rKTs


J205

(e-text produced by ADARSHA)

see text in transliteration
62.222a
བོད་སྐད་དུ། འཕགས་པ་ཐར་པ་ཆེན་པོ་ཕྱོགས་སུ་རྒྱས་པ་འགྱོད་ཚངས་ཀྱིས་སྡིག་སྦྱངས་ཏེ་སངས་རྒྱས་སུ་གྲུབ་པར་རྣམ་པར་བཀོད་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན། དགེ་སློང་གི་དགེ་འདུན་ཆེན་པོ་བརྒྱད་ཁྲི་དང ། བྱང་ཆུབ་སེམས་དཔའི་དགེ་འདུན་སུམ་ཁྲི་དྲུག་སྟོང་དང་ཐབས་གཅིག་ཏུ་བཞུགས་ཏེ། དེ་དག་ཀུན་ཀྱང་སྐྱེ་བ་གཅིག་གིས་ཐོགས་པ། སྒྲིབ་པ་ཐམས་ཅད་དང་ཡོངས་སུ་བྲལ་བ།
62.222b
གཟི་བརྗིད་དང་དཔལ་གྱི་དབང་ཕྱུག་དང་ལྡན་པ། དེ་བཞིན་གཤེགས་པ་ལ་གསོང་བའི་དོན་ཐབས་ཀྱིས་བསྐུལ་བ། སངས་རྒྱས་ཀྱི་ཞིང་ཡོངས་སུ་དག་པར་བྱེད་པ། སངས་རྒྱས་ཀྱི་བྱ་བ་ལྷུན་གྱིས་གྲུབ་པ། སངས་རྒྱས་རྣམས་ཀྱི་བྱིན་གྱི་བརླབས་ཀྱིས་རྣམ་པར་བཀོད་པ། ཆོས་ཀྱི་སྡེ་སྣོད་སྲུང་ཞིང་སྐྱོབ་པའི་ཕྱིར་ཐེག་པ་ཆེན་པོའི་མདོ་གཟུངས་སུ་འཛིན་ཅིང་སེང་གེའི་སྒྲས་ཕྱོགས་བཅུར་ཆོས་ཀྱི་འབྲུག་སྒྲ་ཆེན་པོ་སྒྲོགས་པ། དེ་དག་གི་ཡོན་ཏན་གྱི་གོ་འཕང་ནི་རི་རབ་དང་འདྲ་བ་ཤེས་རབ་ཟབ་ཅིང་རྒྱ་ཆེ་བ་ནི་རྒྱ་མཚོ་དང་འདྲ་སྟེ། བདུད་ཀྱི་སྡེ་དཔུང་དང་བཅས་པར་བཏུལ་བ། མུ་སྟེགས་ཐམས་ཅད་སྡུད་ཅིང་སེམས་རྣམ་པར་བྱང་བ་ལ་འཇོག་པ། མཐུ་སྟོབས་དང་ལྡན་པས་རྣམ་པར་གྲོལ་བ་ལ་ཐོགས་པ་མེད་པ། མཉམ་པ་ཉིད་ལ་བདེ་བར་གནས་པ། དྲན་པ་དང་ཏིང་ངེ་འཛིན་ཀུན་དུ་བཟུང་བ། བསྟན་པ་ལ་མོས་ཤིང་བློ་གྲོས་དང་ལྡན་པ། བསྡུ་བའི་དངོས་པོ་བཞི་དང ། ཕ་རོལ་དུ་ཕྱིན་པ་དྲུག་དང ། ཐབས་ལ་མཁས་པ་དཔག་ཏུ་མེད་པས་ཆོས་ཐམས་ཅད་ཀྱི་དོན་དང་མི་ལྡན་པ་མེད་པ། སྐྱེ་བོ་རྣམས་ཀྱི་ཡིད་བཞིན་དུ་ཕྱིར་མི་ལྡོག་པའི་འཁོར་ལོ་བསྐོར་བ། ཡོད་པ་དང་མེད་པ་ཤེས་པའི་ཤེས་རབ་དང་ལྡན་པས་ཆོས་ཀྱི་རྣམ་གྲངས་ལ་མཁས་པ། མངོན་པར་ཤེས་པའི་ཏིང་ངེ་འཛིན་ལ་བཞུགས་ཏེ་སྤྱན་ལྔས་སེམས་ཅན་རྣམས་ཀྱི་དབང་པོ་རྟོགས་པ། གཟི་བརྗིད་དང་དཔལ་དཔག་ཏུ་མེད་པ་སྐྱེ་བོ་མང་པོ་རྣམས་བསམ་གཏན་དང་ཤེས་རབ་ཀྱིས་སེམས་སུ་སྦྱངས་ཏེ་མཚན་དང་དཔེ་བྱད་བཟང་པོས་བརྒྱན་ཅིང་མཆོག་དང་ལྡན་པར་བྱེད་པ། སེམས་ནམ་མཁའ་དང་འདྲ་བ། འཇིག་རྟེན་གྱི་གཟུགས་དང་ཁ་དོག་ཡོངས་སུ་བཏང་སྟེ། ཆོས་རྣམས་ཀྱི་ཆོས་ཉིད་ལ་མཁས་པ། རང་གི་རིག་པ་དང་ལྡན་པའི་ཤེས་རབ་ཀྱིས་སེམས་ཅན་གང་ནས་གང་དུ་འཁོར་བར་ཤེས་པ། ཏིང་ངེ་འཛིན་ཐམས་ཅད་དང་ལྡན་པས་མཉམ་པ་མེད་པ་ལ་བསྙེན་པ། དགེ་བའི་རྩ་བ་ཡུན་རིང་པོ་ནས་བསྐྱེད་པས་སངས་རྒྱས་ཀྱི་དབང་ཕྱུག་ཐོབ་པ། ཡེ་ཤེས་དང ། སྟོབས་བཅུ་དང ། མི་འཇིགས་པ་བཞི་དང ། མ་འདྲེས་པ་བཅཝ་བརྒྱད་དང་ལྡན་པ། བཟང་འགྲོའི་སྒོ་ནི་ཕྱེ། ངན་འགྲོ་རྣམས་ཀྱི་སྒོ་ནི་བཀག་སྟེ། སེམས་ཅན་ཀུན་ལ
62.223a
བུ་གཅིག་དང་འདྲ་བར་སྙོམས་པར་བསྟན་པའི་ཕྱིར་ལམ་རྒྱུད་ལྔར་སྐྱེ་ཞིང་ལུས་སྟོན་པར་བྱེད་པ། སེམས་ཅན་རྣམས་ཉོན་མོངས་པ་ལས་བསྒྲལ་བའི་ཕྱིར་སྨན་པའི་རྒྱལ་པོ་ལྟར་རྫུ་ཞིང་འཁོར་བ་ལ་གནས་ཏེ། ནད་གསོ་བའི་ཆོ་ག་ལ་མཁས་པས་ནད་ཀྱི་རྐྱེན་བཞིན་དུ་སྨན་བྱིན་ནས་འཁོར་བ་ལས་ཡོངས་སུ་ཐར་བར་བྱེད་པ། གང་གིས་ཐོས་ཀྱང་མ་གྲོལ་བ་མེད་པ་དེ་ལྟ་བུའི་ཡོན་ཏན་ཚད་མེད་པ་དང་ལྡན་པ། སྔོན་འདས་པའི་སངས་རྒྱས་གྲངས་མེད་པ་ལ་མཆོད་པ་མྱོང་བ། སངས་རྒྱས་ཀྱི་ངོ་བོ་ཉིད་ཤིན་དུ་རིག་པ། དེ་བཞིན་གཤེགས་པ་ཡུན་དུ་གནས་པར་ཤེས་པ། རྟག་པར་ཡང་སེམས་ཅན་ལ་སངས་རྒྱས་ཀྱི་ངོ་བོ་ཉིད་ཡོད་པར་བཤད་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་དང ། བྱང་ཆུབ་སེམས་དཔའ་འོད་མི་གཡོ་དང ། བྱང་ཆུབ་སེམས་དཔའ་ཀླུ་ཤིང་ལྗོན་པ་དང ། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང ། བྱང་ཆུབ་སེམས་དཔའ་མཐུ་ཆེན་ཐོབ་དང ། བྱང་ཆུབ་སེམས་དཔའ་སྨན་གྱི་རྒྱལ་པོ་དང ། བྱང་ཆུབ་སེམས་དཔའ་སྨན་གྱི་བླ་དང ། བྱང་ཆུབ་སེམས་དཔའ་ཀུན་དུ་བཟང་པོ་དང ། བྱང་ཆུབ་སེམས་དཔའ་ཆོས་ཀྱི་དབང་ཕྱུག་རྒྱལ་པོ་དང ། བྱང་ཆུབ་སེམས་དཔའ་སེང་གེའི་སྒྲ་དང ། བྱང་ཆུབ་སེམས་དཔའ་གཟུངས་འཛིན་དང ། བྱང་ཆུབ་སེམས་དཔའ་རིན་ཆེན་མཛོད་དང ། བྱང་ཆུབ་སེམས་དཔའ་རྟག་འགྲུས་དང ། བྱང་ཆུབ་སེམས་དཔའ་རྒྱུན་མི་གཏོང་དང ། བྱང་ཆུབ་སེམས་དཔའ་མཚན་ཉིད་ལ་དད་པ་དང ། བྱང་ཆུབ་སེམས་དཔའ་ཐུབ་མེད་དང ། བྱང་ཆུབ་སེམས་དཔའ་བྱམས་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་སུམ་ཁྲི་དྲུག་སྟོང་དང ། མཐུ་སྟོབས་དང་ལྡན་པའི་ལྷ་བྱེ་བ་ཁྲག་ཁྲིག་ཕྲག་བརྒྱད་བཅུ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་རྣམས་དང ། ལྷ་དང ། ཀླུ་དང ། གནོད་སྦྱིན་དང ། མི་དང་མི་མ་ཡིན་པ་ལ་སོགས་པ་དང ། ཚངས་པ་དང ། བརྒྱ་བྱིན་ལ་སོགས་ཏེ་གྲངས་མེད་དཔག་ཏུ་མེད་པའི་ལྷ་དང་ལྷན་ཅིག་ཏུ་ནམ་མཁའ་ལ་འཁོད་དེ། ལྷའི་རིན་པོ་ཆེའི་མེ་ཏོག་གི་ཆར་ཕབ་ནས་རོལ་མོ་སིལ་སྙན་ཡང་གྲངས་མེད་དཔག་ཏུ་མེད་པ་སྒྲ་རང་འབྱིན་པ་བྱས་ཏེ། ལྷ་ཚངས་པས་སམ་བ་རའི་སྤོས
62.223b
ཀྱི་བདུག་པ་དྲི་ཞིམ་པོས་བདུགས་ཏེ། དེ་བཞིན་གཤེགས་པ་ལ་མཆོད་པའི་སྤྲིན་ཕུང་ཕྱོགས་བཅུའི་འཇིག་རྟེན་གྲངས་མེད་པའི་ཁམས་ཀུན་ཁྱབ་པར་གྱུར་ཏེ། ཕྱོགས་བཅུའི་སངས་རྒྱས་ཐམས་ཅད་དང ། ཕྱོགས་བཅུའི་ཆོས་ཐམས་ཅད་དང ། ཕྱོགས་བཅུའི་བྱང་ཆུབ་སེམས་དཔའི་དགེ་འདུན་ཐམས་ཅད་ལ་ཀུན་དུ་མཆོད་ཡོན་གསོལ་བར་གྱུར་ཏོ། །དེ་ལྟར་ལྷ་རྣམས་ཀྱིས་མཆོད་པ་ཕུལ་ནས་ཐེག་པ་ཆེན་པོ་བླ་ན་མེད་པའི་ལམ་ཚོལ་བའི་ཕྱིར་རོ། །དེ་ནས་དེའི་ཚེ་དེའི་དུས་ན་བཅོམ་ལྡན་འདས་འཁོར་ཆེན་པོ་གྲངས་མེད་དཔག་ཏུ་མེད་པས་བཀོར་བ་དེ་དག་དང་ཐབས་གཅིག་ཏུ་ཤིང་ས་ལ་ཆེན་པོ་ག་ལ་བ་དེ་ལོགས་སུ་གཤེགས་ནས་དཔྱིད་ཟླ་འབྲིང་པོའི་ཚེས་བཅཝ་ལྔ་ལ་མྱ་ངན་ལས་འདའ་བའི་ཁར། དེ་བཞིན་གཤེགས་པའི་བྱིན་གྱི་བརླབས་ཀྱིས་བྱམས་པ་ཆེན་པོས་སེམས་ཅན་ཐམས་ཅད་སྡུད་ཅིང་སྐྱོབ་པར་དགོངས་ཏེ། གསུང་དབྱངས་ཆེན་པོ་ཕྱུང་ནས་སྒྲ་དེས་ཕྱོགས་བཅུ་ཀུན་དུ་ཁྱབ་པར་སོ་སོའི་སྐད་བཞིན་དུ་སེམས་ཅན་ཐམས་ཅད་ལ་བཀའ་སྩལ་པ། དེང་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སེམས་ཅན་ལ་ཐུགས་བརྩེ་བར་དགོངས་སོ། །སེམས་ཅན་ལ་སྲུང་ཞིང་སྐྱོབ་པར་དགོངས་སོ། །སེམས་ཅན་སྡུད་ཅིང་གཞེས་པར་དགོངས་སོ། །སེམས་ཅན་ལ་སྙོམས་པར་གཟིགས་པ་ནི་དཔེར་ན་བུ་གཅིག་ལ་ལྟ་བ་དང་འདྲ་བར་རྟེན་མེད་པ་ལ་རྟེན་བྱའོ། །སངས་རྒྱས་ཀྱི་བདག་ཉིད་མ་མཐོང་བ་ནི་མཐོང་བར་བྱའོ། །ཉོན་མོངས་པ་དང་མ་བྲལ་བ་ནི་བྲལ་བར་བྱའོ། །བདེ་བ་མེད་པ་ནི་བདེ་བར་བྱའོ། །མ་གྲོལ་བ་ནི་རྣམ་པར་གྲོལ་བར་བྱའོ། །ལོངས་སྤྱོད་མེད་པ་ནི་ལོངས་སྤྱོད་དང་ལྡན་པར་བྱའོ། །ཐེ་ཙོམ་དང་མ་བྲལ་བ་ནི་ཐེ་ཙོམ་དང་བྲལ་བར་བྱའོ། །འགྱོད་ཚངས་མ་བྱས་པ་ནི་འགྱོད་པ་ཚངས་པར་བྱའོ། །མྱ་ངན་ལས་མ་འདས་པ་ནི་མྱ་ངན་ལས་བཟླ་བར་བྱའོ་ཞེས་བཀའ་སྩལ་པ་དང ། དེའི་ཚེ་དེའི་དུས་ན་ལམ་གྱི་གཡས་གཡོན་དུ་ས་གཞི་མཉམ་པ་ཐང་བཟང་པོ་ཡོངས་སུ་དག་པ། བཀྲ་ཤིས་ཀྱི་ས་ཆུ་ཞེང་དུ་མཉམ་པར་དཔག་ཚད་སྟོང་ཕྲག་བཅུ་བཅུ་ཡོད་པར་བཅོམ་ལྡན
62.224a
འདས་ཀྱིས་གཟིགས་ནས་མོད་ལ་དེར་གཞེས་ཏེ། དགེ་སློང་རྣམས་ལ་འདི་སྐད་ཅེས་བཀའ་སྩལ་ཏོ། །གནས་འདི་ནི་ཆོས་བཤད་པའི་སར་འོས་སོ་ཞེས་བཀའ་སྩལ་པ་དང ། དགེ་སློང་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི་སྔོན་རྟག་ཏུ་རི་དང ། ཚལ་དང ། ཆབ་གཙང་མ་འབབ་པ་དང ། བཟའ་ཤིང་གི་ར་བ་དང ། མེ་ཏོག་དག་མཆིས་པ་ལ་དགྱེས་ན་དེང་འདིར་ནི་ཆབ་འབབ་པ་ཡང་མ་མཆིས། ཤིང་དང་ཚལ་ཡང་མ་མཆིས། གྲོང་ཁྱིམ་དང ། བཟའ་ཤིང་གི་ར་བ་དང ། མི་ཕལ་ཡང་མ་མཆིས་པར་བཅོམ་ལྡན་འདས་འདིར་ཅི་ལ་དགྱེས་ཏེ་བཞུགས་ཤིང་ཆོས་བཤད་ཅེས་གསུངས། ཕལ་ཤུལ་རིང་པོ་ནས་མཆི་བ། བཀྲེས་སྐོམ་པའི་སྡུག་བསྔལ་གྱིས་གདུངས་པའི་སེམས་ཅན་རྣམས་སྲོག་ཀྱང་མི་འཚོ་སྟེ། ཟས་མཆིས་ན་ནི་སྲོག་མཆིས། སྲོག་མཆིས་ན་ནི་ལུས་མཆིས། ལུས་མཆིས་ན་ནི་ཆོས་ལམ་ཡང་མཆིས་སོ། །ཟས་མ་མཆིས་ན་སྲོག་མ་མཆིས། སྲོག་མ་མཆིས་ན་ལུས་མ་མཆིས། ལུས་མ་མཆིས་ན་ཆོས་ལམ་ཡང་མ་མཆིས་པ་ལགས་ན་ད་འདིའི་ནང་དུ་འདི་ལྟ་བུའི་ཡིད་ལ་བབ་པ་གང་ཡང་མ་མཆིས་པར་བཅོམ་ལྡན་འདས་ཅིའི་སླད་དུ་འདིར་ཆོས་བཤད་ཅེས་གསུངས། དེ་ནས་ཤེས་རབ་ཆེན་པོ་ཤཱ་ར་དྭ་ཏིའི་བུས་སངས་རྒྱས་ཀྱི་བྱིན་གྱིས་བརླབས་ཀྱིས་ཀུན་དགའ་བོ་ལ་སྨྲས་པ། སྔར་ཆོས་ཀྱི་ཕྱིར་ཞུ་བའི་རིགས་ཀྱི་གཞན་ནི་བསམ་མི་དགོས་སོ། །དེ་བཞིན་གཤེགས་པ་ནི་སྟོབས་བཅུ་དང ། མི་འཇིགས་པ་བཞིར་མ་ཟད་ཀྱི་དེ་བཞིན་གཤེགས་པ་ལ་སྟོབས་དཔག་ཏུ་མེད་པ་དང ། ཅེས་ཀྱང་མི་བསྙེངས་པ་ཐམས་ཅད་མཁྱེན་པའི་ཡེ་ཤེས་དཔག་ཏུ་མེད་པ་དང ། གཟི་བརྗིད་དང ། རྫུ་འཕྲུལ་དཔག་ཏུ་མེད་པ་མངའ་སྟེ། གང་བརྟེན་མེད་པ་ནི་རྟེན་དུ་མཛད། སངས་རྒྱས་ཀྱི་ངོ་བོ་ཉིད་མ་མཐོང་བ་ནི་མཐོང་བར་མཛད། ཉོན་མོངས་པ་དང་མ་བྲལ་བ་ནི་བྲལ་བར་མཛད། བདེ་བ་མེད་པ་ནི་བདེ་བ་ལ་རེག་པར་མཛད། མ་གྲོལ་བ་ནི་རྣམ་པར་གྲོལ་བར་མཛད། ལོངས་སྤྱོད་དང་མི་ལྡན་པ་ནི་ལོངས་སྤྱོད་དང་ལྡན་པར་མཛད། མྱ་ངན་ལས་མ་འདས་པ་ནི་ཡོངས་སུ་མྱ་ངན་ལས་བཟླ་བར་མཛད་དེ། དེ
62.224b
བཞིན་གཤེགས་པ་ལ་འདི་ལྟ་བུ་ལ་སོགས་པའི་རྫུ་འཕྲུལ་དཔག་ཏུ་མེད་པ་དང་ལྡན་ན་དེ་བཞིན་གཤེགས་པ་ལ་རང་འབྱུང་མེད་པའི་མྱ་ངན་བྱ་ཅི་དགོས། བདག་དྲན་པ་སྔོན་དྲ་མ་ཆེན་པོ་དྲི་མ་མེད་པར་གྲགས་པས་ཕལ་མང་པོ་ལ་ཆོས་བསྟན་པ་ན་འཇིག་རྟེན་གྱི་ཁམས་གཞན་ནས་འོངས་པའི་བྱང་ཆུབ་སེམས་དཔའ་དང ། ཉན་ཐོས་དང ། རང་སངས་རྒྱས་དང ། མཐུ་སྟོབས་དང་ལྡན་པའི་ལྷ་དང ། ཀླུ་ལ་སོགས་པའི་ཕལ་མང་པོ་ཁང་པའི་ནང་དུ་འདུས་སྟེ་འཁོད་པའི་ཚེ་ཟས་དག་མི་སྣང་ནས། བདག་དེའི་ཚེ་ཕལ་མང་པོ་འདི་རྣམས་ཀྱི་ཟས་ཇི་ལྟར་འབྱོར་སྙམ་བསམས་པ་ལས་དྲི་མ་མེད་པར་གྲགས་པས་བདག་ལ་སྨྲས་པ། ཉན་ཐོས་ཤེས་རབ་དམན་པ་ཡང་དག་པའི་ཆོས་བསམ་པའི་རིགས་ཀྱི་ཐོག་མ་ནས་ཟས་དང ། གོས་དང ། ཁྲི་སྟན་ལ་སོགས་པ་སྒྱུ་མའི་རྫས་ལ་ཅིའི་ཕྱིར་རྣམ་པར་རྟོག་ཅེས་དྲ་མ་ཆེན་པོ་དྲི་མ་མེད་པར་གྲགས་པས་དེ་སྐད་སྨྲས་པའི་ཚེ་ལྷ་དང ། མི་རྣམས་ནི་ཆོས་ལམ་ཐོབ་བདག་ནི་སྐྱེངས་ཏེ་ཁྱོད་ད་ལྟར་སྨྲས་པ་ཡང་དེ་དང་འདྲའོ། །དེ་ནས་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དགའ་བོ་བློ་གྲོས་ཀྱི་མཆོག་ཤཱ་ར་དྭ་ཏིའི་བུས་སྨྲས་པ་བདེན་ཏེ། ཐེག་པ་ཆེན་པོ་བསམ་པའི་རིགས་ཀྱི་ལུས་བདེ་བའི་ཕྱིར་བསམ་པ་མ་ཡིན་ནོ། །དེ་སྐད་ཅེས་བཀའ་སྩལ་མ་ཐག་ཏུ་ཏིང་ངེ་འཛིན་དུ་ཞུགས་ནས་བྱིན་གྱིས་བརླབས་ཀྱི་མོད་ལ་ས་དེར་གསེར་གྱི་མེ་ཏོག་གཅིག་འབུས་ནས་བྱུང་སྟེ། འཕང་དུ་དཔག་ཚད་ཁྲི་ཕྲག་བཞི་བཅུ་ཡོད་ལ། སྟོང་ཁམས་ཀུན་ཀྱང་ཆུབ་པར་གཡོགས་ནས་བཻ་དཱུརྱའི་དྲ་བས་ཀྱང་གསེར་གྱི་མེ་ཏོག་ཁྱབ་པར་གཡོགས་ཏེ། མེ་ཏོག་དེའི་འོག་ཏུ་རིན་པོ་ཆེའི་ཁྲུས་ཀྱི་རྫིང་བུ་ཡོན་ཏན་བརྒྱད་དང་ལྡན་པའི་ཆུ་ཞེས་བྱ་བས་ཡོངས་སུ་གང་བ། དེའི་ངོས་བཞིར་མེ་ཏོག་སྣ་ཚོགས་རྣམ་པ་མང་པོ་ལ་འདི་ལྟ་སྟེ། མེ་ཏོག་ཨུད་པ་ལ་དང ། ཀུ་མུ་ད་དང ། པད་མ་དང ། པུན་ཏ་རི་ཀ་ལ་སོགས་པ་རྣམ་པ་མང་པོ་དཔག་ཏུ་མེད་པས་རིན་པོ་ཆེའི་རྫིང་རྣམ་པར་བརྒྱན་པ་བྱུང་ནས། གང་ལ་ལ་ཞིག་གིས་གསེར་གྱི་མེ་ཏོག་དང །
62.225a
རིན་པོ་ཆེའི་རྫིང་བུ་མཐོང་བ་ཙམ་གྱིས་ཆོས་ཀྱི་མིག་རྣམ་པར་དག་པ་ཐོབ་ན་ནང་དུ་ཞུགས་ཏེ་ཁྲུས་བྱས་པ་ལྟ་ཅི་སྨོས། གལ་ཏེ་ཞུགས་ཏེ་ཁྲུས་བྱས་པ་ནི་རྣམ་པར་དག་པ་དང ། མི་སྐྱེ་བའི་ཆོས་ལ་བཟོད་པ་ཐོབ་བོ། །གསེར་གྱི་མེ་ཏོག་དེའི་འོག་ཏུ་སེང་གེའི་ཁྲི་རིན་པོ་ཆེ་ལས་བྱས་པ། འཕང་དུ་དཔག་ཚད་བརྒྱ་པ་བྱུང་སྟེ། དེ་ནས་བཅོམ་ལྡན་འདས་ཀྱིས་རིན་པོ་ཆེའི་ཁྲི་དེ་ལ་བཞུགས་ནས་སྐུའི་བ་སྤུའི་བུ་ག་དང ། ཡན་ལག་ཀུན་ནས་འོད་ཟེར་ཆེན་པོ་བཏང་སྟེ། དེ་བཞིན་གཤེགས་པའི་འོད་ཟེར་ཡང་གསེར་གྱི་མེ་ཏོག་གི་ཁ་དོག་དང་འཐུན་པར་ཕྱོགས་བཞིར་བྱུང་བས་ཕྱོགས་བཅུར་སངས་རྒྱས་ཀྱི་ཞིང་ཐམས་ཅད་དུ་ཁྱབ་པར་སྣང་བར་བྱས་པའི་གནས་ཐམས་ཅད་དུ་རི་ལུང་དང ། ཡུལ་ས་ཀུན་ཀྱང་མཉམ་པར་གྱུར་ནས་ཐམས་ཅད་གསེར་གྱི་ཁ་དོག་ཏུ་གྱུར་ཏེ། སྨེ་བཙོགས་པ་ཡང་མེད་ལ་སེམས་ཅན་དམྱལ་བ་ཡང་ཞི་ནས་ཡི་དགས་ཀྱང་རྣམ་པར་གྲོལ་ཏེ། ལོག་སྤྱོད་དང་དམ་པའི་ཆོས་ལ་ཡོད་པ་ནི་མ་གཏོགས་སོ། །དེ་བཞིན་གཤེགས་པའི་བྱིན་གྱི་བརླབས་ཀྱིས་འཇིག་རྟེན་གྱི་ཁམས་གཞན་དང ། དབུས་ཀྱི་ཁམས་འདི་དང་འདྲ་བར་གྱུར་ནས་ཐ་དད་པ་མེད་དོ། །ཕྱོགས་བཅུའི་སངས་རྒྱས་ཀྱིས་ཀྱང་འོད་ཟེར་དེ་གཟིགས་ནས་སོ་སོ་ནས་ཚིག་འཐུན་པར་བཅོམ་ལྡན་འདས་ཤཱཀྱ་ཐུབ་པ་ལ་ལེགས་སོ་ཞེས་པས་བསྟོད་ནས་ལེགསོ་ལེགས་སོ། །བཅོམ་ལྡན་འདས་བྱམས་པ་ཆེན་པོས་འོད་ཟེར་བཏང་བ་འདི་ནི་སྔོན་གྱི་འོད་ཟེར་དང་མི་འདྲ་སྟེ། སྔོན་ཆད་ཀྱི་འོད་ནི་ཤར་ཕྱོགས་སུ་སྔར་ཤར་ན། དེང་གི་འོད་ནི་ཕྱོགས་བཞི་ནས་དུས་གཅིག་ཏུ་ཕྱོགས་བཅུར་ཁྱབ་པར་ཤར་བ་ལས་བལྟས་ན་འོད་དེས་ནི་སྡུག་བསྔལ་བའི་སེམས་ཅན་ཐམས་ཅད་ཁམས་གསུམ་ནས་བཏོན་ཏེ། མྱ་ངན་ལས་བཟླ་བར་མངོན་ནོ་ཞེས་གསུངས་སོ། །དེ་ནས་ཕྱོགས་བཅུའི་སངས་རྒྱས་རྣམས་ཀྱིས་སོ་སོའི་འཁོར་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བཀའ་སྩལ་པ། རིགས་ཀྱི་བུ་དག་འདི་ལྟ་སྟེ། འཇིག་རྟེན་གྱི་ཁམས་མི་མཇེད་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས
62.225b
རྒྱས་ཤཱཀྱ་ཐུབ་པས་འོད་ཟེར་ཆེན་པོ་གཏོང་བ་ནི་གདོན་མི་ཟ་བར་དམ་པའི་ཆོས་བསྟན་ཅིང་སེམས་ཅན་རྣམས་སྡུག་བསྔལ་བ་ལས་བསྒལ་གྱི་ཆ་ན། ཁྱེད་རྣམས་འཇིག་རྟེན་གྱི་ཁམས་དེར་སོང་ལ། སངས་རྒྱས་དེ་ལ་མཆོད་པ་ཕུལ་ནས་ཐེ་ཙོམ་རྣམས་ཞུ་ཞིང་ཆོས་ཀྱི་རྣམ་གྲངས་ཉན་ཅིང་གསོལ་བའི་རིགས་སོ། །འཇིག་རྟེན་གྱི་ཁམས་དེའི་སེམས་ཅན་ཡོངས་ཀྱིས་ངན་ཅིང་ཁྲོ་ལ་རྫུན་སྒྱུ་ཅན་ཏེ། ཐེག་པ་གཅིག་ལ་མ་དད་པས་དེ་བཞིན་གཤེགས་པ་ཤཱཀྱ་ཐུབ་པས་བྱམས་པ་ཆེན་པོས་ཐབས་སྣ་ཚོགས་ཀྱིས་ཐེག་པ་གསུམ་དུ་ཕྱེ་སྟེ། སྲིད་པ་གསུམ་རྣམ་པར་གྲོལ་བར་བྱེད་དོ། །ཐེག་པ་གསུམ་དུ་བསྟན་གྱིས་ཀྱང་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་དག་པ། ཡོངས་སུ་དཀར་བ་སྟེ། སངས་རྒྱས་བཅོམ་ལྡན་འདས་དེ་ནི་བསྐལ་པ་ཁྲི་ཕྲག་བརྒྱ་སྟོང་དུ་ཡང་མཐོང་བར་མི་འགྱུར། ཆོས་ཀྱི་རྣམ་གྲངས་བཤད་དོ་ཅོག་ཀྱང་ཐོས་པར་མི་འགྱུར། འཁོར་དེ་དག་ཀྱང་ཚོགས་འདུས་པར་མི་འགྱུར། བཅོམ་ལྡན་འདས་ཤཱཀྱ་ཐུབ་པའི་གདན་ཁྲི་དང ། གསེར་གྱི་མེ་ཏོག་ཁྱད་པར་ཅན་ལ་བཞུགས་པ་ཡང་མཐོང་བར་མི་འགྱུར་རོ། །དེ་བས་ན་ཁྱེད་རྣམས་འཇིག་རྟེན་དེར་སོང་ལ། སངས་རྒྱས་དེ་མཐོང་ཞིང་ཐེ་ཙོམ་དག་ཞུ་ན་ཁྱེད་རྣམས་ཀྱང་བསོད་ནམས་ཐོབ་ལ། སྐྱེ་བོ་ཀུན་ལ་ཕན་པ་དང ། བདེ་བར་འགྱུར་རོ། །དེ་སྐད་ཅེས་བཀའ་སྩལ་མ་ཐག་ཏུ་ཕྱོགས་བཅུའི་སངས་རྒྱས་ཀྱི་ཞིང་རེ་རེ་ནས་བྱང་ཆུབ་སེམས་དཔའ་བྱེ་བ་ཕྲག་བཅུ་བཅུ་རང་རང་གི་གནས་ནས་ལངས་ཏེ། སོ་སོའི་སངས་རྒྱས་ལ་ཕྱག་འཚལ་ནས། ཐབས་གཅིག་ཏུ་དོང་སྟེ། བྱང་ཆུབ་སེམས་དཔའ་རེ་རེ་ཡང་རོལ་མོ་རྣམ་པ་བརྒྱ་སྟོང་ཐོགས་ཏེ། མེ་ཏོག་རིན་པོ་ཆེ་མཆོག་ཏུ་བཟང་པོའི་ཆར་ཕབ་ནས་བཅོམ་ལྡན་འདས་ཤཱཀྱ་ཐུབ་པ་ག་ལ་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས་ལན་བདུན་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། །དེ་ནས་སོ་སོ་ནས་ཚིག་གཅིག་དང ། ངགཅིག་དང ། སྒྲ་གཅིག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གསོལ་ཞིང་ཞུ་བ་ཞིག་མཆིས་ན་སྐྱེ་བོ་རྣམས
62.226a
ལ་སྨན་པ་དང་བདེ་བའི་སླད་དུ་བཅོམ་ལྡན་འདས་ཀྱིས་སྐབས་དབྱེ་ཞིང་བཤད་པར་སྨོན་ཏོ། །དེ་ནས་བཅོམ་ལྡན་འདས་ཀྱིས་ཕས་བྱིན་པའི་བྱང་ཆུབ་སེམས་དཔའ་རྣམས་ལ་བཀའ་སྩལ་པ། རིགས་ཀྱི་བུ་དག་ཐེ་ཙོམ་ཡོད་ན་དེ་ཀུན་དྲིས་ཤིག་དང ། ངས་ཁྱེད་རྣམས་ལ་བྱེ་བྲག་ཕྱེད་པར་བཤད་དོ། །དེ་ནས་བྱང་ཆུབ་སེམས་དཔའ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་དེ་བཞིན་གཤེགས་པ་ནི་ཐེག་པ་གཅིག་ལས་མི་བཤད་ན། འདིར་བཅོམ་ལྡན་འདས་ཀྱིས་ཅིའི་སླད་དུ་བཤད་ཅེས་གསོལ་པ་དང ། དེ་ནས་བཅོམ་ལྡན་འདས་ཀྱིས་ཐོགས་པ་མེད་པའི་ཡེ་ཤེས་ཀྱིས་བྱང་ཆུབ་སེམས་དཔའ་རྣམས་ལ་བཀའ་སྩལ་པ། རིགས་ཀྱིས་བུ་ཁྱེད་རྣམས་སེམས་ཅན་ལ་ཕན་པ་དང་བདེ་བའི་ཕྱིར་དོན་འདི་ལྟ་བུ་འདྲི་བ་ལེགས་ཀྱིས་ཉོན་ཅིག་རིགས་ཀྱི་བུ་རྣམས་དཔེར་ན་མི་གཅིག་ལ་མིང་གསུམ་ཡོད་པ་ལྟ་བུ་སྟེ། ཆུང་ངུའི་ཚེ་ན་ནི་བྱིས་པ་ཞེས་བྱ། ལོ་ཉི་ཤུ་ཡན་ཆད་ལ་ནི་སྐྱེས་བུ་ཞེས་བྱ། ལོ་བརྒྱད་བཅུ་ཡན་ཆད་འདས་པ་ནི་རྒན་པོ་ཞེས་བྱའོ། །ངའི་ཐེག་པ་གསུམ་ཡང་དེ་དང་འདྲ་སྟེ། སེམས་རྒྱ་ཆུང་ངུ་ཉན་ཐོས་ལ་ནི་ཐེག་པ་ཆུང་ངུ་བསྟན། སེམས་རྒྱ་འབྲིང་པོ་རང་སངས་རྒྱས་ལ་ནི་ཐེག་པ་འབྲིང་པོ་བསྟན། བྱང་ཆུབ་སེམས་དཔའ་སེམས་དཔའ་ཆེན་པོ་ལམ་ཆེན་པོ་ལ་ཞུགས་པ་ལ་ནི་ཐེག་པ་ཆེན་པོ་བསྟན་ཏོ། །རིགས་ཀྱི་བུ་ཁྱེད་རྣམས་ཡང་ཉོན་ཅིག་།མདོར་མཐའ་གཉིས་མེད་པ་དང་ཕྱོགས་གཅིག་ཏུ་འཐུན་ཏེ། ཤེས་པའི་སྒོ་ཐ་དད་ཀྱང་མཐའ་གཅིག་ཏུ་འདུའོ། །མདོ་ནི་ཐེག་པ་གཅིག་སྟེ། ཐབས་དཔྱད་པས་གསུམ་དུ་བགོས་སོ། ཉན་ཐོས་དང ། རང་སངས་རྒྱས་ཀྱི་ཐེག་པ་ཡང་ཐེག་པ་ཆེན་པོའི་ནང་དུ་འདུ། ཐེག་པ་ཆེན་པོ་ནི་སངས་རྒྱས་ཀྱི་ཐེག་པའོ། །དེ་བས་ན་ཐེག་པ་གསུམ་ཡང་ཐེག་པ་གཅིག་གོ་ཞེས་ཆོས་འདི་བསྟན་པའི་ཚེ་བྱང་ཆུབ་སེམས་དཔའ་སྟོང་ཕྲག་བཅུ་མི་སྐྱེ་བའི་ཆོས་ལ་བཟོད་པ་ཐོབ་བོ། །དགེ་སློང་བརྒྱད་བརྒྱ་ནི་དགྲ་བཅོམ་པའི་འབྲས་བུ་ཐོབ། ལྷ་ཉི་ཁྲིས་ནི་ཆོས་ཀྱི་མིག་རྣམ་པར་དག་པ་ཐོབ། མི་ལས་ཁྲི་ཕྲག་བརྒྱ་སྟོང་ནི་མོད་ལ་བླ་ན་མེད་པ་ཡང་དག
62.226b
པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་ཕྱོགས་བཅུ་ནས་ཕྱིན་པའི་བྱང་ཆུབ་སེམས་དཔའ་རྣམས་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་དེ་བཞིན་གཤེགས་པའི་མཐུ་དང ། བྱིན་གྱི་བརླབས་ཀྱིས་ཁམས་འདིར་ཕྱིན་ཅིང་བཅོམ་ལྡན་འདས་ཀྱི་ཞལ་མཐོང་བའི་སྟེང་དུ་ཐེག་པ་ཆེན་པོའི་ཆོས་ཀྱང་ཐོས་ན་ཆོས་ཀྱི་རྣམ་གྲངས་འདི་བདག་ཅག་གིས་བླངས་ཏེ་གཟུངས་སུ་འཛིན་པར་གནང་བར་མཛད་དུ་གསོལ། དེ་བཞིན་གཤེགས་པ་མྱ་ངན་ལས་འདས་པའི་སླད་ན་འཇིག་རྟེན་གྱི་ཁམས་འདི་དང ། འཇིག་རྟེན་གྱི་ཁམས་གཞན་དུ་རི་དང ། ནགས་དང ། ཚལ་དང ། ཤིང་དྲུང་དང ། རིག་པ་འཛིན་པའི་གནས་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། དགོན་པ་དང ། དུར་ཁྲོད་དང ། མཆོད་རྟེན་དང ། གཙུག་ལག་ཁང་དང ། དགེ་འདུན་གྱི་གནས་ཁང་དང ། ཆོས་སྟོན་པའི་ས་མང་པོ་འདུ་བ་དང ། ཁྱིམ་པའི་གནས་སོ་སོའི་ཁྱིམ་ཁྱིམ་དུ་རྒྱ་ཆེར་སྤེལ་ཞིང་རྒྱུན་མི་འཆད་པར་བགྱིའོ། །དེ་ཅིའི་སླད་དུ་ཞེ་ན། ཆོས་ཀྱི་རྣམ་གྲངས་འདི་ཡུན་རིང་དུ་གནས་ན་ངན་འགྲོ་ཀུན་བཀག་པར་འགྱུར་རོ། །སྔོན་དེ་བཞིན་གཤེགས་པས་བཏུད་པས་སེམས་ཅན་དམྱལ་བའི་སྒོ་བཅད་ཅེས་ཐོས་ཏེ། གང་གིས་མདོ་སྡེ་འདི་ལས་ཚིག་གཅིག་བཏོན་ན་ལྷ་རྣམས་རབ་ཏུ་དགའ་བ་དང་ཚིམ་པ་སྐྱེས་ཏེ། རྟག་ཏུ་བསྙེན་བཀུར་བགྱིད་ཅིང་རང་བཞིན་གྱིས་དགེ་བ་སྤྱོད་དོ། །གང་ལ་ལས་ཐར་པ་ཆེན་པོ་ཕྱོགས་སུ་རྒྱས་པའི་མདོ་འདི་ཐོས་ཏེ། དགའ་བ་སྐྱེས་ནས་དད་པ་དང་གུས་པའི་སེམས་ཀྱིས་ཡི་གེར་འབྲི་འམ། ཡི་གེར་འདྲིར་འཇུག་གམ། ཀློག་གམ། ཁ་ཏོན་དུ་བྱས་སམ། བླངས་སམ། འཆང་ངམ། ཕྱག་འཚལ་ཞིང་ཆོས་ཀྱི་རྣམ་གྲངས་འདིའི་ནང་གི་སངས་རྒྱས་ཀྱི་མཚན་གཅིག་གམ། བྱང་ཆུབ་སེམས་དཔའི་མིང་གཅིག་བརྗོད་ན་གང་ཟག་དེ་ནི་ཚེ་འདི་ཉིད་ལ་བདེ་བ་ཐོབ་སྟེ། སྡིག་པ་རྣམས་མི་མཐོང་ཞིང་ཚེ་ཟད་དེ་འཆི་འཕོས་ན་ཡང་བྱང་ཆུབ་སེམས་དཔའ་བདག་ཅག་རྣམས་ཀྱིས་སྔོན་དུ་ལམ་དྲངས་ཏེ། བདག་ཅག་གི་འཇིག་རྟེན
62.227a
གྱི་ཁམས་རྣམ་པར་དག་པར་གནས་གཅིག་ཏུ་སྐྱེ་བར་བགྱིའོ། །དེ་ཅིའི་སླད་དུ་ཞེ་ན། མདོ་སྡེ་འདི་བླངས་པ་དང ། གཟུངས་སུ་འཛིན་པའི་སླད་དུའོ། །མདོ་སྡེ་འདི་བླངས་ཏེ། གཟུངས་སུ་འཛིན་པ་ནི་སངས་རྒྱས་ཀྱི་སྐུ་འཛིན་པའོ། །སངས་རྒྱས་ཀྱི་སྐུ་འཛིན་པ་ནི་བྱང་ཆུབ་སེམས་དཔའ་ལགས་པར་མངོན་ཏེ། དེ་བས་ན་དེ་དག་ནི་བདག་ཅག་དང་བསླབ་པ་གཅིག་གོ། །རྒྱུ་དང་རྐྱེན་དེས་ན་མདོ་སྡེ་འདི་གཟུངས་སུ་འཛིན་པ་རྣམས་གནས་གཅིག་ཏུ་སྐྱེ་ཞིང་མི་འབྲལ་བར་སྨོན་ཏོ། །དེ་ནས་ཚངས་པ་ཆེན་པོ་དང ། སུམ་བཅུ་རྩ་གསུམ་གྱི་ལྷ་རྣམས་དང ། འཇིག་རྟེན་སྐྱོང་བ་རྒྱལ་པོ་ཆེན་པོ་བཞི་དང ། གསང་བ་པའི་བདག་པོ་ལག་ན་རྡོ་རྗེ་དང ། གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ལ་སོགས་པ་དང ། ཀླུའི་རྒྱལ་པོ་དགའ་བོ་དང ། ཉེ་དགའ་བོ་དང ། ལྷ་མ་ཡིན་དང ། ནམ་མཁའ་ལྡིང་དང ། དབྱིངས་ཅན་དང ། འཕྲོག་མ་མོ་དང ། རིའི་ལྷ་དང ། ཤིང་གི་ལྷ་དང ། ཀླུང་གི་ལྷ་དང ། མཚོའི་ལྷ་དང ། སའི་ལྷ་དང ། ཆུའི་ལྷ་དང ། མེའི་ལྷ་དང ། རླུང་གི་ལྷ་ལ་སོགས་པ་གྲངས་མེད་དཔག་ཏུ་མེད་པ་དག་རང་རང་གི་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཅིང་གུས་པར་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་བཅོམ་ལྡན་འདས་ཀྱིས་བསྟན་པའི་མདོ་སྡེ་ཐར་པ་ཆེན་པོ་ཕྱོགས་སུ་རྒྱས་པ་འདི་ལ་རྟག་ཏུ་བསྲུང་ཞིང་འཛིན་པར་བགྱིའོ། །མདོ་སྡེ་འདི་གང་དུ་གནས་པ་དེར་བདག་ཅག་གིས་རྟག་ཏུ་མདུན་དུ་བདར་ཏེ་ཡོངས་སུ་དག་པར་བགྱིའོ། །མདོ་སྡེ་འདི་མཆོད་རྟེན་དུ་འམ་གནས་ཁང་དུ་འམ། ཁྱིམ་པའི་ཁྱིམ་དུ་འམ། དགོན་པ་ན་གནས་ཀྱང་རུང་སྟེ། གལ་ཏེ་གང་ཟག་འགའ་ཞིག་གིས་སུག་པ་མི་གཙང་བས་མདོ་སྡེ་འདི་བཟུང་ངམ། མ་གུས་པར་བླགས་སམ། ཁ་ཏོན་དུ་བགྱིས་ན་བདག་ཅག་གིས་གང་ཟག་དེ་འགྲོ་སྡོད་འདུག་ཉལ་སྤྱོད་ལམ་རྣམ་བཞིར་ལུས་དང་སེམས་མི་བདེ་བར་བགྱིའོ། །དེ་གང་དུ་གནས་པ་དེར་འཇིགས་ཤིང་སྐྲག་པ་དང ། གློ་བུར་དུ་གནོད་པ་འབྱུང་བར་བགྱིའོ། །ཚེ་འདི་ལ་མི་བདེ་བ་སྣ་ཚོགས་དང ། ཚེ་འཕོས་ན་ཡང་སེམས་ཅན
62.227b
དམྱལ་བར་ལྟུང་བར་བགྱིའོ། །གང་ལ་ལ་ཞིག་གིས་མདོ་སྡེ་འདི་ལ་གུས་པར་བགྱིས་ཏེ། སུག་པ་གཙང་མས་བླངས་ཤིང་འཆང་ངམ། ཁྲུས་བགྱིས་ཏེ་བདུག་སྤོས་ཀྱིས་བདུག་ཅིང་བླགས་སམ། ཁ་ཏོན་དུ་བགྱིས་སམ། འཆང་ངམ་འཛིན་ཏམ། ཡི་གེར་འབྲི་འམ། ཡི་གེར་འབྲིར་འཇུག་གམ། རྗེས་སུ་དྲན་ནམ་སྡིག་པའི་ཆོས་རྣམས་མ་སྤྱད་ན་བདག་ཅག་གིས་མདོ་སྡེ་འདི་བསྲུང་བའི་སླད་དུ་གང་ཟག་དེའི་རིམ་གྲོ་བགྱིའོ། །བསྲུང་བར་བགྱིའོ། །གང་ཟག་དེ་ཉལ་ན་ཡང་དེའི་མདུན་དུ་མཆིས་ཏེ། ལྟས་ངན་པ་རྣམས་མི་འབྱུང་བར་བགྱིའོ། །ཡང་གཅིག་ཏུ་ན་དགྲ་མ་རུངས་པ་དང ། གདོན་མ་རུངས་པ་རྣམས་ཀྱི་གནོད་པས་མི་ཚུགས་པར་བགྱིའོ། །དེ་གང་དུ་གནས་པའི་ཁང་ཁྱིམ་ཡང་བསྲུང་བར་བགྱིའོ། །དེ་སྟེ་འགྲོན་དུ་མཆི་ན་བདག་ཅག་རྣམས་ཀྱིས་རྟག་ཏུ་ཕྱིན་འབྲང་ཞིང་ཅི་འཚལ་བ་སྦྱར་བར་བགྱིའོ། །ཕྱོགས་བཞིར་གང་དུ་མཆི་ན་ཡང་བགེགས་མ་མཆིས་པར་རྒྱུན་དུ་དགེ་བའི་ཆོས་མཐོང་ཞིང་ཚེ་འཕོས་ན་ཡང་ལྷར་སྐྱེ་བར་བགྱིའོ། །རྒྱུ་དེ་དང་རྐྱེན་དེས་ནི་སངས་རྒྱས་མཐོང་ཞིང་ཐེག་པ་ཆེན་པོ་མི་སྟོང་བར་བགྱིའོ་ཞེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། ལྷ་དང ། ལྷ་མ་ཡིན་གྱི་བདག་པོ་ལ་སོགས་པ་ལ་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ། ཁྱེད་རྣམས་ཀྱིས་བཤད་པ་བཞིན་ཏེ། མདོ་སྡེ་འདི་ཐོས་པར་ཡང་མི་འགྱུར་ན་མཐོང་བར་ལྟ་ག་ལ་འགྱུར། གལ་ཏེ་མདོ་སྡེ་འདི་བླངས་ཏེ་བཟུང་ངམ། འཆང་ངམ། ཀློག་གམ། ཁ་ཏོན་དུ་བྱེད་པར་འདོད་ན་ཁྲུས་དག་པར་བྱས་ལ་གོས་གཙང་མ་བགོས་ཏེ། ཁང་པ་དབེན་པ་གཙང་མའི་ནང་དུ་བ་དན་དང ། རྒྱལ་མཚན་དང ། གདུགས་ཀྱིས་བརྒྱན་ནས་བདུག་པ་སྣ་ཚོགས་དང ། ཙན་དན་དང ། ཕྱེ་མ་དང ། བྱུག་པས་མཆོད་ཅིང་ཕྱག་འཚལ་ནས་དེ་ལྟར་ཉིན་མཚན་དུས་དྲུག་ཏུ་ཐོག་མར་མགོ་བཙུགས་ནས་ཉིན་ཞག་བདུན་གྱི་བར་དུ་ཉིན་རེ་རེ་ཞིང་མདོ་སྡེ་འདི་བཀླགས་ཏེ། སེམས་མི་གཡེང་བ་དང ། དྲན་པ་མི་གཡེང་བ་དང ། རྟོག་པ་མི་གཡེང་བ་དང ། བསམ་པ་མི་གཡེང་བ་དང ། གཟུངས་སུ་འཛིན་པ་མི
62.228a
གཡེང་བ་དང ། སྤྱོད་པ་མི་གཡེང་བ་དང ། བསྟན་ཅིང་བསླབ་པ་མི་གཡེང་བར་ཉིན་མཚན་དུས་དྲུག་ཏུ་མདོ་སྡེ་འདིའི་ནང་ནས་འབྱུང་བའི་སངས་རྒྱས་དང ། བྱང་ཆུབ་སེམས་དཔའ་དང ། མདོ་སྡེ་བཅུ་གཉིས་རྣམས་ལ་ཕྱག་འཚལ་ཞིང་ཀློག་པ་འམ་ཁ་ཏོན་དུ་འདོན་ཅིང་མོས་པ་དང་གུས་པར་བྱེད་ནུས་ན་མདོ་སྡེ་འདིའི་ནང་ནས་འབྱུང་བ་བཞིན་དུ་སྡིག་ལྕི་བ་ཀུན་འབྱང་བར་འགྱུར་གྱིས། དེ་ལ་ཐེ་ཙོམ་འམ་ཡིད་གཉིས་སུ་མ་བྱེད་ཅིག་།དེ་ཅིའི་ཕྱིར་ཞེ་ན། ཐར་པ་ཆེན་པོ་ཕྱོགས་སུ་རྒྱས་པའི་མདོ་སྡེ་འདི་ནི་ཕྱོགས་བཅུའི་སངས་རྒྱས་ཀྱི་སྤྱད་པ་སྤྱོད་པའོ། །འདི་ནི་བསྲུང་ཞིང་སྐྱོབ་པ་སྟེ། སངས་རྒྱས་ཐམས་ཅད་ཀྱི་ཡུམ་མོ། །འདི་ནི་མདོ་སྡེ་ཀུན་གྱི་རྒྱལ་པོའོ། །འདི་ནི་དོན་དམ་པའི་སྙིང་པོའོ། །འདི་ནི་བྱང་ཆུབ་སེམས་དཔའ་རྣམས་ཀྱི་ལམ་མོ། །ཐར་པ་ཆེན་པོ་ཕྱོགས་སུ་རྒྱས་པའི་མདོ་སྡེ་ཟབ་མོ་འདི་ནི་འཇིག་རྟེན་ན་ཆེན་པོ་དྲུག་དང་འདྲ་སྟེ། བསམ་གྱིས་མི་ཁྱབ་བོ། །དྲུག་གང་ཞེ་ན། ས་ཆེན་པོ་དང ། ཆུ་ཆེན་པོ་དང ། མེ་ཆེན་པོ་དང ། རླུང་ཆེན་པོ་དང ། ཉི་མ་ཆེན་པོ་དང ། ནམ་མཁའ་ཆེན་པོའོ། །མདོ་སྡེ་འདི་ནི་ས་ཆེན་པོ་དང་འདྲ་སྟེ། གཙང་སྨེ་དང ། བཟང་ངན་ཐམས་ཅད་ཐེག་པར་བྱེད་དོ། །མདོ་སྡེ་འདི་ནི་ཆུ་ཆེན་པོ་དང་འདྲ་སྟེ། སྨེ་བཙོག་ཐམས་ཅད་འཁྲུ་བར་བྱེད་དོ། །མདོ་སྡེ་འདི་མེ་ཆེན་པོ་དང་འདྲ་སྟེ། ཉོན་མོངས་པ་དང ། བཙོག་པ་དང ། ལྗན་ལྗིན་ཐམས་ཅད་ཚིག་པར་བྱེད་དོ། །མདོ་སྡེ་འདི་ནི་རླུང་ཆེན་པོ་དང་འདྲ་སྟེ། སྨེ་བཙོག་ཐམས་ཅད་འབུད་པར་བྱེད་དོ། །མདོ་སྡེ་འདི་ནི་ཉི་མ་ཆེན་པོ་དང་འདྲ་སྟེ། མུན་ནག་ཡོད་དོ་ཅོག་སྣང་བར་བྱེད་དོ། །མདོ་སྡེ་འདི་ནམ་མཁའ་དང་འདྲ་སྟེ། བཟང་ངན་ཡོད་དོ་ཅོག་ཐམས་ཅད་ཤོང་བར་བྱེད་དོ། །དེ་ལྟ་བུའི་ཐེག་པ་ཆེན་པོའི་མདོ་སྡེ་ཐར་པ་ཆེན་པོ་ཕྱོགས་སུ་རྒྱས་པ་འདི་རྒྱ་ཆེ་བ་ནི་དཔེ་ཟླ་མེད་དེ། ཡར་བྱང་ཆུབ་སེམས་དཔའ་དང ། བར་དུ་ཉན་ཐོས་དང ། མར་འཇིག་ཚོགས་ཀྱི་གཟུགས་ཅན་ནོ་ཅོག་མི་ཤོང་བ་མེད་དོ། །དེ་བས་ན་ཁྱེད་རྣམས་ཀྱིས་མདོ་སྡེ་འདི་གཟུངས་སུ་བཟུང་སྟེ། ཆོངས་ཤིག་།ཀུན་དུ་སྤེལ་བར་གྱིས་ཤིག་།དད་ཅིང་གུས་པར་བྱོས་ཤིག་དང ། ཁྱེད་བྱང་ཆུབ་སེམས་དཔའ་སེམས་དཔའ་ཆན
62.228b
པོ་རྣམས་སངས་རྒྱས་ཀྱི་ཡེ་ཤེས་ཐུགས་སུ་ཆུད་པ་དང ། སངས་རྒྱས་ཀྱི་བདག་ཉིད་མངོན་དུ་མཐོང་བར་བྱའོ། །ཁྱེད་ལྷ་རྣམས་ཀྱང་མདོ་སྡེ་འདི་བླངས་ཏེ། འཆང་ན་རྒྱུན་དུ་ང་ཡང་མཐོང་ལ། མ་བྱོན་པའི་སངས་རྒྱས་ཐམས་ཅད་མཐོང་བ་དང ། ཆོས་ཀྱི་འཁོར་ལོ་བསྐོར་བ་དང ། དཀྱིལ་འཁོར་ཆེན་པོ་ལ་ཞུགས་པར་བྱའོ་ཞེས་བཀའ་སྩལ་པ་དང ། དེ་ནས་འཁོར་མང་པོའི་ནང་ནས་བྱང་ཆུབ་སེམས་དཔའ་མཚན་ཉིད་དད་པ་ཞེས་བྱ་བ་དེ་འཁོར་འདུས་པའི་ནང་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བགོས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་གསོལ་ཞིང་ཞུ་བ་མཆིས་ན་དཔག་ཏུ་མ་མཆིས་པའི་སྐྱེ་བོ་ལ་སྨན་པ་དང ། བདེ་བའི་སླད་དུ་བཅོམ་ལྡན་འདས་སྐབས་དབྱེ་ཞིང་བཤད་པར་སྨོན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཚན་ཉིད་དད་པ་ལ་བཀའ་སྩལ་པ། ཤིན་དུ་ལེགས་སོ་ལེགས་སོ། །རིགས་ཀྱི་བུ་དྲི་བ་ཡོད་ན་ཅི་འདོད་པ་བཞིན་དྲིས་ཤིག་དང ། ངས་ཁྱོད་ལ་བྱེ་བྲག་ཕྱེད་པར་བཤད་དོ། །ཁྱོད་ཀྱིས་དྲིས་པ་དེ་ཡང་སེམས་ཅན་དཔག་ཏུ་མེད་པ་ལ་ཕན་པ་དང་བདེ་བར་འགྱུར་རོ། །དེ་ནས་བྱང་ཆུབ་སེམས་དཔའ་མཚན་ཉིད་དད་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་དྲན་པ་སྔོན་ཡུན་རིང་པོ་འདས་པ་ན། དེ་བཞིན་གཤེགས་པ་མཚན་རིན་ཆེན་གཙུག་ཕུད་ཅེས་བགྱི་བ་དེའི་མཚན་ལན་ཅིག་ཐོས་ན་ལྷར་སྐྱེ་བ་ཐོབ་བོ་ཞེས་ཐོས་ཏེ། དེ་ལས་ཡུན་མི་རིང་བ་ཞིག་ན་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ཁམས་ན་དགོན་པའི་ནང་ཞིག་ལ་རྫིང་ཆེན་པོ་ཞིག་མཆིས་པའི་ཆབ་སྐམས་ནས་དེ་ན་ཉ་ཆེན་པོ་སྟོང་ཕྲག་བཅུ་ཞིག་མཆིས་པ་གདུགས་ཀྱིས་གདུངས་ཏེ་འགུམ་དུ་ཉེ་བ་ལས། དྲ་མ་ཆུ་འབེབས་ཞེས་བགྱི་བས་ཉ་དེ་དག་མཐོང་ནས་སེམས་ཅན་ལ་ཤིན་དུ་བྱམས་པ་དང ། སྙིང་རྗེ་སྐྱེས་ཏེ། ཆབ་དང་ཁ་ཟས་སྩལ་ཀྱང་དགུང་འགའ་ཙམ་ཞིག་ནི་གསོན་འགྲང་ན། ཚེ་རིང་པོར་མི་ཐོགས་པར་འཚལ་བས་བཅོམ་ལྡན་འདས་རིན་ཆེན་གཙུག་ཕུད་ཀྱི་མཚན་ལན་གསུམ་བརྗོད་པ་ཉ་དེ་དག
62.229a
གིས་ཐོས་མ་ཐག་ཏུ་དུས་ལས་འདས་ཏེ། སུམ་བཅུ་རྩ་གསུམ་གྱི་ལྷར་སྐྱེས་སོ་ཞེས་གདའ་ན་དེང་བཅོམ་ལྡན་འདས་འཁོར་འདི་དག་དང ། དུས་སླད་མའི་སེམས་ཅན་རྣམས་ཀྱི་སླད་དུ་སངས་རྒྱས་རྣམས་ཀྱི་མཚན་བསྟན་ཅིང་བཅོམ་ལྡན་འདས་ཤཱཀྱ་ཐུབ་པའི་མཚན་ཐོས་ན་ཚད་མ་མཆིས་དཔག་ཏུ་མ་མཆིས་པའི་སྐྱེ་བོ་ལ་སྨན་པ་དང་བདེ་བ་དང ། དཔག་ཏུ་མ་མཆིས་པའི་བསོད་ནམས་དང ། རྟག་ཏུ་ལོངས་སྤྱོད་ཕུན་སུམ་ཚོགས་པ་དང ། སངས་རྒྱས་ཀྱི་བདག་ཉིད་ཀྱང་མངོན་སུམ་དུ་རྟོགས་པར་འགྱུར་བའི་སླད་དུ་བཤད་དུ་གསོལ། སྡོམ་པའི་རྩ་བ་ཉམས་པ་དང ། ཉོན་མོངས་པས་འཁྲུལ་པའི་སེམས་ཅན་རྣམས་ཡོངས་སུ་གྲོལ་བར་འགྱུར་བའི་སླད་དུ་བཤད་པར་སྨོན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཚན་ཉིད་དད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གལ་ཏེ་ངས་ཕྱོགས་བཅུའི་སངས་རྒྱས་ཀྱི་མཚན་རྒྱ་ཆེར་བཤད་ན་བསྐལ་པ་བརྒྱ་སྟོང་ཁྲིའི་བར་དུ་བཤད་ཀྱང་མི་རྫོགས་ཏེ། འདི་ལྟར་ཆུ་ཐམས་ཅད་ཀྱི་ཐིགས་པ་ནི་བགྲང་ཞིང་ཤེས་པར་རུང་གིས་སངས་རྒྱས་ཐམས་ཅད་ཀྱི་མཚན་ནི་གྲངས་སུ་ཤེས་པ་མེད་དོ། །རི་རབ་ཐམས་ཅད་ནི་སྲང་གྲངས་སུ་བགྲང་དུ་རུང་གི་སངས་རྒྱས་ཐམས་ཅད་ཀྱི་མཚན་ནི་གྲངས་སུ་ཤེས་པ་མེད་དོ། །ནམ་མཁའི་མཚམས་དང་མཐའ་ཐུག་པར་ཤེས་པར་རུང་གི་སངས་རྒྱས་ཐམས་ཅད་ཀྱི་མཚན་ནི་གྲངས་སུ་ཤེས་པ་མེད་དོ། །ངས་ཁྱོད་ལ་དུས་གསུམ་གྱི་སངས་རྒྱས་རྣམས་ཀྱི་མཚན་མདོ་ཙམ་ཞིག་བསྟན་གྱིས་གང་གིས་རྣ་བར་ལན་ཅིག་ཐོས་ན་གང་ཟག་དེ་ཚེ་འཕོས་མ་ཐག་ཏུ་ལྷའི་གནས་སུ་སྐྱེ་བར་འགྱུར་རོ། །ཐོས་ནས་ཀྱང་མོས་པ་དང་གུས་པར་བྱས་ཏེ། ཡི་གེར་བྲིས་ལ་མཚན་ནས་བརྗོད་ཅིང་ཕྱག་འཚལ་ན་བསྐལ་པ་གྲངས་མེད་པ་ནས་འཁོར་བའི་སྡིག་པ་ཀུན་འབྱང་བར་འགྱུར། བསོད་ནམས་དཔག་ཏུ་མེད་པ་འཐོབ་པར་འགྱུར་རོ། །གང་ཟག་དེ་དུས་ཟད་ན་ཡང་ཕྱོགས་བཅུའི་འཇིག་རྟེན་གྱི་ཁམས་གང་ནས་གང་དུ་དད་པ་དེ་དང་དེར་སྐྱེ་བར་འགྱུར། ང་ཡང་མཐོང་ལ་དུས་མ་འོངས་པ་ན་བསྐལ་པ་བཟང་པོའི
