rKTs


J101

(e-text produced by ADARSHA)

see text in transliteration
53.285a
༄#། །རྒྱ་གར་སྐད་དུ། ་ཨཱརྱ་དྲུ་མ་ཀི་ན་ན་ར་རཱ་ཛ་པ་རི་པྲིཙྪཱ་ནཱ་མ་མ་ཧཱ་ཡཱ་སཱུ་ཏྲ། ་བོད་སྐད་དུ། འཕགས་པ་མི་འམ་ཅིའི་རྒྱལ་པོ་སྡོང་པོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་རི་བྱ་རྒོད་ཀྱི་ཕུང་པོ་ལ་དགེ་སློང་དྲུག་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཕལ་ཆེར་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པ་བདུན་ཁྲི་ཉིས་སྟོང་ཐམས་ཅད་ཀྱང་མངོན་པར་ཤེས་པས་མངོན་པར་ཤེས་པ། གཟུངས་རབ་ཏུ་ཐོབ་པ། སྤོབས་པ་ཆགས་པ་མེད་པ། ཏིང་ངེ་འཛིན་རབ་ཏུ་ཐོབ་པ། དྲན་པ་དང ། བློ་གྲོས་དང ། རྟོགས་པ་དང ། མོས་པ་དང ། ངོ་ཚ་ཤེས་པ་དང ། ཁྲེལ་ཡོད་པ་ཕུན་སུམ་ཚོགས་པ། བསམ་པ་རྡོ་རྗེ་ལྟར་བརྟན་ཞིང་མི་ཕྱེད་པ། སངས་རྒྱས་ཀྱི་ཆོས་ཐམས་ཅད་ལ་སྦྱོར་བ་ཕུན་སུམ་ཚོགས་པ། ལྷག་པའི་བསམ་པ་ཁྱད་པར་དུ་འཕགས་པ་ལ་ཞུགས་པ། བདག་ཉིད་བྱང་ཆུབ་ཀྱི་སེམས་མི་འདོར་བ། སེམས་ཅན་གཞན་བྱང་ཆུབ་ཀྱི་སེམས་ཡང་དག་པར་འཛིན་དུ་འཇུག་པ། སྦྱིན་པ་དང ། དུལ་བ་དང ། སྡོམ་པ་དང ། དེས་པ་དང ། བཟོད་པ་དང ། སྡུག་པའི་དངོས་པོ་ཐམས་ཅད་ཡོངས་སུ་གཏོང་བ་དང ། ཡོངས་སུ་བསྔོ་བའི་ཆོ་ག་ཤེས་པ། ལུས་དང ། ངག་དང ། སེམས་དང ། ཚུལ་ཁྲིམས་ཀྱི་རྒྱན་གྱིས་ལེགས་པར་བརྒྱན་པ། སེམས་ཅན་ཐམས་ཅད་ལ་སེམས་སྙོམས་པ་དང ། བཟོད་པ་དང་དེས་པའི་སྟོབས་ཀྱི་གོ་ཆ་ཤིན་དུ་བགོས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གྲངས་མེད་པར་བརྩོན་འགྲུས་ཤིན་དུ་བརྩམས་པ།
53.285b
བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་དང ། མངོན་པར་ཤེས་པའི་ཡེ་ཤེས་ཀྱིས་རྣམ་པར་རོལ་པ། ཚིག་ཐམས་ཅད་རབ་ཏུ་དབྱེ་བ་ལ་སྤོབས་པ་ཆགས་པ་མེད་པའི་ཤེས་རབ་དང ། ཡེ་ཤེས་ལ་མཁས་པ། རི་རབ་ཀྱི་རི་ལྟར་སེམས་གཡོ་བ་མེད་པ། ས་དང ། ཆུ་དང ། མེ་དང ། རླུང་དང ། རི་ལྟར་རྗེས་སུ་ཆགས་པ་དང ། ཁོང་ཁྲོ་བ་དང་བྲལ་བ་བྱམས་པ་ཆེན་པོ་ལ་གནས་ཏེ་འོད་ཟེར་ཐོགས་པ་མེད་པ། སྙིང་རྗེ་ཆེན་པོ་ལ་གནས་ཏེ་སེམས་ཅན་ཐམས་ཅད་ཀྱི་བྱ་བ་གཅིག་ལ་བརྩོན་པ། དགའ་བ་ཆེན་པོ་ལ་གནས་ཏེ་ཆོས་ལ་དགའ་ཞིང་མགུ་བ་དང་ལྡན་པ། བཏང་སྙོམས་ཆེན་པོ་ལ་གནས་པར་བརྩོན་པ། གཉིས་སུ་མེད་པའི་ཡེ་ཤེས་རབ་ཏུ་ཐོབ་པ། འཇིག་རྟེན་གྱི་ཆོས་བརྒྱད་པོ་རྙེད་པ་དང ། མ་རྙེད་པ་དང ། གྲགས་པ་དང ། མ་གྲགས་པ་དང ། བསྟོད་པ་དང ། སྨད་པ་དང ། བདེ་བ་དང ། སྡུག་བསྔལ་ལས་རབ་ཏུ་འདས་པ། ཕ་རོལ་རྒོལ་བ་ངན་པའི་ཚོགས་ཅན་གྱི་ཚོགས་ཐམས་ཅད་ཀུན་དུ་རབ་ཏུ་འཇོམ་པ། བདུད་དང་ཕྱིར་རྒོལ་བ་བཅོམ་པ། ཨུ་དུམ་བ་རའི་མེ་ཏོག་མཐོང་བ་ལྟར་ཤིན་དུ་འབྱུང་བར་དཀའ་བ། གསོལ་བ་མ་བཏབ་པར་སེམས་ཅན་ཐམས་ཅད་ལ་དགེ་བའི་བཤེས་གཉེན་བྱེད་པ། རབ་ཏུ་ཡོངས་སུ་མྱ་ངན་ལས་འདའ་བའི་བཤེས་གཉེན་བྱེད་པ། སེང་གེའི་སྒྲ་ཆེན་པོ་སྒྲོགས་པ། སངས་རྒྱས་ཀྱི་ཆོས་ཟབ་མོ་དང་མི་འཇིགས་པ་སྒྲོགས་པ། དེ་བཞིན་གཤེགས་པའི་ཕྱག་རྒྱས་བཏབ་པ། མི་འཁྲུགས་པར་ཕྱད་པར་ལུང་སྟོན་པ། ཇི་ལྟར་སྨྲས་པ་དེ་བཞིན་བྱེད་པ། དེ་ཁོ་ནའི་ཆོས་ཀྱི་ཚུལ་ལ་བརྩོན་པ་འོད་ཀྱིས་ཉི་མ་དང་ཟླ་བ་མོག་མོག་པོར་བྱེད་པ།
53.286a
ཕྱོགས་བཅུར་སྒྲ་བསྒྲགས་པ། སངས་རྒྱས་ཀྱི་ཆོས་ཐམས་ཅད་ལ་སེམས་པ། ཆོས་དཀོན་མཆོག་གི་མཛོད་ཡང་དག་པར་འཛིན་པ། དཀོན་མཆོག་གསུམ་གྱི་རིགས་མི་གཅོད་པར་ཡིད་ལ་བྱེད་པ། སངས་རྒྱས་ཀྱི་ཞིང་མཐའ་ཡས་པ་འདའ་བ་ལ་མཁས་པ། ཤིན་དུ་རྣམ་པར་ཕྱེ་བ་རྣམ་པར་འབྱེད་པ་གནས་པའི་བློ་དང་ལྡན་པ་མཐོང་བ་དང ། ཐོས་པ་དོན་ཡོད་པས་རྣམ་པར་གནོན་པ། རྟག་པར་རྒྱུན་དུ་སེམས་ཅན་ཡོངས་སུ་སྨིན་པར་བྱེད་པ་ལ་བརྩོན་པ། ཤེས་རབ་དང་ཐབས་ལ་མཁས་པའི་མཆོག་ཐོབ་པ། སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པས་ཅི་རིགས་པར་ཆོས་སྟོན་པ། སེམས་ཅན་ཐམས་ཅད་ཀྱི་སྤྱོད་པ་ལ་ལྟ་བའི་ཆོ་ག་ལ་མཁས་པ། སེམས་ཅན་ཐམས་ཅད་ཀྱི་འཇུག་པ་དང་བཏག་པ་ལ་བདེ་བླག་དུ་མཁས་པ། མི་འཇིགས་པ་ཆེན་པོས་འཇིགས་པ་མེད་པ། རྒ་བ་དང ། ན་བ་དང ། འཆི་བ་དང ། ཉོན་མོངས་པ་རབ་ཏུ་ཞི་བར་བྱེད་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་ལ་དགེ་བའི་རྩ་བ་བསྐྲུན་པ། མཚན་དང་དཔེ་བྱད་བཟང་པོ་ཡོངས་སུ་རྫོགས་པའི་བསོད་ནམས་དང ། ཡེ་ཤེས་ཀྱི་ཚོགས་བསགས་པ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་ཆོས་ཐམས་ཅད་ལ་མོས་པ་ལ། སྨོན་པ་མེད་པ་སེམས་ཅན་དང ། ཆོས་ཐམས་ཅད་སྒྱུ་མ་དང་སྨིག་རྒྱུ་དང ། རྨི་ལམ་དང ། ཆུ་ཟླ་དང ། མིག་ཡོར་དང ། བྲག་ཆ་དང ། ནམ་མཁའ་དང་མཚུངས་པར་མོས་པ། སྒྲ་སྐད་ཐམས་ཅད་ངེས་པའི་ཚིག་གིས་སྟོན་པའི་ཡེ་ཤེས་ལ་མཁས་པ། ཆོས་དང ། དོན་དང་ངེས་པའི་ཚིག་དང ། སྤོབས་པ་སོ་སོ་ཡང་དག་པར་རིག་པ་ཐོབ་པ། འཇིག་རྟེན་ལས་འདས་པའི་ཤེས་རབ་ཀྱི་དབང་པོ་མངོན་སུམ་དུ་གྱུར་པ། ཤུགས་ཆེན་པོ་འཛིན་པའི་སྟོབས་བཅུ་ལ་ཉེ་བར་གྱུར་པ། ཤའི་མིག་དང ། ལྷའི་མིག་དང་ཤེས་རབ་ཀྱི་མིག་དང ། ཆོས་ཀྱི
53.286b
མིག་དང ། སངས་རྒྱས་ཀྱི་སྤྱན་སྣང་བ་ཐོབ་པ། ལམ་གྱི་ཡན་ལག་གི་ཚོགས་ཤིན་དུ་བསགས་པའི་ལམ་ཐམས་ཅད་ལ་འཇུག་པའི་ཡེ་ཤེས་ལ་མཁས་པ། བྱང་ཆུབ་སེམས་དཔའི་སྡེ་སྣོད་སྣང་བ་ལ་འཇུག་པའི་ཆོ་ག་ཤེས་པ། ཕྱིར་མི་ལྡོག་པའི་ཆོས་ཀྱི་འཁོར་ལོ་བསྐོར་བ། མཚན་ཉིད་ཀྱི་ཕྱག་བརྒྱའི་ཏིང་ངེ་འཛིན་རབ་ཏུ་ཐོབ་པ། རྡོ་རྗེ་དཀྱིལ་འཁོར་གྱི་ཏིང་ངེ་འཛིན་ལ་འཇུག་པའི་ཡེ་ཤེས་ལ་མཁས་པ། ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་མངོན་དུ་གྱུར་པ། ཆོས་དཀོན་མཆོག་གི་སྒྲོན་མ་འཛིན་པ། སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་རྣམ་པར་ལྟ་བ། སེམས་ཅན་ཐམས་ཅད་ཀྱི་སེམས་ཀྱི་བསམ་པ་ལ་རྣམ་པར་ལྟ་བར་མཁས་པ་སེམས་ཅན་ཐམས་ཅད་ལ་སངས་རྒྱས་ཀྱི་ཡེ་ཤེས་ཀྱི་བྱ་བས་སོ་སོར་ཉེ་བར་གནས་པ་རྣམ་པའི་མཆོག་ཐམས་ཅད་དང་ལྡན་པའི་ཡོན་ཏན་རིན་པོ་ཆེ་ཐམས་ཅད་ཀྱིས་བརྒྱན་པ། བསྐལ་པ་ཐམས་ཅད་དུ་བལྡགས་པ་ཡོངས་སུ་བརྗོད་ཀྱང་མཐར་མི་ཕྱིན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་དང ། དགའ་འབྱུང་དང ། ལག་ན་རིན་པོ་ཆེ་དང ། རིན་ཆེན་མེ་ཏོག་དང ། རིན་པོ་ཆེའི་ཏོག་དང ། མཐོང་དགའ་དང ། མིག་གིས་མཐོང་དགའ་དང ། མཛེས་པའི་བློ་གྲོས་དང ། དགའ་ཞིང་མཆོག་ཏུ་དགའ་བྱེད་དང ། ས་འཛིན་དང ། སྤྱན་རས་གཟིགས་དབང་ཕྱུག་དང ། མཐུ་ཆེན་ཐོབ་དང ། དཔལ་ཆེན་དང ། བདུད་ཐུལ་དང ། མེ་ཏོག་མན་དཱ་ར་བའི་དྲི་དང ། རླུང་ལྷ་དང ། བདེན་དགའ་དང ། མཉམ་ལྟ་དང ། རི་རབ་རྩེ་འཛིན་དང ། རི་རབ་བརྩེགས་དང ། རི་རབ་མཆོག་དང ། དྲ་བ་ཅན་གྱི་འོད་དང ། རྒྱལ་བའི་བློ་གྲོས་དང ། སྐྱེ་བར་ཚིམ་བྱེད་དང ། འགྲོ་བ་འཛིན་དང་ལྷའི་རྒྱལ་པོས་མཆོད་དང ། མཆོག་གི་བློ་གྲོས་དང་ཐོགས་མེད་སེམས་དང ། སྐྱ་རེང་བློ་གྲོས་དང་མི་སྐྱོབ་པ་དང ། དཔག་མེད་རིན་ཆེན་མཛོད་དང ། འོད་ཀྱི་ཏོག་དང་འོད་དཔལ་དང །
53.287a
སྒྲོན་མའི་རྒྱལ་པོ་དང ། བྱང་ཆུབ་བློ་གྲོས་དང ། འོད་ཀྱི་ཡང་དག་བརྒྱན་དང ། སྣ་ཚོགས་མེ་ཏོག་དང ། ལྷའི་རྒྱལ་པོ་དང ། ལྷའི་ཚུལ་གྱིས་ལྟ་བ་དང ། དཔུང་བཟང་དང ། ལེགས་པར་བསམ་པ་སེམས་དཔའ་དང ། འཁོར་ལོ་རབ་གནས་རྐང་པ་དང ། མི་གཡོ་རྐང་པས་རྣམ་པར་གནོན་དང ། རྡོ་རྗེའི་རྐང་པས་རྣམ་པར་གནོན་དང ། རྐང་པས་འཇིག་རྟེན་གསུམ་རྣམ་པར་གནོན་དང ། དགའ་སྤོབས་དང་སྤོབས་མྱུར་དང ། སྤོབས་པ་མི་འཆད་པ་དང ། སྤོབས་པ་བྱིན་གྱིས་བརླབས་དང ། འཇམ་སྒྲ་དང ། སེམས་ཅན་ཐམས་ཅད་ཚིམ་བྱེད་དང ། ཚངས་དབྱངས་དང ། བཟང་སྐྱོང་དང་རིན་ཆེན་འབྱུང་གནས་དང ། དེད་དཔོན་བཟང་པོ་དང ། མིས་བྱིན་དང་ཆུ་ལྷ་དང ། བྱམས་པ་དང་འཇམ་དབྱངས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུ་གྱུར་པ་ལ་སོགས་པ་བྱང་ཆུབ་སེམས་དཔའ་བདུན་ཁྲི་ཉིས་སྟོང་དང་ཐབས་གཅིག་ཏུ་བཞུགས་སོ། །གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། དེ་ལས་གཞན་པ་ལྷ་དང་ཀླུ་དང་གནོད་སྦྱིན་དང ། དྲི་ཟ་དང་ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང་ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་རྣམས་བཅོམ་ལྡན་འདས་ལ་ལྟ་བ་དང ། ཕྱག་བྱ་བ་དང་བསྙེན་བཀུར་བ་དང ། ཆོས་མཉན་པའི་ཕྱིར་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་ཞེས་བྱ་བ་འཁོར་དེ་ཉིད་དུ་འདུས་པ་དེས། བྱང་ཆུབ་སེམས་དཔའི་འཁོར་ཆེན་པོ་དེ་འདུས་པར་རིག་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ། བཅོམ་ལྡན་འདས
53.287b
ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འཇིག་རྟེན་འདས་པ་འཇིག་རྟེན་སྒྲོན་མ་མཛད། །ཁྱོད་ནི་འཇིག་རྟེན་དོན་མཛད་བློ་གྲོས་ལྡན། །སྣང་བ་བརྙེས་ཤིང་ཉོན་མོངས་དྲི་བསལ་བ། །འཇིག་རྟེན་སྣང་མཛད་ཁྱོད་ལ་ཕྱག་འཚལ་ལོ། །སྦྱིན་ལ་དགྱེས་ཤིང་སྟོབས་བཅུ་མཆོག་མངའ་བ། །དུལ་བ་འདུལ་བ་གདུལ་བའི་ཕ་རོལ་ཕྱིན། །བཅོམ་ལྡན་ལྷ་དང་མི་དང་ཀླུས་མཆོད་པ། །གདུལ་བའི་མཐར་ཕྱིན་ཁྱོད་ལ་ཕྱག་འཚལ་ལོ། །མཚན་མཆོག་འགྲོ་བ་མང་པོའི་དོན་མཛད་པ། །མདོམ་གང་འོད་ནི་གསེར་གྱི་ཁ་དོག་ལྟ། །དགེ་བའི་མཚན་གྱི་དམ་པའི་གཟུགས་མངའ་བ། །སྲིད་གསུམ་མཚུངས་མེད་ཁྱོད་ལ་ཕྱག་འཚལ་ལོ། །ཕ་རོལ་ཕྱིན་པས་གཞན་གྱི་ཚོགས་འཇོམས་ཤིང ། །ཕ་རོལ་རྒོལ་བའི་རྒོལ་འཇོམས་མི་གཡོ་བ། །སེམས་ཅན་གཞན་གྱི་སེམས་དང་སྤྱོད་ལ་མཁས། །ཐུགས་རྗེ་མཆོག་མངའ་ཁྱོད་ལ་ཕྱག་འཚལ་ལོ། །དགྲ་བཅོམ་རྒྱལ་པོ་ཉོན་མོངས་རྡུལ་བསལ་བ། །འཚོ་བ་དག་ཅིང་བརྟུལ་ཞུགས་ཚུལ་ཁྲིམས་གནས། །ལྷ་ཡི་ལྷ་མཆོག་དྲི་མེད་དྲི་མ་བྲལ། །ཕ་རོལ་ཚོགས་འཇོམས་ཁྱོད་ལ་ཕྱག་འཚལ་ལོ། །བདེ་གཤེགས་རིན་ཆེན་མཆོག་ཏུ་དགའ་མཛད་པ། །དགོན་པར་རྟག་གནས་རྟག་ཏུ་དགོན་པར་དགྱེས། །རྡུལ་སྐྱོན་གཏི་མུག་རྙོག་པ་མི་མངའ་བ། །ནམ་མཁའ་མཉམ་ཐུགས་ཁྱོད་ལ་ཕྱག་འཚལ་ལོ། །ཆུ་བོ་བཞི་རྒལ་བདེན་བཞི་བཀའ་མཆིད་གསུང ། །མིག་སྦྱིན་བདུད་རྩི་ཆོས་ཀྱི་དཀའ་མཆིད་ཅན། །འགྲོ་བའི་དོན་མཛད་འཇིག་རྟེན་གསུམ་རྒྱུ་བ། །འཁོར་ལོ་ཞབས་མངའ་ཁྱོད་ལ་ཕྱག་འཚལ་ལོ། །ལྷ་དང་མིས་མཆོད་པ་ཡི་མཐུ་བོ་ཆེ། །མགོན་པོ་ལྷ་ཡི་དབང་པོ་བདུན་འཇོམས་པ། །མི་དང་ལྷ་ཀླུ་ཚོགས་ཀྱིས་མནོད་པ་ཡི། །མི་མཆོག་དམ་པ་ཁྱོད་ལ་ཕྱག་འཚལ་ལོ། །རྟག་ཏུ་བདེ་སྡུག་དམ་པའི་ཆོས་ལ་དགྱེས། །མཉམ་ཐུགས་འགྲོ་བ་ཀུན་ལ་བྱམས་པའི་ཐུགས། །ཆོས་ལ
53.288a
མཉམ་གནས་མི་རྣམས་ཁ་ལོ་སྒྱུར། །ཡོན་ཏན་མཐར་ཕྱིན་ཁྱོད་ལ་ཕྱག་འཚལ་ལོ། །སྙན་པའི་སྒྲ་དབྱངས་རྣམ་པར་དག་དང་ལྡན། །ཚངས་པའི་སྒྲ་དབྱངས་ལྟ་བུར་འཇམ་པའི་གསུང ། །ཐམས་ཅད་དབྱངས་ཀྱི་ཡན་ལག་གསུང་ཚུལ་རྫོགས། །བདེན་པ་སྙན་གསུང་ཁྱོད་ལ་ཕྱག་འཚལ་ལོ། །སྟོང་པ་མཚན་མ་མེད་ཅིང་སྨོན་དང་བྲལ། །ཟབ་མོ་བལྟ་དཀའ་ཤིན་དུ་རྟོགས་པར་དཀའ། །ཐར་ལ་འཇུག་པར་མཁས་པ་བློ་གྲོས་ལྡན། །ཐར་པའི་ལམ་དགྱེས་ཁྱོད་ལ་ཕྱག་འཚལ་ལོ། །རྒྱུ་ལ་རྟེན་པ་མཁས་པའི་བཅོམ་ལྡན་འདས། །མཐའ་གཉིས་ལྟ་བ་རྟག་ཏུ་མི་མངའ་བ། །ལས་ཀྱི་རྣམ་སྨིན་འབྲས་བུ་ཁོ་ན་གསུང ། །ལྷའི་མུན་བྲལ་ཁྱོད་ལ་ཕྱག་འཚལ་ལོ། །གང་ནས་མ་བྱོན་གང་དུའང་གཤེགས་མ་ལགས། །རྟག་ཏུ་དབེན་པའི་ཆོས་རྣམས་རབ་གསུང་བ། །སྨིག་རྒྱུ་རྒྱུ་བཞིན་ང་ཡི་མི་མངའ་བ། །དགེ་བའི་ཆོས་ཚུལ་ཁྱོད་ལ་ཕྱག་འཚལ་ལོ། །སྐྱེ་བ་མི་སྐྱེ་གང་དུའང་སྐྱེ་མ་ལགས། །སྐྱེ་དང་འཇིག་དང་གང་དུའང་མི་བས་པ། །ཆོས་ཀྱི་གནས་ཉིད་ཇི་ལྟའི་གནས་ལ་གནས། །གནས་ལ་མི་གནས་རྒྱལ་ལ་ཕྱག་འཚལ་ལོ། །དེ་བཞིན་ཁོ་ན་དེ་བཞིན་ཡང་དག་གསུང ། །རྟག་ཏུ་མི་གཡོ་དེ་བཞིན་ཉིད་ལ་བཞུགས། །རི་རབ་རྒྱལ་མཚན་རྡོ་རྗེ་འདྲ་བའི་སྐུ། །མི་གཡོ་རི་རབ་མཚུངས་ལ་ཕྱག་འཚལ་ལོ། །སྐུ་ནི་དབེན་ཞིང་མཉམ་ཐུགས་བློ་ལྡན་པ། །གྲགས་པ་མཐའ་ཡས་འཇིག་རྟེན་གསུམ་གྲགས་པ། །སྐྱེས་བུ་མཆོག་ལ་ཞུ་བ་ཞུས་པ་རྣམས། །འཇིག་རྟེན་ཟླ་བས་མྱུར་དུ་སྐབས་དབྱེར་གསོལ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་བདག་གིས་ཞུས་པ་ལུང་བསྟན་པའི་སླད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྐབས་དབྱེ་བར་གནང་ན་བཅོམ་ལྡན་འདས་ལ་བདག
53.288b
ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང ། ངེས་དྲི་བ་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སྤོབས་པ་སྣ་ཚོགས་ཀྱི་རྒྱན་དང་ལྡན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཆོས་ཟབ་མོ་རྣམ་པར་གདོན་མི་ཟ་བ་ལ་འཇུག་པ་ཤེས་པ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ལགས་པ་ཤེས་པ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སོ་སོ་ཅི་རིག་པར་ཆོས་སྟོན་པ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ལ་སེམས་ཀྱི་བསམ་པ་མཉམ་ཞིང་སྤྱོད་པ་ཤེས་པ་ལ་འཇུག་པར་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་རྒྱུ་དང་དབྱེ་བ་དང ། ལས་ཀྱི་རྣམ་པར་སྨིན་པ་ལ་འཇུག་པ་ཤེས་པ་ལ་བརྗེད་པ་མ་མཆིས་པར་སྤྱོད་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སྦྱིན་པའི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཚུལ་ཁྲིམས་ཀྱི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་བཟོད་པའི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་བརྩོན་འགྲུས་ཀྱི་རྒྱན་གྱིས
53.289a
བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་བསམ་གཏན་གྱི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཤེས་རབ་ཀྱི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཚངས་པའི་ལམ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་མངོན་པར་ཤེས་པ་ལས་མི་ཉམས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་གཡུལ་ལས་རྣམ་པར་རྒྱལ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་རྒལ་ནས་ཕ་རོལ་ཐང་ལ་གནས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཉན་ཐོས་དང ། རང་སངས་རྒྱས་ཐམས་ཅད་དང ། སེམས་ཅན་ཐམས་ཅད་ཀྱི་སྤྱོད་ལམ་ཡང་སྟོན་ལ་མཚུངས་པར་སྤྱོད་པར་ཡང་རྣམ་པར་མི་རྟོག་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་འཁོར་བ་ལ་ཡང་ལྟ་ལ་མྱ་ངན་ལས་འདས་པ་ལ་ཡང་མི་གནས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཁམས་སྣ་ཚོགས་ལ་ཡང་རྣམ་པར་ལྟ་ལ་ཆོས་ཀྱི་དབྱིངས་ལས་ཀྱང་མི་གཡོ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་དོན་ཡང་མི་འདོར་ལ་གནོད་པར་ཡང་ཀུན་དུ་གདའ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་བསོད་ནམས་ཀྱི་ནོར་དང་ལྡན་ལ་ཐབས་ཀྱིས་ནོར་མ་མཆིས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཨ་ཞེས་བགྱི་བའི་སྒོས་རྣམ་པ་མ་མཆིས་པའི་སྒོར་འཇུག་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་མངོན་སུམ་དུ་འགྱུར་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཆོས་རྣམ་པར་གདོན་མི་ཟ་བ་རྣམས་ལ་རྣམ་པར་ཕྱེ་བ
53.289b
ཤིན་དུ་རྣམ་པར་འབྱེད་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་འཇིག་རྟེན་གྱི་བྱ་བ་དང་འཐུན་པར་ཞུགས་ཀྱང་ཉོན་མོངས་པ་ཐམས་ཅད་ཀྱིས་མི་གོས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་གཞན་དག་གིས་བལྟར་མི་མཐོང་བའི་ཆོས་ཀྱི་དབང་ཕྱུག་རྣམས་ལགས། ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པ་མཐོང་བ་དང་མི་འབྲལ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཤིན་དུ་དུལ་ཞིང་མི་འཁྲུགས་པའི་ཆོས་ཅན་རྣམས་ལགས། ཇི་ལྟར་ན་བྱང་ཆུབ་སེམས་དཔའ་ཆོས་རྣམས་བླངས་པ་མ་མཆིས་པར་སློབ་དཔོན་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སྟོན་པར་གྱུར་པ་རྣམས་ལག ། ཇི་ལྟར་ན་བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་རྗེས་སུ་བསྐོར་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་དབང་བསྐུར་བ་ཐོབ་པ་རྣམས་ལགས། དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་ལ་ལེགས་སོ་ཞེས་བྱ་བ་གནང་སྟེ། རིགས་ཀྱི་བུ་ལེགསོ་ལེགས་སོ། །རིགས་ཀྱི་བུ་ཁྱོད་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། སྐྱེ་བོ་ཕལ་པོ་ཆེའི་དོན་དང ། ལྷ་དང་མི་རྣམས་ལ་ཕན་པ་དང ། བདེ་བའི་ཕྱིར་ཞུགས་པ་དང ། རིགས་ཀྱི་བུ་ཁྱོད་ད་ལྟར་གྱི་དང ། མ་འོངས་པའི་སེམས་ཅན་རྣམས་རྗེས་སུ་གཟུང་བ་དང ། ཐེག་པ་ཆེན་པོ་འདི་ཡུན་རིང་དུ་གནས་པར་བྱ་བའི་ཕྱིར། རིགས་ཀྱི་བུ་ཁྱོད་དེ་བཞིན་གཤེགས་པ་ལ་གང་དོན་འདི་ཡོངས་སུ
53.290a
འདྲི་བར་སེམས་པ་ནི་ལེགས་སོ། །རིགས་ཀྱི་བུ་དེའི་ཕྱིར་ཤིན་དུ་ལེགས་པར་ཉོན་ལ་ཡིད་ལ་ཟུང་ཤིག་དང་ངེས་ཁྱོད་ལ་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སྤོབས་པ་སྣ་ཚོགས་ཀྱི་རྒྱན་དང་ལྡན་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་འོད་ཟེར་ཐོགས་པ་མེད་པ་རྣམས་རིན་པོ་ཆེ་དང་སྡུག་པའི་དངོས་པོ་ཐམས་ཅད་ཡོངས་སུ་གཏང་ཞིང་ཡིད་འགྱོད་པ་མེད་པ་རྣམས་ཡིན། ཆོས་སྨྲ་བ་གཞན་དག་གིས་བཤད་པ་མི་ཟློག་ཅིང་རྗེས་སུ་ཡིད་རང་སྟེ་དགའ་བ་དང ། མགུ་བ་དང ། དང་བ་དང་མཆོག་ཏུ་དགའ་བ་ཐོབ་ནས་ལེགས་སོ་ཞེས་བྱ་བ་སྦྱིན་པ་དང ། ཆོས་མཉན་པ་འམ། ཆོས་བགྲོ་བ་འམ། དེ་བཞིན་གཤེགས་པའི་མཆོད་རྟེན་གྱི་ཕྱིར་རམ། མཚན་མོ་འདུག་པར་བསྐུལ་ན་མཆོག་ཏུ་དགའ་བ་དང་ལྡན་པ་དང ། བྱང་ཆུབ་ཀྱི་སེམས་ཀྱི་ལྷག་པའི་བསམ་པ་དང ། ཟང་ཟིང་མེད་པའི་སེམས་ཀྱི་ཆོས་ཀྱི་སྦྱིན་པ་སྦྱིན་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སྤོབས་པ་སྣ་ཚོགས་རྒྱན་དང་ལྡན་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཆོས་ཟབ་མོ་རྣམ་པར་གདོན་མི་ཟ་བ་ལ་འཇུག་པ་ཤེས་པ་ལ་མཁས་པ་རྣམས་ཡིན་ནོ། །བཞི་གང་ཞེ་ན། རྟེན་ཅིང་འབྲེལ་པར་འབྱུང་བ་དང་རྗེས་སུ་འཐུན་པ་དང ། བདག་གི་རང་བཞིན་ལྟར་སེམས་ཅན་ཐམས་ཅད་ཀྱི་རང་བཞིན་རྟོགས་པ་དང ། འདུ་བྱེད་ཐམས་ཅད་གར་ཡང་མི
53.290b
འགྲོ། གང་ནས་ཀྱང་མ་འོངས་པར་རབ་ཏུ་ཤེས་པ་དང ། ཆོས་ཐམས་ཅད་ནམ་མཁའི་ཕྱག་རྒྱས་བཏབ་པར་མོས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཆོས་ཟབ་མོ་རྣམ་པར་གདོན་མི་ཟ་བ་ལ་འཇུག་པ་ཤེས་པ་ལ་མཁས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པ་ལ་མཁས་པ་རྣམས་ཡིན་ནོ། །བཞི་གང་ཞེ་ན། ཆོས་ཀྱི་དབྱིངས་ཀྱི་སྒོ་ཤིན་དུ་སྦྱངས་པ་དང ། སྒྲིབ་པ་མེད་པའི་སྒོ་མངོན་སུམ་དུ་གྱུར་པ་དང ། མངོན་པར་ཤེས་པས་རྣམ་པར་རྩེ་བ་ཤེས་པ་དང ། སེམས་ལས་སུ་རུང་ཞིང་ཏིང་ངེ་འཛིན་ཕུན་སུམ་ཚོགས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སེམས་ཅན་ཐམས་ཅད་ཀྱི་དབང་པོ་མཆོག་དང ། མཆོག་མ་ཡིན་པ་ཤེས་པ་ལ་མཁས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སོ་སོ་ཅི་རིགས་པར་ཆོས་སྟོན་པ་ལ་མཁས་པ་རྣམས་ཡིན་ནོ། །བཞི་གང་ཞེ་ན། སོ་སོ་ཡང་དག་པར་རིག་པ་ཤེས་པ་དང ། སེམས་ཅན་གཟུད་པ་ཤེས་པ་དང ། ཆོས་རབ་ཏུ་རྣམ་པར་འབྱེད་པའི་ཤེས་པ་དང ། བདག་གིས་སེམས་སྦྱངས་པས་སེམས་ཅན་ཐམས་ཅད་ཀྱི་སེམས་སྦྱངས་པར་རབ་ཏུ་ཤེས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སོ་སོ་ཅི་རིགས་པར་ཆོས་སྟོན་པ་ལ་མཁས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སེམས་ཅན་ཐམས་ཅད་ལ་སེམས་ཀྱི་བསམ་པ་མཉམ་ཞིང་སྤྱོད་པ་ཤེས་པ་ལ་འཇུག་པར་མཁས་པ་རྣམས་ཡིན་ནོ། །བཞི་གང་ཞེ་ན། ཤེས་རབ་ཀྱི་འཛུད་པ་དང ། ཡེ་ཤེས་ཆགས་པ་མེད་པ་དང ། ཐབས་ཀྱིས་ཞུགས་པས་སྒྲིབ་པ་ཐམས་ཅད་རྒྱུན་བཅད་པ་དང ། བློ་ཤིན་དུ་སྦྱངས་པ་སྟེ། རིགས་ཀྱི་བུ
53.291a
བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སེམས་ཅན་ཐམས་ཅད་ལ་སེམས་ཀྱི་བསམ་པ་མཉམ་ཞིང ། སྤྱོད་པ་ཤེས་པ་ལ་འཇུག་པར་མཁས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་རྒྱུ་དང ། བྱ་བ་དང་ལས་ཀྱི་རྣམ་པར་སྨིན་པ་ལ་འཇུག་པར་ཤེས་པ་ལ་བརྗེད་པ་མེད་པར་སྤྱོད་པ་རྣམས་ཡིན་ནོ། །བཞི་གང་ཞེ་ན། ཆད་པར་སྨྲ་བ་མ་ཡིན་པ་དང ། རྟག་པར་སྨྲ་བ་མ་ཡིན་པ་དང ། རྒྱུ་དང་བྱ་བ་དང་ལས་ཀྱི་འབྲས་བུ་ལ་ཡང་དག་པར་ཇི་ལྟ་བ་བཞིན་དུ་འཇུག་པ་དང ། ཆོས་ལ་ཆོས་ཉིད་དུ་བྱེད་ཅིང་ཆོས་ལ་ཆོས་སུ་སྨྲའི་འདི་ལ་བདག་དང་བདག་གིར་མི་སྨྲ་བ་སྟེ། དེ་ལྟར་བྱ་བ་ལ་འཇུག་པས་རྒྱུ་དང་བྱ་བ་དང་ལས་ཀྱི་འབྲས་བུ་མ་རུང་བར་མི་བྱེད་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། རྒྱུ་དང་བྱ་བ་དང་ལས་ཀྱི་རྣམ་པར་སྨིན་པ་ལ་འཇུག་པ་ཤེས་པ་ལ་བརྗེད་པ་མེད་པར་སྤྱོད་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སྦྱིན་པའི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། མཚན་ཀྱིས་ལེགས་པར་བརྒྱན་པ་རྣམས་ཡིན། དཔེ་བྱད་བཟང་པོས་རྣམ་པར་སྤྲས་པ་རྣམས་ཡིན། གཟུགས་ལྟ་བས་མི་ངོམས་པ་རྣམས་ཡིན། ལག་ན་རིན་པོ་ཆེ་ཐོབ་པས་ལོངས་སྤྱོད་མི་ཟད་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སྦྱིན་པའི་རྒྱན་གྱིས་བརྒྱན་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན། ཚུལ་ཁྲིམས་ཀྱི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། འཁོར་ལོས་བསྒྱུར་བའི་རྒྱལ་པོར་འགྱུར་ཞིང་བྱང་ཆུབ་ཀྱི་སེམས་ཀྱིས་བརྒྱན་པ་དང ། ལྷའི་དབང་པོ་བརྒྱ་བྱིན་དུ་འགྱུར་ཞིང་བྱང་ཆུབ་ཀྱི་སེམས་ཀྱིས་བརྒྱན་པ་དང ། མི་འཇེད་ཀྱི་བདག་པོ་ཚངས་པར་འགྱུར་ཞིང་བྱང་ཆུབ་ཀྱི་སེམས
53.291b
ཀྱིས་བརྒྱན་པ་དང ། ངན་འགྲོ་ཐམས་ཅད་ཡང་དག་པར་བཅད་ནས་ལྷ་དང་མིར་སྐྱེ་བ་ཡོངས་སུ་བཟུང་བར་གྱུར་ཅིང་བྱང་ཆུབ་ཀྱི་སེམས་ཀྱིས་བརྒྱན་པ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཚུལ་ཁྲིམས་ཀྱི་རྒྱན་གྱིས་བརྒྱན་པ་རྣམས་སུ་རིག་པར་བྱའོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་བཟོད་པའི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། ཚངས་པའི་སྐད་དང་སྒྲ་དབྱངས་ལྟ་བུ་དང་ལྡན་པ་རྣམས་ཡིན། ཀ་ལ་པིང་ཀའི་སྒྲ་དང ། རྔ་སྒྲ་ལྟ་བུ་དང་ལྡན་པ་རྣམས་ཡིན། སྐྱེ་བོ་མང་པོས་མཐོང་ན་སྡུག་ཅིང་ཡིད་དུ་འོང་བ་རྣམས་ཡིན། དགེ་བའི་ཆོས་རྣམས་ལ་ཡི་དམ་ལ་བརྟན་པ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་བཟོད་པའི་རྒྱན་གྱིས་བརྒྱན་པ་རྣམས་སུ་རིགས་པར་བྱའོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་བརྩོན་འགྲུས་ཀྱི་རྒྱན་གྱིས་བརྒྱན་པར་རིག་པར་བྱའོ། །བཞི་གང་ཞེ་ན། དམ་བཅས་པ་ཉམས་འོག་ཏུ་ཆུད་པར་བྱ་བའི་ཆོག་ཤེས་པས་དགེ་བའི་ཆོས་རྣམས་ལ་ཡི་དམ་ལ་བརྟན་པ་རྣམས་ཡིན། ཕ་རོལ་གྱིས་མནན་པ་མེད་པས་རྡོ་རྗེ་ཡི་ལུས་རབ་ཏུ་ཐོབ་པ་རྣམས་ཡིན། བྱ་བ་ཅི་ཡོད་ཅེས་བྱ་བ་ལ་མོས་པས་གསོལ་བ་མ་བཏབ་པར་སེམས་ཅན་ཐམས་ཅད་ལ་དགེ་བའི་བཤེས་གཉེན་བྱེད་པ་རྣམས་ཡིན། ཐོས་པའི་ཚོགས་བསགས་པས་མི་ངོམས་པའི་ཕྱིར་ཡིད་ཡོངས་སུ་མི་སྐྱོ་བ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། བརྩོན་འགྲུས་ཀྱི་རྒྱན་གྱིས་བརྒྱན་པ་རྣམས་སུ་རིག་པར་བྱའོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་བསམ་གཏན་གྱི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། མི་རྒོད་པ་རྣམས་ཡིན། མ་ཁེངས་པ་རྣམས་ཡིན། མུ་ཅོར་སྨྲ་བ་མེད་པ་རྣམས་ཡིན། ཅང
53.292a
ཤེས་ཀྱི་སེམས་མི་འདོར་བ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་བསམ་གཏན་གྱི་རྒྱན་གྱིས་བརྒྱན་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཤེས་རབ་ཀྱི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། བདག་དང་སེམས་ཅན་དང ། སྲོག་དང་གསོ་བ་དང ། སྐྱེས་བུ་དང་གང་ཟག་ཏུ་སྨྲ་བ་མེད་པ་རྣམས་ཡིན། སྤོབས་པ་ཆགས་པ་མེད་པ་རྣམས་ཡིན། ཚིག་ཐམས་ཅད་རབ་ཏུ་དབྱེ་བ་བསྟན་པ་ཤེས་པ་ལ་མཁས་པ་རྣམས་ཡིན། ཆོས་ཐམས་ཅད་ལ་སོམ་ཉི་མེད་ཅིང་ཐེ་ཙོམ་དང་བྲལ་བ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཤེས་རབ་ཀྱི་རྒྱན་གྱིས་བརྒྱན་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཚངས་པའི་ལམ་ལ་མཁས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་དཔུང་གཉེན་བྱ་བའི་ཕྱིར་མངོན་པར་བསྒྲུབས་པའི་བྱམས་པ་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་མངོན་པར་བསྒྲུབས་པའི་སྙིང་རྗེ་ཆེན་པོ་དང ། ཆོས་ཐམས་ཅད་ལ་དགའ་བས་མངོན་པར་བསྒྲུབས་པའི་དགའ་བ་དང ། དེ་བཞིན་གཤེགས་པའི་ཡེ་ཤེས་ཀྱི་ཕྱིར་མངོན་པར་བསྒྲུབས་པའི་བཏང་སྙོམས་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཚངས་པའི་ལམ་ལ་མཁས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་མངོན་པར་ཤེས་པ་ལས་མི་ཉམས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། བསམ་གཏན་བཞི་སྡུད་པའི་ཤེས་པ་དང ། གཟུགས་མེད་པའི་སྙོམས་པར་འཇུག་པ་བཞི་བསྒྲུབས་པའི་ཐབས་ཤེས་པ་དང ། རང་གིས་སེམས་ལ་དབང་སྒྱུར་བའི་ཆོས་ཤེས་པ་དང ། སངས་རྒྱས་ལ་བལྟ་བའི་ཕྱིར་སངས་རྒྱས་ཀྱི
53.292b
ཞིང་མཐའ་ཡས་པར་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་མངོན་པར་ཤེས་པ་ལས་མི་ཉམས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་གཡུལ་ལས་རྣམ་པར་རྒྱལ་བ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། ནང་ཉེ་བར་ཞི་བ་དང ། ཕྱི་རོལ་དུ་མི་རྒྱུ་བ་དང ། ཆོས་ཐམས་ཅད་ལ་སྒྱུ་མ་ལྟ་བུ་རབ་ཏུ་རྟོག་པའི་ཤེས་པ་དང ། ཡེ་ཤེས་ཀྱི་སྟོབས་ཅན་ཡིན་གྱི་ཉོན་མོངས་པའི་སྟོབས་ཅན་མ་ཡིན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་གཡུལ་ལས། རྣམ་པར་རྒྱལ་བ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་རྒལ་ནས་ཕ་རོལ་ཐང་ལ་གནས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། འདོད་པའི་ཆུ་བོ་ཡང་རབ་ཏུ་ཤེས་ལ་འདོད་ཆགས་དང་བྲལ་བ། ཡང་མངོན་སུམ་དུ་མི་བྱེད་པ་དང ། སྲིད་པའི་ཆུ་བོ་ཡང་རབ་ཏུ་ཤེས་ལ་བསམས་བཞིན་དུ་ཡང་སྐྱེ་བ་དང ། ལྟ་བའི་ཆུ་བོ་ཡང་རབ་ཏུ་ཤེས་ལ་ལྟ་བའི་བཅིངས་བས་བཅིངས་པ་ཡང་མི་འདོར་བ་དང ། མ་རིགས་པའི་ཆུ་བོ་ཡང་རབ་ཏུ་ཤེས་ལ་རྟེན་ཅིང་འབྲེལ་བར་འབྱུང་བའི་རྗེས་སུ་འཐུན་པར་ཡང་བྱེད་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་རྒལ་ནས་ཕ་རོལ་ཐང་ལ་གནས་པ་རྣམ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཉན་ཐོས་དང་རང་སངས་རྒྱས་ཐམས་ཅད་དང ། སེམས་ཅན་ཐམས་ཅད་ཀྱི་སྤྱོད་ལམ་ཡང་སྟོན་ལ་མཚུངས་པར་སྤྱོད་པ་ཡང་རྣམ་པར་མི་རྟོག་པ་རྣམས་ཡིན་ནོ། བཞི་གང་ཞེ་ན་འདི་ལྟ་སྟེ། སྒྱུ་མ་ལྟ་བུའི་ཏིང་ངེ་འཛིན་ཤིན་དུ་ཡོངས་སུ་བསྒྲུབས་པ་དང ། ཆོས་ཐམས་ཅད་རྣམ་པར་བསྒྲུབས་པས་སོ་སོར་ཉེ་བར་གནས་པའི་མཚན་ཉིད་དུ་ཤིན་དུ་བརྟགས་པ་དང །
53.293a
མངོན་པར་ཤེས་པ་ལྔས་རྣམ་པར་རྩེ་བ་ཤེས་པ་དང་ལྡན་པ་དང ། ཡིད་ཀྱི་ལུས་མངོན་པར་བསྒྲུབས་པ་ལ་མཁས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཉན་ཐོས་དང ། རང་སངས་རྒྱས་ཐམས་ཅད་དང ། སེམས་ཅན་ཐམས་ཅད་ཀྱི་སྤྱོད་ལམ་ཡང་སྟོན་ལ་མཚུངས་པར་སྤྱོད་པར་ཡང་རྣམ་པར་མི་རྟོག་པ་རྣམས་ཡིན་ནོ་རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་འཁོར་བ་ལ་ཡང་ལྟ་ལ་མྱ་ངན་ལས་འདས་པ་ལ་ཡང་མི་གནས་པ་རྣམས་ཡིན་ནོ། །བཞི་གང་ཞེ་ན་འདི་ལྟ་སྟེ། སངས་རྒྱས་ཀྱི་བྱིན་གྱིས་བརླབས་དང ། སྙིང་རྗེ་ཆེན་པོའི་སེམས་དང ། ཐབས་ལ་མཁས་པ་དང ། སྔོན་གྱི་ཡི་དམ་མི་འདོར་བ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་འཁོར་བ་ལ་ཡང་ལྟ་ལ་མྱ་ངན་ལས་འདས་པ་ཡང་མི་གནས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཁམས་སྣ་ཚོགས་ལ་ཡང་རྣམ་པར་ལྟ་ལ་ཆོས་ཀྱི་དབྱིངས་ལས་ཀྱང་མི་གཡོའོ། །བཞི་གང་ཞེ་ན། འདི་ལྟ་སྟེ། སེམས་ཅན་རང་བཞིན་མེད་པས་ཆོས་རང་བཞིན་མེད་པར་རྟོག་པ་དང ། ཆོས་རང་བཞིན་མེད་པས་སེམས་ཅན་རང་བཞིན་མེད་པར་རྟོག་པ་དང ། སེམས་ཅན་རང་བཞིན་མེད་པས་སངས་རྒྱས་ཀྱི་ཆོས་རང་བཞིན་མེད་པར་མོས་པ་དང ། སེམས་ཅན་རང་བཞིན་མེད་པ་ལ་སོམ་ཉི་མེད་ཅིང་ཐེ་ཙོམ་དང་བྲལ་བ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཁམས་སྣ་ཚོགས་ལ་ཡང་རྣམ་པར་ལྟ་ལ་ཆོས་ཀྱི་དབྱིངས་ལས་ཀྱང་མི་གཡོའོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་དོན་ཡང་མི་འདོར་ལ་གནོད་པར་ཡང་ཀུན་དུ་སྣང་ངོ ། །བཞི་གང་ཞེ་ན་འདི་ལྟ་སྟེ། བསམ་པ་མྱ་ངན་ལས་འདས་པར་སོང་བ་རྣམས་ཡིན། སྦྱོར་བ་འཁོར་བར་སོང་བ་རྣམ་ཡིན།
53.293b
སངས་རྒྱས་ཀྱི་ཆོས་ཐམས་ཅད་ཡོངས་སུ་བསྐང་བ་ལ་བསམ་པ་སོང་བ་རྣམས་ཡིན། ཉན་ཐོས་དང ། རང་སངས་རྒྱས་ཀྱི་ཡུལ་ལ་ཡང་ཀུན་དུ་སྣང་བ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་དོན་ཡང་མི་འདོར་ལ་གནོད་པར་ཡང་ཀུན་དུ་སྣང་ངོ ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་བསོད་ནམས་ཀྱིས་ནོར་དང་ལྡན་ལ་ཐབས་ཀྱི་ནོར་མེད་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། རྒྱ་ཆེན་པོ་ལ་མོས་པའི་སེམས་ཅན་འདུལ་བའི་ཕྱིར་བསོད་ནམས་ཀྱིས་འཁོར་ལོས་སྒྱུར་བ་དང ། བརྒྱ་བྱིན་དང་ཚངས་པའི་བསོད་ནམས་ཀྱང་ཉེ་བར་སྟོན་པ་དང ། འགྲོ་བ་ཕལ་པ་འདུལ་བའི་ཕྱིར་དབུལ་ཞིང་དམན་པར་ཡང་ཉེ་བར་སྟོན་པ་དང ། སློང་བ་མཐོང་ན་བདོག་པ་ཐམས་ཅད་གཏོང་ཞིང ། ནོར་མེད་པར་ཡང་འགྱུར་བ་དང ། ནོར་ཆེན་པོ་དང་ལྡན་པ་མཐོང་ན་བསོད་ནམས་ཀྱིས་ལོངས་སྤྱོད་ཟད་མི་ཤེས་པར་ཡང་ཉེ་བར་སྟོན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་བསོད་ནམས་ཀྱིས་ནོར་དང་ལྡན་པ་ཡིན་ལ། ཐབས་ཀྱིས་ནོར་མེད་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཨ་ཞེས་བྱ་བའི་སྒོས་རྣམ་པ་མེད་པའི་སྒོ་ལ་འཇུག་པ་རྣམས་ཡིན་ནོ། །བཞི་གང་ཞེ་ན་འདི་ལྟ་སྟེ། འདུ་བྱེད་ཐམས་ཅད་མི་རྟག་པར་ཤེས་པ་སྦྱོང་བ་དང ། འདུ་བྱེད་ཐམས་ཅད་གཟོད་མ་ནས་སྡུག་བསྔལ་ལོ་ཞེས་བྱང་ཆུབ་རབ་ཏུ་རྙེད་པ་དང ། ཆོས་ཐམས་ཅད་བདག་མེད་དོ་ཞེས་ལྟ་བར་གྱུར་པ་ཡོངས་སུ་སྦྱོང་བ་དང ། མྱ་ངན་ལས་འདས་པ་ནི་གཟོད་མ་ནས་ཞི་བ་ཞེས་ཡེ་ཤེས་ལ་འཇུག་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། ཨ་ཞེས་བྱ་བའི་སྒོས་རྣམ་པ་མེད་པའི་སྒོ་ལ་འཇུག་པ་རྣམས་ཡིན་ནོ། །རིགས
53.294a
ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སངས་རྒྱས་ཀྱི་ཆོས་ཐམ་ཅད་མངོན་སུམ་དུ་འགྱུར་བ་ཡིན་ནོ། །བཞི་གང་ཞེ་ན་འདི་ལྟ་སྟེ། ཤེས་རབ་ཀྱི་མིག་ཤིན་དུ་རྣམ་པར་དག་པ་རྣམས་ཡིན། ཆོས་ཀྱི་མིག་གིས་སྣང་བ་ཐོབ་པ་རྣམས་ཡིན། སངས་རྒྱས་ཀྱི་སྤྱན་མངོན་སུམ་དུ་གྱུར་པ་རྣམས་ཡིན། སངས་རྒྱས་ཀྱི་ཆོས་ཐམས་ཅད་ལ་དབང་བསྐུར་བ་ཐོབ་པ་རྣམས་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སངས་རྒྱས་ཀྱི་ཆོས་མངོན་སུམ་དུ་འགྱུར་བ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན། ཆོས་རྣམ་པར་གདོན་མི་ཟ་བ། རྣམས་ལ་རྣམ་པར་ཕྱེ་བ་ཤིན་དུ་རྣམ་པར་འབྱེད་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ་སོ་སོ་ཡང་དག་པར་རིག་པ་ཤེས་པ་སྒྲིབ་པ་མེད་པ་དང ། བདེན་པ་བཞི་རྣམ་པར་དགོད་པ་ཤེས་པ་དང ། རྟོན་པ་ལ་གནས་སུ་ཤེས་པ་དང ། གཟུངས་ལ་གཡེང་བ་མེད་པར་ཤེས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཆོས་རྣམ་པར་གདོན་མི་ཟ་བ་རྣམས་ལ་རྣམ་པར་ཕྱེ་བ་ཤིན་དུ་རྣམ་པར་འབྱེད་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་འཇིག་རྟེན་གྱི་བྱ་བ་དང ། འཐུན་པར་ཞུགས་ཀྱང་ཉོན་མོངས་པ་ཐམས་ཅད་ཀྱིས་མི་གོས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ་འཇིག་རྟེན་གྱི་ཆོས་མངོན་སུམ་དུ་གྱུར་པ་དང ། འཇིག་རྟེན་ལས་སེམས་ཅན་ཡང་དག་པར་སྒྲོལ་བ་དང ། རྗེས་སུ་ཆགས་པ་དང ། ཁོང་ཁྲོ་བ་སྤོང་བ་དང ། གཟོད་མ་ནས་རྣམ་པར་དག་ཅིང་འོད་གསལ་བས་ཀྱང་རང་བཞིན་གྱིས་ཉོན་མོངས་པ་མེད་པ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་འཇིག་རྟེན་གྱི་བྱ་བ་དང
53.294b
འཐུན་པར་ཞུགས་ཀྱང་ཉོན་མོངས་པ་ཐམས་ཅད་ཀྱིས་མི་གོས་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་གཞན་དག་གིས་བལྟར་མི་མཐོང་བའི་ཆོས་ཀྱི་དབང་ཕྱུག་རྣམ་ཡིན་ནོ། །བཞི་གང་ཞེ་ན་འདི་ལྟ་སྟེ། སེམས་ཀྱི་དབང་ཕྱུག་དང ། ཤེས་རབ་ཀྱི་དབང་ཕྱུག་དང ། ཡེ་ཤེས་ཀྱི་དབང་ཕྱུག་དང ། ཐབས་ཀྱི་དབང་ཕྱུག་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་གཞན་དག་གིས་བལྟར་མི་མཐོང་བའི་ཆོས་ཀྱི་དབང་ཕྱུག་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན། དེ་བཞིན་གཤེགས་པ་མཐོང་བ་དང་མི་འབྲལ་བ་རྣམས་ཡིན་ནོ། །བཞི་གང་ཞེ་ན་འདི་ལྟ་སྟེ། སེམས་ཅན་རྣམས་སངས་རྒྱས་མཐོང་བ་ཡང་དག་པར་འཛིན་དུ་འཇུག་པ་དང ། སེམས་ཅན་རྣམས་ཆོས་ཉན་པ་ཡང་དག་པར་འཛིན་དུ་འཇུག་པ་དང ། སེམས་ཅན་རྣམས་བྱང་ཆུབ་ཀྱི་སེམས་ཡང་དག་པར་འཛིན་དུ་འཇུག་པ་དང ། སངས་རྒྱས་རྗེས་སུ་དྲན་པའི་ཏིང་ངེ་འཛིན་དང་མི་འབྲལ་བ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་དེ་བཞིན་གཤེགས་པ་མཐོང་བ་དང་མི་འབྲལ་བ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཤིན་དུ་དུལ་ཞིང་མི་འཁྲུགས་པའི་ཆོས་ཅན་རྣམས་ཡིན་ནོ། །བཞི་གང་ཞེ་ན་འདི་ལྟ་སྟེ། འཕགས་པ་འཇིག་རྟེན་ལས་འདས་པའི་ཤེས་རབ་ཀྱིས་རྣམ་པར་གྲོལ་བ་ཡེ་ཤེས་མཐོང་བ་མངོན་སུམ་དུ་གྱུར་པ་དང ། བདེན་པ་ལ་ཉེ་བར་བརྟགས་པས་ཆོས་ཐམས་ཅད་ཇི་ལྟ་བ་བཞིན་པ་དང ། བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་གཅོད་པ་ལ་མཁས་པར་གྱུར་པ་དང ། ཉོན་མོངས་པས་མི་འཁྲུགས་པའི་ཆོས་ཅན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཤིན་དུ་དུལ་ཞིང་མི་འཁྲུགས་པའི་ཆོས་ཅན་རྣམས་ཡིན་ནོ། །
