rKTs


J279

(e-text produced by ADARSHA)

see text in transliteration
67.316b
༄#། །རྒྱ་གར་སྐད་དུ། ཀརྨ་བི་བྷང་ག་ནཱ་མ་དྷ་རྨ་གྲན་ཐ། ་བོད་སྐད་དུ། ལས་ཀྱི་རྣམ་པར་འགྱུར་བ་ཞེས་བྱ་བ་ཆོས་ཀྱི་གཞུང ། བམ་པོ་གཅིག་གོ། །སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་དང་ལྷན་ཅིག་ཏུ་བཞུགས་ཏེ། དེ་ནས་ཏོ་འུ་ཏེ་ཡའི་བུ་ཤུ་ཀོ་མ་ན་བ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དང་ལྷན་ཅིག་ཏུ་ཡང་དག་པར་མགུ་བ་དང ། ཡང་དག་པར་རངས་པའི་གཏམ་རྣམ་པ་མང་པོ་བཤད་དེ་ཕྱོགས་གཅིག་ཏུ་འདུག་གོ། །ཏོའུ་ཏེ་ཡའི་བུ་ཤུ་ཀོ་མ་ན་བ་ཕྱོགས་གཅིག་ཏུ་འདུག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཽ་ཏ་མ་ཁྱོད་ལ་བདག་ཅུང་ཤས་ཤིག་འདྲི་ན་དྲིས་པའི་ལན་སླར་བཀའ་སྩལ་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཏོའུ་ཏེ་ཡའི་བུ་ཤུ་ཀོ་མ་ན་བ་ལ་འདི་སྐད་ཅེས་གསུངས་སོ། །མ་ན་བ་ཇི་ལྟར་འདོད་པ་བཞིན་དུ་དྲིས་ཤིག་།ངས་ཁྱོད་ལ་བཤད་པར་བྱའོ། །དེ་ནས་ཏོ་འུ་ཏེ་ཡའི་བུ་ཤུ་ཀོ་མ་ན་བས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་སེམས་ཅན་རྣམས་ལ་ཚེ་ཐུང་བ་དང ། ཚེ་རིང་བ་དང ། ནད་མང་བ་དང ། ནད་ཉུང་བ་དང ། མི་སྡུག་པ་དང ། བཟང་པོ་དང ། དབང་ཆུང་བ་དང ། དབང་ཆེ་བ་དང ། མ་རབས་ཀྱི་རིགས་དང ། ཡ་རབས་ཀྱི་རིགས་དང ། དབུལ་པོ་དང ། ཕྱུག་པོ་དང ། ངན་པ་དང ། ཤེས་རབ་ཆེ་ཆུང་དང ། སྐྱིད་སྡུག་ལ་སོགས་པ་རྣམ་པ་མང་དུ་མཆིས་ན་ཀྱེ་གཽ་ཏ་མ་ལས་ཀྱི་རྣམ་པར་སྨིན་པ་གང་གི་ཕྱིར་ན་སེམས་ཅན་སྣ་མང་པོར་འགྱུར
67.317a
བཅོམ་ལྡན་འདས་ཀྱིས་བཀའ་སྩལ་པ། མ་ན་བ་ཁྱོད་ཉོན་ལ་དགེ་བར་ཤིན་དུ་ཡིད་ལ་ཟུང་ཤིག་དང ། དེའི་ཕྱིར་ངས་བཤད་དོ། །མ་ན་བ་སེམས་ཅན་རྣམས་ནི་ཚེ་རབས་ཀྱི་ལས་ལས་གྱུར་ཏེ། སྦྱིན་པའི་རྣམས་ཀྱང་ལས། སྐྱེ་བའི་རྣམས་ཀྱང་ལས། སོ་སོར་རྒྱུ་བ་ཡང་ལས་ཏེ། མ་ན་བ་སེམས་ཅན་རྣམས་ནི་ལས་ཀྱིས་རྣམ་པར་བསྒྱུར་རོ། །དེ་བས་ན་ངན་པ་དང ། བར་མ་དང ། བཟང་པོའི་ཕྱིར་སེམས་ཅན་རྣམ་པ་མང་པོ་ཡང་ལས་རྣམ་པ་མང་པོ་དང ། མྱ་ངན་རྣམ་པ་མང་པོ་དང ། ལྟ་བ་རྣམ་པ་མང་པོར་སྦྱར་བ་དེ་འདི་ལྟར་ནག་པོ་དང ། དཀར་པོ་ལས་རྣམ་པར་སྨིན་པའི་འབྲས་བུ་བཤད་དོ། །མ་ན་བ་འདི་ལྟ་སྟེ། ལས་ནག་པོ་རྣམས་ཀྱིས་ནི་སེམས་ཅན་དམྱལ་བ་དང ། བྱོལ་སོང་དང ། ཡི་དགས་དང ། རིང་དུ་འཁྱམས་པ་དང ། ་སུ་ར་ལ་སོགས་པ་ངན་སོང་དུ་སྐྱེའོ། །ལས་དཀར་པོ་བགྱིས་པ་རྣམས་ཀྱིས་ནི་ལྷ་དང་མིར་སྐྱེའོ། །མ་ན་བ་དེ་ལྟ་བས་ན་ལས་ཀྱི་རྣམ་པར་སྨིན་པས་ཚེ་ཐུང་བ་ཡང་ཡོད། ལས་ཀྱིས་ཚེ་རིང་པོར་གྱུར་པ་ཡང་ཡོད། ལས་ཀྱིས་ནད་མང་པོར་གྱུར་པ་ཡང་ཡོད། ལས་ཀྱིས་ནད་ཉུང་ངུར་འགྱུར་བ་ཡང་ཡོད། ལས་ཀྱིས་མི་སྡུག་པར་འགྱུར་བ་ཡང་ཡོད། ལས་ཀྱིས་བཟང་པོར་འགྱུར་བ་ཡང་ཡོད། ལས་ཀྱིས་དབང་ཆུང་ངུར་འགྱུར་བ་ཡང་ཡོད། ལས་ཀྱིས་དབང་ཆེ་བར་འགྱུར་བ་ཡང་ཡོད། ལས་ཀྱིས་མ་རབས་ཀྱི་རིགས་སུ་འགྱུར་བ་ཡང་ཡོད། ལས་ཀྱིས་ཡ་རབས་ཀྱི་རིགས་སུ་འགྱུར་བ་ཡང་ཡོད། ལས་ཀྱིས་དབུལ་པོར་འགྱུར་བ་ཡང་ཡོད་ལས་ཀྱིས་ཕྱུག་པོར་འགྱུར་བ་ཡང་ཡོད། ལས་ཀྱིས་ངན་པར་འགྱུར་བ་ཡང་ཡོད། ལས་ཀྱིས་ཤེས་རབ་ཆེན་པོར་འགྱུར་བ་ཡང་ཡོད། ལས་ཀྱིས་སེམས་ཅན་དམྱལ་བར་འགྱུར་བ་ཡང་ཡོད། ལས་ཀྱིས་བྱོལ་སོང་གི་སྐྱེ་གནས་སུ་འགྱུར་བ་ཡང་ཡོད། ལས་ཀྱིས་རིང་དུ་འཁྱམ་པར་འགྱུར་བ་ཡང་ཡོད། ལས་ཀྱིས་ཨ་སུ་རར་སྐྱེ་བར་འགྱུར་བ་ཡང་ཡོད། ལས་ཀྱིས་མིར་སྐྱེ་བར་འགྱུར་བ་ཡང་ཡོད། ལས་ཀྱིས་གཟུགས་ཡོད་པའི་ལྷར་སྐྱེ་བ
67.317b
ཡང་ཡོད། ལས་ཀྱིས་གཟུགས་མེད་པའི་ལྷར་སྐྱེ་བ་ཡང་ཡོད། ལས་བཞིན་དུ་མི་འགྱུར་བར་སྐྱེ་བ་ཡང་ཡོད། ལས་ཀྱིས་འགྱུར་བར་སྐྱེ་བ་ཡང་ཡོད། ལས་ཀྱིས་ཡུལ་གཞན་དུ་སྐྱེ་བར་འགྱུར་བ་ཡང་ཡོད། ལས་མ་བསམས་པར་བྱས་པས་སྐྱེ་བར་འགྱུར་བ་ཡང་ཡོད། ལས་བསམས་ཏེ་མ་བྱས་ཀྱང་སྐྱེ་བར་འགྱུར་བ་ཡང་ཡོད། ལས་བསམས་ཏེ་བྱས་ནས་སྐྱེ་བར་འགྱུར་བ་ཡང་ཡོད། ལས་མ་བསམས་མ་བྱས་ཀྱང་སྐྱེ་བར་འགྱུར་བ་ཡང་ཡོད་དོ། །གང་ཟག་ལས་འདི་ལྟ་བུ་འདུས་པས་ན་སེམས་ཅན་དམྱལ་བར་སྐྱེས་ནས་སེམས་ཅན་དམྱལ་བའི་ཚེ་ཀུན་རྫོགས་ཏེ། སྐྱེ་བའི་ལས་ཀྱང་ཡོད། གང་ཟག་ལས་འདི་ལྟ་བུ་འདུས་པས་ན་སེམས་ཅན་དམྱལ་བའི་ཚེ་ཕྱེད་ཟད་ནས་སྐྱེ་བའི་ལས་ཀྱང་ཡོད་དོ། །སེམས་ཅན་དམྱལ་བར་ཕྱིན་མ་ཐག་ཏུ་སྐྱེས་པ་ཡང་ཡོད། གང་ཟག་ཡང་ལས་འདི་ལྟ་བུ་འདུས་པས་ན་སྔར་བདེ་བ་ལ་ཕྱི་ནས་མི་བདེ་བའི་ལས་ཀྱང་ཡོད། གང་ཟག་ཡང་འདི་ལྟ་བུ་འདུས་པས་ན་སྔར་མི་བདེ་བ་ལ་ཕྱི་ནས་བདེ་བར་གྱུར་པའི་ལས་ཀྱང་ཡོད། སེམས་ཅན་གང་ཟག་ཐམས་ཅད་ཀྱང་འདི་ལྟ་བུ་འདུས་པས་ན་སྔར་བདེ་ལ་ཕྱིས་ཀྱང་བདེ་བར་འགྱུར་བའི་ལས་ཀྱང་ཡོད། གང་ཟག་ཡང་འདི་ལྟ་བུ་འདུས་པས་ན་སེར་སྣ་བྱེད་པའི་ལས་ཀྱང་ཡོད། གང་ཟག་ཡང་འདི་ལྟ་བུ་འདུས་པས་ན་དབུལ་བ་གཏོང་ཕོད་པའི་ལས་ཀྱང་ཡོད། གང་ཟག་ཡང་འདི་ལྟ་བུ་འདུས་པས་ན་ཕྱུག་པོར་འགྱུར་ཞིང་གཏོང་ཕོད་པའི་ལས་ཀྱང་ཡོད། གང་ཟག་ཡང་འདི་ལྟ་བུ་འདུས་པས་ན་དབུལ་བ་སེར་སྣ་ཅན་དུ་འགྱུར་བའི་ལས་ཀྱང་ཡོད་དོ། །གང་ཟག་ཚེ་ཟད་ལ་ལས་མ་ཟད་པ་ཡང་ཡོད། གང་ཟག་ལས་ཟད་ལ་ཚེ་མ་ཟད་པ་ཡང་ཡོད། གང་ཟག་ཚེ་དང་ལས་བཅས་ཏེ་ཟད་པར་འགྱུར་བ་ཡང་ཡོད། གང་ཟག་ཚེ་དང་ལས་བཅས་ཏེ་མ་ཟད་ཀྱང་མྱ་ངན་སྤངས་པར་འགྱུར་བ་ཡང་ཡོད། གང་ཟག་ལུས་བདེ་ལ་སེམས་མི་བདེ་བར་འགྱུར་བ་ཡང་ཡོད། གང་ཟག་ལུས་ཀྱང་བདེ་ལ་སེམས་ཀྱང་བདེ་བར་འགྱུར་བ
67.318a
