༄#། །རྒྱ་གར་སྐད་དུ། ་་ཤྲཱི་ཙནྡྲ་མཱ་ལ་ཏནྟྲ་རཱ་ཛ། ་་བོད་སྐད་དུ། ་་དཔལ་ཟླ་བའི་ཕྲེང་བའི་རྒྱུད་ཀྱི་རྒྱལ་པོ། ་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཀྱེ་ཧོ་མགོན་པོ་རྡོ་རྗེ་ཅན། །སྒྲོན་མ་ཉི་ཤུ་རྩ་བཞི་ཡི། །ངེས་པ་གང་ལགས་ཚད་གང་ལགས། །རང་བཞིན་གྲུབ་པ་ཇི་ལྟར་ལགས། །མགོན་པོས་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །རང་བཞིན་གྲུབ་པ་སྒྲུབ་འདོད་པ། །བླ་མའི་བཀའ་དྲིན་ལེགས་མནོས་ཏེ། །དུར་ཁྲོད་ལ་སོགས་ས་ཕྱོགས་སུ། །བར་ཆད་གསུམ་མེད་ཡོན་ཏན་ལྡན། །བརྟགས་པ་ལས་དང་པོ་ཡི་གནས། །གང་ཟག་མཆོག་ལ་བརྟག་ཏུ་མེད། །ཡོན་ཏན་ལྡན་པའི་སར་འདུག་སྟེ། །བླ་མེད་སེམས་གཟུང་རྣལ་འབྱོར་པས། །སྒོ་གསུམ་དལ་བའི་ཚད་བརྟག་སྟེ། །བཅིང་བ་གསུམ་ནི་ངེས་བསྒོམས་པས། །སྐྱེ་བ་གཅིག་གིས་གྲུབ་པར་ངེས། །དབུགས་བཅིང་ཀུན་རྫོབ་སྣ་རྩེ་ཡིན། །ཡིད་བཅིངས་སོར་བཞི་ནམ་མཁའི་ཁམས། །སེམས་བཅིངས་རང་རིག་བསམ་མི་ཁྱབ། །རྒྱུ་རྐྱེན་ལས་ནི་སྣ་ཚོགས་ལས། །སེམས་ཅན་མོས་པ་སྣ་ཚོགས 87.41b འབྱུང ། །དེ་དག་བཅིངས་གསུམ་དག་པ་ཡིས། །སེམས་ཅན་བཅིངས་ལས་ངེས་པར་གྲོལ། །བླ་མའི་ཞལ་ནས་ཤེས་པར་བྱ། །འདུ་ཤེས་གསུམ་གྱི་ཆ་ལས་གྲོལ། །ཐིག་ལེ་ཆ་གསུམ་ཕྲ་མོ་ནི། །ཡན་ལག་ལྔ་ལྡན་འབྱུང་བའི་རིམ། །སྒྲ་དང་རང་རིག་རེ་རེར་སྣང ། །སྟོང་ཉིད་ཐབས་དང་ཤེས་རབ་ཚུལ། །ས་དང་ལམ་སོགས་རིམ་པ་ཀུན། །རང་བཞིན་གྱིས་གནས་མཁས་པས་སྦྱར། །དེ་ནས་སྒྲོན་མའི་ཚད་བསྟན་ཏེ། །ཚད་ནི་སྤྱི་དང་བྱེ་བྲག་སྟེ། །བརྒྱ་ཕྲག་གཉིས་དང་བཅུ་གཉིས་དང ། །ཡི་གེ་གསུམ་ལས་ངེས་འབྱུང་བ། །གསང་བ་གཅོད་པའི་རྒྱུད་ཀྱི་ཚད། །བརྒྱ་ཕྲག་གཅིག་དང་སུམ་བཅུ་ལྔ། །ཡི་གེ་བཅུ་དགུ་ལས་བྱུང་བ། །རིན་ཆེན་ཕྲེང་བའི་ངེས་པའི་ཚད། །བརྒྱ་ཕྲག་གཅིག་དང་སུམ་བཅུ་བཞི། །མི་འགྱུར་བཅུ་གསུམ་ལས་བྱུང་བ། །སྐུ་གསུང་ཐུགས་ཀྱི་སྒྲོན་མའོ། །བརྒྱད་བཅུ་རྩ་ལྔར་ཡི་གེ་བཞིས། །མ་ཚང་པ་ལས་གང་འགྱུར་བ། །གསང་བ་བསམ་གྱིས་མི་ཁྱབ་པའོ། །བརྒྱད་བཅུ་རྩ་གཉིས་ཡི་གེ་གཅིག་།རིན་ཆེན་འབར་བའི་ལྡང་ཚད་དོ། །སུམ་བཅུ་རྩ་གཅིག་ཡི་གེ་ནི། །ཉི་ཤུ་རྩ་གཉིས་ལས་བྱུང་བ། །ནམ་མཁའ་མཉམ་པའི་ཚད་ཡིན་ནོ། །དྲུག་བཅུ་རྩ་དྲུག་ཡི་གེ་དྲུག་།དམ་ཚིག་ཆེན་པོའི་རྒྱུད་ཀྱི་ཚད། །དྲུག་བཅུ་ཡི་གེ་ཉི་ཤུ་གཅིག་།གསང་བ་རྡོ་རྗེར་རབ་ཏུ་གྲགས། །དྲུག་བཅུ་རྩ་གཉིས་མི་འགྱུར་བ། །བཅུ་དྲུག་སྟོབས་པོ་ཆེ་ཡི་ཚད། །བཞི་བཅུ་རྩ་གཅིག་ཡི་གེ་ལྔ། །ནམ་མཁའ་ཆེན་པོའི་ཚད་ཡིན་ནོ། །དྲུག་བཅུ་རྩ་དྲུག་ཡི་གེ་དྲུག་།ཡེ་ཤེས་འབར་བའི་ལྡང་ཚད་དོ། །སུམ་བཅུ་རྩ་དྲུག་ཡི་གེ་དགུ། །ཡེ་ཤེས་ཕྲེང་བའི་ཚད་ཡིན་ནོ། །སུམ་བཅུ་རྩ་བཞི་ཉི་ཤུ་བཞི། །མཁའ་འགྲོ་གསང་བའི་ཚད་ཡིན་ནོ། །སུམ་བཅུ་རྩ་བཞི་བཅུ་བཞི་དག་།མེ་ཡི་ཕྲེང་བའི་ཚད་ཡིན་ནོ། །ཉི་ཤུ་རྩ་གཉིས་བཅཝ་བརྒྱད་དག་།ཡེ་ཤེས་རྒྱལ་པོའི་ལྡན་ཚད་དོ། །བདུན་བཅུ་རྩ་བརྒྱད་རྐང་བ་ཕྱེད། །ཆགས་པའི་རྒྱལ་པོའི་ཚད་ཡིན་ནོ། ། 87.42a ཚིགསུ་བཅད་པ་ཉི་ཤུ་ལྔ། །ཡེ་ཤེས་བསམ་པའི་ལྡང་ཚད་དོ། །དགུ་བཅུ་གོ་བརྒྱད་ལས་བྱུང་བ། །ཡེ་ཤེས་གསང་བའི་ཚད་ཡིན་ནོ། །ཉི་ཤུ་ཐམས་པ་གང་ཡིན་པ། །གསང་བ་རྡོ་རྗེ་རྒྱལ་པོའི་ཚད། །བརྒྱ་དང་ཉི་ཤུ་རྩ་གཉིས་ནི། །རྡོ་རྗེ་རྒྱལ་པོ་ར་ལིའི་ཚད། །ལྔ་བཅུ་རྩ་གསུམ་ཡི་གེ་བཅུ། །དུར་ཁྲོད་རྒྱན་གྱི་ལྡང་ཚད་དོ། །སུམ་བཅུ་རྩ་གསུམ་ཡི་གེ་ནི། །བཅུ་དྲུག་མཁའ་འགྲོ་མ་སྡོམ་ཚད། །ལྔ་བཅུ་ཡྀ་གེ་བཅཝ་ལྔ་ལས། །བྱུང་བ་གསང་བ་བདུད་རྩིའི་རྒྱལ། །བཞི་བཅུ་ཡི་གེ་ཉི་ཤུ་བཞི། །ཉི་མའི་འཁོར་ལོའི་གཞུང་ཚད་དོ། །སུམ་བཅུ་ཡི་གེ་བཅུ་དྲུག་ལས། །བྱུང་བ་ཟླ་བའི་ཕྲེང