62.229b
སངས་རྒྱས་རྣམས་ཀྱང་མཐོང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཡང་འཁོར་མང་པོ་རྣམས་ལ་བཀའ་སྩལ་པ། ཁྱེད་རྣམས་ཚུལ་བཞིན་དུ་གོས་ཚགས་བཅོས་ལ། ལུས་མི་གཡེང་བ་དང ། སེམས་མི་གཡེང་བ་དང ། དྲན་པ་མི་གཡེང་བ་དང ། རྟོག་པ་མི་གཡེང་བར་བྱོས་ལ་ཆོས་ཐོས་པར་འདོད་ན་སེམས་རྩེ་གཅིག་ཏུ་བསྡུས་ཤིག་།བཅོམ་ལྡན་འདས་མར་མེ་རི་རབ་རྒྱལ་པོ་ལ་ཕྱག་འཚལ་ལོ། །བཅོམ་ལྡན་འདས་རིན་ཆེན་རྒྱལ་པོ་ལ་ཕྱག་འཚལ་ལོ། །བཅོམ་ལྡན་འདས་རིན་ཆེན་གཙུག་ཕུད་ལ་ཕྱག་འཚལ་ལོ། །བཅོམ་ལྡན་འདས་ཚེ་དཔག་མེད་ལ་ཕྱག་འཚལ་ལོ། །བཅོམ་ལྡན་འདས་རྣམ་པར་གཟིགས་ལ་ཕྱག་འཚལ་ལོ། །བཅོམ་ལྡན་འདས་རིན་ཆེན་མང་ལ་ཕྱག་འཚལ་ལོ། །བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་ལོ། །བཅོམ་ལྡན་འདས་ཆོས་ཐམས་ཅད་སྡུད་ཅིང་འཛིན་པ་ལ་ཕྱག་འཚལ་ལོ། །བརྗོད་དཔག་འདས་ལ་ཕྱག་འཚལ་ལོ། །དཔེ་ཟླ་མེད་ལ་ཕྱག་འཚལ་ལོ། །མུ་མེད་ཆོས་ལ་ཕྱག་འཚལ་ལོ། །བསམ་ཁྱབ་དཀའ་ལ་ཕྱག་འཚལ་ལོ། །སྟོབས་ལ་གནས་པའི་སྟོབས་ཀྱི་སྟོབས་ལ་ཕྱག་འཚལ་ལོ། །འཇིག་པ་མེད་པའི་སྟོབས་བཅུ་ལ་ཕྱག་འཚལ་ལོ། །འཇིག་རྟེན་གསུམ་གྱི་གཙོ་ལ་ཕྱག་འཚལ་ལོ། །ཐམས་ཅད་འདྲེན་པའི་སྟོན་པ་ཆེན་པོ་ལ་ཕྱག་འཚལ་ལོ། །འཆིང་བ་ཀུན་གཅོད་ལ་ཕྱག་འཚལ་ལོ། །ཕ་རོལ་མཐར་ཕྱིན་ལ་ཕྱག་འཚལ་ལོ། །འཇིག་རྟེན་ཀུན་ལས་འདས་ཟིན་པ་ལ་ཕྱག་འཚལ་ལོ། །འཁོར་བའི་རྒྱུད་དང་ཡོངས་སུ་བྲལ་བ་ལ་ཕྱག་འཚལ་ལོ། །ཏིང་ངེ་འཛིན་རྣམ་པར་གྲོལ་བ་ལ་ཕྱག་འཚལ་ལོ། །ནམ་མཁའ་ལྟར་དམིགས་སུ་མེད་པ་ལ་ཕྱག་འཚལ་ལོ། །མང་པོའི་ནང་ན་ཆོས་ཀྱི་རྒྱལ་པོ་ལ་ཕྱག་འཚལ་ལོ། །བདུད་བཞིའི་ཚོགས་འཇོམས་ལ་ཕྱག་འཚལ་ལོ། །བུ་གཅིག་གི་ཕ་ལྟར་བྱམས་པ་ཆེན་པོ་ལ་ཕྱག་འཚལ་ལོ། །ཚེ་རབས་འཆི་འཕོས་གར་བྱུང་གར་སྐྱེས་ཀྱང་སངས་རྒྱས་ཀྱི་ཞལ་རྟག་ཏུ་མཐོང་ཞིང་སངས་རྒྱས་ཀྱི་བདག་ཉིད་མངོན་པར་རྟོགས་ལ་མྱ་ངན་ལས་འདས་པ་ཆེན་པོར་ཕྱིན་པར་གྱུར་ཅིག་།དེ་ཅིའི་ཕྱིར་ཞེ་ན། འཇིག་ཚོགས་ཅན་ཀུན་ལ་སངས་རྒྱས་ཀྱི་བདག་ཉིད་ཡོད་པའི་ཕྱིར་རོ། །ཀྱེ
62.230a
འཁོར་མང་པོ་རྣམས་སོར་མོ་བཅུའི་ཐལ་མོ་སྦྱོར་ལ་ཡང་དག་པར་མཉན་ཅིང་སེམས་ཐག་པ་ནས་མཆོད་པ་ཕུལ་ཅིག་།ངས་ནི་ཕྱོགས་བཅུ་དུས་གསུམ་གྱི། །སངས་རྒྱས་མཚན་རྣམས་བཤད་ཀྱིས་ཉོན། །སྡིག་པ་མཚམས་མེད་ལྔ་པོ་ཡང ། །རྣམ་གྲོལ་མཚན་ཉིད་བསྐྱེད་པར་བྱ། །དགེ་རྩ་མེད་པའི་གང་ཟག་ལ། །ངས་ནི་དགྲོལ་ཞིང་བཤད་ཀྱིས་ཀྱང ། །དེས་ཀྱང་ཆུད་པར་མི་ནུས་ཏེ། །ས་བོན་ཚིག་རྣམས་རང་བཞིན་དོང ། །གྲུང་བརྟན་འབའ་ཞིག་གནས་པར་འགྱུར། །ཐེག་པ་ཆུང་ངུ་བསལ་ནས་སུ། །ཐེག་ཆེན་ཉི་ཚེ་ཡོད་པར་འགྱུར། །ཐེག་པ་གཉིས་པོ་བསལ་ནས་སུ། ཐེག་པ་གཅིག་པུ་ཡོད་པར་འགྱུར། །དགེ་རྩ་མེད་པའི་གང་ཟག་གིས། །སྒྲ་འདི་ཐོས་པར་མི་འགྱུར་ཏེ། །སངས་རྒྱས་གྲངས་མེད་མཆོད་མྱོང་བས། །གདོད་དེས་སངས་རྒྱས་མཚན་ཐོས་སོ། །ལེན་ཅིང་འཛིན་པར་བྱེད་པ་ནི། །ཕྱོགས་ཙམ་རྣམ་པར་གྲོལ་བ་སྟེ། །རྣམ་དག་ས་ལ་བདེ་བར་གནས། །ད་ཡང་ང་ཡི་ཆོས་འདི་ལ། །སངས་རྒྱས་སྤྱད་པ་ཀུན་སྤྱད་དེ། །སངས་རྒྱས་མཚན་ལ་ཕྱག་འཚལ་ཞིང ། །མདོ་འདི་བླང་ཞིང་ཀློག་འཆང་ན། །བདུད་ཀྱི་ལས་དང་བྲལ་བར་འགྱུར། །རྩ་བ་བཞི་དང་མཚམས་མེད་དང ། །ལོག་སྤྱོད་རྣམས་ཀྱི་སྡིག་ཀྱང་འབྱང ། །མ་འོངས་དུས་ན་གང་ཟག་དེ། །འཕགས་པའི་ལམ་ཡང་ངེས་པར་འགྲུབ། །གང་ཞིག་དད་པ་མ་སྐྱེས་ན། །ངན་སོང་གསུམ་དུ་ལྟུང་ཡང་དག་།དད་སྐྱེས་བརྩོན་འགྲུས་ཕྱག་འཚལ་ན། །ཚད་མེད་སངས་རྒྱས་མཐོང་བར་འགྱུར། །དེ་བས་རྩེ་གཅིག་ཕྱག་འཚལ་ཞིང ། །སྡིག་པ་དཔག་མེད་བྱང་བར་སྨོན། །དེ་ཕྱིར་གུས་པར་ཕྱག་འཚལ་ལོ། །དེ་ནས་འཁོར་མང་པོ་རྣམས་ཐལ་མོ་སྦྱར་ཏེ། ཡང་དག་པར་མཉན་ནས་ལུས་དང་སེམས་རྩེ་གཅིག་ཏུ་བསྡུས་ཏེ། གཡེལ་ཞིང་འགྱུར་བ་མེད་པར་ཡན་ལག་ལྔ་ས་ལ་གཏུགས་ཏེ་སེམས་ཐག་པ་ནས་ཉན་ཏོ། །དེ་ནས་བཅོམ་ལྡན་འདས་ཀྱིས་སངས་རྒྱས་ཀྱི་མཚན་ནས་བརྗོད་ཅིང་བསྒྲགས་པ་ལས་འདས་པའི་སངས་རྒྱས་དཔག་ཏུ་མེད་པ་ལ་ཕྱག་འཚལ་ལོ། །སངས་རྒྱས་ཉི་ཟླ་མར་མེ
62.230b
གསལ་ཉི་ཁྲི་ལ་ཕྱག་འཚལ་ལོ། །སངས་རྒྱས་མར་མེ་མཛད་སུམ་ཁྲི་ལ་ཕྱག་འཚལ་ལོ། །སངས་རྒྱས་ཐོགས་མེད་ཡེ་ཤེས་མཆོག་ལ་ཕྱག་འཚལ་ལོ། །སངས་རྒྱས་རྒྱལ་བུ་བཅུ་དྲུག་ལ་ཕྱག་འཚལ་ལོ། །སངས་རྒྱས་ནམ་མཁའི་རྒྱལ་པོ་ལ་ཕྱག་འཚལ་ལོ། །སངས་རྒྱས་རིན་ཆེན་མང་ལ་ཕྱག་འཚལ་ལོ། །སངས་རྒྱས་སྤྲིན་དབང་མར་མེ་རྒྱལ་པོ་ལ་ཕྱག་འཚལ་ལོ། །སངས་རྒྱས་བྱིན་སྒྲ་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་དཔག་མེད་ལ་ཕྱག་འཚལ་ལོ། །སངས་རྒྱས་དགེ་བར་བསམས་ལ་ཕྱག་འཚལ་ལོ། །སངས་རྒྱས་སྐུ་སྤྲུལ་ལ་ཕྱག་འཚལ་ལོ། །སངས་རྒྱས་ཉི་ཟླ་གསལ་གྱི་དཔལ་ལ་ཕྱག་འཚལ་ལོ། །སངས་རྒྱས་པད་མ་དག་པ་རྒྱུ་སྐར་རྒྱལ་པོ་ཡེ་ཤེས་ལ་ཕྱག་འཚལ་ལོ། །སངས་རྒྱས་རྣམ་དག་བརྒྱན་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཀླུ་བཙུན་རྒྱལ་པོ་ལ་ཕྱག་འཚལ་ལོ། །སངས་རྒྱས་སྤྲིན་འབྲུག་སྒྲ་རྒྱལ་པོ་ལ་ཕྱག་འཚལ་ལོ། །སངས་རྒྱས་སྤྲིན་འབྲུག་སྒྲ་རྒྱུ་སྐར་རྒྱལ་པོ་ཡེ་ཤེས་པད་མ་ལ་ཕྱག་འཚལ་ལོ། །སངས་རྒྱས་རིན་ཆེན་རྒྱལ་པོ་ལ་ཕྱག་འཚལ་ལོ། །སངས་རྒྱས་ཤིང་ས་ལ་རྒྱལ་པོ་ལ་ཕྱག་འཚལ་ལོ། །སངས་རྒྱས་རིན་ཆེན་བླ་མ་དཔལ་གཟི་བརྗིད་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་སྣང་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་མི་གཡོ་འབུམ་ཕྲག་བརྒྱ་ལ་ཕྱག་འཚལ་ལོ། །སངས་རྒྱས་འོད་རྒྱང་རིང་ལ་ཕྱག་འཚལ་ལོ། །སངས་རྒྱས་ཟླ་འོད་ལ་ཕྱག་འཚལ་ལོ། །སངས་རྒྱས་སྤོས་ཙན་དན་ལ་ཕྱག་འཚལ་ལོ། །སངས་རྒྱས་རི་ལེགས་རྒྱལ་པོ་ལ་ཕྱག་འཚལ་ལོ། །སངས་རྒྱས་རི་རབ་ལྷའི་ཐོར་ཚུགས་ཅན་ལ་ཕྱག་འཚལ་ལོ། །སངས་རྒྱས་འོད་སྙོམས་རི་རབ་ལ་ཕྱག་འཚལ་ལོ། །སངས་རྒྱས་ཟླ་གཟུགས་ལ་ཕྱག་འཚལ་ལོ། །སངས་རྒྱས་ཡང་དག་པའི་དྲན་པ་ལ་ཕྱག་འཚལ་ལོ། །སངས་རྒྱས་དྲི་མ་བྲལ་ལ་ཕྱག་འཚལ་ལོ། །སངས་རྒྱས་ཆགས་མེད་ལ་ཕྱག་འཚལ་ལོ། །སངས་རྒྱས་ཀླུའི་ལྷ་ལ་ཕྱག་འཚལ་ལོ། །སངས་རྒྱས་ས་མི་གཡོ་བའི
62.231a
ས་ལ་ཕྱག་འཚལ་ལོ། །སངས་རྒྱས་མེ་ཏོག་མཆོག་ལ་ཕྱག་འཚལ་ལོ། །སངས་རྒྱས་བཻ་དཱུརྱའི་མེ་ཏོག་མཆོག་ལ་ཕྱག་འཚལ་ལོ། །སངས་རྒྱས་བཻ་དཱུརྱ་དང་གསེར་གྱི་ཁ་དོག་ལ་ཕྱག་འཚལ་ལོ། །སངས་རྒྱས་གསེར་མཛོད་ལ་ཕྱག་འཚལ་ལོ། །སངས་རྒྱས་སའི་གདུང་ལ་ཕྱག་འཚལ་ལོ། །སངས་རྒྱས་ཟླ་བའི་གཟུགས་བརྙན་ལ་ཕྱག་འཚལ་ལོ། །སངས་རྒྱས་ཉི་མའི་དབྱངས་ལ་ཕྱག་འཚལ་ལོ། །སངས་རྒྱས་པད་མ་རྣམ་གྲོལ་ལ་ཕྱག་འཚལ་ལོ། །སངས་རྒྱས་འོད་ཟེར་རྣམ་པར་བརྒྱན་ལ་ཕྱག་འཚལ་ལོ། །སངས་རྒྱས་བློ་རྒྱ་མཚོ་མངོན་པར་ཤེས་པ་ལ་ཕྱག་འཚལ་ལོ། །སངས་རྒྱས་ཆུ་འོད་ལ་ཕྱག་འཚལ་ལོ། །སངས་རྒྱས་དབྱངས་ཆེན་པོ་ལ་ཕྱག་འཚལ་ལོ། །སངས་རྒྱས་དྲི་མ་སྒྱུ་མ་དང་བྲལ་བ་ལ་ཕྱག་འཚལ་ལོ། །སངས་རྒྱས་ཡིད་སྐྱོ་སྤངས་ལ་ཕྱག་འཚལ་ལོ། །སངས་རྒྱས་རིན་པོ་ཆེ་འབར་བ་ལ་ཕྱག་འཚལ་ལོ། །སངས་རྒྱས་གཙུག་དམ་པ་ལ་ཕྱག་འཚལ་ལོ། །སངས་རྒྱས་དཔའ་བར་འཛུགས་ལ་ཕྱག་འཚལ་ལོ། །སངས་རྒྱས་ཤེས་རབ་ཡོན་ཏན་འཛིན་ལ་ཕྱག་འཚལ་ལོ། །སངས་རྒྱས་ཉི་ཟླའི་འོད་སྒྲིབ་ལ་ཕྱག་འཚལ་ལོ། །སངས་རྒྱས་ཉི་ཟླ་བཻ་དཱུརྱའི་འོད་ལ་ཕྱག་འཚལ་ལོ། །སངས་རྒྱས་བླ་མེད་བཻ་དཱུརྱའི་འོད་ལ་ཕྱག་འཚལ་ལོ། །སངས་རྒྱས་རབ་མཆོག་གཙོ་ལ་ཕྱག་འཚལ་ལོ། །སངས་རྒྱས་བྱང་ཆུབ་མེ་ཏོག་ལ་ཕྱག་འཚལ་ལོ། །སངས་རྒྱས་ཟླ་གསལ་ལ་ཕྱག་འཚལ་ལོ། །སངས་རྒྱས་ཉི་འོད་ལ་ཕྱག་འཚལ་ལོ། །སངས་རྒྱས་མེ་ཏོག་མདོག་གི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཐེ་ཚོམ་མུན་སེལ་ལ་ཕྱག་འཚལ་ལོ། །སངས་རྒྱས་སྡུག་བསྔལ་བསྒྲལ་ལ་ཕྱག་འཚལ་ལོ། །སངས་རྒྱས་མོས་པ་དང་བ་ལ་ཕྱག་འཚལ་ལོ། །སངས་རྒྱས་སྔོན་ལེགས་ལ་ཕྱག་འཚལ་ལོ། །སངས་རྒྱས་རྫུ་འཕྲུལ་གཟི་བརྗིད་ལ་ཕྱག་འཚལ་ལོ། །སངས་རྒྱས་ཆོས་ཀྱི་ཤེས་རབ་ལ་ཕྱག་འཚལ་ལོ། །སངས་རྒྱས་བཞད་སྒྲ་ལ་ཕྱག་འཚལ་ལོ། །སངས་རྒྱས་སེང་གེ་སྒྲ་ལ་ཕྱག་འཚལ་ལོ། །སངས་རྒྱས
62.231b
ཀླུའི་སྒྲ་ལ་ཕྱག་འཚལ་ལོ། །སངས་རྒྱས་འཇིག་རྟེན་གནས་ལ་ཕྱག་འཚལ་ལོ། །སངས་རྒྱས་དབང་ཕྱུག་ལ་ཕྱག་འཚལ་ལོ། །སངས་རྒྱས་འོད་མཐའ་ཡས་ལ་ཕྱག་འཚལ་ལོ། །སངས་རྒྱས་འོད་ཐོགས་མེད་ལ་ཕྱག་འཚལ་ལོ། །སངས་རྒྱས་འོད་ཟླ་མེད་ལ་ཕྱག་འཚལ་ལོ། །སངས་རྒྱས་འོད་འབར་རྒྱལ་པོ་ལ་ཕྱག་འཚལ་ལོ། །སངས་རྒྱས་འབར་བའི་འོད་ལ་ཕྱག་འཚལ་ལོ། །སངས་རྒྱས་རབ་ཏུ་དགའ་བའི་འོད་ལ་ཕྱག་འཚལ་ལོ། །སངས་རྒྱས་ཤེས་རབ་འོད་ལ་ཕྱག་འཚལ་ལོ། །སངས་རྒྱས་འོད་རྒྱུན་མི་འཆད་ལ་ཕྱག་འཚལ་ལོ། །སངས་རྒྱས་འོད་བསམ་དཀའ་ལ་ཕྱག་འཚལ་ལོ། །སངས་རྒྱས་འོད་བརྗོད་མེད་ལ་ཕྱག་འཚལ་ལོ། །སངས་རྒྱས་ཉི་ཟླའི་འོད་འཕགས་ལ་ཕྱག་འཚལ་ལོ། །སངས་རྒྱས་མཚན་བཟངས་གསེར་བཙོ་མའི་མདོག་ལ་ཕྱག་འཚལ་ལོ། །སངས་རྒྱས་རིང་དུ་བརྟག་པ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་མཛོད་ལ་ཕྱག་འཚལ་ལོ། །སངས་རྒྱས་དབྱངས་དཔག་མེད་ལ་ཕྱག་འཚལ་ལོ། །སངས་རྒྱས་ཟིལ་དངར་གྱི་རོ་ལ་ཕྱག་འཚལ་ལོ། །སངས་རྒྱས་ཀླུའི་རྒྱལ་བ་ལ་ཕྱག་འཚལ་ལོ། །སངས་རྒྱས་རྒྱལ་བའི་སྟོབས་ལ་ཕྱག་འཚལ་ལོ། །སངས་རྒྱས་སེང་གེའི་དབྱངས་ལ་ཕྱག་འཚལ་ལོ། །སངས་རྒྱས་དྲི་མ་དང་བྲལ་བའི་འོད་ལ་ཕྱག་འཚལ་ལོ། །སངས་རྒྱས་དཔལ་མཆོག་ལ་ཕྱག་འཚལ་ལོ། །སངས་རྒྱས་འཇམ་དཔལ་རི་ལ་ཕྱག་འཚལ་ལོ། །སངས་རྒྱས་རྡོ་རྗེ་རྒྱལ་པོ་ལ་ཕྱག་འཚལ་ལོ། །སངས་རྒྱས་མེ་ཏོག་བླ་མ་ལ་ཕྱག་འཚལ་ལོ། །སངས་རྒྱས་འཇིགས་མེད་སྟོབས་ཀྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཀླུ་རྗེ་དབང་ཕྱུག་ལ་ཕྱག་འཚལ་ལོ། །སངས་རྒྱས་སེང་གེའི་གཟི་བརྗིད་རྒྱལ་པོ་ལ་ཕྱག་འཚལ་ལོ། །སངས་རྒྱས་དབང་ཕྱུག་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་ཁྱབ་ལ་ཕྱག་འཚལ་ལོ། །སངས་རྒྱས་ཀུན་དུ་སྣང་ལ་ཕྱག་འཚལ་ལོ། །སངས་རྒྱས་ཀུན་དུ་གཙང་ལ་ཕྱག་འཚལ་ལོ། །སངས་རྒྱས་སྤོས་ཏ་མ་ར་བར་ཙན་དན་ལ་ཕྱག་འཚལ་ལོ། །སངས་རྒྱས་སྤོས་ཙན་དན་ལ་ཕྱག་འཚལ་ལོ། །སངས་རྒྱས་ནོར་བུའི་རྒྱལ་མཚན་ལ
62.232a
ཕྱག་འཚལ་ལོ། །སངས་རྒྱས་དཀོན་མཆོག་བརྩེགས་རབ་ཏུ་དགའ་བའི་སྙིང་པོ་ལ་ཕྱག་འཚལ་ལོ། །སངས་རྒྱས་བརྩོན་འགྲུས་ཆེན་པོ་བླ་ན་མེད་པ་ལ་ཕྱག་འཚལ་ལོ། །སངས་རྒྱས་ནོར་བུའི་རྒྱལ་མཚན་མར་མེའི་འོད་ལ་ཕྱག་འཚལ་ལོ། །སངས་རྒྱས་ཤེས་རབ་སྒྲོན་མ་སྣང་ལ་ཕྱག་འཚལ་ལོ། །སངས་རྒྱས་རྒྱ་མཚོའི་དཔལ་འོད་སྣང་ལ་ཕྱག་འཚལ་ལོ། །སངས་རྒྱས་རྡོ་རྗེ་སྲ་བརྟན་ལ་ཕྱག་འཚལ་ལོ། །སངས་རྒྱས་གསེར་འོད་ཀུན་དུ་དགྲམ་ལ་ཕྱག་འཚལ་ལོ། །སངས་རྒྱས་བརྩོན་འགྲུས་ཆེ་བཙན་ལ་ཕྱག་འཚལ་ལོ། །སངས་རྒྱས་དཔའ་བརྟུལ་ལ་ཕྱག་འཚལ་ལོ། །སངས་རྒྱས་ཐུགས་རྗེའི་འོད་ལ་ཕྱག་འཚལ་ལོ། །སངས་རྒྱས་ཐུགས་རྗེ་སྟོབས་ཀྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་བྱམས་པའི་སྙིང་པོའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཙན་དན་གྱི་ཕུག་རྣམ་པར་བཀོད་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་བཟང་ལེགས་གཙོ་ལ་ཕྱག་འཚལ་ལོ། །སངས་རྒྱས་ལེགས་པར་སད་ལ་ཕྱག་འཚལ་ལོ། །སངས་རྒྱས་རྣམ་པར་བཀོད་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་གསེར་གྱི་རི་བོ་རིན་པོ་ཆེའི་གདུགས་ལ་ཕྱག་འཚལ་ལོ། །སངས་རྒྱས་གསེར་གྱི་མེ་ཏོག་འབར་བའི་འོད་ཀྱི་མཚན་མ་ལ་ཕྱག་འཚལ་ལོ། །སངས་རྒྱས་སྒྲོན་ཆེན་འོད་སྣང་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་བླ་རེ་སྟོང་པ་ཉིད་དུ་བརྟན་པའི་དབང་ཕྱུག་རྒྱལ་པོ་ལ་ཕྱག་འཚལ་ལོ། །སངས་རྒྱས་གསེར་གྱི་མེ་ཏོག་གི་འོད་ལ་ཕྱག་འཚལ་ལོ། །སངས་རྒྱས་ནམ་མཁའི་རིན་ཆེན་མེ་ཏོག་གི་འོད་ལ་ཕྱག་འཚལ་ལོ། །སངས་རྒྱས་བཻ་དཱུརྱ་རྣམ་པར་བཀོད་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་སྐུ་ཀུན་དུ་མངོན་པར་སྟོན་པའི་འོད་ལ་ཕྱག་འཚལ་ལོ། །སངས་རྒྱས་ཡེ་ཤེས་འོད་མི་འགྱུར་ལ་ཕྱག་འཚལ་ལོ། །སངས་རྒྱས་བདུད་ཀྱི་རྒྱལ་པོ་རྣམས་ཚར་གཅོད་ལ་ཕྱག་འཚལ་ལོ། །སངས་རྒྱས་འོད་སྣང་སྟོང་ལ་ཕྱག་འཚལ་ལོ། །སངས་རྒྱས་བྱམས་པའི་ཤེས་རབ་རྒྱལ་བ་ལ་ཕྱག་འཚལ་ལོ། །སངས་རྒྱས
62.232b
བྱམས་པའི་འོད་གསལ་ལ་ཕྱག་འཚལ་ལོ། །སངས་རྒྱས་འཇིག་རྟེན་དག་པའི་འོད་ལ་ཕྱག་འཚལ་ལོ། །སངས་རྒྱས་དགེ་དབེན་ཟླ་བའི་དབྱངས་ལ་ཕྱག་འཚལ་ལོ། །སངས་རྒྱས་མཆོག་བཙུན་ཡེ་ཤེས་རྒྱལ་པོ་ལ་ཕྱག་འཚལ་ལོ། །སངས་རྒྱས་གདུགས་རིན་པོ་ཆེའི་རྒྱལ་པོར་གནས་པ་ལ་ཕྱག་འཚལ་ལོ། །སངས་རྒྱས་ཀླུའི་རིགས་བླ་ན་མེད་པ་ཡེ་ཤེས་གཙོ་བོའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཉི་ཟླའི་འོད་ལ་ཕྱག་འཚལ་ལོ། །སངས་རྒྱས་ཉི་ཟླ་ནོར་བུའི་འོད་ལ་ཕྱག་འཚལ་ལོ། །སངས་རྒྱས་ཡེ་ཤེས་ཀྱི་བ་དན་མཆོག་ཏུ་བརྒྱན་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་དྲི་མེད་མཛོད་ཀྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་སྣང་མཚན་མ་ལ་ཕྱག་འཚལ་ལོ། །སངས་རྒྱས་གསེར་འབར་བའི་འོད་སྣང་ལ་ཕྱག་འཚལ་ལོ། །སངས་རྒྱས་གསེར་འོད་སྣང་བའི་མཛོད་ལ་ཕྱག་འཚལ་ལོ། །སངས་རྒྱས་སེང་གེའི་སྒྲའི་སྟོབས་ཀྱི་དབང་ཕྱུག་རྒྱལ་པོ་ལ་ཕྱག་འཚལ་ལོ། །སངས་རྒྱས་མཆོག་དབྱངས་དམ་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་བ་དན་འོད་རྟག་ལ་ཕྱག་འཚལ་ལོ། །སངས་རྒྱས་འཇིག་རྟེན་རྣམ་པར་རྟོག་པའི་མར་མེའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཤེས་རབ་ཀྱི་ན་བཟའི་རྒྱལ་པོ་ཐོབ་པ་ལ་ཕྱག་འཚལ་ལོ། །སངས་རྒྱས་ཆོས་ཀྱི་མཚན་ཉིད་དམ་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་རི་རབ་འོད་ལ་ཕྱག་འཚལ་ལོ། །སངས་རྒྱས་མེ་ཏོག་སུ་མ་ནའི་འོད་ལ་ཕྱག་འཚལ་ལོ། །སངས་རྒྱས་མེ་ཏོག་ཨུད་པ་ལའི་འོད་ལ་ཕྱག་འཚལ་ལོ། །སངས་རྒྱས་སྟོབས་བཙན་དམ་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཤེས་རབ་ཀྱི་སྟོབས་ཀྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་རབ་ཏུ་དགའ་བའི་འཁྲུག་མེད་ཀྱི་འོད་ལ་ཕྱག་འཚལ་ལོ། །སངས་རྒྱས་སྒྲ་དབྱངས་དཔག་མེད་རྒྱལ་པོ་ལ་ཕྱག་འཚལ་ལོ། །སངས་རྒྱས་བློ་གྲོས་འོད་ལ་ཕྱག་འཚལ་ལོ། །སངས་རྒྱས་གསེར་གྱི་རྒྱ་མཚོའི་འོད་ལ་ཕྱག་འཚལ་ལོ། །སངས་རྒྱས་ཤེས་རབ་ཀྱི་རི་དང་རྒྱ་མཚོའི་དབང་ཕྱུག་གི་རྒྱལ་པོ་ལ་ཕྱག་འཚལ་ལོ། །
62.233a
སངས་རྒྱས་ཐར་པ་ཆེན་པོའི་འོད་ལ་ཕྱག་འཚལ་ལོ། །སངས་རྒྱས་ཆོས་ཐམས་ཅད་རྟག་ཏུ་གང་བའི་རྒྱལ་པོ་ལ་ཕྱག་འཚལ་ལོ། །སངས་རྒྱས་བླུན་མི་སྟོན་ལ་ཕྱག་འཚལ་ལོ། །འདས་པའི་སངས་རྒྱས་སྤྲུལ་པའི་སྐུ་ཐམས་ཅད་ལ་ཕྱག་འཚལ་ལོ། །འདས་པའི་སངས་རྒྱས་གཅིག་།སངས་རྒྱས་བཅུ། སངས་རྒྱས་བརྒྱ། སངས་རྒྱས་སྟོང ། སངས་རྒྱས་ཁྲི་ལ་ཕྱག་འཚལ་ན་བསྐལ་པ་གྲངས་མེད་དཔག་ཏུ་མེད་པའི་འཁོར་བ་ནས་སྡིག་བགྱིས་པའི་མི་བཟད་པ་ཐམས་ཅད་འབྱང་བར་འགྱུར་རོ། །སངས་རྒྱས་འབུམ་ཕྲག་གཅིག་།འབུམ་ཕྲག་བཅུ། འབུམ་ཕྲག་བརྒྱ། འབུམ་ཕྲག་སྟོང ། འབུམ་ཕྲག་ཁྲི། བྱེ་བ་ཁྲག་ཁྲིག་གང་གཱའི་བྱེ་མ་སྙེད་གྲངས་མེད་དཔག་ཏུ་མེད་པའི་སངས་རྒྱས་ལ་གུས་པར་ཕྱག་འཚལ་ལོ། །གལ་ཏེ་གང་ཟག་ལ་ལས་འདས་པའི་སངས་རྒྱས་གྲངས་མེད་དཔག་ཏུ་མེད་པའི་མཚན་ཐོས་ན་དེ་བསྐལ་པ་ཁྲི་ཕྲག་བརྒྱད་ཅུའི་བར་དུ་སེམས་ཅན་དམྱལ་བའི་སྡུག་བསྔལ་དུ་མི་ལྟུང་སྟེ། དེ་བས་ན་གུས་པར་ཕྱག་འཚལ་ལོ། །གང་གིས་སངས་རྒྱས་འདས་པའི་མཚན། །དེ་ལ་གུས་པར་ཕྱག་འཚལ་ན། །སེམས་ཉིད་ཐོབ་ཅིང་སྡིག་ཀྱང་འབྱང ། །མི་དགེ་བཅུ་དང་མཚམས་མེད་ལྔ། །ཕྱིན་ཆད་མི་བྱེད་སྡོམ་པར་ནུས། །དམ་པའི་ཆོས་ནི་རྟག་ཏུ་ཐོས། །ཐེག་ཆེན་ཚུལ་ཁྲིམས་ལྡན་པ་སྟེ། །དེ་ཕྱིར་ད་ལྟར་ཕྱག་ཀྱང་འཚལ། །རྣམ་པ་གཉིས་ཤིག་མ་གཏོགས་ཏེ། །ཐེག་ཆེན་ཆོས་ལ་དམོད་པ་དང ། །ལོག་སྤྱོད་ཕྱོགས་སུ་ལྟ་བའོ། །གང་ཞིག་སེམས་ཉིད་རྣམ་དག་ན། །ལོག་སྤྱོད་ཅེས་སུ་མི་བྱ་སྟེ། །སངས་རྒྱས་དཔག་མེད་རྟག་ཏུ་མཐོང ། །སྡིག་པའི་རྩ་བ་བཞི་པོ་དང ། །མཚམས་མེད་ལྔར་བཅས་གང་བྱས་པ། །རྣམ་དག་སེམས་ཀྱིས་འགྱོད་ནུས་ན། །དེ་ནི་ཚུལ་བཞིན་གནས་པ་ཡིན། །དེ་ཡང་གུས་པར་ཕྱག་འཚལ་ཕྱིར། །མི་དགེ་བཅུའི་ལས་འབྱང་ཞིང ། །ཐེག་ཆེན་ཚུལ་ཁྲིམས་ཐོབ་པས་ན། །དེ་བས་གུས་པར་ཕྱག་འཚལ་ལོ། །
62.233b
འདས་པའི་སངས་རྒྱས་རྣམས་ཀྱི་མཚན་དེ་དག་བཤད་པའི་ཚེ་བྱང་ཆུབ་སེམས་དཔའ་སྟོང་ཕྲག་བཅུ་མི་སྐྱེ་བའི་ཆོས་ལ་བཟོད་པ་ཐོབ་བོ། །ཉན་ཐོས་བརྒྱད་བརྒྱས་ནི་ཐེག་པ་ཆེན་པོའི་སེམས་ཤེས་ཙམ་སྐྱེས་སོ། །དགེ་སློང་ལྔ་སྟོང་ནི་དགྲ་བཅོམ་པར་གྲུབ་པོ། །ལྷ་དང་མི་ཁྲི་ཕྲག་བཅུ་ཞིག་ཆོས་ཀྱི་མིག་རྣམ་པར་དག་པ་ཐོབ་བོ། །ད་ལྟར་བཞུགས་པའི་སངས་རྒྱས་གྲངས་མེད་དཔག་ཏུ་མེད་པ་ལ་ཕྱག་འཚལ་ལོ། །སངས་རྒྱས་གསལ་རྒྱལ་འབུམ་ཕྲག་བཅུ་ལ་ཕྱག་འཚལ་ལོ། །སངས་རྒྱས་གསེར་གཙོ་མའི་མདོག་དང་བྲལ་ལ་ཕྱག་འཚལ་ལོ། །སངས་རྒྱས་སྣང་བ་དཔག་མེད་ལ་ཕྱག་འཚལ་ལོ། །སངས་རྒྱས་ཉི་མའི་དཀྱིལ་འཁོར་འོད་སྣང་རྒྱལ་པོ་ལ་ཕྱག་འཚལ་ལོ། །སངས་རྒྱས་སྤོས་བརྩེགས་ལ་ཕྱག་འཚལ་ལོ། །སངས་རྒྱས་སེང་གེ་འབུམ་གཟུགས་ལ་ཕྱག་འཚལ་ལོ། །སངས་རྒྱས་སེང་གེ་རྣམ་པར་རོལ་པ་ལ་ཕྱག་འཚལ་ལོ། །སངས་རྒྱས་ཡོན་ཏན་ཀུན་དུ་འོད་ཀྱི་རིའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཡོན་ཏན་བདེ་གནས་རིན་པོ་ཆེའི་རྒྱལ་པོ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་མེ་ཏོག་རྣམ་པར་བརྒྱན་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་དཀའ་ཐུབ་ལ་ཕྱག་འཚལ་ལོ། །སངས་རྒྱས་རི་རབ་མཚན་མ་ལ་ཕྱག་འཚལ་ལོ། །སངས་རྒྱས་རི་རབ་རྒྱལ་པོ་ཐོབ་ལ་ཕྱག་འཚལ་ལོ། །སངས་རྒྱས་རིན་ཆེན་དཔལ་ལ་ཕྱག་འཚལ་ལོ། །སངས་རྒྱས་རིན་ཆེན་ཟླ་བ་ལ་ཕྱག་འཚལ་ལོ། །སངས་རྒྱས་རིན་ཆེན་འབར་བ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་རྒྱན་ལ་ཕྱག་འཚལ་ལོ། །སངས་རྒྱས་དཀའ་ཐུབ་སེང་གེའི་ང་རོ་ལ་ཕྱག་འཚལ་ལོ། །སངས་རྒྱས་འོད་ཆེན་རྒྱལ་པོ་ལ་ཕྱག་འཚལ་ལོ། །སངས་རྒྱས་མི་འགྱུར་ལ་ཕྱག་འཚལ་ལོ། །སངས་རྒྱས་སྨན་གྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་རྣམ་པར་བརྒྱན་ལ་ཕྱག་འཚལ་ལོ། །སངས་རྒྱས་ལྡིང་ཁང་ཕྱིན་ལ་ཕྱག་འཚལ་ལོ། །སངས་རྒྱས་ཟླ་བའི་གདུགས་ལ་ཕྱག་འཚལ་ལོ། །སངས་རྒྱས་འོད་ཁྱབ་ལ་ཕྱག
62.234a
འཚལ་ལོ། །སངས་རྒྱས་རིན་ཆེན་རྒྱལ་པོ་ལ་ཕྱག་འཚལ་ལོ། །སངས་རྒྱས་རྣམ་པར་གཟིགས་ལ་ཕྱག་འཚལ་ལོ། །སངས་རྒྱས་གཙུག་ཏོར་ཅན་ལ་ཕྱག་འཚལ་ལོ། །སངས་རྒྱས་ཐམས་ཅད་སྐྱོབ་ལ་ཕྱག་འཚལ་ལོ། །སངས་རྒྱས་ལོག་པར་དད་སེལ་ལ་ཕྱག་འཚལ་ལོ། །སངས་རྒྱས་གསེར་ཐུབ་ལ་ཕྱག་འཚལ་ལོ། །སངས་རྒྱས་འོད་སྲུང་ལ་ཕྱག་འཚལ་ལོ། །སངས་རྒྱས་འབྲུག་སྒྲའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཙན་དན་མེ་ཏོག་ལ་ཕྱག་འཚལ་ལོ། །སངས་རྒྱས་ཙན་དན་འདབ་མ་ལ་ཕྱག་འཚལ་ལོ། །སངས་རྒྱས་ཡིད་མཆོག་ལ་ཕྱག་འཚལ་ལོ། །སངས་རྒྱས་ཐུབ་ཟླ་མེད་ལ་ཕྱག་འཚལ་ལོ། །སངས་རྒྱས་ཟིལ་མངར་རྔ་ལ་ཕྱག་འཚལ་ལོ། །སངས་རྒྱས་རྣམ་པར་གཟིགས་ལ་ཕྱག་འཚལ་ལོ། །སངས་རྒྱས་ཉི་ཟླའི་འོད་སྣང་ལ་ཕྱག་འཚལ་ལོ། །སངས་རྒྱས་ཐུབ་མེད་འོད་ལ་ཕྱག་འཚལ་ལོ། །སངས་རྒྱས་རྣམ་པར་བརྒྱན་དང་ལྡན་པའི་རྒྱན་དང་ལྡན་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་ཟེར་ཀུན་དུ་ཁྱབ་པའི་ཡོན་ཏན་གྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་བདུད་བཞི་འཇོམས་པའི་སེང་གེའི་སྒྲའི་རྒྱལ་པོ་ལ་ཕྱག་འཚལ་ལོ། །སངས་རྒྱས་རྡོ་རྗེ་འཇིགས་མེད་ལ་ཕྱག་འཚལ་ལོ། །སངས་རྒྱས་བཻ་དཱུརྱའི་འོད་ལ་ཕྱག་འཚལ་ལོ། །སངས་རྒྱས་རི་རབ་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་ཟེར་གཙང་མའི་རྒྱལ་པོ་ལ་ཕྱག་འཚལ་ལོ། །སངས་རྒྱས་དགེ་དཔལ་ལ་ཕྱག་འཚལ་ལོ། །སངས་རྒྱས་འོད་ཟེར་དཔག་མེད་ལ་ཕྱག་འཚལ་ལོ། །སངས་རྒྱས་གཟུངས་རྣམ་པར་རོལ་པ་ལ་ཕྱག་འཚལ་ལོ། །སངས་རྒྱས་དཔའ་བར་འགྲོ་བའི་ཏིང་ངེ་འཛིན་གྱི་སྟོབས་ཀྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་དགེ་མཐོང་ཏིང་ངེ་འཛིན་གྱི་དབང་ཕྱུག་རྒྱལ་པོ་ལ་ཕྱག་འཚལ་ལོ། །སངས་རྒྱས་ཡོན་ཏན་བླ་མེད་ལ་ཕྱག་འཚལ་ལོ། །སངས་རྒྱས་རྫུ་འཕྲུལ་དབང་ཕྱུག་ལ་ཕྱག་འཚལ་ལོ། །སངས་རྒྱས་མཚན་མའི་གཟུགས་མེད་ལ་ཕྱག་འཚལ་ལོ། །སངས་རྒྱས་གཟུགས
62.234b
ཐོར་ལ་ཕྱག་འཚལ་ལོ། །སངས་རྒྱས་དྲི་མཚན་མེད་ལ་ཕྱག་འཚལ་ལོ། །སངས་རྒྱས་བྲོ་མཚན་མེད་ལ་ཕྱག་འཚལ་ལོ། །སངས་རྒྱས་རེག་མཚན་མེད་ལ་ཕྱག་འཚལ་ལོ། །སངས་རྒྱས་ཏིང་ངེ་འཛིན་གྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་ཤེས་རབ་ཏིང་ངེ་འཛིན་གྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་གཟུགས་ཀྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་ཀུན་དུ་སྡུད་ལ་ཕྱག་འཚལ་ལོ། །སངས་རྒྱས་དྲིན་དཔལ་ཀུན་དུ་འོད་ལ་ཕྱག་འཚལ་ལོ། །སངས་རྒྱས་གཙུག་ཏོར་ཅན་ལ་ཕྱག་འཚལ་ལོ། །སངས་རྒྱས་ཐམས་ཅད་སྐྱོབ་ལ་ཕྱག་འཚལ་ལོ། །སངས་རྒྱས་ལོག་པར་དད་སེལ་ལ་ཕྱག་འཚལ་ལོ། །སངས་རྒྱས་གསེར་ཐུབ་ལ་ཕྱག་འཚལ་ལོ། །སངས་རྒྱས་འོད་སྲུངས་ལ་ཕྱག་འཚལ་ལོ། །སངས་རྒྱས་ཡིད་སྒྲ་སྙན་སྲེད་ལ་ཕྱག་འཚལ་ལོ། །སངས་རྒྱས་རབ་ཏུ་དགའ་བ་ལ་ཕྱག་འཚལ་ལོ། །སངས་རྒྱས་མི་འཁྲུགས་པ་ལ་ཕྱག་འཚལ་ལོ། །སངས་རྒྱས་རི་རབ་མཚན་མ་ལ་ཕྱག་འཚལ་ལོ། །སངས་རྒྱས་སེང་གེ་དབྱངས་ལ་ཕྱག་འཚལ་ལོ། །སངས་རྒྱས་སེང་གེའི་མཚན་མ་ལ་ཕྱག་འཚལ་ལོ། །སངས་རྒྱས་སྤྲིན་དབང་ཕྱུག་ལ་ཕྱག་འཚལ་ལོ། །སངས་རྒྱས་རྟག་ཏུ་ཞི་ལ་ཕྱག་འཚལ་ལོ། །སངས་རྒྱས་དབང་པོའི་མཚན་མ་ལ་ཕྱག་འཚལ་ལོ། །སངས་རྒྱས་སྣང་བ་མཐའ་ཡས་ལ་ཕྱག་འཚལ་ལོ། །སངས་རྒྱས་ཚངས་པའི་མཚན་མ་ལ་ཕྱག་འཚལ་ལོ། །སངས་རྒྱས་འཇིག་རྟེན་གྱི་སྡུག་བསྔལ་ཐམས་ཅད་ལས་འདས་པ་ལ་ཕྱག་འཚལ་ལོ། །སངས་རྒྱས་ཏ་མ་ར་བར་ཙན་དན་གྱི་སྤོས་ལ་ཕྱག་འཚལ་ལོ། །སངས་རྒྱས་རི་རབ་ཀྱི་གཟུགས་ལ་ཕྱག་འཚལ་ལོ། །སངས་རྒྱས་སྤྲིན་དབང་ཕྱུག་རྒྱལ་པོ་ལ་ཕྱག་འཚལ་ལོ། །སངས་རྒྱས་འཇིག་རྟེན་གྱི་འཇིགས་པ་ཐམས་ཅད་བཅོམ་པ་ལ་ཕྱག་འཚལ་ལོ། །སངས་རྒྱས་སྤྲུལ་པའི་སྐུ་ཤཱཀྱ་ཐུབ་པ་ལ་ཕྱག་འཚལ་ལོ། །ད་ལྟར་བཞུགས་པའི་སངས་རྒྱས་གཅིག་།སངས་རྒྱས་བཅུ། སངས་རྒྱས་བརྒྱ། སངས་རྒྱས་སྟོང ། སངས་རྒྱས་ཁྲི་ལ་གུས་པར་ཕྱག་འཚལ་ན་བསྐལ་པ་གྲངས་མེད་པ
62.235a
ནས་འཁོར་བའི་སྡིག་ལྕི་བ་ཐམས་ཅད་འབྱང་བར་འགྱུར་རོ། །སངས་རྒྱས་འབུམ་ཕྲག་གཅིག་།འབུམ་ཕྲག་བཅུ། འབུམ་ཕྲག་བརྒྱ། འབུམ་ཕྲག་སྟོང ། འབུམ་ཕྲག་ཁྲི། བྱེ་བ་ཁྲག་ཁྲིག་གང་གཱའི་ཀླུང་གི་བྱེ་མ་སྙེད་གྲངས་མེད་དཔག་ཏུ་མེད་པའི་སངས་རྒྱས་ལ་ཕྱག་འཚལ་ལོ། །གང་ལ་ལས་ད་ལྟར་བཞུགས་པའི་སངས་རྒྱས་གྲངས་མེད་དཔག་ཏུ་མེད་པའི་མཚན་ཐོས་ན་དེ་ནི་བསྐལ་པ་ཁྲི་ཕྲག་དྲུག་བཅུའི་བར་དུ་སེམས་ཅན་དམྱལ་བར་མི་ལྟུང་སྟེ། དེ་བས་གུས་པར་ཕྱག་འཚལ་ལོ། །ད་ལྟར་ཕྱོགས་བཅུར་བཞུགས་པ་ཡི། །སངས་རྒྱས་རྣམས་ལ་ཕྱག་འཚལ་ན། །ལས་ངན་ཀུན་ལས་རྣམ་པར་གྲོལ། །མཚམས་མེད་ལྔ་པོའི་སྡིག་ཀྱང་འབྱང ། །རྣམ་དག་ས་ལ་རྟག་ཏུ་གནས། །ཤཱཀྱའི་ཆོས་ལ་འང་བདེ་གནས་ཤིང ། །དེ་རྣམས་ངན་སོང་གསུམ་དང་བྲལ། །སངས་རྒྱས་བྱམས་པ་འང་མཐོང་བ་དང ། །སངས་རྒྱས་སྟོང་ཡང་མཐོང་བར་འགྱུར། །དེ་བས་ད་ལྟར་ཕྱག་ཀྱང་འཚལ། །ཕྱོགས་བཅུའི་སངས་རྒྱས་ཡང་མཐོང་སྟེ། །རྣམ་དག་ཞིང་དུ་རྟག་པར་སྐྱེ། །དམ་པའི་ཆོས་ཀྱང་ཐོས་གྱུར་ཅིང ། །སངས་རྒྱས་རྟག་པ་འང་མངོན་པར་རྟོགས། །ད་ལྟར་བཞུགས་པའི་སངས་རྒྱས་རྣམས་ཀྱི་མཚན་བཤད་པའི་ཚེ་ཆུ་བོ་གང་གཱ་གཉིས་ཀྱི་བྱེ་མ་སྙེད་ཀྱི་བྱང་ཆུབ་སེམས་དཔའ་གཟུངས་ཀྱི་སྒོར་ཆུད་པར་གྱུར། ལྷ་དང་མི་འབུམ་ཕྲག་བཞི་བཅུ་རྩ་གཉིས་ནི་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །བསྐལ་པ་བཟང་པོའི་སངས་རྒྱས་མ་བྱོན་པ་དཔག་ཏུ་མེད་པ་ལ་ཕྱག་འཚལ་ལོ། །སངས་རྒྱས་བྱམས་པ་ལ་ཕྱག་འཚལ་ལོ། །སངས་རྒྱས་རྣམ་དག་སྐུ་ལ་ཕྱག་འཚལ་ལོ། །སངས་རྒྱས་མེ་ཏོག་འོད་ལ་ཕྱག་འཚལ་ལོ། །སངས་རྒྱས་མེ་ཏོག་རྫོགས་ལ་ཕྱག་འཚལ་ལོ། །སངས་རྒྱས་འོད་སྣང་ལ་ཕྱག་འཚལ་ལོ། །སངས་རྒྱས་མིང་དང་མཚན་མ་ལ་ཕྱག་འཚལ་ལོ། །སངས་རྒྱས་འཛམ་བུ་ན་དའི་གསེར་འོད་ལ་ཕྱག་འཚལ་ལོ། །སངས་རྒྱས་ཆོས་སྣང་ལ་ཕྱག་འཚལ་ལོ། །སངས་རྒྱས་རིན་ཆེན་སྣང་ལ་ཕྱག་འཚལ་ལོ། །སངས་རྒྱས་ཁྱབ་སྣང་ལ
62.235b
ཕྱག་འཚལ་ལོ། །སངས་རྒྱས་ཀུན་དུ་མཚན་མ་ལ་ཕྱག་འཚལ་ལོ། །སངས་རྒྱས་ཀུན་དུ་འོད་ལ་ཕྱག་འཚལ་ལོ། །སངས་རྒྱས་ཤེས་རབ་རི་དང་རྒྱ་མཚོ་ལ་ཕྱག་འཚལ་ལོ། །སངས་རྒྱས་རྫུ་འཕྲུལ་གྱི་དབང་ཕྱུག་གི་རྒྱལ་པོ་ལ་ཕྱག་འཚལ་ལོ། །སངས་རྒྱས་རིན་པོ་ཆེ་རྣམ་པར་བཀོད་པ་ལ་ཕྱག་འཚལ་ལོ། །སངས་རྒྱས་སྐྱེས་བུ་དམ་པ་ལ་ཕྱག་འཚལ་ལོ། །སངས་རྒྱས་དབང་ཕྱུག་ཐོབ་པའི་རྒྱལ་པོ་འབུམ་ཕྲག་བརྒྱ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་མཚན་ཉིད་ལ་ཕྱག་འཚལ་ལོ། །སངས་རྒྱས་མཐོང་དགའ་ལ་ཕྱག་འཚལ་ལོ། །སངས་རྒྱས་འོད་ཀྱི་མཚན་མས་རྣམ་པར་བརྒྱན་པའི་རྒྱལ་པོ་ཉི་ཁྲི་ལ་ཕྱག་འཚལ་ལོ། །སངས་རྒྱས་མཚན་མཐུན་པ་ཀུན་དུ་དཔལ་སུམ་ཁྲི་ལ་ཕྱག་འཚལ་ལོ། །སངས་རྒྱས་འབྲུག་སྒྲའི་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་མི་འགྱུར་བཞི་ཁྲི་བརྒྱད་སྟོང་ལ་ཕྱག་འཚལ་ལོ། །སངས་རྒྱས་ཟླ་བ་རིན་པོ་ཆེའི་རྒྱལ་པོ་ལ་ཕྱག་འཚལ་ལོ། །སངས་རྒྱས་དྲི་མ་དང་བྲལ་བའི་འོད་ལ་ཕྱག་འཚལ་ལོ། །སངས་རྒྱས་གཟུགས་དམ་པ་ལ་ཕྱག་འཚལ་ལོ། །སངས་རྒྱས་གཟུགས་དམ་པའི་འོད་ཟེར་ལ་ཕྱག་འཚལ་ལོ། །སངས་རྒྱས་བགེགས་ཀྱི་ཚོགས་ཐམས་ཅད་བཅོམ་པ་ལ་ཕྱག་འཚལ་ལོ། །སངས་རྒྱས་དྲིའི་ཚོགས་ལ་ཕྱག་འཚལ་ལོ། །སངས་རྒྱས་སྒྲའི་ཚོགས་ལ་ཕྱག་འཚལ་ལོ། །སངས་རྒྱས་འོད་ཟེར་རྣམ་པར་བཀོད་པ་སྟོང་ཕྲག་བརྒྱད་ཅུ་ལ་ཕྱག་འཚལ་ལོ། །སངས་རྒྱས་འོད་ཟེར་རྣམ་པར་བཀོད་པ་འབུམ་ཕྲག་བརྒྱད་ཅུ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་མེ་ཏོག་རྣམ་པར་བརྒྱན་པ་ལ་ཕྱག་འཚལ་ལོ། །སངས་རྒྱས་ཡོན་ཏན་མཆོག་གི་རྒྱལ་པོ་ལ་ཕྱག་འཚལ་ལོ། །སངས་རྒྱས་གསེར་བཙོ་མའི་འོད་སྣང་ལ་ཕྱག་འཚལ་ལོ། །སངས་རྒྱས་ལུང་བསྟན་པ་པད་མའི་འོད་ལྔ་བརྒྱ་ལ་ཕྱག་འཚལ་ལོ། །སངས་རྒྱས་མི་འཇིགས་སྲེད་མེད་ཀྱི་བུ་ལ་ཕྱག་འཚལ་ལོ། །སངས་རྒྱས་མེ་ཏོག་བཟང་པོས་རྣམ་པར་བརྒྱན་པ་ལ་ཕྱག་འཚལ་ལོ། །
62.236a
ལོ། །སངས་རྒྱས་རྡོ་རྗེ་ཏིང་ངེ་འཛིན་གྱི་དབང་ཕྱུག་ལ་ཕྱག་འཚལ་ལོ། །མ་བྱོན་པའི་སངས་རྒྱས་གཅིག་།སངས་རྒྱས་བཅུ། སངས་རྒྱས་བརྒྱ། སངས་རྒྱས་སྟོང ། སངས་རྒྱས་ཁྲི་ལ་ཕྱག་འཚལ་ན། བསྐལ་པ་གྲངས་མེད་དཔག་ཏུ་མེད་པའི་འཁོར་བ་ནས་སྡིག་ལྕི་བ་རྣམས་འབྱང་བར་འགྱུར་རོ། །སངས་རྒྱས་འབུམ་ཕྲག་གཅིག་།འབུམ་ཕྲག་བཅུ། འབུམ་ཕྲག་བརྒྱ། འབུམ་ཕྲག་སྟོང ། འབུམ་ཕྲག་ཁྲི་བྱེ་བ་ཁྲག་ཁྲིག་གང་གཱའི་བྱེ་མ་སྙེད་དཔག་ཏུ་མེད། གྲངས་མེད་པའི་སངས་རྒྱས་ཀྱི་མཚན་གང་ཟག་གང་ལ་ལས་ཐོས་པར་གྱུར་ན་བསྐལ་པ་ཁྲི་ཕྲག་བཞི་བཅུའི་བར་དུ་སེམས་ཅན་དམྱལ་བར་མི་ལྟུང་སྟེ། དེ་བས་ད་ལྟར་ཕྱག་འཚལ་ལོ། །གང་ཞིག་སངས་རྒྱས་མ་བྱོན་རྣམས། །དེ་ལ་གུས་པར་ཕྱག་འཚལ་ན། །ལོག་སྤྱོད་རྣམས་ནི་མ་གཏོགས་ཏེ། །སྒྲིབ་པ་གསུམ་དང་མཚམས་མེད་ལྔ། །སྡིག་པ་དེ་རྣམས་འབྱང་བར་འགྱུར། །སངས་རྒྱས་ཆོས་ལ་བདེ་གནས་ཤིང ། །དཔག་མེད་སངས་རྒྱས་མཐོང་བར་འགྱུར། །དམ་པའི་ཆོས་ཀྱང་རྟག་ཏུ་ཐོས། །དེ་བས་ད་ལྟར་གུས་ཕྱག་འཚལ། །གང་ཞིག་ཕྱོགས་བཅུ་དུས་གསུམ་གྱིས། །སངས་རྒྱས་རྣམས་ལ་ཕྱག་འཚལ་ན། །ཁ་ན་མ་ཐོ་འདས་པ་དང ། །མ་འོངས་པ་དང་ད་ལྟར་གྱི། །ལས་ངན་བཅུ་པོ་བྱས་པ་ཡང ། །ད་ལྟར་མངོན་དུ་བྱང་བར་འགྱུར། །ཕྱི་མའི་དུས་ལ་སངས་རྒྱས་ཀྱི། །ངོ་བོ་ཉིད་ཀྱང་མཐོང་བར་འགྱུར། །དེ་བས་དེ་ལ་མོས་པར་བྱོས། །ཁ་ཏོན་འདྲི་ཀློག་ཕྱག་འཚལ་ན། །ཚེ་རབས་གར་བྱུང་གར་སྐྱེས་ཀྱང ། །ལྟ་བ་ལོག་པར་མི་སྐྱེའོ། །རྣམ་པར་གྲོལ་པ་རྒྱུན་དུ་ཐོབ། །མཐའ་འཁོབ་ས་རུ་ཡོང་མི་སྐྱེ། །ངན་པའི་ཡུལ་དུ་འང་མི་སྐྱེ་ཞིང ། །རྒྱལ་པོ་མ་རུངས་མཐོང་མི་འགྱུར། །བསྐལ་པ་འབུམ་ཕྲག་བཞི་ཁྲིའི་བར། །སེམས་ཅན་དམྱལ་བར་མི་སྐྱེའོ། །དེ་བས་གུས་པར་ཕྱག་འཚལ་ན། །མི་དགེ་བཅུའི་ལས་འབྱང་ཞིང ། །གཟུངས་ཆེན་རབ་ཏུ་ཐོབ་པར་འགྱུར། །བཅོམ་ལྡན་འདས་ཀྱིས་སངས་རྒྱས་མ་བྱོན་པ་རྣམས་ཀྱི་མཚན་བསྒྲགས་པའི་ཚེ་བྱང་ཆུབ་སེམས་དཔའ་ལྔ་ཁྲིས་ཕྱིར་མི་ལྡོག་པའི་སར་གནས་སོ། །དགེ་སློང་མ་བདུན་བརྒྱས
62.236b
