ཡང་དེ་ན་གོས་བ་མེད་བ་རྨི། །རྨི་ལམ་ན་ནི་ཆུ་བོ་ཆུ་ཡིས་རབ་གང་ནས། །སྲོག་ཆགས་བྱེ་བ་ཁྲག་ཁྲིག་མང་པོ་ཁྱེར་བ་ལས། །དེར་ནི་གྲུར་བྱས་བསྒྲལ་ཏེ་གཞན་དག་བསྒྲལ་ནས་ནི། །དེ་ཡིས་འཇིགས་མེད་མྱ་ངན་མེད་མཆོག་ཐང་བཀོད་རྨི། །རྨི་ལམ་ལ་ནི་ནད་པ་མང་པོ་ནད་བཏབ་པ། །ནད་མེད་གཟི་བརྗིད་བྲལ་ཞིང་སྟོབས་ཀྱང་ཉམས་རྣམས་ལ། །དེ་ནི་སྨན་པར་གྱུར་ནས་རྩི་སྨན་མང་བྱིན་པས། །ནད་བཏབ་སེམས་ཅན་ཁྲག་ཁྲིག་མང་པོ་ཐར་བྱེད་རྨི། །རི་རབ་ངོས་ལ་སེངྒེའི་ཁྲི་ལ་འདུག་ནས་ནི། །སློབ་མ་ཐལ་མོ་སྦྱར་ཅིང་ལྷ་རྣམས་ཕྱག་འཚལ་ལ། །བདག་ནི་གཡུལ་ལས་རྒྱལ་ཞིང་ལྷ་རྣམས་ནམ་མཁའ་ལས། །ཀུན་ཏུ་དགའ་བའི་སྒྲ་སྒྲོག་པར་ནི་རྨི་ལམ་རྨི། །བཀྲ་ཤིས་བརྟུལ་ཞུགས་བཟང་པོ་ཡོངས་སུ་རྫོགས་པར་ཡང ། །བྱང་ཆུབ་སེམས་དཔའ་རྨི་ལམ་རྣམ་པ་དེ་དག་རྨི། །དེ་ཐོས་ནས་ནི་འདི་ནི་རིང་པོར་མི་ཐོགས་པར། །མི་ཡི་ལྷ་ཡི་ལྷར་འགྱུར་སྙམ་སྟེ་ལྷ་མི་དགའ། །རྨི་ལམ་གྱི་ལེའུ་སྟེ། བཅུ་བཞི་པའོ།། །། དགེ་སློང་དག། དེ་ནས་བྱང་ཆུབ་སེམས་དཔའ་འདི་སྙམ་དུ་སེམས་ཏེ། བདག་གིས་རྒྱལ་པོ་ཆེན་པོ་ཟས་གཙང་མ་ལའང་མ་བྱས་ཤིང ། ཕས་གནང་བ་མེད་པར་མངོན་པར་
161b
འབྱུང་བ་འདི་ནི་བདག་ལ་མི་རིགས་ཏེ། བྱས་པ་གཟོ་བ་མ་ཡིན་པར་འགྱུར་རོ་སྙམ་ནས་དེ་མཚན་མོ་མི་ཉལ་ཙམ་ན་རང་གི་གནས་ཀྱི་ཁང་བཟང་ནས་བྱུང་སྟེ་རྒྱལ་པོ་ཟས་གཙང་མའི་ཁང་བཟང་དུ་ཕྱིན་ནས་འདུག་གོ་།བྱང་ཆུབ་སེམས་དཔའ་འདུག་མ་ཐག་ཏུ་ཁང་བཟང་ཐམས་ཅད་འོད་ཀྱིས་གསལ་བར་གྱུར་ཏོ། །དེ་ནས་རྒྱལ་པོ་སད་པ་དང ། འོད་དེ་མཐོང་སྟེ་མཐོང་ནས་ཀྱང་མྱུར་བ་མྱུར་བར་ཉུག་རུམ་ལ་སྨྲས་པ། ཀྱེ་ཉུག་རུམ། ཅི་ཉི་མ་ཤར་ཏམ། གང་གིས་ན་འདི་འོད་ཀྱིས་རྣམ་པར་མཛེས། ཉུག་རུམ་གྱིས་སྨྲས་པ། ལྷ། ད་དུང་དུ་དགུང་ཕྱེད་ཀྱང་མ་བས་སོ། །ལྷ། གཞན་ཡང་ཉི་མའི་འོད་ནི་ཤིང་དང་རྩིག་པ་ཐལ་མི་ཕྱིན། །ལུས་ལ་གདུང་བར་བགྱིད་ཅིང་ཚ་བར་རབ་ཏུ་བགྱིད། །ནང་པར་དུས་ན་ངང་པ་དག་དང་རྨ་བྱ་དང ། །ནེ་ཙོ་ཁུ་བྱུག་ངུར་པ་དག་ཀྱང་རང་སྒྲ་འབྱིན། །འོད་འདི་ལྷ་མིའི་ཡིད་དུ་མཆི་ཞིང་བདེ་བ་སྟེ། །རབ་ཏུ་སིམ་བགྱིད་དགེ་བགྱིད་གདུང་བར་བགྱིད་མ་ལགས། །ཤིང་དང་རྩིག་པ་ཐལ་ཕྱུང་སྒྲིབ་པ་ཡོང་མ་མཆིས། །ཡོན་ཏན་ལྡན་པ་གཅིག་ཅིག་དེང་ནི་འདི་འབྱོན་ངེས། །རྒྱལ་པོ་དེ་ནི་མི་དགའ་ཕྱོགས་བཅུར་བལྟས་པ་དང ། །སེམས་ཅན་དག་པ་པདྨའི་མིག་ཅན་དེ་མཐོང་ནས། །དེ་ནི་མལ་ནས་ལྡང་བར་འདོད་ན་མ་ནུས་ཏེ། །རྣམ་དག་བློ་ཅན་དམ་པ་ཕ་
162a
༄#། །ལ་གུས་པ་བསྐྱེད། །དེ་ནི་རྒྱལ་པོའི་མདུན་དུ་འདུག་ནས་འདི་སྐད་སྨྲས། །ལྷ་གཅིག་བདག་ནི་མངོན་པར་འབྱུང་བའི་དུས་བབ་རིགས། །བགེགས་ཀྱང་མ་མཛད་མི་དགྱེས་པ་ཡང་མ་མཛད་ཅིག་།རྒྱལ་པོ་གཉེན་བཅས་ཡུལ་འཁོར་བཅས་ཏེ་བཟོད་པར་མཛོད། །རྒྱལ་པོ་དེ་ནི་མཆི་མས་མིག་གང་འདི་སྐད་སྨྲས། །ཁྱོད་ནི་ཕྱིར་ལྡོག་པ་ཡི་དགོས་པ་ཅི་ཞིག་ཡོད། །བདག་ལ་དམ་པ་ཅི་སློང་སྨྲོས་ཤིག་ཐམས་ཅད་སྦྱིན། །བདག་དང་ཕོ་བྲང་འཁོར་དང་ཡུལ་འཁོར་འདིར་ཕན་ཐོགས། །དེ་ཚེ་བྱང་ཆུབ་སེམས་དཔས་སྙན་པའི་ཚིག་སྨྲས་པ། །ལྷ་གཅིག་དམ་པ་བཞི་འཚལ་དེ་ནི་བདག་ལ་སྩོལ། །གལ་ཏེ་སྩལ་བར་སྤྱོད་ན་མངའ་ནི་ཁྱོད་ལ་མཆིས། །འོན་ཏང་རྟག་ཏུ་ཁྱིམ་ན་གཟིམས་ཤིང་འབྱུང་མི་འགྱུར། །ལྷ་གཅིག་བདག་ནི་རྒ་བས་ཚུགས་པར་མི་འགྱུར་ཞིང ། །རྟག་ཏུ་མདོག་བཟང་དར་ལ་བབ་པར་གནས་པ་དང ། །ནད་མ་མཆིས་པ་ཐོབ་ཅིང་ནད་ཀྱིས་མི་གདབ་དང ། །ཚེ་དཔག་མ་མཆིས་པ་དང་རྒུད་པར་མི་འགྱུར་འཚལ། །རྒྱལ་པོས་ཚིག་ཐོས་ཤིན་ཏུ་སྡུག་བསྔལ་ཉམ་ཐག་སྟེ། །གཞོན་ནུ་གནས་མིན་སློང་བས་བདག་ལ་མཐུ་མེད་དོ། །བསྐལ་པར་གནས་པའི་དྲང་སྲོང་རྣམས་ཀྱང་ན་མ་དུ་ཡང ། །རྒ་ན་འཆི་བའི་འཇིགས་དང་རྒུད་ལས་མ་ཐར་ཏོ། །རྒ་ན་
162b
འཆི་བའི་འཇིགས་དང་རྒུད་པར་མི་འགྱུར་བ། །ལྷ་གཅིག་གལ་ཏེ་མཆོག་བཞི་འདི་དག་མི་སྩོལ་ན། །གཞན་ཡང་མཆོག་ཅིག་གསོལ་གྱི་རྒྱལ་པོ་གསན་དུ་གསོལ། །འདི་ནས་ཤི་འཕོས་ཉིང་མཚམས་སྦྱོར་བར་མི་འགྱུར་མཛོད། །མི་ཡི་དམ་པས་ཚིག་ནི་དེ་སྐད་ཐོས་པ་དང ། །སྲེད་པ་བསྲབས་ཏེ་བུ་ལ་ཆགས་པ་ཡོངས་སུ་ཆོད། །ཕན་བྱེད་འགྲོ་བ་ཐར་བྱེད་རྗེས་སུ་ཡི་རང་ངོ ། །ཁྱོད་ཀྱི་བསམ་པ་རྣམས་ནི་ཡོངས་སུ་རྫོགས་གྱུར་ཅིག་།དགེ་སློང་དག་།དེ་ནས་བྱང་ཆུབ་སེམས་དཔའ་སླར་སོང་སྟེ་རང་གི་ཁྱིམ་དུ་ཕྱིན་ནས་མལ་ན་འདུག་པ་དང ། དེ་སོང་བའམ་འོངས་པར་སུས་ཀྱང་མ་ཚོར་རོ། །དགེ་སློང་དག་།དེའི་ནམ་ནངས་པ་དང ། རྒྱལ་པོ་ཟས་གཙང་མས་ཤཱཀྱའི་ཚོགས་ཐམས་ཅད་བསགས་ཏེ་དེའི་ལོ་རྒྱུས་རྣམས་སྨོས་ནས་གཞོན་ནུ་ནི་མངོན་པར་འབྱུང་ན། ད་ཇི་ལྟར་བྱ་ཞེས་སྨྲས་སོ། །ཤཱཀྱ་རྣམས་ཀྱིས་སྨྲས་པ། ལྷ། བསྲུང་བར་བགྱིའོ། །དེ་ཅིའི་སླད་དུ་ཞེ་ན། ཤཱཀྱའི་ཚོགས་འདི་ནི་མང་ལ། དེ་ནི་གཅིག་པུར་གྱུར་བས་མཐུས་མངོན་པར་འབྱུང་བའི་ནུས་པ་དེ་ལ་མ་མཆིས་སོ། །དེ་ནས་ཤཱཀྱ་དེ་དག་དང ། རྒྱལ་པོ་ཟས་གཙང་མས་ཤཱཀྱ་གཞོན་ནུ་འཐབ་ཆོས་སྦྱངས་པ། འོས་སུ་གྱུར་པ། འཕོང་བསླབ་པ། ཚན་པོ་ཆེ་ཆེན་པོའི་སྟོབས་དང་ལྡན་པ་ལྔ་བརྒྱ་བྱང་ཆུབ་སེམས་དཔའ་བསྲུང་བའི་ཕྱིར་གྲོང་ཁྱེར་གྱི་ཤར་
163a
༄#། །སྒོར་བཀོད་དེ། བྱང་ཆུབ་སེམས་དཔའ་བསྲུང་བའི་ཕྱིར་ཤཱཀྱ་གཞོན་ནུ་རེ་རེ་ལའང་འཁོར་ཤིང་རྟ་ལྔ་བརྒྱ་བརྒྱ་དང ། ཤིང་རྟ་རེ་རེ་ལའང་འཁོར་དཔུང་བུ་ཆུང་ལྔ་བརྒྱ་ལྔ་བརྒྱ་བཀོད་དོ། །བྱང་ཆུབ་སེམས་དཔའ་བསྲུང་བའི་ཕྱིར་དེ་བཞིན་དུ་གྲོང་ཁྱེར་གྱི་ལྷོ་དང ། ནུབ་དང ། བྱང་གི་སྒོར་ཡང་ཤཱཀྱ་གཞོན་ནུ་འཐབ་ཆོས་སྦྱངས་པ། འོས་སུ་གྱུར་པ། འཕོང་བསླབ་པ། ཚན་པ་ཆེ་ཆེན་པོའི་སྟོབས་དང་ལྡན་པ་ལྔ་བརྒྱ་ལྔ་བརྒྱ་དང ། ཤཱཀྱ་གཞོན་ནུ་རེ་རེ་ལའང་འཁོར་ཤིང་རྟ་ལྔ་བརྒྱ་ལྔ་བརྒྱ་དང ། ཤིང་རྟ་རེ་རེ་ལའང་འཁོར་དཔུང་བུ་ཆུང་ལྔ་བརྒྱ་ལྔ་བརྒྱ་བཀོད་དོ། །བྱང་ཆུབ་སེམས་དཔའ་བསྲུང་བའི་ཕྱིར་ཤཱཀྱ་རྒན་རབས་རྒན་རབས་རྣམས་ཀྱང་ལམ་གྱི་བཞི་མདོ་དང ། སུམ་མདོ་དང ། ལམ་པོ་ཆེ་མང་པོ་ཐམས་ཅད་ན་སྡོད་ཅིང་འཁོད་དོ། །རྒྱལ་པོ་ཟས་གཙང་མའང་ཤཱཀྱ་གཞོན་ནུ་ལྔ་བརྒྱས་བསྐོར་ཅིང་མདུན་གྱིས་བལྟས་ཏེ་རྟ་དང ། གླང་པོ་ཆེ་དག་ལ་ཞོན་ནས་རང་གི་ཁྱིམ་སྒོ་ན་མེལ་ཚེ་བྱེད་དོ། །སྐྱེ་རྒུའི་བདག་མོ་ཆེན་མོ་གཽ་ཏ་མིས་ཀྱང་རང་གི་བྲན་མོའི་ཚོགས་ལ་སྨྲས་པ། མར་མེ་དྲི་མ་མེད་པ་བུས་ལ་ནོར་དུ་ཐམས་ཅད་རྒྱལ་མཚན་རྩེ་མོར་ཐོགས། །མུ་ཏིག་རྒྱན་ཕྲེང་རྣམས་ཀྱང་སྦྱངས་ལ་ཁྱིམ་འདི་ཀུན་ཏུ་འོད་ཀྱིས་སྣང་བར་བྱོས། །གླུ་དབྱངས་དག་ཀྱང་སྦྱོར་ལ་དོ་མདོ་
163b
