། རྒྱ་གར་སྐད་དུ། ་་ཤྲཱི་མ་ཧཱ་ས་མཱ་ཡ་ཏནྟྲ་རཱ་ཛ་ནཱ་མ། ་བོད་སྐད་དུ། ་་དཔལ་དམ་ཚིག་ཆེན་པོའི་རྒྱུད་ཀྱི་རྒྱལ་པོ་ཞེས་བྱ་བ། ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས 87.30b དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་ལ་སྙོམས་པར་བཞུགས་སོ། །དེ་ནས་བྱང་ཆུབ་སེམས་དཔའ་ཆེན་པོ་རྡོ་རྗེ་སྙིང་པོ་དང ། རྣལ་འབྱོར་མ་གྲངས་མེད་པའི་ནང་ནས་བྱང་ཆུབ་སེམས་དཔའ་རྡོ་རྗེ་སྙིང་པོ་ལ་ཞལ་འཛུམ་པ་མཛད་ནས། དམ་ཚིག་གི་རིམ་པ་བཀའ་སྩལ་པ། དམ་ཚིག་དང་ནི་མི་ལྡན་ན། །བསྒྲུབས་ཀྱང་འགྲུབ་པར་མི་འགྱུར་ཏེ། །རྒྱུ་མེད་པ་ཡི་འབྲས་བུ་བཞིན། །ཚེ་ཡི་དུས་བྱས་དམྱལ་བར་འགྲོ། །དེ་ཕྱིར་དམ་ཚིག་ཤིན་དུ་བསྲུང ། །སངས་རྒྱས་བླ་མ་ལས་ཐོབ་ཕྱིར། །ཐུན་མོང་མ་ཡིན་བླ་མ་ཡི། །ལྔ་བཅུའི་བདག་ཉིད་བསྲུང་བར་བྱ། །ཐུན་མོང་བརྒྱད་དང་བཅུ་བཞི་སྟེ། །དེ་རྣམས་ངེས་པ་ཤེས་པར་བྱ། །དེ་རྣམས་སྤྱི་ཡི་དམ་ཚིག་སྟེ། །བྱེ་བྲག་དམ་ཚིག་བསྲུང་བར་བྱ། །ཕུང་པོ་ལྔ་ནི་རིགས་ལྔ་སྟེ། །འབྱུང་བ་ལྔ་ནི་ཡུམ་ལྔའོ། །སྐྱེ་མཆེད་སེམས་དཔའ་སེམས་མ་ཡིན། །གཟུགས་ཕུང་རྣམ་པར་སྣང་མཛད་ལ། །བརྗེད་དང་བརྙས་པ་ལ་སོགས་སྤང ། །དེ་ལ་མཆོད་དང་བསྟོད་སོགས་བྱ། །དོན་དམ་པར་ནི་རང་རིག་སྟེ། །ཚོགས་བསགས་ཕྱིར་ན་ང་ཡིས་གསུངས། །ཚོར་བ་ལ་སོགས་དེ་དང་འདྲ། །ས་ནི་སངས་རྒྱས་སྤྱན་ཡིན་ཏེ། །སྤྱོད་ལམ་གསུམ་དུ་མ་ཡེངས་བྱ། །གང་དུ་གསུངས་པའི་ཚུལ་བཞིན་བསྲུང ། །ཆུ་ལ་སོགས་པ་དེ་བཞིན་ནོ། །མིག་ལ་སོགས་པ་དེ་བཞིན་ནོ། །གཟུགས་ལ་སོགས་པ་དེ་བཞིན་བསྲུང ། །དཀྱིལ་འཁོར་དུ་ཞུགས་རྣལ་འབྱོར་པ། །རྡོ་རྗེ་འཛིན་པ་བཞིན་དུ་མཆོད། །བརྙས་ཤིང་གཤེ་བ་ལ་སོགས་སྤང ། །སེམས་ཅན་ཕོ་དང་མོ་ཀུན་ལ། །དཔའ་བོ་དཔའ་མོ་དམ་ཚིག་བསྲུང ། །བཟའ་བ་ལ་སོགས་དུས་སུ་ཡང ། །བདུད་རྩི་སྦྱོར་བས་དམ་ཚིག་བསྲུང ། །ཤ་ལྔ་བདུད་རྩི་ལྔ་རྣམས་ལ། །རང་གི་སྤྱོད་དང་གཞན་སྤྱོད་ལ། །རྗེས་སུ་ཡི་རང་དམ་ཚིག་ཡིན། ། 