rKTs


J529

(e-text produced by ADARSHA)

see text in transliteration
97.216a
༄#། །རྒྱ་གར་སྐད་དུ། ་ཨཱརྱ་ཛ་ཡ་བ་ཏཱི་ནི་ནཱ་མ་དྷ་ར་ཎཱི། ་བོད་སྐད་དུ། ་འཕགས་པ་རྒྱལ་བ་ཅན་ཞེས་བྱ་བའི་གཟུངས། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་དགེ་སློང་སྟོང་དུ་ཚང་བའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱིས་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སེམས་ཅན་ཐམས་ཅད་ལ་སྨན་པ་དང ། མིའི་རྒྱལ་པོ་རྣམས་ལ་སྨན་པ་དང་བདེ་བའི་སླད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་ཞེས་བགྱི་བ་འདི་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་ཐུགས་བརྩེ་བར་དགོངས་ཏེ། རིག་སྔགས་ཀྱི་རྒྱལ་མོ་རྒྱལ་བ་ཅན་བཀའ་སྩལ་པ། ལག་ན་རྡོ་རྗེ་ཁྱོད་ཀྱིས་རིག་སྔགས་ཀྱི་རྒྱལ་མོ་རྒྱལ་བ་ཅན་ཞེས་བྱ་བ། སངས་རྒྱས་བྱེ་བ་ཁྲག་ཁྲིག་འབུམ་ཕྲག་དུ་མས་གསུངས་པ། བྱིན་གྱིས་བརླབས་པ། སེམས་ཅན་ཐམས་ཅད་ལ་ཕན་པ་དང ། བདེ་བ་དང ། སྙིང་བརྩེ་བའི་ཕྱིར་ང་ཡང་ད་ལྟར་འཆད་པ་འདི་ཟུང་ཤིག་།ཏདྱ་ཐཱ་ཛ་ཡེ་ཛ་ཡེ། མ་ཧཱ་ཛ་ཡ་བ་ཏཱི་ཡེ། བུདྡྷ་ཨ་དྷིཥྛི་ཏེ་ཡེ། དྷརྨ་ཨ་བ་བྷཱ་ས་ནི། བུདྡྷ་ཨ་དྷི་ག་མེ་ཛྙཱ་ན་ཨ་བ་བྷཱ་སེ་སཝཱ་ཧཱ། ལག་ན་རྡོ་རྗེ་འདི་དག་ནི་དེ་བཞིན་གཤེགས་པས་སྤྱི་བོ་ནས་དབང་བསྐུར་བའི་གསང་སྔགས་ཀྱི་གཞི་རྣམས་ཏེ། ལག་ན་རྡོ་རྗེ་དེ་བཞིན་གཤེགས་པས་སྤྱི་བོ་ནས་དབང་བསྐུར་བའི་ཚིག་འདི་དག་གང་གིས་ལུས་ལ་བཏགས་སམ། གླེགས་བམ་ལ་བྲིས་པ་དེའི་ལུས་དཔག་ཚད་སྟོང་ཚུན་ཆད་དུ་ཕྱིར་རྒོལ་བའི་གནོད་པ་འབྱུང་བར་མི་འགྱུར་རོ། །མཚོན་དང ། དུག་དང ། དབྱིག་དུག་གིས་མི་ཚུགས་སོ། །རྒྱལ
97.216b
