rKTs


J404

(e-text produced by ADARSHA)

see text in transliteration
87.82a
༄#། །རྒྱ་གར་སྐད་དུ། ་་ཌཱ་ཀི་ནཱི་སརྦ་ཙིཏྟ་ཨ་དྭ་ཡ་ཨ་ཙིནྟ་ཛྙཱ་ན་བཛྲ་བཱ་རཱ་ཧི་ཨ་བྷི་བྷ་བ་ཏནྟྲ་རཱ་ཛ་ནཱ་མ། ་་བོད་སྐད་དུ། ་་མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པ་བསམ་གྱིས་མི་ཁྱབ་པའི་ཡེ་ཤེས་རྡོ་རྗེ་ཕག་མོ་མངོན་པར་འབྱུང་བའི་རྒྱུད་ཀྱི་རྒྱལ་པོ་ཞེས་བྱ་བ། ་མགོན་པོ་དཔའ་བོ་འཇིགས་བྱེད་དཔལ་ཧེ་རུ་ཀ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། ཕྱི་དང་ནང་དང་གསང་བའི་དུར་ཁྲོད་ཆེན་པོའི་གནས་མཆོག་ཏུ་གྱུར་པ་ན། བཅོམ་ལྡན་འདས་ཞེ་སྡང་འཇོམས་པའི་ཧེ་རུ་ཀ་དང ། གཏི་མུག་འཇོམས་པའི་ཧེ་རུ་ཀ་དང ། ང་རྒྱལ་འཇོམས་པའི་ཧེ་རུ་ཀ་དང ། འདོད་ཆགས་འཇོམས་པའི་ཧེ་རུ་ཀ་དང ། ཕྲག་དོག་འཇོམས་པའི་ཧེ་རུ་ཀ་དང ། ཡུམ་སངས་རྒྱས་སྤྱན་དང ། ཡུམ་མཱ་མ་ཀཱི་དང ། ཡུམ་གོས་དཀར་མོ་དང ། ཡུམ་དམ་ཚིག་སྒྲོལ་མ་དང ། ཡུམ་ཀུན་དུ་བཟང་མོ་དང ། དེ་རྣམས་ཀྱི་བྷ་ག་ལ་ལྷན་ཅིག་སྐྱེས་པའི་ཡེ་ཤེས་བསམ་གྱིས་མི་ཁྱབ་པའི་ཚུལ་དུ་བཞུགས་སོ། །དེའི་ཚེ་དེའི་དུས་ན་ཡེ་ཤེས་ཀྱི་མཁའ་འགྲོ་མ་དུར་ཁྲོད་ཀྱི་བདག་མོ་དང ། ཁྲོས་མ་ནག་མོ་དང ། བདེ་ཆེན་དཀར་མོ་དང ། སེར་མོ་དོན
87.82b
གྲུབ་མ་དང ། དམར་མོ་སྒྲ་སྒྲོག་མ་དང ། སྣ་ཚོགས་མཐར་ཕྱིན་མ་དང ། ལས་ཀྱི་གཙོ་མོ་ལ་སོགས་པའི་ཡེ་ཤེས་དང ། ལས་ལ་གྲུབ་པའི་མཁའ་འགྲོ་མའི་ཚོགས་དཔག་ཏུ་མེད་པ་དང ། གཞན་ཡང་བཛྲ་ཌཱ་ཀི་ནཱི་དང ། རཏྣ་ཌཱ་ཀི་ནཱི་དང ། པདྨ་ཌཱ་ཀི་ནཱི་དང ། ཀརྨ་ཌཱ་ཀི་ནཱི་དང ། ས་མ་ཡ་ཌཱ་ཀི་ནཱི་དང ། བི་ཥ་ཌཱ་ཀི་ནཱི་དང ། སརྦ་ཌཱ་ཀི་ནཱི་དང ། ལོ་ཀ་ཌཱ་ཀི་ནཱི་ལ་སོགས་ཏེ་དུར་ཁྲོད་བརྒྱད་ཀྱི་མཁའ་འགྲོ་མ་དང ། དཔའ་བོ་དང་དཔའ་མོའི་ཚོགས་དཔག་ཏུ་མེད་པ་དང ། གཞན་ཡང་འཇིག་རྟེན་པའི་མེས་པོ་ཆངས་པ་དང ། བརྒྱ་བྱིན་ལ་སོགས་པའི་ལྷའི་ཚོགས་དཔག་ཏུ་མེད་པ་དང ། གཞན་ཡང་རྒྱལ་པོ་ཆེན་པོ་བཞི་པོ་རང་གི་འཁོར་དང་བཅས་པ་དང ། ཕྱོགས་སྐྱོང་བ་བཅུ་དང ། ལྷ་མ་སྲིན་སྡེ་བརྒྱད་དང ། འཁོར་དཔག་ཏུ་མེད་པ་དང་ཐབས་གཅིག་པའི་ཚུལ་གྱིས་གནས་སོ། །ཡང་དེའི་ཚེ་ན་ཡེ་ཤེས་ཀྱི་མཁའ་འགྲོ་མ་དུར་ཁྲོད་ཀྱི་བདག་མོ་ཞེས་བྱ་བ་རང་གི་སྟན་ལས་ལངས་ནས་མགོན་པོ་དཔའ་བོ་འཇིགས་བྱེད་ཧེ་རུ་ཀ་ལ་འདི་སྐད་ཅེས་གསོལ་ཏོ། །ཀྱེ་ཀྱེ་མགོན་པོ་བདག་ལ་གསོན། །ཁྱེད་ཀྱི་འཁོར་དུ་འདུས་པ་ཡི། །སྐལ་དང་ལྡན་པ་འདི་རྣམས་ལ། །ལམ་ལོག་མུ་སྟེགས་མ་ལགས་པའི། །དམན་པ་ཉན་ཐོས་མ་ལགས་པའི། །མ་སྨིན་མཚན་ཉིད་མ་ལགས་པའི། །བསམ་གྱིས་མི་ཁྱབ་ཆོས་ཅིག་ཞུ། །ཕྱོགས་རིས་མེད་པ་ལྟ་བའི་མཆོག་།བསམ་གྱིས་མི་ཁྱབ་བཤད་དུ་གསོལ། །དགག་སྒྲུབ་མེད་པ་སྤྱོད་པའི་མཆོག་།བསམ་གྱིས་མི་ཁྱབ་བཤད་དུ་གསོལ། །བར་ཆོད་སེལ་བ་བདེ་ཡི་མཆོག་།བསམ་གྱིས་མི་ཁྱབ་བཤད་དུ་གསོལ། །སྨིན་པར་བྱེད་པ་དབང་གི་མཆོག་།བསམ་གྱིས་མི་ཁྱབ་བཤད་དུ་གསོལ། །སངས་རྒྱས་ཐོབ་བྱེད་འབྲས་བུའི་མཆོག་།ཡེ་ཤེས་ལྔ་ཡི་གཟུགས་བརྙན་ཏེ། །བསམ་གྱིས་མི་ཁྱབ་བཤད་དུ་གསོལ། །རྣམ་རྟོག་སེལ་བྱེད་རྣམ་རྒྱལ་ལྔ། །བསམ་གྱིས་མི་ཁྱབ་བཤད་དུ་གསོལ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས
87.83a
མི་ཁྱབ་པ་ཕག་མོ་མངོན་པར་འབྱུང་བ་ཞེས་བྱ་བ་ལས། གླེང་གཞིའི་ལེའུ་སྟེ་དང་པོའོ།། །། དེ་ནས་མགོན་པོ་དེས་སྤྱན་ཕྱོགས་མཚམས་ཀུན་ལ་གཟིགས་ནས་ཞལ་རྡོ་རྗེའི་མགུར་འཛུམ་པ་མཛད་ནས་བཀའ་སྩལ་པ་ནི། ཨེ་མ་ཧོ། ཉོན་གཅིག་དུར་ཁྲོད་བདག་མོ་ཁྱོད། །དུས་འདིར་ཚོགས་པའི་འཁོར་རྣམས་ལ། །མངོན་པར་འབྱུང་བའི་རྒྱུད་བཤད་ཀྱིས། །ཁ་སྦུབ་ཞབས་རྡོལ་དྲི་མ་ཅན། །སྣོད་སྐྱོན་གསུམ་པོ་སྤང་བྱས་ལ། །རྩེ་གཅིག་སེམས་ཀྱིས་མཉན་པར་གྱིས། །ཕྱོགས་རིས་མེད་པའི་ལྟ་བ་དེ། །གཉུག་མའི་སེམས་ཀྱིས་བལྟ་བར་གྱིས། །དམིགས་གཏད་མེད་པའི་སྒོམ་པ་ནི། །གཉུག་མའི་ཡིད་ཀྱིས་བསྒོམ་པར་བྱ། །དགག་སྒྲུབ་མེད་པ་སྤྱོད་པའི་མཆོག་།གཉུག་མའི་ཡིད་ཀྱིས་སྤྱད་པར་བྱ། །བར་ཆོད་སེལ་བ་བརྡ་ཡི་ཆོས། །གཉུག་མའི་ཡིད་ཀྱིས་བསལ་བར་བྱ། །སྨིན་པར་བྱེད་པ་དབང་གི་མཆོག་།གཉུག་མའི་སེམས་ཀྱིས་བསྐུར་བར་བྱ། །ཚེ་གཅིག་འབྲས་བུ་སངས་རྒྱས་དེ། །གཉུག་མའི་སེམས་ཀྱིས་བསྒྲུབ་པར་བྱ། །ཡེ་ཤེས་ལྔ་ཡི་གཟུགས་བརྙན་དེ། །མ་བཅོས་སེམས་ཀྱིས་བསྒྲུབ་པར་བྱ། །རྣམ་རྟོག་སེལ་བྱེད་རྣམ་རྒྱལ་ལྔ། །མ་བཅོས་སེམས་ཀྱིས་གཅད་པར་བྱ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ལས་ཕག་མོ་མངོན་པར་འབྱུང་བའི་རྒྱུད་ལས་སྟོན་པས་ཞལ་གྱིས་བཞེས་པའི་ལེའུ་སྟེ་གཉིས་པའོ།། །། དེ་ནས་སྟོན་པས་བཀའ་སྩལ་པ། །ཚེ་གཅིག་སངས་རྒྱས་ཐོབ་འདོད་པས། །དང་པོ་གདེང་ཆེན་ལྟ་བ་གཅེས། །དེས་ན་ལྟ་བ་དང་པོར་བསྟན། །ཕྱོགས་རིས་མེད་པ་ལྟ་བའི་མཆོག་།ནམ་མཁའ་ལྟ་བུ་ཤེས་པར་གྱིས། །ཐམས་ཅད་འདེགས་པ་ལྟ་བའི་མཆོག་།ས་གཞི་ལྟ་བུར་ཤེས་པར་གྱིས། །ཐམས་ཅད་བསྡུད་པ་ལྟ་བའི་མཆོག་།འབྱུང་བ་ཆུ་ལྟར་ཤེས་པར་གྱིས། །ཉོན་མོངས་བསྲེག་པ་ལྟ་བའི་མཆོག་།འབྱུང་བ་མེ་ལྟར་ཤེས་པར་གྱིས། །ངོས་གཟུང་མེད་པ་ལྟ
87.83b