87.31a མདོར་ན་སྣང་ཞིང་སྲིད་པའི་རྫས། །དམ་ཚིག་བསྲུང་ཞིང་མཆོད་པའི་ཕྱིར། །ལུས་ཀྱི་ཉེས་སྡོམ་སྐུ་ཡིན་ཏེ། །ངག་གི་ཉེས་སྡོམ་གསུང་དུ་གསུངས། །ཡིད་ཀྱི་ཉེས་སྡོམ་ཐུགས་སུ་གསུངས། །ོཾ་གྱི་འོད་ཟེར་དཀར་པོ་ཡིས། །འདོད་ཁམས་དག་པར་གྱུར་པ་ནི། །སྐུ་ཡི་དམ་ཚིག་བསྲུང་བའོ། །དེ་ལ་མཆོད་དང་བསྟོད་སོགས་བྱ། །བསྡུ་བའང་དུ་ཤེས་པར་བྱ། །ཿ ནི་ཁ་དོག་དམར་པོ་ཡིས། །གཟུགས་ཁམས་དག་པ་གསུང་དམ་ཚིག་།ཧཱུཾ་གི་ཁ་དོག་ནག་པོ་ཡིས། །གཟུགས་མེད་དག་པ་དམ་ཚིག་གོ། །ོཾ་ནི་སྤྱི་བོར་ཡང་དག་གནས། །ཱཿ ནི་དེ་བཞིན་མགྲིན་པར་གནས། །ཧཱུཾ་ནི་སྙིང་གར་སྤྲོ་དང་བསྡུ། །སྐུ་ཡི་མཁའ་འགྲོ་བཅུ་གཉིས་སུ། །འདོད་ཁམས་དག་པ་དམ་ཚིག་གོ། །གསུང་གི་མཁའ་འགྲོ་བཅུ་གཉིས་སུ། །གཟུགས་ཁམས་དག་པ་དམ་ཚིག་ཡིན། །ཐུགས་ཀྱི་མཁའ་འགྲོ་བཅུ་གཉིས་སུ། །གཟུགས་མེད་དག་པ་དམ་ཚིག་སྟེ། །ོཾ་དང་ཨཱཿ དང་ཧཱུཾ་ལ་བསྡུ། །ོཾ་ནི་རྒྱུ་ཡི་སྐུ་བཅུ་གཉིས། །ཱཿ ནི་ལམ་གྱི་སྐུ་བཅུ་གཉིས། །ཧཱུཾ་ནི་འབྲས་བུ་སྐུ་བཅུ་གཉིས། །བདེ་བ་ཆེན་པོའི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པའོ། །དཔལ་ལྡན་ཆོས་ཀྱི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པའོ། །ལོངས་སྤྱོད་རྫོགས་པའི་སྐུ་གསུང་ཐུགས། །ཡེ་ཤེས་གཅིག་གྱུར་སྡོམ་པའོ། །སྤྲུལ་པ་ཡང་ནི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པའོ། །བདེ་ཆེན་སྙིང་པོ་ཧཾ་ཉིད་ལ། །སྐུ་དང་གསུང་དང་ཐུགས་དང་ཡང ། །ཡེ་ཤེས་དང་ནི་རྣམ་པ་བཞི། །ོཾ་དང་ཨཱཿ དང་ཧཱུཾ་དང་ཡང ། །ཡན་ལག་བཞི་བཞིར་ཐུབ་པས་གསུངས། །རྒྱུ་དང་ལམ་དང་འབྲས་བུ་ལ། །བཞི་བཅུ་རྩ་བརྒྱད་ཤེས་པར་བྱ། ། དང་ཧཾ་གཉིས་རང་བཞིན་གྱི། །སྔགས་ཀྱི་ངོ་བོར་ཤེས་པར་བྱ། །སྔགས་ཀྱི་གྲངས་ནི་ཉི་ཁྲི་སྟོང ། །དྲུག་བརྒྱ་བཟླས་པར་ཤེས་པར་བྱ། །ལག་པ་བསྐྱོད་པ་རང་བཞིན་གར། །རྐང་པ་རང་བཞིན་དཀྱིལ 87.31b