པོ་དེའི་ཡུལ་དེར་ཕ་རོལ་གྱི་གནོད་པ་མི་འབྱུང་ངོ ། །ཕྱིར་རྒོལ་བ་དག་ཡུལ་འཁོར་དེར་མཐུས་གནོད་པར་མི་འགྱུར་རོ། །ལག་ན་རྡོ་རྗེ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལས་རིག་སྔགས་ཀྱི་རྒྱལ་མོ་རྒྱལ་བ་ཅན་འདི་ཡི་གེར་བྲིས་ཏེ་འཆང་བ་དེ་ཇི་སྲིད་འཚོ་བའི་བར་དུ་དེའི་ལུས་ལ་མཚོན་དང ། དུག་དང ། ཆུ་དང ། རིམས་དང ། དུག་སྦྱར་མ་གཞན་གྱིས་མི་ཚུགས་པར་འགྱུར་རོ། །དེ་ལ་དགྲའི་འཇིགས་པ་དང ། འཚེ་བ་དང ། མཐོ་འཚམ་པ་འབྱུང་བར་མི་འགྱུར་རོ། །རྒྱལ་པོའི་འཇིགས་པ་མི་འབྱུང ། ཆོམ་རྐུན་གྱི་འཇིགས་པ་མི་འབྱུང ། ཐབ་མོའི་ནང་དུ་སོང་ཡང་དེའི་ལུས་ལ་མཚོན་གྱིས་མི་ཕོག་།ཐམས་ཅད་དུ་ཡང་ང་རྒྱལ་བ་སྨྲ་བར་འགྱུར། གནོད་པ་མེད་ཅིང་མ་སྣད་ལ་མ་རྨས་པར་རིག་སྔགས་ཀྱི་རྒྱལ་མོ་རྒྱལ་བ་ཅན་འདིའི་མཐུ་དང ། གཟི་བརྗིད་དང ། སྟོབས་དང ། བྱིན་གྱི་བརླབས་ཀྱིས་རྒྱལ་བར་འགྱུར་རོ། །ཏདྱ་ཐཱ། ཛ་ཡེ་ཛ་ཡེ། ཛ་ཡོད་མེ། དྷརྨ་ཨ་བ་བྷཱ་ས་ནི། བུདྡྷ་བུདྡྷ། དྷ་ར་དྷ་ར། དྷ་ར་དྷ་ར། བོ་དྷ་ནི། བོ་དྷ་ནི། བོ་དྷ་ནི། ཏ་ཐཱ་ག་ཏ། ཨ་དྷི་ཥྛི་ཏི། ཨ་བྷ་རོ་ཧ་ཎི། ཨ་རོ་བྱ་ནི། ཛ་ཡ་ཀུ་སུ་མེ། སཝ་རེ། ས་ར་བ་ཏཱི། དྲྀཌྷེ་དྲྀཌྷེ། ད་ད་དྲྀཌྷེ་པཱ་ཤ་རི་བདྡྷེ། ཨོ་ཧ་ནི། མོ་ཧ་ནི། ཛམྦྷ་ནི། སྟམྦྷ་ནི། སྟམྦྷི་ཏ། སརྦ་ཨ་ཧི་ཏི་ཥཱི་ཎཱཾ། ན་མོ་བྷ་ག་བ་ཏི། བུདྡྷ་སྱ། མ་ཧཱ་ཀ་རུ་ཎཱཾ། བི་ཧ་རི་ནི། སིདྡྷྱན་མནྟྲ་པ་དཱ་སཝཱ་ཧཱ། དེ་ནས་བཅོམ་ལྡན་འདས་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་སངྱས་ཀྱི་མཐུ་དང ། སངས་རྒྱས་ཀྱི་བྱིན་གྱི་བརླབས་ཀྱིས་བདག་གིས་རིག་སྔགས་ཀྱི་རྒྱལ་མོ་རྒྱལ་བ་ཅན་འདིའི་གཟུངས་ཀྱི་གསང་སྔགས་ཀྱི་གཞི་རྣམས་བརྗོད་པར་བགྱིའོ། །ཏདྱ་ཐཱ། ཛ་ཡ་ཛ་ཡ་ཛ་ཡ། པ་ཊ་པ་ཊ་པ་ཊ། ཛྭ་ལ་ཛྭ་ལ་ཛྭ་ལ། བཛྲ་པྲ་ཧ་ར་པྲ་ཧ་ར། པྲ་ཧ་ར། དྷ་ར་དྷ་ར་དྷ་ར། ཧ་ར་ཧ་ར་ཧ་ར། བྷ་ར་བྷ་ར་བྷ་ར། ཛ་ཡ་ཀུ་སུ་མེ། བ་ལ་བ་ལ། ཙཀྲ་ཙཀྲ། པཱི་ཌ་ཡ་པཱི་ཌ་ཡ། ཨ་ཀྲ་མ་ཨ་ཀྲ་མ། བི་ཀྲ་མེ་བི་ཀྲ་མེ། ཨ་ཙ་ལེ། མ་ཙ་ལེ། ཁ་ག་ཙཱ་རི་ཎི། ནཱི་ལ་བ་ཏཱི། བཛྲ་པྲ
97.217a