བའི་མཆོག་།འབྱུང་བ་རླུང་ལྟར་ཤེས་པར་གྱིས། །དེ་ནས་ཡང་སྟོན་པས་གསུངས་པ། འཕོ་འགྱུར་མེད་པ་ལྟ་བའི་མཆོག་།རི་བོ་ལྟ་བུར་ཤེས་པར་གྱིས། །གཡོ་འགུལ་མེད་པ་ལྟ་བའི་མཆོག་།རྒྱ་མཚོ་ལྟ་བུར་ཤེས་པར་བྱ། །གསལ་ལ་མ་འདྲེས་ལྟ་བའི་མཆོག་།འཇའ་ཚོན་ལྟ་བུར་ཤེས་པར་གྱིས། །གཉིས་སུ་མེད་པ་ལྟ་བའི་མཆོག་།ག་བུར་ལྟ་བུར་ཤེས་པར་བྱ། །དེ་ནས་ཡང་གསང་བས་ཚིག་འདི་གསུངས་ཏེ། ཟིལ་གྱིས་གནོན་པ་ལྟ་བའི་མཆོག་།སེང་གེ་ལྟ་བུར་ཤེས་པར་བྱ། །ཉམ་ང་མེད་པ་ལྟ་བའི་མཆོག་།གླང་ཆེན་ལྟ་བུར་ཤེས་པར་བྱ། །སྟོབས་དང་ལྡན་པ་ལྟ་བའི་མཆོག་།རྟ་མཆོག་ལྟ་བུར་ཤེས་པར་བྱ། །ཀུན་དུ་རྒྱུག་པ་ལྟ་བའི་མཆོག་།སྟག་མོ་ལྟ་བུར་ཤེས་པར་བྱ། །འཇིགས་པེ་མེད་པ་ལྟ་བའི་མཆོག་།དོམ་བུ་ལྟ་བུར་ཤེས་པར་བྱ། །དེ་ནས་ཡང་གསང་བའི་ཚིག་འདི་གསུངས་ཏེ། སྐྱོན་གྱིས་མ་གོས་ལྟ་བའི་མཆོག་།བྱང་ཆུབ་སེམས་དེ་དཀར་པོར་སྣང ། །དུས་གསུམ་མི་འགྱུར་ལྟ་བའི་མཆོག་།བྱང་ཆུབ་སེམས་དེ་ནག་པོར་སྣང ། །ཡོན་ཏན་རྒྱས་པ་ལྟ་བའི་མཆོག་།བྱང་ཆུབ་སེམས་དེ་སེར་པོར་སྣང ། །ཀུན་ལ་ཁྱབ་པ་ལྟ་བའི་མཆོག་།བྱང་ཆུབ་སེམས་དེ་དམར་པོར་སྣང ། །ཕྲིན་ལས་རྫོགས་པ་ལྟ་བའི་མཆོག་།བྱང་ཆུབ་སེམས་དེ་ལྗང་ཁུར་ཤར། །དེ་ནས་ཡང་གསང་བའི་ཚིག་གསུངས་ཏེ། དུས་གསུམ་སྣང་བ་ལྟ་བའི་མཆོག་།རྣམ་པར་སྣང་མཛད་ལྟ་བུར་ཤར། །ཆོས་ཉིད་དོན་ལ་རྟག་སེམས་པས། །རྡོ་རྗེ་སེམས་དཔའ་ལྟ་བུར་ཤར། །ཐམས་ཅད་མཉམ་པ་ཉིད་རྟོགས་པས། །རིན་ཆེན་འབྱུང་ལྡན་ལྟ་བུར་ཤར། །ཆོས་ཅན་སོ་སོར་མ་འདྲེས་པས། །སྣང་བ་མཐའ་ཡས་ལྟ་བུར་ཤར། །སྣ་ཚོགས་སྣང་ལ་མ་འདྲེས་པས། །དོན་ཡོད་གྲུབ་པ་ལྟ་བུར་ཤར། །ཞེས་པ་གསུངས་སོ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་ལྟ་བ་བསྟན་པའི་ལེའུ་སྟེ་གསུམ
87.84a
པའོ།། །། དེ་ནས་དུར་ཁྲོད་བདག་མོ་དེས། །སྟོན་པ་ལ་ནི་འདི་སྐད་ཞུས། །རྟོགས་པ་ལྟ་བའི་རྗེས་ཐོགས་ལ། །བསྒོམ་པའི་གོ་རིམས་ཇི་ལྟ་བུ། །ཞེས་ཞུས་པས། དེ་ནས་སྟོན་པས་བཀའ་སྩལ་པ། །སངས་རྒྱས་ཐོབ་པར་འདོད་པ་ཡིས། །རྟོགས་པའི་དོན་གོ་བསྒོམས་ལས་བྱུང ། །གཞན་དུ་འབྲས་བུ་འབྱུང་མི་འགྱུར། །སྣ་ཚོགས་སྣང་བའི་ཆོས་རྣམས་ཀུན། །ཡེ་ནས་སྤྲོས་དང་བྲལ་བ་ལ། །རྟག་པར་འཛིན་པ་བསྒོམ་པའི་སྐྱོན། །ཕྱི་དང་ནང་གི་ཆོས་ཉིད་ལ། །ཆད་པར་འཛིན་པ་བསྒོམ་པའི་སྐྱོན། །འོ་ན་ཇི་ལྟར་བསྒོམ་ཞེས་ན། །ལམ་མེད་ལམ་གོལ་དམན་པའི་ལམ། །འདི་རྣམས་སྤངས་ཏེ་བསྒོམ་པར་བྱ། །དང་པོ་བྱང་ཆུབ་སེམས་བསྐྱེད་དེ། །སྨོན་འཇུག་གཉིས་པོ་སྔོན་དུ་གཅེས། །གཟུང་བ་ཡུལ་མེད་སྒོམ་པའི་མཆོག་།ཆོས་ཀྱི་བདག་མེད་རྟོགས་པར་བྱ། །འཛིན་པའི་སེམས་མེད་སྒོམ་པའི་མཆོག་།གང་ཟག་བདག་མེད་རྟོགས་པར་བྱ། །ཆོས་རྣམས་གང་ཡིན་མི་འགེགས་པས། །ཐབས་ཀྱི་ལམ་དུ་ཤེས་པར་བྱ། །ངོ་བོ་ཅི་ཡང་མ་གྲུབ་པས། །ཤེས་རབ་ལམ་དུ་ཤེས་པར་བྱ། །ཆོས་རྣམས་རྒྱུ་མེད་སྒོམ་པའི་མཆོག་།སྟོང་པ་ཉིད་ཀྱི་རྣམ་ཐར་ཡིན། །འབྲས་བུ་སྟོང་པ་སྒོམ་པའི་མཆོག་།མཚན་མེད་པའི་རྣམ་ཐར་ཡིན། །རྒྱུ་འབྲས་དབྱེར་མེད་སྒོམ་པའི་མཆོག་།སྨོན་པ་མེད་པའི་རྣམ་ཐར་ཡིན། །ཀུན་ལ་བྱམས་པ་སྒོམ་པའི་མཆོག་།བྱམས་པ་ཚད་མེད་རང་བཞིན་ཡིན། །ཀུན་ལ་བརྩེ་བ་སྒོམ་པའི་མཆོག་།སྙིང་རྗེ་ཚད་མེད་ངོ་བོ་ཉིད། །ཀུན་ལ་ཕན་པ་སྒོམ་པའི་མཆོག་།དགའ་བ་ཚད་མེད་ངོ་བོ་ཉིད། །ཀུན་ལ་ཁྱབ་པ་སྒོམ་པའི་མཆོག་།བཏང་སྙོམས་ཚད་མེད་ངོ་བོ་ཉིད། །བསོད་ནམས་ཚོགས་སོག་སྒོམ་པའི་མཆོག་།བཞི་གསུམ་བཅུ་གཉིས་བདག་ཉིད་ཅན། །ལམ་ལ་བསྒོམས་པ་སྒོམ་པའི་མཆོག་།ངེས་འབྱེད་བཞིའི་བདག་ཉིད་ཅན། །ཡེ་ཤེས་མཐོང་བ་སྒོམ་པའི་མཆོག་།བྱང་ཆུབ་ཡན་ལག་རྣམ་བདུན་ཡིན། །གོམས་པར་བྱེད་པ་སྒོམ་པའི་ལམ། །འཕགས་ལམ་བརྒྱད་ཀྱི་བདག
87.84b
ཉིད་ཅན། །གོམས་པ་མཐར་ཕྱིན་སྒོམ་པའི་མཆོག་།བཅུ་པ་ལ་ནི་ཡོངས་སུ་གྲོལ། །སངས་རྒྱས་པའི་རྣམ་ཐར་ཡིན། །ཆགས་སེམས་བྲལ་བ་སྒོམ་པའི་མཆོག་།སྦྱིན་པའི་ཕ་རོལ་ཕྱིན་པ་ཡིན། །རང་སེམས་དག་པ་སྒོམ་པའི་མཆོག་།ཚུལ་ཁྲིམས་ཕ་རོལ་ཕྱིན་པ་ཡིན། །ཇི་མི་སྙམ་པ་སྒོམ་པའི་མཆོག་།བཟོད་པའི་ཕ་རོལ་ཕྱིན་པ་ཡིན། །གོ་ཆ་སྦྱོར་བ་སྒོམ་པའི་མཆོག་།བརྩོན་འགྲུས་ཕ་རོལ་ཕྱིན་པ་ཡིན། །གཡེང་བ་མེད་པ་སྒོམ་པའི་མཆོག་།བསམ་གཏན་ཕ་རོལ་ཕྱིན་པ་ཡིན། །འཁོར་འདས་ཤེས་པ་སྒོམ་པའི་མཆོག་།ཤེས་རབ་ཕ་རོལ་ཕྱིན་པ་ཡིན། །ཉོན་མོངས་མི་སྤོང་སྒོམ་པའི་མཆོག་།ཐབས་ཀྱི་ཕ་རོལ་ཕྱིན་པ་ཡིན། །མི་མཐུན་ཟིལ་གནོན་སྒོམ་པའི་མཆོག་།སྟོབས་ཀྱི་ཕ་རོལ་ཕྱིན་པ་ཡིན། །ཅི་བསམས་འགྲུབ་པ་སྒོམ་པའི་མཆོག་།སྨོན་ལམ་ཕ་རོལ་ཕྱིན་པ་ཡིན། །ཇི་སྙེད་མཁྱེན་བྱ་སྒོམ་པའི་མཆོག་།ཡེ་ཤེས་ཕ་རོལ་ཕྱིན་པ་ཡིན། །ཆོས་དབྱིངས་ཡེ་ཤེས་སྒོམ་པའི་མཆོག་།སྤྲོས་པ་མེད་པའི་རང་བཞིན་ཡིན། །མེ་ལོང་ཡེ་ཤེས་བསྒོམ་པའི་མཆོག་།ཐམས་ཅད་གཟུགས་བརྙན་ལྟར་ཤེས་ཡིན། །མཉམ་ཉིད་ཡེ་ཤེས་བསྒོམ་པའི་མཆོག་།ཀུན་ལ་སྙོམས་པའི་བདག་ཉིད་ཡིན། །ཀུན་རྟོག་ཡེ་ཤེས་སྒོམ་པའི་མཆོག་།མ་འདྲེས་གསལ་བའི་ངོ་བོ་ཉིད། །བྱ་གྲུབ་ཡེ་ཤེས་སྒོམ་པའི་མཆོག་།ཕྲིན་ལས་ཐམས་ཅད་དུས་གཅིག་རྫོགས། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ཅེས་བྱ་བ་ལས་སྒོམ་པའི་ལེའུ་སྟེ་བཞི་པའོ།། །། དེ་ནས་དུར་ཁྲོད་བདག་མོ་དེས། །ཧེ་རུ་ཀ་ལ་འདི་སྐད་གསོལ། །གོམས་པར་བྱ་བའི་རྗེས་ཐོབ་ལ། །སྤྱོད་པའི་གོ་རིམས་ཇི་ལྟར་བགྱི། །དེ་ནས་སྟོན་པས་གསང་བའི་ཚིག་འདི་སྐད་ཅེས་བཀའ་སྩལ་ཏོ། །ཅུང་ཟད་དྲོད་ནི་ཐོབ་པ་དང ། །དེ་ཚེ་སྤྱོད་པ་སྤྱད་པར་བྱ། །དང་པོ་གསང་བའི་སྤྱོད་པ་བྱ། །བྱང་ཆུབ་སེམས་ནི་དྲོད་ཐོབ་ནས། །རིག་པ་རྟུལ་ཞུགས་སྤྱོད་པར་བྱ། །ལྷན
87.85a
