rKTs


J360

(e-text produced by ADARSHA)

see text in transliteration
85.48a
!་།། རྒྱ་གར་སྐད་དུ། ཤྲཱི་ཏཏྟྭ་པྲ་དཱི་པམ་ནཱ་མ་མ་ཧཱ་ཡོ་གི་ནཱི་ཏནྟྲ་རཱ་ཛཱ། བོད་སྐད་དུ། དཔལ་དེ་ཁོ་ན་ཉིད་ཀྱི་སྒྲོན་མ་ཞེས་བྱ་བའི་རྣལ་འབྱོར་ཆེན་མོའི་རྒྱུད་ཀྱི་རྒྱལ་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང་ཐུགས་རྡོ་རྗེ་དཔའ་བོ་ཆེན་པོ་དང ། དཔའ་མོའི་དབང་ཕྱུག་མས་ཡང་དག་པར་བསྐོར་ནས། ཤེས་རབ་ཀྱི་བྷ་ག་ལ་བཞུགས་སོ། །དེར་བཅོམ་ལྡན་འདས་མ་རྡོ་རྗེ་དབྱིངས་ཀྱི་དབང་ཕྱུག་མས་ལེགས་དགྱེས་ཆེན་པོའི་རོལ་པ་སྒེག་པས་ཉེ་བར་ལོངས་སྤྱོད་པ་དང ། མ་མཆུའི་བདུད་རྩིའི་བཏུང་བས་བཅོམ་ལྡན་འདས་མཉེས་པར་བྱས་ཏེ། ཁ་སྦྱོར་གྱི་ཐབས་ཀྱི་སྦྱོར་བ་ལས་ལངས་ནས་རི་རབ་ཀྱི་ཉི་རྡུལ་གྱི་གྲངས་གྱི་རྣལ་འབྱོར་མ་དང་ལྷན་ཅིག་པས་ལན
85.48b
གསུམ་དུ་བསྐོར་བ་བྱས་ནས་བཅོམ་ལྡན་འདས་ཀྱིས་ཞབས་ལ་མགོ་བོས་ཕྱག་འཚལ་ཏེ། འདི་སྐད་ཅེས་གསོལ་ཏོ། །བཅོམ་ལྡན་ཡེ་ཤེས་ཟླ་བར་གྲགས། །ལྟེ་བའི་ཀུ་མུད་ཁ་འབྱེད་པ། །གང་ཞིག་བདག་གི་ཞུ་བ་ཀུན། །མངའ་བདག་ཆེན་པོས་བདག་ལ་གསུངས། །དཔལ་ལྡན་བླ་ན་མེད་པའི་རྒྱུད། །རྣལ་འབྱོར་མ་ཞེས་རབ་གྲགས་པ། །ེ་བཾ་མ་ཡཱ་ལ་སོགས་སྒྲའི། །དོན་ནི་ཇི་ལྟ་བུར་ནི་བརྗོད། །བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་ལྷ་མོ་སྤྱན་བཟང་རིང ། །ཁྱོད་ཀྱིས་ང་ལ་གང་ཞུས་པ། །ེ་བཾ་མ་ཡ་སོགས་སྒྲ་ཡིས། །ཁམས་གསུམ་འགྲོ་དང་མི་འགྲོ་བཅས། །ཤེས་རབ་ཐབས་ཀྱི་རང་བཞིན་གྱིས། །ཐམས་ཅད་རྒྱས་བཏབ་གཞན་གྱིས་མིན། །དེ་ཁོ་ན་ཉིད་སྒྲོན་མར་གྲགས། །དྲི་མེད་རྫོགས་པའི་འབྲས་བུའི་གཟུགས། །ེ་བཾ་མ་ཡ་དེ་ཉིད་གསུམ། །ཐོག་མར་བདག་བཅས་པ་དང་ནི། །རང་བཞིན་བཞི་ཡི་བྱེ་བྲག་ཏུ། །དོན་དམ་པར་ནི་ཤེས་པར་བྱ། །ཐོས་པའི་དོན་ནི་ཟླ་བ་བདེ། །དེ་ནི་ནམ་མཁའ་བཞིན་དུ་མཆོག་།གཅིག་ཅེས་བྱ་བ་གཞན་མཆོག་རབ། །སྲིད་དང་མྱ་ངན་འདས་པ་སྤངས། །དུས་ནི་ཕྱག་རྒྱ་ཆེན་པོ་སྟེ། །བསྐྱེད་པ་དང་ནི་རྫོགས་དང་བྲལ། །བཅོམ་ལྡན་འདས་ནི་མཐའ་ཞེས་བྱ། །རང་དགའ་ཉམས་སུ་མྱོང་བའི་དངོས། །ཐམས་ཅད་ཡེ་ཤེས་གསུམ་སྟོང་ཉིད། །དེ་ཉིད་དེ་ཉིད་ཀྱིས་ནི་སྤངས། །དེ་བཞིན་གཤེགས་པ་རྣམ་འབྱེད་གྲགས། །དང་པོའི་གནས་ནི་རབ་གྲུབ་བྱེད། །སྐུ་ནི་དགའ་བའི་གཟུགས་སུ་གྲགས། །དབང་པོ་གཉིས་བྱུང་དང་བྲལ་བ། །གསུང་ནི་མངོན་པར་དགའ་ཞེས་བྱ། །དམ་ཚིག་ལས་བྱུང་གིས་ནི་སྤངས། །ཐུགས་ནི་དགའ་བྲལ་དགའ་ཞེས་བྱ། །ཡེ་ཤེས་ལས་བྱུང་བདེ་དང་བྲལ། །རྡོ་རྗེ་ལྷན་སྐྱེས་ཞེས་སུ་བསྟན། །རང་བཞིན་གྱིས་ནི་སྤངས་པའོ། །ལྷ་མོ་དཔལ་ཆེན་ཉི་མ་སྐྱེས། །ཞུ་བ་དགའ་བྲལ་དང་བྲལ་ལོ། །དཔའ་མོའི་དབང་ཕྱུག་མ་བདེ་རྟེན། །དང་པོའི་བདུད་རྩི་ལས
85.49a