གཡེལ་པ་མེད་པར་མེལ་ཚེ་དམ་དུ་གྱིས། །གཞོན་ནུ་ཅི་ནས་མ་ཚོར་བར་ནི་འགྲོ་བར་མི་འགྱུར་ཚུལ་དུ་སྲུང་བགྱིས། །གོ་བགོས་ལག་ན་ལག་ཆ་རལ་གྲི་དང ། མདུང་ཐུང་མདའ་དང་མཚོན་ཆ་རྩེ་གཉིས་ཐོགས། །སྡུག་པའི་བུ་ནི་བསྲུང་བར་བྱ་བའི་ཕྱིར། །ཀུན་ཀྱང་རབ་ཏུ་སྒྲིམ་པ་ཆེན་པོ་གྱིས། །སྒོ་ཀུན་ཆོད་ལ་གཏན་པ་དམ་དུ་ཆུད། །སྒོ་འཕར་སྲ་བ་རྐེད་པར་གཏན་ཆུག་ལ། །དུས་ལ་མ་བབ་པར་ནི་སྒོམ་དབྱེ། །སེམས་ཅན་དམ་པ་འདི་ནི་ཤོར་ཏ་རེ། །ནོར་བུ་དོ་ཤལ་མུ་ཏིག་དོ་ཤལ་ཐོགས། །མེ་ཏོག་ཟླ་གམ་སེངྒེ་ཤིང་ལོ་རེས། ། སྐ་རགས་སོར་གདུབ་སྣ་རྒྱན་ཆིངས་ཤིང་ཐོགས། །རྐང་གདུབ་དག་ཀྱང་ཤིན་ཏུ་ལེགས་པར་ཐོགས། །ལྷ་མི་ཕན་པ་གླང་པོ་དྲེགས་བཞིན་འགྲོ་།གལ་ཏེ་གློ་བུར་མངོན་པར་བྱུང་ང་རེ། །ཅི་ནས་མི་བདེ་རྙེད་པར་མ་གྱུར་པར། །དེ་ལྟ་དེ་ལྟར་ནན་ཏན་ཆེར་གྱིས་ཤིག་།བུད་མེད་གང་དག་མདུང་ཐུང་ཐོགས་པ་དག། དྲི་མ་མེད་པ་མལ་ན་འདུག་པ་བསྐོར། །ཅི་ནས་གཉིད་ཀྱིས་ལོག་པར་མ་གྱུར་པར། །ཕྱེ་མ་ལེབ་བཞིན་མིག་གིས་བསྲུང་བར་གྱིས། །རྒྱལ་བུ་འདི་ནི་བསྲུང་བར་བྱ་བའི་ཕྱིར། །ཁྱིམ་འདིར་རིན་པོ་ཆེ་ཡི་དྲ་བ་བྲོས། །གླིང་བུ་དག་ཀྱང་རབ་ཏུ་བུད་ཅིང་ལོངས། །དེ་མོད་རྡུལ་དང་བྲལ་བ་སྲུང་བར་གྱིས། །ཕན་ཚུན་གཅིག་ལ་གཅིག་ནི་སྤྲོན་བྱོས་ཏེ། །དོ་མོད་མ་ཉལ་ཤིན་ཏུ་སྲུང་བ་གྱིས། །རྒྱལ་སྲིད་དང་ནི་
164a
༄#། །ཡུལ་འཁོར་སྤངས་ནས་སུ། །ཁྱིམ་ནས་མངོན་དུ་འབྱུང་བར་གྱུར་ཏ་རེ། །འདི་ནི་མངོན་པར་བྱུང་བར་གྱུར་ན་ཀོ་།རྒྱལ་པོའི་ཕོ་བྲང་འདི་ཀུན་ཉམས་མི་དགའ། །རྒྱལ་པོའི་རིགས་རྒྱུད་ཡུན་རིང་གནས་པ་ཡང ། །རྒྱལ་པོའི་རིགས་དང་རྒྱུད་ནི་ཆད་པར་འགྱུར། །དགེ་སློང་དག་།དེ་ནས་གནོད་སྦྱིན་གྱི་སྡེ་དཔོན་ལྔ་རྩེན་ལ་སོགས་པ་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང ། འཕྲོག་མའི་བུ་ལྔ་བརྒྱ་རྣམས་གཅིག་ཏུ་འདུས་ནས་འདི་སྐད་ཅེས་སྨྲས་ཏེ། གྲོགས་པོ་དག་།དོ་མོད་བྱང་ཆུབ་སེམས་དཔའ་མངོན་པར་འབྱུང་གི་།ཁྱེད་ཅག་དེ་ལ་མཆོད་པ་བྱེད་པའི་ལས་ལ་སྤྲོ་བ་གྱིས་ཤིག་།རྒྱལ་པོ་ཆེན་པོ་བཞིའང་ལྕང་ལོ་ཅན་གྱི་ཕོ་བྲང་དུ་ཞུགས་ནས་གནོད་སྦྱིན་གྱི་འཁོར་ཆེན་པོ་ལ་སྨྲས་པ། གྲོགས་པོ་དག། དོ་མོད་བྱང་ཆུབ་སེམས་དཔའ་མངོན་པར་འབྱུང་གི་།ཁྱེད་ཀྱིས་བཅིབས་པའི་རྐང་ལག་ནས་ཐེག་ལ་འབྱུང་བར་གྱིས་ཤིག ། གནོད་སྦྱིན་གྱི་འཁོར་གྱིས་སྨྲས་པ། སྐུ་ནི་སྲེད་མེད་བུ་ཡི་སྟོབས་ལྡན་རྡོ་རྗེ་ལྟ་བུར་མི་ཕྱེད་སྲ་ལ་ལྕི། །སེམས་ཅན་ཀུན་གྱི་དམ་པ་དེ་ནི་བརྩོན་འགྲུས་སྟོབས་ལྡན་གཡོ་བ་མི་མངའ་སྟེ། །རི་ཡི་དམ་པ་ལྷུན་པོ་ཆེན་པོ་རྨང་ནས་ཕྱུང་སྟེ་ནམ་མཁར་གཟུང་ནུས་ཀྱི། །རྒྱལ་བའི་ཡོན་ཏན་ལྷུན་པོ་རི་ལྕི་བསོད་ནམས་ཡེ་ཤེས་གནས་པ་སུས་ཀྱང་གང་
164b
དུ་བཀུར་མི་ནུས། །རྣམ་ཐོས་ཀྱི་བུས་སྨྲས་པ། མི་གང་ང་རྒྱལ་འགྱིང་བ་དེ་ལ་སྟོན་པ་ལྕི། །གང་དག་དགའ་གུས་གནས་པ་དེ་དག་ཡང་བར་ཚོར། །བསམ་པ་ཐག་པས་བརྩོན་པར་བྱོས་ལ་གུས་པ་ཡིས། །བྱ་ཡིས་ཤ་ཁམ་བཞིན་དུ་ཡང་བར་ཤེས་པར་གྱིས། །ཁོ་བོ་མདུན་ནས་འགྲོ་ཡིད་ཁྱེད་ཅག་རྣམས་ཀྱིས་བཅིབས་པ་ཐེག་།བྱང་ཆུབ་སེམས་དཔའ་མངོན་པར་འབྱུང་ཚེ་བསོད་ནམས་མང་པོ་གསོག་།དགེ་སློང་དག་།དེ་ནས་ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་གྱི་ལྷ་རྣམས་ལ་སྨྲས་པ། ཀྱེ་གྲོགས་པོ་དག་།དོ་མོད་བྱང་ཆུབ་སེམས་དཔའ་མངོན་པར་འབྱུང་གི་།དེ་ལ་ཁྱེད་ཐམས་ཅད་མཆོད་པའི་ལས་ལ་སྤྲོ་བར་གྱིས་ཤིག་།དེ་ན་ལྷའི་བུ་ཞི་བའི་བློ་གྲོས་ཞེས་བྱ་བ་དེས་འདི་སྐད་ཅེས་སྨྲས་སོ། །བདག་གིས་ནི་སེར་སྐྱའི་གནས་ཀྱི་གྲོང་ཁྱེར་ཆེན་པོའི་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་ཐམས་ཅད་གཉིད་ཀྱིས་ལོག་པར་བགྱིའོ། །ལྷའི་བུ་རྩེ་བ་བཀོད་པ་ཞེས་བྱ་བ་དེས་འདི་སྐད་ཅེས་སྨྲས་སོ། །བདག་གིས་ནི་རྟ་དང ། གླང་པོ་ཆེ་དང ། བོང་བུ་དང ། རྔ་མོ་དང ། བ་ལང་དང ། མ་ཧེ་དང ། སྐྱེས་པ་དང ། བུད་མེད་དང ། ཁྱེའུ་དང ། བུ་མོ་རྣམས་ཀྱི་སྒྲ་མི་གྲག་པར་བགྱིའོ། །ལྷའི་བུ་བཀོད་པའི་བློ་གྲོས་ཞེས་བྱ་བ་དེས་འདི་སྐད་ཅེས་སྨྲས་སོ། །བདག་གིས་ནི། ནམ་མཁའི་དཀྱིལ་དུ་ཤིང་རྟ་ཆེན་པོ་བདུན་རིན་པོ་ཆེའི་སྟེགས་
165a
༄#། །བུས་འཁོར་བར་བསྐོར་བ། ནོར་བུ་རིན་པོ་ཆེ་མེ་ཤེལ་གྱི་འོད་འབར་བ། གདུགས་དང ། རྒྱལ་མཚན་དང ། བ་དན་བསྒྲེང་བ། མེ་ཏོག་སྣ་ཚོགས་ཆལ་པར་བཀྲམ་པ། པོག་པོར་ནས་བདུག་སྤོས་སྣ་ཚོགས་ཀྱིས་བདུགས་པ་དག་བྱང་ཆུབ་སེམས་དཔའ་ལམ་གང་ནས་འབྱུང་བའི་ལམ་དེར་བཀོད་པ་བགྱིའོ། །ཀླུའི་རྒྱལ་པོ་ས་སྲུང་གི་བུ་ཞེས་བྱ་བས་འདི་སྐད་ཅེས་སྨྲས་སོ། །བདག་གིས་ནི་བདག་ཉིད་ཀྱི་སྣ་ལ་ཁང་པ་བརྩེགས་པ་དཔག་ཚད་སུམ་ཅུ་རྩ་གཉིས་ཕ་བགྱིས་ཏེ་དེར་ལྷའི་བུ་མོ་དག་བཀོད་ལ་སིལ་སྙན་དང ། གླུ་དབྱངས་ལེན་དུ་སྩལ་ཅིང་གླུ་དང་རོལ་མོའི་དབྱངས་སྒྲ་ཆེན་པོས་བྱང་ཆུབ་སེམས་དཔའ་ལ་རིམ་གྲོ་དང་བསྙེན་བཀུར་བགྱིད་ཅིང་མཆི་བར་བགྱིའོ། །ལྷའི་དབང་པོ་བརྒྱ་བྱིན་ཉིད་ཀྱིས་འདི་སྐད་ཅེས་སྨྲས་སོ། །ཁོ་བོས་ནི་སྒོ་དབྱེའོ། །ལམ་མཚོན་པར་བྱའོ། །ལྷའི་བུ་ཆོས་སྤྱོད་ཀྱིས་འདི་སྐད་ཅེས་སྨྲས་སོ། །བདག་གིས་ནི་བཙུན་མོའི་འཁོར་རྣམས་མི་སྡུག་པར་བསྟན་པར་བགྱིའོ། །ལྷའི་བུ་ཡང་དག་སྐུལ་པོས་སྨྲས་པ། བདག་གིས་ནི་བྱང་ཆུབ་སེམས་དཔའ་གཟིམས་མལ་ནས་བཞེངས་པར་གསོལ་བར་བགྱིའོ། །དེ་ན་ཀླུའི་རྒྱལ་པོ་ཆུ་ལྷ་དང ། ཀླུའི་རྒྱལ་པོ་གཟི་ཅན་དང ། ཀླུའི་རྒྱལ་པོ་རྒྱ་མཚོ་དང ། ཀླུའི་རྒྱལ་པོ་མ་དྲོས་པ་དང ། ཀླུའི་རྒྱལ་པོ་དགའ་བོ་དང་
165b
ཉེ་དགའ་བོས་འདི་སྐད་ཅེས་སྨྲས་སོ། །བདག་ཅག་གིས་ནི་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་དུས་ཀྱི་རྗེས་སུ་འབྲང་བའི་ཙནྡན་གྱི་སྤྲིན་མངོན་པར་སྤྲུལ་ཏེ་ཙནྡན་སྦྲུལ་གྱི་སྙིང་པོའི་ཕྱེ་མའི་ཆར་དབབ་བོ། །དགེ་སློང་དག་།དེ་ལྟར་ལྷ་དང ། ཀླུ་དང ། གནོད་སྦྱིན་དང ། དྲི་ཟ་རྣམས་ཀྱིས་རྣམ་པ་འདི་ལྟ་བུའི་བསམ་པ་ངེས་པ་བསམ་སྟེ་བརྩམས་སོ། །བྱང་ཆུབ་སེམས་དཔའ་ཆོས་སེམས་པ་ལ་ཞུགས་པ། གླུ་དབྱངས་ལེན་པའི་ཁང་བཟང་ན་མལ་བདེ་བ་ལ་འདུག་པ། བཙུན་མོའི་འཁོར་གྱི་ནང་ན་འདུག་པ་ནི་སྔོན་གྱི་སངས་རྒྱས་ཀྱི་སྤྱོད་པ་རྣམ་པར་སེམས་ཤིང་སེམས་ཅན་ལ་ཕན་པ་བྱ་བ་རྗེས་སུ་སེམས་ལ་སྔོན་གྱི་སྨོན་ལམ་གྱི་ཚིག་བཞི་མངོན་དུ་བྱེད་དོ། །བཞི་གང་ཞེ་ན། སྔོན་ང་རང་བྱུང་གི་བདག་པོ་འདོད་ཅིང་ཐམས་ཅད་མཁྱེན་པ་ཉིད་དོན་དུ་གཉེར་བ་ན་གོ་ཆ་འདི་ལྟ་བུ་བགོས་པར་གྱུར་ཏེ། སེམས་ཅན་སྡུག་བསྔལ་བ་དག་མཐོང་ནས་ཀྱེ་མའོ། །བདག་གིས་འཇིག་རྟེན་གནས་པ་བཅིངས་ཏེ་འཁོར་བའི་བཙོན་ར་ཆེན་པོར་བཅུག་པ་ལ་འཁོར་བའི་བཙོན་ར་དྲལ་ཏེ་བཅིངས་པ་བཀྲོལ་བའི་སྒྲ་བསྒྲག་གོ། སྲེད་པའི་ཞགས་པ་དང ། སྒྲོག་དམ་པོས་བཅིངས་པའི་སེམས་ཅན་རྣམས་ཀྱང་རབ་ཏུ་དགྲོལ་ལོ། །ཞེས་བྱ་བ་སྔོན་གྱི་སྨོན་ལམ་གྱི་ཚིག་དང་པོ་འདི་མངོན་དུ་གྱུར་ཏོ། །ཀྱེ་མའོ་བདག་གིས་འཇིག་རྟེན་མ་རིག་
166a
