rKTs


J275

(e-text produced by ADARSHA)

see text in transliteration
67.288b
འཕགས་པ་མཁར་སིལ་གྱི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ཁྱོད་ཀྱིས་འཁོར་སིལ་འདི་ཡོངས་སུ་བཅང་བར་བྱ་སྟེ། དེ་ཅིའི་ཕྱིར་ཞེ་ན། འདས་པའི་སངས་རྒྱས་རྣམས་ཀྱིས་ཀྱང་མཁར་སིལ་འདི་བསྣམས་སོ། །མ་བྱོན་པའི་སངས་རྒྱས་རྣམས་ཀྱིས་ཀྱང་མཁར་སིལ་འདི་བསྣམས་སོ། །ད་ལྟར་གྱི་སངས་རྒྱས་རྣམས་ཀྱིས་ཀྱང་འཁར་སིལ་འདི་བསྣམས་པ་ཡིན་ཏེ། ང་ད་ལྟར་མངོན་པར་སངས་རྒྱས་ནས་འཁར་སིལ་བསྣམས་པ་དེ་བཞིན་དུ་འདས་པ་དང ། མ་བྱོན་པ་དང ། དེ་ལྟར་བཞུགས་པའི་སངས་རྒྱས་རྣམས་ཀྱིས་ཀྱང་ཉན་ཐོས་རྣམས་ལ་ལ་མཁར་སིལ་བཅང་བར་བྱའོ་ཞེས་སྟོན་པར་མཛད་པས་དེང་ང་མངོན་པར་རྫོགས་པར་སངས་རྒྱས་ནས་ཀྱང་སངས་རྒྱས་རྣམས་ཀྱི་ཆོས་ཇི་ལྟ་བ་བཞིན་དུ་ཁྱེད་ལ་བསྟན་པ་ཡིན་གྱིས། ཁྱེད་ཀྱིས་ཀྱང་མཁར་སིལ་བཅང་བར་བྱའོ། །དེ་ཅིའི་ཕྱིར་ཞེ་ན། མཁར་སིལ་ཞེས་བྱ་བ་ནི་ཡེ་ཤེས་ཀྱི་མཁར་བ་ཞེས་ཀྱང་བྱའོ། །ཡོན་ཏན་གྱི་མཁར་བ་ཞེས་ཀྱང་བྱ་སྟེ། འཕགས་པའི་ཡེ་ཤེས་རབ་ཏུ་སྟོན་པའི་ཕྱིར་ཡེ་ཤེས་ཀྱི་མཁར་བ་ཞེས་བྱའོ། །ཡོན་ཏན་གྱི་གཞི་སྒྲུབ་པའི་ཕྱིར་ཡོན་ཏན་གྱི་མཁར་བ་ཞེས་བྱ་སྟེ། མཁར་སིལ་འདི་ནི་འཕགས་པའི་གང་ཟག་གི་རིགས་ཅན་སྐྱེས་བུ་དམ་པར་མཚོན་པའི་ལམ་གྱི་ཆོས་ལ་ཕྱོགས་པའི་རྒྱལ་མཚན
67.289a
རྗེས་སུ་དྲན་པ་རྣམ་པར་གཞག་པའི་དོན་གྱི་སྤྱོད་པ་ཡིན་པས་དེའི་ཕྱིར་ཁྱོད་ཀྱིས་ཆོས་བཞིན་དུ་བཅང་བར་བྱའོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་སྟན་ལས་ལངས་ཏེ། གོས་ཚགས་བཅོས་ནས་བླ་གོས་ཕྲག་པ་གཅིག་ཏུ་གཟར་ཏེ་ཐལ་མོ་སྦྱར་ནས་པུས་མོ་ས་ལ་བཙུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་མཁར་སིལ་ཞེས་བགྱི། ཇི་ལྟར་ན་བཅང་བར་བགྱི། བཅོམ་ལྡན་འདས་ཀྱིས་བཤད་དུ་གསོལ། བདག་ཅག་རྣམས་ཀྱིས་ཀྱང་བཀའ་བཞིན་དུ་སྤྱོད་པར་འཚལ་ལོ་ཞེས་གསོལ་པ་དང ། བཅོམ་ལྡན་འདས་ཀྱིས་འོད་སྲུངས་ལ་བཀའ་སྩལ་པ། ལེགས་པར་ཉོན་ལ་ཡིད་ལ་ཟུང་ཤིག་དང་ངས་བཤད་པར་བྱའོ། །དེ་ལ་མཁར་སིལ་ཞེས་བྱ་བ་ནི་ཡང་བ་ཡིན་ཏེ། གང་གིས་མཁར་བ་འདི་ལ་བརྟེན་པ་འདི་དག་ཉོན་མོངས་པ་བསལ་ནས་ཁམས་གསུམ་ལས་ངེས་པར་འབྱུང་བའི་ཕྱིར་ཡང་ཞེས་བྱའོ། །མཁར་སིལ་ཞེས་བྱ་བ་ནི་སྣང་བར་བྱེད་པ་ཡིན་ཏེ། མཁར་སིལ་འཛིན་པའི་གང་ཟག་གང་ཡིན་པ་དེ་དག་ཤེས་རབ་ཀྱི་སྣང་བ་ཐོབ་པར་འགྱུར་བའི་ཕྱིར་སྣང་བར་བྱེད་པ་ཞེས་བྱའོ། །མཁར་སིལ་ཞེས་བྱ་བ་ནི་ཕྱིར་མི་ལྡོག་པར་བྱེད་པ་ཡིན་ཏེ། མཁར་སིལ་འཛིན་པའི་གང་ཟག་གང་ཡིན་པ་དེ་དག་སྲིད་པ་གསུམ་ལས་ངེས་པར་འབྱུང་ཞིང་ཡང་མངོན་པར་ཞེན་པ་ཉིད་དུ་མི་འགྱུར་བའི་ཕྱིར་ཕྱིར་མི་ལྡོག་པར་བྱེད་པ་ཞེས་བྱའོ། །མཁར་སིལ་ཞེས་བྱ་བ་ནི་ཁོང་དུ་ཆུད་པར་བྱེད་པ་ཡིན་ཏེ། གང་མཁར་སིལ་འཛིན་པར་བྱེད་པ་ཡིན་ཞེ་ན་སྡུག་བསྔལ་དང ། སྟོང་པ་དང ། ཁམས་གསུམ་གྱི་ཉོན་མོངས་པའི་ཀུན་ནས་བཀྲིས་པར་ཁོང་དུ་ཆུད་པ་དང ། བདེན་པ་བཞི་དང ། རྟེན་ཅིང་འབྲེལ་པར་འབྱུང་བ་བཅུ་གཉིས་པོ་འདི་དག་གསལ་བར་རྟོགས་པར་འགྱུར་བའི་ཕྱིར་ཁོང་དུ་ཆུད་པར་བྱེད་པ་ཞེས་བྱའོ། །མཁར་སིལ་ཞེས་བྱ་བ་ནི་ང་རྒྱལ་མེད་པར་བྱེད་པ་ཡིན་ཏེ། གང
67.289b
མཁར་སིལ་འཛིན་པ་དེ་དག་ང་རྒྱལ་གྱི་ལས་རབ་ཏུ་སྤོང་བར་འགྱུར་བའི་ཕྱིར་ང་རྒྱལ་མེད་པར་བྱེད་པ་ཞེས་བྱའོ། །མཁར་སིལ་ཞེས་བྱ་བ་ནི་རྒྱང་བསྲིངས་པ་ཡིན་ཏེ། གང་མཁར་སིལ་འདི་འཛིན་པའི་གང་ཟག་གང་ཡིན་པ་དེ་དག་འདོད་པ་ལྔ་ཐག་རིང་དུ་བྱེད་པས་དེ་དག་འདོད་པས་སྲེད་པའི་ཀུན་ནས་བཀྲིས་པ་སྤོང་བ་དང ། ཕུང་པོ་ལྔ་པོ་རྣམས་རྣམ་པར་འཐོར་བ་དང ། སྲིད་པ་ལྔ་པོ་དག་ཡོངས་སུ་སྤོང་བ་དང ། མྱ་ངན་ལས་འདས་པ་ལ་ཕྱོགས་ཤིང་འདུ་བྱེད་ཀྱི་ལས་ཀྱང་ཐག་རིང་དུ་སྤོང་བའི་ཕྱིར་རྒྱང་བསྲིངས་པ་ཞེས་བྱའོ། །མཁར་སིལ་ཞེས་བྱ་བ་ནི་ལེན་པར་བྱེད་པ་ཡིན་ཏེ། གང་མཁར་སིལ་འཛིན་པར་བྱེད་པ་དེ་དག་སངས་རྒྱས་རྣམས་ཀྱི་ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་རིན་པོ་ཆེ་བླངས་པས་རྣམ་པར་གྲོལ་བ་ཐོབ་པར་འགྱུར་བའི་ཕྱིར་ལེན་པར་བྱེད་པ་ཞེས་བྱའོ། །མཁར་སིལ་ཞེས་བྱ་བ་ནི་ཡོངས་སུ་གྲུབ་པར་འགྱུར་བ་ཡིན་ཏེ། གང་མཁར་སིལ་འཛིན་པ་དག་སངས་རྒྱས་ཀྱི་ཆོས་ཀྱི་སྡེ་སྣོད་མངོན་པར་གྲུབ་པ་དང ། ཇི་ལྟར་བསྟེན་པ་བཞིན་དུ་བསྒྲུབས་པས་མ་ཉམས་པར་ཕུན་སུམ་ཚོགས་པར་འགྱུར་བའི་ཕྱིར་མངོན་པར་འགྲུབ་པར་འགྱུར་བ་ཞེས་བྱའོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་མཁར་སིལ་ཞེས་བྱ་བའི་ཡི་གེའི་དོན་རྒྱ་ཆེ་ཞིང་མང་བས་ཡོངས་སུ་རྫོགས་པར་རྗོད་མི་ནུས་ཀྱང་ཁྱེད་ཀྱིས་རེ་ཤིག་དེ་བཞིན་དུ་ཡོངས་སུ་གཟུང་བར་བྱའོ། །བཅོམ་ལྡན་འདས་ལ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་མཁར་སིལ་ཞེས་བྱ་བའི་དོན་ནི་དེ་ལྟ་བུ་ལགས་ན། ཅིའི་སླད་དུ་ཡེ་ཤེས་ཀྱི་མཁར་བ་ཞེས་བགྱི་བ་ནས་དྲན་པ་ཉེ་བར་གཞག་པའི་དོན་གྱི་སྤྱོད་པ་ཞེས་བགྱི་བའི་བར་གྱི་དོན་གང་ལགས་པ་བཅོམ་ལྡན་འདས་ཀྱིས་བཀས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། མཁར་སིལ་ཞེས་བྱ་བ་ནི་ཡེ་ཤེས་ཀྱི་སྤྱོད
67.290a