ཡང་ཡོད། གང་ཟག་ལུས་མི་བདེ་ལ་སེམས་ཀྱང་མི་བདེ་བར་འགྱུར་བ་ཡང་ཡོད། གང་ཟག་ལས་འདི་ལྟ་བུ་འདུས་པས་ན་སེམས་ཅན་ངན་པའི་སར་སྐྱེས་ཏེ། གཟུགས་ངན་པ་དང ། བཟང་པོ་དང ། སྡུག་གུ་དང ། ཁ་དོག་མཛེས་པ་དང ། མདོག་སྣུམ་པ་དང ། མཐོང་ན་དགའ་བའི་ལས་ཀྱང་ཡོད། གང་ཟག་ཡང་ལས་འདི་ལྟ་བུ་འདུས་པས་ན་ངན་པའི་སར་ཡང་སྐྱེས་ལ་གཟུགས་ངན་པ་དང ། ལུས་རྩུབ་པ་དང ། མི་སྡུག་པར་སྣང་བ་དང ། མཐོང་ན་ཡིད་དུ་མི་འོང་བའི་ལས་ཀྱང་ཡོད་དེ། མ་ན་བ་ཡང་འདི་ལྟ་སྟེ། མི་དགེ་བ་བཅུའི་ལས་ཀྱི་ལམ་བྱས་པའི་རྒྱུས་ཕྱི་རོལ་གྱི་ཡུལ་སའི་དོན་ངན་དུ་འགྱུར་བ་ཡང་ཡོད་དོ། །དེ་ལ་ཇི་ལྟར་ལས་ཀྱིས་ཚེ་ཐུང་བར་འགྱུར་ཞེ་ན། ཆོས་བཅུས་ན་ཚེ་ཐུང་བར་འགྱུར་ཞེ་ན། བཅུ་གང་ཞེ་ན། སྲོག་གཅོད་པ། སྲོག་གཅོད་དུ་བཅུག་པ། སྲོག་གཅོད་པ་ལ་སྟོད་པ། སྲོག་གཅོད་པ་ལ་སྨིན་པ། མངལ་གནས་མེད་པར་བྱེད་པ། མངལ་གནས་མེད་པར་བྱེད་དུ་བཅུག་པ་དགྲ་བོ་ལ་བསད་པར་སེམས་པ། མི་མཛའ་བ་ཤི་ན་དགའ་བ། རྟེན་བཅས་ཤིང་སེམས་ཅན་བསད་པ། ཐབ་མོ་ལ་ལྟ་ཞིང་དད་པ་དང་བཅུ་སྟེ། ཆོས་འདི་བཅུས་ན་ཚེ་ཐུང་ཞིང་ནད་མང་བར་འགྱུར་རོ། །ཇི་ལྟར་ལས་བཟང་པོ་བྱས་པས་ཚེ་རིང་པོར་འགྱུར་ཞེ་ན། ཆོས་རྣམ་པ་བཅུས་ན་ཚེ་རིང་པོར་འགྱུར་ཏེ། བཅུ་གང་ཞེ་ན། སྲོག་གཅོད་པ་སྤངས་པ། སྲོག་གཅོད་པ་སྤོང་བར་བྱེད་པ། སྲོག་གཅོད་པ་སྤངས་པ་ལ་སྟོད་པ། སྲོག་གཅོད་པ་སྤངས་པ་ལ་སྨོན་པ། བསད་པར་ཆད་པའི་སེམས་ཅན་རྣམས་གཏོང་བ། བསོད་པར་ཆད་པའི་མི་རྣམས་གཏོང་བ། འཇིགས་ཤིང་སྐྲག་པའི་སེམས་ཅན་རྣམས་སྐྱབས་བྱས་པ། མགོན་མེད་པའི་སེམས་ཅན་རྣམས་ལ་སྙིང་རྗེ་བར་སེམས་པ། ན་བའི་སེམས་ཅན་རྣམས་ལ་བྱམས་པས་སྡུད་པ། བྲེལ་ཞིང་ཕོངས་པའི་སེམས་ཅན་རྣམས་ལ་གོས་དང་ཟས་སྐོམ་སྦྱིན་པ་དང་ཆོས་བཅུས་ན་ཚེ་རིང་ཞིང་ནད་མེད་པར་འགྱུར་རོ། །ཇི་ལྟར་ལས་ཀྱིས་ནད་མང་པོ་འགྱུར་ཞེ་ན། ཆོས་བཅུས་ན་ནད་མང་པོར་འགྱུར་ཏེ། བཅུ
67.318b
གང་ཞེ་ན། དབྱུག་པ་དང་ཐལ་མོ་ལ་སོགས་པས་བཙོགས་པ་དང ། དབྱུག་པ་དང ། ཐལ་མོ་ལ་སོགས་པས་འཚོག་ཏུ་བཅུག་པ་དང ། དབྱུག་པ་དང་ཐལ་མོ་ལ་སོགས་པས་འཚོག་པ་ལ་སྟོད་པ་དང ། དབྱུག་པ་དང་ཐལ་མོ་ལ་སོགས་པས་འཚོག་པ་ལ་སྨོན་པ་ཕ་མ་རྣམས་ཀྱི་སེམས་ཉོན་མོངས་པ། མྱ་ངན་བསྲིང་བ་རྣམས་ཀྱི་སེམས་ཉོན་མོངས་པ་མི་མཛའ་བ་རྣམས་ན་ན་དགའ་བ། མི་མཛའ་བ་རྣམས་ནད་མི་སོས་ན་དགའ་བ། སྨན་ལོག་པ་བྱིན་པ། ཟས་མི་ཞུ་བ་ཟ་བ་དང་བཅུ་སྟེ། ཆོས་འདི་བཅུས་ན་ནད་མང་བར་འགྱུར་རོ། །ཇི་ལྟར་ལས་བཟང་པོ་བྱས་པས་ནད་ཉུང་ངུར་འོང་ཞེ་ན། ཆོས་བཅུས་ན་ནད་ཉུང་བར་འགྱུར་ཏེ། བཅུ་གང་ཞེ་ན། དབྱུག་པ་དང་ཐལ་མོ་ལ་སོགས་པས་གཞན་མི་འཚོག་པ། དབྱུག་པ་དང་ཐལ་མོ་ལ་སོགས་པས་འཚོག་ཏུ་མི་གཞུག་པ། དབྱུག་པ་དང་ཐལ་མོ་ལ་སོགས་པས་འཚོག་པ་ལ་མི་སྟོད་པ། དབྱུག་པ་དང་ཐལ་མོ་ལ་སོགས་པས་འཚོག་པ་ལ་མི་སྨོན་པ། ཕ་མ་ལ་སོགས་པ་ན་བ་རྣམས་ལ་རིམ་གྲོ་བྱེད་པ། མྱ་ངན་བསྲིངས་པ་རྣམས་ན་བ་ལ་རིམ་གྲོ་བྱེད་པ། མི་མཛའ་བ་རྣམས་ན་ན་མི་དགའ་བ། མི་མཛའ་བ་རྣམས་ནད་སོས་ན་དགའ་བ། ནད་པ་ལ་སྨན་བྱིན་པ། ཟས་ཞུ་ནས་ཟ་བ་དང་བཅུ་སྟེ། ཆོས་འདི་བཅུས་ནད་ཉུང་བར་འགྱུར་རོ། །ཇི་ལྟར་ལས་ཀྱིས་མི་སྡུག་པར་འགྱུར་ཞེ་ན། ཆོས་བཅུས་མི་སྡུག་པར་འགྱུར་ཏེ། བཅུ་གང་ཞེ་ན། ཁྲོ་བ་གནོང་བཅབས་པ། ཅུང་ཟད་ལས་ཀྱང་འཁོན་དུ་འཛིན་པ། གཏུམ་པ་ཕ་མ་རྣམས་ལ་ངན་དུ་སྨྲ་བ། མྱ་ངན་བསྲིངས་པ་རྣམས་ལ་ངན་དུ་སྨྲ་བ། མྱ་ངན་བསྲིངས་པའི་སྤྱད་པ་ཀུན་ལ་ངན་དུ་བྱེད་པ། ཡང་དག་པར་གཤེགས་པའི་མཆོད་རྟེན་ལ་འོད་གཅོད་པ། གང་ཟག་མི་སྡུག་པ་རྣམས་ལ་མངོན་ཅན་བྱེད་པ་ཅི་ལ་ཡང་མི་གཙང་བར་བྱེད་པ་འདི་དང་ཆོས་བཅུའོ། །ཇི་ལྟར་ལས་ཀྱིས་བཟང་པོར་འགྱུར་ཞེ་ན། ཆོས་བཅུས་བཟང་པོར་འགྱུར་ཏེ། བཅུ་གང་ཞེ་ན། མི་ཁྲོ་བ་གོས་བྱིན་པ། ཡང་དག་པར་གཤེགས་པའི་མཆོད་རྟེན་ལ་རྟག་ཏུ་ཕྱག་དར་བྱེད་པ། གཙུག་ལག་ཁང་ལ་བྱི་དོར་བྱེད་པ། ཕ་མ་ལ་སྙན་དུ་
67.319a
སྨྲ་བ། མྱ་ངན་ལས་བསྲིངས་པ་རྣམས་ལ་སྙན་དུ་སྨྲས་པ། གང་ཟག་མི་སྡུག་པ་རྣམས་ལ་མངོན་ཅན་མི་བྱེད་པ། ཅི་ལ་ཡང་གཙང་བར་བྱེད་སྟེ། ཆོས་འདི་དང་བཅུའོ། །ཇི་ལྟར་ན་ལས་ཀྱིས་དབང་ཆུང་ངུར་འགྱུར་ཞེ་ན། ཆོས་བཅུས་ན་དབང་ཆུང་ངུར་འགྱུར་ཏེ། བཅུ་གང་ཞེ་ན། གཞན་གྱིས་ཐོབ་པ་ལ་ཕྲག་དོག་པ་དང ། གཞན་གྱིས་མ་ཐོབ་པ་ལ་དགའ་བ་དང ། གཞན་གྱིས་ཐོབ་པ་ལ་མི་དགའ་བ་དང ། གཞན་སྐྱིད་པ་དང ། གྲགས་པ་དང ། ཚིགས་སུ་བཅད་ཅིང་སྒྲ་བསྟོད་པ་མེད་པ་ལ་དགའ་བ་གཞན་སྐྱིད་པ་དང ། གྲགས་པ་དང ། ཚིགསུ་བཅད་ཅིང་སྒྲ་བསྟོད་པ་ལ་མི་དགའ་བ། ཕ་མ་དང་དགེ་བའི་གཤེགས་གཉེན་ལ་སྲི་ཞུ་མི་བྱེད་པ། མྱ་ངན་བསིངས་པ་རྣམས་ལ་རིམ་འགྲོ་མི་བྱེད་པ། དབང་ཆུང་ངུ་ལ་མི་དགེ་བའི་རྩ་བ་བསྐྱེད་པ། དབང་ཆེན་པོ་ལ་དགེ་བའི་རྩ་བ་བཅོད་པ། གང་ཟག་ངན་པ་བྱེད་པ་རྣམས་ལ་སྟོད་པ་འདི་དང་བཅུའོ། །ཇི་ལྟར་ལས་ཀྱིས་དབང་ཆེ་བར་འགྱུར་ཞེས་ན། ཆོས་བཅུས་ན་དབང་ཆེ་བར་འགྱུར་ཏེ། བཅུ་གང་ཞེ་ན། གཞན་གྱིས་ཐོབ་པ་ལ་ཕྲག་དོག་མི་བྱེད་པ། གཞན་གྱིས་ཐོབ་ན་དགའ་བ། གཞན་གྱིས་མ་ཐོབ་པ་ལ་མི་དགའ་བ། གཞན་སྐྱིད་པ་དང ། གྲགས་པ་དང ། ཚིགསུ་བཅད་ཅིང་སྒྲས་སྟོད་པ་མེད་པ་ལ་མི་དགའ་བ། གྲགས་པ་དང་ཚིགས་སུ་བཅད་ཅིང་སྒྲས་སྟོད་པ་ལ་དགའ་བ། བྱང་ཆུབ་ཀྱིས་སེམས་སྐྱེས་བར་བྱེད་པ། ཡང་དག་པར་གཤེགས་པའི་མཆོད་རྟེན་དང་གནས་བྱེད་པ། དབང་ཆུང་ངུ་ལ་མི་དགེ་བའི་རྩ་བ་གཅོད་པར་བྱེད་པ། དབང་ཆེན་པོ་རྣམས་ལ་དགེ་བའི་རྩ་བ་སྐྱེད་པ་དང་བཅུའོ། །ཇི་ལྟར་ལས་ཀྱིས་མ་རབས་སུ་སྐྱེ་བར་འགྱུར་ཞེ་ན། ཆོས་བཅུས་ན་མ་རབས་སུ་སྐྱེ་བར་འགྱུར་ཏེ། བཅུ་གང་ཞེ་ན། ཕ་མ་ལ་ཕ་མར་མི་འཛིན་པ། དགེ་སྦྱོང་དུ་མི་ཤེས་པ། བྲམ་ཟེར་མི་ཤེས་པ། རིགས་ཀྱིས་བརྩུན་པ་ལ་མི་བཀུར་བ། མཁན་པོ་དང ། བླ་མ་དང ། ཐར་པར་ཞུགས་པ་རྣམས་ལ་རིམ་གྲོ་དང ། སྟི་སྟང་དུ་མི་བྱེད་པ་ནམས་ཀྱང་འགྲོན་མི་གཉེར་བ། ཕ་མ་ལ་སྲི་ཞུ།
67.319b