སྐྱེས་སོ། །ཡན་ལག་ཀུན་གྱི་ཡང་དག་བསྐོར། །ཁྱབ་པ་སྲོག་གི་པད་མ་བཞིན། །ཤེས་རབ་ཚངས་པའི་སྒོ་ལྔའི་ཁྱིམ། །ཚངས་པའི་ཡེ་ཤེས་འཛིན་ཕྱིར་རོ། །བྷ་ག་དངོས་པོ་འཇིག་པ་ཡིས། །ཡང་ན་ལོངས་སྤྱོད་མྱོང་བས་སོ། །བཞུགས་པ་རང་གི་ངོ་བོ་ལ། །གནས་པ་ཡང་ན་གཤེགས་པའོ། །དེ་ལྟ་བུ་ནི་དོན་དམ་པར། །འདི་སྐད་བདག་ལ་སོགས་པར་བཤད། །ཐམས་ཅད་རྣལ་འབྱོར་རྒྱུད་དུ་སྦས། །དེ་བཞིན་རྣལ་འབྱོར་བླ་མར་ཡང ། །ངེས་དང་དྲང་དོན་བྱེ་བྲག་ཏུ། །ེ་བཾ་མ་ཡཱ་ལ་སོགས་གནས། །རྒྱུད་ཤེས་པ་ཡི་དོན་ཕྱིར་ཏེ། །གཉིས་སུ་དབྱེ་བའི་རྒྱུད་རབ་བསྟན། །འབྲས་བུ་ཡེ་ཤེས་ཆེན་པོ་རོ། །རང་གིས་ཉམས་མྱོང་ངོ་བོ་ཉིད། །རང་རིག་དག་གིས་མི་རྙེད་པས། །རྟོག་པ་ཐམས་ཅད་རྣམ་པར་སྤངས། །ལྷ་མོས་གསོལ་པ། བཅོམ་ལྡན་ཡེ་ཤེས་རྒྱལ་པོ་ཉིད། །ལོག་པའི་ཡེ་ཤེས་མུན་འཇོམས་པ། །དེ་ཉིད་ཉི་ཤུ་གཉིས་བདག་ཉིད། །གང་ཞིག་ཡེ་ཤེས་ཐིག་ལེར་གསུངས། །དེ་ལ་ཡང་ནི་ངེས་པའི་དོན། །མཆོག་གི་དབང་ཕྱུག་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །གང་ཞིག་དེ་ཉིད་ངེས་དོན་དུ། །ཞལ་བཟང་དེ་ནི་གསང་བའོ། །ཁྱོད་ཀྱི་ངོར་བྱས་བདག་གིས་བཤད། །དེ་ལྟ་མིན་ན་སྦས་པའོ། །ེ་བཾ་རྣམ་པའི་དབུས་སུ་ནི་གང་ཞིག་དྲུག་བཅུ་རྩ་བཞིའི་འདབ་མའི་དབྱིབས་ཀྱི་རྩའི་འཁོར་ལོ་དེ་ནི་རྣམ་པ་དང་བཅས་པའི་རྣམ་པར་ཤེས་པའོ། །དེའི་ནང་དུ་གང་དུ་རྩ་སུམ་བཅུ་རྩ་གཉིས་ཀྱི་བདག་ཉིད་ཨུཏྤ་ལའི་རྣམ་པའི་འཁོར་ལོ་དེ་ནི་མཐའ་སྟེ། དེ་ལ་གང་ཞིག་ཟུར་བརྒྱད་པའི་རྣམ་པའི་ལྟེ་བ་དེ་ནི་སྣང་བའོ། །གང་ཞིག་ལྟེ་བའི་དབུས་ཡངས་པ་དེ་ནི་ནམ་མཁའོ། །དེར་ནི་ལྔ་གཉིས་ནས་བཟུང་སྟེ། བཅོ་ལྔའི་བར་གྱི་སའམ། དབང་ཕྱུག་གི་མངའ་བདག་བཞུགས་སོ། །དེར་གང་ཞིག་དེ་ཁོ་ན་ཉིད་གསུམ་གྱི་བདག་ཉིད་དེ་ནི་ལན་གསུམ་འབབ་པའི་ཕུང་པོའི་རྣམ་པར་ཤེས་པ་སེམས་དང་སེམས་ལས་བྱུང་བ་དང་མ་རིག་པའི་གཟུགས་ཀྱིས་གསུམ་དུ་དབྱེ་བ་ཟུར་དང་པོ་ལ་ཐུན་ཚོད་གཅིག་གི་བར
85.49b
དུ་འབར་བའོ། །གང་ཞིག་སྲོག་གི་དབྱིག་པ་དེ་ནི་ལུ་གུ་རྒྱུད་ཀྱི་རྣམ་པའི་མདུད་པ་སུམ་བཅུ་རྩ་གཉིས་སུ་སྦོམ་པ་དང་ཕྲ་བའི་ཐིག་ལེ་རོ་གཅིག་པའི་གཟུགས་ཀྱིས་དབྱིག་པའི་བདུད་རྩི་ཟུར་གཉིས་པ་ལ་ཐུན་ཚོད་གཉིས་ཀྱི་བར་དུ་ཞུ་བའོ། །དྲུག་པོ་དེ་ནི་བསྐྱེད་པ་དང་རྫོགས་པའི་གྲགས་པ་དགའ་བ་དྲུག་ཟུར་གསུམ་པ་ལ་ཐུན་ཚོད་གསུམ་གྱི་བར་དུ་འཛག་པའོ། །གང་ཞིག་ཐིག་ལེ་ཤར་བ་དང་ནུབ་པ་དེ་ནི་ཐིམ་པ་དང་ལོངས་སྤྱོད་དུ་གྲགས་པའི་སྲོག་དེ་ནི་ཟུར་བཞི་ས་ལ་ཐུན་ཚོད་བཞིའི་བར་དུ་འབར་བའོ། །གང་ཞིག་འཕོ་བའི་སྦྱོར་བ་དེ་ནི་སྟེང་དང་འོག་གི་འདབ་མ་ཡོད་པར་བྱང་ཆུབ་ཀྱི་སེམས་འདུས་པའི་དབང་ནི་ཟུར་ལྔ་པ་ལ་ཐུན་ཚོད་ལྔའི་བར་དུ་ཞུ་བའོ། །གང་ཞིག་རྩའི་འཁོར་ལོ་འབྱུང་བ་དེ་ནི་ཡན་ལག་ཐམས་ཅད་ལ་བདུད་རྩི་རྒྱས་པ་ཟུར་དྲུག་པ་ལ་ཐུན་ཚོད་དྲུག་གི་བར་དུ་འཛག་པའོ། །གང་ཞིག་དབང་གི་རིམ་པ་དེ་ནི་གཅིག་ཉིད་སྲོག་གི་ཁ་རུ་སྲོག་ལ་འབབ་པ་དང ། འཕུར་བ་དང་ཁྱབ་པ་དེ་ཡང་ཟུར་བདུན་པ་ལ་ཐུན་ཚོད་བདུན་པའི་བར་དུ་འབར་བའོ། །གང་ཞིག་བསྲུང་བའི་འཁོར་ལོ་དེ་ནི་མཐེའུ་ཆུང་གི་མདུད་པའི་ནང་དུ་བདུད་རྩི་ལ་སྐོར་བ་ཟུར་བརྒྱད་པ་ལ་ཐུན་ཚོད་བརྒྱད་ཀྱི་བར་དུ་ཞུ་བའོ། །དེ་དག་ནི་གཡོན་དུ་བསྐོར་བའི་སྲོག་གི་རླུང་ལ་ཞོན་པ་ཉི་མ་སྐྱེ་བ་ལ་མཚན་མོ་དང་ཉིན་མོའི་བར་དུ་སུམ་བཅུ་རྩ་གཉིས་ཀྱི་ཆ་རྒྱས་པར་འགྱུར་རོ། །སུམ་བཅུ་རྩ་གཉིས་ཀྱི་ནང་ན་བཅུ་དྲུག་བྲལ་བའི་མཚན་ཉིད་མི་གསལ་བ་དང ། དགའ་བའི་མཚན་ཉིད་བཅུ་དྲུག་གསལ་བ་དེའི་དོན་གྱི་ཕྱིར་དགའ་བྲལ་གྱི་དགའ་བའི་མཚན་ཉིད་ཨཱ་ལྀའི་རང་གི་ངོ་བོ་ཟླ་བའོ། །ཕྱི་དང་ཕྱིའི་དོན་རྣམས་ཀྱིས་ནི་ནང་དང་ནང་གི་དོན་གནས་པར་ཤེས་པར་བྱའོ། །དེ་ཡང་ཕྱིའི་ཚེས་ཀྱི་གྲངས་ཀྱིས་སོ། །ནང་སྲོག་གི་རླུང་གི་གྲངས་ཀྱིས་སོ། །ལྷ་མོས་གསོལ་པ། སུམ་བཅུ་རྩ་གཉིས་ཀྱི་ཆུ་སྐྱེས་ཀྱི་ཨུཏྤ་ལའི་རྣམ་པ་ལ་བདེ་བ་ཆེན་པོའི་ཀུན་དུ་སྤྱོད་པ་ངེས་པའི་དོན་ཀྱིས་གནས་པ་དེ་མཆོག་གི་དབང་ཕྱུག་གི་བཀའ་དྲིན་བསྐྱབ་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་ལྷ་མོ་སྐལ་ལྡན་མོ། །གསང་བ་ཆེན་པོ་ཡེ་ཤེས
85.50a
མཆོག་།གང་ཞིག་ཤེས་པ་ཙམ་གྱིས་ནི། །ཐམས་ཅད་ས་ཡི་དབང་ཕྱུག་འགྱུར། །གང་ཞིག་སྙིང་པོའི་སྔགས་ནི་ཉིད། །དེ་ནི་བདག་ཉིད་བཅུ་དྲུག་བདེ། །ཀུན་རྫོབ་རི་བོང་ཅན་གྱི་འོད། །དོན་དམ་པར་ནི་ནམ་མཁའ་བཞིན། །གང་ཞིག་སྐུ་བརྒྱད་མཆོག་སྦྱིན་ནི། །དེ་ནི་མཚན་མོ་བརྒྱད་མཆོག་གོ། །ལྷ་མོ་ཡང་ན་ཡེ་ཤེས་བརྒྱད། །མཚན་མོ་ཉིན་མོ་གཉིས་ལས་འབྱུང ། །གང་ཞིག་ཐིམ་དང་ལོངས་སྤྱོད་དབང ། །དེ་ནི་ངེས་པར་བསྐྱེད་རིམས་སོ། །ལྷ་མོ་བསྐྱེད་རིམ་གསལ་བ་སྟེ། །རིམ་ལས་བྱུང་བའི་བདེ་བ་ཆེ། །སྐལ་ལྡན་མོ་གང་ཡེ་ཤེས་སྐུ། །དེ་ནི་རིམ་སོགས་ཡན་ལག་སྤངས། །ཡན་ལག་བཞིར་དབྱེ་དྲུག་དབྱེ་འམ། །བསྐྱེད་དང་རྫོགས་པའི་རིམ་པའོ། །ལྷ་མོ་གང་ཞིག་གསང་བའི་སྒྲ། །དེ་ནི་ཡེ་ཤེས་གསུམ་དང་བྲལ། །ཡང་ན་གཞན་མིན་བདག་ཉིད་གསུམ། །མཚམས་ཀྱི་ཡེ་ཤེས་ཡོད་པའི་ཕྱིར། །ལྷ་མོ་གང་ཞིག་དམ་ཚིག་ནི། །བསྲུང་བ་ལ་སོགས་ངེས་པར་རོ། །དེ་ནི་བདེ་བ་དབུས་གནས་སུ། །གཟུང་བྱ་ཡང་ན་གང་ནང་དུ། །གང་ཞིག་སྦྱིན་སྲེག་དོན་དམ་པར། །དེ་ནི་ཧ་ཞེས་གློ་བུར་ཏེ། །ཆར་ཡང་དབུས་ཡོད་ཐིག་ལེ་ནི། །གང་དུ་སྐད་ཅིག་གིས་ཐིམ་པོ། །གང་ཞིག་བསྲུབ་དང་བསྲུབ་ཐབས་ནི། །དེ་ནི་ཐོག་མའི་དགའ་བ་སྤངས། །ལྷ་མོ་དེ་བཞིན་ཐ་མ་འང་མིན། །ཐོག་མ་ཐ་མ་གཉིས་དང་བྲལ། །སྐལ་ལྡན་མོ་གང་སྔགས་ཀྱི་བཟླས། །དེ་ནི་སྲིད་པ་འདས་པའི་ཡིད། །མྱ་ངན་འདས་པའི་གནས་ཀྱང་མིན། །གཉིས་ཀྱི་ངོ་བོ་གཉིས་དང་བྲལ། །གང་ཞིག་གནས་ནི་བརྒྱད་དུ་བསྟན། །དེ་ནི་ཉི་སྐྱེས་མ་རྒྱས་པ། །གནས་ཀྱི་དབང་གིས་ཤར་བ་ལ། །ཉེ་བས་མྱུར་དུ་རྒྱས་པའོ། །གང་ཞིག་དགའ་བ་ལ་སོགས་རིམ། །དེ་ནི་རིམ་པ་གཉིས་སུ་དབྱེ། །རྣམ་བཅས་ལས་ནི་དང་པོ་པ། །རྣམ་བྲལ་བཅུ་ཡི་དབང་ཕྱུག་གོ། །གང་ཞིག་དུར་ཁྲོད་རྣམ་རྟོག་བྲལ། །དབུགས་དབྱུང་ལ་སོགས་རྣམ་པར་སྤངས། །བྱང་ཆུབ་ཀྱི་ནི་སེམས་རོ་ལ། །རྣམ་པར་ཞུ་བ་དམ་ཚིག་ཕྱིར། །ལྷ་མོ་གང་ཞིག་ཆུའི་ངོགས། །དེ་ནི་རྟོག་མེད་མ་ཡི་མཐར། །
85.50b
ཡང་ན་དེ་རུ་སྲོག་གི་རྩ། །བདེ་བའི་ཆུ་བོ་འབབ་པའི་ཕྱིར། །གང་ཞིག་སྣང་བ་སོགས་ཡེ་ཤེས། །དེ་ནི་དགའ་བ་དང་ལྡན་ཡིད། །ས་དང་ཆུ་དང་འོད་ཀྱི་གཟུགས། །དེ་བཞིན་རླུང་གི་ངོ་བོ་དང ། །གང་ཞིག་དངོས་པོ་རྟེན་ལ་སོགས། །དེ་ནི་བདེ་བའི་དང་པོར་རིག་།རང་གི་རྣམ་པའི་བྱེ་བྲག་གམ། །རྣམ་པར་དཔྱོད་པས་ངེས་པར་དཔྱོད། །ལྷ་མོ་གང་ཞིག་དུར་ཁྲོད་བརྒྱད། །དེ་ནི་བདེ་བ་ལ་ཐིམ་ཞེས། །རྣམ་པར་རྟོག་པ་འཛིན་པའི་སྐུ། །དེ་ལ་ཐིམ་ཞིང་ཐིག་པའོ། །གང་ཞིག་ཤིང་ལ་སོགས་པའི་དོན། །དེ་ནི་དང་པོའི་བདུད་རྩི་རྒྱུ། །རྩ་དེ་བརྟེན་པའི་གཟུགས་སུ་གྲགས། །ཐམས་ཅད་རྣམ་པའི་བདེ་སྦྱིན་མ། །གང་རླུང་དེ་ཉིད་སྙིང་པོའི་དོན། །དེ་ནི་རིན་ཆེན་གདུ་བུའི་བདེ། །འཛུམས་པ་ཡིས་ནི་ཡང་དག་པར། །པད་མའི་ཞལ་དེ་མྱོང་བའོ། །ལྷ་མོ་གང་ཞིག་མཛུབ་ལ་སོགས། །དེ་ནི་གྱེན་དུ་གཟུང་བའི་རླུང ། །ཡང་ན་རྩ་ཡི་ཀུན་སྤྱོད་ལས། །འགྲོ་བའི་བདུད་རྩི་འཛིན་པའོ། །གང་ཞིག་ཉེ་འགྲོའི་བསམ་གཏན་སྦྱོར། །དེ་ནི་ཟླ་བ་གྱེན་དུ་བྱེད། །ཡང་ན་ཚངས་བཞི་རྣམ་དབྱེ་བྱས། །རྣམ་པར་ཤེས་པ་ལ་གཤེགས་གསོལ། །གང་ཉིད་ཡེ་ཤེས་ཐིག་ལེ་ནི། །དེ་ནི་དྲུག་ཕྱེད་གསུམ་དང་བྲལ། །བཅུ་དང་ལྔ་ཡི་ས་རྣམས་ནི། །དབང་ཕྱུག་འཕོ་མེད་སྐྱེ་མེད་དོ། །གང་ཞིག་བདག་གིས་རང་ངོ་མཆོག་།དེ་ནི་ངེས་པར་བཞི་པའི་འབྲས། །ཡང་ན་ཧོར་ཡ་ཉམས་སུ་མྱོང ། །འབྲས་བུའི་སྒྲས་ནི་བརྗོད་པའོ། །གང་ཞིག་ས་ཡི་དབང་བྱེད་པ། །དེ་ནི་དེ་ཉིད་དྲུག་རང་བཞིན། །དེ་ཉིད་དྲུག་ལས་དེ་ཉིད་གསུམ། །དེ་ཉིད་གསུམ་ལས་རང་བཞིན་གཅིག་།གང་ཞིག་དེ་བཞིན་གཤེགས་པའི་སྐུ། །དེ་ནི་མྱ་ངན་འདས་མཚན་ཉིད། །ཡང་ན་དགའ་བ་དང་ནི་བྲལ། །དགའ་བྲལ་དགའ་མིན་རང་ངོ་བོ། །ལྷ་མོ་གང་ཞིག་རྒྱུད་བསྟན་པ། །དེ་ནི་བདེ་བ་ཤིན་དུ་འཕེལ། །བདེ་དང་བྲལ་བའི་བདེ་བ་ནི། །ཡང་ན་དེ་ཉིད་རྙེད་པའོ། །གང་ཞིག་ཕྱག་རྒྱ་ཆེ་རང་བཞིན། །དེ་ནི་ཐིམ་སོགས་ཡིད་ལས་འདས། །རང་གིས་ཉམས་མྱོང་རང་ངོ་བོ། །བསམ་གཏན་འཛིན་པ་སྤངས་པའོ། །གང་ཞིག་གསང
85.51a
བ་དོན་དམ་པར། །དེ་ནི་དགའ་བ་དགའ་དང་བྲལ། །ཡང་ན་ནང་གི་རེག་བྱ་སྟེ། །རེག་བྱ་དང་བྲལ་རྟོག་པ་མེད། །གང་ཞིག་བསྐུལ་བའི་མཆོད་པའི་དོན། །དེ་ནི་དྲི་མེད་བདེ་བ་འབྱུང ། །འདས་པ་ལས་ནི་ཡང་སྐྱེ་བ། །སྐྱེ་བ་དེ་ལ་འཕེལ་བའོ། །ལྷ་མོ་ཤེས་རབ་ཡེ་ཤེས་གང ། །དེ་ནི་ཁ་ལ་སྙིང་ཀར་བདེ། །ཁ་ནི་རྟག་ཏུ་ཤེས་རབ་ཡིན། །སྙིང་ཀ་ཡེ་ཤེས་བརྗོད་པའོ། །གང་ཞིག་གསང་བའི་དཀྱིལ་འཁོར་འཁོར། །དེ་ནི་ཁུ་བ་འཕོ་མེད་དགེ། །ཡང་ན་བདེ་ཆེན་རང་ངོ་བོ། །བདེ་བའི་རྣམ་པར་རྟོག་དང་བྲལ། །ལྷ་མོ་ཚིགས་རྒྱས་གང་ཞིག་ནི། །བྱ་གདོང་མ་དེ་ཁོང་དུ་ཆུད། །ཡང་ནི་ཚིགས་ནི་ཞུ་མེད་ཁུ། །དགའ་མོ་རྒྱས་པ་མཆོག་ཡིན་ནོ། །འབྱུང་བ་བསྲུང་དོན་གཏོར་མ་གང ། །དེ་ནི་སྲོག་ཆགས་བསད་པའོ། །བཅད་པ་དེ་ནི་མཆོག་གི་གནས། །འགྲོ་བ་འགོག་པར་བྱེད་པའོ། །དེ་དག་ནི་མཆོག་གི་གསང་བ་ཆེན་པོའི་གསང་ཆེན་བཅོམ་ལྡན་འདས་མ་བཞི་བཅུའི་བདག་ཉིད་ཀྱི་དེ་ཁོ་ན་ཉིད་བདེ་བ་ཆེན་པོའི་རྒྱལ་པོའི་བདུད་རྩིའི་གཏེར་ལ་ངེས་པའི་དོན་ཏོ། །ལྷ་མོས་གསོལ་པ། བཞི་བཅུའི་བདག་ཉིད་དེ་ཉིད་ནི། །ཤིན་དུ་རེག་མེད་གཟུང་བར་དཀའ། །ས་ཡི་དབང་ཕྱུག་དུ་ཙམ་ཞིག་།མཆོག་གི་དབང་ཕྱུག་གིས་མཁྱེན་ལགས། །བཅོམ་ལྡན་འདས་ཀྱིས་བཀའ་སྩལ་པ། །སྣ་ཚོགས་རྙེད་པ་སུམ་བཅུ་དྲུག་།བཅུ་གཅིག་ས་ཡི་བདག་པོའོ། །དགའ་བ་རྙེད་པ་སུམ་བཅུ་བདུན། །བཅུ་གཉིས་ས་ཡི་བདག་པོར་བརྗོད། །མཆོག་དགའ་རྙེད་པ་སུམ་བཅུ་བརྒྱད། །དེ་ནི་བཅུ་གསུམ་པ་ཡི་ས། །སུམ་བཅུ་དགུ་ལྷག་མཐར་ཐུག་པ། །ས་ནི་བཅུ་བཞི་རྙེད་པའོ། །བཞི་བཅུ་དེ་ནི་ལྷན་སྐྱེས་སོ། །བཅཝ་ལྔ་རྙེད་པའི་མངའ་བདག་གོ། །གང་ཞིག་བཅུ་དྲུག་པ་ཡི་ས། །བརྗོད་དུ་མེད་པ་ནམ་མཁའ་བཞིན། །དེ་ལ་དབང་ཕྱུག་མཆོག་གི་མཁའ། །ཐམས་ཅད་མཁྱེན་པ་རྙེད་དཀའ་བ། །ཟད་མེད་འཕོ་མེད་ཞི་བ་སྟེ། །སྐྱེ་མེད་རྨད་བྱུང་བས་རྨད་བྱུང ། །