པ་སྒྲུབ་པ་དང ། མང་དུ་ཐོས་པ་རྒྱ་ཆེར་སྒྲུབ་པ་དང ། འཇིག་རྟེན་དང་འཇིག་རྟེན་ལས་འདས་པའི་ཤེས་རབ་དང ། དགེ་བ་དང ། མི་དགེ་བ་དང ། འདུས་བྱས་དང ། འདུས་མ་བྱས་དང ། ཟག་པ་དང་བཅས་པ་དང ། ཟག་པ་མེད་པ་རྣམ་པར་ཐོགས་པ་མེད་པར་ཁོང་དུ་ཆུད་ཅིང་ཤེས་རབ་མངོན་པར་འགྲུབ་པར་བྱེད་པའི་ཕྱིར་ཡེ་ཤེས་ཀྱི་མཁར་བ་ཞེས་ཀྱང་བྱའོ། །ཚུལ་ཁྲིམས་དམ་པོར་སྲུང་བ་དང ། བཟོད་པ་དང ། བསམ་གཏན་ལ་སེམས་རྩེ་གཅིག་ཏུ་གཡེང་བ་མེད་པར་སྒོམ་པ་དང ། རྟག་ཏུ་བསོད་ནམས་ཀྱི་ལས་བསྒྲུབས་པས་མགོ་འམ་ཐོད་ལ་མེ་འབར་བ་བཞིན་དུ་སྐད་ཅིག་ཙམ་དུ་ཡང་མི་གཏོང་བའི་ཕྱིར་ཡོན་ཏན་གྱི་མཁར་བ་ཞེས་བྱའོ། །མཁར་སིལ་འདི་ཡོངས་སུ་འདི་འཛིན་པ་གང་ཡིན་པ་དེ་དག་ནི་གང་གི་སྤྱོད་པ་རྣམ་པ་བཅུ་དྲུག་པོ་འདི་ལྟ་སྟེ། བདེན་པ་བཞི་པོ་སྡུག་བསྔལ་དང ། ཀུན་འབྱུང་བ་དང ། འགོག་པ་དང ། ལམ་དང ། ཚད་མེད་པ་བཞི་པོ་བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། བསམ་གཏན་བཞི་པོ་བསམ་གཏན་དང་པོ་དང ། བསམ་གཏན་གཉིས་པ་དང ། བསམ་གཏན་གསུམ་པ་དང ། བསམ་གཏན་བཞི་པ་དང ། གཟུགས་མེད་པའི་སྙོམས་པར་འཇུག་པ་བཞི་པོ་ནམ་མཁའ་མཐའ་ཡས་སྐྱེ་མཆེད་དང ། རྣམ་ཤེས་མཐའ་ཡས་སྐྱེ་མཆེད་དང ། ཅི་ཡང་མེད་པའི་སྐྱེ་མཆེད་དང ། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་ཕུན་སུམ་ཚོགས་པ་དང ། གཞན་ཡང་སྤྱོད་པ་སུམ་བཅུ་རྩ་བདུན་པོ་འདི་ལྟ་སྟེ། བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་ཕུན་སུམ་ཚོགས་ཤིང་ཆོས་དེ་དག་གསལ་བར་རྣམ་པར་བྱེད་པ་དང ། བདག་ཉིད་ཀྱི་ལུས་ཀྱིས་མངོན་སུམ་དུ་བྱས་པས་སྒྲའི་རྗེས་སུ་མི་འབྲང་བ་དང ། ཆོས་དེ་དག་ལ་བདག་ཉིད་རྣམ་པར་རྩེན་པ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་རྣམ་པར་ཐར་པའི་སྒོར་འཇུག་པ་ལ
67.290b
