(ཁ)་༄#། !་།གསང་སྔགས་རྒྱུད་འབུམ་གྱི་སྐོར་བཞུགས་སོ། །[(黃)་秘密經第二部] 85.1b ༄##། །རྒྱ་གར་སྐད་དུ། ཤྲཱི་ཛྙཱ་ན་གར་བྷ་ནཱ་མ་ཡོ་གི་ནཱི་མ་ཧཱ་ཏན་ཏྲ་རཱ་ཛ་ཛཱ་ཏི་ར་ཛ། ་བོད་སྐད་དུ། དཔལ་ཡེ་ཤེས་སྙིང་པོ་ཞེས་བྱ་བ་རྣལ་འབྱོར་མ་ཆེན་མོའི་རྒྱུད་ཀྱི་རྒྱལ་པོའི་རྒྱལ་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་རབ་ཀྱི་རྩེ་མོར་བྱེ་བ་ཕྲག་བདུན་བཅུ་རྩ་གཉིས་ཀྱི་གྲངས་ཀྱི་མཁའ་འགྲོ་དང་མཁའ་འགྲོ་མས་ཡོངས་སུ་བསྐོར་ནས་བྷ་གུ་ལ་ཆེན་པོའི་སྐྱེད་མོས་ཚལ་ན་བཞུགས་སོ། །དེར་བཅོམ་ལྡན་འདས་ཀྱིས་ལྷ་མོ་ལེགས་དགྱེས་དབང་མོ་དང་ལྷན་ཅིག་ཏུ་རོལ་པ་མཛད་པའི་ཚེ་རྗེ་བཙུན་ལ་བ་སྤུ་ལངས་སོ། །དེའི་དུས་སུ་བཅོམ་ལྡན་འདས་མ་ལེགས་དགྱེས་ཀྱི་སྦྱོར་བ་ལས་ལངས་ཏེ་ལན་གསུམ་དུ་བསྐོར་བ་བྱས་ནས་ཞབས་ལ་མགོ་བོས་ཕྱག་འཚལ་ཏེ། འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་འདས་ཅིའི་ཕྱིར 85.2a ཉིད་ཀྱི་སྐུ་ལ་བ་སྤུ་ལངས་ལགས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་བཅོམ་ལྡན་འདས་མ་དེ་ལ་དགོས་པ་ཅི་ཞིག་ཡོད། གང་གི་དོན་གྱི་ཕྱིར་ངའི་སྐུ་ལ་བ་སྤུ་ལངས་པ་དེ་ནི་གསང་བ་ཆེན་པོའོ། །བཅོམ་ལྡན་འདས་མས་གསོལ་པ། གསང་བ་ཆེན་པོ་ལགས་མོད་ཀྱང་མཆོག་གི་དབང་ཕྱུག་བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། ང་ཡིས་ལེགས་དགྱེས་ཀྱི་བདེ་བ་ཉམས་སུ་མྱོང་ཞིང་སྟེང་དང་འོག་ན་གནས་པའི་དགའ་བའི་སྐྱེད་བྱེད་མ་རྣམས་ལ་འདུས་པ་ལས་བ་སྤུ་ལངས་སོ། །བཅོམ་ལྡན་འདས་མས་གསོལ་པ། སྟེང་དང་འོག་ན་གནས་པའི་དགའ་བ་སྐྱེད་བྱེད་མ་རྣམས་ལ་འདུས་པ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། སྟེང་དང་འོག་ན་གནས་པའི་དགའ་བ་སྐྱེད་བྱེད་མ་རྣམས་ལ་གང་ཞིག་འདུས་པ་དེ་ཅིའི་ཕྱིར་མི་ཤེས། བཅོམ་ལྡན་འདས་མས་གསོལ་པ། བཅོམ་ལྡན་འདས་དེ་སྐད་དུ་དེ་ལྟར་ནི་ལགས་མོད་ཀྱི། འོན་ཀྱང་མི་ཤེས་པའི་ཕྱིར་བཅོམ་ལྡན་འདས་ཀྱི་དྲུང་དུ་བདག་གིས་ནི་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། འདི་ནི་སོ་སོ་རང་གིས་ཉམས་སུ་མྱོང་བ་ཡིན་མོད་ཀྱང ། འོན་ཀྱང་ཁྱོད་ཀྱི་ངོར་ངས་བཤད་པར་བྱ་སྟེ། དགའ་བྲལ་གྱི་དགའ་བ་འབྱུང་བའི་སྟོང་ཕྲག་བདུན་བཅུ་རྩ་གཉིས་ཀྱི་བདག་ཉིད་ཀྱི་རྩའི་དྲ་བ་འདར་ཞིང་གཡོས་པ་ཙམ་གྱིས་ཚུལ་ཤར་རོ། །ཚུལ་ཤར་བས་ཐིག་ལེའི་རྒྱལ་པོ་ཞུའོ། །ཐིག་ལེའི་རྒྱལ་པོ་ཞུ་བ་ལས་སྟེང་དང་འོག་ན་གནས་པའི་དགའ་བ་སྐྱེད་བྱེད་མ་རྣམས་ལ་འདུས་པའོ། །དེ་སྐད་ཅེས་ཐོས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། དམ་དུ་ཁྱུད་པ་བྱས་ནས་མ་མཆུའི་བདུད་རྩྀའི་བཏུང་བས་དགྱེས་པར་བྱ་ཏེ་ཕྱི་ནས་ཡང་ཞུ་བ་མཛད་དོ། །ཀྱཻ་བཅོམ་ལྡན་འདས་དགའ་བྲལ་གྱི་དགའ་བའི་དུས་སུ་འདུས་པ་ལགས 85.2b