85.51b
ཀྱཻ་བཅོམ་ལྡན་འདས་སུམ་བཅུ་རྩ་གཉིས་ཀྱི་བདག་ཉིད་བདེ་བ་ཆེན་པོའི་བདུད་རྩིའི་རྒྱལ་པོའི་བདུད་རྩིའི་གཏེར་དེ་ཁོ་ན་ཉིད་དེ་ལ་ཀུན་དུ་སྤྱོད་པའི་དུས་ནི་གང་ལགས། འདུས་པ་ནི་ཅི་ཞིག་ལགས། ཉམས་སུ་མྱོང་བ་དེ་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། སུམ་བཅུ་རྩ་གཉིས་ཀྱི་བདག་ཉིད་ལ་སུམ་བཅུ་རྩ་གཉིས་ཀྱི་ཆུ་ཚོད་ཀྱི་བར་དུ་སྲོག་དང་རྩོལ་བའི་རླུང་གཉིས་ཤར་བ་ནི་ཀུན་དུ་སྤྱོད་པའོ། །རྩོལ་བའི་རླུང་འབྱུང་བའི་དུས་སུ་གང་ཞིག་ཡན་ལག་ཐམས་ཅད་ལ་ཁྱབ་པའི་སྲོག་དེ་ནི་གཡོན་སྐོར་དུ་འབྱུང་བ་ཡིས་ཨུཏྤ་ལའི་རྣམ་པ་འཛུམས་ཤིང་ནང་གི་ལྟེ་བའི་སྙིང་པོ་རྩ་བའི་སྡོང་བུས་འཇུག་པའོ། །འཇུག་པ་ཙམ་གྱིས་ཟུར་བརྒྱད་པའི་ནང་ན་ཡོད་པའི་བདེ་བ་ཆེན་པོའི་སྲོག་གི་རྒྱལ་པོ་ལ་གང་ཞིག་རོ་གཅིག་པའི་མཚན་ཉིད་དེ་ནི་འདུས་པའོ། །དེའི་དུས་སུ་གང་ཞིག་བདག་དང་གཞན་གྱིས་བྱེ་བྲག་མེད་པ་གཉིས་སུ་མེད་པའི་སྤྲོས་པ་དང་བྲལ་བའི་ཡེ་ཤེས་ཀྱིས་ཐམས་ཅད་གཟིགས་པ་དེ་ནི་ཉམས་སུ་མྱོང་བའོ། །ལྷ་མོས་གསོལ་པ། གང་ཞིག་ཉམས་མྱོང་ལས་རྙེད་དེ། །མངའ་བདག་དེ་ནི་ཇི་ལྟར་ལགས། །ཉམས་སུ་མྱོང་བས་གང་རྙེད་པ། །དེ་ཉིད་མདོར་བསྡུས་བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། །དྲིས་པ་དེ་ནི་རྨད་བྱུང་མཆོག་།ཉོན་ཅིག་ལྷ་མོ་སྤྱན་བཟང་རིང ། །ཉམས་སུ་མྱོང་བས་གང་རྙེད་པ། །དགའ་བའི་དབང་མོ་དེ་བརྗོད་མེད། །བླ་མའི་ཞལ་ནས་ཉམས་སུ་མྱོང ། །དབང་བསྐུར་ལས་ནི་རྙེད་པའོ། །ལྷ་མོས་གསོལ་པ། དབང་བསྐུར་བ་ནི་དུ་མ་ཞིག་།རྒྱུད་རྒྱུད་ནང་དུ་རབ་ཏུ་གསལ། །འདི་རུ་བྱེ་བྲག་ཅི་འདྲ་བ། །སུ་ལ་སྦྱིན་པར་བགྱི་བ་ལགས། །བཅོམ་ལྡན་འདས་ཀྱིས་བཀའ་སྩལ་པ། །དགའ་བའི་འབྲས་བུ་བྱེ་བྲག་ཏུ། །དབང་ནི་རེ་ཤིག་བཞི་རུ་དབྱེ། །དང་པོ་དགའ་བ་དང་ལྡན་པ། །ལས་དང་པོ་ལ་སྦྱིན་པར་བྱ། །གཉིས་པ་མཆོག་དགའ་དང་ལྡན་པ། །སྣང་བ་གསུམ་ནི་ཐོབ་པ་ལ། །དགའ་བ་གསུམ་པ་དང་ལྡན་པ། །ཆོས་ཀྱི་སྤྲིན་རྙེད་ངེས་པས་སོ། །
85.52a
ཀུན་དུ་འོད་ས་ཞེས་བྱ་བ། །རྙེད་པ་བཞི་ལ་སྦྱིན་པར་བྱ། །ལྷ་མོས་གསོལ་པ། ཀྱེ་བཅོམ་ལྡན་འདས་སྣང་བ་ལ་སོགས་པ་དང་ཆོས་ཀྱི་སྤྲིན་དང་ཀུན་དུ་འོད་རྙེད་པ་ལ་དེ་ལྟ་བུའི་དབང་གི་རིམ་པ་ལགས་ན། ས་ལ་སོགས་པ་རྙེད་པ་ལ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ས་ལ་སོགས་པ་མ་རྙེད་པ་རྣམས་ལ་ཐོག་མར་རང་གི་ངོ་བོས་སོ། །ས་ལ་སོགས་པ་རྙེད་པ་རྣམས་ལ་མཐར་ཐུག་པའི་རང་གི་ངོ་བོས་སོ། །གང་གི་ཕྱིར་ཞེ་ན། དེ་རྣམས་ལ་བརྩོན་འགྲུས་ཀྱི་སྟོབས་ཀྱིས་ཤིན་དུ་བསོད་ནམས་ཀྱི་བྱིན་གྱིས་བརླབས་ཀྱི་བྱ་བ་ལ་སོགས་པ་དང་བྲལ་བའི་ཡེ་ཤེས་ཆེན་པོ་མཐོང་བ་ཙམ་གྱིས་ཐོབ་བོ། །ཇི་ལྟར་པད་མ་ཡོངས་སུ་སྨིན་པ་ཉི་མའི་འོད་ཀྱིས་རེག་པ་ཙམ་གྱིས་རྒྱས་སོ། །མ་སྨིན་པ་དེ་བཞིན་དུ་མ་ཡིན་ནོ། །ལྷ་མོས་གསོལ་པ། མ་སྨིན་པ་རྣམས་ལ་ཡོངས་སུ་སྨིན་པའི་དུས་གང་ལགས། བཅོམ་ལྡན་འདས་ཀྱིས་བཀའ་སྩལ་པ། །སྦྱིན་སོགས་བསོད་ནམས་བསགས་པ་ཡིན། །མཆོག་གི་བླ་མས་གཏན་ལ་ཕབ། །སྐལ་ལྡན་མོ་དེ་སྨིན་པའི་དུས། །དེ་ལས་བླ་མེད་བྱང་ཆུབ་ནི། །བླ་མེད་གནས་ནི་ཐོབ་པ་གང ། །ཕྱི་ནས་ཅི་ཡང་བསླབ་མི་དགོས། །བླ་མེད་ཡེ་ཤེས་ཆེན་པོའི་གནས། །འབད་མིན་དེ་ནི་མཐོང་བའོ། །ཇི་ལྟར་ཉི་མ་ཤར་ཙམ་གྱིས། །སྣ་ཚོགས་གཟུགས་ནི་མཐོང་བར་འགྱུར། །དེ་བཞིན་བླ་མེད་འོད་ཀྱིས་ནི། །ཡེ་ཤེས་ཆེན་པོ་མཐོང་བར་འགྱུར། །ཡེ་ཤེས་ཆེན་པོ་སྐུ་དང་བྲལ། །གཉིས་སུ་མེད་པ་ནམ་མཁའ་བཞིན། །ལུས་དང་ངག་དང་ཡིད་གཟུགས་མིན། །སྒྲ་ལ་སོགས་པ་རྣམ་པར་སྤངས། །དཔེ་མེད་ནམ་མཁའ་དང་བྲལ་བ། །སྲིད་དང་མྱ་ངན་འདས་པ་སྤངས། །སྦོམ་དང་ཕྲ་ལ་སོགས་ལས་འདས། །ཆར་ཡང་ཐིག་ལེ་དང་བྲལ་བ། །ཚུལ་དང་ཚུལ་ཙམ་མ་ཡིན་ཏེ། །མཆོག་དང་གཞན་མཆོག་གནས་ལས་གྲོལ། །སྐྱེ་བ་མེད་དང་འཆི་མེད་པ། །རྨད་བྱུང་ཆེན་པོའི་འདུ་ཤེས་སོ། །ལྷ་མོས་གསོལ་པ།
85.52b
ཀྱེ་བཅོམ་ལྡན་འདས་ཡེ་ཤེས་ཆེན་པོའི་དབང་ཕྱུག་བླ་ན་མེད་པ་ཡང་དག་པའི་བྱང་ཆུབ་རྙེད་པ་ལ་ཡེ་ཤེས་ཆེན་པོ་བརྗོད་དུ་མེད་པའི་གནས་གཞན་རྙེད་པ་ཡོད་དམ་ཅི། བཅོམ་ལྡན་འདས་ཀྱིས་བཀའ་སྩལ་པ། གྲངས་མེད་པའི་སངས་རྒྱས་རྣམས་ཀྱི་ཡུམ་ཁྱོད་ཅི་ལ་དེ་ལྟ་བུར་འདྲི། བརྗོད་དུ་མེད་པའི་ཡེ་ཤེས་ཆེན་པོ་ཁྱོད་ཀྱིས་ཅིའི་ཕྱིར་མི་ཤེས། དེ་ལྟར་ཡིན་ན་བདག་གི་རང་གི་ངོ་བོ་ཡང་དག་པར་ཁྱོད་ཀྱིས་མི་ཤེས་སོ། །ལྷ་མོས་གསོལ་པ། ཁྱོད་ཀྱི་ངོ་བོ་བདག་གིས་ཤེས། །འོན་ཀྱང་བདག་གིས་གཞན་ཞིག་ཞུས། །སེམས་ཅན་བྱང་ཆུབ་ལས་གཞན་ཅི། །མཆོག་གི་དབང་ཕྱུག་རྙེད་པ་འམ། །བཅོམ་ལྡན་འདས་ཀྱིས་བཀའ་སྩལ་པ། །བྱང་ཆུབ་རྙེད་ལས་གཞན་ཅི་ཞིག་།ཞལ་བཟང་མོ་དེ་རྙེད་ཡོད་དམ། །འོན་ཀྱང་དེ་ལ་མཐོང་བ་ཡོད། །ཚིལ་ལ་བདུད་རྩི་ཇི་བཞིན་ནོ། །ལྷ་མོས་གསོལ་པ། བཅོམ་ལྡན་དཔའ་བོའི་དཔའ་དབང་ཕྱུག་།རང་བཞིན་ཡེ་ཤེས་སྦྱིན་པ་པོ། །བདག་གིས་གཞན་ཞིག་ཞུ་བ་བགྱིད། །དེ་ལ་བཀའ་དྲིན་བདག་ལ་སྩོལ། །དབང་གི་རིམ་པའི་ཡེ་ཤེས་གང ། །བཞི་པ་དེ་ལྟར་དེ་བཞིན་ནོ། །དེ་ལ་རེ་ཤིག་ཇི་བཞིན་དོན། །རྡོ་རྗེ་འཛིན་པ་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །བཞི་པ་དེ་ཉིད་ངོ་བོར་གྲགས། །དེ་ལྟར་ཡེ་ཤེས་འདུ་ཤེས་སོ། །དེ་བཞིན་ཡེ་ཤེས་ལས་བྱུང་ཤེས། །ཡེ་ཤེས་ལས་བྱུང་ལྟེ་བར་བདེ། །ལྷ་མོ་ཡེ་ཤེས་ཁ་ལ་ཡོད། །ཡེ་ཤེས་ལས་བྱུང་སྐེ་རུ་སྟེ། །སྐེ་རུ་ལོངས་སྤྱོད་ངོ་བོར་གྲགས། །སྙིང་ག་རུ་ནི་དབང་ཞེས་བྱ། །ཐིམ་པ་ཁ་རུ་ཤེས་བྱ་སྟེ། །བསྐྱེད་པའི་རིམ་པ་ཡི་ནི་ཕྱོགས། །ཡང་ན་དེ་བཞིན་གྱི་ནི་སྒྲ། །ཇི་བཞིན་ཤེས་རབ་ལ་སྔར་ཐལ། །དེ་ལྟར་ཡེ་ཤེས་ལྟ་བ་ཡིས། །བཀུག་ནས་རང་གི་ཁ་ལ་བཀོད། །རང་གི
85.53a
སྙིང་གའི་བད་གནས་སུ། །བྱས་ནས་ཉིད་ཀྱིས་ཉམས་སུ་མྱོང ། །དེ་ཡི་སྐད་ཅིག་ཡེ་ཤེས་བདེ། །སྤྲོས་པ་དང་བྲལ་རྟོག་མེད་པ། །སེམས་ཀྱིས་ཐམས་ཅད་མཐོང་ནས་སུ། །ནམ་མཁའ་བཞིན་དུ་བསམ་པར་བྱ། །དེ་ཡང་བསམ་པ་བོར་ནས་སུ། །ཕྱི་ནས་བསམ་པ་ཅི་ཡང་མེད། །ཉིད་ནི་བདེ་ཆེན་ཡེ་ཤེས་ཏེ། །ནམ་མཁའ་ཟླ་བ་བཞིན་དུ་མཐོང ། །ལྷ་མོ་དེ་ནི་རྫོགས་པའི་རིམ། །དོན་དམ་པར་ནི་ཤེས་པར་བྱ། །ལྷ་མོས་གསོལ་པ། བཅོམ་ལྡན་ཡེ་ཤེས་རིན་ཆེན་ཉི། །འདོད་པ་ཐམས་ཅད་རབ་གྲུབ་པ། །སྣང་བ་བཞི་ལ་གོ་རིམས་གནས། །མངའ་བདག་ཆེན་པོས་བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། །སྣང་བ་བཞི་ལ་གོ་རིམས་གནས། །སེམས་དང་སེམས་བྱུང་འདུ་ཤེས་སོ། །དེ་དག་ལས་ནི་མ་རིག་འབྱུང ། །མཚམས་ཀྱི་འདུ་ཤེས་མཚན་ཉིད་ཅན། །ཉིན་མོའི་རང་བཞིན་སེམས་ལས་འབྱུང ། །སེམས་ནི་མཚན་མོའི་ངོ་བོ་ཉིད། །ཡང་དག་འོད་ནི་གསུམ་དང་བྲལ། །ལྷན་སྐྱེས་ཡེ་ཤེས་མཚན་ཉིད་དོ། །གང་ཚེ་ཚངས་པའི་ཚིགས་སུ་སེམས། །ལྷ་མོ་དེ་ཚེ་ཉིན་མོར་འགྱུར། །གང་ཚེ་དེ་ལས་སྲོག་འཕོ་བ། །དེ་ཚེ་མཚན་མོ་འོག་ན་གནས། །སྟེང་ཡང་མ་ཡིན་འོག་ཡང་མིན། །དེ་ཚེ་མཚམས་ཤེས་དྲན་པར་བྱ། །དེ་ཡང་མེ་ཡི་རང་བཞིན་གྲགས། །ཉི་མ་ལ་ནི་སྲོག་འཛིན་མ། །གང་གིས་ཉི་མ་ཡོད་པ་ནི། །སྣང་བ་ལས་ནི་ཤར་དུ་འགྱུར། །སྣང་བ་ཟླ་བ་ཞེས་པར་བསྟན། །ཡོངས་སུ་ཞུ་བའི་བདུད་རྩི་གཡོ། །ལྷ་མོ་ཆེན་མོ་གཡོ་བའི་ཕྱིར། །དགའ་བྲལ་དགའ་བར་རབ་ཏུ་གྲགས། །གང་དུ་ཆད་པ་ལས་ནི་ཐིམ། །མཆོག་གིས་དགའ་བ་ཤར་བའི་དུས། །དེ་ནི་སྣང་བ་དང་པོའི་དགའ། །དེ་ལས་མཆོག་ནི་གསལ་བར་འགྱུར། །གསང་ཕྱིར་སྣང་བ་མཆེད་པར་གྲགས། །ཞུ་མེད་གཡོ་མེད་སྐ་བའོ། །དཀའ་བ་ལ་ནི་ཕྲ་མོའི་དངོས། །བདེ་སྦྱིན་ཡང་ན་ཀུན་སྤྱོད་དོ། །ཀུན་སྤྱོད་ལས་ནི་ཐོབ་པ་ཡིན། །ཞལ་བཟངས་མོ་ནི་སྣང་བས
85.53b
སོ། །དེ་ནི་མཚམས་ཞེས་གྲགས་པ་སྟེ། །དབུས་ཀྱི་གནས་སུ་ཡོད་པའི་ཕྱིར། །དབུས་ཀྱི་གནས་ན་ཡོད་པ་ན། །དེ་ཕྱིར་ཀུན་ཏུ་སྤྱོད་བྱེད་པའོ། །དབུས་ནི་དངོས་པོ་ཐམས་ཅད་ལ། །འདུས་པར་བྱེད་པ་དྲན་པའོ། །ཡང་ན་གང་དུ་མཚན་མོ་ནི། །མ་བྱུང་ཉི་མ་ནུབ་པའོ། །དེ་ནི་དབུས་ཀྱི་མཚམས་ཞེས་གྲགས། །རང་བཞིན་དགའ་བ་སྦྱིན་བྱེད་མ། །དེ་ཉིད་སྣང་བ་ཐོབ་པ་ཡིན། །ཐམས་ཅད་སྐྱེ་བའི་རྒྱུ་ཡིན་ནོ། །གང་དུ་དབུས་མཚམས་སྐད་ཅིག་གིས། །བདེ་བའི་ཚོར་བ་མ་ཤེས་ན། །སྐལ་ལྡན་ལྷ་མོ་དེ་རུ་ནི། །དགའ་བྲལ་གསལ་བར་འགྱུར་བའོ། །དེ་ཡི་ཉམས་སུ་མྱོང་ཤེས་པ། །སྐྱོན་ནི་ཅུང་ཟད་མི་བྱེད་དོ། །མི་ཤེས་པས་ནི་སྐལ་ལྡན་མོ། །རྩ་བ་དང་བཅས་མེད་པར་བྱེད། །རྩ་བ་སྣང་བ་ཞེས་བྱར་དྲན། །ཁུ་བའི་གཟུགས་ནི་ཟླ་བའོ། །བདེ་བ་ཆེན་པོའི་བདུད་རྩིའི་གཏེར། །བསྲུབས་ལས་སྐྱེ་བ་ཡིན་པའི་ཕྱིར། །ལྷ་མོ་མེ་ཏོག་སྣང་བ་མཆེད། །དམར་བའི་ཕྱིར་ནི་ཉི་མ་བརྗོད། །བདེ་ཆེན་རྣམ་པར་སྨིན་པའི་ཕྱིར། །དམར་བའི་གཟུགས་ནི་སྔར་འགྱུར་རོ། །འབྲས་བུ་ཐོབ་པའི་གྲགས་པ་སྟེ། །མཚན་དང་དཔེ་བྱད་དང་ལྡན་ནོ། །དངོས་དང་དངོས་མིན་བྲལ་བའི་ཕྱིར། །ཞལ་བཟངས་མཚམས་ཀྱི་ཡེ་ཤེས་སོ། །ཉིན་མོ་སྣང་བ་མཆེད་འཁོར་གྲགས། །མཚན་མོ་སྣང་བ་མྱ་ངན་འདས། །སྲིད་དང་མྱ་ངན་འདས་བྲལ་བ། །མཚམས་ནི་སྣང་བ་ཐོབ་པའོ། །དེ་ལྟ་བུ་ཡི་གསང་ཆེན་མཆོག་།གང་དུ་ཡང་ནི་གསལ་མ་བྱས། །སྐལ་ལྡན་ཁྱོད་ཀྱི་ངོར་བྱས་པས། །ཡེ་ཤེས་རིན་ཆེན་གསལ་བྱས་སོ། །ལྷ་མོས་གསོལ་པ། འབྲས་བུ་དེ་ཉིད་རིན་ཆེན་གང ། །མངའ་བདག་དེ་ནི་ཇི་ལྟར་རྙེད། །བཅོམ་ལྡན་འདས་ཀྱིས་བཀའ་སྩལ་པ། །འབྲས་བུ་དེ་ནི་རིན་ཆེན་གང ། །དེ་ནི་གཉིས་སུ་དབྱེ་བར་གནས། །མཆོག་གི
85.54a