རང་དབང་དུ་གྱུར་ཅིང་དགའ་བ་མེད་པ་གང་ཡིན་པ་དེ་ནི་འཕགས་པ་ཞེས་བྱ་སྟེ། ནང་ཡོན་ཏན་དེ་ལྟ་བུ་དང་ལྡན་པས་ཕྱི་རོལ་མཁར་སིལ་འཛིན་པ་ཡིན་ཏེ། འདིས་ནི་གང་ཟག་གདོན་མི་ཟ་བར་འཕགས་པའི་ཡོན་ཏན་ཚུལ་ཁྲིམས་དང ། བཟོད་པ་དང ། བསམ་གཏན་དང ། ཤེས་རབ་དང ། རིག་པ་གསུམ་དང ། མངོན་པར་ཤེས་པ་དྲུག་དང ། རྣམ་པར་ཐར་པ་བརྒྱད་པོ་རྣམས་ཕུན་སུམ་ཚོགས་པ་ཡིན་ཏེ། གང་ཟག་དེ་འཕགས་པ་ཡིན་པར་མཚོན་པ་ཉིད་ཀྱིས་གུས་པ་སྐྱེད་པར་འགྱུར་བའི་ཕྱིར་འཕགས་པའི་གང་ཟག་གི་རྟགས་ཞེས་བྱའོ། །སྐྱེས་བུ་དམ་པར་མཚོན་པ་ཞེས་བྱ་བ་ནི་ནང་ན་ཡེ་ཤེས་ཀྱི་ངོ་བོ་ཉིད་དང་ལྡན་པས་དམ་པ་ཞེས་བྱ་སྟེ། གང་ཟག་དེ་འཕགས་པ་ཡིན་པར་མཚོན་པ་ཉིད་ཀྱིས་གུས་པ་སྐྱེད་པར་འགྱུར་བའི་ཕྱིར་འཕགས་པའི་ནང་ན་ཡེ་ཤེས་ཀྱི་ངོ་བོ་ཉིད་དང་ལྡན་པས་ཡོན་ཏན་གྱི་གཞི་སྒྲུབ་པ་དང ། ཆོས་གོང་ནས་གོང་དུ་རྩོལ་ཞིང་ལེགས་པར་སྒྲུབ་པར་བྱེད་དོ་ཞེས་སྟོན་པར་བྱེད་པའི་ཕྱིར་སྐྱེས་བུ་དམ་པར་མཚོན་པ་ཞེས་བྱའོ། །གང་ཟག་གསལ་བ་དེ་རིང་པོར་མི་ཐོགས་པར་ཤེས་རབ་ཀྱིས་མངོན་པར་གྲུབ་ནས་འདུས་མ་བྱས་ཀྱི་གནས་རབ་ཏུ་ཞི་ཞིང་དབེན་པ་མྱ་ངན་ལས་འདས་པའི་བདེ་བ་དོན་དམ་པའི་གནས་ཀྱི་ལམ་དུ་འཇུག་པར་འགྱུར་རོ་ཞེས་ཤེས་པར་བྱེད་པའི་ཕྱིར་ལམ་གྱི་ཆོས་ལ་ཕྱོགས་པའི་རྒྱལ་མཚན་ཞེས་བྱའོ། །རྗེས་སུ་དྲན་པའི་རྣམ་པར་གཞག་པའི་དོན་གྱི་སྤྱོད་པ་ཞེས་བྱ་བ་ནི་མཁར་བ་འདི་རིམ་པ་གསུམ་དང་ལྡན་པར་དུམ་བུ་གསུམ་གྱི་རིམ་པ་མཐོང་བ་ཉིད་ཀྱིས་ངན་སོང་གསུམ་གྱི་སྡུག་བསྔལ་རྗེས་སུ་དྲན་ནས་ཚུལ་ཁྲིམས་དང ། རྟིང་ངེ་འཛིན་དང ། ཤེས་རབ་སྒོམ་པར་བྱེད་པ་དང ། གནོད་པ་གསུམ་པོ་རྒ་བ་དང ། ན་བ་དང ། འཆི་བ་རྗེས་སུ་དྲན་ན་དུག་གསུམ་པོ་འདོད་ཆགས་དང ། ཞེ་སྡང་དང ། གཏི་མུག་ཡོངས་སུ་སིལ་བར་བྱེད་པ་དང ། ཁམས་གསུམ་པོ་དག་མི་རྟགས་པ་ཡིན་པ
67.291a