53.295a
རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཆོས་རྣམས་བླངས་པ་མེད་པར་སློབ་དཔོན་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་ཕན་པའི་དངོས་པོ་ཕུན་སུམ་ཚོགས་པ་རྣམས་ཡིན། སེམས་ཅན་ཡོངས་སུ་སྨིན་པར་བྱ་བ་ལ་བརྟན་ཞིང་བསམ་པ་སྒྱུ་མེད་པ་རྣམས་ཡིན། བདག་གིས་བདེ་བ་ལ་མི་ཆགས་པ་རྣམས་ཡིན། གང་ཡེ་ཤེས་ཡོངས་སུ་ཚོལ་བ་དེ་ཡང ། སེམས་ཅན་ཐམས་ཅད་ཀྱི་ཆེད་དུ་ཡིན་གྱི་བདག་འབའ་ཤིག་གི་ཕྱིར་མ་ཡིན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་ཆོས་རྣམས་བླངས་པ་མེད་པར་སློབ་དཔོན་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སེམས་ཅན་ཐམས་ཅད་ཀྱི་སྟོན་པར་གྱུར་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། བདག་གི་དོན་བཏང་ཞིང་གཞན་གྱི་དོན་བྱེད་པ་རྣམས་ཡིན། བདག་གི་བདེ་བ་ཐམས་ཅད་གཏོང་ཞིང་སེམས་ཅན་རྣམས་ལ་ཆོས་ཀྱི་བདེ་བ་སྦྱིན་པ་རྣམ་ཡིན། ཇི་ལྟར་ཐོས་པའི་ཆོས་སྟོན་པ་ལ་ངལ་བ་མེད་པ་རྣམས་ཡིན། ཆོས་ཀྱི་འཚོ་བས་འཚོའི་ཟང་ཟིང་གིས་འཚོ་བ་མ་ཡིན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སེམས་ཅན་ཐམས་ཅད་ཀྱི་རྟོན་པར་གྱུར་པ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན། སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་རྗེས་སུ་བསྐོར་བ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། གཟུངས་རབ་ཏུ་ཐོབ་པ་དང ། སྤོབས་པ་རྒྱུན་མི་འཆད་པ་དང ། སེམས་ཅན་གྱི་བསམ་པ་ཤེས་པ་ལ་འཇུག་པ་དང ། མྱ་ངན་ལས་འདས་པའི་ལམ་དུ་ཁྲིད་ཅིང་མི་ཕྱེད་པའི་ཆོས་སྟོན་པ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་རྗེས་སུ་བསྐོར་བ་རྣམས་ཡིན་ནོ། །རིགས་ཀྱི་བུ་བྱང་ཆུབ་སེམས
53.295b
དཔའ་ཆོས་བཞི་དང་ལྡན་ན་སངས་རྒྱས་ཀྱི་ཆོས་ཐམས་ཅད་ལ་དབང་བསྐུར་བ་ཐོབ་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སྤྱོད་པ་ཐམས་ཅད་ལས་རབ་ཏུ་འདས་པ་རྣམས་ཡིན། བྱང་ཆུབ་སེམས་དཔའི་སྤྱོད་པ་ལས་མི་ལྡོག་ཅིང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་རྣམས་ཡིན། བསམས་བཞིན་དུ་ཚེ་དང ། འཆི་འཕོ་དང ། སྐྱེ་བ་ཡང་སྟོན་ལ་ཕྱིར་མི་ལྡོག་པའི་ཕྱག་རྒྱས་ཀྱང་བཏབ་པ་རྣམས་ཡིན། དེ་བཞིན་གཤེགས་པའི་ཕྱག་རྒྱ་ལ་ཡང་དག་པར་གཞོལ་ཞིང་ས་བཅུར་ངེས་པར་བྱུང་ན། ས་ནས་སར་འཕར་བ་ལ་མཁས་པ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན་སངས་རྒྱས་ཀྱི་ཆོས་ཐམས་ཅད་ལ་དབང་བསྐུར་བ་ཐོབ་པ་རྣམས་ཡིན་ནོ། །བཅོམ་ལྡན་འདས་ཀྱིས་བཞིས་བསྒྲུབ་པའི་ཆོས་ཀྱི་རྣམ་གྲངས་འདི་བཤད་པ་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ནས་སྣང་བ་ཆེན་པོས་ཀྱང་འཇིག་རྟེན་གྱི་ཁམས་ཁྱབ་པར་གྱུར་ཏོ། །སྟེང་གི་བར་སྣང་ལས་ལྷ་བྱེ་བ་ཁྲག་ཁྲིག་བརྒྱ་སྟོང་གིས་ལྷའི་གླུ་དབྱངས་བླངས་ཏེ། ལྷའི་མེ་ཏོག་མཱན་དཱ་ར་བའི་ཆར་རབ་ཏུ་ཕབ་ནས་འདི་སྐད་ཅེས་ཀྱེ་མའོ་བཅོམ་ལྡན་འདས་ཀྱིས་འདིར་སངས་རྒྱས་བཅོམ་ལྡན་འདས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཞི་པ་བསྒྲུབ་པའི། ཆོས་ཀྱི་རྣམ་གྲངས་འདི་ལས་བསྟན་པ་འདི་ནི་བསྐལ་པ་བྱེ་བ་ཁྲག་ཁྲིག་གྲངས་མེད་པ་ནས་བསྒྲུབས་པ་ལཀས་སོ། །བཅོམ་ལྡན་འདས་གང་བཞི་པ་སྒྲུབ་པའི་ཆོས་ཀྱི་རྣམ་གྲངས་འདི་ཉན་པ་དང ། མཉན་ནས་མོས་པ་དང ། མོས་ནས་འཛིན་པ་དང ། འཆང་བ་དང་ཀློག་པ་དང ། ཀུན་ཆུབ་པར་བགྱིད་པ་དང ། གཞན་དག་ལ་ཡང་སྟོན་པ་དང ། བྱང་ཆུབ་ཀྱི་སེམས་དང་མི་འབྲལ་བའི་སེམས་ཅན་དེ་དག་ནི་དགེ་བའི་རྩ་བ། ངན་ངོན་དང་ལྡན་པ་མ་ལགས་ཏེ། དེ་དག་ནི་ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང
53.296a
དག་པར་རྫོགས་པའི་སངས་རྒྱས་ད་ལྟར་སེང་གེའི་སྒྲ་སྒྲོག་པ་བཞིན་དུ་ལྷ་དང་མི་དང ། ལྷ་མ་ཡིན་གྱི་འཇིག་རྟེན་གྱི་མདུན་དུ་སེང་གེའི་སྒྲ་སྒྲོག་པར་འགྱུར་རོ། །བཅོམ་ལྡན་འདས་བདག་ཅག་ཀྱང་བཞི་པ་སྒྲུབ་པའི་ཆོས་ཀྱི་རྣམ་གྲངས་འདི་ཐོས་པས་རྙེད་པ་ལེགས་པར་རྙེད་དོ། །ཞེས་ཆེད་དུ་བརྗོད་པ་ཆེད་དུ་བརྗོད་དོ། །བཅོམ་ལྡན་འདས་ཀྱིས་བཞི་པ་བསྒྲུབ་པའི་ཆོས་ཀྱི་རྣམ་གྲངས་འདི་བཤད་པ་ན། ལྷ་དང་མིའི་སྲོག་ཆགས་བརྒྱད་ཁྲི་བཞི་སྟོང་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ཁྲི་ཉིས་སྟོང་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དག་དེ་བཞིན་གཤེགས་པ། ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་འདི་འཛིན་པ་དང ། གཞན་དག་ལ་རྒྱ་ཆེར་རབ་ཏུ་སྟོན་པའི་བྱང་ཆུབ་སེམས་དཔའ་དེ་དག་ཆོས་དུ་དང་ལྡན་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་དག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་འདི་འཛིན་པ་དང ། གཞན་དག་ལ་ཡང་རྒྱ་ཆེར་ཡང་དག་པར་སྟོན་པའི། བྱང་ཆུབ་སམས་དཔའ་དེ་དག་ནི་ཆོས་བརྒྱད་དང་ལྡན་པར་འགྱུར་རོ། །བརྒྱད་གང་ཞེ་ན། འདི་ལྟ་སྟེ། དེ་དག་ཡང་དག་པར་རྫོགས་པའི་བྱང་ཆུབ་ལ་བསམ་པ་ངེས་ཏེ། བསམ་པ་ཕུན་སུམ་ཚོགས་པར་འགྱུར་བ་དང ། སེམས་ཅན་ཐམས་ཅད་ལ་ཞེ་སྡང་བའི་སེམས་མེད་དེ། ཤིན་དུ་བྱམས་པ་བསྒོམ་པ་བསྒོམས་པར་འགྱུར་བ་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་གནས་ཏེ། སྙིང་རྗེ་ཆེན་པོ་ལ་གནས་པར་འགྱུར་བ་དང ། ཆོས་འདོད་དེ་ཆོས་དོན་དུ་གཉེར་བར
53.296b
འགྱུར་བ་དང ། ཐོས་པ་ཚོལ་བས་མི་ངོམས་ཏེ་མཚོ་ཆེན་རྒྱ་མཚོ་ལྟ་བུར་འགྱུར་བ་དང ། ལུས་དང་སྲོག་འདོར་ཞིང་དམ་པའི་ཆོས་ཡོངས་སུ་འཛིན་པར་འགྱུར་བ་དང ། བསོད་ནམས་ཀྱི་ཚོགས་བསགས་ཏེ། དགེ་བའི་རྩ་བ་བརྟན་པར་འགྱུར་བ་དང ། སངས་རྒྱས་ཀྱི་བྱིན་གྱི་བརླབས་ཀྱིས་བྱིན་གྱིས་བརླབས་ཏེ་སྨོན་ལམ་གྱིས་ཡང་དག་པར་བྱུང་བར་འགྱུར་བ་དང ། འཁོར་གྱི་ནང་དུ་འཇིགས་པ་མེད་པས་བདུད་དང་ཕྱིར་རྒོལ་བ་བཅོམ་པར་འགྱུར་བ་སྟེ། རིགས་ཀྱི་བུ་གང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་འདི་འཛིན་པ་དང ། གཞན་དག་ལ་རྒྱ་ཆེར་སྟོན་པའི་བྱང་ཆུབ་སེམས་དཔའ་དེ་དག་ནི་ཆོས་བརྒྱད་པོ་འདི་དག་དང་ལྡན་པར་འགྱུར་རོ། །དེ་ནས་དེའི་ཚེ་སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གང་དག་ས་ཕྱོགས་མཐོ་དམའ་ཅན་དང ། རི་ནག་པོ་དང ། ཆུ་མིག་དང ། མཚོ་དང་ལྟེང་ཀ་དང ། རྒྱ་མཚོ་ཆེན་པོ་དེ་དག་ཐམས་ཅད་མི་སྣང་བར་གྱུར་ཏོ། །ས་ཆེན་པོ་འདི་ཐམས་ཅད་ཀྱང་ལག་མཐིལ་ལྟར་མཉམ་པར་གནས་པར་གྱུར་ཏོ། །ཆུ་ན་གནས་པའི་སེམས་ཅན་རྣམས་ལ་ཡང་གནོད་པ་མེད་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཤིང་གང་དག་ལོ་བརྒྱ་ལོན་པ་དེ་དག་ཐམས་ཅད་ལས་ཀྱང་མེ་ཏོག་དང ། འབྲས་བུ་སྣ་ཚོགས་སྐྱེས་པར་གྱུར་ནས། བཅོམ་ལྡན་འདས་ག་ལ་བ་དེ་ལོགས་སུ་བཏུད་མངོན་པར་བཏུད་ནས་ཕྱག་འཚལ་བར་གྱུར་ཏོ། །དེ་མ་ཡིན་པ་ཤིང་གཞན་ཐམས་ཅད་ལས་ཀྱང་མེ་ཏོག་དང ། འབྲས་བུ་སྣ་ཚོགས་སྐྱེས་ནས་བཅོམ་ལྡན་འདས་ག་ལ་བ་དེ་ལོགས་སུ་བཏུད་མངོན་པར་བཏུད་ནས་ཕྱག་འཚལ་བར་གྱུར་ཏོ། །ས་ཆེན
53.297a
པོ་ལས་པད་མ་ཚད་ཤིང་རྟའི་འཁོར་ལོ་ཙམ་སྣ་ཚོགས་བལྟ་ན་སྡུག་པ་ཁ་དོག་དང་ལྡན་པ་དྲི་དང་ལྡན་པ་ཡིད་དུ་འོང་བ་སྐྱེས་སོ། །སྣང་བ་ཆེན་པོས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གསལ་བར་གྱུར་ཏོ། །མི་སྣང་ཞིང་མ་དཀྲོལ་བར་སྟེང་གི་བར་སྣང་ལས་ལྷའི་སིལ་སྙན་དང ། གླུ་དབྱངས་ཀྱི་སྒྲ་བྱུང་སྟེ་གྲགས་པར་གྱུར་ཏོ། །རིའི་རྒྱལ་པོ་གངས་ཅན་དང ། རིའི་རྒྱལ་པོ་སྤོས་ཀྱི་ངད་ལྡང་ལས་ཀྱང་ལྷའི་མེ་ཏོག་སྣ་ཚོགས་སྔོན་དྲི་མེ་མནམ་པ་རྣམས་ཀྱང་མཆོག་གི་དྲི་ལངས་པར་གྱུར་ཏེ། དྲི་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་དྲི་ཞིམ་པོ་བསྣམ་པར་གྱུར་ཏོ། །རིའི་རྒྱལ་པོ་གངས་ཅན་དང ། རིའི་རྒྱལ་པོ་སྤོས་ཀྱི་ངད་ལྡང་དེ་ལས་མེ་ཏོག་གི་ཆར་ཆེན་པོ་བབ་སྟེ། དེ་དག་བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་གང་ན་བ་དེར་མངོན་པར་བབས་ནས་ས་ཆེན་པོ་འདིར་མེ་ཏོག་གི་ཆར་དེ་དག་གིས་པུས་མོ་མན་ཅད་ནུབ་པར་གྱུར་ཏོ། །མེ་ཏོག་གི་ཤིང་དེ་དག་ལས་མེ་ཏོག་སྣ་ཚོགས་ཀྱི་ཆར་རབ་ཏུ་འབབ་ཅིང ། སིལ་སྙན་དང ། གླུ་དབྱངས་སྣ་ཚོགས་ཀྱི་སྒྲ་དག་ཀྱང་བྱུང་ངོ ། །སྟེང་གི་བར་སྣང་ལ་རིན་པོ་ཆེ་སྣ་ཚོགས་ཀྱི་གདུགས་དཔག་ཚད་བརྒྱ་སྟོང་ཕྲག་བཅུའི་ཚད་ཙམ་ཀུན་དུ་གནས་པར་གྱུར་ཏོ། །རིན་པོ་ཆེའི་གདུགས་དེ་ལས་མུ་ཏིག་གི་དོ་ཤལ་དང ། རིན་པོ་ཆེའི་དྲིལ་བུ་གཡེར་ཀའི་དྲིལ་བུ་སྣ་ཚོགས་ཀྱི་དྲ་བ་འཕྱང་བར་གྱུར་ཏོ། །དྲིལ་བུ་གཡེར་ཀའི་དྲ་བའི་སྒྲ་ཡིད་དུ་འོང་བ། ཡིད་དགའ་བར་བྱེད་པ། ཆགས་པར་བྱེད་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གོ་བར་བྱས་པར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགའ་བར་བགྱིད་པ། མགུ་བར་བགྱིད་པའི
53.297b
མཚན་མ་རྒྱ་ཆེན་པོ་འདི་ལྟ་བུ་འདི་དང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྒྱན་ཐམས་ཅད་ཀྱིས་བརྒྱན་པར་གྱུར་པ་དགའ་བ་འདི་སུའི་སྔ་ལྟས་ལགས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་འདི་ནི་མི་འམ་ཅིའི་རྒྱལ་པོ་སྡོང་པོ་རི་སྤོས་ཀྱི་ངད་ལྡང་ནས་འཁོར་མི་འམ་ཅི་སྟོང་ཕྲག་དུ་མ་དང་འཁོར་དྲི་ཟ་སྟོང་ཕྲག་དུ་མ་དང ། འཁོར་ལྷ་སྟོང་ཕྲག་དུ་མ་དང་བཅས་ཏེ་འོང་བ་དེའི་སྔ་ལྟས་སོ། །དེ་སྐད་གསུངས་མ་ཐག་ཏུ་དེ་ནས་སྐད་ཅིག་དེ་ལ་མི་འམ་ཅིའི་རྒྱལ་པོ་སྡོང་པོ་སིལ་སྙན་དང ། གླུ་དབྱངས་ལེན་པ་བརྒྱད་ཁྲི་བཞི་སྟོང་དང ། འཁོར་བརྒྱ་སྟོང་དུ་མས་བསྐོར་ནས་སྟེང་གི་བར་སྣང་ལ་མེ་ཏོག་གི་ཆུ་བོའི་ཆར་འབེབས་ཤིང ། བཅོམ་ལྡན་འདས་ག་ལ་བ་དེར་འོངས་ཏེ་ཕྱིན་ནས་འཁོར་དང་བཅས་པས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་བཅོམ་ལྡན་འདས་ཀྱི་སྤྱན་སྔར་མི་འམ་ཅིའི་རྒྱལ་པོ་སྡོང་པོ་བདག་ཉིད་ཀྱིས་པི་བང་གི་ཁོག་པ་བཻ་དཱུརྱ་ལས་བྱས་པ། འཛམ་བུའི་གླིང་གི་གསེར་གྱི་སབ་ལེའུ་ཅན། ས་ལེ་སྦྲམ་དང ། ནོར་བུ་དང ། རིན་པོ་ཆེ་དུ་མས་སྤྲས་པ། སྔོན་གྱི་ལས་ཀྱི་རྣམ་པར་སྨིན་པས་ཡོངས་སུ་སྦྱངས་པ་བླངས་ཏེ། སིལ་སྙན་བརྒྱད་ཁྲི་བཞི་སྟོང་པོ་དེ་དག་དང་ལྷན་ཅིག་ཏུ་གྲག་པར་བྱེད་དོ། །མི་འམ་ཅིའི་རྒྱལ་པོ་སྡོང་པོས་པི་བང་དེ་བླངས་མ་ཐག་ཏུ་དེ་ནས་པི་བང་གི་སྒྲ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དབྱངས་ཀྱིས་གོ་བར་གྱུར་ཏོ། །པི་བང་གི་སྒྲ་དེས་འདོད་པ་ན་སྤྱོད་པའི་རྒྱུད་ཀྱི་སྒྲ་དང ། གླུའི་སྒྲ་དང ། ལྷའི་གླུ་དབྱངས་ཀྱི་སྒྲ་རྣམས་ཟིལ་གྱིས་མནན་ཏེ་མི་གསལ་བར་གྱུར་ཏོ། །དེ་ནས
53.298a
པི་བང་གི་སྒྲ་བསྐུལ་བས་འདོད་པ་ན་སྤྱོད་པའི་ལྷའི་བུ་དེ་དག་གིས། ལྷའི་རོལ་མོ་བོར་ཏེ་བཅོམ་ལྡན་འདས་ག་ལ་བ་དེར་ལྷགས་སོ། །མི་འམ་ཅིའི་རྒྱལ་པོ་སྡོང་པོས་པི་བང་དེ་བླངས་མ་ཐག་ཏུ་དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ཤིང་དང ། རིའི་རྒྱལ་པོ་རི་རབ་དང ། གངས་ཅན་དང ། སྤོས་ཀྱི་ངད་ལྡང་དང་བཏང་བཟུང་དང ། བཏང་ཟུང་ཆེན་པོ་དང ། དེ་མ་ཡིན་པ་གཞན་རི་ནག་པོ་རྣམ་དང ། རྩཝ་དང་ཤིང་གེལ་པ་དང་སྨན་དང ། ནགས་ཚལ་ཇི་སྙེད་པ་དེ་དག་ཐམས་ཅད་ལྡེག་།རབ་ཏུ་ལྡེག་།ཀུན་དུ་རབ་ཏུ་ལྡེག་གོ། །གཡོ་རབ་ཏུ་གཡོ། ཀུན་དུ་རབ་ཏུ་གཡོའོ། །འགུལ་རབ་ཏུ་འགུལ། ཀུན་དུ་རབ་ཏུ་འགུལ་ལོ་འདི་ལྟ་སྟེ་དཔེར་ན་ཆང་གིས་ར་རོ་བའི་མི་འཁྱར། རབ་ཏུ་འཁྱར། ཀུན་ཏུ་རབ་ཏུ་འཁྱར་བ་དེ་བཞིན་དུ་ཤིང་དེ་དག་ཐམས་ཅད་དང ། རི་ཐམས་ཅད་ཀྱང་འདུད། ཀུན་དུ་རབ་ཏུ་འདུད་དོ།། །། བམ་པོ་གཉིས་པ། མི་འམ་ཅིའི་རྒྱལ་པོ་སྡོང་པོས་པི་བང་ཁོག་པ་བཻ་དཱུརྱ་ལས་བྱས་པ་བླངས་མ་ཐག་ཏུ། དེ་ནས་བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་དེར་འདུས་པའི་ནང་ནས་ཕྱིར་མི་ལྡོག་པའི་བྱང་ཆུབ་སེམས་དཔའ་མ་གཏོགས་པར་འདོད་ཆགས་དང་བྲལ་བའི་དགེ་སློང་དང ། དགེ་སློང་མ་དང ། དགེ་བསྙེན་དང་དགེ་བསྙེན་མ་དང ། ལྷ་དང་ཀླུ་དང་གནོད་སྦྱིན་དང ། དྲི་ཟ་དང་ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང་ལྟོ་འཕྱེ་ཆེན་པོ་དང ། བརྒྱ་བྱིན་དང་ཚངས་པ་དང ། འཇིག་རྟེན་སྐྱོང་བ་དང་མི་དང་མི་མ་ཡིན་པ་དང ། རྣམ་པར་ཐར་པ་བརྒྱད་ལ་བསམ་གཏན་པའི་དགྲ་བཅོམ་པ་དང ། ཐམས་ཅད་དང་ལྡན་པའི་འཁོར་གྱིས་པི་བང་གི་སྒྲ་དེ་ཐོས་པ་དང ། པི་བང་གི་སྒྲ་དེ་མ་བཟོད་ནས་རང་རང་གི་སྟན་ལས་ལངས་ཏེ་འདར། རབ་ཏུ་འདར་ཀུན་དུ་རབ་ཏུ་འདར་རོ། །འདུད་རབ་ཏུ་འདུད། ཀུན་དུ་རབ་ཏུ་འདུད་དོ། །གར་བྱེད་རབ་ཏུ་གར་བྱེད། ཀུན་དུ་རབ་ཏུ་གར་བྱེད་དོ། །ཉན་ཐོས་ཆེན་པོ་དེ
53.298b
དག་ཐམས་ཅད་ཀྱང་རང་རང་གི་སྟན་ལ་མི་དགའ་སྟེ། འགུལ། རབ་ཏུ་འགུལ་ཞིང་སྤྱོད་ལམ་ཡང་འཁྲུགས་ནས་བྱིས་པ་ཆུང་ངུ་བཞིན་དུ་གར་བྱེད་པ་ལྟ་བུར་སྟོན་ཏོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་ཉན་ཐོས་ཆེན་པོ་དེ་དག་ཐམས་ཅད་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཉན་ཐོས་ཆེན་པོ་དག་ཉོན་མོངས་པ་དང་བྲལ་བ། རྣམ་པར་ཐར་པ་བརྒྱད་ལ་བསམ་གཏན་པ་བདེན་པ་བཞི་མཐོང་བར་གྱུར་པ་ཡིན་ན། ཅིའི་ཕྱིར་རང་གི་ལུས་འཇོག་པར་མི་ནུས་ཤིང ། ཚེ་དང་ལྡན་པ་དག་བྱིས་པ་ཆུང་ངུ་བཞིན་དུ་གར་བྱེད་པ་ལྟ་བུར་སྟོན། ཉན་ཐོས་ཆེན་པོ་དེ་དག་གིས་སྨྲས་པ། རིགས་ཀྱི་བུ་མི་འམ་ཅིའི་རྒྱལ་པོ་སྡོང་པོས་པི་བང་འདི་བླངས་པ་དང ། སིལ་སྙན་དང ། གླུ་དབྱངས་སྦྱར་བས་པི་བང་གི་སྒྲ་དེས་བདག་ཅག་ལ་དབང་མེད་པར་བདག་ཅག་གི་ལུས། རང་རང་གི་སྟན་ལ་འདུག་པར་མི་དགའ་འདར་རབ་ཏུ་འདར། ཀུན་དུ་རབ་ཏུ་འདར་ཏེ། སེམས་རྣམ་པར་གཞག་པར་ཡང་མ་ནུས་སོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་གནས་བརྟན་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་ཆེན་པོ་རྒས་གཏུགས་འཁོགས་པ། འདོད་པ་ཉུང་བ་ཆོག་ཤེས་པ། སྦྱངས་པའི་ཡོན་ཏན་འཛིན་པ་དང ། ལྷ་དང་མི་དང ། ལྷ་མ་ཡིན་དུ་བཅས་པའི་འཇིག་རྟེན་གྱི་མཆོད་རྟེན་དུ་གྱུར་པ་ཡིན་ན། ཅིའི་ཕྱིར་རང་གི་ལུས་འཛིན་པར་མི་ནུས་ཤིང ། གནས་བརྟན་དུ་གྱུར་ཀྱང་བྱིས་པ་ཆུང་ངུ་བཞིན་དུ་གར་བྱེད་པ་ལྟ་བུར་སྟོན། གནས་བརྟན་འོད་སྲུང་ཆེན་པོས་སྨྲས་པ། རིགས་ཀྱི་བུ་དཔེར་ན་དམུ་རླུང་ཕྱད་པའི་རླུང་ལངས་པ་ན་ཤིང་དང ། ནགས་དང ། རི་ཐམས་ཅད་གང་གིས་བདག་རྣམ་པར་གཞག་པའི་སྟོབས་མེད་མཐུ་མེད་དེ། དེ་དག་ཐམས་ཅད་མི་འདོད་བཞིན་དུ་གཡོ་རབ་ཏུ་གཡོ། འགུལ་རབ་ཏུ་འགུལ
53.299a
ལོ། །རིགས་ཀྱི་བུ་དེ་བཞིན་དུ་གང་འདི་མི་འམ་ཅིའི་རྒྱལ་པོ་སྡོང་པོས་པི་བང་བླངས་པ་དེའི་སྒྲ་ཐོས་པས་བདག་ཅག་དམུ་རླུང་ཕྱད་པས་རིན་པོ་ཆེ་བདས་པ་བཞིན་དུ་བདག་འཛིན་མ་ནུས་པར་གྱུར་ཏོ། །དེ་ཅིའི་ཕྱིར་ཞེ་ན། སྐྱེས་བུ་དམ་པ་འདིའི་སྨོན་ལམ་དང ། བསོད་ནམས་དང་ཡེ་ཤེས་ཀྱི་ཁྱད་པར་ནི་འདི་འདྲ་སྟེ། དེས་ཉན་ཐོས་ཀྱི་བསོད་ནམས་དང་ཡེ་ཤེས་དང ། གཟི་བརྗིད་ཐམས་ཅད་ཟིལ་གྱིས་ནོན་ཏོ། །བྱང་ཆུབ་སེམས་དཔའ་ལྷའི་ཅོད་པན་གྱིས་སྨྲས་པ། བཙུན་པ་འོད་སྲུང་ཆེན་པོ་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ཀྱི་དཔལ་དང ། གཟི་བརྗིད་དང་སྟོབས་ལ་གང་གི་ཕྱིར་པི་བང་གི་སྒྲ་དེས་བསྐུལ་བ་འམ། བསྐྱོད་པར་མི་ནུས་པས་བཙུན་པ་འོད་སྲུང་ཆེན་པོ་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེད། དེ་ཅིའི་ཕྱིར་ཞེ་ན། གང་ཉི་ཚེའི་ཡེ་ཤེས་དང་ལྡན་པ་རྣམས་ཀྱི་སྟོབས་དང་གཟི་བརྗིད་དེ་ནི་པི་བང་གི་སྒྲ་འདིས་ཟིལ་གྱིས་ནོན་ཏོ། །གང་ཐེག་པ་ཆེན་པོ་ལ་ཞུགས་པ་རྣམས་ཀྱི་སྟོབས་དང ། གཟི་བརྗིད་དེ་ལ་ནི་ཟིལ་གྱིས་གནོན་པར་མི་ནུས་པ་ལ་ལྟོས། དེ་ནས་མི་འམ་ཅིའི་རྒྱལ་པོ་སྡོང་པོས་པི་བང་གི་སྒྲ་དེ་སྒྲོག་པ་ན་སངས་རྒྱས་ཀྱི་མཐུ་དང ། མི་འམ་ཅིའི་རྒྱལ་པོ་སྡོང་པོའི་སྔོན་གྱི་སྨོན་ལམ་གྱི་བྱིན་གྱི་བརླབས་ཀྱིས་པི་བང་དེ་དང་སིལ་སྙན་བརྒྱད་ཁྲི་བཞི་སྟོང་པོ་དེ་དག་ལས་ཚིགས་སུ་བཅད་པ་འདི་དག་བྱུང་ངོ ། །ཐ་མ་འབྲིང་དང་དེ་བཞིན་མཆོག་རྣམས་ཀྱི། །ཆོས་རྣམས་ཐམས་ཅད་མཉམ་ཞིང་ཆོས་རྣམས་དབེན། །ཞི་བ་སྟོང་པ་མི་འགྱུར་འཁྲུགས་པ་མེད། །གཟོད་ནས་དག་སྟེ་དྲི་མེད་ནམ་མཁའ་བཞིན། །གང་དག་ད་ལྟར་གྱི་དང་འདས་པ་ཡི། །སེམས་ཅན་ཀུན་མཉམ་སེམས་ཅན་སེམས་ཅན་མེད། །སེམས་ཅན་སྐད་དུ་སྒྲ་རྣམས་འབྱུང་བ་ཡང ། །ཆོས་ཀྱི་སྒྲ་དང་མཚུངས་ཏེ་དེ་ཡང་མེད། །ཞིང་རྣམ
53.299b
ཐམས་ཅད་ཞིང་མཉམ་ཞིང་མིན་ཏེ། །བར་སྣང་དང་ནི་མཚུངས་ཤིང་མཉམ་པར་སྣང ། །འཕེལ་བ་མ་ཡིན་མི་ཟད་མ་སྐྱེས་ཏེ། །གསོབ་གསོག་ནམ་མཁའ་ལྟ་བུར་རྣམ་པར་དག་།སངས་རྒྱས་ཀུན་མཉམ་སངས་རྒྱས་སངས་རྒྱས་མིན། །ཆོས་དབྱིངས་ངེས་པར་འདྲེས་པ་མེད་པ་སྟེ། །ཚུལ་ཁྲིམས་ཤེས་རབ་ཡེ་ཤེས་རྣམ་གྲོལ་མཉམ། །མཚན་ཉིད་གཅིག་སྟེ་མཚན་མཉམ་མཚན་ཉིད་མེད། །ཉོན་མོངས་ཐམས་ཅད་ཉོན་མོངས་མ་ཡིན་གྲོལ། །རྟོག་དང་རྟོག་པ་ཀུན་རྟོག་རྣམ་པར་རྟོག་།ནང་ན་རྒྱུ་བ་མ་ཡིན་ཕྱི་རོལ་མིན། །འདུ་ཤེས་མདུད་པ་ཕྱིན་ཅི་ལོག་ལས་གྱུར། །རྣམ་པར་རྟོག་པས་ཆོས་དབྱིངས་མིང་བཏག་པ། །མིང་དེ་ཉིད་ཀྱང་གཞན་མིན་དེ་བཞིན་མིན། །མིང་དང་གཟུགས་ཀྱི་རང་བཞིན་རྗེས་རྟོགས་པ། །དེ་དག་རྟག་ཏུ་མི་ཆགས་འཇིག་རྟེན་སྤྱོད། །གང་རྣམས་འདས་པའི་བདེ་གཤེགས་གྲངས་མེད་པ། དེ་དག་གིས་ནི་གང་གསུངས་ཆོས་མང་པོ། །གཟོད་ནས་ཟད་ཅིང་དེངས་དང་འཇིགས་ལས་དབེན། །དེ་དག་ཡུལ་དང་ཕྱོགས་སུ་འགྲོ་མ་ཡིན། །ཆོས་འདི་དག་ནི་ཡི་གེ་ལས་བྱུང་སྟེ། །ཡི་གེ་གང་དག་ཟད་ཅན་ཟད་པའི་ཆོས། །ཡི་གེ་ཟད་པའི་ཆོས་ཉིད་ཤེས་པས་ན། །ཆོས་རྣམས་ཀུན་ལ་རྣམ་པར་རྟོག་མི་བྱེད། །སེམས་ཀྱི་རྒྱུད་ནི་རྒྱུད་མཉམ་རྒྱུད་མ་ཡིན། །རང་བཞིན་གཞན་དང་གཞན་ཏེ་ཆགས་པ་མེད། །སེམས་དང་སེམས་བྱུང་ཆོས་མཐའ་མེད་ཤེས་པས། །འཕགས་པ་རྣམས་ནི་མཉམ་པའི་ཆོས་ལ་འཇུག་།མཐའ་དང་མཐའ་མེད་ཀུན་ཆད་རྣམ་པར་ཆད། །ཐོག་མ་ཐ་མ་བར་མ་མཉམ་གྱུར་པ། །དུས་གསུམ་དག་ནི་དབེན་པས་ཤེས་པ་མཉམ། །ཤེས་པ་དེ་ཡང་མཐའ་ཡོད་མ་ཡིན་ནོ། །སྐྱེ་བོ་རྟག་ཏུ་མིང་དང་གཟུགས་ལ་ཆགས། །མཐའ་དང་མཐའ་མེད་ལྟ་བས་གོས་པ་རྣམས། །རྒྱུ་དང་རྐྱེན་ལས་བྱུང་བར་ཤེས
53.300a
པས་ན། །བདག་དང་སེམས་ཅན་རྣམ་པར་རྟོག་མ་ཡིན། །བདག་ལས་ལྡང་བ་རྟག་ཏུ་ལྡང་མ་ཡིན། །ཆོས་དེ་ཀུན་ནས་བསླང་བ་མེད་པ་སྟེ། །གང་དག་ལྡང་དང་ལྡང་བ་མེད་རྟོག་པ། །དེ་དག་བཟོད་པ་མཉམ་ཉིད་རྗེས་འཐུན་པ། །ཆོས་ཀུན་རྟག་ཏུ་བདག་མེད་རང་བཞིན་ཏེ། །སྤྲིན་དང་གློག་དང་ནམ་མཁའ་ལྟ་བུ་གསོག་།བདག་དང་སེམས་ཅན་རྟག་ཏུ་རང་བཞིན་སྟོང ། །འདི་ནི་གཟུངས་ཀྱི་ཕྱག་རྒྱར་འཇུག་པའོ། །ཆོས་རྣམས་མཚན་ཉིད་གཅིག་སྟེ་མཚན་ཉིད་མེད། །གང་གིས་ཐར་པའི་སྒོ་གསུམ་རྣམ་རྟོགས་ནས། །ཐུག་པ་མེད་པའི་ཆོས་རྣམས་སྟོན་བྱེད་ཀྱང ། །ཆོས་ལ་ཡོངས་སུ་རྟོག་པ་མི་བྱེད་དོ། །ཐ་མ་འབྲིང་དང་དེ་བཞིན་མཆོག་རྣམས་ཀྱི། །ཆོས་འདི་དག་ནི་ཡི་གེ་ལས་བྱུང་སྟེ། །ཡི་གེ་རྣམས་ལ་རྣམ་པར་རྟོག་མི་བྱེད། །དེ་ལྟ་བུར་ནི་དོན་རྣམས་བཤད་པ་ཡིན། །དོན་དང་ཚིག་འབྲུ་གཉིས་ལ་མི་འཇུག་སྟེ། །གཉིས་མེད་རྟག་ཏུ་དོན་ནི་སྒྲ་དང་བྲལ། །གང་གིས་མཐའ་འདི་དབེན་པར་ཤེས་པ་ནི། །དེའི་སྔོན་གྱི་མཐའ་ནི་ཉེ་བར་ཆད། །གང་དག་སྔོན་མཐའ་ཉེ་བར་ཆད་པ་རྣམས། །འགྲོ་བའི་དོན་དུ་འདུས་བྱས་རྣམས་ལ་སྤྱོད། །ཡང་དག་མཐའ་ནི་རྟག་ཏུ་མཐའ་མེད་ཤེས། །དེའི་བྱམས་དང་སྙིང་རྗེ་ཤིན་ཏུ་དག་།གང་གི་བྱམས་དང་སྙིང་རྗེ་རྣམ་དག་པ། །སྡུག་བསྔལ་དང་ནི་བདེ་བ་མཚུངས་མཉམ་སྦྱོར། །རྒོད་དང་ཁེངས་པ་མ་ཡིན་བརྟན་པ་ཡི། །སྐྱེས་བུ་མཆོག་དེ་དོན་གྱི་ཆོ་ག་ཤེས། །ཆོས་ཀྱི་ཚུལ་འདི་ཞི་ཞིང་དབེན་པ་སྟེ། །འཆང་བ་ན་ནི་དགའ་བ་འཐོབ་པར་འགྱུར། །ནམ་ཡང་འཕེལ་བ་མེད་ཅིང་འབྲི་བ་མེད། །ཆོས་ཉིད་འདི་ནི་ངར་འཛིན་མེད་ཅིང་ཞི། །བར་སྣང་ལམ་གྱི་སྒྲ་ནི་གཟུངས་མེད་དེ། །གང་གིས་བཤད་པ་མེད་ཀྱང་གྲགས་པར་གྱུར། །གང་གིས་བཤད་དང་གང་ལ་བཤད་པ་རྣམས། །དེ་དག་ཐམས་ཅད་དབང་ཅན་བརྫུན་པ་ཡིན། །ཚིགས་སུ་བཅད་པ་མངོན་པར་སྒྲུབ་པ་འདི་བཤད་པ་ན།
53.300b
བྱང་ཆུབ་སེམས་དཔའ་བརྒྱ་སྟོང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཚིགས་སུ་བཅད་པ་འདི་ལྟ་བུ་འདི་དག་ག་ལས་བྱུང ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་མི་འམ་ཅིའི་རྒྱལ་པོ་ལ་དྲིས་ཤིག་དང ། དེས་དེའི་ལན་གློན་པར་འགྱུར་རོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་མི་འཾ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་སྨྲས་སོ། །མི་འམ་ཅིའི་བདག་པོ་ཚིགས་སུ་བཅད་པ་མངོན་པར་བསྒྲུབ་པ་འདི་དག་ག་ལས་བྱུང ། སྨྲས་པ། སེམས་ཅན་ཐམས་ཅད་ཀྱི་སྒྲ་ག་ལས་བྱུང་ངོ ། །སྨྲས་པ། མི་འམ་ཅིའི་བདག་པོ་སེམས་ཅན་ཐམས་ཅད་ཀྱི་སྒྲ་ག་ལས་བྱུང ། སྨྲས་པ། རིགས་ཀྱི་བུ་སེམས་ཅན་ཐམས་ཅད་ཀྱི་སྒྲ་ནི་ནམ་མཁའ་ལས་འབྱུང་ངོ ། །སྨྲས་པ། མི་འམ་ཅིའི་བདག་པོ་སེམས་ཅན་ཐམས་ཅད་ཀྱི་སྒྲ་ཁོང་པའི་ནང་ནས་མི་འབྱུང་ངམ། སྨྲས་པ། རིགས་ཀྱི་བུ་དེ་ལ་ཇི་སྙམས་དུ་སེམས། སེམས་ཅན་ཐམས་ཅད་ཀྱི་སྒྲ་ལུས་ཀྱི་ནང་གི་ཁོང་ནས་བྱུང་ངམ། འོན་ཏེ་སེམས་ལས་བྱུང ། སྨྲས་པ། མི་འམ་ཅིའི་བདག་པོ་ལུས་ལས་ཀྱང་མ་ཡིན། སེམས་ལས་ཀྱང་མ་ཡིན་ནོ། །དེ་ཅིའི་ཕྱིར་ཞེ་ན། ལུས་ནི་བླུན་པ་གཡོ་བ་མེད་པ། བྱེད་པ་མེད་པ་རྩཝ་དང་བོང་བ་དང་རྩིག་པ་དང་ཤིང་དང ། མིག་ཡོར་ལྟ་བུའོ། །སེམས་ནི་གཟུགས་མེད་པ་བསྟན་དུ་མེད་པ། ཐོགས་པ་མེད་པ། རྣམ་པར་རིག་པ་མེད་པ་སྟེ། སྒྱུ་མ་ལྟ་བུ་འོ་སྨྲས་པ། རིགས་ཀྱི་བུ་ལུས་དང་སེམས་མ་གཏོགས་པར་གཞན་གང་ནས་སྒྲ་འབྱུང་བར་འགྱུར། སྨྲས་པ་མི་འམ་ཅིའི་བདག་པོ་སེམས་ཅན་རྣམས་ཀྱི་སྒྲ་ནི་ཡིད་ལ་བྱེད་པ་ལས་འབྱུང་བར་བཏགས་སོ། །སྨྲས་པ་གལ་ཏེ་ནམ་མཁའ་མེད་ན་སྒྲ་ག་ལས
53.301a
འབྱུང ། སྨྲས་པ། མི་འམ་ཅིའི་བདག་པོ་ནམ་མཁའ་མ་གཏོགས་པར་གཞན་གང་ནས་སྒྲ་འབྱུང་བར་འགྱུར། སྨྲས་པ་རིགས་ཀྱི་བུ་དེའི་ཕྱིར་རྣམ་གྲངས་འདིས་སྒྲ་ཇི་སྙེད་པ་དེ་དག་ཐམས་ཅད་ནི་ནམ་མཁའ་ལས་འབྱུང་བར་རིག་པར་བྱའོ། །ནམ་མཁའི་ངོ་བོ་ཉིད་ནི་སྒྲ་སྟེ། རྣམ་པར་རིག་མ་ཐག་ཏུ་འགག་གོ། །འགགས་ནས་ནམ་མཁའི་ངོ་བོ་ཉིད་དུ་ཡང་དག་གནས་སོ། །དེའི་ཕྱིར་ཆོས་ཐམས་ཅད་ནི་ནམ་མཁའ་དང་མཉམ་ཞེས་བྱ་སྟེ་རྣམ་པར་རིག་པ་མེད་པ་རྣམ་པར་ཤེས་པར་ཤེས་པར་བྱ་བ་མ་ཡིན་མོད་ཀྱི་སྒྲ་དང་སྒྲའི་བརྡས་བརྗོད་དོ། །བརྗོད་པ་དེ་ཡང་ཐ་སྙད་དོ། །གང་སྒྲས་བརྗོད་པ་འདི་འདྲ་བར་རབ་ཏུ་ཤེས་པ་དེ་ནི་ཆོས་གང་ལ་ཡང་མངོན་པར་མི་ཆགས་སོ། །གང་མངོན་པར་མི་ཆགས་པ་དེ་ནི་རྣམ་པར་མི་འཕྲོའོ། །གང་རྣམ་པར་མི་འཕྲོ་བ་དེ་མི་འཁོར་རོ། །གང་མི་འཁོར་བ་དེ་མི་ཕྱེད་པའོ། །གང་མི་ཕྱེད་པ་དེ་མི་སྐྱེའོ། །གང་མི་སྐྱེ་བ་དེ་མི་འཇིག་པར་འདོད་དོ། །གང་མི་འཇིག་པ་དེ་དང་བའོ། །གང་དང་བ་དེ་དག་པའོ། །གང་དག་པ་དེ་དྲི་མ་མེད་པའོ། །གང་དྲི་མ་མེད་པ་དེ་འོད་གསལ་བའོ། །གང་འོད་གསལ་བ་དེ་སེམས་ཀྱི་རང་བཞིན་གང་ཡིན་པ་དེ་འཇུག་པའོ། །གང་འཇུག་པ་དེ་མཚན་མ་ཐམས་ཅད་གནོན་པའོ། །གང་མཚན་མ་ཐམས་ཅད་གནོན་པ་དེ་སྐྱོན་མེད་པ་ལ་འཇུག་པ་ཞེས་བྱའོ། །བྱང་ཆུབ་སེམས་དཔའི་སྐྱོན་མེད་པ་ལ་འཇུག་པ་གང་ཡིན་པ་དེ་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་སྟེ། དེས་ན་སྐྱོན་མེད་པ་ལ་ཞུགས་པའི་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་ཞེས་བྱའོ། །གང་བཟོད་པ་རབ་ཏུ་ཐོབ་པ་དེས་ཐམས་ཅད་བཟོད་དེ། དེ་སྟོང་པར་ཡང་བཟོད་དེ་གང་ཟག་ཏུ་ཡང་བཟོད་དོ། །དེ་ཅིའི་ཕྱིར་ཞེ་ན། གང་ཟག་ལས་སྟོང་པ་གཞན་མ་ཡིན་ཏེ། གང་ཟག་ཉིད་སྟོང་པ་གཞན་མ་ཡིན་ཏེ། གང་ཟག་ཉིད་སྟོང་པའོ། །དེ་མཚན་མར་ཡང་བཟོད་དེ་མཚན
53.301b
མ་མེད་པར་བཟོད་པའོ། །དེ་ཅིའི་ཕྱིར་ཞེ་ན། མཚན་མའི་ངོ་བོ་ཉིད་མཚན་མ་མེད་པའོ། །དེ་སྨོན་པར་ཡང་བཟོད། དེ་སྨོན་པ་མེད་པ་ཡང་བཟོད་དོ། །དེ་ཅིའི་ཕྱིར་ཞེ་ན། སྨོན་ལམ་གྱི་ངོ་བོ་ཉིད་ཀྱི་མཚན་ཉིད་སྨོན་པ་མེད་པའོ། །དེ་སེམས་ཅན་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་ཡང་བཟོད་དེ་སེམས་ཅན་རྣམས་འཆི་འཕོ་བ་དང་སྐྱེ་བར་ཡང་བཟོད་དོ། །དེ་ཅིའི་ཕྱིར་ཞེ་ན། འཆི་འཕོ་དང་སྐྱེ་བ་ནི་སྒྱུ་མའི་ངོ་བོ་ཉིད་དོ། །རིགས་ཀྱི་བུ་དེ་ལྟར་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པའི་བྱང་ཆུབ་སེམས་དཔའ་ནི་འགག་པ་མེད་པ་སྟེ། ཆོས་ཐམས་ཅད་དང་འགལ་བ་མེད་པ་ཡིན་ནོ། །བདག་བཟོད་པའི་རྗེས་སུ་འགྲོ་ཡང་སེམས་ཅན་ཐམས་ཅད་ཀྱི་རྗེས་སུ་འགྲོ་བས་ཀྱང་འགྲོ། བདག་བཟོད་པ་རྗེས་སུ་འགྲོ་ཡང་ཆོས་ཐམས་ཅད་ཀྱི་རྗེས་སུ་འགྲོ་བས་ཀྱང་འགྲོ་སྟེ། འོང་བ་ཡང་མེད། འགྲོ་བ་ཡང་མེད་དོ། །ཆོས་ཐམས་ཅད་ཆོས་ཀྱི་དབྱིངས་ལ་གནས་པར་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཇི་ལྟར་ཆོས་ཀྱི་དབྱིངས་ལ་གནས་པ་དེ་ལྟར་སེམས་ཅན་ཐམས་ཅད་གནས་ཏེ། གང་གི་གནས་དེ་འཐོབ་པའི་གནས་མེད་པའི་ཚུལ་གྱིས་རྗེས་སུ་ཐོབ་པ་དེ་སྒྲའི་བརྡའི་ཐ་སྙད་ཀྱི་སྒྲ་ཉེ་བར་བཟུང་ནས། མི་སྐྱེ་བའི་ཆོས་ལ་བཟོད་པ་དང་ལྡན་པ་ཞེས་བྱའོ། །མི་སྐྱེ་བའི་ཆོས་ལ་བཟོད་པ་ནི་གང་གིས་ཀྱང་བརྗོད་པ་འམ། བསྙད་པ་འམ། བསྟན་པར་མི་ནུས་སོ། །དེ་ཅིའི་ཕྱིར་ཞེ་ན། དོན་དེ་ནི་བརྗོད་དུ་མེད་པ། སྒྲ་མེད་པ། བཤད་དུ་མེད་པ་ཡིན་ཡང་བརྗོད་དུ་མེད་པའི་དོན་བརྗོད་པས་བསྟན་པ་འདི་རིགས་ཀྱི་བུ་དེ་བཞིན་གཤེགས་པའི་ཆེ་བ་ཉིད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱེ་མ་མི་འམ་ཅིའི་རྒྱལ་པོ་སྡོང་པོ།
53.302a
འདི་ཇི་ཙམ་དུ་ཆོས་ཟབ་མོ་ལ་བཟོད་པ་སྟོན་པར་སྤོབས་པ་དང ། འདི་ལྟ་བུར་རྒྱ་ཆེ་བའི་ཡུལ་ལ་ཉེ་བར་སྤྱོད་ཅིང་ལོངས་སྤྱོད་པས་འབྱོར་བ་དང ། ཆོས་སྟོན་པས་ཟབ་མོའ་བཟོད་པ་འདི་ལྟ་བུ་དང་ལྡན་པ་ནི་ངོ་མཚར་ཏོ། །བཅོམ་ལྡན་འདས་མི་འམ་ཅིའི་རྒྱལ་པོ་སྡོང་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་དགེ་བའི་རྩ་བ་བསྐྲུན་ན་དེས་འདི་སྤོབས་པ་འདི་ལྟ་བུ་གྲུབ་པར་གྱུར་བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་སྐར་མའི་གཟུགས་ཇི་སྙེད་པ་བགྲང་བའི་ཚུལ་གྱིས་ཚད་གཟུང་བར་ནུས་སམ། དེ་བཞིན་དུ་མི་འམ་ཅིའི་རྒྱལ་པོ་སྡོང་པོ་འདིས་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་དགེ་བའི་རྩ་བ་བསྐྲུན་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཙལ་བའི་ཕྱིར་དེ་བཞིན་གཤེགས་པ་དེ་དག་གི་གན་ན་ཚངས་པར་སྤྱོད་པ་སྤྱད་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཀྱང་ཚད་གཟུང་བར་མི་ནུས་ཏེ། དེས་ན་འདིའི་སྤོབས་པ་འདི་འདྲའོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་མི་འམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་སྨྲས་སོ། །མི་འམ་ཅིའི་བདག་པོ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི། སངས་རྒྱས་མང་པོ་དེ་དག་ལས་དགེ་བའི་རྩ་བ་བསྐྲུན་པའི་དགེ་བའི་རྩ་བ་མང་པོ་དེ་ལྟ་བུ་བསྡོམས་པས་ཅི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་འམ། མི་འམ་ཅིའི་རྒྱལ་པོ་སྡོང་པོས་སྨྲས་པ། རིགས་ཀྱི་བུ་བྱང་ཆུབ་སེམས་དཔའ་རྣམས་དགེ་བའི་རྩ་བ་ཡང་དག་པར་སྒྲུབ་པ་ན། གང་དག་གིས་ནམ་དུ་ཡང་ངོམས་པར་མི་འགྱུར་བ་བྱང་ཆུབ་སེམས་དཔའ་རྣམས་ཀྱི་མི་ངོམས་པ་བཅུ་གཉིས་པོ་འདི་དག་སྟེ། བཅུ་གཉིས་གང་ཞེ་ན། འདི་ལྟ་སྟེ། དེ་བཞིན་གཤེགས་པ་ལ་མཆོད་པ་དང །
53.302b
རིམ་གྲོ་བྱ་བས་མི་ངོམས་པ་དང ། ཆོས་མཉན་པས་མི་ངོམས་པ་དང ། དམ་པའི་ཆོས་ཡོངས་སུ་གཟུང་བས་མི་ངོམས་པ་དང ། ཆོས་རྒྱ་ཆེར་རབ་ཏུ་བསྟན་པས་མི་ངོམས་པ་དང ། སེམས་ཅན་ཡོངས་སུ་སྨིན་པར་བྱ་བས་མི་ངོམས་པ་དང ། དགེ་བའི་རྩ་བ་ཡང་དག་པར་བསྒྲུབ་པས་མི་ངོམས་པ་དང ། དགོན་པ་ལ་གནས་པས་མི་ངོམས་པ་དང ། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་བསྐང་བས་མི་ངོམས་པ་དང ། ཡེ་ཤེས་མངོན་པར་རབ་ཏུ་དང་ཞིང་ཡོངས་སུ་སྨིན་པར་བྱ་བས་མི་ངོམས་པ་དང ། ཆོས་ངེས་པར་སེམས་ཤིང་ཚུལ་བཞིན་ལ་རབ་ཏུ་སྦྱོར་བས་མི་ངོམས་པ་དང ། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་བཙལ་བས་མི་ངོམས་པ་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཡང་དག་པར་བསྒྲུབ་པས་མི་ངོམས་པའོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔའ་རྣམས་དགེ་བའི་རྩ་བ་ཡང་དག་པར་བསྒྲུབ་པ་ན་གང་དག་ནམ་དུ་ཡང་ངོམས་པར་མི་འགྱུར་བ་བྱང་ཆུབ་སེམས་དཔའ་རྣམས་ཀྱི་མི་ངོམས་པ་བཅུ་གཉིས་ཏེ། དེས་ན་བྱང་ཆུབ་སེམས་དཔའ་རྣམས་དགེ་བའི་ཚོགས་བསགས་པ་ལ་མི་ངོམས་པ་ཞེས་བྱའོ། །དེ་ནས་བཅོམ་ལྡན་འདས་ལ་མི་འམ་ཅིའི་རྒྱལ་པོ་སྡོང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་དཀོན་མཆོག་འབྱུང་གནས་ཤེས་བགྱི་བ་མཆིས་ཏེ། བྱང་ཆུབ་སེམས་དཔའ་ཏིང་ངེ་འཛིན་དེ་ལ་བརྟེན་ན་ཡོན་ཏན་རིན་པོ་ཆེའི་ཁྱད་པར་གྱི་ཆོས་ཐམས་ཅད་འཐོབ་པར་འགྱུར་རོ་ཞེས་བགྱི་བ་ཞིག་བདག་གིས་ཐོས་ན། བཅོམ་ལྡན་འདས་གང་ཐོས་པས། བྱང་ཆུབ་སེམས་དཔའ་རྣམས་ཡོན་ཏན་རིན་པོ་ཆེའི་ཁྱད་པར་གྱི་ཆོས་ཐམས་ཅད་འཐོབ་པར་འགྱུར་བར་བགྱི་བའི་སླད་དུ། བྱང་ཆུབ་སེམས་དཔའི་ཏིང་ངེ་འཛིན་དཀོན་མཆོག་འབྱུང་གནས་དེ་བཞིན་གཤེགས་པས་ལེགས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། མི་འམ་ཅིའི་བདག་པོ་དེའི་ཕྱིར་ཤིན་ཏུ
53.303a
ལེགས་པར་ཉོན་ལ་ཡིད་ལ་ཟུང་ཤིག་དང ། བྱང་ཆུབ་སེམས་དཔའི་ཏིང་ངེ་འཛིན་དཀོན་མཆོག་འབྱུང་གནས་ངེས་ཁྱོད་ལ་བཤད་དོ། །མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ལ་ལེགས་སོ་ཞེས་གསོལ་ནས། བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །མི་འམ་ཅིའི་བདག་པོ་འདི་ལ་བྱང་ཆུབ་སེམས་དཔའ་ནི་སངས་རྒྱས་དཀོན་མཆོག་རྒྱུན་མི་འཆད་པ་དང ། ཆོས་དཀོན་མཆོག་རྒྱུན་མི་འཆད་པ་དང ། དགེ་འདུན་དཀོན་མཆོག་རྒྱུན་མི་འཆད་པར་བྱ་བའི་ཕྱིར་སེམས་བསྐྱེད་པ་རིན་པོ་ཆེ་བརྒྱད་བཅུ་པོ་འདི་དག་ལ་འཇུག་གོ། །བརྒྱད་བཅུ་གང་ཞེ་ན། འདི་ལྟ་སྟེ། དེ་ཐམ་ཅད་མཁྱེན་པའི་སེམས་རིན་པོ་ཆེ་མི་བརྗེད་པ་དང ། ལྷག་པའི་བསམ་པའི་སེམས་རིན་པོ་ཆེ་མི་གཏོང་བ་དང ། དགེ་བ་རིན་པོ་ཆེ་ཐམས་ཅད་ཀྱི་སེམས་མི་འདོར་བ་དང ། དགེ་བ་རིན་པོ་ཆེ་ཐམས་ཅད་ལ་རབ་ཏུ་སྦྱོར་བའི་སེམས་མི་འདོར་བ་དང ། ཡི་དམ་ལ་བརྟན་པའི་སེམས་རིན་པོ་ཆེ་ཡོངས་སུ་མི་འདོར་བ་དང ། བདོག་པ་ཐམས་ཅད་ཡོངས་སུ་གཏོང་བའི་སེམས་རིན་པོ་ཆེ་བྱང་ཆུབ་ཏུ་ཡོངས་སུ་སྔོ་བས་རྣམ་པར་སྨིན་པ་ལ་མི་རེ་བའི་སེམས་རིན་པོ་ཆེ་ལ་འཇུག་པ་དང ། མི་དགེ་བའི་རྩ་བ་རྣམ་པ་གསུམ་རྣམ་པར་སྤངས་པས། ལུས་ཀྱི་རྒྱན་གྱི་སེམས་རིན་པོ་ཆེ་དང ། ངག་གི་སྐྱོན་རྣམ་པ་བཞི་རྣམ་པར་སྤངས་པས་ངག་གི་རྒྱན་ཀྱི་སེམས་རིན་པོ་ཆེ་དང ། བརྣབ་སེམས་དང་གནོད་སེམས་དང་ལོག་པར་ལྟ་བ་དང་བྲལ་བས་སེམས་ཀྱི་རྒྱན་གྱི་སེམས་རིན་པོ་ཆེ་དང ། ཚུལ་ཁྲིམས་མ་ཉམས་ཤིང་སྐྱོན་མེད་དེ་འདྲེན་མ་མ་ཡིན་ཞིང་ཐུན་ཚགས་མ་ཡིན་པས་ཚུལ་ཁྲིམས་ཀྱི་རྒྱན་གྱི་སེམས་རིན་པོ་ཆེ་དང ། སེམས་ཅན་ཐམས་ཅད་ལ་སེམས་སྙོམས་པས་ཁོང་ཁྲོ་བ་མེད་པའི་སེམས་རིན་པོ་ཆེ་དང ། སེམས་ཅན་ཐམས་ཅད
53.303b
ཀྱིས་ཉེས་པར་བྱས་པ་ལ་ཅི་མི་སྙམ་པས་བཟོད་པ་དང་ངེས་པའི་སེམས་རིན་པོ་ཆེ་དང ། བྱང་ཆུབ་ཀྱི་ཡན་ལག་ལ་ལྟ་བས་ལུས་དང་སྲོག་ལ་མི་ལྟ་བའི་སེམས་རིན་པོ་ཆེ་དང ། མཐོ་དམན་མེད་པས་རྗེས་སུ་ཆག་པ་དང་ཁོང་ཁྲོ་བ་དང་བྲལ་བའི་སེམས་རིན་པོ་ཆེ་དང ། ཞུམ་པ་མེད་པས་བརྩོན་འགྲུས་བརྟན་པའི་གོ་ཆའི་སེམས་རིན་པོ་ཆེ་དང ། ལྷོད་པ་མེད་པའི་བརྩོན་པ་ཐམས་ཅད་ཉམས་འོག་ཏུ་ཆུད་པར་བྱེད་པའི་སེམས་རིན་པོ་ཆེ་དང ། བྱང་ཆུབ་ཀྱི་ལམ་གྱི་ཚོགས་བསགས་པས་དྲན་པ་དང ། བློ་གྲོས་དང་རྟོགས་པ་དང ། ངོ་ཚ་ཤེས་པ་དང་མོས་པ་བརྗེད་པ་མེད་པའི་སེམས་རིན་པོ་ཆེ་དང ། སེམས་ལ་དབང་བྱེད་པས་བསམ་གཏན་དང ། རྣམ་པར་ཐར་པ་དང་ཏིང་ངེ་འཛིན་དང ། སྙོམས་པར་འཇུག་པ་དང་བསྐྱེད་པའི་སེམས་རིན་པོ་ཆེ་དང ། དམ་པའི་ཆོས་བསགས་པས་ཆོས་ཡོངས་སུ་ཚོལ་བའི་སེམས་རིན་པོ་ཆེ་དང ། འཇིགས་པ་མེད་ཅིང་སྤོབས་པས་ཐོས་པ་འཛིན་པའི་སེམས་རིན་པོ་ཆེ་དང ། སྡིག་པ་འདོད་པ་མེད་པས་ཟང་ཟིང་མེད་པར་ཆོས་སྟོན་པའི་སེམས་རིན་པོ་ཆེ་དང ། ཆགས་པའི་སེམས་མེད་པས་སློབ་དཔོན་ཆོས་མི་འཆབ་པའི་སེམས་རིན་པོ་ཆེ་དང ། ནན་ཏན་སྙིང་པོར་བྱེད་པས་ཚུལ་བཞིན་དུ་ཡང་ཡིད་ལ་བྱེད་པའི་སེམས་རིན་པོ་ཆེ་དང ། དེ་ལྟར་བྱེད་པས་ཇི་ལྟར་ཐོས་པའི་ཆོས་རྣམས་ལ་ནན་ཏན་བྱེད་པའི་སེམས་རིན་པོ་ཆེ་དང ། གཞན་གྱི་དྲིང་ལ་མི་འཇོག་པས་ཤེས་རབ་ཀྱིས་སོ་སོར་རྟོག་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ལ་བྱམས་པས་ཁྱབ་པས་བྱམས་པ་ཆེན་པོའི་སེམས་རིན་པོ་ཆེ་དང ། སེམས་ཅན་ཐམས་ཅད་ལ་ལྟ་བས་སྙིང་རྗེ་ཆེན་པོའི་སེམས་རིན་པོ་ཆེ་དང ། ཆོས་ལ་དགའ་མོས་དད་པས་དགའ་བ་ཆེན་པོའི་སེམས་རིན་པོ་ཆེ་དང ། ཆོས་ཐམས་ཅད་ངེས་པར་སེམས་པས་བཏང་སྙོམས་ཆེན་པོའི་སེམས་རིན་པོ་ཆེ་དང །