འཁོར་རོ། །དེ་ལྟར་གནས་ན་དམ་ཚིག་གོ། །གཞན་ཡང་དམ་ཚིག་བྱེ་བྲག་ཡང ། །འཇིག་རྟེན་ཐ་སྙད་སྤང་བའི་ཕྱིར། །མི་བསྐྱོད་རྣམ་སྣང་ལ་སོགས་དང ། །དཔའ་བོ་མཁའ་འགྲོ་མ་ཞེས་པ། །གསང་བའི་རྡོ་རྗེ་པད་མ་དང ། །ཇི་ལྟར་རོལ་པའི་སྤྱོད་པ་ཀུན། །ཐ་སྙད་ཀྱང་ནི་ལམ་ལ་འཇུག་།གཞན་ཡང་གསང་བའི་དམ་ཚིག་ནི། །རྩ་བ་བཞི་དང་ཡན་ལག་བཅུ། །ཐེག་པ་ཆེ་ལ་སྨོད་པ་དང ། །གསང་བའི་དོན་ལ་སྐུར་འདེབས་དང ། །རྣལ་འབྱོར་ཀུན་ལ་གནོད་པ་དང ། །སེམས་ཅན་ཀུན་ལ་འཚེ་བྱེད་པ། །འདི་གསང་བ་ནི་དམ་ཚིག་ཡིན། །སྦས་པ་བསྲུང་བའི་རིམ་པ་ཡང ། །མ་བྱིན་བླང་བའི་དམ་ཚིག་སྟེ། །འདོད་པ་ཆེན་པོ་དང་ལྡན་པའི། །འདོད་ཆགས་སྤྱོད་པའང་དེ་དང་འདྲ། །རང་གི་དམ་ཚིག་བསྲུང་བའི་ཕྱིར། །བརྫུན་དུ་སྨྲ་བ་བཞི་པ་ཡིན། །རོ་རྩའི་ཤ་དང་བཅུད་ཀྱི་ཤ་།ཁ་བའི་ཆང་དང་མངར་བའི་ཆང ། །མར་ལ་གཅིག་སྟེ་འོ་མ་གཉིས། །གཞན་ནི་གསུམ་སྟེ་ཡན་ལག་བཅུ། །འདི་ལྟར་དམ་ཚིག་ཡིན་པར་གསུངས། །བདུད་རྩི་ཉིད་ལ་དུས་གསུམ་དུ། །བཅོམ་ལྡན་སྐུ་གསུང་ཐུགས་ཀྱི་སྟེ། །དང་པོར་ཡུངས་ཀར་ཐ་མ་ཡང ། །བྱི་ལའི་ཁམས་ཀྱི་ཚུལ་དུ་བཟའ། །མཚན་མོ་ཤེས་རབ་སྐུ་གསུང་ཐུགས། །ཉིན་མོ་ཐབས་ཀྱི་སྐུ་གསུང་ཐུགས། །ཉི་མ་ནུབ་དང་ཉི་མ་ཤར། །ཉི་མ་གུང་ནི་ཐབས་ཀྱི་དུས། །ནམ་སྲོས་ནམ་ནི་ལངས་བ་དང ། །ནམ་གྱི་གུང་ནི་ཤེས་རབ་དུས། །དུས་དྲུག་མཆོད་པ་རྒྱུན་མི་གཅད། །དམ་ཚིག་འདི་ལས་མ་ཉམས་ན། །ཕྱོགས་བཅུ་འཇིག་རྟེན་ཁམས་བཞུགས་པའི། །དཔའ་བོ་མཁའ་འགྲོ་མ་མོ་རྣམས།། །མཆོད་དང་བསྲུང་བ་ལ་སོགས་བྱེད། །གཞན་ཡང་གསང་བའི་བྱེ་བྲག་ལ། །གསང་བ་སྒོམ་པའི་རྣལ་འབྱོར་པས། །ལུས་ལ་མེ་དང་ཁྲེག་མི་གདོན། །སྲོག་གམ་ཟུག་རྔུའི་ཕྱིར་མ་གཏོགས། །སྲོག་ཆགས་འདོད་པ་སྤྱོད་མཐོང་ན། །རང་གི་རྣལ་འབྱོར 87.32a