མི་བྱེད་པ། མཁན་པོ་དང་བླ་མ་དང ། ཐར་པར་ཞུགས་པ་རྣམས་ཁྱད་དུ་གསོད་ཅིང་སྲི་ཞུ་མི་བྱེད་པ། རིགས་ཆེན་པོ་ལས་སྐྱེས་པའི་གང་ཟག་རྣམས་སྤོང་བ། རིགས་ཆུང་ངུ་ལས་སྐྱེས་པའི་གང་ཟག་རྣམས་ལ་བཀུར་བ་འདི་དང་བཅུའོ། །ཇི་ལྟར་ལས་ཀྱིས་ཡ་རབས་སུ་སྐྱེས་པར་འགྱུར་ཞེས་ན། ཆོས་བཅུས་ན་ཡ་རབས་སུ་སྐྱེས་པར་འགྱུར་སྟེ། བཅུ་གང་ཞེ་ན། ཕ་མ་དྲན་པ་ཐར་པར་ཞུགས་པར་ཤེས་པ། བྲམ་ཟེར་ཤེས་པ་རིགས་ཀྱིས་བཙུན་པ་ལ་བཀུར་བ། མཁན་པོ་དང ། བླ་མ་དང ། ཐར་པར་ཞུགས་པ་རྣམས་དང ། ཐར་པར་སྤྱོད་པ་གཞན་ལ་ཡང་སྟན་ལས་ལངས་ཏེ་སྤག་ཅིང་སྟི་སྟང་རི་མོ་དང ། སྟན་ལ་སོགས་པ་སྟོབས་པ་དང ། ཕ་མ་ལ་སྲི་ཞུ་བྱེད་པ་དང ། མཁན་པོ་དང ། བླ་མ་ཐར་པར་ཞུགས་པ་རྣམས་ལ་གཞན་ལ་ཡང་སྲི་ཞུ་བྱེད་པ། ཡ་རབ་དང ། མ་རབས་སུ་ཡང་ཁྱད་པར་མི་འབྱེད་ཅིང་སྙོམས་པ། ཡང་དག་པར་གཤེགས་པའི་མཆོད་རྟེན་གྱིས་སྲོག་ཤིང་འཛུགས་པ། མེ་ཏོགས་གི་འཕྲེང་བ་དང ། གདུགས་འཛུགས་པ་དང་བཅུའོ། །ཇི་ལྟར་ལས་ཀྱིས་དབུལ་པོར་འགྱུར་ཞེ་ན། ཆོས་བཅུས་ན་དབུལ་པོར་འགྱུར་ཏེ། བཅུ་གང་ཞེ་ན། མ་བྱིན་པར་ལེན་པར་འཇུག་པ། མ་བྱིན་པར་ལེན་པ་ལ་སྟོད་པ། མ་བྱིན་པར་ལེན་པ་ལ་སྨོན་པ། ཕ་མ་ལ་འཚོ་བ་རྣམས་བཅོད་པ་མཁན་པོ་དང་བླ་མ་དང ། ཐར་པར་ཞུགས་པ་རྣམས་ཀྱི་གཙུག་ལག་ཁང་དང ། གནས་ཁང་དང ། མཆོད་ཅིང་སྤྱོད་པ། ཀུན་གཅོད་པ། གཞན་ཐོབ་ཏུ་མི་དགའ་བ། གཞན་གྱིས་མ་ཐོབ་ན་དགའ་བ། གཞན་གྱིས་ཐོབ་པ་ལ་བགེགས་བྱེད་པ། མུ་གེ་བྱུང་དུ་སྨོད་པ་དང ། བཅུའོ། །ཇི་ལྟར་ལས་ཀྱིས་ཕྱུག་པོར་འགྱུར་ཞེ་ན། ཆོས་བཅུས་ན་ཕྱུག་པོར་འགྱུར་ཏེ། བཅུ་གང་ཞེ་ན། མ་བྱིན་པར་ལེན་པ་སྤོང་བ། མ་བྱིན་པར་ལེན་པ་སྤོང་བར་འཇུག་པ་མ་བྱིན་པར་ལེན་པ་སྤོང་བ་ལ་དགའ་བ། ཕ་མ་ལ་འཚོ་བ་ལ་སྦྱིན་པ། མཁན་པོ་དང་བླ་མ་ལྷག་མ་དང་གཞན་རྣམས་ལ་གཙུག་ལག་ཁང་དང ། གནས་དང་རིམ་པར་སྤྱོད་དང ། ཆོས་གོས་པ་དང ། མལ་སྟན་དང ། ན་བའི་གསོས་སྨན་དང ། གཡོག་དང ། འཚོ་བ་སྦྱིན་པ་གཞན་གྱིས
67.320a
ཐོབ་པ་ལ་དགའ་བར་སེམས་པ། གཞན་གྱིས་དོན་ཐོབ་པར་ནན་ཏན་དུ་བསྒྲུབས་པ། གཞན་གྱིས་མ་ཐོབ་པ་ལ་མི་དགའ་བ། ཕྱོགས་བཅུ་ཐམས་ཅད་དུ་ལོ་ལེགས་པར་སྨོན་པ། སྦྱིན་པ་ལ་སོགས་པ་གཏོང་བའི་གང་ཟག་རྣམས་ལ་རབ་ཏུ་དགའ་བ་དང་བཅུའོ། །ཇི་ལྟར་ལས་ཀྱིས་ངན་པར་འགྱུར་ཞེ་ན། ཆོས་བཅུས་ན་ངན་པར་འགྱུར་ཏེ། བཅུ་གང་ཞེ་ན། གང་ཟག་སུ་ཡང་རུང་སྟེ། འདྲི་མི་ཤེས་པ། ཡང་དག་པའི་ཆོས་མ་ཡིན་པ་ཀུན་འཕེལ་བར་བྱེད་པ་ཡང་དག་པའི་ཆོས་སྤོང་བ། ཡང་དག་པའི་ཆོས་འཆད་པ་ལ་སྟི་སྟང་དང་རི་མོར་མི་བྱེད་པ། མ་གཙིགས་པར་སྨྲ་བ་ལ་དགེ་བར་སྟོད་པ། ངན་པའི་གང་ཟག་རྣམས་ལ་འཁོར་ཞིང་སྙེན་པ། ཡང་དག་པ་ལ་མཁས་པ་རྣམས་སྤོང་བ་ལོག་པར་ལྟ་བ་ལ་ཚད་མར་འཛིན་ཅིང་བསྟོད་པ། ཡང་དག་པར་ལྟ་བ་ལ་སྤོང་བ། ཤེས་རབ་དང་ལྡན་པའི་གང་ཟག་རྣམས་ལ་སྤོང་བ་དང་བཅུའོ། །ཇི་ལྟར་ལས་ཀྱིས་ཤེས་རབ་ཆེན་པོར་འགྱུར་ཞེ་ན། ཆོས་བཅུས་ན་ཤེས་རབ་ཆེན་པོར་འགྱུར་ཏེ། བཅུ་གང་ཞེ་ན། གང་ཟག་སུ་ཡང་རུང་སྟེ། རིམ་པར་འདྲི་ཤེས་པ། མི་མཁས་པའི་དགེ་སྦྱོང་དང ། བྲམ་ཟེ་དང ། ངན་པའི་གང་ཟག་རྣམས་ལ་མི་འཁོར་མི་སྙེན་ཅིང་རི་མོ་སྟི་སྟང་མི་བྱེད་པ། མཁས་པའི་གང་ཟག་རྣམས་ལ་འཁོར་ཞིང་བསྙེན་ནས་རི་མོ་སྟི་སྟང་བྱེད་པ། ཡང་དག་པའི་ཆོས་མ་ཡིན་པ་ཀུན་གཏོང་བ། ཡང་དག་པའི་ཆོས་འཕེལ་བར་བྱེད་པ། ཆོས་ཀྱི་སྣོད་གང་ཟག་རྣམས་མི་འཇིགས་པ་ལ་གོམས་པར་བྱེད་པ། ཡང་དག་པའི་ཚིག་སྙན་པར་སྨྲ་བ་ལ་དགེའོ་ཞེས་བསྟོད་པ། ངན་པར་སྨྲ་བ་ལ་དགེའོ་ཞེས་མི་བསྟོད་པ། ལོག་པར་ལྟ་བ་ལ་མི་སྨོན་པ། ཡང་དག་པར་ལྟ་བ་ལ་བསྟོད་པ་དང་བཅུའོ། །ཇི་ལྟར་ལས་ཀྱིས་སེམས་ཅན་དམྱལ་བར་སྐྱེ་བར་འགྱུར་ཞེ་ན། ཆོས་བཅུས་ན་སེམས་ཅན་དམྱལ་བར་འགྱུར་ཏེ། བཅུ་གང་ཞེ་ན། ལུས་ཀྱིས་ངན་པ་ཆེར་སྤྱོད་པ། ངག་གིས་ངན་པ་ཆེར་སྤྱོད་པ། ཡིད་ཀྱིས་ངན་པ་ཆེར་སྤྱོད་པ། ཆད་པར་ལྟ་བ། རྟག་པར་ལྟ་བ། བྱ་བའི་མི་རིགས་པར་ལྟ་བ། ཕན་པ
67.320b
མེད་པར་བྱེད་པ། མྱ་ངན་བསྲིངས་པ་ལ་ངན་དུ་སྨྲ་བ། འདོད་པས་ལོག་པར་སྤྱོད་དུ་བཅུག་པ་དང་བཅུའོ། །ཇི་ལྟར་ལས་ཀྱིས་བྱོལ་སོང་དུ་འགྱུར་ཞེ་ན། ཆོས་བཅུས་ན་བྱོལ་སོང་དུ་འགྱུར་ཏེ། བཅུ་གང་ཞེ་ན། ལུས་ཀྱིས་ངན་པར་འབྲིང་དུ་སྤྱོད་པ། ངག་གིས་ངན་པ་འབྲིང་དུ་སྤྱོད་པ། ཡིད་ཀྱིས་ངན་པ་འབྲིང་དུ་སྤྱོད་པ། འདོད་པ་སྣ་ཚོགས་ཀུན་གཡོས་པའི་ལས་བྱས་པ། ཁྲོ་བ་སྣ་ཚོགས་ཀུན་གཡོས་པའི་ལས་བྱས་པ། གླེན་པ་སྣ་ཚོགས་ཀུན་གཡོས་པའི་ལས་བྱས་པ། མི་རིགས་པ་བྱིན་པ་བྱོལ་སོང་དུ་འགྱུར་བ་རྣམས་ལ་ཁྲོ་བ། བྱང་ཆུབ་སེམས་དཔའི་སྨོན་ལམ་གྱི་མཐུས་སེང་གེར་སྐྱེས་པ། བྲམ་ཟེ་ཆད་པར་བྱེད་པ། ཁ་ངན་པར་བྱས་པའི་ལན་གྱིས་སྤྲེའུར་སྐྱེས་པ་ལྟ་བུ་དང་བཅུའོ། །ཇི་ལྟར་ལས་ཀྱིས་རིང་དུ་འཁྱམས་པའི་འཇིག་རྟེན་དུ་སྐྱེ་བར་འགྱུར་ཞེ་ན། ཆོས་བཅུས་ན་རིང་དུ་ཁྱམས་པའི་འཇིག་རྟེན་དུ་སྐྱེས་བར་འགྱུར་ཏེ། ལུས་ཀྱིས་ངན་པ་ཆུང་ངུ་སྤྱོད་པ། ངག་གིས་ངན་པ་ཆུང་ངུ་སྤྱོད་པ། ཡིད་ཀྱིས་ངན་པ་ཆུང་ངུ་སྤྱོད་པ། ངན་པ་ལ་དད་པ། ཤིན་ཏུ་དད་པ། ལོག་པས་འཚོ་བ། སེར་སྣ་ལ་དད་ཅིང་མི་གཏོང་བ། སྦྱིན་པ་ལ་གེགས་བྱེད་པ། འདོད་པ་ལ་ཆགས་པ་བཞིན་དུ་ཤི་བ། བྲུ་བ་ཚ་ཞིང་སྐོམ་བཞིན་དུ་ཤི་བ་དང་བཅུའོ། །ཇི་ལྟར་ལས་ཀྱིས་ཨ་སུ་རའི་འཇིག་རྟེན་པར་འགྱུར་ཞེ་ན། ཆོས་བཅུས་ན་ཨ་སུ་རའི་འཇིག་རྟེན་དུ་སྐྱེ་བར་འགྱུར་ཏེ། བཅུ་གང་ཞེ་ན། ཐམས་ཅད་ལ་འང་ལུས་ཀྱིས་ངན་པ་ཅུང་ཟད་སྤྱོད་པ། ཐམས་ཅད་ལའང་ངག་གིས་ངན་པ་ཆུང་ཟད་སྤྱོད་པ། ཐམས་ཅད་ལ་འང་ཡིད་ཀྱིས་ངན་པ་ཆུང་ཟད་སྤྱོད་པ། ངར་སེམས་པ། མི་མཚུངས་པའི་ང ། ཟླ་ལས་ལྷག་པའི་ང ། གོང་མ་ལས་ལྷག་པའི་ང ། གོང་མ་ལས་ཀྱང་གོང་མའི་ང ། བདག་ལ་མི་སྲིད་པའི་ང ། དགེ་བའི་རྩ་བ་བསྐྱེད་པ་ལ་ལོག་པར་སྨོན་པ་དང་བཅུ་སྟེ། ཆོས་འདི་བཅུས་ན་ཨ་སུ་རར་སྐྱེ་བར་འགྱུར་རོ། །ཇི་ལྟར་ལས་ཀྱིས་མིའི་འཇིག་རྟེན་དུ་སྐྱེ་བར་འགྱུར་ཞེ་ན། ཆོས་བཅུས་ན་མིའི་འཇིག་རྟེན་དུ་སྐྱེ་བར་འགྱུར་ཏེ། བཅུ་གང་ཞེ་ན། དགེ་བ
67.321a