ནི་དགྲ་བཅོམ་བར་གྲུབ་བོ། །ལྷ་དང་མི་འབུམ་ཕྲག་དྲུག་ཅུ་རྩ་གཉིས་ནི་ཆོས་ཀྱི་མིག་རྣམ་པར་དག་པ་ཐོབ་བོ། །གཟུངས་ཆེན་པོ་དང ། མདོ་སྡེ་བཅུ་གཉིས་ལ་ཕྱག་འཚལ་ལོ། །མདོ་ཡི་སྡེ་ལ་ཕྱག་འཚལ་ལོ། །ལུང་དུ་བསྟན་པའི་སྡེ་ལ་ཕྱག་འཚལ་ལོ། །ཚིགས་སུ་བཅད་པའི་སྡེ་ལ་ཕྱག་འཚལ་ལོ། །དབྱངས་ཀྱིས་བསྙད་པའི་སྡེ་ལ་ཕྱག་འཚལ་ལོ། །ཆེད་དུ་བརྗོད་པའི་སྡེ་ལ་ཕྱག་འཚལ་ལོ། །གླིང་གཞིའི་སྡེ་ལ་ཕྱག་འཚལ་ལོ། །རྟོགས་པ་བརྗོད་པའི་སྡེ་ལ་ཕྱག་འཚལ་ལོ། །འདས་པ་བརྗོད་པའི་སྡེ་ལ་ཕྱག་འཚལ་ལོ། །སྐྱེས་པ་རབས་ཀྱི་སྡེ་ལ་ཕྱག་འཚལ་ལོ། །ཤིན་དུ་རྒྱས་པའི་སྡེ་ལ་ཕྱག་འཚལ་ལོ། །རྨད་དུ་བྱུང་བའི་སྡེ་ལ་ཕྱག་འཚལ་ལོ། །གཏན་ལ་ཕབ་པར་བསྟན་པའི་སྡེ་ལ་ཕྱག་འཚལ་ལོ། །ཐེག་པ་ཆེན་པོའི་སྡེ་སྣོད་ཐམས་ཅད་ལ་ཕྱག་འཚལ་ལོ། །གང་གིས་མདོ་སྡེ་བཅུ་གཉིས་དང ། ཕ་རོལ་དུ་ཕྱིན་པ་རྣམས་ཀྱི་མཚན་ཐོས་ན་བསྟོད་པ་བྱས་སམ། ཕྱག་འཚལ་ལམ། བརྗོད་དམ། མོས་པ་བསྐྱེད་དམ། བླངས་སམ། འཆང་བར་བྱེད་ན་གང་ཟག་དེ་བསྐལ་པ་ཁྲི་ཕྲག་ཉི་ཤུའི་བར་དུ་སེམས་ཅན་དམྱལ་བར་མི་ལྟུང་སྟེ། ཚེ་སྔ་ཕྱི་དྲན་པའི་ཡེ་ཤེས་དང་ལྡན་པར་འགྱུར་རོ། །དེའི་ཕྱིར་གུས་པས་ཕྱག་འཚོལ་ཅིག་།བཅོམ་ལྡན་འདས་ཀྱིས་མདོ་སྡེ་བཅུ་གཉིས་ཀྱི་མཚན་བཤད་པའི་ཚེ་བྱང་ཆུབ་སེམས་དཔའ་བརྒྱད་ཁྲི་ལྔ་སྟོང་རྡོ་རྗེའི་ཏིང་ངེ་འཛིན་ཐོབ་བོ། །ཉན་ཐོས་འབུམ་ཕྲག་བཅུ་ཐེག་པ་ཆེན་པོའི་སེམས་བསྐྱེད་དོ། །དགེ་སློང་དང ། དགེ་སློང་མ་སྟོང་ཕྲག་བཅུས་དགྲ་བཅོམ་པའི་འབྲས་བུ་ཐོབ་བོ། །ལྷ་དང་མི་དཔག་ཏུ་མེད་པ་ཞིག་ནི་ཆོས་ཀྱི་མིག་རྣམ་པར་དག་པ་ཐོབ་བོ། །ཕྱོགས་བཅུའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་མཐུ་ཆེན་ཐོབ་ལ་ཕྱག་འཚལ་ལོ། །བྱང་ཆུབ་སེམས་དཔའ་བརྩོན་འགྲུས་རྟག་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱུན་མི་གཏོང་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ལག་ལ་ཕྱག་འཚལ་ལོ། །
62.237a
བྱང་ཆུབ་སེམས་དཔའ་སྨིན་གྱི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔའ་བར་རྒྱན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ཟླ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་གང་ལ་ཕྱག་འཚལ་ལོ། །བྱང་ཆུབ་སེམས་དཔའ་སྟོབས་པོ་ཆེ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྟོབས་དཔག་ཏུ་མེད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁམས་གསུམ་འཕགས་ལ་ཕྱག་འཚལ་ལོ། །བྱང་ཆུབ་སེམས་དཔའ་བཟང་སྐྱོང་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་འདྲེན་མཁན་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔལ་གྱི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འཆད་མོས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀླུའི་སྡོང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཙན་དན་རིན་པོ་ཆེའི་མེ་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱོད་པ་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱོད་པ་མཐའ་ཡས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱོད་པ་རྣམ་པར་བཀོད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱོད་པ་རྣམ་དག་ལ་ཕྱག་འཚལ་ལོ། །བྱང་ཆུབ་སེམས་དཔའ་གཟུངས་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་རྡོ་རྗེ་སྲེད་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟག་པར་གུས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྔོན་གྱིས་རྒྱལ་པོའི་མེ་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་མཐོང་ན་དགའ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་དབྱངས་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་བརྩོན་འགྲུས་ཡོན་ཏན་གྱི་སྟོབས་ལ་ཕྱག་འཚལ་ལོ། །བྱང་ཆུབ་སེམས་དཔའ་བློ་གྲོས་མི་ཟད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྙིང་པོ་རྣམ་དག་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱན་རྣམ་དག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་དུ་བཟང་པོ་ལ་ཕྱག་འཚལ་ལོ། །བྱང་ཆུབ
62.237b
སེམས་དཔའ་འཇམ་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་བསམ་ལེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྟོང་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྫུ་འཕྲུལ་མེ་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་གསལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་འོད་གསལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡེ་ཤེས་རྒྱལ་མཚན་ལ་ཕྱག་འཚལ་ལོ། །བྱང་ཆུབ་སེམས་དཔའ་དབང་པོ་ཞི་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་སྨོན་ལམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤོས་ཀྱི་གཟུགས་བརྙན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་གསལ་ལ་ཕྱག་འཚལ་ལོ། །བྱང་ཆུབ་སེམས་དཔའ་དབུང་གནས་ལ་ཕྱག་འཚལ་ལོ། །བྱང་ཆུབ་སེམས་དཔའ་འགོག་སྤྱོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྣམ་གྲོལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཉམ་པར་རྟོག་ལ་ཕྱག་འཚལ་ལོ། །བྱང་ཆུབ་སེམས་དཔའ་མཉམ་མི་རྟོག་ལ་ཕྱག་འཚལ་ལོ། །བྱང་ཆུབ་སེམས་དཔའ་མཉམ་མི་མཉམ་རྟོག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཏིང་ངེ་འཛིན་གྱི་དབང་ཕྱུག་གིས་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་དབང་ཕྱུག་གི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་མཚན་ཉིད་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་ཀྱི་མཚན་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་ཀྱིས་བརྒྱན་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱན་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་དཀོན་མཆོག་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་བློ་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ལག་ལ་ཕྱག་འཚལ་ལོ། །བྱང་ཆུབ་སེམས་དཔའ་ལག་ན་རིན་པོ་ཆེའི་ཕྱག་རྒྱ་ལ་ཕྱག་འཚལ་ལོ། །བྱང་ཆུབ
62.238a
སེམས་དཔའ་ལག་རྒྱུན་དུ་བཏེག་ལ་ཕྱག་འཚལ་ལོ། །བྱང་ཆུབ་སེམས་དཔའ་ལག་རྒྱུན་དུ་ཕབ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟག་ཏུ་བརྩེ་བ་ཅན་ལ་ཕྱག་འཚལ་ལོ། །བྱང་ཆུབ་སེམས་དཔའ་དགའ་བའི་དབང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་དགའ་བའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བློའི་དབྱངས་ལ་ཕྱག་འཚལ་ལོ། །བྱང་ཆུབ་སེམས་དཔའ་ནམ་མཁའི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་སྒྲོན་མ་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་དཔའ་བོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་བལྟ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་བདེན་པའི་དྲ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་དྲ་བ་སྣང་ལ་ཕྱག་འཚལ་ལོ། །བྱང་ཆུབ་སེམས་དཔའ་རྐྱེན་མེད་རྟོག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་གཙུག་ཕུད་ལ་ཕྱག་འཚལ་ལོ། །བྱང་ཆུབ་སེམས་དཔའ་ལྷའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བདུད་རྣམ་པར་འཇོམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་གློག་གི་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་དབང་ཕྱུག་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡོན་ཏན་གྱི་མཚན་ཉིད་དུ་རྣམ་པར་བརྒྱན་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེང་གེ་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབྲུག་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཚན་མ་རི་སྒུལ་བའི་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤོས་ཀྱི་གླང་པོ་ཆེ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤོས་ཀྱི་གླང་པོ་ཆེ་དཀར་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་དམ་པ་སྐྱེས་ལ་ཕྱག་འཚལ་ལོ། །བྱང་ཆུབ་སེམས་དཔའ་མེ་ཏོག་རྒྱན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཚངས་པའི་དྲ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ
62.238b
རིན་པོ་ཆེའི་དབྱུག་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཐུབ་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཞིང་གི་རྒྱན་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་གྱི་གཙུག་པུད་ལ་ཕྱག་འཚལ་ལོ། །བྱང་ཆུབ་སེམས་དཔའ་ནོར་བུའི་གཙུག་ཕུད་ལ་ཕྱག་འཚལ་ལོ། །བྱང་ཆུབ་སེམས་དཔའ་གཞོན་ནུ་བརྒྱན་པའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇིག་རྟེན་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་ཤར་ལ་ཕྱག་འཚལ་ལོ། །བྱང་ཆུབ་སེམས་དཔའ་དཀའ་རྒྱལ་ལ་ཕྱག་འཚལ་ལོ། །བྱང་ཆུབ་སེམས་དཔའ་དགེ་བའི་ཡོན་ཏན་ལ་ཕྱག་འཚལ་ལོ། །བྱང་ཆུབ་སེམས་དཔའ་མེ་ཏོག་གི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་ཙན་དན་གྱི་མེ་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་གསོང་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔལ་གྱི་གཙོ་ལ་ཕྱག་འཚལ་ལོ། །བྱང་ཆུབ་སེམས་དཔའ་མིག་མི་འཛུམས་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔལ་གྱི་གཙུག་ཏོར་ལ་ཕྱག་འཚལ་ལོ། །བྱང་ཆུབ་སེམས་དཔའ་སྔོན་གྱི་དགེ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་དགེ་བའི་རྩ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔུང་མཆོག་ལ་ཕྱག་འཚལ་ལོ། །བྱང་ཆུབ་སེམས་དཔའ་སྐྱེས་བུ་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེང་གེ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེང་གེའི་དབྱངས་ལ་ཕྱག་འཚལ་ལོ། །བྱང་ཆུབ་སེམས་དཔའ་གཙང་ཤེས་ལ་ཕྱག་འཚལ་ལོ། །བྱང་ཆུབ་སེམས་དཔའ་ལེགས་ལྡན་སྲེད་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་དགེ་ཡིད་ལ་ཕྱག་འཚལ་ལོ། །བྱང་ཆུབ་སེམས་དཔའ་མངོན་སུམ་མཐོང་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་དུ་སྲུང་ལ་ཕྱག་འཚལ་ལོ། །བྱང་ཆུབ་སེམས་དཔའ་གློག་གི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་མཐོང་ན་དགའ་བ་ལ་ཕྱག་འཚལ་ལོ། །བྱང་ཆུབ
62.239a
སེམས་དཔའ་སྣང་བའི་མཚན་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་དམ་པའི་ཡིད་ལ་ཕྱག་འཚལ་ལོ། །བྱང་ཆུབ་སེམས་དཔའ་བློ་གྲོས་མི་ཟད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་ཟབ་མོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཞི་བའི་མཚན་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཐོགས་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་དགེ་བའི་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་བསོད་ནམས་ཀྱི་ཞིང་ལ་ཕྱག་འཚལ་ལོ། །བྱང་ཆུབ་སེམས་དཔའ་པད་མའི་རྒྱན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡོན་ཏན་གྱི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་བའི་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ལག་ན་རིན་པོ་ཆེའི་ཕྱག་རྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་ནོར་བུའི་གཙུག་ཏོར་གྱི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བདེན་མོས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་མཐོང་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་པོ་ཐོབ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་པོ་ཟབ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་པོ་མེ་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་གཟུགས་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་འདྲི་མཁས་ལ་ཕྱག་འཚལ་ལོ། །བྱང་ཆུབ་སེམས་དཔའ་ལན་ལྡོན་མཁས་ལ་ཕྱག་འཚལ་ལོ། །བྱང་ཆུབ་སེམས་དཔའ་མཚན་ཉིད་མངོན་དུ་རྟོགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ངེས་པའི་མཚན་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ངེས་པར་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་དགའ་བ་སྐྱེད་ལ་ཕྱག་འཚལ་ལོ། །བྱང་ཆུབ་སེམས་དཔའ་བདེ་བར་གནས་ལ་ཕྱག་འཚལ་ལོ། །བྱང་ཆུབ་སེམས་དཔའ་བདུད་སྐྲག་ལ་ཕྱག་འཚལ་ལོ། །བྱང་ཆུབ་སེམས་དཔའ་སྐྱབས་མཛད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་གོ་འཕང་འཕགས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྦྱིན་པ་དཔའ་ལ་ཕྱག་འཚལ་ལོ། །བྱང་ཆུབ་སེམས
62.239b
དཔའ་ཡེ་ཤེས་དམིགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་སྨོན་ལམ་ལ་ཕྱག་འཚལ་ལོ། །བྱང་ཆུབ་སེམས་དཔའ་བསྡུ་བ་རྣམ་བཞི་ལ་ཕྱག་འཚལ་ལོ། །བྱང་ཆུབ་སེམས་དཔའ་དབྱངས་སྟོན་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོ་མཆོག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་དགའ་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱང་ཆུབ་ཀྱི་ལམ་ལ་ཕྱག་འཚལ་ལོ། །བྱང་ཆུབ་སེམས་དཔའ་མདོ་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱམས་པའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་དབང་ཕྱུག་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཚངས་པའི་དབྱངས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁ་དོག་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཙན་དན་ཚལ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེང་གེའི་དབྱངས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྒྲ་མཆོག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁ་དོག་དམ་པའི་གཟུགས་ལ་ཕྱག་འཚལ་ལོ། །བྱང་ཆུབ་སེམས་དཔའ་རྣམ་པ་སྣ་ཚོགས་བརྒྱན་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤཱཀྱའི་རྒྱལ་མཚན་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱི་བོ་སྐྱེས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་བའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་ཆེན་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇིགས་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གསང་བ་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་མེ་ཏོག་འཚེར་ལ་ཕྱག་འཚལ་ལོ། །བྱང་ཆུབ་སེམས་དཔའ་གཙོ་མཆོག་ལ་ཕྱག་འཚལ་ལོ། །བྱང་ཆུབ་སེམས་དཔའ་ལུས་ཀུན་དུ་མངོན་པར་སྟོན་ལ་ཕྱག་འཚལ་ལོ། །བྱང་ཆུབ་སེམས་དཔའ་མངོན་པར་ཤེས་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོ་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཐའ་ཡས་ལ་ཕྱག་འཚལ་ལོ། །བྱང་ཆུབ་སེམས་དཔའ
62.240a
སྨན་གྱི་རྒྱལ་པོའི་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་སྲུངས་ལ་ཕྱག་འཚལ་ལོ། །བྱང་ཆུབ་སེམས་དཔའ་དྲི་མེད་མཛོད་ཀྱི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཐམས་ཅད་སྐྱོབ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཐོ་བཙུན་དཔལ་གྱི་རྗེ་ལ་ཕྱག་འཚལ་ལོ། །བྱང་ཆུབ་སེམས་དཔའ་བཻ་དཱུརྱའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇིགས་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེང་གེའི་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཚན་ཉིད་དད་ལ་ཕྱག་འཚལ་ལོ། །བྱང་ཆུབ་སེམས་དཔའ་ས་ཆེན་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་རྒྱན་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་ཟེར་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤོབས་པ་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱམས་པའི་སྟོབས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྙིང་རྗེ་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟེན་པའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟེན་པའི་སྟོབས་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟེན་པའི་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་དུ་ཕན་གདགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་དུ་བཟུང་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་མི་འགྱུར་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་དུ་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡང་དག་པའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ལོག་པར་དད་སེལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ལྷའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་ཆུབ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྟོན་པའི་མཁན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བཟོད་པ་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་མེ་ཏོག་རྒྱལ་པོ་ལ
62.240b
ཕྱག་འཚལ་ལོ། །བྱང་ཆུབ་སེམས་དཔའ་མེ་ཏོག་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་རྒྱ་མཚོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བློ་བརྟན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤཱཀྱའི་རིགས་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་གྱི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་གྱི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟག་ཏུ་སྙིང་རྗེ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ནོར་གྱི་དབྱིག་ལ་ཕྱག་འཚལ་ལོ། །བྱང་ཆུབ་སེམས་དཔའ་རིའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་རི་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་བ་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་རི་ངར་ཅན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིའི་རྩེ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིའི་རྒྱལ་མཚན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བདུད་འདུལ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབྲུག་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆར་པའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབྲུག་གི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འཁོར་ལོ་རིན་པོ་ཆེ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་འཚེར་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་གཙོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་མཛོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་སྣང་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་མི་འགྱུར་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་ཕྱག་རྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་དཀྱིལ་འཁོར་ལ་ཕྱག་འཚལ་ལོ། །བྱང་ཆུབ
62.241a
སེམས་དཔའ་རིན་པོ་ཆེའི་རྒྱན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ཆུ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་འབར་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་སྟོན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་བྱེད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་མོས་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་པོ་རྣམ་དག་ལ་ཕྱག་འཚལ་ལོ། །བྱང་ཆུབ་སེམས་དཔའ་གཙུག་ཏོར་གྱི་མཚན་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་ཐོར་ཚུགས་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་སྟོང་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡང་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་བློ་རིག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་བ་རྟོགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་འཁོར་ལོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྣམ་དག་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་སྦྱིན་བརྟག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་དུ་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་ཁྱབ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་མཚན་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཉེན་པའི་དབྱངས་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔལ་འབར་ལ་ཕྱག་འཚལ་ལོ། །བྱང་ཆུབ་སེམས་དཔའ་མཚན་མའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོའི་ཟླ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོའི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་བ་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་གཙང་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་འཕགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་བའི་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཉི་མའི་འོད་ལ་ཕྱག་འཚལ་ལོ། །
62.241b
བྱང་ཆུབ་སེམས་དཔའ་རྡོ་རྗེ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབར་བའི་རྒྱལ་མཚན་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔལ་བཙུན་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོ་གསལ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོ་ཆེ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡུལ་རྣམ་པར་བརྟག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་གསལ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་ཐར་ལ་ཕྱག་འཚལ་ལོ། །བྱང་ཆུབ་སེམས་དཔའ་གསང་བ་སྟོན་ལ་ཕྱག་འཚལ་ལོ། །བྱང་ཆུབ་སེམས་དཔའ་རབ་ཏུ་སྦྱིན་ལ་ཕྱག་འཚལ་ལོ། །བྱང་ཆུབ་སེམས་དཔའ་གཟུགས་སྟོབས་ལ་ཕྱག་འཚལ་ལོ། །བྱང་ཆུབ་སེམས་དཔའ་རབ་ཏུ་འདུལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ལུས་སྦེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གཅིག་དང ། བཅུ་དང ། བརྒྱ་དང ། སྟོང་དང ། ཁྲི་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་བརྒྱ། ཁྲི་ཕྲག་ཉིས་བརྒྱ། ཁྲི་ཕྲག་སུམ་བརྒྱ། ཁྲི་ཕྲག་བཞི་བརྒྱ། ཁྲི་ཕྲག་ལྔ་བརྒྱ། ཁྲི་ཕྲག་དྲུག་བརྒྱ། ཁྲི་ཕྲག་བདུན་བརྒྱ། ཁྲི་ཕྲག་བརྒྱད་བརྒྱ། ཁྲི་ཕྲག་དགུ་བརྒྱ། ཁྲི་ཕྲག་སྟོང་རྣམས་ལ་ཕྱག་འཚལ་ན་བསྐལ་པ་དཔག་ཏུ་མེད་པ་ཚུན་ཆད་ཀྱི་འཁོར་བའི་སྡིག་ལྕི་བ་འབྱང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་འབུམ་ཕྲག་གཅིག་།འབུམ་ཕྲག་བཅུ། འབུམ་ཕྲག་བརྒྱ། འབུམ་ཕྲག་སྟོང ། འབུམ་ཕྲག་ཁྲི། འབུམ་ཕྲག་ཁྲི་ཕྲག་ཁྲི་ལ་ཕྱག་འཚལ་ན། བསྐལ་པ་དཔག་ཏུ་མེད་པ་ཚུན་ཆད་ཀྱི་འཁོར་བའི་སྡིག་པ་མི་ཟད་པ་ཐམས་ཅད་འབྱང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱ་གཅིགི་བྱེ་མ་སྙེད་ལ་ཕྱག་འཚལ་ལོ། །གང་གཱ་གཉིས་ཀྱི་བྱེ་མ་སྙེད་ལ་ཕྱག་འཚལ་ལོ། །གང་གཱ་གསུམ་གྱི་བྱེ་མ་སྙེད་ལ་ཕྱག་འཚལ་ལོ། །གང་གཱ་བཞིའི་བྱེ་མ་སྙེད་ལ་ཕྱག་འཚལ་ལོ། །གང་གཱ་ལྔའི་བྱེ་མ་སྙེད་ལ་ཕྱག་འཚལ་ལོ། །གང་གཱ་དྲུག་གི་བྱེ་མ་སྙེད་ལ་ཕྱག་འཚལ་ལོ། །གང་གཱ་བདུན་གྱི་བྱེ་མ་སྙེད་ལ་ཕྱག་འཚལ་ལོ། །གང་གཱ་བརྒྱད་ཀྱི་བྱེ་མ་སྙེད་ལ་ཕྱག་འཚལ་ལོ། །གང་གཱ་དགུའི་བྱེ་མ་སྙེད་ལ་ཕྱག་འཚལ་ལོ། །གང
62.242a
གང་གཱ་བཅུའི་བྱེ་མ་སྙེད་ལ་ཕྱག་འཚལ་ལོ། །གང་གཱ་བརྒྱའི་བྱེ་མ་སྙེད་ལ་ཕྱག་འཚལ་ལོ། །གང་གཱ་སྟོང་གི་བྱེ་མ་སྙེད་ལ་ཕྱག་འཚལ་ལོ། །གང་གཱ་ཁྲིའི་བྱེ་མ་སྙེད་ལ་ཕྱག་འཚལ་ལོ། །གང་གཱ་བྱེ་བ་ཁྲག་ཁྲིག་ཕྲག་བརྒྱ་སྟོང་དུ་མའི་བྱེ་མ་སྙེད་ལ་ཕྱག་འཚལ་ལོ། །དེ་རྣམས་ལ་ཕྱག་འཚལ་ན་བསྐལ་པ་གྲངས་མེད་དཔག་ཏུ་མེད་པ་ཚུན་ཆད་ཀྱི་འཁོར་བའི་སྡིག་ལྕི་བ་ཐམས་ཅད་ཡོངས་སུ་འབྱང་བར་འགྱུར་རོ། །གང་ལ་ལ་ཞིག་གིས་བྱང་ཆུབ་སེམས་དཔའ་སེམས་དཔའ་ཆེན་པོའི་མཚན་འདི་དག་ཐོས་ན་བསྐལ་པ་སྟོང་ཕྲག་བཞི་བཅུའི་བར་དུ་སེམས་ཅན་དམྱལ་བའི་སྡུག་བསྔལ་དུ་མི་ལྟུང་ཞིང་སྲིད་པ་གསུམ་གྱི་ཁམས་སུ་མི་གཏོགས་ཏེ། རྟག་ཏུ་རྣམ་པར་གྲོལ་བའི་ཁམས་སུ་གཏོགས་པར་འགྱུར་རོ། །མཐའ་འཁོབ་ཏུ་མི་སྐྱེ། ཡུལ་ངན་པར་མི་སྐྱེ། ལུས་ངན་པ་མི་ལེན། ལོག་པར་མི་ལྟ། རིགས་ངན་དུ་མི་སྐྱེ། མུ་སྟེགས་ཅན་དུ་མི་སྐྱེ། དབང་པོ་ཡན་ལག་ཚང་བར་འགྱུར། དམ་པའི་ཆོས་རྟག་ཏུ་ཐོས་པར་འགྱུར། སྡོམ་པའི་ཚུལ་ཁྲིམས་མ་མནོས་ཀྱང་ཁྲིམས་དང་རྟག་ཏུ་ལྡན་པར་འགྱུར། ཐེག་པ་ཆེན་པོ་སྤྱོད་ལམ་མཛེས་པ་དང ། སངས་རྒྱས་ཀྱི་བདག་ཉིད་ཀྱང་མཐོང་བར་འགྱུར། དེ་བས་གུས་པར་ཕྱག་འཚལ་ཏེ། སངས་རྒྱས་ཀྱི་ཆོས་ལ་བདེ་པར་གནས་ཤིང་ཕྱི་མའི་ཚེ་སངས་རྒྱས་གྲུབ་པ་ཐོབ་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་མཚན་བཤད་པའི་ཚེ་རིགས་ཀྱི་བུ་འམ་རིགས་ཀྱི་བུ་མོ་དད་པ་ཅན་འབུམ་ཕྲག་བརྒྱད་ཅུ་རྩ་བརྒྱད་ཀྱིས་ནི་ཕྱིར་མི་འོང་བའི་འབྲས་བུ་ཐོབ་བོ། །ལྷ་འབུམ་ཕྲག་དགུ་བཅུ་རྩ་བཞིས་ནི་ལན་ཅིག་ཕྱིར་འོང་བའི་འབྲས་བུ་ཐོབ་བོ། །དགེ་སློང་སེམས་སྟོར་བ་འབུམ་ཕྲག་བདུན་ཅུ་རྩ་བརྒྱད་ནི་སེམས་ཀྱི་བདག་ཉིད་སླར་རྙེད་དེ་དགྲ་བཅོམ་པའི་འབྲས་བུ་ཐོབ་པོ། །བྱང་ཆུབ་སེམས་དཔའ་འབུམ་ཕྲག་བཅུས་ནི་གཟུངས་ཆེན་པོ་ཐོབ་སྟེ། མ་འོངས་པའི་དུས་ན་མངོན་པར་འཚང་རྒྱའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཚན་ཉིད་དད་ལ་བཀའ་སྩལ་པ། རིགས་ཀྱི་བུ་འདས་པའི་སངས་རྒྱས་བཅོམ་ལྡན
62.242b
འདས་རིན་ཆེན་གཙུག་ཕུད་ཅེས་བྱ་བ་དེའི་མཚན་སེམས་ཅན་སྡུག་བསྔལ་གྱིས་གཟིར་བ་ཅན་རྣམས་ཀྱིས་ལན་ཅིག་ཐོས་ན་འཆི་འཕོས་པའི་ཚེ་ལྷར་སྐྱེའོ་ཞེས་ཁྱོད་ཉིད་ཀྱིས་བཤད་པ་དང ། ད་ཡང་ང་ལ་སངས་རྒྱས་ཐམས་ཅད་ཀྱི་མཚན་བཤད་པར་གསོལ་ཞིང་སེམས་ཅན་ཀུན་སྡུག་བསྔལ་དང་བྲལ་ཞིང་འཇིག་རྟེན་ལས་བཟླ་བར་འདོད་པ་དེའི་ཕྱིར་ངས་ཀྱང་ཁྱོད་དང་སྐྱེ་བོ་ཀུན་ལ་དཀོན་མཆོག་གསུམ་གྱི་མཚན་རྫོགས་པར་བཤད་ཀྱིས། དོན་དམ་པར་ན་དཀོན་མཆོག་གཅིག་ལ་བཀྲི་བའི་དབང་གིས་གསུམ་དུ་བཤད་པ་གང་ལ་ལས་དེའི་མཚན་ཐོས་ནས་སེམས་ཐག་པ་ནས་དྲན་པར་བྱས་ཏེ། འཆི་ཀར་དགེ་བའི་བཤེས་གཉེན་འགའ་ཞིག་གིས་དཀོན་མཆོག་གསུམ་གྱི་མཚན་ལན་གསུམ་དུ། ན་མོ་བུད་དྷཱ་ཡ། ན་མོ་དྷརྨཱ་ཡ། ན་མཿ སཾགྷཱ་ཡ་ཞེས་དེ་སྐད་ཆེད་དུ་བརྗོད་དུ་བཅུག་ན་མི་འདི་འཆི་འཕོས་ནས་ངན་སོང་གསུམ་དུ་མི་འགྲོ་སྟེ། ཕྱོགས་བཅུའི་འཇིག་རྟེན་གྱི་ཁམས་གང་ནས་གང་དུ་དད་པ་དེ་དང་དེར་སྐྱེ་བར་འགྱུར་རོ། །སངས་རྒྱས་ཐམས་ཅད་ལ་མཐར་གྱིས་རིམ་གྲོ་བྱེད་པར་འགྱུར། བྱང་ཆུབ་སེམས་དཔའ་ཐམས་ཅད་མཐོང་བར་འགྱུར། འཇམ་དཔལ་དང་ཀུན་དུ་བཟང་པོས་ཐེག་པ་ཆེན་པོའི་ཕྱོགས་སུ་རྒྱས་པ་བཤད་པ་འང་ཐོས་པར་འགྱུར། ཐོས་ནས་ཀྱང་དེ་མ་ཐག་ཏུ་སྐྱེ་བ་མེད་པའི་ཆོས་ལ་བཟོད་པ་ཐོབ་པར་འགྱུར་རོ། །རིགས་ཀྱི་བུ་གང་ཟག་དེ་ཡང་བསྐལ་པ་གྲངས་མེད་པ་ནས་དགེ་བའི་རྩ་བ་ཤིན་དུ་བསྩགས་པས་གདོད་དཀོན་མཆོག་གསུམ་གྱི་མཚན་ཐོས་པ་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་མཚན་ཉིད་དད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་དཀོན་མཆོག་གསུམ་ཞེས་བགྱི། དངོས་པོ་གཅིག་གམ། དངོས་པོ་གཉིས་སམ། དངོས་པོ་གསུམ་དུ་བགྱི། ཅི་སྟེ་དངོས་པོ་གཅིག་ན་ནི་སྐྱབས་གཅིག་ཏུ་སོང་བས་དངོས་པོ་གསུམ་ལགས་ན་ནི་སྐྱབས་གསུམ་དུ་གྱུར་པས་སྐྱབས་གསུམ་དུ་གྱུར་ན་ནི་སངས་རྒྱས་དང་ཆོས་ཀྱང་དབྱིངས་ཐ་དད་པར་འགྱུར་ཏེ། དགེ་འདུན་ཡང་དེ་བཞིན་ནོ། །གལ་ཏེ་སྐྱབས་གསུམ་ཞིག་ལགས་ན་ནི་སྐྱེ་བོ་རྣམས་རྣམ་པ་གསུམ་དུ་མཐོང
62.243a
བས་བསྐལ་པ་གསུམ་གྱི་བར་ཆོས་སྤྱོད་ཀྱང་ཐེག་པ་གཅིག་ཏུ་བརྡ་མི་མཇལ་བར་མཆི་ན། བཅོམ་ལྡན་འདས་སེམས་ཅན་རྣམས་ལ་སྨན་པ་དང་བདེ་བའི་སླད་དུ་བདག་ལ་བཤད་དུ་གསོལ། བདག་འདི་ཐོས་ནས་ཀྱང་སྐྱེ་བོ་ཀུན་ལ་བྱེ་བྲག་ཕྱེད་པར་བཤད་པར་འཚལ་ལོ། །བཅོམ་ལྡན་འདས་མྱ་ངན་ལས་འདས་པའི་སླད་ན་གང་ལ་ལས་མཚན་ཐོས་ན། བླ་ན་མེད་པའི་བྱང་ཆུབ་ཀྱི་གནས་ཐོབ་པར་ཡང་འགྱུར་རོ། །ཞེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཚན་ཉིད་དད་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ལེགས་སོ་ལེགས་སོ། །དོན་ཆེན་པོ་འདི་ལྟ་བུ་ང་ལ་ཞུ་བར་ནུས་པ་ནི་ཤིན་དུ་ལེགས་སོ་ལེགས་སོ། །རིགས་ཀྱི་བུ་ཁྱོད་འདི་ལྟ་བུའི་དོན་ཆེན་པོ་འདྲི་བ་ཡང་ས་དང་པོ་དང ། ས་གཉིས་པ་དང ། ས་གསུམ་པ་དང ། ས་བཞི་པ་དང ། ས་ལྔ་པ་དང ། ས་དྲུག་པ་དང ། ས་བདུན་པ་དང ། ས་བརྒྱད་པ་ལ་གནས་པ་མ་ཡིན་ཏེ། ས་བཅུ་ཆོས་ཀྱི་སྤྲིན་ལ་གནས་པའི་སྐྱེས་བུ་ཆེན་པོ་ནི་དེ་བཞིན་གཤེགས་པ་ལ་དོན་ཆེན་པོ་འདི་ལྟ་བུ་འདྲི་བ་ཡིན་ནོ། །ཁྱོད་ལེགས་པར་ཉོན་ཅིག་།ངས་བྱེ་བྲག་ཕྱེད་པར་བཤད་དོ། །རིགས་ཀྱི་བུ་སྐྱེ་བོ་ཐམས་ཅད་ནི་ཐོག་མ་མེད་པ་ནས་མ་རིག་པས་བསྒྲིབས་ཏེ། ཁམས་གསུམ་གྱི་བཙོན་ར་ན་འཁོར་ཞིང་སྡུག་བསྔལ་སྣ་ཚོགས་ཀྱིས་གཟིར་ཏེ། ལམ་རྒྱུད་དྲུག་ཏུ་ཕན་ཚུན་རྣམ་པར་རྒྱུ་བ་ལ་སྐྱབས་དང་རྟེན་པའི་གནས་མེད་ནས་ལྷ་མ་སྲིན་ལ་ཕྱོགས་ཏེ་སྐྱབས་ཚོལ་བ། མུ་སྟེགས་རྣམས་རང་གི་རྐང་ལག་བཅིངས་ཤིང་སྲོག་བཏང་སྟེ། སྐྱབས་ཚོལ་ན་ཡང་སྡུག་བསྔལ་ལས་ཐར་པ་མེད་དོ། །མེ་དང་མཚོའི་ནང་དུ་མཆོངས་ཏེ་སྲོག་བཏང་ཡང་འཁོར་བ་ལས་ཐར་པའི་དུས་མེད་དོ། །དེའི་ཕྱིར་མགོན་པོ་ཆེན་པོ་དེ་བཞིན་གཤེགས་པས་བྱམས་པའི་ཏིང་ངེ་འཛིན་གྱིས་སྐྱེ་བོ་རྒྱུན་དུ་འཁྲུལ་པ་རྣམས་ལ་ཐུགས་བརྩེ་བར་དགོངས་ཏེ། དཀོན་མཆོག་གསུམ་གྱི་མཚན་བསྟན་ཅིང་ཡང་དག་པའི་རྟེན་གནས་སུ་བྱ་བའི་ཕྱིར་བསླབ་པ་དང་པོ་ཉན་ཐོས་དང ། རང་བྱང་ཆུབ་པ་རྣམས་ལ་ཐེམ་སྐས་དང་འདྲ་བར་དཀོན་མཆོག་གསུམ་ཡང་དངོས་པོ་ཐ་དད་པར་བཤད་དོ། །
