rKTs


J110

(e-text produced by ADARSHA)

see text in transliteration
54.175a
༄#། །རྒྱ་གར་སྐད་དུ། ཨཱརྱ་རཱཥྚ་པཱ་ལ་པ་རི་པྲིཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། ་བོད་སྐད་དུ། ་འཕགས་པ་ཡུལ་འཁོར་སྐྱོང་གིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང ། ཐབས་གཅིག་ཏུ་བཞུགས་ཏེ། དེ་ནས་ཚེ་དང་ལྡན་པ་ཡུལ་འཁོར་སྐྱོང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ནས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ག་ལ་བ་དེ
54.175b
ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པའི་བསྟན་པ་འདི་ནུབ་པར་བགྱིད་པའི་སེམས་ཅན་གང་ལགས་པ་དེ་དག་ཇི་ལྟ་བུ་དག་ཅིག་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང་གནས་འདི་གཉིས་ནི་བཅོམ་ལྡན་འདས་ཀྱིས་གསུངས་པ་སྟེ། གཉིས་གང་ཞེ་ན། དགེ་སློང་གི་གནས་དང ། ལྷོད་པའི་གནས་སོ། །དེ་ལ་དགེ་སློང་གི་གནས་ནི། ཚུལ་ཁྲིམས་དང་ལྡན་པའི་ཕྱོགས་གང་ཡིན་པའོ། །ལྷོད་པའི་གནས་ནི་ཚུལ་ཁྲིམས་འཆལ་པའི་ཕྱོགས་གང་ཡིན་པའོ། །ཡུལ་འཁོར་སྐྱོང་དེ་ལ་ཡོངས་སུ་མྱ་ངན་ལས་འདའ་བར་འདོད་པའི་དགེ་སློང་གིས་ནི་གནས་གཉིས་ལ་བསླབས་པར་བྱའོ། །གཉིས་གང་ཞེ་ན། ཚུལ་ཁྲིམས་ཀྱི་ཕུང་པོས་ཀྱང་ཤིན་ཏུ་བསྲུང་བར་བྱ་བ་དང ། བདག་ཉིད་ལ་ངེས་པར་བསམ་པར་བྱའི་ཕ་རོལ་ལ་ངེས་པར་བསམ་པར་མི་བྱའོ། །དེ་ལ་ཇི་ལྟར་བདག་ཉིད་ལ་ངེས་པར་བསམ་པར་བྱའི་ཕ་རོལ་ལ་ངེས་པར་བསམ་པར་མི་བྱ་ཞེ་ན། དེས་འདི་ལྟར་བརྟག་པར་བྱ་སྟེ། ཅི་བདག་རང་གི་སྡུག་བསྔལ་གྱི་ཕུང་པོ་ཟད་པར་བྱེད་འདོད་པ་ཡིན་ནམ། འོན་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ་ཡིན་སྙམ་དུ་བརྟག་པར་བྱའོ། །གལ་ཏེ་ཉན་ཐོས་ཀྱི་ཐེག་པས་ཡོངས་སུ་མྱ་ངན