ཅིག་སྐྱེས་པའི་དྲོད་ཐོབ་ནས། །མ་དད་ཟློག་པའི་སྤྱོད་པ་བྱ། །ཆུ་ཚོད་ལྟ་བུའི་དྲོད་ཐོབ་ནས། །ཚོགས་ཀྱི་སྤྱོད་པ་ཅི་བདེར་སྤྱད། །སྨྱོན་པ་ལྟ་བུའི་སེམས་ཐོབ་ནས། །ཕྱོགས་མེད་རྣམ་རྒྱལ་སྤྱོད་པ་བྱ། །དེ་ཡི་དབྱེ་བ་གཞན་ན་གསལ། །གནས་དང་གྲོགས་དང་དུས་དང་ཟས། །ལེའུ་གཞན་ནས་ཤེས་པར་བྱ། །ཀུན་གྱིས་བཀུར་བ་སྤྱོད་པའི་མཆོག་།རྒྱལ་པོ་ལྟ་བུའི་སྤྱོད་པ་བྱ། །ངོ་ཚ་ཤེས་པ་སྤྱོད་པའི་མཆོག་།རྗེ་རིགས་ལྟ་བུའི་སྤྱོད་པ་བྱ། །ཆགས་སྡང་འཁྲུ་བ་སྤྱོད་པའི་མཆོག་།བྲམ་ཟེ་ལྟ་བུའི་སྤྱོད་པ་བྱ། །སྲིད་དང་བྲལ་བ་སྤྱོད་པའི་མཆོག་།དམངས་རིགས་ལྟ་བུའི་སྤྱོད་པ་བྱ། །དམས་ས་འཛིན་པ་སྤྱོད་པའི་མཆོག་།གདོལ་པ་ལྟ་བུའི་སྤྱོད་པ་བྱ། །དེ་ནས་གཞན་ཡང་བཤད་བྱ་སྟེ། །མཐོ་ས་འཛིན་པ་སྤྱོད་པའི་མཆོག་།སེང་གེ་ལྟ་བུའི་སྤྱོད་པ་བྱ། །ཉམ་ང་མེད་པ་སྤྱོད་པའི་མཆོག་།གླང་ཆེན་ལྟ་བུའི་སྤྱོད་པ་བྱ། །ཤུགས་དང་ལྡན་པ་སྤྱོད་པའི་མཆོག་།རྟ་མཆོག་ལྟ་བུའི་སྤྱོད་པ་བྱ། །རྣམ་རྟོག་གསོད་པ་སྤྱོད་པའི་མཆོག་།སྤྱང་ཀི་ལྟ་བུའི་སྤྱོད་པ་བྱ། །དྲག་ཤུལ་ལྟ་བྱེད་སྤྱོད་པའི་མཆོག་།དྲེད་མོ་ལྟ་བུའི་སྤྱོད་པ་བྱ། །དེ་ནས་གཞན་ཡང་བཤད་བྱ་སྟེ། །གཟའ་གཏད་མེད་པ་སྤྱོད་པའི་མཆོག་།རི་དགས་ལྟ་བུའི་སྤྱོད་པ་བྱ། །ངོ་ཚ་བྲལ་བ་སྤྱོད་པའི་མཆོག་།རོ་ལངས་ལྟ་བུའི་སྤྱོད་པ་བྱ། །རོ་དང་འགྲོགས་པ་སྤྱོད་པའི་མཆོག་།རིགས་ངན་ལྟ་བུའི་སྤྱོད་པ་བྱ། །དུར་ཁྲོད་གནས་པ་སྤྱོད་པའི་མཆོག་།ལྕེ་སྤྱང་ལྟ་བུའི་སྤྱོད་པ་བྱ། །བག་ཡོད་རྔམ་པ་སྤྱོད་པའི་མཆོག་།ཝ་མོ་ལྟ་བུའི་སྤྱོད་པ་བྱ། །དེ་ལས་གཞན་ཡང་བཤད་པར་བྱ། །ཟུང་དུ་འབྲེལ་བ་སྤྱོད་པའི་མཆོག་།ངུར་བ་ལྟ་བུའི་སྤྱོད་པ་བྱ། །གཞན་གྱིས་མི་མཐོང་སྦྱོད་པའི་མཆོག་།ཁཝ་ཏ་ལྟ་བུའི་སྤྱོད་པ་བྱ། །དུག་ལྔ་སྤྱོད་པ་སྤྱོད་པའི་མཆོག་།རྨ་བྱ་ལྟ་བུའི་སྤྱོད་པ་བྱ། །དུས་ཚོད་འཛིན་པ་སྤྱོད་པའི་མཆོག་།ཁུ་བྱུག་ལྟ་བུའི་སྤྱོད་པ་བྱ། །ཉེས་པས་མ་གོས་སྤྱོད་པའི་མཆོག་།བྱ་རྒོད་ལྟ་བུའི་སྤྱོད་པ་བྱ། །དེ་ནས་གཞན་ཡང་བཤད་བྱ་སྟེ། །རིམ་གྱིས
87.85b
འཛེག་པའི་སྤྱོད་པའི་མཆོག་།སྤྲེའུ་ལྟ་བུའི་སྤྱོད་པ་བྱ། །འཇིགས་པ་མེད་པ་སྤྱོད་པའི་མཆོག་།དོམ་བུ་ལྟ་བུའི་སྤྱོད་པ་བྱ། །མཚན་མོ་རྒྱུ་བ་སྤྱོད་པའི་མཆོག་།ཞག་མིག་ཅན་གྱི་སྤྱོད་པ་བྱ། །གང་ལ་མི་གནས་སྤྱོད་པའི་མཆོག་།བུང་བ་ལྟ་བུའི་སྤྱོད་པ་བྱ། །སྣང་བ་ལྟ་བ་སྤྱོད་པའི་མཆོག་།འཕར་བ་ལྟ་བུའི་སྤྱོད་པ་བྱ། །དེ་ལས་གཞན་ཡང་བཤད་བྱ་སྟེ། །དགོས་འདོད་འབྱུང་བ་སྤྱོད་པའི་མཆོག་།ནོར་བུ་ལྟ་བུའི་སྤྱོད་པ་བྱ། །སྨན་དུག་གཉིས་མེད་སྤྱོད་པའི་མཆོག་།ག་བུར་ལྟ་བུར་ཤེས་པར་བྱ། །ཅིས་ཀྱང་མི་ཚུགས་སྤྱོད་པའི་མཆོག་།རྡོ་རྗེ་ལྟ་བུར་ཤེས་པར་བྱ། །མི་མཐུན་གཅོད་པ་སྤྱོད་པའི་མཆོག་།རལ་གྲི་ལྟ་བུར་ཤེས་པར་བྱ། །དེ་ནས་གཞན་ཡང་བཤད་བྱ་སྟེ། །ཐབས་དང་ཤེས་རབ་སྤྱོད་པའི་མཆོག་།མདའ་གཞུ་ལྟ་བུར་ཤེས་པར་བྱ། །སྟོང་པའི་ཁ་འབྱེད་སྤྱོད་པའི་མཆོག་།ཤཀ་ཏི་ལྟ་བུར་ཤེས་པར་བྱ། །འབིགས་པར་བྱེད་པ་སྤྱོད་པའི་མཆོག་།མདུང་ཐུང་ལྟ་བུར་ཤེས་པར་བྱ། །ང་བདག་གསོད་པ་སྤྱོད་པའི་མཆོག་།སྟ་རི་ལྟ་བུར་ཤེས་པར་བྱ། །གདུལ་བྱ་འདྲེན་པ་སྤྱོད་པའི་མཆོག་།ལྕགས་ཀྱུ་ལྟ་བུར་ཤེས་པར་བྱ། །དགོན་པའི་གནས་དང་དུར་ཁྲོད་དང ། །གྲོང་ཁྱེར་དག་ཏུ་རྣལ་འབྱོར་རྒྱུ་བའི་ཚེ། །དེ་འདྲའི་སྐྱེས་བུའི་ཕྱག་རྒྱ་ཆེར་རྟོགས་བྱེད། །དེ་ཉིད་སེམས་ཀྱི་ཁྱད་པར་མཐོང་གྱུར་ན། །བརྟུལ་ཞུགས་མེད་ཀྱང་སངས་རྒྱས་ས་ལ་འགྲོ། །སེམས་ཉིད་གཉིས་ཀྱི་གནད་དང་མ་བྲལ་ན། །བརྟུལ་ཞུགས་སྤྱད་ཀྱང་སྡུག་བསྔལ་སྣ་ཚོགས་སྐྱེ། །བསམ་གྱིས་མི་ཁྱབ་བརྟུལ་ཞུགས་རབ་ལྡན་ན། །རྒྱལ་པོ་རྒྱལ་རིགས་སྤྱི་བོར་དབང་བསྐུར་ལྟར། །ཐོགས་པ་མེད་པ་ཕྱག་རྒྱ་ཆེན་པོ་དེ། །སྐྱེ་བ་འདི་ལ་སངས་རྒྱས་ས་ལ་རེག་ཅེས་གསུངས་སོ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་སྤྱོད་པའི་རབ་ཏུ་དབྱེ་བའི་ལེའུ་སྟེ་ལྔ་པའོ།། །། དེ་ནས་དུར་ཁྲོད་བདག་མོ་དེས། །སྟོན་པ་ལ་ནི་འདི་སྐད་གསོལ། །ཡང་དག་བརྡ་ནི་བརྡ་ཆེན་
87.86a
པོ། །ཀུན་གྱིས་མི་རྟོག་སྦས་པའི་དོན། །བར་ཆད་སེལ་བ་བརྡའི་ཆོས། །བསམ་གྱིས་མི་ཁྱབ་བཤད་དུ་གསོལ། །དེ་ནས་སྟོན་པས་བཀའ་སྩལ་པ། །སྣང་བ་ཐམས་ཅད་ལས་ཀྱི་བརྡ། །ཚིག་ནི་ཇི་སྙེད་ངག་གི་བརྡ། །དེ་ལ་བསམ་གྱིས་མི་ཁྱབ་གནས། །དོན་གྱི་བརྡ་རུ་ཤེས་པར་བྱ། །དེ་ནས་དུར་ཁྲོད་བདག་མོས་ཡང་ཞུས་པ། གང་ཟག་འཇུག་པའི་རིམ་པ་དང ། །དཔའ་བོ་བརྟག་པའི་རིམ་པ་དང ། །ཕྱག་རྒྱ་མོ་ཡི་བརྟག་པ་དང ། །མཆོག་དང་ཐུན་མོང་དངོས་གྲུབ་དང ། །ཚོགས་ཀྱི་འཁོར་ལོའི་དུས་དག་དང ། །རྣལ་འབྱོར་ཕག་མོ་རྫོགས་བྱེད་དང ། །བརྡ་ཡི་བྱེ་བྲག་ཇི་སྙེད་པ། །འགྲོ་མགོན་ཁྱེད་ཀྱིས་བཤད་དུ་གསོལ། །མགོན་པོ་དཔའ་བོས་བཀའ་སྩལ་པ། །ཐམས་ཅད་ཀུན་གྱི་བརྡ་ཆེན་པོ། །སྦས་པའི་བརྡ་ནི་བཤད་བྱ་བ། །གཡས་པ་ཐབས་ཀྱི་རང་བཞིན་དང ། །གཡོན་པ་ཤེས་རབ་རང་བཞིན་དང ། །ལུས་ཀྱི་བརྡ་རྣམས་རྫོགས་པར་བྱ། །མི་རྟོག་སྒོམ་པ་སྟོན་པ་ལ། །ལག་པ་གཡོན་པ་བསྟན་པ་ནི། །ས་རོ་ཞེས་ནི་བརྗོད་པར་བྱ། །རྐང་པ་གྲོང་ཁྱེར་ས་བགྲོད་པས། །སྤྱོད་པ་ཉམས་མྱོང་གིས་འགྲོ་བ། །གོ་བའི་ཕྱིར་ནས་རྐང་བསྟན་ཏེ། ། གྷུ་ལ་ཞེས་བརྗོད་པར་བྱ། །སྲིན་ལག་མཁའ་འགྲོ་མ་ཡི་རྩ། །དེ་ཡི་ཕྱིར་ན་དེ་བསྟན་ཏེ། །ཤེས་རབ་ཆེན་པོར་གོ་བྱའི་ཕྱིར། །བྷ་ཏ་རི་ཞེས་བརྗོད་པར་བྱ། །ལྕེ་ཡིས་ཟས་ཀྱི་རོ་མྱོང་ལྟར། །སྟོང་པས་བདེ་བ་མྱོང་བསྟན་ཕྱིར། །ལྕེ་བསྟན་ཙརྱ་གྷ་ཞེས་བརྗོད། །སྐལ་བར་ལྡན་པའི་བདག་ཉིད་ནི། །ཡུལ་ལ་རིག་པར་བྱ་བའི་ཕྱིར། །ལྟོ་བ་ཟས་ཀྱི་སྣོད་བསྟན་པ། །ན་དྷ་ལི་ཞེས་བརྗོད་པར་བྱ། །ལྟོ་བ་ཟས་ཀྱི་སྣོད་ཡིན་ཕྱིར། །དེ་བཞིན་སྣོད་ནི་བསྟན་པར་བྱ། །བླ་མའི་བརྒྱུད་པ་གོ་ཆའི་ཕྱིར། །པཾ་ཀ་ཏ་ཞེས་བརྗོད་པར་བྱ། །སོར་མོ་ལྔའི་ནི་རྒྱུད་གཅིག་ལྟར། །ལྔ་ཡི་རྩ་བ་ཨེ་བཾ་དུ། །བསྡུས་ཕྱིར་སོར་མོ་ལྔ་བསྟན་ལ། །ཚན་དྷོ་ཧ་ཞེས་བརྗོད་པར་བྱ། །སོའི་སྟོབས་ཀྱིས་ཟས་འདུལ་ལྟར། །ེ་བཾ་ཇི་བཞིན་རྟོགས་པར་བྱེད། །གང་གིས་སོ་ནི་བསྟན་བྱས་པས། །ཙ་ལ་ནི་ཞེས་བརྗོད་པར་བྱ། །བྱིན་པས