༄#། །པའི་མུན་པ་མུན་ནག་ཐིབས་པོ་ཆེན་པོར་ཞུགས་པ། མི་ཤེས་པའི་ལིང་ཐོག་དང་རབ་རིབ་ཀྱིས་མིག་བསྒྲིབས་པ། ཤེས་རབ་ཀྱི་མིག་དང་བྲལ་བ། མ་རིག་པ་དང་གཏི་མུག་གིས་ལྡོངས་པ་ལ་ཆོས་ཀྱི་སྣང་བ་ཆེན་པོ་བྱ་ཞིང་ཡེ་ཤེས་ཀྱི་སྒྲོན་མའང་ཉེ་བར་བསྒྲུབས་ལ། རྣམ་པར་ཐར་པའི་སྒོ་གསུམ་ཤེས་པའི་མིག་སྨན་རི་ལུ་དང ། སྨན་ཐབས་དང་ཤེས་རབ་དང ། ཡེ་ཤེས་དང་ལྡན་པ་བཏང་སྟེ། མ་རིག་པའི་མུན་པ་མུན་ནག་དང ། གཏི་མུག་གི་མུན་པ་དང ། རབ་རིབ་དང ། ལིང་ཏོག་དང ། རྙོག་པ་ཐམས་ཅད་བསལ་ནས་ཤེས་རབ་ཀྱི་མིག་རྣམ་པར་སྦྱང་ངོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་གཉིས་པ་འདི་མངོན་དུ་གྱུར་ཏོ། །ཀྱེ་མའོ་བདག་གིས་འཇིག་རྟེན་ང་རྒྱལ་གྱི་རྒྱལ་མཚན་བསྒྲེང་བ། ངར་འཛིན་པ་དང་ང་ཡིར་འཛིན་པ་ལ་མངོན་པར་ཞེན་པ། བདག་དང་བདག་གིར་འཛིན་པ་དང་ལྡན་པའི་ཡིད་ཅན། འདུ་ཤེས་དང ། སེམས་དང ། ལྟ་བ་ཕྱིན་ཅི་ལོག་གིས་ཕྱིན་ཅི་ལོག་ཏུ་གྱུར་པ། བཟུང་བ་ངན་པས་ཟིན་པ་ལ་འཕགས་པའི་ལམ་བསྟན་ཏེ། ངའོ་སྙམ་པའི་ང་རྒྱལ་བསྙིལ་བར་བྱའོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་གསུམ་པ་འདི་མངོན་དུ་གྱུར་ཏོ། །ཀྱེ་མའོ་བདག་གིས་འཇིག་རྟེན་རྣམ་པར་མ་ཞི་བ། ཐགས་འཁྲུགས་པ་ལྟ་བུར་གྱུར་པ། དྲུ་གུ་འཛིངས་པ་ལྟ་
166b
བུར་གྱུར་པ། འོང་བ་དང་འགྲོ་བར་གྱུར་པ། འཇིག་རྟེན་འདི་ནས་འཇིག་རྟེན་ཕ་རོལ་དང ། འཇིག་རྟེན་ཕ་རོལ་ནས་འཇིག་རྟེན་འདིར་ཀུན་ཏུ་རྒྱུག་ཅིང་འཁོར་ལ་འཁོར་བ་ལས་མི་ལྡོག་པ་མགལ་མེའི་འཁོར་ལོ་ལྟ་བུར་གྱུར་པ་ལ་ཉེ་བར་ཞི་བར་བྱེད་པའི་ཤེས་རབ་ཀྱིས་ཆོག་པར་བྱེད་པའི་ཆོས་ཀྱང་བསྟན་ཏོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་བཞི་པ་འདི་མངོན་དུ་གྱུར་ཏེ། སྔོན་གྱི་སྨོན་ལམ་གྱི་ཚིག་བཞི་པོ་དེ་དག་མངོན་དུ་གྱུར་ཏོ། །སྐད་ཅིག་དེ་ལ་ལྷའི་བུ་ཆོས་སྤྱོད་དང ། གནས་གཙང་མའི་རིས་ཀྱི་ལྷའི་བུ་རྣམས་ཀྱིས་བཙུན་མོའི་འཁོར་མི་སྡུག་པར་བསྒྱུར་ཏེ་མི་སྡུག་པར་གནས་པ་དང ། སྨད་པའི་གཟུགས་སུ་བསྟན་ནས་ནམ་མཁའ་ལ་འཁོད་དེ་བྱང་ཆུབ་སེམས་དཔའ་ལ་ཚིགས་སུ་བཅད་དེ་སྨྲས་པ། དེ་ནས་ལྷའི་བུ་རྫུ་འཕྲུལ་ཆེ་རྣམས་ཀྱིས། །པདྨ་རྒྱས་པ་ཡངས་པའི་སྤྱན་ལ་སྨྲས། །དུར་ཁྲོད་དབུས་འདིར་བཞུགས་པར་གྱུར་ལགས་ན། །ཁྱོད་ནི་ཇི་ལྟར་དགྱེས་པ་སྐྱེ་བར་འགྱུར། ། ལྷ་ཡི་དབང་ཕྱུག་རྣམས་ཀྱིས་དེ་བསྐུལ་ནས། །ཡུད་ཙམ་བཙུན་མོའི་འཁོར་ལ་ལྟ་ཞིང་རྟོག་།བལྟས་ནས་སྨད་པར་གྱུར་པ་དེ་དག་མཐོང ། །དུར་ཁྲོད་གནས་པར་གྱུར་པ་བདེན་སྙམ་བྱེད། །བྱང་ཆུབ་སེམས་དཔའ་ཐམས་ཅད་དང་ལྡན་པའི་བུད་མེད་ཀྱི་ཚོགས་ལ་རྣམ་པར་བལྟས་པ་དང ། ཁ་ཅིག་ནི་གོས་ལྷུང་བར་གྱུར། ཁ་ཅིག་ནི་སྐྲ་ཞིག་།ཁ་ཅིག་
167a
༄#། །ནི་རྒྱན་བྲུལ། ཁ་ཅིག་ནི་ཅོད་པན་ལྷུང ། ཁ་ཅིག་ནི་ཕྲག་པ་མི་སྡུག་པར་གྱུར། ཁ་ཅིག་ནི་ལུས་རྣམ་པར་འཁྲུགས། ཁ་ཅིག་ནི་བཞིན་མི་སྡུག་པར་གནས།་ཁ་ཅིག་ནི་མིག་གྱུར། ཁ་ཅིག་ནི་ཁ་ཆུ་ཟག་།ཁ་ཅིག་ནི་སྡུར། ཁ་ཅིག་ནི་ལུད་པ་ལུ། ཁ་ཅིག་ནི་གོད། ཁ་ཅིག་ནི་བརྡོལ། ཁ་ཅིག་ནི་སོ་འཁྲིག་།ཁ་ཅིག་ནི་བཞིན་མདོག་འགྱུར། ཁ་ཅིག་ནི་གཟུགས་མི་སྡུག་པར་གྱུར་ཏེ་ལག་པ་རིང་པོར་གྱུར། ཁ་ཅིག་ནི་རྐང་པ་ཕྲལ། ཁ་ཅིག་ནི་མགོ་ཕྱུང ། ཁ་ཅིག་ནི་མགོ་གཡོགས། ཁ་ཅིག་ནི་བཞིན་གྱི་དབྱིབས་གྱུར། ཁ་ཅིག་ནི་ལུས་མ་རུང་བར་གྱུར། ཁ་ཅིག་ནི་ལུས་སྒྲེན་མོར་གྱུར། ཁ་ཅིག་ནི་ལུས་བསྐུམས་ཤིང་སྡུར། ཁ་ཅིག་ནི་རྫ་རྔ་ལ་འཁྱུད་ནས་ལུས་གན་རྐྱལ་དུ་འགྱེལ། ཁ་ཅིག་ནི་པི་ཝང་དང་རྒྱུད་གསུམ་པའི་སྟེང་དུ་ལག་པ་བརྐྱང ། ཁ་ཅིག་ནི་གླིང་བུ་ལ་སོས་འདེབས། ཁ་ཅིག་ནི་རོལ་མོའི་ཆ་བྱེད་ཀིམྤ་ལ་དང ། ན་ཀུ་ལ་དང ། འཁར་བའི་སིལ་ཁྲོལ་དང ། ཕེག་ལ་འཛིན། ཁ་ཅིག་ནི་མིག་འཛུམ་ཞིང་འབྱེད་ལ་འགྱུར། ཁ་ཅིག་ནི་ཁ་གདངས་པར་གྱུར་ཏེ།་དེ་ལྟར་ས་ལ་མི་སྡུག་པར་གནས་པར་གྱུར་པའི་བཙུན་མོའི་འཁོར་ལ་ལྟ་ཞིང་བྱང་ཆུབ་སེམས་དཔའ་དུར་ཁྲོད་ཀྱི་འདུ་ཤེས་སྐྱེད་དོ། །དེ་ལ་འདི་སྐད་ཅེས་བྱ་སྟེ།
167b
འཇིག་རྟེན་མགོན་དེས་དེ་མཐོང་ཡིད་བྱུང་སྟེ། །སྙིང་རྗེས་ཤུགས་ཕྱུང་ནས་ནི་འདི་སྐད་སྨྲས། །ེ་མ་སྐྱེ་རྒུ་དག་ནི་སྡུག་བསྔལ་གྱུར། །སྲིན་མོའི་ཚོགས་ལ་དགའ་བ་ཇི་ལྟར་རྙེད། །འདོད་པའི་ཡོན་ཏན་ཡོན་མིན་ཡོན་ཏན་འཛིན། །གཏི་མུག་མུན་པས་རབ་བསྒྲིབས་བློ་གྲོས་ངན། །དཔེར་ན་བྱ་ནི་བྱ་རྒྱར་ཚུད་པ་བཞིན། །ནམ་ཡང་འབྱུང་བ་རྙེད་པར་འགྱུར་མ་ཡིན།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་པ། དེ་ནས་བྱང་ཆུབ་སེམས་དཔའ་ཆོས་སྣང་བའི་སྒོ་འདིས་ཡང་བཙུན་མོའི་འཁོར་ལོ་རྟོག་ཅིང་སྙིང་རྗེ་ཆེན་པོའི་སྨྲེ་བས་སེམས་ཅན་གྱི་ཕྱིར་སྨྲེ་སྟེ། འདི་ནི་བྱིས་པ་དེ་དག་ནི་གསོད་པ་སྟེ། གསད་པའི་གནས་སུ་གསང་པར་བྱ་བ་གསོད་པ་དང་མཚུངས་སོ། །འདི་ན་བྱིས་པ་དེ་དག་ནི་ཆགས་པ་སྟེ། ངན་སྐྱུག་གིས་གང་བའི་སྣོད་རི་མོ་ཅན་རྣམས་ལ་མི་མཁས་པ་ཆགས་པ་དང་མཚུངས་སོ། །འདི་ན་བྱིས་པ་དེ་དག་ནི་འབྱིང་བ་སྟེ། གླང་པོ་ཆེ་ཆུར་བྱིང་པ་དང་མཚུངས་སོ། །འདི་ནི་བྱིས་པ་དེ་དག་ནི་བཙས་པ་སྟེ། བཙོན་རའི་ནང་གི་བཙོན་བཙས་པ་དང་མཚུངས་སོ། །འདི་ན་བྱིས་པ་དེ་དག་ནི་མངོན་པར་དགའ་བ་སྟེ། ཕག་མི་གཙང་བ་ལ་དགའ་བ་དང་མཚུངས་སོ། །འདི་ན་བྱིས་པ་དེ་དག་ནི་ཆགས་པ་སྟེ། ཁྱི་ཀེང་རུས་ལ་ཆགས་པ་དང་མཚུངས་སོ། །འདི་ན་བྱིས་
168a
༄#། །པ་དེ་དག་ནི་རབ་ཏུ་ལྷུང་བ་སྟེ། ཕྱེ་མ་ལེབ་མར་མེའི་མེ་ལྕེར་ལྷུང་བ་དང་མཚུངས་སོ། །འདི་ན་བྱིས་པ་དེ་དག་ནི་ཐོགས་པ་སྟེ། སྤྲེའུ་རྙོང་ལ་ཐོགས་པ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་བཟུང་བ་སྟེ། ཉ་རྒྱས་ཟིན་པ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་གཏུབས་པ་སྟེ། ཤ་ཚོང་གི་གནས་ཀྱི་ལུག་དང་མཚུངས་སོ། །འདི་ན་བྱིས་པ་དེ་དག་ནི་བཙུགས་པ་སྟེ། སྡིག་པ་བྱེད་པ་གསལ་ཤིང་གི་རྩེ་མོ་ལ་བཙུགས་པ་དང་མཚུངས་སོ། །འདི་ན་བྱིས་པ་དེ་དག་ནི་འདམ་དུ་འབྱིང་ཞིང་ཐོགས་པ་སྟེ། གླང་པོ་ཆེ་རྒན་པོ་འདམ་དུ་སོང་བ་དང་མཚུངས་སོ། །འདི་ན་བྱིས་པ་དེ་དག་ནི་ཕོངས་པ་སྟེ། རྒྱ་མཚོ་ཆེན་པོར་གྲུའི་སྣམ་བུ་ཞིག་པ་དང་མཚུངས་སོ། །འདི་ན་བྱིས་པ་དེ་དག་ནི་རབ་ཏུ་ལྷུང་བ་སྟེ། དམུས་ལོང་གཡང་ས་ཆེན་པོར་ལྷུང་བ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་ཟད་པར་འགྱུར་བ་སྟེ། སའི་སྟེང་གི་མཚམས་སུ་སོང་བའི་ཆུ་དང་མཚུངས་སོ། །འདི་ན་བྱིས་པ་དེ་དག་ནི་ངུ་བ་འཐུལ་བ་སྟེ། བསྐལ་པ་ཟད་པའི་ས་ཆེན་པོ་དང་མཚུངས་སོ། །འདི་ན་བྱིས་པ་དེ་དག་ནི་འཁོར་བ་སྟེ། རྫ་མཁན་གྱི་འཁོར་ལོའི་ཤུགས་དང་མཚུངས་སོ། །འདི་ན་བྱིས་པ་དེ་དག་ནི་འབྲོག་རྩོལ་བ་སྟེ། དམུས་
168b