ཧ་ར་ནི། བཛྲ་སམྦྷ་བེ། བཛྲ་ཀཱ་ཡེ་བུདྡྷ་ཨ་དྷི་ཥྛི་ཏེ། བུདྡྷ་དརཥྨི་རཥྨི་མ་ཧཱ་པྲ་བྷེ། ཨུཙྪ་སྐནྡྷེ། མ་ཧཱ་ཏེ་ཛ་བ་ཏཱི། མ་ཙ་ལེ། མ་ཙ་ལེ། དྷུ་ན་དྷུ་ན་དྷུ་ན། ཀ་ཀང་རེ། ཀཱ་སི་ནི། ས་མཱ་ཧི་ཏེ། དྷརྨ་ཨ་བ་བྷཱ་ས་ནི། ཙ་ར་ཙ་ར། གྷུ་གྷུ་ཌེ། བཛྲ་མཱ་ལཱ་དྷ་ནི། ས་ར་ས་ར། ཀཱ་ལ་བ་རི་ཎཱི་སཝཱ་ཧཱ། བཅོམ་ལྡན་འདས་གསང་སྔགས་ཀྱི་གཞི་འདི་དག་ནི་སངས་རྒྱས་བྱེ་བ་ཕྲག་དགུ་བཅུ་རྩ་དགུས་གསུངས་པ་སྟེ། སུ་ཞིག་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་ལས་འདའ་བར་བགྱིད་པ་དེ་དག་ནི་སངས་རྒྱས་བཅོམ་ལྡན་འདས་དེ་དག་ལ་འཁུས་པར་འགྱུར་རོ། །འདི་ལྟ་སྟེ། ལྷ་འམ། ཀླུ་འམ། གནོད་སྦྱིན་ནམ། སྲིན་པོ་འམ། ཡི་དགས་སམ། ཤ་ཟ་འམ། བརྗེད་བྱེད་དམ། གསོད་བྱེད་དམ། བྱད་དམ། རོ་ལངས་སམ། བཀྲ་མི་ཤིས་པ་འམ། མ་མོའི་གདོན་ནམ། གོང་མའི་གདོན་ནམ། སྐེམ་བྱེད་དམ། སྐེམ་བྱེད་ཀྱི་གདོན་ནམ། དྲི་ཟའི་གདོན་དེ་དག་ཐམས་ཅད་རྨུགས་པར་བགྱིས་སོ། །རེངས་པར་བགྱིས་སོ། །ཏདྱ་ཐཱ། བཛྲེ་བཛྲེ་བཛྲེ། ཧ་ན་བཛྲེ། ནི་ཧ་ན་བཛྲེ། ཁཱ་ད་ཁཱ་ད་བཛྲེ་ཎི། སྥཱ་ཊ་ཡ། སྥཱ་ཊ་ཡ། བཛྲེ་ཎེ། ཨི་དཾ་གྲི་ཧ་ན། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། གྲ་ས་གྲ་ས་གྲ་ས། པཱ་ཏ་ཡ། པཱ་ཏ་ཡ། པཱ་ཏ་ཡ། དྷ་ར་དྷ་ར་དྷ་ར། བདག་དང་སེམས་ཅན་ཐམས་ཅད་འཇིགས་པ་དང ། གནོད་པ་ཐམས་ཅད་དང ། ཐབ་མོ་དང ། འཐབ་པ་དང ། རྩོད་པ་དང ། འགྱེད་པ་ཐམས་ཅད་ལས་སྲུངས་ཤིག་སྲུངས་ཤིག་།ཛ་ཡ་ཀ་རི། ཛ་ཡ་ཀུ་རུ། ཏ་ར་ཏ་ར་ཏ་ར། མ་ཧཱ་ཏ་ར་ནི། ཀུ་ཊེ་ཀུ་ཊེ་ཀུ་ཊེ། བཛྲ་ཀུ་ཊི་སཝཱ་ཧཱ། དེ་ནས་བཅོཾ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ཏེ། ལག་ན་རྡོ་རྗེ་ལེགས་སོ་ལེགསོ། །ལག་ན་རྡོ་རྗེ་སེམས་ཅན་ཆེན་པོ་ཁྱོད་སེཾས་ཅན་རྣམས་ལ་ཕན་པ་དང ། བདེ་བ་དང ། སྙིང་བརྩེ་བའི་ཕྱིར་ཞུགས་པ་ཡང་ལེགས་སོ། །ལག་ན་རྡོ་རྗེ་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་སུའི་ལག་ཏུ་སོང་སྟེ། ལུས་ལ་བཏགས་སམ། གླེག་བམ་ལ་བྲིས་སམ། གྲོང་ངམ། གྲོང་ཁྱེར་རམ། གྲོང་རྡལ་ལམ། གཙུག་ལག་ཁང་ངམ། གནས་ཁང་ངམ།
