(ཁ)་༄#། !་།མདོ་སྡེ་སྣ་ཚོགས་ཀྱི་སྐོར་བཞུགས་སོ། །[(黃)་經藏第二部] 41.1b ༄##། ་་།རྒྱ་གར་སྐད་དུ། ་ཨཱརྱ་ལ་ལི་ཏ་བིསྟཱ་ར་ནཱ་མ་མ་ཧཱ་ཡཱ་ན་སཱུ་ཏྲ། ་བོད་སྐད་དུ། འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་ལ་འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽཎྜི་ནྱ་དང ། ཚེ་དང་ལྡན་པ་རྟ་ཐུལ་དང ། ཚེ་དང་ལྡན་པ་རླངས་པ་དང ། ཚེ་དང་ལྡན་པ་མིང་ཆེན་དང ། ཚེ་དང་ལྡན་པ་བཟང་པོ་དང ། ཚེ་དང་ལྡན་པ་གྲགས་སྦྱིན་དང ། ཚེ་དང་ལྡན་པ་དྲི་མ་མེད་དང ། ཚེ་དང་ལྡན་པ་ལག་བཟངས་དང ། ཚེ་དང་ལྡན་པ་གང་པོ་དང ། ཚེ་དང་ལྡན་པ་བ་ལང་བདག་དང ། ཚེ་དང་ལྡན་པ་ལྟེང་རྒྱས་འོད་སྲུང་དང ། ཚེ་དང་ལྡན་པ་ཆུ་ཀླུང་འོད་སྲུང་དང ། ཚེ་དང་ལྡན་པ་ག་ཡ་འོད་སྲུང་དང ། ཚེ་དང་ལྡན་པ་ཤཱ་རིའི་བུ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་དང ། ཚེ་དང་ལྡན་པ་འོད་སྲུང་ཆེན་པོ་དང ། ཚེ་དང་ལྡན་པ་ཀཱ་ཏྱཱའི་བུ་ཆེན་པོ་དང ། ཚེ་དང་ལྡན་པ་ཀ་པི་ན་ཆེན་པོ་དང ། ཚེ་དང་ལྡན་པ་གསུས་པོ་ཆེ་དང ། ཚེ 41.2a དང་ལྡན་པ་སྐུལ་བྱེད་དང ། ཚེ་དང་ལྡན་པ་བྱམས་མའི་བུ་གང་པོ་དང ། ཚེ་དང་ལྡན་པ་མ་འགགས་པ་དང ། ཚེ་དང་ལྡན་པ་དགའ་བྱེད་དང ། ཚེ་དང་ལྡན་པ་འུག་པ་དང ། ཚེ་དང་ལྡན་པ་རབ་འབྱོར་དང ། ཚེ་དང་ལྡན་པ་ནམ་གྲུ་དང ། ཚེ་དང་ལྡན་པ་སེང་ལྡེང་ནགས་པ་དང ། ཚེ་དང་ལྡན་པ་དོན་ཡོད་རྒྱལ་པོ་དང ། ཚེ་དང་ལྡན་པ་ཕ་རོལ་ཏུ་འགྲོ་བ་ཆེན་པོ་དང ། ཚེ་དང་ལྡན་པ་བཀྐུ་ལ་དང ། ཚེ་དང་ལྡན་པ་དགའ་བོ་དང ། ཚེ་དང་ལྡན་པ་སྒྲ་གཅན་ཟིན་དང ། ཚེ་དང་ལྡན་པ་ལེགས་འོངས་དང ། ཚེ་དང་ལྡན་པ་ཀུན་དགའ་བོ་དང ། དེ་དག་ལ་སོགས་པ་དགེ་སློང་ཁྲི་ཉིས་སྟོང་དང་ཐབས་གཅིག་ཏུ་བཞུགས་སོ། །བྱང་ཆུབ་སེམས་དཔའ་སུམ་ཁྲི་ཉིས་སྟོང་ཐམས་ཅད་ཀྱང་སྐྱེ་བ་གཅིག་གིས་ཐོགས་པ། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཐམས་ཅད་ལས་ངེས་པར་སྐྱེས་པ། བྱང་ཆུབ་སེམས་དཔའི་མངོན་པར་ཤེས་པ་ཐམས་ཅད་ཀྱིས་རྣམ་པར་རྩེ་བ། བྱང་ཆུབ་སེམས་དཔའི་གཟུངས་ཐམས་ཅད་ཐོབ་པ། བྱང་ཆུབ་སེམས་དཔའི་སྤོབས་པ་ཐམས་ཅད་ཐོབ་པ། བྱང་ཆུབ་སེམས་དཔའི་སྨོན་ལམ་ཐམས་ཅད་ཤིན་ཏུ་ཡོངས་སུ་རྫོགས་པ། བྱང་ཆུབ་སེམས་དཔའི་སོ་སོ་ཡང་དག་པར་རིག་པ་ཐམས་ཅད་རྟོགས་པར་ཁོང་དུ་ཆུད་པ། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ལ་དབང་ཐོབ་པ། བྱང་ཆུབ་སེམས་དཔའི་དབང་ཐམས་ཅད་ཐོབ་པ། བྱང་ཆུབ་སེམས་དཔའི་བཟོད་པ་ཐམས་ཅད་ལ་ཞུགས་པ། བྱང་ཆུབ་སེམས་དཔའི་ས་ཐམས་ཅད་རབ་ཏུ་རྫོགས་པ་ཤ་སྟག་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཀྱི་དབང་ཕྱུག་རྒྱལ་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་ཏོག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དོན་གྲུབ་བློ་གྲོས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་རབ་ཏུ་ཞི་བའི་བློ་གྲོས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོ་ཡང་དག་པར་རིག་པ་ཐོབ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་རྟག་པར་སྦྱོར་དང ། བྱང་ཆུབ་སེམས་དཔའ་སེམས 41.2b དཔའ་ཆེན་པོ་སྙིང་རྗེ་ཆེན་པོ་སེམས་དཔའ་དང ། དེ་དག་ལ་སོགས་པ་བྱང་ཆུབ་སེམས་དཔའ་སུམ་ཁྲི་ཉིས་སྟོང་དང་ཡང་ཐབས་གཅིག་གོ། །དེའི་ཚེ་བཅོམ་ལྡན་འདས་མཉན་ཡོད་ཀྱི་གྲོང་ཁྱེར་ཆེན་པོ་ན། འཁོར་བཞི་དང ། རྒྱལ་པོ་དང ། རྒྱལ་པོའི་སྲས་དང ། རྒྱལ་པོའི་བློན་པོ་ཆེན་པོ་དང ། ཆགས་འོག་གི་རྒྱལ་ཕྲན་དང ། རྒྱལ་པོའི་ཞབས་འབྲིང་བ་དང ། རྒྱལ་རིགས་དང ། བྲམ་ཟེ་དང ། ཚོང་དཔོན་དང ། ཁྱིམ་བདག་དང ། བློན་པོ་དང ། འཁོར་གྱི་མི་དང ། གྲོང་ཁྱེར་པ་དང ། ཡུལ་གྱི་མི་དང ། མུ་སྟེགས་ཅན་དང ། དགེ་སྦྱོང་དང ། བྲམ་ཟེ་དང ། སྤྱོད་པ་པ་དང ། ཀུན་ཏུ་རྒྱུ་སྣ་ཚོགས་ཀྱིས་རིམ་གྲོར་བྱས། བླ་མར་བྱས། སྟི་སྟང་དུ་བྱས། མཆོད་པ་བྱས་སོ། །བཅོམ་ལྡན་འདས་ནི་བཟའ་བ་དང ། བཅའ་བ་དང ། མྱང་བ་བསོད་ཅིང་མང་བ་དང ། ན་བཟའ་དང ། བསོད་སྙོམས་དང ། གཟིམས་ཆ་དང ། སྙུན་གྱི་གསོས་སྨན་དང ། ཡོ་བྱད་རུང་བ་བརྙེས་ཤིང ། བཅོམ་ལྡན་འདས་ནི་བརྙེས་པ་དམ་པ་དང ། གྲགས་པ་དམ་པ་བརྙེས་ཀྱང་པད་མ་ལ་ཆུས་མི་གོས་པ་ལྟར་ཐམས་ཅད་དུ་མ་ཆགས་མ་གོས་པར་བཞུགས་སོ། །བཅོམ་ལྡན་འདས་ཀྱི་གྲགས་པ་དང ། སྒྲ་དང་སྙན་པ་ནི་འདི་སྐད་དུ། བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤེས་བྱ་བར་འཇིག་རྟེན་དུ་མངོན་པར་གྲགས་པར་གྱུར་ཏོ། །དེ་ནི་སྤྱན་ལྔ་དང་ལྡན་པ་སྟེ། འཇིག་རྟེན་འདི་དང་འཇིག་རྟན་ཕ་རོལ་ལྷ་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་ལྷ་དང་མིར་བཅས་པ་དག་།རང་གིས་མངོན་པར་མཁྱེན་པས་མངོན་དུ་མཛད་ནས་ཉེ་བར་བསྒྲུབས་ཏེ་རབ་ཏུ་སྟོན་ཏོ། །དེ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་དཀར་བའི་ཆོས་སྟོན་ཏེ། ཚངས་པའི་སྤྱོད་པ་ཡང་དག་པར་སྟོན་ཏོ། །དེའི་ཚེ་བཅོམ་ལྡན་འདས་ཀྱིས་ནམ་གྱི་གུང་ཐུན་ལ། སངས་རྒྱས 41.3a ཀྱི་རྒྱན་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པར་གྱུར་ཏོ། །བཅོམ་ལྡན་འདས་ཀྱིས་སངས་རྒྱས་ཀྱི་རྒྱན་བཀོད་པ་ཞེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ། སྐད་ཅིག་དེ་ཉིད་ལ་བཅོམ་ལྡན་འདས་ཀྱི་དབུའི་གཙུག་གི་གཙུག་ཏོར་གྱི་གསེབ་ནས། སྔོན་གྱི་སངས་རྒྱས་རྗེས་སུ་དྲན་པར་བྱ་བ་ལ་ཆགས་པ་མེད་པའི་ཡེ་ཤེས་སྣང་བ་ཞེས་བྱ་བའི་འོད་ཟེར་བྱུང་སྟེ། དེས་གནས་གཙང་མའི་ལྷའི་གནས་ཐམས་ཅད་སྣང་བར་བྱས་ནས་ལྷའི་བུ་དབང་ཕྱུག་ཆེན་པོ་ལ་སོགས་པ་ལྷའི་བུ་ཚད་མེད་པ་དག་ཡང་དག་པར་བསྐུལ་ཏོ། །དེ་བཞིན་གཤེགས་པའི་འོད་ཟེར་གྱི་ཚོགས་དེ་ལས་བསྐུལ་བའི་ཚིགས་སུ་བཅད་པ་འདི་དག་ཀྱང་བྱུང་ངོ ། །ཡེ་ཤེས་འོད་ལྡན་མུན་བཅོམ་འོད་མཛད་པ། །འོད་བཟང་གཟི་བརྗིད་དམ་པ་དྲི་མེད་པ། །སྐུ་ལུས་རབ་ཞི་ཐུགས་དགེ་ཞི་བ་པོ། །ཤཱཀྱའི་སེང་གེ་ཐུབ་དང་ཕྲད་པར་གྱིས། །ཡེ་ཤེས་རྒྱ་མཚོ་མཐུ་ཆེན་དག་པ་སྟེ། །ཆོས་ཀྱི་མངའ་བདག་ཀུན་མཁྱེན་ཐུབ་པའི་དབང ། །མི་དང་ལྷས་མཆོད་ལྷ་ཡི་ལྷར་གྱུར་པ། །ཆོས་ལ་རང་བྱུང་མངའ་དབང་མཛད་ལ་སྟོན། །གང་ཞིག་གདུལ་དཀའི་སེམས་ལ་མངའ་མཛད་དེ། །གང་ཞིག་བདུད་ཀྱི་རྙི་ལས་གྲོལ་བའི་ཐུགས། །དེ་འདིར་མཐོང་ཐོས་དོན་མེད་མ་ཡིན་གྱིས། །རྣམ་གྲོལ་མཐར་ཕྱིན་ཞི་བའི་དྲུང་དུ་དེང ། །མཚུངས་མེད་ཆོས་ལ་སྣང་བར་གྱུར་པ་སྟེ། །མུན་སེལ་ཚུལ་བཟང་སྟོན་པར་རབ་མཛད་པ། །སངས་རྒྱས་སྤྱོད་ཞི་མཁྱེན་པ་དཔག་མེད་པ། །དེ་ཡི་དྲུང་དུ་དད་པ་མཆོག་གིས་དེང ། །དེ་ནི་སྨན་པའི་རྒྱལ་པོ་བདུད་རྩི་གཏོང ། །དེ་ནི་སྨྲ་བ་དཔའ་བོ་ཚོགས་ངན་འཇོམས། །དེ་ནི་ཆོས་ཀྱི་རྩ་ལག་དོན་དམ་མཁས། །དེ་ནི་འདྲེན་པ་བླ་མེད་ལམ་སྟོན་པའོ། །གནས་གཙང་མའི་རིས་ཀྱི་ལྷའི་བུ་དེ་དག་སྔོན་གྱི་སངས་རྒྱས་རྗེས་སུ་དྲན་པར་བྱ་བ་ལ་ཆགས་པ་མེད་པའི་ཡེ་ཤེས་སྣང་བའི་འོད་ཟེར་དེས་ཕོག་ཅིང་ཚིགས་སུ་བཅད་པ་རྣམ་པ་དེ་ལྟ་བུ་དེ་དག་གིས་ཀྱང་བསྐུལ་མ་ཐག་ཏུ་རབ་ཏུ་ཞི་བའི་ཏིང་ངེ་འཛིན་དེ་ལས་ལངས་ནས་སངས་རྒྱས་ཀྱི་མཐུས་བསྐལ་པ་གྲངས་མེད་ཚད་མེད། བགྲང་བ 41.3b ལས་ཤིན་ཏུ་འདས་པ་དག་ལས་འདས་པའི་སངས་རྒྱས་བཅོམ་ལྡན་འདས་རྣམས་རྗེས་སུ་དྲན་ཞིང ། སངས་རྒྱས་བཅོམ་ལྡན་འདས་དེ་དག་གི་སངས་རྒྱས་ཀྱི་ཞིང་གི་ཡོན་ཏན་བཀོད་པ་གང་ཡིན་པ་དག་དང ། འཁོར་གྱི་དཀྱིལ་འཁོར་གང་ཡིན་པ་དག་དང ། ཆོས་བསྟན་པ་གང་ཡིན་པ་དེ་དག་ཐམས་ཅད་ཀྱང་རྗེས་སུ་དྲན་པར་གྱུར་ཏོ། །དེ་ནས་དེའི་ནུབ་མོ་མི་ཉལ་ཙམ་ན་གནས་གཙང་མའི་རིས་ཀྱི་ལྷའི་བུ་དབང་ཕྱུག་ཅེས་བྱ་བ་དང ། དབང་ཕྱུག་ཆེན་པོ་དང ། དགའ་བོ་དང ། ཤིན་ཏུ་དགའ་བོ་དང ། ཙན་དན་དང ། མཆོད་བྱས་དང ། རབ་ཞི་དང ། དུལ་བ་རབ་ཞི་དབང་ཕྱུག་ལ་སོགས་པ་དེ་དག་དང ། གནས་གཙང་མའི་རིས་ཀྱི་ལྷའི་བུ་གཞན་ཤིན་ཏུ་མང་པོ་ཁ་དོག་འཕགས་ཤིང་ཤིན་ཏུ་འཕགས་པ་དང་ལྡན་པ་དག་གིས། ལྷའི་སྣང་བས་རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་སྣང་བར་བྱས་ཏེ། བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་གནས་གཙང་མའི་རིས་ཀྱི་ལྷའི་བུ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱ་ཆེར་རོལ་པ་ཞེས་བགྱི་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བསྡུས་པ། བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡང་དག་པར་བསྟན་པ། དགའ་ལྡན་གྱི་ཕོ་བྲང་དམ་པ་ནས་འབབ་པ་དང ། ཆེད་དུ་དགོངས་ཏེ་ལྷུམས་སུ་འཇུག་པའི་རྣམ་པར་རོལ་པ་དང ། མངལ་གྱི་གནས་ཀྱི་ཁྱད་པར་ཀུན་ཏུ་བསྟན་པ། རིགས་བཟང་པོར་སྐྱེ་བའི་སའི་མཐུ་ཀུན་དུ་བསྟན་པ། བྱིས་པའི་སྤྱོད་པ་ཐམས་ཅད་ལས་ཡོན་ཏན་གྱི་ཁྱད་པར་གྱིས་ཤིན་ཏུ་འདའ་བ་བསྟན་པ། འཇིག་རྟེན་པའི་བཟོའི་གནས་དང ། ལས་ཀྱི་གནས་དང ། ཡི་གེ་དང ། གྲངས་དང ། ལག་རྩིས་དང ། རྩིས་དང ། རལ་གྲིའི་ཐབས་དང ། འཕོང་དང ། སྟོབས་དང ། གྱད་ཀྱི་འཛིན་སྟངས་རྣམས་སེམས་ཅན་ཐམས་ཅད་ལས་ཁྱད་པར་དུ་འཕགས་པ་ཀུན་ཏུ་བསྟན་པ། བཙུན་མོའི་འཁོར་དང ། ཡུལ་གྱི་ལོངས་སྤྱོད་དང ། ཡོངས་སུ་སྤྱོད་པ་ཀུན་ཏུ་བསྟན་པ། བྱང 41.4a ཆུབ་སེམས་དཔའི་སྤྱོད་པ་ཐམས་ཅད་ཀྱི་རྒྱུ་འཐུན་པས་ཡོངས་སུ་གྲུབ་པའི་འབྲས་བུ་བརྙེས་པ་ཡོངས་སུ་བརྗོད་པ། བྱང་ཆུབ་སེམས་དཔའི་རྣམ་པར་རོལ་པ་དང ། བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པ་བསྟན་པ། དེ་བཞིན་གཤེགས་པའི་སྟོབས་དང ། མི་འཇིགས་པ་བསྡུས་པ། སངས་རྒྱས་ཀྱི་ཆོས་ཚད་མ་མཆིས་པ་ངེས་པར་བསྟན་པ། སྔོན་གྱི་དེ་བཞིན་གཤེགས་པ་རྣམས་ཀྱིས་སྔོན་ཆད་གསུངས་པ་མཆིས་ཏེ། འདི་ལྟ་སྟེ། བཅོམ་ལྡན་འདས་པད་མའི་བླ་མ་དང ། ཆོས་ཀྱི་ཏོག་དང ། མར་མེ་མཛད་དང ། ཡོན་ཏན་གྱི་ཏོག་དང ། ཡོན་ཏན་འབྱུང་གནས་དང ། འོད་ཟེར་ཆེན་པོ་དང ། དྲང་སྲོང་ལྷ་དང ། དཔལ་གྱི་གཟི་བརྗིད་དང ། བདེན་པའི་ཏོག་དང ། རྡོ་རྗེ་མཁྲེགས་དང ། ཐམས་ཅད་ཟིལ་གྱིས་གནོན་དང ། གསེར་མདོག་དང ། ཤིན་དུ་མཐོར་གཤེགས་དང ། བྱི་རུའི་རྒྱ་མཚོ་དང ། མེ་ཏོག་གི་ཏོག་དང ། གཟུགས་བཟང་དང ། སྤྱན་བཟང་དང ། དྲང་སྲོང་སྦེད་དང ། དམག་ཚོགས་ལས་རྒྱལ་དང ། མཐོ་བ་དང ། མེ་ཏོག་རྒྱས་པ་དང ། མཛོད་སྤུ་གཟི་བརྗིད་དང ། ཤིན་དུ་རྒྱས་དང ། འོད་ཟེར་བཟང་པོ་དང ། བཀྲ་ཤིས་ལྡན་དང ། བལྟ་ན་བཟང་དང ། སེང་གེའི་གཟི་བརྗིད་ཆེན་པོ་དང ། བློ་གྲོས་བརྟན་པས་བྱིན་དང ། སོས་ཀའི་སྤོས་དྲི་དང ། བདེན་པའི་ཆོས་གྲགས་རྒྱ་ཆེན་དང ། འོད་ལྡན་དང ། སྐར་རྒྱལ་དང ། འཇིག་རྟེན་མཛེས་དང ། འོད་རྒྱ་ཆེན་དང ། རིན་ཆེན་གྲགས་དང ། དྲག་ཤུལ་གཟི་བརྗིད་དང ། རིན་ཆེན་གཟི་བརྗིད་དང ། ཚངས་པའི་གཟི་བརྗིད་དང ། སྒྲ་སྙན་དང ། མེ་ཏོག་བཟང་པོ་དང ། རི་རབ་མེ་ཏོག་དང ། རབ་ཏུ་ཡིད་འོང་དབྱངས་དང ། དགེ་བ་ཚུལ་བཟངས་དང ། རབ་ཏུ་འཛུམ་པའི་སྤྱན་དང ། ཡོན་ཏན་ཕུང་པོ་དང ། འབྲུག་སྒྲ་དང ། ཁ་དོག་མཛེས་དང ། ཚེའི་གཟི་བརྗིད་དང ། དོམ་བག་གླང་པོའི་འགྲོས་དང ། འཇིག་རྟེན་མངོན་པར་སྨོན་དང ། དགྲ་ལས་རྒྱལ་དང ། ཡང་དག་མཆོད་དང ། རྣམ་པར་གཟིགས་དང ། གཙུག་ཏོར་ཅན་དང ། ཐམས་ཅད་སྐྱོབས་དང ། འཁོར་བ་འཇིགས་དང ། གསེར་ཐུབ་དང ། དེ་བཞིན་གཤེགས་པ་དགྲ་བཅོམ་པ་ཡང་དག 41.4b པར་རྫོགས་པའི་སངས་རྒྱས་འོད་སྲུང་གིས་ཀྱང་སྔོན་ཆད་གསུངས་པ་ལགས་ན། དེ་བཅོམ་ལྡན་འདས་ཀྱིས་ཀྱང་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེའི་དོན་དང ། ལྷ་དང་མི་རྣམས་ཀྱི་དོན་དུ་འགྱུར་བ་དང ། སྨན་པ་དང་བདེ་བར་འགྱུར་བ་དང ། ཐེག་པ་ཆེན་པོ་འདིའང་བརྗོད་པ་དང ། ཕས་ཀྱི་རྒོལ་བ་ཐམས་ཅད་ཚར་གཅད་པ་དང ། བདུད་ཐམས་ཅད་ཟིལ་གྱིས་མནན་པ་དང ། བྱང་ཆུབ་སེམས་དཔའ་ཐམས་ཅད་ལ་བསྟན་པ་དང ། བྱང་ཆུབ་སེམས་དཔའི་ཐེག་པ་པའི་གང་ཟག་ཐམས་ཅད་ཀྱི་བརྩོན་འགྲུས་བརྩམ་པ་བསྐྱེད་པ་དང ། དམ་པའི་ཆོས་ཡོངས་སུ་གཟུང་བ་དང ། དཀོན་མཆོག་གསུམ་གྱི་གདུང་མི་གཅད་པ་དང ། སངས་རྒྱས་ཀྱི་མཛད་པ་ཡོངས་སུ་རྫོགས་པ་ཡང་ཀུན་ཏུ་བསྟན་པའི་སླད་དུ་ད་བསྟན་དུ་གསོལ་ཞེས་གསོལ་པ་དང ། བཅོམ་ལྡན་འདས་ཀྱིས་ལྷའི་བུ་དེ་དག་དང་ལྷ་དང་བཅས་པའི་འཇིག་རྟེན་ལ་ཐུགས་བརྩེ་བའི་ཕྱིར་ཅང་མི་གསུང་བས་གནང་ངོ ། །དེ་ནས་ལྷའི་བུ་དེ་དག་ཀྱང ། བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཙན་དན་གྱི་ཕྱེ་མ་དང ། ་ག་རུའི་ཕྱེ་མ་དང ། མེ་ཏོག་མན་དཱ་ར་བ་དག་གིས་ཀྱང་མངོན་པར་གཏོར་ཏེ། དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ནུབ་མོ་དེའི་ནམ་ནངས་པ་དང ། སྨྱིག་མའི་ལྡུམ་བུའི་འཁོར་གྱི་ཁྱམས་ག་ལ་བ་དེར་གཤེགས་ཏེ་བྱོན་ནས། བཅོམ་ལྡན་འདས་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་ཉན་ཐོས་ཀྱི་དགེ་འདུན་གྱིས་མདུན་གྱིས་བལྟས་ཏེ། གདན་བཤམས་པ་ལ་བཞུགས་སོ། །བཞུགས་ནས་ཀྱང་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མདང་འདིར་ངའི་དྲུང་དུ་གནས་གཙང་མའི་རིས་ཀྱི་ལྷའི་བུ་དབང་ཕྱུག་ཅེས་བྱ་བ་དང ། དབང་ཕྱུག་ཆེན་པོ་དང་དགའ 41.5a བོ་དང ། ཤིན་ཏུ་དགའ་བོ་དང ། ཙན་དན་དང ། མཆོད་བྱས་དང ། རབ་ཞི་དང ། དུལ་བ་རབ་ཞི་དབང་ཕྱུག་ལ་སོགས་པ་དེ་དག་དང་གནས་གཙང་མའི་རིས་ཀྱི་ལྷའི་བུ་གཞན་ཤིན་ཏུ་མང་པོ་ཞེས་བྱ་བ་ནས། དེ་ཉིད་དུ་མི་སྣང་བར་གྱུར་ཅེས་བྱ་བའི་བར་དུ་སྔ་མ་བཞིན་དུ་གསུངས་སོ། །དེ་ནས་བྱང་ཆུབ་སེམས་དཔའ་དེ་དག་དང ། ཉན་ཐོས་ཆེན་པོ་དེ་དག་གིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱ་ཆེར་རོལ་པའི་ཆོས་ཀྱི་རྣམ་གྲངས་ལེགས་པར་བསྟན་དུ་གསོལ། དེ་ནི་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བར་མཛད་པ་དང ། སྐྱེ་བོ་ཕལ་པོ་ཆེ་དང ། ལྷ་དང་མི་རྣམས་དང ། ད་ལྟར་དང་མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དོན་དང ། སྨན་པ་དང་བདེ་བར་འགྱུར་རོ་ཞེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ཉན་ཐོས་ཆེན་པོ་དེ་དག་དང ། ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་ལ་ཐུགས་བརྩེ་བའི་ཕྱིར་ཅང་མི་གསུང་བས་གནང་ངོ ། །དེ་ལ་འདི་སྐད་ཅེས་བྱ་སྟེ། དགེ་སློང་དག་ཀྱེ་ང་ནི་མདང་སུམ་འདིར། །གནས་པ་བཟང་པོས་བདེ་བར་གནས་གྱུར་ཅིང ། །ཉོན་མོངས་མེད་པར་རབ་ཏུ་གནས་གྱུར་ལ། །རྩེ་གཅིག་སེམས་སུ་མཉམ་པར་བཞག་དྲུང་དུ། །རྫུ་འཕྲུལ་ཆེ་ཞིང་ཁ་དོག་བཟང་ལྡན་ལ། །དྲི་མེད་དཔལ་འབར་ལྷ་ཡི་བུ་ལྷགས་ནས། །དཔལ་གྱིས་རྒྱལ་བྱེད་ཚལ་འདི་སྣང་བྱས་ཏེ། །དགའ་བས་ང་ཡི་གན་དུ་མངོན་པར་ལྷགས། །དབང་ཕྱུག་དབང་ཕྱུག་ཆེན་པོ་ཙན་དན་དང ། །དགའ་བོ་རབ་ཏུ་སེམས་ཞི་མཆོད་བྱས་དང ། །ཤིན་ཏུ་དགའ་བོ་ཞི་བ་ལྷ་ཡི་བུ། །བྱེ་བ་ལྷ་མང་དེ་དང་དེ་དག་རྣམས། །ངའི་ཞབས་ལ་ཕྱག་འཚལ་བསྐོར་བྱས་ཏེ། །ང་ཡི་མདུན་དུ་འདིར་ནི་འཁོད་པར་གྱུར། །སོར་མོ་བཅུའི་ཐལ་སྦྱར་གུས་བཅས་པར། །དེ་དག་འདིར་ནི་ང་ལ་གསོལ་བ་བཏབ། །འཇིག་རྟེན་ཀུན་ལ་སྨན་པའི་དོན་སླད་དུ། །རྒྱལ་བ་ཀུན་གྱིས 41.5b སྔོན་ཆད་གང་གསུངས་པ། །ཤིན་དུ་རྒྱས་མདོ་གླེང་གཞི་ཆེན་པོ་འདི། །ཐུབ་པ་འདོད་ཆགས་བསལ་བས་དེ་རིང་ཡང ། །བྱང་ཆུབ་སེམས་དཔའི་ཚོགས་ཀུན་བཟུང་བཞེད་པས། །ཕས་ཀྱི་རྒོལ་དང་བདུད་རྣམས་འདུལ་མཛད་ལ། །ཐེག་པ་ཆེན་པོ་མཆོག་འདི་རབ་གསུང་ཞིང ། །ཐུབ་པ་དེ་སླད་ལེགས་པར་བཤད་དུ་གསོལ། །ལྷ་ཡི་ཚོགས་ཀྱིས་གསོལ་བ་དེ་སྣང་ཕྱིར། །མི་གསུང་གྱུར་པས་གནང་བ་མཛད་པས་ན། །ཐམས་ཅད་ཚིམ་ཞིང་རབ་དགའ་མགུ་གྱུར་ནས། །དགའ་བ་ཐོབ་པས་མེ་ཏོག་སིལ་མ་གཏོར། །དེ་ཕྱིར་དགེ་སློང་ཤིན་ཏུ་རྒྱས་པའི་མདོ། །འཇིག་རྟེན་ཀུན་ལ་ཕན་པའི་དོན་གྱི་ཕྱིར། །དེ་བཞིན་གཤེགས་པ་ཀུན་གྱིས་སྔོན་བཤད་པ། །གླེང་གཞི་ཆེན་པོ་ཁྱེད་ཀུན་འདིར་ཉོན་ཅིག་།གླེང་གཞིའི་ལེའུ་སྟེ་དང་པོའོ།། །། དགེ་སློང་དག་དེ་ལ་ཆོས་ཀྱི་རྣམ་གྲངས་ཤིན་ཏུ་རྒྱས་པ་ཆེན་པོའི་མདོ་རྒྱ་ཆེར་རོལ་པ་ཞེས་བྱ་བ་དེ་གང་ཞེ་ན། དགེ་སློང་དག་འདི་ལ་བྱང་ཆུབ་སེམས་དཔའ་དགའ་ལྡན་གྱི་གནས་མཆོག་ན་གནས་པ། མཆོད་པར་བྱ་བས་མཆོད་པ། དབང་བསྐུར་བ་ཐོབ་པ། ལྷ་བརྒྱ་སྟོང་གིས་བསྟོད་ཅིང་བཀུར་ཏེ་བརྗོད་ཅིང་བསྔགས་པ། བསམ་པ་ཐོབ་པ། སྨོན་ལམ་གྱིས་ཡང་དག་པར་འཕགས་པ། སངས་རྒྱས་ཀྱི་ཆོས་ཐམས་ཅད་ཡང་དག་པར་ཐོབ་པའི་བློ་དང་ལྡན་པ། ཡེ་ཤེས་ཀྱི་མིག་ཤིན་ཏུ་རྒྱས་ཤིང་ཡོངས་སུ་དག་པ་དང་ལྡན་པ། དྲན་པ་དང ། བློ་གྲོས་དང ། རྟོགས་པ་དང ། ཁྲེལ་ཡོད་པ་དང ། དགའ་བ་འབར་བའི་བློ་རླབས་པོ་ཆེ་དང་ལྡན་པ། སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཐབས་ལ་མཁས་པ་ཆེན་པོའི་དམ་པའི་ཕ་རོལ་ཏུ་སོན་པ། ཚངས་པའི་ལམ་བྱམས་པ་ཆེན་པོ་དང ། སྙིང་རྗེ་ཆེན་པོ་དང ། དགའ་བ་ཆེན་པོ་དང ། བཏང་སྙོམས་ཆེན་པོ་ལ་མཁས་པ། མངོན་པར་ཤེས་པ་དང ། རིག་པ་ཆེན་པོས་སྒྲིབ་པ་མེད་ཅིང་ཆགས་པ་མེད་པའི་ཡེ་ཤེས་མཐོང་བ་མངོན་དུ་གྱུར་པ། དྲན་པ་ཉེ་བར་གཞག་པ་དང ། ཡང་དག་པར་སྤོང་བ་དང ། རྫུ་འཕྲུལ་གྱི་རྐང་པ་དང ། དབང་པོ་དང ། 41.6a སྟོབས་དང ། བྱང་ཆུབ་ཀྱི་ཡན་ལག་དང ། ལམ་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཤིན་ཏུ་ཡོངས་སུ་རྫོགས་པའི་མཐར་ཕྱིན་པ། བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པའི་མཚན་དང་དཔེ་བྱད་བཟང་པོས་ལུས་ལེགས་པར་བརྒྱན་པ། ཡུན་རིང་པོར་རྗེས་སུ་འབྲང་བ་དང་ལྡན་པ། ཇི་སྐད་དུ་སྨྲས་པ་དེ་ལྟར་བྱེད་པས་ལོག་པ་མེད་པའི་ཚིག་གི་ལམ་ཡང་དག་པར་སྨྲ་བ། དྲང་ཞིང་མ་ཡོ་ལ། གྱ་གྱུ་མེད་པའི་ཡིད་ཐོགས་པ་མེད་པ་དང་ལྡན་པ། ང་རྒྱལ་དང ། རྒྱགས་པ་དང ། དྲེགས་པ་དང ། འཇིགས་པ་དང ། ཞུམ་པ་ཐམས་ཅད་མེད་པ། སེམས་ཅན་ཐམས་ཅད་ལ་སེམས་མཉམ་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་ལ་བསྙེན་བཀུར་བྱས་པ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོས་ངོར་བལྟ་ཞིང་བལྟ་བའི་བཞིན་དང་ལྡན་པ། བརྒྱ་བྱིན་དང་ཚངས་པ་དང ། དབང་ཕྱུག་ཆེན་པོ་དང ། འཇིག་རྟེན་སྐྱོང་བ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། སྲིན་པོ་རྣམས་ཀྱིས་མངོན་པར་དགའ་བར་བྱ་བའི་གྲགས་པ་དང་ལྡན་པ། ཚིག་ཐམས་ཅད་རབ་ཏུ་ཕྱེ་སྟེ་བསྟན་པ་ལ་ཐོགས་པ་མེད་པའི་སོ་སོ་ཡང་དག་པར་རིག་པ་ལ་འཇུག་པའི་ཤེས་པ་ལ་མཁས་པ། སངས་རྒྱས་ཐམས་ཅད་ཀྱིས་གསུངས་པ་གཟུང་བ་ལ་དྲན་པའི་སྣོད་འཁྲུལ་པ་མེད་པ་དང ། གཟུངས་མཐའ་ཡས་མུ་མེད་པ་རབ་ཏུ་ཐོབ་པ། དྲན་པ་ཉེ་བར་གཞག་པ་དང ། ཡང་དག་པར་སྤོང་བ་དང ། རྫུ་འཕྲུལ་གྱི་རྐང་པ་དང ། དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་དང ། ལམ་དང་ཤེས་རབ་ཀྱི་ཕ་རོལ་ཏུ་ཕྱིན་པ་དང ། ཐབས་མཁས་པའི་ཆོས་རིན་པོ་ཆེ་དང ། བསོད་ནམས་ཀྱིས་ཡང་དག་པར་བསྒྲུབས་པའི་ཆོས་ཀྱི་གྲུ་ཆེན་པོའི་དེད་དཔོན་ཆེན་པོ། ཆུ་བོ་བཞིའི་ཕ་རོལ་ཏུ་འགྲོ་བའི་བསམ་པ་ཅན། བདུད་དང་ཕྱིར་རྒོལ་བ་བཅོམ་པ། ཕས་ཀྱི་རྒོལ་བ་ཐམས་ཅད་ཤིན་ཏུ་ཚར་བཅད་པ། གཡུལ་ངོའི་ཐོག་མ་ལ་རབ་ཏུ་འདུག་པ། ཉོན་མོངས་པའི་དགྲའི་ཚོགས་འཇོམས་པ། ཡེ་ཤེས་མཆོག་གི་རྡོ་རྗེའི་མཚོན་སྲ་བ་དང་ལྡན་པ། བྱང་ཆུབ་ཀྱི་སེམས་ཀྱི་རྩ་བ་ལས 41.6b སྙིང་རྗེ་ཆེན་པོའི་ཆུ་བ་ལྷག་པའི་བསམ་པས་སྐྱེས་པ་ཟབ་ཅིང་བརྟན་པ་དང ། བརྩོན་འགྲུས་ཀྱི་ཆོས་ཀྱི་ཆུས་མངོན་པར་བརླན་པ། ཐབས་མཁས་པའི་སྙིང་པོ་དང་ལྡན་པ། བྱང་ཆུབ་ཀྱི་ཡན་ལག་དང ། བསམ་གཏན་གྱི་ཟེ་བ་ཅན། ཏིང་ངེ་འཛིན་གྱི་ཟེ་འབྲུ་དང་ལྡན་པ། ཡོན་ཏན་གྱི་ཚོགས་རྒྱ་ཆེན་པོའི་མཚོ་ལས་སྐྱེས་པ། ང་རྒྱལ་དང་དྲེགས་པའི་གདུང་བ་མེད་པའི་ཟླ་བས་དྲི་མ་མེད་པའི་འདབ་མ་རྒྱས་པ། ཚུལ་ཁྲིམས་དང ། ཐོས་པ་དང ། བག་ཡོད་པའི་བསུང་གི་ངད་ཕྱོགས་བཅུར་ཐོགས་པ་མེད་པར་ལྡང་བ། འཇིག་རྟེན་ན་ཤེས་པའི་ཐུ་བོར་གྱུར་པ། འཇིག་རྟེན་གྱི་ཆོས་བརྒྱད་ཀྱིས་མ་གོས་པ། སྐྱེས་བུ་ཆེན་པོའི་པད་མ། བསོད་ནམས་དང་ཡེ་ཤེས་ཀྱི་ཚོགས་ཀྱི་དྲི་ཞིམ་པོ་འབྱུང་བ། ཤེས་རབ་དང་ཡེ་ཤེས་ཀྱི་ཉི་མའི་འོད་ཟེར་གྱིས་མིག་ཤིན་ཏུ་རྣམ་པར་དག་པའི་པད་མ་འདབ་མ་བརྒྱ་པ་རྒྱས་པ། རྫུ་འཕྲུལ་གྱི་རྐང་པ་བཞི་མཆོག་ཏུ་མགྱོགས་པའི་ཤུགས་དང་ལྡན་པ། འཕགས་པའི་བདེན་པ་བཞིའི་སྡེར་མོ་དང་མཆེ་བ་ཤིན་ཏུ་རྣོ་བ། ཚངས་པའི་གནས་པ་བཞིའི་སོ་དྲང་བསྙེར་བ། བསྡུ་བའི་དངོས་པོ་བཞིས་ཤིན་ཏུ་བསྡུས་པའི་མགོ་དང་ལྡན་པ། རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་པ་ཁོང་དུ་ཆུད་པས་རིམ་གྱིས་འཕགས་པའི་ལུས་དང་ལྡན་པ། བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་ཡང་དག་པར་ཡོངས་སུ་རྫོགས་པས་རལ་པ་ཅན་དུ་བྱས་ཤིང་རིག་པ་དང ། ཡེ་ཤེས་ཀྱི་ཟེ་བ་ཅན། རྣམ་པར་ཐར་པའི་སྒོ་གསུམ་གྱི་ཁ་གདངས་པ། ཞི་གནས་དང་ལྷག་མཐོང་ཤིན་ཏུ་རྣམ་པར་དག་པའི་མིག་དང་ལྡན་པ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་རི་སུལ་གྱི་ཕུག་ན་གནས་པ། སྤྱོད་ལམ་བཞི་དང ། འདུལ་བའི་ནགས་ཚལ་དང ། ནགས་འདབ་ནས་སྐྱེས་པའི་ལུས་དང་ལྡན་པ། སྟོབས་བཅུ་དང ། མི་འཇིགས་པ་བཞི་དང ། ཉེ་བའི་སྟོབས་དང་ལྡན་པ། སྐྱེ་བ་དང་འཇིག་པའི་འཇིགས་པ་དང ། སྤུ་གཡོ་བ་མེད་པ། རྩལ་ལ་ཞུམ་པ་མེད་པ། མུ་སྟེགས་ཅན་གྱི་བོང་བུ་དང་རི་དགས་མང་པོའི་ཚོགས་རབ་ཏུ་འཇོམས་པ། བདག་མེད་པར་སྒྲ་བརྗོད་པའི་སེང་གེའི 41.7a ང་རོ་ཆེན་པོ་སྒྲོག་པ། སྐྱེས་བུ་སེང་གེ་དང ། རྣམ་པར་གྲོལ་བ་དང ། བསམ་གཏན་གྱི་དཀྱིལ་འཁོར་ལས་ཤེས་རབ་ཀྱི་འོད་དང ། འོད་ཟེར་གྱིས་མུ་སྟེགས་བྱེད་སྲིན་བུ་མེ་ཁྱེར་གྱི་ཚོགས་འོད་མེད་པར་བྱེད་པ། མ་རིག་པའི་མུན་པ་མུན་ནག་གི་ལིང་ཏོག་དང་རབ་རིབ་མེད་པར་བྱེད་པ། སྟོབས་དང་བརྩོན་འགྲུས་འབར་བ། ལྷ་དང་མིའི་ནང་དུ་བསོད་ནམས་ཀྱི་གཟི་བརྗིད་ཀྱི་གཟི་དང་ལྡན་པ་སྐྱེས་བུ་ཆེན་པོའི་ཉི་མ། ནག་པོའི་ཕྱོགས་མེད་པ། དཀར་པོའི་ཕྱོགས་ཡོངས་སུ་རྫོགས་པ། བལྟ་ན་སྡུག་ཅིང་ཡིད་དུ་འོང་བས་མིག་གི་དབང་པོ་ལ་ཐོགས་པ་མེད་པ། ལྷ་བརྒྱ་སྟོང་གི་སྐར་མའི་ཚོགས་ཀྱིས་ཤིན་ཏུ་བརྒྱན་པ། བསམ་གཏན་དང ། རྣམ་པར་ཐར་པ་དང ། ཡེ་ཤེས་ཀྱི་དཀྱིལ་འཁོར་ཅན། བྱང་ཆུབ་ཀྱི་ཡན་ལག་གི་བདེ་བས་ཟླ་བའི་འོད་ཟེར་དུ་གྱུར་པ། མི་དང་ལྷ་མཁས་པའི་མེ་ཏོག་ཀུ་མུ་ད་ཁ་འབྱེད་པ་སྐྱེས་བུ་ཆེན་པོ་ཟླ་བ། འཁོར་གྱི་གླིང་བཞིར་སོང་བ། བྱང་ཆུབ་ཀྱི་ཡན་ལག་བདུན་གྱི་རིན་པོ་ཆེ་དང་ལྡན་པ། སེམས་ཅན་ཐམས་ཅད་ལ་སེམས་མཉམ་པར་སྦྱོར་བ། བློ་ལ་ཐོགས་པ་མེད་པ། དགེ་བ་བཅུའི་ལས་ཀྱི་ལམ་གྱི་དཀའ་ཐུབ་དང་བརྟུལ་ཞུགས་ཤིན་ཏུ་ཕུན་སུམ་ཚོགས་ཤིང་རབ་ཏུ་རྫོགས་པའི་ཁྱད་པར་དུ་བོགས་དབྱུང་བར་བྱ་བའི་བསམ་པ་ཅན། ཆོས་ཀྱི་རྒྱལ་པོའི་ཆོས་ཀྱི་འཁོར་ལོ་རིན་པོ་ཆེ་མཆོག་དམ་པ་ཐོགས་པ་མེད་པར་བསྐོར་བ། འཁོར་ལོས་སྒྱུར་བའི་རིགས་ཀྱི་རྒྱུད་དུ་བྱུང་བ། ཆོས་ཀྱི་འཁོར་ལོས་སྒྱུར་བ་ཆེན་པོ། རྟེན་ཅིང་འབྲེལ་པར་འབྱུང་བ་ཟབ་ཅིང་གཏིང་དཔག་དཀའ་བ། ཆོས་རིན་པོ་ཆེ་ཐམས་ཅད་ཀྱིས་རབ་ཏུ་གང་བ། ཐོས་པས་མི་ངོམས་པས་ཡངས་ཤིང་རྒྱ་ཆེ་ལ་མཐའ་ཡས་པའི་ཡེ་ཤེས་དང་ཚུལ་ཁྲིམས་ཀྱི་ཚོད་ལས་མི་འདའ་བ། བློ་རྒྱ་མཚོ་དང་ས་ལྟར་རྒྱ་ཆེ་བའི་མཆོག་ཏུ་གྱུར་པ། ས་དང་ཆུ་དང་མེ་དང་རླུང་དང་མཉམ་པའི་སེམས་སུ་གྱུར་པ། རི་རབ་ལྟར་བརྟན་ཞིང་མི་གཡོ་ལ་བསྐྱོད་པར་མི་ནུས་པའི་ཡིད་དང་ལྡན་པ། རྗེས་སུ་ཆགས་པ་དང་ཁོང་ཁྲོ་བ་མེད་པ། ནམ་མཁའི་དཀྱིལ་ལྟར་དྲི་མ་མེད་ཅིང་ཡངས་ལ་འདྲ་བ་མེད་པར་རྒྱ་ཆེ་བའི་བློ་དང་ལྡན་པ། ལྷག་པའི་བསམ་པ་ཤིན་ཏུ་ཡོངས་སུ་དག་པ། སྦྱིན་པ 41.7b ལེགས་པར་བྱིན་པ། སྔོན་སྦྱོར་བ་ལེགས་པར་བྱས་པ། ལྷག་པའི་བྱ་བ་ལེགས་པར་བྱས་པ། བདེན་པའི་རྒྱན་གྱིས་ལེགས་པར་བརྒྱན་པ། དགེ་བའི་རྩ་བ་ཐམས་ཅད་ཡོངས་སུ་བཙལ་བ། གོས་པར་བྱ་བ་བསྒོས་པ། དགེ་བའི་རྩ་བ་ངེས་པར་བྱས་པ། བསྐལ་པ་གྲངས་མེད་པ་བདུན་དུ་དགེ་བའི་རྩ་བ་ཐམས་ཅད་ཡང་དག་པར་བསྒྲུབས་པ། སྦྱིན་པ་རྣམ་པ་བདུན་བྱིན་པ། བསོད་ནམས་བྱ་བའི་དངོས་པོ་ལྔ་ཤིན་ཏུ་བསྟེན་པ། ལེགས་པར་སྤྱད་པ་ལུས་ཀྱི་རྣམ་གསུམ། ངག་གི་རྣམ་བཞི། ཡིད་ཀྱི་རྣམ་གསུམ་སྤྱད་པར་གྱུར་པ། དགེ་བ་བཅུའི་ལས་ཀྱི་ལམ་བསྟེན་པ་དང་ལྡན་པ། ཡང་དག་པའི་སྦྱོར་བ་ཡན་ལག་བཞི་བཅུ་དང་ལྡན་པ་བསྟེན་པར་གྱུར་པ། ཡང་དག་པའི་སྨོན་ལམ་ཡན་ལག་བཞི་བཅུ་དང་ལྡན་པའི་སྨོན་ལམ་བཏབ་པ། ལྷག་པའི་བསམ་པ་ཡན་ལག་བཞི་བཅུ་དང་ལྡན་པ་ལ་ཞུགས་པ། ཡང་དག་པའི་རྣམ་པར་ཐར་པ་ཡན་ལག་བཞི་བཅུ་དང་ལྡན་པ། ཡོངས་སུ་རྫོགས་པར་བྱས་པ། ཡང་དག་པའི་མོས་པ་ཡན་ལག་བཞི་བཅུ་དང་ལྡན་པ་དྲང་པོར་བྱས་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བཞི་བཅུའི་རྗེས་སུ་རབ་ཏུ་བྱུང་བ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལྔ་བཅུ་རྩ་ལྔ་ལ་སྦྱིན་པ་ཕུལ་བར་གྱུར་པ། རང་སངས་རྒྱས་བྱེ་བ་བརྒྱ་ཕྲག་ཕྱེད་དང་བཞི་ལ་ལྷག་པར་བྱ་བ་བྱས་པ། སེམས་ཅན་ཚད་མེད་གྲངས་མེད་པ་དག་མཐོ་རིས་དང་ཐར་པའི་ལམ་དུ་བཙུད་པར་གྱུར་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ། ཚེ་གཅིག་གིས་ཐོགས་པ། འདི་ནས་ཤི་འཕོས་ནས་དགའ་ལྡན་གྱི་གནས་དམ་པ་ན་གནས་པ་ལྷའི་བུ་དམ་པ་ཏོག་དཀར་པོ་ཞེས་བྱ་བ། ལྷའི་ཚོགས་རྣམས་ཀྱིས་འདི་ནི་འདི་ནས་ཤི་འཕོས་ནས་མིའི་འཇིག་རྟེན་དུ་སྐྱེས་ཏེ། རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་དེར་ཤིན་ཏུ་མཆོད་པ། གཞལ་མེད་ཁང་གནས་སུམ་ཁྲི་ཉིས་སྟོང་ལ་རབ་ཏུ་གནས་པ། སྟེགས་བུ་དང ། བ་གམ་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁྱམས་ཀྱིས་ལེགས་པར་བརྒྱན་པ། གདུགས་དང ། རྒྱལ་མཚན 41.8a དང ། བ་དན་སྒྲེང་བ། རིན་པོ་ཆེའི་དྲིལ་བུ་གཡེར་ཁའི་དྲ་བའི་བླ་རེ་བྲེས་པ། མེ་ཏོག་མན་དཱ་ར་བ་དང ། མན་དཱ་ར་བ་ཆེན་པོ་ཆལ་པར་བཀྲམ་པ། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་གླུ་དབྱངས་ལེན་པ། མེ་ཏོག་ཨ་ཏི་མུག་ཏ་དང ། ཙམ་པ་ཀ་དང ། སྐྱ་སྣར་དང ། ས་བརྟོལ་དང ། བཏང་བཟུང་དང ། བཏང་བཟུང་ཆེན་པོ་དང ། མྱ་ངན་འཚང་དང ། ནྱ་གྲོ་དྷ་དང ། ཏིན་དུ་ཀ་དང ། ་ས་ན་དང ། དོང་ཀའི་མེ་ཏོག་དང ། ཤིང་གེ་ས་ར་དང ། ཏ་མ་ལ་དང ། སཱ་ལ་དང ། རིན་པོ་ཆེའི་ཤིང་ལྗོན་པ་ཆེན་པོས་བརྒྱན་པ། གསེར་གྱི་དྲ་བས་གཡོགས་པ། གཞི་མཉམ་ཞིང་བཀོད་པས་མཛེས་པར་བྱས་པ། མེ་ཏོག་སྣང་འོད་དང ། མ་ལི་ཀ་དང ། སྣ་མའི་མེ་ཏོག་དང ། བར་ཤི་ཀ་དང ། ཏ་ར་ནི་དང ། བ་ལི་དང ། ཀོ་ཏ་ར་ནི་དང ། མཆོག་ཏུ་དྲི་ཞིམ་དང ། ད་ནུས་ཀ་རི་དང ། ལྷའི་སྣ་མའི་མེ་ཏོག་དང ། ུད་པ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོ་དང ། དྲི་རབ་ཏུ་ཞིམ་པའི་བླ་རེ་ཆེན་པོ་ཕྱོགས་ཕྱོགས་སུ་བྲེས་པ། བྱ་འདབ་སྤེན་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ངང་པ་དང ། རྨ་བྱ་དང ། ངུར་པ་དང ། ཀུ་ན་ལ་དང ། ཀ་ལ་པིང་ཀ་དང ། ཤང་ཤང་ཏེའུ་ལ་སོགས་པ་བྱ་སྣ་ཚོགས་སྒྲ་སྙན་པ་འབྱིན་པ། ལྷ་བྱེ་བ་ཁྲག་ཁྲིག་བརྒྱ་སྟོང་གིས་མིག་མངོན་དུ་ཕྱོགས་ཏེ་བལྟ་ཞིང་ལྟད་མོར་བྱ་བ། ཆོས་རྒྱ་ཆེ་བ་ཆེན་པོ་ཡང་དག་པར་བརྗོད་པས་འདོད་པ་ལ་དགའ་བའི་ཤུགས་ཀྱིས་ཉོན་མོངས་པ་ཐམས་ཅད་གཅོད་པ། ང་རྒྱལ་དང ། རྒྱགས་པ་དང ། དྲེགས་པ་དང ། ཁྲོ་བ་དང ། ཐ་བ་དང ། ཁོང་ཁྲོ་བ་མེད་པར་གྱུར་པ། དགའ་བ་དང ། མགུ་བ་དང ། མཆོག་ཏུ་དགའ་བ་དང ། དྲན་པ་རྒྱ་ཆེ་ཞིང་གསལ་བ་སྐྱེ་བའི་གཞལ་མེད་ཁང་ཆེན་པོ་དེ་ན་བདེ་བར་གནས་ཤིང་ཆོས་ཀྱི་ཡང་དག་པའི་གཏམ་བྱུང་བ་དང ། སིལ་སྙན་དང ། གླུ་དབྱངས་བརྒྱད་ཁྲི་བཞི་སྟོང་པོའི་སྒྲ་དེ་དག་ལས་བྱང་ཆུབ་སེམས་དཔའི་སྔོན་གྱི་ལས་དགེ་བའི་ཚོགས་ཀྱིས་ཡང་དག་པར་བསྐུལ་བའི་ཚིགས་སུ་བཅད་པ་འདི་དག་བྱུང་ངོ ། །བསོད་ནམས་རྒྱ་ཆེན་ཚོགས་མངའ་དྲན་རྟོགས་དང ། །བློ་གྲོས་མཐའ་ཡས་ཤེས་རབ་འོད་མཛད་པ། །མཚུངས་མེད་སྟོབས་མངའ་སྐུ་རྩལ་རྒྱ་ཆེ་བ། །མར་མེ་མཛད་ཀྱིས་ལུང་བསྟན་དགོངས་པར་མཛོད། ། 41.8b རྒྱ་ཆེན་དྲི་མ་མེད་པའི་ཐུགས་མངའ་བ། །དྲི་མ་གསུམ་སྤངས་རྒྱགས་དང་སྐྱོན་ཞི་བ། །དགེ་བ་དྲི་མེད་རྣམ་པར་དག་པའི་ཐུགས། །སྔོན་ཆད་ཇི་ལྟར་སྦྱིན་སྤྱད་དགོངས་པར་མཛོད། །ཞི་གནས་ཚུལ་ཁྲིམས་བརྟུལ་ཞུགས་བཟོད་པ་དང ། །དུལ་དང་བརྩོན་འགྲུས་བསམ་གཏན་ཤེས་རབ་སྟོབས། །བསྐལ་པ་བྱེ་བ་ཁྲག་ཁྲིག་རྣམས་སྤྱད་པ། །སྤྱོད་རིགས་ཆེར་བྱུང་དགོངས་མཛོད་དགོངས་པར་མཛོད། །སེམས་ཅན་རྣམས་ལ་ཐུགས་བརྩེ་མཛད་གྱུར་ཅིང ། །སངས་རྒྱས་བྱེ་བ་ཁྲག་ཁྲིག་ཁྱོད་ཀྱིས་མཆོད། །དགོངས་མཛོད་དགོངས་པར་མཛོད་ཅིག་གྲགས་མཐའ་ཡས། །དེ་དུས་ལགས་ཀྱིས་བཏང་སྙོམས་མ་མཛད་ཅིག་།རྒ་ཤི་ཉོན་མོངས་འཇིག་མཛད་རྡུལ་བྲལ་བ། །ལྷ་དང་ཀླུ་དང་གནོད་སྦྱིན་དྲི་ཟ་དང ། །ལྷ་མིན་དབང་པོ་དག་ཀྱང་སྡོད་ལགས་ཀྱིས། །འཆི་འཕོའི་ཚུལ་མཁྱེན་འཕོ་བ་བསྟན་པར་མཛོད། །བསྐལ་པ་སྟོང་དུ་དཀའ་བ་སྤྱད་གྱུར་ཀྱང ། །རྒྱ་མཚོ་ཆུ་ཡིས་ཇི་བཞིན་མི་ངོམས་ཀྱིས། །ངོམས་པ་ཁྱོད་ཀྱི་ཐུགས་དམ་དགེ་བ་སྟེ། །ཡུན་རིང་སྐོམ་ཉེན་སྐྱེ་བོ་ཚིམ་པར་མཛོད། །སྨད་པ་མེད་པའི་གྲགས་པ་མངའ་བ་ཁྱོད། །ཆོས་ལ་དགྱེས་པར་ཁྱོད་དགྱེས་འདོད་མི་དགྱེས། །འོན་ཀྱང་དྲི་མ་མེད་པའི་སྤྱན་མངའ་བ། །ལྷར་བཅས་འཇིག་རྟེན་དག་ལ་ཐུགས་བརྩེ་མཛོད། །ལྷ་རྣམས་བྱེ་བ་ཁྱོད་ལས་ཆོས་ཐོས་པས། །ངོམས་པར་འགྱུར་བ་མ་ལགས་འོན་གྱིས་ཀྱང ། །དལ་དང་མི་ལྡན་གྱུར་པའི་ངན་སོང་དུ། །གནས་པར་གྱུར་པ་དག་ལ་གཟིགས་སུ་གསོལ། །དྲི་མ་མེད་པའི་སྤྱན་མངའ་ཕྱོགས་བཅུ་ཡི། །འཇིག་རྟེན་དག་གི་སངས་རྒྱས་གཟིགས་གྱུར་ཅིང ། །དེ་དག་རྣམས་ལ་ཆོས་གསན་ཆོས་མཆོག་དེ། །འཇིག་རྟེན་དག་ལ་རྣམ་པར་དབྱེ་བ་མཛོད། །དཔལ་ལྡན་ཁྱོད་ཀྱི་བསོད་ནམས་དཔལ་གྱིས་ནི། །དགའ་ལྡན་ཕོ་བྲང་ཤིན་ཏུ་མཛེས་མོད་ཀྱི། །འོན་ཀྱང་ཐུགས་རྗེ་ཐུགས་དང་ལྡན་པས་ན། །འཛམ་བུའི་རྒྱལ་མཚན་དུ་ནི་ཆར་པ་ཕོབ། །བརྟུལ་ཞུགས་གྲུབ་པ་བྱང་ཆུབ་རེག་ཅེས་ཏེ། །འདོད་པའི་ཁམས་ལས་རབ་ཏུ་འདས་པ་ཡི། །གཟུགས་ཀྱི་ཁམས་ན་ལྷ་རྣམས་གང་འཁོད་པ། །དུ་མ་ཐམས་ཅད 41.9a མངོན་པར་རབ་ཏུ་དགའ། །མགོན་པོ་ཁྱོད་ཀྱིས་བདུད་ཀྱི་ལས་རྣམས་བཅོམ། །ཁྱོད་གཞན་མུ་སྟེགས་ཅན་རྣམས་ཕམ་མཛད་དེ། །ཁྱོད་ནི་བྱང་ཆུབ་ཕྱག་མཐིལ་བཞག་དང་འདྲ། །དེ་དུས་ལགས་ཀྱིས་བཏང་སྙོམས་མ་མཛད་ཅིག་།ཉོན་མོངས་རབ་ཏུ་འབར་བའི་འཇིག་རྟེན་ལ། །དཔའ་བོ་ཁྱོད་ཀྱིས་སྤྲིན་ལྟར་ཁྱབ་མཛད་དེ། །བདུད་རྩིའི་ཆར་པ་མངོན་པར་རབ་ཏུ་ཕོབ། །ལྷ་མི་རྣམས་ཀྱི་ཉོན་མོངས་ཞི་བར་མཛོད། །ཁྱོད་ནི་སྨན་པ་ཁམས་ལ་མཁས་པ་སྟེ། །ཡུན་རིང་ནད་པ་སྨན་པས་བོར་བ་ཡི། །སེམས་ཅན་རྣམ་ཐར་གསུམ་གྱི་སྦྱར་སྨན་གྱིས། །མྱ་ངན་འདས་པའི་བདེ་ལ་མྱུར་དུ་ཁོད། །སེང་གེའི་ང་རོ་ཐོས་པར་མ་གྱུར་པས། །ཝ་རྣམས་འཇིགས་པ་མེད་པར་སྒྲ་སྒྲོག་གིས། །སངས་རྒྱས་སེང་གེའི་སྒྲ་ནི་རབ་སྒྲོགས་ཏེ། །མུ་སྟེགས་ཅན་གཞན་ཝ་རྣམས་སྐྲག་པར་མཛོད། །ས་ཡི་དཀྱིལ་ན་སྟོབས་དང་བརྩོན་འགྲུས་ཀྱི། །སྟོབས་ལྡན་ཕྱག་ན་ཤེས་རབ་སྒྲོན་མ་བསྣམས། །ཕྱག་མཐིལ་དམ་པས་ས་ལ་བརྡབ་མཛོད་དེ། །འདི་རྣམས་ཁྱོད་ཀྱིས་རབ་ཏུ་ཕམ་པར་མཛོད། །གང་དག་ཁྱོད་ལ་ལྷུང་བཟེད་འབུལ་བ་ཡི། །འཇིག་རྟེན་སྐྱོང་བ་བཞི་པོ་སྡོད་ཅིང་མཆིས། །ཁྱོད་བལྟམ་གང་དག་ལེན་པར་འགྱུར་བ་ཡི། །བརྒྱ་བྱིན་ཚངས་པ་ཁྲག་ཁྲིག་སྡོད་ཅིང་མཆིས། །བློ་གྲོས་བཟང་པོ་རིགས་ཆེན་རིགས་ལྡན་པ། །གང་ལ་གནས་ནས་བྱང་ཆུབ་སེམས་དཔའ་ཡི། །སྤྱོད་པ་སྟོན་གྱུར་དམ་པའི་རིགས་སྐྱེས་པ། །རིགས་ཀྱི་ནང་ན་བཙུན་པའི་རིགས་ལ་གཟིགས། །སྣོད་གྱུར་གང་དུ་ནོར་བུ་རིན་པོ་ཆེ། །བཞག་ན་དཔལ་དང་ལྡན་པར་འགྱུར་བ་བཞིན། །ནོར་བུ་རིན་ཆེན་ལྟ་བུར་དྲི་མེད་ཐུགས། །འཛམ་བུའི་རྒྱལ་མཚན་དུ་ནི་ཆར་པ་ཕོབ། །གླུ་དབྱངས་སྒྲ་ལས་རྣམ་པ་འདི་ལྟ་ཡི། །ཚིགས་སུ་བཅད་པ་མང་པོ་བྱུང་གྱུར་ནས། །འདི་ནི་དུས་ལགས་བཏང་སྙོམས་མ་མཛད་ཅེས། །སྙིང་རྗེའི་ཡིད་དང་ལྡན་ལ་སྐུལ་བར་བྱེད། །ཡང་དག་པར་སྤྲོ་བར་བྱ་བའི་ལེའུ་སྟེ་གཉིས་པའོ།། །། དགེ་སློང་དག་དེ་ལྟར་བྱང 41.9b ཆུབ་སེམས་དཔའ་ཆོས་ཀྱི་དུས་དེ་ལྟ་བུས་ཡང་དག་པར་བསྐུལ་བ་དང ། གཞལ་མེད་ཁང་ཆེན་པོ་དེ་ནས་བྱུང་སྟེ། ཆོས་ཀྱིས་མཐོ་བ་ཞེས་བྱ་བའི་ཁང་བཟངས་ཆེན་པོ་གང་དུ་བྱང་ཆུབ་སེམས་དཔའ་འདུག་ཅིང་དགའ་ལྡན་གྱི་ལྷ་རྣམས་ལ་ཆོས་སྟོན་པ་དེར་བྱང་ཆུབ་སེམས་དཔའ་ཞུགས་སོ། །ཞུགས་ནས་ཀྱང་སེང་གེའི་ཁྲི་ཆོས་བཟང་པོ་ཞེས་བྱ་བ་ལ་འདུག་གོ། །དེ་ནས་ལྷའི་བུ་གང་དག་བྱང་ཆུབ་སེམས་དཔའ་དང་བསྐལ་བ་མཉམ་པ་ཐེག་པ་མཚུངས་པ་ལ་ཞུགས་པ་དེ་དག་ཀྱང་ཁང་བཟངས་དེ་ཉིད་དུ་ཞུགས་སོ། །གང་ཡང་བྱང་ཆུབ་སེམས་དཔའ་ཕྱོགས་བཅུ་ནས་འདུས་པ། བྱང་ཆུབ་སེམས་དཔའ་དང་སྤྱོད་པ་འདྲ་བ་དག་དང ། ལྷའི་བུ་དེ་དག་ཀྱང་ལྷའི་བུ་མོའི་ཚོགས་རྣམས་བསལ་ཅིང་ལྷའི་བུ་ཕལ་རྣམས་ཀྱང་བསལ་ནས་ལྷའི་བསམ་པ་འཐུན་པའི་འཁོར་ཅན་དུ་བྱས་ཏེ། འཁོར་བྱེ་བ་ཕྲག་དྲུག་བཅུ་རྩ་བརྒྱད་བརྒྱད་དང ། ཁང་བཟངས་དེར་ཞུགས་ནས་སོ་སོ་ཅི་རིགས་པར་རང་རང་གི་སེང་གེའི་ཁྲི་ལ་འཁོད་པར་གྱུར་ཏོ། །དགེ་སློང་དག་དེ་ལྟར་བྱང་ཆུབ་སེམས་དཔའ་ལོ་བཅུ་གཉིས་ན་མའི་མངལ་དུ་འཇུག་པར་འགྱུར་རོ་ཞེས་བྱ་བ་དེའི་ཚེ་གནས་གཙང་མའི་རིས་ཀྱི་ལྷའི་བུ་དག་འཛམ་བུའི་གླིང་དུ་ལྷགས་ནས། ལྷའི་ཁ་དོག་མི་སྣང་བར་བྱས་ཏེ། བྲམ་ཟེའི་ཆ་བྱད་དུ་བསྒྱུར་ནས། བྲམ་ཟེ་རྣམས་རིག་བྱེད་སློབ་དུ་འཛུད་དེ། གང་ཞིག་རྣམ་པ་འདི་ལྟ་བུར་མངལ་དུ་ཞུགས་པར་གྱུར་ན། དེ་ནི་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་པར་འགྱུར་ཏེ། དེ་དག་དང་ལྡན་ན་རྣམ་པ་གཉིས་སུ་འགྱུར་གྱི། གསུམ་དུ་འགྱུར་བ་མེད་དེ། དེ་གལ་ཏེ་ཁྱིམ་ན་གནས་ན་ནི་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ་ཆོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི་འདི་ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། བུད་མེད་རིན་པོ་ཆེ་དང ། ནོར་བུ་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་དང་བདུན་ནོ། །འཁོར་ལོས་སྒྱུར་བའི་རྒྱལ་པོ་འཁོར་ལོ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པར་འགྱུར་ཞེ་ན། འདི་ལ་རྒྱལ་པོ་རྒྱལ 41.10a རིགས་སྤྱི་བོ་ནས་དབང་བསྐུར་བའི་གསོ་སྦྱོང་གི་ཉི་མ་ཚེས་བཅཝ་ལྔ་ལ་མགོ་ཁྲུས་བྱས་ཏེ། དབུ་ཟུངས་སུ་གནས་ཤིང་སྟེང་གི་ཁྱམས་ན་བུད་མེད་ཀྱི་ཚོགས་ཀྱིས་ཀུན་ནས་བསྐོར་ཅིང་འདུག་པའི་ཚེ། ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་རྩིབ་སྟོང་ཡོད་པ། མུ་ཁྱུད་དང་ལྡན་པ། ལྟེ་བ་དང་བཅས་པ། ཐམས་ཅད་གསེར་ལས་གྲུབ་པ། མགར་བས་མ་བྱས་པ། འཕང་དུ་ཤིང་ཏ་ལ་བདུན་ཙམ་ནས་འབྱུང་སྟེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས། ལྷའི་འཁོར་ལོ་རིན་པོ་ཆེ་དེ་མཐོང་ནས་འདི་སྙམ་དུ་སེམས་ཏེ། བདག་གིས་ཐོས་པ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གསོ་སྦྱོང་གི་ཉི་མ་ཚེས་བཅཝ་ལྔ་ལ་མགོ་ཁྲུས་བྱས་ཏེ། དབུ་ཟུངས་སུ་གནས་ཤིང་སྟེང་གི་ཁྱམས་ན་བུད་མེད་ཀྱི་ཚོགས་ཀྱིས་ཀུན་ནས་བསྐོར་ཅིང་འདུག་པའི་ཚེ། ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་བྱུང་བར་གྱུར་ན། དེ་ནི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ཐོས་ཏེ། བདག་གི་དྲུང་དུ་ལྷའི་འཁོར་ལོ་རིན་པོ་ཆེ་འོངས་པ་ལས་ན། བདག་ཀྱང་འཁོར་ལོས་སྒྱུར་བའི་རྒྱལ་པོ་ཡིན་དུ་ངེས་སོ་སྙམ་སྟེ། དེ་ནས་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེ་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། ལག་པ་གཡས་པས་ལྷའི་འཁོར་ལོ་རིན་པོ་ཆེ་དེ་སྐོར་ཞིང་འདི་སྐད་དུ་བཙུན་པ་ལྷའི་འཁོར་ལོ་རིན་པོ་ཆེ་ཆོས་ཀྱིས་བསྐོར་ཅིག་།ཆོས་མ་ཡིན་པས་ནི་མ་ཡིན་ནོ་ཞེས་བྱ་བའི་ཚིག་སྨྲས་པ་དང ། དེ་ནས་ལྷའི་འཁོར་ལོ་རིན་པོ་ཆེ་དེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་བསྐོར་བས་རྫུ་འཕྲུལ་གྱིས་ནམ་མཁའ་ལས་ཤར་ཕྱོགས་སུ་ལེགས་པར་འགྲོ་སྟེ། རྒྱལ་པོ་འཁོར་ལོས་སྒྱུར་བ་ཡང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་རྗེས་སུ་འགྲོའོ། །སའི་ཕྱོགས་གང་དུ་ལྷའི་འཁོར་ལོ་རིན་པོ་ཆེ་དེ་གནས་པར་འགྱུར་བ་དེར་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེ་ཡང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་གནས་པར་འགྱུར་རོ། །དེ་ནས་ཤར་ཕྱོགས་ཀྱི་ཁམས་ཀྱི་རྒྱལ་པོ་གང་ཡིན་པ་དེ་དག་དངུལ་གྱི་སྣོད་ནི་གསེར་ཕྱེས་བཀང་སྟེ་ཐོགས། 41.10b གསེར་གྱི་སྣོད་ནི་དངུལ་སིལ་མས་བཀང་སྟེ་ཐོགས་ནས། འཁོར་ལོས་སྒྱུར་བའི་རྒྱལ་པོ་སྩུ་ཞིང་འདི་སྐད་དུ་ལྷ་འདིར་ལེགས་པར་གཤེགས་སོ། །ལྷ་ཚུར་གཤེགས་སུ་གསོལ། ལྷའི་ཆབ་སྲིད་ནི་ཤིན་ཏུ་རྒྱས་ཤིང་འབྱོར་ལ་བདེ་སྟེ། ལོ་ལེགས་ཤིང་ཉམས་དགྱེས་ལ་སྐྱེ་བོ་མང་པོ་དང ། མིས་བལྟམ་པ་ལགས་ཏེ། ལྷ་ཉིད་ཀྱི་ཡུལ་དུ་བྱོན་ན། བཞུགས་སུ་གསོལ། དེ་སྐད་ཅེས་སྨྲས་པ་དང ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་ཁམས་ཀྱི་རྒྱལ་པོ་དེ་དག་ལ་འདི་སྐད་དུ་ཁྱེད་རང་རང་གི་རྒྱལ་སྲིད་དག་ཆོས་ཀྱིས་གྱིས་ཤིག་།ཆོས་མ་ཡིན་པས་ནི་མ་ཡིན་ནོ། །ཁྱེད་སྲོག་ཆགས་མ་གསོད་ཅིག་།མ་བྱིན་པར་མ་ལེན་ཅིག་།འདོད་པ་ལ་ལོག་པར་གཡེམ་པར་མ་བྱེད་ཅིག་།བརྫུན་དུ་མ་སྨྲ་ཤིག་།ཕྲ་མ་མ་ཟེར་ཅིག་།ངག་རྩུབ་པོ་མ་སྨྲ་ཤིག་།ཚིག་ཀྱལ་པ་མ་སྨྲ་ཤིག་།བརྣབ་སེམས་ཅན་དུ་མ་གྱུར་ཅིག་།གནོད་སེམས་ཅན་དུ་མ་གྱུར་ཅིག་།ལོག་པར་ལྟ་བར་མ་འགྱུར་ཅིག་།སྲོག་གཅོད་པ་ལ་བྱམས་པར་མ་གྱུར་ཅིག་།ལོག་པར་ལྟ་བ་ཅན་གྱི་བར་ལ་བྱམས་པར་མ་གྱུར་ཅིག་།ངའི་ཡུལ་དུ་ཆོས་མ་ཡིན་པ་བྱུང་ད་རེ། ཆོས་མ་ཡིན་པར་སྤྱོད་པ་ལ་བྱམས་པར་མ་བྱེད་ཅིག་ཅེས་བསྒོ་ནས། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་དེ་ལྟར་ཤར་ཕྱོགས་སུ་རྣམ་པར་རྒྱལ་བར་བྱེད་དོ། །ཤར་ཕྱོགས་སུ་རྣམ་པར་རྒྱལ་བར་བྱས་ནས། ཤར་ཕྱོགས་ཀྱི་རྒྱ་མཚོ་ལ་འགྲོའོ། །ཤར་ཕྱོགས་ཀྱི་རྒྱ་མཚོ་ལ་སོང་ནས། ཤར་ཕྱོགས་ཀྱི་རྒྱ་མཚོ་ལས་རྒལ་ལོ། །རྒལ་ནས་ཀྱང་ལྷོ་ཕྱོགས་སུ་ནམ་མཁའ་ལ་རྫུ་འཕྲུལ་གྱིས་ལེགས་པར་འགྲོ་སྟེ། འཁོར་ལོས་སྒྱུར་བའི་རྒྱལ་པོ་ཡང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་འགྲོའོ། །སྔ་མ་བཞིན་དུ་ལྷོ་ཕྱོགས་སུ་རྣམ་པར་རྒྱལ་བར་བྱེད་དོ། །ལྷོ་ཕྱོགས་སུ་ཇི་ལྟ་བ་དེ་བཞིན་དུ་ནུབ་ཕྱོགས་དང ། བྱང་ཕྱོགས་སུ་རྣམ་པར་རྒྱལ་བར་བྱེད་དོ། །བྱང་ཕྱོགས་སུ་རྣམ་པར་རྒྱལ 41.11a བར་བྱས་ནས་བྱང་ཕྱོགས་ཀྱི་རྒྱ་མཚོ་ལ་འགྲོའོ། །བྱང་ཕྱོགས་ཀྱི་རྒྱ་མཚོ་ལ་སོང་ནས། བྱང་ཕྱོགས་ཀྱི་རྒྱ་མཚོ་ལས་རྒལ་ལོ། །རྒལ་ནས་ཀྱང་ནམ་མཁའ་ལ་རྫུ་འཕྲུལ་གྱིས་རྒྱལ་པོའི་ཕོ་བྲང་དུ་ལེགས་པར་འོངས་ནས་བཙུན་མོའི་འཁོར་གྱི་སྒོའི་སྟེང་དུ་ཉམས་པ་མེད་པར་གནས་ཏེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ནི་འཁོར་ལོ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །འཁོར་ལོས་སྒྱུར་བའི་རྒྱལ་པོ་གླང་པོ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་གླང་པོ་རིན་པོ་ཆེ་སྔ་མ་བཞིན་དུ་འབྱུང་སྟེ། ཐམས་ཅད་ཐལ་ཀར་གྱུར་པ། ཡན་ལག་བདུན་ཤིན་ཏུ་གནས་པ། གཙུག་གསེར་གྱིས་བརྒྱན་པ། གསེར་གྱི་རྒྱལ་མཚན་དང་ལྡན་པ། གསེར་གྱི་རྒྱན་གྱིས་བརྒྱན་པ། གསེར་གྱི་དྲ་བས་གཡོགས་པ། རྫུ་འཕྲུལ་དང་ལྡན་པ་ནམ་མཁའ་ལ་འགྲོ་བ། རྣམ་པར་འཕྲུལ་པའི་ཆོས་ཅན་ཏེ། འདི་ལྟར་གླང་པོའི་རྒྱལ་པོ་བྱང་ཆུབ་ཅེས་བྱ་བའོ། །གང་གི་ཚེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གླང་པོ་རིན་པོ་ཆེ་དེ་བརྟག་པར་འདོད་པར་གྱུར་པ་དེའི་ཚེ། ཉི་མ་ཤར་ཀར་གླང་པོ་རིན་པོ་ཆེ་དེ་ལ་ཞོན་ཏེ་ས་ཆེན་པོ་འདི་རྒྱ་མཚོའི་མཐའ་སྐོར་དང་བཅས་པ། རྒྱ་མཚོའི་མུར་ཐུག་པ་དང་བཅས་པ་ཀུན་ཏུ་བསྐོར་ཏེ། རྒྱལ་པོའི་ཕོ་བྲང་དུ་འོངས་ནས་ཁྱེའུ་སུས་ཀྱི་དགའ་བ་མྱོང་བར་བྱེད་དེ། འཁོར་ལོས་སྒྱུར་བའི་རྒྱལ་པོ་གླང་པོ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །འཁོར་ལོས་སྒྱུར་བའི་རྒྱལ་པོ་རྟ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་རྟ་རིན་པོ་ཆེ་སྔ་མ་བཞིན་དུ་འབྱུང་སྟེ། ཐམས་ཅད་སྔོན་པོར་གྱུར་པ། མགོ་གནག་པ། རྔོག་མ་ལྕང་ལོར་འདུག་པ། ཞོན་ན་གུས་པར་བྱེད་པ། གསེར་གྱི་རྒྱལ་མཚན་དང་བཅས་པ། གསེར་གྱི་རྒྱན་དང་ལྡན་པ། གསེར་གྱི་དྲ་བས་གཡོགས་པ། 41.11b རྫུ་འཕྲུལ་དང་ལྡན་པ། ནམ་མཁའ་ལ་འགྲོ་བ། རྣམ་པར་འཕྲུལ་པའི་ཆོས་ཅན་ཏེ། འདི་ལྟར་རྟའི་རྒྱལ་པོ་སྤྲིན་གྱི་ཤུགས་ཅན་ཞེས་བྱ་བའོ། །གང་གི་ཚེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ། རྟ་རིན་པོ་ཆེ་བརྟག་པར་འདོད་པར་གྱུར་པ་དེའི་ཚེ་ཉི་མ་ཤར་ཀར་རྟ་རིན་པོ་ཆེ་དེ་ལ་ཞོན་ནས་ས་ཆེན་པོ་འདི་རྒྱ་མཚོའི་མཐའ་སྐོར་དང་བཅས་པ་རྒྱ་མཚོའི་མུར་ཐུག་པ་དང་བཅས་པ་ཀུན་དུ་བསྐོར་ཏེ། ཕྱིར་རྒྱལ་པོའི་ཕོ་བྲང་དུ་འཁོར་ནས་ཁྱེའུ་སུས་ཀྱི་བདེ་བ་མྱོང་བར་བྱེད་དེ། འཁོར་ལོས་སྒྱུར་བའི་རྒྱལ་པོ་ནི་རྟ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །འཁོར་ལོས་སྒྱུར་བའི་རྒྱལ་པོ་ནོར་བུ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་ནོར་བུ་རིན་པོ་ཆེ་སྔ་མ་བཞིན་དུ་འབྱུང་སྟེ། ཐམས་ཅད་དུ་སྔོ་བ། བཻ་དཱུརྱའི་རང་བཞིན། ཟུར་བརྒྱད་དུ་འདུག་པ། ཤིན་དུ་སྦྱངས་པ་འབྱུང་སྟེ། ནོར་བུ་རིན་པོ་ཆེ་དེའི་འོད་ཀྱིས་བཙུན་མོའི་འཁོར་ཐམས་ཅད་ཀྱང་སྣང་བས་ཁྱབ་པར་འགྱུར་རོ། །གང་གི་ཚེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ནོར་བུ་རིན་པོ་ཆེ་དེ་བརྟག་པར་འདོད་པར་གྱུར་པ་དེའི་ཚེ། མཚན་མོ་ནམ་གྱི་གུང་ལ་མུན་པ་མུན་གནག་གི་ནང་དུ་ནོར་བུ་རིན་པོ་ཆེ་དེ་རྒྱལ་མཚན་གྱི་རྩེ་མོ་ལ་བཏགས་ཏེ། བསྐྱེད་མོས་ཚལ་གྱི་ས་བཟང་པོ་བལྟ་བའི་ཕྱིར་སོང་ན། ནོར་བུ་རིན་པོ་ཆེ་དེའི་འོད་ཀྱིས་ཐམས་ཅད་དང་ལྡན་པའི་དཔུང་གི་ཚོགས་ཡན་ལག་བཞི་པ་ཐམས་ཅད་དཔག་ཚད་ཁོ་ར་ཁོར་ཡུག་ཏུ་སྣང་བས་གསལ་བར་འགྱུར་རོ། །ནོར་བུ་རིན་པོ་ཆེའི་འཁོར་ན་གནས་པའི་མི་དེ་དག་ཀྱང་སྣང་བ་དེས་གསལ་བར་གྱུར་པ་དང ། གཅིག་གིས་གཅིག་མཐོང ། གཅིག་གིས་གཅིག་ཤེས་ནས་གཅིག་ལ་གཅིག་འདི་སྐད་སྨྲ་སྟེ། བཞིན་བཟངས་དག་ལོངས། ལས་ཀྱི་མཐའ་དག་བྱོས་ཤིག་།ཚོང་འདུས་དག་ཁྲོམ། ཉི་མ་ཤར་ཏེ་ཉིན་མོར་ཤེས་སོ་ཞེས་ཟེར་ཏེ། རྒྱལ་པོ 41.12a རྒྱལ་རིགས་སྤྱི་བོ་ནས་དབང་བསྐུར་བ་དེ་ནོར་བུ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ། བུད་མེད་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་བུད་མེད་རིན་པོ་ཆེ་སྔ་མ་བཞིན་དུ་འབྱུང་སྟེ། ཚུལ་དང་འཐུན་པ་རྒྱལ་རིགས་སུ་སྐྱེས་པ་ཧ་ཅང་ཡང་མི་རིང་བ། ཧ་ཅང་ཡང་མི་ཐུང་བ། ཧ་ཅང་ཡང་མི་སྦོམ་པ། ཧ་ཅང་ཡང་མི་སྐེམ་པ། ཧ་ཅང་ཡང་མི་དཀར་བ། ཧ་ཅང་ཡང་མི་གནག་པ། གཟུགས་མཛེས་པ། ཚུལ་དུ་ཤིས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། དེའི་སྤུའི་ཁུང་ཐམས་ཅད་ནས་ཙན་དན་གྱི་དྲི་འབྱུང་བ། ཁ་ནས་ཨུཏ་པ་ལའི་ངད་ལྡང་བ། ཀ་ཙ་ལིན་དིའི་གོས་ལྟར་རེག་ན་བདེ་བ། དེ་གྲང་བའི་དུས་ན་ནི་ལུས་ལ་རེག་ན་དྲོ་བ། དྲོ་བའི་དུས་ན་ལུས་ལ་རེག་ན་བསིལ་བ་སྟེ། དེ་འཁོར་ལོས་བསྒྱུར་བའི་རྒྱལ་པོ་མ་གཏོགས་པར་གཞན་ལ་ཡིད་ཀྱིས་ཀྱང་འདོད་ཆགས་སུ་མི་བྱེད་ན། ལུས་ཀྱིས་ལྟ་ཅི་སྨོས་ཏེ། འཁོར་ལོས་སྒྱུར་བའི་རྒྱལ་པོ་ནི་བུད་མེད་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །འཁོར་ལོས་བསྒྱུར་བའི་རྒྱལ་པོ་ཁྱིམ་བདག་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་ཁྱིམ་བདག་རིན་པོ་ཆེ་སྔ་མ་བཞིན་དུ་འབྱུང་སྟེ། མཁས་པ། གསལ་བ། ཡིད་གཞུངས་པ། ལྷའི་མིག་དང་ལྡན་པ་འབྱུང་ངོ ། །དེ་ལྷའི་མིག་དེས་དཔག་ཚད་ཁོ་ར་ཁོར་ཡུག་ཏུ་བདག་པོ་དང་བཅས་པའི་གཏེར་དག་ཀྱང་མཐོང ། བདག་པོ་མེད་པའི་གཏེར་དག་ཀྱང་མཐོང་སྟེ། དེ་བདག་པོ་མེད་པའི་གཏེར་གང་ཡིན་པ་དེ་དག་གིས་འཁོར་ལོས་སྒྱུར་བའི་རྒྱལ་པོའི་ནོར་གྱི་དགོས་པ་བྱེད་དེ། འཁོར་ལོས་སྒྱུར་བའི་རྒྱལ་པོ་ནི་ཁྱིམ་བདག་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ། །འཁོར 41.12b ལོས་སྒྱུར་བའི་རྒྱལ་པོ་བློན་པོ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན། འདི་ལ་འཁོར་ལོས་སྒྱུར་བའི་རྒྱལ་པོའི་བློན་པོ་རིན་པོ་ཆེ་སྔ་མ་བཞིན་དུ་འབྱུང་སྟེ། མཁས་ཤིང་གསལ་ལ་ཡིད་གཞུངས་པའོ། །དེ་འཁོར་ལོས་སྒྱུར་བའི་རྒྱལ་པོ་དེས་བསམས་པ་ཙམ་གྱིས་བསྐོ་བར་བྱ་བའི་དཔུང་རྣམས་སྐོའོ། །འཁོར་ལོས་སྒྱུར་བའི་རྒྱལ་པོ་ནི་བློན་པོ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ཏེ། འཁོར་ལོས་སྒྱུར་བའི་རྒྱལ་པོ་ནི་རིན་པོ་ཆེ་སྣ་བདུན་དེ་དག་དང་ལྡན་པ་ཡིན་ནོ། །དེ་ལ་བུ་སྟོང་འབྱུང་སྟེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་ཤ་སྟག་སྟེ། དེས་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པ་གནོད་པར་སྔོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ་ཆོས་ཀྱིས་ལེགས་པར་ཕབ་སྟེ་གནས་སོ། །གལ་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ན་སངས་རྒྱས་སུ་འགྱུར་ཏེ། འདོད་པའི་འདོད་ཆགས་སྤངས་པ། འདྲེན་པ་གཞན་གྱི་དྲིང་མི་འཇོག་པ། ལྷ་དང་མི་རྣམས་ཀྱི་སྟོན་པར་འགྱུར་རོ། །ཞེས་རིག་བྱེད་འདོན་དུ་འཛུད་དོ། །དེ་བཞིན་དུ་ལྷའི་བུ་གཞན་དག་ཀྱང་འཛམ་བུའི་གླིང་དུ་ལྷགས་ཤིང ། རང་སངས་རྒྱས་དག་ལ་སྐུལ་མ་འདེབས་ཏེ། འཕགས་པ་དག་ད་སྟེ་ལོ་བཅུ་གཉིས་ན་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་གིས་སངས་རྒྱས་ཀྱི་ཞིང་འདི་འོར་ཅིག་ཅེས་ཟེར་རོ། །དགེ་སློང་དག་དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་མཇུག་མ་སྒྱུར་བ་ཞེས་བྱ་བའི་རི་ལ་རང་སངས་རྒྱས་གླང་པོ་ཞེས་བྱ་བ་འདུག་པས་སྒྲ་དེ་ཐོས་ནས་རྡོ་བའི་སྟེང་དུ་འཇིམ་པ་ལ་བྱ་བ་དེ་བཞིན་དུ་འདུག་སྟེ། ནམ་མཁའ་ལ་ཤིང་ཏ་ལ་བདུན་སྲིད་དུ་གྱེན་དུ་འཕགས་སོ། །གྱེན་དུ་འཕགས་ནས་ཀྱང་མེའི 41.13a ཁམས་ལ་སྙོམས་པར་ཞུགས་ཏེ་སྒྲོན་མ་བཞིན་དུ་མྱ་ངན་ལས་འདས་སོ། །དེའི་མཁྲིས་པ་དང ། བད་ཀན་དང ། ཆུ་རྒྱུས་དང ། རུས་པ་དང ། ཤ་དང ། ཁྲག་ཏུ་གྱུར་པ་གང་ཡིན་པ་ཐམས་ཅད་ནི་མེས་ཡོངས་སུ་ཟད་པར་གྱུར་ཏེ། རིང་བསྲེལ་འབའ་ཤིག་ས་ལ་ལྷགས་ནས། རྐང་རྗེས་དེ་དག་ནི་ད་དུང་ཡང་དྲང་སྲོང་གི་རྗེས་ཞེས་གྲག་སྟེ་ཡོད་དོ། །དགེ་སློང་དག་དེའི་ཚེ་ཡུལ་བཱ་རཱ་ཎ་སཱིའི་རི་དགས་ཀྱི་ནགས་དྲང་སྲོང་ལྷུང་བ་ན་རང་སངས་རྒྱས་ལྔ་བརྒྱ་འཁོད་པ་དེ་དག་གིས་ཀྱང་སྒྲ་དེ་ཐོས་ནས། ནམ་མཁའ་ལ་ཤིང་ཏ་ལ་བདུན་སྲིད་དུ་གྱེན་དུ་འཕགས་ནས། མེའི་ཁམས་ལ་སྙོམས་པར་ཞུགས་ཏེ། སྒྲོན་མ་བཞིན་དུ་ཡོངས་སུ་མྱ་ངན་ལས་འདས་སོ། །དེ་དག་གི་མཁྲིས་པ་དང ། བད་ཀན་དང ། ཆུ་རྒྱུས་དང ། རུས་པ་དང ། ཤ་དང ། ཁྲག་ཏུ་གྱུར་པ་གང་ཡིན་པ་དེ་དག་ཐམས་ཅད་ནི་མེས་ཡོངས་སུ་ཟད་པར་གྱུར་ཏེ། རིང་བསྲེལ་འབའ་ཤིག་ས་ལ་ལྷགས་སོ། །དེ་ལྟར་འདིར་དྲང་སྲོང་རྣམས་ལྷུང་ངོ་ཞེས་དེ་ཕྱིན་ཆད་དྲང་སྲོང་ལྷུང་བ་ཞེས་བྱ་བ་ཡང་དྲང་སྲོང་ལྷུང་བ་དྲང་སྲོང་ལྷུང་བ་ཞེས་མིང་དུ་གྱུར་ཏོ། །མི་འཇིགས་པ་བྱིན་པའི་རི་དགས་དག་ཀྱང་དེ་ན་གནས་པས་དེ་ཕྱིན་ཆད་རི་དགས་ཀྱི་ནགས་ཤེས་བྱ་བ་ཡང་རི་དགས་ཀྱི་ནགས་རི་དགས་ཀྱི་ནགས་ཤེས་མིང་དུ་གྱུར་ཏོ། །དགེ་སློང་དག་དེ་ལྟར་བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ན་འདུག་པ་ནི་རྣམ་པར་བལྟ་བ་ཆེན་པོ་བཞི་ལ་རྣམ་པར་ལྟ་སྟེ། བཞི་གང་ཞེ་ན། འདི་ལྟ་སྟེ། དུས་ལ་རྣམ་པར་ལྟ་བ་དང ། གླིང་ལ་རྣམ་པར་ལྟ་བ་དང ། ཡུལ་ལ་རྣམ་པར་ལྟ་བ་དང ། རིགས་ལ་རྣམ་པར་ལྟ་བའོ། །དགེ་སློང་དག་ཅིའི་ཕྱིར་བྱང་ཆུབ་སེམས་དཔའ་དུས་རྣམ་པར་བལྟ་བ་ལ་རྣམ་པར་ལྟ་ཞེ་ན། བྱང 41.13b ཆུབ་སེམས་དཔའ་ནི་ཐོག་མའི་དུས་སེམས་ཅན་འདུ་བའི་ཚེ་མའི་མངལ་དུ་མི་འཇུག་གི། གང་གི་ཚེ་འཇིག་རྟེན་གསལ་བར་ཀུན་ནས་གནས་པར་གྱུར་ཏེ། སྐྱེ་བ་སྣང་བར་གྱུར། རྒ་བ་སྣང་བར་གྱུར། ན་བ་སྣང་བར་གྱུར། འཆི་བ་སྣང་བར་གྱུར་པ་དེའི་ཚེ་བྱང་ཆུབ་སེམས་དཔའ་མའི་མངལ་དུ་འཇུག་གོ། །དགེ་སློང་དག་ཅིའི་ཕྱིར་བྱང་ཆུབ་སེམས་དཔའ་གླིང་རྣམ་པར་བལྟ་བ་ལ་རྣམ་པར་ལྟ་ཞེ་ན། བྱང་ཆུབ་སེམས་དཔའ་ནི་མཐའ་འཁོབ་ཀྱི་གླིང་དུ་མི་སྐྱེ། ཤར་གྱི་ལུས་འཕགས་པོར་མི་སྐྱེ། ནུབ་ཀྱི་བ་ལང་སྤྱོད་དུ་མི་སྐྱེ། བྱང་གི་སྒྲ་མི་སྙན་དུ་མི་སྐྱེའི། ལྷོའི་འཛམ་བུ་གླིང་ཉིད་དུ་སྐྱེའོ། །དགེ་སློང་དག་ཅིའི་ཕྱིར་བྱང་ཆུབ་སེམས་དཔའ་ཡུལ་རྣམ་པར་བལྟ་བ་ལ་རྣམ་པར་ལྟ་ཞེ་ན། བྱང་ཆུབ་སེམས་དཔའ་ནི་མཐའ་འཁོབ་ཀྱི་ཡུལ་གང་ན་མི་རྣམས་དབང་པོ་རྟུལ་ཞིང་བླུན་ལ་ལུག་ལྟར་ལྐུགས་པའི་རང་བཞིན་ཅན་ལེགས་པར་བསྟན་པ་དང ། ཉེས་པར་བསྟན་པའི་དོན་ཤེས་པར་བྱ་བའི་སྐལ་བ་མེད་པ་དག་ཡོད་པ་དག་ཏུ་མི་སྐྱེའི། བྱང་ཆུབ་སེམས་དཔའ་ནི་ཡུལ་གྱི་དབུས་ཉིད་དུ་སྐྱེའོ། །དགེ་སློང་དག་ཅིའི་ཕྱིར་བྱང་ཆུབ་སེམས་དཔའ་རིགས་རྣམ་པར་བལྟ་བ་ལ་རྣམ་པར་ལྟ་ཞེ་ན། བྱང་ཆུབ་སེམས་དཔའ་ནི་རིགས་དམའ་བ་གདོལ་པའི་རིགས་སམ། སྨྱིག་མ་མཁན་གྱི་རིགས་སམ། ཤིང་རྟ་མཁན་གྱི་རིགས་སམ། གཡུང་རིགས་སུ་མི་སྐྱེའི། བྲམ་ཟེའི་རིགས་སམ། རྒྱལ་རིགས་ཁོ་ན་སྟེ། རིགས་གཉིས་སུ་སྐྱེའོ། །དེ་ལ་གང་གི་ཚེ་བྲམ་ཟེའི་རིགས་བཙུན་པར་བྱ་བ་དེའི་ཚེ་བྲམ་ཟེའི་རིགས་སུ་སྐྱེའོ། །གང་གི་ཚེ་རྒྱལ་རིགས་བཙུན་པར་བྱ་བ་དེའི་ཚེ་རྒྱལ་རིགས་སུ་སྐྱེ་སྟེ། དགེ་སློང་དག་ད་ལྟར་ནི་རྒྱལ་རིགས་བཙུན་པར་བྱ་བས། དེའི་ཕྱིར་བྱང་ཆུབ་སེམས་དཔའ་རྒྱལ་རིགས་སུ་སྐྱེ་སྟེ། དགེ་སློང་དག་དོན་གྱི 41.14a དབང་དེ་ལ་བརྟེན་ནས། བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ན་གནས་པ་རྣམ་པར་བལྟ་བ་ཆེན་པོ་བཞི་ལ་རྣམ་པར་ལྟ་སྟེ། དེ་ལྟར་བལྟས་ནས་ཅང་མི་ཟེར་བར་གྱུར་ཏོ། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་གཉིས་པ། དགེ་སློང་དག་དེ་ལྟར་ལྷའི་བུ་དེ་དག་དང ། བྱང་ཆུབ་སེམས་དཔའ་དེ་དག་གཅིག་ལ་གཅིག་འདི་སྐད་དུ། བྱང་ཆུབ་སེམས་དཔའ་རིགས་རིན་པོ་ཆེ་ནི་ཇི་ལྟ་བུ་ཞིག་ཏུ་སྐྱེ་བར་འགྱུར། ཡུམ་ནི་ཇི་ལྟ་བུ་ཞིག་གི་ལྷུམས་སུ་འཇུག་པར་འགྱུར་ཞེས་འདྲིའོ། །དེ་ལ་ལ་ན་རེ་ཡུལ་མ་ག་དྷཱ་ན་ལུས་འཕགས་ཀྱི་རིགས་འདི་འབྱོར་ཅིང་རྒྱས་ལ་ལོ་ལེགས་པ་དང ། བདེ་བ་དང་ལྡན་པ་ཡིན་ཏེ། དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ་དེ་ནི་ཚུལ་དང་འཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་དེ་ནི་མའི་རྒྱུད་ཀྱིས་དག་པ་ཡང་མ་ཡིན། ཕའི་རྒྱུད་ཀྱིས་དག་པ་ཡང་མ་ཡིན་ལ། བསོད་ནམས་ཆུང་ངུས་བྱུང་གི། བསོད་ནམས་རྒྱ་ཆེན་པོས་མངོན་པར་བྱུང་བ་མ་ཡིན་ཞིང་རྒོད་ལ་མི་བརྟེན་ཏེ་མི་གནས་པ་ཡིན་ལ། ཡུལ་དེ་ཡང་ཉེ་འཁོར་གསེག་མས་གང་བ། བསྐྱེད་མོས་ཚལ་དང ། མཚོ་དང ། མཚེའུ་དག་ཀྱང་མི་མང་ལ་རི་བྲགས་ལྟར་མཐའ་འཁོབ་ཀྱི་གནས་སུ་གྱུར་པ་སྟེ། དེའི་ཕྱིར་དེ་ནི་ཚུལ་དང་འཐུན་པ་མ་ཡིན་ནོ་ཞེས་ཟེར་རོ། །ལ་ལ་ན་རེ་ཀོ་ས་ལའི་རིགས་འདི་འཁོར་མང་ཞིང་བཞོན་པ་མང་ལ་ནོར་ཆེ་བ་སྟེ། དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ་དེ་ཡང་ཚུལ་དང་འབུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་ཀོ་ས་ལའི་རིགས་ནི་གདོལ་པའི་རིགས་ལས་ཤི་འཕོས་ནས་སྐྱེས་པ་ཡིན་ཏེ། ཕ་དང་མས་དག་པ་ཡང་མ 41.14b ཡིན་ལ། དམའ་བ་ལ་མོས་པ་སྟེ། རིགས་མཐོ་བར་ཡང་མི་བྱ། ནོར་དང་རིན་པོ་ཆེའི་གཏེར་ཡང་ཚད་མེད་པར་ཕུན་སུམ་ཚོགས་པ་མ་ཡིན་ཏེ། དེའི་ཕྱིར་དེ་ནི་ཚུལ་དང་འཐུན་པ་མ་ཡིན་ནོ་ཞེས་ཟེར་རོ། །ལ་ལ་ན་རེ་རྒྱལ་པོ་བད་སའི་རིགས་འདི་འབྱོར་ཅིང་རྒྱས་ལ། ལོ་ལེགས་པ་དང ། བདེ་བ་དང་ལྡན་པ་ཡིན་ཏེ། དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ་དེ་ཡང་དེའི་ཚུལ་དང་འཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་རྒྱལ་པོ་བད་སའི་རིགས་ནི་ཕལ་པ་སྟེ། གཏུམ་ལ་གཟི་བརྗིད་འབར་བ་ཡང་མ་ཡིན་ཞིང ། སྐྱེས་པ་གཞན་ལས་སྐྱེ་བ་གྲུབ་པ། ཕ་མ་ཉིད་ཀྱི་གཟི་བརྗིད་ཀྱི་ལས་ཀྱིས་གྲུབ་པ་མ་ཡིན་ལ། དེའི་རྒྱལ་པོ་ཡང་ཆད་པར་སྨྲ་བ་སྟེ། དེའི་ཕྱིར་དེ་ཡང་ཚུལ་དང་འཐུན་པ་མ་ཡིན་ནོ་ཞེས་ཟེར་རོ། །ལ་ལ་ན་རེ་གྲོང་ཁྱེར་ཆེན་པོ་ཡངས་པ་ཅན་འདི་ནི་འབྱོར་ཅིང་རྒྱས་ལ། ལོ་ལེགས་པ་དང ། བདེ་བ་དང་ལྡན་པ་ཡིན་ཏེ། ཉམས་དགའ་ལ་སྐྱེ་བོ་མང་པོ་དང་མིས་ཀུན་དུ་གང་བ། སྟེགས་བུ་དང ། བ་གམ་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁང་བཟངས་དག་གིས་ལེགས་པར་བརྒྱན་པ་སྟེ། མེ་ཏོག་གི་ར་བ་དང ། ནགས་ཚལ་གྱི་ཕྲེང་བ་མེ་ཏོག་ཀུན་ཏུ་རྒྱས་པ་དང་ལྡན་པ་ཡིན་ལ་ལྷའི་ཕོ་བྲང་དང་འདྲ་བ་ཡིན་ཏེ། དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་དེ་དག་ལ་ནི་ཕན་ཚུན་དུ་རིགས་པར་སྨྲ་བ་མེད་དོ། །ཆོས་སྤྱོད་པ་མེད་དོ། །གོང་མ་དང་བར་མ་དང་རྒན་པ་དང ། གཙོ་བོ་དག་ལ་ཡང་རིམ་གྲོར་བྱ་བ་མེད་ཅིང ། རེ་རེ་ཞིང་ཡང་འདི་སྙམ་དུ་བདག་ནི་རྒྱལ་པོའོ། །བདག་ནི་རྒྱལ་པོའོ་སྙམ་དུ་སེམས་པས་སློབ་མར་ཁས་ལེན་པ་མེད་ཅིང་ཆོས་ཁས་ལེན་པ་མེད་པ་སྟེ། དེའི་ཕྱིར་དེའང 41.15a ཚུལ་དང་འཐུན་པ་མ་ཡིན་ནོ་ཞེས་ཟེར་རོ། །ལ་ལ་ན་རེ་གྲོང་ཁྱེར་འཕགས་རྒྱལ་ན་རབ་སྣང་གི་རིགས་འདི་ནི་དཔུང་ཆེ་ཞིང་བཞོན་པ་མང་བ། ཕ་རོལ་གྱི་གཡུལ་ངོར་རྒྱལ་བ་འཐོབ་པ་ཡིན་ཏེ། དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་དེ་དག་ནི་ཁྲོ་ཞིང་གཏུམ་ལ་བརླང་ཞིང་གཟུ་ལུམས་ཅན་རྒོད་པ་སྟེ། ལས་ཡོད་པར་བལྟ་བའང་མ་ཡིན་པས། དེའི་ཕྱིར་དེ་ཡང་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་ཀྱི་འོས་མ་ཡིན་ནོ་ཞེས་ཟེར་རོ། །ལ་ལ་ན་རེ་གྲོང་ཁྱེར་བཅོམ་བརླག་འདི་འབྱོར་ཅིང་རྒྱས་ལ་ལོ་ལེགས་པ་དང་བདེ་བ་དང་ལྡན་པ། སྐྱེ་བོ་མང་པོ་དང་མིས་ཀུན་དུ་གང་བ་ཡིན་པས། རྒྱལ་པོ་ལག་བཟངས་སྡེ་དཔའ་བའི་བདག་པོའི་རྒྱལ་པོའི་ཕོ་བྲང་དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་རྒྱལ་པོ་དེ་ནི་ལོག་པར་ལྟ་བའི་རིགས་ཀྱི་རྒྱུད་དུ་སྐྱེས་པ་སྟེ། མི་རྒོད་དང་འདྲ་བའི་རྒྱལ་པོ་ཡིན་པས་བྱང་ཆུབ་སེམས་དཔའ་སྲིད་པ་ཐ་མ་པ་ནི་ལོག་པར་ལྟ་བའི་རིགས་སུ་སྐྱེ་བར་མི་རིགས་ཏེ། དེའི་ཕྱིར་དེ་ཡང་ཚུལ་དང་འཐུན་པ་མ་ཡིན་ནོ་ཞེས་ཟེར་རོ། །ལ་ལ་ན་རེ་གྲོང་ཁྱེར་ཧསྟི་ན་པུ་ར་འདིའི་རྒྱལ་པོ་ནི་སྐྱ་བསེང་གི་བུའི་རིགས་ཀྱི་རྒྱུད་ལས་སྐྱེས་པ། དཔའ་ཞིང་རྟུལ་ཕོད་པ་དང་ལྡན་པ། ཡན་ལག་མཆོག་གི་གཟུགས་ཕུན་སུམ་ཚོགས་པ་གཞན་གྱི་སྡེ་འཇོམས་པ་སྟེ། རིགས་དེ་ནི་བྱང་ཆུབ་སེམས་དཔའ་དེ་ཡུམ་གྱི་ལྷུམས་སུ་འཇུག་པའི་གནས་ཀྱི་འོས་ཡིན་ནོ་ཞེས་ཟེར་རོ། །ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟར་སྐྱ་བསེང་གི་བུའི་རིགས་སུ་སྐྱེས་པ་དག་གིས་ནི་རིགས་ཀྱི་རྒྱུད་རྣམ་པར་འཁྲུགས་པར་བྱས་ཏེ། 41.15b གཡུལ་ངོར་བརྟན་པ་ལ་ནི་ཆོས་ཀྱི་བུ་ཞེས་ཟེར། འཇིགས་སྡེ་ལ་ནི་རླུང་གི་བུ་ཞེས་ཟེར། སྲིད་སྒྲུབ་ལ་ནི་དབང་པོའི་བུ་ཞེས་ཟེར། རིགས་མེད་དང་ལྷར་བཅས་ལ་ནི་ཐ་སྐར་གྱི་བུ་ཞེས་ཟེར་ཏེ། དེའི་ཕྱིར་རིགས་དེ་ཡང་བྱང་ཆུབ་སེམས་དཔའ་དེ་ལྷུམས་སུ་འཇུག་པའི་གནས་ཀྱི་འོས་མ་ཡིན་ནོ་ཞེས་ཟེར་རོ། །ལ་ལ་ན་རེ་གྲོང་ཁྱེར་བཅོམ་བརླག་འདི་ནི་ཤིན་ཏུ་ཡང་ཉམས་དགའ་ཞིང་ཕན་ཚུན་འབྱོར་གྱི་སྟེང་དུ་རྒྱལ་པོ་བཟང་པོའི་བཤེས་གཉེན་བཞུགས་པའི་ས་ཡང་ཡིན་ལ། རྒྱལ་པོ་དེ་ཡང་གླང་པོ་དང ། རྟ་དང ། ཤིང་རྟ་དང ། དཔུང་བུ་ཆུང་དང ། དཔུང་གི་ཚོགས་མང་པོ་དང་ལྡན་པ། གསེར་དང ། དངུལ་དང ། ནོར་བུ་དང ། མུ་ཏིག་དང ། བཻ་དཱུརྱ་དང ། དུང་དང ། མན་ཤེལ་དང ། བྱི་རུ་དང ། ས་ལེ་སྦྲམ་དང ། ནོར་དང ། ཡོ་བྱད་ཤིན་ཏུ་མང་བ། རྒྱལ་པོ་དང་བློན་པོ་ཐམས་ཅད་ཀྱི་ཟིལ་གྱིས་མི་ནོན་པའི་སྟོབས་དང ། ཕ་རོལ་གནོན་པ་དང་ལྡན་པ། མཛའ་བ་དང་ལྡན་ཞིང་ཆོས་ལ་དགའ་བ་སྟེ། རིགས་དེ་ནི་བྱང་ཆུབ་སེམས་དཔའ་དེ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ། །ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ། དེ་ཅིའི་ཕྱིར་ཞེ་ན། རྒྱལ་པོ་བཟང་པོའི་བཤེས་གཉེན་ཡོན་ཏན་དེ་ལྟ་བུ་དང་ལྡན་པ་དེ་ཡོད་མོད་ཀྱི། དེ་ནི་ཤིན་ཏུ་རྒས་པས་བུ་སྐྱེད་པའི་མཐུ་ཡང་མེད་ལ། བུའང་མང་བས་དེའི་ཕྱིར་རིགས་དེ་ཡང་བྱང་ཆུབ་སེམས་དཔའ་དེ་ཡུམ་གྱི་ལྷུམས་སུ་འཇུག་པའི་གནས་ཀྱི་འོས་མ་ཡིན་ནོ་ཞེས་ཟེར་རོ། །དེ་ལྟར་བྱང་ཆུབ་སེམས་དཔའ་དེ་དག་དང་ལྷ་དེ་དག་གིས་འཛམ་བུའི་གླིང་གི་ཡུལ་ཆེན་པོ་བཅུ་དྲུག་པོ་ཐམས་ཅད་ན། རྒྱལ་པོའི་རིགས་མཐོན་པོ་མཐོན་པོའི་རིགས་གང་ཇི་སྙེད་ཅིག་ཡོད་པ་དེ་དག་ཐམས་ཅད་ལ་བལྟས་ན་ཐམས་ཅད་ཀྱང་ཉེས་པ་དང་བཅས་པར་མཐོང་སྟེ། དེ་དག་དེ་ལྟར་སེམས་པའི་ཡིད་ལ་བྱེད་པའི་ཚེ། ལྷའི་བུ་ཡེ་ཤེས་ཏོག་གི་རྒྱལ་མཚན་ཞེས་བྱ་བ་བྱང་ཆུབ་ལས་ཕྱིར་མི 41.16a ལྡོག་པ་ཐེག་པ་ཆེན་པོ་འདི་ལ་ངེས་པར་གྱུར་པ་ཞིག་ཡོད་པ་དེས་བྱང་ཆུབ་སེམས་དཔའི་འཁོར་དང ། ལྷའི་འཁོར་ཆེན་པོ་ཡོད་པ་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་ཚུར་ཤོག་།བྱང་ཆུབ་སེམས་དཔའ་དེ་ཉིད་ཀྱི་དྲུང་དུ་དོང་སྟེ། རིགས་རིན་པོ་ཆེ་ཡོན་ཏན་ཇི་ལྟ་བུར་ཕུན་སུམ་ཚོགས་པ་ཞིག་ཏུ་སྲིད་པ་ཐ་མ་པའི་བྱང་ཆུབ་སེམས་དཔའ་སྐྱེ་བར་འགྱུར་བ་དྲིའོ་ཞེས་སྨྲས་པ་དང ། ལེགས་སོ་ཞེས་ཏེ། དེ་དག་ཐམས་ཅད་ཀྱང་ཐལ་མོ་སྦྱར་ནས་བྱང་ཆུབ་སེམས་དཔའི་དྲུང་དུ་ཕྱིན་ཏེ་དྲིས་པ། སྐྱེས་བུ་དམ་པ་རིགས་རིན་པོ་ཆེ་ཡོན་ཏན་ཕུན་སུམ་ཚོགས་པ་ཇི་ལྟ་བུ་ཞིག་ཏུ་བྱང་ཆུབ་སེམས་དཔའ་སྲིད་པ་ཐ་མ་པ་སྐྱེ་བར་འགྱུར། དེ་ནས་བྱང་ཆུབ་སེམས་དཔའས་བྱང་ཆུབ་སེམས་དཔའི་ཚོགས་ཆེན་པོ་དང ། ལྷའི་ཚོགས་ཆེན་པོ་དེ་དག་ལ་རྣམ་པར་བལྟས་ཏེ་འདི་སྐད་ཅེས་སྨྲས་སོ། །གྲོགས་པོ་དག་བྱང་ཆུབ་སེམས་དཔའ་སྲིད་པ་ཐ་མ་པ་གང་དུ་སྐྱེ་བར་འགྱུར་བའི་རིགས་དེ་ནི་རྣམ་པ་དྲུག་བཅུ་རྩ་བཞི་ཕུན་སུམ་ཚོགས་པ་ཡིན་ཏེ། དྲུག་བཅུ་རྩ་བཞི་གང་ཞེ་ན། འདི་ལྟ་སྟེ། རིགས་དེ་ནི་བཙུན་པ་ཡིན། རིགས་དེ་ནི་ཀུན་གྱིས་མངོན་པར་ཤེས་པ་ཡིན། རིགས་དེ་ནི་ཕྲན་ཚེགས་མེད་ཅིང་གནོད་པར་བྱེད་པ་མེད་པ་ཡིན། རིགས་དེ་ནི་རྒྱུད་ཕུན་སུམ་ཚོགས་པ་ཡིན། རིགས་དེ་ནི་ཆོ་འབྲང་ཕུན་སུམ་ཚོགས་པ་ཡིན། རིགས་དེ་ནི་སྐྱེས་བུ་ཟུང་ཕུན་སུམ་ཚོགས་པ་ཡིན། རིགས་དེ་ནི་སྔོན་གྱི་སྐྱེས་བུ་ཟུང་ཕུན་སུམ་ཚོགས་པ་ཡིན། རིགས་དེ་ནི་བཙུན་པའི་སྐྱེས་བུ་ཟུང་ཕུན་སུམ་ཚོགས་པ་ཡིན། རིགས་དེ་ནི་ཀུན་གྱིས་མངོན་པར་ཤེས་པའི་སྐྱེས་བུ་ཟུང་ཕུན་སུམ་ཚོགས་པ་ཡིན། རིགས་དེ་ནི་དབང་ཆེ་བར་གྲགས་པའི་སྐྱེས་བུ་ཟུང་ཕུན་སུམ་ཚོགས་པ་ཡིན། རིགས་དེ་ནི་སྐྱེས་པ་མང་བ་ཡིན། རིགས་དེ་ནི་བུད་མེད་མང་བ་ཡིན། རིགས་དེ་ནི་འཇིགས་པ་མེད་པ་ཡིན། རིགས་དེ་ནི་དམན་པ་མེད་ཅིང་ཞུམ་པ་མེད་པ་ཡིན། རིགས་དེ་ནི་བརྐམ་པ་མེད་པ་ཡིན། རིགས་དེ་ནི་ཚུལ་ཁྲིམས་དང་ལྡན་པ་ཡིན། རིགས་དེ་ནི་ཤེས་རབ 41.16b དང་ལྡན་པ་ཡིན། རིགས་དེ་ནི་བློན་པོས་བལྟ་ཞིང་ལོངས་སྤྱོད་ལ་སྤྱོད་པ་ཡིན། རིགས་དེ་ནི་བཟོ་དོན་ཡོད་པས་བཤམས་ཤིང་ལོངས་སྤྱོད་ལ་སྤྱོད་པ་ཡིན། རིགས་དེ་ནི་མཛའ་བ་བརྟན་པ་ཡིན། རིགས་དེ་ནི་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་ཀྱི་སྲོག་ལ་ལྟ་བ་ཡིན། རིགས་དེ་ནི་བྱས་པ་གཟོ་བ་དང་ལྡན་པ་ཡིན། རིགས་དེ་ནི་བརྟུལ་ཞུགས་ཤེས་པ་ཡིན། རིགས་དེ་ནི་འདུན་པས་མི་འགྲོ་བ་ཡིན། རིགས་དེ་ནི་ཞེ་སྡང་གིས་མི་འགྲོ་བ་ཡིན། རིགས་དེ་ནི་གཏི་མུག་གིས་མི་འགྲོ་བ་ཡིན། རིགས་དེ་ནི་འཇིགས་པས་མི་འགྲོ་བ་ཡིན། རིགས་དེ་ནི་ཁ་ན་མ་ཐོ་བས་འཇིགས་པ་ཡིན། རིགས་དེ་ནི་གཏི་མུག་ལ་མི་གནས་པ་ཡིན། རིགས་དེ་ནི་ལག་སྦབས་ཆེ་བ་ཡིན། རིགས་དེ་ནི་བྱ་བ་ལ་མོས་པ་ཡིན། རིགས་དེ་ནི་གཏོང་བ་ལ་མོས་པ་ཡིན། རིགས་དེ་ནི་སྦྱིན་པ་ལ་མོས་པ་ཡིན། རིགས་དེ་ནི་ཞོ་ཤ་ཤེས་པ་ཡིན། རིགས་དེ་ནི་རྩལ་བརྟན་པ་ཡིན། རིགས་དེ་ནི་མཐུ་རྩལ་དང་ལྡན་པ་ཡིན། རིགས་དེ་ནི་རྩལ་མཆོག་དང་ལྡན་པ་ཡིན། རིགས་དེ་ནི་དྲང་སྲོང་མཆོད་པ་ཡིན། རིགས་དེ་ནི་ལྷ་མཆོད་པ་ཡིན། རིགས་དེ་ནི་མཆོད་རྟེན་མཆོད་པ་ཡིན། རིགས་དེ་ནི་མཚུན་རྗེད་པ་ཡིན། རིགས་དེ་ནི་ཁོན་དུ་འཛིན་པ་མེད་པ་ཡིན། རིགས་དེ་ནི་ཕྱོགས་བཅུར་སྒྲ་གྲགས་པ་ཡིན། རིགས་དེ་ནི་འཁོར་ཆེན་པོ་དང་ལྡན་པ་ཡིན། རིགས་དེ་ནི་འཁོར་མི་ཕྱེད་པ་དང་ལྡན་པ་ཡིན། རིགས་དེ་ནི་བླ་ན་མེད་པའི་འཁོར་དང་ལྡན་པ་ཡིན། རིགས་དེ་ནི་རིགས་ཀྱི་ནང་ན་གཙོ་བོར་བྱ་བ་ཡིན། རིགས་དེ་ནི་རིགས་ལ་དབང་ཐོབ་པ་ཡིན། རིགས་དེ་ནི་དབང་ཆེ་བར་གྲགས་པ་ཡིན། རིགས་དེ་ནི་ཕར་འཛིན་པ་ཡིན། རིགས་དེ་ནི་མར་འཛིན་པ་ཡིན། རིགས་དེ་ནི་དགེ་སྦྱོང་དུ་འཛིན་པ་ཡིན། རིགས་དེ་ནི་བྲམ་ཟེར་འཛིན་པ་ཡིན། རིགས་དེ་ནི་ནོར་དང་འབྲུའི་བང་མཛོད་མང་བ་ཡིན། རིགས་དེ་ནི་དབྱིག་དང ། གསེར་དང ། ནོར་བུ་དང ། མུ་ཏིག་དང ། བཻ་དཱུརྱ་དང ། དུང་དང ། 41.17a མན་ཤེལ་དང ། བྱི་རུ་དང ། ས་ལེ་སྦྲམ་དང ། དངུལ་དང ། རྫས་དང ། ཡོ་བྱད་མང་བ་ཡིན། རིགས་དེ་ནི་གླང་པོ་ཆེ་དང ། རྟ་དང ། རྔ་མོ་དང ། བ་ལང་དང ། ལུག་ཤིན་ཏུ་མང་བ་ཡིན། རིགས་དེ་ནི་བྲན་ཕོ་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་ཤིན་དུ་མང་བ་ཡིན། རིགས་དེ་ནི་ཐུབ་པར་དཀའ་བ་ཡིན། རིགས་དེ་ནི་དོན་ཐམས་ཅད་གྲུབ་པ་ཡིན། རིགས་དེ་ནི་འཁོར་ལོས་སྒྱུར་བའི་རིགས་ཀྱི་རྒྱུད་དུ་སྐྱེས་པ་ཡིན། རིགས་དེ་ནི་སྔོན་གྱི་དགེ་བའི་རྩ་བའི་གྲོགས་ཀྱིས་བསྐྱེད་པ་ཡིན། རིགས་དེ་ནི་བྱང་ཆུབ་སེམས་དཔའི་རིགས་སུ་རིགས་བཙུན་པར་སྐྱེས་པ་ཡིན། རིགས་དེ་ནི་འཇིག་རྟེན་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པའི་ནང་ན་རིགས་ལས་སྨོས་པའི་སྐྱོན་གྱིས་ཁ་ན་མ་ཐོ་བ་ཐམས་ཅད་དང་བྲལ་བ་སྟེ། གྲོགས་པོ་དག་གང་དུ་བྱང་ཆུབ་སེམས་དཔའ་སྲིད་པ་ཐ་མ་པ་འབྱུང་བར་འགྱུར་བའི་རིགས་དེ་ནི་རྣམ་པ་དྲུག་བཅུ་རྩ་བཞི་པོ་དེ་དག་དང་ལྡན་པ་ཡིན་ནོ། །གྲོགས་པོ་དག་སྲིད་པ་ཐ་མ་པའི་བྱང་ཆུབ་སེམས་དཔའ་བུད་མེད་གང་གི་མངལ་དུ་འཇུག་པར་འགྱུར་བའི་བུད་མེད་དེ་ནི་ཡོན་ཏན་གྱི་རྣམ་པ་སུམ་བཅུ་རྩ་གཉིས་དང་ལྡན་པ་ཡིན་ཏེ། སུམ་བཅུ་རྩ་གཉིས་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་སྲིད་པ་ཐ་མ་པ་ནི་ཀུན་གྱིས་མངོན་པར་ཤེས་པའི་བུད་མེད་ཀྱི་མངལ་དུ་འཇུག་གོ། །ཀུན་གྱིས་མངོན་པར་རིག་པ་དང ། སྤྱོད་པ་ལ་གླགས་མི་ཐོད་པ་དང ། རིགས་ཕུན་སུམ་ཚོགས་པ་དང ། ཆོ་འབྲང་ཕུན་སུམ་ཚོགས་པ་དང ། གཟུགས་ཕུན་སུམ་ཚོགས་པ་དང ། མིང་ཕུན་སུམ་ཚོགས་པ་དང ། ཆུ་ཞེང་ཕུན་སུམ་ཚོགས་པ་དང ། སྔན་ཆད་མ་བཙས་པ་དང ། ཚུལ་ཁྲིམས་ཕུན་སུམ་ཚོགས་པ་དང ། གཏོང་བ་ཕུན་སུམ་ཚོགས་པ་དང ། བཞིན་འཛུམ་པ་དང ། འཐུན་པར་འཛིན་པ་དང ། གསལ་བ་དང ། དུལ་བ་དང ། འཇིགས་པ་མེད་པ་དང ། 41.17b མང་དུ་ཐོས་པ་དང ། མཁས་པ་དང ། སྒྱུ་མེད་པ་དང ། གཡོ་མེད་པ་དང ། མི་ཁྲོ་བ་དང ། ཕྲག་དོག་མེད་པ་དང ། སེར་སྣ་མེད་པ་དང ། མི་རྒོད་པ་དང ། མི་གཡེང་བ་དང ། ཅ་ཅོ་མེད་པ་དང ། བཟོད་ཅིང་དེས་པ་དང་ལྡན་པ་དང ། ངོ་ཚ་ཤེས་ཤིང་ཁྲེལ་ཡོད་པ་དང ། འདོད་ཆགས་དང ། ཞེ་སྡང་དང ། གཏི་མུག་གི་ཤས་ཆུང་བ་དང ། བུད་མེད་ཀྱི་སྐྱོན་དང་བྲལ་བ་དང ། ཁྱིམ་ཐབ་ཀྱི་བརྟུལ་ཞུགས་དང་ལྡན་པ་དང ། ཡོན་ཏན་ཐམས་ཅད་ཕུན་སུམ་ཚོགས་པའི་བུད་མེད་ཀྱི་མངལ་དུ་བྱང་ཆུབ་སེམས་དཔའ་སྲིད་པ་ཐ་མ་པ་འཇུག་གོ། །གྲོགས་པོ་དག་བྱང་ཆུབ་སེམས་དཔའ་སྲིད་པ་ཐ་མ་པ་བུད་མེད་གང་གི་མངལ་དུ་འཇུག་པའི་བུད་མེད་དེ་ནི་ཡོན་ཏན་གྱི་རྣམ་པ་སུམ་བཅུ་རྩ་གཉིས་པོ་དེ་དག་དང་ལྡན་པ་ཡིན་ནོ། །གྲོགས་པོ་དག་བྱང་ཆུབ་སེམས་དཔའ་ནི་ཟླ་བ་མར་གྱི་ངོ་ལ་མའི་མངལ་དུ་མི་འཇུག་གི། བྱང་ཆུབ་སེམས་དཔའ་སྲིད་པ་ཐ་མ་པ་ནི་ཟླ་བ་ཡར་གྱི་ཚེས་བཅཝ་ལྔའི་ཟླ་བ་ཉ་སྟེ་རྒྱས་པ་ལ་སྐར་མ་རྒྱལ་དང་ལྡན་པའི་ཚེ། མ་གསོ་སྦྱོང་བླངས་པའི་མངལ་དུ་འཇུག་གོ། །དེ་ནས་བྱང་ཆུབ་སེམས་དཔའ་དེ་དག་དང ། ལྷའི་བུ་དེ་དག་གིས་བྱང་ཆུབ་སེམས་དཔའ་ལས་རིགས་ཡོངས་སུ་དག་པ་དང ། མ་ཡོངས་སུ་དག་པའི་རྣམ་པ་དེ་ལྟ་བུ་དེ་དག་ཐོས་ནས་འདི་སྙམ་དུ་སེམས་ཏེ། སྐྱེས་བུ་དམ་པ་འདིས་རྣམ་པ་ཇི་སྙེད་དུ་བསྟན་པ་དེ་ལྟ་བུའི་ཡོན་ཏན་དང་ལྡན་པའི་རིགས་དེ་གང་ཞིག་ལ་ཡོད་སྙམ་དུ་སེམས་སོ། །དེ་ལྟར་སེམས་ཤིང་ཡིད་ལ་བྱེད་པ་ལ་ཞུགས་པ་ན་དེ་དག་འདི་སྙམ་དུ་སེམས་ཏེ། ཤཱཀྱའི་གྲོང་ཁྱེར་འདི་འབྱོར་ཅིང་རྒྱས་ལ་བདེ་ཞིང་ལོ་ལེགས་པ་དང་ལྡན་ཏེ། ཉམས་དགའ་ཞིང་སྐྱེ་བོ་མང་པོ་དང་མིས་གང་བ་ཡིན་ལ། རྒྱལ་པོ་ཟས་གཙང་མ་ཡང་མའི་རྒྱུད་ཀྱིས་དག་པ། ཕའི་རྒྱུད་ཀྱིས་དག་པ། ཆུང་མ་དག་པ་དང་ལྡན་པ། ལས་ཀྱི་མཐའ་ལ་ཉོན་མོངས་པ་མེད་པ། དཔེ་བྱད་བཟང་བ། ཤིན་དུ་མཛངས་པ། བསོད་ནམས་ཀྱི་གཟི་བརྗིད 41.18a དང་ལྡན་པ། གྲགས་པ་ཆེན་པོའི་རིགས་སུ་སྐྱེས་པ། འཁོར་ལོས་སྒྱུར་བའི་རིགས་ཀྱི་རྒྱུད་དུ་སྐྱེས་པ། ནོར་དང ། གཏེར་དང ། རིན་པོ་ཆེ་དཔག་ཏུ་མེད་པ་དང་ལྡན་པ། ལས་ཡོད་པར་ལྟ་བ། སྡིག་པའི་ལྟ་བ་མེད་པ། ཤཱཀྱའི་ཡུལ་ཀུན་ན་ཡང་རྒྱལ་པོ་དེ་གཅིག་པུར་ཟད་དེ། ཚོང་དཔོན་དང ། ཁྱིམ་བདག་དང ། བློན་པོ་དང ། འཁོར་གྱི་མི་ཐམས་ཅད་ཀྱིས་རིམ་གྲོར་བྱ་ཞིང་མཆོད་པ། མཛེས་པ། བལྟ་ན་སྡུག་པ། ཧ་ཅང་ཡང་མི་རྒན་ཧ་ཅང་ཡང་མི་གཞོན་ཞིང་གཟུགས་མཛེས་ལ་ཡོན་ཏན་ཐམས་ཅད་དང་ལྡན་པ། བཟོ་ཤེས་པ། དུས་ཤེས་པ། བདག་ཤེས་པ། ཆོས་ཤེས་པ། སེམས་ཅན་ཤེས་པ། འཇིག་རྟེན་ཤེས་པ། མཚན་ཤེས་པ། ཆོས་ཀྱི་རྒྱལ་པོ་ཆོས་ཀྱིས་རྗེས་སུ་སྟོན་པའོ། །སེར་སྐྱའི་གནས་ཀྱི་གྲོང་ཁྱེར་ཆེན་པོ་དེ་ནི་སེམས་ཅན་དགེ་བའི་རྩ་བ་བསྐྱེད་པ་རྣམས་ཀྱི་གནས་ཏེ། གང་དག་དེར་སྐྱེས་པར་གྱུར་པ་དེ་དག་ཀྱང་དེ་དང་སྐལ་བ་འདྲ་བ་དག་གོ། །རྒྱལ་པོ་ཟས་གཙང་མ་དེ་ལ་ལྷ་མོ་སྒྱུ་འཕྲུལ་ཞེས་བྱ་བ་ཤཱཀྱའི་བདག་པོ་ཤིན་ཏུ་ལེགས་པར་རྟོགས་པ་ཞེས་བྱ་བའི་བུ་མོ་ཞིག་ཡོད་པའང་ཕྱུགས་ཅུང་གཞོན་ཞིང་དར་ལ་བབ་པའི་གཟུགས་ཕུན་སུམ་ཚོགས་པ་སྔན་ཆད་མ་བཙས་པ། བུ་དང་བུ་མོ་མེད་པ། གཟུགས་མཛེས་པ། བུ་དོན་ལ་བྲིས་པ་ལྟར་བལྟ་ན་སྡུག་པ། ལྷའི་བུ་མོ་ལྟར་རྒྱན་ཐམས་ཅད་ཀྱིས་བརྒྱན་པ། བུད་མེད་ཀྱི་སྐྱོན་རྣམས་དང་བྲལ་བ། བདེན་པར་སྨྲ་བ། མི་དྲག་པ། མི་བརླངས་པ། མི་གཅོར་བ། ཁ་ན་མ་ཐོ་བ་མེད་པ། གྱོ་མོའི་སྒྲ་ལྟ་བུ་མེད་པ། ཅ་ཅོ་མེད་པ། འཇམ་ཞིང་སྙན་ལ་ཡིད་དུ་འོང་བར་སྨྲ་བ། མི་དེས་པ་དང ། ཁོང་ཁྲོ་བ་དང ། ང་རྒྱལ་དང ། དྲེགས་པ་དང ། རྒྱགས་པ་དང ། ཁྲོ་བ་མེད་པ། ཕྲག་དོག་མེད་པ། དུས་སུ་སྨྲ་བ། གཏོང་བ་ཕུན་སུམ་ཚོགས་པ། ཚུལ་ཁྲིམས་དང་ལྡན་པ། ཁྱོས་ཆོག་པར་འཛིན་པ། ཁྱིམ་ཐབ་ཀྱི་བརྟུལ་ཞུགས་ཅན། སྐྱེས་པ་གཞན་ལ་བསམ་པའི་ཡིད་ལ་བྱ་བ་དང་བྲལ 41.18b བ་མགོ་དང ། རྣ་བ་དང ། སྣ་གནས་སུ་ཕེབས་པ། བུང་བའི་མཆོག་གི་ཁ་དོག་ལྟ་བུའི་སྐྲ་དང་ལྡན་པ། དཔྲལ་བ་ལེགས་པ། སྨིན་ཚུགས་ལེགས་པ། ཁྲོ་གཉེར་མེད་པ། བཞིན་འཛུམ་པ། གསོང་པོར་སྨྲ་བ། འཇམ་ཞིང་སྙན་པའི་ཚིག་དང་ལྡན་པ། འཐུན་པར་འཛིན་པ། དྲང་བ། གྱ་གྱུ་མེད་པ། སྒྱུ་མེད་པ། གཡོ་མེད་པ། ཁྲེལ་ཡོད་ཅིང་ངོ་ཚ་ཤེས་པ། མི་རྒོད་པ། མི་གཡེང་བ། ཁ་ངན་མི་སྨྲ་བ། འཆལ་པའི་ཚིག་མེད་པ། འདོད་ཆགས་དང ། ཞེ་སྡང་དང ། གཏི་མུག་གི་ཤས་ཆུང་བ། ངང་དེས་ཤིང་བཟོད་པ་དང་ལྡན་པ། རྐང་ལག་དང ། མིག་དང ། བློ་ཤིན་དུ་བསྲུངས་པ། རྐང་ལག་ཤིན་དུ་འཇམ་པ། ཀ་ཙ་ལིན་དཱའི་གོས་ལྟར་རེག་ན་བདེ་བ། པད་མ་གཞོན་ནུའི་འདབ་མ་ལྟར་མིག་ཤིན་དུ་རྣམ་པར་དག་པ། སྣ་དབྱིབས་ལེགས་ཤིང་མདོག་སྡུག་པ། ཡན་ལག་ཤིན་དུ་བརྟན་པ། འཇའི་དབྱིབས་ལྟར་ཤིན་དུ་འདུད་པ། ཡན་ལག་དང ། ཉིང་ལག་ཤིན་དུ་འབྱེས་པ། ཡན་ལག་ལ་སྨད་དུ་མེད་པ། མཆུ་བིམ་པ་ལྟར་དམར་བ། བལྟ་ན་མཛེས་པ། མགུལ་རིམ་བཞིན་དུ་འདུག་པ། རྒྱན་དམ་པ་དང་ལྡན་པ། སྣ་མའི་མེ་ཏོག་དང་བར་ཤི་ཀ་ལྟར་སོ་ཤིན་དུ་རྣམ་པར་དག་པ། ཕྲག་པ་ལེགས་པར་བྱིན་གྱིས་འཚམ་པ། རིམ་གྱིས་ལེགས་པར་གྲུབ་པའི་དཔུང་པ་དང་ལྡན་པ། རྐེད་པ་གཞུའི་ཆང་ཟུངས་ལྟར་ཕྲ་བ། གཞོགས་ཉམས་པ་མེད་པ། ལྟེ་བ་ཁུང་ཟབ་པ། སྟ་ཟུར་འཇམ་ཞིང་ཡངས་ལ་ཟླུམ་ཞིང་བརྟན་པར་གྲུབ་པ། རྡོ་རྗེ་ལྟར་མཁྲེགས་ཤིང་མཚུངས་པ་མེད་པའི་ལུས་དང་ལྡན་པ། གླང་པོའི་སྣ་ལྟར་མཉམ་ཞིང་ལེགས་པའི་བརླ་དང་ལྡན་པ། བྱིན་པ་རི་དགས་ཨེ་ནེ་ཡའི་ལྟ་བུ། ལག་པ་དང་རྐང་པའི་མཐིལ་རྒྱ་སྐྱེགས་ཀྱི་ཁུ་བ་ལྟར་འདུག་པ། འགྲོ་བའི་མིག་ཏུ་སྡུག་པ་མིག་གི་དབང་པོ་ཉམས་པ་མེད་པ། ཡིད་དུ་འོང་ཞིང་བལྟ་ན་སྡུག་པ། བུད་མེད་རིན་པོ་ཆེའི་གཟུགས་ལས་ཀྱང་ཁྱད་པར་དུ་འཕགས་པ་མཚུངས་པ་མེད་པ། སྒྱུ་འཕྲུལ་སྤྲུལ་པ་ལྟ་བུའི་གཟུགས་སུ་འདུག་པ། 41.19a སྒྱུ་འཕྲུལ་སྤྲུལ་པ་ལྟ་བུ་ཞེས་མིང་གི་བརྡར་བཏགས་པ། སྒྱུ་རྩལ་ལ་མཁས་པ། དགའ་ཚལ་གྱི་ལྷའི་བུ་མོ་ལྟ་བུ་ཞིག་རྒྱལ་པོ་ཟས་གཙང་མའི་བཙུན་མོའི་འཁོར་གྱི་ནང་ན་འདུག་པ་དེ་ནི་བྱང་ཆུབ་སེམས་དཔའི་ཡུམ་དུ་ཚུལ་དང་འཐུན་གྱིས་གང་བྱང་ཆུབ་སེམས་དཔས་རིགས་དག་པ་བསྟན་པ་དེ་ནི་ཤཱཀྱའི་རིགས་ཉིད་ལ་སྣང་གི་གཞན་ལ་ནི་མ་ཡིན་ནོ། །དེ་ལ་འདི་སྐད་ཅེས་བྱ་སྟེ། དག་པའི་སེམས་ཅན་ཆོས་མཐོ་ཁང་བཟངས་ན། །ཆོས་བཟང་སེང་གེའི་ཁྲི་ལ་རབ་ཏུ་འདུག་།བྱང་ཆུབ་སེམས་དཔའ་གྲགས་ཆེན་ལྡན་པ་དང ། །སྐལ་བ་མཉམ་པའི་ལྷ་རྣམས་དྲང་སྲོང་འཁོར། །དེ་ན་འདུག་ཅིང་དེ་ནི་འདི་སྙམ་སེམས། །རིགས་གང་རྣམ་དག་རབ་ཏུ་ཤེས་དང་ལྡན། །བྱང་ཆུབ་སེམས་དཔའ་སྐྱེ་དང་ཚུལ་འཐུན་གང ། །ཕ་མ་གང་ཞིག་དག་པའི་དངོས་དང་ལྡན། །འཛམ་བུའི་གླིང་འདི་ཀུན་ཏུ་རྣམ་བལྟས་ན། །རྒྱལ་རིགས་རྒྱལ་རྒྱུད་ཆེ་བ་གང་ཡིན་པ། །ཀུན་ཀྱང་སྐྱོན་དང་བཅས་པར་རྗེས་བསམས་ནས། །ཤཱཀྱའི་རིགས་ནི་སྐྱོན་དང་བྲལ་བར་མཐོང ། །ཟས་གཙང་རྒྱལ་པོའི་རིགས་ནང་རིགས་དང་ལྡན། །མི་དབང་རྒྱུད་ནི་རྣམ་དག་ཆོ་རིགས་ཅན། །འབྱོར་ཅིང་རྒྱས་ལ་འཁྲུག་པ་མེད་པ་སྟེ། །སྐྱེ་བོ་དམ་པ་ཆོས་ལྡན་རིམ་གྲོ་ཅན། །སེར་སྐྱར་བརྗོད་པའི་གྲོང་ཁྱེར་སེམས་ཅན་གཞན། །ཀུན་ཀྱང་བསམ་པ་རབ་དག་ཆོས་དང་ལྡན། །བསྐྱེད་མོས་ཀུན་དགའ་གཞལ་མེད་ཁང་གིས་བརྒྱན། །སྐྱེ་བའི་སར་ནི་སེར་སྐྱར་བརྗོད་པར་མཛེས། །ཀུན་ཀྱང་ཚན་ཆེན་སྟོབས་དང་ལྡན་པ་སྟེ། །གླང་པོ་གཉིས་སམ་གསུམ་གྱི་སྟོབས་ཀྱང་བདོག་།འཕོང་རྩལ་བསླབ་པའི་ཕ་རོལ་མཐར་ཕྱིན་ཀྱང ། །སྲོག་གི་དོན་དུ་གཞན་ལ་གནོད་མི་བྱེད། །ཟས་གཙང་རྒྱལ་པོའི་བུད་མེད་དབེན་པ་སྟེ། །བུད་མེད་དམ་པ་སྟོང་གི་མཆོག་ཏུ་ཕྱིན། །ཡིད་དུ་འོང་བ་སྒྱུ་འཕྲུལ་སྤྲུལ་པའི་གཟུགས། །དེ་ཡི་མིང་ཡང་ལྷ་མོ་སྒྱུ་འཕྲུལ་ཏེ། །མཛེས་པའི་གཟུགས་འཆང་ལྷ་ཡི་བུ་མོ་བཞིན། ། 41.19b འབྱེས་པའི་ལུས་ལྡན་ཡན་ལག་དྲི་མེད་སྡུག་།ལྷ་དང་མི་རྣམས་གང་ཡང་རུང་བ་དག་།སྒྱུ་འཕྲུལ་མཐོང་ན་གང་ངོམས་དེ་མེད་ཀྱང ། །འདོད་ཆགས་ཞེན་མེད་སྡང་བས་ཞེ་སྡང་མེད། །དེ་ནི་འཇམ་སྙན་དྲང་བའི་ངག་དང་ལྡན། །མི་བརླང་མི་རྩུབ་ཤིན་དུ་དེས་པ་སྟེ། །དེ་ནི་བཞིན་འཛུམ་ཁྲོ་གཉེར་རབ་ཏུ་སྤངས། །ངོ་ཚ་ཁྲེལ་ཡོད་ཆོས་སྤྱོད་ལྡན་པ་སྟེ། །ང་རྒྱལ་མེད་ཅིང་མ་ཁེངས་རྒོད་པ་མེད། །ཕྲག་དོག་མེད་ཅིང་སྒྱུ་དང་གཡོ་མེད་དེ། །གཏོང་ལ་དགའ་ཞིང་རྟག་ཏུ་བྱམས་སེམས་ལྡན། །ལས་ཡོད་བལྟ་ཞིང་ལོག་པའི་སྦྱོར་བ་སྤངས། །བདེན་ལ་གནས་ཤིང་ལུས་དང་ཡིད་རབ་བསྡམས། །ས་ལ་གང་ཡོད་བུད་མེད་སྐྱོན་མང་ཚོགས། །དེ་དག་ཐམས་ཅད་དེ་ལ་ཡོད་མ་ཡིན། །མིའི་འཇིག་རྟེན་དྲི་ཟའི་འཇིག་རྟེན་ནམ། །ལྷའི་འཇིག་རྟེན་དག་ན་བུད་མེད་གཞན། །ལྷ་མོ་སྒྱུ་འཕྲུལ་མཚུངས་མེད་ག་ལ་ལྷག་།དྲང་སྲོང་ཆེན་པོའི་མར་ནི་དེ་འོས་ཏེ། །ཚེ་རབས་ལྔ་བརྒྱ་ཁོ་ནར་ཚང་བར་ཡང ། །དེ་ནི་བྱང་ཆུབ་སེམས་དཔའི་མར་གྱུར་ཏོ། །དེ་དང་དེར་ནི་ཡབ་ཀྱང་ཟས་གཙང་སྟེ། །དེ་ཕྱིར་ཡོན་ཏན་ལྡན་པ་མ་ཡི་འོས། །དཀའ་ཐུབ་ཅན་ལྟར་དེ་ནི་བརྟུལ་ཞུགས་གནས། །བརྟུལ་ཞུགས་རྗེས་སྤྱོད་རྟག་པར་ཆོས་ཀྱང་སྤྱོད། །རྒྱལ་པོས་གནང་སྟེ་མཆོག་སྦྱིན་ཐོབ་པས་ན། །འདོད་པ་མ་སྤྱད་ཟླ་བ་སུམ་བཅུ་གཉིས། །གང་གི་ཕྱོགས་ན་དེ་འདུག་འགྲེང་བ་འམ། །ཉལ་ཞིང་འགྲོ་བར་གྱུར་པའི་གནས་དག་ཀྱང ། །དེ་ཡི་ལས་དགེ་གཞོལ་བའི་འོད་ཟེར་གྱིས། །ཤིན་ཏུ་སྣང་བར་འོད་ཀྱིས་གསལ་བར་གྱུར། །ལྷ་དང་ལྷ་མིན་མི་རྣམས་གང་ཡང་རུང ། །འདོད་ཆགས་སེམས་ཀྱིས་བལྟ་བར་ནུས་པ་མེད། །སྤྱོད་ལམ་རྣམས་སུ་འཕགས་པའི་ཡོན་ཏན་ལྡན། །དེ་ལ་ཀུན་ཀྱང་མ་དང་བུ་མོར་ལྟ། །སྒྱུ་འཕྲུལ་ལྷ་མོའི་དགེ་བའི་ལས་ཀྱི་རྒྱུས། །རྒྱལ་པོའི་སྲིད་ནི་རབ་ཡངས་རྣམ་པར་འཕེལ། །ཁམས་ཀྱི་རྒྱལ་པོའང་འཇུག་པར་མི་བྱེད་ཅིང ། །རྒྱལ་པོའི་གྲགས་དང་བརྗོད་པ་རྣམ་པར་འཕེལ། ། 41.20a དེ་ལྟར་སྒྱུ་འཕྲུལ་སྣོད་དུ་འཐུན་གྱུར་ཅིང ། །དེ་ལྟར་སེམས་ཅན་དམ་པ་མཆོག་མཛེས་པས། །དེ་གཉིས་ཡོན་ཏན་མཆོག་དང་ལྡན་པས་ན། །འདི་ནི་བུར་འགྱུར་དེ་ནི་མ་ཡི་འོས། །ལྷ་མོ་ཡོན་ཏན་མཆོག་དང་ལྡན་པ་སྟེ། །གླང་པོའི་ཁྲི་ཡི་སྟོབས་བདོག་མ་གཏོགས་པར། །འཛམ་བུའི་རྒྱལ་མཚན་འདི་ན་མི་མཆོག་དེ། །འཛིན་པར་ནུས་པའི་བུད་མེད་གང་ཡང་མེད། །དེ་སྐད་ཆེ་བའི་ལྷ་ཡི་བུ་རྣམས་དང ། །བྱང་ཆུབ་སེམས་དཔའ་ཤེས་རབ་རྒྱ་ཆེན་དག་།ཤཱཀྱའི་རིགས་རྣམས་དགའ་བར་མཛད་པ་ཡི། །ཡུམ་དུ་ལེགས་ལྡན་སྒྱུ་འཕྲུལ་འགྱུར་ཞེས་ཟེར། །རིགས་ཡོངས་སུ་དག་པའི་ལེའུ་སྟེ་གསུམ་པའོ།། །། དགེ་སློང་དག་དེ་ལྟར་བྱང་ཆུབ་སེམས་དཔའ་སྐྱེ་བའི་རིགས་ལ་རྣམ་པར་བལྟས་ནས། དགའ་ལྡན་གྱི་གནས་ཀྱི་གཞལ་མེད་ཁང་ཆེན་པོ་མཆུ་དང་རྒྱར་དཔག་ཚད་དྲུག་བཅུ་རྩ་བཞི་ཡོད་པ་གང་དུ་བྱང་ཆུབ་སེམས་དཔའ་འདུག་སྟེ། དགའ་ལྡན་གྱི་ལྷ་རྣམས་ལ་ཆོས་སྟོན་པ་རྒྱལ་མཚན་མཐོན་པོ་ཞེས་བྱ་བ་ཡོད་དེ། བྱང་ཆུབ་སེམས་དཔའ་དེ་གཞལ་མེད་ཁང་ཆེན་པོ་དེར་སོང་ནས་ཕྱིན་པ་དང ། དགའ་ལྡན་གྱི་རིས་ཀྱི་ལྷའི་བུ་ཐམས་ཅད་ལ་སྨྲས་པ། ཁྱེད་རྣམས་འདིར་འདུ་བར་གྱིས་ཤིག་།ཤི་འཕོ་བའི་རྣམ་པར་སྦྱོར་བ་ཞེས་བྱ་བའི་ཆོས་རྗེས་སུ་དྲན་པ་ཆོས་རྗེས་སུ་བསྟན་པ་ཐ་མའི་ཆོས་མཉན་པ་བྱང་ཆུབ་སེམས་དཔའ་ལས་ཉོན་ཅིག་།དེ་སྐད་ཀྱི་ཚིག་ཐོས་ནས། དགའ་ལྡན་གྱི་རིས་ཀྱི་ལྷའི་བུ་ཐམས་ཅད་ལྷའི་བུ་མོའི་ཚོགས་དང་བཅས་ཏེ། གཞལ་མེད་ཁང་ཆེན་པོ་དེར་འདུས་སོ། །དེར་བྱང་ཆུབ་སེམས་དཔས་འཁོར་གྱི་ཁྱམས་གླིང་བཞི་པ་ཆེན་པོའི་འཇིག་རྟེན་གྱི་ཁམས་ཀྱི་ཚད་ཙམ་དུ་ཡངས་པར་བྱིན་གྱིས་བརླབས་པར་གྱུར་ནས། དེ་དེ་ཙམ་དུ་བཟང་ཞིང་དེ་ཙམ་དུ་བལྟ་ན་སྡུག་ལ། དེ་ཙམ་དུ་རྒྱན་གྱིས་རྒྱས་ཤིང་དེ་ཙམ་དུ་ཡིད་དུ་འོང་བར་གྱུར་པ་དེས་འདོད་པ་ན་སྤྱོད་པ་དང ། 41.20b གཟུགས་ན་སྤྱོད་པའི་ལྷའི་བུ་ཐམས་ཅད་རང་རང་གི་ཁྱིམ་གྱི་བཀོད་པ་ལ་དུར་ཁྲོད་ལྟ་བུའི་འདུ་ཤེས་སྐྱེས་པར་གྱུར་ཏོ། །དེ་ལ་བྱང་ཆུབ་སེམས་དཔའ་རང་གི་བསོད་ནམས་ཀྱི་རྣམ་པར་སྨིན་པའི་རྒྱུ་འཐུན་པས་ཡོངས་སུ་བརྒྱན་པའི་སེང་གེའི་ཁྲི་ནོར་བུ་རིན་པོ་ཆེ་དུ་མས་རྩ་བ་སྤྲས་པ། ལྷའི་རས་བཅོས་བུའི་སྟན་དུ་མ་བཏིང་བ། ལྷའི་སྤོས་ཞིམ་པོ་དུ་མས་བསྒོས་པ། བདུག་སྤོས་དམ་པ་མཆོག་ཏུ་བྱ་བ་དུ་མས་བདུགས་པ། ལྷའི་མེ་ཏོག་ཁ་དོག་དུ་མའི་དགྲམ་པ་བཀྲམ་པ། ནོར་བུ་རིན་པོ་ཆེའི་འོད་བརྒྱ་སྟོང་དུ་མ་འབར་བའི་གཟི་བརྗིད་ཅན། ནོར་བུ་རིན་པོ་ཆེ་དུ་མའི་དྲ་བས་གཡོགས་པ། རིན་པོ་ཆེའི་དྲིལ་བུ་གཡར་ཀའི་དྲ་བ་དུ་མ་སྒྲ་འབྱུང་བས་མངོན་པར་དགའ་བ་དང་ལྡན་པ། རིན་པོ་ཆེའི་དྲིལ་བུ་བརྒྱ་སྟོང་དུ་མ་མངོན་པར་དཀྲོལ་བའི་སྒྲ་དང་ལྡན་པ། རིན་པོ་ཆེའི་དྲ་བ་བརྒྱ་སྟོང་དུ་མས་ཡོངས་སུ་གསལ་བར་གྱུར་པ། རིན་པོ་ཆེའི་གདུགས་བརྒྱ་སྟོང་དུ་མས་ཀུན་ནས་བཀབ་པ། དར་བརྒྱ་སྟོང་དུ་མ་རབ་ཏུ་སྤྱངས་པ། དར་གྱི་ཕྲེང་བ་ལྡ་ལྡི་བརྒྱ་སྟོང་དུ་མས་ཤིན་དུ་བརྒྱན་པ། ལྷའི་བུ་མོ་བརྒྱ་སྟོང་དུ་མས་གླུ་བླངས། གར་བྱས། རོལ་མོ་བྱས་པ། ཡོན་ཏན་བརྒྱ་སྟོང་དུ་མ་ཀུན་དུ་བརྗོད་པ། འཇིག་རྟེན་སྐྱོང་བ་བརྒྱ་སྟོང་དུ་མས་རྗེས་སུ་བསྲུངས་པ། བརྒྱ་བྱིན་བརྒྱ་སྟོང་དུ་མས་ཕྱག་བྱས་པ། ཚངས་པ་བརྒྱ་སྟོང་དུ་མས་རབ་ཏུ་བཏུད་པ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བཟུང་བ། ཕྱོགས་བཅུའི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དུ་མ་མཐའ་ཡས་པས་དགོངས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་ཕ་རོལ་ཏུ་ཕྱིན་པ་ཚོགས་སུ་བྱས་པའི་བསོད་ནམས་ཀྱི་རྣམ་པར་སྨིན་པའི་རྒྱུ་འཐུན་པ་ལས་བྱུང་བ་དེ་ལྟ་བུ་ལ་འདུག་གོ། །དགེ་སློང་དག་དེ་ལྟར་བྱང་ཆུབ་སེམས་དཔའ་སེང་གེའི་ཁྲི་ཆེན་པོ་ཡོན་ཏན་དེ་ལྟ་བུ་དང་ལྡན་པ་ལ་འདུག་ནས་ལྷའི་འཁོར་ཆེན་པོ་དེ་དག་ལ་སྨྲས་པ། 41.21a གྲོགས་པོ་དག་བྱང་ཆུབ་སེམས་དཔའི་ལུས་བསོད་ནམས་བརྒྱའི་མཚན་གྱིས་ལེགས་པར་བརྒྱན་པ་ལ་ལྟོས། ཤར་དང ། ལྷོ་དང ། ནུབ་དང ། བྱང་དང ། འོག་དང ། སྟེང་དང ། ཕྱོགས་བཅུ་ཀུན་ན་བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ན་འཁོད་ཅིང་ཐམས་ཅད་ཀྱང་སྲིད་པ་ཐ་མ་པ་ལ་མངོན་དུ་ཕྱོགས་པ། ལྷའི་ཚོགས་ཀྱིས་ཡོངས་སུ་བསྐོར་བ་འཆི་འཕོའི་རྣམ་པས་ལྷ་རྣམས་དགའ་བར་བྱེད་པའི་ཆོས་སྣང་བའི་སྒོ་ཡང་དག་པར་སྟོན་པ། ཚད་མེད་གྲངས་མེད་བགྲང་བ་ལས་འདས་པ་དག་ལ་ལྟོས། དེ་ནས་ལྷའི་འཁོར་དེ་ཐམས་ཅད་ཀྱིས་བྱང་ཆུབ་སེམས་དཔའི་བྱིན་གྱིས་བརླབས་ཀྱིས་བྱང་ཆུབ་སེམས་དཔའ་དེ་དག་མཐོང་བར་གྱུར་ཏེ། མཐོང་བར་གྱུར་ནས་ཀྱང་བྱང་ཆུབ་སེམས་དཔའ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། ཡན་ལག་ལྔས་ཕྱག་འཚལ་ནས་འདི་སྐད་དུ་འདི་ལྟར་བདག་ཅག་གིས་བལྟས་པ་ཙམ་གྱིས་བྱང་ཆུབ་སེམས་དཔའ་འདི་སྙེད་ཅིག་མཐོང་བ་ནི་བྱང་ཆུབ་སེམས་དཔའི་བྱིན་གྱི་བརླབས་བསམ་གྱིས་མི་ཁྱབ་པ་སྟེ། ལེགས་སོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་བྱང་ཆུབ་སེམས་དཔས་ཡང་ལྷའི་འཁོར་ཆེན་པོ་དེ་དག་ལ་བོས་ནས་འདི་སྐད་ཅེས་སྨྲས་ཏེ། གྲོགས་པོ་དག་དེ་བས་ན་བྱང་ཆུབ་སེམས་དཔའ་དེ་དག་ལྷའི་བུ་དེ་དག་ལ་གང་སྟོན་པ་འཆི་འཕོའི་རྣམ་པས་ལྷ་རྣམས་དགའ་བར་བྱེད་པའི་ཆོས་སྣང་བའི་སྒོ་ཉོན་ཅིག་།གྲོགས་པོ་དག་ཆོས་སྣང་བའི་སྒོ་བརྒྱ་རྩ་བརྒྱད་པོ་འདི་དག་ནི་བྱང་ཆུབ་སེམས་དཔས་འཆི་འཕོའི་དུས་ལ་བབ་པའི་ཚེ། ལྷའི་འཁོར་ལ་གདོན་མི་ཟ་བར་ཡང་དག་པར་བསྟན་པར་བྱ་བ་སྟེ། བརྒྱ་རྩ་བརྒྱད་གང་ཞེ་ན། འདི་ལྟ་སྟེ། གྲོགས་པོ་དག་དད་པ་ནི་ཆོས་སྣང་བའི་སྒོ་སྟེ་བསམ་པ་མི་ཕྱེད་པར་འགྱུར་རོ། །དང་བ་ནི་ཆོས་སྣང་བའི་སྒོ་སྟེ་སེམས་རྙོག་པ་ཅན་དང་བར་འགྱུར་རོ། །མཆོག་ཏུ་དགའ་བ་ནི་ཆོས་སྣང 41.21b བའི་སྒོ་སྟེ། ལུས་ཤིན་དུ་སྦྱངས་པར་འགྱུར་རོ། །དགའ་བ་ནི་ཆོས་སྣང་བའི་སྒོ་སྟེ། སེམས་རྣམ་པར་དག་པར་འགྱུར་རོ། །ལུས་ཀྱི་སྡོམ་པ་ནི་ཆོས་སྣང་བའི་སྒོ་སྟེ། ལུས་ཀྱི་ཉེས་པ་རྣམ་པ་གསུམ་ཡོངས་སུ་དག་པར་འགྱུར་རོ། །ངག་གི་སྡོམ་པ་ནི་ཆོས་སྣང་བའི་སྒོ་སྟེ། ངག་གི་ཉེས་པ་བཞི་ཡོངས་སུ་སྤོང་བར་འགྱུར་རོ། །ཡིད་ཀྱི་སྡོམ་པ་ནི་ཆོས་སྣང་བའི་སྒོ་སྟེ། བརྣབ་སེམས་དང ། གནོད་སེམས་དང ། ལོག་པར་ལྟ་བ་སྤོང་བར་འགྱུར་རོ། །སངས་རྒྱས་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། སངས་རྒྱས་མཐོང་བ་རྣམ་པར་དག་པར་འགྱུར་རོ། །ཆོས་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། ཆོས་བསྟན་པ་རྣམ་པར་དག་པར་འགྱུར་རོ། །དགེ་འདུན་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། སྐྱོན་མེད་པར་འཇུག་པར་འགྱུར་རོ། །གཏོང་བ་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། རྫས་ཐམས་ཅད་རབ་ཏུ་སྤོང་བར་འགྱུར་རོ། །ཚུལ་ཁྲིམས་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། སྨོན་ལམ་ཡོངས་སུ་རྫོགས་པར་འགྱུར་རོ། །ལྷ་རྗེས་སུ་དྲན་པ་ནི་ཆོས་སྣང་བའི་སྒོ་སྟེ། སེམས་རྒྱ་ཆེན་པོར་འགྱུར་རོ། །བྱམས་པ་ནི་ཆོས་སྣང་བའི་སྒོ་སྟེ། རྫས་ལས་བྱུང་བའི་བསོད་ནམས་བྱ་བའི་དངོས་པོ་ཐམས་ཅད་ཟིལ་གྱིས་གནོན་པར་འགྱུར་རོ། །སྙིང་རྗེ་ནི་ཆོས་སྣང་བའི་སྒོ་སྟེ། རྣམ་པར་འཚེ་བ་མེད་པ་ལྷུར་ལེན་པར་འགྱུར་རོ། །དགའ་བ་ནི་ཆོས་སྣང་བའི་སྒོ་སྟེ། མི་དགའ་བ་ཐམས་ཅད་སེལ་བར་འགྱུར་རོ། །བཏང་སྙོམས་ནི་ཆོས་སྣང་བའི་སྒོ་སྟེ། འདོད་པ་ལ་སྨོད་པར་འགྱུར་རོ། །མི་རྟག་པར་སོ་སོར་རྟོག་པ་ནི་ཆོས་སྣང་བའི་སྒོ་སྟེ། འདོད་པ་དང ། གཟུགས་ཡོད་པ་དང ། གཟུགས་མེད་པའི་འདོད་ཆགས་ལས་ཡང་དག་པར་འདའ་བར་འགྱུར་རོ། །སྡུག་བསྔལ་དུ་སོ་སོར་རྟོག་པ་ནི་ཆོས་སྣང་བའི་སྒོ་སྟེ། སྨོན་ལམ་ཀུན་དུ་ཆད་པར་འགྱུར་རོ། །བདག་མེད་པར་སོ་སོར་རྟོག་པ་ནི་ཆོས 41.22a སྣང་བའི་སྒོ་སྟེ། བདག་ལ་མངོན་པར་ཞེན་པ་མེད་པར་འགྱུར་རོ། །ཞི་བར་སོ་སོར་རྟོག་པ་ནི་ཆོས་སྣང་བའི་སྒོ་སྟེ། རྗེས་སུ་ཆགས་པ་འབར་བ་མེད་པར་འགྱུར་རོ། །ངོ་ཚ་ཤེས་པ་ནི་ཆོས་སྣང་བའི་སྒོ་སྟེ། ནང་ཉེ་བར་ཞི་བར་འགྱུར་རོ། །ཁྲེལ་ཡོད་པ་ནི་ཆོས་སྣང་བའི་སྒོ་སྟེ། ཕྱི་རོལ་ཉེ་བར་ཞི་བར་འགྱུར་རོ། །བདེན་པ་ནི་ཆོས་སྣང་བའི་སྒོ་སྟེ། ལྷ་དང་མི་རྣམས་མི་སླུ་བར་འགྱུར་རོ། །ཡང་དག་པ་ནི་ཆོས་སྣང་བའི་སྒོ་སྟེ། བདག་ལ་སླུ་བ་མེད་པར་འགྱུར་རོ། །ཆོས་སྤྱད་པ་ནི་ཆོས་སྣང་བའི་སྒོ་སྟེ། ཆོས་ལ་རྟོན་པར་འགྱུར་རོ། །གསུམ་ལ་སྐྱབས་སུ་འགྲོ་བ་ནི་ཆོས་སྣང་བའི་སྒོ་སྟེ། ངན་སོང་གསུམ་ལས་ཡང་དག་པར་འདའ་བར་འགྱུར་རོ། །བྱས་པ་གཟོ་བ་ནི་ཆོས་སྣང་བའི་སྒོ་སྟེ། དགེ་བའི་རྩ་བ་བྱས་པ་རྣམས་ཆུད་མི་ཟ་བར་འགྱུར་རོ། །བྱས་པ་རིག་པ་ནི་ཆོས་སྣང་བའི་སྒོ་སྟེ། གཞན་ལ་བརྙས་པ་མེད་པར་འགྱུར་རོ། །བདག་ཤེས་པ་ནི་ཆོས་སྣང་བའི་སྒོ་སྟེ། བདག་ལ་སྟོད་པ་མེད་པར་འགྱུར་རོ། །སེམས་ཅན་ཤེས་པ་ནི་ཆོས་སྣང་བའི་སྒོ་སྟེ། གཞན་ལ་སྨོད་པ་མེད་པར་འགྱུར་རོ། །ཆོས་ཤེས་པ་ནི་ཆོས་སྣང་བའི་སྒོ་སྟེ། ཆོས་ཀྱི་རྗེས་སུ་འཐུན་པའི་ཆོས་ལ་ནན་ཏན་བྱེད་པར་འགྱུར་རོ། །དུས་ཤེས་པ་ནི་ཆོས་སྣང་བའི་སྒོ་སྟེ། མཐོང་བ་དོན་ཡོད་པར་འགྱུར་རོ། །ང་རྒྱལ་བཅོམ་པ་ནི་ཆོས་སྣང་བའི་སྒོ་སྟེ། ཡེ་ཤེས་ཡོངས་སུ་རྫོགས་པར་འགྱུར་རོ། །ཞེ་འགྲས་པ་མེད་པའི་སེམས་ནི་ཆོས་སྣང་བའི་སྒོ་སྟེ། བདག་དང་གཞན་རྗེས་སུ་སྲུང་བར་འགྱུར་རོ། །ཁོན་དུ་མི་འཛིན་པ་ནི་ཆོས་སྣང་བའི་སྒོ་སྟེ། འགྱོད་པ་མེད་པར་འགྱུར་རོ། །མོས་པ་ནི་ཆོས་སྣང་བའི་སྒོ་སྟེ། ཐེ་ཚོམ་མེད་པར་ལྷུར་ལེན་པར་འགྱུར་རོ། །མི་སྡུག་པར་སོ་སོར་རྟོག་པ་ནི་ཆོས་སྣང་བའི་སྒོ་སྟེ། འདོད་པ་ལ་རྣམ་པར་རྟོག་པ་སྤོང་བར་འགྱུར་རོ། །གནོད་སེམས་མེད་པ་ནི་ཆོས་སྣང 41.22b བའི་སྒོ་སྟེ། གནོད་སེམས་ཀྱི་རྣམ་པར་རྟོག་པ་སྤོང་བར་འགྱུར་རོ། །གཏི་མུག་མེད་པ་ནི་ཆོས་སྣང་བའི་སྒོ་སྟེ། མི་ཤེས་པ་རྣམ་པར་སེལ་བར་འགྱུར་རོ། །ཆོས་དོན་དུ་གཉེར་བ་ནི་ཆོས་སྣང་བའི་སྒོ་སྟེ། དོན་ལ་རྟོན་པར་འགྱུར་རོ། །ཆོས་འདོད་པ་ནི་ཆོས་སྣང་བའི་སྒོ་སྟེ། ཆོས་སྣང་བ་ཐོབ་པར་འགྱུར་རོ། །ཐོས་པ་ཚོལ་བ་ནི་ཆོས་སྣང་བའི་སྒོ་སྟེ། ཚུལ་བཞིན་དུ་ཆོས་ལ་སོ་སོར་རྟོག་པར་འགྱུར་རོ། །ཡང་དག་པའི་སྦྱོར་བ་ནི་ཆོས་སྣང་བའི་སྒོ་སྟེ། ཡང་དག་པར་ནན་ཏན་བྱེད་པར་འགྱུར་རོ། །མིང་དང་གཟུགས་ཡོངས་སུ་ཤེས་པ་ནི་ཆོས་སྣང་བའི་སྒོ་སྟེ། ཆགས་པ་ཐམས་ཅད་ལས་ཡང་དག་པར་འདའ་བར་འགྱུར་རོ། །རྒྱུར་ལྟ་བ་ཡང་དག་པར་འཇོམས་པ་ནི་ཆོས་སྣང་བའི་སྒོ་སྟེ། རིག་པ་དང་རྣམ་པར་གྲོལ་བ་ཐོབ་པར་འགྱུར་རོ། །རྗེས་སུ་ཆགས་པ་དང་ཁོང་ཁྲོ་བ་སྤོང་བ་ནི་ཆོས་སྣང་བའི་སྒོ་སྟེ། མཐོ་བར་སེམས་པ་མེད་ཅིང་དམའ་བར་སེམས་པ་མེད་པར་འགྱུར་རོ། །ཕུང་པོ་ལ་མཁས་པ་ནི་ཆོས་སྣང་བའི་སྒོ་སྟེ། སྡུག་བསྔལ་ཡོངས་སུ་ཤེས་པར་འགྱུར་རོ། །ཁམས་མཉམ་པ་ཉིད་ནི་ཆོས་སྣང་བའི་སྒོ་སྟེ། ཀུན་འབྱུང་བ་སྤོང་བར་འགྱུར་རོ། །སྐྱེ་མཆེད་གསལ་བ་ནི་ཆོས་སྣང་བའི་སྒོ་སྟེ། ལམ་སྒོམ་པར་འགྱུར་རོ། །མི་སྐྱེ་བའི་བཟོད་པ་ནི་ཆོས་སྣང་བའི་སྒོ་སྟེ། འགོག་པ་མངོན་དུ་བྱེད་པར་འགྱུར་རོ། །ལུས་ལ་སོང་བའི་དྲན་པ་ནི་ཆོས་སྣང་བའི་སྒོ་སྟེ། ལུས་དབེན་པར་འགྱུར་རོ། །ཚོར་བ་ལ་སོང་བའི་དྲན་པ་ནི་ཆོས་སྣང་བའི་སྒོ་སྟེ། ཚོར་བ་ཐམས་ཅད་རྒྱུན་ཆད་པར་འགྱུར་རོ། །སེམས་ལ་སོང་བའི་དྲན་པ་ནི་ཆོས་སྣང་བའི་སྒོ་སྟེ། སེམས་ལ་སྒྱུ་མ་ལྟ་བུར་སོ་སོར་རྟོག་པར་འགྱུར་རོ། །ཆོས་ལ་སོང་བའི་དྲན་པ་ནི་ཆོས་སྣང་བའི་སྒོ་སྟེ། རབ་རིབ་དང་བྲལ་བའི་ཡེ་ཤེས་སུ་འགྱུར་རོ། །ཡང་དག་པའི་སྤོང་བ་བཞི་ནི་ཆོས་སྣང་བའི་སྒོ་སྟེ། མི་དགེ་བའི་ཆོས་ཐམས་ཅད་སྤོང་བ་དང་དགེ་བའི་ཆོས་ཐམས་ཅད་ཡོངས་སུ་རྫོགས 41.23a པར་འགྱུར་རོ། །རྫུ་འཕྲུལ་གྱི་རྐང་པ་བཞི་ནི་ཆོས་སྣང་བའི་སྒོ་སྟེ། ལུས་དང་སེམས་ཡང་བར་འགྱུར་རོ། །དད་པའི་དབང་པོ་ནི་ཆོས་སྣང་བའི་སྒོ་སྟེ། གཞན་གྱི་དྲིང་མི་འཇོག་པར་འགྱུར་རོ། །བརྩོན་འགྲུས་ཀྱི་དབང་པོ་ནི་ཆོས་སྣང་བའི་སྒོ་སྟེ། ཤིན་ཏུ་རྟོགས་པའི་ཡེ་ཤེས་དང་ལྡན་པར་འགྱུར་རོ། །དྲན་པའི་དབང་པོ་ནི་ཆོས་སྣང་བའི་སྒོ་སྟེ། ལས་ལེགས་པར་བྱས་པར་འགྱུར་རོ། །ཏིང་ངེ་འཛིན་གྱི་དབང་པོ་ནི་ཆོས་སྣང་བའི་སྒོ་སྟེ། སེམས་རྣམ་པར་གྲོལ་བར་འགྱུར་རོ། །ཤེས་རབ་ཀྱི་དབང་པོ་ནི་ཆོས་སྣང་བའི་སྒོ་སྟེ། མངོན་སུམ་གྱི་ཡེ་ཤེས་སུ་འགྱུར་རོ། །དད་པའི་སྟོབས་ནི་ཆོས་སྣང་བའི་སྒོ་སྟེ། བདུད་ཀྱི་སྟོབས་ལས་ཡང་དག་པར་འདའ་བར་འགྱུར་རོ། །བརྩོན་འགྲུས་ཀྱི་སྟོབས་ནི་ཆོས་སྣང་བའི་སྒོ་སྟེ། ཕྱིར་མི་ལྡོག་པར་འགྱུར་རོ། །དྲན་པའི་སྟོབས་ནི་ཆོས་སྣང་བའི་སྒོ་སྟེ། མི་འཕྲོགས་པར་འགྱུར་རོ། །ཏིང་ངེ་འཛིན་གྱི་སྟོབས་ནི་ཆོས་སྣང་བའི་སྒོ་སྟེ། རྣམ་པར་རྟོག་པ་ཐམས་ཅད་སྤོང་བར་འགྱུར་རོ། །ཤེས་རབ་ཀྱི་སྟོབས་ནི་ཆོས་སྣང་བའི་སྒོ་སྟེ། མི་ཐུལ་བར་འགྱུར་རོ། །དྲན་པ་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། ཆོས་ཇི་ལྟ་བ་བཞིན་དུ་རབ་ཏུ་ཤེས་པར་འགྱུར་རོ། །ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། ཤིན་དུ་རྟོགས་པའི་བློ་དང་ལྡན་པར་འགྱུར་རོ། །དགའ་བ་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། ཏིང་ངེ་འཛིན་སྒྲུབ་པར་འགྱུར་རོ། །ཤིན་དུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། བྱ་བ་བྱས་པར་འགྱུར་རོ། །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། ཆོས་ཐམས་ཅད་མཉམ་པ་ཉིད་དུ་ཁོང་དུ་ཆུད་པར་འགྱུར་རོ། །བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི་ཆོས་སྣང་བའི་སྒོ་སྟེ། སྐྱེ་བ 41.23b ཐམས་ཅད་ལ་སྨོད་པར་འགྱུར་རོ། །ཡང་དག་པའི་ལྟ་བ་ནི་ཆོས་སྣང་བའི་སྒོ་སྟེ། སྐྱོན་མེད་པར་འཇུག་པར་འགྱུར་རོ། །ཡང་དག་པའི་རྟོག་པ་ནི་ཆོས་སྣང་བའི་སྒོ་སྟེ། རྟོག་པ་དང་རྣམ་པར་རྟོག་པ་དང་ཡོངས་སུ་རྟོག་པ་ཐམས་ཅད་སྤོང་བར་འགྱུར་རོ། །ཡང་དག་པའི་ངག་ནི་ཆོས་སྣང་བའི་སྒོ་སྟེ། ཡི་གེ་དང་སྒྲ་དང ། སྐད་དང་ཚིག་གི་ལམ་ཐམས་ཅད་བྲག་ཅ་དང་མཉམ་པ་ཉིད་དུ་རྟོགས་པར་འགྱུར་རོ། །ཡང་དག་པའི་ལས་ཀྱི་མཐའ་ནི་ཆོས་སྣང་བའི་སྒོ་སྟེ། ལས་མེད་ཅིང་རྣམ་པར་སྨིན་པ་མེད་པར་འགྱུར་རོ། །ཡང་དག་པའི་འཚོ་བ་ནི་ཆོས་སྣང་བའི་སྒོ་སྟེ། ཚོལ་བ་ཐམས་ཅད་རྒྱུན་ཆད་པར་འགྱུར་རོ། །ཡང་དག་པའི་རྩོལ་བ་ནི་ཆོས་སྣང་བའི་སྒོ་སྟེ། ཕ་རོལ་གྱི་ངོགས་སུ་ཕྱིན་པར་འགྱུར་རོ། །ཡང་དག་པའི་དྲན་པ་ནི་ཆོས་སྣང་བའི་སྒོ་སྟེ། དྲན་པ་མེད་ཅིང་ཡིད་ལ་བྱེད་པ་མེད་པར་འགྱུར་རོ། །ཡང་དག་པའི་ཏིང་ངེ་འཛིན་ནི་ཆོས་སྣང་བའི་སྒོ་སྟེ། སེམས་མི་འཁྲུགས་པའི་ཏིང་ངེ་འཛིན་ཐོབ་པར་འགྱུར་རོ། །བྱང་ཆུབ་ཀྱི་སེམས་ནི་ཆོས་སྣང་བའི་སྒོ་སྟེ། དཀོན་མཆོག་གསུམ་གྱི་རིགས་རྒྱུན་མི་འཆད་པར་འགྱུར་རོ། །བསམ་པ་ནི་ཆོས་སྣང་བའི་སྒོ་སྟེ། ཐེག་པ་དམན་པ་ལ་འདོད་པ་མེད་པར་འགྱུར་རོ། །ལྷག་པའི་བསམ་པ་ནི་ཆོས་སྣང་བའི་སྒོ་སྟེ། སངས་རྒྱས་ཀྱི་ཆོས་རྒྱ་ཆེན་པོ་ལ་ལྷག་པར་དམིགས་པར་འགྱུར་རོ། །སྦྱོར་བ་ནི་ཆོས་སྣང་བའི་སྒོ་སྟེ། དགེ་བའི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །སྦྱིན་པའི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། མཚན་དང་དཔེ་བྱད་བཟང་པོ་དང་སངས་རྒྱས་ཀྱི་ཞིང་ཡོངས་སུ་དག་པར་འགྱུར་ཞིང་སེར་སྣ་ཅན་གྱི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། མི་ཁོམ་པ་དང་ངན་འགྲོ་ཐམས་ཅད་ལས་ཡང་དག་པར་འདའ་ཞིང་ཚུལ་ཁྲིམས་འཆལ་བའི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །བཟོད་པའི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། གནོད་སེམས 41.24a དང་ཐ་བ་དང ། ཞེ་སྡང་དང ། ང་རྒྱལ་དང ། དྲེགས་པ་དང ། རྒྱགས་པ་སྤོང་བར་འགྱུར་ཞིང་གནོད་སེམས་ཅན་གྱི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། དགེ་བའི་ཆོས་བརྩམས་པ་ཐམས་ཅད་ཉམས་སུ་ལོན་པར་འགྱུར་ཞིང ། ལེ་ལོ་ཅན་གྱི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །བསམ་གཏན་གྱི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། བསམ་གཏན་དང་མངོན་པར་ཤེས་པ་ཐམས་ཅད་བསྐྱེད་ཅིང་སེམས་གཡེངས་པ་ཅན་གྱི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཆོས་སྣང་བའི་སྒོ་སྟེ། མ་རིག་པ་དང་གཏི་མུག་གི་མུན་པ་མུན་ནག་དང ། དམིགས་པའི་ལྟ་བ་སྤོང་ཞིང་ཤེས་རབ་འཆལ་བའི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །ཐབས་མཁས་པ་ནི་ཆོས་སྣང་བའི་སྒོ་སྟེ། སེམས་ཅན་ཇི་ལྟར་མོས་པ་བཞིན་དུ་སྤྱོད་ལམ་སྟོན་ཅིང་སངས་རྒྱས་ཀྱི་ཆོས་ཐམས་ཅད་བསྒྲུབ་པར་འགྱུར་རོ། །བསྡུ་བའི་དངོས་པོ་བཞི་ནི་ཆོས་སྣང་བའི་སྒོ་སྟེ། སེམས་ཅན་ཐམས་ཅད་སྡུད་ཅིང་བྱང་ཆུབ་བརྙེས་པ་ལས་ཆོས་ནོད་པར་འགྱུར་རོ། །སེམས་ཅན་ཡོངས་སུ་སྨིན་པར་བྱ་བ་ནི་ཆོས་སྣང་བའི་སྒོ་སྟེ། བདག་གི་བདེ་བ་ལ་མི་ཆགས་ཤིང་ཡོངས་སུ་སྐྱོ་བ་མེད་པར་འགྱུར་རོ། །དམ་པའི་ཆོས་ཡོངས་སུ་འཛིན་པ་ནི་ཆོས་སྣང་བའི་སྒོ་སྟེ། སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་སྤོང་བར་འགྱུར་རོ། །བསོད་ནམས་ཀྱི་ཚོགས་ནི་ཆོས་སྣང་བའི་སྒོ་སྟེ། སེམས་ཅན་ཐམས་ཅད་ཉེ་བར་འཚོ་བར་འགྱུར་རོ། །ཡེ་ཤེས་ཀྱི་ཚོགས་ནི་ཆོས་སྣང་བའི་སྒོ་སྟེ། སྟོབས་བཅུ་ཡོངས་སུ་རྫོགས་པར་འགྱུར་རོ། །ཞི་གནས་ཀྱི་ཚོགས་ནི་ཆོས་སྣང་བའི་སྒོ་སྟེ། དེ་བཞིན་གཤེགས་པའི་ཏིང་ངེ་འཛིན་ཐོབ་པར་འགྱུར་རོ། །ལྷག་མཐོང་གི་ཚོགས་ནི་ཆོས་སྣང་བའི་སྒོ་སྟེ། 41.24b ཤེས་རབ་ཀྱི་མིག་ཐོབ་པར་འགྱུར་རོ། །སོ་སོ་ཡང་དག་པར་རིག་པ་ལ་འཇུག་པ་ནི་ཆོས་སྣང་བའི་སྒོ་སྟེ། ཆོས་ཀྱི་མིག་ཐོབ་པར་འགྱུར་རོ། །རྟོན་པ་ལ་འཇུག་པ་ནི་ཆོས་སྣང་བའི་སྒོ་སྟེ། སངས་རྒྱས་ཀྱི་སྤྱན་ཡོངས་སུ་དག་པར་འགྱུར་རོ། །གཟུངས་ཐོབ་པ་ནི་ཆོས་སྣང་བའི་སྒོ་སྟེ། སངས་རྒྱས་ཀྱིས་གསུངས་པ་ཐམས་ཅད་འཛིན་པར་འགྱུར་རོ། །སྤོབས་པ་ཐོབ་པ་ནི་ཆོས་སྣང་བའི་སྒོ་སྟེ། སེམས་ཅན་ཐམས་ཅད་ལེགས་པར་བཤད་པས་ཚིམ་པར་བྱེད་པར་འགྱུར་རོ། །རྗེས་སུ་འཐུན་པའི་ཆོས་ཀྱི་བཟོད་པ་ནི་ཆོས་སྣང་བའི་སྒོ་སྟེ། སངས་རྒྱས་ཀྱི་ཆོས་ཐམས་ཅད་དང་འཐུན་པར་འགྱུར་རོ། །མི་སྐྱེ་བའི་ཆོས་ལ་བཟོད་པ་ནི་ཆོས་སྣང་བའི་སྒོ་སྟེ། ལུང་བསྟན་པ་ཐོབ་པར་འགྱུར་རོ། །ཕྱིར་མི་ལྡོག་པའི་ས་ནི་ཆོས་སྣང་བའི་སྒོ་སྟེ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །ས་ནས་སར་འཕར་བའི་ཡེ་ཤེས་ནི་ཆོས་སྣང་བའི་སྒོ་སྟེ། ཐམས་ཅད་མཁྱེན་པའི་ཡེ་ཤེས་ཀྱིས་དབང་བསྐུར་བར་འགྱུར་རོ། །དབང་བསྐུར་བའི་ས་ནི་ཆོས་སྣང་བའི་སྒོ་སྟེ། མངལ་དུ་འཇུག་པ་དང ། བཙས་པ་དང ། མངོན་པར་འབྱུང་བ་དང ། དཀའ་བ་སྤྱད་པ་དང ། བྱང་ཆུབ་ཀྱི་སྙིང་པོར་འགྲོ་བ་དང ། བདུད་འདུལ་བ་དང ། བྱང་ཆུབ་རྣམ་པར་འཚང་རྒྱ་བ་དང ། ཆོས་ཀྱི་འཁོར་ལོ་བསྐོར་བ་དང ། ཡོངས་སུ་མྱ་ངན་ལས་འདས་པ་ཆེན་པོ་སྟོན་པར་འགྱུར་རོ། །གྲོགས་པོ་དག་འདི་དག་ནི་ཆོས་སྣང་བའི་སྒོ་བརྒྱ་རྩ་བརྒྱད་ཅེས་བྱ་བ་སྟེ། བྱང་ཆུབ་སེམས་དཔས་འཆི་འཕོ་བའི་དུས་ཀྱི་ཚེ་ལྷའི་འཁོར་དུ་གདོན་མི་ཟ་བར་གང་བསྟན་པར་བྱ་བའོ། །དགེ་སློང་དག་བྱང་ཆུབ་སེམས་དཔས་ཆོས་སྣང་བའི་སྒོའི་ལེའུ་འདི་བསྟན་པའི་ཚེ། ལྷའི་འཁོར་དེ་དག་ལས་ལྷའི་བུ་བརྒྱད་ཁྲི་བཞི་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་པར་གྱུར་ཏོ། །ལྷའི་བུ་སྔོན་ཡོངས་སུ་སྦྱང་བ་བྱས་པ་སུམ 41.25a ཁྲི་ཉིས་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ལྷའི་བུ་བྱེ་བ་སུམ་བཅུ་རྩ་དྲུག་ནི་ཆོས་རྣམས་ལ་ཆོས་ཀྱི་མི་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །དགའ་ལྡན་གྱི་གནས་ཐམས་ཅད་ཀྱང་ལྷའི་མེ་ཏོག་གིས་པུས་མོ་ནུབ་ཙམ་དུ་ཡོག་པར་གྱུར་ཏོ། །དགེ་སློང་དག་དེ་ལྟར་བྱང་ཆུབ་སེམས་དཔའས་ལྷའི་འཁོར་དེ་དག་རྒྱ་ཆེར་དགའ་བར་བྱ་བའི་ཕྱིར། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་གི་ཚེ་ན་དགའ་ལྡན་གནས་མཆོག་ནས། །འདྲེན་པ་སྐྱེས་བུ་སེང་གེ་འཆི་འཕོའི་ཚེ། །ལྷ་རྣམས་དག་ལ་ཚིག་ཏུ་སྨྲ་བ་ནི། །བག་མེད་མཐའ་དག་རྣམ་པར་སྤོངས་ཤེས་སྨྲ། །ལྷ་ཡི་དགའ་བ་རྣམ་མང་ཇི་སྙེད་པ། །ཡིད་ཀྱིས་བསམས་པས་འབྱུང་བ་དཔལ་ལྡན་པ། །ཐམས་ཅད་ལས་དགེའི་རྒྱུ་ལས་བྱུང་བ་སྟེ། །དེ་ནི་དགེ་བའི་ལས་ཀྱི་འབྲས་བུ་ཡིན། །དེ་ལྟ་བས་ན་བྱས་པ་གཟོ་བར་གྱིས། །སྔོན་གྱི་དགེ་བསགས་འདི་ནི་ཟད་གྱུར་ཏེ། །གང་དུ་མི་བདེ་སྡུག་བསྔལ་མྱོང་འགྱུར་བ། །ངན་སོང་དག་ཏུ་སོང་བར་གྱུར་ཏ་རེ། །ང་ལ་གུས་པར་བྱ་བ་བསྐྱེད་ནས་ནི། །ཆོས་གང་ཐོས་པར་གྱུར་པ་དེ་དག་ལ། །ནན་ཏན་གྱིས་ནི་རབ་ཏུ་སྒྲུབས་ཤིག་དང ། །བདེ་བ་མཐའ་ཡས་ངེས་པར་ཐོབ་པར་འགྱུར། །འདོད་པ་ཐམས་ཅད་མི་རྟག་བརྟན་པ་མིན། །ཐེར་ཟུག་མ་ཡིན་རྨི་ལམ་འདྲ་བ་སྟེ། །སྨིག་རྒྱུ་དང་ནི་སྒྱུ་མ་རྣམས་དང་འདྲ། །གློག་དང་དབུ་བ་འདྲ་ཞིང་འགྱུར་བ་ཡིན། །འདོད་པའི་ཡོན་ཏན་དག་གི་དགའ་བས་ནི། །ལན་ཚཝའི་འཆུ་འཐུངས་བཞིན་དུ་ངོམས་མི་འགྱུར། །གང་དག་རྡུལ་མེད་འཇིག་རྟེན་འདས་པ་ཡི། །ཤེས་རབ་ལྡན་པ་དེ་དག་ངོམས་པར་འགྱུར། །ལྷ་མོ་དག་དང་འགྲོགས་དང་གླུ་དབྱངས་ནི། །གར་གྱི་ལྟད་མོ་པ་དང་མཚུངས་ཤིང་འདྲ། །དཔེར་ན་འདུས་པ་དག་ནི་ཁྲི་ལས་སུ། །ཕན་ཚུན་འགྲོ་བར་སྦྱོར་བར་བྱེད་དང་མཚུངས། ། 41.25b དགེ་བའི་ལས་བྱས་རྗེས་སུ་འབྲང་བྱེད་ཅིང ། །ཕྱི་བཞིན་འགྲོ་བར་བྱེད་པ་མ་གཏོགས་པར། །འདུས་བྱས་དག་ལ་གྲོགས་ཡོད་མ་ཡིན་ཏེ། །མཛའ་བཤེས་ཉེ་དུ་མེད་ཅིང་འཁོར་ཀྱང་མེད། །དེ་ལྟ་བས་ན་ལྷན་ཅིག་འཐུན་བྱོས་ལ། །ཕན་ཚུན་བྱམས་སེམས་ཕན་པའི་སེམས་བྱོས་ཏེ། །ཆོས་ཀྱི་སྤྱད་པ་དག་ནི་སྤྱད་པར་གྱིས། །སྤྱད་པ་ལེགས་པར་སྤྱད་ལ་གདུང་བ་མེད། །ཐོས་དང་ཚུལ་ཁྲིམས་སྦྱིན་ལ་དགའ་གྱུར་ཅིང ། །བཟོད་དང་དེས་པ་ཕུན་སུམ་ཚོགས་ཀྱིས་ཏེ། །སངས་རྒྱས་དང་ནི་ཆོས་དང་དགེ་འདུན་དང ། །དེ་བཞིན་བག་ཡོད་པ་དག་དྲན་པར་གྱིས། །རྟག་པ་མེད་ཅིང་སྡུག་བསྔལ་བདག་མེད་ལ། །རྒྱུ་དང་རྐྱེན་རྣམས་དང་ནི་ལྡན་གྱུར་ཅིང ། །བདག་པོ་མེད་ལ་བེམས་པོར་གྱུར་པ་ཡི། །ཆོས་འདི་དག་ལ་ཚུལ་བཞིན་བརྟག་པར་གྱིས། །ང་ལ་རྫུ་འཕྲུལ་དག་ནི་གང་ཡོད་དང ། །སྤོབས་པ་ཡེ་ཤེས་དབང་རྣམས་གང་མཐོང་བ། །ཀུན་ཀྱང་ལས་དགེའི་རྒྱུ་ལས་བྱུང་བ་སྟེ། །ཐོས་དང་ཚུལ་ཁྲིམས་བག་ཡོད་རྣམས་ལས་བྱུང ། །སེམས་ཅན་དོན་དང་ཕན་དང་བྱམས་དོན་དུ། །ང་ཡི་ཚུལ་ཁྲིམས་དང་ནི་ཐོས་པ་དང ། །བག་ཡོད་པ་དང་སྦྱིན་དང་དུལ་བ་དང ། །ཡང་དག་སྡོམ་པའི་རྗེས་སུ་བསླབ་པར་གྱིས། །ངག་དང་སྐད་དང་སྒྲ་རྣམས་ཙམ་གྱིས་ནི། །དགེ་བའི་ཆོས་རྣམས་སྒྲུབ་པར་མི་ནུས་ཀྱིས། །ནན་ཏན་སྙིང་པོར་བྱ་བས་སྒྲུབ་བྱོས་ལ། །ཇི་ལྟར་སྨྲས་པ་དེ་བཞིན་བྱ་བར་བྱོས། །གཞན་གྱིས་གླེང་བའི་སྐབས་ནི་མ་དབྱེ་བར། །བདག་ནི་རྟག་ཏུ་བསྒྲིམ་པས་འབད་པར་གྱིས། །ལ་ལས་བྱས་ཤིང་སྦྱིན་པ་ཡོད་མ་ཡིན། །མ་བྱས་པར་ཡང་འགྲུབ་པར་འགྱུར་བ་མེད། །སྔོན་ཆད་འཁོར་བར་འཁོར་ཚེ་སྡུག་བསྔལ་དག་།མྱོང་བར་གང་གྱུར་དེ་ནི་དྲན་པར་གྱིས། །ཁྱེད་ཅག་ལོག་པ་ཉིད་དུ་ངེས་པས་ན། །མྱ་ངན་འདས་དང་འདོད་ཆགས་བྲལ་མ་ཐོབ། ། 41.26a དེ་ལྟ་བས་ན་དལ་དང་བཤེས་གཉེན་དང ། །ཚུལ་དང་འཐུན་པའི་ཡུལ་དུ་གནས་པ་དང ། །ཆོས་མཉན་དམ་པ་ཐོབ་པར་བྱས་ནས་ནི། །འདོད་ཆགས་ལ་སོགས་ཉོན་མོངས་ཞི་བར་གྱིས། །ང་རྒྱལ་དང་ནི་རྒྱགས་དང་དྲེགས་ཐོང་ལ། །རྟག་ཏུ་མཉེན་ཤིང་དྲང་ལ་གཡོ་མེད་ཅིང ། །མྱ་ངན་འདས་པར་འགྲོ་ལ་གཞོལ་བྱོས་ཏེ། །ལམ་རྟོགས་བྱ་བའི་ཕྱིར་ནི་སྦྱོར་བར་གྱིས། །གཏི་མུག་རྙོག་པའི་མུན་པ་ཐམས་ཅད་ཀྱང ། །ཤེས་རབ་སྒྲོན་མས་རྣམ་པར་བསལ་བར་གྱིས། །བག་ལ་ཉལ་བཅས་སྐྱོན་གྱི་དྲ་བ་རྣམས། །ཡེ་ཤེས་རྡོ་རྗེ་ཡིས་ནི་རྣམ་པར་ཁྲོལ། །ཤིན་དུ་མང་པོར་སྨྲ་བ་ཅི་དགོས་ཏེ། །དོན་དང་ཡང་དག་ལྡན་པའི་ཆོས་དེ་ལ། །ཁྱེད་ཅག་གནས་པར་བྱས་པར་མ་གྱུར་ན། །དེ་ལ་ཆོས་ཀྱིས་ལན་པ་མ་ཡིན་ནོ། །གང་ཚེ་ངས་ནི་བྱང་ཆུབ་ཐོབ་གྱུར་ཏེ། །འཆི་མེད་འགྲོ་བའི་ཆོས་ཆར་འབེབས་པའི་ཚེ། །རྣམ་པར་དག་པའི་སེམས་དང་ལྡན་པ་ཁྱེད། །ཆོས་ཀྱི་དམ་པ་མཉན་པའི་ཕྱིར་ཤོག་ཤིག་།ཆོས་སྣང་བའི་སྒོའི་ལེའུ་སྟེ། བཞི་པའོ།། །། དགེ་སློང་དག་དེ་ལྟར་བྱང་ཆུབ་སེམས་དཔས་ལྷའི་འཁོར་ཆེན་པོ་དེ་དག་ལ་ཆོས་ཀྱི་གཏམ་འདི་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེང་བསྟོད། ཡང་དག་པར་དགའ་བར་བྱས། བཟོད་པར་བྱས་ནས། ལྷའི་འཁོར་བཀྲ་ཤིས་དང་ལྡན་པ་རྣམས་ལ་སྨྲས་པ། གྲོགས་པོ་དག་ཁོ་བོ་ནི་འཛམ་བུའི་གླིང་དུ་འགྲོའོ། །ཁོ་བོ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཅན་རྣམས་བསྡུ་བའི་དངོས་པོ་སྦྱིན་པ་དང ། སྙན་པར་སྨྲ་བ་དང ། དོན་སྤྱད་པ་དང ། དོན་འཐུན་པར་བྱ་བ་བཞི་ལ་མགྲོན་དུ་བོས་ལ། གྲོགས་པོ་དག་ད་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་བར་འདུག་པ་དེ་ནི 41.26b ཁོ་བོས་བྱས་པ་མ་ཤེས་ཤིང་རིགས་པ་མ་ཡིན་པར་འགྱུར་རོ། །དེ་ནས་དགའ་ལྡན་གྱི་རིས་ཀྱི་ལྷའི་བུ་དེ་དག་ངུ་ཞིང་བྱང་ཆུབ་སེམས་དཔའི་རྐང་པ་གཉིས་ལ་འཇུས་ཏེ། འདི་སྐད་ཅེས་འཛེར་ཏོ། །སྐྱེས་བུ་དམ་པ་ཁྱོད་མི་བཞུགས་ན་དགའ་ལྡན་གྱི་གནས་འདི་མཛེས་པར་མི་འགྱུར་རོ། །དེ་ནས་བྱང་ཆུབ་སེམས་དཔས་ལྷའི་འཁོར་ཆེན་པོ་དེ་དག་ལ་འདི་སྐད་དུ་བྱང་ཆུབ་སེམས་དཔའ་བྱམས་པ་འདི་ཁྱེད་ལ་ཆོས་སྟོན་པར་འགྱུར་རོ་ཞེས་དེ་སྐད་སྨྲས་ཏེ། དེ་ནས་བྱང་ཆུབ་སེམས་དཔས་རང་གི་མགོ་ལས་ཐོད་དང་ཅོད་པན་ཕོག་སྟེ། བྱང་ཆུབ་སེམས་དཔའ་བྱམས་པའི་མགོ་ལ་བཞག་ནས་འདི་སྐད་དུ། སྐྱེས་བུ་དམ་པ་ཁྱོད་ནི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་དེ་སྐད་སྨྲས་ཏེ། དེ་ནས་བྱང་ཆུབ་སེམས་དཔས་བྱང་ཆུབ་སེམས་དཔའ་བྱམས་པ་དགའ་ལྡན་གྱི་གནས་དམ་པར་དབང་བསྐུར་ནས། ཡང་ལྷའི་འཁོར་ཆེན་པོ་དེ་དག་ལ་སྨྲས་པ། གྲོགས་པོ་དག་ཁོ་བོས་ཇི་ལྟ་བུའི་གཟུགས་ཀྱིས་མའི་མངལ་དུ་འགྲོ་བར་བྱ། དེ་ལ་ཁ་ཅིག་ན་རེ་བྲམ་ཟེའི་ཁྱེའུ་ཡི་གཟུགས་སུ་གཤེགས་པའི་རིགས་སོ་ཞེས་ཟེར་རོ། །ལ་ལ་ན་རེ་བརྒྱ་བྱིན་གྱི་གཟུགས་སུ། ལ་ལ་ན་རེ་ཚངས་པའི་གཟུགས་སུ། ལ་ལ་ན་རེ་རྒྱལ་པོ་ཆེན་པོའི་གཟུགས་སུ། ལ་ལ་ན་རེ་རྣམ་ཐོས་ཀྱི་བུའི་གཟུགས་སུ། ལ་ལ་ན་རེ་སྒྲ་གཅན་གྱི་གཟུགས་སུ། ལ་ལ་ན་རེ་དྲི་ཟའི་གཟུགས་སུ། ལ་ལ་ན་རེ་མིའམ་ཅིའི་གཟུགས་སུ། ལ་ལ་ན་རེ་ལྟོ་འཕྱེ་ཆེན་པོའི་གཟུགས་སུ། ལ་ལ་ན་རེ་དབང་ཕྱུག་ཆེན་པོའི་གཟུགས་སུ། ལ་ལ་ན་རེ་ཟླ་བའི་གཟུགས་སུ། ལ་ལ་ན་རེ་ཉི་མའི་གཟུགས་སུ། ལ་ལ་ན་རེ་ནམ་མཁའ་ལྡིང་གི་དབང་པོའི་གཟུགས་སུ་བཞུད་པའི་རིགས་སོ་ཞེས་ཟེར་རོ། །དེ་ནས་ཚངས་རིས་ཀྱི་ལྷའི་བུ་གཟི་བརྗིད་དམ་པ་ཞེས་བྱ་བ་སྔོན་དྲང་སྲོང་ལས 41.27a ཤི་འཕོས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཞིག་འདུག་པ་དེས་འདི་སྐད་ཅེས་སྨྲས་སོ། །བྲམ་ཟེ་རྣམས་ཀྱི་གསང་སྔགས་ཀྱི་ཚིག་རིག་བྱེད་ཀྱི་བསྟན་བཅོས་ལས་ཇི་སྐད་འབྱུང་བ་དེ་ལྟ་བུའི་གཟུགས་སུ་བྱང་ཆུབ་སེམས་དཔའ་ཡུམ་གྱི་ལྷུམས་སུ་བཞུད་པའི་རིགས་སོ། །དེའང་ཅི་འདྲ་ཞེ་ན། གླང་པོ་དམ་པ་ལུས་ཆེན་མཆོག་གྱུར་པ། །མཆེ་བ་དྲུག་ཅན་གསེར་གྱི་དྲ་བས་གཡོགས། །མགོ་བོ་རབ་ཏུ་དམར་ཞིང་ཤིན་དུ་མཛེས། །འགྲམ་ནས་ཟག་ཅིང་གཟུགས་ལྡན་དཔལ་ལྡན་པའོ། །རིག་བྱེད་བསྟན་བཅོས་ཡང་དག་མཁས་པ་ཡི། །བྲམ་ཟེས་རྣམ་པ་དེ་འདྲ་དེ་ཤེས་ནས། །སུམ་བཅུ་རྩ་གཉིས་མཚན་དང་ལྡན་འགྱུར་ཞེས། །ཡང་དག་ཉིད་དུ་ལུང་ནི་སྟོན་པར་འགྱུར། །དགེ་སློང་དག་དེ་ལྟར་བྱང་ཆུབ་སེམས་དཔས་སྐྱེ་བའི་དུས་ལ་བལྟས་ནས། དགའ་ལྡན་གྱི་གནས་དམ་པ་ན་གནས་བཞིན་དུ་རྒྱལ་པོ་ཟས་གཙང་མའི་ཁྱིམ་དམ་པ་དེར་སྔ་བལྟས་བརྒྱད་སྟོན་ཏོ། །བརྒྱད་གང་ཞེ་ན། འདི་ལྟ་སྟེ། ཁྱིམ་དེ་རྩཝ་དང ། སྡོང་དུམ་དང ། ཚེར་མ་དང ། གསེག་མ་དང ། གྱོ་མོ་མེད་ཅིང ། དྲི་མ་མེད་ལ་ཆག་ཆག་ལེགས་པར་བཏབ་པ་དང ། ཕྱག་དར་ལེགས་པར་བྱས་ཤིང་རླུང་རྡུལ་ཅན་དང ། མུན་པ་དང ། རྡུལ་དང་བྲལ་བ་དང ། སྦྲང་མ་དང ། ཤ་སྦྲང་དང ། སྦྲང་བུ་དང ། ཕྱེ་མ་ལེབ་དང ། སྡིག་སྦྲུལ་མེད་ཅིང་མེ་ཏོག་གིས་ཀུན་དུ་གང་བ་ལག་མཐིལ་ལྟར་མཉམ་པར་གནས་པར་གྱུར་ཏེ། འདི་ནི་སྔ་བལྟས་བྱུང་བ་དང་པོའོ། །རིའི་རྒྱལ་པོ་གངས་རི་ལ་བྱ་འདབ་སྦེད་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ངང་པ་དང ། རྨ་བྱ་དང ། ངུར་པ་དང ། ཀུ་ན་ལ་དང ། ཀ་ལ་པིང་ཀ་དང ། ཤང་ཤང་ཏེའུ་ལ་སོགས་པ་སྒྲོ་གཤོག་སྣ་ཚོགས་མཛེས་པ་ཡིད་དུ་འོང་ཞིང་སྙན་པའི་སྒྲ་འབྱིན་པའི་བྱའི་ཚོགས་གང་དག་གནས་པ་དེ་དག་དེར་འོངས་ནས། རྒྱལ་པོ་ཟས་གཙང་མའི་ཁྱིམ 41.27b དམ་པ་དེའི་སྟེགས་བུ་དང ། བ་གམ་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁང་བཟངས་ཀྱི་སྟེང་དག་ཏུ་གནས་ཤིང་དགའ་བ་དང ། མགུ་བ་དང ། ཡིད་བདེ་བ་སྐྱེས་ནས་རང་རང་གི་སྒྲ་སྐད་དག་འབྱིན་ཏེ། འདི་ནི་སྔ་བལྟས་བྱུང་བ་གཉིས་པའོ། །གང་ཡང་རྒྱལ་པོ་ཟས་གཙང་མ་དེའི་ཀུན་དགའ་ར་བ་ཉམས་དགའ་བ་དང ། ནགས་ཚལ་ཉམས་དགའ་བ་དང ། བསྐྱེད་མོས་ཚལ་ཉམས་དགའ་བ་དག་ན་མེ་ཏོག་དང་འབྲས་བུའི་ཤིང་ལྗོན་པ་སྣ་ཚོགས་དུས་ཐ་དད་པར་འབྱུང་བ་དེ་ཐམས་ཅད་ཀྱང་ཁ་འབུས་ཤིང་མེ་ཏོག་རྒྱས་པར་གྱུར་ཏེ། འདི་ནི་སྔ་ལྟས་བྱུང་བ་གསུམ་པའོ། །རྒྱལ་པོ་ཟས་གཙང་མའི་ཆུའི་ལོངས་སྤྱོད་ཀྱི་རྐྱེན་རྫིང་ལ་སོགས་པ་གང་དག་ཡོད་པ་དེ་དག་ཐམས་ཅད་ཀྱང་པད་མ་འདབ་མ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ལྡན་པ་ཚད་ཤིང་རྟའི་འཕང་ལོང་ཙམ་དག་གིས་ཁེབས་པར་གྱུར་ཏེ། འདི་ནི་སྔ་ལྟས་བྱུང་བ་བཞི་པའོ། །རྒྱལ་པོ་ཟས་གཙང་མའི་ཁྱིམ་དམ་པ་དེ་ན་མར་དང ། འབྲུ་མར་དང ། སྦྲང་རྩི་དང ། བུ་རམ་གྱི་དབུ་བ་དང ། ཤ་ཁ་ར་ལ་སོགས་པ་བཟའ་བའི་རྣམ་པ་གང་དག་ཡོད་པ་དེ་དག་ཀྱང་ཡོངས་སུ་སྤྱད་པས་ཟད་པར་མི་འགྱུར་ཞིང ། ཡོངས་སུ་གང་བར་སྣང་སྟེ། འདི་ནི་སྔ་ལྟས་བྱུང་བ་ལྔ་པའོ། །རྒྱལ་པོ་ཟས་གཙང་མའི་ཁྱིམ་མཆོག་དམ་པ་དང ། བཙུན་མོའི་འཁོར་ཆེན་པོ་དག་ན་རྔ་བོ་ཆེ་དང ། རྫ་རྔ་དང ། ཁར་རྔ་དང ། རྒྱུད་གཅིག་པ་དང ། པི་བང་དང ། གླིང་བུ་དང ། རྒྱུད་གསུམ་པ་དང ། ཁར་བའི་སིལ་ཁྲོལ་དང ། ཕེག་ལ་སོགས་པ་རོལ་མོའི་ཆ་སྤྱད་གང་དག་ཡོད་པ་དེ་དག་ཐམས་ཅད་ཀྱང་མ་བླངས་མ་དཀྲོལ་བར་ཡིད་དུ་འོང་བའི་སྒྲ་རང་སྒྲོག་པར་གྱུར་ཏེ། འདི་ནི་སྔ་ལྟས་བྱུང་བ་དྲུག་པའོ། །རྒྱལ་པོ་ཟས་གཙང་མའི་ཁྱིམ་མཆོག་དམ་པ་ན། གསེར་དང ། དངུལ་དང ། ནོར་བུ་དང ། མུ་ཏིག་དང ། བཻ་དཱུརྱ་དང ། དུང 41.28a དང ། མན་ཤེལ་དང ། བྱི་རུ་ལ་སོགས་པ་རིན་པོ་ཆེ་སྣ་ཚོགས་ཀྱི་སྣོད་གང་དག་ཡོད་པ་དེ་དག་ཐམས་ཅད་ཀྱང་ཁ་བྱེ་ཞིང་དྲི་མ་མེད་ལ་རྣམ་པར་དག་ཅིང་རབ་ཏུ་གང་བར་སྣང་སྟེ། འདི་ནི་སྔ་ལྟས་བྱུང་བ་བདུན་པའོ། །ཉི་ཟླའི་འོད་ཟིལ་གྱིས་རླག་པར་བྱེད་ཅིང ། ལུས་དང་སེམས་དགའ་བ་སྐྱེད་པའི་འོད་དག་ཅིང་དྲི་མ་མེད་པས་སྣང་བར་གྱུར་ཏེ། འདི་ནི་སྔ་ལྟས་བྱུང་བ་བརྒྱད་པའོ། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་གསུམ་པ། ལྷ་མོ་སྒྱུ་འཕྲུལ་ཡང་ཁྲུས་བྱས། ལུས་བྱུག་པས་བྱུགས། རྒྱན་སྣ་ཚོགས་ཀྱིས་ལག་པ་ཤིན་དུ་བརྒྱན་ཏེ། གོས་ཤིན་དུ་འཇམ་པ་མཆོག་བགོས་ཤིང་བཙུན་སྤུ་དང་བཅས་ལ། དགའ་བ་དང ། མཆོག་ཏུ་དགའ་བ་དང ། རངས་པ་ཐོབ་ནས། བུད་མེད་སྟོང་ཕྲག་བཅུས་བསྐོར་ཅིང་མདུན་དུ་བདར་ཏེ། ལྷན་གཅིག་དུ་རྒྱལ་པོ་ཟས་གཙང་མ་རོལ་མོ་བྱ་བའི་ཁང་བཟངས་ན་བདེ་བར་གནས་པའི་དྲུང་དུ་ཕྱིན་ཏེ། གཡས་རོལ་ན་ཁྲི་བཟང་པོ་རིན་པོ་ཆེའི་དྲ་བས་བརྒྱན་པ་ལ་འདུག་ནས། འཛུམ་པའི་བཞིན་ཁྲོ་གཉེར་མེད་ཅིང་རབ་ཏུ་དང་བའི་མདོག་གིས་རྒྱལ་པོ་ཟས་གཙང་མ་ལ་ཚིགས་སུ་བཅད་པ་འདི་དག་སྨྲས་སོ། །རྒྱལ་པོ་ས་བདག་ལེགས་པར་བདག་ལས་གསན་དུ་གསོལ། རྒྱལ་པོ་ཁྱོད་ལ་གསོལ་གྱིས་བདག་ལ་དེ་གནོང་ཤིག་།བདག་གི་བསམ་པ་ཡིད་ལ་ཅི་མཆིས་ཅིར་དགའ་བ། །དེ་དག་བདག་ལ་གསན་ཅིང་ཐུགས་དགྱེས་རངས་པར་མཛོད། །ལྷ་བདག་བསྙེན་གནས་ཚུལ་ཁྲིམས་བརྟུལ་ཞུགས་ལེན་པར་གསོལ། །བདག་ནི་འགྲོ་ལ་བྱམས་པས་ཡན་ལག་བརྒྱད་ལེན་ཏེ། །སྲོག་ཆགས་གནོད་པ་སྤངས་ཤིང་བསམ་པ་རྟག་དག་པས། །ཇི་ལྟར་བདག་ལ་བྱམས་པ་ད་ལྟར་གཞན་ལ་བགྱི། །རྐུ་སེམས་རྣམ་པར་སྤངས་ཏེ་འདོད་དང་དྲེགས་པ་སྤངས། །རྒྱལ་པོ 41.28b འདོད་པ་རྣམས་ལ་ལོག་པར་གཡེམ་མི་བགྱིད། །བདེན་ལ་གནས་ཤིང་ཕྲ་མ་མ་མཆིས་ཞེ་གཅོད་སྤང ། །མི་དགེ་ཀྱལ་པའི་ཚིག་ཀྱང་ཡོངས་སུ་མི་སྤྱོད་དོ། །གནོད་སེམས་ཞེ་སྡང་ཐ་བ་གཏི་མུག་རྒྱགས་པ་དང ། །བརྣབ་སེམས་ཀུན་སྤངས་རང་གི་ནོར་གྱིས་འཚལ་བར་བགྱི། །ཡང་དག་སྦྱོར་བས་ཁ་གསག་ཚུལ་འཆོས་ཕྲག་དོག་སྤང ། །དགེ་བཅུའི་ལས་ལམ་འདི་དག་བདག་གིས་སྤྱད་པར་བགྱི། །བདག་ནི་ཚུལ་ཁྲིམས་བརྟུལ་ཞུགས་མངོན་དགའ་རབ་བསྡམས་ཀྱིས། །མི་ཡི་དབང་པོ་བདག་ལ་བཞེད་པས་སྲེད་མ་མཛད། །རྒྱལ་པོ་ཁྱོད་ལ་ཡུན་རིང་མི་དགེར་གྱུར་དུ་མཆི། །བདག་གི་ཚུལ་ཁྲིམས་བརྟུལ་ཞུགས་ཉེར་གནས་དགྱེས་པར་མཛོད། །རྒྱལ་པོ་བདག་གི་འཚལ་བ་འདི་ལགས་དེང་མྱུར་སྩོལ། །ཁང་བཟངས་བསིལ་ཁང་ལྡན་པ་ངང་སྐྱ་ལྡན་པའི་ནང ། །མེ་ཏོག་བཀྲམ་པའི་མཆིས་མལ་འཇམ་ཞིང་དྲི་བདའ་བར། །གྲོགས་མོས་རྟག་ཏུ་བསྐོར་ཅིང་བདེ་དགར་གནས་སྙམ་བགྱིད། །སྐྱེས་པ་ཉུང་རུམ་རྣམས་དང་དེ་བཞིན་ཁྱེའུ་དག་དང ། །བུད་མེད་ཕལ་པ་རྣམས་ཀྱང་མདུན་ན་མཆིས་མི་འཚལ། །སྙན་ཅིང་ཡིད་མཆི་སྒྲ་སྙན་ཉན་པ་མ་གཏོགས་པར། །གཟུགས་དང་སྒྲ་བསུང་ཡིད་དུ་མི་མཆི་བདག་མི་འཚལ། །བཅིངས་དང་བཙོན་རར་སྩལ་བ་ཐམས་ཅད་དགྱེ་བར་གསོལ། །ནོར་གྱིས་བྲེལ་བའི་མི་རྣམས་ནོར་དང་ལྡན་པར་མཛོད། །ཟས་སྐོམ་རད་པ་ཤིང་རྟ་ཁྱོགས་དང་བཞོན་པ་རྟ། །འགྲོ་ལ་བདེ་བའི་སླད་དུ་དགུང་བདུན་སྩལ་བ་མཛོད། །ཕོ་བྲང་འདི་ན་སྐྱེས་པ་ཁྱེའུ་དང་བུད་མེད་དག་།ཇི་སྙེད་མཆིས་པ་འཐབ་རྩོད་ཁྲོ་བའི་ཚིག་བྲལ་ཞིང ། །ཕན་ཚུན་བྱམས་པའི་ཡིད་ལྡན་ཕན་དང་དེས་སེམས་ཀྱིས། །དགའ་ཚལ་གནས་པའི་ལྷ་ལྟར་འཐུན་ཞིང་བདེ་སྤྱོད་མཛོད། །རྒྱལ་པོའི་ཆད་པ་ཆེ་ཕྲ་གཉེར་གྱིས་བདའ་བ་དང ། །གནོད་པ་བགྱིད་དང་རྡེག་བཙོག་སྡིག་ཏུ་མི 41.29a མཛད་པར། །ཀུན་ལའང་དད་པའི་ཐུགས་ཀྱིས་བྱམས་དང་ཕན་དགོངས་ཏེ། །ལྷ་ཡིས་སྐྱེ་བོ་རྣམས་ལ་སྲས་གཅིག་བཞིན་དུ་གཟིགས། །རྒྱལ་པོས་དེ་སྐད་ཚིག་ཐོས་རབ་ཏུ་དགར་གྱུར་ནས། །སྨྲས་པ་ཁྱོད་ནི་ཅི་འདོད་དེ་ཀུན་དེ་བཞིན་བྱ། །ཁྱོད་ཀྱི་བསམ་པ་ཡིད་ཀྱིས་གང་རྣམས་རྗེས་བསམས་ཤིང ། །ཁྱོད་ཀྱིས་མཆོག་བླངས་གང་ཡིན་དེ་ནི་ངས་སྦྱིན་ནོ། །རྒྱལ་པོའི་དམ་པས་རང་གི་འཁོར་ལ་བསྒོ་བ་ནི། །ཁང་བཟངས་དམ་པའི་སྟེང་དུ་ཕུན་སུམ་ཚོགས་པ་ཤོམས། །མེ་ཏོག་མཛེས་པ་ཁྲོམ་ལ་བདུག་སྤོས་མཆོག་གིས་བདུགས། །གདུགས་དང་བ་དན་ཏ་ལའི་ཕྲེང་བའི་རྒྱན་ཀྱང་གྱིས། །འཐབ་ཕོད་སྟོང་ཕྲག་ཉི་ཤུ་སྣ་ཚོགས་གོ་ཆ་ཅན། །མདའ་མདུང་ལྕགས་མདའ་མདུང་ཐུང་རལ་གྲི་ཐོགས་པ་དག་།ཡིད་འོང་སྒྲ་ཅན་ངང་སྐྱ་ལྡན་པ་བསྐོར་གྱིས་ཏེ། །ལྷ་མོ་འཇིགས་པ་མེད་པར་བྱ་ཕྱིར་སྲུང་ཞིང་གནས། །ཁྲུས་བྱས་སྤོས་བྱུགས་གོས་མཆོག་དག་གིས་ཡན་ལག་བརྒྱན། །བུད་མེད་རྣམས་ཀྱིས་དེ་བསྐོར་ལྷ་ཡི་བུ་མོ་འདྲ། །ཡིད་དུ་འོང་བའི་སྒྲ་ལྡན་སིལ་སྙན་སྟོང་བླངས་ཏེ། །ལྷ་མོ་དེ་བཞུགས་ལྷ་ཡི་བུ་མོ་བཞིན་དུ་གནས། །ལྷ་ཡི་རིན་ཆེན་རིན་ཐང་ཆེན་པོས་རྩ་སྤྲས་པ། །ཁྲི་ལ་གོས་མཆོག་མང་པོས་ཡིད་འོང་མལ་བཤམས་ཏེ། །མལ་ཕྱིན་གཙུག་གི་ནོར་བུ་རིན་ཆེན་ཀློད་བྱས་ནས། །འདྲེས་པའི་ནགས་ཚལ་ལྷ་ཡི་བུ་མོ་བཞིན་དུ་གནས། །དགེ་སློང་དག་དེ་ནས་རྒྱལ་པོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། ལྷའི་བུ་རབ་འཐབ་བྲལ་དང ། ཡོངས་སུ་དགའ་ལྡན་དང ། རབ་འཕྲུལ་དགའ་དང ། གཞན་འཕྲུལ་དབང་བྱེད་དང ། བདུད་ཀྱི་བུ་དེད་དཔོན་དང ། མི་མཇེད་ཀྱི་བདག་པོ་ཚངས་པ་དང ། མདུན་ན་འདོན་ཚངས་མཆོག་དང ། མདུན་ན་འདོན་ཚངས་བཟངས་དང ། འོད་བཀོད་པ་དང ། འོད་གསལ་དང ། གནས་གཙང་མའི་རིས་ཀྱི་དབང་ཕྱུག་ཆེན 41.29b པོ་དང ། མཐར་ཐུག་དང ། འོག་མིན་པ་དང ། དེ་དག་ལ་སོགས་པ་དང ། གཞན་ཡང་ལྷ་བརྒྱ་སྟོང་མང་པོ་འདུས་ཏེ། གཅིག་ལ་གཅིག་འདི་སྐད་ཅེས་སྨྲས་སོ། །གྲོགས་པོ་དག་བདག་ཅག་གིས་བྱང་ཆུབ་སེམས་དཔའ་གཅིག་པུ་གཉིས་སུ་མེད་པར་གཤེགས་སུ་གསོལ་ན། བདག་ཅག་གིས་བྱས་པ་མ་ཤེས་པར་འགྱུར་ཏེ། བདག་ཅག་ལ་མི་ཆས། གྲོགས་པོ་དག་ཁྱེད་ཀྱི་ནང་ནས་བྱང་ཆུབ་སེམས་དཔའ་ཐོག་མ་ཡུམ་གྱི་ལྷུམས་སུ་གཤེགས་པ་དང ། ལྷུམས་ན་བཞུགས་པ་དང ། བལྟམ་པ་དང ། ཐོར་བུ་དང ། བྱིས་པའི་ནང་ན་རོལ་པ་དང ། བཙུན་མོའི་འཁོར་གྱི་ནང་ན་བཞུགས་པ་དང ། རོལ་མོ་གཟིགས་པ་དང ། མངོན་པར་འབྱུང་བ་དང ། དཀའ་བ་སྤྱོད་པ་དང ། བྱང་ཆུབ་ཀྱི་སྙིང་པོར་གཤེགས་པ་དང ། བདུད་འདུལ་བ་དང ། བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དང ། ཆོས་ཀྱི་འཁོར་ལོ་བསྐོར་བ་དང ། །མྱ་ངན་ལས་འདས་པ་ཆེན་པོ་བསྟན་གྱི་བར་དུ་ཕན་པའི་སེམས་དང ། དགའ་བའི་སེམས་དང ། ཕངས་པའི་སེམས་དང ། བྱམས་པའི་སེམས་དང ། མཉེན་པའི་སེམས་ཀྱིས་རྟག་པར་རྒྱུན་དུ་བྱང་ཆུབ་སེམས་དཔའི་ཞབས་འབྲིང་ན་འཁོད་པར་སུ་དག་སྤྲོ། དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ཁྱེད་ལས་སུ་ཞིག་རྟག་ཏུ་དགའ་ཡིད་ཀྱིས། །གཟུགས་མཆོག་མངའ་བའི་ཞབས་འབྲིང་བྱེད་པར་སྤྲོ། །སུ་དག་རང་གི་བསོད་ནམས་གཟི་བརྗིད་དང ། །སྟོབས་དང་གྲགས་པ་རྣམ་པར་སྤེལ་བར་འདོད། །གང་ཞིག་ལྷའི་ཕོ་བྲང་འདི་དག་ན། །ལྷ་མོ་དག་དང་འདོད་པའི་ཡོན་ཏན་གྱི། །ལྷ་ཡི་བདེ་བས་དགའ་བར་འདོད་པ་དག་།དྲི་མེད་ཟླ་བའི་ཞལ་གྱི་ཞབས་འབྲིང་གྱིས། །དེ་བཞིན་འདྲེས་པའི་ནགས་ཚལ་མཛེས་པ་མཆོག་།ལྷ་ཡི་འབྱུང་གནས་ལྷ་ཡི་ཕོ་བྲང་ན། །གསེར་མདོག་མེ་ཏོག་རྒྱས་པར་དགའ་འདོད་ན། །དྲི་མེད་གཟི་བརྗིད་མངའ་བའི་ཞབས་འབྲིང་གྱིས། །གང་གིས་སྣ་ཚོགས 41.30a ཤིང་རྟ་དེ་བཞིན་དུ། །དགའ་ཚལ་མེ་ཏོག་མན་དཱར་འདབ་རྒྱས་སུ། །ལྷ་མོ་ལྷན་ཅིག་རྩེ་བར་འདོད་པ་དག་།སྐྱེས་བུ་ཆེན་པོ་འདི་ཡི་ཞབས་འབྲིང་གྱིས། །འཐབ་བྲལ་བདག་པོའམ་དགའ་ལྡན་བདག་པོ་འམ། །ཡང་ན་དབང་ཕྱུག་འགྱུར་བར་འདོད་པ་དང ། །འགྲོ་བ་ཀུན་གྱིས་མཆོད་འོས་འདོད་པ་དག་།གྲགས་པ་མཐའ་ཡས་འདི་ཡི་ཞབས་འབྲིང་གྱིས། །གང་ཞིག་འཕྲུལ་དགའི་ཁང་པ་མཛེས་པ་དང ། །དབང་སྒྱུར་ལྷ་ཡི་གནས་སུ་རྩེ་འདོད་ཅིང ། །ཡིད་ཀྱི་འཕྲུལ་གྱིས་ཐམས་ཅད་སྤྱོད་འདོད་པ། །ཡོན་ཏན་མཆོག་མངའ་འདི་ཡི་ཞབས་འབྲིང་གྱིས། །བདུད་ཀྱི་དབང་པོ་ཞེ་སྡང་ཡིད་མེད་པ། །རྫུ་འཕྲུལ་དབང་ཕྱུག་ཀུན་གྱི་མཐར་ཕྱིན་པའི། །འདོད་པའི་དབང་ཕྱུག་དབང་མཐར་ཕྱིན་འདོད་ན། །ཕན་པ་མཛད་པ་འདི་དང་ལྷན་ཅིག་དེང ། །དེ་བཞིན་འདོད་པའི་ཁམས་ལས་འདའ་བྱས་ཏེ། །ཚངས་པའི་གནས་སུ་གནས་པར་སུ་འདོད་པ། །དེ་ནི་ཚད་མེད་བཞི་ཡི་གཟི་མངའ་བ། །སྐྱེས་བུ་ཆེན་པོའི་ཞབས་འབྲིང་དེང་ནས་གྱིས། །འོན་ཏམ་གང་ཞིག་མི་ཡི་ནང་དག་ཏུ། །འཁོར་ལོས་སྒྱུར་ཡུལ་ཡངས་པར་སྐྱེ་འདོད་ན། །རིན་ཆེན་འབྱུང་གནས་མི་འཇིགས་བདེ་སྦྱིན་པ། །བསོད་ནམས་ཡངས་པ་མངའ་བའི་ཞབས་འབྲིང་གྱིས། །གང་ཞིག་ས་བདག་དེ་བཞིན་ཚོང་དཔོན་བུ། །ཕྱུག་ཅིང་སྐྱིད་ལ་ནོར་མང་ཚོགས་ཆེན་དང ། །དགྲ་ཡི་དཔུང་བཅོམ་འཁོར་དང་ལྡན་འདོད་པ། །དེ་ནི་ཕན་མཛད་འདི་དང་ལྷན་ཅིག་དེང ། །གཟུགས་དང་ལོངས་སྤྱོད་དེ་བཞིན་དབང་ཕྱུག་དང ། །སྙན་པ་གྲགས་དང་སྤོབས་དང་ཡོན་ཏན་དང ། །གཟུང་འོས་ཚིག་དང་མཉན་པའི་ཚིག་འདོད་པ། །དེ་ནི་ཚངས་དབྱངས་མཁས་པའི་གན་དུ་སོང ། །ལྷ་དང་མི་ཡི་འདོད་པ་གང་ཡིན་དང ། །སྲིད་པ་གསུམ་གྱི་བདེ་བ་ཐམས་ཅད་དང ། །བསམ་གཏན་བདེ་དང་དབེན་པའི་བདེ་འདོད་པ། །དེ་ནི་ཆོས་ཀྱི་དབང་ཕྱུག 41.30b ཞབས་འབྲིང་གྱིས། །འདོད་ཆགས་དང་ནི་ཞེ་སྡང་སྤོང་བ་དང ། །ཉོན་མོངས་མུན་པ་སེལ་བར་སུ་འདོད་ཅིང ། །ཞི་བ་རབ་ཞི་ཉེར་ཞི་ཡིད་ལྡན་པ། །དེ་ནི་ཐུགས་དུལ་ཞབས་འབྲིང་མྱུར་དུ་སོང ། །གང་ཞིག་སློབ་དང་མི་སློབ་རང་རྒྱལ་དང ། །ཐམས་ཅད་མཁྱེན་པའི་ཡེ་ཤེས་ཐོབ་འདོད་ཅིང ། །སྟོབས་བཅུས་སེང་གེའི་སྒྲ་སྒྲོགས་སུ་འདོད་པ། །དེ་ནི་ཡོན་ཏན་རྒྱ་མཚོ་མཁས་དྲུང་སོང ། །གང་ཞིག་ངན་སོང་རྣམས་ཀྱི་ལམ་གཅོད་ཅིང ། །བཟང་འགྲོ་འཆི་བ་མེད་པའི་ལམ་དབྱེ་དང ། །ཡན་ལག་བརྒྱད་ལམ་འགྲོ་བས་འགྲོ་འདོད་ན། །འགྲོ་ལམ་མཐར་འབྱིན་འདི་ཡི་ཞབས་འབྲིང་གྱིས། །གང་ཞིག་བདེ་གཤེགས་ཡོངས་སུ་མཆོད་པ་དང ། །ཐུགས་རྗེ་མངའ་བ་དེ་ལས་ཆོས་ཉན་དང ། །དགེ་འདུན་ཡོན་ཏན་ཐོབ་པར་འདོད་པ་ནི། །ཡོན་ཏན་རྒྱ་མཚོ་འདི་ཡི་ཞབས་འབྲིང་གྱིས། །སྐྱེ་རྒ་ན་འཆིའི་སྡུག་བསྔལ་ཟད་པ་དང ། །འཁོར་བའི་བཅིངས་པ་རྣམ་པར་གྲོལ་བ་དང ། །ནམ་མཁའི་མཐའ་མཉམ་རྣམ་དག་སྤྱོད་འདོད་པ། །དེ་ནི་སེམས་ཅན་དག་པའི་ཞབས་འབྲིང་གྱིས། །འགྲོ་བ་ཀུན་ན་ཡིད་འོང་སྡུག་མཛེས་ཤིང ། །གཟུགས་མཆོག་མཚན་དང་ཡོན་ཏན་རྒྱས་པ་དང ། །བདག་དང་དེ་བཞིན་གཞན་ཡང་འགྲེལ་འདོད་པ། །དེ་ནི་བལྟ་སྡུག་མཁས་པའི་གན་དུ་སོང ། །ཚུལ་ཁྲིམས་ཏིང་འཛིན་དེ་བཞིན་ཤེས་རབ་དང ། །ཟབ་ཅིང་བལྟ་དཀའ་གཏིང་དཔག་དཀའ་བ་ཡི། །རྣམ་གྲོལ་ཐོབ་འདོད་མཁས་པ་གང་ཡིན་དེ། །སྨན་པའི་རྒྱལ་པོའི་གན་དུ་མྱུར་དུ་སོང ། །ཡོན་ཏན་འདི་དང་གཞན་ཡང་རྣམ་མང་དང ། །སྲིད་པའི་བདེ་དང་དེ་བཞིན་མྱ་ངན་འདས། །ཡོན་ཏན་ཐམས་ཅད་རབ་ཏུ་རྫོགས་འདོད་པ། །དེ་ནི་བརྟུལ་ཞུགས་གྲུབ་མཁས་གན་དུ་སོང ། །ཚིག་དེ་ཐོས་ནས་རྒྱལ་ཆེན་བཞིའི་རིས་ཀྱི་ལྷ་འབུམ་ཕྲག་བརྒྱད་བཅུ་རྩ་བཞི་དང ། སུམ་བཅུ་རྩ་གསུམ་གྱི་ལྷ་འབུམ་དང ། འཐབ་བྲལ་གྱི 41.31a ལྷ་འབུམ་དང ། དགའ་ལྡན་གྱི་ལྷ་འབུམ་དང ། འཕྲུལ་དགའི་ལྷ་འབུམ་དང ། བདུད་ཀྱི་རིས་ཀྱི་ལྷ་སྔོན་གྱི་དགེ་བའི་ལས་ཀྱིས་བྱུང་བ་དྲུག་ཁྲི་དང ། ཚངས་རིས་ཀྱི་ལྷ་དྲུག་ཁྲི་བརྒྱད་སྟོང་དང ། འོག་མིན་གྱི་བར་གྱི་ལྷ་བརྒྱ་སྟོང་མང་པོ་དག་འདུས་པར་གྱུར་པ་དང ། གཞན་ཡང་ཤར་ཕྱོགས་དང ། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་ནས་ལྷའི་བུ་བརྒྱ་སྟོང་མང་པོ་འདུས་པར་གྱུར་པ་དེ་དག་ལས་གང་དག་མཆོག་ཏུ་བྱ་བའི་ལྷའི་བུ་དག་གིས་ལྷའི་འཁོར་ཆེན་པོ་དེ་དག་ལ་ཚིགས་སུ་བཅད་པ་འདི་དག་སྨྲས་སོ། །བདག་ཅག་རྣམས་ཀྱིས་བསམ་པ་ཡང་དག་ཅི་འདྲ་ཡི། །ཚིག་འདི་ལྷ་ཡི་དབང་པོ་དག་གིས་གསན་དུ་གསོལ། །འདོད་པའི་དགའ་འབྱོར་བསམ་གཏན་བདེ་བ་མཆོག་སྤངས་ཏེ། །སེམས་ཅན་དག་པ་དམ་པ་འདི་ཡི་ཞབས་འབྲིང་བགྱི། །ལྷུམས་སུ་གཤེགས་དང་ལྷུམས་ན་བཞུགས་དང་བལྟམ་པའི་ཚེ། །བདག་ཉིད་ཆེན་པོ་མཆོད་འོས་ཤིན་དུ་མཆོད་པར་བགྱི། །བསོད་ནམས་དག་གིས་བསྲུངས་པའི་དྲང་སྲོང་ཡོངས་བསྲུངས་ན། །ཞེ་སྡང་སེམས་ཀྱིས་སུས་ཀྱང་གླགས་རྙེད་འགྱུར་མ་མཆིས། །གླུ་དབྱངས་སིལ་སྙན་རོལ་མོའི་དབྱངས་སྒྲ་ལེགས་བསྒྲགས་པས། །ཡོན་ཏན་རྒྱ་མཚོ་མངའ་བའི་ཡོན་ཏན་བསྔགས་བརྗོད་དེ། །གང་ཐོས་སྐྱེ་བོ་བྱང་ཆུབ་མཆོག་ཏུ་སེམས་བསྐྱེད་པར། །ལྷ་དང་མི་རྣམས་ཐམས་ཅད་རབ་ཏུ་དགའ་བར་བགྱི། །རྒྱལ་པོའི་ཕོ་བྲང་མེ་ཏོག་སིལ་མས་རྒྱས་པར་དགང ། ། ག་རུ་མཆོག་ནག་པོས་བདུགས་ཏེ་དྲི་ཞིམ་བགྱི། །དེ་ཡི་དྲི་ཚོར་ལྷ་མི་རབ་ཏུ་དགའ་འགྱུར་ཞིང ། །ནད་མེད་རིམས་ནད་བྲལ་ཞིང་བདེ་བར་འགྱུར་བར་བགྱི། །མེ་ཏོག་མན་དཱ་ར་དང་ཀུན་ནས་འདུ་བ་དང ། །སིམ་བྱེད་རབ་ཏུ་སིམ་བྱེད་སྠ་ལ་རྣམ་སྣང་དང ། །མེ་ཏོག་བཟང་པོས་ཕྲིན་ལས་དགེ་ལས་བྱུང་བ་དེ། །མཆོད་པའི་སླད་དུ་སེར་སྐྱའི་གྲོང་ཀུན་དགང་བར་བགྱི། །ཇི་སྲིད་ཡུམ་གྱི་ལྷུམས་ན་དྲི་གསུམ་མ་གོས་བཞུགས། །ཇི་སྲིད་རྒ་ཤི་མཐར་འབྱིན་བལྟམ་པར 41.31b གྱུར་གྱི་བར། །དེ་སྲིད་དུས་སུ་དང་བའི་ཡིད་ཀྱིས་ཞབས་འབྲིང་བགྱི། །བློ་གྲོས་ཆེ་མངའ་མཆོད་པ་བགྱི་བར་བདག་ཅག་སེམས། །བལྟམ་ནས་གོམ་པ་བདུན་གཤེགས་བརྒྱ་བྱིན་ཚངས་པ་ཡིས། །ལག་ཏུ་བླངས་ཏེ་སྤོས་ཆུ་དག་གིས་སྐུ་བསིལ་བ། །སེམས་ཅན་རྣམ་པར་དག་པ་དེ་ནི་མཐོང་བ་ཡི། །ལྷ་མི་དེ་དག་ཐོབ་པ་རྒྱ་ཆེན་ལེགས་པར་ཐོབ། །ཇི་སྲིད་བར་དུ་འཇིག་རྟེན་རྗེས་སུ་འཐུན་མཛད་ཅིང ། །འདོད་པའི་ཉོན་མོངས་འཇོམས་མཛད་བཙུན་མོའི་ནང་བཞུགས་ལ། །ཇི་སྲིད་ཅིག་ན་རྒྱལ་སྲིད་ཀུན་སྤངས་ཁབ་ནས་འབྱུང ། །དེ་སྲིད་དུས་སུ་དད་པའི་སེམས་ཀྱིས་ཞབས་འབྲིང་བགྱི། །ཇི་སྲིད་ཅིག་ན་རན་བསྣམས་བྱང་ཆུབ་སྙིང་པོར་གཤེགས། །ཇི་སྲིད་གཅིག་ན་བདུད་བཅོམ་བྱང་ཆུབ་རེག་གྱུར་ཅིང ། །ཚངས་པ་ཁྲག་ཁྲིག་འཁོར་ལོ་བསྐོར་བར་གསོལ་བཏབ་པ། །དེ་སྲིད་བདེ་བར་གཤེགས་ལ་མཆོད་པ་རྒྱ་ཆེན་བགྱི། །སེམས་ཅན་བྱེ་བ་ཁྲག་ཁྲིག་འཆི་མེད་བཏུལ་གྱུར་ཏེ། །སྟོང་གསུམ་འདིར་ནི་སངས་རྒྱས་ཕྲིན་ལས་ནམ་ལགས་ནས། །ཞི་ཞིང་བསིལ་བའི་མྱ་ངན་འདས་པར་གཤེགས་གྱུར་པ། །དེ་སྲིད་ཀུན་གྱིས་དྲང་སྲོང་གྲགས་ཆེན་གཏང་མི་བགྱི། །དགེ་སློང་དག་དེ་ནས་འདོད་པ་ན་སྤྱོད་པའི་ལྷའི་བུ་མོ་དག་གིས། བྱང་ཆུབ་སེམས་དཔའི་ལུས་གཟུགས་ཕུན་སུམ་ཚོགས་པ་མཐོང་ནས་འདི་སྙམ་དུ་སེམས་ཏེ། སེམས་ཅན་དག་པ་མཆོག་དམ་པ་འདི་ལྟ་བུ་འཛིན་པར་འགྱུར་བའི་ན་ཆུང་དེ་ནི་ཇི་ལྟ་བུ་ཞིག་ཡོད་སྙམ་ནས། དེ་དག་ངོ་མཚར་དུ་གྱུར་ཏེ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་མཆོག་ཏུ་བྱ་བ་དག་ཁྱེར་ནས་ལྷའི་ལུས་ཡིད་ལས་གྲུབ་པ་ཐོབ་ཅིང་བསོད་ནམས་ཀྱི་རྣམ་པར་སྨིན་པའི་རྫུ་འཕྲུལ་གྱིས་བྱིན་གྱིས་བརླབས་པ། དེ་དག་སྐད་ཅིག་དེ་ཉིད་ལ་ལྷའི་ཕོ་བྲང་དེ་ནས་མི་སྣང 41.32a བར་གྱུར་ཏེ། སེར་སྐྱའི་གྲོང་ཁྱེར་ཆེན་པོ་དམ་པ་བསྐྱེད་མོས་ཚལ་བརྒྱ་སྟོང་གིས་བརྒྱན་པ། རྒྱལ་པོ་ཟས་གཙང་མའི་ཁྱིམ་མཆོག་ཁང་བཟངས་ཆེན་པོ་ངང་སྐྱ་ལྡན་ཞེས་བྱ་བ་ལྷའི་དབང་པོའི་ཕོ་བྲང་ལྟ་བུ་དེར་ཕྱིན་ནས། ལྷའི་བུ་མོ་གོས་ལྷུག་ལྷུག་པོ་གྱོན་པ། དགེ་བ་དྲི་མ་མེད་པའི་བསོད་ནམས་ཀྱི་གཟི་བརྗིད་ཀྱིས་རབ་ཏུ་བརྒྱན་པ། ལྷའི་རྒྱན་གྱིས་ལག་པ་ཤིན་དུ་བརྒྱན་པ་དེ་དག་གིས་ལྷ་མོ་སྒྱུ་འཕྲུལ་མལ་མཆོག་གི་སྟེང་ན་འདུག་པ་མཐོང་ནས། ཕན་ཚུན་མཛུབ་མོས་སྟོན་ཅིང ། ནམ་མཁའི་དཀྱིལ་ན་འཁོད་དེ། གཅིག་ལ་གཅིག་ཚིགས་སུ་བཅད་དེ་སྨྲས་པ། །ལྷ་གནས་འཁོད་པའི་ལྷ་ཡི་བུ་མོ་རྣམས། །ཡིད་འོང་བྱང་ཆུབ་སེམས་དཔའི་སྐུ་མཐོང་ནས། །དེ་ཚེ་དེ་དག་འདི་སྙམ་སེམས་གྱུར་ཏེ། །བྱང་ཆུབ་སེམས་དཔའི་ཡུམ་གྱུར་ཅི་འདྲ་སྙམ། །ལག་ན་མེ་ཏོག་ཕྲེང་ཅན་དེ་དག་རྣམས། །ཐེ་ཙོམ་སྐྱེས་ནས་རྒྱལ་པོའི་ཕོ་བྲང་དུ། །མེ་ཏོག་དེ་བཞིན་བྱུག་པ་ཐོགས་ནས་སུ། །སོར་བཅུ་ཐལ་མོ་སྦྱར་ཏེ་འདུད་ཅིང་ལྷགས། །ལྷུག་ལྷུག་གོས་གྱོན་འཇོ་བག་གཟུགས་འཆང་བས། །ལྷ་མོ་སྒྱུ་འཕྲུལ་མལ་སྟེང་གནས་མཐོང་ནས། །ལག་པ་གཡས་པའི་སོར་མོས་ཕྱག་བྱས་ཏེ། །མི་ཡི་བུད་མེད་གཟུགས་ལ་ལེགས་ལྟོས་འཛེར། །བདག་ཅག་ང་རྒྱལ་སེམས་ཀྱིས་མངོན་སེམས་པ། །ལྷ་ཡི་བུ་མོ་གཟུགས་མཆོག་ཡིད་འོང་སྙམ། །རྒྱལ་པོའི་བཙུན་མོ་འདི་ཡི་གཟུགས་མཐོང་ན། །ལྷ་ཡི་ལུས་ཀྱང་ཟིལ་གྱིས་ནོན་པར་མཐོང ། །འདི་ནི་གང་ཟག་མཆོག་གི་ཡུམ་འགྱུར་དུ། །ཡོན་ཏན་ལྡན་པས་ཤིན་དུ་གཤའ་ཞིང་འོས། །ནོར་བུ་རིན་ཆེན་སྣོད་བཟང་གནས་པ་ལྟར། །ལྷ་མོ་འདི་ནི་ལྷ་ཡི་ལྷ་སྣོད་ཡིན། །རྐང་ལག་མཐིལ་དང་སྤྱི་བོ་མན་ཅད་དུ། །ཡན་ལག་ཡིད་འོང་ལྷ་ལས་ལྷག་པ་སྟེ། །མིག་གིས་བལྟ་ན་ངོམས་པར་འགྱུར་མ་ཡིན། ། 41.32b ཡིད་དང་སེམས་ནི་ཕྱིར་ཞིང་དགའ་བར་འགྱུར། །འདི་ཡི་ཁ་བཞིན་ལུས་མཛེས་སྡུག་པ་ནི། །ནམ་མཁའི་དཀྱིལ་ན་ཟླ་བ་མཛེས་པ་འདྲ། །ཉི་ལྟར་དྲི་མེད་མེ་ལྟར་འབར་བ་སྟེ། །འདི་ཡི་ལུས་ལས་འོད་གསལ་བཟང་པོ་འབྱུང ། །གསེར་སྦྲམ་བཙོ་མ་བཟང་པོའི་གསེར་བཞིན་དུ། །ལྷ་མོ་འདི་ཡི་ཁ་དོག་རྣམ་པར་མཛེས། །འདི་ཡི་སྐྲ་ནི་འཇམ་གཙང་དྲི་ཞིམ་སྟེ། །བུང་བ་མཆོག་གི་མདོག་འདྲ་ལྕང་ལོར་འཁྱིལ། །འདི་ཡི་མིག་ནི་པད་མའི་འདབ་མ་འདྲ། །རྣམ་དག་སོ་ནི་ནམ་མཁའི་སྐར་མ་བཞིན། །རྐེད་པ་གཞུ་ལྟར་ཕྲ་ཞིང་སྟ་ཟུར་ཡངས། །ཕྲག་པ་ཟླུམ་ཞིང་ཚིགས་རྣམས་མངོན་པ་མེད། །བརླ་ལེགས་གླང་པོ་མཆོག་གི་སྣ་འདྲ་སྟེ། །བྱིན་པ་ཤིན་དུ་ལེགས་པ་བྱིན་གྱིས་ཕྲ། །རྐང་ལག་མཐིལ་མཉམ་ཤིན་དུ་དམར་བ་སྟེ། །འདི་ནི་གཞན་མིན་ལྷ་ཡི་བུ་མོར་ངེས། །དེ་ལྟར་རྣམ་མང་དུ་མར་བལྟ་བྱས་ནས། །མེ་ཏོག་གཏོར་ཏེ་བསྐོར་བ་བྱས་ནས་ནི། །གྲགས་ལྡན་རྒྱལ་བའི་ཡུམ་ལ་བསྟོད་བྱས་ཏེ། །སྐད་ཅིག་གཅིག་གིས་ཕྱིར་ཡང་ལྷ་གནས་དོང ། །དེ་ནས་ཕྱོགས་བཞི་སྐྱོང་བ་བཞི་པོ་དང ། །འཐབ་བྲལ་རབ་དང་བརྒྱ་བྱིན་འཕྲུལ་པ་དང ། །ལྷ་ཚོགས་ལྷ་མིན་གྲུལ་བུམ་སྲིན་པོ་དང ། །མི་འམ་ཅི་དང་ལྟོ་འཕྱེ་ཆེས་སྨྲས་པ། །སྐྱེས་བུ་མཆོག་གི་མདུན་དུ་ཁྱེད་དེང་ལ། །སྐྱེས་བུ་དམ་པ་དེ་ལ་བསྲུང་བ་གྱིས། །འགྲོ་བ་དག་ལ་ཡིད་ཀྱིས་སྡང་མ་བྱེད། །མི་རྣམས་ལ་ཡང་གཙེ་བ་མ་བྱེད་ཅིག་།ལྷ་མོ་སྒྱུ་འཕྲུལ་ཁྱིམ་མཆོག་གང་གནས་པ། །དེར་ནི་འཐུན་པར་འཁོར་དང་ལྷན་ཅིག་ཀུན། །མདའ་གཞུ་རལ་གྲི་མདུང་ཐུང་མཚོན་ཐོགས་ལ། །ནམ་མཁའི་དཀྱིལ་ན་གནས་ཏེ་བལྟ་བར་གྱིས། །དེ་ལྟར་ཤི་འཕོའི་དུས་ཤེས་ལྷའི་བུ་རྣམས། །མེ་ཏོག་དེ་བཞིན་བྱུག་པ་ཐོགས་ནས་ནི། །སོར་བཅུ་ཐལ་མོ་སྦྱར་ཏེ 41.33a འདུད་བྱོས་ལ། །དགའ་བའི་སེམས་ཀྱིས་སྒྱུ་འཕྲུལ་དྲུང་དུ་དེང ། །སྨྲ་བའི་སེང་གེ་དུས་ནི་དེང་ལགས་ཀྱིས། །འཇིག་རྟེན་ཀུན་ལ་ཐུགས་རྗེ་བརྩེ་བསྐྱེད་དེ། །མི་དབང་སེམས་ཅན་དག་པ་འཆི་འཕོ་སྟོན། །མཆོད་སྦྱིན་དོན་དུ་བདག་ཅག་གསོལ་བ་འདེབས། །དགེ་སློང་དག་དེ་ནས་བྱང་ཆུབ་སེམས་དཔའ་འཆི་འཕོ་བའི་དུས་ཀྱི་ཚེ་ཤར་ཕྱོགས་ནས་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་དགའ་ལྡན་གྱི་གནས་དམ་པ་ན་གནས་པ་བརྒྱ་སྟོང་ཕྲག་མང་པོ་དག་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་བཞིན་དུ་ཕྱོགས་བཅུའི་ཕྱོགས་རེ་རེ་ནས་ཀྱང་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ། དགའ་ལྡན་གྱི་གནས་དམ་པ་ན་གནས་པ་བརྒྱ་སྟོང་ཕྲག་མང་པོ་དག་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་ནས་ལྷའི་བུ་མོ་འབུམ་ཕྲག་བརྒྱད་བཅུ་རྩ་བཞི་སིལ་སྙན་དང ། གླུ་དབྱངས་སྣ་ཚོགས་ལེན་ཅིང་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་བཞིན་དུ་སུམ་བཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ནང་ནས་ལྷའི་བུ་མོ་འབུམ་ཕྲག་བརྒྱད་བཅུ་རྩ་བཞི་སིལ་སྙན་དང་གླུ་དབྱངས་སྣ་ཚོགས་ལེན་ཅིང ། བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་ནས་བྱང་ཆུབ་སེམས་དཔའ་ཁང་པ་བརྩེགས་པ་ཆེན་པོ་བསོད་ནམས་ཐམས་ཅད་ཀྱིས་ཡང་དག་པར་བྱུང་བ་དཔལ་གྱི་སྙིང་པོ་ལྷ་རྣམས་ཀྱིས་ཀུན་ནས་བལྟ་བའི་ནང་དུ་འདུག་སྟེ། བྱང་ཆུབ་སེམས་དཔའ་དེ་དག་དང ། ལྷ་བྱེ་བ་ཁྲག་ཁྲིག 41.33b བརྒྱ་ཕྲག་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས། དགའ་ལྡན་གྱི་གནས་དམ་པ་ནས་བསྐྱོད་པར་བརྩམས་སོ། །དགེ་སློང་དག་དེ་ལྟར་བསྐྱོད་པར་བརྩམས་པའི་ཚེ་བྱང་ཆུབ་སེམས་དཔས་འོད་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལྟར་རྒྱ་ཆེ་ཞིང་ཡངས་ལ་ཐ་གྲུ་ཆེ་བ་འདིར་སྔན་ཅད་མ་བྱུང་བའི་འོད་སྣང་བ་ལྷའི་འོད་ལས་ཤིན་དུ་འདས་པས་ཡོངས་སུ་གསལ་ཞིང་སྣང་བར་གྱུར་ཏོ། །འཇིག་རྟེན་གྱི་བར་གང་སྡིག་པ་སྡིག་པས་ཁེབས་ནས་མུན་པ་མུན་ནག་སྨག་ཏུ་གྱུར་པ་སྣང་བ་མེད་པ་གང་དུ་ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་ལ་འདི་ལྟར་དབང་ཆེ་བར་གྲགས་པས་ཀྱང་འོད་དང ། ཁ་དོག་དང ། གཟི་བརྗིད་ཀྱིས་ལམ་མེར་མ་གྱུར། ཐལ་ལེར་མ་གྱུར། ལྷང་ངེར་མ་གྱུར་པ་དེར་སེམས་ཅན་གང་དག་སྐྱེས་པ་དེ་དག་རང་རང་གིས་ལག་པ་བརྐྱང་པའང་མི་མཐོང་བ་དེ་དག་ཏུའང་དེའི་ཚེ་སྣང་བ་ཆེན་པོས་རྒྱས་པར་ཁྱབ་པར་གྱུར་ཅིང ། དེར་སྐྱེས་པའི་སེམས་ཅན་དེ་དག་སྣང་བ་དེས་ཁྱབ་པར་གྱུར་ནས་གཅིག་གིས་གཅིག་མཐོང་ཞིང་གཅིག་གིས་གཅིག་ཤེས་ཏེ། འདི་སྐད་དུ་ཀྱེ་གྲོགས་པོ་དག་སེམས་ཅན་གཞན་དག་ཀྱང་འདིར་སྐྱེས་སོ། །ཀྱེ་གྲོགས་པོ་དག་སེམས་ཅན་གཞན་དག་ཀྱང་འདིར་སྐྱེས་སོ་ཞེས་ཟེར་བར་གྱུར་པ་དེ་ལྟ་བུའི་འོད་ལུས་ལས་བཀྱེའོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་རྣམ་པ་དྲུག་དང ། ལྟས་ཆེན་པོ་བཅཝ་བརྒྱད་དུ་གཡོས། རབ་ཏུ་གཡོས། ཀུན་དུ་རབ་ཏུ་གཡོས་སོ། །འགུལ་རབ་ཏུ་འགུལ། ཀུན་དུ་རབ་ཏུ་འགུལ་ཏོ། །ལྡེག་རབ་ཏུ་ལྡེག་།ཀུན་དུ་རབ་ཏུ་ལྡེག་གོ། །འཁྲུགས་རབ་ཏུ་འཁྲུགས། ཀུན་དུ་རབ་ཏུ་འཁྲུགས་སོ། །འུར་འུར་རབ་ཏུ་འུར་འུར། ཀུན་དུ་རབ་ཏུ་འུར་འུར་རོ། །ཆེམ་ཆེམ་རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ 41.34a ཆེམ་མོ། །མཐའ་དམའ་ན་དབུས་མཐོ་བར་གྱུར་ཏོ། །དབུས་དམའ་ན་མཐའ་མཐོ་བར་གྱུར་ཏོ། །ཤར་ཕྱོགས་དམའ་ན་ནུབ་ཕྱོགས་མཐོ་བར་གྱུར་ཏོ། །ནུབ་ཕྱོགས་དམའ་ན་ཤར་ཕྱོགས་མཐོ་བར་གྱུར་ཏོ། །ལྷོ་ཕྱོགས་དམའ་ན་བྱང་ཕྱོགས་མཐོ་བར་གྱུར་ཏོ། །བྱང་ཕྱོགས་དམའ་ན་ལྷོ་ཕྱོགས་མཐོ་བར་གྱུར་ཏོ། །དེའི་ཚེ་སྒྲ་དགའ་བར་འགྱུར་བ། ཚིམ་པར་འགྱུར་བ། མགུ་བར་འགྱུར་བ། དང་བར་འགྱུར་བ། སིམ་པར་འགྱུར་བ། མཉན་པར་འོས་པ། བསྔགས་པར་འོས་པ། མཚུངས་པ་མེད་པ། མཉན་ན་གཏང་མི་བྲ་བ། མི་མཐུན་པ་མེད་པ། སྡང་བར་འགྱུར་བ་མེད་པ་དག་ཀྱང་གྲག་པར་གྱུར་ཏོ། །སྐད་ཅིག་དེ་ལ་སེམས་ཅན་གང་ལ་ཡང་གནོད་པ་འམ། འཇིགས་པ་འམ། སྔང་བ་འམ། བག་ནོན་པ་མེད་པར་གྱུར་ཏོ། །སྐད་ཅིག་དེ་ལ་ཉི་ཟླ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དག་གི་འོད་ཀྱང་མི་སྣང་བར་གྱུར་ཏོ། །སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་ཐམས་ཅད་ཀྱང་སྐད་ཅིག་དེ་ལ་སྡུག་བསྔལ་དང་བྲལ་ཞིང་བདེ་བ་ཐམས་ཅད་དང་ལྡན་པར་གྱུར་ཏེ། སེམས་ཅན་གང་ལ་ཡང་འདོད་ཆགས་ཀྱིས་གནོད་པར་མི་འགྱུར། ཞེ་སྡང་གིས་གནོད་པར་མི་འགྱུར། གཏི་མུག་གིས་གནོད་པར་མི་འགྱུར་ཞིང ། ཕྲག་དོག་གམ། སེར་སྣ་འམ། ང་རྒྱལ་ལམ། འཆབ་པ་འམ། རྒྱགས་པ་འམ། ཁྲོ་བ་འམ། གནོད་སེམས་སམ། ཡོངས་སུ་གདུང་བས་གནོད་པར་འགྱུར་བ་མེད་པར་གྱུར་ཏེ། སེམས་ཅན་ཐམས་ཅད་ཀྱང་སྐད་ཅིག་དེ་ལ། ཕན་ཚུན་ཕ་མ་ཙམ་དུ་སེམས་པའི་འདུ་ཤེས་སུ་གྱུར་ནས། བྱམས་པའི་སེམས་དང ། ཕན་པའི་སེམས་དང་ལྡན་པར་གྱུར་ཏོ། །ལྷ་དང་མིའི་རོལ་མོ་སིལ་སྙན་བྱེ་བ་ཁྲག་ཁྲིག་བརྒྱ་སྟོང་དག་ཀྱང་མ་དཀྲོལ་མ་བླངས་པར་ཡིད་དུ་འོང་བའི་སྒྲ་འབྱིན་པར་གྱུར་ཏོ། །ལྷ་བྱེ་བ་ཁྲག་ཁྲིག་བརྒྱ་སྟོང་དག་ཀྱང་ལག 41.34b པ་དང་ཕྲག་པ་དང་སྤྱི་བོས་གཞལ་མེད་ཁང་ཆེན་པོ་དེ་འདེག་ཅིང་ཁྱེར་བར་གྱུར་ཏོ། །ལྷའི་བུ་མོ་བརྒྱ་སྟོང་དག་གིས་ཀྱང་རང་རང་གི་གླུ་དབྱངས་བླངས་ཏེ། མདུན་དང ། རྒྱབ་དང ། གཡས་གཡོན་དག་ནས་བྱང་ཆུབ་སེམས་དཔའ་ལ་གླུ་དབྱངས་ཀྱི་སྒྲ་སྐད་ཀྱིས་མངོན་པར་བསྟོད་པ། ཁྱོད་ཀྱིས་སྔན་ཆད་དགེ་ལས་བསགས་པ་དང ། །ཡུན་རིང་དུས་ཀྱི་དགེ་བས་བྱུང་བ་དང ། །ཁྱོད་ཀྱིས་ཆོས་རྣམས་ཀུན་གྱི་ཚུལ་སྦྱངས་པས། །དེ་རིང་མཆོད་པ་རྒྱ་ཆེན་བྱུང་བར་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །སྲས་མོ་སྲས་སྡུག་སྦྱིན་པ་མཛད་པས་ན། །ལྷ་ཡི་མེ་ཏོག་ཆར་དུ་བབ་པ་འདི། །སྦྱིན་པ་སྤྱད་པ་དེ་ཡི་འབྲས་བུ་ལགས། །གཙོ་བོ་ཁྱོད་ཀྱིས་རང་གི་ཤ་བཅད་དེ། །སྲང་ལ་བཅལ་ནས་ཐུགས་བྱོན་བྱ་ཕྱིར་བཏང ། །སྦྱིན་པ་དེ་སྤྱད་པ་ཡི་འབྲས་བུ་དེས། །ཡི་དགས་འཇིག་རྟེན་རྣམས་ཀྱང་ཟས་སྐོམ་ཐོབ། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཚུལ་ཁྲིམས་མ་ཞིག་མ་ཉམས་བསྲུངས་པས་ན། །ཚུལ་ཁྲིམས་དེ་སྤྱད་པ་ཡི་འབྲས་བུ་དེས། །མི་ཁོམ་ངན་སོང་ཡོངས་སུ་དག་པར་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །བྱང་ཆུབ་བསྒྲུབ་པའི་གཞིར་ནི་བཟོད་པ་བསྒོམས། །བཟོད་པ་དེ་སྤྱད་པ་ཡི་འབྲས་བུ་དེས། །ལྷ་དང་མི་ཀུན་བྱམས་པའི་སེམས་སུ་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །བརྩོན་འགྲུས་མ་གོད་དམ་པ་བསྒོམས་པས་ན། །བརྩོན་འགྲུས་དེ་སྤྱད་པ་ཡི་འབྲས་བུ་དེས། །སྐུ་ནི་རི་རབ་བཞིན་དུ་མཛེས་པར་གྲུབ། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཉོན་མོངས་སྦྱང་སླད་བསམ་གཏན་བསྒོམ་མཛད་པས། །བསམ་གཏན་དེ་སྤྱད་པ་ཡི་འབྲས་བུ་དེས། །འགྲོ་བ་དག་ལ་ཉོན་མོངས་གནོད་མི་འགྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཉོན་མོངས་གཅོད་པའི་ཤེས་རབ་བསྒོམ་མཛད་པའི། །ཤེས་རབ་དེ་སྤྱད་པ་ཡི་འབྲས་བུ་དེས། ། 41.35a འོད་གསལ་དམ་པ་རྣམ་པར་སྣང་ཞིང་མཛེས། །བྱམས་པའི་གོ་མནབས་ཉོན་མོངས་འཇོམས་མཛད་ཅིང ། །སེམས་ཅན་ཀུན་ལ་ཐུགས་རྗེ་ཆེས་བྱུང་བ། །དགྱེས་པ་མཆོག་བརྙེས་བཏང་སྙོམས་མཆོག་ལྡན་པ། །བདེ་གཤེགས་ཚངས་གྱུར་ཁྱོད་ལ་ཕྱག་འཚལ་ལོ། །ཤེས་རབ་སྒྲོན་མའི་འོད་དང་གཟིས་འཕགས་ཤིང ། །གཏི་མུག་སྐྱོན་གྱི་མུན་པ་ཀུན་སེལ་བ། །འདྲེན་པ་སྟོང་གསུམ་དག་ན་མིག་གྱུར་པའི། །ཐུབ་པ་ལམ་སྟོན་ཁྱོད་ལ་ཕྱག་འཚལ་ལོ། །རྫུ་འཕྲུལ་རྐང་པ་མངོན་ཤེས་མཆོག་ལ་མཁས། །བདེན་པ་གཟིགས་ཤིང་དམ་པའི་དོན་བསླབས་པ། །རྒལ་ནས་སྲོག་ཆགས་གཞན་དག་སྒྲོལ་མཛད་པ། །བདེ་གཤེགས་གྲོལ་གྱུར་ཁྱོད་ལ་ཕྱག་འཚལ་ལོ། །ཐབས་དང་མངོན་ཤེས་དམ་པ་ཀུན་ལ་མཁས། །འཆི་འཕོ་འཆི་འཕོ་མེད་པའི་འཕོ་བ་སྟོན། །འཇིག་རྟེན་ཆོས་ཀྱི་རྗེས་སུ་འཐུན་མཛད་ཀྱང ། །འཇིག་རྟེན་གང་དུའང་ཆགས་པ་ཁྱོད་མི་མངའ། །གང་དག་ཁྱོད་ནི་ཉན་ཏམ་ལྟར་ལྷགས་པ། །དེ་དག་ཐོབ་པ་དམ་པ་བསམ་མི་ཁྱབ། །ཁྱོད་ལ་ཆོས་ཉིད་ཐོས་ཏེ་གང་དད་ཅིང ། །དགའ་བ་ཡངས་པ་སྐྱེས་པ་སྨོས་ཅི་འཚལ། །དགའ་ལྡན་གནས་རྣམས་ཀུན་ནི་མོག་མོག་གྱུར། །འཛམ་བུའི་གླིང་དུ་ཉི་མ་མངོན་དུ་ཤར། །སྲོག་ཆགས་བྱེ་བ་ཁྲག་ཁྲིག་བསམ་མི་ཁྱབ། །ཉོན་མོངས་གཉིད་ཀྱིས་ལོག་ལས་སད་པར་མཛད། །དེང་ནི་ཕོ་བྲང་འབྱོར་ཅིང་རྒྱས་གྱུར་ལ། །བྱེ་བ་ཁྲག་ཁྲིག་ལྷ་རྣམས་ལང་ལོང་གྱུར། །ལྷ་ཡི་བུ་མོས་སིལ་སྙན་སྒྲ་ཕྱུང་བས། །རྒྱལ་པོའི་ཁབ་ན་སིལ་སྙན་གྲགས་པར་འགྱུར། །བསོད་ནམས་གཟི་བརྗིད་རྫོགས་ཤིང་ལས་དགེ་བ། །བུད་མེད་གཟུགས་ཀྱི་མཆོག་དང་ལྡན་གྱུར་པ། །དེ་ཡི་སྲས་གྱུར་དེ་ནི་དེ་ལྟར་འབྱོར། །དཔལ་གྱིས་འཇིག་རྟེན་གསུམ་ནི་ཟིལ་གྱིས་གནོན། །མི་མཆོག་འབྱུང་བ་དེ་ཡི་གཟི 41.35b བརྗིད་ཀྱིས། །དེ་ཕྱི་ཕྱིན་ཆད་ཕོ་བྲང་དམ་པ་འདིར། །ལུས་ཅན་རྣམས་ལ་འདོད་སྡང་འཐབ་རྩོད་མེད། །ཀུན་ཀྱང་བྱམས་པའི་སེམས་ཀྱིས་སྲི་ཞུར་བཅས། །འཁོར་ལོས་སྒྱུར་བའི་རིགས་རྒྱལ་བྱུང་བས་ན། །རྒྱལ་པོའི་རིགས་ནི་རབ་ཏུ་འཕེལ་བར་འགྱུར། །སེར་སྐྱའི་གྲོང་འདི་ཤིན་དུ་ཕུན་སུམ་ཚོགས། །རིན་ཆེན་མཛོད་ཀྱིས་རབ་ཏུ་གང་བར་འགྱུར། །གནོད་སྦྱིན་སྲིན་པོ་གྲུལ་བུམ་གསང་བ་པ། །ལྷ་དང་ལྷ་མིན་ཚོགས་རྣམས་དབང་པོར་བཅས། །མི་མཆོག་སྲུང་བ་གང་དག་གནས་པ་རྣམས། །དེ་དག་རིང་པོར་མི་ཐོགས་ཐར་པ་འཐོབ། །གུས་དང་སྲི་ཞུ་ལ་ནི་གནས་ནས་སུ། །འདྲེན་པ་ཁྱོད་བསྟོད་བསོད་ནམས་གང་བསགས་པ། །ཀུན་ཀྱང་བྱང་ཆུབ་ཏུ་ནི་ཡོངས་སུ་བསྔོ། །མི་ཡི་དམ་པ་ཁྱོད་ལྟར་མྱུར་དུ་ཤོག་།བསྐྱོད་པར་བརྩམས་པའི་ལེའུ་སྟེ་ལྔ་པའོ།། །། དགེ་སློང་དག་དེ་ལྟར་དགུན་འདས་ཏེ། དཔྱིད་ཀྱི་དུས་ལ་དཔྱིད་ཟླ་ཐ་ཆུངས་ཀྱི་ཚེ། སྐར་མ་ས་ག་ལ་བབ་པ་དུས་ཀྱི་དམ་པ་ལ་ཤིང་རྣམས་ཀྱི་ལོ་མ་རྒྱས་ཤིང་མེ་ཏོག་མཆོག་ཏུ་རྒྱས་ནས་གྲང་དྲོ་དང ། མུན་པ་དང ། རྡུལ་མེད་ཅིང་སའི་གཞི་སྔོ་གཞོན་ནུ་སྐྱེས་པས་ཁེབས་པར་གནས་པའི་ཚེ། འཇིག་རྟེན་གསུམ་གྱི་གཙོ་བོ་འཇིག་རྟེན་གྱིས་མཆོད་པས་དུས་ལ་བབ་པའི་ཚོད་ལ་རྣམ་པར་གཟིགས་ནས། ཚེས་བཅཝ་ལྔའི་ཟླ་བ་ཉ་ལ་སྐར་མ་རྒྱལ་གྱི་དུས་སུ། ཡུམ་གསོ་སྦྱོང་བླངས་པའི་རུམ་དུ། བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ནས་འཕོས་ཏེ། དྲན་ཞིང་ཤེས་བཞིན་དུ། གླང་པོའི་ཕྲུ་གུ་ཐལ་ཀར་མཆེ་བ་དྲུག་དང་ལྡན་པ། མགོའི་ཁ་དོག་སྲིན་བུ་ལྷམ་བུ་ཆུ་གཤེར་གྱིས་མདོག་ལྟ་བུ། མཆེ་བ་ལ་གསེར་འཚིག་པ། ཡན་ལག་དང་ཉིང་ལག་ཐམས་ཅད་དང་ལྡན་པ། དབང་པོ་ཉམས་པ་མེད་པར་བྱས་ཏེ། མའི་གློ་གཡས་པ་ནས་ཞུགས་སོ། །ཞུགས་ནས་ཀྱང་གློ་གཡས་པ་ལོགས 41.36a སུ་བརྟེན་ཏེ་གནས་ཀྱི། གློ་གཡོན་པ་ལོགས་སུ་ནམ་ཡང་མ་བརྟེན་ཏོ། །ལྷ་མོ་སྒྱུ་འཕྲུལ་མལ་བདེ་བ་ན་ཉལ་བ་དེས་ཀྱང་རྨི་ལམ་འདི་ལྟ་བུ་མཐོང་ངོ ། །གླང་པོ་ཁ་བ་དངུལ་མདོག་མཆེ་བ་དྲུག་།རྐང་ལག་རབ་མཛེས་མགོ་བོ་དམར་སྡུག་པ། །འགྲོས་བཟང་ལུས་ཚིགས་རྡོ་རྗེ་བཞིན་བརྟན་པ། །གླང་པོ་མཆོག་གཅིག་ཁོང་དུ་སོང་སྙམ་བྱེད། །དེས་ནི་དེ་འདྲའི་བདེ་བ་བརྒྱ་ལམ་ནའང ། །མ་མཐོང་མ་ཐོས་མྱོང་བར་མ་གྱུར་ཏེ། །ལུས་ཀྱང་བདེ་ཞིང་སེམས་ཀྱང་བདེར་གྱུར་ནས། །བསམ་གཏན་མཉམ་པར་བཞག་པ་བཞིན་དུ་གྱུར། །དེ་ནས་ལྷ་མོ་སྒྱུ་འཕྲུལ་རྒྱན་དང་གོས་ལྷུག་ལྷུག་པོར་གྱོན་ཅིང ། ཐོགས་པ་ལས་ལུས་དང་སེམས་བདེ་བར་གྱུར་ཏེ། དགའ་བ་དང ། རངས་པ་དང ། ཉམས་བདེ་བ་ཐོབ་ནས། མལ་དམ་པ་དེ་ལས་ལངས་ཏེ་བུད་མེད་ཀྱི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་ཁང་བཟངས་དེའི་སྟེང་ནས་བབས་ཏེ། ཤིང་མྱ་ངན་འཚང་གི་ནགས་ཚལ་ག་ལ་བ་དེར་སོང་ནས། དེ་མྱ་ངན་འཚང་གི་ནགས་ཚལ་དུ་བདེ་བར་འདུག་སྟེ། རྒྱལ་པོ་ཟས་གཙང་མའི་དྲུང་དུ་ཕོ་ཉ་བཏང་ནས། རྒྱལ་པོ་གཤེགས་སུ་གསོལ། ལྷ་མོ་དེ་ཁྱོད་ཀྱི་ཞལ་མཐོང་བར་བཞེད་དོ། །ཞེས་བྱས་པ་དང ། རྒྱལ་པོ་ཟས་གཙང་མས་ཚིག་དེ་ཐོས་ནས། རབ་ཏུ་དགའ་བར་གྱུར་ཏེ། ལུས་གཡོས་ནས་ཁྲི་བཟང་པོ་ལས་ལངས་ཏེ། བློན་པོ་དང ། གྲོང་རྡལ་པ་དང ། འཁོར་དང ། གཉེན་པའི་སྐྱེ་བོ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། མྱ་ངན་འཚང་གི་ནགས་ཚལ་ག་ལ་བ་དེར་སོང་ངོ ། །སོང་ནས་ཀྱང་བདག་གི་ལུས་ཤིན་དུ་ལྕི་བ་སྙམ་བྱེད་ནས། མྱ་ངན་འཚང་གི་ནགས་ཚལ་དུ་འགྲོ་མ་ནུས་ཏེ། མྱ་ངན་འཚང་གི་ནགས་ཚལ་གྱི་སྒོར་འདུག་ནས། ཆུང་ཟད་ཅིག་བསམས་ཏེ། དེའི་ཚེ་ཚིགས་སུ་བཅད་པ་འདི་སྨྲས་སོ། །བདག་ནི་གཡུལ་དུ་དཔའ་བའི་ཕུལ་ཕྱིན་པ། །དེང་ལྟར་ལུས 41.36b ལྕི་བདག་གིས་མྱོང་མི་དྲན། །བདག་གི་ཁྱིམ་དུའང་འགྲོ་བར་དེང་མ་ནུས། །ཀྱེ་མ་འདི་ཅི་སུ་ལ་དྲི་བར་བྱ། །གནས་གཙང་མའི་རིས་ཀྱི་ལྷ་དག་ནམ་མཁའི་དཀྱིལ་ན་འཁོད་ནས་ལུས་ཕྱེད་མངོན་པར་སྤྲུལ་ཏེ། རྒྱལ་པོ་ཟས་གཙང་མ་ལ་ཚིགས་སུ་བཅད་དེ་སྨྲས་པ། དཀའ་ཐུབ་བརྟུལ་ཞུགས་ཡོན་ཏན་ལྡན་པ་འཇིག་རྟེན་གསུམ་གྱིས་མཆོད། །བྱམས་དང་སྙིང་རྗེ་ཐོབ་པས་བསོད་ནམས་ཡེ་ཤེས་དབང་བསྐུར་བའི། །བྱང་ཆུབ་སེམས་དཔའ་ཆེ་བ་དགའ་ལྡན་གནས་ནས་འཕོས་གྱུར་ཏེ། །རྒྱལ་པོ་ཁྱོད་ཀྱི་སྲས་གྱུར་ལྷ་མོ་སྒྱུ་འཕྲུལ་མངལ་དུ་ཞུགས། །དེ་ཚེ་རང་གི་མགོ་གཅོགས་སོར་བཅུ་ཐལ་མོ་སྦྱར་བྱས་ཏེ། །རྒྱལ་པོ་རིམ་གྲོ་བྱ་བར་ལྡན་གྱུར་དེ་ཡི་ནང་དུ་ཞུགས། །ང་རྒྱལ་དྲེགས་པ་མེད་པས་ལྷ་མོ་སྒྱུ་འཕྲུལ་ངོར་བལྟས་ཏེ། །ངས་ནི་ཁྱོད་ལ་ཅི་བྱ་ཅི་སྦྱར་ཁྱོད་ཀྱིས་ང་ལ་སྨྲོས། །ལྷ་མོས་སྨྲས་པ། ཁ་བ་དངུལ་གྱི་མདོག་འདྲ་ཉི་ཟླའི་འོད་ལས་འཕགས་པ་སྟེ། །རྐང་ལག་ལེགས་ཤིང་རབ་འབྱེས་མཆེ་བ་དྲུག་ལྡན་ཆེ་བ་ཉིད། །གླང་པོའི་དམ་པ་རྡོ་རྗེ་བཞིན་དུ་ཚིགས་བརྟན་གཟུགས་བཟང་བ། །བདག་གི་རུམ་དུ་ཞུགས་ཀྱིས་དེའི་ལོ་རྒྱུས་གསན་པར་གསོལ། །སྟོང་གསུམ་ཁམས་འདི་མཛེས་པར་རབ་རིབ་མ་མཆིས་བདག་གིས་མཐོང ། །བདག་ནི་ཉལ་ཞིང་མཆིས་ན་ལྷ་རྣམས་བྱེ་བས་རབ་ཏུ་བསྟོད། །འོན་ཀྱང་བདག་ལ་ཁྲོ་ཞིང་འཚིག་དང་ཞེ་སྡང་རྨོངས་མ་མཆིས། །ཞི་བའི་སེམས་སུ་གྱུར་ཅིང་བསམ་གཏན་བདེ་དང་ལྡན་སྙམ་བགྱིད། །བདག་གི་རྨི་ལམ་འདི་ནི་རིགས་ལ་དགེ་འམ་དོང་འམ་ཅི། །བདག་གི་རྨི་ལམ་འདི་ནི་ཡང་དག་ལྡན་པར་ལུང་སྟོན་པ། །རིག་བྱེད་རྨི་ལམ་གཞུང་ལ་མཁས་ཤིང་གཟའ་ཡི་ཆོ་ག་མཁན། །རྒྱལ་པོ་མྱུར་དུ་བྲམ་ཟེ་འདིར་ནི་ལེགས་པར་དགུག་ཏུ་གསོལ། །དེ་སྐད་ཚིག་ཐོས་རྒྱལ་པོས་དེ་ཡི་དུས་ཀྱི་སྐད་ཅིག་ལ། །བྲམ་ཟེ་རིག་བྱེད་བསྟན་བཅོས་གཞུང་ལ་ཤིན་དུ་མཁས་པ་གཉེར། །སྒྱུ་འཕྲུལ་བྲམ་ཟེ 41.37a རྣམས་ཀྱི་མདུན་དུ་འདུག་ནས་འདི་སྐད་སྨྲས། །ཁོ་མོས་རྨི་ལམ་འདི་འདྲ་མཐོང་ན་དེ་ཡི་ལོ་རྒྱུས་གསོན། །བྲམ་ཟེ་རྣམས་ཀྱིས་སྨྲས་པ། ལྷ་མོ་བཀའ་སྩལ་དུ་གསོལ། ཁྱོད་ཀྱིས་རྨི་ལམ་ཅི་འདྲ་བ་ཞིག་གཟིགས། ཐོས་ནས་ཀྱང་དཔྱད་པར་བགྱིའོ། །ལྷ་མོས་སྨྲས་པ། ཁ་བ་དངུལ་གྱི་མདོག་འདྲ་ཉི་ཟླའི་འོད་ལས་འཕགས་པ་སྟེ། །རྐང་ལག་ལེགས་ཤིང་རབ་འབྱེས་མཆེ་བ་དྲུག་ལྡན་ཆེ་བ་ཉིད། །གླང་པོའི་དམ་པ་རྡོ་རྗེ་བཞིན་དུ་ཚིགས་བརྟན་གཟུགས་བཟང་བ། །བདག་གི་རུམ་དུ་ཞུགས་ན་དེ་ཡི་ལོ་རྒྱུས་མཉན་པར་གྱིས། །དེ་སྐད་ཚིག་ཐོས་ནས་ནི་བྲམ་ཟེ་རྣམས་ཀྱིས་འདི་སྐད་སྨྲས། །རིགས་ལ་དངོ་བ་མ་མཆིས་དགྱེས་པ་རྒྱ་ཆེན་བརྙེས་པར་འགྱུར། །ཁྱོད་ལ་སྲས་མངའ་མཚན་གྱིས་ཡན་ལག་བརྒྱན་པ་སྐྱེ་བར་འགྱུར། །རྒྱལ་པོའི་རིགས་སུ་རིགས་ལྡན་འཁོར་ལོས་སྒྱུར་བ་ཆེ་བ་ཉིད། །གལ་ཏེ་འདོད་པ་དག་དང་རྒྱལ་སྲིད་ཕོ་བྲང་སྤངས་གྱུར་ཏེ། །འཇིག་རྟེན་ཀུན་ལ་ཐུགས་བརྩེ་ཆགས་མེད་རབ་ཏུ་བྱུང་གྱུར་ན། །དེ་ནི་འཇིག་རྟེན་གསུམ་ན་སྦྱིན་གནས་སངས་རྒྱས་འགྱུར་བ་སྟེ། །བདུད་རྩི་མཆོག་གི་རོ་ཡིས་འཇིག་རྟེན་ཐམས་ཅད་ཚིམ་མཛད་འགྱུར། །དེ་སྐད་ཚིག་སྙན་ལུང་བསྟན་ཏེ། །རྒྱལ་པོའི་ཕོ་བྲང་ཟན་ཟོས་ནས། །བྱ་དགའ་བྱིན་པ་བླངས་ནས་སུ། །བྲམ་ཟེ་དེ་དག་ཕྱིར་དོང་ངོ ། །དགེ་སློང་དག་དེ་ལྟར་རྒྱལ་པོ་ཟས་གཙང་མས་བྲམ་ཟེ་མཚན་དང་ལྟས་ཤེས་ཤིང་རྣམ་པར་འབྱེད་པ་དང ། རྨི་ལམ་གྱི་གཞུང་ཤེས་པ་དག་ལས་དེ་སྐད་ཀྱི་ཚིག་དེ་ཐོས་ནས། ཚིམ་ཞིང་མགུ་སྟེ། ཡི་རངས་ལ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས། བྲམ་ཟེ་དེ་དག་བཟའ་བ་དང་བཏུང་བ་དང ། མྱང་བ་མང་པོ་ཉམས་སུ་བསོད་པས་ཚིམ་ཞིང་ངོམས་པར་བྱས་ནས། བྱ་དགའ་བྱིན་ཏེ་བཀྱེའོ། །དེ་ཉིད་ཀྱི་ཚེ་གྲོང་ཁྱེར་ཆེན་པོ་སེར་སྐྱའི་གནས་ཀྱི་གྲོང་ཁྱེར་ཆེན་པོ་དེའི་སྒོ་བཞི་ན། གྲོང་ཁྱེར 41.37b གྱི་བཞི་མདོ་དང་སུམ་མདོ་ཐམས་ཅད་དུ་སྦྱིན་པ་བྱིན་ཏེ། ཇི་ཙམ་དུ་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། ཟས་འདོད་པ་རྣམས་ལ་ནི་ཟས། སྐོམ་འདོད་པ་རྣམས་ལ་ནི་སྐོམ། གོས་འདོད་པ་རྣམས་ལ་ནི་གོས། བཞོན་པ་འདོད་པ་རྣམས་ལ་ནི་བཞོན་པ། སྤོས་འདོད་པ་རྣམས་ལ་ནི་སྤོས། ཕྲེང་བ་འདོད་པ་རྣམས་ལ་ནི་ཕྲེང་བ། བྱུག་པ་འདོད་པ་རྣམས་ལ་ནི་བྱུག་པ། མལ་ཆ་འདོད་པ་རྣམས་ལ་ནི་མལ་ཆ། གནས་འདོད་པ་རྣམས་ལ་ནི་གནས། འཚོ་བ་འདོད་པ་རྣམས་ལ་ནི་འཚོ་བ་བྱིན་ནོ། །དགེ་སློང་དག་དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། ལྷ་མོ་སྒྱུ་འཕྲུལ་འདི་ཁྱིམ་གང་ན་འདུག་ན་བདེ་ཞིང་ཉོན་མོངས་པ་མེད་པར་འདུག་པར་འགྱུར་སྙམ་པ་དང ། དེ་ནས་སྐད་ཅིག་དེ་ཉིད་ལ་རྒྱལ་པོ་ཆེན་པོ་བཞི་རྒྱལ་པོ་ཟས་གཙང་མའི་དྲུང་དུ་འོངས་ཏེ་འདི་སྐད་ཅེས་སྨྲས་སོ། །ལྷ་ཐུགས་ལས་སུ་མ་མཛད་པར་བཏང་སྙོམས་སུ་བདེ་བར་བཞུགས་ཤིག་།བདག་ཅག་གིས་བྱང་ཆུབ་སེམས་དཔའི་ཕོ་བྲང་བཤམ་མོ། །དེ་ནས་ལྷའི་དབང་པོ་བརྒྱ་བྱིན་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །སྐྱོང་བའི་གཞལ་མེད་ཁང་རྣམས་ངན། །སུམ་བཅུ་རྩ་གསུམ་པ་ཡི་བཟང ། །བྱང་ཆུབ་སེམས་དཔའི་ཕོ་བྲང་ནི། །རྣམ་པར་རྒྱལ་ཙམ་བདག་གིས་དབུལ། །དེ་ནས་ལྷའི་བུ་རབ་འཐབ་བྲལ་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །ཁོ་བོའི་ཁང་ཁྱིམ་མཐོང་གྱུར་ནས། །བརྒྱ་བྱིན་བྱེ་བ་ངོ་མཚར་གྱུར། །འཐབ་བྲལ་རབ་ཀྱི་དཔལ་ལྡན་ཁང ། །རྒྱལ་བའི་སྲས་ལ་བདག་འབུལ་ལོ། །དེ་ནས་ལྷའི་བུ་ཡོངས་སུ་དགའ་ལྡན་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །གྲགས་པ་ཆེ་མངའ་སྔོན་ཆད་ནི། །དགའ་ལྡན་གང་དུ་བཞུགས་གྱུར་པ། །ཕོ་བྲང་དམ་པ་དགྱེས་པ་དེ། །རྒྱལ་བའི་སྲས་ལ་བདག་འབུལ་ལོ། ། 41.38a དེ་ནས་ལྷའི་བུ་རབ་འཕྲུལ་དགའ་རྒྱལ་པོ་ཟས་གཙང་མའི་གན་དུ་འོངས་ཏེ། འདི་སྐད་ཅེས་སྨྲས་སོ། །དཔལ་ལྡན་ཡིད་ལས་གྲུབ་པའི་ཁང ། །དེ་ནི་རིན་ཆེན་རང་བཞིན་ཏེ། །བྱང་ཆུབ་སེམས་དཔའ་མཆོག་དོན་དུ། །རྒྱལ་པོ་བདག་གིས་དབུལ་བར་བགྱིས། །དེ་ནས་ལྷའི་བུ་གཞན་འཕྲུལ་དབང་བྱེད་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །འདོད་པའི་ཁམས་གནས་ཇི་སྙེད་པ། །གཞལ་མེད་ཁང་མཛེས་གང་ཡོད་པ། །བདག་གི་གཞལ་མེད་ཁང་དྲུང་ན། །འོད་དང་མདོག་ཀྱང་སྦོར་བར་སྣང ། །དེ་བས་དཔལ་ལྡན་བདག་གིས་དབུལ། །བྱང་ཆུབ་སེམས་དཔའ་མཆོད་པའི་ཕྱིར། །རིན་ཆེན་རང་བཞིན་ཕོ་བྲང་བཟང ། །དེ་ནི་རྒྱལ་པོ་བླང་བར་གྱིས། །ལྷ་ཡི་མེ་ཏོག་རབ་བཀང་སྟེ། །ལྷ་ཡི་སྤོས་ཀྱི་ངད་ལྡང་བའི། །ཕོ་བྲང་ཡངས་པ་བདག་གིས་དབུལ། །དེར་ནི་ལྷ་མོ་བཞུགས་པར་གྱིས། །དགེ་སློང་དག་དེ་ལྟར་འདོད་པ་ན་སྤྱོད་པའི་ལྷའི་དབང་པོ་ཐམས་ཅད་ཀྱིས་བྱང་ཆུབ་སེམས་དཔའ་ལ་མཆོད་པའི་ཕྱིར་སེར་སྐྱའི་གནས་ཀྱི་གྲོང་ཁྱེར་ཆེན་པོ་དམ་པ་དེར་རང་རང་གི་ཁྱིམ་ཕུལ་བར་གྱུར་ཏོ། །རྒྱལ་པོ་ཟས་གཙང་མས་ཀྱང་མིའི་ལས་ནི་འདས་ཀྱི་ལྷ་ཡིར་ནི་མ་གྱུར་པ་བཤམས་པར་གྱུར་ཏེ། དེ་ལ་བྱང་ཆུབ་སེམས་དཔའ་བཀོད་པ་ཆེན་པོའི་ཏིང་ངེ་འཛིན་གྱི་མཐུས་ཁྱིམ་དེ་དག་ཐམས་ཅད་དུ་ལྷ་མོ་སྒྱུ་འཕྲུལ་མངོན་པར་བསྟན་ཏོ། །བྱང་ཆུབ་སེམས་དཔའ་ལྷ་མོ་སྒྱུ་འཕྲུལ་གྱི་རུམ་ན་འདུག་པའི་ཚེ། གློ་གཡས་ཕྱོགས་ལོགས་སུ་སྐྱིལ་མོ་ཀྲུང་བཅས་ཏེ་གནས་པར་གྱུར་ཏོ། །ལྷའི་དབང་པོ་དེ་དག་ཐམས་ཅད་ཀྱང་སོ་སོ་ནས་བདག་ཉིད་ཀྱི་ཁྱིམ་ན་བྱང་ཆུབ་སེམས་དཔའི་མ་འདུག་གི་གཞན་མ་ཡིན་ནོ་ཞེས་དེ་ལྟར་ཤེས་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། ཏིང་འཛིན་བཀོད་པ་ཆེ་ལ་གནས་གྱུར་ཏེ། །སྤྲུལ་པ་བསམ་གྱིས་མི་ཁྱབ་སྤྲུལ་བྱས་ནས། །ལྷ་རྣམས་ཐམས་ཅད་བསམ 41.38b པ་རྫོགས་པར་བྱས། །རྒྱལ་པོའང་དེ་ལྟར་ཡིད་བཞིན་བསམ་པ་གྲུབ། །དེ་ནས་འཁོར་དེའི་ནང་ནས་ལྷའི་བུ་ཁ་ཅིག་འདི་སྙམ་དུ་སེམས་ཏེ། རྒྱལ་ཆེན་བཞིའི་རིས་ཀྱི་ལྷ་གང་ཡིན་པ་དེ་དག་ཀྱང་མིའི་ལུས་ཀྱི་དྲི་བྲོ་ན་སྐྱོ་ཞིང་འབྱོལ་ན། དེ་མ་ཡིན་པའི་ལྷ་གཞན་སུམ་བཅུ་རྩ་གསུམ་འམ། འཐབ་བྲལ་ལམ། དགའ་ལྡན་གྱི་ལྷའི་བུ་དག་ལྟ་སྨོས་ཀྱང་ཅི་དགོས་ན། ཇི་ལྟར་བྱང་ཆུབ་སེམས་དཔའ་གཙང་ཞིང་དྲི་ང་བ་དང་བྲལ་བ། འཇིག་རྟེན་ཐམས་ཅད་ལས་མངོན་པར་འཕགས་པ། སེམས་ཅན་རིན་པོ་ཆེ་དགའ་ལྡན་གྱི་ལྷའི་རིས་ནས་འཕོས་ཏེ། ཡུམ་གྱི་ལྷུམས་མིའི་ལུས་དྲི་མི་ཞིམ་པར་བཞུགས་པར་གྱུར་སྙམ་པ་དང ། དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཀུན་དགའ་བོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་བུད་མེད་ཀྱི་ལུས་ནི་སྨད་པ་ལགས་པ་དང ། འདོད་ཆགས་ལ་སྤྱོད་ཅེས་བགྱི་བའི་བར་དུ་དེ་བཞིན་གཤེགས་པས་གསུངས་པ་ངོ་མཚར་ཆེ་ན། བཅོམ་ལྡན་འདས་དེ་བས་ཀྱང་འཇིག་རྟེན་ཐམས་ཅད་ལས་མངོན་པར་འཕགས་པ། སྔོན་བྱང་ཆུབ་སེམས་དཔར་གྱུར་པ། འདི་ལྟར་དགའ་ལྡན་གྱི་ལྷའི་རིས་ནས་འཕོས་ཏེ། ཡུམ་གྱི་ལྷུམས་མིའི་ལུས་སུ་གློ་གཡས་ཕྱོགས་སུ་བརྟེན་ཏེ་བཞུགས་སོ། །ཞེས་བགྱི་བ་འདི་ནི་རབ་ཏུའང་ངོ་མཚར་ཆེ་སྟེ། བཅོམ་ལྡན་འདས། སྔོན་བཅོམ་ལྡན་འདས་ཀྱིས་དེ་ལྟར་མཛད་དོ་ཞེས་དེ་སྐད་དུ་སྨྲ་བར་ནི་བདག་ལ་སྤྲོ་བ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་ཞེས་བྱ་བ་གང་བྱང་ཆུབ་སེམས་དཔའ་མའི་རུམ་ན་གནས་པའི་ཡོངས་སུ་སྤྱད་པར་གྱུར་པ་མཐོང་བར་འདོད་དམ། གསོལ་པ། བཅོམ་ལྡན་འདས་དེའི་དུས་ནི་ད་ལགས་སོ། །བདེ་བར་གཤེགས་པ་དེའི་དུས་ནི་ད་ལགས་ཏེ། དེ་བཞིན་གཤེགས་པས་བྱང་ཆུབ་སེམས་དཔའི 41.39a ཡོངས་སུ་སྤྱད་པ་དེ་བསྟན་ཏེ་མཐོང་ན་གློ་བ་དགའ་འོ། །དེ་ནས་བཅོམ་ལྡན་འདས་ཀྱིས་རྣམ་པ་དེ་ལྟ་བུའི་མཚན་མ་མཛད་དེ། དེས་མི་མཇེད་ཀྱི་བདག་པོ་ཚངས་པ། ཚངས་པ་འབུམ་ཕྲག་དྲུག་བཅུ་རྩ་བརྒྱད་དང་ལྷན་ཅིག་ཚངས་པའི་འཇིག་རྟེན་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་ཕྱིན་ནས། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདུད་ཅིང་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་མི་མཇེད་ཀྱི་བདག་པོ་ཚངས་པ་ལ་བཀའ་སྩལ་པ། ཚངས་པ་ཁྱོད་ཀྱིས་སྔོན་ང་བྱང་ཆུབ་སེམས་དཔའར་གྱུར་ཅིང་མའི་རུམ་ན་ཟླ་བ་ཅུར་འདུག་འདུག་པའི་བྱང་ཆུབ་སེམས་དཔའི་ཡོངས་སུ་སྤྱད་པ་བླངས་སམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་སོ། །བཀའ་སྩལ་པ། ཚངས་པ་ད་དེ་ག་ལ་ཡོད་སྟོན་ཅིག་།གསོལ་པ། བཅོམ་ལྡན་འདས་དེ་ནི་ཚངས་པའི་འཇིག་རྟེན་ན་མཆིས་སོ། །བཀའ་སྩལ་པ། ཚངས་པ་དེའི་ཕྱིར་ཟླ་བ་བཅུ་པའི་བྱང་ཆུབ་སེམས་དཔའི་ཡོངས་སུ་སྤྱད་པ་དེ་འདིར་ཁྱོད་ཀྱིས་སྟོན་ཅིག་དང ། ཇི་ཙམ་དུ་འདུས་བྱས་པ་ཤེས་པར་འགྱུར་རོ། །དེ་ནས་མི་མཇེད་ཀྱི་བདག་པོ་ཚངས་པས། ཚངས་པ་དག་ལ་འདི་སྐད་ཅེས་སྨྲས་སོ། །ཁོ་བོས་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་བླང་གིས་དེའི་བར་དུ་ཁྱེད་འཁོད་ཅིག་།དེ་ནས་མི་མཇེད་ཀྱི་བདག་པོ་ཚངས་པ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་མི་སྣང་བར་གྱུར་ནས་སྐད་ཅིག་དེ་ཉིད་ལ་ཚངས་པའི་འཇིག་རྟེན་དུ་ཕྱིན་ཏོ། །དེ་ནས་མི་མཇེད་ཀྱི་བདག་པོ་ཚངས་པས་ལྷའི་བུ་ཚངས་པ 41.39b བཟང་པོ་ལ་འདི་སྐད་ཅེས་སྨྲས་སོ། །གྲོགས་པོ་ཁྱོད་སོང་ལ་ཚངས་པའི་འཇིག་རྟེན་འདི་མན་ཆད་སུམ་བཅུ་རྩ་གསུམ་གྱི་གནས་ཡན་ཆད་དུ་སྒྲ་སྒྲོགས་ཏེ། བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་བདག་ཅག་གིས་དེ་བཞིན་གཤེགས་པའི་སྤྱན་སྔར་བཀུར་ན་ཁྱེད་ཀྱི་ནང་ནས་མཐོང་བར་སུ་དགའ་བ་མྱུར་དུ་ཤོག་ཤིག་ཅེས་སྒྲས་གོ་བར་གྱིས་ཤིག་།དེ་ནས་མི་མཇེད་ཀྱི་བདག་པོ་ཚངས་པས། ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་དང་ལྷན་ཅིག་ཏུ་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་བླངས་ཏེ། ཚངས་པའི་གཞལ་མེད་ཁང་ཆེན་པོ་དཔག་ཚད་སུམ་བརྒྱ་པའི་སྟེང་དུ་བཞག་ནས། ལྷ་བྱེ་བ་ཁྲག་ཁྲིག་བརྒྱ་སྟོང་དུ་མས་ཀུན་ནས་བསྐོར་ཏེ། འཛམ་བུའི་གླིང་དུ་ཕབ་བོ། །དེའི་ཚེ་བཅོམ་ལྡན་འདས་ཀྱི་ཞབས་འབྲིང་དུ་འདོད་པ་ན་སྤྱོད་པའི་ལྷའི་བུ་འདུས་པ་ཆེན་པོར་གྱུར་ཏེ། བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་ཡང་ལྷའི་གོས་དང ། ལྷའི་ཕྲེང་བ་དང ། ལྷའི་སྤོས་དང ། ལྷའི་མེ་ཏོག་དང ། ལྷའི་རོལ་མོའི་དབྱངས་སྒྲ་དང ། ལྷའི་ལོངས་སྤྱོད་རྣམས་ཀྱིས་མངོན་པར་འདུས་བྱས་པར་གྱུར་ཅིང་ལྷ་དབང་ཆེ་བར་གྲགས་པ་དག་གིས་ཡོངས་སུ་བསྐོར་བར་གྱུར་པ་ནི་འདི་ཙམ་སྟེ། ལྷའི་དབང་པོ་བརྒྱ་བྱིན་རྒྱ་མཚོ་ཆེན་པོའི་དབུས་སུ་འདུག་ནས་རྒྱང་རིང་པོ་ནས་གདོང་ཐལ་མོས་བསྐྱབས་ཏེ་མགོ་བྱོ་ནས་བལྟས་ཀྱང་མཐོང་བར་མི་ནུས་སོ། །དེ་ཅིའི་ཕྱིར་ཞེ་ན། ལྷའི་ནང་ན་ཚངས་པ་དག་ནི་མཐུ་ཆེ་བ་སྟེ། སུམ་བཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷ་དག་ཀྱང་དེ་དག་གི་དྲུང་ན་དམའ་བ་ཡིན་ན། ལྷའི་དབང་པོ་བརྒྱ་བྱིན་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཀྱིས་དེའི་ཚེ། ལྷའི་རོལ་མོ་དབྱངས་སྒྲའི་སྒྲ་དེ་དག་ཞི་བར་མཛད་དོ། །དེ་ཅིའི་ཕྱིར་ཞེ་ན། དེ་ཐོས་པ་ཙམ་གྱིས་འཛམ་བུའི་གླིང་གི་མི་རྣམས་མྱོ་མྱོ་པོར 41.40a འགྱུར་དུ་འོང་བའི་ཕྱིར་རོ། །དེ་ནས་རྒྱལ་པོ་ཆེན་པོ་བཞི་ལྷའི་དབང་པོ་བརྒྱ་བྱིན་གྱི་དྲུང་དུ་ལྷགས་ནས་འདི་སྐད་ཅེས་སྨྲས་སོ། །ལྷའི་དབང་པོ་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་འདི་བདག་ཅག་གིས་མཐོང་བར་མི་ནུས་ན་ཇི་ལྟར་བགྱི། དེས་དེ་དག་ལ་སྨྲས་པ། གྲོགས་པོ་དག་ཁོ་བོས་ཀྱང་ཇི་ལྟར་བྱ། ཁོ་བོ་ཉིད་ཀྱིས་ཀྱང་མཐོང་བར་མི་ནུས་སོ། །གྲོགས་པོ་དག་འོན་ཀྱང་དེ་ནི་ནམ་བཅོམ་ལྡན་འདས་ཀྱི་སྤྱན་སྔར་ཕུལ་བ་དེའི་ཚེ་མཐོང་གྲང་ངོ ། །དེ་དག་གིས་སྨྲས་པ། ལྷའི་དབང་པོ་དེ་བས་ན་ཅི་ནས་ཀྱང་མྱུར་དུ་མཐོང་བར་འགྱུར་བ་དེ་ལྟར་མཛད་དུ་གསོལ། སྨྲས་པ། གྲོགས་པོ་དག་ལྷའི་བུ་མངོན་པར་འཕགས་པ་མངོན་པར་འཕགས་པ་དེ་དག་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ། དགའ་བར་བྱ་བའི་ཚིག་བརྗོད་པར་གྱུར་གྱི་བར་དུ་སྡོད་ཅིག་།དེ་ནས་དེ་དག་ཕྱོགས་གཅིག་ཏུ་འཁོད་དེ་མགོ་བྱོ་ནས་བཅོམ་ལྡན་འདས་ལོགས་སུ་ལྟ་ཞིང་འཁོད་པར་གྱུར་ཏོ། །དེ་ནས་མི་མཇེད་ཀྱི་བདག་པོ་ཚངས་པ་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་པོ་དེ་དག་དང་ལྷན་ཅིག་ཏུ་བྱང་ཆུབ་སེམས་དཔའི་ཡོངས་སུ་སྤྱད་པར་བྱ་བ་རིན་པོ་ཆེ་བཀོད་པ་དེ་ཁྱེར་ཏེ། དེ་བཞིན་གཤེགས་པ་ག་ལ་བ་དེར་ཕུལ་ལོ། །བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་ནི་གཟུགས་བཟང་བ་མཛེས་པ་བལྟ་ན་སྡུག་པ་གྲུ་བཞི་ལྷམ་པ། ཀ་བ་བཞི་ཟུག་པ། སྟེང་ཁང་པ་བརྩེགས་པས་ལེགས་པར་བརྒྱན་པ་སྟེ། དེའི་ཚད་ནི་འཕང་དུ་འདི་ལྟ་སྟེ། དཔེར་ན་བྱིས་པ་བཙས་ནས་ཟླ་བ་དྲུག་ལོན་པ་ཙམ་མོ། །ཁང་པ་བརྩེགས་པ་དེའི་ནང་དུ་ཁྲི་བཤམས་པ་ནི་འདི་ལྟ་སྟེ་དཔེར་ན་བྱིས་པ་བཙས་ནས་ཟླ་བ་དྲུག་ལོན་པ་འདུག་པའི་སྟེགས་བུ་ཙམ་མོ། །བྱང་ཆུབ་སེམས་དཔའི་ཡོངས་སུ་སྤྱད་པར་བྱ་བ་རིན་པོ་ཆེ་བཀོད་པ་དེ་ཡི་ཁ་དོག་དང་དབྱིབས་ནི་འདི་ལྟ་བུ་སྟེ། ལྷ་དང་བཅས་པའི 41.40b འཇིག་རྟེན་ན་དེའི་དབྱིབས་དང་ཁ་དོག་འདྲ་བ་གང་ཡང་མེད་དོ། །ལྷ་རྣམས་ཀྱིས་དེ་མཐོང་ན་ཡང་མིག་འཁྲུགས་ཤིང་ངོ་མཚར་དུ་འགྱུར་རོ། །དེ་དེ་བཞིན་གཤེགས་པའི་སྤྱན་སྔར་བཞག་ན་ལམ་མེ། ལྷན་ནེ། ལྷང་ངེ་སྟེ། དཔེར་ན་མགར་བ་མཁས་པས་ཤིན་དུ་གཞུ་སྟེ། ལེགས་པར་སྦྱངས་ནས། དྲི་མའི་སྐྱོན་མེད་པར་བྱས་པའི་གསེར་བཞིན་དུ་ཁང་པ་བརྩེགས་པ་དེ་རྣམ་པར་མཛེས་སོ། །བྱང་ཆུབ་སེམས་དཔའི་ཡོངས་སུ་སྤྱད་པ་དེའི་ནང་དུ་ཁྲི་བཤམས་པ་ནི། བྱང་ཆུབ་སེམས་དཔའི་དུང་མགྲིན་མ་གཏོགས་པ་ལྷ་དང་བཅས་པའི་འཇིག་རྟེན་ན་དེའི་དབྱིབས་དང ། ཁ་དོག་འདྲ་བ་གང་ཡང་མེད་དོ། །ཚངས་པ་ཆེན་པོས་གོས་བགོས་པ་དེ་ཡང་བྱང་ཆུབ་སེམས་དཔའི་ཁྲི་དེའི་དྲུང་ན་མཛེས་པར་མི་སྣང་སྟེ། འདི་ལྟ་སྟེ་དཔེར་ན། རླུང་དང་ཆར་གྱིས་བཏབ་པའི་ལ་བ་ནག་པོ་བཞིན་ནོ། །ཁང་པ་བརྩེགས་པ་དེ་ནི་ཙན་དན་སྦྲུལ་གྱི་སྙིང་པོ་ལས་བྱས་པ་སྟེ། དེའི་ཕྱེ་མ་ཞོ་གཅིག་ལའང་སྟོང་གི་འཇིག་རྟེན་གྱི་ཁམས་ཀྱིས་རིན་དུ་མི་ཆོག་གོ། །ཁང་པ་བརྩེགས་པ་དེ་ནི་ཙན་དན་སྦྲུལ་གྱི་སྙིང་པོ་དེ་ལྟ་བུས་ཀུན་ནས་བསྐོར་བ་སྟེ། ཁང་པ་བརྩེགས་པ་དེ་དང་འདྲ་བ་གཉིས་པ་གཅིག་ཀྱང་ཁང་པ་བརྩེགས་པ་དང་པོ་དེའི་ནང་ན་མ་ཆགས་མ་རེག་པར་འདུག་གོ། །ཁང་པ་བརྩེགས་པ་དེ་ཁོ་ན་དང་འདྲ་བ་གསུམ་པ་གཅིག་ཀྱང་ཁང་པ་བརྩེགས་པ་གཉིས་པ་དེའི་ནང་ན་མ་རེག་མ་ཆགས་པར་འདུག་གོ། །སྤོས་ཀྱི་ཁང་པ་བརྩེགས་པ་གསུམ་པ་དེའི་ནང་དུ་ཁྲི་དེ་བཞག་སྟེ་གདན་བཏིང་ངོ ། །ཙན་དན་སྦྲུལ་གྱི་སྙིང་པོ་དེའི་ཁ་དོག་ནི་རྣམ་པ་འདི་ལྟ་བུ་སྟེ། དཔེར་ན་བཻ་དཱུརྱ་སྔོན་པོ་རིགས་དམ་པ་དང་ལྡན་པ་བཞིན་ནོ། །སྤོས་ཀྱི་ཁང་པ་བརྩེགས་པ་དེའི་འཁོར་ན་མེ་ཏོག་ལྷའི་ལས་འདས་པ་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་མ་བསྐྱེད་པར་བྱང་ཆུབ་སེམས་དཔའི་སྔོན་གྱི་དགེ་བའི་རྩ་བའི་རྣམ་པར་སྨིན་པས་ཁང་པ་བརྩེགས 41.41a པ་དེར་སྐྱེའོ། །བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་ནི་རྡོ་རྗེའི་རང་བཞིན་ཏེ། སྲ་ཞིང་བརྟན་ལ་མི་ཤིགས་པ་སྟེ། ཀ་ཙ་ལིན་དིའི་གོས་ལྟར་རེག་ན་བདེ་བའོ། །འདོད་པ་ན་སྤྱོད་པའི་ལྷ་རྣམས་ཀྱི་གནས་བཀོད་པ་གང་ཇི་སྙེད་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེར་ཀུན་དུ་སྣང་ངོ ། །གང་གི་ནུབ་མོ་བྱང་ཆུབ་སེམས་དཔའ་མའི་རུམ་དུ་འཇུག་པ་དེ་ཡི་ནུབ་མོ་འོག་གི་ཆུའི་ཕུང་པོ་ནས་བཟུང་སྟེ། ས་ཆེན་པོའི་རྔམས་དཔག་ཚད་འབུམ་ཕྲག་དྲུག་བཅུ་རྩ་བརྒྱད་བརྟོལ་ཏེ་པད་མ་བྱུང་བས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་སོ། །པད་མ་དེ་ནི་ཁ་ལོ་སྒྱུར་བ་སྐྱེས་བུའི་དམ་པ་དང ། ཚངས་པ་ཆེན་པོ་བརྒྱ་ཕྲག་བཅུའི་སྟོབས་ལ་དབང་བས་མཐོང་དུ་ཟད་ཀྱི་གཞན་སུས་ཀྱང་མཐོང་བ་མེད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སྙིང་ཁུ་དང ། སྙིང་པོ་དང ། བཅུད་ཇི་སྙེད་ཡོད་པ་དེ་དག་ཐམས་ཅད་པད་མ་ཆེན་པོ་དེ་ལ་ཟིལ་དངར་གྱི་ཐིགས་པར་ཆགས་ཏེ། འདུག་ནས་དེ་ཚངས་པ་ཆེན་པོས་བཻ་དཱུརྱའི་སྣོད་བཟང་པོས་བླངས་ཤིང་བྱང་ཆུབ་སེམས་དཔའ་ལ་ཕུལ་ནས་བྱང་ཆུབ་སེམས་དཔས་ཀྱང་དེ་བླངས་ཏེ་ཚངས་པ་ཆེན་པོ་ལ་སྙིང་བརྩེ་བའི་ཕྱིར་འཐུངས་པར་གྱུར་ཏོ། །སྙིང་ཁུའི་ཐིགས་པ་དེ་འཐུངས་ན་བྱང་ཆུབ་སེམས་དཔས་སྲིད་པ་ཐ་མ་པ་བྱང་ཆུབ་སེམས་དཔའི་ས་ཐམས་ཅད་ཡོངས་སུ་རྫོགས་པ་མ་གཏོགས་པར་དེ་ཡང་དག་པར་བདེ་བར་ཞུ་བར་ནུས་པ་སེམས་ཅན་གྱི་ཁམས་ན་སེམས་ཅན་དེ་ལྟ་བུ་དེ་གང་ཡང་མེད་དོ། །ལས་གང་གི་རྣམ་པར་སྨིན་པས་སྙིང་ཁུའི་ཐིགས་པ་དེ་ལྟ་བུ་བྱང་ཆུབ་སེམས་དཔའ་ལ་ཡོད་པར་གྱུར་ཞེ་ན། བྱང་ཆུབ་སེམས་དཔས་སྔོན་ཡུན་རིང་པོར་བྱང་ཆུབ་སེམས་དཔའི་སྤྱོད་པ་སྤྱད་པའི་ཚེ། སེམས་ཅན་ནད་པ་དག་ལ་སྨན་བྱིན་པ་དང ། སེམས་ཅན་བསམ་པ་ལ་རྟེན་པ་རྣམས་ཀྱི་བསམ་པ་ཡོངས་སུ 41.41b བསྐང་བ་དང ། སྐྱབས་སུ་འོངས་པ་རྣམས་ཡོངས་སུ་མ་བཏང་བ་དང ། རྟག་པར་མེ་ཏོག་གི་ཕུད་དང ། འབྲས་བུའི་ཕུད་དང ། རོའི་ཕུད་དེ་བཞིན་གཤེགས་པ་རྣམས་དང ། དེ་བཞིན་གཤེགས་པའི་མཆོད་རྟེན་རྣམས་དང ། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་རྣམས་དང ། ཕ་དང་མ་ལ་ཕུལ་ཞིང་ཕྱིས་བདག་ཉིད་ཡོངས་སུ་སྤྱོད་སྤྱོད་པས་ལས་དེའི་རྣམ་པར་སྨིན་པས་ཚངས་པ་ཆེན་པོ་ཟིལ་དངར་གྱི་ཐིགས་པ་དེ་བྱང་ཆུབ་སེམས་དཔའ་ལ་འབུལ་ལོ། །ཁང་པ་བརྩེགས་པ་དེར་གནས་ཀྱི་ཁྱད་པར་དགའ་བ་དང ། རྩེད་མོ་དང ། ཕྲེང་བ་བརྒྱུས་པ་དང་ལྡན་པ་འཕགས་པ་འཕགས་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་སྔོན་གྱི་ལས་ཀྱི་རྣམ་པར་སྨིན་པས་དེར་བྱུང་བར་སྣང་ངོ ། །བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེར་གོས་སྟོང་ཕྲག་བརྒྱའི་རྒྱན་ཅེས་བྱ་བ་འཕྲུགས་གཅིག་བྱུང་སྟེ། དེའི་བྱུང་བ་ནི་བྱང་ཆུབ་སེམས་དཔའ་སྲིད་པ་ཐ་མ་པ་མ་གཏོགས་པར་སེམས་ཅན་གྱི་རིས་ན་སེམས་ཅན་དེ་ལྟ་བུ་དེ་གང་ཡང་མེད་དོ། །གཟུགས་དང ། སྒྲ་དང ། དྲི་དང ། རོ་དང ། རེག་མཆོག་ཏུ་བྱ་བ་དམ་པ་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཁང་པ་བརྩེགས་པ་དེ་ནི་མེད་པ་གང་ཡང་མེད་དོ། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཞི་པ། ཡོངས་སུ་སྤྱད་པར་བྱ་བ་ཁང་པ་བརྩེགས་པ་དེ་ནི་འདི་ལྟར་ཕྱི་ནང་ཤིན་དུ་གྲུབ་པ། འདི་ལྟར་ཤིན་དུ་ཡོངས་སུ་རྫོགས་པ་སྟེ། འདི་ལྟ་སྟེ་དཔེར་ན། ཡུལ་ཀ་ལིང་ཀ་ནས་བྱུང་བའི་དར་ལྟར་རེག་ན་བདེ་བའོ། །དེ་ཡང་འོལ་བྱིར་བསྟན་པར་ཟད་ཀྱི། དེ་ལ་དཔེ་མེད་དོ། །བྱང་ཆུབ་སེམས་དཔའི་སྔོན་གྱི་སྨོན་ལམ་གྱིས་འདི་ནི་བསམས་པས་འགྲུབ་སྟེ། གདོན་མི་ཟ་བར་བྱང་ཆུབ་སེམས་དཔའ་སེམས 41.42a དཔའ་ཆེན་པོ་མིའི་འཇིག་རྟེན་དུ་སྐྱེ་བ་དང ། མངོན་པར་བྱུང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཆོས་ཀྱི་འཁོར་ལོ་བསྐོར་བ་དང ། མ་གང་གི་རུམ་དུ་སྐྱེ་བར་འགྱུར་བ་དེའི་རུམ་གཡས་པར་ཁང་པ་བརྩེགས་པ་རིན་པོ་ཆེ་བཀོད་པ་དམ་པ་སྔར་མངོན་པར་འགྲུབ་ཅིང ། ཕྱིས་བྱང་ཆུབ་སེམས་དཔའ་དགའ་ལྡན་གྱི་གནས་ནས་འཕོས་ཏེ་ཁང་པ་བརྩེགས་པ་དེར་སྐྱིལ་དཀྲུང་བཅས་ནས་འདུག་པར་འབྱུང་བ་དང ། བྱང་ཆུབ་སེམས་དཔའ་སྲིད་པ་ཐ་མ་པའི་ལུས་ནུར་ནུར་པོ་དང ། མེར་མེར་པོ་དང ། ལྡར་ལྡར་པོ་དང ། རེང་རེང་པོར་འགྱུར་བ་མེད་ཅིང ། ཡན་ལག་དང ། ཉིང་ལག་དང ། མཚན་ཐམས་ཅད་ཕུན་སུམ་ཚོགས་པར་འདུག་བཞིན་དུ་འབྱུང་ལ། ལྷ་མོ་སྒྱུ་འཕྲུལ་གྱི་རྨི་ལམ་དུ་གླང་པོ་ཆེན་པོ་འོངས་པར་མཐོང་བ་འདི་ནི་ཆོས་ཉིད་དོ། །དེ་དེ་ལྟར་འདུག་པ་ལ་ལྷའི་དབང་པོ་བརྒྱ་བྱིན་དང ། རྒྱལ་པོ་ཆེན་པོ་བཞི་དང ། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང ། གང་ལས་ལག་ན་རྡོ་རྗེ་སྐྱེས་པའི་གནོད་སྦྱིན་གྱི་རིགས་གསང་བ་པ་ཞེས་བྱ་བ་དེ་དག་བྱང་ཆུབ་སེམས་དཔའ་མའི་རུམ་དུ་ཞུགས་པར་ཤེས་ནས་རྟག་ཏུ་རྒྱུན་མི་འཆད་པར་ཕྱི་བཞིན་འབྲང་བར་གྱུར་ཏོ། །བྱང་ཆུབ་སེམས་དཔའ་ལ་རིམ་གྲོ་བྱེད་པའི་ལྷ་མོ་བཞི་ཡོད་དེ། ཨུ་ཁུ་ལི་ཞེས་བྱ་བ་དང ། མུ་ཁུ་ལི་ཞེས་བྱ་བ་དང ། རྒྱལ་མཚན་ལྡན་པ་ཞེས་བྱ་བ་དང ། འོད་དང་ལྡན་པ་ཞེས་བྱ་བ་སྟེ། བཞི་པོ་དེ་དག་ཀྱང་བྱང་ཆུབ་སེམས་དཔའ་མའི་རུམ་དུ་ཞུགས་པར་ཤེས་ནས་རྟག་ཏུ་རྒྱུན་མི་འཆད་པར་སྲུང་ངོ ། །ལྷའི་དབང་པོ་བརྒྱ་བྱིན་ཡང་ལྷའི་བུ་ལྔ་བརྒྱ་ཙམ་དང་ལྷན་ཅིག་བྱང་ཆུབ་སེམས་དཔའ་མའི་རུམ་དུ་ཞུགས་པ་ཤེས་ནས། རྟག་ཏུ་རྒྱུན་མི་འཆད་པར་ཕྱི་བཞིན་འབྲང་བར་གྱུར་ཏོ། །བྱང་ཆུབ་སེམས་དཔའ་མའི་རུམ་དུ་ཞུགས་པའི་ལུས་ནི་རྣམ་པ་འདི་ལྟ་བུར་གྱུར་ཏེ། དཔེར་ན་མཚན་མོ 41.42b མུན་པ་ཤིན་དུ་གནག་པའི་ནང་ན་རིའི་སྤོ་ལ་མེའི་ཕུང་པོ་ཆེན་པོ་འདུག་པ་ནི་དཔག་ཚད་གཅིག་ནས་ཀྱང་སྣང་ངོ ། །དཔག་ཚད་ལྔའི་བར་ནས་ཀྱང་སྣང་ངོ ། །དེ་བཞིན་དུ་བྱང་ཆུབ་སེམས་དཔའ་མའི་རུམ་དུ་ཞུགས་པའི་ལུས་མངོན་པར་གྲུབ་པ་ཡང་དེ་ལྟ་བུར་གྱུར་ཏེ། འོད་གསལ་ཞིང་གཟུགས་བཟང་ལ་མཛེས་ཤིང་བལྟ་ན་སྡུག་པར་གྱུར་པ་དེ། ཁང་པ་བརྩེགས་པ་དེའི་ནང་དུ་སྐྱིལ་མོ་དཀྲུང་དུ་འདུག་ན་གསེར་གྱི་ས་ལེ་སྦྲམ་རིགས་དང་ལྡན་པ་རིན་པོ་ཆེ་བཻ་དཱུརྱས་བརྒྱན་པ་ལྟར་ཤིན་དུ་མཛེས་པར་གྱུར་ཏོ། །བྱང་ཆུབ་སེམས་དཔའི་མས་ཀྱང་བྱང་ཆུབ་སེམས་དཔའ་རུམ་ན་འདུག་པ་མཐོང་བར་གྱུར་ཏོ། །འདི་ལྟ་སྟེ་དཔེར་ན་སྤྲིན་གྱི་ཚོགས་ཆེན་པོའི་ནང་ནས་གློག་བྱུང་བ་ནི་སྣང་བ་ཆེན་པོ་བསྐྱེད་དོ། །དེ་བཞིན་དུ་བྱང་ཆུབ་སེམས་དཔའ་མའི་རུམ་ན་འདུག་པ་ཡང་དཔལ་དང ། གཟི་བརྗིད་དང ། ཁ་དོག་གིས་རིན་པོ་ཆེའི་ཁང་པ་བརྩེགས་པ་དང་པོ་དེ་སྣང་བར་བྱེད་དོ། །སྣང་བར་བྱས་ནས་སྤོས་ཀྱི་ཁང་པ་བརྩེགས་པ་གཉིས་པ་སྣང་བར་བྱེད་དོ། །སྤོས་ཀྱི་ཁང་པ་བརྩེགས་པ་གཉིས་པ་སྣང་བར་བྱས་ནས། སྤོས་ཀྱི་ཁང་པ་བརྩེགས་པ་གསུམ་པ་སྣང་བར་བྱེད་དོ། །སྤོས་ཀྱི་ཁང་པ་བརྩེགས་པ་གསུམ་པ་སྣང་བར་བྱས་ནས་མའི་ལུས་ཐམས་ཅད་སྣང་བར་བྱེད་དོ། །དེ་སྣང་བར་བྱས་ནས་དེ་སྟན་གང་ལ་འདུག་པ་དེ་སྣང་བར་བྱེད་དོ། །དེ་སྣང་བར་བྱས་ནས་ཁྱིམ་ཐམས་ཅད་སྣང་བར་བྱེད་དོ། །ཁྱིམ་ཐམས་ཅད་སྣང་བར་བྱས་ནས་འོད་འཕྲོ་བ་ཁྱིམ་གྱི་སྟེང་དུ་བྱུང་སྟེ། ཤར་ཕྱོགས་སྣང་བར་བྱེད་དོ། །དེ་བཞིན་དུ་ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་བཅུ་ཀུན་དུ་རྒྱང་གྲགས་ཙམ་དུ་ཕྱོགས་རེ་རེར་ཡང་བྱང་ཆུབ་སེམས་དཔའ་མའི་རུམ་ན་འདུག་པའི་དཔལ་དང་གཟི་བརྗིད་དང་ཁ་དོག་གིས་སྣང་བར་བྱས་པར་གྱུར་ཏོ། །དགེ་སློང་དག་དེ་ལྟར་བྱང་ཆུབ་སེམས་དཔའ་དེ་བལྟ་བ་དང ། དེ་ལ་ཕྱག་བྱ་བ 41.43a དང ། བསྙེན་བཀུར་བྱ་བ་དང་ཆོས་མཉན་པའི་ཕྱིར་རྒྱལ་པོ་ཆེན་པོ་བཞི་དང ། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་གནོད་སྦྱིན་ལྔ་བརྒྱ་ཙམ་དག་དང་ལྷན་ཅིག་ཏུ་སྔ་དྲོའི་དུས་ཀྱི་ཚེ་འོངས་ཏེ། དེའི་ཚེ་བྱང་ཆུབ་སེམས་དཔས་དེ་དག་འོངས་པར་རིག་ནས་ལག་པ་གཡས་པ་བརྐྱང་སྟེ་མཛུབ་མོ་བསྒྲེང་ནས་སྟན་སྟོན་ཏོ། །འཇིག་རྟེན་སྐྱོང་བ་ལ་སོགས་པ་དེ་དག་ཀྱང་ཇི་ལྟར་བཏིང་བའི་སྟན་ལ་འཁོད་པར་གྱུར་ཏེ། དེ་དག་གིས་བྱང་ཆུབ་སེམས་དཔའ་མའི་རུམ་ན་འདུག་བཞིན་དུ། སྐྱེས་ཟིན་པའི་གཟུགས་དང་འདྲ་བར་ལག་པ་སྐྱོད་ཅིང་འདེག་ལ། རྣམ་པར་སྐྱོད་ཅིང་གཞོག་པ་མཐོང་ནས། དེ་དག་དགའ་མགུ་ཞིང་ཉམས་བདེ་བ་ཐོབ་སྟེ། བྱང་ཆུབ་སེམས་དཔའ་ལ་ཕྱག་འཚལ་བར་གྱུར་ཏོ། །བྱང་ཆུབ་སེམས་དཔས་ཀྱང་དེ་དག་དེ་ལྟར་འཁོད་པ་མཐོང་ནས། ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག་།ཡང་དག་པར་གཟེང་བསྟོད། ཡང་དག་པར་དགའ་བར་བྱེད་དོ། །གང་གི་ཚེ་དེ་དག་འདོང་བར་འདོད་པར་གྱུར་པ་དེའི་ཚེའང ། བྱང་ཆུབ་སེམས་དཔས་དེ་དག་གི་སེམས་སེམས་ཀྱིས་རྣམ་པར་ཤེས་ནས་ལག་པ་གཡས་པ་བརྐྱང་སྟེ་དེ་དག་འདོང་བའི་བརྡ་སྟོན་ཏོ། །དེ་ལྟར་ལག་པ་བརྐྱང་སྟེ། འདོང་བའི་བརྡ་བསྟན་ནས། ཕྱིར་བསྐུམ་པར་བྱེད་དེ། མ་ལ་གནོད་པ་མེད་དོ། །དེའི་ཚེ་རྒྱལ་པོ་ཆེན་པོ་བཞི་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང་འདོང་བར་གནང་ངོ་སྙམ་སེམས་ཤིང ། དེ་དག་བྱང་ཆུབ་སེམས་དཔའ་དང ། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་འདོང་བར་གྱུར་ཏོ། །དེ་ལྟར་བྱང་ཆུབ་སེམས་དཔའ་ནུབ་མོ་མི་ཉལ་ནས་ལག་པ་གཡས་པ་བརྐྱང་ཞིང་བརྐྱངས་ནས་ཀྱང་བསྐུམ་པ་དང ། བསྐུམ་ནས་ཀྱང་དྲན་ཞིང་ཤེས་བཞིན་དུ་ལག་པ་དེ་འཇོག་པའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །གཞན་ཡང་གང་གི 41.43b ཚེ་སྐྱེས་པའམ། བུད་མེད་དམ། ཁྱེའུའམ། བུ་མོ་སུ་ཡང་རུང་སྟེ། བྱང་ཆུབ་སེམས་དཔའ་བལྟ་བའི་ཕྱིར་འོངས་པ་དེའི་ཚེ། ཐོག་མར་ནི་བྱང་ཆུབ་སེམས་དཔའ་དགའ་བར་བྱ་བ་སྨྲའོ། །དེའི་འོག་ཏུ་བྱང་ཆུབ་སེམས་དཔའི་མ་སྨྲའོ། །དགེ་སློང་དག་དེ་ལྟར་བྱང་ཆུབ་སེམས་དཔའ་མའི་རུམ་ན་འདུག་པའི་ཚེ། སྔར་དགའ་བར་བྱ་བ་སྨྲ་བ་ལ་མཁས་པར་གྱུར་ཏེ། ལྷ་འམ། ཀླུ་འམ། གནོད་སྦྱིན་ནམ། མི་འམ། མི་མ་ཡིན་པ་སུ་ཡང་རུང་བྱང་ཆུབ་སེམས་དཔའ་ལ་སྔོན་དུ་དགའ་བར་བྱ་བའི་ཚིག་སྨྲ་བར་ནུས་པ་མེད་དོ། །བྱང་ཆུབ་སེམས་དཔའ་ཉིད་ཐོག་མར་དགའ་བར་བྱ་བ་སྨྲ་ཞིང་དེའི་འོག་ཏུ་བྱང་ཆུབ་སེམས་དཔའི་མ་དགའ་བར་བྱ་བ་སྨྲའོ། །དེ་ནས་སྔ་དྲོའི་དུས་ཟད་དེ། ཉི་མ་གུང་ལ་བབ་ནས་ལྷའི་དབང་པོ་བརྒྱ་བྱིན་དང ། སུམ་བཅུ་རྩ་གསུམ་པའི་ལྷའི་བུ་མངོན་པར་འཕགས་པ། མངོན་པར་འཕགས་པ་དག་བྱང་ཆུབ་སེམས་དཔའ་བལྟ་བ་དང ། དེ་ལ་བསྙེན་བཀུར་བྱ་བ་དང ། ཆོས་མཉན་པའི་ཕྱིར་འོང་བ་དང ། བྱང་ཆུབ་སེམས་དཔས་དེ་དག་རྒྱང་རིང་པོ་ནས་འོང་པ་མཐོང་ནས། གསེར་གྱི་མདོག་དུ་འདུག་པའི་ལག་པ་གཡས་པ་བརྐྱང་སྟེ། ལྷའི་དབང་པོ་བརྒྱ་བྱིན་དང ། སུམ་བཅུ་རྩ་གསུམ་པའི་ལྷ་དག་དགའ་བར་བྱེད་ཅིང་མཛུབ་མོ་བརྐྱང་སྟེ། སྟན་སྟོན་ཏོ། །དགེ་སློང་དག་དེའི་ཚེའང་ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་ལ་ཕྱིར་བཟློག་མ་ནུས་ནས་ཇི་ལྟར་བཏིང་བའི་སྟན་དེ་དག་ལ་ལྷའི་དབང་པོ་བརྒྱ་བྱིན་དང ། དེ་མ་ཡིན་པའི་ལྷའི་བུ་གཞན་དག་ཀྱང་འཁོད་པར་གྱུར་ཏོ། །བྱང་ཆུབ་སེམས་དཔས་དེ་ལྟར་འཁོད་པར་རིག་ནས་ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག་།ཡང་དག་པར་གཟེང་སྟོད། ཡང་དག་པར་དགའ་བར་བྱེད་དོ། །བྱང་ཆུབ་སེམས་དཔས་ལག་པ་གང་དུ་བརྐྱང་བ་དེ་ལོགས་སུ་བྱང་ཆུབ་སེམས་དཔའི་མ་ཡང་ལྟ་བར་གྱུར་ཏོ། །དེས་ན་ལྷ་དེ་དག་ཀྱང་འདི་སྙམ 41.44a དུ་བདག་ཅག་ནི་བྱང་ཆུབ་སེམས་དཔའ་དང་དགའ་བར་བྱ་བ་སྨྲའོ་སྙམ་མོ། །དེ་དག་རེ་རེ་ཞིང་ཡང་འདི་སྙམ་དུ་བྱང་ཆུབ་སེམས་དཔའ་ནི་བདག་འབའ་ཤིག་ལ་སྨྲ་སྟེ། བདག་འབའ་ཤིག་ལ་དགའ་བར་བྱ་བ་སྨྲའོ་སྙམ་མོ། །ཁང་པ་བརྩེགས་པ་དེར་ལྷའི་དབང་པོ་བརྒྱ་བྱིན་དང ། སུམ་བཅུ་རྩ་གསུམ་པའི་ལྷ་དེ་དག་གི་གཟུགས་བརྙན་སྣང་བར་གྱུར་ཏོ། །ཇི་ལྟར་བྱང་ཆུབ་སེམས་དཔའ་མའི་རུམ་ན་གནས་པའི་ལོངས་སྤྱོད་ཡོངས་སུ་དག་པར་གྱུར་པ་དེ་ལྟ་བུ་ནི་གཞན་དག་ན་མེད་དོ། །དགེ་སློང་དག་གང་གི་ཚེ་ལྷའི་དབང་པོ་བརྒྱ་བྱིན་དང ། དེ་མ་ཡིན་པའི་ལྷའི་བུ་གཞན་དག་འདོང་བར་འདོད་པར་གྱུར་པ་དེའི་ཚེའང་བྱང་ཆུབ་སེམས་དཔས་དེ་དག་གི་སེམས་ཀྱི་རྟོག་པ་སེམས་ཀྱིས་ཡོངས་སུ་ཤེས་ནས། ལག་པ་གཡས་པ་བརྐྱང་སྟེ་དེ་དག་འདོང་བའི་བརྡ་སྟོན་ཏོ། །བརྡ་བསྟན་ནས་ཕྱིར་བསྐུམ་པ་བྱས་ཏེ། དྲན་ཞིང་ཤེས་བཞིན་དུ་ལག་པ་བཞག་ཀྱང་མ་ལ་གནོད་པ་མེད་དོ། །དེའི་ཚེ་ལྷའི་དབང་པོ་བརྒྱ་བྱིན་དང ། དེ་མ་ཡིན་པའི་ལྷའི་བུ་སུམ་བཅུ་རྩ་གསུམ་པ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང་འདོད་པར་གནང་ངོ་སྙམ་དུ་སེམས་ཤིང ། དེ་དག་ཀྱང་བྱང་ཆུབ་སེམས་དཔའ་དང ། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་དོང་བར་གྱུར་ཏོ། །དགེ་སློང་དག་ཉི་མ་ཕྱེད་ཀྱི་དུས་འདས་ནས་ཕྱི་དྲོའི་དུས་ལ་བབ་པ་དང ། མི་མཇེད་ཀྱི་བདག་པོ་ཚངས་པ་ལྷའི་བུ་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། ལྷ་ཡུལ་བའི་སྙིང་ཁུའི་ཐིགས་པ་དེ་ཁྱེར་ནས་བྱང་ཆུབ་སེམས་དཔའ་ག་ལ་བ་དེར། བྱང་ཆུབ་སེམས་དཔའ་དེ་བལྟ་བ་དང ། དེ་ལ་ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་འོང་བར་གྱུར་ཏོ། །དགེ་སློང་དག་བྱང་ཆུབ་སེམས་དཔའས་མི་མཇེད་ཀྱི་བདག་པོ་ཚངས་པ་འཁོར་དང 41.44b བཅས་ཏེ་འོངས་པར་ཤེས་ནས། བྱང་ཆུབ་སེམས་དཔས་ཡང་གསེར་གྱི་མདོག་ཏུ་འདུག་པའི་ལག་པ་གཡས་པ་བརྐྱང་སྟེ། མི་མཇེད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷའི་བུ་དེ་དག་ལ་དགའ་བར་བྱ་བ་སྨྲས་ཏེ། མཛུབ་མོ་བརྐྱང་ནས་སྟན་སྟོན་ཏོ། །དགེ་སློང་དག་མི་མཇེད་ཀྱི་བདག་པོ་ཚངས་པ་དེས་ཀྱང་བྱང་ཆུབ་སེམས་དཔའི་བཀའ་ལས་བཟློག་པར་མ་ནུས་ནས། ཇི་ལྟར་བཏིང་བའི་སྟན་དེ་དག་ལ་མི་མཇེད་ཀྱི་བདག་པོ་ཚངས་པ་དང་ཚངས་རིས་ཀྱི་ལྷའི་བུ་གཞན་དག་ཀྱང་འཁོད་པར་གྱུར་ཏོ། །བྱང་ཆུབ་སེམས་དཔས་དེ་ལྟར་འཁོད་པར་རིག་ནས་ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག་།ཡང་དག་པར་གཟེང་སྟོད ། ཡང་དག་པར་དགའ་བར་བྱེད་དོ། །བྱང་ཆུབ་སེམས་དཔས་ལག་པ་གང་དུ་བརྐྱང་བ་དེ་ལོགས་སུ་ལྷ་མོ་སྒྱུ་འཕྲུལ་ཡང་ལྟ་བར་གྱུར་ཏོ། །དེ་ལྟར་ན་ལྷ་དེ་དག་ཀྱང་བདག་ཅག་ནི་བྱང་ཆུབ་སེམས་དཔའ་དང་དགའ་བར་བྱ་བའི་གཏམ་བྱེད་དོ། །སྙམ་སྟེ་ལྷའི་བུ་དེ་དག་རེ་རེ་ཞིང་ཡང་འདི་སྙམ་དུ་བྱང་ཆུབ་སེམས་དཔའ་ནི་བདག་འབའ་ཤིག་ལ་སྨྲས་ཏེ། བདག་འབའ་ཤིག་ལ་དགའ་བའི་གཏམ་བྱེད་དོ་སྙམ་མོ། །དགེ་སློང་དག་གང་གི་ཚེ་མི་མཇེད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷའི་བུ་དེ་དག་འདོང་བར་འདོད་པར་གྱུར་པ་དེའི་ཚེ་ཡང་བྱང་ཆུབ་སེམས་དཔས་དེ་དག་གི་སེམས་ཀྱི་རྟོག་པ་སེམས་ཀྱི་ཡོངས་སུ་ཤེས་ནས་ལག་པ་གཡས་པ་བརྐྱང་སྟེ། དེ་དག་འདོང་བའི་བརྡ་སྟོན་ཏོ། །དེ་ལྟར་འདོང་བའི་བརྡ་བསྟན་ནས་ཕྱིར་བསྐུམ་པ་བྱས་ཏེ། དྲན་ཞིང་ཤེས་བཞིན་དུ་ལག་པ་བཞག་ཀྱང་མ་ལ་གནོད་པ་མེད་དོ། །དེའི་ཚེ་མི་མཇེད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷ་དེ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང་འདོང་བར་གནང་ངོ 41.45a སྙམ་དུ་སེམས་ཤིང་དེ་དག་བྱང་ཆུབ་སེམས་དཔའ་དང ། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་འདོང་བར་གྱུར་ཏོ། །བྱང་ཆུབ་སེམས་དཔའ་ཡང་དྲན་ཞིང་ཤེས་བཞིན་དུ་ལག་པ་འཇོག་གོ། །དགེ་སློང་དག་ཤར་ཕྱོགས་དང ། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་བཅུ་ཀུན་ནས་ཀྱང་བྱང་ཆུབ་སེམས་དཔའ་བརྒྱ་སྟོང་མང་པོ་བྱང་ཆུབ་སེམས་དཔའ་དེ་བལྟ་བ་དང ། དེ་ལ་ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པ་དང ། ཆོས་ཡང་དག་པར་བརྗོད་པར་བྱ་བའི་ཕྱིར་འོང་བར་གྱུར་ཏོ། །དེ་དག་དེ་ལྟར་འོངས་པ་དང ། བྱང་ཆུབ་སེམས་དཔས་ལུས་ལས་འོད་བཀྱེ་སྟེ། འོད་ཀྱི་བཀོད་པ་དེ་དག་སེང་གེའི་ཁྲིར་སྤྲུལ་ནས། དེ་ལྟར་སྤྲུལ་པའི་ཁྲི་དེ་དག་ལ་བྱང་ཆུབ་སེམས་དཔའ་དེ་དག་འཁོད་དུ་བཅུག་སྟེ། དེ་དག་དེ་ལྟར་འཁོད་པར་ཤེས་ནས་འདི་ལྟ་སྟེ་ཐེག་པ་ཆེན་པོ་འདི་ཉིད་རྒྱ་ཆེར་རྣམ་པར་དབྱེ་བའི་དོན་དུ་དྲིས་ཏེ་བརྟགས་ཀྱང་བསྐལ་པ་མཉམ་པའི་ལྷ་རྣམས་མ་གཏོགས་པར་གཞན་སུས་ཀྱང་དེ་དག་མ་མཐོང་སྟེ། དགེ་སློང་དག་དེ་ལྟར་བྱང་ཆུབ་སེམས་དཔས་ནུབ་མོ་མི་ཉལ་ནས་ལུས་ལས་འོད་བཀྱེ་བའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །དགེ་སློང་དག་ལྷ་མོ་སྒྱུ་འཕྲུལ་གྱིས་ཀྱང་བྱང་ཆུབ་སེམས་དཔའ་མའི་རུམ་ན་འདུག་པའི་ཚེ། ལུས་ལྕི་བར་མ་ཚོར་ཏེ། གཞན་དུ་ན་ཡང་བ་དང ། འཇམ་པ་དང ། བདེ་བར་ཚོར་ཞིང་ལྟོ་མི་བདེ་བའི་སྡུག་བསྔལ་གང་ཡང་མྱོང་བར་མ་གྱུར་ཏོ། །འདོད་ཆགས་ཀྱིས་ཡོངས་སུ་གདུང་བ་འམ། ཞེ་སྡང་གིས་ཡོངས་སུ་གདུང་བ་འམ། གཏི་མུག་གིས་ཡོངས་སུ་གདུང་བས་ཀྱང་ཡོངས་སུ་གདུང་བར་མ་གྱུར། འདོད་པའི་རྣམ་པར་རྟོག་པའམ། གནོད་སེམས་ཀྱི་རྣམ་པར་རྟོག་པའམ། གཙེ་བའི་རྣམ་པར་རྟོག 41.45b པ་དག་ལ་ཡང་རྣམ་པར་རྟོག་པར་མ་གྱུར་ཏེ། གྲང་བའམ། ཚ་བའམ། བཀྲེས་པའམ། སྐོམ་པའམ། མུན་པའམ། རྡུལ་ལམ། ངལ་བ་ཚོར་བའམ། མཐོང་བར་མ་གྱུར་ཏེ། དེ་ལ་གཟུགས་དང ། སྒྲ་དང ། དྲི་དང ། རོ་དང ། རེག་ཡིད་དུ་མི་འོང་བ་སྣང་བར་མ་གྱུར་ཏོ། །རྨི་ལམ་ངན་པ་ཡང་མཐོང་བར་མ་གྱུར་ཏོ། །དེ་ལ་བུད་མེད་ཀྱི་སྒྱུའམ། གཡོ་འམ། ཕྲག་དོག་གམ། བུད་མེད་ཀྱི་ཉོན་མོངས་པ་དག་ཀྱང་ཉམས་སུ་གནོད་པར་བྱེད་པར་མ་གྱུར་ཏོ། །དེའི་ཚེ་བྱང་ཆུབ་སེམས་དཔའི་མ་ནི་བསླབ་པའི་གཞི་ལྔ་ཡང་དག་པར་བླངས་ཏེ། ཚུལ་ཁྲིམས་དང་ལྡན་ཞིང་དགེ་བ་བཅུའི་ལས་ཀྱི་ལམ་ལ་གནས་པར་གྱུར་ཏོ། །བྱང་ཆུབ་སེམས་དཔའི་མ་ཡང་སྐྱེས་པ་གང་ལ་ཡང་འདོད་ཆགས་ཀྱི་སེམས་སྐྱེ་བར་མ་གྱུར་ལ། སྐྱེས་པ་གང་ཡང་བྱང་ཆུབ་སེམས་དཔའི་མ་ལ་འདོད་ཆགས་ཀྱི་སེམས་མི་སྐྱེའོ། །སེར་སྐྱའི་གྲོང་ཁྱེར་ཆེན་པོ་དེ་དང ། ཡུལ་གཞན་དག་ན་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་སུ་གང་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། འབྱུང་པོས་ནོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་མ་མཐོང་མ་ཐག་ཏུ་སོས་ཤིང་དྲན་པ་ཐོབ་པར་གྱུར་ཏོ། །མི་མ་ཡིན་པ་དེ་དག་ཀྱང་མྱུར་དུ་གནས་གཞན་དུ་འདོང་བར་གྱུར་ཏོ། །སེམས་ཅན་གང་ལ་ལ་ཞིག་ནད་སྣ་ཚོགས་ཀྱིས་ཐེབས་པར་གྱུར་ཏེ། རླུང་དང ། མཁྲིས་པ་དང ། བད་ཀན་དང ། འདུས་པ་ལས་བྱུང་བའི་ནད་ཀྱིས་གནོད་པར་གྱུར་པ་དང ། མིག་གི་ནད་དམ། རྣ་བའི་ནད་དམ། སྣའི་ནད་དམ། ལྕེའི་ནད་དམ། མཆུའི་ནད་དམ། སོའི་ནད་དམ། ལྐོག་མའི་ནད་དམ། ཤུ་བའམ། འབྲས་སམ། མཛེ་འམ། ཤ་བཀྲ་འམ། སྐམ་པ་འམ། བརྗེད་བྱེད་དམ། རིམས་སམ། ལྦ་བ་འམ། ཕོལ་མིག་གམ། མེ་དབལ་ལམ། རྐང་ཤུ་ལ་སོགས་པའི་ནད་ཀྱིས་བཏབ་པར་གྱུར་པ་དེ་དག་ལ་བྱང་ཆུབ 41.46a སེམས་དཔའི་མས། ལག་པ་གཡས་པ་སྤྱི་བོར་བཞག་པ་ཙམ་གྱིས་ནད་དང་བྲལ་བར་གྱུར་ཅིང ། རང་རང་གི་གནས་སུ་འདོང་བར་གྱུར་ཏོ། །ཐ་ན་ལྷ་མོ་སྒྱུ་འཕྲུལ་གྱིས་རྩཝ་ཉག་མ་འགའ་ཞིག་ས་ལས་བླངས་ཏེ་སེམས་ཅན་ནད་པ་དག་ལ་བྱིན་ཡང་དེ་དག་དེ་བླངས་མ་ཐག་ཏུ་ནད་མེད་ཅིང་ཉམས་པ་མེད་པར་གྱུར་ཏོ། །གང་གི་ཚེ་ལྷ་མོ་སྒྱུ་འཕྲུལ་དེས་བདག་གི་ལྟོ་གཡས་པར་བལྟས་པ་དེའི་ཚེ། བྱང་ཆུབ་སེམས་དཔའ་མའི་རུམ་ན་འདུག་པ་དེ་འདི་ལྟ་སྟེ་དཔེར་ན་མེ་ལོང་གི་དཀྱིལ་འཁོར་ཤིན་དུ་དག་པ་ལ་གདོང་གི་དཀྱིལ་འཁོར་སྣང་བ་བཞིན་ཏེ། དེ་ལྟར་དེ་མཐོང་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་པར་གྱུར་ཏོ། །དགེ་སློང་དག་བྱང་ཆུབ་སེམས་དཔའ་མའི་རུམ་ན་གནས་པའི་བྱིན་གྱི་རླབས་ཀྱིས། ཉིན་མཚན་རྟག་ཏུ་རྒྱུན་མི་འཆད་པར་ལྷའི་རོལ་མོ་སིལ་སྙན་གྱི་སྒྲ་འབྱུང་ཞིང་ལྷའི་མེ་ཏོག་གི་ཆར་འབབ་པར་གྱུར་ཏོ། །ཆར་ནི་དུས་བཞིན་དུ་འབབ། རླུང་ནི་དུས་བཞིན་དུ་ལྡང ། དུས་དང་སྐར་མ་དག་ཀྱང་དུས་བཞིན་དུ་འགྱུར་ཞིང་འཕོ་བར་གྱུར་ཏོ། །རྒྱལ་སྲིད་ཀྱང་བདེ་ཞིང་ལོ་ལེགས་ལ་འཁྲུག་པ་མེད་ཅིང་དགྲ་མེད་པར་གྱུར་ཏོ། །སེར་སྐྱའི་གྲོང་ཁྱེར་ཆེན་པོ་དེ་ན་ཤཱཀྱའི་རིགས་དང ། སེམས་ཅན་གཞན་དག་འཁོད་པ་ཐམས་ཅད་ཀྱང་ཟ་ཞིང་འཐུང ། དགའ་ཞིང་རྩེ་ལ་དགའ་མགུར་སྤྱོད་དོ། །སྦྱིན་པ་དག་ཀྱང་གཏོང ། བསོད་ནམས་དག་ཀྱང་བྱེད་དེ། ཟླ་བ་བཞི་འདས་པའི་དུས་སྟོན་བཞིན་དུ་ཐམས་ཅད་ཀྱང་དགའ་བའི་མཆོག་གིས་རྩེ་ཞིང་བདེ་བར་གནས་པས་གནས་པར་གྱུར་ཏོ། །རྒྱལ་པོ་ཟས་གཙང་མ་ཡང་ཚངས་པའི་སྤྱོད་པ་ཡང་དག་པར་བླངས་ཏེ། རྒྱལ་པོའི་ལས་བཏང་ནས་དཀའ་ཐུབ་ཀྱི་ནགས་ཚལ་ཡོངས་སུ་དག་པ་ན་གནས་པ་བཞིན་དུ་ཆོས་ཀྱི་རྗེས་སུ་འབྲང་བར་གྱུར་ཏོ། །དགེ་སློང་དག་བྱང་ཆུབ་སེམས་དཔའ་མའི་རུམ་ན་གནས་པ་ནི་རྣམ་པ་དེ་ལྟ་བུའི་རྫུ་འཕྲུལ་གྱི་ཆོ 41.46b འཕྲུལ་དང་ལྡན་པས་གནས་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་གུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་སྔོན་བྱང་ཆུབ་སེམས་དཔའ་མའི་རུམ་ན་གནས་པའི་ཚེ་གནས་གནས་པ་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །དེ་བཞིན་གཤེགས་པས་ཚེ་དང་ལྡན་པ་ཀུན་དགའ་བོ་དང ། ལྷའི་དབང་པོ་བརྒྱ་བྱིན་དང ། འཇིག་རྟེན་སྐྱོང་བ་བཞི་དང ། དེ་མ་ཡིན་པའི་ལྷ་དང ། མི་གཞན་དག་ཀྱང་བསྟན་ཏེ་མཐོང་ནས། དེ་དག་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་སོ། །མི་མཇེད་ཀྱི་བདག་པོ་ཚངས་པས་དེའི་ཕྱིར་ཡང་ཚངས་པའི་འཇིག་རྟེན་དུ་མཆོད་པར་བྱ་བའི་ཕྱིར་བཏེག་སྟེ་ཁྱེར་ནས་བཞག་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་ཡང་དགེ་སློང་དག་ལ་བཀའ་སྩལ་པ། དགེ་སློང་དག་དེ་ལྟར་བྱང་ཆུབ་སེམས་དཔའ་མའི་རུམ་ན་འདུག་པས་ལྷ་དང་མི་ཁྲག་ཁྲིག་ཕྲག་སུམ་བཅུ་རྩ་དྲུག་ཐེག་པ་གསུམ་ལ་ཡོངས་སུ་སྨིན་པར་བྱས་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། གང་ཚེ་རྒྱལ་སྲས་སེམས་ཅན་དམ་པ་མ་ཡི་རུམ་གནས་པ། །དེ་ཚེ་ས་འདི་ཚལ་དང་བཅས་པར་རྣམ་པ་དྲུག་ཏུ་གཡོས། །གསེར་མདོག་འོད་བཀྱེ་ངན་སོང་ཐམས་ཅད་རྣམ་པར་སྦྱངས་པར་གྱུར། །ཆོས་ཀྱི་རྒྱལ་པོར་འགྱུར་ཞེས་ལྷ་ཡི་ཚོགས་རྣམས་རབ་ཏུ་དགའ། །གཞལ་མེད་ཁང་ཆེན་དབྱིབས་ལེགས་རིན་ཆེན་དུ་མས་རྣམ་པར་སྤྲས། །དེར་ནི་དཔའ་བོ་རྣམ་པར་འདྲེན་པ་ཞུགས་པར་གྱུར་ནས་འདུག་།ཙན་དན་དྲི་ཞིམ་མཆོག་གིས་རབ་ཏུ་གང་ཞིང་རྣམ་པར་མཛེས། །སྟོང་གསུམ་རིན་ཆེན་ཡོངས་བཀང་དེ་ཡི་སྲང་ཕྱེད་རིན་མི་ཆོག་།སྟོང་ཆེན་འཇིག་རྟེན་ཁམས 41.47a ཀྱང་འོག་ནས་བརྟོལ་བ་བྱས་ནས་ནི། །ཡོན་ཏན་འབྱུང་བའི་གནས་ཀྱི་པད་མའི་སྙིང་ཁུའི་ཐིགས་པ་བྱུང ། །དེ་བཞིན་ཞག་བདུན་བསོད་ནམས་གཟི་བརྗིད་ཚངས་པའི་འཇིག་རྟེན་འཕགས། །དེ་ལས་སྙིང་ཁུའི་ཐིགས་བླངས་ཚངས་པ་རྒྱལ་བའི་སྲས་ལ་འབུལ། །བྱང་ཆུབ་སེམས་དཔའ་དཔའ་བོ་ཚངས་པ་འདྲ་བ་མ་གཏོགས་པར། །སེམས་ཅན་གང་གིས་དེ་ཟོས་འཇུར་འགྱུར་སེམས་ཅན་རིས་ན་མེད། །བསྐལ་པ་དུ་མའི་བསོད་ནམས་གཟི་བརྗིད་སྙིང་ཁུའི་ཐིགས་གནས་པ། །དེ་ཟོས་ལུས་དང་སེམས་དང་ཤེས་པ་རྣམ་པར་དག་པར་གྱུར། །འདྲེན་པ་མཆོད་ཕྱིར་བརྒྱ་བྱིན་ཚངས་པ་འཇིག་རྟེན་སྐྱོང་བ་རྣམས། །བྱང་ཆུབ་སེམས་དཔའི་དྲུང་དུ་རྟག་པར་དུས་གསུམ་རྒྱུན་དུ་འོང ། །ཕྱག་བྱས་མཆོད་བྱས་ཆོས་ཀྱི་དམ་པ་དེ་དག་ཐོས་གྱུར་ནས། །བསྐོར་བ་བྱས་ཏེ་ཀུན་ཀྱང་གང་ནས་འོངས་པའི་གནས་སུ་འདོང ། །འཇིག་རྟེན་ཁམས་རྣམས་ཀུན་ནས་ཆོས་འདོད་བྱང་ཆུབ་སེམས་དཔའ་འོང ། །འོད་བཀོད་ཁྲིར་གྱུར་རྣམས་ལ་དེ་དག་གནས་པར་ཕན་ཚུན་སྣང ། །མཆོག་ཏུ་བྱ་བའི་ཐེག་པ་དམ་པའི་ཆོས་ནི་ཐོས་གྱུར་ནས། །ཀུན་ཀྱང་དགའ་བའི་སེམས་གྱུར་བསྟོད་པའི་ཕྲེང་བ་བརྗོད་ཅིང་འདོང ། །བུད་མེད་བྱིས་པ་གང་དག་སྡུག་བསྔལ་ལྡན་པར་གྱུར་པ་དང ། །འབྱུང་པོས་ནོན་དང་སེམས་འཁྲུགས་གོས་མེད་རྡུལ་གྱིས་ཡོག་པ་རྣམས། །དེ་ཀུན་ལྷ་མོ་སྒྱུ་འཕྲུལ་མཐོང་ནས་སེམས་ནི་རྙེད་གྱུར་ཏེ། །བློ་གྲོས་རྟོགས་དང་དྲན་པ་ལྡན་ཞིང་སོ་སོའི་ཁྱིམ་ཁྱིམ་འདོང ། །རླུང་དང་བད་ཀན་མཁྲིས་པའི་ནད་དང་འདུས་པའི་ནད་ཐེབས་དང ། །མིག་ནད་རྣ་ནད་དག་གིས་ལུས་སེམས་མི་བདེར་གྱུར་པ་དག་།རྣམ་མང་ཐ་དད་ནད་ཀྱི་རྣམ་པས་གང་དག་གནོད་གྱུར་པ། །དེ་དག་སྒྱུ་འཕྲུལ་ལག་པ་མགོ་ལ་བཞག་པས་ནད་མེད་གྱུར། །ཡང་ན་རྩཝའི་ཉག་མ་འགའ 41.47b ཞིག་ས་ལས་བླངས་བྱས་ཏེ། །སྒྱུ་འཕྲུལ་ནད་པ་བྱིན་ན་ཐམས་ཅད་རིམས་ནད་མེད་པར་གྱུར། །བདེ་བ་ཐོབ་ཅིང་ད་རོད་མ་ཉམས་སོ་སོའི་ཁྱིམ་དུ་འདོང ། །དེ་ནི་སྨན་གྱུར་སྨན་པའི་རྒྱལ་པོ་རུམ་ན་འདུག་ཕྱིར་རོ། །གང་ཚེ་ལྷ་མོ་སྒྱུ་འཕྲུལ་བདག་གི་ལུས་ལ་བརྟག་བྱས་པ། །དེ་ཚེ་བྱང་ཆུབ་སེམས་དཔའ་རུམ་ན་འདུག་པ་མཐོང་བ་ནི། །ཇི་ལྟར་བར་སྣང་གནས་ཀྱི་ཟླ་བ་སྐར་མས་བསྐོར་གནས་པ། །དེ་བཞིན་བྱང་ཆུབ་སེམས་དཔའ་མཚན་གྱིས་ཀུན་ནས་བརྒྱན་པ་སྣང ། །དེ་ལ་འདོད་ཆགས་ཞེ་སྡང་གཏི་མུག་གནོད་པར་འགྱུར་བ་མེད། །འདོད་ལ་འདོད་པ་དེ་མེད་དེ་ལ་ཕྲག་དོག་འཚེ་བ་མེད། །དགའ་བའི་སེམས་དང་མགུ་བའི་སེམས་དང་དགའ་དང་ཡིད་བདེར་གནས། །དེ་ལ་བཀྲེས་དང་སྐོམ་དང་ཚ་དང་གྲང་བའི་གནོད་པ་མེད། །ལྷ་ཡི་རོལ་མོ་སིལ་སྙན་དབྱངས་སྒྲ་མ་བྱས་རྟག་ཏུ་འབྱུང ། །ལྷ་ཡི་སྤོས་དྲི་མེ་ཏོག་དམ་པ་མཆོག་མཛེས་ཆར་ཡང་འབབ། །ལྷ་དང་མི་རྣམས་དེ་ལ་ལྟ་ཞིང་ལྷ་མི་ཐམས་ཅད་ཀྱང ། །དེ་དག་ཕན་ཚུན་གནོད་པ་མེད་ཅིང་འཚེ་བ་གང་ཡང་མེད། །སེམས་ཅན་དགའ་བདེར་རྩེ་ཞིང་ཟས་དང་སྐོམ་གྱི་སྦྱིན་པ་བྱེད། །དགའ་བའི་སྒྲ་སྒྲོག་དེ་དག་དགའ་ཞིང་མགུ་བའི་ཡིད་དང་ལྡན། །རྒྱལ་པོའི་སྲིད་བདེ་འཁྲུག་པ་མེད་ཅིང་ཆར་པ་དུས་བཞིན་འབབ། །རྩཝ་དང་སྨན་དང་མེ་ཏོག་རྣམས་ཀྱང་དེ་ཡི་དུས་སུ་སྐྱེ། །རྒྱལ་པོའི་ཁབ་ཏུ་ཞག་བདུན་རིན་ཆེན་ཆར་པ་བབ་གྱུར་པས། །སེམས་ཅན་དབུལ་པོ་དེ་ལས་ལེན་ཅིང་སྦྱིན་བྱེད་བདེ་བར་སྤྱོད། །སེམས་ཅན་དབུལ་ཞིང་སྡུག་བསྔལ་གྱུར་པ་དེ་ཚེ་གང་ཡང་མེད། །རི་རབ་ཟོམ་གྱི་དགའ་ཚལ་སེམས་ཅན་བཞིན་དུ་དགའ་དང་ལྡན། །ཤཱཀྱའི་རྒྱལ་པོ་དེ་ཡང་གསོ་སྦྱོང་རབ་ལ་ཉེར་གནས་ཤིང ། །དེ་ནི་རྒྱལ་པོའི་བྱ་བ་མི་བྱེད་ཆོས་ལ་རྟག་པར་སྤྱོད། །དེ་ནི་དཀའ་ཐུབ་ནགས་ཚལ་སོང་ནས་ལྷ་མོ་སྒྱུ་འཕྲུལ་ལ། །སེམས་ཅན 41.48a མཆོག་སྲེལ་ཁྱོད་ཀྱི་ལུས་ལ་བདེ་བ་ཅི་འདྲ་རྨེད། །ལྷུམས་སུ་འཇུག་པའི་ལེའུ་སྟེ་དྲུག་པའོ།། །། དགེ་སློང་དག་དེ་ལྟར་ཟླ་བ་བཅུ་འདས་ཏེ། བྱང་ཆུབ་སེམས་དཔའ་བཙའ་བའི་དུས་ལ་བབ་པ་དང ། རྒྱལ་པོ་ཟས་གཙང་མའི་བསྐྱེད་མོས་ཚལ་དུ་སྔ་ལྟས་སུམ་བཅུ་རྩ་གཉིས་བྱུང་ངོ ། །སུམ་བཅུ་རྩ་གཉིས་གང་ཞེ་ན། མེ་ཏོག་ཐམས་ཅད་ཁ་འབུས་ནས་རྒྱས་པར་མ་གྱུར་པ་དང ། རྫིང་དག་ན་མེ་ཏོག་ཨུད་པ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོ་ཡོད་པ་དག་ཀྱང་ཁ་འབུས་ནས་རྒྱས་པར་མ་གྱུར་པ་དང ། མེ་ཏོག་དང་འབྲས་བུའི་ཤིང་ལྗོན་པ་གསར་པ་དག་ཀྱང་ས་ལས་འཐོན་ཏེ་ཁ་འབུས་ནས་རྒྱས་པར་མ་གྱུར་པ་དང ། རིན་པོ་ཆེའི་ཤིང་ལྗོན་པ་བརྒྱད་བྱུང་བ་དང ། གཏེར་ཆེན་པོ་ཉི་ཁྲི་འབུས་ཏེ་བྱུང་ནས་གནས་པར་སྣང་བ་དང ། ཁྱིམ་གྱི་ནང་དུ་ཡང་རིན་པོ་ཆེའི་མྱུ་གུ་འཐོན་པ་དང་སྤོས་ཆུའི་དཔལ་གྱི་ཝ་འབྲུ་མར་དྲི་ཞིམ་པོས་སྦགས་པ་རྣམས་ཀྱང་ཟག་པར་གྱུར་པ་དང ། གངས་ཀྱི་རིའི་ངོས་ལས་སེང་གེའི་ཕྲུ་གུ་དག་འོངས་ཏེ། དགའ་བར་རྩེ་ཞིང་སེར་སྐྱའི་གྲོང་ཁྱེར་དམ་པ་ལ་བསྐོར་བ་བྱས་ནས་སྒོ་ན་གནས་པར་གྱུར་ཀྱང་སེམས་ཅན་གང་ལ་ཡང་འཚེ་བ་མེད་པར་གྱུར་པ་དང ། གླང་པོའི་ཕྲུ་གུ་ཐལ་ཀར་ལྔ་བརྒྱ་ལྷགས་ཏེ། རྒྱལ་པོ་ཟས་གཙང་མའི་རྐང་པ་ལ་སྣའི་རྩེ་མོས་ཉུག་ཅིང་གནས་པར་གྱུར་པ་དང ། ལྷའི་བྱིས་པ་རོགས་པ་སྐ་རགས་བཅིངས་པ་དག་ཀྱང་རྒྱལ་པོ་ཟས་གཙང་མའི་བཙུན་མོའི་འཁོར་གྱི་པང་པ་ནས་པང་པ་དག་ཏུ་འགྲེ་ལྡོག་པར་སྣང་བར་གྱུར་པ་དང ། ཀླུའི་བུ་མོ་མཆོད་པ་སྣ་ཚོགས་ཀྱི་ཡོ་བྱད་ཐོགས་པ་དག་ཀྱང་ལུས་ཕྱེད་ཕྱུང་ཞིང་ནམ་མཁའ་ལ་རྒྱུ་བར་སྣང་བ་དང ། ལྷའི་བུ་མོ་ཁྲི་ཡང་རྨ་བྱའི་མདོངས་ལག་ན་ཐོགས་ཤིང་ནམ་མཁའ་ལ་འཁོད་པར་སྣང 41.48b བ་དང ། བུམ་པ་གང་བ་ཁྲི་ཡང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་སྐོར་བ་བྱེད་པར་སྣང་བ་དང ། ལྷའི་བུ་མོ་ཁྲི་ཡང་སྤོས་ཆུའི་རིལ་བ་བྲིང་ག་ར་གླད་ལ་ཐོགས་ཤིང་འཁོད་པར་སྣང་བ་དང ། ལྷའི་བུ་མོ་ཁྲི་ཡང་གདུགས་དང ། རྒྱལ་མཚན་དང ། བ་དན་ཐོགས་ཤིང་འཁོད་པར་སྣང་བ་དང ། ལྷའི་བུ་མོ་བརྒྱ་སྟོང་མང་པོ་དག་ཀྱང་དུང་དང ། རྔ་དང ། རྫ་རྔ་དང ། ཁར་རྔ་མགུལ་ནས་སྤྱངས་ཏེ་སྡོད་ཅིང་འཁོད་པར་སྣང་བ་དང ། རླུང་ཐམས་ཅད་ཀྱང་མི་ལྡང་པར་གནས་པར་གྱུར་པ་དང ། ཆུ་ཀླུང་དང་ཆུ་བྲན་ཐམས་ཅད་ཀྱང་མི་འགུལ་ཞིང་མི་འབབ་པར་གྱུར་པ་དང ། ཉི་ཟླ་དང ། གཞལ་མེད་ཁང་དང ། རྒྱུ་སྐར་དང ། སྐར་མའི་ཚོགས་རྣམས་ཀྱང་མི་རྒྱུ་བར་གྱུར་པ་དང ། སྐར་མ་རྒྱལ་དང་ཡང་ལྡན་པར་གྱུར་པ་དང ། རྒྱལ་པོ་ཟས་གཙང་མའི་ཁྱིམ་ཡང་རིན་པོ་ཆེའི་དྲ་བས་ཡོག་པར་གྱུར་པ་དང ། མེ་ཡང་མི་འབར་བར་གྱུར་པ་དང ། ཁང་པ་བརྩེགས་པ་དང ། ཁང་བཟངས་དང ། ཡང་ཐོག་དང ། རྟ་བབས་དག་ལའང་ནོར་བུ་དང་རིན་པོ་ཆེ་དག་འཕྱང་བར་སྣང་བར་གྱུར་པ་དང ། རས་བཅོས་བུའི་མཛོད་དང ། རིན་པོ་ཆེ་སྣ་ཚོགས་ཀྱི་མཛོད་རྣམས་ཀྱང་སྒོ་བྱེ་བར་སྣང་བ་དང ། བྱ་རོག་དང ། འུག་པ་དང ། བྱ་རྒོད་དང ། སྤྱང་ཀི་དང ། ཝའི་སྒྲ་དག་ཀྱང་མེད་པར་གྱུར་པ་དང ། སྒྲ་སྐད་སྙན་པའི་སྒྲ་དག་ཀྱང་འབྱུང་བར་གྱུར་པ་དང ། སྐྱེ་བོ་ཐམས་ཅད་ཀྱི་ལས་ཀྱི་མཐའ་འང་རྒྱུན་ཆད་པར་གྱུར་པ་དང ། སའི་ཕྱོགས་མཐོན་དམན་དུ་འདུག་པ་རྣམས་ཀྱང་མཉམ་པར་གནས་པར་གྱུར་པ་དང ། ལམ་གྱི་བཞི་མདོ་དང ། སུམ་མདོ་དང ། སྲང་དང ། ཚོང་འདུས་ཀྱི་འཁོར་ཀྱང་ལག་མཐིལ་ལྟར་གཞི་མཉམ་ཞིང་འཇམ་ལ་མེ་ཏོག་སིལ་མས་གང་སྟེ་མཛེས་པར་སྣང་བ་དང ། སྦྲུམ་པ་ཐམས་ཅད་ཀྱང་བདེ་བ་དང ། ལེགས་པར་བཙའ་བར་གྱུར་པ་དང ། ཤིང 41.49a སཱ་ལའི་ནགས་ཚལ་གྱི་ལྷ་ཐམས་ཅད་ཀྱང་ཤིང་གི་ལོ་མའི་ནང་ནས་ལུས་ཕྱེད་ཕྱུང་སྟེ། ཕྱག་འཚལ་ཞིང་གནས་པར་སྣང་བ་སྟེ། སྔ་ལྟས་སུམ་བཅུ་རྩ་གཉིས་པོ་དེ་དག་བྱུང་བར་གྱུར་ཏོ། །དེ་ནས་ལྷ་མོ་སྒྱུ་འཕྲུལ་བྱང་ཆུབ་སེམས་དཔའ་ཉིད་ཀྱི་གཟི་བརྗིད་དང་མཐུས་བྱང་ཆུབ་སེམས་དཔའ་བཙའ་བའི་དུས་ལ་བབ་པར་ཤེས་ཏེ། ནམ་གྱི་སྲོད་ལ་རྒྱལ་པོ་ཟས་གཙང་མའི་དྲུང་དུས་འོངས་ནས་ཚིགས་སུ་བཅད་དེ་སྨྲས་པ། བདག་གི་བསམ་པ་གང་ལགས་གསོལ་གྱིས་ལྷ་ནི་གསན་དུ་གསོལ། །ཡུན་རིང་རིང་པོ་འདས་ནས་བསྐྱེད་མོས་ཚལ་གྱི་བློ་སྐྱེས་ཏེ། །གལ་ཏེ་ཁྱོད་མི་བཀྱོན་ཅིང་ཞེ་སྡང་ཕྲག་དོག་མི་མངའ་ན། །བདག་ནི་རྩེ་ནས་བསྐྱེད་མོས་ཚལ་དུ་མྱུར་དུ་མཆི་བར་བགྱི། །ཆོས་དགོངས་བརྩོན་པ་དཀའ་ཐུབ་སྤྱོད་པས་ཁྱོད་ཀྱང་སྐྱོན་མཁྱེན་གྲང ། །བདག་ཀྱང་སེམས་ཅན་དག་པ་བསྲེལ་ནས་ཡུན་ནི་རིང་ལགས་ལ། །སཱ་ལའི་ཤིང་ལྗོན་སྡོང་པོ་མཆོག་ཀྱང་མེ་ཏོག་ཁ་འབུས་ཏེ། །བསྐྱེད་མོས་ཚལ་གྱི་དོག་སར་ད་ནི་མཆི་བའི་རིགས་སོ་ལྷ། །སོས་ཀའི་དུས་མཆོག་བུད་མེད་རྣམས་ཀྱི་རྒྱན་དུ་གྱུར་ལགས་ཏེ། །ནགས་རྒྱུ་ཁུ་བྱུག་དང་ནི་རྨ་བྱ་སྒྲ་རབ་སྙན་པ་འབྱིན། །གཙང་ཞིང་མཛེས་ལ་སྣ་ཚོགས་མེ་ཏོག་རྡུལ་གྱི་ངད་ཀྱང་ལྡང ། །ད་ནི་མཆི་ན་མ་ཐོགས་ལེགས་པར་བཀའ་ལུང་སྩལ་དུ་གསོལ། །རྒྱལ་པོའི་དབང་པོས་ལྷ་མོ་ལས་ནི་དེ་སྐད་ཚིག་ཐོས་ནས། །དགའ་ཞིང་རབ་ཏུ་མགུ་བའི་སེམས་ཀྱིས་འཁོར་ལ་སྨྲས་པ་ནི། །བཞོན་པ་བཞོན་ཆེ་མགྱོགས་པའི་ཤུགས་ལྡན་དག་ཀྱང་བསྟད་པར་གྱིས། །ཡོན་ཏན་ཕུན་སུམ་ཚོགས་ལྡན་ལུམ་བི་ནི་ཚལ་བརྒྱན་པར་གྱིས། །རི་སྔོའི་མདོག་ལྡན་སྤྲིན་གྱི་ཁ་དོག་འཐུན་པར་གྱུར་པ་ཡི། །གླང་པོ་སྟོང་ཕྲག་ཉི་ཤུ་སྙེད་ཅིག་མྱུར་དུ་བསྟད་པར་གྱིས། །གླང་པོའི་དབང་པོ་མཆེ་བ་དྲུག་ལྡན་དྲིལ་མཛེས་གློ་ལ་རྒྱུས། །གསེར་དང 41.49b ནོར་བུས་རྣམ་པར་སྤྲས་ཤིང་གསེར་གྱི་དྲ་བས་སྤུད། །རྒྱལ་པོའི་བཅིབས་པ་རླུང་ལྟར་མགྱོགས་པའི་ཤུགས་དང་ལྡན་པ་སྟེ། །དངུལ་དང་ཁ་བའི་མདོག་འདྲ་རྔ་རྔོག་ལྕང་ལོ་བཟང་འཁྲིལ་བའི། །རྟ་མཆོག་སྟོང་ཕྲག་ཉི་ཤུ་བགྲངས་པ་མྱུར་དུ་སྟོང་གྱིས་ཏེ། །གསེར་དྲིལ་གཡེར་ཀའི་དྲ་བ་གློ་ནས་སྤྱང་བ་གྱིས། །སྐྱེས་བུ་རྟུལ་ཕོད་གཡུལ་ལ་མོས་ཤིང་འཐབ་འདོད་དཔའ་བོ་དག་།མདའ་གཞུ་རལ་གྲི་མདུང་ཐུང་ཞགས་པ་མཚོན་ཆ་རྣོ་ཐོགས་པ། །སྟོང་ཕྲག་ཉི་ཤུ་བགྲངས་པ་མྱུར་དུ་ཆོས་ཏེ་བཤམ་གྱིས་ལ། །སྒྱུ་འཕྲུལ་འཁོར་དང་བཅས་པ་བག་ཡོད་པར་ནི་བསྲུང་བར་གྱིས། །ལུམ་བི་ནི་དེར་གསེར་དང་ནོར་བུའི་རྒྱན་ཁྲོམ་བརྒྱན་པར་གྱིས། །གོས་དམར་རྣམ་པ་མང་པོས་ཤིང་རྣམས་ཐམས་ཅད་བརྒྱན་པར་གྱིས། །ལྷ་ཡི་དགའ་ཚལ་བཞིན་དུ་མེ་ཏོག་སྣ་ཚོགས་ཆལ་པར་ཁྲོམ། །དེ་ལྟར་ཐམས་ཅད་བཤམས་ཟིན་མྱུར་དུ་ང་ལ་སྦྲན་པར་གྱིས། །འཁོར་རྣམས་ཀྱིས་ནི་དེ་སྐད་ཚིག་ཐོས་སྐད་ཅིག་ཏུ། །བཞོན་པ་ཀུན་བཤམས་དེ་བཞིན་ལུམ་བི་ནི་ཡང་བརྒྱན་བྱས་ཏེ། །རྒྱལ་གྱུར་རྒྱལ་གྱུར་སྐུ་ཚེ་རིང་སྐྱོངས་རྒྱལ་པོ་གཤེགས་སུ་གསོལ། །ཇི་སྐད་བཀའ་སྩལ་དེ་བཞིན་ཀུན་བགྱིས་དུས་བབ་ལྷ་གཟིགས་ཤིག་།མི་ཡི་བདག་པོ་དམ་པ་དེ་ཡང་དགའ་བའི་སེམས་གྱུར་ནམ། །ཁྱིམ་གྱི་དམ་པར་ཞུགས་ཏེ་བུད་མེད་རྣམས་ལ་འདི་སྐད་སྨྲས། །གང་ཞིག་ང་ལ་སྙིང་ཉེ་ང་ལ་དགའ་བར་འདོད་པ་དག་།ང་ཡི་བཀའ་བཞིན་གྱིས་ཏེ་བདག་གི་ལུས་ཀུན་བརྒྱན་པར་གྱིས། །སྤོས་མཆོག་ངད་ཀྱི་དྲི་ཞིམ་ཁ་དོག་སྣ་ཚོགས་སྡུག་པའི་གོས། །འཇམ་ཞིང་ཡིད་འོང་དགའ་བའི་སེམས་ཀྱིས་ལེགས་པར་བགོ་བར་གྱིས། །བྲང་ན་འཕྱང་བའི་མུ་ཏིག་སེ་མོ་དོ་ཡིས་བརྒྱན་པར་གྱིས། །རྒྱན་གྱི་ཁྱད་པར་ཐམས་ཅད་དེ་རིང་ཀུན་གྱིས་བསྟན་པར་གྱིས། །ཁར་རྔ་རྒྱུད་གཅིག་གླིང་བུའི་པི་ཝང་རྫ་རྔ་དུམ་དུམ་པག་།སིལ 41.50a སྙན་ཡིད་དུ་འོང་བ་བརྒྱ་སྟོང་དག་ཀྱང་བཤམ་པར་གྱིས། །སྒྲ་སྙན་ཐོས་ནས་ལྷ་རྣམས་རབ་ཏུ་དགའ་བ་སྐྱེ་འགྱུར་ཞིང ། །ལྷ་མོ་རྣམས་ཀྱང་དེ་བཞིན་དགའ་བར་འགྱུར་བ་ཁྱེད་ཀྱིས་གྱིས། །ཤིང་རྟའི་མཆོག་འདིར་ལྷ་མོ་སྒྱུ་འཕྲུལ་གཅིག་པུ་འདུག་པར་གྱིས། །བུད་མེད་སྐྱེས་པ་གཞན་དག་སུ་ཡང་ཤིང་རྟ་དེར་མ་འཁོད། །ན་ཆུང་སྣ་ཚོགས་གོ་ཅན་རྣམས་ཀྱིས་ཤིང་རྟ་དེ་དྲོངས་ཏེ། །གང་དུའང་ཡིད་དུ་མི་འོང་མི་མཐུན་སྒྲ་རྣམས་མི་གྲག་ཀྱིས། །ལྷ་མོ་སྒྱུ་འཕྲུལ་ཁྱིམ་ནས་བྱུང་སྟེ་སྒོ་དྲུང་ཕྱིན་པའི་ཚེ། །རྟ་དང་གླང་པོ་ཤིང་རྟ་རྐང་ཏང་དཔལ་ལྡན་སྣ་ཚོགས་དཔུང ། །རྒྱལ་པོའི་སྒོ་དྲུང་ལྷགས་ཚེ་སྒྲ་ཆེན་མང་པོ་གྲག་པར་གྱུར། །རྒྱ་མཚོ་ཆེན་པོ་འཁྲུགས་པའི་སྒྲ་ལྟར་དེ་དག་ཡོངས་སུ་གྲག་།དེ་ཚེ་བཀྲ་ཤིས་དོན་དུ་དྲིལ་བུ་བརྒྱ་སྟོང་དཀྲོལ་བར་བྱས། །ཤིང་རྟ་དེ་ཡང་དེ་ལྟར་རྒྱལ་པོས་སྣ་ཚོགས་བརྒྱན་པ་ལ། །ལྷ་རྣམས་སྟོང་གིས་ལྷ་ཡི་ཁྲི་ཡང་ལེགས་པར་བཤམ་པ་བྱས། །རིན་ཆེན་ཤིང་ལྗོན་མེ་ཏོག་ལོ་མ་ལྡན་བཞིན་ལྡན་པར་བྱས། །རྨ་བྱ་ཁྲུང་ཁྲུང་ངང་པ་ཡིད་དུ་འོང་བའི་སྒྲ་ཡང་འབྱིན། །གདུགས་དང་རྒྱལ་མཚན་བ་དན་ཆེ་ཕྲ་ཀུན་ནས་བསྒྲེང ། །ལྷ་ཡི་གོས་དང་དྲིལ་བུ་གཡེར་ཀའི་དྲ་བ་མཆོག་གིས་བཀབ། །ལྷ་ཡི་བུ་མོ་ནམ་མཁའ་ལས་ནི་ཤིང་རྟ་དེ་ལ་ལྟ། །ལྷ་ཡི་སྒྲ་དབྱངས་སྙན་པ་སྒྲོག་ཅིང་བསྟོད་པའི་ཚིག་བརྗོད་དེ། །གང་ཚེ་ལྷ་མོ་སྒྱུ་འཕྲུལ་སེང་གེའི་ཁྲི་ལ་འདུག་གྱུར་པ། །དེ་ཚེ་སྟོང་གསུམ་ས་འདི་རྣམ་པ་དྲུག་ཏུ་རབ་ཏུ་གཡོས། །ལྷ་རྣམས་གོས་ཀྱི་གཡབ་མོ་འབྱིན་ཅིང་མེ་ཏོག་སྣ་ཚོགས་འཐོར། །དེ་རིང་ལུམ་བི་ནི་འདིར་འགྲོ་བའི་དམ་པ་བལྟམ་གྱུར་ཏེ། །འཇིག་རྟེན་སྐྱོང་བ་བཞི་ནི་ཤིང་རྟའི་མཆོག་དེ་འདྲེན་པར་བྱེད། །སུམ་བཅུ་རྩ་གསུམ་བདག་པོ་དབང་པོའང་ལམ་གྱི་བྱི་དོར་བྱེད། །ཚངས་པ་སྐྱེ་བོ་མི་སྲུན་སེལ་ཅིང་སྔོན་དུ་འགྲོ་བར་གྱུར། ། 41.50b ལྷ་རྣམས་བརྒྱ་ཕྲག་སྟོང་ཡང་ཐལ་མོ་སྦྱར་བས་ཕྱག་འཚལ་འདུད། །རྒྱལ་པོ་རབ་ཏུ་དགའ་བའི་སེམས་ཀྱིས་བཀོད་པ་དེ་ལ་ལྟ། །དེ་ནི་འདི་སྙམ་འདི་ནི་ལྷ་ཡི་ལྷ་ཞིག་ཡིན་སྙམ་བྱེད། །གང་ལ་སྐྱོང་བ་བཞི་དང་ཚངས་པ་དབང་པོར་བཅས་པའི་ལྷ། །མཆོད་པ་རྒྱ་ཆེན་བྱེད་པ་འདི་ནི་ངེས་པར་སངས་རྒྱས་འགྱུར། །སྲིད་པ་གསུམ་ན་ལྷ་ཀླུ་བརྒྱ་བྱིན་ཚངས་པ་འཇིག་རྟེན་སྐྱོང ། །གང་ཡང་མཆོད་པ་འདི་འདྲ་བཟོད་པའི་སེམས་ཅན་དེ་མེད་དེ། །ཡང་ན་མགོ་འགས་ཡང་ན་དེ་དག་སྲོག་དང་བྲལ་བར་འགྱུར། །འདི་ནི་ལྷ་ཡི་དམ་པ་ཡིན་པས་མཆོད་པ་ཐམས་ཅད་བཟོད། །དགེ་སློང་དག་དེ་ནས་ལྷ་མོ་སྒྱུ་འཕྲུལ་རྟའི་ཤིང་རྟ་རྒྱན་ཐམས་ཅད་ཀྱིས་བརྒྱན་པ་བརྒྱད་ཁྲི་བཞི་སྟོང་གིས་ནི་ཀུན་ནས་བསྐོར། གླང་པོ་ཆེའི་ཤིང་རྟ་རྒྱན་ཐམས་ཅད་ཀྱིས་བརྒྱན་པ་བརྒྱད་ཁྲི་བཞི་སྟོང་དང ། རྐང་ཐང་དཔའ་ཞིང་རྟུལ་ཕོད་པ་ཡན་ལག་དམ་པ་དང་ལྡན་པ། གོ་ཆ་ལེགས་པར་བགོས་པ་སྲ་བའི་གོ་གྱོན་པ་བརྒྱད་ཁྲི་བཞི་སྟོང་གིས་ནི་ཡོངས་སུ་བསྲུངས། ཤཱཀྱའི་བུ་མོ་སྟོང་ཕྲག་དྲུག་ཁྲིས་ནི་མདུན་དུ་བདར། རྒྱལ་པོ་ཟས་གཙང་མའི་ཕུ་ནུའི་རིགས་སུ་སྐྱེས་པའི་ཤཱཀྱ་རྒན་པ་དང ། བཞོན་པ་དང ། བར་མ་བཞི་ཁྲིས་ནི་ཡོངས་སུ་བསྲུངས། རྒྱལ་པོ་ཟས་གཙང་མའི་སླས་གླུ་དང་རོལ་མོའི་དབྱངས་སྒྲ་བྱེད། ཁར་བའི་སིལ་ཁྲོལ་དང ། ཕེག་རྡོབ་སིལ་སྙན་དང ། གླུ་དབྱངས་ལེན་པ་དྲུག་ཁྲིས་ནི་ཀུན་ནས་བསྐོར། ལྷའི་བུ་མོ་བརྒྱད་ཁྲི་བཞི་སྟོང་དང ། ཀླུའི་བུ་མོ་བརྒྱད་ཁྲི་བཞི་སྟོང་དང ། དྲི་ཟའི་བུ་མོ་བརྒྱད་ཁྲི་བཞི་སྟོང་དང ། མི་འམ་ཅིའི་བུ་མོ་བརྒྱད་ཁྲི་བཞི་སྟོང་དང ། ལྷ་མ་ཡིན་གྱི་བུ་མོ་བརྒྱད་ཁྲི་བཞི་སྟོང་བཀོད་པའི་རྒྱན་སྣ་ཚོགས་ཀྱིས་བརྒྱན་པ་ཤ་སྟག་གླུ་དང་རོལ་མོའི་དབྱངས་སྒྲ་སྣ་ཚོགས་ཀྱིས་བསྔགས་པ་བརྗོད་པ། རྗེས་སུ་འབྲང་བས་འགྲོའོ། ། 41.51a ལུམ་བི་ནིའི་ནགས་ཚལ་དེ་ཐམས་ཅད་ཀྱང་སྤོས་ཆུའི་ཆག་ཆག་གིས་བཏབ་ཅིང་ལྷའི་མེ་ཏོག་གིས་གཏོར་བར་གྱུར་ཏོ། །ནགས་ཚལ་དམ་པ་དེའི་ནང་ན་ཤིང་ལྗོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་དུས་ལ་མ་བབ་པར་ལོ་མ་དང་མེ་ཏོག་དང་འབྲས་བུ་སྐྱེད་པར་གྱུར་ཏོ། །ནགས་ཚལ་དེ་ནི་ལྷ་རྣམས་ཀྱིས་ཀྱང་ལེགས་པར་བརྒྱན་པར་གྱུར་ཏེ། འདི་ལྟ་སྟེ་དཔེར་ན། འདྲེས་པའི་ཚལ་ལྷ་རྣམས་ཀྱིས་ལེགས་པར་བརྒྱན་པ་བཞིན་ནོ། །དེ་ནས་ལྷ་མོ་སྒྱུ་འཕྲུལ་ལུམ་བི་ནིའི་ནགས་ཚལ་དུ་ཕྱིན་ནས་ཤིང་རྟ་དམ་པ་དེ་ལས་བབས་ཏེ། མི་དང་ལྷའི་བུ་མོ་དག་གིས་ཡོངས་སུ་བསྐོར་ཅིང ། ཤིང་དྲུང་ནས་ནི་ཤིང་དྲུང་དག་ཏུ་འགྲོ། ནགས་ཚལ་ནས་ནི་ནགས་ཚལ་དག་ཏུ་འཆག་།ལྗོན་པ་ནས་ནི་ལྗོན་པ་དག་ལ་ལྟ་ཞིང་དེ་རིམ་གྱིས་ཤིང་རིན་པོ་ཆེ་ཆེན་པོ་མཆོག་དང་ཕུལ་དུ་བྱ་བ། ཡལ་ག་ཤིན་དུ་རྣམ་པར་འབྱེས་པ། ལོ་མ་དང་དོག་པ་བཟང་པོ་དང་ལྡན་པ། མི་དང་ལྷའི་མེ་ཏོག་སྣ་ཚོགས་རབ་ཏུ་རྒྱས་པ། སྤོས་མཆོག་དང་ཕུལ་དུ་བྱ་བའི་དྲིའི་ངད་དང་ལྡན་པའི་གོས་ཁ་དོག་སྣ་ཚོགས་སྤྱངས་པ། ནོར་བུ་དང་རིན་པོ་ཆེ་སྣ་ཚོགས་ལྟ་བུའི་འོད་རྣམ་པ་ཐ་དད་པ་འབར་བ། རྩ་བ་དང ། སྡོང་པོ་དང ། ཡལ་ག་དང ། ལོ་མ་རྣམས་རིན་པོ་ཆེ་ཐམས་ཅད་ཀྱིས་ལེགས་པར་བརྒྱན་པ། ཡལ་ག་རིང་ཞིང་ཤིན་དུ་རྣམ་པར་འབྱེས་པ། བླག་ཤ་ཞེས་བྱ་བ་སའི་ཕྱོགས་ལག་མཐིལ་ལྟར་མཉམ་ཞིང་ཤིན་དུ་བཟང་ལ་ཡངས་པ། རྩཝ་སྔོན་པོ་རྨ་བྱའི་མགྲིན་པ་ལྟ་བུ་སྐྱེས་པ། ཀ་ཙ་ལིན་དིའི་གོས་ལྟར་རེག་ན་བདེ་བའི་ས་ལ་འདུག་པ། སྔོན་གྱི་རྒྱལ་བའི་ཡུམ་གྱིས་བརྟེན་པ། ལྷའི་གླུ་དབྱངས་བླངས་པ། གནས་གཙང་མའི་ལྷ་བཟང་ཞིང་དྲི་མ་མེད་ལ་རྣམ་པར་དག་པ་རབ་ཏུ་ཞི་བའི་སེམས་དང་ལྡན་པ་རྣམས་ཀྱིས་ཐོར་ཚུགས་དང་ཅོད་པན་མངོན་པར་བཏུད་པའི་སྤྱི་བོས་མངོན་པར་ཕྱག་བྱ 41.51b བའི་ཤིང་ལྗོན་པ་བླག་ཤ་དེའི་དྲུང་དུ་ཕྱིན་ཏོ། །དེ་ནས་བྱང་ཆུབ་སེམས་དཔའི་གཟི་བརྗིད་དང་མཐུས་ཤིང་བླག་ཤ་དེས་མངོན་པར་བཏུད་དེ་ཕྱག་བྱས་སོ། །དེ་ནས་ལྷ་མོ་སྒྱུ་འཕྲུལ་ནམ་མཁའི་དཀྱིལ་དུ་སྣང་བའི་གློག་གི་ཕྲེང་བ་ལྟ་བུའི་ལག་པ་གཡས་པ་བརྐྱང་ནས། བླག་ཤའི་ཡལ་ག་ལས་བཟུང་སྟེ། ཚུལ་དུ་ཤིས་པར་ནམ་མཁའི་དཀྱིལ་དུ་བལྟས་ནས་བྱ་སྨྱངས་བྱེད་ཅིང་འདུག་པར་གྱུར་ཏོ། །དེ་ནས་དེའི་ཚེ་འདོད་པ་ན་སྤྱོད་པའི་ལྷའི་ནང་ནས་ལྷའི་བུ་མོ་དྲུག་ཁྲི་ལྷགས་ཏེ། ལྷ་མོ་སྒྱུ་འཕྲུལ་ལ་རིམ་གྲོ་དང་བཀུར་སྟི་བྱེད་པར་གྱུར་ཏོ། །བྱང་ཆུབ་སེམས་དཔའ་མའི་རུམ་ན་འདུག་པའི་ཚེ། རྣམ་པ་དེ་ལྟ་བུའི་རྫུ་འཕྲུལ་གྱི་ཆོ་འཕྲུལ་དང་ལྡན་པར་གནས་སོ། །དེ་ཟླ་བ་བཅུ་ཚང་ནས་མའི་གློ་གཡས་པ་ནས་དྲན་ཞིང་ཤེས་བཞིན་དུ་མངལ་གྱི་དྲི་མས་མ་གོས་པར་བྱུང་སྟེ། གཞན་ལྟར་མ་ཡིན་ཞིང་གཞན་དག་ལ་མངལ་གྱི་དྲི་མ་ཞེས་བྱ་བ་བརྗོད་པ་ལྟ་བུ་མེད་པར་གྱུར་ཏོ། །དགེ་སློང་དག་དེའི་ཚེ་ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་གཉིས་མདུན་ན་འཁོད་དེ། དེ་གཉིས་ཀྱིས་རིམ་གྲོ་དམ་པ་ཆེན་པོས་ལྷའི་གོས་ཀ་ཤི་པའི་སླེབ་མོས་ལུས་དང་ཡན་ལག་ཐམས་ཅད་ཀྱིས་དྲན་ཞིང་ཤེས་བཞིན་དུ་བྱང་ཆུབ་སེམས་དཔའ་བླངས་སོ། །བྱང་ཆུབ་སེམས་དཔའ་ཁང་པ་བརྩེགས་པ་གང་གི་ནང་ན་འདུག་ཅིང་མའི་རུམ་ན་གནས་གནས་པ་དེ་ཡང་མི་མཇེད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷ་རྣམས་ཀྱིས་ཚངས་པའི་འཇིག་རྟེན་དུ་གྱེན་དུ་བཏེག་སྟེ། མཆོད་རྟེན་དུ་བྱ་བ་དང ། མཆོད་པ་བྱ་བའི་ཕྱིར་ཁྱེར་རོ། །དེ་ལྟར་བྱང་ཆུབ་སེམས་དཔའ་དེ་ནི་མིར་གྱུར་པ་གང་གིས་ཀྱང་མ་བླངས་ཀྱི། བྱང་ཆུབ་སེམས་དཔའ་དེ་ནི་ལྷ་རྣམས་ཀྱིས་བླངས་སོ། །དེ་ནས་བྱང་ཆུབ་སེམས་དཔའ་བཙས་མ་ཐག་ཏུ་ས་ལ་འབབ་སྟེ། བྱང་ཆུབ་སེམས་དཔའ་དེ་ས་ལ། བབས་པར་གྱུར་མ 41.52a ཐག་ཏུ་པད་མ་ཆེན་པོ་ཞིག་གིས་ས་འདི་ཡང་བརྟོལ་ཏེ་བྱུང་ངོ ། །ཀླུའི་རྒྱལ་པོ་ཆེན་པོ་དགའ་བོ་དང ། ཉེ་དགའ་བོ་གཉིས་ཀྱང་ནམ་མཁའི་དཀྱིལ་ན་ལུས་ཕྱེད་ཕྱུང་སྟེ་འཁོད་ནས་བསིལ་བ་དང ། དྲོ་བའི་ཆུའི་རྒྱུན་གཉིས་མངོན་པར་སྤྲུལ་ནས་བྱང་ཆུབ་སེམས་དཔའི་ལུས་བཀྲུས་སོ། །བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་ལ་སོགས་པ་གཞན་ཡང་ལྷའི་བུ་བརྒྱ་སྟོང་མང་པོ་དག་བྱང་ཆུབ་སེམས་དཔའ་བཙས་མ་ཐག་ཏུ་སྤོས་ཆུ་སྣ་ཚོགས་དང ། མེ་ཏོག་སིལ་མས་ལུས་འཁྲུ་ཞིང་མངོན་པར་འཐོར་རོ། །བར་སྣང་ལས་ཀྱང་རྡུལ་ཡབ་ཀྱི་རྔ་མ་གཉིས་དང ། རིན་པོ་ཆེའི་གདུགས་བྱུང་བར་གྱུར་ཏོ། །དེ་པད་མ་ཆེན་པོ་དེ་ལ་འདུག་ནས་ཕྱོགས་བཞིར་རྣམ་པར་ལྟ་སྟེ། སེང་གེའི་ལྟ་སྟངས་དང ། སྐྱེས་བུ་ཆེན་པོའི་ལྟ་བསྟངས་ཀྱིས་རྣམ་པར་ལྟའོ། །དེའི་ཚེ་བྱང་ཆུབ་སེམས་དཔས་སྔོན་གྱི་དགེ་བའི་རྩ་བའི་རྣམ་པར་སྨིན་པ་ལས་བྱུང་བ་ལྷའི་མིག་ཐོགས་པ་མེད་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་གྲོང་ཁྱེར་དང་གྲོང་རྡལ་དང་ཡུལ་འཁོར་དང་ལྗོངས་སུ་བཅས། ཡུལ་དུ་བཅས། མི་དང་ལྷར་བཅས་པ་རྣམས་མཐོང་བར་གྱུར་ཏོ། །སེམས་ཅན་ཐམས་ཅད་ཀྱི་སེམས་ཀྱི་སྤྱོད་པའང་རབ་ཏུ་ཤེས་ཏེ། ཤེས་ནས་ཀྱང་སེམས་ཅན་གང་ཚུལ་ཁྲིམས་སམ། ཏིང་ངེ་འཛིན་ཏམ། ཤེས་རབ་བམ། དགེ་བའི་སྤྱོད་པས་བདག་དང་འདྲ་བ་དེ་ལྟ་བུ་གང་ལ་ལ་ཞིག་ཡོད་དམ་ཞེས་རྣམ་པར་ལྟའོ། །དེའི་ཚེ་བྱང་ཆུབ་སེམས་དཔས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བདག་དང་མཚུངས་པའི་སེམས་ཅན་གང་ཡང་མ་མཐོང་ནས། དེའི་ཚེ་བྱང་ཆུབ་སེམས་དཔའ་སེང་གེ་ལྟར་འཇིགས་པ་མེད་ཅིང་བག་ཚ་བ་མེད་དེ། ཞུམ་པ་དང་བག་འཆུམས་པ་མེད་པས་ལེགས་པར་བསམ་པ་དྲན་པར་བྱས་ཏེ། བསམས་བརྟགས་ནས་སེམས་ཅན་ཐམས 41.52b ཅད་ཀྱི་སེམས་ཀྱི་སྤྱོད་པ་ཤེས་པར་བྱ་སྟེ། སུས་ཀྱང་བརྟན་པ་མེད་པར་བྱང་ཆུབ་སེམས་དཔའ་དགེ་བའི་རྩ་བའི་ཆོས་ཐམས་ཅད་ཀྱི་སྔོན་དུ་འགྲོ་བར་བྱའོ་ཞེས་ཤར་ཕྱོགས་ལོགས་སུ་གོམ་པ་བདུན་བོར་རོ། །དེ་ལྟར་བྱང་ཆུབ་སེམས་དཔའ་གང་དང་གང་དུ་གོམ་པ་བོར་བ་དེ་དང་དེ་དག་ཏུ་པད་མ་དག་ཀྱང་སྐྱེས་པར་གྱུར་ཏོ། །ལྷ་དང་མི་རྣམས་ཀྱི་སྦྱིན་པའི་གནས་སུ་འགྱུར་བར་བྱའོ་ཞེས་ལྷོ་ཕྱོགས་ལོགས་སུ་གོམ་པ་བདུན་བོར་རོ། །ནུབ་ཕྱོགས་ལོགས་སུ་གོམ་པ་བདུན་བོར་ནས་གོམ་པ་བདུན་པ་ལ་གནས་ཏེ་ང་ནི་འཇིག་རྟེན་ན་ཕུལ་དུ་ཕྱིན་པའོ། །འདི་ནི་ངའི་སྐྱེ་བ་ཐ་མ་སྟེ། སྐྱེ་བ་དང ། རྒ་བ་དང ། ན་བ་དང ། འཆི་བ་མཐར་དབྱུང་ངོ་ཞེས་སེང་གེ་ལྟར་ཚིམ་པར་གྱུར་པའི་སྒྲ་སྒྲགས་སོ། །སེམས་ཅན་ཐམས་ཅད་ཀྱི་ནང་ན་བླ་ན་མེད་པར་བྱའོ་ཞེས་བྱང་ཕྱོགས་ལོགས་སུ་གོམ་པ་བདུན་བོར་རོ། །བདུད་དང་བདུད་ཀྱི་སྡེ་ནི་གཞོམ་པར་བྱའོ། །སེམས་ཅན་དམྱལ་བ་པ་ཐམས་ཅད་ཀྱི་སེམས་ཅན་དམྱལ་བའི་མེ་གསད་པའི་ཕྱིར་ཆོས་ཀྱི་ཆར་སྤྲིན་ཆེན་པོའི་ཆར་ཕབ་སྟེ། དེ་དག་བདེ་བས་ཚིམ་པར་བྱའོ་ཞེས་འོག་གི་ཕྱོགས་ལོགས་སུ་གོམ་པ་བདུན་བོར་རོ། །སེམས་ཅན་ཐམས་ཅད་ཀྱི་གྱེན་དུ་བལྟ་བར་འགྱུར་བར་བྱའོ་ཞེས་སྟེང་གི་ཕྱོགས་ལོགས་སུ་གོམ་པ་བདུན་བོར་ནས་སྟེང་དུ་ལྟའོ། །བྱང་ཆུབ་སེམས་དཔས་ཚིག་དེ་བརྗོད་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སྒྲས་མངོན་པར་གོ་བར་གྱུར་ཏེ། དེ་ནི་བྱང་ཆུབ་སེམས་དཔའི་ལས་ཀྱི་རྣམ་པར་སྨིན་པ་ལས་བྱུང་བའི་མངོན་པར་ཤེས་པའི་ཆོས་ཉིད་དོ། །གང་གི་ཚེ་བྱང་ཆུབ་སེམས་དཔའ་སྲིད་པ་ཐ་མ་པ་བཙའ་བར་འགྱུར་བ་དང ། གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ། རྫུ་འཕྲུལ་གྱི་ཆོ་འཕྲུལ་གྱི 41.53a རྣམ་པ་དེ་ལྟ་བུ་དེ་དག་བྱུང་ངོ ། །དགེ་སློང་དག་དེའི་ཚེ་སེམས་ཅན་ཐམས་ཅད་ཀྱང་རབ་ཏུ་དགའ་ཞིང་སྤུ་གཡོས་པར་གྱུར་ཏོ། །འཇིག་རྟེན་དུ་ས་གཡོ་བ་ཆེན་པོ་ཤིན་དུ་འཇིགས་ཤིང་སྤུ་གཡོ་བར་འགྱུར་བ་ཡང་བྱུང་བར་གྱུར་ཏོ། །མི་དང་ལྷའི་སིལ་སྙན་དང ། རོལ་མོའི་དབྱངས་སྒྲར་བྱ་བ་ཐམས་ཅད་ཀྱང་མ་བླངས་པར་སྒྲ་འབྱིན་པར་གྱུར་ཏོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་དུས་དང་དུས་མཚམས་སོ་སོའི་ཤིང་ཐམས་ཅད་ཀྱང་མེ་ཏོག་རྒྱས་ཤིང་འབྲས་བུ་ཆགས་པ་དང་རྣམ་པར་དག་པར་གྱུར་ཏོ། །ནམ་མཁའི་དཀྱིལ་ནས་ཀྱང་སྤྲིན་གྱི་སྒྲ་གྲགས་ཏེ། སྤྲིན་མེད་པའི་ནམ་མཁའ་ལས་ཀྱང་དལ་བུས་དལ་བུས་ཕྲ་བའི་ཆར་ལྷ་ཡུལ་བའི་ཁ་དོག་དང་ལྡན་པའི་མེ་ཏོག་དང ། གོས་དང ། རྒྱན་དང ། སྤོས་ཀྱི་ཕྱེ་མ་དང་འདྲེས་པ་འབབ་པར་གྱུར་ཏོ། །རླུང་རེག་ན་མཆོག་ཏུ་བདེ་བ་འཇམ་པ་དྲི་ཞིམ་པོ་དག་ཀྱང་ལྡང་བར་གྱུར་ཏོ། །ཕྱོགས་ཐམས་ཅད་ཀྱང་མུན་པ་དང ། རྡུལ་དང ། དུ་བ་དང ། ཁུག་རྣ་མེད་ཅིང་རབ་ཏུ་དང་བས་རྣམ་པར་མཛེས་པར་གྱུར་ཏོ། །སྟེང་གི་བར་སྣང་ལས་ཀྱང་ཚངས་པའི་སྒྲ་ཆེན་པོ་མི་སྣང་ཞིང་ཟབ་པ་གྲག་པར་གྱུར་ཏོ། །ཉི་ཟླ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བའི་འོད་ཐམས་ཅད་ཀྱང་ཟིལ་གྱིས་མནན་ཏེ། འོད་ཁ་དོག་བརྒྱ་སྟོང་དང་ལྡན་པ། རེག་ན་མཆོག་ཏུ་བདེ་བ། སེམས་ཅན་ཐམས་ཅད་ཀྱི་ལུས་དང་སེམས་ལ་བདེ་བ་སྐྱེད་པ། འཇིག་རྟེན་ལས་འདས་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་གང་བར་གྱུར་ཏོ། །བྱང་ཆུབ་སེམས་དཔའ་བཙས་མ་ཐག་ཏུ་སེམས་ཅན་ཐམས་ཅད་ཀྱང་བདེ་བས་ཤིན་དུ་ཚིམ་པར་གྱུར་ཏེ། འདོད་ཆགས་དང ། ཞེ་སྡང་དང ། གཏི་མུག་དང ། དྲེགས་པ་དང ། མི་དགའ་བ་དང ། ཞུམ་པ་དང ། འཇིགས་པ་དང ། 41.53b ཆགས་པ་དང ། ཕྲག་དོག་དང ། སེར་སྣ་ཐམས་ཅད་དང་བྲལ་ཞིང་མི་དགེ་བའི་བྱ་བ་ཐམས་ཅད་སྤངས་པར་གྱུར་ཏོ། །སེམས་ཅན་ནད་པ་རྣམས་ཀྱི་ནད་ཀྱང་ཞི་བར་གྱུར་ཏོ། །བཀྲེས་ཤིང་སྐོམ་པའི་སེམས་ཅན་རྣམས་ཀྱང་བཀྲེས་པ་དང་སྐོམ་པ་མེད་པར་གྱུར་ཏོ། །ཆང་གིས་ར་རོ་ཞིང་མྱོས་པ་རྣམས་ཀྱང་མྱོས་པ་མེད་པར་གྱུར་ཏོ། །སྨྱོས་པ་རྣམས་ཀྱང་དྲན་པ་ཐོབ་པར་གྱུར་ཏོ། །མིག་མེད་པ་རྣམས་ཀྱིས་ཀྱང་མིག་ཐོབ་པར་གྱུར་ཏོ། །རྣ་བ་འོན་པ་རྣམས་ཀྱིས་ཀྱང་སྒྲ་ཐོས་པར་གྱུར་ཏོ། །ཡན་ལག་དང་ཉིང་ལག་ཉམས་པ་རྣམས་ཀྱང་དབང་པོ་ཉམས་པ་མེད་པར་གྱུར་ཏོ། །དབུལ་པོ་རྣམས་ཀྱིས་ཀྱང་ནོར་ཐོབ་པར་གྱུར་ཏོ། །བཙོན་ར་ན་འཁོད་པ་རྣམས་ཀྱང་བཙོན་ར་ནས་ཐར་བར་གྱུར་ཏོ། །མནར་མེད་པ་ལ་སོགས་པའི་སེམས་ཅན་དམྱལ་བ་པའི་སེམས་ཅན་ཐམས་ཅད་ཀྱི་ནད་དུ་བྱ་བ་དང་སྡུག་བསྔལ་ཐམས་ཅད་དེའི་ཚེ་རྒྱུན་ཆད་པར་གྱུར་ཏོ། །དུད་འགྲོའི་སྐྱེ་གནས་པ་རྣམས་ཀྱིས་གཅིག་ལ་གཅིག་ཟ་བ་ལ་སོགས་པའི་སྡུག་བསྔལ་ཡང་ཞི་བར་གྱུར་ཏོ། །གཤིན་རྗེའི་འཇིག་རྟེན་པའི་སེམས་ཅན་རྣམས་ཀྱི་བཀྲེས་པ་དང་སྐོམ་པ་ལ་སོགས་པའི་སྡུག་བསྔལ་ཡང་ཞི་བར་གྱུར་ཏོ། །གང་གི་ཚེ་བྱང་ཆུབ་སེམས་དཔའ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་སྤྱད་པ་ཤིན་དུ་སྤྱད་པ། བརྩོན་འགྲུས་ཆེན་པོ་དང་ལྡན་པ། མཐུ་ཆེན་པོ་དང་ལྡན་པ། བཙས་མ་ཐག་ཏུ་གོམ་པ་བདུན་འདོར་བའི་ཚེ་ཆོས་ཉིད་ཐོབ་པས་དེའི་ཚེ། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་སའི་ཕྱོགས་དེ་དེའི་ཚེ་ཞིག་པར་མི་འགྱུར་བར་བྱ་བའི་ཕྱིར་རྡོ་རྗེའི་རང་བཞིན་དུ་བྱིན་གྱིས་རློབ་པ་མཛད་དེ། དགེ་སློང་དག་དེ་ཙམ་དུ་སྟོབས་ཀྱི་ཤུགས་དྲག་པོ་དང་ལྡན་པར་བྱང་ཆུབ་སེམས 41.54a དཔའ་བཙས་མ་ཐག་པ་གོམ་པ་བདུན་འདོར་བར་གྱུར་ཏོ། །འཇིག་རྟེན་གྱི་བར་ཐམས་ཅད་ཀྱང་དེའི་ཚེ་སྣང་བ་ཆེན་པོས་རྒྱས་པར་གང་བར་གྱུར་ཏོ། །དེའི་ཚེ་གླུའི་སྒྲ་ཆེན་པོ་ཡང་བྱུང་བར་གྱུར་ཏེ། གར་གྱི་སྒྲ་ཆེན་པོ་ཡང་བྱུང་བར་གྱུར་ཏོ། །དེའི་ཚེ་མེ་ཏོག་དང ། ཕྱེ་མ་དང ། སྤོས་དང ། ཕྲེང་བ་དང ། རིན་པོ་ཆེ་དང ། རྒྱན་དང ། གོས་ཀྱི་སྤྲིན་དཔག་ཏུ་མེད་པ་དག་ཀྱང་ཆར་དུ་མངོན་པར་བབ་པར་གྱུར་ཏོ། །སེམས་ཅན་ཐམས་ཅད་ཀྱང་བདེ་བའི་མཆོག་དང་ལྡན་པར་གྱུར་ཏེ། མདོར་ན་བྱང་ཆུབ་སེམས་དཔའ་འཇིག་རྟེན་ཐམས་ཅད་ལས་མངོན་པར་འཕགས་པ་འཇིག་རྟེན་དུ་བྱུང་བའི་ཚེ། བྱ་བ་བསམ་གྱིས་མི་ཁྱབ་པ་བྱུང་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི་སེམས་ཅན་ཐམས་ཅད་ལས་ངོ་མཚར་དུ་གྱུར་པ་སྟེ། བྱང་ཆུབ་སེམས་དཔའ་ཉིད་ཀྱང་རྨད་དུ་བྱུང་བའི་ཆོས་དང་ལྡན་པར་གྱུར་ན། ད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས་འདི་ལྟར་བདག་ནི་ལན་བཞི་འམ། ལན་ལྔར་ཡང ། ལན་བཅུར་ཡང ། ལན་ལྔ་བཅུའི་བར་དུ་ཡང ། ལན་བརྒྱའི་བར་དུ་ཡང ། ལན་བརྒྱ་སྟོང་དུ་མའི་བར་དུ་ཡང་སངས་རྒྱས་བཅོམ་ལྡན་འདས་ལ་སྐྱབས་སུ་མཆིའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་མ་འོངས་པའི་དུས་ན་དགེ་སློང་ལ་ལ་ལུས་མ་བསྒོམས་པ། 41.54b སེམས་མ་བསྒོམས་པ། ཚུལ་ཁྲིམས་མ་བསྒོམས་པ། ཤེས་རབ་མ་བསྒོམས་པ། བྱིས་པ་མི་མཁས་པ། ལྷག་པའི་ང་རྒྱལ་ཅན། རྒོད་པ། ཁེངས་པ། མ་བསྡམས་པ། སེམས་གཡེངས་པ། ནེམ་ནུར་གྱིས་འཁོར་བ། ཐེ་ཚོམ་མང་བ། དད་པ་མེད་པ། དགེ་སྦྱོང་གི་དྲི་མར་གྱུར་པ། དགེ་སྦྱོང་གི་ཚུལ་དང་མི་འདྲ་བ་དག་འབྱུང་སྟེ། དེ་དག་ནི་བྱང་ཆུབ་སེམས་དཔའ་མའི་རུམ་དུ་འགྲོ་བ་ཡོངས་སུ་དག་པ་འདི་ལྟ་བུ་ཐོས་ནས་ཡིད་མི་ཆེས་ཤིང་དེ་དག་ཕྱོགས་གཅིག་ཏུ་ཚོགས་ནས་གཅིག་ལ་གཅིག་འདི་སྐད་དུ། ཀྱེ་ཁྱེད་ཅག་འདི་ལྟ་བུའི་མི་རིགས་པ་ལ་ལྟོས། བྱང་ཆུབ་སེམས་དཔའ་མའི་མངལ་ན་འདུག་པ་བཙོག་པའི་ཁུ་ཤུགས་དང་འདྲེས་པ་ལ་ཡང་འདི་ལྟ་བུའི་ལོངས་སྤྱོད་ཡོད་ཅེས་བྱ་བ་དང ། དེ་འབྱུང་བའི་ཚེ་མའི་གློ་གཡས་པ་ནས་མངལ་གྱི་དྲི་མས་མ་གོས་པར་འབྱུང་ཞེས་བྱ་བ་འདི་རིགས་པར་ཇི་ལྟར་འགྱུར་ཞེས་ཟེར་བར་འགྱུར་ཏེ། སྐྱེས་བུ་གླེན་པ་དེ་དག་ནི་སེམས་ཅན་ལེགས་པར་བྱས་པའི་ལས་དང་ལྡན་པ་རྣམས་ཀྱི་ལུས་མི་གཙང་བའི་ཁུ་བའི་ནང་དུ་མི་འབྱུང་ངོ་ཞེས་བྱ་བར་མི་ཤེས་སོ། །དགེ་སློང་དག་སེམས་ཅན་དམ་པ་དེ་ལྟ་བུ་དག་གི་མངལ་དུ་འགྲོ་བ་དང་མངལ་ན་གནས་པ་ནི་ཤིན་དུ་ཡང་བཟང་བ་ཡིན་ནོ། །བྱང་ཆུབ་སེམས་དཔའ་རྣམས་ནི་སེམས་ཅན་རྣམས་ལ་སྙིང་བརྩེ་བས་མིའི་འཇིག་རྟེན་དུ་སྐྱེ་སྟེ། ལྷར་གྱུར་པ་ཉིད་ཀྱིས་ཆོས་ཀྱི་འཁོར་ལོ་མི་སྐོར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་སེམས་ཅན་རྣམས་ཞུམ་པར་འགྱུར་ཞིང ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ནི་ལྷར་གྱུར་པ་ཡིན་གྱི། བདག་ཅག་ནི་མི་ཙམ་དུ་ཟད་པས་ན། བདག་ཅག་གིས་གནས་དེ་ལྟ་བུ་ཡོངས་སུ་རྫོགས་པར་བྱ་བར་མི་ནུས་སོ། །ཞེས་ཞུམ་པར་འགྱུར་དུ་འོང་བའི་ཕྱིར་ཏེ། སྐྱེས་བུ་གླེན་པ་ཆོས་ཀྱི་རྐུན་པོར་གྱུར 41.55a པ་དེ་དག་འདི་སྙམ་དུ་སེམས་ཅན་དེ་ནི་བསམ་གྱིས་མི་ཁྱབ་པ་སྟེ། དེ་ནི་བདག་ཅག་གིས་ཚོད་གཟུང་བར་བྱ་བ་མ་ཡིན་ནོ། །སྙམ་དུ་མི་སེམས་སོ། །ཀུན་དགའ་བོ་དེ་དག་ནི་དེའི་ཚེ་སངས་རྒྱས་ཀྱི་ཆོ་འཕྲུལ་ལའང་ཡིད་མི་ཆེས་པར་འགྱུར་ན། དེ་བཞིན་གཤེགས་པ་བྱང་ཆུབ་སེམས་དཔར་གྱུར་པའི་བྱང་ཆུབ་སེམས་དཔའི་ཆོ་འཕྲུལ་ལྟ་སྨོས་ཀྱང་ཅི་དགོས་ཏེ། ཀུན་དགའ་བོ་ད་ལྟར་སྐྱེས་བུ་གླེན་པ་རྙེད་པ་དང ། བཀུར་སྟི་དང་ཚིགས་སུ་བཅད་པའི་ཟིལ་གྱིས་ནོན་པ། མི་གཙང་བར་བྱིང་བ། རིམ་གྲོའི་ཟིལ་གྱིས་ནོན་པ། མ་རབས་ཀྱི་ངང་ཚུལ་ཅན་དེ་དག་སངས་རྒྱས་ཀྱི་ཆོས་སྤོང་ཞིང་བསོད་ནམས་མ་ཡིན་པའི་མངོན་པར་འདུ་བྱ་བ་མང་པོ་ཇི་སྙེད་ཅིག་མངོན་པར་འདུ་བྱེད་པ་ལ་ལྟོས། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་ལྔ་པ། ཀུན་དགའ་བོས་གསོལ་བ། བཅོམ་ལྡན་འདས་མ་བྱུང་བའི་དུས་ན། འདི་ལྟ་བུའི་མདོ་སྡེ་བཟང་པོ་ལ་ཡང་སྤོང་ཞིང་མི་སྙན་པར་བརྗོད་པ་དེ་ལྟ་བུའི་དགེ་སློང་དག་ཀྱང་འབྱུང་བ་ལགས་པ་ལྟ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དག་ནི་མདོ་སྡེ་འདི་ལྟ་བུ་སྤོང་ཞིང་མི་སྙན་པ་བརྗོད་པར་ཡང་མ་ཟད་དེ། སྡིག་པ་རྣམ་པ་དུ་མ་མངོན་པར་འདུ་བྱ་བ་མངོན་པར་འདུ་བྱེད་ཅིང་དགེ་སྦྱོང་གི་དངོས་པོ་དོན་དུ་མི་གཉེར་བ་དག་ཀྱང་འབྱུང་བར་འགྱུར་རོ། །གསོལ་པ་བཅོམ་ལྡན་འདས་འོ་ན་སྐྱེས་བུ་དམ་པ་མ་ལགས་པ་དེ་འདྲ་བ་དེ་དག་གི་འགྲོ་བ་ནི་ཅི་འདྲ་བ་ཞིག་ཏུ་འགྱུར། ཚེ་རབས་ཕོས་ནས་ནི་ཇི་ལྟ་བུ་ཞིག་ཏུ་མཆི། བཅོམ་ལྡན་འདས་ཀྱིས་བཀའ་སྩལ་པ། དེ་དག་ནི་སངས་རྒྱས་ཀྱི་བྱང་ཆུབ་མེད་པར་བྱས་ཏེ། འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས 41.55b བཅོམ་ལྡན་འདས་རྣམས་ལ་མི་སྙན་པས་སྐུར་བ་བཏབ་པའི་འགྲོ་བ་གང་ཡིན་པའི་འགྲོ་བ་དེར་འགྲོ་བར་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོ་སྤུ་གཡོས་ནས་སངས་རྒྱས་ལ་ཕྱག་འཚལ་ལོ་ཞེས་བརྗོད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྐྱེས་བུ་དམ་པ་མ་ལགས་པ་དེ་དག་གི་སྤྱོད་པ་འདི་དག་ཐོས་ནས་བདག་ནི་བརྒྱལ་བ་དང་འདྲ་བར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དག་གི་སྤྱོད་པ་ནི་མཉམ་པར་མི་འགྱུར་ཞིང ། སེམས་ཅན་དེ་དག་ནི་མི་མཉམ་པའི་སྤྱོད་པ་ཅན་དུ་འགྱུར་རོ། །ཀུན་དགའ་བོ་དེ་དག་ཚུལ་དང་མི་འདྲ་བའི་སྤྱོད་པ་དེས་མནར་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་མདོ་སྡེ་འདི་ལྟ་བུ་འདི་དག་ཐོས་ནས་མ་མོས་ཤིང་ཡིད་མི་ཆེས་པ་དང ། སྤོང་བ་དེ་དག་ནི་ཤི་འཕོས་མ་ཐག་ཏུ་མནར་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། ཀུན་དགའ་བོ་དེ་བཞིན་གཤེགས་པ་ལ་ནི་ཚད་དུ་མ་བྱེད་ཅིག་།དེ་ཅིའི་ཕྱིར་ཞེ་ན། ཀུན་དགའ་བོ་དེ་བཞིན་གཤེགས་པ་ནི་ཚད་མེད་ཅིང་ཟབ་ལ་རྒྱ་ཆེ་ཞིང་གཏིང་དཔག་དཀའ་བའོ། །ཀུན་དགའ་བོ་ལ་ལ་ཞིག་གིས་མདོ་སྡེ་འདི་ལྟ་བུ་འདི་དག་ཐོས་ནས་དགའ་བ་དང ། མཆོག་ཏུ་དགའ་བ་དང ། དད་པ་སྐྱེ་བའི་སེམས་ཅན་དེ་དག་གིས་ནི་ཐོབ་པ་ལེགས་པར་ཐོབ་པ་ཡིན་ཏེ། དེ་དག་གི་འཚོ་བ་ནི་དོན་ཡོད་པའོ། །དེ་དག་གི་མིའི་དངོས་པོ་ནི་དོན་ཡོད་པའོ། །དེ་དག་གི་སྤྱོད་པ་ལེགས་པར་སྤྱད་པའོ། །དེ་དག་གིས་ནི་སྙིང་པོ་བླངས་སོ། །དེ་དག་ནི་ངན་སོང་གསུམ་ལས་གྲོལ་བའོ། །དེ་དག་ནི་དེ་བཞིན 41.56a གཤེགས་པའི་སྲས་སུ་འགྱུར་རོ། །དེ་དག་གིས་ནི་དགོས་པ་ཐམས་ཅད་ཡོངས་སུ་ཐོབ་བོ། །དེ་དག་གིས་དད་པ་ཐོབ་པ་ནི་དོན་ཡོད་དོ། །དེ་དག་གིས་ནི་ཡུལ་འཁོར་གྱི་ཟས་ལེགས་པར་ཟོས་སོ། །དེ་དག་གིས་ནི་སེམས་ཅན་དམ་པ་རྣམས་ལ་ལེགས་པར་མོས་པ་ཡིན་ནོ། །དེ་དག་ནི་བདུད་ཀྱི་ཞགས་པ་གཏུབས་པ་ཡིན་ནོ། །དེ་དག་ནི་འཁོར་བའི་འབྲོག་དགོན་པ་ལས་རྒལ་ཏོ། །དེ་དག་གིས་ནི་མྱ་ངན་གྱི་ཟུག་རྔུ་ཕྱུང་ངོ ། །དེ་དག་གིས་ནི་མཆོག་ཏུ་དགའ་བའི་དངོས་པོ་རྗེས་སུ་ཐོབ་བོ། །དེ་དག་གིས་ནི་སྐྱབས་སུ་འགྲོ་བ་ལེགས་པར་བླངས་སོ། །དེ་དག་ནི་སྦྱིན་པའི་གནས་ཡིན་ཏེ་མཆོད་པར་འོས་པའོ། །དེ་དག་ནི་འཇིག་རྟེན་ན་འབྱུང་བར་དཀོན་པའོ། །དེ་དག་ནི་འཇིག་རྟེན་ན་སྦྱིན་པའི་གནས་སུ་གཟུང་བའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་ཆོས་འཇིག་རྟེན་ཐམས་ཅད་དང་མི་མཐུན་པ་རྣམ་པ་འདི་ལྟ་བུ་འདི་ལ་དད་པའི་ཕྱིར་རོ། །ཀུན་དགའ་བོ་སེམས་ཅན་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ཡིན་ཏེ། ཀུན་དགའ་བོ་སེམས་ཅན་དེ་དག་ནི་ང་དང་ཚེ་རབས་འགའ་ཞིག་ཏུ་འགྲོགས་པར་གྱུར་པའི་གྲོགས་པོ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་ལ་ལ་ནི་ཐོས་པ་ཙམ་གྱིས་དགའ་ཞིང་ཡིད་དུ་འོང་བ་ཡོད་ཀྱི་མཐོང་ན་མ་ཡིན་ནོ། །ཀུན་དགའ་བོ་ལ་ལ་ནི་མཐོང་བས་དགའ་ཞིང་ཡིད་དུ་འོང་བ་ཡོད་ཀྱི་ཐོས་པས་ནི་མ་ཡིན་ནོ། །ཀུན་དགའ་བོ་ལ་ལ་ནི་མཐོང་ན་ཡང་དགའ་ཞིང་ཡིད་དུ་འོང་ལ་ཐོས་ན་ཡང་དགའ་ཞིང་ཡིད་དུ་འོང་བ་ཡོད་དོ། །ཀུན་དགའ་བོ་གང་ཡང་རུང་སྟེ། ལ་ལ་ཞིག་མཐོང་ངམ། ཐོས་ནས་དགའ་ཞིང་ཡིད་དུ་འོང་བར་གྱུར་ན། ཁྱོད་ཀྱིས་དེ་ལ་འདི་ལྟར་དེ་དག་ནི་ང་དང་ཚེ་རབས་འགའ་ཞིག་ཏུ་འགྲོགས་པའི་གྲོགས་པོ་ཡིན་པར་ངེས་པར་རྟོགས་པར་བྱ་སྟེ། 41.56b དེ་དག་ནི་དེ་བཞིན་གཤེགས་པས་གཟིགས་སོ། །དེ་དག་ནི་དེ་བཞིན་གཤེགས་པས་དགྲོལ་བར་བྱ་བའོ། །དེ་དག་ནི་དེ་བཞིན་གཤེགས་པ་དང་ཡོན་ཏན་གྱི་ཆ་མཉམ་པའོ། །དེ་དག་ནི་དེ་བཞིན་གཤེགས་པ་ལ་སྐྱབས་སུ་དོང་བའོ། །དེ་དག་ནི་དེ་བཞིན་གཤེགས་པས་བཟུང་བའོ། །ཀུན་དགའ་བོ་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ཉིད་ཀྱི་ཚེ་ཡང་སེམས་ཅན་སུ་ཡང་རུང་སྟེ། འཇིགས་པས་ཉམ་ཐག་ཅིང་འོངས་ནས་མི་འཇིགས་པ་སློང་ན་སེམས་ཅན་དེ་དག་ལ་ངས་མི་འཇིགས་པ་བྱིན་པར་གྱུར་ན། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པས་ལྟ་སྨོས་ཀྱང་ཅི་དགོས། ཀུན་དགའ་བོ་དད་པ་ལ་བརྩོན་པར་གྱིས་ཤིག་།འདི་ནི་དེ་བཞིན་གཤེགས་པས་བཅོལ་བའོ། །ཀུན་དགའ་བོ་ཁྱོད་ཀྱིས་བྱ་བ་ཅི་ཡོད་པ་དེ་དག་ནི་དེ་བཞིན་གཤེགས་པས་བྱས་སོ། །ང་རྒྱལ་གྱི་ཟུག་རྔུ་ནི་དེ་བཞིན་གཤེགས་པས་བསལ་ཏོ། །ཀུན་དགའ་བོ་གྲོགས་པོའི་གཏམ་ཐོས་པ་ཙམ་གྱིས་ཀྱང་དཔག་ཚད་བརྒྱའི་ལམ་དུ་ཡང་འགྲོ་སྟེ། ཐོས་པས་ཀྱང་དགའ་བར་འགྱུར་བ་ཡིན་ན། སྔར་མ་མཐོང་བ་ལས་མཛའ་བོ་མཐོང་བར་གྱུར་ན་སྨོས་ཀྱང་ཅི་དགོས་ཏེ། གང་ང་ལ་རྟེན་ཅིང་དགེ་བའི་རྩ་བ་སྐྱེད་པར་བྱེད་པ་དེ་དག་ནི་མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་མཁྱེན་ཅིང་སེམས་ཅན་དེ་དག་ནི་དེ་བཞིན་གཤེགས་པ་རྣམས་ཀྱི་སྔོན་གྱི་མཛའ་བོ་སྟེ། དེ་དག་ནི་བདག་ཅག་གི་ཡང་མཛའ་བོ་ཡིན་ནོ་སྙམ་དུ་དགོངས་སོ། །དེ་ཅིའི་ཕྱིར་ཞེ་ན། ཀུན་དགའ་བོ་མཛའ་བོ་གང་ཡིན་པ་དེ་ནི་མཛའ་བོ་ལ་སྡུག་ཅིང་ཡིད་དུ་འོང་བ་ཡིན་ནོ། །མཛའ་བོ་དེའི་གང་སྡུག་པའི་གྲོགས་པོ་དེ་ཡང་དེ་ལ་སྡུག་ཅིང་ཡིད་དུ་འོང་བ་ཡིན་ནོ། །ཀུན་དགའ་བོ་དེ་ལྟ་བས་ན་ཁྱོད་མོས་པར་བྱ་ཞིང་ཁོང་དུ་ཆུད 41.57a པར་བྱས། དད་པ་ཙམ་ཡང་སྐྱེད་པར་གྱིས་ཤིག་།ངས་མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་ཡང་གཏད་དེ། །དེ་དག་ཀྱང་འདི་དག་ནི་བདག་ཅག་གི་ཡང་མཛའ་བོ་ཡིན་ནོ་ཞེས་བྱ་བར་མཁྱེན་ཅིང ། །བསམ་པ་རྫོགས་པར་མཛད་པར་འགྱུར་རོ། །ཀུན་དགའ་བོ་འདི་ལྟ་སྟེ། དཔེར་ན་སྐྱེས་བུ་ལ་ལ་ཞིག་ལ་བུ་དག་ཉན་ཅིང ། འཐུན་པར་འཛིན་པ་གཅིག་པུ་ཞིག་བདོག་པར་གྱུར་ལ། སྐྱེས་བུ་དེ་ཡང་མཛའ་བོ་མང་བ་ཞིག་ཡིན་ན། ཕ་དེ་ཤིར་ཟིན་ཀྱང་ཕའི་མཛའ་བོས་ཡོངས་སུ་བཟུང་བའི་བུ་དེ་ནི་ཕོངས་པར་མི་འགྱུར་རོ། །ཀུན་དགའ་བོ་དེ་བཞིན་དུ་གང་སུ་ཡང་རུང་སྟེ་ང་ལ་དད་ན་དེ་དག་ངས་བཟུང་བ་ཡིན་ཏེ། །དེ་དག་ནི་ངའི་མཛའ་བོའོ། །དེ་དག་ནི་ང་ལ་སྐྱབས་སུ་དོང་བའོ། །དེ་བཞིན་གཤེགས་པ་ནི་མཛའ་བོ་མང་པོ་མངའ་བ་སྟེ། དེ་བཞིན་གཤེགས་པའི་མཛའ་བོ་དེ་དག་ཀྱང་ཡང་དག་པར་གསུང་ཞིང་བརྫུན་དུ་མི་གསུང་བས་དེ་བཞིན་གཤེགས་པའི་མཛའ་བོ་དེ་དག་ཀྱང་ཡང་དག་པར་གསུང་བ་མ་འོངས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དེ་དག་རྗེས་སུ་གཏད་ཀྱིས། ཀུན་དགའ་བོ་དད་པ་ལ་བརྩོན་པར་གྱིས་ཤིག་།འདི་ནི་ངས་ཁྱོད་ལ་བཅོལ་བའོ། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་པའི་ཚེ། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་མང་པོ་དག་ནམ་མཁའི་དཀྱིལ་ན་གནས་ཤིང་ལྷ་མོ་སྒྱུ་འཕྲུལ་ལ་ལྷའི་མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། གོས་དང ། རྒྱན་གྱིས་མངོན་པར་འཐོར་བར་གྱུར་ཏོ། །དེ་ལ་འདི་སྐད་ཅེས་བྱ་སྟེ། དགེ་བ་དྲི་མེད་རྣམ་དག་གསེར་གྱི་འོད་ལྡན་ཉི་ཟླའི་འོད་ལྡན་པ། །ལྷ་ཡི་བུ་མོ་སྒྲ་དབྱངས་སྙན་བརྗོད་སྟོང་ཕྲག་དྲུག་བཅུ་དེ་ཡི་ཚེ། །སྐད་ཅིག་དེ་ལ་ལུམ 41.57b བི་ནིར་ལྷགས་ལྷ་མོ་སྒྱུ་འཕྲུལ་དེ་ལ་སྨྲ། །མི་དགྱེས་མ་མཛད་རབ་ཏུ་དགྱེས་མཛད་བདག་ཅག་ཁྱོད་ཀྱི་ཕྱག་རྗེད་ལགས། །བདག་ཅག་རྣམས་ཀྱིས་བགྱི་བ་ཅི་མཆི་ཅི་བགྱི་ཅི་འཚལ་བཀའ་སྩོལ་ཅིག་།བདག་ཅག་ཁྱོད་ཀྱི་ཕྱག་རྗེད་ནུས་ལྡན་ཉེ་བའི་སེམས་དང་ལྡན་པ་ལགས། །ཁྱོད་ཀྱིས་དགྱེས་ཤིང་བདེ་བའི་ཉམས་སྐྱེས་མི་དགྱེས་ཐམས་ཅད་སྤང་བར་གསོལ། །རྒ་ཤི་སེལ་བའི་སྨན་པ་དམ་པ་དེ་རིང་ལྷ་མོ་མྱུར་སྐྱེད་འགྱུར། །ཇི་ལྟར་ཞུགས་ཤིང་འདི་རྣམས་ཁ་འབུས་ས་ལ་མེ་ཏོག་རྒྱས་གྱུར་ཅིང ། །སྟོང་ཕྲག་བགྲངས་པའི་ལྷ་རྣམས་དྲུང་ན་གནས་ཤིང་ལག་པ་འདུད་པ་དང ། །ཇི་ལྟར་དོག་ས་རྒྱ་མཚོར་བཅས་ཏེ་རྣམ་པ་དྲུག་ཏུ་གཡོས་ལགས་ན། །ཁྱོད་ལས་ལྷ་ཡུལ་མི་ཡུལ་སྒྲ་གྲགས་འཇིག་རྟེན་འདས་པའི་སྲས་བལྟམ་འགྱུར། །ཇི་ལྟར་རྣམ་དག་འོད་ཀྱིས་རྣམ་པར་མཛེས་ཤིང་གསེར་གྱི་ཁ་དོག་བཟང ། །ནམ་མཁའི་དཀྱིལ་ལས་ཡིད་འོང་སིལ་སྙན་བརྒྱ་དག་མ་དཀྲོལ་སྒྲ་འབྱིན་དང ། །ཇི་ལྟར་དག་ཅིང་གཙང་ལ་འདོད་ཆགས་བྲལ་བའི་ལྷ་རྣམས་བརྒྱ་སྟོང་ཡང ། །དགའ་སེམས་ཕྱག་འཚལ་བ་ལས་དེ་རིང་འཇིག་རྟེན་ཀུན་ཕན་བལྟམ་པར་གྱུར། །བརྒྱ་བྱིན་ཚངས་པ་འཇིག་རྟེན་སྐྱོང་དང་དེ་བཞིན་ལྷ་རྣམས་གཞན་དག་ཀྱང ། །དགའ་ཞིང་བྲོད་པའི་སེམས་ཀྱིས་དྲུང་དུ་གནས་ནས་ལག་པ་འདུད་པ་བགྱིད། །སྐྱེས་བུ་སེང་གེ་བརྟུལ་ཞུགས་གྲུབ་པ་དེ་ཡང་རྩིབ་ལོགས་གཡས་ནས་བྱུང ། །གསེར་གྱི་རི་དང་འདྲ་ཞིང་དག་པའི་འོད་དང་ལྡན་པའི་འདྲེན་པ་བལྟམ། །བརྒྱ་བྱིན་ཚངས་པ་གཉིས་ཀྱིས་ལག་པ་དར་ཏེ་ཐུབ་པ་དེ་ཡང་བླངས། །ཞིང་རྣམས་བརྒྱ་སྟོང་འོད་བཟངས་བཀྱེ་བས་ཐམས་ཅད་རབ་ཏུ་གཡོས་པར་གྱུར། །ངན་སོང་གསུམ་གྱི་སེམས་ཅན་རྣམས་ཀྱང་བདེ་ཞིང་སྡུག་བསྔལ་མེད་གྱུར་ཏེ། །ལྷ་རྣམས་བརྒྱ་ཕྲག་སྟོང་གིས་མེ་ཏོག 41.58a གཏོར་ཏེ་གོས་ཀྱི་གཡབ་མོ་ཕྱུང ། །དེ་ཚེ་ས་འདི་སྟོབས་མཐུ་ལྡན་ཞིང་རྡོ་རྗེའི་དངོས་གནས་པད་མ་མཛེས། །སྣ་ཚོགས་མངོན་མཐོན་དགེ་ལ་འདྲེན་པ་འཁོར་ལོའི་མཚན་རིས་ཞབས་བཞག་སྟེ། །གོམ་པ་བདུན་དུ་བཞུད་ནས་ཚངས་པའི་སྒྲ་དབྱངས་དམ་པ་གསུངས་པ་ནི། །རྒ་ཤི་སེལ་བའི་སྨན་པ་དམ་པ་སེམས་ཅན་མཆོག་ཏུ་བདག་འགྱུར་རོ། །ཚངས་པའི་མཆོག་དང་བརྒྱ་བྱིན་ལྷ་མཆོག་ནམ་མཁའི་དཀྱིལ་ན་འཁོད་གྱུར་ཏེ། །གཙང་ཞིང་དང་ལ་མཛེས་པའི་སྤོས་ཆུ་དག་གིས་འདྲེན་པའི་སྐུ་ཡང་བསིལ། །ཀླུ་ཡི་རྒྱལ་གཉིས་བར་སྣང་གནས་ནས་གྲང་དྲོའི་ཆུ་ཡི་རྒྱུན་ཀྱང་གཏོར། །ལྷ་རྣམས་བརྒྱ་སྟོང་དག་ཀྱང་སྤོས་ཆུ་དག་གིས་འདྲེན་པའི་སྐུ་བསིལ་བྱེད། །འཇིག་རྟེན་སྐྱོང་བ་རྣམས་ཀྱང་རིམ་གྲོ་དམ་པར་ལག་པ་བཟང་པོས་ལེན། །སྟོང་གསུམ་འདི་འང་རྒྱུ་དང་མི་རྒྱུ་བཅས་པར་རབ་ཏུ་གཡོས་པར་གྱུར། །མཛེས་པའི་འོད་རྣམས་བཀྱེ་བས་ངན་སོང་རྣམས་ཀྱང་རབ་ཏུ་ཞི་བར་འགྱུར། །འཇིག་རྟེན་རྣམ་པར་འདྲེན་པ་བལྟམ་པས་ཉོན་མོངས་སྡུག་བསྔལ་དེ་དག་ཞི། །མི་ཡི་འདྲེན་པ་རྒྱལ་བ་ལ། ལྷ་རྣམས་མེ་ཏོག་སིལ་མ་འཐོར། །སྟོབས་དང་བརྩོན་འགྲུས་ལྡན་པ་ཡི། །བརྟན་པ་གོམ་པ་བདུན་དུ་བཞུད། །ས་ཕྱོགས་གང་དུ་ཞབས་བཞག་པ། །དེར་ནི་པད་མ་བཟང་བའི་མཆོག་།རིན་ཆེན་ཀུན་གྱིས་བརྒྱན་པ་དག་།ས་ལས་མངོན་དུ་འཐོན་པར་གྱུར། །དེ་ལྟར་གོམ་པ་བདུན་བཞུད་ནས། །རྒ་དང་འཆི་བ་སེལ་བ་ཡི། །སྨན་པ་དམ་པ་འདིར་བྱུང་ཞེས། །ཚངས་པའི་དབྱངས་ཀྱིས་གསུང་བརྗོད་དོ། །འཇིགས་མེད་ཕྱོགས་སུ་རྣམ་གཟིགས་ཏེ། །དེ་ནས་དོན་ལྡན་གསུང་ཕྱུང་བ། །ང་ནི་འཇིག་རྟེན་ཀུན་གྱི་གཙོ། །འཇིག་རྟེན་ཕུལ་ཕྱིན་རྣམ་པར་འདྲེན། །ང་ཡི 41.58b སྐྱེ་མཐའ་འདི་ཡིན་ཞེས། །མི་ཡི་འདྲེན་པས་འཛུམ་པ་མཛད། །ལྷ་དབང་བཅས་དང་འཇིག་རྟེན་སྐྱོང་དག་རབ་ཏུ་དད་སེམས་སྐྱེས། །སྤོས་ཆུ་མཆོག་གིས་འཇིག་རྟེན་ཕན་པའི་དོན་མཛད་སྐུ་ཡང་བསིལ། །ཀླུ་ཡི་དབང་པོ་རྣམས་ཀྱང་ལྷན་ཅིག་འཐུན་པར་བྱས་ནས་ནི། །དྲི་ཞིམ་སྤོས་ཆུ་དག་གིས་རྒྱུན་གྱིས་སྐུ་ཡང་བསིལ་བ་བྱས། །ལྷ་གཞན་ཁྲག་ཁྲིག་དག་ཀྱང་བར་སྣང་ལ་ནི་གནས་ནས་སུ། །དྲི་ཞིམ་སྤོས་ཆུ་མཆོག་གི་རྒྱུན་གྱིས་རང་བྱུང་སྐུ་ཡང་བསིལ། །གདུགས་དཀར་ཡངས་དང་རྔ་ཡབ་བཟང་པོ་དམ་པ་ཐོགས་ནས་ནི། །བར་སྣང་འཁོད་དེ་ལྷ་རྣམས་མི་ཡི་ཁྱུ་མཆོག་སྐུ་བསིལ་བྱེད། །སྐྱེས་བུ་གཅིག་ཅིག་རིངས་པར་འོངས་ནས་ཟས་གཙང་དེ་ལ་དགར་སྨྲས་པ། །ལྷ་ཅིག་འབྱོར་པ་རྒྱས་གྱུར་ཁྱོད་ཀྱི་སྲས་ནི་མཚན་གྱིས་བརྒྱན་པ་བལྟམ། །དེ་ནི་ངེས་པར་འཁོར་ལོས་སྒྱུར་བ་དབང་ཕྱུག་གདུང་རབས་རིན་ཆེན་འཚོབ། །འཛམ་བུའི་གླིང་འདི་གདུགས་མང་ཅིག་འགྱུར་ཕས་ཀྱི་དགྲ་ཡང་མ་མཆིས་འགྱུར། །དེ་ནས་སྐྱེས་བུ་གཉིས་འོངས་ཟས་གཙང་རྒྱལ་པོའི་མདུན་དུ་དེ་སོང་སྟེ། །ལྷ་ཅིག་འབྱོར་པ་རྒྱས་གྱུར་ཤཱཀྱའི་རིགས་སུ་རྒྱལ་བུ་སྐྱེས་གྱུར་ན། །ཤཱཀྱ་རྣམས་ཀྱི་གྲོང་དུ་རོགས་པ་འབུམ་ཕྲག་ལྔ་ནི་བཙས་པ་སྐྱེས་པར་གྱུར། །ཀུན་ཀྱང་གཞན་གྱིས་མི་ཐུབ་སྟོབས་དང་ལྡན་ཞིང་ཚན་པོ་ཆེ་དང་འདྲ། །སྐྱེས་བུ་གཞན་འོངས་སྨྲས་པ་བདག་ལས་དགྱེས་པའི་སྒྲ་གསོན་ལྷ། །འདུན་པ་ཅན་ལ་སོགས་པ་འབངས་ཀྱི་བྱིས་པ་བརྒྱད་བརྒྱ་བཙས་པར་གྱུར། །བསྔགས་ལྡན་གྱི་ནི་ཟླ་བོ་ཆིབས་རྟ་སྟོང་ཕྲག་བཅུ་དག་འབྲངས་གྱུར་ཏེ། །ཆིབས་མཆོག་དམ་པ་གསེར་གྱི་འོད་ལྡན་རྔ་རྔོག་ལྕང་ལོར་འཁྲིལ་བ་ལགས། །མཐའ་འཁོབ་ཁམས་ཀྱི་རྒྱལ་པོ་སྟོང་ཕྲག་ཉི་ཤུ་དག་ཀྱང་དེ་བཞིན་དུ། །རྒྱལ་པོ་ཁྱོད་ཀྱི་ཞབས་ཀྱི་དྲུང་དུ་མཆིས་ཀྱིས་ལེགས་པར་རྒྱལ་གྱུར་ལྷ། །ད་ནི་བདག་མཆིས་སུག་ལས་ཅི་བགྱི 41.59a རྒྱལ་པོས་བདག་ལ་བཀའ་སྩལ་གསོལ། རྒྱལ་པོ་ཁྱོད་འདིར་མངའ་བརྙེས་བདག་འབངས་ཇོ་བོ་ལྷ་ཅིག་རྒྱལ་བར་སྤྱོན། །གསེར་གྱི་དྲ་བས་མཛེས་པའི་གླང་པོ་དམ་པ་སྟོང་ཕྲག་ཉི་ཤུ་དག་།ནམ་མཁའ་ལས་ནི་སྒྲ་དག་འབྱིན་ཅིང་རྒྱལ་པོའི་ཁབ་ཏུ་མགྱོགས་སུ་མཆིས། །སྦྲུམ་མ་ལ་སོགས་ནག་གུ་ཟལ་ལུ་དག་དང་བེའུ་ནི་དྲུག་སྟོང་འབྲངས། །ལྷ་ཅིག་ལྷ་མཆོག་བལྟམ་ཞིང་དེ་དག་བཙས་པས་རྒྱལ་ཁབ་ཕུན་སུམ་ཚོགས། །རྗེ་ཅིག་རྒྱལ་པོར་གཤེགས་ཏེ་བསོད་ནམས་གཟི་འོད་ལྡན་པ་བལྟམ་པ་ཡི། །ཡོན་ཏན་དག་ནི་མཐོང་བར་གྱུར་ནས་ལྷ་དང་མི་རྣམས་སྟོང་བགྲངས་པ། །རབ་ཏུ་དགའ་བར་གྱུར་དང་ཀུན་ལ་ཉིད་ཀྱིས་ལེགས་པར་གཟིགས་སུ་གསོལ། །མྱུར་དུ་རྒྱལ་གྱུར་ཅིག་ཅེས་བྱང་ཆུབ་དམ་པ་མྱ་ངན་མེད་པར་ཞུགས། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་པ་དང་སྐད་ཅིག་དེ་ལ་སྦྱིན་པའི་གཏོང་བ་ཡང་དེ་བས་རྒྱ་ཆེར་གྱུར་ཏོ། །ཡ་རབས་ཀྱི་རིགས་ལྔ་བརྒྱ་ཡང་བཙས་པར་གྱུར་ཏོ། །གྲགས་ལྡན་ལ་སོགས་པ་བུ་མོ་ཁྲི་དང ། བྲན་མོ་བརྒྱད་བརྒྱ་དང ། འདུན་པ་ལ་སོགས་པ་བྲན་ལྔ་བརྒྱ་དང ། རྟེའུ་མོ་ཁྲི་དང ། བསྔགས་ལྡན་ལ་སོགས་པ་རྟེའུ་ཕོ་ཁྲི་དང ། བ་ལང་གི་ཕྲུག་གུ་མོ་ལྔ་བརྒྱ་དང ། བ་ལང་གི་ཕྲུག་གུ་ཕོ་ལྔ་བརྒྱ་པོ་དག་ཀྱང་བཙས་ཤིང་འབྲངས་པར་གྱུར་ནས་དེ་དག་ཐམས་ཅད་རྒྱལ་པོ་ཟས་གཙང་མས་སྣ་གྲངས་ཡི་གེར་བྲིས་ཏེ་སྲས་བུ་གཞོན་ནུ་རྩེན་པའི་ཕྱིར་བྱིན་པར་གྱུར་ཏོ། །བྱང་ཆུབ་སེམས་དཔའི་ལོངས་སྤྱོད་ཀྱི་དོན་དུ་བྱང་ཆུབ་སེམས་དཔའ་ཉིད་ཀྱི་མཐུས་གླིང་བྱེ་བ་བརྒྱ་ཕྲག་བཞིའི་དབུས་ཀྱི་ས་ཕྱོགས་ནས་ཨ་ཤཝད་ཐའི་སྡོང་པོ་སྐྱེས་པར་གྱུར་ཏོ། །གླིང་ཕྲ་མོ་རྣམས་སུ་ཡང་ཙན་དན་གྱི་ནགས་ཚལ་སྐྱེས་པར་གྱུར་ཏོ། །བྱང་ཆུབ་སེམས་དཔའི་ལོངས་སྤྱོད་ཀྱི་དོན་དུ་གྲོང་ཁྱེར་གྱི་ཁོ་ར 41.59b ཡུག་ཏུ་ཡང་བསྐྱེད་མོས་ཚལ་ལྔ་བརྒྱ་དག་བྱུང་བར་གྱུར་ཏོ། །གཏེར་ལྔ་སྟོང་ཡང་སའི་འོག་ནས་གྱེན་དུ་འབུས་ཏེ་སྒོ་སྟོན་པར་གྱུར་ཏོ། །དེ་ལྟར་རྒྱལ་པོ་ཟས་གཙང་མ་དེའི་དོན་བསམ་པ་གང་ཡིན་པ་དེ་དག་ཐམས་ཅད་ཕུན་སུམ་ཚོགས་པར་གྱུར་ནས་རྒྱལ་པོ་ཟས་གཙང་མ་འདི་སྙམ་དུ་བདག་གི་བུ་གཞོན་ནུ་དེའི་མིང་ཇི་སྐད་ཅིག་གདགས་པར་བྱ་སྙམ་པ་དང ། དེ་འདི་སྙམ་དུ་སེམས་ཏེ། བུ་འདི་སྐྱེས་མ་ཐག་ཏུ་བདག་གི་དོན་ཐམས་ཅད་ཡང་དག་པར་གྲུབ་པར་གྱུར་གྱིས། འདིའི་མིང་ནི་དོན་ཐམས་ཅད་གྲུབ་པར་གདགས་སོ་སྙམ་སྟེ། དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་རིམ་གྲོ་ཆེར་བྱས་ནས་བུ་འདིའི་མིང་དོན་ཐམས་ཅད་གྲུབ་པ་ཞེས་བྱའོ་ཞེས་མིང་དུ་བཏགས་སོ། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་ནས་མའི་གློ་གཡས་པ་ཡང་མ་རལ་མ་ཉམས་ཤིང་སྔོན་བཞིན་དུ་གྱུར་ཏོ། །དེར་ཁྲོན་པ་ལན་གསུམ་ལྡུད་པ་དག་ཀྱང་བྱུང་བར་གྱུར། སྤོས་ཀྱི་འབྲུ་མར་གྱི་རྫིང་བུ་དག་ཀྱང་བྱུང་བར་གྱུར་ཏོ། །དེ་ནས་ལྷའི་བུ་མོ་ལྔ་སྟོང་དག་ལྷའི་སྤོས་ཀྱིས་བསྒོས་པའི་འབྲུ་མར་དྲི་ཞིམ་པོ་ཁྱེར་ཏེ་བྱང་ཆུབ་སེམས་དཔའི་མའི་དྲུང་དུ་ལྷགས་ནས། བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ། ཞེས་འདྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་བྱུག་པ་དང ། རྣམ་པར་བྱུག་པ་ཐོགས་ཏེ། བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ། ཞེས་འདྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་སྤོས་ཆུས་བཀང་བའི་བུམ་པ་ཐོགས་ཏེ། བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ་ཞེས་འདྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་བྱིས་པའི་གོས་ཐོགས་ཏེ་བྱང་ཆུབ་སེམས་དཔའི 41.60a མའི་དྲུང་དུ་ལྷགས་ནས་བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ་ཞེས་འདྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་བྱིས་པའི་རྒྱན་ཐོགས་ཏེ། བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ་ཞེས་འདྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་གླུ་དབྱངས་ལེན་ཅིང་བྱང་ཆུབ་སེམས་དཔའི་མའི་དྲུང་དུ་ལྷགས་ཏེ་བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ་ཞེས་འདྲི་བར་གྱུར་ཏོ། །འཛམ་བུ་ཡི་གླིང་འདི་ན་ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་དང་ལྡན་པ་ཇི་སྙེད་ཅིག་འཁོད་པ་དེ་དག་ཐམས་ཅད་ནམ་མཁའ་ལས་འོངས་ཏེ། རྒྱལ་པོ་ཟས་གཙང་མའི་མདུན་དུ་འཁོད་ནས། རྒྱལ་པོ་འཕེལ་བར་གྱུར་ཅིག་ཅེས་བྱ་བའི་སྒྲ་སྒྲོག་པར་གྱུར་ཏོ། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་ནས་ཞག་བདུན་དུ་ལུམ་བི་ནིའི་ནགས་ཚལ་དུ་ལྷ་དང་མིའི་སིལ་སྙན་དང ། ཕེག་རྡོབ་པས་རིམ་གྲོར་བྱས་སོ། །བཀུར་བསྟིར་བྱས་སོ། །སྟིང་སྟང་དུ་བྱས་སོ། །མཆོད་པར་བྱས་སོ། །བཟའ་བ་དང ། བཅའ་བ་དང ། མྱང་བ་དག་ཀྱང་དྲངས་པར་གྱུར་ཏོ། །ཤཱཀྱའི་ཚོགས་ཐམས་ཅད་ཀྱང་འདུས་ནས་ཀུན་དགའ་བའི་སྒྲ་བརྗོད་པར་གྱུར་ཏོ། །སྦྱིན་པ་དག་ཀྱང་བྱིན་ནོ། །བསོད་ནམས་དག་ཀྱང་བྱེད་དོ། །བྲམ་ཟེ་སུམ་ཁྲི་ཉིས་སྟོང་ཡང་ཉིན་གཅིག་བཞིན་དུ་ཚིམ་པར་བྱས་སོ། །སུ་དག་ཅི་འདོད་པ་དེ་དག་ལ་ཡང་དེ་བྱིན་པར་གྱུར་ཏོ། །བརྒྱ་བྱིན་དང་ཚངས་པ་ཡང་བྲམ་ཟེའི་འཁོར་དེར་བྲམ་ཟེའི་ཁྱེའུ་ཡི་གཟུགས་སུ་སྤྲུལ་ཏེ་གྲལ་གྱི་ཐོག་མ་ལ་འཁོད་ནས་བཀྲ་ཤིས་ཀྱི་ཚིགས་སུ་བཅད་པ་འདི་དག་བརྗོད་པར་གྱུར་ཏོ། །ཇི་ལྟར་ངན་སོང་རྣམས་ཞི་ཞིང ། །ཇི་ལྟར་འགྲོ་ཀུན་བདེ་ལས་ན། །འགྲོ་ལ་བདེ་བ་འགོད་པ་ཡི། །བདེ་བ་མཛད་ཅིག་བལྟམ་པར་མངོན། །ཇི་ལྟར་རབ་རིབ་མེད་འོད་ཀྱིས། །ལྷ་དང་ཉི་ཟླའི་འོད་རྣམས་ཀྱང ། ། 41.60b མི་སྣང་ཟིལ་དུ་རླག་པ་ལས། །བསོད་ནམས་འོད་ཅིག་བྱུང་བར་མངོན། །མིག་མེད་རྣམས་ཀྱང་མཐོང་གྱུར་ཅིང ། །རྣ་བ་འོན་པས་སྒྲ་ཐོས་ལ། །སྨྱོན་པ་རྣམས་ཀྱང་དྲན་ལྡན་ལས། །འཇིག་རྟེན་མཆོད་རྟེན་འགྱུར་བར་མངོན། །ཇི་ལྟར་ཉོན་མོངས་མི་གནོད་ཅིང ། །འགྲོ་བ་བྱམས་པའི་ཡིད་གྱུར་ལས། །ཚངས་པ་བྱེ་བས་མཆོད་འོས་སུ། །གདོན་མི་ཟ་བར་འགྱུར་བར་མངོན། །ས་ལ་མེ་ཏོག་རྒྱས་གྱུར་ཅིང ། །ས་ཡང་མཉམ་པར་གནས་པ་ལས། །འགྲོ་བ་ཀུན་གྱིས་མཆོད་པ་ཡི། །ཐམས་ཅད་མཁྱེན་དུ་འགྱུར་བར་མངོན། །ཇི་ལྟར་འཇིག་རྟེན་འཁྲུག་མེད་ཅིང ། །པད་མ་ཆེན་པོ་འཐོན་པ་ལས། །ངེས་པར་གཟི་བརྗིད་ཆེན་པོ་འདི། །འཇིག་རྟེན་མགོན་དུ་བྱོན་པར་འགྱུར། །ལྷ་ཡི་སྤོས་ཀྱིས་སྤགས་གྱུར་པ། །འཇམ་པའི་རླུང་གི་ངད་ལྡང་ཞིང ། །སེམས་ཅན་ནད་རྣམས་ཞི་གྱུར་ལས། །འདི་ནི་སྨན་པའི་རྒྱལ་པོར་བྱོན། །གཟུགས་ཁམས་གནས་པའི་ལྷ་བརྒྱ་པོ། །འདོད་ཆགས་བྲལ་བ་འདི་དག་ཀྱང ། །ཐལ་མོ་སྦྱར་ཞིང་འདུད་པ་ལས། །འདི་ནི་སྦྱིན་པའི་གནས་སུ་བྱོན། །མི་རྣམས་ཀྱིས་ནི་ལྷ་མཐོང་ཞིང ། །ལྷ་རྣམས་ཀྱིས་ནི་མི་མཐོང་ཡང ། །ཕན་ཚུན་འཚེ་བ་མེད་པ་ལས། །འདི་ནི་དེད་དཔོན་ཆེན་པོར་བྱོན། །མེ་རྣམས་ཞི་བར་གནས་གྱུར་ཅིང ། །ཆུ་ཀླུང་ཐམས་ཅད་མི་གཡོ་ལ། །ས་ཡང་དལ་བུས་གཡོ་བ་ལས། །འདི་ནི་ཡང་དག་གཟིགས་པར་འགྱུར། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་ནས་ཞག་བདུན་ལོན་པ་དང ། ལྷ་མོ་སྒྱུ་འཕྲུལ་ཤི་བའི་དུས་བྱས་པར་གྱུར་ཏེ། དེ་ཤི་བའི་དུས་བྱས་ནས་སུམ་བཅུ་རྩ་གསུམ་གྱི་ལྷའི་ནང་དུ་སྐྱེས་སོ། །དགེ་སློང་དག་ཁྱེད་འདི་སྙམ་དུ་བྱང་ཆུབ་སེམས་དཔའི་ལན་བོན་གྱིས་ལྷ་མོ་སྒྱུ་འཕྲུལ་འཆི་བའི་དུས་བྱས་སོ། །སྙམ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེའི་ཚེའི་ཚད་ནི་མཐར་ཐུག་པའི་ཕྱིར་རོ། །དགེ་སློང་དག་འདས་པའི་བྱང་ཆུབ་སེམས་དཔའ་རྣམས་ཀྱང་བཙས 41.61a ནས་ཞག་བདུན་ལོན་ན་མ་འཆི་བའི་དུས་བྱས་པར་གྱུར་ཏོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སྐྱེས་ཏེ་དབང་པོ་ཡོངས་སུ་རྫོགས་ནས་མངོན་པར་བྱུང་ན་མ་སྙིང་འགས་སུ་འོང་བའི་ཕྱིར་རོ། །དགེ་སློང་དག་དེ་ལྟར་ཞག་བདུན་ལོན་ནས་ཐོག་མ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་ལྷ་མོ་སྒྱུ་འཕྲུལ་བཀོད་པ་ཇི་ལྟ་བུས་བསྐྱེད་མོས་ཚལ་གྱི་སར་ཞུགས་པར་གྱུར་པ་དེ་དག་ལས་བྱེ་བ་བརྒྱ་སྟོང་གྱུར་པས་ཀྱང་ལྷག་པའི་བཀོད་པ་ཆེན་པོས་བྱང་ཆུབ་སེམས་དཔའ་གྲོང་ཁྱེར་ཆེན་པོ་སེར་སྐྱའི་གནས་སུ་ཞུགས་སོ། །དེ་ཞུགས་པ་དང ། བུམ་པ་སྤོས་ཆུས་གང་བ་ལྔ་སྟོང་གིས་མདུན་དུ་དྲངས་པར་གྱུར་ཏོ། །དེ་བཞིན་དུ་བུ་མོ་ལྔ་སྟོང་ནི་རྨ་བྱའི་མདོངས་ལག་ན་ཐོགས་ཏེ་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་ཤིང་ཏ་ལའི་ཡལ་ག་ཐོགས་ཤིང་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་སྤོས་ཆུའི་རིལ་བ་བྲིང་ག་ར་ཐོགས་ཏེ་ལམ་ཆག་ཆག་གིས་འདེབས་ཤིང་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་ནགས་ཚལ་གྱི་མེ་ཏོག་གི་ཕྲེང་བ་འཕྱང་བ་ཁྱེའུ་ཚང་སྣ་ཚོགས་ཐོགས་ཏེ་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་བཟང་པོར་སྒྱུར་བའི་རིན་པོ་ཆེ་ཐོགས་ཏེ། ལམ་གྱི་བྱི་དོར་བྱེད་ཅིང་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་སྟན་བཟང་པོ་ཐོགས་ཤིང་མདུན་དུ་འདོང་བར་གྱུར་ཏོ། །བྲམ་ཟེ་ལྔ་སྟོང་ནི་དྲིལ་བུ་ཐོགས་ཏེ་བཀྲ་ཤིས་ཀྱི་སྒྲ་འབྱིན་ཅིང་མདུན་དུ་འདོང་བར་གྱུར་ཏོ། །གླང་པོ་ལྔ་སྟོང་ནི་རྒྱན་ཐམས་ཅད་ཀྱིས་བརྒྱན་ཏེ་མདུན་དུ་འདོང་བར་གྱུར་ཏོ། །རྟ་ཉིས་ཁྲི་ནི་གསེར་གྱི་བརྒྱན་གྱིས་བཀབ་ཅིང་རྒྱན་ཐམས་ཅད་ཀྱིས་བརྒྱན་ཏེ་མདུན་དུ་འདོང་བར་གྱུར་ཏོ། །ཤིང་རྟ་བརྒྱད་ཁྲི་ནི་གདུགས་དང ། རྒྱལ་མཚན་དང ། བ་དན་བསྒྲེང་ཞིང་དྲིལ་བུ་གཡེར་ཀའི་དྲ་བས་ལེགས་པར་བརྒྱན་ཏེ། བྱང་ཆུབ་སེམས་དཔའི་ཕྱི་བཞིན་འདོང་བར་གྱུར་ཏོ། །རྐང་ཐང་དཔའ་ཞིང་རྟུལ་ཕོད་པ། ཡན་ལག་དམ་པའི་གཟུགས་དང་ལྡན་པ། གོ 41.61b ཆ་སྲ་བ་བགོས་པ་བཞི་ཁྲི་ནི་བྱང་ཆུབ་སེམས་དཔའ་འགྲོ་བའི་ཕྱི་བཞིན་འདོང་བར་གྱུར་ཏོ། །འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷ་གྲགས་པ་གྲགས་པ་ཆེ་བ་བྱེ་བ་ཁྲག་ཁྲིག་བརྒྱ་སྟོང་ཚད་མེད་གྲངས་མེད་པ་དག་ནི་ནམ་མཁའི་དཀྱིལ་ནས་བཀོད་པ་རྣམ་པ་སྣ་ཚོགས་དུ་མ་བྱང་ཆུབ་སེམས་དཔའ་ལ་མཆོད་པ་བྱེད་ཅིང་ཕྱི་བཞིན་འདོང་བར་གྱུར་ཏོ། །ཤིང་རྟ་གང་ལ་བྱང་ཆུབ་སེམས་དཔའ་འདུག་པར་གྱུར་པ་དེ་ཡང་འདོད་པ་ན་སྤྱོད་པའི་ལྷ་རྣམས་ཀྱིས་བཀོད་པ་ཆེན་པོ་དུ་མས་ལེགས་པར་བརྒྱན་པར་གྱུར་ཏོ། །ལྷའི་བུ་མོ་རྒྱན་ཐམས་ཅད་ཀྱིས་ཆས་པ་རིན་པོ་ཆེའི་ཕྲེང་བ་ཐོགས་པ་ཉིས་ཁྲི་ཤིང་རྟ་དེ་དྲངས་ཏེ་ལྷའི་བུ་མོ་གཉིས་ཀྱི་བར་དུ་ནི་མིའི་བུ་མོ་གཅིག་འདུག་།མིའི་བུ་མོ་གཉིས་ཀྱི་བར་དུ་ནི་ལྷའི་བུ་མོ་གཅིག་འདུག་ཀྱང་བྱང་ཆུབ་སེམས་དཔའི་མཐུས་ལྷའི་བུ་མོས་ཀྱང་མིའི་བུ་མོའི་དྲི་མི་ཞིམ་པ་མི་ཚོར། མིའི་བུ་མོས་ཀྱང་ལྷའི་བུ་མོའི་གཟུགས་མཐོང་ན་བག་མེད་པར་མ་གྱུར་ཏོ། །དགེ་སློང་དག་སེར་སྐྱའི་གནས་ཀྱི་གྲོང་ཁྱེར་ཆེན་པོར་ཤཱཀྱ་ལྔ་བརྒྱ་ཙམ་གྱིས་བྱང་ཆུབ་སེམས་དཔའི་ཆེད་དུ་ཁྱིམ་ལྔ་བརྒྱ་ཕུབ་སྟེ། དེ་དག་བྱང་ཆུབ་སེམས་དཔའ་གྲོང་ཁྱེར་དེར་འཇུག་པའི་ཚེ། རང་རང་གིས་བྱས་པའི་ཁྱིམ་གྱི་སྒོར་འཁོད་དེ། ཐལ་མོ་སྦྱར་ནས་ལུས་གུས་པར་བཏུད་དེ་རིམ་གྲོ་དང་བཅས་པས་འདི་སྐད་དུ། ཀྱེ་དོན་ཐམས་ཅད་གྲུབ་པ་འདིར་གཤེགས་སུ་གསོལ། ཀྱེ་ལྷའི་ལྷ་འདིར་གཤེགས་སུ་གསོལ། ཀྱེ་སེམས་ཅན་དག་པ་འདིར་གཤེགས་སུ་གསོལ། ཀྱེ་ཁ་ལོ་སྒྱུར་བ་དམ་པ་འདིར་གཤེགས་སུ་གསོལ། ཀྱེ་དགའ་ཞིང་བདེ་བ་དང་མཆོག་ཏུ་དགའ་བ་མཛད་པ་འདིར་གཤེགས་སུ་གསོལ། ཀྱེ་སྨད་པ་མེད་པའི་གྲགས་པ་མངའ་བ་འདིར་གཤེགས་སུ་གསོལ། ཀྱེ་ཀུན་ནས་སྤྱན་མངའ་བ་འདིར་གཤེགས་སུ་གསོལ། ཀྱེ་མི་མཉམ་པ་དང་མཉམ་ཞིང་འདྲ་བ་མེད་པའི་ཡོན་ཏན་དང་གཟི་བརྗིད 41.62a མངའ་བ། མཚན་དང་དཔེ་བྱད་བཟང་པོས་ཡང་དག་པར་བརྒྱན་པའི་སྐུ་མངའ་བ་འདིར་གཤེགས་སུ་གསོལ་ཞེས་དེ་སྐད་འཛེར་ཏོ། །དེ་ནས་རྒྱལ་པོ་ཟས་གཙང་མས་དེ་དག་ཐམས་ཅད་དང་འཐུན་པར་བྱ་བའི་ཕྱིར། བྱང་ཆུབ་སེམས་དཔའ་ཁྱིམ་དེ་ཀུན་དུ་ཡང་ཞུགས་པར་བྱས་ཏེ། ཟླ་བ་བཞི་ལོན་པ་ནས་བྱང་ཆུབ་སེམས་དཔའ་ཉིད་ཀྱི་ཁྱིམ་དུ་ཞུགས་ཏེ་རིན་པོ་ཆེ་སྣ་ཚོགས་བཀོད་པ་ཞེས་བྱ་བའི་ཁང་བཟངས་ཆེན་པོ་དེར་བྱང་ཆུབ་སེམས་དཔའ་ཞུགས་པར་གྱུར་ཏོ། །དེ་ན་ཤཱཀྱ་རྒན་རབས་རྒན་རབས་རྣམས་འདུས་ཏེ་བགྲོས་པ། ཕན་པའི་སེམས་དང ། བྱམས་པའི་སེམས་ཀྱིས་ཡོན་ཏན་དང་ལྡན་པ་དང ། འཇམ་པ་དང་ལྡན་པར་བྱང་ཆུབ་སེམས་དཔའ་བཙའ་བ་དང ། བྱི་དོར་བྱ་བ་དང ། ཉམས་སུ་བླང་བར་སུས་ནུས་ཤེས་བྱས་པ་དང ། དེ་ན་ཤཱཀྱའི་བུ་མོ་ལྔ་བརྒྱ་ཙམ་སོ་སོ་ནས་འདི་སྐད་དུ་བདག་གིས་གཞོན་ནུའི་རིམ་གྲོ་བགྱིའོ། །བདག་གིས་གཞོན་ནུའི་རིམ་གྲོ་བགྱིའོ་ཞེས་ཟེར་རོ། །དེ་ན་ཤཱཀྱ་ཆེས་འགྲས་ཆེས་འགྲས་པ་དེ་དག་ན་རེ་བུ་མོ་འདི་དག་ཐམས་ཅད་ནི་བྱིས་པ་གཞོན་ནུ་ཐོར་བུ་གཞོན་ནུ་ལ་གཟུགས་དང་དར་ལ་བབ་པས་རྒྱགས་ཤིང་དྲེགས་པ་ཡིན་པས་འདི་དག་གིས་བྱང་ཆུབ་སེམས་དཔའ་ལ་དུས་དུས་སུ་རིམ་གྲོ་བྱ་བ་མི་ནུས་སོ། །སྐྱེ་དགུའི་བདག་མོ་ཆེན་མོ་གཽ་ཏ་མཱི་གཞོན་ནུའི་སྲུ་མོ་སྟེ། འདིས་ནི་གཞོན་ནུ་བདེ་བ་དང་ལེགས་པར་སྐྱེད་པར་ནུས་སོ། །རྒྱལ་པོ་ཟས་གཙང་མ་ཡང་མཉེས་པར་ནུས་སོ། །ཞེས་ཐམས་ཅད་གྲོས་གཅིག་ཏུ་འདུས་ཏེ། སྐྱེ་དགུའི་བདག་མོ་ཆེན་མོ་གཽ་ཏ་མཱི་དད་པར་བྱས་ནས། སྐྱེ་དགུའི་བདག་མོ་ཆེན་མོ་གཽ་ཏ་མཱིས་གཞོན་ནུ་དེ་ལེགས་པར་བསྐྱེད་དོ། །དེའི་ཚེ་བྱང་ཆུབ་སེམས་དཔའི་རིམ་གྲོར་མ་མ་སུམ་བཅུ་རྩ་གཉིས་བཀོད་པར་གྱུར་ཏེ། དེ་ལ་བརྒྱད་ནི་པང་ན་འཚོ་བའི་མ་མའོ། །བརྒྱད་ནི་ནུ་མ་སྣུན་པའི་མ་མའོ། །བརྒྱད་ནི་རྩེན 41.62b གྲོགས་ཀྱི་མ་མའོ། །བརྒྱད་ནི་དྲི་མ་འཕྱི་བའི་མ་མའོ། །དེ་ནས་རྒྱལ་པོ་ཟས་གཙང་མས་ཤཱཀྱའི་ཚོགས་ཐམས་ཅད་བསོགས་ཏེ་དཔྱད་པ། ཇི་ལྟ་གཞོན་ནུ་འདི་འཁོར་ལོས་སྒྱུར་བའི་རྒྱལ་པོ་ཞིག་ཏུ་འགྱུར་རམ་འོན་ཏེ་མ་ཡིན་གྱིས་རབ་ཏུ་འབྱུང་བའི་ཕྱིར་མངོན་པར་འབྱུང་ཞེས་དཔྱད་པ་དང ། དེའི་ཚེ་རིའི་རྒྱལ་པོ་གངས་རིའི་ངོས་ལ་དྲང་སྲོང་ཆེན་པོ་ནག་པོ་ཞེས་བྱ་བ་མངོན་པར་ཤེས་པ་ལྔ་དང་ལྡན་པ་ཞིག་སྣག་གི་ཚ་བོ་མིས་བྱིན་ཞེས་བྱ་བ་དང་ལྷན་ཅིག་ཏུ་འདུག་འདུག་པ་ལས་དེས་བྱང་ཆུབ་སེམས་དཔའ་བཙས་པའི་ཚེ། ངོ་མཚར་རྨད་དུ་བྱུང་བའི་ཆོ་འཕྲུལ་མང་དུ་མཐོང་སྟེ། ནམ་མཁའི་དཀྱིལ་ན་ཡང་ལྷའི་བུ་མང་པོ་སངས་རྒྱས་ཀྱི་སྒྲ་སྒྲོག་ཅིང་གོས་ཀྱི་གཡབ་མོ་གཡོབ་པ་དང ། དགའ་ཞིང་ཕན་ཚུན་འདོང་བ་མཐོང་ནས། དེས་བསམས་པ། མ་ལ་བདག་གིས་རྣམ་པར་བལྟ་བ་ཞིག་ཏུ་བྱ་འམ་སྙམ་ནས། དེས་ལྷའི་མིག་གིས་འཛམ་བུའི་གླིང་ཐམས་ཅད་དུ་བལྟས་ན་སེར་སྐྱའི་གྲོང་ཁྱེར་ཆེན་པོ་དེ་ན་རྒྱལ་པོ་ཟས་གཙང་མའི་ཁྱིམ་དུ་གཞོན་ནུ་བསོད་ནམས་ཀྱི་གཟི་བརྗིད་ཀྱིས་གཟི་དང་ལྡན་པར་བྱས་པ། འཇིག་རྟེན་ཐམས་ཅད་ཀྱིས་མཆོད་པ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལུས་ལེགས་པར་བརྒྱན་པ་ཞིག་བཙས་པར་མཐོང་ནས། བྲམ་ཟེའི་ཁྱེའུ་མིས་བྱིན་ལ་སྨྲས་པ། བྲམ་ཟེའི་ཁྱེའུ་ཤེས་པར་གྱིས་ཤིག་།འཛམ་བུའི་གླིང་དུ་ནི་རིན་པོ་ཆེ་ཆེན་པོ་བྱུང་སྟེ། སེར་སྐྱའི་གནས་ཀྱི་གྲོང་ཁྱེར་ཆེན་པོ་ན་རྒྱལ་པོ་ཟས་གཙང་མའི་ཁྱིམ་དུ་གཞོན་ནུ་བསོད་ནམས་ཀྱི་གཟི་བརྗིད་ཀྱིས་གཟི་དང་ལྡན་པར་བྱས་པ་འཇིག་རྟེན་ཐམས་ཅད་ཀྱིས་མཆོད་པ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་པ་བཙས་སོ། །དེ་གལ་ཏེ་ཁྱིམ་ན་གནས་ན་ནི་མཐའ་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོར་འགྱུར་ཏེ། རྣམ་པར་རྒྱལ་བ་དང་ལྡན་པ། ཆོས་དང་ལྡན་པ། ཆོས་ཀྱི་རྒྱལ་པོ་སྲིད་ཀྱི་མཐུ་སྟོབས་ཐོབ་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི་འདི 41.63a ལྟ་སྟེ། འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་དང་བདུན་འབྱུང་བར་འགྱུར་རོ། །དེ་ལ་བུ་སྟོང་ཡོད་པར་འགྱུར་ཏེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་འཇོམས་པ་ཤ་སྟག་འབྱུང་བར་འགྱུར་རོ། །དེ་ནི་ས་ཆེན་པོའི་དཀྱིལ་འཁོར་འདི་རྒྱ་མཚོའི་མཐའ་བསྐོར་དང་བཅས་པ་ཆད་པ་མེད་ཅིང་མཚོན་གྱིས་བདའ་བ་མེད་པ་དང ། ཆོས་དང་འཐུན་པར་རང་གི་མཐུས་ཟིལ་གྱིས་མནན་ཅིང་མངོན་པར་ཕབ་སྟེ། དབང་ཕྱུག་གི་དབང་གིས་རྒྱལ་སྲིད་བྱེད་པར་འགྱུར་རོ། །དེ་གལ་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་ཏེ། སྟོན་པ་འདྲེན་པ་གཞན་གྱི་དྲིང་མི་འཇོག་པ། འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ། །དེ་ལྟ་བས་ན་ཚུར་ཤོག་དེ་ལྟར་འདོང་ངོ ། །དེ་ནས་དྲང་སྲོང་ཆེན་པོ་ནག་པོ་སྣག་གི་ཚ་བོ་མིས་བྱིན་དང་འགྲོགས་ཏེ། ངང་པའི་རྒྱལ་པོ་ལྟར་ནམ་མཁའི་དཀྱིལ་ནས་ལྡིངས་ཏེ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ག་ལ་བ་དེར་སོང་ནས་ཕྱིན་པ་དང ། རྫུ་འཕྲུལ་བརྟུལ་ནས་རྐང་གིས་སེར་སྐྱའི་གནས་ཀྱི་གྲོང་ཁྱེར་ཆེན་པོར་དོང་སྟེ། རྒྱལ་པོ་ཟས་གཙང་མའི་ཁྱིམ་ག་ལ་བ་དེར་ཕྱིན་ནས། རྒྱལ་པོ་ཟས་གཙང་མའི་ཁྱིམ་གྱི་སྒོར་བསྡད་དོ། །དགེ་སློང་དག་དེ་ལྟར་དྲང་སྲོང་ནག་པོ་དེས་རྒྱལ་པོ་ཟས་གཙང་མའི་ཁྱིམ་གྱི་སྒོ་དྲུང་དུ་སྲོག་ཆགས་བརྒྱ་སྟོང་མང་པོ་འདུས་པ་མཐོང་ངོ ། །དེ་ནས་དྲང་སྲོང་ནག་པོ་སྒོ་བའི་དྲུང་དུ་སོང་སྟེ་འདི་སྐད་ཅེས་སྨྲས་སོ། །ཀྱེ་མི་ཁྱོད་སོང་ལ་རྒྱལ་པོ་ཟས་གཙང་མ་ལ་ཆབ་སྒོ་ན་དྲང་སྲོང་ཞིག་མཆིས་སོ་ཞེས་གསོལ་ཅིག་།དེ་ནས་སྒོ་བ་དེས་དེ་ལྟར་བགྱིའོ་ཞེས་དྲང་སྲོང་ནག་པོའི་ལྟར་མཉན་ཏེ། རྒྱལ་པོ་ཟས་གཙང་མ་ག་ལ་བ་དེར་སོང་ནས་ཕྱིན་པ་དང་ཐལ་མོ་སྦྱར་ཏེ། རྒྱལ་པོ་ཟས་གཙང་མ་ལ་འདི་སྐད་ཅེས 41.63b སྨྲས་སོ། །ལྷ་མཁྱེན་པར་མཛད་དུ་གསོལ། ཆབ་སྒོ་ན་དྲང་སྲོང་རྒན་པོ་འཁོགས་པ་ནས་གཟེར་བ་ཞིག་མཆིས་ཏེ། འདི་སྐད་དུ་བདག་ནི་རྒྱལ་པོའི་ཞལ་མཐོང་བར་འཚལ་ལོ་ཞེས་མཆིའོ། །དེ་ནས་རྒྱལ་པོ་ཟས་གཙང་མས་དྲང་སྲོང་ནག་པོའི་སྟན་འདིང་དུ་བཅུག་སྟེ། མི་དེ་ལ་འདི་སྐད་ཅེས་སྨྲས་སོ། །དྲང་སྲོང་དེ་ནང་དུ་འོང་བར་གྱིས་ཤིག་།དེ་ནས་མི་དེ་རྒྱལ་པོའི་ཕོ་བྲང་ནས་བྱུང་ནས། དྲང་སྲོང་ནག་པོ་ལ་འདི་སྐད་ཅེས་སྨྲས་ཏེ། ནང་དུ་བཞུད་ཅིག་།དེ་ནས་དྲང་སྲོང་ནག་པོ་རྒྱལ་པོ་ཟས་གཙང་མ་ག་ལ་བ་དེར་སོང་སྟེ་ཕྱིན་པ་དང ། མདུན་དུ་འདུག་སྟེ་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་རྒྱལ་བར་སྤྱོན་ཅིག་།རྒྱལ་བར་སྤྱོན་ཅིག་།སྐུ་ཚེ་རིང་བར་སྲུངས་ཤིག་།ཆོས་བཞིན་དུ་རྒྱལ་པོ་མཛོད་ཅིག་།དེ་ནས་རྒྱལ་པོ་ཟས་གཙང་མས། དྲང་སྲོང་ནག་པོ་ལ་ཡོན་ཆུ་དང་རྐང་པ་ལ་གཏོར་བའི་ཆུས་མཆོད་པ་བྱས་ཏེ་ཤིན་དུ་ལེགས་པར་ཡོངས་སུ་བསྐུར་ནས་སྟན་ལ་བདར་ཏེ། དེ་སྟན་ལ་བདེ་བར་འདུག་པར་ཤེས་ནས་ཞེ་ས་དང་བཅས། གུས་དང་བཅས་པར་འདི་སྐད་ཅེས་སྨྲས་སོ། །དྲང་སྲོང་སྔོན་མཐོང་བར་མི་དྲན་ན་འདིར་ཅི་ལ་བྱོན་ཅི་ཞིག་བཞེད། དེ་སྐད་ཅེས་སྨྲས་པ་དང ། དྲང་སྲོང་ནག་པོས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ཀྱི་སྲས་ཤིག་བལྟམ་པར་གྱུར་པ་དེ་ལྟ་ཞིང་བདག་འདིར་མཆིས་སོ། །རྒྱལ་པོས་སྨྲས་པ། དྲང་སྲོང་ཆེན་པོ་གཞོན་ནུ་ཉལ་ཞིང་མཆིས་ཀྱིས་ལངས་ཀྱི་བར་དུ་ཆུང་ཟད་ཅིག་གཞེས་ཤིག་།དྲང་སྲོང་གིས་སྨྲས་པ། རྒྱལ་པོ་ཆེན་པོ་སྐྱེས་བུ་ཆེན་པོ་དེ་ལྟ་བུ་ནི་རིང་པོར་མི་ཉལ་ཏེ། སྐྱེས་བུ་དམ་པ་དེ་ལྟ་བུ་དག་ནི་སད་པར་གནས་པའི་ངང་ཚུལ་ཅན་ནོ། །དགེ་སློང་དག་དེ་ནས་བྱང་ཆུབ་སེམས་དཔས་དྲང་སྲོང་ནག་པོ་དེ་ལ་སྙིང་བརྩེ་བ་ཉེ་བར་བཟུང་སྟེ་སད་པའི་བརྡའ་བྱས་སོ། །དེ་ནས་རྒྱལ་པོ་ཟས 