བཅུའི་ལམ་མ་ཉམས་ཤིང་མ་གོད་པས་མིའི་འཇིག་རྟེན་དུ་སྐྱེ་བར་འགྱུར་རོ། །ཇི་ལྟར་ལས་ཀྱིས་འདོད་པ་དྲུག་ན་སྤྱོད་པའི་ལྷར་སྐྱེ་བར་འགྱུར་ཞེ་ན། ཆོས་བཅུས་ན་འདོད་པ་དྲུག་ན་སྤྱོད་པའི་ལྷར་སྐྱེ་བར་འགྱུར་ཏེ། དགེ་བ་བཅུའི་ལམ་ལས་མ་ཉམས་ཤིང་བརྩོན་འགྲུས་སུ་བསྡམས་པས་ན་འདོད་པ་དྲུག་ན་སྤྱོད་པའི་ལྷར་སྐྱེ་བར་འགྱུར་རོ། །ཇི་ལྟར་ལས་ཀྱིས་གཟུགས་ཡོད་པ་ན་སྤྱོད་པའི་ལྷར་སྐྱེ་བར་འགྱུར་ཞེ་ན། ཆོས་བཅུས་ན་གཟུགས་ཡོད་པ་ན་སྤྱོད་པའི་ལྷར་སྐྱེ་བར་འགྱུར་ཏེ། བཅུ་གང་ཞེ་ན། དགེ་བ་བཅུའི་ལས་ཀྱི་ལམ་ལ་དད་ཅིང་ཕ་རོལ་དུ་ཕྱིན་པ་དྲུག་ཚད་མེད་པ་བཞི་ཀུན་རྫོགས་པ་ནི་གཟུགས་ཡོད་པ་ན་སྤྱོད་པའི་ལྷར་སྐྱེ་བར་འགྱུར་རོ། །ཇི་ལྟར་ལས་ཀྱིས་གཟུགས་མེད་པ་ན་སྤྱོད་པའི་ལྷར་སྐྱེ་བར་འགྱུར་ཞེ་ན། དགེ་བ་བཅུའི་ཆོས་དང ། མི་གཡོ་བ་འཛིན་པ་བཞིའི་ཆོས་སྤྱད་ན་གཟུགས་མེད་པ་ན་སྤྱོད་པའི་ལྷར་སྐྱེ་བར་འགྱུར་ཏེ། མི་གཡོ་བ་བཞི་ནི་གཟུགས་ཐམས་ཅད་ལས་འདས་ཏེ། རིག་པའི་མིང་ཐམས་ཅད་བརྗོད་དུ་མེད་པ་ནས་ཆོས་སྣ་ཚོགས་སྨྲ་བསམ་ལས་འདས་པར་ནམ་མཁའ་མཐའ་ཡས་པ་བསམས་ནས་ནམ་མཁའ་མཐའ་ཡས་སྐྱེ་མཆེད་སྟེངས་ཀྱི་མི་གཡོ་མི་འཛིན་པ་དང ། ནམ་མཁའ་མཐའ་ཡས་པའི་སྐྱེ་མཆེད་ཐམས་ཅད་ཀུན་ལས་འདས་ནས་རྣམ་པར་ཤེས་པ་མཐའ་ཡས་པ་བསམས་ནས་རྣམ་པར་ཤེས་པ་མཐའ་ཡས་པའི་སྐྱེ་མཆེད་སྟེངས་ཀྱི་མི་གཡོ་མི་འཛིན་པ་དང ། རྣམ་པར་ཤེས་པ་མཐའ་ཡས་པའི་སྐྱེ་མཆེད་ཐམས་ཅད་ལས་འདས་ནས་ཅུང་ཟད་ཀྱང་མེད་པར་བསམས་ཏེ། ཅུང་ཟད་མེད་པའི་སྐྱེ་མཆེད་སྟེངས་ཀྱི་མི་གཡོ་མི་འཛིན་པ་དང ། ཅུང་ཟད་མེད་པའི་སྐྱེ་མཆེད་ལས་འདས་ཏེ། སེམས་མེད་པ་སེམས་མེད་པ་མ་ཡིན་པ་བསམས་ཏེ། སེམས་མེད་པ་དང ། སེམས་མེད་པ་མ་ཡིན་པའི་སྟེངས་ཀྱི་མི་གཡོ་མི་འཛིན་པ་དང ། ཆོས་བཞིན་གཟུགས་མེད་པ་ན་སྤྱོད་པའི་ལྷར་སྐྱེ་བར་འགྱུར་རོ། །ཇི་ལྟར་ལས་ཀྱིས
67.321b
བཞིན་མི་འགྱུར་བར་སྐྱེ་བ་གང་ཞེ་ན། དགེ་བའི་རྩ་བ་ལས་བྱས་ལ་དེས་བདག་ཅིར་སྨོན་ལམ་བཏབ་པ་དང ། མཚམས་མེད་པའི་སྡིག་ལས་བྱས་པ་དེ་ལྟ་བུ་ནི་ལས་ཀྱིས་བཞིན་མི་འགྱུར་བར་སྐྱེ་བར་འོང་ངོ ། །ཇི་ལྟར་ལས་ཀྱིས་འགྱུར་བར་སྐྱེ་ཞེ་ན། སུས་དགེ་བའི་ལས་བྱས་ནས་སྨོན་ལམ་བཏབ་པ་ནི་ལས་དེས་འགྱུར་ཞིང་སྐྱེ་བར་འོང་ངོ ། །ཇི་ལྟར་ལས་ཀྱིས་གང་ཡུལ་གཞན་དུ་སྐྱེ་བར་འགྱུར་ཞེ་ན། སངས་རྒྱས་ཀྱང་རུང ། ཆོས་ཀྱང་རུང ། དགེ་འདུན་ཀྱང་རུང ། ཚུལ་ཁྲིམས་ཐུབ་པའི་གང་ཟག་ཀྱང་རུང་སྟེ། དེ་ལ་ཤིན་དུ་དད་པར་བསམས་ནས་བྱིན་པས་ཡུལ་གཞན་དུ་སྨོན་ལམ་བཏབ་པ་དང ། ལས་གང་བྱས་ཀྱང་རུང་སྟེ། བཟང་པོ་དང ། ངན་པ་གར་འགྱུར་བ་ནི་འདི་ལྟ་སྟེ། དཔེར་ན་ཚོང་པ་བཞིན་ཏེ། ལས་དེ་ལྟ་བུས་ཡུལ་གཞན་དུ་སོང་ནས་རྣམ་པར་སྨིན་པར་འགྱུར་རོ། །ཇི་ལྟར་ལས་ཀྱིས་མ་བསམས་པར་བྱས་པ་གང་ཞེ་ན། ལས་བྱས་ནས་འགྱོད་པ་དང ། ཁྲེལ་གྱིས་དོགས་པ་དང ། ཉེས་པར་སེམས་པ་དང ། མི་རིགས་པ་དང ། འཆགས་པ་དང ། ཡལ་བར་མི་གཏོང་བ་དང ། སླར་མི་འཇུག་པ་དང ། ད་ཕྱིན་ཅད་མི་བྱེད་པར་དམ་འཆའ་བ་དང ། འདི་ལྟ་བུའི་ལས་ནི་མ་བསམས་པར་བྱས་པའོ། །ཇི་ལྟར་ལས་བསམས་ལ་མ་བྱས་པ་གང་ཞེ་ན། ལུས་ཀྱིས་མ་བྱས་པ་དང ། སེམས་རྒྱུས་ཤིང་ལས་འདི་བྱའོ་ཞེས་ཁར་སྨྲས་ལ་མ་བྱས་པ་དེ་ལྟ་བུའི་ལས་ནི་བསམས་ཏེ་མ་བྱས་པའོ། །ཇི་ལྟར་ལས་བསམས་ཏེ་བྱས་པ་གང་ཞེ་ན། ལས་གང་བྱས་ཀྱང་རུང་སྟེ་མི་འགྱོད་པ་ཁྲེལ་གྱིས་མི་དོགས་པ་ཉེས་པར་མི་སེམས་པ། མི་འཆགས་པ། ཡལ་བར་གཏོང་བ། སླར་འཇུག་པ། ཕྱིན་ཅད་མི་བྱེད་པར་དམ་མི་འཆའ་བའོ། །ཇི་ལྟར་གང་ཟག་ལས་འདི་ལྟ་བུ་འདུས་པས་ན་སེམས་ཅན་ལས་དམྱལ་བར་སྐྱེས་ཏེ། སེམས་ཅན་དམྱལ་བའི་ཚེ་ཀུན་རྫོགས་ནས་སྐྱེ་བའི་ལམ་ཡིན་ཞེ་ན། གང་ཟག་སུ་ཡང་རུང་སྟེ། སེམས་ཅན་དམྱལ་བའི་ལས་བསམས་ཏེ་བྱས་ནས། དེས་ཀྱང་མི་འགྱོད་པ་ཁྲེལ་གྱིས་མི་དོགས་པ་དང ། ཉེས་པར་མི་སེམས
67.322a
པ། མི་རིགས་པར་མི་སེམས་པ། མི་འཆགས་པ། ཡལ་བར་གཏོང་བ། སླར་ངན་དུ་འཇུག་པ། ཕྱིན་ཅད་བྱེད་པར་དམ་འཆའ་བ། དེ་ལྟ་བུའི་སེམས་དགའ་བ་དེ་ལྟ་བུ་སྨོན་པ། དེ་ལྟ་བུའི་ལས་འདུས་པའི་གང་ཟག་སེམས་ཅན་དམྱལ་བར་སྐྱེས་ཏེ། སེམས་ཅན་དམྱལ་བའི་ཚེ་ཀུན་རྫོགས་ནས་སླར་སྐྱེའོ། །ཇི་ལྟར་གང་ཟག་ལས་འདི་ལྟ་བུ་འདུས་པས་སེམས་ཅན་དམྱལ་བར་སྐྱེས་ཏེ་སེམས་ཅན་དམྱལ་བའི་ཚེ་ཕྱེད་ཟད་ནས་སླར་སྐྱེས་བའི་ལས་གང་ཡིན་ཞེ་ན། གང་ཟག་སུ་ཡང་རུང ། སེམས་ཅན་དམྱལ་བའི་ལས་བྱས་ནས། འགྱོད་པ། ཁྲེལ་གྱིས་དོགས་པ། ཉེས་པར་སེམས་པ། མི་རིགས་པར་སེམས་པ། འཆགས་པ། ཡལ་བར་མི་གཏོང་བ་སླར་ངན་དུ་མི་འཇུག་པ། ཕྱིན་ཅད་མི་བྱེད་པར་དམ་འཆའ་བ་འདི་ལྟ་བུའི་ལས་འདུས་པའི་གང་ཟག་ནི་སེམས་ཅན་དམྱལ་བར་སྐྱེ་སྟེ། སེམས་ཅན་དམྱལ་བའི་ཚེ་ཕྱེད་ཟད་ནས་སླར་སྐྱེའོ། །ཇི་ལྟར་གང་ཟག་ལས་འདི་ལྟ་བུ་འདུས་པས་སེམས་ཅན་དམྱལ་བར་སྐྱེས་མ་ཐག་ཏུ་སླར་སྐྱེ་བའི་ལས་གང་ཡིན་ཞེ་ན། གང་ཟག་སུ་འང་རུང་སྟེ། སེམས་ཅན་དམྱལ་བའི་ལས་བསམས་ཏེ་བྱས་ནས་ལས་དེ་བྱས་པ་དང་འགྱོད་པ། ཁྲེལ་གྱི་དོགས་པ། ཉེས་པར་སེམས་པ། མི་རིགས་པར་སེམས་པ། འཆགས་པ། ཡལ་བར་མི་གཏོང་བ། སླར་ངན་དུ་མི་འཇུག་པ། ཕྱིན་ཅད་མི་བྱེད་པར་དམ་འཆའ་བ། དེ་ལྟ་བུའི་ལས་ལ་ཕྱིས་མི་དགའ་ཞིང་མི་སྨོན་པ་སྤོང་ཞིང་གཏོང་བ། ཕྱིས་ཤིན་དུ་མི་དགའ་བའི་ཡིད་སྐྱོད་པ་འདི་ལྟ་བུའི་ལས་འདུས་པའི་གང་ཟག་ནི་སེམས་ཅན་དམྱལ་བར་སྐྱེས་མ་ཐག་ཏུ་སླར་སྐྱེས་ཏེ། དེ་ནི་རྒྱལ་པོ་མ་སྐྱེས་དགྲ་བཞིན་ནོ། །ཇི་ལྟར་གང་ཟག་ལས་འདི་ལྟ་བུ་འདུས་པས་ན་སྔར་བདེ་ལ་ཕྱིས་མི་བདེ་བའི་ལས་གང་ཡིན་ཞེ་ན། གང་ཟག་སུ་འང་རུང་སྟེ་སྦྱིན་པ་བྱིན་ཡང་ཡི་རངས་བཞིན་དུ་མི་བྱིན་དགའ་ཞིང་བདེ་བ་ཡིད་དུ་མ་བྱས། བྱིན་ནས་ཕྱིས་འགྱོད་པར་སེམས་པ། གང་ཟག་དེ་ལྟ་བུ་མིར་སྐྱེས་ན་ཡང་ཕྱུག་པོའི་རིགས་སུ་སྐྱེ་སྟེ་ནོར་མང་པོ་དང ། སྤྱོད་པ་མང་པོའི་ཇོ་བོར་འགྱུར་ཏེ། བློན་པོ་དང ། གྲོགས་པོ་དང ། གཉེན་དང ། རིགས
67.322b