་ལས་འདའ་བར་འདོད་པ་ཞིག་ཡིན་ན་ནི་དེས་ཉན་ཐོས་ཀྱི་བསླབ་པ་ཁོ་ན་ལ་བསླབ་པར་བྱ་སྟེ། སོ་སོ་ཐར་པའི་སྡོམ་པས་བསྡམ་པར་བྱའོ། །ཆོ་ག་དང་སྤྱོད་ཡུལ་ཕུན་སུམ་ཚོགས་པར་བྱའོ། །ཁ་ན་མ་ཐོ་བ་ཕྲ་རབ་ཙམ་དག་ལ་ཡང་འཇིག་པར་ལྟ་བས་ཡང་དག་པར་བླངས་ཏེ་བསླབ་པར་བྱའོ། །བསླབ་པའི་གཞི་རྣམས་ལ་ཡང་ལུས་ཀྱི་ལས་དང ། ངག་གི་ལས་དང ། ཡིད་ཀྱི་ལས་ཡོངས་སུ་དག་པར་བྱའོ། །འཚོ་བ་ཡོངས་སུ་དག་པ་དང ། སྨད་དུ་མེད་པར་ཡང་བྱའོ། །བརྐམ་པ་མེད་ཅིང་རོ་རྣམས་ལ་འཆུམས་པ་མེད་པ་དང ། ཆོས་གོས་ལ་ཚོད་ཟིན་པར་ཡང་བྱའོ། །ལྷུང་བཟེད་ལ་ཚོད་ཟིན་པར་ཡང་བྱའོ། །དེས་ཁ་ཟས་ཡོག་དྲོད་ཀྱིས་བཟའ་བར་ཡང་མི་བྱ་སྟེ། ལྟོ་མ་བཀྲེས་ཙམ་དུ་ཁ་ཟས་བསྙུངས་པ་དེས་བསླབ་པར་བྱའོ། །དེས་ཁ་ཟས་ལ
54.176a
རྟག་ཏུ་རྒྱུན་མི་ཆད་པར་མི་གཙང་བའི་འདུ་ཤེས་བསྐྱེད་པར་བྱའོ། །འདི་ལྟ་སྟེ། ཕྱི་ས་དང ། གཅིན་གྱི་འདུ་ཤེས་དང ། རྣག་གི་འདུ་ཤེས་དང ། སྐྱུགས་པའི་འདུ་ཤེས་དང ། མི་གཙང་བའི་འདུ་ཤེས་དང ། རྨ་བསྐུ་བ་ལྟ་བུའི་འདུ་ཤེས་དང ། དམན་པའི་འདུ་ཤེས་དང ། མི་འཐུན་པའི་འདུ་ཤེས་དང ། ཤུ་བ་ལྟ་བུའི་འདུ་ཤེས་དང ། དོར་བའི་འདུ་ཤེས་དང ། སྤང་བའི་འདུ་ཤེས་དང ། དྲི་མི་ཞིམ་པའི་འདུ་ཤེས་བསྐྱེད་པར་བྱ་སྟེ། དེས་དེ་ལྟ་བུའི་ཚུལ་དུ་བཟའ་ཞིང་ཚོད་རིག་པར་བྱའོ། །དེས་ཆགས་པ་མེད་པ་དང ། སྡང་བ་མེད་པ་དང ། རྨོངས་པ་མེད་པ་དང ། རྟག་ཏུ་དབེན་པ་ལ་མངོན་པར་དགའ་བར་བྱ་སྟེ། བྲེ་མོ་གཏམ་ལ་དགའ་བར་མི་བྱའོ། །རི་དགས་འཆི་བ་ལྟ་བུར་དང་དུ་བླང་བར་བྱའོ། །དབེན་པར་བྱའོ། །དབེན་པ་ལ་མངོན་པར་དགའ་བར་བྱའོ། །དབེན་པ་ལ་མངོན་པར་དགའ་ཞིང་མོས་པ་དང ། བཟོད་པ་དང་ལྡན་པར་བྱའོ། །དེས་པ་དང་འགྲོགས་ན་བདེ་བར་བྱའོ། །འཇིག་རྟེན་གྱི་གཏམ་ལ་མི་རྟེན་པར་བྱའོ། །ཉོ་ཚོང་སྤྱོད་པ་སྤོང་བར་བྱའོ། །སྨན་དཔྱད་ལ་དགའ་བ་དང ། ཕྲིན་པ་ལ་དགའ་བ་དང ། ཁྱིམ་གྱི་བྱ་བ་དང་འབྲེལ་པར་མི་བྱའོ། །འདུག་པ་དང ། འགྲེང་བ་དང ། འཆག་པ་དང ། ཉལ་བ་ལ་མཁས་པར་བྱའོ། །རབ་དུ་དབེན་པ་དང ། དགོན་པར་དགའ་བ་དང ། ཞི་བའི་གནས་མལ་སྒྲ་ཆུང་བ། སྐད་ཆུང་བ། འཇིགས་པའི་ཡིད་ལ་བྱེད་པ་མེད་པ། སྡིག་སྦྲུལ་མེད་པ། མི་མང་པོ་མེད་པ། མིས་དབེན་པ། ནང་དུ་ཡང་དག་འཇོག་དང་འཚམ་པ་བསྟེན་པར་བྱའོ། །བདག་བསྟོད་པར་ཡང་མི་བྱ། གཞན་སྨད་པར་ཡང་མི་བྱའོ། །ཚུལ་འཆོས་པ་དང་ཁ་གསག་མི་བྱའོ། །རྟག་ཏུ་རྒྱུན་མི་ཆད་པར་སྐྱོ་བའི་སེམས་བསྐྱེད་པར་བྱའོ། །དེས་ཁྱིམ་པ་དང་རབ་ཏུ་བྱུང་བ་རྣམས་དང་འདུ་ཞིང་འདྲིས་པར་མི་བྱའོ། །སྟོང་པའི་ཆོས་རྣམས་ཀུན་ཏུ་བསྟེན་པར་བྱ། བསྒོམ་པར་བྱ། མང་དུ་བྱའོ། །དེས་རིག་པ་དང་མི་ལྡན་པའི་དགེ་སློང་དང་ལྷན་ཅིག་ཕྲད་པ་སྤང་བར་བྱའོ། །དགེ་སློང་མ་དང་འདྲིས་པར་མི་བྱའོ། །འདོད་པ་ཆུང་བར་ཡང་བྱའོ། །རྟག་ཏུ་བདག་ཉིད་ཀྱི་འཁྲུལ་པ་རྣམས་ལ་སོ་སོར་བརྟགས་པར་བྱའི་གཞན་གྱི་འཁྲུལ་པ་རྣམས་ལ་བརྟག་པར་མི་བྱའོ། །ཕ་མ་ལ་ཡང་ཡིད་བརྟན་པར་མི་བྱ་ན་རིགས་གཞན་ལྟ་ལ་ཅི་སྨོས། ཤིན་ཏུ་ཡང་དག་པར་བསྡམ
54.176b
པ་ཅན་དུ་བྱའོ། །ཉེ་བར་ཞི་བའི་ཆོས་ཀྱི་སྦྱིན་བདག་བྱའོ། །དམིགས་པ་ལ་མཁས་པར་བྱའོ། །དབེན་པའི་གནས་མལ་དུ་གནས་པར་བྱའོ། །འཐུན་པ་ཡང་གཞན་དག་ལ་སྨྲ་བར་མི་བྱ་ན་མི་འཐུན་པ་ལྟ་ཅི་སྨོས། དེས་ཆོས་དེ་དག་ལ་སེམས་ཉེ་བར་གནས་པར་བྱས་ནས། ཆོས་ཟབ་མོ་རྣམས་ལ་སོ་སོར་བཏགས་པར་བྱའོ། །ཆོས་ཟབ་མོ་རྣམས་ལ་བརྟག་པར་བྱ་བ་དེ་དག་ཀྱང་གང་ཞེ་ན། མིག་མི་རྟག་གོ་སྙམ་དུ་སོ་སོར་བརྟག་པར་བྱའོ། །དེའི་སྐྱེ་བ་དང་འཇིག་པ་ལ་ཡང་སོ་སོར་བརྟག་པར་བྱའོ། །དེ་ལ་སྐྱེ་བ་དང ། འཇིག་པ་ལ་སོ་སོར་བརྟག་པ་གང་ཡིན་པ་དེ་ནི་མེད་པ་ལ་སོ་སོར་རྟོག་པའོ། །དེ་ཅིའི་ཕྱིར་ཞེ་ན། མིག་ཅེས་བྱ་བ་ནི་མེད་པའི་ཕྱིར་རོ། །མིག་དང ། གཟུགས་དང་མིག་གི་རྣམ་པར་ཤེས་པ་ནི་དམིགས་པ་མ་ཡིན་གྱི་མེད་པ་དམིགས་པ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་དམིགས་པ་མེད་པའི་ཕྱིར་རོ། །དེས་རྣ་བའི་རྟེན་བསམ་པ་དང ། མིགོ་དང ། །སྣ་དང ། ལྕེ་དང ། ལུས་དང ། ཡིད་ཀྱི་རྟེན་བསམ་པར་མི་བྱའོ། །ཅི་ཡང་རུང་བའི་རྟེན་བསམ་པར་མི་བྱའོ། །དེ་ལྟར་བྱས་ན་ཅི་ཞིག་བསམ་པ་ཡིན། དེ་བཞིན་དུ་ཆོས་རྣམས་སྟོང་པར་ཡང་བརྩོན་པར་བྱའོ། །དེ་ལྟར་བརྩོན་པ་དེ་ནི་ཚུལ་ཁྲིམས་ཀྱི་ཕུང་པོ་ཡོངས་སུ་དག་པར་བྱེད་དོ། །ཏིང་ངེ་འཛིན་གྱི་ཕུང་པོ་དང ། ཤེས་རབ་ཀྱི་ཕུང་པོ་ཡོངསུ་དག་པར་བྱེད་དོ། །རྒྱུན་ཏུ་ཞུགས་པའི་འབྲས་བུ་འཐོབ་པར་འགྱུར་རོ། །ལན་ཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པ་ཉིད་ཐོབ་པར་འགྱུར་ཏེ། དེ་ལྟ་བུའི་འདུ་འཛི་མེད་པ་ནི་དང་པོའི་ཉན་ཐོས་ཀྱི་ཡིན་ཏེ། དེ་དེ་དག་གིས་ཟག་པ་ཟད་པ་ཐོབ་པར་འགྱུར་རོ། །དེ་ལ་དགེ་སློང་ལྟར་བཅོས་པ་གང་ཞེ་ན། ཡུལ་འཁོར་སྐྱོང་འདི་ན་དགེ་སློང་བདག་ཉིད་ལ་ངའོ་སྙམ་དུ་འཛིན་ཏེ། དེ་ནི་ཚུལ་ཁྲིམས་ཀྱི་ཕུང་པོ་ཡོངས་སུ་མ་རྫོགས་པ་དང་ལྡན་པ་ཡིན། ཆོས་གོས་གཅེས་པར་འཛིན་པ་དང ། ལྷུང་ཟེད་གཅེས་པར་འཛིན་པ་ཡིན། ཟང་ཟིང་གཅེས་པར་འཛིན་པ་ཡིན་ཏེ། དེ་ནི་མི་སྨ་བ་སྤངས་ནས་ངན་སོང་དུ་འགྱུར་བའི་མལ་ཆ་དང ། སྟན་དང ། འགྲོན་དུ་གཉེར་བ་ཆེན་པོ་རྣམས་བདག་གིར་བྱེད། བུད་མེད་དང་འདྲིས་པར་བྱེད། དགེ་སློང་མ་དང་འདྲིས་པར་བྱེད།
54.177a
རྒྱལ་པོས་བཀྲབས་པ་དང་འདྲིས་པར་བྱེད་དེ། དེ་འདྲིས་པར་གྱུར་ནས་རྒྱུན་མི་འཆད་པར་མིག་གིས་གཟུགས་རྣམས་ལ་ངེས་པར་སེམས་སོ། །དེས་དེ་ལྟར་སེམས་བསྐྱེད་ནས་ཀུན་ནས་ཉོན་མོངས་པར་འགྱུར་རོ། །ཀུན་ནས་ཉོན་མོངས་པའི་སེམས་དང་ལྡན་ན་གནས་འདི་ལྟ་བུ་ཡོད་དེ། །ཉེས་པ་ལྕི་བ་དེ་བྱེད་པ་འམ། ཡང་ན་ཆུང་ངུ་བྱེད་ཅིང་འདུག་པར་འགྱུར་ཏེ། ཡུལ་འཁོར་སྐྱོང་འདི་ནི་དགེ་སློང་ལྟར་བཅོས་པ་ཡིན་ནོ། །ཡུལ་འཁོར་སྐྱོང་ཅིའི་ཕྱིར་དགེ་སློང་ལྟར་བཅོས་པ་ཡིན་ཞེ་ན། དགེ་སློང་ལྟར་བཅོས་པ་དེ་དེ་བཞིན་གཤེགས་པས་མལ་ཆ་དང་སྟན་གནང་བ་ཐ་མལ་པ་གང་ལ་དགེ་སྦྱོང་གནས་པའི་མལ་ཆ་དང་སྟན་གང་ཡིན་པ་མི་བླུན་པོ་དེས་སྤངས་ན་ཆོས་གོས་ལ་ཞེན་ཅིང་ཟང་ཟིང་ལ་ཞེན་ནས་བུད་མེད་དང་འདྲིས་པར་བྱེད་ཅིང ། ཁྱིམ་པ་དང་འདྲིས་པར་བྱེད་ན་འདྲིས་པར་འགྱུར་བའི་མི་བླུན་པོ་དེ་ལ་དགེ་སྦྱོང་གི་ཚུལ་ལྟ་ག་ལ་ཡོད་དེ། དེའི་སྟེང་དུ་ཆོས་ཟབ་མོ་རྣམས་ལ་ཡང་སུན་འབྱིན་ཅིང་གཤེ་བར་བྱས་ལས་དེས་ཐོས་སུ་ཟིན་ཀྱང་བསྔགས་པ་མ་ཡིན་པ་བརྗོད་པར་བྱེད་དོ། །དགོན་པའི་བསྔགས་པ་མ་ཡིན་པ་རྗོད་པར་བྱེད་དོ། །གང་ལ་དེའི་སེམས་མངོན་པར་དགའ་བའི་འདོད་པ་རྣམས་འབའ་ཞིག་གི་བསྔགས་པ་རྗོད་པར་བྱེད་ཅིང་གང་ལ་དེའི་སེམས་མངོན་པར་དགའ་བའི་བྲེ་མོའི་གཏམ་འབའ་ཤིག་གི་བསྔགས་པ་རྗོད་པར་བྱེད་ལ། དགེ་སློང་གི་གནས་གང་ཡང་རུང་བ་དེ་དག་གི་བསྔགས་པ་མ་ཡིན་པ་རྗོད་པར་བྱེད་དོ། །གང་ལ་ལས་དེ་བཞིན་གཤེགས་པས་མདོའི་ཚིག་ཁྱིམ་ན་གནས་པ་དང ། རབ་ཏུ་བྱུང་བ་རྣམས་དང ། འདུ་འཛིར་མི་འབྱུང་བར་བྱའོ་ཞེས་གསུངས་པའི་མདོའི་ཚིག་དེ་བོར་ནས་དགེ་སྦྱོང་གི་ཚུལ་མི་འདོད་ཅིང་དགེ་སློང་གི་དངོས་པོ་མི་འདོད་དེ། གཅིག་པུར་འདུག་ཅིང་བུད་མེད་ལ་ཆོས་འཆད་པར་བྱེད་ལ་གཞན་དག་ལ་ཡང་དེ་ལྟ་བུའི་གཞི་རྣམས་སུ་ལུང་འབོག་པར་བྱེད་པའོ། །དེ་ཅིའི་ཕྱིར་ཞེ་ན། དེ་དག་ནི་དེ་བཞིན་གཤེགས་པས་ཆོས་ཀྱི་ཆོམ་རྐུན་པར་གསུངས་ཏེ། སོ་སོར་ཐར་པ་སྤངས་ནས་གཅིག་པུར་འདུག་ཅིང་བུད་མེད་ལ་ཆོས་འཆད་པའི་ཕྱིར་རོ། །མི་བླུན་པོ
54.177b