97.217b
འཆག་ས་ན་སྤྱོད་པར་འགྱུར་བ་དེར་རྒྱལ་པོ་ཆེན་པོ་རྣམ་ཐོས་ཀྱི་བུའི་ཚོགས་ཀྱི་གཡོག་དང་བཅས་པར་གྲོང་ངམ། གྲོང་ཁྱེར་རམ། གྲོང་རྡལ་ལམ། ཡུལ་དེ་བསྲུང་བར་འགྱུརོ། །ཡུལ་དེར་ཕ་རོལ་གྱི་དམག་ཚོགས་ཀྱིས་གནོད་པར་མི་འགྱུར་རོ། །ས་ཕྱོགས་དེར་མི་ངས་མི་འབྱུང་ངོ ། །དགྲ་མི་འབྱུང་ངོ ། །རྒྱལ་པོ་ཆེན་པོ་རྣཾ་ཐོས་ཀྱི་བུ་གནོད་སྦྱིན་བྱེ་བ་ཁྲག་ཁྲིག་འབུམ་ཕྲག་ཕྱི་བཞིན་འབྲང་བ་དང ། ལྷན་ཅིག་དེར་བསྲུང་ངོ ། །ཡོངས་སུ་བསྐྱབ་བོ། །ཡོངས་སུ་འཛིན་ཏོ། །ཞི་བ་དང་བདེ་ལེག་སུ་འགྱུར་བར་བྱེད་དོ། །ཆད་པ་སྤོངས་ངོ ། །མཚོན་ཆ་སྤོང་ངོ ། །དུག་གསོད་དོ། །མི་མཛའ་བ་འགོག་གོ་།མཚམས་གཅོད་དོ། །ས་གཅོད་དོ། །ཏདྱ་ཐཱ། ཏ་པ་ནི་ཏ་པ་ནི། པྲ་ཏ་པ་ན། དྷུ་རུ་མེ། དྷུ་རུ་མེ། བུདྡྷ་ཨ་དྷི་ཥྛི་ཏེ། མུ་ཁེ། མུ་ཁེ། སུ་མུ་ཁེ། སུ་མུ་ཁེ། སྤ་ལ་པྲ་ཏེ། ས་མཱ་དྷི་ཏེ། ས་མཱ་དྷི་གརྦྷེ། གརྦྷེ། མཱ་ན་སི། ཕུ་རུ་ཕུ་རུ་ཕུ་རུ་དྷུ་རུ། བུདྡྷ་མཱ་ན་སི་ཀེ་སཝཱ་ཧཱ། ལག་ན་རྡོ་རྗེ་འདི་དག་ནི་དེ་བཞིན་གཤེགས་པའི་སྤྱི་བོ་ནས་དབང་བསྐུར་བའོ། །གསང་བའི་གནས་སོ། །དེ་བཞིན་གཤེགས་པ་ཐམས་ཅད་ཀྱི་གསུང་བའོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའོ། །ལག་ན་རྡོ་རྗེ་མིའི་རྒྱལ་པོ་གང་ལ་ལ་ཞིག་གིས་རིག་སྔགས་ཀྱི་རྒྱལ་མོ་རྒྱལ་བ་ཅན་འདི་གླེགས་བམ་ལ་ལེགས་པར་བྲིས་ཏེ་འཆང་ངམ། ལུས་ལ་བཏགས་ཏེ་འཆང་ཞིང་དེ་ལ་སྤོས་དང ། ཕྲེང་བ་དང ། བྱུག་པ་དང ། མེ་ཏོག་སྣ་ཚོགས་ཀྱི་ལྷབ་ལྷུབ་ཀྱིས་བསྟི་སྟང་དུ་བྱེད། བླ་མར་བྱེད། རི་མོར་བྱེད། མཆོད་པར་བྱེད་ན། མིའི་རྒྱལ་པོ་དེ་ལ་རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་ཕྱི་བཞིན་འབྲང་བ། བྱེ་བ་ཁྲག་ཁྲིག་འབུམ་ཕྲག་དུ་མ་དང་ལྷན་ཅིག་ཏུ་བསྲུང་བར་འགྱུརོ། །མིའི་རྒྱལ་པོ་དེ་ལ་ཕྱིར་རྒོལ་བ་དང ། དགྲ་དང ། ཕ་རོལ་གྱི་དམག་ཚོགས་ཐམས་ཅད་ཀྱིས་གླགས་མི་རྙེད་དོ། །མཐུས་ཡུལ་དེར་འཇུག་པ་དང ། བགེགས་འཇུག་ན་ཡང་རྒྱལ་པོ་ཆེན་པོ་རྣམ་ཐོས་ཀྱི་བུ་བགེགས་སྣ་ཚོགས་བརྒྱ་དང ། བགེགས་སྣ་ཚོགས་སྟོང་བྱེད་པར་འགྱུར་རོ། །མིའི་རྒྱལ་པོ་གང་དང་གང་དུ་འགྲོ་བ་དེ་དང་དེར་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི
97.218a
རྒྱལ་མཚན་གྱི་རྩེ་མོ་ལ་བཏགས་ཏེ་མདུན་དུ་བཀུར་བར་བྱའོ། །གང་དུ་གཡུལ་ངོར་འཇུག་གམ། དགྲ་ཆེན་པོ་དང་འཐབ་པ་དེར་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་མགུལ་དུ་བཏགས་ཏེ། གཡུལ་ངོར་ཞུགས་ན་དེར་རྒྱལ་པོ་ཆེན་པོ་རྣམ་ཐོས་ཀྱི་བུས་ཕ་རོལ་གྱི་དམག་ཚོགས་དེ་ཕམ་པར་བྱེད་པར་འགྱུརོ། །དེ་ནི་རྒྱལ་བར་འགྱུར་རོ། །རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་སུའི་མགུལ་དུ་བཏགས་པ་དེ་རྒྱལ་བར་འགྱུར་རོ། །ལག་ན་རྡོ་རྗེ་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། རྒྱལ་པོའི་ཕོ་བྲང་འཁོར་གང་དུ་གལ་ཏེ་ནད་འགོ་བ་སྣ་ཚོགས་དང ། མི་ངས་མི་ཟད་པ་ཆེན་པོ་བྱུང་ན་དེར་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་དང་མེ་ཏོག་སྣ་ཚོགས་དང ། ཆོ་ག་དང ། གཏོར་མ་དང ། བུམ་པ་བཏུང་བ་སྣ་ཚོགས་ཀྱིས་བཀང་བ་བཞི་ཕྱོགས་བཞིར་བཞག་སྟེ། རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་བཀླགས་ན་དེའི་ཚེ་རྒྱལ་པོ་ཆེན་པོ་རྣམ་ཐོས་ཀྱི་བུ་ཚོགས་ཀྱི་གཡོག་དང་བཅས་ཤིང ། གནོད་སྦྱིན་བྱེ་བ་ཁྲག་ཁྲིག་འབུཾ་ཕྲག་དུ་མ་དང་ལྷན་ཅིག་ཏུ་ནད་འགོ་བ་དང ། མི་ངས་དེ་རབ་ཏུ་ཞི་བར་བྱེད་པར་འགྱུར་རོ། །དེ་ནས་བཅོམ་ལྡན་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལས་ལྷག་པའི་རིག་སྔགས་ཆེས་སྟོབས་དང་ལྡན་པ་འམ། གཟི་བརྗིད་ཆེ་བའམ། རྫུ་འཕྲུལ་ཆེ་བ་འམ། མཐུ་ཆེ་བ་གང་ཡང་མ་མཆིས་སོ། །རིག་སྔགས་ཐམས་ཅད་ཀྱི་མཆོག་