ཤོར་མི་བྱ། །དམ་ཚིག་བསྡུ་ཕྱིར་དབེན་པར་འདུག་།ལས་སུ་རུང་ན་གཡོན་བར་འཁྱམ། །འདི་སྐད་ཅེས་བྱ་ཡན་ལག་བརྒྱད། །བདག་གི་བཅུ་བཞི་ཡིན་པར་གསུངས། །ཐོས་པའི་དུས་གཅིག་ལྔ་བཅུའི་དོན། །བཅོམ་ལྡན་འདས་ནི་རྩ་བ་བཞི། །དེ་བཞིན་གཤེགས་པ་ཡན་ལག་བཅུ། །སྐུ་གསུང་ཐུགས་ནི་ལུས་ངག་ཡིད། །རྡོ་རྗེ་མི་ཕྱེད་ཕྱིར་དམ་ཚིག་།བཙུན་མོ་དམ་ཚིག་གིས་བརྒྱན་མཛེས། །བྷ་ག་མཉམ་པར་འཇོག་པས་སོ། །སྙོམས་པ་དུས་གསུམ་མི་འགྱུར་བ། །བཞུགས་པ་བདེ་བའི་ངོ་བོ་ལའོ། །རྡོ་རྗེ་སྙིང་པོ་ལ་སོགས་པ། །བྱེ་བྲག་ཡིན་པར་ང་ཡིས་གསུངས། །ེ་ནི་ཡན་ལག་བརྒྱད་ཡིན་ནོ། །བཾ་ནི་བཅུ་པོའི་རང་བཞིན་ཏེ། །མ་ནི་ལྔ་བཅུའི་རང་བཞིན་ནོ། །ཡཱ་ནི་གཞན་རྣམས་ཡིན་པར་གསུངས། །ེ་ནི་སྲོག་ཆགས་གསོད་པ་སྟེ། །བཾ་ནི་མ་བྱིན་ལེན་པའོ། །མ་ནི་བརྫུན་དུ་སྨྲ་བའོ། །ཡ་ནི་འདོད་ཆགས་སྤྱོད་པའོ། །ེ་ནི་སྐུ་ཡི་དམ་ཚིག་སྟེ། །བཾ་ནི་གསུང་གི་དམ་ཚིག་གོ། །མ་ནི་ཐུགས་ཀྱི་དམ་ཚིག་གོ། །ཡཱ་ནི་བཟའ་བའི་དམ་ཚིག་གོ། །དུས་གསུམ་དམ་ཚིག་མ་བསྲུངས་ན། །འཇིག་རྟེན་པ་དང་འབུམ་འགྱུར་བའི། །རྣམ་སྨིན་ཆེ་བར་ང་ཡིས་གསུངས། །དམ་ཚིག་ཉམས་པའི་མཚན་མ་ནི། །ལུས་ཀྱི་ཉེས་པ་སྣ་ཚོགས་འབྱུང ། །ངག་གི་ཉེས་པ་སྣ་ཚོགས་སྨྲ། །ཁ་དོག་དབྱིབས་རྣམས་འགྱུར་བ་དང ། །ལག་གི་རྫས་རྣམས་མི་ཐུབ་ཅིང ། །འབྲས་དང་ཤུ་བ་ལ་སོགས་འབྱུང ། །དེ་ཚེ་རྣལ་འབྱོར་ཉམས་པ་དེས། །དམ་ཚིག་ཉམས་པ་ཤིན་དུ་བསམ། །བླ་མ་རྡོ་རྗེ་སྤུན་གྲལ་དུ། །ཚོགས་ཀྱི་དཀྱིལ་འཁོར་སྤྲུལ་བྱས་ལ། །གསེར་དངུལ་ལ་སོགས་བརྒྱ་འམ་སྟོང ། །རྟ་དང་གླང་པོ་ལ་སོགས་དང ། ། 87.32b བཻ་ཌཱུརྱ་དང་མན་ཤེལ་དང ། །གདུགས་དང་རྒྱལ་མཚན་བརྒྱ་འམ་སྟོང ། །མར་མེ་ལ་སོགས་དེ་བཞིན་ནོ། །ཚོགས་ཀྱི་འཁོར་ལོ་ཆེན་པོ་བསྐོར། །ཚོགས་བསགས་པས་ནི་ཉམས་པ་གསོ། །གལ་ཏེ་ཉམས་པ་མ་གསོས་ན། །ཉམས་པ་དེ་དང་རྣལ་འབྱོར་གཞན། །གནས་གཅིག་དང་ནི་ཆུ་གཅིག་གམ། །ཡུལ་དང་ལམ་གྱི་གནས་གཅིག་གམ། །སྐད་ཅིག་ཙམ་ཡང་འདུག་མི་བྱ། །འདུག་ན་ཉེས་པ་བསམ་མི་ཁྱབ། །རབ་གནས་སྦྱིན་སྲེག་དབང་བསྐུར་དང ། །གཏོར་མ་མཆོད་དང་བཟླས་པ་དང ། །རི་ལུ་མིག་སྨན་ལ་སོགས་དང ། །ཞི་རྒྱས་ལ་སོགས་ལས་རྣམས་དང ། །འཇིག་རྟེན་མཚན་མ་བརྒྱད་དག་དང ། །འཇིག་རྟེན་འདས་པའི་མཚན་མ་བཞི། །སངས་རྒྱས་པ་ཡི་མཚན་མ་གཅིག་།གཞན་ཡང་དངོས་གྲུབ་མ་ལུས་པ། །དམ་ཚིག་འདི་ལས་འབྱུང་བར་འགྱུར། །འབྲུ་རྣམས་སྣ་ཚོགས་སྐྱེ་འགྱུར་བ། །རིན་ཆེན་ས་ལས་སྐྱེས་པ་བཞིན། །དམ་པ་སྐུ་གསུང་ཐུགས་ཡིན་ཏེ། །དེ་ལས་འདས་ན་ཚིམ་བར་འགྱུར། །ཇི་ལྟར་བུ་ནི་མེད་པའི་ཁྱིམ། །ཤི་མ་ཐག་ཏུ་སྟོང་པར་འགྱུར། །དེ་བཞིན་དམ་ཚིག་འདི་མེད་ན། །མནར་མེད་སེམས་ཅན་དམྱལ་བར་སྐྱེ། །པི་ཝང་གླིང་བུ་སྦྱོར་ཀུན་སོགས། །རྒྱུད་དང་བྲལ་ན་བརྡུང་མི་རུང ། །དེ་བཞིན་དམ་ཚིག་མེད་གྱུར་ན། །སྔགས་བཟླས་བསྒོམ་པ་ལ་སོགས་པ། །འབྲས་བུ་མེད་པར་བརླག་པར་འགྱུར། །ནས་ལས་ནས་ཀྱི་མྱུ་གུ་སྐྱེ། །དམ་ཚིག་ལས་ནི་རྡོ་རྗེ་འཆང ། །ཚེ་འདིར་ཐོབ་པར་གསུངས་པ་སྟེ། །དུས་ནི་གཞན་མིན་རྩོད་ལྡན་དུས། ། 87.33a བསྟན་བྱ་གཞན་མིན་ང་ཡིས་ཏེ། །སྐྱེ་བ་གཞན་མིན་ཕ་དང་མ། །མན་ངག་གཞན་མིན་ས་མ་ཡ། །བཞི་ནི་ཡིན་པར་གསུངས་པའོ། །དེ་ལྟར་དམ་ཚིག་དང་ལྡན་པ། །བུད་མེད་འདུ་ཞིང་དགའ་བར་འགྱུར། །མཁའ་འགྲོ་རྣལ་འབྱོར་མ་མོ་སྟེ། །སྐུ་གསུང་ཐུགས་ཀྱི་མཚན་མར་སྟོན། །ནོར་དང་བྲན་དང་གཡོག་འཁོར་དང ། །རྒྱལ་པོའི་འཁོར་ཡུལ་ལ་སོགས་འདུ། །ངག་ནི་སྙན་ཅིང་བདེ་བར་འགྱུར། །སྲོག་གཅོད་ལ་སོགས་ཚིག་སྨྲས་ཀྱང ། །སེམས་ཅན་སྐྲག་པར་མི་འགྱུར་རོ། །ལུས་ཀྱི་སེམས་ཅན་བསད་བྱས་ཀྱང ། །རྣམ་སྨིན་འབྱུང་བར་མི་འགྱུར་རོ། །སྐུ་ནི་ཐོབ་པར་གསུངས་པའོ། །ངག་གིས་ཕྲ་མའི་ཚིག་སྨྲས་ཀྱང ། །ཉེས་པར་མི་འགྱུར་གསུང་ཐོབ་འགྱུར། །ཡིད་ཀྱིས་མནར་སེམས་བསམས་བྱས་ཀྱང ། །ཉེས་པར་མི་འགྱུར་ཐུགས་ཐོབ་འགྱུར། །དམ་ཚིག་ལྡན་པའི་ཡོན་ཏན་ནོ། །ེ་མའོ་རྒྱུད་ནི་ངོ་རེ་མཚར། །དཔལ་དམ་ཚིག་ཆེན་པོའི་རྒྱུད་ཀྱི་རྒྱལ་པོ་རྫོགས་པའོ།། །། རྒྱ་གར་གྱི་མཁན་པོ་གཱ་ཡ་དྷ་ར་དང ། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ། |