53.304a
དགེ་བའི་རྩ་བ་བསགས་པས་འཁོར་བ་ན་ཡོངས་སུ་མི་སྐྱོ་བའི་སེམས་རིན་པོ་ཆེ་དང ། བདག་གི་བདེ་བ་ལ་མི་ཆགས་པས་སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་སེམས་རིན་པོ་ཆེ་དང ། ཆོས་འཛིན་པས་བསྡུ་བའི་དངོས་པོའི་སེམས་རིན་པོ་ཆེ་དང ། ཐམས་ཅད་དུ་རྣམ་པར་འཕྲུལ་པས་མངོན་པར་ཤེས་པ་ཆེན་པོའི་སེམས་རིན་པོ་ཆེ་དང ། མ་ཐོས་པའི་ཆོས་མཉན་པའི་ཕྱིར་དགེ་བའི་བཤེས་གཉེན་ལ་བསྟེན་པའི་སེམས་རིན་པོ་ཆེ་དང ། དགེ་བའི་རྩ་བ་ཐམས་ཅད་སོགས་པས་སྡིག་པའི་གྲོགས་པོ་སྤོང་བའི་སེམས་རིན་པོ་ཆེ་དང ། ཐ་དད་པ་མེད་པས་སེམས་ཅན་ཐམས་ཅད་ལ་སྦྱོར་བ་མཉམ་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ཀྱི་བསམ་པ་ལ་འཇུག་པས་སེམས་ཅན་ཐམས་ཅད་ཀྱི། ཉོན་མོངས་པའི་ནད་ཡོངས་སུ་ཤེས་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ཀྱི་ཉོན་མོངས་པའི་ནད་རབ་ཏུ་ཞི་བར་བྱེད་པས་ཆོས་ཀྱི་སྨན་ཐམས་ཅད་ཡོངས་སུ་ཚོལ་བའི་སེམས་རིན་པོ་ཆེ་དང ། ཆོས་ཀྱི་བདག་ཉིད་པས་མ་བསླབས་པ་རྣམས་ལ་མི་བརྙས་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ལ་འདུད་པས་ང་རྒྱལ་མེད་པའི་སེམས་རིན་པོ་ཆེ་དང ། འཆོས་པ་མེད་པའི་གཡོ་དང་སྒྱུ་མེད་པའི་སེམས་རིན་པོ་ཆེ་དང ། དམ་པའི་ཆོས་ཡུན་རིང་དུ་གནས་པས་ཆོས་ལ་དགའ་བའི་སེམས་རིན་པོ་ཆེ་དང ། སངས་རྒྱས་ཐམས་ཅད་ལ་བྱས་པ་གཟོ་བས་དམ་པའི་ཆོས་ཡོངས་སུ་འཛིན་པའི་སེམས་རིན་པོ་ཆེ་དང ། བརྟན་པའི་གྲོགས་པོའི་ཕྱིར་བྱས་པ་ཤེས་ཤིང་བྱས་པ་གཟོ་བའི་སེམས་རིན་པོ་ཆེ་དང ། ལྟོས་པ་མེད་པས་ལན་དུ་ཕན་འདོགས་པ་ལ་མི་རེ་བའི་སེམས་རིན་པོ་ཆེ་དང ། དཀར་པོའི་ཕྱོགས
53.304b
སྲུང་བས་དགོན་པ་ལ་དགའ་བའི་སེམས་རིན་པོ་ཆེ་དང ། ལས་བྱས་པ་ཆུད་མི་གསོན་པས་རྟག་ཏུ་རབ་ཏུ་འབྱུང་བའི་སེམས་རིན་པོ་ཆེ་དང ། སྡོམ་པའི་སྤྱོད་པ་སོགས་པས་འཕགས་པའི་རིགས་ལ་དགའ་བའི་སེམས་རིན་པོ་ཆེ་དང ། སེམས་ཅན་ཐམས་ཅད་མགུ་བར་བྱེད་པས་སྦྱངས་པའི་ཡོན་ཏན་ཐམས་ཅད་དང་ཡོ་བྱད་བསྙུངས་པའི་སེམས་རིན་པོ་ཆེ་དང ། ཤེས་རབ་ཀྱིས་མི་ངོམས་པས་འདོད་པ་ཆུང་ཞིང་ཆོག་ཤེས་པའི་སེམས་རིན་པོ་ཆེ་དང ། ལུས་དང་སེམས་དབེན་པས་དགའ་བ་ལ་དབེན་པའི་སེམས་རིན་པོ་ཆེ་དང ། མཚན་དང་དཔེ་བྱད་བཟང་པོ་ཡོངས་སུ་རྫོགས་པར་བྱེད་པས་བསོད་ནམས་ཀྱི་ཚོགས་ཀྱིས་མི་ངོམས་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ཀྱི་ཐེ་ཙོམ་གཅད་པའི་ཕྱིར་ཡེ་ཤེས་ཀྱི་ཚོགས་ཡོངས་སུ་ཚོལ་བའི་སེམས་རིན་པོ་ཆེ་དང ། སངས་རྒྱས་མཐོང་བ་དང་མི་འབྲལ་བའི་ཕྱིར་སངས་རྒྱས་རྗེས་སུ་དྲན་པའི་སེམས་རིན་པོ་ཆེ་དང ། ཆོས་མཉན་པ་དང་མི་འབྲལ་བའི་ཕྱིར་ཆོས་རྗེས་སུ་དྲན་པའི་སེམས་རིན་པོ་ཆེ་དང ། ཕྱིར་མི་ལྡོག་པའི་དགེ་འདུན་ལ་གཞོལ་བའི་ཕྱིར་དགེ་འདུན་རྗེས་སུ་དྲན་པའི་སེམས་རིན་པོ་ཆེ་དང ། བྱང་ཆུབ་ཀྱི་སེམས་ལས་མི་གཡོ་བའི་ཕྱིར་ཚུལ་ཁྲིམས་རྗེས་སུ་དྲན་པའི་སེམས་རིན་པོ་ཆེ་དང ། ཉོན་མོངས་པ་ཐམས་ཅད་ཡོངས་སུ་བོར་བས་གཏོང་བ་རྗེས་སུ་དྲན་པའི་སེམས་རིན་པོ་ཆེ་དང ། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་རྗེས་སུ་དྲན་པའི་ཕྱིར་ལྷ་རྗེས་སུ་དྲན་པའི་སེམས་རིན་པོ་ཆེ་དང ། མཚུངས་པར་བྱེད་པའི་ཕྱིར་བྱང་ཆུབ་སེམས་དཔའ་རྗེས་སུ་དྲན་པའི་སེམས་རིན་པོ་ཆེ་དང ། དོན་ཐམས་ཅད་རྟོགས་པས་དོན་སོ་སོ་ཡང་དག་པར་རིག་པའི་སེམས་རིན་པོ་ཆེ་དང ། ཆོས་ཀྱི་དབྱིངས་འདྲེས་པ་མེད་པས་ཆོས་སོ་སོ་ཡང་དག་པར་རིག་པའི་སེམས་རིན་པོ་ཆེ་དང ། སེམས་ཅན་ཀྱི་ཚིག
53.305a
ཐམས་ཅད་རྟོགས་པས་ངེས་པའི་ཚིག་སོ་སོ་ཡང་དག་པར་རིག་པའི་སེམས་རིན་པོ་ཆེ་དང ། ཚིག་འབྲུའི་རང་བཞིན་རྗེས་སུ་རྟོགས་པས་སྤོབས་པ་སོ་སོ་ཡང་དག་པར་རིག་པའི་སེམས་རིན་པོ་ཆེ་དང ། རྣམ་པར་ཤེས་པ་སྒྱུ་མ་ལྟ་བུར་ཡོངས་སུ་ཤེས་པའི་ཚུལ་གྱིས་ཡེ་ཤེས་ལ་སྟོན་པའི་སེམས་རིན་པོ་ཆེ་དང ། བཀྲི་བའི་དོན་གྱི་མདོ་སྡེ་ལས་དང་བྱ་བ་དང་འགལ་བས་ངེས་པའི་དོན་གྱི་མདོ་སྡེ་ལ་རྟོན་པའི་སེམས་རིན་པོ་ཆེ་དང ། གང་ཟག་གི་རང་བཞིན་རྗེས་སུ་རྟོག་པས་ཆོས་ཉིད་ལ་རྟོན་པའི་སེམས་རིན་པོ་ཆེ་དང ། ཁམས་གསུམ་ཐམས་ཅད་ལ་མངོན་པར་ཞེན་པས་འཇིགས་པའི་ཕྱིར་འདུ་བྱེད་ཐམས་ཅད་ལ་མི་རྟག་པ་དང ། སྡུག་བསྔལ་བར་སོ་སོར་རྟོག་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ལ་བདག་མེད་པས་ཆོས་ཐམས་ཅད་ལ་བདག་མེད་པར་སོ་སོར་རྟོག་པའི་སེམས་རིན་པོ་ཆེ་དང ། འདོད་པའི་ཁམས་ལས་ཤིན་དུ་འདའ་བས་མི་གཙང་བར་སོ་སོར་རྟོག་པའི་སེམས་རིན་པོ་ཆེ་དང ། ཤིན་དུ་ཞི་ཞིང་ཉེ་བར་ཞི་བས་མྱ་ངན་ལས་འདས་པ་ལ་ཞི་བར་སོ་སོར་རྟོག་པའི་སེམས་རིན་པོ་ཆེ་དང ། བདུད་རྩིའི་སྒོ་ལ་ཡང་དག་པར་གཞོལ་བས་རྣམ་པར་ཐར་པའི་སྒོ་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་ལ་མོས་པའི་སེམས་རིན་པོ་ཆེ་དང ། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པས་ཆོས་ཐམས་ཅད་ལ་མ་སྐྱེས་པ་དང་མ་བྱུང་བས་མོས་པའི་སེམས་རིན་པོ་ཆེ་དང ། ལྟ་བ་ཐམས་ཅད་ལ་མངོན་པར་ཞེན་པ་མེད་པས་ཆོས་ཐམས་ཅད་ལ་སྒྱུ་མ་དང ། སྨིག་རྒྱུ་དང་ཆུ་ཟླ་དང ། མིག་ཡོར་དང ། རྨི་ལམ་ལྟ་བུར་ཡང་དག་པར་གཞོལ་བའི་སེམས་རིན་པོ་ཆེ་དང ། རྟག་པ་དང་ཆད་པ་དང་བྲལ་བས་རྟེན་ཅིང་འབྲེལ་བར་འབྱུང་བ་དང་འཐུན་པའི་སེམས་རིན་པོ་ཆེ་དང ། གཉིས་དང་བྲལ་བས་མཐར་ལྟ་བ་ཐམས་ཅད་སེལ་བའི་སེམས་རིན་པོ་ཆེ་དང ། ཐེག་པ
53.305b
གཅིག་ཏུ་ཁོང་དུ་ཆུད་པས་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའི་སེམས་རིན་པོ་ཆེ་དང ། སྐྱོན་མེད་པ་ལ་འཇུག་པས་སྤྱོད་པ་ཐམས་ཅད་ལས་ལྡོག་པའི་སེམས་རིན་པོ་ཆེ་དང ། ཆོས་ཐམས་ཅད་མཉམ་པ་ཉིད་ཀྱི་ཕྱིར་ཡང་དག་པར་སྐྱོན་མེད་པ་ལ་སོ་སོར་རྟོག་པའི་སེམས་རིན་པོ་ཆེ་དང ། སངས་རྒྱས་ཀྱི་ཆོས་ཐམས་ཅད་སྐྱེ་བ་མེད་པའི་ཕྱིར་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཡང་དག་པར་སྒྲུབ་པའི་སེམས་རིན་པོ་ཆེ་སྟེ། འདི་དག་ནི་ཆོས་རིན་པོ་ཆེ་བརྒྱད་བཅུའོ། །མི་འམ་ཅིའི་བདག་པོ་དེ་ལྟར་གང་ཆོས་བརྒྱད་བཅུ་པོ་འདི་ལ་འཇུག་པ་དང་ཐོབ་པ་དང ། ནན་ཏན་བྱེད་པ་དེ་ནི་དཀོན་མཆོག་འབྱུང་གནས་ཏིང་ངེ་འཛིན་ཅེས་བྱའོ། །ཆོས་འདི་དག་ནི་ཏིང་ངེ་འཛིན་སྒྲུབ་པའོ། །བྱང་ཆུབ་སེམས་དཔས་གང་གི་ཚེ་དཀོན་མཆོག་འབྱུང་གནས་ཏིང་ངེ་འཛིན་འདི་རབ་ཏུ་ཐོབ་པར་གྱུར་པ་དེའི་ཚེ། དེས་གང་ལ་དབང་ཐོབ་པར་མ་གྱུར་པའི་རིན་པོ་ཆེའི་འཇིག་རྟེན་གྱི་འམ། འཇིག་རྟེན་ལས་འདས་པ་དེ་གང་ཡང་མེད་དོ། །མི་འམ་ཅིའི་བདག་པོ་དེ་ལ་འཇིག་རྟེན་གྱི་རིན་པོ་ཆེ་ནི་གང ། འཇིག་རྟེན་ལས་འདས་པའི་རིན་པོ་ཆེ་ནི་གང་ཞེ་ན། མི་འམ་ཅིའི་བདག་པོ་དེ་ལ་འཇིག་རྟེན་གྱི་རིན་པོ་ཆེ་ནི་འདི་ལྟ་སྟེ། ལྷ་དང་མི་རྣམས་ཀྱི་ཆེ་བ་ཉིད་དང ། བརྒྱ་བྱིན་དང ། ཚངས་པའི་ཆེ་བ་ཉིད་དང ། འཇིག་རྟེན་སྐྱོང་བའི་ཆེ་བ་ཉིད་དང་འཁོར་ལོས་བསྒྱུར་བའི་ཆེ་དང ། ཚོང་དཔོན་དང ། ཁྱིམ་བདག་དང་བྲམ་ཟེ་དང ། རྒྱལ་རིགས་ཤིང་ས་ལ་ཆེན་པོ་ལྟ་བུའི་ཆེ་བ་ཉིད་དོ། །དེ་དེ་ལྟར་ལྷ་དང་མི་རྣམས་ཀྱི་ཆེ་བ་ཉིད་རབ་ཏུ་ཐོབ་ཀྱང་རྒྱགས་པ་མི་སྐྱེད། བག་མེད་པ་མི་སྐྱེད་དོ། །དེ་བག་ཡོད་པར་གྱུར་པས། བྱང་ཆུབ་སྒྲུབ་པར་བྱེད་པའི་ཆོས་རྣམས་ཡང་དག་པར་བསྒྲུབ་པ་སྟེ། འདི་ནི་འཇིག་རྟེན་གྱི་རིན་པོ་ཆེ་ཞེས་བྱའོ། །དེ་ལ་འཇིག་རྟེན་ལས་འདས་པའི་རིན་པོ་ཆེ་གང་ཞེ་ན། འདི་ལྟ་སྟེ།
53.306a
འཇིག་རྟེན་ལས་འདས་པའི་ཆོས་རིན་པོ་ཆེའོ། །འཇིག་རྟེན་ལས་འདས་པའི་རིན་པོ་ཆེ་གང་ཞེ་ན། ཆོས་གང་འཇིག་རྟེན་ལས་སྒྲོལ་བའོ། །འཇིག་རྟེན་ལས་སྒྲོལ་བའི་ཆོས་གང་ཞེ་ན། འདི་ལྟ་སྟེ། འཕགས་པ་འཇིག་རྟེན་ལས་འདས་པའི་ཤེས་རབ་སྟེ། ཤེས་རབ་ཀྱི་འཇིག་རྟེན་ལས་སྒྲོལ་ལོ། །ཤེས་རབ་རིན་པོ་ཆེས་ནི་འཇིག་རྟེན་ལས་འདས་པའི་ཆོས་ཐམས་ཅད་བསྡུས་ཏེ། ཤེས་རབ་ནི་འཇིག་རྟེན་ལས་འདས་པའི་ཆོས་ཐམས་ཅད་ཀྱི་གཙོ་བོ་ཡིན་ནོ། །མི་འམ་ཅིའི་བདག་པོ་འདི་ལྟ་སྟེ་དཔེར་ན་ཀླུང་ཐམས་ཅད་ཀྱི་གཙོ་བོ་ནི་རྒྱ་མཚོ་ཆེན་པོའོ། །རི་ཐམས་ཅད་ཀྱི་གཙོ་བོ་ནི་རིའི་རྒྱལ་པོ་རི་རབ་བོ། །སྐར་མ་ཐམས་ཅད་ཀྱི་གཙོ་བོ་ནི་ཟླ་བའོ། །སྣང་བ་ཐམས་ཅད་ཀྱི་གཙོ་བོ་ནི་ཉི་མའོ། །རི་དགས་ཐམ་ཅད་ཀྱི་གཙོ་བོ་ནི་སེང་གེའོ། །སྐྱེ་དགུ་ཐམས་ཅད་ཀྱི་གཙོ་བོ་ནི་རྒྱལ་པོའོ། །སུམ་བཅུ་རྩ་གསུམ་པ་ཐམས་ཅད་ཀྱི་གཙོ་བོ་ནི་རྒྱ་བྱིན་ནོ། །ཚངས་པ་ལ་དབང་དུ་བྱ་བ་རྣམས་ཀྱི་གཙོ་བོ་ནི་ཚངས་པ་ཆེན་པོའོ། །མི་འམ་ཅིའི་བདག་པོ་དེ་བཞིན་དུ་འཇིག་རྟེན་ལས་འདས་པའི་ཆོས་ཐམས་ཅད་ཀྱི་གཙོ་བོ་ནི་ཤེས་རབ་སྟེ། དེའི་ཕྱིར་ཤེས་རབ་ནི་ཆོས་ཐམས་ཅད་ཀྱི་རྒྱལ་པོ་ཞེས་བྱའོ། །མུ་ལ་གནས་པ་བསྒྲལ་བའི་ཕྱིར་བདེ་བར་འགྲོ་བས་ལམ་མོ། །ཉོན་མོངས་པའི་མུན་པ་སེལ་བའི་ཕྱིར་སྒྲོན་མའོ། །གཡུལ་ལས་རྒྱལ་བའི་ཕྱིར་དཔའ་བོའོ། །སྨན་རབ་ཏུ་སྦྱོར་བའི་ཕྱིར་སྨན་པའོ། །གཙུག་ལག་ཐམས་ཅད་ཤེས་པའི་ཕྱིར་སློབ་དཔོན་ནོ། །ཆོས་ཐམ་ཅད་ཕིགས་པའི་ཕྱིར་མདའོ། །ཉོན་མོངས་པ་གཅོད་པའི་ཕྱིར་རལ་གྲིའོ། །ཉོན་མོངས་པའི་ཚང་ཚིང་དྲལ་བའི་ཕྱིར་ཐོང་གཤོལ་ལོ། །མཉམ་པའི་ཕྱིར་མི་འགལ་བའོ། །འཐབ་པ་མེད་པའི་ཕྱིར་རྩོད་པ་མེད་པའོ། །འབྱུང་བ་མེད་པའི་ཕྱིར་མི་འགག་པའོ། །བདེན་པའི་དོན་རྣམས་ཡོངས་སུ་ཤེས་པའི་མཐར་ཐུག་པའི་ཕྱིར་མི་འཁྲུགས་པའོ། །
53.306b
དྲན་པ་ཉེ་བར་གཞོག་པའི་ཕྱིར་དྲན་པའོ། །ཡང་དག་པར་སྤོང་བ་རྣམས་ལ་མཉམ་པ་ཉིད་དོ། །རྫུ་འཕྲུལ་གྱི་རྐང་པ་རྣམས་བསྐྱེད་པའོ། །དབང་པོ་རྣམས་སྦེད་པའོ། །སྟོབས་རྣམས་ཀྱིས་མི་རྫི་བའོ། །བྱང་ཆུབ་ཀྱི་ཡན་ལག་རྣམས་རྗེས་སུ་རྟོག་པའོ། །ལམ་སྟོན་པའོ། །ཞི་གནས་ཞི་བར་བྱེད་པའོ། །ལྷག་མཐོང་རིག་པར་བྱེད་པའོ། །རབ་རིབ་མེད་པའི་ཕྱིར་སྣང་བར་བྱེད་པའོ། །ཆོས་ཀྱི་སྣང་བས་མུན་པ་སེལ་བའོ། །རྡུལ་དང་བྲལ་བའི་ཕྱིར་རྡུལ་མེད་པའོ། །བརྙས་ཐབས་དང་བྲལ་བའི་ཕྱིར་མཐོ་བར་སེམས་པ་མེད་པའོ། །ཡ་ང་བའི་ལམ་ལས་རབ་ཏུ་འདས་པའི་ཕྱིར་ཀུན་དུ་མཐོང་བར་བྱེད་པའོ། །ཕྱི་ནང་དང་བྲལ་བའི་ཕྱིར་ཡུལ་མེད་པའོ། །ལྟ་བས་བྱས་པ་མེད་པའི་ཕྱིར་སྟོང་པ་སྒྲོལ་བའོ། །རྣམ་པར་རྟོག་པ་ཉེ་བར་ཞི་བའི་ཕྱིར། མཚན་མ་མེད་པས་རབ་ཏུ་ཕྱེ་བའོ། །ཁམས་གསུམ་པ་ལས་རྣམ་པར་འདས་པའི་ཕྱིར་སྨོན་པ་མེད་པའི་མཚན་ཉིད་དོ། །མཚན་ཉིད་མེད་པའི་ཕྱིར་མཚན་ཉིད་གཅིག་པའོ། །མཚུངས་པ་མེད་པའི་ཕྱིར་ནམ་མཁའི་མཚན་ཉིད་དོ། །བདུད་ཀྱི་ལས་དང་བྲལ་བའི་ཕྱིར་གཡོ་བ་དང་རློམ་སེམས་འཇོམ་པའོ། །མི་རྟོག་པའི་སྦྱིན་པའོ། །མི་གནས་པའི་ཚུལ་ཁྲིམས་སོ་རབ་ཏུ་མི་གནས་པའི་བཟོད་པའོ། །བླངས་བ་མེད་པ་དང་དོར་བ་མེད་པའི་བརྩོན་འགྲུས་སོ། །སྒྲོ་བཏགས་པ་མེད་པའི་བསམ་ཏན་ནོ། །རྣམ་པར་རིག་བྱེད་མ་ཡིན་པའི་སྒོའོ། །ཐམས་ཅད་ལ་མངོན་དུ་ཕྱོགས་པའོ། །ཐབས་དང་འདྲེས་པའོ། །སེམས་ཅན་ལ་བདག་མེད་པར་ཡང་དག་པར་གཞོལ་བའོ། །དགེ་བའི་རྩ་བ་བསགས་པའོ། །བྱ་བ་མེད་པའོ། །བྱ་བ་དང་བྲལ་བ་སྟེ། མིའི་ཅིའི་བདག་པོ་འདི་ནི་ཤེས་རབ་རིན་པོ་ཆེའོ། །ཤེས་རབ་རིན་པོ་ཆེ་འདི་ནི་དཀོན་མཆོག་འབྱུང་གནས་ཏིང་ངེ་འཛིན་ཐོབ་པའི་བྱང་ཆུབ་སེམས་དཔས་འཐོབ་བོ། །འདི་འཐོབ་པ
53.307a
ན་རིན་པོ་ཆེ་ཐམས་ཅད་ཡང་དག་པར་འདུ་བ་ཡིན་ནོ། །མི་འམ་ཅིའི་བདག་པོ་འདི་ལྟ་སྟེ་དཔེར་ན་ཆུ་བོ་ཐམས་ཅད་ཀྱི་སྒོ་ནི་རྒྱ་མཚོ་ཆེན་པོ་སྟེ། རིན་པོ་ཆེ་ཐམས་ཅད་སོགས་པ་རིན་པོ་ཆེ་ཐམ་ཅད་ཡང་དག་པར་འདུ་བ་སྟེ། དེ་ལས་རིན་པོ་ཆེ་ཐམ་ཅད་འབྱུང་ངོ ། །མི་འམ་ཅིའི་བདག་པོ་དེ་བཞིན་དུ་དཀོན་མཆོག་འབྱུང་གནས་ཏིང་ངེ་འཛིན་རབ་ཏུ་ཐོབ་པའི་བྱང་ཆུབ་སེམས་དཔའ་ཡང་རིན་པོ་ཆེ་ཐམས་ཅད་ཀྱི་སྒོ་ཡིན་ཏེ། ཆོས་དཀོན་མཆོག་ཐམས་ཅད་སོགས་པ་རིན་པོ་ཆེ་ཐམས་ཅད་ཡང་དག་པར་འདུ་བའོ། །དཀོན་མཆོག་འབྱུང་གནས་ཏིང་ངེ་འཛིན་ལས་དཀོན་མཆོག་གསུམ་འབྱུང་སྟེ། སངས་རྒྱས་དཀོན་མཆོག་དང ། ཆོས་དཀོན་མཆོག་དང ། དགེ་འདུན་ན་དཀོན་མཆོག་གོ། །དེས་ན་དཀོན་མཆོག་འབྱུང་གནས་ཏིང་ངེ་འཛིན་ནི་རིན་པོ་ཆེ་ཐམས་ཅད་སོགས་པ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མི་འམ་ཅིའི་རྒྱལ་པོ་སྡོང་པོ་འདིས་དཀོན་མཆོག་འབྱུང་གནས་ཏིང་ངེ་འཛིན་འདི་ཐོབ་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རིག་ཀྱི་བུ་ཁྱོད་ཀྱིས་དེ་མི་འམ་ཅིའི་རྒྱལ་པོ་སྡོང་པོ་ལ་དྲི་ཤིག་དང་དེ་ཁྱོད་ལ་སྟོན་པར་འགྱུར་རོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་མི་འམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་སྨྲས་སོ། །མི་འམ་ཅིའི་བདག་པོ་ཁྱོད་ཀྱིས་དཀོན་མཆོག་འབྱུང་གནས་ཏིང་ངེ་འཛིན་འདི་ཐོབ་བམ། སྨྲས་པ་རིགས་ཀྱི་བུ་ཏིང་ངེ་འཛིན་འདི་ནི་ཐོབ་པ་འམ། དམིགས་པར་སོ་སོར་ཉེ་བར་གནས་པ་མ་ཡིན་ནོ། །ཏིང་ངེ་འཛིན་འདི་ནི་སུས་ཀྱང་མི་ཐོབ་བོ། །ཏིང་ངེ་འཛིན་འདི་ནི་གཟུགསུ་བགྲང་བ་འམ། ཚོར་བ་དང་འདུ་ཤེས་དང་འདུ་བྱེད་དང ། རྣམ་པར་ཤེས་པར་བགྲང་བ་མ་ཡིན་ནོ། །ཏིང་ངེ་འཛིན་འདི་ནི་གཟུགས་སུ་སྣང་བ་མ་ཡིན་ནོ། །ཏིང་ངེ་འཛིན་འདི
53.307b
ནི་མིག་དང ། རྣ་བ་དང་སྣ་དང ། ལྕེ་དང་ལུས་དང ། ཡིད་ཀྱི་རྣམ་པར་ཤེས་པའི་གཟུང་བ་མ་ཡིན། སྐྱེ་བའི་མཚན་ཉིད་མ་ཡིན། འཇིགས་པའི་མཚན་ཉིད་མ་ཡིན། གནས་པའི་མཚན་ཉིད་མ་ཡིན། རྒྱུན་འཆད་པའི་མཚན་ཉིད་མ་ཡིན། མཚན་ཉིད་གཅིག་པ་མ་ཡིན། མཚན་ཉིད་ཐ་དད་པ་མ་ཡིན། མཚན་ཉིད་མ་ཡིན། མཚན་ཉིད་དང་བྲལ་བ་མ་ཡིན། མཚན་ཉིད་མེད་པ་ཡང་མ་ཡིན་ཏེ། བརྗོད་པར་བྱ་བ་མ་ཡིན་ནོ། །ཏིང་ངེ་འཛིན་འདི་ནི་ཡོངས་སུ་རྟོག་པར་མི་ནུའས་ཏེ། ཀུན་དུ་རྟོགས་པར་མ་ཡིན་རྣམ་པར་རྟོགས་པར་མ་ཡིན་ནོ། །དེ་ཅིའི་ཕྱིར་ཞེ་ན། གལ་ཏེ་ཏིང་ངེ་འཛིན་འདི་ཡོངས་སུ་རྟོགས་པ་འམ། ཀུན་དུ་རྟོགས་པ་འམ། རྣམ་པར་རྟོགས་པར་གྱུར་ན་ནི་བརྟག་པའི་གཞི་ཉིད་དུ་འགྱུར་གྱི་ཏིང་ངེ་འཛིན་མ་ཡིན་ནོ། །རིགས་ཀྱི་བུ་ཏིང་ངེ་འཛིན་ཅེས་བྱ་བ་ནི་ཆོས་ཐམས་ཅད་མཉམ་པ་ཉིད་དོ། །ཆོས་ཐམས་ཅད་ཀྱི་མཉམ་པ་ཉིད་གང་ཡིན་པ་དེ་དང་ང་མཉམ་མོ། །དེ་དང་སེམས་ཅན་ཐམས་ཅད་ཀྱང་མཉམ་མོ། །རིགས་ཀྱི་བུ་དེའི་ཕྱིར་ཏིང་ངེ་འཛིན་འདི་དང་སེམས་ཅན་ཐམས་ཅད་མཉམ་མོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ནི་སྟོང་པ་སྟེ། སྟོང་པའི་མཚན་ཉིད་ནི་ཏིང་ངེ་འཛིན་འདིའོ། །སེམས་ཅན་ཐམས་ཅད་ནི་མཚན་ཉིད་མེད་པ་སྟེ། མཚན་ཉིད་མེད་པའི་མཚན་ཉིད་ནི་ཏིང་ངེ་འཛིན་འདིའོ། །སེམས་ཅན་ཐམས་ཅད་ནི་སྨོན་པ་མེད་པ་སྟེ། སྨོན་པ་མེད་པའི་མཚན་ཉིད་ནི་ཏིང་ངེ་འཛིན་འདིའོ། །སེམས་ཅན་ཐམས་ཅད་ནི་དབེན་པ་སྟེ། དབེན་པའི་མཚན་ཉིད་ནི་ཏིང་ངེ་འཛིན་འདིའོ། །སེམས་ཅན་ཐམས་ཅད་ནི་བདག་མེད་པ་སྟེ། བདག་མེད་པའི་མཚན་ཉིད་ནི་ཏིང་ངེ་འཛིན་འདིའོ། །དེ་ནི་ལུས་དང་ངག་དང་སེམས་ཀྱིས་རེག་པར་མི་ནུས་སོ། །གང་ལ་ལ་དག་ཆོས་ལ་རེག
53.308a
པར་བྱེད་པ་དང ། མཉམ་པར་བྱེད་པ་དང ། མངོན་པར་མཉམ་པར་བྱེད་པ་དེ་དག་ཐམས་ཅད་ནི་ལེགས་པར་གསུངས་པའི་ཆོས་འདུལ་བ་ལ་ང་རྒྱལ་ཅན་དུ་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མི་འམ་ཅིའི་རྒྱལ་པོ་སྡོང་པོའི་སྤྱོད་པ་བག་མཆིས་པ་འདི་ལྟ་བུ་དང ། ཆོས་ལ་སྤོབས་པ་འདི་ལྟ་བུ་ནི་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱ་བ་ཐམས་ཅད་ཀྱང་ཀུན་དུ་སྟོན་ལ་བྱ་བ་ཐམ་ཅད་ཀྱིས་ཀྱང ། མི་གོས་པ་འདི་ནི་ཐབས་དང་ཤེས་རབ་ལས་བྱུང་བའི་བྱང་ཆུབ་སེམས་དཔའ་རྣམས་ཀྱི་སའོ། །རིགས་ཀྱི་བུ་མི་འམ་ཅིའི་རྒྱལ་པོ་སྡོང་པོ་འདིས་རྒྱུད་ཀྱི་སྒྲ་དང ། གླུའི་སྒྲ་དང་སིལ་སྙན་དང ། ཕེག་བརྡོབ་པ་བྱས་པའི་ཚུལ་འདིས་མི་འམ་ཅི་བྱེ་བ་ཕྲག་བདུན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དྲི་ཟ་བྱེ་བ་ཕྲག་སུམ་བཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ལྟོ་འཕྱེ་ཆེན་པོ་བྱེ་བ་ཕྲག་བཞི་བཅུ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །རང་གི་འཁོར་གྱི་སྲོག་ཆགས་བརྒྱད་ཁྲི་བཞི་སྟོང་ཡང་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ཤེས་རབ་དང་ཐབས་ཀྱི་ཡེ་ཤེས་འདི་དང་ལྡན་པའི་བྱང་ཆུབ་སེམས་དཔའ་ནི་གང་དང་གང་གི་ཚེ་འཁོར་གྱི་ཆེ་བ་ཉིད་ཐོབ་པ་དེ་དང་དེའི་ཚེ། སེམས་ཅན་གྲངས་མེད་དཔག་ཏུ་མེད་པ་ཡོངས་སུ་སྨིན་པར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱུ་མེད་པར་མེ་མི་འབར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དབེན་པ་ན་གནས་པ་ཡང་སེམས་ཅན་ཡོངས་སུ་སྨིན་པར་བྱ་བ་མི་འབར་རོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱུ་ཡོད་ན་མེ
53.308b
འབར་རོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བོ་ཕལ་པོ་ཆེའི་ནང་ན་འདུག་ན། སེམས་ཅན་ཡོངས་སུ་སྦྱིན་པར་བྱ་བ་འབར་རོ། །རིགས་ཀྱི་བུ་དེའི་ཕྱིར་རྣམ་གྲངས་འདིས་འདི་ལྟར་བྱང་ཆུབ་སེམས་དཔའ་ཇི་ལྟ་ཇི་ལྟ་བུར་ཡུལ་དང་འཁོར་ཆེན་པོ་འབྱོར་པར་གྱུར་པ། དེ་ལྟ་དེ་ལྟ་བུར་སེམས་ཅན་དཔག་ཏུ་མེད་པ་ཡོངས་སུ་སྨིན་པར་བྱེད་པར་རིག་པར་བྱའོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་མི་འམ་ཅིའི་རྒྱལ་པོ་སྡོང་པོས་རྒྱུད་ཀྱི་སྒྲ་དང ། གླུའི་སྒྲ་དང ། སིལ་སྙན་དང ། ཕེག་བརྡབ་པ་བགྱིས་པས་སེམས་ཅན་ཡོངས་སུ་སྨིན་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མི་འམ་ཅི་དང ། དྲི་ཟ་དང ། ལྟོ་འཕྱེ་ཆེན་པོ་གླུ་དང ། རོལ་མོའི་དབྱངས་སྒྲ་ལ་མོས་པ་རྣམས་ལ་མི་འམ་ཅིའི་རྒྱལ་པོ་སྡོང་པོས་གང་གི་ཚེ་པི་བང་གི་སྒྲ་ཐོས་པར་བྱེད་ཅིང་སིལ་སྙན་དང ། གླུ་དབྱངས་སྦྱོར་བ་དེ་ན་མི་འམ་ཅི་དང ། དྲི་ཟ་དང ། ལྟོ་འཕྱེ་ཆེན་པོ་དེ་དག་དགའ་བ་དང ། རབ་ཏུ་མགུ་བ་ཆེན་པོ་འཐོབ་བོ། །དེ་དག་དགའ་བ་དང ། མོས་པ་དང ། རབ་ཏུ་མགུ་བ་ཐོབ་ནས་རྒྱུད་ཀྱི་སྒྲ་དང ། སིལ་སྙན་གྱི་སྒྲ་དང ། གླུ་དབྱངས་ཀྱི་སྒྲ་དེ་དག་ལས་སངས་རྒྱས་ཀྱི་སྒྲ་འབྱུང་ངོ ། །ཆོས་ཀྱི་སྒྲ་དང་དགེ་འདུན་གྱི་སྒྲ་འབྱུང་ངོ ། །བྱང་ཆུབ་ཀྱི་སེམས་ལ་དགའ་བ་དང ། ཐམས་ཅད་མཁྱེན་པའི་སེམས་བསྐྱེད་པར་སྦྱོར་བའི་སྒྲ་འབྱུང་ངོ ། །སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་ཀྱི་སྒྲ་འབྱུང་ངོ ། །བྱམས་པ་དང་སྙིང་རྗེ་དང ། དགའ་བ་དང་བཏང་སྙོམས་ཀྱི་སྒྲ་དང ། དྲན་པ་ཉེ་བར་གཞག་པ་དང ། ཡང་དག་པར་སྤོང་བ་དང ། རྫུ་འཕྲུལ་གྱི་རྐང་པ་དང་དབང་པོ་དང །
53.309a
སྟོབས་དང ། བྱང་ཆུབ་ཀྱི་ཡན་ལག་དང ། ལམ་དང་ཞི་གནས་དང ། ལྷག་མཐོང་དང ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་སྒྲ་འབྱུང་ངོ ། །མི་རྟག་པ་དང་སྡུག་བསྔལ་བ་དང ། བདག་མེད་པའི་སྒྲ་འབྱུང་ངོ ། །སྟོང་པ་ཉིད་དང་མཚན་མ་མེད་པ་དང ། སྨོན་པ་མེད་པ་དང་མངོན་པར་འདུ་བྱེད་པ་མེད་པ་དང ། སྐྱེ་བ་མེད་པ་དང ། འབྱུང་བ་མེད་པ་དང་དངོས་པོ་མེད་པའི་སྒྲ་འབྱུང་ངོ ། །བྱང་ཆུབ་སེམས་དཔའ་སྡེ་སྣོད་ཀྱི་ཆོས་ཀྱི་རྣམ་གྲངས་དང ། གཟུངས་དང་རྡོ་རྗེའི་ཚིག་དང ། འཁོར་གསུམ་ཡོངས་སུ་སྦྱོང་བའི་སྒྲ་འབྱུང་ངོ ། །ཕྱིར་མི་ལྡོག་པའི་ཆོས་ཀྱི་འཁོར་ལོ་རབ་ཏུ་བསྐོར་བའི་སྒྲ་དང ། ཆོས་ཐམས་ཅད་ལ་རྣམ་པར་གདོན་མི་ཟ་བའི་རྒྱལ་པོའི་ཏིང་ངེ་འཛིན་གྱི་སྒྲ་དང ། རྒྱ་མཚོའི་ཕྱག་རྒྱའི་ཏིང་ངེ་འཛིན་གྱི་སྒྲ་དང ། ཆོས་ཐམས་ཅད་ལ་ཡང་དག་པར་གཞོལ་བའི་ཏིང་ངེ་འཛིན་གྱི་སྒྲ་དང ། ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་གྱི་སྒྲ་དང ། རྣམ་པར་བཀོད་པའི་ཏིང་ངེ་འཛིན་གྱི་སྒྲ་དང ། རིན་ཆེན་སྒྲོན་མའི་ཏིང་ངེ་འཛིན་གྱི་སྒྲ་དང ། རིན་ཆེན་འབྱུང་གནས་ཏིང་ངེ་འཛིན་གྱི་སྒྲ་དང ། རིན་ཆེན་བརྩེགས་པའི་ཏིང་ངེ་འཛིན་གྱི་སྒྲ་དང ། ཉོན་མོངས་པ་སྤོང་བའི་ཏིང་ངེ་འཛིན་གྱི་སྒྲ་དང ། དགའ་བྱེད་ཏིང་ངེ་འཛིན་གྱི་སྒྲ་དང ། པད་མ་བཀོད་པའི་ཏིང་ངེ་འཛིན་གྱི་སྒྲ་དང ། པད་མ་བླ་མའི་ཏིང་ངེ་འཛིན་གྱི་སྒྲ་དང ། ནམ་མཁའི་མཛོད་ཀྱི་ཏིང་ངེ་འཛིན་གྱི་སྒྲ་དང ། ཐམས་ཅད་ཀྱི་རྗེས་སུ་འགྲོ་བའི་ཏིང་ངེ་འཛིན་གྱི་སྒྲ་དང ། དམ་པའི་ཆོས་པུཎ་ཌ་རི་ཀའི་ཏིང་ངེ་འཛིན་གྱི་སྒྲ་དང ། ཁྱད་པར་ཅན་གྱི་ཏིང་ངེ་འཛིན་གྱི་སྒྲ་དང ། རྣམ་པར་རྒྱལ་བར་དབང་བྱེད་ཏིང་ངེ་འཛིན་གྱི་སྒྲ་དང ། ཆེར་བསྒྱིངས་ཏིང་ངེ་འཛིན་གྱི་སྒྲ་དང ། རྣམ་པ་ལ་སེམས་དབང་བྱེད་པའི་ཏིང་ངེ་འཛིན་གྱི་སྒྲ་དང ། སེང་གེ་བསྒྱིངས་པའི་ཏིང་ངེ་འཛིན་གྱི་སྒྲ
53.309b
དང ། ཉི་མ་སྒྲོན་མའི་ཏིང་ངེ་འཛིན་གྱི་སྒྲ་དང ། མཐའ་ཡས་འཁྱིལ་པའི་ཏིང་ངེ་འཛིན་གྱི་སྒྲ་དང ། རྒྱུན་གྱི་རྗེས་སུ་སོང་བའི་ཏིང་ངེ་འཛིན་གྱི་སྒྲ་དང ། རྡོ་རྗེའི་དཀྱིལ་འཁོར་ཏིང་ངེ་འཛིན་གྱི་སྒྲ་དང ། རྡོ་རྗེའི་རྒྱལ་མཚན་ཏིང་ངེ་འཛིན་གྱི་སྒྲ་དང ། རྡོ་རྗེ་ལྟ་བུའི་ཏིང་ངེ་འཛིན་གྱི་སྒྲ་དང ། རྡོ་རྗེ་ལྟེ་བའི་ཏིང་ངེ་འཛིན་གྱི་སྒྲ་དང ། ས་འཛིན་ཏིང་ངེ་འཛིན་གྱི་སྒྲ་དང ། རི་རབ་སྒྲོན་མའི་ཏིང་ངེ་འཛིན་གྱི་སྒྲ་དང ། རི་རབ་རྒྱལ་མཚན་ཏིང་ངེ་འཛིན་གྱི་སྒྲ་དང ། རིན་ཆེན་མཛོད་ཀྱི་ཏིང་ངེ་འཛིན་གྱི་སྒྲ་དང ། སེམས་ལ་དབང་བྱེད་ཏིང་ངེ་འཛིན་གྱི་སྒྲ་དང ། སེམས་ཅན་ཐམས་ཅད་ཀྱི་སེམས་ལ་རྣམ་པར་ལྟ་བའི་ཏིང་ངེ་འཛིན་གྱི་སྒྲ་དང ། སྤྱོད་པ་ཐམས་ཅད་ཀྱི་ཡུལ་ལས་ངེས་པར་འབྱུང་བའི་ཏིང་ངེ་འཛིན་གྱི་སྒྲ་དང ། ཟབ་མོ་སྦེད་པར་སྦྱོར་བའི་ཏིང་ངེ་འཛིན་གྱི་སྒྲ་དང ། སྤོབས་པ་སྣ་ཚོགས་ཀྱི་ཏིང་ངེ་འཛིན་གྱི་སྒྲ་དང ། བལྟར་མི་མཐོང་བའི་ཏིང་ངེ་འཛིན་གྱི་སྒྲ་དང ། ཆོས་ཐམས་ཅད་ལ་རྣམ་པར་ལྟ་བའི་ཏིང་ངེ་འཛིན་གྱི་སྒྲ་དང ། རྣམ་པར་རོལ་བའི་ཏིང་ངེ་འཛིན་གྱི་སྒྲ་དང ། མངོན་པར་ཤེས་པ་ཐམས་ཅད་ལས་ངེས་པར་འབྱུང་བའི་ཏིང་ངེ་འཛིན་གྱི་སྒྲ་དང ། བདུད་ཀྱི་དཀྱིལ་འཁོར་འཇིག་པའི་ཏིང་ངེ་འཛིན་གྱི་སྒྲ་དང ། གཟུགས་ཐམས་ཅད་ཀུན་དུ་སྟོན་པའི་ཏིང་ངེ་འཛིན་གྱི་སྒྲ་དང ། སྒྲ་ཐམས་ཅད་ལ་འཇུག་པའི་ཏིང་ངེ་འཛིན་གྱི་སྒྲ་དང ། ལུས་ཐམས་ཅད་རྣམ་པར་གཞིག་པའི་ཏིང་ངེ་འཛིན་གྱི་སྒྲ་དང ། སྤྱོད་པ་ཐམས་ཅད་ལ་དབང་བའི་ཏིང་ངེ་འཛིན་གྱི་སྒྲ་དང ། ཤེས་རབ་སྒྲོན་མའི་ཏིང་ངེ་འཛིན་གྱི་སྒྲ་དང ། བྱང་ཆུབ་མངོན་སུམ་སྣང་བྱེད་ཏིང་ངེ་འཛིན་གྱི་སྒྲ་དང ། ་སོ་སོ་ཡང་དག་པར་རིག་པ་ལ་འཇུག་པ་སྟོན་པའི་ཏིང་ངེ་འཛིན་གྱི་སྒྲ་དང ། ཡོན་ཏན་གྱི་རྣམ་པ་ཐམས་ཅད་ལ་འཇུག་པའི་ཏིང་ངེ་འཛིན་གྱི་སྒྲ་འབྱུང་ངོ ། །རིགས་ཀྱི་བུ་དེ་ལྟར་རྒྱུད་ཀྱི་སྒྲ་དང ། སིལ
53.310a
སྙན་གྱི་སྒྲ་དང ། གླུ་དབྱངས་ཀྱི་སྒྲ་དེ་དག་ལས་ཆོས་ཀྱི་སྒྲ་འདི་ལྟ་བུ་འདི་དང་ཏིང་ངེ་འཛིན་གྱི་སྒྲ་འབྱུང་ངོ ། །སྒྲ་དེ་དག་གིས་སེམས་ཅན་དེ་དག་ཡོངས་སུ་སྨིན་པར་བྱེད་པར་འགྱུར་ཏེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ངོ་མཚར་རྨད་དུ་བྱུང་བའི་ཆོས་འདི་ལྟ་བུ་དང་ལྡན་པ་ཡིན་ནོ། །མི་འམ་ཅིའི་རྒྱལ་པོ་སྡོང་པོའི་ཡོན་ཏན་བསྔགས་པ་བསྟན་པ་འདི་བཤད་པ་ན། སངས་རྒྱས་ཀྱི་མཐུས་ཐམས་ཅད་དང་ལྡན་པའི་འཁོར་གྱི་ལག་པར་ལྷའི་མེ་ཏོག་མཱན་དཱ་རའི་བུར་མ་གྲུབ་ནས། དེ་དག་གིས་མེ་ཏོག་གི་ཕུར་མ་དེ་དག་མི་འམ་ཅིའི་རྒྱལ་པོ་སྡོང་པོ་ལ་གཏོར་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོས་བྱིན་གྱི་བརླབས་ཇི་ལྟ་བུ། མེ་ཏོག་དེ་དག་ལག་པ་གཡས་པར་བླངས་ཏེ། མེ་ཏོག་གཅིག་ཀྱང་ས་ལ་མ་ལྟུང་བར་དེ་ལྟ་བུའི་བྱིན་གྱི་བརླབས་བྱིན་གྱིས་བརླབས་ནས་མེ་ཏོག་བླངས་པ་དེ་དག་བཅོམ་ལྡན་འདས་ལ་མངོན་པར་གཏོར་ཏོ། །དེ་ནས་མེ་ཏོག་དེ་དག་གཏོར་མ་ཐག་ཏུ་སངས་རྒྱས་ཀྱི་མཐུས་སྐད་ཅིག་དེ་ལ་སྟོང་གི་འཇིག་རྟེན་གྱི་ཁམས་མེ་ཏོག་རིན་པོ་ཆེའི་གདུགས་གཅིག་གིས་ཁེབས་པར་གྱུར་ཏོ། །མེ་ཏོག་རིན་པོ་ཆེའི་གདུགས་དེ་ལས་མུ་ཏིག་གི་དོ་ཤལ་བྱེ་བ་ཁྲག་ཁྲིག་བརྒྱ་སྟོང་ཕྲག་རབ་ཏུ་འཕྱང་ངོ ། །མེ་ཏོག་གི་དོ་ཤལ་འཕྱང་བ་རེ་རེ་ལས་ཀྱང་འོད་ཟེར་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱུང་ངོ ། །འོད་ཟེར་ཐམས་ཅད་ཀྱི་རྩེ་མོ་ལས་ཀྱང་པད་མ་སྣ་ཚོགས་བལྟ་ན་སྡུག་པ། ཁ་དོག་དག་དང་ལྡན་པ་དྲི་དང་ལྡན་པ། ཡིད་དུ་འོང་བ་དག་བྱུང་བར་གྱུར་ཏོ། །པད་མ་ཐམས་ཅད་ལ་ཡང་བཅོམ་ལྡན་འདས་ཤཱཀྱ་ཐུབ་པའི་སྐུ་ཅི་འདྲ་བ་དེ་འདྲ་བའི་དེ་བཞིན་གཤེགས་པའི་སྐུ། སྐྱིལ་མོ་དཀྲུང་བཅས་ཤིང་བཞུགས་པར་ཀུན་དུ་སྣང
53.310b
ངོ ། །སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱིས་ཀྱང་མི་འམ་ཅིའི་རྒྱལ་པོ་སྡོང་པོ་ལ་ལེགས་སོ་ཞེས་བྱ་བ་གནང་སྟེ། སྐྱེས་བུ་དམ་པ་ཁྱོད་ཀྱིས་སེམས་ཅན་མང་པོ་ཡོངས་སུ་སྨིན་པར་བྱས་སོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་གང་ཡུལ་ལས་རྣམ་པར་གྲོལ་ཡང་ཡུལ་ཐམས་ཅད་ཀྱང་སྟོན། འཁོར་བ་ལས་གྲོལ་ཡང་བསམས་བཞིན་དུ་སྲིད་པར་སྐྱེ་བ་ཀུན་དུ་སྟོན། མྱ་ངན་ལས་འདས་པའི་སྐྱོན་མེད་པ་ཐོབ་ཀྱང ། ཁམས་གསུམ་ན་ཉེ་བར་སྤྱོད་པ་འདི་ལྟ་བུ་ནི་བྱང་ཆུབ་སེམས་དཔའི་བྱ་བ་ཡིན་ཏེ། ལེགས་སོ་ལེགས་སོ། །དེ་ནས་མི་འམ་ཅིའི་རྒྱལ་པོ་སྡོང་པོ་འདི་སྙམ་དུ་སེམས་ཏེ། བདག་གིས་དེ་བཞིན་གཤེགས་པ་དེ་དག་ཐམས་ཅད་ཀྱི་དབུ་ལ་རིན་པོ་ཆེའི་གདུགས་གཞན་དག་བྱིན་གྱིས་བརླབས་པོ་སྙམ་མོ། །དེ་ནས་མི་འམ་ཅིའི་སྡོང་པོ་དེའི་ཚེ་རིན་པོ་ཆེའི་གདུགས་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །མི་འམ་ཅིའི་རྒྱལ་པོ་སྡོང་པོ་རིན་པོ་ཆེའི་གདུགས་བཀོད་པའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ། དེ་ནས་དེ་བཞིན་གཤེགས་པ་ཐམས་ཅད་ཀྱི་དབུའི་ཐད་དྲང་གི་སྟེང་ན་རིན་པོ་ཆེའི་གདུགས་རྣམས་གནས་པར་ཀུན་དུ་སྣང་ངོ ། །འཁོར་དེར་ཐམས་ཅད་ཀྱི་ལག་པ་གཡས་པ་ནས་ཀྱང་རིན་པོ་ཆེའི་གདུགས་རྣམས་བྱུང་བར་གྱུར་ཏེ། དེ་དག་གིས་རིན་པོ་ཆེའི་གདུགས་དེ་དག་སངས་རྒྱས་བཅོམ་ལྡན་འདས་དེ་དག་ལ་མངོན་པར་བཀབ་བོ།། །། བམ་པོ་གསུམ་པ། མི་འམ་ཅིའི་རྒྱལ་པོ་སྡོང་པོ་འདི་སྙམ་དུ་སེམས་ཏེ། འདི་ལྟར་བདག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཉན་ཐོས་དང ། བྱང་ཆུབ
53.311a
སེམས་དཔའི་དགེ་འདུན་བཅས་པར་བཤོས་ལ་སྤྱན་དྲངས་ཏེ། འདི་ལྟར་བདག་གིས་བཅོམ་ལྡན་འདས་འཁོར་དང་བཅས་པར་རིའི་རྒྱལ་པོ་སྤོས་ཀྱི་ངད་ལྡང་དུ་བདག་གི་གནས་སུ་གཤེགས་པར་གསོལ་ཏོ། །དེ་ལྟར་ན་བདག་གི་གནས་ཡོངས་སུ་སྤྱད་པར་འགྱུར་རོ། །ལྷ་དང་ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང་ནམ་མཁའ་ལྡིང་དང ། མི་འམ་ཅི་དང་ལྟོ་འཕྱེ་ཆེན་པོའི་ཚོག་ཚད་མེད་པ་ལ་ཕན་བཏགས་པར་ཡང་འགྱུར་རོ། །དེ་དག་ཀྱང་བཅོམ་ལྡན་འདས་ལ་བསྙེན་བཀུར་བྱ་བ་དང ། ཡོངས་སུ་སྤྱད་པར་བྱ་བར་སྤྲོ་བར་འགྱུར་ཏེ། དེའི་ཕྱིར་དེ་དག་གི་ཡུན་རིང་པོའི་དོན་དང་ཕན་པ་དང ། གྲུབ་པ་དང ། བདེ་བ་དང ། བྱང་ཆུབ་སེམས་དཔའི་བསྒྲུབ་པ་འཐོབ་པར་འགྱུར་རོ་སྙམ་མོ། །དེ་ནས་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བ་དང ། སེམས་ཅན་ཚད་མ་མཆིས་པའི་དགེ་བའི་རྩ་བ་སྤེལ་བའི་སླད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔའི་དགེ་འདུན་དང ། ཉན་ཐོས་ཀྱི་དགེ་འདུན་དང་ཐབས་གཅིག་ཏུ་རི་སྤོས་ཀྱི་ངད་ལྡང་གི་ངོས་ལ་བདག་གི་གནས་སུ་དགུང་བདུན་ཞིག་བཞུགས་པར་བདག་ལ་གནང་བར་མཛད་དུ་གསོལ། བཅོམ་ལྡན་འདས་བདག་ཅག་ནི་དེ་བཞིན་གཤེགས་པའི་འཁོར་དང་བཅས་པ་ལ་བསྙེན་བཀུར་དང་ཡོངས་སུ་སྤྱད་པར་བགྱི་བར་སྤྲོའོ། །བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོ་ལ་ཐུགས་བརྩེ་བའི་ཕྱིར་བྱང་ཆུབ་སེམས་དཔའ་དང ། ཉན་ཐོས་ཀྱི་ཚོགས་དང་བཅས་པ་ལ་ཞག་བདུན་རི་སྤོས་ཀྱི་ངད་ལྡང་གི་ངོས་ལ་བཞུག་པར་གནང་ངོ ། །དེ་ནས་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ཀྱིས་གནང
53.311b
བར་རིག་ནས། ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ་དགའ་བ་དང ། ཡིད་བདེ་བ་སྐྱེས་ནས་དཔུང་དང་བཅས་གཡོག་འཁོར་དང་བཅས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ། སིལ་སྙན་དང་རོལ་མོའི་དབྱངས་སྒྲ་བྱས་ནས་བཅོམ་ལྡན་འདས་ལ་མཆོད་པ་བྱས་ཏེ། འཁོར་གྱི་དཀྱིལ་འཁོར་དེ་ནས་སོང་ནས་རིའི་རྒྱལ་པོ་སྤོས་ཀྱི་ངད་ལྡང་བ་ལ་གནས་སོ། །དེ་ནས་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་རང་གི་ཁྱིམ་རྒྱན་ཐམ་ཅད་ཀྱིས་བརྒྱན་ཏེ། འཁོར་གྱི་ཁྱམས་རྒྱར་ཀུན་ནས་དཔག་ཚད་ལྔ་བརྒྱ་པ། བཻ་དཱུརྱ་སྔོན་པོ་དང ། འཛམ་བུའི་ཀླུང་གི་གསེར་གྱི་པད་མས་ལེགས་པར་བརྒྱན་པ། རིན་པོ་ཆེ་དུ་མས་རྣམ་པར་སྤྲས་པ་བྱས་སོ། །འཁོར་གྱི་ཁྱམས་དེར་གདན་ཁྲི་རྩ་བ་རིན་པོ་ཆེ་ལས་བྱས་པ། ལྷའི་རས་བརྒྱ་སྟོང་བཏིང་བ་བརྒྱ་སྟོང་ཕྲག་མང་པོ་བཤམས་སོ། །བཅོམ་ལྡན་འདས་ཀྱི་གདན་སེང་གེའི་ཁྲི་འཕང་དུ་དཔག་ཚད་བཅུ་གཉིས་པ་རིན་པོ་ཆེ་ཐམས་ཅད་ཀྱིས་སྤྲས་པ། རིན་པོ་ཆེའི་ཁ་ཁྱེར་གྱི་བསྐོར་བ་གདུགས་དང ། རྒྱལ་མཚན་དང་བ་དན་བསྒྲེང་བ། སྙིང་པོ་མཆོག་གི་བདུག་པས་བདུགས་པ། བླ་རེ་བྲེས་པ། དར་གྱི་ལྡ་ལྡི་མང་པོ་བྲེས་པ་ལྷའི་མེ་ཏོག་གཏོར་བ་བཤམས་སོ། །སེང་གེའི་ཁྲི་དེའི་ཕྱོགས་བཞིར་རིན་པོ་ཆེའི་ཤིང་སྣ་ཚོགས་ལྟ་ན་སྡུག་པ་བཞི་སྤྲུལ་ཏེ། སྐྱེ་བོ་ཐམས་ཅད་བསྡུས་ནས་ཚིགས་སུ་བཅད་པ་འདི་དག་སྨྲས་སོ། །ུ་དུམ་བ་རའི་མེ་ཏོག་ཇི་བཞིན་དུ། །སངས་རྒྱས་འབྱུང་བ་བརྒྱ་ལམ་རྙེད་འགྱུར་བ། །མི་མཆོག་དེ་ནི་ད་ལྟར་བྱུང་གྱུར་ཀྱིས། །སྐྱོབ་ལ་གུས་དང་བཅས་པས་མཆོད་པ་གྱིས། །ང་རྒྱལ་དག་དང་རྒྱགས་དང་གཡོ་སྤོངས་ལ། །ཕྲག་དོག་སེར་སྣ་དེ་བཞིན་སྒྱུ་རྣམས་དང ། །རྒོད་པ་ཐམས་ཅད་ཡོངས་སུ་སྤོང་བྱོས་ལ། །སྟོན་ལ་གུས་དང་བཅས་པས་མཆོད་པ་གྱིས། །སྤོས་ངད་ལྡང་བ་འདི་ན་ལྷ་ཡུལ་བའི། །མེ་ཏོག་ཁྱད་པར་འཕགས་པ་ཇི་སྙེད་པ། །དེ་དག
53.312a
ཐམས་ཅད་གཅིག་ཏུ་བསྡུས་ནས་སུ། །སྐྱེས་བུ་ཁྱུ་མཆོག་ལ་ནི་མཆོད་པ་གྱིས། །སེམས་ཅན་མཆོག་ལ་མཆོད་པ་བྱ་བའི་ཕྱིར། །དྲི་ཞིམ་ཡིད་འོང་ཁྱད་པར་འཕགས་པའི་དྲི། །དུས་ཀྱི་རྗེས་སུ་འབྲང་བའི་ཙན་དན་གྱིས། །སྤོས་ཀྱི་ངད་ལྡང་འདི་ལ་བདུག་པ་གྱིས། །གླུ་དབྱངས་སིལ་སྙན་རྣམ་མང་ཡིད་འོང་བ། །མི་འམ་ཅི་དག་རྟག་རྩེ་གར་བྱེད་པ། །ལྡན་པར་བྱོས་ལ་དགའ་ཞིང་དང་བ་ཡིས། །རྐང་གཉིས་མཆོག་ལ་མཆོད་པ་རབ་ཏུ་གྱིས། །མཚུངས་པ་མེད་པ་མཐོང་བ་རྙེད་དཀའ་བ། །དེ་བཞིན་གཤེགས་ལ་ལྷའི་གདུགས་རྣམས་དང ། །བ་དན་དག་དང་རྒྱལ་མཚན་ཆོས་གོས་དང ། །བླ་རེ་མང་པོ་ཡིད་འོང་གཟུང་བར་བྱོས། །སངས་རྒྱས་མཆོད་པས་བདེ་འགྲོར་འགྲོ་བར་འགྱུར། །བརྒྱ་བྱིན་དང་ནི་འཇིག་རྟེན་སྐྱོང་བར་འགྱུར། །ཚངས་པ་དག་དང་དབང་བྱེད་དབང་ཕྱུག་དང ། །ལྷ་དང་མིའི་བདག་པོ་ཆེན་པོར་འགྱུར། །མི་མཆོག་མཆོད་པས་གཟུགས་དང་ཁ་དོག་དང ། །གྲགས་དང་བརྗོད་དང་འཁོར་དང་ལོངས་སྤྱོད་དང ། །དེ་བཞིན་དབང་ཕྱུག་དང་ནི་སྙན་ཚིག་དང ། །དེ་བཞིན་གཟུང་བར་འོས་པའི་ཚིག་ཏུ་འགྱུར། །གང་དག་འདིར་ནི་ལྷ་དང་དེ་བཞིན་དུ། །མི་རྣམས་ཀྱི་ནི་འདུས་བྱས་བདེ་བ་དང ། །བདེ་བ་བདེ་བས་ཚིམ་པར་འདོད་པ་རྣམས། །འཇིག་རྟེན་མགོན་པོ་དེ་ལ་མཆོད་པ་གྱིས། །རང་རྒྱལ་བྱང་ཆུབ་དེ་བཞིན་ཉན་ཐོས་དང ། །དེ་ལྟར་དམ་པ་མཆོག་གི་ཐེག་པ་དང ། །བདུད་ཀྱི་དཔུང་རྣམས་རབ་འཇོམ་གང་འདོད་པས། །སེམས་ཅན་མཆོག་དེ་ལ་ནི་མཆོད་པ་གྱིས། །དེ་ནས་མི་འམ་ཅིའི་རྒྱལ་པོ་སྡོང་པོས་རང་གི་གཡོག་འཁོར་ཐམས་ཅད་ལ་གོ་བར་བྱས་ཏེ། མེ་ཏོག་དང་དྲི་དང་ཕྲེང་བ་དང ། བྱུག་པ་བསྔོགས་ནས་རོ་བརྒྱ་པའི་ཞལ་ཟས་བཤམས་ཏེ། རིའི་རྒྱལ་པོ་སྤོས་ཀྱི་ངད་ལྡང་གི་ལྷོ་ཕྱོགས་ཀྱི་ངོས་ལ་འདུག་ནས་སིལ་སྙན་དང་གླུ་དབྱངས་བླངས་ཏེ། རྒྱུད་ཀྱི་སྒྲ་དང་གླུའི་སྒྲ་དང་ལྡན་པའི་ཚིགསུ་བཅད་པ་འདི་དག་གིས་དབྱངས་ལས་ཚིགས་སུ་བཅད་དེ། བཅོམ་ལྡན་འདས་ལ་དུས་བསྐུལ
53.312b
བ། ཕན་པ་མཛད་ཅིང་བདེ་མཛད་དགའ་མཛད་བཅོམ་ལྡན་འདས། །ཞལ་ཡང་རབ་འཛུམ་ཟླ་བའི་ངོས་ལྟར་དྲི་མི་མངའ། །སྐྱེ་མཆོག་དགེ་སྦྱོང་དམ་པ་ལྷ་དང་མིས་མཆོད་པ། །བདེ་བར་གཤེགས་ཁྱོད་འདིར་གཤེགས་པའི་དུས་འདི་ལགས། །སྟོབས་བཅུ་རྣམས་ཀྱི་སྟོབས་མངའ་ཕ་རོལ་དཔུང་འཇོམ་པ། །གཞན་གྱི་ཚོགས་རྣམས་འཇོམ་ཤིང་འགྲོ་ལ་ཕན་པ་མཛད། །འཇོ་དང་རྙོག་པ་རྣམས་དང་དྲི་མ་འཐབ་སྤངས་པ། །ཕན་པ་མཛད་པ་ཁྱོད་འདིར་གཤེགས་པའི་དུས་འདི་ལགས། །སྦྱངས་པའི་ཡོན་ཏན་རྡུལ་སྦྱངས་ཐེ་ཙོམ་རྣམ་པར་གཏོར། །དྲན་དང་བློ་གྲོས་བློ་ཡངས་མོས་རྟོགས་བློ་གྲོས་ལྡན། །འགྲོ་རྒྱལ་རྟག་ཏུ་འགྲོ་བ་འགྲོ་མེད་འགྲོ་བ་སྤངས། །ཕན་པ་མཛད་ཅིང་དགའ་མཛད་རབ་ཏུ་དགྱེས་པའི་ཐུགས། །ཉི་མ་ཟླ་བ་ནོར་བུ་གློག་རྣམས་མཛེས་པའི་འོད། །བརྒྱ་བྱིན་ཚངས་པ་སྲིད་གསུམ་ལྷ་ཚོགས་འོད་འཕྲོག་ཅིང ། །འོད་མཛད་དཔལ་སྟུག་ཐུབ་ཁྱོད་འོད་ནི་ཕན་བགྱིད་པས། །འོད་འདི་བསལ་ནས་རྒྱལ་བའི་འོད་ནི་ལྷག་གེ་ཡི། །ཁྱོད་ཀྱི་ལྷ་སྐད་ཀླུ་སྐད་མི་ཅིའི་ཀླུ་སྒྲ་ཡིས། །ཡང་དང་ཡང་དུ་འབར་བའི་ཉོན་མོངས་ཞི་བར་བགྱིད། །སྐད་མཆོག་ཡངས་པ་ཚངས་པ་རྣམས་ཀྱི་སྒྲ་སྐད་ཀྱིས། །ཉོན་མོངས་ཐམས་ཅད་ཞི་བར་བགྱིད་པས་འབར་མ་ལགས། །སྨན་པ་གང་དག་ཕྱོགས་བཅུར་རྒྱུ་ཡང་དེ་དག་གིས། །གང་དུའང་འགྲོ་བའི་ཉོན་མོངས་ཞི་བར་བགྱིད་མི་ནུས། །སྨན་པའི་རྒྱལ་པོ་བླ་མེད་གང་ཚེ་གཟུང་བརྗོད་པ། །དེ་ཚེ་ཉོན་མོངས་ཀུན་ཞི་བདེ་བ་ཐམས་ཅད་སྦྱིན། །ཤིན་དུ་ངོ་མཚར་འོད་དང་སྟོབས་མཆོག་མཚུངས་མེད་སྟོབས། །གསུང་ནི་སྐྱོན་བྲལ་འཁྲུལ་པ་མི་མངའ་དགྲ་འདུལ་བ། །རྡུལ་མེད་རབ་རིབ་བདག་གི་མུན་པ་ཤིན་དུ་བཅོམ། །དགྲ་བྲལ་ཕན་མཛད་ཁྱེད་ཀྱི་དུས་ལགས་འདིར་གཤེགས་གསོལ། །སྦྱིན་དང་དུལ་དང་ལེགས་སྤྱོད་མི་མཉམ་མཚུངས་དང་མཉམ། །ཚུལ་ཁྲིམས་བརྟུལ་ཞུགས་མི་འཁྲུགས་བརྟུལ་ཞུགས་དཀའ་ཐུབ་དགྱེས། །བཟོད་དང་དུལ་དང་ཤིན་དུ་དགེ་ལ་ངེས་པའི