87.86b
ལུས་ཀྱི་སྟོབས་སྐྱེད་ལྟར། །གོམས་པས་འབྲས་བུ་སྐྱེད་པའི་ཕྱིར། །གོ་ཕྱིན་པ་ནི་བསྟན་བྱས་ལ། །མེ་ག་བ་ཞེས་བརྗོད་པར་བྱ། །ས་གཞི་འགྲོ་བ་ཀུན་འདེགས་ལྟར། །འབྲས་བུ་དམ་ཚིག་གིས་བསྟེན་ལྟར། །ས་གཞི་གྲུ་བཞིར་བསྟན་བྱས་ལ། །མཎ་ཌལ་ཞེས་སུ་བརྗོད་པར་བྱ། །སོར་མོ་ལྔ་ནི་རྒྱུ་མཐུན་ཕྱིར། །ཕུང་ལྔ་རིགས་ལྔར་རྒྱས་བཏབ་པས། །གཡས་པའི་སོར་མོ་ལྔ་བསྟན་པ། །སྦ་ར་ན་ཞེས་བརྗོད་པར་བྱ། །མི་བསྐྱོད་པ་དང་རྡོ་རྗེ་འཆང ། །རྒྱས་གདབ་གཉིས་ནི་གོ་བྱའི་ཕྱིར། །དབུགས་ནི་ལ་ནི་དབྱུང་བར་བྱ། །དཔལ་ཀུན་ཤམ་ཞེས་བརྗོད་པར་བྱ། །སོ་འཆའ་བའི་ཞེ་སྡང་གིས། །འབྲས་བུའི་རྟགས་ནི་ཡིན་པའི་ཕྱིར། །གཉིས་སྣང་གཅོད་ཕྱིར་སོ་འཆའ་བས། །མ་ཏ་ཁྲ་ཞེས་བརྗོད་པར་བྱ། །ཤ་ནི་སྲོག་ཆགས་ཐམས་ཅད་ལས། །འབྱུང་ཞིང་ཆོས་རྣམས་ཐམས་ཅད་ནི། །སེམས་ཡིན་ཕྱིར་ནས་ཤ་བསྟན་པས། །ར་ཙ་ན་ཞེས་བརྗོད་པར་བྱ། །ཁྲོ་གཉེར་ཁྲོས་པའི་རྟགས་ཡིན་པས། །བྱ་བ་ཐམས་ཅད་སྡུག་བསྔལ་གྱི། །རྟགས་ཡིན་ཕྱིར་ན་ཁྲོ་གཉེར་བསྟན། །ནི་རི་ཧ་ཞེས་བརྗོད་པར་བྱ། །བསྡུམས་པས་དབྱེ་བ་མེད་པ་ལྟར། །འཁོར་འདས་དབྱེར་མི་ཕྱེད་པ་ལྟར། །བྷ་ག་ནི་ཞེས་བརྗོད་པར་བྱ། །དཔེ་ཡིས་མཚོན་པའི་དོན་དུ་ནི། །དྲི་མ་ཀུན་ལས་གྲོལ་བའི་ཕྱིར། །བསྡམས་པ་བཀྲོལ་ནས་གྲེ་ནན་བརྗོད། །བྱིན་གྱིས་བརླབས་པའི་གཏོར་མ་ཡིན། །ཐམས་ཅད་ཚིམ་པར་བྱེད་པ་ལྟར། །སྣ་ཚོགས་སྣང་བའི་ཆོས་ཀུན་ལ། །བདེ་བ་ཆེན་པོའི་རོས་ཚིམ་ཕྱིར། །གཏོར་མ་བཏང་ལ་ཧིཀ་ཀ་བརྗོད། །ལྟོ་བ་ཟས་ཀྱི་སྣོད་ཡིན་ལྟར། །སེམས་ཅན་སངས་རྒྱས་སྣོད་ཡིན་པས། །དོན་དུ་ལྟོ་བ་བསྟན་ནས་ནི། །ནི་གར་མ་ཞེས་བརྗོད་པར་བྱ། །དེ་རྣམས་ཕན་ཡོན་དཔག་མེད་པས། །སྙིང་པོ་རྒྱུད་དུ་གསལ་བར་བསྟན། །བརྡ་དང་ལྡན་པའི་རྣལ་འབྱོར་པས། །བདུད་རྩི་རྣམ་པ་ལྔ་པོ་ལ། །ལོངས་སྤྱོད་པ་ནི་ཐབས་ཀྱི་མཆོག་།བྱིན་གྱིས་བརླབས་དང་ས་བོན་དང ། །རང་བཞིན་བདུད་རྩི་ལ་འབད་པས། །དཔག་མེད་རིམས་ཀྱིས་ཕན་ཡོན
87.87a
འབྱུང ། །དེ་ནས་གཞན་ཡང་བཤད་བྱ་སྟེ། །ལྔ་བསྡུས་རྩེ་མོ་མནན་པ་ནི། །བུམ་པའི་དབང་སྟེ་ལུས་ཀྱི་བརྡ། །མཐེབ་སྲིན་ཨེའི་དྲང་རོ་གཅིག་།གསང་བའི་དབང་སྟེ་ལུས་ཀྱི་བརྡ། །བྱང་ཆུབ་མཆོག་གི་ཕྱག་རྒྱ་ནི། །གསུམ་པ་ཤེས་རབ་ཡེ་ཤེས་ཡིན། །སྐྱེས་དང་མ་སྐྱེས་གཉིས་མེད་པས། །བཞི་པ་ཡིན་སྟེ་ལུས་ཀྱི་བརྡ། །དེ་ཡི་ངག་གི་བརྡ་སྨྲས་པ། །ཀ་ལ་ཤ་ཡ་བུམ་པའི་དབང ། །ཡ་ར་ལ་ཝ་གསང་བའི་བརྡའོ། །ེ་བཾ་མ་ཡ་གསུམ་པའི་བརྡའོ། །ེ་ཧཱུཾ་ཨོཾ་ཨཱ་བཞི་པའོ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་བརྡའི་ལེའུ་སྟེ་དྲུག་པའོ།། །། དེ་ནས་དུར་ཁྲོད་བདག་མོ་དེས། སྟོན་པ་མཚན་ཉིད་བཞི་དང་ལྡན་པ་དེ་ལ་ཕྱིའི་མཆོད་པའི་ཚོགས་དཔག་ཏུ་མེད་པ་དང ། ནང་གི་མཆོད་པའི་ཚོགས་དཔག་ཏུ་མེད་པ་དང ། གསང་བའི་མཆོད་པའི་ཚོགས་དཔག་ཏུ་མེད་པ་དང ། དེ་ཁོ་ན་ཉིད་ཀྱི་མཆོད་པ་ཕུལ་ནས་འདི་སྐད་ཞུས་སོ། །བླ་མེད་སྟོན་པ་ཧེ་རུ་ཀ ། འཁོར་བའི་སེམས་ཅན་འདྲེན་མཛད་པ། །ཐུགས་རྗེ་ཆེ་དང་ལྡན་པ་ཁྱོད། །ནད་པ་ལྟ་བུའི་སེམས་ཅན་ལ། །ཆོས་ཀྱི་སྨན་མཆོག་བསྟན་དུ་གསོལ། །ལོང་བ་ལྟ་བུའི་སེམས་ཅན་ལ། །ཆོས་ཀྱི་སྒྲོན་མེ་སྦར་དུ་གསོལ། །རྒྱལ་པོ་ལྟ་བུའི་སྟོན་པ་ཁྱོད། །ཀུན་ལ་བྱམས་པ་མཛད་དུ་གསོལ། །བློན་པོ་ལྟ་བུའི་སྟོན་པ་ཁྱོད། །ཀུན་ལ་ཕན་པ་མཛད་དུ་གསོལ། །ཞེས་ཞུས་སོ། །དེ་ནས་སྟོན་པ་འཇིགས་བྱེད་ཧེ་རུ་ཀ་དེ་ཐུགས་རབ་ཏུ་དགྱེས་ཏེ། སྐུའི་སྒོ་ནས་མཛེས་གར་རྣམ་པ་གསུམ་མཛད། གསུང་གི་སྒོ་ནས་རྡོ་རྗེའི་ཚིག་རྣམ་པ་གསུམ་མཛད། ཐུགས་ཀྱི་སྒོ་ནས་ཁྱད་པར་ཀྱི་ཡེ་ཤེས་རྣམ་པ་གསུམ་བསྐྱེད་ནས། འཁོར་རྣམས་ལ་སྤྱན་གཟིགས་ནས་ཚངས་པའི་གསུང་གིས་རྡོ་རྗེའི་ཚིག་འདི་བཀའ་སྩལ་ཏོ། །ཉོན་ཅིག་དུར་ཁྲོད་བདག་མོ་ཁྱོད། །འཁོར་བའི་སེམས་ཅན་ཐམས་ཅད་ལ། །
87.87b
མ་རིག་པའི་མུན་པས་བསྒྲིབས། །འཁོར་བའི་རྒྱ་མཚོ་ཆེན་པོར་ལྟུང ། །ཉོན་མོངས་འདམ་དུ་བྱིང་བ་ཡིས། །དུས་གསུམ་སངས་རྒྱས་ཐམས་ཅད་ཀྱིས། །ཆོས་ཀྱི་སྒོ་མོ་བརྒྱད་ཁྲི་དང ། །བཞི་སྟོང་གི་ནི་གྲངས་སྙེད་ཀུན། །ཉོན་མོངས་པའི་གཉེན་པོར་བསྟན། །དབང་པོ་རབ་འབྲིང་དང་སྦྱར་ནས། །ཐུན་མོང་ཐེག་པ་རིམ་གྱིས་བསྟན། །མདོ་སྡེ་འདུལ་བ་མངོན་པ་གསུམ། །བསྟན་པ་ཀུན་གྱི་རྩ་བ་ཡིན། །བདེར་གཤེགས་ཐུགས་རྗེ་བསམ་མི་ཁྱབ། །སེམས་ཅན་རྣམས་ལ་དེ་ལྟར་བསྟན། །དེ་ནས་དུར་ཁྲོད་བདག་མོ་དེས་ཡང་འདི་སྐད་ཅེས་གསོལ་ཏོ། །བླ་མེད་སྟོན་པ་ཧེ་རུ་ཀ ། ཐུན་མོང་ཐེག་པ་དེ་ལྟར་བསྟན། །ཁྱད་པར་གསང་སྔགས་ཇི་ལྟར་ལགས། །རྒྱུད་སྡེ་རྣམས་ཀྱི་དབྱེ་བ་ཞུ། །སྨིན་པའི་ལམ་ནི་ཇི་ལྟར་ལགས། །གྲོལ་བའི་ལམ་ནི་གང་ལ་བགྱི། །དཔའ་བོ་ཆེན་པོས་བཤད་དུ་གསོལ། །ཞེས་ཞུས་སོ། །དེ་ནས་སྟོན་པ་ཧེ་རུ་ཀས། །ཉོན་ཅིག་དུར་ཁྲོད་བདག་མོ་ཁྱོད། །སྐལ་བར་ལྡན་པའི་གང་ཟག་ལ། །གསང་སྔགས་རྒྱུད་སྡེ་ངས་བཤད་ཀྱིས། །སྣོད་སྐྱོན་གསུམ་པོ་སྤོངས་ལ་ཉོན། །བྱ་བ་གཙོ་བོར་བྱེད་པ་ལ། །ཀྲི་མའི་རྒྱུད་སྡེ་རྣམ་ལྔ་བསྟན། །སྦྱོར་བ་གཙོ་བོར་བྱེད་པ་ལ། །གཉིས་པའི་རྒྱུད་སྡེ་རྣམ་ལྔ་བསྟན། །སེམས་ཉིད་གཙོ་བོར་བྱེད་པ་ལ། །རྣལ་འབྱོར་རྒྱུད་སྡེ་རྣམ་ལྔ་བསྟན། །བདེ་སྟོང་གཙོ་བོར་བྱེད་པ་ལ། །བླ་ན་མེད་པའི་རྒྱུད་ལྔ་བསྟན། །ཡིད་ལ་བྱེད་པ་མེད་རྣམས་ལ། །གོང་ན་མེད་པའི་རྒྱུད་ལྔ་བསྟན། །དེའི་ཕྱིར་རྒྱུད་སྡེ་རྣམ་པ་ལྔ། །གསང་སྔགས་རྒྱུད་ཅེས་བྱ་བར་གྲགས། །རེ་རེ་ལ་ཡང་ལྔ་ལྔ་སྟེ། །རྒྱུད་ཆེན་ཉི་ཤུ་རྩ་ལྔ་ནི། །མ་བྱུང་འབྱུང་བར་མི་འགྱུར་རོ། །ཞེས་གསུངས་སོ། །དེ་ནས་ཡང་དུར་ཁྲོད་བདག་མོ་དེས་ཡང་ཞུས་པ། རྒྱུད་ཀྱི་དབྱེ་བ་དེ་ལྟར་ན། །སྨིན་ཞེས་བགྱི་བ་ཇི་ལྟར་ལགས། །ལམ་ཞེས་བགྱི་བ་གང་ལ་བགྱི། །དེ་ཡི་དབྱེ་བ་བཤད་དུ་གསོལ་ཞེས་ཞུས་སོ། །དེ་ནས་སྟོན་པས་བཀའ་སྩལ་པ། །ཉོན་ཅིག་དུར་ཁྲོད་བདག་མོ་ཁྱོད། །འཁོར་བའི་སེམས་ཅན་ཐམས་ཅད་ལ། །དེ
87.88a
ཉིད་ཡོད་དེ་སྨིན་ལམ་མེད། །དེས་ན་འབྲས་བུ་ཐོབ་མི་འགྱུར། །ལམ་ལོག་མུ་སྟེགས་བྱེད་རྣམས་ལ། །དེ་ཉིད་ཡོད་དེ་སྨིན་ལམ་མེད། །དེས་ན་འབྲས་བུ་ཐོབ་མི་འགྱུར། །དམན་པ་ཉན་ཐོས་རང་རྒྱལ་ལ། །དེ་ཉིད་ཡོད་དེ་སྨིན་ལམ་མེད། །དེ་ཕྱིར་བསྐལ་པ་གྲངས་མེད་དུ། །དཀའ་ཐུབ་སྤྱོད་པ་ཉོན་རེ་མོངས། །མ་སྨིན་མདོ་སྡེར་ཞུགས་རྣམས་ལ། །དེ་ཉིད་ཡོད་དེ་སྨིན་ལམ་མེད། །དེས་ན་ཚེ་གཅིག་སངས་རྒྱས་དཀའ། །ཞེས་སོ། །དེ་ནས་དུར་ཁྲོད་བདག་མོ་དེས་ཡང་ཞུས་པ། སྨིན་ཞེས་བྱ་བ་གང་ལ་བགྱི། །ལམ་ཞེས་བྱ་བ་ཇི་ལྟར་ལགས། །དཔའ་བོ་ཆེན་པོས་བཤད་དུ་གསོལ། །ཉོན་ཅིག་དུར་ཁྲོད་བདག་མོ་ཁྱོད། །སྨིན་ཞེས་བྱ་བ་ནི་སང་དྷའི་སྒྲ་ལས་ཤེས་པར་བྱའོ། །ལམ་ཞེས་བྱ་བའི་སྒྲ་ནི་ཨ་ཐ་མི་ཐའི་སྒྲ་ལས་ཤེས་པར་བྱ། འཇིག་རྟེན་པའི་ལམ་དང་སྦྱར་རོ། །ལུས་དང་ངག་དང་སེམས་དང་གསུམ། །མ་སྨིན་སྨིན་པར་བྱེད་པའི་ཐབས། །དབང་བཀུར་ཆོ་ག་ཇི་སྙེད་བསྟན། །དང་པོ་བསྙེན་པ་བྱ་བ་གཅེས། །གྲངས་དང་དུས་དང་མཚན་མ་ཡི། །བསྙེན་པ་རྣམ་གསུམ་རྫོགས་བྱས་ནས། །ས་ཆོག་སྟ་གོན་ཚུལ་བཞིན་བྱ། །དང་པོ་ས་གཞི་ཡོངས་སུ་གཟུང ། །གཉིས་པ་སྟ་གོན་གནས་པ་སྟེ། །ནུབ་གསུམ་པ་ལ་འཇུག་པར་བྱ། །རྒྱུད་རྣམས་གཞན་དུ་ཤེས་པར་བྱ། །དེ་ནས་དཀྱིལ་འཁོར་ཤར་གྱི་སྒོར། །བའི་རྣམ་ལྔའི་མན་ཌལ་བྲི། །སྐལ་ལྡན་སློབ་མ་དེར་བཞག་ལ། །བུམ་པའི་དབང་རྣམས་རྫོགས་པར་བསྐུར། །དཀྱིལ་འཁོར་དེ་ཡི་ལྷོའི་སྒོ་རུ། །བདུད་རྩི་ལྔ་ཡི་མན་ཌལ་བྱ། །སྐལ་ལྡན་སློབ་མ་དེར་བཞག་ལ། །གསང་བའི་དབང་རྣམས་རྫོགས་པར་བསྐུར། །དཀྱིལ་འཁོར་དེ་ཡི་ནུབ་སྒོ་རུ། །དལ་གྱི་ཆོས་འབྱུང་ཨེ་དབྱིབས་བྲི། །སྐལ་ལྡན་སློབ་མ་དེར་བཞག་ལ། །ཤེས་རབ་ཡེ་ཤེས་དབང་བསྐུར་ཏེ། །གསུམ་པའི་དབང་རྣམས་རྫོགས་པར་བསྐུར། །དཀྱིལ་འཁོར་དེ་ཡི་བྱང་སྒོ་རུ། །ཕྲིན་ལས་རྣམ་བཞིའི་མན་ཌལ་བྲི། །སྐལ་ལྡན་སློབ་མ་དེར་བཞག་ལ། །བཞི་བའི
87.88b
དབང་རྣམས་རྫོགས་པར་བསྐུར། །དཀྱིལ་འཁོར་དེ་ཡི་ཕོ་བྲང་དུ། །སེང་ཆེན་བསྣོལ་བའི་ཁྲི་སྟེངས་སུ། །སྐལ་ལྡན་སློབ་མ་དེར་བཞག་ལ། །རྡོ་རྗེ་སློབ་དཔོན་བྱེད་པའི་དབང ། །ཆོ་ག་ཐམས་ཅད་རྫོགས་པར་བསྐུར། །སྐུ་གསུང་ཐུགས་ཀྱི་དབང་གསུམ་པོ། །ཐོག་མ་ཉིད་དུ་བསྐུར་བར་བྱ། །དེ་ནས་དུར་ཁྲོད་བརྒྱད་རྣམས་ཀྱིས། །དབང་ནི་རྣམ་པ་བརྒྱད་པོ་བསྐུར། །དེ་ནས་ཟས་རྣམས་བདུད་རྩིའི་དབང ། །ཇི་ལྟ་བར་ནི་བསྐུར་བར་བྱ། །དེ་ནས་ཕྱག་མཚན་རྣམས་ཀྱི་དབང ། །གོ་རིམས་བཞིན་དུ་བསྐུར་བར་བྱ། །དེ་ནས་ཉན་པའི་དབང་རྣམས་བསྐུར། །དེ་ནས་བཤད་པའི་དབང་རྣམས་བསྐུར། །དེ་ནས་སྐལ་ལྡན་གང་ཟག་ལ། །མངའ་གསོལ་སུམ་བཅུ་རྩ་ལྔ་བྱ། །དེ་ནས་བཀྲ་ཤིས་རྫས་བརྒྱད་ཀྱིས། །དབང་རྣམས་མ་ལུས་རྫོགས་པར་བསྐུར། །དེ་ནས་དབང་རྫོགས་གང་ཟག་དེ། །བདེར་གཤེགས་རྣམས་ཀྱི་སྲས་ཡིན་ཏེ། །མཁྱེན་རབ་བདེ་གཤེགས་རྣམས་དང་མཉམ། །མཐུ་སྟོབས་ཁྲོ་རྒྱལ་རྣམས་དང་མཉམ། །ཚེ་ཚད་ཉི་ཟླ་གཉིས་དང་མཉམ། །དང་པོ་ལས་ཅན་སྦྱོར་བ་ཡིས། །ས་བརྒྱད་པ་ལ་རབ་ཏུ་གནས། །དབང་བསྐུར་གནང་བ་མ་ཐོབ་ན། །རིག་པ་ཤེས་རབ་རྩལ་རྫོགས་ཀྱང ། །སློབ་དཔོན་བྱ་བ་ཡོང་མི་ནུས། །དབང་བསྐུར་གནང་བ་མ་མཐོང་ན། །གཞན་གྱི་ཡོན་ཏན་ཀུན་འཆང་ཡང ། །འཁོར་ལོ་སྲོག་ཤིང་མེད་པ་འདྲ། །དབང་མ་ཐོབ་པར་ལས་རྩོམ་དང ། །སྒྱིད་མ་མ་རྟས་ཁལ་འགེལ་བ། །འདི་དག་ཕུང་པོའི་རྒྱུ་ཡིན་ནོ། །སློབ་དཔོན་མཉེས་པར་མ་བྱས་ཤིང ། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་རྩོམ་པ་ནི། །འབྲས་བུ་མེད་ཅིང་བརླག་པར་འགྱུར། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་དབང་བསྐུར་བའི་ལེའུ་སྟེ་བདུན་པའོ།། །།དེ་ནས་དུར་ཁྲོད་ཕག་མོ་དེས། །ཧེ་རུ་ཀ་ལ་འདི་སྐད་ཞུས། །སངས་རྒྱས་ཐོབ་བྱེད་འབྲས་བུའི་ཆོས། །བསམ་གྱིས་མི་ཁྱབ་བཤད་དུ་གསོལ། །དབང་པོ་རབ་འབྲིང་ཐ་མ་གསུམ། །གང་དང་གང་གིས་གྲོལ་བ་ལགས། །དུག་ལྔ
87.89a