ལོང་རི་ལ་ཕྱིན་པ་དང་མཚུངས་སོ། །འདི་ན་བྱིས་པ་དེ་དག་ནི་བཏགས་ཤིང་འཁོར་བ་སྟེ། ཁྱི་ལྟོང་གིས་བཏགས་པ་དང་མཚུངས་སོ། །འདི་ན་བྱིས་པ་དེ་དག་ནི་རྙིས་པ་སྟེ། དཔྱིད་ཀྱི་རྩཝ་དང་ནགས་ཚལ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་ཉམས་པ་སྟེ། མར་གྱི་ངོའི་ཟླ་བ་དང་མཚུངས་སོ། །འདི་དག་ནི་བྱིས་པ་རྣམས་ལ་ཟ་བ་སྟེ།་ཀླུ་ལ་ནམ་མཁའ་ལྡིང་དང་མཚུངས་སོ། །འདི་དག་ནི་བྱིས་པ་རྣམས་ལ་འཆའ་བ་སྟེ། གྲུ་བོ་ཆེ་ལ་ཆུ་སྲིན་ཆེན་པོ་དང་མཚུངས་སོ། །འདི་དག་ནི་བྱིས་པ་རྣམས་ལ་འཛེམས་པ་སྟེ། མགྲོན་པོ་ལ་ཆོམ་པོ་མང་པོ་དང་མཚུངས་སོ། །འདི་དག་ནི་བྱིས་པ་རྣམས་ལ་འཇིག་པ་སྟེ། ཤིང་སཱ་ལ་ལ་རླུང་དམར་ཆེན་པོ་དང་མཚུངས་སོ། །འདི་དག་ནི་བྱིས་པ་རྣམས་ལ་གསོད་པ་སྟེ། སྐྱེ་བོ་ལ་སྦྲུལ་མིག་གདུག་པ་དང་མཚུངས་སོ། །བྱིས་པ་རྣམས་ནི་རོ་མྱང་བའི་འདུ་ཤེས་ཀྱིས་ཆོད་པ་སྟེ། རལ་གྲིའི་སོ་སྦྲང་རྩིས་བསྐུས་པས་ཆོད་པ་བཞིན་ནོ། །འདི་དག་ནི་བྱིས་པ་རྣམས་ཁྱེར་བ་སྟེ། ཤིང་གི་ཕུང་པོ་ཆུ་བོའི་ཆུས་ཁྱེར་བ་དང་མཚུངས་སོ། །འདི་དག་ནི་བྱིས་པ་རྣམས་ལ་རྩེན་པ་སྟེ། བྱིས་པ་ཆུང་ངུ་རང་གི་གཅིན་རྟུག་ལ་རྩེ་བ་དང་མཚུངས་སོ། །འདི་དག་ནི་བྱིས་པ་རྣམས་ཀུན་ཏུ་སྒྱུར་བ་སྟེ། གླང་པོ་ཆེ་ལ་ལྕགས་ཀྱུ་དང་མཚུངས་སོ། །འདི་དག་ནི་བྱིས་པ་རྣམས་ལ་
169a
༄#། །སླུ་བ་སྟེ། གཡོན་ཅན་གྱིས་བྱིས་པའི་རང་བཞིན་ཅན་དག་བྲིད་པ་བཞིན་ནོ། །འདི་དག་ནི་བྱིས་པ་དེ་དག་གི་དགེ་བའི་རྩ་བ་ཟད་པར་བྱེད་པ་སྟེ། རྒྱན་པོ་ལ་དགའ་བའི་ནོར་དང་མཚུངས་སོ། །འདི་དག་གིས་བྱིས་པ་རྣམས་ལ་འཆོས་པ་སྟེ། སྲིན་མོ་རྣམས་ཀྱིས་ཚོང་པ་འཆོས་པ་དང་མཚུངས་སོ། །བྱང་ཆུབ་སེམས་དཔའ་རྣམ་པ་སུམ་ཅུ་རྩ་གཉིས་པོ་འདི་དག་གིས་བཙུན་མོའི་འཁོར་ལ་ཡོངས་སུ་བརྟག་པ་བྱས་ནས་ལུས་ལ་མི་གཙང་བའི་འདུ་ཤེས་རྣམ་པར་སྒོམ། མི་མཐུན་པའི་འདུ་ཤེས་ཉེ་བར་སྒྲུབ། སྨད་པའི་འདུ་ཤེས་སྐྱེད། རང་གི་ལུས་ལའང་དེ་དང་འདྲ་བར་རྣམ་པར་སྒོམ། ལུས་ཀྱི་ཉེས་དམིགས་ཡང་དག་པར་མཐོང ། ལུས་ལ་ལུས་སུ་མངོན་པར་ཞེན་པ་ལས་སྐྱོད། སྡུག་པའི་འདུ་ཤེས་རྣམ་པར་འཇིག་།མི་སྡུག་པའི་འདུ་ཤེས་འཇུག་པར་བྱེད། འོག་གི་རྐང་པའི་མཐིལ་ནས་སྟེང་གི་ཀླད་པ་མན་ཆད་མི་གཙང་བ་ལས་བྱུང་བ་དང ། མི་གཙང་བ་ལས་གྱུར་པ་དང ། རྟག་ཏུ་མི་གཙང་བ་ཟག་པར་མཐོང་ངོ ། །དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ལུས་ཀྱི་ཞིང་ལས་སྐྱེས་ཤིང་སྲེད་པའི་ཆུ་ལས་བྱུང་བ་འཇིག་ཚོགས་མིང་དུ་བཏགས། །མཆི་མ་རྡུལ་དང་མཆིལ་མས་བརླན་ལ་གཅིན་གྱིས་བསྒྱུར་ཅིང་ཁྲག་གི་ཐིགས་པས་གང ། །ཞག་དང་རྣག་དང་ལྒང་
169b
པ་དང་ནི་ཀླད་རྒྱས་དག་དང་སྡིག་པ་རྣམས་ཀྱིས་གང ། །རྟག་ཏུ་ངན་སྐྱུག་ཟག་ཅིང་ཀུན་ཀྱང་དྲི་མ་རྣམ་པ་སྣ་ཚོགས་ཐ་དད་པ། །པགས་དང་སོ་དང་སྐྲ་དང་སྤུ་ཡིས་བསྒྱུར་ཅིང་པགས་པས་གཡོགས་ལ་སྤུ་དང་ལྡན། །རྒྱུ་མ་མཆིན་པ་མཚེར་པ་ཆུ་སེར་ཁ་ཆུ་འདི་དག་བསགས་པ་ཉམ་ཆུང་བ། །རྐང་དང་ཆུ་རྒྱུས་དག་གིས་སྦྲེལ་ཏེ་འཁྲུལ་འཁོར་འདྲ་ཞིང་ཤ་ཡིས་མཛེས་པར་བྱས། །སྣ་ཚོགས་ནད་ཀྱིས་གང་ཞིང་མྱ་ངན་ཁྱབ་ལ་བཀྲེས་དང་སྐོམ་པས་ཀུན་ཏུ་ཉེན། །སྐྱེ་བ་པོ་དག་ལུས་ནི་བུ་ག་མང་ཞིང་འཆི་དང་རྒ་བའི་གནས་གྱུར་པ། །མཐོང་ནས་མཁས་པ་སུ་ཞིག་རང་གི་ལུས་ལ་དགྲ་དང་མཚུངས་པར་སེམས་མི་འགྱུར། །དེ་ལྟར་བྱང་ཆུབ་སེམས་དཔའ་ལུས་ལ་ལུས་སུ་སོང་བའི་དྲན་པས་གནས་པར་གྱུར་ཏོ། །ནམ་མཁའི་དཀྱིལ་ན་འཁོད་པའི་ལྷའི་བུ་རྣམས་ཀྱིས་ལྷའི་བུ་ཆོས་སྤྱོད་ལ་འདི་སྐད་ཅེས་སྨྲས་སོ། །གྲོགས་པོ་དོན་གྲུབ་འདི་ནི་བཙུན་མོའི་འཁོར་ལ་རྣམ་པར་ལྟ་ཞིང་འཛུམ་ཡང་སྟོན། །སེམས་ནི་མི་དགའ་མིག་ནི་ཕྱིར་ཞིང་ལྟ་ན་ཕྱི་བཤོལ་བྱེད་དམ་ཅི། །ཡང་ན་འདི་ནི་རྒྱ་མཚོའི་ཟབས་དང་མཚུངས་ཏེ་འདི་ཚད་གཟུང་བར་མི་ནུས་སོ། །ཡང་ན་ཆགས་པ་མེད་པ་འདི་ཡུལ་རྣམས་ལ་ཆགས་པར་མི་འགྱུར་གྲང ། །ལྷ་རྣམས་ཀྱིས་བསྐུལ་བ་ཡི་ཡི་དམ་བརྗེད་པར་མ་གྱུར་གྲང ། །ལྷའི་བུ་ཆོས་སྤྱོད་ཀྱིས་སྨྲས་པ། དེ་སྐད་
170a
༄#། །སྨྲ་ཅི་དགོས། འདི་སྔོན་བྱང་ཆུབ་ཀྱི་ཕྱིར་སྤྱོད་པ་ནའང་མངོན་པར་འབྱུང་བ་དང ། གཏོང་བ་ལ་རྣམ་པ་དེ་ལྟ་བུར་ཆགས་པ་མེད་པར་གྱུར་པ་དེ་ཁྱེད་ལ་མངོན་སུམ་དུ་གྱུར་པ་ཡིན་ན། ད་སྲིད་པ་ཐ་མ་པ་ལ་གནས་པ་ཆགས་པར་མི་འགྱུར་བ་ལྟ་སྨོས་ཀྱང་ཅི་དགོས། དགེ་སློང་དག་།དེ་ནས་བྱང་ཆུབ་སེམས་དཔའ་ངེས་པར་བྱས་པ།་ཡིད་བྱུང་བར་གྱུར་པ། བློ་བརྟུལ་བ། ཚུལ་དུ་ཤིས་ཤིང་རིངས་ཐབས་མེད་པར་སྐྱིལ་མོ་ཀྲུང་བཤིག་སྟེ་གླུ་དབྱངས་ལེན་པའི་ཁང་བཟང་ན་ཤར་ཕྱོགས་སུ་ལྟ་ཞིང་འདུག་ནས་ལག་པ་གཡས་པས་རིན་པོ་ཆེའི་དྲ་བ་སྨད་དེ། ཁང་བཟང་གི་སྟེང་དུ་སོང་ནས་སོར་མོ་བཅུ་ཐལ་མོ་སྦྱར་ཏེ་སངས་རྒྱས་ཐམས་ཅད་བསམ་ནས་སངས་རྒྱས་ཐམས་ཅད་ལ་ཕྱག་འཚལ་ཏེ་ནམ་མཁའི་དཀྱིལ་དུ་བལྟས་པ་དང་དེས་མཐོང་བ། ནམ་མཁའི་དཀྱིལ་ན་ལྷའི་དབང་པོ་མིག་སྟོང་དང་ལྡན་པ་ལྷ་བརྒྱ་སྟོང་གིས་བསྐོར་ཅིང ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། གོས་དང ། གདུགས་དང ། རྒྱལ་མཚན་དང ། བ་དན་དང ། མེ་ཏོག་གི་རྣ་རྒྱན་དང ། རིན་པོ་ཆེའི་དོ་ཤལ་གྱི་ཆུན་པོ་ཐོགས་ཏེ་ལུས་བཏུད་ནས་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་པ་མཐོང་ངོ ། །འཇིག་རྟེན་སྐྱོང་བ་བཞིའང་གནོད་སྦྱིན་དང ། སྲིན་པོ་དང ། དྲི་
170b
ཟ་དང ། ཀླུའི་ཚོགས་ཀྱིས་བསྐོར་ཅིང་གོ་ཆ་སྲ་བ་བགོས། རལ་གྲི་དང ། མདའ་གཞུ་དང ། མདུང་ཐུང་དང ། མཚོན་རྩེ་གཉིས་པ་དང ། རྩེ་གསུམ་པ་ལག་ན་ཐོགས་ཤིང་ཚུལ་དུ་ཤིས་པར་ནོར་བུའི་ཅོད་པན་དང ། གཙུག་ཕུད་འཕྱང་བར་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་པ་མཐོང་ངོ ། །ལྷའི་བུ་ཉི་མ་དང་ཟླ་བ་གཉིས་ཀྱང་གློ་གཡས་གཡོན་ན་འདུག་པར་མཐོང་ངོ ། །སྐར་མའི་བདག་པོ་རྒྱལ་ཡང་ནམ་ཕྱེད་ན་ཤར་བར་མཐོང་ངོ ། །མཐོང་ནས་ཀྱང་བྱང་ཆུབ་སེམས་དཔས་འདུན་པ་ལ་སྨྲས་པ། ང་ཡི་བཀྲ་ཤིས་འདི་ནི་དོན་ཀུན་གྲུབ། །དོ་མོད་གདོན་མི་ཟ་བར་དོན་གྲུབ་ཀྱི། །འདུན་པ་ཕྱི་བཤོལ་མ་བྱེད་ལ་གོར་དུ། །རྟ་རྒྱལ་རྒྱན་གྱིས་བརྒྱན་པ་ང་ལ་བྱིན། །དེ་ནས་འདུན་པས་ཚིག་དེ་ཐོས་ནས་ཡིད་མི་དགའ་ཞིང་འདི་སྐད་ཅེས་སྨྲས་སོ། །སྨིན་མ་རིང་ཞིང་པདྨའི་འདབ་མ་རྒྱས་འདྲའི་སྤྱན་མངའ་མི་ཡི་སེངྒེ་སྟོན་ཀའི་ཟླ་བ་ཉ་བ་ལྟ་བུ་དང ། །མེ་ཏོག་ཀུ་མུ་ད་དང་ཟླ་བ་དང་ནི་དགའ་བའི་པདྨའི་རྫིང་བུ་གསར་པར་འཇམ་པའི་པདྨ་རྒྱས་འདྲའི་ཞལ། །སྦྱངས་པའི་གསེར་དང་ཉི་མ་ཤར་མ་ཐག་དང་ཟླ་བ་དྲི་མེད་གཟི་དང་མར་བླུགས་མེ་ཡི་འོད་འཕྲོ་ནོར་བུ་གློག་འོད་འབར་བའི་གཟི་བརྗིད་ཅན། །གླང་པོ་རྒྱགས་པ་འགྱིང་བའི་གླང་པོའི་སྟོབས་ཅན་བ་ལང་ཁྱུ་མཆོག་རི་དྭགས་རྒྱལ་དང་ངང་པའི་སྟབས་
171a
༄#། །ཅན་སྟབས་མཛེས་ཤིན་ཏུ་ཞབས་ལེགས་གང་དུ་བཞུད། །བྱང་ཆུབ་སེམས་དཔས་སྨྲས་པ། འདུན་པ་གང་གི་དོན་དུ་ང་ཡིས་སྔོན་ཆད་ལག་པ་རྐང་པ་མིག་དང་དེ་བཞིན་མགོ་དང་ལུས་བཏང་ཞིང ། །ཆུང་མ་དང་ནི་ཕངས་པའི་རྒྱལ་སྲིད་ནོར་གསེར་གོས་དང་རིན་ཆེན་གང་བའི་ཤིང་རྟ་གླང་པོ་རླུང་མགྱོགས་ཤུགས་ལྡན་རྟ་ཕོ་རྩལ་མཆོག་ལྡན་པ་བཏང ། །བསྐལ་པ་བྱེ་བ་ཁྲག་ཁྲིག་མང་ནས་ཚུལ་ཁྲིམས་ངས་བསྲུངས་བཟོད་པ་ཡོངས་བསྒོམས་བརྩོན་འགྲུས་སྟོབས་དང་བསམ་གཏན་ཤེས་རབ་དག། དེ་ལྟ་མོད་ཀྱི་བྱང་ཆུབ་ཞི་བ་ཤིས་པ་ཐོབ་ནས་རྒ་ཤིའི་རྒྱ་མོར་ཆུད་པའི་སེམས་ཅན་ང་ཡིས་ཡོངས་སུ་དགྲོལ་བའི་དུས་ལ་བབ། །འདུན་པས་སྨྲས་པ། ཇོ་ཇོ་ཁྱོད་བལྟམས་མ་ཐག་ཏུ་བལྟ་བའི་ཕྱིར་བྲམ་ཟེ་ལྟས་མཁན་རྣམས་ལ་བསྟན་ན། དེ་དག་གིས་རྒྱལ་པོ་ཟས་གཙང་མའི་སྤྱན་སྔར་ལྷ་ཁྱོད་ཀྱི་རྒྱལ་པོའི་ཕོ་བྲང་འཕེལ་བར་འགྱུར་རོ་ཞེས་ལུང་བསྟན་ཅེས་བདག་གིས་ཐོས་སོ། །སྨྲས་པ། ཇི་ལྟ་བུར་འགྱུར། སྨྲས་པ། གཞོན་ནུ་འདི་ནི་བསོད་ནམས་བརྒྱ་མཚན་ལྡན། །ཁྱོད་ཀྱི་བུ་བཙས་བསོད་ནམས་གཟི་བརྗིད་ཅན། །དེ་ནི་གླིང་བཞིའི་དབང་ཕྱུག་འཁོར་ལོས་བསྒྱུར། །ནོར་བདུན་དང་ནི་རབ་ཏུ་ལྡན་པར་འགྱུར། །གལ་ཏེ་