གཅིག་པ་མང་དུ་བདོག་པ་དང ། མཛོད་དང་བང་བ་ཀུན་ཀྱང་གང་བ། ཤིན་ཏུ་བདེ་ཞིང་བཞོན་པ་མང་པོ་དང་ལྡན་པ་དེ་ལྟ་བུ་ནི་སྐྱིད་པ་ཀུན་སྤྱོད་དེ་ཕྱིས་དམས་པ་དང ། ཟད་པར་འགྱུར་ཏེ་མི་བདེ་བར་སོང་བ་ལས་འདི་ལྟ་བུ་འདུས་པའི་གང་ཟག་ནི་སྔར་བཙན་ཕྱུག་ཅིང་བདེ་ཡང་ཕྱིས་བཀྲེས་ཤིང་དམས་པས་མི་བདེ་བར་འགྱུར་རོ། །ཇི་ལྟར་གང་ཟག་ལས་འདུས་པས་སྔར་མི་བདེ་བ་ལ་ཕྱིས་བདེ་བར་འགྱུར་བའི་ལས་ཀྱི་འབྲས་བུ་ནི་གང་ཡིན་ཞེ་ན། གང་ཟག་སུ་ཡང་རུང་སྟེ། སྦྱིན་པ་སྔར་མ་དད་པར་བྱིན་ནས་དད་ཅིང་རངས་པ་སེམས་ཡིད་ལ་སྐྱེས་པའི་གང་ཟག་དེ་ནི་མིར་སྐྱེས་ན་ཡང་དབུལ་པོའི་རིགས་སུ་སྐྱེ་སྟེ། ཟས་དང་སྤྱོད་པ་ཉུང་བ། ཉོན་མོངས་ཤིང་ཟས་དང་གོས་མེད་པ་ལས་ཕྱིས་བཙན་ཕྱུག་ཅིང་སྐྱིད་པར་གྱུར་ཏེ། ཅི་འང་འཕེལ་ཏེ། ཅིས་ཀྱང་མི་བྲེལ་བར་འགྱུར་བ་འདི་ལྟ་བུའི་གང་ཟག་ནི་སྔར་མི་བདེ་ལ་ཕྱིས་བདེ་བར་གྱུར་པའོ། །ཇི་ལྟར་གང་ཟག་ལས་འདི་ལྟ་བུར་གྱུར་པས་སྔར་ཀྱང་བདེ་ལ་ཕྱིས་ཀྱང་བདེ་བར་འགྱུར་བའི་ལས་གང་ཡིན་ཞེ་ན། གང་ཟག་སུའང་རུང་སྟེ་སྦྱིན་པ་བྱིན་པ་ཡང་མང་པོ་དང་རངས་པར་བྱིན། བདག་ཀྱང་ཡིད་དགའ་སྟེ་བྱིན་པས་ཕྱིས་མི་འགྱོད་པའི་གང་ཟག་དེའི་འབྲས་བུ་ནི་མིར་སྐྱེས་ན་ཡང་ཕྱུག་པའི་རིགས་སུ་སྐྱེས་ཏེ། ནོར་མང་པོ་སྤྱོད་པ་དང ། མང་པོའི་ཇོ་བོར་གྱུར་ནས་བློན་པོ་དང ། གྲོགས་པོ་དང ། གཉེན་དང་རིགས་གཅིག་པ་མང་དུ་བདོག་པ་དང ། བང་མཛོད་ཐམས་ཅད་ཀྱང་གང་བ། ཤིན་དུ་བདེ་ཞིང་བཞོན་པ་མང་པོ་དང ། དེ་ལྟ་བུའི་རིགས་སུ་སྐྱེ་སྟེ། སྐྱིད་པ་དེ་ལྟ་བུའི་ཕྱིར་སྐྱེ་ཞིང་འཕེལ་བར་འགྱུར་ཏེ། གང་ཟག་ལས་འདི་ལྟ་བུ་འདུས་པས་སྔར་ཡང་བདེ། ཕྱིས་ཀྱང ། བདེ་བར་འགྱུར་རོ། །ཇི་ལྟར་གང་ཟག་ལས་འདི་ལྟ་བུ་འདུས་པས་སྔར་མི་བདེ་ལ་ཕྱིས་ཀྱང་མི་བདེ་བར་འགྱུར་བའི་ལས་ཀྱིས་འབྲས་བུ་ནི་གང་ཡིན་ཞེ་ན། གང་ཟག་སུ་ཡང་རུང་སྟེ། དགེ་བའི་གྲོགས་པོ་སྤངས་པ་ཡིན། སུས་ཀྱང་སྦྱིན་པ་ལ་མ་བཅུག་པ་ཡིན། བདག་ཉིད་ཀྱིས་ཀྱང་གཞན་ལ་སྦྱིན་པ་མ་བྱས་པ་ཡིན་པའི་གང་ཟག་དེ་ལྟ་བུ་ནི་མིར་སྐྱེས་ན་ཡང་དབུལ་པོ་བཀྲེས་པ་དང ། ཟས
67.323a
སྐོམ་གྱིས་ཕོངས་པ། གོས་རྒྱབ་ཀྱིས་ཕོངས་ཤིང་བྲེལ་ཏེ། ཉོན་མོངས་བཞིན་དུ་འཚོ་བ་དང ། ཟས་སྐོམ་དང ། གོས་རྒྱབ་ཀྱིས་མི་འཚོ་བ་དང ། ཕྱིས་ཀྱང་དེ་ལས་སྐྱིད་ཅིང་སྤྱོད་པ་འཕེལ་བར་འགྱུར་བ་ཡང་མེད་དེ། གང་ཟག་ལས་དེ་ལྟ་བུ་འདུས་པས་ན་སྔར་ཡང་མི་བདེ། ཕྱིས་ཀྱང་བདེ་བར་མི་འགྱུར་རོ། །ཇི་ལྟར་གང་ཟག་ལས་འདི་ལྟ་བུ་འདུས་པས་ཕྱུག་ལ་སེར་སྣ་ཅན་དུ་བྱེད་པར་འགྱུར་བའི་ལས་ཀྱི་འབྲས་བུ་གང་ཡིན་ཞེ་ན། གང་ཟག་སུ་ཡང་རུང་སྟེ་སྦྱིན་པའི་གནས་ལ་ཅི་ཡང་བུངས་མི་ཆེ་ཞིང་ཉུང་ངུ་བྱིན་པ་ཡིན། གཏོང་བ་ལ་ནི་བསྲི་ཞིང་གོམས་པར་བྱས་པས་གང་ཟག་དེ་མིར་སྐྱེས་ན་ཡང་ཕྱུག་པོའི་རིགས་སུ་སྐྱེ་སྟེ། ནོར་དང་སྤྱོད་པ་མང་པོ་ཡོད་ཀྱང་སེར་སྣ་བྱེད་པར་འགྱུར་ཏེ། དེ་ལྟ་བུའི་ལས་འདུས་པའི་གང་ཟག་ནི་ཕྱུག་ལ་སེར་སྣ་ཆེ་བ་ཡིན་ནོ། །ཇི་ལྟར་ཕྱུག་ལ་གཏོང་ཕོད་པའི་ལས་ཀྱི་འབྲས་བུ་ནི་གང་ཞེ་ན། གང་ཟག་སུ་ཡང་རུང ། སྦྱིན་པའི་གནས་མ་ཡིན་པ་ལ་མང་དུ་བྱིན་ཡང་སྦྱིན་པ་ཕྱིར་ཞིང་གོམས་པར་བྱས་པ་ཡིན་པས་གང་ཟག་དེ་མིར་སྐྱེས་ན་ཡང་དབུལ་པོའི་རིགས་སུ་སྐྱེ་སྟེ། ཟས་དང་སྤྱོད་པས་མི་འཚོ་ཞིང་ཉོན་མོངས་ནས་སྡུག་ཅིང་གོས་ཟས་ཀྱིས་མི་འཚོ་ཡང་གཏོང་བ་ཡིན་ཏེ། ལས་དེ་ལྟ་བུ་འདུས་པའི་གང་ཟག་ནི་དབུལ་ལ། གཏོང་ཕོད་པའོ། །ཇི་ལྟར་གང་ཟག་ལས་འདི་ལྟ་བུས་འདུས་པས་དབུལ་ལ་སེར་སྣ་བྱེད་པའི་ལས་སུ་གྱུར་པ་ཡིན་ཞེ་ན། གང་ཟག་སུ་ཡང་རུང ། དགེ་བའི་གྲོགས་པོ་སྤངས་པ་སུས་ཀྱང་སྦྱིན་པ་ལ་མ་བཅུག་པ་ཡིན། ཉིད་ཀྱིས་ཀྱང་སྦྱིན་པ་མ་བྱིན་པ་ཡིན། སྡིག་པའི་ལས་ཀྱང་མ་བསམས་མ་བྱས་པ་ཡིན་ཏེ། གང་ཟག་སུ་ཡང་རུང་སྟེ། དེ་མིར་སྐྱེས་ན་ཡང་དབུལ་པོའི་རིགས་སུ་སྐྱེ་སྟེ། ཟས་དང་སྤྱོད་པ་ལ་སོགས་པས་མི་འཚོ་ཞིང་ཉོན་མོངས་ནས་སྡུག་ཅིང་གོས་ཟས་ཀྱིས་བྲེལ་ནས་སེར་སྣ་བྱེད་པ་ཡིན་ཏེ། ལས་དེ་ལྟ་བུ་འདུས་པའི་གང་ཟག་ནི་དབུལ་པོ་ལ་སེར་སྣ་བྱེད་པའོ། །གང་ཟག་ཚེ་ཟད་ལ་ལས་མ་ཟད་པ་གང་ཞེ་ན། གང་ཟག་སུ་ཡང་རུང ། སེམས་ཅན་དམྱལ་བར་ཤི་ན་
67.323b
ནས་ཡང་སེམས་ཅན་དམྱལ་བར་སྐྱེ་བ། བྱོལ་སོང་ལས་ཤི་ནས་ཡང་བྱོལ་སོང་དུ་སྐྱེ་བ། རིང་དུ་འཁྱམས་པ་ལས་ཤི་ན་ཡང་རིང་དུ་འཁྱམས་པར་སྐྱེ་བ། ཨ་སུ་ར་ལས་ཤི་ནས་ཡང་ཨ་སུ་རར་སྐྱེ་བ། མི་ལས་ཤི་ནས་ཡང་མིར་སྐྱེ་བ་དེ་ལྟ་བུའི་གང་ཟག་ནི་ཚེ་ཟད་ལ་ལས་མ་ཟད་པ་ཡིན་ནོ། །གང་ཟག་ལས་ཟད་ལ་ཚེ་མ་ཟད་པ་གང་ཞེ་ན། གང་ཟག་སུ་ཡང་རུང་སྟེ། སྔོན་སྐྱིད་ལ་ཕྱིས་སྡུག་པར་གྱུར་པ། སྔ་ན་སྡུག་ལ་ཕྱི་ནས་སྐྱིད་པར་གྱུར་པ་དེ་ལྟ་བུའི་གང་ཟག་ནི་ལས་ཟད་ལ་ཚེ་མ་ཟད་པ་ཡིན་ནོ། །གང་ཟག་ལས་དང་ཚེ་གཉིས་ཀ་ཟད་པ་གང་ཞེ་ན། གང་ཟག་སུ་ཡང་རུང་སྟེ། སེམས་ཅན་དམྱལ་བ་ལས་ཤི་ནས་བྱོལ་སོང་དུ་སྐྱེས་པ། བྱོལ་སོང་ལས་ཤི་ནས་རིང་དུ་འཁྱམས་པར་སྐྱེས་པ། རིང་དུ་འཁྱམས་པ་ལས་ཤི་ནས་ཨ་སུ་རར་སྐྱེས་པ། ཨ་སུ་ར་ལས་ཤི་ནས་མིར་སྐྱེས་པ། མི་ལས་ཤི་ནས་ལྷར་སྐྱེས་པ། དེ་ལྟ་བུའི་གང་ཟག་ནི་ལས་དང་ཚེ་གཉིས་ཀ་ཟད་པ་ཡིན་ནོ། །གང་ཟག་ལས་གང་གིས་ན་ཚེ་ཡང་མ་ཟད་ལས་ཀྱང་མ་ཟད་ལ་མྱ་ངན་སྤངས་པ་གང་ཞེ་ན། རྒྱུན་དུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་གང་ཟག་དེ་རྣམས་ལས་དང་ཚེ་མ་ཟད་མོད་ཀྱི་མྱ་ངན་སྤངས་པའོ། །གང་ཟག་ལུས་བདེ་ལ་སེམས་མི་བདེ་བ་གང་ཞེ་ན། མ་རབས་ཀྱིས་བསོད་རྣམས་བྱས་ནས་འཁོར་ལོ་སྐོར་བའི་རྒྱལ་པོར་གྱུར་པ་དེ་ལྟ་བུའི་གང་ཟག་ནི་ལུས་བདེ་ལ་སེམས་མི་བདེ་བའོ། །གང་ཟག་སེམས་བདེ་ལ་ལུས་མི་བདེ་བ་གང་ཞེ་ན། བསོད་ནམས་མ་བྱས་པའི་དགྲ་བཅོམ་པ་སྟེ་ཁྲིམས་རྫོགས་པ། འགུག་པ་ལྟ་བུ་དགྲ་བཅོམ་པའི་གང་ཟག་ནི་སེམས་བདེ་ལ་ལུས་མི་བདེ་ཞེས་བྱའོ། །གང་ཟག་ལུས་དང་སེམས་གཉིས་ཀ་བདེ་བ་གང་ཞེ་ན། བསོད་ནམས་བྱས་པའི་དགྲ་བཅོམ་པ་སྟེ། ཁྲིམས་རྫོགས་པ་རྡོ་སྟོབས་ལྟ་བུའི་གང་ཟག་ནི་ལུས་དང་སེམས་གཉིས་ཀ་བདེ་བའོ། །གང་ཟག་ལུས་དང་སེམས་གཉིས་ཀ་མི་བདེ་བ་གང་ཞེ་ན། མ་རབས་ཀྱིས་བསོད་ནམས་མ་བྱས་པ་དེ་ལྟ་བུའི་གང་ཟག་ནི་ལུས་དང
67.324a