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་ཡུལ་གང་དང་གང་དུ་སྤྱོད་པར་འགྱུར་བའི་གནས་དེ་དང་དེ་དག་ཏུ་སངས་རྒྱས་ཀྱི་མཛད་པ་མཛད་པར་འགྱུར་རོ། །ཏདྱ་ཐཱ། བཛྲེ་བཛྲེ་བཛྲེ། ཨ་མྲྀ་ཏ་བཛྲེ། ཛྭ་ལ་ཏ་བཛྲེ། ཧཱུ་ཏཱ་ཤ་ནི། བྷཉྫ་བྷཉྫ་བྷཉྫ། ཛམྦྷ། སྟམྦྷ་ཡ། སརྦ་གྲ་ཧཱ་ཎཱཾ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། གྲ་ས་གྲ་ས་གྲ་ས། པ་ཊ་པ་ཊ་པ་ཊ། ཏ་ཊ་ཏ་ཊ་ཏ་ཊ། མུ་རུ་མུ་རུ་མུ་རུ། དྷ་མ་དྷ་མ་དྷ་མ། ཛྭ་ལ་ཛྭ་ལ་ཛྭ་ལ། ཁུ་ཁུ་མེ། ཁུ་ཁུ་མེ། གྷོ་རི་གྷོ་རི་གྷོ་རི། བཛྲ་མཱ་ན་སི། བཛྲ་ཧུ་ཏི། ཧུ་ཏི་རུ། ཕུ་རུ་ཕུ་རུ། གྲ་ས་གྲ་ས།
97.218b
སརྦ་ཨ་ཧི་ཏི་ཥི་ཎཱཾ། ནཱ་བུ་རུ་ཎི། མུ་མུ་ལེ། བཛྲ་པྲ་དཱི་པ་ནི། ཙ་མ་ལེ་ཕུ་སཝཱ་ཧཱ། ཨཱ་ཡུཿ པཱ་ལ་ནི་ཙུ་ཙུ་རེ་སཝཱ་ཧཱ། ཛ་ཡེ་ཛ་ཡེ། ཛ་ཡ་སམྦྷ་བེ་སཝཱ་ཧཱ། ཛ་ཡོཏྟ་མེ་སཝཱ་ཧཱ། ཛ་ཡ་བ་རེ་དེ་སཝཱ་ཧཱ། ཛ་ཡནྡྷ་རེ་སཝཱ་ཧཱ། ཛ་ཡ་མཱ་ན་སི་སཝཱ་ཧཱ། ཛ་ཡ་བཛྲ་སཝཱ་ཧཱ། ཨ་ཛི་ཏ་བཛྲཱ་ཡ་སཝཱ་ཧཱ། མ་ཧཱ་བཛྲ་ཧུ་ཏ་ཤ་ན་ཡ་སཝཱ་ཧཱ། ཨ་མོ་གྷ་བཛྲ་ཧསྟ་སཝཱ་ཧཱ། དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་ཆོས་ཀྱི་རྣམ་གྲངས་འདི་ལ་བསྲུང་བ་སྩལ་བར་བགྱི། ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཆད་པ་སྤང་བ་དང ། མཚོན་ཆ་སྤང་བ་དང ། དུག་དགུམ་པ་དང ། མི་མཛའ་བ་དགག་པ་དང ། དུས་མ་ལགས་པར་འགུམ་པ་དགག་པ་དང ། འཐབ་པ་དང ། ཐབ་མོ་དང ། རྩོད་པ་དང ། འགྱེད་པ་དང ། གཡུལ་འགྱེད་པ་དང ། ཁྲག་ཁྲུག་དང ། འཇིགས་པ་ཐམས་ཅད་དགག་པར་བགྱིའོ། །མཚམས་དགུམ་པར་བགྱིའོ། །ཏདྱ་ཐཱ། ཛ་ཡེ་ཛ་ཡེ་ཛ་ཡེ། མ་ཧཱ་ཛ་ཡེ། མི་ལི་མ་ན་སི། ཛྷེ་ཛྷེ་ཛྷེ། མུ་རུ་མུ་རུ། ཏུ་ཊུ་ཏུ་ཊུ། མུ་མུ་ལེ། མཱརྒ་བ་ཏི། དྷུ་དྷུ་མེ། བེ་གེ་བེ་ག་དྷཱ་རི་ཎཱི། ཏེ་ཛ་བ་ཏཱི། བདག་དང་སེམས་ཅན་ཐམས་ཅད་འཇིགས་པ་དང ། གནོད་པ་ཐམས་ཅད་དང ། དུས་མ་ཡིན་པར་འཆི་བ་ཐམས་ཅད་ལས་སྲུངས་ཤིག་སྲུངས་ཤིག་སཝཱ་ཧཱ། བཅོམ་ལྡན་འདས་གཟུངས་ཀྱི་གསང་སྔགས་ཀྱི་གཞི་འདི་དག་ནི་སངས་རྒྱས་བྱེ་བ་ཕྲག་དགུ་བཅུ་རྩ་དགུས་གསུངས་པ། བྱིན་གྱིས་བརླབས་པ་ལགསོ། །ཏདྱ་ཐཱ། བུདྡྷེ་བུདྡྷེ། བུདྡྷེ་བུདྡྷེ། བུདྡྷ་བ་ཏཱི། བུདྡྷ་ཨ་བ་བྷ་ས་ནི། རྡརྨ་བ་ཏཱི། ས་མ་ཧི་ཏེ། ས་མཱ་དྷི་གརྦྷེ་བུདྡྷ་ཨ་བ་བྷཱ་ས་ནི། བུདྡྷ་པ་རི་ཧ་རི། རྡརྨ་ཨ་བ་བྷཱ་ས་ནི་སཝཱ་ཧཱ། སུ་ལ་ལ་ཞིག་རིག་སྔགས་ཀྱི་རྒྱལ་མོ་རྒྱལ་བ་ཅན་འདི་ལས་འདའ་བར་བགྱིད་པ་དེ་ནི་མགོ་སི་ཏ་ཀའི་འབྲས་བུ་བཞིན་དུ་ཚལ་པ་བདུན་དུ་འགསོ། །སུ་ཞིག་རིག་སྔགས་ཀྱི་རྒྱལ་མོ་ཆེན་པོ
97.219a
རྒྱལ་བ་ཅན་འདི་འཆང་ངམ། ཀློག་གམ། མཆོད་པར་བགྱིད་དམ། ཡི་གེར་འདྲི་འམ། གླེགས་བམ་ལ་བྲིས་ཏེ། གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། རྒྱལ་པོའི་ཕོ་བྲང་འཁོར་རམ། གཙུག་ལག་ཁང་དུ་འཇོག་ན། དེར་བདག་ཚོགས་ཀྱི་གཡོག་དང་བཅས་ཤིང ། གནོད་སྦྱིན་བྱེ་བ་ཁྲག་ཁྲིག་འབུམ་ཕྲག་དུ་མ་དང་ལྷན་ཅིག་ཏུ་རིག་སྔགས་འཛིན་པ་དེའི་སླད་བཞིན་དུ་འབྲང་སྟེ་བསྲུང་བར་བགྱིའོ། །དཔག་ཚད་བརྒྱ་སྟོང་ཚུན་ཆད་དུ་མཚམས་དགུམ་པར་བགྱིའོ། །སླར་རྒོལ་བ་དང ། དགྲ་དང ། གཡུལ་འགྱེད་པ་དང ། འཐབ་པ་དང ། མཚང་འདྲུ་བ་དང ། འཐབ་མོ་དང ། འགྱེད་པ་ཐམས་ཅད་མ་མཆིས་པར་བགྱིའོ། །སླར་བཟློག་པར་བགྱིའོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་རྣམ་ཐོས་ཀྱི་བུ་ལ་ལེགས་སོ་ཞེས་བྱ་བ་བྱིན་ཏེ། རྒྱལ་པོ་ཆེན་པོ་ལེགས་སོ་ལེགས་སོ། །སེམས་ཅན་ཆེན་པོ་ཁྱོད་འཇིག་རྟེན་ཐམས་ཅད་ལ་ཕན་པ་དང ། སེམས་ཅན་ཐམས་ཅད་ལ་སྙིང་བརྩེ་བ་དང ། བདེ་བ་དང ། བསྟན་པ་བསྲུང་བའི་ཕྱིར་ཞུགས་པ་ཡང་ལེགས་སོ། །རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདིས་གང་ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཡོངས་སུ་བསྐྱང་བ་བྱས་པ་དེའི་ལུས་ལ་མཚོན་དང ། དུག་དང ། བྱད་དང ། གསོད་བྱེད་དང ། རིམས་དང ། གནོད་པ་ཐམས་ཅད་ཀྱིས་མི་ཚུགས་པར་འགྱུར་རོ། །རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་ནི་དེ་བཞིན་གཤེགས་པའི་ཕྱག་རྒྱས་བཏབ་པའོ། །ལག་ན་རྡོ་རྗེ་ཁྱོད་ཀྱིས་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་འདི་ཟུང་ཤིག་།ཆོངས་ཤིག་།ཀུན་ཆུབ་པར་གྱིས་ཤིག་།ལག་ན་རྡོ་རྗེ་ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་དམ་པའི་ཆོས་རབ་ཏུ་རྣམ་པར་འཇིག་པའི་དུས་ན། སེམས་ཅན་དྲག་ཤུལ་དང་ལྡན་པ། ཤིན་ཏུ་མི་བཟད་པ། མདངས་འཕྲོག་པའི་གནོད་སྦྱིན་དང ། སྲིན་པོ་རྣམས་དང ། ཆོས་མ་ཡིན་པ་སྤྱོད་པའི་རྒྱལ་པོ་འབྱུང་བར་འགྱུར་རོ། །ཚེ་ཐུང་བ་ཆོས་མ་ཡིན་པས་ཡུལ་འཁོར་སྐྱོང་བ་འབྱུང་བ་དེའི་ཚེ་རིག་སྔགས་ཀྱི་རྒྱལ་མོ
97.219b
ཆེན་མོ་རྒྱལ་བ་ཅན་འདི་སེམས་མི་མཉམ་པ། སེམས་མི་བཟད་པ་དེ་དག་དང ། སྡང་བ་དང ། རབ་ཏུ་སྡང་བའི་སེམས་ཅན་ཐམས་ཅད་ཀྱི་དོན་དུ་འགྱུར། ཚར་གཅོད་པར་འགྱུར་རོ། །རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇོམས་པར་བྱེད་པ་འདི་ནི་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དུ་མས་གསུངས་པ། བྱིན་གྱིས་བརླབས་པ། ་ཕྱག་རྒྱས་བཏབ་པའོ། །རིག་སྔག་གྱི་རྒྱལ་མོ་ཆེན་མོ་རྒྱལ་བ་ཅན་འདི་ནི་ལྷ་ཐམས་ཅད་ཀྱིས་ཕྱག་བྱས་པའོ། །དེ་ནས་བཅོམ་ལྡན་འདས་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་དེའི་ཕྱིར་ཁྱོད་ཀྱིས་དེ་བཞིན་གཤེགས་པའི་སྙིང་པོ་དང ། ཕྱག་རྒྱ་ཞེས་བྱ་བར་ཟུང་ཤིག་།བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇོམས་པར་བྱེད་པ་རྒྱལ་བ་ཅན་ཞེས་བྱ་བར་ཡང་ཟུང་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། གསང་བ་པའི་བདག་པོ་ལག་ན་རྡོ་རྗེ་དང ། རྒྱལ་པོ་ཆེན་པོ་རྣམ་ཐོས་ཀྱི་བུ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་རྒྱལ་བ་ཅན་ཞེས་བྱ་བའི་གཟུངས་རྫོགས་སྷོ།། །།