་ཚད་དོ། །དེ་ནས་ངེས་པར་བཤད་བྱ་སྟེ། །གསང་བའི་འཁོར་ལོ་གང་སྟོན་པ། །གསང་བའི་རྡོ་རྗེའི་དམ་ཚིག་དག་།སྟོན་པ་དམ་ཚིག་ཆེན་པོར་ངེས། །དགྲ་དྲུག་སྟོན་པ་སྟོབས་པོ་ཆེ། །དབང་བཞི་དགག་སྒྲུབ་གསང་བ་གཅོད། །རང་རིག་དེ་སྟོན་བསམ་མི་ཁྱབ། །ཡི་གེ་གསུམ་སྟོན་རིན་ཆེན་འབར། །སྒོ་གསུམ་ལམ་སྟོན་ནམ་མཁའ་མཉམ། །བཅོམ་ལྡན་ལ་སོགས་ཐེ་ཙོམ་མེད། །སྟོན་པ་ནམ་མཁའ་ཆེན་པོ་སྟེ། །དབང་བཞིའི་དེ་ཉིད་གང་སྟོན་པ། །ཡེ་ཤེས་གསང་བའི་རྒྱུད་དུ་ངེས། །ལྟ་སྤྱོད་རྨད་དུ་གང་བྱུང་བ། །སྟོན་པ་ཡེ་ཤེས་ཕྲེང་བར་ངེས། །གླེང་བསླང་རྣམ་པ་ལྔ་ཡི་དོན། །སྟོན་པ་མཁའ་འགྲོ་གསང་བའི་རྒྱུད། །ཧེ་རུ་ཀ་དཔལ་གང་སྟོན་པ། །མེ་ཡི་ཕྲེང་བའི་རྒྱུད་དུ་གྲགས། །དབང་གསུམ་དོན་ནི་གང་སྟོན་པ། །སྐུ་གསུང་ཐུགས་ཀྱི་ར་ལིར་ངེས། །སྣོད་བཅུད་རིན་ཆེན་སྟོན་བྱེད་པ། །རིན་ཆེན་ཕྲེང་བའི་ར་ལིར་ངེས། །ལྷན་ཅིག་སྐྱེས་སྟོན་ཡེ་ཤེས་བསམ། །རྡོ་རྗེ་རྙོག་པ་མེད་པའོ། །ལྷ་ཡི་དེ་ཉིད་གང་སྟོན་པ། །ཆགས་པའི་རྒྱལ་པོའི་ར་ལིར་ངེས། །ངེས་པ་ལྔ་སྟོན་རྡོ་རྗེ་རྒྱལ། །ཱ་ལི་དུར་ཁྲོད་བརྒྱད་སྟོན་དུར་ཁྲོད་བརྒྱན། །དམ་ཚིག་སྡོམ་པ་མཁའ་འགྲོ་གསུམ། །སྟོན་པ་མཁའ་འགྲོ་སྡོམ་པའོ། །དཀྱིལ་འཁོར 87.42b ལ་སོགས་དྲུག་སྟོན་པ། །གསང་བ་བདུད་རྩིའི་རྒྱལ་པོའོ། །འཁྲུལ་པ་འཁྲུལ་གཞི་དེ་སད་པ། །གསུམ་སྟོན་ཡེ་ཤེས་རྒྱལ་པོའི་རྒྱུད། །མ་སྤངས་ངེས་སྟོན་ཉི་འཁོར་ལོ། །ཚད་ངེས་བསྒྲུབ་གསུམ་སྟོན་ཟླ་ཕྲེང ། །རྒྱུད་སོགས་ལྔ་སྟོན་ཡེ་ཤེས་འབར། །དེ་ནས་འཁོར་ཐམས་ཅད་དགའ་ནས་རྒྱུད་ཐམས་ཅད་ཀྱི་དོན་ལ་ཡི་རང་བར་གྱུར་ཏོ། །དཔལ་ཟླ་བའི་ཕྲེང་བའི་རྒྱུད་ཀྱི་རྒྱལ་པོ་རྫོགས་སྷོ།། །།རྒྱ་གར་གྱི་མཁན་པོ་གཱ་ཡ་དྷ་ར་དང ། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ། ། |