སྤྱོད་པའི་གང་ཟག་ལྔ། །གང་དང་གང་གིས་འཇོམས་པར་བྱེད། །དེ་ནས་སྟོན་པས་བཀའ་སྩལ་ཏེ། །ཉོན་ཅིག་དུར་ཁྲོད་བདག་མོ་ཁྱོད། །དབང་པོ་རབ་ཀྱི་གང་ཟག་ལ། །རང་བཞིན་རྣམ་དག་ཕག་མོ་བསྟན། །དབང་པོ་འབྲིང་གི་གང་ཟག་ལ། །བརྗོད་པ་སྒྲ་ཡི་ཕག་མོ་བསྟན། །དབང་པོ་ཐ་མའི་གང་ཟག་ལ། །མཚོན་པ་བརྡ་ཡི་ཕག་མོ་བསྟན། །ཞེས་བཀའ་སྩལ་ཏོ། །དེ་ནས་དུར་ཁྲོད་བདག་མོ་དེས། །སྟོན་པ་ལ་ནི་ཚིག་འདི་གསོལ། །རང་བཞིན་རྣམ་པར་དག་པ་ཡི། །རྡོ་རྗེ་ཕག་མོ་ཇི་ལྟ་བུ། །སྒྲ་ཡི་ཕག་མོ་ཇི་ལྟ་བུ། །དབྱིབས་ཀྱི་ཕག་མོ་ཇི་ལྟ་བུ། །ཞེས་པ་ལ་སོགས་པ་ཞུས་སོ། །ཉོན་ཅིག་དུར་ཁྲོད་བདག་མོ་ཁྱོད། །རང་བཞིན་ཉིད་ནས་དག་པ་དེ། །ཆོས་ཀྱི་སྐུ་ཡི་ངོ་བོ་ཉིད། །སྐད་ཅིག་དྲུག་གིས་རྫོགས་སངས་རྒྱས། །གྲོལ་འགྱུར་འདི་ལ་ཐེ་ཚོམ་མེད། །བརྗོད་པ་སྒྲ་ཡི་ཕག་མོ་དེ། །ལོངས་སྤྱོད་སྒྲ་ཡི་ངོ་བོ་ཉིད། །ལོངས་སྤྱོད་རྫོགས་སྐུའི་ངོ་བོ་ཉིད། །ཟླ་དྲུག་གོམས་པའི་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །མཚོན་པ་བརྡ་ཡི་ཕག་མོ་དེ། །སྤྲུལ་པ་སྐུ་ཡི་ངོ་བོ་ཉིད། །ཟླ་དྲུག་གོམས་པའི་སྦྱོར་བ་ཡིས། །འགྲུབ་འགྲུར་འདི་ལ་ཐེ་ཚོམ་མེད། །ཅེས་བཀའ་སྩལ་ཏོ། །དེ་ནས་དུར་ཁྲོད་བདག་མོ་དེས། །དཔའ་བོ་ཆེ་ལ་ཡང་ཞུས་པ། །གང་ཟག་རིགས་ལ་ལྔ་ཡོད་དེ། །གཏི་མུག་ཅན་གྱི་གང་ཟག་དང ། །ཞེ་སྡང་ཅན་གྱི་གང་ཟག་དང ། །འདོད་པ་གཙོར་བྱེད་གང་ཟག་དང ། །ང་རྒྱལ་ཅན་གྱི་གང་ཟག་དང ། །ཕྲག་དོག་ཅན་གྱི་གང་ཟག་ལྔ། །དེ་རྣམས་གང་དང་གང་གིས་གྲོལ་ཞེས་ཞུས་སོ། །དེ་ནས་སྟོན་པས་བཀའ་སྩལ་ཏེ། །གཏི་མུག་ཅན་གྱི་གང་ཟག་ལ། །སྐུ་ཡི་ཕག་མོ་དཀར་མོ་བསྟན། །གཏི་མུག་ཚུལ་གྱིས་གཏི་མུག་འཇོམས། །འདོད་པ་གཙོར་བྱེད་སྐྱེས་བུ་ལ། །གསུང་གི་ཕག་མོ་དམར་མོ་བསྟན། །འདོད་ཆགས་ཚུལ་གྱིས་འདོད་ཆགས་འཇོམས། །ཞེ་སྡང་ཅན་གྱི་གང་ཟག་ལ། །ཐུགས་ཀྱི་ཕག་མོ་ནག་མོ་བསྟན། །ཞེ་སྡང་ཚུལ་གྱིས་ཞེ་སྡང་འཇོམས། །
87.89b
ང་རྒྱལ་ཅན་གྱི་གང་ཟག་ལ། །ཡོན་ཏན་ཅན་གྱི་ཕག་མོ་བསྟན། །ང་རྒྱལ་ཚུལ་གྱིས་ང་རྒྱལ་འཇོམས། །ཕྲག་དོག་ཅན་གྱི་གང་ཟག་ལ། །ཕྲིན་ལས་ཕག་མོ་ལྗང་ཁུ་བསྟན། །ཕྲག་དོག་ཚུལ་གྱིས་ཕྲག་དོག་འཇོམས། །དེ་ནས་དུར་ཁྲོད་བདག་མོ་དེས། །ཧེ་རུ་ཀ་ལ་ཚིག་འདི་གསོལ། །དུག་ལྔ་ཤས་ཆེ་གང་ཟག་ལྔ། །འབྲས་བུ་སྐུ་ལྔ་ཇི་ལྟར་ཐོབ། །ཡེ་ཤེས་ལྔ་ནི་ཇི་ལྟར་སྣང ། །རིགས་ལྔ་ཞེས་ནི་གང་ལ་བགྱི། །ཁྲོ་མོ་ལྔ་ནི་ཇི་ལྟར་བསྒོམ། །འཁོར་ལོ་ལྔ་ནི་ཇི་ལྟར་གནས། །སྙིང་པོ་ལྔ་ནི་ཇི་ལྟར་བཟླས། །དམ་ཚིག་ལྔ་ནི་ཇི་ལྟར་བསྲུང ། །ཉམས་མྱོང་ལྔ་ནི་ཇི་ལྟར་འབྱུང ། །ཉོན་མོངས་ལྔ་ནི་ཇི་ལྟར་འབྱུང ། །ཡེ་ཤེས་ལྔ་ནི་ཇི་ལྟར་འཕེལ། །གྲངས་ཀྱི་ཚད་ནི་ཇི་ལྟར་བཟླས། །མཚན་མའི་རྟགས་ནི་ཇི་ལྟར་འབྱུང ། །དུས་ཀྱི་ཚད་ནི་ཇི་ལྟར་ལགས། །ལས་ཚོགས་རྣམས་ནི་ཇི་ལྟར་འགྲུབ་ཅེས་ཞུས་སོ། །དེ་ནས་དཔའ་བོ་ཧེ་རུ་ཀས། ཐུགས་རབ་ཏུ་དགྱེས་ཏེ་བརྡའི་ཚིག་འདི་བཀའ་སྩལ་ཏོ། །ཉོན་ཅིག་དུར་ཁྲོད་བདག་མོ་ཁྱོད། །དུག་ལྔ་སྤྱོད་པའི་གང་ཟག་ལྔ། །འབྲས་བུ་རྣམ་པ་ལྔ་ཐོབ་སྟེ། །ཀུན་ལ་ཁྱབ་པ་ཆོས་སྐུ་དང ། །ཐེག་ཆེན་སྤྱོད་པ་ལོངས་སྐུ་དང ། །གང་ལ་གང་འདུལ་སྤྲུལ་སྐུ་དང ། །ཅིས་ཀྱང་མི་ཤིགས་རྡོ་རྗེའི་སྐུ། །ངོ་བོ་ཉིད་ཀྱི་སྐུ་མཆོག་དང ། །སྐྱེ་བ་གཅིག་གིས་ཐོབ་པར་འགྱུར། །རྟོགས་པའི་དོན་ལ་གོམས་པར་བྱེད། །ཚེ་འདི་ཉིད་ལ་སངས་རྒྱས་འཐོབ། །རྫོགས་སངས་རྒྱས་ཀྱིས་རྒྱུད་དུ་བཤད། །ཐོབ་བྱའི་ཡེ་ཤེས་རྣམ་ལྔ་ཡང ། །སྤྲོས་བྲལ་ཆོས་དབྱིངས་ཡེ་ཤེས་དང ། །མེ་ལོང་ཡེ་ཤེས་གཟུགས་བརྙན་ལྟར། །བདག་གཞན་གཉིས་མེད་མཉམ་པ་ཉིད། །གསལ་ལ་མ་འདྲེས་སོ་སོར་རྟོག་།ཕྲིན་ལས་མཐར་ཕྱིན་བྱ་བ་གྲུབ། །ཡེ་ཤེས་ལྔ་ནི་དེ་ལྟར་སྐྱེ། །གཞན་ནས་མ་ཡིན་རང་ཉིད་ལའོ། །དུག་ལྔ་སྤྱོད་པའི་གང་ཟག་ལྔ། །རིགས་ནི་རྣམ་པ་ལྔ་ཐོབ་སྟེ། །སྤྲོས་མེད་དེ་བཞིན་གཤེགས་པའི་རིགས། །དགོས་འདོད་འབྱུང་བ་རིན་ཆེན་རིགས། །སྐྱོན་གྱིས་མ་གོས་པདྨའི་རིགས། །སེམས
87.90a
ཅན་དོན་གྲུབ་ལས་ཀྱི་རིགས། །གཞན་ནས་མ་ཡིན་རང་ཉིད་ལ། །དུག་ལྔ་སྤྱོད་པའི་གང་ཟག་དེ། །ཡེ་ཤེས་ཁྲོ་མོ་ལྔ་བསྒོམས་ནས། །བདེ་བ་སྐྱེ་བ་སྐུ་ཡིན་པས། །བདེ་ཆེན་དཀར་མོ་བསྒོམ་པར་བྱ། །ནུས་པ་འབྱུང་བ་གསུང་ཡིན་པས། །དམར་མོ་སྒྲ་སྒྲོགས་བསྒོམ་པར་བྱ། །རྟོགས་ཚད་འཆར་བ་ཐུགས་ཡིན་པས། །ཁྲོས་མ་ནག་མོ་བསྒོམ་པར་བྱ། །བརྟན་པར་བྱེད་པ་ཡོན་ཏན་ཏེ། །སེར་མོ་དོན་གྲུབ་བསྒོམ་པར་བྱ། །བར་ཆད་སེལ་བ་ཕྲིན་ལས་ཏེ། །སྣ་ཚོགས་མཐར་ཕྱིན་བསྒོམ་པར་བྱ། །རིམས་ཀྱིས་མ་ཡིན་ཅིག་ཅར་ཡིན། །རྒྱ་དང་འབུར་གྱི་ཚུལ་དུ་བྱ། །ཡིག་འབྲུ་རྣམས་ཀྱི་གནས་ལུགས་ནི། །སྤྱི་གཙུག་བདེ་ཆེན་འཁོར་ལོ་ན། །བདེ་བྱེད་སྐུའི་གེ་བཞི། །རང་བཞིན་རྩའི་གཟུགས་ཅན་ནོ། །མགྲིན་པ་ལོངས་སྤྱོད་འཁོར་ལོ་ན། །གསུང་མཆོག་ཡི་གེ་རྣམ་བཞི་ནི། །རང་བཞིན་རྩའི་ཚུལ་དུ་གནས། །སྙིང་ཀ་ཆོས་ཀྱི་འཁོར་ལོ་ན། །ཐུགས་མཆོག་ཡི་གེ་རྣམ་བཞི་ནི། །རྩ་ཡི་དབྱིབས་དང་འཐུན་པར་གནས། །ལྟེ་བ་སྤྲུལ་པའི་འཁོར་ལོ་ན། །རྟེན་བྱེད་ཡོན་ཏན་ཡི་གེ་བཞི། །དེ་ཡི་རང་བཞིན་རྩ་ཡི་དབྱིབས། །ཕྲིན་ལས་ཡི་གེ་རྣམ་བཞི་ནི། །ཞི་རྒྱས་དབང་དྲག་ཡི་གེ་བཞི། །ལས་དང་རྗེས་འཐུན་གཟུགས་སུ་གནས། །སྙིང་པོ་ལྔའི་བཟླས་ཐབས་ནི། །ཕྱི་དང་ནང་དང་གསང་བ་དང ། །ཕྲིན་ལས་བཞི་ཡི་ཚུལ་དུ་བཟླས། །དམ་ཚིག་ལྔའི་བསྲུང་ཚུལ་ནི། །བདེ་ཆེན་དཀར་མོའི་དམ་ཚིག་ཏུ། །སེམས་ཅན་ཀུན་ལ་བྱམས་པ་བསྒོམས། །ཁྲོས་མ་ནག་མོའི་དམ་ཚིག་ཏུ། །དྲག་ཅིང་རྩུབ་པའི་སྤྱོད་པ་བྱ། །སེར་མོ་དོན་གྲུབ་དམ་ཚིག་ཏུ། །དངོས་པོ་ཀུན་ལ་ཆགས་མེད་བྱ། །དམར་མོ་སྒྲ་སྒྲོགས་དམ་ཚིག་ཏུ། །སྨྲ་ཞིང་བུད་མེད་བརྟེན་པར་བྱ། །སྣ་ཚོགས་མཐར་ཕྱིན་དམ་ཚིག་ཏུ། །རྒྱུད་ཅིང་མཆོད་པའི་སྤྱོད་པ་བྱ། །མཁའ་འགྲོ་སྤྱིའི་དམ་ཚིག་ཏུ། །བདུད་རྩི་ལྔ་དང་ཤ་ལྔ་ལ། །རྟག་ཏུ་ལོངས་སྤྱོད་བྱ་བ་ནི། །བཟའ་བའི་དམ་ཚིག་རྣམ་ལྔ་སྟེ། །གསང་སྔགས་སྤྱོད་པས་བསྟེན་པར