དེ་དག་ནི་བཅོས་མ་སྟེ། མགོ་བྲེགས་པས་བཅོས་པ་དང ། གོས་ངུར་སྨྲིག་གྱོན་པས་བཅོས་པའོ། །རྒྱུ་གང་གིས་བཅོས་མ་ཡིན་པར་ཤེས་པར་བྱ་ཞེ་ན། སངས་རྒྱས་བཅོམ་ལྡན་འདས་རྣམས་ཀྱིས་སྨད་པ་གང་ཡིན་པ་མི་བླུན་པོ་དེ་དག་གི་གནང་བར་བྱེད་དེ། ལོ་ཉི་ཤུ་མ་ལོན་པར་རྫོགས་པར་བསྙེན་པར་བྱེད། རང་གི་ལག་གིས་ལེན་པར་བྱེད། མ་བརྟགས་པ་ལ་ལོངས་སྤྱོད་པར་བྱེད། རང་ཉིད་གཡོས་དང་འཚེད་པའི་ལས་བྱེད། གསེར་དང་དངུལ་བདག་གིར་བྱེད། ཁྲེ་རྒོད་དང ། འབྲུ་ལ་སོགས་པ་བསོགས་པར་བྱེད། ཁྱིམ་གྱི་གཞི་དང ། ཞིང་གི་གཞི་དང ། ཀུན་དགའ་ར་བའི་གཞི་ཉོ་ཚོང་བྱེད་ཅིང་ཚལ་ཟའི་འཚོ་བ་སྦྱོར་བར་བྱེད། ཁྱིམ་གྱི་གཞི་དང ། ཞིང་གི་གཞི་དང ། ཀུན་དགའ་ར་བའི་གཞི་ལེན་པར་བྱེད་དེ། ལས་ཀྱི་རྣམ་པར་སྨིན་པ་ལ་ཡང་ཡིད་མི་ཆེས་ཤིང་སོ་སོར་ཐར་པ་ལ་ཡང་མ་དད་ནས་དེ་ལ་འབབ་དེ་ལ་བབ་དེ་ལ་བདེན་པར་འཛིན་དེའི་སྤྱོད་ལམ་བྱེད། གེ་སྦྱོང་དུ་འདྲ་བར་འཛིན་ཅིང་གང་ན་སྐྱེ་བོ་མང་པོ་ཡོད་པ་དེར་གཅེར་བུ་པ་དང ། མཚུངས་པར་སྟོན་པར་བྱེད། གང་ཟག་ཏུ་ལྟ་བ་བསྔགས་པར་བྱེད། གང་ཟག་ཏུ་ལྟ་བ་དང ། གཅེར་བུ་པ་དང་མཚུངས་པར་སྟོན་པས། སྐྱེ་བོ་མང་པོ་འཛུད་པར་བྱེད་ཅིང་འགོད་པར་བྱེད། སངས་རྒྱས་ཀྱི་སྤྱོད་ཡུལ་དེ་བཞིན་གཤེགས་པའི་གནས་པ་སྟོང་པ་ཉིད་ལ་དམིགས་ནས་སུན་འབྱིན་པར་བྱེད། གཤེ་བར་བྱེད་པར་ཤེས་པར་བྱའོ། །ཡུལ་འཁོར་སྐྱོང་དེ་ལྟ་བུའི་སེམས་ཅན་དག་འབྱུང་བར་འགྱུར་ཏེ། དེ་དག་ནི་ཁྱིམ་པ་ཡང་མ་ཡིན། དགེ་སྦྱོང་ཡང་མ་ཡིན་ཏེ། དེ་དག་གིས་ནི་དེ་བཞིན་གཤེགས་པའི་བསྟན་པ་འདི་ནུབ་པར་བྱེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དགེ་སློང་ཚུལ་ཁྲིམས་རྣམས་ལ་བསྡམ། །ཞི་ཞིང་ཞི་བའི་གནས་ལ་དགའ། །སོ་སོར་ཐར་པ་སློབ་བྱེད་པ། །དེ་དག་དགེ་སློང་བྲམ་ཟེ་ཡིན། །ཆོས་རྣམས་གཙོ་བོ་བླངས་ནས་ནི། །ཅི་ཡང་མེད་པའི་དགེ་སློང་བ། །བས་མཐའ་དགོན་པ་རྣམས་སུ་དགའ། །དེ་དག་དགེ་སློང་བྲམ་ཟེ་ཡིན། །དེ་དག་བྲེ་མོ་གཏམ་མི་དགའ། །སོ་སོར་ཐར་རྣམས་ལེགས་པར་བསླབས། །གང་ཟག་མཆོག་ལ་ཉིན་མཚན་དུ། །བཀུར་སྟི་ཆེན་པོ་བྱེད་པ་ཡིན། །ཞིང་ཡང་མི་རྨེད་ཚོང་མི་བྱེད། །
54.178a
ལྷུང་བཟེད་ཆོས་གོས་རྙེད་མི་ཚོལ། །ལེན་པ་མེད་པར་བརྩོན་པ་གང ། །དེ་དག་སངས་རྒྱས་ཉན་ཐོས་ཡིན། །དེ་དག་བུད་མེད་སྟོན་མི་བྱེད། །བུད་མེད་རྣམས་དང་འདུ་བ་མེད། །ཤིང་དྲུང་རྣམས་ནི་བསྔགས་པར་བྱེད། །དེ་དག་སངས་རྒྱས་ཉན་ཐོས་ཡིན། །ཟས་དང་སྐོམ་གྱི་དོན་གྱི་ཕྱིར། །གཅམ་གསག་དག་ཀྱང་ཡང་མི་བྱེད། །དེ་འདྲར་གྱུར་པ་དེ་དག་ནི། །དགེ་སློང་མ་ལ་སྟེན་མི་བྱེད། །མཚོན་རྣོ་ཇི་ལྟར་བདར་བ་བཞིན། །བུད་མེད་རྣམས་ནི་དེ་འདྲར་ཤེས། །སོ་སོར་ཐར་ལས་བྱུང་བ་བཞིན། །བུད་མེད་འདུ་ཤེས་སྤོང་བར་བྱེད། །དེས་པ་དེ་དག་ཟས་ཕྱིར་དང ། །སྐོམ་གྱི་ཕྱིར་དང་གོས་ཀྱི་ཕྱིར། །ཁྱིམ་ཁྱིམ་དག་དུ་འགྲོ་བྱེད་ཅིང ། །ཆོས་རྣམས་སྟོན་པར་མི་བྱེད་དོ། །དགེ་སློང་རྣམས་ཀྱིས་བུད་མེད་རྣམས། །བལྟ་བར་མི་བྱ་རྫོགས་སངས་རྒྱས། །དེ་ལ་ཤེས་ལྡན་སུ་ཞིག་རྟོན། །དེ་ནི་བདུད་ཀྱི་སྤྱོད་ཡུལ་ཡིན། །དེ་དག་གིས་ནི་མེད་པར་སྨྲས། །རོ་དང་ཉལ་བ་བཞིན་དུ་ཉལ། །དེ་ཕྱིར་སངས་རྒྱས་ཐམས་ཅད་མཁྱེན། །འདུ་འཛི་བསྔགས་པར་མི་མཛད་དོ། །ཆོས་རྣམས་སྲོག་མེད་གསོ་བ་མེད། །གསོག་དང་གསོབ་དང་སྙིང་པོ་མེད། །སྟོང་པ་ཉིད་ལ་མོས་བྱེད་པ། །དེ་ནི་དགེ་སློང་ཆོས་ཉིད་དོ། །རྟག་ཏུ་བརྩོན་འགྲུས་ཕུན་སུམ་ཚོགས། །གཅིག་པུ་དགོན་པར་གནས་བྱེད་དང ། །འཇིག་རྟེན་ན་ནི་རྟེན་མེད་སེམས། །དེ་ནི་དགེ་སློང་ཆོས་ཉིད་དོ། །སེང་གེ་བཞིན་དུ་འཇིག་པ་མེད། །ཚངས་པར་སྤྱོད་ལ་གཞོལ་བར་བྱེད། །སྡུག་བསྔལ་ཀུན་ལས་ཐར་བྱའི་ཕྱིར། །ཤེས་རབ་ལྡན་པས་ལམ་ལ་སྒོམ། །མིག་དང་གཟུགས་ནི་ཚོལ་བ་ན། །དེ་དག་གིས་ནི་རྣམ་ཤེས་རྙེད། །དངོས་པོ་དེ་ཡང་ཚོལ་བ་ན། །བཙལ་བ་གང་ཡིན་མི་རྙེད་དོ། །སྔོན་ཡང་མ་བྱུང་ཕྱིས་མི་འབྱུང ། །དབུས་ནའང་ཡོད་པ་མ་ཡིན་ཏེ། །དེ་ལྟ་བུ་ཡི་དོན་གྱིས་ན། །ཆོས་ཀུན་མཉམ་པ་ཉིད་ཀྱིས་ཕྱིར། །དེས་པ་དེ་དག་ཟས་ཕྱིར་དང ། །སྐོམ་གྱི་ཕྱིར་དང་གོས་ཀྱི་ཕྱིར། །ཁྱིམ་ཁྱིམ་དག་དུ་འགྲོ་བྱེད་ཅིང ། །ཆོས་རྣམས་སྟོན་པར་མི་བྱེད་དོ། །རྒྱུ་མེད་དེས་པ་བཟང་པོ་ཡིན། །དེ་དག་སངས་རྒྱས་བསླབས་པ་རྣམས། །འདའ་ཞིང་འཇིག་པར་མི་བྱེད་དེ། །བརྟུལ་བཟང་སྟོང་ཉིད་སྐྲག་པ་མེད། །འཇིགས་པ་མེད་པར་འཇུག་པར་བྱེད། །ལྟ་བ་མི་བཟད་འཇིག་མི་བྱེད། །སེམས་ཅན་གང་ཟག་དངོས་མི་འཇིག་།དཀར་པོའི་ཆོས་རྣམས
54.178b
ཐམས་ཅད་ལ། །ཤིན་ཏུ་བརྟན་པར་གནས་པ་ཡིན། །བརྟན་པོ་དེ་དག་འཇིག་རྟེན་ན། །མྱ་ངན་འདས་པའང་རེག་གྱུར་ནས། །མཆོད་པའི་གནས་སུ་འོས་པར་འགྱུར། །གང་དག་ཤེས་རབ་འཆལ་པ་དང ། །ལེ་ལོ་ཅན་དང་དམན་ལ་བརྩོན། །ཐོས་པ་ཉུང་དང་སྦིག་པ་འདོད། ང་རྒྱལ་ཐ་བ་ཁྲ་འགྱུར་གནས། །མགོ་ལ་སྤུ་གྲི་སྟེན་བྱེད་ཅིང ། །ཤིང་གིས་ཁ་བསྒྱུར་ཆོས་གོས་གྱོན། །སྟོང་པ་ཉིད་ནི་དོན་མེད་པ། །དེ་ནི་མཁས་པ་སྒོམ་མི་བྱེད། །ཆོས་ལ་སུན་འབྱིན་ཐེག་ཆེན་གྱི། །བསྔགས་པ་མ་ཡིན་རྗོད་པར་བྱེད། །གང་ཞིག་ཆོས་འདི་བསྟན་པ་རྣམས། །ཇི་ལྟར་བསྟན་པ་དེ་བཞིན་དུ། །ནག་པོའི་ཕྱོགས་ལ་ཀུན་ཏུ་ཆགས། །དེས་ནི་ངན་འགྲོར་འགྲོ་བར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཡུལ་འཁོར་སྐྱོང་དང ། དགེ་སློང་དེ་དག་དང ། ལྷ་དང་མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཡུལ་འཁོར་སྐྱོང་གིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། རྫོགས་སྷོ།། །།