62.243b
དེའི་འོག་ཏུ་རྒྱུན་རིང་དུ་ཚངས་པར་སྤྱད་པའི་སྐྱེས་བུ་དམ་པ་ལ་ཡང་དག་པ་མཐར་ཕྱིན་པའི་དཀོན་མཆོག་གསུམ་དངོས་པོ་གཅིག་པར་ཡང་བཤད་དེ། སངས་རྒྱས་དཀོན་མཆོག་གཅིག་གི་ནང་ན་ཆོས་དང་དགེ་འདུན་གྱི་དཀོན་མཆོག་ཀྱང་ཡོད་པར་བཤད་དོ། །རིགས་ཀྱི་བུ་ཅིའི་ཕྱིར་དཀོན་མཆོག་ཅེས་བྱ་ཞེ་ན། དཔེར་ན་འཇིག་རྟེན་གྱི་རིན་པོ་ཆེ་སྣ་བདུན་པོ་ཕོངས་པ་རྣམས་ལ་འཚོ་བ་བསྟངས་པ་དང་འདྲ་བར་དཀོན་མཆོག་གསུམ་ཡང་འཇིག་རྟེན་ན་སྐྱེ་བོ་རྣམས་ཀྱི་ཆོས་ཀྱི་སྐུ་བསྐྱེད་པ་དང ། ཡེ་ཤེས་སྤེལ་བར་བྱེད་པས་དཀོན་མཆོག་ཅེས་བྱའོ། །དཀོན་མཆོག་གསུམ་དངོས་པོ་ཐ་དད་པ་ནི་སངས་རྒྱས་རྒྱལ་པོའི་ཁབ་ཏུ་སྐུ་སྤྲུལ་ཅིང་བྱང་ཆུབ་སེམས་དཔའ་ཡིན་པ་སྐད་དུ་སེམས་ཅན་བསྒྲལ་བའི་ཕྱིར་བརྟུལ་ཞུགས་དང་དཀའ་ཐུབ་སྤྱད་དེ། བྱང་ཆུབ་ཀྱི་ཤིང་དྲུང་དུ་མངོན་པར་བྱང་ཆུབ་ནས་བདག་དང་གཞན་གྱི་དོན་མཛད་ཅེས་བྱ་བ་ནི་སངས་རྒྱས་ཞེས་བྱའོ། །སངས་རྒྱས་ནི་མ་རིག་པའི་གཉིད་ལས་སད་པའོ། །དགེ་འདུན་ཞེས་བྱ་བ་ནི་མཆོད་པའི་གནས་སོ། །སྟོན་པ་ལས་སློབ་མས་དོན་རྙེད་པའི་ཕྱིར་དགེ་འདུན་ཞེས་བྱའོ། །དགེ་འདུན་ལ་རྣམ་པ་གཉིས་ཏེ། འཐུན་པ་དང ། འདུས་མ་བྱས་པའོ། །འདུས་མ་བྱས་པ་ཐོབ་པ་ནི་ཡང་དག་པའི་སྟོང་པ་ཉིད་ཀྱིས་ཤེས་རབ་ཀྱི་མཚན་ཉིད་སྟོང་པ་ཉིད་གྲོལ་བ་ནི་འདུས་མ་བྱས་པའོ། །འཁྲུལ་པ་བར་མི་ཆད་པར་འབྱུང་བའི་ཟག་པ་ཟད་པ་ཡང་འདུས་མ་བྱས་ཞེས་བྱའོ། །ཟག་པ་ཐམས་ཅད་འགགས་ནས་འཕགས་པ་རྣམས་དང་གནས་གཅིག་ཏུ་འཐུན་ཏེ། རྩོད་པ་མེད་པ་ནི་འཐུན་པ་སྟེ། དོན་དེ་གཉིས་དང་ལྡན་པ་ནི་དགེ་འདུན་ཞེས་བྱའོ། །རིགས་ཀྱི་བུ་ཆོས་ནི་དགེ་སྡིག་གི་ཆོས་ཐམས་ཅད་དང ། འདུས་བྱས་དང ། འདུས་མ་བྱས་རྣམས་སོ། །སྡིག་པའི་ཆོས་ནི་སྤང་བར་བྱ། དགེ་བའི་ཆོས་ནི་འཕེལ་བར་བྱའོ། །དེ་ཡང་སེམས་ཀྱིས་དམིགས་སོ་ཅོག་ཆོས་ཀྱི་དཀོན་མཆོག་ཅེས་བྱའོ། །དེའི་ཕྱིར་སངས་རྒྱས་དང ། དགེ་འདུན་གཉིས་དངོས་པོ་ཡང་མི་གཅིག་ལ། ངོ་བོ་ཉིད་ཀྱང་ཐ་དད་དོ། །ཆོས་ནི་དགེ་འདུན་དང་སངས་རྒྱས་སུ་དབྱིངས་འཐུན་ཏེ་སོ་སོར་དབྱེ་བར་དཀའོ། །ཇི་ལྟར་སོ་སོར་དབྱེ་བར་དཀའ་ཞེ་ན། །གལ་ཏེ
62.244a
སངས་རྒྱས་དང་དགེ་འདུན་གཉིས་ཀྱི་མཚན་བླ་དགས་སུ་བཏགས་ཏེ། རྣམ་པར་དཔྱོད་པ་བས་རྣམ་པར་གྲོལ་བའི་ཕུང་པོ་ཐོབ་པ་དང ། དགེ་བའི་ཡོན་ཏན་ཐམས་ཅད་ཆོས་ཀྱི་དཀོན་མཆོག་གོ་ཞེས་བྱ་བར་དོན་དེ་ལྟ་བུ་ཡང་མ་ཡིན་ཏེ། དེ་ཅིའི་ཕྱིར་ཞེ་ན། དགེ་བའི་ཡོན་ཏན་དང་བསོད་ནམས་ཀྱི་དབང་གིས་མི་ལུས་ཐོབ་པ་ཡིན་ནོ། །ཆོས་དང་བྲལ་ན་མི་བྱེད། མི་ལས་གུད་ན་ཡང་ཆོས་ཀྱི་དཀོན་མཆོག་ཅེས་བྱ་བ་ག་ལ་ཡོད། །དེང་འདིར་གླེང་བ་ནི་མི་དང་ཆོས་སུ་གཅིག་ཏུ་འཐུན་ལ་ཐ་དད་པ་ཡང་ཡོད་དེ། ཆོས་ཀྱི་དབང་གིས་མིར་གྲུབ། མིའི་དབང་དུ་ཆོས་འགྲོ་བས་དེའི་ཕྱིར་རྣམ་པར་གྲོལ་བའི་ཕུང་པོ་དང ། སྟོབས་བཅུ་དང ། མི་འཇིགས་པ་བཞི་དང ། མཚན་སུམ་བཅུ་རྩ་གཉིས་དང ། དཔེ་བྱད་བཟང་པོ་བརྒྱད་ཅུ་དང ། ཕ་རོལ་ཏུ་ཕྱིན་པ་ལ་སོགས་ཏེ། ཏིང་ངེ་འཛིན་གྲངས་མེད་པ་ཡང་སངས་རྒྱས་དཀོན་མཆོག་ཏུ་བཤད་དོ། །ཉན་ཐོས་ཀྱི་རྣམ་པར་གྲོལ་བའི་ཕུང་པོ་ནི་དགེ་འདུན་དཀོན་མཆོག་ཏུ་བཤད་དོ། །ཡོན་ཏན་འདི་རྣམས་འདུས་བྱས་དང་འདུས་མ་བྱས་པའི་ཆོས་ཀྱི་རྣམ་གྲངས་དང ། གཏན་ཚིགས་སུ་དམིགས་པའི་སྦྱོར་བ་ནི་ཆོས་ཀྱི་དཀོན་མཆོག་ཅེས་བྱའོ། །ཡེ་ནི་དབྱིངས་གཅིག་སྟེ། དོན་གཉིས་སུ་བཤད་ཀྱིས་ཀྱང་ཆོས་ཀྱི་དབྱིངས་ལ་སངས་རྒྱས་དང་དགེ་འདུན་ཐ་དད་པ་ཡང་ཡོད་དེ། དེ་ཡང་ཆོས་ཀྱི་དཀོན་མཆོག་ཏུ་བསྡུའོ། །དེ་ལྟར་ན་འཁོར་བའི་སྤྱོད་པ་ཐམས་ཅད་ཀྱིས་སྡུག་བསྔལ་སྦོམ་པོ་ལས་ཐར་གྱིས་ཀྱང་སྡུག་བསྔལ་ཕྲ་མོ་མ་ཟད་དེ། དེའི་ཕྱིར་ཡང་དག་པ་མཐར་ཕྱིན་པའི་དཀོན་མཆོག་གསུམ་བཤད་པར་བྱའོ། །སྔོན་བཤད་པ་ལ་སངས་རྒྱས་ལ་སྡུག་བསྔལ་མངའོ། །ཆོས་ནི་མི་རྟག་གོ། །དགེ་འདུན་ཡང་མི་རྟག་སྟེ། སྡུག་བསྔལ་ཡིན་པས་ཡང་དག་པའི་རྟེན་གནས་མ་ཡིན་ཞེས་ཟེར་ན་དེང་འདིར་བཤད་པ་ནི་རྟག་ཏུ་གནས་པ་ནི་རྣལ་འབྱོར་སྤྱོད་པ་པ་རྣམས་ཀྱིས་ཆོས་ཉིད་སྟོང་པ་ཉིད་དུ་མངོན་པར་ཆུད་ཅིང ། ཕྱིན་ཅི་ལོག་བརྒྱད་དང་བྲལ་བ། སྐྱེ་འགག་མེད་པ་ཡང་དག་པའི་རྟེན་གནས་སུ་གྱུར་པ་དེ་ནི་སངས་རྒྱས་དཀོན་མཆོག་ཅེས་བྱའོ། །རྟག་པའི་ཆོས་རྙེད་དོ་ཅོག་དམིགས་པའི་མཐར་ཕྱིན་པར་སྤྱད་པ་ནི་ཡང་དག་པའི་ཆོས་དཀོན་མཆོག་ཅེས་བྱའོ། །
62.244b
སྤྱོད་པ་པ་རྣམས་ཀྱིས་ཡང་དག་པའི་ཆོས་ཀྱི་ཆོས་ཉིད་ཁོང་དུ་ཆུད་ཅིང་རྟག་ཏུ་འདུས་མ་བྱས་པའི་གནས་སུ་གྲུབ་པ་ནི་དགེ་འདུན་ཞེས་བྱའོ། །ཡང་ཕྱིན་ཅི་ལོག་བརྒྱད་གཏན་དུ་བྲལ་བས་འཕགས་པ་དང་སྐྱེ་བོ་ཐམས་ཅད་འཐུན་ཞིང་ནམ་དུ་ཡང་རྩོད་པ་མེད་པ་ནི་དགེ་འདུན་དཀོན་མཆོག་ཅེས་བྱའོ། །སྔོན་དཀོན་མཆོག་གསུམ་མི་དང་ཆོས་སུ་ཐ་དད་པར་བཤད། དེང་འདིར་ནི་སངས་རྒྱས་དངོས་པོ་གཅིག་ལ་ཆོས་དང་དགེ་འདུན་ཡང་དེར་བྱུང་བས་དོན་དེའི་ཕྱིར་ངས་ཁྱོད་ལ་དངོས་པོ་གཅིག་པའི་དཀོན་མཆོག་གསུམ་བཤད་དེ། སྐྱེ་བོ་ཀུན་ཐེག་པ་གཅིག་ཏུ་ཕྱོགས་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་མཚན་ཉིད་དད་ཀྱིས་འདི་སྐད་ཅེས་གསོལ་ཏོ། །སངས་རྒྱས་བཅོམ་ལྡན་འདས་གང་ལ་རྣམ་པར་རྟོག་སྟེ་ཐེག་པ་ཆེན་པོ་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁམས་གསུམ་མི་རྟག་པར་བསམས་ཏེ་ཐེག་པ་ཆེན་པོར་བསྒྲུབ་བོ། །བྱང་ཆུབ་སེམས་དཔའ་མཚན་ཉིད་དད་ཀྱིས་གསོལ་པ། ཇི་ལྟར་ན་མི་རྟག་པ་ལ་རྣམ་པར་རྟོག་པར་བགྱི། བཀའ་སྩལ་པ། མི་རྟག་པ་ལ་རྣམ་པར་རྟོག་པར་བྱ་ན་ཉོན་མོངས་པ་རྣམ་པར་སྦྱངས་ཏེ་ཡང་དག་པའི་དྲན་པ་མངོན་དུ་བཞག་ལ་བྱམས་པ་དང་སྙིང་རྗེ་ཐོག་མར་འགྲོ་བར་བྱ་སྟེ། སྐྱེ་བོ་རྣམས་ལ་ཆོས་བཤད་ཅིང་བསྒྲལ་ན་ཡང་ལན་མི་རེ་བ་ནི་བྱང་ཆུབ་སེམས་དཔའ་ཞེས་བྱའོ། །དེ་ལྟར་སེམས་ཅན་ཡོངས་སུ་མི་གཏོང་སྟེ་ཐེག་པ་ཆེན་པོ་བསྒྲུབ་པར་བྱའོ། །རིགས་ཀྱི་བུ་དཔེར་ན་གྲོང་ཁྱེར་ཆེན་པོ་གཅིག་འཁོར་རྒྱ་དཔག་ཚད་གཅིག་ལ། སྒོ་མང་པོ་ཞིག་ཡོད་པ་དེར་འགྲོར་ནི་ལམ་ན་གཡང་ས་དང ། མུན་ནག་པ་དང ། ཤིན་དུ་འཇིགས་པའི་ས་ཆེར་ཡོད་ཀྱིས་ཀྱང ། གྲོང་ཁྱེར་དེར་ཕྱིན་ན་ཤིན་དུ་བདེ་སྐྱིད་པར་འགྱུར་བས་སྐྱེས་བུ་མི་གཅིག་ལ་བུ་གཅིག་པུ་ཞིག་ཡོད་པ་ཤིན་དུ་ཡང་སྡུག་མོད་ཀྱི། གྲོང་ཁྱེར་དེ་ན་བདེ་སྐྱིད་པའི་ལོངས་སྤྱོད་དཔག་ཏུ་མེད་པ་ཡོད་དོ་ཞེས་ཐོས་པས་བུ་སྡུག་པ་དེར་འགྲོ་འདོད་པའི་ཕྱིར་ཐབས་སྣ་ཚོགས་ཀྱིས་ལམ་འཇིགས
62.245a
ས་རྒལ་ནས་གྲོང་ཁྱེར་དེའི་སྒོར་ཕྱིན་པ་དང ། རྐང་པ་ཡ་གཅིག་ནང་དུ་བཅུག་སྟེ། རྐང་པ་ཡ་གཅིག་མ་བཏེག་པའི་བར་དུ་བུ་དེ་དྲན་ནས་འདི་ལྟར་བསམས་སོ། །བདག་ལ་བུ་གཅིག་པུ་ཡོད་པ་བདག་ཆས་པའི་ཁར་ཅི་སྟེ་མ་ཁྲིད། ད་སུ་ཞིག་སླད་ན་གསོ་ཞིག་གུ་ཞེས་བསམས་ནས་གྲོང་ཁྱེར་དེ་བཏང་སྟེ་སླར་བུའི་ཐད་དུ་ཆས་སོ། །རིགས་ཀྱི་བུ་བྱང་ཆུབ་སེམས་དཔའི་བྱམས་པ་དང་སྙིང་རྗེ་ཡང་དེ་དང་འདྲ་སྟེ་བྱམས་ཤིང་སྙིང་བརྩེ་བའི་ཕྱིར་མངོན་པར་ཤེས་པ་ལྔ་བསྒོམ་པར་བྱེད་དོ། །བསྒོམས་ཏེ་ཟག་པ་ཟད་ནས་ཡང་མི་ཤེས་གྲུབ་པ་མི་ལེན་ཏེ། དེ་ཅིའི་ཕྱིར་ཞེ་ན། སེམས་ཅན་ལ་སྙིང་བརྩེ་བའི་ཕྱིར་ཟག་པ་ཟད་པ་དང ། མངོན་པར་ཤེས་པ་སྤོང་སྟེ། སོ་སོའི་སྐྱེ་བོའི་སར་བགྲོད་པར་བྱའོ། །རིགས་ཀྱི་བུ་དཔེར་གྲོང་ཁྱེར་བདེ་སྐྱིད་པ་ཞེས་བྱ་བ་ནི་རྣམ་པར་ཐར་པ་ཆེན་པོ་ལ་བྱའོ། །དཔེར་སྒོ་མང་པོ་ཞེས་བྱ་བ་ནི་ཏིང་ངེ་འཛིན་གྱི་སྒོ་བརྒྱད་ཁྲི་བཞི་སྟོང་ལ་བྱའོ། །དཔེར་ལམ་འཇིགས་ས་ཆེན་པོ་ཞེས་བྱ་བ་ནི་བདུད་དང་བགེགས་ལྟ་བུ་ལ་བྱའོ། །དཔེར་གྲོང་ཁྱེར་གྱི་སྒོར་ཕྱིན་ཞེས་བྱ་བ་ནི་མངོན་པར་ཤེས་པ་ལྔ་ཐོབ་པ་ལ་བྱའོ། །དཔེར་རྐང་པ་ཡ་གཅིག་བཏེག་སྟེ་ཐེམ་པའི་ནང་དུ་འཇུག་པ་ནི་ཡེ་ཤེས་ལ་བྱའོ། །དཔེར་རྐང་པ་ཡ་གཅིག་མ་བཏེག་པ་ནི་བྱང་ཆུབ་སེམས་དཔའ་གཞན་རྣམ་པར་མ་གྲོལ་བ་ལ་བྱའོ། །དཔེར་བུ་གཅིག་པུ་ལུས་ཞེས་སྨྲ་བ་ནི་ལམ་རྒྱུད་ལྔའི་སེམས་ཅན་ལ་བྱའོ། །དཔེར་བུ་ལ་དྲན་པ་ནི་སྙིང་རྗེ་ཆེན་པོ་ལ་བྱའོ། །དཔེར་བུའི་ཐད་དུ་ལོག་པ་ནི་སེམས་ཅན་འདུལ་ཞིང་རྣམ་པར་གྲོལ་བ་ཐོབ་པར་བྱེད་པ་ལ་བྱའོ། །དཔེར་ལན་དང་འགྲུབ་པ་མི་རེ་བ་ནི་ཐབས་མཁས་པ་ལ་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱམས་པ་ཆེན་པོ་དང་སྙིང་རྗེ་ཆེན་པོས་བསྡུས་ཏེ། མི་གཏོང་བ་ནི་བསམ་གྱིས་མི་ཁྱབ་བོ། །རིགས་ཀྱི་བུ་ཡང་འདི་ལྟ་སྟེ། བྱང་ཆུབ་སེམས་དཔའ་སྐྱེས་བུ་དམ་པ་དང་པོ་སེམས་བསྐྱེད་པ་ནས་བྱང་ཆུབ་ཀྱི་སྙིང་པོ་ལ་ཐུག
62.245b
གི་བར་དུ་སེམས་ཅན་ལ་རྟག་ཏུ་དགེ་བ་བཅུ་དཔོག་པར་བྱའོ། །བཅུ་པོ་གང་ཞེ་ན། སྲོག་མི་གཅོད་པ་དང ། མ་བྱིན་པར་མི་ལེན་པ་དང ། འདོད་པས་ལོག་པར་མི་གཡེམ་པ་དང ། བརྫུན་དུ་མི་སྨྲ་བ་དང ། ཕྲ་མ་དང་དབྱེན་མི་བྱེད་པ་དང ། ངག་རྩུབ་པོ་མི་སྨྲ་བ་དང ། དོན་མེད་པའི་གཏམ་ཚིག་ཁྱལ་བ་མི་སྨྲ་བ་དང ། བརྣབ་སེམས་མི་བྱེད་པ་དང ། གནོད་སེམས་མི་བྱེད་པ་དང ། ལོག་པར་མི་ལྟ་བ་སྟེ། བྱང་ཆུབ་སེམས་དཔའ་དེ་བཞིན་དུ་བྱམས་པ་དང ། སྙིང་རྗེ་ཕུན་སུམ་ཚོགས་པར་སྤྱད་ན་བྱམས་པས་ནི་དགེ་བ་སྟོན་ཅིང་བདེ་བ་ལ་འགོད་པར་བྱེད། སྙིང་རྗེས་ནི་སྡུག་བསྔལ་ལས་ཐར་བ་དང ། དམྱལ་བ་ལས་སྒྲོལ་བར་བྱེད་དོ། །སྐྱེ་བོ་རྣམས་མྱ་ངན་ལས་འདའ་བར་བསྒྲུབ་འདོད་པའི་སྒོ་མ་ཤེས་པ་མཐོང་ན་བྱང་ཆུབ་སེམས་དཔས་སྐྱེ་བོ་དེ་དག་ལ་སྙིང་རྗེ་བའི་སེམས་བསྒོམ་པར་བྱའོ། །སྙིང་རྗེ་བའི་དབང་གིས་སེམས་ཅན་ཐམས་ཅད་མྱ་ངན་ལས་འདའ་བའི་སྒོ་འབྱེད་པས་བདེ་བའི་གནས་མངོན་པར་སྟོན་ཏེ། ཐེག་པ་ཆེན་པོའི་འབྲས་བུ་ཐོབ་པར་བྱེད་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱད་པ་སྤྱོད་པ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་མཚན་ཉིད་དད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡང་དག་པའི་དྲན་པ་ཞེས་བགྱི་བ་གང ། བཀའ་སྩལ་པ། མི་སྐྱེ་མི་འགག་པའི་ཆོས་སྤྱད་པའོ། །གསོལ་པ། བཅོམ་ལྡན་འདས་ཆོས་མི་སྐྱེ་བ་ནི་གང ། མི་འགག་པ་ནི་གང ། བཀའ་སྩལ་པ། རིགས་ཀྱི་བུ་སྡིག་པའི་ཆོས་ནི་མི་སྐྱེ་བར་བྱ། དགེ་བའི་ཆོས་ནི་མི་འགག་པར་བྱའོ། །དེ་ལྟ་བུའི་སྤྱོད་པ་ཁམས་གསུམ་དུ་སྤྱད་པ་ནི་འདོད་པ་རྣམ་པ་ལྔའི་བག་ཆགས་ཀྱི་དྲི་མས་གོས་པར་མི་འགྱུར་རོ། །རིགས་ཀྱི་བུ་ཁམས་གསུམ་ན་བགྲོད་ཅིང་སེམས་ཅན་བསྒྲལ་བར་འདོད་ན་ཆོས་རྣམས་པ་བཅུ་པོ་འདིས་ཁམས་གསུམ་དུ་བགྲོད་པར་བྱ་སྟེ། ཀུན་རྫོབ་ཀྱི་ཚིག་དང ། ཡི་གེའི་རྗེས་སུ་ཁམས་གསུམ་ཡོད་པར་བཤད་མོད་ཀྱི། བླ་ན་མེད་པའི་བྱང་ཆུབ་ནི་དུས་གསུམ་དུ་མི་གནས་ལ། མཐར་ཕྱིན་པའི་བྱང་ཆུབ་རྣམ་གྲངས་སུ
62.246a
མི་ལྟུང་ན་དུས་གསུམ་དང་ཁམས་གསུམ་ལྟ་ཅི་སྨོས། ཆོས་བཅུ་པོ་གང་ཞེ་ན། སྟོད་པ་དང་སྨད་པ་ལ་སེམས་སྐྱེ་བྲི་མེད་པ་དང ། སྙན་པ་དང་མི་སྙན་པར་ཐོས་པ་ལ་སེམས་རྣམ་པར་མི་རྟོག་པ་དང ། ཤེས་རབ་ཅན་དང ། གཏི་མུག་ཅན་ལ་འདྲ་བར་སྙིང་རྗེ་བསྐྱེད་པ་དང ། སེམས་ཅན་བླ་འོག་གང་ཡང་རུང་སྟེ། སྙོམས་པར་ལྟ་བ་དང་མཆོད་པ་གུས་མ་གུས་ལ་སེམས་རྣམ་པ་གཉིས་སུ་མི་འབྱེད་པ་དང ། གཞན་གྱི་ཉེས་སྐྱོན་ལ་འཕྱས་མི་འདོགས་པ་དང ། ཐེག་པ་རྣམ་པ་སྣ་ཚོགས་སུ་མཐོང་ན་ཡང་ཐེག་པ་གཅིག་ཏུ་ལྟ་བ་དང ། ངན་སོང་གསུམ་གྱི་སྒྲ་ཐོས་ན་ཡང་འཇིགས་པ་དང་སྐྲག་པ་མི་སྐྱེད་པ་དང ། བྱང་ཆུབ་སེམས་དཔའ་རྣམས་ལ་དེ་བཞིན་གཤེགས་པ་དང་འདྲ་བར་བལྟ་བ་དང ། བསྐལ་པ་སྙིགས་མ་ཅན་གྱི་དུས་སུ་སངས་རྒྱས་འབྱུང་བ་ལ་ངོ་མཚར་རྨད་དུ་བྱུང་བའི་འདུ་ཤེས་བསྐྱེད་པ་དང་བཅུ་སྟེ། ཆོས་བཅུ་པོ་དེ་དག་དང་ལྡན་ན་བྱང་ཆུབ་སེམས་དཔའི་ཉོན་མོངས་པའི་བག་ཆགས་ཀྱིས་ཉོན་མོངས་པར་མི་འགྱུར་རོ། །བྱང་ཆུབ་སེམས་དཔའ་སྐྱེས་བུ་དམ་པ་ཁམས་གསུམ་ན་བགྲོད་པའི་ཚེ་སྙིང་རྗེ་ཆེན་པོས་གཞི་བྱས་ན་མནོལ་བའི་ཞིང་དེར་འོད་འདྲེས་ཀྱང་རྡུལ་མི་གཅིག་སྟེ། དེ་བས་ན་བསམ་གྱིས་ཁྱབ་དཀའ་ཞེས་བྱའོ། །གང་ཞིག་འཇིག་རྟེན་རྣམ་དག་ན། །བསྐལ་པ་གཅིག་གི་བར་དག་ཏུ། །ཚུལ་ཁྲིམས་དམ་དུ་བསྲུང་བ་ནི། །སྐྱེས་བུ་དེ་ནི་སྐད་ཅིག་ཙམ། །བྱམས་པ་སྤྱད་པས་དམ་པ་མཆོག་།གང་ཞིག་འཇིག་རྟེན་འདི་རུ་ནི། །ལུས་དང་ངག་ཡིད་སྡིག་སྤྱད་དེ། །ངན་སོང་གསུམ་དུ་ལྟུང་ངེས་དག་།བྱམས་སེམས་དེ་ཡིས་འཕྲལ་དུ་འབྱང ། །བྱང་ཆུབ་སེམས་དཔའ་འགའ་ཞིག་གིས། །འཇིག་རྟེན་ངན་པར་སྐྱེས་ན་ཡང ། །འཇིགས་དང་དོགས་པ་མ་སྐྱེད་ཅིག་།ངན་སོང་ལྟུང་བའི་སྡིག་ཡོད་ཀྱང ། །མགོ་བོ་ན་བ་ཙམ་གྱིས་འབྱང ། །གང་ཞིག་འཆིང་བ་གཅོད་འདོད་དམ། །ཉོན་མོངས་སྒྲིབ་པ་སྤང་འདོད་པ། །འཇིག་རྟེན་ངན་འདིར་སྐྱེས་ན་ཡང ། །དམ་ཆོས
62.246b
བསྲུང་བས་ཤེས་རབ་འཕེལ། །རྣམ་དག་ཞིང་དུ་བསྐལ་པ་འབུམ། །ཚུལ་ཁྲིམས་རྣམ་དག་སྤྱད་པ་བས། །དེང་ནས་སང་གི་བར་དག་ཏུ། །འཇིག་རྟེན་འདི་ན་གནས་ཀྱང་སླ། །དེ་ཅིའི་ཕྱིར་ཞེ་ན། ངས་ནི་མི་འཁྲུགས་འཇིག་རྟེན་དང ། །བདེ་བ་ཅན་གྱི་འཇིག་རྟེན་གཉིས། །ཤིན་དུ་རྣམ་དག་མཐོང་བ་ན། །སྡུག་བསྔལ་བྱ་བའི་མིང་ཡང་མེད། །ཁམས་དེར་བསོད་ནམས་བྱ་བ་ནི། །དཀའ་བ་སྙམ་དུ་མི་མཛད་དེ། །གང་ཞིག་འཇིག་རྟེན་འདི་དག་ཏུ། །རང་གིས་མི་བཟོད་བཟོད་བྱ་སྟེ། །ཕ་རོལ་པོ་ཡང་བཟོད་བཅུག་ན། །དེ་ནི་བསོད་ནམས་དམ་པ་མཆོག་།དེ་ཕྱིར་བྱང་ཆུབ་སེམས་དཔའ་རྣམས། །འཇིག་རྟེན་ངན་འདིར་བགྲོད་པའི་ཚེ། །ཉོན་མོངས་མྱ་ངན་མ་བྱེད་པར། །སེམས་ཅན་ཐམས་ཅད་འདྲེན་བྱ་སྟེ། །བརྩོན་འགྲུས་བརྟན་པའི་སེམས་བསྐྱེད་ན། །བླ་མེད་བྱང་ཆུབ་མྱུར་དུ་ཐོབ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱིས་དེང་འདིར་བྱང་ཆུབ་སེམས་དཔའ་བྱང་ཆུབ་ཀྱི་རྒྱུ་དང་རྐྱེན་ཞིག་ཞུ་ཞིང་མཆིས་ན། དེ་བཞིན་གཤེགས་པས་སྐབས་དབྱེ་བར་གནང་ན་སྤོབས་པ་བསྐྱེད་དེ་ཞུ་བར་བགྱིའོ་ཞེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ། །རིགས་ཀྱི་བུ་ཁྱོད་སྔོན་སངས་རྒྱས་བརྒྱ་སྟོང་དུ་མ་ལ་དགེ་བའི་རྩ་བ་རྣམས་བསྐྱེད་པ། བྱང་ཆུབ་སེམས་དཔའ་ཐམས་ཅད་ཀྱི་ཕྱིར་བྱང་ཆུབ་སྤྱོད་པའི་བརྩོན་འགྲུས་བརྟན་པ་དྲི་བ་ལེགས་ཀྱིས་འདོད་པ་བཞིན་དྲིས་ཤིག་།ངས་ཁྱོད་ལ་བྱེ་ཕྲག་ཕྱེད་པར་བཤད་དོ། །བཅོམ་ལྡན་འདས་ཀྱིས་སྐབས་དབྱེ་བར་གནང་ནས་བཅོམ་ལྡན་འདས་ལ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔས་ཅི་བགྱིས་ན་བརྟུལ་ཞུགས་དང་དཀའ་ཐུབ་ཀྱི་སེམས་ལ་གདུང་བ་མ་མཆིས་པར་འགྱུར། བྱང་ཆུབ་སེམས་དཔས་ཅི་བགྱིས་ན་ངེས་པའི་ཚིག་ལ་འགྱོད་པ་མ་མཆིས་པར་འགྱུར། བྱང་ཆུབ་སེམས་དཔས་ཅི་བགྱིས་ན་དགེ
62.247a
བའི་རྩ་བ་འཕེལ་བར་འགྱུར། བྱང་ཆུབ་སེམས་དཔས་ཅི་བགྱིས་ན་འཇིགས་པ་མ་མཆིས་ཤིང་ཚུལ་མི་གཡོ་བར་འགྱུར། བྱང་ཆུབ་སེམས་དཔས་ཅི་བགྱིས་ན་དམ་པའི་ཆོས་ཡོངས་སུ་འགྲུབ་པར་འགྱུར། བྱང་ཆུབ་སེམས་དཔས་ཅི་བགྱིས་ན་ས་གཅིག་ནས་ས་བཅུའི་བར་དུ་ལེགས་པར་འཚལ་བར་འགྱུར། བྱང་ཆུབ་སེམས་དཔས་ཅི་བགྱིས་ན། ཐབས་ལ་ཤིན་དུ་མཁས་པར་འགྱུར། བྱང་ཆུབ་སེམས་དཔས་ཅི་བགྱིས་ན་སེམས་ཅན་གྱི་སྟོན་པ་བགྱིད་པར་འགྱུར། བྱང་ཆུབ་སེམས་དཔས་ཅི་བགྱིས་ན་ཚེ་རབས་སུ་བྱང་ཆུབ་ཀྱི་སེམས་ཆུད་མི་གཟོན་པར་འགྱུར། བྱང་ཆུབ་སེམས་དཔས་ཅི་བགྱིས་ན་སེམས་སྤྱོད་པ་རྣམས་གཅིག་ལས་རྣམ་པ་སྣ་ཚོགས་སུ་སྤྱོད་པ་མ་མཆིས་པར་འགྱུར། བྱང་ཆུབ་སེམས་དཔས་ཅི་བགྱིས་ན་ཆོས་རིན་པོ་ཆེས་ལེགས་པར་སྒྲུབ་པར་འགྱུར། བྱང་ཆུབ་སེམས་དཔས་ཅི་བགྱིས་ན་ཚུལ་ཁྲིམས་དང་འདུལ་བ་ལས་བཅས་པའི་ཁ་ན་མ་ཐོ་བ་ལས་འབྱུང་བར་འགྱུར། བྱང་ཆུབ་སེམས་དཔས་ཅི་བགྱིས་ན་ཉོན་མོངས་པ་རྣམས་འགག་པར་འགྱུར། བྱང་ཆུབ་སེམས་དཔས་ཅི་བགྱིས་ན་ཚོགས་མང་པོ་ཀུན་དང་འཐུན་པར་འགྱུར། བྱང་ཆུབ་སེམས་དཔས་ཅི་བགྱིས་ན་ཆོས་ཀྱི་སྦྱིན་པའི་སྒོ་ལེགས་པར་འབྱེད་པར་འགྱུར། བྱང་ཆུབ་སེམས་དཔས་ཅི་བགྱིས་ན་སྔོན་གྱི་དབང་གི་མཐུས་དགེ་བའི་རྩ་བ་མི་སྟོར་བར་འགྱུར། བྱང་ཆུབ་སེམས་དཔས་ཅི་བགྱིས་ན་གཞན་གྱིས་བསྟན་པ་ལ་རག་མི་ལུས་པར་རང་བཞིན་གྱིས་ཕ་རོལ་ཏུ་ཕྱིན་པ་དྲུག་སྤྱད་པར་འགྱུར། བྱང་ཆུབ་སེམས་དཔས་ཅི་བགྱིས་ན་བསམ་གཏན་དང་ཏིང་ངེ་འཛིན་བཏང་སྟེ། འདོད་པའི་ཁམས་སུ་སྐྱེ་བར་འགྱུར། བྱང་ཆུབ་སེམས་དཔས་ཅི་བགྱིས་ན་སངས་རྒྱས་ཀྱི་ཆོས་ལས་ཕྱིར་མི་ལྡོག་པར་འགྱུར། བྱང་ཆུབ་སེམས་དཔས་ཅི་བགྱིས་ན་དགེ་བའི་རྩ་བ་འཕེལ་བ་དང ། ཁམས་གསུམ་དུ་བགྲོད་ཅིང་སེམས་ཅན་ལ་སྟོན་པ་བགྱིད་དེ། སངས་རྒྱས་ཀྱི་ངོ་བོ་ཉིད་བར་མི་འཆད་པར་འགྱུར།
62.247b
དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་ལེགས་སོ་ཞེས་བྱ་བ་བྱིན་ཏེ། ཁྱོད་དེ་བཞིན་གཤེགས་པ་ལ་བྱང་ཆུབ་སེམས་དཔའི་བྱ་བ་རྣམས་ཞུ་ནུས་པ་ཡང་ཤིན་དུ་ལེགས་སོ་ལེགས་སོ། །ཁྱོད་ལེགས་པར་ཉོན་ལ་དྲན་པ་མངོན་དུ་ཞོག་ཤིག་།གསོལ་པ། བཅོམ་ལྡན་འདས་བཀའ་བཞིན་དུ་ཐོས་པར་སྨོན་ཏེ། མཉན་ཅིང་མནོས་པར་འཚལ་ལོ་ཞེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་བརྟུལ་ཞུགས་དང་དཀའ་ཐུབ་ཀྱིས་སེམས་མི་གདུང་བར་འགྱུར་རོ། །ཆོས་བཞི་གང་ཞེ་ན། སེམས་ཅན་ཐམས་ཅད་ལ་སྙིང་རྗེ་ཆེར་བསྐྱེད་པ་དང ། བརྩོན་འགྲུས་བསྐྱེད་ཅིང་ལེ་ལོ་མི་བྱེད་པ་དང ། སྐྱེ་ཤིའི་འཁོར་བ་རྨྱི་ལམ་ཙམ་དང་འདྲ་བར་ཤེས་པ་དང ། ཡང་དག་པའི་ཡིད་ཀྱིས་སངས་རྒྱས་ཀྱི་ཡེ་ཤེས་བསམ་པ་དང་བཞི་སྟེ། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་དཀའ་ཐུབ་དང་བརྟུལ་ཞུགས་ཀྱི་སེམས་གདུང་བ་མེད་པར་འགྱུར་རོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ངེས་པའི་ཚིག་ལ་བར་མ་དོར་འགྱོད་པར་མི་འགྱུར་རོ། །བཞི་གང་ཞེ་ན། ངེས་པའི་ཚིག་ཆོས་ལ་བདག་མེད་པར་མངོན་པར་ཆུད་ཅེས་བརྗོད་པ་དང ། ངེས་པའི་ཚིག་སྐྱེ་གནས་སོ་ཅོག་ལ་དད་པའི་འདུ་ཤེས་བསྐྱེད་པ་མི་རིགས་ཞེས་བརྗོད་པ་དང ། ངེས་པའི་ཚིག་གིས་ཐེག་པ་ཆེན་པོ་ལ་རྒྱུན་དུ་བསྔགས་པ་བརྗོད་པ་དང ། ངེས་པའི་ཚིག་གིས་ལས་དགེ་སྡིག་གི་འབྲས་བུ་མི་རླག་ཅེས་བརྗོད་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་དགེ་བའི་རྩ་བ་རྣམ་པར་འཕེལ་བར་འགྱུར་རོ། །བཞི་གང་ཞེ་ན། ཚུལ་ཁྲིམས་བསྲུང་བ་དང ། མང་དུ་ཐོས་པ་དང ། སྦྱིན་པ་བྱིན་པ་དང ། རབ་ཏུ་བྱུང་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་འཇིགས་པ་མེད་ཅིང་ཚུལ་ལས་མི་གཡོ་བར་འགྱུར་རོ། །བཞི་གང་ཞེ་ན། ཁེ་སྟོར་བ་དང་མི
62.248a
སྙན་པར་གྲགས་པ་དང ། སྨད་ཅིང་དམའ་དབབ་པ་དང ། སྡུག་བསྔལ་གྱིས་ནོན་ཀྱང་མི་གཡོ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཆོས་དཀར་པོ་ཡོངས་སུ་འགྲུབ་པར་འགྱུར་རོ། །བཞི་གང་ཞེ་ན། ཕ་རོལ་པོ་ལ་ལས་དགེ་སྡིག་ཡིད་ཆེས་པར་སྟོན་པ་དང ། སྦྱིན་པ་ལ་ལན་མི་རེ་བ་དང ། དམ་པའི་ཆོས་བསྲུང་ཞིང་སྐྱོང་བ་དང ། ཤེས་རབ་ཆེན་པོས་བྱང་ཆུབ་སེམས་དཔའ་ཐམས་ཅད་ལ་བསྟོད་པར་བྱེད་པ་དང་བཞིའོ། །རིགས་ཀྱི་བུ་བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ས་གཅིག་ནས་ས་བཅུའི་བར་དུ་ལེགས་པར་འགྱུར་རོ། །ཆོས་བཞི་གང་ཞེ་ན། དགེ་བའི་རྩ་བ་ཡུན་དུ་བསྐྱེད་པ་དང ། ཉེས་སྐྱོན་ཐམས་ཅད་སེལ་བ་དང ། ཐབས་ལ་ཤིན་ཏུ་མཁས་པ་དང ། དགེ་བའི་བརྩོན་འགྲུས་ཅི་སྤྱད་པ་བྱང་ཆུབ་ཏུ་བསྔོ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཐབས་ལ་ཤིན་དུ་མཁས་པར་འགྱུར་རོ། །བཞི་གང་ཞེ་ན། སེམས་ཅན་གྱི་ཡིད་དང་འཐུན་པར་བྱེད་པ་དང ། གཞན་གྱི་བསོད་ནམས་དང་ཡོན་ཏན་ལ་རྗེས་སུ་ཡི་རང་བའི་སེམས་སྐྱེད་པ་དང ། སྡིག་ཡོད་ན་འགྱོད་ཚངས་བྱེད་པ་དང ། དེ་བཞིན་གཤེགས་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་སེམས་ཅན་གྱི་སྟོན་པ་བྱེད་པར་འགྱུར་རོ། །བཞི་གང་ཞེ་ན། རྟག་ཏུ་སེམས་ཅན་ལ་ཕན་པ་དང་བདེ་བ་བསྒྲུབ་པར་བྱེད་པ་དང ། རང་གི་དགའ་བ་ཡོངས་སུ་འདོར་བ་དང ། མཉེན་དེས་བྱས་ཏེ་བཟོད་པ་བསྒོམ་པ་དང་ལེ་ལོ་སྤོང་བ་དང་བཞིའོ། །བྱང་ཆུབ་སེམས་དཔའ་ཆོས་བཞི་དང་ལྡན་ན་ཚེ་རབས་སུ་བྱང་ཆུབ་ཀྱི་སེམས་ཆུད་མི་ཟོས་པར་འགྱུར་རོ། །བཞི་གང་ཞེ་ན། ཕྱོགས་བཅུའི་སངས་རྒྱས་ཐམས་ཅད་རྟག་ཏུ་དྲན་པར་བྱེད་པ་དང ། བསོད་ནམས་བྱས་སོ་ཅོག་སེམས་ཅན་གྱི་ཕྱིར་བླ་ན་མེད་པའི་བྱང་ཆུབ་ཏུ་བསྔོ་བ་དང ། དགེ་བའི་བཤེས་གཉེན་ལ་བརྟེན་པ་དང ། ཐེག་པ་ཆེན་པོ་ཡོངས་སུ་སྒྲོག་པར་བྱེད་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང
62.248b
ལྡན་ན་སེམས་སྤྱོད་པ་རྣམ་པ་གཅིག་ལས་རྣམ་པ་སྣ་ཚོགས་སུ་མི་སྤྱོད་པར་འགྱུར་རོ། །བཞི་གང་ཞེ་ན། ཉན་ཐོས་ཀྱི་སེམས་སྤང་བ་དང ། རང་སངས་རྒྱས་ཀྱི་སེམས་སྤང་བ་དང ། ཆོས་སྒྲུབ་པས་སྐྱོ་མི་ངས་པ་དང ། ཆོས་ཅི་ཐོས་པ་གཞན་ལ་སྟོན་པར་བྱེད་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཆོས་རིན་པོ་ཆེ་ལེགས་པར་བསྒྲུབ་པར་འགྱུར་རོ། །བཞི་གང་ཞེ་ན། ཐེག་པ་ཆེན་པོ་ཆོས་དཀོན་པའི་ཕྱིར་རིན་པོ་ཆེ་དང་འདྲ་བར་འདུ་ཤེས་བསྐྱེད་པ་དང ། ཐེག་པ་ཆེན་པོའི་ཆོས་སེམས་ཀྱི་ནད་ཐམས་ཅད་སེལ་བའི་ཕྱིར་སྨན་དང་འདྲ་བར་ལྟ་བ་དང ། ཐེག་པ་ཆེན་པོའི་ཆོས་ནམ་ཡང་མི་རླག་པའི་ཕྱིར་ནོར་གྱི་དབྱིག་དང་འདྲ་བར་ལྟ་བ་དང ། ཐེག་པ་ཆེན་པོའི་ཆོས་མྱ་ངན་ལས་འདའ་བར་བྱེད་པའི་ཕྱིར་སྡུག་བསྔལ་འགོག་པར་ལྟ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཚུལ་ཁྲིམས་ཉམས་པ་དང ། ཉོན་མོངས་པའི་ཁ་ན་མ་ཐོ་བ་ལས་འབྱུང་བར་འགྱུར་རོ། །བཞི་གང་ཞེ་ན། ཆོས་རྣམས་འོང་བ་མེད་པའི་ཕྱིར་ཆོས་ལ་མི་སྐྱེ་བའི་བཟོད་པ་ཐོབ་པ་དང ། ཆོས་རྣམས་སོང་བ་མེད་པའི་ཕྱིར་ཆོས་ལ་མི་འགོག་པའི་བཟོད་པ་ཐོབ་པ་དང ། ཆོས་རྣམས་རྒྱུ་དང་རྐྱེན་ལས་སྐྱེ་བར་ཤེས་པའི་ཕྱིར་ཆོས་ལ་རྟེན་ཅིང་འབྲེལ་བར་འབྱུང་བའི་བཟོད་པ་ཐོབ་པ་དང ། ཐ་དད་པའི་སེམས་རྒྱུད་མེད་པའི་ཕྱིར་མི་གནས་པའི་བཟོད་པ་ཐོབ་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཉོན་མོངས་པ་རྣམས་འགག་པར་འགྱུར་རོ། །བཞི་གང་ཞེ་ན། ཡང་དག་པའི་དྲན་པ་མངོན་དུ་གཞག་པ་དང ། དབང་པོ་རྣམས་བསྡམ་པ་དང ། དགེ་བའི་ཆོས་ཀྱི་སྟོབས་བསྐྱེད་ནུས་པ་དང ། དབེན་པའི་གནས་སུ་དད་ཅིང་འདུ་འཛི་སྤང་བར་བྱ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཚོགས་མང་པོ་ཀུན་དང་འཐུན་པར་འགྱུར་རོ། །བཞི་གང་ཞེ་ན། བདག་ཆོས་སྒྲུབ་ན་ཡང་ཁྱད་པར་ཐོབ་པར་མི་སྒྲུབ་པ་དང ། ལེ་ལོ་མེད་པར་རྟག་ཏུ་བཀུར་སྟི་དང་གུས་པའི་སེམས་སྐྱེད་པ་དང ། ཆོས་ཀྱི་ཕན་པ་འབའ་ཞིག་ཚོལ་གྱི་བདག་མི་སྤྱོམ་པ་དང ། གཞན
62.249a
ལ་དགེ་བའི་ཆོས་བསྟན་ཀྱང་རྙེད་པ་དང ། བཀུར་སྟི་དང ། གྲགས་པ་མི་ཚོལ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཆོས་ཀྱི་སྦྱིན་པའི་སྒོ་ལེགས་པར་འབྱེད་པར་འགྱུར་རོ། །བཞི་གང་ཞེ་ན། དམ་པའི་ཆོས་ཡོངས་སུ་བསྲུང་ཞིང་བསྐྱབ་པ་དང ། རང་གི་ཤེས་རབ་ལ་ཕན་པར་བྱེད་ཅིང་གཞན་ལ་སྟོན་པར་བྱེད་པ་དང ། རྟག་ཏུ་ཡ་རབས་ཀྱི་ཆོས་སྤྱོད་པ་དང ། རྣམ་པར་དག་པ་དང་མ་དག་པའི་ཆོས་ལ་མི་རྟོག་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་སྔོན་གྱི་དབང་གི་མཐུས་དགེ་བའི་རྩ་བ་མི་རླག་པར་འགྱུར་རོ། །བཞི་གང་ཞེ་ན། ཕ་རོལ་པོའི་ཉེས་སྐྱོན་ལ་དབང་མི་བཟའ་བ་དང ། ཞེ་སྡང་ཅན་ལ་རྟག་ཏུ་བྱམས་སེམས་བསྒོམ་པ་དང ། རྟག་ཏུ་ཆོས་ཐམས་ཅད་རྟེན་འབྲེལ་དུ་བཤད་པ་དང ། བླ་ན་མེད་པའི་བྱང་ཆུབ་རྟག་ཏུ་དྲན་པར་བྱ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་གཞན་གྱིས་བསྟན་པ་ལ་རག་མ་ལུས་པར་རང་བཞིན་གྱིས་ཕ་རོལ་དུ་ཕྱིན་པ་དྲུག་སྤྱོད་པར་འགྱུར་རོ། །བཞི་གང་ཞེ་ན། རྟག་ཏུ་ཆོས་ཀྱི་སྦྱིན་པ་གཞན་ལ་སྦྱིན་པ་དང ། གཞན་གྱི་ཁ་ན་མ་ཐོ་བ་མི་བརྗོད་པ་དང ། ཆོས་ཀྱིས་བསྡུས་ཏེ་སེམས་ཅན་གྱི་སྟོན་པ་ལ་མཁས་པ་དང ། ཆོས་ཟབ་མོ་ཆུབ་པར་ཤེས་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་བསམ་གཏན་དང་ཏིང་ངེ་འཛིན་བཏང་སྟེ་འདོད་པའི་ཁམས་སུ་མངོན་དུ་སྐྱེ་བར་འགྱུར་རོ། །བཞི་གང་ཞེ་ན། སེམས་མཉེན་དེས་སུ་བྱ་བ་དང ། དགེ་བའི་རྩ་བའི་མཐུ་རྙེད་པར་བྱ་བ་དང ། སེམས་ཅན་ཐམས་ཅད་མི་གཏོང་བ་དང ། ཤེས་རབ་དང་ཐབས་མཁས་པའི་མཐུ་སྟོབས་རྒྱུན་དུ་བསྒོམ་ནུས་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན། སངས་རྒྱས་ཀྱི་ཆོས་ལས་ཕྱིར་མི་ལྡོག་པར་འགྱུར་རོ། །བཞི་གང་ཞེ་ན། སྐྱེ་ཤིའི་འཁོར་བ་གྲངས་མེད་པར་མྱོང་ན་ཡང་སྐྱོ་བའི་སེམས་མི་སྐྱེད་པ་དང ། རྟག་ཏུ་སངས་རྒྱས་ཚད་མེད་པ་ལ་མཆོད་པ་བྱ་བ་དང ། བྱམས་སེམས་ཚད་མེད་པ་བསྒོམ་པར་བྱ་བ་དང ། སངས་རྒྱས་ཀྱི་ཡེ་ཤེས་ཚད་མེད་པ་ལ་མོས་པ
62.249b
བསྐྱེད་པ་དང་བཞིའོ། །རིགས་ཀྱི་བུ་བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་སངས་རྒྱས་ཀྱི་བདག་ཉིད་རྒྱུན་མི་འཆད་པར་འགྱུར་རོ། །བཞི་གང་ཞེ་ན། སེམས་ཅན་ཐམས་ཅད་ཀྱི་ཕྱིར་སྨོན་ལམ་མི་གཏོང་བ་དང ། སྦྱིན་པའི་སྤྱོད་ལམ་ལ་དད་པ་དང ། བརྩོན་འགྲུས་ཆེན་པོ་ལ་འདུན་པ་དང ། སངས་རྒྱས་ཀྱི་ཆོས་ལ་སེམས་ཟབ་མོས་རྒྱུན་དུ་སྤྱོད་པ་དང་བཞི་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་ཁམས་གསུམ་དུ་བགྲོད་ཅིང་སྤྱོད་པ་རྣམ་པ་བཞི་པོའི་རྣམ་གྲངས་སྤྱད་དེ། སེམས་ཅན་ལ་ཕན་པ་དང་བདེ་བར་བྱས་ཤིང་འཇིག་རྟེན་ལས་བཟླ་བར་བསྒོམས་ན་སངས་རྒྱས་ཀྱི་བདག་ཉིད་རྒྱུན་མི་འཆད་པར་འགྱུར་རོ། །དེའི་ཚེ་ཐེག་པ་ཆེན་པོའི་ཆོས་རྣམ་པ་བཞི་བཞིར་བཤད་པའི་ཚེ་ན་ལྷ་བཞི་ཁྲི་ནི་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །མི་ལས་ཉི་ཁྲི་ལྔ་སྟོང་ནི་ཆོས་ལ་མི་སྐྱེ་བའི་བཟོད་པ་ཐོབ་བོ། །བྱང་ཆུབ་སེམས་དཔའ་བཞི་ཁྲི་བརྒྱད་སྟོང་ནི་ཆོས་ཀྱི་ཁམས་ཀྱི་བཟོད་པའི་ཕ་རོལ་ཏུ་ཕྱིན་པ་ཐོབ་སྟེ་སངས་རྒྱས་ཀྱི་ཡེ་ཤེས་ལ་མངོན་པར་ཆུད་དོ། །དེའི་ཚེ་དེའི་དུས་ན་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་མདོ་སྡེ་འདི་ལེགས་པར་ཟུང་ཤིག་།ཆོངས་ཤིག་ཅེས་བཀའ་སྩལ་ནས་བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་མདོ་སྡེ་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་གྱིས་བཀའ་སྩལ་པ། མདོ་སྡེ་འདིའི་མིང་ནི་ཐར་པ་ཆེན་པོ་ཕྱོགས་སུ་རྒྱས་པ་བདུད་ཀྱི་ཡུལ་འཇོམས་པ། མུ་སྟེགས་ཀྱི་དཔུང་དང་བཅས་པར་གཞིག་པ། ཉོན་མོངས་པ་ཐམས་ཅད་སེལ་བ། ལོག་པར་ལྟ་བ་དང ། འདོད་པ་རྣམ་པ་ལྔའི་འཆིང་བ་འགྲོལ་བ། ཁམས་གསུམ་གྱི་བཙོན་ར་འདྲིལ་བ། འཁོར་བ་ལས་ཐར་ཅིང་མྱ་ངན་ལས་འདའ་བའི་ཕྱོགས་སུ་བསྒྲོལ་བ། ས་བོན་དམ་པའི་རྒྱུ་སྐམས་པ་རླན་པར་བྱེད་པ། རྒྱུ་རྐྱེན་ཆེན་པོ་ཕ་རོལ་དུ་ཕྱིན་པ་དྲུག་གི་ཆོས་ཀྱི་ཆར་འབེབས་པ། སེམས་ཅན་ཐེག་པ་གསུམ་གྱི་མྱུ་གུ་དང་མེ་ཏོག་རྒྱས
62.250a
ཤིང་འཕེལ་བར་བྱེད་པ། བྱང་ཆུབ་ཀྱི་འབྲས་བུ་མཆོག་ཐེག་པ་གཅིག་ཏུ་འགྲུབ་པར་བྱེད་པ་ཞེས་བྱ་བར་ཟུང་ཤིག་།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་སྔོན་འདས་པའི་སངས་རྒྱས་གྲངས་མ་མཆིས་པའི་སྤྱན་སྔ་དང ། འདུས་པ་གྲངས་མ་མཆིས་པ་དང ། ཚོགས་དཔག་ཏུ་མ་མཆིས་པའི་ནང་དུ་ཆོས་རྣམ་པ་སྣ་ཚོགས་དང ། དོན་རྣམ་པ་སྣ་ཚོགས་དང ། མཚན་མ་རྣམ་པ་སྣ་ཚོགས་དང ། ཐེག་པ་རྣམ་པ་སྣ་ཚོགས་ཀྱང་ཐོས་ན་ངོ་མཚར་རྨད་དུ་བྱུང་བའི་ཆོས་དེ་ལྟ་བུ་དང ། ངོ་མཚར་རྨད་དུ་བྱུང་བའི་དོན་དེ་ལྟ་བུ་དང ། ངོ་མཚར་རྨད་དུ་བྱུང་བའི་མཚན་མ་དེ་ལྟ་བུ་དང ། ངོ་མཚར་རྨད་དུ་བྱུང་བའི་ཐེག་པ་ཆེན་པོ་དེ་ལྟ་བུ་ནི་ཐོས་མ་མྱོང་སྟེ། དེང་ཐོས་པ་འདི་དག་རྒྱུན་མི་འཆད་པར་བགྱིའོ། །བཅོམ་ལྡན་འདས་དེ་བཞིན་གཤེགས་པ་ནི་རྟག་ལ་ཆོས་དང་དགེ་འདུན་ནི་འགག་པར་མི་འགྱུར་ཏེ། ཁམས་གསུམ་གྱི་སེམས་ཅན་རང་སྐྱེ་ཞིང་རང་འགག་པར་གྱུར་ནས་དེ་བཞིན་གཤེགས་པ་མ་མཐོང་བ་དང ། ཆོས་དང་དགེ་འདུན་མ་མཐོང་བས་མྱ་ངན་ལས་འདས་ཏེ་འགག་པར་འགྱུར་རོ་ཞེས་བརྗོད་དོ། །བདག་ཅག་དེ་བཞིན་གཤེགས་པའི་བྱིན་གྱི་བརླབས་ཀྱིས་ཁམས་གསུམ་དུ་བགྲོད་ཅིང་སོ་སོའི་སྐྱེ་བོའི་རྗེས་སུ་སྙེགས་ཏེ། མྱ་ངན་ལས་འདའོ་ཞེས་བླ་དགས་སུ་བརྗོད་པ་ལགས་སོ། །བཅོམ་ལྡན་འདས་དེ་བཞིན་གཤེགས་པ་མྱ་ངན་ལས་འདས་པའི་སླད་ན། བདག་ཅག་རྣམས་ཀྱིས་ཐེག་པ་བརྒྱད་ཁྲིས་སངས་རྒྱས་ཀྱི་ཡེ་ཤེས་སུ་ཆུད་པར་སྐྱེས་བུ་ཆེན་པོའི་ཆོས་ཀྱི་སྐུ་ཐོབ་པར་བགྱིའོ། །ཆོས་ཀྱི་ཁམས་སུ་གཏོགས་པའི་སེམས་ཅན་རྣམས་ལ་མདོ་སྡེ་འདི་སྤེལ་བར་བགྱིའོ། །གཟུང་ཞིང་འཆང་བ་དང ། ཀློག་པ་དང ། ཁ་ཏོན་དུ་འདོན་པར་བགྱིའོ། །ཇི་ལྟར་བཤད་པ་བཞིན་བསྒོམས་ཏེ། དུས་གཅིག་ཏུ་སངས་རྒྱས་སུ་འགྲུབ་པར་བགྱིའོ། །མི་གཏོང་བར་བགྱིའོ། །བཅོམ་ལྡན་འདས་རིགས་ཀྱི་བུ་དང ། རིགས་ཀྱི་བུ་མོ་གང་ལ་ལས་བཅོམ་ལྡན་འདས་མྱ་ངན་ལས་འདས་པའི་སླད་ན་སྙིགས་མ་ཅན་གྱི་དུས་སུ་མདོ་སྡེ་འདི་གཟུངས་སུ་བཟུང་ཞིང་ཀློག་གམ། ཁ་ཏོན་དུ་བགྱིད་དམ། གླེགས་བམ་དུ་ཡི་གེར་འབྲི་འམ།
62.250b