171b
འཇིག་རྟེན་སྡུག་བསྔལ་བལྟས་ནས་ནི། །བཙུན་མོའི་འཁོར་སྤངས་མངོན་པར་བྱུང་འགྱུར་ན། །བྱང་ཆུབ་རྒ་ཤི་མེད་པའི་གནས་ཐོབ་སྟེ། །ཆོས་ཀྱི་ཆུ་ཡིས་སྐྱེ་རྒུ་འདི་ཚིམ་བྱེད། །ཇོ་ཇོ་ལུང་བསྟན་པ་འདི་ནི་མཆིས་ཏེ། འདི་མ་མཆིས་པ་མ་ལགས་མོད་ཀྱི། འོན་ཀྱང་ཕན་པར་འཚལ་བ་བདག་གི་ཚིག་གསན་པར་གསོལ། སྨྲས་པ། ཅི་ཞིག། སྨྲས་པ།་ལྷ་གཅིག་གང་གི་དོན་དུ་འདི་ན་ཁ་ཅིག་བརྟུལ་ཞུགས་དང་དཀའ་ཐུབ་རྣམ་པ་དུ་མ་རྩོམ་སྟེ། རི་དྭགས་ཀྱི་པགས་པ་དང ། རལ་པའི་ཐོར་ཚུགས་དང ། རྩཝ་དང་ཤིང་ཤུན་གྱོན་པ་དང ། སེན་མོ་དང ། སྐྲ་དང ། ག་ཚོམ་རིང་པོར་འཇོག་པ་དང ། ལུས་ལ་གདུང་བ་དང ། ཡོངས་སུ་གདུང་བ་རྣམ་པ་དུ་མ་སྤྲོ་བར་བགྱིད་དེ། བདག་ཅག་ཇི་ལྟར་ལྷ་དང་མིའི་ཕུན་སུམ་ཚོགས་པ་འཐོབ་པར་འགྱུར་ཞེས་བརྟུལ་ཞུགས་དང་དཀའ་ཐུབ་དྲག་པོ་རྩོམ་མོ། །ཇོ་ཇོ་ཕུན་སུམ་ཚོགས་པ་དེ་ནི་ཁྱོད་ཀྱིས་བརྙེས་ལགས་ཏེ། རྒྱལ་སྲིད་འབྱོར་ཅིང་རྒྱས་ལ་བདེ་ཞིང་ལོ་ལེགས་ཏེ། ཉམས་དགའ་ཞིང་མི་དང་སྐྱེ་བོ་མང་པོས་གང་བ་འདི་དང ། སྐྱེད་མོས་ཚལ་དམ་པ་མཆོག་མེ་ཏོག་དང་འབྲས་བུ་རྣམ་པ་སྣ་ཚོགས་ཀྱིས་བརྒྱན་པ། བྱའི་ཚོགས་སྣ་ཚོགས་སྒྲ་སྐད་ཡིད་དུ་འོང་བ་འབྱིན་པ་འདི་དག་དང ། རྫིང་མེ་ཏོག་ཨུཏྤ་ལ་དང ། པདྨ་དང ། ཀུ་མུ་ད་དང ། པདྨ་དཀར་
172a
༄#། །པོས་མཛེས་པར་འགྱུར་བ། ངང་པ་དང ། རྨ་བྱ་དང ། ཁུ་བྱུག་དང ། ངུར་པ་དང ། ཁྲུང་ཁྲུང་དང ། ངང་སྐྱ་སྒྲ་སྐད་འབྱིན་པ། ཤིང་ཨ་མྲ་དང ། མྱ་ངན་འཚང་དང ། ཙམ་པ་ཀ་དང ། ཀུ་ར་བ་ཀ་དང ། ཀེ་ས་ར་ལ་སོགས་པ་ཤིང་མེ་ཏོག་ཆགས་པ་སྣ་ཚོགས་ཀྱིས་འགྲམ་འཁོར་བ། རིན་པོ་ཆེའི་ཤིང་སྣ་ཚོགས་ཀྱི་ཕྲེང་གིས་ལེགས་པར་བརྒྱན་པ། མིག་མང་རིས་སུ་བཀོད་པ། རིན་པོ་ཆེ་སྣ་ཚོགས་ཀྱི་སྟེགས་བུས་བསྐོར་བ། རིན་པོ་ཆེའི་དྲ་བ་བྲེས་པ། དུས་ཇི་ལྟ་བ་བཞིན་དུ་ཡོངས་སུ་སྤྱད་པ།་དགུན་དང ། དབྱར་དང ། སྟོན་དང ། དཔྱིད་གནས་བདེ་བ་རྣམས་དང ། ཁང་བཟང་ཆེན་པོ་ཆོས་དང ། ཆོས་བཟང་དང ། བདེ་བ་དང ། མྱ་ངན་འབྲལ་ལ་སོགས་པ་རྣམ་པར་རྒྱལ་བའི་ཁང་པ་ལྟ་བུ་སྟོན་ཀའི་སྤྲིན་འདྲ་བ། གངས་ཏེ་སེ་ལྟ་བུ་སྟེགས་བུ་དང ། སྒོ་གང་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁྱམས་ཀྱིས་ལེགས་པར་བརྒྱན་པ། རིན་པོ་ཆེའི་དྲིལ་བུ་གཡེར་ཀའི་དྲ་བ་སྒྲ་འབྱུང་བ་འདི་དག་དང ། བཙུན་མོའི་འཁོར་དང་རོལ་མོའི་ཆ་བྱད་རྒྱུད་གཅིག་པ་དང ། པི་ཝང་དང ། འཁར་རྔ་དང ། གླིང་བུ་དང ། འཁར་བའི་སིལ་ཁྲོལ་དང ། ཕེག་དང ། ཀི་མྤ་ལ་དང ། ན་ཀུ་ལ་དང ། སྒྲ་སྙན་དང ། རྫ་རྔ་དང ། པ་ཊ་ཧ་དང །
172b
གླུ་དང ། གར་དང ། རོལ་མོའི་དབྱངས་སྒྲ་དང ། གླུ་དབྱངས་སྦྱར་བ་ལེགས་པར་བསླབ་པ་དགོད་པ་དང ། འཇོ་པ་དང ། རྩེ་བ་དང ། དགའ་བ་དང ། ཚུལ་དུ་ཤིས་བ་དང ། སྤྱོད་པ་མཛེས་པ་འདི་དང་ནི་ལྡན་ལ། ལྷ། ཁྱོད་ཀྱང་དར་ནི་མ་ཡོལ་ཏེ། གཞོན་པ་ཐོར་བུ་དར་ལ་བབ་པ། ལུས་འཇམ་པ། ལང་ཚོ་ལ་བབ་པ། དབུ་སྐྲ་ནག་པ། འདོད་པ་ལ་མ་རོལ་བ་ལགས་ཀྱི། སུམ་ཅུ་རྩ་གསུམ་པའི་བདག་པོ་མིག་སྟོང་དང་ལྡན་པ། ལྷའི་བདག་པོ་ལྟ་བུར་རེ་ཞིག་དགྱེས་པར་རོལ་ལ། སླད་ཀྱིས་བགྲེས་ནས་མངོན་པར་འབྱུང་བར་མཛོད་ཅིག་།དེའི་ཚེ་ཚིགས་སུ་བཅད་པ་འདིའང་སྨྲས་སོ། །སུམ་ཅུ་རྩ་གསུམ་འཇིག་རྟེན་ལྷ་དབང་ལྟར། །དགྱེས་པའི་ཆོ་ག་མཁྱེན་པ་དགྱེས་པར་རོལ། །སླད་ཀྱིས་བགྲེས་པར་གྱུར་ནས་བརྟུལ་ཞུགས་དང ། །དཀའ་ཐུབ་དག་ནི་ཡང་དག་བརྩམ་པར་མཛོད། །བྱང་ཆུབ་སེམས་དཔས་སྨྲས་པ། འདུན་པ་མི་དགོས་ཏེ། འདོད་པ་འདི་དག་ནི་མི་རྟག་པ།་མི་བརྟན་པ། ཐེར་ཟུག་མ་ཡིན་པ། འགྱུར་བའི་ཆོས་ཅན། མྱུར་དུ་འགྲོ་བ། གཡོ་བ། རི་གཟར་པོའི་ཆུའི་ཤུགས་དང་འདྲ་བ། ཟིལ་པའི་ཐིགས་པ་ལྟར་རིང་དུ་མི་གནས་པ། ལག་པ་བཅངས་པ་སྟོང་པས་བྱིས་པ་བྲིད་པ་ལྟར་སྙིང་པོ་མེད་པ། ཆུ་ཤིང་གི་སྙིང་པོ་ལྟར་མཐུ་མེད་པ། སྣོད་སོ་མ་བཏང་བ་ལྟར་མཐར་འཇིག་པ། སྟོན་
173a
༄#། །ཀའི་སྤྲིན་ལྟར་སྐད་ཅིག་བྱུང་ནས་མེད་པར་འགྱུར་བ། ནམ་མཁའི་གློག་ལྟར་རིང་དུ་མི་གནས་པ། དུག་དང་བཅས་པའི་སྣོད་ལྟར་འགྱུར་བའི་སྡུག་བསྔལ་ཅན།་འཁྲི་ཤིང་མ་ལུ་ཏ་ལྟར་མི་བདེ་བ་འབྱིན་པ། བྱིས་པའི་བློ་ཅན་རྣམས་ཀྱིས་འདོད་བར་བྱ་བ། ཆུའི་ཆུ་བུར་ལྟ་བུར་མྱུར་དུ་འགྱུར་བའི་ཆོས་ཅན། སྨིག་རྒྱུ་ལྟར་འདུ་ཤེས་ཕྱིན་ཅི་ལོག་ལས་བྱུང་བ། སྒྱུ་མ་ལྟར་སེམས་ཕྱིན་ཅི་ལོག་གིས་རྣམ་པར་བསྒྲུབས་པ། རྨི་ལམ་ལྟར་ལྟ་བ་ཕྱིན་ཅི་ལོག་གིས་ཡོངས་སུ་ཟིན་པ། རྒྱ་མཚོ་དགང་དཀའ་བ་ལྟར་ངོ་མ་མི་ཤེས་པར་བྱེད་པ། ཚཝ་ཆུ་ལྟར་སྐོམ་པར་བྱེད་པ། སྦྲུལ་གྱི་མགོ་ལྟར་རེག་པར་དཀའ་བ། གཡང་ས་ཆེན་པོ་ལྟར་མཁས་པ་རྣམས་ཀྱིས་ཡོངས་སུ་སྤངས་པ། ཤེས་རབ་ཅན་རྣམས་ཀྱིས་འཇིགས་པ་དང་བཅས་པ་དང ། རྩོད་པ་དང་བཅས་པ་དང ། ཉེས་པ་དང་བཅས་པ་དང ། སྐྱོན་དང་བཅས་པར་ཤེས་ནས་རྣམ་པར་སྤངས་པ། རིག་པ་རྣམས་ཀྱིས་སྨད་པ། འཕགས་པ་རྣམས་ཀྱིས་བཤུང་པ། མཁས་པ་རྣམས་ཀྱིས་མ་བསྔགས་པ། མི་མཁས་པ་རྣམས་ཀྱིས་ཡོངས་སུ་བཟུང་བ། བྱིས་པ་རྣམས་ཀྱིས་བསྟེན་པ་ཡིན་ནོ། །དེའི་ཚེ་ཚིགས་སུ་བཅད་པ་འདི་འང་སྨྲས་སོ། །མཁས་པ་རྣམས་ཀྱིས་སྦྲུལ་གྱི་མགོ་བཞིན་སྤངས། །ངན་སྐྱུག་སྣོད་བཞིན་མི་གཙང་རྣམ་
173b
པར་སྤངས། །འདུན་པ་དགེ་བ་ཐམས་ཅད་འཇིག་བྱེད་པར། །འདོད་པ་ཤེས་ནས་ང་ནི་དགའ་མི་སྐྱེ། །དེའི་ཚེ་འདུན་པ་ཟུག་རྡུས་ཟུག་པ་བཞིན་དུ་སྐད་ཕྱུང་སྟེ་ངུ་ཞིང་དེ་ནས་མིག་ནས་མཆི་མ་ཟག་ལ། སྡུག་བསྔལ་བཞིན་ཚིག་འདི་སྐད་ཅེས་སྨྲས་སོ། །ལྷ་གཅིག་གང་གི་དོན་དུ་འདི་ན་ཁ་ཅིག་བརྟུལ་ཞུགས་རྣམ་པ་མང་པོ་རྩོམ་སྟེ་རི་དྭགས་པགས་པ་འཆང ། །སྐྲ་དང་སེན་མོ་ཨག་ཚོམ་རིང་དུ་འཇོག་ཅིང་དེ་བཞིན་ཤིང་ཤུན་གྱོན་ལ་ཡན་ལག་བསྐམས་ཤིང་བརྟུལ་ཞུགས་གནས། །སྲེ་ད་དང་ནི་ལྡན་མ་ལྡུམ་དག་དང་མ་དྲུས་འབྲས་ཟ་ཁ་ཅིག་སྤྱིའུ་ཚུགས་འདུག་དང་བ་ལང་བརྟུལ་ཞུགས་གནས། །ཇི་ལྟར་བདག་ཅག་འགྲོ་བའི་གཙོ་བོ་ཁྱད་འཕགས་འཁོར་ལོས་བསྒྱུར་བ་མཆོག་དང་དེ་བཞིན་འཇིག་རྟེན་སྐྱོང་བ་དང ། །བརྒྱ་བྱིན་རྡོ་རྗེ་འཆང་དང་འཐབ་བྲལ་ལྷ་དབང་འཕྲུལ་བར་འགྱུར་སྙམ་ཚངས་པའི་འཇིག་རྟེན་བསམ་གཏན་བདེ་བ་འདོད། །མི་ཡི་དམ་པ་ཁྱོད་ཀྱི་རྒྱལ་སྲིད་འདི་ནི་ཤིན་ཏུ་འབྱོར་ཅིང་རབ་ཏུ་རྒྱས་ལ་ཤིན་ཏུ་ལོ་ལེགས་པ། །དེ་བཞིན་ཀུན་དགའི་ར་བ་དག་དང་སྐྱེད་མོས་ཚལ་དང་ཁང་བཟང་མཐོན་པོ་རྣམ་པར་རྒྱལ་བའི་ཁང་པ་མཚུངས། །བུད་མེད་འདི་དག་རྣམས་ཀྱང་པི་ཝང་དང་ནི་གླིང་བུ་དག་དང་གླུ་དང་རོལ་མོའི་དབྱངས་སྒྲ་ལེན་ཅིང་མཆིས། །དགའ་བར་བགྱིད་