53.313a
ཐུགས། །དགའ་གསུང་དགྲ་རྣམ་ཀྱི་ནི་དགའ་སྤོང་གཤེགས་སུ་གསོལ། །དབང་པོ་སྟོབས་དང་ལམ་དགྱེས་བསམ་གཏན་མངོན་མཁྱེན་རོལ། །དྲན་དང་བློ་གྲོས་རྟོགས་དང་མོས་ལ་གནས་པའི་ཐུགས། །འོད་ནི་རབ་ཏུ་ལྷག་གེ་ཤིན་དུ་དགྱེས་པའི་ཐུགས། །ཡོན་ཏན་མངའ་བ་ཁྱོད་འདིར་གཤེགས་པའི་དུས་འདི་ལགས། །བྱམས་དང་སྙིང་རྗེ་དགའ་དང་བཏང་སྙོམས་བསྒོམས་པའི་ཐུགས། །སྐྱོན་གྱི་མུན་པ་བཅོམ་ཞིང་བག་ལ་ཉལ་དང་བྲལ། །ཚངས་པའི་ལམ་ནི་རབ་བསླབས་རྒྱལ་བའི་ལམ་ལ་གནས། །དགའ་མཛད་བདེ་བར་གཤེགས་པ་དུས་ལགས་གཤེགས་སུ་གསོལ། །དེ་ནས་བཅོམ་ལྡན་འདས་ཀྱི་མི་འམ་ཅིའི་རྒྱལ་པོ་སྡོང་པོས་དུས་བསྐུལ་བའི་ཚིགས་སུ་བཅད་པ་གསན་ནས་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག་མི་འམ་ཅིའི་རྒྱལ་པོ་སྡོང་པོས་དུས་བསྐུལ་གྱིས་ལྷུང་བཟེད་དང ། ཆོས་གོས་ཐོགས་ལ་ཞག་བདུན་གནས་པའི་གཙུག་ལག་ཁང་སྐྱོང་ཡང་བསྐོས་ཤིག་།དེ་ནས་བྱང་ཆུབ་སེམས་དཔའ་ལྷའི་ཅོད་པན་འདི་སྙམ་དུ་སེམས་ཏེ། འདི་ལྟར་བདག་གིས་ཁང་པ་བརྩེགས་པ། བཀོད་པ་འདི་ལྟ་བུ་སྤྲུལ་ལ་ཁང་པ་བརྩེགས་པ་དེར། བཅོམ་ལྡན་འདས་བྱང་ཆུབ་སེམས་དཔའ་དང་ཉན་ཐོས་ཀྱི་ཚོགས་དང་བཅས་པ་བཞུགས་ཏེ། རིན་པོ་ཆེ་བཀོད་པའི་སེང་གེའི་ཁྲི་ལ་བཞུགས་པའི་ཁང་པ་བརྩེགས་པ་བདག་གིས་ལག་པ་གཡས་པར་བླངས་ཏེ། ནམ་མཁའི་ངོས་ལས་རིའི་རྒྱལ་པོ་སྤོས་ཀྱི་ངད་ལྡང་དུ་བཀུར་བར་བྱིན་གྱིས་བརླབ་བོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་དེ་འི་ཚེ་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་བཅོམ་ལྡན་འདས་ཀྱི་སྤྱན་སྔར་ཁང་པ་བརྩེགས་པ་ཚད་དཔག་ཚད་བཅུ་པ་བཀྲ་བ་བལྟ་ན་སྡུག་པ
53.313b
གྲུ་བཞི་པ། ཀ་བ་བཞི་ཟུག་པ་ཆ་མཉམ་པ། ཤིན་དུ་རྣམ་པར་ཕྱེ་བ་བྱུང་ངོ ། །ཁང་པ་བརྩེགས་པ་དེར་སྟོབས་དང་ལྡན་པའི་པད་མ་བཀོད་པའི་ཁྲི་རྣམས་ཀྱང་བྱུང་ངོ ། །ཁང་པ་བརྩེགས་པ་དེར་བཅོམ་ལྡན་འདས་ཀྱི་གདན་རིན་པོ་ཆེའི་པད་མ་བཀོད་པའི་སེང་གེའི་ཁྲི་འཕང་དུ་མི་བདུན་ཡོད་པ་བྱུང་ངོ ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་ཁང་པ་བརྩེགས་པ་བཀོད་པ་དང ། སེང་གེའི་ཁྲི་བཀོད་པ་འདི་ལྟ་བུ་འདི་བྱས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ལ་ཐུགས་བརྩེ་བའི་སླད་དུ་བཅོམ་ལྡན་འདས་བྱང་ཆུབ་སེམས་དཔའ་དང་ཉན་ཐོས་ཆེན་པོ་འདི་དག་དང་ཐབས་གཅིག་ཏུ་ཁང་པ་བརྩེགས་པ་སེང་གེའི་ཁྲི་བཤམས་པ་འདིར་བཞུགས་སུ་གསོལ། བཅོམ་ལྡན་འདས་བདག་གིས་ཁང་པ་བརྩེགས་པ་འདི་སུག་པ་གཡས་པས་བླངས་ཏེ། རིའི་རྒྱལ་པོ་སྤོས་ཀྱི་ངད་ལྡང་དུ་འཚལ་ནས་གཞག་པར་བགྱིའོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་ལྷའི་ཅོད་པན་ལ་ཐུགས་བརྩེ་བའི་ཕྱིར། བྱང་ཆུབ་སེམས་དཔའ་དང་ཉན་ཐོས་ཆེན་པོ་དེ་དག་དང་ཐབས་གཅིག་ཏུ་ཁང་པ་བརྩེགས་པ་དེར་ཇི་ལྟར་ཁྲི་བཤམས་པ་དེ་དག་ལ་བཞུགས་སོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་ཁང་པ་བརྩེགས་པ་དེ་ལག་མཐིལ་གཡས་པར་བླངས་ཏེ། སྟེང་གི་ནམ་མཁའ་ལས་རྫུ་འཕྲུལ་གྱིས་སོང་ངོ ། །དེ་ནས་འདོད་པ་ན་སྤྱོད་པའི་ལྷའི་བུ་དང ། གཟུགས་ན་སྤྱོད་པའི་ལྷའི་བུ་རྣམས་ཀྱིས་བྱང་ཆུབ་སེམས་དཔའ་ལྷའི་ཅོད་པན་གྱི་རྫུ་འཕྲུལ་གྱི་ཆོ་འཕྲུལ་འདི་མཐོང་ནས་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ་དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་དང་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་ལ་མཆོད་པའི་ལས་ཀྱི་ཕྱིར་མེ་ཏོག་དང ། བདུག་པ་དང །
53.314a
སྤོས་དང་ཕྲེང་བ་དང ། བྱུག་པ་ཐམས་ཅད་ཐོགས་ཏེ། སིལ་སྙན་དང་ཕེག་བརྡབ་པ་བྱས་ནས་བཅོམ་ལྡན་འདས་ཁང་པ་བརྩེགས་པ་ན་བཞུགས་ཤིང ། ནམ་མཁའི་ངོས་ལས་གཤེགས་པ་ལ་མཆོད་པ་བྱས་ཏེ། རིའི་རྒྱལ་པོ་སྤོས་ཀྱི་ངད་ལྡང་དུ་ཕྱིན་ཏོ། །མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ཁང་པ་བརྩེགས་པ་ན་བཞུགས་ཤིང་ནམ་མཁའི་ངོས་ལས་གཤེགས་པ་མཐོང་ངོ ། །མཐོང་ནས་མི་འམ་ཅི་དང ། དྲི་ཟ་བརྒྱད་ཁྲི་བཞི་སྟོང་གིས་བསྐོར་ཏེ། མེ་ཏོག་དང ། བདུག་པ་དང ། སྤོས་དང་ཕྲེང་བ་དང ། བྱུག་པ་ཐམས་ཅད་ཐོགས་ནས་སིལ་སྙན་དང ། ཕེག་རྡོབ་པ་དང་གླུ་དབྱངས་ལེན་པའི་བཀོད་པ་བྱས་ཏེ། བཅོམ་ལྡན་འདས་བསུ་བའི་ཕྱིར་བྱུང་ངོ ། །དེ་ནས་མི་འམ་ཅིའི་རྒྱལ་པོ་སྡོང་པོ་དཔུང་དང་བཅས་འཁོར་དང་བཅས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཇི་ལྟར་ཐོགས་པའི་མེ་ཏོག་དང ། བདུག་པ་དང་སྤོས་དང ། ཕྲེང་བ་དང་བྱུག་པ་དེ་དག་དང ། སིལ་སྙན་དང ། ཕེག་རྡོབ་པ་དང ། གླུ་དབྱངས་ལེན་པས་བཅོམ་ལྡན་འདས་ལ་མཆོད་པ་བྱས་སོ། །དེ་ནས་བཅོམ་ལྡན་འདས་ཀྱིས་དུས་ལ་བབ་པར་མཁྱེན་ནས། བྱང་ཆུབ་སེམས་དཔའ་དང་ཉན་ཐོས་ཆེན་པོ་དང ། བརྒྱ་བྱིན་དང་ཚངས་པ་དང ། འཇིག་རྟེན་སྐྱོང་བ་དང ། དེ་མ་ཡིན་པ་གཞན་ལྷའི་བུ་རྣམས་དང ། ཐབས་གཅིག་ཏུ་མི་འམ་ཅིའི་རྒྱལ་པོ་སྡོང་པོས་འཁོར་གྱི་ཁྱམས་བཀོད་པ་ག་ལ་བ་དེར་གཤེགས་ཏེ་རང་གི་སེང་གེའི་ཁྲི་ཇི་ལྟར་བཤམས་པ་ལ་བཞུགས་སོ། །བྱང་ཆུབ་སེམས་དཔའི་ཚོགས་དང་ཉན་ཐོས་ཀྱི་ཚོགས་ཐམས་ཅད་སོ་སོ་ཅི་རིག་པར་འཁོད་དོ། །མི་འམ་ཅིའི་རྒྱལ་པོ་སྡོང་པོས་བརྒྱ་བྱིན་དང་ཚངས་པ་དང ། འཇིག་རྟེན་སྐྱོང་བ་དང་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་དེ་དག་ལ
53.314b
སྨྲས་པ། གྲོགས་པོ་དག་དེ་བཞིན་གཤེགས་པ་དང་ཐབས་གཅིག་ཏུ་གདུགས་ཚོད་གསོལ་གྱིས། ཁྱེད་ཐམས་ཅད་འདུས་ལ་ཚུར་སྤྱོན། དེ་ནས་མི་འམ་ཅིའི་རྒྱལ་པོ་སྡོང་པོ་སླས་དང་བཅས། བུ་དང་བཅས། རང་གི་སྐྱེ་བོ་དང་བཅས་འཁོར་དང་བཅས། གཡོག་དང་བཅས་ཏེ་རང་རང་གི་ལག་གིས་བཟའ་བ་དང ། བཅའ་བ་གྱ་ནོམ་པ་མང་པོ་རོ་དང་ལྡན་པ། རོ་བརྒྱ་པའི་ཞལ་ཟས་སྣ་ཚོགས་བཅོམ་ལྡན་འདས་དང ། བྱང་ཆུབ་སེམས་དཔའི་དགེ་འདུན་དང ། དགེ་སློང་གི་དགེ་འདུན་དང ། འཁོར་ལ་བྲིམས་ནས་བདེ་བར་བསྟབས་ཏེ་ཚིམ་པར་བྱས་སོ། །ཚིམ་པར་བྱས་ནས་བཅོམ་ལྡན་འདས་ཀྱིས་ལྷུང་བཟེད་བཞག་སྟེ། ཕྱག་བཅས་པར་རིག་ནས། དཔུང་དང་བཅས་གཡོག་དང་བཅས་ཏེ། ཆོས་ཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་ཇི་ལྟར་བདག་ལ་འོས་པའི་སྟན་ལ་འདུག་གོ། །དེ་ནས་བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོ་དང་སྐྱེ་བོའི་ཚོགས་ཕལ་པོ་ཆེ་དེ་དག་ལ་ཆོས་ཀྱི་གཏམ་ཡང་དག་པར་སྟོན་ཏོ། །ཡང་དག་པར་འཛིན་དུ་བཅུག་གོ། །གཟེང་བསྟོད་དོ། །རབ་ཏུ་དགའ་བར་མཛད་དོ། །དེ་ནས་བཅོམ་ལྡན་འདས་ཀྱིས་ཆོས་ཀྱི་གཏམ་ནི་འདི་ཡིན་ཏེ། མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །རྣམ་པ་སུམ་བཅུ་རྩ་གཉིས་གང་འདི་ལྟ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་སྦྱིན་པ་སྦྱིན་པ་ན་བྱང་ཆུབ་ཀྱི་སེམས་སྔོན་དུ་འགྲོ་བའི་སྦྱིན་པ་དེ་སྦྱིན་པ་དང ། ཐེག་པ་ཆུང་ངུ་སྤངས་པའི་སེམས་ཀྱིས་སྦྱིན་པ་དེ་སྦྱིན་པ་དང ། སློང་བ་ལ་ཞེ་སྡང་བ་མེད་པའི་སེམས་ཀྱིས་སྦྱིན་པ་དེ་སྦྱིན་པ་དང ། ལེན་པ་རྣམས་ལ་སྦྱིན་གནས་སུ་འདུ་ཤེས་བསྐྱེད་དེ་སྦྱིན་པ་དེ་སྦྱིན་པ་དང ། ལེན་པ་རྣམས་ལ་དགེ་བའི་བཤེས་གཉེན་དུ་འདུ་ཤེས་བསྐྱེད་དེ་སྦྱིན་པ་དེ
53.315a
སྦྱིན་པ་དང ། ནང་གི་ཀུན་ནས་ཉོན་མོངས་པའི་དྲི་མ་སྤངས་ཏེ། སྦྱིན་པ་དེ་སྦྱིན་པ་དང་ཀུན་དུ་འཛིན་པ་མེད་པའི་སེམས་ཀྱི་དགའ་བ་དང ། དང་བ་དང་མཆོག་ཏུ་དགའ་བ་ཐོབ་ནས་སྦྱིན་པ་དེ་སྦྱིན་པ་དང ། ལག་པ་བརྐྱང་སྟེ་གྲོལ་བས་གཏོང་བ་རྣམ་པར་གཏོང་བ་ལ་དགའ་བས་སྦྱིན་པ་དེ་སྦྱིན་པ་དང ། རྒྱ་ཆེན་པོ་ལ་མོས་ཏེ་ཞུམ་པ་མེད་པའི་སེམས་ཀྱིས་སྦྱིན་པ་དེ་སྦྱིན་པ་དང ། སྣོད་ཐམས་ཅད་ལ་མི་གནས་པར་སྦྱིན་པ་དེ་སྦྱིན་པ་དང ། རྣམ་པར་སྨིན་པ་ལ་རེ་བ་མེད་པར་སྦྱིན་པ་དེ་སྦྱིན་པ་དང ། ལན་ལ་རེ་བ་མེད་པའི་སྦྱིན་པ་དེ་སྦྱིན་པ་དང ། སངས་རྒྱས་ཀྱི་ཆོས་ཚོལ་བའི་བློས་སྦྱིན་པ་དེ་སྦྱིན་པ་དང ། ཐམས་ཅད་མཁྱེན་པའི་ཡེ་ཤེས་སུ་བསྔོས་ཏེ་སྦྱིན་པ་དེ་སྦྱིན་པ་དང ། གདུང་བ་མེད་པའི་སེམས་ཀྱིས་སྦྱིན་པ་དེ་སྦྱིན་པ་དང ། བསྡུ་བའི་དངོས་པོ་སྔོན་དུ་འགྲོ་བས་སྦྱིན་པ་དེ་སྦྱིན་པ་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་སྦྱིན་པ་དེ་སྦྱིན་པ་དང ། ཆོས་འཛིན་པར་གྱུར་ཅིག་སྙམ་སྟེ་སྦྱིན་པ་དེ་སྦྱིན་པ་དེ། དེ་བཞིན་གཤེགས་པའི་གསུང་དང་འཐུན་པར་གྱུར་ཅིག་སྙམ་སྟེ་སྦྱིན་པ་དེ་སྦྱིན་པ་དང ། བདག་བདུད་ཀྱི་ཕྱོགས་ཚར་གཅོད་པར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། བདག་བྱང་ཆུབ་ཀྱི་ལམ་རྣམ་པར་སྤྱོད་པར་གྱུར་ཅིག་ཅེས་སྦྱིན་པ་དེ་སྦྱིན་པ་དང ། བདག་སྐྱེས་བུ་དམ་པའི་ལས་བྱེད་པར་གྱུར་ཅིག་ཅེས་སྦྱིན་པ་དེ་སྦྱིན་པ་དང ། བདག་ཡི་དགས་ཀྱི་ལམ་རྣམ་པར་སྤོང་བར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། བདག་གི་བདོག་པ་ཐམས་ཅད་ཡོངས་སུ་གཏོང་བའི་རྒྱུར་གྱུར་ཅིག་ཅེས་སྦྱིན་པ་དེ་སྦྱིན་པ་དང ། བདག་གིས་ལོངས་སྤྱོད་ཆེན་པོར་འགྱུར་བའི་བསྒྲུབ་པ་རབ་ཏུ་བཟུང་བར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། ཆོས་ལ་དགའ་བར་རབ་ཏུ་གནས་པར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། བདག་ལ་དགེ་བའི་བཤེས་གཉེན་དཀོན་པར་མ་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང །
53.315b
བདག་ལ་སེམས་ཅན་ཐམས་ཅད་དགའ་བའི་མིག་དང་ལྡན་པར་གྱུར་ཅིག་ཅེས་ཏེ་སྦྱིན་པ་སྦྱིན་པ་དང ། བདག་གི་སྦྱིན་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྒྲུབ་པར་གྱུར་ཅིག་ཅེས་སྦྱིན་པ་སྦྱིན་པ་དང ། བྱང་ཆུབ་སེམས་དཔའ་གཏོང་བ་ཕུན་སུམ་ཚོགས་པ་གཞན་རྣམས་ཀྱི་རྗེས་སུ་སློབ་པར་མ་གྱུར་ཅིག་ཅེས་ཏེ་སྦྱིན་པ་སྦྱིན་པ་དང ། བདག་མཚན་དང་དཔེ་བྱད་བཟང་པོ་བསགས་པ་ཡོངས་སུ་འཛིན་པར་གྱུར་ཅིག་ཅེས་ཏེ་སྦྱིན་པ་སྦྱིན་པ་དང ། བདག་སངས་རྒྱས་ཀྱི་ཞིང་ཡོངས་སུ་སྦྱོང་བ་དང ། བདག་སངས་རྒྱས་ཀྱི་ཆོས་ཐམས་ཅད་མངོན་སུམ་དུ་གྱུར་ཅིག་ཅེས་ཏེ་སྦྱིན་པ་སྦྱིན་པ་སྟེ། མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་པོ་འདི་དག་གིས། བྱང་ཆུབ་སེམས་དཔའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །སུམ་བཅུ་རྩ་གཉིས་གང་ཞེ་ན་འདི་ལྟ་སྟེ། འདོད་ཆགས་དང ། ཞེ་སྡང་དང ། གཏི་མུག་དང་བྲལ་བས་ལུས་ཡོངས་སུ་དག་པའི་ཚུལ་ཁྲིམས་དང ། བདག་གི་ལྷ་སངས་རྒྱས་ལ་མི་སླུ་བའི་མཚན་ཉིད་ཀྱིས་ངག་ཡོངས་སུ་དག་པའི་ཚུལ་ཁྲིམས་དང ། བརྣབ་སེམས་དང ། གནོད་སེམས་དང་ལོག་པར་ལྟ་བ་མེད་པས་སེམས་ཡོངས་སུ་དག་པའི་ཚུལ་ཁྲིམས་དང ། ལྷ་དང་མིའི་ཕུན་སུམ་ཚོགས་པ་མྱོང་བས་དགེ་བ་བཅུའི་ལས་ཀྱི་ལམ་ཡོངས་སུ་དག་པའི་ཚུལ་ཁྲིམས་དང ། ཉི་ཚེ་བའི་ས་ཐམས་ཅད་མི་སྟོན་པས་བྱང་ཆུབ་ཀྱི་སེམས་དང ། བསམ་པ་མི་བརྗེད་པའི་ཚུལ་ཁྲིམས་དང ། ཤིན་དུ་ཉམས་པ་མེད་ཅིང་གཡོ་དང་བྲལ་བས་ལྷག་པའི་བསམ་པ་ཡོངས་སུ་དག་པའི་ཚུལ་ཁྲིམས་དང ། སྐྱེ་བོ་ཕལ་པ་ཐམས་ཅད་སྡུད་པས་འཕགས་པའི་སྐྱེ་བོས་བསྔགས་པའི་ཚུལ་ཁྲིམས་དང ། སེམས་ཅན་ཐམས་ཅད་ལ་སེམས་སྙོམས་པར་བྱམས་པ་སྔོན་དུ
53.316a
འགྲོ་བའི་ཚུལ་ཁྲིམས་དང ། སེམས་ཅན་ཐམས་ཅད་ཡོངས་སུ་སྐྱོབ་པས་སྙིང་རྗེ་ཆེན་པོ་ལ་རབ་ཏུ་སྦྱོར་བའི་ཚུལ་ཁྲིམས་དང ། དམ་བཅས་པས་སྟོབས་ཀྱིས་བསླབ་པ་རྫོགས་པ་མེད་པ་ཡང་དག་པར་འཛིན་པའི་ཚུལ་ཁྲིམས་དང ། ཁ་ན་མ་ཐོ་བ་ཆུང་ངུ་ལ་ཡང་འཇིགས་པར་ལྟ་བས་ངོ་ཚ་ཤེས་ཤིང་ཁྲེལ་ཡོད་པ་ཕུན་སུམ་ཚོགས་པའི་ཚུལ་ཁྲིམས་དང ། ཤིན་དུ་མི་གཏོང་བས་སྐྱོན་མེད་པའི་ཚུལ་ཁྲིམས་དང ། སྤྱོད་པ་ཤིན་དུ་དག་པས་ཐུན་ཚགས་མ་ཡིན་པའི་ཚུལ་ཁྲིམས་དང ། སངས་རྒྱས་ཀྱི་ཞིང་གཞན་དུ་འགྲོ་བས་རང་གི་རྣམ་པ་མང་པོ་ལ་དབང་བྱེད་པའི་ཚུལ་ཁྲིམས་དང ། སྐྱེ་བོ་མཁས་པས་རིག་པའི་ཕྱིར་སྔགས་པའི་ཚུལ་ཁྲིམས་དང ། ངན་སོང་ངན་འགྲོ་ཐམས་ཅད་ཀྱི་ལམ་ལས་སྒྲོལ་བའི་ཚུལ་ཁྲིམས་དང ། བདེ་བའི་དངོས་པོ་ཐམས་ཅད་ལ་རབ་ཏུ་གནས་པའི་ཚུལ་ཁྲིམས་དང ། སངས་རྒྱས་ཀྱི་ཚུལ་ཁྲིམས་ཡོངས་སུ་རྫོགས་པར་བྱེད་པས་སངས་རྒྱས་ཀྱིས་གནང་བའི་ཚུལ་ཁྲིམས་དང ། ཡི་དམ་ལ་བརྟན་པས་མི་ལྷོད་པའི་ཚུལ་ཁྲིམས་དང ། རང་གི་སེམས་ངེས་པར་སེམས་པས་བདག་ལ་མི་སྟོད་གཞན་ལ་མི་སྨོད་པའི་ཚུལ་ཁྲིམས་དང ། ཉོན་མོངས་པ་མེད་པས་ངེས་པར་སེམས་པའི་སྙིང་རྗེའི་ཚུལ་ཁྲིམས་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ལ་ཉེ་བར་བྱེད་པའི་ཚུལ་ཁྲིམས་དང ། རབ་ཏུ་དགའ་བར་བྱེད་པ་ལ་དགའ་བར་བྱེད་པའི་ཚུལ་ཁྲིམས་དང ། འདོད་པ་དང ། ཆགས་པ་མེད་པས་ཆོག་ཤེས་པར་བྱེད་པའི་ཚུལ་ཁྲིམས་དང ། ནན་ཏན་སྙིང་པོས་བྱེད་པས་བསྒྲུབ་པ་བརླབས་པོ་ཆེའི་ཚུལ་ཁྲིམས་དང ། ཁྱིམ་གྱི་གནས་ཐམས་ཅད་ལ་མི་ལྟ་བའི་རབ་ཏུ་འབྱུང་བ་ལ་གཞོལ་བའི་ཚུལ་ཁྲིམས་དང ། ཆོས་ཀྱི་དགའ་བ་ལ་དགའ་མོས་པས་དགོན་པ་ལ་དགའ་བ་དང་ལྡན་པའི་ཚུལ་ཁྲིམས་དང ། འཕགས་པའི་རིགས་ལ་རྟོན་པས་འདོད་པ་ཉུང་ཞིང་ཆོག་ཤེས
53.316b
པ་ལ་ངེས་པའི་ཚུལ་ཁྲིམས་དང ། སྡིག་པ་འདོད་པ་ཐམས་ཅད་དང་བྲལ་བས་སྦྱངས་པའི་ཡོན་ཏན་ལ་ཡང་དག་པར་རབ་ཏུ་སྦྱོར་བའི་ཚུལ་ཁྲིམས་དང ། སེམས་ཅན་མེད་པར་རྣམ་པར་སྤྱོད་པས་དམིགས་པ་མེད་པར་སྦྱོར་བའི་ཚུལ་ཁྲིམས་དང ། ཆད་པ་དང་རྟག་པ་ཡོངས་སུ་སྤོང་བས་ལྟ་བར་སོང་བ་ཐམས་ཅད་དང་གཏི་མུག་སེལ་བའི་ཚུལ་ཁྲིམས་དང ། རྟེན་ཅིང་འབྲེལ་པར་འབྱུང་བ་དང་མི་འགལ་བས་བྱང་ཆུབ་ཀྱི་རྗེས་སུ་འཐུན་པའི་ཚུལ་ཁྲིམས་ཏེ། མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་པོ་འདི་དག་གིས་བྱང་ཆུབ་སེམས་དཔའི། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་ཀྱིས་བྱང་ཆུབ་སེམས་དཔའ་རྣམ་ཀྱི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །སུམ་བཅུ་རྩ་གཉིས་གང་ཞེ་ན་འདི་ལྟ་སྟེ། ལུས་ལ་མི་ལྟ་བས་བཟོད་པར་ལྟ་བ་དང ། སྲོག་ལ་མི་ཆགས་པར་བཟོད་པར་ལྟ་བ་དང ། ཞེ་སྡང་བའི་སེམས་མེད་པར་བཟོད་པར་བལྟ་བ་དང ། ཉེས་པར་སྨྲས་པའི་ཚིག་དང་དུ་ལེན་པས་བཟོད་པར་བལྟ་བ་དང ། ཉམ་ཆུང་བའི་སེམས་ཅན་ལ་སྙིང་རྗེ་སྐྱེད་པས་བཟོད་པར་བལྟ་བ་དང ། མ་བསླབས་པ་ལ་མི་བརྙས་པས་བཟོད་པར་བལྟ་བ་དང ། གནོད་པ་བྱེད་པ་རྣམས་ལ་ལན་གླན་པའི་མཐུ་ཡོད་ཀྱང་ལན་མི་ལྡོན་པས་བཟོད་པར་བལྟ་བ་དང ། ཡན་ལག་དང་ཉིང་ལག་ཐམས་ཅད་གཅད་ཀྱང་མི་འཁྲུགས་ཤིང་གནོད་སེམས་མེད་པས་བཟོད་པར་བལྟ་བ་དང ། བརླང་བ་མེད་པས་བཟོད་པར་བལྟ་བ་དང ། གཤེ་བ་ལ་སླར་མི་གཤེ་བས་བཟོད་པར་བལྟ་བ་དང ། བསམ་པ་དག་པས་བཟོད་པར་བལྟ་བ་དང ། རྙོག་པའི་སེམས་མེད་པས་བཟོད་པར་བལྟ་བ་དང ། དཀྲུགས་པའི་སེམས་མེད་པས་བཟོད་པར་བལྟ་བ་དང ། གཞན་གྱི་སེམས་བསྲུང་བས་བཟོད་པར་བལྟ་བ་དང ། སེམས
53.317a
ཅན་ཐམས་ཅད་ལ་ཕན་པའི་དངོས་པོས་བཟོད་པར་བལྟ་བ་དང ། སྙིང་རྗེའི་བློ་དང་ལྡན་པས་བཟོད་པར་བལྟ་བ་དང ། ང་རྒྱལ་མེད་པས་བཟོད་པར་བལྟ་བ་དང ། སེམས་ཅན་ཐམས་ཅད་ལ་བརྙས་ཐབས་མེད་ཅིང་འདུད་པས་བཟོད་པར་བལྟ་བ་དང ། འབར་བ་མེད་པས་བཟོད་པར་བལྟ་བ་དང ། ཉེ་བར་ཞི་བས་བཟོད་པར་བལྟ་བ་དང ། ངེས་པར་སེམས་པས་བཟོད་པར་བལྟ་བ་དང ། བདག་གི་འཁྲུལ་པ་ལ་སོ་སོར་རྟོག་པས་བཟོད་པར་བལྟ་བ་དང ། གཞན་གྱི་འཁྲུལ་པའི་སྐྱོན་ལ་མི་ལྟ་བས་བཟོད་པར་བལྟ་བ་དང ། སངས་རྒྱས་རྗེས་སུ་དྲན་པ་བསྒོམས་པས་བཟོད་པར་བལྟ་བ་དང ། ཆོས་ལ་སེམས་སྦྱོར་བས་བཟོད་པར་བལྟ་བ་དང ། དང་བའི་དངོས་པོས་བཟོད་པར་བལྟ་བ་དང ། སེམས་ལ་གདུང་བ་མེད་པས་བཟོད་པར་བལྟ་བ་དང ། བཞིན་འཛུམ་ཞིང་ཁྲོ་གཉེར་མེད་པས་བཟོད་པར་བལྟ་བ་དང ། གསོང་པོ་སྨྲ་བས་བཟོད་པར་བལྟ་བ་དང ། རྣམ་པར་ཐར་པའི་སྒོ་གསུམ་ལ་དངང་བ་མེད་པས་བཟོད་པར་བལྟ་བ་དང ། མ་སྐྱེས་པ་དང་མ་བྱུང་བ་ལ་མོས་པས་བཟོད་པར་བལྟ་བ་དང ། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པས་བཟོད་པར་བལྟ་བ་སྟེ། མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་པོ་འདི་དག་གིས། བྱང་ཆུབ་སེམས་དཔའ་རྣམས་ཀྱི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་ཀྱིས་བྱང་ཆུབ་སེམས་དཔའ་རྣམ་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངསུ་དག་པ་ཡིན་ནོ། །སུམ་བཅུ་རྩ་གཉིས་གང་ཞེ་ན། འདི་ལྟ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་སངས་རྒྱས་ཀྱི་རིགས་རྒྱུན་མི་འཆད་པར་བྱ་བའི་ཕྱིར་བརྩོན་འགྲུས་རྩོམ་པ་དང ། ཆོས་ཀྱི་རིགས་རྒྱུན་མི་འཆད་པར་བྱ་བའི་ཕྱིར་བརྩོན་འགྲུས་རྩོམ་པ་དང ། དགེ་འདུན་གྱི་རིགས་རྒྱུན་མི་འཆད
53.317b
པར་བྱ་བའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཚད་མེད་པ་ཡོངས་སུ་སྨིན་པར་བྱ་བའི་ཕྱིར་བརྩོན་འགྲུས་རྩོམ་པ་དང ། འཁོར་བ་ཚད་མེད་པ་ཡོངས་སུ་གཟུང་བའི་ཕྱིར་བརྩོན་འགྲུས་རྩོམ་པ་དང ། སངས་རྒྱས་ཚད་མེད་པ་ལ་མཆོད་པ་དང་རིམ་གྲོ་བྱ་བའི་ཕྱིར་བརྩོན་འགྲུས་རྩོམ་པ་དང ། དགེ་བའི་རྩ་བ་ཚད་མེད་པ་བསགས་པའི་ཕྱིར་བརྩོན་འགྲུས་རྩོམ་པ་དང ། ཐོས་པ་ཚད་མེད་པ་གཟུང་བའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཐམས་ཅད་ལ་ལེགས་པར་སྨྲ་བ་སྨྲ་བའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཐམས་ཅད་ལ་རབ་ཏུ་གདིང་བར་བྱེད་པའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཐམས་ཅད་ལ་བྱ་བ་ཅི་ཡོད་ཅེས་བྱ་བ་ལ་སྤྲོ་བའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཐམས་ཅད་ཡོངས་སུ་མི་གཏོང་བའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཐམས་ཅད་ཚུལ་ཁྲིམས་ཀྱི་བསླབ་པ་ལ་གཟུད་པའི་ཕྱིར་བརྩོན་འགྲུས་རྩོམ་པ་དང ། བཟོད་པའི་སྟོབས་ཐམས་ཅད་དང ། དེས་པ་མི་ཉམས་པར་བྱ་བའི་ཕྱིར་བརྩོན་འགྲུས་རྩོམ་པ་དང ། བསམ་གཏན་དང་རྣམ་པར་ཐར་པ་དང་ཏིང་ངེ་འཛིན་དང ། སྙོམས་པར་འཇུག་པ་ཐམས་ཅད་བསྐྱེད་པའི་ཕྱིར་བརྩོན་འགྲུས་རྩོམ་པ་དང ། ཆགས་པ་མེད་པའི་ཤེས་རབ་མཆོག་ཡོངས་སུ་བསྐང་བའི་ཕྱིར་བརྩོན་འགྲུས་རྩོམ་པ་དང ། བྱམས་པ་དང་སྙིང་རྗེ་དང་དགའ་བ་དང ། བཏང་སྙོམས་ཚངས་པའི་གནས་པའི་གནས་པ་ཡོངས་སུ་བསྐང་བའི་ཕྱིར་བརྩོན་འགྲུས་རྩོམ་པ་དང ། མངོན་པར་ཤེས་པ་ཐམས་ཅད་ལ་བརྩོན་འགྲུས་བསྐྱེད་པའི་ཕྱིར་བརྩོན་འགྲུས་རྩོམ་པ་དང ། སངས་རྒྱས་ཀྱི་ཞིང་ཐམས་ཅད་ཀྱི་ཡོན་ཏན་བཀོད་པ་རང་གི་སངས་རྒྱས་ཀྱི་ཞིང་ཡོངས་སུ་བསྡུ་བའི་ཕྱིར་བརྩོན་འགྲུས་རྩོམ་པ་དང ། བདུད་ཐམས་ཅད་གཞོམ་པའི་ཕྱིར
53.318a
བརྩོན་འགྲུས་རྩོམ་པ་དང ། སྟོབས་བརྟན་པ་ཆེན་པོས་ཕ་རོལ་གནོན་པའི་ཕྱིར་བརྩོན་འགྲུས་རྩོམ་པ་དང ། ཕ་རོལ་རྒོལ་བ་ཐམས་ཅད་ཆོས་དང་འཐུན་པས་ཚར་གཅད་པའི་ཕྱིར་བརྩོན་འགྲུས་རྩོམ་པ་དང ། སྟོབས་བཅུ་དང་མི་འཇིགས་པ་དང ། སངས་རྒྱས་ཀྱི་ཆོས་ཡོངས་སུ་བསྐང་བའི་ཕྱིར་བརྩོན་འགྲུས་རྩོམ་པ་དང ། ལུས་དང་ངག་དང་སེམས་ཀྱི་རྒྱན་ཀྱི་ཕྱིར་བརྩོན་འགྲུས་རྩོམ་པ་དང ། བྱ་བ་ཐམས་ཅད་ཉམས་འོག་ཏུ་ཆུད་པར་བྱེད་ཅིང་བརྩོན་པ་མི་གཏོང་བའི་ཕྱིར་བརྩོན་འགྲུས་རྩོམ་པ་དང ། སེམས་ཞུམ་པ་མེད་པར་བྱ་བའི་ཕྱིར་བརྩོན་འགྲུས་རྩོམ་པ་དང ། ཉོན་མོངས་པ་ཐམས་ཅད་ཀྱིས་མི་རྫི་བའི་ཕྱིར་བརྩོན་འགྲུས་རྩོམ་པ་དང ། མ་རྒལ་བ་སྒྲོལ། མ་གྲོལ་བ་དགྲོལ། དབུགས་མ་ཕྱིན་པ་དབུགས་དབྱུང་ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་བཟླ་བའི་ཕྱིར་བརྩོན་འགྲུས་རྩོམ་པ་དང ། བསོད་ནམས་བརྒྱ་པའི་མཚན་གྱི་ཚོགས་བསགས་པའི་ཕྱིར་བརྩོན་འགྲུས་རྩོམ་པ་དང ། སངས་རྒྱས་ཐམས་ཅད་ཀྱི་དམ་པའི་ཆོས་ཡོངས་སུ་གཟུང་བའི་ཕྱིར་བརྩོན་འགྲུས་རྩོམ་པ་དང ། སངས་རྒྱས་ཀྱི་ཞིང་མཐའ་ཡས་པར་རྫུ་འཕྲུལ་གྱིས་འགྲོ་ཞིང་སངས་རྒྱས་ལ་བལྟ་བའི་ཕྱིར་བརྩོན་འགྲུས་རྩོམ་པ་དང ། སེམས་དང་ལུས་དབེན་པའི་ཕྱིར་དེའི་བརྩོན་འགྲུས་དེ་དབེན་པ་ལས་ངེས་པར་བྱུང་བ་དང ། ཐམས་ཅད་མཁྱེན་པའི་ཡེ་ཤེས་ལ་འཇུག་པའི་ཕྱིར་དེའི་བརྩོན་འགྲུས་དེ་བླང་བ་མེད་ཅིང་དོར་བ་མེད་ལ། གདེག་པ་མེད་ཅིང་གཞག་པ་མེད་དེ། སྐྱེ་བ་མེད་ཅིང་འབྱུང་བ་མེད་པས་བསྡུས་པ་ཡིན་ཏེ། མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་པོ་འདི་དག་གིས། བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོས་སུ་དག་པ་ཡིན་ནོ། །མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་ཀྱིས་བྱང་ཆུབ་སེམས་དཔའི་བསམ་གཏན་གྱི་ཕ་རོལ་ཏུ
53.318b
ཕྱིན་པ་ཡོངས་སུ་དག་པ་ཡིན་ནོ། །སུམ་བཅུ་རྩ་གཉིས་གང་ཞེ་ན། འདི་ལྟ་སྟེ་དྲན་པ་ཡོངས་སུ་དག་པ་དང ། བློ་གྲོས་ཡོངས་སུ་དག་པ་དང ། རྟོགས་པ་ཡོངས་སུ་དག་པ་དང ། ངོ་ཚ་ཤེས་པ་ཡོངས་སུ་དག་པ་དང ། ཁྲེལ་ཡོད་པ་ཡོངས་སུ་དག་པ་དང ། མོས་པ་ཡོངས་སུ་དག་པ་དང ། བསྔོ་བ་ཡོངས་སུ་དག་པ་དང ། བྱང་ཆུབ་ཀྱི་སེམས་མི་བརྗེད་པ་ཡོངས་སུ་དག་པ་དང ། དབང་པོ་སྦས་པ་ཡོངས་སུ་དག་པ་དང ། མི་གནས་པ་ཡོངས་སུ་དག་པ་དང ། དེ་ལ་མ་ཆགས་པ་ཡོངས་སུ་དག་པ་དང ། མངོན་པར་ཤེས་པ་བསྐྱེད་པ་ཡོངས་སུ་དག་པ་དང ། སེམས་ལས་སུ་རུང་བ་ཡོངས་སུ་དག་པ་དང ། ལུས་དབེན་པ་ཡོངས་སུ་དག་པ་དང ། བྲག་ཆ་ཤེས་པ་ཡོངས་སུ་དག་པ་དང ། ནང་ཉེ་བར་ཞི་བ་ཡོངས་སུ་དག་པ་དང ། ཕྱི་རོལ་དུ་མི་རྒྱུ་བ་ཡོངས་སུ་དག་པ་དང ། དམིགས་པའི་ལྟ་བ་སྤོང་བ་ཡོངས་སུ་དག་པ་དང ། བདག་མེད་པ་དང ། སེམས་ཅན་མེད་པ་དང་སྲོག་མེད་པ་དང ། གསོ་བ་མེད་པ་དང ། གང་ཟག་མེད་པར་སོ་སོར་རྟོག་ཅིང་ཁམས་གསུམ་པ་ལ་མི་གནས་པ་ཡོངས་སུ་དག་པ་དང ། བྱང་ཆུབ་ཀྱི་ཡན་ལག་གི་སྒོ་ཡོངས་སུ་དག་པ་དང ། སེམས་ཅན་ལ་ལྟ་བའི་སྙིང་རྗེ་ཆེན་པོ་ཡོངས་སུ་དག་པ་དང ། ཤེས་རབ་ལ་འཇུག་པས་རབ་རིབ་མེད་ཅིང་སྣང་བ་ཡོངས་སུ་དག་པ་དང ། རྒྱུ་དང་འབྲས་བུ་དང་རྣམ་པར་སྨིན་པ་དང་མི་འགལ་བ་ཡོངས་སུ་དག་པ་དང ། ཆོས་ལ་སེམས་པའི་བཟོད་པ་ཡོངས་སུ་དག་པ་དང ། ཚུལ་བཞིན་གྱི་རྣམ་པའི་ཆོས་ལ་སོ་སོར་རྟོག་པ་ཡོངས་སུ་དག་པ་དང ། ཐབས་ལ་མཁས་པ་བསྡུ་བ་ཡོངས་སུ་དག་པ་དང ། བྱང་ཆུབ་ཀྱི་སྙིང་པོ་བསྒྲུབ་པ་ཡོངས་སུ་དག་པ་དང ། ཉན་ཐོས་དང་རང་སངས་རྒྱས་དང་མ་འདྲེས་པ་ཡོངས་སུ་དག་པ་དང ། མི་གཡོ་བའི་བསམ་གཏན་བསྒྲུབ་པ་ཡོངས་སུ་དག་པ་དང ། སངས་རྒྱས་ཀྱི་ཏིང་ངེ་འཛིན་ཐོབ་པ་ལ་མི་གཡེང་བ་ཡོངས་སུ་དག་པ་དང ། སེམས
53.319a
ཅན་ཐམས་ཅད་ཀྱི་སེམས་དང་སྤྱོད་པ་ལྟ་བ་ཡོངས་སུ་དག་པ་དང ། སེམས་ཅན་ཐམས་ཅད་ཀྱི་དབང་པོའི་མཆོག་དང ། མཆོག་མ་ཡིན་པ་ཤེས་ནས་སོ་སོར་ཅི་རིགས་པར་ཆོས་སྟོན་པ་ཡོངསུ་དག་པ་སྟེ། མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་པོ་འདི་དག་གིས། བྱང་ཆུབ་སེམས་དཔའི་བསམ་གཏན་གྱི་ཕ་རོལ་དུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་ཀྱིས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །སུམ་བཅུ་རྩ་གཉིས་གང་ཞེ་ན། འདི་ལྟ་སྟེ་ཐོས་པ་ཚོལ་བས་མི་ངོམས་པས་མང་དུ་ཐོས་པ་དང ། ཚུལ་བཞིན་ཡིད་ལ་བྱེད་པས་ཆོས་རྣམས་ལ་དཔྱོད་པའི་ཤེས་པ་ལ་མཁས་པ་དང ། བྱང་ཆུབ་མངོན་སུམ་དུ་བྱེད་པའི་བདག་ཉིད་ཆོས་བསྒྲུབ་པ་ཤེས་པ་དང ། ཕུང་པོ་ལ་མཁས་པ་ལ་འཇུག་པས་རྣམ་པར་གྲོལ་བ་ཤེས་པ་དང ། ཆོས་ཀྱི་དབྱིངས་ལ་མཁས་པའི་ཤེས་པ་དང ། སྐྱེ་མཆེད་ལ་མཁས་པའི་ཤེས་པ་དང ། རྒྱུ་དང་བྱ་བ་ཁོང་དུ་ཆུད་པས་སྟོང་པའི་རྣམ་པར་རྟེན་ཅིང་འབྲེལ་པར་འབྱུང་བ་ལ་མཁས་པ་དང ། བདེན་པ་ལ་མཁས་པའི་ཤེས་པ་དང ། དེར་མི་ལྟུང་བར་སྐྱོན་མེད་པ་ལ་འཇུག་པ་ཤེས་པ་དང ། བསམ་བཞིན་དུ་སྐྱེ་བས་སྐྱེ་བ་ལ་སོ་སོར་མི་རྟོག་པའི་ཤེས་པ་དང ། བཟོད་མ་ནས་རྣམ་པར་དག་པས་ཆོས་ཐམས་ཅད་མི་སྐྱེ་བར་ཤེས་པ་དང ། ཕྱིན་ཅི་ལོག་ཏུ་གྱུར་པ་ཡོངས་སུ་སྨིན་པར་བྱེད་པས་སེམས་ཅན་ཐམས་ཅད་བདག་མེད་པར་ཤེས་པ་དང ། འདོད་ཆགས་དང་བྲལ་བའི་མཐའི་ཕྱིར་ཆོས་ཐམས་ཅད་ཆོས་གཅིག་ཏུ་ཤེས་པ་དང ། ནམ་མཁའ་དང་མཚུངས་པའི་ཕྱིར་ཞིང་ཐམས་ཅད་ཞིང་གཅིག་ཏུ་ཤེས་པ་དང ། ཆོས་ཀྱི་དབྱིངས་བསམ་གྱི་མི་ཁྱབ་པ་ལ་ཞུགས་པས་སངས་རྒྱས་ཐམས་ཅད་སངས་རྒྱས་གཅིག་ཏུ་ཤེས་པ་དང ། ཡི་གེ་ཤེས་པ་ལ་མཁས་པས་ཆོས་ཀྱི་ཚིག་རབ་ཏུ་དབྱེ་བ་བསྟན་པ་ཤེས་པ་དང ། ལེགས་པར་བཤད
53.319b
པས་སེམས་ཅན་ཐམས་ཅད་ཚིམ་པར་བྱེད་པའི་ཕྱིར་ཆགས་པ་མེད་པའི་སྤོབས་པས་ཆོས་རྒྱ་ཆེར་ཤེས་པ་དང ། ཐོས་པ་ཐམས་ཅད་འཛིན་པས་གཟུངས་བརྗེད་པ་མེད་པའི་ཤེས་པ་དང ། བདུད་དེ་དག་བྱང་ཆུབ་ཏུ་ཡོངས་སུ་སྨིན་པར་བྱེད་པས། བདུད་ཀྱི་ལས་ཐམས་ཅད་ཁོང་དུ་ཆུད་པའི་ཤེས་པ་དང ། རྣམ་པར་བསྒྲུབས་ཏེ་སོ་སོར་ཉེ་བར་གནས་པར་ཤེས་པས་ཆོས་ཐམས་ཅད་སྒྱུ་མ་ལྟ་བུར་རྟོག་པའི་ཤེས་པ་དང ། ཤིན་དུ་ཡོངས་སུ་གྲུབ་པ་མེད་པའི་ཚུལ་གྱིས་ཆོས་ཐམས་ཅད་རྨི་ལམ་དང ། སྨིག་རྒྱུ་དང་ཆུ་ཟླ་དང ། མིག་ཡོར་དང་བྲག་ཆ་ལྟ་བུའི་ཚུལ་དུ་སྟོན་པ་ཤེས་པ་དང ། ཤེས་པ་རྣམ་པར་དག་པའི་ཕྱིར་སེམས་ཅན་གྱི་སེམས་ཀྱི་སྤྱོད་པ་ཐམ་ཅད་ཁོང་དུ་ཆུད་པའི་ཤེས་པ་དང ། ཤིན་དུ་བསླབས་པའི་ཕྱིར་འཁོར་བ་དང་མྱ་ངན་ལས་འདས་པ་བརྟགས་པར་ཤེས་པའི་ཐབས་ལ་མཁས་པ་དང ། རྣམ་པར་ཐར་པའི་སྒོའི་ཕྱིར་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་རྣམ་པའི་ཆོས་ཤེས་པ་དང ། གཟོད་མ་ནས་བྲལ་བ་མེད་པའི་ཕྱིར་ཆོས་ཐམས་ཅད་རང་བཞིན་གྱི་ཞི་བ་དང ། རབ་ཏུ་ཞི་བ་དང ། ཉེ་བར་ཞི་བར་ཤེས་པ་དང ། མ་རིག་པ་དང ། གཏི་མུག་གི་མུན་པ་ཀུན་དུ་བཅོམ་པའི་ཕྱིར་ཆོས་ཐམས་ཅད་ལ་རབ་རིབ་མེད་ཅིང་སྣང་བ་ཐོབ་པ་དང ། ཆོས་ཐམས་ཅད་གར་ཡང་མི་འགྲོ་གང་ནས་ཀྱང་མི་འོང་བར་ཤེས་པས་ཤེས་རབ་ཀྱི་འོད་དང་ལྡན་ཞིང་སེམས་ཅན་ཐམས་ཅད་ལ་རྣམ་པར་ཐར་པའི་ཆོས་སྟོན་པ་དང ། ལས་དང་བྱ་བ་ཁོང་དུ་ཆུད་པས་སེམས་ཅན་རྣམས་ཀྱི་འཆི་འཕོ་དང་འགྲོ་བར་སྐྱེ་བ་སྟོན་པ་དང ། དོན་དང་ཆོས་དང་ངེས་པའི་ཚིག་དང་སྤོབས་པའི་ཚུལ་ལ་མཁས་ཏེ་ཕྱད་པར་དེ་ཁོ་ནའི་ལུང་སྟོན་པས། སོ་སོ་ཡང་དག་པར་རིག་པ་བཞི་ཐོབ་པ་དང ། བདག་དུལ་བ་དང་ཞི་བ་དང ། གྲོལ་བ་དང་སྦས་པ་དང ། བྱང་བས་ཡོངས་སུ་མྱ་ངན་ལས་ཟློ་བའི་ཕྱིར་དོན་ཡོད་པའི་ཆོས་སྟོན་པ་དང ། དམ་པའི་ཆོས་ཡོངས་སུ་འཛིན
53.320a
པས་སངས་རྒྱས་བཅོམ་ལྡན་འདས་རྣམས་ཀྱིས་དེ་ཤེས་རབ་ལས་ངེས་པར་བྱུང་བར་རིག་ནས་ཆོས་ཀྱི་གྲོང་ཁྱེར་ཐམས་ཅད་ཡོངས་སུ་སྐྱོང་བར་བྱིན་གྱིས་རློབ་པ་དང ། ཕྱིར་མི་ལྡོག་པའི་བྱང་ཆུབ་སེམས་དཔའི་ས་ལ་ཡང་དག་པར་གཞོལ་ཏེ། མཐའ་ལ་གནས་པའི་ཚུལ་ངེས་པར་བྱས་པས་ལུང་བསྟན་པའི་ས་རབ་ཏུ་ཐོབ་པ་ཡིན་ཏེ། མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་པོ་འདི་དག་གིས། བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ་བྱང་ཆུབ་སེམས་དཔའ་རྣམ་པ་སུམ་བཅུ་རྩ་གཉིས་དང་ལྡན་ན་ཐབས་ལ་མཁས་པར་རིག་པར་བྱའོ། །སུམ་བཅུ་རྩ་གཉིས་གང་ཞེ་ན་འདི་ལྟ་སྟེ། བྱང་ཆུབ་སེམས་དཔའ་བདག་ཟད་པར་མི་བྱེད་པས་སེམས་ཅན་ལ་ལྟ་བ་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་བསོད་ནམས་ཆེན་པོ་ལ་གནས་པ་དང ། སེམས་ཅན་ཐམས་ཅད་ཀྱི་སྦྱིན་གནས་ཀྱི་ཕྱིར་སྦྱིན་གནས་མི་ཚོལ་བ་དང ། སེམས་ཅན་དབུལ་པོ་ཡོངས་སུ་སྨིན་པར་བྱ་བའི་ཕྱིར་རྒྱ་ཆེན་པོ་དོན་དུ་མི་གཉེར་བ་དང ། སེམས་ཅན་ཐམས་ཅད་ངག་བསྡམ་པ་ལ་སྦྱར་བའི་ཕྱིར། ལྐུག་པ་དང ། དིག་པ་ལྟ་བུར་སྟོན་པ་དང ། བུད་མེད་དང་བུ་མོ་ཡོངས་སུ་སྨིན་པར་བྱ་བའི་ཕྱིར། བུད་མེད་ཡོངས་སུ་འཛིན་པ་དང ། ཁྱེའུ་ཡོངས་སུ་སྨིན་པར་བྱ་བའི་ཕྱིར། ཁྱེའུའི་གཟུགས་སུ་སྟོན་པ་དང ། སེམས་ཅན་ཡོངས་སུ་སྨིན་པར་བྱ་བ་དང་འཐུན་པར་བྱ་བའི་ཕྱིར། གཟུགས་ཐམས་ཅད་སྟོན་པ་དང ། སེམས་ཅན་མྱོས་པ་ཡོངས་སུ་སྨིན་པར་བྱ་བའི་ཕྱིར། མྱོས་པ་མ་ཡིན་ཡང་མྱོས་པའི་ལུས་སུ་སྟོན་པ་དང ། དེ་ལ་མོས་པའི་སེམས་ཅན་རྣམས་ལ་ཆོས་སྟོན་པའི་ཕྱིར། སྨྱོན་པ་དང་སེམས་གཡེངས་པའི་གཟུགསུ
53.320b
སྟོན་པ་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར། ལོ་བརྒྱར་བསགས་པའི་ཚུལ་ཁྲིམས་ཀྱི་ཕུང་པོ་འདོར་བ་དང ། ཆོས་འཛིན་དུ་གཞུག་པའི་ཕྱིར། སེམས་ཅན་རྣམས་ལ་དགའ་བ་ཐམས་ཅད་ལ་རྩེ་བ་དང ། ལོངས་སྤྱོད་སྟོན་པ་དང ། དེ་ལ་མོས་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར། གཡོན་ཅན་མ་རུངས་པས་འཚོ་བའི་ལུས་སུ་སྟོན་པ་དང ། བུད་མེད་གང་ཚོང་དཔོན་དང ། ཁྱིམ་བདག་དང ། རྒྱལ་པོའི་ཆུང་མར་གྱུར་པ་བུ་མེད་པ་བུའི་ཚེ་འདོད་པའི་མྱ་ངན་གྱི་ཟུག་རྔུ་དང་ལྡན་ཞིང ། སྡུག་བསྔལ་གྱི་ཚོར་བ་མྱོང་བ་ལ་དེ་ན་བྱང་ཆུབ་སེམས་དཔས་དེ་དག་དགེ་བ་ལ་དད་ཅིང ། ཡོངས་སུ་སྨིན་པར་བྱ་བའི་ཕྱིར་དེའི་བུར་ཁས་ལེན་པ་དང ། འབྲོག་དགོན་པར་སོང་བའི་སེམས་ཅན་དབུལ་པོ་ལ་བཟའ་བ་དང ། བཏུང་བ་དང་ནོར་སྦྱིན་ཞིང་བགོ་བཤའ་བྱ་བའི་ཕྱིར་འདྲོན་པོ་མང་པོའི་ནང་དུ་དེད་དཔོན་དུ་འགྱུར་བ་དང ། གཏེར་ཆེན་པོ་མདུན་དུ་བྱས་ནོར་གྱི་ཕུང་པོ་ཆེན་པོ་འབྱིན་ནས་ཆོས་སྟོན་པ་དང ། མྱ་ངན་གྱི་ཟུག་རྔུ་དང་ལྡན་པའི་སེམས་ཅན་རྣམས་ཀྱི་མྱ་ངན་གྱི་ཟུག་རྔུ་བསལ་ནས། རྫུ་འཕྲུལ་གྱིས་ཆོས་སྟོན་པ་དང ། གཏེར་སྟོར་བའི་སེམས་ཅན་རྣམས་ཀྱི་མདུན་དུ་གཏེར་ཆེན་པོ་ཉེ་བར་བསྟན་ནས་འཚོ་བ་ཡོངས་སུ་དག་པར་བྱ་བའི་ཕྱིར་ཆོས་སྟོན་པ་དང ། དེ་དག་སངས་རྒྱས་ཀྱི་བསྟན་པ་ལ་དགུག་པའི་ཕྱིར་གཞན་མུ་སྟེགས་ཅན་སྤྱོད་པ་ཅན་དང ། ཀུན་དུ་རྒྱུ་བ་རྣམས་ཀྱི་ནང་དུ་རབ་ཏུ་འབྱུང་བ་དང ། སེམས་ཅན་འདོད་ཆགས་ཀྱི་ལྕགས་ཀྱུས་ཟིན་པ་རྣམས་ཡོངས་སུ་སྨིན་པར་བྱ་བའི་ཕྱིར་སྨད་འཚོང་མའི་ཁྱིམ་དང ། སླས་ཀྱི་ནང་དུ་བུ་མོའི་གཟུགས་མཛེས་པ་བལྟ་ན་སྡུག་པར་སྟོན་པ་དང ། སེམས་ཅན་རྣམས་མོས་པ་ཇི་ལྟ་བ་བཞིན་དུ་ཆོས་ཀྱིས་ཡོངས་སུ་སྨིན་པར་བྱ་བའི་ཕྱིར་འདུས་པ་ཆེན་པོ་དང ། ཚོགས
53.321a
པ་མང་པོའི་ནང་དུ་རྔ་དང ། རྔ་མྲི་དང་ག་དང་རྔ་པ་ན་བ་དང་དུང་གི་སྒྲས་ས་ཆེན་པོ་མཛེས་པར་བྱས་ནས། བདག་ཉེ་བར་སྟོན་ཅིང་སེམས་ཅན་འདུས་པ་དེ་དག་ལ་རོལ་མོའི་དབྱངས་སྒྲ་དེ་དག་ལས་ཆོས་སྟོན་པའི་སྒྲ་འབྱིན་ཅིང་བཟོའི་གནས་ཐམས་ཅད་ཉེ་བར་སྟོན་པ་དང ། མྱ་ངན་དུ་སོན་པའི་འདྲོན་པ་བཟའ་བ་དང ། བཏུང་བ་ཟད་པ་ལ་མངོན་པར་ཤེས་པ་ཆེན་པོས་རྣམ་པར་རྩེ་ཞིང་དེའི་སྟོབས་ཀྱིས་བཟའ་བ་དང ། བཏུང་བ་བྱིན་ནས་བཀྲེས་པ་དང་བྲལ་ཞིང་སྐོམ་པ་དང་བྲལ་བའི་སེམས་ཅན་རྣམས་ལ་ཆོས་སྟོན་པ་དང ། སེམས་ཅན་གང་དག་དམུས་ལོང་དུ་གྱུར་པ་དེ་དག་གི་ནང་དུ་དམུས་ལོང་ལྟ་བུར་གྱུར་ནས། དབུལ་པོ་མིག་མེད་པ་དེ་དག་ལ་རྫུ་འཕྲུལ་གྱི་སྟོབས་ཀྱིས་བཟའ་བ་དང ། བཏུང་བ་འབྱོར་བར་བྱས་ནས། མིག་བྱིན་ཏེ་རང་གི་གཟུགས་བསྟན་ནས། ཇི་ལྟར་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་དེ་ལྟ་དེ་ལྟར་ཆོས་སྟོན་པ་དང ། རྒྱལ་པོའི་ཁྲི་མོན་དུ་བཅུག་པའི་སྲོག་ཆགས་བརྒྱ་ཕྲག་དུ་མ་གཡོན་ཅན་སྣ་ཚོགས་དང་ལྡན་པ་དེ་དག་ཡོངས་སུ་སྨིན་པར་བྱ་བའི་ཕྱིར། བསམས་བཞིན་དུ་བདག་རྐུན་པོར་སྟོན་ཅིང་དེ་གཡོན་ཅན་ནོ་ཞེས་ཤེས་པར་བྱས་ནས། ཁྲི་མོན་དུ་བཅུག་པ་དང་དེ་དེར་ཞུགས་ནས་རྫུ་འཕྲུལ་གྱི་སྟོབས་ཀྱིས་བཅིངས་པ། དེ་དག་གི་ལུས་བཀྲུས་ཤིང་བསྐུས་ཏེ། གོས་བཟང་པོ་བསྐོན་ནས་བཟའ་བ་དང ། བཏུང་བས་ལུས་ཚིམ་པར་བྱས་ཏེ། བཅིངས་པ་དམ་པོ་དེ་དག་ལས་བཀྲོལ་ནས་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་དེ་ལྟ་བུར་ཆོས་སྟོན་པ་དང ། སེམས་ཅན་གང་དག་རྒྱལ་པོས་བསད་པར་དཀྲི་བ་སྲོག་འཆི་བའི་འཇིགས་པའི་ཐོབ་པ་སྡུག་བསྔལ་གྱིས་ཉམ་ཐག་པ་དེ་དག་ཡོངས་སུ
53.321b
སྨིན་པར་བྱ་བའི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོས་རྫུ་འཕྲུལ་གྱིས་གཞན་དག་ཅིག་སྤྲུལ་ཏེ། རྫུ་འཕྲུལ་གྱིས་གཤེད་མ་ལ་བཀྲིས་ནས་གསད་པར་འོས་པའི་མི་དེ་དག་བཅིངས་པ་དེ་ལས་བཀྲོལ་ཏེ། འཇིགས་པ་དང་བྲལ་བ་སྲོག་རྙེད་པ་དང ། དབུགས་ཕྱིན་པ་དེ་དག་ལ་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་དེ་ལྟ་དེ་ལྟ་བུར་ཆོས་སྟོན་པ་དང ། ཕྱོགས་གང་ན་དོན་དང ། ནོར་དང ། ཞིང་དང ། ཁྱིམས་ཀྱི་དངོས་པོ་དང ། བྲན་ཕོ་དང་བྲན་མོ་དང ། ལས་བྱེད་པ་དང་དམག་མིའི་ཕྱིར་འཐབ་པ་དང ། རྩོད་པ་དང་འགྱེད་པ་དང ། འཚང་འདྲུ་བར་གྱུར་པ་དེར་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ཀྱིས་དབུས་སུ་འདུག་ནས་རྫུ་འཕྲུལ་གྱིས་དོན་དང ། ནོར་དང་རིན་པོ་ཆེ་ཡོངས་སུ་བཏང་སྟེ། དེ་དག་འདུམ་པར་སྦྱོར་རོ། །དེ་དག་དུམ་པར་རིགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་པ་དང ། བྱང་ཆུབ་སེམས་དཔའ་ཐབས་ལ་མཁས་པས་ཡན་ལག་དང ། ཉིང་ལག་ཐམས་ཅད་ཀྱིས་དབང་པོ་ཉམས་པ་མེད་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་དབང་པོ་ཉམས་པར་ཡང་སྟོན་པ་དང ། སྤྱོད་ལམ་ཕུན་སུམ་ཚོགས་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྤྱོད་ལམ་ཐམས་ཅད་འཁྲུགས་པར་ཡང་བྱེད་པ་དང ། བྱང་ཆུབ་སེམས་དཔའ་ཐབས་ལ་མཁས་པས་གཞན་མུ་སྟེགས་ཅན་སྟོན་པ་དང ། རིང་དུ་གནས་པ་བདུད་ཀྱི་སྤྱོད་ཡུལ་ལ་སྤྱོད་པ། བདུད་ཀྱིས་བྱིན་གྱིས་བརླབས་པའི་མུ་སྟེགས་ཅན་དེ་དག་སངས་རྒྱས་ཀྱི་བསྟན་པ་ལ། དགུག་པའི་ཕྱིར་དེ་དག་གི་མདུན་དུ་དཀོན་མཆོག་གསུམ་གྱི་བསྔགས་པ་བརྗོད་པ་དང ། བྱང་ཆུབ་སེམས་དཔའ་ཐབས་ལ་མཁས་པས་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསམ་གཏན་དང་རྣམ་པར
53.322a
ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་རྣམས་ལས་ལོག་ནས་བསམ་བཞིན་དུ་འདོད་པའི་ཁམས་སུ་སྐྱེ་སྟེ། མྱ་ངན་ལས་འདས་པ་འདོད་པ་རྣམས་ལ་སྐྱེ་བའི་སྡུག་བསྔལ་བསྟན་ནས་དབེན་པ་ཐོབ་པ་རྣམས་བླ་མའི་ལམ་བསྒོམ་དུ་གཟུད་པའི་ཕྱིར། མྱ་ངན་ལས་འདས་པ་སྟོན་པ་དང ། སྐྱོན་མེད་པ་ལ་མ་ཞུགས་པ་ལ་མྱ་ངན་ལས་འདས་པར་འགྲོ་བར་འདུན་པ་རྣམས་ཀྱི་མདུན་དུ། བྱང་ཆུབ་སེམས་དཔའ་ཐབས་ལ་མཁས་པ་སངས་རྒྱས་ཀྱི་སྐུ་སྟོན་པ་དང ། སངས་རྒྱས་ལ་དད་པ་ཐོབ་ཅིང ། སེམས་མཉམ་པར་བཞག་པ་རྣམས་བྱང་ཆུབ་ཀྱི་སེམས་ལེན་དུ་གཟུད་པའི་ཕྱིར། རྐྱེན་འདི་ཤེས་པ་ལ་འཇུག་པ་ཉེ་བར་སྟོན་པ་སྟེ། མི་འམ་ཅིའི་བདག་པོ་རྣམ་པ་སུམ་བཅུ་རྩ་གཉིས་པོ་འདི་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པར་རིག་པར་བྱའོ། །ཕ་རོལ་ཏུ་ཕྱིན་པ་དང་ཐབས་ལ་མཁས་པ་ལ་འཇུག་པ་ཡོངས་སུ་དག་པའི་ལེའུ་འདི་བསྟན་པ་ན། མི་འམ་ཅིའི་རྒྱལ་པོ་སྡོང་པོའི་འཁོར་དང ། དེ་མ་ཡིན་པ་གཞན་ལྷ་དང ། ཀླུ་དང་གནོད་སྦྱིན་དང ། དྲི་ཟའི་སྲོག་ཆགས་དགུ་ཁྲི་བརྒྱད་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བཅོམ་ལྡན་འདས་ཀྱི་འཁོར་བྱང་ཆུབ་སེམས་དཔའ་ལས་བྱང་ཆུབ་སེམས་དཔའ་ཁྲི་རྒྱད་སྟོང་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །མི་འམ་ཅིའི་རྒྱལ་པོ་སྡོང་པོ་ནི་ཤེས་རབ་སྒྲོན་མ་ཞེས་བྱ་བའི་ཏིང་ངེ་འཛིན་རབ་ཏུ་ཐོབ་པར་གྱུར་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོ་བཅོམ་ལྡན་འདས་ཀྱིས་ཆོས་ཀྱི་གཏམ་གྱིས་རབ་ཏུ་དགའ་བར་བྱས་ཡང་དག་པར་འཛིན་དུ་བཙུད། གཟེངས་བསྟོད། ཡང་དག་པར་བསྟན་པས། ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང ། ཡིད་བདེ་བ་སྐྱེས་ནས། རིན་ཐང་མེད་པའི་རས་བཅོས་མ་ཕྲུགས་གཅིག་བཅོམ་ལྡན་འདས་ལ་མངོན་པར
53.322b
བཀབ་བོ། །བྱང་ཆུབ་སེམས་དཔའི་དགེ་འདུན་དང ། ཉན་ཐོས་ཀྱི་དགེ་འདུན་ཐམས་ཅད་ལ་ཡང་རིན་ཐང་མེད་པའི་གོས་ཀྱིས་སོ་སོར་བཀབ་བོ། །གནས་ཐམས་ཅད་ནི་ཡོངས་སུ་ལོངས་སྤྱད་པའི་ཕྱིར་བཅོམ་ལྡན་འདས་ལ་ཕུལ་ལོ། །དེ་ནས་མི་འམ་ཅིའི་རྒྱལ་པོ་སྡོང་པོའི་བུ་བརྒྱད་སྟོང་པོས་རིན་པོ་ཆེའི་པད་མ་བཀོད་པ་དང ། རིན་པོ་ཆེའི་གདུགས་བརྒྱད་སྟོང་དུ་ཚང་བས་བཅོམ་ལྡན་འདས་ལ་མངོན་པར་བཀབ་སྟེ། གཏོར་མ་ཐག་ཏུ་སངས་རྒྱས་ཀྱི་མཐུས་དེ་དག་ཐམས་ཅད་འཁོར་གྱི་ཁྱམས་དེར་བཅོམ་ལྡན་འདས་ཀྱི་དབུའི་དྲང་ཐད་ཀྱི་སྟེང་གི་བར་སྣང་ལ་དཔག་ཚད་སྟོང་ཙམ་ན། རིན་པོ་ཆེའི་གདུགས་གཅིག་ཏུ་གནས་པར་གྱུར་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོའི་བུ་བརྒྱད་སྟོང་པོས་བཅོམ་ལྡན་འདས་ཀྱི་ཆོ་འཕྲུལ་ཆེན་པོ་འདི་མཐོང་ནས་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡི་བདེ་བ་སྐྱེས་ནས། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་དག་གིས་བྱང་ཆུབ་ཏུ་སེམས་བསྐྱེད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཐོས་པས་བདག་ཅག་བྱང་ཆུབ་ཀྱི་ཕྱོགས་ཀྱི་ཆོས་ཡང་དག་པར་སྒྲུབ་པར་འགྱུར་བ་བྱང་ཆུབ་ཏུ་ཡོངས་སུ་སྨིན་པར་བགྱིད་པའི་ཆོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བདག་ཅག་ལ་བཤད་དུ་གསོལ། དེ་ནས་བཅོམ་ལྡན་འདས་ཀྱི་མི་འམ་ཅིའི་རྒྱལ་པོ་སྡོང་པོའི་བུ་དེ་དག་གི་ལྷག་པའི་བསམ་པ་མཁྱེན་ནས་ཏ་ལ་བདུན་སྲིད་གྱི་སྟེང་གི་བར་སྣང་ལ་སྐྱིལ་མོ་དཀྲུང་བཅས་ཏེ་བཞུག་ནས་སྐུ་ལས་འདི་ལྟ་བུའི་འོད་ཕྱུང་སྟེ། འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་ཆེན་པོས་ཁྱབ་པར་གྱུར་ཏོ། །གང་མི་འམ་ཅི་དང ། དྲི་ཟ་དང་ལྟོ་འཕྱེ་དེ་དག་དང ། འདོད་པ་ན
53.323a
སྤྱོད་པའི་ལྷའི་བུ་དེ་དག་གི་རོལ་མོ་སིལ་སྙན་རྣམ་པ་སྣ་ཚོགས་དེ་དག་ཐམས་ཅད་མ་བརྡུངས་མ་དཀྲོལ་བར་མཛེས་པ་དང་ལྡན་པར་འཁྲོལ་ལོ། །རིའི་རྒྱལ་པོ་སྤོས་ཀྱི་ངད་ལྡང་ན་དྲིའི་ཤིང་དང་མེ་ཏོག་གི་ཤིང་དང་འབྲས་བུའི་ཤིང་ཇི་སྙེད་པ་དེ་དག་ལས་ཀྱང་རོལ་མོ་སིལ་སྙན་གྱི་སྒྲ་བྱུང་ངོ ། །བཅོམ་ལྡན་འདས་ཀྱི་སྤུའི་ཁུང་བུ་ཐམས་ཅད་ནས་ཀྱང་འོད་ཟེར་བྱེ་བ་ཁྲག་ཁྲིག་བརྒྱད་སྟོང་བྱུང་ངོ ། །འོད་ཟེར་ཐམས་ཅད་ཀྱི་རྩེ་མོ་ལས་ཀྱང་པད་མ་ཚད་ཤིང་རྟའི་འཁོར་ལོ་ཙམ་དག་བྱུང་ངོ ། །པད་མའི་སྙིང་པོ་ཐམས་ཅད་ལ་ཡང་བྱང་ཆུབ་སེམས་དཔའི་གཟུགས་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་དུ་རྒྱན་པའི་ལུས་དག་གནས་པར་ཀུན་དུ་སྣང་ངོ ། །སངས་རྒྱས་ཀྱི་མཐུས་རོལ་མོ་སིལ་སྙན་དེ་དག་ལས་ནི་ཡོངསུ་འདྲི་བའི་ཚིགསུ་བཅད་པ་བྱུང ། བྱང་ཆུབ་སེམས་དཔའ་དེ་དག་ཐམས་ཅད་ནི་སྒྲ་དབྱངས་དང་སྐད་གཅིག་གིས་ཚིགས་སུ་བཅད་ནས་ངེས་པར་ལན་འདེབསོ། །དེ་ལ་སིལ་སྙན་ལས་ཚིགསུ་བཅད་པ། བླ་ན་མེད་པའི་བྱང་ཆུབ་སེམས། །ཇི་ལྟ་བུར་ནི་སྐྱེད་པ་དང ། །བྱང་ཆུབ་སྙིང་པོར་འདུག་བར་དུ། །སེམས་ནི་བརྗེད་པ་མེད་པར་འགྱུར། །བྱང་ཆུབ་སེམས་དཔའི་གཟུག་རྣམ་ཀྱིས་སྨྲས་པ། སེམས་ཅན་ཀུན་གྱི་ཆེད་ཀྱི་ཕྱིར། །ལྷག་པའི་བསམ་པ་ཕུན་སུམ་ཚོག ། །སྙིང་རྗེ་ཆེ་དང་ལྡན་པ་ནི། །བྱང་ཆུབ་སེམས་བརྗེད་མི་འགྱུར་རོ། །སིལ་སྙན་རྣམ་ཀྱིས་སྨྲས་པ། དེ་དག་བསམ་པ་ཇི་ལྟ་བུ། །རབ་ཏུ་འབྱོར་པ་ཅི་འདྲ་ཞིག་།དེ་དག་སྙིང་རྗེ་ཆེན་པོ་ལ། །ངེས་པར་སེམས་པ་ཇི་ལྟར་སྐྱེ། །བྱང་ཆུབ་སེམས་དཔའི་གཟུག་རྣམ་ཀྱི་སྨྲས་པ། གཡོ་མེད་ལྷག་པའི་བསམ་པ་སྟེ། །དེ་དག་སྦྱོར་བ་བཅོས་མ་མིན། །མྱ་ངན་འདའ་སྒོར་འཇོག་པ་ནི། །དེ་དག་སྙིང་རྗེ་དེ་འདྲའོ། །སིལ་སྙན་རྣམ་ཀྱི་སྨྲས་པ། དེ་དག་གཏོང་བ་ཇི་ལྟ་བུ། །ཇི་ལྟར་བྱིན་ནས་འགྱོད་མེད་ཅིང ། །རྣམ་སྨིན་དོན་དུ་མི་གཉེར་བར། །བྱང་ཆུབ་ཏུ་ནི་སྔོ་བར་བྱེད། །བྱང་ཆུབ་སེམས
53.323b
དཔའི་གཟུགས་རྣམ་ཀྱིས་སྨྲས་པ། དངོས་པོ་ཀུན་ལ་མི་ལྟ་བ། །དེས་ནི་བྱིན་ནས་འགྱོད་པ་མེད། །བྱང་ཆུབ་ལམ་དུ་འཇོག་བྱེད་པ། །དེ་ཕྱིར་རྣམ་སྨིན་རེ་བ་མེད། །སིལ་སྙན་རྣམ་ཀྱིས་སྨྲས་པ། ཇི་ལྟར་ཚུལ་ཁྲིམས་ལྡན་གྱུར་ཀྱང ། །ཚུལ་ཁྲིམས་ཀྱིས་ནི་རློམ་སེམས་མེད། །ཐེག་ཆེན་བླ་ན་མེད་པ་ལ། །ངང་ཚུལ་ངན་ཅན་སྨིན་པར་བྱེད། །བྱང་ཆུབ་སེམས་དཔའི་གཟུགས་རྣམ་ཀྱིས་སྨྲས་པ། བྱང་ཆུབ་སེམས་ཀྱི་ཚུལ་ཁྲིམས་ལྡན། སྟོང་པ་ཉིད་ཀྱི་རློམ་སེམས་མེད། །བྱམ་པ་ཆེན་པོ་སྐྱེད་པ་ནི། །ངང་ཚུལ་ངན་ཅན་ཡོང་སྨིན་བྱེད། །སིལ་སྙན་རྣམ་ཀྱིས་སྨྲས་པ། ཇི་ལྟར་ན་ནི་སེམས་ཅན་གྱི། །སྤྱོས་ཤིང་སྡིགས་པ་བཟོད་བྱེད་ཅིང ། །སེམས་ཀྱི་གནོད་པ་མི་བྱེད་ལ། །མཆོག་ཏུ་དགའ་བ་སྐྱེ་བར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱི་སྨྲས་པ། བདག་ནི་སེམས་ཅན་ཐམས་ཅད་ཀྱི། །ཉོན་མོངས་གསོ་བའི་སྨན་པ་སྙམ། །དེ་དག་ངན་པར་སྨྲས་པ་ཡི། །ཚིག་ཐོས་ཞེ་སྡང་མི་འགྱུར་རོ། །སིལ་སྙན་རྣམ་ཀྱིས་སྨྲས་པ། དེ་དག་བརྩོན་འགྲུས་ཇི་ལྟ་བུ། །ཕ་རོལ་གནོན་པའང་ཅི་འདྲ་ཞིག་།ཇི་ལྟར་ཞུམ་པ་མེད་སེམས་ཀྱི། །བྱང་ཆུབ་སྤྱད་པ་སྤྱོད་པར་འགྱུར། །བྱང་ཆུབ་སེམས་དཔའི་གཟུགས་རྣམ་ཀྱིས་སྨྲས་པ། ཆོས་དང་སེམས་ཅན་བསྲུང་བ་ནི། །ཕ་རོལ་གནོན་དང་བརྩོན་འགྲུས་སོ། །དགེ་བའི་རྩ་བས་རྟན་པ་ནི། །དེས་ན་སེམས་ནི་ཞུམ་མི་འགྱུར། །སིལ་སྙན་རྣམ་ཀྱི་སྨྲས་པ། དེ་དག་ཇི་ལྟར་དྲན་དང་ལྡན། །བློ་གྲོས་རྟོག་པར་ཁོང་དུ་ཆུད། །ཇི་ལྟར་བསམ་ཏན་བསམ་ཏན་བྱེད། །དེ་ལ་ཆག་པ་མེད་པར་འགྱུར། །བྱང་ཆུབ་སེམས་དཔའི་གཟུགས་རྣམ་ཀྱི་སྨྲས་པ། གཡེང་བ་མེད་པ་དྲན་དང་ལྡན། །ཚུལ་འཆོས་མེད་པ་བློ་གྲོས་ལྡན། །ཐབ་ཀྱིས་བསམ་ཏན་བསམ་ཏན་བྱེད། །དེས་ན་དེ་ལ་ཆག་མི་འགྱུར། །སིལ་སྙན་རྣམ་ཀྱི་སྨྲས་པ་ཇི་ལྟར་ཤེས་རབ་ལྡན་པ་དང ། །ཡང་དག་ལྟ་བ་དྲང་པོ་དང ། །ཆོས་རྣམ་རྣམས་པར་དབྱེ་བ་ལ། །མཁས་ཤིང་འཇིག་པ་མེད་པར་འགྱུར། །
53.324a
བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ཐོས་པས་ཤེས་རབ་ཀུན་དུ་འཕེལ། །རྟེན་པས་ལྟ་བ་དྲང་པོར་འགྱུར། །ཆོས་ཀྱིས་སྦྱིན་པས་ངེས་འགྱུར་ཏེ། །ཚུལ་བཞིན་གྱིས་ནི་དོན་རྟོགས་འགྱུར། །སིལ་སྙན་རྣམས་ཀྱིས་སྨྲས་པ། ཇི་ལྟར་ཐོས་པ་ཙལ་བས་ན། །དེ་དག་ཐོས་པ་མང་དུ་འགྱུར། །གང་གིས་ཆེ་བའི་བདག་འགྱུར་བར། །ཐོས་པའི་ཆོས་རྣམས་སྟོན་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། གུས་པར་བྱས་ཏེ་ཐོས་ཚོལ་ཞིང ། །སྒྲུབ་པའི་ཐོས་པ་མང་དུ་འགྱུར། །ཟང་ཟིང་མེད་པར་ཆོས་སྦྱིན་པ། །དེས་ནི་ཆེ་བའི་བདག་ཉིད་འགྱུར། །སིལ་སྙན་རྣམས་ཀྱིས་སྨྲས་པ། དེ་དག་བྱམས་པ་ཇི་ལྟ་བུ། །དེ་དག་སྙིང་རྗེ་ཅི་འདྲ་ཞིག་།དེ་དག་དགའ་བ་ཇི་ལྟ་བུ། །བཏང་སྙོམས་ཀྱང་ནི་ཅི་འདྲ་ཞིག་།བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། སེམས་དང་བསམ་སྙོམས་བྱམས་པ་ཞིག་།སེམས་ཅན་འགྲོལ་བ་སྙིང་རྗེའོ། །སངས་རྒྱས་ཆོས་དགའ་དགའ་བ་སྟེ། །གཉིས་སྤངས་པ་ནི་བཏང་སྙོམས་སོ། །སིལ་སྙན་རྣམས་ཀྱིས་སྨྲས་པ། ཇི་ལྟར་སངས་རྒྱས་མཐོང་བར་འགྱུར། །སེམས་ཀྱང་ཇི་ལྟར་མཐོང་བར་འགྱུར། །ཆོས་ཐོས་ནས་ནི་ཇི་ལྟ་བུར། །དེ་དག་ཐེ་ཙོམ་སྐྱེ་མི་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། སངས་རྒྱས་རྗེས་སུ་དྲན་བསྒོམས་པ། །དེས་ནི་འདྲེན་པ་མཐོང་བར་འགྱུར། ཐེ་ཙོམ་མེད་ཅིང་བསམ་དག་པས། །ཆོས་ཐོས་ནས་ནི་སོམ་ཉི་མེད། །སིལ་སྙན་རྣམས་ཀྱིས་སྨྲས་པ། བསོད་ནམས་ཚོགས་ནི་ཇི་ལྟ་བུ། །ཡེ་ཤེས་ཚོགས་ཀྱང་ཅི་འདྲ་ཞིག་།དེ་དག་ཞི་གནས་ལྷག་མཐོང་ལ། །བརྩོན་པ་ཡང་ནི་ཇི་ལྟ་བུ། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ངོམས་མི་ཤེས་པ་བསོད་ནམས་ཚོགས། །འདྲི་བ་རྣམས་ནི་ཡེ་ཤེས་ཚོགས། །ཞི་བའི་སེམས་ནི་ཞི་གནས་ཏེ། །ཆོས་ཤེས་པ་ནི་ལྷག་མཐོང་ངོ ། །སིལ་སྙན་རྣམས་ཀྱིས་སྨྲས་པ། དེ་དག་གི་ནི་སྤྱོད་ཡུལ་གང ། །དེ་དག་གནས་ཀྱང་ཇི་ལྟ་བུ། །དེ་དག་གནས་པ་ཅི་འདྲ་ཞིག་།དེ་དག་སྦྱོར་བའང་ཇི་ལྟ་བུ། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། དེ་དག་སྤྱོད་ཡུལ་སྟོང་པ་ཉིད། །གནས་ནི་ཕ་རོལ་ཕྱིན་པའི་ལམ། །གནས་པ་བསམ་གཏན་བཞི་རྣམས་ཏེ། །སེམས་ཅན་རབ་གྲོལ་སྦྱོར་བའོ། །སིལ་སྙན་རྣམས་ཀྱིས
53.324b
སྨྲས་པ། དེ་དག་བདུད་ཀྱི་ལས་གང་ཡིན། །སངས་རྒྱས་ཕྲིན་ལས་ཇི་ལྟ་བུ། །ཅི་འདྲ་བའི་ལས་བྱས་ན། །བྱང་ཆུབ་ལ་ནི་གཞོལ་བར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ཐེག་པ་ཆུང་ངུ་བདུད་ཀྱི་ལས། །སངས་རྒྱས་ཕྲིན་ལས་ཐེག་པ་ཆེ། །སྡིག་པ་ཐམས་ཅད་སྤོང་བ་ནི། །བྱང་ཆུབ་གཞོལ་བར་འགྱུར་བའོ། །སིལ་སྙན་རྣམས་ཀྱིས་སྨྲས་པ། དེ་དག་གྲོགས་བསྟེན་ཇི་ལྟ་བུ། །སྡིག་པའི་གྲོགས་པོ་ཅི་འདྲ་ཞིག་།ལོག་པར་ལྟ་ལ་མི་གནས་ཤིང ། །ཇི་ལྟར་ཡང་དག་སོང་བར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། གང་ཞིག་བྱང་ཆུབ་ལམ་སྟོན་པ། །རྟག་ཏུ་བདེ་སྦྱིན་གྲོགས་པོའོ། །བྱང་ཆུབ་སེམས་ལས་གང་ཟློག་པ། །དེ་དག་སྡིག་པའི་གྲོགས་པོ་ཤེས། །སིལ་སྙན་རྣམས་ཀྱིས་སྨྲས་པ། །ལམ་དུ་འཇུག་པར་འགྱུར་བའི། །ལྟ་བ་དྲང་པོ་ཇི་ལྟ་བུ། །སྦྱོར་བ་རྣམ་པར་ཤེས་ནས་སུ། །ཇི་ལྟར་ལྟ་དེ་འཇིག་མི་བྱེད། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ལས་དང་བྱ་བར་འཇུག་པ་ནི། །དེ་དག་དྲང་པོར་ལྟ་བ་ཡིན། །ལོག་པར་སྦྱོར་བ་རྣམ་ཤེས་ནས། །ལྟ་བ་དེ་དག་འཇིག་མི་བྱེད། །སིལ་སྙན་རྣམས་ཀྱིས་སྨྲས་པ། ཇི་ལྟར་དམ་པའི་ཆོས་བསྲུང་ཞིང ། །སེམས་ཅན་ཡོངས་སུ་སྨིན་པར་བྱེད། །ཇི་ལྟ་བུའི་ཐབས་ཀྱིས་ནི། །དེ་དག་བྱང་ཆུབ་བསྒྲུབ་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། བརྩོན་འགྲུས་ཀྱི་ནི་ཆོས་བསྲུང་སྟེ། བསྡུ་བས་ཡོངས་སུ་སྨིན་པར་བྱེད། །མཐའ་གཉིས་རྣམ་པར་སྤངས་པས་ནི། །བྱང་ཆུབ་སྒྲུབ་པར་བྱེད་པ་ཡིན། །སིལ་སྙན་རྣམས་ཀྱིས་སྨྲས་པ། དེ་དག་ཤེས་པའི་ལམ་ཅི་འདྲ། །ང་རྒྱལ་ལས་ནི་ཇི་ལྟ་བུ། །ཇི་ལྟར་བཀའ་བློ་བདེ་བ་དང ། །ཐམས་ཅད་དུས་སུ་འཐུན་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། རྩོད་པ་མེད་པ་ཤེས་པའི་ལས། །ང་རྒྱལ་ལས་ནི་རྩོད་པ་འབྱུང ། །ངེས་པར་བཀའ་བློ་བདེ་བ་སྟེ། །གུས་པ་ཡིས་ནི་འཐུན་པར་འགྱུར། །སིལ་སྙན་རྣམས་ཀྱིས་སྨྲས་པ། དེ་དག་ལམ་ནི་ཇི་ལྟ་བུ། །ལོག་པའི་ལམ་ཡང་ཅི་འདྲ་ཞིག་།བླ་མེད་བྱང་ཆུབ་ལམ་དུ་ནི། །ཇི་ལྟར་སེམས་ཅན་རབ་ཏུ་འགོད། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ལམ་ནི་ཕ་རོལ་ཕྱིན་པ་དྲུག་།ཐེག་པ་ཆུང་ངུ་ལོག་པའི་ལམ། །ཤེས་རབ་ཐབས་ལ་བསླབས་པ་ནི། །སེམས་ཅན་ལམ་ལ་འཛུད་པའོ། །སིལ་སྙན་རྣམས་ཀྱིས་སྨྲས་པ། ཇི་ལྟ་བུར་ན་ནོར་ཆེན་འགྱུར། །
53.325a
དེ་དག་རྙེད་པ་འང་ཅི་ཞིག་།གཏེར་རྣམས་ཀྱང་ནི་ཇི་ལྟ་བུ། །གང་གིས་དེ་དག་འགྲོ་ཚིམ་བྱེད། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ནོར་བདུན་དང་ནི་རྟག་ཏུ་ལྡན། །ཆོས་རྙེད་པ་ནི་རྙེད་པའོ། །དེ་དག་གཏེར་ནི་གཟུངས་ཡིན་ཏེ། རབ་ཏུ་རྙེད་ནས་ཚིམ་པར་བྱེད། །སིལ་སྙན་རྣམས་ཀྱིས་སྨྲས་པ། དེ་དག་གི་ནི་ཕ་མ་གང ། །ཉེ་དུའི་ཚོགས་ནི་ཇི་ལྟ་བུ། །གཡོག་རྣམས་ཀྱང་ནི་ཅི་འདྲ་ཞིག་།གང་གིས་མཁས་པ་དེ་དག་མཛེས། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། མ་ནི་ཤེས་རབ་ཕ་ནི་ཐབས། །ཉེ་དུ་བྱང་ཆུབ་ཕྱོགས་རྣམས་ཡིན། །དགེ་བ་རྣམས་ནི་གཡོག་ཡིན་ཏེ། །དེས་ནི་མཁས་པ་དེ་དག་མཛེས། །སིལ་སྙན་རྣམས་ཀྱིས་སྨྲས་པ། ཇི་ལྟར་བདག་མེད་རྟོགས་ནས་ནི། །བྱམས་པས་འགྲོ་བ་ཁྱབ་པར་བྱེད། །བདག་མེད་པ་དང་བྱམས་པ་དག་།དེ་ལ་ཇི་ལྟར་མཚུངས་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། གང་དག་སྟོང་ཉིད་རབ་ཤེས་པ། །དེ་ནི་བདག་མེད་ཁོང་དུ་ཆུད། །གང་གིས་འགྲོ་བ་སྟོང་ཤེས་པ། །དེ་ནི་དེ་ཡི་བྱམས་པ་མཆོག་།སིལ་སྙན་རྣམས་ཀྱིས་སྨྲས་པ། འདུ་བྱེད་རྣམས་ནི་རང་བཞིན་གྱིས། །འོང་བ་མེད་ཅིང་འགྲོ་མེད་ན། །ལས་དང་ལས་ཀྱི་རྣམ་པར་སྨིན། །ཇི་ལྟ་བུར་ན་འཐད་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། དམ་པའི་དོན་དུ་འོང་མེད་དེ། །གང་དུའང་འགྲོ་བ་ཡོད་མ་ཡིན། །ཀུན་རྫོབ་ཏུ་ན་ལམ་འཇུག་ཅིང ། །རྣམ་པར་སྨིན་པ་ཉེ་བར་སྟོན། །སིལ་སྙན་རྣམས་ཀྱིས་སྨྲས་པ། སྟོང་ཉིད་མཚན་མ་མེད་པ་དང ། །སྨོན་ལམ་རྣམ་པར་སྤངས་པར་ནི། །མཚན་ཉིད་གཅིག་ཏུ་རབ་རྟོགས་ནས། །དེ་ཁོ་ན་ནི་ཇི་ལྟར་ཤེས། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། སྟོང་ཉིད་གང་ཡིན་དེ་མཚན
53.325b
མེད། །མཚན་མ་དོན་དུ་གཉེར་མེད་པ། །མཚན་ཉིད་གཅིག་ཅིང་དོན་གཅིག་སྟེ། །རྣམ་པར་ཐར་པའི་སྒོ་བསྟན་ཏོ། །སིལ་སྙན་རྣམས་ཀྱིས་སྨྲས་པ། གང་གིས་མྱ་ངན་འདས་འགྲོ་བའི། །སྟོང་པར་རྟོག་པ་ཇི་ལྟ་བུ། །སེམས་ཅན་ལྟ་བ་ཇི་ལྟ་བུ། །ཡོངས་སུ་སྨིན་བྱེད་ཇི་ལྟ་བུ། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ཤེས་རབ་ཀྱིས་ནི་སྟོང་པར་རྟོགས། །ཐབས་ཀྱིས་སེམས་ཅན་རྣམས་ལ་ལྟ། །སྙིང་རྗེས་ཡོངས་སུ་སྨིན་པར་བྱེད། །དེས་ནི་མྱ་ངན་འདས་པར་འགྲོ། །སིལ་སྙན་རྣམས་ཀྱིས་སྨྲས་པ། ཆོས་འདི་དག་ནི་ཆོས་ཉིད་ཀྱིས། །སྐྱེ་བ་མེད་ཅིང་འབྱུང་མེད་པར། །ཚུལ་མཆོག་འདི་འདྲ་ཤེས་ནས་ནི། །གང་གིས་འཁོར་བར་སྐྱེ་བར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། མི་སྐྱེ་བ་དང་མི་འགྱུར་བ། །དེ་ནི་ཤེས་རབ་སྤྱོད་ཡུལ་ལོ། །བསམས་བཞིན་དུ་ནི་གང་སྐྱེ་བ། །དེ་ནི་ཐབས་ཀྱི་ཚུལ་ཡིན་ནོ། །སིལ་སྙན་རྣམས་ཀྱིས་སྨྲས་པ། གཏོང་ལ་དགའ་བར་ཇི་ལྟར་འགྱུར། །ཇི་ལྟ་བུར་ནི་ཕྱིར་མི་ལྡོག་།ཇི་ལྟར་བཟོད་པ་ཕུན་སུམ་ཚོགས། །ཇི་ལྟར་རྣམ་པར་ངེས་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། མཉམ་པར་གནས་པར་གཏོང་ལ་དགའ། །ཆོས་ཀྱི་དབྱིངས་ལས་ཕྱིར་མི་ལྡོག་།མི་སྐྱེ་བ་ལ་བཟོད་པ་སྟེ། །ཆོས་ཤེས་ནས་ནི་རྣམ་པར་ངེས། །སིལ་སྙན་རྣམས་ཀྱིས་སྨྲས་པ། བྱང་ཆུབ་སྙིང་པོ་སྙིང་པོ་གང ། །རྫོགས་པའི་བྱང་ཆུབ་མཚན་ཉིད་གང ། །ཅི་ཕྱིར་རྫོགས་སངས་རྒྱས་ཤེས་བྱ། །དེ་བཞིན་གཤེགས་པ་ཇི་ལྟར་གྲོལ། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། བྱང་ཆུབ་སྙིང་པོ་ནམ་མཁའ་སྟེ། །བྱང་ཆུབ་ནམ་མཁའི་མཚན་ཉིད་དོ། །གང་ཡང་ཀུན་ནས་གཏི་མུག་མེད། །དེ་བཞིན་ཉིད་ཕྱིར་དེ་བཞིན་གཤེགས། །དེ་ནས་མི་འམ་ཅིའི་རྒྱལ་པོའི
53.326a
བུ་དེ་དག་གིས་ཚིགས་སུ་བཅད་པ་འདི་དག་ཐོས་ནས་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་བོ། །དེ་དག་གིས་བཟོད་པ་རབ་ཏུ་ཐོབ་ནས་རང་རང་གི་གོས་དང་རྒྱན་བཅོམ་ལྡན་འདས་ལ་མངོན་པར་བཀབ་སྟེ། འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས་གང་གི་སླད་དུ་བདག་ཅག་གིས་ཉན་པའི་རྣ་བ་འདི་ལྟ་བུ་ཐོབ་པས་སངས་རྒྱས་ནི་བདག་ཅག་གི་ཆེད་དུ་བྱུང་ངོ ། །བཅོམ་ལྡན་འདས་སིལ་སྙན་དང་གླུ་དབྱངས་འདི་དག་ལས་ཐེ་ཙོམ་འདྲི་བའི་སྒྲ་འདི་ལྟ་བུ་བྱུང་བ་དང ། བྱང་ཆུབ་སེམས་དཔའི་གཟུགས་འདི་དག་གིས་དྲིས་པ་དེ་དག་ཐམས་ཅད་ཀྱི་ལན་བཏབ་པས་འཁོར་འདིའི་དོགས་པ་ཐམས་ཅད་སྤངས་པ་དང ། བདག་ཅག་ཀྱང་ཆོས་ཀྱི་སྣང་བ་དཔག་ཏུ་མ་མཆིས་པ་སྐྱེས་པ་ངོ་མཚར་ཏོ། །བཅོམ་ལྡན་འདས་སིལ་སྙན་དེ་དག་ལས་སྒྲ་འདི་ལྟ་བུ་བྱུང་བའི་རྒྱུ་ཅི་ལགས། སུའི་བྱིན་གྱི་བརླབས་ཀྱིས་ན་བྱང་ཆུབ་སེམས་དཔའི་གཟུགས་འདི་དག་གིས་ལན་འདེབས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། བཞིན་བཟངས་དག་དེ་དག་ཐམས་ཅད་ནི་སངས་རྒྱས་ཀྱི་བྱིན་གྱི་བརླབས་སུ་བལྟའོ། །བཞིན་བཟངས་དག་དེ་བཞིན་པ། གཤེགས་པའི་བྱིན་གྱི་བརླབས་ཀྱིས། ནམ་མཁའ་ལས་ཀྱང་ཆོས་ཀྱི་སྒྲ་འདི་ལྟ་བུ་བྱུང་ན་སིལ་སྙན་ལས་ཆོས་ཀྱི་སྒྲ་ཅི་ཕྱིར་མི་འབྱུང་སྟེ། བཞིན་བཟངས་དག་དེ་ལྟར་དེ་བཞིན་གཤེགས་པའི་བྱིན་གྱི་བརླབས་ནི་བསམ་གྱིས་མི་ཁྱབ་བོ། །མི་འམ་ཅིའི་རྒྱལ་པོའི་བུ་དེ་དག་གིས་གསོལ་པ། བཅོམ་ལྡན་འདས་སེམས་ཅན་ཐམས་ཅད་ཀྱིས་སངས་རྒྱས་ཀྱི་བྱིན་གྱི་བརླབས་བསམ་གྱིས་མི་ཁྱབ་པ་ཐོབ་པར་གྱུར་ཅིག་།བམ་པོ་བཞི་པ། དེ་ནས་མི་འམ་ཅིའི་རྒྱལ་པོ་སྡོང་པོའི་སླས་མི་འམ་ཅི་མོ་བརྒྱད་ཁྲི་བཞི་སྟོང་མུ་ཏིག་ཁ་དོག་སྣ་ཚོགས་ཀྱི་དོ་ཤལ་ཐོགས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང ། བཅོམ
53.326b
ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཇི་ལྟར་ཐོགས་པའི་མུ་ཏིག་གི་དོ་ཤལ་དེ་དག་གིས་བཅོམ་ལྡན་འདས་ལ་མངོན་པར་བཀབ་བོ། །མུ་ཏིག་གི་དོ་ཤལ་དེ་དག་ཕུལ་མ་ཐག་ཏུ་སངས་རྒྱས་ཀྱི་མཐུས་དེ་དག་བཅོམ་ལྡན་འདས་ཀྱི་དབུ་གཙུག་གི་དྲང་ཐད་ཀྱི་སྟེང་གི་བར་སྣང་ལ་མུ་ཏིག་གི་དོ་ཤལ་གྱི་ཁང་པ་བརྩེགས་པ་བརྒྱད་ཁྲི་བཞི་སྟོང་དུ་གྱུར་ཏེ། ཁང་པ་བརྩེགས་པ་དེ་དག་ཐམས་ཅད་ཀྱང་གྲུ་བཞི་ལྷམ་པ། ཀ་བ་བཞི་ཟུག་པ། ཆ་མཉམ་པ། ངོས་ཤིན་དུ་རྣམ་པར་ཕྱེ་བ་ཤ་སྟག་གོ། །ཁང་པ་བརྩེགས་པ་དེ་དག་ནི་རིན་པོ་ཆེས་སྤྲས་པའི་ཁྲི་རྩ་བ་ཡང་རིན་པོ་ཆེ་ལས་བྱས་པ། ལྷའི་རས་བཅོས་མའི་ཟུང་དུ་མ་བཀྲམ་པ་དག་བྱུང་བར་གྱུར་ཏོ། །ཁྲི་དེ་དག་ཐམས་ཅད་ལ་ཡང་དེ་བཞིན་གཤེགས་པའི་སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ་དག་བཞུགས་པར་ཀུན་དུ་སྣང་ངོ ། །དེ་ནས་མི་འམ་ཅིའི་མོ་བརྒྱད་ཁྲི་བཞི་སྟོང་གིས་བཅོམ་ལྡན་འདས་ཀྱི་ཆོ་འཕྲུལ་འདི་ལྟ་བུ་འདི་མཐོང་ནས། ཚིམ་ཞིང་མགུ་སྟེ་ཡིད་རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་དག་བྱང་ཆུབ་ཏུ་སེམས་བསྐྱེད་ནས་དགའ་ཞིང་མཆོག་ཏུ་དགའ་སྟེ་དད་པ་ཐོབ་ནས། ཐམས་ཅད་ཀྱིས་སྒྲ་སྐད་དང་དབྱངས་གཅིག་ཏུ་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །བླ་ན་མེད་པའི་དགྲ་བཅོམ་མཆོག་གསུང་བ། །དོན་དགོངས་མཚུངས་པ་མ་མཆིས་བསམ་མི་ཁྱབ། །དོན་དང་ཆོས་དང་འདུལ་བ་རབ་བསླབས་པ། །སེམས་ཅན་མཆོག་ལ་མགོ་བོས་ཕྱག་འཚལ་ལོ། །འདོད་ཆགས་ཞེ་སྡང་གཏི་མུག་ཐ་བ་འཇིག་།དགོན་པར་བཞུགས་དགྱེས་བསྙེངས་པ་མི་མངའ་བ། །རིན་ཆེན་མཛོད་དང་རིན་ཆེན་སྟོན་པ་པོ། །
53.327a
བཅོམ་ལྡན་རྒྱལ་པོའི་རྒྱལ་ལ་ཕྱག་འཚལ་ལོ། །སྤྱན་སྔར་དྲི་བྲལ་ཉོན་མོངས་མི་མངའ་བ། །སའི་དབང་པོ་ཕ་རོལ་དགྲ་འཇོམ་པ། །པད་མོ་ལྟ་བུར་སྲིད་གསུམ་མི་གོས་པ། །བདེ་གཤེགས་མཆོག་བརྙེས་ཁྱོད་ལ་ཕྱག་འཚལ་ལོ། །འགྲོ་བའི་ནང་ན་མིག་དང་འདྲར་སྤྱོད་ཅིང ། །ཉི་ཟླ་འདིའི་འོད་ནི་སྤ་བཀོང་བ། །འཁོར་ལོས་སྒྱུར་བའི་རིགས་སུ་རྒྱལ་པོར་སྐྱེས། །འཁོར་ལོ་མཚན་མངའ་ཁྱོད་ལ་ཕྱག་འཚལ་ལོ། །མིང་དང་གཟུགས་ལ་ནམ་ཡང་མི་ཆགས་ཤིང ། །མགོན་དང་དཔུང་དང་སྐྱབས་དང་དཔུང་གཉེན་གྱུར། །ཁྱོད་དང་མཚུངས་མེད་ལྷག་པ་ག་ལ་ཞིག་།མཐའ་ཡས་དབྱངས་ལ་མགོ་བོས་ཕྱག་འཚལ་ལོ། །བརྙེས་དང་མ་བརྙེས་ནམ་ཡང་ཆགས་མི་མངའ། །འཇིག་རྟེན་ཆོས་རྣམས་ཟིལ་གྱིས་མནན་ཏེ་བཞུགས། །ཆགས་སྲེད་འཁྲི་ཤིང་དྲ་བ་གྲོལ་མཛད་པ། །བཅོམ་ལྡན་འཇིག་རྟེན་མགོན་ལ་ཕྱག་འཚལ་ལོ། །དུལ་བ་ཐུགས་ནི་རྟག་ཏུ་མཉམ་པར་གཞག་།ཉོན་མོངས་བསྲེགས་ཏེ་སྟོབས་བཅུས་རབ་བཞུགས་ཤིང ། །འགྲོ་ལ་ཟང་ཟིང་མི་མངའ་སྦྱིན་སྩོལ་པ། །སྦྱིན་པའི་གནས་ལ་མགོ་བོས་ཕྱག་འཚལ་ལོ། །སྨྲ་མཆོག་དམ་པ་མཚན་གྱི་འོད་འཕྲོས་པ། །ལམ་ལོག་ཕྱིན་ཅི་ལོག་ནི་རྣམ་པར་སྤངས། །འཇམ་ཞིང་སྣུམ་ལ་སྙན་པའི་གསུང་གསུང་པ། །སྲིད་པ་གསུམ་ལས་འཕགས་ལ་ཕྱག་འཚལ་ལོ། །མི་མཆོག་གདུང་བས་གདུངས་པ་མི་མངའ་བ། །རྫུ་འཕྲུལ་གྱིས་ནི་བྱེ་བའི་ཞིང་དུ་གཤེགས། །འགྲོ་བ་རབ་ཏུ་སྒྲོལ་བའི་གྲུ་མཛད་པ། །བཅོམ་ལྡན་བྲན་འདྲ་ཁྱོད་ལ་ཕྱག་འཚལ་ལོ། །བཅོམ་ལྡན་བརྩོན་འགྲུས་དག་ལ་སྟོན་མཛད་པ། །ཆགས་ཤིང་ཞེན་པའི་འགྲོ་དང་མངོན་ཤེས་དྲུག་།ལྡན་ཞིང་མཁས་པའི་ཉན་ཐོས་རྣམས་ཀྱང་འགྲེལ། །འགྲོ་དྲུག་ཉེ་གཤེགས་ཁྱོད་ལ་ཕྱག་འཚལ་ལོ། །གསེར་གྱི་ཁ་དོག
53.327b
འདྲ་ལ་ཕྱག་འཚལ་ལོ། །ཞི་གནས་དབང་པོ་དུལ་ལ་ཕྱག་འཚལ་ལོ། །སྟོན་ཀྱི་ཟླ་འདྲའི་ཞལ་ལ་ཕྱག་འཚལ་ལོ། །མི་མཆོག་ཡོན་ཏན་མངའ་ལ་ཕྱག་འཚལ་ལོ། །ཉོན་མོངས་བསྲེགས་ཤིང་བསྙེངས་པ་མི་མངའ་བ། །སྐྱེ་དགུ་འདི་དག་བསྒྲལ་དཀའ་ཆུ་བཞི་སྒྲོལ། །བསྒོམས་ཤིང་དབང་པོ་ཐུལ་བའི་བཅོམ་ལྡན་འདས། །ཁྱོད་ལ་སྐྱབས་སུ་མཆི་བར་མཆིད་ཀྱིས་འཚལ། །ཐུབ་པས་སྦྱིན་པ་བསམ་གྱིས་མི་ཁྱབ་སྩལ། །བསླངས་ན་དབང་པོ་དགྱེས་པར་རབ་འགྱུར་བ། །ཕ་རོལ་དག་ལ་སྦྱིན་པ་མཆོག་སྩོལ་བ། །གཏོང་དཔའ་བཅོམ་ལྡན་ཁྱོད་ལ་ཕྱག་འཚལ་ལོ། །སེམས་ཅན་ང་རྒྱལ་རྒྱགས་ཁེངས་གཏི་མུག་པ། །རྒྱུ་དང་རྐྱེན་དང་བྱ་བ་འགལ་བགྱིད་རྣམས། །འཕགས་པ་བླ་ན་མེད་པའི་ལམ་མཆོག་ལ། །རྣམ་པར་འདྲེན་པ་ཆེན་པོ་ཁྱོད་ཀྱིས་བཀོད། །ཕུང་པོ་རང་བཞིན་གྱིས་ནི་སྟོང་མཁྱེན་ནས། །ལས་དང་ཉོན་མོངས་ཟིལ་གྱིས་མནན་ཏེ་བཞུགས། །འདྲེན་པ་འགྲོ་བ་རྣམས་ཀྱི་སོམ་ཉི་གཅོད། །བཅོམ་ལྡན་དུས་གསུང་ཁྱོད་ལ་ཕྱག་འཚལ་ལོ། །བདེན་པའི་ཆོས་ལ་དགྱེས་ཤིང་མཉམ་པར་བཞག་།ཆོས་རྣམས་ཀུན་ལ་མངའ་དབང་ཕ་རོལ་ཕྱིན། །བླ་ན་མེད་པ་ཁ་ལོ་སྒྱུར་བ་མཆོག་།བཅོམ་ལྡན་དེད་དཔོན་ཁྱོད་ལ་ཕྱག་འཚལ་ལོ། །འཆོས་པ་མི་མངའ་གཡོ་སྒྱུ་རྣམས་དང་བྲལ། །བདུད་ཀྱི་སྡེ་རྣམས་འཇོམ་པའི་སྟོབས་པོ་ཆེ། །མི་མཆོག་ལམ་དང་ལམ་མ་ལགས་ལ་མཁས། །རླུང་དམར་ལྟ་བུར་ཅི་ལའང་ཆགས་མི་མངའ། །གཟིར་བར་གྱུར་གསལ་ཕ་རོལ་ཤིན་དུ་གནས། །ཐུབ་པ་བས་མ་འཚལ་བའི་བང་མཛོད་མངའ། །སྤྱད་པ་སྤྱོད་པའི་ཚེ་ན་གང་གཱ་ཡི། །བྱེ་མ་སྙེད་ཀྱི་མི་མཆོག་རྣམས་ལ་མཆོད། །མཐུ་བརྙེས་མི་གཡོ་བསམ་གྱིས་མི་ཁྱབ་པ། །ཆགས་པའི་སྐྱོན་མི་མངའ་ཞིང་ཐང་ལ་བཞུགས། །གནས་ན་བཞུགས་པའི་རྒྱལ་བ་རྣམས་ཀྱིས
53.328a
བརྟེན། །དེ་སླད་མི་རྣམས་མཆོག་ལ་ཕྱག་འཚལ་ལོ། །སྐྱེ་དང་ན་དང་རྒ་ཤི་རྣམ་པར་སྤངས། །ཚེ་རབས་བྱེ་བ་བསམ་མི་ཁྱབ་པ་དགོངས། །བཅོམ་ལྡན་འདས་ཀྱི་མཁྱེན་པའི་གདུགས་འོད་ཀྱིས། །འཇིགས་པ་ཆེན་པོའི་དྲ་བ་རབ་ཏུ་འདལ། །འདྲེན་པ་རྨི་འདྲར་ཆོས་རྣམས་ཐུགས་སུ་ཆུད། །ཕྱག་དང་ཞབས་ལ་བཀྲ་ཤིས་མཚན་མངའ་ཞིང ། །བཀྲ་ཤིས་བགྱིད་ལས་འཇམ་པའི་ངན་སློང་བ། །བཅོམ་ལྡན་བཀྲ་ཤིས་མཛད་ལ་ཕྱག་འཚལ་ལོ། །གཟུངས་རྣམས་ལ་ནི་དབང་གི་ཕ་རོལ་ཕྱིན། །ཟང་ཟིང་མི་མངའ་ཆོས་ཀྱི་སྦྱིན་པ་སྩོལ། །ཐུབ་པ་ཆོས་ཀྱི་རྔ་ནི་རབ་བརྡུངས་པ། །ཆོས་རྗེ་བཅོམ་ལྡན་ཁྱོད་ལ་ཕྱག་འཚལ་ལོ། །ཤཱཀྱའི་རིགས་དུས་རྒྱལ་པོའི་ལས་བྱུང་བ། །དབང་པོ་ཞི་ཞིང་ཐུགས་ཀྱང་རབ་ཏུ་ཞི། །སྟོན་པ་སྲིད་གསུམ་འཇིག་རྟེན་རྣམ་གཟིགས་པ། །བདེ་གཤེགས་ཞི་ཐུགས་ཁྱོད་ལ་ཕྱག་འཚལ་ལོ། །བདུད་རྣམས་དཔུང་དང་བཅས་པས་རྣོ་བ་ཡི། །རལ་གྲི་ཐོགས་ནས་བྱང་ཆུབ་དྲུང་ལྷགས་ཀྱང ། །ཁྱོད་ཀྱི་བ་སྤུ་ཙམ་ཡང་མ་གཡོས་ཏེ། །བཅོམ་ལྡན་རི་རབ་མཚུངས་ལ་ཕྱག་འཚལ་ལོ། །མི་ཡི་དམ་པ་བཟོད་པའི་ཕ་རོལ་ཕྱིན། །སྐུ་རྣམས་ཀུན་ལ་ནོངས་པ་བགྱིས་ཀྱང་བཟོད། །ཡང་འབྱུང་བ་དང་སྐྱེ་དང་འཆི་བས་དཔའ། །བཟོད་གསུང་བཅོམ་ལྡན་ཁྱོད་ལ་ཕྱག་འཚལ་ལོ། །མཐུ་བརྙེས་བདེ་བར་གཤེགས་པ་མི་གཡོ་བ། །གནས་དང་གནས་མིན་མཁས་པ་བསྙེངས་མི་མངའ། །ཁྱོད་ཀྱིས་སེམས་ཅན་མང་པོ་བྱང་ཆུབ་བཀོད། །ཆོས་གནས་རྒྱལ་བ་ཁྱོད་ལ་ཕྱག་འཚལ་ལོ། །འདུས་བགྱིས་ཉམ་ཆུང་སྙིང་པོ་མེད་པར་མཁྱེན། །སྐྱེ་བའི་ཚོགས་ནི་ཉུང་བ་མ་ལགས་སེལ། །ཁྱོད་ཀྱི་མཁྱེན་པ་སྲིད་གསུམ་ཁྱད་པར་འཕགས། །ཡེ་ཤེས་ཕ་རོལ་ཕྱིན་ལ་ཕྱག་འཚལ་ལོ། །སེམས་ཅན་ལོང་བ་སྡུག་བསྔལ་མགོན་མེད་པ། །དེ་དག་ཁྱོད་ཀྱིས
53.328b
དཀོན་མཆོག་གསུམ་ཚིམ་བགྱིས། །ཁྱོད་ནི་བདུད་དཔུང་བཅས་པ་སྐྲག་མཛད་པ། །བཅོམ་ལྡན་མགོན་གྱུར་ཁྱོད་ལ་ཕྱག་འཚལ་ལོ། །སྟོབས་དང་བསམ་གཏན་དང་ནི་དབང་པོ་བསྒོམས། །ཁྱོད་ཀྱིས་བདུད་ནི་དཔུང་དང་བཅས་པ་བཅོམ། །སྲིད་པ་རྣམས་ཀྱི་ནང་ན་མཆོག་གྱུར་པ། །ཐུབ་པ་དབང་པོ་བསྒོམས་ལ་ཕྱག་འཚལ་ལོ། །དད་པའི་རྩ་བ་རྒྱ་ཆེན་ཆོས་བསྟན་པ། །མཚུངས་མེད་བྱང་ཆུབ་ལ་ནི་ཆགས་མི་མངའ། །གྲིབ་མ་ལྟ་བུར་མཁྱེན་ནས་བདེ་གསུངས་པ། །བཅོམ་ལྡན་གདུགས་འདྲ་ཁྱོད་ལ་ཕྱག་འཚལ་ལོ། །འདྲེན་པ་རྨི་འདྲར་ཆོས་རྣམས་ཐུགས་སུ་ཆུད། །འཕགས་པའི་འཁོར་ལོ་རྨི་འདྲ་རབ་ཏུ་བསྐོར། །འདུས་བགྱིས་ཡང་དག་དུ་ནི་རྨི་ལམ་འདྲར། །མཁྱེན་ནས་སེམས་ཅན་མང་པོ་དྲན་པར་མཛད། །ཁྱོད་ཀྱི་ལྗགས་མཆོག་དག་པ་དྲི་མི་མངའ། །ལྗགས་ཀྱིས་རང་གི་ཞལ་གྱི་དཀྱིལ་འཁོར་ཁེབས། །ལྗགས་ནི་པད་མ་མདབ་མ་བརྒྱ་ལྟ་བུ། །ལྗགས་སྐྱོན་མི་མངའ་ཁྱོད་ལ་ཕྱག་འཚལ་ལོ། །སྲིད་གསུམ་ཀུན་ལ་ཆགས་པ་མི་མངའ་བ། །འགྲོ་བ་རྣམས་ལ་འདོད་པའི་སྐྱོན་མི་གསུང ། །འདོད་པའི་ཆགས་བྲལ་སྨད་པ་མ་ལགས་པ། །བྱང་ཆུབ་མཆོག་ལ་སྲོག་ཆགས་མོས་པར་མཛད། །ཉོན་མོངས་དགྲ་དང་སྡིག་པའི་དགྲ་སྤངས་པ། །སེར་སྣའི་འདོད་ཆགས་བྲལ་ཞིང་ཆགས་མི་མངའ། །མི་ཡི་དམ་པ་གསེར་ལྟར་དཔལ་སྟུག་པ། །ཁྱོད་ཀྱི་མཚན་དང་གྲགས་པ་ཆུབ་པར་གྲགས། །གནས་དང་དབང་པོ་རྣམ་པར་འབྱེད་ལ་མཁས། །འདི་ན་བཞུགས་ཤིང་འགྲོ་བའི་མིག་ཏུ་གྱུར། །གནས་དང་ཡིག་འབྲུ་ཚིག་གི་དོན་བསླབས་པས། །ཁྱོད་ཀྱིས་ཆུ་བོ་བཞི་ལ་ཟམ་པ་བཏགས། །གླང་པོ་རིན་ཐང་མ་མཆིས་སྦྱིན་པ་མཛད། །འདྲེན་པ་མི་དང་ལྷ་རྣམས་སྒྲོལ་བ་པོ། །ཁྱོད་ཀྱི་ཡོན་ཏན་མཐའ་མ་མི་རྙེད་དེ། །མགོན་པོ་ཁྱོད
53.329a
ལ་བདག་ནི་ཐལ་མོ་སྦྱར། །མི་ཡི་མཆོག་ལ་རྡུལ་ནི་སྦྱིན་བྱིན་པས། །མི་མཇེད་འཛམ་བུའི་རྒྱལ་པོར་གྱུར་ལགས་ན། །འདིར་ནི་དབང་པོ་དང་བས་ཐལ་སྦྱར་ནས། །སྐྱབས་སུ་ཉེ་བར་མཆི་བ་སྨོས་ཅི་འཚལ། །ཕུང་པོ་གསོག་སྟེ་ཉམ་ཆུང་སྙིང་པོ་མེད། །སྟོང་པ་སྒྱུ་མ་ཆུ་ཟླ་འདྲ་བར་ནི། །གཽ་ཏམ་ཁྱོད་ཀྱིས་དེ་དག་ཡང་དག་མཁྱེན། །ཕུང་པོ་ཁམས་མཁས་ཁྱོད་ལ་ཕྱག་འཚལ་ལོ། །སྲེད་པའི་སྲད་བུས་དམ་དུ་མདུད་བོར་ཏེ། །སྲིད་པའི་འགྲོ་བར་དྲ་བར་རབ་གྲགས་པ། །སྲིད་པར་འགྲོ་བ་རྣམས་ཀྱི་དྲ་བ་དེ། །བདེ་གཤེགས་ཁྱོད་ཀྱི་མཁྱེན་པའི་འོད་ཀྱིས་དྲལ། །ཚངས་པའི་སྒྲ་སྐད་ལྟ་བུའི་གསུང་བརྗོད་པ། །ཤོ་བེ་མ་ལགས་མི་འགྱུར་འདྲིད་མ་ལགས། །ཕུན་ཚོགས་གསུང་དེ་དེ་དག་ཐོས་ནས་ནི། །ཐལ་མོ་སྦྱར་ཏེ་སྐྱབས་སུ་ཉེ་བར་མཆི། །ཕྱག་གི་མཐིལ་གྱིས་ས་འདིར་རེག་པ་ན། །ནགས་ཚལ་བཅས་པར་རྣམ་པ་དྲུག་གཡོས་ཀྱང ། །འདིར་ནི་གཞན་ལ་གནོད་པར་འགྱུར་མ་མཆིས། །བདུད་ཕྱོགས་དགྲ་བཅོམ་ཁྱོད་ལ་ཕྱག་འཚལ་ལོ། །ལྷ་ཡི་རྒྱལ་པོ་ཆེ་དང་མཁས་པ་གང ། །ཁྱོད་ཀྱི་ཆོས་དོན་གཉེར་ཞིང་མཆིས་པ་རྣམས། །དེ་དག་སོ་སོར་ཆོས་བསྟན་ཐོས་ནས་སུ། །ཞབས་གཉིས་ལ་ནི་རབ་ཏུ་གཏུགས་པར་བགྱིད། །དེ་ནས་མི་འམ་ཅིའི་རྒྱལ་པོའི་སླས་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་ནས་བུད་མེད་ཀྱི་དངོས་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་ན། ་ཇི་ལྟར་བདག་ཅག་བུད་མེད་ཀྱི་དངོས་པོ་ལས་གྱུར་ཏེ། སྐྱེས་པའི་དངོས་པོ་འཐོབ་པ་དང ། བླ་ན་མེད་པ
53.329b
ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་བ་དེ་ལྟ་བུའི་ཆོས་ཏེ། བཅོམ་ལྡན་འདས་ཀྱིས་བདག་ཅག་ལ་ལེགས་པར་བཤད་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོའི་སླས་དེ་དག་ལ་འདི་སྐད་ཅེས་བཀའ་སྩལ་ཏོ། །སྲིང་མོ་དག་དེའི་ཕྱིར་ཤིན་དུ་ལེགས་པར་ཉོན་ལ་ཡིད་ལ་ཟུང་ཤིག་དང ། ཇི་ལྟར་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་འཐོབ་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་བ་ངས་ཁྱོད་ལ་བཤད་པར་བྱའོ། །མི་འམ་ཅིའི་རྒྱལ་པོའི་སླས་རྣམས་ཀྱིས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །སྲིང་མོ་དག་ཆོས་གཅིག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་བར་འགྱུར་ཏེ། ཆོས་གཅིག་པོ་དེ་གང་ཞེ་ན། འདི་ལྟ་སྟེ། ཐམས་ཅད་མཁྱེན་པའི་སེམས་བསྐྱེད་པ་དང ། མི་མཉམ་པ་དང་མཉམ་པའི་སེམས་བསྐྱེད་པ་དང ། འཇིག་རྟེན་གསུམ་ལས་ཁྱད་པར་དུ་འཕགས་པའི་སེམས་བསྐྱེད་པ་དང ། དགེ་བའི་རྩ་བ་ཐམས་ཅད་ལ་བརྗེད་པ་མེད་པའི་སེམས་སྐྱེད་པ་སྟེ། སྲིང་མོ་དག་ཆོས་གཅིག་པོ་འདི་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ། སྐྱེས་པའི་ལུས་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་གཉིས་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་དེ་སྐྱེས་པའི་ལུས་ཐོབ་པར་འགྱུར་རོ། །གཉིས་གང་ཞེ་ན། འདི་ལྟ་སྟེ། ཕྲག་དོག་མེད་པ་དང ། སེར་སྣ་མེད་པ་སྟེ། སྲིང་མོ་དག་ཆོས་འདི་གཉིས་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར
53.330a
ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་གསུམ་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །གསུམ་གང་ཞེ་ན། འདི་ལྟ་སྟེ། ལུས་ཀྱི་སྡོམ་པ་གསུམ་ཡོངས་སུ་དག་པ་དང ། ངག་གི་སྡོམ་པ་བཞི་ཡོངས་སུ་དག་པ་དང ། ཡིད་ཀྱི་སྡོམ་པ་གསུམ་ཡོངས་སུ་དག་པ་སྟེ། སྲིང་མོ་དག་ཆོས་གསུམ་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ། སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་བཞི་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །བཞི་གང་ཞེ་ན། འདི་ལྟ་སྟེ། གཡོ་མེད་པར་སྦྱིན་པ་སྦྱིན་པ་དང ། གཡོ་མེད་པར་བསླབ་པའི་གནས་འཛིན་པ་དང ། གཡོ་མེད་པར་ཚུལ་ཁྲིམས་བསྟེན་པ་དང ། གཡོ་མེད་པར་ཆོས་ཉན་པ་སྟེ། སྲིང་མོ་དག་ཆོས་བཞི་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་ལྔ་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ། སྐྱེས་པའི་དངོས་པོ་ཐོབ་པར་འགྱུར་རོ། །ལྔ་གང་ཞེ་ན། འདི་ལྟ་སྟེ། ཆོས་དོན་དུ་གཉེར་བ་དང ། ཆོས་ཐོས་ནས་ཚུལ་བཞིན་དུ་སོ་སོར་རྟོག་པ་དང ། བསམ་པ་ཐག་པ་ནས་བུད་མེད་ཀྱི་དངོས་པོ་ལ་སྨོད་པ་དང ། རྟག་པར་རྒྱུན་དུ་སྐྱེས་པའི་ལུས་འཐོབ་པར་སེམས་སྐྱེད་པ་དང ། ཇི་སྐད་སྨྲས་པ་དེ་བཞིན་དུ་བྱེད་པ་སྟེ། སྲིང་མོ་དག་ཆོས་ལྔ་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་དྲུག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ། སྐྱེས་པའི་དངོས་པོ་ཐོབ་པར་འགྱུར་རོ། །དྲུག་གང་ཞེ་ན། འདི་ལྟ་སྟེ། དྲང་བ་དང ། མཉེན་པ་དང་སྒྱུ་མེད་པ་དང ། གཡོ་མེད་པ་དང་བསྩལ་བ་མེད་པ་དང ། བཅོས་པ་མེད་པ་སྟེ།
53.330b
སྲིང་མོ་དག་ཆོས་དྲུག་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ། སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་བདུན་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ། སྐྱེས་པའི་དངོས་པོ་ཐོབ་པར་འགྱུར་རོ། །བདུན་གང་ཞེ་ན། འདི་ལྟ་སྟེ། སངས་རྒྱས་ཀྱི་སྐུ་ཐོབ་པར་བྱ་བའི་ཕྱིར་སངས་རྒྱས་རྗེས་སུ་དྲན་པ་དང ། སངས་རྒྱས་ཀྱི་ཆོས་ཐོབ་པར་བྱ་བའི་ཕྱིར་ཆོས་རྗེས་སུ་དྲན་པ་དང ། རང་གིས་ཕྱིར་མི་ལྡོག་པའི་དགེ་འདུན་བསྡུ་བའི་ཕྱིར་དགེ་འདུན་རྗེས་སུ་དྲན་པ་དང ། སྨོན་ལམ་ཡོངས་སུ་དག་པར་བྱ་བའི་ཕྱིར་ཚུལ་ཁྲིམས་རྗེས་སུ་དྲན་པ་དང ། ཉོན་མོངས་པ་ཐམས་ཅད་ཡོངས་སུ་དོར་བའི་ཕྱིར་གཏོང་བ་རྗེས་སུ་དྲན་པ་དང ། བྱང་ཆུབ་ཀྱི་སེམས་རྣམ་པར་དག་པར་བྱ་བའི་ཕྱིར་ལྷ་རྗེས་སུ་དྲན་པ་དང ། དེ་དག་དགྲོལ་བའི་ཕྱིར་སེམས་ཅན་ཐམས་ཅད་ལ་སེམས་པ་སྟེ། སྲིང་མོ་དག་ཆོས་བདུན་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ། སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་བརྒྱད་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །བརྒྱད་གང་ཞེ་ན། འདི་ལྟ་སྟེ། ཟས་ལ་སྲེད་པ་མ་ཡིན་པ་དང ། སྐོམ་པ་ལ་སྲེད་པ་མ་ཡིན་པ་དང ། མེ་ཏོག་དང་སྤོས་དང་ཕྲེང་བ་དང ། བྱུག་པ་དང ། ཕྱེ་མ་ལ་སྲེད་པ་མ་ཡིན་པ་དང ། སྐྱེད་མོས་ཚལ་དུ་འགྲོ་བར་སྲེད་པ་མ་ཡིན་པ་དང ། རྒོད་པ་དང་འཇོ་བ་ལ་སྲེད་པ་མ་ཡིན་པ་དང ། གླུ་དང་གར་དང་རོལ་མོའི་དབྱངས་སྒྲ་ལ་སྲེད་པ་མ་ཡིན་པ་དང ། དགའ་བ་དང་རྩེ་བ་ལ་སྲེད་པ་མ་ཡིན་པ་དང ། རྣ་བ་དང་སྒྲ་དང ། སྣ་དང་དྲི་དང ། ལྕེ་དང་རོ་དང ། ལུས་དང་རེག་ལ་དགའ་བ་ལ་སྲེད་པ་མ་ཡིན་པ་སྟེ། སྲིང་མོ་དག་ཆོས་བརྒྱད་པོ་འདི་དག་དང་ལྡན་ན་བུད་མེད་བུད་མེད