87.90b
བྱ། །དེ་ནས་ཉམས་དང་བྱིན་བརླབས་ནི། །གོ་རིམས་སྐྱེ་ཚུལ་འདི་ལྟ་སྟེ། །དམིགས་པ་མེད་པའི་སྙིང་རྗེ་སྐྱེ། །སངས་རྒྱས་མཁའ་འགྲོའི་ཉམས་མྱོང་ཡིན། །ཆོས་རྣམས་གཟུགས་བརྙན་ལྟར་མཐོང་བ། །རྡོ་རྗེ་མཁའ་འགྲོའི་ཉམས་མྱོང་ཡིན། །ཐམས་ཅད་མཉམ་པ་ཉིད་སྐྱེ་བ། །རིན་ཆེན་མཁའ་འགྲོའི་ཉམས་མྱོང་ཡིན། །ཆོས་རྣམས་མ་འདྲེས་སོ་སོར་གསལ། །པད་མ་མཁའ་འགྲོའི་ཉམས་མྱོང་ཡིན། །དངོས་པོ་གང་ལའང་ཐོགས་མེད་པ། །ལས་ཀྱི་མཁའ་འགྲོའི་ཉམས་མྱོང་ཡིན། །ཉོན་མོངས་ལྔ་ཡི་འགྱུར་ལུགས་ནི། །གཏི་མུག་ཆོས་ཀྱི་དབྱིངས་སུ་འགྱུར། །ཞེ་སྡང་མེ་ལོང་ཡེ་ཤེས་འགྱུར། །ང་རྒྱལ་མཉམ་པ་ཉིད་ཀྱིར་འགྱུར། །འདོད་ཆགས་སོ་སོར་རྟོག་པར་འགྱུར། །ཕྲག་དོག་བྱ་བ་ནན་ཏན་འགྱུར། །དེ་ནས་འགྱུར་བ་ལམ་དུ་བྱེད། །དེ་ནས་གཞན་ཡང་བཤད་བྱ་སྟེ། །སྐུ་ཡི་ཡི་གེ་རྣམ་བཞི་ཡིས། །ཆོས་ཀྱི་དབྱིངས་ཀྱི་ཡེ་ཤེས་འཕེལ། །གསུང་གི་ཡི་གེ་རྣམ་བཞི་ཡིས། །སོ་སོར་རྟོག་པའི་ཡེ་ཤེས་འཕེལ། །ཐུགས་ཀྱི་ཡི་གེ་རྣམ་བཞི་ཡིས། །མེ་ལོང་ལྟ་བུའི་ཡེ་ཤེས་འཕེལ། །ཡོན་ཏན་ཡི་གེ་རྣམ་བཞི་ཡིས། །མཉམ་པ་ཉིད་ཀྱི་ཡེ་ཤེས་འཕེལ། །ཕྲིན་ལས་ཡི་གེ་རྣམ་བཞི་ཡིས། །བྱ་བ་གྲུབ་པའི་ཡེ་ཤེས་འཕེལ། །ཱ་ལི་དང་ནི་ཀཱ་ལི་ཡིས། །སྒྲ་དོན་དག་གིས་རྟོགས་པར་འགྱུར། །ཞེས་སོ། །དེ་ནས་གསང་བ་བཤད་བྱ་སྟེ། །གྲངས་ཀྱི་ཚད་ནི་འདི་ལྟ་སྟེ། །འབུམ་ཕྲག་གཅིག་གིས་བགེགས་རྣམས་སྐྲོད། །འབུམ་ཕྲག་གཉིས་ཀྱིས་གྲོང་ཁྱེར་སྐྲོད། །འབུམ་ཕྲག་གསུམ་གྱིས་རྒྱལ་པོ་འཇོམས། །འབུམ་ཕྲག་བཞི་པས་བུད་མེད་འགུགས། །འབུམ་ཕྲག་ལྔ་ཡིས་ཕྱོགས་རྣམས་བསྲེག་།འབུམ་ཕྲག་དྲུག་གིས་འབྱུང་བ་བཟློག་།འབུམ་ཕྲག་བདུན་གྱིས་གནས་ཁང་གཡོ། །འབུམ་ཕྲག་བརྒྱད་ཀྱིས་མངོན་ཤེས་འཆར། །འབུམ་ཕྲག་དགུ་ཡིས་ཟས་ནོར་འདུ། །འབུམ་ཕྲག་བཅུ་ཡིས་གང་འདོད་འགྲུབ། །དེ་ནས
87.91a
གསང་བ་བཤད་བྱ་སྟེ། །མཚན་ལྟས་རབ་འབྲིང་ཐ་མ་གསུམ། །སྐལ་དང་ལྡན་པའི་གང་ཟག་ལ། །ཡེ་ཤེས་ཁྲོ་མོ་རྣམ་པ་ལྔ། །མངོན་སུམ་དག་དུ་མཐོང་བར་འགྱུར། །དབང་པོ་རབ་ཀྱི་སྣང་བ་སྟེ། །ལས་འཕྲོ་ཅན་གྱི་སྣང་བ་ཡིན། །སྐལ་པ་འབྲིང་གི་གང་ཟག་ལ། །ཡེ་ཤེས་ཁྲོ་མོ་རྣམ་པ་ལྔ། །རང་གི་ལས་དང་གང་འཐུན་པར། །རྨྱི་ལམ་དག་ཏུ་མཆོག་དུ་གསལ། །སྐལ་བ་འབྲིང་གི་མཚན་ལྟས་ཡིན། །སྐལ་བ་དམན་པའི་གང་ཟག་ལ། །ཚུལ་བཞིན་བྲིས་པའི་ཐང་སྐུ་སྟེ། །འོད་དང་སྒྲ་དང་འཛུམ་པ་དང ། །མཁའ་འགྲོའི་ལུང་བསྟན་འབྱུང་བ་དང ། །སྐྱེ་བ་འདི་ལ་ངེས་པར་འགྲུབ། །སྦྱོར་བ་དམན་པའི་གང་ཟག་ལ། །བར་མ་དོར་ནས་ལམ་སྣ་འདྲེན། །མཁས་སྤྱོད་གནས་སུ་འཁྲིད་པར་བྱེད། །དུས་ཀྱི་ཚད་ནི་རྣམ་གསུམ་སྟེ། །རབ་ལ་སྐད་ཅིག་རྣམ་དྲུག་ཡིན། །འབྲིང་ལ་ཟླ་བ་དྲུག་གིས་གྲོལ། །ཐ་མ་ལོ་དྲུག་སྦྱར་བའོ། །ཕྱི་དང་ནང་དང་གསང་བ་གསུམ། །རྣམ་པ་གསུམ་དུ་ཤེས་པར་བྱ། །ལས་ཚོགས་རང་བཞིན་དབྱེ་བ་ནི། །རྒྱས་དང་བསྡུས་པ་ཤིན་དུ་རྒྱས། །རྣམ་པ་གསུམ་དུ་ཤེས་པར་བྱ། །བསྡུས་པ་ཚར་གཅད་རྗེས་གཟུང་གཉིས། །རྒྱས་པ་ཕྲིན་ལས་རྣམ་པ་བཞི། །ཤིན་དུ་རྒྱས་པ་ཐུན་མོང་བརྒྱད། །དེ་ལས་འཕྲོས་པ་ཉི་ཤུ་ལྔ། །བདེ་ཆེན་དཀར་མོའི་ཏིང་འཛིན་གྱིས། །ཞི་བའི་ལས་ཚོགས་རྣམ་ལྔ་འགྲུབ། །སེར་མོ་དོན་གྲུབ་ཏིང་འཛིན་གྱིས། །རྒྱས་པའི་ལས་ཚོགས་རྣམ་ལྔ་འགྲུབ། །དམར་མོ་སྒྲ་སྒྲོགས་ཏིང་འཛིན་གྱིས། །དབང་གི་ལས་ཚོགས་རྣམ་ལྔ་འགྲུབ། །ཁྲོས་མ་ནག་མོའི་ཏིང་འཛིན་གྱིས། །དྲག་པོའི་ལས་ཚོགས་རྣམ་ལྔ་འགྲུབ། །སྣ་ཚོགས་མཐར་ཕྱིན་ཏིང་འཛིན་གྱིས། །ཕྲིན་ལས་བཞི་ཡི་ལས་རྣམས་འགྲུབ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པའི་ཕག་མོ་མངོན་པར་འབྱུང་བའི་རྒྱུད་ལས་འབྲས་བུའི་ལེའུ་སྟེ་བརྒྱད་པའོ།། །།
87.91b
དེ་ནས་དུར་ཁྲོད་བདག་མོ་དེས། །སྟོན་པ་མཚན་ཉིད་བཞི་ལྡན་ལ། །ཕྱི་ནང་གསང་བའི་མཆོད་པ་འདི་ཕུལ་ནས་འདི་སྐད་ཞུས་ཏེ། སྐལ་བར་ལྡན་པའི་གང་ཟག་གིས། །བདག་དང་གཞན་ལ་ཕན་གདགས་ཕྱིར། །སྐུ་དང་མཆོད་རྟེན་ཇི་ལྟར་བགྱི། །དེ་ཡི་གོ་རིམས་བཤད་དུ་གསོལ། །ཞེས་ཞུས་པའོ། །དེ་ནས་སྟོན་པས་བཀའ་སྩལ་ཏེ། །ཉོན་ཅིག་དུར་ཁྲོད་བདག་མོ་ཁྱོད། །རིགས་ཅན་ལྔའི་གང་ཟག་དེས། །བདག་དོན་གཞན་དོན་བྱེད་འདོད་པས། །སྐུ་ལྔ་གདུང་ལྔ་མཆོད་རྟེན་ལྔ། །རྒྱུ་ལྔ་སྔགས་ལྔ་ལས་རིམ་ལྔ། །ལྔ་ཚན་ལྔ་རུ་ཤེས་པར་བྱ། །དེ་ཡི་བྱ་བའི་རིམ་པ་ནི། །དེ་ཉིད་གསུམ་དང་ལྡན་པར་བྱ། །དང་པོ་བདག་གི་དེ་ཉིད་དང ། །གཉིས་པ་རྒྱུ་ཡི་དེ་ཉིད་དང ། །གསུམ་པ་འབྲས་བུའི་དེ་ཉིད་དོ། །དང་པོ་བདག་གི་དེ་ཉིད་ནི། །དེ་བཞིན་རིགས་ཀྱི་གང་ཟག་དེ། །དད་དང་བརྩོན་འགྲུས་རབ་ལྡན་པས། །སྐུ་དང་མཆོད་རྟེན་འདེབས་དུས་སུ། །འདུ་ཤེས་གསུམ་དང་ལྡན་པར་བྱ། །གཉིས་པ་རྒྱུ་ཡི་དེ་ཉིད་ནི། །རྣམ་པ་ལྔ་རུ་ཤེས་པར་བྱ། །ས་གཞི་དཀར་ཞིང་སྣུམ་པ་ལ། །རིན་ཆེན་སྣ་ལྔ་ལ་སོགས་པའི། །ལྔ་ཚན་ལྔ་ནི་ལེགས་སྦྱར་ཏེ། །ལུས་ངག་ཡིད་གསུམ་སྦྱོར་བ་ཡིས། །སྐུ་དང་མཆོད་རྟེན་ཅི་རིགས་གདབ། །འོག་མིན་གནས་ནས་སྤྱན་དྲངས་ལ། །རབ་ཏུ་གནས་པ་གཞུང་བཞིན་བྱ། །དེ་ནས་མངའ་གསོལ་ན་བཟའ་གསོལ། །དེ་ལ་མཆོད་དང་བསྟོད་པ་བྱ། །བཞུགས་སུ་གསོལ་བའི་རིམ་པ་ནི། །དམ་ཆོས་གཞན་དང་འཐུན་པར་བྱ། །ཞི་བའི་ལས་རྣམས་འགྲུབ་པར་འགྱུར། །དང་པོ་བདག་གི་དེ་ཉིད་ནི། །རིན་ཆེན་རིགས་ཀྱི་གང་ཟག་དེས། །དད་དང་བརྩོན་འགྲུས་རབ་ལྡན་པས། །སྐུ་འམ་མཆོད་རྟེན་འདེབས་དུས་སུ། །འདུ་ཤེས་གསུམ་དང་ལྡན་པར་བྱ། །གཉིས་པ་རྒྱུ་ཡི་དེ་ཉིད་ནི། །རྣམ་པ་ལྔ་རུ་ཤེས་པར་བྱ། །ས་བཞི་སེར་ལ་འཚེར་བ་ལ། །གོང་དུ་བསྟན་པ་ཇི་ལྟ་བར། །སྐུ་དང་མཆོད