སེམས་གཉིས་ཀ་མི་བདེ་བའོ། །ཇི་ལྟར་གང་ཟག་ལས་འདི་ལྟ་བུ་འདུས་པས་ན་ངན་པའི་སར་སྐྱེས་ལ་གཟུགས་ལེགས་པ་དང ། བཟང་པོ་དང ། སྡུག་གུ་དང ། ཁ་དོག་མཛེས་པ་དང ། མདོག་སྣུམ་པ་དང ། མཐོང་ན་དགའ་བའི་ལས་གང་ཞེ་ན། ཆགས་པ་གཡོས་ཏེ་ཚུལ་ཁྲིམས་ཉམས་པ་དང་ལྡན་པའི་གང་ཟག་ནི་ངན་པའི་སར་སྐྱེས་ལ་གཟུགས་ལེགས་པ་དང ། བཟང་པོ་དང་སྡུག་གུར་འགྱུར་རོ། །ཇི་ལྟར་གང་ཟག་ལས་འདི་ལྟ་བུ་འདུས་པས་ན་ངན་པའི་སར་སྐྱེས་ལ། གཟུགས་ངན་པ་དང ། ལུས་རྩུབ་པ་དང ། མི་སྡུག་པ་དང ། མཐོང་ན་མི་སྡུག་པར་འགྱུར་བའི་ལས་གང་ཞེ་ན་ཁྲོ་བ་སྐྱེས་ཤིང་ཁྲིམས་མི་ཐུབ་པ་དང་ལྡན་པའི་གང་ཟག་འདི་ལྟ་བུ་འདུས་པས་ན་ངན་པའི་སར་སྐྱེས་ལ་གཟུགས་ངན་པ་དང ། ལུས་རྩུབ་པ་དང ། མི་སྡུག་པར་སྣང་བ་དང ། མཐོང་ན་ཡིད་དུ་མི་འོང་བར་འགྱུར་རོ། །ཇི་ལྟར་གང་ཟག་ལས་འདི་ལྟ་བུ་འདུས་པས་ན་ངན་པའི་སར་སྐྱེས་ལ་དྲི་མི་ཞིམ་པ་དང ། དབང་པོ་མ་ཚང་བ་དང ། དབང་པོ་མི་མཐུན་པར་འགྱུར་བའི་ལས་གང་ཡིན་ཞེ་ན། གླེན་པར་སྐྱེས་ཤིང་ཁྲིམས་མི་ཐུབ་པ་དང་ལྡན་པ་གང་ཟག་ལས་འདི་ལྟ་བུ་འདུས་པས་ན་ངན་པའི་སར་སྐྱེས་ལ་དྲི་མི་ཞིམ་པ་དང ། དབང་པོ་མ་ཚང་བ་དང ། དབང་པོ་མི་མཐུན་པར་འགྱུར་རོ། །ཇི་ལྟར་མི་དགེ་བ་བཅུའི་ལས་བྱས་པའི་རྒྱུས་ཕྱི་རོལ་གྱི་ཡུལ་ས་རྣམས་ངན་དུ་འོང་བར་འགྱུར་བ་ཡིན་ཞེ་ན། སྲོག་གཅོད་ན་དེའི་ལས་ཀྱིས་སའི་མདོག་ཉམས་པར་འོང་ངོ ། །མ་བྱིན་པར་བླངས་པ་དེའི་ལས་ཀྱིས་སེར་བ་དང ། བྱེ་བ་དང ། བྱི་བ་དང ། སྲིན་མང་དུ་འོང་བར་འགྱུར་རོ། །མི་ཚངས་པར་སྤྱོད་པ་བྱས་པས་དེའི་ལས་ཀྱིས་ཁུག་རྣ་དང ། རླུང་དང་རྡུལ་དང་རྡུལ་ཆེན་པོ་འོང་བའི་སར་སྐྱེའོ། །བརྫུན་མང་དུ་བྱས་པའི་ལས་ཀྱི་འབྲས་བུ་ནི་ཁར་མནམ་པོར་འགྱུར་བ། དབུགས་མི་ཞིམ་པར་འོང་ངོ ། །ཕྲ་མ་མང་དུ་བྱས་པའི་ལས་ཀྱི་འབྲས་བུ་ནི་ཡུལ་མཐོ་དམན་ཅན་དང ། ལྕང་ལྕོང་ཅན་དང ། མི་གཙང་བ་དང ། ན་རྐོང་དང ། རྡོ་བ་གྲམ་ཁྲོད་ཅན་གྱི་ཡུལ་དུ་སྐྱེའོ། །ཁ་འཁྱལ་པ་བྱས་པའི་ལས་ཀྱི་འབྲས་བུ་ནི་གྲོག་པོ་མང་བ། རྩི་ཤིང་དང །
67.324b
ཡལ་ག་དང ། འདབ་མ་ཚེར་མ་ཅན་དང ། ནགས་ཚང་ཚིང་ཅན་གྱི་ཡུལ་དུ་སྐྱེའོ། །བརྐམ་པར་བྱས་པའི་འབྲས་བུ་ནི་འབྲུ་འབྲས་ཅི་ཡང་ཕྲ་མར་འོང་ངོ ། །ཁྲོ་བ་བྱས་པའི་ལས་ཀྱིས་ས་བོན་འབྲས་བུ་ཚ་བ་དང ། སྐྱུར་བ་དང ། ཁ་བར་འོང་ངོ ། ལོག་པར་བལྟས་པ་དང ། བྱེད་དུ་བཅུག་པའི་ལས་ཀྱི་རྒྱུས་ནི་ས་བོན་དང་འབྲས་བུ་ཆུང་ཞིང་ངན་པར་འོང་ངོ ། འདི་ལྟར་མི་དགེ་བ་བཅུའི་ལས་བྱས་པས་ཕྱི་རོལ་གྱི་ཡུལ་ས་རྣམས་ངན་པར་འགྱུར་ཞིང་མི་བདེ་བའི་གནས་སུ་སྐྱེ་བར་འགྱུར་རོ། །བཅོམ་ལྡན་འདས་ཀྱིས་ཡང་བཀའ་སྩལ་པ། མ་ན་བ་ངན་པ་རྣམ་པ་བཅུར་འགྱུར་བ་ཡང་གོ་ཞིང་ཤེས་པར་བྱོས་ཤིག་།བཅུ་གང་ཞེ་ན། དགྲ་མང་དུ་འགྱུར་བ། ཡིད་དུ་མི་འོང་བར་སྣང་བ། ཚེ་ཐུང་བ། སྡིག་པའི་ལས་ལ་སེམས་པ། སེམས་ཅན་རྣམས་འཇིགས་པར་འགྱུར་བ། མི་དགའ་བཞིན་ཉལ་བ། མི་དགའ་བཞིན་སད་པ། རྨི་ལམ་ན་སྡིག་པ་མཐོང་བ། ཕྱིས་འགྱོད་པ། ཚེ་ཐུང་བའི་ལས་སེམས་ཤིང་བྱེད་པ་ཡིན་ཏེ། ཤི་ནས་ལུས་དང་བྲལ་ན་ལམ་ངན་པར་ལྟུང་ཞིང་སེམས་ཅན་དམྱལ་བར་སྐྱེའོ། མ་བྱིན་པར་བླངས་ན་ལས་ཀྱི་རྣམ་པར་སྨིན་པ་བཅུར་འགྱུར་ཏེ། བཅུ་གང་ཞེ་ན། དགྲར་འགྱུར་བ་ཡིན། དོགས་པར་འགྱུར་བ་ཡིན། མི་རིགས་པར་འགྲོ་བ་ཡིན། མཚན་མོ་འཁྱམ་པ་ཡིན། སྡིག་པའི་གྲོགས་པོ་ཀུན་གྱི་ནད་ཀྱིས་ཟིན་པ་ཡིན། དགེ་བའི་གྲོགས་པོ་ཀུན་སྤངས་པ་ཡིན། ཁྲིམས་མི་ཐུབ་པ་ཡིན། རྒྱལ་པོས་གྱོད་བཏབ་པ་ཡིན། ཆད་པས་བཅད་པ་ཡིན། མི་སྐྱིད་པར་བྱེད་པར་འགྱུར་བའི་ལས་སེམས་ཤིང་བྱེད་པ་ཡིན་ཏེ། ཤི་ནས་ལུས་དང་བྲལ་ནས་ལམ་ངན་པར་ལྟུང་ཞིང་སེམས་ཅན་དམྱལ་བར་སྐྱེའོ། །མི་ཚངས་པར་སྤྱོད་པས་ན་ངན་པ་བཅུར་འགྱུར་བ་ཤེས་པར་བྱོས་ཤིག་།བཅུ་གང་ཞེ་ན། གཞན་གྱི་ཁྱོ་ཤུག་དང་ཉལ་བ་ཡིན། གླགས་ཚོལ་བ་ཡིན། ཁྱོ་ཤུག་དང་འཐབ་པ་ཡིན། ཁྱོ་ཤུག་འཕྲོགས་པ་ཡིན། མི་དགེ་བའི་ཆོས་ཀུན་སྐྱེ་བ་ཡིན། དགེ་བའི་ཆོས་བྱང་ཞིང་འབྲི་བར་འགྱུར་བ་ཡིན། བདག་ཀྱང་བདེན་པར་མི་སྲུང་བ་ཡིན། བུ་སྨད་ལ་སོགས་པ་ཡང་བདེན་པར
67.325a
མ་བསྲུངས་པ་ཡིན། དོགས་པར་འགྱུར་བ་ཡིན། གཉེན་དང ། གྲོགས་པོ་དང ། རིགས་གཅིག་པ་དགྲར་འགྱུར་བའི་ལས་སེམས་ཤིང་བྱེད་པ་ཡིན་ཏེ། ཤི་ནས་ལུས་དང་བྲལ་ན་ལམ་ངན་པར་ལྟུང་ཞིང་སེམས་ཅན་དམྱལ་བར་སྐྱེའོ། །བརྫུན་བྱས་ན་ངན་པ་བཅུར་འགྱུར་ཏེ། བཅུ་གང་ཞེ་ན། དེའི་ལུས་ལ་ལྷ་རྣམས་མི་འཁོར་བ། གཞན་གྱིས་སླུ་བ། བདག་གི་ཚིག་མི་བརྟན་པ། ཁ་མནམ་པ། དྲང་པོར་སྨྲས་ཀྱང་སུ་ཡང་ཡིད་མི་ཆེས་པ། བརྫུན་པོ་ཆེ་དེ་ལ་དྲི་བའི་མི་རིགས་ཤེས་ཟེར་བ། དེ་ལ་ཚིགས་སུ་བཅད་ཅིང་བསྟོད་པ་མེད་པར་གྲགས་པར་འགྱུར་བ། སུ་ཡང་མི་ཉན་པའི་ཚིག་ཏུ་འགྱུར་བ་ཀུན་དུ་ངན་དུ་རྗོད་པའི་ལས་སེམས་ཤིང་བྱེད་པ་ཡིན་ཏེ། ཤི་ནས་ལུས་དང་བྲལ་ན་ལམ་ངན་པར་ལྟུང་ཞིང་སེམས་ཅན་དམྱལ་བར་སྐྱེའོ། །ཆང་འཐུངས་ན་ངན་པ་བག་མེད་པ་སུམ་བཅུ་རྩ་ལྔར་འགྱུར་བ་ཤེས་པར་བྱོས་ཤིག་།སུམ་བཅུ་རྩ་ལྔ་གང་ཞེ་ན། མངོན་པར་སྣང་བཞིན་དུ་ནོར་ཟད་པ། ནད་མང་པོ་འདུ་བ། འཐབ་མོ་དང་རྩོད་པ་རྣམས་སྐྱེ་བ། ཁྲེལ་ཞིང་ངོ་ཚས་མི་འཛེམ་པ། མི་སྙན་པར་གྲགས་པར་བྱེད་པ། ཤེས་རབ་ཉམས་པར་བྱེད་པ། སྐྱིད་པ་སྔན་ཅད་མ་བསགས་པ། ད་ཡང་མི་སོགས་པ། སྐྱིད་པའི་བསགས་པ་ཀུན་ཟད་ཅིང་མེད་པར་བྱས་པ། གསང་བ་རྣམས་སྨྲ་བ། ལས་སུ་བྱ་བ་རྣམས་ཤོར་བ། ཞན་ཏེ་ཉམ་ཆུང་བར་གྱུར་པ། མྱ་ངན་གྱི་རྩ་བ། མར་མི་འཛིན་པ། ཕར་མི་འཛིན་པ། ཐར་པར་མི་ཤེས་པ། བྲམ་ཟེར་མི་ཤེས་པ། རིགས་བཙུན་པ་ལ་སྟི་སྟང་རིམ་གྲོ་མི་བྱེད་པ། སངས་རྒྱས་ལ་རིམ་གྲོ་མི་བྱེད་པ། ཆོས་ལ་རིམ་གྲོ་མི་བྱེད་པ། དགེ་འདུན་ལ་རིམ་གྲོ་མི་བྱེད་པ། སྡིག་བྱེད་པའི་གྲོགས་པོ་ལ་རིམ་གྲོ་བྱེད་པ། དགེ་བའི་གྲོགས་པོ་ཀུན་སྤོང་ཞིང་ཁྱད་དུ་གསོད་པ། ངོ་ཚ་མི་ཤེས་པ། ཁྲེལ་གྱིས་དོགས་པ་མེད་པ། སྤ་ཞིང་མཛེས་པའི་བག་མི་བྱེད་པ། གཡེམ་པ་ལ་བག་མེད་པ། འགྲོ་བ་མང་པོའི་ཡིད་དུ་མི་འོང་བ། འགྲོ་བ་མང་པོས་སྨད་པ། རིགས་ཆེན་པོ་དང ། གཉེན་པ་དང ། རིགས་གཅིག་པ་སྤངས་པ། ཡང་དག་པའི་ཆོས་མ་ཡིན
67.325b