174a
༄#། །དང་གར་དང་གླུ་དབྱངས་སྦྱར་བ་ཤིན་ཏུ་བསླབ་པ་འདི་དག་སྤྱོད་ཅིང་དེས་པ་མ་བཞུད་ཅིག་།བྱང་ཆུབ་སེམས་དཔས་སྨྲས་པ། འདུན་པ་ཉོན་ཅིག་འདོད་པའི་རྒྱུས་ནི་སྔོན་གྱི་ཚེ་རབས་དག་ན་བཅིངས་དང་བཙས་དང་བརྡེགས་དང་བསྡིགས་པ་སྡུག་བསྔལ་བརྒྱ་དག་ངས་ནི་བཟོད་བྱས་འདུས་བྱས་རྣམས་ལ་ང་ཡིས་ཡིད་བྱུང་བྱས་མ་གྱུར། །སྔོན་ཆད་བག་མེད་དབང་དུ་སོང་ཞིང་གཏི་མུག་དཀྲུགས་ལ་ལྟ་བའི་དྲ་བས་དཀྲིས་ཤིང་མུན་གྱུར་ཆོས་འདི་མི་ཤེས་པ་ལས་བྱུང་སྟེ་བདག་ཏུ་འདུ་ཤེས་འཛིན་དང་ཚོར་བ་པོ་ལས་འདས། །དངོས་པོ་འདི་དག་ཐམས་ཅད་གཡོ་ཞིང་འགྱུར་ལ་མི་རྟག་སྤྲིན་དང་མཚུངས་ཤིང་གློག་དང་འདྲ་སྟེ་ཟིལ་པའི་ཐིགས་པ་འདྲ་ཞིང་གསོབ་གསོག་སྙིང་པོ་མེད་ལ་བདག་ཡོད་མ་ཡིན་སྟོང་པར་གྱུར་པ་སྟེ། །ང་ཡི་ཡིད་ནི་ཡུལ་ལ་ཆགས་པ་མེད་ཀྱི་འདུན་པ་རྟ་རྒྱལ་དམ་པ་བསྔགས་ལྡན་ད་བྱིན་ངས་སྔོན་བསམ་པའི་བཀྲ་ཤིས་རྫོགས་ཀྱི་ཐམས་ཅད་ཟིལ་གནོན་ཆོས་ཀུན་དབང་ཕྱུག་ཆོས་རྒྱལ་ཐུབ་པར་འགྱུར། །འདུན་པས་སྨྲས་པ། པདྨ་འདབ་མ་རྒྱས་པ་འདྲ་བའི་མིག་ལྡན་ཞིང ། །དོ་ཤལ་ནོར་བུ་རིན་ཆེན་སྣ་ཚོགས་རྣམས་ཀྱིས་བརྒྱན། །མཁའ་ལ་སྤྲིན་ཚོགས་དག་ལས་བྱུང་བའི་ཀློག་འདྲ་བ། །མལ་ན་རྣམ་པར་
174b
མཛེས་པ་འདི་ལ་མི་གཟིགས་སམ། །པི་ཝང་དང་ནི་འཁར་རྔ་དག་དང་སྒྲ་སྙན་དང ། །རྫ་རྔ་དག་དང་གླིང་བུ་གླུ་དབྱངས་ལེན་པ་དང ། །བྱ་བང་རྨ་བྱ་ཀ་ལ་པིངྐ་སྒྲ་འབྱིན་པ། ། མིའམ་ཅི་ཡི་ཁྱིམ་འདྲ་འདི་ཡང་འདོར་ལགས་སམ། །སུ་མ་ན་དང་ཨུཏྤ་ལ་དང་པཪྴ་ཀ། ཙམྤ་ཀ་དང་དྲི་མཆོག་ཕྲེང་བ་མེ་ཏོག་བརྒྱུས། །དུས་ཀྱི་ཨ་ག་རུ་མཆོག་བདུག་པས་རབ་བདུགས་དང ། །བྱུག་པ་དམ་པ་དེ་དག་ལ་ཡང་མི་གཟིགས་སམ། །ཤིན་ཏུ་དྲི་གདའ་དྲི་ལྡན་རོ་བྲོ་གྱ་ནོམ་དང ། །སྐྱུ་རུམ་དག་དང་བཤོས་གཙང་ཤིན་ཏུ་ལེགས་སྦྱར་དང། །སྐྱེམས་ཀྱི་རོ་ཡང་ཁ་ར་བཅས་པ་རབ་སྦྱར་བ། །འདི་ལའང་མི་གཟིགས་པར་ནི་ལྷ་ཁྱོད་གང་དུ་བཞུད། །གྲང་བའི་དུས་ན་བྱུག་པ་དྲོ་བ་དམ་པ་དང ། །ཚ་བའི་དུས་ན་ཙནྡན་སྤྲུལ་གྱི་སྙིང་པོ་དང ། །ཀ་ཤི་པ་ཡི་ན་བཟའ་བཟང་པོ་མང་པོ་དང ། །དེ་དག་ལ་ཡང་མི་གཟིགས་ལྷ་ཁྱོད་གང་དུ་བཞུད། །ལྷ་ཡུལ་དག་ན་ལྷ་རྣམས་དག་ནི་ཅི་འདྲ་བར། །འདོད་པའི་ཡོན་ཏན་ལྔ་པོ་འདི་དག་རབ་འབྱོར་པ། །དགའ་ཞིང་བདེ་དང་ལྡན་ལ་དགྱེས་པར་རོལ་མཛད་དེ། །དེ་ནས་ཤཱཀྱའི་དམ་པ་ནགས་ཚལ་བཞུད་པར་མཛོད། ། བྱང་ཆུབ་སེམས་དཔས་སྨྲས་པ། འདུན་པ་ངས་ནི་བསྐལ་པ་མཐའ་ཡས་དཔག་ཏུ་མེད་པར་གཟུགས་དང་སྒྲ་དང་དྲི་དང་རོ་དང་རེག་དང་མི་དང་ལྷ་ཡི་འདོད་པ་རྣམ་པ་སྣ་
175a
༄#། །ཚོགས་སྤྱད་ཀྱང་ངོམས་པར་གྱུར་པ་མེད། །རྒྱལ་པོའི་སྲས་མཆོག་གྱུར་ཏེ་དབང་ཕྱུག་བྱས་ཤིང་གང་ཚེ་གླིང་བཞི་དག་ཏུ་འཁོར་ལོས་བསྒྱུར་བའི་རྒྱལ་པོར་གྱུར་ནས་རིན་ཆེན་སྣ་བདུན་ལྡན་ཞིང་བུད་མེད་ནང་ན་འདུག་པ་དང ། །སུམ་ཅུ་རྩ་གསུམ་དབང་དང་འཐབ་བྲལ་རབ་ཀྱི་ལྷ་དབང་བྱས་ཤིང་དེ་དག་ནས་ནི་ཤི་འཕོས་འདི་འོངས་སྤྲུལ་པའི་ལྷ་ཡི་ནང་ན་ཡིད་འོང་དཔལ་ལྡན་དམ་པ་ང་ཡིས་སྔོན་ཆད་སྤྱད། །ལྷ་ཡི་གནས་སུ་དབང་སྒྱུར་བདུད་ཀྱི་དབང་པོ་བྱས་ཤིང་འདོད་པ་འབྱོར་པ་མཆོག་ལ་སྤྱད་ཀྱང་ངོམས་མ་གྱུར་ན་ད་ཅི་དམན་པ་འདི་ལ་བསྟེན་པས་ང་ངོམས་འགྱུར་རམ་དེ་ནི་གནས་མིན་ནོ། །གཞན་ཡང་འདུན་པ་ང་ནི་སྡུག་བསྔལ་མྱ་ངན་དགོན་པའི་འཁོར་བར་གནས་པ་ཉོན་མོངས་གདུག་པས་དཀྲུགས་ཤིང་ཉམ་ངས་རྟག་ཏུ་ཁྱེར་ཏེ་མགོན་མེད་སྐྱབས་མེད་ཅིང ། །གཏི་མུག་མ་རིག་མུན་པ་དག་ན་རྒ་དང་ན་དང་འཆི་བའི་འཇིགས་པ་དག་གིས་ཉེན་ལ་སྐྱེ་བའི་སྡུག་བསྔལ་དགྲ་ཡིས་ཀུན་ཏུ་གནོད་ཅིང་རྣམ་པར་གནོད་པའི་འགྲོ་བ་འདི་བལྟས་ནས། །ངས་འདིར་ཆོས་ཀྱི་གྲུ་བཟང་གཏོང་དང་ཚུལ་ཁྲིམས་བརྟུལ་ཞུགས་བཟོད་པ་བརྩོན་འགྲུས་སྟོབས་ཅན་དག་གི་ཤིང་ཚོགས་བསགས་ཏེ་སྦྱར་ནས་ལྷག་པའི་བསམ་པ་སྙིང་པོ་ལྡན་པ་རྡོ་རྗེ་
175b
ལྟ་བུས་བརྟན་པོར་གཟུངས་བཏབ་སྦྱར། །གྲུ་དེར་ང་ཉིད་ཞུགས་ནས་བདག་ཉིད་རྒལ་ཏེ་བདག་གིས་འགྲོ་བ་མཐའ་ཡས་པ་དག་འཁོར་བའི་ཆུ་བོ་འདལ་བར་ཆེ་བ་ཁྲོ་བའི་དབའ་རླབས་ལྡན་པ་འདོད་ཆགས་འཛིན་ཁྲི་ཀློང་འཁྱིལ་དགྲ་ཡིས་རྣམ་པར་དཀྲུགས་པ་རྒལ་བར་དཀའ་ལས་བསྒྲལ་ལོ་སྙམ་སྟེ་ང་སེམས་དེ་འདྲའོ། །དེ་ཕྱིར་སྲིད་མཚོ་དགྲར་བཅས་ལྟ་བའི་འཛིན་ཁྲི་དང ། །ཉོན་མོངས་སྲིན་པོ་ཡོད་པ་འདི་ལས་བདག་རྒལ་ཏེ། །བདག་ཉིད་རྒལ་བར་གྱུར་ནས་འགྲོ་བ་མཐའ་ཡས་པ། །རྒ་མེད་ཤི་མེད་ཞི་བའི་ཐང་ལ་དགོད་པར་བྱ། །དེའི་ཚེ་འདུན་པ་དེ་བས་ཀྱང་རབ་ཏུ་ངུ་ཞིང་འདི་སྐད་ཅེས་སྨྲས་སོ། །ལྷ། དེ་ལྟར་ངེས་པར་མཇད་དམ། བྱང་ཆུབ་སེམས་དཔས་སྨྲས་པ། འདུན་པ་ང་ཡིས་ངེས་པར་བྱས་པ་ཉོན། །སེམས་ཅན་དགྲོལ་ཕྱིར་ཕན་པར་བྱ་ཕྱིར་བརྩོན། །མི་གཡོ་ལས་ཀྱང་མི་གཡོ་གནོད་པ་མེད། །རི་རྒྱལ་ལྷུན་པོ་ལྟ་བུར་བརྟན་མི་གཡོ། །འདུན་པས་སྨྲས་པ། ཇོ་ཇོའི་ངེས་པ་ཅི་འདྲ་བ་ཞིག་ལགས། བྱང་ཆུབ་སེམས་དཔས་སྨྲས་པ། རྡོ་རྗེའི་གནམ་ལྕགས་དགྲ་སྟ་མདུང་ཐུང་མདའ་ཆར་དང ། །ལྕགས་བསྐོལ་གློག་གི་ཚོགས་ལྟར་རབ་ཏུ་འབར་བ་དང ། །རི་རྩེ་ཀུན་ཏུ་འབར་བ་མགོ་སྟེང་རབ་འབབ་ཀྱང ། །ང་ནི་ཁྱིམ་ལ་འདོད་པ་ཕྱིར་ཡང་མི་སྐྱེད་དོ། །དེའི་ཚེ་ལྷའི་བུ་ནམ་མཁའ་ལ་
176a
༄#། །འཁོད་པ་དག་གིས་ཅ་ཅོ་དང ། ག་ཞའི་སྒྲ་བརྒྱ་སྟོང་ཕྱུང་སྟེ་མེ་ཏོག་གི་ཆར་ཡང་ཕབ་ནས་ཚིགས་སུ་བཅད་པ་འདི་དག་སྨྲས་སོ། །ཡུལ་རྣམས་ལ་ནི་ཡིད་ཀྱང་མ་ཆགས་ཤིང ། །སེམས་ཅན་དག་པ་སྙིང་རྗེ་སྙིང་བརྩེར་ལྡན། །བློ་གྲོས་མཆོག་ལྡན་རྒྱལ་གྱུར་རྒྱལ་གྱུར་ཅིག་།མགོན་པོ་འགྲོ་ལ་མི་འཇིགས་སྦྱིན་མཛད་པ། །མཁའ་ལ་རྡུལ་ནག་དུ་བ་མཇུག་རིང་དག་།མི་ཆགས་བཞིན་དུ་སྐྱེས་མཆོག་ཐུགས་མི་ཆགས། །དྲི་མེད་ཡུལ་གྱི་བདེ་བས་མི་གོས་ཏེ། །ཆུ་ལས་པདྨ་ཇི་ལྟར་འཕགས་པ་བཞིན། །དགེ་སློང་དག། དེ་ནས་ལྷའི་བུ་ཞི་བའི་བློ་གྲོས་དང ། ལྷའི་བུ་རྩེ་བ་བཀོད་པས་བྱང་ཆུབ་སེམས་དཔའི་ངེས་པ་རིག་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོའི་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་ཐམས་ཅད་གཉིད་ཀྱིས་ལོག་པར་བྱས་སོ། །སྒྲ་ཐམས་ཅད་ཀྱང་མི་གྲག་པར་བྱས་སོ། ། དགེ་སློང་དག་།དེ་ནས་བྱང་ཆུབ་སེམས་དཔས་གྲོང་ཁྱེར་གྱི་སྐྱེ་བོ་ཐམས་ཅད་གཉིད་ཀྱིས་ལོག་པར་རིག་།ནམ་གྱི་དགུང་ལ་བབ་པར་རིག་།སྐར་མའི་བདག་པོ་རྒྱལ་དང་ལྡན་པར་རིག་།ད་ཁོ་ན་མངོན་པར་འབྱུང་བའི་དུས་ལ་བབ་པར་རིག་ནས་འདུན་པ་ལ་སྨྲས་པ། འདུན་པ་ད་ང་སྐྱོ་བར་མ་བྱེད་པར་རྟ་བསྔགས་ལྡན་ལེགས་པར་
176b