ཡི་གེར་འབྲིར་འཇུག་ན་བསོད་ནམས་ཇི་ཙམ་ཞིག་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་ལ་ལས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནོར་བུ་རིན་པོ་ཆེས་ཡོངས་སུ་བཀང་སྟེ་སྦྱིན་པ་བྱིན་པ་བས་མདོ་སྡེ་འདིའི་མིང་ཙམ་ཐོས་པས་བསོད་ནམས་དཔག་ཏུ་མེད་པར་ཆེའོ། །གང་ལ་ལས་འཇིག་རྟེན་གྱི་ཁམས་སྟོང་ཕྲག་བཅུར། ནོར་བུ་རིན་པོ་ཆེས་ཡོངས་སུ་བཀང་སྟེ་སྦྱིན་པ་བྱིན་པ་བས་མདོ་སྡེ་འདི་གླེགས་བམ་དུ་བྱས་ཏེ་འཆང་བ་ཙམ་གྱིས་བསོད་ནམས་དཔག་ཏུ་མེད་པར་ཆེའོ། །གང་ལ་ལས་ཕྱོགས་བཅུའི་འཇིག་རྟེན་གྱི་ཁམས་སུ་ནོར་བུ་རིན་པོ་ཆེས་ཡོངས་སུ་བཀང་སྟེ་སྦྱིན་པ་བྱིན་པ་བས་ཐེག་པ་ཆེན་པོ་ཕྱོགས་སུ་རྒྱས་པའི་མདོ་སྡེ་འདིའི་ནང་ན་ཡི་གེ་འབྲུ་གཅིག་གམ། ཚིགས་བཅད་གཅིག་གམ། ཤུ་ལོ་ག་གཅིག་འབྲི་འམ། འབྲིར་འཇུག་ན་དེ་བས་ཀྱང་བསོད་ནམས་དཔག་ཏུ་མེད་པར་ཆེའོ། །འཇིག་རྟེན་གྲངས་མེད་པའི་ཁམས་སུ་རིན་པོ་ཆེས་ཡོངས་སུ་བཀང་སྟེ་སྦྱིན་པ་བྱིན་པ་བས་སེམས་ཐག་པ་ནས་མདོ་སྡེ་འདི་ཤུ་ལོ་ག་གཅིག་ཀློག་གམ་ཁ་ཏོན་བྱས་ན་བསོད་ནམས་དེ་བས་ཀྱང་དཔག་ཏུ་མེད་པར་ཆེའོ། །སྟོང་ཁམས་ཡོངས་སུ་གང་བའི་སེམས་ཅན་གྱི་སྲོག་གི་སྐྱབས་བྱིན་པ་བས་ཀྱང་གང་གིས་སེམས་ཐག་པ་ནས་མདོ་སྡེ་འདིའི་དོན་ཚིག་གཅིག་ཤེས་ཏེ། གཞན་ལ་ཚིག་གཅིག་གམ། ཤུ་ལོ་ག་གཅིག་གི་དོན་བསྟན་ན་བསོད་ནམས་དེ་བས་ཀྱང་དཔག་ཏུ་མེད་པར་ཆེའོ། །དེ་ཅིའི་ཕྱིར་ཞེ་ན། ཟང་ཟིང་གི་སྦྱིན་པ་ནི་ཉན་ཐོས་ཀྱི་སྦྱིན་པ་ཡིན་ཏེ། ཚེ་དང་ལོངས་སྤྱོད་བསྐྱེད་པར་ཟད་ཀྱི་འཁོར་བ་ལས་མི་ཐར་རོ། །ཐེག་པ་ཆེན་པོ་ཆོས་ཀྱི་སྦྱིན་པ་ནི་སེམས་ཅན་རྣམས་ཀྱི་བྱང་ཆུབ་ཀྱི་རྩ་བ་བསྐྱེད་པ་དང ། ཐེག་པ་གསུམ་གྱི་ཡེ་ཤེས་ཀྱི་སྲོག་སྡུད་པར་བྱེད་པའོ། །རིགས་ཀྱི་བུ་མདོ་སྡེ་འདི་ཀློག་པ་དང་འཆང་བ་ནི་སྔོན་སྡིག་ཅན་མ་རུངས་པ་ཡིན་ན་ཡང་ད་དགེ་བ་དང་ལྡན་པའོ། །སྔོན་སྡུག་བསྔལ་ཅན་ཡིན་ན་ཡང་ད་ལོངས་སྤྱོད་དང་ལྡན་པའོ། །སྔོན་འཆིང་བ་ཅན་ཡིན་ན་ཡང་ད་གྲོལ་ཐར་པ་དང་ལྡན་པར་འགྱུར་རོ། །སྔོན་མ་རྒལ་བ་ཡིན་ན་ཡང་ད་རྒལ་བ་ཅན་ནོ། །སྔོན་བླུན་པ་ཞིག་ཡིན་ན་ཡང་ད་ནི་སློབ་དཔོན་དུ་ཆུད་པའོ། །སྔོན་ཟག་པ་དང་བཅས་པ་ཞིག་ན
62.251a
ཡང་ད་ནི་ཟག་པ་མེད་པའོ། །སྔོན་སོ་སོའི་སྐྱེ་བོའི་སྤྱོད་པ་ཅན་ཞིག་ཡིན་ན་ཡང་ད་ནི་འཕགས་པའི་སྤྱོད་པ་དང་ལྡན་པའོ། །སྔོན་ཆོས་ལམ་དང་འགལ་བ་ཞིག་ཡིན་ན་ཡང་ད་ནི་འཕགས་པའི་ལམ་ལ་ཆུད་པའོ། །ལུས་སྐྱེ་བོའི་ལུས་ཅན་ཡིན་ན་ཡང་མདོ་སྡེ་འདི་ཀློག་པ་དང་འཆང་བའི་ཕྱིར་བློ་ནི་འཕགས་པའི་ཡེ་ཤེས་དང་འདྲའོ། །སྔོན་ཉོན་མོངས་པ་ཅན་ཞིག་ཡིན་ན་ཡང་ད་མདོ་སྡེ་འདི་ཀློག་པ་དང་འཆང་བའི་ཕྱིར་སངས་རྒྱས་བཅོམ་ལྡན་འདས་དང་འདྲ་བར་མྱ་ངན་ལས་འདའ་བ་ཅན་ནོ་ཞེས་བཀའ་ནས། བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་བཤད་པ་ལྟར་ན། སྔོན་སོ་སོའི་སྐྱེ་བོ་ལགས་ཀྱང་ད་ནི་འཕགས་པའི་སྤྱོད་པ་དང་ལྡན་ནོ་ཞེས་བགྱི་བ་དང ། སྔོན་ཉོན་མོངས་པ་ཅན་ལགས་ན་ཡང་ད་ནི་མདོ་སྡེ་འདི་ཀློག་པ་དང ། འཆང་བས་སངས་རྒྱས་བཅོམ་ལྡན་འདས་དང་འདྲ་བར་མྱ་ངན་ལས་འདའ་བ་ཅན་ནོ། །ཞེས་བྱུང་ན་ཚུལ་ཁྲིམས་ཞིག་པ་དང ། མཚམས་མ་མཆིས་པར་སྤྱད་པ་དང ། དམ་པའི་ཆོས་ལ་སྐུར་པ་བཏབ་པ་ཡང་ཅི་མདོ་སྡེ་འདི་ཀློག་པ་ཙམ་གྱིས་ཉོན་མོངས་པ་སྤོང་སྟེ། མྱ་ངན་ལས་འདའ་བ་དང་འཐུན་པ་ཞིག་ལགས་སམ། དོན་དེ་རིག་པར་དཀའ་ཞིང་མཆིས་ན་བཅོམ་ལྡན་འདས་བྱེ་བྲག་ཕྱེད་པར་བསྟན་དུ་གསོལ་ཞེས་བགྱིས་པ་དང ། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་ལེགས་པར་ཞུས་པས་ངས་ཀྱང་ལེགས་པར་བཤད་པར་བྱའོ། །རིགས་ཀྱི་བུ་སེམས་ཅན་ཐམས་ཅད་སངས་རྒྱས་མ་མཐོང་བའི་ཕྱིར་ལོག་པར་ལྟ་བ་དང ། ཚུལ་ཁྲིམས་ཉམས་པ་དང ། དམ་པའི་ཆོས་ལ་སྐུར་པ་བཏབ་པ་ཡིན་ནོ། །སངས་རྒྱས་འཇིག་རྟེན་དུ་བཞུགས་པ་ན་ཚུལ་ཁྲིམས་ཉམས་པ་དང ། དམ་པའི་ཆོས་ལ་སྐུར་པ་བཏབ་པ་ཡོང་མེད་དོ། །དེ་ཇི་ལྟ་ཞེ་ན། དཔེར་ན་དྲི་མ་མི་གཅིག་ལ་བུ་གཅིག་པུ་ཞིག་ཡོད་པ་དེ་ཤིན་དུ་འང་ཕངས་ཤིང་སྡུག་ན་ཕ་ཡོད་པའི་ཚེ་ན་ནི་ཉིན་མཚན་དུ་བསྟན་ཅིང་བསླབས་པས་བྱས་སོ་ཅོག་ལ་འགལ་བ་མེད་བུ་ཡང་ཕ་ལ་སྲི་ཞུ་ཆེ་སྟེ། ཕའི་ངག་ཉན་ཅིང་ཉེས་པ་ཡོང་མ་བྱུང
62.251b
ངོ ། །རེ་ཤིག་དུས་གཅིག་ན་ཕ་ལམ་རིང་པོར་འདྲོན་དུ་སོང་བ་ལས་རིང་དུ་ལོན་ཏེ་སླར་མ་འཁོར་བའི་བར་དུ་བུ་དེ་ཕའི་བསྟན་ངག་བརྗེད་ནས་ཉེས་པ་ཡང་མང་དུ་བྱུང་ངོ ། །ཕ་རིང་དུ་ལོན་ཏེ་སླར་མ་འཁོར་བའི་ཕྱིར་ཕ་ཤི་བ་སྐད་དུ་བརྗོད་དེ་ངུད་མོ་དག་བྱེད་ཅིང་ཁད་ཀྱིས་འཆལ་དུ་བྱེད་དོ། །མྱ་ངན་གྱིས་ནོན་ཏེ་སེམས་སྟོར་ནས་ཕའི་བསྟན་པ་ཡང་བརྗེད་དེ་ཆོས་ལ་སྐུར་པ་དང་འདྲ་བར་འགལ་བ་ཤ་སྟག་བྱེད་དོ། །ཕ་དེ་ཡུན་རིང་མོ་ཞིག་ལོན་ནས་དུས་གཅིག་ན་སླར་ཁྱིམ་དུ་ལོག་པའི་ཚེ་བུ་ཡང་ཤིན་དུ་དགའ་བ་དང་ཚིམ་པ་སྐྱེས་ནས་ཕའི་བསྟན་ངག་ཀྱང་དྲན་ཏེ་གཟུངས་སུ་བཟུང་ནས་ཉེས་པ་ཡང་མ་བྱུང་ངོ ། །ཕ་མཐོང་བའི་ཕྱིར་ཕ་མ་ཤི་བར་ཡང་ཡིད་ཆེས་ནས་ལོག་པར་ལྟུང་བ་ཅན་ཞེས་ཀྱང་མི་བྱའོ། །ཕའི་བཀའ་བཞིན་དུ་མི་འགལ་བར་སྤྱད་པས་སྐུར་པ་ཅན་ཞེས་ཀྱང་མི་བྱ་སྟེ། རིགས་ཀྱི་བུ་དྲ་མ་ཞེས་བྱ་བ་ནི་དེ་བཞིན་གཤེགས་པའོ། །བུ་གཅིག་པུ་ཞེས་པ་ནི་སེམས་ཅན་ཐམས་ཅད་དོ། །ཕས་བསྟན་ཅིང་བསླབས་ཤེས་བྱ་བ་ནི་ཚུལ་ཁྲིམས་སོ། །ལམ་རིང་པོར་སོང་ཞེས་བྱ་བ་ནི་དེ་བཞིན་གཤེགས་པ་ཁམས་གཞན་དུ་ཆོས་ཀྱི་འཁོར་ལོ་བསྐོར་བར་གཤེགས་པའོ། །ཕ་མ་མཐོང་ཞེས་བྱ་བ་ནི་ཚེ་འདས་སོ་ཞེས་བརྗོད་པའོ། །མྱ་ངན་གྱིས་ནོན་པ་ནི་སྒྲིབ་པས་བསྒྲིབས་པའོ། །གཟུངས་སུ་མི་འཛིན་པ་ནི་ཚུལ་ཁྲིམས་ཞིག་པའོ། །ཤི་བ་སྐད་བརྗོད་པའི་ཕྱིར་སྡིག་སྤྱོད་པའོ། །དོན་འཁྲུལ་པའི་ཕྱིར་སྐུར་པ་བཏབ་པའོ། །དེ་བཞིན་གཤེགས་པས་ཁམས་གཞན་ནས་སླར་གཤེགས་ཏེ། སེམས་ཅན་གྱིས་མཐོང་བ་ནི་སངས་རྒྱས་མྱ་ངན་ལས་མི་འདའ་བར་ཡིད་ཆེས་པའོ། །སངས་རྒྱས་ཀྱིས་ཆོས་བསྟན་ནས་སེམས་ཀྱི་རང་བཞིན་སླར་རྙེད་པས་ཚུལ་ཁྲིམས་མི་ཉམས་པའོ། །མྱ་ངན་ལས་མི་འདའ་བར་ཡིད་ཆེས་པ་ནི་ལྟུང་བ་མེད་པའོ། །བསྟན་པ་དང་མི་འགལ་བར་སྤྱོད་ཅིང་དོན་ཤེས་པ་ནི་ཆོས་ལ་མི་སྐུར་པ་ཡིན་ནོ། ། རིགས་ཀྱི་བུ་མདོ་སྡེ་འདི་ཀློག་པ་དང་འཆང་བ་ནི་འཁོར་བ་གྲངས་མེད་པའི་ཉོན་མོངས་པའི་སྡིག་ལྕི་བ་ཀུན་འབྱང་བར་འགྱུར་རོ། །གང་མདོ་སྡེ་འདི་ཐོས་པ་ནི་སངས་རྒྱས་ཀྱི་མཚན་ཐོས་པའོ། །
62.252a
གང་མདོ་སྡེ་འདི་མཐོང་བ་ནི་སངས་རྒྱས་ཀྱི་ཞལ་མཐོང་བའོ། །གང་མདོ་སྡེ་འདི་འཛིན་པ་ནི་སངས་རྒྱས་ཀྱི་སྐུ་འཛིན་པའོ། །གང་མདོ་སྡེ་འདི་སྤྱོད་པ་ནི་སངས་རྒྱས་ཀྱི་མཛད་པ་སྤྱོད་པའོ། །གང་མདོ་སྡེ་འདི་བཤད་པ་ནི་སངས་རྒྱས་ཀྱི་མཛད་པ་བཤད་པའོ། །གང་མདོ་སྡེ་འདིའི་དོན་ཤེས་པ་ནི་སངས་རྒྱས་ཀྱི་དོན་ཤེས་པའོ། །གང་སངས་རྒྱས་ཀྱི་མཛད་པ་སྤྱོད་པ་དང ། སངས་རྒྱས་ཀྱི་དོན་ལེགས་པར་ཁྲོལ་བ་དེ་ནི་ཉོན་མོངས་པ་གཏན་མེད་པར་འགྱུར་རོ། །དེ་ཅིའི་ཕྱིར་ཞེ་ན། མདོ་སྡེ་འདི་ལག་ཏུ་འོངས་པའི་ཕྱིར་ཉོན་མོངས་པ་ཡོངས་སུ་སྤང་བར་འགྱུར་བའོ། །རིགས་ཀྱི་བུ་བསྐལ་པ་བརྒྱད་ཁྲི་ལ་ཉིན་ཞག་གཅིག་ཏུ་བརྩི་བ། ཞག་སུམ་བཅུ་ལ་ཟླ་བ་གཅིག་།ཟླ་བ་བཅུ་གཉིས་ལ་ལོ་གཅིག་ཏུ་བསྒྲེས་པའི་བསྐལ་པ་བརྒྱ་སྟོང་བྱེ་བ་ཁྲག་ཁྲིག་འདས་པ་ལ་སངས་རྒྱས་གཅིག་འབྱུང་བ་དང་ཕྲད་དོ། །ཡང་བསྐལ་པ་གྲངས་དེ་དང་འདྲ་བ་འདས་ནས་སངས་རྒྱས་གཅིག་འབྱུང་བ་དང་ཕྲད་ཀྱང་མདོ་སྡེ་འདི་དང་ཕྲད་པ་ནི་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་དང་ཕྲད་པ་དང་འདྲའོ། །དེའི་ཕྱིར་བློ་དང་ལྡན་པས་མདོ་སྡེ་འདི་བླང་བ་དང ། འཆང་བ་དང ། ཀློག་པ་དང ། ཁ་ཏོན་དུ་འདོན་པ་དང ། ཡི་གེར་འབྲི་བ་དང ། འབྲིར་འཇུག་པ་དང ། གཞན་ལ་ཡང་བསྟན་ན་ལོག་པར་ལྟ་བ་དང ། མ་རིག་པའི་ཉོན་མོངས་པ་དང ། ཟག་པ་དང་བཅས་པའི་སྡིག་པ་ཡོངས་སུ་འབྱང་བར་འགྱུར། བསོད་ནམས་ཀྱི་ཞིང་ལ་གནས་པར་འགྱུར། འཇིག་རྟེན་གྱི་མཆོད་ཡོན་དཔག་ཏུ་མེད་པ་ཡང་འཇུ་བར་འགྱུར་རོ། །ཞེས་བཀའ་སྩལ་པ་དང ། ནམ་མཁའི་སྙིང་པོས་གསོལ་པ། བཅོམ་ལྡན་འདས་རང་སངས་རྒྱས་ཀྱང་འཇིག་རྟེན་གྱི་ཡོན་འཇུ་བ་སྐད་མི་གདའ་ན་སོ་སོའི་སྐྱེ་བོ་ལྟ་བ་ཞིག་ཡོན་འཇུ་བར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། རང་སངས་རྒྱས་ཡོན་མི་འཇུ་མི་སྲིད་དེ། སེམས་ཅན་ལ་ཆོས་བཤད་ཅིང་བསྒྲལ་མི་ནུས་ན་ཡང་བསམ་གཏན་དང་ཏིང་ངེ་འཛིན་ལ་འཇུག་པས་ཏིང་ངེ་འཛིན་ལས་ལངས་ཏེ། རྫུ་འཕྲུལ་ཆེན་པོ་རྣམ་པར་སྤྲུལ་ཅིང་སེམས་ཅན་རྣམས་སྒྲོལ་བར་བྱེད་པས་མཆོད་ཡོན་འཇུ་བར་འགྱུར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས
62.252b
དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་མདོ་སྡེ་ཁ་ཅིག་ལས་བྱུང་བ་ལྟ་བ་ལོག་པ་དང ། ཚུལ་ཁྲིམས་ཞིག་པ་རྣམས་ཁམས་གཅིག་ཏུ་ལྷན་ཅིག་གནས་སུ་ཡང་མི་རུང་བ་དང ། ཆུ་ཀླུང་གཅིག་ལ་ཆབ་འཚལ་དུ་ཡང་མི་རུང་ངོ་ཞེས་བྱུང་ལ་གསོ་སྦྱོང་གི་ཚེ་གང་ཟག་དེ་འཕགས་པའི་ལམ་སྟོར་བ་ལགས་ཏེ། དགེ་འདུན་གྱི་ནང་དུ་འང་མི་ཆུད་ཅེས་འབྱུང་ན་ཅིའི་སླད་དུ་དེང་འདིར་ཚུལ་ཁྲིམས་ཞིག་པ་རྣམས་ཀྱང་མཆོད་ཡོན་འཇུ་བར་འགྱུར་ཞེས་གསུངས། གལ་ཏེ་དེ་དག་མཆོད་ཡོན་འཇུ་བར་འགྱུར་ན་ནི་དེ་བཞིན་གཤེགས་པ་དང་ཡང་ཐ་མི་དད་ལ། འཕགས་པ་དགྲ་བཅོམ་པ་དང ། རང་སངས་རྒྱས་དང་འདྲ་ན་བཅོམ་ལྡན་འདས་དེ་ཙམ་ཞིག་བྱེ་བྲག་ཕྱེད་པར་བཤད་པར་སྨོན། བདག་ཀྱང་དེ་ཐོས་ནས་དེ་བཞིན་དུ་སེམས་ཅན་རྣམས་ལ་བསྟན་པར་བགྱིའོ། །རྣམ་པར་དགྲོལ་བར་བགྱིའོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱེད་ལ་སོགས་པ་དེང་འདིར་བྱམས་པ་དང ། སྙིང་རྗེ་ཕུན་སུམ་ཚོགས་པར་ལྡན་པས་སེམས་ཅན་རྣམས་ལ་སྙིང་བརྩེ་བར་བསམས་ཏེ། དོན་དེ་ཞུ་བ་ནི་རབ་ཏུ་འང་ལེགས་ཏེ་ངས་ཀྱང་བྱེ་བྲག་ཕྱེད་པར་བཤད་ཀྱིས་ལེགས་པར་སོམས་ལ་ཉོན་ཅིག་།ཆོས་ཀྱི་རྣམ་གྲངས་འདིའི་སྤྱོད་ཡུལ་ནི་ཉན་ཐོས་དང ། རང་སངས་རྒྱས་རྣམས་ཀྱིས་རིག་པར་ཡང་མི་འགྱུར་ལ། བདུད་དང ། མུ་སྟེགས་དང ། སོ་སོའི་སྐྱེ་བོ་རྣམས་ཀྱི་བསམ་པའི་གནས་ཀྱང་མ་ཡིན་ཏེ། དེ་ནི་སངས་རྒྱས་མཁྱེན་པ་དང་ཁྱོད་ཀྱི་ཁོང་དུ་ཆུད་པར་ཟད་དོ། །རིགས་ཀྱི་བུ་ངས་རྟག་ཏུ་བྱང་ཆུབ་ཏུ་སེམས་བསྐྱེད་པ་རྣམས་ལ་བསྟན་པ། སེམས་ཅན་བཟང་ངན་རྣམ་པར་མི་རྟོག་པར་སྦྱིན་པ་བྱས་ན་བསོད་ནམས་ཀྱི་ཚོགས་ཡོངས་སུ་འགྲུབ་པོ་ཞེས་བཤད་དེ། བྱོལ་སོང་ལ་སྦྱིན་པ་བྱིན་པས་ནི་བསོད་ནམས་ཀྱི་ཡོན་ཏན་བརྒྱ་ཐོབ་པར་འགྱུར་རོ། །ལོག་སྤྱོད་ལ་སྦྱིན་པ་བྱིན་པས་ནི་བསོད་ནམས་ཀྱི་ཡོན་ཏན་ལན་སྟོང་ཐོབ་པར་འགྱུར་རོ། །རིགས་ཀྱི་བུ་དགེ་བའི་རྩ་བ་རྒྱུན་ཆད་པ་ནི་འཆི
62.253a
འཕོས་ནས་ལོག་སྤྱོད་ཀྱི་རྒྱུད་དུ་འགྲོའོ། །དྲིན་མི་གཟོ་བ་དང་ཁྲེལ་མེད་པ་ནི་འཆི་འཕོས་ན་བྱོལ་སོང་གི་རྒྱུད་དུ་འགྲོའོ། །ལོག་སྤྱོད་ཀྱི་འབྲས་བུ་རྣམ་པར་སྨིན་པ་ཡང་བསོད་ནམས་ཅན་གྱི་ཡོན་འཇུ་ན་མདོ་སྡེ་འདི་ཀློག་པ་དང ། འཆང་བའི་གང་ཟག་ལྟ་ཞིག་ཅི་སྨོས། དེ་བས་ན་ཐེག་པ་ཆེན་པོའི་མདོ་སྡེ་ཐར་པ་ཆེན་པོའི་ཕྱོགས་སུ་རྒྱས་པའི་མཐུ་དང་བྱིན་གྱི་བརླབས་བསམ་གྱིས་མི་ཁྱབ་བོ། །ཚུལ་ཁྲིམས་འཇིག་པ་དང ། མཚམས་མེད་པར་འགྲོ་བ་དང ། དམ་པའི་ཆོས་ལ་སྐུར་པ་དང ། ལོག་པར་ལྟ་བ་དང ། ཉོན་མོངས་པ་ཅན་གྱི་སྡིག་པ་ཡོངས་སུ་འབྱང་བར་བྱེད་པས་ན་མཆོད་ཡོན་ཡང་འཇུ་བར་ནུས་སོ། །བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའི་སྙིང་པོས་གསོལ་པ། བཅོམ་ལྡན་འདས་དེ་བཞིན་གཤེགས་པ་ཡང་བསམ་གྱིས་མི་ཁྱབ། ཐར་པ་ཆེན་པོ་ཕྱོགས་སུ་རྒྱས་པའི་མཐུ་དང་བྱིན་ཡང་བསམ་གྱིས་མི་ཁྱབ། མདོ་སྡེ་འདི་འཛིན་པ་དང ། ཀློག་པའི་གང་ཟག་དེའི་ཡོན་ཏན་ཡང་བསམ་གྱིས་མི་ཁྱབ་བོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །རིགས་ཀྱི་བུ་དེ་དེ་བཞིན་ནོ། །ཁྱོད་ཀྱིས་བཤད་པ་བཞིན་ཏེ། ཡོན་ཏན་བསམ་གྱིས་མི་ཁྱབ་པ་མཐའ་ཡས་པ་ཐོབ་པར་འགྱུར་རོ་ཞེས་གསོལ་པ་དང ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ངས་དྲན་པ་སྔོན་འདས་པའི་བསྐལ་པ་རྣམ་པར་དག་པ་ཞེས་བྱ་བ་ན་ང་དེའི་ཚེ་སངས་རྒྱས་བྱེ་བ་ཁྲག་ཁྲིག་དགུ་བཅུ་རྩ་གཉིས་ལ་མཆོད་པ་ཕུལ་ཏེ། བསྙེན་བཀུར་བྱས་ན་ཡང་ཉན་ཐོས་ཀྱི་ཚུལ་དུ་སྤྱད་པས་ཉེས་སྐྱོན་མང་དུ་བྱུང་བ་དང ། ཚུལ་ཁྲིམས་ཉམས་པ་དཔག་ཏུ་མེད་པ་དག་བྱུང་བའི་ཕྱིར་དེ་བཞིན་གཤེགས་པ་དེ་དག་གིས་ཀྱང་ང་ལ་ལུང་བསྟན་པར་མ་གྱུར་ཏོ། །བསྐལ་པ་དེ་འདས་ནས་བསྐལ་པ་མཐོང་བར་མོས་པ་ཞེས་བྱ་བ་ན་ང་དེའི་ཚེ་སངས་རྒྱས་བྱེ་བ་ཕྲག་བཞི་བཅུ་ལ་མཆོད་པ་ཕུལ་ཏེ། བསྙེན་བཀུར་བྱས་ན་ཡང་སངས་རྒྱས་དེ་དག་གིས་ང་ལ་ལུང་མ་བསྟན་ཏོ། །བསྐལ་པ་དེ་འདས་ནས་ཀྱང་བསྐལ་པ་ཚངས་པའི་དབྱངས་ཤེས་བྱ་བ་ན་ང་དེའི
62.253b
ཚེ་སངས་རྒྱས་བྱེ་བ་ཕྲག་ཉི་ཤུ་རྩ་གཉིས་ལ་མཆོད་པ་ཕུལ་ཏེ། བསྙེན་བཀུར་བྱས་ན་ཡང་སངས་རྒྱས་དེ་དག་གིས་ང་ལ་ལུང་མ་བསྟན་ཏོ། །བསྐལ་པ་དེ་འདས་ནས་ཡང་བསྐལ་པ་སེམས་དགའ་ཞེས་བྱ་བ་ན་ང་དེའི་ཚེ་སངས་རྒྱས་བརྒྱད་ཁྲི་བཞི་སྟོང་ལ་མཆོད་པ་ཕུལ་ཏེ། བསྙེན་བཀུར་བྱས་ན་ཡང་སངས་རྒྱས་དེ་དག་གིས་ལུང་མ་བསྟན་ཏོ། །བསྐལ་པ་དེ་འདས་ནས་ཡང་བསྐལ་པ་སྡུག་བསྔལ་སྐྱབས་ཞེས་བྱ་བ་དང ། འཇིག་རྟེན་རྣམ་པར་བརྒྱན་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སྦྱིན་པ་ཆེན་པོ་ཞེས་བྱ་བ་བྱུང་སྟེ། ང་དེའི་ཚེ་སངས་རྒྱས་བྱེ་བ་ཕྲག་བཞི་བཅུ་ལ་མཆོད་པ་ཕུལ་ཏེ། བསྙེན་བཀུར་བྱས་ནས་གདོད་མདོ་སྡེ་འདིའི་མིང་ཐོས་ཏེ། ཉོན་མོངས་པ་ཡོངས་སུ་སྤངས་ཀྱིས་ཀྱང་མདོ་སྡེ་འདི་ད་དུང་མ་མཐོང་སྟེ། ང་དེའི་ཚེ་དེའི་དུས་ན་མཆོད་པའི་ཡོ་བྱད་བསམ་གྱིས་མི་ཁྱབ་པ་རྣམ་པ་སྣ་ཚོགས་བསྩགས་ཏེ། མཆོད་པ་ཕུལ་ན་ཡང་དེ་བཞིན་གཤེགས་པ་དེ་དག་གིས་ཀྱང་ང་ལ་ལུང་བསྟན་པར་མ་གྱུར་ཏོ། །རིགས་ཀྱི་བུ་ང་སྔོན་བསྐལ་པ་དེ་སྙེད་དུ་སངས་རྒྱས་དེ་སྙེད་ལ་མཆོད་པ་དེ་སྙེད་ཅིག་ཕུལ་བ་དང ། བསྙེན་བཀུར་དང་བསྟོད་པ་བྱས་ནས་ཉོན་མོངས་པ་རྣམ་པར་སྤངས་ཏེ། ཉན་ཐོས་ཀྱི་སྡོམ་པ་དང ། ཚུལ་ཕུན་སུམ་ཚོགས་པ་ཚངས་པར་སྤྱད་ཅིང་སྦྱིན་པ་བྱིན་པ་དང ། ཚུལ་ཁྲིམས་བསླབ་པ་དང་ང་རྒྱལ་དང ། ཞེ་སྡང་དང ། གཏི་མུག་སྤངས་ཏེ། སྦྱངས་པའི་ཡོན་ཏན་སྤྱད་པ་དང ། བཟོད་པ་དང ། བྱམས་པའི་སེམས་དང ། ཇི་ལྟར་ཐོས་པ་བཞིན་བརྩོན་འགྲུས་སུ་བཤད་པ་དང ། ཐོས་སོ་ཅོག་ཐམས་ཅད་མི་བརྗེད་པ་དང ། འདུ་འཛི་སྤངས་ཏེ་དབེན་པ་ལ་གནས་པ་དང ། བསམ་གཏན་དང་ཏིང་ངེ་འཛིན་ལ་འཇུག་པ་དང ། བསམ་གཏན་ལས་བྱུང་ནས་ཆོས་ཉན་པ་དང ། ཀློག་པ་དང ། ཁ་ཏོན་དུ་འདོན་པ་དང ། བསམ་པ་ལ་སོགས་པ་བྱས་ཀྱང་རྒྱལ་བ་དེ་དག་གིས
62.254a
ང་ལ་ལུང་མ་བསྟན་སྟེ། དེ་ཅིའི་ཕྱིར་ཞེ་ན། སྡོམ་པ་མནོས་སོ་ཅོག་འཇིག་པ་དང ། ཉམས་པ་མང་དུ་བྱུང་བའི་ཕྱིར་རོ། །ཉན་ཐོས་དང ། རང་སངས་རྒྱས་ཀྱི་ཐེག་པ་ལ་ཆགས་པའི་ཕྱིར་རོ། །ཐེག་པ་ཆེན་པོའི་མདོ་སྡེ་ཐར་པ་ཆེན་པོ་ཕྱོགས་སུ་རྒྱས་པ་འདི་མ་ཐོས་པའི་ཕྱིར་རོ། །དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཉན་ཐོས་དང ། རང་སངས་རྒྱས་ཀྱི་སྤྱོད་ལམ་སྤང་བར་བྱ། ཐེག་པ་ཆེན་པོའི་མདོ་སྡེ་ཐར་པ་ཆེན་པོ་ཕྱོགས་སུ་རྒྱས་པ་བསྒོམ་པར་བྱས་ན་ལུང་བསྟན་པ་ཐོབ་པར་འགྱུར་རོ། །གལ་ཏེ་ངས་བསྐལ་པ་གཅིག་ནས་བསྐལ་པ་གཅིག་གི་བར་དུ་སངས་རྒྱས་ཀྱི་མཚན་བཤད་ན་ཡང་རྫོགས་པར་མི་ནུས་ཏེ། རིགས་ཀྱི་བུ་བསྐལ་པ་དེ་དག་འདས་པའི་འོག་ཏུ་དེ་བཞིན་གཤེགས་པ་འོད་མི་འགྱུར་གྱིས་ཚོགས་ཆེན་པོ་དཔག་ཏུ་མེད་པ་ལ་ཐེག་པ་ཆེན་པོའི་མདོ་སྡེ་ཐར་པ་ཆེན་པོ་ཕྱོགས་སུ་རྒྱས་པའི་ཆོས་ཀྱི་རྣམ་གྲངས་འདི་བཤད་པ་དེར་མཐོང་ནས་ང་དེའི་ཚེ་དེའི་དུས་ན་གདོད་ཐོས་པ་དང་མཐོང་བར་གྱུར་ཏོ། །རྒྱལ་བ་དེ་ལས་བླངས་ཏེ་འཛིན་པ་དང ། ཀློག་པ་དང ། ཁ་ཏོན་དུ་བྱ་བ་དང ། དོན་བསམ་པ་ལ་སོགས་པ་བྱས་ནས་དེ་མ་ཐག་ཏུ་ཆོས་ལ་མི་སྐྱེ་བའི་བཟོད་པ་ཐོབ་བོ། །དེ་བཞིན་གཤེགས་པ་འོད་མི་འགྱུར་གྱིས་ང་ལ་ལུང་བསྟན་པ། ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །དེ་བས་ན་རིགས་ཀྱི་བུ་ཆོས་ཀྱི་རྣམ་གྲངས་འདི་བླངས་ཏེ། འཆང་བ་དང ། ཀློག་པ་ལ་སོགས་པ་བྱས་ན་སངས་རྒྱས་ཀྱི་ས་ཡང་མྱུར་དུ་ཐོབ་པར་འགྱུར་ན། འཇིག་རྟེན་ན་ལྷ་དང་མིར་བཅས་པའི་མཆོད་ཡོན་འཇུ་བར་འགྱུར་བ་ལྟ་ཅི་སྨོས། རིགས་ཀྱི་བུ་དེའི་ཕྱིར་ངས་ཐེག་པ་ཆེན་པོའི་ཆོས་ཀྱི་རྣམ་གྲངས་ཀྱི་མཐུ་སྟོབས་རིན་པོ་ཆེའི་སྙིང་པོ་དང་འདྲ་བ་བསམ་གྱིས་མི་ཁྱབ་པ་ཚུལ་ཁྲིམས་འཇིག་པ་དང ། དབུལ་ཕོངས་པ་རྣམས་ཀྱི་ཚུལ་དང་རིན་པོ་ཆེའི་ནོར་བུ་སྦྱིན་པར་བྱེད་པ་ལ་བསྟོད་པའི་ཚིགས་སུ་བཅད་པ
62.254b
བརྗོད་པར་བྱའོ། །ཐེག་ཆེན་དཔེ་ཚད་རྒྱ་མཚོ་བཞིན། །ཐེག་པ་ཆུང་ངུ་བ་རྗེས་ཆུ། །ཐེག་ཆེན་དཔེ་ཚད་རི་རབ་ལྷུན། །ཐེག་པ་ཆུང་ངུ་གྲོག་མའི་མཁར། །ཐེག་ཆེན་དཔེ་ཚད་ཉི་ཟླ་བཞིན། །ཐེག་པ་ཆུང་ངུ་མེ་སྟག་ཙམ། །ཐེག་པ་འདི་ནི་ཐེག་ཆེན་ཡིན། །བསམ་གྱིས་མི་ཁྱབ་ཐེག་པའོ། །དཔེར་ན་ནམ་མཁའ་དང་འདྲ་བ། །སེམས་ཅན་ཐམས་ཅད་གོ་འབྱེད་དོ། །ཐེག་པ་ཐམས་ཅད་ཀུན་གྱི་ནང ། །ཐེག་པ་འདི་ལས་འདའ་བ་མེད། །ཐེག་པ་ཆེན་པོ་འདི་ནང་ནས། །ཐེག་པ་རྣམ་པ་སྣ་ཚོགས་འབྱུང ། །དཔག་པའི་གྲངས་ཤིག་ཡོད་ན་ནི། །ཐམས་ཅད་བསྒྲལ་བར་མི་ནུས་སོ། །ཐེག་པ་བླ་ན་མེད་པ་འདི། །སེམས་ཅན་ཡོངས་སུ་བསྒྲལ་ནུས་པ། །ནམ་མཁའ་འདྲ་བའི་ཐེག་ཆེན་ལ། །གང་གིས་དཔག་མེད་འདི་སྤྱད་པ། །ནམ་མཁའ་དཔག་ཏུ་མེད་པ་བཞིན། །གཟུགས་དང་དབྱིབས་ཀྱང་ཡོང་མེད་དོ། །ཐེག་པ་ཆེན་པོའང་དེ་བཞིན་ཏེ། །ཐོགས་པ་མེད་ཅིང་དཔག་ཏུ་མེད། །སེམས་ཅན་ཐམས་ཅད་དེ་དག་ཀུན། །ཐེག་པ་ཆེན་པོ་འདི་ཞོན་ལ། །ཐེག་པའི་མཚན་མ་རྣམ་རྟོག་ན། །གཏོས་རྒྱ་ཆེ་ཞིང་མང་དུ་ཤོང ། །གལ་ཏེ་ཐེག་ཆེན་ཡོན་ཏན་དང ། །ཐེག་པ་གཅིག་ཏུ་སྤྱོད་པ་ནི། །བསྐལ་པ་དཔག་མེད་རབ་བཤད་ཀྱང ། །མཐའ་རུ་རྫོགས་པར་ཡང་མི་ནུས། །ཐེག་པ་ཐམས་ཅད་ཀུན་གྱི་ནང ། །ཐེག་པ་ཆེན་པོ་དམ་པ་མཆོག་།སེམས་ཐག་ཐེག་ཆེན་འདི་བླངས་ན། །བྱང་ཆུབ་ཤིང་དྲུང་མངོན་པར་འགྲོ། །འཆིང་བ་མེད་ཅིང་ཐོགས་མེད་པ། །བླ་ན་མེད་པའི་ཐེག་པ་འདི། །ཐེག་པ་དམན་པའི་མཆོག་འགྱུར་བས། །བྱང་ཆུབ་དཀྱིལ་དུ་འདུག་པར་འོང ། །རྟེན་འབྲེལ་བཅུ་གཉིས་རྣམ་རྟག་སྟེ། །སེམས་ཅན་རྣམས་ལ་སྙིང་བརྩེའི་ཕྱིར། །ཕྱོགས་བཅུའི་སེམས་ཅན་ཐམས་ཅད་ལ། །ཐེག་ཆེན་མདོ་སྡེ་བཤད་པར་བྱ། །གང་ཞིག་ཐེག་ཆེན་ཐེག་པ་ནི། །འཕེལ་བའམ་འགྲིབ་པ་ཡོང་མེད་དེ། །ནམ་མཁའ་བཞིན་དུ་ཀུན་ཤོང་བས། །ཐེག་པ་ཆེན་པོ་བསམ་མི་ཁྱབ། །དེ་ཕྱིར་སེམས་ཅན་ཐམས་ཅད་ཀྱིས། །བརྩོན་འགྲུས་སུ་ནི་བསྒོམ་བྱ་སྟེ། །མངོན་པར་ཤེས་པ་རྣམས་དང་ནི། །ཡེ་ཤེས་ཆེན་པོ་ཐོབ་པར་བྱ། །ལྷ་ཡི་ཚོགས་དང་ལྷའི་བདུད། །མུ་སྟེགས
62.255a
ཉོན་མོངས་སེལ་འདོད་ན། །ཐེག་པ་ཆེན་པོའི་སྐྱབསོང་ལ། །མངོན་ཤེས་དྲུག་དང་ལྡན་པར་བྱོས། །རིག་པ་གསུམ་དང་རྣམ་ཐར་གསུམ། །དེས་ནི་བདུད་དང་མུ་སྟེགས་འཇོམས། །ལོག་པར་ལྟ་བ་འང་འཇིལ་བས་ན། །ཐེག་པ་ཆེན་པོ་མཆོག་ཏུ་དགོས། །ཉོན་མོངས་ཐམས་ཅད་འཇིག་པ་དང ། །དགེ་རྩ་ཕུན་སུམ་ཚོགས་འགྱུར་བས། །ཐེག་ཆེན་མཐུ་ནི་བསམ་མི་ཁྱབ། །དེ་བས་དཔག་པ་འང་རབ་ཏུ་དཀའ། །འཇིག་རྟེན་པའི་ཆོས་རྣམས་དང ། །འཇིག་རྟེན་འདས་པའི་ཆོས་ཐམས་ཅད། །སློབ་དང་མི་སློབ་དེ་དག་ཀུན། །ཐེག་པ་ཆེན་པོར་ཀུན་འདུས་སོ། །སེམས་ཅན་གང་ཞིག་ངན་འགྲོར་སྤྱོད་པ་ནི། །ལོག་པར་ལྟ་བ་དང་ནི་སྡིག་གྲོགས་བསྟེན། །གང་ཞིག་ཐེག་པ་ཆེན་པོར་མ་དད་པ། །དེས་ནི་ཉོན་མོངས་བདུད་རྣམས་འཇོམས་མི་ནུས། །དེ་རྣམས་སྤངས་ཏེ་ཐེག་ཆེན་སྐྱབས་སོང་བ། །གྲོལ་ཐར་འདོད་པས་ཐེག་པ་ཆེན་པོ་སློབ། །སྐྱེས་བུ་གང་ཞིག་དོན་འདི་ཤེས་འདོད་པ། །ཐེག་ཆེན་བཤད་པ་ཐོས་ན་དགའ་བ་སྐྱེ། །དེ་ནི་ཐེག་ཆེན་མི་ནི་ཡིན་པར་མངོན། །ཞི་གནས་སེམས་ནི་མངོན་པར་ཤེས་དང་ལྡན། །དེ་ཡང་ཐེག་ཆེན་དབང་གིས་རྣམ་པར་བརྒྱན། །གང་ཞིག་ཐེག་པ་ཆེན་པོར་སྤྱོད་ནུས་པ། །དེ་ནི་དཀོན་མཆོག་གསུམ་གྱི་རིགས་མི་ཆད། །གང་ཞིག་དཀོན་མཆོག་གསུམ་ལ་ཕྱོགས་པ་ནི། །དེ་ནི་བསོད་ནམས་དཔག་མེད་ཐོབ་པའོ། །ཕྱོགས་བཅུའི་འཇིག་རྟེན་ཁམསུ་ཕྱིན་པ་དང ། །ཕྱོགས་བཅུའི་རྒྱལ་བ་དཔག་མེད་མཆོད་པ་དང ། །དེ་བཞིན་ཐེག་ཆེན་ཕྱོགས་སུ་རྒྱས་པའི་མདོ། །མཆོད་ན་འཇིག་རྟེན་ཐེག་པས་ཐུབ་པ་མེད། །དཔལ་དང་གཟི་བརྗིད་ལྡན་ཞིང་འཁོར་བ་འཇོམས། །དེ་ཕྱིར་ཐེག་པ་ཆེན་པོ་བསམ་ཁྱབ་དཀའ། །བྱད་གཟུགས་སྟོབས་དང་དབང་ཕྱུག་ཐོབ་པར་འགྱུར། །ཕུན་སུམ་ཚོགས་ལྡན་ཆོས་སྐུ་མངོན་པར་འགྲུབ། །གང་ཞིག་ཐེག་ཆེན་འདི་ལ་ཞོན་པ་ནི། །བླ་ན་མེད་པའི་དགའ་བ་མྱོང་བ་ཡིན། །ལུས་ཀྱི་སྦྱིན་པས་སྙིང་རྗེ་བྱམས་བསྒོམས་ན། །དེ་ཕྱིར་ཐེག་པ་བླ་མེད་ཐོབ་པར་འགྱུར། །ཚུལ་ཁྲིམས་བརྩོན་འགྲུས་ཚངས་པར་སྤྱོད་པ་ནི། །རྫུ་འཕྲུལ་མངོན་དུ་ཉི་ཟླ་སྒྲིབ་ཀྱང་ནུས། །དེ་ཡང་ཐེག་ཆེན་སྤྱོད་པའི་དབང་གིས་སོ། །རང་གི་སེམས
62.255b
ཀྱིས་བརྩོན་འགྲུས་རྒྱུན་སྤྱོད་པ། །དེས་ནི་ཐེག་པ་ཆེན་པོ་ཐོབ་པའོ། །སྡུག་བསྔལ་ནོན་པའི་སྒྲིབ་པ་ཡོད་ན་ཡང ། །ཐེག་ཆེན་བསྒོམས་པས་དེ་དག་ཀུན་ཀྱང་འབྱང ། །གང་ཞིག་ཐེག་ཆེན་ཆོས་ལ་བདེ་གནས་པ། །དེ་ནི་ཚེ་དང་ལོངསྤྱོད་སངས་རྒྱས་བཞིན། །ཡང་དག་དྲན་པ་བརྩོན་པར་ལྡན་པ་ནི། །རྫུ་འཕྲུལ་རྐང་པ་བཞི་ཡི་སྟོབས་ཀྱང་རྙེད། །དམ་ཆོས་ཡང་དག་དོན་ལ་བརྟེན་པ་ཡང ། །ཐེག་པ་ཆེན་པོ་བསྒོམས་པའི་དབང་གིས་སོ། །མི་འཇིགས་དང་ནི་སྟོབས་བཅུ་ལྡན་པ་དང ། །མཚན་བཟང་སུམ་བཅུ་རྩ་གཉིས་བརྒྱན་པ་དང ། །རྡོ་རྗེ་ཏིང་འཛིན་ཡེ་ཤེས་ཐམས་ཅད་ཀྱང ། །ཐེག་པ་ཆེན་པོ་བསྒོམ་པའི་དབང་གིས་སོ། །རིགས་ཀྱི་བུ་གང་ལ་ལས་ཐེག་པ་ཆེན་པོ་ཆོས་ཀྱི་རྣམ་གྲངས་འདི་བཟུང་སྟེ། འབྲུ་གཅིག་གམ། ཚིག་གཅིག་གམ། ཚིགས་བཅད་གཅིག་འཆང་ངམ་ཀློག་ན་བསོད་ནམས་འདི་ལྟ་བུ་དང་ལྡན་པར་འགྱུར་རོ། །གང་ཞེ་ན། འདི་ལྟ་སྟེ། གང་གིས་མདོ་སྡེ་འདི་འཛིན་པ། །སྡུག་བསྔལ་ཀུན་དང་ཡོང་བྲལ་ལོ། །ནམ་དུ་འང་ངན་འགྲོར་མི་ལྟུང་སྟེ། །བདེ་བའི་གནས་སུ་ཕྱིན་པར་འགྱུར། །གང་གིས་མདོ་སྡེ་འདི་ཐོས་པ། །ཕྱི་མ་མ་འོངས་དུས་ངན་ཚེ། །མཐའ་རུ་སངས་རྒྱས་འགྲུབ་པར་ཡང ། །ངས་ནི་ལུང་དུ་བསྟན་པར་བྱ། །གང་གིས་རྒྱལ་བ་རྟག་གཞོལ་བ། །རྒྱལ་བ་འང་རྟག་ཏུ་དེ་ལ་གཞོལ། །གང་གིས་རྒྱལ་བའི་ཆོས་བསྲུངས་ན། །རྒྱལ་བ་འང་དེ་ལ་བསྲུང་བར་འགྱུར། །རྫུ་འཕྲུལ་ཆེན་པོ་ཐོབ་པ་དང ། །ཆོས་ཀྱི་འཁོར་ལོ་བསྐོར་བར་ནུས། །འཁོར་བའི་རྒྱུད་ལས་བསྒྲལ་བ་དང ། །བདུད་ཀྱི་དཔུང་བཅས་འཇིལ་ཡང་ནུས། །རྒྱལ་བ་འོད་མི་འགྱུར་དེ་ལས། །ངས་ནི་མདོ་སྡེ་འདི་ཐོས་ནས། །བཟོད་པར་གནས་ཏེ་ལུང་བསྟན་པ། །ཤཱཀྱ་ཐུབ་ཅེས་བྱ་བར་གྲུབ། །ང་ནི་མྱ་ངན་འདས་འོག་ན། །གང་ཞིག་མདོ་སྡེ་འདི་འཆང་བ། །མངོན་པར་རྫོགས་པར་འཚང་རྒྱ་བར། །ངས་ཀྱང་ལུང་དུ་བསྟན་པར་བྱ། །གང་གིས་མ་འོངས་དུས་ཀྱི་ཚེ། །མདོ་སྡེ་འདི་ཡི་དོན་ཤེས་ཏེ། །བླུན་པོ་རྣམས་ལ་རབ་བཤད་པ། །དཀོན་མཆོག་གསུམ་གྱི་རིགས་མི་འཆད། །སངས་རྒྱས་འཇིག་རྟེན་མི་བཞུག་ཀྱང ། །མདོ་འདི་འཇིག་རྟེན་གང་ན་བར། །གནས་པའི
62.256a
མཆོད་གནས་དེ་དག་ཏུ། །སངས་རྒྱས་མངོན་སུམ་བཞུགས་པ་བཞིན། །དེ་ཅིའི་ཕྱིར་ཞེ་ན། ངས་སྔོན་དེ་བཞིན་གཤེགས་པ་དཔག་ཏུ་མེད་པ་ལས་མདོ་སྡེ་འདི་མནོས་ཏེ་འཆང་བ་དང ། བསྐལ་པ་འཇིག་པའི་ཚེ་གཞན་ལ་རྒྱ་ཆེར་བཤད་པས་ན་མཚན་སུམ་བཅུ་རྩ་གཉིས་ཀྱང་དེ་ལྟར་ཐོབ་བོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་ཀྱང་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་བཤད། དེང་འདིར་ཡང་བཅོམ་ལྡན་འདས་ཀྱིས་མཚན་སུམ་བཅུ་རྩ་གཉིས་བཤད་ན། ལས་ཀྱི་རྒྱུ་གང་དང་གང་གི་དབང་གིས་དེ་དག་འགྲུབ་པར་འགྱུར་བ་བཅོམ་ལྡན་འདས་ཀྱིས་སྐབས་དབྱེ་ཞིང་བསྟན་དུ་གསོལ་ཞེས་བགྱིས་པ་དང ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ནི་ཡོན་ཏན་དཔག་ཏུ་མེད་པ་བསྒྲུབས་པས་མཚན་སུམ་བཅུ་རྩ་གཉིས་འགྲུབ་པ་ཡིན་ཏེ། གལ་ཏེ་ངས་རྒྱ་ཆེར་བཤད་དུ་བསྐལ་པའི་བར་དུ་ཡང་བཤད་པ་མི་རྫོགས་པས་དེང་མདོ་ཙམ་ཞིག་ཁྱོད་ལ་བཤད་དོ། །དེ་དག་གང་ཞེ་ན། འདི་ལྟ་སྟེ་སེམས་ཐག་པ་ནས་ཚུལ་ཁྲིམས་དག་པར་བསྲུང་བ་དང ། ཡི་དམ་ལ་བརྟན་པས་ཞབས་ཤིན་དུ་གནས་པའི་མཚན་དང་ལྡན་པར་འགྱུར་བ་དང ། བླ་མ་ལ་བསུ་སྐྱལ་དང ། ཆོས་ཉན་པ་དང ། གཙུག་ལག་ཁང་དང ། མཆོད་རྟེན་བསྒྲུབ་པ་ལ་ཕུ་དུད་དུ་བྱས་པས་ཕྱག་དང་ཞབས་འཁོར་ལོའི་མཚན་རྩིབས་སྟོང་དང་ལྡན་པར་འགྱུར་བ་དང ། སེམས་ཅན་ཐམས་ཅད་ལ་མ་བརྙས་པས་རྟིང་པ་ཡངས་པའི་མཚན་དང་ལྡན་པར་འགྱུར་བ་དང ། དམ་པའི་ཆོས་ཡོངས་སུ་བསྲུང་བས་སོར་མོ་རིང་བའི་མཚན་དང་ལྡན་པར་འགྱུར་བ་དང ། བསྡུ་བ་རྣམ་བཞི་གོམས་པར་བྱས་པས་ཕྱག་དང་ཞབས་དྲ་བས་སོར་མོ་བར་འབྲེལ་བའི་མཚན་དང་ལྡན་པར་འགྱུར་བ་དང ། གོས་བཟང་པོ་སྦྱིན་པ་བྱིན་པས། ཕྱག་དང་ཞབས་གཞོན་ཞིང་འཇམ་པའི་མཚན་དང་ལྡན་པར་འགྱུར་བ་དང ། བཟའ་བ་དང ། བཏུང་བ་དང ། ཞིམ་པོ་དང ། གཙང་མ་དང ། ཉམས་སུ་བདེ་བ་བྱིན་པས། བདུན་ཤིན་དུ་མཐོ
62.256b
བའི་མཚན་དང་ལྡན་པར་འགྱུར་བ་དང ། སངས་རྒྱས་ཀྱི་ཆོས་ལ་ཐོས་པར་དགའ་བས་རི་དགས་ཨེ་ན་ཡའི་བྱིན་པ་ལྟ་བུའི་མཚན་དང་ལྡན་པར་འགྱུར་བ་དང ། གཞན་གྱི་གཡོ་དང་མཚང་སྦེད་ཅིང་བཅབས་པས་གསང་བའི་གནས་སྦུབས་སུ་ནུབ་པའི་མཚན་དང་ལྡན་པར་འགྱུར་བ་དང ། དགེ་བ་བཅུ་སྒོམས་པས་སེང་གེའི་རོ་སྟོད་ལྟ་བུའི་མཚན་དང་ལྡན་པར་འགྱུར་བ་དང ། དགེ་བའི་ཆོས་ཡང་དག་པར་བླངས་ཏེ་སེམས་ཅན་ལ་རྟག་ཏུ་སྟོན་པས་ཕྲག་སོ་ཤིན་དུ་རྒྱས་པའི་མཚན་དང་ལྡན་པར་འགྱུར་བ་དང ། འཇིགས་པ་རྣམས་ཀྱི་མགོན་དང་སྐྱབས་བྱས་པས་ཕྲག་པའི་ལྷུན་མཛེས་པར་གྲུབ་པའི་མཚན་དང་ལྡན་པར་འགྱུར་བ་དང ། གཞན་གྱི་གཙུག་ལག་ཁང་ངམ། མཆོད་རྟེན་བསྒྲུབ་པའི་གྲོགས་བྱེད་པར་མོས་པ་དང ། སློང་བ་རྣམས་ལ་བདོག་པ་མེད་ཅེས་མ་བྱས་པས་ཕྱག་བརླ་དྲང་པོར་པུས་མོའི་ལྷ་ང་ལ་སླེབ་པའི་མཚན་དང་ལྡན་པར་འགྱུར་བ་དང ། རྟག་ཏུ་དགེ་བའི་ཆོས་ཐམས་ཅད་བསྒྲུབ་པ་དང ། སྲོག་གི་རིམ་གྲོ་བྱས་པས་སྐུ་ཆེ་ཞིང་དྲང་བའི་མཚན་དང་ལྡན་པར་འགྱུར་བ་དང ། ན་བ་རྣམས་ཀྱི་རྩི་སྨན་དང ། རིམ་གྲོ་དང ། ཉམས་སུ་ཕན་པའི་ཟས་བྱིན་པས་རོ་བྲོ་བའི་མཆོག་ཐོབ་པའི་མཚན་དང་ལྡན་པར་འགྱུར་བ་དང ། ཡུན་རིང་པོ་ནས་ཚིག་ཁྱལ་པ་སྤངས་ཤིང་དུས་སུ་སྨྲ་བས་སེང་གེའི་འགྲམ་པ་ལྟ་བུའི་མཚན་དང་ལྡན་པར་འགྱུར་བ་དང ། སེམས་ཅན་ཐམས་ཅད་ལ་སེམས་མཉམ་པར་སྙོམས་པས་ཚེམས་མཉམ་ཞིང་བཞི་བཅུ་ཚང་བའི་མཚན་དང་ལྡན་པར་འགྱུར་བ་དང ། རྩོད་པ་རྣམས་སྡུམ་པ་ལ་དགའ་བས་ཚེམས་ཐགས་བཟང་བའི་མཚན་དང་ལྡན་པར་འགྱུར་བ་དང ། རིན་པོ་ཆེའི་སྦྱིན་པ་བྱས་པས་ཚེམས་མཉམ་པའི་མཚན་དང་ལྡན་པར་འགྱུར་བ་དང ། ལུས་དང་ངག་ཡིད་ཡོངསུ་དག་པས་ཚེམས་ཤིན་དུ་དཀར་བའི་མཚན་དང་ལྡན་པར་འགྱུར་བ་དང ། ངག་གི་ཉེས་པ་བསྡམས་པས་ལྗགས་ཤིན་དུ་ཡངས་ཤིང་སྲབ་པའི་མཚན་དང་ལྡན་པར་འགྱུར་བ་དང ། སེམས་ཅན་རྣམས་ལ་རྟག་ཏུ་ཚིག་འཇམ་པོ་སྨྲ་བས་ཚངས་པའི་དབྱངས་ཀྱི་མཚན་དང་ལྡན་པར་འགྱུར་བ་དང ། བྱམས་པའི་སེམས་བསྒོམས་ཏེ་རྨོངས་པ་མེད
62.257a
པའི་མིག་གིས་བལྟ་ལྟ་བས་སྤྱན་དཀར་ནག་འབྱེས་པའི་མཚན་དང་ལྡན་པར་འགྱུར་བ་དང ། སེམས་ཐག་པ་ནས་བླ་ན་མེད་པའི་བྱང་ཆུབ་ཏུ་སྒྲུབ་པས་བའི་རྫི་མ་ལྟ་བུའི་མཚན་དང་ལྡན་པར་འགྱུར་བ་དང ། གཞན་ལ་བསོད་ནམས་དང་ཡོན་ཏན་ཡོད་པ་རྗེས་སུ་ཡི་རང་ཞིང་བསྔགས་པས་ཞལ་མཛོད་སྤུས་བརྒྱན་པའི་མཚན་དང་ལྡན་པར་འགྱུར་བ་དང ། ཕ་དང ། མ་དང ། མཁན་པོ་དང ། སློབ་དཔོན་ལ་སོགས་པ་བླ་མ་རྣམས་ལ་ཚུལ་བཞིན་དུ་རིམ་གྲོ་དང ། བཙུན་པར་བྱས་པས་དབུ་སྤྱི་གཙུག་དང་ལྡན་པའི་མཚན་དང་ལྡན་པར་འགྱུར་བ་དང ། ཐེག་པ་ཆེན་པོའི་ཆོས་བསྟན་པ་ལ་མོས་པས་མདོག་ཤིན་དུ་འཇམ་པའི་མཚན་དང་ལྡན་པར་འགྱུར་བ་དང ། སྟན་དང ། གོས་དང ། ཁང་པ་དང ། གནས་བཟང་པོ་བྱིན་པས་གསེར་གྱི་ཁ་དོག་དང་ལྡན་པའི་མཚན་དང་ལྡན་པར་འགྱུར་བ་དང ། འཇིག་རྟེན་གྱི་གཏམ་སྣ་ཚོགས་དེ་སྨྲ་བ་སྤངས་པས་བ་སྤུ་རེ་རེ་ནས་གཡས་ཕྱོགས་སུ་འཁྱིལ་པའི་མཚན་དང་ལྡན་པར་འགྱུར་བ་དང ། དགེ་བའི་བཤེས་གཉེན་དང ། མཁན་པོ་དང ། བླ་མ་རྣམས་ཀྱིས་བསྟན་པའི་ཚིག་ཡང་དག་པར་བླངས་པ་དང ། བཟུང་བ་མངོན་དུ་སྤེལ་ཞིང་འགྲིབ་པར་མ་བྱས་པས་ཡན་ལག་གི་སྤུ་གྱེན་དུ་འཁྱིལ་པའི་མཚན་དང་ལྡན་པར་འགྱུར་བ་དང ། ཡོན་ཏན་དཔག་ཏུ་མེད་པར་བསྒྲུབས་པས་ཞབས་ལེགས་པར་མཐོ་བའི་མཚན་དང་ལྡན་པར་འགྱུར་བ་དང ། སེམས་ཅན་རྣམས་ཏིང་ངེ་འཛིན་བསྒོམ་པར་བསྐུལ་བས་ཤིང་ནྱ་གྲོ་དྷ་ལྟར་ཆུ་ཞེང་གབ་པའི་མཚན་དང་ལྡན་པར་འགྱུར་བ་སྟེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་དཔག་ཏུ་མེད་པའི་ཡོན་ཏན་བསྒྲུབས་ན་མཚན་སུམ་བཅུ་རྩ་གཉིས་དེ་ལྟ་བུ་དག་དང་ལྡན་པར་འགྱུར་རོ་ཞེས་དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཐམས་ཅད་ལ་བདག་གིས་བརྟགས་ན་གང་ཡང་དངོས་པོ་དང་མཚན་མར་མ་གྲུབ་སྟེ་མ་མཆིས་ལ། དེ་བཞིན་གཤེགས་པ་ལ་བརྟགས་ན་ཡང་དེ་བཞིན་གཤེགས་པའི་སྤྱོད་ལམ་དེ་མ་ལགས་ན་ཅིའི་སླད་དུ་སྤྱོད་ལམ་རྒྱ་ཆེར་གྲུབ་ཅེས་གསུངས། དཀོན་མཆོག་གསུམ་དང ། བདེན་པ་བཞི་དང ། ཕུང་པོ་དང ། སྐྱེ
62.257b