པ། ཀུན་འཛིན་པ། ཡང་དག་པའི་ཆོས་ཀུན་སྤོང་བ། ཉེས་པར་བྱེད་སྟོད་པའི་མི་རིགས་ཤེས་བླ་མས་སྨད་པ། མྱ་ངན་ལས་འདས་པ་དང་རིང་དུ་བྲལ་བ། སྨྱོན་པར་གྱུར་པའི་ལས་སེམས་ཤིང་ངན་པའི་སྐྱོན་རྣམས་སྣ་ཚོགསུ་བྱེད་པ་ཡིན་ཏེ། ཤི་ནས་སེམས་ཅན་དམྱལ་བར་ལྟུང་ཞིང་ལུས་དང་བྲལ་ན་ཡང་ལམ་ངན་པར་འགྲོ་བས་བླ་འོག་ཀུན་གྱིས་ཀྱང་མི་བཏུང་ཞིང་སྤོང་བར་བྱའོ། །མ་ན་བ་བདེ་བར་གཤེགས་པའི་མཆོད་རྟེན་ལ་ཐལ་མོ་སྦྱར་ནས་གུས་པས་ཕྱག་བྱས་ནས་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། ཆེན་པོའི་རིགསུ་སྐྱེ་བ། གཟུགས་ཆེ་བ། འཁོར་མང་བ། ཕ་མ་ལ་རིམ་འགྲོ་སྟི་སྟང་ཆེ་བ། ནོར་མང་བ། མང་དུ་ཐོས་པ། དད་པ་དང་ལྡན་པ། མང་དུ་དྲན་པ་ཤེས་རབ་ཆེན་པོ་མཐོ་རིག་ཀྱི་ལམ་ཆེན་པོ་ཐོབ་པར་འོང་ངོ ། །ཡང་དག་པར་གཤེགས་པའི་མཆོད་རྟེན་ལ་ཕྱག་འཚལ་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། གཟུགས་བཟང་པོར་འགྱུར། སྐད་སྙན་པར་འགྱུར། ངག་ཀུན་གྱིས་མཉན་པར་འགྱུར། འཁོར་ཀུན་གྱི་བསྟོད་པར་འགྱུར། སྐྱིད་པ་དང་ལྡན་པར་འགྱུར། ལྷ་དང་མིའི་ནང་ན་ཡང་དབང་ཆེ་བར་འགྱུར། སྤྱོད་པ་མང་པོར་འགྱུར། ཐོ་རིགསུ་སྐྱེ་བར་འགྱུར། མྱ་ངན་ལས་འདས་པ་ཡང་མྱུར་དུ་མཐོབ་པར་འགྱུརོ། །ཡང་དག་པར་གཤེགས་པའི་མཆོད་རྟེན་ལ་གདུགས་འཕུལ་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། གདུགས་དང་འདྲ་བར་འགྱུར། འཇིག་རྟེན་ལ་མི་གནོད་པར་འགྱུར། སྨོན་པའི་གནསུ་འགྱུར། འཇིག་རྟེན་གྱི་དབང་པོར་འགྱུར་བའི་ལས་སེམས་ཤིང་བྱེད་པར་འགྱུར་ཕྱི་ཕྱིར་འཁོར་ལོས་སྒྱུར་བའི་རྒྱལ་པོ་ཐོབ་པར་འགྱུར། དབང་པོ་ཆེན་པོར་འགྱུར། སྤྱོད་པ་མང་པོར་འགྱུར། མཐོ་རིསུ་སྐྱེ་བར་འགྱུར། མྱ་ངན་ལས་འདས་པ་ཡང་མྱུར་དུ་ཐོབ་པར་འགྱུརོ་ཡང་དག་པར་གཤེགས་པའི་མཆོད་རྟེན་ལ་དྲིལ་བུ་འཕུལ་ན་ལེགས་པ་བཅུ་མཐོབ་པར་འགྱུར་ཏེ། བཅུ་གང་ཞེ་ན། གཟུགས་བཟང་པོར་འགྱུར་བ་ཡིན། དབྱང་སྙན་པ་ཡིན། ཡིད་དུ་འོང་བ་སྨྲ་བ་ཡིན། བྱ་ཀ་ལ་པིང་ཀའི་སྒྲ་སྐད་སྨྲ་བ་ཡིན། ཀུན་གྱིས་མཉན་པར་འགྱུར་བ་ཡིན།
67.326a
རྟག་ཏུ་དགའ་ཞིང་རངས་པ་ཡིན། ཕྱི་ཕྱིར་ཡིད་དུ་འོང་བའི་སྒྲ་ཐོས་པ་ཡིན། སྤྱོད་པ་མང་པོ་ཡིན། མཐོ་རིས་སུ་སྐྱེ་བ་ཡིན། མྱ་ངན་ལས་འདས་པར་གྱུར་བ་ཡིན་ནོ། །ཡང་དག་པར་གཤེགས་པའི་མཆོད་རྟོན་ལ་ན་བཟའ་ཕུལ་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། མདོག་འཇམ་པ་ཡིན། ལུས་རྡུལ་མི་ཆགས་པ་ཡིན། ཁྲེལ་ལྟས་དང་ལྡན་པ་ཡིན། མཐོང་ན་དགའ་བ་ཡིན། རྟག་ཏུ་གོས་དང་ལྡན་པ་ཡིན། འཇམ་ཞིང་བཟང་པོའི་གོས་རྟག་པ་ཡིན་ཅི་ཡང་རྙེད་པ་ཡིན། སྤྱོད་པ་མང་པོ་ཡིན། མཐོ་རིས་སུ་སྐྱེ་བ་ཡིན། མྱུར་དུ་མྱ་ངན་ལས་འདས་པ་ཐོབ་པ་ཡིན་ནོ། །ཡང་དག་པར་གཤེགས་པའི་མཆོད་རྟེན་ལ་མེ་ཏོག་ཕུལ་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། འཇིག་རྟེན་གྱི་ནང་ན་མེ་ཏོག་དང་འདྲ་བར་འགྱུར། གསུང་གི་དབང་པོ་གཙང་མར་འགྱུར། ལུས་ལ་བསྣམ་པ་དྲི་ཞིམ་པར་འགྱུར། ལུས་གཙང་མར་འགྱུར། ཕྱོགས་བཅུར་ཁྲིམས་ཐུབ་པའི་གཟུགས་རྒྱས་པར་འགྲོ། ཀུན་ཀྱང་དེ་ལས་འདུ་བར་འགྱུར། འཇིག་རྟེན་གྱི་ནང་ན་རྙེད་པར་འགྱུར། དད་པའི་ཆོས་རྣམས་མང་དུ་འགྲུབ་པར་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །ཡང་དག་པར་གཤེགས་པའི་མཆོད་རྟེན་ལ་མེ་ཏོག་ཕྲེང་བ་ཕུལ་ན་དེའི་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། འཇིག་རྟེན་གྱི་ནང་ན་མེ་ཏོག་གི་ཕྲེང་བ་དང་འདྲ་བར་ལུས་ལ་སྣམ་པའི་དྲི་ཞིམ་པར་འགྱུར། ལུས་གཙང་བར་འགྱུར། རྟག་ཏུ་དྲི་ཞིམ་པར་འགྱུར། རྒྱན་དང་ལྡན་པར་འགྱུར། འཁོར་རྣམས་སྟོང་ཞིང་ཉེ་བར་འགྱུར། ཕོ་མོ་ཐམས་ཅད་ཀྱི་ཡིད་དུ་འོང་བར་འགྱུར། སྤྱོད་པ་མང་དུ་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པ་ཐོབ་པར་འགྱུར་རོ། །ཡང་དག་པར་གཤེགས་པའི་མཆོད་རྟེན་ལ་མར་མེ་ཕུལ་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། འཇིག་རྟེན་གྱི་ནང་ན་མར་མེ་དང་འདྲ་བར་འགྱུར། ཤའི་མིག་གཙང་བར་འགྱུར། འཕྲུལ་གྱི་མིག་ཐོབ་པར་འགྱུར། མི་ཤེས་པའི་མུན་པ་ནག་པོ
67.326b
མེད་པར་འགྱུར། ཤེས་རབ་ཀྱི་འོད་ཐོབ་པར་འགྱུར། དགེ་བ་དང་མི་དགེ་བའི་དོན་རྣམས་བྱེ་བྲག་ཕྱེད་པར་འགྱུར། འཁོར་བ་ན་འཁོར་ཡང་མུན་པ་དང་མྱོས་པར་མི་འགྱུར། སྤྱོད་པ་མང་པོར་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །ཡང་དག་པར་གཤེགས་པའི་མཆོད་རྟེན་ལ་སྤོས་ཕུལ་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། འཇིག་རྟེན་གྱི་ནང་ན་སྤོས་དང་འདྲ་བར་འགྱུར། སྣའི་དབང་པོ་རྣོ་བར་འགྱུར། ལུས་དྲི་ཞིམ་པ་གཙང་མར་འགྱུར། རྟག་ཏུ་དྲི་ཞིམ་པར་འགྱུར། གཟུགས་བཟང་པོར་འགྱུར། སེམས་ཅན་དགའ་ཞིང་འདུ་བར་འགྱུར། འཇིག་རྟེན་གྱི་ནང་ན་རྙེད་པར་འགྱུར། དད་པའི་ཆོས་རྣམས་མང་དུ་འགྲུབ་པར་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །ཡང་དག་པར་གཤེགས་པའི་མཆོད་རྟེན་ལ་རྔ་ཕུལ་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། གཟུགས་བཟང་པོར་འགྱུར། སྐད་སྙན་པར་འགྱུར། སྨྲས་པ་ཡིད་དུ་འོང་བར་འགྱུར། སྐྱིད་པ་དང་ལྡན་པར་འགྱུར། རྟག་ཏུ་དགའ་བར་འགྱུར། ཚིག་ཀུན་གྱིས་ཉན་པར་འགྱུར། ཕྱི་ཕྱིར་སྒྲ་སྐད་སྙན་པ་ཐོབ་པར་འགྱུར། སྤྱོད་པ་མང་པོར་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །ཡང་དག་པར་གཤེགས་པའི་མཆོད་རྟེན་བརྩིགས་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། རིགས་ཆེན་པོར་འགྱུར། གཟུགས་དང་མིག་བཟང་ཞིང་སྡུག་པར་འགྱུར། དབང་ཆེ་ཞིང་འཁོར་མང་ལ་འཁོར་སྙིང་ཉེ་བར་འགྱུར། སྤྱོད་པ་མང་པོར་འགྱུར། ཀུན་འདུམ་པའི་གནས་སུ་འགྱུར། ཚིགས་སུ་བཅད་པ་དང ། བསྟོད་ཅིང་བསྐྱེད་པས་ཕྱོགས་བཅུར་ཆེར་གྲགས་ཤིང་ལྷ་དང་མི་རྣམས་ཀྱིས་མཆོད་པར་འགྱུར། ཕྱི་ཕྱིར་ནོར་མང་ཞིང་འཁོར་ལོས་སྒྱུར་བའི་རྒྱལ་པོར་འགྱུར། བྱང་ཆུབ་སེམས་དཔའ་རྡོ་རྗེ་སྙིང་པོའི་ལུསུ་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །སྟན་གྱི
