rKTs


J487

(e-text produced by ADARSHA)

see text in transliteration
95.19b
༄#། །རྒྱ་གར་སྐད་དུ། ་ཨཱརྱ་སརྦ་བུདྡྷ་ཨངྒ་བ་ཏི་ནཱ་མ་དྷཱ་ར་ཎཱྀ། ་བོད་སྐད་དུ། ་འཕགས་པ་སངྱས་ཐཾད་ཀྱི་ཡན་ལག་དང་ལྡན་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གང་གཱའི་ཀླུང་ཆེན་པོའི་འགྲམ་ན་འཇིག་རྟེན་སྐྱོང་བ་བཞི་དང་ཐབས་ཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་ཀྱིས་རྣམ་ཐོས་ཀྱི་བུ་ལ་སོགས་པ་རྒྱལ་པོ་ཆེན་པོ་བཞི་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དག་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་རྣམས་ལ་འཇིགས་པ་ཆེན་པོ་བཞི་པོ་འདི་དག་འབྱུང་ངོ ། །བཞི་གང་ཞེ་ན། འདི་ལྟ་སྟེ། རྒ་བ་དང ། ན་བ་དང ། རྒུད་པ་དང ། འཆི་བའོ། །དེ་ལ་ཡང་འཇིགས་པ་ཆེན་པོ་གཅིག་སྟེ། འདི་ལྟར་འཆི་བདག་གི་འཇིགས་པ་ཆེན་པོ་སྟེ། བརྩམ་པ་མེད་པ། གཉེན་པོ་མེད་པ། རྟག་ཏུ་ཕྱི་བཞིན་འབྲང་བའོ། །རྒྱལ་པོ་ཆེན་པོ་དག་དེ་ལ་འཇིགས་པ་ཆེན་པོ་གཅིག་པོ་དེའི་གཉེན་པོ་ངས་འདིར་བརྗོད་པར་བྱའོ། །དེ་ནས་བཅོམ་ལྡན་འདས
95.20a
ལ་རྒྱལ་པོ་ཆེན་པོ་བཞིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་སླད་དུ་བཅོམ་ལྡན་འདས་ཀྱིས་སྲོག་རབ་ཏུ་སྩལ་བས། སྐྱེ་དགུ་རྗེས་སུ་བཟུང་བ་འདི་ནི་དེང་བདག་ཅག་གི་རྙེད་པ་ལེགས་པར་རྙེད་དོ། །དེ་ནས་བཅོམ་ལྡན་འདས་ཤར་ཕྱོགས་སུ་ཐུགས་མངོན་དུ་ཕྱོགས་ཏེ་བཞུགས་ནས། སེ་གོལ་གྱི་སྒྲས་དེ་བཞིན་གཤེགས་པ་ཐམས་ཅད་ལ་བསྐུལ་ཏེ། འདི་སྐད་ཅེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་སུ་དག་སེམས་ཅན་རྣམས་ལ་ཐུགས་བརྩེ་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ་དག་བདག་གི་གྲོགས་མཛོད་ཅིག་།དེས་ན་བདག་ཅག་འདིར་སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་ནས་སེམས་ཅན་ཐམས་ཅད་ཀྱི་དུས་མ་ཡིན་པར་འཆི་བ་རབ་ཏུ་བཟློག་པར་བགྱིའོ། །སྔོན་མ་བསྐོར་བའི་ཆོས་ཀྱི་འཁོར་ལོ་གཉིས་པ་ཡང་བསྐོར་བར་བགྱིའོ་ཞེས་གསུངས་སོ། །དེ་བཞིན་དུ་ལྷོ་དང ། ནུབ་དང ། བྱང་དང ། སྟེང་དང ། འོག་གི་དེ་བཞིན་གཤེགས་པ་ཐམས་ཅད་ལ་བསྐུལ་ཏེ། འདི་སྐད་ཅེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་སུ་དག་སེམས་ཅན་རྣམས་ལ་ཐུགས་བརྩེ་བའི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་དེ་དག་བདག་གིས་གྲོགས་མཛོད་ཅིག་ཅེས་གསུང་ངོ ། །དེ་བཞིན་དུ་ཕྱོགས་མཚམས་རྣམས་སུ་ཡང་འདི་སྐད་ཅེས་གང་གི་ཕྱིར་འདི་དག་ཚེ་དང ། སྟོབས་དང ། ཁ་དོག་དང་ལྡན་པ་ཡོངས་སུ་འགྲུབ་ཅིང་དུས་མ་ཡིན་པར་འཆི་བའི་འཇིགས་པ་འབྱུང་བར་མི་འགྱུར་བར་སངས་རྒྱས་ཐམས་ཅད་བདག་གི་གྲོགས་མཛོད་ཅིག་ཅེས་གསུང་ངོ ། །དེ་ནས་ཕྱོགས་བཅུའི་སའི་ཁམས་ཇི་སྙེད་སངས་རྒྱས་ཀྱི་སྤྱན་ལ་སྣང་བར་གྱུར་པ་དེ་སྙེད་ཀྱི་འཇིག་རྟེན་གྱི
95.20b
ཁམས་དག་སངས་རྒྱས་བཅོམ་ལྡན་འདས་ཀྱིས་ཏིལ་གྱི་གང་བུ་བཞིན་དུ་གང་སྟེ། དེ་དག་གིས་དེ་བཞིན་གཤེགས་པའི་གྲོགས་མཛད་པར་ཞལ་གྱིས་བཞེས་ནས་དེ་བཞིན་གཤེགས་པ་དེ་དག་ཐམས་ཅད་འདི་སྐད་ཅེས་གསུང་ངོ ། །ཏདྱ་ཐཱ། ཙ་ལཱ་ཙ་ལཱ་ཙ་ལེ། བི་ན་ཏི། སཝ་སྟི་ཀི་།ཙཀྲ། ཨངྒ་ཏི། པྲ་ཤ་མནྟུ། སརྦ་རོ་ག་ཨ་ན་ཏྲེ། ཀུ་ན་ཊེ་མ་ཧཱ་ཀུ་ན་ཊེ། ཙ་རེ་ཙ་རེ་རེ། ཧེ་མ་གི་རི། ཧེ་མ་གཽ་རི། ཧེ་མ་ནི་ཤུནྟི། ཧེ་མ་སི་སི། ཀཽ་ར་བེ་ཀཽ་ར་བ་བེ། ཧེ་ཀུ་ར་རེ། ཀུ་ར་རེ། ཀུ་མ་ཏི། བི་ཥ་ས་མ་ཎེ། ཤི་ཥྱ་བི། ཙ་ལེ་ཙ་ལེ། བི་ཙ་ལེ། མཱ་བི་ལམྦ། ཧུ་མུ་ཧུ་མུ་སཝཱ་ཧཱ། གསང་བ་པའི་བདག་པོ་ཇི་སྙེད་པ་ཐམས་ཅད་ཀྱང་དེ་བཞིན་གཤེགས་པ་ཐམས་ཅད་དང་ཉེ་བར་འདུག་ནས་དེ་དག་གིས་སྨྲས་པ། ཧཱུཾ་ཧཱུཾ་སི་སི་སཝཱ་ཧཱ། དེ་སྐད་ཅེས་བཀའ་སྩལ་པ་དང ། དེ་བཞིན་གཤེགས་པ་ཐམས་ཅད་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་རྣམ་ཐོས་ཀྱི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་དེ་བཞིན་གཤེགས་པའི་བྱིན་གྱིས་བརླབས་ཀྱིས་བསྲུང་བར་བགྱིའོ། །དུས་མ་ལགས་པར་འགུམ་པ་ལས་བཟློག་པར་བགྱིའོ། །ཏདྱ་ཐཱ། ཤཝེ་ཏེ་ཤཝེ་ཏེ། ལེ་ལི་ལི། འཕགས་སྐྱེས་པོས་ཀྱང་སྨྲས་པ། མཱ་ཏངྒེ་མཱ་ཏངྒེ། མཱ་ཏངྒི་ནི། ཤཱུ་མཱ་ཤཱུ་མུ། ཡུལ་འཁོར་སྲུང་གིས་ཀྱང་སྨྲས་པ། ཙ་རེ་ཙ་རེ་རེ་སཝཱ་ཧཱ། མིག་མི་བཟང་གིས་ཀྱང་སྨྲས་པ། བ་ལམྤི་པ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དག་གང་ལ་ལ་ཞིག་སངས་རྒྱས་ཐམས་ཅད་ཀྱིས་གཟིགས་པའི་རིག་སྔགས་འདི་ཉིན་རེ་ལ་ལན་རེ་འདོན་ན་རིགས་ཀྱི་བུའམ། རིགས་ཀྱི་བུ་མོ་དེ་ལ་སྟོན་པའི་འདུ་ཤེས་བསྐྱེད་པར་བྱའོ། །རིགས་ཀྱི་བུའམ། རིགས་ཀྱི་བུ་མོ་དེ་ངན་སོང་གསུམ་དུ་འགྲོ་བར་མི་འགྱུར་རོ། །འདིས་སེམས་ཅན་ཐམས་ཅད་ཀྱི་སྲོག་ལ་ཕན་བཏགས་པར་འགྱུར་རོ། །གང་ཞིག་སེམས་ཅན་ཐམས་ཅད་ཀྱི་དོན་དུ་ཉིན་གཅིག་བཞིན་དུ་ཚིག་ཏུ་འདོན་པ་དང ། གང་ཡང་འདི་ཀློག་པ་དེ་ལ་དུས་མ་ཡིན་པར་འཆི་བའི་འཇིགས་པ་མེད་དོ། །
95.21a
དེའི་ལུས་ལ་ནད་ངན་པ་འབྱུང་བར་མི་འགྱུར་རོ། །ཆུས་འཆི་བའི་དུས་བྱེད་པར་མི་འགྱུར་རོ། །མེས་མ་ཡིན། མཚོན་གྱིས་མ་ཡིན། དུག་གིས་མ་ཡིན། ལྕེ་འབབ་པས་མ་ཡིན་ནོ། །གང་ན་རྒྱལ་བའི་བུ་དག་རིག་སྔགས་འདོན་པའི་ས་ཕྱོགས་དེ་སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ཀྱིས་དགོངས་པར་རིག་པར་བྱའོ། །ཡི་གེར་འདྲིའམ། །ཡི་གེར་འདྲིར་འཇུག་པ་དེས་སངས་རྒྱས་བཅོམ་ལྡན་འདས་ལ་རིམ་གྲོར་བྱ་བ་ཐམས་ཅད་ཀྱིས་བསྟི་སྟང་བྱས་པར་འགྱུར་རོ། །དེ་ཅིའི་ཕྱིར་ཞེ་ན། སེམས་ཅན་རྣམས་ལ་རིམ་གྲོ་བྱེད་པ་ནི་སངས་རྒྱས་ལ་རིམ་གྲོ་བྱེད་པ་ཡིན་ནོ་ཞེས་དེ་བཞིན་གཤེགས་པ་རྣམས་གསུང་བའི་ཕྱིར་རོ། །སུ་ཞིག་གིས་འདི་བྲིས་ནས་ཡན་ལག་ལ་བཏགས་ན་དེའི་ཡན་ལག་ཐམས་ཅད་བསྲུང་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། རྒྱལ་པོ་ཆེན་པོ་བཞི་དང ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སངས་རྒྱས་ཐམས་ཅད་ཀྱི་ཡན་ལག་དང་ལྡན་པ་ཞེས་བྱ་བའི་གཟུངས་རྫོགས་སྷོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ། །