41.64a གཙང་མས་གཞོན་ནུ་དོན་ཐམས་ཅད་གྲུབ་པ་ལག་པ་གཉིས་ཀྱིས་ཤིན་དུ་ལེགས་པར་བླངས་ཏེ། དྲང་སྲོང་ནག་པོའི་དྲུང་དུ་ཁྱེར་རོ། །དེ་ནས་དྲང་སྲོང་ནག་པོས་བྱང་ཆུབ་སེམས་དཔའ་བལྟས་ན། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་ཞིང་དཔེ་བྱད་བཟང་པོ་བརྒྱད་བཅུས་ལེགས་པར་རྣམ་པར་སྤྲས་པའི་ལུས་དང་ལྡན་པ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་ལས་འཕགས་པའི་ལུས་ཅན་ཉི་མ་བརྒྱ་ཕྲག་སྟོང་ལས་ཀྱང་ལྷག་པའི་གཟི་བརྗིད་དང་ལྡན་པ། ཡན་ལག་ཐམས་ཅད་དུ་མཛེས་པ་མཐོང་ནས། ཀྱེ་མ་འཇིག་རྟེན་དུ་ངོ་མཚར་གྱིས་གང་ཟག་འདི་བྱུང་ངོ ། །ཀྱེ་མ་འཇིག་རྟེན་དུ་ངོ་མཚར་ཆེན་པོ་དང་ལྡན་པའི་གང་ཟག་འདི་བྱུང་ངོ་ཞེས་ཆེད་དུ་བརྗོད་པ་ཆེད་དུ་བརྗོད་ནས། སྟན་ལས་ལངས་ཏེ་ཐལ་མོ་སྦྱར་ནས། བྱང་ཆུབ་སེམས་དཔའི་རྐང་པ་གཉིས་ལ་ཕྱག་འཚལ་ཏེ། བསྐོར་བ་བྱས་ནས་བྱང་ཆུབ་སེམས་དཔའ་པང་དུ་བླངས་ཏེ། སེམས་ཤིང་འདུག་པར་གྱུར་ཏོ། །དེ་ནས་དེས་བྱང་ཆུབ་སེམས་དཔའི་ལུས་ལ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཡོད་པ་མཐོང་སྟེ། དེ་དག་དང་ལྡན་པའི་སྐྱེས་བུ་གང་ཟག་དེ་རྣམ་པ་གཉིས་སུ་འགྱུར་གྱི། གཞན་དུ་མི་འགྱུར་རོ། །གལ་ཏེ་ཁྱིམ་ན་གནས་ན་ནི་མཐའ་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོར་འགྱུར་ཏེ་ཞེས་བྱ་བ་ནས་སྔ་མ་བཞིན་དུ་དབང་ཕྱུག་གི་དབང་གིས་རྒྱལ་སྲིད་བྱེད་དོ་ཞེས་བྱ་བའི་བར་དུ་འགྱུར་བ་དང ། གལ་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པར་འགྱུར་ཏེ། ཡང་དག་པར་རྫོགས་པའི་སངས་རྒྱས་སུ་གྲགས་པ་འདྲེན་པ་གཞན་གྱི་དྲིང་མི་འཇོག་པར་འགྱུར་བ་མཐོང་ནས། དེས་དེ་ལྟ་བུ་མཐོང་བ་དང ། མཆི་མ་བླགས་ཏེ་ངུས་ནས་ཤུགས་རིང་དུ་ཕྱུང་བ་དང ། རྒྱལ་པོ་ཟས་གཙང་མས་དྲང་སྲོང་དེ་མཆི་མ་བླགས་ཏེ་ངུས་ནས་ཤུགས་རིང་དུ་འབྱིན་པར་མཐོང་ནས། སྔངས་ཏེ་མི་དགའ་ཞིང་རིངས་པར 41.64b རིངས་པར་དྲང་སྲོང་ཆེན་པོ་དེ་ལ་སྨྲས་པ། དྲང་སྲོང་དེ་ལྟར་བཤུམ་མོ་བླགས་ཏེ་བཤུམས་པ་དང ། ཤུགས་རིང་དུ་འབྱིན་པ་ཅི་ཞིག་ནོངས། གཞོན་ནུ་འདི་ལ་མི་དགེ་བ་འམ་ཅིག་མི་གདའ་འམ། དེ་སྐད་ཅེས་སྨྲས་པ་དང ། དྲང་སྲོང་ཆེན་པོ་ནག་པོས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བདག་ནི་གཞོན་ནུའི་སླད་དུ་ངུ་བ་ཡང་མ་ལགས། འདི་ལ་མི་དགེ་བ་ཡང་གང་ཡང་མ་མཆིས་ཏེ། བདག་ཉིད་ངུ་བར་བས་སོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་བདག་ནི་རྒས་ཤིང་འཁོགས་ཏེ་ནས་གཟེར་ལ་གཞོན་ནུ་དོན་ཐམས་ཅད་གྲུབ་པ་འདི་ནི་གདོན་མི་འཚལ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བླ་ན་མེད་པའི་ཆོས་ཀྱི་འཁོར་ལོ་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། གཞན་སུས་ཀྱང་རུང་སྟེ། འཇིག་རྟེན་དུ་ཆོས་དང་འཐུན་པར་བསྐོར་བར་མི་ནུས་བསྐོར་བར་འགྱུར་རོ། །ལྷ་དང་བཅས་པའི་འཇིག་རྟེན་ལ་སྨན་པ་དང་བདེ་བའི་སླད་དུ་ཆོས་སྟོན་པར་འགྱུར་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བའི་ཆོས། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ་ཡོངས་སུ་དག་པ། ཡོངས་སུ་བྱང་བའི་མཐར་ཕྱིན་པའི་ཆོས་ཡང་དག་པར་སྟོན་པར་འགྱུར་རོ། །སེམས་ཅན་སྐྱེ་བའི་ཆོས་ཅན་དག་འདི་ལས་ཆོས་དེ་ཐོས་ནས། སྐྱེ་བ་ལས་ཡོངས་སུ་མ་གྲོལ་བ་རྣམས་གྲོལ་བར་འགྱུར་རོ། །དེ་བཞིན་དུ་སེམས་ཅན་རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པའི་ཆོས་ཅན་རྣམས་ནི་རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་ལས་ཡོངས་སུ་འགྲོལ་བར་འགྱུར། སེམས་ཅན་འདོད་ཆགས་དང ། ཞེ་སྡང་དང ། གཏི་མུག་གི་མེས་གདུངས་པ་རྣམས་ལ་ནི་དམ་པའི་ཆོས་ཀྱི 41.65a ཆར་པས་སིམ་པར་མཛད་པར་འགྱུར། སེམས་ཅན་ལྟ་བ་ངན་པ་སྣ་ཚོགས་ཐིབས་པོས་ཁེབས་པ་ལམ་གོལ་བར་ཞུགས་པ་རྣམས་ནི་ལམ་དྲང་པོར་མྱ་ངན་ལས་འདས་པར་འདྲེན་པར་འགྱུར། སེམས་ཅན་འཁོར་བའི་དྲ་བ་དང་བཙོན་རར་འཁོར་ཞིང་ཉོན་མོངས་པའི་འཆིང་བས་བཅིངས་པ་རྣམས་ནི་བཅིངས་པ་ལས་ཡོངས་སུ་གྲོལ་བར་མཛད་པར་འགྱུར། སེམས་ཅན་མི་ཤེས་པའི་མུན་པ་དང ། རབ་རིབ་དང ། ལིང་ཏོག་གིས་མིག་ལྡོང་པ་རྣམས་ལ་ནི་ཤེས་རབ་ཀྱི་མིག་བསྐྱེད་པར་འགྱུར། སེམས་ཅན་ཉོན་མོངས་པའི་ཟུག་རྔུས་ཟུག་པ་རྣམས་ལ་ནི་ཟུག་རྔུ་འབྱིན་པར་འགྱུར་ཏེ། རྒྱལ་པོ་ཆེན་པོ་འདི་ལྟ་སྟེ་དཔེར་ན་ཨུ་དུམ་བ་རའི་མེ་ཏོག་ནི་བརྒྱ་ལ་བརྒྱ་ལམ་ན་འཇིག་རྟེན་དུ་འབྱུང་ངོ ། །རྒྱལ་པོ་ཆེན་པོ་དེ་བཞིན་དུ་བསྐལ་པ་བྱེ་བ་ཁྲག་ཁྲིག་མང་པོར་བརྒྱ་ལ་བརྒྱ་ལམ་ན། སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་སྟེ། དེ་ལྟར་གཞོན་ནུ་འདི་ནི་ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་འཁོར་བའི་རྒྱ་མཚོའི་ཕ་རོལ་ཏུ་སྒྲོལ་བར་འགྱུར་ཞིང་འཆི་བ་མེད་པ་ལ་རབ་ཏུ་གཞོག་པར་འགྱུར་ལ། བདག་གིས་ནི་སངས་རྒྱས་དཀོན་མཆོག་དེ་མི་མཐོང་བ་དང ། བདག་གི་ནད་མ་མཆིས་པ་འདི་ལ་ཡང་འདོད་ཆགས་དང་བྲལ་བར་གྱུར་ཏེ། རྒྱལ་པོ་ཆེན་པོ་བདག་ནི་དེའི་སླད་དུ་ངུ་ཞིང་མི་དགའ་བས་ཤུགས་རིང་དུ་འབྱིན་པ་ལགས་སོ། །རྒྱལ་པོ་ཆེན་པོ་བདག་ཅག་གི་བསྟན་བཅོས་ལས་འབྱུང་བ་ལྟ་ན་ནི་གཞོན་ནུ་དོན་ཐམས་ཅད་གྲུབ་པ་ཡང་ཁབ་ན་བཞུགས་པར་མི་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་འདི་ནི་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་པ་སྟེ། སུམ་བཅུ་རྩ་གཉིས་གང་ཞེ་ན། རྒྱལ་པོ་ཆེན་པོ་འདི་ལྟ་སྟེ་གཞོན་ནུ་དོན་ཐམས་ཅད་གྲུབ་པ་ནི 41.65b དབུ་གཙུག་ཏོར་དང་ལྡན་པ་སྟེ། རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སྐྱེས་བུ་ཆེན་པོའི་མཚན་དང་པོ་འདི་དང་ལྡན་ནོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་དབུ་སྟང་ཟིལ་བཅག་པའི་འཕྲོ་དང་རྨ་བྱའི་མགྲིན་པ་ལྟར་མཐོན་མཐིང་དུ་གྲུབ་ཅིང་ལྕང་ལོར་འཁྲིར་ལ་གཡས་སུ་འཁྱིལ་བ་དང ། འཕྲལ་བའི་དབྱེས་མཉམ་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པའི་སྨིན་མཚམས་སུ་མཛོད་སྤུ་སྐྱེས་པ་ནི་ཁ་བ་དང་དངུལ་གྱི་མདོག་ལྟར་མཆིས་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སྤྱན་གྱི་རྫི་མ་བའི་རྫི་མ་ལྟ་བུ་དང ། སྤྱན་དཀར་ནག་འབྱེས་པ་དང ། ཚེམས་བཞི་བཅུ་མཉམ་པ་དང ། ཚེམས་ཐགས་བཟང་བ་དང ། ཚེམས་ཤིན་དུ་དཀར་བ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་ཚངས་པའི་དབྱངས་དང ། རོ་བྲོ་བའི་མཆོག་དང་ལྡན་པ་དང ། ལྗགས་ཤིན་དུ་རིང་ཞིང་སྲབ་པ་དང ། འགྲམ་པ་སེང་གེའི་འདྲ་བ་དང ། དཔུང་མགོ་ཤིན་དུ་ཟླུམ་པ་དང ། བདུན་མཐོ་བ་དང ། ཐལ་གོང་རྒྱས་པ་དང ། ལྤགས་པ་སྲབ་ཅིང་མདོག་གསེར་འདྲ་བ་དང ། བཞེངས་བཞིན་དུ་མ་བཏུད་པར་ཕྱག་པུས་མོར་སླེབས་པ་དང ། རོ་སྟོད་སེང་གེའི་ལྟ་བུ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་ཤིང་ནྱ་གྲོ་དྷ་ལྟར་ཆུ་ཞེང་གབ་པ་དང ། སྤུ་རེ་རེ་ནས་སྐྱེས་པ་དང ། ཡན་ལག་གི་སྤུ་གཡས་ཕྱོགས་ནས་གྱེན་དུ་འཁྱིལ་བ་དང ། མདོམས་ཀྱི་སྦ་བ་སྦུབས་སུ་ནུབ་པ་དང ། བརླ་ལེགས་པར་ཟླུམ་པ་དང ། བྱིན་པ་རི་དགས་ཀྱི་རྒྱལ་པོ་ཨེ་ན་ཡའི་ལྟ་བུ་དང ། སོར་མོ་རིང་བ་དང ། ཞབས་ཀྱི་རྟིང་པ་ཡངས་པ་དང ། ཞབས་ཀྱི་གོང་མཐོ་བ་དང ། ཕྱག་དང་ཞབས་ཀྱི་མཐིལ་འཇམ་པ་དང ། ཕྱག་དང་ཞབས་ཀྱི་སོར་མོ་དྲ་བས་འབྲེལ་བ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པའི་ཞབས་ཀྱི་འོག་གི་མཐིལ་གཉིས་ལ་འཁོར་ལོ་རེ་རེ 41.66a སྐྱེས་པ་ནི་བཟང་ཞིང་རྩིབས་སྟོང་དང་ལྡན་ལ། མུ་ཁྱུད་དང་བཅས། ལྟེ་བ་དང་བཅས་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་ཞབས་མཉམ་ཞིང་ཤིན་དུ་གནས་པ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་པོ་འདི་དག་དང་ལྡན་ནོ། །རྒྱལ་པོ་ཆེན་པོ་མཚན་གྱི་རྣམ་པ་དེ་ལྟ་བུ་དག་ནི་འཁོར་ལོས་སྒྱུར་བའི་རྒྱལ་པོ་ལ་མི་འབྱུང་སྟེ། མཚན་དེ་ལྟ་བུ་དག་ནི་བྱང་ཆུབ་སེམས་དཔའ་རྣམས་ལ་འབྱུང་ངོ ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པའི་སྐུ་ལ་དཔེ་བྱད་བཟང་པོ་བརྒྱད་བཅུ་མཆིས་ཏེ། དེ་དག་དང་ལྡན་པས་གཞོན་ནུ་དོན་ཐམས་ཅད་གྲུབ་པ་ནི་ཁབ་ན་བཞུགས་པར་མི་འགྱུར་གྱི། གདོན་མི་འཚལ་བར་རབ་ཏུ་འབྱུང་བའི་དོན་དུ་མངོན་པར་འབྱུང་བར་འགྱུར་རོ། །རྒྱལ་པོ་ཆེན་པོ་དཔེ་བྱད་བཟང་པོ་བརྒྱད་བཅུ་པོ་དེ་དག་གང་ཞེ་ན། འདི་ལྟ་སྟེ་རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སེན་མོ་མཐོ་བ་དང ། སེན་མོ་ཟངས་ཀྱི་མདོག་ལྟ་བུ་དང ། སེན་མོ་མདོག་སྣུམ་པ་དང ། སོར་མོ་རྣམས་ཟླུམ་པ་དང ། སོར་མོ་རྣམས་རྒྱས་པ་དང ། སོར་མོ་བྱིན་གྱིས་ཕྲ་བ་དང ། རྩ་མི་མངོན་པ་དང ། ལོང་བུ་མི་མངོན་པ་དང ། ཚིགས་མི་མངོན་པ་དང ། ཞབས་མཉམ་ཞིང་མི་མཉམ་པ་མ་མཆིས་པ་དང ། ཞབས་ཀྱི་རྟིང་པ་ཡངས་པ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་ཕྱག་གི་རི་མོ་མཚུངས་པ་དང་ལྡན་ཞིང་ཕྱག་གི་རི་མོ་མདངས་ཡོད་པ་དང ། ཕྱག་གི་རི་མོ་ཟབ་པ་དང ། ཕྱག་གི་རི་མོ་ཡ་ཡོར་མ་གྱུར་པ་དང ། ཕྱག་གི་རི་མོ་རིམ་པར་འཚམ་པ་དང ། སྒྲོས་བིམ་པ་ལྟར་དམར་བ་དང ། སྒྲ་མི་དྲག་པའི་ཚིག་དང ། ལྗགས་མཉེན་ཞིང་འཇམ་ལ་ཟངས་ཀྱི་མདོག་ལྟར་འདུག་པ་དང ། གླང་པོ་ཆེའི་ང་རོ་དང ། འབྲུག་གི་སྒྲ་དང་ལྡན་པ་དང ། སྙན་ཅིང་འཇམ་པ་དང་ལྡན 41.66b པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་དཔེ་བྱད་བཟང་པོ་ཡོངས་སུ་རྫོགས་པ་སྟེ། ཕྱག་རིང་བ་དང ། སྐུའི་ན་བཟའ་གཙང་མ་ཕུན་སུམ་ཚོགས་པ་དང ། སྐུ་འཇམ་པ་དང ། བསྙེངས་པ་མི་མངའ་བའི་སྐུ་དང ། ཞུམ་པ་མི་མངའ་བའི་སྐུ་དང ། རིམ་པར་འཚམ་པའི་སྐུ་དང ། ཤིན་དུ་དཔའ་བར་མཛེས་པའི་སྐུ་དང ། རྣམ་པར་ལེགས་པར་གྲུབ་པའི་སྐུ་དང ། པུས་མོའི་ལྷ་ང་ཡངས་ཤིང་རྒྱ་ཆེ་ལ་ཤིན་དུ་གང་བ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སྐུ་ཟླུམ་པ་དང་ལྡན་པ་སྟེ། སྐུ་ཤིན་དུ་འཇམ་པ་དང ། སྐུ་ཡ་ཡོ་མ་མཆིས་པ་དང ། སྐུ་རིམ་གྱིས་ལེགས་པར་གྲུབ་པ་དང ། ལྟེ་བ་ཟབ་པ་དང ། ལྟེ་བ་མ་ཡོ་བ་དང ། ལྟེ་བ་རིམ་གྱིས་གཞོལ་བ་དང ། དྲང་སྲོང་ལྟར་གཙང་སྦྲས་སྤྱོད་པ་དང ། ཀུན་ནས་མཛེས་པ་དང ། སྣང་བ་དམ་པ་ཤིན་དུ་རྣམ་པར་དག་ཅིང ། རབ་རིབ་མ་མཆིས་པའི་འོད་ཀུན་ནས་འབྱུང་བ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་གླང་པོ་ལྟར་དལ་བའི་འགྲོས་དང ། སེང་གེའི་སྟབས་ལྟ་བུའི་འགྲོས་དང ། ཁྱུ་མཆོག་གི་སྟབས་ལྟ་བུའི་འགྲོས་དང ། ངང་པའི་སྟབས་ལྟ་བུའི་འགྲོས་དང ། གཡས་ཕྱོགས་སུ་མཛེས་པར་འཁོར་བའི་འགྲོས་དང ། དཀུ་ཟླུམ་པ་དང ། དཀུ་སྐབས་ཕྱིན་པ་དང ། དཀུ་མ་རྙོངས་པ་དང ། རྐེད་པ་གཞུའི་ཆང་ཟུངས་ལྟར་ཕྲ་བ་དང ། མདོག་གི་ཉེས་པ་སྔོ་བ་འམ། གནག་པའི་སྐྱོན་དང་བྲལ་བའི་སྐུ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་མཆེ་བ་ཟླུམ་པ་དང ། མཆེ་བ་རྣོ་བ་དང ། མཆེ་བ་བྱིན་གྱིས་ཕྲ་བ་དང ། ཤངས་ལེགས་པར་མཐོ་བ་དང ། སྤྱན་གསལ་བ་དང ། སྤྱན་དྲི་མ་མེད་པ་དང ། འཛུམ་པའི་སྤྱན་དང་ལྡན་པ་དང ། སྤྱན་རིང་བ་དང ། སྤྱན་ཡངས་པ་དང ། ུད་པ་ལ་སྔོན་པོ་ལྟ་བུའི་སྤྱན་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད 41.67a གྲུབ་པ་ནི་སྨིན་མའི་སྤུ་མཉམ་པ་དང ། སྨིན་མ་སྟུག་པ་དང ། སྨིན་མ་གནག་པ་དང ། སྨིན་མ་རྒྱུན་ཆགས་པ་དང ། སྨིན་མ་རིམ་གྱིས་གཞོལ་བ་དང ། མཁུར་བ་རྒྱས་པ་དང ། མཁུར་བ་མི་མཉམ་པ་མེད་པ་དང ། མཁུར་བ་སྐྱོན་དང་བྲལ་བ་དང ། སྡང་བ་དང ། ཁྲོ་བའི་མདོག་མེད་པ་དང ། ཤིན་དུ་རིག་པའི་དབང་པོ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་དེ་ནི་མཛོད་སྤུ་ཡོངས་སུ་རྫོགས་པ་དང་ལྡན་པ་དང ། གདོང་དང་དཔྲལ་བ་རྐྱེན་དུ་འབབ་པ་དང ། དབུ་ཡོངས་སུ་རྒྱས་པ་དང ། དབུ་སྐྲ་གནག་པ་དང ། དབུ་སྐྲ་མཉམ་པ་དང ། དབུ་སྐྲ་དྲི་ཞིམ་པ་དང ། དབུ་སྐྲ་མི་བཤོར་བ་དང ། དབུ་སྐྲ་མི་འཛིངས་པ་དང ། དབུ་སྐྲ་བྱིན་གྱིས་ཕྲ་བ་དང ། དབུ་སྐྲ་ལྕང་ལོར་འཁྲིལ་བ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་དེ་ནི་དབུ་སྐྲ་དཔལ་གྱི་བེའུ་དང ། བཀྲ་ཤིས་དང ། གཡུང་དྲུང་འཁྱིལ་བ་དང ། སྡོང་རིས་ཀྱི་དབྱིབས་ལྟ་བུའི་དབུ་སྐྲ་དང་ལྡན་པའོ། །རྒྱལ་པོ་ཆེན་པོ་འདི་དག་ནི་གཞོན་ནུ་དོན་ཐམས་ཅད་གྲུབ་པའི་དཔེ་བྱད་བཟང་པོ་བརྒྱད་བཅུ་སྟེ། དེ་དག་དང་ལྡན་པས་གཞོན་ནུ་དོན་ཐམས་ཅད་གྲུབ་པ་ནི་ཁབ་ན་བཞུགས་པར་མི་འགྱུར་གྱིས། གདོན་མི་འཚལ་བར་རབ་ཏུ་འབྱུང་བའི་སླད་དུ་མངོན་པར་འབྱུང་བར་འགྱུར་རོ། །དེ་ནས་རྒྱལ་པོ་ཟས་གཙང་མས་དྲང་སྲོང་ཆེན་པོ་ནག་པོ་ལས་གཞོན་ནུའི་ལུང་བསྟན་པ་དེ་ཐོས་ནས་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་སྟན་ལས་ལངས་ཏེ། བྱང་ཆུབ་སེམས་དཔའི་རྐང་པ་གཉིས་ལ་ཕྱག་འཚལ་ནས་ཚིགས་སུ་བཅད་པ་འདི་སྨྲས་སོ། །ཁྱོད་ལ་ལྷ་ཀུན་ཕྱག་འཚལ་ཞིང ། །དྲང་སྲོང་རྣམས་ཀྱིས་མཆོད་གྱུར་ཏེ། །འཇིག་རྟེན་ཀུན་གྱི་མཆོད་རྟེན་པས། །བདག་ཀྱང་ཁྱོད་ལ་ཕྱག་འཚལ་ལོ། །དགེ་སློང་དག་དེ་ལྟར་རྒྱལ་པོ་ཟས་གཙང་མས་དྲང་སྲོང་ཆེན་པོ་ནག་པོ་དང ། སྣག་གི་ཚ་བོ་མིས་བྱིན 41.67b དང་བཅས་ཏེ། ཁ་ཟས་ཚུལ་དང་འདྲ་བས་ཚིམ་པར་བྱས་ནས། གོས་བསྐོན་ཏེ་བསྐོར་བ་བྱས་སོ། །དེ་ནས་དྲང་སྲོང་ཆེན་པོ་ནག་པོ་གནས་དེ་ཉིད་ནས་རྫུ་འཕྲུལ་གྱིས་ནམ་མཁའ་ལས་རང་གི་གནས་ག་ལ་བ་དེར་སོང་ངོ ། །དེ་ནས་དྲང་སྲོང་ཆེན་པོ་ནག་པོས་བྲམ་ཟེའི་ཁྱེའུ་མིས་བྱིན་ལ་འདི་སྐད་ཅེས་སྨྲས་སོ། །མིས་བྱིན་ཁྱོད་ཀྱིས་ནམ་སངས་རྒྱས་འཇིག་རྟེན་དུ་བྱུང་ངོ་ཞེས་ཐོས་པ་དེའི་ཚེ། ཁྱོད་སོང་སྟེ་དེའི་བསྟན་པ་ལ་རབ་ཏུ་བྱུང་ཤིག་དང ། དེ་ནི་ཁྱོད་ཀྱི་ཡུན་རིང་པོའི་དོན་དང ། ཕན་པ་དང་བདེ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། ལྷའི་ཚོགས་རྣམས་ནམ་མཁའི་ངོས་ལ་གནས་ཏེ་སངས་རྒྱས་སྒྲ་སྒྲོག་པ། །ལྷ་ཡི་དྲང་སྲོང་ནག་པོ་རི་སུལ་གནས་པས་མཐོང་ནས་དགའ་མཆོག་ཐོབ། །འདི་ན་སྲོག་ཆགས་རྣམས་ཀྱི་དགའ་སྐྱེད་སངས་རྒྱས་ཤེས་བྱའི་ཚིག་འདི་ཅི། །བདག་གི་ལུས་ཀྱང་རབ་སིམ་གྱུར་ཅིང་སེམས་བདེ་མཆོག་ཏུ་ཞི་བར་གྱུར། །དེ་ལྷ་འམ་འོན་ཏེ་ལྷ་མིན་ཡང་ན་ནམ་མཁའ་ལྡིང་ངམ་མི་འམ་ཅི། །སངས་རྒྱས་ཤེས་བྱ་དགའ་དང་མོས་བྱེད་ཚིག་འདི་སྔོན་ཆད་མ་ཐོས་ཅི། །ལྷ་ཡི་མིག་གིས་ཕྱོགས་བཅུར་རི་དང་ས་དང་རྒྱ་མཚོ་རྣམས་ལ་བལྟས། །ཕྱིས་ཡང་ས་རི་མཚོ་ལ་རྨད་དུ་བྱུང་བ་རྣམ་པ་སྣ་ཚོགས་མཐོང ། །འོད་གསལ་མཛེས་པ་ལུས་ལ་སིམ་བྱེད་འདི་ནི་རབ་ཏུ་བཟང་སྣང་ཞིང ། །ཇི་ལྟར་རི་ཡི་རྩེ་མོ་རྣམས་སུ་བྱི་རུའི་མྱུ་གུ་འཐོན་གྱུར་ལ། །ཤིང་ལྗོན་རྣམས་ཀྱང་མེ་ཏོག་བཟང་རྒྱས་སྣ་ཚོགས་འབྲས་བུས་བརྒྱན་གྱུར་ལས། །སྲིད་པ་གསུམ་དུ་དཀོན་མཆོག་དམ་པ་མྱུར་དུ་འབྱུང་བར་ཤིན་དུ་གསལ། །ས་འདི་ཐམས་ཅད་མཉམ་ཞིང་དྲི་མེད་ལག་མཐིལ་བཞིན་དུ་སྣང་བ་དང ། །ལྷ་རྣམས་དགའ་ཞིང་ནམ་མཁའི་དཀྱིལ་ན་གོས་ཀྱི་གཡབ་མོ་འབྱིན་གྱུར་ལ། །ཀླུ་རྒྱལ་རྒྱ་མཚོའི་གནས་ཀྱི་སྟེང་ན་རིན་ཆེན་རྨད་འབྱུང་འཕྱོ་བ་ལས། །འཛམ་བུའི་གླིང་དུ་རྒྱལ་བའི་དཀོན་མཆོག་ཆོས་ཀྱི་འབྱུང་གནས་ངེས་པར 41.68a འབྱུང ། །ངན་སོང་ཞི་ཞིང་སྡུག་བསྔལ་བྲལ་ཏེ་སེམས་ཅན་རྣམས་ནི་བདེར་ལྡན་ལ། །ལྷ་ཡི་ཚོགས་རྣམས་ནམ་མཁའི་དཀྱིལ་ལ་དགའ་དང་ལྡན་པར་རྒྱུ་བ་དང ། །ཇི་ལྟར་ལྷ་ཡི་གླུ་དབྱངས་སྒྲ་སྙན་ཡིད་དུ་འོང་བ་གྲག་པ་ལས། །སྲིད་པ་གསུམ་འདིར་དཀོན་མཆོག་འབྱུང་འགྱུར་དེ་ཡི་ལྟས་སུ་གདོན་མི་ཟ། །འཛམ་བུའི་གླིང་འདིར་དྲང་སྲོང་ནག་པོས་ལྷ་ཡི་མིག་གིས་རྣམ་བལྟས་ན། །སེར་སྐྱའི་གྲོང་ན་རྒྱལ་པོ་ཟས་གཙང་གྲོང་ཁྱེར་དམ་པ་ཡོད་པ་དེར། །མཐུ་ཆེན་མཐུ་ལྡན་མཚན་དང་བསོད་ནམས་གཟི་བརྗིད་རྒྱས་པ་བཙས་པ་མཐོང ། །མཐོང་ནས་དགའ་མགུ་རངས་ཤིང་བདེ་བའི་ཡིད་སྐྱེས་མཐུ་ཡང་སྐྱེས་པར་གྱུར། །དེ་ནས་ངོ་མཚར་རྙེད་དེ་རང་གི་སློབ་མ་ལྷན་ཅིག་རིངས་སུ་དོང ། །ཕྱིན་ནས་སེར་སྐྱར་བརྗོད་པའི་རྒྱལ་པོའི་གྲོང་ཁྱེར་མཆོག་གི་སྒོར་འདུག་སྟེ། །ཞབས་འབྲིང་སྲོག་ཆགས་བྱེ་བ་ཁྲག་ཁྲིག་མང་པོ་དྲང་སྲོང་དེས་མཐོང་ནས། །སྒོ་བ་དེ་ལ་སྨྲས་པ་ཆབ་སྒོར་དྲང་སྲོང་ཕྱིན་ཅེས་མྱུར་དུ་གསོལ། །དེ་མཉན་མྱུར་དུ་ཕོ་བྲང་ནང་ཕྱིན་རྒྱལ་པོ་ལ་ནི་དེ་བསྙད་པ། །ལྷ་ཅིག་དྲང་སྲོང་རྒན་འཁོགས་དཀའ་ཐུབ་ཆེན་པོ་ཅན་ཞིག་ཆབ་སྒོར་མཆིས། །དྲང་སྲོང་མཆོག་དེ་རྒྱལ་པོའི་ཕོ་བྲང་ནང་དུ་མཆི་བར་དགའ་ཞེས་མཆི། །རྒྱལ་པོ་ཆེན་པོ་ནང་དུ་བཏང་ངམ་མི་བཏང་བདག་ལ་བཀའ་སྩལ་གསོལ། །དེ་ནས་དེ་ཡི་སྟན་བཏིང་རྒྱལ་པོས་ཁྱོད་སོང་ནང་དུ་བོས་ཞེས་བསྒོ། །དྲང་སྲོང་ནག་པོས་བསྒོ་བའི་ཚིག་ཐོས་དགའ་མགུ་བདེ་དང་ལྡན་པར་གྱུར། །སྐོམ་པ་བསིལ་བའི་ཆུ་འདོད་བཀྲེས་པས་གདུངས་པ་ཟས་ལ་མོས་པ་ལྟར། །དྲང་སྲོང་དམ་པ་དེ་ཡང་སེམས་ཅན་མཆོག་དེ་མཐོང་དུ་མངོན་པར་དགའ། །རྒྱལ་པོ་རྒྱལ་གྱུར་སྐུ་ཚེ་རིང་བསྲུང་གསོལ་ཞེས་དགའ་བས་དེ་སྐད་སྨྲས། །སྙན་པར་བརྗོད་ནས་ཡིད་དུལ་དབང་པོ་ཞི་ཞིང་དེས་པ་སྟན་ལ་འདུག་།རྒྱལ་པོས་གུས་པར་སྨྲ་བྱས་དྲང་སྲོང་ཐུབ་པ་དེ་ལ་ཚིག་བརྗོད་པ། །རྒྱལ་པོའི་ཕོ་བྲང་འདིར་བྱོན་རྒྱུ་ཅི་ཐུབ 41.68b པས་བདག་ལ་མྱུར་དུ་གསུངས། །ཁྱོད་ཀྱི་སྲས་བལྟམ་གཟུགས་མཆོག་ཕ་རོལ་ཕྱིན་ཅིང་གཟི་བརྗིད་ཆེ་དང་ལྡན། །མཐུ་ཆེན་མཚན་རབ་སུམ་བཅུ་གཉིས་ཀྱིས་ཀུན་ནས་རྒྱན་མངའ་བ། །རྒྱལ་པོ་ཁྱོད་སྲས་ཐམས་ཅད་དོན་གྲུབ་དེ་ནི་མཐོང་བར་བདག་དགའ་སྟེ། །དེ་སླད་འདིར་མཆིས་རྒྱལ་པོ་བདག་ལ་འཚལ་བ་གཞན་ནི་ཡོད་མ་མཆིས། །ལེགས་སོ་ལེགས་པར་བྱོན་ཏེ་མཉེལ་ཏམ་མ་མཉེལ་ཁྱོད་མཐོང་བདག་དགའོ། །མཆོག་སྦྱིན་གཞོན་ནུ་དེ་ཉལ་ད་ལྟར་བལྟ་བའི་སྐབས་ནི་མ་མཆིས་ཀྱིས། །རེ་ཤིག་ཡུད་ཙམ་གཞེས་དང་འདིར་ནི་ཟླ་བ་ཉ་བ་དྲི་མེད་པ། །སྐར་མའི་ཚོགས་ཀྱིས་བརྒྱན་པ་འདྲ་བའི་དྲི་མེད་གཟིགས་པར་འགྱུར། །གང་ཚེ་ཁ་ལོ་སྒྱུར་མཆོག་ཟླ་བ་རྒྱས་པའི་འོད་མངའ་དེ་སད་པ། །དེ་ཚེ་རྒྱལ་པོས་འོད་འབར་གཟུགས་འཆང་ཉི་ལས་འཕགས་འོད་པང་བླངས་ཏེ། །འདི་ལྟར་དྲང་སྲོང་ལྷ་མིས་མཆོད་པ་གསེར་མཆོག་གཟུགས་ལྡན་ད་གཟིགས་ཤིག་།དྲང་སྲོང་ནག་པོས་དེ་ཡི་རྐང་པ་མཛེས་པ་འཁོར་ལོའི་མཚན་ཅན་མཐོང ། །དེ་ནས་ལངས་ཏེ་ཐལ་མོ་སྦྱར་ནས་རྐང་པ་གཉིས་ལ་ཕྱག་འཚལ་ཏེ། །བདག་ཉིད་ཆེན་པོ་བསྟན་བཅོས་མཁས་པས་པང་དུ་བླངས་ནས་བསམས་ཤིང་བལྟས། །དེས་ནི་མཐུ་ཆེན་མཐུ་ལྡན་མཚན་གྱི་མཆོག་གིས་བརྒྱན་པ་མཐོང་གྱུར་ནས། །མགོ་གཅོགས་རིག་བྱེད་བསྟན་བཅོས་མཁས་པ་དེས་ནི་དེ་ལ་རྣམ་གཉིས་མཐོང ། །སྟོབས་ལྡན་འཁོར་ལོས་སྒྱུར་བའི་རྒྱལ་པོ་འམ་སངས་རྒྱས་འཇིག་རྟེན་གཙོ་བོར་འགྱུར། །ཤིན་དུ་མི་དགའ་ལུས་དང་སེམས་ཀྱིས་མཆི་མ་བླགས་ཏེ་ཤུགས་རིང་ཕྱུང ། །རྒྱལ་པོ་མཆོག་ཀྱང་སྔངས་པར་གྱུར་ནས་བྲམ་ཟེ་ཅི་སླད་བཤུམས་ཤེས་སྨྲ། །དྲང་སྲོང་ནག་པོས་བདག་གི་དོན་གྲུབ་བགེགས་ཤིག་མ་གཟིགས་སམ། དྲང་སྲོང་ཅི་སླད་བཤུམས་མཛད་དགེ་སྡིག་གང་གཟིགས་བདག་ལ་མད་པར་གསུངས། །ཁྱོད་སྲས་དོན་ཀུན་གྲུབ་ལ་བར་ཆད་སྡིག་ཏུ་འགྱུར་བ་མ་མཆིས་ཏེ། །བདག་ལ་བདག་ཉིད་རྒས་ཤིང 41.69a འདི་ལྟར་འཁོགས་པར་གྱུར་ཅེས་མྱ་ངན་བགྱིད། །འདི་ནི་སངས་རྒྱས་འཇིག་རྟེན་མཆོག་འགྱུར་ཆོས་ཀྱང་ཡང་དག་སྟོན་པར་འགྱུར། །བདག་གིས་དགའ་བ་ཐོབ་པས་ཡིད་ཀྱིས་མི་མཐོང་ངོ་ཞེས་དེ་སླད་དུ། །འདི་ཡི་སྐུ་ལ་མཚན་རབ་སུམ་བཅུ་རྩ་གཉིས་དྲི་མེད་མངའ་བ་ལས། །རྣམ་པ་གཉིས་སུ་འགྱུར་ཏེ་གསུམ་དུ་མ་མཆིས་རྒྱལ་པོ་མཁྱེན་པར་མཛོད། །འཁོར་ལོས་སྒྱུར་བའི་རྒྱལ་འགྱུར་ཡང་ན་སངས་རྒྱས་འཇིག་རྟེན་གཙོ་བོར་བྱོན། །འདི་ནི་འདོད་པའི་ཡོན་ཏན་བཞེད་པར་མི་འགྱུར་ངེས་པར་སངས་རྒྱས་འགྱུར། །དྲང་སྲོང་ལུང་བསྟན་དེ་ཐོས་རྒྱལ་པོ་དགའ་ཞིང་བདེ་བ་ཐོབ་པར་གྱུར། །དེ་ནས་ལངས་ཏེ་ཐལ་མོ་སྦྱར་ནས་རྐང་པ་གཉིས་ལ་ཕྱག་ཀྱང་བྱས། །སྟོབས་མཆོག་ལྡན་པ་ཁྱོད་ནི་ལྷས་མཆོད་དྲང་སྲོང་རྣམས་ཀྱིས་བསྔགས་པ་སྟེ། །སྲིད་གསུམ་ཀུན་གྱི་འགྲོ་བའི་དེད་དཔོན་མཆོག་གྱུར་ཁྱོད་ལ་ཕྱག་འཚལ་ལོ། །དྲང་སྲོང་དགའ་བས་ཚ་བོ་དེ་ལ་སྨྲས་པ་ང་ཡི་གདམས་ངག་ཉོན། །གང་ཚེ་འདི་ནི་བྱང་ཆུབ་སངས་རྒྱས་འགྲོ་ལ་འཁོར་ལོ་སྐོར་ཐོས་པ། །དེ་ཚེ་མྱུར་དུ་ཐུབ་པའི་བསྟན་ལ་རབ་བྱུང་མྱ་ངན་འདས་པ་འཐོབ། །དྲང་སྲོང་དམ་པ་དེ་ཡིས་རྐང་ལ་ཕྱག་འཚལ་བསྐོར་བ་བྱས་ནས་ནི། །འདི་འདྲའི་སྲས་མངའ་ཁྱོད་ཀྱི་ཐོབ་པ་རྒྱ་ཆེན་ལེགས་པར་ཐོབ་ཅེས་སྨྲས། །འདི་ནི་འཇིག་རྟེན་ལྷ་དང་མིར་བཅས་ཆོས་ཀྱིས་ཚིམ་པར་མཛད་པར་འགྱུར། །དྲང་སྲོང་མཆོག་དེ་སེར་སྐྱའི་གནས་ནས་བྱུང་ནས་བདག་གནས་དགོན་པར་ཕྱིན། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དྲུག་པ། དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་མ་ཐག་ཏུ་ལྷའི་བུ་དབང་ཕྱུག་ཆེན་པོས། གནས་གཙང་མའི་རིས་ཀྱི་ལྷའི་བུ་རྣམས་ལ་བོས་ཏེ། འདི་སྐད་ཅེས་སྨྲས་སོ། །གྲོགས་པོ་དག་བྱང་ཆུབ་སེམས་དཔའ་སེམས་དཔའ་ཆེན་པོ་གང་བསྐལ་པ་བྱེ་བ 41.69b ཁྲག་ཁྲིག་བརྒྱ་སྟོང་གྲངས་མེད་པར་ཡོངས་སུ་སྦྱང་བ་བྱས་པ། སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཐབས་དང ། ཐོས་པ་དང ། སྤྱོད་པ་དང ། བརྟུལ་ཞུགས་དང ། དཀའ་ཐུབ་ཅན་སྤྱད་པ་ལེགས་པར་སྤྱད་པ། བྱམས་པ་ཆེན་པོ་དང ། སྙིང་རྗེ་ཆེན་པོ་དང ། དགའ་བ་ཆེན་པོ་དང་ལྡན་པ། བཏང་སྙོམས་ཀྱིས་ཡང་དག་པར་འཕགས་པའི་བློ་ཅན། སེམས་ཅན་ཐམས་ཅད་ལ་ཕན་པར་བརྩོན་པ། བརྩོན་འགྲུས་བརྟན་པའི་གོ་ཆ་ལེགས་པར་བགོས་པ། སྔོན་གྱི་རྒྱལ་བ་ལ་དགེ་བའི་རྩ་བ་བསྐྱེད་པས་བྱུང་བ། བསོད་ནམས་བརྒྱ་པའི་མཚན་གྱིས་ཡང་དག་པར་བརྒྱན་པ། རྟུལ་བ་ངེས་པར་བྱས་པ་དང་ལྡན་པ། ཕ་རོལ་གྱི་དམག་ཚོགས་རབ་ཏུ་འཇོམས་པ། དགའ་བའི་བསམ་པ་ཤིན་དུ་དྲི་མ་མེད་པ་ཕུན་སུམ་ཚོགས་པ། ཡེ་ཤེས་ཆེན་པོའི་ཏོག་གི་རྒྱལ་མཚན་ཅན། བདུད་ཀྱི་སྟོབས་མཐར་འབྱིན་པ། སྟོང་གསུམ་གྱི་དེད་དཔོན་ཆེན་པོ། ལྷ་དང་མིས་མཆོད་པ། མཆོད་སྦྱིན་ཆེན་པོའི་མཆོད་སྦྱིན་བྱས་པ། བསོད་ནམས་ཀྱི་ཚོགས་ཤིན་དུ་ཕུན་སུམ་ཚོགས་པ་དང་ལྡན་པ། འབྱུང་བའི་བསམ་པ་ཅན། སྐྱེ་བ་དང ། རྒ་བ་དང ། འཆི་བ་མཐར་འབྱིན་པ། ལེགས་པར་སྐྱེ་བས་སྐྱེས་པ། འགྲོ་བ་རྣམ་པར་བྱང་ཆུབ་པར་བྱེད་པ་དེ། བུ་རམ་ཤིང་པའི་རྒྱལ་པོའི་རིགས་སུ་སྐྱེས་ནས་མིའི་འཇིག་རྟེན་དུ་བྱུང་སྟེ། དེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱས་ཚུར་ཤོག་།བདག་ཅག་དེ་ལ་ཕྱག་འཚལ་ཞིང་རིམ་གྲོར་བྱ་བ་དང ། བཀུར་སྟིར་བྱ་བ་དང ། མངོན་པར་བསྟོད་པར་བྱ་བའི་ཕྱིར་འདོང་ངོ ། །ལྷའི་བུ་ང་རྒྱལ་གྱི་ཟིལ་གྱིས་ནོན་པ་གཞན་དག་ཀྱང་བདག་ཅག་བྱང་ཆུབ་སེམས་དཔའ་ལ་ཕྱག་འཚལ་བ་མཐོང་བ་དང ། དེ་དག་ཀྱང་ང་རྒྱལ་དང ། དྲེགས་པ་དང ། རྒྱགས་པ་གཏོང་བར་འགྱུར་ཏེ། བྱང་ཆུབ་སེམས་དཔའ་ལ་ཕྱག་འཚལ་ཞིང་རིམ་གྲོ་དང་བཀུར་སྟི་བྱེད་པར་བྱ་བའི་ཕྱིར 41.70a འདོང་ངོ ། །དེ་ནི་ལྷའི་བུ་དེ་དག་ལ་ཡུན་རིང་པོའི་དོན་དང ། ཕན་པ་དང ། བདེ་བ་དང ། འཆི་བ་མེད་པ་འཐོབ་པའི་བར་དུ་འགྱུར་རོ། །རྒྱལ་པོ་ཟས་གཙང་མ་རྒྱལ་བ་འཕེལ་བ་ཡང་རྗེས་སུ་བསྒྲགས་པར་འགྱུར་རོ། །བྱང་ཆུབ་སེམས་དཔའ་ཡང་དེ་ཁོ་ནའི་ལུང་བསྟན་པས་ལུང་བསྟན་ཏེ་བདག་ཅག་ཕྱིར་འོང་བར་བྱའོ། །དེ་སྐད་ཅེས་བསྒོ་ནས་ལྷའི་བུ་དབང་ཕྱུག་ཆེན་པོ། ལྷའི་བུ་བརྒྱ་སྟོང་ཕྲག་བཅུ་གཉིས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་འོད་ཀྱིས་རྒྱས་པར་བཀང་སྟེ། རྒྱལ་པོ་ཟས་གཙང་མའི་ཕོ་བྲང་ག་ལ་བ་དེར་སོང་ནས་ཕྱིན་པ་དང ། སྒོ་བས་རྒྱལ་པོ་ལ་གསོལ་ཏེ། རྒྱལ་པོས་གནང་ནས་རྒྱལ་པོའི་ཕོ་བྲང་དུ་ཕྱིན་ཏེ། བྱང་ཆུབ་སེམས་དཔའི་རྐང་པ་ལ་མགོ་བོས་ཕྱག་འཚལ་ནས། བླ་གོས་ཕྲག་པ་གཅིག་ཏུ་གཟར་ཏེ། ལན་བརྒྱ་སྟོང་ཕྲག་དུ་མར་བསྐོར་བ་བྱས་ནས་བྱང་ཆུབ་སེམས་དཔའ་པང་དུ་བླངས་ཏེ་རྒྱལ་པོ་ཟས་གཙང་མ་ལ་དགའ་བར་བྱ་བའི་ཕྱིར་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དགྱེས་པའི་དམ་པས་དགྱེས་པར་མཛོད་ཅིག་།དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་བྱང་ཆུབ་སེམས་དཔའི་སྐུ་མཚན་དང་དཔེ་བྱད་བཟང་པོས་ལེགས་པར་བརྒྱན་པ་དང ། གཞོན་ནུས་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་ཁ་དོག་དང ། གཟི་བརྗིད་དང ། གྲགས་པ་དང ། དཔལ་གྱི་ཟིལ་གྱིས་ནོན་པ་ལས་ན། རྒྱལ་པོ་ཆེན་པོ་བྱང་ཆུབ་སེམས་དཔའ་ནི་གདོན་མི་འཚལ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དགེ་སློང་དག་དེ་ལྟར་ལྷའི་བུ་དབང་ཕྱུག་ཆེན་པོ་གནས་གཙང་མའི་རིས་ཀྱི་ལྷའི་བུ་མང་པོ་དང་ལྷན་ཅིག་ཏུ་བྱང་ཆུབ་སེམས་དཔའ་ལ་མཆོད་པ་དང ། རིམ་གྲོ་ཆེན་པོ་བྱས་ཏེ། དེ་ཁོ་ནའི་ལུང་བསྟན་པས་བྱང་ཆུབ་སེམས་དཔའ་ལུང་བསྟན་ནས་ཕྱིར་བདག་གི་གནས་སུ་སོང་ངོ ། །དེ་ལ་འདི་སྐད་ཅེས་བྱ་སྟེ། ཡོན་ཏན 41.70b རྒྱ་མཚོའི་ཕ་རོལ་ཕྱིན་པ་དེ་བལྟམ་པ། །ལྷ་ཡི་དབང་པོས་ཤེས་ནས་དགའ་སྟེ་ལྷ་ལ་སྨྲས། །དེ་ཐོས་འགྱུར་བའང་བསྐལ་པ་བྱེ་མང་ཤིན་དུ་དཀའ། །ཚུར་ཤོག་མི་ཡི་དབང་པོ་དེ་ལ་མཆོད་དུ་འདེང ། །རིན་ཆེན་ནོར་བུས་གཙུག་ནི་ལེགས་བརྒྱན་སྤྱོད་ལམ་ལྡན། །གཙུག་པུད་མཛེས་པ་འཕྱང་བ་རྣམ་པར་དག་པའི་ལྷ། །སྟོང་ཕྲག་བཅུ་གཉིས་ཚང་བ་སེར་སྐྱའི་གནས་མཆོག་ཏུ། །མྱུར་དུ་ལྷག་ནས་རྒྱལ་པོའི་སྒོ་ཡི་དྲུང་ན་སྡོད། །དེ་དག་རྣམས་ཀྱིས་སྒོ་བ་ལ་ནི་ཡིད་འོང་སྨྲས། །རྒྱལ་པོའི་ཕོ་བྲང་སོང་སྟེ་ཐུགས་སུ་ཆུད་པར་གསོལ། །ཆབ་སྒོ་བས་ཀྱང་ཚིག་དེ་མཉན་ནས་ནང་དུ་སོང ། །ཐལ་མོ་སྦྱར་ནས་རྒྱལ་པོ་དེ་ལ་འདི་སྐད་སྨྲས། །ལྷན་ཅིག་རྟག་ཏུ་རྒྱལ་གྱུར་སྐུ་ཚེ་རིང་དུ་སྲུངས། །བསོད་ནམས་ཡངས་པ་རྣམ་དག་འོད་ཅན་ཆབ་སྒོར་མཆིས། །རིན་ཆེན་ནོར་བུས་གཙུག་ནི་ལེགས་བརྒྱན་སྤྱོད་ལམ་ལྡན། །ཟླ་བ་ཉ་ལྟར་བཞིན་བཟང་ཟླ་ལྟར་དྲི་མེད་འོད། །རྒྱལ་པོ་དེ་དག་གང་དུ་མཆི་ཡང་གྲིབ་མི་གདའ། །སུག་པ་འདོར་ཡང་གོམ་པའི་སྒྲ་དག་ཐོས་མི་འགྱུར། །དོག་སར་རྒྱུ་བ་བགྱིད་ཀྱང་རྡུལ་ནི་ཡོང་མི་ལྡང ། །སྐྱེ་བོ་རྣམས་ཀྱང་དེ་དག་མཐོང་ན་ངོམས་མི་འགྱུར། །དེ་དག་ལུས་ཀྱི་འོད་ནི་ཤིན་དུ་རྒྱ་ཆེན་གསལ། །ཚིག་ཀྱང་ཡིད་དུ་མཆིས་ཏེ་མི་ལ་དཔེ་མ་མཆིས། །ཟབ་ཅིང་འཇམ་མཉེན་སྙན་པ་འབྱུང་བའི་གནས། །དེ་དག་མི་མ་ལགས་ཀྱི་ལྷ་ཚོགས་ལགས་སྙམ་བགྱིད། །མེ་ཏོག་མཆོག་ཕྲེང་བྱུག་པ་དར་གྱི་ལྡ་ལྡི་དག་།ཀུན་གྱི་ལག་ན་ཐོགས་ནས་གུས་དང་བཅས་པར་སྡོད། །རྒྱལ་པོ་ལྷ་རྣམས་དེ་དག་གཞོན་ནུ་ལྷ་ཡི་ལྷ། །བལྟ་བར་འཚལ་ཞིང་མཆོད་པའི་སླད་དུ་མཆིས་སུ་དེས། །རྒྱལ་པོས་དེ་སྐད་ཚིག་ཐོས་རབ་ཏུ་དགར་གྱུར་ནས། །སོང་སྟེ་ཀུན་ཀྱང་ཕོ་བྲང་ནང་དུ་གཤེགས་ཤེས་གྱིས། །དེ་དག་ཡོན་ཏན་སྤྱོད་ལམ་ཁྱོད་ཀྱིས་སྨྲས་ལྟར་ན། །རྫུ་འཕྲུལ་དེ་འདྲ་བ་ནི་མི་ལ་གང་ཡང་མེད། །སྒོ་བས་ཐལ་མོ་སྦྱར་ཏེ་ལྷ་ལ་འདི་སྐད 41.71a སྨྲས། །རྒྱལ་པོས་གནང་གིས་ཁྱེད་ཅག་ནང་དུ་བཞུད་དུ་གསོལ། །ལག་ན་ཕྲེང་ཐོགས་དེ་དག་དགའ་མགུ་ཡི་རངས་ཏེ། །ལྷ་ཡི་གནས་དང་འདྲ་བའི་རྒྱལ་པོའི་ཁྱིམ་དུ་ཞུགས། །ལྷ་མཆོག་དེ་དག་ཁྱིམ་དུ་ཕྱིན་པར་མཐོང་ནས་ནི། །རྒྱལ་པོ་སྟན་ལས་ལངས་ཏེ་ཐལ་མོ་སྦྱར་བྱས་ནས། །རིན་ཆེན་རྩ་བ་ཅན་གྱི་ཁྲི་གདན་བཤམས་པ་འདིར། །ཐུགས་བརྩེ་མཛད་པའི་ཐུགས་ཀྱིས་ཁྱེད་ཅག་བཞུགས་སུ་གསོལ། །ང་རྒྱལ་དྲེགས་མེད་དེ་དག་སྟན་ལ་འཁོད་པར་གྱུར། །བདག་ཅག་ཅི་སླད་འདིར་མཆིས་རྒྱལ་པོ་གསན་དུ་གསོལ། །ཁྱོད་སྲས་རྣམ་དག་སྐུ་མངའ་བསོད་ནམས་ཆེན་པོ་བལྟམ། །ཤིན་དུ་ལེགས་པའི་ཞབས་ལྡན་བདག་ཅག་མཐོང་བར་འཚལ། །གང་གི་འགྲོ་བ་གང་དང་སྦྱོར་བ་གང་ཅིར་འགྱུར། །མཚན་བཟང་མཚན་གྱི་ཆོ་ག་དག་ནི་བདག་ཅག་འཚལ། །དེ་བས་རྒྱལ་པོའི་དམ་པ་མི་དགྱེས་སྤང་བར་མཛོད། །སྣ་ཚོགས་མཚན་གྱིས་ཡན་ལག་བརྒྱན་པ་བལྟ་བར་འཚལ། །རྒྱལ་པོ་བུད་མེད་ཚོགས་ཀྱིས་བསྐོར་བ་དེ་རབ་དགའ། །གཞོན་ནུ་མེ་ཡི་འོད་ལྟར་འབར་བ་པང་ཏུ་བླངས། །ལྷ་མཆོག་གཙུག་ཕུད་འཕྱང་བ་དག་ནི་ཉེ་བར་བསྙེན། །ཐོག་མ་སྒོར་བྱུང་སྟོང་གསུམ་འདི་དག་ཀུན་དུ་གཡོས། །ལྷ་མཆོག་དེ་དག་འདྲེན་པའི་ཞབས་དང་སེན་མོ་ནི། །ཟངས་མདོག་དྲི་མེད་རྣམ་དག་གཟི་བརྗིད་ལྡན་མཐོང་ནས། །གཙུག་པུད་འཕྱང་བ་དེ་དག་མྱུར་དུ་ལངས་པར་གྱུར། །དྲི་མ་མེད་པའི་འོད་ཀྱིས་ཞབས་ལ་མགོས་ཕྱག་འཚལ། །འདི་འདྲའི་མཚན་དང་འདི་འདྲར་ལྟ་བ་དཔལ་ཅན་དང ། །འདི་འདྲའི་བསོད་ནམས་གཟི་བརྗིད་སྤྱི་གཙུག་མི་མཐོང་དང ། །མཛོད་སྤུ་ནས་ནི་རྒྱ་ཆེན་འོད་འབྱུང་འདི་འདྲ་ལས། །བདུད་རྣམས་ཕམ་མཛད་བྱང་ཆུབ་བརྙེས་འགྱུར་གདོན་མི་འཚལ། །མུན་སེལ་ཉོན་མོངས་བྲལ་བའི་ཡོན་ཏན་བརྟགས་ནས་སུ། །ཡང་དག་ཡོན་ཏན་ཇི་ལྟར་དོན་མཐོང་དེ་ལ་བསྟོད། །སྐྱེ་དང་རྒ་དང་འཆི་དང་ཉོན 41.71b མོངས་དགྲ་བསལ་བའི། །སེམས་ཅན་རིན་ཆེན་འདི་ནི་རིང་པོར་མི་ཐོགས་འབྱུང ། །ཡོངས་རྟོག་འདོད་ཆགས་ཡུལ་གྱི་གཙུབ་མས་བསྐྱེད་པ་ཡི། །རྣམ་གསུམ་མེས་ནི་སྲིད་གསུམ་ཀུན་འབར་ཡོངས་གདུངས་པར། །དཔའ་ཁྱོད་ཆོས་ཀྱི་སྤྲིན་གྱིས་སྟོང་གསུམ་བཀང་ནས་ནི། །འཆི་མེད་ཆར་གྱིས་ཉོན་མོངས་གདུང་བ་ཞི་མཛད་འགྱུར། །བྱམས་པའི་གསུང་མངའ་ཐུགས་རྗེ་ལྡན་པ་འཇམ་པའི་གསུང ། །ཚངས་པའི་སྒྲ་དབྱངས་ཡིད་འོང་གསུང་དུ་སྒྲོག་མཛད་པ། །སྟོང་གསུམ་ཀུན་དུ་གོ་ཞིང་འགྲོ་བ་གོར་འགྱུར་བ། །བཅོམ་ལྡན་ཁྱོད་ཀྱིས་སངས་རྒྱས་གསུང་ཆེན་མྱུར་དུ་སྒྲོགས། །སྲིད་པའི་འདོད་ཆགས་བཅིངས་བྱིང་སྲིད་པའི་རྩེར་གནས་པ། །མུ་སྟེགས་ཅན་གྱི་ཚོགས་ངན་ལོག་པར་ལྟ་བ་བཅོམ། །ཁྱོད་ཀྱི་རྒྱུ་ལ་བརྟེན་དང་སྟོང་བའི་ཆོས་ཐོས་ནས། །སེང་གེས་ཝ་ཚོགས་བཞིན་དུ་དེ་དག་འབྱེར་བར་འགྱུར། །ཉོན་མོངས་ཆེན་པོའི་དུ་བ་མ་རིག་བསྒྲིབས་བསལ་ཏེ། །ཀུན་དུ་བྱུང་བ་སྐྱེ་བོ་ངེས་པར་སྣང་བྱེད་པའི། །ཡེ་ཤེས་འོད་འཕྲོ་ཤེས་རབ་འོད་རིག་གཟིགས་པ་ཡིས། །འགྲོ་བ་ཀུན་གྱི་མུན་པ་ཆེན་པོ་བསལ་བར་གསོལ། །གང་དུ་སེམས་ཅན་དག་པ་རྨད་བྱུང་འདི་འདྲ་བྱུང ། །ལྷ་དང་མི་རྣམས་ཀྱིས་ནི་རྙེད་པ་རྒྱ་ཆེན་ཐོབ། །རྣམ་པར་རྟོགས་པར་མཛད་པའི་སེམས་ཅན་རིན་ཆེན་འདིས། །ངན་སོང་ལམ་བཅད་ལྷ་ཡི་ལམ་ནི་གཏོད་པར་འགྱུར། །སེར་སྐྱའི་གནས་སུ་ལྷ་ཡི་མེ་ཏོག་ཆར་ཕབ་ནས། །བསྐོར་བ་བྱས་ཏེ་གུས་པར་བསྟོད་པ་བྱས་ནས་ནི། སངས་རྒྱས་སངས་རྒྱས་ལེགས་ཤེས་དེ་དག་ཚིག་རྗོད་ཅིང ། །ལྷ་ཚོགས་དེ་དག་ཚུལ་དུ་ཤིས་པར་མཁའ་ལས་དོང ། །བལྟམ་པའི་ལེའུ་སྟེ་བདུན་པའོ།། །།དགེ་སློང་དག་དེ་ལྟར་བྱང་ཆུབ་སེམས་དཔའ་གང་གི་ནུབ་མོ་བཙས་པ་དེ་ཉིད་ཀྱི་ནུབ་མོ་རྒྱལ་རིགས་དང ། བྲམ་ཟེ་དང ། ཁྱིམ་བདག་གི་རིགས་ཤིང 41.72a སཱ་ལ་ཆེན་པོ་ལྟ་བུ་རྣམས་སུ་བུ་མོ་ཉི་ཁྲི་བཙས་པར་གྱུར་ཏེ། དེ་དག་ཐམས་ཅད་ཀྱང་དེ་དག་གི་ཕ་མ་རྣམས་ཀྱིས་བྱང་ཆུབ་སེམས་དཔའ་ལ་རིམ་གྲོ་བྱ་བ་དང ། བསྙེན་བཀུར་བྱ་བའི་ཕྱིར་ཕུལ་ལོ། །རྒྱལ་པོ་ཟས་གཙང་མས་ཀྱང་བུ་མོ་ཉི་ཁྲི་བྱང་ཆུབ་སེམས་དཔའ་ལ་རིམ་གྲོ་བྱ་བ་དང ། བསྙེན་བཀུར་བྱ་བའི་ཕྱིར་ཕུལ་ལོ། །མཛའ་བཤེས་དང ། བློན་པོ་དང ། ཉེ་དུ་དང ། སྣག་གི་གཉེན་མཚམས་དག་གིས་ཀྱང་བྱང་ཆུབ་སེམས་དཔའ་ལ་རིམ་གྲོ་བྱ་བ་དང ། བསྙེན་བཀུར་བྱ་བའི་ཕྱིར་བུ་མོ་ཉི་ཁྲི་ཕུལ་ལོ། །བློན་པོའི་འཁོར་རྣམས་ཀྱིས་ཀྱང་བྱང་ཆུབ་སེམས་དཔའ་ལ་རིམ་གྲོ་དང ། བསྙེན་བཀུར་བྱ་བའི་ཕྱིར་བུ་མོ་ཉི་ཁྲི་ཕུལ་ལོ། །དགེ་སློང་དག་དེའི་ཚེ་ཤཱཀྱ་རྒན་རབས་རྒན་རབས་རྣམས་འདུས་ནས། རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། གཞོན་ནུ་འདི་ནི་ལྷ་ཁང་དུ་བཀུར་བར་བགྱིའོ། །རྒྱལ་པོས་སྨྲས་པ། གཞོན་ནུ་དེ་ལྟར་བཀུར་བ་ལེགས་ཀྱིས་དེ་བས་ན་གྲོང་ཁྱེར་ནི་བརྒྱན་པར་གྱིས་ཤིག་།སྲང་དང ། ལམ་གྱི་བཞི་མདོ་དང ། མདོ་སུམ་དང ། ཚོང་འདུས་དག་ནི་མཛེས་པར་གྱིས་ཤིག་།བཀྲ་མི་ཤིས་པ་སྒུར་པོ་དང ། ཞར་བ་དང ། འོན་པ་དང ། ལྐུག་པ་དང ། དབྱིབས་མི་མཛེས་པ་དང ། དབང་པོ་མ་ཚང་བ་རྣམས་ནི་སོལ་ཅིག་།བཀྲ་ཤིས་པ་རྣམས་ཀྱང་སོགས་ཤིག་།བསོད་ནམས་ཀྱི་རྔ་ནི་རྡུངས་ཤིག་།བཀྲ་ཤིས་ཀྱི་དྲིལ་ནི་དཀྲོལ་ཅིག་།གྲོང་ཁྱེར་དམ་པའི་སྒོ་ནི་རྒྱན་གྱིས་ལེགས་པར་སྤུད་ཅིག་།རོལ་མོ་སིལ་སྙན་དང་ཕེག་བརྡབ་པ་ཤིན་དུ་ཡིད་དུ་འོང་བ་དག་ནི་ལོང་ཞིང་རྡོབས་ཤིག་།ཁམས་ཀྱི་རྒྱལ་པོ་ཐམས་ཅད་ནི་སོགས་ཤིག་།ཚོང་དཔོན་དང ། ཁྱིམ་བདག་དང ། བློན་པོ་དང ། སྒོ་བ་དང ། འཁོར་གྱི་མི་དག་ནི་གཅིག་ཏུ་བསྡུས་ཤིག་།བུ་མོའི་ཤིང་རྟ་ནི་ཤོམས་ཤིག་།བུམ་པ་གང་བ་རྣམས་ནི་སྙེན་ཅིག་།བྲམ་ཟེ་ཁ་ཏོན་པ་རྣམས་ནི་སྡུས་ཤིག་།ལྷ་ཁང་རྣམས 41.72b ནི་ཤིན་དུ་བརྒྱན་པར་གྱིས་ཤིག་།དགེ་སློང་དག་དེ་ནས་རྒྱལ་པོས་ཇི་སྐད་བསྒོ་བ་དེ་བཞིན་དུ་ཐམས་ཅད་སྦྱར་བ་དང ། དེ་ནས་རྒྱལ་པོ་ཟས་གཙང་མ་རང་གི་ཁྱིམ་དུ་སོང་ནས་སྐྱེ་དགུའི་བདག་མོ་ཆེན་མོ་གོའུ་ཏ་མཱི་ལ་བོས་ཏེ་འདི་སྐད་ཅེས་སྨྲས་སོ། །གཞོན་ནུ་ལྷ་ཁང་དུ་བཀུར་གྱིས་རྒྱན་གྱིས་ལེགས་པར་བརྒྱན་པར་གྱིས་ཤིག་།ལེགས་སོ་ཞེས་སྐྱེ་དགུའི་བདག་མོ་ཆེན་མོ་གོའུ་ཏ་མཱིས་དེ་ལྟར་མཉན་ཏེ། གཞོན་ནུ་རྒྱན་གྱིས་བརྒྱན་ཏོ། །དེ་ནས་གཞོན་ནུ་དེ་རྒྱན་གྱིས་བརྒྱན་པའི་ཚེ། བཞིན་འཛུམ་ཞིང་ཁྲོ་གཉེར་མེད་པས་ཤིན་དུ་ཡིད་དུ་འོང་བའི་ཚིག་གིས་སྲུ་མོ་ལ་སྨྲས་པ། མ་བདག་གང་དུ་བཀུར། སྨྲས་པ། བུ་ལྷ་ཁང་དུ་བཀུར་རོ། །དེ་ནས་གཞོན་ནུས་བཞིན་འཛུམ་སྟེ་བགད་ནས་སྲུ་མོ་ལ་ཚིགས་སུ་བཅད་དེ་སྨྲས་པ། བདག་བཙས་དེ་ཚེ་སྟོང་གསུམ་འདི་ནི་གཡོས་པར་གྱུར། །བརྒྱ་བྱིན་ཚངས་པ་ལྷ་མིན་ལྟོ་འཕྱེ་ཆེན་པོ་དང ། །ཉི་ཟླ་དེ་བཞིན་རྣམ་ཐོས་བུ་དང་གཞོན་ནུ་ཡང ། །སྤྱི་བོ་རྐང་པ་གཉིས་ལ་གཏུགས་ཏེ་ཕྱག་འཚལ་ན། །དེ་རིང་མ་ཡིས་གང་དུ་བདག་བཀུར་བགྱི་བ་ཡི། །ལྷ་གཞན་བདག་གི་གོང་ན་འཕགས་པ་གང་ཞིག་མཆིས། །ལྷ་རྣམས་ཀུན་ལས་བདག་འཕགས་ལྷ་ཡི་ལྷ་ལགས་ཏེ། །བདག་འདྲའི་ལྷ་ཡང་མ་མཆིས་གོང་མ་ག་ལ་མཆིས། །འོན་ཀྱང་འཇིག་རྟེན་རྗེས་བསྙག་ཙམ་དུ་བདག་མཆིའོ། །བདག་གི་རྣམ་འཕྲུལ་སྐྱེ་བོས་མཐོང་ན་དགར་འགྱུར་ཞིང ། །རིམ་གྲོ་བཀུར་སྟི་ཤིན་དུ་ཆེ་བར་བགྱིད་འགྱུར་ལ། །ལྷ་མིས་འདི་ནི་ལྷ་ཡི་ལྷ་ཞེས་རིག་པར་འགྱུར། །དགེ་སློང་དག་དེ་ལྟར་གྲོང་ཁྱེར་དུ་གཞོན་ནུའི་ཤིང་རྟ་བཤམས་ཏེ་རྒྱན་གྱིས་བརྒྱན་ནས། བཀྲ་ཤིས་ཐམས་ཅད་བཤམས་ཏེ་རྒྱལ་པོ་ཟས་གཙང་མས་གཞོན་ནུ་པང་དུ་བླངས་ནས། བྲམ་ཟེ་དང ། གྲོང་རྡལ་པ་དང ། ཚོང་དཔོན་དང ། ཁྱིམ་བདག་དང ། བློན་པོ་དང ། ཁམས་ཀྱི་རྒྱལ་པོ་དང ། སྒོ་བ་དང ། འཁོར་གྱི་མི་དང ། མཛའ 41.73a བཤེས་དང ། ཉེ་དུས་བསྐོར་ཏེ། སྲང་དང ། ལམ་གྱི་བཞི་མདོ་དང ། མདོ་སུམ་དང ། ཚོང་འདུས་རྒྱན་ཚད་མེད་པས་བརྒྱན་པ་དག་ནས་བདུག་སྤོས་དྲི་ཞིམ་པོས་ནི་བདུགས། མེ་ཏོག་སིལ་མ་ནི་གཏོར། རྟ་དང་གླང་པོ་ཆེ་དང ། ཤིང་རྟ་དང ། རྐང་ཐང་གི་བུན་ལོང་ནི་ཆེར་གྱུར། གདུགས་དང ། རྒྱལ་མཚན་དང ། བ་དན་ནི་བསྒྲེང ། སིལ་སྙན་སྣ་ཚོགས་ཀྱི་སྒྲ་ནི་ཕྱུང་སྟེ། སོང་བར་གྱུར་ཏོ། །དེའི་ཚེ་ལྷ་བརྒྱ་སྟོང་དག་གིས་བྱང་ཆུབ་སེམས་དཔའི་ཤིང་རྟ་དྲངས་ཏེ། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་དུ་མས་ནམ་མཁའི་དཀྱིལ་ནས་མེ་ཏོག་གི་ཆར་ཕབ་སྟེ། སིལ་སྙན་སྒྲ་འབྱིན་པར་གྱུར་ཏོ། །དགེ་སློང་དག་རྒྱལ་པོ་ཟས་གཙང་མས་རྒྱལ་པོའི་བཀོད་པ་ཆེན་པོ་དང ། རྒྱལ་པོའི་ཕུན་སུམ་ཚོགས་པ་ཆེན་པོ་དང ། རྒྱལ་པོའི་བྱིན་ཆེན་པོས་གཞོན་ནུ་དེ་ཁྱེར་ཏེ་ལྷ་ཁང་དུ་ཕྱིན་ཏོ། །དེ་ནས་བྱང་ཆུབ་སེམས་དཔས་ལྷ་ཁང་དེར་རྐང་པ་གཡས་པའི་མཐིལ་བཞག་པ་དང ། དེ་ནས་ལྷའི་གཟུགས་སེམས་མེད་པ་དེ་དག་འདི་ལྟ་སྟེ། གུ་ལང་དང ། སྐེམ་བྱེད་དང ། ལུས་ངན་དང ། ཟླ་བ་དང ། ཉི་མ་དང ། རྣམ་ཐོས་ཀྱི་བུ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་ལ་སོགས་པའི་གཟུགས་ཐམས་ཅད་ཀྱང་རང་རང་གི་གནས་ནས་ལངས་ཏེ། བྱང་ཆུབ་སེམས་དཔའི་རྐང་པ་ལ་ཕྱག་འཚལ་བར་གྱུར་ཏོ། །དེའི་ཚེ་ལྷ་དང་མི་བརྒྱ་སྟོང་ནི་ཀྱེ་མ་ཨ་ལ་ལ་ཞེས་བྱ་བ་དང ། ཅ་ཅོ་དང ། ག་ཞའི་སྒྲ་བརྒྱ་སྟོང་མང་པོ་འབྱིན་པར་གྱུར་ཏོ། །སེར་སྐྱའི་གནས་ཀྱི་གྲོང་ཁྱེར་ཆེན་པོ་དམ་པ་དེ་ཐམས་ཅད་ཀྱང་རྣམ་པ་དྲུག་ཏུ་གཡོས་སོ། །ལྷའི་མེ་ཏོག་གི་ཆར་ཡང་བབ་བོ། །ལྷའི་སིལ་སྙན་བརྒྱ་སྟོང་དུ་མ་དག་ཀྱང་མ་དཀྲོལ་བར་སྒྲ་འབྱིན་པར་གྱུར་ཏོ། །ལྷ་གང་དག་གི་གཟུགས་གང་ཡིན་པ་དེ་དག་ཐམས་ཅད་ཀྱང་རང་རང་གི་གཟུགས་བསྟན་ནས། ཚིགས་སུ་བཅད་པ་འདི་དག་སྨྲ་བར་གྱུར་ཏོ། །རི་རྒྱལ་རི་མཆོག་རི་རབ་ནམ་ཡང་ཡུངས་ཀར་འབྲུ་ལ་ཕྱག་མི་འཚལ། །རྒྱ་མཚོ 41.73b ཀླུ་རྗེ་གནས་ནི་ནམ་ཡང་བ་རྗེས་ཆུ་ལ་ཕྱག་མི་འཚལ། །ཉི་ཟླ་འོད་བྱེད་སྲིན་བུ་མེ་ཁྱེར་འོད་བྱེད་དེ་ལ་ཕྱག་མི་འཚལ། །བསོད་ནམས་ཤེས་རབ་རིགས་བྱུང་ལེགས་ལྡན་ལྷ་རྣམས་གང་ལ་འང་ཕྱག་མི་བཞེས། །ཡུངས་འབྲུ་བ་རྗེས་ཆུ་དང་སྲིན་བུ་མེ་ཁྱེར་འདྲ་བར་གྱུར་པ་ནི། །སྟོང་གསུམ་འདི་ན་ལྷ་མི་གང་ཡང་རུང་སྟེ་ང་རྒྱལ་གནས་པ་ལགས། །རི་རབ་རྒྱ་མཚོ་ཉི་ཟླ་འདྲ་བ་འཇིག་རྟེན་རང་བྱུང་དམ་པ་སྟེ། །དེ་ལ་འཇིག་རྟེན་ཕྱག་འཚལ་བ་ནི་མཐོ་རིས་མྱ་ངན་འདས་པ་འཐོབ། །བྱང་ཆུབ་སེམས་དཔའ་ལྷ་ཁང་དུ་ཞུགས་པ་དེ་བསྟན་པའི་ཚེ། ལྷའི་བུ་བརྒྱ་སྟོང་ཕྲག་སུམ་བཅུ་རྩ་གཉིས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དགེ་སློང་དག་བྱང་ཆུབ་སེམས་དཔའ་ལྷ་ཁང་དུ་ཁྱེར་བའི་ཚེ་བཏང་སྙོམས་སུ་བཞག་པའི་རྐྱེན་ནི་དེ་ཡིན། རྒྱུ་ནི་དེ་ཡིན་ནོ། །ལྷ་ཁང་དུ་ཁྱེར་བའི་ལེའུ་སྟེ། བརྒྱད་པའོ།། །།དགེ་སློང་དག་དེ་ནས་བྲམ་ཟེ་མདུན་ན་འདོན་འཆར་པོ་ཞེས་བྱ་བ་འཆར་འགྲོའི་ཕ། བྲམ་ཟེ་ལྔ་བརྒྱ་ཙམ་གྱིས་བསྐོར་ཏེ། སྐར་མ་མེ་བཞི་འདས་ནས་ནག་པ་ལ་བབ་པའི་ཚེ་རྒྱལ་པོ་ཟས་གཙང་མའི་དྲུང་དུ་ཕྱིན་ནས་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། ད་ནི་གཞོན་ནུའི་རྒྱན་མཛད་པའི་རིགས་སོ། །རྒྱལ་པོས་སྨྲས་པ། ལེགས་ཀྱིས་བྱེད་དུ་ཆུག་ཤིག་།དེའི་ཚེ་རྒྱལ་པོ་ཟས་གཙང་མ་དང ། ཤཱཀྱ་ལྔ་བརྒྱ་ཙམ་གྱིས། རྒྱན་གྱི་རྣམ་པ་ལྔ་བརྒྱ་ཙམ་བྱེད་དུ་བཅུག་སྟེ། འདི་ལྟར་ལག་པའི་རྒྱན་དག་དང ། རྐང་པའི་རྒྱན་དག་དང ། མགོའི་རྒྱན་དག་དང ། མགུལ་གྱི་རྒྱན་དག་དང ། སོར་གདུབ་དག་དང ། རྣ་རྒྱན་དག་དང ། དཔུང་རྒྱན་དག་དང ། གསེར་གྱི་སྐ་རགས་དག་དང ། གསེར་སྐུད་དག་དང ། དྲིལ་བུ་གཡེར་ཀའི་དྲ་བ་དག་དང ། རིན་པོ་ཆེའི་དྲ་བ་དག་དང ། ལྷམ་རིན་པོ་ཆེས་སྤྲས་པ་དག་དང ། དོ་ཤལ་རིན་པོ་ཆེ་སྣ་ཚོགས་ཀྱིས་བརྒྱན 41.74a པ་དག་དང ། གདུ་བུ་རྒྱན་ཅན་དག་དང ། མགུལ་གདུབ་དག་དང ། ཅོད་པན་དག་ཀྱང་བྱེད་དུ་བཅུག་སྟེ་ཟིན་ནས། སྐར་མ་རྒྱལ་དང་ལྡན་པའི་ཚེ། ཤཱཀྱ་དེ་དག་རྒྱལ་པོ་ཟས་གཙང་མའི་དྲུང་དུ་དོང་ནས་འདི་སྐད་ཅེས་སྨྲས་སོ། །ལྷ་གཞོན་ནུ་བརྒྱན་དུ་གསོལ། རྒྱལ་པོས་སྨྲས་པ། ཁྱེད་ཀྱིས་གཞོན་ནུ་ལ་བརྒྱན་པ་དང ། མཆོད་པ་བྱས་པས་ཆོག་གིས། ངས་གཞོན་ནུའི་རྒྱན་ཐམས་ཅད་བྱེད་དུ་བཅུག་གོ། །སྨྲས་པ། བདག་ཅག་གི་རྒྱན་འདི་དག་གཞོན་ནུའི་སྐུ་ལ་གདུགས་མཚན་བདུན་ཞིག་གདགས་སུ་གསོལ། དེ་ལྟར་གནང་ན་བདག་ཅག་གིས་སུག་ལས་བགྱིས་པ་ཡང་དོན་མཆིས་པར་འགྱུར་རོ། །དེའི་ཚེ་ནམ་ལངས་ཏེ་ཉི་མ་ཤར་བ་དང ། བྱང་ཆུབ་སེམས་དཔའ་བསྐྱེད་མོས་ཚལ་བཀོད་པ་དྲི་མ་མེད་པ་ཞེས་བྱ་བ་དེར་ཞུགས་སོ། །དེའི་ཚེ་སྐྱེ་དགུའི་བདག་མོ་ཆེན་མོ་གོའུ་ཏ་མཱིས་བྱང་ཆུབ་སེམས་དཔའ་པང་དུ་བླངས་སོ། །བུད་མེད་བརྒྱད་ཁྲིས་ཀྱང་བྱང་ཆུབ་སེམས་དཔའ་བསུ་སྟེ་གདོང་དུ་ལྟ་ཞིང་འཁོད་པར་གྱུར་ཏོ། །བུ་མོ་སྟོང་ཕྲག་བཅུས་བྱང་ཆུབ་སེམས་དཔའ་བསུ་སྟེ། གདོང་དུ་ལྟ་ཞིང་འཁོད་པར་གྱུར་ཏོ། །ཤཱཀྱ་སྟོང་ཕྲག་བཅུས་བྱང་ཆུབ་སེམས་དཔའ་བསུ་སྟེ་གདོང་དུ་ལྟ་ཞིང་འཁོད་པར་གྱུར་ཏོ། །བྲམ་ཟེ་ལྔ་སྟོང་ཡང་ལྷགས་ནས་བྱང་ཆུབ་སེམས་དཔའི་གདོང་དུ་ལྟ་ཞིང་འཁོད་པར་གྱུར་ཏོ། །དེ་ནས་ཤཱཀྱའི་རྒྱལ་པོ་བཟང་པོ་ཞེས་བྱ་བས་རྒྱན་ཇི་སྙེད་ཅིག་བྱས་པ་དེ་དག་བྱང་ཆུབ་སེམས་དཔའི་ལུས་ལ་བཏགས་ཏེ། དེ་དག་ལུས་ལ་བཏགས་མ་ཐག་ཏུ་བྱང་ཆུབ་སེམས་དཔའི་ལུས་ཀྱི་འོད་ཀྱིས་མོག་མོག་པོར་གྱུར་ནས་ལམ་མེར་མ་གྱུར། ལྷན་ནེར་མ་གྱུར། ལྷང་ངེར་མ་གྱུར་ཏེ། འདི་ལྟ་སྟེ་དཔེར་ན། འཛམ་བུའི་ཆུ་བོའི་གསེར་གྱི་གན་དུ་སྣག་ཙའི་ཡུག་བཞག་ན་ལམ་མེར་མི་རུང ། ལྷན་ནེར་མི་རུང ། ལྷང་ངེར་མི་རུང་ངོ ། །དེ་བཞིན་དུ་རྒྱན་དེ་དག་ཀྱང་བྱང་ཆུབ་སེམས་དཔའི་ལུས་ཀྱི་འོད 41.74b ཀྱིས་ཕོག་ན་ལམ་མེར་མི་རུང ། ལྷན་ནེར་མི་རུང ། ལྷང་ངེར་མི་རུང་ངོ ། །དེ་བཞིན་དུ་རྒྱན་གྱི་རྣམ་པ་གང་དང་གང་བྱང་ཆུབ་སེམས་དཔའི་ལུས་ལ་བཏགས་པ་དེ་དང་དེ་དག་མོག་མོག་པོར་གྱུར་ཏེ། འདི་ལྟ་སྟེ་དཔེར་ན། འཛམ་བུའི་ཆུ་བོའི་གསེར་གྱི་གན་དུ་སྣག་ཙ་ཡུག་བཞག་པ་བཞིན་ནོ། །དེའི་ཚེ་བསྐྱེད་མོས་ཚལ་གྱི་ལྷ་མོ་དྲི་མ་མེད་པ་ཞེས་བྱ་བ་འདུག་པ་དེས་ལུས་ཆེན་པོ་བསྟན་ནས་མདུན་དུ་འདུག་སྟེ། རྒྱལ་པོ་ཟས་གཙང་མ་དང་ཤཱཀྱའི་ཚོགས་དེ་དག་ལ་ཚིགས་སུ་བཅད་དེ་སྨྲས་པ། སྟོང་གསུམ་ས་འདི་གྲོང་ཁྱེར་གྲོང་རྡལ་བཅས་པ་ཀུན། །གལ་ཏེ་གསེར་གྱིས་གང་ཁྱབ་དྲི་མེད་མཛེས་གྱུར་ཀྱང ། །འཛམ་བུའི་ཆུ་བོའི་གསེར་གཟེགས་གཅིག་གིས་ཟིལ་རླག་སྟེ། །གསེར་གཞན་དག་ནི་དཔལ་དང་བྲལ་ཞིང་གསལ་མི་འགྱུར། །ས་འདི་མཐའ་དག་འཛམ་བུའི་གླིང་གི་གསེར་ཁེབས་ཀྱང ། །འདྲེན་པ་དཔལ་རྒྱས་སྤུ་ཁུང་འོད་ཕྱུང་ཟིལ་གྱིས་ནོན། །མི་སྣང་མི་གསལ་མི་མཛེས་འོད་ཀྱང་ཉམས་གྱུར་ཅིང ། །བདེ་གཤེགས་སྐྱོབ་པའི་དྲུང་ན་སྣག་ཙ་བཞིན་དུ་འགྱུར། །ཡོན་ཏན་བརྒྱས་གང་འདི་ནི་རང་གི་གཟི་ཡིས་བརྒྱན། །དེ་ནི་རྒྱན་གྱིས་མཛེས་མིན་ཤིན་དུ་དྲི་མེད་སྐུ། །ཉི་ཟླའི་འོད་དང་སྐར་མ་ནོར་བུ་མེ་དག་དང ། །བརྒྱ་བྱིན་ཚངས་པའི་འོད་ཀྱང་དཔའ་སྟུག་མདུན་མི་གསལ། །གང་སྐུ་སྔོན་གྱི་དགེ་བའི་འབྲས་བུས་མཚན་སྤྲས་པ། །དེ་ལ་གཞན་གྱིས་བྱས་པའི་རྒྱན་ཕལ་ཅི་ཞིག་དགོས། །རྒྱན་རྣམས་ཕྲོལ་འོར་མི་མཁས་མཁས་མཛད་མ་གཙེ་ཤིག་།བློ་གྲོས་མཆོག་མཛད་འདི་ནི་བཅོས་མའི་རྒྱན་མི་བཞེད། །འདུན་པ་དེ་ནི་རྒྱལ་ཁབ་སྲས་དང་ལྷན་ཅིག་བཙས། །དྲི་མེད་རབ་ཏུ་མཛེས་པའི་རྒྱན་རྣམས་འབངས་དེ་སྩོལ། །ཤཱཀྱའི་རིགས་ནི་རྒྱ་ཆེན་མཆོག་ཏུ་འགྱུར་སྙམ་ནས། །ཤཱཀྱ་དག་ནི་ཡིད་དགའ་མགུ་ཞིང་ངོ་མཚར་གྱུར། །ལྷ་མོ་དེས 41.75a དེ་སྐད་ཅེས་སྨྲས་ནས། ལྷའི་མེ་ཏོག་དག་གིས་བྱང་ཆུབ་སེམས་དཔའ་དེ་ལ་མངོན་པར་གཏོར་ཏེ་དེ་ཉིད་དུ་མི་སྣང་བར་གྱུར་ཏོ། །རྒྱན་གྱི་ལེའུ་སྟེ་དགུ་པའོ།། །། དགེ་སློང་དག་དེ་ལྟར་གཞོན་ནུ་དེ་ཡ་ཟད་སྐྱེས་པ་དང ། བཀྲ་ཤིས་བརྒྱ་སྟོང་བྱས་ནས་ཁྱེའུ་སྟོང་ཕྲག་བཅུ་དང ། བུ་མོ་སྟོང་ཕྲག་བཅུས་ཡོངས་སུ་བསྐོར་ཅིང་མདུན་དུ་བདར་ཏེ་ཡི་གེའི་གྲཝར་འཇུག་པར་བྱས་སོ། །བཟའ་བ་དང ། བཅའ་བ་དང ། མྱང་བས་གང་བའི་ཤིང་རྟ་སྟོང་ཕྲག་བཅུ་དང ། གསེར་དངུལ་དང ། དབྱིག་གིས་གང་བའི་ཤིང་རྟ་སྟོང་ཕྲག་བཅུ་དྲངས་ཏེ། སེར་སྐྱའི་གནས་ཀྱི་གྲོང་ཁྱེར་ཆེན་པོའི་སྲང་དང ། གྲོང་བར་དང ། ཚོང་འདུས་ཀྱི་ཕྱོགས་གང་ཡིན་པ་དག་ཏུ་གཏོར་ཏོ། །མངོན་པར་བྱིན་ནོ། །སིལ་སྙན་འབུམ་ཕྲག་བརྒྱད་ཀྱི་སྒྲ་ཡང་ཕྱུང་ཞིང་མེ་ཏོག་གི་ཆར་ཆེན་པོ་ཡང་བབ་པོ། །སྟེགས་བུ་དང ། སྒོ་ཁང་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁང་བཟངས་དག་གི་སྟེང་ནས། བུ་མོ་བརྒྱ་སྟོང་རྒྱན་ཐམས་ཅད་ཀྱིས་བརྒྱན་པ་དག་།བྱང་ཆུབ་སེམས་དཔའ་ལ་ལྟ་ཞིང་མེ་ཏོག་དག་འཐོར་བར་གྱུར་ཏོ། །ལྷའི་བུ་མོ་སྟོང་ཕྲག་བརྒྱད་ནི་རྒྱན་རྣམས་ཀྱིས་ལྷུག་ལྷུག་པོར་བརྒྱན་ཏེ། རིན་པོ་ཆེ་བཟང་བྱེད་ཐོགས་ནས་ལམ་འཕྱག་ཅིང་བྱང་ཆུབ་སེམས་དཔའི་མདུན་ནས་འདོང་བར་གྱུར་ཏོ། །ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་རྣམས་ཀྱང་ལུས་ཕྱེད་ཕྱུང་ཞིང་ནམ་མཁའི་དཀྱིལ་ནས་མེ་ཏོག་དང ། དར་གྱི་ལྡ་ལྡི་བྲེ་བར་གྱུར་ཏོ། །ཤཱཀྱའི་ཚོགས་ཐམས་ཅད་ཀྱང་རྒྱལ་པོ་ཟས་གཙང་མའི་མདུན་དུ་བདར་ནས་བྱང་ཆུབ་སེམས་དཔའི་མདུན་ནས་འདོང་བར་གྱུར་ཏེ། བཀོད་པའི་རྣམ 41.75b པ་འདི་ལྟ་བུ་འདིས་བྱང་ཆུབ་སེམས་དཔའ་ཡི་གེའི་གྲཝར་ཞུགས་པར་གྱུར་ཏོ། །བྱང་ཆུབ་སེམས་དཔའ་ཡི་གེའི་གྲཝར་ཞུགས་མ་ཐག་ཏུ་དེ་ནས། བྱིས་པའི་སློབ་དཔོན་ཀུན་གྱི་བཤེས་གཉེན་ཞེས་བྱ་བས་བྱང་ཆུབ་སེམས་དཔའི་དཔལ་དང་གཟི་བརྗིད་མ་བཟོད་དེ། ཁས་བུབ་ཏུ་སྒྱེལ་ཏོ། །དེ་ལྟར་སྒྱེལ་བ་དང་དགའ་ལྡན་གྱི་རིས་ཀྱི་ལྷའི་བུ་ཡན་ལག་བཟང་པོ་ཞེས་བྱ་བས་མཐོང་ནས། ལག་པ་གཡས་པས་བཏེག་སྟེ་བསླང་ངོ ། །བསླང་ནས་ཀྱང་དེ་ནམ་མཁའི་དཀྱིལ་ན་འདུག་སྟེ། རྒྱལ་པོ་ཟས་གཙང་མ་དང་སྐྱེ་བོ་ཕལ་པོ་ཆེ་དེ་དག་ལ་ཚིགས་སུ་བཅད་དེ་སྨྲས་པ། མི་ཡི་འཇིག་རྟེན་འདི་ན་བསྟན་བཅོས་གང་ཡོད་པ། །གྲངས་དང་ཡི་གེ་རྩིས་དང་ཁམས་ཀྱི་རྒྱུད་དག་དང ། །འཇིག་རྟེན་བཟོ་ཡི་སྦྱོར་བ་ཚད་མེད་མང་པོ་དག་།བསྐལ་པ་བྱེ་མང་སྔོན་ཆད་འདིས་ནི་དེ་དག་བསླབས། །འོན་ཀྱང་སྐྱེ་བོའི་རྗེས་སུ་འཐུན་པ་ཙམ་མཛད་དེ། །བྱིས་པ་མང་པོ་ཐེག་པ་མཆོག་ལ་སྨིན་མཛད་དང ། །སེམས་ཅན་ཁྲག་ཁྲིག་གཞན་ཡང་འཆི་མེད་དགོད་པའི་ཕྱིར། །ཤིན་དུ་ལོབས་པའང་བསླབ་ཕྱིར་ཡི་གེའི་གྲཝར་ཞུགས་སོ། །འཇིག་རྟེན་འདས་པའི་བདེན་བཞི་ལམ་གྱི་ཚུལ་མཁྱེན་ཅིང ། །རྒྱུ་ལ་བརྟེན་ནས་ཇི་ལྟར་འབྱུང་བ་དེ་ལའང་མཁས། །ཇི་ལྟར་འདུས་བྱས་འགགས་ཟད་བསིལ་འགྱུར་དེ་ཚུལ་ཡང ། །མཁྱེན་ན་ཡི་གེའི་བསྟན་བཅོས་ཙམ་ལྟ་ཅིས་མི་མཁྱེན། །འཇིག་རྟེན་གསུམ་ན་འདི་ཡི་སློབ་དཔོན་གོང་ན་མེད། །ལྷ་དང་མིར་བཅས་ནང་ན་འདི་ཉིད་གཙོ་བོ་སྟེ། །བསྐལ་པ་བྱེ་མང་སྔོན་ཆད་གང་ལ་འདིས་བསླབས་པའི། །ཡི་གེ་དེ་དག་མིང་ཡང་ཁྱེད་ཀྱིས་ཤེས་མི་འགྱུར། །འགྲོ་བ་རྣམས་ཀྱི་སེམས་རྒྱུད་སྣ་ཚོགས་གང་འབྱུང་བ། །སྐད་ཅིག་གཅིག་གིས་སེམས་ཅན་དག་པ་འདིས་མཁྱེན་ཏེ། །གཟུགས་མེད་ལྟར་མི་སྣང་བའི་ཚུལ་ཡང་རབ་མཁས་ན། །ཡི་གེ་གཟུགས་ཡོད 41.76a བལྟར་སྣང་དག་ལྟ་སྨོས་ཅི་དགོས། །དེ་སྐད་ཅེས་སྨྲས་པ་དང ། ལྷའི་བུ་དེས་བྱང་ཆུབ་སེམས་དཔའ་ལ་ལྷའི་མེ་ཏོག་མང་པོས་གཏོར་ཏེ་དེ་ཉིད་དུ་མི་སྣང་བར་གྱུར་ཏོ། །དེ་ནས་མ་མ་དང་བྲན་མོའི་འཁོར་བཀོད་དེ། རྒྱལ་པོ་ཟས་གཙང་མ་ལ་སོགས་པ་ཤཱཀྱ་གཞན་ནི་ཕྱིར་དོང་ངོ ། །དེ་ནས་བྱང་ཆུབ་སེམས་དཔའ་ཙན་དན་སྦྲུལ་གྱི་སྙིང་པོ་ལས་བྱས་པའི་ཡི་གེའི་ཤིང་ལྷའི་ཚོན་གྱིས་བྱུག་པ། གསེར་གྱི་ཡང་མིག་གིས་བཏགས་པ། མཐའ་མ་ནོར་བུ་རིན་པོ་ཆེས་ཀུན་ནས་བརྒྱན་པ་ཐོགས་ཏེ། སློབ་དཔོན་ཀུན་གྱི་བཤེས་གཉེན་ལ་འདི་སྐད་ཅེས་སྨྲས་སོ། །ཀྱེ་མཁན་པོས་བདག་ལ་ཡི་གེ་གང་ཞིག་བསླབ། ཚངས་པའི་ཡི་གེ་འམ། ཁ་རོསྟིའི་ཡི་གེ་འམ། པད་མའི་སྙིང་པོའི་ཡི་གེ་འམ། ཨང་གའི་ཡི་གེ་འམ། ་ཡུལ་མ་ག་དྷཱའི་ཡི་གེ་འམ། བཀྲ་ཤིས་པའི་ཡི་གེ་འམ། སོར་མོ་པའི་ཡི་གེ་འམ། ཤ་ཀ་ནིའི་ཡི་གེ་འམ། ཡ་བ་ནའི་ཡི་གེ་འམ། བག་ལེ་བའི་ཡི་གེ་འམ། པ་རུ་ཤའི་ཡི་གེ་འམ། འགྲོ་ལྡིང་བའི་ཡི་གེ་འམ། ཀི་ར་ཏའི་ཡི་གེ་འམ། ལྷོ་ཕྱོགས་པའི་ཡི་གེ་འམ། དྲག་ཤུལ་ཅན་གྱི་ཡི་གེ་འམ། གྲངས་ཀྱི་ཡི་གེ་འམ། སྤྱིའུ་ཚུགས་པའི་ཡི་གེ་འམ། རྗེས་སུ་འཐུན་པའི་ཡི་གེ་འམ། བྲུ་ཤའི་ཡི་གེ་འམ། ཀ་ཤའི་ཡི་གེ་འམ། རྒྱའི་ཡི་གེ་འམ། ཕུ་ནའི་ཡི་གེའམ། ཧུ་ནའི་ཡི་གེ་འམ། ཡི་གེ་འབྲིང་དང ། རྒྱས་པར་བྲི་བའི་ཡི་གེ་འམ། རྒྱལ་གྱི་ཡི་གེ་འམ། ལྷའི་ཡི་གེ་འམ། ཀླུའི་ཡི་གེ་འམ། གནོད་སྦྱིན་གྱི་ཡི་གེ་འམ། དྲི་ཟའི་ཡི་གེ་འམ། མི་འམ་ཅིའི་ཡི་གེ་འམ། ལྟོ་འཕྱེ་ཆེན་པོའི་ཡི་གེ་འམ། ལྷ་མ་ཡིན་གྱི་ཡི་གེ་འམ། ནམ་མཁའ་ལྡིང་གི་ཡི་གེ་འམ། རི་དགས་ཀྱི་འཁོར་ལོ་བའི་ཡི་གེ་འམ། ཁཝ་སྐད་ཤེས་པའི་ཡི་གེ་འམ། ས་བླའི་ལྷའི་ཡི་གེ་འམ། བར་སྣང་གི་ལྷའི་ཡི་གེ་འམ། ནུབ་ཀྱི་བ་གླང་སྤྱོད་ཀྱི་ཡི་གེ་འམ། བྱང་གི་སྒྲ་མི་སྙན་གྱི་ཡི་གེ་འམ། 41.76b ཤར་གྱི་ལུས་འཕགས་པོའི་ཡི་གེ་འམ། གདེག་པའི་ཡི་གེ་འམ། གཞག་པའི་ཡི་གེ་འམ། བསྣན་པའི་ཡི་གེ་འམ། རྒྱ་མཚོའི་ཡི་གེ་འམ། རྡོ་རྗེའི་ཡི་གེ་འམ། སྤྲིང་ཡིག་དང ། ལན་གྱི་ཡི་གེ་འམ། རྣམ་འཐོར་གྱི་ཡི་གེ་འམ། རིངས་མེད་ཀྱི་ཡི་གེ་འམ། བསྟན་བཅོས་བསྐོར་བའི་ཡི་གེ་འམ། རྩིས་བསྐོར་བའི་ཡི་གེ་འམ། གདེག་པ་བསྐོར་བའི་ཡི་གེ་འམ། གཞག་པ་བསྐོར་བའི་ཡི་གེ་འམ། རྐང་པས་བྲིས་པའི་ཡི་གེ་འམ། ཚིག་ལན་ལན་གཉིས་སུ་གདབ་པའི་ཚིག་གི་མཚམས་ཀྱི་ཡི་གེ་འམ། ཚིག་གི་མཚམས་བཅུར་བརྒྱུད་པའི་བར་གྱི་ཡི་གེ་འམ། བླ་ཐབས་སུ་བསྣན་པའི་ཡི་གེ་འམ། སྒྲ་ཐམས་ཅད་ཀུན་དུ་སྡུད་པའི་ཡི་གེ་འམ། རིག་པ་དང་འཐུན་པའི་ཡི་གེ་འམ། རྣམ་པར་འདྲེས་པའི་ཡི་གེ་འམ། དྲང་སྲོང་གི་དཀའ་ཐུབ་སྤྱད་པའི་ཡི་གེ་འམ། ལྷ་ངེས་པའི་ཡི་གེ་འམ། ས་བལྟ་བའི་ཡི་གེ་འམ། ནམ་མཁའ་བལྟ་བའི་ཡི་གེ་འམ། སྨན་ཐམས་ཅད་ཀྱི་རྒྱུ་འཐུན་པའི་ཡི་གེ་འམ། སྙིང་པོ་ཐམས་ཅད་ཀུན་དུ་སྡུད་པའི་ཡི་གེ་འམ། འབྱུང་པོ་ཐམས་ཅད་ཀྱི་སྒྲ་སྡུད་པའི་ཡི་གེ་འམ། ཀྱེ་སློབ་དཔོན་ཡི་གེ་དྲུག་བཅུ་རྩ་བཞི་པོ་དེ་དག་གི་ནང་ནས་བདག་ལ་གང་བསླབ། དེ་ནས་བྱིས་པའི་སློབ་དཔོན་ཀུན་གྱི་བཤེས་གཉེན་ངོ་མཚར་དུ་གྱུར་ནས་བཞིན་གྱི་འཛུམ་ཕྱུང་སྟེ། ང་རྒྱལ་དང ། དྲེགས་པ་དང ། རྒྱགས་པ་མེད་པར་བྱས་ནས་ཚིགས་སུ་བཅད་པ་འདི་དག་སྨྲས་སོ། །སེམས་ཅན་དག་པ་ངོ་མཚར་ཆེ། །བསྟན་བཅོས་ཀུན་ལས་བསླབས་གྱུར་ཀྱང ། །འཇིག་རྟེན་འཇིག་རྟེན་རྗེས་སྙག་ཕྱིར། །ཡི་གེའི་གྲཝར་ནི་བྱོན་པར་གྱུར། །ཡི་གེ་གང་གི་མིང་དག་ཀྱང ། །བདག་གིས་ཤེས་པར་མ་གྱུར་པ། །དེ་ལ་འདི་ལ་བྱང་གྱུར་ཀྱང ། །ཡི་གེ་སློབ་པའི་གྲཝར་བྱོན་ཏོ། །འདི་ཡི་ཞལ་ནི་མཐོང་མོད་ཀྱི། །སྤྱི་གཙུག་འཕགས་པ་བལྟར་མི་སྣང ། །ཡི་གེའི་ཤེས 41.77a རབ་མཐར་ཕྱིན་ན། །བདག་གིས་འདི་གོ་ཇི་ལྟར་བསླབ། །ལྷ་ཡི་ལྷ་ཆེན་ལྷ་འདི་ནི། །ལྷ་རྣམས་ཀུན་གྱི་མཆོག་མཁས་པ། །ཁྱད་པར་འཕགས་ཤིང་མཉམ་པ་མེད། །འཇིག་རྟེན་གང་ཟག་དོ་ཟླ་མེད། །བདག་ཀྱང་འདི་ཉིད་མཐུ་ཡིས་ན། །ཤེས་རབ་ཐབས་ཀྱི་ཁྱད་པར་གྱིས། །འཇིག་རྟེན་ཀུན་ཀྱི་དཔུང་གཉེན་པོ། །ལོབས་པ་འདི་ནི་བསླབ་པར་བྱ། །དགེ་སློང་དག་དེ་ལྟར་བྱིས་པ་སྟོང་ཕྲག་བཅུ་པོ་དེ་དག་བྱང་ཆུབ་སེམས་དཔའ་དང་ལྷན་ཅིག་ཏུ་ཡི་གེ་སློབ་པའི་ཚེ་བྱང་ཆུབ་སེམས་དཔའི་བྱིན་གྱི་རླབས་ཀྱིས་བྱིས་པ་དེ་དག་ཡི་གེའི་ཕྱི་མོ་སློབ་ཅིང་གང་གི་ཚེ། ཨ་ཞེས་བརྗོད་པ་དེའི་ཚེ། འདུ་བྱེད་ཐམས་ཅད་མི་རྟག་པའི་སྒྲ་བྱུང་ངོ ། །ཱ་ཞེས་བརྗོད་པ་དང་བདག་མེད་པའི་སྒྲ་བྱུང་ངོ ། །ི་ཞེས་བརྗོད་པ་དང་དབང་པོ་ཤིན་དུ་ཡངས་པའི་སྒྲ་བྱུང་ངོ ། །ཱི་ཞེས་བརྗོད་པ་དང་འགྲོ་བ་ནི་ཡམས་ཀྱི་ནད་མང་བ་ཞེས་བྱ་བའི་སྒྲ་བྱུང་ངོ ། །ུ་ཞེས་བརྗོད་པ་དང་འགྲོ་བ་ནི་འཚེ་བ་མང་ངོ་ཞེས་བྱ་བའི་སྒྲ་བྱུང་ངོ ། །ཱུ་ཞེས་བརྗོད་པ་དང་འགྲོ་བ་ནི་དམའ་བའོ་ཞེས་བྱ་བའི་སྒྲ་བྱུང་ངོ ། །ེ་ཞེས་བརྗོད་པ་དང ། ཉེས་པ་ནི་བཙལ་བ་ལས་བྱུང་ངོ་ཞེས་བྱ་བའི་སྒྲ་བྱུང་ངོ ། །ཻ་ཞེས་བརྗོད་པ་དང་འཕགས་པའི་ལམ་ནི་དགེའོ་ཞེས་བྱ་བའི་སྒྲ་བྱུང་ངོ ། །ོ་ཞེས་བརྗོད་པ་དང་ཆུ་བོ་ལས་རྒལ་བའི་སྒྲ་བྱུང་ངོ ། །ཽ་ཞེས་བརྗོད་པ་དང་རྫུབ་པའི་སྒྲ་བྱུང་ངོ ། །ཾ་ཞེས་བརྗོད་པ་དང་བདག་གི་བ་མི་འབྱུང་ཞེས་བྱ་བའི་སྒྲ་བྱུང་ངོ ། །ཿ ཞེས་བརྗོད་པ་དང་ནུབ་པ་ཞེས་བྱ་བའི་སྒྲ་བྱུང་ངོ ། །ཀ་ཞེས་བརྗོད་པ་དང་ལས་ཀྱི་རྣམ་པར་སྨིན་པ་ལ་འཇུག་པ་ཞེས་བྱ་བའི་སྒྲ་བྱུང་ངོ ། །ཁ་ཞེས་བརྗོད་པ་དང་ཆོས་ཐམས་ཅད་ནམ་མཁའ་དང་མཉམ་ཞེས་བྱ་བའི་སྒྲ་བྱུང་ངོ ། །ག་ཞེས་བརྗོད་པ་དང་ཆོས་ཟབ་ཅེས་བྱ་བའི་སྒྲ་བྱུང་ངོ ། །གྷ་ཞེས་བརྗོད་པ་དང་མ་རིག་པ་དང ། གཏི་མུག་གི་མུན་པ་དང་ལིང་ཐོག་སྟུག་པོ་བསལ་ཞེས་བྱ་བའི་སྒྲ་བྱུང་ངོ ། ། 41.77b ང་ཞེས་བརྗོད་པ་དང་ཡན་ལག་རྣམ་པར་དག་པ་ཞེས་བྱ་བའི་སྒྲ་བྱུང་ངོ ། །ཙ་ཞེས་བརྗོད་པ་དང་འཕགས་པའི་བདེན་པ་བཞིའི་སྒྲ་བྱུང་ངོ ། །ཚ་ཞེས་བརྗོད་པ་དང་འདོད་པའི་འདོད་ཆགས་སྤང་བའི་སྒྲ་བྱུང་ངོ ། །ཛ་ཞེས་བརྗོད་པ་དང་རྒ་ཤི་ལས་ཡང་དག་པར་འདས་པའི་སྒྲ་བྱུང་ངོ ། །ཛྷ་ཞེས་བརྗོད་པ་དང་འཆི་བྱེད་ཀྱི་རྒྱལ་མཚན་ཅན་གྱི་དཔུང་ཚར་བཅད་པའི་སྒྲ་བྱུང་ངོ ། །ཉ་ཞེས་བརྗོད་པ་དང་ཤེས་པར་བྱེད་པའི་སྒྲ་བྱུང་ངོ ། །ཊ་ཞེས་བརྗོད་པ་དང་ལམ་ཤིན་ཏུ་ཆད་པའི་སྒྲ་བྱུང་ངོ ། །ཋ་ཞེས་བརྗོད་པ་དང་དྲི་བ་བཞག་པའི་སྒྲ་བྱུང་ངོ ། །ཌ་ཞེས་བརྗོད་པ་དང་དཀྲུགས་མ་དང་བདུད་ཚར་བཅད་པའི་སྒྲ་བྱུང་ངོ ། །ཌྷ་ཞེས་བརྗོད་པ་དང་ཡུལ་མི་གཙང་བའི་སྒྲ་བྱུང་ངོ ། །ཎ་ཞེས་བརྗོད་པ་དང་ཉོན་མོངས་པ་ནི་ཕྲ་བ་ཞེས་བྱ་བའི་སྒྲ་བྱུང་ངོ ། །ཏ་ཞེས་བརྗོད་པ་དང་དེ་བཞིན་ཉིད་ནི་འདྲེས་པ་མེད་ཅེས་བྱ་བའི་སྒྲ་བྱུང་ངོ ། །ཐ་ཞེས་བརྗོད་པ་དང་མཐུ་སྟོབས་དང་ཤུགས་དང་མི་འཇིགས་པའི་སྒྲ་བྱུང་ངོ ། །ད་ཞེས་བརྗོད་པ་དང་སྦྱིན་པ་དང་དུལ་བ་དང ། ཡང་དག་པར་སྡོམ་པ་དང ། ངེས་པའི་སྒྲ་བྱུང་ངོ ། །དྷ་ཞེས་བརྗོད་པ་དང་འཕགས་པ་རྣམས་ཀྱི་ནོར་ནི་རྣམ་པ་བདུན་ནོ་ཞེས་བྱ་བའི་སྒྲ་བྱུང་ངོ ། །ན་ཞེས་བརྗོད་པ་དང་མིང་དང་གཟུགས་ཡོངས་སུ་ཤེས་པར་བྱ་བའི་སྒྲ་བྱུང་ངོ ། །པ་ཞེས་བརྗོད་པ་དང་དོན་དམ་པའི་སྒྲ་བྱུང་ངོ ། །ཕ་ཞེས་བརྗོད་པ་དང་འབྲས་བུ་རྙེད་པ་མངོན་དུ་བྱ་བའི་སྒྲ་བྱུང་ངོ ། །བ་ཞེས་བརྗོད་པ་དང་བཅིངས་པ་ལས་རྣམ་པར་ཐར་པའི་སྒྲ་བྱུང་ངོ ། །བྷ་ཞེས་བརྗོད་པ་དང་སྲིད་པ་འཇིགས་པའི་སྒྲ་བྱུང་ངོ ། །མ་ཞེས་བརྗོད་པ་དང་ང་རྒྱལ་དང་རྒྱགས་པ་ཞི་བར་བྱ་བའི་སྒྲ་བྱུང་ངོ ། །ཡ་ཞེས་བརྗོད་པ་དང་ཆོས་ཇི་ལྟ་བ་བཞིན་དུ་རྟོགས་པར་བྱ་བའི་སྒྲ་བྱུང་ངོ ། །ར་ཞེས་བརྗོད་པ་དང་དགའ་བ་ལ་དགའ་བ་མེད་པའི་དོན་དམ་པར་དགའ་བ་ཞེས་བྱ་བའི་སྒྲ་བྱུང་ངོ ། །ལ་ཞེས་བརྗོད་ 41.78a པ་དང་འཁྲི་ཤིང་ཆད་པའི་སྒྲ་བྱུང་ངོ ། །ཝ་ཞེས་བརྗོད་པ་དང་ཐེག་པ་མཆོག་གི་སྒྲ་བྱུང་ངོ ། །ཤ་ཞེས་བརྗོད་པ་དང་ཞི་གནས་དང་ལྷག་མཐོང་གི་སྒྲ་བྱུང་ངོ ། །ཥ་ཞེས་བརྗོད་པ་དང་སྐྱེ་མཆེད་དྲུག་གཞོམ་ཞིང་མངོན་པར་ཤེས་པ་དྲུག་དང་ཡེ་ཤེས་ཐོབ་པའི་སྒྲ་བྱུང་ངོ ། །ས་ཞེས་བརྗོད་པ་དང་ཐམས་ཅད་མཁྱེན་པའི་ཡེ་ཤེས་མངོན་པར་རྫོགས་པར་བྱང་ཆུབ་པར་བྱ་བའི་སྒྲ་བྱུང་ངོ ། །ཧ་ཞེས་བརྗོད་པ་དང་ཉོན་མོངས་པ་བཅོམ་ཞིང་འདོད་ཆགས་དང་བྲལ་བའི་སྒྲ་བྱུང་ངོ ། །ཀྵ་ཞེས་བརྗོད་པ་དང་ཡི་གེའི་མཐར་ཕྱིན་ཏེ། ཆོས་ཐམས་ཅད་བརྗོད་དུ་མེད་པའོ་ཞེས་བྱ་བའི་སྒྲ་བྱུང་ངོ ། །དེ་ལྟར་བྱིས་པ་དེ་དག་ཡི་གེའི་ཕྱི་མོ་སློབ་པའི་ཚེ། བྱང་ཆུབ་སེམས་དཔའི་མཐུས་དེ་དག་ལ་སོགས་པ་ཆོས་ཀྱི་སྒོ་བརྒྱ་སྟོང་གྲངས་མེད་པ་བྱུང་བར་གྱུར་ཏེ། བྱང་ཆུབ་སེམས་དཔའ་ཡི་གེའི་གྲཝ་ན་འདུག་པའི་ཚེ་བྱིས་པ་སུམ་ཁྲི་ཉིས་སྟོང་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །བྱང་ཆུབ་སེམས་དཔའ་ལོགས་པར་གྱུར་ཀྱང་ཡི་གེའི་གྲཝར་འཇུག་པའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །ཡི་གེ་བསྟན་པའི་ལེའུ་སྟེ་བཅུ་པའོ།། །། དགེ་སློང་དག་གཞོན་ནུ་དེ་དེ་བས་ཀྱང་ཡ་ཟད་སྐྱེས་ནས་དུས་གཞན་ཞིག་ན་གཞོན་ནུ་དེ་གཞོན་ནུ་གཞན་དག་དང་ཞང་བློན་གྱི་བུ་དག་དང་ལྷན་ཅིག་ཏུ་ཞིང་པའི་གྲོང་ལྟ་ཞིང་དོང་སྟེ། གྲོང་བལྟས་ནས་ཞིང་བླས་ཀྱི་མཐའི་བསྐྱེད་མོས་ཚལ་ཞིག་ཏུ་ཕྱིན་ཏོ། །དེ་ན་བྱང་ཆུབ་སེམས་དཔའ་གཅིག་པུ་གཉིས་སུ་མེད་པར་ཕ་ཟད་འཁྱམ་ཞིང་སོང་སོང་བ་དང ། འཛམ་བུའི་ཤིང་ལྗོན་པ་མཛེས་པ་བལྟ་ན་སྡུག་པ་ཞིག་མཐོང་ནས། བྱང་ཆུབ་སེམས་དཔའ་དེའི་གྲིབ་མ་ལ་སྐྱིལ་མོ་ཀྲུང་བཅས་ཏེ་འདུག་གོ། །འདུག་ནས་བྱང་ཆུབ་སེམས་དཔའ་སེམས་རྩེ་གཅིག་པ་རྙེད་དེ་རྙེད་ནས་ཀྱང་སྡིག་པ་མི་དགེ 41.78b བའི་ཆོས་རྣམས་ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་བསྒྲུབས་ཏེ་གནས་སོ། །དེ་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང ། བདེ་བ་ཅན་བསམ་གཏན་གཉིས་པ་བསྒྲུབས་ཏེ་གནས་སོ། །དེ་དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་ལ། འཕགས་པ་རྣམས་ཀྱིས་གང་དེ་དྲན་པ་དང་ལྡན་པ། བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ། དགའ་བ་མེད་པའི་བསམ་གཏན་གསུམ་པ་བསྒྲུབས་ཏེ་གནས་སོ། །དེ་བདེ་བ་ཡང་སྤངས་ཏེ་སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང ། ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན། སྡུག་བསྔལ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་བསྒྲུབས་ཏེ་གནས་སོ། །དེའི་ཚེ་ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་ཡོད་པ་རྫུ་འཕྲུལ་དང་ལྡན་པ་ནམ་མཁའ་ལས་དོང་བ་ལྔ་ཞིག་ལྷོ་ཕྱོགས་ནས་བྱང་ཕྱོགས་ལོགས་སུ་དོང་དོང་བ་ལས་དེ་དག་ཚལ་སྟུག་པོ་དེའི་སྟེང་དུ་ཕྱིན་པ་དང ། ཕྱིར་ཕུལ་བ་ལྟར་འདོང་མ་ནུས་ནས། དེ་དག་མི་དགའ་ཞིང་བ་སྤུ་གཡོས་ཏེ། ཚིགས་སུ་བཅད་པ་འདི་སྨྲས་སོ། །བདག་ཅག་འདི་ན་རི་རབ་ནོར་བུ་རྡོ་རྗེ་བརྩེགས་རི་ཤིན་དུ་རྔམས་སྟུག་པ་ཡང་ཐལ་ཕྱུང་སྟེ། །གླང་པོ་ཨ་མྲའི་ཤིང་རློན་ཡལ་གས་གཟིངས་པ་མང་པོ་བཅོམ་ནས་འགྲོ་བཞིན་དོང་དོང་ལ། །བདག་ཅག་འདི་ན་ལྷ་ཡི་ཁྱིམ་ལ་འང་ཐོགས་མེད་གནོད་སྦྱིན་དྲི་ཟའི་ཁྱིམ་སྟེང་ནམ་མཁར་གནས་གནས་ན། །ཚལ་སྟུག་འདིར་ཕྱིན་ནས་ནི་སྒྱིད་ལུག་གྱུར་པ་སུ་ཡི་མཐུ་ཞིག 41.79a གིས་ན་རྫུ་འཕྲུལ་སྟོབས་བཟློག་གྱུར། །དེ་ནས་ཚལ་སྟུག་པོ་དེ་ན་ལྷ་མོ་ཞིག་གནས་པ་དེས་དྲང་སྲོང་དེ་དག་ལ་ཚིགས་སུ་བཅད་དེ་སྨྲས་པ། རྒྱལ་པོའི་གཙོ་བོའི་རིགས་བྱུང་ཤཱཀྱའི་རྒྱལ་སྲས་ཉི་མ་ཤར་བ་ལྟ་བུར་རབ་ཏུ་སྣང་བའི་འོད། །འཇིག་རྟེན་གཙོ་བོ་མཁས་པ་ཟླ་ཞལ་པད་མ་རྒྱས་པའི་སྙིང་པོའི་ཁ་དོག་ལྟ་བུར་རབ་མཛེས་པ། །ལྷ་དང་ཀླུ་དབང་གནོད་སྦྱིན་དྲི་ཟས་མཆོད་པ་དེ་ནི་བསམ་གཏན་དགོངས་ཤིང་ཚལ་སྟུག་འདི་ན་བཞུགས། །སྲིད་པ་བྱེ་བ་བརྒྱ་དག་ཏུ་ནི་བསོད་ནམས་སྤེལ་བ་དེ་ཡི་མཐུ་ཡིས་རྫུ་འཕྲུལ་སྟོབས་བཟློག་གོ། །དེ་ནས་དེ་དག་གིས་འོག་ལོགས་སུ་བལྟས་པ་དང ། གཞོན་ནུ་ཞིག་དཔལ་དང་གཟི་བརྗིད་ཀྱིས་འབར་བ་མཐོང་ནས་འདི་དག་འདི་སྙམ་དུ་སུ་ཞིག་འདི་ལྟར་གནས། ནོར་གྱི་བདག་པོ་རྣམ་ཐོས་ཀྱི་བུ་འམ་ཅིག་མ་ཡིན་ནམ། འོན་ཏེ་འདོད་པའི་དབང་པོ་བདུད་ལྟ་འམ། ཡང་ན་ལྟོ་འཕྱེ་ཆེན་པོའི་དབང་པོ་འམ། འོན་ཏེ་དབང་པོ་རྡོ་རྗེ་འཆང་བ་འམ། ཡང་ན་གུ་ལང་ངམ། གྲུལ་བུམ་གྱི་བདག་པོ་འམ། འོན་ཏེ་སྤྲོ་བ་ཆེན་པོ་དང་ལྡན་པ་ནག་པོ་འམ། འོན་ཏེ་ལྷའི་བུ་ཟླ་བ་འམ། འོན་ཏེ་འོད་ཟེར་སྟོང་དང་ལྡན་པའི་ཉི་མ་འམ། འོན་ཏེ་འཁོར་ལོས་སྒྱུར་བའི་རྒྱལ་པོ་ཞིག་ཡིན་ནམ། སུ་ཞིག་སྙམ་མོ། །དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། །གཞོན་ནུ་འདི་ནི་རྣམ་ཐོས་བུའི་གཟུགས་ལས་འཕགས་པར་གསལ་བར་སྣང་བས་ན། །འདི་ནི་སྒྲ་གཅན་ཡིན་ནམ་འོན་ཏེ་རྡོ་རྗེ་འཆང་གི་གཟུགས་སམ་ཉི་ཟླའི་གཟུགས། །འདོད་མཆོག་དབང་པོའི་གཟུགས་སམ་གུ་ལང་གཟུགས་སམ་འོན་ཏེ་ནག་པོའི་གཟུགས་ཡིན་ནམ། །ཡང་ན་འདི་ནི་དཔལ་ལྡན་ཡན་ལག་མཚན་སྤྲས་སྡིག་མེད་སངས་རྒྱས་འགྱུར་བ་ཞིག་།དེ་ནས་ཚལ་གྱི་ལྷ་མོ་དེས་དྲང་སྲོང་དེ་དག་ལ་ཚིགས་སུ་བཅད་དེ 41.79b སྨྲས་པ། རྣམ་ཐོས་བུ་དང་མིག་སྟོང་བདོག་ལ་དཔལ་ནི་གང་ཡོད་གྱུར་པ་དང ། །འཇིག་རྟེན་སྐྱོང་བ་བཞི་དང་ལྷ་མིན་དབང་ལ་དཔལ་ནི་གང་ཡོད་དང ། །མི་མཇེད་བདག་པོ་ཚངས་དང་གཟའ་རྣམས་ལ་ཡང་དཔལ་ནི་གང་ཡོད་པ། །དཔལ་དེ་ཤཱཀྱའི་སྲས་པོ་འདི་དྲུང་ཕྱིན་ན་གང་གི་ཆར་མི་ཕོད། །དེ་ནས་དྲང་སྲོང་དེ་དག་གིས་ལྷ་མོ་དེའི་ཚིག་ཐོས་ནས་ས་ལ་བབས་པ་དང ། དེ་དག་གིས་བྱང་ཆུབ་སེམས་དཔའ་མི་གཡོ་བའི་ལུས་ཀྱིས་བསམ་གཏན་བྱེད་ཅིང ། མེའི་ཕུང་པོ་ལྟར་འབར་བ་མཐོང་ནས། དེ་དག་བྱང་ཆུབ་སེམས་དཔའ་ལ་སེམས་ཤིང་ཚིགས་སུ་བཅད་པས་བསྟོད་དེ། དེ་ལ་གཅིག་གིས་སྨྲས་པ། འཇིག་རྟེན་ཉོན་མོངས་མེས་གདུངས་པ། །མཚོ་འདི་རབ་ཏུ་བྱུང་གྱུར་ཏེ། །གང་གིས་འཇིག་རྟེན་སིམ་འགྱུར་བའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་པ། མི་ཤེས་རབ་རིབ་འཇིག་རྟེན་དུ། །སྒྲོན་མ་འདི་ནི་རབ་ཏུ་བྱུང ། །གང་གིས་འགྲོ་བ་སྣང་འགྱུར་བའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་པ། མྱ་ངན་རྒྱ་མཚོ་འདལ་བ་ལ། །གྲུ་ཡི་དམ་པ་འདི་བྱུང་སྟེ། །གང་གིས་འགྲོ་བ་སྒྲོལ་འགྱུར་བའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་པ། ཉོན་མོངས་འཆིང་བས་བཅིངས་པ་ལ། །འགྲོལ་བར་མཛད་པ་འདི་བྱུང་སྟེ། །གང་གིས་འགྲོ་བ་འགྲོལ་འགྱུར་བའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་པ། རྒ་དང་ནད་ཀྱིས་གཟིར་བ་ལ། །སྨན་པ་དམ་པ་འདི་བྱུང་སྟེ། །གང་གིས་རྒ་ཤི་ཐར་བྱ་བའི། །ཆོས་དེ་འདི་ཡིས་བརྙེས་པར་འགྱུར། །དེ་ནས་དྲང་སྲོང་དེ་དག་གིས་བྱང་ཆུབ་སེམས་དཔའ་ལ་ཚིགས་སུ་བཅད་པ་དེ་དག་གིས་བསྟོད་དེ། ལན་གསུམ་བསྐོར་བ་བྱས་ནས་ནམ་མཁའ་ལས་དོང་ངོ ། །རྒྱལ་པོ་ཟས་གཙང 41.80a མ་ཡང་བྱང་ཆུབ་སེམས་དཔའ་མི་མཐོང་ཞིང་བྱང་ཆུབ་སེམས་དཔའ་མེད་པས་མི་དགའ་སྟེ། དེས་སྨྲས་པ། གཞོན་ནུ་དེ་མི་སྣང་ན་གར་སོང ། དེའི་ཚེ་སྐྱེ་བོ་ཕལ་པོ་ཆེ་གཞོན་ནུ་ཚོལ་དུ་དོང་དོང་བ་དང ། དེའི་ཚེ་བློན་པོ་གཅིག་ཅིག་གིས་བྱང་ཆུབ་སེམས་དཔའ་འཛམ་བུའི་ཤིང་གི་གྲིབ་མ་ལ་སྐྱིལ་མོ་ཀྲུང་བཅས་ཏེ་བསམ་གཏན་བྱེད་ཅིང་འདུག་པ་མཐོང་ངོ ། །དེས་དེའི་ཚེ་ཤིང་ཐམས་ཅད་ཀྱི་གྲིབ་མ་ནི་ཡོལ་ན། འཛམ་བུའི་ཤིང་གི་གྲིབ་མ་ནི་བྱང་ཆུབ་སེམས་དཔའི་ལུས་མི་གཏོང་བར་འདུག་པར་མཐོང་ནས་ངོ་མཚར་དུ་གྱུར་ཏེ། ཚིམ་ཞིང་མགུ་ལ་ཡི་རངས་ནས་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་རིངས་ཤིང་མྱུར་བ་མྱུར་བའི་གཟུགས་ཀྱིས། རྒྱལ་པོ་ཟས་གཙང་མའི་ཐད་དུ་ཕྱིན་ཏེ་ཚིགས་སུ་བཅད་པ་འདི་དག་སྨྲས་སོ། །རྒྱལ་པོ་གཞོན་ནུ་དེ་ལ་གཟིགས། །འཛམ་བུའི་ཤིང་གྲིབ་བསམ་གཏན་མཛད། །བརྒྱ་བྱིན་ཚངས་པ་ཇི་བཞིན་དུ། །གཟི་བརྗིད་དཔལ་གྱིས་རབ་ཏུ་མཛེས། །ཞུགས་ཤིང་གང་གི་གྲིབ་མ་ལ། །མཚན་རབ་མངའ་བ་དེ་བཞུགས་པའི། །གྲིབ་མ་དེས་ནི་དེ་མ་བཏང ། །སྐྱེས་མཆོག་བསམ་གཏན་མཛད་ལ་སྒྲིབ། །དེ་ནས་རྒྱལ་པོ་ཟས་གཙང་མ་འཛམ་བུའི་ཤིང་ལྗོན་པ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་དཔལ་དང་གཟི་བརྗིད་ཀྱིས་འབར་བ་དེ་མཐོང་བ་དང ། ཚིགས་སུ་བཅད་པ་འདི་སྨྲས་སོ། །རི་ཡི་སྤོ་ལ་མེ་འབར་འདྲ་བ་སྟེ། །ཟླ་བ་སྐར་མའི་ཚོགས་ནང་འདུག་འདྲ་ཞིང ། །གཟི་བརྗིད་སྒྲོན་འདྲ་བསམ་གཏན་བྱེད་མཐོང་ན། །ང་ཡི་ལུས་འདི་ཤིན་དུ་འདར་བར་གྱུར། །དེ་སྐད་ཅེས་སྨྲས་ནས། དེས་བྱང་ཆུབ་སེམས་དཔའི་རྐང་པ་ལ་ཕྱག་བྱས་ཏེ། ཚིགས་སུ་བཅད་པ་འདི་སྨྲས་སོ། །ཐུབ་པ་གང་ཚེ་བལྟམ་པ་དང ། །གང་ཚེ་འོད་ལྡན་བསམ་གཏན་མཛད། །འདྲེན་པ་འདི་ལྟར་ལན་གཉིས་སུ། །མགོན་པོ་ཁྱོད་ཞབས་ཕྱག་འཚལ་ལོ། །དེའི་ཚེ་བྱིས་པ་ཁྲེའུ་ཐོགས་པ་དག 41.80b ཅ་ཅོའི་སྒྲ་འབྱིན་པར་གྱུར་ནས། དེ་དག་ལ་བློན་པོ་དག་གིས་སྒྲ་མ་ཆེ་སྒྲ་མ་ཆེ་ཞེས་བྱས་པ་དང ། དེ་དག་ཅི་ཞིག་ནོངས་ཤེས་ཟེར་རོ། །བློན་པོ་དག་གིས་སྨྲས་པ། རྒྱལ་པོའི་སྲས་དོན་ཐམས་ཅད་གྲུབ་པ་དགེ་བའི་མཚན་བཟང་པོ་མཆོག་དམ་པ་དང་ལྡན་ཞིང་འོད་འདོམ་གང་བ་མངའ་བ་འདི་རི་ལྟར་མི་གཡོ་ཞིང་བསམ་གཏན་མཛད་པའི་ཚེ། ཉི་མའི་དཀྱིལ་འཁོར་ཡོལ་ཏེ་སོང་ཡང ། ཤིང་གི་གྲིབ་མ་དེ་མ་ཡོལ་ཞིང་སྒྲིབ་པར་གནས་སོ། །དེ་ལ་འདི་སྐད་ཅེས་བྱ་སྟེ། དཔྱིད་འདས་དབྱར་གྱི་དུས་བབ་དབྱར་ཟླ་ར་བ་ལ། མེ་ཏོག་རྒྱས་ཤིང་མེ་ཏོག་ཡལ་གས་ཁེབས་གྱུར་ཏེ། །ཁྲུང་ཁྲུང་རྨ་བྱ་ནེ་ཙོ་རི་སྐེགས་སྐད་འབྱིན་པ། །ཤཱཀྱའི་བུ་དག་ཕལ་ཆེར་མངོན་དུ་འདོང་བར་གྱུར། །འདུན་པ་ཅན་གྱིས་སྨྲས་པ། གཞོན་ནུ་ནགས་ཚལ་དག་ནི་གཟིགས་པ་མཛད་སླད་དུ། །བྱིས་པ་རྣམས་ཀྱིས་ཡོངས་སུ་བསྐོར་ཏེ་གཤེགས་པའི་རིགས། །བྲམ་ཟེ་ལྟ་བུར་ཁྱིམ་ན་བཞུགས་པས་ཅི་ཞིག་བགྱི། །བདག་ཅག་རྣམས་ནི་བུ་མོའི་ཚོགས་རྣམས་སྦྲོན་དུ་མཆི། །ཉི་མའི་གུང་ལ་སེམས་ཅན་རྣམ་པར་དག་པ་དེ། །བྱིས་པ་ལྔ་བརྒྱ་དག་གིས་བསྐོར་ནས་ལྷན་ཅིག་ཏུ། །ཡབ་ལ་མ་གསོལ་ཡུམ་ལ་མ་གསོལ་མ་ཚོར་བར། །དེ་ནི་བྱུང་ནས་ཞིང་པ་རྣམས་ཀྱི་གྲོང་དུ་སོང ། །རྒྱལ་པོ་དམ་པའི་ཞིང་པ་དག་གི་གྲོང་དེ་ན། །འཛམ་བུའི་སྡོང་ཆེན་ཡལ་ག་མང་པོ་རྒྱས་ཡོད་པ། །གཞོན་ནུས་མཐོང་ན་ཉམ་ཐག་སྡུག་བསྔལ་ཕོག་གྱུར་ཏེ། །འདུས་བྱས་ཅི་རུང་སྡུག་བསྔལ་མང་ཞེས་སྙིང་རྗེ་བྱེད། །དུལ་བའི་སེམས་དང་ལྡན་པ་འཛམ་བུའི་གྲིབ་མར་སོང ། །རྩཝ་དག་བསྡུས་ཏེ་བདག་གིས་གདིང་བ་བཏིང་ནས་ནི། །སྐྱིལ་མོ་ཀྲུང་འདུག་དྲང་པོར་ལུས་བསྲང་བསམ་གཏན་བཞི། །དགེ་བ་དག་ལ་བྱང་ཆུབ་སེམས་དཔའ་བསམ་གཏན་བྱེད། །དྲང་སྲོང་ལྔ་ཞིག་ནམ་མཁའི་དཀྱིལ་ནས་དོང་དོང་ན། །འཛམ་བུའི་ཤིང་གི་སྟེང་དུ་ཕྱིན་ནས་འདོང་མ་ནུས། །དེ་དག་ཐོགས་ནས་ང་རྒྱལ་དྲེགས་པ་སྤང་བྱ་ཞིང ། །དེ་དག་ཐམས 41.81a ཅད་འཐུན་པར་ལྷན་ཅིག་ལྟ་བར་བྱེད། །བདག་ཅག་རི་མཆོག་རི་རབ་དེ་བཞིན་འཁོར་ཡུག་དག་།ཐལ་ཕྱུང་ཐགས་ཐོགས་མེད་པར་ཤུགས་ཀྱིས་དོང་དོང་ན། །བདག་ཅག་དེ་རིང་འཛམ་བུའི་ཤིང་ལྗོན་འདི་ལས་ནི། །འདའ་བར་མ་ནུས་འདི་ལ་རྒྱུ་རྐྱེན་ཅི་ཞིག་ཡོད། །བབས་ཏེ་ས་སྟེངས་འདུག་ནས་འཛམ་བུའི་ཤིང་དྲུང་ན། །ཤཱཀྱའི་བུ་ཕོ་བྱང་ཆུབ་སེམས་དཔའ་གཟི་བརྗིད་ཅན། །འཛམ་གླིང་གསེར་གྱི་འོད་འཕྲོ་འདྲ་བ་འོད་ཟེར་ལྡན། །སྐྱིལ་མོ་ཀྲུང་བཅས་བསམ་གཏན་བྱེད་པ་དེ་ཚེ་མཐོང ། །དེ་དག་རྨད་གྱུར་སྤྱི་བོར་སོར་བཅུ་ཐལ་སྦྱར་ཏེ། །ཐལ་མོ་སྦྱར་བ་རྐང་པར་གཏུགས་ནས་ཕྱག་འཚལ་ལོ། །འགྲོ་བ་ཤིན་དུ་བདེ་མཛད་ལེགས་པར་བལྟམ་པ་ལེགས། །མྱུར་དུ་རྣམ་སངས་རྒྱས་ཏེ་བདུད་རྩིར་སེམས་ཅན་ཐུལ། །སྡོང་པོ་མཆོག་ནི་པད་མ་འདྲ་བའི་སྤྱན་ལ་འདུད། །གདུགས་ཡོལ་གྱུར་ཀྱང་གྲིབ་མས་བདེ་བར་གཤེགས་མི་གཏོང ། །ལྷ་རྣམས་སྟོང་ཕྲག་མང་པོ་གནས་པ་ཐལ་སྦྱར་ནས། །དེས་པར་བྱས་པ་དེ་ཡི་རྐང་པར་ཕྱག་ཀྱང་འཚལ། །ཟས་གཙང་རྒྱལ་པོ་བདག་གི་ཁྱིམ་ན་ཡོངས་ཚོལ་ཞིང ། །ངའི་བུ་གཞོན་ནུ་དེ་ནི་གང་དུ་སོང་ཞེས་རྨེད། །སྲུ་མོས་སྨྲས་པ་བདག་གིས་བཙལ་ཀྱང་མ་རྙེད་ན། །གཞོན་ནུ་དེ་ནི་གར་བཞུད་རྒྱལ་པོས་རྨ་བར་གསོལ། །ཟས་གཙང་རྒྱལ་པོས་ཉུང་རུམ་དག་ལ་རིངས་པར་རྨས། །ང་ཡི་གཞོན་ནུ་འདི་ནས་བྱུང་བར་ལ་ལས་མཐོང་ངམ་ཞེས། །སྒོ་བ་རྣམས་དང་དེ་བཞིན་ནང་མི་ཀུན་ལའང་རྨས། །ལྷ་གཅིག་ཁྱོད་གསོན་མཆོག་དེ་ཞིང་པའི་གྲོང་དུ་བཞུད། །དེ་ནི་རིངས་པར་ཤཱཀྱ་རྣམས་དང་ལྷན་ཅིག་ཏུ། །བྱུང་ནས་དཔལ་ཞུགས་གྱུར་པའི་ཞིང་པའི་གྲོང་དུ་བལྟས། །ཇི་ལྟར་ཉི་མ་བྱེ་བ་ཁྲག་ཁྲིག་ཤར་བ་ལྟར། །དེ་ལྟར་དཔལ་གྱིས་འབར་ཞིང་ཕན་བྱེད་འདུག་པ་མཐོང ། །ཅོད་པན་རལ་གྲི་ལྷམ་དག་ཕ་ཟད་ཕོག་ཕུད་དེ། །མགོ་བོར་སོར་བཅུ་ཐལ་མོ་སྦྱར་ནས་ཕྱག་ཀྱང་འཚལ། །དྲང་སྲོང་བདག་ཉིད་ཆེན་པོ་ལེགས་པར་ཡང་དག་སྨྲ། །གཞོན་ནུ་བྱང་ཆུབ་དོན་དུ 41.81b མངོན་པར་འབྱུང་དུ་ངེས། །རབ་ཏུ་དད་ལྷ་བརྒྱ་ཕྲག་བཅུ་གཉིས་ཚང་བ་དང ། །དེ་བཞིན་ཤཱཀྱ་ལྔ་བརྒྱ་ཉེ་བར་འོངས་པ་དང ། །བདེ་གཤེགས་ཡོན་ཏན་རྒྱ་མཚོ་ལྡན་པའི་རྫུ་འཕྲུལ་མཐོང ། །བསམ་པ་བརྟན་པས་རྫོགས་པའི་བྱང་ཆུབ་སེམས་ཀྱང་སྐྱེད། །དེས་ནི་སྟོང་གསུམ་མ་ལུས་ས་རྣམས་རབ་བསྐྱོད་ནས། །དྲན་དང་ཤེས་བཞིན་ཏིང་ངེ་འཛིན་ལས་ལངས་གྱུར་ཏེ། །མདོག་བཟང་ལྡན་པས་ཡབ་ལ་ཚངས་པའི་ཚིག་བརྗོད་པ། །ཡབ་ཅིག་ཞིང་བླས་ཐོང་ལ་གཞན་ལས་ཚོལ་མ་མཛད། །གལ་ཏེ་གསེར་ཞིག་འཚལ་ནའང་བདག་གིས་གསེར་ཆར་དབབ། །དེ་སྟེ་ན་བཟའ་འཚལ་ནའང་བདག་གིས་ན་བཟའ་དབུལ། །འོན་ཏེ་འབྲུ་ཞིག་འཚལ་ནའང་བདག་གིས་འབྲུ་ཆར་དབབ། །མི་དབང་ཁྱོད་ཀྱིས་འགྲོ་བ་ཀུན་ལ་ཡང་དག་སྦྱོར། །ཡབ་དང་དེ་བཞིན་སྐྱེ་བོ་འཁོར་ལ་བསྟན་བྱས་ནས། །སྐད་ཅིག་དེ་ལ་དེ་སླར་གྲོང་ཁྱེར་མཆོག་ཏུ་ཞུགས། །འགྲོ་དང་འཐུན་པ་ཙམ་དུ་གྲོང་ཁྱེར་དེར་གནས་ཀྱི། །སེམས་ཅན་རྣམ་དག་མངོན་པར་འབྱུང་བའི་ཡིད་དང་ལྡན། །ཞིང་བའི་གྲོང་གི་ལེའུ་སྟེ་བཅུ་གཅིག་པའོ།། །། འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བདུན་པ། དགེ་སློང་དག་དེ་ལྟར་གཞོན་ནུ་དེ་དེ་བས་ཀྱང་ཡ་ཟད་སྐྱེས་པ་དང ། དུས་གཞན་ཞིག་ན་རྒྱལ་པོ་ཟས་གཙང་མ་ཤཱཀྱའི་ཚོགས་དང་ལྷན་ཅིག་ཏུ་འདུན་ས་ན་འདུག་འདུག་པ་དེའི་ཚེ། ཤཱཀྱ་རྒན་རབས་རྒན་རབས་ཁ་ཅིག་གིས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། གཞོན་ནུ་དོན་ཐམས་ཅད་གྲུབ་པ་འདི་ནི་བྲམ་ཟེ་ལྟས་མཁན་རྣམས་དང ། བློ་ངེས་པ་དང་ལྡན་པའི་ལྷ་མང་པོས་འདི་སྐད་དུ་བསྟན་ཏེ། གཞོན་ནུ་འདི་གལ་ཏེ་མངོན་པར་བྱུང་བར་གྱུར་ན་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ། །ཇི་སྟེ་མངོན་པར་མ་བྱུང་ན་ནི་འཁོར་ལོས་སྒྱུར་བའི་རྒྱལ་པོ་མཐའ་བཞི་ལས་རྣམ་པར་རྒྱལ་བ་ཆོས 41.82a ཀྱི་རྒྱལ་པོ་ཆོས་དང་ལྡན་ཞིང་རིན་པོ་ཆེ་སྣ་བདུན་དང་ལྡན་པར་འགྱུར་རོ། །དེའི་རིན་པོ་ཆེ་སྣ་བདུན་ནི་འདི་དག་སྟེ། འདི་ལྟར་འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་དང་བདུན་ནོ། །དེ་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། གཞན་གྱི་སྡེ་རབ་ཏུ་འཇོམས་པ་སྟོང་ཚང་བ་འབྱུང་ངོ ། །དེ་གནོད་པར་བྱ་བ་དང ། མཚོན་ཆ་མེད་པར་ཆོས་དང་འཐུན་པས་སའི་དཀྱིལ་འཁོར་འདི་ལས་མངོན་པར་རྒྱལ་བར་བྱས་ཏེ། གཅིག་པུ་གནས་པར་འགྱུར་རོ་ཞེས་མཆི་ན། དེའི་སླད་དུ་གཞོན་ནུ་དེའི་བཙུན་མོ་བླང་བར་བགྱིའོ། །དེ་ལྟར་མཛད་དང་བུད་མེད་ཀྱི་ཚོགས་ཀྱིས་ཡོངས་སུ་བསྐོར་ཏེ། དགྱེས་པ་ལ་ལོངས་སྤྱོད་ཅིང་མངོན་པར་འབྱུང་བར་ཡང་མི་འགྱུར་ཏེ། དེ་ལྟར་གྱུར་པ་དང་བདག་ཅག་གི་འཁོར་ལོས་སྒྱུར་བའི་གདུང་ཡང་མི་འཆད། ཁམས་ཀྱི་རྒྱལ་པོ་ཐམས་ཅད་ཀྱིས་ཀྱང་མི་སྙན་པར་མི་བརྗོད་ཅིང་རིམ་གྲོར་བགྱི་བར་འགྱུར་རོ། །དེ་ནས་རྒྱལ་པོ་ཟས་གཙང་མས་སྨྲས་པ། གལ་ཏེ་དེ་ལྟར་བྱ་ན་དེའི་ཕྱིར་གཞོན་ནུའི་ཚུལ་དང་འཐུན་པའི་བུ་མོ་གང་ཞིག་ཡོད་ཁྱེད་ཀྱིས་ལྟོས་ཤིག་།དེའི་ཚེ་ཤཱཀྱ་ལྔ་བརྒྱ་ཙམ་སོ་སོ་ནས་འདི་སྐད་དུ་བདག་གི་བུ་མོ་ནི་གཞོན་ནུའི་ཚུལ་དང་འཐུན་ནོ། །བདག་གི་བུ་མོ་ནི་གཞོན་ནུའི་ཚུལ་དང་འཐུན་ནོ་ཞེས་ཟེར་རོ། །རྒྱལ་པོས་སྨྲས་པ། གཞོན་ནུ་དེ་ནི་ཤིན་དུ་ཕུལ་ཆེ་བ་ཡིན་གྱིས། གཞོན་ནུ་ཉིད་ལ་ཁྱོད་བུ་མོ་གང་འདོད་ཅེས་དྲི་བར་བྱའོ་ཞེས། དེ་དག་ཀུན་ཀྱང་འདུས་ཏེ། གཞོན་ནུ་ལ་དངོས་པོ་དེ་བརྗོད་དོ། །གཞོན་ནུས་སྨྲས་པ། ད་སྟེ་དགུང་བདུན་ན་འདིའི་ལན་གསན་པར་གསོལ། དེ་ནས་བྱང་ཆུབ་སེམས་དཔའ་འདི་སྙམ་དུ་བསམས་ཏེ། འདོད་པའི་སྐྱོན་ནི་བདག་གིས་མཐའ་ཡས་རིག་།ཐབ་མོ་ཁོན་བཅས་མྱ་ངན་སྡུག་བསྔལ་རྩ། །འཇིགས་བྱེད་དུག་གི་ལོ་མ་འདྲ་བ་སྟེ། །མེ་དང་འདྲ་ཞིང་རལ་གྲིའི་སོ་དང་འདྲ། །འདོད་པའི་ཡོན་ཏན 41.82b བདག་འདོད་མ་ཡིན་ཏེ། །བདག་ནི་བུད་མེད་ཚོགས་དང་མཛེས་མ་ཡིན། །བསམ་གཏན་ཏིང་འཛིན་བདེ་བས་ཞི་སེམས་སུ། །བདག་ནི་མི་སྨྲ་ནགས་ཚལ་གནས་པར་བྱ། །ཡང་དེས་བརྟགས་ནས་ཐབས་མཁས་པ་མངོན་དུ་བྱས་ཏེ། སེམས་ཅན་ཡོངས་སུ་སྨིན་པར་བྱ་བ་ལ་བལྟས་ནས། སྙིང་རྗེ་ཆེན་པོ་བསྐྱེད་དེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདམ་དང་ལྕག་ལྕིག་ཁྲོད་ནས་པད་མ་རྣམ་པར་འཕེལ། །མི་རྣམས་གང་བའི་ནང་ན་རྒྱལ་པོ་མཆོད་པ་འཐོབ། །གང་ཚེ་བྱང་ཆུབ་སེམས་དཔའ་འཁོར་མཆོག་ཐོབ་གྱུར་པ། །དེ་ཚེ་སེམས་ཅན་བྱེ་བ་ཁྲག་ཁྲིག་འཆི་མེད་འདུལ། །སྔོན་གྱི་བྱང་ཆུབ་སེམས་དཔའ་མཁས་པ་གང་བྱུང་བ། །དེ་དག་ཀུན་གྱིས་བཙུན་མོ་སྲས་དང་སླས་ཀྱང་བསྟན། །འོན་ཀྱང་འདོད་པས་ཆགས་མེད་བསམ་གཏན་བདེ་མ་ཉམས། །བདག་ཀྱང་དེ་དག་ཡོན་ཏན་རྗེས་སུ་བསླབ་པར་བྱ། །གང་ལ་སྤྱོད་ལམ་ཡོན་ཏན་བདེན་པའི་ཚིག་མེད་པ། །བུད་མེད་ཕལ་པ་གང་ཡང་བདག་གི་ཚུལ་འཐུན་མིན། །གང་ཞིག་བདག་གི་སེམས་ནི་མངོན་པར་དགའ་བྱེད་ཅིང ། །བག་ཡོད་གཟུགས་དང་ན་ཚོད་རུས་རིགས་དག་པ་འོས། །དེས་ནི་ཡོན་ཏན་ཚིགས་སུ་བཅད་དེ་ཡི་གེར་བྲིས། །འདི་འདྲའི་བུ་མོ་མཆིས་ན་བདག་ལ་བཀའ་སྩོལ་ཅིག་།སྐྱེ་བོ་ཕལ་པ་མ་བསྡམས་བདག་ལ་མཁོ་མ་ལགས། །ཡོན་ཏན་བརྗོད་པ་འདི་ལྡན་མཆིས་ན་བདག་སྩོལ་ཅིག་།དར་ཅིང་གཟུགས་བཟང་ལྡན་ཡང་གཟུགས་ཀྱི་དྲེགས་དང་བྲལ། །ཕུ་ནུ་མ་ལ་བྱམས་ལྟར་བྱམས་པའི་སེམས་ལྡན་ཞིང ། །གཏོང་ལ་དགའ་སྟེ་དགེ་སྦྱོང་བྲམ་ཟེ་སྦྱིན་ཚུལ་ཅན། །དེ་འདྲའི་བུ་མོ་མཆིས་ན་ཡབ་ཀྱིས་བདག་སྩོལ་ཅིག་།གང་ལ་ང་རྒྱལ་ཁེངས་དང་ཞེ་སྡང་མ་མཆིས་ཤིང ། །གཡོ་དང་ཕྲག་དོག་སྒྱུ་སྤངས་དྲང་བའི་ངང་ཚུལ་ཅན། །རྨི་ལམ་ན་ཡང་སྐྱེས་པ་གཞན་ལ་ཆགས་དང་བྲལ། །བདག་གི་ཁྱོས་ནི་ཆོག་འཚལ་རྟག་སྡོམ་བག་མཆིས་ལ། །རྒྱགས་པ་མ་མཆིས་མི་གཡེང་ཟུང་ཐུབ་ཚུལ་འཆང་ཞིང ། ། 41.83a ང་རྒྱལ་མ་མཆིས་འགྱིང་དང་བྲལ་བས་བྲན་མོ་བཞིན། །སྒྲ་དྲི་རོ་ལ་མ་ཆགས་ཆང་ལ་མ་ཆགས་ཏེ། །འདོད་བྲལ་བརྣབ་སེམས་མ་མཆིས་རང་གི་ནོར་གྱིས་འཚལ། །བདེན་ལ་གནས་ཤིང་མི་འཕྱར་གཡེང་བ་མ་ལགས་པ། །ངོ་ཚའི་གོས་འཚལ་རྒོད་དང་ཁེངས་པ་མ་མཆིས་གནས། །ལྷ་དང་བཀྲ་ཤིས་མ་ཆགས་རྟག་ཏུ་ཆོས་ལ་བརྩོན། །ལུས་དང་ངག་དང་ཡིད་ཀྱི་དངོས་པོ་རབ་དག་པ། །གཉིད་དང་རྨུགས་པ་མི་མང་ང་རྒྱལ་གླེན་བྲལ་ཞིང ། །རྟོག་དང་ལྡན་ལ་ལེགས་པའི་ལས་རྣམས་རྟག་སྤྱོད་དེ། །གྱོས་སྒྱུག་གཉིས་ལའང་སྟོན་པ་བཞིན་གྱི་རིམ་གྲོར་ལྡན། །བྲན་དང་བྲན་མོ་ཀུན་ལའང་བདག་བཞིན་བྱམས་སྲེལ་བ། །སྨད་འཚོང་བཞིན་དུ་བསྟན་བཅོས་ཆོ་ག་འཚལ་ཅིང་མཁས། །སླད་ཀྱིས་ཉལ་ཞིང་སྔོན་དུ་མལ་ནས་ལྡང་བགྱིད་པ། །བྱམས་པས་རྗེས་སྙེགས་མ་བཞིན་ཚུལ་འཆོས་མ་མཆིས་པ། །དེ་འདྲའི་བུད་མེད་མཆིས་ན་ཡབ་ཀྱིས་བདག་སྩོལ་ཅིག་།དགེ་སློང་དག་དེ་ནས་རྒྱལ་པོ་ཟས་གཙང་མས་ཚིགས་སུ་བཅད་པ་དེ་དག་ཐོས་ནས། མདུན་ན་འདོན་ལ་སྨྲས་པ། བྲམ་ཟེ་ཆེན་པོ་ཁྱོད་སེར་སྐྱའི་གནས་ཀྱི་གྲོང་ཁྱེར་ཆེན་པོར་སོང་ལ། ཁྱིམ་ཐམས་ཅད་དུའང་སོང་སྟེ། བུ་མོ་དག་ལྟོས་ལ་གང་ལ་ཡང་རུང་སྟེ་ཡོན་ཏན་དེ་ལྟ་བུ་དག་ཡོད་ན། རྒྱལ་རིགས་ཀྱི་བུ་མོ་ཡང་རུང ། བྲམ་ཟེའི་བུ་མོ་ཡང་རུང ། རྗེའུ་རིགས་ཀྱི་བུ་མོ་ཡང་རུང ། དམངས་རིགས་ཀྱི་བུ་མོ་ཡང་རུང་གིས། བུ་མོ་དེ་དག་འདིར་འོན་ཅིག་།དེ་ཅིའི་ཕྱིར་ཞེ་ན། གཞོན་ནུ་འདི་ནི་རིགས་དོན་དུ་གཉེར་བ་མ་ཡིན་གྱི། གཞོན་ནུ་འདི་ནི་ཡོན་ཏན་དོན་དུ་གཉེར་བ་ཡིན་ནོ། །དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །རྒྱལ་རིགས་བྲམ་ཟེའི་བུ་མོ་དང ། །རྗེའུ་རིགས་དམངས་རིགས་དེ་བཞིན་ཏེ། །སུ་ལ་ཡོན་ཏན་འདི་ཡོད་པའི། །བུ་མོ་དེ་ནི་འདིར་འོན་ཅིག་།ང་ཡི་བུ་འདི་རིགས་དག་དང ། །རུས་ལ་ངོ་མཚར་འཛིན་མ་ཡིན། །ཡོན་ཏན་བདེན་པ་ཆོས་ཀྱི་རྣམས། ། 41.83b དེ་ལ་འདི་ཡི་ཡིད་དགའ་འོ། །དགེ་སློང་དག་དེ་ནས་བྲམ་ཟེ་མདུན་ན་འདོན་དེས་ཚིགས་སུ་བཅད་པ་ཡི་གེར་བྲིས་པ་དེ་ཁྱེར་ཏེ། སེར་སྐྱའི་གནས་ཀྱི་གྲོང་ཁྱེར་ཆེན་པོར་སོང་ནས། ཁྱིམ་ནས་ཁྱིམ་དུ་ཡོན་ཏན་དེ་ལྟ་བུ་དང་ལྡན་པའི་བུ་མོ་ལྟ་ཞིང་ཚོལ་དུ་སོང་སོང་བ་ལས། ཡོན་ཏན་དེ་ལྟ་བུ་དང་ལྡན་པའི་བུ་མོ་མ་མཐོང་སྟེ། དེ་ནས་རིམ་གྱིས་ཤཱཀྱ་ལག་ན་བེ་ཅོན་ཅན་གྱི་ཁྱིམ་དུ་ཕྱིན་ནས། དེས་བལྟས་ན། བུ་མོ་གཟུགས་མཛེས་ཤིང་བལྟ་ན་སྡུག་ལ་ཡིད་དུ་འོང་བ། མདོག་བཟང་པོ་རྒྱས་པ་མཆོག་དང་ལྡན་པ། ཧ་ཅང་ཡང་མི་རིང་བ། ཧ་ཅང་ཡང་མི་ཐུང་བ། ཧ་ཅང་ཡང་མི་སྦོམ་པ། ཧ་ཅང་ཡང་མི་སྐེམ་པ། ཧ་ཅང་ཡང་མི་དཀར་བ། ཧ་ཅང་ཡང་མི་གནག་པ། གཟོད་མ་དར་ལ་བབ་པ། བུད་མེད་རིན་པོ་ཆེ་ལྟར་སྣང་བ་ཞིག་མཐོང་བ་དང ། བུ་མོ་དེས་བྲམ་ཟེ་མདུན་ན་འདོན་དེའི་རྐང་པ་གཉིས་ནས་བཟུང་སྟེ། འདི་སྐད་ཅེས་སྨྲས་སོ། །བྲམ་ཟེ་ཆེན་པོ་ཁྱོད་ལ་དགོས་པ་ཅི་ཞིག་མཆིས། བྲམ་ཟེ་མདུན་ན་འདོན་གྱིས་ཚིགས་སུ་བཅད་དེ་སྨྲས་པ། ཟས་གཙང་སྲས་པོ་གཟུགས་ནི་མཆོག་ཏུ་མཛེས་གྱུར་ཅིང ། །སུམ་བཅུ་རྩ་གཉིས་མཚན་ལྡན་ཡོན་ཏན་གཟི་བརྗིད་ཅན། །དེ་ཡིས་བུད་མེད་རྣམས་ཀྱི་ཡོན་ཏན་ཡི་གེར་བྲིས། །སུ་ལ་ཡོན་ཏན་འདི་ཡོད་དེའི་ཆུང་མར་འོས། །ཞེས་སྨྲས་ཏེ། དེས་དེ་ལ་ཡི་གེ་དེ་བྱིན་ནོ། །དེ་ནས་བུ་མོ་དེས་ཚིགས་སུ་བཅད་པའི་ཡི་གེ་དེ་ཀླགས་ནས། བཞིན་འཛུམ་པ་བསྟན་ཏེ། བྲམ་ཟེ་མདུན་ན་འདོན་དེ་ལ་ཚིགས་སུ་བཅད་དེ་སྨྲས་པ། བྲམ་ཟེ་ཡོན་ཏན་འདི་དག་བདག་ལ་ཀུན་ཚང་གིས། །དེས་པའི་གཟུགས་ཅན་དེ་ནི་བདག་གི་ཁྱིམ་ཐབ་བོ། །གལ་ཏེ་གཞོན་ནུ་བཞེད་ན་ཕྱི་བཤོལ་མ་མཛད་གསུངས། །བརྒྱ་ལ་སྐྱེ་བོ་ཕལ་དང་བཞུགས་པར་འགྱུར་ཡང་གདའ། །དེ་ནས་བྲམ་ཟེ་མདུན་ན་འདོན་དེ། རྒྱལ་པོ་ཟས་གཙང་མའི་དྲུང་དུ་སོང་སྟེ་དོན་དེ་བརྗོད་པ། རྒྱལ་པོ་ཆེན་པོ་བདག་གིས་གཞོན་ནུའི་ཚུལ་དང་འཐུན་པའི་བུ་མོ 41.84a མཐོང་ངོ ། །རྒྱལ་པོས་སྨྲས་པ། སུ་ལ་དེ་ལྟ་བུ་ཞིག་ཡོད། སྨྲས་པ། ལྷ་ཤཱཀྱ་ལག་ན་བེ་ཅོན་ཅན་ལ་བུ་མོ་དེ་ལྟ་བུ་ཞིག་མཆིས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། གཞོན་ནུ་དེ་ནི་ཤིན་དུ་ཕུལ་ཆེ་ཞིང་བཟང་བ་ལ་མོས་པ་ཡིན་ལ། བུད་མེད་དག་ནི་ཕལ་ཆེར་ཡོན་ཏན་མེད་པ་དག་ཀྱང ། བདག་ལ་ཡོན་ཏན་ཡོད་པར་ཁས་ལེན་གྱིས། བདག་གིས་ཡིད་དུ་འོང་བའི་ཡོ་བྱད་དག་ཅིག་བྱས་ཏེ། གཞོན་ནུ་འདི་བུ་མོ་ཐམས་ཅད་ལ་སྦྱིན་པ་བྱེད་དུ་གཞུག་གོ། །བུ་མོ་དེ་དག་གི་ནང་ནས་གང་ལ་གཞོན་ནུ་མིག་མངོན་པར་ཆགས་པར་གྱུར་པ་དེ། གཞོན་ནུ་ལ་སྦྱིན་པར་བྱའོ་སྙམ་མོ། །དེ་ནས་རྒྱལ་པོ་ཟས་གཙང་མས་ཡིད་དུ་འོང་བའི་ཡོ་བྱད་གསེར་དང ། དངུལ་དང ། རིན་པོ་ཆེ་སྣ་ཚོགས་ལས་བྱེད་དུ་བཅུག་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོར་དྲིལ་གྱི་སྒྲ་བསྒྲགས་ཏེ། དེང་ནས་ཞག་བདུན་ན་ཀུན་གྱིས་ཀྱང་གཞོན་ནུ་མཐོང་བར་འགྱུར་ཏེ། ཡིད་དུ་འོང་བའི་ཡོ་བྱད་དག་ཀྱང་བུ་མོ་དག་ལ་སྦྱིན་པ་བྱེད་ཀྱིས། བུ་མོ་ཐམས་ཅད་ཀྱང་འདུན་ཁང་དུ་ཤོག་ཤིག་ཅེས་བསྒོའོ། །དགེ་སློང་དག་དེ་ནས་ཞག་བདུན་ལོན་པ་དང ། བྱང་ཆུབ་སེམས་དཔའ་འདུན་ཁང་དུ་སོང་སྟེ། སེང་གེའི་ཁྲི་ལ་འདུག་གོ། །དེའི་ཚེ་རྒྱལ་པོ་ཟས་གཙང་མས་བྱ་ར་བ་དག་བཀོད་ནས། གཞོན་ནུ་འདི་བུ་མོ་གང་ལ་མིག་ཆགས་པ་དེ་ང་ལ་གྱིས་ཤིག་ཅེས་བསྒོའོ། །དགེ་སློང་དག་དེ་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོ་དེ་ན་བུ་མོ་གང་ཇི་སྙེད་ཅིག་ཡོད་པ་དེ་དག་ཐམས་ཅད་འདུན་ཁང་ག་ལ་བ་དེ་དང ། བྱང་ཆུབ་སེམས་དཔའ་གང་ན་བ་དེར་བྱང་ཆུབ་སེམས་དཔའ་བལྟ་བ་དང་ཡིད་དུ་འོང་བའི་ཡོ་བྱད་བླངས་པའི་ཕྱིར་དེར་དོང་ངོ ། །དགེ་སློང་དག་དེ་ནས་བྱང་ཆུབ་སེམས་དཔའས་བུ་མོ་ཇི་ལྟར་འོངས་པ་དེ་དག་ལ་ཡིད་དུ་འོང་བའི་ཡོ་བྱད་རྣམས་བྱིན་ནོ། །དེ་ནས་བུ་མོ་དེ་དག་གིས་བྱང་ཆུབ་སེམས་དཔའི་དཔལ་དང་གཟི་བརྗིད་མ་བཟོད་ནས། ཡིད་དུ་འོང་བའི་ཡོ་བྱད་དེ་དག་བླངས་ཤིང་མྱུར་བ་མྱུར་བར 41.84b ཕྱིར་དོང་ངོ ། །དེ་ནས་ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་ཞེས་བྱ་བ། བྲན་མོའི་ཚོགས་ཀྱིས་བསྐོར་ཅིང་མདུན་དུ་བདར་ཏེ། འདུན་ཁང་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་པ་དང ། མིག་མི་འཛུམས་པར་བྱང་ཆུབ་སེམས་དཔའ་ལ་ལྟ་ཞིང་ཕྱོགས་གཅིག་ཏུ་འདུག་པར་གྱུར་ཏོ། །གང་གི་ཚེ་བྱང་ཆུབ་སེམས་དཔས་ཡིད་དུ་འོང་བའི་ཡོ་བྱད་དེ་དག་བྱིན་ཟིན་པར་གྱུར་པ་དེའི་ཚེ་བྱང་ཆུབ་སེམས་དཔའི་དྲུང་དུ་འོངས་ནས་འཛུམ་དམུལ་ཏེ་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །གཞོན་ནུ་བདག་གིས་ཁྱོད་ལ་ནོངས་པ་ཅི་ཞིག་བགྱིས་ན། བདག་ལ་དེ་ལྟར་དངན་སྡང་མཛད། སྨྲས་པ། ངས་ནི་ཁྱོད་ལ་དངན་སྡང་བྱས་པའང་མེད་ན། ཁྱོད་ནི་ཤིན་དུ་འཕྱིས་ཏེ་འོངས་སོ་ཞེས་སྨྲས་ནས་དེས་སོར་གདུབ་སྲང་བརྒྱ་སྟོང་དུ་མ་རི་བ་ཕུད་དེ་དེ་ལ་བྱིན་ནོ། །བུ་མོ་དེས་སྨྲས་པ། གཞོན་ནུ་ཁྱོད་ལ་བདག་གིས་འདི་ལྟ་ཞིག་འཚལ་བ་འོས་སམ། སྨྲས་པ། འོ་ན་རྒྱན་གཞན་དང་གཞན་དག་ཡོད་པ་འདི་དག་ཀྱང་ཁྱོད་ཁྱེར་ཅིག་།དེས་སྨྲས་པ། གཞོན་ནུ་བདག་ནི་རྒྱན་མ་མཆིས་པར་བགྱིད་པ་མ་ལགས་ཀྱི། རྒྱན་དང་ལྡན་པར་བགྱིད་པ་ལགས་སོ། །ཞེས་སྨྲས་ནས་བུ་མོ་དེ་སོང་ངོ ། །དེ་ནས་བྱ་ར་བར་བཀོད་པའི་མི་དེ་དག་རྒྱལ་པོ་ཟས་གཙང་མའི་དྲུང་དུ་སོང་ནས། ལོ་རྒྱུས་དེ་དག་སྨོས་ཏེ་སྨྲས་པ། ལྷ་ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་ཞེས་བགྱི་བ་དེ་ལ་གཞོན་ནུ་སྤྱན་ཆགས་པར་གྱུར་ལ་ཆུང་ཟད་ཅིག་ཏུ་བཀའ་མཆིད་ཀྱང་བགྱིས་སོ། །དེ་ནས་རྒྱལ་པོ་ཟས་གཙང་མས་ཚིག་དེ་ཐོས་ནས་ཤཱཀྱ་ལག་ན་བེ་ཅོན་ཅན་གྱི་གན་དུ་བྲམ་ཟེ་མདུན་ན་འདོན་ཕོ་ཉར་བཏང་སྟེ། ཁྱོད་ཀྱི་བུ་མོ་ཞིག་ཡོད་པ་དེ་ངའི་གཞོན་ནུ་ལ་བྱིན་ཅིག་ཅེས་སྤྲིང་ངོ ། །ལག་ན་བེ་ཅོན་ཅན་གྱིས་སྨྲས་པ། འཕགས་པ་གཞོན་ནུ་དེ་ནི་ཕོ་བྲང་ན་སྐྱིད་དེ་བར་འཁྲུངས་པ་ལགས་ལ། བདག་ཅག་གི་རིགས་ཀྱི་ཆོས་ནི་འདི་ལྟ་བུ་ལགས་ཏེ། སྒྱུ་རྩལ་ཤེས་པ་ལ་བུ་མོ་གཏོང་གི་། 41.85a སྒྱུ་རྩལ་མི་ཤེས་པ་ལ་མི་གཏོང་བ་ལགས་ན། གཞོན་ནུ་དེ་ནི་སྒྱུ་རྩལ་ཤེས་པ་ཡང་མ་ལགས་ལ། རལ་གྲིའི་ཐབས་དང ། འཕོང་དང ། སྟོབས་དང ། གྱད་ཀྱི་འཛིན་སྟངས་ཀྱི་ཚུལ་ཤེས་པ་ཡང་མ་ལགས་ན། བདག་གིས་སྒྱུ་རྩལ་ཤེས་པ་མ་ལགས་པ་ལ་བུ་མོ་ཇི་ལྟར་གཏང ། ཚིག་དེ་རྒྱལ་པོ་ལ་བཟླས་པ་དང ། དེ་ནས་རྒྱལ་པོ་འདི་སྙམ་དུ་སེམས་ཏེ། ང་ལ་དེས་འདི་དང་ལན་གཉིས་སུ་བསྡོས་ཏེ། གང་གི་ཚེ་ངས་ཤཱཀྱ་གཞོན་ནུ་དག་།གཞོན་ནུའི་རིམ་གྲོ་བྱེད་དུ་ཅིའི་ཕྱིར་མི་འོང་ཞེས་བྱས་པ་དེའི་ཚེ་ཡང ། ཅི་ངེད་ལུག་གི་རིམ་གྲོ་བྱེད་དུ་འོང་ངམ་ཞེས་ཟེར་ལ། དའང་འདི་སྐད་ཟེར་རོ་སྙམ་དུ་སེམས་ཤིང་འདུག་པར་གྱུར་ཏོ། །བྱང་ཆུབ་སེམས་དཔས་ཀྱང་གཏམ་དེ་ཐོས་ནས་རྒྱལ་པོ་ཟས་གཙང་མ་ག་ལ་བ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །ཅི་ནོངས་ཏེ་དེ་ལྟར་ཞལ་ཟུང་གནག་པར་བཞུགས། རྒྱལ་པོས་སྨྲས་པ། གཞོན་ནུ་དེ་དྲི་བས་ཅི་ཞིག་བྱ། གཞོན་ནུས་སྨྲས་པ། ལྷ་དེ་ནི་བཀའ་མི་སྩལ་དུ་མི་རུང་ངོ་ཞེས་ལན་གསུམ་གྱི་བར་དུ་བྱང་ཆུབ་སེམས་དཔས་རྒྱལ་པོ་ཟས་གཙང་མ་ལ་དྲིས་པ་དང ། དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་དངོས་པོ་དེ་དག་བརྗོད་དོ། །བྱང་ཆུབ་སེམས་དཔས་སྨྲས་པ། ལྷ་གྲོང་ཁྱེར་འདི་ན་བདག་དང་སྒྱུ་རྩལ་གྱིས་འདྲན་པར་ནུས་པ་འགའ་མཆིས་སམ། དེ་ནས་རྒྱལ་པོ་ཟས་གཙང་མས་བགད་ནས། བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །བུ་ཁྱོད་ཀྱིས་སྒྱུ་རྩལ་བསྟན་པར་ནུས་སམ། སྨྲས་པ། ལྷ་དེ་ནི་བདག་གིས་ལེགས་པར་རྔོ་ཐོག་གོ། །དེ་བས་ན་སྒྱུ་རྩལ་འཚལ་བ་རྣམས་ཀུན་ཀྱང་བསོག་ཏུ་གསོལ། དེ་དག་གི་མདུན་དུ་བདག་གིས། སྒྱུ་རྩལ་བསྟན་པར་བགྱིའོ། །དེ་ནས་རྒྱལ་པོ་ཟས་གཙང་མས་སེར་སྐྱའི་གནས་ཀྱི་གྲོང་ཁྱེར་ཆེན་པོར་དྲིལ་གྱི་སྒྲ་བསྒྲགས་ཏེ། དེང་ནས་ཞག་བདུན་ན་གཞོན་ནུ་རང་གི་སྒྱུ་རྩལ་སྟོན་གྱིས། དེར་སྒྱུ་རྩལ་ཤེས་པ་ཐམས་ཅད་ཤོག་ཤིག་ཅེས་བསྒོའོ། ། 41.85b དེ་ནས་ཞག་བདུན་ལོན་པ་དང ། ཤཱཀྱ་གཞོན་ནུ་ལྔ་བརྒྱ་ཙམ་ཚོགས་པར་གྱུར་ཏོ། །དེ་ནས་ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་རྒྱལ་བའི་རུ་མཚོན་དུ་བཞག་སྟེ། འདིར་རལ་གྲིའི་ཐབས་དང་འཕོང་དང ། སྟོབས་དང ། གྱད་ཀྱི་འཛིན་སྟངས་ཀྱིས་སུ་རྒྱལ་བ་དེ་ནི་འདི་ཁྱེར་ཅིག་ཅེས་དམ་བཅས་ནས། དེའི་ཚེ་ཐམས་ཅད་ཀྱི་ཐོག་མ་ལ་གཞོན་ནུ་ལྷ་སྦྱིན་གྲོང་ཁྱེར་ནས་བྱུང་ངོ ། །དེའི་ཚེ་བྱང་ཆུབ་སེམས་དཔའི་བཞོན་པར་གླང་པོ་དཀར་པོ་བོང་ཤིན་དུ་ཆེ་བ་ཞིག་གྲོང་ཁྱེར་དུ་ཁྲིད་པ་གཞོན་ནུ་ལྷ་སྦྱིན་གྱིས་མཐོང་ནས་ཕྲག་དོག་དང ། ཤཱཀྱའི་ང་རྒྱལ་དང ། སྟོབས་ཀྱི་ང་རྒྱལ་གྱིས་དྲེགས་ནས། དེས་གླང་པོ་དེ་ལག་པ་གཡོན་པས་སྣ་ནས་བཟུང་སྟེ། ལག་པ་གཡས་པས་ཐལ་མོ་ལན་ཅིག་བསྣུན་པས་བསད་པར་གྱུར་ཏོ། །དེའི་འོག་ཏུ་གཞོན་ནུ་མཛེས་དགའ་བོ་བྱུང་བ་དང ། དེས་གླང་པོ་ཆེན་པོ་དེ་གྲོང་ཁྱེར་གྱི་སྒོར་བསད་པ་མཐོང་ནས། སུས་བསད་ཅེས་དྲིས་པ་དང ། སྨྲས་པ། ལྷ་སྦྱིན་གྱིས་བསད་དོ། །སྨྲས་པ། ལྷ་སྦྱིན་གྱིས་དེ་ནི་མ་ལེགས་པ་ཞིག་བྱས་སོ་ཞེས། དེས་གླང་པོ་དེའི་མཇུག་མ་ནས་བཟུང་སྟེ། གྲོང་ཁྱེར་གྱི་སྒོ་ནས་གུད་དུ་བོར་རོ། །དེའི་འོག་ཏུ་བྱང་ཆུབ་སེམས་དཔའ་ཤིང་རྟ་ལ་ཞོན་ཏེ་བྱུང་བ་དང ། བྱང་ཆུབ་སེམས་དཔས་གླང་པོ་དེ་ལྟར་བསད་པ་མཐོང་ངོ ། །མཐོང་ནས་ཀྱང་སུས་བསད་ཅེས་དྲིས་པ་དང ། སྨྲས་པ། ལྷ་སྦྱིན་གྱིས་བསད་དོ། །སྨྲས་པ་ལྷ་སྦྱིན་གྱིས་དེ་ནི་མ་ལེགས་པ་ཞིག་བྱས་སོ། །གྲོང་ཁྱེར་འདིའི་སྒོ་ནས་སུས་བོར་ཞེས་དྲིས་པ་དང ། སྨྲས་པ། མཛེས་དགའ་བོས་བོར་རོ། །སྨྲས་པ། མཛེས་དགའ་བོས་དེ་ལྟར་བྱས་པ་ཡང་ལེགས་ན། སེམས་ཅན་འདི་ནི་ལུས་ཆེན་པོ་དང་ལྡན་པ་སྟེ། རུལ་ན་གྲོང་ཁྱེར་ཐམས་ཅད་དྲི་མི་ཞིམ་པས་གང་བར་འགྱུར་རོ་ཞེས་ནས། དེ་ནས་བྱང་ཆུབ་སེམས་དཔས་ཤིང་རྟ་ལ་འདུག་བཞིན་དུ་རྐང་པ་ཡ་གཅིག་ས་ལ་བརྐྱང་སྟེ། རྐང་པའི་མཐེ་བོས་གླང་པོ་དེ་བླངས་ཏེ། ར་བ་བདུན་རིམ་དང་འོབས་བདུན་རིམ་འདས་ནས་གྲོང་ཁྱེར་གྱི་ཕྱི་རོལ་རྒྱང་གྲགས་གཅིག་ཙམ་དུ་འཕངས་སོ། །གླང་པོ་དེ་ཕྱོགས་གང་དུ་ལྷུང་བའི 41.86a ཕྱོགས་དེ་ཤོང་ཆེན་པོ་ཞིག་ཏུ་གྱུར་ནས། ད་ལྟར་གླང་པོའི་ཤོང་ཞེས་བྱ་བ་ཡིན་ནོ། །དེའི་ཚེ་ལྷ་དང་མི་བརྒྱ་སྟོང་མང་པོ་ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང་ག་ཞའི་སྒྲ་བརྒྱ་སྟོང་འབྱིན་ལ། གོས་ཀྱི་གཡབ་མོ་འབྱིན་པར་གྱུར་ཏོ། །ནམ་མཁའི་དཀྱིལ་ནས་ལྷའི་བུ་དག་གིས་ཀྱང་ཚིགས་སུ་བཅད་པ་འདི་དག་སྨྲས་སོ། །གླང་པོའི་དབང་པོ་བདོ་བ་བཞིན་བཞུད་པ། །ཞབས་ཀྱི་མཐེ་བོས་གླང་པོའི་དབང་པོ་བླངས། །ར་བ་བདུན་དང་འོབས་བདུན་ཡོངས་བཟླས་ནས། །གྲོང་ཁྱེར་འདི་ཡི་ཕྱི་རོལ་རྒྱང་རིང་འཕངས། །མཁྱེན་པ་མཆོག་མངའ་འདིས་ནི་གདོན་མི་ཟར། །ང་རྒྱལ་སྟོབས་ཀྱིས་མཐོ་བའི་ལུས་ཅན་རྣམས། །འཁོར་བའི་གྲོང་ནས་ཕྱི་རོལ་རྒྱང་རིང་དུ། །ཤེས་རབ་སྟོབས་ཀྱིས་འདིས་ནི་འཕེན་པར་འགྱུར། །དགེ་སློང་དག་དེ་ནས་ཤཱཀྱ་གཞོན་ནུ་ལྔ་བརྒྱ་ཙམ་གྲོང་ཁྱེར་ནས་འཐོན་ནས། སའི་ཕྱོགས་གང་དུ་ཤཱཀྱ་གཞོན་ནུ་དག་སྒྱུ་རྩལ་སྟོན་པ་དེར་དོང་ངོ ། །རྒྱལ་པོ་ཟས་གཙང་མ་དང ། ཤཱཀྱ་རྒན་རབས་རྒན་རབས་དག་དང ། སྐྱེ་བོ་ཕལ་པོ་ཆེ་དག་ཀྱང་བྱང་ཆུབ་སེམས་དཔའ་དང ། ཤཱཀྱ་གཞོན་ནུ་གཞན་དག་གི་སྒྱུ་རྩལ་གྱི་ཁྱད་པར་མཐོང་བར་འདོད་དེ་སའི་ཕྱོགས་དེར་དོང་ངོ ། །དེ་ནས་ཐོག་མར་ཤཱཀྱ་གཞོན་ནུ་ཡི་གེ་མཁས་ཤིང་ཡི་གེའི་ཆོ་ག་ཤེས་པ་དེ་དག་དང ། བྱང་ཆུབ་སེམས་དཔར་ཡི་གེ་འགྲན་ཏོ། །དེའི་ཚེ་ཤཱཀྱ་དེ་དག་གིས་སློབ་དཔོན་ཀུན་གྱི་བཤེས་གཉེན་དཔང་དུ་བཞག་སྟེ། གཞོན་ནུ་འདི་དག་གི་ནང་ནས། ཡི་གེ་འབྲུ་འམ། ཡི་གེའི་སྣ་གྲངས་ཀྱི་མཐར་ཕྱིན་པས་ཁྱད་པར་དུ་འཕགས་པ་གང་ཡིན་ཁྱོད་ཀྱིས་བྱེ་བྲག་ཕྱེ་ཤིག་།དེ་ནས་སློབ་དཔོན་ཀུན་གྱི་བཤེས་གཉེན་བྱང་ཆུབ་སེམས་དཔའ་ཡི་གེ་ལ་མཁས་པ་མངོན་དུ་མཐོང་བས་བཞིན་འཛུམ་པ་བསྟན་ཏེ། ཚིགས་སུ་བཅད་པ་འདི་དག་སྨྲས་སོ། །མི་ཡི་འཇིག་རྟེན་ལྷ་ཡི་འཇིག་རྟེན་ནམ། །ལྷ་མིན་འཇིག་རྟེན་དྲི་ཟའི་འཇིག་རྟེན་ནམ། །འཇིག་རྟེན་ཀུན་གྱི་ཡི་གེ་ཇི་སྙེད་གང ། །དེ་ལ་སེམས་ཅན་དག་པ་འདིས་མཐར་ཕྱིན། །མི་ཡི་ཟླ་བ་འདི་ཡིས་གང 41.86b མཁྱེན་པའི། །ཡི་གེ་དག་དང་ཡི་གེའི་སྣ་གྲངས་ཀྱི། །མིང་ཡང་ཁྱེད་དང་ངས་ནི་ཡོང་མི་ཤེས། །འདི་ལ་མངོན་སུམ་ངས་ཤེས་འདི་རྒྱལ་འགྱུར། །ཤཱཀྱ་རྣམས་ཀྱིས་སྨྲས་པ། གཞོན་ནུ་འདི་ཡི་གེའི་ཤེས་པ་ལ་ཁྱད་པར་དུ་འཕགས་པར་ཆུག་སྟེ། གཞོན་ནུ་འདི་གྲངས་ཀྱིས་ཤེས་པ་ལ་ཁྱད་པར་ཅི་ཡོད་འགྲན་པར་བྱའོ། །དེ་ནས་ཤཱཀྱ་སྲིད་སྒྲུབ་ཅེས་བྱ་བ་རྩིས་པ་ཆེན་པོ་བྱེད་པ་བགྲང་བ་དང ། རྩིས་ཀྱི་ཕ་རོལ་ཏུ་ཕྱིན་པ་ཞིག་ཡོད་པ་དེ་དཔང་དུ་བཞག་སྟེ། གཞོན་ནུ་འདི་དག་གི་ནང་ནས་གྲངས་ཀྱི་ཤེས་པ་ལ་ཁྱད་པར་དུ་གང་འཕགས་ཁྱོད་ཀྱིས་ལྟོས་ཤིག་ཅེས་བྱས་ཏེ། དེ་ནས་དེའི་ཚེ་བྱང་ཆུབ་སེམས་དཔས་ནི་རྩིས་མགོ་ཕོག་།ཤཱཀྱ་གཞོན་ནུ་གཅིག་གིས་ནི་བརྩིས་པ་དང ། བྱང་ཆུབ་སེམས་དཔའ་ལ་སླེབས་པར་མ་ནུས་སོ། །དེ་ནས་ཤཱཀྱ་གཞོན་ནུ་གཉིས་དང ། གསུམ་དང ། བཞི་དང ། ལྔ་དང ། བཅུ་དང ། ཉི་ཤུ་དང ། སུམ་བཅུ་དང ། བཞི་བཅུ་དང ། ལྔ་བཅུ་དང ། བརྒྱ་ནས། ཤཱཀྱ་གཞོན་ནུ་ལྔ་བརྒྱའི་བར་གྱིས་དུས་གཅིག་ཏུ་བརྩིས་ཀྱང་བྱང་ཆུབ་སེམས་དཔའ་ལ་མ་སླེབས་སོ། །དེ་ནས་བྱང་ཆུབ་སེམས་དཔས་སྨྲས་པ། ཁྱེད་ཀྱིས་ནི་རྩིས་མགོ་ཕོག་ཤིག་།ཁོ་བོས་ནི་བརྩིའོ། །དེའི་ཚེ་ཤཱཀྱ་གཞོན་ནུ་གཅིག་གིས་རྩིས་མགོ་ཕོག་ན། བྱང་ཆུབ་སེམས་དཔས་བརྩིས་ཀྱི་ཆོད་པ་ལ་མ་སླེབས་སོ། །དེ་ནས་ཤཱཀྱ་གཞོན་ནུ་གཉིས་དང ། གསུམ་དང ། བཞི་དང ། ལྔ་དང ། བཅུ་དང ། ཉི་ཤུ་དང ། སུམ་བཅུ་དང ། བཞི་བཅུ་དང ། ལྔ་བཅུ་དང ། བརྒྱ་ནས་ཤཱཀྱ་གཞོན་ནུ་ལྔ་བརྒྱའི་བར་གྱིས་དུས་གཅིག་ཏུ་རྩིས་མགོ་ཕོག་ཀྱང་བྱང་ཆུབ་སེམས་དཔས་རྩིས་ཀྱིས་ཆོད་པ་ལ་མ་སླེབས་སོ། །བྱང་ཆུབ་སེམས་དཔས་སྨྲས་པ། འདི་ལ་བརྩད་དེ་ཡང་ཅི་རུང་གིས། ཁྱེད་ཐམས་ཅད་གཅིག་ཏུ་འདུས་ཏེ་རྩིས་མགོ་ཕོག་ཤིག་དང ། ཁོ་བོས་བརྩིའོ། །དེ་ནས་ཤཱཀྱ་གཞོན་ནུ་ལྔ་བརྒྱས་ཚིག་གཅིག་ཏུ་བརྗོད་པས་སྔ་ཕྱི་མེད་པར་རྩིས་མགོ་ཕོག་ན། བྱང་ཆུབ་སེམས་དཔས་རྨོངས་པ་མེད་པར་བརྩིས་ཏེ། དེ་ལྟར་ཤཱཀྱ་གཞོན་ནུ་དེ་དག་ཐམས་ཅད་ནི་ཕུག་ཐུག 41.87a པར་གྱུར། བྱང་ཆུབ་སེམས་དཔའ་ལ་ནི་ཐུག་པའི་མཐའ་མེད་པར་གྱུར་ཏོ། །དེ་ནས་རྩིས་པ་ཆེན་པོ་སྲིད་སྒྲུབ་ངོ་མཚར་དུ་གྱུར་ཏེ་ཚིགས་སུ་བཅད་པ་འདི་དག་སྨྲས་སོ། །ལེགས་པའི་བློ་མངའ་འདི་དྲིས་ན། །མཁྱེན་པ་ཤིན་དུ་མྱུར་བ་སྟེ། །ཤཱཀྱ་གཞོན་ནུ་ལྔ་བརྒྱ་ཙམ། །ཀུན་ཀྱང་རྩིས་ཀྱི་ལམ་ལ་ཐུག་།དེ་ཡི་ཤེས་རབ་འདི་འདྲ་སྟེ། །ཡེ་ཤེས་བློ་གྲོས་དྲན་ལྡན་ཡང ། །རྩིས་ཀྱི་མཁྱེན་པ་རྒྱ་མཚོ་དེ། །ད་དུང་སྦྱོང་ཞིང་སློབ་པ་མཛད། །དེ་ནས་ཤཱཀྱའི་ཚོགས་ཐམས་ཅད་ངོ་མཚར་དུ་གྱུར་ཏེ། ཤིན་དུ་རྨད་དུ་བྱུང་བར་སེམས་ཤིང ། དེའི་ཚེ་ཐམས་ཅད་མགྲིན་གཅིག་ཏུ་ཚིག་འདི་སྐད་ཅེས་སྨྲས་སོ། །ཀྱེ་དོན་གྲུབ་གཞོན་ནུ་ཁྱོད་ནི་རྒྱལ་ལོ་རྒྱལ་ལོ་ཞེས་ཐམས་ཅད་སྟན་ལས་ལངས་ཏེ། ཐལ་མོ་སྦྱར་ནས་བྱང་ཆུབ་སེམས་དཔའ་ལ་ཕྱག་འཚལ་ཏེ་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ལ་སྲས་དེ་ལྟར་དྲིས་པ་ལ་སྤོབས་པ་མྱུར་ཞིང་མགྱོགས་ལ། ཡང་ཞིང་ཤུགས་དང་ལྡན་པ་ཅན་མངའ་བ་ནི་བརྙེས་པ་ལེགས་པར་བརྙེས་སོ། །དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །བུ་རྩིས་པ་ཆེན་པོ་སྲིད་སྒྲུབ་གྲངས་ཀྱི་ཤེས་པ་ལ་མཁས་པ་དང ། རྩིས་ཀྱི་ལུགས་འགྲན་ནུས་སམ། སྨྲས་པ། ལྷ་རྔོ་ཐོག་གོ། །སྨྲས་པ་འོ་ན་རྩིས་ཤིག་།དེ་ནས་རྩིས་པ་ཆེན་པོ་སྲིད་སྒྲུབ་ཀྱིས་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །གཞོན་ནུ་ཁྱོད་བྱེ་བ་ལས་བརྒྱར་གོང་དུ་བསྒྲེས་པ་ཞེས་བགྱི་བའི་རྩིས་ཀྱི་ལུགས་མཁྱེན་ཏམ། སྨྲས་པ། ཤེས་སོ། །སྨྲས་པ། འོ་ན་བྱེ་བ་ལས་བརྒྱར་གོང་དུ་བསྒྲེས་པའི་རྩིས་ཀྱི་ལུགས་ལ་ཇི་ལྟར་རྗེས་སུ་འཇུག་པར་བགྱི། བྱང་ཆུབ་སེམས་དཔས་སྨྲས་པ། བྱེ་བ་ཕྲག་བརྒྱ་ན་ཐེར་འབུམ་ཞེས་བྱའོ། །ཐེར་འབུམ་ཕྲག་བརྒྱ་ན་ཁྲག་ཁྲིག་ཅེས་བྱའོ། །ཁྲག་ཁྲིག་ཕྲག་བརྒྱ་ན་གཏམས་པ་ཞེས་བྱའོ། །གཏམས་པ་ཕྲག་བརྒྱ་ན་དཀྲིགས་པ་ཞེས་བྱའོ། །དཀྲིགས་པ་ཕྲག་བརྒྱ་ན་མི་འཁྲུགས་པ་ཤེས་བྱའོ། ། 41.87b མི་འཁྲུགས་ཕྲག་བརྒྱ་ན་ཁྱད་ཕྱིན་ཅེས་བྱའོ། །ཁྱད་ཕྱིན་ཕྲག་བརྒྱ་ན་ཕང་སྟེང་ཞེས་བྱའོ། །ཕང་སྟེང་ཕྲག་བརྒྱ་ན་མང་འཛིན་ཅེས་བྱའོ། །མང་འཛིན་ཕྲག་བརྒྱ་ན་གླང་པོའི་སྟོབས་ཤེས་བྱའོ། །གླང་པོའི་སྟོབས་ཕྲག་བརྒྱ་ན་ངོགས་འཐོབ་ཅེས་བྱའོ། །ངོགས་འཐོབ་ཕྲག་བརྒྱ་ན་རྣམ་པར་གཞག་པ་གདགས་པ་ཞེས་བྱའོ། །རྣམ་པར་གཞག་པ་གདགས་པ་ཕྲག་བརྒྱ་ན་རྒྱུ་རིག་ཅེས་བྱའོ། །རྒྱུ་རིག་ཕྲག་བརྒྱ་ན་ལག་སྦྱིན་ཞེས་བྱའོ། །ལག་སྦྱིན་ཕྲག་བརྒྱ་ན་རྒྱུ་དབང་ཞེས་བྱའོ། །རྒྱུ་དབང་ཕྲག་བརྒྱ་ན་རྫོགས་ཐོབ་ཅེས་བྱའོ། །རྫོགས་ཐོབ་ཕྲག་བརྒྱ་ན་བགྲང་རྟོགས་ཤེས་བྱའོ། །བགྲང་རྟོགས་ཕྲག་བརྒྱ་ན་སྒྲིབ་པ་ཞེས་བྱའོ། །སྒྲིབ་པ་ཕྲག་བརྒྱ་ན་སྟོབས་ཤེས་བྱའོ། །སྟོབས་ཕྲག་བརྒྱ་ན་ཀུན་སྟོབས་ཤེས་བྱའོ། །ཀུན་སྟོབས་ཕྲག་བརྒྱ་ན་རྣམ་པར་བརྡ་ཤེས་ལྡན་ཞེས་བྱའོ། །རྣམ་པར་བརྡ་ཤེས་ལྡན་ཕྲག་བརྒྱ་ན་བརྡ་ཤེས་ཀུན་ཞེས་བྱའོ། །བརྡ་ཤེས་ཀུན་ཕྲག་བརྒྱ་ན་རྣམ་འབྱུང་ཞེས་བྱའོ། །རྣམ་འབྱུང་ཕྲག་བརྒྱ་ན་དེའི་མཚན་ཉིད་ཅེས་བྱ་སྟེ། འདི་ལྟར་དེའི་མཚན་ཉིད་ཅེས་བྱ་བའི་རྩིས་ཀྱིས་ནི་རིའི་རྒྱལ་པོ་རི་རབ་བརྩི་བའི་གཞིར་བྱས་ཀྱང་ཆོད་པར་རུང་ངོ ། །དེ་ཡི་ཡང་གོང་ན་རྒྱལ་མཚན་གྱི་རྩེ་མོའི་ནོར་བུ་ཞེས་བྱ་བའི་གྲངས་ཡོད་དེ། གྲངས་དེས་ནི་གང་གཱའི་ཀླུང་གི་བྱེ་མ་སྙེད་བརྩི་བའི་གཞིར་བྱས་ཀྱང་ཆོད་པར་རུང་ངོ ། །དེའི་ཡང་གོང་ན་རྒྱལ་མཚན་གྱི་རྩེ་མོ་ངེས་པར་སྒྲོགས་པ་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་དེད་འདྲེན་གདགས་པ་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་གཏན་ལ་འབེབས་པ་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་གཅོད་རྟོག་ཤེས་བྱ་བའི་གྲངས་ཡོད་དོ། །དེའི་ཡང་གོང་ན་གཅོད་རྟོགས་ལྡན་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་ཐམས་ཅད་རྣམ་པར་འབྱེས་པ་ཞེས་བྱ་བའི་གྲངས་ཡོད་དེ། གྲངས་དེས་ནི་གང་གཱའི་ཀླུང་བཅུའི་བྱེ་མ་བརྩི་བའི་གཞིར་བྱས་ཀྱང་ཆོད་པར་རུང་ངོ ། །དེའི་ཡང་གོང་ན་སྙིང་པོ་མཆོག་ཅེས་བྱ་བའི་གྲངས་ཡོད་དེ། གྲངས 41.88a དེས་ནི་གང་གཱའི་ཀླུང་བྱེ་བ་ཕྲག་བརྒྱའི་བྱེ་མ་དང་མཉམ་པ་བརྩི་བའི་གཞིར་བྱས་ཀྱང་ཆོད་པར་རུང་ངོ ། །དེའི་ཡང་གོང་ན་རྡུལ་ཕྲ་རབ་ལ་འཇུག་པའི་རྗེས་སུ་སོང་བ་ཞེས་བྱ་བའི་གྲངས་ཡོད་དེ། གྲངས་དེ་ལ་ནི་དེ་བཞིན་གཤེགས་པ་དང ། བྱང་ཆུབ་ཀྱི་སྙིང་པོ་མཆོག་དམ་པར་གནས་པའི་བྱང་ཆུབ་སེམས་དཔའ་དང ། ཆོས་ཐམས་ཅད་ལ་དབང་བསྐུར་བ་མངོན་དུ་གྱུར་པའི་བྱང་ཆུབ་སེམས་དཔའ་མ་གཏོགས་པར་སེམས་ཅན་གྱི་རིས་ན་གྲངས་དེ་ཤེས་པ་ནི་ང་དང་གཞན་ཡང་ང་དང་འདྲ་བ་སྲིད་པ་ཐ་མ་པར་གྱུར་པ་ཁྱིམ་གྱི་གནས་ནས་མངོན་པར་མ་བྱུང་བའི་བྱང་ཆུབ་སེམས་དཔའ་མ་གཏོགས་པ་གང་ཡང་མེད་དོ། །སྲིད་སྒྲུབ་ཀྱིས་སྨྲས་པ། གཞོན་ནུ་རྡུལ་ཕྲ་རབ་ལ་འཇུག་པའི་རྗེས་སུ་སོང་བའི་གྲངས་ལ་ཇི་ལྟར་རྗེས་སུ་འཇུག་པར་བགྱི། བྱང་ཆུབ་སེམས་དཔས་སྨྲས་པ། རྡུལ་ཕྲ་རབ་ཀྱི་རྡུལ་བདུན་ལ་ནི་རྡུལ་ཕྲ་མོ་གཅིག་གོ། །རྡུལ་ཕྲ་མོ་བདུན་ལ་ནི་རྡུལ་ཆུང་ངུ་གཅིག་གོ། །རྡུལ་ཆུང་ངུ་བདུན་ལ་ནི་ཉི་ཟེར་གྱི་རྡུལ་གཅིག་གོ། །ཉི་ཟེར་གྱི་རྡུལ་བདུན་ལ་ནི་རི་བོང་རྡུལ་གཅིག་གོ། །རི་བོང་རྡུལ་བདུན་ལ་ནི་ལུག་རྡུལ་གཅིག་གོ། །ལུག་རྡུལ་བདུན་ལ་ནི་གླང་རྡུལ་གཅིག་གོ། །གླང་རྡུལ་བདུན་ལ་ནི་སྲོ་མ་གཅིག་གོ། །སྲོ་མ་བདུན་ལ་ནི་ཡུངས་འབྲུ་གཅིག་གོ། །ཡུངས་འབྲུ་བདུན་ལ་ནི་ནས་གཅིག་གོ། །ནས་བདུན་ལ་ནི་སོར་གཅིག་གོ། །སོར་བཅུ་གཉིས་ལ་ནི་མཐོ་གང་ངོ ། །མཐོ་དོ་ལ་ནི་ཁྲུ་གང་ངོ ། །ཁྲུ་བཞི་ལ་ནི་གཞུ་གང་ངོ ། །གཞུ་སྟོང་ལ་ནི་ཡུལ་མ་ག་དྷཱའི་རྒྱང་གྲགས་གཅིག་གོ། །རྒྱང་གྲགས་བཞི་ལ་ནི་དཔག་ཚད་གཅིག་གོ། །དེ་ལ་ཁྱེད་ཀྱིས་ནང་ནས་དཔག་ཚད་ལ་རྡུལ་ཕྲ་རབ་དེ་ལྟ་བུ་དུ་ཡོད་སུས་ཤེས། སྲིད་སྒྲུབ་ཀྱིས་སྨྲས་པ། གཞོན་ནུ་བདག་ཉིད་ཀྱང་དེ་ལ་མགོ་རྨོངས་ན་གཞན་བློ་ཆུང་ངུ་དང་ལྡན་པ་ལྟ་སྨོས་ཀྱང་ཅི་འཚལ་དེ་བས་ན་གཞོན་ནུས་དཔག་ཚད་ལ་རྡུལ་ཕྲ་རབ་དེ་ལྟ་བུ་དུ་མཆིས་བཤད་དུ་གསོལ། བྱང་ཆུབ་སེམས་དཔས་སྨྲས་པ། དེ་ལ་དཔག་ཚད་ལ་ནི་རྡུལ་ཕྲ་རབ་མི་འཁྲུགས 41.88b ཁྲག་ཁྲིག་གཅིག་དང ། བྱེ་བ་ཁྲག་ཁྲིག་འབུམ་ཕྲག་སུམ་བཅུ་དང ། བྱེ་བ་དྲུག་བཅུ་ཕྲག་བརྒྱ་དང ། བྱེ་བ་ཕྲག་སུམ་བཅུ་རྩ་གཉིས་དང ། འབུམ་ཕྲག་ལྔ་དང ། ཁྲི་ཉིས་སྟོང་ཡོད་དེ། དཔག་ཚད་ལ་ནི་རྡུལ་ཕྲ་རབ་དེ་སྙེད་ཅིག་ཡོད་དོ། །དེ་ལྟར་འཇུག་པ་དེས་འཛམ་བུའི་གླིང་འདི་ལ་ནི་དཔག་ཚད་བདུན་སྟོང་ཡོད་དོ། །ནུབ་ཀྱི་བ་ལང་སྤྱོད་ལ་ནི་དཔག་ཚད་བརྒྱད་སྟོང་ཡོད་དོ། །ཤར་གྱི་ལུས་འཕགས་ལ་ནི་དཔག་ཚད་དགུ་སྟོང་ཡོད་དོ། །བྱང་གི་སྒྲ་མི་སྙན་ལ་ནི་དཔག་ཚད་ཁྲི་ཡོད་དེ། དེ་ལྟར་འཇུག་པ་དེས་གླིང་བཞི་པའི་འཇིག་རྟེན་གྱི་ཁམས་འདི་ལ་སོགས་པ་གླིང་བཞི་པ་ཆེན་པོའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་དང ། རྒྱ་མཚོ་ཆེན་པོ་བྱེ་བ་ཕྲག་བརྒྱ་དང ། འཁོར་ཡུག་དང་འཁོར་ཡུག་ཆེན་པོ་བྱེ་བ་ཕྲག་བརྒྱ་དང ། རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང ། རྒྱལ་ཆེན་བཞིའི་རིས་ཀྱི་ལྷ་བྱེ་བ་ཕྲག་བརྒྱ་དང ། སུམ་བཅུ་རྩ་གསུམ་བྱེ་བ་ཕྲག་བརྒྱ་དང ། འཐབ་བྲལ་བྱེ་བ་ཕྲག་བརྒྱ་དང ། དགའ་ལྡན་བྱེ་བ་ཕྲག་བརྒྱ་དང ། འཕྲུལ་དགའ་བྱེ་བ་ཕྲག་བརྒྱ་དང ། གཞན་འཕྲུལ་དབང་བྱེད་བྱེ་བ་ཕྲག་བརྒྱ་དང ། ཚངས་རིས་བྱེ་བ་ཕྲག་བརྒྱ་དང ། ཚངས་པའི་མདུན་ན་འདོན་བྱེ་བ་ཕྲག་བརྒྱ་དང ། ཚངས་འཁོར་བྱེ་བ་ཕྲག་བརྒྱ་དང ། ཚངས་ཆེན་བྱེ་བ་ཕྲག་བརྒྱ་དང ། འོད་ཆུང་བྱེ་བ་ཕྲག་བརྒྱ་དང ། ཚད་མེད་འོད་བྱེ་བ་ཕྲག་བརྒྱ་དང ། འོད་གསལ་བྱེ་བ་ཕྲག་བརྒྱ་དང ། དགེ་ཆུང་བྱེ་བ་ཕྲག་བརྒྱ་དང ། ཚད་མེད་དགེ་བྱེ་བ་ཕྲག་བརྒྱ་དང ། དགེ་རྒྱས་བྱེ་བ་ཕྲག་བརྒྱ་དང ། སྤྲིན་མེད་བྱེ་བ་ཕྲག་བརྒྱ་དང ། བསོད་ནམས་སྐྱེས་བྱེ་བ་ཕྲག་བརྒྱ་དང ། འབྲས་བུ་ཆེ་བྱེ་བ་ཕྲག་བརྒྱ་དང ། སེམས་ཅན་འདུ་ཤེས་མེད་པ་བྱེ་བ་ཕྲག་བརྒྱ་དང ། མི་ཆེ་བ་བྱེ་བ་ཕྲག་བརྒྱ་དང ། མི་གདུང་བ་བྱེ་བ་ཕྲག་བརྒྱ་དང ། གྱ་ནོམ་སྣང་བྱེ་བ་ཕྲག་བརྒྱ་དང ། ཤིན་དུ་མཐོང་བྱེ་བ་ཕྲག་བརྒྱ་དང ། འོག་མིན་གྱི་ལྷའི་རིས་བྱེ་བ་ཕྲག་བརྒྱ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་ཅེས་བྱ་སྟེ། ཡངས་ཤིང་རྒྱ་ཆེ་བ་དེ་ལ་དཔག་ཚད་དུ་ཡོད་པ་དང ། དཔག་ཚད་བརྒྱ་ཕྲག་དུ་ཡོད་པ་དང ། དཔག་ཚད་སྟོང་ཕྲག་དུ་ཡོད་པ་དང ། 41.89a དཔག་ཚད་བྱེ་བ་ཕྲག་དུ་ཡོད་པ་དང ། དཔག་ཚད་ཐེར་འབུམ་ཕྲག་དུ་ཡོད་པ་དང ། དཔག་ཚད་ཁྲག་ཁྲིག་ཕྲག་དུ་ཡོད་པ་དང ། དེ་བཞིན་དུ་སྦྱར་ཏེ། དཔག་ཚད་སྙིང་པོ་དམ་པའི་རྩིས་ཀྱི་བར་དུ་ཐུག་པ་ལ་རྡུལ་ཕྲ་རབ་དེ་ལྟ་བུ་དུ་ཡོད་ཅེས་བྱ་བའི་རྩིས་དེ་ནི་གྲངས་དང་བགྲང་བ་ལས་འདས་པ་སྟེ། དེ་ནི་གྲངས་མེད་པ་ཞེས་བྱའོ། །དེ་བས་ཀྱང་ཤིན་དུ་གྲངས་མེད་པ་དེ་སྙེད་ཀྱི་རྡུལ་ཕྲ་རབ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཡོད་དོ། །བྱང་ཆུབ་སེམས་དཔས་རྩིས་ཀྱི་ལེའུ་འདི་བསྟན་པའི་ཚེ། རྩིས་པ་ཆེན་པོ་སྲིད་སྒྲུབ་དང ། ཤཱཀྱའི་ཚོགས་ཐམས་ཅད་ཀྱང་ཚིམ་ཞིང་མགུ་ལ་ཡི་རངས་ཏེ་ངོ་མཚར་རྨད་དུ་བྱུང་བ་ཐོབ་ནས། དེ་དག་ཐམས་ཅད་ཀྱང་གོས་རེ་རེ་ཞིག་བཞག་སྟེ་གོས་དང་རྒྱན་ལྷག་མ་གཞན་བྱང་ཆུབ་སེམས་དཔའ་ལ་ཡོན་དུ་ཕུལ་ལོ། །དེ་ནས་རྩིས་པ་ཆེན་པོ་སྲིད་སྒྲུབ་ཀྱིས་ཚིགས་སུ་བཅད་པ་འདི་དག་སྨྲས་སོ། །བྱེ་བ་བརྒྱ་ན་ཐེར་འབུམ་ཐེར་འབུམ་དེ་བཞིན་དུ། །ཁྲག་ཁྲིག་དང་ནི་གཏམས་པའི་རྒྱུད་དང་དེ་བཞིན་དུ། །དཀྲིགས་པ་མི་འཁྲུགས་བདག་གི་ཤེས་ཐུག་དེ་གོང་མིན། །མཚུངས་པ་མེད་ཀྱི་མཁྱེན་པ་རྩིས་ལ་དེ་བས་ལྷག་།ཡང་ཀྱེ་ཤཱཀྱ་དག་།སྟོང་གསུམ་དག་གི་རྡུལ་དང་རྩཝ་དང་ནགས་ཚལ་དང ། །སྨན་དང་ཆུ་ཡི་ཐིགས་པ་ཇི་སྙེད་ཡོད་པ་ཡང ། །ཧུ་ཞེས་བྱ་བ་གཅིག་ལ་འདི་ཡིས་རྩི་ནུས་ན། །ལྔ་བརྒྱ་ཙམ་དག་གི་ལྟ་ངོ་མཚར་ཅི་ཞིག་ཆེ། །དེ་ནས་ལྷ་དང་མི་བརྒྱ་སྟོང་དག་།ེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང ། ག་ཞའི་སྒྲ་བརྒྱ་སྟོང་འབྱིན་པར་གྱུར་ཏོ། །ནམ་མཁའི་དཀྱིལ་ནས་ལྷའི་བུ་དག་གིས་ཀྱང་ཚིགས་སུ་བཅད་པ་འདི་དག་བརྗོད་དོ། །དུས་གསུམ་སེམས་ཅན་མ་ལུས་ཇི་སྙེད་གང་ཡོད་པའི། །སེམས་དང་སེམས་བྱུང་འདུ་ཤེས་རྣམ་པར་རྟོག་པ་དག་།མཆོག་དང་ཐ་མ་དེ་བཞིན་རྒྱ་ཆུང་ཡངས་པ་དག་།ཐམས་ཅད་སེམས་ཀྱི་འགྱུར་བ་གཅིག་གིས་རབ་ཏུ་མཁྱེན། །དགེ་སློང་དག་དེ་ལྟར་ཤཱཀྱ་གཞོན་ནུ་དེ་དག་ཐམས་ཅད 41.89b ཟིལ་གྱིས་ནོན་པར་གྱུར་ཏེ། བྱང་ཆུབ་སེམས་དཔའ་འབའ་ཞིག་ཁྱད་པར་དུ་འཕགས་པར་གྱུར་ཏོ། །དེའི་རྗེས་ལ་མཆོངས་པ་དང ། རྐྱལ་དང ། བང་ལ་སོགས་པ་ཐམས་ཅད་ལའང་བྱང་ཆུབ་སེམས་དཔའ་ཉིད་ཁྱད་པར་དུ་འཕགས་པར་གྱུར་ནས། ནམ་མཁའི་དཀྱིལ་ནས་ལྷའི་བུ་དག་གིས་ཚིགས་སུ་བཅད་པ་འདི་དག་སྨྲས་སོ། །བརྟུལ་ཞུགས་དཀའ་ཐུབ་སྡོམ་པའི་ཡོན་ཏན་དང ། །བསྐལ་པ་བྱེ་བར་བཟོད་དུལ་བྱམས་སྟོབས་ཀྱིས། །ལུས་དང་སེམས་ནི་ཅི་ནས་ཡང་མཛད་པས། །དེ་ཡི་ཤུགས་ཀྱི་ཁྱད་པར་མཉན་པར་གྱིས། །སེམས་ཅན་མཆོག་འདི་གྲོང་ཁྱེར་འདི་ན་བཞུགས་པར་ཁྱེད་ཀྱིས་མཐོང ། །འོན་ཀྱང་འདི་ནི་ཕྱོགས་བཅུའི་འཇིག་རྟེན་ཁམས་རྣམས་ཐམས་ཅད་དུ། །སྐད་ཅིག་གཅིག་ལ་རིན་ཆེན་གསེར་དང་མཆོད་པ་སྣ་ཚོགས་ཀྱིས། །རྒྱལ་བ་དཔག་ཏུ་མེད་པ་དག་ལ་མཆོད་པ་མཛད་དུ་བཞུད། །འོན་ཀྱང་རྫུ་འཕྲུལ་དེ་འདྲ་བརྙེས་པ་དེ། །བྱོན་ཏམ་བཞུད་པར་ཁྱེད་ཀྱིས་ཡོང་མི་ཤེས། །ཇི་ཙམ་ཞུགས་ཤེས་དེ་ལ་ཅི་ཞིག་བསྐྱེད། །འདི་ནི་མཚུངས་པ་མེད་ཀྱིས་རིམ་གྲོ་སྐྱེད། །དེ་ལྟར་བྱང་ཆུབ་སེམས་དཔའ་དེ་གཅིག་པུ་ཁྱད་པར་དུ་འཕགས་པར་གྱུར་ཏོ། །དེ་ནས་ཤཱཀྱ་དེ་དག་གིས་སྨྲས་པ། གཞོན་ནུ་འདི་ལ་སྟོབས་ཀྱི་ཁྱད་པར་ཅི་ཡོད་པའང་སད་པར་བྱའོ། །དེ་ནས་བྱང་ཆུབ་སེམས་དཔའ་ཕྱོགས་གཅིག་ཏུ་འདུག་ནས། ཤཱཀྱ་གཞོན་ནུ་ལྔ་བརྒྱ་པོ་དེ་དག་ཀྱང་དུས་གཅིག་ཏུ་སོ་སོ་ནས་སྟོབས་འགྱེད་པར་གྱུར་ཏེ། ཤཱཀྱ་གཞོན་ནུ་སུམ་བཅུ་རྩ་གཉིས་ཤིག་འཚོགས་ནས་བྱང་ཆུབ་སེམས་དཔའ་ལ་བརྒལ་བ་ལྟར་ཆས་ཏེ་འཁོད་དོ། །དེའི་ནང་ནས་དགའ་བོ་དང ། ཀུན་དགའ་བོ་གཉིས་ཀྱིས་བྱང་ཆུབ་སེམས་དཔའ་ལ་སྟོབས་བརྒལ་བའི་ཕྱིར་དྲུང་དུ་ཕྱིན་པ་དང ། བྱང་ཆུབ་སེམས་དཔའི་ལག་གིས་རེག་མ་ཐག་ཏུ་དེ་གཉིས་ཀས་ཀྱང་བྱང་ཆུབ་སེམས་དཔའི་མཐུ་དང་གཟི་བརྗིད་མ་བཟོད་དེ་ས་ལ་སྒྱེལ་ཏོ། །དེའི་འོག་ཏུ་ཤཱཀྱ་གཞོན་ནུ་ལྷ་སྦྱིན་ང་རྒྱལ་ཅན་མཐུ 41.90a སྙེམས་པ་དེ་སྟོབས་ཀྱི་ང་རྒྱལ་དང་ཤཱཀྱའི་ང་རྒྱལ་གྱིས་སྙེམས་ལ། བྱང་ཆུབ་སེམས་དཔའ་ལ་སྡོ་ཞིང་ཐམས་ཅད་དང་ལྡན་པའི་ལྟད་མོ་པའི་དཀྱིལ་འཁོར་ལ་བསྐོར་ཏེ། བསྒྱིངས་ནས་བྱང་ཆུབ་སེམས་དཔའ་ལ་སྟོབས་བརྒལ་ཏོ། །དེ་ནས་བྱང་ཆུབ་སེམས་དཔས་མ་སྟབས་ཤིང་མི་རིངས་པར་སྟངས་བཟང་པོར་གཞོན་ནུ་ལྷས་བྱིན་ལག་པ་གཡས་པས་བཏེག་སྟེ་བསད་པའི་བློས་མ་ཡིན་གྱི་ང་རྒྱལ་བཅག་པའི་ཕྱིར་བྱམས་པའི་སེམས་ཀྱིས་ནམ་མཁའ་ལས་བསྐོར་བསྐོར་ཏེ་སའི་སྟེང་དུ་བོར་ཡང་དེའི་ལུས་ལ་གནོད་པར་གྱུར་པ་མེད་དོ། །དེ་ནས་བྱང་ཆུབ་སེམས་དཔས་སྨྲས་པ། དེ་ལྟ་བུ་གནོད་པར་འགྱུར་བས་ཆོག་གིས་ཐམས་ཅད་གཅིག་ཏུ་འདུས་ཏེ་བརྒལ་བར་གྱིས་ཤིག་།དེ་ནས་དེ་དག་ཐམས་ཅད་ང་རྒྱལ་གྱིས་རློམ་ཞིང་བྱང་ཆུབ་སེམས་དཔའ་ལ་རུབ་པར་གྱུར་ཏོ། །དེ་ནས་དེ་དག་བྱང་ཆུབ་སེམས་དཔའ་ལ་རེག་མ་ཐག་ཏུ་བྱང་ཆུབ་སེམས་དཔའི་དཔལ་དང་གཟི་བརྗིད་དང་ལུས་ཀྱི་མཐུ་མ་བཟོད་དེ། བྱང་ཆུབ་སེམས་དཔས་རེག་པ་ཙམ་གྱིས་ས་ལ་སྒྱེལ་བར་གྱུར་ཏོ། །དེ་ནས་ལྷ་དང་མི་བརྒྱ་སྟོང་དེ་དག་ཨེ་མ་ཨ་ལ་ལ་ཞེས་ཟེར་ཞིང ། ཅ་ཅོ་དང་ག་ཞའི་སྒྲ་བརྒྱ་སྟོང་ཕྱུང་ངོ ། །ནམ་མཁའི་དཀྱིལ་ན་འཁོད་པའི་ལྷའི་བུ་དག་གིས་ཀྱང་མེ་ཏོག་གི་ཆར་ཆེན་པོ་མངོན་པར་ཕབ་སྟེ། དབྱངས་གཅིག་ཏུ་ཚིགས་སུ་བཅད་པ་འདི་དག་སྨྲས་སོ། །ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་གྱད་ཆེན་སྟོབས་པོ་ཆེ་འདྲ་ལ། །ཅིག་ཅར་སྐྱེས་བུའི་མཆོག་ལ་རུབ་གྱུར་ཀྱང ། །རེག་པ་ཙམ་གྱིས་ས་ལ་འགྱེལ་བར་འགྱུར། །ལྷུན་པོ་རི་རབ་རྡོ་རྗེའི་འཁོར་ཡུག་དང ། །ཕྱོགས་བཅུ་དག་ན་རི་གཞན་གང་ཡོད་པ། །ལག་པས་མཉེས་ཤིང་དམེག་མེད་ཕྱེར་ཀློག་ན། །མི་ལུས་སྙིང་པོ་མེད་པ་མཚར་ཅི་ཆེ། །འདི་ནི་ཤིང་དབང་མཆོག་དྲུང་སྡང་བའི་གྱད། །དཔུང་བཅས་བདུད་རྣམས་རྒྱལ་མཚན་སྡེར་བཅས་པ། །ནག་པོའི་རྩ་ལག་བྱམས་པའི་སྟོབས་ཀྱིས་འཇོམས། །བླ་མེད་བྱང་ཆུབ་ཞི་བར 41.90b འཚང་ཡང་རྒྱ། །དེ་ལྟར་བྱང་ཆུབ་སེམས་དཔའ་དེ་གཅིག་པུ་ཁྱད་པར་དུ་འཕགས་པར་གྱུར་ཏོ། །དེ་ནས་ཤཱཀྱ་ལག་ན་བེ་ཅོན་ཅན་གྱིས་ཤཱཀྱ་གཞོན་ནུ་དེ་དག་ལ་འདི་སྐད་ཅེས་སྨྲས་སོ། །འདི་དག་ནི་སད་ཀྱང་ཟིན། མཐོང་ཡང་ཟིན་གྱིས་ད་ནི་འཕོང་ཞིག་བསྟན་པར་གྱིས་ཤིག་།དེའི་ཚེ་ཀུན་དགའ་བོས་རྒྱང་གྲགས་གཉིས་ཀྱི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེའི་འོག་ཏུ་ལྷ་སྦྱིན་གྱིས་རྒྱང་གྲགས་བཞིའི་ཕ་རོལ་དུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེའི་འོག་ཏུ་མཛེས་དགའ་བོས་རྒྱང་གྲགས་དྲུག་གི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེའི་འོག་ཏུ་ཤཱཀྱ་ལག་ན་བེ་ཅོན་ཅན་གྱིས་དཔག་ཚད་གཉིས་ཀྱི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེ་ནས་བྱང་ཆུབ་སེམས་དཔས་རྒྱང་གྲགས་བཅུའི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་ཏེ། དེའི་དྲུང་དུ་ཤིང་ཏ་ལ་བདུན་དངར་ནས་དེའི་ཕ་རོལ་ཏུ་ལྕགས་ཀྱི་ཕག་རྒོད་ཀྱི་གཟུགས་འཁྲུལ་འཁོར་དུ་བྱས་པ་གཅིག་བཙུགས་སོ། །དེ་ནས་ཀུན་དགའ་བོས་རྒྱང་གྲགས་གཉིས་ཀྱི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། དེ་ཕན་ཆོད་ཀྱི་ལ་ཕོག་པར་མ་ནུས་སོ། །ལྷ་སྦྱིན་གྱིས་རྒྱང་གྲགས་བཞིའི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། དེ་ཕན་ཆད་ཀྱི་ལ་ཕོག་པར་མ་ནུས་སོ། །མཛེས་དགའ་བོས་རྒྱང་གྲགས་དྲུག་གི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། དེ་ཕན་ཆད་ཀྱི་ལ་ཕོག་པར་མ་ནུས་སོ། །ལག་ན་བེ་ཅོན་ཅན་གྱིས་དཔག་ཚད་གཉིས་ཀྱི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། ཐལ་བྱུང་དུ་ཕྱིན་ནས་དེ་ཕན་ཆད་ཀྱི་ལ་ཕོག་པར་མ་ནུས་སོ། །དེ་ནས་བྱང་ཆུབ་སེམས་དཔའ་ལ་གཞུ་གང་དང་གང་བྱིན་པ་དེ་དག་ལ་ལ་ནི་གཞུ་རྒྱུད་ཆད། ལ་ལ་ནི་ཆག་ནས་བྱང་ཆུབ་སེམས་དཔས་སྨྲས་པ། གྲོང་ཁྱེར་འདི་ན་གཞུ་གཞན་ལ་ལ་བདག་གིས་བརྡུང་བཟོད་པ་འམ། ལུས་ཀྱི་སྟོབས 41.91a དང་མཐུ་བཟོད་པ་མཆིས་སམ། རྒྱལ་པོས་སྨྲས་པ། བུ་ཡོད་དོ། །གཞོན་ནུས་སྨྲས་པ། ལྷ་དེ་ལྟ་བུ་གང་ན་མཆིས། རྒྱལ་པོས་སྨྲས་པ། བུ་ཁྱོད་ཀྱི་མེས་སེང་གེའི་ཟ་འགྲམ་ཞེས་བྱ་བ་བྱུང་སྟེ། དེའི་སྣམ་རུ་ད་ལྟར་ལྷ་ཁང་ན་སྤོས་དང་ཕྲེང་བས་མཆོད་དེ། དེ་ནི་སུས་ཀྱང་བརྡུང་བར་ཡང་མི་ནུས་ན། དགང་བར་ལྟ་སྨོས་ཀྱང་ཅི་དགོས་པ་ཞིག་ཡོད་དོ། །བྱང་ཆུབ་སེམས་དཔས་སྨྲས་པ། ལྷ་དེ་བླང་དུ་གསོལ། སད་པར་བགྱིའོ། །དེ་ནས་གཞུ་དེ་བླངས་ཏེ་འོངས་པ་དང ། ཤཱཀྱ་གཞོན་ནུ་ཐམས་ཅད་ཀྱིས་ནན་ཏན་གྱི་མཆོག་གིས་བསྒྲིམས་ཀྱང་གཞུ་དེ་བརྡུང་བར་ཡང་མ་ནུས་ན་དགང་བར་ལྟ་སྨོས་ཀྱང་ཅི་དགོས་ཏེ་མ་ནུས་སོ། །དེ་ནས་གཞུ་དེ་ཤཱཀྱ་ལག་ན་བེ་ཅོན་ཅན་གྱིས་ལུས་ཀྱི་མཐུ་སྟོབས་ཐམས་ཅད་ཕྱུང་སྟེ། གཞུ་དེ་བརྡུང་བར་བརྒལ་ན་མ་བརྡུངས་སོ། །དེ་ནས་གཞུ་དེ་བྱང་ཆུབ་སེམས་དཔའ་ལ་བྱིན་ནོ། །དེ་ནས་བྱང་ཆུབ་སེམས་དཔས་གཞུ་དེ་བླངས་ཏེ་སྟན་ལས་མ་ལངས་པར་སྐྱིལ་མོ་དཀྲུང་ཕྱེད་བཅས་ཏེ། ལག་པ་གཡོན་པས་བཟུང་ནས་ལག་པ་གཡས་པའི་སོར་མོ་གཅིག་གིས་བརྡུངས་སོ། །གཞུ་དེ་དེ་ལྟར་བརྡུངས་པའི་ཚེ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་དུ་སྒྲ་མངོན་པར་གྲག་པར་གྱུར་ཏོ། །གྲོང་ཁྱེར་གྱི་མི་ཐམས་ཅད་ཀྱང་སྲེག་སྲེག་པོར་གྱུར་ཏེ། གཅིག་ལ་གཅིག་འདྲི་ཞིང་འདི་ལྟར་ཅིའི་སྒྲ་ཞིག་ཅེས་ཟེར་རོ། །དེ་ལ་ལ་ལ་ན་རེ་གཞོན་ནུ་དོན་གྲུབ་ཀྱིས་མེས་ཀྱི་སྣམ་རུ་བརྡུངས་ནས་དེའི་སྒྲ་བྱུང་བ་འདི་ཡིན་ནོ་ཞེས་ཟེར་རོ། །དེ་ནས་ལྷ་དང་མི་བརྒྱ་སྟོང་དག་ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང་ག་ཞའི་སྒྲ་བརྒྱ་སྟོང་འབྱིན་པར་གྱུར་ཏོ། །ནམ་མཁའི་དཀྱིལ་ན་འཁོད་པའི་ལྷའི་བུ་དག་གིས་ཀྱང ། རྒྱལ་པོ་ཟས་གཙང་མ་དང ། སྐྱེ་བོའི་ཚོགས་ཕལ་པོ་ཆེ་དེ་དག་ལ་ཚིགས་སུ་བཅད་དེ་སྨྲས་པ། གདན་ལས་མ་བཞེངས་བརྩལ་བ་མ་མཆིས་སུ། །ཐུབ་པས་སྣམ་རུ་འདི་འདྲ་བརྡུངས་པ་ལས། །གདོན་མི་འཚལ་བར་དགོངས་པ་རྫོགས་གྱུར་ཏེ། །བདུད་ཀྱི་སྡེ་བཅོམ་མྱུར་དུ 41.91b ཐུབ་པར་བྱོན། །དགེ་སློང་དག་དེ་ལྟར་བྱང་ཆུབ་སེམས་དཔས་མདའ་བླངས་ནས་གཞུ་དེ་དང་སྦྱར་ཏེ་བཀང་ནས་འཕངས་པའི་མཐུ་སྟོབས་ཀྱིས་ཀུན་དགའ་བོའི་འབེན་དུ་རྔ་བཙུགས་པ་དང ། ལྷ་སྦྱིན་གྱི་འབེན་དུ་རྔ་བཙུགས་པ་དང ། མཛེས་དགའ་བོའི་འབེན་དུ་རྔ་བཙུགས་པ་དང ། ལག་ན་བེ་ཅོན་ཅན་གྱི་འབེན་དུ་རྔ་བཙུགས་པ་དེ་དག་ཐམས་ཅད་ལས་ཐལ་ནས་རྒྱང་གྲགས་བཅུའི་ཕ་རོལ་ཏུ་བདག་གི་འབེན་ལྕགས་ཀྱི་རྔ་བཙུགས་པ་དང ། ཤིང་ཏ་ལ་བདུན་དངར་བ་དང ། ཕག་རྒོད་ཀྱི་གཟུགས་འཁྲུལ་འཁོར་དུ་བྱས་པ་ལས་ཀྱང་ཐལ་ཏེ་མདའ་དེ་ས་ལ་ཟུག་ནས་མི་སྣང་བར་གྱུར་ཏོ། །ས་ཕྱོགས་གང་དུ་མདའ་དེ་ཟུག་སྟེ་ནུབ་པའི་ས་ཕྱོགས་དེར་ཁྲོན་པ་ལྟ་བུའི་ཁུང་ཞིག་བྱུང་ནས་ད་ལྟར་ཡང་མདའི་ཁྲོན་པ་ཞེས་བྱ་བ་ཡིན་ནོ། །དེའི་ཚེ་ལྷ་དང་མི་བརྒྱ་སྟོང་དག་།ེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང་ག་ཞའི་སྒྲ་བརྒྱ་སྟོང་འབྱིན་པར་གྱུར་ཏོ། །ཤཱཀྱའི་ཚོགས་དེ་དག་ཐམས་ཅད་ཀྱང་ངོ་མཚར་རྨད་དུ་བྱུང་བ་ཐོབ་སྟེ། ཀྱེ་ངོ་མཚར་ཏོ། །འདིས་ནི་བསླབས་ཀྱང་མ་བསླབས་པར་རྩལ་གྱི་ཤེས་པ་དེ་ལྟ་བུ་དང་ལྡན་པ་ནི་ངོ་མཚར་ཆེའོ་ཞེས་ཟེར་རོ། །ནམ་མཁའི་དཀྱིལ་ན་འཁོད་པའི་ལྷའི་བུ་དག་གིས་ཀྱང་རྒྱལ་པོ་ཟས་གཙང་མ་དང ། སྐྱེ་བོའི་ཚོགས་ཕལ་པོ་ཆེ་དེ་དག་ལ་འདི་སྐད་ཅེས་སྨྲས་སོ། །དེ་ལྟར་ངོ་མཚར་ཡང་ཅི་ཆེ་སྟེ། དེ་ཅིའི་ཕྱིར་ཞེ་ན། འདི་ནི་སའི་སྙིང་པོ་སྔོན་གྱི་སངས་རྒྱས་གདན་ལ་བཞུགས། །ཞི་གནས་སྣམ་རུ་ཐོགས་ཤིང་སྟོང་པ་བདག་མེད་མདའ་རྣམས་ཀྱིས། །ཉོན་མོངས་དགྲ་རྣམས་བཅོམ་སྟེ་ལྟ་བའི་དྲ་བ་དྲལ་ནས་སུ། །བྱང་ཆུབ་དམ་པ་ཞི་བ་རྡུལ་མེད་མྱ་ངན་མེད་པ་འཐོབ། །དེ་སྐད་ཅེས་སྨྲས་ནས། ལྷའི་བུ་དེ་དག་གིས་བྱང་ཆུབ་སེམས་དཔའ་ལ་ལྷའི་མེ་ཏོག་དག་གིས་མངོན་པར་གཏོར་ཏེ་དོང་ངོ ། །དེ་བཞིན་དུ་མཆོངས་པ་དང ། ཡི་གེ་དང ། ལག་རྩིས་དང ། རྩིས་དང ། གྲངས་དང ། གྱད་ཀྱི་འཛིན་སྟངས་དང ། རྒྱང་ནས་ཕོག་པ་དང ། བང་དང ། ཚར་དང ། རྐྱལ་དང ། འཕོང་དཔྱད་དང ། གླང་པོ་ཆེའི་གཉར་ཞོན་པ་དང ། རྟ་རྩལ་དང ། ཤིང་རྟའི 41.92a ཐབས་དང ། མདའ་གཞུའི་ཐབས་དང ། བརྟན་པ་དང ། མཐུ་དང ། དཔའ་བ་དང ། འགྱེད་སྟོབས་དང ། ལྕགས་ཀྱུས་སྒྱུར་ཐབས་དང ། ཞགས་པའི་ཐབས་དང ། མདུན་དུ་བསྣུར་བ་དང ། ཕྱིར་བསྣུར་བ་དང ། བཟུར་བ་དང ། འཛིན་སྟངས་དང ། གོམ་སྟབས་དང ། ཐོར་ཚུགས་དང ། གཅད་པ་དང ། དྲལ་བ་དང ། དབུག་པ་དང ། གཞིག་པ་དང ། གཤེག་པ་དང ། མི་འཆོར་བར་འཕོག་པ་དང ། གནད་དུ་འཕོག་པ་དང ། ་ཚབས་ཆེ་བ་དང ། ཆོ་ལོའི་རྩེད་མོ་དང ། སྙན་དངགས་སྦྱར་བ་དང ། ལམ་དང ། རི་མོ་དང ། གཟུགས་དང ། གཟུགས་ཀྱི་ལས་དང ། ཐབས་ཀྱི་དཔྱད་དང ། མེའི་ལས་དང ། རོལ་མོའི་དབྱངས་སྒྲ་དང ། གར་དང ། གླུ་དང ། ཡི་གེ་ཀླག་པའི་མིག་འོར་དང ། གཏམ་དང ། བཞད་གད་དང ། རྩེད་མོ་དང ། བྲོ་དང ། སྒེག་པ་དང ། ཕྲེང་བ་དང ། བརྒྱུ་བ་དང ། རླུང་ཡབ་གཡབ་པ་དང ། ནོར་བུ་ཚོན་གྱིས་བསྒྱུར་བ་དང ། གོས་ཚོན་གྱིས་བསྒྱུར་བ་དང ། མིག་འཕྲུལ་གྱི་ཆོ་ག་དང ། རྨི་ལམ་གྱི་དཔྱད་དང ། བྱའི་སྐད་དང ། བུད་མེད་ཀྱི་མཚན་དང ། སྐྱེས་པའི་མཚན་དང ། གླང་པོ་ཆེའི་མཚན་དང ། རྟའི་མཚན་དང ། བ་ལང་གི་མཚན་དང ། རའི་མཚན་དང ། ལུག་གི་མཚན་དང ། ཁྱིའི་མཚན་དང ། ཤེས་གསལ་དང ། སྒྲ་ངེས་པར་སྦྱོར་བ་དང ། ང་རོ་སྒྱུར་བ་དང ། སྔོན་གྱི་རབས་དང ། སྔོན་བྱུང་བ་དང ། རིག་བྱེད་དང ། ལུང་བསྟན་པ་དང ། ངེས་པའི་ཚིག་དང ། ཡི་གེ་ལྕི་ཡང་དང ། ཚིག་བསྡེབ་པ་དང ། མཆོད་སྦྱིན་གྱི་ཆོ་ག་དང ། སྐར་མའི་ལུགས་དང ། གྲངས་ཅན་གྱི་ལུགས་དང ། རྣལ་འབྱོར་གྱི་ལུགས་དང ། ལས་ཀྱི་ཚོགས་དང ། བྱེ་བྲག་པའི་ལུགས་དང ། ནོར་གྱི་རིག་པ་དང ། ཕུར་བུའི་ལུགས་དང ། ཆུའི་ལུགས་དང ། ལྷ་མ་ཡིན་གྱི་ལུགས་དང ། བྱ་དང་རི་དགས་ཀྱི་སྐད་དང ། གཏན་ཚིགས་ཀྱི་རིག་པ་དང ། རྒྱ་སྐྱེགས་ཀྱི་འཁྲུལ་འཁོར་དང ། སྤྲ་ཚིལ་གྱི་ལས་དང ། འདྲུབ་ཤུར་དང ། བརྐོ་བཞོག་དང ། ལོ་མ་དྲ་བ་དང ། སྤོས་སྦྱར་བ་ལ་སོགས་པའི་སྒྱུ་རྩལ་འཇིག་རྟེན་པ་དང་ལྷའི་དང་མིའི་ལས་འདས་པ་ཐམས་ཅད་ལའང་བྱང་ཆུབ་སེམས་དཔའ་འབའ་ཤིག་ཁྱད་པར་དུ་འཕགས་པར་གྱུར་ཏོ། ། 41.92b དེའི་ཚེ་ཤཱཀྱ་ལག་ན་བེ་ཅོན་ཅན་གྱིས་རང་གི་བུ་མོ་ས་འཚོ་མ། བྱང་ཆུབ་སེམས་དཔའ་ལ་ཕུལ་ལོ། །རྒྱལ་པོ་ཟས་གཙང་མས་ཀྱང ། དེ་རིམ་གྱིས་བག་མར་བླངས་ཏེ་བྱང་ཆུབ་སེམས་དཔའ་ལ་ཕུལ་ལོ། །དེ་ན་བྱང་ཆུབ་སེམས་དཔས་འཇིག་རྟེན་དང་འཐུན་པ་ཙམ་དུ་བྱ་བའི་ཕྱིར་བུད་མེད་བརྒྱད་ཁྲི་བཞི་སྟོང་གི་ནང་དུ་འདུག་སྟེ། དགའ་ཞིང་རྩེ་ལ་ཡོངས་སུ་སྤྱོད་པ་སྟོན་ཏོ། །བུད་མེད་བརྒྱད་ཁྲི་བཞི་སྟོང་དེ་དག་ཐམས་ཅད་ཀྱི་ནང་ན། ཤཱཀྱའི་བུ་མོ་ས་འཚོ་མ་བཙུན་མོའི་མཆོག་ཏུ་དབང་བསྐུར་བར་གྱུར་ཏོ། །དེ་ན་ཤཱཀྱའི་བུ་མོ་ས་འཚོ་མ་གྱོ་སྒྱུག་གམ་ནང་མི་གང་མཐོང་ཡང་རུང་སྟེ། གདོང་མི་སྦེད་དོ། །དེ་དག་ཀྱང་དེ་ལ་བག་སར་མོ་ནི་ཞུམ་ཞུམ་པོར་འདུག་པའི་རིགས་ན། འདི་ནི་རྟག་ཏུ་མ་གཡོགས་སོ་ཞེས་འཕྱ་སྨོད་ཅིང་མི་སྙན་པར་ཟེར་རོ། །དེའི་ཚེ་ཤཱཀྱའི་བུ་མོ་ས་འཚོ་མས་གཏམ་དེ་ཐོས་ནས་ནང་མི་རྣམས་ཀྱི་མདུན་དུ་འདུག་སྟེ། ཚིགས་སུ་བཅད་པ་འདི་དག་སྨྲས་སོ། །འདུག་དང་འགྲེང་དང་འཆག་པ་ལ། །འཕགས་པ་དག་ནི་མ་གཡོགས་མཛེས། །ནོར་བུ་རིན་ཆེན་འོད་གསལ་བ། །རྒྱལ་མཚན་རྩེ་མོར་གསལ་ན་མཛེས། །འཕགས་པ་འགྲོ་ནའང་མཛེས་པ་སྟེ། །འོང་ནའང་དེ་བཞིན་མཛེས་པ་ཡིན། །འགྲེང་བ་འམ་དེ་བཞིན་འདུག་པ་དང ། །ཐམས་ཅད་དུའང་འཕགས་པ་མཛེས། །འཕགས་པ་སྨྲ་ནའང་མཛེས་པ་སྟེ། །མི་སྨྲར་འདུག་ཀྱང་དེ་བཞིན་མཛེས། །དཔེར་ན་ཀ་ལ་པིང་ཀ་ནི། །མཐོང་དང་སྒྲ་ཐོས་དེ་བཞིན་ནོ། །ཀུ་ཤའི་གོས་ནི་གྱོན་པ་དང ། །གོས་ངན་གྱོན་དང་ལུས་རིད་པ། །དེ་ནི་རང་གི་གཟི་ཡིས་མཛེས། །ཡོན་ཏན་ལྡན་པ་ཡོན་ཏན་བརྒྱན། །གང་ལ་སྡིག་པ་མེད་གྱུར་པ། །འཕགས་པ་ཀུན་དུ་དགེ་བ་ཡིན། །བྱིས་པ་སྡིག་པ་བྱེད་པ་ནི། །ཇི་སྙེད་བརྒྱན་ཀྱང་མཛེས་མ་ཡིན། །གང་དག་སྙིང་ལ་སྡིག་པ་ཡོད་ཅིང་ཚིག་འཇམ་པ། །དེ་དག་དུག་གི་བུམ་པར་བདུད་རྩི་བླུགས་པ་བཞིན། །བྲག་གི་སེར་ག་རྩུབ་པ་ལྟ་བུར་ནང་ཡང་རྩུབ། །དེ་འདྲ་དེ་དག་སྦྲུལ་གྱི་ཁ་ལ་ཉུག་པ་བཞིན། །དེས་པ་དེ་དག་གན་དུ་ཀུན་འོང་ཀུན་ཕྱག་འཚལ། ། 41.93a འབབ་སྟེགས་ཐམས་ཅད་ལྟ་བུར་འགྲོ་བ་ཀུན་གྱི་གསོས། །འཕགས་པ་དག་ནི་རྟག་ཏུ་འོ་ཞོས་བཀང་བུམ་འདྲ། །བདག་ཉིད་དག་པ་དེ་འདྲ་མཐོང་ན་བཀྲ་ཤིས་དགེ། །གང་དག་སྡིག་པའི་གྲོགས་པོ་ཡུན་རིང་ཡོངས་སྤོང་ཞིང ། །དགེ་བའི་བཤེས་གཉེན་རིན་པོ་ཆེས་ནི་ཡོངས་བཟུང་ལ། །སྡིག་པ་རྣམ་སྤོང་སངས་རྒྱས་ཆོས་ལ་མངོན་ཆགས་པ། །དེ་ལྟ་བུ་དག་མཐོང་བ་བཀྲ་ཤིས་འབྲས་བུ་ཡོད། །གང་དག་ལུས་བསྡམས་ལུས་ཀྱི་སྐྱོན་རྣམས་རབ་བསྡམས་དང ། །གང་དག་ཚིག་བསྡམས་རྟག་ཏུ་ཚིག་འཆལ་མེད་གྱུར་ལ། །དབང་པོ་སྦས་ཤིང་ཤིན་དུ་བསྡམས་ལ་ཡིད་དང་བ། །དེ་ལྟ་བུ་དག་གདོང་གཡོགས་ཏེ་ནི་ཅི་ཞིག་བྱ། །གལ་ཏེ་ལུས་ལ་གོས་ནི་སྟོང་གིས་གཡོགས་གྱུར་ཀྱང ། །གང་དག་སེམས་བཤུས་ངོ་ཚ་མེད་ཅིང་ཁྲེལ་མེད་དང ། །གང་དག་འདི་འདྲའི་ཡོན་ཏན་མེད་ཅིང་བདེན་ཚིག་མེད། །དེ་དག་སྒྲེན་མོ་བས་ཀྱང་སྒྲེན་མོར་འཇིག་རྟེན་རྒྱུ། །གང་ཞིག་སེམས་སྦས་རྟག་ཏུ་དབང་པོ་བསྡམས་གྱུར་ཅིང ། །བདག་གིས་ཁྱོས་ཆོག་སེམས་ཅན་གཞན་ལ་མི་སེམས་པ། །དེ་འདྲ་བ་དག་ཉི་ཟླ་བཞིན་དུ་མ་གཡོགས་སྣང ། །དེ་འདྲ་བ་དག་གདོང་གཡོགས་ཏེ་ནི་ཅི་ཞིག་བྱ། །གཞན་ཡང་དྲང་སྲོང་བདག་ཉིད་ཆེ་དང་གཞན་སེམས་བློ་མཁས་དང ། །དེ་བཞིན་ལྷ་ཚོགས་དག་གིས་ཁོ་མོའི་བསམ་པ་དང ། །ཁོ་མོའི་ཚུལ་ཁྲིམས་ཡོན་ཏན་སྡོམ་དང་བག་ཡོད་མཁྱེན། །དེ་ལྟ་བས་ན་ཁོ་མོས་གདོང་བཀབ་ཅི་ཞིག་དགོས། །དགེ་སློང་དག་རྒྱལ་པོ་ཟས་གཙང་མས་ཤཱཀྱའི་བུ་མོ་ས་འཚོ་མའི་སྤོབས་པ་དང་བསྟན་པའི་ཚིགས་སུ་བཅད་པ་རྣམ་པ་འདི་ལྟ་བུ་འདི་ཐོས་སོ། །ཐོས་ནས་ཀྱང་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས། རས་བཅོས་སུ་བཟང་པོ་རིན་པོ་ཆེ་དུ་མས་སྤྲས་པ་ཟུང་གཅིག་དང ། མུ་ཏིག་གི་དོ་ཤལ་སྲང་བྱེ་བ་བརྒྱ་སྟོང་རི་བ་དང ། མུ་ཏིག་དམར་པོ་བཟང་པོས་སྤྲས་པའི་གསེར་གྱི་ཕྲེང་བས་ཤཱཀྱའི་བུ་མོ་ས་འཚོ་མ་ལ་བཀབ་ནས་ཆེད་དུ་བརྗོད་པ་འདི་ཆེད་དུ 41.93b བརྗོད་དོ། །ཁོ་བོའི་བུ་ནི་ཡོན་ཏན་ཅི་འདྲས་བརྒྱན་པ་དང ། །མནའ་མ་རང་གི་ཡོན་ཏན་ཇི་ལྟར་རབ་སྨྲ་བ། །སེམས་ཅན་དག་པ་དེ་གཉིས་ཕྲད་པར་གྱུར་པ་ནི། །མར་དང་མར་གྱི་ཉིང་ཀུ་ཇི་ལྟར་འདྲ་བ་བཞིན། །སྒྱུ་རྩལ་བསྟན་པའི་ལེའུ་སྟེ་བཅུ་གཉིས་པའོ།། །། འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བརྒྱད་པ། དགེ་སློང་དག་དེ་ལྟར་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འདུག་པ་ན། གང་དག་བྱང་ཆུབ་སེམས་དཔའ་ལ་མཆོད་པའི་ལས་བྱེད་པ་ལ་སྤྲོ་བར་གྱུར་པ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དུ་མ་དེ་དག་རང་རང་གི་དགའ་བའི་སྒྲ་འབྱིན་ཅིང་ལྷགས་པར་གྱུར་ཏོ། །དེ་ལ་དགེ་སློང་དག་དུས་གཞན་ཞིག་ན་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་མང་པོ་དག་འདི་སྙམ་དུ་སེམས་པར་གྱུར་ཏེ། མ་ལ་སྐྱེས་བུ་དམ་པ་འདི་བཙུན་མོའི་འཁོར་གྱི་ནང་དུ་ཧ་ཅང་ཡུན་རིང་དུ་ཐོགས་པར་གྱུར་ན་སེམས་ཅན་གང་དག་འདིས་ཡུན་རིང་པོ་ནས་བསྡུ་བའི་དངོས་པོ་བཞི་པོ་སྦྱིན་པ་དང ། སྙན་པར་སྨྲ་བ་དང ། དོན་སྤྱད་པ་དང ། དོན་འཐུན་པས་ཡོངས་སུ་སྨིན་པར་བྱས་པ་དང ། གང་དག་འདིས་བྱང་ཆུབ་ཐོབ་ནས། ཆོས་བསྟན་པ་ཤེས་པར་འགྱུར་བ་ཆོས་ཀྱི་སྣོད་དུ་གྱུར་པའི་སེམས་ཅན་དེ་དག་མེད་པར་གྱུར་ནས། ཕྱིས་བྱང་ཆུབ་སེམས་དཔའ་མངོན་པར་བྱུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བ་འམ་ཅིག་ཏུ་མི་འགྱུར་གྲང་སྙམ་མོ། །དེ་ནས་དེ་དག་གུས་པ་དང་བཅས་ཞེ་ས་དང་བཅས་པར་ཐལ་མོ་སྦྱར་ཏེ། བྱང་ཆུབ་སེམས་དཔའ་ལ་ཕྱག་འཚལ 41.94a ནས། ནམ་ཞིག་ན་བདག་ཅག་གིས་བྱང་ཆུབ་སེམས་དཔའ་དམ་པ་མཆོག་རབ་དག་པ་འདི་མངོན་པར་བྱུང་བ་དང ། མངོན་པར་བྱུང་ནས་ཀྱང་ཤིང་གི་རྒྱལ་པོ་ཆེན་པོ་དེའི་དྲུང་དུ་འདུག་སྟེ། བདུད་དཔུང་དང་བཅས་པ་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པའི་སྟོབས་བཅུ་དང་ལྡན་པ་དང ། དེ་བཞིན་གཤེགས་པའི་མི་འཇིགས་པ་བཞི་དང་ལྡན་པ་དང ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་དང་ལྡན་པ་དང ། ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའི་ཆོས་ཀྱི་འཁོར་ལོ་བླ་ན་མེད་པ་སྐོར་ཞིང་སངས་རྒྱས་ཀྱི་རྣམ་པར་རོལ་པ་ཆེན་པོས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་མོས་པ་ཇི་ལྟ་བ་བཞིན་དུ་ལེགས་པར་བཤད་པས་ཚིམ་པར་བྱེད་པ་མཐོང་བར་འགྱུར་སྙམ་པའི་བསམ་པ་དེ་ལྟ་བུས་སྡོད་ཅིང་འཁོད་པར་གྱུར་ཏོ། །དགེ་སློང་དག་དེ་ལ་བྱང་ཆུབ་སེམས་དཔའ་ནི་བསྐལ་པ་གྲངས་མེད་པའི་ཡང་གྲངས་མེད་པ་ནས་བཟུང་སྟེ། ཡུན་རིང་པོར་རྟག་པར་རྒྱུན་དུ་འཇིག་རྟེན་པ་དང ། འཇིག་རྟེན་ལས་འདས་པའི་ཆོས་ཐམས་ཅད་ལ་གཞན་གྱི་དྲིང་མི་འཇོག་པར་གྱུར་ཅིང ། དགེ་བའི་ཆོས་སྤྱོད་པ་ཐམས་ཅད་ལ་བདག་ཉིད་སློབ་དཔོན་དུ་གྱུར་པ་ཡིན་ལ། ཡུན་རིང་པོ་ནས་དུས་ཤེས་པ་དང ། ཚོད་ཤེས་པ་དང ། རན་པ་ཤེས་པར་གྱུར་པ་དང ། མངོན་པར་ཤེས་པ་ལས་མ་ཉམས་པ་དང ། མངོན་པར་ཤེས་པ་ལྔ་དང་ལྡན་པ་དང ། རྫུ་འཕྲུལ་གྱི་རྐང་པས་རྣམ་པར་རྩེ་བ་དང ། སེམས་ཅན་གྱི་བསམ་པ་དང་དབང་པོ་ལ་མཁས་པ་དང ། དུས་དང་དུས་མ་ཡིན་པ་ཤེས་པ་དང ། དུས་ལ་ལྟ་ཞིང་རྒྱ་མཚོ་ཆེན་པོ་ལྟར་དུས་རན་པ་ལས་མི་ཡོལ་བར་གྱུར་པའོ། །དེ་མངོན་པར་ཤེས་པའི་ཡེ་ཤེས་ཀྱི་སྟོབས་དང་ལྡན་པས་འདི་ནི་རབ་ཏུ་གཟུང་བའི་དུས་སོ། །འདི་ནི་ཚར་གཅད་པའི་དུས་སོ། །འདི་ནི་བསྡུ་བའི་དུས་སོ། །འདི་ནི་ཕན་གདགས་པའི་དུས་སོ། །འདི་ནི 41.94b བཏང་སྙོམས་སུ་གཞག་པའི་དུས་སོ། །འདི་ནི་སྨྲ་བའི་དུས་སོ། །འདི་ནི་མི་སྨྲ་བར་བྱ་བའི་དུས་སོ། །འདི་ནི་ཁྱིམ་ནས་འབྱུང་བའི་དུས་སོ། །འདི་ནི་རབ་ཏུ་འབྱུང་བའི་དུས་སོ། །འདི་ནི་ཁ་ཏོན་བྱ་བའི་དུས་སོ། །འདི་ནི་ཚུལ་བཞིན་ཡིད་ལ་བྱ་བའི་དུས་སོ། །འདི་ནི་རབ་ཏུ་དབེན་པར་བྱ་བའི་དུས་སོ། །འདི་ནི་རྒྱལ་རིགས་ཀྱི་འཁོར་གྱི་ནང་དུ་འགྲོ་བའི་དུས་སོ་ཞེས་བྱ་བ་ནས། འདི་ནི་བྲམ་ཟེ་དང་ཁྱིམ་བདག་གི་བར་གྱི་འཁོར་གྱི་ནང་དུ་འགྲོ་བའི་དུས་སོ། །འདི་ནི་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མའི་འཁོར་གྱི་ནང་དུ་འགྲོ་བའི་དུས་སོ། །འདི་ནི་ཆོས་བསྟན་པའི་དུས་སོ། །འདི་ནི་ནང་དུ་ཡང་དག་གཞག་པའི་དུས་སོ་ཞེས་བྱ་བ་ཐམས་ཅད་བདག་ཉིད་ཀྱིས་ཤེས་སོ། །བྱང་ཆུབ་སེམས་དཔའ་དུས་ཐམས་ཅད་དུ་རྟག་པར་འདུ་ཤེས་པར་གྱུར་ཅིང ། དུས་ལ་ལྟ་བ་ཡིན་ཡང་དགེ་སློང་དག་འདི་ནི་ཆོས་ཉིད་ཀྱིས་ཐོབ་པ་ཡིན་ཏེ། སྲིད་པ་ཐ་མ་པའི་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འཁོད་པ་རྣམས་ལ་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་རྣམས་གླུ་དབྱངས་དང་སིལ་སྙན་གྱི་སྒྲ་ལས་ཆོས་ཀྱི་སྒོ་རྣམ་པ་འདི་ལྟ་བུ་འདི་དག་གིས་ཡང་དག་པར་བསྐུལ་བ་མཛད་དོ། །དེ་ལ་འདི་སྐད་ཅེས་བྱ་སྟེ། སེམས་ཅན་མཆོག་གང་ཕྱོགས་བཅུའི་འཇིག་རྟེན་བཞུགས། །དེ་དག་མཐུ་ཡིས་སིལ་སྙན་སྒྲ་དག་ལས། །ཚིགས་བཅད་སྒྲ་སྙན་འདི་དག་བྱུང་བ་ཡིས། །མི་མཆོག་དམ་པ་རྣམས་ལ་ཡང་དག་སྐུལ། །སྡུག་བསྔལ་བརྒྱས་གང་སེམས་ཅན་མཐོང་ནས་ནི། །འགྲོ་བའི་མགོན་དང་སྐྱབས་དང་གནས་འགྱུར་ཞིང ། །ཕན་བྱེད་མཆོག་དང་དཔུང་གཉེན་གྱུར་ཅིག་ཅེས། །ཁྱོད་ཀྱིས་སྔོན་ནི་སྨོན་ལམ་དེ་སྐད་བཏབ། །དགེ་བ་དཔའ་བོ་སྔོན་གྱི་སྤྱོད་པ་དང ། །འགྲོ་ཕན 41.95a བྱ་ཞེས་སྨོན་བཏབ་དྲན་པར་བྱོས། །འདི་ནི་ཁྱོད་ཀྱིས་དུས་མན་ཚོད་ཡིན་གྱིས། །དྲང་སྲོང་མཆོག་རབ་མངོན་པར་འབྱུང་བར་བྱོས། །སངས་རྒྱས་ལྷ་མི་འདུལ་བྱེད་འཇིག་རྟེན་མཆོག་།ཡོན་ཏན་བརྒྱས་གང་བར་ནི་གྱུར་ཅིག་ཅེས། །དེའི་ཕྱིར་ཁྱོད་སྔོན་མགོ་དང་རྐང་ལག་དང ། །ནོར་གྱི་དམ་པ་སྣ་ཚོགས་རྣམས་ཀྱང་བཏང ། །ཁྱོད་ནི་ཁྲིམས་ཀྱིས་བརྟུལ་ཞུགས་དཀའ་ཐུབ་སྤྱད། །ཁྱོད་ནི་བཟོད་པས་འགྲོ་ལ་ཕན་པ་བྱེད། །ཁྱོད་ནི་བརྩོན་པས་ཡོན་ཏན་བརྒྱ་ཡིས་གང ། །བསམ་གཏན་ཤེས་རབ་སྲིད་གསུམ་མཉམ་པ་མེད། །ཁྲོ་བས་ནོན་ཅིང་ཐ་བའི་དྲི་མང་བ། །དེ་དག་བདེ་གཤེགས་ཁྱོད་ཀྱི་བྱམས་པས་ཁྱབ། །དགེ་བའི་ཡོན་ཏན་བྲལ་བ་ལོག་ངེས་པ། །མི་མཁས་རྣམ་མང་དག་ལ་ཁྱོད་སྙིང་རྗེ། །བསོད་ནམས་ཡེ་ཤེས་དགེ་བའི་ལུས་ཁྱབ་ཅིང ། །རྡུལ་བྲལ་བསམ་གཏན་མངོན་ཤེས་ལམ་མེར་འདུག་།ཕྱོགས་བཅུ་འདི་དག་རྣམས་སུ་རབ་ཏུ་གསལ། །སྤྲིན་མེད་ཟླ་བ་དྲི་མ་མེད་པ་འདྲ། །འདི་དང་གཞན་ཡང་སྙན་པ་རྣམ་མང་གིས། །སིལ་སྙན་དག་ལས་རྒྱལ་བས་སྒྲ་བསྒྲགས་ཏེ། །མངོན་པར་ཁྱོད་འབྱུང་དུས་ནི་འདི་ཡིན་ཞེས། །ལྷ་མིས་མཆོད་པར་འོས་ལ་སྐུལ་མ་འདེབས། །དགེ་སློང་དག་བྱང་ཆུབ་སེམས་དཔའ་ཁྱིམ་དམ་པ་མཆོག་ཡོ་བྱད་ཕུན་སུམ་ཚོགས་པ་ཐམས་ཅད་དང་ལྡན་པ། བསམ་པ་ཇི་ལྟ་བ་བཞིན་དུ་བདེ་བར་གནས་པ་དང་འཐུན་པ། ལྷའི་ཁང་ཁྱིམ་ལྟ་བུ་སྟེགས་བུ་དང ། སྒོ་ཁང་དང ། རྟ་བབས་དང ། སྐར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁང་བཟངས་མཆོག་དང ། རིན་པོ་ཆེ་སྣ་ཚོགས་ཀྱི་རྒྱན་རྣམ་པ་ཐ་དད་པ་དབྱེ་བ་ཤིན་དུ་རྣམ་པར་ཕྱེ་བ། གདུགས་དང ། རྒྱལ་མཚན་དང ། བ་དན་བསྒྲིང་བ། རིན་པོ་ཆེའི་དྲིལ་བུ་གཡེར་ཀའི་དྲ་བ་དུ་མས་ལེགས་པར་བརྒྱན་པ། དར་གྱི་ལྡ་ལྡི་བརྒྱ་སྟོང་དུ་མས་མངོན་པར་སྤྱངས་པ། རིན་པོ་ཆེ་སྣ་ཚོགས་ཀྱིས་སྤྲས་པའི་མུ་ཏིག་གི་རྒྱན་ཕྲེང་རབ་ཏུ་སྤྱངས་པ། རིན་པོ་ཆེ་སྣ་ཚོགས་ཀྱི་སྤང་ལེབ་ཅན་གྱི་ཟམ་པས་མཛེས་པར་བྱས་པ། མེ་ཏོག་གི་ཕྲེང་བ 41.95b དང་ཆུན་པོ་མང་པོ་སྤྱངས་པ། པོག་སྣོད་ནས་སྤོས་ཀྱིས་བདུགས་པ། དར་ལའི་བླ་རེ་བྲེས་པ། དུས་ཐམས་ཅད་པའི་མེ་ཏོག་དྲི་མཆོག་ཏུ་ཞིམ་ཞིང ། ཤིན་དུ་མཛེས་པ་དག་བཀྲམ་པ། རྫིང་མེ་ཏོག་པད་མ་དཀར་པོ་དང ། པད་མ་དང་ལྡན་པའི་ཆུའི་གནས་ཡོངས་སུ་སྤྱད་པར་བྱ་བ་མང་བ། བྱ་འདབ་སྐྱོབ་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། ངང་པ་དང ། རྨ་བྱ་དང ། ངུར་པ་དང ། ཀུ་ན་ལ་དང ། ཀ་ལ་པིང་ཀ་དང ། ཤང་ཤང་ཏེའུ་ལ་སོགས་པ་བྱ་རྣམ་པ་ཐ་དད་པའི་ཚོགས་སྒྲ་སྙན་པ་འབྱིན་པ། བཻ་དཱུརྱ་སྔོན་པོའི་ས་གཞི་གནས་ཡོངས་སུ་སྤྱད་པར་བྱ་བ། གཟུགས་ཐམས་ཅད་ཀྱི་གཟུགས་བརྙན་ཀུན་དུ་སྟོན་པ། བལྟ་བས་མི་ངོམས་པར་ཉམས་དགའ་བ། དགའ་བ་དང་མཆོག་ཏུ་དགའ་བ་དམ་པ་སྐྱེད་པའི་ཁྱིམ་དམ་པ་མཆོག་དེ་ན་འདུག་སྟེ། བྱང་ཆུབ་སེམས་དཔའ་ཁང་པ་མཛེས་པ་ཆེན་པོ་མཆོག་ན་གནས་པ། དྲི་མ་མེད་པ། དྲི་མ་དང་བྲལ་བ། ཡན་ལག་དྲི་མ་མེད་པ། ཕྲེང་བ་དང་རྒྱན་མ་བོར་བ། དྲི་མཆོག་ཏུ་ཞིམ་པ་དམ་པའི་བྱུག་པས་ལུས་བསྐུས་པ། དཀར་ཞིང་བཟང་ལ་དྲི་མ་མེད་ཅིང་རྣམ་པར་དག་ལ་དྲི་མ་དང་བྲལ་བའི་གོས་གྱོན་པའི་ལུས་དང་ལྡན་པ། མལ་ཆ་ལྷའི་རས་བཅོས་བུ་བཟང་པོ་ཕྲ་བ་དུ་མ་བཏིང་བ་འཇམ་པ་ཀ་ཙ་ལིན་དིའི་གོས་ལྟར་རེག་ན་བདེ་བ། ཡན་ལག་དམ་པས་སྤྲས་པའི་མལ་བཟང་པོའི་སྟེང་ན་འདུག་པ་བཙུན་མོའི་འཁོར་དམ་པ། ལྷའི་བུ་མོ་དང་འདྲ་བ། ཐམས་ཅད་དུ་ཁ་ན་མ་ཐོ་བ་མེད་པ། ལྟ་བ་དང་འཐུན་པ། སྤྱོད་པ་བཟང་པོས་མཛེས་པར་བྱས་པ། གཟུགས་བཟང་བའི་ནང་ན་འདུག་པ། དུང་དང ། རྔ་དང ། རྫ་རྔ་དང ། ཁར་རྔ་དང ། པི་བང་དང ། རྒྱུད་གསུམ་པ་དང ། ཁར་བའི་སིལ་ཁྲོལ་དང ། ཕེག་དང ། ཀིམ་པ་ལ་དང ། ན་ཀུ་ལ་དང ། སྒྲ་སྙན་དང ། གླིང་བུའ་སྙན་པའི་སྒྲ་འབྱུང་བའི་སྒྲ་དབྱངས་དང ། སིལ་སྙན་དང ། གླུ་དབྱངས་སྣ་ཚོགས་དང་ལྡན་པས་བསླང་བ་ལ། བུད་མེད་ཀྱི་ཚོགས་ཀྱིས་ཀྱང ། སྒྲ་མཉེན་ཞིང་འཇམ་པ་སྙན་ལ་ཡིད་དུ 41.96a འོང་བ་དང ། གླིང་བུ་འབུད་པའི་སྒྲ་དབྱངས་ཀྱིས་བྱང་ཆུབ་སེམས་དཔའ་སློང་ངོ ། །ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་དེ་དག་གི་བྱིན་གྱི་རླབས་ཀྱིས་སིལ་སྙན་སྒྲ་བྱུང་བའི་སྒྲ་སྐད་དེ་དག་ལས་བྱང་ཆུབ་སེམས་དཔའ་ལ་སྐུལ་བའི་ཚིགས་སུ་བཅད་པ་འདི་དག་བྱུང་ངོ ། །བུད་མེད་གང་དག་རབ་ཏུ་ཡིད་དགའ་སེམས་དང་བས། །སིལ་སྙན་ཡིད་དུ་འོང་ཞིང་སྙན་པའི་སྒྲ་འབྱིན་ཚེ། །ཕྱོགས་བཅུའི་རྒྱལ་བ་དམ་པ་དག་གི་མཐུ་ཡིས་ནི། །ཚིགས་བཅད་རྣམ་པ་སྣ་ཚོགས་རྣམ་མང་འདི་དག་བྱུང ། །རྟག་ཏུ་མགོན་མེད་གྱུར་པའི་འགྲོ་བ་འདི་མཐོང་ནས། །གོ་འཕང་མྱ་ངན་མེད་མཆོག་རྡུལ་མེད་སངས་རྒྱས་ཏེ། །སྐྱེ་དང་རྒ་དང་སྡུག་བསྔལ་དག་ལས་དགྲོལ་ལོ་ཞེས། །དཔའ་བོ་ཁྱོད་སྔོན་སྨོན་ལམ་དེ་སྐད་བཏབ་པར་གྱུར། །དེ་ཕྱིར་དགེ་མྱུར་གྲོང་ཁྱེར་མཆོག་འདི་ནས། །བྱུང་ལ་སྔོན་གྱི་དྲང་སྲོང་ཞབས་བཅགས་པ། །ས་ཕྱོགས་དེ་ནི་རབ་ཏུ་མནན་ནས་སུ། །རྒྱལ་བའི་ཡེ་ཤེས་མཚུངས་མེད་འཚང་རྒྱར་གྱིས། །ཁྱོད་ཀྱིས་སྔོན་ཆད་སྣ་ཚོགས་རིན་ཆེན་ནོར། །རྐང་ལག་ཕངས་པའི་ལུས་ཀྱང་བཏང་བར་གྱུར། །དྲང་སྲོང་ཆེན་པོ་དི་རིང་ཁྱོད་དུས་འདི། །ཆོས་ཀྱི་ཆུ་བོ་མཐའ་ཡས་འགྲོ་ལ་ཕྱེ། །ཁྱོད་ཀྱི་ཚུལ་ཁྲིམས་མ་ཉམས་དྲི་མེད་དགེ། །སྔོན་ཆད་ཁྱོད་ནི་རྟག་ཏུ་མཆོག་གིས་བརྒྱན། །དྲང་སྲོང་ཆེན་པོ་ཁྱོད་ཁྲིམས་འདྲ་བ་མེད། །འགྲོ་བ་ཉོན་མོངས་རྣམ་པ་མང་ལས་ཁྲོལ། །ཁྱོད་ཀྱིས་སྲིད་པ་བརྒྱར་ནི་བཟོད་པ་སྤྱད། །ཁྱོད་ནི་འགྲོ་བས་ངན་བརྗོད་རྣམ་མང་བཟོད། །བཟོད་པས་བཟོད་ཅིང་དུལ་བས་དེས་པའི་བདག་།རྐང་གཉིས་དབང་པོ་མངོན་པར་འབྱུང་བློ་གྱིས། །ཁྱོད་བརྩོན་བརྟན་ཞིང་མི་གཡོ་གཡོ་བ་མེད། །བདེ་བར་གཤེགས་པ་སྔོན་མཐར་རྒྱ་ཆེན་གྱུར། །གཡོན་ཅན་བདུད་ནི་སྡེ་དང་བཅས་བཏུལ་ཏེ། །ངན་སོང་གསུམ་པོ་མཐའ་དག་སྐམས་པར་གྱིས། །གང་ཕྱིར་ཁྱོད་ཀྱིས 41.96b བརྟུལ་ཞུགས་དཀའ་ཐུབ་སྤྱད། །དུས་ངན་ཉོན་མོངས་སྙིགས་མ་བསྲེགས་གྱིས་ལ། །ཁྱོད་ཀྱིས་བདུད་རྩི་ཆུ་བོའི་ཆར་ཕོབ་སྟེ། །མགོན་མེད་རིང་ནས་སྐོམ་པ་ཚིམ་པར་གྱིས། །འཆི་མེད་མྱ་ངན་མེད་གནས་སངས་རྒྱས་ཏེ། །སྐོམ་པས་ཉམ་ཐག་བདུད་རྩིས་ཚིམ་བྱ་ཞེས། །ཁྱོད་ཀྱིས་སྔོན་སྨྲས་ཚིག་མཆོག་དྲན་བྱོས་ཏེ། །གྲོང་ཁྱེར་དམ་པ་འདི་ནས་མྱུར་དུ་བྱུང ། །ཁྱོད་ནི་ཤེས་རབ་མཆོག་གི་སྤྱོད་པ་མཁས། ཁྱོད་ཀྱི་ཡེ་ཤེས་མཐའ་ཡས་དྲི་མེད་ཆེ། །རྨངས་པ་ཡིད་གཉིས་ལམ་ལ་གནས་རྣམས་ལ། །ཤེས་རབ་འོད་དགེ་དམ་པ་མཛེས་པར་གྱིས། །ཁྱོད་ཀྱིས་སྲིད་པ་བརྒྱར་ནི་བྱམས་པ་སྤྱད། །སྙིང་རྗེ་དང་ནི་དགའ་མཆོག་བཏང་སྙོམས་དང ། །ཁྱོད་ཀྱིས་སྤྱོད་པ་དམ་པ་གང་སྤྱད་པ། །སྤྱོད་པ་དེ་ཉིད་འགྲོ་ལ་རྣམ་པར་ཕྱེ། །ཕྱོགས་བཅུའི་རྒྱལ་བ་དག་གི་གཟི་བརྗིད་ཀྱིས། །ཡོན་ཏན་མེ་ཏོག་སྣ་ཚོགས་ཚིགས་བཅད་འདི། །སིལ་སྙན་དག་ལས་རྣམ་མང་ཡིད་འོང་གྲག་།མལ་ན་འདུག་པའི་གཞོན་ནུ་དེ་ལ་སྐུལ། །གང་གི་ཚེ་ན་དགའ་བྱེད་བུད་མེད་རབ་ཏུ་དགའ་བ་རྣམས། །ཤིན་དུ་མཛེས་ཤིང་རབ་ཏུ་སྙན་པའི་སིལ་སྙན་སྒྲོགས་པའི་ཚེ། །ཕྱོགས་བཅུ་དག་གི་རྒྱལ་བ་ལྷ་མི་འདུལ་བ་མཛད་རྣམས་ཀྱང ། །སིལ་སྙན་དག་ལས་གསུང་མཆོག་ཧ་ཅང་མི་ཆེ་རྗེས་སུ་སྒྲོག་།འགྲོ་ལ་ཕན་བྱེད་ཡོན་ཏན་མང་པོ་ལྡན་ཁྱོད་འགྲོ་རྣམས་སུ། །རྣམ་པར་རྒྱུ་བའི་ཚེ་ན་རྒྱལ་བའི་ཡོན་ཏན་གཉུག་མར་བྱས། །སྔོན་གྱི་བརྟུལ་ཞུགས་དཀའ་ཐུབ་སྤྱད་པ་དེ་དག་དྲན་གྱིས་ཏེ། །ཤིང་མཆོག་དྲུང་དུ་མྱུར་སོང་འཆི་མེད་གོ་འཕང་ཐོབ་པར་གྱིས། །ལྷ་མི་དག་ནི་ཤིན་དུ་སྐོམ་ཞིང་རྒྱལ་བའི་ཡོན་ཏན་བྲལ། །ཁྱོད་ནི་ཤིན་ཏུ་སྟོབས་ལྡན་བདུད་རྩིའི་རོ་བྲོ་རྟག་ཏུ་སྦྱིན། །སྟོབས་བཅུའི་རོ་བྲོ་དམ་པ་མཁས་པ་རྣམས་ཀྱིས་མཆོད་བྱས་པ། །བདུད་རྩི་དེ་ནི་མི་བདག་ཁྱོད་ཀྱིས་མྱུར་དུ་རྣམ་པར་ཕྱེ། །རྒྱལ་བའི་ཡོན་ཏན་འགྲོ་ལ 41.97a ཕན་པ་བྱེད་ལ་དགའ་བ་པོ། །ཁྱོད་ཀྱིས་སྔོན་གྱི་སྲིད་པར་ནོར་དང་ནོར་བུ་གསེར་རྣམས་བཏང ། །ཆུང་མ་བུ་སྡུག་དག་དང་གྲོང་ཁྱེར་གྲོང་རྡལ་བཅས་པ་དང ། །རང་གི་མགོ་དང་མིག་དང་ལག་པ་དག་དང་རྐང་པའང་བཏང ། །མི་མཆོག་ཁྱོད་ནི་གནའ་སྔོན་རྒྱལ་པོ་དགེ་བར་གྱུར་པའི་ཚེ། །མི་ཞིག་ཁྱོད་ལ་མངོན་དུ་ཕྱོགས་ནས་འདི་སྐད་ཚིག་སྨྲས་ཏེ། །གྲོང་ཁྱེར་གྲོང་རྡལ་བཅས་པའི་ས་འདི་ཁོ་ལ་བྱིན་ཞེས་བྱས། །དེ་ཡི་ཚེ་ན་རབ་ཏུ་དགའ་ཞིང་འཁྲུགས་པར་གྱུར་པ་མེད། །གནའ་སྔོན་ཁྱོད་ནི་རྒྱལ་པོའི་བྲམ་ཟེ་དགེ་བར་གྱུར་པའི་ཚེ། །སྐྱེ་བོ་བླ་མ་བསྙེན་བཀུར་བྱེད་ཅིང་གཞན་ལ་འཁུ་མི་བྱེད། །བྲམ་ཟེ་དམ་པ་དག་དང་སྐྱེ་བོ་མང་པོ་དགེ་ལ་བཀོད། །དེ་ནས་ཤི་འཕོས་སྲིད་པའི་འགྲོ་བ་ལྷ་ཡི་གནས་སུ་སྐྱེས། །སྔོན་ཁྱོད་རྒྱལ་པོའི་བུ་ལས་དྲང་སྲོང་དམ་པར་གྱུར་པའི་ཚེ། །རྒྱལ་པོ་ངན་པ་ཁྲོས་པས་ཁྱོད་ཀྱི་ཡན་ལག་བཅད་པ་ན། །ཁྱོད་ནི་ཡིད་འཁྲུགས་གྱུར་པ་མེད་པར་འཆི་བའི་དུས་བྱས་ཏེ། །དེ་ཡི་ཚེ་ན་ཁྱོད་ཀྱི་རྐང་ལག་དག་ལས་འོ་མ་ཟག་།ཁྱོད་སྔོན་དྲང་སྲོང་སྔོ་སངས་ཞེས་བྱར་གང་ཚེ་གྱུར་པ་ན། །རི་མཆོག་གནས་ན་བརྟུལ་ཞུགས་དགའ་ཞིང་བླ་མ་ལ་ཡང་དགའ། །མི་ཡི་བདག་པོས་དུག་མདའ་དག་གིས་ཁྱོད་ལ་བསྣུན་པ་ན། །ཁྱོད་ནི་རྒྱལ་པོ་དེ་ལ་ཡིད་འཁྲུགས་མེད་ཅིང་སྙིང་བརྩེར་གྱུར། །ཁྱོད་སྔོན་རི་དགས་བདག་པོ་ཡོན་ཏན་ཅན་དུ་གྱུར་པའི་ཚེ། །རི་གཟར་འབབ་ཆུ་ཆེན་པོས་མི་ཞིག་ཁྱེར་བར་གྱུར་པ་ན། །ཕན་དང་ལྡན་པ་ཁྱོད་ཀྱིས་མི་དེ་ཕྱུང་སྟེ་ཐང་ལ་བཞག་།ཁྱོད་ཀྱི་དགྲ་བོ་ཁྲིད་དེ་འོངས་པ་ན་ཡང་ཡིད་མ་འཁྲུགས། །མི་མཆོག་ཁྱོད་སྔོན་བྲམ་ཟེའི་བུར་ནི་གང་ཚེ་གྱུར་པ་ན། །ཁྱོད་ཀྱི་ནོར་བུ་རྒྱ་མཚོ་ཆེན་པོ་ཡངས་པར་ལྷུང་བའི་ཚེ། །ཁྱོད་ཀྱིས་རྒྱ་མཚོ་ཆེན་པོ་ཟད་པར་བྱ་བར་བརྩམས་པ་དང ། །སྟོབས་བརྟན་ཁྱུ་མཆོག་ཁྱོད་ཀྱི་ནོར་བུ་དེ་ཚེ་ཕྱིར་ཡང་རྙེད། །སྐྱེས 41.97b བུ་མཆོག་ཁྱོད་གནའ་སྔོན་དྲང་སྲོང་དམ་པར་གྱུར་པའི་ཚེ། །བྲམ་ཟེ་ཞིག་གིས་བདག་གི་སྐྱབས་གྱུར་ཤོག་ཅེས་ཁྱོད་གན་འོངས། །སྨྲས་པ་བྲམ་ཟེ་དམ་པ་ཁོ་བོ་དགྲ་ལས་བྱུང་ཞེས་བྱས། །ཁྱོད་ཀྱིས་རང་ལུས་བཏང་གིས་བྲམ་ཟེ་དེ་ནི་མ་བཏང་ངོ ། །གནའ་སྔོན་ཤིང་གི་གནས་སུ་དྲང་སྲོང་སྔོ་བསངས་དྲུང་འོངས་ཏེ། །འདོད་པས་སྨྲས་པ་ཤིང་འདི་ལོ་མ་དུ་ཡོད་གྲོངས་ཤེས་བྱས། །ཤིང་དེ་ལོ་མ་ཇི་སྙེད་ཡོད་པ་རབ་བགྲངས་རབ་མཁས་པས། །ཁྱོད་ཀྱིས་དེ་བཞིན་ནོར་བ་མེད་ཅིང་འཐུན་པར་ཚིག་ཏུ་བརྗོད། །ཁྱོད་སྔོན་ནེ་ཙོ་ཡོན་ཏན་ལྡན་གྱུར་ཤིང་ལ་གནས་པའི་ཚེ། །ཟད་པར་གྱུར་ཀྱང་སྔོན་གྱི་དྲིན་ལ་བསམས་ཏེ་དེ་མ་སྤངས། །ལྷ་ཡི་བདག་པོས་ཁྱོད་ཀྱི་ཡོན་ཏན་དྲན་ནས་རབ་ཏུ་དགའ། །སྔ་མཁོ་བཞིན་དུ་ཤིང་མཆོག་དེ་ནི་དཔལ་དང་ལྡན་པར་བྱས། །ཁྱོད་ཀྱི་བརྟུལ་ཞུགས་དཀའ་ཐུབ་སྤྱད་པ་དེ་དག་མཚུངས་མེད་དེ། །ཡོན་ཏན་ལྡན་པ་ཡོན་ཏན་ལམ་ལ་སྤྱད་པ་ཡོན་ཏན་མང ། །ཁྱོད་ཀྱི་དུས་ལ་ད་བབ་གྲོང་ཁྱེར་བཅས་པའི་ས་ཡང་ཐོང ། །འགྲོ་བ་དག་ནི་རྒྱལ་བའི་ཡོན་ཏན་སྤྱོད་ལ་མྱུར་དུ་ཁོད། །གང་གི་ཚེ་ན་བུད་མེད་རིན་ཆེན་བཟང་པོའི་གོས་ཀྱིས་ལུས་བརྒྱན་ཏེ། །སིལ་སྙན་དམ་པ་མཆོག་རབ་ཡིད་དུ་འོང་བའི་སྒྲ་ནི་རབ་སྒྲོག་པ། །དེ་ཚེ་ཕྱོགས་བཅུའི་རྒྱལ་བའི་གཟི་ཡིས་ཚིགས་སུ་བཅད་པ་སྣ་ཚོགས་པ། །སྒྲ་དབྱངས་སྙན་པ་འདི་དག་སིལ་སྙན་དག་གི་སྒྲ་ལས་རབ་ཏུ་བྱུང ། །རྒ་དང་ཤི་བས་ཟིན་པའི་འཇིག་རྟེན་དག་ལ་བདག་ནི་སྐྱབས་གྱུར་ཅེས། །འཇིག་རྟེན་སྒྲོན་མ་ཁྱོད་ཀྱིས་བསྐལ་མང་སྔ་རོལ་སྨོན་ལམ་དེ་སྐད་བཏབ། །མི་ཡི་སེང་གེ་ཁྱོད་ཀྱིས་སྔོན་གྱི་སྨོན་ལམ་དག་ནི་དྲན་གྱིས་ཤིག་།རྐང་གཉིས་དབང་པོ་ཁྱོད་ད་མངོན་པར་འབྱུང་བའི་དུས་ནི་འདི་ཡིན་ནོ། །ཁྱོད་འདིར་སྲིད་པ་ཁྲག་ཁྲིག་དག་ཏུ་སྦྱིན་པ་མང་པོ་དུ་མ་བྱིན། །ནོར་དང་རིན་པོ་ཆེ་དང་གསེར་དང་གོས་བཟང་རིན་ཆེན་སྤྲས་པ་དང ། །རྐང་ལག་དག་དང་མིག་དང་ཕངས་པའི་བུ་དང་རྒྱལ་སྲིད་འབྱོར་པ་དག་།ཁྱོད་ཀྱིས 41.98a བཏང་ཡང་ཁྱོད་ནི་སློང་བ་རྣམས་ལ་ཐ་བ་ཞེ་སྡང་མེད། །ཁྱོད་འདིར་ཟླ་བའི་ཏོག་དང་མཆེ་བ་བཟང་དང་རྒྱལ་པོ་ཞི་བར་གྱུར། །སྙིང་བརྩེ་སྙིང་རྗེའི་ཡིད་དང་ཟླ་བའི་སྒྲོན་དང་གཙུག་ན་ནོར་བུར་གྱུར། །རྒྱལ་པོ་དཔའ་བོ་བརྟན་དང་མིག་བཟངས་དང་ནི་དེ་ལ་སོགས་པ་བྱས། །རྒྱལ་པོ་ཁྲག་ཁྲིག་མང་པོ་སྦྱིན་དགའ་རྣམ་པར་འཕྲུལ་པ་དེ་ཉིད་ཁྱོད། །བདེ་བར་གཤེགས་པ་ཁྱོད་ཀྱིས་བསྐལ་པ་མང་པོར་ཚུལ་ཁྲིམས་སྤྱོད་པ་སྤྱད། །ནོར་བུ་རིན་ཆེན་དྲི་མ་མེད་པ་ལྟ་བུར་ཚུལ་ཁྲིམས་རྣམ་དག་གྱུར། །ཁྱོད་ཀྱིས་འབྲུ་ཡི་རྔ་མ་ཅི་འདྲ་དེ་འདྲར་ཚུལ་ཁྲིམས་བསྲུངས་ཤིང་སྤྱད། །ཚུལ་ཁྲིམས་དགའ་བས་ཁྱོད་ཀྱིས་འདིར་ནི་འགྲོ་ལ་རྒྱ་ཆེར་དོན་ཡང་བྱས། །འདིར་ཁྱོད་གླང་པོ་མཆོག་ཏུ་གྱུར་ཏེ་རྔོན་པ་དགྲ་ཡིས་མདས་བསྣུན་ཚེ། །གཏུམ་པོ་དགྲ་ལ་སྙིང་བརྩེ་སྙིང་རྗེ་བསྐྱེད་ནས་དེ་ནི་ཁྱོད་ཀྱིས་བསྐྱབས། །བཟང་ཞིང་མཛེས་པའི་མཆེ་བ་ཡོངས་སུ་བཏང་སྟེ་ཚུལ་ཁྲིམས་ཡོང་མ་བཏང ། །ཁྱོད་ཀྱིས་དེ་ལ་སོགས་པ་ཚུལ་ཁྲིམས་རྣམ་པར་འཕྲུལ་པ་མང་པོ་བྱས། །བཟོད་ལ་དགའ་བས་ཁྱོད་ཀྱིས་འགྲོ་བའི་མི་ཕན་སྡུག་བསྔལ་སྟོང་མང་དང ། །ཚིག་རྩུབ་ངག་དང་བསད་པ་དང་ནི་བཅིང་པ་མང་པོ་བཟོད་པར་བྱས། །ཁྱོད་ཀྱིས་གནའ་སྔོན་མི་གང་དག་ལ་བདེ་བ་ཀུན་གྱིས་རིམ་གྲོར་བྱས། །དེ་དག་ཕྱི་ནས་ཁྱོད་ཀྱི་གཤེད་མར་གྱུར་ཀྱང་ཁྱོད་ཀྱིས་དེ་དག་བཟོད། །མགོན་པོ་ཁྱོད་ནི་རི་མཆོག་གནས་ན་གང་ཚེ་དྲེད་མོར་གྱུར་པའི་ཚེ། །ཁ་བ་བབ་ཅིང་ཆུ་བྲུག་པས་ནི་འཇིགས་ཤིང་སྐྲག་པའི་མི་བཟུང་སྟེ། །རྩ་བ་འབྲས་བུ་རྣམ་པ་མང་དང་བདེ་བ་ཀུན་གྱིས་རིམ་གྲོ་བྱས། །དེ་ཡིས་མྱུར་དུ་ཁྱོད་ལ་གསོད་པ་ཁྲིད་འོངས་ཁྱོད་ཀྱིས་དེ་ལ་བཟོད། །བྱང་ཆུབ་བཙལ་ཕྱིར་བརྟུལ་ཞུགས་དཀའ་ཐུབ་ཡོན་ཏན་རྣམ་མང་ཡེ་ཤེས་ལ། །ཁྱོད་ཀྱིས་བརྩོན་འགྲུས་ཤིན་ཏུ་བརྟན་པར་གནས་ཤིང་མི་གཡོ་གཡོ་བ་མེད། །དབང་བསྒྱུར་བདུད་ཀྱང 41.98b ཁྱོད་ཀྱིས་བརྩོན་འགྲུས་སྟོབས་ཀྱིས་སྟོབས་ནི་མེད་པར་བྱས། །མི་ཡི་སེང་གེ་ཁྱོད་འདིར་མངོན་པར་འབྱུང་བའི་དུས་ལ་ད་བབ་བོ། །ཁྱོད་འདིར་གནའ་སྔོན་ཁ་བའི་ཁ་དོག་འདྲ་བའི་རྟ་མཆོག་གྱུར་པའི་ཚེ། །སྙིང་རྗེ་བསྐྱེད་ནས་ནམ་མཁའ་ལས་ནི་སྲིན་པོའི་གླིང་དུ་མྱུར་དུ་སོང ། །དེ་ཚེ་ཕོངས་ཤིང་འདུག་པའི་མི་དེ་བླངས་ཏེ་བདེ་ལ་རབ་ཏུ་བཞག་།ཁྱོད་ཀྱིས་འདི་ལ་སོགས་པ་བརྩོན་འགྲུས་རྣམ་པར་འཕྲུལ་པ་མང་པོ་བྱས། །མྱུར་དུ་འགྱུར་ཞིང་གཡོ་ལ་ཡུལ་ལ་དགའ་ཞིང་རྒོད་པའི་སེམས་བརྟུལ་ཏེ། །བསམ་གཏན་པར་གྱུར་དུལ་དེས་ཞི་གནས་རྣམས་ཀྱིས་ཉོན་མོངས་གཙོ་བོ་བཅོམ། །ཁྱོད་འདིར་བསམ་གཏན་དགའ་བས་རང་གི་ཡོན་ཏན་དག་གིས་འགྲོ་དོན་བྱས། །ད་འདིར་སེམས་ཅན་མཆོག་ཁྱོད་བསམ་གཏན་རྣམ་འཕྲུལ་བྱ་བའི་དུས་ལ་བབ། །གནའ་སྔོན་ཁྱོད་ནི་དྲང་སྲོང་བསམ་གཏན་དགའ་ཞིང་རབ་ཏུ་གནས་པར་གྱུར། །རྒྱལ་པོ་མེད་པའི་མི་དག་གིས་ནི་ཁྱོད་ཁྲིད་རྒྱལ་སྲིད་དབང་ཡང་བསྐུར། །ཁྱོད་ཀྱིས་སྐྱེ་བོ་དག་ནི་དགེ་བ་བཅུ་དང་ཚངས་པའི་ལམ་ལ་བཀོད། །དེ་ཡི་ཚེ་ན་མི་ལས་ཤི་འཕོས་ཐམས་ཅད་ཚངས་པའི་གནས་སུ་དོང ། །ཕྱོགས་དང་ཕྱོགས་མཚམས་འགྲོ་བ་རྣམ་མང་ཤེས་པའི་ཆོ་ག་ཁྱོད་རབ་མཁས། །གཞན་གྱི་སྤྱོད་དང་འགྲོ་བའི་སྐད་ཤེས་པ་དང་དབང་པོ་ཤེས་པ་དང ། །ཚུལ་དང་འདུལ་དང་བློ་གྲོས་རྣམ་མང་རྒྱུ་བའི་ཕ་རོལ་ཁྱོད་ཕྱིན་གྱུར། །རྒྱལ་པོའི་སྲས་ཁྱོད་འདིར་ནི་མངོན་པར་འབྱུང་བའི་དུས་ལ་ད་བབ་པོ། །ཁྱོད་ཀྱིས་གནའ་སྔོན་སྐྱེ་བོ་ལྟ་བ་ལོག་པར་ཞུགས་པར་གྱུར་པ་དག་།རྒ་ཤི་སྡུག་བསྔལ་རྣམ་པ་མང་པོས་ཉམ་ཐག་འཁོད་པ་འདི་མཐོང་ནས། །སྲིད་པ་རྣམ་པར་གཞིག་པའི་དྲང་ལམ་ཉིད་ཀྱིས་ཁོང་དུ་ཆུད་བྱས་ཏེ། །མུན་པ་བཅོམ་པ་ཁྱོད་ཀྱིས་འཇིག་རྟེན་དག་ལ་དོན་ཆེན་རབ་ཏུ་བྱས། །ཚིགས་བཅད་རྣམ་པ་མང་པོ་མཛེས་པ་ཡོན་ཏན་ལྡན་པ་སྣ་ཚོགས་འདིས། །སིལ་སྙན་སྒྲ་བསྒྲགས་དེ་ལ་རྒྱལ 41.99a བའི་གཟི་ཡིས་དཔའ་བོ་སྐུལ་བར་གྱུར། །བློ་མཆོག་ལྡན་པ་ཁྱོད་འདིར་མངོན་པར་འབྱུང་བའི་དུས་ནི་ད་བབ་ཀྱིས། །སྡུག་བསྔལ་གང་བའི་སྐྱེ་བོ་འདི་དག་མཐོང་ནས་བཏང་སྙོམས་མ་བྱེད་ཅིག་།བུད་མེད་གོས་དང་རིན་པོ་ཆེ་དང་དོ་ཤལ་སྤོས་ཕྲེང་སྣ་ཚོགས་ཀྱིས། །རྒྱན་པ་དག་ཀྱང་སེམས་དང་ཕངས་པ་སྐྱེས་ནས་རབ་ཏུ་དགའ་བ་རྣམས། །སེམས་ཅན་མཆོག་ལ་སིལ་སྙན་རབ་ཏུ་སྒྲོག་ཅིང་སློང་བར་བྱེད་པ་ན། །རྒྱལ་བའི་མཐུ་ཡིས་སིལ་སྙན་དག་ལས་ཚིགས་སུ་བཅད་པ་འདི་འདྲ་བྱུང ། །གང་གི་དོན་དུ་ཁྱོད་ཀྱིས་འགྲོ་ལ་ཕན་ཕྱིར་བསྐལ་པ་དུ་མར་ནི། །གཏང་བར་དཀའ་བ་བཏང་ཞིང་ཚུལ་ཁྲིམས་བཟོད་པ་བརྩོན་འགྲུས་ཤིན་ཏུ་སྤྱད། །བསམ་གཏན་ཤེས་རབ་ཤིན་དུ་བསྒོམ་པ་ཁྱོད་ཀྱིས་དུས་ལ་ད་བབ་ཀྱིས། །འདྲེན་པ་མངོན་པར་འབྱུང་བའི་བློ་ལ་མྱུར་སོམས་ཕྱིར་ཤོལ་མ་བྱེད་ཅིག་།སྔོན་ཆད་རིན་ཆེན་མཛོད་དང་གསེར་དང་དངུལ་དང་རྒྱན་རྣམས་རབ་ཏུ་བཏང ། །སྐྱེ་བ་དེ་དང་དེ་དག་ཏུ་ནི་མཆོད་སྦྱིན་རྣམ་པ་མང་པོ་བྱས། །ཁྱོད་ཀྱིས་ཆུང་མ་བུ་ཕོ་བུ་མོ་ལུས་དང་རྒྱལ་སྲིད་སྲོག་བཏང་སྟེ། །བྱང་ཆུབ་དོན་དུ་གཏང་བར་དཀའ་བ་དཔག་ཏུ་མེད་པ་ཁྱོད་ཀྱིས་བཏང ། །ཁྱོད་ནི་རྒྱལ་པོ་མི་དམན་བསོད་ནམས་དཔལ་གྱིས་རྣམ་པར་གྲགས་པར་གྱུར། །མུ་ཁྱུད་འཛིན་དང་མུ་ཁྱུད་ནག་པོ་ཚངས་པས་བྱིན་དང་རལ་པ་ཅན། །མཆོད་སྦྱིན་སྟོང་ལྡན་དང་ནི་ཆོས་སེམས་འོད་ཕྲོ་ཅན་དང་ནོར་བརྟན་དང ། །ཤིན་ཏུ་དོན་བསམས་གྱུར་ཏེ་སེམས་ཅན་དམན་ལ་གཏང་བར་དཀའ་བ་བཏང ། །ཟླ་བའི་བུ་དང་བརྩོན་འགྲུས་འབར་དང་བསོད་ནམས་འོད་ཟེར་ཅན་དུ་གྱུར། །གཏོང་བ་ཆེ་དང་ལྡན་ཞིང་མཐུ་ལྡན་ཁྱོད་ནི་བྱས་པ་གཟོ་བར་གྱུར། །རྒྱལ་པོ་དྲང་སྲོང་ཟླ་བ་གཟུགས་ལྡན་དཔའ་བོ་བདེན་པ་འཕེལ་བ་དང ། །རྒྱལ་པོ་ལེགས་པར་སྨྲ་བ་ཚོལ་དང་བློ་གྲོས་བཟང་དང་དེས་པར་གྱུར། །ཟླ་བའི་འོད་དང་ཁྱད་པར་འགྲོ་དང་རྡུལ་དང་ཕྱོགས་ཀྱི་བདག་པོར་གྱུར། །རབ་སྦྱིན 41.99b དཔའ་བོ་ཀ་ཤི་རྒྱལ་པོ་རིན་ཆེན་གཙུག་ཕུད་ཞི་བ་བསྟོད། །མི་དབང་དེ་དག་རྣམས་དང་གཞན་དུ་གྱུར་ཏེ་གཏང་བར་དཀའ་བ་བཏང ། །ཁྱོད་ཀྱིས་ཇི་ལྟར་གཏོང་བའི་ཆར་ཕབ་དེ་བཞིན་ཆོས་ཀྱི་ཆར་པ་ཕོབ། །ཁྱོད་ཀྱིས་སྔོན་ཆད་སེམས་ཅན་སྙིང་པོ་གང་གཱའི་བྱེ་མ་སྙེད་ཅིག་མཐོང ། །སེམས་ཅན་ཐར་བར་བྱ་ཕྱིར་བྱང་ཆུབ་དམ་པའི་མཆོག་ནི་ཚོལ་བ་ན། །ཁྱོད་ཀྱིས་མཆོད་པ་དཔག་མེད་བསམ་མི་ཁྱབ་པས་སངས་རྒྱས་དེ་དག་མཆོད། །དཔའ་བོ་གྲོང་ཁྱེར་དམ་པ་འདི་ནས་འབྱུང་བའི་དུས་ལ་ད་བབ་བོ། །ཐོག་མར་ཁྱོད་ཀྱིས་དོན་ཡོད་མཐོང་ལ་སཱ་ལའི་མེ་ཏོག་གིས་ནི་མཆོད། །རྣམ་པར་སྣང་མཛད་ལ་ནི་དང་བའི་སེམས་ཀྱིས་སྐད་ཅིག་རབ་ཏུ་བལྟས། །རྔ་དབྱངས་ལྡན་པ་ལ་ནི་ཁྱོད་ཀྱིས་ཨ་རུ་རའི་འབྲུ་ཅིག་ཕུལ། །ཙན་དན་མཐོང་ནས་ཁྱོད་ཀྱིས་རྩཝའི་མེ་སྒྲོན་བླངས་ཏེ་ཁྱིམ་དུ་བཟུང ། །རྟུལ་པོ་གྲོང་ཁྱེར་འཇུག་པ་མཐོང་ནས་ཕྱེ་མ་སྤར་གང་རབ་ཏུ་གཏོར། །ཆོས་ཀྱི་དབང་ཕྱུག་ཆོས་འཆད་པ་ན་ལེགས་ཤེས་བྱ་བ་རབ་ཏུ་བྱིན། །ཀུན་དུ་གཟིགས་པ་མཐོང་ནས་ཕྱག་འཚལ་ཕྱག་འཚལ་ལོ་ཞེས་ཚིག་ཏུ་བརྗོད། །འོད་འཕྲོ་ཆེན་པོའི་ཕུང་པོ་ལ་ནི་ཁྱོད་ཀྱིས་དགའ་བས་གསེར་ཕྲེང་གཏོར། །འོད་ཟེར་རྒྱལ་མཚན་ལ་ནི་ཁ་ཚར་ཕུལ་ཞིང་གསལ་ལ་བལ་སྲན་གཏོར། །ཡེ་ཤེས་ཏོག་ལ་མྱ་ངན་མེད་པའི་མེ་ཏོག་ཁ་ལོ་སྒྱུར་ལ་འཇམ། །རིན་ཆེན་གཙུག་ཏོར་ཅན་ལ་མར་མེ་པད་མ་ལྡན་ལ་སྨན་ཡང་ཕུལ། །ཐམས་ཅད་ཟིལ་གནོན་མུ་ཏིག་དོ་ཤལ་རྒྱ་མཚོ་ལ་ནི་པད་མ་ཕུལ། །པད་མའི་སྙིང་པོ་ལ་ནི་བླ་རེ་སེང་གེ་ལ་ནི་ཆར་གདིང་ཕུལ། །ས་ལའི་དབང་པོ་རྒྱལ་ལ་མར་ཕུལ་མེ་ཏོག་རྒྱས་ལ་འོ་མ་ཕུལ། །གྲགས་སྦྱིན་ཀུན་དའི་མེ་ཏོག་ཕུལ་ཏེ་བདེན་པ་གཟིགས་ལ་ཞལ་ཟས་ཕུལ། །ཡེ་ཤེས་ལྷུན་ལ་ལུས་བཏུད་ཀླུས་བྱིན་ལ་ནི་ནམ་བཟའ་དབུལ་བ་བྱས། །རབ་འཐོར་གཤེགས་དང་ཙན་དན་མཆོག་དང་འོད་ལྡན་ལ་ནི་ཚཝ་སྤར་རེ། །བཀོད་པ་ཆེ་ལ་པད་མ་དབུལ་བྱས་འོད་ཟེར་རྒྱལ་ལ་རིན་ཆེན་ཕུལ། །ཤཱཀྱ་ཐུབ་ལ་སྤར 41.100a གང་གསེར་ཕུལ་དབང་པོའི་ཏོག་ལ་བསྟོད་པ་བྱས། །ཉི་མའི་ཞལ་ལ་མེ་ཏོག་རྣ་རྒྱན་བློ་གྲོས་བཟང་ལ་གསེར་ཅོད་པན། །ཀླུ་ཟིལ་གནོན་ལ་ནོར་བུ་ཕུལ་ཏེ་རྒྱལ་ལ་རས་བཅོས་གདིང་བ་ཕུལ། །སྨན་གྱི་རྒྱལ་ལ་རིན་ཆེན་གདུགས་ཕུལ་སེང་གེའི་ཏོག་ལ་ཁྲི་གདན་ཕུལ། །ཡོན་ཏན་མཆོག་ལྡན་རིན་ཆེན་དྲ་བ་འོད་སྲུངས་ལ་ནི་གླུ་དབྱངས་ཀུན། །སྤོས་མཆོག་མེ་ཏོག་ཕུལ་ཞིང་འོད་འཕྲོའི་ཏོག་ལ་རྟག་ཏུ་མེ་ཏོག་ཕུལ། །མི་འཁྲུགས་རྒྱལ་ལ་ཁང་བརྩེགས་ཕུལ་ཞིང་འཇིག་རྟེན་མཆོད་ལ་ཕྲེང་བ་ཕུལ། །རྒྱ་སྤོས་གཙུག་ལག་རྒྱལ་སྲིད་དབུལ་བྱས་རྒྱལ་བར་དགའ་ལ་སྤོས་ཀུན་ཕུལ། །སྒྲོན་མ་ཆེ་ལ་བདག་ཕུལ་པད་མའི་མཆོག་ལ་རྒྱན་རྣམས་དབུལ་བ་བྱས། །ཆོས་ཀྱི་ཏོག་ལ་མེ་ཏོག་སྣ་ཚོགས་སྒྲོན་མ་མཛད་ལ་ཨུད་པ་ལ། །མཆོད་པ་རྣམ་པ་སྣ་ཚོགས་ཐ་དད་གཞན་དང་གཞན་དག་བྱེད་པ་ན། །ཁྱོད་ཀྱིས་སེམས་ཅན་སྙིང་པོ་དེ་དག་རྣམས་དང་གཞན་ཡང་སྔོན་ཆད་མཆོད། །འདས་པའི་སངས་རྒྱས་རྣམས་དང་སྟོན་པ་དེ་དག་ཁྱོད་མཆོད་དྲན་པར་གྱིས། །སེམས་ཅན་མགོན་མེད་མྱ་ངན་གང་བ་ཡལ་བར་མ་དོར་མངོན་པར་བྱུང ། །མར་མེ་མཛད་པ་མཐོང་བ་ཙམ་གྱིས་ཁྱོད་ཀྱིས་བཟོད་པ་མཆོག་ཐོབ་སྟེ། །རྗེས་སུ་འཐུན་པའི་མངོན་པར་ཤེས་པ་ལྔ་པོ་ཉམས་པ་མེད་པ་ཐོབ། །དེ་ནས་རབ་ཏུ་དགའ་བས་བསྐལ་པ་གྲངས་མེད་འཇིག་རྟེན་ཁམས་ཀུན་དུ། །སངས་རྒྱས་དག་ནི་རེ་རེ་ལ་ཡང་མཆོད་པ་བསམ་གྱིས་མི་ཁྱབ་བྱས། །བསྐལ་པ་དཔག་མེད་དེ་དག་ཟད་གྱུར་སངས་རྒྱས་དེ་དག་མྱ་ངན་འདས། །ཁྱོད་ཀྱི་ལུས་རྣམས་ཐམས་ཅད་དང་ནི་དེ་དག་མིང་ཡང་གང་དུ་སོང ། །དངོས་པོ་ཐམས་ཅད་ཐ་མར་འཛད་པའི་ཆོས་ཏེ་འདུས་བྱས་རྟག་པ་མེད། །འདོད་པ་རྒྱལ་སྲིད་ལོངས་སྤྱོད་རྟག་པ་མིན་གྱིས་གྲོང་ཁྱེར་མཆོག་ནས་བྱུང ། །བསྐལ་པ་ཟད་པར་འགྱུར་ཚེ་གཟི་བརྗིད་དྲག་པོ་འཇིགས་པའི་མེ་འོད་ལྟར། །རྒ་དང་ན་དང་འཆི་བ་མི་བཟད་འཇིགས་པ་ཆེན་པོ 41.100b འོང་བར་འགྱུར། །དངོས་པོ་ཐམས་ཅད་ཐ་མར་ཟད་པའི་ཆོས་ཏེ་འདུས་བྱས་རྟག་པ་མེད། །ཤིན་དུ་སྡུག་བསྔལ་སེམས་ཅན་ལྟོས་ལ་ཡོན་ཏན་ལྡན་པ་མངོན་པར་བྱུང ། །རྒྱལ་པོ་བདེ་བའི་མལ་ན་ཉལ་གྱུར་ཅིང ། །གང་ཚེ་མོ་ཚོགས་གླིང་བུ་རྒྱུད་གཅིག་དང ། །སིལ་སྙན་སྣ་ཚོགས་སྒྲ་ཡིས་སློང་བྱེད་པ། །དེ་ཚེ་སིལ་སྙན་སྒྲ་ལས་འདི་དག་བྱུང ། །སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འཆི་མེ་རབ་འབར་འདི་ནི་མགོན་མེད་པ། །སྲིད་ལས་འབྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། །སྲིད་གསུམ་མི་བརྟན་སྟོན་ཀའི་སྤྲིན་དང་འདྲ། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་ལྟ་བུར་མྱུར་མགྱོགས་འགྲོ། །སྲིད་སྲེད་མ་རིག་དབང་གིས་སྐྱེ་བོ་རྣམས། །མི་དང་ལྷ་གནས་ངན་སོང་ལམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་ཕང་ལོ་བསྐོར་བ་བཞིན། །རྟག་ཏུ་གཟུགས་སྡུག་མཆོག་དང་སྒྲ་སྙན་དང ། །དྲི་ཞིམ་རོ་མཆོག་རེག་པ་བདེ་བྱེད་པ། །དུས་ངན་རྙི་ལ་འགྲོ་བ་འདི་དག་ཐོགས། །དཔེར་ན་རྔོན་པའི་སྙི་ལ་སྤྲེའུ་ཐོགས་བཞིན། །འདོད་པའི་ཡོན་ཏན་མྱ་ངན་གནོད་པ་མང ། །འཇིགས་བཅས་རྟག་ཏུ་དགྲ་བྱེད་ཉོན་མོངས་བཅས། །རལ་གྲི་སོ་འདྲ་དུག་སྡོང་ལོ་མ་མཚུངས། །ངན་སྐྱུགས་སྣོད་ལྟར་འཕགས་པའི་སྐྱེ་བོས་སྤངས། །འདོད་པའི་ཡོན་ཏན་འཇིགས་བཅས་ཉོན་མོངས་བཅས། །རྟག་ཏུ་རྗེད་པར་བྱེད་པ་མུན་པ་འདྲ། །རྟག་ཏུ་འཇིགས་པའི་རྒྱུ་བྱེད་སྡུག་བསྔལ་རྩ། །སྲིད་པའི་སྲེད་པའི་འཁྲི་ཤིང་འཕེལ་བར་བྱེད། །ཇི་ལྟར་མེ་འབར་འོབས་ནི་འཇིགས་བཅས་པ། །དེ་ལྟར་འདོད་འདི་འཕགས་པའི་སྐྱེ་བོས་རིག་།འདམ་རྫབ་ཆེ་འདྲ་རལ་གྲི་གཤེགས་གནས་འདྲ། །རལ་གྲིའི་སོ་ལ་སྦྲང་རྩིས་སྐུས་དང་མཚུངས། །ཇི་ལྟར་སྦྲུལ་གྱི་མགོ་དང་ངན་སྐྱུགས་སྣོད། །དེ་ལྟར་འདོད་འདི་མཁས་པ་རྣམས་ཀྱིས་རིག་།བྱ་ཤ་ཁམ་བུ་འདྲ་ཞིང་གསལ 41.101a ཤིང་འདྲ། །རོ་ལ་ཁྱི་ལྟར་དགྲ་དང་བཅས་པ་ཡིན། །འདོད་པའི་ཡོན་ཏན་འདི་དག་ཆུ་ཟླ་འདྲ། །གཟུགས་བརྙན་མཚུངས་ཤིང་བྲག་ཆ་འདྲ་བ་དང ། །མིག་ཡོར་འདྲ་ཞིང་གར་ལ་ལྟ་འདྲ་དང ། །རྨི་ལམ་མཉམ་པ་འཕགས་པའི་སྐྱེ་བོས་རིག་།འདོད་པའི་ཡོན་ཏན་སྐད་ཅིག་ཡ་མ་རླ། །སྒྱུ་མ་སྨིག་རྒྱུ་འདྲ་ཞིང་བརྫུན་པ་ཅན། །ཆུ་བུར་དབུ་བ་ལྟ་བུ་ཡང་དག་མིན། །ཡོངས་སུ་བཏགས་ལས་བྱུང་བར་མཁས་པས་རྟོགས། །ན་ཚོད་ཐོག་མར་གཟུགས་མཆོག་འཛིན་པའི་ཚེ། །ཕངས་ཤིང་སྡུག་འདོད་འདི་ནི་བྱིས་པའི་སྤྱོད། །རྒ་ན་སྡུག་བསྔལ་གཟི་བརྗིད་ལུས་བཅོམ་ནས། །རྣམ་པར་སྤོང་སྟེ་རི་དགས་ཀླུང་སྐམ་བཞིན། །ནོར་འབྲུ་དམ་པ་རྫས་མང་སྟོབས་ལྡན་ཚེ། །ཕངས་ཤིང་སྡུག་འདོད་འདི་ནི་བྱིས་པའི་སྤྱོད། །ནོར་ཉམས་སྡུག་བསྔལ་བར་ནི་གྱུར་པའི་ཚེ། །རྣམ་པར་སྤོང་སྟེ་མི་ཡིས་འབྲོག་སྟོང་བཞིན། །ཇི་ལྟར་མེ་ཏོག་ཤིང་དང་འབྲས་བཅས་ཤིང ། །དེ་ལྟར་སྦྱིན་འདོད་མི་ལ་དགའ་བར་བྱེད། །ནོར་ཉམས་རྒ་བས་ཉེན་ཅིང་སྤང་བ་ན། །དེ་ཚེ་དགའ་བར་མི་འགྱུར་བྱ་རྒོད་བཞིན། །རྫས་ལྡན་གཟུགས་མཆོག་ལྡན་ཚེ་དཔོན་པོ་བཞིན། །ཕྲད་ན་སྡུག་ཅིང་དབང་པོ་དགའ་བར་བྱེད། །རྒ་ན་སྡུག་བསྔལ་ཉེན་ཅིང་ནོར་ཟད་ན། །དེ་ཚེ་འདོད་པར་མི་འགྱུར་འཆི་བདག་བཞིན། །རྒ་བས་རྒ་བྱས་ན་ཚོད་ཡོལ་གྱུར་ན། །སྡོང་པོ་གནམ་ལྕགས་ཀྱིས་ནི་བཅོམ་པ་བཞིན། །རྒ་བས་འཁོགས་ན་འཇིགས་བཅས་ཁང་རུལ་འདྲ། །རྒ་ལས་བྱུང་བ་ཐུབ་པ་མྱུར་དུ་སྨྲོས། །བུད་མེད་སྐྱེས་པའི་ཚོགས་རྣམས་རྒ་བས་སྐེམས། །མ་ལུའི་འཁྲི་ཤིང་སཱ་ལའི་ནགས་སྟུག་བཞིན། །རྒ་བས་བརྩོན་འགྲུས་རྩལ་དང་ཤུགས་འཕྲོག་སྟེ། །དཔེར་ན་སྐྱེས་བུ་འདམ་དུ་བྱིང་བ་བཞིན། །རྒ་བས་གཟུགས་སྡུག་གཟུགས་ནི་མི་སྡུག་བྱེད། །རྒ་བས་གཟི་བརྗིད་འཕྲོག་ཅིང་མཐུ་སྟོབས་འཕྲོག་།རྒ་བས་བདེ་བ་འཕྲོག་ཅིང་བརྙས་པར་བྱེད། །རྒ་བས་འཆི་བྱེད་རྒ་བས་མདངས 41.101b ཀྱང་འཕྲོག་།ནད་བརྒྱ་མང་དང་ནད་ཐིབས་སྡུག་བསྔལ་གྱིས། །འགྲོ་བ་གཙེས་ཏེ་མི་ཡིས་རི་དགས་བཞིན། །རྒ་དང་ན་བས་བཅོམ་པའི་འགྲོ་ལྟོས་ལ། །སྡུག་བསྔལ་ལས་ནི་འབྱུང་བ་མྱུར་ཤོད་ཅིག་།དཔེར་ན་དགུན་སྨད་རླུང་དང་ཁ་བ་ཆེ། །རྩཝ་ཤིང་གེལ་བ་ནགས་སྨན་མདངས་ཀྱང་འཕྲོག་།དེ་ལྟར་ནད་འདི་འགྲོ་བའི་མདངས་འཕྲོག་ཅིང ། །དབང་པོ་གཟུགས་དང་སྟོབས་ནི་ཉམས་པར་བྱེད། །ནོར་འབྲུ་ནོར་ཆེན་ཐ་མར་ཟད་པར་བྱེད། །ནད་ནི་རྟག་ཏུ་འགྲོ་བ་བརྙས་པར་བྱེད། །གནོད་པ་བྱེད་ཅིང་སྡུག་ལ་སྡང་བར་བྱེད། །ཡོངས་སུ་གདུང་བྱེད་མཁའ་ལས་ཉི་མ་བཞིན། །འཆི་དང་འཕོ་དང་འཆི་འཕོ་དུས་བྱེད་པ། །ཕངས་ཤིང་སྡུག་པའི་སྐྱེ་བོ་རྟག་ཏུ་འབྲལ། །ཕྱིར་མི་འོང་ཞིང་འཕྲད་པར་འགྱུར་མ་ཡིན། །ཤིང་ལས་ལོ་འབྲུ་འདྲ་ཞིང་ཀླུ་ཡི་རྒྱན་དང་མཚུངས། །ཞི་བ་དབང་ཡོད་པ་དག་དབང་མེད་བྱེད། །འཆི་བ་འཕྲོག་བྱེད་ཆུ་བོས་ཤིང་དེད་བཞིན། །མི་ནི་གཉིས་མིན་གྲོགས་མེད་གཅིག་པུར་འགྲོ། །རང་ལས་འབྲས་བུ་ལྡན་པས་དབང་ཡང་མེད། །འཆི་བས་སྲོག་ཆགས་བརྒྱ་ཕྲག་མང་འཛིན་ཏེ། །འབྱུང་པོའི་ཚོགས་ལ་རྒྱ་མཚོའི་ཆུ་སྲིན་བཞིན། །ཀླུ་ལ་མཁའ་ལྡིང་གླང་ཆེན་སེང་གེ་འདྲ། །རྩཝ་རྩི་འབྱུང་པོའི་ཚོགས་ལ་མེ་དང་མཚུངས། །སྐྱོན་བརྒྱ་མང་པོ་འདི་འདྲ་འདི་དག་ལས། །འགྲོ་བ་སྒྲོལ་ཞེས་ཁྱོད་ཀྱིས་སྨོན་ལམ་བཏབ། །སྔོན་གྱི་སྨོན་ལམ་སྤྱོད་པ་དེ་དྲན་བྱོས། །ཁྱོད་ནི་མངོན་པར་འབྱུང་བའི་དུས་ལ་བབ། །གང་ཚེ་བུད་མེད་ཚོགས་ནི་རབ་དགའ་ཞིང ། །སིལ་སྙན་དག་གིས་ཐུབ་ཆེན་སློང་བྱེད་པ། །དེ་ཚེ་བདེ་བར་གཤེགས་པ་རྣམས་ཀྱི་མཐུས། །ཚིགས་བཅད་སྣ་ཚོགས་སིལ་སྙན་སྒྲ་ལས་བྱུང ། །འདུས་བྱས་ཐམས་ཅད་མྱུར་དུ་འཇིག་པ་སྟེ། །མཁའ་ལ་གློག་རྒྱུན་རིང་དུ་མི་གནས་བཞིན། །ཁྱོད་ཀྱི་དུས་འདི་ཉེ་བར་གནས་གྱུར་གྱིས། །བརྟུལ་ཞུགས་བཟང་པོ་མངོན་འབྱུང་དུས་ལ་བབ། །འདུ་བྱེད་མི་རྟག་བརྟན་པ་མ་ཡིན་ཏེ། །རྫ་སོ་མ་བཏང་ལྟ་བུར་འཇིག་པའི་བདག་། 41.102a གཞན་གྱི་རྫས་ནི་བརྙན་པོ་བྱས་དང་མཚུངས། །བྱེ་མའི་གྲོང་ཁྱེར་ལྟ་བུར་རིང་མི་ཐོགས། །འདུ་བྱེད་འདི་དག་འཇིག་པའི་ཆོས་ཅན་སྟེ། །དབྱར་གྱི་ཞལ་ཞལ་ཇི་ལྟར་འགོགས་པ་བཞིན། །ཆུ་ངོགས་བྱེ་མ་ཡོད་པ་འདྲ་བ་སྟེ། །རྐྱེན་ལ་རག་ལས་རང་བཞིན་ཉམ་ཆུང་བ། །འདུ་བྱེད་མར་མེའི་འོད་འཕྲོ་འདྲ་བ་སྟེ། །མྱུར་དུ་འབྱུང་ཞིང་འགག་པའི་ཆོས་ཅན་ཡིན། །རླུང་དང་མཚུངས་པར་རིང་དུ་མི་གནས་ལ། །དབུ་བ་ལྟ་བུར་ཉམ་ཆུང་སྙིང་པོ་མེད། །འདུ་བྱེད་གཡོ་བ་མེད་ཅིང་སྟོང་པ་སྟེ། །བརྟགས་ན་ཆུ་ཤིང་དག་གི་ཕུང་པོ་འདྲ། །སྒྱུ་མ་ལྟ་བུར་སེམས་ནི་རྨོངས་པར་བྱེད། །ལག་བཅངས་སྟོངས་པས་བྱིས་པ་བྲིད་དང་མཚུངས། །འདུས་བྱས་གྱུར་པ་ཐམས་ཅད་རྒྱུ་དག་དང ། །རྐྱེན་རྣམས་ཀྱིས་ནི་རབ་ཏུ་འབྱུང་བ་སྟེ། །གཅིག་གིས་གཅིག་རྒྱུ་བྱས་ཏེ་བརྟེན་ནས་བྱུང ། །བྱིས་པའི་སྐྱེ་བོས་འདི་འདྲ་དེ་མ་རྟོགས། །དཔེར་ན་གྲེས་མ་མུན་འཛའ་རྟེན་བྱས་ལ། །བཙལ་བའི་སྟོབས་ཀྱིས་ཐག་པར་འགྱུར་བ་དང ། །ཟོ་ཆུན་རྒྱུད་མོ་འཁོར་ལོར་བཅས་པ་ཡང ། །དེ་དག་རེ་རེས་འགྲུབ་པར་འགྱུར་བ་མེད། །དེ་ལྟར་སྲིད་པའི་ཡན་ལག་ཀུན་གྲུབ་པ། །གཞན་དང་གཞན་ཚོགས་པ་ལ་བརྟེན་ནས་ནི། །དེ་དག་སོ་སོ་རེ་རེར་འགྲུབ་པར་འགྱུར། །སྔོན་གྱི་མཐའ་དང་ཕྱི་མའི་མཐའ་མི་དམིགས། །ས་བོན་ཡོད་ན་མྱུ་གུ་ཇི་བཞིན་ཏེ། །ས་བོན་གང་ཡིན་མྱུ་གུ་དེ་ཉིད་མིན། །དེ་ལས་གཞན་མིན་དེ་ཡང་མ་ཡིན་ཏེ། །དེ་ལྟར་རྟག་མིན་ཆད་མིན་ཆོས་ཉིད་དོ། །མ་རིག་པ་ཡི་འདུ་བྱེད་རྐྱེན་ཡིན་ཏེ། །འདུ་བྱེད་དེ་ཡང་ཡང་དག་ཉིད་དུ་མེད། །མ་རིག་པ་དང་འདུ་བྱེད་དེ་དག་ཀྱང ། །རང་བཞིན་སྟོང་སྟེ་གཡོ་བ་མེད་པ་ཡིན། །རྒྱ་ལས་རྒྱའི་འབུར་ནི་སྣང་མོད་ཀྱི། །རྒྱ་དེ་འཕོས་པར་གྱུར་པའང་ཡོད་མ་ཡིན། །དེ་ལ་དེ་མེད་གཞན་ལས་མ་ཡིན་ཏེ། །དེ་ལྟར་འདུས་བྱས་རྟག་མེད་ཆད་པ་མེད། །མིག་དང་གཟུགས་ལ་བརྟེན་པ་བྱས་ནས་སུ། །མིག་གི་རྣམ 41.102b རྣམ་པར་ཤེས་པ་འདིར་འབྱུང་ཡང ། །མིག་ནི་གཟུགས་ལ་བརྟེན་པ་མ་ཡིན་ལ། །གཟུགས་ཀྱང་མིག་ལ་འཕོ་བ་ཡོད་མ་ཡིན། །འདི་དག་བདག་མེད་མི་སྡུག་ཆོས་ཅན་ཡང ། །དེ་དག་བདག་དང་སྡུག་པར་བརྟགས་པ་སྟེ། །ནོར་པ་ཡང་དག་མ་ཡིན་བརྟགས་ཡིན་ཡང ། །དེ་ལས་མིག་གི་རྣམ་པར་ཤེས་པ་འབྱུང ། །རྣམ་པར་ཤེས་པ་འགགས་ནས་འབྱུང་འགྱུར་ཏེ། །མཁས་པས་སྐྱེ་དང་འཇིག་པ་རྣམ་པར་མཐོང ། །གང་དུ་མ་སོང་གང་ནས་འོངས་པ་མིན། །རྣལ་འབྱོར་པས་ནི་སྟོང་པ་སྒྱུ་ལྟར་མཐོང ། །དཔེར་ན་གཙུབ་ཤིང་དང་ནི་གཙུབ་སྟན་དང ། །ལག་པས་བཙོལ་བ་བྱས་པ་གསུམ་ཚོགས་པ། །དེ་ལ་བརྟེན་ནས་མེ་ནི་འབྱུང་འགྱུར་ཏེ། །བྱུང་ནས་རིང་པོར་མི་ཐོགས་འགག་པར་འགྱུར། །དེ་ནས་མཁས་པ་ལ་ལས་བརྟགས་བྱས་ཏེ། །འདི་ནི་གང་ནས་འོངས་ལ་གར་སོང་ཞེས། །ཕྱོགས་དང་ཕྱོགས་མཚམས་ཀུན་དུ་བརྟགས་བྱས་ནས། །དེ་ཡི་འོང་བ་འམ་འགྲོ་བ་མི་དམིགས་སོ། །ཕུང་པོ་དག་དང་སྐྱེ་མཆེད་ཁམས་རྣམས་ཀྱི། །རྐྱེན་ནི་མ་རིག་པ་དང་སྲེད་དང་ལས། །དེ་དག་ཚོགས་པ་སེམས་ཅན་ཞེས་བརྗོད་ཀྱང ། །དེ་ནི་དམ་པའི་དོན་དུ་དམིགས་སུ་མེད། །མཆུ་དང་ལྐོག་མ་རྐན་ལ་བརྟེན་ནས་ནི། །ལྕེ་བསྒྱུར་བ་ལས་ཡི་གེའི་སྒྲ་འབྱུང་ཡང ། །ལྐོག་མར་བརྟེན་ནས་མ་ཡིན་རྐན་ལས་མིན། །རེ་རེ་ལ་ནི་ཡི་གེ་དམིགས་སུ་མེད། །ཚོགས་པ་དེ་ལ་བརྟེན་ནས་ངག་དེ་ནི། །ཡིད་ཀྱི་བློ་ཡི་དབང་གིས་འབྱུང་མོད་ཀྱི། །ཡིད་དང་ངག་ནི་མི་སྣང་གཟུགས་མེད་དེ། །ནང་དང་ཕྱི་རོལ་ན་ཡང་དམིགས་སུ་མེད། །མཁས་པས་ངག་སྐད་སྒྲ་དང་དབྱངས་རྣམས་ཀྱི། །སྐྱེ་དང་འཇིག་ལ་རྣམ་པར་བརྟགས་བྱས་ན། །དེ་ཚེ་ངག་ཀུན་བྲག་ཆ་ལྟ་བུ་དང ། །སྐད་ཅིག་པ་དང་སྙིང་པོ་མེད་པར་མཐོང ། །དཔེར་ན་ཤིང་དང་རྒྱུད་ལ་བརྟེན་བྱས་ལ། །ལག་པས་བརྩོལ་བ་བྱས་པ་གསུམ་ཚོགས་ན། །སྒྲ་སྙན་པི་བང་གླིང་བུ་ལ་སོགས་པ། །དེ་དག་ལས་ནི་སྒྲ་ཡང་འབྱུང་བར་འགྱུར། །དེ་ནས 41.103a མཁས་པ་ལ་ལས་བརྟགས་བྱས་ཏེ། །འདི་ནི་གང་ནས་འོངས་ལ་གར་སོང་ཞེས། །ཕྱོགས་དང་ཕྱོགས་མཚམས་ཀུན་དུ་བརྟགས་བྱས་ན། །སྒྲ་ཡི་འོང་བ་འམ་འགྲོ་བ་མི་དམིགས་སོ། །དེ་ལྟར་རྒྱུ་དག་དང་ནི་རྐྱེན་རྣམས་ལས། །འདུ་བྱེད་གྱུར་པ་ཐམས་ཅད་བྱུང་བ་སྟེ། །ཡང་དག་མཐོང་བའི་རྣལ་འབྱོར་པ་ཡིས་ནི། །འདུ་བྱེད་སྟོང་པ་གཡོ་བ་མེད་པར་མཐོང ། །ཕུང་པོ་དག་དང་སྐྱེ་མཆེད་ཁམས་རྣམས་ནི། །ནང་ཡང་སྟོང་ལ་ཕྱི་རོལ་སྟོང་པ་སྟེ། །ཐམས་ཅད་བདག་གིས་དབེན་ཞིང་གནས་མེད་ལ། །ཆོས་ཀྱི་མཚན་ཉིད་ནམ་མཁའི་ངོ་བོ་ཉིད། །ཆོས་ཀྱི་མཚན་ཉིད་འདི་འདྲ་འདི་དག་ནི། །མར་མེ་མཛད་པ་མཐོང་ནས་ཁྱོད་ཀྱིས་རྟོགས། །ཇི་ལྟར་ཉིད་ཀྱིས་རྗེས་སུ་རྟོགས་པ་ལྟར། །དེ་བཞིན་ལྷ་མིར་བཅས་པ་རྟོགས་པར་གྱིས། །གནོད་པ་ཡང་དག་མ་ཡིན་བརྟགས་པ་ཡི། །འདོད་ཆགས་ཞེ་སྡང་དག་གིས་འགྲོ་བ་གདུངས། །སྙིང་རྗེའི་སྤྲིན་ལས་ཞི་བ་བསིལ་བའི་ཆུ། །འདྲེན་པ་བདུད་རྩི་རྒྱུན་ནི་རབ་ཏུ་ཕོབ། །བྱང་ཆུབ་དམ་པ་ཡང་དག་ཐོབ་ནས་ནི། །འཕགས་པའི་ནོར་གྱིས་སྲོག་ཆགས་བསྡུའོ་ཞེས། །མཁས་པ་ཁྱོད་ཀྱིས་གང་གི་ཆེད་ཀྱི་ཕྱིར། །བསྐལ་པ་བྱེ་བ་མང་པོར་སྦྱིན་པ་བྱིན། །སྔོན་གྱི་སྤྱོད་དེ་རྗེས་སུ་དྲན་གྱིས་ཏེ། །འཕགས་པའི་ནོར་གྱིས་དམན་དབུལ་སྡུག་བསྔལ་ལ། །སེམས་ཅན་ཁ་ལོ་སྒྱུར་བ་མ་གཡེལ་བར། །འཕགས་པའི་ནོར་གྱིས་དེ་དག་བསྡུ་བ་གྱིས། །ངན་སོང་ས་ཡི་ལམ་ནི་བཅད་པ་དང ། །མཐོ་རིས་བདུད་རྩིའི་སྒོ་མོ་མཆོག་དེ་ནི། །སེམས་ཅན་བྱེ་བ་མང་ལ་བསྟན་ཞེས་ཏེ། །ཁྱོད་ཀྱིས་རྟག་ཏུ་ཚུལ་ཁྲིམས་ཤིན་དུ་བསྲུངས། །ཚུལ་ཁྲིམས་ལྡན་པས་བསམས་པ་འགྲུབ་འགྱུར་གྱིས། །སྔོན་གྱི་སྤྱོད་དེ་རྗེས་སུ་དྲན་གྱིས་ལ། །ངན་སོང་གསུམ་པོའི་ས་ཡི་སྒོ་ཆོད་དེ། །མཐོ་རིས་བདུད་རྩིའི་སྒོ་ནི་དབྱེ་བར་གྱིས། །སྲོག་ཆགས་རྣམས་ཀྱི་ཁོང་ཁྲོ་ཁྲོ་གཞིལ་དང ། སྲིད་པའི་མཚོ་ལས་སེམས་ཅན་བསྒྲལ་བྱས་ཏེ། །ཞི་བདེ་རིམས་ནད 41.103b མེད་ལ་དགོད་དོ་ཞེས། །ཁྱོད་ཀྱིས་རྟག་ཏུ་བཟོད་པ་ཤིན་དུ་བསྒོམས། །སྔོན་གྱི་སྤྱོད་དེ་རྗེས་སུ་དྲན་གྱིས་ཏེ། །དགྲ་དང་གནོད་སེམས་འཚེ་བས་དཀྲུགས་པ་ཡི། །འཚེ་བ་སྤྱོད་པ་ཡལ་བར་མ་དོར་བར། །འགྲོ་བ་འདི་དག་བཟོད་པའི་ས་ལ་ཁོད། །ཆོས་ཀྱི་གྲུ་ནི་ལེགས་པར་སྦྱར་བྱས་ལ། །སྲིད་པའི་མཚོ་ལས་འགྲོ་བ་རྣམས་བསྒྲལ་ཏེ། །ཞི་བདེ་རིམས་ནད་མེད་ལ་དགོད་དོ་ཞེས། །གང་གི་དོན་དུ་ཁྱོད་ཀྱིས་བརྩོན་འགྲུས་བསྟེན། །སྔོན་གྱི་སྤྱོད་དེ་རྗེས་སུ་དྲན་གྱིས་ལ། །འགྲོ་བ་ཆུ་བོ་བཞི་ཡིས་ཁྱེར་གྱུར་པ། །སེམས་ཅན་མགོན་མེད་པ་དག་བརྩོན་སྟོབས་དང ། །བརྟུལ་བའི་ཤུགས་ཀྱིས་མྱུར་དུ་འདི་དག་ཐོན། །དབང་པོ་འཁྲུལ་དང་ཕལ་པའི་དབང་པོ་དང ། །སྤྲེའུ་འདྲའི་སེམས་ལས་ཞི་གནས་ངས་དགོད་ཅེས། །འདྲེན་པ་ཁྱོད་ཀྱིས་གང་གི་ཆེད་ཀྱི་ཕྱིར། །ཉོན་མོངས་གཞིལ་བའི་བསམ་གཏན་བསྒོམས་གྱུར་པ། །སྔོན་གྱི་སྤྱོད་དེ་རྗེས་སུ་དྲན་གྱིས་ཏེ། །ཉོན་མོངས་དྲ་བས་དཀྲུགས་པར་གྱུར་པ་ཡི། །འགྲོ་ལ་མ་གཡེལ་ཉོན་མོངས་གཙེས་པ་ལས། །བསམ་གཏན་མཆོག་ལ་སྐྱེ་དགུ་འདི་དག་ཁོད། །གཏི་མུག་མ་རིག་མུན་པས་བསྒྲིབས་པ་ཡི། །འགྲོ་ལ་ཆོས་བརྒྱ་མང་པོ་མཐོང་བྱེད་པ། །ཡང་དག་མཐོང་བའི་མིག་ནི་སྦྱིན་ནོ་ཞེས། །ཁྱོད་ཀྱིས་སྔོན་ཆད་ཤེས་རབ་ཤིན་དུ་བསྒོམས། །སྔོན་གྱིས་སྤྱོད་དེ་རྗེས་སུ་དྲན་གྱིས་ལ། །གཏི་མུག་མ་རིག་མུན་པས་བསྒྲིབས་པ་ཡི། །འགྲོ་ལ་ཤེས་རབ་དམ་པ་འོད་བཟང་བ། །ཆོས་མིག་དྲི་མེད་ཉོན་མོངས་མེད་པ་བྱིན། །བུད་མེད་རྣམས་ཀྱི་སིལ་སྙན་གླུ་དབྱངས་ལས། །ཚིགས་སུ་བཅད་པ་འདི་འདྲ་འདི་བྱུང་སྟེ། །དེ་ཐོས་ནས་ནི་རྒྱགས་པ་རྣམ་སྤངས་ནས། །བྱང་ཆུབ་དམ་པ་མཆོག་ཏུ་སེམས་བཏང་ངོ ། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འདུག་པའི་ཚེ་ཡང་ཆོས་མཉན་པ་དང་བྲལ་བར་མ་གྱུར་ཏོ། །ཆོས་ཡིད་ལ་བྱེད་པ་དང་བྲལ་བར་མ་གྱུར་ཏོ། །དེ་ཅིའི་ཕྱིར་ཞེ་ན། དགེ་སློང 41.104a དག་འདི་ལྟར་བྱང་ཆུབ་སེམས་དཔའ་ནི་ཡུན་རིང་པོ་ནས་ཆོས་དང་ཆོས་སྨྲ་བ་རྣམས་ལ་གུས་པ་དང་བཅས་པར་གྱུར་ཅིང ། བསམ་པ་ཐག་པ་ནས་ཆོས་དོན་དུ་གཉེར་བ། ཆོས་འདོད་པ། ཆོས་ཀྱི་ཀུན་དགའ་ལ་དགའ་ཞིང་མོས་པར་གྱུར་པ། ཆོས་ཚོལ་བས་ངོམས་མི་ཤེས་པ། ཇི་ལྟར་ཐོས་པའི་ཆོས་ཡང་དག་པར་སྟོན་པ། བླ་ན་མེད་པའི་ཆོས་ཆེན་པོའི་སྦྱིན་བདག་ཏུ་གྱུར་པ། ཟང་ཟིང་མེད་པར་ཆོས་སྟོན་པ། ཆོས་སྦྱིན་པ་ལ་སེར་སྣ་མེད་པ། ཆོས་ལ་སློབ་དཔོན་གྱི་དཔེ་མཁྱུད་དང་བྲལ་བ། ཆོས་ཀྱི་རྗེས་སུ་འཐུན་པའི་ཆོས་སྒྲུབ་པ། ཆོས་ལ་ནན་ཏན་བྱེད་པ་ལ་དཔའ་བ། ཆོས་ལ་གནས་སུ་འཛིན་པ། ཆོས་ལ་སྐྱབས་སུ་འཛིན་པ། ཆོས་ལ་དཔུང་གཉེན་དུ་འཛིན་པ། ཆོས་ལ་རྟོན་པ། ཆོས་ལ་ངེས་པར་སེམས་པའི་བཟོད་པས་ངེས་པར་བྱུང་བ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པ་སྟེ། ཐབས་ལ་མཁས་པས་རྟོགས་པར་ཁོང་དུ་ཆུད་པ་ཡིན་ནོ། །དགེ་སློང་དག་དེ་ལ་བྱང་ཆུབ་སེམས་དཔའ་ཐབས་མཁས་པ་ཆེན་པོས་རྣམ་པར་རྩེ་ཞིང་བཙུན་མོའི་འཁོར་ཐམས་ཅད་ཀྱི་མོས་པ་ཇི་ལྟ་བ་བཞིན་དུ་སྤྱོད་ལམ་ནི་བསྟན། སྔོན་གྱི་བྱང་ཆུབ་སེམས་དཔའ་འཇིག་རྟེན་གྱི་ཡུལ་ཐམས་ཅད་ལས་ཡང་དག་པར་འདས་པ་རྣམས་ཀྱི་འཇིག་རྟེན་དང་འཐུན་པར་བྱ་བའི་ཆོས་ཉིད་དང་འཐུན་པར་ནི་བྱས། ཡུན་རིང་པོ་ནས་འདོད་པའི་སྐྱོན་ཤིན་དུ་རྟོགས་པ་ཡིན་ཡང་སེམས་ཅན་ཡོངས་སུ་སྨིན་པར་བྱ་བའི་དབང་གིས་འདོད་པའི་ལོངས་སྤྱོད་ནི་ཀུན་དུ་བསྟན། དགེ་བའི་རྩ་བ་དཔག་ཏུ་མེད་པ་བསགས་པའི་བསོད་ནམས་ཀྱི་སྟོབས་ཀྱི་ཚོགས་ཀྱི་ཁྱད་པར་གྱིས་འཇིག་རྟེན་གྱི་དབང་དུ་བྱ་བ་མཚུངས་པ་མེད་པ་ནི་ཀུན་དུ་བསྟན། ལྷའི་དང་མིའི་ལས་ཤིན་དུ་འདས་པ་སྙིང་པོ་དང་ལྡན་ཞིང་རྒྱ་ཆེ་ལ། རྣམ་པ་ཐ་དད་པ་སྣ་ཚོགས་ཀྱི་གཟུགས་དང ། སྒྲ་དང ། དྲི་དང ། རོ་དང ། རེག་མཆོག་ཏུ་དགའ་བ་ཉམས་དགའ་བའི་འདོད་པའི་དགའ་བའི་བདེ་བ་ནི་བསྟན། འདོད་པའི་དགའ་བའི་ཡུལ 41.104b ཐམས་ཅད་ལ་འཛིན་པ་མེད་པར་རང་གི་སེམས་ལ་དབང་བསྒྱུར་བ་ནི་བསྟན། སྔོན་གྱི་སྨོན་ལམ་གྱི་སྟོབས་ཀྱིས་གྲོགས་སུ་གྱུར་པ། དགེ་བའི་རྩ་བ་བསགས་པའི་སེམས་ཅན་རྣམས་ནི་མཚུངས་པར་གནས་པས་ཡོངས་སུ་སྨིན་པར་བྱས་ནས། འཇིག་རྟེན་གྱི་ཀུན་ནས་ཉོན་མོངས་པའི་དྲི་མ་ཐམས་ཅད་ཀྱིས་ནི་སེམས་ལ་ཀུན་ནས་ཉོན་མོངས་པ་མེད་པར་བཙུན་མོའི་འཁོར་གྱི་ནང་ན་གནས་ཏེ། ཇི་ལྟར་མགྲོན་དུ་གཉེར་བའི་སེམས་ཅན་གྱི་ཁམས་ཡོངས་སུ་སྨིན་པར་བྱ་བའི་དུས་ལ་ལྟ་ཞིང ། དེའི་ཚེ་བྱང་ཆུབ་སེམས་དཔའ་ཤིན་དུ་རྒྱ་ཆེར་སྔོན་གྱི་དམ་བཅས་པ་རྗེས་སུ་དྲན་ནོ། །སངས་རྒྱས་དང་ཆོས་ཀྱང་མངོན་དུ་བྱེད་དོ། །སྨོན་ལམ་གྱི་སྟོབས་ཀྱང་མངོན་པར་སྒྲུབ་བོ། །སེམས་ཅན་རྣམས་ལ་ཡང་སྙིང་རྗེ་ཆེན་པོ་གཏོང་ངོ ། །སེམས་ཅན་རབ་ཏུ་ཐར་བར་བྱ་བར་ཡང་སེམས་སོ། །འབྱོར་པ་ཐམས་ཅད་ཀྱི་མཐའ་ནི་རྒུད་པ་ཡིན་པར་ཡང་སོ་སོར་རྟོག་གོ། །འཁོར་བ་ལ་གནོད་པ་དང ། འཇིགས་པ་མང་པོ་དུ་མ་ཡོད་པར་ཡང་རྟོག་གོ། །བདུད་དང་ཉེས་པའི་ཞགས་པ་ཡང་ཡང་དག་པར་གཅོད་དོ། །འཁོར་བའི་རྒྱུད་ལས་ཀྱང་བདག་ཉིད་འདའ་བར་བྱེད་དོ། །མྱ་ངན་ལས་འདས་པ་ལ་ཡང་སེམས་ཡང་དག་པར་གཏོད་དོ། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དགུ་པ། དགེ་སློང་དག་དེ་ལ་བྱང་ཆུབ་སེམས་དཔའ་ནི་སྔོན་གྱི་མཐའ་ཉིད་ནས་ཀྱང་འཁོར་བའི་སྐྱོན་ཤིན་དུ་རིག་པ་ཡིན། འདུས་བྱས་ལ་བསམ་པ་ཐག་པ་ནས་དོན་དུ་མི་གཉེར་བ་ཡིན། ཉེ་བར་ལེན་པ་ཡོངས་སུ་འཛིན་པ་ཐམས་ཅད་དོན་དུ་མི་གཉེར་བ་ཡིན། སངས་རྒྱས་ཀྱི་ཆོས་དོན་དུ་གཉེར་བ་ཡིན། མྱ་ངན་ལས་འདས་པ་ལ་མངོན་དུ་ཕྱོགས་པ་ཡིན། འཁོར་བ་ལ་རྒྱབ་ཀྱིས་བལྟས་པ་ཡིན། དེ་བཞིན་གཤེགས་པའི་སྤྱོད་ཡུལ་ལ་མངོན་དུ་དགའ་བ་ཡིན། 41.105a བདུད་ཀྱི་སྤྱོད་ཡུལ་དང་མ་འདྲེས་པ་ཡིན། སྲིད་པ་ལ་འབར་བར་སྐྱོན་དུ་མཐོང་བ་ཡིན། ཁམས་གསུམ་པ་ལས་བྱུང་བའི་བསམ་པ་ཅན་ཡིན། འཁོར་བའི་སྐྱོན་དང་ཉེས་དམིགས་དང་འབྱུང་བ་ལ་མཁས་པ་ཡིན། རབ་ཏུ་འབྱུང་བར་འདོད་པ་ཡིན། མངོན་པར་འབྱུང་བའི་བསམ་པ་ཅན་ཡིན། བདེན་པ་ལ་གཞོལ་བ་ཡིན། བདེན་པ་ལ་འབབ་པ་ཡིན། དབེན་པ་ལ་བབ་པ་ཡིན། དགོན་པ་དང་བས་མཐར་མངོན་པར་དགའ་བ་ཡིན། རབ་ཏུ་དབེན་པས་རབ་ཏུ་ཞི་བར་འདོད་པ་ཡིན། བདག་དང་གཞན་ལ་ཕན་པར་ཞུགས་པ་ཡིན། བླ་ན་མེད་པའི་ནན་ཏན་ལ་དཔའ་བ་ཡིན། འཇིག་རྟེན་གྱི་དོན་དུ་འདོད་པ་ཡིན། ཕན་པར་འདོད་པ་ཡིན། བདེ་བར་འདོད་པ་ཡིན། གྲུབ་པ་དང་བདེ་བར་འདོད་པ་ཡིན། འཇིག་རྟེན་ལ་སྙིང་བརྩེ་བ་ཅན་ཡིན། ཕན་པར་འདོད་པ་ཅན་ཡིན། བྱམས་པ་ལ་གནས་པ་ཅན་ཡིན། སྙིང་རྗེ་ཆེན་པོ་དང་ལྡན་པ་ཡིན། བསྡུ་བའི་དངོས་པོ་ལ་མཁས་པ་ཡིན། རྟག་ཏུ་ཡིད་ཡོངས་སུ་མི་སྐྱོ་བ་ཡིན། སེམས་ཅན་ཡོངས་སུ་སྨིན་པར་བྱ་བ་དང་འདུལ་བ་ལ་མཁས་པ་ཡིན། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་སྡུག་པར་སེམས་པ་ཡིད་ལ་བྱེད་པ་དང་ལྡན་པ་ཡིན། དངོས་པོ་ཐམས་ཅད་ལ་མི་ལྟ་བར་ཡོངས་སུ་བཏང་བ་ཡིན། སྦྱིན་པ་འགེད་པ་ལ་དགའ་བ་ཡིན། ལྷུག་པར་གཏོང་བ་ཡིན། ལག་པ་བརྐྱང་བ་ཡིན། གཏོང་བ་ལ་དཔའ་བ་ཡིན། མཆོད་སྦྱིན་བྱས་པ་ཡིན། བསོད་ནམས་ཤིན་ཏུ་ཕུན་སུམ་ཚོགས་པ་ཡིན། བསོད་ནམས་ཀྱི་ཡོ་བྱད་ཤིན་ཏུ་བཟུང་བ་ཡིན། དྲི་མ་དང་སེར་སྣ་དང་བྲལ་བ་ཡིན། སེམས་ཀུན་དུ་མ་བཟུང་བ་ཡིན། བླ་ན་མེད་པའི་སྦྱིན་བདག་ཆེན་པོ་ཡིན། བྱིན་ནས་ཀྱང་རྣམ་པར་སྨིན་པ་ལ་མི་རེ་བ་ཡིན། སྦྱིན་པ་ལ་དཔའ་བ་ཡིན། འདོད་པ་དང ། འདོད་པ་ཆེ་བ་དང ། ཆགས་པ་དང ། ཞེ་སྡང་དང ། རྒྱགས་པ་དང ། ང་རྒྱལ་དང ། གཏི་མུག་དང ། སེར་སྣ་ལ་སོགས་པ་ཉོན་མོངས་པའི་དགྲའི་ཚོགས་ཕྱིར་རྒོལ་བ་ཐམས་ཅད་ཚར་གཅད་པའི་ཕྱིར་མངོན་པར་བྱུང་བ་ཡིན། ཐམས་ཅད 41.105b མཁྱེན་པའི་སེམས་བསྐྱེད་པའི་རྒྱུན་ལས་མི་གཡོ་བ་ཡིན། གཏོང་བ་ཆེན་པོའི་སེམས་ཀྱི་གོ་ཆ་ཤིན་ཏུ་བགོས་པ་ཡིན། འཇིག་རྟེན་ལ་སྙིང་བརྩེ་བ་ཅན་ཡིན། ཕན་པར་འདོད་པ་ཅན་ཡིན། ཡ་ལད་བགོས་པ་ཡིན། གོ་ཆ་བགོས་པ་ཡིན། སེམས་ཅན་རབ་ཏུ་ཐར་བར་བྱ་བ་ལ་དམིགས་པ་ཡིན། སྙིང་རྗེ་ཆེན་པོའི་སྟོབས་དང་རྣམ་པར་གནོན་པ་དང ། ཕ་རོལ་གནོན་པ་དང་ལྡན་པ་ཡིན། ཕྱིར་མི་ལྡོག་པ་ཡིན། སེམས་ཅན་ཐམས་ཅད་ལ་སེམས་མཉམ་པ་ཡིན། གཏོང་བའི་ལག་ཆ་ཅན་ཡིན། སེམས་ཅན་གྱི་བསམ་པ་དང་རེ་བ་ཇི་ལྟ་བ་བཞིན་དུ་ཚིམ་པར་བྱེད་པ་ཡིན། བྱང་ཆུབ་ཀྱི་སྣོད་དུ་གྱུར་པ་ཡིན། དུས་དང་ཕྱད་པར་ཆོས་རྟོགས་པ་ཡིན། སྨོན་ལམ་བྱང་ཆུབ་ཏུ་ཡོངས་སུ་བསྔོས་པ་ཡིན། རྒྱལ་མཚན་མ་བསྙལ་བ་ཡིན། འཁོར་གསུམ་ཡོངས་སུ་དག་པའི་སྦྱིན་པ་ཡོངས་སུ་གཏོང་བ་དང་ལྡན་པ་ཡིན། ཡེ་ཤེས་མཆོག་གི་རྡོ་རྗེའི་མཚོན་ཆ་སྲ་བ་དང་ལྡན་པ་ཡིན། ཉོན་མོངས་པའི་ཕྱིར་རྒོལ་བ་ཤིན་ཏུ་ཚར་གཅོད་པ་ཡིན། ཚུལ་ཁྲིམས་དང ། ཡོན་ཏན་དང ། སྤྱོད་པ་ལ་ཞུགས་པ་ཡིན། ལུས་དང ། ངག་དང ། ཡིད་ཀྱི་ལས་ཀྱི་མཐའ་ལེགས་པར་བསྲུངས་པ་ཡིན། ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ་ཡིན། ཚུལ་ཁྲིམས་ཡོངས་སུ་དག་པ་ཡིན། དྲི་མ་མེད་ཅིང་དྲི་མ་དང་བྲལ་ལ་དྲི་མ་སྤངས་པའི་སེམས་དང་ལྡན་པ་ཡིན། ངན་དུ་སྨྲས་པ་དང ། ངན་དུ་བརྗོད་པའི་ཚིག་གི་ལམ་དང ། བརྒྱད་པ་དང ། སྤྱོ་བ་དང ། སྨད་པ་དང ། བཤུང་བ་དང ། བརྡེག་པ་དང ། བསྡིགས་པ་དང ། བསད་པ་དང ། བཅིང་བ་དང ། གཟུང་བའི་ཉོན་མོངས་པ་ཐམས་ཅད་ཀྱིས་སེམས་མ་བརྙོགས་པ་ཡིན། སེམས་མ་འཁྲུགས་པ་ཡིན། བཟོད་པ་དང་དེས་པ་ཕུན་སུམ་ཚོགས་པ་ཡིན། གནོད་པར་མི་སེམས་པ་ཡིན། གནོད་པ་མི་བྱེད་པ་ཡིན། གནོད་སེམས་མེད་པའི་སེམས་དང་ལྡན་པ་ཡིན། སེམས་ཅན་ཐམས་ཅད་ལ་ཕན་པར་བྱ་བའི་བརྩོན 41.106a འགྲུས་འབར་བ་བརྩམས་པ་ཡིན། ཡི་དམ་ལ་བརྟན་པ་ཡིན། དགེ་བའི་ཆོས་ཐམས་ཅད་ཡང་དག་པར་སྒྲུབ་པ་ལ་ཕྱིར་མི་ལྡོག་པ་ཡིན། དྲན་པ་དང་ལྡན་པ་ཡིན། ཤེས་བཞིན་ཅན་ཡིན། ཤིན་ཏུ་མཉམ་པར་བཞག་པ་ཡིན། སེམས་མ་གཡེངས་པ་ཡིན། བསམ་གཏན་ལ་རྩེ་གཅིག་ཏུ་ཡིད་ལ་བྱེད་པ་ཡིན། ཆོས་རབ་ཏུ་རྣམ་པར་འབྱེད་པ་ལ་མཁས་པ་ཡིན། སྣང་བ་ཐོབ་པ་ཡིན། མུན་པ་མུན་གནག་དང་བྲལ་བ་ཡིན། མི་རྟག་པ་དང་སྡུག་བསྔལ་བ་དང ། བདག་མེད་པ་དང ། མི་སྡུག་པའི་རྣམ་པར་སེམས་ཡོངས་སུ་བསྒོམས་པ་ཡིན། དྲན་པ་ཉེ་བར་གཞག་པ་དང ། ཡང་དག་པའི་སྤོང་བ་དང ། རྫུ་འཕྲུལ་གྱི་རྐང་པ་དང ། དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་དང ། ལམ་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཤིན་ཏུ་ཡོངས་སུ་སྦྱང་བ་བྱས་པའི་ཡིད་ལ་བྱེད་པ་དང་ལྡན་པ་ཡིན། ཞི་གནས་དང་ལྷག་མཐོང་གིས་ཤིན་ཏུ་དཀར་བར་བྱས་པའི་བློ་དང་ལྡན་པ་ཡིན། རྟེན་ཅིང་འབྲེལ་བར་འབྱུང་བར་ལྟ་བ་ཡིན། བདེན་པ་རྗེས་སུ་རྟོགས་པས་གཞན་གྱི་དྲིང་མི་འཇོག་པ་ཡིན། རྣམ་པར་ཐར་པའི་སྒོ་གསུམ་གྱིས་རྣམ་པར་རྩེ་བ་ཡིན། ཆོས་ཐམས་ཅད་ཀྱི་ཚུལ་སྒྱུ་མ་དང ། སྨིག་རྒྱུ་དང ། ཆུ་ཟླ་དང ། བྲག་ཆ་དང ། མིག་ཡོར་ལྟ་བུར་རྟོགས་པ་ཡིན་ནོ། །དགེ་སློང་དག་བྱང་ཆུབ་སེམས་དཔའ་དེ་ནི་དེ་ལྟར་རང་བཞིན་གྱིས་ཆོས་ལ་གནས་པ་ཡིན། དེ་ལྟར་ཡེ་ཤེས་ལ་གནས་པ་ཡིན། དེ་ལྟར་ཡོན་ཏན་གྱི་ཆེ་བ་ཉིད་ལ་གནས་པ་ཡིན། དེ་ལྟར་སེམས་ཅན་གྱི་དོན་ལ་བརྩོན་པར་གནས་པ་ཡིན་ཏེ། ཕྱོགས་བཅུའི་སངས་རྒྱས་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པས་སིལ་སྙན་དང་གླུ་དབྱངས་ལས་བྱུང་བའི་ཚིགས་སུ་བཅད་པ་དེ་དག་གིས་རྒྱ་ཆེར་བསྐུལ་བ་དང ། དེའི་ཚེ་སྔོན་གྱི་བྱང་ཆུབ་སེམས་དཔའ་སྲིད་པ་ཐ་མ་པར་གྱུར་པ་རྣམས་ཀྱི་བཙུན་མོའི་འཁོར་ཡོངས་སུ་སྨིན་པར 41.106b བྱ་བའི་ཕྱིར་ཆོས་ཀྱི་སྒོ་བཞི་མངོན་དུ་བྱེད་དོ། །བཞི་གང་ཞེ་ན། འདི་ལྟ་སྟེ། སྦྱིན་པ་དང ། སྙན་པར་སྨྲ་བ་དང ། དོན་བྱ་བ་དང ། དོན་འཐུན་པ་བསྡུ་བའི་དངོས་པོ་བཞི་ལ་སྦྱོར་བ་སྒྲུབ་པ་རྣམ་པར་དག་པ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པ་དང ། དཀོན་མཆོག་གསུམ་གྱི་རིགས་ཡང་དག་པར་འཛིན་པའི་བསམ་པ་ཆུད་མི་ཟ་བའི་ཐམས་ཅད་མཁྱེན་པའི་སེམས་སྨོན་ལམ་གྱི་སྟོབས་བསྐྱེད་པའི་ཕྱིར་མི་ལྡོག་པའི་ཡུལ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པ་དང ། སེམས་ཅན་ཐམས་ཅད་ཡོངས་སུ་མི་གཏང་བའི་ལྷག་བའི་བསམ་པ་སྙིང་རྗེ་ཆེན་པོའི་སྟོབས་ལ་ཞུགས་པ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པ་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་དང ། དོན་ལ་རྣམ་པར་ངེས་པའི་ཡེ་ཤེས་ཀྱི་ཚོགས་ཀྱི་སྟོབས་ཀྱི་ཁྱད་པར་ཡང་དག་པར་སྒྲུབ་པ་བཀོད་པ་ཆེན་པོ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པའོ། །བྱང་ཆུབ་སེམས་དཔས་ཆོས་ཀྱི་སྒོ་བཞི་པོ་དེ་དག་མངོན་དུ་བྱས་ནས། བཙུན་མོའི་འཁོར་ཐམས་ཅད་ཡོངས་སུ་སྨིན་པར་བྱ་བའི་ཕྱིར་དེའི་ཚེ། རྣམ་པ་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་པས་བྱང་ཆུབ་སེམས་དཔའི་མཐུས་སིལ་སྙན་དང་གླུ་དབྱངས་དེ་དག་ལས་ཆོས་ཀྱི་སྒོ་རྣམ་པ་འདི་ལྟ་བུ་བརྒྱ་སྟོང་འབྱུང་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་བྱེད་དོ། །མོས་པ་རྒྱ་ཆེན་དང་ནི་བསམ་པ་དང ། །ལྷག་པའི་བསམ་དང་སྲོག་ཆགས་སྙིང་རྗེ་བས། །བྱང་ཆུབ་དམ་པའི་མཆོག་ཏུ་སེམས་སྐྱེ་ཞེས། །དེ་འདྲའི་སྒྲ་དག་སིལ་སྙན་རྣམས་ལས་བྱུང ། །དང་ཞིང་དད་དང་མོས་དང་གུས་པ་དང ། །ང་རྒྱལ་མེད་ཅིང་བླ་ལ་འདུད་པ་དང ། །འདྲི་དང་དགེ་བ་ཅི་ཞེས་ཚོལ་བ་དང ། །རྗེས་སུ་དྲན་པ་བསྒོམས་པའི་སྒྲ་བྱུང་ངོ ། །སྦྱིན་དང་དུལ་དང་སྡོམ་དང་ཚུལ་ཁྲིམས་སྒྲ། །བཟོད་པའི་སྒྲ་དང་དེ་བཞིན་བརྩོན་འགྲུས་སྒྲ། །བསམ་གཏན་མངོན་པར་སྒྲུབ་དང་ཏིང་འཛིན་སྒྲ། །ཤེས་རབ་དང་ནི་ཐབས་ཀྱི་སྒྲ་ཡང་འབྱུང ། །བྱམས་པའི 41.107a སྒྲ་དང་དེ་བཞིན་སྙིང་རྗེའི་སྒྲ། །དགའ་དང་བཏང་སྙོམས་མངོན་པར་ཤེས་པའི་སྒྲ། །བསྡུ་བའི་དངོས་པོ་བཞི་པོ་རྣམ་ངེས་པས། །སེམས་ཅན་ཡོངས་སུ་སྨིན་བྱའི་སྒྲ་ཡང་བྱུང ། །དྲན་པ་ཉེ་བར་གཞག་པ་རབ་དབྱེ་སྒྲ། །ཡང་དག་སྤོང་དང་དེ་བཞིན་རྫུ་འཕྲུལ་དང ། །དབང་པོ་ལྔ་དང་སྟོབས་ལྔ་རབ་དབྱེ་དང ། །བྱང་ཆུབ་ཡན་ལག་སྒྲ་ནི་སིལ་སྙན་བྱུང ། །ཡན་ལག་བརྒྱད་པའི་འཕགས་ལམ་མཆོག་དབྱེ་དང ། །ཞི་གནས་སྒྲ་དང་དེ་བཞིན་ལྷག་མཐོང་དང ། །མི་རྟག་པ་དང་སྡུག་བསྔལ་བདག་མེད་སྒྲ། །མི་སྡུག་སྒྲ་ཡང་སིལ་སྙན་རྣམས་ལས་བྱུང ། །འདོད་ཆགས་བྲལ་སྒྲ་དེ་བཞིན་དབེན་པའི་སྒྲ། །ཟད་པ་ཤེས་པའི་སྒྲ་དང་མི་སྐྱེ་སྒྲ། །འགོག་པའི་སྒྲ་དང་དེ་བཞིན་གནས་མེད་སྒྲ། །མྱ་ངན་འདས་པའི་སྒྲ་ཡང་སིལ་སྙན་བྱུང ། །རྫོགས་པའི་བྱང་ཆུབ་སེམས་དཔའི་མཐུ་ཡིས་ན། །སིལ་སྙན་དག་ལས་འདི་འདྲའི་སྒྲ་བྱུང་སྟེ། །སྒྲ་དེ་ཐོས་ནས་བུད་མེད་ཐམས་ཅད་ཀྱིས། །སེམས་ཅན་མཆོག་རབ་རྗེས་བསླབས་བྱང་ཆུབ་སྨོན། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འདུག་པས་བུད་མེད་བརྒྱད་ཁྲི་བཞི་སྟོང་དང ། ལྷའི་བུ་བརྒྱ་སྟོང་མང་པོ་གང་དག་དེར་འདུས་པར་གྱུར་པ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་པར་གྱུར་ཏོ། །དེ་ནས་བྱང་ཆུབ་སེམས་དཔའ་མངོན་པར་འབྱུང་བའི་དུས་ལ་བབ་པ་དང ། དགའ་ལྡན་གྱི་རིས་ཀྱི་ལྷའི་བུ་ཁྲེལ་ཡོད་པའི་ལྷ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དེས་མཚན་མོ་མི་ཉལ་ཙམ་ན། ལྷའི་བུ་འབུམ་ཕྲག་སུམ་བཅུ་རྩ་གཉིས་ཀྱིས་བསྐོར་ཅིང་མདུན་དུ་བདར་ཏེ་བྱང་ཆུབ་སེམས་དཔའ་ལ་རིམ་གྲོ་བྱ་བའི་ཕྱིར་ཁང་བཟངས་ག་ལ་བ་དེར་སོང་སྟེ་ཕྱིན་ནས། ནམ་མཁའི་དཀྱིལ་ན་འདུག་སྟེ། བྱང་ཆུབ་སེམས་དཔའ་ལ་ཚིགས་སུ་བཅད་དེ་སྨྲས་པ། ཤི་འཕོ་བ་ནི་ཤིན་ཏུ་བསྟན། །སྐྱེས་བུ་སེང་གེས་ཚེ་ཡང་བསྟན། །བཙུན་མོའི 41.107b འཁོར་ཡང་བསྟན་པ་མཛད། །ཁྱོད་ཀྱིས་འཇིག་རྟེན་རྗེས་འཐུན་མཛད། །འཇིག་རྟེན་ཆོས་ནི་རྗེས་ཐོབ་པས། །ལྷ་མི་མང་པོ་ཡོངས་སྨིན་མཛད། །མངོན་པར་འབྱུང་བའི་བློ་དགོངས་པའི། །དེ་ཡི་དུས་ལ་དེང་བབ་བོ། །མ་གྲོལ་བས་ནི་དགྲོལ་མི་ནུས། །ལོང་བས་ལམ་ཡང་སྟོན་མི་ནུས། །གྲོལ་བས་དགྲོལ་བར་བྱེད་པར་ནུས། །མིག་ལྡན་ལོང་བ་ལམ་སྟོན་ནུས། །སེམས་ཅན་གང་དག་འདོད་པས་འཁོལ། །ཁྱིམ་ནོར་བུ་དང་ཆུང་མ་ཆགས། །དེ་དག་ཁྱོད་ཀྱི་རྗེས་སློབ་ཅིང ། །མངོན་པར་འབྱུང་བར་བཞེད་པར་མཛོད། །དབང་ཕྱུག་འདོད་པས་རྩེ་བ་དང ། །གླིང་བཞི་རིན་ཆེན་བདུན་སྤངས་ཏེ། །ཁྱོད་ནི་མངོན་པར་འབྱུང་རིག་ནས། །ལྷ་མིར་བཅས་པའི་འཇིག་རྟེན་མོས། །ཁྱོད་ནི་འདོད་ལ་མི་དགྱེས་ཏེ། །བསམ་གཏན་བདེ་བས་གནས་མཛད་ཀྱང ། །ལྷ་མི་བརྒྱ་ཕྲག་མང་པོ་དག་།གཉིད་ཀྱིས་ལོག་ལས་སད་པར་མཛད། །དར་ལ་བབ་འདི་ཤིན་ཏུ་འདའ། །རི་གཟར་འབབ་ཆུ་མགྱོགས་འགྲོ་བཞིན། །དར་ལ་བབ་པ་ཡལ་གྱུར་ནས། །མངོན་པར་འབྱུང་བ་མཛེས་མ་ལགས། །དེ་སླད་ཐོག་མར་གཞོན་པའི་ཚེ། །དར་བབ་དམ་པར་མངོན་བྱུང་སྟེ། །ཐུགས་དམ་ཉམས་འོག་ཆུད་མཛོད་ལ། །ལྷ་མི་དོན་ནི་མཛད་པའི་རིགས། །འདོད་པའི་ཡོན་ཏན་མི་ངོམས་ཏེ། །དཔེར་ན་ལན་ཚཝའི་ཆུ་དང་མཚུངས། །འཕགས་པ་རྡུལ་མེད་འཇིག་རྟེན་འདས། །ཤེས་རབ་གང་ལྡན་དེ་དག་ངོམས། །ཁྱོད་འདིར་རྒྱལ་པོ་ཟས་གཙང་དང ། །ཡུལ་འཁོར་རྣམས་ཀྱི་ཡིད་འོང་སྡུག་།འདབ་མ་བརྒྱ་པའི་ཞལ་འདྲ་བ། །མངོན་པར་འབྱུང་བར་དགོངས་སུ་གསོལ། །ཉོན་མོངས་གདུང་བས་རབ་གདུངས་ཤིང ། །འབྱུང་མེད་བཅིང་བས་དམ་བཅིངས་རྣམས། །དཔའ་བོས་མྱུར་དུ་མཚུངས་མེད་པ། །ཐར་ལམ་ཞི་ལ་དགོད་དུ་གསོལ། །ཁྱོད་ནི་སྨན་པ་ཁམས་ལ་མཁས། །སེམས་ཅན་ཡུན་རིང་ན་རྣམས་ལ། །ཆོས་ཀྱི་སྨན་ནི་སྦྱོར་མཛད་དེ། །མྱ་ངན་འདས་བདེ་མྱུར་དུ་ཁོད། །མིག་མེད་མུན་པ་གཏི་མུག་གླགས། །ལྟ་བའི་དྲ་བས་དཀྲིས་པ་ཡི། ། 41.108a ལྷ་རྣམས་དང་ནི་མི་ཡི་མིག་།ཤེས་རབ་སྒྲོན་མ་མྱུར་དུ་སྦྱོངས། །བྱང་ཆུབ་ཐོབ་པར་བལྟ་བྱ་ཞིང ། །བླ་ན་མེད་པའི་ཆོས་མཉན་ཅེས། །ལྷ་དང་ལྷ་མིན་ཀླུ་དག་དང ། །གནོད་སྦྱིན་དྲི་ཟ་མང་པོ་སྡོད། །ཀླུ་ཡི་རྒྱལ་པོས་རང་གི་གནས། །ཁྱོད་ཀྱི་དཔལ་གྱིས་སྣང་བར་མཐོང ། །མཆོད་པ་དག་ནི་མཐའ་ཡས་བགྱིད། །དེ་ཡི་བརྟུལ་ཞུགས་བསམ་པ་སྐོངས། །བྱང་ཆུབ་ཤིང་དྲུང་ཡིད་རྫོགས་ལ། །ལྷུང་ཟེད་བཞི་ནི་དབུལ་ལོ་ཞེས། །འཇིག་རྟེན་སྐྱོང་བཞི་སྡེར་བཅས་པ། །དེ་དག་ཁྱོད་ལ་སྡོད་ཅིང་མཆིས། །ཚངས་པ་རབ་ཏུ་ཞི་སྤྱོད་པ། །བྱམས་ལྡན་སྙིང་རྗེ་ཐོབ་པ་ཡང ། །བླ་མེད་འཁོར་ལོ་རབ་སྐོར་བར། །མི་དབང་གསོལ་སྙམ་སྡོད་ཅིང་མཆིས། །བྱང་ཆུབ་བསྙེན་བཀུར་བྱེད་པའི་ལྷ། །བྱང་ཆུབ་སྙིང་པོར་གནས་རྣམས་ཀྱང ། །བྱང་ཆུབ་རྣམ་པར་འཚང་རྒྱ་བ། །བལྟའོ་ཞེས་ཏེ་སྡོད་ཅིང་མཆིས། །བྱང་ཆུབ་སེམས་དཔའ་བཙུན་མོའི་ནང ། །བྱ་བ་སྟོན་པ་གཞན་ཡང་མཆིས། །དེ་དག་ཐོག་མར་ཁྱོད་གྱུར་མཛོད། །དེ་དག་འོག་ཏུ་ལུས་ས་རེ། །དབྱངས་སྙན་ཅིང་ནི་དབྱངས་འཇམ་པ། །མར་མེ་མཛད་ཀྱིས་ལུང་བསྟན་དགོངས། །ཡང་དག་དེ་བཞིན་མ་ནོར་བ། །རྒྱལ་བའི་སྒྲ་དབྱངས་བསྒྲག་ཏུ་གསོལ། །བསྐུལ་བའི་ལེའུ་སྟེ། བཅུ་གསུམ་པའོ།། །། དགེ་སློང་དག་དེ་ལྟར་ལྷའི་བུ་དེས་བྱང་ཆུབ་སེམས་དཔའ་བསྐུལ་མ་ཐག་ཏུ་རྒྱལ་པོ་ཟས་གཙང་མ་ལ་རྨི་ལམ་འདི་བསྟན་ཏོ། །རྒྱལ་པོ་ཟས་གཙང་མ་གཉིད་ཀྱིས་ལོག་པའི་རྨི་ལམ་དུ་རྨིས་པ། བྱང་ཆུབ་སེམས་དཔའ་མཚན་མོ་མི་ཉལ་ཙམ་ན། ལྷའི་ཚོགས་ཀྱིས་བསྐོར་ཏེ་མངོན་པར་འབྱུང་ཞིང་མངོན་པར་བྱུང་ནས་ཀྱང་རབ་ཏུ་བྱུང་སྟེ། གོས་ངུར་སྨྲིག་གྱོན་པ་རྨིས་སོ། །དེ་ནས་དེ་སད་པ་དང ། རིངས་པ་རིངས་པར་ཉུང་རུམ་ལ་དྲིས་པ། གཞོན་ནུ་བཙུན་མོའི་འཁོར་གྱི་ནང་ན་འདུག་གམ། དེས་སྨྲས་པ་ལྷ་བཞུགས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ། གཞོན་ནུ་ནི་གདོན་མི་ཟ་བར་མངོན་པར་འབྱུང་བར་འགྱུར་ཏེ། 41.108b སྔ་ལྟས་སུ་སྣང་བ་ནི་འདི་དག་ཡིན་སྙམ་ནས། ཁོང་པའི་སྙིང་ལ་མྱ་ངན་གྱི་ཟུག་རྔུས་ཟུག་པར་གྱུར་ཏོ། །དེ་ཡང་འདི་སྙམ་དུ་སེམས་ཏེ། བདག་གི་གཞོན་ནུ་ནི་སྐྱེད་མོས་ཚལ་གྱི་སར་ཡང་ནམ་ཡང་འགྲོ་བར་མི་འགྱུར་ཏེ། བུད་མེད་ཀྱི་ཚོགས་ཀྱི་ནང་ན་མངོན་པར་དགའ་བས་འདི་ཉིད་དུ་ཆགས་པར་འགྱུར་ཏེ། མངོན་པར་འབྱུང་བར་ནི་མི་འགྱུར་རོ་སྙམ་མོ། །དེ་ནས་རྒྱལ་པོ་ཟས་གཙང་མ་གཞོན་ནུའི་ལོངས་སྤྱོད་ཀྱི་ཕྱིར། དཔྱིད་དང ། དབྱར་དང ། སྟོན་གྱི་དུས་ཇི་ལྟ་བ་བཞིན་དུ་ཁང་བཟངས་གསུམ་བྱེད་དུ་བཅུག་གོ། །དེ་ལ་དཔྱིད་ས་གང་ཡིན་པ་དེ་ནི་ཤིན་ཏུ་བསིལ་བའོ། །དབྱར་ས་གང་ཡིན་པ་དེ་ནི་གྲང་དྲོ་རན་པའོ། །དགུན་ས་གང་ཡིན་པ་དེ་ནི་རང་བཞིན་གྱིས་དྲོ་བའོ། །ཁང་བཟངས་རེ་རེའི་གྲུ་སྐས་རྣམས་ཀྱང་མི་ལྔ་བརྒྱ་ལྔ་བརྒྱས་འཛུགས་ཤིང་འབེབས་སོ། །དེ་དག་དེ་ལྟར་འཛུགས་ཤིང་འབེབས་པ་ན་གཞོན་ནུ་སུས་ཀྱང་མ་ཚོར་བར་མངོན་པར་བྱུང་བར་འགྱུར་དུ་འོང་ངོ་ཞེས་སྒྲ་དཔག་ཚད་ཕྱེད་དུ་གྲག་པ་བྱུང་ངོ ། །ལྟས་པ་དང་མཚན་མཁན་ཀུན་གྱིས་ཀྱང ། གཞོན་ནུ་ནི་ཆབ་སྒོ་བཀྲ་ཤིས་པ་ནས་མངོན་པར་འབྱུང་བར་འགྱུར་རོ། །ཞེས་ལུང་བསྟན་ཏོ། །དེ་ནས་རྒྱལ་པོས་བཀྲ་ཤིས་ཀྱི་སྒོའི་སྒོ་འཕར་ཆེན་པོ་བྱེད་དུ་བཅུག་སྟེ། སྒོ་འཕར་རེ་རེ་ཡང་མི་ལྔ་བརྒྱ་ལྔ་བརྒྱས་འབྱེད་ཅིང་གཅོད་དོ། །དེ་དག་གི་སྒྲ་ཡང་དཔག་ཚད་ཕྱེད་དུ་གྲག་གོ། །དེ་ལ་འདོད་པའི་ཡོན་ཏན་མཚུངས་པ་མེད་པ་ཡང་སྦྱོར་རོ། །གླུ་དང་རོལ་མོའི་སྒྲ་དབྱངས་ལེན་པ་དང ། གར་བྱེད་པའི་ན་ཆུང་དག་ཀྱང་རྟག་ཏུ་བཞག་པར་གྱུར་ཏོ། །དགེ་སློང་དག་དེ་ནས་བྱང་ཆུབ་སེམས་དཔས་ཁ་ལོ་བསྒྱུར་བ་ལ་སྨྲས་པ། དེང་སྐྱེད་མོས་ཚལ་གྱི་སར་འགྲོས་ཤིང་རྟ་མྱུར་དུ་སྦྱོར་ཅིག་།དེ་ནས་ཁ་ལོ་བསྒྱུར་བ་རྒྱལ་པོ་ཟས་གཙང་མའི་གན་དུ་སོང་སྟེ་འདི་སྐད་ཅེས་སྨྲས་སོ། །ལྷ་གཞོན་ནུ་སྐྱེད་མོས་ཚལ་གྱི་སར་འབྱུང་ངོ་ཞེས་གསུང་ངོ ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། བདག་གིས་གཞོན་ནུ་སྐྱེད་མོས་ཚལ་གྱི་སར་ནམ་ཡང་མ་ཕྱུང་བས་ས་བཟང་པོ་བལྟ་བར་བྱ 41.109a བའི་ཕྱིར་བདག་གིས་གཞོན་ནུ་སྐྱེད་མོས་ཚལ་གྱི་སར་ཕྱུང་ན་འོན་ཏང་གཞོན་ནུ་བུད་མེད་ཀྱི་ཚོགས་ཀྱིས་བསྐོར་ཏེ་དགའ་བ་མྱོང་བར་འགྱུར་བས། མངོན་པར་མི་འབྱུང་ངོ་སྙམ་མོ། །དེ་ནས་རྒྱལ་པོ་ཟས་གཙང་མ་བྱང་ཆུབ་སེམས་དཔའ་ལ་བྱམས་པ་དང ། རིམ་གྲོ་བྱེད་པས་ད་སྟེ་ཞག་བདུན་ན་གཞོན་ནུ་ས་བཟང་པོ་བལྟ་བའི་ཕྱིར་སྐྱེད་མོས་ཚལ་གྱི་སར་འབྱུང་གིས། དེར་ཁྱེད་ཀྱིས་གཞོན་ནུའི་མིག་ཏུ་མི་འོང་བ་མཐོང་བར་མི་འགྱུར་བར་ཡིད་དུ་མི་འོང་བ་ཐམས་ཅད་ནི་སོལ་ཅིག་།ཡིད་དུ་འོང་བ་དང ། ཡུལ་ཉམས་དགའ་བ་ཐམས་ཅད་ནི་སྦྱོར་ཅིག་ཅེས་གྲོང་ཁྱེར་དུ་དྲིལ་བསྒྲགས་སོ། །དེ་ནས་ཞག་བདུན་གྱི་ཉིན་པར་གྲོང་ཁྱེར་ཐམས་ཅད་བརྒྱན་ཏོ། །སྐྱེད་མོས་ཚལ་ཡང་མཛེས་པར་བྱས་ཏེ། རས་བཅོས་བུ་ཁ་དོག་ཐ་དད་པའི་བླ་རེ་ནི་བྲེས། གདུགས་དང་རྒྱལ་མཚན་དང ། བ་དན་གྱིས་ནི་ལེགས་པར་བརྒྱན་ཏོ། །བྱང་ཆུབ་སེམས་དཔའ་ལམ་གང་ནས་འགྲོ་བའི་ལམ་དེ་ཡང་ཆག་ཆག་བཏབ་སྟེ་ཕྱགས་ནས། སྤོས་ཆུའི་ཆག་ཆག་བཏབ་སྟེ། མེ་ཏོག་སིལ་མ་ནི་ཆལ་པར་བཀྲམ། པོག་ཕོར་ནས་ནི་བདུགས། བུམ་པ་གང་བས་ནི་མཛེས་པར་བྱས། ཆུ་ཤིང་ལྗོན་པ་ནི་བསྒྲེང ། དར་ཐ་དད་པ་སྣ་ཚོགས་ཀྱི་བླ་རེ་ནི་བྲེས། རིན་པོ་ཆེའི་དྲིལ་བུ་གཡེར་ཀའི་དྲ་བ་དང ། རྒྱན་ཕྲེང་དང་ཆུན་པོ་ནི་སྤྱངས། དཔུང་བཞིའི་བཀོད་པ་ནི་བྱས་སོ། །གཡོག་འཁོར་ཀྱང་གཞོན་ནུའི་བཙུན་མོའི་འཁོར་བརྒྱན་པའི་ཕྱིར་བརྩོན་པར་གྱུར་ཏོ། །དེ་ནས་བྱང་ཆུབ་སེམས་དཔའ་བཀོད་པ་ཆེན་པོས་གྲོང་ཁྱེར་གྱི་ཤར་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་བྱུང་ངོ ། །དེ་ནས་བྱང་ཆུབ་སེམས་དཔའ་ཉིད་ཀྱི་མཐུས་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་མི་རྒན་པོ་གཏུགས་པ། འཁོགས་པ། ལུས་ལས་རྩ་རྒྱུས་འཐོན་པ། སོ་རྒལ་བ། ལུས་གཉེར་མས་གང་བ། སྐྲ་བྱི་བ། སྒུར་བ་གདུང་རྟེན་ལྟར་དགུ་བ། ཞོམ་པ། འཁར་བ་ལ་རྟེན་པ། མཐུ་ཟད་པ། དར་ཡལ་བ། མིད་པ་ནས་སྒྲ་ངར་ངར་པོ་འབྱུང་བ། ལུས་སྒུ 41.109b བས་འཁར་བ་ལ་བརྟེན་ནས་ཡན་ལག་དང་ཉིང་ལག་ཐམས་ཅད་འདར་བ་ཞིག་ལམ་ཀར་བསྟན་པར་གྱུར་ཏོ། །དེ་ནས་བྱང་ཆུབ་སེམས་དཔས་ཤེས་བཞིན་དུ་ཁ་ལོ་བསྒྱུར་བ་ལ་འདི་སྐད་ཅེས་སྨྲས་སོ། །ཁ་ལོ་བསྒྱུར་བ་མི་རིད་ཉམ་ཆུང་ཞིང ། །ཤ་ཁྲག་སྐམས་ལ་རྒྱུས་ལྤགས་ཉི་ཚེས་དཀྲིས། །མགོ་དཀར་སོ་རྒལ་ལུས་ནི་རབ་སྐེམ་ལ། །མཁར་བ་བརྟེན་ཅིང་མི་བདེ་འཁྱོར་འགྲོས་སུ། །ཁ་ལོ་བསྒྱུར་བས་སྨྲས་པ། ལྷ་ཅིག་མི་འདི་རྒ་བས་ཟིལ་གྱིས་ནོན། །དབང་པོ་ཉམས་ཤིང་སྡུག་བསྔལ་བརྩོན་སྟོབས་ཉམས། །གཉེན་གྱི་སྐྱེ་བོས་བརྙས་ཤིང་མགོན་མེད་གྱུར། །དོན་བགྱིད་མི་ནུས་ནགས་ཁྲོད་ཤིང་ལྟར་བོར། །བྱང་ཆུབ་སེམས་དཔས་སྨྲས་པ། འདི་ཡི་ཆོས་འདི་རིགས་ཀྱི་ཡིན་ནམ་འོན་ཏམ་ནི། །འགྲོ་བ་འདི་ཀུན་ལ་ཡང་འདི་སྲིད་དེ་སྨྲོས་ཤིག་།ཚིག་འདི་ཡང་དག་ཇི་བཞིན་མྱུར་དུ་སྨྲོས་ཤིག་དང ། །ཐོས་ནས་དེ་བཞིན་དོན་ལ་འདིར་ནི་ཚུལ་བཞིན་བསམ། །ཁ་ལོ་བསྒྱུར་བས་སྨྲས་པ། ལྷ་འདི་རིགས་ཆོས་མ་ལགས་ཡུལ་འཁོར་ཆོས་མ་ལགས། །སྐྱེ་བོ་ཀུན་གྱི་དར་ལ་བབ་པ་རྒ་བས་འཇོམས། །ཁྱོད་ཀྱི་ཡབ་དང་ཡུམ་དང་ཉེ་དུ་གཉེན་ཚོགས་ཀྱང ། །རྒ་ལས་མཐར་འགྲོ་བ་ཡི་ཐབས་ནི་གཞན་མ་མཆིས། །བྱང་ཆུབ་སེམས་དཔས་སྨྲས་པ། ཁ་ལོ་བསྒྱུར་བ་བྱིས་པའི་སྐྱེ་བོ་མི་མཁས་པའི། །བློ་ངན་གཞོན་པས་རྒྱགས་ཤིང་མྱོས་པས་རྒ་མ་མཐོང ། །ང་ནི་སླར་འགྲོ་ང་ཡི་ཤིང་རྟ་མྱུར་དུ་སྒྱུར། །ང་ཡང་རྒ་ལ་གནས་པས་རྩེ་དགའས་ཅི་ཞིག་བྱ། །དེ་ནས་བྱང་ཆུབ་སེམས་དཔའ་ཤིང་རྟའི་མཆོག་དེ་སླར་བསྒྱུར་ཏེ་ཕྱིར་གྲོང་ཁྱེར་དུ་ཞུགས་སོ། །དགེ་སློང་དག་དེ་ལྟར་བྱང་ཆུབ་སེམས་དཔའ་དུས་གཞན་ཞིག་ན། བཀོད་པ་ཆེན་པོས་གྲོང་ཁྱེར་གྱི་ལྷོ་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་ཞུགས་པ་དང ། དེས་ལམ་ཀ་ན་མི་ནད་ཀྱིས་ཉེན་པ། དམུ་རྫིང་ཅན་ལུས་ཉམ་ཆུང་བ། རང་གི་གཅིན་རྐྱག་ཏུ་བྱིང་བ། མགོན་མེད་པ། སྐྱབས་མེད་པ། ཤིན་ཏུ་ཤ་ཐང་བར་དབུགས་དབྱུང་ཞིང་བརྔུབ་དགོས་པ་ཞིག་མཐོང་ངོ ། །མཐོང་ནས 41.110a ཀྱང་ཡང་བྱང་ཆུབ་སེམས་དཔས་ཤེས་བཞིན་དུ་ཁ་ལོ་བསྒྱུར་བ་ལ་འདི་སྐད་ཅེས་སྨྲས་སོ། །ཁ་ལོ་བསྒྱུར་བ་མི་རྩུབ་ལུས་ཀྱི་མདོག་ངན་ལ། །དབང་པོ་ཐམས་ཅད་ཉམས་ཤིང་དབུགས་དབྱུང་རབ་ཏུ་དཀའ། །ཡན་ལག་ཀུན་སྐམས་ལྟོ་བས་དཀྲུགས་ཤིང་ཉམ་ཐག་གྱུར། །རང་གི་གཅིན་རྟུག་སྨད་པའི་གནས་ན་འདུག་འདི་སུ། །ཁ་ལོ་བསྒྱུར་བས་སྨྲས་པ། ལྷ་ཅིག་མི་འདི་ཤིན་ཏུ་ནད་ཀྱིས་བཏབ་པ་སྟེ། །ནད་ཀྱི་འཇིགས་པ་ཉེ་བར་མཆིས་པས་འགུམ་ལ་ཐུག་།ནད་མེད་གཟི་བརྗིད་མ་མཆིས་སྟོབས་ཀྱང་རྣམ་པར་ཉམས། །མགོན་དང་སྐྱབས་དང་གླིང་དང་དཔུང་གཉེན་མ་མཆིས་ལགས། །བྱང་ཆུབ་སེམས་དཔས་སྨྲས་པ། ནད་མེད་པ་ཡང་རྨི་ལམ་ན་ནི་རྩེ་དང་མཚུངས། །ནད་ཀྱི་འཇིགས་པ་འདི་ལྟར་ཤིན་ཏུ་མི་བཟད་པ། །སྐྱེས་བུ་མཁས་པས་གནས་འདི་མཐོང་ནས་ཇི་ལྟ་བུར། །རྩེ་ལ་དགའ་དང་སྡུག་པའི་འདུ་ཤེས་བསྐྱེད་པར་འགྱུར། །དགེ་སློང་དག་དེ་ནས་བྱང་ཆུབ་སེམས་དཔའ་ཤིང་རྟའི་མཆོག་དེ་སླར་བསྒྱུར་ཏེ་ཕྱིར་ཡང་གྲོང་ཁྱེར་དུ་ཞུགས་སོ། །དགེ་སློང་དག་དེ་ལྟར་བྱང་ཆུབ་སེམས་དཔའ་དུས་གཞན་ཞིག་ན་བཀོད་པ་ཆེན་པོས་གྲོང་ཁྱེར་གྱི་ནུབ་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་ཞུགས་པ་དང ། དེས་ལམ་ཀ་ན་མི་ཤི་བར་གྱུར་པ། ཁྱོགས་ལ་བཞག་པ། རས་ཀྱི་བླ་རེ་ཕུབ་པ། ཉེ་དུའི་ཚོགས་ཀྱིས་བསྐོར་ཏེ། ཀུན་ཀྱང་ངུ་ཞིང་སྐད་ཕྱུང་སྟེ། ངུ་ལ་སྨྲེ་སྔགས་འདོན་ཅིང་སྐྲ་བཤིག་ལ་མགོ་ལས་ས་འཐོར་ཞིང་བྲང་རྡུང་ལ་ཆོ་ངེ་འདོན་ཅིང་ཕྱི་བཞིན་འབྲང་བར་གྱུར་པ་མཐོང་ངོ ། །མཐོང་ནས་ཀྱང་ཡང་བྱང་ཆུབ་སེམས་དཔས་ཤེས་བཞིན་དུ་ཁ་ལོ་བསྒྱུར་བ་ལ་འདི་སྐད་ཅེས་སྨྲས་སོ། །ཁ་ལོ་བསྒྱུར་བ་མི་འདི་ཁྱོགས་ལ་བཞག་ནས་ནི། །མི་དག་སྐྲ་བཤིག་མགོ་ལ་ས་ཡིས་འཐོར་བྱེད་ཅིང ། །སྣ་ཚོགས་དག་གི་ཚིག་ནི་བརྗོད་ལ་བྲང་རྡུང་བས། །ཀུན་ནས་བསྐོར་བ་བྱས་ཏེ་ཁྱེར་བ་སུ་ཞིག་ཡིན། །ཁ་ལོ་བསྒྱུར་བས་སྨྲས་པ། ལྷ་ཅིག་མི་འདི་འཛམ་བུའི་གླིང་དུ་གུམ་པ་སྟེ། །སླན་ཆད་ཕ་མ་མཆིས་བྲང་བུ་རྣམས་མཐོང་མི་འགྱུར། ། 41.110b ལོངས་སྤྱོད་ཁྱིམ་དང་མཛའ་གཉེན་ཚོགས་རྣམས་སྤངས་ནས་ནི། །འཇིག་རྟེན་ཕ་རོལ་མཆིས་ཏེ་སླན་ཆད་གཉེན་མི་མཐོང ། །བྱང་ཆུབ་སེམས་དཔས་སྨྲས་པ། རྒ་བས་གནོད་པར་འགྱུར་བའི་གཞོན་པ་ཅིར་མི་རུང ། །སྣ་ཚོགས་ནད་ཀྱིས་གནོད་འགྱུར་ནད་མེད་ཅིར་མི་རུང ། །རིང་དུ་མི་གསོན་གསོན་པ་མཁས་ལ་ཅིར་མི་རུང ། །རྒ་ལ་ཆགས་པ་སྐྱེས་བུ་མཁས་ལ་ཅིར་མི་རུང ། །གལ་ཏེ་རྒ་མེད་ནད་མེད་འཆི་བ་མེད་གྱུར་ཀྱང ། །འོན་ཀྱང་ཕུང་པོ་ལྔ་འཛིན་སྡུག་བསྔལ་ཆེ་ཡིན་ན། །རྒ་ན་འཆི་བ་རྟག་ཏུ་འབྲང་བ་སྨོས་ཅི་དགོས། །ལེགས་པར་སླར་ཟློག་རབ་ཏུ་ཐར་པར་བྱ་བ་བསམ། །དགེ་སློང་དག་དེ་ནས་བྱང་ཆུབ་སེམས་དཔའ་ཤིང་རྟ་མཆོག་དེ་སླར་བཟློག་སྟེ། ཕྱིར་ཡང་གྲོང་ཁྱེར་དུ་ཞུགས་སོ། །དགེ་སློང་དག་དེ་ལྟར་བྱང་ཆུབ་སེམས་དཔའ་དུས་གཞན་ཞིག་ན་གྲོང་ཁྱེར་གྱི་བྱང་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་ཞུགས་པ་དང ། བྱང་ཆུབ་སེམས་དཔའི་མཐུས་ལྷའི་བུ་དེ་དག་ཉིད་ཀྱིས་ལམ་ཀ་དེར་དགེ་སློང་ཞིག་མངོན་པར་སྤྲུལ་པ་དང ། བྱང་ཆུབ་སེམས་དཔས་དགེ་སློང་ཞི་བ། དུལ་བ་ཡང་དག་པར་བསྡམས་པ། ཚངས་པར་སྤྱོད་པ། མིག་ཕམ་པ། གཉའ་ཤིང་གང་ཙམ་དུ་ལྟ་བ། སྤྱོད་ལམ་མཛེས་པ་ཕུན་སུམ་ཚོགས་པ། འགྲོ་བ་དང་ལྡོག་པ་མཛེས་པ་ཕུན་སུམ་ཚོགས་པ། མདུན་དུ་ལྟ་བ་དང ། གཡས་གཡོས་སུ་ལྟ་བ་མཛེས་པ། བསྐུམ་པ་དང་སྨྱང་བ་མཛེས་པ། ཆོས་གོས་སྣམ་སྦྱར་དང་ལྷུང་བཟེད་དང་ཆོས་གོས་ཐོགས་པ་མཛེས་པ་ཞིག་ལམ་ཀ་ན་འདུག་པ་དེ་མཐོང་ངོ ། །མཐོང་ནས་ཀྱང་བྱང་ཆུབ་སེམས་དཔས་ཤེས་བཞིན་དུ་ཁ་ལོ་བསྒྱུར་བ་ལ་འདི་སྐད་ཅེས་སྨྲས་སོ། །ཁ་ལོ་བསྒྱུར་བ་སྐྱེས་བུ་སེམས་ཞི་རབ་ཞི་ཞིང ། །མིག་ཕབ་འགྲོ་ལ་གཉའ་ཤིང་གང་ཙམ་ལྟ་བྱེད་ཅིང ། །ངུར་སྨྲིག་གོས་གྱོན་ཤིན་ཏུ་རབ་ཏུ་ཞི་བ་སྤྱོད། །ལྷུང་བཟེད་ཐོགས་ནས་མི་རྒོད་མ་ཁེངས་སུ་ཞིག་ཡིན། །ཁ་ལོ་བསྒྱུར་བས་སྨྲས་པ། ལྷ་ཅིག་མི་འདི་དགེ་སློང་ཞེས་ནི་བགྱི་བ་ལགས། །འདོད་པའི་དགའ་བ་སྤངས་ཤིང་ཤིན་ཏུ་དུལ་བར་སྤྱོད། །བདག 41.111a ཉིད་ཞི་བ་ཚོལ་ཞིང་རབ་ཏུ་བྱུང་བར་གྱུར། །འདོད་ཆགས་ཞེ་སྡང་བྲལ་བར་བསོད་སྙོམས་སྤྱོད་ཅིང་རྒྱུ། །བྱང་ཆུབ་སེམས་དཔས་སྨྲས་པ། འདི་ནི་དགེ་བར་ལེགས་སྨྲས་ང་ཡང་འདོད་པ་སྟེ། །རབ་ཏུ་བྱུང་བ་མཁས་པ་རྣམས་ཀྱིས་རྟག་ཏུ་བསྔགས། །དེ་ནི་བདག་ལ་ཕན་ཞིང་སེམས་ཅན་གཞན་ལའང་ཕན། །འཚོ་བ་བདེ་ཞིང་ཉམས་འཐུན་འཆི་མེད་འབྲས་བུར་འགྱུར། །དགེ་སློང་དག་དེ་ནས་བྱང་ཆུབ་སེམས་དཔས་ཤིང་རྟ་མཆོག་དེ་སླར་བསྒྱུར་ཏེ་ཕྱིར་ཡང་གྲོང་ཁྱེར་དུ་ཞུགས་སོ། །དགེ་སློང་དག་དེ་ལྟར་བྱང་ཆུབ་སེམས་དཔའ་ལ་བསྐུལ་བ་རྣམ་པ་འདི་ལྟ་བུ་འདི་དག་རྒྱལ་པོ་ཟས་གཙང་མས་མཐོང་ཞིང་ཐོས་ནས། བྱང་ཆུབ་སེམས་དཔའ་ཡོངས་སུ་བསྲུང་བའི་ཕྱིར་ར་བ་རྒྱ་ཆེན་པོ་བྱེད་དུ་བཅུག་སྟེ། འོབས་ཀྱང་རྐོར་བཅུག་།སྒོ་གཏན་དམ་པོ་ཡང་འཛུགས་སུ་བཅུག་།སྲུངས་མ་ཡང་བཀོད། དཔའ་བོ་རྣམས་ཀྱང་སྦྲན། བཞོན་པ་ཡང་སྟ་གོན་བྱས། གོ་ཆ་ཡང་གྱོན་དུ་བཅུག་གོ། །བྱང་ཆུབ་སེམས་དཔའ་བསྲུང་བའི་ཕྱིར། གྲོང་ཁྱེར་ཆེན་པོའི་སྒོ་བཞིའི་ལམ་གྱི་འདོ་སུམ་རྣམས་སུ་དཔུང་ཆེན་པོའི་བཀོད་པ་བཞག་སྟེ། བྱང་ཆུབ་སེམས་དཔའ་མངོན་པར་བྱུང་ད་རེ་ཞེས་དེ་དག་དེ་སྲུང་དུ་བཅུག་གོ། །བཙུན་མོའི་འཁོར་ལ་ཡང་རེས་འགའ་ཙམ་ཡང་གླུ་དབྱངས་ཀྱི་རྒྱུན་ཆད་ད་རེ། དགའ་བ་དང་རྩེ་བ་ཐམས་ཅད་ཀྱང་སྦྱོར་ཅིག་།ཅི་ནས་ཀྱང་གཞོན་ནུ་ཆགས་ནས་རབ་ཏུ་འབྱུང་བར་མི་འགྱུར་བ་དང ། མགུ་བར་འགྱུར་བར་བུད་མེད་ཀྱི་སྒྱུ་ཡང་སྟོན་ཅིག་ཅེས་བསྒོའོ། །དེ་ལ་འདི་སྐད་ཅེས་བྱ་སྟེ། ཐབ་མོ་མོས་པའི་སྐྱེས་བུ་ལག་ན་རལ་གྲི་མཚོན་ཐོགས་སྒོ་གར་བཀོད། །གོ་བགོས་མི་རྟ་གླང་པོ་ཤིང་རྟ་མི་བསྐྱོན་གླང་པོའི་ཕྲེང་བའང་བཀོད། །འོབས་དང་ཤིང་ཐགས་དག་དང་རྟ་བབས་ཕྱིར་མཐོན་པོ་འང་བྱེད་དུ་བཅུག་།སྒོ་མོ་རྒྱང་གྲགས་གྲག་པའི་སྒྲ་འབྱུང་བ་ཡང་གཏན་པ་དམ་པོ་བཅུག་།ཤཱཀྱའི་ཚོགས་རྣམས་ཐམས་ཅད་ཡིད་མི་དགའ་ཞིང་ཉིན་མཚན་སྲུང་བར་བྱེད། །དཔུང་ཆེན་དེ་དག་རྣམས་ཀྱང་སྒྲ་སྐད་ཆེན་པོ་ཤིན་ཏུ་གྲག་པར་བྱེད། །དེས་པ་འདི་ནས་འབྱུང་དུ་འོང 41.111b ཞེས་གྲོང་ཁྱེར་འཁྲུགས་ཤིང་ཡིད་སྔངས་སྐྲག་།ཤཱཀྱའི་རིགས་སྐྱེས་སོང་ན་རིགས་འདི་ཆད་པར་མི་འགྱུར་གྲང་སྙམ་བྱེད། །སྐྱེ་བོ་བུད་མེད་དག་ལ་བསྒོ་བ་རྟག་ཏུ་གླུ་དབྱངས་རྒྱུན་མ་བཅད། །རྩེ་བས་དགའ་བ་རྣམས་ཀྱི་བསྙེན་བཀུར་གྱིས་ཤིང་ཡིད་ཀྱང་མགུ་བར་གྱིས། །བུད་མེད་སྒྱུ་ཐབས་སྤྱོད་པ་གང་ཡིན་རྣམ་པ་དུ་མ་མང་པོ་སྟོན། །དེས་པ་འགྲོར་མི་འགྱུར་བར་བསྲུང་བར་བྱོས་ཤིང་བགེགས་ཀྱང་རབ་ཏུ་བྱོས། །ཁ་ལོ་བསྒྱུར་བ་མཆོག་དེ་མངོན་པར་འབྱུང་བའི་སྔ་ལྟས་འདི་དག་སྟེ། །ངང་པ་ཁྲུང་ཁྲུང་དག་དང་རྨ་བྱ་རི་སྐེགས་དག་དང་ནེ་ཚོ་རྣམས། །ཁང་བཟང་སྐར་ཁུང་རྟ་བབས་མཆོག་དང་ཡང་ཐོག་ཁྲི་ལ་འཁོད་ནས་ནི། །དམན་ཞིང་དམན་ལ་མི་དགའ་མི་བདེ་མགོ་སྨད་སེམས་ཤིང་སྒྲ་མི་འབྱིན། །རྫིང་དང་རྫིང་ཆེན་དག་གི་པད་མ་དག་ཀྱང་རྙིས་ཤིང་རྙིས་པར་གྱུར། །ཤིང་ལྗོན་སྐམས་ཤིང་ཡལ་ག་མེ་ཏོག་ལྷགས་ལ་མེ་ཏོག་སླར་མི་འཆགས། །པི་བང་གླིང་བུ་རྒྱུད་གསུམ་རྒྱུད་ཀྱིས་བརྒྱན་པ་དེ་ཚེ་གློ་བུར་ཆད། །རྔ་དང་རྫ་རྔ་དག་ཀྱང་ལག་པས་བརྡུངས་ན་འཆགས་ཅིང་སྒྲ་མི་འབྱུང ། །གྲོང་ཁྱེར་དེ་དག་ཐམས་ཅད་འཁྲུག་པར་གྱུར་ཅིང་ཤིན་ཏུ་གཉིད་ཀྱིས་ནོན། །གང་གི་ཡིད་ཀྱང་གར་བྱེད་པ་དང་གླུ་ལེན་པ་ལ་དགའ་བ་མེད། །རྒྱལ་པོའང་མཆོག་ཏུ་རབ་ཏུ་ཡིད་དམན་གྱུར་ཏེ་སེམས་ཁོངས་ཆུད་ཅིང་འདུག་།ེ་མ་མ་རུང་ཤཱཀ་རིགས་རྫུ་འཕྲུལ་རྒྱ་ཆེན་མི་ཚིག་གྲང་སྙམ་བྱེད། །ས་འཚོ་མ་དང་རྒྱལ་བུ་མལ་ཅིག་ན་ནི་ཉལ་ཞིང་འཁོད་པའི་ཚེ། །ནམ་ཕྱེད་ཙམ་ན་ས་འཚོ་མ་ཡི་རྨི་ལམ་དུ་ནི་འདི་དག་རྨིས། །ས་འདི་ཐམས་ཅད་རྩེ་མོར་ལྡན་པའི་རི་དང་བཅས་ཏེ་གཡོས་པར་གྱུར། །ཤིང་ལྗོན་རྣམས་ཀྱང་རླུང་གིས་བསྐྱོད་ནས་རྩ་ནས་འཐོན་ཏེ་ས་ལ་སྒྱེལ། །ཉི་མ་ཟླ་བ་སྐར་མའི་རྒྱན་དང་བཅས་ཏེ་མཁའ་ལས་ས་ལ་ལྷུང ། །ལག་པ་གཡོན་པས་སྐྲ་ཡང་རབ་ཏུ་འབལ་ཞིང་ཅོད་པན་ལྷུང་བ་མཐོང ། །ལག་པ་ཆད་ལ་དེ་བཞིན་རྐང་པའང་ཆད་ཅིང་བདག་ནི་སྒྲེན་མོར་མཐོང ། །བདག་གི་མུ་ཏིག་དོ་ཤལ་ནོར་བུ་གསེར་གྱི་འོག་པག་ཆད་པར་མཐོང ། །ཉལ་ཁྲི་དེ་ཡི་རྐང་པ་བཞི 41.112a ཆག་ས་ཡི་སྟེང་ན་ཉལ་བ་མཐོང ། །རྒྱལ་པོའི་གདུགས་ཀྱི་ཡུ་བ་སྤྲས་པ་དཔལ་ལྡན་མཛེས་པ་ཆག་པར་མཐོང ། །རྒྱན་རྣམས་ཀུན་ཀྱང་རྣམ་པར་འཐོར་ཅིང་ཆུ་ཡིས་ཁྱེར་བར་གྱུར་པ་དང ། །ཁྱིམ་ཐབ་རྒྱན་ཡང་གོས་དང་ཅོད་པན་བཅས་ཏེ་མལ་སྟེང་འཐོར་བར་མཐོང ། །གྲོང་ཁྱེར་དག་ནས་མེ་སྒྲོན་ཕྱིར་བྱུང་གྲོང་ཁྱེར་མུན་པས་ནོན་པ་དང ། །རིན་པོ་ཆེ་ལས་བྱས་པའི་དྲ་བ་མཛེས་པའང་ཆད་པར་གྱུར་པ་རྨིས། །མུ་ཏིག་དོ་ཤལ་འཕྱང་བ་ལྷུང་ནས་རྒྱ་མཚོ་ཆེན་པོས་དཀྲུགས་པ་དང ། །དེ་ཡི་ཚེ་ན་རི་ཡི་རྒྱལ་པོ་རི་རབ་གནས་ནས་གཡོས་པ་རྨིས། །ཤཱཀྱའི་བུ་མོའི་རྨི་ལམ་དུ་ནི་འདི་འདྲ་འདི་དག་རྨིས་གྱུར་ནས། །དེ་སད་མིག་ནས་མཆི་མ་ཟག་ཅིང་རང་གི་ཁྱོ་ལ་འདི་སྐད་སྨྲས། །ལྷ་ཅིག་རྨི་ལམ་འདི་འདྲ་རྨིས་པ་ཅིར་འགྱུར་བ་ནི་བཀའ་སྩོལ་ཅིག་།བདག་ནི་དྲན་པ་འཁྲུལ་ཅིང་མིག་ཀྱང་འཁྲུལ་ལ་ཡིད་ནི་མྱ་ངན་ནོན། །དེ་ཡིས་དེ་ཐོས་ཀ་ལ་པིང་ཀ་རྔ་སྒྲ་ཚངས་དབྱངས་སྒྲ་སྙན་པས། །ས་འཚོ་མ་ལ་སྨྲས་པ་ཁྱོད་ནི་རབ་ཏུ་དགར་འགྱུར་སྡིག་པ་མེད། །སེམས་ཅན་གང་དག་བསོད་ནམས་སྔོན་སྤྱད་དེ་དག་རྨི་ལམ་འདི་འདྲ་རྨི། །སྡུག་བསྔལ་དུ་མས་ཉེན་པ་རྨི་ལམ་འདི་འདྲ་རྨི་བ་ག་ལ་ཡོད། །ཁྱོད་ཀྱིས་ས་ནི་རབ་ཏུ་གཡོས་པ་དང ། །རི་རྩེར་བཅས་ཏེ་ས་ལ་ལྷུང་རྨིས་པ། །ལྷ་དང་ཀླུ་དང་སྲིན་པོ་འབྱུང་པོའི་ཚོགས། །ཀུན་གྱིས་ཁྱོད་མཆོད་གཙོ་མོར་བྱེད་པར་འགྱུར། །ཁྱོད་ཀྱིས་ཤིང་རྣམས་རྩ་ནས་འཐོན་རྨིས་ཤིང ། །ལག་པ་གཡོན་པས་སྐྲ་འབལ་རྨིས་པ་ནི། །ས་འཚོ་མྱུར་དུ་ཉོན་མོངས་དྲ་བ་བཅད། །འདུས་བྱས་དག་ལས་ལྟ་བའི་དྲ་བ་འབྱིན། །ཁྱོད་ཀྱིས་ཉི་ཟླ་ས་ལ་ལྷུང་རྨིས་ཤིང ། །སྐར་མ་རྣམས་ཀྱང་ལྷུང་བར་རྨིས་པ་ནི། །ས་འཚོ་མྱུར་དུ་ཉོན་མོངས་དགྲ་བཅོམ་སྟེ། །ཁྱོད་ནི་འཇིག་རྟེན་མཆོད་པ་བསྔགས་པར་འགྱུར། །ཁྱོད་ཀྱིས་མུ་ཏིག་དོ་ཤལ་འཐོར་རྨིས་ཤིང ། །ལུས་ཀུན་ཆད་དང་སྒྲེན་མོ་རྨིས་པ་ནི། །ས་འཚོ་མྱུར་དུ་བུད་མེད་ལུས་སྤངས་ཏེ། །རིང་པོར་མི་ཐོགས་སྐྱེས་པའི་ལུས་སུ་འགྱུར། །ཁྱོད་ཀྱིས་ཁྲི་རྐང་ཆག་པར་རྨིས་པ་དང ། །གདུགས་ཡུ་རིན 41.112b ཆེན་སྤྲས་པ་ཆག་རྨིས་པ། །ས་འཚོ་མྱུར་དུ་ཆུ་བོ་བཞི་རྒལ་ཅིང ། །ང་ནི་འཇིག་རྟེན་གདུགས་གཅིག་འགྱུར་བ་མཐོང ། །ཁྱོད་ཀྱིས་རྒྱན་རྣམས་ཆུས་ཁྱེར་རྨིས་པ་དང ། །ང་ཡི་གོས་དང་ཅོད་པན་ཁྲི་སྟེང་རྨིས། །ས་མཚོ་མྱུར་དུ་མཚན་གྱིས་བརྒྱན་ནས་ནི། །འཇིག་རྟེན་ཀུན་གྱིས་ང་ལ་བསྟོད་པ་མཐོང ། །ཁྱོད་ཀྱིས་མར་མེ་བརྒྱ་ཕྲག་བྱེ་བ་དག་།གྲོང་ཁྱེར་བྱུང་ནས་མུན་གནག་གྱུར་རྨིས་པ། །ས་འཚོ་མྱུར་དུ་མ་རིག་རྨོངས་པའི་མུན། །འཇིག་རྟེན་ཀུན་ལ་ཤེས་རབ་སྣང་བྱེད་འགྱུར། །ཁྱོད་ཀྱིས་མུ་ཏིག་དོ་ཤལ་ཆད་པ་དང ། །གསེར་གྱི་ཚོང་ཚོང་སྤྲས་པ་ཆད་རྨིས་པ། །ས་འཚོ་མྱུར་དུ་ཉོན་མོངས་དྲ་བཅད་དེ། །འདུས་བྱས་དག་ལས་འདུ་ཤེས་སྐུད་པ་འབྱིན། །ས་འཚོ་གང་ཕྱིར་ང་ལ་གུས་པར་ནི། །རྟག་ཏུ་རིམ་གྲོ་མཆོག་གིས་མཆོད་བྱེད་ན། །ཁྱོད་ལ་ངན་འགྲོ་མེད་ཅིང་མྱ་ངན་མེད། །མྱུར་དུ་དགའ་ཞིང་མཆོག་ཏུ་དགའ་བ་འཐོབ། །ངས་ནི་སྔོན་ཆད་སྦྱིན་པ་གྱ་ནོམ་བྱིན། །ཚུལ་ཁྲིམས་བསྲུངས་དང་རྟག་ཏུ་བཟོད་པ་བསྒོམས། །དེ་བས་ང་ལ་དད་པ་གང་རྙེད་པ། །དེ་དག་ཐམས་ཅད་དགའ་ཞིང་རབ་དགའ་རྙེད། །འཁོར་བར་བསྐལ་པ་བྱེ་བ་མཐའ་ཡས་སུ། །ངས་ནི་བྱང་ཆུབ་ལམ་མཆོག་རྣམ་པར་སྦྱངས། །དེ་བས་ང་ལ་དད་པ་གང་བྱེད་པ། །དེ་དག་ཐམས་ཅད་ངན་སོང་གསུམ་པོ་ཆད། །དགའ་བ་འཐོབ་ཀྱིས་མི་དགའ་མ་སྐྱེད་ཅིག་།ཚིམ་པ་ཐོབ་པར་གྱིས་ལ་མགུ་སྐྱེད་ཅིག་།དགའ་དང་མཆོག་ཏུ་དགའ་བ་མྱུར་འཐོབ་སྟེ། །ཁྱོད་ཀྱི་རྨི་ལྟས་བཟང་གིས་ས་འཚོ་ཉོལ། །སྔོན་ཆད་དགེ་བའི་ལས་ནི་ཡང་དག་བསགས་གྱུར་པ། །མི་མཆོག་རྣམས་ནི་མངོན་པར་འབྱུང་བའི་དུས་བབ་ཚེ། །མཚན་མ་འདི་དག་བསོད་ནམས་གཟི་བརྗིད་བསགས་པ་དང ། །དཔལ་གྱི་གཟི་བརྗིད་སྙིང་པོ་ཅན་དེས་རྨི་བར་འགྱུར། །དེ་ནི་རྐང་པ་དག་དང་ལག་པ་ཆེན་པོ་ཡིས། །རྒྱ་མཚོ་ཆེན་པོ་བཞི་པོ་དག་གི་ཆུ་དཀྲུག་དང ། །ས་འདི་ཐམས་ཅད་སྣ་ཚོགས་མལ་ཆར་གྱུར་པ་དང ། །རི་བོ་ལྷུན་པོ་མཆོག་ཀྱང་སྔས་སུ་གྱུར་པ་རྨི། །རྨི་ལམ་ན་ནི་འོད་རབ་བཀྱེ་བས་འཇིག་རྟེན་ན། །མུན་པ་མུན་ནག 41.113a ཆེན་པོ་རྣམ་པར་བསལ་བ་དང ། །ས་ལས་གདུགས་ཤིག་བྱུང་བས་འཇིག་རྟེན་གསུམ་ཁྱབ་དང ། །འོད་ཀྱིས་རེག་པས་ལོག་ལྷུང་སྡུག་བསྔལ་རབ་ཞི་རྨི། །དཀར་ནག་སྲོག་ཆགས་བཞི་ཞིག་རྐང་པ་ལྡག་པ་དང ། །ཁ་དོག་བཞི་པའི་བྱ་འོངས་ཁ་དོག་གཅིག་སྒྱུར་དང ། །མཆོག་ཏུ་ངན་པ་སྨད་པ་ངན་སྐྱུགས་རི་ལ་ཡང ། །འཛེགས་ནས་འགྲོ་ཡང་དེ་ན་གོས་པ་མེད་པ་རྨི། །རྨི་ལམ་ན་ནི་ཆུ་བོ་ཆུ་ཡིས་རབ་གང་ནས། །སྲོག་ཆགས་བྱེ་བ་ཁྲག་ཁྲིག་མང་པོ་ཁྱེར་བ་ལས། །དེར་ནི་གྲུར་བྱས་བསྒྲལ་ཏེ་གཞན་དག་བསྒྲལ་ནས་ནི། །དེ་ཡིས་འཇིགས་མེད་མྱ་ངན་མེད་མཆོག་ཐང་བཀོད་རྨི། །རྨི་ལམ་ན་ནི་ནད་པ་མང་པོ་ནད་བཏབ་པ། །ནད་མེད་གཟི་བརྗིད་བྲལ་ཞིང་སྟོབས་ཀྱང་ཉམས་རྣམས་ལ། །དེ་ནི་སྨན་པར་གྱུར་ནས་རྩི་སྨན་མང་བྱིན་པས། །ནད་བཏབ་སེམས་ཅན་ཁྲག་ཁྲིག་མང་པོ་ཐར་བྱེད་རྨི། །རི་རབ་ངོས་ལ་སེང་གེའི་ཁྲི་ལ་འདུག་ནས་ནི། །སློབ་མ་ཐལ་མོ་སྦྱར་ཅིང་ལྷ་རྣམས་ཕྱག་འཚལ་ལ། །བདག་ནི་གཡུལ་ལས་རྒྱལ་ཞིང་ལྷ་རྣམས་ནམ་མཁའ་ལས། །ཀུན་ཏུ་དགའ་བའི་སྒྲ་སྒྲོག་པར་ནི་རྨི་ལམ་རྨི། །བཀྲ་ཤིས་བརྟུལ་ཞུགས་བཟང་པོ་ཡོངས་སུ་རྫོགས་པར་ཡང ། །བྱང་ཆུབ་སེམས་དཔའ་རྨི་ལམ་རྣམ་པ་དེ་དག་རྨི། །དེ་ཐོས་ནས་ནི་འདི་ནི་རིང་པོར་མི་ཐོགས་པར། །མི་ཡི་ལྷ་ཡི་ལྷར་འགྱུར་སྙམ་སྟེ་ལྷ་མི་དགའ། །རྨི་ལམ་གྱི་ལེའུ་སྟེ། བཅུ་བཞི་པའོ།། །། དགེ་སློང་དག་དེ་ནས་བྱང་ཆུབ་སེམས་དཔའ་འདི་སྙམ་དུ་སེམས་ཏེ། བདག་གིས་རྒྱལ་པོ་ཆེན་པོ་ཟས་གཙང་མ་ལ་ཡང་མ་བྱས་ཤིང ། ཕས་གནང་བ་མེད་པར་མངོན་པར་འབྱུང་བ་འདི་ནི་བདག་ལ་མི་རིགས་ཏེ། བྱས་པ་གཟོ་བ་མ་ཡིན་པར་འགྱུར་རོ་སྙམ་ནས། དེ་མཚན་མོ་མི་ཉལ་ཙམ་ན་རང་གི་གནས་ཀྱི་ཁང་བཟང་ནས་བྱུང་སྟེ། རྒྱལ་པོ་ཟས་གཙང་མའི་ཁང་བཟངས་སུ་ཕྱིན་ནས་འདུག་གོ། །བྱང་ཆུབ་སེམས་དཔའ་འདུག་མ་ཐག་ཏུ་ཁང་བཟངས་ཐམས་ཅད་འོད་ཀྱིས་གསལ་བར་གྱུར་ཏོ། །དེ་ནས་རྒྱལ་པོ་སད་པ་དང ། 41.113b འོད་དེ་མཐོང་སྟེ་མཐོང་ནས་ཀྱང་མྱུར་བ་མྱུར་བར་ཉུང་རུམ་ལ་སྨྲས་པ། ཀྱེ་ཉུང་རུམ་ཅི་ཉི་མ་ཤར་ཏམ། གང་གིས་ན་འདི་འོད་ཀྱིས་རྣམ་པར་མཛེས། ཉུང་རུམ་གྱིས་སྨྲས་པ། ལྷ་ད་དུང་དུ་དགུང་ཕྱེད་ཀྱང་མ་བས་སོ། །ལྷ་གཞན་ཡང་ཉི་མའི་འོད་ནི་ཤིང་དང་རྩིག་པ་ཐལ་མི་ཕྱིན། །ལུས་ལ་གདུང་བར་བགྱིད་ཅིང་ཚ་བར་རབ་ཏུ་བགྱིད། །ནང་པར་དུས་ན་ངང་པ་དག་དང་རྨ་བྱ་དང ། །ནེ་ཚོ་ཁུ་བྱུག་ངུར་པ་དག་ཀྱང་རང་སྒྲ་འབྱིན། །འོད་འདི་ལྷ་མིའི་ཡིད་དུ་མཆི་ཞིང་བདེ་བ་སྟེ། །རབ་ཏུ་སིམ་བགྱིད་དགེ་བགྱིད་གདུང་བར་བགྱིད་མ་ལགས། །ཤིང་དང་རྩིག་པ་ཐལ་ཕྱུང་སྒྲིབ་པ་ཡོང་མ་མཆིས། །ཡོན་ཏན་ལྡན་པ་གཅིག་ཅིག་དེང་ནི་འདིར་བྱོན་ངེས། །རྒྱལ་པོ་དེ་ནི་མི་དགའ་ཕྱོགས་བཅུར་བལྟས་པ་དང ། །སེམས་ཅན་དག་པ་པད་མའི་མིག་ཅན་དེ་མཐོང་ནས། །དེ་ནི་མལ་ནས་ལྡང་བར་འདོད་ན་མ་ནུས་ཏེ། །རྣམ་དག་བློ་ཅན་དམ་པ་ཕ་ལ་གུས་པ་བསྐྱེད། །དེ་ནི་རྒྱལ་པོའི་མདུན་དུ་འདུག་ནས་འདི་སྐད་སྨྲས། །ལྷ་ཅིག་བདག་ནི་མངོན་པར་འབྱུང་བའི་དུས་བབ་རིགས། །བགེགས་ཀྱང་མ་མཛད་མི་དགྱེས་པ་ཡང་མ་མཛད་ཅིག་།རྒྱལ་པོ་གཉེན་བཅས་ཡུལ་འཁོར་བཅས་ཏེ་བཟོད་པར་མཛོད། །རྒྱལ་པོ་དེ་ནི་མཆི་མས་མིག་གང་འདི་སྐད་སྨྲས། །ཁྱོད་ནི་ཕྱིར་ལྡོག་པ་ཡི་དགོས་པ་ཅི་ཞིག་ཡོད། །བདག་ལ་དམ་པ་ཅི་སློང་སྨྲོས་ཤིག་ཐམས་ཅད་སྦྱིན། །བདག་དང་ཕོ་བྲང་འཁོར་དང་ཡུལ་འཁོར་འདི་ཕན་ཐོགས། །དེ་ཚེ་བྱང་ཆུབ་སེམས་དཔས་སྙན་པའི་ཚིག་སྨྲས་པ། ལྷ་ཅིག་དམ་པ་བཞི་འཚལ་དེ་ནི་བདག་ལ་སྩོལ། །གལ་ཏེ་སྩལ་བར་སྤྱོད་ན་མངའ་ནི་ཁྱོད་ལ་མཆིས། །འོན་ཏང་རྟག་ཏུ་ཁྱིམ་ན་གཟིམས་ཤིང་འབྱུང་མི་འགྱུར། །ལྷ་ཅིག་བདག་ནི་རྒ་བས་ཚུགས་པར་མི་འགྱུར་ཞིང ། །རྟག་ཏུ་མདོག་བཟང་དར་ལ་བབ་པར་གནས་པ་དང ། །ནད་མ་མཆིས་པ་ཐོབ་ཅིང་ནད་ཀྱིས་མི་བཏབ་དང ། །ཚེ་དཔག་མ་མཆིས་པ་དང་རྒུད་པར་མི་འགྱུར་འཚལ། །རྒྱལ་པོས་ཚིག་ཐོས་ཤིན་ཏུ་སྡུག་བསྔལ་ཉམ་ཐག་སྟེ། །གཞོན་ནུ་གནས་མིན་སློང་བས་བདག་ལ་མཐུ་མེད་དོ། ། 41.114a བསྐལ་པར་གནས་པའི་དྲང་སྲོང་རྣམས་ཀྱང་ནམ་དུ་ཡང ། །རྒ་ན་འཆི་བའི་འཇིགས་དང་རྒུད་ལས་མ་ཐར་ཏོ། །རྒ་ན་འཆི་བའི་འཇིགས་དང་རྒུད་པར་མི་འགྱུར་བ། །ལྷ་ཅིག་གལ་ཏེ་མཆོག་བཞི་འདི་དག་མི་སྩོལ་ན། །གཞན་ཡང་མཆོག་ཅིག་གསོལ་གྱིས་རྒྱལ་པོ་གསན་དུ་གསོལ། །འདི་ནས་ཤི་འཕོས་ཉིང་མཚམས་སྦྱོར་བར་མི་འགྱུར་མཛོད། །མི་ཡི་དམ་པའི་ཚིག་ནི་དེ་སྐད་ཐོས་པ་དང ། །སྲེད་པ་བསྲབས་ཏེ་བུ་ལ་ཆགས་པ་ཡོངས་སུ་གཅོད། །ཕན་བྱེད་འགྲོ་བ་ཐར་བྱེད་རྗེས་སུ་ཡི་རང་ངོ ། །ཁྱོད་ཀྱི་བསམ་པ་རྣམས་ནི་ཡོངས་སུ་རྫོགས་གྱུར་ཅིག་།དགེ་སློང་དག་དེ་ནས་བྱང་ཆུབ་སེམས་དཔའ་སླར་སོང་སྟེ། རང་གི་ཁྱིམ་དུ་ཕྱིན་ནས་མལ་ན་འདུག་པ་དང ། དེ་སོང་བ་འམ་འོངས་པར་སུས་ཀྱང་མ་ཚོར་རོ། །དགེ་སློང་དག་དེའི་ནམ་ནངས་པ་དང ། རྒྱལ་པོ་ཟས་གཙང་མས་ཤཱཀྱའི་ཚོགས་ཐམས་ཅད་བསོགས་ཏེ་དེའི་ལོ་རྒྱུས་རྣམས་སྨོས་ནས། གཞོན་ནུ་ནི་མངོན་པར་འབྱུང་ན་ད་ཇི་ལྟར་བྱ་ཞེས་སྨྲས་སོ། །ཤཱཀྱ་རྣམས་ཀྱིས་སྨྲས་པ། ལྷ་བསྲུང་བར་བགྱིའོ། །དེ་ཅིའི་སླད་དུ་ཞེ་ན། ཤཱཀྱའི་ཚོགས་འདི་ནི་མང་ལ། དེ་ནི་གཅིག་པུར་གྱུར་པས་མཐུས་མངོན་པར་འབྱུང་བའི་ནུས་པ་དེ་ལ་མ་མཆིས་སོ། །དེ་ནས་ཤཱཀྱ་དེ་དག་དང་རྒྱལ་པོ་ཟས་གཙང་མས་ཤཱཀྱ་གཞོན་ནུ་འཐབ་ཆོས་སྦྱངས་པ། འོས་སུ་གྱུར་པ། འཕོང་བསླབས་པ། ཚན་པོ་ཆེ་ཆེན་པོའི་སྟོབས་དང་ལྡན་པ་ལྔ་བརྒྱ་བྱང་ཆུབ་སེམས་དཔའ་བསྲུང་བའི་ཕྱིར་གྲོང་ཁྱེར་གྱི་ཤར་སྒོར་བཀོད་དེ། བྱང་ཆུབ་སེམས་དཔའ་བསྲུང་བའི་ཕྱིར་ཤཱཀྱ་གཞོན་ནུ་རེ་རེ་ལ་ཡང་འཁོར་ཤིང་རྟ་ལྔ་བརྒྱ་ལྔ་བརྒྱ་དང ། ཤིང་རྟ་རེ་རེ་ལ་ཡང་འཁོར་དཔུང་བུ་ཆུང་ལྔ་བརྒྱ་ལྔ་བརྒྱ་བཀོད་དོ། །བྱང་ཆུབ་སེམས་དཔའ་བསྲུང་བའི་ཕྱིར། དེ་བཞིན་དུ་གྲོང་ཁྱེར་གྱི་ལྷོ་དང་ནུབ་དང་བྱང་གི་སྒོར་ཡང་ཤཱཀྱ་གཞོན་ནུ་འཐབ་ཆོས་སྦྱངས་པ་འོས་སུ་གྱུར་པ། འཕོང་བསླབས་པ་ཚན་པོ་ཆེ་ཆེན་པོའི་སྟོབས་དང་ལྡན་པ་ལྔ་བརྒྱ་ལྔ་བརྒྱ་དང ། ཤཱཀྱ་གཞོན་ནུ་རེ་རེ་ལ་ཡང་འཁོར་ཤིང་རྟ་ལྔ་བརྒྱ 41.114b ལྔ་བརྒྱ་དང ། ཤིང་རྟ་རེ་རེ་ལ་ཡང་འཁོར་དཔུང་བུ་ཆུང་ལྔ་བརྒྱ་ལྔ་བརྒྱ་བཀོད་དོ། །བྱང་ཆུབ་སེམས་དཔའ་བསྲུང་བའི་ཕྱིར་ཤཱཀྱ་རྒན་རབས་རྒན་རབས་རྣམས་ཀྱང་ལམ་གྱི་བཞི་མདོ་དང ། མདོ་སུམ་དང ། ལམ་པོ་ཆེ་མང་པོ་ཐམས་ཅད་ན་གདོད་ཅིང་འཁོད་དོ། །རྒྱལ་པོ་ཟས་གཙང་མ་ཡང་ཤཱཀྱ་གཞོན་ནུ་ལྔ་བརྒྱས་བསྐོར་ཅིང་མདུན་གྱིས་བལྟས་ཏེ། རྟ་དང་གླང་པོ་ཆེ་དག་ལ་ཞོན་ནས་རང་གི་ཁྱིམ་སྒོ་ན་མེལ་ཚེ་བྱེད་དོ། །སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཀྱང་རང་གི་བྲན་མོའི་ཚོགས་ལ་སྨྲས་པ། མར་མེ་དྲི་མ་མེད་པ་བུས་ལ་ནོར་བུ་ཐམས་ཅད་རྒྱལ་མཚན་རྩེ་མོར་ཐོགས། །མུ་ཏིག་རྒྱན་ཕྲེང་རྣམས་ཀྱང་སྤྱངས་ལ་ཁྱིམ་འདི་ཀུན་ཏུ་འོད་ཀྱིས་སྣང་བར་བྱོས། །གླུ་དབྱངས་དག་ཀྱང་སྦྱོར་ལ་དོ་མོད་གཡེལ་བ་མེད་པར་མེ་ཚེ་དམ་དུ་གྱིས། །གཞོན་ནུ་ཅི་ནས་མ་ཚོར་བར་ནི་འགྲོ་བར་མི་འགྱུར་ཚུལ་དུ་བསྲུང་བ་གྱིས། །གོ་བགོས་ལག་ན་ལག་ཆ་རལ་གྲི་དང ། །མདུང་ཐུང་མདའ་དང་མཚོན་ཆ་རྩེ་གཉིས་ཐོགས། །སྡུག་པའི་བུ་ནི་བསྲུང་བར་བྱ་བའི་ཕྱིར། །ཀུན་ཀྱང་རབ་ཏུ་བསྒྲིམ་པ་ཆེན་པོ་གྱིས། །སྒོ་ཀུན་ཆོད་ལ་གཏན་པར་དམ་དུ་ཆུད། །སྒོ་འཕར་སྲ་བ་རྐེད་པར་གཏན་ཆུག་ལ། །དུས་ལ་མ་བབ་པར་ནི་སྒོ་མ་དབྱེ། །སེམས་ཅན་དམ་པ་འདི་ནི་ཤོར་ཏ་རེ། །ནོར་བུ་དོ་ཤལ་མུ་ཏིག་དོ་ཤལ་ཐོགས། །མེ་ཏོག་ཟླ་གམ་སེང་གེ་ཤིང་ལོ་རིས། །སྐ་རགས་སོར་གདུབ་རྣ་རྒྱན་ཆིངས་ཤིང་ཐོགས། །རྐང་གདུབ་དག་ཀྱང་ཤིན་ཏུ་ལེགས་པར་ཐོགས། །ལྷ་མི་ཕན་པ་གླང་པོ་དྲེགས་བཞིན་འགྲོ། །གལ་ཏེ་བློ་བུར་མངོན་པར་བྱུང་ད་རེ། །ཅི་ནས་མི་བདེ་རྙེད་པར་མ་གྱུར་པར། །དེ་ལྟ་དེ་ལྟར་ནན་ཏན་ཆེར་གྱིས་ཤིག་།བུད་མེད་གང་དག་མདུང་ཐུང་ཐོགས་པ་དག་།དྲི་མ་མེད་པ་མལ་ན་འདུག་པ་བསྐོར། །ཅི་ནས་གཉིད་ཀྱིས་ལོག་པར་མ་གྱུར་པར། །ཕྱེ་མ་ལེབ་བཞིན་མིག་གིས་བསྲུང་བར་གྱིས། །རྒྱལ་བུ་འདི་ནི་བསྲུང་བར་བྱ་བའི་ཕྱིར། །ཁྱིམ་འདིར་རིན་པོ་ཆེ་ཡི་དྲ་བ་བྲེས། །གླིང་བུ་དག་ཀྱང་རབ་ཏུ་འབུད་ཅིང་ལོང ། །དོ་མོད་རྡུལ་དང་བྲལ་བ 41.115a བསྲུང་བ་གྱིས། །ཕན་ཚུན་གཅིག་ལ་གཅིག་ནི་སྦྲོན་བྱོས་ཏེ། །དོ་མོད་མ་ཉལ་ཤིན་ཏུ་བསྲུང་བ་གྱིས། །རྒྱལ་སྲིད་དང་ནི་ཡུལ་འཁོར་སྤངས་ནས་སུ། །ཁྱིམ་ནས་མངོན་དུ་འབྱུང་བར་གྱུར་ཏ་རེ། །འདི་ནི་མངོན་པར་བྱུང་བར་གྱུར་ན་གོ། །རྒྱལ་པོའི་ཕོ་བྲང་འདི་ཀུན་ཉམས་མི་དགའ། །རྒྱལ་པོའི་རིགས་རྒྱུད་ཡུན་རིང་གནས་པ་ཡང ། །རྒྱལ་པོའི་རིགས་དང་རྒྱུད་ནི་ཆད་པར་འགྱུར། །དགེ་སློང་དག་དེ་ནས་གནོད་སྦྱིན་གྱི་སྡེ་དཔོན་ལྔ་རྩེན་ལ་སོགས་པ་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང ། འཕྲོག་མའི་བུ་ལྔ་བརྒྱ་རྣམས་གཅིག་ཏུ་འདུས་ནས་འདི་སྐད་ཅེས་སྨྲས་ཏེ། གྲོགས་པོ་དག་དོ་མོད་བྱང་ཆུབ་སེམས་དཔའ་མངོན་པར་འབྱུང་གིས་ཁྱེད་ཅག་དེ་ལ་མཆོད་པ་བྱེད་པའི་ལས་ལ་སྤྲོ་བ་གྱིས་ཤིག་།རྒྱལ་པོ་ཆེན་པོ་བཞི་ཡང་ལྕང་ལོ་ཅན་གྱི་ཕོ་བྲང་དུ་ཞུགས་ནས་གནོད་སྦྱིན་གྱི་འཁོར་ཆེན་པོ་ལ་སྨྲས་པ། གྲོགས་པོ་དག་དོ་མོད་བྱང་ཆུབ་སེམས་དཔའ་མངོན་པར་འབྱུང་གིས་ཁྱེད་ཀྱིས་བཅིབས་པའི་རྐང་ལག་ནས་ཐེག་ལ་འབྱུང་བར་གྱིས་ཤིག་།གནོད་སྦྱིན་གྱི་འཁོར་གྱིས་སྨྲས་པ། སྐུ་ནི་སྲེད་མེད་བུ་ཡི་སྟོབས་ལྡན་རྡོ་རྗེ་ལྟ་བུར་མི་ཕྱེད་སྲ་ལ་ལྕི། །སེམས་ཅན་ཀུན་གྱི་དམ་པ་དེ་ནི་བརྩོན་འགྲུས་སྟོབས་ལྡན་གཡོ་བ་མི་མངའ་སྟེ། །རི་ཡི་དམ་པ་ལྷུན་པོ་ཆེན་པོ་རྨང་ནས་ཕྱུང་སྟེ་ནམ་མཁར་གཟུང་ནུས་ཀྱི། །རྒྱལ་པོའི་ཡོན་ཏན་ལྷུན་པོ་རི་ལྕི་བསོད་ནམས་ཡེ་ཤེས་གནས་པ་སུས་ཀྱང་གང་དུ་བཀུར་མི་ནུས། །རྣམ་ཐོས་ཀྱི་བུས་སྨྲས་པ། མི་གང་ང་རྒྱལ་འགྱིང་བ་དེ་ལ་སྟོན་པ་ལྕི། །གང་དག་དགའ་གུས་གནས་པ་དེ་དག་ཡང་བར་ཚོར། །བསམ་པ་ཐག་པས་བརྩོན་པར་བྱོས་ལ་གུས་པ་ཡིས། །བྱ་ཡིས་ཤ་ཁམ་བཞིན་དུ་ཡང་བར་ཤེས་པར་གྱིས། །ཁོ་བོ་མདུན་ནས་འགྲོ་ཡིས་ཁྱེད་ཅག་རྣམས་ཀྱིས་བཅིབས་པ་ཐེག་།བྱང་ཆུབ་སེམས་དཔའ་མངོན་པར་འབྱུང་ཚེ་བསོད་ནམས་མང་པོ་སྩོགས། །དགེ་སློང་དག་དེ་ནས་ལྷའི་དབང་པོ་བརྒྱ་བྱིན་གྱིས་སུམ་བཅུ་རྩ་གསུམ་གྱི་ལྷ 41.115b རྣམས་ལ་སྨྲས་པ། ཀྱེ་གྲོགས་པོ་དག་དོ་མོད་བྱང་ཆུབ་སེམས་དཔའ་མངོན་པར་འབྱུང་གིས་དེ་ལ་ཁྱེད་ཐམས་ཅད་མཆོད་པའི་ལས་ལ་སྤྲོ་བར་གྱིས་ཤིག་།དེ་ན་ལྷའི་བུ་ཞི་བའི་བློ་གྲོས་ཤེས་བྱ་བ་དེས་འདི་སྐད་ཅེས་སྨྲས་སོ། །བདག་གིས་ནི་སེར་སྐྱའི་གནས་ཀྱི་གྲོང་ཁྱེར་ཆེན་པོའི་སྐྱེས་པ་དང ། བུད་མེད་དང་ཁྱེའུ་དང་བུ་མོ་ཐམས་ཅད་གཉིད་ཀྱིས་ལོག་པར་བགྱིའོ། །ལྷའི་བུ་རྩེ་བ་བཀོད་པ་ཞེས་བྱ་བ་དེས་འདི་སྐད་ཅེས་སྨྲས་སོ། །བདག་གིས་ནི་རྟ་དང་གླང་པོ་ཆེ་དང ། བོང་བུ་དང ། རྔ་མོ་དང ། བ་ལང་དང ། མ་ཧེ་དང ། སྐྱེས་པ་དང ། བུད་མེད་དང ། ཁྱེའུ་དང ། བུ་མོ་རྣམས་ཀྱི་སྒྲ་མི་གྲག་པར་བགྱིའོ། །ལྷའི་བུ་བཀོད་པའི་བློ་གྲོས་ཤེས་བྱ་བ་དེས་འདི་སྐད་ཅེས་སྨྲས་སོ། །བདག་གིས་ནི་ནམ་མཁའི་དཀྱིལ་དུ་ཤིང་རྟ་ཆེན་པོ་བདུན་རིན་པོ་ཆེའི་སྟེགས་བུས་འཁོར་བར་བསྐོར་བ་ནོར་བུ་རིན་པོ་ཆེ་མེ་ཤེལ་གྱི་འོད་འབར་བ། གདུགས་དང ། རྒྱལ་མཚན་དང ། བ་དན་བསྒྲེང་བ། མེ་ཏོག་སྣ་ཚོགས་ཆལ་པར་བཀྲམ་པ། པོག་ཕོར་ནས་བདུག་སྤོས་སྣ་ཚོགས་ཀྱིས་བདུགས་པ་དག་བྱང་ཆུབ་སེམས་དཔའ་ལམ་གང་ནས་འབྱུང་བའི་ལམ་དེར་བཀོད་པར་བགྱིའོ། །ཀླུའི་རྒྱལ་པོ་ས་སྲུང་གི་བུ་ཞེས་བྱ་བས་འདི་སྐད་ཅེས་སྨྲས་སོ། །བདག་གིས་བདག་ཉིད་ཀྱི་སྣ་ལ་ཁང་པ་བརྩེགས་པ་དཔག་ཚད་སུམ་བཅུ་རྩ་གཉིས་པ་བགྱིས་ཏེ་དེར་ལྷའི་བུ་མོ་དག་བཀོད་ལ་སིལ་སྙན་དང ། གླུ་དབྱངས་ལེན་དུ་སྩལ་ཅིང་གླུ་དང་རོལ་མོའི་དབྱངས་སྒྲ་ཆེན་པོས་བྱང་ཆུབ་སེམས་དཔའ་ལ་རིམ་གྲོ་དང་བསྙེན་བཀུར་བགྱིད་ཅིང་མཆི་བར་བགྱིའོ། །ལྷའི་དབང་པོ་བརྒྱ་བྱིན་ཉིད་ཀྱིས་འདི་སྐད་ཅེས་སྨྲས་སོ། །ཁོ་བོས་ནི་སྒོ་དབྱེའོ། །ལམ་མཚོན་པར་བྱའོ། །ལྷའི་བུ་ཆོས་སྤྱོད་ཀྱིས་འདི་སྐད་ཅེས་སྨྲས་སོ། །བདག་གིས་ནི་བཙུན་མོའི་འཁོར་རྣམས་མི་སྡུག་པར་བསྟན་པར་བགྱིའོ། །ལྷའི་བུ་ཡང་དག་སྐུལ་པོས་སྨྲས་པ། བདག་གིས་ནི་བྱང་ཆུབ་སེམས་དཔའ་གཟིམས་མལ་ནས་བཞེངས་པར་གསོལ་བར་བགྱིའོ། །དེ་ན་ཀླུའི་རྒྱལ་པོ་ཆུ་ལྷ་དང ། ཀླུའི 41.116a རྒྱལ་པོ་གཟི་ཅན་དང ། ཀླུའི་རྒྱལ་པོ་རྒྱ་མཚོ་དང ། ཀླུའི་རྒྱལ་པོ་མ་དྲོས་པ་དང ། ཀླུའི་རྒྱལ་པོ་དགའ་བོ་དང་ཉེ་དགའ་བོས་འདི་སྐད་ཅེས་སྨྲས་སོ། །བདག་ཅག་གིས་ནི་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་དུས་ཀྱི་རྗེས་སུ་འབྲང་བའི་ཙན་དན་གྱི་སྤྲིན་མངོན་པར་སྤྲུལ་ཏེ། ཙན་དན་སྦྲུལ་གྱི་སྙིང་པོའི་ཕྱེ་མའི་ཆར་དབབ་པོ། །དགེ་སློང་དག་དེ་ལྟར་ལྷ་དང་ཀླུ་དང ། གནོད་སྦྱིན་དང ། དྲི་ཟ་རྣམས་ཀྱིས་རྣམ་པ་འདི་ལྟ་བུའི་བསམ་པ་ངེས་པར་བསམས་ཏེ་བརྩམས་སོ། །བྱང་ཆུབ་སེམས་དཔའ་ཆོས་སེམས་པ་ལ་ཞུགས་པ། གླུ་དབྱངས་ལེན་པའི་ཁང་བཟངས་ན་མལ་བདེ་བ་ལ་འདུག་པ། བཙུན་མོའི་འཁོར་གྱི་ནང་ན་འདུག་པ་ནི་སྔོན་གྱི་སངས་རྒྱས་ཀྱི་སྤྱོད་པ་རྣམ་པར་སེམས་ཤིང་སེམས་ཅན་ལ་ཕན་པ་བྱ་བ་རྗེས་སུ་སེམས་ལ། སྔོན་གྱི་སྨོན་ལམ་གྱི་ཚིག་བཞི་མངོན་དུ་བྱེད་དོ། །བཞི་གང་ཞེ་ན། སྔོན་ང་རང་བྱུང་གི་བདག་པོ་འདོད་ཅིང་ཐམས་ཅད་མཁྱེན་པ་ཉིད་དོན་དུ་གཉེར་བ་ན། གོ་ཆ་འདི་ལྟ་བུ་བགོས་པར་གྱུར་ཏེ། སེམས་ཅན་སྡུག་བསྔལ་བ་དག་མཐོང་ནས་ཀྱེ་མའོ་བདག་གིས་འཇིག་རྟེན་གནས་པ་བཅིངས་ཏེ་འཁོར་བའི་བཙོན་ར་ཆེན་པོར་བཅུག་པ་ལ་འཁོར་བའི་བཙོན་ར་དྲལ་ཏེ། བཅིངས་པ་བཀྲོལ་བའི་སྒྲ་བསྒྲག་གོ། །སྲེད་པའི་ཞགས་པ་དང ། སྒྲོག་དམ་པོས་བཅིངས་པའི་སེམས་ཅན་རྣམས་ཀྱང་རབ་ཏུ་དགྲོལ་ལོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་དང་པོ་འདི་མངོན་དུ་གྱུར་ཏོ། །ཀྱེ་མའོ་བདག་གིས་འཇིག་རྟེན་མ་རིག་པའི་མུན་པ་མུན་གནག་ཐིབས་པོ་ཆེན་པོར་ཞུགས་པ་མི་ཤེས་པའི་ལིང་ཏོག་དང་རབ་རིབ་ཀྱིས་མིག་བསྒྲིབས་པ་ཤེས་རབ་ཀྱི་མིག་དང་བྲལ་བ། མ་རིག་པ་དང་གཏི་མུག་གིས་ལྡོངས་པ་ལ་ཆོས་ཀྱི་སྣང་བ་ཆེན་པོ་བྱ་ཞིང་ཡེ་ཤེས་ཀྱི་སྒྲོན་མ་ཡང་ཉེ་བར་བསྒྲུབས་ལ། རྣམ་པར་ཐར་པའི་སྒོ་གསུམ་ཤེས་པའི་མིག་སྨན་རི་ལུ་དང་སྨན་ཐབས་དང་ཤེས་རབ་དང ། ཡེ་ཤེས་དང་ལྡན་པ་བཏང་སྟེ། མ་རིག་པའི་མུན་པ་མུན་གནག་དང ། གཏི་མུག་གི་མུན་པ་དང ། རབ་རིབ་དང ། ལིང་ཏོག་དང ། 41.116b རྙོག་པ་ཐམས་ཅད་བསལ་ནས་ཤེས་རབ་ཀྱི་མིག་རྣམ་པར་སྦྱང་ངོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་གཉིས་པ་འདི་མངོན་དུ་གྱུར་ཏོ། །ཀྱེ་མའོ་བདག་གིས་འཇིག་རྟེན་ང་རྒྱལ་གྱི་རྒྱལ་མཚན་བསྒྲེང་བ། ངར་འཛིན་པ་དང ། ང་ཡིར་འཛིན་པ་ལ་མངོན་པར་ཞེན་པ། བདག་དང་བདག་གིར་འཛིན་པ་དང་ལྡན་པའི་ཡིད་ཅན། འདུ་ཤེས་དང ། སེམས་དང ། ལྟ་བ་ཕྱིན་ཅི་ལོག་གིས་ཕྱིན་ཅི་ལོག་ཏུ་གྱུར་པ་བཟུང་བ་ངན་པས་ཟིན་པ་ལ་འཕགས་པའི་ལམ་བསྟན་ཏེ། ངའོ་སྙམ་པའི་ང་རྒྱལ་བསྙལ་བར་བྱའོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་གསུམ་པ་འདི་མངོན་དུ་གྱུར་ཏོ། །ཀྱེ་མའོ་བདག་གིས་འཇིག་རྟེན་རྣམ་པར་མ་ཞི་བ། ཐགས་འཁྲུགས་པ་ལྟ་བུར་གྱུར་པ། དྲུ་བུ་འཛིངས་པ་ལྟ་བུར་གྱུར་པ། འོང་བ་དང་འགྲོ་བར་གྱུར་པ། འཇིག་རྟེན་འདི་ནས་འཇིག་རྟེན་ཕ་རོལ་དང ། འཇིག་རྟེན་ཕ་རོལ་ནས་འཇིག་རྟེན་འདིར་ཀུན་ཏུ་རྒྱུག་ཅིང་འཁོར་ལ་འཁོར་བ་ལས་མི་ལྡོག་པ་མགལ་མེའི་འཁོར་ལོ་ལྟ་བུར་གྱུར་པ་ལ་ཉེ་བར་ཞི་བར་བྱེད་པའི་ཤེས་རབ་ཀྱིས་ཆོག་པར་བྱེད་པའི་ཆོས་ཀྱང་བསྟན་ཏོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་བཞི་པོ་འདི་མངོན་དུ་གྱུར་ཏེ། སྔོན་གྱི་སྨོན་ལམ་གྱི་ཚིག་བཞི་པོ་དེ་དག་མངོན་དུ་གྱུར་ཏོ། །སྐད་ཅིག་དེ་ལ་ལྷའི་བུ་ཆོས་སྤྱོད་དང ། གནས་གཙང་མའི་རིས་ཀྱི་ལྷའི་བུ་རྣམས་ཀྱིས་བཙུན་མོའི་འཁོར་མི་སྡུག་པར་བསྒྱུར་ཏེ། མི་སྡུག་པར་གནས་པ་དང ། སྨད་པའི་གཟུགས་སུ་བསྟན་ནས་ནམ་མཁའ་ལ་འཁོད་དེ། བྱང་ཆུབ་སེམས་དཔའ་ལ་ཚིགས་སུ་བཅད་དེ་སྨྲས་པ། དེ་ནས་ལྷའི་བུ་རྫུ་འཕྲུལ་ཆེ་རྣམས་ཀྱིས། །པད་མ་རྒྱས་པ་ཡངས་པའི་སྤྱན་ལ་སྨྲས། །དུར་ཁྲོད་དབུས་འདིར་བཞུགས་པར་གྱུར་ལགས་ན། །ཁྱོད་ནི་ཇི་ལྟར་དགྱེས་པ་སྐྱེ་བར་འགྱུར། །ལྷ་ཡི་དབང་ཕྱུག་རྣམས་ཀྱིས་དེ་བསྐུལ་ནས། །ཡུད་ཙམ་བཙུན་མོའི་འཁོར་ལ་ལྟ་ཞིང་རྟོག་།བལྟས་ནས་སྨད་པར་གྱུར་པ་དེ་དག་མཐོང ། །དུར་ཁྲོད་གནས་པར་གྱུར་པ་བདེན་སྙམ་བྱེད། །བྱང་ཆུབ་སེམས་དཔས་ཐམས་ཅད་དང་ལྡན་པའི་བུད་མེད་ཀྱི་ཚོགས་ལ་རྣམ་པར་བལྟས་པ་དང ། 41.117a ཁ་ཅིག་ནི་གོས་ལྷུང་བར་གྱུར། ཁ་ཅིག་ནི་སྐྲ་ཞིག་།ཁ་ཅིག་ནི་རྒྱན་བྲུལ། ཁ་ཅིག་ནི་ཅོད་པན་ལྷུང ། ཁ་ཅིག་ནི་ཕྲག་པ་མི་སྡུག་པར་གྱུར། ཁ་ཅིག་ནི་ལུས་རྣམ་པར་འཁྲུགས། ཁ་ཅིག་ནི་བཞིན་མི་སྡུག་པར་གནས། ཁ་ཅིག་ནི་མིག་གྱུར། ཁ་ཅིག་ནི་ཁ་ཆུ་ཟག་།ཁ་ཅིག་ནི་སྔུར། ཁ་ཅིག་ནི་ལུད་པ་ལུ། ཁ་ཅིག་ནི་གོད། ཁ་ཅིག་ནི་བརྡོལ། ཁ་ཅིག་ནི་སོ་འཁྲིག་།ཁ་ཅིག་ནི་བཞིན་མདོག་གྱུར། ཁ་ཅིག་ནི་གཟུགས་མི་སྡུག་པར་གྱུར་ཏེ། ལག་པ་རིང་པོར་གྱུར། ཁ་ཅིག་ནི་རྐང་པ་ཕྲལ། ཁ་ཅིག་ནི་མགོ་ཕྱུང ། ཁ་ཅིག་ནི་མགོ་གཡོགས། ཁ་ཅིག་ནི་བཞིན་གྱི་དབྱིབས་གྱུར། ཁ་ཅིག་ནི་ལུས་མ་རུངས་པར་གྱུར། ཁ་ཅིག་ནི་ལུས་སྒྲེན་མོར་གྱུར། ཁ་ཅིག་ནི་ལུས་བསྐུམས་ཤིང་སྔུར། ཁ་ཅིག་ནི་རྫ་རྔ་ལ་འཁྱུད་ནས་ལུས་གན་རྐྱལ་དུ་འགྱེལ། ཁ་ཅིག་ནི་པི་བང་དང་རྒྱུད་གསུམ་པའི་སྟེང་དུ་ལག་པ་བརྐྱང ། ཁ་ཅིག་ནི་གླིང་བུ་ལ་སོས་འདེབས། ཁ་ཅིག་ནི་རོལ་མོའི་ཆ་བྱད་ཀིམ་པ་ལ་དང ། ན་ཀུ་ལ་དང ། ཁར་བའི་སིལ་ཁྲོལ་དང ། ཕེག་ལ་འཛིན། ཁ་ཅིག་ནི་མིག་འཛུམས་ཤིང་འབྱེད་ལ་འགྱུར། ཁ་ཅིག་ནི་ཁ་གདངས་པར་གྱུར་ཏེ། དེ་ལྟར་ས་ལ་མི་སྡུག་པར་གནས་པར་གྱུར་པའི་བཙུན་མོའི་འཁོར་ལ་ལྟ་ཞིང་བྱང་ཆུབ་སེམས་དཔའ་དུར་ཁྲོད་ཀྱི་འདུ་ཤེས་སྐྱེད་དོ། །དེ་ལ་འདི་སྐད་ཅེས་བྱ་སྟེ། འཇིག་རྟེན་མགོན་དེས་དེ་མཐོང་ཡིད་བྱུང་སྟེ། །སྙིང་རྗེས་ཤུགས་ཕྱུང་ནས་ནི་འདི་སྐད་སྨྲས། །ེ་མ་སྐྱེ་དགུ་དག་ནི་སྡུག་བསྔལ་གྱུར། །སྲིན་མོའི་ཚོགས་ལ་དགའ་བ་ཇི་ལྟར་རྙེད། །འདོད་པའི་ཡོན་ཏན་ཡོད་མིན་ཡོན་ཏན་འཛིན། །གཏི་མུག་མུན་པས་རབ་བསྒྲིབས་བློ་གྲོས་ངན། །དཔེར་ན་བྱ་ནི་བྱ་རྒྱར་ཆུད་པ་བཞིན། །ནམ་ཡང་འབྱུང་བ་རྙེད་པར་འགྱུར་མ་ཡིན། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་པ། དེ་ནས་བྱང་ཆུབ་སེམས་དཔས་ཆོས་སྣང་བའི་སྒོ་འདིས་ཡང་བཙུན་མོའི་འཁོར་ལ་རྟོག་ཅིང་སྙིང་རྗེ་ཆེན་པོའི་སྨྲེ་བས་སེམས་ཅན་གྱི་ཕྱིར་སྨྲེ་སྟེ། འདི་ན་བྱིས་པ་དེ་དག 41.117b ནི་གསོད་པ་སྟེ། བསད་པའི་གནས་སུ་གསད་པར་བྱ་བ་གསོད་པ་དང་མཚུངས་སོ། །འདི་ན་བྱིས་པ་དེ་དག་ནི་ཆགས་པ་སྟེ། ངན་སྐྱུགས་ཀྱིས་གང་བའི་སྣོད་རི་མོ་ཅན་རྣམས་ལ་མི་མཁས་པ་ཆགས་པ་དང་མཚུངས་སོ། །འདི་ན་བྱིས་པ་དེ་དག་ནི་འབྱིང་བ་སྟེ། གླང་པོ་ཆེ་ཆུར་བྱིང་བ་དང་མཚུངས་སོ། །འདི་ན་བྱིས་པ་དེ་དག་ནི་བཙས་པ་སྟེ། བཙོན་རའི་ནང་གི་བཙོན་བཙས་པ་དང་མཚུངས་སོ། །འདི་ན་བྱིས་པ་དེ་དག་ནི་མངོན་པར་དགའ་བ་སྟེ། ཕག་མི་གཙང་བ་ལ་དགའ་བ་དང་མཚུངས་སོ། །འདི་ན་བྱིས་པ་དེ་དག་ནི་ཆགས་པ་སྟེ། ཁྱི་ཀེང་རུས་ལ་ཆགས་པ་དང་མཚུངས་སོ། །འདི་ན་བྱིས་པ་དེ་དག་ནི་རབ་ཏུ་ལྷུང་བ་སྟེ། ཕྱེ་མ་ལེབ་མར་མེའི་མེ་ལྕེར་ལྷུང་བ་དང་མཚུངས་སོ། །འདི་ན་བྱིས་པ་དེ་དག་ནི་ཐོགས་པ་སྟེ། སྤྲེའུ་རྙོང་ལ་ཐོགས་པ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་བཟུང་བ་སྟེ། ཉ་རྒྱས་ཟིན་པ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་གཏུབས་པ་སྟེ། ཤ་འཚོང་གི་གནས་ཀྱི་ལུག་དང་མཚུངས་སོ། །འདི་ན་བྱིས་པ་དེ་དག་ནི་བཙུགས་པ་སྟེ། སྡིག་པ་བྱེད་པ་གསལ་ཤིང་གི་རྩེ་མོ་ལ་བཙུགས་པ་དང་མཚུངས་སོ། །འདི་ན་བྱིས་པ་དེ་དག་ནི་འདམ་དུ་འབྱིང་ཞིང་ཐོགས་པ་སྟེ། གླང་པོ་ཆེ་རྒན་པོ་འདམ་དུ་སོང་བ་དང་མཚུངས་སོ། །འདི་ན་བྱིས་པ་དེ་དག་ནི་ཕོངས་པ་སྟེ། རྒྱ་མཚོ་ཆེན་པོར་གྲུའི་སྣམ་བུ་ཞིག་པ་དང་མཚུངས་སོ། །འདི་ན་བྱིས་པ་དེ་དག་ནི་རབ་ཏུ་ལྷུང་བ་སྟེ། དམུས་ལོང་གཡང་ས་ཆེན་པོར་ལྷུང་བ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་ཟད་པར་འགྱུར་བ་སྟེ། སའི་སྟེང་གི་མཚམས་སུ་སོང་བའི་ཆུ་དང་མཚུངས་སོ། །འདི་ན་བྱིས་པ་དེ་དག་ནི་དུ་བ་འཐུལ་བ་སྟེ། བསྐལ་པ་ཟད་པའི་ས་ཆེན་པོ་དང་མཚུངས་སོ། །འདི་ན་བྱིས་པ་དེ་དག་ནི་འཁོར་བ་སྟེ། རྫ་མཁན་གྱི་འཁོར་ལོའི་ཤུགས་དང་མཚུངས་སོ། །འདི་ན་བྱིས་པ་དེ་དག་ནི་འབྲོག་རྩོལ་བ་སྟེ། དམུས་ལོང་རི་ལ་ཕྱིན་པ་དང་མཚུངས་སོ། །འདི་ན 41.118a བྱིས་པ་དེ་དག་ནི་བཏགས་ཤིང་འཁོར་བ་སྟེ། ཁྱི་སྟུང་གིས་བཏགས་པ་དང་མཚུངས་སོ། །འདི་ན་བྱིས་པ་དེ་དག་ནི་རྙིས་པ་སྟེ། དཔྱིད་ཀྱི་རྩཝ་དང་ནགས་ཚལ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་ཉམས་པ་སྟེ། ཟླ་བ་མར་གྱི་ངོའི་ཟླ་བ་དང་མཚུངས་སོ། །འདི་དག་ནི་བྱིས་པ་རྣམས་ལ་ཟ་བ་སྟེ། ཀླུ་ལ་ནམ་མཁའ་ལྡིང་དང་མཚུངས་སོ། །འདི་དག་ནི་བྱིས་པ་རྣམས་ལ་འཆའ་བ་སྟེ། གྲུ་བོ་ཆེ་ལ་ཆུ་སྲིན་ཆེན་པོ་དང་མཚུངས་སོ། །འདི་དག་ནི་བྱིས་པ་རྣམས་ལ་འཇོམས་པ་སྟེ། འདྲོན་པོ་ལ་ཆོམ་པོ་མང་པོ་དང་མཚུངས་སོ། །འདི་དག་ནི་བྱིས་པ་རྣམས་ལ་འཇིག་པ་སྟེ། ཤིང་ས་ལ་ལ་རླུང་མར་ཆེན་པོ་དང་མཚུངས་སོ། །འདི་དག་ནི་བྱིས་པ་རྣམས་ལ་གསོད་པ་སྟེ། སྐྱེ་བོ་ལ་སྦྲུལ་མིག་གདུག་པ་དང་མཚུངས་སོ། །བྱིས་པ་རྣམས་ནི་རོ་མྱང་བའི་འདུ་ཤེས་ཀྱིས་ཆོད་པ་སྟེ། རལ་གྲིའི་སོ་སྦྲང་རྩིས་བསྐུས་པས་ཆོད་པ་བཞིན་ནོ། །འདི་དག་ནི་བྱིས་པ་རྣམས་ཁྱེར་བ་སྟེ། ཤིང་གི་ཕུང་པོ་ཆུ་བོའི་ཆུས་ཁྱེར་བ་དང་མཚུངས་སོ། །འདི་དག་ནི་བྱིས་པ་རྣམས་ལ་རྩེན་པ་སྟེ། བྱིས་པ་ཆུང་ངུ་རང་གི་གཅིན་རྟུག་ལ་རྩེ་བ་དང་མཚུངས་སོ། །འདི་དག་ནི་བྱིས་པ་རྣམས་ཀུན་ཏུ་སྒྱུར་བ་སྟེ། གླང་པོ་ཆེ་ལ་ལྕགས་ཀྱུ་དང་མཚུངས་སོ། །འདི་དག་ནི་བྱིས་པ་རྣམས་ལ་སླུ་བ་སྟེ། གཡོན་ཅན་གྱིས་བྱིས་པའི་རང་བཞིན་ཅན་དག་བྲིད་པ་བཞིན་ནོ། །འདི་དག་ནི་བྱིས་པ་དེ་དག་གི་དགེ་བའི་རྩ་བ་ཟད་པར་བྱེད་པ་སྟེ། བརྒྱན་པོ་ལ་དགའ་བའི་ནོར་དང་མཚུངས་སོ། །འདི་དག་གིས་བྱིས་པ་རྣམས་འཆོས་པ་སྟེ། སྲིན་མོ་རྣམས་ཀྱིས་ཚོང་པ་འཆོས་པ་དང་མཚུངས་སོ། །བྱང་ཆུབ་སེམས་དཔས་རྣམ་པ་སུམ་བཅུ་རྩ་གཉིས་པོ་འདི་དག་གིས་བཙུན་མོའི་འཁོར་ལ་ཡོངས་སུ་བརྟག་པ་བྱས་ནས། ལུས་ལ་མི་གཙང་བའི་འདུ་ཤེས་རྣམ་པར་སྒོམ། མི་མཐུན་པའི་འདུ་ཤེས་ཉེ་བར་སྒྲུབ། སྨད་པའི་འདུ་ཤེས་སྐྱེད། རང་གི་ལུས་ལ 41.118b ཡང་དེ་དང་འདྲ་བར་རྣམ་པར་སྒོམ། ལུས་ཀྱི་ཉེས་དམིགས་ཡང་དག་པར་མཐོང ། ལུས་ལ་ལུས་སུ་མངོན་པར་ཞེན་པ་ལས་སྐྱོད། སྡུག་པའི་འདུ་ཤེས་རྣམ་པར་འཇིག་།མི་སྡུག་པའི་འདུ་ཤེས་འཇུག་པར་བྱེད། འོག་གི་རྐང་པའི་མཐིལ་ནས་སྟེང་གི་གླད་པ་མན་ཆད་མི་གཙང་བ་ལས་བྱུང་བ་དང ། མི་གཙང་བ་ལས་གྱུར་པ་དང ། རྟག་ཏུ་མི་གཙང་བ་ཟག་པར་མཐོང་ངོ ། །དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ལུས་ཀྱི་ཞིང་ལས་སྐྱེས་ཤིང་སྲེད་པའི་ཆུ་ལས་བྱུང་བ་འཇིག་ཚོགས་མིང་དུ་བཏགས། །མཆི་མ་རྔུལ་དང་མཆིལ་མས་བརླན་ལ་གཅིན་གྱིས་བསྒྱུར་ཅིང་ཁྲག་གི་ཐིགས་པས་གང ། །ཞག་དང་རྣག་དང་ལྒང་བ་དང་ནི་གླད་རྒྱས་དག་དང་སྡིག་པ་རྣམས་ཀྱིས་གང ། །རྟག་ཏུ་ངན་སྐྱུགས་ཟག་ཅིང་ཀུན་ཀྱང་དྲི་མ་རྣམ་པ་སྣ་ཚོགས་ཐ་དད་པ། །ལྤགས་དང་སོ་དང་སྐྲ་དང་སྤུ་ཡིས་བསྒྱུར་ཅིང་ལྤགས་པས་གཡོགས་ལ་སྤུ་དང་ལྡན། །རྒྱུ་མ་མཆིན་པ་མཚེར་པ་ཆུ་སེར་ཁ་ཆུ་འདི་དག་བསགས་པ་ཉམ་ཆུང་བ། །རྐང་དང་ཆུ་རྒྱུས་དག་གིས་སྦྲེལ་ཏེ་འཁྲུལ་འཁོར་འདྲ་ཞིང་ཤ་ཡིས་མཛེས་པར་བྱས། །སྣ་ཚོགས་ནད་ཀྱིས་གང་ཞིང་མྱ་ངན་ཁྱབ་ལ་བཀྲེས་དང་སྐོམ་པས་ཀུན་ཏུ་ཉེན། །སྐྱེ་བ་པོ་དག་ལུས་ནི་བུ་ག་མང་ཞིང་འཆི་དང་རྒ་བའི་གནས་གྱུར་པ། །མཐོང་ནས་མཁས་པ་སུ་ཞིག་རང་གི་ལུས་ལ་དགྲ་དང་མཚུངས་པར་སེམས་མི་འགྱུར། །དེ་ལྟར་བྱང་ཆུབ་སེམས་དཔའ་ལུས་ལ་ལུས་སུ་སོང་བའི་དྲན་པས་གནས་པར་གྱུར་ཏོ། །ནམ་མཁའི་དཀྱིལ་ན་འཁོད་པའི་ལྷའི་བུ་རྣམས་ཀྱིས་ལྷའི་བུ་ཆོས་སྤྱོད་ལ་འདི་སྐད་ཅེས་སྨྲས་སོ། །གྲོགས་པོ་དོན་གྲུབ་འདི་ནི་བཙུན་མོའི་འཁོར་ལ་རྣམ་པར་ལྟ་ཞིང་འཛུམ་ཡང་སྟོན། །སེམས་ནི་མི་དགའ་མིག་ནི་ཕྱིར་ཞིང་ལྟ་ན་ཕྱི་ཤེལ་བྱེད་དམ་ཅི། །ཡང་ན་འདི་ནི་རྒྱ་མཚོའི་ཟབས་དང་མཚུངས་ཏེ་འདི་ཚད་གཟུང་བར་མི་ནུས་སོ། །ཡང་ན་ཆགས་པ་མེད་པ་འདི་ཡུལ་རྣམས་ལ་ཡིད་ཆགས་པར་ནི་མི་འགྱུར་གྲང ། །ལྷ་རྣམས 41.119a ཀྱིས་བསྐུལ་བ་ཡི་ཡིད་དམ་བརྗེད་པར་མ་གྱུར་གྲང ། །ལྷའི་བུ་ཆོས་སྤྱོད་ཀྱིས་སྨྲས་པ། དེ་སྐད་སྨྲ་ཅི་དགོས། འདི་སྔོན་བྱང་ཆུབ་ཀྱི་ཕྱིར་སྤྱོད་པ་ན་ཡང་མངོན་པར་འབྱུང་བ་དང ། གཏོང་བ་ལ་རྣམ་པ་དེ་ལྟ་བུར་ཆགས་པ་མེད་པར་གྱུར་པ་དེ་ཁྱེད་ལ་མངོན་སུམ་དུ་གྱུར་པ་ཡིན་ན། སྲིད་པ་ཐ་མ་པ་ལ་གནས་པ་ཆགས་པར་མི་འགྱུར་བ་ལྟ་སྨོས་ཀྱང་ཅི་དགོས། དགེ་སློང་དག་དེ་ནས་བྱང་ཆུབ་སེམས་དཔའ་ངེས་པར་བྱས་པ། ཡིད་བྱུང་བར་གྱུར་པ། བློ་བརྟུལ་བ། ཚུལ་དུ་ཤིས་ཤིང་རིངས་ཐབས་མེད་པར་སྐྱིལ་མོ་ཀྲུང་བཤིག་སྟེ། གླུ་དབྱངས་ལེན་པའི་ཁང་བཟངས་ན་ཤར་ཕྱོགས་སུ་ལྟ་ཞིང་འདུག་ནས་ལག་པ་གཡས་པས་རིན་པོ་ཆེའི་དྲ་བ་སྨད་དེ་ཁང་བཟངས་ཀྱི་སྟེང་དུ་སོང་ནས་སོར་མོ་བཅུ་ཐལ་མོ་སྦྱར་ཏེ། སངས་རྒྱས་ཐམས་ཅད་བསམས་ནས་སངས་རྒྱས་ཐམས་ཅད་ལ་ཕྱག་འཚལ་ཏེ། ནམ་མཁའི་དཀྱིལ་དུ་བལྟས་པ་དང་དེས་མཐོང་བ། ནམ་མཁའི་དཀྱིལ་ན་ལྷའི་དབང་པོ་མིག་སྟོང་དང་ལྡན་པ་ལྷ་བརྒྱ་སྟོང་གིས་བསྐོར་ཅིང ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། གོས་དང ། གདུགས་དང ། རྒྱལ་མཚན་དང ། བ་དན་དང ། མེ་ཏོག་གི་རྣ་རྒྱན་དང ། རིན་པོ་ཆེའི་དོ་ཤལ་གྱི་ཆུན་པོ་ཐོགས་ཏེ། ལུས་བཏུད་ནས་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་པ་མཐོང་ངོ ། །འཇིག་རྟེན་སྐྱོང་བ་བཞི་ཡང་གནོད་སྦྱིན་དང་སྲིན་པོ་དང་དྲི་ཟ་དང་ཀླུའི་ཚོགས་ཀྱིས་བསྐོར་ཅིང་གོ་ཆ་སྲ་བ་བགོས། རལ་གྲི་དང ། མདའ་གཞུ་དང ། མདུང་ཐུང་དང ། མཚོན་རྩེ་གཉིས་པ་དང ། རྩེ་གསུམ་པ་ལག་ན་ཐོགས་ཤིང་ཚུལ་དུ་ཤིས་པར་ནོར་བུའི་ཅོད་པན་དང ། གཙུག་ཕུད་འཕྱང་བར་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་པ་མཐོང་ངོ ། །ལྷའི་བུ་ཉི་མ་དང་ཟླ་བ་གཉིས་ཀྱང་གློ་གཡས་གཡོས་ན་འདུག་པར་མཐོང་ངོ ། །སྐར་མའི་བདག་པོ་རྒྱལ་ཡང་ནམ་ཕྱེད་ན་ཤར་བར་མཐོང་ངོ ། །མཐོང་ནས་ཀྱང་བྱང་ཆུབ་སེམས་དཔས་འདུན་པ་ལ་སྨྲས 41.119b པ། ང་ཡི་བཀྲ་ཤིས་འདི་ནི་དོན་ཀུན་གྲུབ། །དོ་མོད་གདོན་མི་ཟ་བར་དོན་གྲུབ་ཀྱིས། །འདུན་པ་ཕྱི་ཤོལ་མ་བྱེད་ལ་གོར་དུ། །རྟ་རྒྱལ་རྒྱན་གྱིས་བརྒྱན་པ་ང་ལ་བྱིན། །དེ་ནས་འདུན་པས་ཚིག་དེ་ཐོས་ནས། ཡིད་མི་དགའ་ཞིང་འདི་སྐད་ཅེས་སྨྲས་སོ། །སྨིན་མ་རིང་ཞིང་པད་མའི་འདབ་མ་རྒྱས་འདྲའི་སྤྱན་མངའ་མི་ཡི་སེང་གེ་སྟོན་ཀའི་ཟླ་བ་ཉ་བ་ལྟ་བུ་དང ། །མེ་ཏོག་ཀུ་མུ་ད་དང་ཟླ་བ་དང་ནི་དགའ་བའི་པད་མའི་རྫིང་བུ་སར་པར་འཇམ་པའི་པད་མ་རྒྱས་འདྲའི་ཞལ། །སྦྱངས་པའི་གསེར་དང་ཉི་མ་ཤར་མ་ཐག་དང་ཟླ་བ་དྲི་མེད་གཟི་དང་མར་བླུགས་མེ་ཡི་འོད་འཕྲོ་ནོར་བུ་གློག་འོད་འབར་བའི་གཟི་བརྗིད་ཅན། །གླང་པོ་རྒྱགས་པ་འགྱིང་བའི་གླང་པོའི་སྟོབས་ཅན་བ་ལང་ཁྱུ་མཆོག་རི་དགས་རྒྱལ་དང་ངང་པའི་སྟབས་ཅན་སྟབས་མཛེས་ཤིན་ཏུ་ཞབས་ལེགས་གང་དུ་བཞུད། །བྱང་ཆུབ་སེམས་དཔས་སྨྲས་པ། འདུན་པ་གང་གི་དོན་དུ་ང་ཡིས་སྔོན་ཆད་ལག་པ་རྐང་པ་མིག་དང་དེ་བཞིན་མགོ་དང་ལུས་བཏང་ཞིང ། །ཆུང་མ་དང་ནི་ཕངས་པའི་རྒྱལ་སྲིད་ནོར་གསེར་གོས་དང་རིན་ཆེན་གང་བའི་ཤིང་རྟ་གླང་པོ་རླུང་མགྱོགས་ཤུགས་ལྡན་རྟ་ཕོ་རྩལ་མཆོག་ལྡན་པ་བཏང ། །བསྐལ་པ་བྱེ་བ་ཁྲག་ཁྲིག་མང་ནས་ཚུལ་ཁྲིམས་ངས་བསྲུངས་བཟོད་པ་ཡོངས་བསྒོམས་བརྩོན་འགྲུས་སྟོབས་དང་བསམ་གཏན་ཤེས་རབ་དག་།དེ་ལྟ་མོད་ཀྱི་བྱང་ཆུབ་ཞི་བ་ཤིས་པ་ཐོབ་ནས་རྒ་ཤིའི་རྒྱ་མོར་ཆུད་པའི་སེམས་ཅན་ང་ཡིས་ཡོངས་སུ་དགྲོལ་བའི་དུས་ལ་བབ། །འདུན་པས་སྨྲས་པ། ཇོ་ཇོ་ཁྱོད་བལྟམ་མ་ཐག་ཏུ་བལྟ་བའི་ཕྱིར་བྲམ་ཟེ་ལྟས་མཁན་རྣམས་ལ་བསྟན་ན། དེ་དག་གིས་ཁྱོད་རྒྱལ་པོ་ཟས་གཙང་མའི་སྤྱན་སྔར་ལྷ་ཁྱོད་ཀྱི་རྒྱལ་པོའི་ཕོ་བྲང་འཕེལ་བར་འགྱུར་རོ་ཞེས་ལུང་བསྟན་ཅེས་བདག་གིས་ཐོས་སོ། །སྨྲས་པ། ཇི་ལྟ་བུར་འགྱུར། སྨྲས་པ་གཞོན་ནུ་འདི་ནི་བསོད་ནམས་བརྒྱ་མཚན་ལྡན། །ཁྱོད་ཀྱི་བུ་བཙས་བསོད་ནམས་གཟི་བརྗིད་ཅན། །དེ་ནི་གླིང་བཞིའི་དབང་ཕྱུག་འཁོར་ལོས་བསྒྱུར། །ནོར་བདུན་དང་ནི་རབ་ཏུ་ལྡན་པར་འགྱུར། །གལ་ཏེ་འཇིག་རྟེན་སྡུག་བསྔལ 41.120a བལྟས་ནས་ནི། །བཙུན་མོའི་འཁོར་སྤངས་མངོན་པར་བྱུང་འགྱུར་ན། །བྱང་ཆུབ་རྒ་ཤི་མེད་པའི་གནས་ཐོབ་སྟེ། །ཆོས་ཀྱི་ཆུ་ཡིས་སྐྱེ་དགུ་འདི་ཚིམ་བྱེད། །ཇོ་ཇོ་ལུང་བསྟན་པ་འདི་ནི་མཆིས་ཏེ། འདི་མ་མཆིས་པ་མ་ལགས་མོད་ཀྱི་འོན་ཀྱང་ཕན་པར་འཚལ་བ་བདག་གི་ཚིག་གསན་པར་གསོལ། སྨྲས་པ། ཅི་ཞིག་།སྨྲས་པ། ལྷ་ཅིག་གང་གི་དོན་དུ་འདི་ན་ཁ་ཅིག་བརྟུལ་ཞུགས་དང་དཀའ་ཐུབ་རྣམ་པ་དུ་མ་རྩོམ་སྟེ། རི་དགས་ཀྱི་ལྤགས་པ་དང ། རལ་པའི་ཐོར་ཚུགས་དང ། རྩཝ་དང་ཤིང་ཤུན་གྱོན་པ་དང ། སེན་མོ་དང ། སྐྲ་དང ། ག་ཙོམ་རིང་པོར་འཇོག་པ་དང ། ལུས་ལ་གདུང་བ་དང ། ཡོངས་སུ་གདུང་བ་རྣམ་པ་དུ་མ་སྤྲོ་བར་བགྱིད་དེ། བདག་ཅག་ཇི་ལྟར་ལྷ་དང་མིའི་ཕུན་སུམ་ཚོགས་པ་འཐོབ་པར་འགྱུར་ཞེས་བརྟུལ་ཞུགས་དང་དཀའ་ཐུབ་དྲག་པོ་རྩོམ་མོ། །ཇོ་ཇོ་ཕུན་སུམ་ཚོགས་པ་དེ་ནི་ཁྱོད་ཀྱིས་བརྙེས་ལགས་ཏེ། རྒྱལ་སྲིད་འབྱོར་ཅིང་རྒྱས་ལ་བདེ་ཞིང་ལོ་ལེགས་ཏེ། ཉམས་དགའ་ཞིང་མི་དང་སྐྱེ་བོ་མང་པོས་གང་བ་འདི་དང ། སྐྱེད་མོས་ཚལ་དམ་པ་མཆོག་མེ་ཏོག་དང་འབྲས་བུ་རྣམ་པ་སྣ་ཚོགས་ཀྱིས་བརྒྱན་པ། བྱའི་ཚོགས་སྣ་ཚོགས་སྒྲ་སྐད་ཡིད་དུ་འོང་བ་འབྱིན་པ་འདི་དག་དང ། རྫིང་མེ་ཏོག་ཨུད་པ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོས་མཛེས་པར་གྱུར་པ། ངང་པ་དང ། རྨ་བྱ་དང ། ཁུ་བྱུག་དང ། ངུར་པ་དང ། ཁྲུང་ཁྲུང་དང ། ངང་སྐྱ་སྒྲ་སྐད་འབྱིན་པ། ཤིང་ཨ་མྲ་དང ། མྱ་ངན་འཚང་དང ། ཙམ་པ་ཀ་དང ། ཀུ་ར་བ་ཀ་དང ། ཀེ་ས་ར་ལ་སོགས་པ་ཤིང་མེ་ཏོག་ཆགས་པ་སྣ་ཚོགས་ཀྱིས་འགྲམ་འཁོར་བ། རིན་པོ་ཆེའི་ཤིང་སྣ་ཚོགས་ཀྱི་ཕྲེང་གིས་ལེགས་པར་བརྒྱན་པ། མིག་མངས་རིས་སུ་བཀོད་པ། རིན་པོ་ཆེ་སྣ་ཚོགས་ཀྱི་སྟེགས་བུས་བསྐོར་བ། རིན་པོ་ཆེའི་དྲ་བ་བྲེས་པ། དུས་ཇི་ལྟ་བ་བཞིན་དུ་ཡོངས་སུ་སྤྱད་པ། དགུན་དང ། དབྱར་དང ། སྟོན་དང ། དཔྱིད་གནས་བདེ་བ་རྣམས་དང ། ཁང་བཟངས་ཆེན་པོ་ཆོས་དང ། ཆོས་བཟང་དང ། 41.120b བདེ་བ་དང ། མྱ་ངན་བྲལ་བ་ལ་སོགས་པ་རྣམ་པར་རྒྱལ་བའི་ཁང་པ་ལྟ་བུ་སྟོན་ཀའི་སྤྲིན་འདྲ་བ། གངས་ཏི་སེ་ལྟ་བུ་སྟེགས་བུ་དང ། སྒོ་གང་དང ། རྟ་བབས་དང ། ཀར་ཁུང་དང ། བསིལ་ཁང་དང ། ཁང་པ་བརྩེགས་པ་དང ། ཁྱམས་ཀྱིས་ལེགས་པར་བརྒྱན་པ། རིན་པོ་ཆེའི་དྲིལ་བུ་གཡེར་ཀའི་དྲ་བ་སྒྲ་འབྱུང་བ་འདི་དག་དང ། བཙུན་མོའི་འཁོར་དང་རོལ་མོའི་ཆ་བྱད་རྒྱུད་གཅིག་པ་དང ། པི་བང་དང ། ཁར་རྔ་དང ། གླིང་བུ་དང ། ཁར་བའི་སིལ་ཁྲོལ་དང ། ཕེག་དང ། ཀིམ་པ་ལ་དང ། ན་ཀུ་ལ་དང ། སྒྲ་སྙན་དང ། རྫ་རྔ་དང ། པ་ཊ་ཧ་དང ། གླུ་དང ། གར་དང ། རོལ་མོའི་དབྱངས་སྒྲ་དང ། གླུ་དབྱངས་སྦྱར་བ་ལེགས་པར་བསླབས་པ་དགོད་པ་དང ། འཇོ་བ་དང ། རྩེ་བ་དང ། དགའ་བ་དང ། ཚུལ་དུ་ཤིས་པ་དང ། སྤྱོད་པ་མཛེས་པ་འདི་དང་ནི་ལྡན་ལ། ལྷ་ཁྱོད་ཀྱང་དར་ནི་མ་ཡོལ་ཏེ། གཞོན་པ་ཐོར་བུ་དར་ལ་བབ་པ། ལུས་འཇམ་པ། ལང་ཚོ་ལ་བབ་པ། དབུ་སྐྲ་གནག་པ། འདོད་པ་ལ་མ་རོལ་བ་ལགས་ཀྱིས། སུམ་བཅུ་རྩ་གསུམ་པའི་བདག་པོ་མིག་སྟོང་དང་ལྡན་པ་ལྷའི་བདག་པོ་ལྟ་བུར་རེ་ཤིག་དགྱེས་པར་རོལ་ལ། སླད་ཀྱིས་བགྲེས་ནས་མངོན་པར་འབྱུང་བར་མཛོད་ཅིག་།དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། །སུམ་བཅུ་རྩ་གསུམ་འཇིག་རྟེན་ལྷ་དབང་ལྟར། །དགྱེས་པའི་ཆོ་ག་མཁྱེན་པ་དགྱེས་པར་རོལ། །སླད་ཀྱིས་བགྲེས་པར་གྱུར་ནས་བརྟུལ་ཞུགས་དང ། །དཀའ་ཐུབ་དག་ནི་ཡང་དག་བརྩམ་པར་མཛོད། །བྱང་ཆུབ་སེམས་དཔས་སྨྲས་པ། འདུན་པ་མི་དགོས་ཏེ། འདོད་པ་འདི་དག་ནི་མི་རྟག་པ། མི་བརྟན་པ། ཐེར་ཟུག་མ་ཡིན་པ། འགྱུར་བའི་ཆོས་ཅན། མྱུར་དུ་འགྲོ་བ། གཡོ་བ། རི་གཟར་པོའི་ཆུའི་ཤུགས་དང་འདྲ་བ། ཟིལ་པའི་ཐིགས་པ་ལྟར་རིང་དུ་མི་གནས་པ། ལག་པ་བཅངས་པ་སྟོངས་པས་བྱིས་པ་བྲིད་པ་ལྟར་སྙིང་པོ་མེད་པ། ཆུ་ཤིང་གི་སྙིང་པོ་ལྟར་མཐུ་མེད་པ། སྣོད་སོ་མ་བཏང་བ་ལྟར་མཐར་འཇིག་པ། སྟོན་ཀའི་སྤྲིན་ལྟར་སྐད་ཅིག་བྱུང་ནས 41.121a མེད་པར་འགྱུར་བ། ནམ་མཁའི་གློག་ལྟར་རིང་དུ་མི་གནས་པ། དུག་དང་བཅས་པའི་སྣོད་ལྟར་འགྱུར་བའི་སྡུག་བསྔལ་ཅན། འཁྲི་ཤིང་མ་ལུ་ཏ་ལྟར་མི་བདེ་བ་འབྱིན་པ། བྱིས་པའི་བློ་ཅན་རྣམས་ཀྱིས་འདོད་པར་བྱ་བ། ཆུའི་ཆུ་བུར་ལྟ་བུར་མྱུར་དུ་འགྱུར་བའི་ཆོས་ཅན། སྨིག་རྒྱུ་ལྟར་འདུ་ཤེས་ཕྱིན་ཅི་ལོག་ལས་བྱུང་བ། སྒྱུ་མ་ལྟར་སེམས་ཕྱིན་ཅི་ལོག་གིས་རྣམ་པར་བསྒྲུབས་པ། རྨི་ལམ་ལྟར་ལྟ་བ་ཕྱིན་ཅི་ལོག་གིས་ཡོངས་སུ་ཟིན་པ། རྒྱ་མཚོ་དགང་དཀའ་བ་ལྟར་ངོམས་མི་ཤེས་པར་བྱེད་པ། ཚཝ་ཆུ་ལྟར་སྐོམ་པར་བྱེད་པ། སྦྲུལ་གྱི་མགོ་ལྟར་རེག་པར་དཀའ་བ། གཡང་ས་ཆེན་པོ་ལྟར་མཁས་པ་རྣམས་ཀྱིས་ཡོངས་སུ་སྤངས་པ། ཤེས་རབ་ཅན་རྣམས་ཀྱིས་འཇིགས་པ་དང་བཅས་པ་དང ། རྩོད་པ་དང་བཅས་པ་དང ། ཉེས་པ་དང་བཅས་པ་དང ། སྐྱོན་དང་བཅས་པར་ཤེས་ནས་རྣམ་པར་སྤངས་པ། རིག་པ་རྣམས་ཀྱིས་སྨད་པ། འཕགས་པ་རྣམས་ཀྱིས་བཤུངས་པ། མཁས་པ་རྣམས་ཀྱིས་མ་བསྔགས་པ། མི་མཁས་པ་རྣམས་ཀྱིས་ཡོངས་སུ་བཟུང་བ། བྱིས་པ་རྣམས་ཀྱིས་བསྟེན་པ་ཡིན་ནོ། །དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། །མཁས་པ་རྣམས་ཀྱིས་སྦྲུལ་གྱི་མགོ་བཞིན་སྤངས། །ངན་སྐྱུགས་སྣོད་བཞིན་མི་གཙང་རྣམ་པར་སྤངས། །འདུན་པ་དགེ་བ་ཐམས་ཅད་འཇིག་བྱེད་པར། །འདོད་པ་ཤེས་ནས་ང་ནི་དགའ་མི་སྐྱེ། །དེའི་ཚེ་འདུན་པ་ཟུག་རྔུས་ཟུག་པ་བཞིན་དུ་སྐད་ཕྱུང་སྟེ། ངུ་ཞིང་དེ་ནས་མིག་ནས་མཆི་མ་ཟག་ལ། སྡུག་བསྔལ་བཞིན་ཚིག་འདི་སྐད་ཅེས་སྨྲས་སོ། །ལྷ་ཅིག་གང་གི་དོན་དུ་འདི་ན་ཁ་ཅིག་བརྟུལ་ཞུགས་རྣམ་པ་མང་པོ་རྩོམ་སྟེ་རི་དགས་ལྤགས་པ་འཆང ། །སྐྲ་དང་སེན་མོ་ཨག་ཙོམ་རིང་དུ་འཇོག་ཅིང་དེ་བཞིན་ཤིང་ཤུན་གྱོན་ལ་ཡན་ལག་སྐམས་ཤིང་བརྟུལ་ཞུགས་གནས། །སྲེ་ད་དང་ནི་ལྡམ་ལྡུམ་དག་དང་དྲུས་མ་འབྲས་ཟ་ཁ་ཅིག་སྤྱིའུ་ཚུགས་འདུག་དང་བ་ལང་བརྟུལ་ཞུགས 41.121b གནས། །ཇི་ལྟར་བདག་ཅག་འགྲོ་བའི་གཙོ་བོ་ཁྱད་འཕགས་འཁོར་ལོས་བསྒྱུར་བ་མཆོག་དང་དེ་བཞིན་འཇིག་རྟེན་སྐྱོང་བ་དང ། །བརྒྱ་བྱིན་རྡོ་རྗེ་འཆང་དང་འཐབ་བྲལ་ལྷ་དབང་འཕྲུལ་བར་འགྱུར་སྙམ་ཚངས་པའི་འཇིག་རྟེན་བསམ་གཏན་བདེ་བ་འདོད། །མི་ཡི་དམ་པ་ཁྱོད་ཀྱི་རྒྱལ་སྲིད་འདི་ནི་ཤིན་ཏུ་འབྱོར་ཅིང་རབ་ཏུ་རྒྱས་ལ་ཤིན་ཏུ་ལོ་ལེགས་པ། །དེ་བཞིན་ཀུན་དགའི་ར་བ་དག་དང་སྐྱེད་མོས་ཚལ་དང་ཁང་བཟངས་མཐོན་པོ་རྣམ་པར་རྒྱལ་བའི་ཁང་པ་མཚུངས། །བུད་མེད་འདི་དག་རྣམས་ཀྱང་པི་བང་དང་ནི་གླིང་བུ་དག་དང་གླུ་དང་རོལ་མོའི་དབྱངས་སྒྲ་ལེན་ཅིང་མཆིས། །དགའ་བར་བགྱིད་དང་གར་དང་གླུ་དབྱངས་སྦྱར་བ་ཤིན་ཏུ་བསླབས་པ་འདི་དག་སྤྱོད་ཅིང་དེས་པ་མ་བཞུད་ཅིག་།བྱང་ཆུབ་སེམས་དཔས་སྨྲས་པ། འདུན་པ་ཉོན་ཅིག་འདོད་པའི་རྒྱུས་ནི་སྔོན་གྱི་ཚེ་རབས་དག་ན་བཅིངས་དང་བཙས་དང་བརྡེགས་དང་བསྡིགས་པ་སྡུག་བསྔལ་བརྒྱ་དག་ངས་ནི་བཟོད་བྱས་འདུས་བྱས་རྣམས་ལ་ང་ཡིས་ཡིད་བྱུང་བྱས་མ་གྱུར། །སྔོན་ཆད་བག་མེད་དབང་དུ་སོང་ཞིང་གཏི་མུག་དཀྲུགས་ལ་ལྟ་བའི་དྲ་བས་དཀྲིགས་ཤིང་མུན་གྱུར་ཆོས་འདི་མི་ཤེས་པ་ལས་བྱུང་སྟེ་བདག་ཏུ་འདུ་ཤེས་འཛིན་དང་ཚོར་བ་པོ་ལས་འདས། དངོས་པོ་འདི་དག་ཐམས་ཅད་གཡོ་ཞིང་འགྱུར་ལ་མི་རྟག་སྤྲིན་དང་མཚུངས་ཤིང་གློག་དང་འདྲ་སྟེ་ཟིལ་པའི་ཐིགས་པ་འདྲ་ཞིང་གསོབ་གསོག་སྙིང་པོ་མེད་ལ་བདག་ཡོད་མ་ཡིན་སྟོང་པར་གྱུར་པ་སྟེ། །ང་ཡི་ཡིད་ནི་ཡུལ་ལ་ཆགས་པ་མེད་ཀྱིས་འདུན་པ་རྟ་རྒྱལ་དམ་པ་བསྔགས་ལྡན་ང་བྱིན་ངས་སྔོན་བསམས་པའི་བཀྲ་ཤིས་རྫོགས་ཀྱིས་ཐམས་ཅད་ཟིལ་གནོན་ཆོས་ཀུན་དབང་ཕྱུག་ཆོས་རྒྱལ་ཐུབ་པར་འགྱུར། །འདུན་པས་སྨྲས་པ། པད་མ་འདབ་མ་རྒྱས་པ་འདྲ་བའི་མིག་ལྡན་ཞིང ། །དོ་ཤལ་ནོར་བུ་རིན་ཆེན་སྣ་ཚོགས་རྣམས་ཀྱིས་བརྒྱན། །མཁའ་ལ་སྤྲིན་ཚོགས་དག་ལས་བྱུང་བའི་གློག་འདྲ་བ། །མལ་ན་རྣམ་པར་མཛེས་པ་འདི་ལ་མི་གཟིགས་སམ། ། 41.122a པི་ལྡིར་དང་ནི་ཁ་རྔ་དག་དང་སྒྲ་སྙན་དང ། །རྫ་རྔ་དག་དང་གླིང་བུ་གླུ་དབྱངས་ལེན་པ་དང ། །བྱ་བང་རྨ་བྱ་ཀ་ལ་པིང་ཀ་སྒྲ་འབྱིན་པ། །མི་འམ་ཅི་ཡི་ཁྱིམ་འདྲ་འདི་ཡང་དོར་ལགས་སམ། །སུ་མ་ན་དང་ཨུད་པ་ལ་དང་པར་ཤ་ཀ་།ཙམ་པ་ཀ་དང་དྲི་མཆོག་ཕྲེང་བ་མེ་ཏོག་བརྒྱུས། །དུས་ཀྱི་ཨ་ཀ་རུ་མཆོག་བདུག་པས་རབ་བདུགས་དང ། །བྱུག་པ་དམ་པ་དེ་དག་ལ་ཡང་མི་གཟིགས་སམ། །ཤིན་ཏུ་དྲི་བདའ་དྲི་ལྡན་རོ་བྲོ་གྱ་ནོམ་དང ། །སྐྱུ་རུམ་དག་དང་བཤོས་གཙང་ཤིན་ཏུ་ལེགས་སྦྱར་དང ། །སྐྱེམས་ཀྱི་རོ་ཡང་ཁ་ར་བཅས་པར་རབ་སྦྱར་བ། །འདི་ལའང་མི་གཟིགས་པར་ནི་ལྷ་ཁྱོད་གང་དུ་བཞུད། །གྲང་བའི་དུས་ན་བྱུག་པ་དྲོ་བ་དམ་པ་དང ། །ཚ་བའི་དུས་ན་ཙན་དན་སྦྲུལ་གྱི་སྙིང་པོ་དང ། །ཀ་ཤི་པ་ཡི་ན་བཟའ་བཟང་པོ་མང་པོ་དང ། །དེ་དག་ལ་ཡང་མི་གཟིགས་ལྷ་ཁྱོད་གང་དུ་བཞུད། །ལྷ་ཡུལ་དག་ན་ལྷ་རྣམས་དག་ནི་ཅི་འདྲ་བར། །འདོད་པའི་ཡོན་ཏན་ལྔ་པོ་འདི་དག་རབ་འབྱོར་པ། །དགའ་ཞིང་བདེ་དང་ལྡན་ལ་དགྱེས་པར་རོལ་མཛོད་དེ། །དེ་ནས་ཤཱཀྱའི་དམ་པ་ནགས་ཚལ་བཞུད་པར་མཛོད། །བྱང་ཆུབ་སེམས་དཔས་སྨྲས་པ། འདུན་པ་ངས་ནི་བསྐལ་པ་མཐའ་ཡས་དཔག་ཏུ་མེད་པར་གཟུགས་དང་སྒྲ་དང་དྲི་དང་རོ་དང་རེག་དང་མི་དང་ལྷ་ཡི་འདོད་པ་རྣམ་པ་སྣ་ཚོགས་སྤྱད་ཀྱང་ངོམས་པར་གྱུར་པ་མེད། །རྒྱལ་པོའི་སྲས་མཆོག་གྱུར་ཏེ་དབང་ཕྱུག་བྱས་ཤིང་གང་ཚེ་གླིང་བཞི་དག་ཏུ་འཁོར་ལོས་བསྒྱུར་བའི་རྒྱལ་པོར་གྱུར་ནས་རིན་ཆེན་སྣ་བདུན་ལྡན་ཞིང་བུད་མེད་ནང་ན་འདུག་པ་དང ། །སུམ་བཅུ་རྩ་གསུམ་དབང་དང་འཐབ་བྲལ་རབ་ཀྱི་ལྷ་དབང་བྱས་ཤིང་དེ་དག་ནས་ནི་ཤི་འཕོས་འདི་འོངས་སྤྲུལ་པའི་ལྷ་ཡི་ནང་ན་ཡིད་འོང་དཔལ་ལྡན་དམ་པ་ང་ཡིས་སྔོན་ཆད་སྤྱད། །ལྷ་ཡི་གནས་སུ་དབང་བསྒྱུར་བདུད་ཀྱི་དབང་པོ་བྱས་ཤིང་འདོད་པ་འབྱོར་པ་མཆོག་ལ་སྤྱད་ཀྱང་ངོམས་མ་གྱུར་ན་ད་ཅི་དམན་པ་འདི་ལ་བསྟེན་པས་ང་ངོམས་འགྱུར་རམ་དེ་ནི་གནས་མིན་ནོ། །གཞན་ཡང་འདུན་པ་ང་ནི་སྡུག་བསྔལ་མྱ་ངན 41.122b དགོན་པའི་འཁོར་བར་གནས་པ་ཉོན་མོངས་གདུག་པས་དཀྲུགས་ཤིང་ཉམ་ངས་རྟག་ཏུ་ཁྱེར་ཏེ་མགོན་མེད་སྐྱབས་མེད་ཅིང ། །གཏི་མུག་མ་རིག་མུན་པ་དག་ན་རྒ་དང་ན་དང་འཆི་བའི་འཇིགས་པ་དག་གིས་ཉེན་ལ་སྐྱེ་བའི་སྡུག་བསྔལ་དགྲ་ཡིས་ཀུན་ཏུ་གནོད་ཅིང་རྣམ་པར་གནོད་པའི་འགྲོ་བ་འདི་བལྟས་ནས། །ངས་འདིར་ཆོས་ཀྱི་གྲུ་བཟང་གཏོང་དང་ཚུལ་ཁྲིམས་བརྟུལ་ཞུགས་བཟོད་པ་བརྩོན་འགྲུས་སྟོབས་ཅན་དག་གི་ཤིང་ཚོགས་བསོགས་ཏེ་སྦྱར་ནས་ལྷག་པའི་བསམ་པ་སྙིང་པོ་ལྡན་པ་རྡོ་རྗེ་ལྟ་བུས་བརྟན་པོར་གཟུངས་བཏབ་སྦྱར། །གྲུ་དེར་ང་ཉིད་ཞུགས་ནས་བདག་ཉིད་རྒལ་ཏེ་བདག་གིས་འགྲོ་བ་མཐའ་ཡས་པ་དག་འཁོར་བའི་ཆུ་བོ་འདལ་བར་ཆེ་བ་ཁྲོ་བའི་དབའ་རླབས་ལྡན་པ་འདོད་ཆགས་འཛིན་ཁྲི་གློང་འཁྱིལ་དགྲ་ཡིས་རྣམ་པར་དཀྲུགས་པ་རྒལ་བར་དཀའ་ལས་བསྒྲལ་ལོ་སྙམ་སྟེ་ང་སེམས་དེ་འདྲའོ། །དེ་ཕྱིར་སྲིད་འཚོ་དགྲར་བཅས་ལྟ་བའི་འཛིན་ཁྲི་དང ། །ཉོན་མོངས་སྲིན་པོ་ཡོད་པ་འདི་ལས་བདག་རྒལ་ཏེ། །བདག་ཉིད་རྒལ་བར་གྱུར་ནས་འགྲོ་བ་མཐའ་ཡས་པ། །རྒ་མེད་ཤི་མེད་ཞི་བའི་ཐང་ལ་དགོད་པར་བྱ། །དེའི་ཚེ་འདུན་པ་དེ་བས་ཀྱང་རབ་ཏུ་ངུ་ཞིང་འདི་སྐད་ཅེས་སྨྲས་སོ། །ལྷ་དེ་ལྟར་ངེས་པར་མཛད་དམ། བྱང་ཆུབ་སེམས་དཔས་སྨྲས་པ། འདུན་པ་ང་ཡིས་ངེས་པར་བྱས་པ་ཉོན། །སེམས་ཅན་དགྲོལ་ཕྱིར་ཕན་པར་བྱ་ཕྱིར་བརྩོན། །མི་གཡོ་ལས་ཀྱང་མི་གཡོ་གནོད་པ་མེད། །རི་རྒྱལ་ལྷུན་པོ་ལྟ་བུར་བརྟན་མི་གཡོ། །འདུན་པས་སྨྲས་པ། ཇོ་ཇོའི་ངེས་པ་ཅི་འདྲ་བ་ཞིག་ལགས། བྱང་ཆུབ་སེམས་དཔས་སྨྲས་པ། རྡོ་རྗེའི་གནམ་ལྕགས་དགྲ་སྟ་མདུང་ཐུང་མདའ་ཆར་དང ། །ལྕགས་བསྐོལ་གློག་གི་ཚོགས་ལྟར་རབ་ཏུ་འབར་བ་དང ། །རི་རྩེ་ཀུན་ཏུ་འབར་བ་མགོ་སྟེང་རབ་འབབ་ཀྱང ། །ང་ནི་ཁྱིམ་ལ་འདོད་པའི་ཕྱིར་ཡང་མི་སྐྱེད་དོ། །དེའི་ཚེ་ལྷའི་བུ་ནམ་མཁའ་ལ་འཁོད་པ་དག་གིས་ཅ་ཅོ་དང་ག་ཞའི་སྒྲ་བརྒྱ་སྟོང་ཕྱུང་སྟེ། མེ་ཏོག་གི་ཆར་ཡང་ཕབ་ནས་ཚིགས་སུ་བཅད་པ 41.123a འདི་དག་སྨྲས་སོ། །ཡུལ་རྣམས་ལ་ནི་ཡིད་ཀྱང་མ་ཆགས་ཤིང ། །སེམས་ཅན་དག་པ་སྙིང་རྗེ་སྙིང་བརྩེར་ལྡན། །བློ་གྲོས་མཆོག་ལྡན་རྒྱལ་གྱུར་རྒྱལ་གྱུར་ཅིག་།མགོན་པོ་འགྲོ་ལ་མི་འཇིགས་སྦྱིན་མཛད་པ། །མཁའ་ལ་རྡུལ་གནག་དུ་བ་འཇུག་རེངས་དག་།མི་ཆགས་བཞིན་དུ་སྐྱེས་མཆོག་ཐུགས་མི་ཆགས། །དྲི་མེད་ཡུལ་གྱི་བདེ་བས་མི་གོས་ཏེ། །ཆུ་ལས་པད་མ་ཇི་ལྟར་འཕགས་པ་བཞིན། །དགེ་སློང་དག་དེ་ནས་ལྷའི་བུ་ཞི་བའི་བློ་གྲོས་དང ། ལྷའི་བུ་རྩེ་བ་བཀོད་པས། བྱང་ཆུབ་སེམས་དཔའི་ངེས་པ་རིག་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོའི་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་ཐམས་ཅད་གཉིད་ཀྱིས་ལོག་པར་བྱས་སོ། །སྒྲ་ཐམས་ཅད་ཀྱང་མི་སྒྲག་པར་བྱས་སོ། །དགེ་སློང་དག་དེ་ནས་བྱང་ཆུབ་སེམས་དཔས་གྲོང་ཁྱེར་གྱི་སྐྱེ་བོ་ཐམས་ཅད་གཉིད་ཀྱིས་ལོག་པར་རིག་།ནམ་གྱི་གུང་ལ་བབ་པར་རིག་།སྐར་མའི་བདག་པོ་རྒྱལ་དང་ལྡན་པར་རིག་།ད་ཁོ་ན་མངོན་པར་འབྱུང་བའི་དུས་ལ་བབ་པར་རིག་ནས་འདུན་པ་ལ་སྨྲས་པ། འདུན་པ་དང་སྐྱོ་བར་མ་བྱེད་པར་རྟ་བསྔགས་ལྡན་ལེགས་པར་བརྒྱན་ཏེ་མ་ཐོགས་པར་ང་ལ་བྱིན། བྱང་ཆུབ་སེམས་དཔས་ཚིག་དེ་སྐད་སྨྲས་མ་ཐག་ཏུ། དེ་ནས་སྐད་ཅིག་དེ་ཉིད་ལ་རྒྱལ་པོ་ཆེན་པོ་བཞིས། བྱང་ཆུབ་སེམས་དཔའི་ཚིག་ཐོས་ནས། རང་རང་གི་གནས་ནས་བྱུང་སྟེ། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་རང་རང་གི་བཀོད་པས་རིངས་པ་རིངས་པར་ཡང་སེར་སྐྱའི་གནས་ཀྱི་གྲོང་ཁྱེར་ཆེན་པོར་འོངས་སོ། །དེ་ན་དྲི་ཟའི་བདག་པོ་རྒྱལ་པོ་ཆེན་པོ་ཡུལ་འཁོར་སྲུང་ནི་དྲི་ཟ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་སིལ་སྙན་དང་གླུ་དབྱངས་སྣ་ཚོགས་ལེན་ཅིང་ཤར་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་ཤར་ཕྱོགས་ཉིད་དུ་གནས་ནས་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ། །རྒྱལ་པོ་ཆེན 41.123b པོ་འཕགས་སྐྱེས་པོ་ནི་གྲུལ་བུམ་མུ་ཏིག་གི་དོ་ཤལ་སྣ་ཚོགས་ལག་ན་འཕྱང་བ། ནོར་བུ་རིན་པོ་ཆེ་སྣ་ཚོགས་ཐོགས་པ། སྤོས་ཆུ་སྣ་ཚོགས་ཀྱིས་གང་བའི་བུམ་པ་ཐོགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་ལྷོ་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་ལྷོ་ཕྱོགས་ཉིད་དུ་གནས་ནས། བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ། །རྒྱལ་པོ་ཆེན་པོ་མིག་མི་བཟང་ནི་ཀླུ་མུ་ཏིག་གི་དོ་ཤལ་སྣ་ཚོགས་ལག་ན་འཕྱང་བ། ནོར་བུ་རིན་པོ་ཆེ་སྣ་ཚོགས་ཐོགས་པ། སྤོས་ཀྱི་ཕྱེ་མ་དང་མེ་ཏོག་གི་ཆར་གྱི་སྤྲིན་ཀུན་ནས་སློང་བའི་རླུང་དལ་ཞིང་དྲི་ཞིམ་པ་སྣ་ཚོགས་གཏོང་བ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་ནུབ་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་ནུབ་ཕྱོགས་ཉིད་དུ་གནས་ནས། བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ། །རྒྱལ་པོ་ཆེན་པོ་ལུས་ངན་ནི་གནོད་སྦྱིན་ནོར་བུ་རིན་པོ་ཆེ་སྐར་མའི་འོད་ཟེར་ཐོགས་པ། ལག་ན་མར་མེ་ཐོགས་པ། སྒྲོན་མ་འབར་བ་ལག་ན་ཐོགས་པ། མདའ་གཞུ་དང ། རལ་གྲི་དང ། མདུང་ཐུང་དང ། མཚོན་རྩེ་གཉིས་པ་དང ། རྩེ་གསུམ་པ་དང ། འཁོར་ལོ་དང ། མཚོན་རྩེ་གཅིག་པ་དང ། འཕང་མདུང་ལ་སོགས་པ་མཚོན་ཆ་སྣ་ཚོགས་ཐོགས་པ། གོ་ཆ་དང་ཡ་ལད་སྲ་བ་བགོས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་བྱང་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་བྱང་ཕྱོགས་ཉིད་དུ་གནས་ནས། བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ། །ལྷའི་དབང་པོ་བརྒྱ་བྱིན་ཡང་སུམ་བཅུ་རྩ་གསུམ་པའི་ལྷ། ལྷའི་མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། གོས་དང ། 41.124a གདུགས་དང ། རྒྱལ་མཚན་དང ། བ་དན་དང ། མེ་ཏོག་གི་རྣ་རྒྱན་དང ། རྒྱན་ཐོགས་པ་རྣམས་དང ། ལྷན་ཅིག་ཏུ་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་སྟེང་གི་བར་སྣང་ལ་འཁོར་དང་བཅས་ཏེ། བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ། །དགེ་སློང་དག་དེ་ལྟར་འདུན་པས་བྱང་ཆུབ་སེམས་དཔའི་ཚིག་ཐོས་ནས། མིག་མཆི་མས་གང་ཞིང་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །ཇོ་ཇོ་ཁྱོད་ནི་དུས་མཁྱེན་པ། ཚོད་མཁྱེན་པ། རན་པ་མཁྱེན་པ་ལགས་ན། ད་ལྟར་ནི་བཞུད་པའི་དུས་དང་ཚོད་མ་ལགས་ན། ཅིའི་སླད་དུ་བཀའ་དེ་སྐད་སྩལ། བྱང་ཆུབ་སེམས་དཔས་སྨྲས་པ། འདུན་པ་ད་ནི་དུས་ལ་བབ་པོ། །སྨྲས་པ། ཇོ་ཇོ་གང་གི་དུས་ལ་བབ། བྱང་ཆུབ་སེམས་དཔས་སྨྲས་པ། སེམས་ཅན་རྣམས་ཀྱི་དོན་ནི་ཚོལ་བ་ན། །བྱང་ཆུབ་རྒ་ཤི་མེད་པའི་གནས་ཐོབ་ནས། །འགྲོ་བ་དགྲོལ་ཞེས་ང་ཡིས་ཡུན་རིང་ནས། །སྨོན་ལམ་བཏབ་པ་དེ་ཡི་དུས་ལ་བབ། །འདི་ལ་འདི་ནི་ཆོས་ཉིད་དེ། དེ་ལ་འདི་སྐད་ཅེས་བྱའོ། །ས་བླ་བ་དང་བར་སྣང་དེ་བཞིན་སྐྱོང ། །ལྷ་དབང་བརྒྱ་བྱིན་རང་གི་ཕྱོགས་དང་བཅས། །འཐབ་བྲལ་ལྷ་དང་དགའ་ལྡན་འཕྲུལ་དགའ་དང ། །གཞན་འཕྲུལ་དབང་བྱེད་ལྷ་རྣམས་བརྩོན་པར་གྱུར། །ཀླུ་རྒྱལ་ཆུ་ལྷ་དང་ནི་གཟི་ཅན་དང ། །མ་དྲོས་པ་དང་དེ་བཞིན་རྒྱ་མཚོ་ཡང ། །མི་མཆོག་མངོན་པར་བྱུང་བའི་དུས་བབ་པས། །དེ་དག་རྣམས་ཀྱང་མཆོད་ཕྱིར་བརྩོན་པར་གྱུར། །གང་དག་གཟུགས་ན་སྤྱོད་པའི་ལྷ་རྣམས་དང ། །རྟག་ཏུ་བསམ་གཏན་སྤྱོད་ཡུལ་རབ་ཞི་སྤྱད། །དེ་དག་རྣམས་ཀྱང་འཇིག་རྟེན་གསུམ་མཆོད་པ། །མི་མཆོག་དེ་ལ་མཆོད་ཕྱིར་མངོན་པར་བརྩོན། །སྔོན་སྤྱད་སྤྱོད་ཚེ་གྲོགས་པོར་གྱུར་པ་ཡི། །བྱང་ཆུབ་སེམས་དཔའ་ཕྱོགས་བཅུར་ལྷགས་པ་ཡང ། །རྒྱལ་བ་མངོན་པར་འབྱུང་བ་ལྟ་བྱེད་ཅིང ། །རྗེས་སུ 41.124b འཐུན་པས་མཆོད་པ་བྱ་སྙམ་བྱེད། །གསང་བའི་བདག་པོ་བདག་ཉིད་ཆེན་པོ་དེ། །རྡོ་རྗེ་འབར་ཐོགས་ནམ་མཁའི་དཀྱིལ་ན་གནས། །ལུས་ལ་གོ་བགོས་སྟོབས་བརྩོན་རྩལ་དང་ལྡན། །གསང་བ་ལག་ན་རྡོ་རྗེ་འབར་བ་ཐོགས། །ལྷའི་བུ་ཉི་མ་ཟླ་བ་དེ་གཉིས་ཀྱང ། །གཡས་དང་གཡོན་ན་རབ་ཏུ་གནས་པར་གྱུར། །སོར་མོ་བཅུ་ཡི་ཐལ་མོ་སྦྱར་བྱས་ཏེ། །མངོན་པར་འབྱུང་ལ་རྗེས་སུ་རྟོག་པར་བྱེད། །སྐར་མ་རྒྱལ་དེ་འཁོར་དང་བཅས་པ་ཡང ། །རང་གི་ལུས་ནི་རྒྱ་ཆེན་སྤྲུལ་བྱས་ཏེ། །མི་ཡི་དམ་པ་དེ་ཡི་མདུན་འདུག་ནས། །ཡིད་དུ་འོང་བའི་སྒྲ་ནི་རབ་འབྱིན་ཏེ། །སྐར་མ་རྒྱལ་ལྡན་བཞུད་པའི་དུས་ལ་བབ། །དོ་མོད་ཁྱོད་དགེ་བཀྲ་ཤིས་ཐམས་ཅད་གྲུབ། །བདག་ཀྱང་ཁྱོད་དང་ཐབས་གཅིག་མཆི་བར་བགྱི། །འདོད་ཆགས་སེལ་བ་བར་ཆད་འབྱུང་མི་འགྱུར། །ལྷའི་བུ་ཡང་དག་སྐུལ་པོས་བསྐུལ་བྱས་པ། །སྟོབས་དང་བརྩོན་འགྲུས་འཕགས་པ་མྱུར་དུ་བཞེངས། །སྡུག་བསྔལ་ཉེན་པའི་སེམས་ཅན་ཐམས་ཅད་སྒྲོལ། །ད་ནི་མངོན་པར་འབྱུང་བའི་དུས་ལ་བབ། །ལྷ་རྣམས་བྱེ་བ་སྟོང་ཕྲག་མང་པོ་ཡང ། །ཡིད་འོང་མེ་ཏོག་ཆར་པ་འབེབས་ཤིང་ལྷགས། །དེ་ནི་སྐྱིལ་མོ་ཀྲུང་བཅས་མཆོག་ལ་འདུད་།ལྷ་ཡིས་བསྐོར་ཅིང་མཛེས་ལ་གཟི་བརྗིད་འབར། །གྲོང་ཁྱེར་ན་ནི་སྐྱེས་པ་བུད་མེད་ཁྱེའུ་དང་བུ་མོ་གང་ཡོད་པ། །དེ་དག་ཐམས་ཅད་ཡིད་ངལ་གྱུར་ནས་ཉལ་ཏེ་སྤྱོད་ལམ་རྣམས་ལས་ཉམས། །རྟ་དང་གླང་པོ་བ་ལང་ནེ་ཙོ་ཁྲུང་ཁྲུང་རྨ་བྱ་རི་སྐེགས་རྣམས། །དེ་དག་རྣམས་ཀྱང་ཡིད་ངལ་མྱུར་དུ་ཉལ་ཏེ་དེ་དག་གཟུགས་མི་མཐོང ། །ཤཱཀྱའི་བུ་གང་རྡོ་རྗེ་སྲ་བ་མཚོན་ཆ་རྩེ་གཉིས་ཐོགས་བཀོད་དང ། །གླང་ཆེན་རྟ་དང་ཤིང་རྟ་རྟ་བབས་མཆོག་དྲུང་བཀོད་པ་དེ་དག་ཉལ། །རྒྱལ་པོ་རྒྱལ་བུ་རྒྱལ་པོའི་སྐྱེ་བོ་ཀུན་ཀྱང་གཉིད་ཀྱིས་ལོག་པར་གྱུར། །བུད་མེད་ཚོགས་རྣམས་གཉིད་ལོག་གོས་བྲལ་གཅེར་བུར་གྱུར་ཀྱང་ཡང་མ་ཚོར། །དེ་ནི་ཚངས་དབྱངས་ཡིད་དུ་འོང་ཚིག་ཀ་ལ་པིང་ཀའི་སྒྲ 41.125a དབྱངས་ཀྱིས། །ནམ་ཕྱེད་འདས་ཏེ་ནམ་གྱི་གུང་ལ་བབ་ནས་འདུན་པ་དེ་ལ་སྨྲས། །འདུན་པ་རྟ་ཕོ་བསྔགས་ལྡན་བཟང་པོ་ལེགས་བརྒྱན་ལེགས་པར་ང་ལ་བྱིན། །གལ་ཏེ་ང་ལ་བྱམས་པར་སེམས་ན་བགེགས་མ་བྱེད་པར་མྱུར་དུ་བྱིན། །འདུན་པས་ཚིག་ཐོས་མཆི་མས་མིག་གང་རང་གི་ཇོ་བོ་དེ་ལ་སྨྲས། །སེམས་ཅན་ཁ་ལོ་བསྒྱུར་མཆོག་གར་བཞུད་བཅིབས་པས་ཅི་ཞིག་བགྱི། །དུས་མཁྱེན་ཅིང་ནི་ཚོད་མཁྱེན་ཆོས་སྤྱོད་གང་དུའང་གཤེགས་པའི་དུས་མ་ལགས། །ཁྱོད་ཀྱི་སྒོ་བཀུམ་གཏན་པ་དམ་སྩལ་སུ་ཡང་ཆབ་སྒོ་འབྱེད་མི་འགྱུར། །བརྒྱ་བྱིན་གྱི་ནི་ཡིད་ཀྱི་སེམས་པའི་དབང་གིས་སྒོ་ཡང་བྱེ་བར་གྱུར། །འདུན་པས་དེ་འདྲ་མཐོང་ནས་དགའ་ཞིང་སྡུག་བསྔལ་དེ་ནི་མཆི་མ་འཁོར། །ཀྱི་ཧུད་བདག་གྲོགས་སུ་ཡོད་ཇི་ལྟར་བྱ་ཞིང་ཕྱོགས་ནི་གར་བརྒྱུག་སྙམ། །གཟི་བརྗིད་ལྡན་པས་དྲག་ཤུལ་ཅན་གྱི་ཚིག་སྨྲས་བརྒྱ་བྱིན་འབའ་ཤིག་ཐོས། །ཡན་ལག་བཞི་ལྡན་དཔུང་དང་བཅས་པ་འདི་ཡང་འདི་ན་ཅི་ཞིག་བྱེད། །རྒྱལ་པོ་རྒྱལ་བུ་རྒྱལ་པོའི་སྐྱེ་བོ་དེ་དག་རྣམས་ཀྱིས་འདི་མ་ཚོར། །བུད་མེད་ཚོགས་ཀྱང་གཉིད་ལོག་ལྷ་རྣམས་ཀྱིས་ནི་གྲགས་ལྡན་གཉིད་ལོག་བྱས། །ཀྱི་ཧུད་འདི་ཡིས་སྔོན་ཆད་བསམས་པའི་སྨོན་ལམ་ཐམས་ཅད་གྲུབ་གྱུར་ཅིག་།ལྷ་སྟོང་བྱེ་བ་དེ་དག་དགའ་བའི་ཡིད་ཀྱིས་འདུན་པ་དེ་ལ་སྨྲས། །འདུན་པ་རྟ་མཆོག་བསྔགས་ལྡན་ལེགས་པར་ཕུལ་ཅིག་འདྲེན་པ་སྐྱོ་མ་བྱ། །ལྷ་དང་ལྷ་མིན་དག་གིས་རྔ་དུང་རྫ་རྔ་རོལ་མོ་ཁྲག་ཁྲིག་བྱས། །འོན་ཀྱང་ལྷས་བསྙལ་བ་ཡི་གྲོང་ཁྱེར་མཆོག་འདི་སད་པར་ཡོང་མ་གྱུར། །འདུན་པ་བར་སྣང་དྲི་མ་མེད་ལ་ལྷ་ཡི་འོད་རབ་མཛེས་ལ་ལྟོས། །ཁྱོད་ཀྱིས་བྱང་ཆུབ་སེམས་དཔའ་བྱེ་བ་མང་པོ་མཆོད་ཕྱིར་གང་ལྷགས་ལྟོས། །བདེ་སོགས་ཁྱིམ་ཐབ་བརྒྱ་བྱིན་དཔུང་བསྐོར་སྒོ་ན་མཛེས་པར་འདུག་པ་དང ། །ལྷ་དང་ལྷ་མིན་མི་འམ་ཅི་ཚོགས་གང་དག་མཆོད་ཕྱིར་ལྷགས་ལ་ལྟོས། །འདུན་པ་དེས་ཀྱང་ལྷ་ཚིག་དེ་ཐོས་བསྔགས་ལྡན་རྟ་པོ 41.125b དེ་ལ་སྨྲས། །སེམས་ཅན་ཁ་ལོ་བསྒྱུར་མཆོག་འདི་བཞུད་ཁྱོད་ནི་རྟ་སྐད་སྒྲོགས་ཤིང་ཤོག་།དེ་ཡིས་དབྱར་གྱི་ཁ་དོག་ཅན་དེ་རྨིག་པ་གསེར་གྱིས་བརྒྱན་བྱས་ནས། །ཡིད་མི་དགའ་བཞིན་ཡོན་ཏན་རྒྱ་མཚོ་མངའ་བའི་བཅིབས་པར་དབུལ་བ་བྱས། །མཚན་མཆོག་མངའ་ཞིང་ཕན་མཛད་ཁྱོད་ཀྱི་ཆིབས་འདི་རིགས་བཟང་དགེ་བ་ལགས། །ཁྱོད་ཀྱིས་སྔོན་ཆད་གང་བགོས་སྨོན་ལམ་དེ་གྲུབ་གྱུར་ཅིག་གཤེགས་སུ་གསོལ། །གང་དག་བགེགས་བགྱིད་ཞི་བར་གྱུར་ཅིག་དགོངས་པའི་བརྟུལ་ཞུགས་གྲུབ་གྱུར་ཅིག་།འགྲོ་བ་ཀུན་ལ་བདེ་དང་མཐོ་རིས་པ་དང་ཞི་བ་སྦྱིན་གྱུར་ཅིག་།དེ་ནི་གང་ཚེ་མལ་ནས་ལངས་ཚེ་ས་འདི་ཐམས་ཅད་རྣམ་དྲུག་གཡོས། །རྟ་རྒྱལ་དམ་པ་ཟླ་བ་ཉ་བའི་དཀྱིལ་འཁོར་འདྲ་བ་དེ་ལ་ཞོན། །སྐྱོང་བའི་ལག་པ་རྣམ་དག་པད་མ་དྲི་མེད་འདྲ་བས་རྟ་མཆོག་བཏེག་།བརྒྱ་བྱིན་ཚངས་པ་དེ་གཉིས་དེ་ཡི་མདུན་ན་ལམ་ནི་འདི་ཞེས་སྟོན། །དེ་ཡིས་གསལ་བ་དྲི་མ་མེད་པའི་འོད་བཏང་ས་རྣམས་སྣང་བས་གསལ། །དེ་ཚེ་ངན་སོང་ཀུན་ཞི་སེམས་ཅན་བདེ་ལྡན་ཉོན་མོངས་གནོད་པ་མེད། །མེ་ཏོག་ཆར་བབ་སིལ་སྙན་བྱེ་བ་སྒྲ་བྱུང་ལྷ་དང་ལྷ་མིན་བསྟོད། །ཐམས་ཅད་དགའ་དང་ལྡན་ནས་གྲོང་ཁྱེར་མཆོག་ལ་བསྐོར་བ་བྱས་ཏེ་དོང ། །སྐྱེས་བུ་ཆེན་པོ་སོང་བས་གྲོང་ཁྱེར་དམ་པའི་ལྷ་ཡང་ཡིད་ནི་དམན་པར་གྱུར་ནས་འོངས། །མདུན་དུ་འདུག་ནས་སྙིང་རྗེར་ངུ་བའི་ཡིད་ལྡན་དེ་ཡིས་པད་མ་འདྲ་བའི་བཞིན་ལ་སྨྲས། །ཁྱོད་བྲལ་སྒྲེན་མོར་མི་མཛེས་ས་འདི་གྲོང་ཁྱེར་ཐམས་ཅད་མུན་པས་ཀུན་ཏུ་དཀྲུགས་པར་གྱུར། །དོ་མོད་ཁྱོད་ཀྱིས་ཁབ་འདི་སྤངས་ན་བདག་ལ་དགའ་བདེ་བགྱིད་པ་འགའ་མ་མཆིས། །སླན་ཆད་བྱ་ཚོགས་རྣམས་ཀྱིས་སྒྲ་དག་དང ། །གྲགས་པ་མཐའ་ཡས་ཁྱོད་ནི་སད་བགྱིད་པའི། །བཙུན་མོའི་འཁོར་གྱི་གླིང་བུ་སྙན་པ་དང ། །བཀྲ་ཤིས་སྒྲ་དང་གླུ་སྒྲ་ཐོས་མི་འགྱུར། །ཉོན་མོངས་བཅོམ་པ་ཁྱོད་ནི་གཤེགས་གྱུར་ན། །གདུགས་མཚན་ཁྱོད་ལ་མཆོད་པ 41.126a བགྱིད་པ་ཡི། །ལྷ་དང་གྲུབ་ཚོགས་སླན་ཆད་མཐོང་མི་འགྱུར། །ལྷ་ཡི་དྲི་ཡང་སླན་ཆད་སྣོམ་མི་འགྱུར། །ཕྲེང་བ་བཏགས་ནས་ཞག་ལོན་གྱུར་པ་ལྟར། །ཁྱོད་ཀྱིས་དོ་མོད་ཕོ་བྲང་དེ་བཞིན་སྤངས། །ཁྱོད་བཞུད་སླན་ཆད་གཟི་བརྗིད་དཔལ་མ་མཆིས། །གར་ལ་ལྟ་བ་བཞིན་དུ་བདག་ལ་གདའ། །གྲོང་ཁྱེར་ཀུན་གྱི་བྱིན་དང་སྟོབས་ཕྲོགས་ཏེ། །འདི་ནི་དགོན་པ་འདྲ་ཞིང་མཛེས་མ་ལགས། །གང་གིས་ས་འདིར་འཁོར་ལོ་སྟོབས་ཅན་དུ། །ལུང་བསྟན་དྲང་སྲོང་ཚིག་ནི་དེང་བརྫུན་གྱུར། །བསོད་ནམས་སྡོང་པོ་ཆེན་པོ་ཁྱོད་བྱུང་ན། །ས་འདིར་ཤཱཀྱའི་སྟོབས་ནི་སྟོབས་མ་མཆིས། །རྒྱལ་པོའི་ཕོ་བྲང་འཁོར་འདིར་གདུང་ཡང་འཆད། །ཤཱཀྱའི་ཚོགས་འདི་བསམ་པ་རབ་ཏུ་ཉམས། །དྲི་མེད་དྲི་བྲལ་ཁྱོད་ནི་གར་བཞུད་པར། །བདག་ཀྱང་ཁྱོད་དང་ལྷན་ཅིག་མཆི་བར་བགྱི། །འོན་ཀྱང་ཐུགས་བརྩེ་ཐུགས་རྗེ་བསྐྱེད་ནས་ནི། །ཁྱོད་ཀྱིས་ཕོ་བྲང་འདི་ལ་གཟིགས་སུ་གསོལ། །བློ་གྲོས་ལྡན་པ་ཁྱིམ་ལ་བལྟས་ནས་ནི། །སྙན་པའི་ང་རོས་འདི་སྐད་ཚིག་སྨྲས་ཏེ། །སྐྱེ་འཆི་མཐར་འབྱིན་མ་ཐོབ་བར་དུ་ནི། །ང་ཡིས་སེར་སྐྱའི་གྲོང་ཁྱེར་འཇུག་མི་བྱ། །རྒ་ཤི་མེད་པའི་གནས་མཆོག་འཆི་མེད་པ། །བྱང་ཆུབ་དམ་པ་ང་ཡིས་མ་ཐོབ་པར། །ང་ནི་སེར་སྐྱའི་གནས་སུ་མངོན་ཕྱོགས་ཏེ། །འགྲེང་འདུག་ཉལ་དང་འཆག་པར་མི་བྱའོ། །གང་ཚེ་འགྲོ་བའི་གཙོ་བོ་པ། །བྱང་ཆུབ་སེམས་དཔའ་དེ་བྱུང་ཞིང ། །དེ་ནི་མཁའ་ལས་འགྲོ་བའི་ཚེ། །ལྷ་ཡི་བུ་མོ་རྣམས་ཀྱིས་བསྟོད། །འདི་ནི་སྦྱིན་པའི་གནས་ཆེན་ཡིན། །འདི་ནི་བསོད་ནམས་ཞིང་ཆེན་ཡིན། །འདི་ནི་བསོད་ནམས་འདོད་པའི་ཞིང ། །འཆི་མེད་འབྲས་བུ་སྦྱིན་མཛད་པ། །སེམས་ཅན་རྣམས་ལ་ཐུགས་རྗེ་བས། །འདི་ཡིས་བསྐལ་པ་བྱེ་མང་དུ། །སྦྱིན་དང་དུལ་དང་སྡོམ་པ་ཡིས། །འདིས་ནི་བྱང་ཆུབ་ཡང་དག་བསྒྲུབས། །འདི་ཡི་ཚུལ་ཁྲིམས་ཡོངས་སུ་དག་།བརྟུལ་ཞུགས་བཟང་ཞིང་སྤྱོད 41.126b མ་ཉམས། །འདོད་པ་དག་དང་ལོངས་སྤྱོད་རྣམས། །དོན་དུ་མི་གཉེར་ཚུལ་ཁྲིམས་སྲུང ། །སེམས་ཅན་ཡོངས་སུ་བསྐྱབ་པའི་ཕྱིར། །འདི་ནི་རྟག་ཏུ་བཟོད་པ་གསུང ། །ཡན་ལག་ཉིང་ལག་གཅད་གྱུར་ཀྱང ། །ཁྲོ་བ་མི་མངའ་སྡང་མི་མངའ། །འདི་ནི་རྟག་ཏུ་བརྩོན་འགྲུས་ལྡན། །བསྐལ་པ་བྱེ་བར་སྐྱོ་མི་མངའ། །འདི་ཡིས་བྱང་ཆུབ་ཡང་དག་བསྒྲུབས། །མཆོད་སྦྱིན་དག་ནི་བྱེ་བ་མཛད། །འདི་རྟག་བསམ་གཏན་བསམ་གཏན་པ། །ཐུགས་ནི་ཞི་ཞིང་རབ་ཏུ་ཞི། །ཉོན་མོངས་ཐམས་ཅད་བསྲེགས་ནས་ནི། །སེམས་ཅན་བྱེ་བ་འགྲོལ་བར་འགྱུར། །འདི་ནི་ཤེས་རབ་ཆགས་མི་མངའ། །རྟོག་དང་རྣམ་པར་རྟོག་ལྡན་ལས། །གྲོལ་ཞིང་ཐུགས་ནི་རྣམ་གྲོལ་ཏེ། །རང་བྱུང་བ་ཡི་རྒྱལ་བར་འགྱུར། །འདི་ནི་རྟག་ཏུ་བྱམས་ཐུགས་ལྡན། །ཐུགས་རྗེ་ཡི་ནི་ཕ་རོལ་བྱོན། །དགའ་དང་བཏང་སྙོམས་བསམ་གཏན་པ། །ཚངས་པའི་ལམ་གྱི་ཆོ་ག་མཁྱེན། །འདི་ནི་ཤིན་ཏུ་ལྷ་ཡི་ལྷ། །ལྷ་རྣམས་ཀྱིས་ནི་མཆོད་པའི་འོས། །ཐུགས་དགེ་དག་ཅིང་དྲི་མ་བྲལ། །ཡོན་ཏན་ཁྲག་ཁྲིག་ཕ་རོལ་བྱོན། །འཇིགས་པས་ཉེན་པ་རྣམས་ཀྱི་སྐྱབས། །མིག་མེད་རྣམས་ཀྱི་སྒྲོན་མ་སྟེ། །གནོད་པ་རྣམས་ཀྱི་སྐྱབས་ཀྱང་ལགས། །རིང་ནས་ན་བའི་སྨན་པ་ལགས། །རྒྱལ་པོ་དམ་པ་ཆོས་ཀྱི་རྒྱལ། །དབང་པོ་ལྟ་བུར་སྤྱན་སྟོང་མངའ། །ཚངས་པ་ལྟ་བུར་རང་བྱུང་གྱུར། །ལུས་དང་སེམས་ནི་རབ་སྦྱངས་པ། །བརྟན་ཞིང་ཤེས་རབ་རབ་ཏུ་མང ། །དཔའ་ཞིང་ཐུགས་ནི་འདོད་ཆགས་བྲལ། །ཉོན་མོངས་འཇོམས་པས་དཔའ་བོ་སྟེ། །མ་རྒྱལ་དགྲ་ལས་རྒྱལ་བ་ལགས། །སེང་གེ་ལྟ་བུར་བསྙེངས་པ་སྤངས། །གླང་པོ་ལྟ་བུར་རབ་དུལ་ཐུགས། །ཁྱུ་མཆོག་ལྟ་བུར་ཚོགས་ཀྱི་གཙོ། །བཟོད་དེ་འཁྲུག་པ་རབ་ཏུ་སྤངས། །ཟླ་བ་ལྟ་བུར་རབ་ཏུ་གསལ། །ཉི་མ་ལྟ་བུར་སྣང་བ་མཛད། །སྒྲོན་མ་ལྟ་བུར་གསལ་མཛད་པ། །སྐར་མ་ལྟ་བུར་མུན་པ་བྲལ། ། 41.127a པད་མ་ལྟ་བུར་ཆགས་མི་མངའ། །མེ་ཏོག་ལྟ་བུར་ཁྲིམས་དྲི་གདའ། །སྟོན་པ་ལྷུན་པོ་ལྟར་མི་གཡོ། །དོག་ས་ལྟ་བུར་གསོས་སུ་གྱུར། །རིན་ཆེན་འབྱུང་གནས་ལྟར་མི་འཁྲུགས། །འདི་ནི་ཕུང་པོའི་བདུད་ལས་རྒྱལ། །འདི་ནི་འཆི་བདག་བདུད་ལས་རྒྱལ། །འདི་ནི་ལྷ་ཡི་བདུད་ཀྱང་བཅོམ། །འདི་ནི་དེད་དཔོན་ཆེན་པོ་སྟེ། །ལམ་ངན་དག་ན་གནས་རྣམས་ལ། །ཡན་ལག་བརྒྱད་པ་ལམ་གྱི་མཆོག་།རིང་པོར་མི་ཐོགས་སྟོན་པར་འགྱུར། །རྒ་ཤི་ཉོན་མོངས་འཇོམས་པ་པོ། །མུན་པ་རབ་རིབ་རྣམ་པར་གྲོལ། །ས་དང་ལྷ་ཡུལ་གྲགས་པ་ཡི། །རང་བྱུང་རྒྱལ་བར་བྱོན་པ་ལགས། །སྐྱེས་བུ་མཆོག་གི་གཟུགས་མངའ་བ། །དཔག་ཏུ་མེད་ལ་བསྟོད་པས་བསྟོད། །ཁྱོད་ལ་བསྟོད་པའི་བསོད་ནམས་དེས། །སྨྲ་བའི་སེང་གེ་འདྲ་བར་ཤོག་།དགེ་སློང་དག་དེ་ལྟར་བྱང་ཆུབ་སེམས་དཔའ་མངོན་པར་བྱུང་ནས་ཤཱཀྱའི་ཡུལ་དང ། ཀེའུ་ཏའི་ཡུལ་དང ། གྱད་ཡུལ་ལས་འདས་ཏེ་མེ་ནེ་ཡའི་ཡུལ་གྱི་གྲོང་རྡལ་རྗེས་སུ་དཔག་པ་ཞེས་བྱ་བ་ནས་དཔག་ཚད་དྲུག་ཏུ་བྱང་ཆུབ་སེམས་དཔའ་ཕྱིན་པ་དང་ནམ་ནངས་པར་གྱུར་ཏོ། །དེ་ནས་བྱང་ཆུབ་སེམས་དཔའ་རྟ་བསྔགས་ལྡན་ལས་བབས་ཏེ་ས་ལ་འདུག་ནས། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོའི་ཚོགས་ཆེན་པོ་སླར་བཀྱེའོ། །སླར་བཀྱེ་ནས་ཀྱང་དེ་འདི་སྙམ་དུ་སེམས་ཏེ། རྒྱན་འདི་དག་དང་རྟ་བསྔགས་ལྡན་ཡང་འདུན་པའི་ལག་ཏུ་གཏད་དེ་སླར་གཏང་ངོ་སྙམ་མོ། །དེ་ནས་བྱང་ཆུབ་སེམས་དཔས་འདུན་པ་ལ་བོས་ཏེ་འདི་སྐད་ཅེས་སྨྲས་སོ། །འདུན་པ་ཁྱོད་སོང་ལ་རྒྱན་འདི་དག་དང་རྟ་བསྔགས་ལྡན་ཁྱེར་ཏེ་སླར་ལོག་ཤིག་།ས་ཕྱོགས་གང་ནས་འདུན་པ་སླར་ལོག་པ་དེར་མཆོད་རྟེན་བརྩིགས་ཏེ། དེང་སང་དུ་ཡང་མཆོད་རྟེན་དེ་ལ་འདུན་པ་སླར་ལོག་པའི་མཆོད་རྟེན་ཞེས་གྲགས་པ་ཡིན་ནོ། །ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། 41.127b ཇི་ལྟར་ན་གཙུག་ཕུད་ཀྱང་ཡོད་ལ་རབ་ཏུ་བྱུང་བ་ཞེས་བྱ་བར་ཡང་འགྱུར་སྙམ་ནས་དེས་རལ་གྲིས་གཙུག་ཕུད་བཅད་དེ་བར་སྣང་ལ་བོར་བ་དང ། དེ་སུམ་བཅུ་རྩ་གསུམ་པའི་ལྷ་རྣམས་ཀྱིས་མཆོད་པའི་ཕྱིར་བླངས་ཏེ། དེང་སང་དུ་ཡང་སུམ་བཅུ་རྩ་གསུམ་པའི་ལྷ་རྣམས་གཙུག་ཕུད་ཀྱི་དུས་སྟོན་བྱེད་དོ། །དེར་མཆོད་རྟེན་ཡང་བྱས་ཏེ། དེང་སང་མཆོད་རྟེན་དེ་གཙུག་ཕུད་བླངས་པའི་མཆོད་རྟེན་ཞེས་མིང་དུ་ཆགས་སོ། །ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། རབ་ཏུ་བྱུང་ཡང་གོས་ཀ་ཤི་པ་གྱོན་པ་ཇི་ལྟར་རུང་གིས་གལ་ཏེ་ནགས་ཚལ་གྱི་གནས་ནས་ཚུལ་དང་འཐུན་པའི་གོས་ཤིག་རྙེད་ན་ནི་ལེགས་སོ་སྙམ་དུ་བསམས་པ་དང ། དེ་ནས་གནས་གཙང་མའི་རིས་ཀྱི་ལྷ་རྣམས་འདི་སྙམ་དུ་སེམས་ཏེ། བྱང་ཆུབ་སེམས་དཔའ་ལ་ངུར་སྨྲིག་དགོས་པར་གྱུར་ཏོ་སྙམ་མོ། །དེ་ན་ལྷའི་བུ་གཅིག་ཅིག་ལྷའི་གཟུགས་མི་མངོན་པར་བྱས་ཏེ། རྔོན་པའི་གཟུགས་ལྟ་བུས་གོས་ངུར་སྨྲིག་བགོས་ནས་བྱང་ཆུབ་སེམས་དཔའི་མདུན་དུ་ཕྱིན་ཏོ། །དེ་ནས་བྱང་ཆུབ་སེམས་དཔས་དེ་ལ་འདི་སྐད་ཅེས་སྨྲས་སོ། །གལ་ཏེ་གྲོགས་པོ་ཁྱོད་ཀྱིས་གོས་ངུར་སྨྲིག་རྣམས་ཁོ་བོ་ལ་བྱིན་ན། ཁོ་བོའི་གོས་ཀ་ཤི་པ་འདི་རྣམས་ཀྱང་ཁྱོད་ལ་སྦྱིན་ནོ། །དེས་སྨྲས་པ། གོས་འདི་དག་ཀྱང་ཁྱོད་ལ་མཛེས་ལ། འོ་ནི་རྣམས་ཀྱང་ཁོ་བོ་ལ་མཛེས་སོ། །བྱང་ཆུབ་སེམས་དཔས་སྨྲས་པ། ཁོ་བོས་ཁྱོད་ལ་བསླང་ངོ ། །དེ་ནས་ལྷའི་བུ་རྔོན་པའི་གཟུགས་ལྟ་བུ་དེས་གོས་ངུར་སྨྲིག་རྣམས་བྱང་ཆུབ་སེམས་དཔའ་ལ་བྱིན་ཏེ། གོས་ཀ་ཤི་པ་རྣམས་ཀྱང་བླངས་སོ། །དེ་ནས་ལྷའི་བུ་དེས་མོས་པ་བསྐྱེད་དེ་ལག་པ་གཉི་གས་གོས་དེ་དག་བླངས་ནས་སྤྱི་བོ་ལ་བཞག་སྟེ། དེ་དག་ལ་མཆོད་པ་དང་བཀུར་སྟི་བྱ་བའི་ཕྱིར་དེ་ཉིད་ནས་ལྷའི་འཇིག་རྟེན་དུ་སོང་ངོ ། །དེ་ཡང་འདུན་པས་མཐོང་བར་གྱུར་ནས་དེས་མཆོད་རྟེན་བརྩིགས་ཏེ། དེང་སང་དུ་ཡང་མཆོད་རྟེན་དེ་ངུར་སྨྲིག་བླངས་པ་ཞེས་མིང་དུ་ཆགས་སོ། །གང་གི་ཚེ 41.128a བྱང་ཆུབ་སེམས་དཔས་གཙུག་ཕུད་བཅད་ནས། གོས་ངུར་སྨྲིག་རྣམས་བགོས་པ་དེའི་ཚེ། ལྷའི་བུ་བརྒྱ་སྟོང་དགའ་ཞིང་མགུ་ལ་ཚིམ་ཞིང་ཡི་རངས་ཏེ། མཆོག་ཏུ་རབ་ཏུ་དགའ་ནས། དགའ་བ་དང་ཡིད་བདེ་བ་སྐྱེས་ཏེ། ཀྱེ་གྲོགས་པོ་དག་གཞོན་ནུ་དོན་གྲུབ་རབ་ཏུ་བྱུང་ངོ ། །དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་བར་འགྱུར་ཏེ། སེམས་ཅན་སྐྱེ་བའི་ཆོས་ཅན་གྲངས་མེད་པ་དག་སྐྱེ་བ་ལས་ཡོངས་སུ་འགྲོལ་བར་འགྱུར་བ་ནས། རྒ་བ་དང ། འཆི་བ་དང ། ན་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་དག་ལས་སེམས་ཅན་རྣམས་ཡོངས་སུ་བཀྲོལ་ཏེ། འཁོར་བའི་རྒྱ་མཚོའི་ཕ་རོལ་ཏུ་བསྒྲལ་ནས། བདེ་བ་འཇིགས་པ་མེད་པ། མྱ་ངན་མེད་པ། གནོད་པ་མེད་པ། ཞི་བ། རྡུལ་དང་བྲལ་བ། འཆི་བ་མེད་པའི་ཆོས་ཀྱི་དབྱིངས་ལ་འགོད་པར་འགྱུར་རོ་ཞེས་ནས། ཨ་ལ་ལ་ཞེས་བྱ་བ་དང ། ཅ་ཅོ་དང་ག་ཞའི་སྒྲ་སྐད་ཕྱུང་བར་གྱུར་ཏོ། །སྒྲ་དེ་ཡང་གཅིག་ནས་གཅིག་ཏུ་བརྒྱུད་ནས་འོག་མིན་གྱི་གནས་ཀྱི་བར་དུ་གྲག་པར་གྱུར་ཏོ། །དེ་ནས་བཙུན་མོའི་འཁོར་རྣམས་ཀྱིས་གཞོན་ནུ་མ་མཐོང་ནས། དཔྱིད་དང་དགུན་དང་དབྱར་གནས་པའི་ཁང་བཟང་རྣམས་དང ། ཁྲི་རྣམས་དང ། ཁྱིམ་རྣམས་སུ་ཚོལ་ཞིང་གང་གི་ཚེ་མ་རྙེད་པ་དེའི་ཚེ་གཅིག་ཏུ་འདུས་ནས། བྱ་ཀུ་ར་ར་མོ་བཞིན་དུ་ངུད་མོ་འཐོན་པར་གྱུར་ཏོ། །དེ་ན་བུད་མེད་ཁ་ཅིག་ནི་ཤིན་ཏུ་མྱ་ངན་གྱིས་ཉམ་ཐག་ནས། ཁ་ཅིག་ནི་ཀྱི་ཧུད་བུ་ཞེས་འཛེར་ཅིང་ངུའོ། །ཁ་ཅིག་ནི་ཀྱི་ཧུད་མིང་པོ་ཞེས་འཛེར་ཅིང་ངུའོ། །ཁ་ཅིག་ནི་ཀྱི་ཧུད་ཁྱིམ་ཐབ་ཅེས་འཛེར་ཏོ། །ཁ་ཅིག་ནི་རྗེ་བོ་ཞེས་འཛེར་ཏོ། །ཁ་ཅིག་ནི་སྡུག་པའི་ཚིག་སྣ་ཚོགས་སྨྲའོ། །ཁ་ཅིག་ནི་ལུས་རྡེབ་ཅིང་ངུའོ། །ཁ་ཅིག་ནི་མགོ་འབལ་ལོ། །ཁ་ཅིག་ནི་གཅིག་གི་གདོང་དུ་གཅིག 41.128b ལྟ་ཞིང་ངུའོ། །ཁ་ཅིག་ནི་མིག་བསྒྱུར་ཅིང་ངུའོ། །ཁ་ཅིག་ནི་ལག་པ་བརླ་ལ་རྡེབ་ཅིང་ངུའོ། །ཁ་ཅིག་ནི་བྲང་རྡུང་ཞིང་ངུའོ། །ཁ་ཅིག་ནི་ལག་པ་དཔུང་པར་རྡེབ་ཅིང་ངུའོ། །ཁ་ཅིག་ནི་མགོར་རྡུང་ཞིང་ངུའོ། །ཁ་ཅིག་ནི་མགོ་ལ་ས་འཐོར་ཞིང་ངུའོ། །ཁ་ཅིག་ནི་སྐྲ་འཇིག་ཅིང་ངུའོ། །ཁ་ཅིག་ནི་སྐྲ་འབལ་ཞིང་ངུའོ། །ཁ་ཅིག་ནི་ལག་པ་བསྟོད་དེ་བསྒྲེང་ནས་ཆོ་ངེ་འདོན་ཏོ། །ཁ་ཅིག་ནི་རི་དགས་མོ་དུག་མདས་ཕོག་པ་བཞིན་དུ་གློ་བུར་དུ་རྒྱུག་ཅིང་ངུའོ། །ཁ་ཅིག་ནི་གདོང་གོས་ཀྱིས་གཡོགས་ཤིང་ངུའོ། །ཁ་ཅིག་ནི་ཆུ་ཤིང་རླུང་མར་གྱིས་བསྐྱོད་པ་བཞིན་དུ་ལུས་འཁྱོར་ཞིང་ངུའོ། །ཁ་ཅིག་ནི་ས་ལ་སྒྱེལ་ཏེ་མ་ཤི་ཙམ་དུ་གྱུར་ཏོ། །ཁ་ཅིག་ནི་ཉ་ཆུ་ནས་བཏོན་པ་བཞིན་དུ་ས་ལ་འགྲེ་ལྡོག་ཅིང་ངུའོ། །ཁ་ཅིག་ནི་ཤིང་རྩ་ནས་ཕྱུང་བ་བཞིན་དུ་གློ་བུར་དུ་ས་ལ་སྒྱེལ་ནས་ངུའོ། །སྒྲ་དེ་ཡང་རྒྱལ་པོས་ཐོས་ནས་ཤཱཀྱ་རྣམས་ལ་སྨྲས་པ། ཅིའི་ཕྱིར་བཙུན་མོའི་འཁོར་ན་སྒྲ་ཆེན་པོ་འདི་གྲག་།ཤཱཀྱ་རྣམས་ཀྱིས་ཤེས་ནས་སྨྲས་པ། རྒྱལ་པོ་ཆེན་པོ་གཞོན་ནུ་བཙུན་མོའི་འཁོར་ན་མི་གདའ་ཞེས་གདའོ། །རྒྱལ་པོས་སྨྲས་པ། མྱུར་དུ་གྲོང་ཁྱེར་གྱི་སྒོ་རྣམས་ཆོད་ལ་ནང་དུ་གཞོན་ནུ་ཚོལ་ཅིག་།དེ་དག་གིས་ཕྱི་ནང་དུ་བཙལ་ཀྱང་མ་རྙེད་ནས་སྐྱེ་དགུའི་བདག་མོ་ཆེན་མོ་གཽ་ཏ་མའི་སྨྲེ་སྔགས་འདོན་ཏེ། ས་ལ་འགྲེ་ལྡོག་ཅིང་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བདག་བུ་དང་མྱུར་དུ་སྤྲད་དུ་གསོལ། དེ་ནས་རྒྱལ་པོས་ཕྱོགས་བཞིར་ཕོ་ཉ་རྟ་པ་བཀྱེ་སྟེ། ཁྱེད་དེང་ལ་གཞོན་ནུ་མ་རྙེད་ཀྱི་བར་དུ་སླར་མ་ལྡོག་ཤིག་།མཚན་མཁན་དང་ལྟས་མཁན་རྣམས་ཀྱིས་ཀྱང་བྱང་ཆུབ་སེམས་དཔའ་ནི་བཀྲ་ཤིས་ཀྱི་ཆབ་སྒོ་ནས་མངོན་པར་འབྱུང་ངོ་ཞེས་ལུང་བསྟན་ནས་དེ་དག་བཀྲ་ཤིས་ཀྱི་སྒོར་དོང་བ་དང ། ལམ་གྱི་བར་ཞིག་ན་མེ་ཏོག་གི་ཆར་འབབ་པར་མཐོང་ངོ ། །དེ་ནས་དེ་དག་འདི་སྙམ་དུ་སེམས་ཏེ། གཞོན་ནུ་ནི 41.129a ལམ་འདི་ནས་བྱུང་ངོ་སྙམ་ནས་དེ་དག་ཅུང་ཟད་ཅིག་ཕ་ཟད་དུ་སོང་བ་དང ། ལྷའི་བུ་བྱང་ཆུབ་སེམས་དཔའི་གོས་ཀ་ཤི་པ་རྣམས་མགོ་ལ་ཐོགས་ཏེ་འགྲོ་བ་དེ་མཐོང་ནས་དེ་དག་འདི་སྙམ་དུ་སེམས་ཏེ། འདི་དག་ནི་གཞོན་ནུའི་གོས་ཀ་ཤི་པ་རྣམས་ཡིན་ན། གོས་འདི་དག་གི་ཕྱིར་འདིས་གཞོན་ནུ་བསད་དེ་འདི་དག་ཁྱེར་བར་མ་གྱུར་ཏམ་སྙམ་མོ། །དེ་ནས་ཡང་དེ་དག་གིས་དེའི་ཕྱི་བཞིན་དུ་འདུན་པ་རྟ་བསྔགས་ལྡན་དང་རྒྱན་རྣམས་ཐོགས་ཏེ་འོང་བ་མཐོང་ངོ ། །དེ་ནས་དེ་དག་ཕན་ཚུན་དུ་སྨྲས་པ། ཀྱེ་འདུན་པ་རྟ་བསྔགས་ལྡན་ཁྲིད་དེ་འོང་གིས་དེ་ལ་མ་དྲིས་ཀྱི་བར་དུ་ཧུར་འདུམས་མ་བྱེད་ཅིག་ཅེས་སྨྲས་ནས། དེ་དག་གིས་འདུན་པ་ལ་དྲིས་པ། ཀྱེ་འདུན་པ་གོས་ཀ་ཤི་པ་འདི་དག་གི་ཕྱིར་མི་འདིས་གཞོན་ནུ་བཀྲོངས་པར་མ་གྱུར་གྲང ། འདུན་པས་སྨྲས་པ། དེ་ལྟ་ནི་མ་ཡིན་ཏེ་འདིས་ཀྱང་གཞོན་ནུ་ལ་གོས་ངུར་སྨྲིག་རྣམས་ཕུལ་ལོ། །གཞོན་ནུས་ཀྱང་ན་བཟའ་ཀ་ཤི་པ་འདི་རྣམས་འདི་ལ་བྱིན་ནོ། །དེ་ནས་ལྷའི་བུ་དེས་དེ་དག་མཆོད་པའི་ཕྱིར་གོས་དེ་རྣམས་ལག་པ་གཉི་གས་སྤྱི་བོ་ལ་ཐོགས་ཏེ། དེ་ཉིད་ནས་ལྷའི་འཇིག་རྟེན་དུ་སོང་ངོ ། །དེ་དག་གིས་ཡང་འདུན་པ་ལ་དྲིས་པ། འདི་ལ་ཇི་སྙམ་དུ་སེམས། ཁོ་བོ་ཅག་ཤཱཀྱ་གཞོན་ནུ་ཟློག་ཏུ་དོང་ན་ནུས་སམ། དེས་སྨྲས་པ་མི་ནུས་སོ། །གཞོན་ནུ་ནི་བརྩོན་འགྲུས་དང་བརྟུལ་བ་བརྟན་པ་ཡིན་ཏེ། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་ང་སེར་སྐྱའི་གནས་ཀྱི་གྲོང་ཁྱེར་ཆེན་པོར་མི་འཇུག་གོ་ཞེས་དེ་སྐད་གསུང་བས་ཕྱིར་མི་ལྡོག་སྟེ། གཞོན་ནུས་ཇི་སྐད་གསུངས་པ་དེ་དེ་བཞིན་དུ་འགྱུར་རོ། །དེ་ཅིའི་ཕྱིར་ཞེ་ན། གཞོན་ནུ་ནི་བརྩོན་འགྲུས་དང་བརྟུལ་བ་བརྟན་པས་སླར་མི་ལྡོག་གོ། །དེ་ནས་འདུན་པ་རྟ་བསྔགས་ལྡན་དང་རྒྱན་རྣམས་ཁྱེར་ཏེ་བཙུན་མོའི་འཁོར་གྱི་ནང་དུ་ཕྱིན་ཏོ། །དེ་ནས་རིང་བ་ཞིག་ལོན 41.129b པ་དང ། རྒྱན་དེ་དག་ཤཱཀྱ་གཞོན་ནུ་བཟང་པོ་དང ། མིང་ཆེན་དང ། མ་འགགས་པས་བཏེག་པ་དང ། སྲེད་མེད་ཀྱི་བུ་ཆེན་པོ་ལྟར་མཁྲེགས་པ་དང ། སྲེད་མེད་ཀྱི་བུ་ཕྱེད་ལྟར་མཁྲེགས་པའི་རྒྱན་དེ་རྣམས་དེ་དག་གིས་མ་ཐེག་གོ། །གང་གི་ཚེ་དེ་དག་གང་གིས་ཀྱང་ཐེག་པར་མ་ནུས་པ་དེའི་ཚེ། སྐྱེ་དགུའི་བདག་མོ་ཆེན་མོ་གཽ་ཏ་མི་འདི་སྙམ་དུ་སེམས་ཏེ། བདག་གིས་ཇི་སྲིད་དུ་རྒྱན་འདི་དག་མཐོང་བ་དེ་སྲིད་དུ་བདག་གི་སྙིང་ལ་མྱ་ངན་དུ་འགྱུར་གྱིས། བདག་གིས་རྒྱན་འདི་དག་རྫིང་དུ་དོར་རོ་སྙམ་མོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མིས་རྒྱན་དེ་དག་རྫིང་དུ་བོར་ཏེ། དེང་སང་དུ་ཡང་རྒྱན་གྱི་རྫིང་ཞེས་མིང་དུ་ཆགས་སོ། །དེ་ལ་འདི་སྐད་ཅེས་བྱ་སྟེ། གང་ཚེ་བྱང་ཆུབ་སེམས་དཔའ་མཁས་པ་དཔའ་བོ་བྱུང ། །དེ་ཚེ་སེར་སྐྱའི་གྲོང་ཁྱེར་པ་དག་མཐའ་དག་སད། །ཀུན་གྱི་སྙིང་ལ་གཞོན་ནུ་མལ་ན་ཉལ་སྙམ་སེམས། །མགུ་ཞིང་རབ་ཏུ་དགའ་ནས་ཕན་ཚུན་ཚིག་ཀྱང་སྨྲ། །ས་འཚོ་མ་དང་དེ་བཞིན་བཙུན་མོའི་འཁོར་རྣམས་སད། །མལ་དུ་ལྟས་ན་བྱང་ཆུབ་སེམས་དཔའ་མ་མཐོང་ནས། །ཀྱི་ཧུད་བདག་བསླུས་བྱང་ཆུབ་སེམས་དཔའ་གར་བཞུད་ཅེས། །རྒྱལ་པོའི་ཁྱིམ་དུ་ངུད་མོའི་སྒྲ་ཡང་བྱུང་བར་གྱུར། །རྒྱལ་པོས་སྒྲ་དེ་ཐོས་ནས་ས་ལ་སྒྱེལ་གྱུར་ཏེ། །ེ་མ་ང་ཡི་བུ་གཅིག་པ་ཞེས་ངུད་མོ་ཕྱུང ། །དེ་ནས་དེ་ལ་བུམ་པའི་ཆུ་བླུགས་ཁྲུས་བྱས་ནས། །ཤཱཀྱ་མང་པོ་དག་གིས་དེ་ནི་དབུགས་ཀྱང་ཕྱུང ། །ས་འཚོ་མ་ཡང་མལ་ནས་ས་ལ་ལྷུང་བར་གྱུར། །སྐྲ་རྣམས་འབལ་ཞིང་རྒྱན་རྣམས་དག་ཀྱང་བཀྲོལ་བར་གྱུར། །སྡུག་པ་ཀུན་དང་བྲལ་བ་རིང་པོར་མི་ཐོགས་ཤེས། །འདྲེན་པས་བདག་ལ་སྔོན་གསུངས་ཀྱེ་མ་ལེགས་པར་གསུངས། །གཟུགས་ནི་གཟུགས་བཟང་ཤིན་ཏུ་དྲི་མེད་ཡན་ལག་སྤྲས། །གསལ་ཞིང་རྣམ་དག་འགྲོ་བ་རྣམས་ཀྱི་ཡིད་འོང་སྡུག་།དཔལ་ཡོན་ལྡན་པ 41.130a བསྔགས་པ་ལྷ་མིས་མཆོད་པའི་འོས། །བདག་ནི་མལ་དུ་བོར་ཏེ་ཁྱོད་ནི་གང་དུ་བཞུད། །ཡོན་ཏན་མངའ་བའི་བྱང་ཆུབ་སེམས་དཔའ་མ་མཐོང་བར། །སྐོམ་ཡང་མི་འཚལ་རྒྱགས་པ་རྣམས་ཀྱིས་རྒྱགས་མི་བགྱི། །ས་ལ་ཉལ་ཞིང་རལ་པ་རྣམས་ཀྱང་ཐོགས་པར་བགྱི། །ཁྲུས་བགྱི་སྤངས་ཏེ་བརྟུལ་ཞུགས་དཀའ་ཐུབ་སྤྱད་པར་བགྱི། །སྐྱེད་མོས་ཚལ་ཀུན་ལོ་མ་མེ་ཏོག་འབྲས་མ་མཆིས། །རྣམ་དག་སེ་མོ་དོ་ཡང་མུན་རྡུལ་ཕྱག་དར་འདྲ། །མི་མཆོག་དམ་པ་ཁྱོད་ཀྱིས་སྤངས་པར་གང་གྱུར་པའི། །གྲོང་ཁྱེར་ཁྱིམ་རྣམས་མཛེས་པ་མ་ལགས་འབྲོག་དང་མཚུངས། །ཀྱི་ཧུད་གླུ་དབྱངས་རབ་ཏུ་སྙན་པའི་སྒྲ་སྐད་ཅན། །ཀྱི་ཧུད་ལྷུག་ལྷུག་པ་ཡི་རྒྱན་ཐོགས་བཙུན་མོའི་འཁོར། །ཀྱི་ཧུད་གསེར་གྱི་དྲ་བས་ཁྱབ་པའི་བར་སྣང་ཡང ། །ཡོན་ཏན་ལྡན་དང་བྲལ་བས་ཕྱིན་ཆད་མི་བལྟའོ། །སྲུ་མོ་དེ་ཡང་ཤིན་ཏུ་སྡུག་བསྔལ་ཐོབ་གྱུར་ཅིང ། །ཤཱཀྱའི་བུ་མོ་མ་ངུ་ཤིག་ཅེས་དབུགས་ཀྱང་འབྱིན། །ང་ནི་འཇིག་རྟེན་དག་ན་རྒ་ཤི་མཐར་བྱེད་ཅེས། །མི་མཆོག་དམ་པ་དེས་ནི་སྔོན་ཡང་སྨྲས་པ་ཡིན། །དྲང་སྲོང་ཆེན་པོ་དགེ་བ་སྟོང་དག་སྤྱད་པ་དེ། །ནམ་ཕྱེད་ནས་ནི་དཔག་ཚད་དྲུག་ཏུ་སོང་གྱུར་ནས། །འདུན་པ་དེ་ལ་རྟ་མཆོག་དང་ནི་རྒྱན་རྣམས་གཏད། །འདུན་པ་འདི་དག་ཁྱེར་ལ་སེར་སྐྱའི་གྲོང་སོང་ཤིག་།ཡབ་དང་ཡུམ་དག་ལ་ཡང་ང་ཡི་ཚིག་གིས་ནི། །གཞོན་ནུ་སོང་གིས་སླར་ཞིང་ཐུགས་ངན་མ་མཛད་ཅིག་།བྱང་ཆུབ་སངས་རྒྱས་ནས་ནི་སླར་འདིར་མཆི་བར་བགྱི། །ཆོས་རྣམས་གསན་ནས་ཐུགས་ཀྱང་ཞི་བར་འགྱུར་ཞེས་སྨྲོས། །འདུན་པ་དེ་བཞིན་འདྲེན་པ་ལ་ནི་སླར་སྨྲས་པ། །འདུན་པ་ལེགས་ལྡན་བྱང་ཆུབ་སེམས་དཔའ་གར་ཁྲིད་ཅེས། །མི་མཆོག་གཉེན་གྱི་ཚོགས་རྣམས་བདག་ལ་རྡེག་འགྱུར་གྱིས། །བདག་ལ་ནུས་པ་མ་མཆིས་སྟོབས་དང་མཐུ་མ་མཆིས། །བྱང་ཆུབ་སེམས་དཔས་སླར 41.130b སྨྲས་འདུན་པ་མ་འཇིགས་ཤིག་།ང་ཡི་གཉེན་གྱི་ཚོགས་རྣམས་དགའ་བར་གྱུར་ནས་ནི། །ཁྱོད་ལ་སྟོན་པའི་འདུ་ཤེས་རྟག་ཏུ་བསྒོམ་གྱུར་ཏེ། །ང་ལ་བྱམས་པ་བཞིན་དུ་ཁྱོད་ལའང་བྱམས་པར་འགྱུར། །འདུན་པ་རྟ་མཆོག་དང་ནི་རྒྱན་རྣམས་ཁྱེར་ནས་སུ། །མི་མཆོག་དམ་པ་དེ་ཡི་བསྐྱེད་མོས་ཚལ་དུ་ཕྱིན། །སྐྱེད་མོས་ཚལ་གྱི་སྲུངས་མ་དགའ་བའི་ཤུགས་སྐྱེས་ནས། །ཀུན་ཏུ་དགའ་བའི་སྒྲ་ནི་ཤཱཀྱ་རྣམས་ལ་སྨྲས། །གཞོན་ནུ་འདི་ཡི་རྟ་མཆོག་དང་ནི་འདུན་པ་ཡང ། །སྐྱེད་མོས་ཚལ་དུ་ཕྱིན་གྱིས་ཐུགས་ངན་མ་མཛད་ཅིག་།རྒྱལ་པོས་དེ་སྐད་ཐོས་ནས་ཤཱཀྱས་བསྐོར་ནས་ནི། །རབ་ཏུ་དགའ་བའི་ཤུགས་སྐྱེས་བསྐྱེད་མོས་ཚལ་དུ་ཕྱིན། །ས་འཚོས་བྱང་ཆུབ་སེམས་དཔའ་བློ་གྲོས་བརྟན་རིག་ནས། །ཚིག་དེ་ལ་ནི་ཡིད་མ་ཆེས་ཏེ་དགར་མ་གྱུར། །གཞོན་ནུ་བྱང་ཆུབ་མ་ཐོབ་བར་དུ་ཕྱིར་འདིར་ཡང ། །བྱོན་ཅིང་ལྡོག་པར་འགྱུར་བ་དེ་ནི་གནས་མ་ཡིན། །རྒྱལ་པོས་རྟ་མཆོག་དང་ནི་འདུན་པ་དེ་མཐོང་ནས། །ངུད་མོ་བཏབ་སྟེ་ས་ཡི་སྟེང་དུ་སྒྱེལ་བར་གྱུར། །ཀྱི་ཧུད་ངའི་བུ་གླིང་བུ་རོལ་མོ་སྒྲ་དབྱངས་མཁས། །རྒྱལ་སྲིད་ཐམས་ཅད་བོར་ཏེ་ཁྱོད་ནི་གང་དུ་སོང ། །འདུན་པ་ཁྱོད་ཀྱིས་ང་ལ་འདིར་ནི་ལེགས་པར་སྨྲོས། །བྱང་ཆུབ་སེམས་དཔའ་གར་སོང་སྦྱོར་བ་ཅི་འདྲ་ཞིག་།སྒོ་ནི་སུ་ཡིས་ཕྱེ་ཞིང་གང་གིས་ཁྲིད་པར་གྱུར། །ལྷ་ཚོགས་རྣམས་ཀྱིས་དེ་ལ་མཆོད་པ་ཇི་ལྟར་བྱས། །འདུན་པས་སྨྲས་པ་རྒྱལ་པོའི་དབང་པོ་བདག་ལ་གསོན། །དགུང་ཕྱེད་གྲོང་ཁྱེར་བྱིས་པ་རྒན་པོ་གཉིད་ལོག་ནས། །བྱང་ཆུབ་སེམས་དཔའ་འཇམ་དབྱངས་བདག་ལ་འདི་སྐད་དུ། །འདུན་པ་རྟ་རྒྱལ་ང་ལ་མྱུར་དུ་བྱིན་ཞེས་གསུང ། །བདག་གིས་སྐྱེས་པའི་ཚོགས་དང་བུད་མེད་ཚོགས་ཀྱང་བསླང ། །དེ་དག་ལོག་ཅིང་རབ་ཏུ་ལོག་པས་ཚིག་མ་ཐོས། །བདག་ནི་ངུ་ཞིང་བདག་གིས་ཆིབས་ཀྱི་རྒྱལ་པོ་ཕུལ། །ཕན་པ་མཛད་པ་གང་དུ་དགྱེས་པར་གཤེགས 41.131a ཤེས་བགྱིས། །བརྒྱ་བྱིན་གྱིས་ནི་འཁྲུལ་འཁོར་ལྡན་པའི་ཆབ་སྒོ་ཕྱེ། །འཇིག་རྟེན་སྐྱོང་བ་བཞིས་ནི་ཆིབས་ཀྱི་རྐང་ལག་བཏེག་།དཔའ་བོ་བཅིབས་ནས་སྟོང་གསུམ་ལམ་རྣམས་རབ་ཏུ་གཡོས། །ནམ་མཁའ་ཤིན་ཏུ་ཡངས་པ་འདི་ལས་གཤེགས་གྱུར་ཏེ། །འོད་ནི་རབ་ཏུ་བཏང་བས་མུན་པ་མུན་ནག་བསལ། །མེ་ཏོག་བབ་ཅིང་སིལ་སྙན་བརྒྱ་དག་སྒྲ་ཡང་བྱུང ། །ལྷ་དང་དེ་བཞིན་ལྷ་ཡི་བུ་མོ་རྣམས་ཀྱིས་བསྟོད། །ནམ་མཁའ་ལས་ནི་ལྷ་ཚོགས་རྣམས་ཀྱིས་བསྐོར་ཏེ་གཤེགས། །འདུན་པ་རྟ་མཆོག་དང་ནི་རྒྱན་རྣམས་ཁྱེར་ནས་སུ། །དེ་ནི་ངུ་ཞིང་བཙུན་མོའི་འཁོར་དུ་ཕྱིན་པ་དང ། །ས་འཚོས་འདུན་པ་དེ་དང་རྟ་མཆོག་མཐོང་གྱུར་ནས། །རབ་ཏུ་བརྒྱལ་བར་གྱུར་ཏེ་ས་ཡི་སྟེང་དུ་སྒྱེལ། །བུད་མེད་ཚོགས་མང་ཐམས་ཅད་རབ་ཏུ་བརྩོན་པར་ནི། །ཆུ་དག་བླངས་ཤིང་ཤཱཀྱའི་བུ་མོ་འཁྲུ་བར་བྱེད། །མྱ་ངན་རྙེད་པས་འཆི་བའི་དུས་བྱེད་གྱུར་དུ་འོང ། །ཕངས་པ་གཉིས་དང་བྲལ་བར་འགྱུར་དུ་འོང་སྙམ་བྱེད། །ཤཱཀྱའི་བུ་མོ་སྡུག་བསྔལ་གྱུར་པ་མཐུ་བསྐྱེད་ནས། །རྟ་ཡི་རྒྱལ་པོ་རྟ་མཆོག་དེ་ཡི་མགུལ་ནས་འཇུས། །སྔོན་ཆད་དགའ་བས་རྩེ་བ་དག་ཀྱང་དྲན་བྱས་ནས། །མྱ་ངན་གྱུར་ཅིང་སྣ་ཚོགས་ཚིག་ཀྱང་རབ་ཏུ་སྨྲ། །ཀྱི་ཧུད་བདག་གི་དགའ་སྐྱེད་ཀྱི་ཧུད་བདག་གི་མི་མཆོག་དྲི་མེད་ཟླ་བའི་ཞལ་མངའ་བ། །ཀྱི་ཧུད་བདག་གི་གཟུགས་མཆོག་གཟུགས་ཅན་ཀྱི་ཧུད་བདག་གི་མཚན་མཆོག་དྲི་མེད་གཟི་བརྗིད་ལྡན། །ཀྱི་ཧུད་བདག་གི་ཡན་ལག་མ་སྨད་ལེགས་པར་འཁྲུངས་པ་རིམ་གྱིས་འཕགས་པ་མཉམ་མེད་པ། །ཀྱི་ཧུད་བདག་གི་ཡོན་ཏན་མཆོག་ལྡན་ལྷ་མིས་མཆོད་པ་ཐུགས་རྗེ་ཆེན་པོ་མཆོག་ལྡན་པ། །ཀྱི་ཧུད་བདག་གི་སྟོབས་ལྡན་སྲེད་མེད་བུ་ཡི་མཐུ་དང་ལྡན་པ་དགྲ་ཡི་ཚོགས་བཅོམ་པ། །ཀྱི་ཧུད་བདག་གི་ཤིན་ཏུ་འཇམ་དབྱངས་ཀ་ལ་པིང་ཀའི་སྒྲ་སྐད 41.131b ཚངས་དབྱངས་སྙན་ལྡན་པ། །ཀྱི་ཧུད་བདག་གི་གྲགས་པ་མཐའ་ཡས་བསོད་ནམས་བརྒྱས་འཕགས་བསོད་ནམས་རྒྱ་ཆེན་མངའ་བ་པོ། །ཀྱི་ཧུད་བདག་གི་བསྔགས་པ་མཐའ་ཡས་ཡོན་ཏན་ཚོགས་བརྒྱན་དྲང་སྲོང་ཚོགས་རྣམས་དགའ་མཛད་པ། །ཀྱི་ཧུད་བདག་གི་ནགས་མཆོག་བུང་བ་སྒྲ་འབྱིན་ལུམ་བི་ནི་དེར་བལྟམ་པ་ལེགས་བལྟམ་པ། །ཀྱི་ཧུད་བདག་གི་སྒྲ་གྲགས་ལྷ་མི་རྣམས་ཀྱིས་མངོན་པར་མཆོད་པའི་ཡེ་ཤེས་སྡོང་པོ་ཆེ། །ཀྱི་ཧུད་བདག་གི་རོ་བྲོ་དམ་པ་བིམ་པའི་སྒྲོས་ཅན་པད་མའི་སྤྱན་མངའ་གསེར་མདོག་འདྲ། །ཀྱི་ཧུད་བདག་གི་ཤིན་ཏུ་རྣམ་དག་ཚེམས་ལྡན་པ་ཞོ་བ་མོ་ལྟ་བུའི་ཚེམས་ལྡན་པ། །ཀྱི་ཧུད་བདག་གི་ཤངས་ལེགས་སྨིན་ལེགས་སྨིན་མཚམས་བར་ན་དྲི་མེད་མཛོད་སྤུ་གནས་པ་པོ། །ཀྱི་ཧུད་བདག་གི་དཔུང་མགོ་རབ་ཟླུམ་གཞུ་འདྲའི་རྐེད་པ་ཨེ་ནེའི་བྱིན་པ་རྐེད་པ་ཟླུམ། །ཀྱི་ཧུད་བདག་གི་གླང་པོའི་སྣ་འདྲ་བརླ་ལྡན་ཕྱག་ཞབས་རྣམ་དག་མཛེས་པའི་སེན་མོ་ཅན། །དེ་ཡི་རྒྱན་རྣམས་འདི་དག་བསོད་ནམས་དག་གིས་བྱས་པ་རྒྱལ་པོ་རབ་ཏུ་དགའ་བྱེད་པ། །ཀྱི་ཧུད་བདག་གི་གླུ་དང་དབྱངས་སྒྲ་དམ་པ་མེ་ཏོག་བྱུག་པ་བཟང་པོའི་དུས་བཟང་བ། །ཀྱི་ཧུད་བདག་གི་མེ་ཏོག་སྤོས་རྣམས་གླུ་ལེན་དག་དང་བཙུན་མོའི་འཁོར་ནི་དགའ་བྱེད་པ། །ཀྱི་ཧུད་བསྔགས་ལྡན་ལེགས་སྐྱེས་ང་ཡི་ཁྱིམ་ཐབ་གྲོགས་པོ་ཡིན་ན་ཁྱོད་ཀྱིས་གང་དུ་ཁྲིད། །ཀྱི་ཧུད་འདུན་པ་སྙིང་རྗེ་མེད་པ་མི་ཡི་དམ་པ་བཞུད་ཚེ་སྒྲོན་ཅིང་སློང་མ་ཕོད། །དོ་མོད་གྲོང་ཁྱེར་དམ་པ་འདི་ནས་མི་ཡི་ཁ་ལོ་བསྒྱུར་བ་ཐུགས་རྗེ་ལྡན་གཤེགས་ཏེ། །ཕན་པ་མཛད་པ་འདི་ནི་གཤེགས་ཤེས་སྐབས་དེར་ཚིག་གཅིག་ཙམ་ཞིག་ཅི་ཡི་ཕྱིར་མ་སྨྲས། །ཕན་པ་མཛད་པ་ཇི་ལྟར་གཤེགས་ཤིང་རྒྱལ་པོའི་ཕོ་བྲང་འདི་ནས་སུ་ཡི་ཕྱུང་བ་བྱས། །གང་གི་ཕྱོགས་གཤེགས་ནགས་ཚལ་གེལ་བའི་ལྷ་མོ་དེ་ཡི་གྲོགས་སུ་གྱུར་པ་དཔལ་ཡོན་ལྡན། །འདུན་པ་ཁོ་མོ 41.132a ཤིན་ཏུ་སྡུག་བསྔལ་གཏེར་བསྟན་ནས་ནི་མིག་ཕྱུང་འདྲ་བས་མིག་བྱིན་ཅིག་།འདུན་པ་རྒྱལ་བ་ཀུན་གྱིས་ཕ་དང་མ་དག་མཆོད་པའི་འོས་ཤེས་རྟག་ཏུ་བསྔགས་མཛད་ན། །དེ་དག་རྣམས་ཀྱང་སྤངས་ཏེ་བྱུང་ན་བུད་མེད་འདོད་པའི་དགའ་བ་འདི་ལྟ་སྨོས་ཅི་དགོས། །ཀྱི་ཧུད་སྡུག་པ་རྣམས་དང་བྲལ་བ་གར་ལ་ལྟ་བའི་རང་བཞིན་འདྲ་སྟེ་རྟག་མ་ཡིན། །བྱིས་པ་འདུ་ཤེས་ཀྱིས་བཟུང་ལྟ་བ་ཕྱིན་ཅི་ལོག་པས་སྐྱེ་དང་འཆི་འཕོ་གནས་པར་གྱུར། །དེ་ཡིས་སྔོན་ཡང་རྒ་ཤི་ལྡན་པའི་འདུས་བྱས་དག་ལ་གྲོགས་པོ་འགའ་ཡང་མེད་ཅེས་བསྟན། །ཁྱོད་ཀྱི་དགོངས་པ་ཡོངས་སུ་རྫོགས་ནས་ཤིང་མཆོག་དྲུང་དུ་བྱང་ཆུབ་དམ་པ་མཆོག་ཐོབ་གྱུར། །རྡུལ་མེད་བྱང་ཆུབ་སངས་རྒྱས་ནས་ནི་གྲོང་ཁྱེར་དམ་པ་འདིར་ནི་སླར་ཡང་གཤེགས་སུ་གསོལ། །འདུན་པ་དེ་ཡང་མཆོག་ཏུ་ཡིད་མི་དགའ་ཞིང་ས་འཚོ་མ་ཡི་ཚིག་ནི་ཐོས་གྱུར་ནས། །དེ་ནི་ང་རོ་འཐོན་ཅིང་ཚིག་ཏུ་སྨྲས་པ་ས་འཚོ་མ་ཁྱོད་བདག་ཚིག་ལེགས་པར་གསོན། །ནམ་གྱི་གུང་ཐུན་བུད་མེད་ཚོགས་རྣམས་ཐམས་ཅད་རབ་ཏུ་གཉིད་ཀྱིས་ལོག་སྟེ་དབེན་གྱུར་པ། །དེ་ཡི་ཚེ་ན་བསོད་ནམས་བརྒྱས་འཕགས་དེ་ཡིས་བདག་ལ་བསྔགས་ལྡན་ང་ལ་བྱིན་ཞེས་གསུང ། །དེ་སྐད་ཚིག་ཐོས་ནས་ནི་དེ་མ་ཐག་ཏུ་བདག་གིས་ཁྱོད་ནི་གཟིམས་མལ་གཟིམས་ལ་བལྟས། །དེ་ཚེ་ཁྱོད་ཀྱི་སྡུག་པ་འདི་ནི་གཤེགས་ཀྱིས་ས་འཚོ་བཞེངས་ཤེས་སྒྲ་སྐད་ཆེན་པོ་ཕྱུང ། །ལྷ་ཡིས་ཚིག་དེ་བཀག་པར་གྱུར་པས་བུད་མེད་རྣམས་ལས་འགའ་ཙམ་ཞིག་ཀྱང་སད་མ་གྱུར། །བདག་ནི་རབ་ཏུ་ངུ་ཞིང་རྟ་ཡི་རྒྱལ་པོ་བརྒྱན་པ་བགྱིས་ནས་མི་མཆོག་དེ་ལ་ཕུལ། །བསྔགས་ལྡན་དྲག་ཤུལ་ཅན་གྱི་གཟི་ལྡན་སྒྲ་ཕྱུང་དེ་ཡི་སྒྲ་ནི་རྒྱང་གྲགས་ཙམ་ཏུ་གྲགས། །འོན་ཀྱང་ལྷ་ཡིས་གཉིད་ཀྱིས་ལོག་པར་བགྱིས་པས་གྲོང་ཁྱེར་པ་ལས་འགའ་ཡང་སད་མ་གྱུར། །གསེར་དང་དངུལ་དང་ནོར་བུ་རྣམས་ཀྱིས་གཡོགས་པའི 41.132b ས་ལ་བསྔགས་ལྡན་རྐང་ལག་རབ་ཏུ་བརྡབས། །དེ་ལས་སྙན་དང་འཇིགས་དང་མཛེས་པའི་སྒྲ་བྱུང་འོན་ཀྱང་མི་ལས་འགའ་ཙམ་སད་མ་གྱུར། །དེ་ཡི་བར་སྐབས་སྐར་མ་རྒྱལ་དང་ལྡན་གྱུར་ཟླ་བ་སྐར་མ་དག་ཀྱང་མཁའ་ལ་གནས། །མཁའ་ལས་ལྷ་རྣམས་བྱེ་བ་ཐལ་མོ་སྦྱར་ཏེ་བཏུད་ནས་ཕྱག་ཀྱང་རབ་ཏུ་འཚལ། །གནོད་སྦྱིན་སྲིན་པོ་ཚོགས་རྣམས་ཉེ་བར་གནས་ཤིང་འཇིག་རྟེན་སྐྱོང་བ་རྫུ་འཕྲུལ་ཆེ་ལྡན་བཞིས། །པད་མའི་ཟེ་བ་ལྟ་བུར་རྣམ་དག་དྲི་མེད་ལག་པས་བསྔགས་ལྡན་གྱི་ནི་རྐང་ལག་བཏེག་།བསོད་ནམས་གཟི་བརྗིད་བརྒྱས་འཕགས་དེ་ཡང་ཀུ་མུ་ད་དང་བར་ཤ་ལྟ་བུ་དེ་ལ་བཅིབས། །ས་ནི་རྣམ་པ་དྲུག་ཏུ་རབ་ཏུ་གཡོས་ཤིང་སངས་རྒྱས་ཞིང་རྣམས་དྲི་མེད་འོད་ཀྱིས་ཁྱབ། །བདེ་སོགས་ཁྱིམ་ཐབ་བརྒྱ་བྱིན་ལྷ་ཡི་གཙོ་བོ་ཉིད་ཀྱིས་དེ་ཚེ་ཆབ་སྒོ་དབྱེ་བ་བགྱིས། །དེ་ནི་བྱེ་བ་ཁྲག་ཁྲིག་ལྷ་ཡིས་མདུན་དུ་བདར་ཏེ་ལྷ་དང་ཀླུ་ཡིས་མཆོད་ནས་གཤེགས། །བསྔགས་ལྡན་གྱིས་ནི་འདུ་ཤེས་ཙམ་གྱིས་དེ་ན་འཇིག་རྟེན་མགོན་པོ་མཁའ་ལས་བཀུར་བར་ཤེས། །ལྷ་དང་ལྷ་མ་ཡིན་ཚོགས་དབང་པོར་བཅས་པ་དེ་དག་བཅིབས་ཏེ་བདེ་བར་གཤེགས་པ་གཤེགས། །ལྷ་ཡི་བུ་མོ་གླུ་དབྱངས་མཁས་པ་རྣམས་ཀྱང་བྱང་ཆུབ་སེམས་དཔའི་ཡོན་ཏན་རབ་བརྗོད་ཅིང ། །དེ་དག་བསྔགས་ལྡན་ལ་ཡང་སྟོབས་འཐུད་བྱེད་ཅིང་སྙན་ལ་ཡིད་དུ་འོང་བའི་སྒྲ་ཡང་འབྱིན། །བསྔགས་ལྡན་འཇིག་རྟེན་འདྲེན་པ་མྱུར་བ་མྱུར་བར་ཁྱེར་ལ་སྐྱོ་བ་མི་དགའ་མ་སྐྱེད་ཅིག་།འཇིག་རྟེན་མགོན་པོ་མཉེས་པར་བྱས་ན་ཁྱོད་ལ་འཇིགས་དང་ངན་སོང་ངན་འགྲོ་མེད་པར་འགྱུར། །ལྷ་རྣམས་རེ་རེ་ཞིང་ཡང་བདག་ལ་འཇིག་རྟེན་མགོན་པོ་བཅིབས་པར་མངོན་དུ་དགའ་བར་གྱུར། །ཡུལ་ས་འདི་ན་བྱེ་བ་ལྷ་ཡི་རྐང་པ་དག་གིས་ནོན་པར་མ་གྱུར་ཅུང་ཟད་མེད། །བསྔགས་ལྡན་ནམ་མཁའི་སྐབས 41.133a ན་སྣ་ཚོགས་སྤྲས་ཤིང་མཛེས་པའི་ལམ་གནས་རིན་ཆེན་སྟེགས་བུ་ནི། །རྣམ་པ་སྣ་ཚོགས་དག་གིས་བརྒྱན་ཅིང་ལྷ་ཡི་བདུག་པ་སྙིང་པོ་མཆོག་བདུགས་འདི་ལ་ལྟོས། །བསྔགས་ལྡན་དགེ་བའི་ལས་འདིས་སུམ་བཅུ་རྩ་གསུམ་ལྷ་གནས་ཤིན་ཏུ་ལེགས་པར་སྤྲུལ་པ་དེར། །ལྷ་ཡི་བུ་མོས་བསྐོར་ཅིང་མདུན་གྱིས་བལྟས་ལ་ལྷ་ཡི་འདོད་པའི་དགའ་བས་དགའ་བར་གྱིས། །ལེགས་པ་ས་འཚོ་མ་ཁྱོད་ཕྱིར་ཞིང་མ་བཤུམས་དགྱེས་པར་མཛོད་ཅིང་མཆོག་ཏུ་དགྱེས་པར་མཛོད། །མི་མཆོག་བྱང་ཆུབ་བརྙེས་ནས་ལྷ་ཡིས་མདུན་དུ་བདར་བ་རིང་པོར་མི་ཐོགས་གཟིགས་པར་འགྱུར། །ས་འཚོ་མི་རྣམས་གང་དག་ལེགས་པའི་ལས་བགྱིས་དེ་དག་རྟག་ཏུ་བཤུམས་པར་བགྱི་མ་ལགས། །དེ་ནི་བསོད་ནམས་གཟི་བརྗིད་བརྒྱས་འཕགས་ལགས་ཀྱིས་དགྱེས་པར་མཛོད་ལ་བཤུམ་མོ་མ་མཛད་ཅིག་།རྒྱལ་པོ་མངོན་པར་བྱུང་བ་དེ་ན་ལྷ་དང་མིས་མཆོད་པ་ཡི་བཀོད་པ་གང་ལགས་པ། །བཀོད་པ་དེ་ནི་ས་འཚོ་བདག་གིས་དགུང་བདུན་བར་དུ་བརྗོད་ཀྱང་རྫོགས་པར་བརྗོད་མི་ནུས། །ཁྱོད་ཀྱིས་འགྲོ་ལ་ཕན་མཛད་པ་ལ་བསྙེན་བཀུར་མཛད་པས་བརྙེས་མཆོག་བསམ་གྱིས་མི་ཁྱབ་བརྙེས། །བདག་གིས་བསམས་ན་ཁྱོད་ཀྱང་མི་ཡི་དམ་པ་དེ་ནི་ཅི་འདྲ་དེ་འདྲར་འགྱུར་སྙམ་བགྱིད། །མངོན་པར་འབྱུང་བའི་ལེའུ་སྟེ་བཅཝ་ལྔ་པའོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་གཅིག་པ། དགེ་སློང་དག་དེ་ལྟར་བྱང་ཆུབ་སེམས་དཔའི་བྱིན་གྱི་རླབས་ཀྱིས་འདུན་པས་རྒྱལ་པོ་ཟས་གཙང་མ་དང ། ཤཱཀྱའི་བུ་མོ་ས་འཚོ་མ་དང ། བཙུན་མོའི་འཁོར་ཐམས་ཅད་དང ། ཤཱཀྱའི་ཚོགས་ཐམས་ཅད་ཀྱི་མྱ་ངན་བསང་བའི་གཏམ་སྨྲས་སོ། ། 41.133b དགེ་སློང་དག་དེ་ལྟར་བྱང་ཆུབ་སེམས་དཔས་ལྷའི་བུ་རྔོན་པའི་གཟུགས་ལྟ་བུ་ལ་གོས་ཀ་ཤི་པ་རྣམས་བྱིན་ནས་དེ་ལ་གོས་ངུར་སྨྲིག་རྣམས་བླངས་ཏེ། འཇིག་རྟེན་དང་འཐུན་པར་བྱ་བ་དང ། སེམས་ཅན་ལ་སྙིང་བརྩེ་བ་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་བདག་ཉིད་རབ་ཏུ་བྱུང་ངོ ། །དེ་ནས་བྱང་ཆུབ་སེམས་དཔའ་བྲམ་ཟེ་རིགས་ལྡན་གྱི་གནས་ག་ལ་བ་དེར་སོང་བ་དང ། དེས་བྱང་ཆུབ་སེམས་དཔའ་གནས་པར་བྱ་བ་དང ། ཟས་ལ་འགྲོན་དུ་བོས་སོ། །དེ་ནས་བྱང་ཆུབ་སེམས་དཔའ་བྲམ་ཟེ་པད་མའི་གནས་སུ་སོང་བ་དང ། དེས་ཀྱང་བྱང་ཆུབ་སེམས་དཔའ་གནས་པར་བྱ་བ་དང ། ཟས་ལ་འགྲོན་དུ་བོས་སོ། །དེ་ནས་བྲམ་ཟེའི་དྲང་སྲོང་ནམ་གྲུའི་གནས་སུ་སོང་བ་དང ། དེས་ཀྱང་དེ་བཞིན་དུ་བྱང་ཆུབ་སེམས་དཔའ་འགྲོན་དུ་བོས་སོ། །དེ་བཞིན་དུ་གདུལ་བའི་བེ་ཅོན་ཅན་གྱི་བུ་འོད་ལྡན་གྱིས་ཀྱང་བྱང་ཆུབ་སེམས་དཔའ་འགྲོན་དུ་བོས་ཏེ། དགེ་སློང་དག་དེ་ལྟར་བྱང་ཆུབ་སེམས་དཔའ་རིམ་གྱིས་གྲོང་ཁྱེར་ཆེན་པོ་ཡངས་པ་ཅན་དུ་ཕྱིན་ཏོ། །དེའི་ཚེ་སྒྱུ་རྩལ་ཤེས་ཀྱི་བུ་རིང་འཕུར་ཉན་ཐོས་ཀྱི་དགེ་འདུན་ཆེན་པོ་དང ། སློབ་མ་སུམ་བརྒྱ་དང་ལྷན་ཅིག་ཏུ། གྲོང་ཁྱེར་ཡངས་པ་ཅན་དུ་གནས་བཅས་ཤིང་གནས་ཏེ། དེ་སློབ་མ་དག་ལ་ཅིའང་མེད་པའི་སྐྱེ་མཆེད་ཀྱི་བརྟུལ་ཞུགས་དང་འཐུན་པའི་ཆོས་སྟོན་པ་དེས་བྱང་ཆུབ་སེམས་དཔའ་རྒྱང་རིང་པོ་ནས་འོང་བ་མཐོང་ནས་ངོ་མཚར་དུ་གྱུར་ཏེ་སློབ་མ་རྣམས་ལ་སྨྲས་པ། ཀྱེ་འདིའི་གཟུགས་ལ་ལྟོས་ཤིག་།དེ་དག་གིས་སྨྲས་པ། དེ་བཞིན་དུ་དེ་ལ་བལྟ་བར་བགྱིས་ཏེ་འདི་ནི་ཡ་མཚན་ཆེའོ། །དགེ་སློང་དག་དེ་ནས་ང་སྒྱུ་རྩལ་ཤེས་ཀྱི་བུ་རིང་འཕུར་ག་ལ་བ་དེར་སོང་སྟེ། སྒྱུ་རྩལ་ཤེས་ཀྱི་བུ་རིང་འཕུར་ལ་འདི་སྐད་ཅེས་སྨྲས་སོ། །ཀྱེ་སྒྱུ་རྩལ་ཤེས་ཀྱི་བུ་རིང་འཕུར་ཁྱོད་ལས་བདག་གིས་ཚངས་པར་སྤྱད་པ 41.134a སྤྱོད་དོ། །དེས་སྨྲས་པ། ཀྱེ་གཽ་ཏ་མ་དད་པའི་རིགས་ཀྱི་བུས་གང་ལ་སྤྱད་ན་ཚེགས་ཆུང་ངུས་ཀུན་ཤེས་པ་ཐོབ་པར་འགྱུར་བའི་ཆོས་བསྟན་པ་དེ་ལྟ་བུ་ལ་སྤྱོད་ཅིག་།དགེ་སློང་དག་ངས་འདི་སྙམ་དུ་སེམས་ཏེ། ང་ལ་མོས་པ་ཡང་ཡོད། ང་ལ་བརྩོན་འགྲུས་ཀྱང་ཡོད། དྲན་པ་ཡང་ཡོད། ཏིང་ངེ་འཛིན་ཀྱང་ཡོད། ཤེས་རབ་ཀྱང་ཡོད་ཀྱིས། ཆོས་དེ་ཉིད་ཐོབ་པར་བྱ་བ་དང ། མངོན་དུ་བྱ་བའི་ཕྱིར་བདག་གཅིག་པུ་བག་ཡོད་པ་དང ། བརྟུན་པ་དང་དབེན་པར་གནས་པར་བྱའོ་སྙམ་ནས། དགེ་སློང་དག་དེ་ནས་ང་གཅིག་པུ་བག་ཡོད་པ་དང ། བརྟུན་པ་དང ། དབེན་པར་གནས་ནས། ཚེགས་ཆུང་ངུས་ཆོས་དེ་ཁོང་དུ་ཆུད་ཅིང་མངོན་དུ་གྱུར་ཏོ། །དགེ་སློང་དག་དེ་ནས་ང་སྒྱུ་རྩལ་ཤེས་ཀྱི་བུ་རིང་འཕུར་ག་ལ་བ་དེར་སོང་སྟེ་འདི་སྐད་ཅེས་སྨྲས་སོ། །ཀྱེ་རིང་འཕུར་ཁྱོད་ཀྱིས་ཆོས་འདི་ཙམ་ཞིག་ཁོང་དུ་ཆུད་ཅིང་མངོན་དུ་གྱུར་ཏམ། དེས་སྨྲས་པ། ཀྱེ་གཽ་ཏ་མ་དེ་དེ་བཞིན་ནོ། །ངས་སྨྲས་པ། ཀྱེ་ཁོ་བོས་ཀྱང་ཆོས་དེ་མངོན་དུ་བྱས་ཤིང་ཁོང་དུ་ཆུད་དོ། །དེས་སྨྲས་པ། ཀྱེ་གཽ་ཏ་མ་དེ་བས་ན་ཆོས་གང་ཁོ་བོས་ཤེས་པ་དེ་ཁྱོད་ཀྱིས་ཤེས་ལ་གང་ཁྱོད་ཀྱིས་ཤེས་པ་དེ་ཡང་ཁོ་བོས་ཤེས་ཏེ། དེ་བས་ན་བདག་ཅག་གཉི་གས་སློབ་མའི་ཚོགས་འདི་ལ་བསྟན་ཏོ། །དགེ་སློང་དག་དེ་ནས་སྒྱུ་རྩལ་ཤེས་ཀྱི་བུ་རིང་འཕུར་གྱིས་ང་ལ་མཆོད་པ་དམ་པས་མཆོད་དེ། ང་སློབ་མ་རྣམས་ལ་ཡང་དོན་འཐུན་པར་བྱེད་དུ་བཅུག་གོ། །དགེ་སློང་དག་ངས་འདི་སྙམ་དུ་བསམས་ཏེ། རིང་འཕུར་གྱི་ཆོས་འདི་ནི་ངེས་པར་འབྱུང་བ་མ་ཡིན་ཏེ། དེ་བྱེད་པ་ཡང་དག་པར་སྡུག་བསྔལ་ཟད་པར་ངེས་པར་འབྱུང་བ་མ་ཡིན་གྱིས། བདག་གིས་དེ་ལས་ལྷག་པ་ཞིག་བཙལ་ཞིང་སྤྱད་དོ་སྙམ་མོ། །དགེ་སློང་དག་དེ་ནས་ང་ཇི་སྲིད་དགའ་བའི་བར་དུ་གྲོང 41.134b ཁྱེར་ཡངས་པ་ཅན་དུ་གནས་ནས། ཡུལ་མ་ག་དྷཱར་ཡུལ་རྒྱུ་ཞིང་ཡུལ་མ་ག་དྷཱའི་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དེར་སོང་སྟེ། རིའི་རྒྱལ་པོ་སྐྱ་བོ་ག་ལ་བ་དེར་སོང་ནས། རིའི་རྒྱལ་པོ་སྐྱ་བོ་དེའི་ངོས་ལ་ང་གཅིག་པུ་གཉིས་སུ་མེད་ཅིང་གྲོགས་མེད་པར་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་བསྲུངས་ཤིང་གནས་སོ། །དེ་ནས་ང་ནང་པར་ཤམ་ཐབས་དང་ཆོས་གོས་བགོས། ལྷུང་བཟེད་ཐོགས་ཏེ་ཆུ་དྲོན་ཅན་གྱི་སྒོ་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་འགྲོ་བ་དང ། ལྡོག་པ་དང ། མདུན་དུ་ལྟ་བ་དང ། གཡས་གཡོན་དུ་ལྟ་བ་དང ། བསྐུམ་པ་དང་བརྐྱང་བ་མཛེས་པ་དང ། སྣམ་སྦྱར་དང ། ཐང་བ་དང ། ལྷུང་ཟེད་དང ། ཆོས་གོས་འཛིན་པ་མཛེས་པ་དང ། དབང་པོ་མ་གཡེངས་པ་དང ། སྤྲུལ་པ་བཞིན་དུ་ཡིད་ཕྱི་རོལ་ཏུ་མ་བྱུང་བ་དང ། འབྲུ་མར་གྱིས་གང་བའི་སྣོད་ཐོགས་པ་བཞིན་གཉའ་ཤིང་གང་ཙམ་དུ་ལྟ་ཞིང་བསོད་སྙོམས་ཀྱི་ཕྱིར་ཞུགས་སོ། །དེ་ནས་རྒྱལ་པོའི་ཁབ་ཀྱི་མི་རྣམས་ཀྱིས་ང་མཐོང་ནས་ངོ་མཚར་དུ་གྱུར་ཏེ། ཅི་འདི་ཚངས་པ་ཡིན་ནམ། ལྷའི་དབང་པོ་བརྒྱ་བྱིན་ནས། འོན་ཏེ་རྣམ་ཐོས་ཀྱི་བུ་འམ། འོན་ཏེ་རིའི་ལྷ་འགའ་ཞིག་ཡིན་ནམ་སྙམ་མོ། །དེ་ལ་འདི་སྐད་ཅེས་བྱ་སྟེ། དེ་ནས་གཟི་བརྗིད་མཐའ་ཡས་དྲི་མེད་ལྡན། །བྱང་ཆུབ་སེམས་དཔའ་བདག་ཉིད་རབ་བྱུང་སྟེ། །སེམས་ནི་ཞི་ཞིང་སྤྱོད་ལམ་རབ་དུལ་བར། །རི་ཡི་རྒྱལ་པོ་སྐྱ་བོའི་ངོས་ལ་གནས། །བྱང་ཆུབ་སེམས་དཔས་ནམ་ནངས་ཤེས་ནས་ནི། །མཆོག་ཏུ་བལྟ་ན་མཛེས་པར་ཤམ་ཐབས་བགོས། །ལྷུང་བཟེད་ཐོགས་ཏེ་དམའ་བའི་ཡིད་ཀྱིས་སུ། །དེ་ནི་རྒྱལ་པོའི་ཁབ་ཏུ་བསོད་སྙོམས་ཞུགས། །གསེར་གྱི་ས་ལེ་སྦྲམ་བཞིན་རབ་དུལ་ལ། །སུམ་བཅུ་རྩ་གཉིས་མཚན་གྱི་གོ་བགོས་པ། །སྐྱེས་པའི་ཚོགས་དང་བུད་མེད་ཀྱིས་མཐོང་ན། ། 41.135a སུ་ཡང་ལྟ་བས་ངོམས་པར་མི་འགྱུར་རོ། །སྲང་དག་རིན་ཆེན་གོས་དང་འབྲུས་ཀྱང་བརྒྱན། །གང་གི་མཐུས་ནི་གྲོང་ཁྱེར་ཀུན་མཛེས་པའི། །སྔོན་ཆད་མ་མཐོང་སེམས་ཅན་འདི་སུ་ཞེས། །སྐྱེ་བོ་སེལ་ཅིང་དེ་ཡི་ཕྱི་བཞིན་འབྲང ། །བུད་མེད་སྟོང་དག་ཁང་པའི་སྟེང་འདུག་ཅིང ། །དེ་བཞིན་སྒོ་དང་དེ་བཞིན་སྐར་ཁུང་དང ། །སྲང་དག་བཀང་སྟེ་ཁྱིམ་ནི་སྟོང་བྱས་ནས། །དེ་དག་ལས་གཞན་མེད་པར་མི་མཆོག་ལྟ། །སྐྱེས་བུ་མཆོག་གི་གཟུགས་ལ་ལྟ་བའི་ཚེ། །ཉོ་དང་འཚོང་བ་དག་ཀྱང་མི་བྱེད་ཅིང ། །ཆང་དད་ཅན་ཡང་ཆང་ནི་མི་འཐུང་ལ། །ཁྱིམ་དང་སྲང་ན་འདུག་པར་མི་དགའོ། །རིངས་པར་མི་ཞིག་རྒྱལ་པོའི་ཁབ་སོང་སྟེ། །དེ་དགའ་རྒྱལ་པོ་གཟུགས་ཅན་སྙིང་པོ་ལ། །གྲོང་འདིར་ཚངས་པ་བདག་ཉིད་བསོད་སྙོམས་སྤྱོད། །ལྷ་ཁྱོད་བརྙེས་པ་དམ་པ་བརྙེས་ཤེས་ཟེར། །ཁ་ཅིག་བརྒྱ་བྱིན་ལྷ་ཡི་རྒྱལ་ཞེས་ཟེར། །གཞན་དག་འཐབ་བྲལ་ལྷ་ཡི་བུ་ཞེས་ཟེར། །དེ་བཞིན་ཡོངས་སུ་དགའ་ལྡན་འཕྲུལ་པ་དང ། །གཞན་དག་རབ་འཕྲུལ་ལྷ་ཡི་བུ་ཞེས་ཟེར། །ཁ་ཅིག་ཉི་མ་ཟླ་བ་དེ་བཞིན་དུ། །སྒྲ་གཅན་སྟོབས་ལྡན་ཐགས་བཟངས་རིས་ཤེས་ཟེར། །ཁ་ཅིག་དག་ནི་ཚིག་ཀྱང་འདི་སྐད་དུ། །རི་རྒྱལ་སྐྱ་ལ་འདུག་པ་འདི་ཡིན་ཟེར། །རྒྱལ་པོས་ཚིག་ནི་དེ་དག་ཐོས་གྱུར་ནས། །ཡིད་ནི་མཆོག་ཏུ་དགའ་ཞིང་སྐར་ཁུང་འདུག་།ཤིན་ཏུ་སྦྱངས་པའི་གསེར་ལྟར་དཔལ་འབར་བ། །བྱང་ཆུབ་སེམས་དཔའ་སེམས་ཅན་མཆོག་མཐོང་ངོ ། །རྒྱལ་པོ་གཟུགས་ཅན་སྙིང་པོས་མི་དེ་ལ། །བསོད་སྙོམས་བྱིན་ལ་གར་སོང་ལྟོས་ཤེས་བསྒོ། །རི་ཡི་མཆོག་ལ་དེ་ནི་སོང་མཐོང་ནས། །ཁ་ཅིག་རི་ཡི་ངོས་ལ་དེ་མཆིས་སྨྲས། །གཟུགས་ཅན་སྙིང་པོས་ནམ་ནངས་ཤེས་ནས་ནི། །མི་དབང་སྐྱེ་བོ་མང་པོས་ཡོངས་བསྐོར་ཏེ། །རི་ཡི་རྒྱལ་པོ་སྐྱ་བོའི་དྲུང་དུ་སོང ། །རི་དེ་དཔལ་ནི་རབ་ཏུ་འབར་བར་མཐོང ། །བཞོན་པ་ལས་ནི་བབས་ཏེ་རྐང་གིས་སོང ། །ཇི་ལྟར་ལྷུན་པོ་བཞིན་དུ་མི 41.135b གཡོ་ཞིང ། །རྩཝ་བཏིང་སྟེང་ན་སྐྱིལ་མོ་ཀྲུང་འདུག་པའི། །བྱང་ཆུབ་སེམས་དཔའ་མཆོག་ཏུ་གུས་པས་མཐོང ། །རྒྱལ་པོས་རྐང་པར་མགོ་བོས་ཕྱག་བྱས་ཏེ། །རྣམ་པ་སྣ་ཚོགས་དག་གི་གཏམ་བྱས་ནས། །ཁྱོད་ལ་རྒྱལ་སྲིད་ཀུན་གྱི་ཕྱེད་སྦྱིན་གྱིས། །འདོད་པའི་ཡོན་ཏན་འདི་སྤྱོད་མ་འཕྱན་སྨྲས། །བྱང་ཆུབ་སེམས་དཔས་འཇམ་པོའི་ཚིག་སྨྲས་པ། །ས་ཡི་བདག་པོ་ཡུན་རིངས་ཚེ་སྲུངས་ཤིག་།ཁོ་བོས་རྒྱལ་སྲིད་སྡུག་པ་བོར་ནས་སུ། །རེ་བ་མེད་པར་ཞི་ཕྱིར་རབ་ཏུ་བྱུང ། །གཞོན་ནུ་ཐོར་བུ་དར་ལ་བབ་དང་ལྡན། །ལུས་ཀྱི་ཁ་དོག་མཛེས་ཤིང་ཤུགས་ལྡན་ན། །ནོར་མང་དག་དང་བུད་མེད་ཚོགས་བཞེས་ཏེ། །བདག་གི་རྒྱལ་སྲིད་འདིར་བཞུགས་འདོད་པ་སྤྱོད། །མ་ག་དྷཱའི་རྒྱལ་པོས་བྱང་ཆུབ་སེམས་དཔའ་ལ་སྨྲས་པ། བདག་ཁྱོད་མཐོང་བས་མཆོག་ཏུ་དགའ། །བདག་གི་རྒྱལ་སྲིད་ཀུན་གྱི་གྲོགས་མཛོད་ཅིག་།བདག་ནི་ཁྱོད་ལ་མངའ་འབུལ་འདོད་པ་སྤྱོད། །ནགས་ཚལ་སྟོང་པ་དག་ཏུ་མ་བཞུགས་ཤིག་།སླན་ཆད་ས་གནས་རྩཝ་སྟེང་མ་བཞུགས་ཤིག་།ཁྱོད་ཀྱི་སྐུ་ནི་མཆོག་ཏུ་རབ་ཏུ་གཞོན། །བདག་གི་རྒྱལ་སྲིད་འདིར་བཞུགས་འདོད་པ་སྤྱོད། །བྱང་ཆུབ་སེམས་དཔས་འཇམ་ཞིང་གྱ་གྱུ་མེད། །དགའ་འགྱུར་ཕན་ཞིང་སྙིང་བརྩེའི་ཚིག་སྨྲས་པ། །རྒྱལ་པོ་ཁྱོད་ནི་རྟག་ཏུ་བཀྲ་ཤིས་གྱུར། །ཁོ་བོ་འདོད་པའི་ཡོན་ཏན་མི་འདོད་དོ། །འདོད་པ་དུག་འདྲ་ཉེས་པ་མཐའ་ཡས་ལྡན། །སེམས་ཅན་དམྱལ་དང་ཡི་དགས་དུད་འགྲོར་ལྟུང ། །མཁས་པས་སྨད་ཅིང་འདོད་པས་འཕགས་མ་ཡིན། །ཁོ་བོས་ངར་སྣབས་རུལ་པ་བཞིན་དུ་བོར། །འདོད་པ་ཤིང་གི་འབྲས་བུ་བཞིན་དུ་ལྟུང ། །ཇི་ལྟར་སྤྲིན་དང་ཆར་པ་བཞིན་དུ་འགྲོ། །མི་བརྟན་འགྱུར་ལ་ཇི་ལྟར་རླུང་བཞིན་འགྲོ། །དགེ་བ་ཐམས་ཅད་རྣམ་པར་འཐོར་ཞིང་སླུ། །དེ་བཞིན་འདོད་པ་མི་རྙེད་ཕྱིར་ཡང་གདུང ། །རྙེད་དུ་ཟིན་ཀྱང་ཆོག་པར་འཛིན་མི་འགྱུར། །གང་ཚེ་དབང་མེད་མ་རུང་རབ་གྱུར་པ། །དེ་ཚེ་འདོད་པ་སྡུག་བསྔལ་དྲག་ཆེན་བསྐྱེད། །རྒྱལ་པོ་ལྷ་ཡི 41.136a འདོད་པ་གང་ཡིན་དང ། །མི་ཡི་འདོད་པ་བཟང་པོ་གང་ཡིན་པའི། །འདོད་པ་ཐམས་ཅད་མི་གཅིག་གིས་ཐོབ་ཀྱང ། །དེ་ལ་ཆོག་པ་མེད་དེ་ཡང་ཚོལ་ལོ། །རྒྱལ་པོ་གང་དག་ཞི་ཞིང་དུལ་གྱུར་པ། །འཕགས་པ་ཟག་མེད་ཆོས་ཀྱིས་འདུ་ཤེས་གང ། །ཤེས་རབ་མཁས་པས་ཆོག་པ་དེ་ལེགས་ཆོག་།འདོད་པའི་ཡོན་ཏན་ཆོག་པ་ཅུང་ཟད་མེད། །རྒྱལ་པོ་འདོད་པ་དག་ལ་བསྟེན་བྱས་ཤིང ། །སྔན་ཆད་འདུས་བྱས་པ་ཡི་མཐའ་མ་མེད། །ཇི་ལྟར་མི་དག་ལན་ཚཝའི་ཆུ་འཐུངས་བཞིན། །འདོད་པ་བསྟེན་ན་ཕྱིར་ཞིང་སྲེད་པ་འཕེལ། །རྒྱལ་པོ་ལུས་ལ་ཡང་ལྟོས་དེ་མི་བརྟན། །སྙིང་པོ་མེད་དེ་སྡུག་བསྔལ་འཁྲུལ་འཁོར་བཞིན། །བུ་ག་དགུ་ཡི་སྒོ་ནས་རྟག་ཏུ་འཛག་།རྒྱལ་པོ་ཁོ་བོ་འདོད་པའི་འདོད་ཆགས་མེད། །ཁོ་བོས་འདོད་པ་མང་དང་དེ་བཞིན་དུ། །བལྟ་ན་སྡུག་པའི་བུད་མེད་སྟོང་བོར་ཏེ། །མཆོག་ཞི་བྱང་ཆུབ་དམ་པ་ཐོབ་འདོད་ནས། །ཁོ་བོ་སྲིད་པ་མི་དགའ་ངེས་པར་འབྱུང ། །དགེ་སློང་ཕྱོགས་ནི་གང་དང་གང་ནས་བྱོན། །གང་དུ་ཁྱོད་སྐྱེས་ཡབ་ཡུམ་གང་ན་བཞུགས། །རྒྱལ་རིགས་ལགས་སམ་བྲམ་ཟེ་འམ་རྒྱལ་པོ་ལགས། །དགེ་སློང་ཁུར་གྱི་འདུ་ཤེས་མེད་ན་གསུངས། །རྒྱལ་པོ་ཤཱཀྱ་རྣམས་ཀྱི་སེར་སྐྱའི་གྲོང ། །མཆོག་ཏུ་འབྱོར་ཅིང་རྒྱས་པ་ཐོས་གྱུར་ཏམ། །ཁོ་བོའི་ཕ་ཡི་མིང་ནི་ཟས་གཙང་ཡིན། །ཡོན་ཏན་འདོད་པས་ཁོ་བོ་དེར་རབ་བྱུང ། །ཁྱོད་མཐོང་ལེགས་པར་མཐོང་སྟེ་ལེགས་པ་ལགས། །གང་ལས་ཁྱོད་སྐྱེས་བདག་ཀྱང་དེའི་སློབ་མ། །འདོད་ཆགས་བྲལ་བ་འདོད་པར་སྤྱན་དྲངས་པ། །ཐུགས་ནས་བདག་ལ་བཟོད་པ་མཛད་དུ་གསོལ། །གང་ཚེ་ཁྱོད་ཀྱིས་བྱང་ཆུབ་བརྙེས་གྱུར་ཚེ། །ཆོས་རྗེས་བདག་ལ་ཆོས་ཀྱི་བགོ་བཤའ་མཛོད། །རང་བྱུང་བདག་གི་ཡུལ་ན་བཞུགས་པ་ནི། །བདག་གིས་མཆོག་ཏུ་རྙེད་པ་རབ་རྙེད་དོ། །དེ་ནས་ཀྱང་ནི་རྐང་པར་ཕྱག་བྱས་ཏེ། །རྒྱལ་པོས་ཤིན་ཏུ་གུས་པར་བསྐོར་བྱས་ནས། །མི་དབང་རང་གི་སྐྱེ་བོས་ཡོངས་བསྐོར་ཏེ། །སླར་ཡང་རྒྱལ་པོའི་ཁབ་ཏུ་ཞུགས་པར་གྱུར། །འཇིག་རྟེན་མགོན 41.136b པོ་མ་ག་དྷ་ཡི་གྲོང་ཞུགས་ཏེ། །ཇི་སྲིད་འདོད་པར་ཞི་བའི་ཡིད་ཀྱིས་འདུག་།ལྷ་དང་མི་རྣམས་ཀྱི་ནི་དོན་བྱས་ནས། །མི་དབང་ནཻ་རན་འཛ་ནའི་ཆུ་འགྲམ་སོང ། །གཟུགས་ཅན་སྙིང་པོ་འོངས་པའི་ལེའུ་ཞེས་བྱ་བ་སྟེ་བཅུ་དྲུག་པའོ།། །།དགེ་སློང་དག་ཡང་དེའི་ཚེ་རངས་བྱེད་ཀྱི་བུ་ལྷག་སྤྱོད་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གནས་བཅས་ནས་སློབ་མའི་ཚོགས་ཆེན་པོ་སློབ་མ་བདུན་བརྒྱ་དང་ལྷན་ཅིག་ཏུ་གནས་ཏེ། དེ་དེ་དག་ལ་འདུ་ཤེས་མེད་འདུ་ཤེས་མེད་མིན་གྱི་བརྟུལ་ཞུགས་དང་འཐུན་པའི་ཆོས་སྟོན་ཏོ། །དགེ་སློང་དག་བྱང་ཆུབ་སེམས་དཔའ་རངས་བྱེད་ཀྱི་བུ་ལྷག་སྤྱོད་ཚོགས་དང་ལྡན་པ་ཚོགས་ཅན། ཚོགས་ཀྱི་སློབ་དཔོན། གྲགས་པ་མངོན་པར་འདོད་པ། སྐྱེ་བོ་མང་པོས་མཆོད་པ། མཁས་པ། ཀུན་གྱིས་ཤེས་པ་མཐོང་ངོ ། །མཐོང་ནས་ཀྱང་དེ་འདི་སྙམ་དུ་སེམས་ཏེ། རངས་བྱེད་ཀྱི་བུ་ལྷག་སྤྱོད་འདི་ཚོགས་དང་ལྡན་པ། ཚོགས་ཅན། ཚོགས་ཀྱི་སློབ་དཔོན། གྲགས་པ་མངོན་པར་འདོད་པ། སྐྱེ་བོ་མང་པོས་མཆོད་པ། མཁས་པ་ཀུན་གྱིས་ཤེས་པ་ཡིན་ན། གལ་ཏེ་བདག་དེའི་དྲུང་དུ་སོང་སྟེ་བརྟུལ་ཞུགས་དང་དཀའ་ཐུབ་མ་བརྩམས་ན་ནི། འདི་བདག་ལ་ཁྱད་པར་དུ་འཕགས་པའི་འདུ་ཤེས་ཀྱང་མི་སྐྱེད་ལ། མངོན་སུམ་གྱི་ཤེས་པས་ཀྱང་ཤེས་པར་མི་འགྱུར་བ་དང ། འདུས་བྱས་ཟག་པ་དང་བཅས་པ་ཉེ་བར་ལེན་པ་དང་བཅས་པའི་བསམ་གཏན་དང་ཏིང་ངེ་འཛིན་དང་སྙོམས་པར་འཇུག་པ་དག་ཀྱང་སུན་ཕྱུང་བར་མ་གྱུར་གྱིས། གང་གིས་ན་དེ་ལ་བསམ་གཏན་གྱི་སྤྱོད་ཡུལ་དག་དང་སྙོམས་པར་འཇུག་པའི་དམིགས་པ་དག་མངོན་སུམ་དུ་འགྱུར་བ་དང ། འཇིག་རྟེན་པའི་ཏིང་ངེ་འཛིན་དག་ཀྱང་འབྱུང་བ་མ་ཡིན་པར་བསྟན་པར་འགྱུར་བ་དེ་ལྟ་བུའི་ཐབས་ཤིག་བསྟན་པར་བྱ་འམ། བདག་རངས་བྱེད་ཀྱི་བུ་ལྷག་སྤྱོད་ཀྱི་དྲུང་དུ་སོང་སྟེ། བདག་གི་ཏིང་ངེ་འཛིན་གྱི་ཡོན་ཏན་གྱི་ཁྱད་པར་བསྟན་པའི་ཕྱིར་དེའི་སློབ་མར་ཁས་བླངས་ལ། འདུས་བྱས་ཀྱི་ཏིང་ངེ་འཛིན་སྙིང་པོ་མེད་པར 41.137a བསྟན་པར་བྱ་འམ་སྙམ་མོ། །དགེ་སློང་དག་དེ་ནས་བྱང་ཆུབ་སེམས་དཔས་དོན་དེའི་དབང་དུ་བྱས་ཏེ། རངས་བྱེད་ཀྱི་བུ་ལྷག་སྤྱོད་ག་ལ་བ་དེར་སོང་ནས་ཕྱིན་པ་དང ། རངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་སྨྲས་སོ། །གྲོགས་པོ་ཁྱོད་ཀྱི་སྟོན་པ་ནི་སུ་ཞིག་།སུས་ཆོས་བསྟན་པ་ཀུན་ཤེས། དེ་སྐད་ཅེས་སྨྲས་པ་དང ། རངས་བྱེད་ཀྱི་བུ་ལྷག་སྤྱོད་ཀྱིས་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །གྲོགས་པོ་ཁོ་བོ་ལ་སྟོན་པ་གང་ཡང་མེད་དེ། འོན་ཀྱང་ཁོ་བོ་རང་གིས་འདི་ཡང་དག་པར་ཁོང་དུ་ཆུད་དོ། །བྱང་ཆུབ་སེམས་དཔས་སྨྲས་པ། ཁྱོད་ཀྱིས་ཅི་ཁོང་དུ་ཆུད། སྨྲས་པ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྙོམས་པར་འཇུག་པའི་ལམ་མོ། །བྱང་ཆུབ་སེམས་དཔས་སྨྲས་པ། བདག་གིས་ཁྱོད་ལས་ཏིང་ངེ་འཛིན་གྱི་ལམ་གྱི་གདམས་ངག་དང་རྗེས་སུ་བསྟན་པ་ཐོབ་པར་འཚལ་ལོ། །སྨྲས་པ། དེ་ལྟར་བྱའོ་ཞེས་བྱ་བ་ནས་གདམས་ངག་བྱིན་པའི་བར་དུའོ། །དེ་ནས་བྱང་ཆུབ་སེམས་དཔའ་ཕྱོགས་གཅིག་ཏུ་སོང་སྟེ་སྐྱིལ་མོ་ཀྲུང་བཅས་ནས་འདུག་གོ། །འདུག་མ་ཐག་ཏུ་བྱང་ཆུབ་སེམས་དཔའི་བསོད་ནམས་ཀྱི་ཁྱད་པར་དང ། ཡེ་ཤེས་ཀྱི་ཁྱད་པར་དང ། སྔོན་སྤྱད་པ་ལེགས་པར་སྤྱད་པའི་འབྲས་བུའི་ཁྱད་པར་དང ། ཏིང་ངེ་འཛིན་ཐམས་ཅད་ལ་འདྲིས་པའི་ཁྱད་པར་དང ། དེ་སེམས་ལ་དབང་སྒྱུར་བའི་ཕྱིར་བསམ་གཏན་ལ་སོགས་པའི་འཇིག་རྟེན་པའི་སྙོམས་པར་འཇུག་པ་བརྒྱ་སྟོང་ཐམས་ཅད་རྣམ་པ་དང་བཅས། བྱེ་བྲག་དང་བཅས་པར་མངོན་སུམ་དུ་གྱུར་ཏོ། །དེ་ནས་བྱང་ཆུབ་སེམས་དཔའ་དྲན་པ་དང་ཤེས་བཞིན་དུ་སྟན་ལས་ལངས་ཏེ། རངས་བྱེད་ཀྱི་བུ་ལྷག་སྤྱོད་ག་ལ་བ་དེར་སོང་ནས་ཕྱིན་པ་དང ། རངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་སྨྲས་སོ། །གྲོགས་པོ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་ལམ་ལས་གོང་ན་གཞན་འགའ་ཞིག་ཡོད་དམ། དེས་སྨྲས་པ། མེད་དོ། །དེ་ནས་བྱང་ཆུབ་སེམས་དཔའ 41.137b འདི་སྙམ་དུ་སེམས་ཏེ། ལྷག་སྤྱོད་འབའ་ཤིག་ལ་དད་པ་ཡོད་པ་དང ། བརྩོན་འགྲུས་དང ། དྲན་པ་དང ། ཏིང་ངེ་འཛིན་དང ། ཤེས་རབ་ཡོད་པ་མ་ཡིན་གྱི། བདག་ལ་ཡང་དད་པ་དང ། བརྩོན་འགྲུས་དང ། དྲན་པ་དང ། ཏིང་ངེ་འཛིན་དང ། ཤེས་རབ་ཡོད་དོ་སྙམ་མོ། །དེ་ནས་བྱང་ཆུབ་སེམས་དཔས་རངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་སྨྲས་སོ། །གྲོགས་པོ་ཁྱོད་གང་དུ་ངེས་པར་བྱུང་བའི་ཆོས་དེ་ཁོ་བོས་ཀྱང་ཁོང་དུ་ཆུད་དོ། །དེས་སྨྲས་པ། དེ་བས་ན་འདོང་ཁྱོད་དང་ཁོ་བོས་ཚོགས་འདི་དག་ལ་རྗེས་སུ་བསླབ་བོ་ཞེས་བྱང་ཆུབ་སེམས་དཔའ་དོན་འཐུན་པ་དང ། སློབ་དཔོན་གྱི་གནས་སུ་བཞག་གོ། །བྱང་ཆུབ་སེམས་དཔས་སྨྲས་པ། གྲོགས་པོ་ལམ་འདི་ནི་ཡིད་འབྱུང་བར་འགྱུར་བ་མ་ཡིན། འདོད་ཆགས་དང་བྲལ་བར་འགྱུར་བ་མ་ཡིན། འགོག་པར་འགྱུར་བ་མ་ཡིན། ཉེ་བར་ཞི་བར་འགྱུར་བ་མ་ཡིན། མངོན་པར་ཤེས་པར་འགྱུར་བ་མ་ཡིན། རྫོགས་པར་བྱང་ཆུབ་པར་འགྱུར་བ་མ་ཡིན། དགེ་སྦྱོང་ཉིད་དུ་འགྱུར་བ་མ་ཡིན། མྱ་ངན་ལས་འདས་པར་འགྱུར་བ་མ་ཡིན་ནོ། །དགེ་སློང་དག་དེ་ལྟར་བྱང་ཆུབ་སེམས་དཔས་ལྷག་སྤྱོད་སློབ་མ་དང་བཅས་པ་འདུན་པར་བྱས་ནས། དེ་ཙམ་གྱིས་ཆོག་གོ་ཞེས་བྱ་བ་ནས་ཆོག་པར་བྱས་ཏེ་སོང་བའི་བར་དུའོ། །དེའི་ཚེ་ལྔ་སྡེ་བཟང་པོ་རངས་བྱེད་ཀྱི་བུ་ལྷག་སྤྱོད་ལས་ཚངས་པར་སྤྱད་པ་སྤྱོད་པ་དེ་དག་འདི་སྙམ་དུ་སེམས་ཏེ། བདག་ཅག་གིས་འདིའི་ཕྱིར་ཡུན་རིང་པོར་བཙལ་ཅིང་བརྩོན་པར་བྱས་ཀྱང་མཐའ་དང་མུ་ཁོང་དུ་ཆུད་པར་མ་ནུས་ཀྱི། དགེ་སྦྱོང་གཽ་ཏ་མས་ཚེགས་ཆུང་ངུས་ཁོང་དུ་ཆུད་ཅིང་མངོན་དུ་བྱས་ལ་དེ་དེ་ཡང་མི་འདོད་ཅིང ། དེ་ལས་གོང་དུ་ཚོལ་བ་ལས་ཐེ་ཚོམ་མེད་པར་དེ་ནི་འཇིག་རྟེན་གྱི་སྟོན་པར་འགྱུར་རོ། །གང་དེས་མངོན་དུ་བྱེད་པར་འགྱུར་བ་དེ་བདག་ཅག་ལ་ཡང་འགེད་པར་འགྱུར་རོ་སྙམ་མོ། །དེ་ལྟར་དཔྱད་ནས་ལྔ་སྡེ་བཟང་པོས་རངས་བྱེད་ཀྱི་བུ་ལྷག་སྤྱོད་ཀྱི་དྲུང་ནས་དོང་སྟེ། བྱང་ཆུབ་སེམས་དཔའི 41.138a ཕྱི་བཞིན་འབྲང་ངོ ། །དགེ་སློང་དག་དེ་ལྟར་བྱང་ཆུབ་སེམས་དཔའ་ཇི་སྲིད་དགའ་བའི་བར་དུ་རྒྱལ་པོའི་ཁབ་ཏུ་གནས་ནས་ལྔ་སྡེ་བཟང་པོ་དང་ལྷན་ཅིག་ཏུ་ཡུལ་མ་ག་དྷཱར་ཡུལ་རྒྱུ་ཞིང་སོང་སོང་ངོ ། །ཡང་དེའི་ཚེ་རྒྱལ་པོའི་ཁབ་དང ། རི་ག་ཡཱའི་བར་ན་ཚོགས་གཞན་དག་ཅིག་དུས་སྟོན་བྱེད་དེ། ཚོགས་དེ་དག་གིས་ཀྱང་བྱང་ཆུབ་སེམས་དཔའ་ལྔ་སྡེ་བཟང་པོ་དང་ལྷན་ཅིག་ཏུ་གནས་པར་བྱ་བ་དང ། ཟས་ལ་འགྲོན་དུ་བོས་སོ། །དགེ་སློང་དག་དེ་ནས་བྱང་ཆུབ་སེམས་དཔའ་ཡུལ་མ་ག་དྷཱར་ཡུལ་རྒྱུ་ཞིང་ཡུལ་མ་ག་དྷཱའི་རི་ག་ཡཱ་ག་ལ་བ་དེར་སོང་སྟེ། དེར་ཕྱིན་པར་གྱུར་ཏོ། །རི་ག་ཡཱའི་རྩེ་མོ་དེར་བྱང་ཆུབ་སེམས་དཔས་སྤོང་བའི་ཕྱིར་གནས་ཏེ། དེ་དེར་གནས་པའི་ཚེ། སྔོན་མ་ཐོས་པ་དང ། སྔོན་མི་ཤེས་པའི་དཔེ་གསུམ་མངོན་དུ་གྱུར་ཏོ། །གསུམ་གང་ཞེ་ན། དགེ་སྦྱོང་དང་བྲམ་ཟེ་གང་ལ་ལ་འདོད་པ་དག་ལས་ལུས་དབེན་པར་མི་གནས་འདོད་པ་དག་ལས་སེམས་དབེན་པར་མི་གནས་ཤིང ། དེ་དག་གི་འདོད་པ་ལ་དགའ་བ་དང ། འདོད་པ་ལ་ཆགས་པ་དང ། འདོད་པ་ལ་འདུན་པ་དང ། འདོད་པ་ལ་སྐོམ་པ་དང ། འདོད་པ་ལ་ཡོངས་སུ་གདུང་བ་དང ། འདོད་པ་ལ་ཞེན་པ་གང་ཡིན་པ་དེ་ནི་ཉེ་བར་ཞི་བ་མ་ཡིན་ལ། དེ་དག་བདག་ཉིད་ཀྱིས་གནོད་པ་བྱེད་ཅིང་ལུས་ལ་གདུང་བར་བྱེད་པས། སྡུག་བསྔལ་གྱི་ཚོར་བ་དྲག་པོ་མི་བཟད་པ་ཚ་བ་མྱོང་སྟེ། འོན་ཀྱང་དེ་དག་མིའི་ཆོས་བླ་མ་ལས་མཆོག་ཏུ་གྱུར་པ། འཕགས་པ་ཡེ་ཤེས་མཐོང་བའི་ཁྱད་པར་མངོན་དུ་བྱེད་མི་ནུས་སོ། །འདི་ལྟ་སྟེ་དཔེར་ན་སྐྱེས་བུ་ཞིག་མེ་འདོད་ལ་ཤིང་རློན་པའི་གཙུབ་སྟན་དང ། ཤིང་རློན་པའི་གཙུབ་ཤིང་ཐོགས་ལ་ཆུར་བཅུག་སྟེ་གཙུབས་ན་དེས་མེ་ཕྱིན་པར་མི་ནུས་སོ། །དེ་བཞིན་དུ་དགེ་སྦྱོང་དང ། བྲམ་ཟེ་དེ་དག་འདོད་པ་རྣམས་ལས་ལུས་དབེན་པར་མི་གནས། འདོད་པ་རྣམས་ལས་སེམས་དབེན་པར་མི་གནས་ཏེ། དེ་དག་གི་འདོད་པ་ལ་དགའ་བ་དང ། འདོད་པ་ལ་སྲེད་པ་དང ། འདོད་པ 41.138b ལ་འདུན་པ་དང ། འདོད་པ་ལ་སྐོམ་པ་དང ། འདོད་པ་ལ་ཡོངས་སུ་གདུང་བ་དང ། འདོད་པ་ལ་བརྒྱལ་བ་དང ། འདོད་པ་ལ་ཞེན་པ་གང་ཡིན་པ་དེ་ནི་ཉེ་བར་ཞི་བ་མ་ཡིན་གྱི། དེ་དག་བདག་ཉིད་ཀྱིས་གནོད་པར་བྱེད་ཅིང ། ལུས་ལ་གདུང་བར་བྱེད་པས། སྡུག་བསྔལ་གྱི་ཚོར་བ་དྲག་པོ་མི་བཟད་པ་ཚ་བ་མྱོང་མོད་ཀྱི་འོན་ཀྱང་དེ་དག་མིའི་ཆོས་བླ་མ་ལས་མཆོག་ཏུ་གྱུར་པ་འཕགས་པ་ཡེ་ཤེས་མཐོང་བའི་ཁྱད་པར་མངོན་དུ་བྱེད་མི་ནུས་སོ་སྙམ་སྟེ། འདི་ནི་བྱང་ཆུབ་སེམས་དཔའ་ལ་དཔེ་མངོན་དུ་གྱུར་པ་དང་པོའོ། །ཡང་དེ་འདི་སྙམ་དུ་སེམས་ཏེ། གང་དགེ་སྦྱོང་དང ། བྲམ་ཟེ་འདི་དག་འདོད་པ་རྣམས་ལས་ལུས་དང་སེམས་དབེན་པར་གནས་ཀྱང ། དེ་དག་གི་འདོད་པ་ལ་དགའ་བ་ཞེས་བྱ་བ་ནས་མེ་ཚོལ་བ་ཞེས་བྱ་བའི་བར་དུ་ཐམས་ཅད་སྔ་མ་བཞིན་དུ་སྦྱར་ཏེ། དེས་ཤིང་རློན་པའི་གཙུབ་སྟན་ཐོགས་ལ་ཐང་ལ་བཞག་སྟེ། ཤིང་རློན་པའི་གཙུབ་ཤིང་གིས་གཙུབས་ན་དེས་མེ་ཕྱིན་པར་མི་ནུས་སོ། །དེ་བཞིན་དུ་གང་དགེ་སྦྱོང་དང་བྲམ་ཟེ་འདི་དག་ཅེས་བྱ་བ་ནས་ཐམས་ཅད་སྔ་མ་བཞིན་དུ་སྦྱར་ཏེ། མིའི་ཆོས་བླ་མ་ལས་མཆོག་ཏུ་གྱུར་པ་འཕགས་པ་ཡེ་ཤེས་མཐོང་བའི་ཁྱད་པར་མངོན་དུ་བྱ་བར་མི་ནུས་སོ་སྙམ་སྟེ། འདི་ནི་སྔོན་མ་ཐོས་ཤིང་མི་ཤེས་པའི་དཔེ་མངོན་དུ་གྱུར་པ་གཉིས་པའོ། །གཞན་ཡང་གང་དགེ་སྦྱོང་དང ། བྲམ་ཟེ་འདི་དག་འདོད་པ་རྣམས་ལས་ལུས་དང་སེམས་དབེན་པར་གནས་ཤིང ། དེ་དག་གི་འདོད་པ་ལ་དགའ་བ་ཞེས་བྱ་བ་ནས། ཐམས་ཅད་དེ་བཞིན་དུ་སྦྱར་ཏེ་དེ་དག་གི་དེ་ནི་ཉེ་བར་ཞི་བ་ཡིན་ཏེ། དེ་དག་བདག་ཉིད་ཀྱིས་གནོད་པ་བྱེད་ཅིང་ལུས་ལ་གདུང་བར་བྱེད་པས་སྡུག་བསྔལ་གྱི་ཚོར་བ་དྲག་པོ་མི་བཟད་པ་མྱོང་མོད་ཀྱི་འོན་ཀྱང་དེ་དག་མིའི་ཆོས་བླ་མ་ལ་མཆོག་ཏུ་གྱུར་པ། འཕགས་པ་ཡེ་ཤེས་མངོན་དུ་མཐོང་བའི་ཁྱད་པར་མངོན་དུ་བྱ་བར་ནུས་སོ། །འདི་ལྟ་སྟེ་དཔེར་ན་སྐྱེ་བུ་ཞིག་མེ་འདོད་ཅིང་འོད་འདོད་པ་དང ། འོད་ཚོལ་བར་གྱུར་ལ། དེས་ཤིང་སྐམ་པོའི་གཙུབ 41.139a སྟན་དང ། གཙུབ་ཤིང་ཐོགས་ཤིང་ཐང་ལ་བཞག་སྟེ་གཙུབས་ན། དེས་མེ་དབྱུང་བ་དང་འོད་འབར་བར་བྱེད་ནུས་སོ། །དེ་བཞིན་དུ་གང་དགེ་སྦྱོང་དང་བྲམ་ཟེ་འདི་དག་ཅེས་བྱ་བ་ནས། ཚོར་བ་མྱོང་ཞེས་བྱ་བའི་བར་དུ་སྔ་མ་བཞིན་ཏེ། འོན་ཀྱང་དེ་མིའི་ཆོས་བླ་མ་ལས་མཆོག་ཏུ་གྱུར་པ་འཕགས་པ་ཡེ་ཤེས་མཐོང་བའི་ཁྱད་པར་མངོན་དུ་བྱ་བར་ནུས་སོ་སྙམ་སྟེ། འདི་ནི་སྔོན་མ་ཐོས་ཤིང་སྔོན་མི་ཤེས་པའི་དཔེ་གསུམ་པའོ། །དགེ་སློང་དག་དེ་ནས་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། བདག་ཀྱང་ད་ལྟར་འདོད་པ་རྣམས་ལས་ལུས་དབེན་པར་གནས། འདོད་པ་རྣམས་ལས་སེམས་དབེན་པར་གནས་ལ། བདག་གི་འདོད་པ་ལ་དགའ་བ་ཞེས་བྱ་བ་ནས་ཐམས་ཅད་སྔ་མ་བཞིན་དུ་སྦྱར་ཏེ། བདག་གི་དེ་ཡང་ཉེ་བར་ཞི་བ་ཡིན་ལ་བདག་ཉིད་ཀྱིས་གནོད་པར་བྱས་ཤིང་ལུས་ལ་གདུང་བར་བྱེད་པས་སྡུག་བསྔལ་ཞེས་བྱ་བ་ནས་ཚོར་བ་མྱོང་ཞེས་བྱ་བའི་བར་དུ་སྔ་མ་བཞིན་དུ་སྦྱར་ཏེ། འོན་ཀྱང་བདག་མིའི་ཆོས་བླ་མ་ལས་མཆོག་ཏུ་གྱུར་པ་འཕགས་པ་ཡེ་ཤེས་མཐོང་བའི་ཁྱད་པར་མངོན་དུ་བྱ་བར་ནུས་སོ་སྙམ་མོ། །དགེ་སློང་དག་དེ་ལྟར་བྱང་ཆུབ་སེམས་དཔའ་ཇི་སྲིད་དགའ་བའི་བར་དུ་ག་ཡའི་རིར་ག་ཡའི་རྩེ་མོ་ལ་གནས་ཏེ། རྐང་གིས་ཡུལ་རྒྱུ་ཞིང་སྡེ་དཔོན་གྱི་གྲོང་ལྟེང་རྒྱས་ག་ལ་བ་དེར་སོང་སྟེ་ཕྱིན་པ་དང ། དེ་ན་ཀླུང་ནཻ་རན་ཛ་ན་ཆུ་གསལ་བ་འབབ་སྟེགས་བདེ་བ། ཤིང་དང་ཤིང་གེལ་པ་མཛེས་པ་དག་གིས་བརྒྱན་པ་ཉེ་འཁོར་ན་སྤྱོད་ཡུལ་གྱི་གྲོང་ཡོད་པ་མཐོང་སྟེ། དེ་ལ་བྱང་ཆུབ་སེམས་དཔའ་ཡིད་ཤིན་ཏུ་དགའ་བར་གྱུར་ནས་འདི་སྙམ་དུ་སེམས་ཏེ། ཨེ་མའོ་ས་ཕྱོགས་འདི་ནི་མཉམ་ཤིང་ཉམས་དགའ་བ། ནང་དུ་ཡང་དག་འཇོག་དང་འཐུན་པ་སྟེ། རིགས་ཀྱི་བུ་སྤོང་བ་དོན་དུ་གཉེར་བ་ལ་ནི་འདིས་ཆོག་གོ། །བདག་ཀྱང་སྤོང་བ་དོན་དུ་གཉེར་བ་ཡིན་གྱིས་བདག་འདི་ཉིད་དུ་གནས་པར་བྱའོ་སྙམ་མོ། །དགེ་སློང་དག་དེ་ལྟར་བྱང་ཆུབ་སེམས་དཔའ་འདི་སྙམ་དུ 41.139b སེམས་ཏེ། བདག་ནི་འཛམ་བུའི་གླིང་འདིར་སྙིགས་མ་ལྔའི་དུས་ལ་བབ་ཅིང་སེམས་ཅན་རྣམས་དམན་པ་ལ་མོས་པ་དང ། མུ་སྟེགས་ཅན་གྱི་སྡེས་གང་བ་དང ། ལྟ་བ་སྣ་ཚོགས་ལ་ཞུགས་པ་དང ། ལུས་ལ་རིལ་པོར་འཛིན་པ་ལ་ཞེན་པའི་ཚེ་འོངས་ཏེ། བླུན་པོ་དག་གདུང་བས་ཡོངས་སུ་གདུང་བ་རྣམ་པ་སྣ་ཚོགས་ཀྱིས་དག་པ་ཚོལ་ཞིང་སྟོན་པ་འདི་ལྟ་སྟེ། སྔགས་སྤྱོད་པ་དང ། ལག་པ་ལ་ལྡག་པ་དང ། མི་སློང་བ་དང ། མི་སྨྲ་བ་དང ། རྩ་བ་དུ་མ་ཟ་བ་དང ། ཤ་དང་ཉ་མི་ཟ་བ་དང ། བྱར་མི་འབྱུང་བ་དང ། ཆང་དང ། ཕུབ་མ་དང ། ཆུ་ཡོངས་སུ་སྤངས་པ་དང ། ཁྱིམ་གཅིག་དང ། གསུམ་དང ། ལྔ་དང་བདུན་ནས་ཟས་ལེན་པ་དང ། རྩ་བ་དང ། འབྲས་བུ་དང ། ཉ་ལྕིབས་པ་དང ། རྩཝ་ཀུ་ཤ་དང ། ལོ་མ་དང ། བ་ལང་གི་ལྕི་བ་དང ། བའི་གཅིན་དང ། འོ་ཐུག་དང ། ཞོ་དང ། མར་དང ། བུ་རམ་དང ། མ་བརྟགས་པ་ཟ་ཞིང་འཐུང་བ་དང ། བྱ་ངང་པ་དང ། ཕུག་རོན་གྱིས་ཟོས་ཏེ་བོར་བ་བཀྲུས་ཏེ་ཟ་བ་དང ། གྲོང་དང་དགོན་པས་འཚོ་བ་དང ། བ་ལང་གི་བརྟུལ་ཞུགས་དང ། རི་དགས་དང ། ཁྱི་དང ། ཕག་དང ། སྤྲེའུ་དང ། གླང་པོ་ཆེའི་བརྟུལ་ཞུགས་དང ། འགྲེང་བ་དང ། མི་སྨྲ་བ་དང ། དཔའ་བོའི་ཚུལ་དུ་འདུག་པ་དང ། ཁམ་གཅིག་ཟ་བ་དང ། ཁམ་བདུན་གྱི་བར་དུ་ཟ་བ་དང ། ཟས་ལན་གཅིག་ཟ་བ་དང ། ཉིན་ཞག་གཅིག་ཟ་བ་དང ། བཞི་དང་ལྔ་དང་དྲུག་གི་སྐབས་སྐབས་སུ་ཟ་བ་དང ། ཟླ་བ་ཕྱེད་དང ། ཟླ་བ་གཅིག་ཟ་བར་བྱེད་པ་དང ། ཟླ་བ་ལ་ལྟ་བ་དང ། བྱ་རྒོད་དང ། འུག་པའི་གཤོག་པ་ཐོགས་པ་དང ། ཤིང་ལེབ་དང ། རྩཝ་མུན་ཛ་དང ། ཟར་མའི་ཤུན་པ་དང ། རྩཝ་དར་བྷ་དང ། གྲེས་མ་དང ། རྔ་བལ་གྱི་ལ་བ་དང ། ར་བལ་གྱི་ལ་བ་དང ། སྐྲའི་ལ་བ་དང ། ཀོ་ལྤགས་གྱོན་པ་དང ། གོས་གཤེར་བ་དང ། སྟེགས་བུའི་སྟེང་དང ། ཆུའི་ནང་ན་ཉལ་བ་དང ། ཐལ་བ་དང ། རྡོ་དང ། གྱོ་མོ་དང ། ཤིང་ལེབ་དང ། ཚེར་མ་དང ། 41.140a རྩཝ་དང་གཏུན་ཤིང་གི་སྟེང་དུ་ཉལ་བ་དང ། མགོ་ཐུར་དུ་བསྟན་པ་དང ། ཙོག་ཙོག་པོར་འདུག་པ་དང ། ཐང་ལ་ཉལ་བ་དང ། གོས་གཅིག་དང ། གོས་གཉིས་དང ། གསུམ་དང ། བཞི་དང ། ལྔ་དང ། དྲུག་དང ། བདུན་དང ། གོས་མང་པོ་སྲེལ་བ་དང ། གཅེར་བུར་འདུག་པ་དང ། འཁྲུ་བ་དང ། མི་འཁྲུ་བའི་ཆོ་ག་ཅན་དང ། སྐྲ་དང ། སེན་མོ་དང ། ག་ཙོམ་རིང་པོར་འཇོག་པ་དང ། རལ་པའི་ཐོར་ཚུགས་འཆང་བ་དང ། རྒྱ་ཤུག་དང ། ཏིལ་དང ། འབྲས་འབྲུ་གཅིག་ཟ་བ་དང ། ཐལ་བ་དང ། སྣག་ཙ་དང ། མེ་ཏོག་སྤྱད་སྤྱད་པ་དང་།[་]རྡུལ་འཐུལ་བ་དང ། རྡུལ་ནག་པོ་དང ། ཕྱག་དར་དང ། རྫབ་ཀྱིས་ལུས་ལ་སྐུད་པ་དང ། བ་སྤུ་དང ། མིའི་ཐོད་པ་དང ། སྐྲ་དང ། སེན་མོ་དང ། ཚལ་བུའི་སྨད་གཡོགས་དང ། རྫབ་དང ། ཀེང་རུས་ཐོགས་པ་དང ། ཆུ་དྲོན་པོ་དང ། འབྲས་ཀྱི་ཁུ་བ་དང ། ལ་བར་བཙགས་པ་དང ། ཁྲུད་མ་འཐུང་བ་དང ། འདབ་མ་དང ། ཚོན་རྩི་དང ། ཚོན་ངུར་སྨྲིག་དང ། ཁར་བ་གསུམ་དང ། མགོ་འདྲེག་པ་དང ། རིལ་བ་དང ། མིའི་ཐོད་པ་དང ། ཁྲིའི་ཟུར་ཤིང་འཆང་བས་བླུན་པོ་རྣམས་དག་པར་ཁོང་དུ་ཆུད་དོ། །དུ་བ་རྔུབ་པ་དང ། མེ་རྔུབ་པ་དང ། ཉི་མ་ལ་ལྟ་བ་དང ། གདུང་བ་ལྔ་བྱེད་པ་དང ། རྐང་པ་གཅིག་དང ། ལག་པ་གཅིག་བསྟོད་པ་དང ། རྐང་པ་གཅིག་བཙུགས་པ་དང ། གནས་གཅིག་ན་འདུག་པས་དཀའ་ཐུབ་ལ་སོགས་པ་དང ། ཕུབ་མ་ལ་སོགས་པ་དང ། འདབ་མ་བསྲེགས་པ་དང ། བུམ་པ་བསྲེགས་པ་དང ། རྡོ་བསྲེགས་པ་དང ། མེ་འབར་བར་འཇུག་པ་དང ། ཟས་མི་ཟ་བ་དང ། མྱ་ངན་དང ། འབབ་སྟེགས་སུ་སོང་སྟེ་ཤི་བས་སྡུག་པའི་འགྲོ་བ་ཚོལ་ལོ། །རབ་བསྔགས་ཤེས་བྱ་བ་དང ། གཞི་མི་འགྲིབ་པ་ཞེས་བྱ་བ་དང ། གཞི་སྲུང་ཞེས་བྱ་བ་དང ། གཞི་ཚུགས་ཤེས་བྱ་བ་དང ། སྨོན་ལམ་དང ། བསྟོད་པ་དང ། 41.140b སྦྱིན་བསྲེག་དང ། དབབ་པ་དང ། སྔགས་ཀྱི་བཟླས་བརྗོད་དང ། ཀླག་པ་འཛིན་ཅིང་བྱེད་པས་དག་པར་ཁོང་དུ་ཆུད་དོ། །བདག་དག་པར་སེམས་ཤིང་དེ་དག་ལ་རྟེན་ཏེ། འདི་ལྟ་སྟེ་ཚངས་པ་དང ། དབང་པོ་དང ། གུ་ལང་དང ། ཁྱབ་འཇུག་དང ། ལྷ་མོ་དང ། གཞོན་ནུ་དང ། མ་མོ་དང ། ཀཱ་ཏྱཱ་ཡའི་བུ་དང ། ཟླ་བ་དང ། ཉི་མ་དང ། རྣམ་ཐོས་ཀྱི་བུ་དང ། ཆུ་ལྷ་དང ། ནོར་ཅན་གྱི་བུ་དང ། ཐ་སྐར་གྱི་བུ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། སྲིན་པོ་དང ། འབྱུང་པོ་དང ། གྲུལ་བུམ་དང ། ཡི་དགས་དང ། འཁོར་དང ། ཚོགས་དང ། མཚུན་དང ། ཤ་ཟ་དང ། ལྷའི་དྲང་སྲོང་དང ། རྒྱལ་པོའི་དྲང་སྲོང་དང ། ཚངས་པའི་དྲང་སྲོང་དག་ལ་ཕྱག་འཚལ་ཞིང་དེ་དག་ལ་སྙིང་པོར་འདུ་ཤེས་སོ། །ས་དང ། ཆུ་དང ། མེ་དང ། རླུང་དང ། ནམ་མཁའ་ལ་ཡང་རྟེན། རི་དང ། རི་སུལ་དང ། ཀླུང་དང ། ཆུ་མིག་དང ། མཚོ་དང ། མཚེའུ་དང ། རྫིང་དང ། རྒྱ་མཚོ་དང ། ལྟེང་ཀ་དང ། ཁྲོན་པ་དང ། རྫིང་བུ་དང ། ཤིང་དང ། ཤིང་གེལ་པ་དང ། འཁྲི་ཤིང་དང ། རྩཝ་དང ། སྡོང་དུམ་དང ། ལྷས་དང ། དུར་ཁྲོད་དང ། བཞི་མདོ་དང ། སུམ་མདོ་དང ། སྲང་དག་ལ་ཡང་རྟེན་ཏོ། །ཁང་པ་དང ། ཀ་བ་དང ། རྡོ་དང ། ཐོ་བ་དང ། རལ་གྲི་དང ། གཞུ་དང ། དགྲ་སྟ་དང ། མདའ་དང ། མདུང་ཐུང་དང ། རྩེ་གསུམ་པ་དག་ལའང་ཕྱག་འཚལ་ལོ། །ཞོ་དང ། མར་དང ། ཡུངས་ཀར་དང ། ནས་དང ། ཤིང་བལ་གྱི་ཕྲེང་བ་དང ། རྩཝ་དཱུར་བ་དང ། ནོར་བུ་དང ། གསེར་དང ། དངུལ་ལ་སོགས་པ་ལ་བཀྲ་ཤིས་པར་འཛིན་ཏེ། གཞན་མུ་སྟེགས་ཅན་འདི་དག་འཁོར་བས་འཇིགས་སྐྲག་ནས་རྣམ་པ་དེ་ལྟ་བུ་དག་བྱེད་ཅིང་སྟེན་ཏོ། །འདི་ན་ཁ་ཅིག་བདག་ཅག་གི་མཐོ་རིས་དང་ཐར་པ་ཡང་འདི་ལྟ་བུ་དག་ལས་འགྲུབ་པོ་སྙམ་དུ་སེམས་ཏེ། དེ་ལྟར་ལོག་པའི་ལམ་དུ་སོང་བས 41.141a སྐྱབས་མ་ཡིན་པ་ལ་སྐྱབས་སུ་འདུ་ཤེས་ཤིང ། བཀྲ་ཤིས་མ་ཡིན་པ་ལ་བཀྲ་ཤིས་པར་འདུ་ཤེས་ལ། དག་པ་མ་ཡིན་པ་ལ་དག་པར་སེམས་ཀྱིས་བདག་གིས་ཅི་ནས་ཀྱང་ཕས་ཀྱི་རྒོལ་བ་ཐམས་ཅད་ཚར་བཅད་པར་འགྱུར་བ་དང ། སེམས་ཅན་ལས་དང་བྱ་བ་ཆུད་ཟོས་པ་རྣམས་ཀྱི་ལས་དང་བྱ་བ་ཆུད་མི་ཟ་བ་བསྟན་པར་བྱ་བ་དང ། གཟུགས་ན་སྤྱོད་པའི་ལྷ་བསམ་གཏན་སྤྱོད་ཡུལ་པ་རྣམས་ལ་བསམ་གཏན་གྱི་ཁྱད་པར་བསྟན་པས་འདུན་པར་བྱེད་པ་དེ་ལྟ་བུའི་བརྟུལ་ཞུགས་དང ། དཀའ་ཐུབ་ཀྱི་ཁྱད་པར་བརྩམ་མོ་སྙམ་མོ། །དགེ་སློང་དག་དེ་ལྟར་བྱང་ཆུབ་སེམས་དཔས་དེ་སྙམ་དུ་བསམས་ནས་ལོ་དྲུག་ཏུ་བརྟུལ་ཞུགས་དང་དཀའ་ཐུབ་ཤིན་ཏུ་དྲག་པོ་ཤིན་ཏུ་སྤྱད་པར་དཀའ་བ། ཤིན་ཏུ་བྱ་བར་དཀའ་བའི་དཀའ་བ་སྤྱད་པར་བརྩམས་སོ། །ཅིའི་ཕྱིར་དཀའ་བ་སྤྱད་པ་ཞེས་བྱ་ཞེ་ན། དེ་ནི་སྤྱད་པར་དཀའ་བ་སྟེ། དེ་བས་ན་དཀའ་བ་སྤྱད་པ་ཞེས་བྱ་སྟེ། བྱང་ཆུབ་སེམས་དཔའ་སྲིད་པ་ཐ་མ་པ་གང་བསམ་གཏན་མཁའ་ཁྱབ་ལ་སྙོམས་པར་ཞུགས་པ་མ་གཏོགས་པར་སེམས་ཅན་གྱི་རིས་ན་མི་འམ་མི་མ་ཡིན་པ་སུས་ཀྱང་དཀའ་བ་སྤྱད་པ་དེ་ལྟ་བུ་སྤྱོད་པར་ནུས་པ་མེད་དོ། །ཅིའི་ཕྱིར་མཁའ་ཁྱབ་ཅེས་བྱ་ཞེ་ན། དེ་དང་པོ་ཉིད་དུ་བསམ་གཏན་བཞི་པ་ལ་སྙོམས་པར་འཇུག་པའི་ཚེ། དབུགས་ཕྱི་ནང་དུ་རྒྱུ་བ་ཉེ་བར་འགོག་ཀུན་ཏུ་འགོག་སྟེ། བསམ་གཏན་དེ་ནི་རྟོག་པ་མེད། རྣམ་པར་རྟོག་པ་མེད། གཡོ་བ་མེད། སེམས་པ་མེད། འགྱུར་བ་མེད་ཅིང་ཐམས་ཅད་དུ་རྗེས་སུ་སོང་བ། ཐམས་ཅད་ལ་མི་རྟེན་པ་སྟེ། བསམ་གཏན་དེ་ལ་སྔོན་སློབ་པ་འམ། མི་སློབ་པ་འམ། རང་སངས་རྒྱས་སམ། སྤྱོད་པ་ལ་ཞུགས་པའི་བྱང་ཆུབ་སེམས་དཔའ་སུས་ཀྱང་སྙོམས་པར་མ་ཞུགས་སོ། །མཁའ་ཞེས་བྱ་བ་ནི་ནམ་མཁའ་སྟེ། ཁྱབ་པར་མི་བྱེད་པ་བྱེད་པ་མེད་པ། རྣམ་པར་མི་འཐོར་བ་སྟེ། དེས་ཐམས 41.141b ཅད་ཁྱབ་པར་བྱེད་པས་ན། བསམ་གཏན་དེ་ནམ་མཁའ་དང་མཉམ་པ་སྟེ། དེ་བས་ན་མཁའ་ཁྱབ་ཅེས་བྱའོ། །དགེ་སློང་དག་དེ་ནས་བྱང་ཆུབ་སེམས་དཔའ་འཇིག་རྟེན་པ་རྣམས་ལ་ངོ་མཚར་ཡང་དག་པར་བསྟན་པར་བྱ་བ་དང ། མུ་སྟེགས་ཅན་རྣམས་ཀྱི་རྒྱགས་པ་གཞིལ་བ་དང ། ཕས་ཀྱི་རྒོལ་བ་རྣམས་ཚར་གཅོད་པ་དང ། ལྷ་རྣམས་འདུན་པར་བྱ་བ་དང ། སེམས་ཅན་ཆད་པ་དང ། རྟག་པར་སྨྲ་བ། ལས་དང་བྱ་བ་ཆུད་ཟོས་པ་རྣམས་ལས་དང་བྱ་བ་ལ་གཟུད་པ་དང ། བསོད་ནམས་ཀྱི་འབྲས་བུ་བརྗོད་པ་དང ། ཡེ་ཤེས་ཀྱི་འབྲས་བུ་ཡང་དག་པར་བསྟན་པ་དང ། བསམ་གཏན་གྱི་ཡན་ལག་རྣམ་པར་དབྱེ་བ་དང ། ལུས་ཀྱི་སྟོབས་དང ། མཐུ་ཡང་དག་པར་བསྟན་པ་དང ། སེམས་ཀྱི་དཔའ་བ་ཡང་དག་པར་བསྐྱེད་པའི་ཕྱིར། བྱི་དོར་མ་བྱས་པའི་ས་ཐ་མལ་པ་ལ་སྐྱིལ་མོ་ཀྲུང་བཅས་ཏེ་འདུག་གོ། །འདུག་ནས་རང་གི་ལུས་སེམས་ཀྱིས་ཚར་བཅད་ཅིང་གཟིར་ཏོ། །དགེ་སློང་དག་དེ་ནས་ང་དགུན་གྱི་བརྒྱད་པའི་ནུབ་མོ་དེ་ལྟར་ལུས་ཚར་བཅད་ཅིང་གཟིར་བས། མཆན་ཁུང་ནས་ཀྱང་རྔུལ་བྱུང་སྟེ་ཟགས། དཔྲལ་བ་ནས་ཀྱང་རྔུལ་བྱུང་སྟེ་ཟགས་ནས་ས་ལ་ལྷུང་སྟེ་ཟིལ་པར་ཆགས་ནས་དྲོ་ཞིང་རླངས་པ་བྱུང་ངོ ། །འདི་ལྟ་སྟེ་དཔེར་ན་སྐྱེས་བུ་སྟོབས་དང་ལྡན་པས་སྐྱེས་བུ་ཤིན་ཏུ་ཉམ་ཆུང་བ་ཞིག་མགྲིན་པ་ནས་བཟུང་སྟེ་བཙིར་བ་དེ་བཞིན་དུ་དགེ་སློང་དག་ལུས་འདི་སེམས་ཀྱིས་ཚར་བཅད་ཅིང་གཟིར་ན་མཆན་ཁུང་ནས་ཀྱང་རྔུལ་བྱུང་ཞིང་ཟགས། དཔྲལ་བ་ནས་ཀྱང་རྔུལ་བྱུང་ཞིང་ཟགས་ནས་ས་ལ་ལྷུང་སྟེ། ཟིལ་པར་ཆགས་ནས་དྲོ་ཞིང་རླངས་པ་བྱུང་ངོ ། །དགེ་སློང་དག་དེ་ནས་ངས་འདི་སྙམ་དུ་སེམས་ཏེ། བདག་གིས་བསམ་གཏན་མཁའ་ཁྱབ་ལ་བསམ་གཏན་དུ་བྱའོ་སྙམ་ནས། དགེ་སློང་དག་དེ་ནས་ངས་བསམ་གཏན་མཁའ་ཁྱབ་ལ་བསམ་གཏན་དུ་བྱས་པ་དང ། ཁ་དང་སྣ་ནས་དབུགས་ཕྱི་ནང་དུ་རྒྱུ་བ་འགགས་པར་གྱུར་ཏོ། །རྣ་བའི་བུ་ག་གཉིས་ནས 41.142a སྒྲ་དྲག་པོ་ཆེན་པོ་བྱུང་ངོ ། །འདི་ལྟ་སྟེ་དཔེར་ན། སྦུད་པ་བུས་པའི་ཚེ་སྒྲ་དྲག་པོ་དང ། སྒྲ་ཆེན་པོ་བྱུང་བ་དེ་བཞིན་དུ་དགེ་སློང་དག་ཁ་དང་སྣ་ནས་དབུགས་ཕྱི་ནང་དུ་རྒྱུ་བ་འགགས་པར་གྱུར་པ་དང ། རྣ་བའི་བུ་ག་གཉིས་ནས་སྒྲ་དྲག་པོ་དང ། སྒྲ་ཆེན་པོ་བྱུང་ངོ ། །དགེ་སློང་དག་དེ་ནས་ངས་འདི་སྙམ་དུ་བསམས་ཏེ་ཡང་བདག་གིས་བསམ་གཏན་མཁའ་ཁྱབ་ལ་བསམ་གཏན་དུ་བྱའོ་སྙམ་པ་དང ། དེ་ནས་ངའི་ཁ་དང་སྣ་དང་རྣ་བ་འགགས་པར་གྱུར་ཏོ། །དེ་དག་འགགས་པ་དང ། རླུང་གོང་དུ་མགོའི་ཐོད་པ་ལ་གནོད་པར་གྱུར་ཏོ། །དགེ་སློང་དག་འདི་ལྟ་སྟེ་དཔེར་ན་སྐྱེས་བུ་ཞིག་གིས་མདུང་ཐུང་རྟུལ་པོས་མགོའི་ཐོད་པ་ལ་བཏད་པ་དེ་བཞིན་དུ་དགེ་སློང་དག་ཁ་དང་སྣ་དང་རྣ་བའི་དབུགས་ཕྱི་ནང་དུ་རྒྱུ་བ་འགགས་པ་དང ། གོང་དུ་མགོའི་ཐོད་པ་ལ་གནོད་པར་གྱུར་ཏོ། །དེར་ལྷའི་བུ་གཅིག་གིས་བྱང་ཆུབ་སེམས་དཔའ་ན་བ་དེ་མཐོང་ནས་འདི་སྐད་ཅེས་སྨྲས་སོ། །ེ་མའོ་ཀྱི་ཧུད་གཞོན་ནུ་དོན་གྲུབ་འདི་འཆི་བའི་དུས་བྱས་སོ། །གཞན་ཞིག་གིས་འདི་སྐད་ཅེས་སྨྲས་སོ། །འདི་འཆི་བའི་དུས་བྱས་པ་མ་ཡིན་གྱི་དགྲ་བཅོམ་པ་བསམ་གཏན་ལ་གནས་པ་རྣམས་ཀྱི་ཚུལ་ནི་དེ་ལྟ་བུ་ཞེས་སྨྲས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མི་ཡི་དབང་པོ་ཤཱཀྱའི་སྲས་པོ་འདི། །བརྣག་པ་མ་རྫོགས་དོན་ཀྱང་མ་མཛད་ཅིང ། །འཇིག་རྟེན་གསུམ་པོ་སྡུག་བསྔལ་མགོན་མེད་པར། །མཛད་ནས་དགོན་འདིར་གྲོངས་པར་མི་འགྱུར་གྲང ། །ཀྱི་ཧུད་སེམས་ཅན་སྙིང་པོ་ཐུགས་དམ་བརྟན། །མགོན་པོས་སྔན་ཆད་བདག་ཅག་དགའ་ལྡན་དུ། །དམ་ཆོས་མཆོད་སྦྱིན་ལ་ནི་འགྲོན་དུ་བོས། །སེམས་ཅན་དག་ཁྱོད་དམ་བཅས་དེ་ག་རེ། །དེ་ནས་ལྷ་དེ་སུམ་བཅུ་རྩ་གསུམ་གྱི་ལྷའི་ནང་དུ་སོང་སྟེ་ལྷ་མོ་སྒྱུ་འཕྲུལ་ལ་གཞོན་ནུ་ནི་འཆི་བའི་དུས་བྱས་སོ་ཞེས་དོན་དེ་བརྗོད་དོ། །དེ་ནས་ལྷ་མོ་སྒྱུ་འཕྲུལ་ལྷའི་བུ་མོའི་ཚོགས་ཀྱིས་བསྐོར་ནས། ནམ་ཕྱེད་ཙམ་ན་ཀླུང་ནཻ་རན་ཛ་ནའི་འགྲམ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་བ 41.142b དང ། དེས་བྱང་ཆུབ་སེམས་དཔའ་ལུས་སྐམས་ཤིང་འཆི་བའི་དུས་བྱས་པ་དང་འདྲ་བ་མཐོང་ངོ ། །མཐོང་ནས་མཆི་མས་བརྣངས་ཤིང་ངུས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ལུམ་བི་ནི་ཞེས་བྱ་བའི་ཚལ་དུ་ང་བུ་བཙས་པའི་ཚེ། །སེང་གེ་བཞིན་དུ་འཛིན་པ་མེད་པར་གོམ་བདུན་ཁྱོད་ཉིད་སོང ། །ཕྱོགས་བཞིར་བལྟས་ཤིང་འདི་ནི་ང་ཡི་སྐྱེ་བ་ཐ་མ་ཞེས། །ཁྱོད་ཀྱིས་ཚིག་སྙན་སྨྲས་པ་དེ་ཡང་ཁྱོད་ལ་ཡོང་མ་རྫོགས། །འཇིག་རྟེན་སངས་རྒྱས་འགྱུར་ཞེས་དྲང་སྲོང་ནག་པོས་བསྟན་པ་ཡི། །དེ་ཡི་ལུང་བསྟན་པ་ཡང་ཉམས་ལ་མི་རྟག་དེས་མ་མཐོང ། །བུས་ནི་ཡིད་དགའ་འཁོར་ལོས་སྒྱུར་བའི་དཔལ་ཡང་མ་མྱོང་ལ། །བྱང་ཆུབ་ཀྱང་ནི་རྗེས་སུ་མ་ཐོབ་ཚུལ་དུ་ཤི་བར་གྱུར། །བུ་ཕྱིར་སུ་ལ་བསྒྲུབ་ཕྱིར་སྡུག་བསྔལ་སུ་ཡི་གན་དུ་མདུད། །བདག་གི་བུ་གཅིག་ཅུང་ཟད་གསོན་པའི་སྲོག་ནི་སུ་ཡིས་སྦྱིན། །བྱང་ཆུབ་སེམས་དཔས་སྨྲས་པ། ཤིན་ཏུ་སྙིང་རྗེ་བར་ནི་ངུ་བྱེད་ཅིང ། །སྐྲ་ཡང་བཤིག་ལ་མཛེས་པ་རྣམས་བོར་བ། །ཤིན་ཏུ་བུ་ཡི་སྨྲེ་སྔགས་འདོན་བྱེད་ལ། །ས་སྟེང་འདུག་ཅིང་འགྲེང་བ་འདི་སུ་ཞིག་།ལྷ་མོ་སྒྱུ་འཕྲུལ་གྱིས་སྨྲས་པ། །བདག་གིས་ཟླ་བ་བཅུ་བར་དུ། །རྡོ་རྗེ་འདྲ་བ་མངལ་དུ་བཅངས། །བུ་དེའི་མ་ནི་བདག་ཡིན་ཏེ། །རབ་ཏུ་སྡུག་བསྔལ་རྣམ་པར་སྨྲེ། །དེ་ནས་བྱང་ཆུབ་སེམས་དཔའ་མའི་དབུགས་འབྱིན་ཅིང་སྨྲས་པ། བུ་ལ་བྱམས་པ་ཁྱོད་ཀྱི་ངལ་བ་འབྲས་བུ་ཡོད་པར་བྱས། མ་འཇིགས་ཤིག་།སངས་རྒྱས་པར་བྱ་བའི་ཕྱིར་ཡོངས་སུ་བཏང་བ་ནི་དོན་ཡོད་པ་སྟེ། དྲང་སྲོང་ནག་པོས་བསྟན་པ་ཡང་མངོན་དུ་གསལ་བར་བྱའོ། །མར་མེ་མཛད་ཀྱིས་ལུང་བསྟན་པ་ཡང་མངོན་དུ་གསལ་བར་བྱའོ། །ས་ནི་རྣམ་བརྒྱར་འཐོར་བར་འགྱུར་ཡང་སྲིད། །རིན་ཆེན་རྩེ་མོ་ལྷུན་པོ་ཆུར་འཕྱོ་སྲིད། །ཉི་ཟླ་སྐར་ཚོགས་ས་ལ་ལྟུང་འགྱུར་སྲིད། །སོ་སོའི་སྐྱེ་བོ་ཡིན་ཡང་ང་མི་འཆི། །དེ་ཕྱིར་འདི་ལ་མྱ་ངན་ཁྱོད་མ་བྱེད། །རིང་པོར་མི་ཐོགས་བྱང་ཆུབ་སངས་རྒྱས་མཐོང ། །ལྷ་མོ་སྒྱུ་འཕྲུལ་གྱིས་ཐོས་མ་ཐག་ཏུ་རབ་ཏུ་དགའ 41.143a སྟེ། བ་སྤུ་གཡོས་ནས་བྱང་ཆུབ་སེམས་དཔའ་ལ་མེ་ཏོག་མན་ད་ར་བས་གཏོར་ཏེ། ལན་གསུམ་བསྐོར་བ་བྱས་ནས། ལྷའི་སིལ་སྙན་དཀྲོལ་ཞིང ། རང་གི་གནས་ག་ལ་བ་དེར་སོང་ངོ ། དགེ་སློང་དག་ངས་འདི་སྙམ་དུ་བསམས་ཏེ། དགེ་སྦྱོང་དང་བྲམ་ཟེ་གང་དག་ཁ་ཅིག་ཟས་ཆུང་ངུས་དག་པར་སེམས་པ་ཡོད་ཀྱིས། ངས་ཀྱང་ཟས་ཆུང་ངུ་ལ་ནན་ཏན་བྱའོ་སྙམ་མོ། །དགེ་སློང་དག་ངས་མངོན་པར་ཤེས་ཏེ། ཟས་སུ་རྒྱ་ཤུག་འབྲུ་གཅིག་པུ་ཁོ་ན་སྟེ་གཉིས་སུ་མེད་པར་ཟོས་སོ། །དགེ་སློང་དག་ཁྱེད་ཀྱི་བློ་འདི་སྙམ་དུ་དེའི་ཚེའི་རྒྱ་ཤུག་ཆེ་བ་སྙམ་དུ་སེམས་པར་གྱུར་ན་དེ་ལྟར་མི་བལྟ་སྟེ་དེའི་ཚེའི་རྒྱ་ཤུག་ཀྱང་འདི་ཉིད་ཙམ་མོ། །དགེ་སློང་དག་ངས་ཟས་སུ་རྒྱ་ཤུག་འབྲུ་གཅིག་པུ་ཁོ་ན་སྟེ་གཉིས་སུ་མེད་པ་ཟོས་པས་ལུས་ཤིན་ཏུ་ཉམ་ཆུང་ཞིང་རིད་པར་གྱུར་ཏོ། །དགེ་སློང་དག་འདི་ལྟ་སྟེ་དཔེར་ན་ལྡུམ་བུ་ཨ་སི་ཏ་ཀའི་ཚིགས་པ་དང ། ཀ་ལི་ཀའི་ཚིགས་པ་ཅི་འདྲ་བར་ངའི་ཡན་ལག་དང་ཉིང་ལག་རྣམས་ཀྱང་དེ་འདྲ་བར་གྱུར་ཏོ། །འདི་ལྟ་སྟེ་དཔེར་ན་སྲོག་ཆགས་ཀར་ཀ་ཏ་ཀའི་རྩིབ་ལོགས་ཅི་འདྲ་བར་ངའི་རྩིབ་ལོགས་ཀྱང་དེ་འདྲ་བར་གྱུར་ཏོ། །འདི་ལྟ་སྟེ་དཔེར་ན་བཞོན་པའི་བྲེས་ཁང་ངམ། གླང་པོའི་བྲེས་ཁང་རྙིང་པ་ངོས་གཉིས་ཞིགས་པ་ནི་གདུང་རྟེན་གྱི་བར་སྣང་ཞིང་མངོན་ནོ། །དེ་བཞིན་དུ་ངའི་རྩིབ་ལོགས་གཉིས་ཀ་ནས་ལུས་ཀྱི་ནང་སྣང་ཞིང་མངོན་ནོ། །འདི་ལྟ་སྟེ་དཔེར་ན་ལན་བུར་བླས་པ་ནི་མཐོན་དམན་དང་མཉམ་པ་དང་མི་མཉམ་པར་གྱུར་ཏོ། །དེ་བཞིན་དུ་ངའི་སྒལ་ཚིགས་ཀྱང་མཐོན་དམན་དང་མཉམ་པ་དང་མི་མཉམ་པར་གྱུར་ཏོ། །འདི་ལྟ་སྟེ་དཔེར་ན་སྐུ་བ་ཁ་བོ་གཞོན་ནུར་བཅད་པ་ནི་རྙིས་པ་དང ། ཀུན་ཏུ་རྙིས་པ་དང་རྩུམ་རྩུམ་པོར་འགྱུར་རོ། །དེ་བཞིན་དུ་ངའི་མགོ་ཡང་རྙིས་པ་དང་ཀུན་ཏུ་རྙིས་པ་དང་རྩུམ་རྩུམ་པོར་གྱུར་ཏོ། །འདི་ལྟ་སྟེ་དཔེར་ན་སོས་ཀའི་ཟླ་བ་ཐ་མ་ལ་ཁྲོན་པའི་སྐར་མ་དམའ་བར་སོང་སྟེ་ཚེགས་ཆེན་པོས་སྣང་བར་འགྱུར་རོ། །དེ་བཞིན་དུ་ངའི་མིག་གི་འབྲས་བུ་ཡང་ཁུང་དུ་སོང་སྟེ་ཚེགས་ཆེན་པོས་སྣང་བར་གྱུར་ཏོ། །འདི་ལྟ་སྟེ 41.143b དཔེར་ན་ངའི་རྐང་པ་འམ་རྔ་མོའི་རྐང་པ་ཅི་འདྲ་བར་ངའི་མཆན་ཁུང་དང་ལྟོ་དང་བྲང་ལ་སོགས་པ་ཡང་དེ་འདྲ་བར་གྱུར་ཏོ། །དགེ་སློང་དག་དེ་ནས་ང་གང་གི་ཚེ་ལག་པས་ལྟོ་བ་ལ་བྱུག་གོ་སྙམ་ན་སྒལ་ཚིགས་ཉིད་ལ་རེག་གོ། །ལྡང་ངོ་སྙམ་ནས་ལངས་ན་ཡང་དེ་བཞིན་དུ་སྒུར་པོར་གྱུར་ཏེ་འགྱེལ་ཏོ། །ཤ་ཐང་སྟེ་ལངས་ནས་རྡུལ་གྱིས་ལུས་ཡོག་པ་ལག་པས་ཕྱིས་པ་དང ། བ་སྤུ་རུལ་པ་ཐམས་ཅད་ལུས་ལས་ལྷགས་སོ། །གང་སྔོན་ང་ཁ་དོག་མཛེས་ཤིང་འཇམ་པར་གྱུར་པ་དེ་ཡང་འདི་ལྟར་བདག་ཉིད་སྤོང་བ་རྩུབ་པོར་བཏང་བས་མེད་པར་གྱུར་ཏོ། །ངའི་སྤྱོད་ཡུལ་གྱི་གྲོང་ན་གནས་པའི་སྐྱེ་བོ་ཉེན་ཀོར་བ་རྣམས་ཀྱང་ང་ལ་འདི་ལྟར། ཨེ་མའོ་དགེ་སྦྱོང་གཽ་ཏ་མ་ནི་གནག་གོ། །ེ་མའོ་དགེ་སྦྱོང་གཽ་ཏ་མ་ནི་སྔོ་བསངས་སོ། །ེ་མའོ་དགེ་སྦྱོང་གཽ་ཏ་མ་ནི་ཉ་མང་གུ་རའི་མདོག་འདྲའོ། །སྔོན་འདིའི་མདོག་མཛེས་པ་གསལ་བར་གྱུར་པ་དེ་ཡང་མེད་པར་གྱུར་ཏོ་སྙམ་དུ་ཤེས་སོ། །དགེ་སློང་དག་ངས་འདི་སྙམ་དུ་བསམས་ཏེ་བདག་གིས་དེ་བས་ཀྱང་ཟས་ཆུང་ངུ་ལ་ནན་ཏན་བྱའོ་སྙམ་མོ། །དགེ་སློང་དག་ངས་མངོན་པར་ཤེས་ཏེ། ངས་ཟས་སུ་འབྲས་འབྲུ་གཅིག་པུ་ཁོ་ན་སྟེ། གཉིས་སུ་མེད་པ་ཟོས་སོ། །དགེ་སློང་དག་ཁྱོད་འདི་སྙམ་དུ་དེའི་ཚེའི་འབྲས་ཆེ་བ་སྙམ་དུ་སེམས་པར་གྱུར་ན་དེ་ལྟར་མི་བལྟ་སྟེ། དེའི་ཚེའི་འབྲས་ཀྱང་འདི་ཉིད་ཙམ་མོ། །དགེ་སློང་དག་ངས་ཟས་སུ་འབྲས་འབྲུ་གཅིག་ཟོས་པས་ལུས་མྱུར་དུ་སྔ་མ་བཞིན་དུ་གྱུར་ཏེ། ཨེ་མའོ་དགེ་སྦྱོང་གཽ་ཏ་མ་ཉ་མང་གུ་རའི་མདོག་འདྲའོ། །སྔོན་འདིའི་མདོག་མཛེས་པ་གསལ་བར་གྱུར་པ་དེ་ཡང་མེད་པར་གྱུར་ཏོ་ཞེས་བྱ་བའི་བར་དུའོ། །དགེ་སློང་དག་ངས་འདི་སྙམ་དུ་བསམས་ཏེ། བདག་གིས་དེ་བས་ཀྱང་ཟས་ཆུང་ངུ་ཉིད་ལ་ནན་ཏན་བྱའོ་སྙམ་མོ། །དགེ་སློང་དག་ངས་མངོན་པར་ཤེས་ཏེ། ངས་ཟས་སུ་ཏིལ་འབྲུ་གཅིག་པུ་ཁོ་ན་སྟེ་གཉིས་སུ་མེད་པ་ཟོས་པ་ནས། དེའི་ཁ་དོག་འཇམ་པོ་མེད་པར་གྱུར་ཏོ་ཞེས་བྱ་བའི་བར་དུའོ། །དགེ་སློང་དག་ངས་འདི་སྙམ་དུ་བསམས་ཏེ། 41.144a དགེ་སྦྱོང་དང་བྲམ་ཟེ་གང་དག་ཁ་ཅིག་ཟས་མི་ཟ་བས་དག་པར་སེམས་ཏེ། བདག་གིས་ཀྱང་ཐམས་ཅད་ཀྱི་ཐམས་ཅད་དུ་ཟས་མི་ཟ་བར་ནན་ཏན་བྱའོ་སྙམ་ནས་དགེ་སློང་དག་དེ་ནས་ཟས་མི་ཟ་བར་འདུག་གོ། །དགེ་སློང་དག་ངས་ཟས་མ་ཟོས་པས་ལུས་ཤིན་ཏུ་སྐམས་ཤིང་ཉམ་ཆུང་བ་དང་རིད་པར་གྱུར་ཏོ། །འདི་ལྟ་སྟེ་དཔེར་ན་ལྡུམ་བུ་ཨ་སི་ཏ་ཀའི་ཚིགས་པ་དང ། ཀ་ལི་ཀའི་ཚིགས་པ་བས་ཀྱང་ཉིས་འགྱུར་དང ། སུམ་འགྱུར་དང ། བཞི་འགྱུར་དང ། ལྔ་འགྱུར་དང ། བཅུ་འགྱུར་གྱིས་ངའི་ཡན་ལག་དང ། ཉིང་ལག་སྐེམས་པར་གྱུར་ཏེ། འདི་ལྟ་སྟེ་རྩིབ་ལོགས་ནི་སྲོག་ཆགས་ཀར་ཀ་ཏ་ཀའི་རྩིབ་ལོགས་དང ། བཞོན་པའི་བྲེས་ཁང་ལྟ་བུར་གྱུར་ཏོ། །སྒལ་ཚིགས་ནི་ལན་བུ་བླས་པ་ལྟ་བུར་གྱུར་ཏོ། །མགོའི་ཐོད་པ་ནི་ཀུ་བ་ཁ་བོ་ལྟ་བུར་གྱུར་ཏོ། །མིག་གི་འབྲས་བུ་ནི་ཁྲོན་པའི་སྐར་མ་ལྟ་བུར་གྱུར་ཏོ། །དགེ་སློང་དག་ང་ལེགས་པར་ལྡང་ངོ་སྙམ་ནས་ལུས་ཀྱིས་བསྐྱོད་ན། སྒུར་པོར་གྱུར་ཏེ་འགྱེལ་ཏོ། །ཤ་ཐང་སྟེ་ལངས་ནས་རྡུལ་གྱིས་ལུས་ཡོག་པ། ལག་པས་ཕྱིས་པ་དང ། བ་སྤུ་རུལ་པ་ཐམས་ཅད་ལུས་ལས་ལྷགས་སོ། །གང་སྔོན་ང་ཁ་དོག་མཛེས་ཤིང་འཇམ་པར་གྱུར་པ་དེ་ཡང་འདི་ལྟར་བདག་ཉིད་སྤོང་བ་རྩུབ་པོར་བཏང་བའི་ཕྱིར་མེད་པར་གྱུར་ཏོ། །ངའི་སྤྱོད་ཡུལ་གྱི་གྲོང་ན་གནས་པའི་སྐྱེ་བོ་ཉེན་ཀོར་བ་རྣམས་ཀྱང ། འདི་ལྟར་ཨེ་མའོ་དགེ་སྦྱོང་གཽ་ཏ་མ་ནི་གནག་གོ། །ེ་མའོ་དགེ་སྦྱོང་གཽ་ཏ་མ་ནི་སྔོ་བསངས་སོ། །ེ་མའོ་དགེ་སྦྱོང་གཽ་ཏ་མ་ནི་ཉ་མང་གུ་རའི་མདོག་འདྲའོ། །སྔོན་འདིའི་ཁ་དོག་མཛེས་པ་གསལ་བར་གྱུར་པ་དེ་ཡང་མེད་པར་གྱུར་ཏོ། །སྙམ་དུ་ཤེས་སོ། །དེའི་ཚེ་རྒྱལ་པོ་ཟས་གཙང་མ་ཡང་ཉིན་རེ་ཞིང་བྱང་ཆུབ་སེམས་དཔའི་དྲུང་དུ་ཕོ་ཉ་གཏོང་ངོ ། །དགེ་སློང་དག་དེ་ལྟར་ན་བྱང་ཆུབ་སེམས་དཔའ་སྔ་མ་བཞིན་དུ་འཇིག་རྟེན་དུ་བྱ་བ་རྨད་དུ་བྱུང་བ་བསྟན་པ་དང ། བྱ་བ་ཉམས་པའི་སེམས་ཅན་རྣམས་ལས་དང་བྱ་བ་ལ་གཟུད་པ་དང ། བསོད་ནམས་ཀྱི་ཚོགས་རྣམས་བརྗོད་པ་དང ། ཡེ་ཤེས་ 41.144b ཆེན་པོའི་ཡོན་ཏན་བསྟན་པ་དང ། བསམ་གཏན་གྱི་ཡན་ལག་རྣམས་རྣམ་པར་དབྱེ་བའི་ཕྱིར་ཏིལ་འབྲུ་གཅིག་དང ། རྒྱ་ཤུག་འབྲུ་གཅིག་དང ། འབྲས་འབྲུ་གཅིག་གིས་ལོ་དྲུག་གི་བར་དུ་དཀའ་བ་སྤྱོད་པ་བསྟན་ཏེ་ཡིད་དམན་པ་མེད་དོ། །བྱང་ཆུབ་སེམས་དཔའ་ལོ་དྲུག་གི་བར་དུ་སྐྱིལ་མོ་ཀྲུང་བཅས་ནས། ཇི་ལྟར་འདུག་པ་བཞིན་དུ་གནས་ཏེ། སྤྱོད་ལམ་ཉམས་པ་མེད་དོ། །ཉི་མས་བབ་ནས་ཀྱང་གྲིབ་མ་ལ་མ་སོང་ངོ ། །གྲིབ་མ་ལས་ཀྱང་ཉི་མ་ལ་མ་སོང་ངོ ། །རླུང་དང་ཉི་མ་དང་ཆར་པའི་སྐྱབས་མ་བཙལ་ཏོ། །ཤ་སྦྲང་དང ། སྦྲང་བུ་དང ། སྡིག་སྦྲུལ་མ་བསྐྲད་དོ། །བཤང་བ་དང ། གཅི་བ་དང ། མཆིལ་མ་དང ། སྣབས་མ་བོར་རོ། །བསྐུམ་པ་དང ། སྨྱང་བ་མ་བྱས་སོ། །གློས་ཕབ་པ་འམ། ཁས་བུབ་འམ། གན་རྐྱལ་མ་ཡིན་པར་གནས་པས་གནས་སོ། །སྤྲིན་ཆེན་པོ་དང ། ཡུལ་ངན་ཆེན་པོ་དང ། ཆར་པ་དང ། སེར་བ་དང ། སྟོན་དང ། དཔྱིད་དང ། དགུན་གང་ཡིན་པ་དེ་དག་གིས་ཀྱང་བྱང་ཆུབ་སེམས་དཔའི་ལུས་ལ་མ་ཕོག་གོ། །ཐ་ན་བྱང་ཆུབ་སེམས་དཔས་ལག་པས་ཀྱང་མ་བསྐྱབས་སོ། །དབང་པོ་ཡང་མ་བཀག་གོ། །དབང་པོའི་ཡུལ་ཡང་མ་བླངས་སོ། །གང་དག་དེར་འོང་བ་གྲོང་གི་གཞོན་ནུ་འམ། གྲོང་གི་གཞོན་ནུ་མ་འམ། བ་ལང་རྫི་འམ། ཕྱུགས་རྫིའམ། རྩཝ་ཐུན་ནམ། ཤིང་ཐུན་ནམ། ལྕི་ཐུན་དེ་དག་ཀྱང་བྱང་ཆུབ་སེམས་དཔའ་ལ་རྡུལ་ཁྲོད་ཀྱི་འདྲེ་ཡིན་པ་སྙམ་དུ་སེམས་ཤིང་དེ་ལ་རྩེན་ཏེ། དེ་ལས་ས་སྐུད་དོ། །དེར་བྱང་ཆུབ་སེམས་དཔའ་ལོ་དྲུག་པོ་དེ་དག་གིས་ལུས་ངན་པ་དང ། གོད་པ་དང་རིད་པར་གྱུར་ཏེ། དེའི་རྣ་བ་གཉིས་སུ་རྩཝ་འམ་ཤིང་བལ་བཅུག་ནས་སྣའི་བུ་ག་གཉིས་སུ་འབྱིན་ཏོ། །སྣའི་བུ་ག་གཉིས་སུ་བཅུག་ནས་རྣ་བའི་བུ་ག་གཉིས་སུ་འབྱིན་ཏོ། །རྣ་བའི་བུ་ག་གཉིས་སུ་བཅུག་ནས་ཁར་འབྱིན་ཏོ། །ཁར་བཅུག་ནས་རྣ་བ་དང་སྣའི་བུ་གར་འབྱིན་ཏོ། །སྣར་བཅུག་ནས་རྣ་བ་དང་སྣ་དང་ཁར་འབྱིན་ཏོ། །ལྷ་དང་ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་གང 41.145a དག་བྱང་ཆུབ་སེམས་དཔའི་ཡོན་ཏན་མངོན་སུམ་དུ་གྱུར་པ་དེ་དག་ཉིན་མཚན་དུ་གནས་ཤིང་བྱང་ཆུབ་སེམས་དཔའ་ལ་མཆོད་པ་བྱེད་དོ། །སྨོན་ལམ་ཡང་འདེབས་སོ། །དེ་ན་བྱང་ཆུབ་སེམས་དཔའ་ལོ་དྲུག་གི་བར་དུ་དཀའ་བ་སྤྱོད་པ་སྟོན་ཅིང་ལྷ་དང་མི་ཁྲག་ཁྲིག་ཕྲག་བཅུ་གཉིས་ཚང་བ་དག་ཐེག་པ་གསུམ་ལ་ཡོངས་སུ་སྨིན་པར་བྱས་སོ། །དེ་ལ་འདི་སྐད་ཅེས་བྱ་སྟེ། བྱང་ཆུབ་སེམས་དཔའ་ཁྱིམ་བྱུང་བ། །ཡོན་ཏན་དག་དང་ལྡན་པ་དེ། །སེམས་ཅན་དོན་དང་ཕན་པའི་ཕྱིར། །ཐབས་དང་ལྡན་པའི་བསམ་པ་སྐྱེས། །སྙིགས་མ་ལྔ་ཡི་དུས་ཀྱི་ཚེ། །ཆོས་དམའ་མོས་པའི་འཇིག་རྟེན་པོ། །ལས་དང་བྱ་བོར་འཇིག་རྟེན་དུ། །འཛམ་བུའི་གླིང་འདིར་སྐྱེས་པར་གྱུར། །མུ་སྟེགས་ཚོགས་ཀྱིས་རབ་ཏུ་གང ། །ལྟད་མོ་དང་ནི་ལྟས་སུ་ལྟ། །ལུས་ལ་གནོད་པ་བྱ་བ་བྱེད། །བྱིས་པ་དེ་དག་དག་པར་སེམས། །གཡང་ས་མེ་དང་མྱ་ངམ་འཇུག་།སྒྲེན་མོ་ས་དང་ལྕི་བས་སྐུད། །ལུས་ནི་ཡོངས་སུ་གདུང་བའི་ཕྱིར། །གདུང་བ་ལྔ་ལ་བརྩོན་དང་ལྡན། །ལག་པ་བརྐྱང་སྟེ་རྒྱུ་བ་དང ། །མི་མཁས་ཁ་ཅིག་ལག་པ་ལྡག་།བུམ་པ་ཁར་གཞོང་ལས་མི་ལེན། །སྒོ་དང་ཀ་བས་ཆོད་མི་ལེན། །གང་ན་ཁྱི་ཡོད་པ་ནས་མིན། །འདུག་ཅེ་འམ་ཚུར་ཤོག་ཅེས་ལས་མིན། །ཁྱིམ་ནས་ཁ་ཟས་གཅིག་ལེན་པས། །བདག་ནི་དག་པར་འགྱུར་སྙམ་སེམས། །མར་དང་འབྲུ་མར་བུ་རམ་ཞོ། །ཉ་དང་ཤ་དང་འོ་མ་སྤོང ། །ལྡམ་ལྡུམ་སྲེ་ད་པད་མའི་རྩ། །གཟེགས་དང་བ་ལང་ལྕི་བ་ཟ། །རྩ་བ་འབྲས་བུ་ལོ་མ་ཟ། །ཀུ་ཤ་ཚལ་བུ་ལ་བ་ལྤགས། །སྲེལ་བྱེད་ཁ་ཅིག་སྒྲེན་མོར་རྒྱུ། །གླེན་པ་འདི་བདེན་གཞན་བརྫུན་སྙམ། །ལག་པ་སྒྲེང་བར་བྱེད་པ་དང ། །སྐྲ་བསྒྲེང་རལ་པ་བསྒྲེང་བ་དག་།ལམ་ལས་རབ་ཏུ་རྣམ་པར་ཉམས། །ལམ་མིན་གནས་ཤིང་བདེ་འགྲོ་འདོད། །རྩཝ་དང་གཏུན་ཤིང་ཐལ་བར་ཉལ། །ཚེར་མར་ཉལ་ཞིང་ཙོག་པུར་འདུག་།ཁ་ཅིག་རྐང་པ་གཅིག་པུས་འགྲེང ། །གདོང་བསྟོད་ཉི་དང་ཟླ་ལ་ལྟ། །ཆུ་མིག་མཚོ་དང་ལྟེང་ཀ་དང ། །རྒྱ་མཚོ་ཆུ་བོ་ཉི་ཟླ་དང ། ། 41.145b ཤིང་དང་རི་ཡི་རྩེ་མོ་དང ། །རྫ་དང་ས་ལ་ཕྱག་ཀྱང་འཚལ། །གླེན་པ་དེ་དག་གནོད་མང་གིས། །ལུས་ནི་ཡོངས་སུ་སྐམས་པར་བྱེད། །ལོག་པར་ལྟ་དང་ལྡན་པ་དག་།མྱུར་དུ་ངན་སོང་རྣམས་སུ་ལྟུང ། །ང་ནི་དཀའ་ཐུབ་བརྟུལ་ཞུགས་དང ། །དཀའ་སྤྱད་གང་ཞིག་ལྷ་དང་མིས། །སྤྱད་པར་ནུས་པ་མ་ཡིན་པའི། །དཀའ་སྤྱད་དྲག་པོ་རྩོམ་སྙམ་སེམས། །བསམ་གཏན་གང་ཞིག་རང་རྒྱལ་གྱིས། །བལྟ་བར་ནུས་པ་མ་ཡིན་པ། །རྡོ་རྗེ་ལྟ་བུར་བརྟན་གནས་པ། །མཁའ་ཁྱབ་བསམ་གཏན་བསམ་གཏན་བྱེད། །མུ་སྟེགས་བརྟུལ་ཞུགས་ངན་པ་ཡིས། །དགའ་བའི་ལྷ་མི་འདི་ན་ཡོད། །དེ་དག་ཡོངས་སུ་སྨིན་བྱའི་ཕྱིར། །དཀའ་སྤྱད་བརྟུལ་ཞུགས་དྲག་པོ་བརྩམས། །ས་སྟེང་ཅི་ཡང་མ་བཏིང་བར། །སྐྱིལ་མོ་ཀྲུང་ནི་བཅས་ཏེ་འདུག་།རྒྱ་ཤུག་ཏིལ་དང་འབྲས་འབྲུ་གཅིག་།ཟ་བའི་ཆོ་ག་རྣམ་པར་སྟོན། །དབུགས་དབྱུང་བརྔུབ་པ་རྣམ་པར་སྤངས། །སྟོབས་དང་ལྡན་པ་གཡོ་བ་མེད། །ལོ་དྲུག་བར་དུ་བསམ་གཏན་མཆོག་།ནམ་མཁའ་ཁྱབ་ལ་བསམ་གཏན་བྱེད། །རྟོག་དང་རྣམ་པར་རྟོག་མེད་པ། །གཡོ་བ་མེད་ཅིང་སེམས་རྒྱུ་མེད། །ནམ་མཁའི་ཁམས་སུ་ཁྱབ་པ་ཡི། །མཁའ་ཁྱབ་བསམ་གཏན་བསམ་གཏན་བྱེད། །དེ་ནི་ཉིན་ལས་གྲིབ་མར་རམ། །གྲིབ་ལས་ཉི་མར་སོང་མ་བྱས། །ལྷུན་པོ་ལྟ་བུར་མི་གཡོ་བའི། །མཁའ་ཁྱབ་བསམ་གཏན་བསམ་གཏན་བྱེད། །རླུང་དང་ཆར་དང་ཤ་སྦྲང་དང ། །སྡིག་སྦྲུལ་སྦྲང་བུ་སྐྱོབ་མི་བྱེད། །རྣམ་པར་མ་འཁྲུགས་སྤྱོད་པ་ཡིས། །མཁའ་ཁྱབ་བསམ་གཏན་བསམ་གཏན་བྱེད། །བདག་ཉིད་གཅིག་པུའི་དོན་གྱི་ཕྱིར། །མཁའ་ཁྱབ་བསམ་གཏན་བྱེད་པ་མིན། །གཞན་དུ་སྙིང་རྗེ་སེམས་ཀྱིས་ནི། །འཇིག་རྟེན་དོན་མང་ཆེད་དུ་བསྒོམ། །གྲོང་གི་བྱིས་པ་བ་ལང་རྫི། །ཤིང་ཐུན་དག་དང་རྩཝ་ཐུན་དག་།དེ་ལ་རྡུལ་ཁྲོད་འདྲེ་སྙམ་སེམས། །དེ་ལ་ས་ཡིས་སྐུད་བྱེད་ཅིང ། །མི་གཙང་བ་ཡང་འཐོར་བར་བྱེད། །དེ་དག་གནོད་པ་མང་བྱེད་ཀྱང ། །གཡོ་བ་མེད་ཅིང་འཁྲུགས་མེད་པར། །མཁའ་ཁྱབ་བསམ 41.146a གཏན་བསམ་གཏན་བྱེད། །མཐོ་བ་མེད་ཅིང་དམའ་བ་མེད། །ལུས་མ་བསྲུངས་པར་ཆོས་མ་རེག་།བཤང་བ་མི་བྱེད་གཅི་མི་བྱེད། །སྒྲ་ཡིས་མི་འཇིགས་གཞན་མི་ལྟ། །ཤ་དང་ཁྲག་རྣམས་སྐམས་གྱུར་ཏེ། ལྤགས་པ་རྩ་རྒྱུས་རུས་པ་ལུས། །སྒལ་ཚིགས་དག་ནི་ལྟོ་བར་སྣང ། །ལན་བུ་བླས་པ་ཅི་བཞིན་ནོ། །གང་དག་ལྷག་པར་བྱས་ལྷ་དང ། །ལྷ་མིན་གནོད་སྦྱིན་དྲི་ཟ་ཀླུ། །ཡོན་ཏན་ལྡན་པ་མངོན་སུམ་བས། །ཉིན་དང་མཚན་དུ་མཆོད་པ་བྱེད། །ཇི་ལྟར་མཁའ་འདྲའི་སེམས་ལྡན་འདི། །མཁའ་ཁྱབ་བསམ་གཏན་བསམ་གཏན་བྱེད། །དེ་འདྲར་བདག་ཅག་མྱུར་གྱུར་ཅེས། །སྨོན་ལམ་དག་ཀྱང་འདེབས་པར་བྱེད། །སྙིང་རྗེའི་བློ་ཡིས་འཇིག་རྟེན་གྱི། །དོན་མང་ཕྱིར་བྱེད་མ་གཏོགས་པར། །བདག་ཕྱིར་མ་ཡིན་བདེ་བློས་མིན། །བསམ་གཏན་རོ་ནི་མྱང་ཕྱིར་མིན། །ཕས་ཀྱི་རྒོལ་བ་རབ་ཏུ་བཅོམ། །མུ་སྟེགས་བློ་ཉམས་ཟིལ་གྱིས་མནན། །མགོ་རེག་བྱང་ཆུབ་ག་ལ་ཡོད། །བྱང་ཆུབ་བསྐལ་མང་རྙེད་དཀའ་ཞེས། །འོད་སྲུང་ལ་ནི་ཚིག་སྨྲས་པའི། །ལས་དང་བྱ་བ་རབ་ཏུ་བསྟན། །སྐྱེ་བོ་དག་ནི་དགའ་བྱའི་ཕྱིར། །མཁའ་ཁྱབ་བསམ་གཏན་བསམ་གཏན་བྱེད། །ལྷ་མི་ཁྲག་ཁྲིག་བཅུ་གཉིས་ཚང ། །ཐེག་པ་གསུམ་ལ་རབ་ཏུ་བཏུལ། །དེ་ཡི་ཆེད་དུ་བློ་གྲོས་བཟང ། །མཁའ་ཁྱབ་བསམ་གཏན་བསམ་གཏན་བྱེད། །དཀའ་བ་སྤྱད་པའི་ལེའུ་ཞེས་བྱ་བ་སྟེ། བཅུ་བདུན་པའོ།། །། དགེ་སློང་དག་བདུད་སྡིག་ཅན་ཡང་བྱང་ཆུབ་སེམས་དཔའ་ལོ་དྲུག་གི་བར་དུ་དཀའ་བ་སྤྱད་པ་སྤྱོད་པའི་ཚེ་ཕྱི་བཞིན་འབྲང་སྟེ། གླགས་བལྟས་སྐབས་བཙལ་ཀྱང་ནམ་ཡང་གླགས་ཅུང་ཟད་ཀྱང་མ་རྙེད་དོ། །དེ་གླགས་མ་རྙེད་ནས་ཡི་ཆད་དེ་ཡིད་ལ་གཅགས་བཞིན་དུ་སོང་ངོ ། །དེ་ལ་འདི་སྐད་ཅེས་བྱ་སྟེ། དགོན་པ་ཉམས་ནི་དགའ་བ་དང ། །ནགས་ཚལ་གེལ་པ་སྒྲ་མེད་དང ། །ལྟེང་རྒྱས་ཀྱི་ནི་ཤར་ཕྱོགས་ན། །ཆུ་ཀླུང་ནཻ་རན་ཛ་ན་དེར། །སྤོང་བའི་ཕྱིར་ནི་བརྩོན་པར་བྱས། །རྟག་ཏུ་མཐུ་རྩལ་བརྟན་པ་པོ། །གྲུབ་དང་བདེ་བ་ཐོབ 41.146b བྱའི་ཕྱིར། །བརྩོན་པས་རབ་ཏུ་རྟུལ་དེ་ལ། །བདུད་ནི་འཇམ་ཞིང་སྙན་པའི་ཚིག་།སྨྲ་བར་བྱེད་ཅིང་འོངས་པར་གྱུར། །ཀྱེ་སྲོག་གཅེས་ཀྱིས་འཚོ་བར་གྱིས། །གསོན་ན་ཆོས་ནི་སྤྱོད་པར་འགྱུར། །གསོན་ཚེ་བྱ་བ་གང་ཡོད་པ། །དེ་དག་བྱས་ན་མྱ་ངན་མེད། །ཁྱོད་ནི་མདོག་ཉམས་དམན་པར་གྱུར། །ཁྱོད་ནི་ཤི་ལ་ཐུག་ཅིང་འདུག་།འཆི་བའི་ཆ་ནི་སྟོང་སྙེད་ཙམ། །ཆ་གཅིག་ཙམ་ཅིག་གསོན་པར་ཟད། །སྦྱིན་པ་དག་ནི་རྟག་ཏུ་བྱིན། །མེ་ཡི་སྦྱིན་སྲེག་སྦྱིན་བསྲེག་བྱོས། །འོན་ཀྱང་བསོད་ནམས་ཆེན་པོར་འགྱུར། །སྤོང་བ་ཡིས་ནི་ཅི་ཞིག་བྱ། །སྤོང་བའི་ལམ་ནི་སྡུག་བསྔལ་ཏེ། །སེམས་དུལ་བ་ནི་བྱ་དཀའ་ཞེས། །དེ་ཚེ་བདུད་ཀྱིས་དེ་སྐད་ཚིག་།བྱང་ཆུབ་སེམས་དཔའ་དེ་ལ་སྨྲས། །དེ་སྐད་སྨྲ་བའི་བདུད་དེ་ལ། །བྱང་ཆུབ་སེམས་དཔས་འདི་སྐད་སྨྲས། །སྡིག་ཅན་མྱོས་པའི་རྩ་ལག་པོ། །ཁྱོད་ནི་རང་གི་དོན་ཕྱིར་འོངས། །ང་ལ་བསོད་ནམས་ཆུང་ཟད་ཀྱང ། །དོན་དུ་གཉེར་བ་མེད་དོ་བདུད། །གང་དག་བསོད་ནམས་དོན་དུ་གཉེར། །དེ་ལ་དེ་སྐད་སྨྲ་བའི་རིགས། །འཚོ་བའི་མཐའ་ནི་འཆི་ཡིན་པས། །མི་འཆི་སྙམ་དུ་ང་མི་སེམས། །ཚངས་པར་སྤྱོད་ལ་གཞོལ་གྱུར་པས། །ཕྱིར་ལྡོག་པར་ནི་མི་བྱའོ། །ཆུ་ཀླུང་དག་གི་ཆུ་རྒྱུན་ཀྱང ། །རླུང་གིས་རྣམ་པར་སྐེམས་བྱེད་ན། །སྤངས་པ་ཉིད་ཀྱི་ཁྲག་ཙམ་ལྟ། །འདི་ཡིས་ཅི་ཕྱིར་སྐམས་མི་འགྱུར། །ཁྲག་ནི་སྐམས་པར་གྱུར་པ་དང ། །དེ་ཡི་འོག་ཏུ་ཤ་སྐམས་འགྱུར། །ཤ་ནི་ཟད་པར་གྱུར་པ་དང ། །ཕྱིར་ཞིང་སེམས་ནི་དང་བར་འགྱུར། །ཕྱིར་ཞིང་འདུན་དང་བརྩོན་འགྲུས་དང ། །ཏིང་ངེ་འཛིན་ཀྱང་གནས་པར་འགྱུར། །ང་ནི་དེ་ལྟར་གནས་པས་ན། །ཚོར་བ་དམ་པ་ཐོབ་གྱུར་ཀྱང ། །ལུས་དང་སྲོག་ལ་མི་ལྟ་སྟེ། །སྲན་ཐུབ་དག་པར་གྱུར་ལ་ལྟོས། །ང་ལ་འདུན་པ་ཡོད་གྱུར་ཅིང ། །བརྩོན་འགྲུས་དང་ནི་ཤེས་རབ་ཡོད། །ང་ཡི་བརྩོན་འགྲུས་བསྐྱོད་ནུས་པ། །འཇིག་རྟེན་དེ་ནི་ངས་མ་མཐོང ། །སྲོག་ཆད་ཤི་བ་ཆེས་བླ་སྟེ། །འཚོ་བ་ངན་པ་དེ་ལྟ་མིན། །གཡུལ་ངོར་ཤི་བ 41.147a ལེགས་པ་སྟེ། །ཕམ་ནས་གསོན་པ་དེ་ལྟ་མིན། །སྡར་མ་དཔུང་ལས་མི་རྒྱལ་ཏེ། །དཔའ་བོ་དཔུང་ལས་རྒྱལ་བར་འགྱུར། །རྒྱལ་ཡང་དེ་ནི་རློམ་སེམས་མེད། །བདུད་ཁྱོད་ལས་ནི་མྱུར་རྒྱལ་བྱ། །འདོད་པ་ཁྱོད་ཀྱི་དང་པོའི་དཔུང ། །མི་དགའ་བ་ནི་གཉིས་པ་ཡིན། །ཁྱོད་ཀྱི་གསུམ་པ་བཀྲེས་དང་སྐོམ། །སྲེད་པ་དཔུང་ཚོགས་བཞི་པ་ཡིན། །རྨུགས་དང་གཉིད་ནི་ལྔ་པ་སྟེ། །འཇིགས་པ་དྲུག་པར་བརྗོད་པ་ཡིན། །ཁྱོད་ཀྱི་ཐེ་ཚོམ་བདུན་པ་སྟེ། །ཁྲོ་དང་འཆབ་པ་བརྒྱད་པ་ཡིན། །འཐོབ་དང་ཚིགས་བཅད་བཀུར་སྟི་དང ། །ལོག་པར་གྲགས་པ་གང་ཐོབ་དང ། །བདག་ལ་སྟོད་པར་བྱེད་པ་དང ། །གཞན་ལ་སྨོད་པར་བྱེད་པ་དང ། །དེ་དག་ནག་པོའི་རྩ་ལག་ཏུ། །ལྷུང་བའི་བདུད་ཀྱི་དཔུང་ཡིན་ནོ། །དགེ་སྦྱོང་བྲམ་ཟེ་ཁ་ཅིག་ནི། །འདི་ན་གླགས་ལྟ་འཁོད་པར་སྣང ། །ཁྱོད་དཔུང་གང་ཡིན་ལྷར་བཅས་ཀྱིས། །འཇིག་རྟེན་འདི་ནི་རབ་འདུལ་བ། །སོ་བཏང་མ་བྱས་སྣོད་ཆུས་བཞིན། །ཤེས་རབ་ཀྱིས་ནི་དེ་དག་གཞིག་།དྲན་པ་ལེགས་པར་ཉེར་བཞག་སྟེ། །ཤེས་རབ་ལེགས་པར་བསྒོམ་བྱས་ནས། །ཤེས་བཞིན་དུ་ནི་སྤྱོད་པར་བྱ། །བློ་ངན་ཁྱོད་ཀྱིས་ཅི་བྱར་ཡོད། །དེ་སྐད་ཅེས་སྨྲས་པ་དང ། བདུད་སྡིག་ཅན་སྡུག་བསྔལ་ཞིང་ཡིད་མི་བདེ་སྟེ། ཡི་མ་རངས་ནས་ཡིད་ལ་གཅགས་བཞིན་དུ་དེ་ཉིད་དུ་མི་སྣང་བར་གྱུར་ཏོ། །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་གཉིས་པ། དགེ་སློང་དག་དེ་ནས་བྱང་ཆུབ་སེམས་དཔའ་འདི་སྙམ་དུ་སེམས་ཏེ། དགེ་སྦྱོང་དང་བྲམ་ཟེ་གང་དག་ཁ་ཅིག་འདས་པ་དང ། མ་འོངས་པ་དང་ད་ལྟར་བྱུང་བའི་དུས་ན་བདག་ལ་གནོད་པ་བྱེད་པ་དང ། ལུས་ལ་གདུང་བ་བྱེད་དེ། སྡུག་བསྔལ་དྲག་པོ་ཚ་བ་མི་བཟད་པ། ཡིད་དུ་མི་འོང་བའི་ཚོར་བ་མྱོང་བར་བྱེད་པས་དེ་དག་ཤིན་ཏུ་སྡུག་བསྔལ་བ་མྱོང་ངོ་སྙམ་མོ། །དགེ་སློང་དག་ངས་འདི་སྙམ་དུ་བསམས་ཏེ། སྤྱོད་པ་འདི་དང་བསྒྲུབ་པ་འདིས་མིའི་ཆོས་བླ་མ་ལས་མཆོག་ཏུ་གྱུར་པ། འཕགས་པ 41.147b ཡེ་ཤེས་མཐོང་བའི་ཁྱད་པར་གང་ཡང་མངོན་དུ་མ་བྱས་ཏེ། འདི་ནི་བྱང་ཆུབ་ཀྱི་ལམ་མ་ཡིན། ལམ་འདི་ནི་མ་འོངས་པའི་སྐྱེ་བ་དང ། རྒ་བ་དང་འཆི་བ་འབྱུང་བ་ནུབ་པར་བྱེད་པ་མ་ཡིན་ཏེ། བྱང་ཆུབ་ཀྱི་ལམ་མ་འོངས་པའི་སྐྱེ་བ་དང ། རྒ་བ་དང་འཆི་བའི་སྡུག་བསྔལ་འབྱུང་བ་ནུབ་པར་བྱེད་པ་གཞན་ཞིག་ཡོད་དོ་སྙམ་མོ། །དགེ་སློང་དག་ངས་འདི་སྙམ་དུ་བསམས་ཏེ། ངས་ཕའི་བསྐྱེད་མོས་ཚལ་དུ་ཤིང་འཛམ་བུའི་གྲིབ་མ་ལ་འདུག་སྟེ། འདོད་པ་རྣམས་ལས་དབེན་པ། སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང ། བདེ་བ་ཅན་བསམ་གཏན་དང་པོ་ནས་བསམ་གཏན་བཞི་པའི་བར་དུ་བསྒྲུབས་ཏེ་གནས་པ་དེ་བྱང་ཆུབ་ཀྱི་ལམ་ཡིན་ཏེ་སྐྱེ་བ་དང ། རྒ་བ་དང་འཆི་བའི་སྡུག་བསྔལ་འབྱུང་བ་རྣམས་ནུབ་པར་འགྱུར་བ་ཡིན་སྙམ་ནས། དེ་བྱང་ཆུབ་ཀྱི་ལམ་ཡིན་ནོ་སྙམ་སྟེ། ངའི་རྣམ་པར་ཤེས་པ་དེའི་རྗེས་སུ་འབྲང་བར་གྱུར་ཏོ། །ངས་འདི་སྙམ་དུ་བསམས་ཏེ། འདི་ལྟར་ཉམ་ཆུང་བར་གྱུར་པས་ནི་ལམ་དེ་མངོན་པར་རྫོགས་པར་བྱང་ཆུབ་པར་བྱ་མི་ནུས་སོ། །གལ་ཏེ་ང་འདི་ལྟར་ལུས་ངན་ཅིང་ཉམ་ཆུང་བཞིན་དུ་མངོན་པར་ཤེས་པ་དང ། ཡེ་ཤེས་ཀྱི་སྟོབས་ཀྱིས་བྱང་ཆུབ་ཀྱི་སྙིང་པོར་སོང་ན་ནི་ངས་ཕྱི་མའི་སྐྱེ་བོ་ལ་སྙིང་བརྩེ་བ་བྱས་པར་མི་འགྱུར་ཏེ། འདི་ཡང་བྱང་ཆུབ་ཀྱི་ལམ་མ་ཡིན་གྱིས། ངས་ཁ་ཟས་རགས་པ་ཟོས་ལ་ལུས་ཀྱི་མཐུ་སྟོབས་བསྐྱེད་དེ། དེ་ནས་གདོད་བྱང་ཆུབ་ཀྱི་སྙིང་པོར་འགྲོའོ་སྙམ་མོ། །དགེ་སློང་དག་དེ་ན་ལྷའི་བུ་གང་དག་ངན་པ་ལ་མོས་པ་དེ་དག་གིས་ངའི་སེམས་ཀྱི་ཡོངས་སུ་རྟོག་པ་སེམས་ཀྱིས་ཤེས་ནས། ང་ག་ལ་བ་དེར་འོངས་ཏེ་ང་ལ་འདི་སྐད་ཅེས་སྨྲས་སོ། །སྐྱེས་བུ་དམ་པ་ཞལ་ཟས་རགས་པ་མ་གསོལ་ཅིག་།བདག་ཅག་གིས་བ་སྤུའི་ཁུང་བུར་མདངས་སྩལ་བར་བགྱིའོ། །དགེ་སློང་དག་ངས་འདི་སྙམ་དུ་བསམས 41.148a ཏེ། བདག་ནི་ཟས་མི་བཟའ་བར་བདག་ཉིད་ཀྱིས་དམ་བཅས་ལ། བདག་གི་སྤྱོད་ཡུལ་གྱི་གྲོང་ན་གནས་པའི་སྐྱེ་བོ་ཉེན་ཀོར་བ་རྣམས་ཀྱིས་ཀྱང ། འདི་ལྟར་དགེ་སྦྱོང་གཽ་ཏ་མ་ནི་ཟས་མི་ཟ་བ་ཡིན་པར་ཡང་ཤེས་ཏེ། ངན་པ་ལ་མོས་པའི་ལྷའི་བུ་འདི་དག་གིས་ངའི་བ་སྤུའི་ཁུང་བུར་མདངས་བཅུག་པར་གྱུར་ན། ངས་ཤིན་ཏུ་བརྫུན་སྨྲས་པར་གྱུར་ཏོ་སྙམ་སྟེ། དེ་ནས་བྱང་ཆུབ་སེམས་དཔས་བརྫུན་སྨྲ་བ་སྤང་བའི་ཕྱིར་ལྷའི་བུ་དེ་དག་གི་ཚིག་མ་མཉན་པར་ཁ་ཟས་རགས་པ་བཟའ་བར་སེམས་བཏུད་དོ། །དགེ་སློང་དག་དེ་ལྟར་བྱང་ཆུབ་སེམས་དཔས་ལོ་དྲུག་གི་བར་དུ་བརྟུལ་ཞུགས་དང་དཀའ་ཐུབ་ཉམས་སུ་བླངས་ནས། སྟན་དེ་ལས་ལངས་ཏེ། ཁ་ཟས་རགས་པ་འདི་ལྟ་སྟེ་བུ་རམ་གྱི་དབུ་བ་དང ། མོན་སྲན་སྡེའུ་ཡི་ཁུ་བཅུད་དང ། ཧར་ནུ་ཁའི་ཁུ་བཅུད་དང ། ཟན་དང ། འབྲས་ཅན་དང ། འདྲེན་མར་བཟའ་འོ་ཞེས་ཚིག་ཏུ་བརྗོད་དོ། །དགེ་སློང་དག་དེ་ནས་ལྔ་སྡེ་བཟང་པོ་དག་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མས་ལམ་འདི་དང་བསྒྲུབ་པ་འདིས་མིའི་ཆོས་བླ་མ་ལས་མཆོག་ཏུ་གྱུར་པ་འཕགས་པ་ཡེ་ཤེས་མཐོང་བའི་ཁྱད་པར་གང་ཡང་མངོན་དུ་བྱེད་མ་ནུས་ན་ཁ་ཟས་རགས་པ་འདི་ཟོས་ཏེ། བསོད་ཉམས་ལ་སྦྱོར་བ་དང་ལྡན་པར་གནས་པས་ཅི་ནུས་ཏེ་མི་གསལ་བ་བྱིས་པ་ཡིན་ནོ་སྙམ་དུ་བསམས་ནས་བྱང་ཆུབ་སེམས་དཔའི་གན་ནས་སོང་སྟེ། གྲོང་ཁྱེར་བཱ་ར་ཎ་སཱིར་སོང་ནས་དྲང་སྲོང་ལྷུང་བ་རི་དགས་ཀྱི་ནགས་སུ་གནས་སོ། །དེ་ན་བྱང་ཆུབ་སེམས་དཔའ་ཐོག་མ་ཉིད་དུ་དཀའ་བ་སྤྱད་པ་སྤྱོད་པ་ན་གྲོང་པའི་བུ་མོ་གཞོན་ནུ་བཅུས་བལྟ་བ་དང་ཕྱག་བྱ་བའི་ཕྱིར་བསྙེན་བཀུར་བྱས་སོ། །ལྔ་སྡེ་བཟང་པོ་དེ་དག་གིས་ཀྱང་རིམ་གྲོ་བྱས་ཤིང་རྒྱ་ཤུག་འབྲུ་གཅིག་དང ། འབྲས་འབྲུ་གཅིག་དང ། ཏིལ་འབྲུ་གཅིག་དབུལ་བ་ཡང་ཕུལ་ལོ། །གྲོང་པའི་བུ་མོ་བཅུ་ནི་བུ་མོ་སྟོབས་ལྡན་མ་ཞེས་བྱ་བ་དང ། སྟོབས་སྦེད་མ་དང ། ཤིན་ཏུ་སྡུག་དང ། སྡེ་ལས་རྣམ་པར་རྒྱལ་དང ། 41.148b ་ཏི་མུག་ཏ་ཀའི་ཕྲེང་བ་ཅན་དང ། མཛེས་མ་དང ། རྫ་བྱེད་མ་དང ། སྐྲ་ལྕང་ལོ་རྒྱས་དང ། རལ་བུ་ཅན་དང ། ལེགས་སྐྱེས་མ་ཞེས་བྱ་བ་སྟེ། གཞོན་ནུ་མ་དེ་དག་གིས་བྱང་ཆུབ་སེམས་དཔའི་ཚོད་མའི་རྣམ་པ་དེ་དག་ཐམས་ཅད་བྱས་ཏེ་ཕུལ་ལོ། །བྱང་ཆུབ་སེམས་དཔས་ཀྱང་དེ་དག་ཟོས་ནས་རིམ་གྱིས་སྤྱོད་ཡུལ་གྱི་གྲོང་དུ་བསོད་སྙོམས་སྤྱད་པས་མདོག་དང ། གཟུགས་དང ། སྟོབས་དང་ལྡན་པར་གྱུར་ཏོ། །དེ་ཚུན་ཆད་བྱང་ཆུབ་སེམས་དཔའ་ལ་དགེ་སྦྱོང་མཛེས་པ། དགེ་སྦྱོང་ཆེན་པོ་ཞེས་འཛེར་ཏོ། །དགེ་སློང་དག་དེ་ན་བྱང་ཆུབ་སེམས་དཔའ་དང་པོ་ཉིད་དུ་དཀའ་བ་སྤྱད་པ་སྤྱོད་པ་ན་བྱང་ཆུབ་སེམས་དཔས་བརྟུལ་ཞུགས་དང ། དཀའ་ཐུབ་ཉམས་འོག་ཏུ་ཆུད་པར་བྱ་བ་དང ། ལུས་རྟས་པར་བྱ་བའི་ཕྱིར་གྲོང་པའི་བུ་མོ་ལེགས་སྐྱེས་མས་ཉིན་གཅིག་བཞིན་དུ། བྲམ་ཟེ་བརྒྱད་བརྒྱ་ཟན་བྱིན་ཞིང་འདི་སྐད་དུ་བདག་གི་ཟས་ཟོས་པས་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཤོག་ཤིག་ཅེས་སྨོན་ལམ་ཡང་བཏབ་བོ། །དགེ་སློང་དག་ལོ་དྲུག་འདས་ནས། དགེ་སློང་དག་ངས་འདི་སྙམ་དུ་བསམས་ཏེ། གལ་ཏེ་བདག་གིས་འདོམས་ཡོག་འགའ་ཞིག་རྟེན་ན་རེ་སྟེས་སྙམ་མོ། །དགེ་སློང་དག་དེའི་ཚེ་གྲོང་པའི་བུ་མོ་ལེགས་སྐྱེས་མའི་བྲན་མོ་གྲུབ་མ་ཞེས་བྱ་བ་ཞིག་ཤི་ནས་དེ་ཤ་ནའི་རས་ཀྱིས་དཀྲིས་ཏེ། དུར་ཁྲོད་དུ་བོར་བར་གྱུར་པའི་ཕྱག་དར་ཁྲོད་པ་དེ་ངས་མཐོང་ནས། ངས་ཕྱག་དར་ཁྲོད་པ་དེ་བླང་བའི་ཕྱིར་རྐང་པ་གཡོན་པས་མནན་ཏེ། དགུས་ནས་ལག་པ་གཡས་པ་བརྐྱང་པ་དང ། དེ་ནས་ས་བླའི་ལྷས་བར་སྣང་གི་ལྷ་རྣམས་ལ་སྒྲ་བསྒྲགས་པ། གྲོགས་པོ་དག་འདི་ལྟར་རྒྱལ་པོ་ཆེན་པོའི་རིགས་སུ་སྐྱེས་པ་འཁོར་ལོས་བསྒྱུར་བའི་རྒྱལ་སྲིད་བོར་ཏེ། ཕྱག་དར་ཁྲོད་པ་ལ་སེམས་བཏུད་པ་ངོ་མཚར་ཏེ། གྲོགས་པོ་དག་འདི་ནི་རྨད་དུ་བྱུང་བའོ། །བར་སྣང་གི་ལྷ་རྣམས་ཀྱིས་ས་བླའི་ལྷ་རྣམས་ཀྱི་སྒྲ་ཐོས་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ལ་སྒྲ་བསྒྲགས་སོ། །རྒྱལ་ཆེན་བཞིའི་རིས་པས་ཀྱང་སུམ 41.149a བཅུ་རྩ་གསུམ་པ་ལའོ། །སུམ་བཅུ་རྩ་གསུམ་པས་ཀྱང་འཐབ་བྲལ་བ་ལའོ། །འཐབ་བྲལ་བས་ཀྱང་དགའ་ལྡན་པ་ལའོ། །དགའ་ལྡན་པས་ཀྱང་འཕྲུལ་དགའ་བ་ལའོ། །འཕྲུལ་དགའ་བས་ཀྱང་གཞན་འཕྲུལ་དབང་བྱེད་པ་ལའོ། །གཞན་འཕྲུལ་དབང་བྱེད་པས་ཀྱང་ཚངས་རིས་པའི་བར་དུའོ། །སྐད་ཅིག་དེ་དང ། ཐང་ཅིག་དེ་དང ། ཡུད་ཙམ་དེ་ལ་གྲོགས་པོ་དག་འདི་ལྟར་རྒྱལ་པོ་ཆེན་པོའི་རིགས་སུ་སྐྱེས་པ། འཁོར་ལོས་བསྒྱུར་བའི་རྒྱལ་སྲིད་བོར་ཏེ། ཕྱག་དར་ཁྲོད་པ་ལ་སེམས་བཏུད་པ་ངོ་མཚར་ཏེ། འདི་ནི་རྨད་དུ་བྱུང་བའོ་ཞེས་སྒྲ་གཅིག་དང ། བརྗོད་པ་གཅིག་འོག་མིན་གྱི་གནས་ཀྱི་བར་དུ་གྲགས་པར་གྱུར་ཏོ། །དེ་ནས་བྱང་ཆུབ་སེམས་དཔས་ཡང་འདི་སྙམ་དུ་བསམས་ཏེ། བདག་གིས་ཕྱག་དར་ཁྲོད་པ་ནི་རྙེད་ན། གལ་ཏེ་ཆུ་ཞིག་རྙེད་ན་རེ་སྟེས་སྙམ་མོ། །དེ་ནས་དེ་ཉིད་དུ་ལྷས་ལག་པ་ས་ལ་བརྡབས་པ་དང ། དེར་རྫིང་བུ་ཞིག་བྱུང་བར་གྱུར་ཏེ། དེང་སང་དུའང་ལག་པ་བརྡབས་པའི་རྫིང་ཞེས་གྲགས་སོ། །དེ་ནས་ཡང་བྱང་ཆུབ་སེམས་དཔས་འདི་སྙམ་དུ་བསམས་ཏེ། བདག་གིས་ཆུ་ནི་རྙེད་ན། གལ་ཏེ་ཕྱག་དར་ཁྲོད་པ་འདི་བདག་ཉིད་རྡོ་ལེབ་ཅིག་རྙེད་ན་རེ་སྟེས་སྙམ་པ་དང ། སྐད་ཅིག་དེ་ཉིད་ལ་བརྒྱ་བྱིན་གྱིས་དེར་རྡོ་ལེབ་བཞག་ནས། དེ་ལ་བྱང་ཆུབ་སེམས་དཔས་ཕྱག་དར་ཁྲོད་པ་དེ་བཀྲུས་སོ། །དེ་ནས་ལྷའི་རྒྱལ་པོ་བརྒྱ་བྱིན་གྱིས་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །སྐྱེས་བུ་དམ་པ་འདི་ཁོ་བོ་ལ་སྩོལ་ཅིག་དང་ཁོ་བོས་བཀྲུའོ། །དེ་ནས་བྱང་ཆུབ་སེམས་དཔས་རབ་ཏུ་བྱུང་བ་ནི་བདག་ཉིད་ཀྱིས་བྱ་བར་བསྟན་པའི་ཕྱིར་བརྒྱ་བྱིན་ལ་མ་བྱིན་པར་བདག་ཉིད་ཀྱིས་བཀྲུས་སོ། །དེ་ལུས་ངལ་ཏེ་ཆད་ནས་རྫིང་ནས་འབྱུང་སྙམ་པ་དང ། བདུད་སྡིག་ཅན་ཕྲག་དོག་གི་ཆོས་དང་ལྡན་པས་རྫིང་བུ་གང་བ་མཐོན་པོ་ཞིག་སྤྲུལ་ཏོ། །རྫིང་དེའི་འགྲམ་ན་ཤིང་སྒྲུབ་བྱེད་ཅེས་བྱ་བ་ཆེན་པོ་ཞིག་ཡོད་དོ། །བྱང་ཆུབ་སེམས་དཔའ་འཇིག་རྟེན་དང་འཐུན་པར་བྱ་བ་དང ། ལྷ་མོ་ལ་ཕན་གདགས་པའི་ཕྱིར་ཤིང་དེའི་ལྷ་མོ་ལ་སྨྲས་པ། ལྷ་མོ་ཤིང་གི་ཡལ 41.149b ག་སྨོད་ཅིག་།དེས་ཀྱང་ཤིང་ཡལ་ག་སྨད་ནས་བྱང་ཆུབ་སེམས་དཔའ་དེ་ལ་འཇུས་ཏེ་བྱུང་ངོ ། །བྱུང་ནས་ཀྱང་ཤིང་སྒྲུབ་བྱེད་དེའི་དྲུང་དུ་ཕྱག་དར་ཁྲོད་པ་ཆོས་གོས་སྣམ་སྦྱར་དུ་བྱས་ནས་དྲུབས་ཏེ། དེང་སུང་དུའང་དེ་ཕྱག་དར་ཁྲོད་པ་དྲུབས་པ་ཞེས་མིང་དུ་གྲག་གོ། །དེ་ནས་གནས་གཙང་མའི་རིས་ཀྱི་ལྷའི་བུ་འོད་དྲི་མ་མེད་པ་ཞེས་བྱ་བ་དེས། ལྷའི་གོས་ངུར་སྨྲིག་གི་ཚོན་དུ་བཙོས་པ་རུང་བ་དགེ་སྦྱོང་གི་ཚུལ་དང་འཐུན་པ་དག་བྱང་ཆུབ་སེམས་དཔའ་ལ་ཕུལ་ལོ། །བྱང་ཆུབ་སེམས་དཔས་ཀྱང་དེ་དག་བླངས་ཏེ། སྔ་དྲོ་ཤམ་ཐབས་དང་ཆོས་གོས་བགོས་ནས་སྤྱོད་ཡུལ་གྱི་གྲོང་དུ་ཕྱོགས་པ་དང ། དེ་ན་ལྷ་རྣམས་ཀྱིས་ལྟེང་རྒྱས་ཀྱི་སྡེ་དཔོན་གྱི་གྲོང་ན་དགའ་བྱེད་ཅེས་བྱ་བའི་གྲོང་མི་ཞིག་ཡོད་པའི་བུ་མོ་ལེགས་སྐྱེས་མ་ལ་ནམ་ཕྱེད་ཙམ་ན་སྨྲས་པ། ཁྱོད་ཀྱིས་གང་གི་ཕྱིར་མཆོད་སྦྱིན་བྱས་པ་དེ་བརྟུལ་ཞུགས་དེ་ཉམས་འོག་ཏུ་ཆུད་ནས་དེ་ཁ་ཟས་རགས་པ་བཟང་པོ་བཟའ་བར་སེམས་ཀྱིས། སྔོན་ཁྱོད་ཀྱིས་བདག་གི་ཟས་ཟོས་ནས་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཤོག་ཤིག་ཅེས་སྨོན་ལམ་བཏབ་པ་གང་ཡིན་པའི་ཁྱོད་ཀྱི་བྱ་བ་དེ་གྱིས་ཤིག་།དགེ་སློང་དག་དེ་ནས་གྲོང་མི་དགའ་བྱེད་ཀྱི་བུ་མོ་ལེགས་སྐྱེས་མས་ལྷ་དེ་དག་གི་ཚིག་དེ་ཐོས་ནས་མྱུར་བ་མྱུར་བར་བ་སྟོང་གི་འོ་མ་ལན་བདུན་དུ་སྙིང་ཀུར་བྱས་པ་བཟང་པོ་མཆོག་ཏུ་འགྱུར་བ་སྙིང་པོ་ཅན་བླངས་ཏེ། བླངས་ནས་ཀྱང་འོ་མ་དེ་འབྲས་སར་པ་སར་པ་དག་དང ། ཕྲུ་བ་སར་པར་བླུགས་ནས་ཐབ་སར་པར་བཙུགས་ཏེ། ཁ་ཟས་དེ་སྒྲུབ་བོ། །དེ་སྒྲུབ་པ་ན་སྔ་ལྟས་འདི་དག་སྣང་སྟེ། འོ་མ་དེའི་ནང་ན་དཔལ་བེའུ་དང ། བཀྲ་ཤིས་པ་དང ། གཡུང་དྲུང་འཁྱིལ་པ་དང ། པད་མ་དང ། སྡོང་རིས་ལ་སོགས་པ་བཀྲ་ཤིས་རྣམས་སྣང་ངོ ། །དེ་ནས་དེས་འདི་སྙམ་དུ་བསམས་ཏེ། ལྟས་འདི་ལྟ་བུ་འདི་དག་སྣང་བ་ལས་ན། བྱང་ཆུབ་སེམས་དཔས་ཟས་ཟོས་ནས་བྱང་ཆུབ་འཐོབ་པར་འགྱུར་དུ་ཐེ་ཙོམ་མེད་དོ་སྙམ་པ་དང ། རྒྱ་མཚོ་པ་ཤེས་ཤིང་ཆོ་ག་ཤེས 41.150a པའི་མཚན་མཁན་ཕྱོགས་དེར་ཕྱིན་པར་གྱུར་ནས། དེས་ཀྱང་བདུད་རྩི་འཐོབ་པ་ཉིད་དུ་ལུང་བསྟན་ཏོ། །དེ་ནས་ལེགས་སྐྱེས་མས་ཐུག་པ་དེ་ཚོས་པ་དང་ཐང་ལ་བཞག་སྟེ། མེ་ཏོག་གིས་གཏོར། སྤོས་ཆུས་གཏོར་ནས་གུས་པར་སྟན་བཏིང་སྟེ། བྲན་མོ་གོང་མ་ཞེས་བྱ་བ་ལ་སྨྲས་པ། གོང་མ་སོང་ལ་བྲམ་ཟེ་བོས་ཤིག་།ངས་ནི་འོ་ཐུག་སྦྲང་རྩི་ཅན་འདི་བལྟའོ། །ཇོ་མོ་ལེགས་སོ་ཞེས་དེའི་ལྟར་མཉན་ནས། ཤར་ཕྱོགས་ལོགས་སུ་སོང་བ་དང ། དེས་བྱང་ཆུབ་སེམས་དཔའ་མཐོང་ངོ ། །དེ་བཞིན་དུ་ལྷོ་ཕྱོགས་ལོགས་སུ་སོང་ན་ཡང་བྱང་ཆུབ་སེམས་དཔའ་མཐོང་ངོ ། །དེ་བཞིན་དུ་ནུབ་དང་བྱང་ཕྱོགས་ལོགས་སུ་སོང་ན་ཡང་དེ་དང་དེར་དེས་བྱང་ཆུབ་སེམས་དཔའ་མཐོང་ངོ ། །དེའི་ཚེ་ན་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་གཞན་མུ་སྟེགས་ཅན་ཐམས་ཅད་ཚར་བཅད་པར་གྱུར་པས་འགའ་ཙམ་ཡང་མི་སྣང་ངོ ། །དེ་ནས་དེ་སླར་ལོག་སྟེ་ཇོ་མོ་ལ་འདི་སྐད་ཅེས་སྨྲས་སོ། །གང་དང་གང་དུ་མཆིས་ཀྱང་དེ་དང་དེ་ན་དགེ་སྦྱོང་མཛེས་པ་གདའ་བ་ལས། དགེ་སྦྱོང་ངམ་བྲམ་ཟེ་གཞན་ནི་འགའ་ཡང་མི་གདའོ། །ལེགས་སྐྱེས་མས་སྨྲས་པ། དེ་ཉིད་བྲམ་ཟེ་ཡིན་ཏེ། དེའི་ཕྱིར་འདི་བརྩམས་ཀྱིས། གོང་མ་སོང་ལ་དེ་ཉིད་བོས་ཤིག་།ཇོ་མོ་ལེགས་སོ་ཞེས་སྨྲས་ཏེ། གོང་མ་སོང་ནས་བྱང་ཆུབ་སེམས་དཔའི་རྐང་པ་གཉིས་ལ་གཏུགས་ཏེ་ལེགས་སྐྱེས་མ་ཞེས་བགྱི་བས་སྤྱན་འདྲེན་ཏོ་ཞེས་སྨྲས་སོ། །དགེ་སློང་དག་དེ་ནས་བྱང་ཆུབ་སེམས་དཔའ་གྲོང་པའི་བུ་མོ་ལེགས་སྐྱེས་མའི་ཁྱིམ་དུ་སོང་སྟེ་སྟན་བཏིང་བ་ལ་འདུག་གོ། །དགེ་སློང་དག་དེ་ནས་དེ་དག་གྲོང་པའི་བུ་མོ་ལེགས་སྐྱེས་མས་འོ་ཐུག་སྦྲང་རྩི་ཅན་གྱིས་གསེར་གྱི་སྣོད་ཆེན་པོ་བཀང་སྟེ། བྱང་ཆུབ་སེམས་དཔའ་ལ་ཕུལ་ལོ། །དེ་ནས་བྱང་ཆུབ་སེམས་དཔས་འདི་སྙམ་དུ་བསམས་ཏེ། ལེགས་སྐྱེས་མས་ཁ་ཟས་འདི་ལྟ་བུ་འདི་བྱིན་པ་འདི་བདག་གིས་དེང་ཟོས་ཏེ། ཐེ་ཙོམ་མེད་པར་བླ་ན་མེད་པ་ཡང་དག་པར་རྫོགས 41.150b པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་སྙམ་མོ། །དེ་ནས་བྱང་ཆུབ་སེམས་དཔས་ཟས་དེ་བླངས་ནས་གྲོང་པའི་བུ་མོ་ལེགས་སྐྱེས་མ་ལ་འདི་སྐད་ཅེས་སྨྲས་སོ། །ཆེ་ཞེ་གསེར་གྱི་སྣོད་ཆེན་པོ་འདི་ཇི་ལྟར་བྱ། དེས་སྨྲས་པ། ཁྱོད་སྣོམས་ཤིག་།བྱང་ཆུབ་སེམས་དཔས་སྨྲས་པ། ཁོ་བོ་ལ་ནི་སྣོད་འདི་ལྟ་བུ་མི་དགོས་སོ། །ལེགས་སྐྱེས་མས་སྨྲས་པ། ཅི་དགྱེས་སུ་མཛོད་ཅིག་།བདག་ནི་སྣོད་མ་མཆིས་པར་སུ་ལ་ཡང་ཟས་མི་སྩོལ་ཏོ། །དེ་ནས་བྱང་ཆུབ་སེམས་དཔས་ཟས་དེ་ཐོགས་ཏེ། ལྟེང་རྒྱས་ནས་བྱུང་ནས་དྲོ་ལ་བབ་པ་དང ། ཀླུའི་ཀླུང་ཆུ་བོ་ནཻ་རན་ཛ་ནའི་ངོགས་སུ་སོང་སྟེ། ཟས་དང་ཆོས་གོས་རྣམས་ཕྱོགས་གཅིག་ཏུ་བཞག་ནས། བྱང་ཆུབ་སེམས་དཔའ་ལུས་བསིལ་བར་བྱ་བའི་ཕྱིར་ཀླུང་ནཻ་རན་ཛ་ནའི་ནང་དུ་ཞུགས་སོ། །དགེ་སློང་དག་བྱང་ཆུབ་སེམས་དཔའ་ཁྲུས་བྱེད་པའི་ཚེ། ལྷའི་བུ་བརྒྱ་སྟོང་དུ་མ་དག་འདི་ལྟ་སྟེ། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་ལྷའི་ཨ་ག་རུ་དང ། ཙན་དན་གྱི་ཕྱེ་མ་དང ། བྱུག་པ་དག་ཀླུང་དུ་ལྡུགས་ཤིང་ལྷའི་མེ་ཏོག་ཁ་དོག་སྣ་ཚོགས་དག་ཀྱང་ཆུའི་ནང་དུ་འཐོར་རོ། །དེའི་ཚེ་ཀླུང་ཆེན་པོ་ནཻ་རན་ཛ་ན་ལྷའི་སྤོས་རྣམས་དང ། མེ་ཏོག་རྣམས་ཀྱིས་གང་བར་གྱུར་ཏེ་འབབ་བོ། །བྱང་ཆུབ་སེམས་དཔའ་སྤོས་ཆུ་གང་གིས་ཁྲུས་བྱས་པར་གྱུར་པ་དེ་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དག་གིས་བླངས་ཏེ་མཆོད་རྟེན་དུ་བྱ་བ་དང ། མཆོད་པར་བྱ་བའི་ཕྱིར་རང་རང་གི་གནས་སུ་ཁྱེར་རོ། །བྱང་ཆུབ་སེམས་དཔའི་སྐྲ་དང་ཨག་ཚོམ་གང་ཡིན་པ་དེ་དག་ཀྱང་གྲོང་པའི་བུ་མོ་ལེགས་སྐྱེས་མས་བཀྲ་ཤིས་པ་ཡིན་ནོ་སྙམ་ནས། མཆོད་རྟེན་དུ་བྱ་བ་དང ། མཆོད་པར་བྱ་བའི་ཕྱིར་ཁྱེར་རོ། །བྱང་ཆུབ་སེམས་དཔའ་ཀླུང་ནས་བྱུང་ནས་འདུག་པར་འདོད་དེ་གླིང་ལ་ལྟའོ། །དེ་ནས་ཀླུང་ནཻ་རན་ཛ་ནའི་ཀླུའི་བུ་མོ་གང་ཡིན་པ་དེ་སའི་འོག་ནས་བྱུང་སྟེ། ཡིད་ལས་བྱུང་བའི་སེང་གེའི་ཁྲི་བྱང་ཆུབ་སེམས་དཔའ་ལ་ཕུལ་ནས། བྱང་ཆུབ་སེམས་དཔའ་དེ་ལ་འདུག་སྟེ། གྲོང་པའི་བུ་མོ་ལེགས་སྐྱེས 41.151a མ་ལ་སྙིང་བརྩེ་བ་ཉེ་བར་བཟུང་ནས། ཇི་ཙམ་དགོས་པར་འོ་ཐུག་སྦྲང་རྩི་ཅན་དེ་འཐུངས་སོ། །འཐུངས་ནས་ཀྱང་གསེར་གྱི་སྣོད་ཆེན་པོ་དེ་ལ་མ་ཆགས་པར་ཆུར་བོར་རོ། །བོར་མ་ཐག་ཏུ་ཀླུའི་རྒྱལ་པོ་རྒྱ་མཚོས་མཆོད་པའི་འོས་ཡིན་ནོ་ཞེས་དད་པ་དང་གུས་པ་བསྐྱེད་དེ་བླངས་ནས་རང་གི་གནས་སུ་སོང་ངོ ། །དེ་ནས་མིག་སྟོང་པ་གྲོང་ཁྱེར་འཇིག་པ་ནམ་མཁའ་ལྡིང་གི་གཟུགས་སུ་སྤྲུལ་ནས་ཁ་རྡོ་རྗེའི་མཆུར་བསྒྱུར་ཏེ། ཀླུའི་རྒྱལ་པོ་རྒྱ་མཚོ་ལས་གསེར་གྱི་སྣོད་ཆེན་པོ་དེ་དབྲོག་ཏུ་བརྒལ་ན་མ་ནུས་ནས་རང་གི་གཟུགས་ཀྱིས་གུས་པར་བྱས་ཏེ། བསླངས་ནས་མཆོད་རྟེན་དུ་བྱ་བ་དང ། མཆོད་པར་བྱ་བའི་ཕྱིར་སུམ་བཅུ་རྩ་གསུམ་གྱི་གནས་སུ་ཁྱེར་རོ། །ཁྱེར་ནས་ཀྱང་སྣོད་ཆེན་པོའི་དགེ་འདུན་གྱི་དུས་སྟོན་བྱས་ཏེ། དེང་སང་དུའང་སུམ་བཅུ་རྩ་གསུམ་པའི་ལྷ་རྣམས་ལོ་གཅིག་བཞིན་དུ་སྣོད་ཆེན་པོའི་དུས་སྟོན་བྱེད་དོ། །སེང་གེའི་ཁྲི་དེ་ཡང་ཀླུའི་བུ་མོ་དེ་ཉིད་ཀྱིས་མཆོད་རྟེན་དུ་བྱ་བ་དང ། མཆོད་པར་བྱ་བའི་ཕྱིར་ཁྱེར་རོ། །དགེ་སློང་དག་བྱང་ཆུབ་སེམས་དཔས་ཟས་རགས་པ་ཟོས་མ་ཐག་ཏུ་བྱང་ཆུབ་སེམས་དཔའི་བསོད་ནམས་ཀྱི་སྟོབས་དང ། ཤེས་རབ་ཀྱི་སྟོབས་ཀྱིས་སྐད་ཅིག་དེ་ཉིད་ལ་ལུས་ལ་སྔ་མའི་ཁ་དོག་བཟང་པོ་རྒྱས་པ་དང ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང ། དཔེ་བྱད་བཟང་པོ་བརྒྱད་བཅུ་དང ། འོད་འདོམ་གང་བ་ཡང་བྱུང་བར་གྱུར་ཏོ། །དེ་ལ་འདི་སྐད་ཅེས་བྱ་སྟེ། ལོ་དྲུག་བར་དུ་བརྟུལ་ཞུགས་ཉམས་འོག་ཆུད་བྱས་བཅོམ་ལྡན་བློ་གྲོས་འདི་སྙམ་སེམས། །གལ་ཏེ་བདག་ནི་འདི་ལྟར་རིད་བཞིན་བསམ་གཏན་མངོན་ཤེས་ཡེ་ཤེས་སྟོབས་ལྡན་པ། །ཤིང་གི་རྒྱལ་པོའི་དྲུང་དུ་སོང་སྟེ་ཐམས་ཅད་མཁྱེན་ཉིད་འཚང་རྒྱར་བྱ་ན་ནི། །དེ་དག་ན་ཡང་བདག་གིས་ཕྱི་མའི་སྐྱེ་བོ་དག་ལ་སྙིང་བརྩེ་མ་བྱས་འགྱུར། །བསོད་ནམས་ངན་ངོན་ཙམ་དང་ལྡན་པའི་ལྷ་མི་འདི་དག་ངན་པས་ཡེ་ཤེས་ཚོལ། །དེ་དག་ལུས་ནི་ཉམ་ཆུང་གྱུར་ན་བདུད་རྩི་འཚང་རྒྱ་བྱེད་པར་མི་ནུས་པས། །ཁ་ཟས་རགས་པ་དམ་པ 41.151b ཟོས་ཏེ་ལུས་ཀྱི་མཐུ་སྟོབས་བསྐྱེད་པ་བྱས་ན་ནི། །ཤིང་གི་རྒྱལ་པོའི་དྲུང་དུ་སོང་སྟེ་ཐམས་ཅད་མཁྱེན་ཉིད་འཚང་རྒྱར་བྱ་བར་བསམས། །གྲོང་པའི་བུ་མོ་སྔོན་ཆད་སྤྱོད་པ་སྤྱད་པ་ལེགས་སྐྱེས་མ་ཞེས་བྱ་བ་དེ། །འདྲེན་པ་བརྟུལ་ཞུགས་གྲུབ་པར་ཤོག་ཅེས་དེ་ལྟའི་ཡིད་ཀྱིས་རྟག་ཏུ་མཆོད་སྦྱིན་བྱེད། །དེ་ནི་ལྷ་ཡིས་བསྐུལ་བ་ཐོས་ནས་དེ་ཚེ་འོ་ཐུག་སྦྲང་རྩི་ཅན་བླངས་ཏེ། །ཀླུང་གི་འགྲམ་དུ་སོང་ནས་དགའ་བའི་ཡིད་ཀྱིས་ནཻ་རན་ཛ་ནའི་ངོགས་ན་འདུག་།བསྐལ་པ་སྟོང་དུ་སྤྱོད་པ་སྤྱད་ཅིང་དབང་པོ་ཞི་ལ་རབ་ཏུ་ཞི་བ་དེ། །ལྷ་དང་ཀླུ་ཡི་ཚོགས་དང་དྲང་སྲོང་དག་གིས་བསྐོར་ཏེ་ནཻ་རན་ཛ་ནར་འོངས། །ཕ་རོལ་བརྒལ་ནས་སེམས་ཅན་སྒྲོལ་བ་བློ་གྲོས་ལྡན་པ་ཁྲུས་བྱར་བསམས་ནས་ནི། །ཐུབ་པ་དག་པ་དྲི་མེད་འཇིག་རྟེན་སྙིང་བརྩེ་ཕྱིར་ནི་ཀླུང་དུ་ཞུགས་ཏེ་འཁྲུ། །བྱེ་བ་ཕྲག་སྟོང་ལྷ་དག་དགའ་བའི་ཡིད་ཀྱིས་སྤོས་རྣམས་དང་ནི་ཕྱེ་མ་དག་།ཀླུང་དུ་འཐོར་ཞིང་སེམས་ཅན་དམ་པ་བཀྲུ་བའི་དོན་དུ་ཆུ་ལ་གང་བར་བྱེད། །བྱང་ཆུབ་སེམས་དཔའ་དྲི་མེད་ངེས་པ་བཀྲུས་ཏེ་ངོགས་ན་འདུག་པར་ཤེས་གྱུར་ནས། །ལྷ་སྟོང་རབ་ཏུ་དགའ་སྟེ་སེམས་ཅན་དག་པ་བཀྲུས་པའི་ཆུ་དེ་མཆོད་ཕྱིར་ཁྱེར། །ངུར་སྨྲིག་བཟང་པོ་དྲི་མ་མེད་པའི་གོས་དག་ལྷ་ཡི་བུ་ཡིས་དེ་ལ་བྱིན། །རུང་བ་དག་དང་ཤམ་ཐབས་བགོས་ནས་བཅོམ་ལྡན་འདས་ནི་ཆུ་ཀླུང་ངོགས་ན་འདུག་།ཀླུ་ཡི་བུ་མོ་དགའ་ཞིང་རབ་ཏུ་མགུ་བའི་ཡིད་ཀྱིས་སེང་གེའི་ཁྲི་ཡང་བཤམས། །དེ་ལ་འཇིག་རྟེན་དག་གི་མིག་བྱེད་ཡིད་ཀྱང་རབ་ཏུ་ཞི་བ་དེ་འདུག་ནས། །བློ་གྲོས་ལྡན་པ་ལེགས་སྐྱེས་མ་དེས་གསེར་གྱི་སྣོད་དུ་ཁ་ཟས་བླུགས་ཏེ་བྱིན། །རྐང་པར་ཕྱག་འཚལ་ནས་ནི་དེ་དག་ཁ་ལོ་བསྒྱུར་བ་བདག་གིས་གསོལ་ཞེས་བྱས། །བློ་གྲོས་ལྡན་པས་ཇི་ཙམ་དགོས་པར་ཟས་ཀྱང་ཟོས་ནས་སྣོད་ནི་ཆུར་བོར་ཏེ། །དེ་ནི་གྲོང་ཁྱེར་འཇིག་པ་ལྷ་ཡི་བླ་མས་བདག་གིས་མཆོད་པར་བྱ་ཞེས་ཁྱེར། །གང་ཚེ་རྒྱལ་བས་ཁ་ཟས་རགས་པ་དམ་པ་ཟོས་པ་དེ་ཡི་སྐད་ཅིག་ལ། །དེ་ཡི་ལུས་ཀྱི་སྟོབས་དང་གཟི་བརྗིད 41.152a དག་དང་དཔལ་ཡང་སྔ་འཁོ་བཞིན་དུ་གནས། །ལེགས་སྐྱེས་མ་དང་ལྷ་རྣམས་དག་ལ་ཆོས་གཏམ་བྱས་ནས་དོན་ཀྱང་མང་དུ་བྱས། །སེང་གེ་ངང་པའི་སྟབས་དང་གླང་པོའི་དབང་པོའི་འགྲོས་ཀྱིས་བྱང་ཆུབ་ཤིང་དྲུང་ཆས། །ནཻ་རན་ཛ་ནའི་ལེའུ་ཞེས་བྱ་བ་སྟེ། བཅཝ་བརྒྱད་པའོ།། །། དགེ་སློང་དག་དེ་ལྟར་བྱང་ཆུབ་སེམས་དཔའ་ཀླུང་ནཻ་རན་ཛ་ནར་ཁྲུས་བྱས་ཏེ། ཟས་ཟོས་ནས་ལུས་ཀྱི་མཐུ་སྟོབས་བསྐྱེད་དེ། བདུད་ལས་རྣམ་པར་རྒྱལ་བར་བྱ་བའི་ཕྱིར་རྣམ་པ་བཅུ་དྲུག་དང་ལྡན་པའི་ས་ཕྱོགས་ཤིང་གི་རྒྱལ་པོ་བྱང་ཆུབ་ཆེན་པོའི་དྲུང་ག་ལ་བ་དེར་སྐྱེས་བུ་ཆེན་པོའི་སྟབས་གང་ཡིན་པའི་སྟོབས་དེས་སོང་སྟེ། མི་བསྐྱོད་པའི་སྟབས་དང ། དབང་པོའི་མཆོད་སྡོང་ལྟ་བུའི་སྟབས་དང ། རིའི་རྒྱལ་པོ་ལྷུན་པོ་ལྟར་ཤིན་ཏུ་བརྟན་པའི་སྟབས་དང ། མི་དངོམ་པ་མ་ཡིན་པའི་སྟབས་དང ། ཡ་ཡོ་མེད་པའི་སྟབས་དང ། འཚེ་བ་མེད་པའི་སྟབས་དང ། རིངས་པ་མ་ཡིན་པའི་སྟབས་དང ། སྡོད་པ་མེད་པའི་སྟབས་དང ། འཁྲུགས་པ་མེད་པའི་སྟབས་དང ། འཁྱོར་པ་མེད་པའི་སྟབས་དང ། འདྲུད་པ་མེད་པའི་སྟབས་དང ། ཞུམ་པ་མེད་པའི་སྟབས་དང ། ཧ་ཅང་མི་སྡོད་པའི་སྟབས་དང ། མི་གཡོས་པའི་སྟབས་དང ། ཏབ་ཏབ་པོ་མེད་པའི་སྟབས་དང ། ཚུལ་དུ་ཤིས་པའི་སྟབས་དང ། དྲི་མ་མེད་པའི་སྟབས་དང ། དགེ་བའི་སྟབས་དང ། ཞེ་སྡང་མེད་པའི་སྟབས་དང ། གཏི་མུག་མེད་པའི་སྟབས་དང ། ཆགས་པ་མེད་པའི་སྟབས་དང་སེང་གེའི་སྟབས་དང ། ངང་པའི་རྒྱལ་པོའི་སྟབས་དང ། ཀླུའི་རྒྱལ་པོའི་སྟབས་དང ། སྲེད་མེད་ཀྱི་བུའི་སྟབས་དང ། ས་ལ་མི་རེག་པའི་སྟབས་དང ། རྩིབས་སྟོང་དང་ལྡན་པའི་འཁོར་ལོའི་རི་མོ་ས་ལ་སྣང་བའི་སྟབས་དང ། སོར་མོ་དྲ་བས་འབྲེལ་ཅིང་སེན་མོ་ཟངས་ལྟ་བུའི་སྟབས་དང ། ས་སྒྲ་འབྱིན་པའི་སྟབས་དང ། རི་རྡོབ་པའི་སྟབས་དང ། མཐོན་དམན་མཉམ་པར་བྱེད་པའི་རྐང་མཐིལ་གྱི་སྟབས་དང ། དྲ་བའི་བར་ནས་འོད་ཟེར་ཕྱུང་ནས་སེམས་ཅན 41.152b ལ་རེག་ན་བདེ་འགྲོར་འགྲོ་བའི་སྟབས་དང ། པད་མ་དྲི་མ་མེད་པ་ལ་གོམ་པ་འདོར་བའི་སྟབས་དང ། སྔོན་དགེ་བ་ལེགས་པར་སྤྱད་པའི་འགྲོས་ཀྱི་སྟབས་དང ། སྔོན་གྱི་སངས་རྒྱས་སེང་གེའི་ཁྲི་ལ་བཞུད་པའི་སྟབས་དང ། རྡོ་རྗེ་ལྟར་བསམ་པ་བརྟན་ཞིང་མི་ཕྱེད་པའི་སྟབས་དང ། ངན་སོང་ངན་འགྲོ་ཐམས་ཅད་གཅོད་པའི་སྟབས་དང ། བདེ་བ་ཐམས་ཅད་བསྐྱེད་པའི་སྟབས་དང ། ཐར་པའི་ལམ་སྟོན་པའི་སྟབས་དང ། བདུད་ཀྱི་སྟོབས་སྟོབས་མེད་པར་བྱེད་པའི་སྟབས་དང ། ངན་པའི་ཚོགས་ཅན་གྱི་ཚོགས་ཕས་ཀྱི་རྒོལ་བ་ཆོས་དང་འཐུན་པས་ཚར་གཅད་པའི་སྟབས་དང ། མུན་པའི་ལིང་ཐོག་དང ། ཉོན་མོངས་པ་སེལ་བའི་སྟབས་དང ། འཁོར་བའི་ཕྱོགས་ཕྱོགས་མེད་པར་བྱེད་པའི་སྟབས་དང ། བརྒྱ་བྱིན་དང ། ཚངས་པ་དང ། དབང་ཕྱུག་ཆེན་པོ་དང ། འཇིག་རྟེན་སྐྱོང་བ་རྣམས་ཟིལ་གྱིས་གནོན་པའི་སྟབས་དང ། སྟོང་གསུམ་གྱི་སྟོང་ཆེན་པོ་ན་དཔའ་བོ་གཅིག་པུའི་སྟབས་དང ། རང་བྱུང་ཟིལ་གྱིས་མནོན་པའི་སྟབས་དང ། ཐམས་ཅད་མཁྱེན་པའི་ཡེ་ཤེས་ཐོབ་པར་བྱེད་པའི་སྟབས་དང ། དྲན་པ་དང་བློ་གྲོས་ཀྱི་སྟབས་དང ། བདེ་འགྲོར་འགྲོ་བའི་སྟབས་དང ། རྒ་བ་དང་འཆི་བ་རབ་ཏུ་ཞི་བར་བྱེད་པའི་སྟབས་དང ། ཞི་བ་རྡུལ་མེད་པ། བདུད་ཀྱི་འཇིགས་པ་མེད་པ། མྱ་ངན་ལས་འདས་པའི་གྲོང་ཁྱེར་དུ་འགྲོ་བའི་སྟབས་ཏེ། དེ་འདྲ་བའི་སྟབས་ཀྱིས་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོར་ཆས་སོ། །དགེ་སློང་དག་དེ་ལྟར་ཀླུང་ནཻ་རན་ཛ་ན་དང ། བྱང་ཆུབ་ཀྱི་སྙིང་པོའི་བར་དེར་རླུང་གི་སྤྲིན་གྱི་ལྷའི་བུ་རྣམས་ཀྱིས་ལམ་ཕྱག་དར་བྱས་པར་གྱུར་ཏོ། །ཆར་སྤྲིན་རྣམས་ཀྱིས་སྤོས་ཆུས་ཆག་ཆག་བཏབ་པོ། །མེ་ཏོག་ཀྱང་ཆལ་མར་བཀྲམ་མོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཤིང་ཇི་སྙེད་ཡོད་པ་དེ་དག་ཐམས་ཅད་ཀྱང་ཤིང་བྱང་ཆུབ་ག་ལ་བ་དེ་ལོགས་སུ་རྩེ་མོ་འདུད་པར་གྱུར་ཏོ། །གང་དག་དེའི་ཉིན་པར་བཙས་པའི་བྱིས་པ་དེ་དག་ཀྱང་བྱང་ཆུབ་ཀྱི་སྙིང་པོ་ལོགས་སུ་མགོ་ 41.153a བསྟན་ཏེ་ཉལ་ལོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་རི་རབ་ལ་སོགས་པ་རི་གང་དག་ཡོད་པ་དེ་དག་ཐམས་ཅད་ཀྱང་བྱང་ཆུབ་ཀྱི་སྙིང་པོ་ག་ལ་བ་དེ་ལོགས་སུ་འདུད་པར་གྱུར་ཏོ། །ཀླུང་ནཻ་རན་ཛ་ན་ནས་བཟུང་སྟེ། བྱང་ཆུབ་ཀྱི་སྙིང་པོའི་བར་དེར་འདོད་པ་ན་སྤྱོད་པའི་ལྷའི་བུ་རྣམས་ཀྱིས་ཁ་ཚོན་རྒྱང་གྲགས་ཙམ་ཚུན་ཆད་ཀྱི་ལམ་མངོན་པར་བཀོད་པར་གྱུར་ཏོ། །ལམ་དེའི་འགྲམ་གཡས་གཡོས་སུ་འང་རིན་པོ་ཆེ་སྣ་བདུན་གྱི་སྟེགས་བུ་འཕང་དུ་ཤིང་ཏ་ལ་བདུན་ཙམ་དུ་མཐོ་བ། སྟེང་དུ་རིན་པོ་ཆེའི་དྲ་བ་བྲེས་པ། ལྷའི་གདུགས་དང ། རྒྱལ་མཚན་དང ། བ་དན་གྱིས་ལེགས་པར་བརྒྱན་པར་སྤྲུལ་ཏོ། །མདའ་རྒྱང་གང་ཙམ། མདའ་རྒྱང་གང་ཙམ་གྱི་ཞིང་རིན་པོ་ཆེ་སྣ་བདུན་གྱི་ཤིང་ཏ་ལ་སྟེགས་བུ་དེ་བས་མཐོ་བ་མངོན་པར་སྤྲུལ་ཏེ། ཤིང་ཏ་ལ་ཐམས་ཅད་རིན་པོ་ཆེ་བརྒྱུས་པས་ཕན་ཚུན་འབྲེལ་བར་འདུག་གོ། །ཤིང་ཏ་ལ་གཉིས་གཉིས་ཀྱི་བར་དུ་རྫིང་སྤོས་ཆུས་ཡོངས་སུ་གང་བ་གསེར་གྱི་བྱེ་མ་བདལ་བ། མེ་ཏོག་ཨུད་པ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོ་ལ་སོགས་པས་གང་བ། རིན་པོ་ཆེའི་སྟེགས་བུས་བསྐོར་བ། ནོར་བུ་རིན་པོ་ཆེ་བཻ་དཱུརྱས་ཐེམ་སྐས་བརྒྱན་པ། ཆུ་སྲེག་དང ། བྱ་གར་དང ། ངང་པ་དང ། ངུར་པ་དང ། ཁྲུང་ཁྲུང་དང ། རྨ་བྱ་སྒྲ་འབྱིན་པའི་རྫིང་དག་བྱས་སོ། །ལམ་དེ་ན་ལྷའི་བུ་མོ་བརྒྱད་ཁྲི་ནི་སྤོས་ཆུས་ཆག་ཆག་འདེབས་སོ། །ལྷའི་བུ་མོ་བརྒྱད་ཁྲི་ནི་མེ་ཏོག་སིལ་མ་ལྷའི་དྲི་བསུང་དང་ལྡན་པ་འཐོར་རོ། །ཤིང་ཏ་ལ་ཐམས་ཅད་ཀྱི་མདུན་ལོགས་སུ་རིན་པོ་ཆེའི་མཁའ་རྟེན་བཞག་གོ། །རིན་པོ་ཆེའི་མཁའ་རྟེན་ཐམས་ཅད་ལ་ལྷའི་བུ་མོ་ཙན་དན་དང ། ་ག་རུའི་ཕྱེ་མའི་ཕུར་མ་ཐོགས་པ་དང ། དུས་ཀྱི་རྗེས་སུ་འབྲང་བའི་བདུག་པའི་པོག་ཕོར་ཐོགས་པ་བརྒྱད་ཁྲི་འཁོད་པར་གྱུར་ཏོ། །རིན་པོ་ཆེའི་མཁའ་རྟེན་ཐམས་ཅད་ལ་ལྷའི་བུ་མོ་ལྷའི་གླུ་དབྱངས་ལེན་པ་ལྔ་ཁྲི་འཁོད་པར་གྱུར་ཏོ། །དགེ་སློང་དག་དེ་ལྟར་བྱང་ཆུབ 41.153b སེམས་དཔའ་ཞིང་རྣམས་ནི་རབ་ཏུ་སྐྱོད། འོད་ཟེར་བྱེ་བ་ཁྲག་ཁྲིག་བརྒྱ་སྟོང་ནི་འབྱིན། སིལ་སྙན་བརྒྱ་སྟོང་ནི་སྒྲོགས། མེ་ཏོག་མང་པོའི་ཆར་ཆེན་པོ་ནི་འབེབས། གོས་བརྒྱ་སྟོང་གི་གཡབ་མོ་ནི་འདོར། རྔ་བོ་ཆེ་བརྒྱ་སྟོང་ནི་རྡུང ། རྟ་དང་གླང་པོ་ཆེ་དང ། གླང་ཁྱུ་བ་རྣམས་ནི་སྒྲ་འབྱིན། བྱ་ནེ་ཙོ་དང ། རི་སྐེགས་དང ། ཁུ་བྱུག་དང ། ཀ་ལ་པིང་ཀ་དང ། ཤང་ཤང་ཏེའུ་དང ། ངང་པ་དང ། ངུར་པ་དང ། ཁྲུང་ཁྲུང་དང ། རྨ་བྱ་བརྒྱ་སྟོང་ནི་བསྐོར་བ་བྱེད། བཀྲ་ཤིས་བརྒྱ་སྟོང་ནི་འབུལ་ཞིང་ལམ་གྱི་བཀོད་པ་རྣམ་པ་དེ་ལྟ་བུ་དེས། བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོར་སོང་ངོ ། །གང་གི་ནུབ་མོ་བྱང་ཆུབ་སེམས་དཔའ་བྱང་ཆུབ་མངོན་པར་རྫོགས་པར་བྱང་ཆུབ་པར་འདོད་པར་གྱུར་པ་དེ་ཉིད་ཀྱི་ནུབ་མོ་སྟོང་གསུམ་གྱི་སྟོང་ཆེན་པོའི་བདག་པོ་ཚངས་པ་དབང་བསྒྱུར་ཞེས་བྱ་བ་དེས་ཚངས་པའི་འཁོར་ཆེན་པོ་དེ་ལ་བོས་ཏེ་འདི་སྐད་ཅེས་སྨྲས་སོ། །གྲོགས་པོ་དག་ཤེས་པར་གྱིས་ཤིག་།བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་མནབས་པ། དམ་བཅས་པ་ཆེན་པོ་མ་བོར་བ། གོ་ཆ་སྲ་བ་མནབས་པ། ཐུགས་ཡོངས་སུ་མི་སྐྱོ་བ། བྱང་ཆུབ་སེམས་དཔའི་སྤྱོད་པ་ཐམས་ཅད་ཚར་ཕྱིན་པ། ཕ་རོལ་ཏུ་ཕྱིན་པ་ཐམས་ཅད་ཀྱི་ཕ་རོལ་ཏུ་བྱོན་པ། བྱང་ཆུབ་སེམས་དཔའི་ས་ཐམས་ཅད་ལ་མངའ་དབང་བརྙེས་པ། བྱང་ཆུབ་སེམས་དཔའི་བསམ་པ་ཐམས་ཅད་ཀྱི་བྱ་བ་ཤིན་ཏུ་མཁྱེན་པ། སེམས་ཅན་ཐམས་ཅད་ཀྱི་དབང་པོའི་རྗེས་སུ་ཞུགས་པ། བདུད་ཀྱི་ལས་ཀྱི་ལམ་ཐམས་ཅད་ལས་ཡང་དག་པར་འདས་པ། དགེ་བའི་རྩ་བ་ཐམས་ཅད་ལ་གཞན་གྱི་དྲིང་མི་འཇོག་པ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ། སེམས་ཅན་ཐམས་ཅད་ལ་རབ་ཏུ་ཐར་པའི་ལམ་སྟོན་པ། དེད་དཔོན་ཆེན་པོར་གྱུར་པ། བདུད་ཀྱི་དཀྱིལ་འཁོར་ཐམས་ཅད་འཇོམས་པར་མཛད་པ། སྟོང་གསུམ་ན་དཔའ་བོ་གཅིག་པུར་གྱུར་པ། 41.154a