ཉིད་དུ་རྗེས་སུ་དྲན་ནས་དཀོན་མཆོག་གསུམ་ལ་མངོན་པར་ཡིད་ཆེས་ཤིང་གུས་པ་དང ། སྲིད་པ་གསུམ་བསལ་བ་དང ། དག་པ་གཙང་བ་དང ། ལས་རྣམ་གསུམ་རྣམ་པར་སྦྱང་བ་དང ། རིག་པ་གསུམ་དང་ལྡན་པར་འདོད་པ་དང ། རྣམ་པར་ཐར་པ་གསུམ་ལ་འཇུག་པ་དང ། རྗེས་སུ་དྲན་པ་དྲུག་གི་གནས་གསུམ་ཐོབ་པ་དང ། ཡེ་ཤེས་ཐག་རིང་དུ་བྱེད་པ་གསུམ་རྟོགས་པར་འགྱུར་བའི་ཕྱིར་དུམ་བུ་གསུམ་རིམ་པར་རྣམ་པར་གཞག་པ་ཡིན་ནོ། །གཞན་ཡང་བཞི་སྒྲིལ་དུ་བྱས་པ་ནི་སྐྱེ་བ་རྣམ་པ་བཞི་ཡོངས་སུ་བཅད་པ་དང ། བདེན་པ་བཞི་རྗེས་སུ་དྲན་པར་བྱ་བ་དང ། ཚད་མེད་པ་བཞི་སྒོམ་པ་དང ། བསམ་གཏན་བཞི་ལ་འཇུག་པར་བྱ་བ་དང ། སྙོམས་པར་འཇུག་པ་བཞི་ཡོངས་སུ་དག་པར་བྱ་བ་དང ། དྲན་པ་ཉེ་བར་གཞག་པ་བཞི་རབ་ཏུ་བསྟན་པ་དང ། ཡང་དག་པའི་སྤོང་བ་བཞི་བསྟན་པར་བྱ་བ་དང ། ཏིང་ངེ་འཛིན་གྱི་རྐང་པ་བཞི་ཐོབ་པར་བྱ་བའི་ཕྱིར་བཞི་སྒྲིལ་དུ་རྣམ་པར་གཞག་པ་ཡིན་ནོ། །དབུས་ཀྱི་ཤིང་གཏོགས་པར་རྣམ་པ་ལྔར་གཞག་པ་ནི་ལྟ་བ་ལྔ་པོ་དག་སྤང་བ་དང ། འགྲོ་བ་ལྔ་པོ་དག་གི་འཁོར་བའི་སྡུག་བསྔལ་གྱི་འཁྲུག་པ་ཡོངས་སུ་སོང་བ་དང ། དབང་པོ་ལྔ་སྒོམ་པ་དང ། སྟོབས་ལྔ་དང་ལྡན་པར་བྱ་བ་དང ། སྒྲིབ་པ་ལྔ་པོ་དག་བསལ་བ་དང ། ཕུང་པོ་ལྔ་པོ་དག་རྣམ་པར་གཤིག་པ་དང ། ཆ་ལྔ་དང་ལྡན་པའི་ཆོས་ཀྱི་སྐུ་ཐོབ་པར་བྱ་བའི་ཕྱིར་རྣམ་པ་ལྔར་གཞག་པ་ཡིན་ནོ། །སིལ་སྒྲིལ་བཅུ་གཉིས་སུ་བསྟན་པ་ནི་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་སུ་དྲན་པར་བྱ་ཞིང་ཐོགས་པ་མེད་པར་བྱ་བ་དང ། སྒོ་བཅུ་གཉིས་པའི་བསམ་གཏན་བསྒོམ་པར་བྱ་བ་དང ། སེམས་ལ་སྐྱོན་མེད་པར་རྗེས་སུ་དྲན་པར་བྱའོ། །རིམ་པ་གསུམ་དང་བཞི་སྒྲིལ་དུ་བསྡུས་ཏེ། གྲངས་བདུན་དུ་བསྟན་པ་ནི་དེ་བཞིན་གཤེགས་པའི་བྱང་ཆུབ་ཀྱི་ཡན་ལག་བདུན་གྱི་ཆོས་རྗེས་སུ་དྲན་པར་བྱ་བ་དང ། འཕགས་པའི་ནོར་བདུན་མངོན་པར་བསྒྲུབ་པར་བྱའོ། །མར་རྩེ་གཏོགས་པར་བརྒྱད་ཏུ་བསྟན་པ་ནི་ལམ་ཡན