མཆེད་དང ། ཁམས་དང ། རྟེན་འབྲེལ་བཅུ་གཉིས་དང ། ཕ་རོལ་དུ་ཕྱིན་པའི་ཆོས་རྣམས་ལ་བདག་གིས་བརྟགས་ན་ཡང་ཕྱི་ནང་གི་རྒྱུ་འབྲས་ཀུན་སྟོང་པ་ཉིད་དེ། མཚན་མ་མ་མཆིས། སྨོན་པ་མ་མཆིས། སྐྱེ་ཞིང་འབྱུང་བ་ཡང་མ་མཐོང ། འགག་ཅིང་ནུབ་པ་ཡང་མ་མཐོང ། སྒྱུ་མ་དང་འདྲ་བ། སྤྲུལ་པ་དང་འདྲ་བ། འབར་བ་དང་འདྲ་བ། བྲག་ཅ་དང་འདྲ་བ། ཆབ་ཀྱི་ཟླ་བ་དང་འདྲ་བ། རུས་སྦལ་གྱི་སྤུ་དང་འདྲ་བ། རི་བོང་གི་རཝ་དང་འདྲ་བ། ནམ་མཁའི་མེ་ཏོག་དང་འདྲ་བ། མོ་གཤམ་གྱི་བུ་དང་འདྲ་བ། གཟུགས་བརྙན་གྱི་གོས་གྱོན་ཞིང་སྒྱུ་མའི་གླང་པོ་ཆེ་ལ་འཚལ་བ་དང་འདྲ་བ། མཆིས་པ་ཡང་འདྲ་བ། མ་མཆིས་པ་ཡང་འདྲ་བ། དེ་དག་ནི་མཆིས་པ་དང་མ་མཆིས་པ། མཆིས་པ་ཡང་མ་ལགས། མ་མཆིས་པ་ཡང་མ་ལགས། རྟག་པ་མ་ལགས། ཆད་པ་མ་ལགས། སྐྱེ་བ་མ་ལགས། འགག་པ་མ་ལགས། ནང་དུ་མ་ལགས། སླད་རོལ་མ་ལགས། མཐོང་བ་མ་ལགས། ཤེས་པ་མ་ལགས། དཔེར་ན་ནམ་མཁའ་དང་འདྲ་བ་ལ་བཅོམ་ལྡན་འདས་ཅིའི་སླད་དུ་ངས་ནི་སྤྱོད་ལམ་དེ་དག་སྤྱད་ཅེས་གསུངས། དེ་བཞིན་གཤེགས་པ་ལ་བདག་གིས་བརྟགས་ན་བདག་མ་ལགས། སེམས་ཅན་མ་ལགས། སྲོག་མ་ལགས། གསོ་བ་མ་ལགས། སྐྱེས་བུ་མ་ལགས། གང་ཟག་མ་ལགས། ཤེད་ཅན་མ་ལགས། ཤེད་བདག་མ་ལགས། བྱེད་པ་པོ་ལ་སོགས་པ་མ་ལགས། མིག་མ་ལགས། གཟུགས་མ་ལགས། མིག་དང་གཟུགས་ཀྱི་མཚན་ཉིད་ཀྱི་སྤྱོད་ཡུལ་མ་ལགས། རྣ་བ་མ་ལགས། སྒྲ་མ་ལགས། རྣ་བ་དང་སྒྲའི་མཚན་ཉིད་ཀྱི་སྤྱོད་ཡུལ་མ་ལགས། སྣ་མ་ལགས། དྲི་མ་ལགས། སྣ་དང་དྲིའི་མཚན་ཉིད་ཀྱི་སྤྱོད་ཡུལ་མ་ལགས། ལྕེ་མ་ལགས། རོ་མ་ལགས། ལྕེ་དང་རོའི་མཚན་ཉིད་ཀྱི་སྤྱོད་ཡུལ་མ་ལགས། ལུས་མ་ལགས། རེག་བྱ་མ་ལགས། ལུས་དང་རེག་བྱའི་མཚན་ཉིད་ཀྱི་སྤྱོད་ཡུལ་མ་ལགས། ཡིད་མ་ལགས། ཆོས་མ་ལགས། ཡིད་དང་ཆོས་ཀྱི་མཚན་ཉིད་ཀྱི་སྤྱོད་ཡུལ་མ་ལགས། རྣམ་པར་ཤེས་པ་མ་ལགས། གཟུགས་མ་ལགས། རྣམ་པར་ཤེས་པ
62.258a
དང་གཟུགས་ཀྱི་མཚན་ཉིད་ཀྱི་སྤྱོད་ཡུལ་ཡང་མ་ལགས། གཟུགས་མ་ལགས། སྡུག་བསྔལ་མ་ལགས། གཟུགས་དང་སྡུག་བསྔལ་གྱི་མཚན་ཉིད་ཀྱི་སྤྱོད་ཡུལ་ཡང་མ་ལགས། བདག་མ་ལགས། བདག་གི་མ་ལགས། འགྲོ་བ་མ་ལགས། གཟུགས་ཅན་མ་ལགས། ཕུང་པོ་མ་ལགས། བདེན་པ་མ་ལགས། བརྫུན་པ་མ་ལགས། བསྡུས་པ་མ་ལགས། གཏོར་བ་མ་ལགས། འབྱུང་བ་མ་ལགས། འཇུག་པ་མ་ལགས་ཏེ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་རྣམས་ཀྱང་དེ་བཞིན་ནོ། །ཕར་བཞུད་པ་མ་ལགས། ཚུར་བྱོན་པ་མ་ལགས། བཞུགས་པའི་གནས་ཀྱང་མི་མངའ། སེམས་དང་ཡིད་དང་རྣམ་པར་ཤེས་པ་ཡང་མི་མངའ། ལུས་དང་ངག་དང་ཡིད་ཀྱི་ལས་མི་མངའ། གཅིག་པ་ཡང་མ་ལགས། ཐ་དད་པ་འང་མ་ལགས། འདས་པ་ཡང་མ་ལགས། མ་བྱོན་པ་ཡང་མ་ལགས། ད་ལྟར་བྱུང་བ་ཡང་མ་ལགས། དྲི་མ་ཅན་མ་ལགས། ཡོངས་སུ་དག་པ་མ་ལགས། བདག་མ་ལགས། སེམས་ཅན་མ་ལགས། སྲོག་དང ། སྐྱེས་བུ་དང ། གང་ཟག་ལ་སོགས་པ་ཡང་མ་ལགས། རྟག་པ་མ་ལགས། ཆད་པ་མ་ལགས། སྐྱེ་བ་མ་མཆིས། འགག་པ་མ་མཆིས། སྒོམ་དུ་མ་མཆིས། སྤྱོད་དུ་མ་མཆིས། དོར་དུ་མ་མཆིས། བླང་དུ་མ་མཆིས། མཐའ་ལས་འདས་པ། ཡུན་དུ་བཞུགས་པ་ལ་གང་གི་སླད་དུ་སྤྱོད་ལམ་རྒྱ་ཆེར་བསྒྲུབས་ཤེས་གསུངས་ཤེས་གསོལ་པ་དང ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ལེགས་སོ་ཞེས་བྱ་བ་བྱིན་ནས་ལེགས་སོ་ལེགས་སོ། །རིགས་ཀྱི་བུ་ཁྱོད་སྔོན་འདས་པའི་དུས་ན་སངས་རྒྱས་གྲངས་མེད་དཔག་ཏུ་མེད་པ་རྣམས་ལ་བྱ་བ་བྱས་པ། དགེ་བའི་རྩ་བ་བསྐྲུན་པ། ཡུན་རིང་པོ་ནས་ཐེག་པ་ཆེན་པོ་བླ་ན་མེད་པའི་དོན་ཆུབ་པར་ཆུད་དེ། ཆོས་སོ་ཅོག་ཀུན་ཀྱང་སྟོང་པ་ཉིད་དུ་མངོན་པར་ཤེས་པ་དང ། དེ་བཞིན་གཤེགས་པ་ཡང་དག་པའི་མཐའ་ལས་འདས་ཏེ། ཡུན་དུ་གནས་པར་ཡང་ཤེས་པས་རིགས་ཀྱི་བུ་འདི་ལྟ་སྟེ།
62.258b
དཔེར་ན། ནོར་བུ་རིན་པོ་ཆེ་བཻ་དཱུརྱ་ཤིན་དུ་དང་བ་གསལ་བ། འདམ་རྫབ་ཀྱི་ནང་དུ་ལོ་སྟོང་གི་བར་དུ་བཞག་ཀྱང ། རང་བཞིན་ཡོང་གིས་དག་པས་ཕྱིར་ཕྱུང་ན་ཡང་སྔ་མཁོ་བཞིན་ཏེ། ཁྱོད་ཀྱང་དེ་དང་འདྲ་བར་ཆོས་ཀྱི་མཚན་ཉིད་མངོན་པར་རྟོགས་ལ། རང་བཞིན་རྣམ་པར་དག་པས། ཁྱེད་རྣམས་ད་ལྟར་ཁམས་གསུམ་ན་སྙིགས་མ་ཅན་རྣམ་ལྔའི་འདམ་རྫབ་ཏུ་གནས་ཏེ། དེ་བཞིན་གཤེགས་པ་དང ། སེམས་ཅན་གྱི་དོན་བྱས་ཀྱིས་ཀྱང་འདམ་རྫབ་ཀྱིས་མ་གོས་པས་ན་དོན་འདི་ལྟ་བུ་དག་འདྲི་ནུས་པ་ཡིན་ནོ། །རིགས་ཀྱི་བུ་ཁྱོད་ཡང་ཉོན་ཅིག་།འདི་ལྟ་སྟེ། ཆོས་སོ་ཅོག་ཐམས་ཅད་ཡང་དག་པར་ན་དངོས་པོ་མེད་དེ། ཡི་གེ་ཡོད་པའི་ཕྱིར་ཆོས་ཡོད་ཅེས་བཤད། ཆོས་ཀྱི་ནང་དུ་ཡི་གེ་མེད་ལ་ཡི་གེའི་ནང་དུ་ཡང་ཆོས་མེད་དོ། །ཀུན་དུ་སྤེལ་བའི་ཕྱིར་ཡི་གེ་བསྟན་ཏོ། །ཡི་གེའི་ནང་དུ་ནི་བྱང་ཆུབ་ཀྱང་མེད། བྱང་ཆུབ་ཀྱི་ནང་དུ་ནི་ཡི་གེ་ཡང་མེད་མོད་ཀྱི། དོན་དམ་པར་ནི་ཡི་གེ་མེད་ཀྱང་ཀུན་རྫོབ་ཏུ་ཡི་གེ་ཡོད་པར་བཤད་པས་སེམས་ཅན་ལ་སངས་རྒྱས་ཀྱི་ངོ་བོ་ཉིད་དང ། བླ་ན་མེད་པའི་བྱང་ཆུབ་ཀྱང་ཡི་གེ་ལས་གུད་ན་མི་རྙེད་དོ། །རིགས་ཀྱི་བུ་ཁྱོད་ཟེར་བ་འང་བདེན་ཏེ། དེ་བཞིན་གཤེགས་པ་ལ་ཟད་པ་མེད། སྐྱེ་བ་མེད། མི་བསྒོམ་མི་སྤྱོད། བསྒོམ་སྤྱོད་རྣམས་དང་བྲལ་བ། ཡང་དག་པའི་ཆོས་ལ་མི་འཇུག་།དེ་ལས་ལྡོག་ཅིང་འགྱུར་བ་འང་མ་ཡིན། སྐྱེ་བ་གཅིག་གིས་དགའ་ལྡན་གྱི་གནས་སུ་ཡང་མ་སྐྱེས། དེ་ལས་བབས་ཏེ་ཡུམ་གྱི་ལྷུམས་སུ་ཡང་མ་གནས། ཆོས་ཐམས་ཅད་ལ་སེམས་མི་གནས་པས་ང་ནི་སྐྱེ་རྒ་ན་འཆི་ལས་འདས་སོ་ཞེས་ཀྱང་མ་བྱས། ཕྱོགས་བཞིར་གོམ་པ་བདུན་བདུན་ཡང་མ་བོར། ང་ནི་འཇིག་རྟེན་ན་བླ་ན་མེད་པའི་བཙུན་པ་ཡིན་ནོ་ཞེས་ཀྱང་མ་བརྗོད། གྲོང་ཁྱེར་མཆོག་ཏུ་ན་ཅུང་བཟང་མོ་དང་ཡང་མ་རྩེན། འཇིག་རྟེན་གྱི་བྱ་བ་ཡིག་རྩིས་ལ་སོགས་པ་ཡང་མ་བསླབས། སྟོབས་དང་འཕོང་རྩོལ་ཡང་མ་བསྒྲུན། སེམས་ཅན་ཡོངས་སུ་མྱ་ངན་ལས་བཟླ་བའི་ཕྱིར་རྒན་པོ་མངོན་སུམ་དུ་བསྟན་པ་ནི་ལུས་ལ་ཆགས་པ་རྣམས་བཀག་པའོ། །ནད་པ་མངོན་སུམ་དུ་བསྟན་པ་ནི་ཚེ་ལ་ཆགས་པ་རྣམས་བཀག་པའོ། །ཤི་བའི
62.259a
མཚན་མ་མངོན་སུམ་དུ་བསྟན་པ་ནི་འདོད་ཆགས་དང་ང་དང་ངར་འཛིན་པ་རྣམས་བཀག་པའོ། །དགེ་སློང་མངོན་སུམ་དུ་བསྟན་པ་ནི་སེམས་ཅན་རྣམས་ཚངས་པ་དང་བརྒྱ་བྱིན་གྱི་ལུས་སུ་མི་སྨོན་པར་འཇིག་རྟེན་ལས་འདས་པ་བླ་ན་མེད་པའི་ཆོས་བརྩོན་པར་བསྒྲུབ་པར་བྱ་བའོ། །གྲོང་ཁྱེར་མཆོག་ནས་བྱུང་སྟེ་གཤེགས་པ་ནི་ཁམས་གསུམ་གྱི་བཙོན་ར་ནས་ཐར་པ་དང་འབྲས་བུ་མ་ཡིན་པ་རྣམས་བསྟན་པའོ། །སླར་གཟིགས་པ་ནི་བྱམས་སྡང་མི་མངའ་བར་བསྟན་པའོ། །དེའི་ཕྱིར་མཚན་སུམ་བཅུ་རྩ་གཉིས་ཀྱིས་སྐུ་རྣམ་པར་བརྒྱན་ཅིང་སེམས་ཅན་གྱི་བསོད་ནམས་ཀྱི་ཞིང་དུ་བྱ་བའོ། །དབུ་བྲེག་པ་དང ། རྒྱན་རྣམས་སྤངས་པ་དང ། རྟ་ཙན་ཏ་ཀ་ཞབས་རིང་དད་པ་ཅན་ལ་སླར་བསྐུར་བ་ནི་ཉོན་མོངས་པ་ཐམས་ཅད་དང་དབྲལ་བར་བསྟན་པའོ། །ཁ་སྤུ་བྲེགས་པ་ནི་ཆོས་ཐམས་ཅད་ལ་མི་ཆགས་པར་བསྟན་པའོ། །ཀ་ཤ་ངུར་སྨྲིག་གྱོན་པ་ནི་སེམས་ཅན་འདུལ་བར་བསྟན་པའོ། །དྲང་སྲོང་ཨུ་ཏ་ཀ་དང ། ་རན་ཏ་ལ་ཆོས་འདྲི་རྟོག་བྱ་བ་ནི་རང་གི་ང་རྒྱལ་གྱི་སེམས་འཇོམས་པར་བསྟན་པའོ། །ལོ་དྲུག་གི་བར་དུ་དཀའ་ཐུབ་སྤྱད་པ་ནི་མུ་སྟེགས་འདུལ་བའོ། །ཞལ་ཟས་བླངས་པ་ནི་འཇིག་རྟེན་པའི་ཆོས་ཀྱི་རྗེས་སུ་འབྲང་བའོ། །རྩཝ་ས་སྟི་ཀ་བསླངས་པ་ནི་ཆོག་ཤེས་པར་བསྟན་པའོ། །རྩཝ་བཏིང་བའི་སྟེང་དུ་བཞུགས་པ་ནི་ཉམ་རངས་དང་གཡེལ་བ་རྣམས་འཇོམས་པར་བསྟན་པའོ། །ལྷ་ཀླུ་ཀུན་གྱིས་བསྟོད་ཅིང་བསྔགས་པ་དང་བསྙེན་བཀུར་བྱས་པ་ནི་ཡོན་ཏན་གྱི་འབྲས་བུ་ལ་བཀོད་པར་བསྟན་པའོ། །བདུད་རྣམས་བཏུལ་བ་ནི་དཔའ་བའི་མཐུ་བསྟན་པའོ། །ཕྱག་གཡས་པ་ས་ལ་བསྟན་པ་ནི་བསོད་ནམས་ཀྱི་མཐུ་བསྟན་པའོ། །ས་ཆེན་པོ་ཀུན་དུ་གཡོ་བ་ནི་དྲིན་གྱི་ལན་ལྡོན་པར་བསྟན་པའོ། །དེ་ལྟར་མཚན་མ་མེད་པར་བསྒོམས་པའི་ཕྱིར་བླ་ན་མེད་པའི་བྱང་ཆུབ་ཀྱི་ལམ་ཐོབ་པ་ཡིན་ནོ། །འདི་ལྟར་ཆོས་ཐམས་ཅད་ཀྱི་མཚན་ཉིད་མངོན་སུམ་དུ་མཁྱེན་ནས། ཆོས་ཀུན་མཉམ་པ་ཉིད་དུ་བསྟན་པ་ནི་སངས་རྒྱས་ཤེས་བྱའོ། །སངས་རྒྱས་ཀྱི་ཡེ་ཤེས་ལ་ཐུབ་པ་མེད་དེ། ཆོས་བསྟན
62.259b
ཏོ་ཅོག་ལ་སངས་རྒྱས་སུ་འགྲུབ་པའི་དོན་བསྟན་པས་ན་དེ་བཞིན་གཤེགས་པ་ཞེས་བྱའོ། །དུས་གསུམ་གྱི་བྱ་བ་དགེ་བ་དང་མི་དགེ་བའི་ཆོས་མངོན་དུ་གསལ་བར་གཟིགས་ཤིང་མཁྱེན་པས་ན་ཐམས་ཅད་མཁྱེན་པ་ཞེས་བྱའོ། །བདེན་པ་དང་ཡང་དག་པར་གསུངས་པའི་ཕྱིར་ལྷ་དང་མིའི་མཁན་པོ་ཞེས་བྱའོ། །གང་ཞིག་དེ་ལྟར་བསླབ་ཅིང་རྟོག་པ་ནི་བྱང་ཆུབ་སེམས་དཔའ་ཞེས་བྱའོ། །དེ་ལ་ལོག་པར་རྟོག་པ་ནི་བྱང་ཆུབ་སེམས་དཔའ་ཞེས་མི་བྱ་སྟེ། སངས་རྒྱས་ཐམས་ཅད་ལ་བསླུ་བ་ཅན་ཞེས་བྱའོ། །རིགས་ཀྱི་བུ་སངས་རྒྱས་ཐམས་ཅད་ནི་མི་འབྱུང་མི་འཇུག་མི་སྐྱེ་མི་འགོག་སྟེ། སེམས་ཅན་ཐམས་ཅད་མྱ་ངན་ལས་བཟླ་བའི་ཕྱིར་འཇིག་རྟེན་དུ་འབྱུང་ངོ་ཞེས་བརྗོད་པ་དང ། སངས་རྒྱས་མྱ་ངན་ལས་འདའོ་ཞེས་བརྗོད་པ་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཀྱང་ཡང་དག་པར་ན་ཆོས་ཐམས་ཅད་ཀྱི་ངོ་བོ་ཉིད་ནི་སྟོང་པ་ཉིད་དུ་རྟོགས་ཏེ། དེ་བཞིན་གཤེགས་པ་ལ་འབྱུང་བ་འམ་ནུབ་པ་མི་མངའ་བས་རྒྱལ་པོའི་ཕོ་བྲང་དུ་ཡང་མ་བལྟམ། བྱང་ཆུབ་ཀྱི་ཤིང་དྲུང་དུ་ཡང་མྱ་ངན་ལས་མ་འདས། མཐའ་ལས་འདས་ཏེ་ཡུན་དུ་གནས་པ། སེམས་ཅན་ཡོངས་སུ་བསྒྲལ་པར་མཛད་པའི་སླད་དུ་དཀའ་ཐུབ་སྤྱད་ཅིང་མྱ་ངན་ལས་འདའ་བར་བསྟན་ཀྱང་ཡང་དག་པར་ན་འགྱུར་བ་འམ་སྤྲོས་པ་མི་མངའ་ཞིང་དེ་བཞིན་གཤེགས་པའི་སྤྱོད་ཡུལ་དུ་གནས་ཏེ། ཁམས་གསུམ་ན་སྐུ་འབྱུང་བ་ཡང་ཆོས་ཀྱི་སྐུ་རྣམ་པ་ལྔ་འབྱུང་ངོ ། །ལྔ་པོ་གང་ཞེ་ན། འདི་ལྟ་སྟེ། སྐུ་ཡང་དག་པའི་ངོ་བོ་ཉིད་དང ། སྐུ་ཡོན་ཏན་དང ། སྐུ་ཆོས་ཀྱི་ངོ་བོ་ཉིད་ལས་སྐྱེས་པ་དང ། སྐུ་སྤྲུལ་ཅིང་འབྱུང་བ་དང ། སྐུ་ནམ་མཁའ་ལྟ་བུ་དང་ལྔ་སྟེ། དེ་ལ་སྐུ་ཡང་དག་པའི་ངོ་བོ་ཉིད་ཅེས་བགྱི་བ་ནི་ཡང་དག་པའི་འབྲས་བུའི་མཆོག་མཚན་མ་ཐམས་ཅད་ལས་འདས་པ་རང་གི་དབྱིངས་ལ་ཡུན་དུ་གནས་པས་ན་སྐུ་ཡང་དག་པའི་ངོ་བོ་ཉིད་ཅེས་བགྱིའོ། །སྐུ་ཡོན་ཏན་ཅན་ཞེས་བགྱི་བ་ནི་སེམས་ཅན་མྱ་ངན
62.260a
ལས་བཟླ་བའི་སླད་དུ་སྤྱོད་པ་རྣམ་པ་སྣ་ཚོགས་མཛད་ཅིང་དགེ་བ་ཐམས་ཅད་ཕུན་སུམ་ཚོགས་པར་མཛད་པས་ན་སྐུ་ཡོན་ཏན་ཅན་ཞེས་བགྱིའོ། །སྐུ་ཆོས་ཀྱི་ངོ་བོ་ཉིད་ལས་སྐྱེས་ཞེས་བགྱི་བ་ནི་ཆོས་ཀྱི་མཚན་ཉིད་ཐམས་ཅད་ཐུགས་སུ་ཆུད་དེ་མི་མཁྱེན་མི་མངའ། སྤྱོད་ཡུལ་དེ་ལ་ཡང་དག་པར་མཁྱེན་པའི་སྟོང་པ་ཉིད་ལས་སྐྱེས་ཏེ། ཡང་དག་པར་རྫོགས་པས་ན་སྐུ་ཆོས་ཀྱི་ངོ་བོ་ཉིད་ལས་སྐྱེས་ཞེས་བགྱིའོ། །སྐུ་སྤྲུལ་ཅིང་འབྱུང་བ་ཞེས་བགྱི་བ་ནི་དེ་བཞིན་གཤེགས་པ་འཇིག་རྟེན་དུ་འབྱུང་ཡང་ལམ་རྒྱུད་ལྔར་དགེ་སྡིག་ཀུན་ལ་མངོན་པར་བསྟན་ཅིང་སྐྱབས་སུ་མི་མཛད་པ་མ་མཆིས་ཏེ། སྤྲུལ་པའི་རྫས་ལས་མཚན་དུ་འགྱུར་བས་ན་སྐུ་སྤྲུལ་ཅིང་འབྱུང་བ་ཞེས་བགྱིའོ། །སྐུ་ནམ་མཁའ་ལྟ་བུ་ཞེས་བགྱི་བ་ནི་ནམ་མཁའ་མཐའ་ཡས་པས་ན་ཆོས་ཀྱི་སྐུ་ཡང་མཐའ་ཡས་སོ། །ནམ་མཁའ་ལ་དཔག་པ་དང་གཞལ་དུ་མ་མཆིས་པས་ན་ཆོས་ཀྱི་སྐུ་ཡང་དཔག་ཅིང་གཞལ་དུ་མ་མཆིས་ཏེ། དེ་བཞིན་གཤེགས་པའི་སྐུ་ཡང་ནམ་མཁའ་ཆེན་པོ་དང་འདྲ་བ་སེམས་ཅན་ཡོངས་སུ་མྱ་ངན་ལས་འདའ་བའི་སླད་དུ་སྐུ་རྣམ་པ་ལྔར་སྟོན་པས་ན་དེ་བཞིན་གཤེགས་པ་ལ་སྐྱེ་བ་མི་མངའ། འགག་པ་མི་མངའ་བར་མངོན་ནོ། །ཆོས་ཐམས་ཅད་ཀྱང་དེ་བཞིན་ཏེ་སེམས་ཅན་ཡོངས་སུ་མྱ་ངན་ལས་བཟླ་བའི་སླད་དུ་སངས་རྒྱས་མངོན་དུ་སྤྲུལ་ཅིང་ཆོས་རྣམ་པར་སྤེལ་བ་ལགས་སོ་ཞེས་གསོལ་པ་དང ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ནི་དེ་བཞིན་གཤེགས་པ་དང་འདྲ་བར་ཆོས་ཀྱི་མཚན་ཉིད་ལ་མཁས་པས་སྤྱོད་ཡུལ་ཐམས་ཅད་ལ་བར་དུ་ཆོད་པ་འམ་ཐོགས་པ་མེད་དེ། རིགས་ཀྱི་བུ་ཁྱོད་མ་འོངས་པའི་དུས་ན་བསྐལ་པ་སྟོང་རྣམ་པར་དག་པ་ཞེས་བྱ་བ་དང ། འཇིག་རྟེན་ལོངས་སྤྱོད་ཅན་ཞེས་བྱ་བ་དེར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེ་དག་ཐེག་པ་ཆེན་པོ་འབའ་ཤིག་སྤྱོད་དེ། ཉན
62.260b
ཐོས་དང ། རང་སངས་རྒྱས་ཀྱི་ཐེག་པའི་མིང་རྣ་བའི་ཐོག་མར་ཡང་མི་གྲག་ན་ངན་སོང་ལྟ་ཅི་ཞིག་སྨོས། ཁྱོད་བསྐལ་པ་དེ་དང་འཇིག་རྟེན་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱན་རྣམ་པར་དག་པ་ཞེས་བྱ་བ་འབྱུང་སྟེ། འཇིག་རྟེན་གཞན་ནས་སྐྱེས་བུ་ཆེན་པོ་དག་ཀྱང་དེར་ཕྱིན་ཅིང་ཐེག་པ་ཆེན་པོ་ཐར་པ་ཕྱོགསུ་རྒྱས་པའི་མདོ་སྡེ་མཉན་པ་དང ། བླངས་པ་དང ། བཅངས་པར་འགྱུར་རོ། །དེ་བས་ན་སེམས་ཅན་གང་ལ་ལས་བྱང་ཆུབ་སེམས་དཔའ་ནམ་མཁའི་སྙིང་པོའི་མིང་ཐོས་ཏེ་ཕྱག་འཚལ་ཞིང་མཆོད་པ་བྱས་ན་འཇིག་རྟེན་ལོངས་སྤྱོད་ཅན་གྱི་ཁམས་དེར་སྐྱེ་བར་འགྱུར་རོ། །སེམས་ཅན་གང་ལ་ལས་ཐེག་པ་ཆེན་པོའི་ཆོས་སྒྲུབ་ན་ཡང་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར། གང་ཆོས་ཀྱི་རྣམ་གྲངས་འདི་བླང་ཞིང་བཅངས་པ་དེས་ནི་སངས་རྒྱས་འབྱུང་བ་བཅུ་མ་འདས་པར་ལུང་བསྟན་པ་ཡང་ཐོབ་པར་འགྱུར་རོ། །དེའི་ཚེ་དེའི་དུས་ན་བཅོམ་ལྡན་འདས་ཤཱཀྱ་ཐུབ་པ་ལ་བྱང་ཆུབ་སེམས་དཔའ་མཚན་ཉིད་དད་ཀྱིས་བདག་དང་སེམས་ཅན་ཐམས་ཅད་ཀྱི་དོན་གྱི་ཕྱིར་ཞུས་ནས་བཅོམ་ལྡན་འདས་ཀྱིས་ཕྱོགས་བཅུ་དུས་གསུམ་གྱི་སངས་རྒྱས་ཀྱི་མཚན་དང ། མདོ་སྡེ་བཅུ་གཉིས་ཀྱི་མཚན་དང ། བྱང་ཆུབ་སེམས་དཔའི་དགེ་འདུན་རྣམས་ཀྱི་མཚན་བསྟན་ནས་ཡང་སེང་གེའི་སྒྲ་ཆེན་པོ་སྒྲོགས་ཏེ། སེང་གེའི་སྒྲ་ཞེས་བྱ་བ་ནི་ངེས་པའི་ཚིག་བསྟན་པའོ། །ངེས་པའི་ཚིག་བསྟན་པ་ནི་དེ་བཞིན་གཤེགས་པ་རྟག་པར་འཚོ་སྐྱོང་ཞིང་གཞེས་ཏེ། མྱ་ངན་ལས་མི་འདའ་བར་རིག་པའོ་ཡང་སེམས་ཅན་ཐམས་ཅད་ལ་སངས་རྒྱས་ཀྱི་ངོ་བོ་ཉིད་ཡོད་དོ་ཞེས་བསྟན་པ་དང ། ལྷའི་བདུད་མུ་སྟེགས་ལ་སོགས་པ་སྤ་སྐོང་སྟེ། སྐྱབས་ཀྱི་དབང་དུ་གྱུར་པས་ན་སེང་གེའི་སྒྲ་ཞེས་བྱའོ། །དེ་ལྟར་བསྟན་ནས་ལྗགས་ཀྱི་མཚན་རྒྱ་ཆེན་པོས་སྟོང་གསུམ་གྱི་སྟོང་ཆེན་པོའི་ཁམས་ཀུན་ཁེབས་པར་གཡོག་ནས། འཇིག་རྟེན་གྱི་ཁམས་ཐམས་ཅད་རྣམ་པ་དྲུག་ཏུ་གཡོསོ། །རྣམ་པ་དྲུག་ཏུ་གཡོས་ཞེས་བྱ་བ་ནི་ཤར་ཕྱོགས་མཐོ་ན་ནུབ་ཕྱོགས་དམའ། ནུབ་ཕྱོགས་མཐོ་ན་ཤར་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས
62.261a
མཐོ་ན་ལྷོ་ཕྱོགས་དམའ། དབུས་མཐོ་ན་མཐའ་དམའ། མཐའ་མཐོ་ན་དབུས་དམའ་བ་ནི་ས་རྣམ་པ་དྲུག་ཏུ་གཡོས་ཞེས་བྱའོ། །ལྗགས་ཀྱི་དྲུང་ནས་འོད་ཟེར་ཆེན་པོ་བཏང་སྟེ་ཕྱོགས་བཅུར་སྣང་བ་ཆེན་པོ་བྱས་སོ། །སྣང་བ་ཆེན་པོ་དེས་མི་རྟག་པ་ནི་རྟག་པར་བྱས། མ་དག་པ་ནི་དག་པར་བྱས། སྡུག་བསྔལ་ཅན་ནི་བདེ་བར་བྱས། མ་རིག་པ་ནི་རིག་པར་བྱས། དེའི་ཚེ་སངས་རྒྱས་ཀྱི་འོད་ཀྱིས་རེག་ཅིང་སྣང་ངོ་ཅོག་ལ་རི་དང ། ནགས་ཚལ་དང ། ཡུལ་ས་དང ། ཆུ་བོའི་ཀླུང་དང ། རྒྱ་མཚོ་དང ། ལྕགས་ཀྱི་རི་ཁོར་ཡུག་དང ། དམྱལ་བ་ལ་སོགས་པ་ཐམས་ཅད་ཀྱང་མཐོ་དམའ་མེད་པར་མཉམ་པར་གྱུར་ཅིང་ཉལ་ཉིལ་དང ། ལྗན་ལྗིན་མེད་དེ། ཀུན་ཀྱང་ཡོངས་སུ་དག་པར་གྱུར་ནས་འདི་ལྟ་སྟེ། དཔེར་ན་ཤར་ཕྱོགས་ན་འཇིག་རྟེན་ཟླ་གང་རྣམ་དག་ཡོངས་སུ་བརྒྱན་དང་འདྲའོ། །དེའི་ཚེ་དེའི་དུས་ན་བཅོམ་ལྡན་འདས་ཤཱཀྱ་ཐུབ་པའི་སྐུ་སྤྲུལ་པ་ནི་ནམ་མཁའ་ནས་བབ་པ་ནི་མེ་ཏོག་གི་ཆར་བབ་པ་དང་འདྲའོ། །ས་འོག་ནས་བྱུང་བ་ནི་སྤྲིན་དང ། ན་བུན་བྱུང་བ་དང་འདྲ་བར་ནམ་མཁའ་ཡོངས་སུ་གང་སྟེ་ནམ་མཁའ་སྟོང་པ་ཅུང་ཟད་ཀྱང་མེད་དོ། །སྤྲུལ་པའི་ཞལ་སོ་སོ་ནས་ཚིག་འཐུན་པར་དེ་བཞིན་གཤེགས་པ་ནི་རྟག་པར་འཚོ་སྐྱོང་ཞིང་གཞེས་ཏེ་མྱ་ངན་ལས་མི་འདའོ། །སེམས་ཅན་ཐམས་ཅད་ལ་སངས་རྒྱས་ཀྱི་ངོ་བོ་ཉིད་ཡོད་དོ་ཞེས་གསུངས། ཡང་ཆོས་ཐམས་ཅད་ནི་སྟོང་པ་ཉིད་དོ་ཞེས་གསུངས་སོ། །སྤྱོད་ལམ་དེ་དག་གི་རྒྱུ་འབྲས་ནི་ཐེག་པ་གཅིག་ཏུ་ཟད་པ་ལས་སེམས་ཅན་གྱིས་ཐེག་པ་རྣམ་པ་གསུམ་དུ་མཐོང་ཞེས་བཤད་ནས་དེ་མ་ཐག་ཏུ་ཀུན་མི་སྣང་བར་གྱུར་ནས་བཅོམ་ལྡན་འདས་གདན་ལ་བཞུགས་པ་ཉི་ཚེ་སྣང་སྟེ། དེའི་ཚེ་ཚོགས་མང་པོ་ཐམས་ཅད་ཀྱིས་སྐུ་སྤྲུལ་པ་དེ་དག་མཐོང་བ་ནི་བཅོམ་ལྡན་འདས་ཤཱཀྱ་ཐུབ་པའི་བྱིན་གྱི་བརླབས་ཀྱི་མཐུ་སྟེ། ཤཱཀྱ་ཐུབ་པ་ཡང་བྱམས་པས་འདི་འདྲ་བའི་རྫུ་འཕྲུལ་དང ། གཟི་བརྗིད་མངོན་པར་སྤྲུལ་པའི་ཚེ་ཚོགས་ཀྱི་ནང་ནས་བྱང་ཆུབ་སེམས་དཔའ་གང་གཱའི་ཀླུང་བཞི་བཅུའི་བྱེ་མ་སྙེད་ཀྱིས་ནི་མི་སྐྱེ་བའི་ཆོས་ལ་བཟོད་པ་ཐོབ་བོ། །ཉན་ཐོས་བརྒྱད་ཁྲི་ཞིག་ནི་ཐེག་པ་ཆེན་པོའི་སེམས
62.261b
བསྐྱེད་དོ། །དགེ་སློང་སྟོང་ཕྲག་བཅུ་ཞིག་ནི་དགྲ་བཅོམ་པའི་ལམ་ཐོབ་བོ། །དགེ་སློང་མ་ཁྲི་བརྒྱད་སྟོང་ཞིག་གིས་ནི་ཕྱིར་མི་འོང་བའི་ལམ་ཐོབ་བོ། །དགེ་བསྙེན་ཁྲི་ཕྲག་བཞི་བཅུས་ནི་ལན་ཅིག་ཕྱིར་འོང་བའི་ལམ་ཐོབ་བོ། །དགེ་བསྙེན་མ་འབུམ་ཕྲག་བཅུ་ཞིག་ནི་རྒྱུན་དུ་ཞུགས་པའི་ལམ་ཐོབ་བོ། །ལྷ་དང་མི་གྲངས་མེད་པ་ཞིག་ནི་ཆོས་ཀྱི་མིག་རྡུལ་མེད་པ་དྲི་མ་དང་བྲལ་བ་རྣམ་པར་དག་པ་ཐོབ་སྟེ། རང་གི་ཚེ་སྔ་ཕྱི་ཤེས་པ་དང་འདུས་བྱས་ཀྱི་ཆོས་ཐམས་ཅད་མི་རྟག་པར་མཐོང་ངོ ། །དེ་ནས་ཚོགས་ཀྱི་ནང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་སྒྲ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བགོས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གོང་དུ་བསྟན་པ་བཞིན་ན་ནི་སངས་རྒྱས་ཀྱི་མཚན་ཐོས་ན་ཡང་སྡིག་འབྱང ། ཆོས་ཀྱི་མཚན་ཐོས་ན་ཡང་སྡིག་འབྱང ། དགེ་འདུན་གྱི་མཚན་ཐོས་ན་ཡང་སྡིག་འབྱང་བར་འགྱུར་རོ། །ཞེས་འབྱུང་ན་སངས་རྒྱས་ཀྱི་མཐུ་ལགས་སམ། ཆོས་ཀྱི་མཐུ་ལགས་སམ། དགེ་འདུན་གྱི་མཐུ་ལགས་སམ། སངས་རྒྱས་ཀྱི་མཐུ་ལགས་ན་ནི་སངས་རྒྱས་ལ་གསོལ་བ་བགྱི། ཆོས་ཀྱི་མཐུ་ལགས་ན་ནི་ཆོས་ལ་གསོལ་བ་བགྱི། དགེ་འདུན་གྱི་མཐུ་ལགས་ན་ནི་དགེ་འདུན་ལ་གསོལ་བ་བགྱི་བ་ལགས་ན་གསུམ་ཆར་ལ་གསོལ་བ་བགྱི་ཅི་འཚལ། གོང་ན་གསུངས་པ་ཐེག་པ་གཅིག་ལ་སོ་སོའི་སྐྱེ་བོས་རྣམ་པ་གསུམ་དུ་མཐོང་ངོ་ཞེས་བྱུང་ན། བཅོམ་ལྡན་འདས་ཉིད་ཀྱིས་ཀྱང་གསུམ་དུ་བཤད་ན་སེམས་ཅན་ལྟ་ཅི་ཞིག་སྨོས་ཞེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་སྒྲ་ལ་འདི་སྐད་ཅེས་བཀའ་སྩལ་ཏོ། །ལེགས་སོ་ལེགས་སོ། །རིགས་ཀྱི་བུ་སེམས་ཅན་ལ་ཕན་པ་དང ། བདེ་བའི་ཕྱིར་དོན་དེ་ལྟ་བུ་འདྲི་བ་ཡང་ཤིན་དུ་ལེགས་པར་ཉོན་ཅིག་ངས་ཁྱོད་ལ་བྱེ་བྲག་ཕྱེད་པར་བཤད་དོ། །སངས་རྒྱས་ཀྱི་མཐུ་འབའ་ཤིག་ཀྱང་མ་ཡིན། ཆོས་ཀྱི་མཐུ་འབའ་ཞིག་ཀྱང་མ་ཡིན། དགེ་འདུན་གྱི་མཐུ་འབའ་ཞིག་ཀྱང་མ
62.262a
ཡིན་ཏེ། ཀུན་ཚོགས་པའི་མཐུས་སངས་རྒྱས་ནི་སེམས་ཅན་གྱི་མགོན་གྱི་སྐྱབས་ཀྱི་ཕ་མ། བྱང་ཆུབ་སེམས་དཔའ་ནི་དགེ་བའི་བཤེས་གཉེན་ཡིན་ནོ། །སེམས་ཅན་བསླད་པ་ཅན་སེམས་སྟོར་བ་སླར་རྙེད་དེ་འཁོར་བ་ལས་སྐྱོ་ནས་དྲན་པའི་མཐུ་མང་པོས་ཁམས་གསུམ་ན་ཉོན་མོངས་པའི་རྒྱ་མཚོ་ལས་བསྒྲལ་བར་འདོད་ན་ཕྱོགས་སུ་རྒྱས་པའི་མདོ་སྡེ་འདིས་བསྒྲལ་བའི་གྲུ་ཆེན་པོ་བྱེད་དོ། །དེ་བས་ན་རིགས་ཀྱི་བུ་སངས་རྒྱས་ཀྱང་ཆོས་སོ། །ཆོས་ཀྱང་དགེ་འདུན་ནོ། །དགེ་འདུན་ནི་འདུས་མ་བྱས་པའོ། །འདུས་མ་བྱས་པ་ནི་སྟོང་པ་ཉིད་དེ། འདུས་མ་བྱས་པའི་སྟོང་པ་ཉིད་དང ། འདུས་བྱས་ཀྱི་སྟོང་པ་ཉིད་དང ། ནང་གི་སྟོང་པ་ཉིད་དང ། ཕྱིའི་སྟོང་པ་ཉིད་དང ། ཆེན་པོ་སྟོང་པ་ཉིད་དང ། ཆུང་ངུའི་སྟོང་པ་ཉིད་ཀྱང་སྟོང་པ་ཉིད་དུ་འདྲ་སྟེ། དེ་ལས་གཞན་མེད་དོ། །རིགས་ཀྱི་བུ་ཁྱོད་ཟེར་བ་ལྟ་ན། རྣམ་པ་གཅིག་ཏུ་བསྒྲུབ་པའི་རིགས་ཀྱི་རྣམ་པ་གསུམ་དུ་བསྒྲུབ་ཅི་དགོས་ཞེས་བྱ་བ་ནི་རིགས་ཀྱི་བུ་འདི་ལྟ་སྟེ། དཔེར་ན་མི་གཅིག་ནམ་མཁའ་སྟོང་པས་སྐྲག་སྟེ། གར་ཕྱིན་དགུར་གབ་ཀྱང་ནམ་མཁའ་དང་ཡོང་མ་བྲལ་ལོ། །རིགས་ཀྱི་བུ་ཕྱོགས་བཅུའི་དེ་བཞིན་གཤེགས་པས་བཤད་པ་དང ། ངས་བཤད་དོ་ཅོག་དགེ་བ་ཐམས་ཅད་ཀྱི་རྒྱུ་རྐྱེན་དང ། དཀོན་མཆོག་གསུམ་དང ། ཐེག་པ་གསུམ་ཡང་གཅིག་ལས་མི་འདའོ། །བྱང་ཆུབ་སེམས་དཔའ་སེང་གེ་སྒྲས་གསོལ་པ། ལེགས་སོ་ལེགས་སོ། ། བཅོམ་ལྡན་འདས་འཕགས་པས་བསྟན་པ་ལྟར་ན་བདག་སྔ་ནས་འཚལ་ཏེ་སེམས་ཅན་རྣམས་ཀྱི་སླད་དུ་དོན་དེ་ཞུ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ་བཞིན་དུ་མི་གཉིས་མི་གསུམ་མོ། །ཕྱོགས་སུ་རྒྱས་པའི་ཆོས་ཀྱི་རྣམ་གྲངས་འདི་ནི་སངས་རྒྱས་རྣམས་ཀྱི་ནི་ཡུམ། བྱང་ཆུབ་སེམས་དཔའ་རྣམས་ཀྱི་ནི་ཤུལ་ཆེན་པོ། རྣལ་འབྱོར་པ་རྣམས་ཀྱི་མིག་སྟེ། ལྟ་བ་ལོག་པ་རྣམས་སྡུད་པ་དང ། སེམས་སྟོར་བ་རྣམས་སྐྱོང་བ་དང ། ངན་སོང་གསུམ་གྱི་སྒོ་གཅོད་པ་དང ། བླ་ན་མ་མཆིས་པའི་བྱང་ཆུབ་ཀྱི་སྒོ་འབྱེད་པ་དང ། ཉན་ཐོས་རྣམས་བཟློག་པ་སྟེ། ཐེག་པ་ཆེན་པོར་འཛུད་པའི་སླད་དུ་བདག་གིས་གཟུངས་ཆེན་མོའི
62.262b
སྔགས་ཀྱིས་བསྲུང་ཞིང་བསྐྱབ་པར་བགྱིའོ། །སྡོམ་པ་མ་ཉམས་པ་དང ། མདོ་སྡེ་འདི་ལ་སྒོམ་ཞིང་བསླབ་པར་བགྱིད་པ་དེ་ལ་ཡང་སྲུང་ཞིང་བསྐྱབ་པར་བགྱིའོ། །གལ་ཏེ་གང་ཟག་གང་ལ་ལས་མདོ་སྡེ་འདི་ལ་བསྙེན་བཀུར་བགྱིད་ཅིང་དགུང་བདུན་གྱི་བར་དུ་སྤྱད་པ་སྤྱོད་པ་ལ་བདུད་སྡིག་ཅན་གྱིས་འཁྲུག་ཅིང་གླགས་ལྟ་བ་མཆིས་བདུད་སྡིག་ཅན་གྱིས་གླགས་ཀྱི་སྐབས་མི་རྙེད་པར་བགྱིའོ། །བཅོམ་ལྡན་འདས་བདག་མདོ་སྡེ་འདི་ལ་རིམ་གྲོ་བགྱིས་ཏེ། ཡུན་རིང་པོར་གནས་པར་བགྱི་བ་ཡང་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་གནས་པར་བགྱིའོ། །བཅོམ་ལྡན་འདས་གྱིས་བཀའ་སྩལ་པ། རིགས་ཀྱི་བུ་ཁྱོད་མདོ་སྡེ་འདི་ལ་རིམ་གྲོ་བྱ་བ་ནི་དཀོན་མཆོག་གསུམ་ལ་རིམ་གྲོ་བྱ་བ་དང་འདྲའོ། །སྟོན་པ་ལ་ཡང་རིམ་གྲོ་བྱ་བ་དང་འདྲའོ། །དེ་ནས་བྱང་ཆུབ་སེམས་དཔའ་སེང་གེ་སྒྲས་བཅོམ་ལྡན་འདས་ཀྱི་སྤྱན་སྔར་གཟུངས་སྔགས་འདི་སྐད་ཅེས་སྨྲས་སོ། །ན་མོ་བུད་དྷཱ་ཡ། ན་མོ་དྷརྨཱ་ཡ། ན་མཿ སང་གྷཱ་ཡ། ཨ་དན་ཏི་ད་ར་ནི། ཏ་ཐ་ཏ། ཨཱ་ཀཱ་ཤ་ནི་བ་ནི། སརྦ་དྷརྨཱ་ནི་བ་ནི། ཨི་ཤ་མ་ད། པི་པ་ཤ་ན། བི་མ་ལ་སུ་པ་རི། དྷརྨ་ནི་ཁ་ན། བ་ར་རུ་ནི་ཙ་ཡ་ཏ་མ་ལེ། ཙ་ལེ། ཧུ་ལུ་ཧུ་ལུ། ཤི་བི་ཏེ། མནྟྲ་མནྟྲ། མནྟྲཿ སཝཱ་ཧཱ། སྔགས་འདི་དུས་གཅིག་ལ་ལན་བརྒྱ་རྩ་བརྒྱད་བཟླས་ཤིང་མཆོད་རྟེན་ལ་ལན་བདུན་བསྐོར་བ་བགྱི། དེ་ལྟར་གདུགས་བདུན་གྱི་བར་དུ་མདོ་སྡེ་གཞན་ལ་མི་བསམ་པར་གདུགས་གཅིག་ཀྱང་དུས་གསུམ་དུ་ཕྱོགས་སུ་རྒྱས་པའི་མདོ་སྡེ་འདི་ལ་སེམས་རྩེ་གཅིག་ཏུ་བགྱི་སྟེ་སེམས་གཞན་དུ་མི་གཡེང་བར་བགྱིའོ། །བཅོམ་ལྡན་འདས་གཟུངས་སྔགས་འདི་ནི་སངས་རྒྱས་ཁྲི་ཕྲག་བརྒྱད་བརྒྱས་གསུངས་པ་སྟེ། དེང་འདིར་བདག་གིས་ཀྱང་བརྗོད་པ་ལགས་སོ། །གལ་ཏེ་འགའ་ཞིག་གཟུངས་འདི་ལ་སྨོད་པ་མཆིས་ན་སངས་རྒྱས་དེ་དག་ལ་སྨོད་པར་འགྱུར་རོ། །གཟུངས་འདི་ལ་སྨོད་པ་ནི་ཚེ་རབས་དུ་མའི་བར་དུ་བྱང་ཆུབ་ཏུ་བསྒྲུབ་ཀྱང་འགྲུབ་པར་མི་འགྱུར་ཏེ། སྲིད་པ་གསུམ་ལས་ཀྱང་མི་འདའོ། །དེ་ཅིའི་སླད་དུ་ཞེ་ན། སྔགས་འདི་ནི་སེམས་དྲན་པ
62.263a
ཉམས་པ་རྣམས་སླར་རྙེད་པ་དང ། གཟུངས་འདི་ལན་ཅིག་ཙམ་རྣ་བར་ཐོས་སམ། ཐོས་ནས་ཡི་གེར་བྲིས་ཏེ། ཤ་དང་ཆང་མི་འཚལ་བར་སྡོམ་པ་ལ་གནས་ཤིང་བདག་ཉིད་རྩེན་འཇོ་ལ་སོགས་པ་སྤངས་ཏེ། འདུ་འཛིའི་ནང་དུ་མི་འཇུག་ལ། རྒྱུན་དུ་བྱམས་པ་ཆེན་པོ་སྤྱོད་ཅིང་བསམ་གཏན་ལ་གཅེས་པར་འཛིན་ན་གང་ཟག་དེ་དཔག་ཏུ་མ་མཆིས་པའི་སྒྲིབ་པ་གསུམ་གྱི་སྡིག་ལྕི་བ་རྣམས་འབྱང་བར་འགྱུར་རོ། །གཟུངས་འདི་ཐོས་མ་ཐག་ཏུ་སེམས་ཐག་པ་ནས་བླང་བ་དང ། བཅང་བ་དང ། ཉིན་རེ་ཞིང་ཀློག་པ་དང ། ཁ་ཏོན་དུ་བགྱིད་པ་དང ། ཡི་དམ་དུ་མི་བསྐྱུད་པར་བགྱིད་ན་གང་ཟག་དེ་མངོན་པར་བྱང་མ་ཆུབ་ཀྱི་བར་དུ་ངན་སོང་གསུམ་དུ་ལྟུང་བར་མི་འགྱུར་རོ་ཞེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེང་གེ་སྒྲ་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་དཀོན་མཆོག་གསུམ་གྱི་རིམ་གྲོ་བྱ་བ་དང ། བྱམས་པའི་སེམས་ཀྱིས་སེམས་ཅན་རྣམས་སྤིད་པ་གསུམ་ལས་འདོན་པ་དང ། བསླབ་པ་མང་པོ་གྲངས་མེད་པ་ལ་ཕན་པ་དང ། བདེ་བ་ཆེན་པོ་བྱ་བའི་ཕྱིར་སྟོན་པའི་སྒོ་འབྱེད་ཅིང་ལོག་པར་ལྟ་བ་རྣམས་བཟློག་སྟེ་ཡང་དག་པར་ལྟ་བ་ལ་འཛུད་པའི་ཕྱིར་གཟུངས་སྔགས་འདི་བཤད་པ་ནི་ཤིན་དུ་འང་ལེགས་སོ། །རིགས་ཀྱི་བུ་སེམས་ཅན་ཐམས་ཅད་ཁྱོད་ཀྱི་མིང་དང་སྔགས་ཀྱི་སྒྲ་ཐོས་ནས་དད་པ་དང་གུས་པ་བསྐྱེད་དེ་མི་སྨོད་ན་གང་ཟག་དེ་ཚེ་འདི་ཉིད་ལ་ཡང་བདེ་ལ། འཆི་འཕོས་ན་ཡང་རྟག་ཏུ་སངས་རྒྱས་ཐམས་ཅད་མཐོང་ཞིང་ང་ཡང་མཐོང་ལ། ཁྱོད་ལ་སོགས་པ་བྱང་ཆུབ་སེམས་དཔའ་ཐམས་ཅད་ཀྱང་མཐོང་བར་འགྱུར་རོ། །མངོན་པར་འཚང་རྒྱ་བར་ཡང་ངེས་པར་རང་གིས་རིག་སྟེ་ཐེ་ཙོམ་མེད་དོ། །ཀུན་ནས་ཉོན་མོངས་པ་སྤངས་པ་དང ། །དགེ་བ་ཀུན་གྱི་ལམ་བསྒྲུབས་ཏེ། །སངས་རྒྱས་རང་བཞིན་མཐོང་བ་ཡང ། །རྣམ་དག་དད་པའི་དབང་གིས་སོ། །ཡང་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ང་མྱ་ངན་ལས་འདས་པའི་འོག་ཏུ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལས་ཉན་གཅིག་གམ། དུས་གཅིག་གམ། མཚན་གཅིག་གམ། སྐད་ཅིག་མ
62.263b
གཅིག་ལ་ཕྱོགས་བཅུ་དུས་གསུམ་དུ་གཤེགས་པའི་སངས་རྒྱས་དང ། མདོ་སྡེ་བཅུ་གཉིས་དང ། བྱང་ཆུབ་སེམས་དཔའི་དགེ་འདུན་ཆེན་པོ་རྣམས་ལ་ཕྱག་འཚལ་ཞིང་ཐེག་པ་ཆེན་པོ་ཚུལ་བཞིན་དུ་ཡིད་ལ་བྱེད་པ་དང ། དོན་དམ་པའི་བདེན་པ་ལ་བསམས་ན་གང་ཟག་དེ་ནི་སྐད་ཅིག་མ་སེ་གོལ་གཏོགས་པ་ཙམ་གྱིས་མི་དགེ་བ་བཅུ་དང ། མཚམས་མེད་པ་ལྔ་དང ། མཉམ་པ་ཉིད་ལ་སྐུར་པ་དང ། ཀུན་ནས་ཉོན་མོངས་པའི་ལས་ཐམས་ཅད་ཡོངས་སུ་མ་ལུས་པར་འབྱང་བར་འགྱུར་རོ། །གལ་ཏེ་དགེ་སློང་ངམ། དགེ་སློང་མ་འམ། བྱང་ཆུབ་སེམས་དཔའ་འམ། དགེ་སྦྱོང་ངམ། དགེ་སྦྱོང་མས་སེམས་ཀྱི་རང་བཞིན་སྟོར་ནས་རྩ་བ་བཞི་དང ། སྡོམ་པ་བརྒྱད་ཉམས་པ་དང ། མི་དགེ་བ་བཅུ་དང ། མཚམས་མེད་པ་ལྔ་བྱས་པ་དང ། མཉམ་པ་ཉིད་ལ་སྐུར་པ་རྣམས་ཕྱོགས་བཅུ་དུས་གསུམ་དུ་གཤེགས་པའི་སངས་རྒྱས་ཀྱི་མཚན་ལ་དད་པ་བསྐྱེད་དེ་ཕྱག་འཚལ་ན་འདི་ལྟ་བུའི་ལས་ངན་པ་ཀུན་མ་ལུས་པར་འབྱང་བར་འགྱུར་རོ། །དེ་སྐད་ཅེས་བཀའ་སྩལ་མ་ཐག་ཏུ་སྔོན་སངས་རྒྱས་འོད་མི་འགྱུར་གྱི་དུས་ན་རྒྱལ་བུ་དགེ་མཐོང་ཞེས་བྱ་བ་དེའི་ཚེ་མི་སུམ་སྟོང་དང་ལྷན་ཅིག་ཏུ་སྐད་ཅིག་མ་དེར་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་གཏུགས་ཏེ་ཕྱག་འཚལ་ནས་ཚིག་འཐུན་པར་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཅག་བསྐལ་པ་གྲངས་མ་མཆིས་པ་ནས་ཀུན་ནས་ཉོན་མོངས་པའི་ལས་བགྱིས་པ་ལྟ་ཞིག་བཤད་ཀྱིས་མི་རྫོགས་ཏེ། མི་དགེ་བ་བཅུ་དང ། མཚམས་མ་མཆིས་པ་ལྔ་དང་མཉམ་པ་ཉིད་ལ་སྐུར་པའི་སྡིག་གྲངས་མ་མཆིས་པར་བགྱིས་པ་དེ་དག་དེ་བཞིན་གཤེགས་པའི་མདོ་སྡེ་བཅུ་གཉིས་ལ་བརྟེན་ནས་བྱང་ཆུབ་སེམས་དཔའི་དགེ་འདུན་རྣམས་ཀྱི་སྤྱན་སྔར་མཐོལ་ཏེ། འགྱོད་ཚངས་སུ་གསོལ་ཞིང་མཆིས་ན་སྐབས་དབྱེ་ཞིང་ཅི་གནང་ཞེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ལེག་སོ་ལེགས་སོ། །རིགས་ཀྱི་བུ་འཇིགས་པའི་སེམས་བསྐྱེད་པ་འང་དཀའ་ལ། དགེ་བའི་རྩ་བ་བསྐྱེད་པ་འང་དཀའ་སྟེ། མི་དགེ་བ་བཅུ་དང ། མཚམས་མེད་པ་ལྔ་འཐོལ་ཞིང་འཆགས་པར་འདོད་པ་ནི་ལོངས་སྤྱོད་ལ་སོགས་པ་ཡང
62.264a
སངས་རྒྱས་ཀྱི་བདག་ཉིད་མཐོང་དུ་ཉེ་བས་ཡིད་ལ་དྲན་པ་བཞིན་དུ་མཐོལ་ཞིང་ཤོགས་ཤིག་།དེ་ནས་རྒྱལ་བུ་དགེ་མཐོང་ལ་སོགས་པ་མི་སུམ་སྟོང་གིས་བཅོམ་ལྡན་འདས་ཀྱིས་སྐབས་དབྱེ་བར་གནང་བ་བྱམས་པའི་གསུང་ཐོས་ནས་གོས་ཚགས་བཅོས་ཏེ་ཐལ་མོ་སྦྱར་ཅིང་ཕྱག་འཚལ་ནས་བླ་གོས་ཕྲག་པ་གཡས་སུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཕྱོགས་བཅུའི་སངས་རྒྱས་ལ་སྐྱབས་སུ་མཆིའོ། །ཕྱོགས་བཅུའི་ཆོས་ལ་སྐྱབས་སུ་མཆིའོ། །ཕྱོགས་བཅུའི་དགེ་འདུན་ལ་སྐྱབས་སུ་མཆིའོ། །ཡང་འདི་ལྟ་སྟེ། ཤར་ཕྱོགས་ཀྱི་སངས་རྒྱས་འཁྲུག་པ་མི་མངའ་ལ་ཕྱག་འཚལ་ཞིང་སྐྱབས་སུ་མཆིའོ། །ལྷོ་ཕྱོགས་ཀྱི་སངས་རྒྱས་རིན་ཆེན་འབྱུང་གནས་ལ་ཕྱག་འཚལ་ཞིང་སྐྱབས་སུ་གསོལ་ལོ། །ནུབ་ཕྱོགས་ཀྱི་སངས་རྒྱས་འོད་དཔག་མེད་ལ་ཕྱག་འཚལ་ཞིང་སྐྱབས་སུ་གསོལ་ལོ། །བྱང་ཕྱོགས་ཀྱི་སངས་རྒྱས་དོན་ཡོད་གྲུབ་པ་ལ་ཕྱག་འཚལ་ཞིང་སྐྱབས་སུ་གསོལ་ལོ། །བླ་མ་ཕྱོགས་ཀྱི་སངས་རྒྱས་དྲི་བརྩེགས་ལ་ཕྱག་འཚལ་ཞིང་སྐྱབས་སུ་གསོལ་ལོ། །འོག་མ་ཕྱོགས་ཀྱི་སངས་རྒྱས་གཟུགས་བརྙན་འབུམ་ལ་ཕྱག་འཚལ་ཞིང་སྐྱབསུ་གསོལ་ལོ། །ཡང་ཤར་ཕྱོགས་ན་སྐྱེས་བུ་ཆེན་པོ་ཀུན་དུ་བཟང་པོ་ལ་ཕྱག་འཚལ་ཞིང་སྐྱབས་སུ་གསོལ་ལོ། །ལྷོ་ཕྱོགས་ན་སྐྱེས་བུ་ཆེན་པོ་འཇིན་རྟེན་འཛིན་ལ་ཕྱག་འཚལ་ཞིང་སྐྱབས་སུ་གསོལ་ལོ། །ནུབ་ཕྱོགས་ན་ཀུན་དུ་སྤྱན་རས་གཟིགས་དབང་ཕྱུག་ལ་ཕྱག་འཚལ་ཞིང་སྐྱབསུ་གསོལ་ལོ། །བྱང་ཕྱོགས་ན་ཟླ་གང་ལ་ཕྱག་འཚལ་ཞིང་སྐྱབས་སུ་གསོལ་ལོ། །བླ་མ་ཕྱོགས་ན་ནམ་མཁའི་སྙིང་པོ་ལ་ཕྱག་འཚལ་ཞིང་སྐྱབས་སུ་གསོལ་ལོ། །འོག་མ་ཕྱོགས་ན་སྐྱེས་བུ་ཆེན་པོ་བརྟན་དཔལ་ལ་ཕྱག་འཚལ་ཞིང་སྐྱབསུ་གསོལ་ལོ། །ཡང་བདག་ཅག་གི་མཁན་པོ་དེ་བཞིན་གཤེགས་པ་འོད་མི་འགྱུར་ལ་ཕྱག་འཚལ་ཞིང་སྐྱབས་སུ་གསོལ་ལོ། །མ་བྱོན་པའི་སངས་རྒྱས་ཀྱི་བདག་ཉིད་ལ་ཕྱག་འཚལ་ཞིང་སྐྱབས་སུ་གསོལ་ལོ། །ཕྱོགས་གཞན་ན་སངས་རྒྱས་སྤྲུལ
62.264b
པའི་སྐུ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །ད་ལྟར་བདག་ཅག་གི་མཁན་པོ་བཅོམ་ལྡན་འདས་ཤཱཀྱ་ཐུབ་པ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །སྐྱེས་བུ་ཆེན་པོ་དྲི་མ་མེད་པར་གྲགས་པ་དང་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ཞིང་སྐྱབས་སུ་གསོལ་ལོ། །འཕགས་པ་དགའ་བོ་དང་འོད་སྲུང་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །འཕགས་པའི་འབྲས་བུ་རྣམ་བཞི་མངོན་པར་འབྱུང་བ་རྣམས་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །བྱང་ཆུབ་ཀྱི་སེམས་དང་པོ་བསྐྱེད་པ་རྣམས་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །སྡེ་སྣོད་ཆེན་པོ་གསུང་རབ་མདོ་སྡེ་བཅུ་གཉིས་དང་མཉམ་པ་ཉིད་ཡང་དག་པའི་མདོ་སྡེ་གཞན་བཞུགས་སོ་འཚལ་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །ཆ་བརྒྱད་དུ་བགོས་པའི་སྐུ་གདུང་དང་རིང་བསྲེལ་དང་བཅས་པའི་མཆོད་རྟེན་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །ད་ལྟ་ན་སྐུ་གཟུགས་བཞུགས་པ་ཐམས་ཅད་ལ་ཡང་ཕྱག་འཚལ་ཞིང་སྐྱབས་སུ་གསོལ་ལོ། །ཕྱོགས་བཞིའི་རྒྱལ་པོ་ཆེན་པོ་བཞི་དང ། ཚངས་པ་དང ། བརྒྱ་བྱིན་དང ། སུམ་བཅུ་རྩ་གསུམ་གྱི་ལྷའི་དབང་ཕྱུག་དང ། བར་སྣང་ལ་གནས་པའི་ལྷ་དང ། སའི་ལྷ་དང ། རི་དང ། ནགས་ཚལ་དང ། ཤིང་དྲུང་གི་ལྷ་དང ། དྲང་སྲོང་དང ། རྫུ་འཕྲུལ་གྱི་རྐང་པ་དང་ལྡན་པ་རྣམས་དང ། ལྷའི་སྤྱན་མངའ་བ་རྣམས་དང ། ལྷའི་སྙན་མངའ་བ་ཐམས་ཅད་ཀྱིས་སྙན་གྱིས་གསན་ཅིང་མཁྱེན་པར་མཛོད་ཅིག་།ཀུན་དབང་དུ་གསོལ་ཏེ། སེམས་ཅན་ཐམས་ཅད་ལ་མ་མཐོལ་མ་བཤགས་པ་ཞིག་མཆིས་ན་ཡང་སྡིག་པ་ཐམས་ཅད་བྱང་བར་གྱུར་ཅིག་།ཡང་དེ་སྐད་ཅེས་སྨྲས་པ་དང ། བདག་ཅག་ཐོག་མ་མ་མཆིས་པ་ནས་ད་ལྟར་གྱི་ལུས་ངན་པ་འདི་ཐོབ་པའི་བར་དུ་ནོར་ཅིང་འཁྲུལ་པའི་སེམས་ཀྱིས་ཕྱིན་ཅི་ལོག་ཏུ་ལྟ་བ་དཔག་ཏུ་མ་མཆིས་པ་ཉོན་མོངས་པ་དང་མི་དགེ་བའི་ལས། བགྱིས་པ་བརྗོད་ཀྱིས་མི་ལང་སྟེ། སྡིག་པའི་ཚོགས་བགྱིས་སོ་འཚལ་རང་གིས་མ་ཚོར་མ་རིག་པས་ངན་སེམས་རབ་ཏུ་རྒྱས
