༄#། ་་།རྒྱ་གར་སྐད་དུ། སུ་མ་ག་དྷཱ་ཨ་བ་དཱ་ན། བོད་སྐད་དུ། མ་ག་དྷཱ་བཟང་མོའི་རྟོགས་པ་བརྗོད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་དེའི་ཚེ་མཉན་ཡོད་ན་མགོན་མེད་ཟས་སྦྱིན་གྱི་བུ་མོ་མ་ག་དྷཱ་བཟང་མོ་ཞེས་བྱ་བ་དད་པ་དང་ལྡན་པ། རང་བཞིན་བཟང་བ། བསམ་པ་དགེ་བ། བདག་དང་གཞན་ལ་ཕན་པའི་ཕྱིར་ཞུགས་པ་ཞིག་གནས་སོ། །ཇི་ཙམ་ན་བུ་རམ་ཤིང་འཕེལ་ཞེས་བྱ་བའི་གྲོང་ཁྱེར་ན་ཚོང་དཔོན་གཞན་ཞིག་གནས་པ་ལ། དེའི་བུ་ཁྱུ་མཆོག་བྱིན་ཞེས་བྱའོ། །དེ་ཡང་གཞན་མུ་སྟེགས་པ་སྟེན་པས་གཅེར 70.316a བུ་པ་རྣམས་ལ་མངོན་པར་དད་པ་ཞིག་གནས་པ་དང ། གང་གི་ཚེ་བཅོམ་ལྡན་འདས་ཀྱིས་ཆོ་འཕྲུལ་ཆེན་པོ་རྣམ་པར་བསྟན་པ་དེའི་ཚེ་མུ་སྟེགས་པ་རྣམས་མཐའ་འཁོབ་དུ་ཀུན་དུ་གནས་ཏེ། ལ་ལ་ནི་གྲོང་ཁྱེར་བཟང་བྱེད་ཅེས་བྱ་བ་ནའོ། །ལ་ལ་ནི་མུད་གྷི་རི་ཀ་ཞེས་བྱ་བའི་ཡུལ་ནའོ། །ལ་ལ་ནི་བུ་རམ་ཤིང་འཕེལ་ཞེས་བྱ་བའི་གྲོང་ཁྱེར་ན་གནས་སོ། །དེའི་ཚེ་དེའི་དུས་ན་ཁྱུ་མཆོག་བྱིན་དེའི་བར་དུ་ཁྱིམ་མ་བྱས་པ་དང ། དེ་ལ་གཅེར་བུ་པ་རྣམས་ཀྱིས་སྨྲས་པ། མགོན་མེད་ཟས་སྦྱིན་གྱི་བུ་མོ་མ་ག་དྷཱ་བཟང་མོ་ཞེས་བྱ་བ་གཟུགས་བཟང་བ། ལྟ་ན་སྡུག་པ། མཛེས་པ། སྐྱེ་བོ་དམ་པ་རྣམས་དང་འདྲ་བ་ཞིག་ཡོད་དོ། །ཇི་སྲིད་དེས་ཐོས་པ་དང་བདག་ཉིད་གཅེར་བུ་པའི་ཆ་བྱད་དུ་བྱས་ཏེ་མཉན་ཡོད་དུ་སོང་ངོ ། །ཇི་ཙམ་ན་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དུ་སློང་བའི་ཕྱིར་ཞུགས་པ་དང ། དེས་བུ་མོ་དེ་མཐོང་ངོ ། །མཐོང་བའི་མོད་ཁོ་ན་ལ་བུ་མོ་དེ་ལ་ཀུན་དུ་ཆགས་པར་གྱུར་ལ། དེ་དེར་བསླངས་པའི་ཚེ་ཞཝའི་ནང་དུ་བླངས་སོ། །དེ་ནས་བུ་མོ་དེས་ལོག་པར་སྤྱོད་པ་དེ་མཐོང་བ་དང ། འདི་ནི་ཤེས་བཞིན་མེད་པར་སློངས་མོ་ལེན་ཏོ་ཞེས་བགད་དོ། །དེ་ནས་ཁྱུ་མཆོག་བྱིན་ཏེ་ངོ་ཚ་བར་གྱུར་པ་དང ། བུ་རམ་ཤིང་འཕེལ་གྱི་གྲོང་ཁྱེར་དུ་སོང་སྟེ་ཕ་ལ་སྨྲས་ནས་དེས་བུ་མོ་དེ་བླངས་སོ། །མགོན་མེད་ཟས་སྦྱིན་གྱིས་བཅོམ་ལྡན་འདས་ལ་ཞུས་པ་དང ། བཅོམ་ལྡན་འདས་ཀྱིས་བཀའ་སྩལ་པ། གཞན་དུ་ན་གང་གི་ཚེ་མ་ག་དྷཱ་བཟང་མོ་འདི་བུ་རམ་ཤིང་འཕེལ་དུ་སོང་ན་རབ་ཏུ་བྱུང་བ་རྣམས་ཀྱི་བྱ་བ་དང ། སངས་རྒྱས་ཀྱི་བྱ་བ་བྱེད་པར་འགྱུར་རོ། །ཡང་ཇི་སྲིད་ཅིག་ན་ཁྱིམ་བདག་མགོན་མེད་ཟས་སྦྱིན་གྱིས་ཉེ་དུ་རྣམས་ལ་ཡང་གོ་བར་བྱས་ནས་བྱིན་པ་དང་བུ་རམ་ཤིང་འཕེལ་དུ་ཁྱེར་རོ། །ཇི་ཙམ་ན་དུས་གཞན་ཞིག་གི་ཚེ་ཁྱིམ་དེ་ན་གཅེར་བུ་པ་རྣམས་ཟན་ཟ་བ་དང ། དེ་ལ་སྒྱུག་མོས་སྨྲས་པ། དེ་རིང་བདག་ཅག་གི་ཁྱིམ་ན་མཆོད་གནས་རྣམས་བཤོས་གསོལ་གྱིས་ཚུར་ཤོག་།མཆོད་གནས་རྣམས་ལ་ལྟོས་ཤིག་།མ་ག་དྷཱ་བཟང་མོས་དེ་ཐོས་པ་དང་དགའ་བ་དང ། མགུ་བ་དང་རངས་པ་དང་ཡིད་བདེ་བ 70.316b སྐྱེས་ཏེ་བསམས་པ། ངེས་པར་བཙུན་པ་ཤཱ་རིའི་བུའམ། མཽད་གལ་གྱི་བུ་ཆེན་པོ་ལ་སོགས་པ་ཉན་ཐོས་ཆེན་པོ་རྣམས་བྱོན་པར་གྱུར་ཏོ་སྙམ་ནས་དེ་ཡིད་རབ་ཏུ་དགའ་བ་དང ། འཇིགས་པ་མེད་པར་སོང་བ་དང་གཅེར་བུ་ནགས་ཀྱི་མ་ཧེ་འདྲ་བ། སྐྲ་རྣམས་བཏོགས་པ། ཕུག་རོན་གྱི་ཕྲུ་གུ་འདྲ་བའི་གཅེར་བུ་པ་རྣམས་མཐོང་ངོ ། །མཐོང་བ་དང་དེའི་མོད་ལ་མ་ག་དྷཱ་བཟང་མོ་ངོ་ཚ་སྟེ། དེ་གདོང་གཞན་དུ་བལྟས་པ་དང ། དེ་ལ་སྒྱུག་མོ་དེས་སྨྲས་པ། བུ་མོ་ཁྱོད་ཅིའི་ཕྱིར་ཡི་མུག་པར་གྱུར། དེས་སྨྲས་པ། གང་འདི་ལྟ་བུ་མཆོད་གནས་ཡིན་ན་མཆོད་གནས་མ་ཡིན་པ་གོ་ཇི་ལྟ་བུ་ཞིག་ཡོད་པར་འགྱུར། དེ་ལ་དེས་སྨྲས་པ། བུ་མོ་ཁྱོད་ལ་འདི་བས་ཆེས་ཁྱད་པར་དུ་འཕགས་པའི་སྟོན་པ་འགའ་ཞིག་ཡོད་དམ། བདག་གི་ཕའི་གཙུག་ལག་ཁང་རྒྱལ་བྱེད་ཀྱི་ཚལ་ན་སངས་རྒྱས་ཞེས་བྱ་བའི་སྟོན་པ་བཞུགས་ཏེ། དེ་ནི་རྒྱུ་བ་དང ། མི་རྒྱུ་བའི་འཇིག་རྟེན་གྱི་མཆོད་གནས་ཡིན་ནོ། །ཁྱོད་ཀྱི་སྟོན་པ་དེ་ཇི་འདྲ་བ་ཞིག་།སྨྲས་པ། བདག་གི་སྟོན་པ་བཙོ་མའི་ཚོགས་ལྟར་སེར། །བཙོ་མའི་གསེར་ལྟར་ཤིན་དུ་དྲི་མ་མེད། །ཚུལ་ཁྲིམས་རྣམ་དག་ཤེས་རབ་ཤིན་དུ་དག་།འཇིག་རྟེན་གསུམ་ན་མཉམ་མེད་འགྲོ་ལས་འཕགས། །དེ་ཐོས་མ་ཐག་ཏུ་སེམས་རབ་ཏུ་དགའ་བར་གྱུར་ནས་སྨྲས་པ། བུ་མོ་ངེད་ཅག་རྣམས་ལ་བཅོམ་ལྡན་འདས་དེ་སང་བསྟན་པར་ནུས་སམ། མ་ག་དྷཱ་བཟང་མོས་སྨྲས་པ། བཤོས་གཙང་རྣམས་སྦྱོར་ཅིག་དང ། སང་བཅོམ་ལྡན་འདས་སྤྱན་དྲང་བར་བྱའོ། །ཇི་ཙམ་ན་དེ་རྣམས་ཀྱིས་སྨྲས་པ། བཤོས་གཙང་རྣམས་སྦྱར་གྱིས་ཁྱོད་ཀྱིས་བཅོམ་ལྡན་འདས་སང་སྤྱན་དྲོངས་ཤིག ། དེ་ནས་མ་ག་དྷཱ་བཟང་མོས་ཁང་པའི་ཡང་ཏོག་གི་སྟེང་དུ་མངོན་པར་འཛེགས་ནས་ཕྱོགས་གང་ན་བཅོམ་ལྡན་འདས་བཞུགས་པའི་ཕྱོགས་དེར་ཐལ་མོ་སྦྱར་ཏེ་ཕྱག་འཚལ་ནས། བཅོམ་ལྡན་འདས་ཀྱི་ཡོན་ཏན་རྗེས་སུ་དྲན་ཏེ། མེ་ཏོག་རྣམས་གཏོར་ཅིང་སྤོས་ཀྱང་བཏུལ་ནས་གསེར་གྱི་བུམ་པའི་ཆུས་བཅོམ 70.317a ལྡན་འདས་སྤྱན་དྲང་བའི་ཕྱིར་གསེར་གྱི་བུམ་པའི་ཆུ་ཡང་སྦྲེངས་སོ། །སྙིང་རྗེ་བའི་ཚིག་འདི་སྐད་ཅེས་ཀྱང་སྨྲ་སྟེ། བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། བདག་ནི་རི་དགས་དང་འདྲ་བར་གྱུར་ཅིང་མཐའ་འཁོབ་ན་མཆིས་ཏེ། དཀོན་མཆོག་གསུམ་དང་བྲལ་བར་གྱུར་པ་ལ་རྗེས་སུ་བཟུང་བར་མཛད་ཅིང་དགེ་སློང་གི་དགེ་འདུན་དང་བཅས་པ་འདིར་གཤེགས་པར་མཛད་དུ་གསོལ། ཡང་འདི་སྐད་ཅེས་ཀྱང་སྨྲས་ཏེ། ཚུལ་ཁྲིམས་རྣམ་དག་ཤེས་རབ་ཤིན་དུ་དག་།དད་ལྡན་སྙིང་པོ་ཉན་ཐོས་ཆེ་རྣམས་ཀྱིས། །མགོན་མེད་གྱུར་པ་བདག་ལ་རྗེས་གཟུང་བའི། །དོན་མཛད་ཐུགས་རྗེས་གཤེགས་པར་མཛད་དུ་གསོལ། །ཇི་ཙམ་ན་མེ་ཏོག་དང་སྤོས་དང་གསེར་གྱི་བུམ་པའི་ཆུའང་ནམ་མཁའ་ལ་འཕགས་པར་གྱུར་ཏོ། །བཅོམ་ལྡན་འདས་ཀྱང་དེའི་ཚེ་ནང་དུ་ཡང་དག་འཇོག་ལས་བཞེངས་ནས་འཁོར་རྣམ་བཞི་ལ་ཆོས་སྟོན་ཏོ། །གསེར་གྱི་བུམ་པའི་ཆུ་དེ་ཡང་བཅོམ་ལྡན་འདས་ཀྱི་སྤྱན་སྔར་བེ་དུརྱའི། སྡོང་བུ་བཞིན་དུ་རྣམ་པར་གནས་སོ། །མེ་ཏོག་དེ་བཅོམ་ལྡན་འདས་ཀྱི་སྟེང་གི་ནམ་མཁའ་ལ་ཁང་པ་བརྩེགས་པ་བཞིན་དུ་གནས་སོ། །དྲི་ངད་སྤོས་ཀྱང་སྤྲིན་བརྩེགས་པ་བཞིན་དུ་གནས་པར་གྱུར་ཏོ། །དེ་ནས་དེ་མཐོང་བ་དང ། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་སྤྱན་འདྲེན་པ་འདི་ག་ལས་མཆིས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དཔག་ཚད་བརྒྱ་དྲུག་བཅུ་རྩ་གསུམ་ན། བུ་རམ་ཤིང་འཕེལ་གྱི་གྲོང་ཁྱེར་ཡོད་པ་ནས་འོངས་སོ། །ཀུན་དགའ་བོ་གྲོང་ཁྱེར་དེ་ནི་མུ་སྟེགས་པ་རྣམས་ཀྱིས་བཟུང་བ་ཡིན་པས་རྫུ་འཕྲུལ་གྱི་རྣམ་པར་འཕྲུལ་པས་འགྲོ་བར་བྱའོ་ཞེས་དགེ་སློང་རྣམས་ལ་ཚུལ་ཤིང་བྲིམས་ཤིག་།ཇི་ཙམ་ན་ཚེ་དང་ལྡན་པ་ཀུན་དགའ་བོས་རྒན་པའི་གནས་མཐའ་ནས་བཟུང་ནས་ཚུལ་ཤིང་བྲིམས་ཏེ། འདི་སྐད་ཅེས་ཀྱང་སྨྲས་སོ། །སང་བུ་རམ་ཤིང་འཕེལ་གྱི་གྲོང་ཁྱེར་དུ་འགྲོ་བར་བྱ་སྟེ། གྲོང་ཁྱེར་དེ་ནི་མུ་སྟེགས་པ་རྣམས་ཀྱིས་ཡོངས་སུ་བཟུང་བས་ཁྱོད་ཅག་རྣམས་ལས་གང་རྫུ་འཕྲུལ་ཐོབ་པ་དེས 70.317b ཚུལ་ཤིང་ལོང་ཤིག་།ཇི་སྲིད་ཅིག་ན་རྒན་པའི་མཐའ་ནས་ཚུལ་ཤིང་ལེན་པར་བརྩམས་སོ། །ཡང་དེ་ན་གནས་བརྟན་གང་པོ་ཞེས་བྱ་བ་ཡོད་དེ་དེ་ཡང་རྫུ་འཕྲུལ་མ་ཐོབ་པར་ལག་པ་བརྐྱང་སྟེ་ཚུལ་ཤིང་ལེན་པར་བརྩམས་པ་དང ། དེ་ལ་ཚེ་དང་ལྡན་པ་ཀུན་དགའ་བོས་སྨྲས་པ། གནས་བརྟན་མགོན་མེད་ཟས་སྦྱིན་གྱི་ཁྱིམ་དུ་འཇུག་པ་མ་ཡིན་གྱི། གཞན་དུ་དཔག་ཚད་བརྒྱ་དྲུག་ཅུ་རྩ་གསུམ་ན། བུ་རམ་ཤིང་འཕེལ་ཞེས་བྱ་བའི་གནས་ཡོད་དེ། དེར་འགྲོ་དགོས་སོ། །དེ་འདི་སྙམ་དུ་སེམས་ཏེ། ངས་ནི་ཐོག་མ་མེད་པའི་དུས་ནས་གོམས་པའི་ཉོན་མོངས་པ་ནི་སྤངས་ན། མུ་སྟེགས་པ་རྣམས་དང་ཐུན་མོང་དུ་གྱུར་པའི་རྫུ་འཕྲུལ་ལྟ་ཞིག་དཀའ་བ་ཇི་ཞིག་ཡོད་ནས་བསྐྱེད་པར་མི་བྱ་སྙམ་ནས་དེས་ཀྱང་དུས་དེ་ཉིད་དུ་རྫུ་འཕྲུལ་བསྐྱེད་པ་དང ། ཇི་སྲིད་དུ་ཚུལ་ཤིང་གཉིས་པ་མ་བྲིམས་པ་དེ་སྲིད་དུ་དེས་གླང་པོ་ཆེའི་སྣ་འདྲ་བའི་ལག་པ་བརྐྱང་སྟེ་ཚུལ་ཤིང་བླངས་སོ། །ཇི་ཙམ་ན་ཚེ་དང་ལྡན་པ་ཀུན་དགའ་བོས་རྒན་པའི་མཐའ་ལོགས་སུ་འདུག་ཏེ་སྨྲས་པ། གང་གིས་རྫུ་འཕྲུལ་གང་ཐོབ་པ་དེས་བུ་རམ་ཤིང་འཕེལ་ཞེས་བྱ་བའི་གྲོང་ཁྱེར་དུ་འགྲོ་བར་བྱའོ། །དེ་ནས་ཉི་མ་གཉིས་པ་ལ་ནམ་ནངས་ཏེ་དགེ་སློང་རྣམས་རྫུ་འཕྲུལ་གྱི་རྣམ་པར་འཕྲུལ་པས་ཡང་དག་པར་ཆས་སོ། །དེ་ནས་རྒྱལ་པོ་ཆེན་པོ་བཞི་ཡང་མཉན་ཡོད་གང་ན་བ་དེར་མངོན་པར་བལྟ་བར་བརྩམས་སོ། །ཇི་ཙམ་ན་བར་སྐབས་དེར་ཀུན་ཤེས་ཀཽཎྜི་ནྱ་ཞེས་བྱ་བ་རྟའི་ཤིང་རྟ་ལ་ཞོན་ཏེ་གློག་འགྱུ་བའི་སྣང་བ་སྟོན་ཅིང་དལ་བུ་དལ་བུས་ཆར་རབ་ཏུ་འབེབས་ཏེ། དེ་ལྟ་བུའི་རང་གི་རྫུ་འཕྲུལ་རྣམ་པར་སྟོན་ཅིང་འོང་ངོ ། །དེ་ནས་མ་ག་དྷཱ་བཟང་མོའི་བདག་པོས་དེ་མཐོང་བ་དང་དྲིས་པ། མ་ག་དྷཱ་བཟང་མོ་འདི་ཁྱོད་ཀྱི་སྟོན་པ་དེ་ཡིན་ནམ། དེས་སྨྲས་པ། འདི་ནི་ཀུན་ཤེས་ཀཽཎྜི་ནྱ་ཞེས་བྱ་བ་ཡིན་ཏེ། འདི་ནི་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་དང་པོ་བསྐོར་བ་ན། འདིས་ཐོག་མར་བདག་མེད་པ་མངོན་སུམ་དུ་བྱས་པ་དེ་ཐོག་མར་འོངས་པ་འདི་ཡིན་ནོ། །བར་སྐབས་དེར་གནས་བརྟན་འོད་སྲུང་ཆེན་པོས་བྲག་གི་རི་ཆེན་པོ་ཤིང་སྣ་ཚོགས་པ་རྣམ་པ་བརྒྱས་ཁྱབ་པ། བྱ་རྣམ་པ་སྣ་ཚོགས་ཀྱིས་ཁྱབ་པ། མེ་ཏོག་སྣ 70.318a ཚོགས་པས་ཡང་དག་པར་ཁེབས་པ། གཡའ་ཆུ་སྣ་ཚོགས་ཀྱིས་ཉེ་བར་མཛེས་པར་བྱས་པ་མངོན་པར་སྤྲུལ་ཏེ་སྟེང་གི་ནམ་མཁའ་ལས་འོང་ངོ ། །དེ་ནས་ཁྱིམ་བདག་དེས་དེ་མཐོང་ནས་སྨྲས་པ། མ་ག་དྷཱ་བཟང་མོ་འདི་ཁྱོད་ཀྱི་སྟོན་པ་དེ་ཡིན་ནམ། དེས་དེ་ལ་སྨྲས་པ། འདི་ནི་འོད་སྲུང་ཆེན་པོ་ཞེས་བྱ་བ་ཡིན་ཏེ། བཅོམ་ལྡན་འདས་ཀྱིས་སྦྱངས་པའི་ཡོན་ཏན་ལ་གནས་པར་སྨྲ་བ་རྣམས་ཀྱི་མཆོག་ཏུ་གསུངས་པ་སྟེ། འདིས་གཅིག་གིས་མ་ཚང་བའི་གླང་དོར་སྟོང་བོར་ཞིང ། སེར་སྐྱ་བཟང་མོ་སྐྱེ་བོ་དགེ་བ་རྣམས་དང་མཚུངས་པ་དང ། དབྱིག་དང་གསེར་མང་པོ་མཆིལ་མའི་ཐལ་བ་བཞིན་སྤངས་ནས་མངོན་པར་བྱུང་སྟེ་རབ་ཏུ་བྱུང་བ་དེ་ནི་འོང་བ་འདི་ཡིན་ནོ། །བར་སྐབས་དེར་ཚེ་དང་ལྡན་པ་ཤཱ་རིའི་བུས་སེང་གེའི་ཤིང་རྟ་མངོན་པར་སྤྲུལ་ཏེ། སྟེང་གི་ནམ་མཁའ་ལ་རྫུ་འཕྲུལ་གྱིས་འོང་ངོ ། །དེ་ནས་ཁྱིམ་བདག་དེས་དེ་མཐོང་བ་དང་དྲིས་པ། མ་ག་དྷཱ་བཟང་མོ་གང་སེང་གེའི་ཤིང་རྟས་འོང་བ་འདི་ཁྱོད་ཀྱི་སྟོན་པ་དེ་ཡིན་ནམ། དེ་ནས་དེས་དེ་ལ་སྨྲས་པ། འདི་ནི་དགེ་སློང་ཤཱ་རིའི་བུ་ཞེས་བྱ་བ་ཡིན་ཏེ། བཅོམ་ལྡན་འདས་ཀྱིས་ཤེས་རབ་དང་ལྡན་པ་རྣམས་ཀྱི་མཆོག་ཏུ་བསྟན་པ་ཡིན་ཏེ། འདི་མའི་མངལ་དུ་ཞུགས་པ་ཙམ་གྱིས་འཛམ་བུའི་གླིང་ཐམས་ཅད་ཀྱི་རྩོད་པར་སྨྲ་བ་རྣམས་ལས་རྒྱལ་བར་གྱུར་ཏོ། །འདི་ནི་སྟོན་པ་གཉིས་པ། མཆོག་གཉིས་པ། ཆོས་ཀྱི་སྡེ་དཔོན། ཆོས་ཀྱི་འཁོར་ལོ་རྗེས་སུ་སྐོར་བ་དེ་ནི་སེང་གེའི་ཤིང་རྟས་འོངས་པ་འདི་ཡིན་ནོ། །དེའི་རྗེས་ཐོགས་ཉིད་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་གླང་པོ་ཆེ་ས་སྲུང་འདྲ་བའི་གླང་པོའི་རྒྱལ་པོ་མངོན་པར་སྤྲུལ་ཏེ། སྟེང་གི་ནམ་མཁའ་ལ་རྫུ་འཕྲུལ་གྱིས་འོང་ངོ ། །དེ་ནས་ཁྱིམ་བདག་དེས་དེ་མཐོང་ནས། མ་ག་དྷཱ་བཟང་མོ་ལ་དྲིས་པ། གང་གླང་པོའི་རྒྱལ་པོ་ས་སྲུང་འདྲ་བའི་གླང་པོས་འོང་བ་འདི་ཁྱོད་ཀྱི་སྟོན་པ་དེ་ཡིན་ནམ། དེས་དེ་ལ་སྨྲས་པ། འདི་ནི་དགེ་སློང་མཽད་གལ་གྱི་བུ་ཆེན་པོ་ཞེས་བྱ་བ་ཡིན་ཏེ། བཅོམ་ལྡན་འདས་ཀྱིས་རྫུ་འཕྲུལ་ཅན་རྣམས་ཀྱི་མཆོག་ཏུ་བསྟན་པ་སྟེ། འདིའི་རྫུ 70.318b འཕྲུལ་གྱིས་ལྷའི་དབང་པོ་བརྒྱ་བྱིན་གྱི་རྣམ་པར་རྒྱལ་བའི་ཁང་བཟངས་རྐང་པའི་མཐེ་བོས་ཀུན་དུ་སྒུལ་བ་དང ། འདིས་ཀླུའི་རྒྱལ་པོ་དགའ་བོ་དང་ཉེ་དགའ་བོ་གཉིས་བཏུལ་བ་དེ་གླང་པོའི་ཤིང་རྟས་འོང་བ་འདི་ཡིན་ནོ། །བར་སྐབས་དེར་ཚེ་དང་ལྡན་པ་མ་འགགས་པས་ཤིང་རྟའི་འཕང་ལོ་ཙམ་གྱི་པད་མ་ཐམས་ཅད་གསེར་ལས་བྱས་པ། བཻ་དཱུརྱའི་སྡོང་བུ་ཅན་དངུལ་གྱི་གེ་སར་དང་ལྡན་པ་མངོན་པར་སྤྲུལ་ཏེ། རྫུ་འཕྲུལ་གྱིས་ནམ་མཁའ་ལས་འོང་ངོ ། །དེ་ནས་ཁྱིམ་བདག་དེས་དེ་མཐོང་བ་དང་དྲིས་པ། མ་ག་དྷཱ་བཟང་མོ་འདི་ཁྱོད་ཀྱི་སྟོན་པ་དེ་ཡིན་ནམ། དེས་དེ་ལ་སྨྲས་པ། འདི་ནི་དགེ་སློང་མ་འགགས་པ་ཞེས་བྱ་བ། བཅོམ་ལྡན་འདས་ཀྱིས་ལྷའི་མིག་དང་ལྡན་པ་རྣམས་ཀྱི་མཆོག་ཏུ་བསྟན་པ་སྟེ། འདི་ནི་བསོད་ནམས་ཀྱི་སྟོབས་ཀྱིས་ཡོངས་སུ་བཟུང་བས་སྣོད་ཚོས་པས་གང་བ་ལྔ་བརྒྱ་སྒོ་ན་གནས་པ་དང ། ཅུང་ཟད་བསམས་པ་ཙམ་གྱིས་ཆོས་གོས་དང་བསོད་སྙོམས་དང་མལ་སྟན་དང་ནད་ཀྱི་རྐྱེན་སྨན་དང་ཡོ་བྱད་རྣམས་འབྱུང་བ་ལ་སྤྱོད་པ་དེ་པད་མའི་ཤིང་རྟས་འོང་བ་འདི་ཡིན་ནོ། །བར་སྐབས་དེར་ཚེ་དང་ལྡན་པ་གང་པོས་ནམ་མཁའ་ལྡིང་གི་ཤིང་རྟ་མངོན་པར་སྤྲུལ་ཏེ། རྫུ་འཕྲུལ་གྱིས་སྟེང་གི་ནམ་མཁའ་ལས་འོང་ངོ ། །དེ་ནས་ཁྱིམ་བདག་དེས་དྲིས་པ་མ་ག་དྷཱ་བཟང་མོ་ནམ་མཁའ་ལྡིང་གི་ཤིང་རྟས་འོང་བ་འདི་ཁྱོད་ཀྱི་སྟོན་པ་དེ་ཡིན་ནམ། དེས་དེ་ལ་སྨྲས་པ། འདི་ནི་དགེ་སློང་གང་པོ་ཞེས་བྱ་བ་བཅོམ་ལྡན་འདས་ཀྱིས་ཆོས་སྟོན་པ་རྣམས་ཀྱི་མཆོག་ཏུ་བསྟན་པ་དེ་ནམ་མཁའ་ལྡིང་གི་ཤིང་རྟས་འོང་བ་འདི་ཡིན་ནོ། །བར་སྐབས་དེར་ཚེ་དང་ལྡན་པ་རྟ་ཐུལ་སྤྱོད་ལམ་རབ་ཏུ་ཞི་བས་འོང་ངོ ། །དེ་ནས་ཁྱིམ་བདག་དེས་དེ་ལ་དྲིས་པ། མ་ག་དྷཱ་བཟང་མོ་གང་ལྷུང་བཟེད་ལག་ན་ཐོགས་ཏེ་སྤྱོད་ལམ་རབ་ཏུ་ཞི་བས་འོང་བ་དེ་ཁྱོད་ཀྱི་སྟོན་པ་ཡིན་ནམ། དེས་དེ་ལ་སྨྲས་པ། འདི་ནི་དགེ་སློང་རྟ་ཐུལ་ཞེས་བྱ་བ་ཡིན་ཏེ། འདིའི་སྤྱོད་ལམ་རབ་ཏུ་ཞི་བས་གླང་པོ་ཆེ་སྨྱོན་པ་བཏུལ་བ་དང ། འདིའི་སྤྱོད་ལམ་རབ་ཏུ་ཞི་བ་མཐོང་བས་འཕགས་པ་ཤ་རིའི་བུས 70.319a བདེན་པ་མཐོང་བར་གྱུར་ཏེ། དེ་མངོན་པར་བྱུང་ནས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ངོ ། །རབ་ཏུ་བྱུང་ནས་ཀྱང་དགྲ་བཅོམ་པ་ཉིད་ཐོབ་པ་དེ་སྤྱོད་ལམ་རབ་ཏུ་ཞི་བས་འོང་བ་འདི་ཡིན་ནོ། །བར་སྐབས་དེར་ཚེ་དང་ལྡན་པ་ཉེ་བར་འཁོར་གསེར་གྱི་ཏ་ལའི་ནགས་མངོན་པར་སྤྲུལ་ཏེ། རྫུ་འཕྲུལ་གྱིས་སྟེང་གི་ནམ་མཁའ་ལས་འོང་ངོ ། །དེ་ནས་ཁྱིམ་བདག་དེས་དེ་ལ་དྲིས་པ། མ་ག་དྷཱ་བཟང་མོ་གང་གསེར་གྱི་ཏ་ལའི་ནགས་ལ་རྟེན་ཅིང་འོང་བ་འདི་ཁྱོད་ཀྱི་སྟོན་པ་དེ་ཡིན་ནམ། དེས་དེ་ལ་སྨྲས་པ། འདི་ནི་དགེ་སློང་ཉེ་བར་འཁོར་ཞེས་བྱ་བ་བཅོམ་ལྡན་འདས་ཀྱིས་འདུལ་བ་འཛིན་པ་རྣམས་ཀྱི་མཆོག་ཏུ་བསྟན་པ་ཡིན་ཏེ། འདི་ལ་ཤཱཀྱ་ལྔ་བརྒྱ་ཙམ་རབ་ཏུ་བྱུང་བ་རྣམས་ཀྱིས་དོ་ཤལ་དང་གདུ་བུ་དང་དཔུང་རྒྱན་དང་གསེར་གྱི་གདུགས་ལ་སོགས་པའི་རྒྱན་རྣམས་དང ། གོས་རྣམས་ཀྱི་ཕུང་པོ་ཆེན་པོ་མདུན་དུ་བཞག་པ་དང ། འདིས་དེ་མཐོང་བ་དང་སྐྱོ་བ་ཆེན་པོ་སྐྱེས་ཏེ། དེ་དག་ཐམས་ཅད་མི་རྟག་པར་ཤེས་ནས། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ངོ ། །རབ་ཏུ་བྱུང་ནས་ཀྱང་དགྲ་བཅོམ་པ་ཉིད་མངོན་སུམ་དུ་བྱས་པ་དེ་གསེར་གྱི་ཏ་ལའི་ནགས་ལ་རྟེན་ནས་འོང་བ་འདི་ཡིན་ནོ། །དེ་ནས་བར་སྐབས་དེར་ཚེ་དང་ལྡན་པ་ཀ་ཏྱཱ་ཡ་ནའི་བུ་ཆེན་པོས་བཻ་དཱུརྱའི་ཁང་པ་བརྩེགས་པ་མངོན་པར་སྤྲུལ་ཏེ། རྫུ་འཕྲུལ་གྱིས་ནམ་མཁའ་ལས་འོང་ངོ ། །དེ་ནས་ཁྱིམ་བདག་གིས་དྲིས་པ། མ་ག་དྷཱ་བཟང་མོ་བཻ་དཱུརྱའི་ཁང་པ་བརྩེགས་པ་ན་འདུག་སྟེ་འོང་བ་འདི་ཁྱོད་ཀྱི་སྟོན་པ་དེ་ཡིན་ནམ། དེས་དེ་ལ་སྨྲས་པ། འདི་ནི་དགེ་སློང་ཀཱ་ཏྱཱ་ཡ་ན་ཆེན་པོ་ཞེས་བྱ་བ། བཅོམ་ལྡན་འདས་ཀྱིས་མདོ་སྡེ་པ་དང་བྱེ་བྲག་ཏུ་སྨྲ་བ་རྣམས་ཀྱི་མཆོག་ཏུ་བསྟན་པ་དེ་བཻ་དཱུརྱའི་ཁང་པ་བརྩེགས་པའི་ནང་དུ་འདུག་ནས་འོང་བ་འདི་ཡིན་ནོ། །བར་སྐབས་དེར་ཚེ་དང་ལྡན་པ་གསུས་པོ་ཆེས་ཁྱུ་མཆོག་གི་ཤིང་རྟ་མངོན་པར་སྤྲུལ་ནས་རྫུ་འཕྲུལ་གྱིས་སྟེང་གི་ནམ་མཁའ་ལས་འོང་ངོ ། །དེ་ནས་ཁྱིམ་བདག་དེས་དྲིས་པ། མ་ག་དྷཱ་གཟང་མོ་གང་ཁྱུ་མཆོག་གི་ཤིང་རྟ་ལ་ཞོན་ཏེ་འོང་བ་འདི་ཁྱོད་ཀྱི་སྟོན་པ་དེ་ཡིན 70.319b ནམ། དེས་དེ་ལ་སྨྲས་པ། འདི་ནི་དགེ་སློང་གསུས་པོ་ཆེ་ཞེས་བྱ་བ། བཅོམ་ལྡན་འདས་ཀྱིས་རིག་པ་ཐོབ་པ་རྣམས་ཀྱི་མཆོག་ཏུ་བསྟན་པ་དེ་ཁྱུ་མཆོག་གི་ཤིང་རྟས་འོང་བ་འདི་ཡིན་ནོ། །བར་སྐབས་དེར་ཚེ་དང་ལྡན་པ་བསྲུང་དབང་གི་བུ་ངང་པའི་ཤིང་རྟས་སྟེང་གི་ནམ་མཁའ་ལས་རྫུ་འཕྲུལ་གྱིས་འོང་ངོ ། །དེ་ནས་ཁྱིམ་བདག་དེས་དྲིས་པ། མ་ག་དྷཱ་བཟང་མོ་གང་ངང་པའི་ཤིང་རྟས་འོང་བ་འདི་ཁྱོད་ཀྱི་སྟོན་པ་དེ་ཡིན་ནམ། དེས་དེ་ལ་སྨྲས་པ། འདི་ནི་དགེ་སློང་བསྲུང་དབང་གི་བུ་ཞེས་བྱ་བ། བཅོམ་ལྡན་འདས་ཀྱིས་སྙིང་རྗེ་ལ་གནས་པ་རྣམས་ཀྱི་མཆོག་ཏུ་བསྟན་པ་དེ་འདི་ཡིན་ཏེ། འདི་ཆུ་བོ་གང་གཱ་རྒལ་བར་འདོད་པ་ན་དམངས་མོ་འདུག་ཤིག་ཅེས་སྨྲས་པ་དང ། ཚིག་དེའི་རྗེས་ཐོགས་ཉིད་ལ་རི་བོ་བརྩེགས་པ་བཞིན་དུ་གནས་ཏེ། རྣམ་པ་ཐམས་ཅད་དུ་མི་འབབ་པར་བྱེད་པ་དེ་ངང་པའི་ཤིང་རྟས་འོང་བ་འདི་ཡིན་ནོ། །བར་སྐབས་དེར་ཚེ་དང་ལྡན་པ་རྣ་བ་བྱེ་བ་ཉི་ཤུ་རི་ནགས་ཀྱི་ཚོགས་ལ་འཆག་ཅིང་འདུག་པ་དེ་འཆག་བཞིན་དུ་འོང་ངོ ། །དེ་ནས་ཁྱིམ་བདག་དེས་དྲིས་པ། མ་ག་དྷཱ་བཟང་མོ་གང་ནགས་ཤིང་བརྒྱ་དག་གིས་ཁྱབ་པའི་ནགས་འདི་ལ་འཆག་ཅིང་འོང་བ་འདི་ཁྱོད་ཀྱི་སྟོན་པ་དེ་ཡིན་ནམ། དེས་དེ་ལ་སྨྲས་པ། འདི་ནི་དགེ་སློང་རྣ་ཅན་ཞེས་བྱ་བ་བཅོམ་ལྡན་འདས་ཀྱིས་བརྩོན་འགྲུས་རྩོམ་པ་རྣམས་ཀྱི་མཆོག་ཏུ་བསྟན་པ་ཡིན་ཏེ། འདི་སྐྱེས་པ་ཙམ་གྱིས་རྣ་བ་བྱེ་བ་ཉི་ཤུ་རི་བ་དང་བཅས་པར་སྐྱེས་པ་དང ། གང་གི་རྐང་མཐིལ་གྱི་འོག་ནས་སོར་བཞི་ཙམ་གྱི་གསེར་གྱི་སྤུ་ཡང་དག་པར་སྐྱེས་པ་དང ། གང་འདི་དང་པོའི་ཟན་ལ་ཀར་ཥ་པ་ཎཱ་ལྔ་བརྒྱ་ཟད་པར་བྱས་པ་དང ། གང་བཅོམ་ལྡན་འདས་སྙུང་བ་དང ། མཽད་གལ་གྱི་བུ་ཆེན་པོས་བཤོས་གཙང་ཉེ་བར་བླངས་པ་དང ། གང་གི་དྲིས་འོད་མའི་ཚལ་ཐམས་ཅད་ཀུན་དུ་གང་བ་ན། རྒྱལ་པོ་གཟུགས་ཅན་སྙིང་པོས་མནམས་ནས་མཆོག་ཏུ་ངོ་མཚར་སྐྱེས་ཏེ། གང་གི་རྐང་པ་གཉིས་བཞག་པ་ཙམ་གྱིས་ས་འདི་རབ་ཏུ་གཡོས་པ་དང ། གང་ཞིག་རབ་ཏུ་བྱུང་ནས་འཆག་སར་འཆག་པ་ན་དེའི་རྐང་པ་གཉིས་ལས་ཁྲག་བྱུང་བ་ཟགས་པ་ཁཝ་རྣམས་འཐུང་བ་དེ་འཆག་ཅིང་འོང་བ་འདི་ཡིན་ནོ། །བར་སྐབས་དེར་ཚེ་དང་ལྡན་པ་སྒྲ་གཅན་འཛིན་འཁོར་ལོས 70.320a སྒྱུར་བའི་ཆ་ལུགས་མངོན་པར་སྤྲུལ་ཏེ་འོང་བ་དང ། དེ་ནས་ཁྱིམ་བདག་དེས་དྲིས་པ། མ་ག་དྷཱ་བཟང་མོ་གང་འཁོར་ལོས་སྒྱུར་བའི་ཆ་བྱད་ཀྱིས་འོང་བ་འདི་ཁྱོད་ཀྱི་སྟོན་པ་དེ་ཡིན་ནམ། དེས་དེ་ལ་སྨྲས་པ། འདི་ནི་བཅོམ་ལྡན་འདས་ཀྱི་སྲས་བཅོམ་ལྡན་འདས་ཀྱིས་བསླབ་པ་འཛིན་པ་རྣམས་ཀྱི་མཆོག་ཏུ་བསྟན་པ་ཡིན་ཏེ། འདིས་ཡབ་ཀྱིས་སྤངས་པའི་དཔལ་སྟོན་པར་བྱེད་ཅིང་འཁོར་ལོས་སྒྱུར་བའི་ཆ་ལུགས་ཀྱིས་རིན་པོ་ཆེ་སྣ་བདུན་དང་ལྡན་པ་བུ་སྟོང་གིས་ཡོངས་སུ་བསྐོར་ཏེ། གཟའ་དང་རྒྱུ་སྐར་དང་སྐར་མའི་ཚོགས་ཀྱིས་བསྐོར་བའི་ཟླ་བ་ལྟ་བུ་དང ། རྒྱལ་པོའི་ལམ་བཟུང་ནས་འགྲོ་བ་མིའི་བདག་པོ་ལྟ་བུ་དང ། ཆུ་བོ་སྟོང་ཕྲག་གི་ཆུ་འབབ་པས་ཀུན་དུ་འགེངས་པའི་རྒྱ་མཚོ་ལྟ་བུ་དང ། འཇིགས་པ་དང་ནད་དང་མྱ་ངན་སེལ་བའི་སྐྱེ་དགུ་སྐྱོང་བ་ཆེན་པོ་ལྟ་བུ་དང ། རི་དགས་ཀྱི་ནང་ན་སེང་གེ་ལྟ་བུ་དང ། བྱ་རྣམས་ཀྱི་ནང་ན་ནམ་མཁའ་ལྡིང་ལྟ་བུ་དང ། ཐམས་ཅད་སེལ་བའི་ཉི་མ་དང ། གླིང་བཞི་ལ་དབང་བའི་འཁོར་ལོས་སྒྱུར་བ་དང ། ཆོས་བཟང་ན་མིག་སྟོང་ལྡན་པ་ཆོས་སྐྱོང་བ་ལྟ་བུར་འོང་བ་ཡིན་ནོ། །དེ་བཞིན་དུ་ལ་ལ་ནི་འབར་བར་བྱེད་པ་དང ། ལ་ལ་ནི་ཆར་འབེབས་པ་དང ། དེ་བཞིན་དུ་ཆོ་འཕྲུལ་སྣ་ཚོགས་པ་སྟོན་ཅིང་འོང་བ་ཡིན་ནོ། །ལ་ལ་ས་ལས་འཕགས་པ་དང ། །ལ་ལ་ནམ་མཁའི་གཞི་ལ་གནས། །ལ་ལ་སྟན་ནི་སྤྲུལ་བྱེད་དེ། །རྫུ་འཕྲུལ་ལྡན་པའི་མཐུ་ལ་ལྟོས། །དེ་ལྟར་བཅོམ་ལྡན་འདས་ཀྱི་སློབ་མ་རྣམས་ཡང་དག་པར་སོང་བ་དང ། དེ་ནས་བཅོམ་ལྡན་འདས་ཀྱིས་འོད་གང་གིས་འཛམ་བུའི་གླིང་ཐམས་ཅད་གསེར་བཙོ་མའི་མདོག་འདྲ་བའི་འོད་ཀྱིས་གང་བ་དེ་ལྟ་བུའི་འོད་བཀྱེ་ཞིང ། མཉན་ཡོད་ནས་བརྩམས་ཏེ་བུ་རམ་ཤིང་འཕེལ་གྱི་བར་འདིར་འོད་ཀྱི་དཀྱིལ་འཁོར་ཆེན་པོ་བཀྱེ་བས་གང་དུའང་མིག་གིས་མི་མཐོང་བ་མེད་པས་ཐམས་ཅད་ཀྱིས་མཐོང་བར་གྱུར་ཏོ། །བཅོམ་ལྡན་འདས་ཀྱང་ནམ་མཁའ་ལ་གཤེགས་པ་དང་ལག་ན་རྡོ་རྗེ་ནི་སྣམ་ལོགས་ནས་འབྲང་ངོ ། །གནས་གཙང་མ་པ་རྣམས་ནི་སྟེང་ནས་སོ། །འདོད་པ་ན་སྤྱོད་པའི་ལྷ་རྣམས་ནི་འོག་ནས་སོ། །གཡོན་ལོགས་ནས་ནི་བརྒྱ་བྱིན་ནོ། །གཡས 70.320b ནས་ནི་ཚངས་པའོ། །དེ་བཞིན་དུ་གཙུག་ཕུད་ལྔ་པ་དང ། ཤིན་དུ་དགའ་དང་མིག་སྦྱིན་ལ་སོགས་པ་དྲི་ཟ་རྣམས་པི་བང་དང་གླིང་བུ་དང་རྔ་དང་རྫ་རྔ་ལས་སོགས་པ་རོལ་མོའི་བྱེ་བྲག་སྙན་པ་རྣམས་རྡུང་ཞིང ། མེ་ཏོག་དང་བདུག་པ་དང་དྲི་དང་ཕྲེང་བ་རྣམས་ཀྱང་འཐོར་ཞིང་འབྱོར་པ་ཆེན་པོས་གཤེགས་ཏེ། བར་སྐབས་དེར་བཅོམ་ལྡན་འདས་སྲོག་ཆགས་སྟོང་ཕྲག་བདུན་བཅུ་རྩ་བདུན་བདེན་པ་ལ་ཐོག་མར་རབ་ཏུ་བཀོད་པར་མཛད་ནས་དེའི་འོག་ཏུ་བུ་རམ་ཤིང་འཕེལ་གྱི་གྲོང་ཁྱེར་དུ་གཤེགས་ཏེ། གྲོང་ཁྱེར་དེ་ན་ཡང་སྒོ་བཅཝ་བརྒྱད་ཡོད་པ་དང ། དེར་བཅོམ་ལྡན་འདས་ཀྱིས་སངས་རྒྱས་བཅཝ་བརྒྱད་སྤྲུལ་པར་མཛད་ནས་སྒོ་རེ་རེ་ཞིང་སངས་རྒྱས་སྣང་བར་གྱུར་པ་ནས་བཅོམ་ལྡན་འདས་མ་ག་དྷཱ་བཟང་མོའི་ཁྱིམ་དུ་གཤེགས་སོ། །དེ་ནས་སྐྱེ་བོའི་ཚོགས་ཆེན་པོ་དེ་རྣམས་ཀྱིས་སངས་རྒྱས་བཅོམ་ལྡན་འདས་མ་མཐོང་སྟེ། དེ་རྣམས་ཁྲོས་ནས་དེའི་ཁྱིམ་བཤིག་པར་བརྩམས་སོ། །དེ་ནས་བཅོམ་ལྡན་འདས་ཀྱིས་གྲོང་ཁྱེར་དེ་ཐམས་ཅད་ཤེལ་གྱི་རང་བཞིན་དུ་བྱིན་གྱིས་བརླབས་ཏེ། གང་ཁྱིམ་ཐམས་ཅད་དུའང་སངས་རྒྱས་ཀྱི་སྐུ་བཞུགས་པར་མཐོང་བར་མཛད་དོ། །ཇི་སྲིད་བུ་རམ་ཤིང་འཕེལ་དུ་མ་ག་དྷ་བཟང་མོ་ལ་སོགས་པའི་སྲོག་ཆགས་བརྒྱ་སྟོང་དུ་མ་རྣམས་ཀྱིས་བཅོམ་ལྡན་འདས་ལ་མེ་ཏོག་དང་དྲི་དང་ཕྲེང་བ་དང ། སྤོས་རྣམས་ཀྱིས་མཆོད་པ་བྱས་སོ། །བཅོམ་ལྡན་འདས་ཀྱིས་ཀྱང་མ་ག་དྷ་བཟང་མོ་ལ་སོགས་པའི་སྐྱེ་བོའི་ཚོགས་ཆེན་པོ་དེ་རྣམས་ལ་གང་ཞིག་ཐོས་ན་མ་ག་དྷཱ་བཟང་མོ་ལ་སོགས་པའི་སྲོག་ཆགས་བརྒྱ་སྟོང་དུ་མ་རྣམས་ཀྱིས་བདེན་པ་མངོན་དུ་མཐོང་བ་ཐོབ་པར་གྱུར་པ་དེ་ལྟ་བུའི་ཆོས་བསྟན་པ་མཛད་ཅིང ། འཁོར་དེ་ཐམས་ཅད་ཀྱང་སངས་རྒྱས་ལ་གཞོལ་བ་དང ། ཆོས་ལ་བབ་པ་དང ། དགེ་འདུན་ལ་འབབ་པར་གྱུར་ཏོ། །ཡང་དགེ་སློང་རྣམས་ཐེ་ཙོམ་སྐྱེས་ཏེ། ཐེ་ཙོམ་ཐམས་ཅད་གཅོད་པར་མཛད་པ་སངས་རྒྱས་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཇི་སྲིད་མ་ག་དྷཱ་བཟང་མོ་མཆིས་ནས་སྲོག་ཆགས་བརྒྱ་སྟོང་དུ་མ་མཐོ་རིས་དང་ཐར་པ་ལ་གཞོལ་བར་གྱུར་པ་དང ། 70.321a འདིས་སངས་རྒྱས་ཀྱི་མཛད་པ་བགྱིས་པ་ནི་ངོ་མཚར་ཆེའོ། །བཅོམ་ལྡན་འདས་ཀྱིས་བཀའ་སྩལ་པ། ད་ལྟར་འབའ་ཞིག་དུ་མ་ཟད་དེ། འདས་པའི་དུས་ན་འདིས་སངས་རྒྱས་ཀྱི་བྱ་བ་བྱས་པ་དེ་ཉོན་ཅིག་།དགེ་སློང་དག་སྔོན་བྱུང་བ་འདས་པའི་དུས་ན་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན། ཡང་དག་པར་རྫོགས་པའི་སངས་རྒྱས་འོད་སྲུང་ཞེས་བྱ་བ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། ཡང་དུས་དེའི་ཚེ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཀྲྀ་ཀི་ཞེས་བྱ་བ་རྒྱལ་པོ་བྱེད་དེ། དེའི་བུ་མོ་གསེར་གྱི་ཕྲེང་བ་དང་ལྡན་པ་ཞིག་བཙས་ཏེ། དེའི་མིང་ཡང་གསེར་ཕྲེང་ཅན་ཞེས་བྱ་བར་བཏགས་སོ། །ཇི་སྲིད་ཅིག་ན་བུ་མོ་དེ་ཆེར་སྐྱེས་པར་གྱུར་པ་དང་ན་ཟླ་གཞོན་ནུ་མ་ལྔ་བརྒྱ་ཐམས་ཅད་ཀྱང་གཞོན་ནུ་མས་བསྐོར་ཅིང་ཐམས་གཅིག་ཏུ་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དེ། དེ་ལ་དད་པ་ཡང་དག་པར་ཐོབ་པས་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་ལ་ཇི་སྲིད་འཚོའི་བར་དུ་ཆོས་གོས་དང ། བསོད་སྙོམས་དང་གཟིམས་ཆ་དང་སྙུན་གྱི་རྐྱེན་སྨན་དང ། ཡོ་བྱད་རྣམས་ཀྱིས་བསྙེན་བཀུར་བྱེད་དོ། །ཡང་དུས་དེའི་ཚེ་རྒྱལ་པོ་ཀྲྀ་ཀིས་མཚན་གཅིག་ལ་རྨི་ལམ་བཅུ་རྨིས་ཏེ། དེས་སྨྲས་པ། གླང་པོ་ཆེའི་རྒྱལ་པོ་སྐར་ཁུང་ནས་བྱུང་བ་ན་མཇུག་མ་ཕྲ་མོ་ཐོགས་པ་དང ། སྐོམ་པའི་ཕྱི་ནས་ཁྲོན་པ་སྙེག་པར་རྨི་བ་དང ། ཕྱེ་བྲེ་གང་དང་མུ་ཏིག་བྲེ་གང་ཚོང་བྱེད་པ་དང ། ཙན་དན་དང་ཤིང་རིན་མཉམ་པར་བྱེད་པ་དང ། ཀུན་དགའ་ར་བ་མེ་ཏོག་དང་འབྲས་བུ་ཕུན་སུམ་ཚོགས་པ་མ་བྱིན་པར་ལེན་པ་རྣམས་ཀྱིས་ཕྲོགས་པ་དང ། གླང་པོ་ཆེ་ཕྲུ་གུས་སྤོས་ཀྱི་གླང་པོ་འཇིགས་པར་བྱེད་པ་དང ། སྤྲེའུ་མི་གཙང་བས་གོས་པས་གཞན་ལ 70.321b སྐུད་པ་དང ། སྤྲིའུ་རྒྱལ་པོར་དབང་བསྐུར་བར་མཐོང་བ་དང ། རས་གཅིག་མི་བཅཝ་བརྒྱད་ཀྱིས་དྲས་ཀྱང་མ་རལ་བ་དང ། སྐྱེ་བོའི་ཚོགས་ཆེན་པོ་གཅིག་ཏུ་འདུས་ནས་འཐབ་པ་དང ། རྩོད་པ་དང་གཡུལ་འགྱེད་པ་དང་མཚང་འདྲུ་བར་གྱུར་པས་འཇིགས་པ་མཐོང་ངོ ། །དེ་ནས་རྒྱལ་པོ་དེ་སད་པ་དང་འཇིགས་ཤིང་སྐྲག་ལ་སྐྱོ་བས་ངའི་འཚོ་བའི་སྲོག་གི་བར་ཆད་དུ་གྱུར་པ་འམ། རྒྱལ་སྲིད་ལས་ཉམས་པར་མི་འགྱུར་རམ་སྙམ་སྟེ། དེས་བྲམ་ཟེ་རྨི་ལྟས་ཀྱི་མཚན་མ་སྟོན་ཤེས་པ་རྣམས་བསྡུས་ནས་དེ་རྣམས་ལ་རྨི་ལམ་དེ་རྣམས་སྨྲས་སོ། །དེ་རྣམས་ཀྱང་གསེར་ཕྲེང་ཅན་ལ་ཞེ་སྡང་བ་ཡིན་པས་དེ་རྣམས་ཀྱིས་སྨྲས་པ། ལྷ་ཁྱེད་ལ་ཐམས་ཅད་ཀྱི་ནང་ན་ཐུགས་སུ་བྱོན་པ་དེའི་སྙིང་དང་མེ་ལ་སྦྱིན་སྲེག་གི་མཆོད་སྦྱིན་མཛོད་ཅིག ། དེ་ནས་རྒྱལ་པོ་དེ་ཡི་མུག་པས་བསམས་པ། ཐམས་ཅད་ཀྱི་ནང་ན་ང་ལ་སྡུག་པ་ནི་ངའི་གསེར་ཕྲེང་ཅན་ཡིན་ནོ། །གསེར་ཕྲེང་ཅན་གྱིས་དེ་ཐོས་པ་དང ། དེ་ཡང་མཁས་པ་ཡིན་པས་རྒྱལ་པོ་དེའི་གན་དུ་སོང་སྟེ་ཕྱིན་ནས་སྨྲས་པ། ལྷ་ཉི་མ་ཤར་ན་སྒྲོན་མ་མེའི་འོད་དགོས་པ་ཅི་མཆིས། ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་འདི་དྲང་སྲོང་སྨྲ་བ་རི་དགས་རྒྱུ་བ་ན་བཞུགས་ཏེ་དེར་གཤེགས་ལ་ཞུས་ཤིག་དང ། བཅོམ་ལྡན་འདས་དེས་ཁྱེད་ལ་ཇི་ལྟར་ལུང་བསྟན་པ་དེ་བཞིན་དུ་ཁྱེད་ཀྱིས་ཟུང་ཤིག་།དེ་ནས་རྒྱལ་པོ་ཀྲྀ་ཀིས་གྲོང་ཁྱེར་བཱ་རཱ་ཎ་སཱིར་ང་དེང་བཅོམ་ལྡན་འདས་དེའི་དྲུང་དུ་འགྲོའོ་ཞེས་དྲིལ་ཆེན་པོ་བསྒྲགས་ནས་དེ་འཁོར་བརྒྱ་སྟོང་དུ་མ་དང ། གསེར་ཕྲེང་ཅན་དེ་དང་ཐབས་གཅིག་ཏུ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། །ཇི་སྲིད་ཅིག་ན་རྒྱལ་པོ་ཀྲྀ་ཀིས་སྟན་ལས་ལངས་ཏེ་བཅོམ་ལྡན་འདས་གང་ན་བ་དེར་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདིར་དགུང་གཅིག་ལ་བདག་གིས་རྨི་ལམ་བཅུ་ཁུམས་པ། གླང་པོ་ཆེ་སྐར་ཁུང་ནས་བྱུང་བ་ན། 70.322a དེའི་མཇུག་མ་ཐོགས་པ་ལ་སོགས་པ་སྔ་མ་བཞིན་ཏེ། བཅོམ་ལྡན་འདས་ཀྱིས་རྨི་ལམ་དེའི་འབྲས་བུ་འདིར་བདག་ལ་ལུང་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་མ་འཇིགས་ཤིག་།ཁྱོད་ཀྱི་ཡུལ་འཁོར་ཉམས་པར་མི་འགྱུར་ལ། སྲོག་གི་བར་ཆད་དུ་ཡང་མི་འགྱུར་གྱིས། རྒྱལ་པོ་ཆེན་པོ་གཞན་དུ་ན་མ་འོངས་པའི་ཚེ་སྐྱེ་དགུའི་ཚེ་ལོ་བརྒྱ་ཐུབ་པ་ན་ཤཱཀྱ་ཐུབ་པ་ཞེས་བྱ་བ་ཡང་དག་པར་རྫོགས་པའི་སངས་རྒྱས་འབྱུང་སྟེ། དེའི་ཕྱི་མའི་དུས་ན་ཉན་ཐོས་རྣམས་ལུས་མ་བསྡམས་པ། སེམས་མ་བསྡམས་པ། ཚུལ་ཁྲིམས་མ་བསྡམས་པ། ཤེས་རབ་མ་བསྡམས་པ་འབྱུང་བར་འགྱུར་ཏེ། དེ་རྣམས་གཉེན་གྱི་ཚོགས་སྤངས་ནས་རབ་ཏུ་འབྱུང་བར་འགྱུར་ཏེ། དེ་ནས་གཙུག་ལག་ཁང་རྣམས་སུ་ཁྱིམ་གྱི་འདུ་ཤེས་འཇོག་པས་ཆགས་པར་འགྱུར་ཏེ། གླང་པོ་ཆེ་སྐར་ཁུང་ནས་བྱུང་བ་ན་དེའི་མཇུག་མ་ཐོགས་པ་ནི་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་སྐོམ་པའི་ཕྱི་ནས་ཁྲོན་པ་སྙེག་པར་རྨི་ལམ་དུ་མཐོང་བ་གང་ཡིན་པ་དེ་ནི་དེ་རྣམས་གཙུག་ལག་ཁང་གི་ནང་ན་ལྷན་ཅིག་གནས་པ་རྣམས་ལ་ཆོས་སྟོན་པར་འགྱུར་ཡང་དེ་རྣམས་ཉན་པར་འདོད་པར་མི་བྱེད་ཅིང་ཡིད་ལ་མི་འཇོག་སྟེ། དེའི་སྔ་ལྟས་ནི་འདི་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་ཕྱེ་བྲེ་གང་དང་མུ་ཏིག་བྲེ་གང་ཚོང་བྱེད་པར་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་ཉན་ཐོས་རྣམས་ཏེ། གང་བཟའ་བ་ཙམ་གྱི་དོན་དུ་དབང་པོ་དང་སྟོབས་དང་བྱང་ཆུབ་ཀྱི་ཡན་ལག་རིན་པོ་ཆེ་རྣམས་ཡང་དག་པར་སྟོན་པར་འབྱུང་བར་འགྱུར་ཏེ་དེའི་སྔ་ལྟས་ནི་འདི་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་ཙན་དན་དང་ཤིང་མཉམ་པོར་ཚོང་བྱེད་པར་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་ཉན་ཐོས་རྣམས་མུ་སྟེགས་ཀྱི་ཚིག་གང་ཡིན་པ་རྣམས་བཟུང་ནས་སངས་རྒྱས་ཀྱི་བཀའ་དང་སྙོམས་པ་འབྱུང་བར་འགྱུར་ཏེ་དེའི་སྔ་ལྟས་ནི་འདི་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་ཀུན་དགའ་ར་བ་འབྲས་བུ་ཕུན་སུམ་ཚོགས་པ་མ་བྱིན་པར་ལེན་པ་རྣམས་ཀྱིས་ཕྲོགས་པར་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་ཉན་ཐོས་ལུས་མ་བསྡམས་པ། སེམས་མ་བསྡམས་པ། 70.322b