53.331a
ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་དགུ་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །དགུ་གང་ཞེ་ན། འདི་ལྟ་སྟེ། ཆད་པར་ལྟ་བ་མ་ཡིན་པ་དང ། རྟག་པར་ལྟ་བ་མ་ཡིན་པ་དང ། བདག་ཏུ་སྨྲ་བ་མ་ཡིན་པ་དང ། སེམས་ཅན་དུ་སྨྲ་བ་མ་ཡིན་པ་དང ། སྲོག་དུ་སྨྲ་བ་མ་ཡིན་པ་དང ། གང་ཟག་དུ་སྨྲ་བ་མ་ཡིན་པ་དང ། ་འབྱུང་བར་ལྟ་བ་མ་ཡིན་པ་དང ། འཇིག་པར་ལྟ་བ་མ་ཡིན་པ་དང ། རྒྱུ་དང་རྐྱེན་ལ་འཇུག་པ་ལ་མཁས་པ་ཡིན་ཏེ། སྲིང་མོ་དག་ཆོས་དགུ་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་བཅུ་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་བྱམས་པར་གནས་པ་དང ། གཞན་གྱི་ལོངས་སྤྱོད་ལ་བརྣབ་སེམས་མི་སྐྱེད་པ་དང ། སྐྱེས་པའི་སེམས་སུ་ཡིད་ལ་བྱེད་པ་སྐྱེད་པ་དང ། སྲོག་གི་ཕྱིར་ཡང་རྫུན་གྱི་ཚིག་མི་སྨྲ་བ་དང ། ཕྲ་མའི་ཚིག་མི་སྨྲ་བ་དང ། ཞེ་གཅོད་པའི་ཚིག་མི་སྨྲ་བ་དང ། ཚིག་ཀྱལ་པ་མི་སྨྲ་བ་དང ། ཕ་རོལ་པོ་དགའ་ཞིང་རྩེ་བ་ལ་ཕྲག་དོག་མེད་པ་དང ། གནོད་སེམས་ཀྱི་བག་ལ་ཉལ་མངོན་པར་མི་སྒྲུབ་པ་དང ། ཡང་དག་པར་ལྟ་བ་དང་ལྡན་པར་འགྱུར་བ་དང་རྣམ་པར་སྨིན་པ་ལ་རེ་བ་མེད་པ་སྟེ། སྲིང་མོ་དག་ཆོས་བཅུ་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་བོའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་བུད་མེད་ཟབ་མོ་ལ་མོས་པ་ཡིན་ཏེ། དེ་གཟུགས་ལ་དབུ་བ་བརྡོས་པ་ལྟ་བུར་སོ་སོར་རྟོག་ཀྱང་གཟུགས་ཀྱིས་རྒྱགས་ཞིང
53.331b
མྱོས་པར་མི་འགྱུར་བ་དང ། ཚོར་བ་ལ་ཆུའི་ཆུ་བུར་ལྟ་བུར་སོ་སོར་རྟོག་ཀྱང་བདེ་བའི་ཚོར་བ་ལ་རྗེས་སུ་ཆགས་པ་མེད་པ་དང ། སྡུག་བསྔལ་གྱི་ཚོར་བ་ལ་ཁོང་ཁྲོ་བར་མི་འགྱུར་བ་དང ། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བའི་ཀུན་དུ་གཏི་མུག་པར་མི་འགྱུར་བ་དང ། འདུ་ཤེས་ལ་སྨིག་རྒྱུ་ལྟ་བུར་སོ་སོར་རྟོག་ཅིང་བུད་མེད་ཀྱི་འདུ་ཤེས་མི་སྐྱེད། སྐྱེས་པའི་འདུ་ཤེས་མི་སྐྱེད་པ་དང་འདུ་བྱེད་རྣམས་ལ་ཆུ་ཤིང་གི་ཕུང་པོ་ལྟ་བུར་སོ་སོར་རྟོག་སྟེ། འདུ་བྱེད་ཐམས་ཅད་ལ་སྙིང་པོ་མེད་པར་རྟོགས་ནས་འདུ་བྱེད་ཐམས་ཅད་ལ་མི་གནས་ཤིང་དེ་ལ་མི་སྐྱེད་པ་དང ། རྣམ་པར་ཤེས་པ་ལ་སྒྱུ་མ་ལྟ་བུར་སོ་སོར་རྟོག་སྟེ། སེམས་དང་ཡིད་དང་རྣམ་པར་རིག་པ་དེ་སྒྱུ་མ་བྱས་པ་བཞིན་དུ་རྟོགས་ནས་ཆོས་ཐམས་ཅད་ལ་ཆགས་པ་མེད་ཞེ་སྡང་མེད། གཏི་མུག་མེད་པ་དང ། ལུས་ལ་འབྱུང་བ་ཆེན་པོ་བཞི་དང་ལྡན་པར་སོ་སོར་རྟོག་སྟེ། འདི་ལྟ་སྟེ། སའི་ཁམས་དང་ལྡན་པ་དང ། ཆུའི་ཁམས་དང་ལྡན་པ་དང ། མེའི་ཁམས་དང་ལྡན་པ་དང ། རླུང་གི་ཁམས་དང་ལྡན་པར་ལུས་ལ་སོ་སོར་རྟོག་གོ། །ལུས་འདི་ནི་བསྡུས་པ་རྩཝ་དང ། ཤིང་དང ། བོང་བ་དང ། རྩིག་པ་དང ། མིག་ཡོར་ལྟ་བུ་སྟེ། འདི་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེ་དགུ་མ་ཡིན། གང་ཟག་མ་ཡིན་གྱི་ཕྱིན་ཅི་ལོག་སྔོན་དུ་སོང་བས་རྒྱུ་དང་བྱ་བ་དང ། ལས་ཀྱི་བྱུང་བའོ། །གཞན་ཡང་བུད་མེད་མིག་ལ་ཁ་ཟས་ལས་སྐྱེས་པ་ཤའི་གོང་བུ་ངོ་བོ་ཉིད་ཀྱིས་སྟོང་པ་རང་བཞིན་གྱིས་དབེན་པར་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པ་དང ། དེ་བཞིན་དུ་རྣ་བ་དང་སྣ་དང་ལྕེ་དང་ལུས་དང་ཡིད་ལ་ངོ་བོ་ཉིད་ཀྱིས་སྟོང་པ་དང ། རང་བཞིན་གྱིས་དབེན་པར་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པའོ། །གཞན
53.332a
ཡང་བུད་མེད་ལུས་ལ་གཟུགས་བརྙན་ལྟ་བུར་འཇུག་པ་དང ། ངག་ལ་བྲག་ཆ་ལྟ་བུར་འཇུག་པ་དང ། སེམས་ལ་སྒྱུ་མ་ལྟ་བུར་འཇུག་པའོ། །སྲིང་མོ་དག་ཆོས་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་མི་འམ་ཅིའི་རྒྱལ་པོ་སྡོང་པོའི་སླས་དེ་དག་ཐམས་ཅད་ཀྱིས་བཅོམ་ལྡན་འདས་ལས་བུད་མེད་ཀྱི་དངོས་པོ་ལས་སྒྱུར་བའི་ཆོས་ཀྱི་རྣམ་གྲངས་འདི་ཐོས་ནས་ཚིམ་ཞིང་མགུ་སྟེ། ཡི་རངས་ཤིང་རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །དྲི་མེད་དྲི་བྲལ་དྲི་མ་གཅོད་མཛད་པ། །རྡུལ་མེད་རྡུལ་བྲལ་ལྷག་པའི་གཟི་བརྗིད་མངའ། །པད་མའི་འདབ་འདྲའི་སྤྱན་དང་མཛེས་པའི་ཐུགས། །དྲི་མེད་ཟླ་ཞལ་ཁྱོད་ལ་ཕྱག་འཚལ་ལོ། །དགའ་མཛད་ཞི་མཛད་ཉོན་མོངས་གཅོད་མཛད་པ། །དགའ་བ་སྟོན་པ་རྟག་ཏུ་དགོན་པར་དགྱེས། །རིན་ཆེན་འབྱུང་གནས་རིན་ཆེན་མཛོད་མངའ་བ། །ཡོན་ཏན་མཆོག་མངའ་ཁྱོད་ལ་ཕྱག་འཚལ་ལོ། །ཕ་རོལ་གཤེགས་པ་གཞན་གྱི་ཚོགས་རྣམས་འཇོམ། །པད་མ་ལྟ་བུར་སྟོང་མཆོག་བཀའ་མཆིད་གསུང ། །ལམ་མཆོག་སྩོལ་ཅིང་དམ་པའི་དོན་སྟོན་པ། །མཆོག་ཏུ་དགའ་མཛད་ཁྱོད་ལ་ཕྱག་འཚལ་ལོ། །ཆུ་བོ་བཞི་རྒལ་བདེན་བཞིའི་བཀའ་མཆིད་གསུང ། །ས་ལ་རྒྱུ་བ་འདི་ལ་མིག་སྩོལ་བ། །འཁོར་ལོ་མཆོག་གི་མཚན་ནི་སྟོང་མངའ་བ། །རྡུལ་མེད་ཕན་མཛད་ཁྱོད་ལ་ཕྱག་འཚལ་ལོ། །ཉོན་མོངས་རྡུལ་བསལ་དམ་པ་མཐུ་བོ་ཆེ། །མགོན་པོ་འགྲོ་ལ
53.332b
མཆོག་གི་དོན་མཛད་པ། །བདུད་ཀྱི་དཔུང་རྣམས་སྟོབས་མེད་འཇིག་མཛད་པ། །བཅོམ་ལྡན་སྟོབས་བཅུ་ཁྱོད་ལ་ཕྱག་འཚལ་ལོ། །སྲེད་པའི་འཁྲི་ཤིང་གཅོད་མཛད་མཉམ་པ་མེད། །བརྙེས་པ་དག་དང་མ་བརྙེས་མཚུངས་མཉམ་ཐུགས། །འཇིག་རྟེན་མཐར་འབྱིན་སྣང་བའི་སྒྲོན་མཛད་པ། །རྒྱ་མཚོ་ལྟ་བུ་ཁྱོད་ལ་ཕྱག་འཚལ་ལོ། །དུལ་ཞིང་སྟོབས་བཅུ་ཆེན་པོ་དམ་པ་མངའ། །སྦྱིན་པ་སྩོལ་ཅིང་རྟག་ཏུ་གཏོང་ལ་དགྱེས། །དུལ་བ་ཞི་གནས་ཡོན་ཏན་ཕ་རོལ་ཕྱིན། །ཉོན་མོངས་རྡུལ་བསལ་ཁྱོད་ལ་ཕྱག་འཚལ་ལོ། །མཚན་མཆོག་འགྲོ་བ་ཀུན་ལ་དམ་པ་སྩོལ། །སྐྱེ་བོའི་འདྲེན་པ་ལྷའི་མཆོག་པས་མཆོག་།བྱམས་དང་སྟོབས་དང་བཟོད་ལ་ངེས་པར་དགྱེས། །མཆོད་འོས་བདེ་གཤེགས་ཁྱོད་ལ་ཕྱག་འཚལ་ལོ། །མར་མེ་ལྟ་བུ་དྲི་མེད་ཟླ་བ་འདྲ། །ཕྱི་ནང་ཉོན་མོངས་དྲི་མ་གཅོད་མཛད་པ། །ཉོན་མོངས་སྤངས་པ་ཡོན་ཏན་བསོད་ནམས་གཏེར། །ཞི་བ་ཐུགས་ཞི་ཁྱོད་ལ་ཕྱག་འཚལ་ལོ། །དད་པ་སྩོལ་བ་དགེ་སྦྱོང་ཞི་མཛད་པ། །སྟོན་པ་སྐྱེ་མཆེད་དྲུག་ལས་ཐར་མཛད་པ། །རྗེས་སུ་དྲན་དྲུག་ཤིན་དུ་ཡོངས་དག་དྲན། །རྒྱལ་བ་དགེ་སྦྱོང་རྒྱལ་ལ་ཕྱག་འཚལ་ལོ། །འདོམ་གང་འོད་ནི་གསེར་གྱི་ཁ་དོག་བལྟ། །གསུང་སྙན་དམ་པ་རྣམ་པར་དག་པའི་དབྱངས། །བཅོམ་ལྡན་གང་ཟག་དམ་པ་སྐྱེས་བུ་མཆོག་།སྲིད་གསུམ་ཞི་མཛད་ཁྱོད་ལ་ཕྱག་འཚལ་ལོ། །ཤེས་རབ་མུན་པ་མ་མཆིས་ཕ་རོལ་གཤེགས། །རྟག་ཏུ་དཀའ་ཐུབ་བརྟུལ་ཞུགས་རབ་ཏུ་སྤྱོད། །དེ་བཞིན་ཁོ་ན་གཞན་མིན་དེ་བཞིན་གསུང ། །མུན་པར་སྒྲོན་མ་འཛིན་ལ་ཕྱག་འཚལ་ལོ། །བདེ་གཤེགས་གྲགས་ལྡན་ཡོན་ཏན་བས་མ་འཚལ། །དེ་བཞིན་ཉིད་ཀྱི་ཆོས་ཀྱི་གནས་སྟོན་པ། །ཡོན་ཏན་བརྗོད་པ་མཐོང་ཞིང་གྲགས་བསྒྲགས་པས། །མཆོག་ཏུ
53.333a
དགའ་མཛད་ཁྱོད་ལ་ཕྱག་འཚལ་ལོ། །བསྔགས་ལ་གནས་ཤིང་བརྟུལ་ཞུགས་དཀའ་ཐུབ་འཕགས། །ཁེངས་དང་ང་རྒྱལ་རྒྱགས་པ་གཅོད་མཛད་པ། །ཡེ་ཤེས་འབྱུང་གནས་རྡུལ་བྲལ་བློ་གྲོས་མཆོག་།སྐྱེ་བོ་མཐར་ཕྱིན་ཁྱོད་ལ་ཕྱག་འཚལ་ལོ། །ཀ་ལ་པིང་ཀ་ཚངས་དབྱངས་ཐུགས་རྗེ་ཅན། །འདོད་པ་རྩོད་བགྱིད་དྲི་མ་སེལ་མཛད་པ། །ཕུང་པོ་ཡོངས་མཁྱེན་མཁས་པ་བདེ་བར་གཤེགས། །ཡོན་ཏན་ཚོགས་མཆོག་མངའ་ལ་ཕྱག་འཚལ་ལོ། །ཡོན་ཏན་སྟོན་པ་ཡོན་ཏན་བསྟོད་མཆོད་པ། །ཟབ་མོ་བལྟ་དཀའ་ཤིན་དུ་རྟོགས་པར་དཀའ། །འཛུམ་ཞལ་ཟླ་འདྲ་གསོང་པོར་གསུང་མཛད་པ། །བདུད་སྟོབས་འཇོམ་མཛད་ཁྱོད་ལ་ཕྱག་འཚལ་ལོ། །མཉམ་ཐུགས་ཁ་ལོ་བསྒྱུར་བ་རབ་དུལ་ཐུགས། །ཀུན་གྱིས་མངོན་བསྟོད་མཉམ་པའི་ལམ་ལ་གནས། །ཐུབ་པ་མཆོག་གསུང་བདེན་པའི་བཀའ་མཆིད་ཅན། །བདེ་གཤེགས་མཉམ་ཐུགས་ཁྱོད་ལ་ཕྱག་འཚལ་ལོ། །ལམ་སྩོལ་སྙན་པ་ཤིན་དུ་འཇམ་པའི་དབྱངས། །བདུད་ཀྱི་སྡེ་མང་འཇོམ་མཛད་ང་རྒྱལ་དང ། །ལྷག་པའི་ང་རྒྱལ་མི་མངའ་ཚུལ་མི་འཆོས། །ཐུབ་པ་དགེ་སྦྱོང་རྒྱལ་ལ་ཕྱག་འཚལ་ལོ། །སྟོབས་དང་མཐུ་དང་བརྩོན་འགྲུས་བསམ་གཏན་དགྱེས། །རྟག་ཏུ་འདོད་ཆགས་སྐྱོན་དང་རབ་རིབ་བྲལ། །བདེ་བར་གཤེགས་པ་མི་གཡོ་གནས་ལ་ཞུགས། །སྟོབས་བཅུ་མཆོག་མངའ་ཁྱོད་ལ་ཕྱག་འཚལ་ལོ། །ཕྱག་དང་ཞབས་ནི་དྲི་མེད་དྲ་བས་འབྲེལ། །སྐྱེ་དང་རྒ་དང་འཆི་བ་མི་མངའ་བ། །རྒྱལ་བར་འོས་པ་འགྲོ་བ་ཀུན་ལས་རྒྱལ། །ནམ་མཁའ་མཉམ་ཐུགས་ཁྱོད་ལ་ཕྱག་འཚལ་ལོ། །དེ་ནས་མི་འམ་ཅིའི་རྒྱལ་པོ་སྡོང་པོའི་སླས་མི་འམ་ཅི་མོ་བརྒྱད་ཁྲི་བཞི་སྟོང་པོ་དེ་དག་གིས་བཅོམ་ལྡན་འདས་ཀྱི་ཞབས་ལ་གཏུགས་པ་དང ། བཅོམ་ལྡན་འདས་ཀྱིས་དེ་དག་གི་ལྷག་པའི་བསམ་པ་མཁྱེན
53.333b
ནས་དེའི་ཚེ་བཅོམ་ལྡན་འདས་ཀྱིས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ་གང་གི་ཚེ་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་དུ་མ་ཁ་དོག་སྣ་ཚོགས་བྱུང་སྟེ། འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེ་བརྒན་དང ། ཤེལ་དང་དངུལ་གྱི་ཁ་དོག་ལྟ་བུའོ། །དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པར་འོད་ཀྱིས་ཁྱབ་པར་བྱས་ཏེ། ཚངས་པའི་འཇིག་རྟེན་གྱི་བར་དུ་མངོན་པར་འཕགས་ནས་ཉི་མ་དང་ཟླ་བའི་འོད་མོག་མོག་པོར་བྱས་ཏེ། སླར་ལོག་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ་ཞེ་ས་དང་བཅས་ཤིང་གུས་པ་དང་བཅས་པར་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཚིགས་སུ་བཅད་པ་མངོན་པར་བསྒྲུབ་པ་འདིས་བཅོམ་ལྡན་འདས་ལ་འཛུམ་པ་མཛད་པའི་དོན་ཞུས་པ། བདེ་བར་གཤེགས་པ་ཅི་སླད་འཛུམ་སྟོན་པ། །ཟླ་བ་དྲི་མ་མེད་ཞལ་ཁྱོད་ལ་ཞུ། །དྲི་མེད་གཟི་བརྗིད་མངའ་བ་ཁྱོད་ལ་ཞུ། །གསེར་གྱི་ཁ་དོག་ལྟ་བུ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །དམ་པའི་གཟུགས་རྣམས་མངའ་བ་ཁྱོད་ལ་ཞུ། །འགྲོ་བ་རྣམས་ཀྱི་དོན་མཛད་ཁྱོད་ལ་ཞུ། །ལྷ་དང་མི་རྣམས་ཀྱིས་མཆོད་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །སྦྱིན་དང་དུལ་ལ་དགྱེས་པ་ཁྱོད་ལ་ཞུ། །ཚུལ་ཁྲིམས་ཡོངས་དག་གྱུར་པ་ཁྱོད་ལ་ཞུ། །བཟོད་པའི་སྟོབས་དང་སྟོབས་སྩོལ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །བརྩོན་འགྲུས
53.334a
སྟོབས་དང་མཐུ་མངའ་ཁྱོད་ལ་ཞུ། །བསམ་གཏན་མངོན་ཤེས་དགྱེས་པ་ཁྱོད་ལ་ཞུ། །ཤེས་རབ་ནམ་མཁའ་མཉམ་པ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །རྟག་ཏུ་བྱམས་པའི་ཐུགས་ཅན་ཁྱོད་ལ་ཞུ། །རྟག་ཏུ་ཐུགས་རྗེ་ལྡན་པ་ཁྱོད་ལ་ཞུ། །དགའ་དང་བཏང་སྙོམས་དགྱེས་པ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །སྲིད་པ་གསུམ་པོ་མཐར་འབྱིན་ཁྱོད་ལ་ཞུ། །སྤྱན་གསུམ་དྲི་མ་མི་མངའ་ཁྱོད་ལ་ཞུ། །བདུད་རྩི་ཆོས་རྣམས་གསུང་བ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །བདུད་རྣམས་ཐ་མར་འབྱིན་པ་ཁྱོད་ལ་ཞུ། །ངན་པའི་ཆོགས་རྣམས་འཇོམ་པ་ཁྱོད་ལ་ཞུ། །བདེན་པ་དམ་པ་གཟིགས་པ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །སྟོབས་བཅུ་དམ་པ་མངའ་བ་ཁྱོད་ལ་ཞུ། །ཐེ་ཙོམ་དག་ནི་གཅོད་མཛད་ཁྱོད་ལ་ཞུ། །ཡོན་ཏན་སྟོང་གིས་བརྒྱན་པ་ཁྱོད་ལ་ཞུ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་མི་འམ་ཅིའི་རྒྱལ་པོའི་སླས་རྣམས་ང་ལས་དགེ་བའི་རྩ་བ་བསྐྱེད་དོ། །བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། བུད་མེད་ཀྱི་དངོས་པོ་ལས་བསྒྱུར་ཞིང་སྐྱེས་པའི་དངོས་པོ་ཐོབ་པར་བྱ་བའི་ཕྱིར་ངའི་རྐང་པ་གཉིས་ལ་གཏུགས་པ་མཐོང་ངམ། གསོལ་པ། བཅོམ་ལྡན་འདས་མཐོང་ངོ ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་མི་འམ་ཅིའི་སླས་བརྒྱད་ཁྲི་བཞི་སྟོང་པོ་དེ་དག་གིས་བསམ་པ་ཐག་པ་ནས་དགེ་བའི་རྩ་བ་བསྐྲུན་པ་འདིས་འདི་ནི་ཤི་འཕོས་ནས་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་ལུས་ཐོབ་ནས་དགའ་ལྡན་གྱི་ལྷ་རྣམས་དང་སྐལ་བ་མཉམ་པར་སྐྱེ
53.334b
བར་འགྱུར་རོ། །དེར་སྐྱེས་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་ལྷན་ཅིག་ཏུ་སངས་རྒྱས་བཅོམ་ལྡན་འདས་རྣམས་ཀྱི་རྫོགས་པའི་བྱང་ཆུབ་འདི་ཀུན་འགྲོ་བ་བྱེད་པར་འགྱུར་རོ། །བྱམས་པ་དེ་བཞིན་གཤེགས་པ་བྱང་ཆུབ་ཐོབ་པ་ན་མཉེས་པར་བྱེད་ཅིང་དམ་པའི་ཆོས་ཀྱང་ཀུན་འགྲོ་བར་བྱེད་པར་འགྱུར་རོ། །བསྐལ་པ་བཟང་པོའི་དེ་བཞིན་གཤེགས་པ་ཐམས་ཅད་ལ་ཡང་རིམ་གྱིས་མཉེས་པར་བྱེད་པར་འགྱུར། དེ་དག་གིས་དམ་པའི་ཆོས་ཀྱང་ཀུན་བགྲོ་བ་བྱེད་པར་འགྱུར། འཛིན་པར་འགྱུར་རོ། །དེ་དག་རིམ་གྱིས་བྱང་ཆུབ་ཀྱི་ཕྱོགས་ཀྱི་ཆོས་ཡང་དག་པར་བསྒྲུབ་པར་བྱ་བ་ཐམས་ཅད་ཀུན་དུ་རྫོགས་པར་བྱས་ནས། གང་གི་ཚེ་མི་འམ་ཅིའི་རྒྱལ་པོ་སྡོང་པོ་བླ་ན་མེད་པ་ཡང་དག་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ་དེ་དག་སངས་རྒྱས་ཀྱི་ཞིང་དེར་སྐྱེ་བར་འགྱུར་ཏེ། དེས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་ཡང་འགྱུར་རོ། །དེ་ནས་བཅོམ་ལྡན་འདས་ལ་མི་འམ་ཅིའི་རྒྱལ་པོ་སྡོང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་བདག་ཅག་ལ་སངས་རྒྱས་ཀྱི་མཛད་པ་མཛད་དོ། །ངན་སོང་ངན་འགྲོ་ཐམས་ཅད་ཀྱི་ལམ་བཀུམ་མོ། །བདེ་འགྲོ་ཐམས་ཅད་ཀྱི་ལམ་རྣམ་པར་སྦྱངས་སོ། །བདག་ཅག་བྱང་ཆུབ་ཀྱི་ལམ་ལ་རབ་ཏུ་བཀོད་དོ། །བདག་ཅག་ལ་ཆོས་ཀྱི་གཏེར་བསྟན་ཏོ། །བདག་ཅག་ཡེ་ཤེས་ཀྱི་ས་ལ་བཀོད་དོ། །དགེ་བའི་རྩ་བ་ཐམས་ཅད་འབར་བར་བགྱིས་སོ། །ཕ་རོལ་ཏུ་ཕྱིན་པའི་ཕྱོགས་བསྟན་ཏོ། །ཐབས་ལ་མཁས་པ་བསྟན་ཏོ། །བདག་ཅག་བྱང་ཆུབ་ཀྱི་སེམས་ཡང་དག་པར་འཛིན་པ་སྩལ་ཏོ། །ཆོས་བསྒྲགས་པས་རབ་ཏུ་དགའ་བར་མཛད་དོ། །དགའ་བ་དང་དང་བ་དང ། མཆོག་ཏུ་དགའ་བ་ཐོབ་པས་གཟེང་བསྟོད་དོ། །ཆོས་ཟབ་མོའི་བཟོད་པ་ལ་རབ་ཏུ
53.335a
དགའ་བར་མཛད་དོ། །བདག་ཅག་ཕྱིར་མི་ལྡོག་པའི་ས་ལ་རབ་ཏུ་བཀོད་དོ། །བདག་ཅག་ནི་བཅོམ་ལྡན་འདས་ལ་བྱས་པ་གཟོ་བ་ལགས་ཀྱི་བྱས་པ་མི་གཟོ་བ་མ་ལགས་ཀྱང་བཅོམ་ལྡན་འདས་བདག་ཅག་གིས་ཤ་དང་ཁྲག་གིས་ཀྱང་དེ་བཞིན་གཤེགས་པ་ལ་ལན་མི་ལོན་ན་གཞན་གྱིས་ལན་ལོན་པར་མི་འགྱུར་བ་ལྟ་སྨོས་ཀྱང་ཅི་འཚལ། དེ་ནས་འཁོར་དེའི་ནང་ནས་བྱང་ཆུབ་སེམས་དཔའ་ཁ་ཅིག་འདི་སྙམ་དུ་སེམས་ཏེ། མ་ལ་མི་འམ་ཅིའི་རྒྱལ་པོ་སྡོང་པོ་འདི་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། འདིའི་མིང་ནི་ཇི་སྐད་ཅེས་བྱ་བར་འགྱུར། བྱང་ཆུབ་སེམས་དཔའི་དགེ་འདུན་ནི་ཇི་སྙེད་ཅིག་ཏུ་འགྱུར། ལོངས་སྤྱོད་དང་ཡོངས་སུ་སྤྱོད་པ་ནི་ཇི་འདྲ་ཞིག་ཏུ་འགྱུར། དེའི་སེམས་ཅན་བཀོད་པ་དང ། སངས་རྒྱས་ཀྱི་ཞིང་གི་ཡོན་ཏན་བཀོད་པ་ནི་ཇི་འདྲ་བ་ཞིག་ཏུ་འགྱུར་སྙམ་མོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་གི་སེམས་ཀྱི་རྣམ་པར་རྟོག་པ་ཐུགས་ཀྱིས་ཡོངས་སུ་མཁྱེན་ནས་འཛུམ་པ་མཛད་པ་དང ། བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་དུ་མ་ཁ་དོག་ཐ་དད་པ་ཁ་དོག་བརྒྱ་སྟོང་ཕྲག་དུ་མ་བྱུང་སྟེ། ཕྱོགས་བཅུ་ཀུན་གྱི་ཕྱོགས་རེ་རེར་ཡང་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་སྣང་བར་བྱས་ཏེ། སེམས་ཅན་རྣམས་ཀྱི་ངན་སོང་གི་སྡུག་བསྔལ་ཐམས་ཅད་ཞི་བར་བྱས་ནས་ལྷ་དང ། མི་དང་ལྷ་མ་ཡིན་དུ་བཅས་པའི་འཇིག་རྟེན་འདུན་པར་བྱས་ཏེ་སླར་ལོག་ནས་བཅོམ་ལྡན་འདས་ལ་ལན་སྟོང་དུ་བསྐོར་བ་བྱས་ཏེ། བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱིས་སྔོན་ཆད་མ་མཛད་པའི་འཛུམ་པ་མཐོང་ནས་སྟན་ལས་ལངས་ཏེ་ཐལ་མོ་སྦྱར་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ།
53.335b
ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་འདུག་སྟེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཚིགས་སུ་བཅད་པས་གསོལ་པ། བདེ་བར་གཤེགས་ཀྱི་འཛུམ་པ་ཅི་འདྲ་བ། །དེ་རིང་ཕྱུང་སྟེ་ཐུག་མེད་བྱེ་བའི་ཞིང ། །རྒྱ་ཆེན་ཕྱོགས་བཅུའི་གང་གཱའི་རྡུལ་མཐའ་ཡས། །ཁྱབ་པ་དེ་འདྲ་སྔོན་ཆད་ཡོང་མ་མཐོང ། ཚངས་པ་དེ་བཞིན་འཇིག་རྟེན་སྐྱོང་བ་དང ། །ནོར་བུ་མེ་དང་ཉི་མ་ཟླ་བའི་འོད། །མི་དབང་གཟི་བརྗིད་ཀྱིས་ནི་མོག་མོག་གྱུར། །འཛུམ་མཛད་འདིའི་རྒྱུ་ནི་ལུང་བསྟན་གསོལ། །སུ་ཡི་ཆེད་དུ་དཔའ་བོ་ཁྱོད་ཀྱིས་འོད་ཕྱུང་བས། །འདིར་ནི་ངན་སོང་གསུམ་ཞི་བྱང་ཆུབ་ཡན་ལག་རྫོགས། །ཆོས་ཀྱི་རྗེ་ཡིས་བདག་ཅག་རྣམས་ཀྱི་དོགས་པ་སོལ། །མི་རྣམས་ཀྱི་ནི་ཡིད་གཉིས་མ་ལུས་ལེགས་པར་ཁུམ། །འཁོར་ཀུན་དགའ་བས་རྟོག་བགྱིད་ན། །སུ་སླད་དེ་རིང་འཛུམ་པ་བསྟན། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་བསྐོར་བ་བྱས་ཏེ་རང་གི་སྟན་ལ་འདུག་གོ། །དེ་ནས་བཅོམ་ལྡན་འདས་ཀྱིས་དེའི་ཚེ་གླང་པོ་ཆེའི་བལྟ་སྟངས་ཀྱིས་ཕྱོགས་བཅུར་གཟིགས་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་མི་འམ་ཅིའི་རྒྱལ་པོ་སྡོང་པོ་འདིས་ཚུལ་འདི་ལྟ་བུ་དང ། རྒྱ་ཆེ་བ་འདི་ལྟ་བུ་དང ། རྣམ་པ་འདི་ལྟ་བུ་འདིས་དེ་བཞིན་གཤེགས་པ་ལ་མཆོད་པ་བྱས་པ་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་མི་འམ་ཅིའི་རྒྱལ་པོ་སྡོང་པོ་འདི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་བཅུ་རྩ་བརྒྱད་ན་བླ་ན་མེད
53.336a
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དཀོན་མཆོག་འབྱུང་ཞེས་བྱ་བའི་བསྐལ་པ་ལ་འཇིག་རྟེན་གྱི་ཁམས་ཟླ་བ་དྲི་མ་མེད་ཅེས་བྱ་བར་ཡོན་ཏན་གྱི་རྒྱལ་པོར་སྣང་བ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བ་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་འཇིག་རྟེན་དུ་འབྱུང་ངོ ། །ཀུན་དགའ་བོ་འཇིག་རྟེན་གྱི་ཁམས་ཟླ་བ་དྲི་མ་མེད་པ་དེ་ནི་ལག་མཐིལ་ལྟར་མཉམ་པར་འགྱུར་ཏེ། བཻ་དཱུརྱ་དཀར་པོ་ལས་གྲུབ་པ། ཟླ་བ་ལྟ་བུར་སྣང་བ། ཤིན་དུ་དྲི་མ་མེད་པ། ཤིན་དུ་རྣམ་པར་དག་པ། མཆིང་བུ་མེད་པའོ། །དེ་བཞིན་གཤེགས་པ་དེའི་བྱང་ཆུབ་སེམས་དཔའི་དགེ་འདུན་ཡང་ཚད་མེད་པར་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཐམས་ཅད་ཀྱང་ཕྱིར་མི་ལྡོག་པ། རྣམ་པར་ཐར་པ་བསམ་གྱིས་མི་ཁྱབ་པ་ཐོབ་པ་ཤ་སྟག་གོ། །བྱང་ཆུབ་སེམས་དཔའ་དེ་དག་ནི་ནམ་མཁའ་ལ་ཁང་པ་བརྩེགས་པ་ན་ལོངས་སྤྱོད་དེ། དེ་དག་ནམ་མཁའ་ལ་ཁང་པ་བརྩེགས་པ་ན་གནས་པ་ན་བཻ་དཱུརྱ་དཀར་པོ་ལས་གྲུབ་པའི་ས་ཆེན་པོ་དེར་བཅོམ་ལྡན་འདས་དེ་བཞིན་གཤེགས་པ་ཡོན་ཏན་གྱི་རྒྱལ་པོར་སྣང་བ་དེའི་གཟུགས་བརྙན་མཐོང་བར་འགྱུར་རོ། །དེ་དག་གིས་མཐོང་མ་ཐག་ཏུ་ཆོས་འདི་དག་ཐམས་ཅད་ནི་གཟུགས་བརྙན་ལྟ་བུའོ་ཞེས་དྲན་པ་སྐྱེ་བར་འགྱུར་རོ། །བྱང་ཆུབ་སེམས་དཔའ་གང་ཆོས་གང་ལ་ཐེ་ཙོམ་ཟ་བ་ན་དེ་དེ་བཞིན་གཤེགས་པས་དེ་ལ་སྣང་བར་གྱུར་པ་དེ་ལ་ཞུ་བར་འགྱུར་རོ། །དེ་བཞིན་གཤེགས་པ་དེས་ཀྱང་བྱང་ཆུབ
53.336b
སེམས་དཔའ་དེ་དག་ལ་ཞུས་པའི་ལུང་བསྟན་པས་སེམས་རངས་པར་མཛད་པར་འགྱུར་རོ། །བྱང་ཆུབ་སེམས་དཔའ་དེ་དག་གིས་ཆོས་དེ་ཐོས་ནས་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །ཀུན་དགའ་བོ་འཇིག་རྟེན་གྱི་ཁམས་དེ་ན་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་ཡོད་པར་མི་འགྱུར་རོ། །སེམས་ཅན་དེ་དག་ཐམས་ཅད་ཀྱང་ནམ་མཁའ་ལ་ཁང་པ་བརྩེགས་པ་ན་འཁོད་པར་འགྱུར་རོ། །སངས་རྒྱས་ཀྱི་ཞིང་དེར་བུད་མེད་དུ་གདགས་པ་འང་མེད་པར་འགྱུར་རོ། །སེམས་ཅན་དེ་དག་ཐམས་ཅད་ཀྱང་པད་མའི་སྙིང་པོ་ལས་བརྫུས་ཏེ་སྐྱེ་བར་འགྱུར་རོ། །འཇིག་རྟེན་གྱི་ཁམས་དེ་ན་ཁ་ཟས་སུ་གདགས་པ་མེད་དེ། སེམས་ཅན་དེ་དག་ཐམས་ཅད་ནི་བསམ་གཏན་ལ་དགའ་བ་དང ། ཆོས་ལ་དགའ་བའི་ཟས་ཅན་དུ་འགྱུར་རོ། །འཇིག་རྟེན་གྱི་ཁམས་དེ་ན་གཞན་རྣམ་པར་གཞག་པ་མེད་དེ། སེམས་ཅན་དེ་དག་ཐམས་ཅད་ནི་ཐེག་པ་ཆེན་པོ་ལ་ངེས་པར་འགྱུར་བ་དག་གོ། །འཇིག་རྟེན་གྱི་ཁམས་དེ་ན་ཚུལ་ཁྲིམས་ལོག་པར་ཞུགས་པའམ། ལྟ་བ་ལོག་པར་ཞུགས་པ་འམ། ཆོ་ག་ལོག་པར་ཞུགས་པ་འམ། འཚོ་བ་ལོག་པར་ཞུགས་པའི་སེམས་ཅན་འགའ་ཡང་མེད་པར་འགྱུར་རོ། །སེམས་ཅན་དེ་དག་ཐམས་ཅད་ནི་ནན་ཏན་དང་ལྡན་པ་སྟེ། སངས་རྒྱས་ཀྱི་ཆོས་རྣམས་ལ་བརྩོན་འགྲུས་བརྩམས་པར་འགྱུར་བ་ཤ་སྟག་གོ། །སངས་རྒྱས་ཀྱི་ཞིང་དེ་ན་བདུད་དམ། བདུད་ཀྱི་རིས་ཀྱི་ལྷའམ། གཞན་མུ་སྟེགས་ཅན་སྤྱོད་པ་ཅན་དང ། ཀུན་དུ་རྒྱུ་དང་དམིགས་པའི་ལྟ་བ་ལ་མངོན་པར་ཞེན་པ་དང ། ཕ་རོལ་རྒོལ་བ་མེད་པར་འགྱུར་རོ། །སེམས་ཅན་དེ་དག་ཐམས་ཅད་ནི་ཟབ་མོའི་སྤྱོད་ཡུལ་སྟོང་པ་ཉིད་ཀྱི་ཕྱག་རྒྱས་བཏབ་པར་འགྱུར་རོ། །འཇིག་རྟེན་གྱི་ཁམས་དེ་ནི
53.337a
མིང་དུ་བཏགས་པ་ཙམ་དང ། འདུ་ཤེས་ཙམ་མ་གཏོགས་པར་ལྷ་དང་མི་ཞེས་ཐ་དད་དུ་བྱ་བ་མེད་པར་འགྱུར་རོ། །སེམས་ཅན་དེ་དག་ཐམས་ཅད་ནི་ཡོངས་སུ་སྤྱད་པ་མཚུངས་པར་འགྱུར་རོ། །ཀུན་དགའ་བོ་བཅོམ་ལྡན་འདས་ཡོན་ཏན་གྱི་རྒྱལ་པོར་སྣང་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ཡང་ལྷ་དང ། མི་རྣམས་ཀྱི་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བའི་ཕྱིར་བར་གྱི་བསྐལ་པ་བཅུ་ཐམ་པར་བཞུགས་པར་འགྱུར་རོ། །བཅོམ་ལྡན་འདས་ཡོན་ཏན་གྱི་རྒྱལ་པོར་སྣང་བ་དེ་བཞིན་གཤེགས་པ་དེ་གང་གི་ཚེ་ཡོངས་སུ་མྱ་ངན་ལས་འདས་པར་བཞེད་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་འབར་བ་འདི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བཀོད་པ་ཆེན་པོ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་འགྱུར་རོ་ཞེས་བྱང་ཆུབ་སེམས་དཔའ་བརྩོན་འགྲུས་འབར་བ་ཞེས་བྱ་བ་ལུང་བསྟན་ནས་མྱ་ངན་ལས་འདའ་བར་འགྱུར་རོ། །ཀུན་དགའ་བོ་བར་གྱི་བསྐལ་པ་དེ་ཡང་སངས་རྒྱས་དཀོན་མཆོག་དང་ཆོས་དཀོན་མཆོག་དང་དགེ་འདུན་དཀོན་མཆོག་དང་མི་འབྲེལ་བར་འགྱུར་ཏེ། བར་གྱི་བསྐལ་པ་དེ་ནི་དཀོན་མཆོག་འབྱུང་བ་ཞེས་བརྗོད་དོ། །དེ་ནས་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ལས་ལུང་བསྟན་པ་ཐོས་ནས་དགའ་ཞིང་མགུ་སྟེ། ཡི་རངས་ཤིང་རབ་ཏུ་དགའ་ནས། དགའ་བ་དང ། ཡིད་བདེ་བ
53.337b
སྐྱེས་ཏེ། བྱང་ཆུབ་སེམས་དཔའི་དགའ་བ་དང ། མཆོག་ཏུ་དགའ་བའི་ཤུགས་ཀྱིས་ས་ལས་སྟེང་གི་བར་སྣང་ལས་ཤིང་ཏ་ལ་བདུན་ཙམ་དུ་འཕགས་ཏེ། ཐམས་ཅད་དང་ལྡན་པའི་འཁོར་དད་པ་རྒྱ་ཆེར་སྤེལ་བ་དང ། དགེ་བའི་རྩ་བ་ཡང་དག་པར་བསྐྱེད་པའི་ཕྱིར་སངས་རྒྱས་ཀྱི་མཐུ་དང ། རང་གི་ཤེས་རབ་ཀྱི་སྤོབས་པས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆོས་འདི་ཐམས་ཅད་རབ་ཏུ་དབེན་པ་དང ། །དྲི་མ་མེད་དེ་ནམ་མཁའི་ངོ་བོ་ཉིད། །རྒྱུད་ཀྱི་དམ་པ་འདི་ནི་རྣམ་ཤེས་ན། །དེ་ཕྱིར་དེ་དག་ཐུབ་སྲས་ཐུ་བོར་འགྱུར། །རྨི་ལམ་བཞིན་དུ་མཐོང་བ་ཅུང་ཟད་མེད། །ཐམས་ཅད་མེད་དེ་གཟུང་མེད་གསོག་དང་གསོབ། །ཆོས་རྣམས་ཐམས་ཅད་རྨི་ལམ་འདྲར་ཤེས་ནས། །འདུས་བྱས་དག་ལ་སྐྱོ་བར་འགྱུར་བ་མེད། །ལ་ལས་སྒྱུ་མའི་རྟ་དང་གླང་ཆེན་དང ། །ཤིང་རྟ་དཔུང་བུ་ཆུང་དང་བཞོན་མཐོང་བ། །དམ་པའི་དོན་དུ་སྙིང་པོ་མེད་པ་ལྟར། །ཕུང་པོ་འདི་དག་སྒྱུ་འདྲ་སྙིང་པོ་མེད། །གཟུགས་ཀྱི་རང་བཞིན་དབུ་བ་རྡོས་པ་བཞིན། །ཚོར་བ་འདི་ནི་ཆུའི་ཆུ་བུར་འདྲ། །འདུ་ཤེས་དག་ནི་སྨིག་རྒྱུ་འདྲ་བར་གསུངས། །འདུས་བྱས་ཐམས་ཅད་ཆུ་ཤིང་སྙིང་པོ་མེད། །སྲིད་གསུམ་འདི་ནི་སེམས་ཡིད་རྣམ་པར་ཤེས། །རྒྱལ་བས་དེ་བཞིན་སྒྱུ་འདྲ་གསོག་ཏུ་གསུངས། །གཟུགས་ཀྱི་རང་བཞིན་སྟོང་པར་རིག་ནས་ནི། །འདུས་བྱས་དག་ལ་ནམ་ཡང་སྐྱོ་བ་མེད། །ཁམས་བཞི་པོ་ནི་ཆོས་ཀྱི་དབྱིངས་འདྲ་དང ། །སྐྱེ་མཆེད་རྣམས་ནི་གྲོང་སྟོང་ལྟ་བུ་དང ། །ཆོས་འདི་གསོག་དང་གསོབ་ལྟར་རྣམ་ཤེས་པ། །དེ་དག་རྒྱལ་བའི་ཆོས་མཛོད་འཛིན་པ་ཡིན། །རབ་ཏུ་དུལ་ཕྱིར་སྦྱིན་དང་དུལ་བ་དང ། །དེ་བཞིན་ཚུལ་ཁྲིམས་རྣམ་དག་ཚུལ་ཁྲིམས་དང ། །རྟག་ཏུ་འཕགས་པའི་ཚུལ་གྱིས་བཟོད་མི་ཟད། །སྟོང་པ་ཉིད་ཕྱིར་བརྩོན་འགྲུས་རྣམ་པར་དག་།བསམ་གཏན་རང་བཞིན་འགྱུར་བ་མེད་པ་དང ། །
53.338a
དེ་ལྟར་ཤེས་རབ་ཆགས་མེད་མ་སྤྲོས་པར། །གང་གི་འཇུག་པ་དེ་འདྲར་གྱུར་པ་དེ། །ཕ་རོལ་ཕྱིན་པའི་ཕ་རོལ་རབ་ཏུ་ཕྱིན། །བདག་མེད་ཁོ་ན་ཉིད་ཕྱིར་བྱམས་པ་མཉམ། །ནམ་མཁའ་ལྟ་བུར་གོང་དུ་སྙིང་རྗེ་དག་།ཞི་ཕྱིར་དགའ་དང་བཏང་སྙོམས་བཅས་པ་ཡི། །ལམ་འདི་ཚངས་པའི་ལམ་སྟེ་རྟག་ཏུ་ཞི། །བསྡུ་བ་བཞི་པོ་ཁྱད་པར་འཕགས་པ་འདི། །རྣམ་པར་འདྲེན་པས་རྗེས་སུ་གཟུང་ཕྱིར་གསུངས། །འཛིན་པ་མེད་ཅིང་རྣམ་རྟོག་གང་མེད་པ། །དེ་ནི་བསྡུ་བའི་དངོས་པོའི་ཕ་རོལ་ཕྱིན། །སེམས་ཅན་འདི་དག་བདག་མེད་སེམས་ཅན་མེད། །སྲོག་དང་གསོ་བ་གང་ཟག་མི་རྙེད་དོ། །དབང་པོ་དྲུག་འདི་སྟོང་སྟེ་རབ་ཞི་བར། །གང་ཤེས་དེ་ནི་བྱང་ཆུབ་སེམས་དཔའ་ཡིན། །སེམས་ཅན་མེད་ཅིང་བྱང་ཆུབ་སེམས་དཔའ་མེད། །དེ་ནི་གང་དུའང་བདག་མེད་རློམ་སེམས་མེད། །གཉིས་དང་བྲལ་ཞིང་མ་ཆགས་སྤྲོས་མེད་པ། །སེམས་ཅན་བྱང་ཆུབ་སེམས་དཔའ་དེ་དཔལ་ལྡན། །ཆོས་འདི་སྙིང་པོ་མེད་དེ་སྒྱུ་མ་འདྲ། །གང་དུའང་མི་འོང་ནམ་ཡང་འགྲོར་མི་འགྱུར། །ཆོས་དབྱིངས་འདིའི་གནས་པ་རིག་ནས་ནི། །རྒྱལ་བས་དེ་བཞིན་ཉིད་ནི་མཉམ་སངས་རྒྱས། །གང་ནའང་ཡོད་པ་འམ་མེད་པ་མེད་མོད་ཀྱི། །རྒྱུ་ལ་བརྟེན་ནས་ཆོས་རྣམས་འབྱུང་བས་ན། །མཁའ་ལ་གློག་མཐོང་འཇིག་པ་ལྟ་བུར་ནི། །སེམས་ཀྱི་འཁྲི་ཤིང་དེ་ལྟར་ཤེས་པར་བྱ། །རླུང་ནི་ནམ་མཁར་མི་ཆགས་རྒྱུ་བ་བཞིན། །གཟུགས་མེད་སེམས་ནི་འདུས་བྱས་དག་ལ་རྒྱུ། །སེམས་ཀྱི་རང་བཞིན་རྣམ་དག་དེ་ཤེས་ནས། །ཉོན་མོངས་གཟུགས་མེད་སོགས་པར་མི་འགྱུར་རོ། །ལུས་ནི་བརྩིག་པ་རྩཝ་དང་ལོ་མ་འདྲ། །བླུན་པ་རྗེ་མེད་རྡོ་ཤིང་ངན་པ་ལྟར། །དེ་ཡིས་སྔ་མའི་རང་བཞིན་འདྲར་ཤེས་ནས། །ལུས་ཀྱི་ཆོས་ལ་གནས་པར་མི་བྱེད་དོ། །ཚིག་ནི་རྟག་ཏུ་གཟུང་མེད་རླུང་དང་འདྲ། །
53.338b
རི་དང་བྲག་གི་བྲག་ཆ་ལྟ་བུ་སྟེ། །དེ་འདྲར་སྒྲ་ནི་རབ་ཏུ་དབེན་ཤེས་པ། །སྒྲ་རྣམས་ཀུན་ལ་འདོད་པའི་ཆགས་པ་མེད། །བདག་ནི་ནམ་མཁའི་ངོས་གནས་མི་ལྟུང་སྟེ། །མཁའ་ལས་ལྟུང་བའི་གནས་ཀྱིང་ཡོད་མ་ཡིན། །ཆོས་འདི་ནམ་མཁའ་འདྲ་བར་བསྒོམས་ནས་ནི། །དེ་ལྟར་སེམས་ཅན་སེམས་ཅན་མེད་མཚུངས་གནས། །བསྐལ་པ་བརྒྱ་ཕྲག་མང་པོར་བསྲེགས་ཀྱང་ནི། །ཇི་ལྟར་ནམ་མཁའ་ནམ་ཡང་སྔོན་མ་ཚིག་།ཆོས་རྣམས་ཐམས་ཅད་ནམ་མཁར་འདྲར་ཤེས་པ། །དེ་སྲེག་བསྐལ་ཆེ་ཞིང་རྣམས་བརྒྱར་ཡང་འགྲོ། །རི་དང་རི་བར་ཁོ་ར་ཁོར་ཡུག་རི། །དེ་བཞིན་རི་དང་བཅས་པའི་ས་རྣམས་ཀུན། །ནམ་མཁའི་ངོས་ཀྱིས་ཕྱེ་བར་རིག་ནས་དེ། །རྫུ་འཕྲུལ་སྟོབས་ཀྱིས་བྱེ་བའི་ཞིང་དུ་འགྲོ། །ས་དང་ཆུ་དང་མེ་དང་རླུང་དག་དང ། །ཁམས་བཞི་འདི་དག་ནམ་མཁའི་ངོས་མཉམ་པར། །དཔའ་བོ་ཚུལ་འདི་ཁོང་དུ་ཆུད་པ་དག་།མཁའ་ལས་བྱེ་བ་མཐའ་ཡས་ཞིང་དུ་འགྲོ། །སྲིད་པ་གསུམ་ན་སྒྲ་དང་སྐད་ཀྱི་བག་།བཟང་ངན་དེ་བཞིན་འབྲིང་པོ་ཅི་ཡོད་པ། །དེའི་མཐའ་མ་བསྐལ་པ་བརྒྱར་བརྗོད་ཀྱང ། །སྔོན་གྱི་རང་བཞིན་མི་སྣང་རྒྱུ་བ་མེད། །རང་བྱུང་བ་ནི་མཚན་མཆོག་མ་ཡིན་ཡང ། །སེམས་ཀྱི་ཆོས་ཀྱིས་གཟུགས་ཀྱིས་རབ་ཏུ་ཕྱེ། །སེམས་དང་ཡིད་ནི་མཚུངས་པ་དབེན་པར་གྱུར། །རྒྱལ་བ་ཐམས་ཅད་ཆོས་མཚུངས་ཉིད་ཕྱིར་མཉམ། །སྔོན་གྱི་སྲིད་པར་བྱང་ཆུབ་སྤྱད་སྤྱོད་ཅིང ། །དགེ་བ་བརྒྱ་སྟོང་རབ་ཏུ་བསགས་ནས་ནི། །བྱང་ཆུབ་མཉམ་ཞིང་མཉམ་པར་རབ་ཤེས་པ། །གྲགས་པ་ཆེན་པོ་རྣམས་ནི་ལུང་བསྟན་འགྱུར། །ཆོས་རྣམས་ཀུན་ནི་རང་ཡུལ་ཡོངས་དག་སྟེ། །མཐའ་ཡས་ཕྱིར་ནི་རྒྱལ་བའི་ཡུལ་དུ་མཉམ། །མཉམ་ཉིད་འདི་དག་གང་གིས་རབ་ཤེས་པ། །ཡོན་ཏན་ལྡན་པ་དེ་དག་ལུང་བསྟན་འགྱུར། །བདག་ནི་གཟུགས
53.339a
མིན་ཚོར་མིན་འདུ་ཤེས་མིན། །སེམས་དཔའ་མ་ཡིན་རྣམ་པར་ཤེས་མེད་ཀྱང ། །བྱང་ཆུབ་ཁོང་དུ་ཆུད་པས་བདག་ལུང་བསྟན། །ཕུང་པོ་ཁམས་ཀྱིས་བདག་ནི་ལུང་མ་བསྟན། །བཟོད་པ་གང་ཞིག་གཟོད་མ་ནས་ཞི་ཡི། །སྐད་ཅིག་པ་ནི་ཟད་དང་འདྲ་མིན་ལ། །མཚུངས་མེད་མི་སྐྱེ་བ་ལ་བཟོད་པ་ན། །མི་དབང་འགྱུར་ཞེས་རྒྱལ་བས་ལུང་བསྟན་ཏོ། །ཆོས་རྣམས་ཀུན་དང་བདག་ཏུ་རང་བཞིན་མཉམ། །བདག་ནི་བདག་མེད་སྟོང་པའི་རང་བཞིན་ཏེ། །སྟོང་པ་ནམ་མཁའ་འདྲ་བའི་ངོ་བོ་ཉིད། །བྱང་ཆུབ་རྟག་ཏུ་མཁའ་མཉམ་རང་བཞིན་ནོ། །ཟད་པར་བྱ་ཕྱིར་ཟད་པ་ཤེས་མི་ནུས། །མི་ཟད་པ་ནི་ཟད་པས་ཟད་མི་འགྱུར། །ཟད་པའི་སྒོ་ཡིས་ཆོས་རྣམས་ཀུན་མ་སྐྱེས། །བཟོད་དང་ལྡན་ལ་སངས་རྒྱས་ལུང་སྟོན་ཏོ། །མཚན་མེད་གནས་འཇུག་པའི་གནས་མེད་དེ། །ཡང་དག་འདུས་མ་བྱས་པ་དུས་ལས་གྲོལ། །མ་བྱས་བྱེད་དུ་མ་བཅུག་བྱུང་བ་མིན། །དེ་བཞིན་ཉིད་འདྲར་རྒྱལ་བས་བདག་ལུང་བསྟན། །གལ་ཏེ་བདག་ནི་ལུང་བསྟན་འགྱུར་སྙམ་ན། །ཆོས་ལམ་ཚུལ་ལ་མི་མཉམ་སྦྱོར་བ་ཡིན། །སེམས་དང་ཡིད་ཀྱིས་སྦྱོར་བ་སྦྱོར་མ་ཡིན། །ཆོས་སྦྱོར་ཁྱད་པར་འཕགས་འདི་མཚུངས་ཤིང་མཉམ། །ཁྱེད་ཅག་ཐམས་ཅད་སའི་སྟེང་ན་འཁོད། །བདག་ནི་ནམ་མཁའི་དཀྱིལ་ན་རྣམ་པར་གནས། །ས་དང་ནམ་མཁའ་མཉམ་པར་ཤེས་ནས་ནི། །སྲིད་པ་གསུམ་ན་ཆགས་མེད་ཡེ་ཤེས་འཇུག་།དེ་ནས་མི་འམ་ཅིའི་རྒྱལ་པོ་སྡོང་པོས་ཚིགས་སུ་བཅད་པ་འདི་དག་སྨྲས་ནས་སྟེང་གི་བར་སྣང་ལས་བབས་ཏེ་ཐལ་མོ་སྦྱར་ནས་བཅོམ་ལྡན་འདས་ལ་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་ནི་བདག་གི་ཆེད་དུ་བྱུང་ངོ ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདག་སྔོན
53.339b
བྱང་ཆུབ་སེམས་དཔའི་སྤྱོད་པ་དོན་མ་མཆིས་པར་མ་བགྱིས་ཏེ། སྔོན་གྱི་དགེ་བའི་རྩ་བ་རྣམས་ཀྱིས་བདག་མ་བསླུས་པས་བཅོམ་ལྡན་འདས་ཀྱིས་བདག་གི་བསམ་པ་ཐམས་ཅད་ཡོངས་སུ་བསྐང་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་འཁོར་དེའི་ནང་ན་བྱང་ཆུབ་སེམས་དཔའ་ཁ་ཅིག་འདི་ལྟ་བུའི་སེམས་བསྐྱེད་དེ། མི་འམ་ཅིའི་རྒྱལ་པོ་སྡོང་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ལས་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ་སྙམ་མོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་བྱང་ཆུབ་སེམས་དཔའ་དེ་དག་གི་སེམས་ཀྱི་རྣམ་པར་རྟོག་པ་སེམས་ཀྱིས་ཤེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མི་འམ་ཅིའི་རྒྱལ་པོ་སྡོང་པོས་དེ་བཞིན་གཤེགས་པ་གང་ལས་བྱང་ཆུབ་ཏུ་སེམས་བསྐྱེད་པའི་དེ་བཞིན་གཤེགས་པ་དེའི་མཚན་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སྔོན་བྱུང་བ་འདས་པའི་དུས་བསྐལ་པ་གྲངས་མེད་པའི་ཡང་ཆེས་གྲངས་མེད་པ། རྒྱས་པ། ཚད་མེད་པ། བསམ་གྱིས་མི་ཁྱབ་པར་གྱུར་པ་དེའི་ཚེ་དེའི་དུས་ན་རྣམ་པར་དག་པ་ཞེས་བྱ་བའི་བསྐལ་པ་ལ་འཇིག་རྟེན་གྱི་ཁམས་དགེ་བ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་རིན་ཆེན་ཕུང་པོ་ཞེས་བྱ་བ་འིཇིག་རྟེན་དུ་བྱུང་ངོ ། །རིགས་ཀྱི་བུ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ
53.340a
བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་ཕུང་པོ་དེའི་བྱང་ཆུབ་སེམས་དཔའི་དགེ་འདུན་ནི་བྱེ་བ་ཕྲག་དྲུག་བཅུར་གྱུར་ཏེ། ཐམས་ཅད་ཀྱང་བརྩོན་འགྲུས་བརྩམས་པ། བཟོད་པ་རབ་ཏུ་ཐོབ་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤ་སྟག་གོ། །དེའི་ཚེའི་ཚད་ནི་ལོ་བྱེ་བ་ཕྲག་དྲུག་བཅུ་ཐུབ་པར་གྱུར་ཏོ། །དགེ་བ་ཞེས་བྱ་བའི་འཇིག་རྟེན་གྱི་ཁམས་དེ་ཡང་བཻ་དཱུརྱ་ལས་གྲུབ་པ། རྒྱན་ཐམས་ཅད་ཀྱིས་བརྒྱན་པ། རྣམ་པའི་མཆོག་ཐམས་ཅད་དང་ལྡན་པ་དགའ་ལྡན་གྱི་ལྷའི་རིས་ལྟ་བུར་ཁང་ཁྱིམ་དང ། ལོངས་སྤྱོད་དང ། ཉེ་བར་སྤྱོད་པ་དང ། བཟའ་བ་དང ། བཏུང་བ་བསམས་པ་ཙམ་གྱིས་འབྱོར་པའོ། །སངས་རྒྱས་ཀྱི་ཞིང་དེ་ན་ཐེག་པ་ཆེན་པོ་མ་གཏོགས་པར་ཐེག་པ་གཞན་རྣམ་པར་གཞག་པ་མེད་པར་གྱུར་ཏོ། །རིགས་ཀྱི་བུ་དེའི་ཚེ་དེའི་དུས་ན་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོ་ས་འཛིན་ཅེས་བྱ་བ་རིན་པོ་ཆེ་སྣ་བདུན་དང་ལྡན་པ་ཞིག་བྱུང་སྟེ། དེའི་སླས་ནི་སྟོང་ཕྲག་བཞི་བཅུ་ཡོད་དོ། །དེའི་བུ་ནི་སྟོང་ཐམ་པ་ཡོད་དེ། དཔའ་བ་བརྟུལ་ཕོད་པ། ཡན་ལག་མཆོག་གི་གཟུགས་ཅན་ཕ་རོལ་གྱི་སྡེ་རབ་ཏུ་འཇོམ་པ་ཤ་སྟག་གོ། །རིགས་ཀྱི་བུ་རྒྱལ་པོ་ས་འཛིན་དེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་དང ། བྱང་ཆུབ་སེམས་དཔའ་བྱེ་བ་ཕྲག་དྲུག་བཅུ་ལ་ལོ་བྱེ་བ་ཐམ་པར་ཡིད་དུ་འོང་བའི་ཆོས་གོས་དང ། ཞལ་ཟས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་དང ། བདེ་བར་སྦྱར་བ་བདེ་བ་ལ་རེག་པར་གནས་པར་བྱ་བ་ཐམས་ཅད་ཀྱིས་བསྙེན་བཀུར་བྱས་ནས་དེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་ལ་མཆོད་པ་དཔག་ཏུ་མེད་པ་བྱས་ཏེ། དགེ་བའི་རྩ་བས་ཉེ་བར་བརྟན་ནས་བུད་མེད་བཞི་སྟོང་པོ་དེ་དག་དང ། བུ་སྟོང་པོ་དེ་དག
53.340b
དང ། སྲོག་ཆགས་བརྒྱད་ཁྲི་བཞི་སྟོང་དང་ལྷན་ཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེས་བྱང་ཆུབ་ཏུ་སེམས་བསྐྱེད་ནས་ཀྱང་ལོ་བྱེ་བར་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་ལ་བསྙེན་བཀུར་བྱས་སོ། །དེ་དུས་གཞན་ཞིག་ན་བུ་ཐུ་བོ་བརྟུལ་ཞུགས་ཡོངས་སུ་དག་པ་ཞེས་བྱ་བ་རྒྱལ་པོར་བཅུག་ནས་རྒྱལ་སྲིད་ཐམས་ཅད་བོར་ཏེ། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་བཅོམ་ལྡན་འདས་དེའི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་ན་རྒྱལ་པོའི་བུ་དེ་དག་གིས་ཀྱང་རིམ་གྱིས་བུ་ཐུ་བོ་རེ་རེ་རྒྱལ་པོར་བཅུག་ནས་ཕའི་རྗེས་སུ་རབ་ཏུ་བྱུང་བར་གྱུར་ཏོ། །རིགས་ཀྱི་བུ་དེ་ལྟར་ན་རྣམ་གྲངས་འདིས་དེ་བཞིན་གཤེགས་པ་དེའི་ཚེའི་ཚད་རིང་བར་གྱུར་ཏོ། །རྒྱལ་པོ་གཞོན་ནུ་དེ་དག་ཐམས་ཅད་དེ་བཞིན་གཤེགས་པ་དེ་ལས་རབ་ཏུ་བྱུང་ནས་རྒྱལ་བུ་གཞོན་ནུ་ཐ་ཆུང་སྙིང་རྗེའི་བློ་ཞེས་བྱ་བ་གཅིག་པུ་མ་གཏོགས་ཏེ། དེ་ནི་ཆོས་ཀྱིས་རྒྱལ་སྲིད་བྱེད་པ་ཆད་པ་མེད་པ་དང ། མཚོན་ཆ་མེད་པར་ཆོས་དང་འཐུན་པར་དབང་བྱེད་དུ་བཅུག་གོ། །རིགས་ཀྱི་བུ་དེ་ལྟར་རྒྱལ་པོ་ས་འཛིན་དེ་བུ་དང་བཅས་པར་བཅོམ་ལྡན་འདས་དེའི་བསྟན་པ་ལ་རབ་ཏུ་བྱུང་ནས་ཐོག་མ་དང་བར་མ་དང་ཐ་མར་དེ་བཞིན་གཤེགས་པ་རིན་ཆེན་ཕུང་པོ་དེའི་དམ་པའི་ཆོས་རབ་ཏུ་བཟུང་ངོ ། །རིགས་ཀྱི་བུ་དེའི་ཚེ་དེའི་དུས་ན་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོ་ས་འཛིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཙོམ་ཟ་འམ་ཡིད་གཉིས་སུ་གྱུར་པ་ལྟ་ན་རིགས་ཀྱི་བུ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། མི་འམ་ཅིའི་རྒྱལ་པོ་སྡོང་པོ་འདི་དེའི་ཚེ་དེའི་དུས་ན་རྒྱལ་པོ་ས་འཛིན་ཞེས་བྱ་བར་གྱུར་ཏོ། །རྒྱལ་པོ་དེའི་བུར