62.265a
ཏེ། ཚེ་ཕྱི་མ་མ་མཐོང་ཞིང་ཚེ་འདི་འབའ་ཞིག་མཐོང་བས་ཉོན་མོངས་པའི་བག་ཆགས་ལ་མོས་ཏེ། དགེ་བའི་རྩ་བ་དང་རིང་དུ་གྱུར་ཅིང་ལས་ངན་པས་བར་དུ་ཆོད་ནས་སྡིག་པའི་གྲོགས་པོ་དང་བསྟེན་ཅིང་དགེ་སློང་དང ། དགེ་སློང་མ་ལ་མི་རིགས་མི་ཚུལ་བའི་ལས་བགྱིས་པ་དང ། ཕ་དང་མ་ལ་མི་རིགས་མི་ཚུལ་བའི་ལས་བགྱིས་པ་དང ། ཡང་བདག་རང་ཉམས་ཀྱི་དབང་གིས་དགེ་འདུན་གྱི་དཀོར་ནོར་ཐུགས་ཐུབ་ཏུ་སྤྱད་པ་དང ། དགེ་འདུན་སྡེ་ལྔ་ལ་མི་རིགས་མི་ཚུལ་བར་བགྱིས་པ་དང ། འཇིག་རྟེན་པའི་ཀུན་ནས་ཉོན་མོངས་པའི་འབྲས་བུ་དཔག་ཏུ་མ་མཆིས་པར་བཤད་པ་འམ། བྱང་ཆུབ་ཀྱི་དགེ་བའི་རྩ་བ་དང་ལྡན་པའི་སེམས་ཅན་བཀུམ་པ་འམ། ཆོས་ཀྱི་སློབ་དཔོན་ལ་སྐུར་ཏེ། ཆོས་ལ་ཆོས་མ་ལགས་ཞེས་སྐུར། ཆོས་མ་ལགས་པ་ནི་ཆོས་ལགས་ཞེས་བརྗོད། དེ་བཞིན་གཤེགས་པ་ལ་ནི་མི་རྟག་ཅེས་བགྱིས། དམ་པའི་ཆོས་ལ་ཡང་མི་རྟག་གོ་ཞེས་བགྱིས། དགེ་འདུན་དཀོན་མཆོག་ཀྱང་མི་རྟག་གོ་ཞེས་བགྱིས། སྦྱིན་པ་དང་ཤེས་རབ་ལ་ནི་མ་མོས། ལོག་པའི་ཆོས་ལ་དད་ཅིང་འཛིན་པ་དེ་དག་གི་སླད་དུ་དེང་འཇིགས་ཤིང་སྐྲག་པ་དཔག་ཏུ་མ་མཆིས། ཁྲེལ་ཞིང་ངོ་ཚ་བ་ཡང་དཔག་ཏུ་མ་མཆིས་ཏེ། དཀོན་མཆོག་གསུམ་ལ་སྐྱབས་སུ་གསོལ་ལོ། །སངས་རྒྱས་བཅོམ་ལྡན་འདས་ནི་བྱམས་པ་དང་ཐུགས་རྗེ་མངའ་སྟེ། ཕྱོགས་སུ་སྙོམས་པའི་ཡབ་ཡུམ་ལགས། བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་ལགས་ན་བདག་ཅག་གི་སྡིག་པ་བསྐལ་པ་གྲངས་མ་མཆིས་པ་ནས་འཁོར་བ་ནས་བགྱིས་པ་མཐོལ་ཞིང་བཤགས་པར་འཚལ་ན་གནང་བའི་སྐབས་དབྱེ་བར་གསོལ་ཞིང་སླན་ཆད་ཀྱང་མི་བགྱིད་པར་སྨོན་ཏོ། །ཡང་འདི་ལྟ་སྟེ། བཅོམ་ལྡན་འདས་བདག་ཅག་བསྐལ་པ་དཔག་ཏུ་མ་མཆིས་པ་ཚུན་ཆད་མཚམས་མ་མཆིས་པ་ལྔ་བགྱིས་པ་དང ། སངས་རྒྱས་དུས་གསུམ་དུ་གཤེགས་པའི་བསླབ་པ་ཞིག་བགྱིས་པ་དང ། ལོག་སྤྱོད་ཀྱི་སྤྱད་པ་སྤྱོད་པ་དང ། ངག་རྩུབ་མོ་གཏོང་བ
62.265b
དང ། དམ་པའི་ཆོས་ལ་སྐུར་པའི་ལས་ངན་པ་དེ་དག་འགྱོད་ཅིང་མཐོལ་མ་མྱོང་སྟེ།[་]སེམས་ལ་གནོང་བ་འམ། ངོ་ཚ་བ་མ་མཆིས་པར་མི་དགེ་བ་བཅུ་དང ། མཚམས་མ་མཆིས་པ་ལྔ་ལ་སོགས་པའི་སྡིག་པ་མི་དགེ་བའི་ལས་ལྕི་བ་ངེས་པར་བགྱིས་པར་རང་གིས་འཚལ་ཀྱང་ནོངས་པ་བཅབས་ནས་འཇིགས་ཤིང་སྐྲག་པ་དང ། གནོང་ཞིང་ངོ་ཚ་བའི་སེམས་ཐོག་མ་ནས་མ་མཆིས་པར་དད་པ་ཅན་གྱི་མཆོད་པ་བླངས་ནས་མཐོལ་ཞིང་བཤགས་མ་མྱོང་སྟེ། དམ་པའི་ཆོས་ཡུན་དུ་བཙུགས་ཏེ་རིམ་གྲོ་བགྱི་བའི་སེམས་མ་མཆིས་པར་རྟག་ཏུ་སྨོས་ཤིང་བརྙས་པ་དང ། ངག་གི་སྒོ་ནས་ཀུན་ནས་ཉོན་མོངས་པའི་ནོངས་པ་མང་པོ་བགྱིས་པ་དང ། ཆེད་ན་དཀོན་མཆོག་གསུམ་ཡང་མེད་དོ། །ཞེས་བརྗོད་པ་དང ། མི་དགེ་བ་བཅུ་དང ། མཚམས་མ་མཆིས་པའི་སྡིག་དེ་དག་བགྱིས་པའི་སླད་དུ་དེང་འཇིགས་ཤིང་སྐྲག་པ་དཔག་ཏུ་མ་མཆིས། གནོང་ཞིང་ཁྲེལ་པ་དཔག་ཏུ་མ་མཆིས་ཏེ་དཀོན་མཆོག་གསུམ་ལ་སྐྱབས་སུ་གསོལ་ལོ། །སངས་རྒྱས་བཅོམ་ལྡན་འདས་ནི་བྱམས་པ་དང་ཐུགས་རྗེ་མངའ་སྟེ་ཕྱོགས་སུ་སྙོམས་པའི་ཡབ་ཡུམ་ལགས། བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་ལགས་ན་བདག་ཅག་གི་སྡིག་བསྐལ་པ་གྲངས་མ་མཆིས་པའི་འཁོར་བ་ནས་བགྱིས་པ་མི་འཆབ་པའི་སེམས་ཀྱིས་མཐོལ་ཞིང་བཤགས་པར་འཚལ་ན། གནང་བའི་སྐབས་དབྱེ་བར་གསོལ། སླན་ཆད་ཀྱང་མི་བགྱིད་པར་སྨོན་ཡང་འདི་ལྟ་སྟེ། བཅོམ་ལྡན་འདས་བདག་ཅག་བསྐལ་པ་གྲངས་མ་མཆིས་པ་ཚུན་ཆད་ཕྱིན་ཅི་ལོག་ཏུ་ལྟ་ལྟ་སྟེ། རྩ་བ་བཞི་ནི་སྦོམ་པོར་བཤད། སྦོམ་པོ་ནི་རྩ་བ་བཞིར་བཤད། ཞིག་པ་རྣམས་ནི་མ་ཞིག་པར་བཤད། མ་ཞིག་པ་རྣམས་ནི་ཞིག་པར་བཤད། ལྕི་བ་རྣམས་ནི་ཡང་བར་བཤད། ཡང་བ་རྣམས་ནི་ལྕི་བར་བཤད། དག་པ་རྣམས་ནི་མ་དག་པར་བཤད། མ་དག་པ་རྣམས་ནི་དག་པར་བཤད་པ་དང ། ཡང་ལོག་པར་ལྟ་བས་འཇིག་རྟེན་པའི་གཙུག་ལག་ལ་བསྟོད་ཅིང་བསྔགས་ནས་ཆོས་དང་མདོ་སྡེ་ལ་ནི་མ་གུས་ཏེ་སྨྲེ་ངན་གྱི
62.266a
གཏམ་རྟག་ཏུ་གླེང་ཞིང་བརྗོད་པ་དང ། མ་བརྟགས་པའི་རྣམ་པ་བརྒྱད་པོ་འཆང་བ་དང ། དེ་བཞིན་གཤེགས་པའི་བཀའ་ཡང་དག་པ་ནི། བདུད་ཀྱི་ཚིག་གོ་ཞེས་བགྱིས་པ་དང ། བདུད་ཀྱི་ཚིག་ཡང་དག་པ་ནི་དེ་བཞིན་གཤེགས་པའི་བཀའ་ཞེས་བགྱིས་པ་དང ། མུ་སྟེགས་མཁེན་གྱི་ཚིག་ལ་ཡིད་ཆེས་པར་འཛིན་པ་དང ། དེ་བཞིན་གཤེགས་པ་མཐར་མྱ་ངན་ལས་འདས་ཏེ་མེད་པས་དཀོན་མཆོག་གསུམ་ཡང་མི་རྟག་གོ་ཞེས་བགྱིས་ནས་ལུས་དང་སེམས་འཁྲུལ་ཅིང་ཕྱིན་ཅི་ལོག་ཏུ་ལྟ་བ་དཔག་ཏུ་མ་མཆིས་པའི་སླད་དུ་དེང་འཇིགས་ཤིང་སྐྲག་པ་དཔག་ཏུ་མ་མཆིས། གནོང་ཞིང་ངོ་ཚ་བ་ཡང་དཔག་ཏུ་མ་མཆིས་ཏེ། དཀོན་མཆོག་གསུམ་ལ་སྐྱབས་སུ་གསོལ་ལོ། །སངས་རྒྱས་བཅོམ་ལྡན་འདས་ནི་བྱམས་པ་དང་ཐུགས་རྗེ་མངའ་སྟེ། ཕྱོགས་སུ་སྙོམས་པའི་ཡབ་ཡུམ་ལགས། བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་ལགས་ན་བདག་ཅག་གི་སྡིག་པ་བསྐལ་པ་གྲངས་མ་མཆིས་པའི་འཁོར་བ་ནས་བགྱིས་པ་དེ་དག་མི་འཆབ་པའི་སེམས་ཀྱིས་འཐོལ་ཞིང་བཤགས་པར་འཚལ་ན་གནང་བའི་སྐབས་དབྱེ་བར་གསོལ། སླན་ཆད་ཀྱང་མི་བགྱིད་པར་སྨོན་ཏོ། །ཡང་འདི་ལྟ་སྟེ། བཅོམ་ལྡན་འདས་བདག་ཅག་བསྐལ་པ་དཔག་ཏུ་མ་མཆིས་པ་ནས་ཚེ་ལུས་འདི་ལ་ཐུག་གི་བར་དུ་དགེ་འདུན་སྤྱིའི་ནོར་རམ། ཕྱོགས་བཅུའི་དགེ་འདུན་གྱི་ནོར་རམ། །ད་ལྟར་བཞུགས་པའི་དགེ་འདུན་གྱི་ནོར་རམ། དགེ་འདུན་སྡེ་ལྔའི་ནོར་རམ། དགེ་སློང་གང་ཟག་གི་ནོར་རམ། ཡོན་བདག་ཐམས་ཅད་ཀྱི་ནོར་རྫས་ལ་བརྐུས་པ་འམ། རང་ཉམ་དུ་སྤྱོད་པ་དང ། ཡང་རང་སྨོས་ཏེ། བདག་དམ་པའི་ཆོས་བསམ་གཏན་བཞི་འམ། འབྲས་བུ་བཞི་མ་ཐོབ་པར་ཐོབ་བོ་ཞེས་སྨྲས་པ་ལ་སོགས་པ་རྐྱེན་དེ་ལྟ་བུའི་ལས་ངན་པ་མི་དགེ་བའི་རྒྱུ་རྐྱེན་དུ་གྱུར་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ཡང་ཕམ་པ་བཞི་དང ། སྡོམ་པ་བརྒྱད་དང ། དྲུག་དང ། དགེ་འདུན་གྱི་ལྷག་མ་བཅུ་གསུམ་དང ། མ་ངེས་པའི་ཆོས་གཉིས་དང ། སྤང་བའི་ལྟུང་བ་སུམ་བཅུ་དང ། ལྟུང་བ་དགུ་བཅུ་དང ། སོ་སོར་བཤགས
62.266b
པ་བཞི་དང ། བསླབ་པ་མང་པོ་དང ། བདུན་ཤིན་དུ་ལྕི་བའི་ཆོས་རྣམས་ཏེ། ཚུལ་ཁྲིམས་དེ་དག་རེ་རེ་ལ་ཉེས་བྱས་ནས་ཕམ་པ་ལ་ཐུག་གི་བར་དུ་ཉམས་པ་དང ། མཚམས་མ་མཆིས་པ་ལྔ་བགྱིས་པ་དང ། དམ་པའི་ཆོས་དང ། མདོ་སྡེ་ཟབ་མོ་ལ་སྐུར་པ་དང ། ལོག་སྤྱོད་ཀྱི་སྤྱད་པ་སྤྱོད་པ་ནས་ནོངས་པ་བཅབས་ཏེ་འགྱོད་ཅིང་མཐོལ་མ་མྱོང་བས་ཉིན་མཚན་དུ་འཕེལ་ཞིང་སྐྱེ་བ་སྔོན་རྒྱལ་བ་དག་བཤད་པ་ལས་ཐོས་པ་ནི་དམ་པའི་ཆོས་ལ་སྐུར་པ་འམ། མཚམས་མ་མཆིས་པ་ལྔ་བགྱིས་པ་འམ། རྩ་བ་བཞི་ཕམ་པར་གྱུར་པ་རྣམས་མ་བཤགས་མ་མཐོལ་ན་སེམས་ཅན་དམྱལ་བར་ངེས་པར་ལྟུང་སྟེ། དེ་བཞིན་གཤེགས་པ་དང ། བྱང་ཆུབ་སེམས་དཔའ་རྣམས་དང ། ཉན་ཐོས་དང ། རང་སངས་རྒྱས་ཀྱིས་ཀྱང་སྐྱབས་མཛད་པར་མི་འགྱུར། དགེ་འདུན་དང ། ཕ་མ་དང ། ལྷ་རྣམས་དང ། མི་རྣམས་ཀྱིས་ཀྱང་སྐྱབས་དང་འོར་བ་བགྱིད་མི་ནུས་སོ་ཞེས་བྱུང་བས་ན་དེའི་སླད་དུ་དེང་འཇིགས་ཤིང་སྐྲག་པ་དཔག་ཏུ་མ་མཆིས། གནོང་ཞིང་ངོ་ཚ་བ་དཔག་ཏུ་མ་མཆིས་ཏེ། དེའི་སླད་དུ་དེང་དཀོན་མཆོག་གསུམ་དང ། འདས་པའི་སངས་རྒྱས་རིན་ཆེན་མང་དང ། མ་འོངས་པའི་སངས་རྒྱས་སྟོང་དང ། ད་ལྟར་བཞུགས་པའི་སངས་རྒྱས་སྤྲུལ་པའི་སྐུ་ཤཱཀྱ་ཐུབ་པ་ལ་སྐྱབསུ་གསོལ་ལོ། །སངས་རྒྱས་བཅོམ་ལྡན་འདས་ནི་བྱམས་པ་དང་ཐུགས་རྗེའི་མངའ་བདག་སྟེ། ཕྱོགས་སུ་སྙོམས་པའི་ཡབ་ཡུམ་ལགས། བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་ལགས་ན་བདག་ཅག་བསྐལ་པ་དཔག་ཏུ་མ་མཆིས་པ་ཚུན་ཆད་ཀྱི་ཉོན་མོངས་པའི་སྒྲིབ་པ་དང ། ལས་ཀྱི་སྒྲིབ་པ་དང ། ཤེས་བྱའི་སྒྲིབ་པ་དང ། ཕམ་པ་བཞི་དང ། མཚམས་མ་མཆིས་པ་དང ། མི་དགེ་བ་བཅུ་ལ་སོགས་པའི་སྡིག་ལྕི་བ་རྣམས་མཐོལ་ཞིང་བཤགས་པར་འཚལ་ན་གནང་བའི་སྐབས་དབྱེ་བར་གསོལ། ཡང་འདི་ལྟ་སྟེ། བཅོམ་ལྡན་འདས་དེང་བདག་ཅག་གིས་སེམས་ཅན་རྣམས་དང ། བདག་ཅག་རང་རང་གི་སླད་དུ་ཕྱོགས་བཅུའི་རྒྱལ་བའི་སྤྱན་སྔར་ད་མཐོལ་ཞིང་བཤགས་པར་འཚལ་ལོ། །སེམས་ཅན་ཐམས་ཅད་ཀྱིས་བསྐལ་པ་དཔག་ཏུ་མ་མཆིས་པ་ཚུན་ཆད་དེ་བཞིན་གཤེགས་པ
62.267a
རྣམས་དང ། ཕ་མའི་དྲིན་གློ་བར་མ་ཆུད་པ་དང ། རྣམ་པར་བྱང་བའི་ཆོས་མ་མཚལ་ཏེ། མི་དགེ་བ་སྣ་ཚོགས་བགྱིས་པ་དང ། རང་གི་རིགས་སྙེམས་ཏེ། དྲེགས་ཤིང་རྒྱགས་པའི་ཚེ་ཀུན་ནས་ཉོན་མོངས་པའི་ལས་ཉམ་བག་ཏུ་བགྱིས་ཀྱང་ནོངས་པར་མ་མཐོང་བས་སྐྱེ་བོ་བླུན་པོའི་ལས་བགྱིས་པ་དང ། སྡིག་པའི་བཤེས་གཉེན་ལ་བསྟེན་ཅིང་ཉོན་མོངས་པའི་སེམས་འཁྲུགས་པ་དང ། འདོད་པ་ལྔའི་ཡོན་ཏན་ལ་ཆོག་མ་འཚལ་ཏེ། མི་དགེ་བའི་ལས་རྣམས་བགྱིས་པ་དང ། འགྲོ་བ་བཟང་མོས་བསླུས་ཏེ་འདོད་ཆགས་དང ། ཞེ་སྡང་དང ། གཏི་མུག་གི་ཉོན་མོངས་པས་གཟིར་ཅིང་སེམས་འཁྲུགས་ཏེ། སྤྲོས་པ་དང ། ལུས་དང ། ངག་དང་ཡིད་གསུམ་གྱི་སྒོ་ནས་བསྩོགས་པའི་ལས་མི་དགེ་བ་བདག་རང་གིས་བགྱིས་པ་དང ། གཞན་བགྱིད་དུ་སྩལ་པ་དང ། བགྱིད་པ་ལ་རྗེས་སུ་ཡི་རང་བ་དེ་དག་ཐམས་ཅད་དེང་སོ་སོར་འཆགས་སོ། །མཐོལ་ལོ། །མི་འཆབ་བོ། །སངས་རྒྱས་དང ། ཆོས་དང ། འཕགས་པའི་དགེ་འདུན་ལ་བསྙེན་བཀུར་མ་བགྱིས་པའི་སྡིག་པ་ཡང་དེང་སོ་སོར་ཤགས་སོ་མཐོལ་ལོ། །མི་འཆབ་བོ། །བྱང་ཆུབ་སེམས་དཔའ་དང ། རང་སངས་རྒྱས་ལ་ཡང་བསྙེན་བཀུར་མ་བགྱིས་པའི་སྡིག་པ་ཡང་དེང་སོ་སོར་འཆགས་སོ། །མཐོལ་ལོ་མི་འཆབ་བོ། །མ་རིག་པའི་དབང་གིས་དམ་པའི་ཆོས་ལ་སྐུར་པ་བཏབ་པ་དང ། ཕ་མ་དང ། མཁན་པོ་དང ། སློབ་དཔོན་གྱི་དྲིན་གློ་བར་མ་ཆུད་པའི་སླད་དུ་བསྙེན་བཀུར་མ་བགྱིས་པའི་སྡིག་པ་དེ་དག་ཀྱང་དེང་སོ་སོར་འཆགས་སོ། །མཐོལ་ལོ། །མི་འཆབ་བོ། །བླུན་ཞིང་རྨོངས་པས་བསྒྲིབས་ཏེ། ཉམ་རངས་དང་རྒྱགས་པས་མི་དགེ་བ་སྣ་ཚོགས་བགྱིས་པའི་སྡིག་པ་དེ་དག་ཀྱང་དེང་སོ་སོར་འཆགས་སོ། །མཐོལ་ལོ། །མི་འཆབ་བོ། །སླན་ཆད་ཀྱང་མི་བགྱིད་དོ། །ཕྱོགས་བཅུའི་སངས་རྒྱས་ཐམས་ཅད་ལ་བདག་ཅག་གིས་ཡོན་ཕུལ་ཞིང་མཆོད་པས་ནི་མ་ལུས་པའི་སེམས་ཅན་དེ་དག་ཀུན་ས་བཅུ་ལ་འཁོད་དེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར
62.267b
འཚང་རྒྱ་བར་གྱུར་ཅིག་།དེ་ནས་བཅོམ་ལྡན་འདས་ཀྱིས་རྒྱལ་བུ་དགེ་མཐོང་ལ་འདི་སྐད་ཅེས་བཀའ་སྩལ་ཏོ། །ལེགས་སོ་སྐྱེས་བུ་ཆེན་པོ་རང་གི་ལས་ལེགས་ཉེས་ཀྱི་རྟོག་པ་ལ་མཁས་ཏེ། ཀུན་ནས་ཉོན་མོངས་པའི་ལས་ལ་འཇིགས་པ་དང་སྐྲག་པ་སྐྱེས་ནས་ཉེས་པ་རྣམས་མངོན་པར་མཐོལ་བའི་སྟེང་དུ་སེམས་ཅན་གྱི་སྡིག་མང་པོ་ཡང་ཁྱོད་ཀྱིས་མཐོལ་ཞིང་འཆགས་པའི་ཕྱིར་ཁྱོད་ནི་སྐྱེས་བུ་དམ་པ་ཡང་དག་པ་ཞེས་བྱའོ། །རང་གི་ཉོན་མོངས་པ་སྤོང་བའི་སྟེང་དུ་སེམས་ཅན་ཀུན་ནས་ཉོན་མོངས་པ་ཡང་རིང་དུ་དབྲལ་བར་བྱས་པས་དེའི་ཕྱིར་ཁྱོད་ནི་སྐྱེས་བུ་དམ་པ་ཡང་དག་པ་ཞེས་བྱ་བ་ཡིན་ཏེ། རང་གི་དོན་དུ་སྨོན་པ་མ་ཡིན་ཏེ། ཐོག་མར་སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་སྨོན་ལམ་བཏབ་པའི་ཕྱིར་ཁྱོད་ནི་སྐྱེས་བུ་དམ་པ་ཡང་དག་པ་སྐྱེས་བུ་དམ་པ་ཡང་དག་པ་ཞེས་བྱའོ། །དེ་ནས་རྒྱལ་བུ་དགེ་མཐོང་ལ་སོགས་པ་མི་སུམ་སྟོང་གིས་འགྱོད་ཚངས་བགྱིས་པའི་འོག་ཏུ་བཅོམ་ལྡན་འདས་ལ་ཚིགས་སུ་བཅད་དེ་འདི་སྐད་ཅེས་བསྟོད་དོ། །བཅོམ་ལྡན་ཉགཅིག་གཙོ་བོ་ཁྱོད། །ཁམས་གསུམ་ཕ་མ་ཐམས་ཅད་མཁྱེན། །ཐམས་ཅད་མི་མཉམ་མཉམ་པ་ཉིད། །བཅོམ་ལྡན་དཀོན་ལ་ཕྱག་འཚལ་ལོ། །སྐྱེ་བོ་སྦྱིན་གཏོང་རང་གི་ཕྱིར། །ནོར་རྫས་བྱིན་ཅིང་ལན་ཡང་རེ། །བྱམས་ཆེན་རྒྱལ་བ་དེ་མིན་ཏེ། །དགྲ་གཉེན་བྱམས་དང་ཕན་སྙོམས་མཛད། །རྐང་གཉིས་ནང་ན་རྒྱལ་བ་བཙུན། །ཤེས་རབ་སྤྱན་གྱིས་མཁྱེན་གཟིགས་ལ། །བརྩོན་འགྲུས་ཆེ་བདག་སྐྱབས་སུ་མཆི། །ལྷ་གཞན་ཤེས་རབ་དེ་མ་འཚལ། །འདས་དང་མ་བྱོན་ད་ལྟར་བཞུགས། །རྒྱལ་བ་ཀུན་ལ་བདག་ཕྱག་འཚལ། །དེ་བཞིན་རྒྱལ་ལ་སྐྱབས་གསོལ་པ་འང ། །དུས་གསུམ་རྒྱལ་བ་མཆོད་པ་བཞིན། །དེ་ནས་ཕྱོགས་བཅུའི་སངས་རྒྱས་རྣམས་ཀྱིས་རྒྱལ་བུ་དགེ་མཐོང་དང་མི་སུམ་སྟོང་ལ་ཚིགས་སུ་བཅད་དེ་བསྟོད་པ། གང་ཞིག་སངས་རྒྱས་འགྲུབ་འདོད་པ། །མང་དུ་ཐོས་ལ་འབྲང་བར་བྱོས། །སློབ་དཔོན་དགེ་ལ་བཀུར་བྱས་ན། །སངས་རྒྱས་འགྲུབ
62.268a
ལ་ཡུན་མི་རིང ། །གང་ཞིག་ཚུལ་ཁྲིམས་རྣམ་དག་སྤྱོད། །དེ་ནི་དགེ་སློང་ཡང་དག་ཡིན། །གང་ཞིག་སྟོང་པར་སྒོམ་ནུས་པ། །དེ་ནི་ཏིང་འཛིན་ཐོབ་ཅེས་བྱ། །གང་ཞིག་བརྩོན་འགྲུས་སྤྱོད་ནུས་པ། །དེ་ནི་བྱང་ཆུབ་སྤྱོད་པའོ། །གང་ཞིག་མྱ་ངན་འདའ་འགྱུར་བ། །དེ་ནི་དགའ་བ་ཡང་དག་པའོ། །ཚུལ་ཁྲིམས་འཛིན་པའི་དགེ་སློང་དང ། །རྣམ་དག་ཁྲིམས་འཛིན་དགེ་སློང་མ། །ཟླ་བ་ཕྱེད་ཅིང་གསོ་སྦྱོང་བྱོས། །ཆོས་གོས་རྣམ་པ་ལུས་གྱོན་ཏེ། །ལྷུང་བཟེད་གསེག་གཤང་ཐོགས་ནས་སུ། །རྣམ་དག་བསོད་སྙོམས་འགྲོ་བྱས་ན། །ལྷ་རྣམས་ཀུན་ཀྱང་དགའ་འགྱུར་བས། །ཐལ་མོ་སྦྱར་ཅིང་གུས་ཕྱག་འཚལ། །ངས་ཀྱང་ལྷ་དང་མི་རྣམས་ཀུན། །དེ་ཡི་བྱ་བ་བྱེད་དུ་གཞུག་།དཔེར་ན་ལྷ་བྲན་ཐམས་ཅད་ཀྱིས། །ལྷ་ཡི་དབང་པོ་བརྒྱ་བྱིན་ལ། །རིམ་གྲོ་གུས་པར་བྱེད་པ་བཞིན། །ད་ལྟར་འཕྲལ་དུ་འང་ལན་ཐོབ་སྟེ། །ཕྱི་མའི་དུས་སུ་འང་དཔག་ཏུ་མེད། །རབ་ཏུ་བྱུང་ཞིང་ཁྲིམས་འཛིན་པ། །སངས་རྒྱས་དྲིན་ལན་ལོན་ཞེས་བྱ། །རྒྱལ་བུ་དགེ་མཐོང་འདི་ལྟ་སྟེ། །ང་དང་སེམས་དཔའ་མ་གཏོགས་པར། །འཇིག་རྟེན་པ་ཡི་མི་ཀུན་ཀྱང ། །རྣམ་དག་དད་པའི་སེམས་བསྐྱེད་དོ། །ཕྱོགས་བཅུའི་སངས་རྒྱས་དེ་དག་ཀུན། །མྱ་ངན་མི་འདའ་རྟག་ཏུ་བཞུགས། །ཆོས་དང་དགེ་འདུན་དེ་བཞིན་ཏེ། །དེ་ལྟར་མངོན་པར་ཤེས་པ་ནི། །སངས་རྒྱས་དྲིན་ལན་ལོན་ཞེས་བྱ། །རྒྱལ་བུ་དགེ་མཐོང་འདི་ལྟ་སྟེ། །འཇིག་རྟེན་པ་ཡི་མི་དག་ཀུན། །རྣམ་པར་འབྱེད་པའི་སེམས་མེད་ཅིང ། །ཐེག་པ་གཅིག་ལམ་མངོན་པར་ཤེས། །འདས་པ་དང་ནི་མ་འོངས་པ། །ཕྱོགས་བཅུ་དང་ནི་ད་ལྟའི་རྣམས། །སངས་རྒྱས་ཐེག་ཆེན་གཅིག་པུ་ལ། །གཉིས་སམ་གསུམ་ཞེས་བྱ་མེད་པར། །དེ་ལྟར་ཡིད་ལ་བསྐྱེད་ནས་སུ། །སེམས་ཀྱིས་རྣམ་པར་མི་རྟོག་ན། །དེ་ལྟ་བུ་ཡི་མི་རྣམས་ནི། །རྒྱལ་བའི་དྲིན་ལན་ལོན་ཞེས་བྱ། །རྒྱལ་བུ་དགེ་མཐོང་འདི་ལྟ་སྟེ། །གང་ཟག་ལ་ལ་འགའ་ཞིག་གིས། །སངས་རྒྱས་མྱ་ངན་འདས་ཕྱི་ན། །རྟག་ཏུ་དད་པའི་སེམས་བསྐྱེད་དེ། །སེམས་ཅན་ཀུན་ལ་སངས་རྒྱས་ཀྱི། །བདག་ཉིད་ཡོད་པར་བཤད་པ་ནི། །དེ་ལྟ་བུ་ཡི་གང་ཟག་རྣམས། །
62.268b
རྒྱལ་བའི་དྲིན་ལན་ལོན་ཞེས་བྱ། །གང་ཞིག་སྐད་ཅིག་དགེ་སྤྱོད་ཅིང ། །ལྷ་ཡི་འབྲས་བུ་མི་རེ་སྟེ། །ཅིག་ཅར་བླ་མེད་ལམ་བསྒྲུབས་ན། །རྒྱལ་བའི་དྲིན་ལན་ལོན་ཞེས་བྱ། །རྒྱལ་བུ་དགེ་མཐོང་འདི་ལྟ་སྟེ། །སངས་རྒྱས་མྱ་ངན་འདས་ཕྱི་ན། །གལ་ཏེ་གང་ཟག་འགའ་ཞིག་གིས། །ཡུད་ཙམ་མདོ་སྡེ་འདི་བཀླགས་ཏེ། །དཀོན་མཆོག་གསུམ་ལ་གུས་བྱས་ཤིང ། །མཁན་ལ་སྲིད་ཞུ་མཆོད་བྱས་ན། །དེ་ལྟ་བུ་ཡི་གང་ཟག་རྣམས། །རྒྱལ་བའི་དྲིན་ལན་ལོན་ཞེས་བྱ། །གང་ཞིག་ནོར་རྫས་སྣ་འགའ་འམ། །ཁ་ཟས་དང་ནི་གོས་ཀྱི་རྣམས། །ཀུན་ལ་ཁྱབ་པར་སྦྱིན་བྱས་ན། །རྒྱལ་བའི་དྲིན་ལན་ལོན་ཞེས་བྱ། །རྒྱལ་བུ་དགེ་མཐོང་འདི་ལྟ་སྟེ། །ང་ཡི་ཆོས་རྣམས་འཇིགས་པ་ན། །གང་ཞིག་འགའ་ལ་བློ་བརྟན་ནས། །ཡུད་ཙམ་མདོ་སྡེ་འདི་མཉན་ན། །བྱང་ཆུབ་སེམས་དཔའ་འབུམ་བརྒྱ་ལ། །མཆོད་པ་ཕུལ་བས་དེ་ལྷག་གོ། །ཐེག་ཆེན་མདོ་སྡེ་འདི་དག་ཀྱང ། །སངས་རྒྱས་བྱང་ཆུབ་ཀུན་གྱི་ཡུམ། །སངས་རྒྱས་བྱང་ཆུབ་སེམས་དཔའ་དང ། །མདོ་སྡེ་འདི་ལ་དྲན་བྱས་ཏེ། །སྙོམས་སེམས་ཕན་ཚུན་གཉིས་མེད་ན། །རྒྱལ་བའི་དྲིན་ལན་ལོན་ཞེས་བྱ། །རྒྱལ་བུ་དགེ་མཐོང་འདི་ལྟ་སྟེ། །གང་ཞིག་ཆོས་འདི་འཇིགས་པའི་ཚེ། །རྒྱལ་བའི་དྲིན་ལན་བླན་འདོད་པས། །སྐད་ཅིག་ཡུད་ཙམ་སྒོམ་བྱེད་པ། །སྟོང་ཁམས་གང་བའི་སེམས་ཅན་གྱི། །སྲོག་གི་སྦྱིན་པ་བྱིན་པ་བས། །བསམ་གཏན་བསྒོམ་པ་ཡོན་ཏན་ཆེ། །གང་ཞིག་བསྒོམ་ལ་སྐུར་པ་དང ། །དགེ་འདུན་འཁྲུགས་པར་བྱེད་པ་ནི། །སྟོང་ཁམས་གསུམ་པོ་གང་བ་ཡི། །མི་རྣམས་ཀྱི་ནི་སྲོག་བཅད་དང ། །སྲོག་ཆགས་ཐམས་ཅད་བསད་དང་འདྲ། །དེ་སྡིག་ཡང་ནི་དེ་བཞིན་ནོ། །གང་ཞིག་དགེ་སྤྱོད་མཐོང་བ་ལ། །སྐུར་པ་འདེབས་ཤིང་མ་དད་པ། །དཀོན་མཆོག་གསུམ་གྱི་རིགས་གཅོད་པས། །དེ་ནི་རྒྱལ་བའི་ལན་མི་ལྡོན། །དེ་ནས་རྒྱལ་བུ་དགེ་མཐོང་དང་མི་སུམ་སྟོང་པོ་བཅོམ་ལྡན་འདས་རྣམས་ཀྱིས་བསྟན་པར་གནང་བ་དགའ་བས་ཚིམ་ནས་བསྟན་པ་ཉིད་སྤྱི་བོས་བླངས་ཏེ། ཚིགསུ་བཅད་པ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་བསྟན་པ་ལ། །གང་མང་ལགས་ཤིང་གང་མི་མང ། །མང་དང་མི་མང་གཉི་ག་ཡང ། །
62.269a
དངོས་པོ་དམིགས་སུ་ཡོང་མ་མཆིས། །ཡང་དག་མཚན་ཉིད་དེ་ལྟ་བུ། །ཆོས་རྣམས་ཀུན་དང་མི་འགལ་ལོ། །སེམས་ཅན་ཀུན་ལ་བྱམས་སླད་དུ། །ཐབས་ཀྱིས་ཆོས་ཀྱི་འཁོར་ལོ་བསྐོར། །འཕགས་པ་གང་ནས་བྱོན་པ་ནས། །དེ་བཞིན་གཤེགས་པ་འང་དེ་ནས་བྱོན། །ཡང་དག་མཚན་ཉིད་ཇི་ལྟ་བ། །དེ་བཞིན་གཤེགས་པ་འང་དེ་བཞིན་ནོ། །འཕགས་པ་ཀུན་གྱི་བདེན་ཚིག་ལྟར། །དེ་བཞིན་གཤེགས་པ་འང་དེ་བཞིན་བཤད། །དེ་ཡི་སླད་དུ་རྒྱལ་བའི་མཚན། །དེ་བཞིན་གཤེགས་ཤེས་བགྱི་བ་ལགས། །བཟོད་པའི་གོ་ཆ་བརྟན་པའི་སེམས། །སྲ་བའི་གཞུ་སྟོབས་བརྩོན་འགྲུས་ཆེ། །རྣོ་བའི་མདའ་ནི་ཤེས་རབ་མགྱོགས། །ལེ་ལོའི་དགྲ་རྣམས་འཇོམས་མཛད་ཅིང ། །འཇིག་རྟེན་ལྷ་དང་མི་རྣམས་ཀྱི། །མཆོད་ཡོན་ཕུལ་བ་བཞེས་པས་ན། །དེ་ཡི་སླད་དུ་རྒྱལ་བའི་མཚན། །དགྲ་བཅོམ་ཞེས་ནི་བགྱི་བ་ལགས། །རབ་ཏུ་སྡུག་བསྔལ་མཚན་ཉིད་མཁྱེན། །སྡུག་བསྔལ་རྒྱུ་ཡང་ཤིན་དུ་མཁྱེན། །སྡུག་བསྔལ་ཞི་བའི་མཚན་ཉིད་ལ། །ཞི་བའི་ཚུལ་ཡང་རབ་ཏུ་མཁྱེན། །འཕགས་པའི་བདེན་བཞི་མཁྱེན་པས་ན། །འགྱུར་བ་མ་མཆིས་བདེན་པར་ངེས། །དེ་བས་ཕྱོགས་བཅུའི་ནང་ན་ཡང ། །མཚན་ནི་ཡང་དག་རྫོགས་ཞེས་བགྱི། །རིག་པ་གསུམ་པོ་མཆོག་བརྙེས་པས། །སྤྱོད་ལམ་རྣམ་དག་དང་ཡང་ལྡན། །དེ་སླད་མཚན་ནི་བཅོམ་ལྡན་འདས། །མཁྱེན་དང་ཞབས་སུ་ལྡན་ཞེས་བགྱི། །ཆོས་རྣམས་ཐམས་ཅད་ཀུན་མཁྱེན་ཅིང ། །དམ་པའི་ཆོས་ཉིད་རབ་བརྙེས་པས། །ཐམས་ཅད་ཀུན་ལ་བྱམས་སླད་དུ། །དུས་སྐབས་སྦྱར་ཞིང་ཐབས་ཀྱིས་བཤད། །སྐྱེ་རྒ་ན་འཆི་རབ་བསལ་ཅིང ། །བདེ་བའི་གནས་སུ་ཕྱིན་པར་མཛད། །དེ་ཡི་སླད་དུ་རྒྱལ་བའི་མཚན། །བདེ་བར་གཤེགས་ཤེས་བགྱི་བ་ལགས། །འཇིག་རྟེན་གང་ནས་མཆིས་པ་དང ། །འཇིག་རྟེན་བས་པའི་མཐའ་ཡང་མཁྱེན། །དེ་ཡི་སླད་དུ་རྒྱལ་བའི་མཚན། །འཇིག་རྟེན་མཁྱེན་ཞེས་བགྱི་བ་ལགས། །ཐུགས་རྗེ་ཆེན་པོས་སེམས་ཅན་བསྒྲལ། །མཉེན་དེས་དགེ་བ་བསྟན་ཅིང་བཏུལ། །དེ་ཡི་སླད་དུ་རྒྱལ་བའི་མཚན། །སྐྱེས་བུ་འདུལ་བའི་ཁ་ལོ་སྒྱུར། །ཚུལ་ཁྲིམས་ཏིང་འཛིན་ཤེས་རབ་སྤྱན། །
62.269b
ཐུབ་ཅིང་བླ་རུ་འདའ་བ་མེད། །དེ་ཡི་སླད་དུ་རྒྱལ་བའི་མཚན། །བླ་ན་མེད་ཅེས་བགྱི་བ་ལགས། །ཉོན་མོངས་མི་མངའ་ཤེས་རབ་ལྡན། །རྣམ་གྲོལ་དམ་པ་མཆོག་བཤད་པས། །དེ་ཡི་སླད་དུ་རྒྱལ་བའི་མཚན། །ལྷ་དང་མི་ཡི་སྟོན་ཞེས་བགྱི། །དུས་གསུམ་གཡོ་འམ་མི་གཡོ་བ། །བས་སམ་མ་བས་ཆོས་ཀུན་ཡང ། །བྱང་ཆུབ་ཤིང་དྲུང་ཀུན་མཁྱེན་པས། །དེ་ཡི་སླད་དུ་མཚན་སངས་རྒྱས། །དེ་ནས་ཕྱོགས་བཅུའི་སངས་རྒྱས་རྣམས་རྫུ་འཕྲུལ་ཆེན་པོའི་ཏིང་ངེ་འཛིན་དུ་ཞུགས་ནས་སྐུ་ནམ་མཁའ་ལ་འཕགས་ཏེ་ཞལ་སོ་སོ་ནས་ཚིག་འཐུན་པར་འདི་སྐད་ཅེས་བཀའ་སྩལ་ཏོ། །ཀྱེ་རྒྱལ་བུ་དགེ་མཐོང་དང་མི་སུམ་སྟོང་པོ་ཁྱེད་རྣམས་ཀྱི་སྡིག་གི་རང་བཞིན་ནི་ནང་ན་ཡང་མི་གནས། ཕྱི་རོལ་ན་ཡང་མི་གནས། བར་ན་ཡང་མི་གནས་སོ། །སེམས་བརྟན་པའི་ཕྱིར་དགེ་བའི་མཐུ་ཡང་བརྟན་ནོ། །རྣམ་པར་གྲོལ་བའི་ཕྱིར་སྡིག་གི་རང་བཞིན་ཡང་རྣམ་པར་གྲོལ་ལོ། །ཤེས་རབ་སྟོང་པ་ཉིད་ཀྱི་ཕྱིར་སྡིག་གི་རང་བཞིན་ཡང་སྟོང་པ་ཉིད་དོ། །དད་པའི་མཐུ་ཆེ་བའི་ཕྱིར་བསོད་ནམས་ཀྱི་མཐུ་ཡང་ཆེའོ། །དེ་བཞིན་དུ་མཐོལ་བཤགས་ཏེ་འགྱོད་ཚངས་ནུས་པ་ནི་ངེད་རྣམས་མཐོང་བའི་སྟེང་དུ་སངས་རྒྱས་རིན་ཆེན་མང་དང ། སྤྲུལ་པའི་སྐུ་ཐམས་ཅད་ཀྱང་མཐོང་བར་འགྱུར་རོ། །འགྱོད་ཚངས་ཀྱིས་སྡིག་སྦྱངས་པས་རྒྱུན་དུ་ང་ཡང་མཐོང་ལ། དེང་བྱང་ཆུབ་སེམས་དཔའ་རྣམས་ལ་བསྟན་བཅོས་པ་དང་འདྲ་བར་དེ་བཞིན་དུ་འགྱོད་ཚངས་བྱས་པ་ནི་ང་དང་སྤྲུལ་པ་རྣམས་དང ། འདས་པའི་སངས་རྒྱས་རིན་ཆེན་མང་ལ་སོགས་པ་ཐམས་ཅད་ཀྱང་དགྱེས་པར་འགྱུར་རོ། །ཕྱོགས་བཅུ་དུས་གསུམ་གྱི་སངས་རྒྱས་མཐོང་བ་དང ། མཆོད་པ་བྱས་པར་འགྱུར་རོ། །དེ་དག་ཀྱང་དགྱེས་པར་འགྱུར་ཏེ། ཐེག་པ་ཆེན་པོའི་མདོ་སྡེ་འདིའི་རྗེས་སུ་བྱང་ཆུབ་ཏུ་ཆུད་པར་འགྱུར་རོ། །བཅོམ་ལྡན་འདས་ཀྱིས་འཁོར་ཞབས་རིང་བ་རྣམས་ལ་བཀའ་སྩལ་པ། སྡིག་ཅན་རྣམས་ཀྱིས་སྡིག་བཤགས་པར་འདོད་ན། རྒྱལ་བུ་དགེ་མཐོང་བཞིན་དུ་དུས་གསུམ་གྱི་སངས་རྒྱས་དང ། མདོ་སྡེ་བཅུ་གཉིས་དང ། བྱང་ཆུབ་སེམས་དཔའི་དགེ་འདུན་ཆེན་པོ་རྣམས་ལ། རེ་རེ་ནས་དམིགས་ཏེ་ཕྱག་འཚལ་བ་ང་དང་ཕྲད་པ་དང་འདྲ་བ་འམ། མཐོང་བ
62.270a
དང་འདྲ་བར་འདུ་ཤེས་བསྐྱེད་དེ། སངས་རྒྱས་གཅིག་གམ། སངས་རྒྱས་གཉིས་སམ། སངས་རྒྱས་བཅུ་འམ། སངས་རྒྱས་བརྒྱ་འམ། སངས་རྒྱས་སྟོང་ངམ། སངས་རྒྱས་ཁྲི་འམ། སངས་རྒྱས་གྲངས་མེད་པའི་འདུ་ཤེས་སུ་བསྐྱེད་དེ། མཐོང་བ་དང་འདྲ་བར་དམིགས་ལ། དེ་བཞིན་དུ་རེ་རེ་ནས་སེམས་ཀྱིས་ཕྱག་འཚལ་ན་དེ་དག་གིས་བསོད་ནམས་དཔག་ཏུ་མེད་པ་ཡང་ཐོབ་པར་འགྱུར་ལ། འཁོར་བའི་སྡིག་ལྕི་བ་ཐམས་ཅད་ཀྱང་སེལ་བར་བྱེད་དོ། །བསྐལ་པ་གྲངས་མེད་པའི་བར་དུ་ངན་སོང་གསུམ་དུ་ལྟུང་བར་མི་འགྱུར། སངས་རྒྱས་ཀྱི་ཆོས་ལ་བདེ་བར་གནས་པར་འགྱུར་བར་ཡང་ངེས་ཏེ་ཐེ་ཙོམ་མེད་དོ། །དེའི་ཕྱིར་སྡིག་པ་རྣམས་མཐོལ་ཞིང་བཤགས་པར་བྱས་ལ་སེམས་ཐག་པ་ནས་དད་པ་བསྐྱེད་ན་གདོན་མི་ཟ་བར་སྡིག་འབྱང་བར་འགྱུར་རོ། །དེ་ནས་རྒྱལ་བུ་དགེ་མཐོང་དང་མི་སུམ་སྟོང་གིས་ཅིག་ཅར་དུ་སྐད་བསྐྱེད་དེ། བཅོམ་ལྡན་འདས་ལ་ཚིགས་སུ་བཅད་དེ་བསྟོད་པ་འདི་སྐད་ཅེས་གསོལ་ཏོ། །བཅོམ་ལྡན་བྱམས་ཤིང་ཐུགས་རྗེ་ཆེ། །ཤཱ་ཀྱའི་གདུང་རིགས་ཆོས་ཀྱི་རྗེ། །ཚོགས་ཀྱི་ནང་ན་སེང་གེའི་སྒྲས། །ཁྱབ་པར་སེམས་ཅན་བསྡུས་པ་ནི། །ཕ་ལ་གཟིགས་པ་བུ་གཅིག་བཞིན། །རྣམ་པར་འབྱེད་པ་ཡོང་མ་མཆིས། །དེ་ལྟ་བུ་ཡི་བླ་མེད་པ། །མཐོང་ནས་དེ་སླད་གུས་ཕྱག་འཚལ། །དེ་ནས་བཅོམ་ལྡན་འདས་ཀྱིས་རྒྱལ་བུ་དགེ་མཐོང་དང་མི་སུམ་སྟོང་རྣམས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཁྱེད་རྣམས་འདི་ལྟར་འགྱོད་ཚངས་བྱས་ཏེ། མི་འཆབ་པའི་སེམས་ཀྱིས་མཐོལ་ཞིང་བཤགས་པས་ད་ནི་བྱང་ཆུབ་སེམས་དཔའ་ཞེས་བྱའོ། །ཁྱེད་རྣམས་མ་འོངས་པའི་དུས་ན་གདོན་མི་ཟ་བར་སངས་རྒྱས་སུ་འགྲུབ་བོ། །རིགས་ཀྱི་བུ་ཡང་འདི་ལྟ་སྟེ། ང་མྱ་ངན་ལས་འདས་པའི་འོག་ཏུ་གང་ཞིག་སེམས་ཐག་པ་ནས་ཕྱོགས་བཅུའི་དེ་བཞིན་གཤེགས་པ་རྣམས་དང ། མདོ་སྡེ་བཅུ་གཉིས་དང ། བྱང་ཆུབ་སེམས་དཔའི་དགེ་འདུན་རྣམས་ལ་ཕྱག་འཚལ་བར་ནུས་པ་ནི་དཀོན་མཆོག་གསུམ་གྱི་དྲིན་གྱི་ལན་ལོན་ཞེས་བྱ་བ་སྟེ། དེ་མ་ཐག་ཏུ་མི་དགེ་བ་བཅུ་དང ། མཚམས་མེད་པ་ལྔ་དང ། མཉམ་པ་ཉིད་ལ་བསྐུར་པའི
62.270b
སྡིག་བྱང་བར་གྱུར་ནས་རྒྱུན་དུ་ཞུགས་པར་འོས་པ་ནི། རྒྱུན་དུ་ཞུགས་པའི་འབྲས་བུ་སྦྱིན་ནོ། །ལན་ཅིག་ཕྱིར་འོང་བར་འོས་པ་ནི་ལན་ཅིག་ཕྱིར་འོང་བའི་འབྲས་བུ་སྦྱིན་ནོ། །ཕྱིར་མི་འོང་བར་འོས་པ་ནི་ཕྱིར་མི་འོང་བའི་འབྲས་བུ་སྦྱིན་ནོ། །དགྲ་བཅོམ་པར་འོས་པ་ནི་དགྲ་བཅོམ་པའི་འབྲས་བུ་སྦྱིན་ནོ། །རང་སངས་རྒྱས་སུ་འོས་པ་ནི་རང་སངས་རྒྱས་ཀྱི་འབྲས་བུ་སྦྱིན་ནོ། །བྱང་ཆུབ་སེམས་དཔར་འོས་པ་ནི། བྱང་ཆུབ་སེམས་དཔའི་འབྲས་བུ་སྦྱིན་ནོ། །ད་ལྟར་མདོ་སྡེ་འདིའི་ནང་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྐྱེ་བ་གཅིག་གིས་ཡང་དག་པའི་མཚན་ཉིད་ཐོབ་པ་ཡང་ཕྱོགས་བཅུ་དུས་གསུམ་གྱི་སངས་རྒྱས་ལ་ཕྱག་འཚལ་བའི་ཡོན་ནོ། །བྱང་ཆུབ་སེམས་དཔའ་སྐྱེ་བ་གཉིས་ཀྱིས་ཆོས་ཀྱི་དབྱིངས་ཐོབ་པ་ཡང་དུས་གསུམ་གྱི་སངས་རྒྱས་རྣམས་ལ་ཕྱག་འཚལ་བའི་ཡོན་ནོ། །བྱང་ཆུབ་སེམས་དཔའ་ཡང་དག་པའི་མཐར་ཕྱིན་པའི་ཡེ་ཤེས་ཐོབ་པ་ཡང་དུས་གསུམ་གྱི་སངས་རྒྱས་རྣམས་ལ་ཕྱག་འཚལ་བའི་ཡོན་ནོ། །བྱང་ཆུབ་སེམས་དཔའ་ལ་ལས་དོན་དམ་པའི་བདེན་པ་ཁོང་དུ་ཆུད་པ་ཡང་དུས་གསུམ་གྱི་སངས་རྒྱས་རྣམས་ལ་ཕྱག་འཚལ་བའི་ཡོན་ནོ། །བྱང་ཆུབ་སེམས་དཔའ་དཔའ་བར་འགྲོ་བའི་ཏིང་ངེ་འཛིན་དང་ལྡན་པ་ཡང་དུས་གསུམ་གྱི་སངས་རྒྱས་རྣམས་ལ་ཕྱག་འཚལ་བའི་ཡོན་ནོ། །བྱང་ཆུབ་སེམས་དཔའ་ནམ་མཁའི་ཏིང་ངེ་འཛིན་དང ། ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་དང་ལྡན་པ་ཡང་དུས་གསུམ་གྱི་སངས་རྒྱས་རྣམས་ལ་ཕྱག་འཚལ་བའི་ཡོན་ནོ། །བྱང་ཆུབ་སེམས་དཔའ་ལ་ལས་ཕྱིར་མི་ལྡོག་པའི་བཟོད་པ་དང ། ཆོས་སྦྱིན་གྱི་བཟོད་པ་དང ། ཆོས་བཞིན་གྱི་དབྱིངས་ལྡན་པ་ཡང་དུས་གསུམ་གྱི་སངས་རྒྱས་རྣམས་ལ་ཕྱག་འཚལ་བའི་ཡོན་ནོ། །བྱང་ཆུབ་སེམས་དཔའ་ལ་ལས་གཟུངས་དྲན་པ་ཆེན་པོའི་སེམས་དང ། རང་གིས་རིག་པའི་ཡེ་ཤེས་དང་ལྡན་པ་ཡང་དུས་གསུམ་གྱི་སངས་རྒྱས་རྣམས་ལ་ཕྱག་འཚལ་བའི་ཡོན་ནོ། །བྱང་ཆུབ་སེམས་དཔའ་ལ་ལས་སེང་གེའི་སྒྲའི་ཏིང་ངེ་འཛིན་དང ། རྡོ་རྗེའི་ཏིང་ངེ་འཛིན
62.271a
དང ། ཡེ་ཤེས་ལྔའི་ཕྱག་རྒྱའི་ཏིང་ངེ་འཛིན་དང་ལྡན་པ་ཡང་དུས་གསུམ་དུ་གཤེགས་པའི་སངས་རྒྱས་རྣམས་ལ་ཕྱག་འཚལ་བའི་ཡོན་ནོ། །བྱང་ཆུབ་སེམས་དཔའ་ལ་ལས་མཉམ་པ་ཉིད་ཀྱི་ཏིང་ངེ་འཛིན་དང ། བྱམས་པ་ཆེན་པོ་དང ། སྙིང་རྗེ་ཆེན་པོ་དང ། བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་སྤྱོད་ལམ་དང་ལྡན་པ་ཡང་དུས་གསུམ་དུ་གཤེགས་པའི་སངས་རྒྱས་རྣམས་ལ་ཕྱག་འཚལ་བའི་ཡོན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྗེ་འཇམ་དཔལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་ཐམས་ཅད་ནོར་ཅིང་འཁྲུལ་པའི་སེམས་འཁྲུགས་ཏེ། མི་དགེ་བ་དང་མཚམས་མ་མཆིས་པ་བགྱིས་པ་རྣམས་ཇི་ལྟར་བགྱིས་ན་སྡིག་རྣམས་འབྱང་བར་འགྱུར། བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། གོང་དུ་བསྟན་པ་ཡིན་ཏེ། གང་ལ་ལས་ཕྱོགས་སུ་རྒྱས་པའི་ཆོས་ཀྱི་རྣམ་གྲངས་འདི་དང ། ཕྱོགས་བཅུ་དུས་གསུམ་གྱི་སངས་རྒྱས་དང ། མདོ་སྡེ་བཅུ་གཉིས་དང ། བྱང་ཆུབ་སེམས་དཔའ་རྣམས་ཀྱི་མཚན་ཐོས་ནས་དགའ་བ་དང ། རབ་ཏུ་དགའ་བ་བསྐྱེད་ལ་དད་པ་དང་གུས་པ་དཔག་ཏུ་མེད་པས་བླངས་སམ། འཆང་ངམ། ཀློག་གམ། འདོན་ཏམ། ཡི་གེར་བྲིས་སམ། ཀུན་ཆུབ་པར་བྱས་ཏེ། དབེན་པའི་གནས་ཁང་གཅིག་གི་ནང་དུ་དཀྱིལ་འཁོར་བྱས་ལ་དྲི་ཆུས་ཆག་ཆག་བཏབ་སྟེ། འཕན་གདུགས་བཟང་པོས་བརྒྱན་ཅིང་པོག་སྤོས་ཞིམ་པོ་བསྲེགས་ནས་རྒྱལ་བ་རྣམས་སྤྱན་དྲང་ཞིང་གཤེགས་སུ་གསོལ་བ་མང་ཡང་རུང ། ཉུང་ཡང་རུང་སྤྱན་དྲངས་ནས་བདག་ཁྲུས་དག་པར་བྱས་ལ། གོས་གཙང་མ་གྱོན་ཅིང་ལན་ཅིག་ཕྱི་རོལ་ཆེ་ཆུང་དུ་འགྲོ་ན་ཁྲུས་ལན་གཅིག་བྱས་ཏེ་སེང་གེའི་ཁྲི་བཙུགས་ཏེ་ཆོས་ཀྱི་རྣམ་གྲངས་འདི་ཡུན་རིང་དུ་བསྒོམས་ལ། ཆོས་ཀྱི་མཚན་ཉིད་ལ་བདག་དང ། གང་ཟག་དང ། སེམས་ཅན་ལ་སོགས་པའི་ལྟ་བ་མེད་པར་མངོན་པར་རྟོགས་པར་བྱ་སྟེ། དང་པོ་པས་བྱེ་བྲག་ཕྱེད་ཅིང་གསལ་བར་བརྗོད་པར་བྱའོ། །དེ་ནས་དྲི་སྤོས་ཞིམ་པོ་བསྲེགས་ལ་འཁྲུལ་སེམས་བསལ་ཅིང་དྲན་པ་ཡང་དག་པ་དང་བསམ་པ་ཡང་དག་པས་དེ་བཞིན་གཤེགས་པ་ལ་སེམས་རྩེ་གཅིག་ཏུ་བསམ་མོ། །དེ
62.271b
ལྟར་སྤྱོད་པ་རྣམས་འཐུན་ཞིང་འདུམ་པ་ནི་མཆོག་སྟེ། དེ་ལ་མི་འཐུན་ཞིང་རྩོད་པ་ནི་མཐོལ་ཚངསུ་མི་འགྱུར་རོ། །ཁྲོ་བ་དེས་ཀུན་འཇིག་པར་བྱེད་དེ་སྤྱོད་ལམ་དང་ཡང་འགལ་བར་འགྱུར་རོ། །ཐེག་པ་ཆེན་པོ་དྲན་ཞིང་དོན་དམ་པ་བསམས་ལ་ཉིན་མཚན་བདུན་གྱི་བར་དུ་ཉལ་ཞིང་གཉིད་ལོག་ཏུ་མི་རུང་ངོ ། །ཉིན་གཅིག་ཀྱང་དུས་གསུམ་མདོ་སྡེ་འདི་ཁ་ཏོན་ནམ། ཀློག་པ་ཉིན་མཚན་དུས་དྲུག་ཏུ་བྱས་ལ་དྲི་བསྲུང་གིས་མཆོད་ཅིང་ཕྱག་འཚལ་ནས་མཐོལ་ཚངས་སུ་བྱས་ཏེ། མདོ་སྡེ་འདི་ཉན་ན་སངས་རྒྱས་དང ། བྱང་ཆུབ་སེམས་དཔའ་དང ། མདོ་སྡེ་བཅུ་གཉིས་ཀྱི་མཚན་བརྗོད་ཅིང་སེམས་ཐག་པ་ནས་མི་འཁྲུགས་པ་དང ། སེམས་ཐག་པ་ནས་མི་ནོར་བ་དང ། སེམས་ཐག་པ་ནས་མི་གཡེང་བ་དང ། སེམས་ཐག་པ་ནས་དུས་ཀྱིས་འགྲུས་པ་དང ། སེམས་ཐག་པ་ནས་ཉིན་གཅིག་པས་ཉིན་གཅིག་འགྲུས་པ་དང ། སེམས་ཐག་པ་ནས་དད་པ་བསྐྱེད་པ་དང ། སེམས་ཐག་པ་ནས་དགའ་བ་བསྐྱེད་པ་དང ། སེམས་ཐག་པ་ནས་རིམ་པ་བསྐྱེད་པ་དང ། སེམས་ཐག་པ་ནས་རྒྱུན་མི་བཅད་པ་དང ། སེམས་ཐག་པ་ནས་གཟབ་པ་དང ། སེམས་ཐག་པ་ནས་མི་འབྲལ་བ་དང ། སེམས་ཐག་པ་ནས་སྡིག་མི་བསམས་པ་དང ། སེམས་ཐག་པ་ནས་སངས་རྒྱས་དྲན་པ་དང ། སེམས་ཐག་པ་ནས་ཆོས་དྲན་པ་དང ། སེམས་ཐག་པ་ནས་དགེ་འདུན་དྲན་པ་དང ། སེམས་ཐག་པ་ནས་ཚུལ་ཁྲིམས་དྲན་པ་དང ། སེམས་ཐག་པ་ནས་གཏོང་བ་དྲན་པ་དང ། སེམས་ཐག་པ་ནས་དོན་དམ་པའི་ལྷ་དྲན་པ་སྟེ། དེ་དག་དེ་བཞིན་དུ་ཀློག་པ་དང ། དེ་བཞིན་དུ་ཕྱག་བྱ་བ་དང ། དེ་བཞིན་དུ་སེམས་ཐག་པ་ནས་སོ་སོར་འཆགས་ཤིང་མཐོལ་བ་ཐོག་མའི་ཉིན་པར་ནས་ཞག་དྲུག་ཏུ་ལོན་པའི་ནང་པར་དྲི་ཆུས་ཡང་ཆག་ཆག་བཏབ་སྟེ། ལུས་ཡང་སྤོས་ཆུས་བཀྲུ་བར་བྱའོ། །པོག་སྤོས་བཟང་པོ་བསྲེག་ཅིང་སེམས་ཐག་པས་མཆོད་པ་བྱས་པ་དེ་དག་དེ་ལྟ་བུར་སེམས་ཐག་པ་ནས་སོ་སོར་མཐོལ་ཞིང་བཤགས་པས་ཕྱོགས་བཅུར་བསྐུལ་པར་གྱུར་ཏེ། ང་དེའི་ཚེ་དེའི་དུས་ན་སངས་རྒྱས་དཔག་ཏུ་མེད་པ་གང་གཱའི་ཀླུང་གི་བྱེ་མ་སྙེད་དང ། བྱང་ཆུབ་སེམས་དཔའ་དཔག་ཏུ་མེད་པ་གང་གཱའི་ཀླུང་གི་བྱེ་མ་སྙེད་དང་འགྲོགས་ཏེ