67.327a
སྦྱིན་པ་གཏོང་བ་བྱས་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། འཇིག་རྟེན་གྱི་ནང་ན་བླ་མར་འགྱུར། བཟང་པོར་སྣང་བར་འགྱུར། འགྲོ་བ་མང་པོ་ལ་སྐྱིད་པའི་སྒྲ་གྲགས་པར་འགྱུར། སྤྱོད་པ་མང་པོར་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །ལྷམ་གྱི་སྦྱིན་པ་བྱས་པས་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། བཞོན་པ་ཀུན་གྱིས་མི་བྲེལ་བར་འགྱུར། རྐང་པ་ལེགས་པར་འགྱུར། ལམ་དུ་ཞུགས་ན་མཐུ་དང་ལྡན་པར་འགྱུར། ལུས་མི་ཞན་པར་འགྱུར། ལམ་དུ་ཞུགས་ན་རྡོ་ཤིང་གིས་མི་སྣད་པར་འགྱུར། རྫུ་འཕྲུལ་གྱི་རྐང་པ་ཐོབ་པར་འགྱུར། གཡོག་བྲན་དང་ལྡན་པར་འགྱུར། མཐོ་རིས་སུ་སྐྱེ་ཞིང་མྱུར་དུ་མྱ་ངན་ལས་འདས་པར་འགྱུར་རོ། །སྣོད་ཀྱི་སྦྱིན་གཏོང་བྱས་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། སྣོད་སྤྱད་དང་ལྡན་པར་འགྱུར། འཇིག་རྟེན་གྱི་ཡོན་ཏན་དུ་འགྱུར། སྐོམ་དད་ཆུང་བར་འགྱུར། སྐོམ་ན་ཡང་བཏུང་བ་དང་ལྡན་པར་འགྱུར། སེམས་མཉེན་པར་འགྱུར་རིང་དུ་འཁྱམས་པར་མི་སྐྱེ་བར་འགྱུར། ལྷ་དང་མི་ཀུན་དགའ་བར་འགྱུར། སྤྱོད་པ་མང་པོར་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །ཟས་ཀྱི་སྦྱིན་པ་གཏོང་བ་བྱས་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། ཚེ་རིང་བར་འགྱུར། དབང་དང་ལྡན་པར་འགྱུར། སྟོབས་དང་ལྡན་པར་འགྱུར། དྲན་པ་དང་ལྡན་པར་འགྱུར། སྨྲ་བ་དང་ལྡན་པར་འགྱུར། འཁོར་འདུ་ཞིང་མགུ་བར་བྱེད་པར་འགྱུར། ལྷ་དང་མི་ཀུན་མགུ་བར་འགྱུར། ལོངས་སྤྱོད་མང་པོར་འགྱུར། བདེ་བར་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །གནས་ཀྱི་སྦྱིན་གཏོང་བྱས་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། རྒྱལ་ཕྲན་དུ་འགྱུར། འཁོར་གྱི་རྒྱལ་པོར་འགྱུར། གཞན་གྱིས་མི་ཚུགས་པའི་རྒྱལ་པོར་འགྱུར། གླིང་གཅིག་གི་རྒྱལ་པོར་འགྱུར། གླིང་གཉིས
67.327b
ཀྱི་རྒྱལ་པོར་འགྱུར། གླིང་གསུམ་གྱི་རྒྱལ་པོར་འགྱུར། གླིང་བཞིའི་རྒྱལ་པོར་འགྱུར། སྤྱོད་པ་མང་པོར་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །ཐར་པར་ཞུགས་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། བུ་དང་ཆུང་མ་དང ། གཉེན་དང་འདུ་འཛི་ལ་མ་ཆགས་པ་དང ། སེར་སྣ་མེད་པ་ཡིན། འདོད་པ་ལེན་པ་མེད་པ་ཡིན། ཤིང་ཁྲོད་ན་གནས་པ་ལ་མི་དགའ་བ་ཡིན། རིན་པོ་ཆེ་གསུམ་ལ་རི་མོ་བྱེད་པ་ཡིན། མི་ཤེས་པའི་གནས་དང་བྲལ་བ་ཡིན། ངན་པར་འགྲོ་བའི་ཆོས་དང་བྲལ་བ་ཡིན། དགེ་བའི་ཆོས་ཀུན་ཚོལ་བ་ཡིན། ལྷ་དང་མི་ལ་དབེན་པ་ཡིན། རྟག་ཏུ་ཡང་དག་པར་གཤེགས་པའི་འཕགས་པ་བཞིན་དུ་ཐར་པར་ཞུགས་ཤིང་ཆོས་བྱེད་པ་ཡིན། མྱུར་དུ་མི་བདེ་བ་ལས་ཐར་ཏེ་མྱ་ངན་ལས་འདས་པ་ཡང་ཐོབ་པར་འགྱུར་རོ། །སྐོམ་གྱི་སྦྱིན་པ་བྱས་ན་ལེགས་པ་བཅུ་ཐོབ་སྟེ། བཅུ་གང་ཞེ་ན། དབང་པོ་ཐམས་ཅད་ཚང་བར་འགྱུར། དཔྲལ་བའི་དབྱེས་ལེགས་པར་འགྱུར། སྨྲས་པ་ཀུན་མགུ་བར་འགྱུར་རོ། །སེམས་མཉམ་པར་འགྱུར། སྐོམ་དད་ཆུང་བར་འགྱུར། སྐོམ་ན་ཡང་བཏུང་བ་དང་ལྡན་པར་འགྱུར། རིང་དུ་འཁྱམས་པར་མི་སྐྱེ། ལོངས་སྤྱོད་མང་བར་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །བཞོན་པ་སྦྱིན་གཏོང་བྱས་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། རྐང་པ་འཇམ་པ་ཡིན། རྐང་པའི་དབྱིབས་ལེགས་པར་འགྱུར། རྐང་གིས་འགྲོ་ན་ལུས་ལ་གནོད་པར་མི་འགྱུར། མི་མཛའ་བ་མེད་པར་འགྱུར། རྫུ་འཕྲུལ་གྱི་རྐང་པ་དང་ལྡན་པར་འགྱུར། བཞོན་པས་མི་བྲེལ་བར་འགྱུར། སྤྱོད་པ་མང་བར་འགྱུར། བདེ་བར་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདས་པར་འགྱུར་རོ། །ཁྲོད་དབེན་པར་གནས་པ་ལ་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། མང་པོ་འདུས་པ་རྣམས་སྤངས་པ། ཤིན་ཏུ་དབེན་པར་སྤྱོད་པ། བསམ་གཏན་ལ་དམིགས་པའི་སེམས་སུ་འགྱུར་བ། ཆུང་ངུ་བྱེད་པ།
67.328a
སངས་རྒྱས་ལ་བསྙེན་པ། ལུས་དགེ་ཞིང་བདེ་བར་སྤྱོད་པ། བར་མ་དོར་མི་འཁྱམ་པ། ཆོས་ཇི་ལྟ་བུར་ཐོས་པའི་དོན་རྒྱས་པར་ཤེས་པ། མི་གཡོ་འཛིན་རབ་ཏུ་ཐོབ་པ། ཤེས་རབ་ཤིན་ཏུ་ཐོབ་པའོ། །སློང་བ་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། འགྲོ་བ་ལ་གོམས་པར་འགྱུར། གནས་ཀུན་རིང་བར་འགྱུར། ང་སྤངས་པར་འགྱུར། བདག་རང་ཁེ་དང་ལྡན་པར་འགྱུར། གཞན་བསོད་ནམས་ལ་བགོད་པར་འགྱུར། བསྟན་པའི་ཆོས་རྒྱས་པར་འགྱུར། ཕྱིས་བྱུང་བ་རྣམས་ལ་སྣང་བར་བྱེད་པར་འགྱུར། ཐར་པར་ཞུགས་པའི་ཚུལ་ལས་མི་འགལ་བར་བྱེད་པར་འགྱུར། སྨྲ་བའི་སེམས་སུ་འགྱུར། དགེ་བའི་ཁྲིམས་ཚང་བའི་སེམས་སློངས་མོ་ལ་ཞུགས་པས་ཕྱོགས་གང་དུའང་མུན་པར་མི་འགྱུར་བ་ཡིན་ནོ། །ཐུབ་ཅིང་མི་འཇིགས་པས་ན་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། མི་འཇིགས་བཞིན་དུ་གྲོང་དུ་འཇུག་པ། མི་འཇིགས་བཞིན་དུ་གྲོང་ནས་འབྱུང་བ། མི་འཇིགས་བཞིན་དུ་རིགས་འཇུག་པ། མི་འཇིགས་བཞིན་དུ་འཁོར་ལ་ཆོས་འཆད་པ། མི་འཇིགས་བཞིན་དུ་དགེ་འདུན་གྱི་ནང་དུ་འཇུག་པ། མི་འཇིགས་བཞིན་དུ་མཁན་པོ་དང་སློབ་དཔོན་གྱི་ནང་དུ་འཇུག་པ། བྱམས་པའི་སྟོབས་རྣམས་ལ་སྦྱོང་བ། མི་འཇིགས་བཞིན་དུ་ཆོས་གོས་དང ། ཟས་དང ། མལ་སྟན་དང ། སྨན་དང ། གཡོག་ལ་སོགས་པ་རྣམས་སྤྱོད་པ། མི་འཇིགས་པར་ཁ་ཏོན་དང ། ཀློག་པ་དུས་ཟད་པའི་ཚེ་ཡང་མི་འཇིགས་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་གསུངས་པ་དང ། ཏོའུ་ཏེ་ཡའི་བུ་ཤུ་ཀོ་མ་ན་བ་སྟན་ལས་ལངས་ཏེ་ཕྱོགས་གཅིག་ཏུ་འདུག་ཏེ། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དཀོན་མཆོག་གསུམ་ལ་ཕྱག་འཚལ་ཞིང་སྐྱབས་སུ་མཆིའོ། །དེང་ཕན་ཅད་བདག་གི་ནམ་དུ་ཡང་དགེ་བའི་བཤེས་གཉེན་མཛད་པར་དགོངས་སུ་གསོལ་ཞེས་གསོལ་ཏོ། །ལས་ཀྱི་རྣམ་པར་འགྱུར་བ་རྫོགས་སོ།། །།