ཆོས་ཀྱི་སྨན་ཐམས་ཅད་ཡང་དག་པར་བསྒྲུབས་པ། སྨན་པའི་རྒྱལ་པོ་ཆེན་པོ་རྣམ་པར་གྲོལ་བའི་ཐབས་ཐོབ་པ། ཆོས་ཀྱི་རྒྱལ་པོ་ཆེན་པོ་ཤེས་རབ་ཀྱི་འོད་ཆེན་པོ་གཏོང་བ། ཏོག་ཆེན་པོའི་རྒྱལ་པོ་འཇིག་རྟེན་གྱི་ཆོས་བརྒྱད་ཀྱིས་མ་གོས་པས་པད་མ་ཆེན་པོ་ལྟ་བུ། ཆོས་ཐམས་ཅད་ཀྱི་གཟུངས་མ་བསྙེལ་བ། རྒྱ་མཚོ་ཆེན་པོ་དང་འདྲ་བ། རྗེས་སུ་ཆགས་པ་དང་ཁོང་ཁྲོ་བ་དང་བྲལ་བ། མི་གཡོ་བ། མི་བསྐྱོད་པ། རི་རབ་ཆེན་པོ་ལྟ་བུ། ཤིན་ཏུ་དྲི་མ་མེད་པ། ཤིན་ཏུ་ཡོངས་སུ་དག་པ། ཤིན་ཏུ་དཀར་བའི་བློ་དང་ལྡན་པ། ནོར་བུ་རིན་པོ་ཆེ་ཆེན་པོ་དང་འདྲ་བ། ཆོས་ཐམས་ཅད་ལ་དབང་བསྒྱུར་བ། སེམས་ལས་སུ་རུང་བ། ཚངས་པ་ཆེན་པོ་ལྟ་བུའི་བྱང་ཆུབ་སེམས་དཔའ་དེ་བདུད་ཀྱི་སྡེ་རབ་ཏུ་འདུལ་བ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་བྱང་ཆུབ་པར་བཞེད་པ་དང ། སྟོབས་བཅུ་དང ། མི་འཇིགས་པ་བཞི་དང ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་ཡོངས་སུ་རྫོགས་པར་མཛད་པ་དང ། ཆོས་ཀྱི་འཁོར་ལོ་ཆེན་པོ་བསྐོར་བ་དང ། སེང་གེའི་སྒྲ་ཆེན་པོ་བསྒྲག་པ་དང ། ཆོས་ཀྱི་སྦྱིན་པས་སེམས་ཅན་ཐམས་ཅད་ཚིམ་པར་མཛད་པ་དང ། སེམས་ཅན་ཐམས་ཅད་ཀྱི་ཆོས་ཀྱི་མིག་རྣམ་པར་སྦྱང་བ་དང ། ཕས་ཀྱི་རྒོལ་བ་ཐམས་ཅད་ཆོས་དང་འཐུན་པས་ཚར་གཅད་པ་དང ། སྔོན་དམ་བཅས་པ་ཡོངས་སུ་རྫོགས་པ་ཀུན་ཏུ་བསྟན་པ་དང ། ཆོས་ཐམས་ཅད་ལ་དབང་ཕྱུག་གི་མངའ་དབང་བརྙེས་པར་མཛད་པའི་ཕྱིར་བྱང་ཆུབ་ཀྱི་སྙིང་པོར་བཞུད་ཀྱིས། དེ་ལ་གྲོགས་པོ་དག་ཁྱེད་བྱང་ཆུབ་སེམས་དཔའ་ལ་མཆོད་པ་དང ། རིམ་གྲོ་བྱ་བའི་ལས་ཐམས་ཅད་ལ་སྤྲོ་བར་གྱིས་ཤིག་།དེ་ནས་ཚངས་པ་ཆེན་པོ་དབང་བསྒྱུར་གྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་གི་བསོད་ནམས་དག་དང་གཟི་བརྗིད་དཔལ་གྱིས་བྱམས་དང་སྙིང་རྗེ་དགའ་བ་དང ། །བཏང་སྙོམས་དང་ནི་བསམ་གཏན་དག་དང་དེ 41.154b བཞིན་མངོན་ཤེས་ཚངས་པའི་ལམ་སྣང་བ། །བསྐལ་པ་སྟོང་དུ་སྤྱོད་པ་སྤྱད་པ་དེ་ནི་བྱང་ཆུབ་ཤིང་དྲུང་ཆས་པར་གྱུར། །ཐུབ་པ་དེ་ལ་བསམ་པའི་བརྟུལ་ཞུགས་སྒྲུབ་པར་བྱེད་པའི་མཆོད་པ་ལེགས་པར་བྱ། །དེ་ལ་སྐྱབས་སུ་སོང་ན་ངན་འགྲོའི་འཇིགས་དང་མི་ཕྲད་མི་ཁོམ་མི་འགྱུར་ཏེ། །ལྷ་ཡི་ནང་དུ་འདོད་པའི་བདེ་བ་རྙེད་ནས་ཚངས་པའི་གནས་ཡངས་འགྲོ་བར་འགྱུར། །ལོ་དྲུག་བར་དུ་དཀའ་བ་སྤྱད་པ་སྤྱད་ནས་འདི་ནི་བྱང་ཆུབ་ཤིང་དྲུང་བཞུད། །ཀུན་ཀྱང་དགའ་ཞིང་རབ་ཏུ་མགུ་བའི་ཡིད་ཀྱིས་དེ་ལ་མཆོད་པ་ལེགས་པར་གྱིས། །དེ་ནི་སྟོང་གསུམ་རྒྱལ་པོ་དབང་ཕྱུག་དམ་པ་ཆོས་ཀྱི་དབང་ཕྱུག་རྒྱལ་པོ་སྟེ། །བརྒྱ་བྱིན་ཚངས་པ་ཉི་ཟླའི་གྲོང་ཁྱེར་དག་ན་དེ་དང་མཉམ་པ་གང་ཡང་མེད། །གང་བཙས་ཚེ་ན་ཞིང་རྣམས་བྱེ་བ་ཁྲག་ཁྲིག་རྣམ་པ་དྲུག་ཏུ་གཡོས་གྱུར་པ། །དེ་ནི་དེ་རིང་བདུད་ཀྱི་དཔུང་ལས་རྒྱལ་བར་མཛད་ཕྱིར་ཤིང་ཆེན་མཆོག་དྲུང་བཞུད། །གང་གི་སྤྱི་གཙུག་ཚངས་པའི་གནས་འདིར་གནས་ཀྱང་བལྟ་བར་ནུས་པ་མ་ཡིན་ཞིང ། །གང་གི་སྐུ་ལ་མཚན་རབ་དམ་པ་ལྡན་ཞིང་སུམ་བཅུ་རྩ་གཉིས་ལེགས་བརྒྱན་ལ། །གང་གི་གསུང་འདིར་ཡིད་དུ་འོང་ཞིང་སྙན་ལ་རྣར་འཐད་ཚངས་དབྱངས་སྒྲ་སྙན་ཅིང ། །གང་གི་ཐུགས་ནི་རབ་ཞི་ཁྲོ་དང་བྲལ་བ་དེ་ལ་མཆོད་པ་བྱེད་དུ་འདོང ། །གང་དག་བློ་གྲོས་བརྒྱ་བྱིན་ཚངས་པའི་གནས་སུ་བསམ་གཏན་བདེ་བས་འདའ་བྱ་དང ། །ཉོན་མོངས་འཆིང་བའི་འཁྲི་ཤིང་ཀུན་དང་དྲ་བ་དེ་དག་གཅོད་པར་བྱེད་འདོད་དང ། །གཞན་ལས་མ་ཐོས་པར་ནི་རང་རྒྱལ་བྱང་ཆུབ་ཞི་བ་འཆི་མེད་འཐོབ་འདོད་དང ། །གལ་ཏེ་ས་གསུམ་དག་ན་སངས་རྒྱས་ཉིད་འདོད་དེ་དག་འདྲེན་པ་མཆོད་པར་གྱིས། །གང་གིས་རྒྱ་མཚོར་བཅས་པའི་ས་དང་དེ་བཞིན་རིན་པོ་ཆེ་རྣམས་མཐའ་ཡས་དང ། །ཁང་བཟངས་སྐར་ཁུང་བསིལ་ཁང་མང་ལྡན་པ་དང་ཟུང་དུ་སྦྲེལ་དང་བཞོན་པ་དང ། །མེ་ཏོག་ཕྲེང་བ་ཤིན་ཏུ་མཛེས་པས་བརྒྱན་པ་བསྐྱེད་མོས་ཚལ་གྱིས་རབ་བརྒྱན་དང ། །རྐང་ལག་མགོ་དང 41.155a མིག་རྣམས་ཡོངས་སུ་བཏང་བ་དེ་ནི་བྱང་ཆུབ་སྙིང་པོར་ཞུགས། །དགེ་སློང་དག་དེ་ལྟར་སྟོང་གསུམ་གྱི་ཚངས་པ་ཆེན་པོ་དེ་སྐད་ཅིག་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་ཕྱིན་ཏེ། ལག་མཐིལ་ལྟར་མཉམ་པར་གྱུར་པ། གྱོ་མོ་དང་རྡོ་མེད་པ་དང ། ནོར་བུ་དང་མུ་ཏིག་དང ། བཻ་དཱུརྱ་དང ། དུང་དང ། མན་ཤེལ་དང ། བྱུ་རུ་དང ། གསེར་དང ། དངུལ་མང་བ། རྩཝ་སྔོ་ཞིང་འཇམ་གཡས་སུ་འཁྱིལ་བ་ཀ་ཙ་ལིན་དའི་གོས་ལྟར་རེག་ན་བདེ་བ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྱབ་པ་འདིར་ཕྱིན་ཏོ། །དེའི་ཚེ་རྒྱ་མཚོ་ཆེན་པོ་ཐམས་ཅད་ས་ལྟ་བུར་གྱུར་ཀྱང་ཆུ་ན་རྒྱུ་བའི་སེམས་ཅན་རྣམས་ལ་གནོད་པ་ཅུང་ཟད་ཀྱང་མེད་དོ། །འཇིག་རྟེན་གྱི་ཁམས་དེ་ལྟར་བརྒྱན་པ་འདི་ཕྱོགས་བཅུའི་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་རྣམས་ཀྱིས་མཐོང་ནས་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་སངས་རྒྱས་ཀྱི་ཞིང་བརྒྱ་སྟོང་ལེགས་པར་བརྒྱན་ཏོ། །བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་བྱང་ཆུབ་སེམས་དཔའ་རྣམས་ཀྱིས་ཀྱང་ལྷའི་དང་མིའི་ལས་ཤིན་ཏུ་འདས་པའི་མཆོད་པ་བཀོད་པ་རྣམས་ཀྱིས་ཕྱོགས་བཅུའི་སངས་རྒྱས་ཀྱི་ཞིང་དཔག་ཏུ་མེད་པ་བརྒྱན་པར་གྱུར་ཏོ། །སངས་རྒྱས་ཀྱི་ཞིང་དེ་དག་ཐམས་ཅད་ཀྱང་བཀོད་པའི་རྒྱན་སྣ་ཚོགས་ཀྱིས་བརྒྱན་པས་སངས་རྒྱས་ཀྱི་ཞིང་གཅིག་ལྟ་བུར་སྣང་བར་གྱུར་ཏོ། །འཇིག་རྟེན་གྱི་བར་དག་དང ། རི་ནག་པོ་དང ། ཁོར་ཡུག་དང ། ཁོར་ཡུག་ཆེན་པོ་དག་ཀྱང་མི་སྣང་བར་གྱུར་ཏོ། །སངས་རྒྱས་ཀྱི་ཞིང་དེ་དག་ཐམས་ཅད་ནི་བྱང་ཆུབ་སེམས་དཔའི་འོད་ཀྱིས་གསལ་བར་སྣང་ངོ ། །བྱང་ཆུབ་ཀྱི་སྙིང་པོ་ཡོངས་སུ་སྐྱོང་བའི་ལྷའི་བུ་བཅུ་དྲུག་ཡོད་དེ། འདི་ལྟ་སྟེ། ལྷའི་བུ་ཨུད་ཀ་ལི་ཞེ་བྱ་བ་དང ། ལྷའི་བུ་མུད་ཀ་ལི་ཞེས་བྱ་བ་དང ། སྐྱེ་དགུའི་བདག་པོ་དང ། དཔའ་སྟོབས་དང ། དཔུང་རྒྱན་སྟོབས་དང ། རབ་བརྟན་དང ། 41.155b ས་འཛིན་དང ། སྣང་བྱེད་དང ། དྲི་མ་མེད་དང ། ཆོས་ཀྱི་དབང་ཕྱུག་དང ། ཆོས་ཀྱི་ཏོག་དང ། འགྲོ་གྲུབ་དང ། མིག་ཐོགས་པ་མེད་དང ། བཀོད་པ་ཆེན་པོ་དང ། ཚུལ་ཁྲིམས་རྣམ་དག་དྲི་ལྡན་དང ། པད་མའི་འོད་དེ། ལྷའི་བུ་བཅུ་དྲུག་པོ་དེ་དག་ནི་བྱང་ཆུབ་ཀྱི་སྙིང་པོ་ཡོངས་སུ་སྐྱོང་བ་དག་སྟེ། ཐམས་ཅད་ཀྱང་ཕྱིར་མི་ལྡོག་པའི་བཟོད་པ་ཐོབ་པ་ཤ་སྟག་གོ། །དེ་དག་གིས་ཀྱང་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར་བྱང་ཆུབ་ཀྱི་སྙིང་པོ་བརྒྱན་ཏེ། དཔག་ཚད་བརྒྱད་བཅུ་ཁོར་ཡུག་ཏུ་རིན་པོ་ཆེ་སྣ་བདུན་གྱི་སྟེགས་བུ་རིམ་བདུན་གྱིས་ནི་བསྐོར། ཤིང་ཏ་ལའི་ཕྲེང་བ་རིམ་བདུན་དང ། རིན་པོ་ཆེའི་དྲིལ་བུ་གཡེར་ཀའི་དྲ་བ་རིམ་བདུན་དང ། རིན་པོ་ཆེ་བརྒྱུས་པ་རིམ་པ་བདུན་གྱིས་ནི་བསྐོར། འཛམ་བུའི་ཆུ་བོའི་གསེར་གྱི་གླེགས་བམ་རིན་པོ་ཆེ་ཐམས་ཅད་ཀྱིས་སྤྲས་པ་དག་དང ། གསེར་གྱི་ཚོང་ཚོང་དག་དང ། འཛམ་བུའི་ཆུ་བོའི་གསེར་གྱི་པད་མ་དག་གིས་ནི་ཁེབས་པར་བྱས། སྙིང་པོ་མཆོག་གི་སྤོས་ཀྱིས་ནི་བདུགས། རིན་པོ་ཆེའི་དྲ་བ་ནི་བྲེས་སོ། །ཕྱོགས་བཅུའི་འཇིག་རྟེན་གྱི་ཁམས་ཐ་དད་པ་དག་ན་ཤིང་སྣ་ཚོགས་མངོན་པར་འཕགས་པ། བཟང་བ་མངོན་དུ་མཆོད་པ། ལྷ་ཡུལ་བ་དང ། མི་ཡུལ་བ་གང་དག་ན་ཡོད་པ་དེ་དག་ཐམས་ཅད་ཀྱང་བྱང་ཆུབ་ཀྱི་སྙིང་པོ་དེར་སྣང་བར་གྱུར་ཏོ། །ཕྱོགས་བཅུ་དག་ན་ཆུ་ནས་སྐྱེ་བ་དང ། ཐང་ལས་སྐྱེ་བའི་མེ་ཏོག་རྣམ་པ་སྣ་ཚོགས་གང་དག་ཡོད་པ་དེ་དག་ཐམས་ཅད་ཀྱང་བྱང་ཆུབ་ཀྱི་སྙིང་པོ་དེར་སྣང་བར་གྱུར་ཏོ། །ཕྱོགས་བཅུའི་འཇིག་རྟེན་གྱི་ཁམས་ཐ་དད་པ་དག་ན། བྱང་ཆུབ་སེམས་དཔའ་གང་དག་བསོད་ནམས་དང ། ཡེ་ཤེས་ཀྱི་ཚོགས་ཚད་མེད་པའི་བཀོད་པ་དག་གིས་བྱང་ཆུབ་ཀྱི་སྙིང་པོ་བརྒྱན་པར་བྱེད་པ་དེ་དག་ཀྱང་བྱང་ཆུབ་ཀྱི་སྙིང་པོ་དེར་སྣང་བར་གྱུར་ཏོ། །དེ་ལྟར་ལྷའི་བུ་བྱང་ཆུབ་ཀྱི་སྙིང་པོ་ཡོངས་སུ་སྐྱོང་བ་དག་གིས་བྱང་ཆུབ་ཀྱི་སྙིང་པོར་བཀོད་པ་དེ་འདྲ་བ་དག་སྤྲུལ་པར་གྱུར་ཏེ། དེ་དག་ལྷ་དང ། ཀླུ་དང ། གནོད 41.156a སྦྱིན་དང ། དྲི་ཟ་དང ། ལྷ་མ་ཡིན་དག་གིས་མཐོང་ནས་རང་རང་གི་གནས་ལ་དུར་ཁྲོད་ཙམ་གྱི་འདུ་ཤེས་སྐྱེད་པར་གྱུར་ཏོ། །བཀོད་པ་དེ་དག་མཐོང་ནས་ཤིན་ཏུ་ངོ་མཚར་ཆེར་འཛིན་ཏེ། ཨེ་མའོ་བསོད་ནམས་ཀྱི་རྣམ་པར་སྨིན་པའི་རྒྱུ་འཐུན་པ་བསམ་གྱིས་མི་ཁྱབ་པ་ལེགས་སོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །བྱང་ཆུབ་ཀྱི་ཤིང་གི་ལྷ་མོ་བཞི་ཡོད་དེ་འདི་ལྟ་སྟེ། འོད་མ་དང ། སྙན་ལྡན་དང ། ཡིད་བཟངས་དང ། མདངས་ལྡན་མ་སྟེ། བྱང་ཆུབ་ཀྱི་ཤིང་གི་ལྷ་མོ་བཞི་པོ་དེ་དག་གིས་ཀྱང་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར་བྱང་ཆུབ་ཀྱི་ཤིང་རྩ་བ་ཕུན་སུམ་ཚོགས་པ། སྡོང་པོ་ཕུན་སུམ་ཚོགས་པ། ཡལ་ག་དང ། ལོ་མ་དང ། མེ་ཏོག་དང ། འབྲས་བུ་སྣ་ཚོགས་ཕུན་སུམ་ཚོགས་པ། ཁྲུན་དང་སྦོམས་ཕུན་སུམ་ཚོགས་པ་མཛེས་པ། བལྟ་ན་སྡུག་པ། ཤིན་ཏུ་འགེལ་བ། འཕང་དུ་ཤིང་ཏ་ལ་བདུན་སྲིད་ཙམ་དུ་མཐོ་བ། དེ་དང་འཚམ་པར་འགེལ་བ། བཀྲ་བ། བལྟ་ན་སྡུག་པ། ཡིད་དུ་འོང་བ། རིན་པོ་ཆེ་སྣ་བདུན་གྱི་སྟེགས་བུ་རིམ་བདུན་གྱིས་བསྐོར་བ། རིན་པོ་ཆེའི་ཤིང་ཏ་ལའི་ཕྲེང་བ་རིམ་པ་བདུན་དང ། རིན་པོ་ཆེའི་དྲིལ་བུ་གཡེར་ཀའི་དྲ་བ་རིམ་པ་བདུན་དང ། རིན་པོ་ཆེ་བརྒྱུས་པའི་ཕྲེང་བ་རིམ་པ་བདུན་གྱིས་ཀུན་ནས་བསྐོར་ཅིང་ཕྱི་རིམ་བསྐོར་བ། ཤིང་ཡོངས་འདུ་ས་བརྟོལ་དང་འདྲ་བ། མིག་གིས་བལྟ་བས་མི་ངོམས་པ་བསྐྱེད་དོ། །གང་དུ་བྱང་ཆུབ་སེམས་དཔའ་འདུག་ནས་བྱང་ཆུབ་མངོན་པར་རྫོགས་པར་བྱང་ཆུབ་པར་འདོད་པའི་ས་ཕྱོགས་དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡོ་རྗེའི་དཀྱིལ་ཏེ། སྲ་བ། སྙིང་པོ་ཡོད་པ། མི་ཕྱེད་པ། རྡོ་རྗེའི་རང་བཞིན་དུ་གནས་པར་གྱུར་པའོ། །དགེ་སློང་དག་དེ་ལྟར་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོར་འགྲོ་བ་ན་ལུས་ལས་རྣམ་པ་འདི་ལྟ་བུའི་འོད་འགྱེད་དེ། འོད་དེས་ངན་སོང་ཐམས་ཅད་ཞི་བར་གྱུར་ཏོ། །མི་ཁོམ་པ་ཐམས་ཅད་བཅད་པར 41.156b གྱུར་ཏོ། །ངན་འགྲོའི་ཚོར་བ་ཐམས་ཅད་བསྐམས་པར་གྱུར་ཏོ། །སེམས་ཅན་གང་དག་དབང་པོ་མ་ཚང་བ་དེ་དག་ནི་དབང་པོ་ཡོངས་སུ་རྫོགས་པ་ཐོབ་པར་གྱུར་ཏོ། །ནད་ཀྱིས་བཏབ་པ་རྣམས་ནི་ནད་སོས་པར་གྱུར་ཏོ། །མི་བདེ་བ་ཐམས་ཅད་ནི་བདེ་བ་ཐོབ་པར་གྱུར་ཏོ། །འཇིགས་པས་ཉེན་པ་རྣམས་ནི་དབུགས་ཕྱིན་པ་ཐོབ་པར་གྱུར་ཏོ། །བཅིང་བས་བཅིངས་པ་རྣམས་ནི་བཅིངས་པ་ལས་གྲོལ་བར་གྱུར་ཏོ། །སེམས་ཅན་དབུལ་པོ་རྣམས་ནི་ལོངས་སྤྱོད་དང་ལྡན་པར་གྱུར་ཏོ། །ཉོན་མོངས་པས་གདུངས་པ་རྣམས་ནི་ཡོངས་སུ་གདུང་བ་མེད་པར་གྱུར་ཏོ། །བཀྲེས་པ་རྣམས་ནི་ལྟོ་འདྲངས་པར་གྱུར་ཏོ། །སྐོམ་པ་རྣམས་ནི་སྐོམ་པ་མེད་པར་གྱུར་ཏོ། །སྦྲུམ་པ་རྣམས་ནི་བདེ་བར་བཙས་པར་གྱུར་ཏོ། །ཞུམ་པ་ཉམ་ཆུང་བ་རྣམས་ནི་སྟོབས་ཕུན་སུམ་ཚོགས་པར་གྱུར་ཏོ། །དེའི་ཚེ་སེམས་ཅན་གང་ལ་ཡང་འདོད་ཆགས་དང་ཞེ་སྡང་དང ། གཏི་མུག་དང ། ཁྲོ་བ་དང ། ཆགས་པ་དང ། ཐ་བ་དང ། གནོད་སེམས་དང ། ཕྲག་དོག་གི་གནོད་པ་མེད་པར་གྱུར་ཏོ། །དེའི་ཚེ་སེམས་ཅན་གང་ཡང་འཆི་བ་མེད། འཕོ་བ་མེད། སྐྱེ་བ་མེད་དོ། །དེའི་ཚེ་སེམས་ཅན་ཐམས་ཅད་བྱམས་པའི་སེམས་དང ། ཕན་པའི་སེམས་དང་ལྡན་ཞིང་གཅིག་ལ་གཅིག་ཕ་མར་འདུ་ཤེས་བསྐྱེད་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། མནར་མེད་པ་ལ་ཐུག་པའི་བར། །དམྱལ་བ་མི་བཟད་སྣང་བ་ཡི། །སེམས་ཅན་རྣམས་ཀྱི་སྡུག་བསྔལ་ཞི། །བདེ་བའི་ཚོར་བ་ཐོབ་པར་འགྱུར། །དུད་འགྲོའི་སྐྱེ་གནས་སེམས་ཅན་རྣམས། །ཕན་ཚུན་གནོད་བྱེད་ཇི་སྙེད་པ། །ཐུབ་ཆེན་འོད་ཀྱིས་རེག་པས་ན། །དེ་དག་བྱམས་པའི་སེམས་ཀྱང་སྐྱེས། །ཡི་དགས་འཇིག་རྟེན་ཡི་དགས་རྣམས། །བཀྲེས་སྐོམ་ཉེན་པ་ཇི་སྙེད་པ། །བྱང་ཆུབ་སེམས་དཔའི་གཟི་བརྗིད་ཀྱིས། །དེ་དག་ཟས་བསྐོམ་རྙེད་པར་གྱུར། །མི་ཁོམ་ཐམས་ཅད་ཆད་གྱུར་ཅིང ། །ངན་འགྲོ་རྣམས་ཀྱང་སྐམས་པར་གྱུར། ། 41.157a སེམས་ཅན་ཐམས་ཅད་བདེར་གྱུར་ཏེ། །ལྷ་ཡི་བདེ་བས་རབ་ཏུ་ཚིམ། །མིག་དང་རྣ་བ་མེད་པ་དང ། །གཞན་ཡང་གང་དག་དབང་པོ་ཉམས། །དེ་དག་དབང་པོ་ཀུན་རྫོགས་ཤིང ། །ཡན་ལག་ཐམས་ཅད་མཛེས་པར་གྱུར། །འདོད་ཆགས་ཞེ་སྡང་ལ་སོགས་པའི། །ཉོན་མོངས་རྣམས་ཀྱིས་སེམས་ཅན་གང ། །གནོད་གྱུར་དེ་ཚེ་ཉོན་མོངས་ཀུན། །ཞི་བར་གྱུར་ཏེ་བདེ་དང་ལྡན། །སྨྱོས་པ་དག་ནི་དྲན་ལྡན་ཞིང ། །དབུལ་པོ་དག་ཀྱང་ནོར་དང་ལྡན། །ནད་ཀྱིས་བཏབ་པ་ནད་སོས་ཤིང ། །བཅིང་བས་བཅིངས་པ་གྲོལ་བར་གྱུར། །སེར་སྣ་མེད་ཅིང་དགྲ་མེད་དེ། །གནོད་སེམས་དང་ནི་རྩོད་པ་དག་།ཕན་ཚུན་བྱེད་པ་མེད་གྱུར་ཏེ། །དེ་ཚེ་བྱམས་པའི་སེམས་སུ་གནས། །ཕ་དང་མ་དག་བུ་གཅིག་ལ། །ཇི་ལྟར་ཕངས་པར་སེམས་པ་ལྟར། །དེ་བཞིན་སེམས་ཅན་ཕན་ཚུན་དུ། །དེ་ཚེ་བུ་ཕངས་བཞིན་དུ་སེམས། །བྱང་ཆུབ་སེམས་དཔའི་འོད་དྲ་ཡིས། །ཕྱོགས་བཅུའི་ཕྱོགས་ནི་ཀུན་ཏུ་ཡང ། །གང་གཱའི་བྱེ་མའི་གྲངས་སྙེད་ཀྱི། །ཞིང་རྣམས་བསམ་གྱིས་མི་ཁྱབ་གསལ། །རི་བོ་ནག་པོ་རྣམས་དང་ནི། །ཁོར་ཡུག་དག་ཀྱང་མི་སྣང་གྱུར། །རྒྱ་ཆེན་ཞིང་རྣམས་དེ་དག་ཀུན། །གཅིག་པོ་ཇི་བཞིན་དེ་ལྟར་སྣང ། །ལག་མཐིལ་ལྟ་བུར་གྱུར་པ་སྟེ། །བྱང་ཆུབ་སེམས་དཔའ་མཆོད་པའི་ཕྱིར། །ཞིང་རྣམས་ཐམས་ཅད་ལེགས་བརྒྱན་པས། །ཐམས་ཅད་རིན་ཆེན་ཉིད་དུ་སྣང ། །བྱང་ཆུབ་སྙིང་པོའི་རིམ་གྲོ་པ། །ལྷ་ནི་དེ་ལྟར་བཅུ་དྲུག་ཡོད། །དཔག་ཚད་བརྒྱད་བཅུའི་ས་ཁྱོན་ནང ། །བྱང་ཆུབ་སྙིང་པོ་བརྒྱན་པར་གྱུར། །ཞིང་རྣམས་བྱེ་བ་མཐའ་ཡས་ན། །བཀོད་པ་ཆེན་པོ་གང་ཡོད་པ། །བྱང་ཆུབ་སེམས་དཔའི་གཟི་བརྗིད་ཀྱིས། །དེ་དག་ཐམས་ཅད་དེར་ཡང་སྣང ། །ལྷ་དང་ཀླུ་དང་གནོད་སྦྱིན་དང ། །མི་འམ་ཅི་དང་ལྟོ་འཕྱེ་ཆེ། །རང་རང་གཞལ་མེད་ཁང་རྣམས་ལ། །དུར་ཁྲོད་ཙམ་དུ་ཤེས་པར་གྱུར། །འདིར་ནི་བཀོད་པ་དེ་མཐོང་ནས། །ལྷ་དང་མི་རྣམས་ངོ་མཚར་གྱུར། །བསོད་ནམས་གང་གི 41.157b རྒྱུ་འཐུན་འདིར། །ཕུན་སུམ་འདི་འདྲ་འདི་ལེགས་འཚར། །ལུས་དང་ངག་དང་ཡིད་རྣམས་ཀྱིས། །བརྩོན་པར་བྱེད་པ་མེད་པར་ཡང ། །དེ་ཡི་ཡིད་ལ་འདོད་པ་དང ། །བསམ་པ་ཐམས་ཅད་རབ་ཏུ་འགྲུབ། །ཇི་ལྟར་བསམ་པ་གཞན་དག་ཀྱང ། །སྔོན་སྤྱོད་ཚེ་ན་རྫོགས་གྱུར་པ། །ལས་དེའི་རྣམ་པར་སྨིན་པ་ཡིས། །འདི་འདྲའི་ཕུན་སུམ་ཚོགས་འདི་བྱུང ། །བྱང་ཆུབ་ཤིང་གི་ལྷ་མོ་བཞིས། །ལྷ་ཡི་ཤིང་ནི་ཡོངས་འདུ་བ། །དེ་བས་ཁྱད་པར་འཕགས་པ་ཡིས། །བྱང་ཆུབ་སྙིང་པོ་བརྒྱན་པར་བྱས། །བྱང་ཆུབ་སྙིང་པོའི་བཀོད་པ་གང ། །ལྷ་ཡིས་མངོན་པར་འདུས་བྱས་པ། །ཡོན་ཏན་དེ་དག་ཚིག་གིས་ནི། །ཐམས་ཅད་བརྗོད་པར་ཡོང་མི་ནུས། །དགེ་སློང་དག་དེ་ལྟར་བྱང་ཆུབ་སེམས་དཔའི་ལུས་ལས་འོད་ཕྱུང་བ་རྣམ་པར་དག་པ། དྲི་མ་མེད་པ། ལུས་དང་སེམས་ཚིམ་པར་བྱེད་ཅིང་དགའ་བ་བསྐྱེད་པ། ཉོན་མོངས་པ་ཐམས་ཅད་སེལ་བ། སེམས་ཅན་ལ་དགའ་བ་དང ། བདེ་བ་དང ། དད་པ་དང ། མཆོག་ཏུ་དགའ་བ་ཐམས་ཅད་བསྐྱེད་པ་དེས་ཀླུའི་རྒྱལ་པོ་ནག་པོའི་གནས་སྣང་བར་བྱས་པར་མཐོང་ནས། དེའི་ཚེ་ཀླུའི་རྒྱལ་པོ་ནག་པོ་རང་གི་འཁོར་གྱི་མདུན་དུ་འདུག་སྟེ་ཚིགས་སུ་བཅད་པ་འདི་དག་སྨྲས་སོ། །གང་ཕྱིར་བདག་གི་གནས་འདི་གསེར་གྱི་འོད་ཀྱིས་བརྒྱན་པར་ལྷ་དེར་གྱུར་པ་ལས། །ཇི་ལྟར་འཁོར་བ་འཇིག་གི་འོད་མཛེས་མཐོང་ཞིང་གསེར་ཞེས་བྱ་བ་མཐོང་བ་དང ། །ཇི་ལྟར་འོད་སྲུང་ཆོས་ཀྱི་རྒྱལ་པོ་སྐྱོན་མེད་པ་ཡི་དྲི་མེད་འོད་མཐོང་ལྟར། །མཚན་མཆོག་ལྡན་ཞིང་ཕན་མཛད་ཡེ་ཤེས་འོད་ལྡན་པ་ཞིག་འབྱུང་དུ་ཐེ་ཚོམ་མེད། །སྔོན་ཆད་ཉེས་པར་བྱས་པའི་ལས་ཀྱིས་བདག་གི་ཁྱིམ་ནི་ཤིན་ཏུ་མུན་པས་གང ། །ཁྱིམ་འདི་ན་ནི་ཉི་མ་ཟླ་བ་དག་གིས་རྒྱ་ཆེར་འོད་ཀྱང་ཡོང་མི་སྣང ། །མེ་དང་ནོར་བུ་དག་དང་དྲི་མེད་གློག་དང་སྐར་མ་རྣམས་ཀྱི་འོད་མི་སྣང ། །བརྒྱ་བྱིན་འོད་དང་ཚངས་པའི་འོད་དང་ལྷ་མིན་རྣམས་ཀྱི་འོད་ཀྱང་མི་སྣང་ན། །དེ་རིང་ཁྱིམ་འདིའི་ནང་དུ་ཉི་མའི་འོད་འདྲ་བ་ཡི་དགེ་བས་མཛེས་གྱུར་ལ། ། 41.158a སེམས་ཀྱང་དགའ་བ་བསྐྱེད་ཅིང་ལུས་ཀྱང་བདེ་བར་གྱུར་ལ་ལུས་ནི་བསིལ་གྱུར་ཏོ། །ལུས་ཀྱི་སྟེང་དུ་བྱེ་ཚན་འབབ་པ་དེ་ཡང་བདག་ལ་བསིལ་བར་གྱུར་པ་ལས། །བསྐལ་པ་བྱེ་བ་མང་པོར་སྤྱད་པ་བྱང་ཆུབ་ཤིང་དྲུང་བཞུད་པར་ཤིན་ཏུ་གསལ། །ཀླུ་ཡི་མེ་ཏོག་མཛེས་དང་བཟང་ལ་དྲི་ཞིམ་གོས་དང་མུ་ཏིག་དོ་ཤལ་དང ། །རྒྱན་དང་གདུ་བུ་དག་དང་ཕྱེ་མ་རྣམས་དང་བདུག་པ་མཆོག་རྣམས་མྱུར་ཐོགས་ལ། །གླུ་དབྱངས་དག་དང་རོལ་མོའི་དབྱངས་སྒྲ་སྣ་ཚོགས་གྱིས་ཤིག་རྔ་དང་རྫ་རྔ་བཟང ། །བརྡུང་ཞིང་འགྲོ་བླ་ཀུན་གྱིས་མཆོད་འོས་ཕན་པ་མཛད་ལ་མཆོད་པ་བྱེད་དུ་འདེང ། །དེ་ནི་ལངས་ཏེ་ཀླུ་ཡི་བུ་མོ་རྣམས་དང་ལྷན་ཅིག་ཕྱོགས་བཞིར་བལྟས་པ་དང ། །དེ་ནས་རི་བོ་ལྷུན་པོ་ལྟ་བུར་གཟི་བརྗིད་རྣམས་ཀྱིས་ལེགས་པར་བརྒྱན་པ་ཞིག་།ལྷ་དང་ལྷ་མིན་བྱེ་བ་དག་དང་ཚངས་པའི་དབང་དང་གནོད་སྦྱིན་རྣམས་ཀྱིས་བསྐོར། །དགའ་བའི་ཡིད་ཀྱིས་དེ་ལ་མཆོད་བྱེད་ཤུལ་ནི་འདི་ཞེས་སྟོན་ཅིང་འདོང་བ་མཐོང ། །ཀླུ་ཡི་རྒྱལ་དེ་རབ་ཏུ་དགའ་ཞིང་མགུ་ནས་འཇིག་རྟེན་མཆོག་ལ་མཆོད་བྱས་ཏེ། །གུས་དང་བཅས་པས་དེ་ཡི་རྐང་པ་གཉིས་ལ་ཕྱག་འཚལ་ཐུབ་པའི་མདུན་དུ་འདུག་།ཀླུ་ཡི་བུ་མོ་རྣམས་ཀྱང་དགའ་ཞིང་མགུ་བའི་ཡིད་ཀྱིས་ཐུབ་ལ་མཆོད་པ་བྱེད། །མེ་ཏོག་རྣམས་དང་སྤོས་དང་བྱུག་པ་དག་ཀྱང་འཐོར་ཞིང་སིལ་སྙན་རྣམས་ཀྱང་བྱེད། །ཀླུ་ཡི་རྒྱལ་པོ་རབ་ཏུ་དགའ་ནས་ཐལ་སྦྱར་ཡང་དག་ཡོན་ཏན་རྣམས་ཀྱིས་བསྟོད། །འདྲེན་པ་འཇིག་རྟེན་དམ་པ་དགུང་ཟླ་ཉ་བའི་ཞལ་འདྲ་མཐོང་བར་གྱུར་པ་ལེགས། །བདག་གིས་སྔོན་ཆད་དྲང་སྲོང་རྣམས་ཀྱི་མཚན་མ་མཐོང་བ་ཁྱོད་ཀྱང་དེ་འདྲ་སྟེ། །དེ་རིང་ཁྱོད་ཀྱིས་བདུད་ཀྱི་དཔུང་རྣམས་བཅོམ་སྟེ་བཞེད་པའི་གོ་འཕང་བརྙེས་པར་འགྱུར། །གང་གི་དོན་དུ་སྔན་ཆད་དུལ་དང་སྦྱིན་དང་བསྡམས་ཤིང་བདོག་པ་ཀུན་བཏང་ལ། །གང་གི་དོན་དུ་དུལ་དང་ཚུལ་ཁྲིམས་བྱམས་དང་སྙིང་རྗེ་བ་དང་བཟོད་པ་བསྒོམས། །གང་གི་དོན་དུ་བརྩོན་འགྲུས་བརྟན་དང་བསམ་གཏན 41.158b དགྱེས་དང་ཤེས་རབ་འབར་མཛད་པ། །ཁྱོད་ཀྱི་སྨོན་ལམ་དེ་དག་ཐམས་ཅད་རབ་ཏུ་རྫོགས་ནས་དེ་རིང་རྒྱལ་བར་འགྱུར། །ཇི་ལྟར་ལྗོན་ཤིང་ལོ་མ་མེ་ཏོག་འབྲས་བུར་བཅས་པ་བྱང་ཆུབ་ཤིང་ལ་འདུད། །ཇི་ལྟར་བུམ་པ་ཆབ་ཀྱིས་གང་བ་སྟོང་དག་ཁྱོད་ལ་བསྐོར་བ་རབ་བགྱིད་ཅིང ། །ཇི་ལྟར་ཙ་ཤའི་ཚོགས་རྣམས་རབ་ཏུ་དགའ་སྟེ་སྙན་པའི་སྒྲ་སྐད་འབྱིན་པ་དང ། །ཇི་ལྟར་ངང་པ་ཁྲུང་ཁྲུང་ཚོགས་ཀྱང་མཁའ་ལ་མཆི་ཞིང་ཚུལ་དུ་ཤིས་ལྡན་པར། །དང་བའི་ཡིད་ཀྱིས་དྲང་སྲོང་ལ་ནི་བསྐོར་བ་བགྱིད་ལས་དེ་རིང་དགྲ་བཅོམ་འགྱུར། །ཇི་ལྟར་གསེར་གྱི་ཁ་དོག་ལྟ་བུར་མཛེས་པའི་འོད་རྣམས་ཞིང་ནི་བརྒྱར་མཆིས་ཏེ། །ཇི་ལྟར་ངན་སོང་མཐའ་དག་ཞི་བར་བགྱིད་ཅིང་སྐྱེ་དགུ་སྡུག་བསྔལ་ཐར་བགྱིད་དང ། །ཇི་ལྟར་ཉི་མ་ཟླ་བའི་གནས་ཀྱི་རྒྱུན་ཚད་བསེར་མའང་དལ་བུས་ལྡང་བ་ལས། །སྲིད་པ་གསུམ་དུ་སྐྱེ་དང་རྒ་བ་ཐར་མཛད་པ་ཡི་དེད་དཔོན་དེ་རིང་འགྱུར། །ཇི་ལྟར་ལྷ་རྣམས་འདོད་པའི་དགའ་བ་སྤངས་ཏེ་ཁྱོད་ལ་མཆོད་དུ་ལྷགས་པ་དང ། །ཚངས་དང་ཚངས་པའི་མདུན་ན་འདོན་དང་ལྷ་རྣམས་བསམ་གཏན་བདེ་བ་སྤངས་པ་དང ། །གང་ཡང་སྲིད་པ་གསུམ་ན་དབང་ཕྱུག་དམ་པ་མཆིས་པ་ཐམས་ཅད་འདིར་ལྷགས་ལས། །སྲིད་པ་གསུམ་དུ་སྐྱེ་རྒ་ཐར་བ་མཛད་པའི་སྨན་པའི་རྒྱལ་པོ་དེ་རིང་བྱོན། །ཇི་ལྟར་ལྷ་རྣམས་དག་གིས་ཕྱག་དར་བགྱིས་པའི་ཤུལ་དེ་ནས་ནི་ཁྱོད་གཤེགས་ལ། །བཅོམ་ལྡན་འཁོར་བ་འཇིག་དང་གསེར་ཞེས་བགྱི་དང་འོད་སྲུང་དག་ཀྱང་དེ་ནས་གཤེགས། །ཇི་ལྟར་པད་མ་བཟང་པོ་དྲི་མ་མ་མཆིས་རྣམ་དག་དོག་ས་བརྟོལ་བྱུང་སྟེ། །དེ་ལ་སྟོབས་ཆེན་ལྡན་པ་ཞབས་ཀྱི་གོམ་པ་འདོར་ལས་དེ་རིང་དགྲ་བཅོམ་འགྱུར། བྱེ་བ་ཁྲག་ཁྲིག་སྟོང་ཕྲག་དུ་མ་གང་གཱ་ཀླུང་གི་བྱེ་མ་སྙེད་ཀྱི་བདུད། །དེ་དག་རྣམས་ཀྱིས་བྱང་ཆུབ་ཤིང་དྲུང་ནས་ནི་ཁྱོད་ལ་བསྐྱོད་པ་འམ་གཡོས་མ་ནུས། །མཆོད་སྦྱིན་ཁྲག་ཁྲིག་ཕྲག་སྟོང་རྣམ་པ་དུ་མ་གང་གཱ་ཀླུང་གི་བྱེ་མ་སྙེད། །ཁྱོད་ཀྱིས་མཛད་ཅིང་འགྲོ་ལ་ཕན་ཕྱིར་སྤྱད་པ་དེས་ན་འདིར་ནི་རྣམ 41.159a པར་མཛེས། །རྒྱུ་སྐར་ཟླ་བར་བཅས་ཤིང་སྐར་མ་ཉི་མར་བཅས་པ་མཁའ་ལས་སར་ལྟུང་གདའ། །རི་མཆོག་ཆེན་པོ་རང་གི་གནས་ནས་གཡོ་ཞིང་རྒྱ་མཚོ་སྐམས་པར་འགྱུར་ཡང་གདའ། །སྐྱེས་བུ་མཁས་པ་ལ་ལས་ཁམས་བཞི་པོ་དག་རེ་རེ་ནས་ནི་སྟོན་ནུས་གདའ། །ཁྱོད་ནི་ཤིང་གི་རྒྱལ་པོའི་དྲུང་དུ་གཤེགས་ནས་བྱང་ཆུབ་མ་ཐོབ་བཞེངས་མི་གདའ། །གང་གི་སླད་དུ་ཁ་ལོ་བསྒྱུར་བ་མཐོང་ཞིང་མཆོད་བགྱིས་ཡོན་ཏན་བརྗོད་པ་དང ། །བྱང་ཆུབ་ཏུ་ཡང་སྤྲོ་བས་བདག་གིས་རྙེད་པ་འཕེལ་བ་རྒྱ་ཆེན་རྙེད་པར་གྱུར། །བུར་བཅས་བདག་དང་ཀླུ་ཡི་བུ་མོ་ཐམས་ཅད་སྐྱེ་གནས་འདི་ལས་ཐར་གྱུར་ཅིང ། །གླང་པོ་དྲེགས་པའི་སྟབས་སུ་བཞུད་པ་ཁྱོད་ཀྱི་སྟབས་དེས་བདག་ཅག་མཆི་བར་བགྱི། །དགེ་སློང་དག་དེ་ལྟར་ཀླུའི་རྒྱལ་པོ་ནག་པོའི་ཆུང་མ་དམ་པ་གསེར་འོད་ཅེས་བྱ་བ་ཀླུའི་བུ་མོ་རིན་པོ་ཆེའི་གདུགས་སྣ་ཚོགས་ཐོགས་པ་དང ། སིལ་སྙན་སྣ་ཚོགས་ཐོགས་པ་དང ། མུ་ཏིག་གི་དོ་ཤལ་སྣ་ཚོགས་ཐོགས་པ་དང ། ནོར་བུ་རིན་པོ་ཆེ་སྣ་ཚོགས་ཐོགས་པ་དང ། ལྷའི་དང་མིའི་ཕྲེང་བ་བརྒྱུས་པ་སྣ་ཚོགས་ཐོགས་པ་དང ། པོག་ཕོར་སྣ་ཚོགས་ཐོགས་པ་དང ། སིལ་སྙན་དང་གླུ་དབྱངས་སྣ་ཚོགས་ལེན་པ་རབ་ཏུ་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་སེམས་དཔའི་གན་དུ་འདོང་ཞིང་རིན་པོ་ཆེའི་མེ་ཏོག་སྣ་ཚོགས་མངོན་པར་གཏོར་ཏེ་ཚིགས་སུ་བཅད་པ་འདི་དག་གིས་ཀྱང་བསྟོད་དོ། །འཁྲུལ་པ་མི་མངའ་མི་བསྙེངས་མི་འཛེམ་བག་མི་ཚ། །མ་ཞུམ་མི་དམན་རབ་ཏུ་དགྱེས་པར་གདུལ་དཀའ་བ། །མ་ཆགས་མི་སྡང་མ་རྨོངས་བརྐམ་པ་མི་མངའ་བ། །ཆགས་བྲལ་རྣམ་གྲོལ་དྲང་སྲོང་ཁྱོད་ལ་ཕྱག་འཚལ་ལོ། །སྨན་པ་ཟུག་རྔུ་བྲལ་བ་གདུལ་བ་འདུལ་མཛད་པ། །འགྲོ་བ་སྡུག་བསྔལ་རྣམས་ལས་ཐར་མཛད་སྨན་པ་མཆོག་།གནས་དང་སྐྱབས་མ་མཆིས་ཤིང་དམན་པ་མཁྱེན་ནས་ནི། ། 41.159b འཇིག་རྟེན་གསུམ་འདིར་གནས་དང་སྐྱབས་སུ་ཁྱོད་བྱུང་ངོ ། །ཇི་ལྟར་ལྷ་ཚོགས་རབ་ཏུ་དད་ཅིང་དགར་གྱུར་ཏེ། །མེ་ཏོག་ཆར་པ་ཆེན་པོ་མཁའ་ལས་འབེབས་པ་དང ། །འདི་དག་ཇི་ལྟར་གོས་ཆེན་འཐོར་བར་བགྱིད་པ་ལས། །དེ་རིང་རྒྱལ་བར་འགྱུར་གྱིས་རབ་ཏུ་དགྱེས་པར་མཛོད། །ཤིང་དབང་དྲུང་དུ་གཤེགས་ལ་བསྙེངས་པ་མི་མངར་བཞུགས། །བདུད་ཀྱི་སྡེ་ལས་རྒྱལ་མཛོད་ཉོན་མོངས་དྲ་བ་དྲོལ། །སྔོན་གྱི་རྒྱལ་དབང་རྣམས་ཀྱིས་ཇི་ལྟར་སངས་རྒྱས་ལྟར། །བྱང་ཆུབ་ཞི་བ་དམ་པ་མཆོག་ཏུ་འཚང་རྒྱར་མཛོད། །ཁྱོད་ཀྱིས་གང་གི་དོན་དུ་བསྐལ་པ་བྱེ་མང་དུ། །འགྲོ་བ་སྒྲོལ་བའི་དོན་དུ་དཀའ་བ་སྤྱད་པ་མཛད། །ཁྱོད་ཀྱིས་དགོངས་པ་རྫོགས་ཏེ་དུས་ལ་ད་བབ་ཀྱིས། །ཤིང་དབང་དྲུང་དུ་གཤེགས་ཏེ་བྱང་ཆུབ་མཆོག་རེག་མཛོད། །དགེ་སློང་དག་དེ་ནས་བྱང་ཆུབ་སེམས་དཔས་འདི་སྙམ་དུ་བསམས་ཏེ། སྔོན་གྱི་དེ་བཞིན་གཤེགས་པ་དེ་དག་ཅི་ཞིག་ལ་བཞུགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སྙམ་མོ། །དེ་ནས་དེས་ཡང་འདི་སྙམ་དུ་བསམས་ཏེ། རྩཝ་བཏིང་ནས་བཞུགས་སོ་སྙམ་མོ། །དེ་ནས་གནས་གཙང་མའི་རིས་ཀྱི་ལྷའི་ཚོགས་བརྒྱ་སྟོང་བར་སྣང་ལ་འཁོད་པ་དག་གྀས་བྱང་ཆུབ་སེམས་དཔའི་སེམས་ཀྱི་ཡོངས་སུ་རྟོག་པ་སེམས་ཀྱིས་ཤེས་ནས་ཚིག་འདི་སྐད་ཅེས་སྨྲས་སོ། །དེ་དེ་བཞིན་ནོ། །སྐྱེས་བུ་དམ་པ་དེ་དེ་བཞིན་ཏེ། སྔོན་གྱི་དེ་བཞིན་གཤེགས་པ་དེ་དག་རྩཝ་བཏིང་བ་ལ་བཞུགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །དགེ་སློང་དག་བྱང་ཆུབ་སེམས་དཔས་ལམ་གྱི་གཡས་རོལ་ན་རྩཝ་འཚོང་བཀྲ་ཤིས་པ་ཞེས་བྱ་བ་རྩཝ་སྔོ་བ། འཇམ་པ། ཤིན་ཏུ་གཞོན་པ། ཉམས་དགའ་བ། ལྕང་ལོར་འཁྲིལ་བར་འདུག་པ། གཡས་སུ་འཁྱིལ་བ། རྨ་བྱའི་མགྲིན་པ་ལྟ་བུ། ཀ་ཙ་ལིན་དིའི་གོས་ལྟར་རེག་ན་བདེ་བ། 41.160a དྲི་རབ་ཏུ་ཞིམ་པ། ཁ་དོག་དང་ལྡན་པ། ཡིད་དུ་འོང་བ་དག་བརྔ་ཞིང་འདུག་པ་མཐོང་ངོ ། །མཐོང་ནས་ཀྱང་བྱང་ཆུབ་སེམས་དཔས་ལམ་བོར་ཏེ། རྩཝ་འཚོང་བཀྲ་ཤིས་པ་ག་ལ་བ་དེར་སོང་ནས་ཕྱིན་པ་དང ། རྩཝ་འཚོང་བཀྲ་ཤིས་པ་ལ་སྙན་པའི་ཚིག་གིས་སྨྲས་ཏེ། ཚིག་དེ་ནི་ཀུན་ཤེས་པར་བྱེད་པ་དང ། རྣམ་པར་ཤེས་པར་བྱེད་པ་དང ། རྣམ་པར་གསལ་བ་དང ། མི་ཆོད་པ་དང ། ཆགས་པར་བྱེད་པ་དང ། སྙན་ཅིང་འཇེབས་པ་དང ། མཉན་པར་འོས་པ་དང ། སྣུམ་པ་དང ། གོ་བར་བྱེད་པ་དང ། སྐུལ་བ་དང ། ཚིམ་པར་བྱེད་པ་དང ། དགའ་བར་བྱེད་པ་དང ། མི་རྩུབ་པ་དང ། ཤ་ཤོ་བོ་མ་ཡིན་པ་དང ། མི་བརླང་བ་དང ། མི་བརྐམ་པ་དང ། འཇམ་པ་དང ། སྙན་པ་དང ། རྣར་བདེ་བ་དང ། ལུས་དང་སེམས་ཤིན་ཏུ་དགའ་བར་བྱེད་པ་དང ། འདོད་ཆགས་དང་ཞེ་སྡང་དང་གཏི་མུག་དང་འཐབ་པ་དང ། རྙོག་པ་སེལ་བ་དང ། ཀ་ལ་པིང་ཀའི་སྒྲ་སྐད་ལྟ་བུ་དང ། བྱ་ཀུ་ན་ལ་དང ། ཤང་ཤང་ཏེའུ་ལ་སོགས་པ་སྒྲ་འབྱིན་པའི་ང་རོ་ལྟ་བུ་དང ། རྔ་བོ་ཆེ་དང ། གླུ་དབྱངས་ཀྱི་སྒྲ་སྐད་ཀྱི་ང་རོ་དང་ལྡན་པ་དང ། གནོད་པ་མེད་པ་དང ། བདེན་པ་དང ། གསལ་བ་དང ། ཡང་དག་པ་དང ། ཚངས་པའི་སྒྲ་སྐད་བསྒྲགས་པའི་གདངས་ལྟ་བུ་དང ། རྒྱ་མཚོའི་སྒྲའི་ཤུགས་ལྟ་བུ་དང ། རི་རྡོབ་པའི་སྒྲ་ལྟ་བུ་དང་ལྡན་པ་དང ། ལྷའི་དབང་པོ་དང ། ལྷ་མ་ཡིན་གྱི་དབང་པོས་མངོན་པར་བསྟོད་པ་དང ། ཟབ་པ་དང ། གཏིང་དཔག་དཀའ་བ་དང ། བདུད་ཀྱི་སྟོབས་སྟོབས་མེད་པར་བྱེད་པ་དང ། ཕས་ཀྱི་རྒོལ་བའི་སྨྲ་བ་འཇོམས་པ་དང ། སེང་གེའི་སྒྲའི་ཤུགས་ལྟ་བུ་དང ། རྟ་དང་གླང་པོ་ཆེའི་སྒྲ་འབྱིན་པའི་ང་རོ་ལྟ་བུ་དང ། ཀླུ་སྒྲ་སྒྲོག་པ་ལྟ་བུ་དང ། འབྲུག་ཟེར་བའི་སྒྲ་ལྟ་བུ་དང ། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་པ་དང ། འདུལ་བའི་སེམས་ཅན་ཐམས་ཅད་ཚིམ་པར་བྱེད་པ་དང ། ཏབ་ཏབ་པོར་མ་ཡིན་པ་དང ། འཚེ་བ་མེད་པ་དང ། མི་ཤོལ་པ་དང ། འཚམ་པ་དང ། རིགས་པ་དང ། 41.160b དུས་སུ་སྨྲ་བ་དང ། དུས་ལས་མི་ཡོལ་བ་དང ། ཆོས་བརྒྱ་སྟོང་ལེགས་པར་བརྒྱུས་པ་དང ། མཉེན་པ་དང ། ཐོགས་པ་མེད་པ་དང ། རྒྱུན་ཆད་པ་མེད་པའི་སྤོབས་པ་དང་ལྡན་པ་དང ། སྐད་ཅིག་གིས་སྐད་ཐམས་ཅད་སྒྲོགས་པ་དང ། བསམ་པ་ཐམས་ཅད་ཤེས་པར་བྱེད་པ་དང ། བདེ་བ་ཐམས་ཅད་བསྐྱེད་པ་དང ། ཐར་པའི་ལམ་ཡང་དག་པར་སྟོན་པ་དང ། ལམ་གྱི་ཚོགས་སྨྲ་བ་དང ། འཁོར་ལས་མི་འདའ་བ་དང ། འཁོར་ཐམས་ཅད་ཚིམ་པར་བྱེད་པ་དང ། སངས་རྒྱས་ཐམས་ཅད་ཀྱིས་གསུངས་པ་དང་འཐུན་པ་སྟེ། བྱང་ཆུབ་སེམས་དཔས་དེ་ལྟ་བུའི་ཚིག་གིས་རྩཝ་འཚོང་བཀྲ་ཤིས་པ་ལ་ཚིགས་སུ་བཅད་དེ་སྨྲས་པ། བཀྲ་ཤིས་རྩཝ་དག་ང་ལ་མྱུར་དུ་བྱིན། །དེ་རིང་ང་ལ་རྩཝས་ནི་དོན་ཆེན་འགྱུར། །དཔུང་དང་བཅས་པའི་བདུད་ནི་བཅོམ་ནས་སུ། །བྱང་ཆུབ་དམ་པ་ཞི་བ་རེག་པར་འགྱུར། །གང་གི་ཆེད་དུ་ང་ཡིས་བསྐལ་སྟོང་དུ། །སྦྱིན་དང་དུལ་དང་སྡོམ་དང་གཏོང་བྱས་དང ། །ཚུལ་ཁྲིམས་བརྟུལ་ཞུགས་དཀའ་ཐུབ་རབ་སྤྱད་པ། །དེ་ནི་དེ་རིང་ང་ཡིས་ཐོབ་པར་འགྱུར། །བཟོད་པའི་སྟོབས་དང་དེ་བཞིན་བརྩོན་འགྲུས་སྟོབས། །བསམ་གཏན་སྟོབས་དང་དེ་བཞིན་ཤེས་རབ་སྟོབས། །བསོད་ནམས་དང་ནི་མངོན་ཤེས་རྣམ་ཐར་སྟོབས། །དེ་ནི་དེ་རིང་ང་ལ་འགྲུབ་པར་འགྱུར། །ཤེས་རབ་སྟོབས་དང་ཐབས་ཀྱི་སྟོབས་དག་དང ། །རྫུ་འཕྲུལ་དང་ནི་ཆགས་མེད་བྱམས་པའི་སྟོབས། །སོ་སོ་ཡང་དག་རིག་དང་བདེན་པའི་སྟོབས། །དེ་ནི་དེ་རིང་ང་ལ་འགྲུབ་པར་འགྱུར། །དེ་རིང་ང་ལ་རྩཝ་སྦྱིན་བྱས་ན་ནི། །ཁྱོད་ལ་བསོད་ནམས་སྟོབས་ནི་མཐའ་ཡས་ཏེ། །དེ་ནི་ཁྱོད་ཀྱི་ངན་པའི་རྒྱུར་མི་འགྱུར། །ཁྱོད་ཀྱང་སྟོན་པ་བླ་ན་མེད་པར་འགྱུར། །བཀྲ་ཤིས་པས་ནི་འདྲེན་པའི་ཚིག་སྙན་རབ་ཏུ་མཛེས་ཐོས་ནས། །དགའ་ཞིང་མགུ་ལ་ཡིད་རངས་རབ་ཏུ་དགའ་བའི་ཡིད་ཀྱིས་ནི། །རྩཝ་འཇམ་གཞོན་ཞིང་བཟང་ལ་རེག་པར་ལྡན་པ་སྤར་གང་ཐོགས། །མདུན་དུ་འདུག་ནས་རབ་ཏུ་དགའ་བའི་སེམས་ཀྱིས་འདི་སྐད་སྨྲས། །གལ་ཏེ 41.161a རྩཝ་ཡིས་བྱང་ཆུབ་གོ་འཕང་དམ་པ་འཆི་མེད་པ། །མཆོག་གྱུར་ཞི་བ་བལྟ་དཀའ་སྔོན་གྱི་རྒྱལ་བའི་ལམ་འཐོབ་ན། །ཡོན་ཏན་ཆེན་པོའི་རྒྱ་མཚོ་གྲགས་པ་དཔག་མེད་ཁྱོད་བཞེས་ཅིག་།བདག་གིས་གོ་འཕང་དམ་པ་འཆི་མེད་ཐོག་མར་འཚང་རྒྱར་བགྱི། བརྟུལ་ཞུགས་དཀའ་ཐུབ་རྣམ་མང་བྱ་དཀའ་བསྐལ་མང་མ་སྤྱད་པར། །བཀྲ་ཤིས་རྩཝ་མཆོག་བཏིང་བས་བྱང་ཆུབ་འདི་ནི་འཐོབ་མི་འགྱུར། །གང་ཚེ་བློ་གྲོས་ལྡན་པ་ཤེས་རབ་བསོད་ནམས་ཐབས་ཀྱིས་འཕགས། །དེ་ནས་རྒྱལ་བ་ཐུབ་པས་རྡུལ་མེད་འགྱུར་ཞེས་ལུང་སྟོན་ཏོ། །བཀྲ་ཤིས་གལ་ཏེ་བྱང་ཆུབ་སྐྱེ་བོ་གཞན་ལ་སྦྱིན་ནུས་ན། །སྲོག་ཆགས་བསྡུ་བ་བྱས་ཏེ་སྦྱིན་པར་ཡིད་གཉིས་ཁྱོད་མ་ཟ། །གང་ཚེ་ང་ཡིས་བྱང་ཆུབ་ཐོབ་ཤེས་བདུད་རྩི་རྣམ་པར་དབྱེས། །ཁྱོད་འོངས་ཆོས་ཀྱི་དམ་པ་ཉོན་དང་རྡུལ་དང་བྲལ་བར་འགྱུར། །འདྲེན་པས་ཤིན་ཏུ་མཆོག་ཏུ་འཇམ་པའི་རྩཝ་ནི་སྤར་གང་བླངས། །སེང་གེ་ངང་པའི་སྟབས་ཀྱིས་ཆས་ནས་ས་ནི་རབ་ཏུ་གཡོས། །ལྷ་ཀླུ་ཚོགས་རྣམས་ཐལ་མོ་སྦྱར་ཏེ་རབ་ཏུ་དགའ་ཡིད་ཀྱིས། །དེང་འདིས་བདུད་དཔུང་བཅོམ་ནས་བདུད་རྩི་རེག་པར་འགྱུར་སྙམ་སེམས། །དགེ་སློང་དག་དེ་ལྟར་བྱང་ཆུབ་སེམས་དཔའ་བྱང་ཆུབ་ཀྱི་ཤིང་དྲུང་དུ་འགྲོ་བ་ན་ལྷའི་བུ་རྣམས་དང ། བྱང་ཆུབ་སེམས་དཔའ་རྣམས་ཀྱིས་བྱང་ཆུབ་སེམས་དཔའ་དེང་འདིར་འདུག་ནས་བྱང་ཆུབ་ཐོབ་པར་འགྱུར་ཞིང་མངོན་པར་རྫོགས་པར་འཚང་རྒྱ་བར་འགྱུར་སྙམ་སྟེ། བྱང་ཆུབ་ཀྱི་ཤིང་བརྒྱད་ཁྲི་བརྒྱན་པར་གྱུར་ཏོ། །དེ་ནས་བྱང་ཆུབ་ཀྱི་ཤིང་ཁ་ཅིག་ནི་མེ་ཏོག་གི་རང་བཞིན་ཅན་ལ་འཕང་དུ་དཔག་ཚད་བརྒྱ་པ་ཡང་ཡོད། བྱང་ཆུབ་ཀྱི་ཤིང་ཁ་ཅིག་ནི་སྤོས་ཀྱི་རང་བཞིན་ཅན་ལ་འཕང་དུ་དཔག་ཚད་སྟོང་པ་ཡང་ཡོད། བྱང་ཆུབ་ཀྱི་ཤིང་ཁ་ཅིག་ནི་ཙན་དན་གྱི་རང་བཞིན་ཅན་ལ་འཕང་དུ་དཔག་ཚད་འབུམ་པ་ཡང་ཡོད། བྱང་ཆུབ་ཀྱི་ཤིང་ཁ་ཅིག་ནི་གོས་ཀྱི་རང་བཞིན་ཅན་ལ་འཕང་དུ་དཔག་ཚད་ལྔ་འབུམ་པ་ཡང་ཡོད། བྱང་ཆུབ་ཀྱི་ཤིང་ཁ་ཅིག་ནི་རིན་པོ་ཆེའི་རང་བཞིན་ཅན 41.161b ལ་འཕང་དུ་དཔག་ཚད་འབུམ་ཕྲག་བཅུ་པ་ཡང་ཡོད། བྱང་ཆུབ་ཀྱི་ཤིང་ཁ་ཅིག་ནི་རིན་པོ་ཆེ་ཐམས་ཅད་ཀྱི་རང་བཞིན་ཅན་ལ་དཔག་ཚད་བྱེ་བ་ཁྲག་ཁྲིག་བརྒྱ་སྟོང་པ་ཡང་ཡོད། བྱང་ཆུབ་ཀྱི་ཤིང་དེ་དག་ཐམས་ཅད་ཀྱི་དྲུང་ན་ཡང་ཇི་ལྟར་འདུག་པའི་སེང་གེའི་ཁྲི་ལྷའི་རས་བཅོས་བུ་སྣ་ཚོགས་བཏིང་བ་བཤམས་པར་གྱུར་ཏོ། །བྱང་ཆུབ་ཀྱི་ཤིང་ཁ་ཅིག་གི་དྲུང་དུ་ནི་པད་མའི་ཁྲི་སྟན་བཤམས་པར་གྱུར་ཏོ། །ཁ་ཅིག་གི་དྲུང་དུ་ནི་སྤོས་ཀྱི་ཁྲི་སྟན་ནོ། །ཁ་ཅིག་གི་དྲུང་དུ་ནི་རིན་པོ་ཆེ་རྣམ་པ་སྣ་ཚོགས་ཀྱི་ཁྲི་སྟན་ནོ། །བྱང་ཆུབ་སེམས་དཔའ་ནི་རོལ་པ་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་སེམས་དཔའི་ཏིང་ངེ་འཛིན་རོལ་པ་བཀོད་པ་འདི་ལ་བྱང་ཆུབ་སེམས་དཔའ་སྙོམས་པར་ཞུགས་མ་ཐག་ཏུ་དེ་ནས་སྐད་ཅིག་དེ་ཉིད་ལ་བྱང་ཆུབ་སེམས་དཔའ་མཚན་དང་དཔེ་བྱད་བཟང་པོས་ལེགས་པར་བརྒྱན་པའི་ལུས་ཀྱིས་བྱང་ཆུབ་ཀྱི་ཤིང་དྲུང་གི་སེང་གེའི་ཁྲི་དེ་དག་ཐམས་ཅད་ལ་འདུག་པར་ཀུན་ཏུ་སྣང་སྟེ། བྱང་ཆུབ་སེམས་དཔའ་དང ། ལྷའི་བུ་སོ་སོའི་ཡིད་ལ་ཡང་བྱང་ཆུབ་སེམས་དཔའ་ནི་བདག་ཉིད་ཀྱི་སེང་གེའི་ཁྲི་ལ་སྙོམས་པར་ཞུགས་ཤིང་འདུག་གི་གཞན་གྱི་ཁྲི་ལ་ནི་མ་ཡིན་པར་ཤེས་སོ། །ཇི་ལྟར་དེ་དག་གིས་ཤེས་པ་དེ་བཞིན་དུ་བྱང་ཆུབ་སེམས་དཔའི་ཏིང་ངེ་འཛིན་རོལ་པ་བཀོད་པ་འདི་ཉིད་ཀྱི་མཐུས་སེམས་ཅན་དམྱལ་བ་པ་དང ། དུད་འགྲོའི་སྐྱེ་གནས་པ་དང ། གཤིན་རྗེའི་འཇིག་རྟེན་པ་ཐམས་ཅད་དང ། ལྷ་དང་མི་ཐམས་ཅད་དང ། འགྲོ་བ་ཐམས་ཅད་དུ་སྐྱེས་པའི་སེམས་ཅན་ཐམས་ཅད་ཀྱིས་ཀྱང་བྱང་ཆུབ་སེམས་དཔའ་བྱང་ཆུབ་ཀྱི་ཤིང་དྲུང་ན་སེང་གེའི་ཁྲི་ལ་འདུག་པར་མཐོང་ངོ ། །དེ་ལྟ་མོད་ཀྱི་འོན་ཀྱང་དམན་པ་ལ་མོས་པའི་སེམས་ཅན་རྣམས་ཀྱི་བློ་གྲོས་ཡོངས་སུ་ཚིམ་པར་བྱ་བའི་ཕྱིར་བྱང་ཆུབ་སེམས་དཔའ་རྩཝ་སྤར་གང་ཐོགས་ཏེ། བྱང་ཆུབ་ཀྱི་ཤིང་ག་ལ་བ་དེར་སོང་ནས་ཕྱིན་པ་དང ། བྱང་ཆུབ་ཀྱི་ཤིང་ལ་ལན་བདུན་བསྐོར་བ་བྱས་ཏེ། བདག་ཉིད་ཀྱིས་རྩཝའི་རྩེ་མོ་ནི་ནང་དུ་བསྟན། 41.162a རྩ་བ་ནི་ཕྱིར་བསྟན་ནས། རྩཝའི་གདིང་བ་ཀུན་ནས་བཟང་པོ་བཏིང་སྟེ། སེང་གེ་ལྟ་བུ་དང ། དཔའ་བོ་ལྟ་བུ་དང ། སྟོབས་ལྟ་བུ་དང ། བརྟན་པ་ལྟ་བུ་དང ། བརྩོན་འགྲུས་ལྟ་བུ་དང ། མཐུ་ལྟ་བུ་དང ། གླང་པོ་ལྟ་བུ་དང ། དབང་ཕྱུག་ལྟ་བུ་དང ། རང་བྱུང་ལྟ་བུ་དང ། ཡེ་ཤེས་ཅན་ལྟ་བུ་དང ། བླ་ན་མེད་པ་ལྟ་བུ་དང ། ཁྱད་པར་ལྟ་བུ་དང ། མངོན་པར་འཕགས་པ་ལྟ་བུ་དང ། གྲགས་པ་ལྟ་བུ་དང ། བརྗོད་པ་ལྟ་བུ་དང ། སྦྱིན་པ་ལྟ་བུ་དང ། ཚུལ་ཁྲིམས་ལྟ་བུ་དང ། བཟོད་པ་ལྟ་བུ་དང ། བརྩོན་འགྲུས་ལྟ་བུ་དང ། བསམ་གཏན་ལྟ་བུ་དང ། ཤེས་རབ་ལྟ་བུ་དང ། ཡེ་ཤེས་ལྟ་བུ་དང ། བསོད་ནམས་ལྟ་བུ་དང ། བདུད་རྒོལ་བ་བཅོམ་པ་ལྟ་བུ་དང ། ཚོགས་ལྟ་བུར་སྐྱིལ་མོ་ཀྲུང་བཅས་ནས་རྩཝ་བཏིང་བ་དེ་ལ་ཤར་ཕྱོགས་སུ་བལྟས་ཏེ་འདུག་ནས། ལུས་དྲང་པོར་བསྲང་སྟེ། དྲན་པ་མངོན་དུ་བཞག་ནས་འདི་འདྲ་བའི་ཡི་དམ་བརྟན་པོ་བྱས་སོ། །སྟན་འདིར་བདག་གི་ལུས་ནི་སྐམས་ཀྱང་རུང ། །ལྤགས་པ་རུས་པ་ཤ་རྣམས་ཞིག་ཀྱང་རུང ། །བསྐལ་མང་རྙེད་དཀའ་བྱང་ཆུབ་མ་ཐོབ་པར། །སྟན་འདི་ལས་ནི་ལུས་བསྐྱོད་མི་བྱའོ། །བྱང་ཆུབ་ཀྱི་སྙིང་པོར་བཞུད་པའི་ལེའུ་ཞེས་བྱ་བ་སྟེ། བཅུ་དགུ་པའོ།། །། འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་གསུམ་པ། དགེ་སློང་དག་དེ་ལྟར་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་པ་དང ། འདོད་པ་ན་སྤྱོད་པ་དྲུག་གི་ལྷ་རྣམས་བྱང་ཆུབ་སེམས་དཔའ་ལ་བར་ཆད་བྱེད་པ་མི་འབྱུང་གྲང་སྙམ་སྟེ། ཤར་ཕྱོགས་ལོགས་སུ་གནས་པར་གྱུར་ཏོ། །དེ་བཞིན་དུ་ལྷོ་དང་ནུབ་དང ། བྱང་ཕྱོགས་ཀྱང་ལྷ་རྣམས་ཀྱིས་ཡོངས་སུ་བསྲུངས་པར་གྱུར་ཏོ། །དགེ་སློང་དག་དེ་ལྟར་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་པ་དེའི་ཚེ་བྱང་ཆུབ་སེམས་དཔའ་སྐུལ་བ་ཞེས་བྱ་བའི་འོད་བྱུང་ནས 41.162b འོད་དེས་ཕྱོགས་བཅུ་ཀུན་ཏུ་གྲངས་མེད་དཔག་ཏུ་མེད་པ། ཆོས་ཀྱི་དབྱིངས་ཀྱིས་གླས་པ། ནམ་མཁའི་མཐས་གཏུགས་པའི་སངས་རྒྱས་ཀྱི་ཞིང་ཐམས་ཅད་སྣང་བར་གྱུར་ཏོ། །དེ་ནས་ཤར་ཕྱོགས་ན་དེ་བཞིན་གཤེགས་པ་དྲི་མ་མེད་པའི་འོད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དྲི་མ་མེད་པར་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བ་བཀོད་པ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་དེའི་ཚེ་རྫུ་འཕྲུལ་གྱི་མངོན་པར་འདུ་བྱ་བ་དེ་ལྟ་བུ་བྱས་ཏེ། རྫུ་འཕྲུལ་མངོན་པར་འདུ་བྱ་བ་དེ་བྱས་པས་ཕྱོགས་བཅུར་ནམ་མཁའི་མཐས་གཏུགས་པའི་སངས་རྒྱས་ཀྱི་ཞིང་ཐམས་ཅད་འཁོར་གྱི་ཁྱམས་བཻ་དཱུརྱ་སྔོན་པོ་དག་པ་ལས་བྱས་པ་ཞིག་ཏུ་བསྟན་ཏོ། །འགྲོ་བ་ལྔར་སྐྱེས་པའི་སེམས་ཅན་ཐམས་ཅད་ཀྱི་མདུན་དུ་ཡང་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་པ་བསྟན་ཏོ། །སེམས་ཅན་དེ་དག་ཀྱང་ཕན་ཚུན་དུ་སོར་མོ་གཅིག་གིས་བྱང་ཆུབ་སེམས་དཔའ་སྟོན་ཅིང་སེམས་ཅན་ཚུལ་དུ་ཤིས་པའི་གཟུགས་འདི་ལྟ་བུ་དང་ལྡན་པ་འདི་སུ་ཞིག་།འདི་ལྟར་རྣམ་པར་མཛེས་པའི་སེམས་ཅན་འདི་སུ་ཞིག་ཅེས་འཛེར་ཏོ། །སེམས་ཅན་དེ་དག་གི་མདུན་དུ་བྱང་ཆུབ་སེམས་དཔའ་དེས་བྱང་ཆུབ་སེམས་དཔའ་རྣམས་ཀྱང་སྤྲུལ་ཏེ། དེ་ན་བྱང་ཆུབ་སེམས་དཔའི་གཟུགས་དེ་དག་གིས་ཚིགས་སུ་བཅད་པ་འདི་སྨྲས་སོ། །ཅི་ཡང་མེད་པའི་འདོད་ཆགས་ཞེ་སྡང་རྙོག་པ་གང་ཡིན་བག་ཆགས་བཅས་བཏོན་པ། །གང་གིས་ལུས་ལས་འོད་ཕྱུང་ཕྱོགས་བཅུའི་འོད་རྣམས་ཐམས་ཅད་འོད་ནི་མེད་པར་བྱས། །གང་གིས་བསོད་ནམས་ཏིང་འཛིན་ཡེ་ཤེས་ཚོགས་ནི་བསྐལ་པ་མང་པོར་ཀུན་སྤེལ་བ། ། 41.163a ཤཱཀྱ་ཐུབ་པ་ཐུབ་པ་ཆེན་པོ་དམ་པ་འདི་ནི་ཕྱོགས་རྣམས་ཀུན་ཏུ་མཛེས། །དེ་ནས་ལྷོ་ཕྱོགས་ན་དེ་བཞིན་གཤེགས་པ་རིན་ཆེན་འོད་འཕྲོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རིན་པོ་ཆེ་བཀོད་པར་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་གདུགས་བརྩེགས་པ་ཀུན་ཏུ་སྟོན་པ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་རིན་པོ་ཆེའི་གདུགས་གཅིག་གིས་ཐམས་ཅད་དང་ལྡན་པའི་འཁོར་གྱི་ཁྱམས་དེ་བཀབ་བོ། །དེ་ན་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དག་ཕན་ཚུན་འདི་སྐད་འཛེར་ཏེ། གང་གི་ཕྱིར་རིན་པོ་ཆེའི་གདུགས་བཀོད་པ་རྣམ་པ་འདི་ལྟ་བུ་འདི་སྣང་བར་གྱུར་པ་འདི་སུའི་འབྲས་བུ་ཞེས་འཛེར་ཏོ། །དེ་ནས་རིན་པོ་ཆེའི་གདུགས་དེ་ལས་ཚིགས་སུ་བཅད་པ་འདི་བྱུང་ངོ ། གང་གིས་རིན་པོ་ཆེ་དང་སྤོས་གདུགས་སྟོང་ཕྲག་བྱེ་བ་ཁྲག་ཁྲིག་དག་།བྱམས་པའི་ཡིད་ཀྱིས་དོ་ཟླ་མེད་པར་བཞུགས་དང་མྱ་ངན་འདས་ལ་ཕུལ། །དེ་ཡིས་མཚན་མཆོག་ལྡན་པ་ཕན་མཛད་སྲེད་མེད་བུ་ཡི་མཐུ་ལྡན་པ། །ཡོན་ཏན་མངའ་བ་བྱང་ཆུབ་ཤིང་དྲུང་གཤེགས་པ་དེ་ལ་མཆོད་པ་བྱས། །དེ་ནས་ནུབ་ཕྱོགས་ན་དེ་བཞིན་གཤེགས་པ་མེ་ཏོག་གི་ཕྲེང་བ་ནགས་ཚལ་གྱི་ཕྲེང་བ་མེ་ཏོག་ཀུན་ཏུ་རྒྱས་པ་མངོན་པར་མཁྱེན་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མེ་ཏོག་ཙམ་པ་ཀའི་ཁ་དོག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་དབང་པོའི་དྲ་བ་ཅན་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས 41.163b བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་རིན་པོ་ཆེའི་དྲ་བ་གཅིག་གིས་ཐམས་ཅད་དང་ལྡན་པའི་འཁོར་གྱི་ཁྱམས་དེ་བཀབ་པོ། །དེ་ན་ཕྱོགས་བཅུའི་ལྷ་དང་ཀླུ་དང ། གནོད་སྦྱིན་དང ། དྲི་ཟ་དག་ཕན་ཚུན་དུ་འདི་སྐད་འཛེར་ཏེ། འོད་ཀྱི་བཀོད་པ་རྣམ་པ་འདི་ལྟ་བུ་འདི་སུའི་ཡིན་ཞེས་འཛེར་ཏོ། །དེ་ནས་རིན་པོ་ཆེའི་དྲ་བ་དེ་ལས་ཚིགས་སུ་བཅད་པ་འདི་བྱུང་ངོ ། །རིན་ཆེན་འབྱུང་གནས་འཇིག་རྟེན་གསུམ་དགའ་རིན་ཆེན་ཏོག་།རིན་ཆེན་དམ་པ་རིན་ཆེན་གྲགས་པ་དེ་ཆོས་དགྱེས། །དཀོན་མཆོག་གསུམ་པོ་རྒྱུན་མི་འཆད་པའི་བརྩོན་འགྲུས་བརྙེས། །བྱང་ཆུབ་མཆོག་བརྙེས་འགྱུར་ཏེ་དེ་ཡི་མཆོད་པ་འདི། །དེ་ནས་བྱང་ཕྱོགས་ན་དེ་བཞིན་གཤེགས་པ་ཉི་ཟླ་ཟིལ་དུ་རླག་པར་བྱེད་པའི་འོད་དང་ལྡན་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཉི་མ་འཁོར་བར་བྱང་ཆུབ་སེམས་དཔའ་སེམས་དཔའ་ཆེན་པོ་བཀོད་པའི་རྒྱལ་པོ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཇི་སྙེད་པ་དེ་སྙེད་འཁོར་གྱི་ཁྱམས་དེར་ཀུན་ཏུ་བསྟན་ཏོ། །དེ་ན་བྱང་ཆུབ་སེམས་དཔའ་ཁ་ཅིག་འདི་སྐད་འཛེར་ཏེ། བཀོད་པ་རྣམ་པ་འདི་ལྟ་བུ་འདི་སུའི་ཡིན་ཞེས་འཛེར་ཏོ། །དེ་ནས་བཀོད་པ་དེ་དག་ཐམས་ཅད་ལས་ཚིགས་སུ་བཅད་པ་འདི་བྱུང་ངོ ། །གང་གིས་བསོད་ནམས་ཡེ་ཤེས་ཤིན་ཏུ་མང་པོས་ལུས་ནི་རྣམ་སྦྱངས་ཤིང ། །གང་གིས་བརྟུལ་ཞུགས་དཀའ་ཐུབ་དག་དང་བདེན་པའི་ཆོས་ཀྱིས་ངག་སྦྱངས་ལ། །གང་གིས་ཁྲེལ་ཡོད་མོས་པ་བྱམས་དང་དེ་བཞིན་སྙིང་རྗེས་སེམས 41.164a སྦྱངས་པ། །དེ་ནི་ཤིང་རྒྱལ་དྲུང་གཤེགས་ཤཱཀྱ་ཁྱུ་མཆོག་དེ་ལ་མཆོད་པ་བྱེད། །དེ་ནས་ཤར་ལྷོའི་ཕྱོགས་མཚམས་ན་དེ་བཞིན་གཤེགས་པ་ཡོན་ཏན་གྱི་རྒྱལ་པོ་སྣང་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཡོན་ཏན་གྱི་འབྱུང་གནས་སུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་གྱི་བློ་གྲོས་ཤེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་འཁོར་གྱི་ཁྱམས་དེར་ཡོན་ཏན་གྱི་བཀོད་པ་ཐམས་ཅད་དང་ལྡན་པའི་ཁང་པ་བརྩེགས་པ་མངོན་པར་སྤྲུལ་ཏེ་ཁང་པ་བརྩེགས་པ་དེ་ལས་ཚིགས་སུ་བཅད་པ་འདི་བྱུང་ངོ ། །གང་གི་ཡོན་ཏན་དག་གིས་ལྷ་དང་ལྷ་མིན་དང ། །གནོད་སྦྱིན་ལྟོ་འཕྱེ་ཆེ་དག་རྟག་ཏུ་ཡོན་ཏན་བགོས། །ཡོན་ཏན་ཅན་དེ་ཡོན་ཏན་ལྡན་པའི་རྒྱལ་རིགས་སྐྱེས། །ཡོན་ཏན་རྒྱ་མཚོ་བྱང་ཆུབ་ཤིང་གི་དྲུང་ན་བཞུགས། །དེ་ནས་ལྷོ་ནུབ་ཀྱི་ཕྱོགས་མཚམས་ན་དེ་བཞིན་གཤེགས་པ་རིན་ཆེན་སྲོག་ཤིང་གི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རིན་པོ་ཆེ་འབྱུང་བར་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེ་འབྱུང་བ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་འཁོར་གྱི་ཁྱམས་དེར་རིན་པོ་ཆེའི་མཁའ་རྟེན་གྲངས་མེད་དཔག་ཏུ་མེད་པ་མངོན་པར་སྤྲུལ་ཏེ། རིན་པོ་ཆེའི་མཁའ་རྟེན་དེ་དག་ལས་ཚིགས་སུ་བཅད་པ་འདི་བྱུང་ངོ ། །གང་གིས་རྒྱ་མཚོར་བཅས་པའི་ས་དང་དེ་བཞིན་རིན་ཆེན་རྣམས་དག 41.164b དང ། །ཁང་བཟངས་སྐར་ཁུང་བསིལ་ཁང་མཆོག་དང་ཟུང་དང་བཞོན་པ་མཁའ་རྟེན་བརྒྱན། །མེ་ཏོག་ཕྲེང་བ་མཛེས་དང་འདུན་ས་དག་དང་བསྐྱེད་མོས་ཚལ་རྣམས་དང ། །རྐང་པ་ལག་པ་མགོ་དང་མིག་བཏང་བ་དེ་བྱང་ཆུབ་སྙིང་པོར་འདུག་།དེ་ནས་ནུབ་བྱང་གི་ཕྱོགས་མཚམས་ན་དེ་བཞིན་གཤེགས་པ་འབྲུག་སྒྲ་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་སྤྲིན་དང་ལྡན་པར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་བརྩེགས་འབྲུག་བསྒྲགས་དབྱངས་ཤེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་དུས་ཀྱི་རྗེས་སུ་འབྲང་བའི་ཨ་ཀ་རུའི་སྤྲིན་མངོན་པར་སྤྲུལ་ཏེ་འཁོར་གྱི་ཁྱམས་དེར་ཙན་དན་སྦྲུལ་གྱི་སྙིང་པོའི་ཕྱེ་མའི་ཆར་མངོན་པར་ཕབ་པོ། །དུས་ཀྱི་རྗེས་སུ་འབྲང་བའི་སྤྲིན་གྱི་དཀྱིལ་འཁོར་དེ་ལས་ཀྱང་ཚིགས་སུ་བཅད་པ་འདི་བྱུང་ངོ ། །རིག་དང་རྣམ་པར་གྲོལ་བའི་འོད་ཀྱི་ཆོས་ཀྱི་སྤྲིན་གྱིས་སྲིད་གསུམ་ཐམས་ཅད་ཁྱབ། །དམ་ཆོས་འདོད་ཆགས་བྲལ་བ་བདུད་རྩི་མྱ་ངན་འདས་པ་ཐོབ་བྱེད་ཆར་པ་འབེབས། །འདོད་ཆགས་ཉོན་མོངས་འཆིང་བའི་འཁྲི་ཤིང་ཐམས་ཅད་བག་ཆགས་བཅས་ཏེ་གཅོད་པར་འགྱུར། །བསམ་གཏན་རྫུ་འཕྲུལ་སྟོབས་དང་དབང་པོའི་མེ་ཏོག་རྒྱས་པ་དད་པར་བྱེད་པ་འབྱིན། །དེ་ནས་བྱང་ཤར་གྱི་ཕྱོགས་མཚམས་ན་དེ་བཞིན་གཤེགས་པ་རིན་པོ་ཆེའི་གདུགས་མངོན་པར་འཕགས་པ་སྣང་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་གསེར་གྱི་དྲ་བས་ཁེབས་པ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གསེར་གྱི་དྲ་བས་བརྒྱན་པ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། 41.165a བྱང་ཆུབ་ཀྱི་སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་ཁང་པ་བརྩེགས་པ་དེ་དག་ཐམས་ཅད་དང ། རིན་པོ་ཆེའི་མཁའ་རྟེན་རྣམས་སུ་བྱང་ཆུབ་སེམས་དཔའི་གཟུགས་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ་དག་མངོན་པར་སྤྲུལ་ཏེ། བྱང་ཆུབ་སེམས་དཔའི་གཟུགས་དེ་དག་ཐམས་ཅད་ཀྱང་ལྷ་དང་མིའི་མེ་ཏོག་གི་ཕྲེང་བ་ཐོགས་ཤིང་བྱང་ཆུབ་སེམས་དཔའ་ག་ལ་བ་དེ་ལོགས་སུ་ལུས་བཏུད་ནས་མེ་ཏོག་གི་ཕྲེང་བ་སྤྱངས་ཏེ་ཚིགས་སུ་བཅད་པ་འདི་སྨྲས་སོ། །གང་གིས་སངས་རྒྱས་ཁྲག་ཁྲིག་སྔོན་བསྟོད་ཅིང ། །གུས་དང་བཅས་པས་དད་པ་ཆེ་བསྐྱེད་ལ། །ཚངས་པའི་སྒྲ་དབྱངས་སྙན་པའི་ཚིག་སྨྲས་པ། །བྱང་ཆུབ་སྙིང་པོར་བྱོན་ལ་མགོས་ཕྱག་འཚལ། །དེ་ནས་འོག་གི་ཕྱོགས་ན་དེ་བཞིན་གཤེགས་པ་ཀུན་ཏུ་གཟིགས་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཀུན་ཏུ་རྣམ་པར་བལྟས་པར་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་སྙིང་པོ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་བཻ་དཱུརྱའི་འཁོར་གྱི་ཁྱམས་དེར་འཛམ་བུའི་གླིང་གི་གསེར་གྱི་པད་མ་རྣམས་མངོན་དུ་བྱུང་བར་བསྟན་ཏོ། །པད་མ་དེ་དག་གི་སྙིང་པོ་ལ་བུད་མེད་ལུས་ཕྱེད་སྣང་བ། ཁ་དོག་དང་གཟུགས་ཕུན་སུམ་ཚོགས་པ། རྒྱན་ཐམས་ཅད་ཀྱིས་བརྒྱན་པ་བསྟན་ཏེ། ལག་པ་གཡས་གཡོན་ན་མགུལ་གདུབ་དང ། གདུ་བུ་དང ། དཔུང་རྒྱན་དང ། གསེར་སྐུད་དང ། མུ་ཏིག་གི་དོ་ཤལ་ལ་སོགས་པ་རྒྱན་རྣམ་པ་མང་པོ་ཐོགས་ཤིང་མེ་ཏོག་དང་དར་གྱི་ལྡ་ལྡི་སྤྱངས་ནས་བྱང་ཆུབ་ཀྱི་སྙིང་པོ 41.165b ག་ལ་བ་དང ། བྱང་ཆུབ་སེམས་དཔའ་ག་ལ་བ་དེ་ལོགས་སུ་ལུས་བཏུད་དེ་ཚིགས་སུ་བཅད་པ་འདི་སྨྲས་སོ། །གང་ཞིག་རྟག་ཏུ་སངས་རྒྱས་ཉན་ཐོས་དང ། །རང་རྒྱལ་དག་དང་བླ་མ་རྣམས་ལ་འདུད། །ཁྲིམས་ལྡན་རྟག་དྲན་དགའ་ལ་ང་རྒྱལ་མེད། །ཡོན་ཏན་ལྡན་པ་དེ་ལ་འདུད་པ་བྱོས། །དེ་ནས་སྟེང་གི་ཕྱོགས་ན་དེ་བཞིན་གཤེགས་པ་ཚོགས་ཀྱི་དབང་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཚོགས་ཀྱི་དམ་པར་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་མཛོད་ཅེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་ནམ་མཁའི་དཀྱིལ་ན་འདུག་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ན་སྔོན་མ་མཐོང་མ་ཐོས་པའི་མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། བདུག་སྤོས་དང ། གོས་དང ། རྒྱན་དང ། གདུགས་དང ། རྒྱལ་མཚན་དང ། བ་དན་དང ། རྣམ་པར་རྒྱལ་བའི་ཁང་པ་དང ། རིན་པོ་ཆེ་དང ། ནོར་བུ་དང ། གསེར་དང ། དངུལ་དང ། མུ་ཏིག་དང ། རྟ་དང ། གླང་པོ་ཆེ་དང ། ཤིང་རྟ་དང ། དཔུང་བུ་ཆུང ། བཞོན་པ་དང ། ཤིང་ལྗོན་པ་དང ། ལོ་མ་དང ། མེ་ཏོག་དང ། འབྲས་བུ་དང ། ཁྱེའུ་དང ། བུ་མོ་དང ། ལྷ་དང་ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། མི་དང ། མི་མ་ཡིན་པ་ཇི་སྙེད་ཡོད་པ་དེ་དག་ཐམས་ཅད་ནམ་མཁའི་དཀྱིལ་ནས་ཆར་ཆེན་པོ་མངོན་པར་ཕབ་སྟེ། ཐམས་ཅད་དགའ་བ་དང ། བདེ་བ་བསྐྱེད་ཀྱི་སེམས་ཅན་གང་ལ་ཡང་འཇིགས་པ་འམ་གནོད་པར་མི་བྱེད་དོ། །དེ་བཞིན་དུ་སྦྱར་ཏེ་དེ་ལ་འདི་སྐད་ཅེས་བྱའོ། ། 41.166a ཕྱོགས་བཅུ་དེ་དག་རྣམས་ནས་རྒྱལ་བའི་སྲས་པོ་གང ། །ཕན་པར་བྱེད་པ་མཆོད་པར་བྱང་ཆུབ་ལྷགས་གྱུར་པ། །འགྲོ་ལ་ཕན་པ་དེ་དག་རྣམས་ཀྱི་བཀོད་རིམ་དང ། །རྩལ་དང་རིམ་པ་མཛེས་པ་དག་གི་དཔེ་ཙམ་ཉོན། །ཁ་ཅིག་དོ་ཤལ་ཁྲག་ཁྲིག་རབ་ཏུ་སྤྱང་བྱས་ཏེ། །ནམ་མཁའ་ལས་ནི་འབྲུག་ལྟར་ཤིན་ཏུ་སྒྲོགས་ཤིང་ལྷགས། །ཁ་ཅིག་མཁའ་ལས་མེ་ཏོག་གཞལ་མེད་ཁང་སྟོན་ཅིང ། །ཅོད་པན་རིན་ཆེན་ཐོགས་ལ་གཙུག་ཕུད་འཕྱང་ཞིང་ལྷགས། །ཁ་ཅིག་སྟོང་པ་མཚན་མེད་སྨོན་མེད་མཆོག་བརྗོད་ཅིང ། །ས་ལས་སེང་གེ་ལྟ་བུར་ཤིན་ཏུ་སྒྲོགས་ཤིང་ལྷགས། །ཁ་ཅིག་སྔོན་ཆད་མ་མཐོང་མེ་ཏོག་མཛེས་མཐོར་ཞིང ། །ཁྱུ་མཆོག་ཅི་འདྲ་དེ་འདྲར་ཤིན་ཏུ་སྒྲོགས་ཤིང་ལྷགས། །ཁ་ཅིག་རང་གི་ལུས་ཀྱི་ཁ་དོག་སྟོང་སྟོན་ཅིང ། །རྨ་བྱ་ལྟ་བུར་མཁའ་ལས་ཤིན་ཏུ་སྒྲོགས་ཤིང་ལྷགས། །ཁ་ཅིག་བདེ་གཤེགས་སྲས་ཀྱི་ཡོན་ཏན་ཕྲེང་བརྗོད་ཅིང ། །ཟླ་བ་ལྟ་བུར་མཁའ་ལས་ཤིན་ཏུ་རྒྱས་ཤིང་ལྷགས། །ཁ་ཅིག་ཉི་མ་ལྟ་བུར་འོད་ཟེར་རབ་འགྱེད་དེ། །བདུད་ཀྱི་གནས་རྣམས་ཐམས་ཅད་མོག་མོག་བྱེད་ཅིང་ལྷགས། །བསོད་ནམས་ཚོགས་བསགས་ཁ་ཅིག་དབང་པོའི་མཆོད་སྡོང་འདྲའི། །དྲི་མེད་ཏོག་ཐོགས་བྱང་ཆུབ་སྙིང་པོ་དེར་ཡང་ལྷགས། །ཁ་ཅིག་མཁའ་ལས་ནོར་བུ་རིན་ཆེན་དྲ་བ་འཐོར། །ཟླ་བ་ཟླ་བཟངས་ཐང་སྐྱེས་རྣམ་མཛེས་མན་དཱ་ར། །པར་ཤ་ཙམ་པ་ཀ་དང་སྣ་མའི་མེ་ཏོག་ཕྲེང ། །བྱང་ཆུབ་སེམས་དཔའ་ཤིང་རྒྱལ་དྲུང་ན་བཞུགས་ལ་འཐོར། །ཁ་ཅིག་རྐང་པ་གཉིས་ཀྱིས་ས་ནི་རབ་བསྐྱོད་ལ། །ས་བསྐྱོད་ནས་ཀྱང་སྐྱེ་བོ་དགའ་བར་བྱེད་ཅིང་ལྷགས། །ཁ་ཅིག་རི་བོ་ལྷུན་པོ་ལག་ན་ཐོགས་བྱེད་ལ། །བར་སྣང་གནས་ཏེ་མེ་ཏོག་སྐོན་བུ་འཐོར་ཞིང་ལྷགས། །ཁ་ཅིག་རྒྱ་མཚོ་བཞི་པོ་མགོ་ལ་ཐོགས་ནས་ནི། །ས་ལ་སྤོས་ཆུ་འཐོར་ཏེ་ཆག་ཆག་འདེབས་ཤིང་ལྷགས། །ཁ་ཅིག་རིན་ཆེན་མཆོད་སྡོང་སྣ་ཚོགས་ཐོགས་ནས་ནི། །རྒྱང་རིང་འདུག 41.166b སྟེ་བྱང་ཆུབ་སེམས་དཔའ་སྟོན་ཅིང་ལྷགས། །ཁ་ཅིག་ཚངས་པ་ལྟ་བུར་ཞི་བའི་གཟུགས་བསྒྱུར་ཏེ། །ཡིད་ཞི་རབ་ཞི་གནས་ཤིང་བསམ་གཏན་བསམ་གཏན་པ། །དེ་དག་བ་སྤུ་དག་ལས་བྱམས་དང་སྙིང་རྗེ་དང ། །དགའ་དང་བཏང་སྙོམས་ཚད་མེད་ཡིད་འོང་སྒྲ་འབྱུང་ལྷགས། །ཁ་ཅིག་བརྒྱ་བྱིན་ལྷ་ལྟར་སྟོང་ཕྲག་ཁྲག་ཁྲིག་གི། །ལྷ་རྣམས་དག་གིས་མདུན་དུ་བདར་ནས་ལྷགས་གྱུར་ཅིང ། །དེ་དག་བྱང་ཆུབ་ཤིང་དྲུང་ཕྱིན་ནས་ཐལ་སྦྱར་ཏེ། །བརྒྱ་བྱིན་ཐོགས་པའི་ནོར་བུ་རིན་ཆེན་སྣ་ཚོགས་འཐོར། །ཁ་ཅིག་ཕྱོགས་བཞི་དག་གི་སྐྱོང་བ་ཇི་ལྟ་བར། །དྲི་ཟ་སྲིན་པོ་མི་འམ་ཅི་ཡིས་ཡོངས་བསྐོར་ཏེ། །གློག་ལྟར་གསལ་བའི་མེ་ཏོག་ཆར་པ་འབེབས་ཤིང་ལྷགས། །དྲི་ཟ་མི་འམ་ཅི་ཡི་སྐད་ཀྱིས་བརྟན་པ་བསྟོད། །ཁ་ཅིག་མེ་ཏོག་རྒྱས་པའི་ལྗོན་ཤིང་འབྲས་བུར་བཅས། །མེ་ཏོག་བཅས་ཤིང་མཆོག་གི་དྲི་ནི་རབ་འབྱིན་ལ། །ལོ་མར་སངས་རྒྱས་སྲས་པོ་ལུས་ཕྱེད་གནས་ཐོགས་ལྷགས། །བཏུད་ནས་ས་ཡི་སྙིང་པོར་མེ་ཏོག་རྣམས་ཀྱང་འཐོར། །ཁ་ཅིག་པད་མ་ཨུད་པལ་པད་མ་དཀར་པོ་རྒྱས། །པད་མའི་སྙིང་པོར་སུམ་བཅུ་རྩ་གཉིས་མཚན་ལྡན་གནས། །དེ་འདྲར་མེ་ཏོག་རྒྱས་པའི་རྫིང་བུ་ཐོགས་ཏེ་ལྷགས། །ཆགས་མེད་ཡིད་ལྡན་བྱང་ཆུབ་སེམས་དཔའ་མཁས་ལ་བསྟོད། །ཁ་ཅིག་ལྷུན་པོ་ལྟ་བུར་ལུས་ཆེན་བསྒྱུར་ཏེ་ལྷགས། །བར་སྣང་གནས་ནས་རང་གི་ལུས་ཀྱང་རབ་ཏུ་འདོར། །བོར་མ་ཐག་ཏུ་མེ་ཏོག་ཕྲེང་བ་རྣམས་སུ་གྱུར། །སྟོང་གསུམ་དག་གི་རྒྱལ་བའི་ཞིང་རྣམས་ཁེབས་པར་བྱེད། །ཁ་ཅིག་མིག་གཉིས་སྲེག་པའི་བསྐལ་པ་ལྟ་བུ་དང ། །དེ་བཞིན་ཆགས་པ་དང་ནི་འཇིག་པར་སྟོན་ཅིང་ལྷགས། །དེ་དག་ལུས་ལས་ཆོས་ཀྱི་སྒོ་མོ་མང་གྲག་སྟེ། །དེ་དག་ཐོས་པས་སེམས་ཅན་ཁྲག་ཁྲིག་སྲེད་པ་སྤོང ། །ཁ་ཅིག་མཆུ་ནི་བིམ་པ་འདྲ་ལ་བཞིན་མཛེས་ཤིང ། །ཁ་བཞིན་རྫོགས་ལ་མི་འམ་ཅི་འདྲའི་སྒྲ་སྒྲོགས་ལྷགས། །དོ་ཤལ་སྣ་ཚོགས་ལེགས་བརྒྱན 41.167a བུ་མོ་ཆས་པ་འདྲ། །དེ་ལ་ལྟ་བས་ལྷ་ཡི་ཚོགས་རྣམས་ངོམས་མི་འགྱུར། །ཁ་ཅིག་རྡོ་རྗེ་ལྟ་བུར་མི་ཕྱེད་ལུས་ཅན་དེ། །རྐང་པས་འོག་གི་ཆུ་ཡི་ཕུང་པོ་འབོག་ཅིང་ལྷགས། །ཉི་མ་འདྲ་ཞིང་ཟླ་ལྟར་བཞིན་རྒྱས་སྣང་བྱེད་ལ། །འོད་བྱེད་ཉོན་མོངས་སྐྱོན་རྣམས་བཅོམ་པ་ཁ་ཅིག་ལྷགས། །ཁ་ཅིག་རིན་པོ་ཆེས་བརྒྱན་ལག་ན་རིན་ཆེན་ཐོགས། །ཞིང་མང་བྱེ་བ་སྟོང་དག་ཁེབས་པར་བྱེད་ཅིང་ལྷགས། །སེམས་ཅན་མང་ལ་ཕན་དང་བདེ་དང་ཚིམ་བྱའི་ཕྱིར། །རིན་ཆེན་མེ་ཏོག་དམ་པ་དྲི་ཞིམ་ཆར་པ་འབེབས། །ཁ་ཅིག་གཟུངས་ཆེན་རིན་པོ་ཆེ་ཡི་མཛོད་གྱུར་ཅིང ། །བ་སྤུ་རྣམས་ནས་མདོ་སྡེ་ཁྲག་ཁྲིག་རབ་བརྗོད་ལ། །སྤོབས་པར་ལྡན་ཞིང་བློ་གྲོས་ལྡན་ལ་བློ་མཆོག་ལྡན། །རྒྱགས་ཞིང་རབ་དྲེགས་སྐྱེ་བོ་རྟོགས་པར་བྱེད་ཅིང་ལྷགས། །ཁ་ཅིག་རི་བོ་ལྷུན་པོ་རྔ་ལྟར་ཐོགས་ནས་ནི། །རབ་ཏུ་རྡུང་ཞིང་མཁའ་ལས་ཡིད་འོང་སྒྲ་འབྱིན་ལྷགས། །དེ་ཡི་སྒྲ་ནི་ཕྱོགས་བཅུར་བྱེ་བའི་ཞིང་སོང་སྟེ། །བདུད་རྩི་མ་ཐོབ་སྟོན་པ་དོ་མོད་འཚང་རྒྱར་སྒྲོག་།བྱང་ཆུབ་ཀྱི་སྙིང་པོར་བཀོད་པའི་ལེའུ་ཞེས་བྱ་བ་སྟེ་ཉི་ཤུ་པའོ།། །། དགེ་སློང་དག་དེ་ལྟར་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར། བྱང་ཆུབ་སེམས་དཔའ་དག་གིས་བྱང་ཆུབ་ཀྱི་སྙིང་པོར་བཀོད་པ་རྣམ་པ་དེ་ལྟ་བུ་དེ་དག་མངོན་པར་བྱས་པར་གྱུར་ཏོ། །བྱང་ཆུབ་སེམས་དཔའ་ཉིད་ཀྱིས་ཀྱང་ཕྱོགས་བཅུ་དག་གི་སངས་རྒྱས་བཅོམ་ལྡན་འདས་འདས་པ་དང ། མ་བྱོན་པ་དང ། ད་ལྟར་བྱུང་བ་རྣམས་ཀྱི་སངས་རྒྱས་ཀྱི་ཞིང་ཐམས་ཅད་ན་བྱང་ཆུབ་ཀྱི་སྙིང་པོའི་རྒྱན་བཀོད་པ་ཇི་སྙེད་ཅིག་ཡོད་པ་དེ་དག་ཐམས་ཅད་བྱང་ཆུབ་ཀྱི་སྙིང་པོ་དེར་ཀུན་ཏུ་བསྟན་ཏོ། །དགེ་སློང་དག་དེ་ནས་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་ནས་འདི་སྙམ་དུ་སེམས་ཏེ། འདོད་པའི་ཁམས་འདིའི་བདག་པོ་དབང་ཕྱུག་དབང་བསྒྱུར་བ་བདུད་སྡིག་ཅན་དེ་ལ་བདག་གིས་མ་སྦྲན་པར་བདག་བླ་ན་མེད་པ་ཡང་དག་པར་རྫོགས 41.167b པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེ་ནི་བདག་གི་མི་ཆས། བདག་གིས་བདུད་སྡིག་ཅན་བསྐུལ་བར་བྱའོ། །དེ་ལས་རྣམ་པར་རྒྱལ་ན་འདོད་པ་ན་སྤྱོད་པའི་ལྷ་ལ་སོགས་པ་ཐམས་ཅད་ཚར་བཅད་པར་འགྱུར་རོ། །འོན་ཏང་བདུད་ཀྱི་འཁོར་ན་བདུད་ཀྱི་རིས་ཀྱི་ལྷའི་བུ་སྔོན་དགེ་བའི་རྩ་བ་བསྐྱེད་པ་འཁོད་པ་དག་གིས་ངའི་སེང་གེ་རྣམ་པར་རོལ་པ་མཐོང་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་རོ་སྙམ་མོ། །དགེ་སློང་དག་དེ་ནས་བྱང་ཆུབ་སེམས་དཔས་དེ་ལྟར་བསམས་ནས་དེའི་ཚེ་སྨིན་མཚམས་ཀྱི་བར་གྱི་མཛོད་སྤུ་ནས་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བའི་འོད་ཟེར་གཅིག་ཕྱུང་སྟེ། འོད་ཟེར་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཀྱི་བདུད་ཀྱི་གནས་ཐམས་ཅད་སྣང་བར་བྱས་ནས་མོག་མོག་པོར་བྱས་ཏེ་རབ་ཏུ་གཡོས་པར་བྱས་པར་ཡང་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཀྱང་སྣང་བ་ཆེན་པོས་ཡོངས་སུ་ཁྱབ་པར་གྱུར་ཏོ། །བདུད་སྡིག་ཅན་གྱིས་འོད་དེ་ལས་རྣམ་པ་འདི་ལྟ་བུའི་སྒྲ་འདི་ཡང་ཐོས་སོ། །སེམས་ཅན་ཤིན་ཏུ་དག་པ་བསྐལ་མང་སྤྱོད་སྤྱད་པ། །ཟས་གཙང་སྲས་པོས་རྒྱལ་སྲིད་དག་ནི་རབ་སྤངས་ཏེ། །ཕན་བྱེད་དེ་ནི་བདུད་རྩི་མངོན་པར་འདོད་པས་བྱུང ། །བྱང་ཆུབ་ཤིང་དྲུང་འོངས་ཀྱིས་དེ་རིང་བསྒྲིམ་པ་གྱིས། །དེ་ནི་བདག་ཀྱང་རྒལ་ལ་གཞན་ཡང་སྒྲོལ་བར་བྱེད། །དེ་ནི་བདག་ཉིད་གྲོལ་བས་གཞན་ཡང་གྲོལ་བར་བྱེད། །དེ་ནི་བདག་ཀྱང་དབུགས་ཕྱིན་གཞན་དག་དབུགས་ཀྱང་འབྱིན། །ཡོངས་སུ་མྱ་ངན་འདས་ནས་གཞན་དག་མྱ་ངན་ཟློ། །ངན་སོང་གསུམ་པོ་མ་ལུས་སྟོངས་པར་བྱེད་པར་འགྱུར། །ལྷ་མི་རྣམས་ཀྱི་གྲོང་ཁྱེར་གང་བར་བྱེད་པར་འགྱུར། །ཕན་པ་བྱེད་པ་དེ་ནི་བདུད་རྩི་ཐོབ་གྱུར་ནས། །བསམ་གཏན་མངོན་ཤེས་བདུད་རྩི་བདེ་མཆོག་སྦྱིན་པར་འགྱུར། །གང་ཚེ་རང་བྱུང་ཉིད་ཀྱིས་ཆོས་ཆར་མངོན་ཕབ་ཚེ། ། 41.168a ནག་པོའི་རྩ་ལག་ཁྱོད་ཀྱི་གྲོང་ཁྱེར་སྟོངས་བྱེད་འགྱུར། །སྟོབས་མེད་པས་ཀྱང་སྟོབས་མེད་འགྱུར་ཏེ་དཔུང་ཉམས་འགྱུར། །ཕྱོགས་ནི་ཕྱོགས་མིན་ཅི་བྱ་གར་འགྲོ་ཤེས་མི་འགྱུར། །དགེ་སློང་དག་དེ་ལྟར་བདུད་སྡིག་ཅན་བསྐུལ་བའི་ཚིགས་སུ་བཅད་པ་འདི་དག་གིས་བསྐུལ་ནས་རྨི་ལམ་རྣམ་པ་སུམ་བཅུ་རྩ་གཉིས་རྨིས་སོ། །རྣམ་པ་སུམ་བཅུ་རྩ་གཉིས་གང་ཞེ་ན། འདི་ལྟ་སྟེ། བདག་གི་གནས་མུན་པས་ཁྱབ་པར་རྨིས་པ་དང ། རང་གི་གནས་རྡུལ་གྱིས་གང་ཞིང་གྱོ་མོ་དང་གསེག་མས་གང་བར་རྨིས་པ་དང ། བདག་ཉིད་སྔངས་སྐྲག་ནས་ཕྱོགས་ཕྱོགས་སུ་འབྲོས་པར་རྨིས་པ་དང ། བདག་ཅོད་པན་དང་བྲལ་ཞིང་རྣ་ཆ་ལྷུང་བར་རྨིས་པ་དང ། བདག་མཆུ་དང་གྲེ་བ་དང ། རྐན་སྐམས་པར་རྨིས་པ་དང ། བདག་སྙིང་ཀུན་ཏུ་གདུངས་པར་རྨིས་པ་དང ། བསྐྱེད་མོས་ཚལ་གྱི་ལོ་མ་དང ། མེ་ཏོག་དང ། འབྲས་བུ་རྣམས་རྙིས་པར་རྨིས་པ་དང ། རྫིང་རྣམས་སྐམས་ཏེ་ཆུ་མེད་པར་རྨིས་པ་དང ། ངང་པ་དང ། ཁྲུང་ཁྲུང་དང ། རྨ་བྱ་དང ། ཀ་ལ་པིང་ཀ་དང ། ཀུ་ན་ལ་དང ། ཤང་ཤང་ཏེའུ་ལ་སོགས་པ་བྱའི་ཚོགས་རྣམས་འདབ་གཤོག་ཟེགས་པར་རྨིས་པ་དང ། རྔ་དང ། དུང་དང ། རྫ་རྔ་དང ། ཁར་རྔ་དང ། རྒྱུད་གཅིག་པ་དང ། པི་བང་དང ། རྒྱུད་གསུམ་པ་དང ། ཕེག་དང ། ཁར་བའི་སིལ་ཁྲོལ་ལ་སོགས་པ་རོལ་མོའི་ཆ་བྱད་རྣམས་ཆག་གྲུགས་ཏེ་ས་ལ་ལྷུང་བར་རྨིས་པ་དང ། འཁོར་སྡུག་པས་ཀྱང་བདུད་སྤངས་ཏེ་ངོ་འཛུམ་གནག་ཅིང་ཕྱོགས་གཅིག་ཏུ་དོང་ནས་སེམས་ཤིང་འཁོད་པར་རྨིས་པ་དང ། ཆུང་མའི་དམ་པ་ཕྲེང་བ་ཅན་ཡང་མལ་ནས་ས་ལ་ལྷུང་སྟེ་ལག་པ་གཉིས་མགོ་ལ་རྡེབ་པར་རྨིས་པ་དང ། བདུད་ཀྱི་བུ་གང་དག་ཤིན་ཏུ་བརྩོན་འགྲུས་དང་ལྡན་པ་དང ། ཤིན་ཏུ་སྟོབས་དང་ལྡན་པ་དང ། ཤིན་ཏུ་གཟི་བརྗིད་དང་ལྡན་པ་དང ། ཤིན་ཏུ་ཤེས་རབ་དང་ལྡན་པ་དེ་དག་ཀྱང་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་མཆོག་དམ་པ་ལ 41.168b འདུག་པ་ལ་ཕྱག་འཚལ་བར་རྨིས་པ་དང ། བདག་གི་བུ་མོ་རྣམས་ཀྱང་ཀྱི་ཧུད་ཡབ། ཀྱི་ཧུད་ཡབ་ཅེས་ཆོད་ངེ་འདོན་པར་རྨིས་པ་དང ། བདག་ལུས་ལ་གོས་དྲི་མ་ཅན་གྱོན་པར་རྨིས་པ་དང ། བདག་མགོ་རྡུལ་གྱིས་གང་ལ་སྐྱ་བོ་བསེང་བསེང་པོ་དང ། ཉམས་ཆུང་བ་དང ། མདངས་ཉམས་པར་རྨིས་པ་དང ། བསིལ་ཁང་དང ། ཁང་པ་བརྩེགས་པ་དང ། སྐར་ཁུང་དང ། རྟ་བབས་རྣམས་ཀྱང་རྡུལ་གྱིས་གང་ནས་རྡིབ་པར་རྨིས་པ་དང ། དེའི་སྡེ་དཔོན་གནོད་སྦྱིན་དང ། སྲིན་པོ་དང ། གྲུལ་བུམ་དང ། དྲི་ཟའི་བདག་པོ་གང་ཡིན་པ་དེ་དག་ཐམས་ཅད་ཀྱང་ཨོམས་ཚུགས་བཅས་ཏེ་ངུ་ཞིང་ཆོ་ངེས་བཏབ་ནས་བྱེར་བར་རྨིས་པ་དང ། འདོད་པ་ན་སྤྱོད་པའི་ལྷ་རྣམས་ཀྱི་ལྷའི་བདག་པོ་འདི་ལྟ་སྟེ། ཡུལ་འཁོར་སྲུང་དང ། འཕགས་སྐྱེས་པོ་དང ། མིག་མི་བཟང་དང ། རྣམ་ཐོས་ཀྱི་བུ་དང ། བརྒྱ་བྱིན་དང ། རབ་འཐབ་བྲལ་དང ། ཡོངས་སུ་དགའ་ལྡན་དང ། རབ་འཕྲུལ་དང ། དབང་བསྒྱུར་ལ་སོགས་པ་གང་ཡིན་པ་དེ་དག་ཐམས་ཅད་ཀྱང་བདུད་ལ་མི་གུས་ཤིང་བྱང་ཆུབ་སེམས་དཔའ་ལ་ཕྱོགས་པར་རྨིས་པ་དང ། ཐབ་མོའི་ནང་ན་དེའི་རལ་གྲི་ཤུགས་ནས་མ་ཕྱིན་ཅིང་བདག་མི་ཤིས་པའི་སྒྲ་འབྱིན་པར་རྨིས་པ་དང ། རང་གི་འཁོར་གྱིས་བདག་བོར་བར་རྨིས་པ་དང ། བཀྲ་ཤིས་ཀྱི་བུམ་པ་སྒོར་ལྷུང་བར་རྨིས་པ་དང ། བྲམ་ཟེ་མིས་བྱིན་གྱི་བུ་ཡང་བཀྲ་མི་ཤིས་པའི་སྒྲ་སྒྲོགས་པར་རྨིས་པ་དང ། སྒོ་བ་ཀུན་ཏུ་དགའ་བྱེད་ཀྱང་ཀུན་ཏུ་མི་དགའ་བའི་སྒྲ་སྒྲོགས་པར་རྨིས་པ་དང ། ནམ་མཁའི་དཀྱིལ་མུན་པས་ཁེབས་པར་རྨིས་པ་དང ། འདོད་པའི་གནས་ན་གནས་པའི་དཔལ་ཡང་ངུ་བར་རྨིས་པ་དང ། བདག་གི་དབང་ཡང་དབང་མེད་པར་གྱུར་པར་རྨིས་པ་དང ། རང་གི་ཕྱོགས་ཀྱང་ཕྱོགས་མ་ཡིན་པར་རྨིས་པ་དང ། ནོར་བུ་དང་མུ་ཏིག་གི་དྲ་བ་རྣམས་ཀྱང་ཆད་ཅིང་རྣམ་པར་ཆད་ནས་འབྲུལ་བར་རྨིས་པ་དང ། བདུད་ཀྱི 41.169a གནས་ཐམས་ཅད་ཀྱང་རབ་ཏུ་གཡོས་པར་རྨིས་པ་དང ། ཤིང་རྣམས་ཀྱང་བཅད་ཅིང་བ་གམ་ཡང་ལྷུང་བར་རྨིས་པ་དང ། བདུད་ཀྱི་སྡེ་བཀོད་པ་ཐམས་ཅད་ཀྱང་ཁས་སྦུབ་ཏུ་འགྱེལ་བར་རྨིས་པ་སྟེ། དགེ་སློང་དག་དེ་ལྟར་བདུད་སྡིག་ཅན་གྱི་རྨི་ལམ་དུ་རྣམ་པ་སུམ་བཅུ་རྩ་གཉིས་པོ་འདི་ལྟ་བུ་རྨིས་སོ། །དེ་སད་པ་དང ། འཇིགས་སྐྲག་སྔངས་ནས་ནང་མི་ཐམས་ཅད་བསོགས་ཏེ། དཔུང་དང་བཅས་པ་དང ། འཁོར་དང་སྡེ་དཔོན་དང ། སྒོ་བ་དང་དེ་དག་འདུས་པར་རིག་ནས་ཚིགས་སུ་བཅད་པ་འདི་དག་སྨྲས་སོ། །བདུད་དེས་རྨི། ལམ་དེ་དག་མཐོང་ནས་ཉམ་ཐག་སྟེ། །སྡེ་དཔོན་བདུད་པོ་སེང་གེ་ཟ་འགྲམ་ཞེས་བྱ་དང ། །བུ་རྣམས་དག་དང་འཁོར་རྣམས་གང་དག་ཡིན་ལ་སྨྲས། །ནག་པོའི་རྩ་ལག་དེ་དག་ཀུན་ལ་ཡོངས་སུ་དྲིས། །ཤཱཀྱའི་ནང་དུ་སྐྱེས་པ་མཚན་མཆོག་ཡན་ལག་སྤྲས། །ལོ་དྲུག་བར་དུ་བྱ་དཀའ་བརྟུལ་ཞུགས་དྲག་པོ་སྤྱད། །བྱང་ཆུབ་ཤིང་དྲུང་འོངས་ཀྱིས་རབ་ཏུ་སྒྲིམས་ཤིག་ཅེས། །མདང་སུམ་བར་སྣང་ལས་ནི་ཚིགས་བཅད་དེ་སྐད་གྲག་།བྱང་ཆུབ་སེམས་དཔའ་དེ་ཉིད་རྣམ་པར་སངས་རྒྱས་ནས། །སེམས་ཅན་བྱེ་བ་ཁྲག་ཁྲིག་མང་པོ་རྣམས་རྟོགས་བྱེད། །གང་ཚེ་བདུད་རྩི་ཐོབ་སྟེ་བསིལ་བའི་དངོས་རེག་ཚེ། །དེས་ནི་ང་གནས་མ་ལུས་སྟོངས་པར་བྱེད་པར་འགྱུར། །དཔུང་ཆེན་རྣམས་དང་ལྷན་ཅིག་དེར་ནི་རབ་དོང་ལ། །ཤིང་དབང་དྲུང་འདུག་དགེ་སྦྱོང་གཅིག་དེ་གཞོམ་པར་བྱ། །ཡན་ལག་བཞི་པའི་སྡེ་རྣམས་མྱུར་དུ་རབ་ཏུ་སྒྲིམས། །གལ་ཏེ་ང་ལ་སྡུག་སེམས་ཕྱི་ཤོལ་མ་བྱེད་ཅིག་།དགྲ་བཅོམ་རང་སངས་རྒྱས་ཀྱིས་འཇིག་རྟེན་གང་གྱུར་ཀྱང ། །མྱ་ངན་འདའ་བས་བདག་དཔུང་ཉམ་ཆུང་ཡོང་མི་འགྱུར། །དེ་ཡང་གཅིག་པུ་རྒྱལ་བ་ཆོས་རྒྱལ་གྱུར་ན་ནི། །བགྲང་ལས་འདས་པའི་རྒྱལ་བའི་རིགས་ནི་གཞར་མི་འཆད། །དགེ་སློང་དག་དེ་ནས་བདུད་ཀྱི་བུ་དེད 41.169b དཔོན་ཞེས་བྱ་བས་བདུད་སྡིག་ཅན་དེ་ལ་ཚིགས་སུ་བཅད་དེ་སྨྲས་པ། ཡབ་ཅིག་ཅི་ནོངས་ཞལ་གྱུར་ཅིང་ནི་ཞལ་མདོག་ཉམས། །ཐུགས་ཀྱང་འཕར་ལ་ཁྱོད་ཀྱི་ཡན་ལག་ཉིང་ལག་འདར། །ཁྱོད་ཀྱིས་ཅི་གསན་ཅི་གཟིགས་མྱུར་དུ་བཀའ་སྩོལ་ཅིག་།ཡང་དག་བསམས་ནས་དེ་བཞིན་སྦྱར་བ་འཚལ་བར་བགྱི། །ང་རྒྱལ་མེད་བདུད་སྨྲས་པ་བུ་ཅིག་ང་ལས་ཉོན། །ངས་ནི་སྡིག་པའི་རྨི་ལམ་ཤིན་ཏུ་མི་བཟད་རྨིས། །དེ་རིང་འཁོར་འདིར་དེ་ཀུན་མ་ལུས་སྨྲས་ན་ནི། །ཁྱེད་རྣམས་བརྒྱལ་ཏེ་ས་ལ་རབ་ཏུ་སྒྱེལ་བར་འགྱུར། །དེད་དཔོན་གྱིས་སྨྲས་པ། གལ་ཏེ་འཐབ་དུས་བབ་སྟེ་རྒྱལ་ན་ནོངས་མ་མཆིས། །གལ་ཏེ་དེར་ནི་བཅོམ་པར་གྱུར་ན་ནོངས་དང་བཅས། །གལ་ཏེ་ཁྱོད་ཀྱི་རྨི་ལམ་དེ་འདྲའི་ལྟས་ལགས་ན། །བཞག་ན་དགེ་སྟེ་གཡུལ་ངོར་ཡོངས་སུ་བསྟངས་མི་འགྱུར། །བདུད་ཀྱིས་སྨྲས་པ། བརྩལ་བ་གྲུབ་པའི་སྐྱེས་བུ་གཡུལ་ངོར་གྲགས་པར་འགྱུར། །གལ་ཏེ་བརྟན་ལ་བརྟེན་ཏེ་ལེགས་བྱས་བདག་ཅག་རྒྱལ། །ཁོ་བོ་འཁོར་དང་བཅས་པ་མཐོང་ནས་ལངས་ནས་སུ། །ཁོ་བོའི་རྐང་པར་མགོས་ཕྱག་མི་འཚལ་དེས་མི་ནུས། །དེད་དཔོན་གྱིས་སྨྲས་པ། རྒྱ་ཆེན་དཔུང་བདོག་ཀྱང་ནི་ཤིན་ཏུ་མཐུ་ཆུང་སྟེ། །སྟོབས་ལྡན་དཔའ་བོ་གཅིག་པུ་མཆིས་ན་གཡུལ་ལས་རྒྱལ། །གལ་ཏེ་སྲིན་བུ་མེ་ཁྱེར་སྟོང་གསུམ་གང་གྱུར་ཀྱང ། །ཉི་མ་གཅིག་པུའི་ཟིལ་དུ་བརླག་སྟེ་འོད་མི་བགྱིད། །གཞན་ཡང་གང་ལ་ང་རྒྱལ་གཏི་མུག་མཆིས་ལ་དཔྱོད་མ་མཆིས། །མཁས་དང་མི་མཐུན་བགྱིད་པ་དེ་ནི་གསོ་མི་ནུས། །དགེ་སློང་དག་དེ་ལྟར་བདུད་སྡིག་ཅན་གྱིས་དེད་དཔོན་གྱི་ཚིག་མ་མཉན་ནས་ཡན་ལག་བཞི་པའི་དཔུང་ཆེན་པོ་སྟོབས་ཆེ་བ། འཐབ་མོ་ལ་དཔའ་བ། འཇིགས་སུ་རུང་བ། སྤུ་ཟིང་ཞེས་བྱེད་ནུས་པ། ལྷ་དང་མི་རྣམས་ཀྱིས་སྔོན་མ་མཐོང་མ་ཐོས་པ། བཞིན་བསྒྱུར་བ་རྣམ་པ་མང་པོ་བྱེ་བ་ཁྲག་ཁྲིག་བརྒྱ་སྟོང་དུ་མ་བསྒྱུར 41.170a བའི་རྣམ་པ་དང་ལྡན་པ། རྐང་ལག་སྦྲུལ་བརྒྱ་སྟོང་གིས་དཀྲིས་པ་དང་ལྡན་པ། རལ་གྲི་དང ། མདའ་གཞུ་དང ། མདུང་ཐུང་དང ། མདའ་བོ་ཆེ་དང ། སྟ་རེ་དང ། རྩེ་གསུམ་ཁ་གདེང་དང ། བོང་བ་དང ། གཏུན་ཤིང་དང ། བེ་ཅོན་དང ། ཞགས་པ་དང ། དབྱུག་ཏོ་དང ། འཁོར་ལོ་དང ། རྡོ་རྗེ་དང ། རྡོ་རྗེ་རྩེ་གཅིག་པ་ཐོགས་པ། ལུས་ལ་གོ་ཆ་བཟང་པོ་བགོས་པ། མགོ་དང ། རྐང་ལག་དང ། མིག་ལོག་པར་འདུག་པ། མགོ་དང ། མིག་དང ། གདོང་འབར་བ། ལྟོ་དང་རྐང་ལག་དབྱིབས་མི་སྡུག་པ། བཞིན་གཟི་བརྗིད་དྲག་པོ་དང་ལྡན་པ། ཤིན་ཏུ་བཞིན་བསྒྱུར་ཅིང་སོ་གཙིགས་པ། འཇིགས་སུ་རུང་བར་མཆེ་བ་གཙིགས་པ། ལྕེ་སྟུག་ཅིང་ཞེང་ཆེ་བ་མང་པོ་འཕྱང་བ། ལྕེ་འབར་འབུར་ཅན་རེ་ལྡེ་དང་འདྲ་བ། མིག་མེ་དང་སྦྲུལ་ནག་པོ་དུག་གིས་རྒྱས་པའི་མིག་ལྟར་དམར་བ་དག་ཁར་བཅུག་སྟེ། དེ་ལ་ཁ་ཅིག་ནི་སྦྲུལ་གདུག་སྐྱུག་པ། ཁ་ཅིག་ནི་ནམ་མཁའ་ལྡིང་གིས་རྒྱ་མཚོ་ནས་ཕྱུང་བ་བཞིན་དུ་ལག་མཐིལ་དུ་སྦྲུལ་གདུག་པ་བཞག་སྟེ་ཟ། ཁ་ཅིག་ནི་མིའི་ཤ་དང ། ཁྲག་དང ། རྐང་ལག་དང ། མགོ་དང ། མཁལ་མ་དང ། ནང་གྲོལ་དང ། ངན་སྐྱུགས་ལ་སོགས་པ་ཟ། ཁ་ཅིག་ནི་གཟུགས་སྔོ་བསངས་དང ། ཁམ་པ་པོ་དང ། སྔོན་པོ་དང ། དམར་པོ་དང ། སེར་པོར་འདུག་སྟེ། འཇིགས་སུ་རུང་བའི་གཟུགས་སྣ་ཚོགས་ཅན། ཁ་ཅིག་ནི་མིག་ཞིགས་པ་དང ། མིག་ཁྲོན་པ་ལྟ་བུ་དང ། མིག་ཕྱུང་བ་ལྟ་བུ་དང ། མིག་འབར་བ་དང ། མིག་བཟུར་བ། མི་སྡུག་པ། ཁ་ཅིག་ནི་མིག་ལོག་པ་དང ། འབར་བ་དང ། མི་སྡུག་པ། ཁ་ཅིག་ནི་རི་འབར་བ་ཐོགས་ཏེ། འགྱིང་ཞིང་རི་གཞན་ལ་ཞོན་ཏེ་འོང ། ཁ་ཅིག་ནི་ཤིང་རྩ་ཐོན་བྱས་ཏེ་བྱང་ཆུབ་སེམས་དཔའ་ལོགས་སུ་རྒྱུག་ཅིང་འོང ། ཁ་ཅིག་གི་རྣ་བ་ནི་ཕག་རྣ་ལྟ་བུ་དང ། ཞིབ་མ་ལྟ་བུ་དང ། གླང་པོའི་རྣ་བ་ལྟ་བུ་དང ། འཕྱང་བ་དང ། ཕག་རྣ་ལྟ་བུར 41.170b འདུག་པ། ཁ་ཅིག་ནི་རྣ་བ་མེད་པ། ཁ་ཅིག་ནི་ཀེང་རུས་མང་པོ་སྤྲུལ་ནས་ལུས་རིད་ཅིང་གསུས་པ་ཆེ་ལ་སྣ་ཞོམ་པ། གསུས་པ་བུམ་པ་ལྟ་བུར་འདུག་པ། རྐང་པ་མགོའི་ཐོད་པ་ལྟར་འདུག་པ། ལྤགས་པ་དང ། ཤ་དང་ཁྲག་སྐམས་པ། རྣ་བ་དང ། སྣ་དང ། རྐང་ལག་དང ། མིག་དང ། མགོ་བཅད་པ། ཁ་ཅིག་ནི་ཁྲག་འཐུང་འདོད་པས་གཅིག་ལ་གཅིག་མགོ་གཅོད་པ། ཁ་ཅིག་ནི་སྒྲ་ཤ་ཤ་པོ་དང ། སྒྲ་མི་སྙན་པ་དང ། འཇིགས་སུ་རུང་བ་དང ། སྒྲ་རྩུབ་པ་ལྡན་པ། ཧུ་ཧུ་ཞེས་བྱ་བ་དང ། མཆི་ཞེས་བྱ་བ་དང ། ཧུ་ལུ་ཧུ་ལུ་ཞེས་བྱ་བའི་སྒྲ་འབྱིན་པ་དང ། སྤྱུགས་པ་ལེན་པ་དང ། དགེ་སྦྱོང་གཽ་ཏ་མ་འདི་ཤིང་དང་ཆོས་ཏེ་འོན་ཅིག་ཅེས་ཟེར་བ་དང ། འོར་ཅིག་ཅེས་ཟེར་བ་དང ། རྒྱོབ་ཅིག་ཅེས་ཟེར་བ་དང ། རབ་ཏུ་རྒྱོབ་ཅིག་ཅེས་ཟེར་བ་དང ། ཆིངས་ཤིག་ཅེས་ཟེར་བ་དང ། ཟུང་ཤིག་ཅེས་ཟེར་བ་དང ། ཆོད་ཅིག་ཅེས་ཟེར་བ་དང ། གཏུབས་ཤིག་ཅེས་ཟེར་བ་དང ། གཏོགས་ཤིག་ཅེས་ཟེར་བ་དང ། བབ་བབ་ཏུ་འོར་ཅིག་ཅེས་ཟེར་བ་དག་གོ། །ཁ་ཅིག་ནི་ཝ་དང ། ཅེ་སྤྱང་དང ། ཕག་དང ། བོང་བུ་དང ། བ་ལང་དང ། གླང་པོ་ཆེ་དང ། རྟ་དང ། རྔ་མོ་དང ། རྐྱང་དང ། མ་ཧེ་དང ། རི་བོང་དང ། གཡག་དང ། བསེ་དང ། རི་དགས་ལྡང་སྒོ་སྐ་ལ་སོགས་པའི་ཁ་གདོང་སྣ་ཚོགས་འཇིགས་སུ་རུང་བ་སྔངས་པར་བྱེད་པ། མི་སྡུག་པ་དང་ལྡན་པ་དག་གོ། །ཁ་ཅིག་ནི་སེང་གེ་དང ། སྟག་དང ། ཕག་རྒོད་དང ། དྲེད་དང ། སྤྲེའུ་དང ། གཟིག་དང ། བྱི་ལ་དང ། ར་དང ། ལུག་དང ། སྦྲུལ་དང ། ནེའུ་ལེ་དང ། ཉ་དང ། ཆུ་སྲིན་དང ། ཆུ་སྲིན་བྱིས་པ་གསོད་དང ། རུས་སྦལ་དང ། བྱ་རོག་དང ། བྱ་རྒོད་དང ། འུག་པ་དང ། ནམ་མཁའ་ལྡིང་ལྟ་བུའི་ལུས་དང་ལྡན་པ་དག་གོ། །ཁ་ཅིག་ནི་གཟུགས་མི་སྡུག་པ་དག་གོ། །ཁ་ཅིག་ནི་མགོ་གཅིག་པ་དང ། མགོ་གཉིས་པ་ནས་མགོ་བརྒྱ་སྟོང་གི་བར་དང་ལྡན་པ་དག 41.171a གོ། །ཁ་ཅིག་ནི་མགོ་མེད་པའོ། །ཁ་ཅིག་ནི་ལག་པ་གཅིག་པ་ནས་ལག་པ་བརྒྱ་སྟོང་གི་བར་དང་ལྡན་པ་དག་གོ། །ཁ་ཅིག་ནི་ལག་པ་མེད་པ་དག་གོ། །ཁ་ཅིག་ནི་རྐང་པ་གཅིག་པ་ནས་རྐང་པ་བརྒྱ་སྟོང་གི་བར་དང་ལྡན་པ་དག་གོ། །ཁ་ཅིག་ནི་རྐང་པ་མེད་པ་དག་གོ། །ཁ་ཅིག་ནི་རྣ་བ་དང ། ཁ་དང ། སྣ་དང ། མིག་དང ། ལྟེ་བའི་ཁུང་བུ་ནས་སྦྲུལ་གདུག་པ་འབྱིན་ཏོ། །ཁ་ཅིག་ནི་རལ་གྲི་དང ། མདའ་གཞུ་དང ། མདུང་ཐུང་དང ། རྩེ་གསུམ་ཁ་གདེང་དང ། དགྲ་སྟ་དང ། འཁོར་ལོ་དང ། མདའ་བོ་ཆེ་དང ། རྡོ་རྗེ་རྩེ་གཅིག་པ་དང ། རྡོ་རྗེ་དང ། བོང་དང ། མཚོན་རྩེ་གཅིག་པ་ལ་སོགས་པ་མཚོན་ཆ་སྣ་ཚོགས་གསོར་ཞིང་གར་བྱེད་ལ། བྱང་ཆུབ་སེམས་དཔའ་ལ་སྡིགས་མོ་བྱེད་དོ། །ཁ་ཅིག་ནི་མིའི་སོར་མོ་བཅད་ནས་ཕྲེང་བར་བརྒྱུས་ཏེ་ཐོགས་སོ། །ཁ་ཅིག་ནི་ཀེང་རུས་དང ། ཐོད་པ་དང ། ཕྲེང་བ་ལྟ་བུར་བརྒྱུས་ཏེ་ཐོགས་སོ། །ཁ་ཅིག་ནི་ལུས་སྦྲུལ་གདུག་པས་དཀྲིས་སོ། །ཁ་ཅིག་ནི་མགོ་ལ་ཞུགས་ལིང་མེ་ཅན་ཐོགས་ཏེ། གླང་པོ་དང ། རྟ་དང ། རྔ་མོ་དང ། བ་ལང་དང ། བོང་བུ་དང ། མ་ཧེ་ལ་ཞོན་ནོ། །ཁ་ཅིག་ནི་སྤྱིའུ་ཚུགས་སུ་འདུག་ལ་ཁབ་ལྟ་བུའི་སྤུ་ཅན་དག་གོ། །ཁ་ཅིག་ནི་བ་ལང་དང ། བོང་བུ་དང ། ཕག་རྒོད་དང ། ནེའུ་ལེ་དང ། ར་དང ། ལུག་དང ། བྱི་ལ་དང ། སྤྲེའུ་དང ། སྤྱང་ཀི་དང ། ཅེ་སྤྱང་གི་སྤུ་ལྟ་བུ་དང་ལྡན་ལ། སྦྲུལ་གདུག་པ་སྐྱུག་ཅིང་ལྕགས་ཀྱི་ཐུ་ལུམ་མིད་པ་དང ། མེ་འབྱིན་པ་དང ། ལྕགས་དང ། ཟངས་འབར་བའི་ཆར་འབེབས་པ་དང ། ལྕེ་འབེབས་པ་དང ། རྡོ་རྗེའི་ལྕེ་འབེབས་པ་དང ། ལྕགས་ཀྱི་བྱེ་མ་ཚན་མོའི་ཆར་འབེབས་པ་དང ། སྤྲིན་ནག་པོ་བསྡུས་ཏེ་རླུང་གི་ཆར་འབེབས་པ་དང ། མདའི་སྤྲིན་བསྡུས་ཏེ་ཆར་དུ་འབེབས་པ་དང ། མུན་གནག་སྟོན་པ་དང ། སྒྲ་འབྱིན་ཅིང་བྱང་ཆུབ་སེམས་དཔའི་ལོགས་སུ་རྒྱུག་པ་དག་གོ། །ཁ་ཅིག་ནི་ཞགས་པ་བསྐོར་བ 41.171b དང ། རི་ཆེན་པོ་རྙིལ་བར་བྱེད་པ་དང ། རྒྱ་མཚོ་ཆེན་པོ་འཁྲུགས་པར་བྱེད་པ་དང ། རི་ཆེན་པོ་ལས་མཆོང་བ་དང ། རིའི་རྒྱལ་པོ་ལྷུན་པོ་སྒུལ་བ་དང ། རྒྱུག་པ་དང ། འབྲོས་པ་དང ། ཡན་ལག་དང ། ཉིང་ལག་འཐོར་བ་དང ། ལུས་སྐོར་བ་དང ། གད་མོ་ཆེར་རྒོད་པ་དང ། བྲང་རྡུང་བ་དང ། བྲང་ལ་རྡེབ་པ་དང ། མགོ་གསིག་པ་དང ། མགོ་འབར་ཞིང་སྐྲ་གྱེན་དུ་འགྲེང་བ་དང ། ཕན་ཚུན་ཤུགས་ཕྱུང་སྟེ་རྒྱུག་ཅིང་ཝའི་མིག་ལྟ་བུས་བྱང་ཆུབ་སེམས་དཔའ་ལ་འཇིགས་པར་བྱེད་དོ། །བུད་མེད་རྒན་མོ་དག་ཀྱང་ངུ་ཞིང་བྱང་ཆུབ་སེམས་དཔའི་གན་དུ་ལྷགས་ཏེ། འདི་སྐད་དུ་ཀྱི་ཧུད་བུ། ཀྱི་ཧུད་ངའི་བུ། ལོངས་ཤིག་།ལོངས་ལ་མྱུར་དུ་བྲོས་ཤིག་ཅེས་འཛེར་ཏོ། །སྲིན་མོའི་གཟུགས་དང ། ཤ་ཟ་མོའི་གཟུགས་དང ། ཡི་དགས་ལོང་བ། ཐེང་པོ། རྐེ་བ། བཀྲེས་པས་རིད་པ། ལག་པ་བསྒྲེང་བ། ཁ་གཅུས་པ་དག་ཀྱང ། ངུ་ཞིང་འཇིགས་པ་སྟོན་ཏེ། སྔངས་པར་བྱེད་ཅིང་བྱང་ཆུབ་སེམས་དཔའི་མདུན་ན་རྒྱུག་གོ། །བདུད་ཀྱི་དཔུང་འདུས་པ་རྣམ་པ་དེ་ལྟ་བུ་དེས་དཔག་ཚད་བརྒྱད་བཅུ་ཁོ་ར་ཁོར་ཡུག་ཏུ་གང་བར་གྱུར་ཏོ། །བདུད་གཅིག་གི་ཇི་ལྟ་བ་དེ་བཞིན་དུ་སྟོང་གསུམ་གྱི་སྟོང་ཆེན་པོ་བྱེ་བ་ཕྲག་བརྒྱར་གཏོགས་པའི་བདུད་སྡིག་ཅན་རྣམས་ཀྱི་དཔུང་དག་གིས་ཐད་ཀ་དང ། སྟེང་གང་བར་གྱུར་ཏོ། །དེ་ལ་འདི་སྐད་ཅེས་བྱ་སྟེ། གནོད་སྦྱིན་གྲུལ་བུམ་ལྟོ་འཕྱེ་ཆེན་པོའི་གཟུགས། །སྲིན་པོ་ཡི་དགས་ཤ་ཟའི་གཟུགས་དང་བཅས། །འཇིག་རྟེན་མི་སྡུག་དྲག་གཟུགས་ཇི་སྙེད་པ། །ཐམས་ཅད་སྒྱུ་ཡིས་དེར་ནི་སྤྲུལ་པ་བྱས། །མགོ་གཅིག་མགོ་གཉིས་མགོ་གསུམ་ལྡན་པ་ནས། །མགོ་སྟོང་བར་དུ་ལྡན་བཞིན་གནོད་སྦྱིན་མང ། །ལག་གཅིག་ལག་གཉིས་ལག་གསུམ་ལྡན་པ་ནས། །ལག་སྟོང་བར་དུ་ལྡན་པ་རབ་ཏུ་མང ། །རྐང་གཅིག་རྐང་གཉིས་རྐང་གསུམ་ལྡན་པ་ནས། །རྐང་སྟོང་བར་དུ་ལྡན་པ་གཞན་ཡང 41.172a མང ། །ཁ་བཞིན་སྔོ་ལ་ལུས་ནི་སེར་བ་དང ། །ཁ་བཞིན་སེར་ལ་ལུས་ནི་སྔོ་བ་དང ། །ཁ་བཞིན་དཀར་ལ་ལུས་ནི་གནག་པ་དང ། །ཁ་བཞིན་གནག་ལ་ལུས་ནི་དཀར་བ་དང ། །ཁ་བཞིན་གཞན་ལ་ལུས་ཀྱང་གཞན་པ་དང ། །དེ་འདྲའི་ཕྱག་བརྙན་དག་གི་དཔུང་རྣམས་ལྷགས། །སྟག་དང་སྦྲུལ་དང་ཕག་གི་གདོང་ཅན་དང ། །གླང་པོ་རྟ་དང་བོང་བུ་རྔ་མོའི་གདོང ། །སྤྲེའུ་དང་སེང་གེ་དྲེད་ཀྱི་གདོང་ཅན་དང ། །དེ་འདྲའི་ཁ་གདོང་ལྡན་པའི་དཔུང་རྣམས་ལྷགས། །རལ་པ་བརྫེས་ལ་འཇིགས་པའི་གནོད་སྦྱིན་མང ། །ལུག་མགོ་རུས་པ་འབར་འབུར་ལྦ་བ་ཅན། །ལུས་ནི་མི་ཡི་ཁྲག་གིས་རབ་ཏུ་སྦགས། །གནོད་སྦྱིན་དེ་འདྲ་བ་དག་དེར་ཡང་ལྷགས། །རྐང་པ་དག་ནི་རྐོ་བའི་རྐང་པ་འདྲ། །མིག་གི་འབྲས་བུ་སྤྲེའུའི་མིག་དང་མཚུངས། །མཆེ་བ་དག་ནི་གླང་པོའི་མཆེ་བ་འདྲ། །ཁ་གདོང་དེ་འདྲའི་དཔུང་རྣམས་དེར་ཡང་ལྷགས། །ལུས་ཀྱི་དབྱིབས་ནི་ཆུ་སྲིན་འདྲ་བ་སྟེ། །མིག་གི་འབྲས་བུ་གཉིས་ནི་རབ་ཏུ་འབར། །རྣ་བ་དག་ནི་ར་ཡི་རྣ་བ་འདྲ། །ཁ་གདོང་དེ་འདྲའི་དཔུང་རྣམས་དེར་ཡང་ལྷགས། །ཁ་ཅིག་དག་ནི་ལག་ན་དབྱིག་པ་ཐོགས། །ཐོ་བ་མདུང་ཐུང་རྩེ་གསུམ་ལག་ན་ཐོགས། །ཁ་ཅིག་རི་བོ་ལྷུན་པོ་ལག་ན་ཐོགས། །འཇིགས་སུ་རུང་བའི་གཟུགས་ཅན་གནོད་སྦྱིན་ལྷགས། །གཤོལ་ཐོགས་འཁོར་ལོ་ཐོགས་ཤིང་མིག་བསྒྱུར་དང ། །རི་རྩེ་ཆེན་པོ་ལག་ན་ཐོགས་པ་དང ། །རླུང་དང་རྡོ་དང་གནམ་ལྕགས་རབ་འབེབས་ཤིང ། །གནོད་སྦྱིན་འཇིགས་སུ་རུང་བ་དེར་ཡང་ལྷགས། །རླུང་ནི་རབ་ཏུ་གཏོང་ཞིང་ཆར་ཡང་འབེབས། །བརྒྱ་ཕྲག་སྟོང་གི་གློག་ཀྱང་རབ་ཏུ་འབྱིན། །འབྲུག་གི་སྒྲ་ཡང་སྒྲོག་ཅིང་ཤིང་ལྗོན་སྒྱེལ། །བྱང་ཆུབ་ཤིང་གི་ལོ་མ་ཙམ་མི་གཡོ། །ཆར་པ་རབ་ཏུ་འབེབས་ཤིང་རླུང་ཡང་གཏོང ། །ཆུ་བོ་འབེབས་ཤིང་ཆུ་ཡིས་ས་ཡང་གང ། །དེ་ལྟར་འཇིགས་སུ་རུང་བ་མཚན་མོ་བྱུང ། །དེ་ཡི་ནུབ་མོ 41.172b སེམས་མེད་ཤིང་ཡང་སྒྱེལ། །ཐམས་ཅད་དབྱིབས་མི་སྡུག་ཅིང་གཟུགས་མི་སྡུག་།འཇིགས་པའི་གཟུགས་ལྡན་དེ་དག་མཐོང་ནས་ཀྱང ། །ཡོན་ཏན་མཚན་དང་གཟི་བརྗིད་ལྡན་པ་པོ། །ལྷུན་པོ་ལྟ་བུར་སེམས་ནི་གཡོ་བ་མེད། །སྒྱུ་མ་འདྲ་ཞིང་རྨི་ལམ་མཚུངས་པ་དང ། །སྤྲིན་དང་འདྲ་བར་ཆོས་རྣམས་ཀུན་ལ་རྟོག་།དེ་ལྟར་ཆོས་ཀྱི་ཚུལ་ལ་རྟོག་པས་ན། །ལེགས་གནས་བསམ་གཏན་བྱེད་ཅིང་ཆོས་ལ་གནས། །གང་ཞིག་ང་དང་ང་ཡི་སྙམ་སེམས་ཤིང ། །དངོས་དང་ལུས་ལ་ཡང་དག་མངོན་ཞེན་པ། །མི་མཁས་འཛིན་པར་གནས་དེས་མཐོང་ནས་ནི། །འཇིགས་པར་གྱུར་ཅིང་བདག་ཀྱང་རབ་ཏུ་མྱོས། །ཤཱཀྱའི་སྲས་པོས་ཆོས་རྣམས་བརྟེན་བྱུང་བ། །དངོས་པོ་མེད་པའི་ངོ་བོ་ཉིད་དུ་རྟོགས། །ནམ་མཁའ་ལྟ་བུའི་སེམས་དང་རབ་ཏུ་ལྡན། །དཔུང་བཅས་གཡོ་སྒྱུ་མཐོང་ཡང་མྱོས་པ་མེད། །དགེ་སློང་དག་དེ་ལྟར་བདུད་སྡིག་ཅན་གྱི་བུ་སྟོང་པོ་དེ་དག་གི་ནང་ནས་དེད་དཔོན་ལ་སོགས་པ་བདུད་ཀྱི་བུ་གང་དག་བྱང་ཆུབ་སེམས་དཔའ་ལ་མངོན་པར་དད་པ་དེ་དག་ནི་བདུད་ཀྱི་གཡས་རོལ་ཏུ་འཁོད་པར་གྱུར་ཏོ། །གང་དག་བདུད་ཀྱི་ཕྱོགས་བྱེད་པ་དེ་དག་ནི་བདུད་སྡིག་ཅན་གྱི་གཡོན་རོལ་ཏུ་འཁོད་པར་གྱུར་ཏོ། །དེ་ན་བདུད་སྡིག་ཅན་གྱིས་རང་གི་བུ་དེ་དག་ལ་སྨྲས་པ། ཡུ་བུ་ཅག་ཅི་འདྲ་བའི་དཔུང་གིས་བྱང་ཆུབ་སེམས་དཔའ་གདུལ་བར་བྱ། དེ་ན་གཡས་རོལ་ནས་བདུད་ཀྱི་བུ་དེད་དཔོན་ཞེས་བྱ་བས་ཕ་ལ་ཚིགས་སུ་བཅད་དེ་སྨྲས་པ། ཀླུ་ཡི་དབང་པོ་གཉིད་ལོག་སློང་འདོད་དང ། །གླང་པོའི་དབང་པོ་གཉིད་ལོག་སློང་འདོད་དང ། །རི་དགས་རྒྱལ་པོ་གཉིད་ལོག་སློང་འདོད་པ། །དེ་ནི་མི་དབང་ལེགས་གནས་སློང་བར་འདོད། །གཡོན་རོལ་ནས་བདུད་ཀྱི་བུ་བློ་གྲོས་ངན་པ་ཞེས་བྱ་བ་དེས་འདི་སྐད་ཅེས་སྨྲས་སོ། །བལྟས་པ་ཙམ་གྱིས་སྙིང་ཡང་རབ་ཏུ་འགས་འགྱུར་ལ། །འཇིག་རྟེན་དག་ན་སྙིང་པོ་ལྡན་པའི་ཤིང་ཆེན་འགས། །བདག་གི་ལྟ་བས་ཕོག་ན་འགྲོ་བ་མཆིས་ཕོག་ལྟར། ། 41.173a འཚོ་བར་འགྱུར་བའི་མཐུ་ནི་དེ་ལ་ག་ལ་མཆིས། །གཡས་རོལ་ནས་དབྱངས་སྙན་ཅེས་བྱ་བས་སྨྲས་པ། བལྟས་པ་ཙམ་གྱིས་ཤིང་ཡང་འགས་ན་མི་རྣམས་ལ། །བདག་བསྒྲིམ་ཅི་དགོས་ཤེས་སྨྲས་སྙིང་པོ་ག་ལ་ཡོད། །གལ་ཏེ་བལྟས་པས་རི་བོ་ལྷུན་པོ་འཇིག་འགྱུར་ཡང ། །དེ་ཡི་མདུན་དུ་ཁྱོད་ནི་མིག་འབྱེད་ཡོང་མི་ནུས། །གཞན་ཡང་མི་གང་རྒྱ་མཚོ་ལག་པ་གཉིས་ཀྱིས་རྒལ་འདོད་ཅིང ། །དེ་ཡི་ཆུ་ནི་བརྔུབས་ཏེ་འཐུང་བར་ནུས་འགྱུར་གྱི། །དེ་ཡི་ཁ་བཞིན་དྲི་མ་མེད་ལ་མངོན་སུམ་དུ། །ལྟ་བ་དེ་ནི་དེ་བས་སྡུག་བསྔལ་ཆེ་ཞེས་སྨྲས། །གཡོན་རོལ་ནས་ལག་བརྒྱ་པ་ཞེས་བྱ་བས་སྨྲས་པ། བདག་གི་ལུས་འདི་ལག་པ་བརྒྱ་མཆིས་པ། །གཅིག་གིས་ཀྱང་ནི་མདའ་བརྒྱ་འཕང་བགྱིས་ཏེ། །དགེ་སྦྱོང་དེ་ཡི་ལུས་ནི་དབུག་པར་བགྱི། །ཡབ་ཅིག་བདེར་འགྱུར་མ་ཤོལ་ཁྱོད་གཤེགས་ཤིག་།གཡས་རོལ་ནས་བློ་བཟང་པོ་ཞེས་བྱ་བས་སྨྲས་པ། བ་སྤུ་རྣམས་ཀྱང་ཅི་ཕྱིར་ལག་པ་མིན། །ལག་པ་བརྒྱ་དང་ཁྱད་པར་ཅི་ཞིག་ཡོད། །ལག་པ་རེ་རེར་དེ་ལྟར་མདུང་ཡོད་ཀྱང ། །དེ་དག་གིས་ཀྱང་དེ་ལ་ཅི་མི་ནུས། །ཅིའི་ཕྱིར་ཞེ་ན། དེས་ནི་འཇིག་རྟེན་འདས་པའི་བྱམས་པ་བསྒོམས། །བྱམས་ལྡན་ཐུབ་པ་དེ་ཡི་སྐུ་ལ་ནི། །དུག་དང་མཚོན་དང་མེ་ཡིས་མི་ཚུགས་ཏེ། །མཚོན་ཆ་འཕངས་པ་ཐམས་ཅད་མེ་ཏོག་འགྱུར། །གཞན་ཡང་མཁའ་དང་ས་དང་ཆུ་ལ་སྟོབས་ལྡན་གང ། །མི་འམ་གནོད་སྦྱིན་རལ་གྲི་དགྲ་སྟ་ཐོགས། །མི་དབང་བཟོད་པའི་སྟོབས་ལྡན་དེ་དྲུང་ཕྱིན། །སྟོབས་ཆེན་སྟོབས་ལྡན་དེ་ཀུན་སྟོབས་ཆུང་འགྱུར། །གཡོན་རོལ་ནས་གཟི་བརྗིད་དྲག་ཤུལ་ཅན་ཞེས་བྱ་བས་སྨྲས་པ། བདག་ནི་དེ་ཡི་ལུས་བཟང་གི། །ཁོང་དུ་ཞུགས་ཏེ་བསྲེག་པར་བགྱི། །འབྲོག་གི་མེ་ལྟར་ཆུང་ངུ་ཡིས། །རྐང་དང་བཅས་པའི་ཤིང་ཡང་བསྐམ། །གཡས་རོལ་ནས་མི་བཟངས་ཀྱིས་སྨྲས་པ། །ཁྱོད་ནི་རི་རབ་ས་ཡི་ནང་ཞུགས་ཏེ། །ཐམས་ཅད་མ་ལུས 41.173b བསྲེག་པར་ནུས་གྱུར་ཀྱང ། །ཁྱོད་དང་འདྲ་བ་གང་གཱའི་བྱེ་སྙེད་ཀྱིས། །རྡོ་རྗེའི་ཐུགས་ལྡན་དེ་ནི་བསྲེག་མི་ནུས། །གཞན་ཡང་རི་བོ་ཐམས་ཅད་འགུལ་ཡང་སྲིད། །རྒྱ་མཚོ་ཆེན་པོ་ཟད་ཀྱང་སྲིད། །ཉི་ཟླ་ས་ལ་ལྷུང་ཡང་སྲིད། །ས་ནི་ཞུ་བར་འགྱུར་ཡང་སྲིད། །འཇིག་རྟེན་དོན་དུ་རྩོམ་མཛད་པ། །ཐུགས་དམ་ངེས་པར་མཛད་པ་པོ། །བྱང་ཆུབ་དམ་པ་མ་ཐོབ་པར། །ཤིང་ཆེན་དྲུང་ནས་བཞེངས་མི་སྲིད། །གཡོན་རོལ་ནས་ལག་རིངས་ཀྱིས་བསྒྱིངས་ཏེ་སྨྲས་པ། ཁྱོད་ཀྱི་གནས་འདིར་མཆིས་བཞིན་དུ། །བདག་གིས་སུག་པས་ཉི་མ་དང ། །ཟླ་བ་སྐར་མ་རྣམས་ཀྱི་གནས། །ཐམས་ཅད་རབ་ཏུ་མཉེ་བར་བགྱི། །རྒྱ་མཚོ་ཆེན་པོ་བཞི་པོ་ལས། །ཚུལ་དུ་ཤིས་པར་ཆབ་ཀྱང་བླང ། །ཡབ་ཅིག་དགེ་སྦྱོང་དེ་བཟུང་སྟེ། །རྒྱ་མཚོའི་ཕ་རོལ་དོར་བར་བགྱི། །ཡབ་ཅིག་དཔུང་འདི་གཞག་ཏུ་གསོལ། །ཁྱོད་ནི་ཐུགས་ངན་ཆེ་མ་མཛད། །བྱང་ཆུབ་ཤིང་དེ་དྲུངས་ཕྱུང་སྟེ། །སུག་པས་ཕྱོགས་ཕྱོགས་གཏོར་བར་བགྱིད། །གཡས་རོལ་ནས་དད་པ་ཐོབ་པས་སྨྲས་པ། གལ་ཏེ་ཁྱོད་ནི་དྲེགས་བསྒྱིངས་ཏེ། །ལྷ་དང་ལྷ་མིན་དྲི་ཟར་བཅས། །ས་དང་རི་དང་རྒྱ་མཚོར་བཅས། །དེ་དག་ལག་པས་ཕྱིར་ཀློག་ཀྱང ། །ཁྱོད་དང་འདྲ་བ་སྟོང་ཕྲག་ནི། །གང་གཱའི་བྱེ་མ་སྙེད་རྣམས་ཀྱིས། །བྱང་ཆུབ་སེམས་དཔའ་ཤེས་རབ་ཅན། །དེ་ཡི་བ་སྤུ་གཡོས་མི་ནུས། །གཡོན་རོལ་ནས་འཇིགས་བྱེད་ཀྱིས་སྨྲས་པ། །དཔུང་གི་ནང་ན་བཞུགས་བཞིན་དུ། །ཡབ་ཁྱོད་ཅི་སླད་རབ་ཏུ་བསྙེངས། །དེ་ལ་དཔུང་གྲོགས་ག་ལ་མཆིས། །ཅི་སླད་ཁྱོད་འདིར་དེ་ལ་བསྙེངས། །གཡས་རོལ་ནས་བློ་གྲོས་རྩེ་གཅིག་གིས་སྨྲས་པ། འཇིག་རྟེན་དག་ན་ཉི་ཟླ་དཔུང་མ་མཆིས། །འཁོར་ལོས་བསྒྱུར་དང་སེང་གེ་དཔུང་མ་མཆིས། །བྱང་ཆུབ་སེམས་དཔའ་འདི་ནི་དཔུང་མ་མཆིས། །འོན་ཀྱང་གཅིག་པུས་བདུད་ནི་གཞོམ 41.174a པར་སྤྱོད། །གཡོན་རོལ་ནས་གླགས་ལྟས་སྨྲས་པ། མདུང་ཐུང་རྩེ་གསུམ་དབྱུག་ཏོ་རལ་གྲི་རྟ། །གླང་པོ་ཤིང་རྟ་རྐང་ཏང་མ་མཆིས་པ། །དགེ་སྦྱོང་གཅིག་པུ་མཆིས་པ་དེ་བདག་གིས། །དོ་མོད་དགུམ་གྱིས་ཅུང་ཟད་མ་བསྙེངས་ཡབ། །གཡས་རོལ་ནས་བསོད་ནམས་བརྒྱན་གྱིས་སྨྲས་པ། སྲེད་མེད་བུ་ལྟར་མི་ཕྱེད་མི་ཤིགས་སྐུ་དང་ལྡན། །བཟོད་སྟོབས་གོ་མནབས་བརྩོན་འགྲུས་བརྟན་པའི་རལ་གྲི་མདའ། །རྣམ་པར་ཐར་གསུམ་བཞོན་པ་ཤེས་རབ་གཞུ་ལགས་ཡབ། །བསོད་ནམས་སྟོབས་ཀྱིས་དེ་ནི་བདུད་ཀྱི་དཔུང་ལས་རྒྱལ། །གཡོན་རོལ་ནས་ཕྱིར་མི་ལྡོག་པས་སྨྲས་པ། འབྲོག་མེ་རྩཝ་ལ་ཚིག་པ་ཕྱིར་མི་ལྡོག་།ལོབས་པས་འཕངས་པའི་མདའ་ཡང་ཕྱིར་མི་ལྡོག་།མཁའ་ལས་རྡོ་རྗེ་འབབ་པ་ཕྱིར་མི་ལྡོག་།ཤཱཀྱའི་བུ་ལས་མ་རྒྱལ་བདག་གནས་མེད། །གཡས་རོལ་ནས་ཆོས་འདོད་ཀྱིས་སྨྲས་པ། གཤེར་བའི་རྩཝ་དང་ཕྲད་ན་མེ་ཡང་ལྡོག་།བྲག་གི་རྩེ་མོར་བབ་ན་མདའ་ཡང་ལྡོག་།རྡོ་རྗེ་སར་བབ་དེ་ནས་གང་དུ་འགྲོ། །ཞི་བ་བདུད་རྩི་མ་ཐོབ་དེ་མི་ལྡོག་།ཅིའི་ཕྱིར་ཞེ་ན། ཡབ་ཅིག་བར་སྣང་ལ་ནི་རི་མོ་བྲི་བར་ནུས་ཀྱང་གདའ། །སེམས་ཅན་ཇི་སྙེད་ཀུན་གྱི་སེམས་ནི་གཅིག་བསྡུར་ནུས་ཀྱང་གདའ། །ཡབ་ཅིག་ཉི་ཟླ་རླུང་ནི་ཞགས་པས་བཅིང་དུ་ནུས་ཀྱང་གདའ། །བྱང་ཆུབ་སེམས་དཔའ་བྱང་ཆུབ་སྙིང་པོ་ལས་ནི་བསྐྱོད་མི་ནུས། །གཡོན་རོལ་ནས་ཉེ་བར་མ་ཞི་བས་སྨྲས་པ། ལྟ་བའི་གདུག་པ་ཆེན་པོས་ལྷུན་པོ་བསྲེག་པར་བགྱི། །རྒྱ་མཚོ་ཆེན་པོ་རྣམས་ཀྱི་ཆབ་ཀྱང་ཐལ་བར་བགྱི། །བདག་གིས་དོ་མོད་དེ་གཉིས་ཐལ་བར་བརླག་པར་བགྱིས། །ཡབ་ཅིག་བྱང་ཆུབ་དང་ནི་དགེ་སྦྱོང་གཟིགས་སུ་གསོལ། །གཡས་རོལ་ནས་དོན་གྲུབ་ཀྱིས་སྨྲས་པ། གལ་ཏེ་དུག་གིས་འདི་ཀུན་གང་གྱུར་ལ། །སྟོང་གསུམ་དམ་པ་རབ་ཏུ་འབར་གྱུར་ཀྱང ། །ཡོན་ཏན་འབྱུང་གནས་ཀྱིས་ནི་གཟིགས་ཙམ་གྱིས། །དུག་ནི་དུག 41.174b མ་ཡིན་པར་རབ་ཏུ་འགྱུར། །སྲིད་པ་གསུམ་ན་གདུག་པ་དྲག་པོ་ནི། །འདོད་ཆགས་ཞེ་སྡང་དེ་བཞིན་གཏི་མུག་སྟེ། །དེ་དག་དེ་ཡི་སྐུ་དང་ཐུགས་ལ་མེད། །མཁའ་ལ་རྫབ་དང་རྡུལ་ནི་མེད་པ་བཞིན། །སྐུ་དང་གསུང་དང་ཐུགས་ཀྱང་རབ་ཏུ་དག་།སེམས་ཅན་ཀུན་ལ་བྱམས་པའི་ཐུགས་དང་ལྡན། །དེ་ལ་མཚོན་དང་དུག་གིས་ཡོང་མི་ཚུགས། །དེ་བས་ཡབ་ཅིག་ཐམས་ཅད་བཟློག་ཏུ་གསོལ། །གཡོན་རོལ་ནས་དགའ་བ་ཆགས་པས་སྨྲས་པ། བདག་གིས་སིལ་སྙན་སྟོང་དག་རབ་བགྱིས་ཏེ། །ལྷ་ཡི་བུ་མོ་བརྒྱན་པ་བྱེ་སྟོང་གིས། །ཆགས་པར་བགྱིས་ཏེ་གྲོང་ཁྱེར་མཆོག་ཏུ་བཀྲི། །འདོད་ལ་དགའ་བར་ཁྱོད་ཀྱི་དབང་དུ་བགྱི། །གཡས་རོལ་ནས་ཆོས་དགས་སྨྲས་པ། དེ་འདིར་རྟག་ཏུ་ཆོས་ལ་དགྱེས་པས་དགྱེས། །བསམ་གཏན་དགྱེས་ཤིང་བདུད་རྩི་དོན་ལ་དགྱེས། །སེམས་ཅན་ཐར་བར་མཛད་དང་བྱམས་ལ་དགྱེས། །འདོད་ཆགས་དགའ་ལ་དེ་ནི་དགྱེས་མི་མཛད། །གཡོན་རོལ་ནས་རླུང་གི་ཤུགས་ཤེས་བྱ་བས་སྨྲས་པ། །བདག་གི་ཤུགས་ཀྱིས་ཉི་ཟླ་མིད་བགྱིས་ལ། །ནམ་མཁའ་ལས་ནི་རླུང་ཡང་རབ་གཏང་ཞིང ། །ཡབ་ཅིག་དོ་མོད་དགེ་སྦྱོང་བཟུང་ནས་ནི། །རླུང་གིས་ཕུབ་མ་བཞིན་དུ་གཏོར་བར་བགྱི། །གཡས་རོལ་ནས་བདུད་ཀྱི་བུ་བློ་གྲོས་མི་གཡོ་བ་ཞེས་བྱ་བ་དེས་འདི་སྐད་ཅེས་སྨྲས་སོ། །ཇི་ལྟར་ཁྱོད་ཀྱི་ཤུགས་མགྱོགས་དྲག་པ་ལྟར། །གལ་ཏེ་ལྷ་དང་མི་རྣམས་དེ་འདྲར་གྱུར། །དེ་དག་ཐམས་ཅད་གཅིག་ཏུ་འདུས་པས་ཀྱང ། །ཟླ་མེད་གང་ཟག་དེ་ལ་གནོད་མི་ནུས། །གཡོན་རོལ་ནས་ཚངས་པའི་བློ་གྲོས་ཀྱིས་སྨྲས་པ། དེ་འདྲ་བ་ཡི་དྲག་པོ་ཕལ་ཆེར་གྱུར་ཀྱང་ནི། །ཁྱོད་ཀྱི་ང་རྒྱལ་ཅུང་ཟད་འཇོམ་མི་ནུས། །བགྱི་བ་ཐམས་ཅད་མང་པོས་འགྲུབ་ལགས་ན། །གཅིག་པུས་ཁྱོད་ལ་ཅི་བགྱི་སྨོས་ཅི་འཚལ། །གཡས་རོལ་ནས་སེང་གེའི་བློ་གྲོས་ཀྱིས་སྨྲས་པ། །ས་ལ་སེང་གེ་ཁྱུས་འཁོད་སྔོན་མ་བྱུང ། །ལྟ་བའི་གདུག་པ་དག་ཀྱང་ཁྱུས 41.175a མི་འཁོད། །གཟི་ལྡན་བདེན་པ་ཕ་རོལ་གནོན་པ་པོ། །སྐྱེས་བུ་ཁྱུ་མཆོག་རྣམས་ཀྱང་ཁྱུས་མི་འཁོད། །གཡོན་རོལ་ནས་ཐམས་ཅད་དུ་གདོལ་པ་ཞེས་བྱ་བས་སྨྲས་པ། ཇི་ལྟར་ཁྱོད་ཀྱི་སྲས་པོ་བརྩོན་འགྲུས་དང ། །ཤུགས་དང་སྟོབས་དང་ལྡན་པ་སྒྲ་སྒྲོགས་པ། །ཚིག་འབར་དེ་འདྲ་ཡབ་ཀྱིས་སྔོན་གསན་ཏམ། །མྱུར་དུ་དགེ་སྦྱོང་དེ་ནི་གཞོམ་དུ་བཞུད། །གཡས་རོལ་ནས་སེང་གེ་སྒྲ་སྒྲོགས་ཤེས་བྱ་བས་སྨྲས་པ། ནགས་ཚལ་དག་གི་ཁྲོད་ན་ཝ་མང་པོས། །སེང་གེ་མེད་པ་དེ་ན་སྒྲ་ཡང་སྒྲོག་།སེང་གེས་སྒྲ་བསྒྲགས་འཇིགས་པ་ཐོས་པ་དང ། །སྐྲག་ནས་ཕྱོགས་ཕྱོགས་དག་ཏུ་རབ་ཏུ་འབྲོས། །དེ་ལྟར་བདུད་བུ་མི་མཁས་འདི་དག་ཀྱང ། །མི་མཆོག་གསུང་ནི་མ་ཐོས་དེ་བར་དུ། །དེ་དག་སྤྱི་རྟོལ་བྱེད་ཅིང་བྱུང་རྒྱལ་སྨྲ། །མི་ཡི་སེང་གེས་གསུང་བསྒྲགས་འབྲོས་པར་འགྱུར། །གཡོན་རོལ་ནས་ཉེས་པར་བསམ་པ་སེམས་པས་སྨྲས་པ། བདག་གིས་གང་བསམས་མྱུར་དུ་འདིར་འགྲུབ་ན། །དེ་ནི་ཅི་སླད་དཔུང་ཚོགས་འདི་མི་ལྟ། །གང་ཕྱིར་ལངས་ཏེ་མྱུར་དུ་མི་འབྲོས་པས། །དེ་ནི་གླེན་པ་ཆོ་ག་མ་འཚལ་བ། །གཡས་རོལ་ནས་དོན་ལེགས་པར་བསམ་པ་སེམས་པ་ཞེས་བྱ་བས་སྨྲས་པ། དེ་ནི་མི་གླེན་ཕ་རོལ་གནོན་པ་སྟེ། །ཁྱེད་ཅག་གླེན་ཞིང་ཤིན་ཏུ་མ་བསྡམས་པ། །ཁྱེད་ཀྱིས་དེ་ཡི་མཐུ་རྩལ་ཡོང་མི་ཤེས། །དེ་ཡི་ཤེས་རབ་སྟོབས་ཀྱིས་ཐམས་ཅད་ཕམ། །བདུད་ཀྱི་བུ་ནི་གང་གཱའི་བྱེ་མ་སྙེད། །ཁྱེད་ཅག་རྣམས་ཀྱིས་དེ་འདྲའི་མཐུ་བརྩལ་ཅན། །དེ་ཡི་བ་སྤུ་གཅིག་ཀྱང་གཡོས་མི་ནུས། །གསད་པར་བསམས་པ་མི་འགྲུབ་སྨོས་ཅི་དགོས། །ཁྱོད་ནི་དེ་ལ་ཡིད་ཀྱིས་གནོད་མ་སེམས། །གུས་དང་བཅས་པར་དད་པའི་སེམས་སུ་གྱིས། །འདི་ནི་སྲིད་གསུམ་རྒྱལ་པོར་གྱུར་པས་ན། །འཐབ་མོ་མ་བྱེད་པར་ནི་སླར་ལོག་ཤིག་།དེ་བཞིན་དུ་སྦྱར་ཏེ་དེ་ལྟར 41.175b བདུད་ཀྱི་བུ་དཀར་པོའི་ཕྱོགས་པ་དང་ནག་པོའི་ཕྱོགས་པ་སྟོང་དུ་ཚང་བ་དེ་དག་ཐམས་ཅད་ཀྱིས་སོ་སོ་ནས་བདུད་སྡིག་ཅན་ལ་ཚིགས་སུ་བཅད་དེ་སྨྲས་སོ། །དེ་ནས་བདུད་སྡིག་ཅན་གྱི་སྡེ་དཔོན་སྡེ་བཟང་པོ་ཞེས་བྱ་བ་དེས་བདུད་སྡིག་ཅན་ལ་ཚིགས་སུ་བཅད་དེ་སྨྲས་པ། །གང་དག་ཁྱོད་ཀྱི་རྗེས་འབྲང་བརྒྱ་བྱིན་དང ། །སྐྱོང་དང་མི་འམ་ཅིའི་ཚོགས་རྣམས་དང ། །ལྷ་མིན་དབང་དང་མཁའ་ལྡིང་དབང་པོ་རྣམས། །ཐལ་མོ་སྦྱར་ཏེ་དེ་ལ་ཕྱག་འཚལ་ན། །ཁྱོད་ཀྱི་རྗེས་སུ་འབྲང་བ་མ་ལགས་པ། །ཚངས་པ་འོད་གསལ་ལྷ་ཡི་བུ་རྣམས་དང ། །གནས་གཙང་རིས་ཀྱི་ལྷ་རྣམས་དེ་དག་ཀུན། །དེ་ལ་ཕྱག་འཚལ་བ་ནི་སྨོས་ཅི་འཚལ། །ཁྱོད་ཀྱི་སྲས་པོ་ཤེས་རབ་ཅན། །སྟོབས་དང་ལྡན་ཞིང་ཡིད་གཞུངས་པ། །དེ་དག་བྱང་ཆུབ་སེམས་དཔའ་ལ། །སྙིང་དང་འཐུན་གྱུར་ཕྱག་འཚལ་ལོ། །དཔག་ཚད་བརྒྱད་བཅུར་ཁྱབ་པ་ཡི། །གནོད་སྦྱིན་ལ་སོགས་བདུད་དཔུང་འདི། །ཕལ་ཆེར་རབ་ཏུ་དང་ཡིད་ཀྱིས། །ཀུན་ཀྱང་ཉེས་པ་མེད་ལ་ལྟ། །འཇིགས་སུ་རུང་ཞིང་དྲག་བསྒྱུར་བ། །དཔུང་ཚོགས་མི་བཟད་འདི་གཟིགས་ནས། །ངོ་མཚར་མ་གྱུར་ཞུམ་མི་མངའ། །ངེས་པར་དོ་མོད་འདི་རྒྱལ་འགྱུར། །གང་ན་དཔུང་འདི་གནས་པ་དེར། །ཝ་དང་འུག་པ་སྒྲ་འབྱིན་ལ། །བྱ་རོག་བོང་བུ་སྒྲ་འབྱིན་པས། །མྱུར་དུ་སླར་ནི་ལྡོག་པའི་རིགས། །བྱང་ཆུབ་སྙིང་པོར་གཟིགས་སུ་གསོལ། །པ་ཏ་ཀུན་ཏ་ངང་པ་དང ། །ཁུ་བྱུག་རྨ་བྱ་མངོན་སྐོར་བས། །ངེས་པར་དོ་མོད་འདི་རྒྱལ་འགྱུར། །གང་ན་དཔུང་འདི་གནས་པ་དེར། །རྡུལ་དང་སྣག་ཙའི་ཆར་འབབ་ལ། །ས་དཀྱིལ་མེ་ཏོག་ཆར་འབབ་པས། །བདག་གི་ཚིག་བཞིན་ལྡོག་པའི་རིགས། །གང་ན་དཔུང་འདི་གནས་པ་དེ། །ཤང་ཤོང་གྱུར་ཅིང་ཚེར་མས་གང ། །ས་དཀྱིལ་དྲི་མེད་གསེར་གྱུར་པས། །ཤེས་རབ་ཅན་དག་ལྡོག་པའི་རིགས། །གལ་ཏེ་མི་འདོད་སྔར་རྨིས་པའི། །རྨི་ལམ་དེ་དག་མངོན་སུམ 41.176a འགྱུར། །དྲང་སྲོང་རྣམས་ཀྱི་ཡུལ་བརླག་པ། །དེ་བཞིན་དཔུང་འདི་ཐལ་བར་ཀློག་།རྒྱལ་པོ་འགྲོ་བ་དྲང་སྲོང་མཆོག་།ཚངས་པས་བྱིན་གྱིས་ཁྲོས་བྱས་པས། །དན་ད་ཀ་ཡི་ནགས་ཚལ་ཚིག་།ལོ་མང་ཞིག་ཏུ་རྩཝ་མ་སྐྱེས། །དྲང་སྲོང་བརྟུལ་ཞུགས་སྤྱོད་པ་པོ། །དཀའ་ཐུབ་ལྡན་པའི་འཇིག་རྟེན་ན། །ཇི་སྙེད་འཁོད་པ་ཀུན་གྱི་མཆོག་།འབྱུང་པོ་ཀུན་ལ་མི་འཚེ་འདི། །གང་གི་ལུས་ལ་མཚན་རབ་འབར། །ཁྱིམ་ནས་ཀྱང་ནི་བྱུང་བ་དེར། །ཉོན་མོངས་ཕམ་བྱས་འཚང་རྒྱ་ཞེས། །ཁྱོད་ཀྱིས་སྔོན་ཆད་མ་གསན་ནམ། །རྒྱལ་སྲས་རྣམས་ཀྱིས་མཆོད་དོན་དུ། །འབྱོར་པ་འདི་འདྲ་འདི་དག་སྤྲུལ། །དེ་བས་ངེས་པར་སེམས་ཅན་མཆོག་།སྦྱིན་བསྲེག་དམ་པ་ལེན་པར་འགྱུར། །འདི་ཡི་མཛོད་སྤུ་དྲི་མེད་པ། །བྱེ་བ་ཁྲག་ཁྲིག་ཞིང་དུ་མཛེས། །དེ་ཡིས་བདག་ཅག་མོག་མོག་བགྱིས། །བདུད་དཔུང་ངེས་བཅོམ་གདོན་མི་འཚལ། །སྲིད་པའི་རྩེ་གནས་ལྷ་རྣམས་ཀྱིས། །དེ་ཡི་སྤྱི་གཙུག་བལྟར་མི་ནུས། །ངེས་པར་གཞན་གྱིས་མ་བསྟན་པར། །ཐམས་ཅད་མཁྱེན་ཉིད་ཐོབ་པར་འགྱུར། །ཇི་ལྟར་ལྷུན་པོ་ཁོར་ཡུག་དང ། །ཉི་ཟླ་བརྒྱ་བྱིན་ཚངས་པ་དང ། །ཤིང་ལྗོན་རྣམས་དང་རི་མཆོག་ཀུན། །ས་དཀྱིལ་ཕྱག་འཚལ་བགྱིད་ལས་ན། །བསོད་ནམས་སྟོབས་ཅན་ཤེས་རབ་སྟོབས། །ཡེ་ཤེས་སྟོབས་ཅན་བཟོད་པའི་སྟོབས། །བརྩོན་འགྲུས་སྟོབས་དང་ལྡན་པ་དེ། །བདུད་ཕྱོགས་སྟོབས་མེད་མཛད་པར་ངེས། །གླང་པོས་སོ་མ་བཏང་སྣོད་དང ། །སེང་གེས་ཇི་ལྟར་ཝ་བཅོམ་དང ། །ཉི་མས་སྲིན་བུ་མེ་ཁྱེར་ལྟར། །བདེ་བར་གཤེགས་པས་དཔུང་བཅོམ་འགྱུར། །ཚིག་དེ་སྐད་ཐོས་པ་དང་བདུད་ཀྱི་བུ་གཞན་ཞིག་ཤིན་ཏུ་ཁྲོས་ནས་མིག་དམར་པོར་གྱུར་ཏེ་སྨྲས་པ། ཁྱོད་ནི་གཅིག་པུ་དེ་ཡི་བསྔགས་པ་དག་།ཤིན་ཏུ་དཔག་ཏུ་མེད་པར་བརྗོད་བྱེད་ན། །གཅིག་པུ་དེས་ནི་ཅི་ཞིག་བྱ་བར 41.176b ནུས། །འཇིགས་སུ་རུང་བའི་དཔུང་ཆེན་མ་མཐོང་ངམ། །དེ་ནས་གཡས་རོལ་ནས་བདུད་ཀྱི་བུ་བདུད་རབ་ཏུ་འཇོམས་པ་ཞེས་བྱ་བས་སྨྲས་པ། འཇིག་རྟེན་ཉི་ཟླ་སེང་གེ་དང ། །འཁོར་ལོས་བསྒྱུར་ལ་གྲོགས་བྱེད་མེད། །བྱང་ཆུབ་བཞུགས་ནས་ངེས་པ་ཡི། །བྱང་ཆུབ་སེམས་དཔའ་གྲོགས་མི་དགོས། །དེ་ནས་བྱང་ཆུབ་སེམས་དཔས་བདུད་མཐུ་ཆུང་བར་བྱ་བའི་ཕྱིར་གང་མཐོང་བས་བདག་གི་དཔུང་བྱང་ཆུབ་སེམས་དཔའི་ཁའི་ནང་དུ་ཞུགས་སོ་སྙམ་དུ་སེམས་ཤིང་བདུད་བྲོས་པར་གྱུར་པ་དང ། བྲོས་ནས་ཀྱང་ཅི་ཡང་མ་ཡིན་ནོ་སྙམ་ནས་ཡང་སླར་ལོག་སྟེ། འཁོར་དང་བཅས་པས་མཚོན་ཆ་རྣམ་པ་སྣ་ཚོགས་བྱང་ཆུབ་སེམས་དཔའི་སྟེང་དུ་འཕེན་ཅིང ། རི་རབ་ཙམ་གྱི་རི་དེ་དག་ཀྱང་བྱང་ཆུབ་སེམས་དཔའི་སྟེང་དུ་འཕངས་པ་དང ། མེ་ཏོག་གི་བླ་རེ་དང ། གཞལ་མེད་ཁང་དུ་གྱུར་ཏེ་གནས་པ་དང ། གང་དག་མིག་གདུག་པ་དང ། མྱུར་དུ་གདུག་པ་དང ། དབུགས་གདུག་པ་རྣམས་མེ་ལྕེ་གཏོང་བའི་མེའི་དཀྱིལ་འཁོར་དེ་ཡང་བྱང་ཆུབ་སེམས་དཔའ་ལ་འོད་ཀྱི་དཀྱིལ་འཁོར་ལྟ་བུར་གནས་པར་བྱ་བའི་ཕྱིར་པད་མ་འདབ་མ་བརྒྱ་པ་རྒྱས་པ་ལྟ་བུའི་བཞིན་བསྐྱོད་དོ། །དེ་ནས་ཡང་བྱང་ཆུབ་སེམས་དཔས་ལག་པ་གཡས་པས་མགོ་ལ་བྱུགས་པ་དང ། བདུད་ཀྱིས་བྱང་ཆུབ་སེམས་དཔའི་ལག་ན་རལ་གྲི་ཐོགས་པར་མཐོང་ནས་ལྷོ་ཕྱོགས་སུ་བྲོས་པ་དང་ཅི་ཡང་མ་ཡིན་ནོ་སྙམ་ནས་ཡང་སླར་ལོག་གོ། །སླར་ལོག་ནས་ཀྱང་བྱང་ཆུབ་སེམས་དཔའི་སྟེང་དུ་མཚོན་ཆ་རྣམ་པ་སྣ་ཚོགས་རལ་གྲི་དང ། མདའ་གཞུ་དང ། མདུང་ཐུང་དང ། མདའ་བོ་ཆེ་དང ། དགྲ་སྟ་དང ། བོང་བ་དང ། གཏུན་ཤིང་དང ། རྡོ་རྗེ་རྩེ་གཅིག་པ་དང ། དབྱུག་ཏོ་དང ། འཁོར་ལོ་དང ། ཐོ་བ་དང ། ཤིང་དྲུངས་ཕྱུང་དང ། ཕ་བོང་དང ། ཞགས་པ་དང ། ལྕགས་ཀྱི་ཐུ་ལུམ་ཤིན་ཏུ་འཇིགས་པ་དུ་མ་འཕེན་ཏེ། དེ་དག་ཀྱང་འཕངས་མ་ཐག་ཏུ་མེ་ཏོག་གི་ཕྲེང་བ་དང ། མེ་ཏོག 41.177a གི་བླ་རེར་གྱུར་ཏེ་གནས་སོ། །མེ་ཏོག་སིལ་མར་ཡང་གྱུར་ནས་ས་ལ་འཐོར་བ་དང ། ཕྲེང་བའི་ཆུན་པོར་ཡང་འཕྱང་བས་བྱང་ཆུབ་ཀྱི་ཤིང་བརྒྱན་པར་གྱུར་ཏོ། །བྱང་ཆུབ་སེམས་དཔའི་བཀོད་པ་འབྱོར་པ་དེ་དག་མཐོང་ནས་བདུད་སྡིག་ཅན་ཕྲག་དོག་དང་སེར་སྣས་སེམས་ལ་གནོད་དེ། བྱང་ཆུབ་སེམས་དཔའ་ལ་སྨྲས་པ། ཀྱེ་རྒྱལ་བུ་གཞོན་ནུ་བཞེངས། བཞེངས། རྒྱལ་སྲིད་ལ་སྤྱོད་ཅིག་།ཁྱོད་ཀྱི་བསོད་ནམས་དེ་ཙམ་གྱིས་ཁྱོད་ཀྱིས་ཐར་པ་ག་ལ་འཐོབ། །དེ་ནས་བྱང་ཆུབ་སེམས་དཔས་བརྟན་ལ་ཟབ་ཅིང་རྒྱ་ཆེ་བ་དང ། འཇམ་ཞིང་སྙན་པའི་ཚིག་གིས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་ཁྱོད་ཀྱིས་ནི་གཏན་པ་མེད་པའི་མཆོད་སྦྱིན་གཅིག་གིས་འདོད་པའི་དབང་ཕྱུག་ཐོབ་ཏུ་ཟད་དོ། །ངས་ནི་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་གཏན་པ་མེད་པའི་མཆོད་སྦྱིན་བྱས་སོ། །ལག་པ་དང ། རྐང་པ་དང ། མིག་དང ། མགོ་དག་ཀྱང་བཅད་ཅིང་སློང་བ་རྣམས་ལ་བྱིན་ནོ། །སེམས་ཅན་རྣམས་ཐར་བར་བྱ་བའི་ཕྱིར་ཁྱིམ་དང ། ནོར་དང ། འབྲུ་དང ། མལ་ཆ་དང ། གོས་དང ། འཆགས་དང ། བསྐྱེད་མོས་ཚལ་རྣམ་པ་དུ་མ་དག་ཀྱང་སློང་བ་རྣམས་ལ་བྱིན་ནོ། །དེ་ནས་བདུད་སྡིག་ཅན་གྱིས་ཚིགས་སུ་བཅད་དེ་བྱང་ཆུབ་སེམས་དཔའ་ལ་སླར་སྨྲས་པ། སྔོན་ཆད་ཁོ་བོས་མཆོད་སྦྱིན་ཁ་ན་མ་ཐོ་མེད། །གཏན་པ་མེད་པ་བྱས་པ་ཁྱོད་འདིར་དཔང་དུ་ཡོད། །ཁྱོད་ལ་འདི་ན་དཔང་པོ་གང་ཡང་ཡོད་མིན་པས། །སྨྲས་ཀྱང་ཕན་པ་ཅི་ཡོད་ཁྱོད་ནི་ཕམ་པར་གྱུར། །བྱང་ཆུབ་སེམས་དཔས་སྨྲས་པ། སྡིག་ཅན་ས་འདི་ནི་ངའི་དཔང་ཡིན་ནོ། །དེ་ནས་བྱང་ཆུབ་སེམས་དཔས་བདུད་སྡིག་ཅན་དང་བདུད་ཀྱི་འཁོར་ལ་བྱམས་པ་དང་སྙིང་རྗེ་སྔོན་དུ་འགྲོ་བའི་སེམས་ཀྱིས་ཁྱབ་པར་བྱས་ནས། སེང་གེ་ལྟར་མི་འཇིགས་མི་སྐྲག་ལ་བག་ཚ་བ་མེད་ཅིང་མི་དམན་ལ་མ་ཞུམ 41.177b པ་དང ། མ་འཁྲུགས་པ་དང ། མ་བརྙོགས་པ་དང ། འཇིགས་པ་དང ། སྤུ་ཟིང་ཞེས་བྱེད་པ་མེད་པར་ལག་མཐིལ་ན་དུང་དང ། རྒྱལ་མཚན་དང ། ཉ་དང ། བུམ་པ་དང ། བཀྲ་ཤིས་པ་དང ། ལྕགས་ཀྱུ་དང ། འཁོར་ལོའི་མཚན་མ་ཡོད་པ། སོར་མོ་བར་དྲ་བས་འབྲེལ་བ། སེན་མོ་ཤིན་ཏུ་མཛེས་ཤིང་ཟངས་ཀྱི་མདོག་ལྟར་འདུག་པས་བརྒྱན་པ། འཇམ་ཞིང་མཉེན་ལ་ཤིན་ཏུ་གཞོན་པ། བསྐལ་པ་དཔག་ཏུ་མེད་པར་དགེ་བའི་རྩ་བའི་ཚོགས་བསགས་པས་གྲུབ་པའི་ལག་པ་གཡས་པས་ལུས་ཐམས་ཅད་ལ་བྱུགས་ནས་ཚུལ་དུ་ཤིས་པར་ས་ལ་བརྡབས་ཏེ་དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། །ས་འདི་འགྲོ་བ་ཀུན་གྱི་གནས་ཡིན་ཏེ། །རྒྱུ་དང་མི་རྒྱུ་སྙོམས་ཤིང་ཉེ་མཁོན་མེད། །འདི་ནི་བདག་གི་དཔང་སྟེ་བདག་བརྫུན་མེད། །འདི་ལ་ཁྱོད་ནི་བདག་གི་དཔང་བྱོས་ཤིག་།བྱང་ཆུབ་སེམས་དཔས་ས་ཆེན་པོ་འདི་ལ་རེག་མ་ཐག་ཏུ་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་སོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །འདི་ལྟ་སྟེ་དཔེར་ན། ཡུལ་མ་ག་དྷཱའི་བརྡབ་ཁར་སྒྲ་འབྱུང་ཞིང་སྒྲ་རྒྱུན་རིང་བ་དེ་བཞིན་དུ་ས་ཆེན་པོ་འདི་ཡང་བྱང་ཆུབ་སེམས་དཔའི་ལག་པས་བསྣུན་མ་ཐག་ཏུ་སྒྲ་བྱུང་ཞིང་སྒྲ་རྒྱུན་རིང་དུ་བྱུང་ངོ་།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་བཞི་པ། དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སའི་ལྷ་མོ་བརྟན་མ་ཞེས་བྱ་བ་སའི་ལྷ་མོའི་འཁོར་བྱེ་བ་ཕྲག་བརྒྱ་དང་ལྡན་པ་གང་ཡིན་པ་དེས་ས་ཆེན་པོ་ཐམས་ཅད་གཡོས་པར་བྱས་ནས། བྱང་ཆུབ་སེམས་དཔའ་དང་ཧ་ཅང་ཡང་མི་རིང་བ་ཞིག་ཏུ་ས་བརྟོལ་ཏེ། ལུས་རྒྱན་ཐམས་ཅད་གྱིས་བརྒྱན་པ་ཕྱེད་ཕྱུང་ནས་བྱང་ཆུབ་སེམས་དཔའ་ག་ལ་བ་དེ 41.178a ལོགས་སུ་ལུས་བཏུད་དེ་ཐལ་མོ་སྦྱར་ནས། བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །དེ་དེ་བཞིན་ནོ། །སྐྱེས་བུ་ཆེན་པོ་དེ་དེ་བཞིན་ནོ། །ཁྱོད་ཀྱིས་ཇི་སྐད་གསུངས་པ་བཞིན་ཏེ། འདི་ནི་བདག་ལ་མངོན་སུམ་མོ། །དེ་ལྟ་ལགས་མོད་ཀྱི། འོན་གྱིས་ཀྱང་བཅོམ་ལྡན་འདས་ཉིད་ལྷ་དང་བཅས་པའི་འཇིག་རྟེན་གྱི་དཔང་དུ་གྱུར་པ་དང ། ཚད་མར་གྱུར་པ་དམ་པ་ལགས་སོ། །སའི་ལྷ་མོ་ཆེན་མོ་བརྟན་མས་དེ་སྐད་ཅེས་སྨྲས་ནས། རྣམ་པ་དུ་མར་བདུད་སྡིག་ཅན་གྱི་གླགས་ནི་མེད་པར་བྱས། བྱང་ཆུབ་སེམས་དཔའ་ལ་ནི་བསྟོད་དེ། རང་གི་མཐུ་རྣམ་པ་མང་པོ་བསྟན་ནས་འཁོར་དང་བཅས་ཏེ་དེ་ཉིད་དུ་མི་སྣང་བར་གྱུར་ཏོ། །གཡོན་ཅན་དཔུང་བཅས་ས་སྒྲ་དེ་ཐོས་ནས། །ནགས་སུ་སེང་གེས་སྒྲ་བསྒྲགས་ཝས་ཐོས་དང ། །བྱ་རོག་རྡོ་འཕངས་མོད་ལ་འབྱེར་བ་བཞིན། །སྔངས་སྐྲག་སྙིང་གས་ཐམས་ཅད་རབ་ཏུ་བྱེར། །དེ་ནས་བདུད་སྡིག་ཅན་སྡུག་བསྔལ་ཞིང་ཡིད་མི་བདེ་སྟེ། ཡི་མ་རངས་ལ་སྐྱེངས་བཞིན་དུ་ང་རྒྱལ་གྱི་ཟིལ་གྱིས་ནོན་པས་མ་སོང་ལ་ཕྱིར་ཡང་མ་ལོག་ཅིང་བྲོས་ཀྱང་མ་བྲོས་ཏེ་ཕྱིར་བལྟས་ནས་ཡང་དཔུང་རྣམས་ལ་སྨྲས་པ། ཁྱེད་ལྷན་ཅིག་འདུས་ཏེ་ཅུང་ཟད་ཅིག་སྡོད་ཅིག་།རྣམ་པ་འདི་ལྟ་བུའི་སེམས་ཅན་རིན་པོ་ཆེ་གློ་བུར་དུ་ཆུད་མི་གཟན་པར་ཁོ་བོས་རྗེས་སུ་འཆགས་པས་འདི་བསླང་བར་ནུས་སམ་མི་ནུས་སད་པར་བྱའོ། །དེ་ནས་བདུད་སྡིག་ཅན་གྱིས་རང་གི་བུ་མོ་རྣམས་ལ་སྨྲས་པ། བུ་མོ་ཁྱེད་དེང་སྟེ་བྱང་ཆུབ་ཀྱི་སྙིང་པོར་སོང་ལ་བྱང་ཆུབ་སེམས་དཔའ་འདོད་ཆགས་དང་བཅས་པ་འམ། འོན་ཏེ་འདོད་ཆགས་མེད། ཅི་གཏི་མུག་ཅན་ནམ། འོན་ཏེ་ཤེས་རབ་ཅན། ཅི་ལྡོངས་པ་ཞིག་གམ། འོན་ཏེ་ཕྱོགས་ཤེས་པ་ཞིག་གམ། འོན་ཏེ་དཔུང་གཉེན་མེད་པ་ཞིག་གམ། དམན་པ་ཞིག་གམ་བརྟན་པ་ཞིག་ཡིན་པ་བགོམས་ཤིག་།ཚིག་དེ་ཐོས་ནས་བདུད་ཀྱི་བུ་མོ་དེ་དག་བྱང་ཆུབ་ཀྱི 41.178b སྙིང་པོ་ག་ལ་བ་དང ། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའི་མདུན་དུ་འཁོད་དེ། བུད་མེད་ཀྱི་སྒྱུ་རྣམ་པ་སུམ་བཅུ་རྩ་གཉིས་ཉེ་བར་བསྟན་ཏོ། །རྣམ་པ་སུམ་བཅུ་རྩ་གཉིས་གང་ཞེ་ན། འདི་ལྟ་སྟེ། དེའི་ནང་ནས་ཁ་ཅིག་ནི་བཞིན་ཕྱེད་འགེབས་པ་དང ། ཁ་ཅིག་ནི་ནུ་མ་མཁྲང་ཞིང་འབུར་བ་སྟོན་པ་དང ། ཁ་ཅིག་ནི་ཅུང་ཟད་འཛུམ་པས་སོའི་ཕྲེང་བ་སྟོན་པ་དང ། ཁ་ཅིག་ནི་ལག་པ་བརྐྱང་སྟེ་བྱ་རྨྱངས་བྱེད་ཅིང་མཆན་ཁུང་སྟོན་པ་དང ། ཁ་ཅིག་ནི་བིམ་པ་ལྟར་དམར་བའི་མཆུ་སྟོན་པ་དང ། ཁ་ཅིག་ནི་མིག་ཕྱེད་བཙུམས་ཏེ་བྱང་ཆུབ་སེམས་དཔའ་ལ་ལྟ་ཞིང ། བལྟས་ནས་མྱུར་བ་མྱུར་བར་འཛུམས་པ་དང ། ཁ་ཅིག་ནི་ནུ་མ་ཕྱེད་གཡོགས་ཏེ་སྟོན་པ་དང ། ཁ་ཅིག་ནི་གོས་སྙིལ་བར་བྱས་ཏེ། གསེར་གྱི་ཕག་སྐ་དང་བཅས་པའི་རྐེད་པ་སྟོན་པ་དང ། ཁ་ཅིག་ནི་གོས་དུ་ཀུ་ལ་སྲབ་མོ་གྱོན་ཏེ། གསེར་གྱི་ཕག་སྐ་དང་བཅས་པའི་རྐེད་པ་སྟོན་པ་དང ། ཁ་ཅིག་ནི་རྐང་གདུབ་སྒྲ་སིལ་སིལ་འབྱིན་པ་དང ། ཁ་ཅིག་ནི་ནུ་མའི་བར་ནས་ཕྲེང་བ་གཅིག་ཉེ་བར་སྟོན་པ་དང ། ཁ་ཅིག་ནི་བརླ་ཕྱེད་ཙམ་བརྫེས་པ་ཉེ་བར་སྟོན་པ་དང ། ཁ་ཅིག་ནི་མགོ་དང་ཕྲག་པ་དག་ལ་བྱ་འདབ་སྦེད་དང ། ནེ་ཙོ་དང ། རི་སྐེགས་འདུག་པར་ཉེ་བར་སྟོན་པ་དང ། ཁ་ཅིག་ནི་བྱང་ཆུབ་སེམས་དཔའ་ལ་མིག་ཟུར་གྱིས་ལྟ་བ་དང ། ཁ་ཅིག་ནི་གོས་ལེགས་པར་བགོས་ཀྱང་བགོ་མ་ལེགས་པ་ལྟ་བུར་བཅོས་པ་དང ། ཁ་ཅིག་ནི་རྐེད་པ་དང ། གསེར་གྱི་ཕག་སྐ་སྐྱོད་པ་དང ། ཁ་ཅིག་ནི་འཁྲུལ་བ་ལྟར་འཆོས་ཤིང་སྒེག་སྟེ་ཕན་ཚུན་འཆག་པ་དང ། ཁ་ཅིག་ནི་གར་བྱེད་པ་དང ། ཁ་ཅིག་ནི་གླུ་ལེན་པ་དང ། ཁ་ཅིག་ནི་བསྒེགས་ཤིང་ངོ་ཚ་བ་ལྟར་ཡང་འཆོས་པ་དང ། ཁ་ཅིག་ནི་ཆུ་ཤིང་རླུང་གིས་བསྐྱོད་པ་ལྟར་བརླ་སྒུལ་བ་དང ། ཁ་ཅིག་ནི་བརྗིད་པའི་སྒྲ་འབྱིན་པ་དང ། ཁ་ཅིག་ནི་སེང་རས་བགོས་ཏེ་གསེར 41.179a གྱི་ཕག་སྐ་དྲིལ་བུ་ཅན་བཅིངས་ནས་དགོད་ཅིང་འཆག་པ་དང ། ཁ་ཅིག་ནི་གོས་དང་རྒྱན་རྣམས་ས་ལ་འདོར་ཞིང་ངོ་ཚ་བ་ལྟར་སླར་ཡང་ལེན་པ་དང ། ཁ་ཅིག་ནི་གསང་བ་དང ། གསལ་བའི་རྒྱན་ཐམས་ཅད་ཉེ་བར་སྟོན་པ་དང ། ཁ་ཅིག་ནི་ལག་པ་སྤོས་ཀྱིས་བསྐུས་པར་སྟོན་པ་དང ། ཁ་ཅིག་ནི་མཁུར་བ་བསྐུས་ཤིང་རྣ་ཆ་ཡང་སྟོན་པ་དང ། ཁ་ཅིག་ནི་མགོ་ཡང་གཡོགས་ཤིང་བཞིན་ཡང་གཡོགས་ལ་སྐད་ཅིག་ཙམ་གྱིས་སྟོན་པ་དང ། ཁ་ཅིག་ནི་སྔོན་རྒོད་རྒོད་པ་དང ། དགའ་དགའ་བ་དང ། རྩེ་རྩེ་བ་ཕན་ཚུན་དྲན་པར་བྱེད་ཅིང་ཡང་ངོ་ཚ་བ་ལྟར་འདུག་པ་དང ། ཁ་ཅིག་ནི་གཞོན་ནུའི་གཟུགས་དང ། བུ་མ་བཙས་པའི་གཟུགས་དང ། ན་ཆུང་ཚད་ལ་བབ་པའི་གཟུགས་སྟོན་པ་དང ། ཁ་ཅིག་ནི་འདོད་པ་དང་ལྡན་པས་བྱང་ཆུབ་སེམས་དཔའ་ལ་སྒུགས་པ་དང ། ཁ་ཅིག་ནི་བྱང་ཆུབ་སེམས་དཔའ་ལ་མེ་ཏོག་སིལ་མས་འཐོར་བ་དག་སྟེ། བྱང་ཆུབ་སེམས་དཔའི་མདུན་དུ་འདུག་ནས་བྱང་ཆུབ་སེམས་དཔའི་བསམ་པ་ལ་རྟོག་ཅིང་གདོང་དུ་ཡང་ལྟ་སྟེ། འདི་ཅི་ཆགས་པའི་དབང་པོས་ལྟ་འམ་འོན་ཏེ་མིག་རྒྱང་རིང་དུ་ལྟ་འམ། གཡོ་འམ་མི་གཡོ་ཞེས་བལྟས་ན། བྱང་ཆུབ་སེམས་དཔའི་བཞིན་དག་ཅིང་དྲི་མ་མེད་ལ་སྒྲ་གཅན་ལས་ཐར་བའི་ཟླ་བའི་དཀྱིལ་འཁོར་ལྟ་བུར་འདུག་པ་དང ། ཉི་མ་ཐོག་མ་ཤར་བ་ལྟ་བུ་དང ། གསེར་གྱི་མཆོད་སྡོང་ལྟ་བུ་དང ། པད་མ་འདབ་མ་སྟོང་པ་རྒྱས་པ་ལྟ་བུ་དང ། གཏོར་བར་བྱ་བ་གཏོར་བའི་མེ་ལྟ་བུ་དང ། ལྷུན་པོ་ལྟར་མི་གཡོ་བ་དང ། ཁོར་ཡུག་ལྟར་མངོན་པར་འཕགས་པ་དང ། དབང་པོ་ཤིན་ཏུ་བསྲུངས་པ་དང ། གླང་པོ་ལྟར་སེམས་ཤིན་ཏུ་དུལ་བར་མཐོང་ངོ ། །དེ་ནས་བདུད་ཀྱི་བུ་མོ་དེ་དག་གིས་བྱང་ཆུབ་སེམས་དཔའ་ཤིན་ཏུ་ཆགས་པར་བྱ་བའི་ཕྱིར་གླུ་དང་གར་དུ་སྦྱར་བའི་ཚིགས་སུ་བཅད་པ་འདི་དག་སྨྲས་སོ། །དུས་ཀྱི་དམ་པ་སོས་ཀ་བཟང་ལ་བབ། །ཞུགས་ཤིང་མེ་ཏོག་རྒྱས་ཀྱིས་དགྱེས་པར་རོལ། །ཁྱོད་ཀྱི 41.179b གཟུགས་ནི་གཟུགས་བཟང་མཛེས་པ་སྟེ། །མཚན་གྱིས་སྤྲས་པའི་དབང་དུ་བདག་ཅག་འགྱུར། །བདག་ཅག་སྐྱེས་པ་ལེགས་སྐྱེས་དབྱིབས་ལེགས་ཏེ། །ལྷ་མི་བདེ་བའི་རྐྱེན་དུ་བདག་ཅག་བྱུང ། །བྱང་ཆུབ་རྙེད་དཀས་ཐུགས་ནི་སླར་སྒྱུར་ལ། །མྱུར་དུ་བཞེངས་ཏེ་དར་ལ་བབ་པ་སྤྱོད། །ཁྱོད་ཀྱི་ཆེད་དུ་ཆས་ནས་རབ་ཏུ་བརྒྱན་ཏེ་ལྷགས་གྱུར་པ། །ལྷ་ཡི་བུ་མོ་ལེགས་པར་བརྒྱན་པ་འདི་དག་རྣམས་ལ་གཟིགས། །གཟུགས་འདི་བལྟས་ནས་ཤིང་རུལ་ལྟ་བུར་སྲོག་ཙམ་ལུས་པ་ཡང ། །ཆགས་པར་འགྱུར་ན་ཆགས་པས་དགའ་བ་སུ་ཞིག་ཆགས་མི་འགྱུར། །སྐྲ་འཇམ་ཤིན་ཏུ་དྲི་ཞིམ་དྲི་དང་ལྡན། །ཅོད་པན་རྣ་ཆ་འདབ་རིས་བཞིན་རྒྱས་ལ། །དཔྲལ་བ་ལེགས་ཤིང་ལེགས་བྱུགས་བཞིན་དང་ལྡན། །པད་མ་རྒྱས་པ་ལྟ་བུར་མིག་ཡངས་ལེགས། །ཁ་བཞིན་ཟླ་བ་ཉ་བ་ལྟ་བུ་སྟེ། །ཤིང་ཏོག་བིམ་པ་སྨིན་འདྲའི་མཆུ་དང་ལྡན། །དུང་དང་ཀུན་ད་ཁ་བ་དཀར་སོ་ལྡན། །སྡུག་པ་དགའ་ལ་ཆགས་པ་རྣམས་ལ་གཟིགས། །ནུ་མ་ཤིན་ཏུ་མཁྲང་ཞིང་རྒྱས་ལ་འབུར། །ལྟོ་བའི་རྐེད་ན་གཉེར་གསུམ་ཤིན་ཏུ་མཛེས། །རྐེད་པ་འཁོར་ས་ལྟ་བུར་ཡངས་ཤིང་མཛེས། །ན་ཆུང་ཤིན་ཏུ་མཛེས་ལ་མགོན་པོ་གཟིགས། །གླང་པོའི་སྣ་འདྲ་བ་ཡི་བརླ་ལྡན་ཞིང ། །ལག་པ་གདུ་བུས་ཆལ་པར་གང་བ་ཅན། །རྐེད་པ་གསེར་གྱི་ཕག་སྐ་རབ་མཛེས་བརྒྱན། །ཁྱོད་ཀྱི་བྲན་མོ་འདི་ལ་མགོན་པོ་གཟིགས། །ངང་པའི་སྟབས་ལྡན་དལ་གྱིས་མཆི་བགྱིད་པ། །འཇམ་ཞིང་ཡིད་འོང་འདོད་ལྡན་མཛེས་སྨྲ་བ། །རྣམ་པ་འདི་ལྟར་ཤིན་ཏུ་ལེགས་བརྒྱན་ལ། །ལྷ་ཡི་དགའ་བ་རྣམས་ལ་ཤིན་ཏུ་མཁས། །གླུ་དང་རོལ་མོའི་དབྱངས་སྒྲ་གར་རབ་བསླབས། །དགའ་བའི་ཆེད་དུ་མཛེས་པའི་གཟུགས་ཅན་སྐྱེས། །འདོད་ལ་རབ་དགའ་གལ་ཏེ་མི་བཞེད་ན། །འཇིག་རྟེན་དག་ན་ཁྱོད་ནི་ཤིན་ཏུ་བསླུས། །མི་གླེན་ནོར་གྱི་བདེ་བ་མི་ཤེས་འགའ། །གཏེར་མཐོང་ནས་ནི་འབྲོས་པར་བགྱིད་པ་ལྟར། །ཁྱོད་ཀྱང་འདོད་ཆགས་མི་མཁྱེན 41.180a རང་ལྷགས་པ། །ན་ཆུང་རྣམས་ལ་མི་སྤྱོད་དེ་དང་འདྲ། །དགེ་སློང་དག་དེ་ནས་བྱང་ཆུབ་སེམས་དཔའ་མིག་མི་འཛུམས་པར་འཛུམ་དམུལ་ཏེ། བཞིན་གྱི་འཛུམ་ཕྱུང་ཞིང ། དབང་པོ་རྣམ་པར་མ་འཁྲུགས་པ་དང ། ལུས་མ་བཅོས་པ་དང ། བརྗིད་པ་དང ། མ་ཆགས་པ་དང ། མི་སྡང་བ་དང ། མ་རྨོངས་པ་དང ། རིའི་དབང་པོ་ལྟར་མི་གཡོ་བ་དང ། མ་ཞུམ་པ་དང ། མ་གྱུར་པ་དང ། འཛེམ་པ་མེད་པ། བློ་ཤིན་ཏུ་ལེགས་པར་གནས་པ་དང ། ཉོན་མོངས་པ་རྣམས་ཤིན་ཏུ་སྤངས་པའི་ཕྱིར་རང་གི་ཁ་ན་ལས་པའི་ཡེ་ཤེས་ཀྱི་སྒོ་དང ། འཇམ་ཞིང་སྙན་པའི་ཚིག་དང ། ཚངས་པ་ལས་ལྷག་པའི་ང་རོ་དང ། བྱ་ཀ་ལ་པིང་ཀའི་སྒྲ་དབྱངས་དང ། སྙན་པ་དང ། ཡིད་དུ་འོང་བས་བདུད་ཀྱི་བུ་མོ་དེ་དག་ལ་ཚིགས་སུ་བཅད་པས་སླར་སྨྲས་པ། འདོད་པ་སྡུག་བསྔལ་མང་པོ་སྩོགས་ཤིང་སྡུག་བསྔལ་རྩ་བ་སྟེ། །མི་མཁས་རྣམས་ལ་བསམ་གཏན་རྫུ་འཕྲུལ་དཀའ་ཐུབ་ཉམས་པར་བྱེད། །བུད་མེད་འདོད་པའི་ཡོན་ཏན་ཆོག་པ་མེད་ཅེས་མཁས་པས་སྨྲས། །ང་ནི་མི་མཁས་རྣམས་ལ་ཤེས་རབ་ཆོག་པར་བྱེད་པར་འགྱུར། །འདོད་པ་བསྟེན་ན་སྲིད་པ་ཕྱིར་ཞིང་རྣམ་པར་འཕེལ་འགྱུར་ཏེ། །དཔེར་ན་མི་འགའ་ལ་ལ་ཚཝ་ཆུ་འཐུངས་པར་གྱུར་པ་བཞིན། །དེ་ལ་ཞུགས་པ་བདག་གི་དོན་མིན་གཞན་གྱི་དོན་ཀྱང་མིན། །ང་ནི་བདག་གི་དོན་དང་གཞན་གྱི་དོན་ལ་སྤྲོ་བ་ཡིན། །ཁྱོད་ཀྱི་གཟུགས་ནི་ཆུ་བུར་དག་དང་དབུ་བ་མཚུངས་ཤིང་འདྲ། །སྒྱུ་མའི་ཚོན་ལྟར་རང་གི་བློ་ཡིས་རྣམ་པར་བསྒྲུབས་པ་སྟེ། །རྨི་ལམ་དག་ན་རྩེ་བ་ལྟ་བུར་མི་བརྟན་མི་རྟག་ཀྱང ། །བྱིས་པ་མི་མཁས་རྣམས་ཀྱི་སེམས་ནི་རྟག་ཏུ་རྨོངས་པར་བྱེད། །མིག་ནི་ཆུ་ཡི་ཆུ་བུར་མཚུངས་ཤིང་འདྲ་སྟེ་ལྤགས་པས་གཡོགས། །ཁྲག་རླང་མཁྲང་ཞིང་འབུར་བ་དཔེར་ན་ནད་ཀྱི་འབྲས་དང་མཚུངས། །ལྟོ་ནི་གཅིན་དང་ཕྱི་ས་སོགས་ཏེ་ཤིན་ཏུ་མི་གཙང་བ། །སྡུག་བསྔལ་འཁྲུལ་འཁོར་ལས་དང 41.180b ཉོན་མོངས་པ་ལས་ཡང་དག་བྱུང ། །བྱིས་པའི་བློ་ཅན་དག་ནི་རྨོངས་གྱུར་ཕྱིན་ཅི་ལོག་པ་ཡིས། །ལུས་གང་ལ་ནི་སྡུག་པར་རྟོག་པ་མཁས་པ་དེ་ལྟ་མིན། །སྡུག་བསྔལ་རྩ་བར་གྱུར་པའི་འཁོར་བར་ཡུན་རིང་འཁོར་བྱེད་ན། །སེམས་ཅན་དམྱལ་བ་རྣམས་སུ་སྡུག་བསྔལ་མི་བཟད་མང་པོ་མྱོང ། །རྐེད་པ་ནས་ནི་རབ་ཏུ་ཡིད་མི་འོང་བའི་དྲི་ཅན་འཛག་།བརླ་དང་བྱིན་པ་རྐང་པ་དག་ནི་འཁྲུལ་འཁོར་ལྟ་བུར་གནས། །ང་ཡིས་ཁྱེད་ལ་ཡང་དག་བརྟགས་ན་སྒྱུ་མ་ཇི་བཞིན་ཏེ། །ཕྱིན་ཅི་ལོག་གི་རྒྱུ་དང་རྐྱེན་ལས་བྱུང་བར་གྱུར་པ་ཡིན། །འཕགས་པའི་ཡེ་ཤེས་ལམ་ལས་གོལ་བ་ཕྱིན་གྱུར་པ། །མེ་དང་དུག་གི་ལོ་མ་འདྲ་ཞིང་སྦྲུལ་ཆེན་ཁྲོས་འདྲ་བ། །འདོད་པའི་ཡོན་ཏན་ཡོན་ཏན་མིན་ཞིང་ཡོན་ཏན་ཉམས་མཐོང་ན། །དེ་ལ་བྱིས་པ་བདེ་བའི་འདུ་ཤེས་སྐྱེད་ཅིང་བརྒྱལ་བར་གྱུར། །མི་གང་འདོད་པས་བུད་མེད་རྣམས་ཀྱི་ཁོལ་པོར་གྱུར་པ་དང ། །གང་ཞིག་ཆོས་ཀྱི་དགའ་བ་བོར་ཏེ་འདོད་པས་དགའ་བྱེད་ཅིང ། །དགའ་ལ་བརྐམ་པ་དེ་ནི་ཚུལ་ཁྲིམས་ལམ་ལས་གོལ་གྱུར་ཅིང ། །བསམ་གཏན་ལམ་གོལ་བློ་ཉམས་ཡེ་ཤེས་ལས་ནི་རབ་རིང་གནས། །ང་ནི་འདོད་ཆགས་ཞེ་སྡང་ལྷན་ཅིག་གནས་པ་མ་ཡིན་ཏེ། །རྟག་དང་སྡུག་དང་བདག་དང་ལྷན་ཅིག་གནས་པར་བྱེད་མ་ཡིན། །མི་དགའ་བ་དང་དགའ་དང་ལྷན་ཅིག་གནས་པ་མ་ཡིན་ལ། །ང་ཡི་སེམས་ནི་རབ་ཏུ་གྲོལ་ཏེ་མཁའ་ལ་རླུང་དང་འདྲ། །གལ་ཏེ་ཁྱེད་འདྲའི་འགྲོ་བ་ཀུན་གྱིས་འདིར་ནི་གང་གྱུར་ལ། །བསྐལ་པར་དེ་དག་རྣམས་དང་ལྷན་ཅིག་འདྲེ་ཞིང་གནས་ཀྱང་ནི། །ང་ལ་ཐ་བ་མེད་ཅིང་ཆགས་མེད་གཏི་མུག་མི་འགྱུར་ཏེ། །རྒྱལ་བ་རྣམས་ཀྱི་ཐུགས་ནི་ནམ་མཁའ་མཚུངས་ཤིང་འདྲ་ཕྱིར་རོ། །ལྷ་དང་ལྷ་མོ་ཤིན་ཏུ་དྲི་མེད་ལ། །ཁྲག་དང་རུས་པ་མེད་ཅིང་རབ་བཟང་བ། །དེ་དག་ཀུན་ཀྱང་འཇིགས་པ་ཆེར་གནས་ཏེ། །རྟག་དངོས་བྲལ་ཞིང་ཐེར་ཟུག་མེད་ཕྱིར་རོ། །དེ་ནས་བདུད་ཀྱི་བུ་མོ་བུད་མེད་ཀྱི་སྒྱུ་རྣམས་ཤིན་ཏུ་བསླབས་པ་དེ་དག་དེ་བས་ཀྱང་ཆེར་འདོད་ཆགས་དང ། རྒྱགས་པ་དང ། དྲེགས་པ་བསྐྱེད་དེ། སྟེག་པ་བསྟན་ནས་ལུས་རྣམས་བརྒྱན་ཏེ། བུད་མེད་ཀྱི་གཡོ 41.181a ཉེ་བར་བསྟན་ནས་བྱང་ཆུབ་སེམས་དཔའ་ལ་རྔོད་དོ། །དེ་ལ་འདི་སྐད་ཅེས་བྱ་སྟེ། བུ་མོའི་ནང་ན་གཅེས་མཆོག་སྲེད་དང་དགའ་དང་དགའ་ཅན་ལྷན་ཅིག་ཏུ། །བདུད་ཀྱིས་བཏང་བ་ཤིན་ཏུ་ཚུལ་དུ་ཤིས་པར་རིངས་པར་ལྷགས་གྱུར་ཏེ། །ཤིང་གི་ལྕུག་མ་གཞོན་ནུ་ལོ་མར་བཅས་པ་རླུང་གིས་བསྐྱོད་པ་བཞིན། །གར་བྱེད་ཅིང་ནི་རྒྱལ་པོའི་སྲས་པོ་ཤིང་དྲུང་འདུག་ལ་རྔོད་པར་བྱེད། །དུས་ཀྱི་ནང་ན་དམ་པ་མཆོག་ཏུ་བགྱི་བ་སོས་ཀའི་དུས་འདི་སྟེ། །སྐྱེས་པ་དག་དང་བུད་མེད་དགའ་བར་བགྱིད་ཅིང་མུན་པ་རྡུལ་ཡང་བཅོམ། །ཁུ་བྱུག་དང་ནི་ངང་པ་རྨ་བྱ་སྒྲ་འབྱིན་བྱ་ཚོགས་རྣམས་ཀྱིས་གང ། །འདོད་པའི་ཡོན་ཏན་དགའ་བ་མྱོང་བར་བགྱི་བའི་དུས་ལ་ད་བབ་པོ། །བསྐལ་པ་སྟོང་དུ་ཚུལ་ཁྲིམས་དགའ་ཞིང་བརྟུལ་ཞུགས་དཀའ་ཐུབ་སྤྱད་གྱུར་པ། །རི་ཡི་རྒྱལ་པོ་ལྟ་བུར་མི་གཡོ་ཉི་མ་ཤར་མ་ཐག་པའི་གཟུགས། །འབྲུག་བསྒྲགས་ལྟ་བུར་སྒྲ་སྙན་རི་དགས་དབང་པོ་སྒྲ་བསྒྲགས་འདྲ་བ་པོ། །འགྲོ་ལ་ཕན་པ་བྱེད་པ་དེ་ཡིས་དོན་དང་ལྡན་པའི་ཚིག་སྨྲས་པ། །འདོད་པ་རྩོད་དང་དགྲ་དང་འཐབ་དང་ཉོན་མོངས་བཅས་དང་འཇིགས་བྱེད་པ། །བྱིས་པའི་སྐྱེ་བོས་ཉེ་བར་བསྟེན་གྱི་མཁས་པའི་སྐྱེ་བོས་རྟག་སྤངས་པ། །གང་དུ་བདེ་གཤེགས་རྣམས་ཀྱིས་བདུད་རྩི་བརྙེས་པའི་དུས་ལ་བབ་གྱུར་གྱིས། །དོ་མོད་བདུད་ལས་རྒྱལ་ཏེ་སྟོབས་བཅུ་རྣམས་དང་ལྡན་པ་དགྲ་བཅོམ་འགྱུར། །སྒྱུ་རྣམས་བསྟེན་ནས་སྨྲས་པ་ཞལ་རས་པད་མ་འདྲ་བ་གསན་དུ་གསོལ། །ཁྱོད་ནི་རྒྱལ་པོ་དབང་ཕྱུག་དམ་པ་ས་བདག་སྟོབས་དང་ལྡན་པར་འགྱུར། །བུད་མེད་དམ་པའི་ཚོགས་ཀྱིས་སིལ་སྙན་སྟོང་དག་རབ་ཏུ་བགྱིད་འགྱུར་ན། །ཐུབ་པའི་ཆ་བྱད་ཀྱིས་ནི་ཅི་བགྱིས་སྤོངས་ལ་དགའ་བ་བསྟེན་དུ་གསོལ། །བྱང་ཆུབ་སེམས་དཔས་སྨྲས་པ། ང་ནི་སྲིད་པ་གསུམ་ན་དབང་ཕྱུག་ལྷ་དང་མི་རྣམས་ཀྱིས་མཆོད་ལ། །ཆོས་ཀྱི་འཁོར་ལོས་འགྲོ་ཞིང་སྟོབས་བཅུའི་སྟོབས་དང་ལྡན་པའི་རྒྱལ་པོར་འགྱུར། །སློབ་དང་མི་སློབ་བུ་རྣམས་ཁྲག་ཁྲིག་རྟག་ཏུ་འདུད་པ་མངོན་དུ་བྱེད། །ཆོས་ཀྱི་དགའ་བས་དགའ་ཡི་ཡུལ་ལ་ང་ཡི་ཡིད་ནི་དགའ་མ་ཡིན། །དེ་དག་གིས་སྨྲས 41.181b པ། །རེ་ཤིག་དར་ལ་བབ་པ་མ་ཡོལ་དང་པོ་ཐོར་བུར་གྱུར་པ་དང ། །ཁྱོད་ནི་རེ་ཤིག་སྙུན་གྱིས་མ་བཏབ་མི་ཤིས་བགྲེས་པར་མ་གྱུར་དང ། །ཇི་སྲིད་དར་ལ་བབ་ཅིང་བདག་ཅག་གྲོགས་ཀྱང་དར་ལ་བབ་གྱུར་པ། །དེ་སྲིད་བར་དུ་འཛུམ་པའི་ཞལ་གྱིས་འདོད་པའི་དགའ་བ་སྤྱད་དུ་གསོལ། །བྱང་ཆུབ་སེམས་དཔས་སྨྲས་པ། ཇི་སྲིད་དོ་མོད་དལ་བ་དམ་པ་འཆི་མེད་དཀོན་པ་རྙེད་པ་དང ། །ཇི་སྲིད་ལྷ་དང་ལྷ་མིན་གྲོང་ཁྱེར་མི་ཁོམ་སྡུག་བསྔལ་སྤངས་པ་དང ། །ཇི་སྲིད་རྒ་དང་ན་དང་འཆི་བའི་དགྲ་ཡིས་དཀྲུགས་པར་མ་གྱུར་པ། །དེ་སྲིད་ང་ནི་འཇིགས་མེད་གྲོང་ཁྱེར་འགྲོ་བའི་ལམ་མཆོག་བསྒོམ་པར་བྱ། །དེ་དག་གིས་སྨྲས་པ། ལྷའི་གནས་ན་སུམ་བཅུ་རྩ་གསུམ་བདག་པོ་ལྷ་མོས་བསྐོར་བ་དང ། །འཐབ་བྲལ་འཐབ་བྲལ་རབ་དང་དགའ་ལྡན་རབ་དང་བདུད་ཀྱི་གྲོང་ཁྱེར་ན། །ལྷ་མཆོག་བསྟོད་པ་བཞིན་དུ་བུད་མེད་དབང་དུ་གྱུར་ནས་འདོད་དགའ་ལ། །རོལ་ཅིང་སྤྱོད་ལ་བདག་ཅག་རྣམས་དང་ལྷན་ཅིག་དགྱེས་པ་རྒྱ་ཆེན་མཛོད། །བྱང་ཆུབ་སེམས་དཔས་སྨྲས་པ། འདོད་པ་རྩཝ་རྩེའི་ཟིལ་ཐིགས་བཞིན་དུ་མྱུར་ལ་སྟོན་ཀའི་སྤྲིན་དང་མཚུངས། །ཀླུ་ཡི་བུ་མོ་ཁྲོ་བ་ལྟ་བུར་ཤིན་ཏུ་འཇིགས་པར་བྱེད་པ་ཡིན། །བརྒྱ་བྱིན་འཐབ་བྲལ་རབ་ལྷ་དགའ་ལྡན་པ་དག་བདུད་ཀྱི་དབང་དུ་སོང ། །འཕགས་མིན་རྣམས་ཀྱིས་འདོད་པ་སྡུག་བསྔལ་ལྡན་པ་འདི་ལ་སུ་ཞིག་དགའ། །དེ་དག་གིས་སྨྲས་པ། ཤིང་མཆོག་འདི་དག་ལོ་མ་གཞོན་དང་ལྡན་ཞིང་མེ་ཏོག་རྒྱས་གྱུར་ལ། །ཤང་ཤང་ཏེའུ་དང་ཁུ་བྱུག་སྒྲ་འབྱིན་བུང་བ་སྒྲ་འབྱིན་ལྡན་པ་གཟིགས། །ས་ལས་རྩཝ་འཁྲུངས་རབ་སྔོ་འཇམ་ཞིང་སྣུམ་ལ་ལྕང་ལོ་ཅན་མཆིས་པ། །ནགས་མཆོག་མི་ཅི་ཚོགས་ཀྱིས་བསྟེན་པར་ན་ཆུང་རྣམས་དང་དགྱེས་པར་མཛོད། །བྱང་ཆུབ་སེམས་དཔས་སྨྲས་པ། ལོ་མར་བཅས་པའི་ཤིང་རྣམས་འདི་དག་དུས་ཀྱི་དབང་གིས་མེ་ཏོག་རྒྱས། །བུང་བ་དག་ཀྱང་བཀྲེས་དང་སྐོམ་པས་ཉེན་ནས་མེ་ཏོག་རྣམས་སུ་ལྷགས། །གང་ཞིག་དུས་ན་ས་ལས་སྐྱེས་པ་རྣམས་ཀྱང་ཉི་མས་སྐམས་པར་འགྱུར། །ང་འདིར་སྔོན་གྱི་རྒྱལ་བ་རྣམས་ཀྱིས་སྤྱད་པ་བདུད་རྩི་ངེས་པར་སྤྱད། །བདུད་ཀྱི་བུ་མོ 41.182a རྣམས་ཀྱིས་སྨྲས་པ། །ཟླ་འདྲའི་ཞལ་མངའ་གཟིགས་ཤིག་པད་མ་སར་པ་འདྲ་བའི་ཁ་བཞིན་ཅན། །སྙན་ཅིང་ཡིད་དུ་འོང་བའི་ཚིག་ལྡན་སོ་ནི་དངུལ་དང་ཁ་བ་འདྲ། །འདི་འདྲ་ལྷ་ཡི་གནས་ན་དཀོན་ན་མི་ཡི་གནས་ན་ག་ལ་མཆིས། །གང་དག་ལྷ་མཆོག་རྣམས་ཀྱིས་རྟག་ཏུ་འདོད་པར་བགྱི་བ་ཁྱོད་ཀྱིས་བརྙེས། །བྱང་ཆུབ་སེམས་དཔས་སྨྲས་པ། ལུས་ནི་ངན་སྐྱུགས་མི་གཙང་སྲིན་བུའི་རིགས་ཀྱིས་གང་བ་ཤིག་ཤིག་པོ། །མྱུར་དུ་འགྱེས་ཤིང་འཇིག་པ་བདེ་བ་མ་ཡིན་རྣམས་དང་ལྡན་པར་མཐོང ། །རྒྱུ་བར་བཅས་དང་མི་རྒྱུ་བ་ཡི་འགྲོ་ལ་བདེ་བ་མཆོག་བྱེད་པ། །གོ་འཕང་འཆི་འཕོ་མེད་པ་སྐྱེ་བོ་མཁས་པས་མཆོད་པ་དེ་ཐོབ་བྱ། །དེ་དག་འདོད་པའི་སྒྱུ་རྩལ་དྲུག་བཅུ་རྩ་བཞི་མྱོང་བར་གྱུར་པ་སྟེ། །རྐང་གདུབ་གསེར་གྱི་ཕག་སྐ་འཁྲོལ་ཞིང་གོས་ཀྱང་ཤིག་ཤིག་བྱས་ནས་ནི། །འདོད་པའི་མདའ་ཡིས་ཕོག་པ་རྒྱགས་པ་འཛུམ་ཞིང་འདི་སྐད་སྨྲས། །ཇོ་ཇོ་ཁྱོད་ལ་ནོངས་པ་ཅི་ཞིག་བགྱིས་ན་འདི་དག་བསྟེན་མི་བགྱི། །སྲིད་པ་ཀུན་གྱིས་ཉེས་པ་རིག་ནས་རྡུལ་དང་བྲལ་བས་འདི་སྐད་སྨྲས། །འདོད་པ་རལ་གྲི་མདུང་ཐུང་རྩེ་གསུམ་སྦྲང་རྩི་ཅན་གྱི་སྤུ་གྲི་འདྲ། །སྦྲུལ་གྱི་མགོ་དང་མེ་མུར་འདྲ་བར་ངས་འདིར་རབ་ཏུ་རིག་པས་ན། །བུད་མེད་ཡོན་ཏན་འཕྲོག་པས་དེ་ཕྱིར་ང་ཡིས་བུད་མེད་ཚོགས་རྣམས་སྤངས། །བུད་མེད་ཡོན་ཏན་རྣམ་པ་མང་པོ་ཁྲག་ཁྲིག་བྱེ་བ་དེ་དག་གིས། །གང་གིས་ཚེ་ན་གླང་པོའི་ཕྲུ་གུའི་སྟབས་ཅན་དེ་བརྔོད་མ་ནུས་ཚེ། །ངོ་ཚ་སྐྱེངས་ནས་ཐུབ་པའི་རྐང་པ་གཉིས་ལ་རབ་ཏུ་ཕྱག་འཚལ་ཏེ། །དགའ་ཞིང་མགུ་བ་བསྐྱེད་ནས་ཕན་པ་བྱེད་པ་དེ་ལ་བསྟོད་པ་བྱས། །པད་མ་དྲི་མ་མེད་པའི་སྙིང་པོ་འདྲ་ཞིང་སྟོན་ཟླ་ལྟ་བུའི་ཞལ། །མར་གྱིས་སྦྱིན་བསྲེག་བགྱིས་པའི་འོད་འཕྲོ་མེ་འདྲ་གསེར་གྱི་རི་འདྲ་བ། །སྲིད་པ་བརྒྱ་ནས་སྤྱད་ཅིང་དགོངས་དང་སྨོན་ལམ་བཏབ་པ་གྲུབ་གྱུར་ཅིག་།བདག་ཉིད་རྒལ་ནས་སྡུག་བསྔལ་དག་དང་ལྡན་པའི་འགྲོ་བ་བསྒྲལ་དུ་གསོལ། །དེ་དག་རྣམས་ཀྱིས་དོང་ཀའི་ཤིང་དང་ཙམ་པ་ཀ་འདྲ་རྣམ་མང་བསྟོད། །མཆོག་ཏུ་གྱུར་པའི་རི་ལྟར་མི་གཡོ་བ་ལ་བསྐོར་བ་བྱས་ནས་ནི། །སོང་སྟེ་ཕ་ཡི་རྐང་ལ་མགོ 41.182b བོས་ཕྱག་འཚལ་འདི་སྐད་ཚིག་ཀྱང་སྨྲས། །ཡབ་ཅིག་ལྷ་དང་མི་ཡི་བླ་མ་དེ་ལ་ཁོང་ཁྲོ་སྤངས་ན་ལེགས། །བཞིན་ནི་འཛུམ་པར་གྱུར་ནས་པད་མའི་འདབ་མ་འདྲ་བའི་མིག་གིས་ལྟ། །དེ་ནི་ཆགས་པས་སྐྱེ་བོ་མི་ལྟ་དེ་ལ་ཁྲོ་གཉེར་མཆིས་མ་ལགས། །ལྷུན་པོ་གཡོ་ཞིང་རྒྱ་མཚོ་སྐམས་ལ་ཉི་ཟླ་ལྟུང་བར་འགྱུར་ཡང་གདའ། །སྲིད་པ་གསུམ་གྱི་ཉེས་མཐོང་དེ་ནི་བུད་མེད་རྣམས་ཀྱི་དབང་མི་འགྱུར། །དེ་ནས་བདུད་སྡིག་ཅན་གྱིས་ཚིག་དེ་སྐད་ཐོས་ནས་དེ་བས་ཀྱང་ཆེར་སྡུག་བསྔལ་ཞིང་ཡིད་མི་བདེ་ལ། ཡིད་མ་རངས་ཤིང་ཚིག་པ་ཟ་བའི་ཡིད་ཀྱིས་རང་གི་བུ་མོ་དེ་དག་ལ་སྨྲས་པ། ཀྱེ་མི་ཤེས་ཤིང་གླེན་ཏེ། ཁྱེད་ཀྱི་གཟུགས་དང་ད་རོད་མ་མཐོང་ངམ། ཇི་ལྟར་གྱུར་ན་དེ་བྱང་ཆུབ་ཀྱི་སྙིང་པོ་ལས་བསླང་བར་མ་ནུས། དེ་ནས་བདུད་ཀྱི་བུ་མོ་དེ་དག་གིས་རང་གི་ཕ་ལ་ཚིགས་སུ་བཅད་པས་སླར་སྨྲས་པ། སྙན་ཅིང་འཇམ་པོར་སྨྲ་ཡང་ཆགས་པ་མ་མཆིས་ཏེ། །གསང་བ་ཆེན་པོ་ལྟ་ཡང་སྡང་བ་མཆིས་མ་ལགས། །སྤྱོད་ལམ་དག་དང་སྤྱོད་པ་ལྟ་ཡང་རྨོངས་མ་མཆིས། །ལུས་རྣམས་ཐམས་ཅད་རྟོགས་ཀྱང་བསམ་པ་ཤིན་ཏུ་ཟབ། །བུད་མེད་ནོངས་པ་རྒྱ་ཆེན་ཐེ་ཚོམ་མ་མཆིས་རྟོགས། །འདོད་ལས་དབེན་པའི་ཡིད་ལྡན་འདོད་ཆགས་ཆགས་མ་མཆིས། །གང་ཞིག་དེ་ཡི་སེམས་དང་སྤྱོད་པ་ཡོངས་འཚལ་བ། །ལྷ་ཡུལ་མི་ཡུལ་འདི་ན་ལྷ་མི་དེ་མ་མཆིས། །དེ་ལ་བུད་མེད་སྒྱུ་རྣམས་གང་ལགས་བསྟན་ན་ཡབ། །ཆགས་བཅས་གང་ལགས་དེ་ཡི་སྙིང་ཞུ་འགྱུར་རིགས་ན། །དེ་དག་མཐོང་ཡང་དེ་ཡི་སེམས་ནི་གཅིག་མ་གཡོས། །རི་དབང་རྒྱལ་པོ་བཞིན་དུ་དེ་ནི་མི་གཡོ་གཡོ་མ་མཆིས། །བསོད་ནམས་གཟི་བརྗིད་བརྒྱས་བལྟམ་ཡོན་ཏན་གཟི་བརྗིད་རྫོགས། །བསྐལ་པ་བྱེ་བ་མང་པོར་ཚུལ་ཁྲིམས་བརྟུལ་ཞུགས་སྤྱད། །ལྷ་དང་ཚངས་པ་སེམས་ཅན་གཟི་བརྗིད་རྣམ་དག་དགེ། །དེ་དག་དེ་ཡི་རྐང་པར་མགོས་གཏུགས་ཕྱག་ཀྱང་འཚལ། །སྡེ་དང་བཅས་པའི་བདུད་རྣམས་བཅོམ་ནས་སྔོན་ཆད་ཀྱི། །རྒྱལ་བས་བཞེད་པ་བྱང་ཆུབ་དམ་པ་འཐོབ་འགྱུར་ངེས། །ཡབ་ཅིག་བདག་ཅག་གཡུལ་ངོར་འཐབ་པ་མི་འཚལ་ཏེ། །སྟོབས་ལྡན་དག་དང་འཐབ་པར་སྦྱོར་འདི 41.183a ཚེགས་རབ་ཆེ། །ཡབ་ཅིག་མཁའ་ལ་ནོར་བུ་རིན་ཆེན་གཙུག་ཕུད་ཅན། །རྫོགས་པའི་བྱང་ཆུབ་སེམས་དཔའ་ཁྲག་ཁྲིག་གུས་པར་གནས། །རིན་ཆེན་འབྱུང་གནས་ཡན་ལག་མེ་ཏོག་ཕྲེང་བས་བརྒྱན། །སྟོབས་བཅུ་མངའ་བས་མཆོད་ཕྱིར་འདིར་བཏང་རྣམས་ལ་གཟིགས། །གང་དག་སེམས་པ་མ་མཆིས་གང་དག་སེམས་མ་མཆིས། །ཤིང་རི་ལྷ་དབང་གནོད་སྦྱིན་མཁའ་ལྡིང་དབང་པོ་དག་།ཡོན་ཏན་རི་བོར་མངོན་པར་འདུད་ཅིང་ཕྱོགས་པ་ལས། །ཡབ་ཅིག་དོ་མོད་སླར་ལོག་ན་ནི་ལེགས་པ་འདྲ། །གཞན་ཡང་གང་གི་ཕ་མཐར་མི་ཕྱིན་དེར་ནི་རྐྱལ་མི་བགྱི། །གང་ཞིག་རྩ་ནས་མི་ཕྱིན་དེ་ནི་བརྐོ་མྀ་བགྱི། །གང་ལ་བཟོད་པ་ཡང་གསོལ་དེ་ནི་དཀྲུག་མི་བགྱི། །གང་གིས་ཡིད་མི་བདེ་བར་འགྱུར་བ་དེ་མི་བགྱི། །དགེ་སློང་དག་དེ་ནས་དེའི་ཚེ་ཤིང་གི་ལྷ་མོ་བརྒྱད་ལ་འདི་ལྟ་སྟེ། དཔལ་ལྡན་དང ། འཕེལ་མོ་དང ། དཀའ་ཐུབ་དང ། དགེ་མ་དང ། མཁས་མ་དང ། མདངས་སྟོབས་དང ། བདེན་སྨྲ་དང ། ལྡན་མ་སྟེ། དེ་དག་གིས་བྱང་ཆུབ་སེམས་དཔའ་ལ་ཡང་དག་པར་མཆོད་ནས་དཔལ་རྣམ་པ་བཅུ་དྲུག་གིས་བྱང་ཆུབ་སེམས་དཔའ་འཕེལ་བར་བྱེད། མངོན་དུ་བསྟོད་པར་བྱེད་དེ། སེམས་ཅན་དམ་པ་ཁྱོད་ནི་དགུང་ཟླ་ཡར་གྱི་ངོ་ལྟར་མཛེས་པའོ། །བློ་རྣམ་པར་དམ་པ་ཁྱོད་ནི་གདུགས་དང་པོ་ཤར་བ་ལྟར་ལྷང་ངེ་བའོ། །སེམས་ཅན་དམ་པ་ཁྱོད་ནི་ཆབ་ཀྱི་ནང་ན་པད་མ་ལྟར་རབ་ཏུ་རྒྱས་པའོ། །སེམས་ཅན་དམ་པ་ཁྱོད་ནི་ནགས་དང་ནགས་འདབ་ན་རྒྱུ་བའི་སེང་གེ་ལྟར་སྒྲོགས་པའོ། །སེམས་ཅན་དམ་པ་ཁྱོད་ནི་རྒྱ་མཚོའི་དབུས་ན་རིའི་རྒྱལ་པོ་ལྟར་མཛེས་པའོ། །སེམས་ཅན་དམ་པ་ཁྱོད་ནི་ཁོར་ཡུག་གི་རི་ལྟར་མངོན་པར་འཕགས་པའོ། །སེམས་ཅན་དམ་པ་ཁྱོད་ནི་རྒྱ་མཚོ་ལྟར་རིན་པོ་ཆེས་བལྟམ་ཞིང་གཏིང་དཔག་དཀའ་བའོ། །འཇིག་རྟེན་གྱི་མགོན་པོ་ཁྱོད་ནི་ནམ་མཁའ་ལྟར་ཐུག་པ་མ་མཆིས་ཤིང་ཐུགས་ཀྱི་རྒྱ་ཆེ་བའོ། །སེམས་ཅན་རྣམ་པར་དག་པ་ཁྱོད་ནི་དོག་ས་ལྟར་སེམས་ཅན་ཐམས་ཅད་ཀྱི་འཚོ་བར་གྱུར་ཅིང་ཐུགས་ཤིན་ཏུ་བརྟན་པའོ། །སེམས་ཅན་དམ་པ་ཁྱོད་ནི་མཚོ 41.183b མ་དྲོས་པ་ལྟར་རྟག་ཏུ་དང་ཞིང་ཐུགས་རྙོག་པ་མི་མངའ་བའོ། །སེམས་ཅན་དམ་པ་ཁྱོད་ནི་རླུང་མར་ལྟར་འཇིག་རྟེན་གྱི་ཁམས་ཐམས་ཅད་ལ་རྟག་ཏུ་མི་ཆགས་ཤིང་ཐུགས་གནས་མ་མཆིས་པའོ། །སེམས་ཅན་དམ་པ་ཁྱོད་ནི་གཟི་བརྗིད་ཀྱི་རྒྱལ་པོ་ལྟར་རློམ་སེམས་ཅན་ཐམས་ཅད་སྤངས་ཤིང་བསྙེན་པར་དཀའ་བའོ། །སེམས་ཅན་དམ་པ་ཁྱོད་ནི་སྲེད་མེད་ཀྱི་བུ་ལྟར་ཐུལ་བར་དཀའ་ཞིང་སྟོབས་དང་ལྡན་པའོ། །འཇིག་རྟེན་གྱི་མགོན་པོ་ཁྱོད་ནི་བྱང་ཆུབ་ཀྱི་སྙིང་པོ་ལས་མི་བཞེངས་པས་དམ་བཅས་པ་བརྟན་པའོ། །སེམས་ཅན་དམ་པ་ཁྱོད་ནི་དབང་པོའི་ལག་གིས་འཕངས་པའི་རྡོ་རྗེ་ལྟར་སླར་མི་ལྡོག་པའོ། །སེམས་ཅན་དམ་པ་ཁྱོད་ནི་རིང་པོར་མི་ཐོགས་པར་སྟོབས་བཅུ་དང་ལྡན་པར་བྱོན་པས་བརྙེས་པ་ལེགས་པར་བརྙེས་པའོ། །དགེ་སློང་དག་དེ་ལྟར་བྱང་ཆུབ་ཀྱི་ཤིང་གི་ལྷ་མོ་རྣམས་ཀྱིས་དཔལ་རྣམ་པ་བཅུ་དྲུག་གིས་བྱང་ཆུབ་སེམས་དཔའ་འཕེལ་བར་བྱེད་དོ། །དགེ་སློང་དག་དེ་ན་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་རྣམ་པ་བཅུ་དྲུག་གིས་བདུད་ཉམས་དམས་པར་བྱེད་དེ། རྣམ་པ་བཅུ་དྲུག་གང་ཞེ་ན། འདི་ལྟ་སྟེ། སྡིག་ཅན་ཁྱོད་ནི་ཁྲུང་ཁྲུང་རྒན་པོ་ལྟར་སེམས་ཁོངས་སུ་ཆུད་ཅིང་དམས་པའོ། །སྡིག་ཅན་ཁྱོད་ནི་གླང་པོ་རྒན་པོ་འདམ་དུ་བྱིང་བ་ལྟར་ཉམ་ཆུང་བའོ། །སྡིག་ཅན་ཁྱོད་ནི་དཔའ་བོར་ཁས་འཆས་པ་ཕམ་པ་ལྟར་གཅིག་པུར་གྱུར་པའོ། །སྡིག་ཅན་ཁྱོད་ནི་ནད་ཀྱིས་ཉེན་པ་འབྲོག་ཏུ་བོར་བ་ལྟར་གཉིས་སུ་མེད་པའོ། །སྡིག་ཅན་ཁྱོད་ནི་གླང་བུ་ཁལ་གྱིས་ཉོན་མོངས་པ་ལྟར་སྟོབས་མེད་པའོ། །སྡིག་ཅན་ཁྱོད་ནི་ཤིང་རླུང་གིས་བཏབ་པ་ལྟར་སྒྱེལ་བའོ། །སྡིག་ཅན་ཁྱོད་ནི་འདྲོན་པ་ལམ་སྟོར་བ་ལྟར་ལམ་ངན་པར་གནས་པའོ། །སྡིག་ཅན་ཁྱོད་ནི་མི་དབུལ་པོ་བུ་ལོན་ཅན་ལྟར་དམན་པ་བས་ཀྱང་དམན་པའོ། །སྡིག་ཅན་ཁྱོད་ནི་བྱ་རོག་བྱུང་རྒྱལ་བ་ལྟར་མུ་ཅོར་སྨྲ་བའོ། །སྡིག་ཅན་ཁྱོད་ནི་མ་དུལ་བ་བྱས་པ་མི་གཟོ་བ་ལྟར་ང་རྒྱལ་གྱིས་ཟིལ་གྱིས་ནོན་པའོ། །སྡིག་ཅན་ཁྱོད་ནི་སེང་གེའི་སྒྲས་ཝ་འབྲོས་པ་ལྟར་དེང་འབྲོས་པར་འགྱུར་བའོ། །སྡིག་ཅན་ཁྱོད་ནི་རྣམ 41.184a པར་འཐོར་རླུང་གིས་གཏོར་བའི་བྱ་བཞིན་དུ་དེང་འདར་བར་འགྱུར་བའོ། །སྡིག་ཅན་ཁྱོད་ནི་སྤྲང་པོ་བསོད་ནམས་ཟད་པ་ལྟར་དུས་མི་ཤེས་པའོ། །སྡིག་ཅན་ཁྱོད་ནི་སྣོད་ཆག་པ་རྡུལ་གྱིས་གང་བ་ལྟར་དེང་རྣམ་པར་སྤང་བར་འགྱུར་བའོ། །སྡིག་ཅན་ཁྱོད་ནི་སྔགས་ལ་དཔའ་བ་སྦྲུལ་ལ་བབ་པ་ལྟར་དེང་ཚར་ཆོད་པར་འགྱུར་བའོ། །སྡིག་ཅན་ཁྱོད་ནི་མི་རྐང་ལག་བཅད་པ་ལྟར་སྟོབས་ཐམས་ཅད་དང་བྲལ་བའོ་ཞེས་བྱ་བའོ། །དགེ་སློང་དག་དེ་ལྟར་གནས་གཙང་མའི་རིས་ཀྱི་ལྷ་རྣམས་ཀྱིས་རྣམ་པ་བཅུ་དྲུག་གིས་བདུད་སྡིག་ཅན་ཉམ་སྨད་པ་བྱས་སོ། །དགེ་སློང་དག་དེ་ལ་བྱང་ཆུབ་ཀྱི་བསྙེན་བཀུར་བའི་ལྷ་རྣམས་ཀྱིས་རྣམ་པ་བཅུ་དྲུག་གིས་བདུད་སྡིག་ཅན་ཟློག་པར་བྱེད་དེ། བཅུ་དྲུག་གང་ཞེ་ན། འདི་ལྟ་སྟེ། སྡིག་ཅན་ཁྱོད་ནི་དཔའ་བོས་ཕ་རོལ་གྱི་སྡེ་བཅོམ་པ་ལྟར་བྱང་ཆུབ་སེམས་དཔས་དོ་མོད་ཕམ་པར་བྱས་པར་འགྱུར་རོ། །སྡིག་ཅན་ཁྱོད་ནི་གྱད་སྟོབས་ཆུང་ངུ་ལ་གྱད་སྟོབས་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་ཚར་བཅད་པར་འགྱུར་རོ། །སྡིག་ཅན་ཁྱོད་ནི་སྲིན་བུ་མེ་ཁྱེར་ལ་ཉི་མའི་དཀྱིལ་འཁོར་བབ་པ་ལྟར་དོ་མོད་བྱང་ཆུབ་སེམས་དཔས་ཟིལ་གྱིས་ནོན་པར་འགྱུར་རོ། །སྡིག་ཅན་ཁྱོད་ནི་ཕུབ་མ་སྤར་བ་གང་ལ་རླུང་མར་བཏབ་པ་ལྟར་དོ་མོད་བྱང་ཆུབ་སེམས་དཔས་གཏོར་བར་འགྱུར་རོ། །སྡིག་ཅན་ཁྱོད་ནི་ཝ་ལ་སེང་གེ་བབ་པ་ལྟར་དོ་མོད་བྱང་ཆུབ་སེམས་དཔས་སྔངས་པར་བྱས་པར་འགྱུར་རོ། །སྡིག་ཅན་ཁྱོད་ནི་ཤིང་སཱ་ལ་ཆེན་པོ་རྩ་བ་ནས་བཅད་པ་ལྟར་དོ་མོད་བྱང་ཆུབ་སེམས་དཔས་བསྒྱེལ་བར་འགྱུར་རོ། །སྡིག་ཅན་ཁྱོད་ནི་མི་མཛའ་བའི་གྲོང་ཁྱེར་ལ་རྒྱལ་པོ་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་བརླག་པར་འགྱུར་རོ། །སྡིག་ཅན་ཁྱོད་ནི་བ་རྗེས་ཀྱི་ཆུ་ལ་ཉི་ཚན་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་ཡོངས་སུ་ཟད་པར་བྱས་པར་འགྱུར་རོ། །སྡིག་ཅན་ཁྱོད་ནི་མི་གཡོན་ཅན་གསད་པར་བྱ་བ་ཤོར་བ་ལྟར་དོ་མོད་བྱང་ཆུབ་སེམས་དཔས་འབྲོས་པར་བྱེད་པར་འགྱུར་རོ། ། 41.184b སྡིག་ཅན་ཁྱོད་ནི་མེའི་ཚ་བས་བུང་བའི་ཁྱུ་ལྟར་དོ་མོད་བྱང་ཆུབ་སེམས་དཔས་མགོ་འཁོར་བར་བྱེད་པར་འགྱུར་རོ། །སྡིག་ཅན་ཁྱོད་ནི་ཆོས་ཀྱི་རྒྱལ་པོ་རྒྱལ་སྲིད་ཉམས་པ་ལྟར་དོ་མོད་བྱང་ཆུབ་སེམས་དཔས་མྱ་ངན་བྱེད་དུ་བཅུག་པར་འགྱུར་རོ། །སྡིག་ཅན་ཁྱོད་ནི་ཁྲུང་ཁྲུང་རྒན་པོ་འདབ་མ་བྲེགས་པ་ལྟར་དོ་མོད་བྱང་ཆུབ་སེམས་དཔས་སེམས་ཁོངས་སུ་བཅུག་པར་འགྱུར་རོ། །སྡིག་ཅན་ཁྱོད་ནི་འབྲོག་དགོན་པར་ལམ་རྒྱགས་ཆད་པ་ལྟར་དོ་མོད་བྱང་ཆུབ་སེམས་དཔས་ཕོངས་པར་བྱས་པར་འགྱུར་རོ། །སྡིག་ཅན་ཁྱོད་ནི་རྒྱ་མཚོ་ཆེན་པོར་གྲུ་ཞིག་པ་ལྟར་དོ་མོད་བྱང་ཆུབ་སེམས་དཔས་སྨྲེ་སྔགས་འདོན་དུ་བཅུག་པར་འགྱུར་རོ། །སྡིག་ཅན་ཁྱོད་ནི་སྲེག་པའི་བསྐལ་པས་རྩཝ་དང་ནགས་ཚལ་ལྟར་དོ་མོད་བྱང་ཆུབ་སེམས་དཔས་རྙིས་པར་བྱས་པར་འགྱུར་རོ། །སྡིག་ཅན་ཁྱོད་ནི་རིའི་རྩེ་མོ་ལ་རྡོ་རྗེ་བབ་པ་ལྟར་དོ་མོད་བྱང་ཆུབ་སེམས་དཔས་བརྙིལ་བར་འགྱུར་རོ་ཞེས་བྱ་བའོ། །དགེ་སློང་དག་དེ་ལྟར་བྱང་ཆུབ་ཀྱི་བསྙེན་བཀུར་བའི་ལྷའི་བུ་རྣམས་ཀྱིས་རྣམ་པ་བཅུ་དྲུག་གིས་བདུད་སྡིག་ཅན་ཟློག་པར་བྱེད་ཀྱང་བདུད་སྡིག་ཅན་ཕྱིར་མ་ལོག་གོ། །དེ་ལ་འདི་སྐད་ཅེས་བྱ་སྟེ། ལྷ་ཡི་ཚོགས་ཀྱིས་ཡང་དག་བསྐུལ་བ་ཐོས་ཀྱང་བདུད་ནི་ཕྱིར་ལོག་མ་གྱུར་ཏེ། །སློངས་ཤིག་རྒྱོབ་ཤིག་འདི་ནི་བརླག་པར་གྱིས་ཤིག་སྲོག་ཀྱང་སྦྱིན་པར་མ་བྱེད་ཅིག་།འདི་ནི་རང་ཉིད་རྒྱལ་ནས་ང་ཡི་ཡུལ་ནས་གཞན་ཡང་སྒྲོལ་བར་བྱེད་པར་འགྱུར། །ལངས་ཏེ་བྲོས་པ་མ་གཏོགས་དགེ་སྦྱོང་འདི་ལ་ཐར་གཞན་ཅུང་ཟད་མེད་ཅེས་སྨྲས། །བྱང་ཆུབ་སེམས་དཔས་སྨྲས་པ། རི་ཡི་རྒྱལ་པོ་ལྷུན་པོ་གནས་ནས་གཡོ་སྲིད་འགྲོ་བ་ཐམས་ཅད་མེད་འགྱུར་སྲིད། །སྐར་མའི་ཚོགས་རྣམས་ཐམས་ཅད་ཟླ་བ་བཅས་པར་མཁའ་ལས་ས་ལ་ལྟུང་ཡང་སྲིད། །སེམས་ཅན་ཀུན་གྱི་བསམ་པ་གཅིག་བྱེད་འགྱུར་སྲིད་རྒྱ་མཚོ་ཆེན་པོ་སྐམ་སྲིད་ཀྱི། །ང་འདྲ་ཤིང་གི་རྒྱལ་པོའི་དྲུང་ན་འདུག་པ་ལ་ནི་གཡོ་བ་ཡོང 