62.272a
སྒྲ་དབྱངས་ཀྱི་རྗེས་སུ་ཁང་བུ་དེའི་ནང་དུ་ཕྱིན་ཅིང་མངོན་དུ་གྲུབ་པའི་དབང་བྱའོ། །དེ་བཞིན་དུ་ཉིན་མཚན་བདུན་གྱི་བར་དུ་བྱས་ན་གདོན་མི་ཟ་བར་སྡིག་འབྱང་བར་འགྱུར་རོ། །ཇི་ལྟར་སྡིག་འབྱང་བར་ཤེས་ཤེ་ན། སོ་སོའི་སྐྱེ་བོ་རྣམས་ཀྱི་དོན་དམ་པར་ད་དུང་མ་གྲུབ་པས་རྨྱི་ལྟས་ཀྱི་མཚན་མ་ལ་བརྟག་ཏུ་བྱས་ཏེ། རྨྱི་ལམ་རྣམ་གཅིག་རྨྱིས་ན་མཚམས་མེད་པ་རྣམ་གཅིག་འབྱང་ངོ ། །རྨྱི་ལམ་རྣམ་ལྔ་རྨྱིས་ན་མཚམས་མེད་པ་རྣམ་ལྔ་འབྱང་སྟེ། དེས་ནུབ་མོའི་རྨྱི་ལམ་ན་ཆུ་ཀླུང་ཆེན་པོ་བརྒལ་བར་འདོད་དེ་ཟམ་པ་ཆེན་པོའི་སྟེང་དུ་འགྲོ་བར་རྨྱིས་ན་དེ་ནི་ངེས་པར་རྣམ་པར་གྲོལ་བ་ཐོབ་པ་ཡིན་ནོ། །གལ་ཏེ་དེའི་རྨྱི་ལམ་ན་གཞན་གྱིས་བདག་ལ་ཁྲུས་བྱ་བ་དང ། ལུས་ལ་ཆར་བབ་པར་རྨྱིས་ན་དེ་ནི་ངེས་པར་རྣམ་པར་དག་པ་ཐོབ་པ་ཡིན་ནོ། །གལ་ཏེ་དེའི་རྨྱི་ལམ་ན་བདག་དགེ་འདུན་མང་པོའི་ནང་དུ་ཞུགས་ཏེ། གྲལ་དུ་འདུག་པར་རྨྱིས་ན་དེ་ནི་ངེས་པར་སངས་རྒྱས་ཀྱི་སློབ་མ་ཡང་དག་པར་གྱུར་ཏོ། །གལ་ཏེ་དེའི་རྨྱི་ལམ་ན་བདག་མཆོད་རྟེན་ནམ། གཙུག་ལག་ཁང་དུ་ཞུགས་ཏེ། སངས་རྒྱས་དང་བྱང་ཆུབ་སེམས་དཔའི་གཟུགས་བརྙན་མཐོང་བར་རྨྱིས་ན་དེ་ནི་ཆོས་ཀྱི་སྒོ་མོ་དམ་པར་ཞུགས་པར་གྱུར་ཏོ། །གལ་ཏེ་རང་གིས་ཤིང་ཐོག་རྙེད་ཅིང་ཟ་བར་རྨྱིས་ན་དེའི་ཚེ་འདི་ཉིད་ལ་ཡོན་ཏན་གྱི་འབྲས་བུ་འགྲུབ་པར་མངོན་ནོ། །ཡང་བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། གལ་ཏེ་དགེ་སློང་ངམ། དགེ་སློང་མ་འམ། དགེ་སྦྱོང་ངམ། དགེ་སྦྱོང་མ་འམ། བྱང་ཆུབ་སེམས་དཔའ་དད་པ་ཅན་གང་ལ་ལས་དྲན་པ་ཉམས་ཏེ། ནོར་ཅིང་འཁྲུལ་པས་སྡོམ་པའི་ཚུལ་ཁྲིམས་རེ་རེ་ནས་ཞིག་པ་འམ། ཉམས་པ་དེ་བཞིན་དུ་སོ་སོར་འཆགས་ཤིང་མཐོལ་ན་སྡིག་མི་འབྱང་མི་སྲིད་དེ། སེམས་ཐག་པ་ནས་མ་བྱས་པ་ནི་མ་གཏོགས་སོ། །དེ་ནས་བཅོམ་ལྡན་འདས་ལ་འཇམ་དཔལ་གྱིས་འདི་སྐད་ཅེས་ཞུས་སོ། །བཅོམ་ལྡན་འདས་ཆོ་ག་འདི་ལྟར་བགྱི་བའི་ཚེ་མི་མང་ན་རུང་ངམ་མི་རུང ། བཅོམ་ལྡན་འདས་ཀྱིས་བཀའ་སྩལ་པ། མི་གཅིག་ཡན་ཆད་ཉི་ཤུ་མན་ཆད་རུང་ངོ ། །ཆོ་ག་འདི་ལྟར་སྤྱོད་པའི་ཚེ་མདོ་སྡེ
62.272b
གཞན་མི་བསམ་མོ། །དེ་ལྟར་མཐོལ་ཚངས་བགྱིས་པའི་འོག་ཏུ་ཕྱིན་ཆད་ཉེས་པ་མི་བྱེད་ན་དེ་ནི་མཐོལ་ཚངས་ཞེས་བྱའོ། །དེ་ལྟར་དྲན་པར་གྱིས་ཤིག་།བདག་ཅག་རྣམས་ད་ལྟར་འཆི་བ་ལས་སླར་འཚོ་བ་དང་འདྲ་བས་ད་ནི་བདག་ཚུལ་ཁྲིམས་བསྲུང་ངོ ། །ད་ནི་བདག་བརྩོན་འགྲུས་སུ་སྤྱོད་དོ། །ད་ནི་བདག་ཐེག་པ་ཆེན་པོའི་མདོ་སྡེ་ཀློག་པ་དང ། ཁ་ཏོན་བགྱིའོ་ཞེས་དེའི་ཚེ་དེའི་དུས་ན་དྲན་པ་དེ་ལྟར་གྱིས་ཤིག་།བདག་དེང་ནས་སྡོམ་པ་བཟུང་བ་ནི་རྡོ་རྗེ་དང་འདྲ་བར་སྲན་ཐུབ་པར་སྨོན་ཏོ། །དེས་དེ་ལྟར་དྲན་པའི་ཚེ་སྐྱེས་བུ་དམ་པ་དྲི་མ་མེད་པར་གྲགས་པ་དང ། བྱང་ཆུབ་སེམས་དཔའ་དཔག་ཏུ་མེད་པ་དང་ལྷན་ཅིག་ཏུ་དེའི་མདུན་དུ་འགྲེང་སྟེ་དཔང་དུ་བྱེད་དོ། །འཕགས་པ་ཀུན་དུ་བཟང་པོ་ཡང་འགྱོད་ཚངས་ཀྱི་མཁན་པོ་བྱེད་དོ། །འཕགས་པ་འོད་སྲུངས་ཀྱང་ཞུ་གནས་ཀྱི་རྟེན་བྱེད་དོ། །འཇམ་དཔལ་འདི་ནི་སྡིག་པ་སྦྱངས་པ་ཞེས་བྱའོ། །འདི་ནི་རྣམ་པར་གྲོལ་བ་ཞེས་བྱའོ། །འདི་ནི་ཚུལ་ཁྲིམས་དང་ལྡན་པ་ཞེས་བྱའོ། །འདི་ནི་གནས་ཐོབ་པ་ཞེས་བྱའོ། །བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ལ་འདི་སྐད་ཅེས་བཀའ་སྩལ་ཏོ། །གང་ལ་ལ་ཞིག་གིས་རྩ་བ་བཞི་དང ། སྡོམ་པ་བརྒྱད་དང ། སྡོམ་པ་ཕྱེད་ཅན་དང ། ཁྲིམས་བཅུ་དང ། གསུམ་ལ་སྐྱབས་སུ་སོང་བ་དང ། ཁྲིམས་ལྔ་དང ། དགེ་བ་བཅུ་དང ། ཚུལ་ཁྲིམས་དང་འདུལ་བ་རེ་རེ་ནས་ཞིག་པ་འམ། ཉམས་པ་འམ། མཚམས་མེད་པ་ལྔ་བྱས་པ་འམ། མཉམ་པ་ཉིད་ལ་སྐུར་པའི་སྡིག་བྱས་པ་ཞིག་ཡོད་པ་དེ་ལོག་སྤྱོད་མ་གཏོགས་པར་སོ་སོར་མ་བཤགས་མ་མཐོལ་ན་མི་དེ་ཚེ་འཕོས་མ་ཐག་ཏུ་གདོན་མི་ཟ་བར་མནར་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཅིའི་སླད་དུ་མནར་མེད་པའི་དམྱལ་བ་ཞེས་བགྱི། དེ་བཞིན་གཤེགས་པས་སེམས་ཅན་ཐམས་ཅད་ཀྱི་དོན་གྱི་སླད་དུ་དེ་ཅིའི་རྒྱུ་ཅིའི་རྐྱེན་གྱིས་ལྟུང་བ་དང ། དམྱལ་བའི་དབྱིབས་ཆེ་ཆུང་དང ། རྣམ་པར་སྨིན་པའི་སྡུག་བསྔལ་བསྐལ་པའི་གྲངས་ཇི་ཙམ་གྱི་བར་དུ་གནས་པར་འགྱུར་བ་བཤད་དུ་གསོལ་ཞེས་བགྱིས་པ་དང ། བཅོམ་ལྡན་འདས་ཀྱིས་བཀའ་སྩལ་པ།
62.273a
འཇམ་དཔལ་ཤིན་དུ་འང་མཁས་སོ། །ཤིན་དུ་འང་མཁས་སོ། །དོན་འདི་ལྟ་བུ་འདྲི་བ་ཡང་ཤིན་དུ་མཁས་ཏེ། ལེགས་པར་ཉོན་ལ་ཕལ་མང་པོ་རྣམས་ཀྱང་ལེགས་པར་སོམས་ཤིག་།ངས་བྱེ་བྲག་ཕྱེད་པར་བཤད་དོ། །ཇི་ལྟར་མནར་མེད་པའི་སེམས་ཅན་དམྱལ་བ་ཞེས་བྱ་ཞེ་ན། སྐད་ཅིག་ཀྱང་མནར་ཞིང་བསྟིར་མེད་པའི་ཕྱིར་མནར་མེད་པའི་དམྱལ་བ་ཞེས་བྱའོ། །གཅིག་ཏུ་ན་དགག་པ་འམ། འོར་བར་བྱ་བ་ཡང་མེད། འགྱུར་བ་འང་མེད་དེ། ཚ་བ་ནི་རབ་ཏུ་ཚ། སྡུག་བསྔལ་བ་ནི་ཤིན་དུ་འང་མི་བཟད་པ་སྐད་ཅིག་ཀྱང་མི་དལ། སྐད་ཅིག་ཀྱང་མི་སྡོད་ཅིང་བར་སྐབས་མེད་པའི་ཕྱིར་མནར་མེད་པའི་དམྱལ་བ་ཞེས་བྱའོ། །ཡང་རྣམ་པ་གཅིག་ཏུ་ན། མེ་ཆེན་པོ་འབར་བ། རབ་ཏུ་ཚ་བ། ཀུན་དུ་འབར། རབ་ཏུ་འབར་ཞིང ། མཆེད་པ་ཁོང་དུ་ཞུགས་པའི་ཕྱིར་མནར་མེད་པའི་དམྱལ་བ་ཞེས་བྱའོ། །བཅོམ་ལྡན་འདས་ཀྱིས་ཡང་འཇམ་དཔལ་ལ་བཀའ་སྩལ་པ། རིགས་ཀྱི་བུ་དམྱལ་བ་ཆེན་པོ་མནར་མེད་པའི་དབྱིབས་ནི་གྲུ་བཞི་ལྷམ་པ་དཔག་ཚད་བརྒྱད་ཁྲི་ཡོད་དེ། ལྕགས་ཀྱི་ར་བ་རིམ་པ་བདུན་གྱིས་བསྐོར་ཅིང་སྟེང་དུ་ཡང་ལྕགས་ཀྱི་དྲ་བ་རིམ་པ་བདུན་གྱིས་གཡོགས་ཏེ། འོག་ཏུ་བར་ཆད་བཅཝ་བརྒྱད་ཡོད་དོ། །དེའི་ཁོ་ར་ཁོར་ཡུག་ཏུ་རལ་གྲིའི་ཚལ་རིམ་པ་བདུན་གྱིས་བསྐོར་ཏོ། །ལྕགས་ཀྱི་ར་བ་རིམ་པ་བདུན་གྱི་ནང་ལོགས་སུ་ནགས་ཚལ་རལ་གྲི་ལོ་མ་ཅན་ཡོད་དོ། །ལྕགས་ཀྱི་ཁང་པ་བར་ཆད་བཅཝ་བརྒྱད་པོ་བརྩེག་མར་འདུག་སྟེ། རིམ་པ་བརྒྱད་ཁྲི་བཞི་སྟོང་ཡོད་དོ། །དེའི་གྲཝ་བཞིར་ཟངས་ཀྱི་ཁྱི་ཆེན་པོ་བཞི་འདུག་པ་ལུས་ཀྱི་བོང་ཚད་ནི་འཕང་དུ་དཔག་ཚད་བཞི་བཅུ་ལ། མིག་ནི་ཀློག་གི་འོད་བཞིན། མཆེ་བ་ནི་རལ་གྲིའི་སྡོང་པོ་དང་འདྲ། སོ་ནི་སྤུ་གྲི་གཏམས་པའི་རི་དང་མཚུངས། ལྕེ་ནི་ལྕགས་ཀྱི་མཆིལ་བ་བཞིན། སྡེར་མོ་ནི་ལྕགས་ཀྱི་གསལ་ཤིང་དང་མཚུངས། མཇུག་མ་ནི་ལྕགས་ཀྱི་སྦྲུལ་དང་འདྲ། སྤུའི་བུ་གུ་རེ་རེ་ནས་འབར་བའི་མེ་ཤིན་དུ་མཆེད་ཅིང་ཀུན་དུ་འབར་རབ་ཏུ་འབར་བ་འབྱུང་སྟེ། དེའི་དུད་པ་མནམ་པ་ནི་འཇིག་རྟེན་གྱི་རྫས་མནམ་པ་གང་དང་ཡང་བསྒྲུན་དུ་མེད་དོ། །དམྱལ་བ
62.273b
དེའི་སྒོ་བཞི་ལ་དེའི་སྒོ་རེ་རེ་ན་དམྱལ་བའི་སྲུང་མ་བཅཝོ་བརྒྱད་འདུག་གོ། །མགོ་ནི་སྲིན་པོའི་མགོ་།ཁ་ནི་སྲིན་པོའི་ཁ་དང་འདྲ་སྟེ། མགོ་ལ་རཝ་བཅཝ་བརྒྱད་ཡོད་པ། ལག་ན་ལྕགས་ཀྱི་གསལ་ཤིང་ཐོགས་སོ། །ར་བ་རིམ་པ་བདུན་གྱི་ནང་ལོགས་སུ་ལྕགས་ཀྱི་རྒྱལ་མཚན་གྲངས་མེད་པ་ཞིག་ཡོད་དེ། རྒྱལ་མཚན་གྱི་མགོར་མེ་བྱུང་བ་ནི་ཆུ་མིག་དང་འདྲ་བར་འབྱུང་ངོ ། །ལྕགས་འཇུ་བའི་ཁུ་བ་འབབ་པ་ནི་ཀུན་དུ་ཁྱབ་པར་འབབ་སྟེ། དམྱལ་བའི་སྒོ་བཞིར་སྒོ་རེ་རེའི་སྟེང་ན་ཟངས་པོ་ཆེ་བཅཝ་བརྒྱད་ཡོད་པའི་ནང་ན་ལྕགས་ཁོལ་བའི་ཁུ་བ་ཁར་ལུད་ཅིང་སྒོ་བཞིར་བབ་པ། དམྱལ་བའི་ནང་དུ་གང་བར་འབབ་བོ། །ཁང་པ་བར་ཆད་རེ་རེའི་ནང་ན་ཡང་ལྕགས་ཀྱི་སྦྲུལ་ཆེན་པོ་བརྒྱད་ཁྲི་བཞི་སྟོང་ཡོད་པས་ཁར་གདུག་པའི་མེ་སྐྱུག་ཅིང་ར་བ་ཀུན་དུ་གང་བར་གཏོང་ངོ ། །སྦྲུལ་གྱི་སྒྲ་སྒྲོགས་པ་ནི་འབྲུག་སྒྲ་ཆེན་པོ་ཟེར་བ་བཞིན་ནོ། །ལྕགས་ཀྱི་ཐུ་ལུམ་ཆེན་པོའི་ཆར་བབ་པ་ཡང་མནར་མེད་པ་ཀུན་དུ་གང་ངོ ། །དེར་སྡུག་བསྔལ་མི་བཟད་པ་ནི་འབུམ་ཕྲག་བརྒྱད་ཁྲིའི་སྡུག་བསྔལ་གྱི་ནང་ན་སྡུག་བསྔལ་མི་བཟད་པའི་ནང་ན་མི་བཟད་པ་ཀུན་ཀྱང་དེར་འདུས་ཏེ་དཔེ་ཟླ་མེད་དོ། །མནར་མེད་པའི་དམྱལ་བ་དེའི་སྒོ་བཞིར་སྒོ་རེ་རེའི་ཕྱི་རོལ་དུ་འབར་བའི་མེ་ཤིན་དུ་མཆེད་ཅིང་འབར་བ་ལྷོ་བྱང་ཤར་ནུབ་བསྣོལ་ཞིང་ཕྱད་པར་རྒྱུའོ། །འབར་བ་ཡང་ལྕགས་ཀྱི་ར་བ་ཁོ་ར་ཁོར་ཡུག་དཔག་ཚད་བརྒྱད་ཁྲི་ནས་སྟེང་ལྕགས་ཀྱི་དྲ་བ་ལ་ཐུག་གི་བར་དུ་ཡར་ཐལ་མར་ཐལ་ཞིང་བླ་ཟ་འོག་དང ། ཕྱོགས་བཞིར་ཀུན་ཏུ་འབར། རབ་ཏུ་འབར་བར་གྱུར་ཏེ། སྡུག་བསྔལ་ཅིག་ཅར་ལྡང་བ་ནི་གོང་དུ་སྨོས་པ་བཞིན་ནོ། །རྩ་བ་བཞི་དང ། སྡོམ་པ་བརྒྱད་འཇིག་པ་དང ། མཚམས་མེད་པ་ལྔ་དང ། མཉམ་པ་ཉིད་ལ་སྐུར་པ་འདེབས་པ་རྣམས་མདོ་སྡེ་འདི་ལས་འབྱུང་བ་བཞིན་མཐོལ་ཚངས་མ་བྱས་ན་གནང་བསྐུར་བ་འམ། ཁྲེལ་བ་མེད་ན་མི་དེ་ཚེ་འདི་འཕོས་མ་ཐག་ཏུ་སྟོབས་ཚན་པོ་ཆེའི་དཔུང་པ་བརྐྱང་ཞིང་བསྐུམས་པ་ཙམ་གྱིས་མནར་མེད་པའི་དམྱལ་བར་ལྟུང་བར་འགྱུར་རོ། །ལུས་ཀྱང་དེའི་ནང་དུ་གང་སྟེ། ཚ་བའི་གཟིར་བས་ཕོངས་ནས་ཁ་གདངས
62.274a
མིག་བཙུམས་ཀྱང་ཁ་འཐམས་པས་སྨྲ་མ་ནུས་སོ། །དེ་སྡིག་མང་བའི་ཕྱིར་རལ་གྲི་འཁོར་ལོ་གྲངས་མེད་པ་དུ་མ་ཞིག་ནམ་མཁའ་ནས་ཆར་བཞིན་འབབ་སྟེ། གླད་པར་ཕོག་ཅིང་རྐང་པར་བྱུང་བའི་སྡུག་བསྔལ་ཐམས་ཅད་ནི་སྔར་གོང་དུ་བཤད་པ་བཞིན་བརྒྱ་སྟོང་ཁྲི་ཕྲག་ཏུ་བསྒྱུར་བའོ། །གང་ལ་ལ་རྩ་བ་བཞི་པོ་ཚང་བར་ཞིག་པར་གྱུར་ན་སྡུག་བསྔལ་ཆེན་པོ་ཉམས་སུ་མྱོང་བ་ནི་བསྐལ་པ་ཆེན་པོ་ལྔ་རྫོགས་ཀྱི་བར་དུའོ། །སྡོམ་པ་བརྒྱད་འཇིག་པ་ནི་དེ་ལས་གྱུར་ཅིག་གིས་མང་ངོ ། །མཚམས་མེད་པ་ལྔ་ཡང་གྱུར་ཅིག་གིས་མང་ངོ ། །མཉམ་པ་ཉིད་ཀྱི་མདོ་སྡེ་ལ་སྐུར་པ་འདེབས་པ་ཡང་གྱུར་ཅིག་གིས་མང་ངོ ། །དཀོན་མཆོག་གསུམ་ལ་དམོད་པ་དང ། དགེ་འདུན་གྱི་ནོར་བརྐུས་པ་དང ། དགེ་སློང་དང ། དགེ་སློང་མ་ཚངས་པར་སྤྱད་པ་ལ་དྲི་མ་ཅན་དུ་སྤྱོད་པ་དང ། མཁན་པོ་དང་སློབ་དཔོན་ལ་དབང་ཟ་བ་དང ། མ་ལ་གཡེམ་པ་རྣམས་གོང་མ་དག་ལས་ཀྱང་གྱུར་ཅིག་གིས་བསྐྱེད་དོ། །ལོག་སྤྱོད་ཀྱི་རྣམས་ནི་དགེ་བའི་རྩ་བ་གཏན་ཆད་པས་ནམས་ཀྱང་མནར་མེད་པའི་དམྱལ་བ་ནས་མི་ཐར་བ་ནི་དེར་མ་གཏོགས་སོ། །དེ་ལ་སོགས་པའི་སྡིག་ཅན་རྣམས་སྡུག་བསྔལ་ཉམས་སུ་མྱོང་བའི་ཚེ་འབར་བའི་མེ་ཤིན་དུ་མཆེད་པ་ཁོང་དུ་ཞུགས་ཏེ། རྨུགས་ནས་འཆིའོ། །དེ་ནས་སྲིན་པོ་དམྱལ་བའི་སྲུངས་མས་ལྕགས་ཀྱི་གསལ་ཤིང་ས་ལ་བརྡབས་ཏེ། སོས་སོས་ཞེས་བོས་པ་དང ། བོས་པའི་སྒྲ་བཞིན་དུ་ཡང་སོས་ཡང་སོས་ནས་ཉིན་མཚན་གཅིག་ལ་ལན་ཁྲི་ནི་འཆི། ལན་ཁྲི་ནི་འཚོ་སྟེ། སྡུག་བསྔལ་མི་བཟད་པ་ཆེན་པོ་ཉམས་སུ་མྱོང་བ་ནི་གོང་དུ་བསྟན་པ་བཞིན་ནོ། །ནམ་ཞིག་མནར་མེད་པའི་དམྱལ་བ་ནས་སླར་ཕྱིན་ན་ཡང་ཚུལ་ཁྲིམས་བཤིག་པ་དང ། ཡོན་བདག་དད་པ་ཅན་གྱི་ཡོན་བླངས་པའི་ལས་ཀྱིས་ཡང་དམྱལ་བ་ཆུང་ངུ་རྣམས་ཀྱི་ནང་དུ་འཇུག་སྟེ། དེ་ལ་དམྱལ་བ་གྲང་སྦྲེབས་པ་དང ། དམྱལ་བ་མུན་ནག་པ་དང ། དམྱལ་བ་རབ་ཏུ་ཚ་བ་དང ། དམྱལ་བ་སྤུ་གྲི་སོ་གཏམས་པ་དང ། དམྱལ་བ་རལ་གྲི་འཁོར་ལོ་དང ། དམྱལ་བ་མེའི་ཤིང་རྟ་ཅན་དང ། དམྱལ་བ་ཕྱི་སའི་འདམ་དང ། དམྱལ་བ་ཆུ་ཚན་དང །
62.274b
དམྱལ་བ་མེ་མུར་ཀླུང་དང ། དམྱལ་བ་ནགས་ཚལ་རལ་གྲི་ལོ་མ་ཅན་དང ། དམྱལ་བ་ལྕགས་ཀྱི་འཁྲུལ་འཁོར་དང ། དམྱལ་བ་ལྕགས་ཀྱི་ཤལ་མ་རི་ཀ་བ་ཅན་དང ། དམྱལ་བ་ལྕགས་ཀྱི་ཁྲི་ཅན་དང ། དམྱལ་བ་ལྕགས་ཀྱི་འཁོར་ལོ་ཅན་དང ། དམྱལ་བ་ལྕགས་ཀྱི་ཕུག་དང ། དམྱལ་བ་ལྕགས་ཀྱི་ཐུ་ལུམ་དང ། དམྱལ་བ་བསྡུས་འཇོམས་ཐུག་རི་ཅན་དང ། དམྱལ་བ་ཟངས་ཁོལ་དང ། འདི་རྣམས་སོ་སོར་རེ་རེའི་ནང་དུ་ཡང་ལོ་ཁྲི་ཕྲག་བརྒྱད་བརྒྱའི་བར་དུ་ཉོན་མོངས་ནས་གཟོད་ཐར་ཏེ། འོན་ཀྱང་རྟག་ཏུ་མ་རབས་སུ་སྐྱེས་ལ། ཚེ་རབས་ལྔ་བརྒྱའི་བར་དུ་དཀོན་མཆོག་གསུམ་གྱི་སྒྲ་མི་ཐོས་སོ། །བརྒྱ་ལ་དགེ་བའི་བཤེས་གཉེན་དང་ཕྲད་ན་ནི་བྱང་ཆུབ་ཏུ་སེམས་བསྐྱེད་ཀྱང་སྲིད། དགེ་བའི་བཤེས་གཉེན་དང་མ་ཕྲད་ན་ནི་སླར་ཡང་དམྱལ་བར་ལྟུང་ངོ ། །ཉེས་བྱས་ཀྱི་སྡིག་པ་རྣམས་མ་མཐོལ་མ་བཤགས་ན་དམྱལ་བར་སྡུག་བསྔལ་མྱོང་བ་ཡང་རྒྱལ་ཆེན་རིས་བཞིའི་ལྷའི་ལོ་གྲངས་ལྟ་བུར་ལོ་ཁྲི་ཕྲག་བརྒྱད་བརྒྱའི་བར་དུ་ཉམས་སུ་མྱོང་བར་འགྱུར་རོ། །དེ་ལ་ལྟུང་བ་རྣམས་ཀྱི་སྡིག་པ་ནི་དེ་ལས་ཉིས་གྱུར་དུ་བསྐྱེད་དོ། །དགེ་འདུན་གྱི་ལྷག་མ་ཡང་དེ་ལས་ཉིས་གྱུར་དུ་བསྐྱེད་དོ། །སྡིག་ཅན་དེ་དག་གིས་སྡུག་བསྔལ་ཉམས་སུ་མྱོང་བའི་ཚེ་ཚིག་གཞན་མི་ཕྱིན་ཏེ། ཨཱཾ་པ་པ། ཨཱཾ་ཏ་ཏ། ཨཱཾ་ལ་ལ། ཨཱཾ་བ་བ་འབའ་ཞིག་ཟེར་ཞིང་འདུག་གོ། །དེ་བས་ན་སྡིག་ཅན་རྣམས་རིངས་པར་སོ་སོར་མཐོལ་ཞིང་བཤགས་ལ། དཀོན་མཆོག་གསུམ་གྱི་སྐྱབས་སུ་སོང་བར་གྱིས་ཤིག་།འཇམ་དཔལ་ཡང་འདི་ལྟ་སྟེ། སྡིག་པ་མྱུར་དུ་བསལ་ཅིང ། འབྱང་བར་འདོད་ན་མདོ་སྡེ་འདིའི་ནང་ནས་འབྱུང་བ་བཞིན་དུ་སོ་སོར་མཐོལ་བཤགས་ཏེ་འགྱོད་ཚངས་བྱོས་ཤིག་།ཆོ་ག་ཉིན་ཞག་བདུན་གྱི་བར་དུ་ཉིན་གཅིག་ཟ་གཅིག་ཏུ་བྱས་ལ། ཡང་དག་པའི་རྟོག་པ་དང ། ཡང་དག་པའི་དྲན་པས་དེ་བཞིན་གཤེགས་པ་སངས་རྒྱས་སུ་འགྲུབ་པའི་ཚེ་མི་ཆེན་པོའི་མཚན་དང ། མངོན་པར་འཚང་རྒྱ་བའི་མཚན་དང ། མི་གཡོ་བའི་མཚན་དང ། རྣམ་པར
62.275a
གྲོལ་བའི་མཚན་དང ། འོད་ཟེར་ཅན་གྱི་མཚན་དང ། ཡེ་ཤེས་ཡོངས་སུ་རྒྱས་པའི་མཚན་དང ། ཕ་རོལ་དུ་ཕྱིན་པ་རྣམས་དང་ལྡན་པའི་མཚན་དང ། དཔའ་བར་འགྲོ་བ་ལ་སོགས་པའི་ཏིང་ངེ་འཛིན་རྒྱ་མཚོའི་མཚན་རྣམས་བསམ་པར་བྱའོ། །ཡང་གཅིག་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་ཡིད་དམ་ཏིང་ངེ་འཛིན་ལས་ལངས་ཏེ། ཡིད་འགོག་པའི་ཏིང་ངེ་འཛིན་དུ་འཇུག་པར་བྱའོ། །ཡིད་འགོག་པའི་ཏིང་ངེ་འཛིན་ལས་ལངས་ཏེ་སླར་དཔའ་བར་འགྲོ་བའི་ཏིང་ངེ་འཛིན་ལ་འཇུག་པར་བྱའོ། །དཔའ་བར་འགྲོ་བའི་ཏིང་ངེ་འཛིན་ལས་ལངས་ཏེ་ཤེས་རབ་སྒྲོན་མའི་ཏིང་ངེ་འཛིན་ལ་འཇུག་།ཤེས་རབ་སྒྲོན་མ་ལས་ལངས་ཏེ་ཆོས་རྣམས་ཀྱི་མཚན་ཉིད་ཀྱི་ཏིང་ངེ་འཛིན་ལ་འཇུག་།ཆོས་རྣམས་ཀྱི་མཚན་ཉིད་ལས་ལངས་ཏེ་མཚན་མ་འོད་ཟེར་ཅན་གྱི་ཏིང་ངེ་འཛིན་ལ་འཇུག་།མཚན་མ་འོད་ཟེར་ཅན་ལས་ལངས་ཏེ་སེང་གེའི་ང་རོའི་ཏིང་ངེ་འཛིན་ལ་འཇུག་།སེང་གེ་ང་རོའི་ཏིང་ངེ་འཛིན་ལས་ལངས་ཏེ་སེང་གེ་སྤྲུག་པའི་ཏིང་ངེ་འཛིན་ལ་འཇུག་།སེང་གེ་སྤྲུག་པ་ལས་ལངས་ཏེ་རྒྱ་མཚོ་ཡིད་ཀྱི་ཏིང་ངེ་འཛིན་ལ་འཇུག་།རྒྱ་མཚོ་ཡིད་ལས་ལངས་ཏེ་ཀུན་དུ་ཡེ་ཤེས་ཀྱི་ཏིང་ངེ་འཛིན་ལ་འཇུག་།ཀུན་དུ་ཡེ་ཤེས་ཀྱི་ལས་ལངས་ཏེ་གཟུངས་ཀྱི་ཕྱག་རྒྱའི་ཏིང་ངེ་འཛིན་ལ་འཇུག་།གཟུངས་ཀྱི་ཕྱག་རྒྱ་ལས་ལངས་ཏེ་ཀུན་དུ་སྣང་བའི་ལུས་གཟུགས་ཅན་གྱི་ཏིང་ངེ་འཛིན་ལ་འཇུག་།ཀུན་དུ་སྣང་བའི་ལུས་གཟུགས་ཅན་ལས་ལངས་ཏེ་ཆོས་ཀྱི་དབྱིངས་ཉིད་ཀྱི་ཏིང་ངེ་འཛིན་ལ་འཇུག་།ཆོས་ཀྱི་དབྱིངས་ཉིད་ལས་ལངས་ཏེ་སེང་གེའི་རྒྱལ་པོའི་ཏིང་ངེ་འཛིན་ལ་འཇུག་།སེང་གེའི་རྒྱལ་པོ་ལས་ལངས་ཏེ་ཆོས་ཀྱི་རྒྱལ་པོའི་ཏིང་ངེ་འཛིན་ལ་འཇུག་།ཆོས་ཀྱི་རྒྱལ་པོ་ལས་ལངས་ཏེ་བདུད་རྣམས་ཀྱི་མཚན་མ་འགོག་པའི་ཏིང་ངེ་འཛིན་ལ་འཇུག་།བདུད་རྣམས་ཀྱི་མཚན་མ་འགོག་པ་ལས་ལངས་ཏེ་སྟོང་པ་ཉིད་ཀྱི་ཤེས་རབ་ཀྱི་ཏིང་ངེ་འཛིན་ལ་འཇུག་།སྟོང་པ་ཉིད་ཀྱི་ཤེས་རབ་ལས་ལངས་ཏེ་སྟོང་པ་ཉིད་ཀྱི་མཚན་ཉིད་དུ་ཤེས་པའི་ཏིང་ངེ
62.275b
འཛིན་ལ་འཇུག་།སྟོང་པ་ཉིད་ཀྱི་མཚན་ཉིད་དུ་ཤེས་པ་ལས་ལངས་ཏེ་ཆེན་པོ་སྟོང་པ་ཉིད་ཀྱི་ཡེ་ཤེས་ཀྱི་ཏིང་ངེ་འཛིན་ལ་འཇུག་།ཆེན་པོ་སྟོང་པ་ཉིད་ཀྱི་ཡེ་ཤེས་ལས་ལངས་ཏེ་གནས་ཐམས་ཅད་དུ་ཁྱབ་པའི་ལུས་གཟུགས་ཅན་གྱི་ཏིང་ངེ་འཛིན་ལ་འཇུག་།གནས་ཐམས་ཅད་དུ་ཁྱབ་པའི་ལུས་གཟུགས་ཅན་ལས་ལངས་ཏེ་སེམས་ཀྱི་མཚན་ཉིད་ལ་རྣམ་པར་རྟོག་པའི་ཏིང་ངེ་འཛིན་ལ་འཇུག་།སེམས་ཀྱི་མཚན་ཉིད་ལ་རྣམ་པར་རྟོག་པ་ལས་ལངས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་མཚན་ཉིད་ཀྱི་ཏིང་ངེ་འཛིན་ལ་འཇུག་།བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་མཚན་ཉིད་ཀྱི་ཏིང་ངེ་འཛིན་ལས་ལངས་ཏེ་རྡོ་རྗེའི་གཙུག་ཏོར་གྱི་ཏིང་ངེ་འཛིན་ལ་འཇུག་།རྡོ་རྗེ་གཙུག་ཏོར་ལས་ལངས་ཏེ་རྒྱ་མཚོ་ཐམས་ཅད་ཀྱི་ཏིང་ངེ་འཛིན་ལ་འཇུག་།རྒྱ་མཚོ་ཐམས་ཅད་ལས་ལངས་ཏེ་གཟུངས་ཐམས་ཅད་ཀྱི་རྒྱ་མཚོའི་ཏིང་ངེ་འཛིན་ལ་འཇུག་།གཟུངས་ཐམས་ཅད་ཀྱི་རྒྱ་མཚོའི་ཏིང་ངེ་འཛིན་ལས་ལངས་ཏེ་སངས་རྒྱས་ཐམས་ཅད་ཀྱི་སྤྱོད་ཡུལ་གྱི་རྒྱ་མཚོའི་ཏིང་ངེ་འཛིན་ལ་འཇུག་།སངས་རྒྱས་ཐམས་ཅད་ཀྱི་སྤྱོད་ཡུལ་རྒྱ་མཚོ་ལས་ལངས་ཏེ་སངས་རྒྱས་ཐམས་ཅད་ཀྱི་རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་གཟིགས་པའི་རྒྱ་མཚོའི་ཏིང་ངེ་འཛིན་ལ་འཇུག་།སངས་རྒྱས་ཐམས་ཅད་ཀྱི་རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་གཟིགས་པའི་རྒྱ་མཚོ་ལས་ལངས་ཏེ་གདོད་ཐབས་ཀྱི་ཏིང་ངེ་འཛིན་མཐའ་མེད་མུ་མེད་པའི་རྒྱ་མཚོའི་སྒོར་འཇུག་པར་བྱའོ། །མཐའ་མེད་མུ་མེད་པའི་རྒྱ་མཚོའི་སྒོ་ནས་ལངས་ཏེ་ཡིད་འགོག་པ་དང་ཞི་བའི་ཏིང་ངེ་འཛིན་ལ་འཇུག་།ཡིད་འགོག་པ་དང་ཞི་བ་ལས་ལངས་ཏེ་རྡོ་རྗེ་གདོན་མི་ཟ་བའི་རྣམ་པར་གྲོལ་བ་ཆེན་པོའི་ཏིང་ངེ་འཛིན་ལ་འཇུག་པར་བྱའོ། །འཇམ་དཔལ་ང་མྱ་ངན་ལས་འདས་པའི་འོག་ཏུ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལས་དད་པ་སྐད་ཅིག་མའི་སེམས་བསྐྱེད་དེ། མདོ་འདི་ཡི་གེར་འདྲི་བ་འམ། ཀློག་པ་འམ། ཁ་ཏོན་དུ་སྐད་ཅིག་མར་དྲན་ཏེ། བསམ་པའི་འདུ་ཤེས་དང ། དྲན་པའི་འདུ་ཤེས་དང ། རྟོགས་པའི་འདུ་ཤེས་སུ
62.276a
དད་པའི་སེམས་གྲུབ་ན་སྐད་ཅིག་མར་བསྐལ་པ་བྱེ་བ་ཁྲག་ཁྲིག་འབུམ་ཕྲག་དགུ་བཅུའི་གང་གཱའི་བྱེ་མ་སྙེད་ཀྱི་འཁོར་བའི་སྡིག་ཕྱིར་བསྙིལ་བར་འགྱུར་རོ། །མ་རིག་པའི་སྒྲིབ་པ་ཡང་གཏན་བྲལ་བར་འགྱུར་རོ། །དེ་བས་ན་དེ་བཞིན་གཤེགས་པ་རྟག་ཏུ་འཚོ་སྐྱོང་ཞིང་གཞེས་ཏེ་མྱ་ངན་ལས་མི་འདའ་བར་མངོན་ནོ། །དེ་ནས་བཅོམ་ལྡན་འདས་ཀྱིས་འཁོར་མང་པོ་རྣམས་ལ་ཚིགས་སུ་བཅད་དེ་བཀའ་སྩལ་པ། ཡི་དགས་མཐུ་ཆེན་ཐམས་ཅད་དང ། །དུད་འགྲོ་གླང་པོ་མ་རུངས་དང ། །བུད་མེད་གཡེམ་དང་མ་རུངས་ཀླུ། །དཔག་ཏུ་མེད་པའི་མ་རུངས་རྣམས། །བ་སུ་དང་ནི་མ་སྐྱེས་དགྲ། །ལྷ་སྦྱིན་དང་ནི་སོར་མོའི་ཕྲེང ། །ལུས་དང་སེམས་ཀྱིས་སྡིག་སྤྱད་པས། །དམྱལ་བ་མནར་མེད་ལྟུང་འོས་ཀྱང ། །ཕྱོགས་བཅུ་དུས་གསུམ་རྒྱལ་བ་ལ། །དད་པ་བསྐྱེད་དེ་ཕྱག་འཚལ་ཕྱིར། །ཐུབ་པ་མྱ་ངན་འདའ་བའི་ཁར། །བསྐལ་པ་གྲངས་མེད་ཕྱིར་བཤོལ་ལོ། །མ་ག་དྷ་ཡི་སྐྱེ་བོ་དག་།ཀུན་ཀྱང་བྱང་ཆུབ་སེམས་བསྐྱེད་པ་འང ། །ཕྱོགས་བཅུ་དུས་གསུམ་རྒྱལ་བ་ལ། །གུས་པར་ཕྱག་བྱའི་དབང་གིས་སོ། །ཀཽ་དི་ནྱ་ལ་སོགས་དང ། །ཉན་ཐོས་ལྔ་བརྒྱ་རྣམ་དག་གིས། །མ་འོངས་དུས་སུ་འཚང་རྒྱ་བ་འང ། །ཕྱོགས་བཅུ་དུས་གསུམ་རྒྱལ་བ་ལ། །གུས་པར་ཕྱག་བྱའི་དབང་གིས་སོ། །མུ་སྟེགས་དང་ནི་བྲམ་ཟེ་དང ། །སྔགས་འཆང་ཆེན་པོ་དྲང་སྲོང་བཅུ། །ད་ལྟར་དགྲ་བཅོམ་གྲུབ་པ་ཡང ། །འདས་པའི་ཕྱོགས་བཅུ་དུས་གསུམ་གྱི། །རྒྱལ་བ་རྣམས་ལ་ཕྱག་བྱའི་ཡོན། །དམ་པའི་དོན་ལ་ཆུད་པ་དང ། །ཕྱོགས་བཅུ་རྒྱལ་བའི་ཞིང་རྣམས་ལ། །བྱང་ཆུབ་སེམས་དཔའི་ཚོགས་ཐམས་ཅད། །ཚེ་དཔག་མེད་པར་སྐྱེས་པ་ཡང ། །ཕྱོགས་བཅུ་དུས་གསུམ་རྒྱལ་བ་ལ། །གུས་པར་ཕྱག་བྱའི་དབང་གིས་སོ། །རྒྱལ་བུ་དགེ་མཐོང་འདི་ལྟ་སྟེ། །སྔོན་ང་རྒྱལ་པོར་བྱེད་པའི་ཚེ། །དྲང་སྲོང་ཆེན་པོ་སྦྱིན་ཞེས་བྱ། །དེ་ཚེ་སངས་རྒྱས་མ་བྱུང་སྟེ། །བྲམ་ཟེ་ལྔ་བརྒྱ་རྣམས་ཞིག་ལ། །ཁ་ཟས་དང་ནི་གོས་རྣམས་དང ། །ཁང་ཁྱིམ་དང་ནི་མལ་ཆའི་བར། །རབ་ཏུ་བྱུང་བའི་མཆོད་པ་ཕུལ། །དེས་ནི་དེ་ཚེ་བསྐོས་པ་ལ། །ཁྱེད་རྣམས་བྱང་ཆུབ་སེམས་བསྐྱེད་ཅིག་།བྲམ་ཟེ་ལྔ
62.276b
བརྒྱ་དེ་དག་གིས། །མཆོད་པ་ཕུལ་བ་བླངས་ཀྱིས་ཀྱང ། །དཀོན་མཆོག་གསུམ་ལ་མ་དད་པས། །མོད་བཞིན་ང་ལ་སླར་སྨྲས་པ། །འཇིག་རྟེན་ནང་ན་བྱང་ཆུབ་དང ། །རྣམ་པར་གྲོལ་བ་མེད་དོ་ཞེས། །དེ་སྐད་སྨྲས་པར་ངས་ཐོས་ནས། །མཉམ་ཉིད་མདོ་སྡེ་བསྲུང་བའི་ཕྱིར། །བྲམ་ཟེ་ལྔ་བརྒྱའི་སྲོག་བཅད་དོ། །བྲམ་ཟེ་དེ་དག་ཚེ་འཕོས་ནས། །དམྱལ་བ་མནར་མེད་ལྟུང་བར་འགྱུར། །སེམས་ཅན་དམྱལ་བར་ལྷུང་ནས་སུ། །དྲན་པ་རྣམ་གསུམ་གཡོས་ནས་ཀྱང ། །དུས་གསུམ་རྒྱལ་ལ་ཕྱག་བྱས་སོ། །མཉམ་པ་ཉིད་ཀྱི་མདོ་སྡེ་དང ། །བྱང་ཆུབ་དགེ་འདུན་དད་བསྐྱེད་དེ། །དྲན་པ་རྣམ་གསུམ་བྱས་ནས་སུ། །མོད་ལ་དམྱལ་ནས་བྱུང་སྟེ་དོང ། །འཇིག་རྟེན་ཟིལ་མངར་ལྔ་རུ་སྐྱེས། །ཚེ་ནི་བསྐལ་པ་ཆུང་བཅུ་ཐོབ། །དེ་ཡང་གུས་པའི་སེམས་ཀྱིས་སུ། །ཕྱོགས་བཅུའི་རྒྱལ་ལ་ཕྱག་བྱའི་ཡོན། །བྲམ་ཟེ་དེ་དག་ཐམས་ཅད་ཀྱིས། །ཐོག་མར་སྐུར་པས་དམྱལ་ལྟུང་ཡང ། །ཕྱིས་ནི་དད་པས་མོད་ལ་ཐར། །བྱང་ཆུབ་སེམས་དཔའ་ཁྱེད་རྣམས་ནི། །ཁྲེལ་དང་ལྡན་པ་སྨོས་ཅི་དགོས། །སྡིག་གི་རང་བཞིན་ཐོག་མ་ནས། །མེད་པས་སེམས་ཅན་རྣམས་ཀྱི་ཕྱིར། །རྩ་བ་བཞི་པོ་སྡོམ་པ་དང ། །མཚམས་མེད་ལྔ་པོའི་སྡིག་རྣམས་དང ། །ལོག་སྤྱོད་བར་དུ་མཐོལ་བཤགས་སོ། །སོ་སོའི་སྐྱེ་བོ་ལ་ལ་ཞིག་།དེ་ལྟ་བུ་ཡི་སྡིག་བྱས་པ། །དེ་བཞིན་མཐོལ་ཚངས་བྱེད་ནུས་ན། །རྩ་བ་བཞི་དང་མཚམས་མེད་ལྔ། །ལོག་སྤྱོད་བར་དུ་སྡིག་འབྱང་སྟེ། །སངས་རྒྱས་འགྲུབ་པ་འང་གདོན་མི་ཟ། །མ་དད་པ་ནི་དེར་མ་གཏོགས། །གང་ཞིག་དད་པའི་སེམས་ཤེས་ཏེ། །རྒྱལ་བ་རྣམས་ལ་ཕྱག་བྱས་ན། །ཆོས་ལམ་མི་འགྲུབ་མི་སྲིད་དོ། །དེ་ནས་རྒྱལ་བུ་དགེ་མཐོང་དང ། །སུམ་སྟོང་པོ་ཡི་མི་རྣམས་ཀྱིས། །བཅོམ་ལྡན་འདས་ལ་ཚིག་འཐུན་པར། །འདི་སྐད་གསོལ་ཏེ་བདག་ཅག་རྣམས། །སངས་རྒྱས་གྲུབ་ནས་སྐྱེ་ཤི་ལས། །འཁོར་བའི་རྣམ་དག་བསྒྲལ་བར་སྨོན། །ལྷ་མིའི་ནང་ན་བཙུན་བཞུགས་པས། །བྱེ་བྲག་ཕྱེད་པར་བཤད་དུ་གསོལ། །དེ་ལ་གཟུངས་སུ་བཟུང་བ་དང ། །
62.277a
ཡི་གེར་བྲིས་ཤིང་ཀློག་འཆང་བ། །དེ་ཡི་བསོད་ནམས་ཇི་ཙམ་མཆིས། །བཅོམ་ལྡན་འདས་ཀྱིས་བཀའ་སྩལ་པ། །བྱེ་བྲག་ཕྱེད་པར་ངས་བཤད་ཀྱིས། །རྒྱལ་བུ་དགེ་མཐོང་ལེགས་པར་ཉོན། །གང་ཞིག་རིན་ཆེན་སྣ་བདུན་གྱིས། །སྟོང་ཁམས་གང་བའི་སེམས་ཅན་ལ། །སྦྱིན་པ་བྱས་ཤིང་ཡོན་ཕུལ་ནས། །དེ་ཡི་སྟེང་དུ་ཆོས་བཤད་ཅིང ། །དགྲ་བཅོམ་འབྲས་བུ་ཐོབ་བྱས་པས། །ལ་ལ་ཞིག་གིས་རྒྱལ་བའི་མཚན། །ཐོས་ནས་དད་པའི་སེམས་བསྐྱེད་དེ། །དེ་ཡི་བསོད་ནམས་དེ་བས་འདའ། །ཡི་གེར་བྲིས་ཤིང་ཀློག་འཆང་བ། །དད་པས་ཕྱག་འཚལ་སྨོས་ཅི་དགོས། །དེ་ཡི་བསོད་ནམས་དཔག་ཏུ་མེད། །གང་གིས་ཡི་གེར་བྲིས་པ་དང ། །ཀློག་པ་དང་ནི་འདོན་པ་དང ། །དུས་སུ་ཕྱག་འཚལ་སེམས་བསྐྱེད་ན། །མཆོད་རྟེན་སྟོང་ཁམས་ཆུབ་བར་རུ། །བརྩིགས་པའི་བསོད་ནམས་པས་ནི་ཆེ། །དེ་ནས་འོད་སྲུངས་ཆེན་པོ་དང ། །ཤཱ་རིའི་བུ་དང་ཀུན་དགའ་བོ། །འཇིག་རྟེན་བསྲུང་བ་མཐུ་བོ་ཆེ། །ཚངས་ལྷ་རྣམས་དང་ལྷ་དབང་པོ། །འཁོར་ལོས་སྒྱུར་དང་རྒྱལ་ཆེན་བཞིས། །བཅོམ་ལྡན་ཞབས་ལ་མགོས་བཏུད་ནས། །ཚིག་འཐུན་པར་ནི་འདི་སྐད་གསོལ། །བཅོམ་ལྡན་མྱ་ངན་འདས་སླད་ན། །བདག་ཅག་རྣམས་ཀྱིས་སེམས་ཅན་ལ། ཁྱབ་པར་སྤེལ་ཞིང་བསྟན་པར་བགྱི། །ལུས་སེམས་རྟག་ཏུ་བདེ་བའི་ཕྱིར། །ཕྱག་འཚལ་རྣམས་ལ་བསྲུང་བར་བགྱི། །གང་ཞིག་སྡོམ་པ་ཞིག་པ་དང ། །མཚམས་མེད་ལྔའི་སྡིག་པ་དང ། །མཉམ་པ་ཉིད་ལ་སྐུར་པ་རྣམས། །སངས་རྒྱས་དེ་དག་མཚན་ཐོས་པས། །རྣམ་དག་ས་རུ་བདེ་བར་གནས། །དཔེར་ན་རྒྱལ་བུ་དགེ་མཐོང་བཞིན། །ད་དུང་མ་འོངས་ཕྱི་དུས་ལ། །སངས་རྒྱས་རང་བཞིན་མཐོང་བར་རོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་ཚོགས་ཆེན་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ཁྱེད་རྣམས་ལེགས་པར་ཉོན་ཅིག་།ཁྱེད་རྣམས་ལ་སྔོན་བྱུང་བའི་ལས་ཀྱི་རྒྱུ་རྐྱེན་བཤད་པར་བྱའོ། །ང་སྔོན་བསྐལ་པ་དཔག་ཏུ་མེད་པ་འདས་པའི་སྔོན་རོལ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར
62.277b
རྫོགས་པའི་སངས་རྒྱས་མཛེས་པའི་འོད་ཅེས་བྱ་བ་ལས་ཕྱོགས་བཅུ་དུས་གསུམ་གྱི་སངས་རྒྱས་ཀྱི་མཚན་ཐོས་ནས་ཤིན་དུ་དགའ་བའི་སེམས་སྐྱེས་ཏེ། ཐལ་མོ་སྦྱར་ཅིང་སྤྱི་བོས་བླངས་སོ། །བླངས་ནས་ཀྱང་སེམས་ཅན་གང་ནས་གང་དུ་གནས་པ་དེ་དང་དེར་དཔག་ཏུ་མེད་པ་མཐའ་ཡས་པའི་སེམས་ཅན་རྣམས་ལ་རྒྱ་ཆེར་སྤེལ་ཞིང་བསྟན་ཏེ་སངས་རྒྱས་ཀྱི་མཚན་ཐོས་པར་བྱས་སོ། །དེའི་ཚེ་དེའི་དུས་ན་ཚོགས་རྣམས་ཀྱི་ནང་དུ་མི་སུམ་སྟོང་ཉི་ཚེ་ཞིག་ངའི་ཆོས་ཀྱི་དོན་དང་འཐུན་ཏེ་དད་པའི་སེམས་དཔག་ཏུ་མེད་པ་སྐྱེས་ནས་ངའི་ཐད་དུ་སངས་རྒྱས་དེ་རྣམས་ཀྱི་མཚན་ནས་བརྗོད་ཅིང་ཕྱག་བྱས་པས། ད་ལྟར་ཕྱོགས་བཅུར་སྣང་ཞིང་མངོན་པར་འཚང་རྒྱ་བ་ཡིན་ནོ། །རིགས་ཀྱི་བུ་དག་རྩ་བ་བཞི་དང ། མཚམས་མེད་པའི་སྡིག་ལྕི་བ་དང ། མཉམ་པ་ཉིད་ལ་སྐུར་པ་དང ། ལོག་སྤྱོད་ཀྱི་བར་དུ་སྡིག་འབྱང་བར་འདོད་ན་དད་པའི་སེམས་ཀྱི་དབང་དུ་འགྲོ་བར་བྱའོ། །རིགས་ཀྱི་བུ་ཡང་འདི་ལྟ་སྟེ། གང་ལ་ལས་མ་དད་ཅིང་མ་གུས་པས་མདོ་སྡེ་བཅུ་གཉིས་ལ་སྐུར་ཅིང་དབང་བཟས་པ་དང ། རྡོ་རྗེའི་སྐུ་དང ། སྐྱེས་བུ་དམ་པ་འཇམ་དཔལ་དང ། ཕྱོགས་བཅུའི་རྒྱལ་བ་རྣམས་ལ་སྐུར་ཅིང་དབང་བཟའ་བ་རྣམས་གདོན་མི་ཟ་བར་སེམས་ཅན་དམྱལ་བར་ལྟུང་སྟེ། བརྫུན་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་མ་དད་པའི་ཕྱིར་རོ། །དམ་པའི་ཆོས་ལ་སྐུར་པའི་ཕྱིར་རོ། །བླ་མ་རྣམས་ལ་བརྙས་པའི་ཕྱིར་རོ། །ཕྱོགས་བཅུ་དུས་གསུམ་གྱི་སངས་རྒྱས་ལ་སྨད་པའི་ཕྱིར་ཏེ། ངེས་པར་དམྱལ་བར་ལྟུང་ངོ ། །སངས་རྒྱས་ཀྱི་མཚན་དེ་དག་ལ་དད་ཅིང་སེམས་ཐག་པ་ནས་ཕྱག་འཚལ་ན་མི་དགེ་བ་བཅུ་དང ། མཚམས་མེད་པ་ལྔ་དང ། མཉམ་པ་ཉིད་ལ་སྐུར་པའི་སྡིག་ལྟ་ཞིག་མི་འབྱང་མི་སྲིད་དེ་མ་དད་པ་དང ། མ་གུས་པ་དང ། དགེ་བའི་རྩ་བ་རྒྱུན་ཆད་པ་དང ། ལོག་སྤྱོད་རྣམས་ནི་དེར་མ་གཏོགས་སོ། །རིགས་ཀྱི་བུ་དག་ཤཱཀྱ་ཐུབ་པའི་སྐུ་འབུམ་ཕྲག་བརྒྱར་སྤྲུལ་པ་ཡང་འཇིག་རྟེན་རེ་རེ་ན་སྟོན་པ་མཛད་ཅིང་བཞུགས་ཏེ་ཐ་མའི་སྐུ་ནི་ང་ཡིན་ནོ། །དེའི་ཚེ་ང་དང་འགྲོགས་པའི་མི་སུམ
62.278a
སྟོང་པོ་ཀུན་ད་ལྟར་སངས་རྒྱས་སུ་གྲུབ་སྟེ། སྟོང་དང་པོའི་གཙོ་བོ་ནི་སངས་རྒྱས་པད་མའི་འོད་ཅེས་བྱ། སྟོང་བར་མའི་གཙོ་བོ་ནི་སངས་རྒྱས་རྡོ་རྗེའི་སྐུ་ཞེས་བྱ། སྟོང་ཐ་མའི་གཙོ་བོ་ནི་སངས་རྒྱས་བྱམས་པ་ཞེས་བྱའོ། །དེ་བས་ན་ཁྱེད་རྣམས་ཀྱང་དེ་བཞིན་དུ་ཕྱོགས་བཅུ་དུས་གསུམ་གྱི་སངས་རྒྱས་ཀྱི་མཚན་བརྗོད་ཅིང་ཕྱག་འཚལ་བའི་རིགས་སོ། །ཁྱེད་རྣམས་མ་འོངས་པའི་དུས་ན་ཚོགས་མང་པོ་རྣམས་ལ་སྟོན་པ་རྒྱ་ཆེར་བྱེད་ཅིང་མཐའ་མེད་པའི་སེམས་ཅན་རྣམས་ལ་ཕན་གདགས་ཏེ། ཁམས་གསུམ་ནས་བཟླས་ཤིང་ཞི་བ་དང་དབེན་པའི་གནས་སུ་དཀྱིལ་འཁོར་གྱིས་ལ་ང་དང་འདྲ་བར་བྱོས་ཤིག་།དེ་ནས་བྱང་ཆུབ་སེམས་དཔའ་གཟུངས་འཛིན་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཅིང་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། ཇི་ལྟར་གཟུང་བར་བགྱི། ཇི་ལྟར་བསྒོམ་ཞིང་སྤྱད་པར་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆོས་ཀྱི་རྣམ་གྲངས་འདིའི་མིང་ནི་སྡོམ་པ་ལྕི་བ་རྣམས་ལ་ཕན་གདགས་པའོ་ཞེས་བྱ་བར་ཟུང་ཤིག་།རྡོ་རྗེ་རིན་པོ་ཆེའི་སྙིང་པོ་ཞེས་བྱ་བར་ཟུང་ཤིག་།སྡེ་སྣོད་ཀྱི་སྒོ་དཔག་ཏུ་མེད་པའོ་ཞེས་བྱ་བར་ཟུང་ཤིག་།ཐམས་ཅད་ཀུན་དུ་བསྡུས་པའོ་ཞེས་བྱ་བར་ཟུང་ཤིག་།རྒྱན་ཆེན་པོ་དཔེ་ཟླ་མེད་པའོ་ཞེས་བྱ་བར་ཟུང་ཤིག་།མི་སུམ་སྟོང་སངས་རྒྱས་སུ་གྲུབ་པར་རྣམ་པར་བཀོད་པ་ཞེས་བྱ་བར་ཟུང་ཤིག་།འགྱོད་ཚངས་ཀྱིས་སྡིག་སྦྱངས་དེ་བསོད་ནམས་ཐོབ་པའོ་ཞེས་བྱ་བར་ཟུང་ཤིག་།ཐར་པ་ཆེན་པོ་ཕྱོགས་སུ་རྒྱས་པ་ཞེས་བྱ་བར་ཟུང་ཤིག་།བེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་གཟུངས་འཛིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་བསྟན
62.278b
པ་ལྟར་ན། ཆོས་ཀྱི་རྣམ་གྲངས་འདི་ནི་སེམས་ཅན་དཔག་ཏུ་མ་མཆིས་པ་རྣམས་ལ་སྨན་པ་དང ། བདེ་བ་ཆེན་པོ་མཛད་པའི་སླད་དུ་སྡིག་སྦྱངས་པ་དང ། སངས་རྒྱས་སུ་འགྲུབ་པར་མཛད་པའི་མདོ་འདི་ནི་སངས་རྒྱས་ཐམས་ཅད་ཀྱི་ནི་ཡུམ་མོ། །བྱང་ཆུབ་སེམས་དཔའ་ཐམས་ཅད་ཀྱི་ནི་ལམ་མོ། །ཉན་ཐོས་རྣམས་ཀྱི་ནི་མིག་གོ། །ལྷ་དང་མི་རྣམས་ཀྱི་ནི་ཁང་ཁྱིམ་ལགས་ཏེ། དེ་ལྟ་བུའི་བསམ་གྱིས་མི་ཁྱབ་པའི་དོན་དང་ལྡན་པ་བདག་གིས་གཟུངས་སུ་བཟུང་བར་བགྱིའོ། །ལྷ་དང་མི་གང་ནས་གང་དུ་གནས་པ་དེ་དང་དེར་རྒྱ་ཆེར་སྤེལ་བར་བགྱིའོ། །རྒྱུན་མི་འཆད་ཅིང་ཡུན་དུ་གནས་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཁྱོད་ནི་སྐྱེས་བུ་དམ་པ་ཡིན་ཏེ། སྡེ་སྣོད་ཆེན་པོ་དཔག་ཏུ་མེད་པ་ཐམས་ཅད་གཟུངས་སུ་འཛིན་པ་ལགས་ཏེ། ཁྱོད་མ་འོངས་པའི་དུས་ན་ང་འགྲོ་བའི་གནས་སུ་ཁྱོད་འགྲོ་ཤིག་།ང་འདུག་པའི་གནས་སུ་ཁྱོད་འདུག་ཤིག་།བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བསྟན་པའི་ཚེ། བྱང་ཆུབ་སེམས་དཔའ་དཔག་ཏུ་མེད་པ་ཞིག་ཕྱིར་མི་ལྡོག་པ་དང་མི་འགྱུར་བའི་སར་གནས་སོ། །ཉན་ཐོས་བརྒྱད་ཁྲི་ཞིག་ཐེག་པ་ཆེན་པོའི་སེམས་བསྐྱེད་དོ། །དགེ་སློང་སྟོང་ཕྲག་བཅུ་ཞིག་དགྲ་བཅོམ་པའི་འབྲས་བུ་ཐོབ་བོ། །ལྷ་དང་མི་བརྒྱད་ཁྲི་བཞི་སྟོང་ཞིག་ཆོས་ཀྱི་མིག་རྣམ་པར་དག་པ་ཐོབ་བོ། །སེམས་ཅན་སྟོང་ཕྲག་བརྒྱ་ཞིག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ཀྱིས་མདོ་སྡེ་འདི་བཤད་ཟིན་ནས། ཤིང་སཱ་ལ་ག་ལ་བ་དེ་ལོགས་སུ་གཤེགས་སོ། །གཤེགས་ནས་གསེར་གྱི་མེ་ཏོག་རིན་པོ་ཆེའི་རྫིང་བུ་དང་བཅས་པར་མི་སྣང་བར་གྱུར་ཏེ། དེ་བཞིན་གཤེགས་པའི་འོད་ཀྱང་བསྡུས་ནས། མི་མཇེད་ཀྱི་འཇིག་རྟེན་གྱི་ཁམས་མཐོ་དམའ་དང ། གཙང་སྨེ་ཡང་སྔོན་བཞིན་ནོ། །མི་རྣམས་ཉེས་བྱས་པའི་ཕྱིར་དམྱལ་བ་ཡང་སྔོན་བཞིན་ནོ། །བཅོམ་ལྡན་འདས་ཀྱིས་དེ
62.279a
སྐད་ཅེས་བཀའ་སྩལ་ནས། བྱང་ཆུབ་སེམས་དཔའི་ཚོགས་ཐམས་ཅད་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཐར་པ་ཆེན་པོ་ཕྱོགས་སུ་རྒྱས་པ་འགྱོད་ཚངས་ཀྱིསྡིག་སྦྱང་བ་སྟེ་སངས་རྒྱས་ཡོངསུ་གྲུབ་པ་བཀོད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སྷོ།། །།རྒྱ་ནག་གི་འགྱུར་ཤུ་ལོ་ག་བདུན་བརྒྱ་རྩ་བཅུ་གཉིས་ཏེ་བམ་པོ་གཉིས་དང་ཤུ་ལོ་ག་བརྒྱ་བཅུ་གཉིས། ་་་་་་