ན། དེ་ལ་སྦྱོར་བ་མེད་པ་གང་གི་དུས་ལགས། བཅོམ་ལྡན་འདས་ཀྱིས་བཀའ་སྩལ་པ། དྲིས་པ་ཡང་དག་དགྱེས་པ་མཆོག་།སངས་རྒྱས་རྣམས་ཀྱིས་རྙེད་དཀའ་བ། །དགའ་བྲལ་དུས་སུ་སྦྱོར་བ་མེད། །དེ་ནི་དགའ་བྲལ་དགའ་བ་མིན། །བཅོམ་ལྡན་འདས་མས་གསོལ་པ། ཀྱཻ་བཅོམ་ལྡན་འདས་དགའ་བྲལ་གྱི་དགའ་བ་དང་དགའ་བྲལ་ལ་ཁྱད་པར་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། དགའ་མོ་ཁྱོད་ཅིའི་ཕྱིར་དེ་སྐད་ཅེས་སྨྲ། དགའ་བྲལ་གྱི་དགའ་བ་དང་དགའ་བྲལ་གཉིས་ལ་ཁྱད་པར་ཆེར་ཡོད་པ་དེ་བརྗོད་པར་བྱའོ། །གང་ཞིག་དགའ་བྲལ་གྱི་དགའ་བ་དེ་ཞུ་བ་གནས་པ་སྟེ་འཕོ་བ་ལ་སོགས་པ་དང་བྲལ་བའོ། །གང་ཞིག་དགའ་བྲལ་དེ་ནི་དགའ་བ་དང་བྲལ་བ་ཞུ་བ་འཕོ་ཞིང་འཇིག་པའོ། །དགའ་བྲལ་གྱི་དགའ་བ་ནི་ཞུ་བ་གནས་པ་སྟེ། འཕོ་བ་ལ་སོགས་པ་དང་བྲལ་བའི་ཕྱིར་རང་གིས་ཉམས་སུ་མྱོང་བའི་ངོ་བོའོ། །བཅོམ་ལྡན་འདས་མས་གསོལ་པ། རང་གིས་ཉམས་སུ་མྱོང་བའི་མཚན་ཉིད་དགའ་བྲལ་གྱི་དགའ་བ་དང ། ལྷན་ཅིག་སྐྱེས་པའི་དགའ་བའི་ཁྱད་པར་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། ལྷན་ཅིག་སྐྱེས་པའི་དགའ་བ་ནི་དངོས་པོ་ཡང་མ་ཡིན། དངོས་པོ་མ་ཡིན་པ་ཡང་མ་ཡིན། གསང་བ་ཡང་མ་ཡིན། ཡེ་ཤེས་ཀྱང་མ་ཡིན། ཡེ་ཤེས་ལས་བྱུང་བ་ཡང་མ་ཡིན། སྲིད་པ་ཡང་མ་ཡིན། མྱ་ངན་ལས་འདས་པ་ཡང་མ་ཡིན། ཆར་ཡང་མ་ཡིན། ཐིག་ལེ་ཡང་མ་ཡིན། ཚུལ་ཡང་མ་ཡིན། ཚུལ་ཙམ་ཡང་མ་ཡིན། མཆོག་ཀྱང་མ་ཡིན། གཞན་མཆོག་ཀྱང་མ་ཡིན། ཤར་བ་ཡང་མ་ཡིན། ནུབ་པ་ཡང་མ་ཡིན། གཟུགས་ཀྱང་མ་ཡིན། སྒྲ་ཡང་མ་ཡིན། དྲི་ཡང་མ་ཡིན། རོ་ཡང་མ་ཡིན། རེག་བྱ་ཡང་མ་ཡིན། ཡི་གེ་ཡང་མ་ཡིན། རྟེན་ཡང་མ་ཡིན། བརྟེན་པ་ཡང་མ་ཡིན། ཁམས་ཀྱང་མ་ཡིན། ཤེས་རབ་ཀྱང་མ་ཡིན། ཐབས་ཀྱང་མ་ཡིན། ཐིམ་པ་ཡང་མ་ཡིན། ལོངས་སྤྱོད་ཀྱང་མ་ཡིན། དབང་ཡང་མ་ཡིན། སྤྲུལ་པ་ཡང་མ་ཡིན། ཆོས་ཀྱང་མ་ཡིན། ལོངས་སྤྱོད་ཀྱང་མ་ཡིན། ལུས་ཀྱང་མ་ཡིན། ངག་ཀྱང་མ་ཡིན། ཡིད་ཀྱང་མ་ཡིན། 85.3a རྣམ་པ་ཐམས་ཅད་དང་རྣམ་པར་བྲལ་བ། མི་ཟད་པ། དྲི་མ་མེད་པ། སྐྱེ་བ་མེད་པ། འགག་པ་མེད་པ། རྟག་ཏུ་ཤར་བའོ། །བཅོམ་ལྡན་འདས་མས་གསོལ་པ། དེ་ལྟ་བུའི་ལྷན་ཅིག་སྐྱེས་པའི་དགའ་བ་གང་ལས་རྙེད། བཅོམ་ལྡན་འདས་ཀྱིས་བཀའ་སྩལ་པ། དགའ་བྲལ་གྱི་དགའ་བ་ཉམས་སུ་མྱོང་བ་ལས་རྙེད་དེ། དེ་བཞིན་དུ་བསམ་གཏན་ལ་སོགས་པས་མ་ཡིན་ནོ། །བཅོམ་ལྡན་འདས་མས་གསོལ་པ། ལྷན་ཅིག་སྐྱེས་པའི་དགའ་བ་དེ། དགའ་བྲལ་གྱི་དགའ་བའི་ཉམས་སུ་མྱོང་བའི་རྒྱུ་ལགས་སམ་འབྲས་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ལྷན་ཅིག་སྐྱེས་པའི་དགའ་བའི་རྒྱུ་ཡིན་ཏེ་འབྲས་བུ་མ་ཡིན་ནོ། །བཅོམ་ལྡན་འདས་མས་གསོལ་པ། ལྷུན་གྱིས་གྲུབ་པའི་ལྷན་ཅིག་སྐྱེས་པའི་དགའ་བ་འབྱུང་བ་ལ་རྒྱུའི་དངོས་པོས་དགོས་པ་ཅི་མཆིས། རང་བཞིན་མེད་པའི་ཕྱིར་རོ། །ཇི་ལྟར་སྲེག་པ་ལ་དུད་པ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དེ་སྐད་དུ་སྨྲ་བ་ནི་ཚད་མ་མ་ཡིན་ཏེ། དང་པོར་སྲེག་པ་མེད་པར་དེར་དུད་པ་འབྱུང་བ་གང་ལས་འོང ། དེ་ལྟ་བུའི་རིགས་ལས་ལྷན་ཅིག་སྐྱེས་པའོ། །བཅོམ་ལྡན་འདས་མས་གསོལ་པ། དེ་ལྟར་ལགས་ན་ལྷན་ཅིག་སྐྱེས་པ་ལས་དགའ་བྲལ་གྱི་དགའ་བ་ནི་རྒྱུ་ཡང་ཡིན་ལ་འབྲས་བུ་ཡང་ཡིན་ན། འོན་ཀྱང་འདིར་རྒྱུ་ནི་གཉིས་སུ་དབྱེ་བ་དང ། འབྲས་བུ་ཡང་གཉིས་སུ་དབྱེ་སྟེ། གསལ་བའི་རྒྱུ་དང ། འབྱུང་བའི་རྒྱུའོ། །འབྲས་བུ་ཡང་དེ་བཞིན་ནོ། །བཅོམ་ལྡན་འདས་མས་གསོལ་པ། ཀྱཻ་བཅོམ་ལྡན་འདས་གསལ་བའི་རྒྱུ་ཅི་འདྲ་བ་དང ། འབྱུང་བའི་རྒྱུ་ཅི་འདྲ་བ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གསལ་བའི་རྒྱུ་ནི་དགའ་བྲལ་གྱི་དགའ་བ་སྟེ། ཇི་ལྟར་མར་མེ་བཞིན་ནོ། །འབྱུང་བའི་རྒྱུ་ནི་དགའ་བ་ལས་མཆོག་གི་དགའ་བ་སྟེ། ཇི་ལྟར་ས་བོན་ལས་མྱུ་གུ་བཞིན་ནོ། །དགའ་བྲལ་གྱི་དགའ་བ་ནི་གཞན་རྣམས་དང་མི་འདྲ་བའི་ཕྱིར་འབྱུང་བའི་རྒྱུ་མ་ཡིན་ཏེ། དགའ་བ་གཞན་དང་མི་འདྲ་བ་ལས་འབྱུང་བ་ཡིན་ནོ། །དཔལ་ཡེ་ཤེས་སྙིང་པོ་ལས་ལྷན་ཅིག་སྐྱེས་པའི་དགའ་བའི 85.3b དོན་ཞེས་བྱ་བའི་ལེའུ་སྟེ་དང་པོའོ།། །། བཅོམ་ལྡན་འདས་མས་གསོལ་པ། གང་ཞིག་དཔལ་ཕྱག་རྒྱ་ཆེན་པོའི་ཐིག་ལེའི་རྒྱུད་ཀྱི་རྒྱལ་པོ་ལས་ཕྱག་རྒྱ་ཆེན་པོའི་དོན་བསྟན་པ་དེ་ཐོབ་པར་བྱ་བའི་དོན་དུ་དེའི་ཐབས་བཅོམ་ལྡན་འདས་ཀྱིས་བདག་ལ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་བདག་ལ་ཞུས་པ་གང ། །ཉོན་ཅིག་ལྷ་མོ་རབ་ཏུ་བཤད། །ཕྱག་རྒྱ་ཆེན་པོ་ནི་འདིར་བཞིར་དབྱེ་བ་སྟེ། ལས་ཀྱི་ཕྱག་རྒྱ་དང ། དམ་ཚིག་གི་ཕྱག་རྒྱ་དང ། ཡེ་ཤེས་ཀྱི་ཕྱག་རྒྱ་དང ། ཆོས་ཀྱི་ཕྱག་རྒྱའོ། །གང་ཞིག་ལས་ཀྱི་ཕྱག་རྒྱ་ནི་སྣང་བའི་རང་བཞིན་དགའ་བའི་ལོ་དང་ལྡན་པའོ། །གང་ཞིག་དམ་ཚིག་གི་ཕྱག་རྒྱ་དེ་ནི་སྣང་བ་མཆེད་པའི་རང་བཞིན་སྐྱེ་མཆེད་ཀྱི་ལོ་དང་ལྡན་པའོ། །གང་ཞིག་ཡེ་ཤེས་ཀྱི་ཕྱག་རྒྱ་དེ་ནི་སྣང་བ་ཐོབ་པའི་རང་བཞིན་ཁམས་ཀྱི་ལོ་དང་ལྡན་པའོ། །གང་ཞིག་ཆོས་ཀྱི་ཕྱག་རྒྱ་དེ་ནི་འོད་གསལ་གྱི་རང་བཞིན་ནོ། །ཕྱག་རྒྱ་ཆེན་པོ་དེ་ཡང་འོད་གསལ་མ་ཡིན་པ་གཞན་ལས་མི་རྙེད་དོ། །བཅོམ་ལྡན་འདས་མས་གསོལ་པ། བཅོམ་ལྡན་འདས་འོད་གསལ་ཞེས་བགྱི་བ་ཇི་ལྟར་ལགས། གང་དུ་གནས་པ་ཡིན། བཅོམ་ལྡན་འདས་ཀྱིས་བཀའ་སྩལ་པ། འོད་གསལ་ནི་ནམ་མཁའི་དབུས་སུ་གནས་པའི་ཐིག་ལེའི་ངོ་བོ་སྟེ་དེ་ནི་ཕྱག་རྒྱ་ཆེན་པོ་རྙེད་པར་འགྱུར་རོ། །བཅོམ་ལྡན་འདས་མས་གསོལ་པ། རེ་ཤིག་འོད་གསལ་ནི་ཇི་ལྟར་རྙེད་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ལས་དང་དམ་ཚིག་དང་ཡེ་ཤེས་དང་ཆོས་ཀྱི་ཕྱག་རྒྱས་སོ། །བཅོམ་ལྡན་འདས་མས་གསོལ་པ། ཕྱག་རྒྱ་རྣམས་ཉིད་ནི་གང་ལས་རྙེད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དབང་བསྐུར་བ་ཕྱིའི་ཕྱག་རྒྱ་ལ་བརྟེན་ནས་ནང་གི་ཕྱག་རྒྱ་རྣམས་རྙེད་དོ། །བཅོམ་ལྡན་འདས་མས་གསོལ་པ། ཕྱི་དང་ནང་གི་ཕྱག་རྒྱ་དེ་གནས་གང་དུ་གནས་པར་འགྱུར། མཚན་ནི་ཇི་ལྟ་བུ། རང་གི་ངོ་བོ་ནི་ཇི་ལྟ་བུ། དེར་དབང་ནི་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། འདིར་དབང་ནི་བཞི་སྟེ། སློབ་དཔོན་དང་གསང་བ་དང་ཤེས་རབ་ཡེ་ཤེས་དང ། དེ་ལྟར་དེ་བཞིན་བཞི་པའོ། །སློབ་དཔོན་གྱི་དབང་ནི་དགའ་བའི་ལོ་དང་ལྡན་པ་གཞོན་ནུ་མ་ལ་རྡོ་རྗེ་དང་དྲིལ་བུ་མཉམ་པར་ལྡན་པ་ནུ་མ་དང་འཛའ་གུ་ནི་རེག་པར 85.4a