དགའ་བའི་ངོ་བོ་གཅིག་།མཆོག་གི་དགའ་བ་དང་བྲལ་བ། །མཆོག་དགའ་ངོ་བོར་གྲགས་པ་ནི། །ཉམས་སུ་མྱོང་བའི་རྙེད་པ་ཡིན། །མཆོག་གི་དགའ་བ་དང་བྲལ་བ། །རང་ལས་རབ་ཏུ་གསལ་བར་འགྱུར། །སྐལ་ལྡན་མོ་གང་ཉམས་སུ་མྱོང ། །དེ་ནི་རྫོགས་པའི་རང་བཞིན་ནོ། །ཉམས་སུ་མྱོང་མིན་རྫོགས་པ་ནི། །གང་དུ་སུས་ཀྱང་མི་ཤེས་སོ། །ཇི་ལྟར་བུ་མོ་ལང་ཚོར་བབ། །སྐྱེས་བུ་མེད་ན་ནམ་ཡང་མིན། །ལེགས་དགྱེས་ཀྱི་ནི་བདེ་མྱོང་བ། །ལེགས་དགྱེས་དབང་མོ་མི་ཤེས་སོ། །གང་ཞིག་བསམ་པ་ལ་སོགས་ཀྱིས། །དེ་ནི་བསྐྱེད་པའི་མཚན་ཉིད་དོ། །བསྐྱེད་པ་དང་ནི་རྫོགས་བྲལ་བ། །དེ་ནི་འབྲས་མཆོག་རང་བཞིན་ནོ། །དེ་རུ་གང་ཞིག་སྒོམ་པ་ནི། །ཕྲ་མོའི་ཕྲ་མོ་ཡང་དག་མཆོག་།གང་གིས་བླ་ན་མེད་པ་རྙེད། །འགྲོ་བའི་མ་དེ་ཡོད་པ་མིན། །བླ་ན་མེད་པའི་ཡེ་ཤེས་ཆེ། །བཞི་དང་བྲལ་བ་རྟག་ཏུ་ཤར། །རྟག་ཏུ་ཤར་བ་ལས་གཞན་ཅི། །གང་དུ་ཡང་ན་བསྒོམ་ཡོད་དམ། །གལ་ཏེ་གང་གིས་བསྒོམ་པ་དེ། །ཁྱད་པར་ཅན་དུ་ཡོང་མི་སྐྱེ། །མི་སྐྱེའི་ཕྱིར་ན་བསམ་གཏན་ངལ། །གལ་ཏེ་ཁྱད་པར་འོང་འགྱུར་ན། །དེ་ནི་དེ་ཉིད་རང་བཞིན་མིན། །དེ་ཉིད་མིན་པར་ཐེ་ཚོམ་མེད། །དེ་ཉིད་མི་སྒོམ་དེ་ཉིད་ནི། །སུ་ཞིག་དེ་ལ་རྙེད་པར་འདོད། །དེ་ནི་མཁའ་ལ་རི་མོ་ནི། །མཆོག་གི་དབང་མོ་འདྲི་བའོ། །ལྷ་མོས་གསོལ་པ། གསང་བ་ཆེན་པོའི་རྒྱུད་འདི་ནི། །ཤེས་པ་དང་ནི་བཤད་པས་སུ། །བཅོམ་ལྡན་འདས་ཀྱིས་བཀའ་སྩལ་པ། བྱང་ཕྱོགས་སུ་དཔལ་རྡོ་རྗེའི་གནས་ཨཽ་ཌྱན་དུ་རྒྱལ་པོ་ཨིནྡྲ་བྷཱུ་ཏི་ཞེས་བྱ་བས་ཤེས་པ་དང་བཤད་པ་དང ། སེམས་ཅན་ལ་གསལ་བར་བྱེད་དོ། །ལྷ་མོས་གསོལ་པ། ཀྱེ་བཅོམ་ལྡན་འདས་རྒྱལ་པོ་ཆེན་པོ་ཨིནྡྲ་བྷཱུ་ཏི་ཞེས་བྱ་བ་དེ་ས་དུའི
85.54b
དབང་ཕྱུག་ལགས། བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། དཔལ་ཡེ་ཤེས་ཐིག་ལེའི་རྒྱུད་ཀྱི་རྒྱལ་པོ་ལས་གང་ཞིག་ངས་བསྟན་པའི་ཕྱག་ན་རྡོ་རྗེའི་རྒྱལ་པོ་དེ་ཉིད་ཨིནྡྲ་བྷཱུ་ཏི་སྤྲུལ་པའི་སྐུས་ས་བཅུའི་དབང་ཕྱུག་ཡེ་ཤེས་ཀྱི་སྐུ་ས་བཅུ་བཞིའི་དབང་ཕྱུག་གོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། རི་རབ་ཀྱི་ཉི་རྡུལ་གྱི་གྲངས་བཅོམ་ལྡན་འདས་མ་དང་ལྷན་ཅིག་ཏུ་སྟན་ལས་ལངས་ཏེ། ལན་གསུམ་དུ་སྐོར་བ་བྱས་ནས་ཞབས་ལ་མགོ་བོས་ཕྱག་འཚལ་ཏེ། རང་རང་གི་རྫུ་འཕྲུལ་གྱིས་སྣ་ཚོགས་པའི་མཆོད་པས་མཆོད་སྦྱིན་བྱས་ནས་བསྟོད་པ། དེ་ཁོ་ན་ཉིད་བདུད་རྩིའི་རྒྱ་མཚོའི་སྙིང་པོ་རབ་མཆོག་རྒྱལ་གྱུར་ཅིག་།ཡེ་ཤེས་ནམ་མཁའ་སྐྱེ་མེད་གཟུགས་མེད་བརྗོད་མེད་སྐུ་རབ་རྒྱལ་གྱུར་ཅིག་།དངོས་དང་དངོས་མིན་རོ་གཅིག་ངོ་བོའི་རྨད་བྱུང་དེ་ཉིད་རབ་གཏེར་རྒྱལ་གྱུར་ཅིག་།སྟོང་ཉིད་སྟོང་པ་ཉིད་མིན་མཆོག་དང་གཞན་མཆོག་འོད་ཀྱིས་གྲུབ་པ་རྒྱལ་གྱུར་ཅིག ། དེ་ལྟ་བུའི་བསྟོད་པའི་རྒྱལ་པོས་བསྟོད་ནས། འཁོར་ཐམས་ཅད་བཅོམ་ལྡན་འདས་དང་བཅས་པར་མི་སྣང་བར་གྱུར་ཏོ། །དཔལ་རྣལ་འབྱོར་མ་ཆེན་པོའི་རྒྱུད་ཀྱི་རྒྱལ་པོའི་རྒྱལ་པོ་མཆོག་ཆེན་པོ་རྨད་དུ་བྱུང་ཞིང ། རྨད་དུ་བྱུང་བ་དེ་ཁོ་ན་ཉིད་ཀྱི་སྒྲོན་མ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཆེན་པོ་པྲཛྙཱ་ཤྲཱི་གུཔྟས་བསྒྱུར་ཅིང་ཞུས་ཏེ་གཏན་ལ་ཕབ་པ། དུས་ཕྱིས་དཔལ་ས་སྐྱའི་དབེན་གནས་སུ་བསྒྱུར་ཅིང་ཞུས་ཏེ་དག་པར་བྱས་སོ། །
85.55a
[ཋིས་ཨིས་ཨ་བླནཀ་པགེ་ཝིཐ]་[བླནཀ་ཨིམགེ]