67.291b
ལག་བརྒྱད་པ་རྗེས་སུ་བསྟན་པར་བྱ་བ་དང ། རྣམ་པར་ཐར་པ་བརྒྱད་ཐོབ་པར་བྱ་བ་དང ། མི་ཁོམ་པ་བརྒྱད་ཡོངས་སུ་བསལ་བའི་ཕྱིར་རྣམ་པ་བརྒྱད་བསྟན་པ་ཡིན་ནོ། །མཁར་སིལ་གྱི་དོན་མདོར་བསྟན་པ་དེ་ལྟ་བུ་ཡིན་པས་ཁྱེད་ཀྱིས་ལེགས་པར་ཡོངས་སུ་གཟུང་བར་བྱའོ། །བཅོམ་ལྡན་འདས་ལ་འོད་སྲུང་གིས་གསོལ་པ། བཅོམ་ལྡན་འདས་འཕགས་པའི་གསུང་རབ་ལ་ཇི་སྐད་བསྟན་པ་བཞིན་དུ་འཚལ་ལོ་ཞེས་གསོལ་ཏོ། །དེ་ནས་འོད་སྲུང་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དུས་གསུམ་གྱི་དེ་བཞིན་གཤེགས་པ་རྣམས་ཀྱི་ཆོས་ཀུན་མཚུངས་པ་ཞིག་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཁ་ཅིག་མཁར་བ་མཚུངས་ཀྱང་སྤྱོད་པ་མི་མཚུངས་པས་ཁ་ཅིག་གི་ཚེ་ན་ནི་བཞི་སྒྲིལ་དུ་བྱས་པའོ། །ཁ་ཅིག་གི་ཚེ་ན་ནི་གཉིས་སྒྲིལ་དུ་བྱས་པ་སྟེ། སིལ་སྒྲིལ་གྱི་གྲངས་ལ་ནི་བྱེ་བྲག་དུ་གྱུར་པ་མེད་དོ། ང་ནི་དེང་འདིར་བཞི་སྒྲིལ་སིལ་སྒྲིལ་བཅུ་གཉིས་སུ་བྱས་པའི་བསྟན་པ་དེ་སྤྱོད་དོ། །གཉིས་སྒྲིལ་དུ་བྱས་པ་ནི་དེ་བཞིན་གཤེགས་པ་འོད་སྲུང་གིས་རྣམ་པར་གཞག་པ་ཡིན་ཏེ། སེམས་ཅན་རྣམས་བདེན་པ་གཉིས་པོ་ཀུན་རྫོབ་གྱི་བདེན་པ་དང ། དོན་དམ་པའི་བདེན་པ་རྗེས་སུ་དྲན་པར་བྱ་བའི་ཆེད་དུ་དོན་འདི་རྣམ་པར་གཞག་པ་ཡིན་ནོ། །དེའི་ཚེ་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་འོད་སྲུང་ཆེན་པོ་འཁོར་སྟོང་ཉིས་བརྒྱ་དང ། འཁོར་འདུས་པ་ཆེན་པོ་རྣམས་ཤིན་ཏུ་དགའ་ཞིང་གུས་པས་མངོན་པར་བསྟོད་དོ། །འཕགས་པ་མཁར་སིལ་ཞེས་བྱ་བ་ཐེག་པ་ཆེན་པོའི་མདོ། རྫོགས་སོ།། །།