53.341a
གྱུར་པ་དེ་དག་ཐམས་ཅད་ནི་དེ་ལྟར་ཕྱོགས་བཅུ་ན་བྱང་ཆུབ་སེམས་དཔའི་སྤྱད་པ་སྤྱོད་དོ། །རིགས་ཀྱི་བུ་དེ་ལྟར་ན་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དང་པོ་སེམས་བསྐྱེད་ཚུན་ཆད། དའི་བར་ཐམས་ཅད་དུ་སངས་རྒྱས་མཐོང་བ་དང་ཆོས་ཉན་པ་དང་དགེ་འདུན་ལ་རིམ་གྲོ་བྱེད་པ་དང་མ་བྲལ་བར་གྱུར་ཏོ། །འདིས་ཡང་དག་པར་རྫོགས་པའི་བྱང་ཆུབ་ཀྱི་ཚོགས་ཀྱང་མྱུར་དུ་ཡང་དག་པར་བསྒྲུབས་པས་འདི་ལ་ངས་འདི་ནི་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་གྱི་རྒྱལ་པོ་ཞེས་བྱ་བར་འགྱུར་རོ་ཞེས་ལུང་ཡང་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐོགས་པ་མི་མངའ་བའི་མཁྱེན་པ་དང་ལྡན་པས་འདི་ལྟར་དགེ་བའི་རྩ་བ་མངོན་པར་འདུས་བགྱིས་པའི་རྒྱུ་བ་ནས་ཡུན་རིང་དུ་ལགས་པ་ཡང་བཅོམ་ལྡན་འདས་ཀྱིས་སྒྲིབ་པ་མི་མངའ་བའི་མཁྱེན་པས་གཟིགས་པ་ནི་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཐོགས་པ་མེད་པའི་ཡེ་ཤེས་མཐོང་བ་དང་ལྡན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ་གང་སེམས་ཅན་ཐམས་ཅད་ཀྱི་འདས་པའི་སེམས་ཀྱི་རྒྱུ་ཟད་པ། འགགས་པ།
53.341b
བྲལ་བ། རྣམ་པར་གྱུར་པ། རྒྱུ་གང་དག་ལས་སེམས་ཀྱི་རྒྱུད་དེ་དག་བྱུང་བ་དང ། རྒྱུ་གང་དག་མེད་པས་ཟད་པ། དགེ་བ་འམ། མི་དགེ་བ་འམ། ལུང་དུ་བསྟན་པ་འམ། ལུང་དུ་མ་བསྟན་པ་དེ་དག་ཐམས་ཅད་རྣམ་པ་དང་བཅས། གཞི་དང་བཅས། གཏན་ཚིགས་དང་བཅས་པར་དེ་བཞིན་གཤེགས་པས་རབ་ཏུ་ཤེས་སོ། །ད་ལྟར་བྱུང་བའི་དུས་ཀྱི་སེམས་ཅན་ཐམས་ཅད་ཀྱི་སེམས་ཀྱི་རྒྱུད་བྱུང་བ་དགེ་བ་འམ། མི་དགེ་བ་འམ། ལུང་དུ་བསྟན་པ་འམ། ལུང་དུ་མ་བསྟན་པ་ཡང་རུང་སྟེ། སེམས་རང་གི་འོག་ཏུ་སེམས་གང་བྱུང་བ་དེ་དག་ཐམས་ཅད་ཀྱང་རྣམ་པ་དང་བཅས། གཞི་དང་བཅས། གཏན་ཚིགས་དང་བཅས་པར་དེ་བཞིན་གཤེགས་པས་རབ་ཏུ་ཤེས་སོ། །གང་མ་འོངས་པའི་སེམས་ཅན་ཐམས་ཅད་ཀྱི་སེམས་ཀྱི་རྒྱུད་དང་སེམས་ལས་བྱུང་བའི་ཆོས་དགེ་བ་འམ། མི་དགེ་བ་འམ། ལུང་དུ་བསྟན་པ་འམ། ལུང་དུ་མ་བསྟན་པ་ཡང་རུང་སྟེ། སེམས་གང་གི་འོག་ཏུ་སེམས་གང་འབྱུང་བར་འགྱུར་བ་དེ་དག་ཐམས་ཅད་ཀྱང་རྣམ་པ་དང་བཅས། གཞི་དང་བཅས་པ། གཏན་ཚིགས་དང་བཅས་པར་དེ་བཞིན་གཤེགས་པས་རབ་ཏུ་ཤེས་སོ། །རིགས་ཀྱི་བུ་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཐོགས་པ་མེད་པའི་ཡེ་ཤེས་དང་ལྡན་ནོ། །དེ་བཞིན་གཤེགས་པའི་མཁྱེན་པ་ཐོགས་པ་མི་མངའ་བ་བསྟན་པ་འདི་བཤད་པ་ན་སྲོག་ཆགས་སུམ་འབུམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་བྱང་ཆུབ་སེམས་དཔའ་དང་ཉན་ཐོས་ཀྱི་དགེ་འདུན་གྱི་འཁོར་དང་བཅས་པ་ལ་ཞག་བདུན་བདེ་བར་སྦྱར་བ་ཐམས་ཅད་ཀྱིས་བསྙེན་བཀུར་བྱས་ནས་ཡོངས་སུ
53.342a
ལོངས་སྤྱད་པར་བྱ་བའི་ཕྱིར་རང་གི་ཁང་ཁྱིམ་དང ། འཁོར་གྱི་ཁྱམས་དེ་ཡང་བཅོམ་ལྡན་འདས་ལ་ཕུལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་རྟག་ཏུ་འདིར་གཤེགས་ཤིང་བཞུགས་པར་གསོལ། དེས་ན་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོའི་ཚོགས་ཕལ་པོ་ཆེའི་དོན་དང ། མི་འམ་ཅི་དང ། དྲི་ཟ་དང ། ལྟོ་འཕྱེ་ཆེན་པོ་རྣམས་ལ་ཕན་པ་དང་བདེ་བར་འགྱུར་རོ། །དེ་ནས་མི་འམ་ཅིའི་རྒྱལ་པོ་སྡོང་པོའི་བུ་དྲི་མ་མེད་པའི་མིག་ཅེས་བྱ་བས་བཅོམ་ལྡན་འདས་ལ་ནོར་བུ་རིན་པོ་ཆེའི་དྲ་བ་ཕུལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མི་འམ་ཅི་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་སུ་ལགས་ཀྱང་བདག་ཅག་ནི་སིལ་སྙན་དང་རོལ་མོའི་དབྱངས་སྒྲ་དང ། གླུ་དང་གར་ལ་རབ་ཏུ་ཆགས། མེ་ཏོག་དང་སྤོས་དང་བདུག་པ་དང་བྱུག་པ་དང ། ཕྱེ་མ་ལ་བག་མ་མཆིས་པར་དགའ་ཞིང་རྩེ་བ་ལགས་ན་ཇི་ལྟར་བདག་ཅག་བག་མཆིས་པར་འགྱུར་ཞིང ། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་བསྒྲུབ་པར་འགྱུར་བ་དེ་ལྟ་བུའི་ཆོས་རིན་པོ་ཆེའི་ཕྱག་རྒྱའི་སྒོའི་གདམས་ངག་བཅོམ་ལྡན་འདས་ཀྱིས་བདག་ཅག་ལ་སྩལ་བར་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་མི་འམ་ཅིའི་རྒྱལ་པོའི་བུ་དྲི་མ་མེད་པའི་མིག་ལ་འདི་སྐད་ཅེས་བཀའ་སྩལ་ཏོ། །བཞིན་བཟངས་དག་དེའི་ཕྱིར་དེང་ཕྱིན་ཅད་སིལ་སྙན་དང་གླུ་དབྱངས་དེ་དག་ལས་བྱང་ཆུབ་ཡོངས་སུ་སྨིན་པར་བྱེད་པའི་ཆོས་དྲུག་བཅུ་རྩ་བཞི་འབྱུང་བར་ཁྱེད་ལ་བྱིན་གྱིས
53.342b
བརླབ་པར་བྱའོ། །དྲུག་བཅུ་རྩ་བཞི་གང་ཞེ་ན། འདི་ལྟ་སྟེ། མི་རྟག་པའི་སྒྲ་འབྱུང་བ་དང ། སྡུག་བསྔལ་གྱི་སྒྲ་དང ། བདག་མེད་པའི་སྒྲ་དང ། ཞི་བའི་སྒྲ་དང ། མངོན་པར་འདུ་མི་བྱེད་པའི་སྒྲ་དང ། དབེན་པའི་སྒྲ་དང ། མི་སྐྱེ་བའི་སྒྲ་དང ། དངོས་པོ་མེད་པའི་སྒྲ་དང་འབྱུང་བ་མེད་པའི་སྒྲ་དང ། གནས་མེད་པའི་སྒྲ་དང ། ཇི་ལྟ་བ་བཞིན་གྱི་སྒྲ་དང ། ཡང་དག་པའི་མཐའི་སྒྲ་དང ། ཆོས་ཀྱི་དབྱིངས་ཀྱི་སྒྲ་དང ། སེམས་ཅན་མེད་པའི་སྒྲ་དང ། སྲོག་མེད་པའི་སྒྲ་དང ། གང་ཟག་མེད་པའི་སྒྲ་དང ། སྦྱིན་པའི་སྒྲ་དང ། ཚུལ་ཁྲིམས་ཀྱི་སྒྲ་དང ། བཟོད་པའི་སྒྲ་དང ། བརྩོན་འགྲུས་ཀྱི་སྒྲ་དང ། བསམ་གཏན་གྱི་སྒྲ་དང ། ཤེས་རབ་ཀྱི་སྒྲ་དང ། བྱམས་པའི་སྒྲ་དང ། སྙིང་རྗེའི་སྒྲ་དང ། དགའ་བའི་སྒྲ་དང ། བཏང་སྙོམས་ཀྱི་སྒྲ་དང ། འོང་བ་མེད་པའི་སྒྲ་དང ། འགྲོ་བ་མེད་པའི་སྒྲ་དང ། རྒྱུ་བ་མེད་པའི་སྒྲ་དང ། གནས་མེད་པའི་སྒྲ་དང ། བརྟན་པ་མེད་པའི་སྒྲ་དང ། སྟོང་པ་ཉིད་ཀྱི་སྒྲ་དང ། མཚན་མ་མེད་པའི་སྒྲ་དང ། སྨོན་པ་མེད་པའི་སྒྲ་དང ། འདོད་ཆགས་དང་བྲལ་བའི་སྒྲ་དང ། འབྱུང་བ་མེད་པའི་སྒྲ་དང ། རྟེན་པའི་སྒྲ་དང ། རྟེན་པ་མེད་པའི་སྒྲ་དང ། སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། བྱང་ཆུབ་ཚད་མེད་པའི་སྒྲ་དང ། དྲན་པ་ཉེ་བར་གཞག་པའི་སྒྲ་དང ། ཡང་དག་པར་སྤོང་བའི་སྒྲ་དང ། རྫུ་འཕྲུལ་གྱི་རྐང་པའི་སྒྲ་དང ། དབང་པོའི་སྒྲ་དང ། སྟོབས་ཀྱི་སྒྲ་དང ། བྱང་ཆུབ་ཀྱི་ཡན་ལག་གི་སྒྲ་དང ། ལམ་གྱི་སྒྲ་དང ། ཞི་གནས་ཀྱི་སྒྲ་དང ། ལྷག་མཐོང་གི་སྒྲ་དང ། ཐབས་ཀྱི་སྒྲ་དང ། བསྡུ་བའི་དངོས་པོའི་སྒྲ་དང ། སེམས་ཅན་ཡོངས་སུ་སྨིན་པར་བྱ་བའི་སྒྲ་དང ། བདུད་ཚར་གཅད་པའི་སྒྲ་དང ། དམ
53.343a
པའི་ཆོས་ཡོངས་སུ་གཟུང་བའི་སྒྲ་དང ། ཆོས་ཐམས་ཅད་སྒྱུ་མ་དང ། རྨི་ལམ་དང ། གཟུགས་བརྙན་དང ། ཆུའི་ཟླ་བ་དང ། བྲག་ཆ་ལྟ་བུའི་སྒྲ་དང ། ཆོས་ཀྱི་དབྱིངས་འདྲེས་པ་མེད་པའི་སྒྲ་དང ། འཁོར་བས་ཡོངས་སུ་མི་སྐྱོ་བའི་སྒྲ་དང ། འབྱུང་བའི་སྒྲ་དང ། དགེ་བའི་རྩ་བའི་ཚོགས་ཐམས་ཅད་ཀྱི་སྒྲ་དང ། དབུ་བ་དང ། ཆུའི་ཆུ་བུར་དང ། སྨིག་རྒྱུ་དང ། ཆུ་ཤིང་གི་ཕུང་པོ་དང ། སྒྱུ་མ་དང ། སྙིང་པོ་མེད་པའི་སྒྲ་དང ། ཇི་སྐད་སྨྲས་པ་དེ་བཞིན་དུ་བྱ་ཞིང་ཆོས་བསྒྲུབ་པའི་སྒྲ་འབྱུང་བར་འགྱུར་རོ། །བཞིན་བཟངས་དག་དེ་ལྟར་ན་སངས་རྒྱས་ཀྱི་མཐུས་སིལ་སྙན་དང་གླུ་དབྱངས་དེ་དག་ལས་གང་གི་ཁྱེད་བག་ཡོད་པར་བྱང་ཆུབ་ཀྱི་ཕྱོགས་ཀྱི་ཆོས་རྣམས་བསྒྲུབ་པར་འགྱུར་བ་དེ་ལྟ་བུའི་སྒྲ་འདི་དག་འབྱུང་བར་འགྱུར་རོ།། །། བམ་པོ་ལྔ་པ་སྟེ་ཐ་མ། དེ་ནས་ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ནས་བཅོམ་ལྡན་འདས་ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་སངས་རྒྱས་བཅོམ་ལྡན་འདས་རྣམས་ཀྱང་བྱང་ཆུབ་འདི་བྱིན་གྱིས་བརླབས་ཀྱིས་ཤིན་དུ་བྱིན་གྱིས་བརླབས་པ་དང ། ཆོས་བསྟན་པ་དང ། ཇི་ཙམ་དུ་དེ་བཞིན་གཤེགས་པས་བྱང་ཆུབ་སེམས་དཔའ་རྣམས་ཤིན་དུ་ཡོངས་སུ་བཟུང་བ་ནི་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། གྲོགས་པོ་དག་ཇི་སྐད་སྨྲས་པ་དེ་བཞིན་ཏེ། དེ་བཞིན་གཤེགས་པས་བྱང་ཆུབ་སེམས་དཔའ་རྣམས་ཤིན་དུ་ཡོངས་སུ་བཟུང་ངོ ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ཡོངས་སུ་བཟུང་བས་སེམས་ཅན་ཐམས་ཅད་ཡོངས་སུ་བཟུང་བར་འགྱུར་རོ། །གྲོགས་པོ་དག་དེ་བཞིན་གཤེགས་པས་བྱང་ཆུབ་སེམས་དཔའ་ཡོངས་སུ་བཟུང་བ་གང
53.343b
ཡིན་པ་དེ་སེམས་ཅན་ཐམས་ཅད་ཀྱི་དོན་ཉིད་དོ། །དེ་ལྟར་ན་སེམས་ཅན་ཀྱི་ཆེད་དུ་དེ་དག་གོ་ཆ་གང་གིས་སེམས་ཅན་ཚད་མེད་གྲངས་མེད་པ་འཁོར་བ་ལས་མྱ་ངན་ལས་འདའ་བའི་ལམ་དུ་གཟུད་པར་འགྱུར་བའི་གོ་ཆ་ཆེན་པོ་གྱོན་ནོ། །གྲོགས་པོ་དག་རྣམ་གྲངས་འདིས་འདི་ལྟ་ང་ད་ལྟར་བཞུགས་ཀྱང་རུང་ཡོངས་སུ་མྱ་ངན་ལས་ཀྱང་རུང་སྟེ། བྱང་ཆུབ་སེམས་དཔའ་རྣམས་ཡོངས་སུ་བཟུང་བ་མཛད་པ་གང་ཡིན་པ་དེས་སེམས་ཅན་ཐམས་ཅད་ཡོངས་སུ་བཟུང་བ་ཡིན་པར་རིག་པར་བྱའོ། །གྲོགས་པོ་དག་བྱང་ཆུབ་སེམས་དཔའ་ལ་ཆོས་གོས་དང ། བསོད་སྙོམས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་ཀྱིས་རིམ་གྲོར་བྱས་པ་ནི་སེམས་ཅན་ཐམས་ཅད་ལ་རིམ་གྲོ་བྱས་པར་འགྱུར་རོ། །གྲོགས་པོ་དག་བྱང་ཆུབ་སེམས་དཔའ་ལ་བདེ་བར་སྦྱར་བ་ཉེ་བར་བསྒྲུབས་པ་ནི་སེམས་ཅན་ཐམས་ཅད་ལ་བདེ་བར་སྦྱར་བ་ཉེ་བར་བསྒྲུབས་པར་འགྱུར་རོ། །དེ་ཅིའི་ཕྱིར་ཞེ་ན། གྲོགས་པོ་དག་ཐ་ན་བྱང་ཆུབ་སེམས་དཔའི་དབུགས་འབྱུང་བ་དང ། རྔུབ་པ་གང་ཡིན་པ་དེ་ཐམས་ཅད་ཀྱང་སེམས་ཅན་ཐམས་ཅད་ལ་སྙིང་རྗེ་ཆེན་པོ་རབ་ཏུ་འཐོབ་པ་དང་ལྡན་པ་དང ། སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཡོངས་སུ་འཛིན་ཏོ། །དེ་ནས་འདོད་པ་ན་སྤྱོད་པ་དང ། གཟུགས་ན་སྤྱོད་པ་དང ། གནས་གཙང་མའི་རིས་ཀྱི་ལྷའི་བུ་དེ་དག་དང ། ཀླུ་དང་གནོད་སྦྱིན་དང་དྲི་ཟ་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། ཐམས་ཅད་དང་ལྡན་པའི་འཁོར་དེ་བཅོམ་ལྡན་འདས་ཀྱིས་ལེགས་པར་གསུངས་པ་ལ་རྗེས་སུ་ཡི་རང་ནས། ལྷའི་མེ་ཏོག་རྣམ་པ་མང་པོ་ཁ་དོག་སྣ་ཚོགས་པས་བཅོམ་ལྡན་འདས་ལ་མངོན་པར་གཏོར་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོས་འདི་སྙམ་དུ་བསམས་ཏེ། བཅོམ་ལྡན་འདས་ཉིད
53.344a
ཀྱི་རྫུ་འཕྲུལ་གྱིས་སམ། གཞན་བྱང་ཆུབ་སེམས་དཔའི་རྫུ་འཕྲུལ་གྱིས་བདག་གི་གནས་ནས། བྱ་རྒོད་ཀྱི་ཕུང་པོའི་རི་ལ་གཤེགས་པ་ནི་བདག་གི་ཆ་མ་ཡིན་གྱིས་བདག་གིས་དེ་བཞིན་གཤེགས་པ་ལ་མཆོད་པའི་ལས་ཀྱི་ཕྱིར་ཤིང་རྟ་གང་ལ་བཅོམ་ལྡན་འདས་བྱང་ཆུབ་སེམས་དཔའི་དགེ་འདུན་དང་བཅས་པ་དང་ཉན་ཐོས་ཀྱི་དགེ་འདུན་དང་བཅས་པར་བཞུགས་པ་དེ་ལྟ་བུའི་ཤིང་རྟ་བཀོད་པ་བསྒྲུབས་ཏེ། ཤིང་རྟ་དེ་ཡང་བདག་འཁོར་དང་བཅས་པས་དྲངས་ནས། དེ་ལྟར་ན་བདག་གིས་དེ་བཞིན་གཤེགས་པ་ལ་མཆོད་པ་བྱས་པར་འགྱུར་སྙམ་མོ། །དེ་ནས་མི་འམ་ཅིའི་རྒྱལ་པོ་སྡོང་པོས་ཡིད་ལས་བྱུང་བ་ལྷའི་རིན་པོ་ཆེ་སྣ་བདུན་གྱི་ཤིང་རྟ་འཕང་དུ་དཔག་ཚད་ལྔ་ཁྱོན་དུ་དཔག་ཚད་ལྔ་པ། ཁ་ཁྱེར་རིན་པོ་ཆེ་སྣ་ཚོགས་ཀྱིས་བསྐོར་བ། ཤིང་སྣ་ཚོགས་ཀྱིས་ལེགས་པར་བརྒྱན་པ། སྟེང་དུ་རིན་པོ་ཆེའི་དྲ་བ་བྲེས་པ། རིན་པོ་ཆེའི་སྐུད་པ་མིག་མངས་རིས་སུ་བྲེས་པ་མངོན་པར་སྤྲུལ་ནས་ཤིང་རྟ་དེ་ལ་བཅོམ་ལྡན་འདིས་ཀྱི་གདན་སེང་གེའི་ཁྲི་བཀྲ་བ་བལྟ་ན་སྡུག་པ། འཕང་དུ་མི་བདུན་ཡོད་པ། རས་བཅོས་མ་ཟུང་བརྒྱ་སྟོང་མང་པོ་བཀྲམ་པ་མངོན་པར་སྤྲུལ། བྱང་ཆུབ་སེམས་དཔའ་ཐམས་ཅད་དང་ཉན་ཐོས་ཀྱི་དགེ་འདུན་ཐམས་ཅད་ཀྱི་སྟན་ཡང་སོ་སོར་མངོན་པར་སྤྲུལ། གང་དག་བཅོམ་ལྡན་འདས་ལ་ཆོས་ཉན་ཞིང་ཞབས་འབྲིང་དུ་འབྲང་བ་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། འདོད་པ་ན་སྤྱོད་པ་དང ། གཟུགས་ན་སྤྱོད་པ་དང ། གནས་གཙང་མའི་རིས་ཀྱི་ལྷའི་བུ་དེ་དག་གི་སྟན་ཡང་ཤིང་རྟ་དེའི་སྟེང་དུ་ཅི་རིགས་པར་སྤྲུལ་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོས་དེ་ལྟ་བུའི་ཤིང་རྟ་བཀོད་པ་དེ་སྤྲུལ་ནས་ཐལ་མོ་སྦྱར་ཏེ།
53.344b
བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་ཤིང་རྟ་འདི་ལ་ཇི་ལྟར་གདན་བཤམས་པ་རྣམས་ལ་འཁོར་ཐམས་ཅད་དང་ཐབས་གཅིག་ཏུ་བཞུགས་སུ་གསོལ། དེ་ནས་སེང་གེའི་ཁྲི་དེ་ལ་བཅོམ་ལྡན་འདས་ཀྱང་བཞུགས། བྱང་ཆུབ་སེམས་དཔའ་དང ། དགེ་སློང་གི་དགེ་འདུན་དང་འཁོར་ཐམས་ཅད་ཀྱང་ཅི་རིགས་པར་འཁོད་དོ། །དེ་ནས་མི་འམ་ཅིའི་རྒྱལ་པོ་སྡོང་པོས་རྫུ་འཕྲུལ་གྱི་སྟོབས་ཀྱིས་ཤིང་རྟ་དེ་ལག་པ་གཡས་པས་བླངས་ཏེ། ཤིང་ཏ་ལ་བདུན་སྲིད་ཀྱི་སྟེང་གི་བར་སྣང་ལ་འཕགས་ནས། དེ་ནས་མི་འམ་ཅི་མོ་བརྒྱད་ཁྲི་བཞི་སྟོང་དེ་དག་ཐམས་ཅད་དང་བུ་བརྒྱད་སྟོང་པོ་དེ་དག་དང་གཞན་ཡང་མི་འམ་ཅི་དང་དྲི་ཟ་དང་ལྟོ་འཕྱེ་ཆེན་པོ་བརྒྱ་སྟོང་ཕྲག་དུ་མ་དང་མི་འམ་ཅིའི་རྒྱལ་པོ་སྡོང་པོ་ཉིད་ཀྱང་རིན་པོ་ཆེའི་ཐག་པ་ཐོགས་ནས་ཤིང་རྟ་ལ་བཏགས་ཏེ་ནམ་མཁའ་ལས་དྲངས་སོ། །དེ་ནས་བཅོམ་ལྡན་འདས་སྟེང་གི་བར་སྣང་གི་ཤིང་རྟ་ལ་བཞུགས་ཤིང ། ནམ་མཁའི་དཀྱིལ་ནས་གཤེགས་པ་ལ་མི་འམ་ཅི་མོ་བརྒྱད་ཁྲི་བཞི་སྟོང་པོ་དེ་དག་གིས་སིལ་སྙན་དང ། གླུ་དབྱངས་བླངས་ནས་མཆོད་པ་བྱེད་དེ། མདུན་དུ་དོང་ཞིང་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །མི་འམ་ཅི་མོ་བརྒྱད་ཁྲི་བཞི་སྟོང་པོ། །གཟུགས་ཀྱི་དམ་པ་དང་ནི་ལྡན་པ་དག་།སིལ་སྙན་རྣམས་ནི་རབ་ཏུ་དཀྲོལ་བགྱིད་ཅིང ། །ཡང་དག་བསྔགས་པས་འདྲེན་ལ་བསྟོད་པ་བགྱིད། །མཚན་མཆོག་བསོད་ནམས་ཀྱིས་ནི་གཟི་བརྗིད་གྱུར། །གཟུགས་མཆོག་མཐོང་ན་དགའ་བར་བགྱིད་པའི་གཟུགས། །བདེན་པའི་ཡོན་ཏན་ལ་ནི་རྟག་གནས་པ། །ཡོན་ཏན་མཚོ་ཆེན་ཁྱོད་ལ་ཕྱག་འཚལ་ལོ། །
53.345a
སྔོན་གྱི་རྒྱལ་བ་རྣམས་དང་ཁྱོད་མི་འདྲ། །གཡས་གཡོན་ན་ཡང་རྣམ་པར་མཐོང་མ་མྱོང ། །ཇི་ལྟར་རི་རབ་བརྟན་ཞིང་མི་གཡོ་བ། །དེ་ལྟར་ཁྱད་ཀྱི་སྐུ་ནི་དཔལ་གྱིས་མཛེས། །འདྲེན་པ་ཁྱོད་ཀྱིས་རྫུ་འཕྲུལ་སྟོབས་ཀྱིས་ནི། །ཆགས་པ་མ་མཆིས་པར་ཡང་མཁའ་ལས་མཆི། །ནམ་མཁའ་ལྟ་བུར་དག་ཅིང་དྲི་མི་མངའ། །བཅོམ་ལྡན་ཉོན་མོངས་བསལ་ལ་ཕྱག་འཚལ་ལོ། །ལྷ་དབང་ལྷ་མིན་དབང་དང་སྲིན་པོ་དང ། །བརྒྱ་བྱིན་ཚངས་པ་དང་ནི་དག་པའི་ལྷ། །ཉི་མ་ཟླ་བ་སྐར་མར་བཅས་པའི་འོད། །ཁྱེད་ཀྱི་མཛོད་སྤུས་འོད་ནི་མ་མཆིས་གྱུར། །ཤེས་རབ་འབྱུང་གནས་ཤེས་རབ་རྒྱ་མཚོ་ལྡན། །སེམས་ཅན་ཀུན་གྱི་སེམས་ཀྱི་སྤྱོད་ལ་མཁས། །འཇིག་རྟེན་གསུམ་ན་འཇིག་རྟེན་སུམ་གྱིས་མཆོད། །འཇིག་རྟེན་གྲགས་པའི་ཞབས་ལ་ཕྱག་འཚལ་ལོ། །བདུད་བཞི་པོའི་སྐྱོན་རྣམས་བསལ་བ་པོ། །བདེན་པ་བཞི་ལ་བསྒོམ་ཞིང་དཔྱོད་མཛད་པ། །རྫུ་འཕྲུལ་བཞིའི་སྟོབས་ཀྱིས་བསྙེངས་མི་མངའ། །སངས་རྒྱས་གཤེགས་པས་གཤེགས་ཏེ་གཤེགས་པ་མཛེས། །བསྐལ་པ་བརྒྱར་ཡང་སྐྱོ་བ་མི་མངའ་ཞིང ། །རྟག་ཏུ་དུལ་ལ་ཐུགས་ནི་མཉམ་པར་བཞག་།ལེགས་པར་གསུངས་པས་འགྲོ་བ་ཚིམ་མཛད་ཀྱང ། །ཁྱོད་ནི་ཚིག་དང་སྐད་ལ་གནས་མ་ལགས། །ཁྱོད་ཀྱི་གསུང་ནི་ཡིད་འོང་རབ་ཏུ་སྙན། །ཞིང་བརྒྱ་དག་ཏུ་ཐོགས་པ་མེད་པར་མཆི། །སྒྲ་ནི་སེམས་ཅན་གང་གིས་ཐོས་གྱུར་པ། །དེ་དག་ཐམས་ཅད་བདེ་བས་ཚིམ་པར་འགྱུར། །སེམས་ཅན་ཁ་ལོ་བསྒྱུར་བ་སྤུ་གཅིག་ཏུ། །སྟོང་གསུམ་རྒྱ་མཚོའི་ཆབ་རྣམས་ཞུགས་གྱུར་ཀྱང ། །སེམས་ཅན་རག་པ་རྣམས་ལའང་མི་གནོད་ལ། །རྫུ་འཕྲུལ་ལ་ཡང་སྐྱོན་ནི་ཡོང་མི་གདའ། །སྟོང་གསུམ་གྱི་ནི་རི་བོ་རི་རབ་དག་།ཕྱག་གཅིག་གི་ནི་མཐིལ་དུ་བཞག་ནས
53.345b
སུ། །ཞིང་མང་བྱ་བ་དག་ཏུ་གཤེགས་མཛད་ཀྱང ། །ཁྱོད་ཀྱི་སྐུའི་སྟོབས་ནི་ཞུམ་མ་མཆིས། ཁྱོད་ནི་བསྐལ་པ་བརྒྱ་ཕྲག་བསམ་ཡས་ནས། །བརྟུལ་ཞུགས་དཀའ་ཐུབ་ཚུལ་ཁྲིམས་ཡོན་ཏན་དང ། །སྦྱིན་དང་དུལ་དང་སྡོམ་དང་བཟོད་པ་དང ། །བརྩོན་འགྲུས་བསམ་གཏན་ཤེས་རབ་ཤིན་དུ་བསླབས། །སངས་རྒྱས་བྱེ་བ་མང་ལ་བསྙེན་བཀུར་མཛད། །དེ་དག་རྣམས་ཀྱིས་བཤད་པའི་ཆོས་ཀྱང་བཟུང ། །ཐུགས་རྗེ་ལྡན་ཞིང་འགྲོ་བའི་དོན་གྱི་ཕྱིར། །ཁྱོད་ལ་ཡོངས་སུ་སྐྱོ་བའི་ཐུགས་མི་མངའ། །རིམ་གྲོར་མ་བགྱིས་ཞུམ་པར་མི་འགྱུར་ཞིང ། །རིམ་གྲོ་བགྱིས་པས་མཐོ་བར་འགྱུར་མ་ལགས། །དོག་ས་ལྟ་བུར་སྙོམས་ཤིང་མི་གཡོ་སྟེ། །འཇིག་རྟེན་ཆོས་གནས་མི་གོས་པད་མ་བཞིན། །ཆོས་རྣམས་སྟོང་པ་མཚན་མ་མ་མཆིས་དང ། །ཆུ་ཟླ་འདྲ་ཞིང་སྒྱུ་མ་ལྟ་བུ་དང ། །དབུ་བ་རྡོས་འདྲ་རྨི་ལམ་གློག་འདྲ་དང ། །སྨིག་རྒྱུའི་མཚན་ཉིད་ལྟ་བུར་རབ་ཏུ་མཁྱེན། །ངོ་བོ་ཉིད་ཀྱིས་གང་ཟག་བདག་མ་མཆིས། །གདོད་ནས་སྟོང་ཞིང་མི་གཡོ་རྗེས་མ་མཆིས། །ནམ་མཁའ་ལྟ་བུར་དག་ཅིང་དྲི་མ་མཆིས། །དངོས་པོ་བས་པར་དངོས་པོ་མ་མཆིས་འདྲ། །ལས་དང་བྱ་བ་རྒྱུ་དང་རྐྱེན་རྣམས་ལས། །བྱུང་བ་ལགས་ཀྱི་རྗེས་ནི་མ་མཆིས་པར། །ཚུལ་འདི་རྣམ་པར་སྦྱང་བ་མཛད་པས་ན། །དེ་ཕྱིར་ཁྱོད་ནི་རྫོགས་སངས་རྒྱས་ཤེས་བགྱི། །གང་དག་འདྲེན་པ་མཐོང་ཞིང་ཐོས་གྱུར་པ། །དེ་དག་ལ་ནི་ངན་སོང་འཇིགས་མ་མཆིས། །དེ་དག་བདེ་འགྲོ་དག་ཏུ་མཆོག་གཞོལ་ཏེ། །སྲོག་ཆགས་དེ་རྣམས་ཀྱི་ནི་རྙེད་པ་ལགས། །བདག་ཅག་རྣམས་ཀྱིས་གང་ཟག་དམ་པ་ཁྱོད། །ཀུན་དུ་མཆོད་པས་མཆོད་པ་བགྱིས་ནས་སུ། །བྱང་ཆུབ་ཏུ་ནི་སེམས་ཀྱང་བསྐྱེད་བགྱིས་ཏེ། །གང་ཟག་མཆོག་འདྲར་ཐམས་ཅད་འགྱུར་བར་ཤོག་།ནམ་མཁའ་ལ་ནི་དཔག་ཏུ་ནུས་ཀྱང་གདའ། །རྒྱ་མཚོའི་ཆབ་ནི་བས་བགྱིར་ནུས་ཀྱང་གདའ། །ཉི་ཟླ་མཁའ་ལས་སར་ནི་ལྟུང་གདའ་ཡི། །
53.346a
སངས་རྒྱས་ཡོན་ཏན་བས་པར་འགྱུར་མི་གདའ། །དེ་ནས་བཅོམ་ལྡན་འདས་ཤིང་རྟ་ལ་བཞུགས་ཏེ་ནམ་མཁའི་དཀྱིལ་གྱི་ལམ་ནས་གཤེགས་པས་གཤེགས་ཤིང ། གསེར་གྱི་ཁ་དོག་ལྟ་བུར་སྐུ་ལས་འོད་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྱབ་པར་འགྱུར་བ་དེ་ལྟ་བུའི་འོད་ཕྱུང་བ་དང ། འོད་དེས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་དང ། བྱ་རྒོད་ཀྱི་ཕུང་པོའི་རི་ཡང་རབ་ཏུ་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཤིང་རྟ་དེས་རྒྱལ་པོའི་ཁབ་ཀྱི་གྲོང་ཁྱེར་དང་བྱ་རྒོད་ཀྱི་ཕུང་པོའི་རི་ག་ལ་བ་དེར་གཤེགས་སོ། །དེ་ནས་རྒྱལ་པོའི་ཁབ་ཀྱི་གྲོང་ཁྱེར་གྱི་རྒྱལ་པོ་མ་སྐྱེས་དགྲ་བློན་པོ་དང ། རྒྱལ་བུ་དང ། ཚོང་དཔོན་དང་གྲོང་རྡལ་པ་དང ། ཁྱིམ་བདག་ཏུ་བཅས་པ་དང ། དགེ་སློང་དང་དགེ་སློང་མ་དང ། དགེ་བསྙེན་དང་དགེ་བསྙེན་མ་རྣམས་འོད་དེས་བསྐུལ་ནས་ཕྱི་དྲོའི་དུས་ཀྱི་ཚེ་མེ་ཏོག་དང ། བདུག་པ་དང་སྤོས་དང ། ཕྲེང་བ་དང་བྱུག་པ་དང ། གདུགས་དང ། རྒྱལ་མཚན་དང་བ་དན་ཐོགས་ཏེ། བཅོམ་ལྡན་འདས་བསུ་བའི་ཕྱིར་རིངས་པ་རིངས་པར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ། བྱ་རྒོད་ཀྱི་ཕུང་པོའི་རི་ལ་བཅོམ་ལྡན་འདས་ག་ལ་བ་དེར་དོང་ངོ ། །སྡོང་པོའི་སླས་རྣམས་ཤིང་རྟ་འདྲེན་བཞིན་དུ་སིལ་སྙན་བརྒྱད་ཁྲི་བཞི་སྟོང་བྱེད་དོ། །མི་འམ་ཅི་མོའི་རོལ་མོ་སིལ་སྙན་གྱི་སྒྲ་དེས་བྱ་རྒོད་ཀྱི་ཕུང་པོའི་རི་ཐམས་ཅད་དུ་གྲག་པར་གྱུར་ཏོ། །དེ་ལྟར་མི་འམ་ཅིའི་རྒྱལ་པོ་སྡོང་པོ་དཔུང་དང་བཅས། འཁོར་དང་བཅས་པས་རྫུ་འཕྲུལ་གྱི་སྟོབས་ཀྱིས་བཅོམ་ལྡན་འདས་ནམ་མཁའི་དཀྱིལ་ནས་ཁྱེར་ཏེ་བྱ་རྒོད་ཀྱི་ཕུང་པོའི་རི་ལ་བཞག་གོ། །དེ་ནས་བཅོམ་ལྡན་འདས་ཤིང་རྟ་དེ་ལས་བབས་ནས་རང་གི་གནས་སུ་གདན་བཤམས་པ་ལ་བཞུག་སོ། །བྱང་ཆུབ་སེམས་དཔའ་དེ་དག་དང་ཉན་ཐོས་ཆེན་པོ་དེ་དག་དང ། ཐམས་ཅད་དང་ལྡན་པའི་འཁོར་རྣམས་ཀྱང་ཤིང་རྟ་དེ་ལས་བབས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱིས་གནང་ནས་བཅོམ
53.346b
ལྡན་འདས་ལ་ཀུན་ནས་བསྐོར་ཏེ་རང་རང་གི་སྟན་ལ་འཁོད་དོ། །འདོད་པ་ན་སྤྱོད་པ་དང ། གཟུགས་ན་སྤྱོད་པ་དང ། གནས་གཙང་མའི་རིས་ཀྱི་ལྷའི་བུ་དེ་དག་ཀྱང་ཤིང་རྟ་དེ་ལས་བབས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་ནས་རྒྱལ་པོ་མ་སྐྱེས་དགྲ་བློན་པོ་དང ། རྒྱལ་བུ་དང ། ཚོང་དཔོན་དང ། ཁྱིམ་བདག་དང ། གྲོང་རྡལ་པ་དང་བཅས་པ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་རྣམས་ཀྱིས་མེ་ཏོག་དང ། བདུག་པ་དང་སྤོས་དང་ཕྲེང་བ་དང ། བྱུག་པ་དང་ཕྱེ་མ་དང ། ཆོས་གོས་དང ། གདུགས་དང ། རྒྱལ་མཚན་དང་བ་དན་ཇི་ལྟར་ཐོགས་པ་དེ་དག་གིས་བཅོམ་ལྡན་འདས་ལ་མཆོད་པ་བྱས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་སྐུ་མ་མཉེལ་ཏམ། བདེ་བ་ལ་རེག་པར་གནས་སམ་ཞེས་གསོལ་ནས་ཕྱོགས་གཅིག་ཏུ་འགོར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མི་འམ་ཅིའི་རྒྱལ་པོ་སྡོང་པོ་གཡོག་འཁོར་དང་བཅས་པས་བཅོམ་ལྡན་འདས་འཁོར་དང་བཅས་ཏེ། ཤིང་རྟ་ལ་བཞུགས་པ་ནམ་མཁའི་དཀྱིལ་ནས་དྲངས་པའི་དགེ་བའི་རྩ་བ་འདིས་མི་འམ་ཅིའི་རྒྱལ་པོ་སྡོང་པོའི་འཁོར་དང་བཅས་པས་ཅི་ཞིག་འཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་བའི་རྩ་བ་དེས་མི་འམ་ཅིའི་རྒྱལ་པོ་སྡོང་པོ་སླས་དང་བཅས། བུ་དང་བཅས། གཡོག་དང་བཅས་པས་འདིར་བྱང་ཆུབ་ཏུ་སེམས་བསྐྱེད་ནས་དེ་དག་ཐམས་ཅད་ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་མངོན་པར་ཤེས་པ་ལས་མི་ཉམས་པ་རབ་ཏུ་ཐོབ་པར་འགྱུར། སངས་རྒྱས་ཀྱི་ཞིང་འདི་ནིས་སངས་རྒྱས་ཀྱི་ཞིང་དུ་ཕན་ཚུན་འགྲོ་བར་འགྱུར། སངས་རྒྱས་མཐོང་བ་དང ། ཆོས་ཉན་པ་དང ། དགེ་འདུན་ལ་བསྙེན་བཀུར་བྱེད་པ་དང་མི་འབྲལ་བར་འགྱུར། ཚེ་རབས་ཐམས་ཅད་དུ་སྐྱེ་བ་དྲན་པར་འགྱུར། ལུང་བསྟན
53.347a
པ་ཐོབ་པར་འགྱུར། དམ་པའི་ཆོས་ཡོངས་སུ་གཟུང་བ་ལ་བརྩོན་པར་འགྱུར། སེམས་ཅན་ཡོངས་སུ་སྨིན་པར་བྱ་བ་ལ་སྤྲོ་བར་འགྱུར་རོ། །དེ་ནས་རྒྱལ་པོ་མ་སྐྱེས་དགྲས་མི་འམ་ཅིའི་བདག་པོ་སྡོང་པོ་ལ་འདི་སྐད་ཅེས་སྨྲས་སོ། །མི་འམ་ཅིའི་བདག་པོ་བཅོམ་ལྡན་འདས་ཀྱིས་ཁྱོད་ཀྱི་ཡོན་ཏན་ཡོངས་སུ་བརྗོད་པ་མཛད་པས་ཁྱོད་ཀྱིས་རྙེད་པ་ལེགས་པར་རྙེད་ཀྱིས་ཁྱོད་ཀྱིས་དགེ་བའི་རྩ་བ་དེ་ལས་ཤས་ཤིག་ཁོ་བོས་ཀྱང་ཐོབ་པར་འདོད་དོ། །མི་འམ་ཅིའི་རྒྱལ་པོ་སྡོང་པོས་སྨྲས་པ། རྒྱལ་པོ་ཆེན་པོ་དགེ་བའི་རྩ་བ་འདི་ཐམས་ཅད་བདག་གིས་ཁྱོད་དང་སེམས་ཅན་ཐམས་ཅད་ལ་དབུལ་ལོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ནི་གང་སེམས་ཅན་ཐམས་ཅད་དང་ཐུན་མོང་མ་ཡིན་པ་དེ་གང་ཡང་མེད་དོ། །རྒྱལ་པོ་ཆེན་པོ་བྱང་ཆུབ་སེམས་དཔའ་ཐམས་ཅད་ནི་སེར་སྣ་ཅན་མ་ཡིན་ཏེ། དེ་དག་དགེ་བའི་རྩ་བ་ཐམས་ཅད་ལ་སེར་སྣ་མི་བསྐྱེད་དོ། །དགེ་བའི་རྩ་བ་ཐམས་ཅད་སེམས་ཅན་ཐམས་ཅད་ལ་གཏོང་ཡང་ཡིད་མི་བདེ་བར་མི་བགྱིད། འགྱོད་པར་མི་འགྱུར་རོ། །རྒྱལ་པོ་ཆེན་པོ་བྱང་ཆུབ་སེམས་དཔའི་དགེ་བའི་རྩ་བ་གང་ཐམས་ཅད་མཁྱེན་པར་ཡོངས་སུ་བསྔོས་པ་དེ་ཡང་སེམས་ཅན་ཐམས་ཅད་ཀྱི་འཚོ་བར་འགྱུར་རོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ནི་སེམས་ཅན་ཐམས་ཅད་ཀྱི་གནས་བྱེད་པ་དང ། སེམས་ཅན་ལ་སྦྱོར་བ་དང ། སེམས་ཅན་གྱི་ཕྱིར་འབྲང་བར་འགྱུར་རོ། །རྒྱལ་པོ་ཆེན་པོ་ཁྱོད་ཀྱིས་གང་གི་ཕྱིར་དགེ་བའི་བཤེས་གཉེན་བཅོམ་ལྡན་འདས་དང་འཇམ་དཔལ་གཞོན་ནུར་གྱུར་པ་རྙེད་དེ། དེ་གཉིས་ལས་ཁྱོད་ཀྱིས་དམ་པའི་ཆོས་ཐོས་ནས་དེས་མི་ཤེས་པའི་མུན་པ་དང ། གཏི་མུག་གི་ལིང་ཏོག་ཆེན་པོས་མཚམས་མེད་པའི་འགྱོད་པ་བྱང་བའི་སེམས་བསལ་ནས་ཁྱོད་ཀྱིས་ཆོས་ལ་ཆོས་ཀྱི་སྣང་བ་ཆེན་པོ་ཐོབ་སྟེ།
53.347b
ཆོས་ཀྱི་སྣང་བ་དེས་ཁྱོད་ད་ལྟར་སྒྲིབ་པ་མེད་པ་ཐོབ་ཅིང་གནས་པས་ཁྱོད་ཀྱིས་ཀྱང་རྙེད་པ་ལེགས་པར་རྙེད་དོ། །རྒྱལ་པོ་ཆེན་པོ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་གུས་པར་བྱས་ཏེ། ཇི་ནས་ཀྱང་ཆོས་ཀྱི་ཚིག་དང ། ཡི་གེ་འབྲུ་གཅིག་ཐོས་པ་འང་བརྗེད་པར་མི་འགྱུར་བ་དང ། ཆུད་ཟ་བར་མི་འགྱུར་བ་དང ། ཀུན་དུ་བཟུང་བ་དང ། ཡོངས་སུ་བསྲུང་བའི་ཕྱིར་བདག་ཆོས་ཀྱི་སྣོད་དུ་འགྱུར་བར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ཆོས་ཀྱི་སྣོད་དུ་འགྱུར་བ་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལྷའི་ཅོད་པན་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སུམ་བཅུ་རྩ་གཉིས་དང་ལྡན་ན་ཆོས་ཀྱི་སྣོད་དུ་འགྱུར་རོ། །སུམ་བཅུ་རྩ་གཉིས་གང་ཞེ་ན། འདི་ལྟ་སྟེ། རིགས་ཀྱི་བུ་བྱང་ཆུབ་སེམས་དཔའི་སྣོད་སངས་རྒྱས་ཀྱི་བྱིན་གྱིས་བརླབས་དང ། ལྷག་པའི་བསམ་པའི་སྣོད་བསམ་པ་དང ། བྱང་ཆུབ་ཀྱི་ལམ་ཉེ་བར་སྟོན་པའི་སྣོད་སྦྱོར་བ་དང ། དགེ་བའི་རྩ་བ་ཁྱད་པར་དུ་འགྲོ་བའི་སྣོད་ལྷག་པའི་བསམ་པ་དང ། མང་དུ་ཐོས་པའི་སྣོད་དྲན་པ་དང ། ལམ་ལ་འཇུག་པའི་སྣོད་བློ་གྲོས་དང ། དོན་རྟོགས་པ་རྗེས་སུ་རྟོགས་པའི་སྣོད་རྟོགས་པ་དང ། ལོངས་སྤྱོད་ཆེན་པོའི་སྣོད་སྦྱིན་པ་དང ། བསམ་པ་ཡོངས་སུ་རྫོགས་པའི་སྣོད་ཚུལ་ཁྲིམས་དང ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་འཐོབ་པའི་སྣོད་བཟོད་པ་དང ། སངས་རྒྱས་ཀྱི་ཆོས་ཐམས་ཅད་འགྲུབ་པའི་སྣོད་བརྩོན་འགྲུས་དང ། སེམས་ལས་སུ་རུང་བའི་སྣོད་བསམ་གཏན་དང ། དོགས་པ་ཐམས་ཅད་ལས་རབ་ཏུ་འདས
53.348a
པའི་སྣོད་ཤེས་རབ་དང ། སེམས་ཅན་ཐམས་ཅད་ལ་སེམས་སྙོམས་པའི་སྣོད་བྱམས་པ་དང ། དབུལ་ཞིང་ཉམ་ཐག་པ་ཐམས་ཅད་བསྐྱབ་པའི་སྣོད་སྙིང་རྗེ་དང ། ཆོས་ལ་དགའ་བའི་སྣོད་དགའ་བ་དང ། རྗེས་སུ་ཆགས་པ་དང ། ཁོང་ཁྲོ་བ་སྤང་བའི་སྣོད་བཏང་སྙོམས་དང ། དགེ་བའི་རྩ་བ་ཐམས་ཅད་འཛིན་དུ་འཇུག་པའི་སྣོད་དགེ་བའི་བཤེས་གཉེན་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་སྣོད་ཐོས་པ་ཚོལ་བས་ངོམས་མི་མྱོང་བ་དང ། མི་ལྟོས་པའི་སྣོད་རབ་ཏུ་འབྱུང་བ་དང ། དོན་ཉུང་ཞིང་བྱ་བ་ཉུང་བའི་སྣོད་དགོན་པ་ལ་གནས་པ་དང ། བསམ་གཏན་དང་མངོན་པར་ཤེས་པའི་སྣོད་དབེན་པ་ལ་དགའ་བ་དང ། སེམས་ཅན་ཡོངས་སུ་སྨིན་པར་བྱ་བའི་སྣོད་བསྡུ་བའི་དངོས་པོ་དང ། ཆོས་སྣང་བའི་སྣོད་དམ་པའི་ཆོས་ཡོངས་སུ་འཛིན་པ་དང ། ཐོས་པ་ཐམས་ཅད་འཛིན་པའི་སྣོད་གཟུངས་དང ། སེམས་ཅན་ཐམས་ཅད་ཀྱི་ཐེ་ཙོམ་གཅད་པའི་སྣོད་སྤོབས་པ་དང ། སངས་རྒྱས་མཐོང་བའི་སྣོད་སངས་རྒྱས་རྗེས་སུ་དྲན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་སྣོད་ཆོས་རྗེས་སུ་དྲན་པ་དང ། དགེ་བའི་རྩ་བ་བསྲུང་བའི་སྣོད་ཞེ་སྡང་མེད་པའི་སེམས་དང ། ལྟ་བར་གྱུར་པ་ཐམས་ཅད་སྤོང་བའི་སྣོད་སྟོང་པ་ཉིད་ལ་མོས་པ་དང ། མཐར་མཛིན་པ་ཐམས་ཅད་ཡོངས་སུ་སྤོང་བའི་སྣོད་རྟེན་ཅིང་འབྲེལ་པར་འབྱུང་བ་དང ། མི་འཁྲུགས་ཤིང་ཕྱད་པར་ལུང་སྟོན་པའི་སྣོད་མི་སྐྱེ་བའི་ཆོས་ལ་བཟོད་པ་དང ། སྟོབས་བཅུ་དང་མི་འཇིགས་པ་དང ། སངས་རྒྱས་ཀྱི་ཆོས་མ་འདྲེས་པ་རྣམ་ཀྱི་སྣོད་ཕྱིར་མི་ལྡོག་པའི་ས་སྟེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སུམ་བཅུ་རྩ་གཉིས་པོ་འདི་དག་དང་ལྡན་ན་ཆོས་ཀྱི་སྣོད་དུ་རིག་པར་བྱའོ། །བསྟན་པ་འདི་བཤད་པ་ན
53.348b
སྲོག་ཆགས་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ཚིག་འདི་སྐད་ཅེས་བཅོམ་ལྡན་འདས་སེམས་ཅན་ཐམས་ཅད་ཀྱང་འདི་འདྲ་བའི་ཆོས་ཀྱི་སྣོད་དུ་གྱུར་ཅིག་།བདག་ཅག་ཀྱང་བཅོམ་ལྡན་འདས་ཀྱིས་ཇི་སྐད་དུ་བསྟན་པའི་ཆོས་དེ་ལྟ་བུའི་སྣོད་དུ་གྱུར་ཅིག་ཅེས་སྨྲས་སོ། །དེ་ནས་བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་བཀའ་སྩལ་ཏོ། །མི་འམ་ཅིའི་བདག་པོ་ཁྱོད་ཀྱིས་འཁོར་འདི་སྐྱོ་བར་འགྱུར་དུ་འོང་གིས་ཁྱོད་རང་གི་གནས་སུ་སོང་ཤིག་།མི་འམ་ཅིའི་རྒྱལ་པོ་སྡོང་པོས་གསོལ་པ། བཅོམ་ལྡན་འདས་གང་ཡོངས་སུ་སྐྱོ་བ་དེ་བྱང་ཆུབ་སེམས་དཔའ་ཞེས་མི་བགྱི་སྟེ། བཅོམ་ལྡན་འདས་བྱང་ཆུབ་སེམས་དཔས་ནི་སྐྱོ་བ་བཟོད་པར་བགྱིའོ། །བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་ཡོངས་སུ་སྐྱོ་བ་ལགས། ཇི་ལྟར་ན་ཡོངས་སུ་མི་སྐྱོ་བ་ལགས། བཅོམ་ལྡན་འདས་ཀྱིས་བཀའ་སྩལ་པ། མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཡོངས་སུ་སྐྱོ་བར་འགྱུར་རོ། །བཞི་གང་ཞེ་ན། འདི་ལྟ་སྟེ། སེམས་ཅན་གྱི་ཁམས་ཚད་མེད་པ་ཐོས་ན་སྐྲག་པ་དང ། འཁོར་བ་ཚད་མེད་པ་ཐོས་ན་སྐྲག་པ་དང ། སངས་རྒྱས་ཀྱི་ཡེ་ཤེས་ཚད་མེད་པར་ཐོས་ན་སྐྲག་པ་དང ། བསོད་ནམས་ཚད་མེད་པས་མཚན་དང་དཔེ་བྱད་བཟང་པོ་འགྲུབ་པ་ཐོས་ན་སྐྲག་པ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་ཡོངས་སུ་སྐྱོ་བར་རིག་པར་བྱའོ། །མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཡོངས་སུ་མི་སྐྱོ་བར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། སེམས་ཅན་གྱི་ཁམས་ཚད་མེད་པ་དེ་ཡང་བདག་གི་ཡོངས་སུ་མྱ་ངན་ལས་བཟླ་བར་བྱའོ། །ཞེས་ཐོས་ན་མི་སྐྲག
53.349a
པ་དང ། དགེ་བའི་རྩ་བ་བསྒྲུབ་པའི་ཕྱིར་འཁོར་བ་ཚད་མེད་པ་ཡོངས་སུ་གཟུང་བར་བྱའོ། །ཞེས་ཐོས་ན་མི་སྐྲག་པ་དང ། ཐམས་ཅད་མཁྱེན་པའི་ཡེ་ཤེས་ཚད་མེད་པ་དེ་བདག་གི་ཡོངས་སུ་རྫོགས་པར་བྱའོ་ཞེས་ཐོས་ན་མི་སྐྲག་པ་དང ། བསོད་ནམས་ཚད་མེད་པ་བསགས་པས་མཚན་དང་དཔེ་བྱད་བཟང་པོ་འགྲུབ་སྟེ། བདག་གིས་ཀྱང་བསྒྲུབ་པར་བྱའོ་ཞེས་ཐོས་ན་མི་སྐྲག་པ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་ཡོངས་སུ་མི་སྐྱོ་བར་རིག་པར་བྱའོ། །མི་འམ་ཅིའི་བདག་པོ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཡོངས་སུ་སྐྱོ་བར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། སྐབས་སྐབས་སུ་ཉན་ཐོས་ཀྱི་ཐེག་པ་ལ་རེ་བ་དང ། སྐབས་སྐབས་སུ་རང་སངས་རྒྱས་ཐེ་པ་ལ་རེ་བ་དང ། དམ་པའི་ཆོས་རྣམ་པར་འཇིག་པ་ན་ཡལ་བར་འདོར་ཞིང་ཡོངས་སུ་མི་འཛིན་པ་དང ། གཞན་ཡང་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་ཏུ་མི་འཇུག་པ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་ཡོངས་སུ་སྐྱོ་བར་རིག་པར་བྱའོ། །མི་འམ་ཅིའི་བདག་པོ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཡོངས་སུ་མི་སྐྱོ་བར་རིག་པར་བྱའོ། །བཞི་གང་ཞེ་ན་འདི་ལྟ་སྟེ། རབ་ཏུ་ཉེན་ཀྱང་བྱང་ཆུབ་ཀྱི་སེམས་མི་གཏོང་བ་དང ། ཉན་ཐོས་དང་རང་སངས་རྒྱས་ཀྱི་ས་ལ་མི་དབང་བ་དང ། ལུས་དང་སྲོག་འདོར་ཞིང་དམ་པའི་ཆོས་བསྲུང་བ་དང ། དཔག་ཚད་སྟོང་དུ་འགྲོ་ཞིང་གཞན་དག་བྱང་ཆུབ་ཡང་དག་པར་འཛིན་དུ་འཇུག་པ་སྟེ། མི་འམ་ཅིའི་བདག་པོ་བྱང་ཆུབ་སེམས
53.349b
དཔའ་ཆོས་བཞི་པོ་འདི་དག་དང་ལྡན་ན་ཡོངས་སུ་མི་སྐྱོ་བར་རིག་པར་བྱའོ། །མི་འམ་ཅིའི་བདག་པོ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཡོངས་སུ་སྐྱོ་བར་རིག་པར་བྱའོ། །བཞི་གང་ཞེ་ན་འདི་ལྟ་སྟེ། སློང་བ་མཐོང་ན་ཡོངས་སུ་སྐྱོ་བ་དང ། བསོད་ནམས་བྱེད་པར་སྦྱོར་བ་ལ་བརྩོན་པར་གནས་པ་དང ། མང་དུ་ཐོས་པ་ཚོལ་བ་ལ་མི་བརྩོན་པ་དང ། ཇི་ལྟར་ཐོས་པའི་ཆོས་རྣམས་གཞན་ལ་མི་སྟོན་པ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་ཡོངས་སུ་མི་སྐྱོ་བར་རིག་པར་བྱའོ། །མི་འམ་ཅིའི་བདག་པོ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཡོངས་སུ་མི་སྐྱོ་བར་རིག་པར་བྱའོ། །བཞི་གང་ཞེ་ན་འདི་ལྟ་སྟེ། སློང་བ་ལ་བཤེས་གཉེན་དུ་འདུ་ཤེས་སྐྱེད་ཅིང་ཞེ་སྡང་བའི་སེམས་མེད་ལ་བཞིན་འཛུམ་ཞིང་ཁྲོ་གཉེར་མེད་དེ་ཚུར་ཤོག་ལེགས་པར་འོངས་སམ་ཞེས་བྱ་བའི་ཚིག་སྨྲ་བ་དང ། བདག་བདེ་བ་ལ་མི་ཆགས་ཤིང་སེམས་ཅན་ཐམས་ཅད་ལ་བདེ་བ་རབ་ཏུ་སྦྱིན་པ་དང ། མང་དུ་ཐོས་པ་ཚོལ་བས་མི་ངོམས་ཤིང ། ཇི་ལྟར་ཐོས་པའི་ཆོས་རྣམས་ཀྱང་གཞན་དག་ལ་རྒྱ་ཆེར་རབ་ཏུ་སྟོན་ཅིང་ཟང་ཟིང་མེད་པའི་སེམས་ཀྱི་ཆོས་དེ་གཞན་ལ་རབ་ཏུ་སྟོན་པ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་ཡོངས་སུ་མི་སྐྱོ་བར་རིག་པར་བྱའོ། །མི་འམ་ཅིའི་བདག་པོ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཡོངས་སུ་སྐྱོ་བར་རིག་པར་བྱའོ། །བཞི་གང་ཞེ་ན་འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པའི་ལམ་ཡོངས་སུ་མི་ཚོལ་བ་དང ། བསྡུ་བའི་དངོས་པོ་ལ་མི་སྦྱོར་བ་དང ། སེམས་ཅན་ཡོངས་སུ་སྨིན་པར་བྱེད་པར་བརྩོན་འགྲུས་མི་རྩོམ་པ་དང ། ཡོན་ཏན་ཆུང་ངུ་ཙམ་གྱིས
53.350a
ཆོག་པར་འཛིན་ཅིང་གོང་དུ་མི་ཚོལ་བ་སྟེ། མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་ཡོངས་སུ་སྐྱོ་བར་རིག་པར་བྱའོ། །མི་འམ་ཅིའི་བདག་པོ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཡོངས་སུ་མི་སྐྱོ་བར་རིག་པར་བྱའོ། །བཞི་གང་ཞེ་ན་འདི་ལྟ་སྟེ། མགོའི་ཐོད་ལ་མེ་འབར་བ་བཞིན་དུ་ཕ་རོལ་ཏུ་ཕྱིན་པའི་ལམ་ཡོངས་སུ་ཚོལ་བ་དང ། བསྡུ་བའི་དངོས་པོ་ལ་རྟག་ཏུ་བརྩོན་པ་དང ། སེམས་ཅན་ཡོངས་སུ་སྨིན་པར་བྱེད་པར་བརྩོན་འགྲུས་རྩོམ་པ་དང ། དགེ་བ་ཐམས་ཅད་ཡོངས་སུ་བཀང་བའི་ཕྱིར་དེ་ལ་མི་ཆགས་པ་ཡིན་ཏེ། མི་འམ་ཅིའི་བདག་པོ་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་ཡོངས་སུ་མི་སྐྱོ་བར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་ཆོས་བཞི་བསྒྲུབ་པ་འདི་མི་འམ་ཅིའི་རྒྱལ་པོ་སྡོང་པོ་ལ་ལན་བཏབ་ནས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་ཡོངས་སུ་སྐྱོ་བ་དང ། ཡོངས་སུ་མི་སྐྱོ་བ་བཞི་བསྒྲུབ་པ་ལ་འཇུག་པ་འདི་ཐོས་སམ། རྒྱལ་པོས་གསོལ་པ་བཅོམ་ལྡན་འདས་ཐོས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་ལྟ་བས་ན་ཁྱོད་བྱང་ཆུབ་སེམས་དཔའི་སྤྱོད་པ་ལ་ཡོངས་སུ་མི་སྐྱོ་བར་སྤྱད་པར་བྱའོ། །རྒྱལ་པོ་མ་སྐྱེས་དགྲས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་སྤྱོད་པ་གང་ལགས། དེ་ནས་བཅོམ་ལྡན་འདས་ཀྱིས་རྒྱལ་པོ་མ་སྐྱེས་དགྲའི་བྱང་ཆུབ་སེམས་དཔའི་སྤྱོད་པ་ཡོངས་སུ་བསྐང་བའི་ཕྱིར་མི་འམ་ཅིའི་རྒྱལ་པོ་སྡོང་པོ་ལ་བཀའ་སྩལ་པ། མི་འམ་ཅིའི་བདག་པོ་ཇི་ལྟར་སེམས་ཅན་ཡོངས་སུ་སྨིན་པར་བྱེད་པའི་རང་གི་ཐབས་མཁས་པའི་ཁྱད་པར་རྒྱལ་པོ་མ་སྐྱེས་དགྲ་འདི་བྱང་ཆུབ་སེམས་དཔའི་སྤྱོད་པ་ཡོངས་སུ་བསྐང་བའི་ཕྱིར་ཁྱོད་ཀྱིས་སྟོན་ཅིག་།