བྱས་པས་སོ། །གསང་བའི་དབང་ནི་སྐྱེ་མཆེད་ཀྱི་ལོ་དང་ལྡན་པའི་གཞོན་ནུ་མ་ལ་ནང་གི་རྐན་ཡོངས་སུ་འཇིབས་པ་ལས་སོ། །ཤེས་རབ་ཡེ་ཤེས་ནི་ཁམས་ཀྱི་ལོ་དང་ལྡན་པའི་གཞོན་ནུ་མ་ལ་ལྷན་ཅིག་བསྲུབ་པ་དང་བསྲུབ་པའི་ཐབས་ཆེན་པོ་ལས་ཞུ་བ་འཕོ་བའི་དུས་སུ་ཡེ་ཤེས་ཉམས་སུ་མྱོང་བས་སོ། །དེ་ལྟར་དེ་བཞིན་བཞི་པ་ནི་ཤེས་རབ་ཡེ་ཤེས་དེ་ཉིད་བརྟན་པར་བྱེད་པ་སྟེ། དེའི་ཕྱིར་དེ་ལྟར་དེ་བཞིན་ཞེས་བསྟན་པ་ཡིན་ནོ། །བརྟན་པར་བྱས་པ་ཙམ་གྱིས་དྲུག་བཅུ་རྩ་བཞིའི་འདབ་མའི་ནང་དུ་ཕྱག་རྒྱ་བཞི་མཉམ་པར་སྦྱོར་བར་འགྱུར་བ་ཡིན་ནོ། །དེ་ཡང་འཇུག་པ་དང ། གནས་པ་དང ། འགྲོ་བ་དང ། རྟེན་པའི་ངོ་བོས་སོ། །འཇུག་པ་ནི་གཏུམ་མོའོ། །གནས་པ་ནི་རང་བཞིན་གྱིས་རྟོག་པ་མེད་པའོ། །འགྲོ་བ་ནི་བྱ་གདོང་མའི་རྩའོ། །རྟེན་པའི་ངོ་བོས་སྒྲོག་མའི་རྩའོ། །དོན་དམ་པར་ཕྱག་རྒྱ་ཆེན་པོ་གཅིག་པུ་སྟེ། འོན་ཀྱང་ལས་ཀྱི་རང་བཞིན་གྱིས་བཞིར་དབྱེའོ། །བཅོམ་ལྡན་འདས་མས་གསོལ་པ། བཅོམ་ལྡན་འདས་དེ་རྣམས་ལ་ལས་ཀྱི་རང་བཞིན་གྱི་བྱེ་བྲག་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ཞི་བ་དང ། རྒྱས་པ་དང ། དབང་དང ། དྲག་པོ་སྟེ། ལས་ཀྱི་བྱེ་བྲག་གིས་ཕྱག་རྒྱ་ཆེན་པོས་ཐོབ་པའོ། །བཅོམ་ལྡན་འདས་མས་གསོལ་པ། བཅོམ་ལྡན་འདས་ཞི་བ་དང ། རྒྱས་པ་དང ། དབང་དང ། དྲག་པོ་རྣམས་ཀྱི་མིང་དང་སྤྱོད་པ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ཞི་བ་ནི་རྒོད་པའོ། །རྒྱས་པ་ནི་བལྟ་བའོ། །དབང་ནི་ལག་པས་མཁྱུད་པས་སོ། །དྲག་པོ་ནི་གཉིས་ཀྱིས་གཉིས་སྙོམས་པར་འཇུག་པའོ། །དེ་རྣམས་ལ་སྤྱོད་པའི་ཚངས་པའི་གནས་པའི་སྤྱོད་པ་དང ། བརྟུལ་ཞུགས་ཆེན་པོའི་སྤྱོད་པ་དང ། གོས་བྲལ་གྱི་བརྟུལ་ཤུགས་ཀྱི་སྤྱོད་པ་དང ། རང་དབང་གི་སྤྱོད་པས་སོ། །དཔལ་ཡེ་ཤེས་སྙིང་པོ་ལས་ཕྱག་རྒྱ་ཆེན་པོ་དང ། དབང་བསྐུར་བའི་དོན་ཞེས་བྱ་བའི་ལེའུ་སྟེ་གཉིས་པའོ།། །། བཅོམ་ལྡན་འདས་མས་གསོལ་པ། དབང་བསྐུར་བའི་དུས་སུ་དཀྱིལ་འཁོར་རྣམས་ཇི་ལྟ་བུ། སློབ་དཔོན 85.4b ནི་ཇི་ལྟ་བུས་བྱ། བཅོམ་ལྡན་འདས་ཀྱིས་བཀའ་སྩལ་པ། སློབ་དཔོན་གྱི་དབང་བསྐུར་བའི་དུས་སུ་རྡུལ་ཚོན་ལ་སོགས་པའི་དཀྱིལ་འཁོར་རོ། །གསང་བའི་དབང་ལ་བླ་མ་ལ་དབུལ་བའི་དཀྱིལ་འཁོར་ནི་རང་བྱུང་གི་མེ་ཏོག་དང་ལྡན་པའི་མེ་ཏོག་གིས་སོ། །ཤེས་རབ་ཡེ་ཤེས་ཀྱི་དབང་གི་དུས་སུ་བྱང་ཆུབ་ཀྱི་སེམས་དང་ལྡན་པའི་བཞི་མཉམ་གྱིས་སོ། །བཞི་པའི་དུས་སུ་གཞན་མ་ཡིན་པ་བྱང་ཆུབ་ཀྱི་སེམས་འབའ་ཞིག་དཀྱིལ་འཁོར་གྱིས་སོ། །དེ་ལ་སློབ་དཔོན་ནི་མཚན་ཐམས་ཅད་ཀྱིས་བརྒྱན་པ་དང ། རྒྱུད་ཐམས་ཅད་མཁྱེན་པ་དང ། དབང་བསྐུར་བ་ལ་མཁས་པ་དང ། ཐུགས་རྗེ་དང་ལྡན་པ་དང ། རྒྱ་ཆེ་བ་ལ་མོས་པ་དང ། སྔགས་ལ་སོགས་པ་དང ། རབ་ཏུ་སྦྱོར་བ་ལ་མཁས་པ་དང ། དངོས་གྲུབ་ཐོབ་པའི་སློབ་དཔོན་ལ་སོགས་པས་དབང་བསྐུར་བ་དང ། དངོས་གྲུབ་ཐོབ་པའི་བླ་མའི་བཀའི་གནང་བ་ཐོབ་པ་དང ། ཡང་ན་རང་ཉིད་དངོས་གྲུབ་ཐོབ་པ་དེས་ནི་དཀྱིལ་འཁོར་དང ། དབང་བསྐུར་བའི་རིམ་པ་དང ། བསྒྲུབ་ཐབས་ལ་སོགས་པ་བྱའོ། །དེ་བཞིན་དུ་རྟོག་གེ་པ་ལ་སོགས་པས་ནི་མ་ཡིན་ནོ། །བཅོམ་ལྡན་འདས་མས་གསོལ་པ། ཀྱཻ་བཅོམ་ལྡན་འདས་སློབ་དཔོན་གྱི་ནི་དབང་བསྐུར་བའི། དཀྱིལ་འཁོར་མཚན་མ་ཇི་ལྟར་ལགས། །དཀྱིལ་འཁོར་གྱི་ནི་ཚད་ཇི་ཙམ། །གཙོ་བོ་བདག་པོ་ཡང་ནི་གང ། །ངོ་བོ་གང་གིས་སློབ་མ་གཟུང ། །ལས་ཀྱི་སློབ་དཔོན་ཇི་ལྟ་བུ། །མཆོད་པ་རྣམས་ནི་ཇི་ལྟར་ལགས། །བླ་མའི་ཡོན་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཁྱོད་ཀྱིས་བདག་ལ་གང་ཞུས་པ། །ལྷ་མོ་ཉོན་ཅིག་བདག་གིས་བཤད། །མཚན་མའི་སློབ་མའི་མོས་པས་སོ། །ཡང་ན་ཇི་ལྟར་དཀྱིལ་འཁོར་གྱི་སློབ་དཔོན་གྱི་ཡིད་དང་འཐད་པའོ། །དེ་བཞིན་མཐེ་བོའི་སོར་གསུམ་ལྷག་པའི་ཁྲུ་ཕྱེད་དང་དོའི་དཀྱིལ་འཁོར་བྱའོ། །དེ་ནི་རེ་ཤིག་མཚན་མའི་དཀྱིལ་འཁོར་ཡིན་ཏེ། དེའང་རྣལ་འབྱོར་མའི་རྒྱུད་ཀྱི་གོ་རིམ་གྱིས་བྱའོ། །དེ་ཡང་ཡན་ལག་ཐམས་ཅད་ཚང་བའོ། །དེའི་དབུས་སུ་ཉི་མའི་དཀྱིལ་འཁོར་བྲིའོ། །དེའི་སྟེང་དུ་སྣ་ཚོགས་རྡོ་རྗེ་སྟེ། སྣ་ཚོགས་རྡོ་རྗེའི་ལྟེ་བའི་ནང་དུ་ཧཱུཾ་གི 85.5a རྣམ་པ། ཕྱི་རོལ་དུ་སྣ་ཚོགས་པདྨ་འདབ་མ་བརྒྱད་དང་ལྡན་པ། རྡོ་རྗེའི་ཕྲེང་བས་རྣམ་པར་བརྒྱན་པར་བྱའོ། །དེའི་ཤར་གྱི་འདབ་མ་ལ་འཁོར་ལོ་མདོག་དཀར་པོ་དང ། ལྷོར་རིན་པོ་ཆེ་མདོག་སེར་པོ་དང ། ནུབ་དུ་པདྨ་མདོག་དམར་པོ་དང ། བྱང་དུ་རལ་གྲི་མདོག་ལྗང་གུ་དང ། མེའི་མཚམས་སུ་རིན་པོ་ཆེའི་ཤིང་དང ། ཆུའི་མཚམས་སུ་སེ་འབྲུ་དང ། རླུང་གི་མཚམས་སུ་རྒྱལ་མཚན་དང ། དབང་ལྡན་གྱི་མཚམས་སུ་ཀ་པཱ་ལའོ། །ཤར་སྒོར་རྡོ་རྗེ་ལྕགས་ཀྱུ་དང ། ལྷོར་རྡོ་རྗེ་ཞགས་པ་དང ། ནུབ་དུ་རྡོ་རྗེ་ལྕགས་སྒྲོག་དང ། བྱང་དུ་རྡོ་རྗེ་དྲིལ་བུའོ། །མཚམས་རྣམས་སུ་མེ་ཏོག་གི་ཆུན་འཕྱང་དང ། བདུག་སྤོས་ཀྱི་རེང་བུ་དང ། མར་མེ་དང ། དྲིའི་དུང་ཆོས་སོ། །དེའི་ཕྱི་རོལ་དུ་རྡོ་རྗེ་ཕྲེང་བའོ། །སྣ་ཚོགས་རྡོ་རྗེའི་ལྟེ་བའི་ནང་དུ་ཧཱུཾ་གི་རྣམ་པ་ཡོངས་སུ་གྱུར་པ་ལས་རྡོ་རྗེ་འཛིན་པ་ཆེན་པོ་ཞལ་གསུམ་པ། སྤྱན་གསུམ་པ། ཕྱག་བཞི་པ། རྒྱལ་པོའི་བཞུགས་ཐབས་ཀྱིས་གནས་པ། རང་འོད་ཀྱི་རིག་མས་འཁྱུད་པ། ནམ་མཁའ་སྔོན་པོའི་མདོག་ཅན། རྒྱན་ཐམས་ཅད་ཀྱིས་བརྒྱན་པ། བརྒྱད་གཉིས་ཀྱི་ལོ་དང་ལྡན་པ། ཉི་མ་བྱེ་བའི་འོད་དང་ལྡན་པ། རལ་པའི་དབུ་རྒྱན་གྱིས་བརྒྱན་པ། རྡོ་རྗེ་དང ། དྲིལ་བུ་དང ། རྔེའུ་ཆུང་དང ། ཀ་པཱ་ལ་དང ། ཁཊྭཱཾ་ག་འཛིན་པའི་བདག་པོའོ། །མཚན་མའི་སྐབས་སུ་དབུས་སུ་རྡོ་རྗེ་དང ། རྡོ་རྗེ་དྲིལ་བུས་བྱའོ། །དེ་ནས་སློབ་མ་སྟ་གོན་བྱས་ལ་སྨན་སྣ་ཚོགས་ཀྱིས་ཁྲུས་བྱས་པ། རྣམ་པར་སྣང་མཛད་ཀྱི་ངོ་བོས་སློབ་མ་གཟུང་བར་བྱའོ། །ལས་ཀྱི་སློབ་དཔོན་ནི་བསྟན་བཅོས་ཐམས་ཅད་ལ་མཁས་པ། སེར་སྣ་མེད་པ། མཚན་མ་ཅུང་ཟད་ཐོབ་པའོ། །དེར་མཆོད་པ་པོ་རྣམས་ཤིན་ཏུ་མཁས་པ། ཆགས་པ་ལ་སོགས་པ་དང་བྲལ་བ། མཚན་མ་རྙེད་པ། དབང་གསུམ་ཐོབ་པའོ། །སློབ་དཔོན་ལ་དབང་བསྐུར་བའི་དུས་སུའམ། རྒྱུད་ཐོས་པའི་དུས་སུ་ཤིན་ཏུ་གཅེས་པའི་ཆུང་མ་དང ། བུ་མོ་དང ། གཞན་ཡང་གསེར་དང ། མུ་ཏིག་དང ། ནོར་བུ་དང ། གླང་པོ་ཆེ་དང ། རྟ་དང ། ཞིང་དང ། བྲན་དང ། བྲན་མོ་དང ། ན་བཟའ་དུ་མ་ལ་སོགས་པ་ཅི་ཙམ་ནུས་པ་དབུལ་བར་བྱའོ། །ནོར་ལ་སོགས་པ་ཡོད་ནས་གང་ཞིག་མི་འབུལ་ན་དེ་ནི་བསྐལ་པ་སྟོང་གི་བར་དུ་དམྱལ་བར་སྐྱེ་བར་འགྱུར་རོ། །ལོངས་སྤྱོད་མེད 