rKTs


J388

(e-text produced by ADARSHA)

see text in transliteration
87.48b
༄། །རྒྱ་གར་སྐད་དུ། ་་ཤྲཱི་བཛྲ་ཌཱ་ཀི་གུ་ཧྱ་ཏནྟྲ་རཱ་ཛ། ་་བོད་སྐད་དུ། ་་དཔལ་རྡོ་རྗེ་མཁའ་འགྲོ་གསང་བའི་རྒྱུད་ཀྱི་རྒྱལ་པོ། ་དཔལ་ཧེ་རུ་ཀ་ལ་ཕྱག་འཚལ་ལོ། །ཀྱེ་ཧོ་མངོན་རྫོགས་མགོན་པོ་ཀྱེ། །དབང་རྣམས་དམ་པ་ཡོད་དམ་ཅི། །གཙོ་འཁོར་ཁྱད་པར་མེད་དམ་ཅི། །སེམས་ཅན་དང་ནི་སངས་རྒྱས་ལ། །བྱེ་བྲག་ཐ་དད་མེད་དམ་ཅི། །དམ་ཚིག་ཆེ་ཆུང་ཇི་ལྟར་མཆིས། །དེ་ཉམས་བཤགས་ཐབས་ཡོད་དམ་ཅི། །བཅོམ་ལྡན་འདས་ཀྱི་བཀའ་སྩལ་པ། །རྣམ་རྟོག་གཟུང་འཛིན་དགག་པ་དང ། །རང་རིག་ཡེ་ཤེས་བླུགས་པའི་ཕྱིར། །དབང་རྣམས་སྒྱུ་མ་ཙམ་དུ་ཡོད། །རྣལ་འབྱོར་སེམས་ཀྱི་ངོ་བོ་རུ། །དབང་ནི་ངེས་པ་ཁོ་ན་སྟེ། །ལུས་ངག་ཀུན་ནས་བཟང་བ་ལ། །དེ་ཕྱིར་སེམས་ཀྱི་དྲི་མ་ནི། །འཁྲུད་དང་གཏོར་དང་སྲེག་པ་དང ། །མཁྱེན་པའི་རྟེན་དང་གོ་འབྱེད་པས། །ས་དང་ཆུ་དང་མེ་དང་རླུང ། །ནམ་མཁའ་ལྟ་བུར་གསུངས་པ་སྟེ། །དང་པོ་གཉིས་པ་གསུམ་པ་དག་།རིམས་ཀྱིས་མ་བགྲོད་དབང་མི་ཐོབ། །བསྐྱེད་པའི་རིམ་ལ་ལེགས་གནས་ཤིང ། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུང ། །
87.49a
གང་ཟག་མཆོག་དང་ལས་དང་པོ། །མངོན་པར་རྟོགས་པའི་རིམ་པ་དང ། །མངོན་པར་རྟོགས་པའི་ཡན་ལག་གོ། །འདི་ཡིས་ངན་འགྲོ་སྲིད་ལས་གྲོལ། །དབང་དང་དམན་ངག་འབྲེལ་བས་སོ། །དེ་ནས་བཞི་པ་ཞལ་གྱི་དབང ། །སྔོན་དུ་འགྲོ་དང་མི་འགྲོ་མེད། །འདྀ་ནི་དབང་གི་རྒྱལ་པོ་སྟེ། །སློབ་དཔོན་སེམས་ཀྱི་རྒྱལ་པོ་ཡིན། །འདི་ནི་རང་རིག་བཞི་པའི་དབང ། །འདི་ཡིས་ཐམས་ཅད་གྲོལ་བར་འགྱུར། །འདི་ལ་རྟག་ཏུ་ཕྱག་སོགས་བྱ། །རྡོ་ཤིང་འདྲ་འབག་ལ་སོགས་པའི། །གཟུགས་བརྙན་ཡོངས་སུ་རྫོགས་པ་དང ། །རས་དང་ཚོན་ལ་སོགས་པ་ཡི། །གཟུགས་བརྙན་ཡོངས་སུ་རྫོགས་པ་ལ། །བྱིན་བརླབས་ཡེ་ཤེས་དབབ་བྱས་ནས། །ལྷ་ཡིན་ཟེར་ནས་མཆོད་སོགས་ཏེ། །བཅོས་མ་ལ་སོགས་དེ་ལྟར་ན། །ཕུང་སོགས་ཡེ་ནས་སངས་རྒྱས་ལ། །ཅི་ཡི་ཕྱིར་ན་མཆོད་མི་བྱེད། །དེ་ནས་གཞན་ཡང་དབྱེ་བ་དག་།འཁྲུལ་པ་དང་ནི་འཁྲུལ་པའི་གཞྀ། །བཅོས་མ་ཉེ་བར་བཅོས་མ་དང ། །འདྲ་བ་ཡིན་པ་ལྟ་བུ་ཡི། །དབང་བཞིས་གྲོལ་བར་མི་འགྱུར་ཏེ། །ལོག་པའི་སྲེད་པས་སྲིད་པར་འཆིང ། །འཁྲུལ་པའི་འཁོར་ལོས་འཁོར་བར་འཁོར། །དེ་བས་དངོས་གྲུབ་འདོད་པས་ཀྱང ། །ལྷ་ཡི་བུ་ཡི་བདུད་སྤང་ཏེ། །བླ་མ་དམ་པ་རྟག་ཏུ་བསྟེན། །ཡིད་ཆེས་རིགས་དང་ངེས་པ་སྐྱེ། །ལུང་གི་ཚད་མ་ཡིན་པ་དང ། །འོག་མ་སྤངས་ཤིང་གོང་མ་ཐོབ། །མན་ངག་ཚད་མ་ཡིན་པ་བླང ། །མོས་པའི་རྗེས་སུ་འབྲང་བྱེད་ཅིང ། །ཆེ་བའི་ང་རྒྱལ་ལ་གནས་ཤིང ། །འཇིག་རྟེན་ལྟ་སྤྱོད་དང་འདྲེས་པའི། །སྣོད་བཅུད་བླང་བར་མི་བྱའོ། །དེ་ནས་གཙོ་འཁོར་བྱེ་བྲག་ཀྱང ། །གནས་ཀྱི་ཁྱད་པར་དབུས་སུ་སྟེ། །རྒྱན་གྱི་ཁྱད་པར་ཐལ་བའོ། །རིགས་ཀྱི་ཁྱད་པར་དྲུག་པའི་རིགས། །དེ་ནས་གཙོ་འཁོར་བྱེ་བྲག་ཀྱང ། །ཕྱག་དང་ཞབས་སོགས་ཁྱད་པར་གྱིས། །གཙོ་བོ་འཁོར་ལས་ཁྱད་པར་འཕགས། །དཔེར་ན་ཕ་རོལ་ཕྱིན་དྲུག་ལས། །ཤེས་རབ་ཕ་རོལ་ཕྱིན་མེད་ན། །ཕ་རོལ་ཕྱིན་པ་ལྔ་དག་གིས། །
87.49b
ཕ་རོལ་ཕྱིན་པའི་མིང་མི་ཐོབ། །དཀྱིལ་འཁོར་དབུས་སུ་གང་གནས་པའི། །དེ་ཉིད་ཀྱི་ནི་དཀྱིལ་འཁོར་སྟེ། །གང་ཞིག་དབུས་སུ་མི་གནས་ན། །འཁོར་རྣམས་དཀྱིལ་འཁོར་དུ་མི་འགྱུར། །དཔེར་ན་རྒྱལ་པོ་མེད་པ་ཡི། །གྲོང་དང་གྲོང་ཁྱེར་ཇི་བཞིན་ནོ། །དེ་བཞིན་དམ་ཚིག་བྱེ་བྲག་ཀྱང ། །རྩ་བའི་དམ་ཚིག་ཉམས་གྱུར་ན། །ཡན་ལག་དམ་ཚིག་དེ་དང་འདྲ། །ཐུགས་ཀྱི་དམ་ཚིག་ཉམས་གྱུར་ན། །སྐུ་གསུང་དམ་ཚིག་དེ་དང་འདྲ། །སྲོག་གཅོད་དམ་ཚིག་ཉམས་གྱུར་ན། །བརྫུན་དང་མ་བྱིན་ལེན་པ་དང ། །འདོད་ཆགས་དམ་ཚིག་དེ་དང་འདྲ། །ལྟ་བའི་དམ་ཚིག་ཉམས་གྱུར་ན། །སྤྱོད་པའི་དམ་ཚིག་དེ་དང་འདྲ། །ཚུལ་འཆོས་མི་དགེ་མོས་པ་ཙམ། །དམ་ཚིག་ཉམས་པ་དེ་དང་འདྲ། །དཔེར་ན་འཁོར་ལོས་སྒྱུར་བའི་རྒྱལ་པོ་དང ། །བྲལ་བའི་རིན་ཆེན་བདུན་པོ་དེ་དག་གིས། །འཁོར་ལོས་སྒྱུར་བའི་མིང་ནི་མི་ཐོབ་བཞིན། །བླ་མའི་ཞལ་ནས་ཐམས་ཅད་ཤེས་པར་བྱ། །དེ་ནས་སངས་རྒྱས་སེམས་ཅན་ཡང ། །རྡུལ་ཙམ་ཁྱད་པར་མེད་མོད་ཀྱང ། །རང་རིག་གཞན་རིག་རྐྱེན་དག་དང ། །རང་སེམས་ལས་སུ་རུང་བ་དང ། །མ་རུང་པ་དང་ལས་ཀྱི་མཐའ། །ལོག་པ་དང་ནི་མ་ལོག་པ། །དོན་བྱེད་ནུས་དང་མི་ནུས་པ། །ཡོངསུ་རྫོགས་དང་མ་རྫོགས་པས། །སངས་རྒྱས་སེམས་ཅན་གཉིས་སུ་སྣང ། །ཐ་དད་པར་ནི་མི་བརྟག་སྟེ། །ཆུ་ཁམས་གསེར་དང་ནམ་མཁའ་བཞིན། །རང་བཞིན་གྱིས་ནི་དག་པར་འདོད། །རང་སེམས་རང་གིས་རྟོགས་པ་ན། །སེམས་ཅན་གདོད་ནས་སངས་རྒྱས་སོ། །རྡོ་རྗེ་ཕག་མོས་ཡང་ཞུས་པ། །སྲོག་གཅོད་ལ་སོགས་དམ་ཚིག་གི། །དབྱེ་བ་ཁྱེད་ཀྱིས་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །རང་གི་ལུས་ངག་སེམས་གཡོས་ཀྱང ། །གསོད་པའི་འདུ་ཤེས་མ་སྐྱེས་ན། །སྲོག་གཅོད་ཉམས་པ་ཆུང་ངུར་ངེས། །གཞན་གྱིས་གནོད་པར་ཚོར་བ་དག་།ཉམས་པ་འབྲིང་དུ་གསུངས་པ་ཡིན། །དེ་ལས་བཟློག་པ་ཆེན་པོར
87.50a
ངེས། །གང་ཞིག་མ་བྱིན་ཆུང་བླངས་ཀྱང ། །གཞན་ལ་ཉོན་མོངས་ཆེར་སྐྱེས་ན། །དེ་ཉིད་ཉམས་པ་འབྲིང་དུ་ངེས། །ཆེར་བླངས་ཉོན་མོངས་ཆུང་ན་འབྲིང ། །ཆེན་པོ་ལས་ནི་ཉོན་མོངས་ཆེར། །དེ་ནི་ཆེན་པོ་ཁོ་ནར་ངེས། །ཚུལ་འཆོས་ལྟུང་བ་ཆེན་པོ་སྟེ། །མི་ཤེས་པ་དང་བག་མེད་དག་།བརྗེད་ངས་ལ་སོགས་འབྲིང་དུ་གསུངས། །གཞན་ཡང་དམ་ཚིག་ཉམས་པ་ཡི། །ཆེ་འབྲིང་ཆུང་ངུའི་ལྡང་ཚད་དག་།རང་དང་གཞན་དང་གཉི་ཀ་ཡིས། །རྒྱུ་རྐྱེན་དག་ལས་ཤེས་བྱ་སྟེ། །ལྟུང་བའི་ངོ་བོས་ཟིན་པ་དང ། །ཕྱི་ནང་རྡོ་རྗེ་སློབ་དཔོན་གྱིས། །སྤྱན་སྔར་དཀྱིལ་འཁོར་ཆེན་པོ་བཞེངས། །ཚུལ་དང་འཐུན་པར་བཤད་པ་བྱ། །དམ་ཚིག་གོང་འོག་བྱེ་བྲག་གིས། །བླ་མའི་དཀྱིལ་འཁོར་ཤེས་པར་བྱ། །གཞན་ཡང་བཤགས་པའི་བྱེ་བྲག་ལ། །སྦྱིན་སྲེག་གིས་ནི་སྡྀག་བསྲེག་ཕྱིར། །ནང་གི་སྦྱིན་སྲེག་ཆེན་པོ་བརྩམ། །ཟབ་པའི་མེ་ནི་རྒྱུན་གཞག་མེད། །ཐབས་ཀྱྀ་རྒྱུན་གཞག་མེ་ཡིན་ཏེ། །ལོ་བདུན་དང་ནི་ལོ་གཅིག་དག་།ཕྱི་ཡི་རྒྱུན་གཞག་ཆེན་པོའི་མེ། །ཟླ་བ་བདུན་དང་གསུམ་དག་ནི། །འབྲིང་དུ་གསུངས་ཏེ་ཞག་བདུན་སོགས། །རྒྱུན་གཞག་མེ་ནི་ཆུང་ངུར་གསུངས། །རྒྱས་པ་ལ་སོགས་དེ་བཞིན་ཏེ། །རང་བཞིན་གདོད་ནས་གནས་པ་ཡི། །གཏུམ་མོ་ཡེ་ཤེས་མེ་རང་བཞིན། །འདི་ནྀ་རྒྱུན་གཞག་ཆེན་པོའྀ་མེ། །ཐོག་མཐའ་མེད་པར་གནས་པའི་ཕྱྀར། །དམ་ཚིག་ཉམས་པའི་བུད་ཤིང་སོགས། །ཡེ་ཤེས་མེ་ཡི་བུད་ཤིང་ཡིན། །མན་ངག་ཅན་གྱིས་བསྲེགས་བྱས་ན། །ཉམས་པའི་ཤིང་སོགས་འཚྀག་པར་ངེས། །དགང་གཟར་ལ་སོགས་དེ་བཞིན་ཏེ། །རྒྱས་པ་ལ་སོགས་དེ་དང་འདྲ། །རྒྱུད་འདི་གཏད་ཀྱིས་ལེགས་པར་ཟུང ། །ཐམས་ཅད་དགའ་ཞིང་མགུ་བར་གྱུར། །དཔལ་རྡོ་རྗེ་མཁའ་འགྲོ་གསང་བའི་རྒྱུད་ཀྱི་རྒྱལ་པོ་རྫོགས་སྷོ།། །། རྒྱ་གར་གྱི་མཁན་པོ་གཱ་ཡ་དྷ་ར་དང ། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། །།