53.350b
དེ་ནས་མི་འམ་ཅིའི་རྒྱལ་པོ་སྡོང་པོས་རང་གི་པི་བང་དེ་བཅོམ་ལྡན་འདས་ཀྱི་སྤྱན་སྔར་བླངས་སོ། །པི་བང་དེ་བླངས་མ་ཐག་ཏུ་དེ་ནས་སངས་རྒྱས་ཀྱི་མཐུ་དང ། མི་འམ་ཅིའི་རྒྱལ་པོ་སྡོང་པོའི་དགེ་བའི་རྩ་བའི་གཟི་བརྗིད་ཀྱིས་པི་བང་གི་སྒྲ་དེ་ལས་སེང་གེ་བསྒྱིངས་པ་ལྟར་ཤིང་ས་ལ་དུ་མ་གཡོ་བའི་སྒྲར་བྱང་ཆུབ་སེམས་དཔའི་སྤྱོད་པའི་ཚིགས་སུ་བཅད་པ་འདི་དག་བྱུང་ངོ ། །ཕན་པ་སྤྱོད་པ་དག་དང་དོན་སྤྱོད་དང ། །ཆོས་ཐོས་ནན་ཏན་བྱེད་པ་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཡོངས་སུ་སྐྱོ་བ་མེད་པར་སྤྱོད། །བདེ་བ་སྤྱོད་དང་སྐྱིད་པ་སྤྱོད་པ་དང ། །སེམས་ཅན་ཀུན་ལ་སམ་སྙོམས་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་རྒྱ་ཆེན་མ་ཡིན་སྤྱོད་པ་མེད། །བརྟན་པ་སྤྱོད་དང་བདེན་པ་སྤྱོད་པ་དང ། །བསམ་པ་ཡོངས་སུ་དག་པ་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གང་དུའང་སྒྱུ་མེད་སྤྱོད་པ་ཡིན། །དུལ་བ་སྤྱོད་དང་སྦྱིན་པ་སྤྱོད་པ་དང ། །དངོས་པོ་ཐམས་ཅད་ཡོངས་སུ་གཏོང་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་སེར་སྣ་མེད་པར་སྤྱོད་པ་ཡིན། །ཚུལ་ཁྲིམས་སྤྱོད་པ་མ་ཉམས་སྤྱོད་པ་དང ། །ལུས་དང་ངག་ནི་ཡོངས་དག་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ངན་པའི་ངང་ཚུལ་སྤྱོད་པ་མེད། །བརྟུལ་ཞུགས་སྤྱོད་དང་བཟོད་པ་སྤྱོད་པ་དང ། །ཁྲོ་སྐྱོན་ཡོང་སུ་གཅོད་པའི་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གནོད་སེམས་མེད་པར་སྤྱོད་པ་ཡིན། །བརྩོན་འགྲུས་སྤྱོད་དང་མཐུ་རྣམས་སྤྱོད་པ་དང ། །འཁོར་བར་ཡོངས་སུ་མི་སྐྱོ་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ལེ་ལོ་མེད་པར་སྤྱོད་པ་ཡིན། །མ་གཏན་སྤྱོད་དང་ཏིང་འཛིན་སྤྱོད་པ་དང ། །ལུས་དང་སེམས་ནི་རབ་ཏུ་དབེན་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །
53.351a
དེ་དག་གཡེང་བ་མེད་པར་སྤྱོད་པ་ཡིན། །ཤེས་རབ་སྤྱོད་དང་བློ་མཆོག་སྤྱོད་པ་དང ། །ཆོས་རྣམས་ཐམས་ཅད་ཇི་བཞིན་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཤེས་རབ་འཆལ་པའི་སྤྱོད་པ་མེད། །བྱམས་པ་སྤྱོད་དང་ཕན་འདོད་སྤྱོད་པ་དང ། །སེམས་ཅན་ཀུན་ལ་སྙིང་རྗེ་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཁྲོ་བའི་ཐ་ན་མེད་པར་སྤྱོད། །སྟོང་པ་སྤྱོད་དང་རབ་ཏུ་དབེན་སྤྱོད་དང ། །མཚན་མ་མེད་པ་ཡོངས་སུ་དག་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་སྨོན་པ་མེད་པར་སྤྱོད་པ་ཡིན། །ཡང་དག་སྤྱོད་དང་དེ་བཞིན་ཉིད་སྤྱོད་དང ། །ཐམས་ཅད་མཁྱེན་པ་ཡོངས་སུ་དག་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གང་དུའང་ཆགས་པ་མེད་པར་སྤྱོད། །དད་པ་སྤྱོད་དང་དང་བ་སྤྱོད་པ་དང ། །དྲན་དང་གཡེང་བ་མེད་པར་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཡོངས་སུ་གཅོད་པ་མེད་པར་སྤྱོད། །བསམ་གཏན་སྤྱོད་དང་རྣམ་ཐར་སྤྱོད་པ་དང ། །མངོན་ཤེས་ལྔ་རྣམས་ཡོངས་དག་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཆགས་པ་མེད་པར་སྤྱོད་པ་ཡིན། །སངས་རྒྱས་སྤྱོད་དང་དམ་ཆོས་སྤྱོད་པ་དང ། །དགེ་འདུན་དཀོན་མཆོག་ཉེ་བར་བརྟན་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་དཀོན་མཆོག་མཆོག་གི་སྤྱོད་པ་ཡིན། །ཆོས་སྤྱོད་པ་དང་ཤིན་དུ་རིགས་སྤྱོད་དང ། །སེམས་ཅན་ཐམས་ཅད་ཡོངས་སུ་སྨིན་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་རྒྱུན་མི་འཆད་པར་སྤྱོད་པ་ཡིན། །བྱ་བ་སྤྱོད་དང་ཆོས་རྣམས་སྤྱོད་པ་དང ། །མཐའ་ཀུན་ཡོངས་སུ་གཅད་པའི་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གང་དུའང་ལྟ་བར་སྤྱོད་པ་མེད། །
53.351b
དག་པར་སྤྱོད་དང་རྣམ་པར་དག་སྤྱོད་དང ། །ཉོན་མོངས་ཐམས་ཅད་ཡོངས་སུ་གཅོད་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཡོངས་སུ་གདུང་བར་སྤྱོད་པ་མེད། །བདེ་བ་སྤྱོད་དང་ཤིན་དུ་རྣམ་ཐར་སྤྱོད། །སེམས་ཅན་ཀུན་ལ་འཇིགས་མེད་མཆོག་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་སྨོན་ལམ་སྤྱོད་པ་མེད་པ་ཡིན། །ཉི་མ་སྤྱོད་དང་ཟླ་བ་སྤྱོད་པ་དང ། །པད་མ་ལྟ་བུར་གོས་པ་མེད་སྤྱོད་དང ། བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ལྷར་བཅས་འཇིག་རྟེན་ཕྱག་བྱ་བ། །བརྒྱ་བྱིན་སྤྱོད་དང་ཚངས་པའི་སྤྱོད་པ་དང ། །དཀར་པོའི་ཆོས་རྣམས་ཡོངས་སུ་རྫོགས་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་བདུད་རྣམས་སྡེར་བཅས་སྐྲག་པར་བྱེད། །མཆོག་སྤྱོད་པ་དང་ཁྱད་པར་འཕགས་སྤྱོད་དང ། །འདོད་ཆགས་ཉེས་པ་ཐ་བ་གཅད་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གང་དུའང་གཏི་མུག་སྤྱོད་པ་མེད། །ལམ་སྤྱོད་པ་དང་མུ་སྟེགས་སྤྱོད་པ་དང ། །ཤེས་རབ་མིག་ནི་ཡོངས་སུ་དག་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཡོངས་སུ་རྟོག་པར་སྤྱོད་པ་མེད། །དུལ་བ་སྤྱོད་དང་རབ་ཏུ་ཞི་སྤྱོད་དང ། །མིང་དང་གཟུགས་ལ་མི་ཆགས་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ལྷ་དང་མེ་ནི་མང་པོས་བསྟོད། །འཕགས་པའི་སྤྱོད་དང་ཤིན་དུ་མཉམ་སྤྱོད་དང ། །གཡོན་ཕྱོགས་ལམ་ནི་ཡོངས་སུ་གཅོད་སྤྱད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་རྟག་ཏུ་དོན་ལ་འབབ་པ་ཡིན། །དཔའ་བོ་སྤྱོད་དང་ཤིན་དུ་བརྟན་སྤྱོད་པ། །བདུད་ཀྱི་སྡེ་རྣམས་འཇིགས་པར་བྱེད་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་བྱང་ཆུབ་སྙིང་པོར་གཞོལ་བ་ཡིན། །གཟུང་བ་སྤྱོད་དང་དོན་ཡོད་སྤྱོད་པ་དང ། །གཟུངས་ལ་གཡེངས་བ་མེད་པར་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གང་དུ
53.352a
འང་མ་རིག་སྤྱོད་པ་མེད། །དགོན་པ་སྤྱོད་དང་རབ་ཏུ་དབེན་སྤྱོད་པ། །རྟག་ཏུ་རབ་ཏུ་འབྱུང་བར་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ནན་ཏན་བྱེད་པར་སྤྱོད་པ་ཡིན། །གཙོ་བོའི་སྤྱོད་དང་ཁྱད་པར་འཕགས་སྤྱོད་དང ། །འཇིག་རྟེན་ཐམས་ཅད་ཟིལ་གནོན་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཆུང་ངུ་ལ་ནི་སྤྱོད་པ་མེད། །རིགས་པ་སྤྱོད་དང་ཐབས་ལ་སྤྱོད་པ་དང ། །བསམ་གཏན་བདེ་ལས་ལྡོག་པར་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་མི་ཤེས་སྤྱོད་པ་མེད་པ་ཡིན། །ལྟ་བ་སྤྱོད་དང་རྣམ་པར་ལྟ་སྤྱོད་དང ། །མིང་དང་གཟུགས་ལ་མི་ཆགས་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་འཇིགས་པ་མེད་པར་སྤྱོད་པ་ཡིན། །ཐམས་ཅད་སྤྱོད་དང་ཀུན་དུ་སྤྱོད་པ་དང ། །དབང་པོ་ཡོངས་སུ་སྨིན་པར་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཡེ་ཤེས་ནམ་མཁའི་མཐའ་དང་འདྲ། །བྱང་ཆུབ་སེམས་དཔའི་སྤྱོད་པ་བསྟན་པའི་ཚིགས་སུ་བཅད་པ་མངོན་པར་བསྒྲུབ་པ་འདི་པི་བང་གི་སྒྲ་དེ་ལས་བྱུང་བ་ན། བྱང་ཆུབ་སེམས་དཔའ་ལྔ་སྟོང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །རྒྱལ་པོ་མ་སྐྱེས་དགྲའི་འཁོར་དང ། རྒྱལ་པོའི་ཁབ་ཀྱི་བྲམ་ཟེ་དང ། ཁྱིམ་བདག་དང ། མི་འམ་ཅི་དང་དྲི་ཟ་དང་ལྟོ་འཕྱེ་ཆེན་པོ་དེ་དག་གི་འཁོར་གྱི་སྲོག་ཆགས་བརྒྱད་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཚིག་འདི་སྐད་ཅེས་བཅོམ་ལྡན་འདས་བདག་ཅག་ཀྱང་བྱང་ཆུབ་སེམས་དཔའི། སྤྱོད་པ་འདི་ལ་བསླབ་པར་བགྱིའོ། །ནན་ཏན་གྱིས་བསྒྲུབ་པར་བགྱིའོ། །སེམས་ཅན་ཚད་མ་མཆིས་པ་དག་ཀྱང་བྱང་ཆུབ་སེམས་དཔའི་སྤྱོད་པ་འདི་ཉིད་ཡང་དག་པར་འཛིན་དུ་སྩལ་བར་བགྱིའོ་ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོ་འགྲོར་གནང་ངོ ། །དེ་ནས་བཅོམ
53.352b
ལྡན་འདས་ཀྱིས་གནང་བས་མི་འམ་ཅིའི་རྒྱལ་པོ་སྡོང་པོ་བུ་དང་བཅས། དཔུང་དང་བཅས་སླས་དང་བཅས། རང་གི་སྐྱེ་བོ་དང་བཅས་འཁོར་དང་བཅས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཟོད་པ་གསོལ་ནས་སིལ་སྙན་དཀྲོལ། མེ་ཏོག་གི་ཆར་ཕབ། འོད་ཟེར་གྱི་དྲ་བ་ཕྱུང་སྟེ། ས་ཆེན་པོ་རྣམ་པ་དྲུག་ཏུ་གཡོས་པར་བྱས་ནས། བཅོམ་ལྡན་འདས་ཀྱི་ཐད་ནས་སོང་སྟེ། དེ་སྐད་ཅིག་ཐང་ཅིག་ཡུད་ཙམ་དེ་ཉིད་ལ་རིའི་རྒྱལ་པོ་སྤོས་ཀྱི་ངད་ལྡང་དུ་རང་གི་ཁྱིམ་དུ་ཕྱིན་ཏོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མི་འམ་ཅིའི་རྒྱལ་པོ་སྡོང་པོས་དེ་བཞིན་གཤེགས་པ་ལ་མཆོད་པ་དང་ཆོས་ལ་མཆོད་པས་བདག་ཟིལ་གྱིས་ནོན་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ་མི་འམ་ཅིའི་རྒྱལ་པོ་སྡོང་པོས་ཁྱོད་འབའ་ཤིག་ཟིལ་གྱིས་མནན་པ་མ་ཡིན་གྱིས། ཀཽ་ཤི་ཀ་བྱང་ཆུབ་སེམས་དཔའ་སེམས་དཔའ་ཆེན་པོ་ས་ཐོབ་པ་མ་གཏོགས་པར་གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བརྒྱ་བྱིན་དང ། ཚངས་པ་དང་འཇིག་རྟེན་སྐྱོང་བ་དང ། ཉན་ཐོས་དང་རང་སངས་རྒྱས་དེ་དག་ཐམས་ཅད་མི་འམ་ཅིའི་རྒྱལ་པོ་སྡོང་པོས་ཟིལ་གྱིས་ནོན་ཏོ། །དེ་ཅིའི་ཕྱིར་ཞེ་ན། ཀཽ་ཤི་ཀ་བྱང་ཆུབ་སེམས་དཔའ་སེམས་བསྐྱེད་མ་ཐག་པས། ཉན་ཐོས་དང་རང་སངས་རྒྱས་ཐམས་ཅད་དང ། བརྒྱ་བྱིན་དང་ཚངས་པ་དང ། འཇིག་རྟེན་སྐྱོང་བ་ཐམ་ཅད་ཟིལ་གྱིས་ནོན་ཏོ། །ཀཽ་ཤི་ཀ་དེ་ལྟ་བས་ན་བྱང་ཆུབ་སེམས་དཔའ་ནི་ལྷར་བཅས་པའི་འཇིག་རྟེན་གྱིས་ཟིལ་གྱིས་མི་ནོན་ཏོ། །གང་བྱང་ཆུབ་སེམས་དཔའ་ལ་ཟིལ་གྱིས་གནོན་པར་སེམས་དཔའ
53.353a
དེ་ནི་དེ་བཞིན་གཤེགས་པ་ལ་ཟིལ་གྱིས་གནོན་པར་འདོད་པའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་ནི་དེ་བཞིན་གཤེགས་པ་འབྱུང་ངོ ། །དེ་བཞིན་གཤེགས་པ་ལས་ནི་ཉན་ཐོས་དང་རང་སངས་རྒྱས་འབྱུང་ངོ ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བསྟན་པ་འདི་ཐོས་ནས་ཐལ་མོ་སྦྱར་ཏེ་མཆི་མ་བླགས་ནས་འདི་སྐད་ཅེས་ཀྱེ་མའོ། །བདག་ནི་སངས་རྒྱས་ཀྱི་མཁྱེན་པ་ཆགས་པ་མི་མངའ་ཞིང་སྒྲིབ་པ་མི་མངའ་བ་འདི་ལྟ་བུ་ལས་ཉམས་སོ་ཞེས་སྨྲས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་བུ་ལྷའི་བུ་འོད་ཟེར་བསྲུང་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་འསྨྲས་སོ། །ཡང་འདི་ལྟར་གང་རབ་ཏུ་དབེན་པ་རྣམ་པར་བསྒྲུབ་པར་ཉེ་བར་གནས་པའི་མཚན་ཉིད་མ་ལགས་པའི་ཆོས་རྣམས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་བསྐྱེད་པ་དེ་ནི་སེམས་ཅན་ཐམས་ཅད་ལ་སྙིང་རྗེ་རྙེད་པ་མ་ལགས། རྒྱ་ཆེན་པོ་ལ་མོས་པའི་དགེ་བའི་བཤེས་གཉེན་ལ་སྟེན་པ་མ་ལགས་ཏེ། ཕྱིས་འགྱོད་པར་འགྱུར་བའོ། །ཡབ་སྐྱོན་མེད་པ་ལ་ཞུགས་ཏེ་རྒྱུད་ཚིག་ཅིང་ས་བོན་ཚིག་སྟེ། ཐེག་པ་ཆེན་པོའི་སྣོད་དུ་མ་གྱུར་པ་ལ་ད་བགྱིར་ཅི་མཆིས། བསྟན་པ་འདི་བཤད་པ་ན་སུམ་བཅུ་རྩ་གསུམ་རིས་ཀྱི་ལྷའི་བུ་ལས་ལྷའི་བུ་སྟོང་ཐམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ལ་ལྷའི་བུ་འོད་ཟེར་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱི་བྱང་ཆུབ་སེམས་དཔའི་སྤྱོད་པ་དཀའ་བ་སྤྱད་པ་བརྒྱ་སྟོང་ཕྲག་ཇི་སྙེད་པ་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བསྟར་བ་ནི་བདག་ལ་མངོན་སུམ་དུ་གྱུར་ཏོ། །བཅོམ་ལྡན་འདས་བཅོམ་ལྡན་འདས་སྔོན་བྱང་ཆུབ་སེམས་དཔར
53.353b
གྱུར་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ལས་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པའི་བཟོད་པ་ཐོབ་པ་དེ་ལ་འཇུག་པའི་རྣམ་པར་དབྱེ་བ་བསྟན་པ་ཅུང་ཟད་ཅིག་བཅོམ་ལྡན་འདས་ཀྱིས་བཤད་དུ་གསོལ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་གང་བདག་གིས་ཐོས་ནས་དེ་བཞིན་ཉིད་དུ་བསྒྲུབས་པས་ཆོས་དེ་འཐོབ་པར་འགྱུར། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ལྷའི་བུ་འོད་ཟེར་སྲུང་ལ་འདི་སྐད་ཅེས་བཀའ་སྩལ་ཏོ། །འོད་ཟེར་སྲུང་བྱང་ཆུབ་སེམས་དཔའ་དགེ་བའི་རྩ་བ་མ་བསྐྲུན་པ་རྣམས་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་པར་མི་འགྱུར་གྱིས། བྱང་ཆུབ་སེམས་དཔའ་དགེ་བའི་རྩ་བ་བརྟན་པ་རྣམས་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །འོད་ཟེར་སྲུང་བྱང་ཆུབ་སེམས་དཔའ་ཆོས་བཞི་དང་ལྡན་ན་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །བཞི་གང་ཞེ་ན་འདི་ལྟ་སྟེ། སངས་རྒྱས་མཉམ་པ་ཉིད་དང་ཆོས་མཉམ་པ་ཉིད་དང་དགེ་འདུན་མཉམ་པ་ཉིད་དང ། ལྷའི་བུ་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །ལྷའི་བུ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །བཞི་གང་ཞེ་ན་འདི་ལྟ་སྟེ། བསམ་གཏན་བཞིས་སྟོང་པ་ཉིད་ལ་རྣམ་པར་རྩེ་བ་དང ། ཕ་རོལ་ཏུ་ཕྱིན་པ་དྲུག་གིས་ཐབས་མཁས་པ་ལ་རྣམ་པར་རྩེ་བ་དང ། མངོན་པར་ཤེས་པ་ལྔས་ཡེ་ཤེས་ལ་རྣམ་པར་རྩེ་བ་དང ། ཐོགས་པ་མེད་པའི་ཡེ་ཤེས་ཀྱིས་རྫུ་འཕྲུལ་ལ་རྣམ་པར་རྩེ་བ་སྟེ། འོད་ཟེར་སྲུང་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །འོད་ཟེར་སྲུང་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །
53.354a
བཞི་གང་ཞེ་ན་འདི་ལྟ་སྟེ། ཕུང་པོ་རྣམས་ལ་བྱང་ཆུབ་ཚོལ་ཡང་ཕུང་པོ་རྣམས་ལ་བྱང་ཆུབ་ཀྱི་རང་བཞིན་དུ་མོས་པ་མ་ཡིན་པ་དང ། ཁམས་རྣམས་ལ་བྱང་ཆུབ་ཚོལ་ཡང་ཁམས་རྣམས་ལ་བྱང་ཆུབ་ཀྱི་རང་བཞིན་དུ་མོས་པ་མ་ཡིན་པ་དང་སྐྱེ་མཆེད་རྣམས་ལ་བྱང་ཆུབ་ཚོལ་ཡང ། སྐྱེ་མཆེད་རྣམས་ལ་བྱང་ཆུབ་ཀྱི་རང་བཞིན་དུ་མི་རྟོག་པ་དང ། ཆོས་ཐམས་ཅད་ལ་བྱང་ཆུབ་ཚོལ་ཡང་ཆོས་ཐམས་ཅད་ལ་བྱང་ཆུབ་ཀྱི་རང་བཞིན་དུ་མོས་པ་མ་ཡིན་པ་སྟེ། འོད་ཟེར་སྲུང་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །འོད་ཟེར་སྲུང་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །བཞི་གང་ཞེ་ན་འདི་ལྟ་སྟེ། མི་གཡོ་བའི་ཚུལ་གྱིས་ཆོས་ཐམས་ཅད་ཡང་དག་པའི་མཐའ་ལ་གནས་པར་ཤེས་པ་དང ། དུས་གསུམ་མཉམ་པ་ཉིད་པས་ཆོས་ཐམས་ཅད་དེ་བཞིན་ཉིད་ལ་གནས་པར་འཇུག་པ་དང ། ཆོས་ཐམས་ཅད་མཚན་ཉིད་འདྲེས་པ་མེད་པས་ཆོས་ཀྱི་དབྱིངས་སུ་འདུ་བར་ཤེས་པ་ཆོས་ཐམས་ཅད་མཉམ་པ་ཉིད་ཀྱི་རྗེས་སུ་སོང་བས་ནམ་མཁའི་རང་བཞིན་དུ་སོ་སོར་རྟོག་པ་སྟེ། འོད་ཟེར་སྲུང་བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་བསྟན་པ་འདི་བཤད་པ་ན་བྱང་ཆུབ་སེམས་དཔའ་ལྔ་སྟོང ། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །ལྷའི་བུ་འོད་ཟེར་སྲུང་ནི་རྗེས་སུ་འཐུན་པར་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །ཆོས་ཀྱི་རྣམ་གྲངས་འདིའི་ཐ་མར་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་མི་འམ་ཅིའི་རྒྱལ་པོ་སྡོང་པོས་ཞུས་པ་ཕ་རོལ་དུ་ཕྱིན་པས་འདུལ་བ
53.354b
བསྟན་པའི་སྒོའི་ལེའུའི་ཆོས་ཀྱི་རྣམ་གྲངས་འདི་བཟུང་ངམ། ཀུན་དགའ་བོ་གསོལ་པ། བཅོམ་ལྡན་འདས་འདི་ལྟ་སྟེ། སངས་རྒྱས་ཀྱི་མཐུ་ཉིད་ཀྱིས་བདག་གིས་ཆོས་ཀྱི་རྣམ་གྲངས་འདི་བཟུང་ལགས་སོ། །བཅོམ་ལྡན་འདས་ཀྱེ་མའོ་ཇི་ཙམ་དུ་ཆོས་ཀྱི་རྣམ་གྲངས་འདི་ཟབ་མོ་རྣམ་པར་ངེས་པ་དང་དོན་བཟང་པོ་དང་ཚིག་འབྲུ་བཟང་པོས་བརྒྱན་པ་ནི་མཛེས་ཏེ་ངོ་མཚར་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ལ་བཅོམ་ལྡན་འདས་ཀྱིས་ཆོས་ཀྱི་སྒོ་མ་བསྡུས་པ་དེ་གང་ཡང་མ་མཆིས་སོ། །བཅོམ་ལྡན་འདས་སྔོན་བདག་ལ་ཆོས་སྣང་བར་གྱུར་པ་གང་ལགས་པ་དེ་ཡང་ང་ཆོས་ཀྱི་རྣམ་གྲངས་འདི་ལ་བརྟེན་ནས་འབུམ་འགྱུར་དུ་སྐྱེས་སོ། །བཅོམ་ལྡན་འདས་བདག་ནི་འདི་སྙམ་དུ་བདག་ལྟ་བུ་ཉི་ཚེ་བའི་འཆལ་བ་དང་ལྡན་པ་བློ་ཆུང་ངུ་ཉན་ཐོས་ཀྱི་ཐེག་པའི་སྐྱོན་མ་མཆིས་པ། ཐ་ཆད་ལ་ཞུགས་པར་གནས་པས་ཆོས་ཀྱི་རྣམ་གྲངས་འདི་ཐོས་ནས་ཀྱང་འདི་ལྟ་བུའི་ཆོས་ཀྱི་སྣང་བ་འདི་སྐྱེས་པར་གྱུར་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཚད་མ་མཆིས་པའི་སྣོད་དུ་གྱུར་པ། བློ་རྒྱ་ཆེ་ཞིང་རྒྱ་མཚོ་ལྟ་བུ་དང་ལྡན་པ་ཆོས་རིན་པོ་ཆེ་ཐམས་ཅད་ཡོངས་སུ་འཛིན་པ། གསོལ་བ་མ་བཏབ་པར་སེམས་ཅན་ཐམས་ཅད་ཀྱི་དགེ་བའི་བཤེས་གཉེན་བགྱི་བ་གང་ལགས་པ་དེ་དག་གིས་ཆོས་ཀྱི་རྣམ་གྲངས་འདི་ཐོས་ན་ཆོས་ཀྱི་སྣང་བ་ཇི་སྙེད་ཅིག་ཐོབ་པར་འགྱུར་བ་ལྟ་སྨོས་ཀྱང་ཅི་འཚལ་སྙམ་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཉི་མ་དང་ཟླ་བའི་སྣང་བ་ཇི་སྙེད་པ་དེ་དག་ཐམས་ཅད་ནི་དེ་བཞིན་གཤེགས་པའི་སྤུ་གཅིག་གི་འོད་ཀྱི་མོག་མོག་པོར་འགྱུར་རོ། །ཀུན་དགའ་བོ་དེ་བཞིན་གཤེགས་པའི་སྤུའི་ཁུང་བུ་ཐམས་ཅད་ནས་འོད་ཇི་སྙེད་བྱུང་བ་དེ་དག་ནི་ཤེས
53.355a
རབ་ཀྱི་འོད་ཀྱི་བརྒྱའི་ཆར་ཡང་ཉེ་བར་མི་འགྲོ་སྟེ། སྟོང་གི་ཆ་དང་སྟོང་ཕྲག་བརྒྱའི་ཆ་དང ། བྱེ་བའི་ཆ་དང་བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཆ་དང་གྲངས་དང་ཆ་དང་བགྲང་བ་དང་དཔེ་དང་རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། སྣང་བ་ཐམས་ཅད་ནི་ཤེས་རབ་ཀྱི་སྣང་བ་ལས་བྱུང་བའི་ཕྱིར་རོ། །ཀུན་དགའ་བོ་དེ་བཞིན་གཤེགས་པའི་ཤེས་རབ་ཀྱི་སྣང་བ་གང་ཡིན་པ་ཤེས་རབ་ཀྱི་སྣང་བ་དེ་དང་ལྡན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་འདས་པ་དང་མ་འོངས་པ་དང ། ད་ལྟར་བྱུང་བའི་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང ། གཡོ་བ་རྣམས་མཁྱེན་པའི་ཤེས་རབ་ཀྱི་སྣང་བ་དེ་ལྟ་བུ་དང་རིགས་ཀྱི་བུ་དང་རིགས་ཀྱི་བུ་མོ་དག་ལྡན་པར་འགྱུར་རོ། །ཀུན་དགའ་བོ་གང་ཆོས་ཀྱི་རྣམ་གྲངས་འདི་ཉན་པ་དང ། ཐོས་ནས་ཀྱང་མོས་པ་དང་མོས་ནས་ཀྱང་འཛིན་པ་དང་འཆང་བ་དང ། ཀློག་པ་དང་ཀུན་ཆུབ་པར་བྱེད་པ་དང་གཞན་དག་ལ་ཡང་རྒྱ་ཆེར་རབ་ཏུ་སྟོན་པ་དང་ཚུལ་བཞིན་དུ་སོ་སོར་རྟོགས་པ་དང ། དེ་བཞིན་དུ་བསྒྲུབ་པ་དེ་དག་ནི་བྱང་ཆུབ་ཀྱི་སེམས་མི་བརྗེད་པ་དང་སེམས་ཅན་ཡོངས་སུ་སྨིན་པར་བྱ་བ་དོན་དུ་གཉེར་བ་དང་སྙིང་རྗེ་ཆེན་པོའི་གོ་ཆ་བགོས་པ་དང་བྱམས་པ་ཆེན་པོའི་གོ་ཆ་བགོས་པ་དང ། བདུད་དང་ཕྱིར་རྒོལ་བ་བཅོམ་པ་དང་བྱང་ཆུབ་ཀྱི་སྙིང་པོར་གཞོལ་བའི་སྐྱེས་བུ་དམ་པར་རིག་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཆོས་ཀྱི་རྣམ་གྲངས་འདི་ཐོས་ནས་མོས་པ་དང ། འཛིན་པ་དང་འཆང་བ་དང་ཀློག་པ་དང་ཀུན་ཆུབ་པར་བགྱིད་པ་དང ། གཞན་དག
53.355b
ཡང་རྒྱ་ཆེར་རབ་ཏུ་སྟོན་པའི་རིགས་ཀྱི་བུ་འམ་རིགས་ཀྱི་བུ་མོ་དེ་བསོད་ནམས་ཇི་སྙེད་ཅིག་སྐྱེད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རིགས་ཀྱི་བུ་འམ་རིགས་ཀྱི་བུ་མོ་གང་གིས་སྔ་དྲོའི་དུས་ཀྱི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་བཀང་སྟེ། རྒྱུན་ཏུ་ཞུགས་པ་དང ། ལན་ཅིག་ཕྱིར་འོང་བ་དང་ཕྱིར་མི་འོང་བ་དང ། དགྲ་བཅོམ་པ་དང ། རང་སངས་རྒྱས་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སྦྱིན་པ་བྱིན་པ་དང ། དེ་བཞིན་དུ་ཉི་མའི་གུང་དང་ཕྱེམ་རེད་ཀྱི་དུས་དང་སྲོད་དང་ནམ་གྱི་གུང་ཐུན་དང ། ཐ་རས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བར་ལ་སྦྱིན་པ་བྱིན་པ་དང་རྣམ་གྲངས་འདི་ལྟ་བུས་ལོ་གཅིག་གམ། ལོ་བརྒྱའམ། ལོ་སྟོང་ངམ། ལོ་བརྒྱ་ཕྲག་སྟོང་དུ་སྦྱིན་པ་བྱིན་ན་ཀུན་དགའ་བོ་དེ་ལ་ཇི་སྙམ་དུ་སེམས། རིགས་ཀྱི་བུ་འམ་རིགས་ཀྱི་བུ་མོ་དེ་གཞི་དེ་ལས་བསོད་ནམས་མང་དུ་སྐྱེད་དམ། ཀུན་དགའ་བོས་གསོལ་པ། བཅོམ་ལྡན་འདས་མང་སྟེ་ཚད་མ་མཆིས་སོ། །བདེ་བར་གཤེགས་པ་དཔག་ཏུ་མ་མཆིས་སོ། །བཅོམ་ལྡན་འདས་གདུགས་གཅིག་བསགས་པའི་བསོད་ནམས་ཀྱི་ཕུང་པོ་དེ་ཡང་ཚད་མ་མཆིས་ན། དགུང་ལོ་བརྒྱ་ཕྲག་སྟོང་དུ་བསགས་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །བྱང་ཆུབ་དོན་དུ་གཉེར་བ་དང་ཆོས་ཀྱི་འཁོར་ལོ་བསྐོར་བ་དོན་དུ་གཉེར་བ་དང ། སེམས་ཅན་རབ་ཏུ་ཐར་པར་བྱ་བ་དོན་དུ་གཉེར་བ་གང་ཆོས་ཀྱི་རྣམ་གྲངས་འདི
53.356a
ཐོས་ནས་མོས་སམ། འཛིན་ཏམ། འཆང་ངམ་ཀློག་གམ། ཀུན་ཆུབ་པར་བྱེད་ན་རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་པ་དེ་དེ་ལས་བསོད་ནམས་ཀྱི་ཕུང་པོ་མང་དུ་སྐྱེད་ན་གང་དེ་བཞིན་ཉིད་དུ་བསྒྲུབ་པ་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན། ཀུན་དགའ་བོ་གང་དག་ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་ཙམ་འཛིན་ཏམ། འཆང་ངམ་ཀློག་གམ། ཀུན་ཆུབ་པར་བྱེད་དམ། གཞན་དག་ལ་ཡང་སྟོན་ན་དེ་ནི་སྦྱིན་པ་ཞེས་བྱ་སྟེ། དེ་ནི་སྦྱིན་པ་ཐམས་ཅད་ཟིལ་གྱིས་གནོན་པའོ། །འདི་ལྟ་སྟེ་ཆོས་ཀྱི་སྦྱིན་པ་འདི་ནི་སྦྱིན་པ་རྣམས་ཀྱི་མཆོག་གོ། །འདི་ལྟ་སྟེ་ཆོས་ཀྱི་རྗེས་སུ་འཛིན་པ་དེ་ནི་རྗེས་སུ་བཟུང་བ་རྣམས་ཀྱི་མཆོག་གོ། །འདི་ལྟ་སྟེ་ཆོས་ཀྱི་གདིང་བ་དེ་ནི་གདིང་བ་རྣམས་ཀྱི་མཆོག་གོ། །འདི་ལྟ་སྟེ། ཆོས་ཡོངས་སུ་འཛིན་པ་དེ་ནི་ཡོངས་སུ་འཛིན་པ་རྣམས་ཀྱི་མཆོག་གོ། །དེ་ཅིའི་ཕྱིར་ཞེ་ན། ཀུན་དགའ་བོ་ཆོས་ཀྱི་སྦྱིན་པ་བྱིན་པས་ནི་ཉོན་མོངས་པ་འབྲི་བར་འགྱུར་རོ། །ཟང་ཟིང་གི་སྦྱིན་པ་བྱིན་པས་ནི་ལུས་བརྟན་པ་བྱས་པར་འགྱུར་རོ། །ཀུན་དགའ་བོ་དེ་ལྟ་བས་ན་བྱང་ཆུབ་སེམས་དཔའ་ཉོན་མོངས་པ་འབྲི་བར་བྱེད་འདོད་པས་སངས་རྒྱས་ཀྱིས་གནང་བ་ཆོས་ཀྱི་སྦྱིན་པ་དེ་སྦྱིན་པར་བྱ་སྟེ། ཆོས་ཀྱི་སྦྱིན་པ་དེས་ནི་ཡོན་ཏན་གྱི་ཁྱད་པར་ཐམས་ཅད་ཐོབ་པར་འགྱུར་རོ། །བྱང་ཆུབ་སེམས་དཔའ་ཅོས་སྦྱིན་པ་སྦྱིན་པ་ནི་ཡོན་ཏན་གྱི་ཕན་ཡོན་ཡང་དག་ཕུལ་སུམ་བཅུ་རྩ་གཉིས་རབ་ཏུ་འཛིན་པར་འགྱུར་རོ། །སུམ་བཅུ་རྩ་གཉིས་གང་ཞེ་ན། འདི་ལྟ་སྟེ་དྲན་པ་དང་ལྡན་པར་འགྱུར་བ་དང་བློ་གྲོས་དང་ལྡན་པར་འགྱུར་བ་དང ། རྟོགས་པ་དང་ལྡན་པར་འགྱུར་བ་དང་འདོད་ཆགས་ཆུང་བར་འགྱུར་བ་དང ། ཞེ་སྡང་ཆུང་བར་འགྱུར་བ་དང ། གཏི་མུག་ཆུང་བར་འགྱུར་བ་དང་བདག་དང་གཞན་གྱི་ཉོན་མོངས་པ་ཚར་གཅོད་པར་འགྱུར་བ་དང ། སྐྱེ་བོ་མང་པོ
53.356b
དགའ་བར་འགྱུར་བ་དང་དེའི་བསྔགས་པ་ལྷ་རྣམས་ཀྱི་བརྗོད་པར་འགྱུར་བ་དང ། ལྷ་དང་ཀླུ་དང་གནོད་སྦྱིན་དང་དྲི་ཟ་རྣམས་ཀྱིས་བསྲུང་བར་འགྱུར་བ་དང ། ལས་བྱས་ནས་བསོད་སྙོམས་ཟ་བར་འགྱུར་བ་དང ། ཆོས་གོས་དང་བསོད་སྙོམས་དང་མལ་ཆ་དང་ན་བའི་གསོས་སྨན་དང་ཡོ་བྱད་རྙེད་པར་འགྱུར་བ་དང་གྲགས་པ་དང་སྒྲ་དང་ཚིགས་སུ་བཅད་པ་ཕྱོགས་བཅུར་གྲགས་པར་འགྱུར་བ་དང ། མི་མ་ཡིན་པ་རྣམས་ཀྱིས་གླགས་རྙེད་པར་མི་འགྱུར་བ་དང ། སངས་རྒྱས་བཅོམ་ལྡན་འདས་རྣམས་ཀྱིས་བསྔགས་པར་འགྱུར་བ་དང ། དམ་པའི་ཆོས་ཡོངས་སུ་བསྲུང་བ་དང ། སངས་རྒྱས་བཅོམ་ལྡན་འདས་རྣམས་ཀྱིས་དམ་པའི་ཆོས་འཛིན་པར་འང་འགྱུར་བ་དང་ངན་སོང་ཐམས་ཅད་ཀྱིས་འཇིགས་པར་མི་འགྱུར་ཞིང ། དེ་ལ་ལྷ་དང་མིར་སྐྱེ་བ་དཀའ་བར་མི་འགྱུར་བ་དང ། སངས་རྒྱས་མཐོང་བ་དང་མི་འབྲལ་བར་འགྱུར་བ་དང ། དགེ་འདུན་ལ་བསྙེན་བཀུར་བྱེད་པ་དང་བྲལ་བར་མི་འགྱུར་བ་དང་སྐྱེ་བ་དྲན་པར་འགྱུར་བ་དང ། སངས་རྒྱས་ཀྱི་ཞིང་ཡོངསུ་དག་པར་སྐྱེ་བར་འགྱུར་བ་དང་ནམ་དུ་ཡང་དབང་པོ་མི་ཚང་བར་མི་འགྱུར་བ་དང ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཐོབ་པར་འགྱུར་བ་དང ། གཟི་བརྗིད་ཅན་གཟུངས་ཀྱི་ས་བོན་བསྒྲུབ་པར་འགྱུར་བ་དང ། སྤོབས་པ་རྒྱུན་མི་འཆད་པའི་རྒྱུ་རབ་ཏུ་འཛིན་པར་འགྱུར་བ་དང ། སྐྱེ་བོ་མཁས་པས་གཡོག་བྱས་པར་འགྱུར་བ་དང་ཤེས་རབ་ཆེན་པོའི་རྒྱུ་རབ་ཏུ་འཛིན་པར་འགྱུར་བ་དང ། མྱུར་དུ་ཆོས་ཀྱི་སྣང་བ་རབ་ཏུ་ཐོབ་པར་འགྱུར་བ་དང ། དེའི་སེམས་ལ་ཚུལ་བཞིན་མ་ཡིན་པའི་ཡིད་ལ་བྱེད་པ་ཀུན་དུ་མི་འབྱུང་བ་དང ། འཇིག་རྟེན་གྱི་ཟང་ཟིང་གྱི་སྦྱིན་པ་ཐམས་ཅད་ཟིལ་གྱིས་མནན་ནས་དེ་ཆོས་ཀྱི་གཏེར་ཟད་མི་ཤེས་པ་ཡོངས་སུ་འཛིན་པར་འགྱུར་བ་སྟེ། ཀུན་དགའ་བོ་བྱང་ཆུབ་སེམས་དཔའ་ཆོས་ཀྱི་སྦྱིན་པ་སྦྱིན་ན་ཡོན་ཏན་གྱི་ཁྱད་པར
53.357a
ཡང་དག་ཕུལ་སུམ་བཅུ་རྩ་གཉིས་པོ་འདི་དག་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་ཆོས་ཀྱི་རྣམ་གྲངས་འདི་བཟུང་ལགས་ཏེ། བཅོམ་ལྡན་འདས་ཡོངས་སུ་མྱ་ངན་ལས་འདས་པའི་སླད་ན་སེམས་ཅན་སྣོད་དུ་གྱུར་པ་དེ་དག་གི་རྣ་ལམ་དུ་བསྒྲག་པར་བགྱི། ཀུན་བསྲུང་བར་བགྱི། མོས་པར་བགྱི། དེ་ཅིའི་སླད་དུ་ཞེ་ན། བཅོམ་ལྡན་འདས་བདག་ནི་ཡོན་ཏན་ཕུན་སུམ་ཚོགས་པ་འདི་དང་བསོད་ནམས་ཡོངས་སུ་འཛིན་པ་དོན་དུ་གཉེར་བའི་སླད་དུའོ། །དེ་ནས་བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་ལེགས་སོ། །ཞེས་བྱ་བ་གནང་སྟེ། ཀཽ་ཤི་ཀ་ཁྱོད་དམ་པའི་ཆོས་ཡོངས་སུ་གཟུང་བའི་ཕྱིར་ངའི་མདུན་དུ་སེང་གེའི་སྒྲ་བསྒྲགས་པ་ལེགས་སོ་ལེགས་སོ། །ཀཽ་ཤི་ཀ་དགེ་བའི་རྩ་བ་འདི་ངའི་དམ་པའི་ཆོས་ཡུན་ཇི་སྲིད་དུ་གནས་པ་དེ་སྲིད་དུ་ལྷ་དང་ལྷ་མ་ཡིན་གཡུལ་འགྱེད་པ་ན་ལྷ་མ་ཡིན་རྣམས་ནི་ཕམ་པར་འགྱུར་ལྷ་རྣམས་ནི་རྒྱལ་བར་འགྱུར་རོ། །དེ་ཅིའི་ཕྱིར་ཞེ་ན། ཀཽ་ཤི་ཀ་ཆོས་ཀྱི་རྣམ་གྲངས་འདི་ནི་ཡང་དག་ཕུལ་ཡིན་ཏེ། ཀཽ་ཤི་ཀ་འདི་ལྟ་སྟེ། ཆོས་ཐམས་ཅད་མི་དམིགས་པ་དེ་ནི་འཇིགས་པ་མེད་པའི་སྦྱིན་པའོ། །ཀཽ་ཤི་ཀ་གང་ཅུང་ཟད་འཇིགས་པ་སྐྱེ་བ་དེ་དག་ཐམ་ཅད་ནི་འཇིག་ཚོགས་ལ་ལྟ་བ་ལ་དམིགས་ཤིང་རབ་ཏུ་གནས་པ་ལས་བྱུང་ངོ ། །ཀཽ་ཤི་ཀ་གང་མི་དམིགས་པ་དེ་དམ་པའི་ཆོས་ཡོངས་སུ་འཛིན་པའོ། །དེ་ནས་བཅོམ་ལྡན་འདས་ལ་མི་མཇེད་ཀྱི་བདག་པོ་ཚངས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་བསམ་གཏན་གྱི་བདེ་བ་ལ་གནས་པ་ཚད་མ་མཆིས་པ་བཏང་སྟེ། གྲོང་དང་གྲོང་ཁྱེར་དང་གྲོང་རྡལ་དང་ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་གང་དང་གང་ན་ཆོས་ཀྱི་རྣམ་གྲངས་འདི་རབ་ཏུ་སྤྱོད་པ་དེ་དང་དེ་དག་ཏུ་བདག་ཆོས་ཉན་པའི་སླད་དུ་ཉེ་བར་མཆི་བར་བགྱིའོ། །མཆིས་ནས་ཀྱང་ཆོས
53.357b
སྨྲ་བ་དེ་དག་ཆོས་དང་ལྡན་པས་བསྲུང་བ་དང ། སྦ་བ་དང་བསྐྱབ་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཉན་ཐོས་དང ། རང་སངས་རྒྱས་དང་བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་དང་འཁོར་ལོ་སྒྱུར་བའི་རྒྱལ་པོ་རྣམ་ནི་འདི་ལས་བྱུང་བའི་སླད་དུའོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་བཞིས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོ་ཆེན་པོ་བཞི་པོ་བདག་ཅག་དང ། བཅོམ་ལྡན་འདས་ཀྱི་ཉན་ཐོས་ཆེན་པོ་དེ་དག་དང་བདག་ཅག་གིས་ཆོས་ཀྱི་རྣམ་གྲངས་འདི་ཡུན་རིང་དུ་གནས་པར། བགྱི་བའི་སླད་དུ་བསྲུང་བ་དང་སྦ་བ་དང་བསྐྱབ་པ་ལ་བརྩོན་པར་བགྱིའོ། །བདག་ཅག་གི་འཁོར་གང་དག་སངས་རྒྱས་དང་སངས་རྒྱས་ཀྱི་བསྟན་པ་ལ་མ་དད་པ་དེ་དག་ཀྱང་ཇི་ནས་དེ་བཞིན་གཤེགས་པའི་བསྟན་པ་བསྲུང་བའི་སླད་དུ་བརྩོན་པར་འགྱུར་བར་དད་པར་བགྱིའོ། །བཅོམ་ལྡན་འདས་དགེ་སློང་དང་དགེ་སློང་མ་དང་དགེ་སྙེན་དང་དགེ་སྙེན་མ་དག་སངས་རྒྱས་ཀྱི་བསྟན་པ་ལ་རྩོན་པ་དང ། གཞན་ཡང་བཅོམ་ལྡན་འདས་ཀྱི་སྟན་པ་ལ་མངོན་པར་དད་པ་སྲུང་བ་མཆིས་པ་དེ་དག་སྲུང་བའི་ཆེད་དུ་གསང་སྔགས་ཀྱི་ཚིག་འདི་དག་ལ་ཁ་ཏོན་དུ་བགྱིའོ། །གསང་སྔགས་ཀྱི་ཚིག་དེ་དག་གིས་གནོད་སྦྱིན་དང་སྲིན་པོ་དང་དྲི་ཟ་དང་མི་འམ་ཅི་དང་ལྟོ་འཕྱེ་ཆེན་པོ་དང ། གྲུལ་བུམ་ལ་སོག་པ་དང་མི་མ་ལག་པ་དང ། གཞན་ཡང་སངས་རྒྱས་ཀྱི་སྟན་པ་ལ་ཞེ་སྡང་བར་བགྱིད་པ་རྣམ་ཤིན་དུ་ཚར་ཆོད་པར་འགྱུར་རོ། །ཏརྱ་ཐཱ། ཏ་ར་བེ་ཨ་ར་བ་ཨ་ནོ་པ་ས་ར་པ། ཧུ་ལུ་མ་ཧཱ་ཧུ་ལུ་ཧུ་ལུ། ཧུ་ལུ། ཨ་བད་ཊེ། བི་ཀད་ཊེ། པ་རི་ཚེ་ད་ནི། ནི་གྲ་ནི་ཧཱ་ཏེ། པྲ་གྷཱ་ཏ་ནི། ཨིད་ཊེ་ཨིད་ཏི། བིད་ཊི་བིད་ཊི། ཨད་ཚེ་གད་ཚེ། མ་ར་ནི་གྲ་ཧ་ན། སརྦ་པ་ར་པྲ་བཱ་དི་ནི། གྲ་ཧ་ན་སརྦ་མི་ཐྱ་པྲ་ཡཱ། ཏ་ནན་ནི་གྲ་ཧ་ན། སརྦ། བུད་དྷ་བར་ནི་ཏ་དྷར་མ་ནི་ཡ་ཏ་ཤ་ཡ་བྷཱུ་ཏཱན། བྷད་དྷ་བར་ནི་ཏན། ཙ་ཏུར་མ་ཧཱ་རཱ་ཛ་ནིར་དེ་ཤ་ན། མན་ཏྲ་བ་ལན། ཨ་བ་ཏཱ་ར། ཨ་ཐྱ་ཏཱ་ར། པྲཱེཀྵེ་ཎ་ནི་གྲ་ཧཱ་ཡ། དེ་ནས་བཅོམ་ལྡན་འདས་ཀྱི་བྱང་ཆུབ་སེམས་དཔའ་བྱམས་པ་དང་བྱང་ཆུབ་སེམས་དཔའ་ལྷའི
53.358a
ཅོད་པན་ལ་བཀའ་སྩལ་པ། སྐྱེས་བུ་དམ་པ་དག་ངས་བསྐལ་པ་མཐའ་ཡས་གྲངས་མེད་པར་ཡང་དག་པར་བསྒྲུབས་པའི་བྱང་ཆུབ་འདི་ཇི་ནས་ཡུན་རིང་དུ་གནས་པར་འགྱུར་བ་དང་ནུབ་པར་མི་འགྱུར་བར་བྱ་བའི་ཕྱིར་ཁྱེད་གཉིས་ཀྱི་ལག་ཏུ་བཞག་གོ་གཏད་དོ། །དེ་གཉིས་ཀྱིས་གསོལ་པ། བཅོམ་ལྡན་འདས་བདག་ཅག་གཉིས་ཀྱིས་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་སླད་ན་ཆོས་ཀྱི་རྣམ་གྲངས་འདི་གཟུང་བར་བགྱིའོ། །རྒྱས་པར་བགྱིའོ། །ཆོས་ཀྱི་རྣམ་གྲངས་འདི་ཆོས་སྨྲ་བ་དང ། དགེ་བའི་རྩ་བ་བསྐྲུན་པའི་རིགས་ཀྱི་བུ་འམ་རིགས་ཀྱི་བུ་མོ་དེ་དག་གི་ལག་ཏུ་མཆི་བར་བགྱིའོ། །དེ་དག་མདོ་སྡེ་འདི་ལ་མོས་པར་བགྱི་བ་དང་ཡོངས་སུ་འ་འཛིན་པར་བགྱི་བའི་སླད་དུ་དེ་དག་གི་ཡིད་རབ་ཏུ་གཟུང་བར་བགྱིའོ། །བཅོམ་ལྡན་འདས་སླད་མའི་ཚེ་སླད་མའི་དུས་ན་ཆོས་ཀྱི་རྣམ་གྲངས་འདི་གང་དག་གི་རྣ་ལམ་དུ་ཐོས་པ་དང ། ཐོས་ནས་འཛིན་པ་དང ། འཆང་བ་དང ། ཀློག་པ་དང་ཀུན་ཆུབ་པར་བགྱིད་པ་དང ། འཆང་བ་དེ་དག་ནི་བྱང་ཆུབ་སེམས་དཔའ་བྱམས་པ་དང ། བྱང་ཆུབ་སེམས་དཔའ་ལྷའི་ཅོད་པན་གྱི་བྱིན་གྱི་བརླབས་ལེགས་པར་རིག་པར་བགྱིའོ། །དེ་ནས་བདུད་སྡིག་ཅན་འཁོར་དེར་འདུས་པར་གྱུར་ནས་འདུག་པ་དེ་གདོང་ལས་མཆི་མ་ཟག་ཅིང་ང་རོ་ཕྱུང་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་བཅོམ་ལྡན་འདས་ཀྱིས་ཉན་ཐོས་ཀྱི་ཐེག་པ་ལས་བརྩམས་ཏེ། ཆོས་བསྟན་པ་ལ་ནི་བདག་ཐ་ན་སྤུ་ཟིང་ཞེས་བགྱིད་པ་ཙམ་ཡང་མ་མཆིས་སོ། །གང་བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཕྱག་རྒྱ་དེ་བཞིན་གཤེགས་པའི་བྱིན་གྱི་བརླབས་ཀྱིས་བྱིན་གྱིས་བརླབས་པ། བྱང་ཆུབ་སེམས་དཔའ་ཐམས་ཅད་ཀྱི་བྱང་ཆུབ་ཀྱི་ལམ་ལ་འཇུག་པ། སེམས་ཅན་ཐམས་ཅད་ཀྱི་རྟོན་པའི་ཆོས་ཀྱི་རྣམ་གྲངས་འདི་གསུངས་པ་དེས་བདག་མྱ་ངན
53.358b
གྱི་ཟུག་ངུ་དང་ལྡན་ཞིང་བདག་ཉིད་རྙིས་པར་གྱུར་པ་སྙམ་བགྱིད་དོ། །བཅོམ་ལྡན་འདས་བདག་ལ་ཕྱག་བརྐྱང་བ་བསྩལ་དུ་གསོལ། གང་ཐོས་པས་བདག་མྱ་ངན་གྱི་ཟུག་རྔུ་དང་ལྡན་པར་འགྱུར་བའི་ཆོས་ཀྱི་རྣམ་གྲངས་འདི་ལྟ་བུ་ཡང་མི་གསུང་བར་གསོལ། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན་ཁྱོད་དང་འཐུན་པའི་སེམས་ཅན་ཆོས་ཟབ་མོ་འདི་ལྟ་བུ་ལ་མ་མོས་པ་ནི་མང ། གང་དག་མོས་པའི་སམས་ཅན་དེ་དག་ནི་ཉུང་གིས། མྱ་ངན་མ་བྱེད་སྨྲེ་སྔགས་མ་འདོན་ཅིག་།སྡིག་ཅན་འདི་ལྟ་སྟེ་དཔེར་ན། སའི་སྟེང་ནས་རྡུལ་བླངས་པ་སྙེད་ཀྱི་སེམས་ཅན་ནི་ཆོས་ཀྱི་རྣམ་གྲངས་ཟབ་མོ་འདི་ལྟ་བུ་ལ་མོས་སོ། །སའི་རྡུལ་ཇི་སྙེད་པ་དེ་སྙེད་ཀྱི་སེམས་ཅན་ན་ཆོས་ཀྱི་རྣམ་གྲངས་ཟབ་མོ་འདི་ལ་མ་མོས་ཏེ། དེ་དག་ཐམས་ཅད་ནི་ཁྱོད་དང་འཐུན་ནོ། །སེམས་ཅན་གྱི་ཁམས་ཚད་མེད་པ་ཁྱོད་དང་འཐུན་གྱིས་དེ་བས་ན་སྡིག་ཅན་དགའ་བར་གྱིས་ཤིག་།ཆོས་ཀྱི་རྣམ་གྲངས་འདི་བཤད་པ་ན་སེམས་ཅན་དཔག་ཏུ་མེད་པ་ནི་བྱང་ཆུབ་ལ་ཡང་དག་པར་ཞུགས་སོ། །བྱང་ཆུབ་སེམས་དཔའ་དགུ་ཁྲི་ཉིས་སྟོང་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །སྲོག་ཆགས་བརྒྱད་ཁྲི་བཞི་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །དགེ་སློང་བརྒྱད་སྟོང་ནི་ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ནས་སྣང་བ་ཆེན་པོས་ཁྱབ་པར་གྱུར་ཏེ། ལྷའི་མེ་ཏོག་གི་ཆར་ནི་རབ་ཏུ་བབ། སིལ་སྙན་བརྒྱ་སྟོང་དག་ནི་མ་དཀྲོལ་བར་རང་འཁྲོལ་ལོ། །ལྷ་བྱེ་བ་ཁྲག་ཁྲིག་བརྒྱ་སྟོང་རྣམས་ནི་སྟེང་གི་བར་སྣང་ལ་ཀྱེ་མ་བདག་ཅག་གིས་འཛམ་བུའི་གླིང་དུ་ཆོས་ཀྱི་འཁོར་ལོ་ལན་གཉིས་བསྐོར་བ་འདི་མཐོང་ངོ ། །བཅོམ་ལྡན་འདས་ཀྱིས་གང་ཡང་ཆོས་ཀྱི་རྣམ་གྲངས་འདི་བསྟན་ཏེ་བཤད་ནས། སེམས་ཅན་གྱི་དོན་མཛད་པ
53.359a
གང་ལགས་པ་འདི་ན་གྲོང་ཁྱེར་འཁོར་མོར་འཇིག་ཏུ་ཆོས་ཀྱི་འཁོར་ལོ་བསྐོར་ཏེ། སེམས་ཅན་ཡོངས་སུ་སྨིན་པར་མཛད་པ་དེ་བས་ཆེས་མཆོག་གོ། །གང་ཆོས་ཀྱི་རྣམ་གྲངས་འདི་འཛིན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བགྱིད་པ་དང ། གཞན་དག་ལ་རྒྱ་ཆེར་སྟོན་པ་དང ། ཐ་ན་གླེགས་བམ་ལ་བྲིས་ཏེ། འཆང་བའི་སེམས་ཅན་དེ་དག་ཀྱང་ཆོས་ཀྱི་འཁོར་ལོ་བསྐོར་བར་འགྱུར་རོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པ་དང ། བྱང་ཆུབ་སེམས་དཔའ་ལྷའི་ཅོད་པན་དང ། ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་མི་འམ་ཅིའི་རྒྱལ་པོ་སྡོང་པོས་ཞུས་པ་ཕ་རོལ་ཏུ་ཕྱིན་པ་རྣམ་པར་ངེས་པ་བསྟན་པ་དང ། དམ་པའི་ཆོས་རིན་པོ་ཆེའི་ལེའུ་ཞེས་བྱ་བར་ཡང་ཟུག་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་བྱམས་པ་དང ། ཚེ་དང་ལྡན་པ་ཀུན་དགའ་བོ་དང་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་དགོའོ།། །།འཕགས་པ་མི་འམ་ཅིའི་རྒྱལ་པོ་སྡོང་པོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། །རྫོགས་སོ།། །མཾ་ག་ལཾ་བྷ་བ་ཏུ། །ཤུབྷ་མསྟརྦ་ཛཱ་ག་ཏཾ། ཡེ་དྷརྨཱ་ཧེ་ཏུ་པྲ་བྷ་བཱ་ཧེ་ཏུན་ཏེ་ཥཱན་ཏ་ཐ་ག་ཏོ་ཧྱ་བ་དད། ཏེ་ཥཱཉ་ཙ་ཡོ་ནི་རོ་དྷ་ཨེ་བཾ་བཱ་དཱི་མ་ཧཱ་ཤྲ་མ་ཎཿ ་ཞུ་ཆེན་གྱི་ལོ་ཅ་བ་བན་དེ་དཔལ་གྱི་ལྷུན་པོ་དང ། དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།