85.5b པར་གྱུར་པས་དང་རང་གི་ལུས་པོ་དབུལ་བར་བྱ་སྟེ་བྲན་དུ་བྱའོ། །དེས་ནི་ཚེ་འདི་ཉིད་ལ་སངས་རྒྱས་ཉིད་དམ། ཡང་ན་རྡོ་རྗེ་འཛིན་པ་ཉིད་ཐོབ་པར་འགྱུར་རོ། །ལྷ་མོས་གསོལ་པ། བཅོམ་ལྡན་འདས་སྦྱིན་པ་ལ་སོགས་པ་ཙམ་གྱིས་སངས་རྒྱས་སམ།རྡོ་རྗེ་འཛིན་པར་འགྱུར་རམ་ཅི། བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་སྦྱིན་པ་ལ་སོགས་པ་ཙམ་གྱིས་སངས་རྒྱས་སམ་རྡོ་རྗེ་འཛིན་པར་མི་འགྱུར་ཏེ། འོན་ཀྱང་བླ་མ་ལ་མཆོད་པས་བསོད་ནམས་ཆེན་པོའི་ཚོགས་སྐྱེའོ། །བསོད་ནམས་ཆེན་པོའི་ཚོགས་བསགས་པ་ལས་སྡིག་པའི་ཕུང་པོ་ཟད་དེ། བླ་མའི་མཆོག་སངས་རྒྱས་ཐམས་ཅད་ཀྱི་རང་བཞིན་རང་གི་ལྷའི་སྐུ་ཡང་དག་པ་དང་ཕྲད་པ་ཐོབ་བོ། །ཕྲད་པས་ཡང་དག་པའི་མན་ངག་གནང་བར་འགྱུར་རོ། །མན་ངག་ཐོབ་པ་ལས་བརྩོན་འགྲུས་ཆེན་པོ་དང་ལྡན་པ་ཡིན་ནོ། །དེས་ཚེ་འདི་ཉིད་ལ་སངས་རྒྱས་སམ་རྡོ་རྗེ་འཛིན་པ་ཐོབ་པར་འགྱུར་རོ། །དཔལ་ཡེ་ཤེས་སྙིང་པོ་ལས་དབང་བསྐུར་བ་དང ། དཀྱིལ་འཁོར་གྱི་དོན་ཞེས་བྱ་བའི་ལེའུ་སྟེ་གསུམ་པའོ།། །། བཅོམ་ལྡན་འདས་མས་གསོལ་པ། ཁྱོད་ཀྱི་དཀྱིལ་འཁོར་ཇི་ལྟར་ལགས། །མངའ་བདག་ཆེན་པོ་བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། །བདག་གིས་དཀྱིལ་འཁོར་དགེ་བ་ནི། །ཉོན་ཅིག་ལྷ་མོ་རབ་ཏུ་བཤད། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་རྣམ་པར་བརྒྱན། །དྲ་བ་དྲ་ཕྱེད་ཆུན་འཕྱང་དང ། །འདོད་ཡོན་རིན་ཆེན་ལ་སོགས་བརྒྱན། །དེ་ཡི་དབུས་སུ་གཞན་མིན་བདག་།ཞལ་བཟངས་ཁྱོད་དང་ལྷན་ཅིག་གོ། །ཕྱག་བཞི་པ་ལ་ཞལ་བཞི་པ། །སྤྱན་གསུམ་ཨུཏྤལ་སྔོན་པོའི་མདོག་།ཕྱག་རྒྱ་དྲུག་དང་ལྡན་པ་དང ། །སྣ་ཚོགས་རུས་པའི་རྒྱན་དང་ལྡན། །ཞི་བ་ཆེན་པོའི་རང་བཞིན་ཅན། །སྣ་ཚོགས་པདྨའི་སྟེང་དུ་ནི། །འཇིགས་བྱེད་དུས་མཚན་ཞབས་ཀྱིས་མནན། །རྒྱལ་པོའི་བཞུགས་སྟབས་ཀྱིས་ནི་བཞུགས། །རྡོ་རྗེ་དྲིལ་བུ་རྔེ་ཆུང་དང ། །ཀ་པཱ་ལ་དང་ཁཊྭཱཾ་བསྣམས། །ཞལ་གཞན་སེར་དང་དམར་དང་ལྗང ། །ལྷ་མོ་ཁྱོད་ཀྱང་བདག་གི་མདོག་།ཞལ་གསུམ་མ་ལ་སྤྱན་གསུམ་པ། །ཕྱག་གཉིས་གྲི་གུག་པད་སྣོད་འཛིན། །སྣ་ཚོགས་རྒྱན་གྱིས་བརྒྱན་པའོ། །བཅོམ་ལྡན་འདས་མས་གསོལ་པ། འདི་ཡི་དཀྱིལ་འཁོར་འཁོར་ལོ་ལ། །འཁོར་ནི 85.6a གང་ལགས་གྲངས་དུ་མཆིས། །བཅོམ་ལྡན་འདས་ཀྱིས་བཀའ་སྩལ་པ། །གང་ཞིག་ཁྱོད་ཀྱིས་བདག་ལ་ཞུས། །ཉོན་ཅིག་ལྷ་མོ་བདག་གིས་བཤད། །དཀྱིལ་འཁོར་ཕྱོགས་བཞིར་དཔའ་ཆེན་པོ། །ཤེས་རབ་ཡན་ལག་མས་འཁྱུད་ཅིང ། །མཚམས་སུ་རྡོ་རྗེ་མ་མོ་བཞི། །སྒོར་ནི་ཁྲོས་པའི་ལྷ་མོ་བཞིའོ། །བཅོམ་ལྡན་འདས་མས་གསོལ་པ། དེ་རྣམས་ལ་བསྐྱེད་པའི་ཆོ་ག་ནི་གང ། མདོག་དང་ཕྱག་རྒྱ་དང་བཞུགས་ཐབས་ལ་སོགས་པ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱོད་དང་བདག་རོལ་པ་མཛད་ཅིང ། བསྲུབ་པ་དང་བསྲུབ་པའི་ཐབས་ཆེན་པོའི་སྦྱོར་བའི་དགའ་བའི་རྟགས་ལས་དཔའ་བོ་ཆེན་པོའི་ཚངས་པ་ཞེས་བྱ་བ་ཕྱག་བཞི་པ། ཞལ་གསུམ་པ། སྤྱན་གསུམ་པ། གསེར་གྱི་མདོག་ཉི་མའི་དཀྱིལ་འཁོར་གྱི་སྟེང་དུ་རྒྱལ་པོའི་བཞུགས་ཐབས་ཀྱིས་གནས་པ། རལ་པའི་ཅོད་པན་གྱིས་བརྒྱན་པ། ཤེས་རབ་མའི་ཡན་ལག་གིས་འཁྱུད་པ། ཕྱག་རྒྱ་ལྔ་འཛིན་པ། རྒྱན་སྣ་ཚོགས་ཀྱིས་བརྒྱན་པའོ། །རྡོ་རྗེ་དང ། དྲིལ་བུ་དང ། རྔེའུ་ཆུང་དང ། ཀ་པཱ་ལ་དང ། ཁཊྭཱཾ་ག་བསྣམས་པ། ཤར་གྱི་འདབ་མར་རོ། །ཡང་བསྲུབ་པ་དང་བསྲུབ་པའི་ཐབས་ཀྱི་མཆོག་གི་དགའ་བའི་རྟགས་ལས་དཔའ་བོ་ཆེན་པོ་ཁྱབ་འཇུག་ཅེས་བྱ་བ། མར་ཀ་ཏའི་མདོག་ལྷག་མ་ནི་ཚངས་པ་བཞིན་དུ་བྱང་དུའོ། །ཡང་བསྲུབ་པ་དང་བསྲུབ་པའི་ཐབས་ཀྱི་དགའ་བྲལ་གྱི་དགའ་བའི་རྟགས་ལས་དཔའ་བོ་ཆེན་པོ་དྲག་པོ་ཞེས་བྱ་བ་མདོག་ནག་པོ་ཁྱབ་འཇུག་བཞིན་ནུབ་ཏུའོ། །ཡང་བསྲུབ་པ་དང་བསྲུབ་པའི་ཐབས་ཀྱིས་ལྷན་ཅིག་སྐྱེས་པའི་དགའ་བའི་རྟགས་ལས་དཔའ་བོ་ཆེན་པོ་དབང་ཕྱུག་ཅེས་བྱ་བ་མདོག་དཀར་པོ་བཞིན་ལྷོ་ཕྱོགས་སུའོ། །པདྨའི་མཚམས་སུ་དྲི་ཞིམ་པ་དང་ལྡན་པའི་ཆུས་གང་བའི་བུམ་པའི་སྟེང་དུ་བདུད་རྩི་ལྔས་བཀང་བའི་ཀ་པཱ་ལ་བཞིའོ། །ཡང་བསྲུབ་པ་དང་བསྲུབ་པའི་ཐབས་ཀྱི་རོ་བརྒྱད་ལས་མེའི་མཚམས་སུ་དཔའ་མོ་ཆེན་མོ་མདོག་དཀར་མོའོ། །ཆུའི་མཚམས་སུ་གཞན་གྱིས་མི་ཐུབ་མ་བཻ་དཱུརྱའི་མདོག་གོ། །རླུང་གི་མཚམས་སུ་དུས་མཚན་མ་ནམ་མཁའ་སྔོན་པོའི་མདོག་གོ། །དབང་ལྡན་གྱི་མཚམས་སུ་གཽ་རཱི་མདོག་སེར་པོའོ། །ཐམས་ཅད་ཀྱང་ཤིན་ཏུ་ལང་ཚོ་ལ་བབ་པ་ཞལ་གཅིག་པ། སྤྱན་གསུམ་པ། ཕྱག་བཞི་པ། ཉི་མའི་དཀྱིལ 85.6b འཁོར་གྱི་སྟེང་དུ་རྒྱལ་པོའི་བཞུགས་སྟབས་ཀྱིས་བཞུགས་པ། ཕྱག་རྒྱ་ལྔ་འཛིན་པ། ཕྱོགས་ཀྱི་གོས་ཅན། གྲི་གུག་དང ། ཀ་པཱ་ལ་དང ། ཁཊྭཱཾ་ག་དང ། རྔེའུ་ཆུང་བསྣམས་པའོ། །ཤར་ཕྱོགས་ཀྱི་སྒོར་རྡོ་རྗེ་གཏུམ་མོ་ནི་ནག་མོ་ཆེན་མོའི་མདོག་གོ། །བྱང་སྒོར་རྡོ་རྗེ་འཇིགས་བྱེད་མ་སེར་མོའི་མདོག་གོ། །ནུབ་སྒོར་རྡོ་རྗེ་སྒྲ་མ་དམར་མོ་ཆེན་མོའི་མདོག་གོ། །ལྷོ་སྒོར་རྡོ་རྗེ་ཙ་རྩི་ཀཱ་ལྗང་གུའི་མདོག་གོ། །ཕྱག་བཞི་པ། ཞལ་གཅིག་པ། སྤྱན་གསུམ་པ། གཡོན་བརྐྱང་བ། ན་བཟའ་སྤངས་པ་རིམ་པ་བཞིན་དུ་ནམ་མཁའ་ལྡིང་དང ། སེང་གེ་དང ། སྟག་དང ། མ་ཧེའི་སྟེང་ན་གནས་པའོ། །ཕྱག་རྒྱ་ལྔས་བརྒྱན་པ། མགོ་ཆེན་པོའི་ཆུན་པོ་འཕྱང་བ་འཛིན་པ། འཇིགས་བྱེད་ཆེན་པོ་མཆེ་བ་གཙིགས་པ། ལྗགས་འདྲིལ་བ། དབུ་སྐྱེས་འབར་བ། སྒྲ་ཆེན་པོའི་སྒྲ་སྒྲོགས་པ། རལ་གྲི་དང ། རྩེ་གསུམ་པ་དང ། ཀ་པཱ་ལ་དང ། ཁཊྭཱཾ་ག་བསྣམས་པ། རང་འོད་ཀྱི་ཐབས་དང་འཁྱུད་པའོ། །བཅོམ་ལྡན་འདས་མས་གསོལ་པ། བཅོམ་ལྡན་འདས་དཔའ་བོ་ཆེན་པོ་རྣམས་ལ་ཤེས་རབ་མའི་ཡན་ལག་མ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། དཔའ་བོ་ཆེན་པོ་རྣམས་ལ་ཤེས་རབ་མའི་ཡན་ལག་རང་རང་གི་མདོག་དང་མཚུངས་པ་སྟེ། འོན་ཀྱང་ཁྱོད་བཞིན་དུ་ཞལ་གཅིག་པའོ། །དེ་ལྟའི་དཀྱིལ་འཁོར་རྒྱལ་པོ་ནི། །རྣལ་འབྱོར་རྒྱུད་དུ་རྙེད་པར་དཀའ། །དགྱེས་པ་ཐམས་ཅད་གྲུབ་བྱེད་ཅིང ། །སྡིག་པ་ཐམས་ཅད་འཇིག་པར་མཛད། །བཅོམ་ལྡན་འདས་མས་གསོལ་པ། བཅོམ་ལྡན་ཁྱོད་དང་བདག་སྐྱེད་པའི། །ས་བོན་གང་ལགས་སྙིང་པོ་ཅི། །ཉེ་བའི་སྙིང་པོ་ཇི་ལྟ་བུ། །འཁོར་གྱི་སྔགས་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཁྱོད་ཀྱིས་བདག་ལ་གང་ཞིག་ཞུས། །ཉོན་ཅིག་ལྷ་མོ་བདག་གིས་བཤད། །ས་བོན་ཡ་སྡེའི་བདུན་པ་ནི། །དབྱངས་ཡིག་ལྔ་པ་དང་ལྡན་པ། །ལྷ་མོ་ཆེན་མོ་ཐིག་ལེ་ལྡན། །ཁྱོད་ཀྱི་ས་བོན་རབ་མཆོག་གོ། །ཡ་སྡེའི་ས་བོན་བརྒྱད་པ་ནི། །དབྱངས་ཡིག་དྲུག་པ་དང་ལྡན་པ། །དབུ་ནི་ཐིག་ལེ་ཡིས་ནི་བརྒྱན། །བདག་གིས་ས་བོན་རབ་མཆོག་གོ། །དེ་ནི་ས་བོན་གཉིས་ཀ་རབ། །ཐམས་ཅད་དབང་དུ་བྱེད་པ་ནི། །ལུས་ཅན་ཀུན་གྱི་སྙིང་ལ་བཞུགས། །སྐྱེ་བ་དང་ནི་སྡུད་བྱེད་དོ། །དྲུག་པ་བརྒྱད་པ་བཞི་པ་དང ། །བཅུ་གཉིས་པ་དང་བཅུ་དང་ཉི། །དང་པོར་དང 85.7a ཧཱུཾ་ཕཊ་མཐར། །བདག་གི་སྙིང་པོ་རབ་ཏུ་མཆོག་།ཉི་ཤུ་པ་དང་བཅུ་གཉིས་མཁའ། །དང་པོ་དང་ནི་བཅུ་དྲུག་ཉི། །དང་པོ་ཚངས་པ་ཧཱུཾ་ཕཊ་མཐར། །ཁྱོད་ཀྱི་སྙིང་པོ་དགྱེས་པ་མཆོག་།དང་པོར་ཨོཾ་དང་ཧཱུཾ་ཕཊ་མཐར། །དབུས་སུ་མིང་དང་སྤེལ་བ་ནི། །ཚོགས་ཀུན་གྱི་ནི་སྔགས་ཡིན་ཏེ། །མཆོད་པའི་དུས་སུ་མཆོད་པར་བྱ། །ོཾ་སརྦྦ་མཱ་ར་བེ་མར་དྷ་ན་མ་ཧཱ་བཱི་ར་རཱ་ཛ་ཧཱུཾ་ཧཱུཾ་ཕཊ་ཕཊ། སྐལ་ལྡན་མོ་དེ་ཁྱོད་ཀྱི་ནི། །ཉེ་བའི་སྙིང་པོ་དྲག་པོ་ཆེ། །ཧཾ་ཧཾ ། ཀེ་ལེ་ཀེ་ལེ་སརྦྦ་དོསྟ་པྲ་བྷ་ཛ་ཀ་ཧཱུཾ་ཧཱུཾ་ཕཊ་ཕཊ། པད་མའི་ཞལ་དེ་བདག་གི་ནི། །འོད་ཆེན་ཉེ་བའི་སྙིང་པོའོ། །བཅོམ་ལྡན་འདས་མས་གསོལ་པ། སྔགས་འདི་ལ་ནུས་པའི་མཐུ་ཅི་ཙམ་ཞིག་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། གྲུབ་པ་ཙམ་གྱིས་ཁམས་གསུམ་ཐམས་ཅད་དབང་དུ་བྱེད་པར་འགྱུར་རོ། །རྣལ་འབྱོར་པ་ཁྲོ་བོའི་ལྟ་བས་འབུམ་ཕྲག་གཅིག་བཟླས་པ་བྱེད་ན། ལྷ་མ་ཡིན་གྱི་དབང་པོ་ལྟ་བུ་ལ་འབུམ་ཕྲག་གཅིག་གིས་གསོད་པར་བྱེད་དོ། །ཞི་བའི་ཚུལ་གྱིས་བཟླས་པ་བྱས་ན་གྲངས་མེད་པའི་ནད་དང ། ཉོན་མོངས་པ་དང ། དབུལ་པོ་དང ། མཛེ་དང ། ཕོལ་མིག་འཇིག་པར་བྱེད་དོ། །ཕྲ་མོའི་གྲུབ་པ་བརྒྱད་སྐད་ཅིག་གིས་བྱེད་དོ། །གཞན་ཡང་ལས་དུ་མ་རྗེས་སུ་འབྲང་བར་བྱེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བཅོམ་ལྡན་འདས་མ་ལེགས་དགྱེས་དབང་མོ་སྟན་ལས་ལངས་ནས་མགོ་བོས་ཕྱག་འཚལ་ཏེ། འཁོར་ཐམས་ཅད་དང་ལྷན་ཅིག་ཏུ་ལན་གསུམ་དུ་སྐོར་བ་བྱས་ནས་རང་རང་གི་རྫུ་འཕྲུལ་གྱིས་མཆོད་པ་བྱས་ཏེ། བཅོམ་ལྡན་འདས་མཆོག་གི་དབང་ཕྱུག་ལེགས་སོ་ལེགས་སོ་ཞེས་བརྗོད་ནས་ཡང་གཉིས་སུ་མེད་པའི་སྦྱོར་བས་བཞུགས་སོ། །དེའི་དུས་སུ་ནམ་མཁའ་ལ་མེ་ཏོག་རྣམ་པ་སྣ་ཚོགས་པའི་ཆར་དང ། རིན་པོ་ཆེ་སྣ་ཚོགས་ཀྱི་ཆར་ཆེན་པོ་བཅོམ་ལྡན་འདས་ཀྱི་ཞབས་ཀྱི་དྲུང་དུ་བབས་པར་གྱུར་ཏོ། །དེ་ནས་བཅོམ་ལྡན་འདས་མེ་ཏོག་དང་རིན་པོ་ཆེ་དེ་དག་གི་ཐོག་ཏུ་ཆིབས་ཏེ། འཁོར་དང་བཅས་པ་མི་སྣང་བར་གྱུར་ཏོ། །དཔལ་ཡེ་ཤེས་སྙིང་པོ་ལས་གསང་བའི་དཀྱིལ་འཁོར་འབྱུང་བའི་དོན་ཞེས་བྱ་བའི་ལེའུ་སྟེ་བཞི་པའོ།། །།དཔལ་ཡེ་ཤེས་སྙིང་པོ་ཞེས་བྱ 85.7b བ་རྣལ་འབྱོར་མ་ཆེན་མོའི་རྒྱུད་ཀྱི་རྒྱལ་པོའི་རྒྱལ་པོ་རྫོགས་སྷོ།། །། རྒྱ་གར་གྱི་མཁན་པོ་དཔལ་ཤེས་རབ་གསང་བའི་ཞལ་སྔ་ནས་བསྒྱུར་བའོ། །དཔལ་ཕྱག་རྒྱ་ཆེན་པོའི་ཐིག་ལེ་རྣལ་འབྱོར་མའི་རྒྱུད་ཀྱི་རྒྱལ་པོའི་ཕྱི་མའི་ཕྱི་མའོ། ། |