41.185a མི་སྲིད། བདུད་ཀྱིས་སྨྲས་པ། ཁོ་བོ་འདོད་པའི་དབང་ཕྱུག་འཇིག་རྟེན་འདི་ཀུན་དབང ། །ལྷ་དང་ལྷ་མིན་ཚོགས་བཅས་མི་དང་དུད་འགྲོ་རྣམས། །ཁོ་བོས་ཁྱབ་སྟེ་ཐམས་ཅད་ཁོ་བོའི་དབང་དུ་འགྱུར། །ཁོ་བོའི་ཡུལ་ན་འདུག་པ་ལོངས་ལ་ཚིག་བཞིན་གྱིས། །བྱང་ཆུབ་སེམས་དཔས་སྨྲས་པ། གལ་ཏེ་འདོད་དབང་ཁྱོད་ཡིན་གསལ་བར་ཁྱོད་དབང་མིན། །ཡང་དག་ང་ལྟོས་ང་ཡང་ཆོས་ཀྱི་དབང་ཕྱུག་ཡིན། །གལ་ཏེ་ངན་འགྲོར་མི་འགྲོ་ཁྱོད་ནི་འདོད་དབང་ཕྱུག་།དབང་མེད་ཁྱོད་ནི་ལྟ་བཞིན་བྱང་ཆུབ་ངས་ཐོབ་འགྱུར། །བདུད་ཀྱིས་སྨྲས་པ། དགེ་སྦྱོང་བདག་ཉིད་གཅིག་པུ་དགོན་པར་ཅི་ཞིག་བྱེད། །ཁྱོད་ཀྱིས་གང་བཙལ་དེ་དང་ཕྲད་པར་སླ་མ་ཡིན། །རབ་འགྲོ་ཤེས་ལྡན་ལ་སོགས་དཀའ་ཐུབ་རབ་བསྒྲིམས་ཀྱང ། །གོ་འཕང་མཆོག་དེ་མ་ཐོབ་མིར་གྱུར་ཁྱོད་ཅི་སྨོས། །བྱང་ཆུབ་སེམས་དཔས་སྨྲས་པ། ཁྲོ་བའི་ཟིལ་ནོན་བློ་དང་ལྷ་ཡུལ་འདོད་པ་དང ། །བདག་ལ་རྟག་དང་མི་རྟག་སྙམ་དུ་གནས་པ་དང ། །ཡུལ་དུ་འགྲོ་བས་གནས་པ་ཐར་སྙམ་གནས་པ་ཡི། །དྲང་སྲོང་མི་ཤེས་སྔོན་དུ་འགྲོ་བས་དཀའ་ཐུབ་སྤྱད། །དེ་དག་ཡང་དག་དོན་དང་བྲལ་ཞིང་སྐྱེས་བུ་སྨྲ། །ཁྱབ་དང་ཕྱོགས་གཅིག་ཆེས་དང་ཁ་ཅིག་རྟག་ཅེས་སྨྲ། །ལུས་ཅན་ལུས་མིན་ཡོན་ཏན་མིན་དང་ཡོན་ཏན་ཅན། །བྱེད་པ་པོ་དང་བྱེད་པོ་མིན་ཞེས་གཞན་དག་འཛེར། །སྟན་འདིར་འདུག་སྟེ་ང་རྒྱལ་བཅོམ་པས་སྡེ་དཔུང་བཅས། །ཁྱོད་ཕམ་བྱས་ཏེ་བྱང་ཆུབ་རྡུལ་མེད་དེང་ཐོབ་ནས། །འགྲོ་བ་འདི་ལ་འབྱུང་དང་བྱུང་དང་མྱ་ངན་འདས། །སྡུག་བསྔལ་ཞི་བ་བསིལ་བའི་དངོས་པོ་བསྟན་པར་བྱ། །བདུད་ནི་ཁྲོས་ཤིང་འཁྲུགས་ཏེ་ཚིག་པ་ཟོས་ནས་མདུན་དུ་རྩུབ་པའི་ཚིག་ཏུ་སྨྲས་པ་དགེ་སྦྱོང་འདི་ཟུང་ཤིག་།གཅིག་པུ་དགོན་པར་བོར་བར་གྱུར་པ་འདི་ནི་ང་ཡི་མདུན་ནས་ཟུང་ལ་སོང་སྟེ་མྱུར་དུ་དབང་དུ་གྱིས། །ང་ཡི་ཁྱིམ་དུ་མྱུར་དུ་སོང་ལ་ཤིང་སྒྲོག་དང་ནི་ལྕགས་སྒྲོག་ཕྲུགས་སུ་ཆུག་སྟེ་སྒོ་བ་བྱེད 41.185b དུ་ཆུག་།སྡུག་བསྔལ་ཉེན་ནས་ཀུ་ཅོ་རྣམ་པ་མང་པོ་འདོན་ཅིང་ལྷ་ཡི་ཁོལ་པོ་ཡིན་པར་བདག་གིས་བདག་མཐོང་བྱོས། །བྱང་ཆུབ་སེམས་དཔས་སྨྲས་པ། ནམ་མཁའ་ལ་ནི་རི་མོ་རྣམ་པ་སྣ་ཚོགས་ཆ་ཆ་རིས་རིས་ཕྱེ་སྟེ་སོ་སོར་བྲི་བར་ནུས་ཀྱང་སྲིད། །ཕྱོགས་དང་ཕྱོགས་མཚམས་འགྲོ་བའི་ཤུགས་ཅན་རླུང་ནི་མི་ཡིས་རབ་ཏུ་བསྒྲིམས་ཏེ་ཞགས་པས་བཅིང་དུ་ནུས་ཀྱང་སྲིད། །ཉི་མ་ཟླ་བ་མུན་པ་རབ་རིབ་མེད་བྱེད་མཁའ་ལས་ས་ལ་ལྟུང་བར་བྱེད་པ་ནུས་སྲིད་ཀྱི། །ཁྱོད་དང་འདྲ་བ་རབ་ཏུ་མང་པོ་བགྲང་ལས་འདས་པ་དག་གིས་ཤིང་དྲུང་ནས་ནི་ང་བསྐྱོད་ནུས་མི་འགྱུར། །བདུད་དཔུང་སྟོབས་དང་ལྡན་པ་ལངས་ཏེ་ཧ་ཞེས་ཟེར། །དུང་དང་རྔ་དང་རྫ་རྔ་མཆོག་གི་སྒྲ་འབྱིན་ལངས། །བདུད་དཔུང་ཤིན་ཏུ་འཇིགས་པ་འདི་དག་མཐོང་ནས་ནི། །ཀྱི་ཧུད་བུ་སྡུག་ཁྱོད་ཅིས་མ་རུང་གྱུར་ཅེས་ཟེར། །འཛམ་ཀླུང་གསེར་དང་ཙམ་པའི་སྙིང་པོ་འདྲ་བར་སེར། །ཤིན་ཏུ་གཞོན་ནུ་ལྷ་མིས་བསྟོད་ཅིང་མཆོད་པའི་འོས། །ཁྱོད་དེང་གཡུལ་ངོ་ཆེན་པོར་རབ་ཏུ་བརླག་འགྱུར་ཏེ། །དབང་པོས་ལྷ་མིན་ལྟ་བུར་བདུད་ཀྱི་དབང་དུ་འགྱུར། །ཚངས་པའི་དབྱངས་དང་ཀ་ལ་པིང་ཀའི་སྒྲ་སྐད་ཀྱིས། །བདེ་བར་གཤེགས་པས་གནོད་སྦྱིན་སྲིན་ཚོགས་དེ་ལ་སྨྲས། །མི་མཁས་གང་ཞིག་ནམ་མཁའ་སྐྲག་པར་བྱེད་འདོད་པ། །དེ་ནི་ཤིང་མཆོག་དྲུང་ནས་ང་འདྲ་སློང་བར་འདོད། །གང་ཞིག་སྟོང་གསུམ་ཆེན་པོ་བཤིག་ནས་རྡུལ་འགྲང་དང ། །གང་ཞིག་བ་སྤུ་ཡིས་ནི་རྒྱ་མཚོ་ཆུ་འབྱིན་དང ། །སྐད་ཅིག་གིས་ནི་རྡོ་རྗེའི་རང་བཞིན་རི་འཐོར་བ། །དེས་ཀྱང་ཤིང་དྲུང་འདུག་པ་ང་ལ་འཚེ་མི་ནུས། །བདུད་ཁྲོས་སེམས་ཀྱིས་གཉ་ཤིང་གང་གིས་བར་ཙམ་འདུག་།ཤུབས་ནས་ཕྱུང་བའི་རལ་གྲི་ནོན་པོ་ལག་ན་ཐོགས། །དགེ་སྦྱོང་མྱུར་ལོངས་ང་ཡིས་བསམ་པ་བཞིན་དུ་སོང ། །འོད་མའི་མྱུ་གུ་སྔོ་ལྟར་དོ་མོད་བཅད་ད་རེ། །བྱང་ཆུབ་སེམས་དཔས་སྨྲས་པ། གལ་ཏེ་སྟོང་གསུམ་ས་རྣམས་འདི་དག་ཐམས་ཅད་བདུད་ཀྱིས་རབ་ཏུ་གང་གྱུར་ལ། །ཀུན 41.186a གྱི་ལག་ན་རི་བོ་ལྷུན་པོ་མཆོག་འདྲ་བ་ཡི་རལ་གྲི་ཐོགས་གྱུར་ཀྱང ། །དེ་དག་ང་ཡི་བ་སྤུ་བསྐྱོད་པར་མི་ནུས་ང་ལ་གནོད་བྱེད་སྨོས་ཅི་དགོས། །སུན་འབྱིན་མ་རིངས་ཤིག་དང་དེའུ་རེ་བཏགས་ཏེ་ང་ཡིས་བརྟན་པོར་དྲན་པར་བྱ། །རྔ་མོ་བ་ལང་གླང་ཆེན་མགོ་དང་འཇིགས་མིག་དང ། །མྱུར་གདུག་སྦྲུལ་དང་མིག་གདུག་མི་བཟད་འདྲ་བ་དག་།མེ་འབར་ཁ་དོག་རྩེ་མོར་བཅས་པའི་རི་འཕེན་ཅིང ། །རྩ་བར་བཅས་པའི་ཤིང་དང་ཟངས་དང་ལྕགས་རྣམས་འཕེན། །སྤྲིན་ལྟར་ལངས་ཏེ་ཕྱོགས་བཞི་དག་ཏུ་སྒྲ་སྒྲོག་ཅིང ། །རྡོ་རྗེའི་ལྕེ་དང་ལྕགས་ཀྱི་ཐུ་ལུམ་ཆར་པ་འབེབས། །རལ་གྲི་མདུང་ཐུང་རྣོ་དང་དགྲ་སྟ་དུག་ཅན་འབེབས། །ས་ནི་བརྟོལ་བར་བྱེད་ཅིང་ཤིང་དག་རབ་ཏུ་འཇོམས། །ཁ་ཅིག་ལག་པ་བརྒྱ་དག་གིས་ནི་མདའ་བརྒྱ་འཕེན། །ཁ་ནས་མྱུར་དུ་གདུག་པའི་སྦྲུལ་དང་མེ་ཡང་འཐོར། །ཆུ་སྐྱེས་ཆུ་སྲིན་ལ་སོགས་པ་དག་མཚོ་ནས་ལེན། །ཁ་ཅིག་ནམ་མཁའ་ལྡིང་དུ་བསྒྱུར་ནས་ཀླུ་ཡང་འཕེན། །ཁ་ཅིག་ཁྲོས་ནས་ལྕགས་ཀྱི་ཐུ་ལུམ་རི་རབ་ཙམ། །མེ་འབར་ཁ་དོག་རྩེ་མོར་བཅས་པ་རྣམས་ཀྱང་འཕེན། །ས་ལ་ལྷགས་ནས་ས་ནི་རབ་ཏུ་འཁྲུགས་པར་བྱེད། །འོག་གི་ཆུ་ཡི་ཕུང་པོའི་ཆུ་ཡང་རྣམ་པར་འཁྲུག་།ཁ་ཅིག་དེ་ཡི་མདུན་དང་དེ་བཞིན་རྒྱབ་ཏུ་མཆོང ། །ཀྱེ་མ་བུ་ཞེས་གཡས་དང་དེ་བཞིན་གཡོན་དུ་མཆོང ། །རྐང་པ་ལག་པ་ལོག་པར་འདུག་ཅིང་མགོ་འབར་ལ། །གློག་ལྟར་རབ་ཏུ་འབར་བར་མིག་ནས་མངོན་དུ་འབྱིན། །བདུད་ཀྱི་དཔུང་ནི་བསྒྱུར་བ་མི་སྡུག་བྱས་མཐོང་ནས། །སེམས་ཅན་དག་པ་སྒྱུ་མ་བྱས་པ་ཇི་བཞིན་རྟོག་།འདི་ལ་བདུད་མེད་སྟོབས་མེད་འགྲོ་མེད་བདག་ཀྱང་མེད། །ཆུ་ཟླའི་ཚུལ་འདྲ་བ་ཡི་འཇིག་རྟེན་གསུམ་པོ་འཁོར། །མིག་དང་སྐྱེས་པ་བུད་མེད་མེད་ཅིང་བདག་གི་མེད། །རྣ་བ་སྣ་དང་དེ་བཞིན་ལྕེ་དང་དེ་བཞིན་ལུས། །ཆོས་འདི་བྱེད་པ་པོ་དང་ཚོར་བ་པོ་དང་བྲལ། །བརྟེན་ནས་སྐྱེས་ཏེ་ནང་ཡང་སྟོང་ཞིང་ཕྱི་ཡང་སྟོང ། །བདེན་ཚིག་གང་གིས་འདིར་ཆོས་ཤིན་ཏུ་སྟོང་ཞེ་ན། །འདུལ་འཐུན་གནོད་སྦྱིན་དེས་པ་གང་ཡིན་དེ་དག་གིས། །ལག་པའི་མཚོན་ཆ་མེ་ཏོག་ཕྲེང་བར 41.186b མཐོང་གྱུར་ཅེས། །རྟག་ཏུ་བདེན་སྨྲས་དེ་ཡིས་བདེན་པའི་ཚིག་བྱས་ཏེ། །དེ་ཡིས་ལག་མཐིལ་གཡོན་པ་དྲ་བ་མཆོག་སྤྲས་པ། །སེན་མོ་ཟངས་མདོག་རབ་མཛེས་རྩིབས་སྟོང་འཁོར་ལོ་ཅན། །འཛམ་ཀླུང་གསེར་འབར་དང་འདྲ་བསོད་ནམས་དགེས་བསྟེན་པས། །ཚུལ་དུ་ཤིས་པར་མགོ་ནས་རྐང་པའི་བར་དུ་བྱུགས། །མཁའ་ལས་གློག་འདྲ་བར་ནི་ལག་པ་བརྐྱང་བྱས་ནས། །ཚིག་ཏུ་སྨྲས་པ་ས་འདི་ངའི་དབང་ཡིན་ཏེ། །ངས་ནི་སྔོན་ཆད་མཆོད་སྦྱིན་ཁྲག་ཁྲིག་སྣ་ཚོགས་བྱས། །སློང་ལ་མི་སྦྱིན་སྙམ་སྟེ་དོན་མེད་གཞར་མ་བྱིན། །ཆུ་དང་མེ་དང་རླུང་ནི་ང་ཡི་དབང་ཡིན་ཏེ། །ཚངས་པ་སྐྱེ་དགུ་བདག་དང་སྐར་བཅས་ཉི་ཟླ་དང ། །གང་དག་ཕྱོགས་བཅུ་དག་ན་བཞུགས་པའི་སངས་རྒྱས་དང ། །བདག་ཁྲིམས་བརྟུལ་ཞུགས་བྱང་ཆུབ་ཡན་ལག་འཕགས་པ་དཔང ། །སྦྱིན་དང་ཚུལ་ཁྲིམས་དེ་བཞིན་བཟོད་པ་ང་ཡི་དཔང ། །བརྩོན་འགྲུས་དེ་བཞིན་བསམ་གཏན་དེ་ལྟར་ཤེས་རབ་དང ། །ཚད་མེད་བཞི་དང་དེ་བཞིན་མངོན་ཤེས་ང་ཡི་དཔང ། །རིམ་གྱིས་བྱང་ཆུབ་སྤྱོད་པ་ཐམས་ཅད་ང་ཡི་དཔང ། །ཕྱོགས་བཅུའི་འཇིག་རྟེན་སེམས་ཅན་མཐའ་དག་ཇི་སྙེད་པ། །དེ་དག་རྣམས་ཀྱི་བསོད་ནམས་ཚུལ་ཁྲིམས་ཡེ་ཤེས་དང ། །གཏན་པ་མེད་པའི་མཆོད་སྦྱིན་བྱས་པ་བསྡོམས་ཀྱང་ནི། །དེ་དག་ང་ཡི་བ་སྤུ་བརྒྱ་ཡི་ཆར་མི་ཕོད། །དེ་ཡིས་ཚུལ་དུ་ཤིས་པར་ལག་པ་ས་ལ་བརྡབས། །ཁར་བའི་སྣོད་ལྟར་ས་འདི་སྒྲ་ཡང་བྱུང་བར་གྱུར། །བདུད་ཀྱི་སྒྲ་ཐོས་ནས་ནི་ས་ལ་སྒྱེལ་གྱུར་ཏེ། །ནག་པོའི་རྩ་ལག་རྒྱོབ་ཤིག་ཟུང་ཤིག་སྒྲ་ཡང་ཐོས། །ལུས་ལས་རྔུལ་བྱུང་གཟི་བརྗིད་ཉམས་ཤིང་བཞིན་མདོག་གྱུར། །རྒ་བས་བཅོམ་པར་བདུད་དེ་ཉིད་ཀྱིས་མཐོང་བར་གྱུར། །བྲང་རྡུང་ཆོ་ངེ་འདོན་ཅིང་འཇིགས་ཉེན་མགོན་ཡང་མེད། །བདུད་ཀྱི་ཡིད་འཁྲུལ་གྱུར་ཅིང་སེམས་ནི་མྱོས་པར་གྱུར། །གླང་པོ་རྟ་དང་བཞོན་པ་ཤིང་རྟ་ས་ལ་ལྷུང ། །སྲིན་པོ་གྲུལ་བུམ་དག་དང་ཤ་ཟ་སྔངས་ཤིང་རྒྱུག་།མགོ་རྨོངས་ལམ་མི་རྙེད་ཅིང་གནས 41.187a མེད་སྐྱབས་ཀྱང་མེད། །རླུང་བཏབ་ནགས་མེས་བྱས་ལྟར་བལྟས་ནས་སོང་བར་གྱུར། །ཕ་མ་བུ་དང་སྲིང་མོ་དེ་བཞིན་ཕུ་ནུ་དག་།གང་ན་མཐོང་ཞིང་གང་དུ་དོང་ཞེས་འདྲི་བར་བྱེད། །དེ་ཡི་རྐྱེན་གྱིས་དེ་དག་ཕན་ཚུན་འཐབ་ཅིང་རྩོད། །བདག་ནི་སྡུག་བསྔལ་གྱུར་ཏེ་འཚོ་བའི་སྐབས་ཀྱང་མེད། །བདུད་དཔུང་རྒྱ་ཆེ་མང་བ་མི་འཁྲུགས་སྙེད་པོ་དེ། །ཐམས་ཅད་རྣམ་པར་འཐོར་ཅིང་ཐ་དགུར་གྱེས་གྱུར་ཏེ། །ཞག་བདུན་འདས་ཀྱི་བར་དུ་ཕན་ཚུན་ཕྲད་མ་གྱུར། །མཐོང་ནས་སྨྲས་པ་གལ་ཏེ་གསོན་ན་དགའ་ཞེས་འཛེར། །ཤིང་གི་ལྷ་མོས་དེ་ཚེ་དེ་ལ་སྙིང་རྗེ་བྱས། །ཆུ་ཡི་བུམ་པ་ཐོགས་ཏེ་ནག་པོའི་རྩ་ལག་གཏོར། །མྱུར་དུ་ལོངས་ལ་ཕྱི་ཤོལ་མ་བྱེད་སྐྱེན་དུ་སོང ། །བླ་མའི་ཚིག་མ་མཉན་པས་དེ་ལྟར་གྱུར་པ་ཡིན། །བདུད་ཀྱིས་སྨྲས་པ། བདག་གི་བུ་ཡི་སྙན་ཚིག་ཕན་པ་མ་མཉན་ཏེ། །སེམས་ཅན་ཤིན་ཏུ་དག་ལ་ཉེས་པ་བྱས་པས་ན། །སྡུག་བསྔལ་འཇིགས་ཕོངས་མྱ་ངན་བརླག་དང་བརྙས་པ་དང ། །ཅིར་མི་རུང་བའི་སྒྲ་དང་དམན་ཉིད་བདག་གིས་ཐོབ། །ལྷ་མོས་སྨྲས་པ། མི་མཁས་གང་ཞིག་ཉེས་པ་མེད་ལ་ཉེས་བྱེད་པ། །དེ་ནི་ཉེས་དང་སྡུག་བསྔལ་བ་དང་ཕོངས་པ་དང ། །ཅིར་མི་རུང་ཞེས་བྱ་བའི་སྒྲ་དང་དམན་ཉིད་དང ། །གསད་དང་བཅིང་དང་ཉེས་པ་དུ་མ་རྙེད་པར་འགྱུར། །ལྷ་དང་ལྷ་མིན་མཁའ་ལྡིང་མི་ཅི་སྲིན་པོའི་དབང ། །ཚངས་པ་བརྒྱ་བྱིན་གཞན་འཕྲུལ་འོག་མིན་བཅས་པ་དག་།འདི་ལྟར་ཁྱོད་ཀྱིས་འདི་འདྲའི་བདུད་ཀྱི་དཔུང་བཅོམ་པས། །འཇིག་རྟེན་དཔའ་བོ་རྒྱལ་ཞེས་དེ་ཡིས་རྒྱལ་བ་བརྗོད། །རྒྱན་ཕྲེང་ཆུན་པོ་ཟླ་བ་གདུགས་དང་རྒྱལ་མཚན་བ་དན་འབུལ། །མེ་ཏོག་ཨ་ག་རུ་དང་རྒྱ་སྤོས་ཙན་དན་ཕྱེ་ཆར་འབེབས། །སིལ་སྙན་དག་ཀྱང་རབ་ཏུ་དཀྲོལ་བ་བྱེད་ཅིང་ཚིག་བརྗོད་པ། །དཔའ་བོ་དགྲ་ཚོགས་རྒྱལ་རྣམས་ཁྱོད་ལ་དགབ་པ་མཛད་པར་འགྱུར། །སྟན་མཆོག་འདིར་ནི་བྱམས་པས་གཡོན་ཅན་བདུད་ཀྱི་ཕྱོགས། །རྒྱ་ཆེན་ཕམ་མཛད་དཔའ་བོ་དོ་མོད་བྱང་ཆུབ་བརྙེས། །སྟོབས་བཅུ་མ་འདྲེས་སོ་སོ་ཡང་དག་རིག་པ་དང ། །སངས་རྒྱས 41.187b ཡུལ་རྣམས་ཐམས་ཅད་དོ་མོད་བརྙེས་པར་འགྱུར། །བདུད་གདུལ་ཆེད་དུ་འདིར་ནི་གཡུལ་ངོར་རབ་ཏུ་ཞུགས། །རྫོགས་པའི་བྱང་ཆུབ་སེམས་དཔའི་སྟོབས་རྩལ་སུས་མཐོང་བ། །བྱེ་བ་སུམ་བཅུ་དྲུག་དང་ཁྲག་ཁྲིག་ཉི་ཤུ་བཞི། །དེ་དག་སངས་རྒྱས་བྱང་ཆུབ་མཆོག་ཏུ་ཡིད་ཀྱིས་སྨོན། །བདུད་བཏུལ་བའི་ལེའུ་ཞེས་བྱ་བ་སྟེ། ཉི་ཤུ་རྩ་གཅིག་པའོ།། །། དགེ་སློང་དག་དེ་ལྟར་བྱང་ཆུབ་སེམས་དཔའ་བདུད་ཕྱིར་རྒོལ་བ་བཅོམ་པ། དགྲ་བཏུལ་བ། གཡུལ་ངོར་གཡུལ་ལས་རྣམ་པར་རྒྱལ་བ། གདུགས་དང ། རྒྱལ་མཚན་དང ། བ་དན་བསྒྲེང་བས་འདོད་པ་རྣམས་ལས་དབེན་པ། སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་རྫོགས་པར་བྱས་ཏེ་གནས་སོ། །དེ་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་རྫོགས་པར་བྱས་ཏེ་གནས་སོ། །དེ་དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་ཤིང ། དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་ལ། འཕགས་པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ། དགའ་བ་མེད་པ་བསམ་གཏན་གསུམ་པ་རྫོགས་པར་བྱས་ཏེ་གནས་སོ། །དེ་བདེ་བ་ཡང་སྤངས་ཏེ། སྔ་ནས་སྡུག་བསྔལ་བ་ཡང་སྤངས་ཤིང་ཡིད་བདེ་བ་དང ། ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་རྫོགས་པར་བྱས་ཏེ་གནས་སོ། །དེ་ནས་བྱང་ཆུབ་སེམས་དཔའ་དེ་ལྟ་བུར་སྙོམས་པར་ཞུགས་པའི་སེམས་ཡོངས་སུ་དག་པ། ཡོངས་སུ་བྱང་བ། འོད་གསལ་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། 41.188a མཉེན་པ། ལས་སུ་རུང་བར་གནས་པ། མི་གཡོ་བར་གྱུར་པས་ནམ་གྱི་ཆ་སྟོད་ལ་ལྷའི་མིག་ལས་ཡེ་ཤེས་མཐོང་བའི་རིག་པ་མངོན་དུ་བྱ་བའི་ཕྱིར་སེམས་མངོན་པར་སྒྲུབ་ཅིང་མངོན་པར་གཏོད་དོ། །དེ་ནས་བྱང་ཆུབ་སེམས་དཔའ་ལྷའི་མིག་ཡོངས་སུ་དག་པ་མིའི་ལས་ཤིན་ཏུ་འདས་པས་སེམས་ཅན་ཤི་འཕོ་བ་དང ། སྐྱེ་བ་དང ། ཁ་དོག་བཟང་པོ་དང ། ཁ་དོག་ངན་པ་དང ། བཟང་པོ་དང ། ངན་པ་རྣམས་མཐོང་ངོ ། །ལས་ཇི་ལྟ་བ་བཞིན་དུ་འགྲོ་བའི་སེམས་ཅན་རྣམས་ཀྱང་རབ་ཏུ་ཤེས་ཏེ། ཀྱེ་མ་སེམས་ཅན་འདི་དག་ནི་ལུས་ཀྱིས་ཉེས་པར་སྤྱད་པ་དང་ལྡན་པ། ངག་དང་ཡིད་ཀྱིས་ཉེས་པར་སྤྱད་པ་དང་ལྡན་པ། འཕགས་པ་རྣམས་ལ་སྐུར་པ་འདེབས་པ། ལོག་པར་ལྟ་བ་དག་སྟེ། དེ་དག་ལོག་པར་ལྟ་བའི་ལས་ཡང་དག་པར་བླངས་པའི་རྒྱུས་ལུས་ཞིག་སྟེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་བ་དག་གོ། །སེམས་ཅན་འདི་དག་ནི་ལུས་ཀྱིས་ལེགས་པར་སྤྱད་པ་དང་ལྡན་པ། ངག་དང་ཡིད་ཀྱིས་ལེགས་པར་སྤྱད་པ་དང་ལྡན་པ། འཕགས་པ་རྣམས་ལ་སྐུར་པ་མི་འདེབས་པ། ཡང་དག་པར་ལྟ་བ་དག་སྟེ། དེ་དག་ཡང་དག་པར་ལྟ་བའི་ལས་ཡང་དག་པར་བླངས་པའི་རྒྱུས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར་བ་དག་གོ་ཞེས་བྱ་བར་རབ་ཏུ་ཤེས་སོ། །དེ་ལྟར་ལྷའི་མིག་རྣམ་པར་དག་པ་མིའི་ལས་ཤིན་ཏུ་འདས་པས་སེམས་ཅན་འཆི་འཕོ་བ་དང ། སྐྱེ་བ་དང ། ཁ་དོག་བཟང་པོ་དང ། ཁ་དོག་ངན་པ་དང ། བདེ་འགྲོར་སོང་བ་དང ། ངན་འགྲོར་སོང་བ་དང ། ངན་པ་དང ། བཟང་པོ་དག་དང ། ལས་ཇི་ལྟ་བ་བཞིན་དུ་འགྲོ་བ་རྣམས་མཐོང་ངོ ། །དགེ་སློང་དག་དེ་ལྟར་བྱང་ཆུབ་སེམས་དཔའ་ནམ་གྱི་ཆ་སྟོད་ལ་རིག་པ་མངོན་སུམ་དུ་བྱེད་དོ། །མུན་པ་སེལ་ཏོ། །སྣང་བ་བསྐྱེད་དོ། །དེ་ནས་བྱང་ཆུབ་སེམས་དཔའ་དེ་ལྟ་བུར་སྙོམས་པར་ཞུགས་པའི་སེམས་ཡོངས་སུ་དག་པ། ཡོངས་སུ་བྱང་བ། འོད་གསལ་བ། ཉོན་མོངས་པ 41.188b མེད་པ། ཉེ་བའི་ཉོན་མོངས་པ་དང་བྲལ་བ། མཉེན་པ། ལས་སུ་རུང་བར་གནས་པ། མི་གཡོ་བར་གྱུར་པས་ནམ་གྱི་གུང་ཐུན་ལ་སྔོན་གྱི་གནས་རྗེས་སུ་དྲན་པའི་ཡེ་ཤེས་མཐོང་བའི་རིག་པ་མངོན་དུ་བྱ་བའི་ཕྱིར་སེམས་མངོན་པར་སྒྲུབ་ཅིང་མངོན་པར་གཏོད་དོ། །དེ་བདག་དང་སེམས་ཅན་གཞན་དག་གི་སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ། འདི་ལྟ་སྟེ། སྐྱེ་བ་གཅིག་དང ། གཉིས་དང ། གསུམ་དང ། བཞི་དང ། ལྔ་དང ། བཅུ་དང ། ཉི་ཤུ་དང ། སུམ་བཅུ་དང ། བཞི་བཅུ་དང ། སྐྱེ་བ་ལྔ་བཅུ་དང ། སྐྱེ་བ་བརྒྱ་དང ། སྐྱེ་བ་སྟོང་དང ། སྐྱེ་བ་བརྒྱ་སྟོང་དང ། སྐྱེ་བ་བརྒྱ་སྟོང་ཕྲག་དུ་མ་དང ། སྐྱེ་བ་བྱེ་བ་དང ། སྐྱེ་བ་བྱེ་བ་ཕྲག་བརྒྱ་དང ། སྐྱེ་བ་བྱེ་བ་ཕྲག་སྟོང་དང ། སྐྱེ་བ་བྱེ་བ་བརྒྱ་སྟོང་དང ། སྐྱེ་བ་བྱེ་བ་ཁྲག་ཁྲིག་བརྒྱ་སྟོང་དང ། སྐྱེ་བ་བྱེ་བ་བརྒྱ་ཕྲག་དུ་མ་དང ། སྐྱེ་བ་བྱེ་བ་སྟོང་ཕྲག་དུ་མ་དང ། སྐྱེ་བ་བྱེ་བ་བརྒྱ་སྟོང་ཕྲག་དུ་མ་དང ། སྐྱེ་བ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ནས། འཇིག་པའི་བསྐལ་པ་དང ། འཆགས་པའི་བསྐལ་པ་དང ། འཇིག་པ་དང་འཆགས་པའི་བསྐལ་པ་དང ། འཇིག་པ་དང་འཆགས་པའི་བསྐལ་པ་དུ་མ་དག་ཀྱང་རྗེས་སུ་དྲན་ནོ། །བདག་ཆེ་གེ་མོ་ཞེས་བྱ་བ་ཞིག་ཏུ་གྱུར་ཏེ། མིང་འདི་ཞེས་བྱ་བར་གྱུར་ཏོ། །རུས་ནི་འདི་ཞེས་བྱའོ། །རིགས་ནི་འདི་ཞེས་བྱའོ། །ཁ་དོག་ནི་འདི་ལྟ་བུའོ། །ཁ་ཟས་ནི་འདི་ལྟ་བུ་ཞིག་ཟ་ཟའོ། །ཚེའི་ཚད་ནི་འདི་ཙམ་ཞིག་ཐུབ་བོ། །ཡུན་ནི་འདི་སྲིད་གཅིག་གནས་གནས་སོ། །བདེ་བ་དང་སྡུག་བསྔལ་ནི་འདི་ལྟ་བུ་ཞིག་མྱོང་ངོ ། །བདག་དེ་ནས་ཤི་འཕོས་ནས་ཆེ་གེ་མོ་ཞེས་བྱ་བ་ཞིག་ཏུ་སྐྱེས་སོ། །དེ་ནས་ཤི་འཕོས་ནས་ཀྱང་ཆེ་གེ་མོ་ཞེས་བྱ་བ་ཞིག་ཏུ་སྐྱེས་སོ། །དེ་ནས་ཤི་འཕོས་ནས་འདིར་སྐྱེས་སོ་ཞེས་རྣམ་པ་དང་བཅས། ཡུལ་ཕྱོགས་དང་བཅས་པར་བདག་དང་སེམས་ཅན་ཐམས་ཅད་ཀྱི་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ། །དེ་ནས་བྱང་ཆུབ་སེམས་དཔའ་དེ་ལྟ་བུར་སྙོམས་པར་ཞུགས 41.189a པའི་སེམས་ཡོངས་སུ་དག་པ། ཡོངས་སུ་བྱང་བ། འོད་གསལ་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། མཉེན་པ། ལས་སུ་རུང་བར་གནས་པ། མི་གཡོ་བར་གྱུར་པས་ནམ་གྱི་ཆ་སྨད་སྐྱ་རེང་འཆར་བའི་དུས་ཀྱི་ཚེ་རྔ་བརྡུང་བའི་ནམ་ཚོད་ཙམ་ན་སྡུག་བསྔལ་དང ། ཀུན་འབྱུང་བ་ནུབ་པར་བྱ་བ་དང ། ཟག་པ་ཟད་པ་ཤེས་པ་མཐོང་བའི་རིག་པ་མངོན་དུ་བྱ་བའི་ཕྱིར་སེམས་མངོན་པར་སྒྲུབ་ཅིང་མངོན་པར་གཏོད་དེ། དེ་འདི་སྙམ་དུ་སེམས་ཏེ། ཀྱེ་མ་འཇིག་རྟེན་འདི་ནི་འདི་ལྟ་སྟེ། སྐྱེ་བ་དང ། རྒ་བ་དང ། འཆི་བ་དང ། འཆི་འཕོ་བ་དང ། སྐྱེ་བས་སྡུག་བསྔལ་བར་གྱུར་པ་ཡིན་ན། འོན་ཀྱང་རྒ་བ་དང ། ན་བ་དང ། འཆི་བ་ལ་སོགས་པའི་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་འདི་ལས་འབྱུང་བར་བྱ་བ་མི་ཤེས་ཏེ། ཨེ་མའོ་རྒ་བ་དང ། ན་བ་དང ། འཆི་བ་ལ་སོགས་པ་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་འདི་ཐམས་ཅད་ཟད་པར་བྱ་བར་ཤེས་ན་ཅི་མ་རུང་སྙམ་ནས། དེ་ནས་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད་པས་རྒ་བ་དང་འཆི་བ་བྱུང ། རྒ་བ་དང་འཆི་བའི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་བསམས་ཏེ། སྐྱེ་བ་ཡོད་པས་རྒ་ཤི་བྱུང་སྟེ། རྒ་ཤིའི་རྐྱེན་ནི་སྐྱེ་བ་ཡིན་ནོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད་པས་སྐྱེ་བ་བྱུང ། སྐྱེ་བའི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་བསམས་ཏེ། སྲིད་པ་ཡོད་པས་སྐྱེ་བ་བྱུང་སྟེ། སྐྱེ་བའི་རྐྱེན་ནི་སྲིད་པ་ཡིན་ནོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད་པས་སྲིད་པ་བྱུང ། སྲིད་པའི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་བསམས་ཏེ། ལེན་པ་ཡོད་པས་སྲིད་པ་བྱུང་སྟེ། སྲིད་པའི་རྐྱེན་ནི་ལེན་པ་ཡིན་ནོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད 41.189b པས་ལེན་པ་བྱུང ། ལེན་པའི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་བསམས་ཏེ། སྲེད་པ་ཡོད་པས་ལེན་པ་བྱུང་སྟེ། ལེན་པའི་རྐྱེན་ནི་སྲེད་པ་ཡིན་ནོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད་པས་སྲེད་པ་བྱུང ། སྲེད་པའི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་བསམས་ཏེ། ཚོར་བ་ཡོད་པས་སྲེད་པ་བྱུང་སྟེ། སྲེད་པའི་རྐྱེན་ནི་ཚོར་བ་ཡིན་ནོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད་པས་ཚོར་བ་བྱུང ། ཚོར་བའི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་བསམས་ཏེ། རེག་པ་ཡོད་པས་ཚོར་བ་བྱུང་སྟེ། ཚོར་བའི་རྐྱེན་ནི་རེག་པ་ཡིན་ནོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད་པས་རེག་པ་བྱུང ། རེག་པའི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་བསམས་ཏེ། སྐྱེ་མཆེད་དྲུག་ཡོད་པས་རེག་པ་བྱུང་སྟེ། རེག་པའི་རྐྱེན་ནི་སྐྱེ་མཆེད་དྲུག་ཡིན་ནོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད་པས་སྐྱེ་མཆེད་དྲུག་བྱུང ། སྐྱེ་མཆེད་དྲུག་གི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་སེམས་ཏེ། མིང་དང་གཟུགས་ཡོད་པས་སྐྱེ་མཆེད་དྲུག་བྱུང་སྟེ། སྐྱེ་མཆེད་དྲུག་གི་རྐྱེན་ནི་མིང་དང་གཟུགས་ཡིན་ནོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད་པས་མིང་དང་གཟུགས་བྱུང ། མིང་དང་གཟུགས་ཀྱི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་བསམས་ཏེ། རྣམ་པར་ཤེས་པ་ཡོད་པས་མིང་དང་གཟུགས་བྱུང་སྟེ། མིང་དང་གཟུགས་ཀྱི་རྐྱེན་ནི་རྣམ་པར་ཤེས་པ་ཡིན་ནོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད་པས་རྣམ་པར་ཤེས་པ་བྱུང ། རྣམ་པར་ཤེས་པའི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་བསམས་ཏེ། འདུ་བྱེད་ཡོད་པས་རྣམ་པར་ཤེས་པ་བྱུང་སྟེ། རྣམ་པར་ཤེས་པའི་རྐྱེན་ནི་འདུ་བྱེད 41.190a ཡིན་ནོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་ཡོད་པས་འདུ་བྱེད་བྱུང ། འདུ་བྱེད་ཀྱི་རྐྱེན་ནི་གང་ཡིན་སྙམ་ནས། དེས་འདི་སྙམ་དུ་བསམས་ཏེ། མ་རིག་པ་ཡོད་པས་འདུ་བྱེད་བྱུང་སྟེ། འདུ་བྱེད་ཀྱི་རྐྱེན་ནི་མ་རིག་པ་ཡིན་ནོ་སྙམ་མོ། །དེ་ལྟར་བྱང་ཆུབ་སེམས་དཔའ་འདི་སྙམ་དུ་སེམས་ཏེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་།སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་འདི་འབྱུང་བར་འགྱུར་རོ་སྙམ་མོ། །དགེ་སློང་དག་སྔོན་མ་ཐོས་པའི་ཆོས་རྣམས་ལ་ཀུན་འབྱུང་ཀུན་འབྱུང་ཞེས་ཚུལ་བཞིན་ཡིད་ལ་བྱེད་ཅིང་མང་དུ་བྱེད་པས་བྱང་ཆུབ་སེམས་དཔའི་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས་སོ། །ཤེས་རབ་སྐྱེས་སོ། །སྣང་བ་བྱུང་ངོ ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་མེད་པས་རྒ་ཤི་མེད་པར་འགྱུར། གང་འགགས་པས་རྒ་ཤི་འགག་སྙམ་ནས། དེས་འདི་སྙམ་དུ་བསམས་ཏེ། སྐྱེ་བ་མེད་ན་རྒ་ཤི་མེད་པར་འགྱུར་ཏེ། སྐྱེ་བ་འགགས་པས་རྒ་ཤི་འགག་གོ་སྙམ་མོ། །དེ་ནས་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་མེད་པས་སྐྱེ་བ་མེད་པར་འགྱུར། གང་འགགས་པས་སྐྱེ་བ་འགག་སྙམ་ནས། དེས་འདི་སྙམ་དུ་བསམས་ཏེ། སྲིད་པ་མེད་ན་སྐྱེ་བ་མེད་པར་འགྱུར་ཏེ། སྲིད་པ་འགགས་པས་སྐྱེ་བ་འགག་གོ་སྙམ་མོ། །དེ་ནས་ཡང 41.190b བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་མེད་པས་ཞེས་བྱ་བ་ནས་རྒྱས་པར་སྦྱར་ཏེ། འདུ་བྱེད་མེད་པར་འགྱུར། གང་འགགས་པས་འདུ་བྱེད་འགག་སྙམ་པའི་བར་དུའོ། །དེས་འདི་སྙམ་དུ་བསམས་ཏེ། མ་རིག་པ་མེད་པས་འདུ་བྱེད་མེད་པར་འགྱུར་ཏེ། མ་རིག་པ་འགགས་པས་འདུ་བྱེད་འགག་གོ། །འདུ་བྱེད་འགགས་པས་རྣམ་པར་ཤེས་པ་འགག་གོ་ཞེས་བྱ་བ་ནས། སྐྱེ་བ་འགགས་པས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འགག་པར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་འདི་འགག་པར་འགྱུར་རོ་སྙམ་པའི་བར་དུའོ། །དགེ་སློང་དག་དེ་ལྟར་སྔོན་མ་ཐོས་པའི་ཆོས་རྣམས་ལ་ཚུལ་བཞིན་ཡིད་ལ་བྱེད་ཅིང་མང་དུ་བྱེད་པས་བྱང་ཆུབ་སེམས་དཔའི་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ ། །དགེ་སློང་དག་ངས་དེའི་ཚེ་འདི་ནི་ཟག་པ་སྡུག་བསྔལ་ལོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་ནི་ཟག་པའི་ཀུན་འབྱུང་བའོ། །འདི་ནི་ཟག་པ་འགོག་པའོ། །འདི་ནི་ཟག་པ་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་ནི་འདོད་པའི་ཟག་པའོ། །འདི་ནི་སྲེད་པའི་ཟག་པའོ། །འདི་ནི་མ་རིག་པའི་ཟག་པའོ། །འདི་ནི་ལྟ་བའི་ཟག་པའོ། །འདིར་ཟག་པ་མ་ལུས་པར་འགག་གོ། །འདིར་ཟག་པ་མ་ལུས་པར་མི་སྣང་བར་འགྱུར་ཞིང་ནུབ་པར་འགྱུར་རོ། །འདི་ནི་མ་རིག་པའོ། །འདི་ནི་མ་རིག་པའི་ཀུན་འབྱུང་བའོ། །འདི་ནི་མ་རིག་པ་འགོག་པའོ། །འདི་ནི་མ་རིག་པ་འགོག་པར་འགྲོ་བའི་ལམ་མོ་ཞེས་ཡང་དག་པར་ཇི་ལྟ་བ་བཞིན་དུ་ཤེས་སོ། །འདིར་མ་རིག་པ་མ་ལུས་པར་མི་སྣང་བར་འགྱུར་ཏེ་ནུབ་པར་འགྱུར་རོ་ཞེས་བྱ་བར་དེ་བཞིན་དུ་སྦྱར་རོ། །འདི་དག་ནི་འདུ་བྱེད་རྣམས་སོ། ། 41.191a འདི་ནི་འདུ་བྱེད་ཀྱི་ཀུན་འབྱུང་བའོ། །འདི་ནི་འདུ་བྱེད་འགོག་པའོ། །འདི་ནི་འདུ་བྱེད་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་ནི་རྣམ་པར་ཤེས་པའོ། །འདི་ནི་རྣམ་པར་ཤེས་པའི་ཀུན་འབྱུང་བའོ། །འདི་ནི་རྣམ་པར་ཤེས་པ་འགོག་པའོ། །འདི་ནི་རྣམ་པར་ཤེས་པ་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་ནི་མིང་དང་གཟུགས་སོ། །འདི་ནི་མིང་དང་གཟུགས་ཀྱི་ཀུན་འབྱུང་བའོ། །འདི་ནི་མིང་དང་གཟུགས་འགོག་པའོ། །འདི་ནི་མིང་དང་གཟུགས་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་ནི་སྐྱེ་མཆེད་དྲུག་གོ། །འདི་ནི་སྐྱེ་མཆེད་དྲུག་གི་ཀུན་འབྱུང་བའོ། །འདི་ནི་སྐྱེ་མཆེད་དྲུག་འགོག་པའོ། །འདི་ནི་སྐྱེ་མཆེད་དྲུག་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་ནི་རེག་པའོ། །འདི་ནི་རེག་པའི་ཀུན་འབྱུང་བའོ། །འདི་ནི་རེག་པ་འགོག་པའོ། །འདི་ནི་རེག་པ་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་ནི་ཚོར་བའོ། །འདི་ནི་ཚོར་བའི་ཀུན་འབྱུང་བའོ། །འདི་ནི་ཚོར་བ་འགོག་པའོ། །འདི་ནི་ཚོར་བ་འགོག་པར་འགྲོ་བའི་ལམ་མོ། །འདི་ནི་སྲེད་པའོ། །འདི་ནི་སྲེད་པའི་ཀུན་འབྱུང་བའོ། །འདི་ནི་སྲེད་པ་འགོག་པའོ། །འདི་ནི་སྲེད་པ་འགོག་པར་འགྲོ་བའི་ལམ་མོ། །འདི་ནི་ལེན་པའོ། །འདི་ནི་ལེན་པའི་ཀུན་འབྱུང་བའོ། །འདི་ནི་ལེན་པ་འགོག་པའོ། །འདི་ནི་ལེན་པ་འགོག་པར་འགྲོ་བའི་ལམ་མོ། །འདི་ནི་སྲིད་པའོ། །འདི་ནི་སྲིད་པའི་ཀུན་འབྱུང་བའོ། །འདི་ནི་སྲིད་པ་འགོག་པའོ། །འདི་ནི་སྲིད་པ་འགོག་པར་འགྲོ་བའི་ལམ་མོ། །འདི་ནི་སྐྱེ་བའོ། །འདི་ནི་སྐྱེ་བའི་ཀུན་འབྱུང་བའོ། །འདི་ནི་སྐྱེ་བ་འགོག་པའོ། །འདི་ནི་སྐྱེ་བ་འགོག་པར་འགྲོ་བའི་ལམ་མོ། །འདི་ནི་རྒ་བའོ། །འདི་ནི་རྒ་བའི་ཀུན་འབྱུང་བའོ། །འདི་ནི་རྒ་བ་འགོག་པའོ། །འདི་ནི་རྒ་བ་འགོག་པར་འགྲོ་བའི་ལམ་མོ། །འདི་ནི་འཆི་བའོ། །འདི 41.191b ནི་འཆི་བའི་ཀུན་འབྱུང་བའོ། །འདི་ནི་འཆི་བ་འགོག་པའོ། །འདི་ནི་འཆི་བ་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་དག་ནི་མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་འདི་འབྱུང་བར་འགྱུར་བ་ནས། འགོག་པར་འགྱུར་རོ་ཞེས་བྱ་བའི་བར་དུ་ཡང་དག་པ་ཇི་ལྟ་བ་བཞིན་དུ་ཤེས་སོ། །འདི་ནི་སྡུག་བསྔལ་ལོ། །འདི་ནི་སྡུག་བསྔལ་གྱི་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །དགེ་སློང་དག་དེ་ལྟར་བྱང་ཆུབ་སེམས་དཔས་ནམ་གྱི་ཆ་སྨད་སྐྱ་རེང་འཆར་བའི་དུས་ཀྱི་ཚེ་རྔ་བརྡུང་བའི་ནམ་ཚོད་ཙམ་ན་སྐྱེས་བུ་དང ། སྐྱེས་བུ་དམ་པ་དང ། སྐྱེས་བུ་མཆོག་དང ། སྐྱེས་བུ་ཆེན་པོ་དང ། སྐྱེས་བུ་ཁྱུ་མཆོག་དང ། སྐྱེས་བུ་གླང་པོ་དང ། སྐྱེས་བུ་སེང་གེ་དང ། སྐྱེས་བུ་སྐྱེས་མཆོག་དང ། སྐྱེས་བུ་དཔའ་བོ་དང ། སྐྱེས་བུ་རྟུལ་ཕོད་དང ། སྐྱེས་བུ་ཅང་ཤེས་དང ། སྐྱེས་བུ་པད་མ་དང ། སྐྱེས་བུ་པད་མ་དཀར་པོ་དང ། སྐྱེས་བུ་ལྗིད་ཁྱེར་བ་དང ། སྐྱེས་བུ་ཁ་ལོ་སྒྱུར་བ་བླ་ན་མེད་པས་འཕགས་པའི་ཡེ་ཤེས་ཀྱིས་ཤེས་པར་བྱ་བ་དང ། ཁོང་དུ་ཆུད་པར་བྱ་བ་དང ། ཐོབ་པར་བྱ་བ་དང ། བལྟ་བར་བྱ་བ་དང ། མངོན་དུ་བྱ་བ་གང་ཅི་ཡང་རུང་སྟེ། དེ་ཐམས་ཅད་སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་རིག་པ་གསུམ་ཐོབ་བོ། །དགེ་སློང་དག་དེ་ནས་ལྷའི་བུ་རྣམས་ཀྱིས་སྨྲས་པ། གྲོགས་པོ་དག་བཅོམ་ལྡན་འདས་མངོན་པར། རྫོགས་པར་སངས་རྒྱས་ཀྱིས་མེ་ཏོག་གཏོར་ཅིག་ཅེས་བྱས་སོ། །དེ་ན་ལྷའི་བུ་གང་དག་སྔོན་གྱི་སངས་རྒྱས 41.192a མཐོང་བ་དེ་དག་འདུས་ནས་དེ་དག་གིས་དེ་དག་ལ་སྨྲས་པ། གྲོགས་པོ་དག་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱང་བརྡའ་མཛད་ཅིང་མངོན་པར་སྤྲུལ་པ་མཛད་ཀྱིས། བཅོམ་ལྡན་འདས་ཀྱིས་བརྡ་མ་མཛད་ཀྱི་བར་དུ་མེ་ཏོག་མ་གཏོར་ཅིག་།དགེ་སློང་དག་དེ་ནས་དེ་བཞིན་གཤེགས་པས་ལྷའི་བུ་དེ་དག་ཡིད་གཉིས་སུ་གྱུར་པར་མཁྱེན་ནས། ཤིང་ཏ་ལ་བདུན་ཙམ་དུ་ནམ་མཁའ་ལ་མངོན་པར་འཕགས་ཏེ། དེར་བཞུགས་ནས་ལམ་གྱི་རྒྱུན་ནི་ཆད་དོ། །རྡུལ་ནི་ཉེ་བར་ཞིའོ། །ཟག་པ་ནི་སྐམས་ཏེ་ཡང་མི་ཟག་གོ། །ལམ་ནི་ཆད་དེ་ཡང་མི་འཇུག་གོ། །འདི་ནི་སྡུག་བསྔལ་གྱི་མཐའ་ཞེས་བྱའོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་ལྷའི་བུ་དེ་དག་གིས་དེ་བཞིན་གཤེགས་པ་ལ་ལྷའི་མེ་ཏོག་གིས་གཏོར་ཏེ། དེ་ནས་ལྷའི་མེ་ཏོག་པུས་མོ་ནུབ་ཙམ་དུ་བཀྲམ་པར་གྱུར་ཏོ། །དགེ་སློང་དག་དེ་ལྟར་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ཏེ། མུན་པ་མུན་ནག་དང་ནི་བྲལ། སྲེད་པ་ནི་རྣམ་པར་སྦྱངས། ལྟ་བ་ནི་བཟློག་།ཉོན་མོངས་པ་རྣམས་ནི་རྣམ་པར་དཀྲུགས། ཟུག་རྔུ་ནི་ཕྱུང ། མདུད་པ་ནི་བཀྲོལ། ང་རྒྱལ་གྱི་རྒྱལ་མཚན་ནི་བསྙལ། ཆོས་ཀྱི་རྒྱལ་མཚན་ནི་བསྒྲེང ། བག་ལ་ཉལ་རྣམས་ནི་བཏོན། ཆོས་ཀྱི་དེ་བཞིན་ཉིད་ནི་མཁྱེན། ཡང་དག་པའི་མཐའ་ནི་ཐུགས་སུ་ཆུད། ཆོས་ཀྱི་དབྱིངས་ནི་ཡོངས་སུ་མཁྱེན། སེམས་ཅན་གྱི་ཁམས་ནི་རྣམ་པར་བཀོད། ཡང་དག་པ་ཉིད་དུ་ངེས་པའི་ཕུང་པོ་ནི་བསྔགས། ལོག་པ་ཉིད་དུ་ངེས་པའི་ཕུང་པོ་ནི་སྨད། མ་ངེས་པའི་ཕུང་པོ་ནི་ཡོངས་སུ་བཟུང ། སེམས་ཅན་གྱི་དབང་པོ་རྣམས་ལ་ནི་རྣམ་པར་གཟིགས། སེམས་ཅན་གྱི་སྤྱོད་པ་ནི་ཡོངས་སུ་མཁྱེན། སེམས་ཅན་གྱི་ནད་གསོ་བ་ནི་ཐུགས་སུ་ཆུད། བདུད་རྩིའི་སྨན་སྦྱར་བ་ནི་གྲུབ། སྨན་པའི་རྒྱལ་པོར་ནི་བྱུང ། སྡུག 41.192b བསྔལ་ཐམས་ཅད་ལས་རབ་ཏུ་ཐར་པར་མཛད་པ་པོར་ནི་གྱུར། མྱ་ངན་ལས་འདས་པའི་བདེ་བ་ལ་འཇོག་པ་པོར་ནི་གྱུར། དེ་བཞིན་གཤེགས་པའི་སྙིང་པོ། དེ་བཞིན་གཤེགས་པའི་ཆོས་ཀྱི་རྒྱལ་པོའི་ཁྲི་ཆེན་པོ་ལ་ནི་བཞུགས། རྣམ་པར་གྲོལ་བའི་ཐབས་ནི་བརྙེས། ཐམས་ཅད་མཁྱེན་པ་ཉིད་ཀྱི་གྲོང་ཁྱེར་དུ་ནི་ཞུགས། སངས་རྒྱས་ཐམས་ཅད་དང་ཡང་དག་པར་ནི་འདྲེས། ཆོས་ཀྱི་དབྱིངས་ཐུགས་སུ་ཆུད་པ་ལས་དབྱེར་མེད་པར་ནི་གྱུར་ཏོ། །དགེ་སློང་དག་དེ་བཞིན་གཤེགས་པ་ངས་འདིར་ཐོག་མ་མེད་པའི་སྐྱེ་བ་དང ། རྒ་བ་དང ། འཆི་བའི་སྡུག་བསྔལ་མཐར་ཕྱུང་ངོ་ཞེས་ཞག་བདུན་པ་དང་པོ་ལ་བྱང་ཆུབ་ཀྱི་སྙིང་པོ་དེ་ཉིད་ན་བཞུགས་སོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅཝ་ལྔ་པ། དགེ་སློང་དག་བྱང་ཆུབ་སེམས་དཔས་ཐམས་ཅད་མཁྱེན་པ་ཉིད་ཐོག་མ་ཐག་ཏུ་དེ་ནས་སྐད་ཅིག་དེ་ཉིད་ལ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་སྐད་ཅིག་དེ་དང ། ཐང་ཅིག་དེ་དང ། ཡུད་ཙམ་དེ་ལ་མཆོག་ཏུ་བདེ་བ་དང་ལྡན་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱང་སྣང་བ་ཆེན་པོས་སྣང་བར་བྱས་ནས། འཇིག་རྟེན་གྱི་བར་སྡིག་པ་སྡིག་པས་ཁྱབ་པ་མུན་ནག་ཅེས་བྱ་བ་སྔ་མ་བཞིན་ནོ། །ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་སོ། །ལྡེག་།རབ་ཏུ་ལྡེག་།ཀུན་ཏུ་རབ་ཏུ་ལྡེག་གོ། །འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་སོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར་རོ། །སངས་རྒྱས་ཐམས་ཅད་ཀྱིས་ཀྱང་དེ་བཞིན་གཤེགས་པ 41.193a མངོན་པར་རྫོགས་པར་སངས་རྒྱས་པ་ལ་ལེགས་སོ་ཞེས་བྱ་བ་བྱིན་ཏེ། ཆོས་ཀྱི་དགབ་པ་དག་ཀྱང་སྐུར་རོ། །ཆོས་ཀྱི་དགབ་པ་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་རིན་པོ་ཆེའི་གདུགས་གཅིག་གིས་ཁེབས་པར་གྱུར་ཏེ། རིན་པོ་ཆེའི་གདུགས་དེ་ལས་ཀྱང་རྣམ་པ་འདི་ལྟ་བུའི་འོད་ཟེར་གྱི་དྲ་བ་བྱུང་སྟེ། དེ་དག་གིས་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་སྣང་བར་བྱས་ནས་ཕྱོགས་བཅུའི་བྱང་ཆུབ་སེམས་དཔའ་རྣམས་དང ། ལྷའི་བུ་རྣམས་ཀྱང་ཀུན་དགའ་བའི་སྒྲ་རྗོད་པར་གྱུར་ཏེ། སེམས་ཅན་མཁས་པའི་པད་མ་ཡེ་ཤེས་ཀྱི་མཚོ་ལས་བྱུང་བ། འཇིག་རྟེན་གྱི་ཆོས་རྣམས་ཀྱིས་མ་གོས་པ་བྱུང་ངོ ། །ཐུགས་རྗེ་ཆེན་པོའི་སྤྲིན་ཡང་དག་པར་འཕགས་ཏེ། ཆོས་ཀྱི་དབྱིངས་ཀྱི་གནས་ཁྱབ་པར་མཛད་ནས། འདུལ་བའི་སྐྱེ་བོའི་སྨན་གྱི་ཆོས་ཀྱི་ཆར། དགེ་བའི་རྩ་བའི་ས་བོན་ཐམས་ཅད་ཀྱི་མྱུ་གུ་སྐྱེད་པ། དད་པའི་མྱུ་གུ་རྣམས་རྣམ་པར་འཕེལ་བར་བྱེད་པ། རྣམ་པར་གྲོལ་བའི་འབྲས་བུ་རྣམས་འབྱིན་པར་བྱེད་པའི་ཆར་འབེབས་པར་འགྱུར་རོ་ཞེས་འཛེར་ཏོ། །དེ་ལ་འདི་སྐད་ཅེས་བྱ་སྟེ། སྐྱེས་བུ་སེང་གེ་དེ་ཡིས་དཔུང་བཅས་བདུད་བཏུལ་ཏེ། །སྟོན་པས་བསམ་གཏན་བདེ་བ་མངོན་དུ་མཛད་ནས་ནི། །གང་ཚེ་སྟོབས་བཅུས་རིག་པ་གསུམ་པོ་བརྙེས་གྱུར་ཚེ། །ཕྱོགས་བཅུའི་སངས་རྒྱས་ཞིང་མང་བྱེ་བ་གཡོས་པར་གྱུར། །ཆོས་འདོད་བྱང་ཆུབ་སེམས་དཔའ་གང་དག་ཡོངས་ལྷགས་པ། །ཞབས་ལ་གཏུགས་ཏེ་འདི་སྐད་ཚིག་སྨྲས་མ་མཉེལ་དམ། །བདག་ཅག་མངོན་སུམ་ཅི་འདྲ་ཤིན་དུ་འཇིགས་དཔུང་དེ། །ཤེས་རབ་བསོད་ནམས་སྟོབས་དང་བརྩོན་འགྲུས་སྟོབས་ཀྱིས་བཅོམ། །ཁྲག་ཁྲིག་ཞིང་ནས་སངས་རྒྱས་རྣམས་ཀྱིས་གདུགས་རྣམས་སྐུར། །དེས་པ་སྐྱེས་བུ་ཆེན་པོ་བདུད་ཀྱི་སྡེ་རྣམས་བཏུལ། །ཁྱེད་ཀྱིས་གནས་མཆོག་མཆི་མེད་མྱ་ངན་མེད་པ་བརྙེས། །སྲིད་པ་གསུམ་དུ་དམ་ཆོས 41.193b ཆར་པ་མྱུར་དུ་ཕོབ། །ཕྱོགས་བཅུའི་སེམས་ཅན་སྙིང་པོ་རྣམས་ཀྱིས་ཕྱག་བརྐྱང་སྟེ། །ཀ་ལ་པིང་ཀའི་སྒྲ་ཡི་གསུང་དུ་བརྗོད་པ་ནི། །བདག་ཅག་ཇི་ལྟར་བྱང་ཆུབ་ཐོབ་ལྟར་ཁྱོད་སངས་རྒྱས། །དཔེར་ན་མར་དང་མར་གྱི་སྙིང་ཀུ་མཚུངས་འདྲ་བཞིན། །དགེ་སློང་དག་དེ་ནས་འདོད་པ་ན་སྤྱོད་པའི་ལྷའི་བུ་མོ་དག་གིས་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་བཞུགས་པ་མངོན་པར་ཤེས་པ་བརྙེས་པ་དང ། བརྣག་པ་ཡོངས་སུ་རྫོགས་པ་དང ། གཡུལ་ལས་རྣམ་པར་རྒྱལ་བ་དང ། བདུད་ཕྱིར་རྒོལ་བ་ཕམ་པར་མཛད་པ་དང ། གདུགས་དང ། རྒྱལ་མཚན་དང ། བ་དན་བསྒྲེང་བ་དང ། དཔའ་བ་དང ། རྒྱལ་བ་འཕགས་པ་དང ། སྐྱེས་བུ་དང ། སྐྱེས་བུ་ཆེན་པོ་དང ། སྨན་པའི་མཆོག་དང ། ཟུག་རྔུ་འབྱིན་པ་ཆེན་པོ་དང ། སེང་གེ་ལྟར་མི་བསྙེངས་ཤིང་སྤུ་ཟིང་ཞེས་བྱེད་པ་མི་མངའ་བ་དང ། གླང་པོ་ལྟར་ཐུགས་ཤིན་དུ་དུལ་བ་དང ། དྲི་མ་གསུམ་སྤངས་པས་དྲི་མ་མི་མངའ་བ་དང ། རིག་པ་གསུམ་བརྙེས་པས་མཁྱེན་པ་པོ་དང ། ཆུ་བོ་བཞི་ལས་བརྒལ་བས་ཕ་རོལ་ཏུ་བྱོན་པ་དང ། རིན་པོ་ཆེའི་གདུགས་གཅིག་འཛིན་པས་རྒྱལ་རིགས་སུ་གྱུར་པ་དང ། སྡིག་པའི་ཆོས་སྤངས་པས་འཇིག་རྟེན་གསུམ་གྱི་བྲམ་ཟེར་གྱུར་པ་དང ། མ་རིག་པའི་སྒོང་ངའི་སྦུབས་བཅོམ་པས་དགེ་སློང་དུ་གྱུར་པ་དང ། ཆགས་པ་ཐམས་ཅད་ལས་ཡང་དག་པར་འདས་པས་དགེ་སྦྱོང་དུ་གྱུར་པ་དང ། ཉོན་མོངས་པ་བསལ་བས་གཙང་སྦྲ་ཅན་དུ་གྱུར་པ་དང ། རྒྱལ་མཚན་མ་བསྙལ་བས་དཔའ་བ་དང ། སྟོབས་བཅུ་མངའ་བའི་ཤིན་དུ་སྟོབས་དང་ལྡན་པ་དང ། རིན་པོ་ཆེའི་འབྱུང་གནས་ལྟར་ཆོས་རིན་པོ་ཆེ་ཐམས་ཅད་ཡོངས་སུ་རྫོགས་པར་རིག་ནས་བྱང་ཆུབ་ཀྱི་སྙིང་པོ་ལོགས་སུ་ཕྱོགས་ཏེ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འདི་ནི་ཤིང་གི་རྒྱལ་དྲུང་དུ། །བདུད་སྡེ་མངོན་དུ་ཕམ་མཛད་ནས། །རི་རབ་ལྟ་བུར་མི་གཡོ་བཞུགས། །བསྙེངས 41.194a པ་མི་མངའ་འབྲོས་མི་མཛད། །འདིས་ནི་བསྐལ་པ་བྱེ་མང་དུ། །སྦྱིན་དང་དུལ་དང་སྡོམ་པ་ཡིས། །བྱང་ཆུབ་དམ་པ་ཡང་དག་བསྒྲུབས། །དེས་ན་འདིར་ནི་དོ་མོད་མཛེས། །བྱང་ཆུབ་དམ་པ་ཚོལ་བ་ན། །འདི་ཡིས་བསྐལ་པ་བྱེ་མང་དུ། །ཚུལ་ཁྲིམས་བརྟུལ་ཞུགས་དཀའ་ཐུབ་ཀྱིས། །བརྒྱ་བྱིན་ཚངས་པ་ཟིལ་དུ་རླག་།འདི་ཡིས་བསྐལ་པ་བྱེ་མང་དུ། །བཟོད་པའི་སྟོབས་ཀྱི་གོ་མནབས་ཏེ། །སྡུག་བསྔལ་རྣམས་ནི་དང་དུ་བླངས། །དེས་ན་གསེར་མདོག་འོད་དང་ལྡན། །འདི་ཡིས་བསྐལ་པ་བྱེ་མང་དུ། །བརྩོན་འགྲུས་སྟོབས་དང་རྩལ་གྱིས་ནི། །གཞན་དག་ཕྱིར་བསྙིལ་མཛད་མཛད་དེ། །དེས་ན་བདུད་ཀྱི་སྡེ་ལས་རྒྱལ། །འདི་ཡིས་བསྐལ་པ་བྱེ་མང་དུ། །བསམ་གཏན་མངོན་ཤེས་ཡེ་ཤེས་ཀྱིས། །ཐུབ་པའི་དབང་པོ་ཡང་དག་མཆོད། །དེས་ན་དོ་མོད་འདི་ལ་མཆོད། །འདི་ཡིས་བསྐལ་པ་བྱེ་མང་དུ། །ཤེས་རབ་དང་ནི་གསན་པ་བསགས། །སེམས་ཅན་བྱེ་བ་ཕན་ཡང་བཏགས། །དེས་ན་བྱང་ཆུབ་མྱུར་དུ་བརྙེས། །འདི་ནི་ཕུང་པོའི་བདུད་ལས་རྒྱལ། །འཆི་བདག་ཉོན་མོངས་བདུད་ལས་རྒྱལ། །འདི་ནི་ལྷ་ཡི་བདུད་ལས་རྒྱལ། །དེས་འདི་མྱ་ངན་མི་འདའོ། །འདི་ནི་ཤིན་དུ་ལྷ་ཡི་ལྷ། །ལྷ་རྣམས་ཀྱིས་ཀྱང་མཆོད་པའི་ཆ། །འཇིག་རྟེན་གསུམ་ན་མཆོད་པའི་འོས། །བསོད་ནམས་དོན་དུ་གཉེར་བའི་ཞིང ། །འཆི་མེད་འབྲས་བུ་སྦྱིན་མཛད་པ། །འདི་ནི་སྦྱིན་གནས་དམ་པ་སྟེ། །འདི་ལ་སྦྱིན་པ་བཏང་ན་དེ། །བྱང་ཆུབ་དམ་པ་ཐོབ་བར་དུ། །བར་མ་དོར་ནི་ཆུད་མི་ཟ། །འདི་ཡིས་མཛོད་སྤུ་མཛེས་པ་ཡིས། །ཞིང་མང་བྱེ་བ་གསལ་བར་བགྱིད། །ཉི་ཟླ་དག་ཀྱང་ཟིལ་དུ་རླག་།སེམས་ཅན་རྣམས་ལ་སྣང་བར་གྱུར། །འདི་ཡིས་གཟུགས་ནི་གཟུགས་མཛེས་ཏེ། །གཟུགས་ཀྱི་དམ་པ་ལེགས་པའི་གཟུགས། །མཚན་མཆོག་མངའ་ཞིང་ཕན་པ་བཞེད། ། 41.194b འཇིག་རྟེན་གསུམ་ན་མཆོད་པའི་འོས། །འདི་སྤྱན་ཤིན་དུ་རྣམ་དག་སྟེ། །ཞིང་རྣམས་དང་ནི་སེམས་ཅན་ཚོགས། །སེམས་དང་ལྡན་དང་སེམས་མེད་པ། །མང་པོ་དག་ལ་རང་བྱུང་གཟིགས། །འདི་སྙན་ཤིན་དུ་རྣམ་དག་སྟེ། །ལྷ་ཡི་དག་དང་མི་ཡི་དང ། །རྒྱལ་བ་རྣམས་ཀྱི་ཆོས་ཀྱི་དང ། །མཐའ་ཡས་པ་ཡི་སྒྲ་རྣམས་གསན། །འདི་ཡི་ལྗགས་ནི་ཡངས་པ་སྟེ། །ཀ་ལ་པིང་ཀ་འཇམ་པའི་དབྱངས། །འཆི་མེད་རབ་ཏུ་ཞིར་འགྲོ་བའི། །ཆོས་ནི་འདི་ལས་བདག་ཅག་མཉན། །བདུད་ཀྱི་སྡེ་རྣམས་གཟིགས་གྱུར་ཀྱང ། །དེ་ཡི་ཐུགས་ནི་འཁྲུགས་མི་མངའ། །ལྷ་ཡི་ཚོགས་རྣམས་གཟིགས་གྱུར་ཀྱང ། །ཤིན་དུ་ཐུགས་གཞུངས་དགྱེས་མི་མངའ། །འདི་ཡིས་མཚོན་དང་མདའ་རྣམས་ཀྱིས། །བདུད་ཀྱི་སྡེ་ལས་རྒྱལ་མ་ལགས། །བདེན་པ་བརྟུལ་ཞུགས་དཀའ་ཐུབ་ཀྱིས། །སྡང་བའི་གྱད་ལས་འདི་རྒྱལ་ལོ། །གདན་ལས་མ་བསྐྱོད་བཞིན་དུ་ནི། །དེ་ཡི་སྐུ་ལ་གནོད་མ་བྱུང ། །དེ་ཡི་སྐབས་སུ་བྱམས་མི་མངའ། །ཞེ་སྡང་གྱུར་པའང་མ་ལགས་སོ། །གང་དག་ཁྱོད་ལས་ཆོས་ཐོས་ནས། །སྒྲུབ་པ་བགྱིད་པར་འཚལ་བ་ཡི། །ལྷ་དང་མི་རྣམས་དེ་དག་ནི། །རྙེད་པ་ལེགས་པར་རྙེད་པ་ལགས། །རྒྱལ་བ་བསོད་ནམས་གཟི་མངའ་བ། །ཁྱོད་ལ་བསྟོད་པའི་བསོད་ནམས་ཀྱིས། །མི་ཡི་ཟླ་བ་ཁྱོད་འདྲ་བར། །ཀུན་ཀྱང་མྱུར་དུ་འགྱུར་བར་ཤོག་།སྐྱེས་བུ་ཁྱུ་མཆོག་འདྲེན་པས་བྱང་ཆུབ་སངས་རྒྱས་ནས། །ཁྲག་ཁྲིག་ཞིང་རྣམས་བསྐྱོད་ཅིང་བདུད་ཀྱང་ཕམ་མཛད་དེ། །ཚངས་པའི་དབྱངས་དང་ཀ་ལ་པིང་ཀའི་སྒྲ་སྐད་ཀྱིས། །འདྲེན་པས་ཐོག་མར་ཚིགས་སུ་བཅད་པ་འདི་གསུངས་སོ། །བསོད་ནམས་རྣམ་སྨིན་བདེ་སྟེ་སྡུག་བསྔལ་ཐམས་ཅད་སེལ། །བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །བདུད་བཅོམ་ནས་ནི་བྱང་ཆུབ་མྱུར་དུ་རེག་པར་འགྱུར། །མྱ་ངན་འདས་པ་ཞི་བ་བསིལ་བའི་དངོས་པོ་ཐོབ། །དེ་བས་བསོད་ནམས་བྱ་བས་ཆོག་པར 41.195a སུ་ཞིག་འཛིན། །བདུད་རྩི་ཆོས་མཉན་པས་ཀྱང་ཆོག་པར་སུ་ཞིག་འཛིན། །སྐྱེ་བོ་མེད་པའི་ནགས་གནས་ཆོག་པར་སུ་ཞིག་འཛིན། །སེམས་ཅན་དོན་བྱ་བས་ཀྱང་ཆོག་པར་སུ་ཞིག་འཛིན། །བྱང་ཆུབ་སེམས་དཔས་ལག་པ་བརྐྱང་སྟེ་ཚིག་བརྗོད་པ། །མཆོད་པ་བྱས་ཀྱིས་རང་རང་དག་གི་ཞིང་དུ་དེང ། །ཀུན་གྱིས་དེ་བཞིན་གཤེགས་པའི་ཞབས་ལ་ཕྱག་འཚལ་ནས། །སྣ་ཚོགས་བཀོད་པས་རང་རང་དག་གི་ཞིང་དུ་དོང ། །དཔུང་རྣམས་ཕན་ཚུན་ཆེན་པོ་བྱུང་བ་དེ་གཟིགས་ནས། །བདེ་བར་གཤེགས་པ་ཚུལ་དུ་ཤིས་པར་རྣམ་པར་རོལ། །དཔུང་བཅས་བདུད་ལས་རྒྱལ་ཏེ་བདུད་རྩི་རེག་ཤོག་ཅེས། །སེམས་ཅན་རྣམས་ཀྱིས་མཚུངས་མེད་སེམས་ཀྱིས་བྱང་ཆུབ་སྨོན། །དགེ་སློང་དག་དེ་བཞིན་གཤེགས་པ་བྱང་ཆུབ་ཀྱི་ཤིང་དྲུང་ན་སེང་གེའི་གདན་ལ་བཞུགས་ཏེ་མངོན་པར་རྫོགས་པར་སངས་རྒྱས་ནས། སྐད་ཅིག་དེ་ལ་སངས་རྒྱས་ཀྱི་རྣམ་པར་རོལ་པ་དཔག་ཏུ་མེད་པ་མཛད་དེ། དེ་དག་ནི་བསྐལ་པར་ཡང་བསྟན་པར་སླ་བ་མ་ཡིན་ནོ། །དེ་ལ་འདི་སྐད་ཅེས་བྱ་སྟེ། ས་ནི་ལག་མཐིལ་ལྟ་བུར་མཉམ་པར་གནས་པར་གྱུར། །འདབ་མ་བརྒྱ་པ་རྒྱས་པ་འོད་དང་ལྡན་པ་བྱུང ། །ལྷ་རྣམས་བརྒྱ་སྟོང་བྱང་ཆུབ་སྙིང་པོར་རབ་ཏུ་འདུད། །སེང་གེ་སྒྲ་ཡི་མཚན་མ་དང་པོ་འདི་འདིར་མཐོང ། །སྟོང་གསུམ་ཤིང་བརྒྱ་དག་དང་རི་རྣམས་དུ་མ་དང ། རི་ཡི་རྒྱལ་པོ་ལྷུན་པོ་བྱང་ཆུབ་སྙིང་པོར་འདུད། །སྟོབས་བཅུའི་གན་དུ་སོང་སྟེ་བརྒྱ་བྱིན་ཚངས་པ་འདུད། །འདི་ཡང་མི་ཡི་སེང་གེ་བྱང་ཆུབ་སྙིང་པོར་རོལ། །སྐུ་ལས་འོད་ཟེར་བརྒྱ་སྟོང་དག་ནི་རབ་བཀྱེ་སྟེ། །རྒྱལ་བའི་ཞིང་མཆོག་ཁྱབ་ནས་ངན་སོང་གསུམ་པོ་ཞི། །དེ་ནས་སྐད་ཅིག་ཡུད་ཙམ་མི་ཁོམ་སྐམས་པར་གྱུར། །སེམས་ཅན་གང་ལའང་ཐ་བ་རྒྱགས་སྡང་གནོད་པ་མེད། །འདི་ཡང་མི་ཡི་སེང་གེ་གདན་ལ་བཞུགས་པའི་རོལ། །ཉི་ཟླ་ནོར་བུ་མེ་དང་གློག་དང་ལྷ་ཡི་འོད། །འོད་དང་ལྡན་པའི 41.195b རླབས་ཀྱིས་ཟིལ་མནན་ལམ་མེ་མིན། །འགྲོ་བ་གང་གིས་ཀྱང་ནི་སྟོན་པའི་གཙུག་མི་མཐོང ། །འདི་ཡང་མི་ཡི་སེང་གེ་གདན་ལ་བཞུགས་པའི་རོལ། །ཕྱག་གི་མཐིལ་གྱིས་རེག་ནས་ས་ཡང་རྣམ་དྲུག་གཡོས། །དེ་ཡི་བདུད་ཀྱི་སྡེ་རྣམས་ཤིང་བལ་བཞིན་དུ་དཀྲུགས། །བདུད་ནི་མདའ་ཐོགས་ས་ལ་རི་མོ་གང་འདྲི་བ། །འདི་ཡང་མི་ཡི་སེང་གེ་གདན་ལ་རོལ་པ་ལགས། །མངོན་པར་རྫོགས་པར་བྱང་ཆུབ་པའི་ལེའུ་ཞེས་བྱ་བ་སྟེ་ཉི་ཤུ་རྩ་གཉིས་པའོ།། །།དེ་ནས་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་བསྐོར་བ་བྱས་ཏེ། ལྷའི་ཙན་དན་གྱི་ཕྱེ་མའི་ཆར་མངོན་པར་ཕབ་ནས། ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་བསྟོད་དོ། །འཇིག་རྟེན་གསལ་བར་མཛད་པ་བྱུང ། །འཇིག་རྟེན་མགོན་པོ་འོད་མཛད་པ། །འཇིག་རྟེན་ལྡོངས་པར་གྱུར་པ་ལ། །ཉོན་མོངས་སྤངས་པ་མིག་སྦྱིན་པ། །ཁྱོད་ནི་གཡུལ་ལས་རྣམ་པར་རྒྱལ། །བསོད་ནམས་དག་གིས་དགོངས་པ་རྫོགས། །དཀར་པོའི་ཆོས་རྣམས་ཀུན་དུ་རྫོགས། །ཁྱོད་ནི་འགྲོ་བ་ཚིམ་མཛད་འགྱུར། །སྡིག་པ་མི་མངའ་འདམ་ལས་རྒལ། །གཽ་ཏ་མ་ནི་ཐང་ལ་བཞུགས། །སེམས་ཅན་གཞན་དག་རླུང་ཆེན་གྱིས། །ཁྱེར་བ་རྣམས་ཀྱང་སྒྲོལ་བར་འགྱུར། །ཤེས་རབ་ཆེན་པོ་ཁྱོད་འཕགས་ཏེ། །འཇིག་རྟེན་དག་ན་ཟླ་མ་མཆིས། །འཇིག་རྟེན་ཆོས་ཀྱིས་ཁྱོད་མི་གོས། །ཆབ་ན་མཆིས་པའི་པད་མ་བཞིན། །འཇིག་རྟེན་རིང་ནས་གཉིད་ལོག་འདི། །མུན་པའི་ཕུང་པོས་གཏིབས་པ་ལ། །ཁྱོད་ནི་ཤེས་རབ་སྒྲོན་མེ་ཡིས། །རབ་ཏུ་སད་པར་མཛད་པ་སྤྱོད། །འཚོ་བའི་འཇིག་རྟེན་རིང་ནས་ནི། །ཉོན་མོངས་ནད་ཀྱིས་གཟིར་བ་ལ། །ནད་རྣམས་ཀུན་ལས་ཐར་མཛད་པ། །སྨན་པའི་རྒྱལ་པོ་ཡང་དག་བྱུང ། །འཇིག་རྟེན་མགོན་པོ་ཁྱོད་བྱུང་བས། །མི་ཁོམ་རྣམས་ནི 41.196a སྟོངས་པར་འགྱུར། །ལྷ་རྣམས་དང་ནི་མི་དག་ཀྱང ། །བདེ་བ་རྣམས་དང་ལྡན་པར་འགྱུར། །སྐྱེས་བུ་ཁྱུ་མཆོག་དེས་པ་ཁྱོད། །ལྟ་བར་གང་དག་འདོང་བགྱིད་པ། །དེ་དག་བསྐལ་པ་སྟོང་རྣམས་སུ། །ནམ་ཡང་ངན་འགྲོར་མཆི་མི་འགྱུར། །གང་དག་ཆོས་ཉན་འགྱུར་བ་རྣམས། །དེ་དག་མཁས་ཤིང་ནད་མེད་དང ། །ཟབ་དང་ཕུང་པོ་ཟད་པ་དང ། །འཇིགས་པ་མེད་པ་རྣམས་སུ་འགྱུར། །ཉོན་མོངས་བཅིངས་པ་བཅད་ནས་ནི། །ཀུན་ཀྱང་ལེན་པ་མ་མཆིས་པར། །མྱུར་དུ་རབ་ཏུ་གྲོལ་འགྱུར་ཏེ། །དགེ་བ་མཆོག་གི་འབྲས་བུ་འཐོབ། །དེ་དག་འཇིག་རྟེན་སྦྱིན་གནས་ཏེ། །སྦྱིན་པ་རྣམས་ནི་བླང་བའི་འོས། །དེ་དག་ཡོན་ཕུལ་མི་ཆུང་སྟེ། །ཀུན་ཀྱང་མྱ་ངན་འདས་རྒྱུ་ལགས། །དགེ་སློང་དག་དེ་ལྟར་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་འོད་གསལ་གྱི་ལྷའི་བུ་རྣམས་ཀྱིས་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་བཞུགས་པ་ལ་མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། བྱུག་པ་དང ། གདུགས་དང ། རྒྱལ་མཚན་དང ། བ་དན་རྣམ་པ་སྣ་ཚོགས་རྣམས་ཀྱིས་ཆོ་ག་བཞིན་དུ་མཆོད་ནས་ལན་གསུམ་བསྐོར་བ་བྱས་ཏེ། ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཐུབ་པ་ཐུགས་ཟབ་གསུང་ནི་ཤིན་དུ་སྙན། །ཐུབ་མཆོག་ཚངས་དབྱངས་གླུ་ལྟར་གསུང་སྙན་མཆོག་།བྱང་ཆུབ་རབ་མཆོག་ཤིན་དུ་དམ་པ་བརྙེས། །དབྱངས་ཀུན་མཐར་ཕྱིན་ཁྱོད་ལ་ཕྱག་འཚལ་ལོ། །ཁྱོད་སྐྱབས་ཁྱོད་གླིང་ཁྱོད་ནི་དཔུང་གཉེན་ཏེ། །ཁྱོད་ནི་འཇིག་རྟེན་མགོན་པོ་བྱམས་ཐུགས་མཛད། །ཁྱོད་ནི་སྨན་པའི་དམ་པ་ཟུག་རྔུ་འབྱིན། །གསོ་བ་ཕན་མཛད་ཁྱོད་ནི་དམ་པ་མཆོག་།མར་མེ་མཛད་པ་གཟིགས་མ་ཐག་ཏུ་ཁྱོད། །བྱམས་དང་ཐུགས་རྗེའི་སྤྲིན་གྱི་དྲ་བ་བསྒྲུབས། ། 41.196b མགོན་པོ་བདུད་རྩིའི་རྒྱུན་གྱི་ཆར་ཕོབ་ལ། །ལྷ་མི་རྣམས་ཀྱི་གདུང་བ་ཞི་བར་མཛོད། །ཁྱོད་ནི་སྲིད་གསུམ་མི་གོས་པད་མ་འདྲ། །ཁྱོད་ནི་མི་གཡོ་མི་བསྐྱོད་ལྷུན་པོ་འདྲ། །ཁྱོད་ནི་ཐུགས་དམ་མི་གཡོ་རྡོ་རྗེ་བཞིན། །ཡོན་ཏན་མཆོག་ཀུན་མངའ་སྟེ་ཟླ་བ་འདྲ། །དགེ་སློང་དག་དེ་ལྟར་འོད་གསལ་བའི་ལྷ་རྣམས་ཀྱིས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་ལྷའི་བུ་རབ་ཚངས་པ་ལ་སོགས་པ་ཚངས་རིས་ཀྱི་ལྷ་རྣམས་ཀྱིས་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་བཞུགས་པ་ལ་ནོར་བུ་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མས་སྤྲས་པའི་རིན་པོ་ཆེའི་དྲ་བས་བཀབ་སྟེ་ལན་གསུམ་བསྐོར་བ་བྱས་ནས་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །དགེ་བ་དྲི་མེད་ཤེས་རབ་འོད་དང་གཟི་བརྗིད་ལྡན། །མཚན་གྱི་དམ་པ་སུམ་བཅུ་རྩ་གཉིས་མཆོག་མངའ་བ། །དྲན་དང་ལྡན་ཞིང་བློ་གྲོས་ལྡན་པ་ཡེ་ཤེས་མངའ། །མཉེལ་བ་མི་མངའ་ཁྱོད་ལ་མགོ་བོས་ཕྱག་འཚལ་ལོ། །དྲི་གསུམ་དྲི་མི་མངའ་བ་དྲི་མེད་དྲི་མ་བྲལ། །འཇིག་རྟེན་གསུམ་དུ་གྲགས་ཤིང་རིག་པ་གསུམ་བརྙེས་པ། །རྣམ་པར་ཐར་པ་དམ་པ་གསུམ་གྱི་མིག་སྦྱིན་པ། །སྤྱན་གསུམ་དྲི་མ་མི་མངའ་ཁྱོད་ལ་ཕྱག་འཚལ་ལོ། །དུས་ངན་རྙོག་པ་བསལ་བ་རབ་ཏུ་ཞི་ཐུགས་ལྡན། །ཐུགས་བརྩེ་ཐུགས་རྗེས་འཕགས་པ་འགྲོ་བའི་དོན་མཛད་པ། །ཐུབ་པ་དགྱེས་པས་འཕགས་པ་ཐུགས་ནི་རབ་ཞི་བ། །ཁྱོད་ནི་ཡིད་གཉིས་གྲོལ་བར་མཛད་པ་བཏང་སྙོམས་དགྱེས། །བརྟུལ་ཞུགས་དཀའ་ཐུབ་འཕགས་པ་འགྲོ་བའི་དོན་མཛད་པ། །རང་སྤྱོད་རྣམ་པར་དག་ཅིང་སྤྱོད་པའི་ཕ་རོལ་བྱོན། །བདེན་པ་བཞི་པོ་སྟོན་པ་རྣམ་ཐར་དགྱེས་པ་པོ། །གྲོལ་བར་གྱུར་ནས་འགྲོ་བ་གཞན 41.197a ཡང་གྲོལ་མཛད་པ། །སྟོབས་དང་བརྩོན་འགྲུས་ལྡན་པའི་བདུད་པོ་འདིར་ལྷགས་པ། །ཤེས་རབ་བརྩོན་འགྲུས་དེ་བཞིན་བྱམས་པས་ཕམ་མཛད་ནས། །ཁྱོད་ཀྱིས་གོ་འཕང་དམ་པ་འཆི་བ་མེད་པ་བརྙེས། །གཡོན་ཅན་དཔུང་རྣམས་བཅོམ་པ་ཁྱོད་ལ་ཕྱག་འཚལ་ལོ། །དགེ་སློང་དག་དེ་ལྟར་ལྷའི་བུ་རབ་ཚངས་པ་ལ་སོགས་པ་ཚངས་རིས་ཀྱི་ལྷ་རྣམས་ཀྱིས་དེ་བཞིན་གཤེགས་པ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་བདུད་ཀྱི་བུ་དཀར་པོའི་ཕྱོགས་པ་དེ་དག་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་པ་དང ། རིན་པོ་ཆེའི་གདུགས་དང ། བླ་རེ་ཆེན་པོ་རྣམས་ཀྱིས་དེ་བཞིན་གཤེགས་པ་མངོན་པར་བཀབ་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཁྱོད་སྟོབས་ཤིན་དུ་རྒྱ་ཆེ་བ་དང་བདུད་དཔུང་དྲག་པོ་བདག་ཅག་མངོན་སུམ་སྟེ། །བདུད་དཔུང་རབ་འཇིགས་ཆེན་པོ་དེ་ཡང་ཁྱོད་ཀྱིས་སྐད་ཅིག་གཅིག་ལ་ཕམ་པར་མཛད། །ཁྱོད་ནི་བཞེངས་པར་མ་གྱུར་སྐུ་ཡང་མི་གཡོ་གསུང་ཡང་བརྗོད་པ་མ་མཛད་དེ། །ཐུབ་པ་དོན་ཀུན་འགྲུབ་པ་འཇིག་རྟེན་གསུམ་གྱིས་མཆོད་པ་ཁྱོད་ལ་བདག་ཕྱག་འཚལ། །བདུད་ཀྱི་བུ་མོ་བྱེ་བ་ཁྲག་ཁྲིག་སྟོང་ཕྲག་དུ་མ་གང་གཱའི་བྱེ་མ་སྙེད། །དེ་དག་རྣམས་ཀྱིས་བྱང་ཆུབ་ཤིང་མཆོག་དྲུང་ནས་ཁྱོད་ནི་བསྐྱོད་ཅིང་གཡོ་མ་ནུས། །མཆོད་སྦྱིན་བྱེ་བ་ཁྲག་ཁྲིག་སྟོང་ཕྲག་དུ་མ་གང་གཱའི་བྱེ་མ་སྙེད་མཛད་དེ། །བྱང་ཆུབ་ཤིང་དྲུང་བཞུགས་པ་དེས་ན་དེ་རིང་ཁྱོད་ནི་རྣམ་པར་མཛེས་པ་ལགས། །བྱང་ཆུབ་སྤྱད་པ་དམ་པ་སྤྱོད་མཛད་ཚེ་ན་ཤིན་དུ་སྡུག་པའི་བཙུན་མོ་དང ། །ཕངས་པའི་སྲས་དང་བྲན་ཕོ་བྲན་མོ་དེ་བཞིན་སྐྱེད་མོས 41.197b ཚལ་དང་གྲོང་ཁྱེར་དང ། །ཡུལ་འཁོར་གྲོང་རྡལ་དག་དང་རྒྱལ་སྲིད་རྣམས་དང་བཙུན་མོའི་འཁོར་དང་གླང་པོ་དང ། །དབུ་དང་སྤྱན་དང་ལྗགས་དང་དེ་བཞིན་ཞབས་བཏང་དེས་ན་དེ་རིང་རྣམ་པར་མཛེས། །ང་ནི་སངས་རྒྱས་འགྱུར་ཏེ་བསམ་གཏན་རྫུ་འཕྲུལ་བློ་ཡི་གོ་བགོས་ནས། །སེམས་ཅན་བྱེ་བ་ཁྲག་ཁྲིག་མང་པོ་སྡུག་བསྔལ་རྒྱ་མཚོས་ཁྱེར་བར་གྱུར་པ་རྣམས། །དམ་ཆོས་གྲུ་ཡིས་ཉིད་ཀྱིས་བསྒྲལ་བར་བྱ་ཞེས་ཁྱོད་ཀྱིས་ལན་མང་གསུང་བརྗོད་པ། །ཁྱོད་ཀྱིས་སྨོན་ལམ་དེ་ནི་གྲུབ་ལགས་སྲོག་ཆགས་རྣམས་ཀྱང་སྒྲོལ་བར་མཛད་པར་འགྱུར། །སྨྲ་བའི་ཁྱུ་མཆོག་འཇིག་རྟེན་མིག་སྦྱིན་མཛད་པ་ཁྱོད་ལ་བསྟོད་པའི་བསོད་ནམས་དེ། །བདག་ཅག་ཐམས་ཅད་དགའ་མགུ་ཡིད་གྱུར་ཐམས་ཅད་མཁྱེན་པ་ཉིད་དུ་སྨོན་ལམ་འདེབས། །སངས་རྒྱས་རྣམས་ཀྱིས་རབ་བསྔགས་བྱང་ཆུབ་དམ་པ་མཚུངས་མེད་ཡང་དག་བསྒྲུབས་ནས་ནི། །དེ་ལྟར་བདུད་སྡེ་འཁོར་དེ་བཅོམ་ནས་ཐམས་ཅད་མཁྱེན་ཉིད་འཚང་རྒྱར་འགྱུར་བར་ཤོག་།དགེ་སློང་དག་དེ་ལྟར་བདུད་ཀྱི་བུ་རྣམས་ཀྱིས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་ལྷའི་བུ་གཞན་འཕྲུལ་དབང་བྱེད་ཀྱི་ལྷའི་བུ་བརྒྱ་སྟོང་དུ་མས་ཡོངས་སུ་བསྐོར་ཏེ། མདུན་དུ་བདར་ནས་དེ་བཞིན་གཤེགས་པ་ལ་འཛམ་བུ་ཀླུང་གི་གསེར་གྱི་པད་མ་དག་གིས་མངོན་པར་གཏོར་ཏེ། སྤྱན་སྔ་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །གསུང་ནི་དཔྱས་མ་མཆིས་ཤིང་མ་འཁྲུལ་རྣམ་པར་མ་འཁྲུགས་པ། །མུན་རྡུལ་བྲལ་ཞིང་འཆི་མེད་རྟོགས་པར་ཐུགས་སུ་ཆུད་པར་གྱུར། །ལྷ་ཡུལ་མི་ཡུལ་པ་ཡི་དཔལ་དང་བགྱི་བ་གཞལ་མེད་འོས། །རབ་ཏུ་འབར་བའི་བློ་གྲོས་ལྡན་ལ་མགོ་བོས་ཕྱག་འཚལ་ལོ། །དཀའ་བ་མཛད་པ་ཉོན་མོངས་སྤོང 41.198a བ་རྡུལ་དང་དྲི་མ་སེལ། །ཤིན་དུ་དགའ་བའི་གསུང་གིས་ལྷ་དང་མི་རྣམས་དགའ་བར་མཛོད། །སྐུ་མཆོག་འོད་ཟེར་རྒྱས་པ་དྲི་མ་ཤིན་དུ་མི་མངའ་བས། །ལྷ་དང་མི་ཡི་བདག་པོ་བཞིན་དུ་འགྲོ་བ་འདི་ལས་རྒྱལ། །ཕ་རོལ་ཚོགས་རྣམས་རབ་ཏུ་འཇོམས་པ་གཞན་གྱི་སྤྱོད་མཁས་པ། །ལྷ་དང་མི་ཡི་སྲིད་པར་དགའ་བ་གཞན་གྱི་བློ་སེལ་བ། །ཤིན་དུ་མཁས་པ་བློ་ལྡན་གཞན་གྱི་སྤྱོད་པ་རྣམ་པར་ཕྱེ། །སྟོབས་བཅུ་མངའ་བ་གཤེགས་པའི་ལམ་འདིར་རྣམ་པར་རྒྱུ་བ་མཛོད། །སྲིད་པ་འཛིན་དང་སྡུག་བསྔལ་ལོག་འཛིན་རྒྱ་ཆེན་འདོར་སེལ་ཏེ། །ལྷ་མི་བློ་གྲོས་འདུལ་བ་ཇི་ལྟ་བཞིན་དུ་འདུལ་བ་མཛོད། །ཟླ་བ་བཞིན་དུ་མཁའ་ལས་ཕྱོགས་བཞི་དག་ཏུ་རྣམ་རྒྱུ་བ། །སྲིད་པ་གསུམ་འདིར་རྨད་བྱུང་མིག་དང་དཔུང་གཉེན་གྱུར་པར་ཤོག་།ལྷ་དང་མི་ཡི་སྲིད་པ་དགའ་ཡང་ཡུལ་ལ་འཁྲུལ་མི་མངའ། །འདོད་པའི་དགའ་དང་བྲལ་ཞིང་དགེ་བའི་དགའ་ལ་དགྱེས་པ་པོ། །འཁོར་ལ་སྒྲོགས་པ་འཇིག་རྟེན་གསུམ་ན་ཁྱོད་དང་མཚུངས་མ་མཆིས། །ཁྱོད་འདིར་འགྲོ་བ་རྣམས་ཀྱི་མགོན་དང་སྐྱབས་དང་དཔུང་གཉེན་ལགས། །དགེ་སློང་དག་དེ་ལྟར་ལྷའི་བུ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་ཀྱི་ལྷའི་བུ་རྣམས་ཀྱིས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་ལྷའི་བུ་རབ་འཕྲུལ་རབ་འཕྲུལ་གྱི་ལྷའི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ། དེ་བཞིན་གཤེགས་པ་ལ་དར་གྱི་ལྡ་ལྡིས་གཡོགས་ནས་སྤྱན་སྔ་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །དྲི་མ་རྣམ་གསུམ་སྤངས་པས་ཁྱོད་ནི་ཆོས་ཀྱི་སྣང་བ་ཡང་དག་འཕགས། །གཏི་མུག་དང་ནི་ལྟ་དང་མ་རིག་འཇོམས་པ་མཛེས་དང་དཔལ་གྱིས་རྒྱས། །ལོག་པའི་ལམ་ལ་དགའ་བའི་སྐྱེ་བོ་འདི་དག་འཆི་མེད་འགོད་མཛད་པ། །འཇིག་རྟེན་འདིར་བྱུང་མཆོད་རྟེན་ལྷ 41.198b ཡུལ་བ་དང་མི་ཡུལ་བས་མཆོད་པ། །ཁྱོད་ནི་གསོ་བའི་སྨན་པ་མཁས་པ་བདུད་རྩི་བདེ་བ་སྦྱིན་པ་པོ། །ལྟ་དང་ཉོན་མོངས་པ་དང་མ་རིག་བསགས་པ་སྔོན་གྱི་བག་ལ་ཉལ། །ལུས་ཅན་རྣམས་ཀྱི་ནད་ཀུན་སྔོན་གྱི་རྒྱལ་བའི་ལམ་གྱིས་སེལ་བ་སྟེ། །དེ་བས་སྨན་པ་དམ་པ་འདྲེན་པ་ཁྱོད་ནི་ས་ལ་རྣམ་པར་རྒྱུ། །ཉི་ཟླའི་འོད་དང་སྐར་མ་རྣམས་དང་མེ་དང་དེ་བཞིན་ནོར་བུ་དང ། །བརྒྱ་བྱིན་ཚངས་པའི་འོད་རྣམས་དཔལ་སྟུག་སྤྱན་སྔར་ལམ་མེ་མ་ལགས་ཏེ། །ཤེས་རབ་སྣང་བ་མཛད་དང་འོད་མཛད་འོད་དང་དཔལ་གྱིས་རབ་ཏུ་རྒྱས། །ཁྱོད་ཀྱི་ཡེ་ཤེས་རྨད་བྱུང་མངོན་སུམ་གྱུར་པས་མགོ་བོས་ཕྱག་འཚལ་ལོ། །རྣམ་པར་འདྲེན་པ་སྙན་པའི་གསུང་ལྡན་བདེན་དང་བདེན་མིན་གསུང ། །དུལ་བ་ཐུགས་ཞི་དབང་པོ་ཐུལ་བ་རབ་ཏུ་ཞི་བའི་ཐུགས་ལྡན་པ། །སྟོན་པ་ལྷ་དང་མི་ཡི་འཁོར་ལ་བསྟན་པར་བགྱི་བ་སྟོན་མཛད་པ། །ཤཱཀྱ་ཐུབ་པ་མི་ཡི་ཁྱུ་མཆོག་ལྷ་མིས་མཆོད་ལ་ཕྱག་འཚལ་ལོ། །ཡེ་ཤེས་མངའ་བ་ཡེ་ཤེས་བཀའ་མཆིད་མཆོག་ཅན་སྲིད་གསུམ་གོ་མཛད་པ། །དྲི་མ་གསུམ་བསལ་རིག་པ་གསུམ་དང་རྣམ་པར་ཐར་གསུམ་སྟོན་པ་པོ། །ཐུབ་པ་བློ་གྲོས་ཇི་ལྟར་གདུལ་བ་སྐལ་དང་སྐལ་མེད་རབ་མཁྱེན་པ། །སྟོང་གསུམ་རྨད་དུ་བྱུང་བ་ལྷ་མིས་མཆོད་པ་ཁྱོད་ལ་ཕྱག་འཚལ་ལོ། །དགེ་སློང་དག་དེ་ལྟར་ལྷའི་བུ་རབ་འཕྲུལ་འཁོར་དང་བཅས་པས་དེ་བཞིན་གཤེགས་པ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འདུག་གོ། །དེ་ནས་ལྷའི་བུ་ཡོངསུ་དགའ་ལྡན་དགའ་ལྡན་རིས་ཀྱི་ལྷའི་བུ་དང་ལྷན་ཅིག་ཏུ་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་ནས། ལྷའི་གོས་ཀྱི་དྲ་བ་ཆེན་པོས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་མངོན་པར་བཀབ་སྟེ། སྤྱན་སྔ་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། ། 41.199a ཁྱོད་ནི་དགའ་ལྡན་གནས་ན་བཞུགས་ཚེ་དེར་ནི་ཁྱོད་ཀྱིས་རྒྱ་ཆེན་ཆོས་ཀྱང་བཤད། །ཁྱོད་ཀྱིས་བསྟན་པ་དེ་ནི་ད་དུང་ལྷ་ཡི་བུ་རྣམས་ཆོས་སྤྱོད་རྒྱུན་མི་འཆད། །ཁྱོད་ལ་བལྟ་བས་ངོམས་པར་མི་འགྱུར་ཆོས་མཉན་པས་ཀྱང་ངོམས་པ་རྙེད་མི་འགྱུར། །ཡོན་ཏན་རྒྱ་མཚོ་འཇིག་རྟེན་སྒྲོན་མ་ཁྱོད་ལ་མགོ་དང་ཡིད་ཀྱིས་ཕྱག་འཚལ་ལོ། །ཁྱོད་ནི་དགའ་ལྡན་གནས་ནས་འཕོས་ཏེ་དེ་ཚེ་ཁྱོད་ཀྱིས་མི་ཁོམ་ཐམས་ཅད་སྦྱངས། །གང་ཚེ་བྱང་ཆུབ་ཤིང་དྲུང་བཞུགས་ཚེ་འགྲོ་བ་ཀུན་གྱི་ཉོན་མོངས་རབ་ཏུ་ཞི། །གང་གི་ཆེད་དུ་རྒྱ་ཆེན་བྱང་ཆུབ་བཙལ་བ་བརྙེས་ཏེ་བདུད་ཀྱང་ཕམ་པར་མཛད། །ཁྱོད་ཀྱི་སྨོན་ལམ་དེ་ནི་རབ་ཏུ་རྫོགས་ཀྱིས་འཁོར་ལོ་རྒྱ་ཆེན་མྱུར་དུ་སྐོར། །ཆོས་འཚལ་བ་དག་ཆོས་མཉན་བགྱི་ཞེས་ཏེ། །སྲོག་ཆགས་སྟོང་ཕྲག་མང་པོ་སྡོད་ཅིང་མཆིས། །འཁོར་ལོ་རྒྱ་ཆེན་མྱུར་དུ་བསྐོར་དུ་གསོལ། །སྲོག་ཆགས་སྟོང་རྣམས་སྲིད་ལས་བསྒྲལ་དུ་གསོལ། །དགེ་སློང་དག་དེ་ལྟར་ལྷའི་བུ་ཡོངས་སུ་དགའ་ལྡན་འཁོར་དང་བཅས་པས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འདུག་གོ། །དེ་ནས་ལྷའི་བུ་རབ་འཐབ་བྲལ་ལ་སོགས་པ་འཐབ་བྲལ་གྱི་ལྷ་རྣམས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། མེ་ཏོག་དང ། སྤོས་དང ། ཕྲེང་བ་དང ། བྱུགས་པ་སྣ་ཚོགས་ཀྱི་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་མཆོད་དེ། སྤྱན་སྔ་ནས་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཚུལ་ཁྲིམས་ཏིང་འཛིན་དེ་བཞིན་ཤེས་རབ་ཀྱིས། །ཁྱོད་དང་མཚུངས་པ་མ་མཆིས་ག་ལ་ལྷག་།མོས་དང་རྣམ་པར་གྲོལ་ལ་མཁས་པ་པོ། །དེ་བཞིན་གཤེགས་པ་ཁྱོད་ལ་མགོས་ཕྱག་འཚལ། །བྱང་ཆུབ་སྙིང་པོར་ལྷ་ཡིས་གང་བགྱིས་པ། །བཀོད་པ་མཛེས་པ་དེ་དག 41.199b མཐོང་ལགས་ཏེ། །ཇི་ལྟར་ཁྱོད་ལ་ལྷ་དང་མིས་མཆོད་པ། །དེ་ནི་གཞན་གང་ལ་ཡང་འོས་མ་ལགས། །ཁྱོད་བྱུང་དོན་མ་མཆིས་པ་མ་ལགས་ཏེ། །གང་གི་དོན་དུ་དཀའ་བ་མང་པོ་སྤྱད། །ཤིན་དུ་གཡོན་ཅན་སྡེ་དང་བཅས་ལས་རྒྱལ། །ཁྱོད་ཀྱིས་བླ་ན་མེད་པའི་བྱང་ཆུབ་བརྙེས། །ཕྱོགས་བཅུ་དག་ཏུ་སྣང་བ་མཛད་པར་གྱུར། །ཤེས་རབ་སྒྲོན་མས་འཇིག་རྟེན་གསུམ་པོ་གསལ། །ཁྱོད་ནི་རབ་རིབ་སེལ་བར་འགྱུར་བ་སྟེ། །འགྲོ་ལ་བླ་ན་མེད་པའི་མིག་སྦྱིན་པ། །ཁྱོད་ལ་བསྟོད་པ་བསྐལ་པར་བརྗོད་ཀྱང་ནི། །ཁྱོད་ཀྱི་བ་སྤུའི་ཁུང་བུ་མཐའ་མ་མཆིས། །ཡོན་ཏན་རྒྱ་མཚོ་འཇིག་རྟེན་རྣམ་པར་གྲགས། །དེ་བཞིན་གཤེགས་པ་ཁྱོད་ལ་མགོས་ཕྱག་འཚལ། །དེ་ལྟར་རབ་འཐབ་བྲལ་ལ་སོགས་པ་འཐབ་བྲལ་གྱི་ལྷའི་བུ་དེ་དག་གིས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་ལྷའི་དབང་པོ་བརྒྱ་བྱིན་སུམ་བཅུ་རྩ་གསུམ་རིས་ཀྱི་ལྷ་རྣམས་དང་ལྷན་ཅིག་ཏུ་མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། གདུགས་དང ། རྒྱལ་མཚན་དང ། བ་དན་བཀོད་པ་རྣམས་ཀྱིས་དེ་བཞིན་གཤེགས་པ་ལ་མཆོད་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཐུབ་པ་མ་འཁྲུལ་ཁ་ན་མ་ཐོ་མི་མངའ་རྟག་ཏུ་ལེགས་བཞུགས་ལྷུན་པོ་འདྲ། །ཕྱོགས་བཅུ་དག་ཏུ་ཡེ་ཤེས་འོད་གྲགས་བསོད་ནམས་དག་དང་གཟི་བརྗིད་ལྡན་པ་པོ། །ཐུབ་པ་ཁྱོད་ཀྱིས་སྔོན་ཆད་སངས་རྒྱས་བརྒྱ་ཕྲག་མཐའ་ཡས་ཡང་དག་མཆོད་པ་མཛད། །དེ་ཡི་ཡུལ་དེ་ཡིས་ནི་བྱང་ཆུབ་ཤིང་དྲུང་བདུད་ཀྱི་སྡེ་ལས་རྒྱལ་བར་གྱུར། །ཚུལ་ཁྲིམས་དང་ནི་ཐོས་དང་ཏིང་འཛིན་ཤེས་རབ་འབྱུང་གནས་ཡེ་ཤེས་རྒྱལ་མཚན་ཏོག་།རྒ་ཤི་འཇོམས་པར་མཛད་པ་སྨན་པ་དམ་པ་འཇིག་རྟེན་དག་ལ་མིག 41.200a སྦྱིན་པ། །ཐུབ་པ་དྲི་མ་གསུམ་དང་ཐ་བ་སྤངས་ཤིང་དབང་པོ་ཞི་ལ་ཐུགས་ཞི་བ། །ཤཱཀྱ་ཁྱུ་མཆོག་འགྲོ་བ་དག་གི་ཆོས་ཀྱི་རྒྱལ་པོ་ཁྱོད་ལ་སྐྱབས་སུ་མཆི། །ཁྱོད་ཀྱིས་བརྩོན་འགྲུས་མཐུ་ཡིས་འཕགས་པའི་བྱང་ཆུབ་སྤྱོད་པ་མཐའ་ཡས་གྱུར་ལགས་ཏེ། །ཤེས་རབ་སྟོབས་དང་ཐབས་དང་བྱམས་པའི་སྟོབས་དང་བསོད་ནམས་སྟོབས་རྣམས་དང ། །སྟོབས་རྣམས་དེ་དག་བཅོམ་ལྡན་འདས་ཁྱོད་བྱང་ཆུབ་བཞུགས་པའི་ཚེ་ན་མཐའ་ཡས་ཏེ། །སྟོབས་དང་ལྡན་པ་དེ་རིང་བྱང་ཆུབ་སྙིང་པོར་བཞུགས་ནས་སྟོབས་བཅུ་མངའ་བར་གྱུར། །དཔུང་ཚོགས་མཐའ་ཡས་མཐོང་ནས་དགེ་སྦྱོང་རྒྱལ་པོ་བྱང་ཆུབ་སྙིང་པོར་བཞུགས་པ་དེ། །ཉམས་པར་མི་འགྱུར་གྲང་ཞེས་ལྷ་རྣམས་ཐམས་ཅད་རབ་ཏུ་སྔངས་ཤིང་སྐྲག་པར་གྱུར། །ཁྱོད་ནི་འབྱུང་པོ་རྣམས་ཀྱིས་བསྙེངས་པར་མ་གྱུར་སྐུ་ཡང་གཡོ་བ་མི་མངའ་སྟེ། །ཁུར་ལྕི་ཕྱག་གིས་བརྡབས་ནས་ཀུན་དུ་གཡོས་ཏེ་བདུད་ཀྱི་སྡེ་ལས་རྒྱལ་བར་གྱུར། །ཇི་ལྟར་སྔ་མ་རྣམས་ཀྱིས་སེང་གེའི་ཁྲི་ལ་བྱང་ཆུབ་དམ་པ་བརྙེས་གྱུར་པ། །དེ་ལྟར་ཁྱོད་ཀྱིས་རྗེས་སུ་སངས་རྒྱས་མཚུངས་ཤིང་མཉམ་སྟེ་གཞན་དུ་གྱུར་མ་ལགས། །ཡིད་ཀྱང་མཉམ་ཞིང་སེམས་ཀྱང་མཉམ་སྟེ་ཁྱོད་བདག་ཉིད་ཀྱིས་ཐམས་ཅད་མཁྱེན་ཉིད་བརྙེས། །དེས་ན་ཁྱོད་ནི་འཇིག་རྟེན་དམ་པ་རང་བྱུང་འགྲོ་བ་རྣམས་ཀྱི་བསོད་ནམས་ཞིང ། །དགེ་སློང་དག་དེ་ལྟར་ལྷའི་དབང་པོ་བརྒྱ་བྱིན་སུམ་བཅུ་རྩ་གསུམ་པའི་ལྷ་རྣམས་དང་ལྷན་ཅིག་ཏུ་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འདུག་གོ། །དེ་ནས་རྒྱལ་པོ་ཆེན་པོ་བཞི་པོ་དག་རྒྱལ་ཆེན་བཞིའི་རིས་ཀྱི་ལྷའི་བུ་རྣམས་དང་ལྷན་ཅིག་ཏུ་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་ནས། མེ་ཏོག་ཨ་ཏི་མུག་ཏ་ཀ་དང ། 41.200b ཙམ་པ་ཀ་དང ། སྣ་མའི་མེ་ཏོག་དང ། བར་ཤ་ཀ་དང ། དྷ་ནུ་ཀ་རིའི་ཕྲེང་བ་དང ། ཆུན་པོ་ཐོགས་ཏེ། ལྷའི་བུ་མོ་བརྒྱ་སྟོང་གིས་བསྐོར་ནས་ལྷའི་གླུ་དབྱངས་ལེན་པས་དེ་བཞིན་གཤེགས་པ་ལ་མཆོད་པ་བྱས་ཏེ། ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཤིན་དུ་གསུང་སྙན་དབྱངས་ནི་ཡིད་དུ་མཆི། །ཟླ་ལྟར་རབ་ཏུ་ཞི་མཛད་ཐུགས་དང་བ། །འཛུམ་པའི་ཞལ་ལྡན་ལྗགས་ནི་རབ་ཡངས་པ། །ཐུབ་མཆོག་དགའ་མཛད་ཁྱོད་ལ་ཕྱག་འཚལ་ལོ། །ལྷ་མི་རྣམས་ཀྱི་སྙན་ཅིང་དགར་འགྱུར་བ། །སྒྲ་སྐད་གང་དག་འཇིག་རྟེན་མཆིས་པ་ཀུན། །ཁྱོད་ཀྱི་འཇམ་པའི་གསུང་ནི་ཕྱུང་བས་ན། །མི་ཡི་སྒྲ་སྐད་ཐམས་ཅད་ཟིལ་གྱིས་ནོན། །འདོད་ཆགས་ཞེ་སྡང་གཏི་མུག་ཉོན་མོངས་ཞི། །མི་མིན་དགའ་བ་རྣམ་པར་དག་པ་སྐྱེད། །རྙོག་པ་མ་མཆིས་སྙིང་གིས་ཆོས་ཐོས་ནས། །དེ་ཀུན་འཕགས་པའི་རྣམ་པར་གྲོལ་བ་ཐོབ། །ཁྱོད་ནི་མི་མཁས་རྣམས་ལ་བརྙས་མི་མཛད། །མཁས་པའི་རྒྱགས་པས་རྣམས་ཀྱང་རྒྱགས་མ་གྱུར། །ཁྱོད་ནི་འགྱིང་བ་མི་མངའ་ཞུམ་མི་མངའ། །རྒྱ་མཚོའི་དབུས་ནས་རི་མཆོག་འཕགས་པ་བཞིན། །དེ་འདྲའི་སེམས་ཅན་འཇིག་རྟེན་བྱུང་བས་ན། །མི་རྣམས་འདིར་ནི་རྙེད་པ་ལེགས་པར་རྙེད། །པད་མ་དཔལ་ལྟར་ནོར་རྣམས་སྦྱིན་པ་པོ། །དེ་ལྟར་འཇིག་རྟེན་ཀུན་ལ་མཆོད་སྦྱིན་མཛད། །དེ་ལྟར་རྒྱལ་པོ་ཆེན་པོ་བཞི་ལ་སོགས་པ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་བར་སྣང་གི་ལྷ་རྣམས་དེ་བཞིན་གཤེགས་པའི་དྲུང་དུ་ལྷགས་ཏེ། མངོན་པར་རྫོགས་པར 41.201a བྱང་ཆུབ་པ་ལ་མཆོད་པའི་ལས་ཀྱི་ཕྱིར་བར་སྣང་ཐམས་ཅད་རིན་པོ་ཆེའི་དྲ་བ་དང ། དྲིལ་བུ་གཡེར་ཀའི་དྲ་བ་དང ། རིན་པོ་ཆེའི་གདུགས་རྣམས་དང ། རིན་པོ་ཆེའི་བ་དན་རྣམས་དང ། རིན་པོ་ཆེ་དང་དར་གྱི་ལྡ་ལྡི་དང ། རིན་པོ་ཆེའི་མེ་ཏོག་རྣ་རྒྱན་དང ། མུ་ཏིག་གི་ཆུན་ཁོར་དང ། མེ་ཏོག་གི་ལྡ་ལྡི་སྣ་ཚོགས་རྣམས་ལུས་ཕྱེད་ཕྱུང་བའི་ལྷ་རྣམས་ཀྱིས་བཟུང་བ་དང ། ཟླ་གམ་རྣམས་ཀྱིས་ལེགས་པར་བརྒྱན་ནས་དེ་བཞིན་གཤེགས་པ་ལ་ཕུལ་ལོ། །ཕུལ་ནས་ཀྱང་སྤྱན་སྔ་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཐུབ་པ་མཁས་ལ་བདག་ཅག་མཆིས་ནས་ནི། །འགྲོ་བའི་སྤྱོད་ཀུན་ཇི་བཞིན་གསལ་བལྟས་ཤིང ། །སེམས་ཅན་དག་པ་ཁྱོད་ཀྱི་སྤྱོད་བལྟས་ན། །དེ་ལྟར་ཁྱོད་ཀྱི་ཐུགས་གཅིག་འཁྲུལ་མ་མཐོང ། །མཆོད་ཕྱིར་བྱང་ཆུབ་སེམས་དཔའ་གང་ལྷགས་པ། །མི་ཡི་འདྲེན་པ་དེ་དག་ནམ་མཁའ་ཁྱབ། །འདི་ལྟར་དེ་དག་ནམ་མཁའི་ལུས་ལགས་པས། །གཞལ་མེད་ཁང་རྣམས་ལ་ཡང་གནོད་མ་མཆིས། །བར་སྣང་ནས་ནི་མེ་ཏོག་ཆར་བབ་པ། །སྟོང་ཆེན་བྱུར་བུར་རབ་ཏུ་གང་གྱུར་པ། །དེ་དག་མ་ལུས་ཁྱོད་ཀྱི་སྐུར་བབ་ཀྱང ། །འབབ་ཆུ་རྒྱ་མཚོར་བབ་པ་བཞིན་དུ་གྱུར། །གདུགས་དང་མེ་ཏོག་རྣ་རྒྱན་མེ་ཏོག་ཕྲེང ། །མེ་ཏོག་ཙམ་པ་ཀ་ཡིའི་ལྡ་ལྡི་དང ། །རྒྱན་ཕྲེང་ཟླ་བ་ཟླ་གམ་རྣམས་ཀྱང་འཐོར། །ལྷ་ཡིས་གཏོར་ཀྱང་འདྲེས་པར་གྱུར་མ་མཆིས། །བར་སྣང་ཐམས་ཅད་ལྷ་ཡིས་གང་གྱུར་ཏེ། །འདི་ལ་སྐྲ་ཙམ་གཞག་པའི་གནས་མ་མཆིས། །རྐང་གཉིས་མཆོག་ལ་མཆོད་པ་བགྱིད་ཀྱང་ནི། །ཁྱོད་ལ་རྒྱགས་པའམ་ངོ་མཚར་འགྱུར་མི་མངའ། །དེ་ལྟར་བར་སྣང་གི་ལྷ་རྣམས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། 41.201b དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་ས་བླའི་ལྷ་རྣམས་ཀྱིས་དེ་བཞིན་གཤེགས་པ་ལ་མཆོད་པའི་ལས་ཀྱི་ཕྱིར་ས་གཞི་ཐམས་ཅད་ལེགས་པར་ཕྱགས་ཏེ་བྱུགས་ནས་སྤོས་ཆུས་ཆག་ཆག་བཏབ་སྟེ། མེ་ཏོག་གིས་ཆལ་བར་བཀང་ནས་རས་བཅོས་བུ་སྣ་ཚོགས་ཀྱི་བླ་རེ་བྲེས་ཏེ་དེ་བཞིན་གཤེགས་པ་ལ་ཕུལ་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སྟོང་གསུམ་རྡོ་རྗེ་ལྟ་བུར་མི་ཤིགས་གནས་པར་གྱུར། །ང་འདིར་ལྤགས་པ་ཤ་དང་རུས་པ་རྐང་སྐམས་ཀྱང ། །བྱང་ཆུབ་མ་རེག་ང་ནི་འདི་ནས་མི་ལྡང་ཞེས། །རྡོ་རྗེའི་གནས་ཀྱིས་དེ་ནི་བྱང་ཆུབ་སྙིང་པོར་བཞུགས། །གལ་ཏེ་མི་ཡི་སེང་གེ་ཁྱོད་ཀྱིས་སྟོང་གསུམ་ཀུན། །བྱིན་གྱིས་མ་བརླབས་ན་ནི་གང་དག་རྐང་མཐིལ་གྱིས། །བྱེ་བའི་ཞིང་རྣམས་བསྐྱོད་པ་དེ་ལྟར་ཤུགས་ཆེ་བ། །བྱང་ཆུབ་སེམས་དཔའ་ལྷགས་ཚེ་མ་ལུས་ཞིག་པར་འགྱུར། །ས་ཕྱོགས་གང་དུ་སེམས་ཅན་དམ་པ་འཆག་པ་ནི། །ས་ཡི་ལྷ་ཡིས་བརྙེད་པ་རྒྱ་ཆེན་ལེགས་པར་རྙེད། །འཇིག་རྟེན་རྡུལ་རྣམས་ཇི་སྙེད་ཁྱོད་ཀྱིས་སྣང་བར་མཛད། །སྟོང་གསུམ་མཆོད་རྟེན་གྱུར་ན་ཁྱོད་སྐུ་སྨོས་ཅི་འཚལ། །འོག་གི་ཆུ་ཡི་ཕུང་པོ་བརྒྱ་སྟོང་ཇི་སྙེད་དང ། །ས་ཡི་སྟེང་ན་འགྲོ་བའི་འཚོ་བ་ཇི་སྙེད་པ། །སྟོང་གསུམ་ས་རྣམས་ཐམས་ཅད་བདག་ཅག་གཟུང་བར་བགྱི། །ཁྱོད་ལ་ཀུན་འབུལ་ཇི་ལྟར་བཞེད་བཞིན་སྤྱད་དུ་གསོལ། །གང་དུ་ཁྱོད་ནི་བཞུགས་སམ་འཆག་གམ་མནལ་བ་དང ། །གཽ་ཏམ་བདེ་བར་གཤེགས་པའི་སྲས་པོ་ཉན་ཐོས་གང ། །ཆོས་གཏམ་སྨྲ་དང་གང་ཡང་དེ་དག་ཉན་པ་དང ། །དགེ་བའི་རྩ་བ་ཐམས་ཅད་བྱང་ཆུབ་ཕྱིར་བསྔོའོ། །དེ་ལྟར་ས་བླའི་ལྷ་རྣམས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། ། 41.202a མངོན་པར་བསྟོད་པའི་ལེའུ་ཞེས་པ་སྟེ་ཉི་ཤུ་རྩ་གསུམ་པའོ།། །། དགེ་སློང་དག་དེ་ལྟར་མངོན་པར་རྫོགས་པར་སངས་རྒྱས་པའི་དེ་བཞིན་གཤེགས་པ་ལྷ་རྣམས་ཀྱིས་བསྟོད་ཅིང་སྐྱིལ་མོ་ཀྲུང་མ་བཤིག་།སྤྱན་མི་འཛུམས་པར་ཤིང་གི་རྒྱལ་པོ་ལ་གཟིགས་ཤིང་བསམ་གཏན་དང་དགའ་བའི་ཟས་ཀྱི་བདེ་བ་མྱོང་བར་བྱང་ཆུབ་ཀྱི་ཤིང་དྲུང་དུ་ཞག་བདུན་འདས་པར་གྱུར་ཏོ། །དེ་ནས་ཞག་བདུན་འདས་པ་དང ། འདོད་པ་ན་སྤྱོད་པའི་ལྷའི་བུ་རྣམས་སྤོས་ཆུའི་བུམ་པ་ཁྲི་ཐོགས་ཏེ། དེ་བཞིན་གཤེགས་པ་ག་ལ་བ་དེར་ལྷགས་སོ། །གཟུགས་ན་སྤྱོད་པའི་ལྷའི་བུ་རྣམས་ཀྱང་སྤོས་ཆུའི་བུམ་པ་ཁྲི་ཐོགས་ཏེ། དེ་བཞིན་གཤེགས་པ་ག་ལ་བ་དེར་དོང་སྟེ་ལྷགས་ནས། བྱང་ཆུབ་ཀྱི་ཤིང་དང ། དེ་བཞིན་གཤེགས་པ་ལ་སྤོས་ཆུས་བཀྲུས་སོ། །ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་བགྲང་བ་ལས་འདས་པ་དག་གིས་དེ་བཞིན་གཤེགས་པའི་སྐུ་ལ་ཕོག་པའི་སྤོས་ཆུ་དེས་རང་རང་གི་ལུས་ལ་བསྐུས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་སེམས་བསྐྱེད་དོ། །ལྷའི་བུ་ལ་སོགས་པ་དེ་དག་རང་རང་གི་གནས་སུ་ཕྱིན་ཀྱང་སྤོས་ཆུ་དེ་དང་མ་བྲལ་བར་གྱུར་ཏེ། སྤོས་གཞན་ལ་འདོད་པ་མི་སྐྱེད་དོ། །དེ་དག་དེ་བཞིན་གཤེགས་པ་ལ་གུས་པར་ཡིད་ལ་བྱ་བ་ལས་སྐྱེས་པའི་དགའ་བ་དང ། མཆོག་ཏུ་དགའ་བ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དགེ་སློང་དག་དེ་ནས་ལྷའི་བུ་ཀུན་ནས་མེ་ཏོག་ཅེས་བྱ་བ་འཁོར་དེ་ཉིད་དུ་འདུས་པར་གྱུར་པ་དེས་དེ་བཞིན་གཤེགས་པའི་ཞབས་གཉིས་ལ་གཏུགས་ཏེ། ཐལ་མོ་སྦྱར་ནས་དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས 41.202b ཏིང་ངེ་འཛིན་གང་དང་ལྡན་པས་དེ་བཞིན་གཤེགས་པ་ལ་དགུང་བདུན་དུ་སྐྱིལ་མོ་ཀྲུང་མ་བཤིག་པར་བཞུགས་པའི་ཏིང་ངེ་འཛིན་དེའི་མིང་ཅི་ཞེས་བགྱི། དགེ་སློང་དག་དེ་སྐད་ཅེས་གསོལ་པ་དང ། དེ་བཞིན་གཤེགས་པས་ལྷའི་བུ་དེ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ་ཏིང་ངེ་འཛིན་འདིའི་མིང་ནི་དགའ་བའི་ཟས་བཀོད་པ་ཞེས་བྱ་སྟེ། ཏིང་ངེ་འཛིན་འདི་དང་ལྡན་པས་དེ་བཞིན་གཤེགས་པ་ཞག་བདུན་དུ་སྐྱིལ་མོ་ཀྲུང་མ་བཤིག་པར་བཞུགས་སོ། །དགེ་སློང་དག་དེ་ནས་ལྷའི་བུ་ཀུན་ནས་མེ་ཏོག་གིས་དེ་བཞིན་གཤེགས་པ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཞབས་ནི་འཁོར་ལོས་ཁྱབ་པ་པོ། །པད་འདབ་རྡུལ་མེད་སྟོང་གཟི་ལྡན། །ལྷ་ཡི་ཅོད་པན་ཞབས་གཏུགས་པ། །དཔལ་སྟུག་ཞབས་ལ་ཕྱག་འཚལ་ལོ། །བདེ་གཤེགས་ཞབས་ལ་ཕྱག་འཚལ་ནས། །དེ་ཚེ་ལྷ་བུ་དེ་སེམས་དགའ། །ལྷ་མིན་རབ་ཏུ་ཞི་བྱེད་པ། །ཡིད་གཉིས་སེལ་བའི་ཚིག་འདི་སྨྲས། །ཤཱཀྱའི་རིགས་ལ་དགྱེས་སྐྱེད་པ། །ཆགས་སྡང་གཏི་མུག་མཐར་འབྱིན་པ། །ཞུས་པ་རྣམས་ཀྱང་མཐར་འབྱིན་པ། །ལྷ་མིའི་དོགས་པ་བསལ་དུ་གསོལ། །དཔག་མེད་ཐམས་ཅད་མཁྱེན་པ་ཉིད། །སངས་རྒྱས་སྟོབས་བཅུ་ཅི་སླད་དུ། །རྒྱལ་བ་དོག་སའི་སྙིང་པོར་ནི། །དགུང་བདུན་སྐྱིལ་མོ་ཀྲུང་མ་བཤིག་།འདབ་བརྒྱ་རྒྱས་པའི་སྤྱན་མངའ་བ། །ཅི་ཞིག་གཟིགས་ན་དགུང་བདུན་དུ། །མི་ཡི་སེང་གེ་རྣམ་དག་སྤྱན། །སྤྱན་མི་འཛུམས་པར་གཟིགས་པ་མཛད། །གང་གིས་ཤིང་རྒྱལ་དྲུང་དུ་ནི། །སྐྱིལ་ཀྲུང་མ་བཤིག་དགུང་བདུན་བཞུགས། །སྨོན་ལམ་འདི་ནི་ཁྱོད་ཀྱི་འམ། །སྨྲ་བའི་སེང་གེ་ཀུན་གྱི་ལགས། །ཚེམས་ནི་མཉམ་ཞིང་རྣམ་དག་པ། །སྟོབས་བཅུའི་ཞལ་ནི་དྲི་རབ་གདའ། །མ་ནོར་ལེགས་པར་བཀའ་སྩོལ་ཏེ། །ལྷ་དང་མི་རྣམས་དགའ་བར་མཛོད། ། 41.203a ཟླ་འདྲའི་ཞལ་གྱིས་བཀའ་སྩལ་པ། །ངས་བཤད་ལྷ་ཡི་བུ་ཉོན་ཅིག་།ངས་ནི་དྲིས་པ་དེ་ཡི་ལན། །ཅུང་ཟད་ཙམ་ཞིག་བཤད་པར་བྱ། །དཔེར་ན་རྒྱལ་པོ་ཕྱོགས་གང་དུ། །གཉེན་གྱི་ཚོགས་ཀྱིས་དབང་བསྐུར་བ། །ཞག་བདུན་བར་དུ་ས་ཕྱོགས་དེ། །མི་འདོར་རྒྱལ་པོའི་ཆོས་ཉིད་དོ། །དེ་བཞིན་སྟོབས་བཅུ་མངའ་བ་ཡང ། །གང་ཚེ་སྨོན་རྫོགས་དབང་བསྐུར་བ། །ས་ཡི་སྙིང་པོར་ཞག་བདུན་དུ། །རྒྱལ་བ་སྐྱིལ་མོ་ཀྲུང་མི་འཇིག་།དཔེར་ན་དཔའ་བོ་དགྲ་ཚོགས་རྣམས། །མ་ལུས་ཕམ་བྱས་ལྟ་བ་ལྟར། །བྱང་ཆུབ་སྙིང་པོར་སངས་རྒྱས་ཀྱང ། །ཉོན་མོངས་བཅོམ་ནས་གཟིགས་པ་མཛད། །གཏི་མུག་བྱུང་བའི་འདོད་དང་ཁྲོ། །དེ་དག་འགྲོ་བའི་དགྲ་འདྲ་སྟེ། །ཆོམ་པོ་ཆས་ནི་བཟང་འདྲ་བ། །དེ་དག་མ་ལུས་ངས་འདིར་བཤིག་།ངས་འདིར་ང་རྒྱལ་རྣམ་དགུ་དང ། །གནས་མེད་རློམ་སེམས་རབ་ཏུ་བཅོམ། །ཟག་པ་ཐམས་ཅད་རབ་ཏུ་སྤངས། །ང་ཡི་ཡེ་ཤེས་དམ་པ་སྐྱེས། །ངས་འདིར་སྲེད་པའི་སྲིད་རྒྱུ་དང ། །མ་རིག་བྱ་མིན་བྱེད་པ་དེ། །བག་ཉལ་བཅས་རྩ་དྲ་བ་རྣམས། །ཡེ་ཤེས་གསལ་བའི་མེ་ཡིས་བསྲེགས། །ངས་འདིར་ང་དང་ང་ཡི་དང ། །ཉེས་ཞགས་རིང་འགྲོ་རྩ་བུག་པ། །སྒྲིབ་པའི་མདུད་པ་དམ་པོ་དེ། །ཡེ་ཤེས་མཚོན་གྱིས་བཅད་པར་གྱུར། །ངས་འདིར་རིང་ནས་ངའི་ལྡན་པ། །སླུ་བ་ཐ་མ་རྣམ་འཇིག་པ། །ལེན་པར་བཅས་པའི་ཕུང་པོ་དེ། །ཡེ་ཤེས་ཀྱིས་ནི་ཡོངས་སུ་ཤེས། །གཉིས་སུ་རྨོངས་པ་ལོག་འཛིན་པ། །ཐ་མར་དམྱལ་འགྱུར་དེ་དག་རྣམས། །ངས་འདིར་མ་ལུས་བསལ་བྱ་སྟེ། །ཕྱིན་ཆད་ནམ་ཡང་སྐྱེར་མི་འགྱུར། །ངས་འདིར་དགེ་བའི་རྩ་བ་ཡི། །མེ་ཡིས་སྒྲིབ་པའི་ནགས་ཚལ་བསྲེགས། །ཕྱིན་ཅི་ལོག་ནི་རྣམ་བཞི་ཡང ། །ང་ཡིས་མ་ལུས་ངེས་པར་བསྲེགས། །འདུ་ཤེས་སྐུད་པས་བརྒྱུས་པ་ཡི། །རྣམ་རྟོག་ཕྲེང་བ་གནོད་བྱེད་པ། །ངས་འདིར་བྱང་ཆུབ་ཡན་ལག་གི། ། 41.203b ཕྲེང་བ་སྣ་ཚོགས་རྣམས་ཀྱིས་བཟློག་།བགྲོད་དཀའ་དྲུག་བཅུ་རྩ་ལྔ་དང ། །གཏི་མུག་སུམ་བཅུ་དྲི་མ་ཅན། །སྡིག་པ་དག་ནི་བཞི་བཅུ་ངས། །ས་ཡི་སྙིང་པོ་འདིར་བསལ་ཏེ། །ས་ཡི་སྙིང་པོར་འདུག་ནས་ངས། །སྡོམ་པ་མ་ཡིན་བཅུ་དྲུག་དང ། །ཁམས་ནི་རྣམ་པ་བཅཝ་བརྒྱད་དང ། །ཁྱབ་པ་ཉི་ཤུ་རྩ་ལྔ་བསལ། །ཉོན་མོངས་ཆུ་བོ་ཉི་ཤུ་དང ། །འགྲོ་བ་འཇིགས་པ་ཉི་ཤུ་བརྒྱད། །བརྩོན་འགྲུས་མཐུ་དང་བརྟུལ་བ་ཡིས། །ང་འདིར་དེ་དག་ཤིན་དུ་འདས། །དེ་བཞིན་སངས་རྒྱས་བསྒྱིངས་སྒྲོག་པ། །ལྔ་བརྒྱ་ངས་འདིར་ཡང་དག་རྟོགས། །བརྒྱ་ཕྲག་སྟོང་དུ་མཚང་བ་ཡི། །ཆོས་རྣམས་ང་ཡིས་ཡང་དག་རྟོགས། །ངས་འདིར་བག་ཉལ་མ་ལུས་པ། །དགུ་བཅུ་རྩ་བརྒྱད་རྩར་བཅས་མཐའ། །ཀུན་ནས་ལྡང་བའི་ལོ་མ་རྣམས། །ཡེ་ཤེས་མེ་ཡིས་ངེས་པར་བསྲེགས། །དོགས་དང་ཡིད་གཉིས་ཀུན་འབྱུང་བ། །ལྟ་བའི་ཆུ་ཡིས་གང་གྱུར་པ། །མི་དགེ་ངོགས་ཅན་སྲེད་པའི་ཀླུང ། །ཤུགས་དྲག་ཡེ་ཤེས་ཉི་མས་བསྐམས། །ཚུལ་འཆོས་པ་དང་ཁ་གསག་སྤངས། །སྒྱུ་དང་སེར་སྣ་ཕྲག་དོག་སྡང ། །ཉོན་མོངས་དགོན་པ་དིང་འདིར་བཅད། །འདུལ་བའི་མེ་ཡིས་རབ་ཏུ་བསྲེགས། །འདིར་ནི་རྩོད་པའི་རྩ་བ་དེ། །ངན་འགྲོ་ཉམ་ངར་འདྲེན་བྱེད་པ། །འཕགས་ལ་སྐུར་པ་འདེབས་པའི་ཚིག་།ཡེ་ཤེས་མཆོག་གི་སྨན་གྱིས་བསྐྱུགས། །ངས་འདིར་ཡེ་ཤེས་ཡོན་ཏན་དང ། །ཏིང་འཛིན་ཐོབ་ནས་ངུ་བ་དང ། །ཆོ་ངེ་འདོན་དང་མྱ་ངན་དང ། །སྨྲེ་བ་མ་ལུས་མཐའ་མར་ཕྱིན། །ངས་འདིར་བདེན་ཚུལ་ཏིང་ངེ་འཛིན། །ཐོབ་ནས་ཆུ་བོ་སྦྱོར་བ་དང ། །མདུད་པ་མྱ་ངན་ཟུག་རྔུ་དང ། །རྒྱགས་དང་བག་མེད་ཀུན་ལས་རྒྱལ། །ངས་འདིར་ཉོན་མོངས་གཟིངས་པ་ཡི། །སྲིད་པའི་ལྗོན་ཤིང་རྟོག་རྩ་བརྟན། །དྲན་པའི་སྟ་རེས་མ་ལུས་པར། །བཅད་ནས་ཡེ་ཤེས་མེ་ཡིས་བསྲེགས། །ངས་འདིར་ང་སྙམ་ང 41.204a རྒྱལ་ཏེ། །ཁམས་གསུམ་དབང་བྱེད་སྟོབས་ཆེ་བ། །གཡོན་ཅན་ཡེ་ཤེས་རལ་གྲིས་བཅོམ། །ལྷ་མིན་དབང་ལ་དབང་པོ་བཞིན། །དྲ་བ་མ་ལུས་སུམ་བཅུ་དྲུག་།འཇུག་པ་ས་ཡི་སྙིང་པོ་འདིར། །ཤེས་རབ་རལ་གྲི་སྟོབས་ལྡན་པས། །བཅད་ནས་ཡེ་ཤེས་མེ་ཡིས་བསྲེགས། །ཉོན་མོངས་རྩ་བ་བག་ཉལ་བཅས། །སྡུག་བསྔལ་མྱ་ངན་འབྱུང་དེ་དག་།ངས་འདིར་ཤེས་རབ་དམ་པ་ཡི། །ཐོང་ལྕགས་ཀྱིས་ནི་མ་ལུས་བཏོན། །རང་བཞིན་གྱིས་དག་སེམས་ཅན་གྱི། །ཤེས་རབ་མིག་འདིར་ང་ཡིས་སྦྱངས། །ཡེ་ཤེས་མིག་སྨན་ཆེན་པོ་ཡིས། །གཏི་མུག་ལིང་ཏོག་རྒྱ་ཆེན་བསལ། །འབྱུང་ཁམས་བཞི་པོ་རྒྱགས་པ་ཡི། །ཆུ་སྲིན་གྱིས་དཀྲུགས་སྲེད་ཡངས་པ། །སྲིད་པའི་རྒྱ་མཚོ་དྲན་པ་དང ། །ཞི་གནས་ཉི་མའི་འོད་ཀྱིས་བསྐམས། །ངས་འདིར་ཡུལ་གྱི་ཤིང་གི་ཚོགས། །རྣམ་རྟོག་དུ་འཐུལ་ཆགས་ཆེན་མེ། །རབ་ཏུ་འབར་བ་རྣམ་ཐར་ཆུ། །བསིལ་བའི་ཁུ་བས་བསད་པར་གྱུར། །ངས་འདིར་བག་ལ་ཉལ་བའི་སྤྲིན། །རོ་མྱང་གློག་འདྲ་རྣམ་རྟོག་འབྲུག་།བརྩོན་འགྲུས་སྟོབས་ཀྱི་རླུང་ཤུགས་ཀྱི། །བདས་ཏེ་ཀུན་དུ་གཏོར་བར་གྱུར། །ངས་འདིར་དྲན་པས་དྲི་མེད་པའི། །ཏིང་འཛིན་ཐོབ་ནས་སེམས་སྤྱོད་དགྲ། །སྲིད་པའི་ཁོན་རྒྱུད་མ་ལུས་པར། །ཤེས་རབ་རལ་གྲིའི་སྟོབས་ཀྱིས་བཅད། །ངས་འདིར་རྒྱལ་མཚན་མཆོག་འཆང་བ། །ཤིང་རྟ་གླང་པོ་རྟས་མཐོ་བ། །གཟུགས་བསྒྱུར་བདུད་དཔུང་བརྩོན་པའི་སྡེ། །བྱམས་པ་ཐོབ་ནས་རྣམ་པར་བཅོམ། །མི་སྡུག་ཏིང་ངེ་འཛིན་ཐོབ་ནས། །ངས་འདིར་དབང་པོ་དྲུག་གི་རྟ། །འདོད་པའི་ཡོན་ཏན་ལྔས་ལྟས་པ། །རྟག་ཏུ་རྒྱགས་ཡན་མ་ལུས་བཏགས། །སྨོན་མེད་ཏིང་ངེ་འཛིན་ཐོབ་ནས། །ངས་འདིར་རྗེས་སུ་ཆགས་པ་དང ། །ཁོང་ཁྲོ་བ་དང་འཐབ་པ་དང ། །རྩོད་སྤང་མ 41.204b ལུས་མཐའ་མར་ཕྱིན། །སྟོང་པའི་ཏིང་ངེ་འཛིན་ཐོབ་ནས། །ངས་འདིར་ཕྱི་དང་ནང་དག་གི། །རློམ་སེམས་ཀུན་དང་རྟོག་པ་དང ། །རྣམ་པར་རྟོག་པ་ཡོངས་སུ་ཟད། །མཚན་མེད་ཏིང་ངེ་འཛིན་ཐོབ་ནས། །ལྷ་མི་སྲིད་པའི་རྩེར་ཐུག་པའི། །བདེ་བ་ཐམས་ཅད་མ་ལུས་པར། །ང་ཡིས་འདིར་ནི་ཡོངས་སུ་བཏང ། །ངས་འདིར་རྣམ་ཐར་གསུམ་ཐོབ་ནས། །ངས་འདིར་ཤེས་རབ་སྟོབས་ཀྱིས་ནི། །སྲིད་པ་དག་གི་འཆིང་བ་ཀུན། །མ་ལུས་ཀུན་ལས་གྲོལ་བར་གྱུར། །ངས་འདིར་རྒྱུ་མཐོང་གྱུར་ནས་ནི། །རྟག་དང་མི་རྟག་འདུ་ཤེས་དང ། །བདག་དང་བདག་མེད་བདེ་སྡུག་བསྔལ། །རྒྱུ་ཡི་འདུ་ཤེས་གསུམ་ལས་རྒྱལ། །ངས་འདིར་ལས་ཀྱི་རྣམ་པ་དག་།སྐྱེ་མཆེད་དྲུག་རྩ་ཀུན་འབྱུང་ལས། །བྱུང་བ་ཐམས་ཅད་ཤིང་དབང་དྲུང ། །མི་རྟག་པ་ཡིས་བསྣུན་ཏེ་བཅད། །ངས་འདིར་ཡེ་ཤེས་ཉི་མ་ཡིས། །གཏི་མུག་མུན་པའི་རྙོག་པ་དང ། །ལྟ་གྱུར་རྒྱགས་དང་ཁྲོས་གང་བ། །ཡུན་རིང་མུན་པ་བསལ་སྣང་བྱས། །ངས་འདིར་བརྩོན་འགྲུས་སྟོབས་ཀྱི་གྲུས། །འདོད་དང་ཆགས་པའི་ཆུ་སྲིན་ཅན། །ངན་འཛིན་ལྟ་ངན་སྲེད་རླབས་ཆུ། །འཁོར་བའི་རྒྱ་མཚོ་ཆེ་ལས་རྒལ། །གང་རྟོགས་ཆགས་དང་གཏི་མུག་དང ། །སེམས་ཀྱི་རྣམ་པར་རྟོག་བསྲེགས་ཏེ། །ཕྱེ་བླབ་ནགས་མེར་ལྷུང་འདྲ་བ། །ངས་འདིར་དེ་ནི་རྗེས་སུ་རྟོགས། །ང་འདིར་རིང་ནས་སོང་བ་ཡི། །བསྐལ་པ་དཔག་མེད་བྱེ་ཁྲག་ཁྲིག་།འཁོར་བའི་ལམ་གྱིས་ཉོན་མོངས་པ། །གདུང་བ་མེད་ནས་ངལ་ཡང་སོས། །འཇིག་རྟེན་ཕན་ཕྱིར་རྒ་ཤི་དང ། །མྱ་ངན་སྡུག་བསྔལ་མཐར་ཕྱིན་པ། །ཕས་རྒོལ་ཀུན་གྱིས་མ་ཐོབ་པ། །བདུད་རྩི་དེ་ནི་ངས་འདིར་རྟོགས། །སྲེད་ལས་བྱུང་བའི་སྐྱེ་མཆེད་ཀྱིས། །སྡུག་བསྔལ་ཕུང་པོས་སྡུག་བསྔལ་བ། །ཕྱིས་མི་འབྱུང་བ་འཇིགས་མེད་ཀྱི། །གྲོང་ཁྱེར་འདིར་ནི་ངས་ཕྱིན་ཏོ། ། 41.205a ངས་འདིར་ནང་གི་དགྲ་ཆེན་པོ། །ཁྱབ་པ་དེ་དག་རྗེས་སུ་རྟོགས། །རྟོགས་ནས་རབ་ཏུ་བསྲེགས་ཏེ་ངས། །དེ་དག་ཡང་བྱུང་གནས་མེད་བྱས། །བདུད་རྩིའི་དོན་དུ་བསྐལ་པ་ནི། །བྱེ་བ་ཁྲག་ཁྲིག་རང་གི་ཤ་།མིག་དང་རིན་ཆེན་མང་བཏང་བ། །དེ་འདིར་ང་ཡིས་རྗེས་སུ་རྟོགས། །སྔོན་གྱི་རྒྱལ་བ་དཔག་མེད་པས། །གང་སངས་རྒྱས་དེ་ངས་འདིར་རྟོགས། །གང་གི་སྙན་པ་ཉམས་དགའ་བ། །སྒྲ་ནི་འཇིག་རྟེན་རྣམས་སུ་གྲགས། །རྟེན་ནས་བྱུང་བའི་འགྲོ་བ་སྟོང ། །སེམས་ཀྱི་སྐད་ཅིག་གཅིག་ལ་འཇིག་།སྨིག་རྒྱུ་དྲི་ཟའི་གྲོང་ཁྱེར་འདྲ། །དེ་འདིར་ང་ཡིས་རྗེས་སུ་རྟོགས། །གང་གིས་ལག་པའི་མཐིལ་དུ་ནི། །ཤིང་ཏོག་བཞག་བཞིན་འཇིག་རྟེན་ཁམས། །ཐམས་ཅད་མཐོང་བའི་མིག་མཆོག་དེ། །ང་ཡིས་འདིར་ནི་དག་པར་བྱས། །སྔོན་གྱི་གནས་ནི་ངས་འདིར་དྲན། །རིག་པ་གསུམ་ཡང་ཐོབ་པར་གྱུར། །བསྐལ་པ་ཁྲག་ཁྲིག་དཔག་མེད་པ། །གཉིད་ཀྱིས་ལོག་ལས་སད་བཞིན་དྲན། །ལྷ་མི་ནོར་ཞིང་འདུ་ཤེས་ལོག་།ཕྱིན་ཅི་ལོག་གྱུར་གང་འབར་བ། །དེ་ཡང་དེ་བཞིན་མ་ནོར་བར། །ངས་འདིར་བདུད་རྩིའི་སྙིང་ཁུ་འཐུངས། །གང་གི་དོན་དུ་སྟོབས་བཅུ་པོ། །སེམས་ཅན་ཀུན་ལ་བྱམས་པ་བསྒོམས། །བྱམས་པའི་སྟོབས་ཀྱིས་རྒྱལ་གྱུར་ནས། །ངས་འདིར་བདུད་རྩིའི་སྙིང་ཁུ་འཐུངས། །གང་གི་དོན་དུ་སྟོབས་བཅུ་པོ། །སེམས་ཅན་ཀུན་ལ་སྙིང་རྗེ་བསྒོམས། །སྙིང་རྗེའི་སྟོབས་ཀྱིས་རྒྱལ་གྱུར་ནས། །ངས་འདིར་བདུད་རྩིའི་སྙིང་ཁུ་འཐུངས། །གང་གི་དོན་དུ་སྟོབས་བཅུ་པོ། །སེམས་ཅན་ཀུན་ལ་དགའ་བ་བསྒོམས། །དགའ་བའི་སྟོབས་ཀྱིས་རྒྱལ་གྱུར་ནས། །ངས་འདིར་བདུད་རྩིའི་སྙིང་ཁུ་འཐུངས། །གང་གི་དོན་དུ་སྟོབས་བཅུ་པོ། །བསྐལ་པ་ཁྲག་ཁྲིག་བཏང་སྙོམས་བསྒོམས། །བཏང་སྙོམས་འདི་ཡི་སྟོབས་ཀྱིས་རྒྱལ། །ངས་འདིར་བདུད་རྩིའི 41.205b སྙིང་ཁུ་འཐུངས། །སྟོབས་བཅུ་གང་གཱའི་བྱེ་མ་བས། །རབ་ཏུ་མང་བས་གང་གསོལ་པ། །སྔོན་རྒྱལ་སེང་གེས་སྔོན་གསོལ་པ། །བདུད་རྩིའི་སྙིང་ཁུ་ངས་འདིར་འཐུངས། །རྒ་ཤི་མཐའ་མར་མ་ཕྱིན་པར། །སྐྱིལ་མོ་ཀྲུང་ནི་མི་གཞིག་ཅེས། །སྡེར་བཅས་པ་ཡི་བདུད་མདུན་འདིར། །ང་ཡིས་ཚིག་ནི་གང་སྨྲས་པ། །ཡེ་ཤེས་རྡོ་རྗེ་བརྟན་འབར་བས། །ང་ཡིས་མ་རིག་པ་ཡང་བཅོམ། །སྟོབས་བཅུ་ཉིད་ནི་ཐོབ་པར་གྱུར། །དེ་ལྟ་བས་ན་སྐྱིལ་ཀྲུང་གཞིག་།ང་ཡིས་དགྲ་བཅོམ་ཉིད་ཐོབ་སྟེ། །ང་ཡི་ཟག་པ་མ་ལུས་ཟད། །བདུད་ཀྱི་སྡེ་ཡང་བཅོམ་པར་གྱུར། །དེ་ལྟ་བས་ན་སྐྱིལ་ཀྲུང་གཞིག་།སྒྲིབ་པ་ལྔ་ཡི་སྒོ་གླེགས་རྣམས། །ང་ཡིས་འདིར་ནི་ཐམས་ཅད་བཅག་།སྲིད་པའི་ཁྲི་ཤིང་རྣམས་ཀྱང་བཅད། །ང་འདིར་སྐྱིལ་མོ་ཀྲུང་གཞིག་གོ། །དེ་ནས་མི་ཡི་ཟླ་བ་དེ། །དལ་གྱིས་གདན་ལས་བཞེངས་ནས་སུ། །དབང་བསྐུར་ཆེན་པོ་བཞེས་ནས་ནི། །སེང་གེའི་གདན་ལ་བཞུགས་པར་གྱུར། །ལྷ་ཚོགས་རྣམས་ཀྱིས་རིན་ཆེན་སྣོད། །སྟེང་ནས་སྤོས་ཆུ་སྣ་ཚོགས་ཀྱིས། །སྟོབས་བཅུ་ཡོན་ཏན་མཐར་ཕྱིན་པ། །འཇིག་རྟེན་རྩ་ལག་སྐུ་ཡང་བསིལ། །བྱེ་བ་ཁྲག་ཁྲིག་ལྷ་རྣམས་དག་།ལྷ་མོ་ཁྲག་ཁྲིག་ལྷན་ཅིག་ཏུ། །ཀུན་ནས་རོལ་མོ་སྟོང་དག་གིས། །མཆོད་པ་གཞལ་དུ་མེད་པ་བྱེད། །དེ་ལྟར་ལྷ་ཡི་བུ་དག་ནི། །ས་ཡི་སྙིང་པོ་ཞག་བདུན་དུ། །རྒྱལ་བའི་སྐྱིལ་ཀྲུང་མ་བཤིག་པ། །རྒྱུར་བཅས་རྐྱེན་བཅས་གཞི་དང་བཅས། །དགེ་སློང་དག་དེ་ལྟར་བྱང་ཆུབ་མངོན་པར་རྫོགས་པར་སངས་རྒྱས་པའི་དེ་བཞིན་གཤེགས་པ་ངས་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ངས་འདིར་ཐོག་མ་མེད་པའི་སྐྱེ་བ་དང ། རྒ་བ་དང ། འཆི་བའི་སྡུག་བསྔལ་མཐར་ཕྱུང་ངོ་ཞེས་ཞག་བདུན་པ་དང་པོ་ལ་གདན་དེ་ཉིད་ལ་བཞུགས་སོ། །ཞག་བདུན་པ་གཉིས 41.206a པའི་ཚེ་ནི་དེ་བཞིན་གཤེགས་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བར་དུ་རྒྱང་རིང་དུ་འཆག་པས་འཆག་གོ། །ཞག་བདུན་པ་གསུམ་པའི་ཚེ་ནི་དེ་བཞིན་གཤེགས་པ་ངས་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཐོག་མ་མེད་པའི་སྐྱེ་བ་དང ། རྒ་བ་དང ། འཆི་བའི་སྡུག་བསྔལ་མཐར་ཕྱུང་ངོ་ཞེས་བྱང་ཆུབ་ཀྱི་སྙིང་པོ་ལ་སྤྱན་མི་འཛུམས་པར་གཟིགས་སོ། །ཞག་བདུན་པ་བཞི་པའི་ཚེ་ནི་དེ་བཞིན་གཤེགས་པ་ཤར་གྱི་རྒྱ་མཚོ་ནས་ནུབ་ཀྱི་རྒྱ་མཚོའི་བར་དུ་མི་རིང་བའི་འཆགས་པས་འཆག་གོ། །། འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་དྲུག་པ། དེ་ནས་བདུད་སྡིག་ཅན་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་ནས། དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ད་ཡོངས་སུ་མྱ་ངན་ལས་འདའ་བའི་དུས་ལ་བབ་ལགས་ཀྱིས། བཅོམ་ལྡན་འདས་ཡོངས་སུ་མྱ་ངན་ལས་འདའ་བར་གསོལ། བདེ་བར་གཤེགས་པ་ཡོངས་སུ་མྱ་ངན་ལས་འདའ་བར་གསོལ། དགེ་སློང་དག་དེ་སྐད་ཅེས་གསོལ་པ་དང ། དེ་བཞིན་གཤེགས་པས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན་ངའི་དགེ་སློང་གནས་བརྟན་གནས་བརྟན། དུལ་བ། གསལ་བ། བྱང་བ། བག་ཚ་བ་མེད་པ། མང་དུ་ཐོས་པ། ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ། བདག་ཉིད་སློབ་དཔོན་དུ་སྒྲོགས་པ་དང ། ཕས་ཀྱི་རྒོལ་བ་བྱུང་བ་རྣམས་ཆོས་དང་འཐུན་པས་ཚར་བཅད་དེ་དད་པར་བྱས་ནས་ཆོ་འཕྲུལ་དང་བཅས་པའི་ཆོས་སྟོན་པར་ནུས་པ་དག་མ་བྱུང་གི་བར་དེ་སྲིད་དུ་ང་ཡོངས་སུ་མྱ 41.206b ངན་ལས་མི་འདའོ། །སྡིག་ཅན་ངས་འཇིག་རྟེན་དུ་སངས་རྒྱས་དང ། ཆོས་དང ། དགེ་འདུན་གྱི་སྒྲ་བཞག་པར་མ་གྱུར་པ་དང ། བྱང་ཆུབ་སེམས་དཔའ་དཔག་ཏུ་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་མ་གྱུར་གྱི་བར་དུ་དེ་སྲིད་དུ་ང་ཡོངས་སུ་མྱ་ངན་ལས་མི་འདའོ། །སྡིག་ཅན་ངའི་འཁོར་བཞི་པོ་དུལ་བ། གསལ་བ། བྱང་བ། བག་ཚ་བ་མེད་པ་ནས་ཆོ་འཕྲུལ་དང་བཅས་པའི་ཆོས་སྟོན་པའི་བར་དུ་ནུས་པ་དག་བྱུང་བ་མ་གྱུར་གྱི་བར་དེ་སྲིད་དུ་ང་ཡོངས་སུ་མྱ་ངན་ལས་མི་འདའོ། །དེ་ནས་བདུད་སྡིག་ཅན་གྱིས་ཚིག་དེ་སྐད་ཐོས་ནས་སྡུག་བསྔལ་ཞིང་ཡིད་མི་བདེ་སྟེ། ཕྱོགས་གཅིག་ཏུ་སོང་ནས་འདུག་སྟེ་མགོ་སྨད་ནས་མདས་ས་ལ་རི་མོ་འདྲི་ཞིང་བདག་གི་ཡུལ་ལས་འདས་སོ་སྙམ་དུ་སེམས་པར་གྱུར་ཏོ། །དེ་ནས་བདུད་ཀྱི་བུ་མོ་དགའ་མ་དང ། མི་དགའ་མ་དང ། སྲེད་མ་གསུམ་གྱིས་བདུད་སྡིག་ཅན་ལ་ཚིགས་སུ་བཅད་དེ་སྨྲས་པ། ཡབ་ཅིག་ཇི་ལྟར་ཐུགས་མི་དགྱེས། །མི་གང་ལགས་པ་བཀའ་སྩོལ་དང ། །འདོད་ཆགས་ཞགས་པས་དེ་བཅིངས་ནས། །གླང་པོ་བཞིན་དུ་དགུག་པར་བགྱི། །བཀུག་ནས་དེ་ནི་མྱུར་དུ་ཡང ། །ཁྱོད་ཀྱི་དབང་དུ་འགྱུར་བར་བགྱི། །དེ་ལ་ཐུགས་ངན་འོ་བརྒྱལ་འོར། །དགྱེས་པ་རྒྱ་ཆེན་བརྙེས་པར་འགྱུར། །བདུད་ཀྱིས་སྨྲས་པ། འཇིག་རྟེན་དགྲ་བཅོམ་བདེ་བར་གཤེགས། །འདོད་ཆགས་དབང་དུ་དེ་མི་འགྲོ། །ང་ཡི་ཡུལ་ལས་ཤིན་ཏུ་འདས། །དེ་བས་ང་ནི་མྱ་ངན་ཆེ། །དེ་ནས་དེ་དག་གིས་དེ་བཞིན་གཤེགས་པའི་མཐུ་བྱང་ཆུབ་སེམས་དཔའི་མཛད་པ་སྔ་ནས་ཀྱང་ཤེས་མོད་ཀྱི། བུད་མེད་ཀྱིས་མི་བརྟན་པས་ཕའི་ཚིག་མ་མཉན་ཏེ། བུ་ཅིག་བཙས་ཙམ་གྱི་ན་ཚོད་ཀྱིས་དར་ལ་བབ་པར་སྒྱུར་ནས། མིག་གིས་མི་རྩོལ་བར་བྱ་བས་ལས་ཀྱི། ཕྱིར་དེ་བཞིན་གཤེགས་པའི་གན་དུ་དོང་བ 41.207a དང ། དེ་བཞིན་གཤེགས་པས་དེ་དག་ཡིད་ལ་མ་མཛད་པར་དེ་དག་རྒ་བས་འཁོགས་པར་བྱིན་གྱིས་བརླབས་སོ། །དེ་ནས་དེ་དག་ཕའི་གན་དུ་སོང་སྟེ། འདི་སྐད་ཅེས་སྨྲས་སོ། །དེ་ནི་ཆགས་པས་མི་བཀྲི་སྟེ། །ང་ཡི་ཡུལ་ལས་ཤིན་ཏུ་འདས། །དེ་བས་མྱ་ངན་ང་ཆེ་ཞེས། །ཡབ་ཀྱིས་བདག་ཅག་གསུངས་པ་མེད། །གཽ་ཏ་མ་ནི་བརླག་པའི་ཕྱིར། །བདག་ཅག་རྣམས་ཀྱིས་གང་སྤྲུལ་པ། །གཟུགས་ལ་གལ་ཏེ་དེ་ལྟ་ན། །དེ་ཡི་དེ་སྙིང་འགས་པར་འགྱུར། །ཡབ་བདག་ཅག་གི་ལུས་རྒ་བས་འཁོགས་པ་འདི་མ་མཆིས་པར་མཛད་དུ་གསོལ། །བདུད་ཀྱིས་སྨྲས་པ། གང་ཞིག་སངས་རྒྱས་བྱིན་གྱིས་བརླབས་ནི་གཞན་དུ་བསྒྱུར་བར་བྱེད་ནུས་པ། །རྒྱུ་དང་མི་རྒྱུ་དག་གི་འཇིག་རྟེན་དག་ན་མི་དེ་ངས་མ་མཐོང ། །མྱུར་དུ་སོང་སྟེ་ཐུབ་པ་དེ་ལས་རང་བྱས་ཤོགས་ཤིག་དང ། །དེ་ནི་ཁྱོད་ཀྱིས་བསམ་པ་བཞིན་དུ་སྔོན་གྱི་ལུས་སུ་སྒྱུར་བར་འགྱུར། །དེ་ནས་དེ་དག་དོང་སྟེ་བདག་ཅག་གིས་བཅོམ་ལྡན་འདས་ལ་སྐུ་བརྙས་བགྱི་བར་བསམས་པས། བཅོམ་ལྡན་འདས་ཇི་ལྟར་བྱིས་པ་རྣམས་དང ། ཇི་ལྟར་གླེན་པ་རྣམས་དང ། ཇི་ལྟར་མི་གསལ་བ་མི་མཁས་ཤིང་མ་འཚལ་བ་རྣམས་ལྟར་བདག་ཅག་ནོངས་པ་ཅན་དུ་གཟུང་དུ་གསོལ། བདེ་བར་གཤེགས་པ་བདག་ཅག་ནོངས་པ་ཅན་དུ་གཟུང་དུ་གསོལ། ཞེས་དེ་བཞིན་གཤེགས་པ་ལ་བཟོད་པར་གསོལ་ཏོ། །དེ་ནས་དེ་བཞིན་གཤེགས་པས་དེ་དག་ལ་ཚིགས་སུ་བཅད་པས་བཀའ་སྩལ་པ། །སེན་མོས་རི་ལ་བྲུ་བ་དང ། །སོ་ཡིས་ལྕགས་ནི་བཅའ་བ་དང ། །མགོ་ཡིས་རི་ནི་དབུག་པ་དང ། །གཏིང་མི་དཔོགས་ལ་དཔོག་པར་འདོད། །དེ་ལྟ་བས་ན་བུ་མོ་ཁྱེད་ཉེས་པ་ཅན་དུ་གཟུང་ངོ ། །དེ་ཅིའི་ཕྱིར་ཞེ་ན། གང་ཉེས་པ་ལ་ཉེས་པར་མཐོང་ནས་འཆགས་ཤིང་ཕྱིན་ཆད་ཀྱང་སྡོམ་པར་བྱེད་པ་དེ་ནི་འཕགས 41.207b པའི་ཆོས་འདུལ་བ་ལ་འཕེལ་བར་འགྱུར་རོ། །དགེ་སློང་དག་ཞག་བདུན་པ་ལྔ་པ་ཞག་བདུན་ཡུལ་ངན་ཆེན་པོ་བྱུང་བའི་ཚེ་ན། དེ་བཞིན་གཤེགས་པ་ཀླུའི་རྒྱལ་པོ་བཏང་ཟུང་གི་གནས་ན་བཞུགས་སོ། །དེ་ནས་ཀླུའི་རྒྱལ་པོ་བཏང་ཟུང་བཅོམ་ལྡན་འདས་ཀྱི་སྐུ་ལ་གྲང་བ་དང་རླུང་གིས་ཕོག་ཏུ་འོང་ཞེས་རང་གི་གནས་ནས་བྱུང་སྟེ། ལུས་ཀྱིས་དེ་བཞིན་གཤེགས་པའི་སྐུ་ལ་ལན་བདུན་དུ་དཀྲིས་ནས་མགོའི་གདེངས་ཀ་རྣམས་ཀྱི་བཀབ་བོ། །བཅོམ་ལྡན་འདས་ཀྱི་སྐུ་ལ་གྲང་བ་དང་རླུང་གིས་ཕོག་ཏུ་འོང་ངོ་ཞེས་ཤར་ཕྱོགས་ནས་ཀྱང་ཀླུའི་རྒྱལ་པོ་གཞན་མང་དུ་ལྷགས་ཏེ། དེ་བཞིན་གཤེགས་པའི་སྐུ་ལ་ལུས་རྣམས་ཀྱིས་ལན་བདུན་དུ་དཀྲིས་ནས་མགོའི་གདེངས་ཀ་རྣམས་ཀྱིས་བཀབ་བོ། །ཤར་ཕྱོགས་ནས་ཇི་ལྟ་བ་བཞིན་དུ་བཅོམ་ལྡན་འདས་ཀྱི་སྐུ་ལ་གྲང་བ་དང་རླུང་གིས་ཕོག་ཏུ་འོང་ངོ་ཞེས་ལྷོ་དང་ནུབ་དང་བྱང་ཕྱོགས་ནས་ཀྱང་ཀླུའི་རྒྱལ་པོ་རྣམས་ལྷགས་ནས་དེ་བཞིན་གཤེགས་པའི་སྐུ་ལ་ལུས་རྣམས་ཀྱིས་ལན་བདུན་དུ་བཀྲིས་ཏེ་མགོའི་གདེངས་ཀ་རྣམས་ཀྱིས་བཀབ་བོ། །ཀླུའི་རྒྱལ་པོའི་ཕུང་པོ་དེ་ནི་རིའི་དབང་པོ་ལྷུན་པོ་ལྟར་མཐོན་པོར་གནས་པར་གྱུར་ཏོ། །ཀླུའི་རྒྱལ་པོ་དེ་དག་གིས་ཀྱང་ཇི་ལྟར་ཉིན་བདུན་མཚན་བདུན་དུ་དེ་བཞིན་གཤེགས་པའི་སྐུ་ལ་རེག་པར་གྱུར་པ་དེ་ལྟ་བུའི་བདེ་བ་དེ་དག་གིས་སྔོན་ནམ་ཡང་མ་རྙེད་དོ། །དེ་ནས་ཞག་བདུན་འདས་ནས་ཀླུའི་རྒྱལ་པོ་དེ་དག་གིས་ཡུལ་ངན་མེད་པར་ཤེས་ཏེ། དེ་བཞིན་གཤེགས་པའི་སྐུ་ལས་ལུས་བཀྲོལ་ནས། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས། རང་རང་གི་གནས་སུ་དོང་ངོ ། །ཀླུའི་རྒྱལ་པོ་བཏང་ཟུང་ཡང་དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་རང་གིས 41.208a གནས་སུ་ཞུགས་སོ། །ཞག་བདུན་པ་དྲུག་པའི་ཚེ་ནི་དེ་བཞིན་གཤེགས་པ་ཀླུའི་རྒྱལ་པོ་བཏང་ཟུང་གི་གནས་ནས་ཤིང་ནྱ་གྲོ་དྷ་ར་སྐྱོང་གི་དྲུང་དུ་བཞུད་དོ། །ཀླུའི་རྒྱལ་པོ་བཏང་ཟུང་གི་གནས་དང་ཤིང་ནྱ་གྲོ་དྷ་ར་སྐྱོང་གི་བར་དུ་ཀླུང་ནཻ་རཎ་ཛ་ནའི་ངོགས་སུ་སྤྱོད་པ་པ་དང ། ཀུན་དུ་རྒྱུ་དང ། ཉན་ཐོས་རྒན་པོ་དང ། གཽ་ཏ་མ་དང ། གཅེར་བུ་པ་དང ། ཀུན་དུ་འཚོ་བ་པ་ལ་སོགས་པས་དེ་བཞིན་གཤེགས་པ་མཐོང་ནས། བཅོམ་ལྡན་འདས་གཽ་ཏ་མས་ཞག་བདུན་པ་ཡུལ་ངན་ཆེན་པོའི་དུས་འདི་བདེ་བས་བདེ་བར་འདས་པར་བྱས་སམ་ཞེས་འཛེར་ཏོ། །དགེ་སློང་དག་དེ་ནས་དེ་བཞིན་གཤེགས་པའི་དེའི་ཚེ་ཆེད་དུ་རྗོད་པ་འདི་ཆེད་དུ་བརྗོད་དོ། །ཆོས་ཐོས་པ་དང་མཐོང་བ་དང ། །དབེན་པར་དགའ་བ་བདེ་བ་ཡིན། །སྲོག་ཆགས་འབྱུང་པོ་རྣམས་ལ་བསྡམས། །གནོད་པ་མི་བྱེད་འཇིག་རྟེན་བདེ། །སྡིག་པ་རྣམས་ལས་རབ་འདས་པ། །འདོད་ཆགས་བྲལ་བ་འཇིག་རྟེན་བདེ། །ང་སྙམ་ང་རྒྱལ་གང་འདུལ་བ། །དེ་ནི་མཆོག་ཏུ་བདེ་བ་ཡིན། །དགེ་སློང་དག་དེ་བཞིན་གཤེགས་པས་སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་ཀྱི་འཇིག་རྟེན་ཀུན་དུ་འབར་ཞིང་རབ་ཏུ་འབར་བར་གཟིགས་ནས་དེའི་ཚེ་བཅོམ་ལྡན་འདས་ཀྱིས་ཆེད་དུ་རྗོད་པ་འདི་ཆེད་དུ་བརྗོད་དོ། །སྒྲ་རེག་རོ་དང་གཟུགས་དང་དྲི་རྣམས་ཀྱིས། །འཇིག་རྟེན་འདི་ནི་ཀུན་དུ་གདུངས་པར་གྱུར། །སྲིད་པས་འཇིགས་ཀྱང་སྲིད་པའི་སྲེད་པ་ཡིས། །ཕྱིར་ཞིང་སྲེད་པ་ཚོལ་བར་བྱེད་པ་ཡིན། །ཞག་བདུན་པ་བདུན་པའི་ཚེ་ནི་དེ་བཞིན་གཤེགས་པ་ཤིང་སྒྲོལ་རྒྱུའི་དྲུང་དུ་བཞུགས་སོ། །དེའི་ཚེ་བྱང་ཕྱོགས་པའི་ཚོང་པ་ག་གོན་དང་བཟང་པོ་ཞེས་བྱ་བ་མཁས་པ་གསལ 41.208b བ་སྤུན་གཉིས་རྙེད་པ་ཆེན་པོ་རྙེད་ནས། ཟོང་རྣམ་པ་མང་པོ་ཐོགས་ཏེ། འདྲོན་པ་ཕལ་པོ་ཆེ་དང ། ཤིང་རྟ་ཤིན་དུ་གང་བ་ལྔ་བརྒྱ་དང་ལྷན་ཅིག་ཏུ་ལྷོ་ཕྱོགས་ནས་བྱང་ཕྱོགས་སུ་དོང་ངོ ། །དེ་གཉིས་ལ་གླང་བུ་ཅང་ཤེས་ལེགས་སྐྱེས་དང་གྲགས་པ་ཞེས་བྱ་བ་གཉིས་ཡོད་དོ། །དེ་གཉིས་ལ་ཐོགས་པའི་འཇིགས་པ་མེད་དེ་གང་དུ་གླང་བུ་གཞན་མི་ཐར་བ་དེར་དེ་གཉིས་གཏོང་ངོ ། །གང་དུ་མདུན་རོལ་ན་འཇིགས་པ་ཡོད་པ་དེར་དེ་གཉིས་ཕུར་པ་ལ་བཏགས་པ་བཞིན་དུ་འདུག་གོ། །དེ་གཉིས་ལ་ལྕག་གིས་མི་འཇུའི་མེ་ཏོག་ཨུད་པ་ལ་སྤར་གང་ངམ། སྣ་མའི་མེ་ཏོག་གི་ཕྲེང་བས་དེ་གཉིས་དེད་དོ། །ཤིང་སྒྲོལ་རྒྱུ་དང་ཉེ་བ་ཞིག་ཏུ་ཤིང་འོ་མ་ཅན་གྱི་ནགས་ན་གནས་པའི་ལྷ་མོས་བྱིན་གྱི་རླབས་ཀྱིས་བྱིན་གྱིས་བརླབས་པས། དེ་དག་གི་ཤིང་རྟ་དེ་དག་ཐམས་ཅད་མི་འགྲོ་སྟེ། འབྲེང་པ་ལ་སོགས་པ་ཤིང་རྟའི་ཆ་རྐྱེན་ཐམས་ཅད་ཀྱང་ཆད་གྲུགས་སོ། །ཤིང་རྟའི་འཕང་ལོ་རྣམས་ཀྱང་ལྟེ་བ་ལ་ཐུག་པར་སའི་ནང་དུ་ནུབ་སྟེ། ཐམས་ཅད་ཀྱིས་རབ་ཏུ་སྒྲིམས་ཀྱང་ཤིང་རྟ་དེ་དག་འགྲོ་བར་མ་གྱུར་ནས། ཁ་ཅིག་ངོ་མཚར་དང་སྐྲག་པར་གྱུར་ཏེ། ཤིང་རྟ་འདི་དག་ཐང་ལ་ཡང་ཐོགས་པར་གྱུར་པ་འདི་ལ་རྒྱུ་ནི་ཅི་ཞིག་ཡོད། འདིའི་འགྱུར་བ་ནི་ཅི་ཞིག་ཡིན་སྙམ་ནས། དེ་དག་གིས་གླང་བུ་ལེགས་སྐྱེས་དང་གྲགས་པ་དེ་གཉིས་འདྲེན་དུ་བཅུག་སྟེ། མེ་ཏོག་ཨུད་པ་ལ་སྤར་གང་དང ། སྣ་མའི་མེ་ཏོག་གི་ཕྲེང་བས་བདས་ཀྱང་འགྲོ་བར་མ་གྱུར་ནས་དེ་དག་འདི་སྙམ་དུ་སེམས་ཏེ། གང་གི་ཕྱིར་འདི་གཉིས་ཀྱང་མི་འགྲོ་བ་ལས་མདུན་ན་འཇིགས་པ་འགའ་ཞིག་འབྱུང་དུ་གདོན་མི་ཟའོ་སྙམ་ནས། དེ་དག་གིས་ས་འཁྲུ་བ་རྟ་པ་དག་སྔར་བཏང་ངོ ། །ས་འཁྲུ་བ་རྟ་པ་རྣམས་སླར་ལོག་ནས་འཇིགས་པ་ཅི་ཡང་མེད་ཅེས་སྨྲས་སོ། །ལྷ་མོ་དེས་ཀྱང་རང་གི་གཟུགས་བསྟན་ནས་མ་འཇིགས 41.209a ཤིག་ཅེས་དབུགས་ཕྱུང་ངོ ། །གླང་བུ་དེ་གཉིས་ཀྱིས་དེ་བཞིན་གཤེགས་པ་ག་ལ་བ་དེ་ལོགས་སུ་ཤིང་རྟ་དྲངས་པ་དང ། དེ་དག་གིས་དེ་བཞིན་གཤེགས་པ་མེ་ལྟར་རབ་ཏུ་འབར་བ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱི་མཚན་གྱིས་ལེགས་པར་བརྒྱན་པ། ཉི་མ་ཤར་ནས་རིང་པོར་མ་ལོན་པ་ལྟ་བུ་དཔལ་གྱིས་འབར་བ་མཐོང་ངོ ། །མཐོང་ནས་ཀྱང་དེ་དག་ངོ་མཚར་དུ་གྱུར་ཏེ། འདི་ཅི་ཞིག་ཚངས་པ་འདིར་ཕྱིན་ཏམ། འོན་ཏེ་ལྷའི་དབང་པོ་བརྒྱ་བྱིན་ནམ། འོན་ཏེ་རྣམ་ཐོས་ཀྱི་བུ་འམ། འོན་ཏེ་ཉི་མ་དང་ཟླ་བ་འམ། འོན་ཏེ་རིའི་ལྷ་འགའ་ཞིག་གམ། རླུང་གི་ལྷ་ཞིག་སྙམ་མོ། །དེ་ནས་དེ་བཞིན་གཤེགས་པས་ན་བཟའ་ངུར་སྨྲིག་རྣམས་བསྟན་ཏོ། །དེ་ནས་དེ་དག་གིས་ངུར་སྨྲིག་བགོས་པ་འདི་ནི་རབ་ཏུ་བྱུང་བ་ཡིན་གྱིས་བདག་ཅག་འཇིགས་པ་མེད་དོ་ཞེས་སྨྲས་ཏེ། དེ་དག་དད་པ་ཐོབ་ནས་ཡང་ཕན་ཚུན་དུ་སྨྲས་པ། རབ་ཏུ་བྱུང་བ་འདི་ནི་དུས་སུ་ཟ་བ་ཡིན་ན། ཅུང་ཟད་ཅི་ཡོད། སྨྲས་པ། སྦྲང་རྩི་དང ། སྐྱོ་མ་དང ། བུ་རམ་ཤིང་བཤུས་པ་ཡོད་དོ། །དེ་དག་གིས་སྦྲང་རྩི་དང ། སྐྱོ་མ་དང ། བུ་རམ་ཤིང་བཤུས་པ་ཁྱེར་ནས། དེ་བཞིན་གཤེགས་པ་ག་ལ་བ་དེར་དོང་སྟེ་ཕྱིན་པ་དང ། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་དེ་དག་གིས་དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བར་དགོངས་ཏེ་སྤྱན་གཟིགས་འདི་བཞེས་སུ་གསོལ། དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། བདག་གིས་ལག་པས་འདི་བླངས་ན་ནི་མ་ལེགས་ན་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་སྣོད་ཇི་ལྟ་བུས་བཞེས་སྙམ་ནས་མཁྱེན་པར་གྱུར་ཏོ། །དགེ་སློང་དག་དེ་ལྟར་དེ་བཞིན་གཤེགས་པའི་སྤྲབས་ཀྱི་དུས་ལ་བབ་པར་རིག་ནས་སྐད་ཅིག་དེ་ཉིད་ལ་ཕྱོགས་བཞི་ནས་རྒྱལ་པོ་ཆེན་པོ་བཞི་གསེར་གྱི་ལྷུང་བཟེད་བཞི 41.209b ཐོགས་ཏེ། ལྷགས་ནས་དེ་བཞིན་གཤེགས་པ་ལ་བཅོམ་ལྡན་འདས་བདག་ཅག་ལ་ཐུགས་བརྩེ་བར་དགོངས་ཏེ། གསེར་གྱི་ལྷུང་བཟེད་བཞི་པོ་འདི་དག་བཞེས་སུ་གསོལ་ཞེས་ཕུལ་ལོ། །དེ་དག་དགེ་སྦྱོང་གི་ཆ་མ་ཡིན་པར་དགོངས་ནས། དེ་བཞིན་གཤེགས་པས་མ་བཞེས་སོ། །དེ་བཞིན་དུ་དངུལ་གྱི་བཞི་དང ། བཻ་དཱུརྱ་དང ། ཤེལ་དང ། སྤུག་དང ། རྡོའི་སྙིང་པོ་ལས་བྱས་པ་བཞི་བཞི་དང ། རིན་པོ་ཆེ་ཐམས་ཅད་ལས་བྱས་པའི་ལྷུང་བཟེད་བཞི་ཐོགས་ཏེ། དེ་བཞིན་གཤེགས་པ་ལ་ཕུལ་ན་ཡང་དགེ་སྦྱོང་གི་ཆ་མ་ཡིན་པར་དགོངས་ཏེ། དེ་བཞིན་གཤེགས་པས་མ་བཞེས་སོ། །དགེ་སློང་དག་དེ་ནས་དེ་བཞིན་གཤེགས་པས་ཡང་འདི་སྙམ་དུ་དགོངས་ཏེ། སྔོན་གྱི་དེ་བཞིན་གཤེགས་པ་རྣམས་ཀྱིས་ལྷུང་བཟེད་རྣམ་པ་ཅི་འདྲ་བ་དག་གིས་བཞེས་སྙམ་དགོངས་ན། རྡོའི་ལྷུང་བཟེད་རྣམས་ཀྱིས་བཞེས་པར་མཁྱེན་ནས། དེ་བཞིན་གཤེགས་པས་དེ་ལྟ་བུའི་ཐུགས་བསྐྱེད་པ་དང ། དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས་རྒྱལ་པོ་ཆེན་པོ་གཞན་གསུམ་ལ་སྨྲས་པ། གྲོགས་པོ་དག་སྔོན་པོའི་རིས་ཀྱི་ལྷའི་བུ་རྣམས་ཀྱིས་བདག་ལ་རྡོའི་ལྷུང་བཟེད་བཞི་བྱིན་པ་དང ། དེ་ལ་བདག་གིས་འདི་སྙམ་དུ་བསམས་ཏེ། འདི་སྤྱད་པར་བྱའོ་སྙམ་པ་དང ། དེ་ནས་སྔོན་པོའི་རིས་ཀྱི་ལྷའི་བུ་རྣམ་པར་སྣང་བྱེད་ཅེས་བྱ་བ་དེས་བདག་ལ་འདི་སྐད་ཅེས་སྨྲས་སོ། །ཀྱེ་སྣོད་འདི་དག་སྤྱད་པར་མ་བྱ་བར། །འདི་དག་ཆོངས་ཤིག་མཆོད་རྟེན་གྲགས་པར་འགྱུར། །ཤཱཀྱ་ཐུབ་ཅེས་བྱ་བའི་རྒྱལ་བ་འབྱུང ། །དེ་ལ་ལྷུང་བཟེད་འདི་དག་དབུལ་བ་གྱིས། །གྲོགས་པོ་དག་གིས་ཤཱཀྱ་ཐུབ་པ་ལ། །སྣོད་དབུལ་བ་ཡི་དུས་དང་ཚོད་ལ་བབ། །གླུ་དབྱངས་དག་དང་སིལ་སྙན་སྒྲ་ཕྱུང་སྟེ། །མཆོད་པ་བྱས་ནས་ལྷུང་བཟེད་དབུལ་བར་བྱ། །སྣོད་དེ་ཆོས་ཀྱི་རང་བཞིན་མི་ཤིགས་པ། །སྣོད་འདི་རྡོ་བའི་རང་བཞིན་བཞེས་སུ་རུང ། །གཞན་གྱིས་བླང་བར་བཟོད་པ་མ་ཡིན་གྱིས། །ད་ནི་བདག་ཅག་དེ་དག་ལེན་དུ་དོང ། །དེ་ནས་རྒྱལ་པོ་ཆེན་པོ་བཞིས་རང་གི་གཉེན་དང་འཁོར 41.210a དུ་བཅས་ཏེ་མེ་ཏོག་དང ། བདུག་པ་དང ། སྤོས་དང་ཕྲེང་བ་དང ། བྱུག་པ་དང་སིལ་སྙན་དང ། ཕེག་རྡོབ་པ་དང ། གླུ་དབྱངས་ལེན་ཅིང་རང་རང་གི་ལག་ཏུ་ལྷུང་བཟེད་དེ་དག་ཐོགས་ནས། དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་ནས། དེ་བཞིན་གཤེགས་པ་ལ་མཆོད་པ་བྱས་ཏེ། ལྷུང་བཟེད་དེ་དག་ལྷའི་མེ་ཏོག་གིས་བཀང་ནས་དེ་བཞིན་གཤེགས་པ་ལ་ཕུལ་ལོ། །དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། རྒྱལ་པོ་ཆེན་པོ་དད་པ་དང་བས་བཞི་པོ་འདི་དག་གིས་བདག་ལ་རྡོའི་ལྷུང་བཟེད་བཞི་ཕུལ་ན། བདག་ལ་ནི་བཞིར་མི་རུང་ལ། ཇི་སྟེ་གཅིག་གི་བླངས་ན་ནི་གསུམ་ཡང་མི་དགའ་བར་འགྱུར་ན། བདག་གིས་ལྷུང་བཟེད་བཞི་པོ་འདི་དག་བླངས་ཏེ་ལྷུང་བཟེད་གཅིག་ཏུ་བྱིན་གྱིས་བརླབ་བོ་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པས་ཕྱག་གཡས་པ་བརྐྱང་སྟེ། རྒྱལ་པོ་ཆེན་པོ་རྣམ་ཐོས་ཀྱི་བུ་ལ་ཚིགས་སུ་བཅད་པས་བཀའ་སྩལ་པ། བདེ་བར་གཤེགས་ལ་ལྷུང་བཟེད་ཕུལ་ཅིག་དང ། །ཁྱོད་ནི་ཐེག་པ་མཆོག་གི་སྣོད་དུ་འགྱུར། །ང་འདྲ་དག་ལ་ལྷུང་བཟེད་ཕུལ་བ་ནི། །དྲན་དང་བློ་གྲོས་ནམས་ཀྱང་ཉམས་མི་འགྱུར། །དགེ་སློང་དག་དེ་ནས་དེ་བཞིན་གཤེགས་པས་ཐུགས་བརྩེ་བར་དགོངས་ཏེ། རྒྱལ་པོ་ཆེན་པོ་རྣམ་ཐོས་ཀྱི་བུ་ལས་ལྷུང་བཟེད་བཞེས་སོ། །བཞེས་ནས་ཀྱང་རྒྱལ་པོ་ཆེན་པོ་ཡུལ་འཁོར་སྲུང་ལ་ཚིགས་སུ་བཅད་པས་བཀའ་སྩལ་པ། གང་ཞིག་དེ་བཞིན་གཤེགས་ལ་ལྷུང་བཟེད་འབུལ། །ནམས་ཀྱང་དྲན་དང་ཤེས་རབ་ཉམས་མི་འགྱུར། །བསིལ་དངོས་གོ་འཕང་སངས་རྒྱས་ཐོབ་བར་དུ། །བདེ་བས་བདེ་བར་དུས་རྣམས་ཟད་པར་བྱེད། །དགེ་སློང་དག་དེ་ནས་དེ་བཞིན་གཤེགས་པས་ཐུགས་བརྩེ་བར་དགོངས་ཏེ། རྒྱལ་པོ་ཆེན་པོ་ཡུལ་འཁོར་སྲུང་ལས་ལྷུང་བཟེད་བཞེས་སོ། །བཞེས་ནས་ཀྱང་རྒྱལ་པོ་ཆེན་པོ་འཕགས་སྐྱེས་པོ་ལ་ཚིགས་སུ་བཅད་པས་བཀའ་སྩལ་པ། རྣམ་པར་དག་སེམས་དེ་བཞིན་གཤེགས་པ 41.210b ལ། །ཁྱོད་ཀྱིས་ཡོངས་དག་ལྷུང་བཟེད་ཕུལ་ཅིག་དང ། །ཁྱོད་ཀྱི་སེམས་ནི་མྱུར་དུ་དག་པར་འགྱུར། །ལྷ་མི་འཇིག་རྟེན་དག་ན་བསྔགས་པར་འོང ། །དགེ་སློང་དག་དེ་ནས་དེ་བཞིན་གཤེགས་པས་ཐུགས་བརྩེ་བར་དགོངས་ཏེ། རྒྱལ་པོ་ཆེན་པོ་འཕགས་སྐྱེས་པོ་ལས་ལྷུང་བཟེད་བཞེས་སོ། །བཞེས་ནས་ཀྱང་རྒྱལ་པོ་ཆེན་པོ་མིག་མི་བཟང་ལ་ཚིགས་སུ་བཅད་པས་བཀའ་སྩལ་པ། །སྐྱོན་མེད་སེམས་དང་དད་པས་སྐྱོན་མེད་སྣོད། །དེ་བཞིན་གཤེགས་པ་ཚུལ་ཁྲིམས་སྐྱོན་མེད་ཅིང ། །ཚུལ་སྐྱོན་མེད་ལ་རབ་ཏུ་ཕུལ་ཅིག་དང ། །ཁྱོད་ཀྱི་སྦྱིན་པ་བསོད་ནམས་སྐྱོན་མེད་འགྱུར། །དགེ་སློང་དག་དེ་བཞིན་གཤེགས་པས་ཐུགས་བརྩེ་བར་དགོངས་ཏེ། །རྒྱལ་པོ་ཆེན་པོ་མིག་མི་བཟང་ལས་ལྷུང་བཟེད་བཞེས་སོ། །བཞེས་ནས་ཀྱང་མོས་པའི་སྟོབས་ཀྱི་ལྷུང་བཟེད་གཅིག་ཏུ་བྱིན་གྱིས་བརླབས་ཏེ། དེའི་ཚེ་ཆེད་དུ་བརྗོད་པ་འདི་ཆེད་དུ་བརྗོད་དོ། །ང་ཡིས་སྔོན་གྱི་སྲིད་པར་སྣོད་ཀྱི་རྣམས། །བཟང་བྱས་འབྲས་བུས་རབ་ཏུ་བཀང་སྟེ་བྱིན། །དེ་ནས་ལྷུང་བཟེད་དབྱིབས་ལེགས་བཞི་པོ་འདི། །རྫུ་འཕྲུལ་ཆེན་པོའི་ལྷ་བཞི་རྣམས་ཀྱིས་བྱིན། །དེ་ལ་འདི་སྐད་ཅེས་བྱ་སྟེ། །བརྟན་པ་དམ་པའི་དོན་དེ་དགོངས་པ་དེ། །ཞག་བདུན་བྱང་ཆུབ་ཤིང་མཆོག་གཟིགས་ནས་ནི། །སེང་གེའི་སྟབས་འདྲ་མི་ཡི་སེང་གེ་དེ། །ས་ནི་རྣམ་པ་དྲུག་ཏུ་བསྐྱོད་ནས་བཞེངས། །གླང་པོའི་དབང་ལྟར་ཀུན་ཏུ་དལ་གྱིས་གཤེགས། །རིམ་གྱིས་སྒྲོལ་རྒྱུའི་ཤིང་གི་དྲུང་བྱོན་ནས། །ལྷུན་པོ་ལྟ་བུར་གཡོ་བ་མི་མངའ་བཞུགས། །ཐུབ་པ་བསམ་གཏན་ཏིང་ངེ་འཛིན་རྣམས་དགོངས། །དེ་ཡི་ཚེ་ན་ག་གོན་བཟང་པོ་སྤུན། །གཉིས་དང་ཚོང་པའི་ཚོགས་དང་ཤིང་རྟ་ནི། །ནོར་གྱིས་གང་བ་དག་དང་ལྷན་ཅིག་ཏུ། །སཱ་ལའི་མེ་ཏོག་ནགས་ཚལ་རྒྱས་པར་ཞུགས། །དྲང་སྲོང་ཆེན་པོའི་གཟི་ཡིས་སྐད་ཅིག་ཏུ། །སྲོག་ཤིང་ཐུག་པར་འཕང་ལོ་ས་ནང་ནུབ། །དེ་དག་དེ་འདྲ་བ་ཡི་གནས་མཐོང་ནས། །ཚོང་པའི་ཚོགས་ནི་འཇིགས་པ་ཆེན་པོ་སྐྱེས། །དེ་དག་རལ་གྲི 41.211a མདའ་དང་མདུང་ཐུང་ཐོགས། །ནགས་ན་རི་དགས་བཞིན་དུ་སུ་ཞེས་ཚོལ། །སྤྲིན་མེད་འོད་ཟེར་སྟོང་ལྡན་འདྲ་བའི་རྒྱལ། །ཞལ་རས་སྟོན་གྱི་ཟླ་བ་འདྲ་བ་མཐོང ། །ཁྲོ་བ་སྤངས་ཤིང་རྒྱགས་པ་བསལ་ནས་སུ། །མགོ་བོས་ཕྱག་འཚལ་འདི་ནི་སུ་ཞེས་དཔྱོད། །མཁའ་ལས་ལྷ་ཡིས་འདི་སྐད་ཚིག་སྨྲས་ཏེ། །འདི་ནི་སངས་རྒྱས་འཇིག་རྟེན་ཕན་དོན་མཛད། །ཉིན་བདུན་མཚན་བདུན་བཟའ་དང་བཏུང་བ་དག་།ཐུགས་རྗེའི་བདག་ཉིད་འདི་ནི་མ་གསོལ་ཏོ། །གལ་ཏེ་བདག་གི་ཉོན་མོངས་ཞི་འདོད་ན། །སྐུ་དང་ཐུགས་བསྒོམས་འདི་ལ་བཤོས་གསོལ་ཅིག་།དེ་དག་གིས་ནི་སྒྲ་སྙན་དེ་ཐོས་ནས། །རྒྱལ་ལ་ཕྱག་འཚལ་བསྐོར་བ་བྱས་ནས་ནི། །དགའ་ནས་དེ་དག་གྲོགས་དང་ལྷན་ཅིག་ཏུ། །རྒྱལ་བ་བཤོས་གསོལ་བར་ནི་གྲོས་བཅད་དོ། །དགེ་སློང་དག་དེའི་ཚེ་ཚོང་པ་ག་གོན་དང་བཟང་པོ་གཉིས་ཀྱི་བའི་ཁྱུ་མཐའ་འཁོབ་ཀྱི་འོར་ཞིག་ན་གནས་སོ། །དེ་ནས་དེའི་ཚེ་བདེ་དག་བཞོས་ནས་མར་གྱི་སྙིང་ཁུ་བྱུང་བར་གྱུར་ཏོ། །དེ་ནས་བ་ལང་རྫི་དེ་དག་གིས་མར་གྱི་སྙིང་ཁུ་དེ་ཁྱེར་ནས། ཚོང་པ་ག་གོན་དང་བཟང་པོ་ག་ལ་བ་དེར་སོང་སྟེ་ཕྱིན་ནས། དེ་དག་གིས་ཚུལ་སྨོས་ཏེ། བཙུན་པ་དག་མཁྱེན་པར་མཛད་དུ་གསོལ། ཁྱེད་ཀྱི་བ་ཐམས་ཅད་ནི་བཞོས་ན། མར་གྱི་སྙིང་ཁུ་བྱུང་ན་འདི་ཅི་དགེ་བ་ཞིག་ལགས་སམ། འོན་ཏེ་མ་ལགས། དེ་ན་བྲམ་ཟེ་ཟས་ལ་བརྐམ་པའི་རང་བཞིན་ཅན་དག་འདི་སྐད་ཅེས་འདི་ནི་དགེ་བ་མ་ཡིན་ཏེ། བྲམ་ཟེ་རྣམས་ལ་མཆོད་སྦྱིན་ཆེན་པོ་བྱ་དགོས་སོ་ཞེས་འཛེར་ཏོ། །དགེ་སློང་དག་དེའི་ཚེ་ཚོང་པ་ག་གོན་དང་བཟང་པོ་དག་གི་ཚེ་རབས་སྔ་མའི་སྣག་གི་གཉེན་མཚམས་བྲམ་ཟེ་རྨ་བྱ་ཞེས་བྱ་བ་ཚངས་པའི་འཇིག་རྟེན་དུ་སྐྱེས་པར་གྱུར་པ་དེས་བྲམ་ཟེའི་གཟུགས་སུ་སྤྲུལ་ནས། ཚོང་པ་དེ་དག་ལ་ཚིགས་སུ་བཅད་དེ་སྨྲས་པ། ཁྱོད་ཀྱིས་སྔོན་ནི་སྨོན་བཏབ་པ། །བྱང་ཆུབ་བརྙེས་ནས་དེ་བཞིན་གཤེགས། །བདག་ཅག་རྣམས་ཀྱི་བཤོས་གསོལ་ཏེ། །ཆོས་ཀྱི 41.211b འཁོར་ལོ་བསྐོར་བར་ཤོག་།སྨོན་ལམ་དེ་ནི་རྫོགས་ཟིན་གྱིས། །བྱང་ཆུབ་བརྙེས་པ་དེ་བཞིན་གཤེགས། །དེ་ལ་ཞལ་ཟས་ཕུལ་ཅིག་དང ། །གསོལ་ནས་འཁོར་ལོ་བསྐོར་བར་འགྱུར། །ཁྱེད་ཀྱི་བ་མར་སྙིང་ཁུ་བྱུང ། །ཤིན་ཏུ་བཀྲ་ཤིས་སྐར་མ་བཟང ། །དྲང་སྲོང་ཆེན་པོ་དེ་ཡི་ནི། །བསོད་ནམས་ལས་ཀྱི་མཐུ་འདིའོ། །དེ་ལྟར་ཚོང་པ་བསྐུལ་ནས་ནི། །རྨ་བྱ་རང་གི་གནས་སུ་སོང ། །ག་གོན་ཞེས་ནི་བྱ་ལ་སོགས། །ཐམས་ཅད་ཡིད་ནི་མགུ་བར་གྱུར། །བ་སྟོང་འོ་མ་ཇི་སྙེད་ཡོད་པ་དག་།དེ་ཀུན་མ་ལུས་པར་ནི་བསྡུས་ནས་སུ། །དེ་ཡི་སྟེང་ནས་པྲིས་མ་བཞམ་བྱས་ཏེ། །དེ་དག་རབ་ཏུ་གུས་པར་ཞལ་ཟས་སྦྱོར། །རིན་ཆེན་གཞོང་པ་ཚིམ་བྱེད་ཅེས་བྱ་བ། །སྲང་གཅིག་ལ་ཡང་འབུམ་ཕྲག་ཅིག་རི་བ། །གཙང་མར་རབ་བཀྲུས་དྲི་མ་མེད་བྱས་ནས། །ཞལ་ཟས་ཀྱིས་ནི་ཁ་ད་ཆད་དུ་བཀང ། །སྦྲང་རྩི་དང་ནི་རིན་ཆེན་གཞོང་ཐོགས་ཏེ། །སྒྲོལ་རྒྱུའི་ཤིང་གི་དྲུང་སོང་སྟོན་པ་ལ། །བཙུན་པ་བཞེས་ཏེ་བདག་ཅག་སྨན་ཡང་ཐོགས། །ཞལ་ཟས་གྱ་ནོམ་པ་འདི་མནབས་སུ་གསོལ། །སྤུན་གཉིས་པོ་ལ་ཐུགས་བརྩེ་མཛད་པ་དང ། །བྱང་ཆུབ་ཞུགས་པའི་སྔོན་གྱི་བསམ་མཁྱེན་ནས། །སྟོན་པ་བཞེས་པ་མཛད་དེ་ཞལ་ཟས་གསོལ། །གསོལ་ནས་གཞོང་པ་ནམ་མཁའི་དཀྱིལ་དུ་བོར། །ལྷ་ཡི་བུ་ཕོ་རབ་ཚངས་ཞེས་བྱ་བ། །དེ་ཡིས་རིན་ཆེན་གཞོང་པ་མཆོག་དེ་བླངས། །དེས་དེ་ད་དུང་ཚངས་པའི་འཇིག་རྟེན་ན། །ལྷ་གཞན་གྲོགས་དང་ལྷན་ཅིག་མཆོད་པ་བྱེད། །དེ་ནས་དེའི་ཚེ་དེ་བཞིན་གཤེགས་པས་ཚོང་པ་ག་གོན་དང་བཟང་པོ་དེ་དག་ལ་འདི་དག་གིས་རབ་ཏུ་དགའ་བར་མཛད་དོ། །ལྷ་ཡི་བཀྲ་ཤིས་དོན་སྒྲུབ་ཅིང ། །ཕྱོགས་རྣམས་བཀྲ་ཤིས་བྱེད་པ་དེས། །ཁྱེད་ཀྱི་དོན་རྣམས་གྲུབ་གྱུར་ཅིག་།ཐམས་ཅད་མྱུར་དུ་མཐུན་པར་ཤོག་།ཕྲེང་བ་མགོ་ལ་འདུག་པ་ལྟར། །ལག་པ་གཡས་ན་དཔལ་ཡོད་ཤོག་།གཡོན་ནའང་དཔལ་ནི་གནས་གྱུར་ཅིག་།ཡན་ལག་ཀུན་ནའང་དཔལ་ཡོད་ཤོག་།ཚོང་པ་དག་ནི་ནོར་ཚོལ་ཞིང ། །ཕྱོགས་བཅུ 41.212a དག་ཏུ་འགྲོ་བ་རྣམས། །རྙེད་པ་ཆེན་པོ་རྙེད་གྱུར་ཅིང ། །དེ་དག་བདེ་བ་སྐྱིད་པར་ཤོག་།དགོས་པ་ལ་ལ་གང་གི་ཕྱིར། །ཤར་ཕྱོགས་སུ་ནི་འགྲོ་བ་ན། །གང་དག་ཕྱོགས་དེར་གནས་པ་ཡི། །རྒྱུ་སྐར་ཁྱེད་ལ་སྐྱོང་གྱུར་ཅིག་།སྨིན་དྲུག་དང་ནི་སྣར་མ་དང ། །མགོ་དང་ལག་དང་ནབ་སོ་དང ། །རྒྱལ་དང་སྐག་ཅེས་བྱ་བ་སྟེ། །དེ་དག་རྣམས་ནི་ཤར་ཕྱོགས་པ། །རྒྱུ་སྐར་བདུན་པོ་དེ་དག་ནི། །འཇིག་རྟེན་སྐྱོང་བ་གྲགས་ལྡན་པ། །ཤར་ཕྱོགས་ལོགས་ན་ཡོད་ཅེས་བསྟན། །དེ་དག་ཁྱེད་ལ་ཀུན་ཏུ་སྲུངས། །དེ་དག་བདག་པོ་རྒྱལ་པོ་ནི། །ཡུལ་འཁོར་སྲུང་ཞེས་གྲགས་པ་སྟེ། །དེ་ནི་དྲི་ཟ་ཀུན་གྱི་བདག་།ཉི་མ་ལྷན་ཅིག་སྲུང་བར་ཤོག་།དེ་ལ་བུ་ནི་མང་ཡོད་ལ། །མཁས་ཤིང་མིང་ཡང་འཐུན་པ་སྟེ། །དགུ་བཅུ་རྩ་གཅིག་ཟད་པར་ཡང ། །དབང་པོ་ཞེས་བྱ་སྟོབས་པོ་ཆེ། །དེ་རྣམས་ཁྱེད་ལ་ནད་མེད་ཅིང ། །ཤིས་པར་ལྷག་པར་སྐྱོང་གྱུར་ཅིག་།ཤར་ཕྱོགས་ལོགས་ཀྱི་ཕྱོགས་ཆ་ན། །ལྷ་མོ་གཞོན་ནུ་བརྒྱད་ཡོད་དེ། །རྒྱལ་དང་རྣམ་པར་རྒྱལ་མ་དང ། །དོན་གྲུབ་མ་དང་མི་འཕམ་དང ། །དགའ་མཆོག་མ་དང་དགའ་སྡེ་དང ། །དགའ་ཅན་མ་དང་དགའ་འཕེལ་མ། །དེ་དག་ཁྱེད་ལ་ནད་མེད་ཅིང ། །ཤིས་པར་ལྷག་པར་སྐྱོང་བར་ཤོག་།ཤར་ཕྱོགས་ལོགས་ཀྱི་ཕྱོགས་ཆ་ན། །གཞི་འཛིན་ཞེས་བྱའི་མཆོད་རྟེན་ཡོད། །རྒྱལ་བ་སྐྱོབ་པ་དགྲ་བཅོམ་པ། །དེ་རྣམས་ཀྱིས་ནི་བཞུགས་ཤིང་མཁྱེན། །དེ་ཡང་ཁྱེད་ལ་ནད་མེད་ཅིང ། །ཤིས་པར་ལྷག་པར་སྐྱོང་གྱུར་ཅིག་།ཕྱོགས་ན་ཁྱེད་ཅག་བདེ་བར་ཤོག་།ཁྱེད་ཅག་སྡིག་པར་མ་གྱུར་ཅིག་།ལྷ་རྣམས་ཀུན་གྱིས་རབ་བསྲུངས་ནས། །ནོར་རྣམས་རྙེད་དེ་ལྡོག་པར་ཤོག་།དགོས་པ་ལ་ལ་གང་གི་ཕྱིར། །ལྷོ་ཕྱོགས་སུ་ནི་འགྲོ་བ་ན། །གང་དག་ཕྱོགས་དེར་གནས་པ་ཡི། །རྒྱུ་སྐར་ཁྱེད་ལ་སྐྱོང་གྱུར་ཅིག་།མཆུ་དང་གྲེ་དང་དབོ་དང་ནི། །མེ་བཞི་ནག་པ་ལྔ་པ་ཡིན། །ས་རི་དང་ནི་ས་ག་སྟེ། །དེ་དག་རྣམས་ནི་ལྷོ་ཕྱོགས་པ། །རྒྱུ་སྐར་བདུན་པོ་དེ་དག་ནི། །འཇིག་རྟེན་སྐྱོང་བ་གྲགས་ལྡན་པ། །ལྷོ་ཕྱོགས་ལོགས་ན 41.212b ཡོད་ཅེས་བསྟན། །དེ་དག་ཁྱེད་ལ་ཀུན་ཏུ་སྲུངས། །དེ་དག་བདག་པོ་རྒྱལ་པོ་ནི། །འཕགས་སྐྱེས་པོ་ཞེས་བྱ་བར་བརྗོད། །དེ་ནི་གྲུལ་བུམ་ཀུན་གྱི་བདག་།གཤིན་རྗེ་ལྷན་ཅིག་སྲུང་བར་ཤོག་།དེ་ལ་བུ་ནི་མང་ཡོད་ལ། །མཁས་ཤིང་མིང་ཡང་འཐུན་པ་སྟེ། །དགུ་བཅུ་རྩ་གཅིག་ཟད་པར་ཡང ། །དབང་པོ་ཞེས་བྱ་སྟོབས་པོ་ཆེ། །དེ་རྣམས་ཁྱེད་ལ་ནད་མེད་ཅིང ། །ཤིས་པར་ལྷག་པར་སྐྱོང་གྱུར་ཅིག་།ལྷོ་ཕྱོགས་ལོགས་ཀྱི་ཕྱོགས་ཆ་ན། །ལྷ་མོ་གཞོན་ནུ་བརྒྱད་ཡོད་དེ། །དཔལ་ལྡན་མ་དང་གྲགས་ལྡན་མ། །གྲགས་པ་འཐོབ་དང་གྲགས་འཛིན་དང ། །ལེགས་པར་ལངས་དང་རབ་སྔ་དང ། །ལེགས་པར་སད་དང་བདེ་སྒྲུབ་མ། །དེ་དག་ཁྱེད་ལ་ནད་མེད་ཅིང ། །ཤིས་པར་ལྷགས་པར་སྐྱོང་བར་ཤོག་།ལྷོ་ཕྱོགས་ལོགས་ཀྱི་ཕྱོགས་ཆ་ན། །པད་མ་ཞེས་བྱའི་མཆོད་རྟེན་ཡོད། །རྟག་ཏུ་གཟི་བརྗིད་ཀྱིས་ཀྱང་འབར། །རྟག་ཏུ་ཐམས་ཅད་གསལ་བྱེད་པ། །དེ་ཡང་ཁྱེད་ལ་ནད་མེད་ཅིང ། །ཤིས་པར་ལྷགས་པར་སྐྱོང་གྱུར་ཅིག་།ཕྱོགས་ན་ཁྱེད་ཅག་བདེ་བར་ཤོག་།ཁྱེད་ཅག་སྡིག་པར་མ་གྱུར་ཅིག་།ལྷ་རྣམས་ཀུན་གྱིས་རབ་བསྲུངས་ནས། །ནོར་རྣམས་རྙེད་དེ་ལྡོག་པར་ཤོག་།དགོས་པ་ལ་ལ་གང་གི་ཕྱིར། །ནུབ་ཕྱོགས་སུ་ནི་འགྲོ་བ་ན། །གང་དག་ཕྱོགས་དེར་གནས་པ་ཡི། །རྒྱུ་སྐར་ཁྱེད་ལ་སྐྱོང་གྱུར་ཅིག་།ལྷ་འཚམས་དང་ནི་སྣརོན་དང་ཡང ། །བརྩོན་འགྲུས་བརྟན་ལྡན་སྣརུམས་དང་ནི། །ཆུ་སྟོད་ཆུ་སྨད་བྱི་ཞིན་དང ། །གྲོ་ཞིན་ཏེ་ནི་བདུན་པ་ཡིན། །རྒྱུ་སྐར་བདུན་པོ་དེ་དག་ནི། །འཇིག་རྟེན་སྐྱོང་བ་གྲགས་ལྡན་པ། །ནུབ་ཕྱོགས་ལོགས་ན་ཡོད་ཅེས་བསྟན། །དེ་དག་ཁྱེད་ལ་ཀུན་ཏུ་སྲུངས། །དེ་དག་བདག་པོ་རྒྱལ་པོ་ནི། །མིག་མི་བཟང་ཞེས་བྱ་བར་ཤེས། །དེ་ནི་ཀླུ་རྣམས་ཀུན་གྱིས་བདག་།ཆུ་ལྷ་ལྷན་ཅིག་སྲུང་བར་ཤོག་།དེ་ལ་བུ་ནི་མང་ཡོད་ལ། །མཁས་ཤིང་མིང་ཡང་འཐུན་པ་སྟེ། །དགུ་བཅུ་རྩ་གཅིག་ཟད་པར་ཡང ། །དབང་པོ་ཞེས་བྱ་སྟོབས་པོ་ཆེ། །དེ་དག་ཁྱེད 41.213a ལ་ནད་མེད་ཅིང ། །ཤིས་པར་ལྷག་པར་སྐྱོང་གྱུར་ཅིག་།ནུབ་ཕྱོགས་ལོགས་ཀྱི་ཕྱོགས་ཆ་ན། །ལྷ་མོ་གཞོན་ནུ་བརྒྱད་ཡོད་དེ། །རྣ་ཆ་སྐྲ་འདྲེས་མ་དང་ནི། །པད་མ་དཀར་དང་སྐྱ་རེང་དང ། །ཆ་མེད་གཅིག་དང་དགུ་པ་དང ། །རོལ་དང་གནག་དང་སྟབས་མྱུར་སྲིད། །དེ་དག་ཁྱེད་ལ་ནད་མེད་ཅིང ། །ཤིས་པར་ལྷག་པར་སྐྱོང་བར་ཤོག་།ནུབ་ཕྱོགས་ལོགས་ཀྱི་ཕྱོགས་ཆ་ན། །ནུབ་ཅེས་བྱ་བའི་རི་བོ་ཡོད། །ཉི་མ་ཟླ་བ་རྣམས་ཀྱང་གནས། །ནུབ་པའང་ཁྱེད་ལ་ནོར་སྦྱིན་གྱུར། །དེ་ཡང་ཁྱེད་ལ་ནད་མེད་ཅིང ། །ཤིས་པར་ལྷག་པར་སྐྱོང་གྱུར་ཅིག་།ཕྱོགས་ན་ཁྱེད་ཅག་བདེ་བར་ཤོག་།ཁྱེད་ཅག་སྡིག་པར་མ་གྱུར་ཅིག་།ལྷ་རྣམས་ཀུན་གྱིས་རབ་སྲུངས་ནས། །ནོར་རྣམས་རྙེད་དེ་ལྡོག་པར་ཤོག་།དགོས་པ་ལ་ལ་གང་གི་ཕྱིར། །བྱང་ཕྱོགས་སུ་ནི་འགྲོ་བ་ན། །གང་དག་ཕྱོགས་དེར་གནས་པ་ཡི། །རྒྱུ་སྐར་ཁྱེད་ལ་སྐྱོང་གྱུར་ཅིག་།མོན་གྲུ་དང་ནི་མོན་གྲེ་དང ། །ཁྲུམས་སྟོད་དང་ཡང་ཁྲུམས་སྨད་དང ། །ནམ་གྲུ་དང་ནི་ཐ་སྐར་དང ། །བྲ་ཉེ་སྟེ་ནི་བདུན་པ་ཡིན། །རྒྱུ་སྐར་བདུན་པོ་དེ་དག་ནི། །འཇིག་རྟེན་སྐྱོང་བ་གྲགས་ལྡན་པ། །བྱང་ཕྱོགས་ལོགས་ན་ཡོད་ཅེས་བསྟན། །དེ་དག་ཁྱེད་ལ་ཀུན་ཏུ་སྲུངས། །དེ་དག་བདག་པོ་རྒྱལ་པོ་ནི། །མི་ལ་ཞོན་པ་ལུས་ངན་པོ། །གནོད་སྦྱིན་ཀུན་གྱི་བདག་པོ་སྟེ། །ནོར་བཟངས་ལྷན་ཅིག་སྲུང་བར་ཤོག་།དེ་ལ་བུ་ནི་མང་ཡོད་ལ། །མཁས་ཤིང་མིང་ཡང་འཐུན་པ་སྟེ། །དགུ་བཅུ་རྩ་གཅིག་ཟད་པར་ཡང ། །དབང་པོ་ཞེས་བྱ་སྟོབས་པོ་ཆེ། །དེ་དག་ཁྱེད་ལ་ནད་མེད་ཅིང ། །ཤིས་པར་ལྷག་པར་སྐྱོང་གྱུར་ཅིག་།བྱང་ཕྱོགས་ལོགས་ཀྱི་ཕྱོགས་ཆ་ན། །ལྷ་མོ་གཞོན་ནུ་བརྒྱད་ཡོད་དེ། །རབ་ཆགས་ལྷ་མོ་སྟོང་ལྷ་མོ། །ས་དང་དེ་བཞིན་པད་མ་ཅན། །རྒྱལ་པོ་ཆེ་ལ་ཉར་གནས་དང ། །རེ་དང་ཁྲེལ་ཡོད་དཔལ་ལྡན་མ། །དེ་དག་ཁྱེད་ལ་ནད་མེད་ཅིང ། །ཤིས་པར་ལྷག་པར་སྐྱོང་བར་ཤོག་།བྱང་ཕྱོགས་ལོགས་ཀྱི་ཕྱོགས་ཆ་ན། །སྤོས་ངད་ལྡང་བའི་རི་བོ་ཡོད། །གནོད་སྦྱིན་འབྱུང་པོ་རྣམས་ཀྱི་གནས། །རྩེ་མོ་སྣ་ཚོགས་ལྟ་ན་སྡུག་།དེ་ཡང་ཁྱེད་ལ 41.213b ནད་མེད་ཅིང ། །ཤིས་པར་ལྷག་པར་སྐྱོང་གྱུར་ཅིག་།ཕྱོགས་ན་ཁྱེད་ཅག་བདེ་བར་ཤོག་།ཁྱེད་ཅག་སྡིག་པར་མ་གྱུར་ཅིག་།ལྷ་རྣམས་ཀུན་གྱིས་རབ་བསྲུངས་ནས། །ནོར་རྣམས་རྙེད་དེ་ལྡོག་པར་ཤོག་།རྒྱུ་སྐར་ཉི་ཤུ་རྩ་བརྒྱད་པོ། །ཕྱོགས་བཞི་དག་ན་བདུན་བདུན་གནས། །ལྷ་ཡི་བུ་མོ་སུམ་བཅུ་གཉིས། །ཕྱོགས་བཞི་དག་ན་བརྒྱད་བརྒྱད་གནས། །དགེ་སྦྱོང་བརྒྱད་དང་བྲམ་ཟེ་བརྒྱད། །ཡུལ་རྣམས་ན་ནི་གྲོང་རྡལ་བརྒྱད། །དབང་པོར་བཅས་པའི་ལྷ་བརྒྱད་རྣམས། །དེ་དག་ཁྱེད་ལ་ཀུན་དུ་སྲུངས། །ཁྱེད་ཅག་འགྲོ་ནའང་བཀྲ་ཤིས་གྱུར། །ལྡོག་པ་ན་ཡང་བཀྲ་ཤིས་ཤོག་།གཉེན་ལ་ལྟ་བ་བཀྲ་ཤིས་གྱུར། །གཉེན་གྱིས་བལྟ་བའང་བཀྲ་ཤིས་ཤོག་།དབང་བཅས་གནོད་སྦྱིན་རྒྱ་ཆེན་དང ། །དགྲ་བཅོམ་པ་དག་སྙིང་བརྩེ་བས། །ཐམས་ཅད་དུ་ནི་བཀྲ་ཤིས་དང ། །བདུད་རྩི་ཤིས་པ་ཐོབ་པར་ཤོག་།ཚངས་པ་དང་ནི་དེ་བཞིན་ནོར་རྒྱས་དང ། །ཟག་པ་མེད་པ་རྣམ་པར་གྲོལ་རྣམས་དང ། །ཀླུ་དང་གནོད་སྦྱིན་རྟག་ཏུ་སྙིང་བརྩེས་བསྲུང ། །སྟོན་བརྒྱར་མཚུངས་པར་ཚེ་ནི་སྐྱོང་བར་ཤོག་།རྣམ་འདྲེན་ཟླ་མེད་འཇིག་རྟེན་མགོན་པོ་ཡིས། །དེ་དག་འཐུན་པར་སྦྱིན་པའི་བསྔགས་པ་གསུངས། །ཁྱེད་རྣམས་ཀྱི་ནི་དགེ་བའི་ལས་འདི་ཡིས། །སྦྲང་རྩི་འབྱུང་ཞེས་བྱ་བའི་རྒྱལ་བར་འགྱུར། །འཇིག་རྟེན་རྣམ་པར་འདྲེན་པ་རྒྱལ་བ་ཡིས། །ལུང་བསྟན་ཆགས་མེད་འདི་ནི་དང་པོ་ཡིན། །ཕྱིན་ཆད་བྱང་ཆུབ་སེམས་དཔའ་མཐའ་ཡས་མང ། །གང་དག་ལུང་བསྟན་དེ་དག་ཕྱིར་མི་ལྡོག་།རྒྱལ་བས་ལུང་བསྟན་པ་ནི་འདི་ཐོས་ནས། །སེམས་ནི་མགུ་ཞིང་མཆོག་ཏུ་དགའ་གྱུར་ཏེ། །དེ་དག་སྤུན་དང་གྲོགས་དང་ལྷན་ཅིག་ཏུ། །དེ་དག་སངས་རྒྱས་ཆོས་ལ་སྐྱབས་སུ་དོང ། །ག་གོན་དང་བཟང་པོའི་ལེའུ་ཞེས་བྱ་བ་སྟེ། ཉི་ཤུ་རྩ་བཞི་པའོ།། །།དགེ་སློང་དག་ད་ལྟར་དེ་བཞིན་གཤེགས་པ་ཤིང་སྒྲོལ་རྒྱུའི་དྲུང་ན་བཞུགས་པ་དང་པོ་མངོན་པར་རྫོགས་པར་སངས་རྒྱས་པ་གཅིག་པུ་དབེན་པར་གཤེགས་ཏེ། ནང་དུ་ཡང་དག་བཞག་ནས་འཇིག་རྟེན་དང་འཐུན་པར་མཛད་པའི་ཕྱིར་འདི་སྙམ་དུ 41.214a དགོངས་ཏེ། ཀྱེ་མ་ངས་ཐོབ་ཅིང་མངོན་པར་རྫོགས་པར་སངས་རྒྱས་པའི་ཆོས་འདི་ནི་ཟབ་པ། ཞི་བ་རབ་ཏུ་ཞི་བ། ཉེ་བར་ཞི་བ་གྱ་ནོམ་པ། མཐོང་བར་དཀའ་བ། ཁོང་དུ་ཆུད་པར་དཀའ་བ། བརྟག་མི་ནུས་པ་རྟོག་གེའི་སྤྱོད་པ་མ་ཡིན་པ། འཕགས་པ་མཁས་པ་དང་མཛངས་པས་རིག་པ་སྟེ། འདི་ལྟ་སྟེ་ཕུང་པོ་ཐམས་ཅད་བོར་བ་ཀུན་ཏུ་རིག་པ། ངེས་པར་རིག་པ། ཚོར་བ་ཐམས་ཅད་འགོག་པ། དོན་དམ་པ་ཀུན་གཞི་མེད་པ་བསིལ་བའི་དངོས་པོ་ལེན་པ་མེད་པ་ཉེ་བར་ལེན་པ་མེད་པ། རྣམ་པར་རིག་པ་མ་ཡིན་པ། རྣམ་པར་རིག་པར་བྱ་བ་མ་ཡིན་པ། འདུས་མ་བྱས་པ་ཡུལ་དྲུག་ལས་ཤིན་ཏུ་འདས་པ། མི་རྟོག་པ་རྣམ་པར་མི་རྟོག་པ། བརྗོད་དུ་མེད་པ་སྒྲ་མེད་པ་སྒྲས་བརྗོད་དུ་མེད་པ། བསྟན་དུ་མེད་པ། ཐོགས་པ་མེད་པ། དམིགས་པ་ཐམས་ཅད་ལས་ཡང་དག་པར་འདས་པ། ཞི་གནས་ཀྱི་ལམ་གྱིས་ཆོད་པ། སྟོང་པ་ཉིད་དམིགས་སུ་མེད་པ། སྲེད་པ་ཟད་པ། འདོད་ཆགས་དང་བྲལ་བ་འགོག་པ་མྱ་ངན་ལས་འདས་པ་སྟེ། གལ་ཏེ་བདག་གིས་ཆོས་འདི་གཞན་དག་ལ་བསྟན་ལ། གལ་ཏེ་དེ་དག་གིས་མ་ཤེས་ན། དེ་ནི་བདག་ངལ་བ་དང ། ལོག་པར་བརྩལ་བ་དང ། ཆོས་བསྟན་པ་དོན་མེད་པར་འགྱུར་གྱིས། བདག་སྙིང་ལས་ཆུང་ངུར་ཁ་རོག་པར་གནས་པར་བྱ་སྙམ་མོ། །དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཟབ་ཞི་རྡུལ་བྲལ་འོད་གསལ་འདུས་མ་བྱས། །བདུད་རྩི་ཆོས་ནི་བདག་གིས་ཐོབ་པར་གྱུར། །བདག་གིས་བསྟན་ཀྱང་གཞན་གྱིས་མི་ཤེས་ཏེ། །མི་སྨྲར་ནགས་འདབས་གནས་པར་བྱ་བ་སྙམ། །ཚིག་བྲལ་ངག་གི་ལམ་གྱིས་མི་གོས་པ། །དེ་བཞིན་ཉིད་ཆོས་རང་བཞིན་ནམ་མཁའ་འདྲ། །སེམས་དང་ཡིད་ཀྱིས་རྒྱུ་བ་རབ་གྲོལ་བ། །མཆོག་རབ་ངོ་མཚར་ཆེ་བ་དམ་པ་ཤེས། །དོན་ཚུལ་འདི་ནི་ཡི་གེ་རྣམས་ཀྱིས་སུ། །ཤེས་པར་མི་ནུས་འ་འཛངས་པས་རིག་པ་ཡིན། །སྔོན་གྱི་རྒྱལ་ལ་ལྷག་བྱས་སེམས་ཅན་རྣམས། །དེ་དག་ཆོས་འདི་ཐོས་ན་ཡིད་ཆེས་འགྱུར། །འདི་ན་ཆོས་ནི་གང་ཡང་ཡོད་མིན་ཏེ། །ཡོད་མེད་གང་ཡིན་དེ་ནི་ཡོད་མ་ཡིན། །གང་གིས་རྒྱུ་དང་བྱ་བ་བརྒྱུད་ཤེས་པ། ། 41.214b དེ་ལ་ཡོད་པ་འམ་མེད་པ་ཡོད་མ་ཡིན། །བསྐལ་པ་བརྒྱ་སྟོང་དཔག་ཏུ་མེད་པར་ནི། །སྔོན་གྱི་རྒྱལ་བའི་གན་ནས་བདག་གིས་སྤྱད། །འོན་ཀྱང་གང་ན་བདག་དང་སེམས་ཅན་དང ། །སྲོག་མེད་བཟོད་པ་དེ་ནི་བདག་མ་ཐོབ། །གང་ཚེ་འདི་ན་སྐྱེ་འཆི་གང་མེད་པ། །ཆོས་འདི་ཐམས་ཅད་རང་བཞིན་བདག་མེད་པའི། །བཟོད་འདི་བདག་གིས་ཐོབ་པ་དེ་ཡི་ཚེ། །སངས་རྒྱས་མར་མེ་མཛད་ཀྱིས་བདག་ལུང་བསྟན། །འཇིག་རྟེན་ཀུན་ལ་སྙིང་རྗེ་མཐའ་ཡས་ང ། །གཞན་གྱིས་གསོལ་བ་བཏབ་ལ་ང་མི་སྡོད། །སྐྱེ་བོ་འདི་དག་ཚངས་ལ་དད་པ་སྟེ། །དེ་ཡིས་གསོལ་བ་བཏབ་ན་འཁོར་ལོ་བསྐོར། །གལ་ཏེ་ཚངས་པས་ང་ཡི་རྐང་པར་གཏུགས། །རྣམ་པ་བཟང་པོ་འཚལ་འགྱུར་སེམས་ཅན་མཆིས། །རྡུལ་བྲལ་གྱ་ནོམ་ཆོས་ཤོད་གསོལ་བཏབ་ན། །དེ་ལྟས་ང་ཡི་ཆོས་འདི་གཟུང་འོས་འགྱུར། །དགེ་སློང་དག་དེ་ལྟར་དེ་བཞིན་གཤེགས་པས་དེའི་ཚེ་སྨིན་མཚམས་ཀྱི་མཛོད་སྤུ་ནས་འོད་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་ཆེན་པོས་ཁྱབ་པར་འགྱུར་བའི་འོད་ཕྱུང་ངོ ། །དེ་ནས་སྟོང་གསུམ་གྱི་སྟོང་ཆེན་པོའི་བདག་པོ་ཚངས་པ་ཆེན་པོ་གཙུག་ཕུད་ཅན་སངས་རྒྱས་ཀྱི་མཐུས་དེ་བཞིན་གཤེགས་པའི་ཐུགས་ཀྱི་རྣམ་པར་རྟོག་པ་སེམས་ཀྱིས་ཤེས་ཏེ། བཅོམ་ལྡན་འདས་ཐུགས་ལས་ཆུང་ངུ་ལ་ཐུགས་བཏུད་ཅིང་ཆོས་མི་སྟོན་པར་ཤེས་ནས། དེ་འདི་སྙམ་དུ་སེམས་ཏེ། བདག་སོང་ལ་དེ་བཞིན་གཤེགས་པ་ལ་ཆོས་ཀྱི་འཁོར་ལོ་བསྐོར་བར་བསྐུལ་གོར་མ་ཆག་སྙམ་མོ། །དེ་ནས་ཚངས་པ་གཙུག་ཕུད་ཅན་གྱིས་དེའི་ཚེ། དེ་མ་ཡིན་པ་ཚངས་རིས་ཀྱི་ལྷའི་བུ་གཞན་དག་ལ་སྨྲས་པ། གྲོགས་པོ་དག་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཀྱང ། འདི་ལྟར་ཆོས་མི་སྟོན་པར་ཐུགས་ལས་ཆུང་ངུ་ལ་ཐུགས་བཏུད་པས། ཀྱེ་མ་འཇིག་རྟེན་འདི་ནི་མ་རུང་ངོ ། །གྲོགས་པོ་དག་ཀྱེ་མ་འཇིག་རྟེན་འདི་ནི་རྣམ་པར་མ་རུང་ངོ ། །བདག་ཅག་དོང་སྟེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཆོས་ཀྱི་འཁོར་ལོ་བསྐོར་བར་བསྐུལ་གོར་མ་ཆག 41.215a གོ། །དགེ་སློང་དག་དེ་ནས་ཚངས་པ་ཆེན་པོ་གཙུག་ཕུད་ཅན་ཚངས་པ་འབུམ་ཕྲག་དྲུག་བཅུ་རྩ་བརྒྱད་ཀྱིས་བསྐོར་ཏེ། མདུན་དུ་བདར་ནས་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་པ་དང ། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། ཐལ་མོ་སྦྱར་ནས་དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །འདི་ལྟར་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཀྱང་ཆོས་མི་སྟོན་པར་ཐུགས་ལས་ཆུང་ངུ་ལ་ཐུགས་བཏུད་པས་ཀྱེ་མའོ་བཅོམ་ལྡན་འདས་འཇིག་རྟེན་འདི་ནི་མ་རུང་ངོ ། །ཀྱེ་མའོ་བཅོམ་ལྡན་འདས་འཇིག་རྟེན་འདི་ནི་རབ་ཏུ་མ་རུང་ངོ ། །སེམས་ཅན་རྣམ་པ་བཟང་པོ་གོ་སླ་བ། བཅོམ་ལྡན་འདས་ཀྱིས་གསུངས་པའི་དོན་འཚལ་བར་རྔོ་ཐོགས་པ། སྐལ་བ་དང་ལྡན་པ། ནུས་པ་དང་ལྡན་པ་དག་མཆིས་ཏེ། དེ་ལྟ་ལགས་པས་བཅོམ་ལྡན་འདས་ཆོས་ལེགས་པར་བསྟན་དུ་གསོལ། བདེ་བར་གཤེགས་པ་ཆོས་བསྟན་དུ་གསོལ། དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ཡེ་ཤེས་ཆེན་པོ་མཆོག་གི་དཀྱིལ་འཁོར་བསྒྲུབས་ནས་ནི། །ཕྱོགས་བཅུ་དག་ཏུ་འོད་ཟེར་རྣམ་པར་འགྱེད་མཛད་དེ། །ཡེ་ཤེས་ཟེར་གྱིས་མི་ཡི་པད་མ་ཁ་འབྱེད་པ། །སྨྲ་བའི་ཉི་མ་དེ་རིང་ཅི་སླད་བཏང་སྙོམས་བཞུགས། །འཕགས་པའི་ནོར་ལ་སེམས་ཅན་དག་ནི་མགྲོན་གཉེར་ཏེ། །སྲོག་ཆགས་བྱེ་བ་མང་པོ་དབུགས་ཕྱུང་མཛད་ནས་ནི། །གང་སླད་མི་གསུང་འགྲོ་ལ་བཏང་སྙོམས་མཛད་པ་འདི། །འཇིག་རྟེན་རྩ་ལག་ཁྱོད་ལ་རིགས་པ་མ་ལགས་སོ། །ཆོས་ཀྱི་དམ་པའི་རྔ་བོ་ཆེ་ནི་བརྡུང་དུ་གསོལ། །དམ་པའི་ཆོས་ཀྱི་དུང་ནི་མྱུར་དུ་བུད་དུ་གསོལ། །ཆོས་ཀྱི་མཆོད་སྡོང་ཆེན་པོ་བསྒྲེང་བར་མཛད་དུ་གསོལ། །ཆོས་ཀྱི་མར་མེ་ཆེན་པོ་འབར་བར་མཛད་དུ་གསོལ། །ཆོས་ཆུ་མཆོག་གི་ཆར་པ་རབ་ཏུ་དབབ་ཏུ་གསོལ། །སྲིད་པའི་རྒྱ་མཚོར་གནས་པ་འདི་དག་བསྒྲལ་དུ་གསོལ། །ནད་ཆེན་ཉོན་མོངས་འདི་དག་ཐར་བར་མཛད་དུ་གསོལ། །ཉོན་མོངས་མེས་གདུངས་རབ་ཏུ་ཞི་བར་མཛད་དུ་གསོལ། །བདེ་བ་ཤིས་པ་རིམས་མེད་མྱ་ངན་མེད་གྱུར་པ། །ཞི་བའི་ལམ་ནི་ཁྱོད 41.215b ཀྱིས་ངེས་པར་བསྟན་དུ་གསོལ། །མྱ་ངན་འདས་པའི་ལམ་དུ་མི་འགྲོ་མགོན་མེད་པ། །ལོག་པའི་ལམ་དུ་གནས་ལ་མགོན་པོ་ཐུགས་རྗེ་མཛོད། །རྣམ་པར་ཐར་པའི་སྒོ་རྣམས་རབ་ཏུ་དབྱེ་བར་གསོལ། །ཆོས་ཚུལ་འཁྲུག་པ་མ་མཆིས་དེ་ནི་གཟུང་དུ་གསོལ། །སྐྱེ་བོ་དམུས་ལོང་དུ་ནི་གྱུར་པ་དེ་དག་ལ། །མགོན་པོ་ཁྱོད་ཀྱིས་ཆོས་མིག་དམ་པ་སྦྱང་དུ་གསོལ། །མི་ཡི་ཟླ་བ་མགོན་པོ་ཁྱོད་ནི་མ་གཏོགས་པར། །འཇིག་རྟེན་དག་གི་སྐྱེ་དང་རྒ་བ་སེལ་བགྱིད་པ། །ཚངས་པའི་འཇིག་རྟེན་དང་ནི་ལྷ་ཡི་འཇིག་རྟེན་དང ། །གནོད་སྦྱིན་དྲི་ཟ་མི་ཡི་འཇིག་རྟེན་ན་མ་མཆིས། །ལྷ་རྣམས་ཐམས་ཅད་ལྷག་པར་སྤྱད་པར་བགྱིས་ནས་ནི། །བདག་ནི་ཆོས་རྒྱལ་ཁྱོད་ལ་གསོལ་བ་འདེབས་པ་ལགས། །བསོད་ནམས་འདི་ཡིས་བདག་ཀྱང་རབ་ཏུ་མྱུར་བར་ནི། །ཆོས་ཀྱི་འཁོར་ལོ་དམ་པ་རབ་ཏུ་སྐོར་གྱུར་ཅིག་།དགེ་སློང་དག་དེ་བཞིན་གཤེགས་པས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་རྗེས་སུ་གཟུང་བའི་ཕྱིར། ཐུགས་བརྩེ་བར་དགོངས་ཏེ། ཚངས་པ་ཆེན་པོ་གཙུག་པུད་ཅན་ལ་ཅང་མི་གསུང་བས་གནང་ངོ ། །དེ་ནས་ཚངས་པ་ཆེན་པོ་གཙུག་པུད་ཅན་གྱིས་དེ་བཞིན་གཤེགས་པས་ཅང་མི་གསུང་བས་གནང་བར་རིག་ནས། ལྷའི་ཙན་དན་གྱི་ཕྱེ་མ་དང ། ་ག་རུའི་ཕྱེ་མས་དེ་བཞིན་གཤེགས་པ་ལ་གཏོར་ནས་དགའ་བ་དང་མཆོག་ཏུ་དགའ་བ་སྐྱེས་ཏེ། དེ་ཉིད་དུ་མི་སྣང་བར་གྱུར་ཏོ། །དགེ་སློང་དག་དེ་ནས་དེ་བཞིན་གཤེགས་པས་ཆོས་ལ་འཇིག་རྟེན་གུས་པ་བསྐྱེད་པ་དང ། ཚངས་པ་ཆེན་པོ་གཙུག་པུད་ཅན་ཡང་དེ་བཞིན་གཤེགས་པ་ལ་ཡང་དང་ཡང་བསྐུལ་བས་དགེ་བའི་རྩ་བ་རྣམ་པར་སྤེལ་བ་དང ། ཆོས་ཀྱང་ཤིན་ཏུ་ཟབ་པའི་ཕྱིར་ཡང་གཅིག་པུ་དབེན་པར་གཤེགས་ཏེ། ནང་དུ་ཡང་དག་བཞག་ནས། ཐུགས་ལ་འདི་ལྟ་བུར་རྣམ་པར་རྟོག་པར་གྱུར་ཏེ། བདག་གིས་ཆོས་ཟབ་པ། ཕྲ་བ། གསལ་བ། ཁོང་དུ་ཆུད་པར་དཀའ་བ། བརྟག་མི་ནུས་པ། རྟོག་གེའི་སྤྱོད་ཡུལ་མ་ཡིན་པ། མཁས་པ་དང་འཛངས་པས་རིག་པ། འཇིག་རྟེན་ཐམས་ཅད་དང་མི་མཐུན་པ། མཐོང་བར་དཀའ་བ། ཕུང་པོ་ཐམས 41.216a ཅད་བོར་བ། འདུ་བྱེད་ཐམས་ཅད་ཉེ་བར་ཞི་བ། ཞི་གནས་ཀྱི་ལམ་གྱིས་ཆད་པ། སྟོང་པ་ཉིད་དམིགས་སུ་མེད་པ། སྲེད་པ་ཟད་པ། འདོད་ཆགས་དང་བྲལ་བ། འགོག་པ། མྱ་ངན་ལས་འདས་པ་འདི་མངོན་པར་རྫོགས་པར་སངས་རྒྱས་ཏེ། གལ་ཏེ་བདག་གིས་ཆོས་འདི་བསྟན་ལ། གཞན་གྱིས་བདག་གིས་ཁོང་དུ་མ་ཆུད་ན་དེ་ནི་བདག་ལ་ཤིན་ཏུ་ཐོ་བཙམས་པར་འགྱུར་གྱིས་བདག་སྙིང་ལས་ཆུང་ངུར་གནས་པས་གནས་པར་བྱ་གོ་མ་ཆག་སྙམ་མོ། །དགེ་སློང་དག་དེ་ནས་སངས་རྒྱས་ཀྱི་མཐུས། ཚངས་པ་ཆེན་པོ་གཙུག་པུད་ཅན་གྱིས་ཡང་དེ་བཞིན་གཤེགས་པའི་ཐུགས་ཀྱི་རྣམ་པར་རྟོག་པ་དེ་ལྟ་བུ་དེ་སེམས་ཀྱིས་ཤེས་ནས། ལྷའི་དབང་པོ་བརྒྱ་བྱིན་ག་ལ་བ་དེར་སོང་སྟེ་ཕྱིན་ནས། ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ་ཤེས་པར་གྱིས་ཤིག་།དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཆོས་མི་སྟོན་པར་ཐུགས་ལས་ཆུང་ངུ་ལ་ཐུགས་བཏུད་དེ། འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་མི་སྟོན་པར་ཐུགས་ལས་ཆུང་ངུ་ལ་ཐུགས་བཏུད་པས། ཀཽ་ཤི་ཀ་ཀྱེ་མའོ་འཇིག་རྟེན་འདི་ནི་མ་རུང་བར་འགྱུར་རོ། །ཀཽ་ཤི་ཀ་ཀྱེ་མའོ་འཇིག་རྟེན་འདི་ནི་རྣམ་པར་མ་རུང་བར་འགྱུར་རོ། །ཀྱེ་མའོ་འཇིག་རྟེན་འདི་ནི་མ་རིག་པའི་མུན་པ་ཆེན་པོར་བཅུག་པར་འགྱུར་ན། བདག་ཅག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཆོས་ཀྱི་འཁོར་ལོ་བསྐོར་བར་བསྐུལ་དུ་ཅིའི་ཕྱིར་མི་འདོང ། དེ་ཅིའི་ཕྱིར་ཞེ་ན། མ་བསྐུལ་བར་དེ་བཞིན་གཤེགས་པ་ཆོས་ཀྱི་འཁོར་ལོ་མི་སྐོར་བའི་ཕྱིར་རོ། །གྲོགས་པོ་ལེགས་སོ་ཞེས་ཏེ། བརྒྱ་བྱིན་དང ། ཚངས་པ་དང ། ས་བླའི་ལྷ་རྣམས་དང ། བར་སྣང་བ་རྣམས་དང ། རྒྱལ་ཆེན་བཞིའི་རིས་དང ། སུམ་བཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་དང ། ཚངས་རིས་དང ། འོད་གསལ་དང ། འབྲས་བུ་ཆེ་དང ། དགེ་རྒྱས་དང ། 41.216b གནས་གཙང་མའི་རིས་ཀྱི་ལྷའི་བུ་བརྒྱ་སྟོང་རབ་ཏུ་མང་པོ་ཁ་དོག་མངོན་པར་འཕགས་པ་དག་ནམ་སྲོས་པ་དང ། ལྷའི་ཁ་དོག་དང ། ལྷའི་སྣང་བས་ཤིང་སྒྲོལ་རྒྱུའི་དྲུང་ཉེ་ཚེ་སྣང་བར་བྱས་ནས། དེ་བཞིན་གཤེགས་པ་ག་ལ་བ་དེར་དོང་སྟེ་ཕྱིན་པ་དང ། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །ལྷའི་དབང་པོ་བརྒྱ་བྱིན་གྱིས་དེ་བཞིན་གཤེགས་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། དེ་བཞིན་གཤེགས་པ་ལ་ཚིགས་སུ་བཅད་པས་མངོན་པར་བསྟོད་དོ། །ཟླ་བ་ཉ་བ་གཟའ་ལས་ཐར་བ་ལྟར། །ཁྱོད་ཀྱི་ཐུགས་ནི་རྣམ་པར་གྲོལ་བ་ལགས། །གཡུལ་ལས་རྣམ་པར་རྒྱལ་བ་བཞེངས་སུ་གསོལ། །འཇིག་རྟེན་མུན་པར་ཤེས་རབ་འོད་དབྱུང་གསོལ། །དེ་སྐད་ཅེས་གསོལ་པ་དང ། དེ་བཞིན་གཤེགས་པ་ཅང་མི་གསུང་བར་བཞུགས་སོ། །དེ་ནས་ཚངས་པ་ཆེན་པོ་གཙུག་པུད་ཅན་གྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ་ཇི་ལྟར་ཁྱོད་ཀྱིས་བསྐུལ་བ་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཆོས་ཀྱི་འཁོར་ལོ་བསྐོར་བར་གསོལ་བ་མི་གདབ་པོ། །དེ་ནས་ཚངས་པ་ཆེན་པོ་གཙུག་པུད་ཅན་གྱིས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། དེ་བཞིན་གཤེགས་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། དེ་བཞིན་གཤེགས་པ་ལ་ཚིགས་སུ་བཅད་པས་གསོལ་པ། གཡུལ་ལས་རྣམ་པར་རྒྱལ་བ་བཞེངས་སུ་གསོལ། །འཇིག་རྟེན་མུན་པར་ཤེས་རབ་འོད་དབྱུང་གསོལ། །ཀུན་ཏུ་འཚལ་བར་འགྱུར་བ་མཆིས་ལགས་ཀྱིས། །ཐུབ་པ་ཁྱོད་ཀྱིས་ཆོས་ནི་བསྟན་དུ་གསོལ། །དགེ་སློང་དག་དེ་སྐད་ཅེས་གསོལ་བ་དང ། དེ་བཞིན་གཤེགས་པས་ཚངས་པ་ཆེན་པོ་གཙུག་པུད་ཅན་ལ་འདི་སྐད་ཅེས་བཀའ་སྩལ་ཏོ། །ཚངས་པ་ངས་ཆོས་ཟབ་པ་ཕྲ་བ། གསལ་བ་འདི་མངོན་པར་རྫོགས་པར་སངས་རྒྱས་ཤེས་བྱ་བ་ནས། དེ་ནི་བདག་ལ་ཤིན་ཏུ་ཐོ་བཙམས 41.217a པར་འགྱུར་རོ་ཞེས་བྱ་བའི་བར་དུ་སྦྱར་རོ་ཚངས་པ་ཚིགས་སུ་བཅད་པ་འདི་དག་ང་ལ་རྒྱུན་དུ་སྣང་མོད་ཀྱི། ངའི་ལམ་རྒྱུན་ལས་བཟློག་པར་འགྲོ་བ་ཟབ་པ། མཐོང་བར་དཀའ་བ་དེ་ནི་འདོད་ཆགས་ཀྱིས་ལྡོངས་པ་དག་གིས་མི་མཐོང་སྟེ། དེ་ལྟ་བས་ན་བསྟན་ཀྱང་མི་ཕན་ནོ། །སྐྱེ་དགུ་འདོད་པ་རྣམས་ལ་བཅིངས། །རྒྱུན་གྱིས་རབ་ཏུ་བདས་པ་ཡིན། །ངས་འདི་ཚེགས་ནི་ཆེན་པོས་རྙེད། །དེ་ལྟ་བས་ན་བསྟན་མི་ཕན། །དགེ་སློང་དག་དེ་ནས་ཚངས་པ་ཆེན་པོ་གཙུག་པུད་ཅན་དང ། ལྷའི་དབང་པོ་བརྒྱ་བྱིན་གྱིས་དེ་བཞིན་གཤེགས་པ་ཅུང་མི་གསུང་བར་གྱུར་པར་རིག་ནས། ལྷའི་བུ་དེ་དག་དང་ལྷན་ཅིག་ཏུ་སྡུག་བསྔལ་ཞིང་ཡིད་མི་བདེ་ནས། དེ་ཉིད་དུ་མི་སྣང་བར་གྱུར་ཏོ། །ལན་གསུམ་གྱི་བར་དུ་དེ་བཞིན་གཤེགས་པ་ཐུགས་ལས་ཆུང་ངུ་ལ་ཐུགས་བཏུད་དོ། །དགེ་སློང་དག་དེའི་ཚེ་ཡུལ་མ་ག་དྷཱའི་མི་རྣམས་ལ་སྡིག་པ་མི་དགེ་བའི་ལྟ་བར་གྱུར་པ་འདི་ལྟ་བུ་དག་བྱུང་བར་གྱུར་ཏེ། འདི་ལྟ་སྟེ། ཁ་ཅིག་ནི་འདི་སྐད་དུ་རླུང་ལྡང་བར་མི་འགྱུར་རོ་ཞེས་འཛེར་རོ། །ཁ་ཅིག་ནི་འདི་སྐད་དུ་མེ་འབར་བར་མི་འགྱུར་རོ་ཞེས་འཛེར་རོ། །ཁ་ཅིག་ནི་འདི་སྐད་དུ་ཆར་འབབ་པར་མི་འགྱུར་རོ་ཞེས་འཛེར་རོ། །ཁ་ཅིག་ནི་ཆུ་འབབ་པར་མི་འགྱུར་རོ་ཞེས་འཛེར་རོ། །ཁ་ཅིག་ནི་ལོ་ཏོག་སྐྱེ་བར་མི་འགྱུར་རོ་ཞེས་འཛེར་རོ། །ཁ་ཅིག་ནི་བྱ་རྣམས་ནམ་མཁའ་ལ་འཕུར་བར་མི་འགྱུར་རོ་ཞེས་འཛེར་རོ། །ཁ་ཅིག་ནི་སྦྲུམ་མ་རྣམས་ནད་མེད་པར་བཙའ་བར་མི་འགྱུར་རོ་ཞེས་འཛེར་རོ། །དགེ་སློང་དག་དེ་ནས་ཚངས་པ་ཆེན་པོ་གཙུག་པུད་ཅན་གྱིས་དེ་བཞིན་གཤེགས་པའི་ཐུགས་ཀྱི་རྣམ་པར་རྟོག་པ་དེ་ལྟ་བུ་དེ་ཡང་ཤེས། ཡུལ་མ་ག་དྷཱའི་མི་རྣམས་ཀྱི་ལྟ་བར་གྱུར་པ་དེ་དག་ཀྱང་རིག་ནས། ནམ་སྲོས་པ་དང ། ཁ་དོག་མངོན་པར་འཕགས་པ་དང ། ལྷའི་སྣང་བས་ཤིང་སྒྲོལ་རྒྱུའི་དྲུང་ཐམས་ཅད་སྣང་བར་བྱས་ནས། དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་པ་དང ། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། 41.217b དེ་བཞིན་གཤེགས་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། དེ་བཞིན་གཤེགས་པ་ལ་ཚིགས་སུ་བཅད་པ་གསོལ་པ། མ་ག་དྷཱར་ནི་སྔོན་ཆོས་མ་དག་པ། །དྲི་མར་བཅས་པར་སེམས་པའི་སྨྲ་བ་བྱུང ། །དེ་སླད་ཐུབ་པ་བདུད་རྩིའི་སྒོ་དབྱེ་གསོལ། །དྲི་མེད་སངས་རྒྱས་ཆོས་ནི་ཉན་ཅིང་མཆིས། །ཁྱོད་ནི་རང་གི་དགོས་མཛད་རང་དབང་གྱུར། །སྡུག་བསྔལ་མངོན་པར་འདུ་བྱེད་དྲི་མ་སྤངས། །ཁྱོད་ཀྱི་དགེ་བ་འཕེལ་དང་འགྲིབ་མ་མཆིས། །ཁྱོད་འདིར་ཆོས་མཆོག་ཕ་རོལ་བྱོན་པར་གྱུར། །ཐུབ་པ་ཁྱོད་འདྲ་འཇིག་རྟེན་འདིར་མ་མཆིས། །དྲང་སྲོང་ཆེ་ཁྱོད་ལྷག་པ་ག་ལ་མཆིས། །སྲིད་གསུམ་འདི་ན་རྣམ་པར་ལྷང་ངེ་སྟེ། །ལྷ་མིན་གནས་ན་མཆིས་པའི་རི་བོ་འདྲ། །སྡུག་བསྔལ་སྐྱེ་བོ་ཐུགས་རྗེ་ཆེ་བསྐྱེད་གསོལ། །ཁྱོད་འདྲ་ནམ་ཡང་བཏང་སྙོམས་མཛད་མི་རིགས། །ཁྱོད་ནི་མི་འཇིགས་སྟོབས་དང་ཡང་དག་ལྡན། །ཁྱོད་ནི་སྐྱེ་བོ་རབ་ཏུ་སྒྲོལ་བར་སྤྱོད། །ལྷ་དང་དགེ་སྦྱོང་བྲམ་ཟེར་བཅས་པ་ཀུན། །སྐྱེ་དགུ་འདི་དག་རིང་ན་ཟུག་རྔུར་བཅས། །ནད་རིམས་མ་མཆིས་ནད་མ་མཆིས་གྱུར་ཅིག་།འདི་ན་དེ་དག་སྐྱབས་ནི་གཞན་མ་མཆིས། །ཆོས་དེ་རྒྱལ་བས་ཐུགས་སུ་ཆུད་གྱུར་ཏེ། །ཇི་ལྟ་བཞིན་དུ་མི་ཉུང་སྟོན་འགྱུར་ཞེས། །དགེ་བའི་སེམས་ཀྱིས་བདུད་རྩི་དོན་གཉེར་ཞིང ། །ལྷ་དང་མི་རྣམས་ཁྱོད་ཕྱིར་རིང་ནས་འབྲང ། །དེ་སླད་མཐུ་རྩལ་བཟང་པོ་ཁྱོད་ལ་གསོལ། །རིང་ནས་ལམ་ལས་ཉམས་པའི་སེམས་ཅན་ཐུལ། །མ་ཐོས་དོན་རྣམས་རབ་ཏུ་ཐོས་པར་འཚལ། །ཤིན་ཏུ་ཉམ་ཆུང་རྟས་པར་འཚལ་དང་འདྲ། །རབ་ཏུ་སྐམ་པའི་ས་ལ་སྤྲིན་ལྟ་བུར། །འདྲེན་པ་ཆོས་ཀྱི་ཆར་པས་ཚིམ་པར་མཛོད། །རིང་ནས་ཉམས་པའི་མི་རྣམས་སྲིད་པ་ན། །ལྟ་ངན་ཐིབས་པོ་ཚེར་མར་བཅས་པར་རྒྱུ། །གང་བསྒོམས་ན་ནི་བདུད་རྩི་ཐོབ་འགྱུར་བ། །ཚེར་མ་མ་མཆིས་དྲང་ལམ་དེ་བསྟན་གསོལ། །ལོང་བ་གཡང་ལྷུང་འདྲེན་པ་མ་མཆིས་པ། །འདི་ན་དེ་དག་གཞན་གྱིས་དྲང་མི་ནུས། །བློ་ལྡན་ཁྱུ་མཆོག་ཁྱོད་ནི་མོས་བསྐྱེད་དེ། །གཡང་ས་ཆེན་པོར་ལྷུང་བ་གདོན་དུ 41.218a གསོལ། །ཐུབ་པ་ཁྱོད་དང་རིང་ནས་རྟག་མི་མཇལ། །ུ་དུམ་འབའ་རའི་མེ་ཏོག་བརྒྱ་ལམ་ལྟར། །འདྲེན་པ་རྒྱལ་བ་དག་ནི་ས་ལ་འབྱུང ། །མགོན་པོ་དལ་རྙེད་སེམས་ཅན་དགྲོལ་དུ་གསོལ། །རང་རྒལ་ནས་ནི་བསྒྲས་བར་བྱའོ་ཞེས། །སྔོན་སྲིད་ཁྱོད་ཀྱི་དགོངས་པ་འདི་འབྱུང་ངོ ། །ད་ལྟར་ཁྱོད་ནི་ཕ་རོལ་བྱོན་པར་ངེས། །བདེན་པའི་མཐུ་རྩལ་ཐུགས་དམ་མད་པར་མཛོད། །ཐུབ་པ་ཆོས་ཀྱི་སྒྲོན་མས་མུན་པ་སོལ། །དེ་བཞིན་གཤེགས་པའི་རྒྱལ་མཚན་ཁྱོད་ཀྱིས་སྒྲེང ། །སྙན་པའི་གསུང་བརྗོད་པ་ཡི་དུས་ལ་བབ། །རྔ་སྒྲ་རི་དགས་དབང་ལྟར་བསྒྲག་ཏུ་གསོལ། །དགེ་སློང་དག་དེ་ནས་དེ་བཞིན་གཤེགས་པས་སངས་རྒྱས་ཀྱི་སྤྱན་གྱིས་ཐམས་ཅད་དང་ལྡན་པའི་འཇིག་རྟེན་ལ་གཟིགས་ན། སེམས་ཅན་དམན་པ་དང ། འབྲིང་དང ། གྱ་ནོམ་དང ། མཐོ་བ་དང ། དམའ་བ་དང ། བར་མ་དང ། རྣམ་པ་བཟང་པོ་དང ། རྣམ་པར་སྦྱང་སླ་བ་དང ། རྣམ་པ་ངན་པ་དང ། །རྣམ་པར་སྦྱང་དཀའ་བ་དང ། ཟུར་ཙམ་གྱིས་གོ་བ་དང ། ཚིག་ལྷུར་ལེན་པ་དང ། སེམས་ཅན་གྱི་ཕུང་པོ་གསུམ་སྟེ། གཅིག་ནི་ལོག་པ་ཉིད་དུ་ངེས་པ་དང ། གཅིག་ནི་ཡང་དག་པ་ཉིད་དུ་ངེས་པ་དང ། གཅིག་ནི་མ་ངེས་པ་གཟིགས་སོ། །དགེ་སློང་དག་འདི་ལྟ་སྟེ་དཔེར་ན། མི་ཞིག་རྫིང་གི་འགྲམ་ན་འདུག་པས་པད་མ་ཁ་ཅིག་ནི་ཆུའི་ནང་ནས་འཐོན། ཁ་ཅིག་ནི་ཆུ་དང་མཉམ། ཁ་ཅིག་ནི་ཆུ་ལས་འཕགས་པ་དག་མཐོང་ངོ ། །དགེ་སློང་དག་དེ་བཞིན་དུ་དེ་བཞིན་གཤེགས་པས་སངས་རྒྱས་ཀྱི་སྤྱན་གྱིས་ཐམས་ཅད་དང་ལྡན་པའི་འཇིག་རྟེན་ན་སེམས་ཅན་ཕུང་པོ་གསུམ་དུ་རྣམ་པར་གནས་པ་དག་གཟིགས་སོ། །དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། ངས་ཆོས་བསྟན་ཀྱང་རུང ། མ་བསྟན་ཀྱང་རུང་སྟེ། གང་ལོག་པ་ཉིད་དུ་ངེས་པའི་ཕུང་པོ་འདི་ནི་ཆོས་འདི་ཤེས་པར་མི་འགྱུར་རོ། །ངས་ཆོས་བསྟན་ཀྱང་རུང་མ་བསྟན་ཀྱང་རུང་སྟེ། གང་ཡང་དག་པ་ཉིད་དུ་ངེས་པའི་ཕུང་པོ་འདི་ནི་ཆོས་འདི་ཤེས་པར་འགྱུར་རོ། །མ་ངེས་པའི་ཕུང་པོ་གང་ཡིན་པ་འདི་ནི་གལ་ཏེ་ཆོས་བསྟན་ན་ནི་ཤེས་པར་འགྱུར། 41.218b ཇི་སྟེ་ཆོས་མ་བསྟན་ན་ནི་ཤེས་པར་མི་འགྱུར་རོ་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པས་མ་ངེས་པའི་ཕུང་པོར་རྣམ་པར་གནས་པའི་སེམས་ཅན་རྣམས་ལས་བརྩམས་ཏེ་ཐུགས་རྗེ་ཆེན་པོ་བསྐྱེད་དོ། །དེ་ནས་དེ་བཞིན་གཤེགས་པས་བདག་ཉིད་ཀྱི་ཡང་དག་པའི་ཡེ་ཤེས་འདིའི་དབང་དུ་མཛད་དེ། ཚངས་པ་ཆེན་པོ་གཙུག་ཕུད་ཅན་གྱིས་བསྐུལ་བ་ཡང་མཁྱེན་ནས། ཚངས་པ་ཆེན་པོ་གཙུག་པུད་ཅན་ལ་ཚིགས་སུ་བཅད་པས་བཀའ་སྩལ་པ། ཚངས་པ་མ་ག་དྷཱའི་སེམས་ཅན་གང ། །རྣ་བ་ལྡན་ཞིང་དད་དང་ལྡན་གྱུར་ལ། །མི་འཚེ་འདུ་ཤེས་རྟག་ཏུ་ཆོས་ཉན་པས། །དེ་དག་ལ་ནི་བདུད་རྩིའི་སྒོ་ཕྱེའོ། །དེ་ནས་ཚངས་པ་ཆེན་པོ་གཙུག་པུད་ཅན་གྱིས་དེ་བཞིན་གཤེགས་པས་གནང་བར་རིག་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ནས་དེ་ཉིད་དུ་མི་སྣང་བར་གྱུར་ཏོ། །དགེ་སློང་དག་དེ་ནས་དེའི་ཚེ་ས་བླའི་ལྷ་རྣམས་ཀྱིས་བར་སྣང་གི་ལྷ་རྣམས་ལ་ཚིག་ཏུ་བརྗོད་ཅིང་སྒྲ་བསྒྲགས་པ། གྲོགས་པོ་དག་དོ་མོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་འཁོར་ལོ་བསྐོར་བར་གནང་སྟེ། དེ་ནི་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང་མི་རྣམས་ཀྱི་དོན་དང ། ཕན་པ་དང ། བདེ་བར་འགྱུར་རོ། །ཀྱེ་གྲོགས་པོ་དག་ལྷ་མ་ཡིན་གྱིས་རིས་ནི་ཡོངས་སུ་འགྲིབ་པར་འགྱུར་རོ། །ལྷའི་རིས་ནི་ཡོངས་སུ་རྫོགས་པར་འགྱུར་རོ། །འཇིག་རྟེན་ན་སེམས་ཅན་མང་པོ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ལྟར་བར་སྣང་གི་ལྷ་རྣམས་ཀྱིས་ས་བླའི་ལྷ་རྣམས་ལས་ཐོས་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ལ་སྒྲར་བརྗོད་དོ། །རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་སུམ་བཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན 41.219a འཕྲུལ་དབང་བྱེད་རྣམས་ལའོ། །དེ་དག་གིས་ཀྱང་ཚངས་རིས་ཀྱི་ལྷ་རྣམས་ལ་ཚིག་ཏུ་བརྗོད་ཅིང་སྒྲ་བསྒྲགས་ཏེ། གྲོགས་པོ་དག་དོ་མོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་འཁོར་ལོ་བསྐོར་བར་གནང་སྟེ། དེ་ནི་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང་མི་རྣམས་ཀྱི་དོན་དང་ཕན་པ་དང་བདེ་བར་འགྱུར་རོ། །ཀྱེ་གྲོགས་པོ་དག་ལྷ་མ་ཡིན་གྱི་རིས་ནི་ཡོངས་སུ་འགྲིབ་པར་འགྱུར་རོ། །ལྷའི་རིས་ནི་ཡོངས་སུ་འཕེལ་བར་འགྱུར་རོ། །འཇིག་རྟེན་ན་སེམས་ཅན་མང་པོ་ཡོངས་སུ་མྱ་ངན་ལས་འདའ་བར་འགྱུར་རོ། །དགེ་སློང་དག་དེ་ལྟར་སྐད་ཅིག་དེ་དང ། ཐང་ཅིག་དེ་དང ། ཡུད་ཙམ་དེ་ལས་བླའི་ལྷ་རྣམས་ནས་བཟུང་སྟེ། ཚངས་རིས་ཀྱི་ལྷའི་བར་མན་ཆད་དུ་གྲོགས་པོ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་དོ་མོད་ཆོས་ཀྱི་འཁོར་ལོ། བསྐོར་བར་གནང་སྟེ་ཞེས་བྱ་བ་ནས་སྔ་མ་བཞིན་དུ་སྒྲ་སྐད་གཅིག་མངོན་དུ་བྱུང་བར་གྱུར་ཏོ། །དགེ་སློང་དག་དེ་ནས་བྱང་ཆུབ་ཀྱི་ཤིང་གི་ལྷ་ཆོས་སྲེད་ཅེས་བྱ་བ་དང ། ཆོས་འདོད་དང ། ཆོས་ཀྱི་བློ་གྲོས་དང ། ཆོས་སྤྱོད་དང ། བྱང་ཆུབ་ཀྱི་ཤིང་གི་ལྷ་བཞི་པོ་དེ་དག་གིས་དེ་བཞིན་གཤེགས་པའི་ཞབས་གཉིས་ལ་གཏུགས་ཏེ། འདི་སྐད་ཅེས་གསོལ་ཏོ། །བཅོམ་ལྡན་འདས་གང་དུ་ཆོས་ཀྱི་འཁོར་ལོ་བསྐོར་བར་མཛད། དགེ་སློང་དག་དེ་སྐད་ཅེས་གསོལ་པ་དང ། དེ་བཞིན་གཤེགས་པས་ལྷ་དེ་དག་ལ་འདི་སྐད་ཅེས་བཀའ་སྩལ་ཏོ། །གྲོང་ཁྱེར་བཱ་ར་ཎ་སཱིར་དྲང་སྲོང་ལྷུང་བ་རི་དགས་ཀྱི་ནགས་སུའོ། །དེ་དག་གིས་གསོལ་པ། བཅོམ་ལྡན་འདས་གྲོང་ཁྱེར་བཱ་ར་ཎ་སཱི་ནི་སྐྱེ་བོའི་ཚོགས་ཆུང་བ་ལགས། རི་དགས་ཀྱི་ནགས་ནི་ཞུགས་ཤིང་གི་གྲིབ་མ་ཆུང་བ་ལགས་ཏེ། བཅོམ་ལྡན་འདས་གྲོང་ཁྱེར་ཆེན་པོ་འབྱོར་པ། རྒྱས་པ། བདེ་བ། ལོ་ལེགས་པ། ཉམས་དགྱེས་པ། མི་དང་སྐྱེ་བོ་མང་པོས་གང་བ། བསྐྱེད་མོས 41.219b ཚལ་དང ། ནགས་དང་ནགས་འདབས་ཀྱིས་བརྒྱན་པ། གཞན་དག་ཀྱང་མཆིས་ན། བཅོམ་ལྡན་འདས་དེ་དག་ཅིག་ཏུ་ཆོས་ཀྱི་འཁོར་ལོ་བསྐོར་བར་གསོལ། དེ་བཞིན་གཤེགས་པས་བཀའ་སྩལ་པ། བཞིན་བཟངས་དག་དེ་སྐད་མ་ཟེར་ཅིག་།དེ་ཅིའི་ཕྱིར་ཞེ་ན། དེར་ནི་ང་ཡིས་མཆོད་སྦྱིན་སྟོང་ཕྲག་བྱེ་བ་ཁྲག་ཁྲིག་དྲུག་བཅུ་བྱས། །དེར་ནི་སངས་རྒྱས་སྟོང་ཕྲག་བྱེ་བ་ཁྲག་ཁྲིག་དྲུག་བཅུ་དེ་དག་མཆོད། །བཱ་ར་ཎ་སཱི་དམ་པ་དེ་ནི་སྔོན་གྱི་དྲང་སྲོང་རྣམས་ཀྱི་གནས། །ས་དེ་ལྷ་དང་ཀླུ་ཡིས་མངོན་བསྟོད་རྟག་ཏུ་ཆོས་ནི་མངོན་པར་གཞོལ། །ངས་ནི་སྔོན་ཆད་སངས་རྒྱས་བྱེ་བ་སྟོང་ཕྲག་དགུ་བཅུ་རྩ་གཅིག་དྲན། །དེ་དག་དྲང་སྲོང་ཞེས་བྱ་ནགས་མཆོག་དེར་ནི་འཁོར་ལོ་དམ་པ་བསྐོར། །ཞི་ཞིང་ཉེར་ཞི་བསམ་གཏན་མངོན་གྱུར་རྟག་ཏུ་རི་དགས་རྣམས་ཀྱིས་བསྟེན། །དེ་ཕྱིར་དྲང་སྲོང་ཞེས་བྱ་ནགས་མཆོག་དེར་ནི་འཁོར་ལོ་དམ་པ་བསྐོར། །བསྐུལ་བའི་ལེའུ་ཞེས་བྱ་བ་སྟེ། ཉི་ཤུ་རྩ་ལྔ་པའོ།། །། འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་བདུན་པ། དགེ་སློང་དག་དེ་ནས་དེ་བཞིན་གཤེགས་པ་བྱ་བ་མཛད་པ། བྱེད་པ་མཛད་པ། བཅིངས་པ་ཐམས་ཅད་ཡང་དག་པར་ཆད་པ། ཉོན་མོངས་པ་ཐམས་ཅད་བསལ་བ། དྲི་མ་དང་ཉོན་མོངས་པ་སྦྱངས་པ། བདུད་ཕྱིར་རྒོལ་བ་བཅོམ་པ། སངས་རྒྱས་ཀྱི་ཆོས་ཐམས་ཅད་ཀྱི་ཚུལ་གྱིས་རྗེས་སུ་ཞུགས་པ། ཐམས་ཅད་མཁྱེན་པ་ཐམས་ཅད་གཟིགས་པ། སྟོབས་བཅུ་དང་ལྡན་པ། མི་འཇིགས་པ་བཞི་བརྙེས་པ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་རབ་ཏུ་རྫོགས་པ། སྤྱན་ལྔ་དང་ལྡན་པ། སངས་རྒྱས་ཀྱི་སྤྱན་སྒྲིབས་པ་མི་མངའ་བས་འཇིག་རྟེན་ཐམས་ཅད་ལ་གཟིགས་ནས་འདི་སྙམ་དུ་དགོངས་ཏེ། ངས་ཐམས་ཅད་ཀྱི་ཐོག་མར་གང་ལ་ཡང་ཆོས་བསྟན་པར་བྱ། སེམས་ཅན་དག་པ། རྣམ་པ་བཟང་བ། གདུལ་སླ་བ། གོ་སླ་བ། སྦྱང་སླ་བ། འདོད་ཆགས་དང ། ཞེ་སྡང་དང་གཏི་མུག་ཆུང་བ། རྣམ་པར་ཤེས་པ་ལྐོག 41.220a ཏུ་མ་གྱུར་པ། གང་ཆོས་མ་ཐོས་ན་ཡོངས་སུ་ཉམས་པར་འགྱུར་བ། གང་དག་ལ་བདག་གིས་ཐོག་མར་ཆོས་བསྟན་པར་བྱ། གང་ལ་ཆོས་འདི་བསྟན་ནས་ཀྱང་ཤེས་པར་འགྱུར་ཞིང་ཐོ་འཚམ་པར་མི་འགྱུར་བ་ནི་གང་ཡིན་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། རངས་བྱེད་ཀྱི་བུ་ལྷག་སྤྱོད་ནི་དག་པ། རྣམ་པ་བཟང་བ། གོ་སླ་བ། སྦྱང་སླ་བ། འདོད་ཆགས་དང་ཞེ་སྡང་དང་གཏི་མུག་ཆུང་བ། རྣམ་པར་ཤེས་པ་ལྐོག་ཏུ་མ་གྱུར་པ་སྟེ། དེ་ཆོས་མ་ཐོས་ན་ཡོངས་སུ་ཉམས་པར་འགྱུར་བའོ། །དེ་ནི་ཉན་ཐོས་རྣམས་ལ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བརྟུལ་ཞུགས་དང་མཐུན་པར་ཆོས་སྟོན་པ་ཡིན་ན། དེ་ད་ལྟར་ག་ལ་འདུག་སྙམ་དགོངས་པ་དང ། དེ་འཆི་བའི་དུས་བྱས་ནས་དེང་དུ་ཞག་བདུན་ལོན་པར་མཁྱེན་ཏོ། །ལྷ་རྣམས་ཀྱིས་དེ་བཞིན་གཤེགས་པའི་ཞབས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། རངས་བྱེད་ཀྱི་བུ་ལྷག་སྤྱོད་གུམ་ནས་དེང་དུ་དགུང་བདུན་ལགས་སོ། །དགེ་སློང་དག་ངས་འདི་སྙམ་དུ་བསམས་ཏེ། ཨེ་མ་རངས་བྱེད་ཀྱི་བུ་ལྷག་སྤྱོད་དེ་ཆོས་ཤིན་ཏུ་བཟང་པོ་འདི་ལྟ་བུ་འདི་མ་ཐོས་པར་ཤི་བའི་དུས་བྱས་པ་ནི་ཆེར་ཉམས་སོ། །གལ་ཏེ་དེས་ཆོས་འདི་ཐོས་ན་ཤེས་པར་འགྱུར་ཏེ། དེ་ལ་བདག་གིས་ཐོག་མར་ཆོས་བསྟན་པར་བྱ་ཞིང་དེ་ཡང་བདག་ལ་ཐོ་འཚམས་པར་མི་འགྱུར་རོ་སྙམ་མོ། །དགེ་སློང་དག་དེ་བཞིན་གཤེགས་པས་ཡང་འདི་སྙམ་དུ་དགོངས་ཏེ། སེམས་ཅན་དག་པ་གདུལ་སླ་བ་ཞེས་བྱ་བ་ནས། ངའི་ཆོས་བསྟན་པ་ཐོ་འཚམ་པར་མི་འགྱུར་བ་ཞེས་བྱ་བའི་བར་དུ་སྔ་མ་བཞིན་ཏེ། དེ་ལྟ་བུ་གཞན་སུ་ཡོད་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། སྒྱུ་རྩལ་ཤེས་ཀྱི་བུ་རིང་འཕུར་ནི་དག་པ་ཞེས་བྱ་བ་ནས། ངའི་ཆོས་བསྟན་པ་ཐོ་འཚམ་པར་མི་འགྱུར་ཞེས་བྱ་བའི་བར་དུ་སྟེ། དེ་ད་ལྟར་ག་ལ་འདུག་སྙམ་དགོངས་ན། དེ 41.220b ཡང་འཆི་བའི་དུས་བྱས་ནས་དེང་དུ་ཞག་གསུམ་ལོན་པར་མཁྱེན་ཏོ། །གནས་གཙང་མའི་རིས་ཀྱི་ལྷ་རྣམས་ཀྱིས་ཀྱང་དོན་དེ་དེ་བཞིན་གཤེགས་པ་ལ་གསོལ་ཏེ། བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། སྒྱུ་རྩལ་ཤེས་ཀྱི་བུ་རིང་འཕུར་གུམ་ནས་དེང་དུ་དགུང་གསུམ་ལགས་སོ། །དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། ཨེ་མ་སྒྱུ་རྩལ་ཤེས་ཀྱི་བུ་རིང་འཕུར་དེ་ཆོས་ཤིན་ཏུ་བཟང་པོ་འདི་ལྟ་བུ་འདི་མ་ཐོས་པར་ཤི་བ་ནི་ཆེར་ཉམས་སོ་སྙམ་མོ། །དགེ་སློང་དག་དེ་བཞིན་གཤེགས་པས་ཡང་འདི་སྙམ་དུ་དགོངས་ཏེ། སེམས་ཅན་དག་པ་རྣམ་པ་བཟང་བ་ཞེས་བྱ་བ་ནས་ངའི་ཆོས་བསྟན་པ་ཐོ་འཚམ་པར་མི་འགྱུར་ཞེས་བྱ་བའི་བར་དུ་སྔ་མ་བཞིན་ཏེ། དེ་ལྟ་བུ་གཞན་སུ་ཡོད་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པས་འདི་སྙམ་དུ་དགོངས་ཏེ། ལྔ་སྡེ་བཟང་པོ་རྣམས་ནི་དག་པ། རྣམ་པ་བཟང་བ། གདུལ་སླ་བ། གོ་སླ་བ། རྣམ་པར་སྦྱང་སླ་བ། འདོད་ཆགས་དང་ཞེ་སྡང་དང ། གཏི་མུག་ཆུང་བ། རྣམ་པར་ཤེས་པ་ལྐོག་ཏུ་མ་གྱུར་པ་སྟེ། དེ་དག་ཆོས་མ་ཐོས་ན་ཡོངས་སུ་ཉམས་པར་འགྱུར་བའོ། །ང་དཀའ་བ་སྤྱད་པ་སྤྱོད་པ་ན་ཡང་དེ་དག་གིས་བསྙེན་བཀུར་བྱས་པར་གྱུར་ཏེ། དེ་དག་ངས་ཆོས་བསྟན་ན་ཤེས་པར་འགྱུར་ཞིང ། ང་ལ་ཐོ་འཚམ་པར་མི་འགྱུར་རོ་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། བདག་གིས་ལྔ་སྡེ་བཟང་པོ་རྣམས་ལ་ཐོག་མར་ཆོས་བསྟན་པར་བྱ་གོར་མ་ཆག་སྙམ་མོ། །དགེ་སློང་དག་དེ་ནས་ཡང་དེ་བཞིན་གཤེགས་པ་འདི་སྙམ་དུ་དགོངས་ཏེ། ལྔ་སྡེ་བཟང་པོ་དག་ད་ལྟར་གང་ན་འཁོད་སྙམ་མོ། །དེ་ནས་དེ་བཞིན་གཤེགས་པས་སངས་རྒྱས་ཀྱི་སྤྱན་གྱིས་ཐམས་ཅད་དང་ལྡན་པའི་འཇིག་རྟེན་ལ་རྣམ་པར་གཟིགས་ན་ལྔ་སྡེ་བཟང་པོ་དག་གྲོང་ཁྱེར་བཱ་རཱ་ཎ་སཱིའི་དྲང་སྲོང་ལྷུང་བ་རི་དགས་ཀྱི་ནགས་ན་འཁོད་པར་གཟིགས་སོ། །གཟིགས་ནས་ཀྱང་དེ་བཞིན་གཤེགས་པས་འདི་སྙམ་དུ་དགོངས་ཏེ། བདག་གིས་ལྔ་སྡེ་བཟང་པོ་རྣམས་ལ 41.221a ཐམས་ཅད་ཀྱི་ཐོག་མར་ཆོས་བསྟན་པར་བྱ་གོར་མ་ཆག་གོ། །དེ་དག་གིས་ངས་ཐམས་ཅད་ཀྱི་ཐོག་མར་ཆོས་བསྟན་པ་ཀུན་ཤེས་པར་འགྱུར་རོ་སྙམ་མོ། །དགེ་སློང་དག་དེ་ཅིའི་ཕྱིར་ཞེ་ན། དེ་དག་ནི་སྤྱད་པ་དང་ལྡན་པ་ཆོས་དཀར་པོ་རྣམས་ཤིན་ཏུ་ཡོངས་སུ་བསྡུས་པ། ཐར་པའི་ལམ་ལ་མངོན་དུ་ཕྱོགས་པ། བགེགས་དང་བྲལ་བ་དག་གོ། །དགེ་སློང་དག་དེ་ནས་དེ་བཞིན་གཤེགས་པས་དེ་སྙམ་དུ་དགོངས་ནས་བྱང་ཆུབ་ཀྱི་སྙིང་པོ་ལས་བཞེངས་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཤེགས་ནས། མཐར་གྱིས་ཡུལ་མ་ག་དྷཱར་རྒྱུ་ཞིང་ཡུལ་གསལ་ལྡན་དུ་གཤེགས་སོ། །དེ་ནས་རི་གཱ་ཡ་དང ། བྱང་ཆུབ་ཀྱི་སྙིང་པོའི་བར་དུ་ཀུན་དུ་འཚོ་བ་པ་གཞན་ཞིག་གིས་དེ་བཞིན་གཤེགས་པ་རྒྱང་རིང་པོ་ནས་གཤེགས་པ་མཐོང་ངོ ། །མཐོང་ནས་ཀྱང་དེ་བཞིན་གཤེགས་པ་ག་ལ་བ་དེར་སོང་སྟེ། ཕྱིན་ནས་ཕྱོགས་གཅིག་ཏུ་འདུག་གོ། །དགེ་སློང་དག་ཕྱོགས་གཅིག་ཏུ་འདུག་ནས་ཀྱང་ཀུན་ཏུ་འཚོ་བ་པ་དེ་དེ་བཞིན་གཤེགས་པ་དང་ལྷན་གཅིག་ཏུ་ཡང་དག་པར་མགུ་བར་བྱ་བའི་གཏམ་རྣམ་པ་མང་པོ་བྱས་ནས་འདི་སྐད་ཅེས་གསོལ་ཏོ། །ཚེ་དང་ལྡན་པ་གཽ་ཏ་མ་ཁྱོད་ཀྱི་དབང་པོ་རྣམས་ནི་ཤིན་དུ་གསལ་ལོ། །ཁྱོད་ཀྱི་ལྤགས་པའི་མདོག་ནི་སེར་པོ་གདའ་ཞིང་ཡོངས་སུ་དག་ལ་ཡོངས་སུ་བྱང་བ་སྟེ། འདི་ལྟ་སྟེ་དཔེར་ན། སྟོན་ཀ་རྒྱ་ཤུག་ཁ་དོག་རྩ་སེར་ཞིང་འོད་གསལ་ཏེ། སེར་པོ་གདའ་བ་དེ་བཞིན་དུ་གཽ་ཏ་མ་ཁྱོད་ཀྱི་དབང་པོ་རྣམས་ཡོངས་སུ་དག་ཅིང ། ཞལ་གྱི་དཀྱིལ་འཁོར་ཡང་ཡོངས་སུ་དག་ལ་ཡོངས་སུ་བྱང་བའོ། །འདི་ལྟ་སྟེ་དཔེར་ན། ཤིང་ཏ་ལའི་འབྲས་བུ་སྨིན་པ་རྩ་བ་ནས་ཆད་མ་ཐག་པའི་རྩ་བ་ལོགས་སེར་པོ་གདའ་བ་ལགས་ཏེ། ཡོངས་སུ་དག་ཅིང་ཡོངས་སུ་བྱང་བ་དེ་བཞིན་དུ་གཽ་ཏ་མ་ཁྱོད་ཀྱི་དབང་པོ་རྣམས་ནི་ཡོངས་སུ་དག་ལ། ཞལ་གྱི་དཀྱིལ་འཁོར་ནི་ཡོངས་སུ་དག་ཅིང་ཡོངས་སུ་བྱང་བའོ། །འདི་ལྟ་སྟེ་དཔེར་ན། འཛམ་བུའི་ཆུ་བོའི་གསེར་གྱི་མགུལ 41.221b རྒྱན་ཐབ་ནས་ཕྱུང་སྟེ། མགར་བའི་བུ་མཁས་པས་ལེགས་པར་ཡོངས་སུ་སྦྱང་བར་གྱིས་པ། ལ་བ་དུར་ཀའི་ནང་དུ་སྩལ་ན། ཁ་དོག་དང་ལྡན་པར་འགྱུར་ཏེ། ཡོངས་སུ་དག་ཅིང་ཡོངས་སུ་བྱང་ལ། སེར་པོ་གདའ་ཞིང་འོད་གསལ་བར་འགྱུར་རོ། །དེ་བཞིན་དུ་གཽ་ཏ་མ་ཁྱོད་ཀྱི་དབང་པོ་རྣམས་ནི་ཤིན་ཏུ་གསལ། ལྤགས་པའི་མདོག་ནི་ཡོངས་སུ་དག་ཞལ་གྱི་དཀྱིལ་འཁོར་ནི་ཡོངས་སུ་བྱང་བ་ལགས་སོ། །ཚེ་དང་ལྡན་པ་གཽ་ཏ་མ་སུ་ལས་ཚངས་པར་སྤྱད་པ་སྤྱོད། དགེ་སློང་དག་དེ་སྐད་ཅེས་གསོལ་བ་དང ། དེ་བཞིན་གཤེགས་པས་ཀུན་ཏུ་འཚོ་བ་པ་དེ་ལ་ཚིགས་སུ་བཅད་པས་སླར་བཀའ་སྩལ་པ། ང་ལ་སློབ་དཔོན་གང་ཡང་མེད། །ང་དང་འདྲ་བ་ཡོད་མ་ཡིན། །ང་ནི་གཅིག་པུ་རྫོགས་སངས་རྒྱས། །བསིལ་གྱུར་ཟག་པ་མེད་པ་ཡིན། །དེས་སྨྲས་པ། གཽ་ཏ་མ་བདག་ཉིད་དགྲ་བཅོམ་པར་ཞལ་གྱིས་འཆེ་འམ། དེ་བཞིན་གཤེགས་པས་བཀའ་སྩལ་པ། ང་ཉིད་འཇིག་རྟེན་དགྲ་བཅོམ་པ། །ང་ནི་སྟོན་པ་བླ་ན་མེད། །ལྷ་དང་ལྷ་མིན་དྲི་ཟར་བཅས། །ང་ཡི་དོ་ཟླ་གང་ཟག་མེད། །དེས་སྨྲས་པ། གཽ་ཏ་མ་བདག་ཉིད་རྒྱལ་བ་ལགས་པར་ཞལ་གྱིས་འཆེ་འམ། དེ་བཞིན་གཤེགས་པས་བཀའ་སྩལ་པ། གང་དག་ཟག་པ་ཟད་བརྙེས་པ། །ང་འདྲ་རྒྱལ་བར་ཤེས་པར་བྱ། །ང་ནི་སྡིག་པའི་ཆོས་ལས་རྒྱལ། །དེ་བས་ཉེ་འགྲོ་ང་རྒྱལ་ཡིན། །དེས་སྨྲས་པ། ཚེ་དང་ལྡན་པ་གཽ་ཏ་མ་ད་གར་བཞུད། དེ་བཞིན་གཤེགས་པས་བཀའ་སྩལ་པ། ང་ནི་བཱ་ར་ཎ་སཱིར་འགྲོ། གྲོང་ཁྱེར་གསལ་ལྡན་སོང་ནས་ནི། །ལོང་བ་ལྟ་བུའི་འཇིག་རྟེན་ལ། །མཚུངས་པ་མེད་པའི་འོད་བྱའོ། །ང་ནི་བཱ་ར་ཎ་སཱིར་འགྲོ། །གྲོང་ཁྱེར་གསལ་ལྡན་སོང་ནས་ནི། །འོན་པ་ལྟ་བུའི་འཇིག་རྟེན་ལ། །བདུད་རྩིའི་རྔ་ཆེན་བརྡུང་བར་བྱ། །ང་ནི་བཱ་ར་ཎ་སཱིར་འགྲོ། །གྲོང་ཁྱེར་གསལ་ལྡན་སོང་ནས་ནི། །འཇིག་རྟེན་དུ་ནི་མ་བསྐོར་བའི། །ཆོས་ཀྱི་འཁོར་ལོ་བསྐོར་བར་བྱ། །ཀུན་དུ་འཚོ་བ་པ་དེས་གཽ་ཏ་མ་དེ་བཞིན་དུ་འགྱུར་རོ། །དེ་བཞིན་དུ་འགྱུར་རོ་ཞེས་སྨྲས་ཏེ། ལྷོ་ཕྱོགས་ལོགས་སུ་སོང་ངོ ། ། 41.222a དེ་བཞིན་གཤེགས་པ་ནི་བྱང་ཕྱོགས་ལོགས་སུ་བཞུད་དོ། །དགེ་སློང་དག་དེ་ལྟར་དེ་བཞིན་གཤེགས་པ་རི་གཱ་ཡའི་ཀླུའི་རྒྱལ་པོ་ཤིན་ཏུ་བལྟ་མཛེས་ཀྱིས་བཞུགས་སུ་གསོལ་བ་དང ། བཤོས་གསོལ་བར་སྤྱན་དྲངས་སོ། །དེ་ནས་དེ་བཞིན་གཤེགས་པ་ཉེ་གནས་སུ་གཤེགས་སོ། །དེ་ནས་ཀྱང་ལྟེང་རྒྱས་ལྟ་བུར་གཤེགས་སོ། །དེ་ནས་ཀྱང་ཙན་ད་ལར་གཤེགས་སོ། །དེ་ནས་གྲོང་ཁྱེར་ཁ་ལོ་སྒྱུར་དུ་གཤེགས་སོ། །དགེ་སློང་དག་དེ་དག་ཏུ་ཡང་ཁྱིམ་བདག་རྣམས་ཀྱིས་དེ་བཞིན་གཤེགས་པ་བཞུགས་སུ་གསོལ་བ་དང ། བཤོས་གསོལ་བར་སྤྱན་དྲངས་ཏེ། མཐར་གྱིས་ཀླུང་ཆེན་པོ་གང་གཱའི་འགྲམ་དུ་གཤེགས་སོ། །དགེ་སློང་དག་དེའི་ཚེ་ཀླུང་ཆེན་པོ་གང་གཱ་ཤིན་ཏུ་བྲུག་སྟེ། མུ་དང་མཉམ་པར་འབབ་བོ། །དགེ་སློང་དག་དེ་ནས་དེ་བཞིན་གཤེགས་པ་ཕ་རོལ་ཏུ་གཤེགས་པའི་ཕྱིར། མཉན་པའི་གན་དུ་གཤེགས་པ་དང ། དེས་གསོལ་པ། གཽ་ཏ་མ་གྲུ་བཙས་སྩལ་དུ་གསོལ། གྲོགས་པོ་ང་ལ་གྲུ་བཙས་མེད་དོ་ཞེས་བཀའ་སྩལ་ནས། དེ་བཞིན་གཤེགས་པ་ནམ་མཁའ་ལས་ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་གཤེགས་སོ། །དེ་ནས་མཉན་པ་དེས་དེ་མཐོང་ནས་སྦྱིན་གནས་རྣམ་པ་འདི་ལྟ་བུ་འདི་བདག་གིས་མ་བསྒྲལ་ཏོ་ཞེས་ཤིན་ཏུ་འགྱོད་དེ། ཀྱི་ཧུད་མཚར་བྱས་སོ་ཞེས་སྨྲས་ནས་བརྒྱལ་ཏེ་ས་ལ་འགྱེལ་ཏོ། །དེ་ནས་མཉན་པས་རྒྱལ་པོ་གཟུགས་ཅན་སྙིང་པོ་ལ་ཇོ་བོ་དགེ་སྦྱོངས་གཽ་ཏ་མ་ལ་གྲུ་བཙས་སྩལ་བར་གསོལ་ན། གྲུ་བཙས་མེད་དོ་ཞེས་གསུངས་ཏེ། ནམ་མཁའ་ལས་ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་གཤེགས་སོ་ཞེས་དེའི་ལོ་རྒྱུས་སྙད་དོ། །དེ་སྐད་ཐོས་ནས་རྒྱལ་པོ་གཟུགས་ཅན་སྙིང་པོས་དེ་ཕྱིན་ཆད་རབ་ཏུ་བྱུང་བ་ཐམས་ཅད་ལ་གྲུ་བཙས་མི་དབབ་པར་བྱས་སོ། །དགེ་སློང་དག་དེ་ལྟར་དེ་བཞིན་གཤེགས་པ་མཐར་གྱིས་ཡུལ་རྒྱུ་བ་རྒྱུ་ཞིང་གྲོང་ཁྱེར་ཆེན་པོ་བཱ་ར་ཎ་སཱི་ག་ལ་བ་དེར་གཤེགས་སོ། །གཤེགས་ནས་ནང་བར་ཤམ་ཐབས་དང་ཆོས་གོས་གསོལ་ཏེ། ལྷུང་བཟེད 41.222b བསྣམས་ནས། གྲོང་ཁྱེར་ཆེན་པོ་བཱ་རཱ་ཎ་སཱིར་བསོད་སྙོམས་ཀྱི་ཕྱིར་གཤེགས་ཏེ། དེར་བསོད་སྙོམས་ཀྱི་ཕྱིར་གཤེགས་ནས། བསོད་སྙོམས་ཀྱི་ཞལ་ཟས་མཇུག་ཏུ་གསོལ་ཏེ། ཟས་ཀྱི་བྱ་བ་བྱས་ནས་དྲང་སྲོང་ལྷུང་བ་རི་དགས་ཀྱི་ནགས་ག་ལ་བ་དང ། ལྔ་སྡེ་བཟང་པོ་ག་ལ་བ་དེར་གཤེགས་པ་དང ། ལྔ་སྡེ་བཟང་པོ་དག་གིས་དེ་བཞིན་གཤེགས་པ་རྒྱང་རིང་པོ་ནས་གཤེགས་པ་མཐོང་ངོ ། །མཐོང་ནས་ཀྱང་འདི་སྐད་དུ་ཚེ་དང་ལྡན་པ་དག་དགེ་སྦྱོང་གཽ་ཏ་མ་ལྷོད་པ། མང་དུ་ཟ་བ། སྤོང་བ་ལས་ཉམས་པ་འདི་འོང་སྟེ། འདིས་སྔོན་གྱིས་དཀའ་བ་སྤྱད་པ་དེས་མིའི་ཆོས་བླ་མ་ལས་མཆོག་ཏུ་གྱུར་པ། འཕགས་པའི་ཡེ་ཤེས་མཐོང་བའི་ཁྱད་པར་ཅུང་ཟད་ཀྱང་མངོན་སུམ་དུ་བྱེད་མ་ནུས་ནས། ད་ལྟར་ཁ་ཟས་རགས་པ་ཟ་ཞིང་བསོད་སྙོམས་ལ་སྦྱོར་བ་དང་ལྡན་པར་གནས་པ་ལྟ་སྨོས་ཀྱང་ཅི་དགོས་ཏེ། ལྷོད་པ་མང་དུ་ཟ་བ། འདི་ལ་སྐལ་བ་མེད་ཀྱིས་གང་གིས་ཀྱང་འདི་བསུ་བར་མི་བྱའོ། །ལྡང་བར་མི་བྱའོ། །ཆོས་གོས་དང་ལྷུང་བཟེད་བླང་བར་མི་བྱའོ། །སྟན་དང་ཡོངས་སུ་སྤྱད་པར་འོས་པའི་བཏུང་བ་དང ། རྐང་པ་གཞག་པ་ཡང་སྦྱིན་པར་མི་བྱའོ། །སྟན་ལྷག་པ་གཞན་ནི་མ་གཏོགས་ཏེ། ཚེ་དང་ལྡན་པ་གཽ་ཏ་མ་སྟན་ལྷག་པ་གཞན་འདི་དག་ཡོད་ཀྱིས་ཇི་སྟེ་འདོད་ན་འདུག་ཤིག་པར་བརྗོད་དོ་ཞེས་འོག་ཁྲིམས་བཅས་སོ། །ཚེ་དང་ལྡན་པ་ཀུན་ཤེས་ཀཽཎྜི་ནྱས་སེམས་ལ་ནི་ཁས་མ་བླངས་ཏེ་ཚིག་གིས་ནི་མི་རུང་ཞེས་མ་བྱས་སོ། །དགེ་སློང་དག་དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་ག་ལ་བ་དེར་གཤེགས་པ་དེ་ལྟ་དེ་ལྟར་དེ་དག་རང་རང་གི་སྟན་ལ་མི་དགའ་ཞིང་ལྡང་འདོད་པར་གྱུར་ཏེ། འདི་ལྟ་སྟེ་དཔེར་ན་འདབ་ཆགས་བྱ་སྐོན་པར་བཅུག་པར་གྱུར་ལ། སྐོན་པ་དེའི་འོག་ནས་མེས་བདུགས་ན། དེ་མེས་གདུངས་པས་མྱུར་བ་མྱུར་བར་འཕར་བར་འདོད་ཅིང་འཕུར་འདོད་པ་དེ་བཞིན་དུ། དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་དག་གི་གན་དུ་གཤེགས་པ་དེ་ལྟ་དེ་ལྟར་ལྔ་སྡེ་བཟང་པོ་དག་རང་རང 41.223a གི་སྟན་ལ་མི་དགའ་ཞིང་ལྡང་འདོད་པར་གྱུར་ཏོ། །དེ་ཅིའི་ཕྱིར་ཞེ་ན། གང་དག་དེ་བཞིན་གཤེགས་པ་མཐོང་ནས་སྟན་ལས་མི་ལྡང་བའི་སེམས་ཅན་དེ་ནི་སེམས་ཅན་གྱི་རིས་ན་གང་ཡང་མེད་དོ། །དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་དག་གིས། གན་དུ་གཤེགས་པ་དེ་ལྟ་དེ་ལྟར་ལྔ་སྡེ་བཟང་པོ་དག་གིས་དེ་བཞིན་གཤེགས་པའི་དཔལ་དང་གཟི་བརྗིད་མ་བཟོད་ནས་སྟན་གྱི་སྟེང་ན་འདར་ཞིང་ཀུན་གྱི་ས་འོག་ཁྲིམས་ཞིག་སྟེ། སྟན་ལས་ལངས་ནས་ལ་ལ་ནི་རིམ་གྲོ་བྱེད། ལ་ལས་ནི་བསུ་ཏེ་ན་བཟའ་ཆོས་གོས་དང་ལྷུང་བཟེད་བླངས། ལ་ལས་ནི་གདན་བཏིང ། ལ་ལས་ནི་ཞབས་གཞག་པ་བཤམས། ལ་ལས་ནི་ཞབས་བཀྲུ་བའི་ཆུ་བཤམས་ཏེ། འདི་སྐད་ཅེས་ཀྱང་གསོལ་ཏོ། །ཚེ་དང་ལྡན་པ་གཽ་ཏ་མ་ཁྱོད་ལེགས་པར་བྱོན་ཏོ། །གདན་བཏིང་བ་འདི་ལ་བཞུགས་སུ་གསོལ། དགེ་སློང་དག་དེ་བཞིན་གཤེགས་པ་གདན་བཏིང་བ་ལ་བཞུགས་ནས། ལྔ་སྡེ་བཟང་པོ་དག་དེ་བཞིན་གཤེགས་པ་དང་ལྷན་ཅིག་ཏུ་ཡང་དག་པར་མགུ་བར་བྱ་བ་དང་ཡང་དག་པར་ཆགས་པར་བྱ་བའི་གཏམ་རྣམ་པ་མང་པོ་བྱས་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་དེ་བཞིན་གཤེགས་པ་ལ་ལྔ་སྡེ་བཟང་པོ་དག་གིས་འདི་སྐད་ཅེས་གསོལ་ཏོ། །ཚེ་དང་ལྡན་པ་གཽ་ཏ་མའི་དབང་པོ་རྣམས་ནི་རབ་ཏུ་གསལ་ལོ། །ལྤགས་པའི་མདོག་ནི་ཡོངས་སུ་དག་གོ། །ཞེས་བྱ་བ་ཐམས་ཅད་སྔ་མ་བཞིན་ནོ། །ཚེ་དང་ལྡན་པ་གཽ་ཏ་མ་ཁྱོད་ལ་མིའི་ཆོས་བླ་མ་ལས་མཆོག་ཏུ་གྱུར་པ་འཕགས་པའི་ཡེ་ཤེས་མཐོང་བའི་ཁྱད་པར་ཆུང་ཟད་མངོན་སུམ་དུ་མཛད་པ་ལྟ་མངའ་འམ། དགེ་སློང་དག་དེ་སྐད་ཅེས་གསོལ་བ་དང ། དེ་བཞིན་གཤེགས་པས་ལྔ་སྡེ་བཟང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་དེ་བཞིན་གཤེགས་པ་ལ་ཚེ་དང་ལྡན་པ་ཞེས་མ་རྗོད་ཅིག་།ཁྱེད་ལ་ཡུན་རིང་པོར་གནོད་པ་དང་མི་ཕན་པ་དང ། མི་བདེ་བར་གྱུར་ཏ་རེ། དགེ་སློང་དག་ངས་ནི་བདུད་རྩི 41.223b དང་འཆི་བ་མེད་པར་འགྲོ་བའི་ལམ་མངོན་དུ་བྱས་སོ། །དགེ་སློང་དག་ང་ནི་སངས་རྒྱས་སོ། །ཐམས་ཅད་མཁྱེན་པའོ། །ཐམས་ཅད་གཟིགས་པའོ། །བསིལ་བར་གྱུར་པའོ། །ཟག་པ་ཟད་པའོ། །ཆོས་ཐམས་ཅད་ལ་དབང་བའོ། །དགེ་སློང་དག་ངས་ཁྱེད་ལ་ཆོས་བཤད་ཀྱིས་ཚུར་ཤོག་།ཉོན་ཅིག་།ནན་ཏན་གྱིས་ཤིག་།རྣ་བ་ལྷོགས་ཤིག་དང ། ངས་གདམས་ཤིང་རྗེས་སུ་བསྟན་ཏོ། །ངས་ཇི་ནས་ཡང་དག་པར་བཤད་ཅིང་ཡང་དག་པར་རྗེས་སུ་བསྟན་ན། ཁྱེད་ཀྱང་ཟག་པ་རྣམས་ཟད་ནས་ཟག་པ་ཟད་པའི་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བ་ཚེ་འདི་ཉིད་ལ་རང་གི་མངོན་པར་ཤེས་པས་མངོན་དུ་བྱས་ཏེ་ཉེ་བར་བསྒྲུབས་ནས། བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྙེན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ། །ཞེས་ཤེས་པར་འགྱུར་རོ། །དགེ་སློང་དག་ཁྱེད་ཚེ་དང་ལྡན་པ་དག་དགེ་སྦྱོང་གཽ་ཏ་མ་ལྷོད་པ་མང་དུ་ཟ་བ། སྤོང་བ་ལས་ཉམས་པ་འདི་འོངས་ཏེ་ཞེས་བྱ་བ་ནས་ཇི་སྟེ་འདོད་ན་འདུག་ཤིག་ཅེས་བྱ་བའི་བར་ཐམས་ཅད་སྔ་མ་བཞིན་ཏེ། དེ་སྙམ་དུ་མ་བསམས་སམ། དགེ་སློང་དག་དེ་སྐད་ཅེས་མ་ཟེར་ཅིག་ཅེས་བཀའ་སྩལ་པ་དང ། དེ་དག་མུ་སྟེགས་ཅན་གྱི་རྟགས་དང ། མུ་སྟེགས་ཅན་གྱི་རྒྱལ་མཚན་གང་ཅི་ཡོད་པ་དེ་ཐམས་ཅད་སྐད་ཅིག་དེ་ཉིད་ལ་མེད་པར་གྱུར་ཏེ། ཆོས་གོས་གསུམ་དང་ལྷུང་བཟེད་དང་ལྡན་པར་གྱུར་ཅིང ། སྐྲ་ཡང་བྲེགས་པར་གྱུར་ཏེ། འདི་ལྟ་སྟེ་དཔེར་ན། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་དང་འདྲ་བར་གྱུར་ཏོ། །དེ་ཉིད་ཀྱིས་དེ་དག་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་གི་དངོས་པོར་གྱུར་ཏོ། །དགེ་སློང་དག་དེ་ནས་དེའི་ཚེ་དགེ་སློང་ལྔ་པོས་དེ་བཞིན་གཤེགས་པའི་ཞབས་ལ་གཏུགས་ཏེ། ཉེས་པ་བཤགས་ནས་དེ་བཞིན་གཤེགས་པ་ལ་སྟོན་པའི་འདུ་ཤེས་དང་ཕངས་པར་བསམས་པ་དང ། དད་པ་དང ། གུས་པ་བསྐྱེད་དེ། གུས་པ་བསྐྱེད་ནས་ཀྱང་རྫིང་ཁེབས་པར་དེ་བཞིན་གཤེགས་པའི 41.224a སྐུ་བསིལ་ཞིང་ཡོངས་སུ་སྦྱང་བའི་ལས་བྱེད་དོ། །དགེ་སློང་དག་དེ་བཞིན་གཤེགས་པ་སྐུ་བསིལ་ཏེ་བྱུང་ནས་འདི་སྙམ་དུ་དགོངས་ཏེ། སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་གང་དུ་བཞུགས་ནས་ཆོས་ཀྱི་འཁོར་ལོ་བསྐོར། སྙམ་པ་དང ། དགེ་སློང་དག་ས་ཕྱོགས་གང་དུ་སྔོན་གྱི་དེ་བཞིན་གཤེགས་པ་རྣམས་ཀྱིས་ཆོས་ཀྱི་འཁོར་ལོ་བསྐོར་བར་གྱུར་པའི་ས་ཕྱོགས་དེར་རིན་པོ་ཆེ་སྣ་བདུན་གྱི་ཁྲི་སྟོང་བྱུང་བར་གྱུར་ཏོ། །དེ་ནས་དེ་བཞིན་གཤེགས་པས་སྔོན་གྱི་དེ་བཞིན་གཤེགས་པ་རྣམས་ལ་གུས་པར་མཛད་པའི་ཕྱིར། ཁྲི་གསུམ་ལ་བསྐོར་བ་མཛད་ནས་སེང་གེ་ལྟར་བག་ཚ་བ་མི་མངའ་བར་ཁྲི་བཞི་པ་ལ་སྐྱིལ་མོ་ཀྲུང་བཅས་ཏེ་བཞུགས་སོ། །དགེ་སློང་ལྔ་པོས་ཀྱང་དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། དེ་བཞིན་གཤེགས་པའི་སྤྱན་སྔར་འཁོད་དོ། །དགེ་སློང་དག་དེ་ནས་དེའི་ཚེ་དེ་བཞིན་གཤེགས་པས་སྐུ་ལས་རྣམ་པ་འདི་ལྟ་བུའི་འོད་ཕྱུང་སྟེ། འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་ཆེན་པོས་ཁྱབ་པར་གྱུར་ནས། སྣང་བ་དེས་འཇིག་རྟེན་གྱི་བར་སྡིག་པ་སྡིག་པས་ཁྱབ་པ་མུན་པ་མུན་ནག་ཏུ་གྱུར་པ། གང་དུ་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་དབང་ཆེ་བར་གྲགས་པ་འདི་གཉིས་ཀྱི་འོད་ཀྱིས་འོད་དང་ཁ་དོག་གིས་ཁ་དོག་དང ། གཟི་བརྗིད་ཀྱི་གཟི་བརྗིད་ལམ་མེར་མ་གྱུར་པ། ལྷང་ངེར་མ་གྱུར་པ་གང་ཡིན་པ་དེ་ན་སེམས་ཅན་གང་དག་སྐྱེས་པ་རང་རང་གི་ལག་པ་བརྐྱང་བ་ཡང་མི་མཐོང་བ་དེར་ཡང་དེའི་ཚེ་སྣང་བ་ཆེན་པོ་རྒྱ་ཆེར་བྱུང་བར་གྱུར་ཏོ། །དེར་སེམས་ཅན་གང་དག་སྐྱེས་པ་དེ་དག་ཀྱང་སྣང་བ་དེས་གསལ་བར་གྱུར་མ་ཐག་ཏུ་གཅིག་གིས་གཅིག་མཐོང་ཞིང་གཅིག་གིས་གཅིག་ཤེས་ཏེ། འདི་སྐད་ཅེས་ཀྱེ་སེམས་ཅན་གཞན་དག་ཀྱང་འདིར་སྐྱེས་སོ། །ཀྱེ་སེམས་ཅན་གཞན་དག་ཀྱང་འདིར་སྐྱེས་སོ་ཞེས་འཛེར་ཏོ། །སྟོང་གསུམ་གྱི་སྟོང་ཆེན་པོའི 41.224b འཇིག་རྟེན་གྱི་ཁམས་འདི་ཡང་རྣམ་པ་དྲུག་དང་ལྟས་ཆེན་པོ་བཅཝོ་བརྒྱད་དུ་གཡོས། །རབ་ཏུ་གཡོས། ཀུན་ཏུ་རབ་ཏུ་གཡོས་སོ། །འགུལ་རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །ལྡེག་།རབ་ཏུ་ལྡེག་།ཀུན་ཏུ་རབ་ཏུ་ལྡེག་གོ། །འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་སོ། །འུར་འུར་རབ་ཏུ་འུར་འུར། ཀུན་ཏུ་རབ་ཏུ་འུར་འུར་རོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །མཐའ་དམའ་ན་དབུས་མཐོ་བར་གྱུར་ཏོ། །དབུས་དམའ་ན་མཐའ་མཐོ་བར་གྱུར་ཏོ། །ཤར་ཕྱོགས་དམའ་ན་ནུབ་ཕྱོགས་མཐོ་བར་གྱུར་ཏོ། །ནུབ་ཕྱོགས་དམའ་ན་ཤར་ཕྱོགས་མཐོ་བར་གྱུར་ཏོ། །བྱང་ཕྱོགས་དམའ་ན་ལྷོ་ཕྱོགས་མཐོ་བར་གྱུར་ཏོ། །ལྷོ་ཕྱོགས་དམའ་ན་བྱང་ཕྱོགས་མཐོ་བར་གྱུར་ཏོ། །དེའི་ཚེ་དགའ་བར་འགྱུར་བ་དང ། ཚིམ་པར་འགྱུར་བ་དང ། མགུ་བར་འགྱུར་བ་དང ། དང་བར་འགྱུར་བ་དང ། བརྟག་པར་བྱ་བ་དང ། རབ་ཏུ་སིམ་པར་འགྱུར་བ་དང ། བསྔགས་པར་བྱ་བ་དང ། བསྔགས་པ་ཟླ་མེད་པ་དང ། ངོམས་པར་མི་འགྱུར་བ་དང ། མི་མཐུན་པ་མེད་པ་དང ། སྐྲག་པར་མི་འགྱུར་བའི་སྒྲ་དག་ཀྱང་གྲག་སྟེ། སྐད་ཅིག་དེ་ལ་སེམས་ཅན་གང་ལ་ཡང་རྣམ་པར་འཚེ་བ་འམ། འཇིགས་པ་འམ་སྡང་བ་འམ་བག་ཚ་བ་མེད་པར་གྱུར་ཏོ། །སྐད་ཅིག་དེ་ལ་ཉི་མ་དང་ཟླ་བ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་རྣམས་ཀྱི་འོད་ཀྱང་མི་སྣང་ངོ ། །སེམས་ཅན་དམྱལ་བ་པ་དང་དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་ཐམས་ཅད་ཀྱང་སྐད་ཅིག་དེ་ལ་སྡུག་བསྔལ་རྣམས་དང་བྲལ་ཞིང་བདེ་བ་ཐམས་ཅད་དང་ལྡན་པར་གྱུར་ཏོ། །སེམས་ཅན་གང་ལ་ཡང་འདོད་ཆགས་དང ། ཞེ་སྡང་དང་གཏི་མུག་དང ། ཕྲག་དོག་དང ། སེར་སྣ་དང ། ང་རྒྱལ་དང ། འཆབ་པ་དང ། རྒྱགས་པ་དང ། ཁྲོ་བ་དང ། གནོད་སེམས་དང ། ཡོངས་སུ་གདུང་བའི་གནོད་པ་མེད་དེ་སྐད་ཅིག་དེ་ལ་སེམས་ཅན་ཐམས་ཅད་གཅིག་ལ་གཅིག་བྱམས་པའི་སེམས་དང ། ཕན་པའི་སེམས་དང ། ཕ་མ་ཙམ་དུ་འདུ་ཤེས་པར་གྱུར་ཏོ། །འོད 41.225a བཀོད་པ་དེ་ལས་ཚིགས་སུ་བཅད་པ་འདི་དག་ཀྱང་བྱུང་ངོ ། །དགའ་ལྡན་རིས་ནས་ཤི་འཕོས་གང ། །ཡུམ་གྱི་ལྷུམས་སུ་ཞུགས་པར་གྱུར། །ལུམ་བི་ནི་ཡི་ཚལ་བལྟམ་ནས། །བདེ་བ་སོགས་པའི་ཁྱོ་ཡིས་བླངས། །གང་ཞིག་སེང་གེའི་རྩལ་སྟབས་ཀྱིས། །མ་རྨོངས་གོམ་པ་བདུན་བོར་ནས། །ང་ནི་འཇིག་རྟེན་གཙོ་བོ་ཞེས། །ཚངས་པའི་དབྱངས་ཀྱིས་གསུང་ཕྱུང་ངོ ། །སེམས་ཅན་ཀུན་ལ་ཕན་པའི་ཕྱིར། །གླིང་བཞི་བཏང་སྟེ་རབ་ཏུ་བྱུང ། །དཀའ་ཐུབ་དཀའ་བ་སྤྱད་ནས་ནི། །ས་ཡི་སྙིང་པོ་ག་ལར་གཤེགས། །དཔུང་དང་བཅས་པའི་བདུད་བཅོམ་ནས། །འཇིག་རྟེན་ཕན་ཕྱིར་བྱང་ཆུབ་བརྙེས། །བཱ་རཱ་ཎ་སཱིར་གཤེགས་ནས་ནི། །ཆོས་ཀྱི་འཁོར་ལོ་སྐོར་བར་མཛད། །དེ་ལ་ཚངས་པ་ལྷར་བཅས་པས། །མཉམ་པའི་འཁོར་ལོ་སྐོར་ཞེས་བསྐུལ། །འཇིག་རྟེན་ཐུགས་རྗེས་བསྐྱེད་ནས་སུ། །ཐུབ་པ་ཡིས་ནི་སྣང་བ་མཛད། །དེ་ནི་ཐུགས་དམ་བརྟན་པ་སྟེ། །བཱ་རཱ་ཎ་སཱིར་རི་དགས་ནགས། །གཤེགས་ཏེ་འཁོར་ལོ་བླ་མེད་པ། །ཤིན་ཏུ་རྨད་བྱུང་དཔལ་ལྡན་སྐོར། །རྒྱལ་བས་བསྐལ་པ་ཁྲག་ཁྲིག་བསྒྲུབས། །ཆོས་དེ་ཉན་པར་གང་འདོད་པ། །དེ་ནི་རིངས་པར་ལ་གོར་དུ། །ཆོས་ཉན་པ་ཡི་ཕྱིར་ཤོག་ཤིག་།མི་དང་སངས་རྒྱས་འབྱུང་རྙེད་དཀའ། །དད་པའང་ཤིན་ཏུ་རྙེད་པར་དཀའ། །མི་ཁོམ་བརྒྱད་སྤངས་རྙེད་པར་དཀའ། །ཆོས་ཉན་པ་ནི་གཙོ་བོ་ཡིན། །སངས་རྒྱས་འབྱུང་དང་དལ་བ་དང ། དད་དང་ཆོས་མཉན་དམ་པ་དང ། །དེ་དག་ཐམས་ཅད་ད་རྙེད་ཀྱིས། །བག་མེད་མ་ལུས་རྣམ་པར་སྤོངས། །གལ་ཏེ་བསྐལ་པ་ཁྲག་ཁྲིག་ཏུ། །ཆོས་ཐོས་མི་འགྱུར་སྲིད་པ་དེ། །ཁྱོད་ཀྱིས་དེ་རིང་རྙེད་ཟིན་གྱིས། །བག་མེད་མ་ལུས་རྣམ་པར་སྤོངས། །འདྲེན་པ་བདུད་རྩིའི་འཁོར་ལོ་ནི། །སྐོར་བ་མཛད་ཀྱིས་ཀུན་མྱུར་ཤོག་།ས་བླའི་ལྷ་ཚོགས་ཚངས་པའི་བར། །དེ་དག་རྣམས་ལ་དེ་སྐད་སྐུལ། །སྒྲ་ཆེན་གྱིས་ནི་ལྷ་བསྐུལ་ནས། །སྐད་ཅིག་དེ་ལ་ཐམས་ཅད་ཀྱིས། །ལྷ་ཡི་འབྱོར་པ་བོར་ནས་ནི། །དེ་དག 41.225b སངས་རྒྱས་གན་དུ་ལྷགས། །དགེ་སློང་དག་དེ་ལྟར་ས་བླའི་ལྷ་རྣམས་ཀྱིས་གྲོང་ཁྱེར་བཱ་ར་ཎ་སཱིར་དྲང་སྲོང་ལྷུང་བ་རིག་དགས་ཀྱི་ནགས་སུ་ཆོས་ཀྱི་འཁོར་ལོ་བསྐོར་བའི་ཕྱིར་དེ་བཞིན་གཤེགས་པའི་འཁོར་གྱི་ཁྱམས་ཆེན་པོ་བཀྲ་བ། བལྟ་ན་སྡུག་པ། ཡངས་པ་རྒྱ་ཆེ་བ། ཆུ་ཞེང་དུ་དཔག་ཚད་བདུན་བརྒྱ་ཡོད་པ་སྤྲུལ་ཏེ། ལྷ་རྣམས་ཀྱིས་སྟེང་གི་ནམ་མཁའི་དཀྱིལ་དུ་གདུགས་དང ། རྒྱལ་མཚན་དང ། བ་དན་དང ། བླ་རེས་ལེགས་པར་བརྒྱན་པར་གྱུར་ཏོ། །འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་རྣམས་ཀྱིས་སེང་གེའི་ཁྲི་བརྒྱད་ཁྲི་བཞི་སྟོང་དེ་བཞིན་གཤེགས་པ་ལ་ཕུལ་ཏེ། བདག་ཅག་ལ་ཐུགས་བརྩེ་བར་དགོངས་ཤིང་འདི་ལ་བཞུགས་ནས་དོ་མོད་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་དུ་གསོལ་ཞེས་གསོལ་ཏོ། །དགེ་སློང་དག་དེ་ནས་དེའི་ཚེ་ཤར་དང ། ལྷོ་དང ། ནུབ་དང ། བྱང་དང ། སྟེང་དང ། འོག་དང ། ཕྱོགས་བཅུ་ཀུན་ནས་བྱང་ཆུབ་སེམས་དཔའ་སྔོན་གྱི་སྨོན་ལམ་དང་ལྡན་པ་བྱེ་བ་ཕྲག་མང་པོ་ལྷགས་ཏེ། དེ་བཞིན་གཤེགས་པའི་ཞབས་ལ་གཏུགས་ནས། ཆོས་ཀྱི་འཁོར་ལོ་བསྐོར་བར་བསྐུལ་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གང་དག་ཡོད་པའི་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། དེ་དག་མ་ཡིན་པ་གཞན་དབང་ཆེ་བ། དབང་ཆེ་བར་གྲགས་པའི་ལྷའི་བུ་དེ་དག་ཐམས་ཅད་ཀྱང་དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ནས། དེ་བཞིན་གཤེགས་པ་ལ་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང་མི་རྣམས་ཀྱི་དོན་དང ། སྨན་པ་དང ། བདེ་བའི་སླད་དུ་བཅོམ་ལྡན་འདས་ཆོས་ཀྱི་འཁོར་ལོ་བསྐོར་དུ་གསོལ། བདེ་བར་གཤེགས་པ་ཆོས་ཀྱི་འཁོར་ལོ་བསྐོར་དུ་གསོལ་བཅོམ་ལྡན་འདས་ཆོས་ཀྱི་མཆོད་སྦྱིན་མཛད་དུ་གསོལ། ཆོས་ཀྱི་ཆར་ཆེན་པོ་དབབ་ཏུ་གསོལ། ཆོས་ཀྱི་རྒྱལ་མཚན་ཆེན་པོ་བསྒྲེངས་དུ་གསོལ། ཆོས་ཀྱི་དུང་ཆེན་པོ 41.226a བུད་དུ་གསོལ། ཆོས་ཀྱི་རྔ་ཆེན་པོ་བརྡུང་དུ་གསོལ། ཞེས་ཆོས་ཀྱི་འཁོར་ལོ་བསྐོར་བར་བསྐུལ་ཏོ། །དེ་ལ་འདི་སྐད་ཅེས་བྱ་སྟེ། སྟོང་གསུམ་འདི་ནས་ཚངས་པ་ལྷ་དབང་སྐྱོང་བ་མང་པོ་དག་།དོང་ནས་རྒྱལ་བའི་ཞབས་ལ་གཏུགས་ཏེ་ཚིག་ཏུ་སྨྲས་པ་ནི། །ང་ནི་གཙོ་བོ་དམ་པ་སྐྱེ་དགུའི་སྡུག་བསྔལ་ཟད་བྱ་ཞེས། །ཐུབ་ཆེན་ཁྱོད་ཀྱིས་གསུང་བརྗོད་སྔོན་གྱི་ཐུགས་དམ་དགོངས་པར་མཛོད། །ཐུབ་ཁྱོད་ཤིང་དབང་དྲུང་དུ་བཞུགས་ནས་སྡེར་བཅས་བདུད་བཏུལ་ཏེ། །བྱང་ཆུབ་དམ་པ་ཞི་བ་སངས་རྒྱས་ཉོན་མོངས་སྡོང་པོ་བསྒྱེལ། །བསྐལ་པ་བརྒྱ་ནས་དགོངས་པའི་དགོངས་པ་མ་ལུས་རྫོགས་ལགས་ཀྱིས། །མགོན་མ་མཆིས་པའི་སྐྱེ་བོ་གཟིགས་ཏེ་འཁོར་ལོ་མཆོག་བསྐོར་གསོལ། །བདེ་བར་གཤེགས་པའི་འོད་ཀྱིས་ཞིང་སྟོང་ཕྲག་བརྒྱ་སྣང་བར་བགྱིས། །སངས་རྒྱས་སྲས་པོ་བརྒྱ་ཕྲག་མང་པོ་རྫུ་འཕྲུལ་སྟོབས་ཀྱིས་མཆིས། །བདེ་བར་གཤེགས་ལ་མཆོད་པ་ཆེན་པོ་རྣམ་པ་མང་བགྱིས་ནས། །ཡང་དག་ཡོན་ཏན་དེ་བཞིན་གཤེགས་བསྟོད་ཐུགས་རྗེ་ཅན་ལ་བསྐུལ། །ཐུགས་རྗེ་སྤྲིན་དང་ཤེས་རབ་གློག་དང་ལྷག་མཐོང་རླུང་དང་འདྲ། །བསྐལ་པ་སྟོང་དུ་འགྲོ་བ་ཐམས་ཅད་འགྲོན་གཉེར་འབྲུག་བསྒྲགས་ཏེ། །ཡན་ལག་བརྒྱད་ལམ་ཆར་གྱི་རྒྱུན་གྱིས་སྐོམ་པ་ཞི་བར་མཛོད། །དབང་པོ་སྟོབས་དང་བསམ་གཏན་རྣམ་ཐར་ལོ་ཏོག་ནགས་འཕེལ་མཛོད། །བསྐལ་པ་སྟོང་མང་སྟོང་པ་ལེགས་བསླབས་དེ་བཞིན་ཉིད་ལ་བཞུགས། །ཆོས་ལས་བྱུང་བའི་སྨན་བསྒྲུབས་སེམས་ཅན་རྣམས་ཀྱི་སྤྱོད་པ་མཁྱེན། །ཉོན་མོངས་ཚོགས་ཀྱི་ནད་བརྒྱས་གཙེས་པའི་སྐྱེ་བོ་འདི་དག་ལ། །རྒྱལ་བ་སྨན་པ་འཁོར་ལོ་དམ་པ་བསྐོར་ཏེ་ཐར་མཛད་གསོལ། །ཁྱོད་ཀྱིས་རིང་ནས་ཕ་རོལ་ཕྱིན་པ་དྲུག་གི་མཛོད་འཕེལ་མཛད། །མཚུངས་མེད་མི་གཡོ་གྱ་ནོམ་ཆོས་ཀྱི་ནོར་ནི་ལེགས་པར་བསགས། །སྐྱེ་དགུ་མགོན་མེད་དབུལ་པོ་འདྲེན་མེད་འདི་དག་ཀུན་གཟིགས་ནས། །ནོར་བདུན་བགོ་བཤའ་མཛོད་ཅིག་འདྲེན་པ་འཁོར 41.226b ལོ་བསྐོར་བར་གསོལ། །རྒྱལ་བ་བྱང་ཆུབ་བཙལ་ཕྱིར་ནོར་འབྲུ་དབྱིགས་དང་གསེར་རྣམས་དང ། །གོས་བཟང་མེ་ཏོག་བདུག་པ་བྱུག་པ་ཕྱེ་མ་དམ་པ་དང ། །ཕོ་བྲང་མཆོག་དང་བཙུན་མོའི་འཁོར་དང་རྒྱལ་སྲིད་ཕངས་པའི་སྲས། །དགྱེས་བཞིན་བཏང་བས་དེ་སངས་རྒྱས་ཀྱིས་འཁོར་ལོ་མཆོག་བསྐོར་གསོལ། །དེ་བཞིན་ཚུལ་ཁྲིམས་མ་ཉམས་མ་འདྲེས་བསྐལ་པ་བརྒྱར་ཡང་བསྲུངས། །རྟག་ཏུ་བཟོད་པ་ལེགས་བསྒོམས་ཁྱོད་ནི་བརྩོན་འགྲུས་མ་ཞུམ་གྱུར། །ཐུབ་པ་བསམ་གཏན་མཆོག་དང་མངོན་ཤེས་ཤེས་རབ་ལྷག་མཐོང་ལྡན། །དགོངས་པ་ཡོངས་རྫོགས་རིམས་ནད་མ་མཆིས་འཁོར་ལོ་མཆོག་བསྐོར་གསོལ། །དགེ་སློང་དག་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཞེས་བྱ་བས་དེའི་ཚེ་ཆོས་ཀྱི་འཁོར་ལོ་ལྷའི་འཛམ་བུ་ཆུ་བོའི་གསེར་གྱིས་ལས་བྱས་པ། རིན་པོ་ཆེ་ཐམས་ཅད་ཀྱིས་སྤྲས་པ། རིན་པོ་ཆེ་ཐམས་ཅད་ཀྱིས་མཛེས་པར་བྱ་བ་རྒྱན་སྣ་ཚོགས་ཀྱིས་བརྒྱན་པ། བཀོད་པ་རྩིབས་སྟོང་དང་ལྡན་པ། འོད་ཟེར་སྟོང་དང་ལྡན་པ། ལྟེ་བ་དང་བཅས་པ། མུ་ཁྱུད་དང་བཅས་པ། མེ་ཏོག་གི་ལྡ་ལྡི་དང་བཅས་པ། གསེར་གྱི་དྲ་བ་དང་བཅས་པ། དྲིལ་བུ་གཡེར་ཀ་དང་བཅས་པ། སྤོས་ཀྱི་ལག་རིས་དང་བཅས་པ། བུམ་པ་གང་བ་དང་བཅས་པ། གཡུང་དྲུང་འཁྱིལ་བ་དང་བཅས་པ། བཀྲ་ཤིས་ཀྱི་བརྒྱན་པ་དང་བཅས་པ། ལྷའི་གོས་ཚོན་སྣ་ཚོགས་སུ་བཅོས་པས་མཛེས་པར་བྱས་པ། ལྷའི་མེ་ཏོག་དང ། སྤོས་དང ། ཕྲེང་བ་དང ། བྱུག་པས་བྱུགས་པ། རྣམ་པའི་མཆོག་ཐམས་ཅད་དང་ལྡན་པ། སྔོན་གྱི་སྨོན་ལམ་གྱིས་བསྒྲུབས་པ། བྱང་ཆུབ་སེམས་དཔའི་བསམ་པས་རྣམ་པར་སྦྱངས་པ། དེ་བཞིན་གཤེགས་པ་ལ་མཆོད་པའི་འོས་སུ་གྱུར་པ། དེ་བཞིན་གཤེགས་པ་ཐམས་ཅད་ཀྱིས་དགོངས་པ། སངས་རྒྱས་ཐམས་ཅད་ཀྱི་བྱིན་གྱིས་བརླབས་ཀྱིས་མ་འཁྲུགས་པ། སྔོན་གྱི་དེ་བཞིན་གཤེགས་པ་དགྲ་བཅོམ་པ 41.227a ཡང་དག་པར་རྫོགས་པའི་སངས་རྒྱས་རྣམས་ཀྱིས་གཞེས་ཤིང་སྔོན་ཡང་བསྐོར་བ་ཆོས་ཀྱི་འཁོར་ལོ་བསྐོར་བའི་ཕྱིར་དེ་བཞིན་གཤེགས་པ་ལ་ཕུལ་ལོ། །ཕུལ་ནས་ཀྱང་ཐལ་མོ་སྦྱར་ཏེ་ཚིགས་སུ་བཅད་པ་འདི་དག་གིས་དེ་བཞིན་གཤེགས་པ་ལ་མངོན་པར་བསྟོད་དོ། །མི་ཡི་སེང་གེ་ཁྱོད་ནི་སངས་རྒྱས་འགྱུར་རོ་ཞེས། །གང་ཚེ་མར་མེ་མཛད་ཀྱིས་སེམས་ཅན་དག་པ་ལུང་བསྟན་པ། །དེ་ཚེ་བདག་གིས་སྨོན་ལམ་རྣམ་པ་འདི་འདྲ་འདི་བཏབ་སྟེ། །རྫོགས་པའི་བྱང་ཆུབ་བརྙེས་ནས་བདག་གིས་ཆོས་བཤད་བསྐུལ་ཞེས་བགྱིས། །ཕྱོགས་བཅུ་དག་ནས་སེམས་ཅན་དམ་པ་གང་དག་འདིར་ལྷགས་པ། །དེ་དག་ཐམས་ཅད་འཇུག་པས་བགྲང་བར་ནུས་པ་མ་ལགས་ཏེ། །བཏུད་ཅིང་ཐལ་མོ་སྦྱར་ནས་ཞབས་གཉིས་ལ་ནི་གཏུགས་ནས་སུ། །ཆོས་ཀྱི་འཁོར་ལོ་བསྐོར་ཕྱིར་ཤཱཀྱའི་རིགས་ལ་དགྱེས་ལ་བསྐུལ། །བྱང་ཆུབ་སྙིང་པོར་ལྟ་རྣམས་ཀྱིས་ནི་བཀོད་པ་གང་བགྱིས་དང ། །རྒྱལ་བའི་སྲས་པོ་ཀུན་གྱིས་བཀོད་པ་གང་དག་བགྱིས་པ་རྣམས། །འབྱོར་པ་དེ་ཀུན་ཆོས་ཀྱི་འཁོར་ལོ་བསྐོར་ཕྱིར་འདིར་བཤམས་ཏེ། །བསྐལ་པ་ཡོངས་སུ་རྫོགས་པར་བརྗོད་ཀྱང་བས་པར་འགྱུར་མ་ལགས། །སྟོང་གསུམ་འཇིག་རྟེན་དག་གི་ནམ་མཁའ་ལྷ་ཡི་ཚོགས་ཀྱིས་བལྟམ། །དོག་སའི་སྟེང་ཡང་ལྷ་མིན་མི་འམ་ཅི་དང་མི་ཡིས་བལྟམ། །ཡུད་ཙམ་དེ་ལ་ལུད་པའི་སྒྲ་ཡང་གྲགས་པར་མ་གྱུར་ཏེ། །ཐམས་ཅད་རབ་ཏུ་དང་བའི་ཡིད་ཀྱིས་རྒྱལ་ལ་མངོན་དུ་བལྟ། །དགེ་སློང་དག་དེ་ལྟར་དེ་བཞིན་གཤེགས་པ་ནམ་གྱི་ཆ་སྟོད་ཀྱི་ཐུན་ནི་ཅང་མི་གསུང་བས་ཟད་པར་མཛད་དོ། །ནམ་གྱི་གུང་ཐུན་ལ་ནི་ཡང་དག་པར་ཆགས་པར་འགྱུར་བའི་གཏམ་གསུང་ངོ ། །ནམ་གྱི་ཆ་སྨད་ཀྱི་ཐུན་ལ་ནི་ལྔ་སྡེ་བཟང་པོ་རྣམས་ལ་བོས་ཏེ་འདི་སྐད་ཅེས་བཀའ་སྩལ་ཏོ། །དགེ་སློང་དག་མཐའ་གཉིས་པོ་འདི་དག་ནི་རབ་ཏུ་བྱུང་བའི་འཇུག་པར་བྱ་བ་མ་ཡིན་པ་སྟེ། གང་འདོད་པ་རྣམས་ལ་བསོད་སྙོམས་སུ་སྦྱོར་བ། དམན་པ། 41.227b གྲོང ། པའི་ཚེ་སོ་སོའི་སྐྱེ་བོ་པ། འཕགས་པ་ལ་མི་མཁོ་བ། གནོད་པ་དང་ལྡན་པ། ཕྱི་མ་ལ་ཚངས་པར་སྤྱོད་པར་མི་འགྱུར་བ། ཡིད་འབྱུང་བར་མི་འགྱུར་བ། འདོད་ཆགས་དང་བྲལ་བར་མི་འགྱུར་བ། འགོག་པར་མི་འགྱུར་བ། མངོན་པར་ཤེས་པར་མི་འགྱུར་བ། རྫོགས་པའི་བྱང་ཆུབ་ཏུ་མི་འགྱུར་བ། མྱ་ངན་ལས་འདའ་བར་མི་འགྱུར་བ་དང ། གང་ཡང་དབུ་མའི་ལམ་མ་ཡིན་པ། ལུས་ངལ་བར་སྦྱོར་བ། སྡུག་བསྔལ་བ། གནོད་པ་དང་ལྡན་པ། ཚེ་འདི་ལ་ཡང་སྡུག་བསྔལ་ལ། ཕྱི་མ་ལ་ཡང་སྡུག་བསྔལ་རྣམ་པར་སྨིན་པ་སྟེ། དགེ་སློང་དག་མཐའ་གཉིས་པོ་འདི་དག་སྤངས་ནས་དབུ་མའི་ལམ་ཉིད་ཀྱིས་དེ་བཞིན་གཤེགས་པ་ཆོས་སྟོན་ཏེ། འདི་ལྟ་སྟེ། ཡང་དག་པའི་ལྟ་བ་དང ། ཡང་དག་པའི་རྟོག་པ་དང ། ཡང་དག་པའི་ངག་དང ། ཡང་དག་པའི་ལས་ཀྱི་མཐའ་དང ། ཡང་དག་པའི་འཚོ་བ་དང ། ཡང་དག་པའི་རྩོལ་བ་དང ། ཡང་དག་པའི་དྲན་པ་དང ། ཡང་དག་པའི་ཏིང་ངེ་འཛིན་ཏོ། །དགེ་སློང་དག་བཞི་པོ་འདི་དག་ནི་འཕགས་པའི་བདེན་པ་དག་སྟེ། བཞི་གང་ཞེ་ན། སྡུག་བསྔལ་བ་དང ། སྡུག་བསྔལ་ཀུན་འབྱུང་བ་དང ། སྡུག་བསྔལ་འགོག་པ་དང ། སྡུག་བསྔལ་འགོག་པར་འགྲོ་བའི་ལམ་མོ། །དེ་ལ་སྡུག་བསྔལ་གང་ཞེ་ན། སྐྱེ་བའི་སྡུག་བསྔལ་དང ། རྒ་བ་དང ། ན་བ་དང ། འཆི་བ་དང ། མི་སྡུག་པ་དང་ཕྲད་པ་དང ། སྡུག་པ་དང་བྲལ་བའི་སྡུག་བསྔལ་དང ། གང་ཡང་འདོད་པ་བཙལ་ཏེ་མ་རྙེད་པ་དེ་ཡང་སྡུག་བསྔལ་ལོ། །མདོར་ན་ཉེ་བར་ལེན་པའི་ཕུང་པོ་ལྔ་པོ་དག་ནི་སྡུག་བསྔལ་ཏེ། འདི་ནི་སྡུག་བསྔལ་ཞེས་བྱའོ། །དེ་ལ་སྡུག་བསྔལ་ཀུན་འབྱུང་བ་གང་ཞེ་ན། གང་འདི་ཡང་འབྱུང་བའི་སྲེད་པ་དང ། དགའ་བའི་འདོད་ཆགས་དང་ལྡན་པ་དང ། དེ་དང་དེར་མངོན་པར་དགའ་བ་སྟེ། འདི་ནི་སྡུག་བསྔལ་ཀུན་འབྱུང་བ་ཞེས་བྱའོ། །དེ་ལ་སྡུག་བསྔལ་འགོག་པ་གང་ཞེ་ན། གང་ཡང་འབྱུང་བ་དེའི་སྲེད་པ་དང ། དགའ་བའི་འདོད་ཆགས་དང་ལྡན་པ་དང ། དེ་དང་དེར་མངོན་པར་དགའ་བ་དང ། སྐྱེད་པ་དང ། བསྒྲུབས་པ་འདི་ཉིད 41.228a ལ་འདོད་ཆགས་མ་ལུས་པ་དང་བྲལ་བ་དང ། འགོག་པ་འདི་ནི་སྡུག་བསྔལ་འགོག་པའོ། །སྡུག་བསྔལ་འགོག་པར་འགྲོ་བའི་ལམ་གང་ཞེ་ན། འཕགས་པའི་ལམ་ཡན་ལག་བརྒྱད་པ་འདི་ཉིད་དེ། འདི་ལྟ་སྟེ། ཡང་དག་པའི་ལྟ་བ་ནས། ཡང་དག་པའི་ཏིང་ངེ་འཛིན་གྱི་བར་དུ་སྟེ། འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཞེས་བྱའོ། །དགེ་སློང་དག་བཞི་པོ་འདི་དག་ནི་འཕགས་པའི་བདེན་པ་དག་ཅེས་བྱའོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་ལོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་ཀུན་འབྱུང་བའོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་འགོག་པའོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་བྱ་བ་ནས་སྣང་བ་བྱུང་ངོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དགེ་སློང་དག་སྡུག་བསྔལ་ཡོངས་སུ་ཤེས་པར་བྱའོ་ཞེས་བྱ་བ་ནས་སྣང་བ་བྱུང་ངོ ། །ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འདི་སྤང་བར་བྱའོ་ཞེས་བྱ་བ་ནས་སྣང་བའི་བར་དུ་ཐམས་ཅད་སྔ་མ་བཞིན་ནོ། །དགེ་སློང་དག་སྡུག་བསྔལ་འགོག་པ་འདི་མངོན་དུ་བྱའོ་ཞེས་བྱ་བ་ནས་སྣང་བའི་བར་དུ་སྔ་མ་བཞིན་ནོ། །དགེ་སློང་དག་སྡུག་བསྔལ་འགོག་པར་འགྲོ་བའི་ལམ་འདི་བསྒོམ་པར་བྱའོ་ཞེས་བྱ་བ་ནས་སྣང་བ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འདི་ཡོངས་སུ་ཤེས་སོ་ཞེས་བྱ་བ་ནས་དེ་བཞིན 41.228b དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འདི་སྤངས་སོ་ཞེས་བྱ་བ་ནས་དེ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པ་འདི་མངོན་དུ་བྱས་སོ་ཞེས་བྱ་བ་ནས་དེ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྲོ་བའི་ལམ་འདི་བསྒོམས་སོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས། ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ ། །དགེ་སློང་དག་དེ་ལྟར་ངས་འཕགས་པའི་བདེན་པ་བཞི་པོ་འདི་དག་ལ་འདི་ལྟར་ཚུལ་བཞིན་ཡིད་ལ་བྱེད་པ་ན་ཇི་སྲིད་དུ་ལན་གསུམ་དུ་བཟླས་ཏེ། རྣམ་པ་བཅུ་གཉིས་སུ་བསྐོར་བའི་ཡེ་ཤེས་མཐོང་བ་མ་སྐྱེས་པ་དེ་སྲིད་དུ་དགེ་སློང་དག་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་ཁས་མ་འཆེས་ཏེ་ང་ལ་ཡེ་ཤེས་མཐོང་བ་མ་སྐྱེས་སོ། །དགེ་སློང་དག་གང་ཚུན་ཆད་ངས་འཕགས་པའི་བདེན་པ་བཞི་པོ་འདི་དག་ལ་དེ་ལྟར་ལན་གསུམ་དུ་བཟླས་ཏེ། རྣམ་པ་བཅུ་གཉིས་སུ་བསྐོར་བའི་ཡེ་ཤེས་མཐོང་བ་སྐྱེས་ནས་ངས་སེམས་རྣམ་པར་གྲོལ་བ་དང ། ཤེས་རབ་རྣམ་པར་གྲོལ་བ་མི་འཁྲུགས་པ་མངོན་དུ་བྱས་པ་དེ་ཚུན་ཆད་དགེ་སློང་དག་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་ཁས་འཆེས་ཏེ། ངའི་ཡེ་ཤེས་མཐོང་བ་ཡང་སྐྱེས་སོ། །ངའི་སྐྱེ་བ་ཟད་དོ། །ཚངས་པར་སྤྱད་པ་བསྙེན་ཏོ། །བྱ་བ་བྱས་སོ། །འདི་ལ་སྲིད་པ་གཞན་མི་ཤེས་སོ། །དེ་ལ་འདི་སྐད་ཅེས་བྱ་སྟེ། དེ་ནི་ཚངས་དབྱངས་མི་འམ་ཅི་ཡི་སྐད་ཀྱིས་གསུང ། །ཡན་ལག་ཁྲག་ཁྲིག་སྟོང་འཕགས་བསྐལ་པ་བྱེ་མང་དུ། །རྟག་ཏུ་བདེན་པ་ཤིན་ཏུ་བསྒོམས་པས་རང་བྱུང་བ། །ཤཱཀྱ་ཐུབ་པས་ཀཽཎྜི་ནྱ་ལ་བཀའ་སྩལ་པ། །མིག་དང་རྣ་བ་སྣ་ནི 41.229a མི་རྟག་མི་བརྟན་ཏེ། །ལྕེ་དང་ལུས་དང་ཡིད་ཀྱང་སྡུག་བསྔལ་བདག་མེད་སྟོང ། །བེམས་པོ་རང་བཞིན་རྩཝ་དང་རྩིག་པ་ལྟར་མི་གཡོ། །འདི་ལ་བདག་མེད་མིང་དང་སྲོག་ཀྱང་ཡོད་མ་ཡིན། །ཆོས་འདི་ཐམས་ཅད་རྒྱུ་ལ་བརྟེན་ནས་བྱུང་བ་སྟེ། །མཐའ་དང་མཐའ་མེད་ལྟ་དང་བྲལ་ཞིང་ནམ་མཁའ་འདྲ། །བྱེད་པ་པོ་མེད་དེ་བཞིན་ཚོར་བ་པོ་ཡང་མེད། །དགེ་དང་མི་དགེ་བྱས་པའི་ལས་ནི་ཆུད་མི་ཟ། །ཕུང་པོ་རྣམས་ལ་བརྟེན་ནས་འདི་ལྟར་སྡུག་བསྔལ་འབྱུང ། །སྲེད་པ་ཆུ་ཡིས་རྣམ་པར་འཕེལ་ནས་འབྱུང་བར་འགྱུར། །ལམ་གྱིས་ཆོས་རྣམས་མཉམ་པ་ཉིད་དུ་རྣམ་མཐོང་ནས། །ཤིན་ཏུ་ཟད་ཅིང་བྱང་བའི་ཆོས་ཉིད་ཀྱིས་ནི་འགགས། །ཀུན་རྟོག་རྟོག་པས་བསྐྱེད་པའི་ཚུལ་བཞིན་མ་ཡིན་པས། །མ་རིག་བྱུང་སྟེ་འདི་ལ་འབྱུང་བྱེད་གང་ཡང་མེད། །འདུ་བྱེད་རྒྱུ་ཡང་འབྱིན་ཏེ་འཕོ་བ་ཡོད་མ་ཡིན། །འཕོ་བར་འགྱུར་ལ་བརྟེན་ཏེ་རྣམ་པར་ཤེས་པ་འབྱུང ། །རྣམ་པར་ཤེས་ལས་དེ་ལྟར་མིང་དང་གཟུགས་ཀྱང་འབྱུང ། །མིང་དང་གཟུགས་ལས་དབང་པོ་དྲུག་ནི་ཡང་དག་འབྱུང ། །དབང་པོ་དེ་དག་འདུས་པ་ལ་ནི་རེག་ཅེས་བརྗོད། །རེག་པ་ལས་ནི་ཚོར་བ་རྣམ་གསུམ་འབྱུང་བར་འགྱུར། །ཆུང་ཟད་ཚོར་བ་གང་ཡིན་དེ་ཀུན་སྲེད་པར་བཤད། །སྲེད་པས་ལས་ནི་སྡུག་བསྔལ་ཕུང་པོ་ཐམས་ཅད་འབྱུང ། །ཉེ་བར་ལེན་པ་ལས་ནི་སྲིད་པ་ཐམས་ཅད་འབྱུང ། །སྲིད་པའི་རྐྱེན་གྱིས་དེ་ཡི་སྐྱེ་བ་འབྱུང་བར་འགྱུར། །སྐྱེ་བའི་གཞི་ལས་རྒ་དང་ན་དང་སྡུག་བསྔལ་འགྱུར། །སྲིད་པའི་དྲ་བ་འདི་ནི་སྐྱེ་བའི་རྣམ་པ་མང ། །དེ་ལྟར་འགྲོ་བ་འདི་རྣམས་ཐམས་ཅད་རྐྱེན་བྱུང་ཉིད། །བདག་གམ་གང་ཟག་འཕོ་བ་པོ་ནི་གང་ཡང་མེད། །གང་ན་རྟོག་དང་རྣམ་རྟོག་མེད་དེ་ཚུལ་བཞིན་བརྗོད། །ཚུལ་བཞིན་གང་ན་ཡོད་དེར་མ་རིག་གང་ཡང་མེད། །གང་ན་མ་རིག་པ་ནི་འགགས་པར་གྱུར་དེ་ན། །སྲིད་པའི་ཡན་ལག་ཀུན་ཟད་བྱུང་ཞིང་ཟད་ནས་འགགས། དེ་ལྟར་རྐྱེན་འདི་དེ་བཞིན་གཤེགས་པས་ཐུགས་སུ་ཆུད། །དེས་ན་རང་བྱུང་བདག་ཉིད་བདག་ལ་ལུང 41.229b སྟོན་ཏོ། །རྒྱུ་རྣམས་རྟོགས་པ་སངས་རྒྱས་ཡིན་པ་མ་གཏོགས་པར། །ཕུང་པོ་སྐྱེ་མཆེད་ཁམས་རྣམས་སངས་རྒྱས་ཡིན་མི་སྨྲ། །འདི་ལ་ཕ་རོལ་མུ་སྟེགས་ཅན་རྟེན་གནས་མེད་དེ། །ཆོས་སྦྱོར་འདི་འདྲ་འདི་ལ་རབ་ཏུ་རྩོད་པ་སྟོང ། །ཡང་དག་མངོན་སངས་རྒྱས་ལས་སྤྱད་ཅིང་རབ་དག་པ། །སེམས་ཅན་དེ་དག་ཆོས་འདི་ཤེས་པའི་བསྐལ་པ་ཡོད། །དེ་ལྟར་རྣམ་པ་བཅུ་གཉིས་ཀྱིས། །ཆོས་ཀྱི་འཁོར་ལོ་རབ་བསྐོར་བ། །ཀཽཎྜི་ནྱས་ནི་ཀུན་ཤེས་ན། དཀོན་མཆོག་གསུམ་ནི་མངོན་དུ་གྲུབ། །སངས་རྒྱས་ཆོས་དང་དགེ་འདུན་ནི། །དེ་དག་དཀོན་མཆོག་གསུམ་ཡིན་ཏེ། །ཚངས་པའི་གྲོང་ཁྱེར་གནས་ཀྱི་བར། །གཅིག་ནས་གཅིག་ཏུ་སྒྲ་སོང་བ། །འཇིག་རྟེན་མགོན་པོ་སྐྱོབས་པ་ཡིས། །རྡུལ་མེད་འཁོར་ལོ་རབ་ཏུ་བསྐོར། །གང་དག་འཇིག་རྟེན་རབ་དཀོན་པ། །དཀོན་མཆོག་གསུམ་ནི་བྱུང་བར་གྱུར། །ཀཽཎྜི་ནྱ་ལ་སོགས་པ་དག་།དགེ་སློང་དག་ནི་ལྔ་པོ་དང ། །ལྷ་ནི་བྱེ་བ་དྲུག་བཅུ་རྣམས། །ཆོས་ཀྱི་མིག་ནི་རྣམ་པར་སྦྱངས། །ཆོས་ཀྱི་འཁོར་ལོ་བསྐོར་བ་ན། །གཟུགས་ཀྱི་ཁམས་ན་འཁོད་པའི་ལྷ། །གཞན་ཡང་བྱེ་བ་བརྒྱད་བཅུ་པོ། །དེ་དག་མིག་ནི་རྣམ་པར་སྦྱངས། །བརྒྱད་ཁྲི་བཞི་སྟོང་མི་ཡི་རྣམས། །གང་དག་ལྷགས་པ་དེ་དག་ཀྱང ། །མིག་ནི་རྣམ་པར་སྦྱངས་གྱུར་ཏེ། །ཐམས་ཅད་ངན་པར་འགྲོ་ལས་གྲོལ། །སྐད་ཅིག་དེ་ལ་ཕྱོགས་བཅུ་མཐའ་ཡས་པར་ནི་སངས་རྒྱས་གསུང་སོང་སྟེ། །སྟོབས་བཅུ་ཤཱཀྱའི་ཁྱུ་མཆོག་འདི་ནི་དྲང་སྲོང་ལྷུང་བར་གཤེགས་ནས་སུ། །བཱ་ར་ཎ་སཱིར་ཆོས་ཀྱི་འཁོར་ལོ་དམ་པ་གཞན་མིན་བསྐོར་ཏོ་ཞེས། །གསུང་སྙན་ཡིད་དུ་འོང་ཞིང་དགེ་བ་བར་སྣང་ཀུན་ཏུ་གྲགས་པར་གྱུར། །ཕྱོགས་བཅུ་དག་ན་སངས་རྒྱས་གང་དག་ཇི་སྙེད་ཐམས་ཅད་མི་གསུང་གྱུར། །ཐུབ་པ་དེ་དག་རྣམས་ཀྱི་རིམ་གྲོ་བ་དག་ཀུན་གྱིས་རྒྱལ་བ་ལ། །སྒྲ་གསན་ནས་ནི་ཅི་སླད་སྟོབས་བཅུས་ཆོས་ཀྱི་བཀའ་མཆིད་རྒྱུན་ཀྱང་བཀུམ། །ཅི་ཡི་སླད་དུ་མི་གསུང་བཞུགས་པར་གྱུར་པ་མྱུར 41.230a དུ་ལེགས་པར་གསུངས། །སྔོན་གྱི་སྲིད་པ་བརྒྱར་ནི་བརྩོན་འགྲུས་སྟོབས་ཀྱིས་བྱང་ཆུབ་བསྒྲུབས་ནས་སུ། །བྱང་ཆུབ་སེམས་དཔའ་བརྒྱ་སྟོང་ཕྲག་མང་རྣམས་ཀྱང་ཕྱིར་ནི་བསྙིལ་བ་མཛད། །དེས་ན་ཕན་པ་མཛད་པས་ཤིན་ཏུ་སྦྱངས་པས་བྱང་ཆུབ་ཤིས་པ་བརྙེས། །འཁོར་ལོ་གསུམ་དུ་བསྐོར་བས་དེས་ནི་མི་གསུང་གྱུར། །ཐུབ་པ་དེ་དག་རྣམས་ཀྱི་གསུང་འདི་ཐོས་ནས་སེམས་ཅན་བྱེ་བ་བརྒྱ། །བྱམས་པའི་སྟོབས་བསྐྱེད་ནས་ནི་བྱང་ཆུབ་དམ་པ་ཤིས་པར་ཡང་དག་ཞུགས། །བདག་ཅག་རྣམས་ཀྱང་ཐུབ་པ་དེ་ལས་བརྩོན་འགྲུས་མཐུས་འཕགས་རྗེས་བསླབས་ཏེ། །འཇིག་རྟེན་ལ་ནི་འཇིག་རྟེན་མཆོག་གི་ཆོས་མིག་སྦྱིན་པར་མྱུར་གྱུར་ཅིག་།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི་བཅོམ་ལྡན་འདས་ལ་ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་བའི་ཕྱོགས་ཉན་པར་འཚལ་བ་ལགས་ན། དེའི་སླད་དུ་བཅོམ་ལྡན་འདས་དེ་བཞིན་གཤེགས་པས་ཆོས་ཀྱི་འཁོར་ལོ་རྣམ་པ་ཇི་ལྟ་བུ་ཞིག་བསྐོར་བ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལེགས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་ཆོས་ཀྱི་འཁོར་ལོ་དེ་ནི་གཏིང་མི་དམིགས་པའི་ཕྱིར་ཟབ་པའོ། །འཁོར་ལོ་དེ་ནི་གཉིས་དང་བྲལ་བའི་ཕྱིར་མཐོང་བར་དཀའ་བའོ། །འཁོར་ལོ་དེ་ནི་ཡིད་ལ་བྱེད་པས་ཡིད་ལ་བྱ་བ་མ་ཡིན་པའི་ཕྱིར། ཁོང་དུ་ཆུད་པར་དཀའ་བའོ། །འཁོར་ལོ་དེ་ནི་ཡེ་ཤེས་དང་རྣམ་པར་ཤེས་པ་མཉམ་པ་ཉིད་དུ་རྟོགས་པའི་ཕྱིར། རྣམ་པར་ཤེས་པར་དཀའ་བའོ། །འཁོར་ལོ་དེ་ནི་སྒྲིབ་པ་མེད་པའི་རྣམ་པར་ཐར་པ་ཐོབ་པའི་ཕྱིར། རྙོག་པ་མེད་པའོ། །འཁོར་ལོ་དེ་ནི་དཔེ་གཞག་པ་དང 41.230b བྲལ་བའི་ཕྱིར་ཕྲ་བའོ། །འཁོར་ལོ་དེ་ནི་རྡོ་རྗེ་ལྟ་བུའི་ཡེ་ཤེས་ཀྱིས་ཐོབ་པའི་ཕྱིར་སྙིང་པོའོ། །འཁོར་ལོ་དེ་ནི་སྔོན་གྱི་མཐར་མ་བྱུང་བའི་ཕྱིར་མི་ཕྱེད་པའོ། །འཁོར་ལོ་དེ་ནི་སྤྲོས་པའི་སྐྱོན་ཐམས་ཅད་དང་བྲལ་བའི་ཕྱིར་སྤྲོས་པ་མེད་པའོ། །འཁོར་ལོ་དེ་ནི་ཤིན་ཏུ་མཐར་ཐུགས་པའི་ཕྱིར་མི་འཁྲུགས་པའོ། །འཁོར་ལོ་དེ་ནི་ནམ་མཁའ་དང་མཚུངས་པའི་ཕྱིར་ཐམས་ཅད་ཀྱི་རྗེས་སུ་སོང་བའོ། །བྱམས་པ་ཆོས་ཀྱི་འཁོར་ལོ་དེ་ནི་ཆོས་ཐམས་ཅད་ཀྱི་རང་བཞིན་དང་ངོ་བོ་ཉིད་ཀུན་ཏུ་བསྟན་པ་འཇིག་པའི་འཁོར་ལོའོ། །སྐྱེ་བ་མེད་པ་དང ། འགག་པ་མེད་པ་དང ། འབྱུང་བ་མེད་པའི་འཁོར་ལོའོ། །ཀུན་གཞི་མེད་པའི་འཁོར་ལོའོ། །རྟོག་པ་མེད་པ་དང ། རྣམ་པར་རྟོག་པ་མེད་པའི་ཆོས་ཀྱི་ཚུལ་ལ་རྟོགས་པའི་འཁོར་ལོའོ། །སྟོང་པ་ཉིད་ཀྱི་འཁོར་ལོའོ། །མཚན་མ་མེད་པའི་འཁོར་ལོའོ། །སྨོན་པ་མེད་པའི་འཁོར་ལོའོ། །མངོན་པར་འདུ་བྱ་བ་མེད་པའི་འཁོར་ལོའོ། །དབེན་པའི་འཁོར་ལོའོ། །འདོད་ཆགས་དང་བྲལ་བའི་འཁོར་ལོའོ། །འགོག་པའི་འཁོར་ལོའོ། །དེ་བཞིན་གཤེགས་པས་ཐུགས་སུ་ཆུད་པའི་འཁོར་ལོའོ། །ཆོས་ཀྱི་དབྱིངས་འདྲེས་པ་མེད་པའི་འཁོར་ལོའོ། །ཡང་དག་པའི་མཐའ་རྣམ་པར་མི་འཁྲུགས་པའི་འཁོར་ལོའོ། །ཆགས་པ་མེད་ཅིང་སྒྲིབས་པ་མེད་པའི་འཁོར་ལོའོ། །རྟེན་པ་ལ་འཇུག་ཅིང་གཉིས་སུ་ལྟ་བ་ལས་ཡང་དག་པར་འདའ་བའི་འཁོར་ལོའོ། །ཆོས་ཀྱི་དབྱིངས་མཐའ་དང་དབུས་མེད་པར་རྣམ་པར་མི་འཁྲུགས་པའི་འཁོར་ལོའོ། །སངས་རྒྱས་ཀྱི་མཛད་པ་ལྷུན་གྱིས་གྲུབ་པར་རྒྱུན་མི་གཅོད་པའི་འཁོར་ལོའོ། །འཇུག་པ་མེད་ཅིང་མངོན་པར་གྲུབ་པ་མེད་པའི་འཁོར་ལོའོ། །ཤིན་ཏུ་དམིགས་སུ་མེད་པའི་འཁོར་ལོའོ། །བླང་བ་མེད་པ་དང་དོར་བ་མེད་པའི་འཁོར་ལོའོ། །བརྗོད་དུ་མེད་པའི་འཁོར་ལོའོ། །རང་བཞིན་གྱིས་ཇི་ལྟ་བ་བཞིན་གྱི་འཁོར་ལོའོ། །ཡུལ 41.231a གཅིག་ལ་ཆོས་ཐམས་ཅད་མཉམ་པ་ཉིད་དུ་འཇུག་པའི་འཁོར་ལོའོ། །སེམས་ཅན་འདུལ་བའི་ཕྱིར་ཕྱད་པར་བྱིན་གྱིས་རློབ་ཅིང་ལྡོག་པ་མེད་པའི་འཁོར་ལོའོ། །གཉིས་སུ་མེད་ཅིང་སྒྲོ་བཏགས་པ་མེད་པ་དོན་དམ་པའི་ཚུལ་ལ་འཇུག་པའི་འཁོར་ལོའོ། །ཆོས་ཀྱི་དབྱིངས་སུ་ཡང་དག་པར་འདུ་བའི་འཁོར་ལོའོ། །འཁོར་ལོ་དེ་ནི་ཚད་ཐམས་ཅད་ལས་ཤིན་དུ་འདས་པས་དཔག་ཏུ་མེད་པའོ། །འཁོར་ལོ་དེ་ནི་གྲངས་ཐམས་ཅད་དང་བྲལ་བས་གྲངས་མེད་པའོ། །འཁོར་ལོ་དེ་ནི་སེམས་ཀྱི་ལམ་ལས་ཡང་དག་པར་འདས་པས་བསམ་གྱིས་མི་ཁྱབ་པའོ། །འཁོར་ལོ་དེ་ནི་གཞལ་བ་དང་བྲལ་བས་མཚུངས་པ་མེད་པའོ། །འཁོར་ལོ་དེ་ནི་སྒྲ་སྐད་ཀྱི་ཚིག་གི་ལམ་ཐམས་ཅད་དང་བྲལ་བས་བརྗོད་དུ་མེད་པ་སྟེ། ཚད་མེད་པ། དཔེ་མེད་པ། དཔེ་དང་བྲལ་བ། ནམ་མཁའ་དང་མཚུངས་ཤིང ། འདྲ་བ། ཆད་པ་མེད་པ། རྟག་པ་མེད་པ། རྟེན་པ་ལ་འཇུག་པ་དང་མི་འགལ་བ། ཞི་བ། ཤིན་ཏུ་ཉེ་བར་ཞི་བ། དེ་ཁོ་ན། དེ་བཞིན་ཉིད། མ་ནོར་བ་དེ་བཞིན་ཉིད། གཞན་མ་ཡིན་པ། གཞན་དུ་མི་འགྱུར་བ། སེམས་ཅན་ཐམས་ཅད་ཀྱི་སྒྲ་བརྗོད་པ། བདུད་རྣམས་ཚར་གཅོད་པ། མུ་སྟེགས་ཅན་རྣམས་ཕམ་པར་བྱེད་པ། འཁོར་བའི་ཡུལ་ལས་འདའ་བ། སངས་རྒྱས་ཀྱི་ཡུལ་ལ་འཇུག་པ། འཕགས་པའི་གང་ཟག་རྣམས་ཀྱིས་ཡོངས་སུ་ཤེས་པ། རང་སངས་རྒྱས་རྣམས་ཀྱིས་རྟོགས་པ། བྱང་ཆུབ་སེམས་དཔའ་རྣམས་ཀྱིས་ཡོངས་སུ་བཟུང་བ། དེ་བཞིན་གཤེགས་པ་ཐམས་ཅད་དང་དབྱེར་མེད་པའོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅཝ་བརྒྱད་པ་སྟེ་ཐ་མ། བྱམས་པ་དེ་བཞིན་གཤེགས་པས་ཆོས་ཀྱི་འཁོར་ལོ་རྣམ་པ་འདི་ལྟ་བུ་བསྐོར་ཏེ། དེ་བསྐོར་བས་དེ་བཞིན 41.231b གཤེགས་པ་ལ་དེ་བཞིན་གཤེགས་པའོ་ཞེས་བྱའོ། །ཡང་དག་པར་རྫོགས་པའི་སངས་རྒྱས་ཤེས་བྱའོ། །རང་བྱུང་ཞེས་བྱའོ། །ཆོས་ཀྱི་རྗེ་ཞེས་བྱའོ། །འདྲེན་པ་ཞེས་བྱའོ། །རྣམ་པར་འདྲེན་པ་ཞེས་བྱའོ། །ཡོངས་སུ་འདྲེན་པ་ཞེས་བྱའོ། །དེད་དཔོན་ཞེས་བྱའོ། །ཆོས་ཐམས་ཅད་ལ་དབང་སྒྱུར་བ་ཞེས་བྱའོ། །ཆོས་ཀྱི་དབང་ཕྱུག་ཅེས་བྱའོ། །ཆོས་ཀྱི་འཁོར་ལོ་བསྐོར་བ་ཞེས་བྱའོ། །ཆོས་ཀྱི་སྦྱིན་བདག་ཅེས་བྱའོ། །མཆོད་སྦྱིན་རྗེ་ཞེས་བྱའོ། །མཆོད་སྦྱིན་ལེགས་པར་མཛད་པ་ཞེས་བྱའོ། །བརྟུལ་ཞུགས་གྲུབ་པ་ཞེས་བྱའོ། །དགོངས་པ་རྫོགས་པ་ཞེས་བྱའོ། །འཆད་པ་པོ་ཞེས་བྱའོ། །དབུགས་འབྱིན་པ་ཞེས་བྱའོ། །བདེ་བ་མཛད་པ་ཞེས་བྱའོ། །དཔའ་བོ་ཞེས་བྱའོ། །ཉོན་མོངས་པ་སྤོང་བ་ཞེས་བྱའོ། །གཡུལ་ལས་རྣམ་པར་རྒྱལ་བ་ཞེས་བྱའོ། །གདུགས་དང་རྒྱལ་མཚན་དང་བ་དན་བསྒྲེང་བ་ཞེས་བྱའོ། །སྣང་བ་མཛད་པ་ཞེས་བྱའོ། །འོད་མཛད་པ་ཞེས་བྱའོ། །མུན་པ་སེལ་བ་ཞེས་བྱའོ། །སྒྲོན་མ་འཛིན་པ་ཞེས་བྱའོ། །སྨན་པའི་རྒྱལ་པོ་ཆེན་པོ་ཞེས་བྱའོ། །ཡང་དག་པའི་གསོ་བ་མཛད་པ་ཞེས་བྱའོ། །ཟུག་རྔུ་འབྱིན་པ་ཆེན་པོ་ཞེས་བྱའོ། །ཡེ་ཤེས་གཟིགས་པ་རབ་རིབ་མི་མངའ་བ་ཞེས་བྱའོ། །ཀུན་དུ་གཟིགས་པ་ཞེས་བྱའོ། །ཀུན་དུ་རྣམ་པར་གཟིགས་པ་ཞེས་བྱའོ། །ཀུན་ནས་སྤྱན་ཅེས་བྱའོ། །ཀུན་ནས་འོད་ཅེས་བྱའོ། །ཀུན་དུ་སྣང་བ་ཞེས་བྱའོ། །ཀུན་ནས་སྒོ་ཞེས་བྱའོ། །ཀུན་དུ་བཟང་པོ་ཞེས་བྱའོ། །ཀུན་དུ་མཛེས་པ་ཞེས་བྱའོ། །གནས་པ་མེད་ལ་བླང་བ་མེད་ཅིང་དོར་བ་མེད་པ་ཞེས་བྱའོ། །མཐོ་བར་སེམས་པ་དང ། དམའ་བར་སེམས་པ་མེད་པའི་ཕྱིར་ས་དང་མཚུངས་པ་ཞེས་བྱའོ། །རབ་ཏུ་མི་གཡོས་པའི་ཕྱིར་རིའི་དབང་པོ་དང་འདྲ་བ་ཞེས་བྱའོ། །ཡོན་ཏན་ཐམས་ཅད་དང་ལྡན་པའི་ཕྱིར། འཇིག་རྟེན་ཐམས་ཅད་ཀྱི་དཔལ་ཞེས་བྱའོ། །འཇིག་རྟེན་ཐམས 41.232a ཅད་ལས་མངོན་པར་འཕགས་པའི་ཕྱིར། སྤྱི་གཙུག་བལྟར་མི་མཐོང་བ་ཞེས་བྱའོ། །ཟབ་ཅིང་གཏིང་དཔག་དཀའ་བའི་ཕྱིར་རྒྱ་མཚོ་དང་མཚུངས་པ་ཞེས་བྱའོ། །བྱང་ཆུབ་ཀྱི་ཕྱོགས་ཀྱི་ཆོས་རིན་པོ་ཆེ་ཐམས་ཅད་རྫོགས་པའི་ཕྱིར་ཆོས་རིན་པོ་ཆེའི་འབྱུང་གནས་ཤེས་བྱའོ། །གནས་པ་མེད་པའི་ཕྱིར་རླུང་དང་མཚུངས་པ་ཞེས་བྱའོ། །ཆགས་པ་མེད་ཅིང་བཅིངས་པ་མེད་ལ་གྲོལ་བ་མེད་པའི་སེམས་དང་ལྡན་པའི་ཕྱིར་བློ་ཆགས་པ་མེད་པ་ཞེས་བྱའོ། །ཆོས་ཐམས་ཅད་ངེས་པར་རྟོགས་པའི་ཕྱིར་ཕྱིར་མི་ལྡོག་པའི་ཆོས་ཤེས་བྱའོ། །བསྙེན་པར་དཀའ་ཞིང་རློམ་སེམས་ཐམས་ཅད་སྤངས་ཏེ་ཉོན་མོངས་པ་ཐམས་ཅད་སྲེག་པར་གནས་པའི་ཕྱིར་མེ་དང་མཚུངས་པ་ཞེས་བྱའོ། །ཀུན་ཏུ་རྟོག་པ་རྙོག་པ་མེད་ཅིང་སྐུ་དང་ཐུགས་དྲི་མ་མེད་ལ་སྡིག་པ་བསལ་བའི་ཕྱིར་ཆུ་དང་མཚུངས་པ་ཞེས་བྱའོ། །ཡེ་ཤེས་ཡུལ་ལ་ཆགས་པ་མེད་པ་དང ། ཆོས་ཀྱི་དབྱིངས་མཐའ་དང་དབུང་མེད་པའི་སྤྱོད་ཡུལ་གྱི་ཡེ་ཤེས་དང ། མངོན་པར་ཤེས་པ་བརྙེས་པའི་ཕྱིར་ནམ་མཁའ་དང་མཚུངས་པ་ཞེས་བྱའོ། །སྒྲིབ་པའི་ཆོས་ཐམས་ཅད་ཤིན་དུ་སྤངས་པའི་ཕྱིར་སྒྲིབ་པ་མེད་པའི་ཡེ་ཤེས་དང་རྣམ་པར་ཐར་པ་ལ་གནས་པ་ཞེས་བྱའོ། །ནམ་མཁའ་དང་མཚུངས་པར་མིག་གི་ལམ་ལས་ཡང་དག་པར་འདས་པའི་ཕྱིར་ཆོས་ཀྱི་དབྱིངས་ཐམས་ཅད་དུ་སོང་བའི་སྐུ་དང་ལྡན་པ་ཞེས་བྱའོ། །འཇིག་རྟེན་གྱི་ཡུལ་ཐམས་ཅད་ཀྱིས་ཉོན་མོངས་པ་མེད་པའི་ཕྱིར་སེམས་ཅན་གྱི་མཆོག་ཅེས་བྱའོ། །སེམས་ཅན་ཆགས་པ་མེད་པ་ཞེས་བྱའོ། །བློ་ཚད་མེད་པ་ཞེས་བྱའོ། །འཇིག་རྟེན་ལས་འདས་པའི་ཆོས་སྟོན་པ་ཞེས་བྱའོ། །འཇིག་རྟེན་གྱི་སློབ་དཔོན་ཞེས་བྱའོ། །འཇིག་རྟེན་གྱི་མཆོད་རྟེན་ཞེས་བྱའོ། །འཇིག་རྟེན་ན་མངོན་པར་འཕགས་པ་ཞེས་བྱའོ། །འཇིག་རྟེན་གྱི་ཆོས་ཀྱིས་མི་གོས་པ་ཞེས་བྱའོ། །འཇིག་རྟེན་གྱི་མགོན་པོ་ཞེས་བྱའོ། །འཇིག་རྟེན་གྱི་གཙོ་བོ་ཞེས་བྱའོ། །འཇིག་རྟེན་གྱི་ཕུལ་ཞེས 41.232b བྱའོ། །འཇིག་རྟེན་གྱི་དབང་ཕྱུག་ཅེས་བྱའོ། །འཇིག་རྟེན་གྱི་མཆོད་པ་ཞེས་བྱའོ། །འཇིག་རྟེན་གྱི་དཔུང་གཉེན་ཞེས་བྱའོ། །འཇིག་རྟེན་གྱི་ཕ་རོལ་ཏུ་བྱོན་པ་ཞེས་བྱའོ། །འཇིག་རྟེན་གྱི་སྒྲོན་མ་ཞེས་བྱའོ། །འཇིག་རྟེན་ལས་འདས་པ་ཞེས་བྱའོ། །འཇིག་རྟེན་གྱི་བླ་མ་ཞེས་བྱའོ། །འཇིག་རྟེན་གྱི་དོན་མཛད་པ་ཞེས་བྱའོ། །འཇིག་རྟེན་དང་འཐུན་པར་མཛད་པ་ཞེས་བྱའོ། །འཇིག་རྟེན་མཁྱེན་པ་ཞེས་བྱའོ། །འཇིག་རྟེན་གྱི་བདག་པོ་བརྙེས་པ་ཞེས་བྱའོ། །སྦྱིན་གནས་ཆེན་པོ་ཞེས་བྱའོ། །མཆོད་པའི་འོས་ཤེས་བྱའོ། །བསོད་ནམས་ཀྱི་ཞིང་ཆེན་པོ་ཞེས་བྱའོ། །སེམས་ཅན་ཆེན་པོ་ཞེས་བྱའོ། །སེམས་ཅན་དམ་པ་ཞེས་བྱའོ། །སེམས་ཅན་མཆོག་ཅེས་བྱའོ། །སེམས་ཅན་རབ་མཆོག་ཅེས་བྱའོ། །སེམས་ཅན་བླ་མ་ཞེས་བྱའོ། །སེམས་ཅན་གོང་ན་མེད་པ་ཞེས་བྱའོ། །སེམས་ཅན་མཉམ་པ་མེད་པ་ཞེས་བྱའོ། །སེམས་ཅན་འདྲ་བ་མེད་པ་ཞེས་བྱའོ། །རྟག་ཏུ་མཉམ་པར་བཞག་པ་ཞེས་བྱའོ། །ཆོས་ཐམས་ཅད་ཀྱི་མཉམ་པ་ཉིད་ལ་གནས་པ་ཞེས་བྱའོ། །ལམ་བརྙེས་པ་ཞེས་བྱའོ། །ལམ་སྟོན་པ་ཞེས་བྱའོ། །ལམ་མཚོན་པ་ཞེས་བྱའོ། །ལམ་ལ་ཤིན་དུ་གནས་པ་ཞེས་བྱའོ། །བདུད་ཀྱི་ཡུལ་ལས་ཡང་དག་པར་འདས་པ་ཞེས་བྱའོ། །བདུད་ཀྱི་དཀྱིལ་འཁོར་འཇོམ་པར་མཛད་པ་ཞེས་བྱའོ། །རྒ་ཤི་མི་མངའ་བས་བསིལ་བའི་དངོས་པོ་བརྙེས་པ་ཞེས་བྱའོ། །མུན་པ་མུན་ནག་དང་བྲལ་བ་ཞེས་བྱའོ། །ཐེ་ཙོམ་དང་བྲལ་བ་ཞེས་བྱའོ། །དོགས་པ་དང་བྲལ་བ་ཞེས་བྱའོ། །ཉོན་མོངས་པ་དང་བྲལ་བ་ཞེས་བྱའོ། །སོམ་ཉི་བཏུལ་བ་ཞེས་བྱའོ། །ཡིད་གཉིས་ཡང་དག་པར་བཅོམ་པ་ཞེས་བྱའོ། །ཆགས་པ་དང་བྲལ་བ་ཞེས་བྱའོ། །རྣམ་པར་གྲོལ་བ་ཞེས་བྱའོ། །རྣམ་པར་དག་པ་ཞེས་བྱའོ། །འདོད་ཆགས་དང་བྲལ་བ་ཞེས་བྱའོ། །ཞེ་སྡང་དང་བྲལ་བ་ཞེས་བྱའོ། །གཏི་མུག་དང་བྲལ་བ་ཞེས་བྱའོ། །ཟག་པ་ཟད་པ་ཞེས་བྱའོ། །ཉོན་མོངས་པ་མི་མངའ་བ་ཞེས་བྱའོ། །དབང་དང་ལྡན་པར་གྱུར་པ་ཞེས་བྱའོ། །ཐུགས་ཤིན་དུ་རྣམ་པར་གྲོལ་བ་ཞེས་བྱའོ། །ཤེས 41.233a རབ་ཤིན་ཏུ་རྣམ་པར་གྲོལ་བ་ཞེས་བྱའོ། །ཅང་མཁྱེན་པ་ཞེས་བྱའོ། །གླང་པོ་ཆེན་པོ་ཞེས་བྱའོ། །བྱ་བ་མཛད་པ་ཤེས་བྱའོ། །བྱེད་པ་མཛད་པ་ཞེས་བྱའོ། །ཁུར་བོར་བ་ཞེས་བྱའོ། །རང་གི་དོན་རྗེས་སུ་བརྙེས་པ་ཞེས་བྱའོ། །སྲིད་པར་ཀུན་དུ་སྦྱོར་བ་ཡོངས་སུ་ཟད་པ་ཞེས་བྱའོ། །མཉམ་པ་ཉིད་ཀྱི་ཡེ་ཤེས་ཀྱིས་རྣམ་པར་གྲོལ་བ་ཞེས་བྱའོ། །སེམས་ཀྱི་དབང་དམ་པ་ཐམས་ཅད་ཀྱི་ཕ་རོལ་ཏུ་བྱོན་པ་ཞེས་བྱའོ། །སྦྱིན་པའི་ཕ་རོལ་ཏུ་བྱོན་པ་ཞེས་བྱའོ། །ཚུལ་ཁྲིམས་ཀྱིས་མངོན་པར་འཕགས་པ་ཞེས་བྱའོ། །བཟོད་པའི་ཕ་རོལ་ཏུ་བྱོན་པ་ཞེས་བྱའོ། །བརྩོན་འགྲུས་གྱིས་མངོན་པར་འཕགས་པ་ཞེས་བྱའོ། །བསམ་གཏན་དང་མངོན་པར་ཤེས་པ་བརྙེས་པ་ཞེས་བྱའོ། །ཤེས་རབ་ཀྱི་ཕ་རོལ་ཏུ་བྱོན་པ་ཞེས་བྱའོ། །སྨོན་ལམ་གྲུབ་པ་ཞེས་བྱའོ། །བྱམས་པ་ཆེན་པོ་ལ་གནས་པ་ཞེས་བྱའོ། །སྙིང་རྗེ་ཆེན་པོ་ལ་གནས་པ་ཞེས་བྱའོ། །དགའ་བ་ཆེན་པོ་ལ་གནས་པ་ཞེས་བྱའོ། །བཏང་སྙོམས་ཆེན་པོ་ལ་གནས་པ་ཞེས་བྱའོ། །སེམས་ཅན་བསྡུ་བ་ལ་བརྩོན་པ་ཞེས་བྱའོ། །སྒྲིབ་པ་མེད་པའི་སོ་སོ་ཡང་དག་པར་རིག་པ་བརྙེས་པ་ཞེས་བྱའོ། །རྟོན་པར་གྱུར་པ་ཞེས་བྱའོ། །བསོད་ནམས་ཆེན་པོ་ཞེས་བྱའོ། །ཡེ་ཤེས་ཆེན་པོ་དང་ལྡན་པ་ཞེས་བྱའོ། །དྲན་པ་དང་བློ་གྲོས་དང་རྟོགས་པ་དང་བློ་ཕུན་སུམ་ཚོགས་པ་ཞེས་བྱའོ། །དྲན་པ་ཉེ་བར་གཞག་པ་དང ། ཡང་དག་པར་སྤོང་བ་དང ། རྫུ་འཕྲུལ་གྱི་རྐང་པ་དང ། དབང་པོ་དང་སྟོབས་དང ། བྱང་ཆུབ་ཀྱི་ཡན་ལག་དང ། ལམ་དང ། ཞི་གནས་དང ། ལྷག་མཐོང་གིས་སྣང་བ་བརྙེས་པ་ཞེས་བྱའོ། །འཁོར་བའི་རྒྱ་མཚོ་ལས་རྒལ་བ་ཞེས་བྱའོ། །ཕ་རོལ་ཏུ་བྱོན་པ་ཞེས་བྱའོ། །ཐང་ལ་བྱོན་པ་ཤེས་བྱའོ། །བདེ་བ་བརྙེས་པ་ཞེས་བྱའོ། །མི་བསྙེངས་པ་བརྙེས་པ་ཞེས་བྱའོ། །ཉོན་མོངས་པའི་ཚེར་མ་དཀྲུགས་པ་ཞེས་བྱའོ། །སྐྱེས་བུ་ཆེན་པོ་ཞེས་བྱའོ། །སྐྱེས་བུ་སེང་གེ་ཞེས་བྱའོ། །འཇིགས་པ་དང་སྤུ་ཟིང་ཞེས་བྱེད་པ་མི་མངའ་བ་ཞེས་བྱའོ། །གླང་པོ་ཞེས་བྱའོ། །དྲི་མ་མེད་པ་ཞེས་བྱའོ། །དྲི་མ་གསུམ་སྤངས་པ་ཞེས་བྱའོ། །རིག་པ་པོ་ཞེས་བྱའོ། །རིག་པ་གསུམ་བརྙེས་པ་ཞེས་བྱའོ། །ཆུ་བོ་བཞི་ལས་རྒལ་བ་ཞེས་བྱའོ། ། 41.233b རིན་པོ་ཆེའི་གདུགས་འཛིན་པ་གཅིག་པུར་གྱུར་པའི་ཕྱིར་རྒྱལ་རིགས་ཤེས་བྱའོ། །སྡིག་པའི་ཆོས་སྤངས་པའི་ཕྱིར་བྲམ་ཟེ་ཞེས་བྱའོ། །མ་རིག་པའི་སྒོ་ངའི་སྦུབས་བཅོམ་པའི་ཕྱིར་དགེ་སློང་ཞེས་བྱའོ། །ཆགས་པ་ཐམས་ཅད་ལས་ཡང་དག་པར་འདས་པའི་ཕྱིར་དགེ་སྦྱོང་ཞེས་བྱའོ། །ཉོན་མོངས་པ་གཟིགས་པའི་ཕྱིར་གཙང་སྦྲ་ཅན་ཞེས་བྱའོ། །སྟོབས་དང་ལྡན་པ་ཞེས་བྱའོ། །སྟོབས་བཅུ་མངའ་བ་ཞེས་བྱའོ། །བཅོམ་ལྡན་འདས་ཞེས་བྱའོ། །སྐུ་བསྒོམས་པ་ཞེས་བྱའོ། །རྒྱལ་པོའི་ཡང་རྒྱལ་པོ་ཞེས་བྱའོ། །ཆོས་ཀྱི་རྒྱལ་པོ་ཞེས་བྱའོ། །ཆོས་ཀྱི་འཁོར་ལོ་མཆོག་དམ་པ་བསྐོར་ཞིང་རྗེས་སུ་སྟོན་པ་ཞེས་བྱའོ། །མི་འཁྲུགས་པའི་ཆོས་སྟོན་པ་ཞེས་བྱའོ། །ཐམས་ཅད་མཁྱེན་པའི་ཡེ་ཤེས་ཀྱི་དབང་བསྐུར་བ་ཞེས་བྱའོ། །ཆགས་པ་མེད་པའི་ཡེ་ཤེས་ཆེན་པོ་དྲི་མ་མེད་ཅིང་རྣམ་པར་གྲོལ་བའི་གོ་འཕང་གི་ཐབས་བརྙེས་པ་ཞེས་བྱའོ། །བྱང་ཆུབ་ཀྱི་ཡན་ལག་བདུན་གྱི་རིན་པོ་ཆེ་དང་ལྡན་པ་ཞེས་བྱའོ། །ཆོས་རིན་པོ་ཆེ་ཐམས་ཅད་ཀྱི་ཁྱད་པར་བརྙེས་པ་ཞེས་བྱའོ། །བློན་པོ་འཕགས་པའི་ཉན་ཐོས་ཐམས་ཅད་ཀྱིས་ཞལ་གྱི་དཀྱིལ་འཁོར་དུ་བལྟས་པ་ཞེས་བྱའོ། །སྲས་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་ཅན་ཞེས་བྱའོ། །གདུལ་བ་ཤིན་དུ་བཏུལ་བ་ཞེས་བྱའོ། །བྱང་ཆུབ་སེམས་དཔའ་ལེགས་པར་ལུང་བསྟན་པ་ཞེས་བྱའོ། །རྣམ་ཐོས་ཀྱི་བུ་དང་འདྲ་བ་ཞེས་བྱའོ། །འཕགས་པའི་ནོར་བདུན་གྱི་མཛོད་བྱིན་པ་ཞེས་བྱའོ། །ལྷུག་པར་གཏོང་བ་ཞེས་བྱའོ། །བདེ་བ་ཕུན་སུམ་ཚོགས་པ་ཐམས་ཅད་དང་ལྡན་པ་ཞེས་བྱའོ། །རེ་བ་ཐམས་ཅད་སྦྱིན་པ་ཞེས་བྱའོ། །འཇིག་རྟེན་ཐམས་ཅད་ལ་ཕན་པ་དང་བདེ་བས་རྗེས་སུ་སྐྱོང་བ་ཞེས་བྱའོ། །དབང་པོ་དང་མཚུངས་པ་ཞེས་བྱའོ། །ཡེ་ཤེས་མཆོག་གི་རྡོ་རྗེ་འཆང་བ་ཞེས་བྱའོ། །ཀུན་ནས་སྤྱན་ཞེས་བྱའོ། །ཆོས་ཐམས་ཅད་ལ་སྒྲིབ་པ་མི་མངའ་བར་གཟིགས་པ་ཞེས་བྱའོ། །ཡེ་ཤེས་ཀྱིས་ཀུན་ཏུ་རྣམ་པར་འཕྲུལ་པ་ཞེས་བྱའོ། །ཆོས་ཀྱི་གར་གྱི་རྒྱུད་རྒྱ་ཆེན 41.234a པོ་སྟོན་པ་ལ་ཞུགས་པ་ཞེས་བྱའོ། །ཟླ་བ་དང་མཚུངས་པ་ཞེས་བྱའོ། །འགྲོ་བ་ཐམས་ཅད་ཀྱིས་བལྟ་བས་མི་ངོམས་པ་ཞེས་བྱའོ། །འོད་རྣམ་པར་དག་ཅིང་ཀུན་དུ་ཡངས་པ་ཞེས་བྱའོ། །དགའ་བ་དང་མཆོག་ཏུ་དགའ་བར་མཛད་པའི་འོད་ཅེས་བྱའོ། །སེམས་ཅན་ཐམས་ཅད་ལ་མངོན་དུ་ཕྱོགས་ཤིང་གཟིགས་པར་སྣང་བ་ཞེས་བྱའོ། །འགྲོ་བ་ཐམས་ཅད་ཀྱི་སེམས་དང་བསམ་པའི་སྣོད་ཇི་ལྟ་བ་བཞིན་དུ་སྣང་བ་བརྙེས་པ་ཞེས་བྱའོ། །བཀོད་པ་ཆེན་པོ་ཞེས་བྱའོ། །སློབ་པ་དང་མི་སློབ་པའི་སྐར་མའི་ཚོགས་ཀྱི་འཁོར་ཅན་ཞེས་བྱའོ། །ཉི་མའི་དཀྱིལ་འཁོར་དང་མཚུངས་པ་ཞེས་བྱའོ། །མུན་པ་མུན་ནག་བསལ་བ་ཞེས་བྱའོ། །ཏོག་ཆེན་པོ་དང་ལྡན་པའི་རྒྱལ་པོ་ཞེས་བྱའོ། །འོད་ཟེར་ཚད་མེད་ཅིང་མཐའ་ཡས་པ་ཞེས་བྱའོ། །སྣང་བ་ཆེན་པོ་ཀུན་དུ་སྟོན་པ་ཞེས་བྱའོ། །དྲིས་པ་ཐམས་ཅད་ལུང་བསྟན་པ་སྟོན་པ་ལ་རྨོངས་པ་མི་མངའ་བ་ཞེས་བྱའོ། །མ་རིག་པའི་མུན་པ་ཆེན་པོ་འཇོམས་པར་མཛད་པ་ཞེས་བྱའོ། །ཡེ་ཤེས་ཀྱི་སྣང་བ་ཆེན་པོས་རྣམ་པར་གཟིགས་པའི་བློ་དང་ལྡན་པ་ཞེས་བྱའོ། །རྣམ་པར་མི་རྟོག་པ་ཞེས་བྱའོ། །བྱམས་པ་དང་སྙིང་བརྩེ་བ་དང་སྙིང་རྗེ་ཆེན་པོས་འགྲོ་བ་ཐམས་ཅད་ལ་འོད་ཟེར་མཉམ་པར་གཏོང་ཞིང་ཡུལ་ཚད་མེད་པ་ཞེས་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་ཅིང་རྙེད་པར་དཀའ་ལ་བལྟ་དཀའ་བའི་དཀྱིལ་འཁོར་ཅན་ཞེས་བྱའོ། །ཚངས་པ་དང་མཚུངས་པ་ཤེས་བྱའོ། །རབ་ཏུ་ཞི་བའི་སྤྱོད་ལམ་དང་ལྡན་པ་ཞེས་བྱའོ། །སྤྱོད་ལམ་དང་སྤྱོད་པའི་ཁྱད་པར་ཐམས་ཅད་དང་ལྡན་པ་ཞེས་བྱའོ། །གཟུགས་དམ་པ་མངའ་བ་ཞེས་བྱའོ། །བལྟ་བས་མི་ངོམས་པ་ཞེས་བྱའོ། །དབང་པོ་ཞི་བ་ཞེས་བྱའོ། །ཡིད་ཞི་བ་ཞེས་བྱའོ། །ཞི་གནས་ཀྱི་ཚོགས་ཡོངས་སུ་རྫོགས་པ་ཞེས་བྱའོ། །ཞི་གནས་དམ་པ་བརྙེས་པ་ཞེས་བྱའོ། །དུལ་བ་དང་ཞི་གནས་མཆོག་བརྙེས་པ་ཞེས་བྱའོ། །ཞི་གནས་དང་ལྷག་མཐོང་གི་ཚོགས་ཡོངས་སུ་རྫོགས་པ་ཞེས་བྱའོ། །སྦས་པ་དང ། དབང་པོ་ཐུལ་བ་དང ། 41.234b གླང་པོ་ལྟར་ཤིན་ཏུ་དུལ་བ་དང ། མཚོ་ལྟར་རྙོག་པ་མེད་ཅིང་དང་བ་ཞེས་བྱའོ། །ཉོན་མོངས་པའི་བག་ཆགས་ཀྱི་སྒྲིབ་པ་ཐམས་ཅད་ལེགས་པར་སྤངས་པ་ཞེས་བྱའོ། །སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་པ་ཞེས་བྱའོ། །སྐྱེས་བུ་མཆོག་ཅེས་བྱའོ། །དཔེ་བྱད་བཟང་པོ་བརྒྱད་བཅུའི་འཁོར་སྣ་ཚོགས་ཀྱིས་སྐུ་སྤྲས་པ་ཞེས་བྱའོ། །སྐྱེས་བུ་ཁྱུ་མཆོག་ཅེས་བྱའོ། །སྟོབས་བཅུ་དང་ལྡན་པ་ཞེས་བྱའོ། །མི་འཇིགས་པ་བཞི་བརྙེས་པ་ཞེས་བྱའོ། །སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ཞེས་བྱའོ། །སྟོན་པ་ཞེས་བྱའོ། །སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་ཡོངས་སུ་རྫོགས་པ་ཞེས་བྱའོ། །སྐུ་དང་གསུང་དང་ཐུགས་ཀྱི་འཕྲིན་ལས་ཀྱི་མཐའ་སྨད་པ་ཞེས་བྱའོ། །རྣམ་པ་ཐམས་ཅད་ཀྱི་མཆོག་དང་ལྡན་པའི་ཕྱིར་ཤིན་ཏུ་ཡོངས་སུ་སྦྱངས་པའི་ཡེ་ཤེས་ཀྱི་དཀྱིལ་འཁོར་མངའ་བ་ཞེས་བྱའོ། །རྟེན་ཅིང་འབྲེལ་བར་འབྱུང་བ་མཉམ་པ་ཉིད་དུ་མངོན་པར་ཐུགས་སུ་ཆུད་པའི་ཕྱིར་སྟོང་པ་ཉིད་ལ་གནས་པ་ཞེས་བྱའོ། །དོན་དམ་པའི་བདེན་པའི་ཚུལ་རབ་ཏུ་རྟོགས་པའི་ཕྱིར་མཚན་མ་མེད་པ་ལ་གནས་པ་ཞེས་བྱའོ། །འཇུག་པ་ཐམས་ཅད་ཀྱིས་མི་གོས་པའི་ཕྱིར་སྨོན་པ་མེད་པ་ལ་གནས་པ་ཞེས་བྱའོ། །འདུ་བྱེད་ཐམས་ཅད་ཀྱི་རྒྱུན་བཅད་པའི་ཕྱིར། མངོན་པར་འདུ་མཛད་པ་མི་མངའ་བ་ཞེས་བྱའོ། །ཡང་དག་པའི་མཐའི་ཡེ་ཤེས་ཀྱི་ཡུལ་རྣམ་པར་མི་འཁྲུགས་པའི་ཕྱིར། ཡང་དག་པར་གསུང་བ་ཞེས་བྱའོ། །དེ་བཞིན་ཉིད་དང་ཆོས་ཀྱི་དབྱིངས་དང་ནམ་མཁའི་མཚན་ཉིད་ཤེས་པའི་ཡུལ་ཡིན་པའི་ཕྱིར་མ་ནོར་བ་དེ་བཞིན་ཉིད་དང ། གཞན་མ་ཡིན་པ་གསུང་བ་ཞེས་བྱའོ། །ཆོས་ཐམས་ཅད་སྒྱུ་མ་དང ། སྨིག་རྒྱུ་དང ། རྨི་ལམ་དང ། ཆུ་ཟླ་དང ། བྲག་ཆ་དང ། མིག་ཡོར་དང་མཚུངས་པར་གནས་པའི་ཕྱིར་ཉོན་མོངས་པ་མེད་པའི་ཆོས་ཤིན་དུ་རྟོགས་པ་ཞེས་བྱའོ། །ཡོངས་སུ་མྱ་ངན་ལས་འདས་པའི་རྒྱུ་སྐྱེད་པའི་ཕྱིར་མཐོང་བ་དང་ཐོས་པ་དོན་ཡོད་པ་ཞེས་བྱའོ། །སེམས་ཅན་གདུལ 41.235a བར་བཏུལ་བའི་རྩལ་དང་ལྡན་པའི་ཕྱིར་གོམ་པ་འདོར་བ་དོན་ཡོད་པ་ཞེས་བྱའོ། །མ་རིག་པ་དང་སྲིད་པའི་སྲེད་པ་ཡང་དག་པར་བཅད་པའི་ཕྱིར་འོབས་ལས་རྒལ་བ་ཞེས་བྱའོ། །ངེས་པར་འབྱིན་པའི་ལམ་ལེགས་པར་བསྟན་པའི་ཕྱིར་ཟམ་པ་བཏགས་པ་ཞེས་བྱའོ། །བདུད་ཀྱི་ཡུལ་དང་སྤྱོད་པ་ཐམས་ཅད་ཀྱིས་མི་གོས་པའི་ཕྱིར་བདུད་དང་ཉོན་མོངས་པའི་ཕྱིར་རྒོལ་བ་ལས་རྒྱལ་བ་ཞེས་བྱའོ། །འདོད་པའི་ཁམས་ལས་ཡང་དག་པར་འདས་པའི་ཕྱིར་འདོད་པའི་འདམ་ལས་རྒལ་བ་ཞེས་བྱའོ། །གཟུགས་ཀྱི་ཁམས་ལས་ཡང་དག་པར་འདས་པའི་ཕྱིར་ང་རྒྱལ་གྱི་རྒྱལ་མཚན་བསྙལ་བ་ཞེས་བྱའོ། །གཟུགས་མེད་པའི་ཁམས་ལས་ཡང་དག་པར་འདས་པའི་ཕྱིར་ཤེས་རབ་ཀྱི་རྒྱལ་མཚན་བསྒྲེང་བ་ཞེས་བྱའོ། །ཆོས་ཀྱི་སྐུ་དང་ཡེ་ཤེས་ཀྱི་སྐུ་དང་ལྡན་པའི་ཕྱིར་འཇིག་རྟེན་གྱི་ཡུལ་ཐམས་ཅད་ལས་ཡང་དག་པར་འདས་པ་ཞེས་བྱའོ། །ཡོན་ཏན་རིན་པོ་ཆེའི་ཡེ་ཤེས་ཀྱི་མེ་ཏོག་མཐའ་ཡས་པ་ཤིན་ཏུ་རྒྱས་ཤིང་རྣམ་པར་གྲོལ་བའི་འབྲས་བུ་ཤིན་ཏུ་ཕུན་སུམ་ཚོགས་པའི་ཕྱིར་སྡོང་པོ་ཆེན་པོ་ཞེས་བྱའོ། །འབྱུང་བ་དང་མཐོང་བ་རྙེད་པར་དཀའ་བའི་ཕྱིར་ཨུ་དུམ་འབའ་རའི་མེ་ཏོག་དང་མཚུངས་པ་ཞེས་བྱའོ། །ཚུལ་ཇི་ལྟ་བ་བཞིན་དུ་ངེས་པར་འབྱུང་བའི་བསམ་པ་ཤིན་དུ་ཡོངས་སུ་རྫོགས་པར་མཛད་པའི་ཕྱིར་ཡིད་བཞིན་གྱི་ནོར་བུ་རིན་པོ་ཆེའི་རྒྱལ་པོ་དང་མཚུངས་པ་ཞེས་བྱའོ། །ཡུན་རིང་པོ་ནས་གཏོང་བ་དང་ཚུལ་ཁྲིམས་དང་དཀའ་ཐུབ་དང་བརྟུལ་ཞུགས་དང ། ཚངས་པར་སྤྱོད་པ་བརྟེན་པོར་ཡང་དག་པར་བླངས་པས་མི་གཡོ་ཞིང་མི་སྐྱོད་པའི་ཕྱིར། ཞབས་ཤིན་དུ་གནས་པ་ཞེས་བྱའོ། །ཡུན་རིང་པོ་ནས་ཕ་མ་དང ། དགེ་སྦྱོང་དང ། བྲམ་ཟེ་དང ། བླ་མ་དང ། སྦྱིན་གནས་རྣམས་དང ། ཆོས་དང་ལྡན་པ་ཡོངས་སུ་སྐྱོངས་བ་དང ། སྐྱབས་སུ་ལྷགས་པ་རྣམས་ཡོངས་སུ་མི་གཏོང་བའི་ཕྱིར། ཞབས་ཀྱི་མཐིལ་བཀྲ་ཤིས་དང་གཡུང་དྲུང་འཁྱིལ་པ་དང ། 41.235b འཁོར་ལོ་རྩིབས་སྟོང་དང་ལྡན་པ་སྣ་ཚོགས་ཀྱི་མཚན་དང་ལྡན་པ་ཞེས་བྱའོ། །ཡུན་རིང་པོ་ནས་སྲོག་གཅོད་པ་སྤོངས་པའི་ཕྱིར་ཞབས་ཀྱི་རྟིང་པ་ཡངས་པ་ཞེས་བྱའོ། །ཡུན་རིང་པོ་ནས་སེམས་ཅན་གཞན་སྲོག་གཅོད་པ་སྤང་བ་ཡང་དག་པར་འཛིན་དུ་འཇུག་པའི་ཕྱིར་ཕྱག་གི་སོར་མོ་རིང་བ་ཞེས་བྱའོ། །ཡུན་རིང་པོ་ནས་སྲོག་གཅོད་པ་སྤང་བའི་ཡོན་ཏན་གྱི་བསྔགས་པ་བརྗོད་པ་མཛད་པ་དང ། སྐྱེ་བོ་མང་པོའི་སྐྱབས་མཛད་པའི་ཕྱིར། སྐུ་ཆེ་ཞིང་དྲང་བ་ཞེས་བྱའོ། །ཡུན་རིང་པོ་ནས་ཕ་མ་དང ། དགེ་སྦྱོང་དང ། བྲམ་ཟེ་དང ། བླ་མ་དང ། སྦྱིན་གནས་ལ་བསྙེན་བཀུར་དང་ཡོངས་སུ་སྤྱད་པ་བྱེད་ཅིང་བཀྲུ་བ་དང ། བྱུག་པ་དང ། མར་དང ། འབྲུ་མར་གྱིས་སྐུད་ཅིང་ལག་དར་ཏེ་ལུས། ལ་སྤྱད་པ་བྱེད་པས་ཡོངས་སུ་མི་སྐྱོ་བའི་ཕྱིར། ཕྱག་དང་ཞབས་འཇམ་ཞིང་མཉེན་པ་ཞེས་བྱའོ། །བསྡུ་བའི་དངོས་པོ་བཞི་པོ་སྦྱིན་པ་དང ། སྙན་པར་སྨྲ་བ་དང ། དོན་བྱེད་པ་དང ། དོན་མཐུན་པའི་དྲ་བས་སེམས་ཅན་བསྡུ་བ་ལ་མཁས་པ་ལེགས་པར་བསླབས་པའི་ཕྱིར་ཕྱག་དང་ཞབས་དྲ་བས་འབྲེལ་བ་ཞེས་བྱའོ། །ཡུན་རིང་པོ་ནས་གོང་ནས་གོང་དུ་དགེ་བའི་རྩ་བ་ཤིན་ཏུ་ཁྱད་པར་དུ་འཕགས་པ་ལ་ལྷག་པར་དམིགས་པའི་ཕྱིར་ཞབས་མཐོ་བ་ཞེས་བྱའོ། །ཡུན་རིང་པོ་ནས་ཕ་མ་དང ། དགེ་སྦྱོང་དང ། བྲམ་ཟེ་དང ། བླ་མ་དང ། སྦྱིན་གནས་དང ། དེ་བཞིན་གཤེགས་པའི་མཆོད་རྟེན་ལ་བསྐོར་བ་བྱེད་པ་དང ། ལུས་ཀྱི་ལས་དང ། གུས་པར་ཆོས་ཉན་ཅིང་སྤུ་ཟིང་ཞེས་བྱེད་པ་དང ། སེམས་ཅན་གཞན་ཡང་དག་པར་དགའ་བར་བྱེད་པ་དང ། ཆོས་སྟོན་པ་ལ་སྦྱོར་བའི་ཕྱིར་ཡན་ལག་གི་སྤུ་གྱེན་དུ་གཡས་སུ་འཁྱིལ་བར་མངོན་པར་གྲུབ་པ་ཞེས་བྱའོ། །ཡུན་རིང་པོ་ནས་སྟི་སྟང་དུ་བྱས་ཏེ། ཆོས་ཉན་པ་དང ། འཛིན་པ་དང ། ཀློག་པ་དང ། ཤེས་པར་བྱེད་པ་དང ། དོན་དང་ཚིག་རྣམ་པར་ངེས་པར་རྟོག་པ་ལ་མཁས་པས་རྒ་བ་དང ། ན་བ་དང ། 41.236a འཆི་བ་ལ་མངོན་དུ་ཕྱོགས་པའི་སེམས་ཅན་ཐམས་ཅད་ལ་སྐྱབས་སུ་འགྲོ་བ་སྦྱིན་པ་དང ། སྟི་སྟང་དུ་བྱས་ཏེ་ཆོས་སྟོན་ཅིང་མི་བརྙས་པའི་བློ་དང་ལྡན་པའི་ཕྱིར་བྱིན་པ་རི་དགས་ཨེ་ན་ཡའི་ལྟ་བུ་ཞེས་བྱ་བའོ། །ཡུན་རིང་པོ་ནས་དགེ་སྦྱོང་དང ། བྲམ་ཟེ་རྣམས་དང ། དེ་ལས་གཞན་པ་ཚངས་པ་མཚུངས་པར་སྤྱོད་པ་རྣམས་ལ་ཚངས་པར་སྤྱོད་པའི་རྗེས་སུ་གཟུང་བའི་ཡོ་བྱད་ཐམས་ཅད་སྦྱིན་པ་དང ། སྒྲེན་མོ་རྣམས་ལ་གོས་སྦྱིན་པ་དང ། གཞན་གྱི་ཆུང་མ་ལ་མི་འཕྱོ་བ་དང ། ཚངས་པར་སྤྱོད་པའི་ཡོན་ཏན་གྱི་བསྔགས་པ་བརྗོད་པ་དང ། ངོ་ཚ་ཤེས་པ་དང ། ཁྲེལ་ཡོད་པ་རྗེས་སུ་བསྲུང་བ་བརྟན་པོར་ཡང་དག་པར་བླངས་པའི་ཕྱིར་མདོམས་ཀྱི་སྦ་བ་སྦུབས་སུ་ནུབ་པ་ཞེས་བྱའོ། །ཡུན་རིང་པོ་ནས་ལག་པ་དང་རྐང་པ་སྦོམ་པ་དང ། སེམས་ཅན་ལ་མི་འཚེ་བར་སྦྱོར་བ་དང ། ལུས་ཀྱི་ལས་དང ། ངག་གི་ལས་དང ། ཡིད་ཀྱི་ལས་བྱམས་པ་དང་ལྡན་པའི་ཕྱིར་ཕྱག་རིང་བ་ཞེས་བྱའོ། །ཡུན་རིང་པོ་ནས་ཟས་ཀྱི་ཚོད་ཤེས་པ་དང་ཉུང་ངུ་ཟ་བ་དང ། ལྟོ་སྡོམ་པ་དང ། ནད་པ་ལ་སྨན་སྦྱིན་པ་དང ། སྐྱེ་བོ་དམན་པ་ལ་མི་བརྙེས་པ་དང ། མགོན་མེད་པ་ཁྱད་དུ་མི་གསོད་པ་དང ། དེ་བཞིན་གཤེགས་པའི་མཆོད་རྟེན་ཞིག་པ་འཆོས་པ་དང ། མཆོད་རྟེན་རྩིག་པ་དང ། འཇིགས་པས་ཉེན་པའི་སེམས་ཅན་རྣམས་ལ་མི་འཇིགས་པ་སྦྱིན་པའི་ཕྱིར་ཤིང་ནྱ་གྲོ་དྷ་ལྟར་ཆུ་ཞེང་གབ་པ་ཞེས་བྱའོ། །ཡུན་རིང་པོ་ནས་ཕ་མ་དང་བྲམ་ཟེ་དང ། དགེ་སྦྱོང་དང ། བླ་མ་དང ། སྦྱིན་གནས་རྣམས་ལ་བཀྲུ་བ་དང ། བསྐུ་བ་དང ། མར་དང ། འབྲུ་མར་གྱིས་སྐུད་པ་དང ། གྲང་བའི་དུས་ན་ནི་ཆུ་དྲོན་པོ་དང་ཚ་བའི་དུས་ན་ནི་ཆུ་གྲང་བ་དང ། བསིལ་གྲིབ་དང་དུས་ཀྱི་བདེ་བའི་ལོངས་སྤྱོད་སྦྱིན་པ་དང ། ཤིང་བལ་འཇམ་པོ་ལྟར་རེག་ན་བདེ་ཞིང་འཇམ་པའི་རས་ལེགས་པར་བཏིང་བའི་མལ་ཆ་སྦྱིན་པ་དང ། དེ་བཞིན་གཤེགས་པའི་མཆོད་རྟེན་ལ་སྤོས་ཀྱི་འབྲུ་མར་འཐོར་བ 41.236b དང ། དར་ཕྲ་མོའི་རྒྱལ་མཚན་དང ། བ་དན་དང ། སྲད་བུ་འབུལ་བའི་ཕྱིར་སྐུའི་ལྤགས་པ་འཇམ་ཞིང་མཉེན་ལ་སྲབ་པ་ཞེས་བྱའོ། །ཡུན་རིང་པོ་ནས་སེམས་ཅན་ལ་ཁོང་ཁྲོ་བ་མེད་པ་དང ། བྱམས་པ་བསྒོམས་པ་ལ་སྦྱོར་བ་དང ། བཟོད་པ་དང་དེས་པ་ལ་སེམས་ཅན་གཞན་དག་འཛུད་པ་དང ། ཁོན་དུ་འཛིན་པ་མེད་ཅིང་གནོད་སེམས་མེད་པའི་ཡོན་ཏན་གྱི་བསྔགས་པ་བརྗོད་པ་དང ། དེ་བཞིན་གཤེགས་པའི་མཆོད་རྟེན་དང ། དེ་བཞིན་གཤེགས་པའི་སྐུ་གཟུགས་རྣམས་ལ་གསེར་གྱི་རྒྱན་དང ། གསེར་གྱི་མེ་ཏོག་དང ། གསེར་གྱི་ཕྱེ་མ་འཐོར་བ་དང ། གསེར་གྱི་ཁ་དོག་ལྟ་བུའི་དར་གྱི་བ་དན་དང ། རྒྱལ་མཚན་དང ། རྒྱན་དང ། གསེར་གྱི་སྣོད་དང ། གསེར་གྱི་ཁ་དོག་ལྟ་བུའི་གོས་འབུལ་བའི་ཕྱིར། ལྤགས་པའི་མདོག་གསེར་གྱི་ཁ་དོག་ལྟ་བུ་ཞེས་བྱའོ། །ཡུན་རིང་པོ་ནས་མཁས་པའི་གན་དུ་འགྲོ་ཞིང་དགེ་བ་དང་མི་དགེ་བ་གང་ཡིན་ཞེས་འདྲི་བ་དང ། ཁ་ན་མ་ཐོ་བ་དང་བཅས་པ་དང ། ཁ་ན་མ་ཐོ་བ་མེད་པ་དང ། བསྟེན་པར་བྱ་བ་དང ། བསྟེན་པར་བྱ་བ་མ་ཡིན་པ་དང ། ངན་པ་དང ། འབྲིང་དང ། གྱ་ནོམ་པའི་ཆོས་ཡོངས་སུ་འདྲི་བ་དང ། དེའི་དོན་དཔྱད་པ་དང ། ཡོངས་སུ་འཇལ་བ་ལ་རྨོངས་པ་མེད་པ་དང ། དེ་བཞིན་གཤེགས་པའི་མཆོད་རྟེན་ལ་སྲིན་བུ་ཀི་ཏ་དང ། ལུ་ཏའི་ཚད་དང ། བ་རྒྱ་དང ། མེ་ཏོག་རྙིང་པ་དང ། རྩཝ་སྣ་ཚོགས་དང ། ཕྱག་དར་ཡོད་པ་སེལ་བར་སྦྱོར་བའི་ཕྱིར་སྤུ་རེ་རེ་སྐྱེས་པ་ཞེས་བྱའོ། །ཡུན་རིང་པོ་ནས་ཕ་མ་དང ། གཙོ་བོ་དང ། དམ་པ་དང ། མཆོད་པའི་འོས་དང ། དགེ་སྦྱོང་དང ། བྲམ་ཟེ་དང ། ཕོངས་པ་དང ། སློང་བ་ལ་སྩོགས་པ་འོངས་པ་དག་ལ་སྟི་སྟང་དུ་བྱས་ཏེ། བསམ་པ་ཇི་ལྟ་བ་བཞིན་དུ་ཟས་དང ། སྐོམ་དང ། མལ་ཆ་དང ། སྨན་དང ། གོས་དང ། གནས་དང ། མར་མེ་དང ། འཚོ་བའི་ཡོ་བྱད་རུང་བ་སྦྱོར་བ་དང ། ཁྲོན་པ་དང ། རྫིང་ཆུ་བསིལ་བས་གང་བ་དག་།སྐྱེ་བོ་མང་པོའི་ལོངས་སྤྱོད་དུ་སྦྱིན་པའི་ཕྱིར་བདུན་མཐོ་བ་ཞེས་བྱའོ། །ཡུན་རིང་པོ་ནས་ཕ་མ་དང ། དགེ་སྦྱོང་དང ། བྲམ་ཟེ་དང ། བླ་མ་དང ། སྦྱིན 41.237a གནས་ལ་འདུད་པ་དང ། རབ་ཏུ་འདུད་པ་དང ། གསོང་པོར་སྨྲ་བ་དང ། མི་འཇིགས་པ་སྦྱིན་པ་དང ། ཉམ་ཆུང་བ་ལ་མི་བརྙས་པ་དང ། སྐྱབས་སུ་སོང་བ་ཡོངས་སུ་མི་གཏོང་བ་བརྟན་པོར་ཡང་དག་པར་བླངས་པ་ཡོངས་སུ་མི་གཏོང་བའི་ཕྱིར་རོ་སྟོད་སེང་གེ་འདྲ་བ་ཞེས་བྱའོ། །ཡུན་རིང་པོ་ནས་རང་གི་ཉེས་པ་ལ་ཡོངས་སུ་འཇལ་བ་དང ། གཞན་གྱི་འཁྲུལ་པ་དང ། གཞན་གྱི་སྐྱོན་ལ་ཉེས་པར་མི་ལྟ་བ་དང ། རྩོད་པའི་རྩ་བ་དང ། གཞན་འབྱེད་པར་བྱེད་པའི་བརྗོད་པ་ཡོངས་སུ་སྤང་བ་དང ། གསང་ཚིག་ལེགས་པར་འདོར་བ་དང ། ངག་གི་ལས་ཀྱི་མཐའ་ལེགས་པར་བསྲུངས་པའི་ཕྱིར་ཐལ་གོང་རྒྱས་པ་ཞེས་བྱའོ། །ཡུན་རིང་པོ་ནས་ཕ་མ་དང ། དགེ་སྦྱོང་དང ། བྲམ་ཟེ་དང ། བླ་མ་དང ། སྦྱིན་གནས་རྣམས་ལ་ལྡང་བ་དང ། བསུ་བ་དང ། གསོང་པོར་སྨྲ་བ་དང ། བསྟན་བཅོས་ཐམས་ཅད་ལ་འཇིགས་པ་མེད་པས་རྩོད་པར་འདོད་པའི་སེམས་ཅན་ཚར་གཅོད་པ། རང་གི་ཆོས་འདུལ་བ་དང་འཐུན་པར་ཡང་དག་པར་འཇུག་པ་དང ། རྒྱལ་པོ་དང་བློན་པོ་ལ་སོགས་པ་དགེ་བའི་ལས་ཀྱི་ལམ་ལ་འགོད་པ་དང ། སྒོམ་དུ་འཇུག་པ་དང ། དེ་བཞིན་གཤེགས་པའི་བསྟན་པ་ཡོངས་སུ་འཛིན་པ་དང ། ཀུན་དུ་འཛིན་པ་དང ། དགེ་བའི་སྤྱོད་པ་ཐམས་ཅད་ཡང་དག་པར་འཛིན་དུ་འཇུག་པའི་སྔོན་དུ་འགྲོ་བའི་ཕྱིར་དཔུང་མགོ་ཤིན་དུ་ཟླུམ་པ་ཞེས་བྱའོ། །ཡུན་རིང་པོ་ནས་སློང་བའི་བསམ་པ་ཇི་ལྟ་བ་བཞིན་དུ་དངོས་པོ་ཐམས་ཅད་ཡོངས་སུ་གཏོང་བ་དང་སྙན་པར་སྨྲ་བ་དང ། ལྷགས་པ་རྣམས་ལ་ཡང་མི་བརྙས་ཤིང་སྤ་གོང་བར་མི་བྱེད་པ་དང ། མི་སྐྱོ་བ་དང ། ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཡོངས་སུ་རྫོགས་པར་བྱ་བའི་སྦྱིན་པ་ཡོངས་སུ་གཏོང་བ་བརྟན་པོར་ཡང་དག་པར་བླངས་པ་མི་འདོར་བའི་ཕྱིར་འགྲམ་པ་སེང་གེའི་འདྲ་བ་ཞེས་བྱའོ། །ཡུན་རིང་པོ་ནས་ཕྲ་མའི་ཚིག་ཡོངས་སུ་སྤོང་བ་དང ། དབྱེན་གྱི་གསང་ཚིག་མི་འཛིན་པ་དང ། འདུམ་པར་བསྡུམས་བྱེད་འདོད་པ་དང ། འདུམ་པ་རྣམས་དབྱེ་བར་མི་སེམས་པ་དང ། ཕྲ་མའི་ཚིག་ལ 41.237b སྨོད་པ་དང ། འདུམ་པ་བསྡུམས་པའི་ཡོན་ཏན་གྱི་བསྔགས་པ་བརྗོད་པར་སྦྱོར་བའི་ཕྱིར་ཚེམས་བཞི་བཅུ་མཉམ་པ་ཞེས་བྱའོ། །ཡུན་རིང་པོ་ནས་ནག་པོའི་ཕྱོགས་ཡོངས་སུ་སྤོང་བ་དང ། དཀར་པོའི་ཕྱོགས་དགེ་བའི་རྩ་བ་སོགས་པ་དང ། ལས་གནག་ཅིང་རྣམ་པར་སྨིན་པ་ཡང་གནག་པ་ཡོངས་སུ་སྤོང་བ་དང ། ལས་དཀར་ཞིང་རྣམ་པར་སྨིན་པ་ཡང་དཀར་བ་བསྔགས་པ་དང ། འོ་མ་དང་སྦྱར་བའི་ཟས་དང ། གོས་དཀར་པོ་སྦྱིན་པ་དང ། དེ་བཞིན་གཤེགས་པའི་རྟེན་རྣམས་ལ་རྡོ་ཐལ་འོ་མ་དང་བསྲེས་པ་པིར་གྱིས་སྐུད་པ་དང ། མེ་ཏོག་སུ་མ་ན་དང ། བར་ཤ་ཀར་དང ། དྷ་ནུ་སྐ་རིའི་ཕྲེང་བ་བརྒྱུས་པའི་མེ་ཏོག་གི་ཆུན་པོ་དང ། མེ་ཏོག་ཁ་དོག་དཀར་པོ་སྦྱིན་པའི་ཕྱིར། ཚེམས་ཤིན་ཏུ་དཀར་བ་ཞེས་བྱའོ། །ཡུན་རིང་པོ་ནས་འཕྱ་བ་དང ། འཐིང་བ་རྣམ་པར་སྤོང་བ་དང ། ཀུན་དགའ་བར་བྱེད་པ་དང ། ཚིག་སྲུང་བ་དང ། ཀུན་དགའ་བར་བྱེད་པའི་ཚིག་བརྗོད་པ་དང ། གཞན་གྱི་འཁྲུལ་པ་དང ། གཞན་གྱི་སྐྱོན་མི་ཚོལ་བ་དང་སེམས་ཅན་ཐམས་ཅད་ལ་སེམས་འཐུན་པར་ཡང་དག་པར་འཛིན་དུ་འཇུག་པ་དང་མཉམ་པར་སྦྱོར་བ་དང ། མཉམ་པར་ཆོས་སྟོན་པ་བརྟན་པོར་ཡང་དག་པར་བླངས་པ་ཡོངས་སུ་མི་འདོར་བའི་ཕྱིར། ཚེམས་ཐགས་བཟང་བ་ཞེས་བྱའོ་ཡུན་རིང་པོ་ནས་སེམས་ཅན་ཐམས་ཅད་ལ་རྣམ་པར་མི་འཚེ་བ་དང ། རྣམ་པར་འཐོ་མི་འཚམ་པ་དང ། ནད་སྣ་ཚོགས་ཀྱིས་ཐེབས་པ་ལ་རིམ་གྲོ་བྱེད་པ་དང ། ནད་པ་ལ་སྨན་བྱིན་པ་དང ། འདྲོན་པ་རྣམས་ལ་རོ་བྲོ་བ་ཐམས་ཅད་སྦྱིན་པས་ཡོངས་སུ་མི་སྐྱོ་བའི་ཕྱིར། རོ་བྲོ་བ་མཆོག་དང་ལྡན་པ་ཞེས་བྱའོ། །ཡུན་རིང་པོ་ནས་བརྫུན་དང ། ཚིག་རྩུབ་པོ་དང ། བརླང་པོ་དང ། གཡོ་དང ། གཞན་ལ་གནོད་པ་དང ། གཞན་འཁྲུག་པར་བྱེད་པ་དང ། མི་སྙན་པ་དང ། གཞན་གྱི་མཚང་འདྲུ་བའི་ཚིག་ཡོངས་སུ་སྤོང་བ་དང ། བྱམས་པ་དང་སྙིང་རྗེ་ལ་སྦྱོར་བ་དང ། དགའ་བ་དང ། མཆོག་ཏུ་དགའ་བར་བྱེད་པ་དང ། འཇམ་པ་དང ། སྙན་པ་དང ། མཉེན་པ་དང ། སྙིང་དུ་འཐད་པ་དང ། སེམས་ཅན་གྱི་དབང་པོ 41.238a ཚིམ་པར་བྱེད་པ་དང ། ཡང་དག་པའི་ངག་ལ་ཡང་དག་པར་སྦྱོར་བའི་ཕྱིར་ཚངས་པའི་དབྱངས་ལྟ་བུ་ཞེས་བྱའོ། །ཡུན་རིང་པོ་ནས་ཕ་མ་ལ་བྱ་བ་དང་འདྲ་བར་སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་མིག་ཏུ་སྦྱོར་བ་དང ། བུ་གཅིག་པ་ལ་བྱ་བ་བཞིན་དུ་སློང་བ་ལ་བྱམས་པ་དང ། སྙིང་རྗེ་སྔོན་དུ་འགྲོ་བས་ལྟ་བ་དང ། སྤ་གོང་བར་མི་བྱེད་པ་དང ། དད་པའི་དབང་པོས་དེ་བཞིན་གཤེགས་པའི་མཆོད་རྟེན་ལ་མིག་མི་འཛུམས་པར་ལྟ་བ་དང ། སེམས་ཅན་གཞན་དེ་བཞིན་གཤེགས་པ་ལ་ལྟ་བ་ཡང་དག་པར་འཛིན་དུ་འཇུག་པ་བརྟན་པོར་ཡང་དག་པར་བླངས་པའི་ཕྱིར་སྤྱན་མཐོན་ཏིང་དུ་འདུག་པ་ཞེས་བྱའོ། །ཡུན་རིང་པོ་ནས་བློ་གྲོས་དམན་པ་དང ། སེམས་པ་དམན་པ་རྣམ་པར་སྤོང་བ་དང ། རྒྱ་ཆེན་པོ་དང ། རླབས་པོ་ཆེ་ལ་མོས་པ་ཡོངས་སུ་རྫོགས་པར་བྱེད་པ་དང ། བླ་ན་མེད་པའི་ཆོས་ལ་མོས་པའི་སེམས་ཅན་ཡང་དག་པར་འཛུད་པ་དང ། ཁྲོ་གཉེར་གྱི་བཞིན་རྣམ་པར་སྤོང་བ་དང ། འཛུམ་པའི་བཞིན་དང་ལྡན་པ་དང ། དགེ་བའི་བཤེས་གཉེན་ཐམས་ཅད་ཀྱི་གན་དུ་འགྲོ་ཞིང་མངོན་དུ་ཕྱོགས་པའི་སྔོན་དུ་འགྲོ་བས་དགེ་བའི་རྩ་བ་ཐམས་ཅད་སོགས་པ་ལས་ཕྱིར་མི་ལྡོག་པའི་ཕྱིར་སྤྱན་གྱི་རྫི་མ་བའི་འདྲ་བ་ཞེས་བྱའོ། །ཡུན་རིང་པོ་ནས་ཚིག་གི་སྐྱོན་ཐམས་ཅད་རྣམ་པར་སྤོང་བ་དང ། ཉན་ཐོས་དང ། རང་སངས་རྒྱས་དང ། ཆོས་སྨྲ་བ་ཐམས་ཅད་ཀྱི་ཡོན་ཏན་གྱི་བསྔགས་པ་ཚད་མེད་པར་བརྗོད་པ་དང ། དེ་བཞིན་གཤེགས་པའི་མདོ་སྡེ་ཡི་གེར་འདྲི་བ་དང ། ཀློག་པ་དང ། འདོན་པ་དང ། རྣམ་པར་ཤེས་པར་བྱེད་པ་དང ། ཆོས་དེ་དག་གི་དོན་དང ། ཚིག་རབ་ཏུ་དབྱེ་བ་སེམས་ཅན་གཞན་ལ་གོ་བར་བྱེད་པ་ལ་མཁས་པའི་ཕྱིར། ལྗགས་ཡངས་པ་ཞེས་བྱའོ། །ཡུན་རིང་པོ་ནས་ཕ་མ་དང ། དགེ་སྦྱོང་དང་བྲམ་ཟེ་དང ། བླ་མ་དང ། སྦྱིན་གནས་ཀྱི་རྐང་པ་ལ་མགོ་བོས་ཕྱག་འཚལ་བ་དང ། རབ་ཏུ་བྱུང་བ་ལ་ཕྱག་འཚལ་བ་དང ། གསོང་པོར་སྨྲ་བ་དང ། དབུ་སྐྲ་སྦེད་པ་དང ། སྟེང་དུ་སྤོས་ཀྱི་འབྲུ་མར་འཐོར་བ་དང ། སློང་བ་ཐམས་ཅད 41.238b ལ་ཕྱེ་མ་དང ། ཕྲེང་བ་བརྒྱུས་པ་དང ། མགོ་རྒྱན་སྦྱིན་པའི་ཕྱིར། དབུ་གཙུག་ཏོར་དང་ལྡན་ཞིང་སྤྱི་གཙུག་བལྟར་མི་མཐོང་བ་ཞེས་བྱའོ། །ཡུན་རིང་པོ་ནས་གཏན་པ་མེད་པའི་མཆོད་སྦྱིན་ཐམས་ཅད་བྱེད་པ་དང ། སེམས་ཅན་ཐམས་ཅད་དགེ་བ་ཡང་དག་པར་ལེན་དུ་འཛུད་པ་དང ། དགེ་བའི་བཤེས་གཉེན་གྱིས་རྗེས་སུ་བསྟན་པ་དང་འགལ་བར་མི་བྱེད་པ་དང ། ཆོས་སྨྲ་བ་རྣམས་ཀྱིས་མངགས་ཏེ་ཕྱོགས་རྣམས་སུ་འགྲོ་བ་དང་འོངས་པས་ཡོངས་སུ་མི་སྐྱོ་བ་དང ། སངས་རྒྱས་དང ། བྱང་ཆུབ་སེམས་དཔའ་དང ། རང་སངས་རྒྱས་དང ། འཕགས་པ་ཉན་ཐོས་དང ། ཕ་མ་དང ། བླ་མ་དང ། སྦྱིན་གནས་ཐམས་ཅད་ལ་རིམ་གྲོ་བྱ་བར་སྤོས་སྣ་ཚོགས་ཀྱི་འབྲུ་མར་དང ། མར་དང ། སྒྲོན་མ་དང ། མར་མེ་རྣམས་ཀྱིས་མུན་པ་མུན་ནག་སེལ་བ་དང ། དེ་བཞིན་གཤེགས་པའི་སྐུ་གཟུགས་རྣམ་པའི་མཆོག་ཐམས་ཅད་དང་ལྡན་པ་མཛེས་པར་བྱེད་དུ་འཇུག་པ་དང ། འོ་མ་ལྟ་བུའི་མཛོད་སྤུས་བརྒྱན་པ་བྱེད་པ་དང ། སེམས་ཅན་གཞན་བྱང་ཆུབ་ཀྱི་སེམས་མངོན་དུ་བྱེད་དུ་འཇུག་པས། དགེ་བའི་ཚོགས་ཁྱད་པར་དུ་གྱུར་པའི་ཕྱིར། སྨིན་མཚམས་ཀྱི་མཛོད་སྤུ་མཛེས་པར་སྐྱེས་ཤིང ། གཡས་སུ་འཁྱིལ་ལ་འབར་ཞིང ། ཁ་དོག་རྣམ་པར་དག་པ་སྣང་བ་དང་ལྡན་པ་ཞེས་བྱའོ། །སྲེད་མེད་ཀྱི་བུ་ཆེན་པོའི་སྟོབས་དང་ལྡན་པའི་ཕྱིར། མཐུ་ཆེན་པོ་བརྙེས་པ་ཞེས་བྱའོ། །བདུད་བྱེ་བ་ཕྲག་བརྒྱ་ཐུལ་བའི་སྟོབས་དང་ལྡན་པའི་ཕྱིར། སྲེད་མེད་ཀྱི་བུ་ཆེན་པོའི་སྟོབས་དང་ལྡན་པ་ཞེས་བྱའོ། །དེ་བཞིན་གཤེགས་པའི་སྟོབས་བཅུ་དང་ལྡན་པའི་ཕྱིར། ཕས་ཀྱི་རྒོལ་བ་ཐམས་ཅད་འདུལ་བ་ཞེས་བྱའོ། །གནས་དང་གནས་མ་ཡིན་པ་མཁྱེན་པ་ལ་མཁས་པ་དང ། དམན་པ་ཉི་ཚེ་བའི་ཐེག་པ་རྣམ་པར་སྤོང་བ་དང ། ཐེག་པ་ཆེན་པོའི་ཡོན་ཏན་ཡང་དག་པར་སྒྲུབ་པའི་སྟོབས་དང་ལྡན་པས། སྟོབས་དེ་ལ་སྦྱོར་བ་ཆོག་མི་ཤེས་པའི་ཕྱིར། དེ་བཞིན་གཤེགས་པའི་སྟོབས་བཅུ་དང་ལྡན་པ་ཞེས་བྱའོ། །འདས་པ་དང ། མ་འོངས་པ་དང ། ད་ལྟར་བྱུང་བའི་ལས་ཡང་དག་པར 41.239a བླངས་པའི་རྒྱུ་དང ། རྣམ་པར་སྨིན་པ་མཁྱེན་པའི་སྟོབས་དང་ལྡན་པའི་ཕྱིར། གནས་དང་གནས་མ་ཡིན་པ་མཁྱེན་པ་ལ་མཁས་པ་དང ། དམན་པ་ཉི་ཚེ་བའི་ཐེག་པ་རྣམ་པར་སྤོང་བ་དང ། ཐེག་པ་ཆེན་པོའི་ཡོན་ཏན་ཡང་དག་པར་སྒྲུབ་པའི་སྟོབས་དང་ལྡན་པས་སྟོབས་ལ་སྦྱོར་བས་ཆོག་མི་ཤེས་པ་ཞེས་བྱའོ། །སེམས་ཅན་ཐམས་ཅད་ཀྱི་དབང་པོ་དང ། བརྩོན་འགྲུས་ཀྱི་རིམ་པ་མཁྱེན་པའི་སྟོབས་དང་ལྡན་པའི་ཕྱིར། འདས་པ་དང ། མ་འོངས་པ་དང ། ད་ལྟར་བྱུང་བའི་ལས་ཡང་དག་པར་བླངས་པའི་རྒྱུ་དང ། རྣམ་པར་སྨིན་པ་མཁྱེན་པའི་སྟོབས་དང་ལྡན་པ་ཞེས་བྱའོ། །ཁམས་དུ་མ་དང ། ཁམས་སྣ་ཚོགས་པའི་འཇིག་རྟེན་ལ་འཇུག་པ་མཁྱེན་པའི་སྟོབས་དང་ལྡན་པའི་ཕྱིར། སེམས་ཅན་ཐམས་ཅད་ཀྱི་དབང་པོ་དང་བརྩོན་འགྲུས་ཀྱི་རིམ་པ་མཁྱེན་པའི་སྟོབས་དང་ལྡན་པ་ཞེས་བྱའོ། །མོས་པ་དུ་མ་དང ། མོས་པ་སྣ་ཚོགས་དང ། མོས་པ་མ་ལུས་པ་དང ། རྣམ་པར་གྲོལ་བ་མཁྱེན་པའི་སྟོབས་དང་ལྡན་པའི་ཕྱིར། ཁམས་དུ་མ་དང ། ཁམས་སྣ་ཚོགས་པའི་འཇིག་རྟེན་ལ་འཇུག་པ་མཁྱེན་པའི་སྟོབས་དང་ལྡན་པ་ཞེས་བྱའོ། །ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང་ལྡན་པའི་ཕྱིར། མོས་པ་དུ་མ་དང ། མོས་པ་མ་ལུས་པ་ཐམས་ཅད་དང ། རྣམ་པར་གྲོལ་བ་མཁྱེན་པའི་སྟོབས་དང་ལྡན་པ་ཞེས་བྱའོ། །བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་ཀུན་ནས་ཉོན་མོངས་པ་དང ། རྣམ་པར་བྱང་བ་དང ། རྣམ་པར་གཞག་པ་ཐམས་ཅད་མཁྱེན་པའི་སྟོབས་དང་ལྡན་པའི་ཕྱིར། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང་ལྡན་པ་ཞེས་བྱའོ། །སྔོན་གྱི་གནས་རྣམ་པ་དུ་མ་མཁྱེན་པ་ཆགས་པ་མི་མངའ་བའི་སྟོབས་དང་ལྡན་པའི་ཕྱིར། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་ཀུན་ནས་ཉོན་མོངས་པ་དང ། རྣམ་པར་བྱང་བ་དང ། རྣམ་པར་གཞག་པ་ཐམས་ཅད་མཁྱེན་པའི 41.239b སྟོབས་དང་ལྡན་པ་ཞེས་བྱའོ། །གཟུགས་མ་ལུས་པ་ཐམས་ཅད་སྒྲིབ་པ་མེད་པར་གཟིགས་པའི་ལྷའི་སྤྱན་གྱི་མཁྱེན་པའི་སྟོབས་དང་ལྡན་པའི་ཕྱིར། སྔོན་གྱི་གནས་རྣམ་པ་དུ་མ་དྲན་པ་མཁྱེན་པ་ཆགས་པ་མི་མངའ་བའི་སྟོབས་དང་ལྡན་པ་ཞེས་བྱའོ། །བག་ཆགས་ཀྱི་མཚམས་སྦྱོར་བར་གྱུར་པ་ཐམས་ཅད་དང ། ཟག་པ་ཐམས་ཅད་མ་ལུས་པར་ཟད་པ་མཁྱེན་པའི་སྟོབས་དང་ལྡན་པའི་ཕྱིར། གཟུགས་མ་ལུས་པ་ཐམས་ཅད་སྒྲིབ་པ་མེད་པར་གཟིགས་པའི་ལྷའི་སྤྱན་གྱིས་མཁྱེན་པའི་སྟོབས་དང་ལྡན་པ་ཞེས་བྱའོ། །ཆོས་ཐམས་ཅད་མ་ལུས་པར་མངོན་པར་རྫོགས་པར་སངས་རྒྱས་སོ་ཞེས་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱི་ཟིལ་གྱིས་མི་ནོན་པའི་དམ་བཅས་པའི་མི་འཇིགས་པ་བརྙེས་པའི་ཕྱིར། བག་ཆགས་ཀྱི་མཚམས་སྦྱོར་བར་གྱུར་པ་ཐམས་ཅད་དང ། ཟག་པ་ཐམས་ཅད་མ་ལུས་པར་ཟད་པ་མཁྱེན་པའི་སྟོབས་དང་ལྡན་པ་ཞེས་བྱའོ། །ཀུན་ནས་ཉོན་མོངས་པ་ཐམས་ཅད་མྱ་ངན་ལས་འདས་པའི་བར་དུ་གཅོད་པའི་ཆོས་སུ་བསྟན་ཏེ། དེར་དམ་བཅས་པ་ལ། ལྷ་དང་བཅས་པའི་འཇིག་རྟེན་གྱིས་མི་ཤིགས་པའི་དམ་བཅས་པ་མི་འཇིགས་པ་བརྙེས་པའི་ཕྱིར། ཆོས་ཐམས་ཅད་མ་ལུས་པར་མངོན་པར་རྫོགས་པར་སངས་རྒྱས་སོ་ཞེས་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱིས་ཟིལ་གྱིས་མི་ནོན་པའི་དམ་བཅས་པའི་མི་འཇིགས་པ་བརྙེས་པ་ཞེས་བྱའོ། །ངེས་པར་འབྱུང་བའི་ལམ་བསྒྲུབས་ན་མྱ་ངན་ལས་འདས་པ་རྙེད་པར་འགྱུར་རོ་ཞེས་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱིས་བརྒལ་དུ་མེད་པའི་དམ་བཅས་པའི་མི་འཇིགས་པ་བརྙེས་པའི་ཕྱིར། ཀུན་ནས་ཉོན་མོངས་པ་ཐམས་ཅད་མྱ་ངན་ལས་འདས་པའི་བར་དུ་གཅོད་པའི་ཆོས་སུ་བསྟན་ཏེ། དེར་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱིས་མི་ཤིགས་པའི་དམ་བཅས་པའི་མི་འཇིགས་པ་བརྙེས་པ་ཞེས་བྱའོ། །ཟག་པ་ཐམས་ཅད་སྤངས་པར་མཁྱེན་པར་དམ་བཅས་པ་ལ་ལྷ་དང་བཅས་པའི 41.240a འཇིག་རྟེན་གྱིས་མི་ཟློགས་པའི་དམ་བཅས་པའི་མི་འཇིགས་པ་བརྙེས་པའི་ཕྱིར། ངེས་པར་འབྱུང་བའི་ལམ་བསྒྲུབས་ན། མྱ་ངན་ལས་འདས་པ་བརྙེས་པར་འགྱུར་རོ་ཞེས་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱིས་བརྒལ་དུ་མེད་པའི་དམ་བཅས་པའི་མི་འཇིགས་པ་བརྙེས་པ་ཞེས་བྱའོ། །ཚིག་མ་འཁྲུལ་བས་ཆོས་སྟོན་པའི་ཕྱིར། ཟག་པ་ཐམས་ཅད་སྤངས་པ་མཁྱེན་པར་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱིས་མི་ཟློགས་པའི་དམ་བཅས་པའི་མི་འཇིགས་པ་བརྙེས་པ་ཞེས་བྱའོ། །སྒྲ་མེད་པ་དང ། བརྗོད་དུ་མེད་པའི་ཆོས་ཀྱི་ངོ་བོ་ཉིད་ཐུགས་སུ་ཆུད་པའི་ཕྱིར། ཚིག་མ་འཁྲུལ་བའི་ཆོས་སྟོན་པ་ཞེས་བྱའོ། །བྲལ་བ་མེད་པའི་ཕྱིར་སྒྲ་མེད་པ་དང ། བརྗོད་དུ་མེད་པའི་ཆོས་ཀྱི་ངོ་བོ་ཉིད་ཐུགས་སུ་ཆུད་པ་ཞེས་བྱའོ། །སེམས་ཅན་ཐམས་ཅད་ཀྱི་སྒྲ་ཚད་མེད་པ་སངས་རྒྱས་ཀྱི་སྒྲ་སྐད་དུ་བྱིན་གྱིས་རློབ་ནུས་པའི་ཕྱིར། བྲལ་བ་མེད་པ་ཞེས་བྱའོ། །བསྙེལ་བ་མི་མངའ་བའི་ཕྱིར། སེམས་ཅན་ཐམས་ཅད་ཀྱི་སྒྲ་ཚད་མེད་པ་སངས་རྒྱས་ཀྱི་ཆོས་ཀྱི་སྒྲ་སྐད་དུ་བྱིན་གྱིས་རློབ་ནུས་པ་ཞེས་བྱའོ། །སྣ་ཚོགས་ཀྱི་འདུ་ཤེས་དང་བྲལ་བའི་ཕྱིར་བསྙེལ་བ་མི་མངའ་བ་ཞེས་བྱའོ། །སེམས་ཅན་ཐམས་ཅད་ཀྱི་སེམས་མཉམ་པར་བཞག་པ་བས་ཤིན་དུ་མཉམ་པར་བཞག་པའི་ཕྱིར། སྣ་ཚོགས་ཀྱི་འདུ་ཤེས་དང་བྲལ་བ་ཞེས་བྱའོ། །སོ་སོར་མ་བརྟགས་པའི་བཏང་སྙོམས་ཅན་གྱི་ཕྱིར། སེམས་ཅན་ཐམས་ཅད་ཀྱི་སེམས་མཉམ་པར་བཞག་པ་བས། ཤིན་དུ་མཉམ་པར་བཞག་པ་ཞེས་བྱའོ། །མོས་པའི་འདུ་བྱེད་ཀྱི་ཏིང་ངེ་འཛིན་ལས་ཡོངས་སུ་མ་ཉམས་པའི་ཕྱིར། སོ་སོར་མ་བརྟགས་པའི་བཏང་སྙོམས་ཅན་ཞེས་བྱའོ། །བརྩོན་འགྲུས་ཀྱི་འདུ་བྱེད་ཀྱི་ཏིང་ངེ་འཛིན་གྱིས་རྒྱུན་མི་འཆད་ཅིང་བརྩོན་འགྲུས་ལས་ཡོངས་སུ་མ་ཉམས་པའི་ཕྱིར། མོས་པའི་འདུ་བྱེད་ཀྱི་ཏིང་ངེ་འཛིན་ལས་ཡོངས་སུ་མ་ཉམས་པ་ཞེས་བྱའོ། །དྲན་པ་ལས་ཡོངས་སུ་མ་ཉམས་པའི་ཕྱིར། 41.240b བརྩོན་འགྲུས་ལས་ཡོངས་སུ་མ་ཉམས་པ་ཞེས་བྱའོ། །ཤེས་རབ་ལས་ཡོངས་སུ་མ་ཉམས་པའི་ཕྱིར། དྲན་པ་ལས་ཡོངས་སུ་མ་ཉམས་པ་ཞེས་བྱའོ། །རྣམ་པར་གྲོལ་བ་ལས་ཡོངས་སུ་མ་ཉམས་པའི་ཕྱིར། ཤེས་རབ་ལས་ཡོངས་སུ་མ་ཉམས་པ་ཞེས་བྱའོ། །རྣམ་པར་གྲོལ་བའི་ཡེ་ཤེས་མཐོང་བ་ལས་ཡོངས་སུ་མ་ཉམས་པའི་ཕྱིར། རྣམ་པར་གྲོལ་བ་ལས་ཡོངས་སུ་མ་ཉམས་པ་ཞེས་བྱའོ། །ལུས་ཀྱི་ལས་དང་ངག་གི་ལས་དང་ཡིད་ཀྱི་ལས་ཐམས་ཅད་ཀྱི་སྔོན་དུ་ཡེ་ཤེས་འགྲོ་ཞིང ། ཡེ་ཤེས་ཀྱི་རྗེས་སུ་འབྲང་བའི་ཡེ་ཤེས་དང་ལྡན་པའི་ཕྱིར། རྣམ་པར་གྲོལ་བའི་ཡེ་ཤེས་མཐོང་བ་ལས་ཡོངས་སུ་མ་ཉམས་པ་ཞེས་བྱའོ། །འདས་པ་དང ། མ་འོངས་པ་དང ། ད་ལྟར་བྱུང་བའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་དང ། ལྡན་པའི་ཕྱིར། ལུས་ཀྱི་ལས་དང་ངག་གི་ལས་དང ། ཡིད་ཀྱི་ལས་ཐམས་ཅད་ཀྱི་སྔོན་དུ་ཡེ་ཤེས་འགྲོ་ཞིང ། ཡེ་ཤེས་ཀྱི་རྗེས་སུ་འབྲང་བའི་ཡེ་ཤེས་དང་ལྡན་པ་ཞེས་བྱའོ། །སྒྲིབ་པ་མེད་པའི་རྣམ་པར་ཐར་པ་བརྙེས་པའི་ཕྱིར། དུས་གསུམ་ལ་མ་ཆགས་མ་ཐོགས་པའི་ཡེ་ཤེས་མཐོང་བ་དང་ལྡན་པ་ཞེས་བྱའོ། །སེམས་ཅན་ཐམས་ཅད་ཀྱི་སྤྱོད་པ་ལ་འཇུག་པ་ལ་མཁས་པ་རྒྱུན་མི་འཆད་པའི་ཕྱིར། སྒྲིབ་པ་མེད་པའི་རྣམ་པར་ཐར་པ་བརྙེས་པ་ཞེས་བྱའོ། །སོ་སོར་ཅི་རིགས་པར་ཆོས་སྟོན་པ་ལ་མཁས་པའི་ཕྱིར། སེམས་ཅན་ཐམས་ཅད་ཀྱི་སྤྱོད་པ་ལ་འཇུག་པ་ལ་མཁས་པ་རྒྱུན་མི་འཆད་པ་ཞེས་བྱའོ། །དབྱངས་ཀྱི་ཡན་ལག་ཐམས་ཅད་ཀྱི་དཀྱིལ་འཁོར་དམ་པ་ཕ་རོལ་ཏུ་ཕྱིན་པའི་ཕྱིར། སོ་སོར་ཅི་རིགས་པར་ཆོས་སྟོན་པ་ལ་མཁས་པ་ཞེས་བྱའོ། །སྒྲ་ཐམས་ཅད་ཀྱི་བྲག་ཅ་འབྱིན་པ་ལ་མཁས་པ་བརྙེས་པའི་ཕྱིར། དབྱངས་ཀྱི་ཡན་ལག་ཐམས་ཅད་ཀྱི་དཀྱིལ་འཁོར་དམ་པའི་ཕ་རོལ་ཏུ་ཕྱིན་པ་ཞེས་བྱའོ། །ལྷ་དང་ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོའི་སྐད་དང་ལྡན་པ་ཞེས་བྱའོ། །ཚངས་པའི 41.241a སྒྲ་དབྱངས་བསྒྲགས་པའི་དབྱངས་ལྟ་བུ་ཞེས་བྱའོ། །ཀ་ལ་པིང་ཀའི་སྒྲ་སྐད་ལྟ་བུ་ཞེས་བྱའོ། །རྔ་བོ་ཆེ་དང ། གླུ་དབྱངས་ཀྱི་སྒྲ་ལྟ་བུ་ཞེས་བྱའོ། །སའི་སྒྲའི་ང་རོའི་སྒྲ་ལྟ་བུ་ཞེས་བྱའོ། །ཀླུའི་རྒྱལ་པོ་རྒྱ་མཚོས་འབྲུག་སྒྲ་བསྒྲགས་པའི་སྒྲ་སྐད་ལྟ་བུ་ཞེས་བྱའོ། །སེང་གེ་དང ། ཁྱུ་མཆོག་ཏུ་གྱུར་པ་བསྒྱིངས་པའི་སྒྲ་སྐད་ལྟ་བུ་ཞེས་བྱའོ། །སེམས་ཅན་ཐམས་ཅད་ཀྱི་སྒྲ་སྐད་བསྒྲགས་པ་དང་འཐུན་པར་སྒྲོགས་པས་ཚིམ་པར་བྱེད་པའི་སྒྲ་དང་ལྡན་པ་ཞེས་བྱའོ། །ཆགས་པ་མེད་ཅིང་སྒྲིབ་པ་མེད་པར་འཁོར་གྱི་དཀྱིལ་འཁོར་དགའ་བར་བྱེད་པའི་སྒྲ་དང་ལྡན་པ་ཞེས་བྱའོ། །སྐད་ཅིག་ལས་སྐད་ཐམས་ཅད་གོ་བར་བྱེད་པའི་སྒྲ་དང་ལྡན་པ་ཞེས་བྱའོ། །ཚངས་པའི་དབང་པོས་མཆོད་པ་ཞེས་བྱའོ། །ལྷའི་དབང་པོས་སྟི་སྟང་དུ་བྱས་པ་ཞེས་བྱའོ། །ཀླུའི་དབང་པོས་ཕྱག་བྱས་པ་ཞེས་བྱའོ། །གནོད་སྦྱིན་གྱི་དབང་པོས་ཞལ་དུ་བལྟས་པ་ཞེས་བྱའོ། །དྲི་ཟའི་དབང་པོས་གླུ་བླངས་པ་ཞེས་བྱའོ། །སྲིན་པོའི་དབང་པོས་དབང་པོ་དང་བས་མིག་མི་འཛུམས་པར་བལྟས་པ་ཞེས་བྱའོ། །ལྷ་མ་ཡིན་གྱི་དབང་པོས་མངོན་པར་བཏུད་པ་ཞེས་བྱའོ། །ནམ་མཁའ་ལྡིང་གི་དབང་པོས་རྣམ་པར་མ་གཙེས་པར་བལྟས་པ་ཞེས་བྱའོ། །མི་འམ་ཅིའི་དབང་པོས་མངོན་པར་བསྟོད་པ་ཞེས་བྱའོ། །ལྟོ་འཕྱེ་ཆེན་པོའི་དབང་པོས་བལྟ་འདོད་པ་ཞེས་བྱའོ། །མིའི་དབང་པོས་མངོན་དུ་ཡང་དག་པར་མཆོད་པ་ཞེས་བྱའོ། །དགྲ་བཅོམ་པའི་ཚོགས་མང་པོས་བསྟེན་པ་ཞེས་བྱའོ། །བྱང་ཆུབ་སེམས་དཔའ་ཐམས་ཅད་ཡང་དག་པར་འཛིན་དུ་འཇུག་པ་དང ། ཡང་དག་པར་གཟེང་བསྟོད་པ་དང ། ཡང་དག་པར་དགའ་བར་མཛད་པ་ཞེས་བྱའོ། །ཟང་ཟིང་མེད་པར་ཆོས་སྟོན་པ་ཞེས་བྱའོ། །ཚིག་དང ། ཚིག་འབྲུ་ཉམས་པ་མེད་པར་འབྲས་བུ་ཡོད་པའི་ཆོས་སྟོན་པ་ཞེས་བྱའོ། །བྱམས་པ་ཆོས་ཀྱི་འཁོར་ལོ་བསྐོར་བ་འདི་ནི་དེ་བཞིན་གཤེགས་པའི་ཡོན་ཏན་བསྔགས་པའི་ཕྱོགས་ལ་འཇུག་པ་ཅུང་ཟད་ཙམ་ཞིག་མདོར་བསྟན་དུ 41.241b ཟད་དེ། བྱམས་པ་རྒྱས་པར་བྱ་བ་ནི་དེ་བཞིན་གཤེགས་པས་བསྐལ་པ་འམ། བསྐལ་པ་ལས་ལྷག་པར་བསྟན་པ་འདིའི་མཐར་མི་ཕྱིན་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །ཟབ་ཅིང་བལྟ་དཀའ་ཕྲ་བ་ཡི། །ཆོས་ཀྱི་འཁོར་ལོ་རབ་བསྐོར་ཏེ། །དེ་ལ་ཕ་རོལ་མུ་སྟེགས་ཅན། །ཀུན་དང་བདུད་ཀྱིས་མི་ཆུད་དོ། །ཀུན་གཞི་མེད་ཅིང་སྤྲོས་མེད་པ། །སྐྱེ་བ་མེད་ཅིང་འབྱུང་མེད་ལ། །དབེན་ཞིང་རང་བཞིན་སྟོང་པ་ཡི། །ཆོས་ཀྱི་འཁོར་ལོ་རབ་བསྐོར་ཏོ། །བླང་བ་མེད་ཅིང་དོར་མེད་ལ། །མཚན་མ་མེད་ཅིང་མཚན་ཉིད་མེད། །མཉམ་པ་ཉིད་ཀྱི་ཆོས་བསྟན་པའི། །འཁོར་ལོ་སངས་རྒྱས་ཀྱིས་བསྐོར་ཏོ། །ཇི་ལྟར་སྒྱུ་མ་སྨིག་རྒྱུ་དང ། །རྨི་ལམ་བྲག་ཆ་ཆུ་ཟླ་དང ། །དེ་དག་འདྲ་བའི་འཁོར་ལོ་ནི། །འཇིག་རྟེན་མགོན་པོས་རབ་བསྐོར་ཏོ། །བརྟེན་པའི་ཆོས་ལ་འཇུག་བྱེད་པ། །ཆད་མིན་རྟག་པ་མ་ཡིན་པ། །ལྟ་བ་ཐམས་ཅད་ཆད་པ་ནི། །ཆོས་ཀྱི་འཁོར་ལོ་ཡིན་ཞེས་བརྗོད། །རྟག་ཏུ་ནམ་མཁའ་མཚུངས་འདྲ་ཞིང ། །རྣམ་པར་མི་རྟོག་འོད་གསལ་བ། །མཐའ་དང་དབུང་མེད་བསྟན་པ་ནི། །ཆོས་ཀྱི་འཁོར་ལོར་འདིར་བརྗོད་དོ། །ཡོད་དང་མེད་ལས་རྣམ་གྲོལ་ཞིང ། །བདག་དང་བདག་མེད་རྣམ་སྤངས་ལ། །རང་བཞིན་མ་སྐྱེས་བསྟན་པ་ནི། །ཆོས་ཀྱི་འཁོར་ལོར་འདིར་བརྗོད་དོ། །ཡང་དག་མཐའ་ནི་མཐའ་མིན་པ། །དེ་བཞིན་ཉིད་ལ་དེ་བཞིན་ཉིད། །གཉིས་སུ་མེད་པའི་ཆོས་བསྟན་པ། །ཆོས་ཀྱི་འཁོར་ལོར་བརྗོད་པ་ཡིན། །མིག་ནི་ངོ་བོ་ཉིད་ཀྱིས་སྟོང ། །དེ་བཞིན་སྣ་དང་རྣ་བ་དང ། །ལྕེ་དང་ལུས་དང་སེམས་ཀྱང་ནི། །སྟོང་པའི་བདག་ཉིད་གཡོ་བ་མེད། །འདི་ལྟ་བུ་ཡི་འཁོར་ལོ་འདི། །ཆོས་ཀྱི་འཁོར་ལོ་ཞེས་བརྗོད་དེ། །སེམས་ཅན་མི་མཁས་རྟོགས་བྱེད་པས། །དེས་ན་སངས་རྒྱས་ཞེས་བརྗོད་དོ། །ཆོས་ཀྱི་མཚན་ཉིད་རང་བཞིན་འདི། །གཞན་གྱིས་བསྟན་པ་མེད་པར་ནི། །ང་བདག་ཉིད་ཀྱིས་སངས 41.242a རྒྱས་ཏེ། །དེས་ན་རང་བྱུང་མིག་དང་ལྡན། །ཆོས་རྣམས་ཀུན་ལ་དབང་བརྙེས་པས། །ཆོས་ཀྱི་རྗེ་ཞེས་བརྗོད་པ་ཡིན། །ཆོས་ལ་ཚུལ་དང་ཚུལ་མིན་མཁྱེན། །དེས་ན་འདྲེན་པར་བརྗོད་པ་ཡིན། །ཇི་ལྟར་འདུལ་བར་འགྱུར་བ་ལ། །སྐྱེ་བོ་དཔག་ཏུ་མེད་བཏུལ་ཏེ། །འདུལ་བའི་ཕ་རོལ་ཕྱིན་པར་གྱུར། །དེས་ན་རྣམ་པར་འདྲེན་ཅེས་བརྗོད། །སེམས་ཅན་གང་དག་ལམ་ལས་ཉམས། །དེ་དག་རྣམས་ལ་ལམ་མཆོག་བསྟན། །ཕ་རོལ་གྱི་ནི་འགྲམ་དུ་བཀྲི། །དེ་ཕྱིར་ང་ནི་རྣམ་པར་འདྲེན། །བསྡུ་བའི་དངོས་པོ་ཤེས་པ་ཡིས། །སྐྱེ་བོ་དག་ནི་ངས་བསྡུས་ཏེ། །འཁོར་བའི་འབྲོག་ལས་རྒལ་བས་ན། །དེས་ན་ང་ནི་དེད་དཔོན་ཡིན། །ཆོས་རྣམས་ཀུན་ལ་དབང་སྒྱུར་ཏེ། །དེས་ན་རྒྱལ་བ་ཆོས་ལ་མངའ། །ཆོས་ཀྱི་འཁོར་ལོ་རབ་བསྐོར་བས། །ཆོས་ཀྱི་རྒྱལ་པོར་བརྗོད་པ་ཡིན། །ཆོས་ཀྱི་སྦྱིན་བདག་སྟོན་པ་ཡིན། །ཆོས་ཀྱི་བདག་པོ་བླ་ན་མེད། །མཆོད་སྦྱིན་ལེགས་མཛད་དོན་གྲུབ་པ། །དགོངས་པ་རྫོགས་པ་བཀྲ་ཤིས་གྲུབ། །དབུགས་འབྱིན་མཛད་པ་དེ་གཟིགས་པ། །དཔའ་བོ་ཉོན་མོངས་ཆེན་པོ་སྤོང ། །གཡུལ་རྣམས་ཀུན་ལས་རྒལ་གྱུར་པ། །གྲོལ་བའི་སྐྱེས་བུ་ཐར་མཛད་པ། །འཇིག་རྟེན་གྱི་ནི་སྣང་གྱུར་པ། །ཤེས་རབ་ཡེ་ཤེས་འོད་མཛད་པ། །མི་ཤེས་མུན་པ་འཇོམས་པ་པོ། །སྒྲོན་མ་འཛིན་པ་འོད་ཆེན་ལྡན། །ཡེ་ཤེས་ཆེ་ལྡན་སྨན་པ་ཆེ། །ཉོན་མོངས་པ་ལས་གསོ་མཛད་པ། །སེམས་ཅན་ཉོན་མོངས་ཟུགས་རྣམས་ལ། །ཟུག་རྔུ་འབྱིན་པ་བླ་ན་མེད། །མཚན་རྣམས་ཐམས་ཅད་ཕུན་སུམ་ཚོགས། །དཔེ་བྱད་བཟང་པོ་ཀུན་གྱིས་མཛེས། །སྐུ་ཡིས་ཀུན་དུ་བཟང་བ་སྟེ། །དམན་པ་རྣམས་དང་འཐུན་པར་མཛད། །སྟོབས་བཅུའི་སྟོབས་དང་ཤིན་དུ་ལྡན། །བསྙེངས་པ་མི་མངའ་མི་བསྙེངས་པ། །མ་འདྲེས་རྣམ་པ་བཅཝ་བརྒྱད་ཀྱིས། །ཐུབ་པ་ཆེན་པོ་ཐེག་པ་མཆོག་།ཆོས་ཀྱི་འཁོར་ལོ་རབ་བསྐོར་བ། །འདི་ནི་མདོ་ཙམ་བཤད་པ་ཡིན། །དེ་བཞིན་གཤེགས་པའི་ཡོན་ཏན་བསྔགས། །འདི་ནི 41.242b ཅུང་ཟད་བརྗོད་པར་ཟད། །སངས་རྒྱས་ཡེ་ཤེས་མཐའ་ཡས་ཏེ། །ནམ་མཁའ་རྒྱ་ཆེ་མཉམ་པ་བཞིན། །བསྐལ་པ་ཟད་པར་བརྗོད་ཀྱང་ནི། །སངས་རྒྱས་ཡོན་ཏན་མི་ཟད་དོ། །ཆོས་ཀྱི་འཁོར་ལོ་བསྐོར་བའི་ལེའུ་ཞེས་བྱ་སྟེ། ཉི་ཤུ་རྩ་དྲུག་པའོ།། །། དེ་ནས་ལྷའི་བུ་གང་དག་གིས་དེ་བཞིན་གཤེགས་པ་ལ་ཆོས་ཀྱི་རྣམ་གྲངས་འདི་རབ་ཏུ་བཤད་པར་གསོལ་བ་བཏབ་པར་གྱུར་པ་དབང་ཕྱུག་དང ། དབང་ཕྱུག་ཆེན་པོ་དང ། དགའ་བོ་དང ། རབ་དགའ་དང ། ཙན་དན་དང ། མཆོད་པ་དང ། ཞི་བ་དང ། །རབ་ཏུ་ཞི་བ་དང ། དུལ་བའི་དབང་ཕྱུག་ལ་སོགས་པ་གནས་གཙང་མའི་རིས་ཀྱི་ལྷའི་བུ་ཁྲི་བརྒྱད་སྟོང་དང ། གང་ཡང་དེ་བཞིན་གཤེགས་པ་ཆོས་ཀྱི་འཁོར་ལོ་བསྐོར་བའི་ཚེ། འདུས་པར་གྱུར་པ་དེ་ལ་བཅོམ་ལྡན་འདས་ཀྱིས་ལྷའི་བུ་དབང་ཕྱུག་ཆེན་པོ་ལ་སོགས་པ་གནས་གཙང་མའི་རིས་ཀྱི་ལྷའི་བུ་རྣམས་ལ་བཀའ་སྩལ་པ། གྲོགས་པོ་དག་རྒྱ་ཆེར་རོལ་པ་ཞེས་བྱ་བའི་མདོ་སྡེ་ཤིན་དུ་རྒྱས་པ་ཆེན་པོ་བྱང་ཆུབ་སེམས་དཔའི་རྣམ་པར་རྩེན་པ། སངས་རྒྱས་ཀྱི་ཡུལ་ལ་རོལ་པ་ལ་འཇུག་པ་འདི་ནི་བདག་ཉིད་ཀྱི་ཕྱིར། དེ་བཞིན་གཤེགས་པས་གསུངས་པ་སྟེ། དེ་ཁྱེད་ཀྱིས་ལོང་ཤིག་།ཟུང་ཤིག་།ལྷོགས་ཤིག་།འཁོར་ལ་ཡང་རྒྱ་ཆེར་རབ་ཏུ་སྟོན་ཅིག་།དེ་ལྟར་ན་ངའི་ཆོས་ཀྱི་ཚུལ་འདི་རྒྱས་པར་འགྱུར་ཏེ། བྱང་ཆུབ་སེམས་དཔའི་ཐེག་པ་པའི་གང་ཟག་དག་གིས། ཆོས་ཀྱི་རྣམ་གྲངས་འདི་ཐོས་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བརྩོན་འགྲུས་བརྟེན་པ་རྩོམ་པར་འགྱུར་རོ། །རྒྱ་ཆེན་པོ་ལ་མོས་པའི་སེམས་ཅན་རྣམས་ནི་ཆོས་ཆེན་པོའི་ཆར་པའི་ཤུགས་སྐྱེད་པར་འགྱུར་རོ། །བདུད་ཀྱི་ཕྱོགས་ཀྱང་ཚར་གཅོད་པར་འགྱུར་རོ། །ཕས་ཀྱི་རྒོལ་བ་ཐམས་ཅད་ཀྱིས་གླགས་མི་རྙེད་པར་འགྱུར་རོ། །ཁྱེད་ཀྱིས་ཆོས་བཤད་པར 41.243a བསྐུལ་བའི་དགེ་བའི་རྩ་བ་ཡང་དོན་ཆེན་པོ་དང ། འབྲས་བུ་ཆེན་པོ་དང ། ཕན་ཡོན་ཆེན་པོར་འགྱུར་རོ། །གྲོགས་པོ་དག་གང་ལ་ལ་ཞིག་རྒྱ་ཆེར་རོལ་པའི་ཆོས་ཀྱི་རྣམ་གྲངས་འདི་ལ་ཐལ་མོ་སྦྱོར་བར་འགྱུར་བ་དེ་མཆོག་གི་ཆོས་བརྒྱད་ཐོབ་པར་འགྱུར་ཏེ། བརྒྱད་གང་ཞེ་ན། འདི་ལྟ་སྟེ། གཟུགས་མཆོག་ཐོབ་པར་འགྱུར་བ་དང ། སྟོབས་མཆོག་ཐོབ་པར་འགྱུར་བ་དང ། གཡོག་འཁོར་མཆོག་ཐོབ་པར་འགྱུར་བ་དང ། སྤོབས་པ་མཆོག་ཐོབ་པར་འགྱུར་བ་དང ། འབྱུང་བ་མཆོག་ཐོབ་པར་འགྱུར་བ་དང ། སེམས་ཡོངས་སུ་དག་པ་མཆོག་ཐོབ་པར་འགྱུར་བ་དང ། ཏིང་ངེ་འཛིན་ཕུན་སུམ་ཚོགས་པ་མཆོག་ཐོབ་པར་འགྱུར་བ་དང ། ཤེས་རབ་ཀྱི་སྣང་བ་མཆོག་ཐོབ་པར་འགྱུར་བ་སྟེ། མཆོག་གི་ཆོས་བརྒྱད་པོ་དེ་དག་འཐོབ་པར་འགྱུར་རོ། །གྲོགས་པོ་དག་གང་ལ་ལ་ཞིག་རྒྱ་ཆེར་རོལ་པའི་ཆོས་ཀྱི་རྣམ་གྲངས་འདི་སྟོན་པར་འདོད་པའི་ཆོས་སྨྲ་བ་ལ་ཆོས་ཀྱི་སྟན་འདིང་ན། སྟན་བཏིང་མ་ཐག་ཏུ་དེ་སྟན་བརྒྱད་འཐོབ་པར་ཤེས་པར་བྱ་སྟེ། བརྒྱད་གང་ཞེ་ན། འདི་ལྟ་སྟེ། ཚོང་དཔོན་གྱི་སྟན་འཐོབ་པ་དང ། ཁྱིམ་བདག་གི་སྟན་འཐོབ་པ་དང ། འཁོར་ལོས་སྒྱུར་བའི་སྟན་འཐོབ་པ་དང ། བརྒྱ་བྱིན་གྱི་སྟན་འཐོབ་པ་དང ། དབང་སྒྱུར་གྱི་སྟན་འཐོབ་པ་དང ། ཚངས་པའི་སྟན་འཐོབ་པ་དང ། བྱང་ཆུབ་ཀྱི་སྙིང་པོ་མཆོག་དམ་པར་སོང་བའི་བྱང་ཆུབ་སེམས་དཔར་གྱུར་པ་ཕྱིར་མི་ལྡོག་པ། བདུད་ཕྱིར་རྒོལ་བ་བཅོམ་པའི་སེང་གེའི་ཁྲི་འཐོབ་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཀྱང་བླ་ན་མེད་པའི་ཆོས་ཀྱི་འཁོར་ལོ་བསྐོར་བའི་ཁྲི་སྟན་འཐོབ་པར་ཤེས་པར་བྱ་སྟེ། སྟན་བརྒྱད་པོ་དེ་དག་འཐོབ་པར་ཤེས་པར་བྱའོ། །གྲོགས་པོ་དག་གང་ལ་ལ་ཞིག་རྒྱ་ཆེར་རོལ་པའི་ཆོས་ཀྱི་རྣམ་གྲངས་འདི་འཆད་པའི་ཆོས་སྨྲ་བ་ལ་ལེགས 41.243b སོ་ཞེས་བྱ་བ་སྦྱིན་པ་དེ་དག་གི་ལས་ཡོངས་སུ་དག་པ་བརྒྱད་འཐོབ་པར་འགྱུར་ཏེ། བརྒྱད་གང་ཞེ་ན། འདི་ལྟ་སྟེ། བདེན་པའི་རྗེས་སུ་འབྲང་བའི་ངག་གི་ལས་ཡོངས་སུ་དག་པས་ཇི་སྐད་སྨྲས་པ་དེ་བཞིན་དུ་བྱེད་པ་དང ། འཁོར་ཟིལ་གྱིས་གནོན་པས་གཟུང་བར་འོས་པའི་ཚིག་དང་འགལ་བར་མི་བྱེད་པས། བླང་བར་འོས་པའི་ཚིག་དང ། མི་བརླང་བས་སྙན་ཅིང་འཇམ་པའི་ཚིག་དང ། ལུས་དང་སེམས་ཚིམ་པར་བྱེད་པས་ཀ་ལ་པིང་ཀའི་སྒྲ་སྐད་ལྟ་བུ་དང ། སེམས་ཅན་སྡུད་པས་ཚིག་སྙན་པ་དང ། སྒྲ་ཐམས་ཅད་ཟིལ་གྱིས་ནོན་པས་ཚངས་པའི་སྒྲ་ལྟ་བུ་དང ། ཕས་ཀྱི་རྒོལ་བ་ཐམས་ཅད་ཀྱིས་ཟིལ་གྱིས་མི་ནོན་པས་སེང་གེ་བསྒྱིངས་པའི་སྒྲ་ལྟ་བུ་དང ། སེམས་ཅན་ཐམས་ཅད་ཀྱི་དབང་པོ་ཡོངས་སུ་ཚིམ་པར་བྱེད་པས་སངས་རྒྱས་ཀྱི་གསུང་སྟེ། ངག་གི་ལས་ཡོངས་སུ་དག་པ་བརྒྱད་པོ་དེ་དག་ཐོབ་པར་འགྱུར་རོ། །གྲོགས་པོ་དག་གང་ལ་ལ་ཞིག་རྒྱ་ཆེར་རོལ་པའི་ཆོས་ཀྱི་རྣམ་གྲངས་འདི་གླེགས་བམ་དུ་བྲིས་ཏེ་འཆང་འམ། ཀློག་གམ། སྟི་སྟང་དུ་བྱེད་དམ། བཙུན་པར་བྱེད་དམ། རིམ་གྲོ་བྱེད་དམ། མཆོད་པ་བྱེད་དམ། སེར་སྣ་མེད་པའི་སེམས་ཀྱིས་ཆོས་ཀྱི་རྣམ་གྲངས་འདིའི་བསྔགས་པ་ཕྱོགས་བཞིར་རྗོད་པ་དང ། ཚུར་ཤོག་ཆོས་ཀྱི་རྣམ་གྲངས་འདི་ཡི་གེར་བྲིས་ཤིག་།ཆོངས་ཤིག་།ལྷོགས་ཤིག་།སོམས་ཤིག་།ཁ་ཏོན་གྱིས་ཤིག་ཅེས་རྗོད་པར་བྱེད་པ་དེ་གཏེར་ཆེན་པོ་བརྒྱད་འཐོབ་པར་འགྱུར་ཏེ། བརྒྱད་གང་ཞེ་ན། བརྗེད་པ་མེད་པས་དྲན་པའི་གཏེར་དང ། བློས་རབ་ཏུ་འབྱེད་པས་བློ་གྲོས་ཀྱི་གཏེར་དང ། མདོ་སྡེ་ཐམས་ཅད་ཀྱི་དོན་གྱི་རྣམ་པ་ཁོང་དུ་ཆུད་པས་རྟོགས་པའི་གཏེར་དང ། ཐོས་པ་ཐམས་ཅད་ཀུན་ཏུ་འཛིན་པས་གཟུངས་ཀྱི་གཏེར་དང ། ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པས་སྤོབས་པའི་གཏེར་དང ། དམ་པའི་ཆོས་ཡོངས་སུ་སྲུང་བས་ཆོས་ཀྱི་གཏེར་དང ། 41.244a དཀོན་མཆོག་གསུམ་གྱི་རིགས་རྒྱུན་མི་གཅོད་པས་བྱང་ཆུབ་ཀྱི་སེམས་ཀྱི་གཏེར་དང ། མི་སྐྱེ་བའི་ཆོས་ལ་བཟོད་པ་འཐོབ་པས་སྒྲུབ་པའི་གཏེར་ཏེ། གཏེར་ཆེན་པོ་བརྒྱད་པོ་དེ་དག་འཐོབ་པར་འགྱུར་རོ། །གྲོགས་པོ་དག་གང་ལ་ལ་ཞིག་གིས་རྒྱ་ཆེར་རོལ་པའི་ཆོས་ཀྱི་རྣམ་གྲངས་འདི་ལེགས་པར་བསྟན་ཏེ་འཆད་པ་དེ་ཚོགས་བརྒྱད་ཡོངས་སུ་རྫོགས་པར་འགྱུར་ཏེ། བརྒྱད་གང་ཞེ་ན། འདི་ལྟ་སྟེ། སེར་སྣའི་སེམས་མེད་པས་སྦྱིན་པའི་ཚོགས་ཡོངས་སུ་རྫོགས་པར་འགྱུར་བ་དང ། དགེ་བའི་བསམ་པ་ཐམས་ཅད་ཡོངས་སུ་རྫོགས་པར་བྱེད་པས། ཚུལ་ཁྲིམས་ཀྱི་ཚོགས་ཡོངས་སུ་རྫོགས་པར་འགྱུར་བ་དང ། ཆགས་པ་མེད་པའི་ཤེས་རབ་ཡང་དག་པར་སྒྲུབ་པའི་ཕྱིར། ཐོས་པའི་ཚོགས་ཡོངས་སུ་རྫོགས་པར་འགྱུར་བ་དང ། ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་མངོན་དུ་བྱ་བའི་ཕྱིར་ཞི་གནས་ཀྱི་ཚོགས་ཡོངས་སུ་རྫོགས་པར་འགྱུར་བ་དང ། རིག་པ་གསུམ་གྱིས་རིག་པ་རབ་ཏུ་རྫོགས་པར་བྱ་བའི་ཕྱིར། ལྷག་མཐོང་གི་ཚོགས་ཡོངས་སུ་རྫོགས་པར་འགྱུར་བ་དང ། མཚན་དང ། དཔེ་བྱད་བཟང་པོ་དང ། སངས་རྒྱས་ཀྱི་ཞིང་གི་རྒྱན་ཡོངས་སུ་སྦྱང་བའི་ཕྱིར་བསོད་ནམས་ཀྱི་ཚོགས་ཡོངས་སུ་རྫོགས་པར་འགྱུར་བ་དང ། སེམས་ཅན་ཐམས་ཅད་ཇི་ལྟར་མོས་པ་བཞིན་དུ་ཚིམ་པར་བྱ་བའི་ཕྱིར་ཡེ་ཤེས་ཀྱི་ཚོགས་ཡོངས་སུ་རྫོགས་པར་འགྱུར་བ་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་ཡོངས་སུ་མི་སྐྱོ་བར་བྱ་བའི་ཕྱིར་སྙིང་རྗེ་ཆེན་པོའི་ཚོགས་ཡོངས་སུ་རྫོགས་པར་འགྱུར་བ་སྟེ། ཚོགས་བརྒྱད་པོ་དེ་དག་ཡོངས་སུ་རྫོགས་པར་འགྱུར་རོ། །གྲོགས་པོ་དག་གང་ལ་ལ་ཞིག་འདི་ལྟ་བུའི་སེམས་དང་ལྡན་ཏེ། འདི་ལྟ་སྟེ། ཇི་ལྟར་སེམས་ཅན་འདི་དག་རྣམ་པ་འདི་ལྟ་བུའི་ཆོས་འདི་ཐོབ་པར་འགྱུར་སྙམ་ནས། རྒྱ་ཆེར་རོལ་པའི་ཆོས་ཀྱི་རྣམ་གྲངས་འདི་གཞན་དག་ལ་རྒྱ་ཆེར་རབ་ཏུ་སྟོན་པར་བྱེད་ན། 41.244b དེ་དགེ་བའི་རྩ་བ་འདིས་བསོད་ནམས་ཆེན་པོ་བརྒྱད་ཐོབ་པར་འགྱུར་ཏེ། བརྒྱད་གང་ཞེ་ན། འདི་ལྟ་སྟེ། འཁོར་ལོས་སྒྱུར་བའི་རྒྱལ་པོ་འཐོབ་པར་འགྱུར་བ་འདི་ནི་བསོད་ནམས་ཆེན་པོ་དང་པོའོ། །རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་བདག་པོ་བྱེད་པར་འགྱུར་བ་འདི་ནི་བསོད་ནམས་ཆེན་པོ་གཉིས་པའོ། །ལྷའི་དབང་པོ་བརྒྱ་བྱིན་དུ་འགྱུར་བ་འདི་ནི་བསོད་ནམས་ཆེན་པོ་གསུམ་པའོ། །ལྷའི་བུ་རབ་འཐབ་བྲལ་དུ་འགྱུར་བ་འདི་ནི་བསོད་ནམས་ཆེན་པོ་བཞི་པའོ། །ཡོངས་སུ་དགའ་ལྡན་དུ་འགྱུར་བ་འདི་ནི་བསོད་ནམས་ཆེན་པོ་ལྔ་པའོ། །རབ་འཕྲུལ་དུ་འགྱུར་བ་འདི་ནི་བསོད་ནམས་ཆེན་པོ་དྲུག་པའོ། །ལྷའི་རྒྱལ་པོ་དབང་སྒྱུར་དུ་འགྱུར་བ་འདི་ནི་བསོད་ནམས་ཆེན་པོ་བདུན་པའོ། །ཚངས་པ་ཆེན་པོའི་ཚངས་པར་འགྱུར་བ་འདི་ནི་བསོད་ནམས་ཆེན་པོ་བརྒྱད་པའོ། །ཐ་མར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་དགེ་བའི་ཆོས་ཐམས་ཅད་སྤངས་ནས། དགེ་བའི་ཆོས་ཐམས་ཅད་དང་ལྡན་པར་ཡང་འགྱུར་ཏེ། བསོད་ནམས་ཆེན་པོ་བརྒྱད་པོ་དེ་དག་ཐོབ་པར་འགྱུར་རོ། །གྲོགས་པོ་དག་གང་ལ་ལ་ཞིག་རྒྱ་ཆེར་རོལ་པའི་ཆོས་ཀྱི་རྣམ་གྲངས་འདི་འཆད་པ་ན་རྣ་བ་བླགས་ཏེ། ཉན་པར་འགྱུར་བ་དེ་སེམས་དྲི་མ་མེད་པ་བརྒྱད་འཐོབ་པར་འགྱུར་ཏེ། བརྒྱད་གང་ཞེ་ན། འདི་ལྟ་སྟེ། ཞེ་སྡང་ཐམས་ཅད་གཞོམ་པའི་ཕྱིར། བྱམས་པ་ཐོབ་པར་འགྱུར་བ་དང ། རྣམ་པར་འཚེ་བ་ཐམས་ཅད་དོར་བའི་ཕྱིར། སྙིང་རྗེ་ཐོབ་པར་འགྱུར་བ་དང ། མི་དགའ་བ་ཐམས་ཅད་བསལ་བའི་ཕྱིར་དགའ་བ་ཐོབ་པར་འགྱུར་བ་དང ། རྗེས་སུ་ཆགས་པ་དང ། ཁོང་ཁྲོ་བ་དོར་བའི་ཕྱིར་བཏང་སྙོམས་ཐོབ་པར་འགྱུར་བ་དང ། འདོད་པའི་ཁམས་ཐམས་ཅད་ལ་དབང་བསྒྱུར་བར་བྱ་བའི་ཕྱིར། བསམ་གཏན་བཞི་ཐོབ་པར་འགྱུར་བ་དང ། སེམས་ལ་དབང་བསྒྱུར་བར་བྱ་བའི་ཕྱིར་གཟུགས་མེད་པའི་སྙོམས་པར་འཇུག་པ་བཞི་ཐོབ་པར་འགྱུར་བ་དང ། སངས་རྒྱས་ཀྱི 41.245a ཞིང་གཞན་དུ་འགྲོ་བ་དང་འོང་བར་བྱ་བའི་ཕྱིར་མངོན་པར་ཤེས་པ་ལྔ་ཐོབ་པར་འགྱུར་བ་དང ། དཔའ་བར་འགྲོ་བའི་ཏིང་ངེ་འཛིན་ཐོབ་པར་བྱ་བའི་ཕྱིར། བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་གཞོམ་པ་ཐོབ་པར་འགྱུར་བ་སྟེ། སེམས་དྲི་མ་མེད་པ་བརྒྱད་པོ་དེ་དག་ཐོབ་པར་འགྱུར་རོ། །གྲོགས་པོ་དག་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། ལྗོངས་ཀྱི་ཕྱོགས་སམ། འཆག་ས་འམ། གཙུག་ལག་ཁང་གང་དུ་རྒྱ་ཆེར་རོལ་པའི་ཆོས་ཀྱི་རྣམ་གྲངས་འདི་སྤྱོད་པར་འགྱུར་བ་དེར་སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་འཇིགས་པ་བརྒྱད་འབྱུང་བར་མི་འགྱུར་རོ། །བརྒྱད་གང་ཞེ་ན། འདི་ལྟ་སྟེ། རྒྱལ་པོས་དཀྲུགས་པའི་འཇིགས་པ་འབྱུང་བར་མི་འགྱུར་བ་དང ། ཆོམ་རྐུན་གྱིས་དཀྲུགས་པའི་འཇིགས་པ་འབྱུང་བར་མི་འགྱུར་བ་དང ། སྦྲུལ་གྱིས་དཀྲུག་པའི་འཇིགས་པ་འབྱུང་བར་མི་འགྱུར་བ་དང ། མུ་གེའི་དགོན་པས་དཀྲུག་པའི་འཇིགས་པ་འབྱུང་བར་མི་འགྱུར་བ་དང ། ཕན་ཚུན་འཐབ་པ་དང ། རྩོད་པ་དང ། འགྱེད་པ་དང ། འཚུང་འདྲུ་བས་དཀྲུགས་པའི་འཇིགས་པ་འབྱུང་བར་མི་འགྱུར་བ་དང ། ལྷས་དཀྲུག་པའི་འཇིགས་པ་འབྱུང་བར་མི་འགྱུར་བ་དང ། ཀླུས་དཀྲུག་པའི་འཇིགས་པ་འབྱུང་བར་མི་འགྱུར་བ་དང ། གནོད་སྦྱིན་ལ་སོགས་པས་དཀྲུགས་པའི་འཇིགས་པ་འབྱུང་བར་མི་འགྱུར་བ་དང ། གཙེ་བ་ཐམས་ཅད་ཀྱིས་དཀྲུག་པའི་འཇིགས་པ་འབྱུང་བར་མི་འགྱུར་བ་སྟེ། སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་གྲོགས་པོ་དག་འཇིགས་པ་བརྒྱད་པོ་དེ་དག་འབྱུང་བར་མི་འགྱུར་རོ། །གྲོགས་པོ་དག་མདོར་ན་གལ་ཏེ་དེ་བཞིན་གཤེགས་པའི་སྐུ་ཚེའི་ཚད་བསྐལ་པར་བཞུགས་ལ་ཉིན་མཚན་དུ་རྒྱུན་མི་འཆད་པར་ཆོས་ཀྱི་རྣམ་གྲངས་འདིའི་བསྔགས་པ་བརྗོད་ཀྱང་ཆོས་ཀྱི་རྣམ་གྲངས་འདིའི་བསྔགས་པ་མཐར་ཐུག་པར་ཡང་མི 41.245b འགྱུར་ལ་དེ་བཞིན་གཤེགས་པའི་སྤོབས་པ་ཡང་ཟད་པར་མི་འགྱུར་རོ། །གྲོགས་པོ་དག་ཇི་ལྟར་དེ་བཞིན་གཤེགས་པའི་ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བ་ཚད་མེད་ཅིང་ཐུག་པ་མེད་པ་དེ་བཞིན་དུ་གྲོགས་པོ་དག་གང་ཆོས་རྒྱ་ཆེན་པོ་འདི་ལྟ་བུ་འདི་སེམས་ཅན་འདི་དག་གིས་ཇི་ལྟར་ཐོབ་པར་འགྱུར་སྙམ་པའི་སེམས་འདིས་ཆོས་ཀྱི་རྣམ་གྲངས་འདི་འཛིན་པ་དང ། འཆང་བ་དང ། ཀློག་པ་དང ། ཡི་གེར་འདྲི་བ་འམ། ཡི་གེར་འདྲིར་འཇུག་པ་དང ། །འཇུག་པར་བྱེད་པ་དང ། འཁོར་གྱི་ནང་དུ་རྒྱ་ཆེར་ཡང་དག་པར་སྟོན་པར་འགྱུར་བ་དེ་དག་གིས་བསོད་ནམས་ཀྱང་ཐུག་པ་མེད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་དང ། ཚེ་དང་ལྡན་པ་ཀུན་དགའ་བོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བཀའ་སྩལ་པ། གྲོགས་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ངས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པ་འདི་ཁྱེད་ཀྱི་ལག་ཏུ་གཏད་དེ། ཡོངས་སུ་གཏད་པའི་མཆོག་གིས་གཏད་དོ། །ཁྱེད་བདག་ཉིད་ཀྱིས་ཀྱང་ཆོས་ཀྱི་རྣམ་གྲངས་འདི་ཟུང་ཤིག་།གཞན་དག་ལ་ཡང་རྒྱ་ཆེར་ཡང་དག་པར་སྟོན་ཅིག་།དེ་སྐད་ཅེས་བཀའ་སྩལ་ནས། དེའི་ཚེ་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་རྒྱ་ཆེར་ཡོངས་སུ་གཏད་པའི་ཕྱིར། དེའི་ཚེ་ཚིགས་སུ་བཅད་པ་འདི་དག་ཀྱང་བཀའ་སྩལ་ཏོ། །སངས་རྒྱས་གཟིགས་པས་སེམས་ཅན་གང་དག་ངས་མཐོང་བ། །དེ་དག་ཤཱ་རིའི་བུ་འདྲར་དགྲ་བཅོམ་པར་གྱུར་ལ། །གལ་ཏེ་ལ་ལས་གང་གའི་ཀླུང་གི་བྱེ་སྙེད་ཀྱི། །བསྐལ་པ་བྱེ་བར་དེ་དག་རྣམས་ལའང་མཆོད་བྱེད་ལ། །གང་ཞིག་ཉིན་ཞག་གཅིག་ཏུ་རབ་ཏུ་དགའ་བ་ཡིས། །རང་སངས་རྒྱས་རྣམས་ལ་ནི་ཕྲེང་བ་དེ་བཞིན་དུ། །གཞན་ཡང་རྣམ་པ 41.246a མཆོག་རྣམས་ཀྱིས་ནི་མཆོད་བྱེད་ན། །དེ་བས་བསོད་ནམས་བྱས་པ་འདི་ནི་ཁྱད་པར་འཕགས། །གལ་ཏེ་སེམས་ཅན་ཐམས་ཅད་རང་རྒྱལ་ཐོབ་གྱུར་ལ། །དེ་དག་རྣམས་ལ་གང་ཞིག་འདིར་ནི་བག་ཡོད་པར། །བསྐལ་པ་དུ་མར་ཟས་དང་སྐོམ་དང་བགོ་བ་དང ། །མེ་ཏོག་སྤོས་དང་བྱུག་པ་རྣམས་ཀྱིས་མཆོད་བྱེད་ལ། །གང་ཞིག་གིས་ནི་དེ་བཞིན་གཤེགས་པ་གཅིག་ཅིག་ལ། །ལན་ཅིག་ཕྱག་འཚལ་བྱེད་ཅིང་དང་བའི་སེམས་ཀྱིས་ནི། །དགྲ་བཅོམ་པ་ལ་ཕྱག་འཚལ་ལོ་ཞེས་ཚིག་བརྗོད་ན། །དེ་བས་བསོད་ནམས་འདི་ནི་ཤིན་ཏུ་ཆེས་མཆོག་གོ། །གལ་ཏེ་སེམས་ཅན་ཐམས་ཅད་སངས་རྒྱས་ཐོབ་གྱུར་ལ། །དེ་དག་རྣམས་ལ་གང་ཞིག་སྔར་བཞིན་མཆོད་བྱེད་ཅིང ། །ལྷ་ཡི་མེ་ཏོག་རྣམས་དང་མི་ཡི་མཆོག་རྣམས་དང ། །རྣམ་པ་མང་པོས་བསྐལ་པ་དུ་མར་མཆོད་བྱེད་ལ། །གང་ཞིག་དམ་པའི་ཆོས་ནི་རྣམ་པར་འཇིག་པའི་ཚེ། །རང་གི་ལུས་དང་དེ་བཞིན་སྲོག་ཀྱང་བཏང་ནས་ནི། །ཞག་གཅིག་བར་དུ་མདོ་སྡེ་འདི་ནི་འཛིན་བྱེད་ན། །བསོད་ནམས་འདི་ནི་དེ་བས་ཁྱད་པར་འཕགས་པར་འགྱུར། །གང་ཞིག་རྣམ་པར་འདྲེན་པ་རྣམས་དང་རང་རྒྱལ་དང ། །དེ་བཞིན་ཉན་ཐོས་རྣམས་ལ་མཆོད་པ་བྱེད་འདོད་པ། །དེ་ཡིས་བྱང་ཆུབ་སེམས་ནི་བརྟན་པོར་བསྐྱེད་བྱས་ཏེ། །མདོ་སྡེ་འདི་ནི་རྟག་པར་རབ་ཏུ་གཟུང་བར་བྱ། །དེ་བཞིན་གཤེགས་པ་ཐམས་ཅད་མངོན་བྱུང་གང་ཡིན་པ། །འདི་ནི་ལེགས་པར་བཤད་པ་ཀུན་གྱི་རྒྱལ་པོ་ཡིན། །མདོ་སྡེ་དཀོན་མཆོག་འདི་ནི་གང་ན་གནས་འགྱུར་བ། །དེ་ཡི་ཁྱིམ་དུ་དེ་བཞིན་གཤེགས་པ་རྟག་ཏུ་གནས། །གང་གིས་མདོ་འདི་ཕ་རོལ་དག་ལ་བྱིན་པ་དང ། །ཚིག་གཅིག་བརྗོད་པ་དེ་ཡང་བསྐལ་པ་བྱེ་བར་ནི། །ཚིག་འབྲུ་རྣམས་ལས་མི་ཉམས་དོན་ལས་ཉམས་མི་འགྱུར། །སྤོབས་པ་དགེ་བ་མཐའ་ཡས་པ་དག་འཐོབ་པར་འགྱུར། །གང་ཞིག་ཆོས་འདི་ཐོས་ནས་རབ་ཏུ་སྒྲུབ་བྱེད་པ། །དེ་ནི་མི་ཡི་འདྲེན་པ་མ་གཏོགས་འོག་ཏུ་ནི། ། 41.246b དེ་འདྲ་བ་ཡི་སེམས་ཅན་གང་ཡང་ཡོད་མ་ཡིན། །དེ་ནི་རྒྱ་མཚོ་ལྟ་བུར་ཟད་མི་ཤེས་པར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ལྷའི་བུ་དབང་ཕྱུག་ཆེན་པོ་ལ་སོགས་པ་གནས་གཙང་མའི་རིས་ཀྱི་ལྷའི་བུ་དེ་དག་དང ། བྱམས་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང ། འོད་སྲུང་ཆེན་པོ་ལ་སོགས་པ་ཉན་ཐོས་ཆེན་པོ་ཐམས་ཅད་དང ། ཚེ་དང་ལྡན་པ་ཀུན་དགའ་བོ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །མཇུག་སྡུད་པའི་ལེའུ་ཞེས་བྱ་བ་སྟེ། ཉི་ཤུ་རྩ་བདུན་པའོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། རྫོགས་སྷོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། མུ་ནི་བར་མ་དང ། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །། |