ཚུལ་ཁྲིམས་མ་བསྡམས་པ། ཤེས་རབ་མ་བསྡམས་པ་རྣམས་འབྱུང་བར་འགྱུར་ཏེ། དེ་རྣམས་དགེ་འདུན་རྣམས་ཀྱི་མེ་ཏོག་གི་མཆོག་དང ། འབྲས་བུའི་མཆོག་རྣམས་འཚོ་བའི་ཕྱིར་དགེ་འདུན་ལས་བཅད་ནས་ཁྱིམ་པ་རྣམས་ལ་སྟེར་བར་འགྱུར་ཏེ། དེའི་སྔ་ལྟས་ནི་འདི་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་གླང་པོ་ཕྲུ་གུས་སྤོས་ཀྱི་གླང་པོ་འཇིགས་པར་བྱེད་པར་རྨི་ལམ་དུ་མཐོང་བ་གང་ཡིན་པ་འདི་ནི་དེ་ཉིད་ཀྱི་ཉན་ཐོས་རྣམས་ཚུལ་ཁྲིམས་འཆལ་བ། སྡིག་པའི་ཆོས་ཅན་དེ་རྣམས་གང་དགེ་སློང་ཚུལ་ཁྲིམས་དང་ལྡན་པ། དགེ་བའི་ཆོས་ཅན་རྣམས་ཟིལ་ཀྱིས་གནོན་པར་བྱེད་པར་འགྱུར་ཏེ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་སྤྲེའུ་མི་གཙང་བས་གོས་པས་གཞན་ལ་སྐུད་པར་རྨི་ལམ་དུ་མཐོང་བ་གང་ཡིན་པ་འདི་ནི་དེ་ཉིད་ཀྱི་ཉན་ཐོས་ཚུལ་ཁྲིམས་འཆལ་བ། སྡིག་པའི་ཆོས་ཅན་རྣམས་འབྱུང་བར་འགྱུར་ཏེ། དེ་རྣམས་ཀྱིས་ཚུལ་ཁྲིམས་དང་ལྡན་པ་རྣམས་ལ་སྐུར་པ་འདེབས་པར་འགྱུར་ཏེ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་སྤྲེའུ་རྒྱལ་པོར་དབང་བསྐུར་བར་མཐོང་བ་གང་ཡིན་པ་དེ་ནི་དུས་དེའི་ཚེ་རྨོངས་པ་རྣམས་རྒྱལ་པོར་དབང་བསྐུར་བར་འགྱུར་ཏེ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་རས་གཅིག་མི་བཅཝ་བརྒྱད་ཀྱིས་དྲས་ཀྱང་མ་རལ་བར་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་བསྟན་པ་སྡེ་བཅཝ་བརྒྱད་དུ་གྱེས་པར་གྱུར་ཀྱང་རྣམ་པར་གྲོལ་བའི་རས་ནི་རལ་བར་བྱ་བར་མི་ནུས་ཏེ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་སྐྱེ་བོའི་ཚོགས་ཆེན་པོ་གཅིག་ཏུ་འདུས་ནས་འཐབ་པ་དང་རྩོད་པ་དང་གཡུལ་འགྱེད་པ་དང ། མཚང་འདྲུ་བར་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་བསྟན་པ་རྩོད་པས་ནུབ་པར་འགྱུར་ཏེ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་དེ་ལྟར་མི་བཟད་པ་རྣམས་མ་འོངས་པའི་དུས་ན་འབྱུང་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། གང་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་ལའང་རྒྱལ་པོ་ཀྲྀ་ཀི་དང ། གསེར 70.323a ཕྲེང་ཅན་གྱིས་ཐར་པའི་ཆ་དང་འཐུན་པའི་དགེ་བའི་རྩ་བ་རྣམས་བསྐྱེད་པ་ཡིན་ནོ། །དགེ་སློང་དག་འདི་ཇི་སྙམ་དུ་སེམས། དེའི་ཚེ་ན་གསེར་ཕྲེང་ཅན་གང་ཡིན་པ་དེ་ནི་མ་ག་དྷཱ་བཟང་མོ་འདི་ཉིད་ཡིན་ཏེ། དེའི་ཚེ་ཡང་འདིས་སངས་རྒྱས་ཀྱི་བྱ་བ་བྱས་ཏེ། ད་ལྟར་ཡང་འདི་འོངས་ནས་སངས་རྒྱས་ཀྱི་བྱ་བ་བྱས་སོ། །ཡང་དགེ་སློང་རྣམས་ཐེ་ཙོམ་སྐྱེས་ནས། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་གསེར་ཕྲེང་གིས་ལས་ཅི་ཞིག་བགྱིས་ན་གསེར་གྱི་ཕྲེང་བ་བཏགས་པར་སྐྱེས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ཉིད་ཀྱིས་ལས་བྱས་པ་ཡོད་དེ། སྔོན་བྱུང་བ་ན་ཞིང་པ་གཞན་ཞིག་གི་ཆུང་མར་གྱུར་ཏེ། རང་སངས་རྒྱས་ཀྱི་མཆོད་རྟེན་ལ་ཁ་དོག་སྣ་ཚོགས་པའི་མེ་ཏོག་རྣམས་ཀྱི་ཕྲེང་བ་བྱས་ནས་བཏགས་ཏེ། ལས་དེའི་རྣམ་པར་སྨིན་པས་གསེར་གྱི་ཕྲེང་བ་བཏགས་པར་སྐྱེས་སོ། །དེ་བས་ན་དགེ་སློང་དག་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ནི་གཅིག་ཏུ་དཀར་བ་ཡིན་ཏེ། འདྲེན་མ་རྣམས་ཀྱི་ནི་འདྲེན་མའོ། །དགེ་སློང་དག་དེ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་རྣམས་ལ་མངོན་པར་བརྩོན་པར་བྱ་སྟེ། དགེ་སློང་དག་ཁྱེད་རྣམས་ཀྱིས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། དགེ་སློང་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །མ་ག་དྷཱ་བཟང་མོའི་རྟོགས་པ་བརྗོད་པ་རྫོགས་སྷོ།། ་་་་་་་་་་་་་་་་་་་་་་་་་་་་་་་་།། །།རྒྱ་གར་གྱི་མཁན་པོ་དྷརྨ་ཤྲཱི་བྷ་དྲ་དང ། ཞུ་ཆེན་གྱི་ལོཙྪ་བ་དགེ་སློང་ཚུལ་ཁྲིམས་ཡོན་ཏན་གྱིས་བསྒྱུར་ཏེ། སྒྲ་སྒྱུར་གྱི་ལོཙྪ་བ་ཆེན་པོ་དགེ་སློང་རིན་ཆེན་བཟང་པོས་བཅོས་ཏེ་གཏན་ལ་ཕབ་པ།། །། # |