rKTs


J502

(e-text produced by ADARSHA)

see text in transliteration
96.1ab
།ཡང་ཞུས་ཤེ་སྐར་ཞུས། ཐང་རྒྱལ་གཉིས་ཀྱི་མ་དཔེ་གསུམ་ལ་གཏུགས་ཏེ་ཞུས་ཆེན་བགྱིས་བདོག་ཅིང་དག་པར་བྱས་པས་སླན་ཆད་ཀྱང་འདི་ལྟར་བྲིས།།[་་]།།ཐམས་ཅད་མཁྱེན་པ་ལ་ཕྱག་འཚལ་ལོ། །བཅོམ་ལྡན་འདས་ཀྱིས་འཇམ་དཔལ་རྣོན་པོ་ལ་བསྟོད་པ། མཐིང་ནག་མཛེས་པས་འཇམ་པར་འཚེར་བའི་དབུ། །ལྕངས་ལོ་རྫིངས་བསྐྱོང་མཐིང་གི་མཚོ་ལྟར་གཡོ། །དགེ་བའི་སྤྱི་གཙུག་མཚན་མཆོག་གཡས་སུ་འཁྱིལ། །གཙུག་ཏོར་འཕགས་པས་སྐྱེ་བོས་བལྟར་མི་མཐོང ། །སྲིད་པའི་སྡུག་བསྔལ་མ་ལུས་གཞོམ་པ་དང ། །མཐུ་ཆེན་བྱིན་གྱིས་རྒལ་བ་གཞོམ་པའི་ཕྱིར། །དབུ་རྒྱན་གཅོད་པན་རྒྱལ་བའི་མཆོག་གསང་ཞིང ། །ཆོས་ཀྱི་རྒྱལ་ཐབས་དབང་གི་ཕ་རོལ་ཕྱིན། །རིན་ཆེན་སྤུག་དང་ཨུཏྤལ་འདྲ་བ་ཡི། །ཤིན་ཏུ་དངས་པར་དཀར་ནག་ཕྱེད་པའི་སྤྱན། །སྨིན་ཚུགས་མཛེས་པས་ཟླ་བ་ཚེས་ལྟར་འཁྱུག་།མིག་འཛུམས་ཟུར་གྱིས་ལྟ་བས་བྱམས་པའི་རྟགས། །སིལ་སྙན་རྣམ་དག
96.14b
མཚན་རབ་འབྲུ་ཆགས་པ། །རིན་ཆེན་མ་ལུས་རྣམ་པ་དུ་མས་སྤྲས། །རྒྱལ་བས་ཞིང་མང་རྣམ་པ་སྣ་ཚོགས་སུ། །རྣམ་ཐར་དཔག་ཡས་ཆོས་སྒོ་གྲངས་མེད་གནས། །ཤངས་ཀྱི་དབྱིབས་ལེགས་སྐྱེ་བོ་ཡོངས་ལས་འཕགས། །མཐོ་ལ་ཡིད་ཙམ་ཟུར་ལ་ལེགས་པའི་མཚན། །དྲང་ལ་ཆུ་ཕྲན་འདྲ་བར་མཛེས་པའི་ཚུལ། །བཟངས་ལེགས་བསྐལ་པ་བརྒྱར་ཡང་བལྟར་མི་ངོམས། །པད་མ་ལེབ་རྒན་ཚོན་ལྟར་དམར་བའི་སྒྲོས། །ཡིད་གཞུངས་འཕེལ་བ་འཁྱིལ་བ་བཟང་ལེགས་སྐུ། །མདོག་སྡུག་ཆུ་སྐྱེས་སྣང་བ་མཚོ་ལོ་བཞིན། །ཤིན་དུ་དང་བའི་ཡིད་ཀྱིས་འཛུམ་པ་མཛད། །ཞལ་རས་ཟླ་འདྲ་གསེར་གྱི་མདོག་གིས་རྒྱས། །འོད་ཀྱི་དཀྱིལ་འཁོར་གསེར་ཕྲེང་དུ་མས་སྤྲས། །གསལ་བའི་འོད་ཕུང་ཉི་མ་བརྒྱ་བས་ལྷག་།འོད་ཟེར་སྣ་ཚོགས་སྤྲིན་ཕུང་བཞིན་དུ་འཕྲོ། །ཆོས་དབྱིངས་འཇམས་པའི་དབྱངས་ཀྱིས་སྒྲ་སྒྲོགས་པ། །ཀ་ལ་པིང་ཀ་ལྟ་བུར་ཡིད་འཕྲོག་མཛད། །སང་སང་དབྱངས་རབ་གསུང་དབྱངས་རབ་བསྒྲགས་པ། །སེང་གེའི་ང་རོ་གསེར་གྱི་དྲིལ་ལྟར་འཁྲོལ། །སྐྱེས་མཆོག་མཛད་པ་རྒམ་པར་མཛད་པའི་སྐུ། །ཆ་ལུགས་བཞིན་འཆང་གཟི་བརྗིད་འཕགས་པའི་སྐུ། །གཞོན་ནུའི་ཚུལ་ཆགས་ཤིན་དུ་གཞོན་པར་གདའ། །གདུལ་བྱའི་སྐྱེ་བོ་གཞོན་ནུའི་གཟུགས་ཀྱིས་གདུལ། །དབུ་རྒྱན་རིན་ཆེན་རྣམ་པ་སྣ་ཚོགས་དང ། །མུ་ཏིག་དོ་ཤལ་གསེར་གྱི་རྒྱན་དུ་བཀོད། །པད་མ་ལྷ་ཡི་ན་བཟའ་སིལ་མ་བསྣམས། །གཡས་ན་མཚོན་མཆོག་བསྣམས་པ་ཐབས་ཀྱིས་འདུལ། །དཔེ་མེད་རྣོ་བ་ཤེས་རབ་ཉིད་དུ་ངེས། །ཆོས་དབྱིངས་ཚུལ་ཉིད་ཡང་དག་བརྗོད་པ་དང ། །མི་ཤིགས་རྡོ་རྗེ་གཏན་ནས་འབིགས་པའི་ཚུལ། །གཡོན་པ་ཤེས་རབ་ཕ་རོལ་ཕྱིན་པ་དང ། །བླང་དོར་གཉིས་མེད་བསམ་གྱིས་མི་ཁྱབ་དབྱིངས། །ཟབ་མོའི་ཆོས་ཉིད་ཐུགས་སུ་ཆུད་པའི་དོན། །བཅོམ་ལྡན་འདས་ཀྱིས་འཇམ་དཔལ་རྣོན་པོ་ལ་བསྟོད་པ་རྫོགས་སྷོ།།