བརྒྱན་ཏེ་མ་ཐོགས་པར་ང་ལ་བྱིན། བྱང་ཆུབ་སེམས་དཔས་ཚིག་དེ་སྐད་སྨྲས་མ་ཐག་ཏུ་དེ་ནས་སྐད་ཅིག་དེ་ཉིད་ལ་རྒྱལ་པོ་ཆེན་པོ་བཞིས་བྱང་ཆུབ་སེམས་དཔའི་ཚིག་ཐོས་ནས་རང་རང་གི་གནས་ནས་བྱུང་སྟེ་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་རང་རང་གི་བཀོད་པས་རིངས་པ་རིངས་པར་སེར་སྐྱའི་གནས་ཀྱི་གྲོང་ཁྱེར་ཆེན་པོར་འོངས་སོ། །དེ་ན་དྲི་ཟའི་བདག་པོ་རྒྱལ་པོ་ཆེན་པོ་ཡུལ་འཁོར་སྲུང་ནི། དྲི་ཟ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་སིལ་སྙན་དང་གླུ་དབྱངས་སྣ་ཚོགས་ལེན་ཅིང་ཤར་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་ཤར་ཕྱོགས་ཉིད་དུ་གནས་ནས་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ་།རྒྱལ་པོ་ཆེན་པོ་འཕགས་སྐྱེས་པོ་ནི། གྲུལ་བུམ་མུ་ཏིག་གི་དོ་ཤལ་སྣ་ཚོགས་ལག་ན་འཕྱང་བ། ནོར་བུ་རིན་པོ་ཆེ་སྣ་ཚོགས་ཐོགས་པ། སྤོས་ཆུ་སྣ་ཚོགས་ཀྱིས་གང་བའི་བུམ་པ་ཐོགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་ལྷོ་ཕྱོགས་ནས་འོངས་པར་གྱུར་ཏེ།་འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་ལྷོ་ཕྱོགས་ཉིད་དུ་གནས་ནས་བྱང་ཆུབ་སེམས་དཔའ་ལ་ཕྱག་འཚལ་
177a
༄#། །ཞིང་འདུག་གོ་།རྒྱལ་པོ་ཆེན་པོ་མིག་མི་བཟང་ནི། ཀླུ་མུ་ཏིག་གི་དོ་ཤལ་སྣ་ཚོགས་ལག་ན་འཕྱང་བ། ནོར་བུ་རིན་པོ་ཆེ་སྣ་ཚོགས་ཐོགས་པ། སྤོས་ཀྱི་ཕྱེ་མ་དང་མེ་ཏོག་གི་ཆར་གྱི་སྤྲིན་ཀུན་ནས་སློང་བའི་རླུང་དལ་ཞིང་དྲི་ཞིམ་པ་སྣ་ཚོགས་གཏོང་བ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་ནུབ་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་ནུབ་ཕྱོགས་ཉིད་དུ་གནས་ནས་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ་།རྒྱལ་པོ་ཆེན་པོ་ལུས་ངན་ནི། གནོད་སྦྱིན་ནོར་བུ་རིན་པོ་ཆེ་སྐར་མའི་འོད་ཟེར་ཐོགས་པ། ལག་ན་མར་མེ་ཐོགས་པ། སྒྲོན་མ་འབར་བ་ལག་ན་ཐོགས་པ། མདའ་གཞུང་དང ། རལ་གྲི་དང ། མདུང་ཐུང་དང ། མཚོན་རྩེ་གཉིས་པ་དང ། རྩེ་གསུམ་པ་དང ། འཁོར་ལོ་དང ། མཚོན་རྩེ་གཅིག་པ་དང ། འཕང་མདུང་ལ་སོགས་པ་མཚོན་ཆ་སྣ་ཚོགས་ཐོགས་པ། གོ་ཆ་དང་ཡ་ལད་སྲ་བ་བགོས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་བྱང་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་བྱང་
177b
ཕྱོགས་ཉིད་དུ་གནས་ནས་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ་།ལྷའི་དབང་པོ་བརྒྱ་བྱིན་ཡང་སུམ་ཅུ་རྩ་གསུམ་པའི་ལྷ་ལྷའི་མེ་ཏོག་དང ། སྤོས་དང་ཕྲེང་བ་དང ། བྱུག་པ་དང ། ཕྱེ་མ་དང ། གོས་དང ། གདུགས་དང ། རྒྱལ་མཚན་དང ། བ་དན་དང ། མེ་ཏོག་རྣ་རྒྱན་དང ། རྒྱན་ཐོགས་པ་རྣམས་དང་ལྷན་ཅིག་ཏུ་འོངས་པར་གྱུར་ཏེ།་འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་སྟེང་གི་བར་སྣང་ལ་འཁོར་དང་བཅས་ཏེ་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ་།དགེ་སློང་དག། དེ་ལྟར་འདུན་པས་བྱང་ཆུབ་སེམས་དཔའི་ཚིག་ཐོས་ནས་མིག་མཆི་མས་གང་ཞིང་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །ཇོ་ཇོ། ཁྱོད་ནི་དུས་མཁྱེན་པ། ཚོད་མཁྱེན་པ། རན་པ་མཁྱེན་པ་ལགས་ན། ད་ལྟར་ནི་བཞུད་པའི་དུས་དང་ཚོད་མ་ལགས་ན། ཅིའི་སླད་དུ་བཀའ་དེ་སྐད་སྩལ། བྱང་ཆུབ་སེམས་དཔས་སྨྲས་པ། འདུན་པ་ད་ནི་དུས་ལ་བབ་བོ། །སྨྲས་པ། ཇོ་ཇོ། གང་གི་དུས་ལ་བབ། བྱང་ཆུབ་སེམས་དཔས་སྨྲས་པ། སེམས་ཅན་རྣམས་ཀྱི་དོན་ནི་ཚོལ་བ་ན། །བྱང་ཆུབ་རྒ་ཤི་མེད་པའི་གནས་ཐོབ་ནས། །འགྲོ་བ་དགྲོལ་ཞེས་ང་ཡིས་ཡུན་རིང་ནས། །སྨོན་ལམ་བཏབ་པ་དེ་ཡི་དུས་ལ་བབ། །འདི་
178a
༄#། །ལ་འདི་ནི་ཆོས་ཉིད་དེ། །དེ་ལ་འདི་སྐད་ཅེས་བྱའོ། །ས་བླ་བ་དང་བར་སྣང་དེ་བཞིན་སྐྱོང ། །ལྷ་དབང་བརྒྱ་བྱིན་རང་གི་ཕྱོགས་དང་བཅས། །འཐབ་བྲལ་ལྷ་དང་དགའ་ལྡན་འཕྲུལ་དགའ་དང ། །གཞན་འཕྲུལ་དབང་བྱེད་ལྷ་རྣམས་བརྩོན་པར་གྱུར། །ཀླུ་རྒྱལ་ཆུ་ལྷ་དང་ནི་གཟི་ཅན་དང ། །མ་དྲོས་པ་དང་དེ་བཞིན་རྒྱ་མཚོ་ཡང ། །མི་མཆོག་མངོན་པར་བྱུང་བའི་དུས་བབ་པས། །དེ་དག་རྣམས་ཀྱང་མཆོད་ཕྱིར་བརྩོན་པར་གྱུར། །གང་དག་གཟུགས་ན་སྤྱོད་པའི་ལྷ་རྣམས་དང ། ། རྟག་ཏུ་བསམ་གཏན་སྤྱོད་ཡུལ་རབ་ཞི་སྤྱད། །དེ་དག་རྣམས་ཀྱང་འཇིག་རྟེན་གསུམ་མཆོད་པ། །མི་མཆོག་དེ་ལ་མཆོད་ཕྱིར་མངོན་པར་བརྩོན། །སྔོན་སྤྱད་སྤྱོད་ཚེ་གྲོགས་པོར་གྱུར་པ་ཡི། །བྱང་ཆུབ་སེམས་དཔའ་ཕྱོགས་བཅུར་ལྷགས་པ་ཡང ། །རྒྱལ་བ་མངོན་པར་འབྱུང་བ་ལྟ་བྱེད་ཅིང ། །རྗེས་སུ་མཐུན་པས་མཆོད་པ་བྱ་སྙམ་བྱེད། །གསང་བའི་བདག་པོ་བདག་ཉིད་ཆེན་པོ་དེ། །རྡོ་རྗེ་འབར་ཐོགས་ནམ་མཁའི་དཀྱིལ་ན་གནས། །ལུས་ལ་གོ་བགོས་སྟོབས་བརྩོན་རྩལ་དང་ལྡན། །གསང་བ་ལག་ན་རྡོ་རྗེ་འབར་བ་ཐོགས། །ལྷའི་བུ་ཉི་མ་ཟླ་བ་དེ་གཉིས་ཀྱང ། །གཡས་དང་གཡོན་ན་རབ་ཏུ་གནས་པར་གྱུར། །སོར་མོ་བཅུ་ཡི་ཐལ་མོ་
178b
སྦྱར་བྱས་ཏེ། །མངོན་པར་འབྱུང་ལ་རྗེས་སུ་རྟོག་པར་བྱེད། །སྐར་མ་རྒྱལ་དེ་འཁོར་དང་བཅས་པ་ཡང ། །རང་གི་ལུས་ནི་རྒྱ་ཆེན་སྦྲུལ་བྱས་ཏེ། །མི་ཡི་དམ་པ་དེ་ཡི་མདུན་འདུག་ནས། །ཡིད་དུ་འོང་བའི་སྒྲ་ནི་རབ་འབྱིན་ཏེ། །སྐར་མ་རྒྱལ་ལྡན་བཞུད་པའི་དུས་ལ་བབ། །དོ་མོད་ཁྱོད་དགེ་བཀྲ་ཤིས་ཐམས་ཅད་གྲུབ། །བདག་ཀྱང་ཁྱོད་དང་ཐབས་ཅིག་མཆི་བར་བགྱི། །འདོད་ཆགས་སེལ་བ་བར་ཆད་འབྱུང་མི་འགྱུར། །ལྷའི་བུ་ཡང་དག་སྐུལ་པོས་བསྐུལ་བྱས་པ། །སྟོབས་དང་བརྩོན་འགྲུས་འཕགས་པ་མྱུར་དུ་བཞེངས། །སྡུག་བསྔལ་ཉེན་པའི་སེམས་ཅན་ཐམས་ཅད་སྒྲོལ། །ད་ནི་མངོན་པར་འབྱུང་བའི་དུས་ལ་བབ། །ལྷ་རྣམས་བྱེ་བ་སྟོང་ཕྲག་མང་པོ་ཡང ། །ཡིད་འོང་མེ་ཏོག་ཆར་པ་འབེབས་ཤིང་ལྷགས། །དེ་ནི་སྐྱིལ་མོ་ཀྲུང་བཅས་མཆོག་ལ་འདུད། །ལྷ་ཡིས་བསྐོར་ཅིང་མཛེས་ལ་གཟི་བརྗིད་འབར། །གྲོང་ཁྱེར་ན་ནི་སྐྱེས་པ་བུད་མེད་ཁྱེའུ་དང་བུ་མོ་གང་ཡོད་པ། །དེ་དག་ཐམས་ཅད་ཡིད་ངལ་གྱུར་ནས་ཉལ་ཏེ་སྤྱོད་ལམ་རྣམས་ལས་ཉམས། །རྟ་དང་གླང་པོ་བ་ལང་ནེ་ཙོ་ཁྲུང་ཁྲུང་རྨ་བྱ་རི་སྐེགས་རྣམས། །དེ་དག་རྣམས་ཀྱང་ཡིད་ངལ་མྱུར་དུ་ཉལ་ཏེ་དེ་དག་གཟུགས་མི་མཐོང ། །ཤཱཀྱའི་བུ་གང་རྡོ་རྗེ་སྲ་བ་མཚོན་ཆ་རྩེ་གཉིས་ཐོགས་བཀོད་དང ། །གླང་ཆེན་རྟ་
179a
༄#། །དང་ཤིང་རྟ་རྟ་བབས་མཆོག་དྲུང་བཀོད་པ་དེ་དག་ཉལ། །རྒྱལ་པོ་རྒྱལ་བུ་རྒྱལ་པོའི་སྐྱེ་བོ་ཀུན་ཀྱང་གཉིད་ཀྱིས་ལོག་པར་གྱུར། །བུད་མེད་ཚོགས་རྣམས་གཉིད་ལོག་གོས་བྲལ་གཅེར་བུར་གྱུར་ཀྱང་ཡོང་མ་ཚོར། །དེ་ནི་ཚངས་དབྱངས་ཡིད་དུ་འོང་ཚིག་ཀ་ལ་པིངྐའི་སྒྲ་དབྱངས་ཀྱིས། །ནམ་ཕྱེད་འདས་ཏེ་ནམ་གྱི་གུང་ལ་བབ་ནས་འདུན་པ་དེ་ལ་སྨྲས། །འདུན་པ་རྟ་ཕོ་བསྔགས་ལྡན་བཟང་པོ་ལེགས་བརྒྱན་ལེགས་པར་ང་ལ་བྱིན། །གལ་ཏེ་ང་ལ་བྱམས་པར་སེམས་ན་བགེགས་མ་བྱེད་པར་མྱུར་དུ་བྱིན། །འདུན་པས་ཚིག་ཐོས་མཆི་མས་མིག་གང་རང་གི་ཇོ་བོ་དེ་ལ་སྨྲས། །སེམས་ཅན་ཁ་ལོ་སྒྱུར་མཆོག་གར་བཞུད་བཅིབས་པས་ཁྱོད་ལ་ཅི་ཞིག་བགྱི། །དུས་མཁྱེན་ཅིང་ནི་ཚོད་མཁྱེན་ཆོས་སྤྱོད་གང་དུའང་གཤེགས་པའི་དུས་མ་ལགས། །ཁྱོད་ཀྱི་སྒོ་བཀུམ་གཏན་པ་དམ་སྩལ་སུའང་ཆབ་སྒོ་འབྱེད་མི་འགྱུར། །བརྒྱ་བྱིན་གྱི་ནི་ཡིད་ཀྱི་སེམས་པའི་དབང་གིས་སྒོ་ཡང་བྱེ་བར་གྱུར། །འདུན་པས་དེ་འདྲ་མཐོང་ནས་དགའ་ཞིང་སྡུག་བསྔལ་དེ་ནི་མཆི་མ་འཁོར། །ཀྱི་ཧུད་བདག་གྲོགས་སུ་ཡོད་ཇི་ལྟར་བྱ་ཞིང་ཕྱོགས་ནི་གར་རྒྱུག་སྙམ། །གཟི་བརྗིད་ལྡན་པས་དྲག་ཤུལ་ཅན་གྱི་ཚིག་སྨྲས་བརྒྱ་བྱིན་འབའ་ཞིག་ཐོས། །ཡན་ལག་
179b
བཞི་ལྡན་དཔུང་དང་བཅས་པ་འདི་ཡང་འདི་ན་ཅི་ཞིག་བྱེད། །རྒྱལ་པོ་རྒྱལ་བུ་རྒྱལ་པོའི་སྐྱེ་བོ་དེ་དག་རྣམས་ཀྱིས་འདི་མ་ཚོར། །བུད་མེད་ཚོགས་ཀྱང་གཉིད་ལོག་ལྷ་རྣམས་ཀྱིས་ནི་གྲགས་ལྡན་གཉིད་ལོག་བྱས། །ཀྱི་ཧུད་འདི་ཡིས་སྔོན་ཆད་བསམ་པའི་སྨོན་ལམ་ཐམས་ཅད་གྲུབ་གྱུར་ཅིག་།ལྷ་སྟོང་བྱེ་བ་དེ་དག་དགའ་བའི་ཡིད་ཀྱིས་འདུན་པ་དེ་ལ་སྨྲས། །འདུན་པ་རྟ་མཆོག་བསྔགས་ལྡན་ལེགས་པར་ཕུལ་ཅིག་འདྲེན་པ་སྐྱོ་མ་བྱ། །ལྷ་དང་ལྷ་མིན་དག་གིས་རྔ་དུང་རྫ་རྔ་རོལ་མོ་ཁྲག་ཁྲིག་བྱས། ། འོན་ཀྱང་ལྷས་བསྙལ་བ་ཡི་གྲོང་ཁྱེར་མཆོག་འདི་སད་པར་ཡོད་མ་གྱུར། །འདུན་པ་བར་སྣང་དྲི་མ་མེད་ལ་ལྷ་ཡི་འོད་རབ་མཛེས་ལ་ལྟོས། །ཁྱོད་ཀྱིས་བྱང་ཆུབ་སེམས་དཔའ་བྱེ་བ་མང་པོ་མཆོད་ཕྱིར་གང་ལྷགས་ལྟོས། །བདེ་སོགས་ཁྱིམ་ཐབ་བརྒྱ་བྱིན་དཔུང་བསྐོར་སྒོ་ན་མཛེས་པར་འདུག་པ་དང ། །ལྷ་དང་ལྷ་མིན་མིའམ་ཅི་ཚོགས་གང་དག་མཆོད་ཕྱིར་ལྷགས་ལ་ལྟོས། །འདུན་པ་དེས་ཀྱང་ལྷ་ཚིག་དེ་ཐོས་བསྔགས་ལྡན་རྟ་ཕོ་དེ་ལ་སྨྲས། །སེམས་ཅན་ཁ་ལོས་གྱུར་མཆོག་འདི་བཞུད་ཁྱོད་ནི་རྟ་སྐད་སྒྲོག་ཅིང་ཤོག་།དེ་ཡིས་དབྱར་གྱི་ཁ་དོག་ཅན་དེ་རྨིག་པ་གསེར་གྱིས་བརྒྱན་བྱས་ནས། །ཡིད་མི་དགའ་བཞིན་ཡོན་ཏན་རྒྱ་མཚོ་མངའ་བའི་བཅིབས་པར་
180a
༄#། །དབུལ་བ་བྱས། །མཚན་མཆོག་མངའ་ཞིང་ཕན་མཛད་ཁྱོད་ཀྱི་ཆིབས་འདི་རིགས་བཟང་དགེ་བ་ལགས། །ཁྱོད་ཀྱིས་སྔོན་ཆད་གང་དགོངས་སྨོན་ལམ་དེ་གྲུབ་གྱུར་ཅིག་གཤེགས་སུ་གསོལ། །གང་དག་བགེགས་བགྱིད་ཞི་བར་གྱུར་ཅིག་དགོངས་པའི་བརྟུལ་ཞུགས་གྲུབ་གྱུར་ཅིག་།འགྲོ་བ་ཀུན་ལ་བདེ་དང་མཐོ་རིས་པ་དང་ཞི་བ་སྦྱིན་གྱུར་ཅིག་།དེ་ནི་གང་ཚེ་མལ་ནས་ལངས་ཚེ་ས་འདི་ཐམས་ཅད་རྣམ་དྲུག་གཡོས། །རྟ་རྒྱལ་དམ་པ་ཟླ་བ་ཉ་བའི་དཀྱིལ་འཁོར་འདྲ་བ་དེ་ལ་ཞོན། ། སྐྱོང་བའི་ལག་པ་རྣམ་དག་པདྨ་དྲི་མེད་འདྲ་བས་རྟ་མཆོག་བཏེག་།བརྒྱ་བྱིན་ཚངས་པ་དེ་གཉིས་དེ་ཡི་མདུན་ན་ལམ་ནི་འདི་ཞེས་སྟོན། །དེ་ཡིས་གསལ་བ་དྲི་མ་མེད་པའི་འོད་བཏངས་རྣམས་སྣང་བས་གསལ། །དེ་ཚེ་ངན་སོང་ཀུན་ཞི་སེམས་ཅན་བདེ་ལྡན་ཉོན་མོངས་གནོད་པ་མེད། །མེ་ཏོག་ཆར་བབ་སིལ་སྙན་བྱེ་བ་སྒྲ་བྱུང་ལྷ་དང་ལྷ་མིན་བསྟོད། །ཐམས་ཅད་དགའ་དང་ལྡན་ནས་གྲོང་ཁྱེར་མཆོག་ལ་བསྐོར་བ་བྱས་ཏེ་དོང ། །སྐྱེས་བུ་ཆེན་པོ་སོང་བས་གྲོང་ཁྱེར་དམ་པའི་ལྷ་ཡང་ཡིད་ནི་དམན་པར་གྱུར་ནས་འོངས། །མདུན་དུ་འདུག་ནས་སྙིང་རྗེར་ངུ་བའི་ཡིད་ལྡན་དེ་ཡིས་པདྨ་འདྲ་བའི་བཞིན་ལ་སྨྲས། །ཁྱོད་བྲལ་སྒྲེན་མོར་མི་མཛེས་ས་འདི་
180b
གྲོང་ཁྱེར་ཐམས་ཅད་མུན་པས་ཀུན་ཏུ་དཀྲུགས་པར་གྱུར། །དོ་མོད་ཁྱོད་ཀྱིས་ཁབ་འདི་སྤངས་ན་བདག་ལ་དགའ་བདེ་བགྱིད་པ་འགའ་མ་མཆིས། །སླན་ཆད་བྱ་ཚོགས་རྣམས་ཀྱི་སྒྲ་དག་དང ། །གྲགས་པ་མཐའ་ཡས་ཁྱོད་ན་སིད་བགྱིད་པའི། །བཙུན་མོའི་འཁོར་གྱི་གླིང་བུ་སྙན་པ་དང ། །བཀྲ་ཤིས་སྒྲ་དང་གླུ་སྒྲ་ཐོས་མ་འགྱུར། །ཉོན་མོངས་བཅོམ་པ་ཁྱོད་ནི་གཤེགས་གྱུར་ན། །གདུགས་མཚན་ཁྱོད་ལ་མཆོད་པ་བགྱིད་པ་ཡི། །ལྷ་དང་གྲུབ་ཚོགས་སླན་ཆད་མཐོང་མི་འགྱུར། །ལྷ་ཡི་དྲི་ཡང་སླན་ཆད་སྣོམ་མི་འགྱུར། །ཕྲེང་བ་བཏགས་ནས་ཞག་ལོན་གྱུར་པ་ལྟར། །ཁྱོད་ཀྱིས་དོ་མོད་ཕོ་བྲང་དེ་བཞིན་སྤངས། །ཁྱོད་བཞུད་སླན་ཆད་གཟི་བརྗིད་དཔལ་མ་མཆིས། །གར་ལ་ལྟ་བ་བཞིན་དུ་བདག་ལ་གདའ། །གྲོང་ཁྱེར་ཀུན་གྱི་བྱིན་དང་སྟོབས་འཕྲོག་སྟེ། །འདི་ནི་དགོན་པ་འདྲ་ཞིང་མཛེས་མ་ལགས། །གང་གིས་ས་འདིར་འཁོར་ལོ་སྟོབས་ཅན་དུ། །ལུང་བསྟན་དྲང་སྲོང་ཚིག་ནི་དེང་རྫུན་གྱུར། །བསོད་ནམས་སྡོང་པོ་ཆེན་པོ་ཁྱོད་བྱུང་ན། །ས་འདིར་ཤཱཀྱའི་སྟོབས་ནི་སྟོབས་མ་མཆིས། །རྒྱལ་པོའི་ཕོ་བྲང་འཁོར་འདིར་གདུང་ཡང་འཆད། །ཤཱཀྱའི་ཚོགས་འདི་བསམ་པ་རབ་ཏུ་ཉམས། །དྲི་མེད་དྲི་བྲལ་ཁྱོད་ནི་གར་བཞུད་པར། །བདག་ཀྱང་ཁྱོད་དང་ལྷན་ཅིག་མཆི་བར་བགྱི། །
181a
༄#། །འོན་ཀྱང་ཐུགས་བརྩེ་ཐུགས་རྗེ་བསྐྱེད་ནས་ནི། །ཁྱོད་ཀྱིས་ཕོ་བྲང་འདི་ལ་གཟིགས་སུ་གསོལ། །བློ་གྲོས་ལྡན་པ་ཁྱིམ་ལ་བལྟས་ནས་ནི། །སྙན་པའི་ང་རོས་འདི་སྐད་ཚིག་སྨྲས་ཏེ། །སྐྱེ་འཆི་མཐར་འབྱིན་མ་ཐོབ་བར་དུ་ནི། །ང་ཡིས་སེར་སྐྱའི་གྲོང་ཁྱེར་འཇུག་མི་བྱ། །རྒ་ཤི་མེད་པའི་གནས་མཆོག་འཆི་མེད་པ། ། བྱང་ཆུབ་དམ་པ་ང་ཡིས་མ་ཐོབ་པར། །ང་ནི་སེར་སྐྱའི་གནས་སུ་མངོན་ཕྱོགས་ཏེ། །འགྲེང་འདུག་ཉལ་དང་འཆག་པ་མི་བྱ་འོ། །གང་ཚེ་འགྲོ་བའི་གཙོ་བོ་པ། །བྱང་ཆུབ་སེམས་དཔའ་དེ་བྱུང་ཞིང ། །དེ་ནི་མཁའ་ལ་འགྲོ་བའི་ཚེ། །ལྷ་ཡི་བུ་མོ་རྣམས་ཀྱིས་བསྟོད། །འདི་ནི་སྦྱིན་པའི་གནས་ཆེན་ཡིན། །འདི་ནི་བསོད་ནམས་ཞིང་ཆེན་ཡིན། །འདི་ནི་བསོད་ནམས་འདོད་པའི་ཞིང ། །འཆི་མེད་འབྲས་བུ་སྦྱིན་མཛད་པ། །སེམས་ཅན་རྣམས་ལ་ཐུགས་རྗེ་བས། །འདི་ཡིས་བསྐལ་བ་བྱེ་མང་དུ། །སྦྱིན་དང་དུལ་དང་སྡོམ་པ་ཡིས། །འདིས་ནི་བྱང་ཆུབ་ཡང་དག་བསྒྲུབས། །འདི་ཡི་ཚུལ་ཁྲིམས་ཡོངས་སུ་དག་།བརྟུལ་ཞུགས་བཟང་ཞིང་སྤྱོད་མ་ཉམས། །འདོད་པ་དག་དང་ལོངས་སྤྱོད་རྣམས། །དོན་དུ་མི་གཉེར་ཚུལ་ཁྲིམས་སྲུང ། །སེམས་ཅན་ཡོངས་སུ་བསྐྱབ་པའི་ཕྱིར། །འདི་ནི་རྟག་ཏུ་བཟོད་པ་གསུང ། །ཡན་ལག་
181b
ཉིད་ལག་བཅད་གྱུར་ཀྱང ། །ཁྲོ་བ་མི་མངའ་སྡང་མི་མངའ། །འདི་ནི་རྟག་ཏུ་བརྩོན་འགྲུས་ལྡན། །བསྐལ་པ་བྱེ་བར་སྐྱོ་མི་མངའ། །འདི་ཡིས་བྱང་ཆུབ་ཡང་དག་བསྒྲུབས། ། མཆོད་སྦྱིན་དག་ནི་བྱེ་བ་མཛད། །འདི་རྟག་བསམ་གཏན་བསམ་གཏན་པ། །ཐུགས་ནི་ཞི་ཞིང་རབ་ཏུ་ཞི། །ཉོན་མོངས་ཐམས་ཅད་བསྲེགས་ནས་ནི། །སེམས་ཅན་བྱེ་བ་འགྲོལ་བར་འགྱུར། །འདི་ནི་ཤེས་རབ་ཆགས་མི་མངའ། །རྟོག་དང་རྣམ་པར་རྟོག་ལྡན་ལས། །གྲོལ་ཞིང་ཐུགས་ནི་རྣམ་གྲོལ་ཏེ། །རང་བྱུང་བ་ཡི་རྒྱལ་བར་འགྱུར། །འདི་ནི་རྟག་ཏུ་བྱམས་ཐུགས་ལྡན། །ཐུགས་རྗེ་ཡི་ནི་ཕ་རོལ་བྱོན། །དགའ་དང་བཏང་སྙོམས་བསམ་གཏན་པ། །ཚངས་པའི་ལམ་གྱི་ཆོ་ག་མཁྱེན། །འདི་ནི་ཤིན་ཏུ་ལྷ་ཡི་ལྷ། །ལྷ་རྣམས་ཀྱིས་ནི་མཆོད་པའི་འོས། །ཐུགས་དགེ་དག་ཅིང་དྲི་མ་བྲལ། །ཡོན་ཏན་ཁྲག་ཁྲིག་ཕ་རོལ་བྱོན། །འཇིགས་པས་ཉེན་པ་རྣམས་ཀྱི་སྐྱབས། །མིག་མེད་རྣམས་ཀྱི་སྒྲོན་མ་སྟེ། །གནོད་པ་རྣམས་ཀྱི་སྐྱབས་ཀྱང་ལགས། །རིང་ནས་ན་བའི་སྨན་པ་ལགས། །རྒྱལ་པོ་དམ་པ་ཆོས་ཀྱི་རྒྱལ། །དབང་པོ་ལྟ་བུར་སྤྱན་སྟོང་མངའ། །ཚངས་པ་ལྟ་བུར་རང་བྱུང་གྱུར། །ལུས་དང་སེམས་ནི་རབ་སྦྱངས་པ། །བརྟན་ཞིང་ཤེས་རབ་རབ་ཏུ་མང ། །དཔའ་ཞིང་ཐུགས་ནི་འདོད་ཆགས་བྲལ། །ཉོན་མོངས་འཇོམས་པས་
182a
༄#། །དཔའ་བོ་སྟེ། །མ་རྒྱལ་དགྲ་ལས་རྒྱལ་བ་ལགས། །སེངྒེ་ལྟ་བུར་བསྙེངས་པ་སྤངས། །གླང་པོ་ལྟ་བུར་རབ་དུལ་ཐུགས། །ཁྱུ་མཆོག་ལྟ་བུར་ཚོགས་ཀྱི་གཙོ། །བཟོད་དེ་འཁྲུག་པ་རབ་ཏུ་སྤངས། །ཟླ་བ་ལྟ་བུར་རབ་ཏུ་གསལ། །ཉི་མ་ལྟ་བ