87.92a
རྟེན་ཅི་རིགས་གདབ། །འོག་མིན་གནས་ནས་སྤྱན་དྲངས་ནས། །རབ་ཏུ་གནས་པ་གཞུང་བཞིན་བྱ། །དེ་ལ་མངའ་གསོལ་ན་བཟའ་གསོལ། །མཆོད་དང་བསྟོད་པ་བཞུགས་པ་རྣམས། །དམ་ཆོས་གཞན་དང་འཐུན་པར་བྱ། །རྒྱས་པའི་ལས་རྣམས་འགྲུབ་པར་འགྱུར། །དང་པོ་བདག་གི་དེ་ཉིད་ནི། །པད་མ་རིགས་ཀྱི་གང་ཟག་དེ། །དད་དང་བརྩོན་འགྲུས་རབ་ལྡན་པས། །སྐུ་དང་མཆོད་རྟེན་བྱེད་དུས་སུ། །འདུ་ཤེས་གསུམ་དང་ལྡན་པར་བྱ། །གཉིས་པ་རྒྱུ་ཡི་དེ་ཉིད་ནི། །རྣམ་པ་ལྔ་རུ་ཤེས་པར་བྱ། །ས་གཞི་དམར་ལ་གདང་བ་ལ། །ལྔ་ཚན་ལྔ་དང་ལེགས་སྦྱར་ཏེ། །ལུས་ངག་ཡིད་གསུམ་སྦྱོར་བ་ཡིས། །སྐུ་དང་མཆོད་རྟེན་ཅི་རིགས་གདབ། །འོག་མིན་གནས་ནས་སྤྱན་དྲངས་ལ། །རབ་ཏུ་གནས་པ་གཞུང་བཞིན་བྱ། །དེ་ལ་མངའ་གསོལ་ན་བཟའ་གསོལ། །མཆོད་དང་བསྟོད་དང་གཞུགས་པ་ཀུན། །དམ་ཆོས་གཞན་དང་འཐུན་པར་བྱ། །དབང་གི་ལས་རྣམས་འགྲུབ་པར་འགྱུར། །དང་པོ་བདག་གི་དེ་ཉིད་ནི། །རྡོ་རྗེ་རིགས་ཀྱི་གང་ཟག་དེ། །དད་དང་བརྩོན་འགྲུས་རབ་ལྡན་པས། །སྐུ་དང་མཆོད་རྟེན་འདེབས་དུས་སུ། །འདུ་ཤེས་གསུམ་དང་ལྡན་པར་བྱ། །གཉིས་པ་རྒྱུ་ཡི་དེ་ཉིད་ནི། །རྣམ་པ་ལྔ་རུ་ཤེས་པར་བྱ། །ས་བཞི་གནག་ཅིང་རྩུབ་པ་ལ། །ཁྲག་དང་དུག་དང་ཚེར་མ་དང ། །ཡུངས་དཀར་ཡུངས་ནག་སྐྱེ་ཚེ་དང ། །ལྔ་ཚན་ལྔ་དང་བཅས་པ་ལ། །ལུས་ངག་ཡིད་གསུམ་སྦྱོར་བ་ཡིས། །སྐུ་དང་མཆོད་རྟེན་ཅི་རིགས་གདབ། །འོག་མིན་གནས་ནས་སྤྱན་དྲངས་ལ། །རབ་ཏུ་གནས་པ་གཞུང་བཞིན་བྱ། །དེ་ལ་མངའ་གསོལ་ན་བཟའ་གསོལ། །མཆོད་དང་བསྟོད་པ་བཞུགས་པ་ཀུན། །དམ་ཆོས་གཞན་དང་འཐུན་པར་བྱ། །དྲག་པོའི་ལས་རྣམས་འགྲུབ་པར་བྱེད། །དང་པོ་བདག་གི་དེ་ཉིད་ནི། །ལས་ཀྱི་རིགས་ཀྱི་གང་ཟག་དེ། །དད་དང་བརྩོན་འགྲུས་རབ་ལྡན་པས། །སྐུ་དང་མཆོད་རྟེན
87.92b
འདེབས་དུས་སུ། །འདུ་ཤེས་གསུམ་དང་ལྡན་པར་བྱ། །གཉིས་པ་རྒྱུ་ཡི་དེ་ཉིད་ནི། །རྣམ་པ་ལྔ་རུ་ཤེས་པར་བྱ། །ས་བཞི་ལྗང་ཞིང་ཁ་དོག་སེར། །གོང་དུ་ལྔ་ཚན་ལྔ་དང་སྦྱར། །དེ་ལ་སྐུ་དང་མཆོད་རྟེན་རྣམས། །ཇི་ལྟར་ནུས་པ་བཞིན་དུ་གདབ། །འོག་མིན་གནས་ནས་སྤྱན་དྲངས་ལ། །རབ་ཏུ་གནས་པ་གཞུང་བཞིན་བྱ། །དེ་ལ་མངའ་གསོལ་ན་བཟའ་གསོལ། །མཆོད་དང་བསྟོད་པ་བཞུགས་པ་རྣམས། །དམ་ཆོས་གཞན་དང་འཐུན་པར་བྱ། །དྲག་པོའི་ལས་རྣམས་འགྲུབ་པར་འགྱུར། །བསྟོད་པ་ལྔ་ནི་སོ་སོར་བསྟོད། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་སྐུ་དང་མཆོད་རྟེན་གདབ་པའི་ལེའུ་སྟེ་དགུ་པའོ།། །། དེ་ནས་དུར་ཁྲོད་བདག་མོ་དེས་སྟོན་པ་མཚན་ཉིད་བཞི་ལྡན་ལ་ཕྱི་ནང་གསང་བའི་མཆོད་པ་གསུམ་ཕུལ་ནས་འདི་སྐད་ཞུས་སོ། །ཀྱེ་ཀྱེ་མགོན་པོ་བདག་ལ་གསོན། །ཁམས་གསུམ་འཁོར་བའི་སེམས་ཅན་རྣམས། །ཉོན་མོངས་བརྒྱད་ཁྲི་བཞི་སྟོང་དང ། །རྣམ་རྟོག་བརྒྱད་ཁྲི་བཞི་སྟོང་གིས། །དུས་གསུམ་ཀུན་ཏུ་སྡུག་བསྔལ་བསྐྱེད། །དེ་ཡི་གཉེན་པོ་བཤད་དུ་གསོལ། །ཁམས་གསུམ་འཁོར་བའི་སེམས་ཅན་རྣམས། །རྒྱུ་ནི་མ་རིག་པ་ཡིས་བསྐྱེད། །རྐྱེན་ནི་རྣམ་པར་རྟོག་པ་སྟེ། །དེ་རྣམས་རྣམ་རྟོག་ཇི་ལྟར་བསལ། །ཕྱོགས་ངན་ལ་སོགས་འགྲོ་བའི་ཚེ། །དེ་ཡི་རྟོག་པ་གཅད་པར་ཞུ། །ལེགས་ཉེས་ཀུན་གྱི་སྟངས་གཅོད་པའི། །མནའ་དང་གལ་གྱིས་འཇིགས་པ་ལ། །དེ་ཡི་རྟོག་པ་གཅད་པར་ཞུ། །ཉོན་མོངས་ནད་ཀྱིས་ཉེན་པ་ལ། །དེ་ལས་ཐར་པའི་ཐབས་གཅིག་ཞུ། །བདག་གཞན་གཉིས་པོ་རྩོད་དུས་སུ། །དེ་ལས་རྒྱལ་བའི་ཐབས་གཅིག་ཞུ། །ལུས་སེམས་གཉིས་པོ་འབྲལ་དུས་དེར། །དེ་ལས་ཐར་པའི་ཐབས་གཅིག་ཞུ། །དེ་ནས་སྟོན་པས་ཚིག་འདི་སྐད་ཅེས་བཀའ་སྩལ་ཏོ། །རྒྱུ་འབྲས་ཀུན་དུ་སྡུག་བསྔལ་བ། །མ་ལུས་དབྱེར
87.93a
མེད་ཤེས་གྱུར་ན། །སྡུག་བསྔལ་མ་ལུས་བདེ་བར་འགྱུར། །གཞན་ཡང་ཐུན་མོངས་འདི་ལྟ་སྟེ། །ཕྱོགས་ངན་ལ་སོགས་འགྲོ་བའི་ཚེ། །ཕྱོགས་ལས་རྣམ་པར་རྒྱལ་བར་བྱ། །ཉེས་ལེགས་ཀུན་གྱི་སྟངས་གཅོད་པ། །མནའ་འམ་གལ་གྱིས་འཇིགས་པ་ལ། །མནའ་ལས་རྣམ་པར་རྒྱལ་བར་བྱ། །ནད་དང་གདོན་གྱིས་ཉེན་པ་ལ། །བགེགས་ལས་རྣམ་པར་རྒྱལ་བར་བྱ། །བདག་གཞན་གཉིས་པོ་རྩོད་པ་ལ། །ངག་ལས་རྣམ་པར་རྒྱལ་བར་བྱ། །ལུས་སེམས་གཉིས་པོ་འབྲལ་དུས་དེར། །རླུང་ལས་རྣམ་པར་རྒྱལ་བར་བྱ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་རྣམ་པར་རྒྱལ་བ་རྣམ་པ་ལྔའི་ལེའུ་སྟེ་བཅུ་པའོ།། །།དེ་ནས་མགོན་པོ་ཧེ་རུ་ཀས་འཁོར་རྣམས་ལ་དེ་སྐད་ཅེས་བཀའ་སྩལ་པ་དང ། གསང་སྔགས་ཀྱི་སྡུད་པ་མོ་རབ་ཏུ་དགའ་སྟེ། འཁོར་རྣམས་འདུས་པའི་ཚོགས་ཀྱིས་ཀྱང་དེ་ལྟར་དགའ་མགུ་ཡི་རངས་ཏེ། ཕྱི་ནང་གསང་བའི་མཆོད་པ་ཕུལ་ནས། མགོན་པོ་ཐུགས་རྗེ་དང་ལྡན་པས། །བདག་དང་འདུས་པའི་འཁོར་རྣམས་དང ། །འཁོར་བའི་སེམས་ཅན་ཐམས་ཅད་ལ། །ཐུགས་རྗེས་གནང་བ་བཀའ་དྲིན་ལགས། །ཞེས་དགའ་མགུ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བ་རྩ་བའི་རྒྱུད་བཅོམ་ལྡན་འདས་འཇིགས་བྱེད་ཧེ་རུ་ཀས་གསུངས་པ་རྫོགས་སྷོ།།