rKTs


J55

(e-text produced by ADARSHA)

see text in transliteration
45.1a
[(黃)་經藏第六部]
45.1b
༄##། ་་།རྒྱ་གར་སྐད་དུ། ཨཱརྱ་གྷ་ན་བྱཱུ་ཧ་ནཱ་མ་མ་ཧཱ་ཡཱ་ན་སཱུ་ཏྲ། ་བོད་སྐད་དུ། འཕགས་པ་རྒྱན་སྟུག་པོ་བཀོད་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཆོས་ཐམས་ཅད་ལ་མངའ་སྒྱུར་བ་འདོད་པ་ནས། གཟུགས་དང ། གཟུགས་མེད་པ་དང ། གཟུགས་མེད་པའི་སེམས་ཅན་རྣམས་ལས་འདས་ཏེ། སངས་རྒྱས་ཀྱི་ཞིང་སྟུག་པོ་ན་སྟོབས་མངའ་བ་རྣམས་དང ། རྫུ་འཕྲུལ་གྱི་རྐང་པ་རྣམས་ཀྱིས་རྣམ་པར་འཕྲུལ་ཞིང་རྗེས་སུ་སྤྱོད་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྣལ་འབྱོར་དམ་པའི་རྣལ་འབྱོར་ཅན་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་མུར་འདུག་བྱེད་པ་ཐམས་ཅད་ཀྱི་གཞུང་རྣམ་པར་འཇོམ་པ་དང ། བྱང་ཆུབ་སེམས་དཔའ
45.2a
སེམས་དཔའ་ཆེན་པོ་བློ་གྲོས་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་ཐམས་ཅད་ཀྱི་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་པོ་བརྙེས་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་འཕྲུལ་པའི་རྒྱལ་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་གྲོལ་བའི་ཟླ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་འཛིན་དང ། དེ་དག་ལ་སོགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་དུ་ཕྲ་བ་བྱེ་བ་སྙེད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་ཁམས་གསུམ་པའི་ཡུལ་ལས་ཡོངས་སུ་འདས་པ་སེམས་དང ། ཡིད་དང ། རྣམ་པར་ཤེས་པ་དང ། ཀུན་གཞིའི་སྤྱོད་ཡུལ་ལས་ཡོངས་སུ་འདས་པ། ཡེ་ཤེས་དང་ཡིད་ཀྱི་ལུས་སུ་གནས་གྱུར་པ། སྒྱུ་མ་ལྟ་བུ་དང ། དཔའ་བར་འགྲོ་བ་དང ། ཆོས་ཀྱི་སྤྲིན་གྱི་ས་དང ། ཏིང་ངེ་འཛིན་དང་ལྡན་པ། སངས་རྒྱས་དུ་མའི་ཕྱག་གི་དབང་བསྐུར་བས་དབང་བསྐུར་བ། ཁམས་གསུམ་པའི་ཡུལ་ལས་ཤིན་དུ་འདས་པའི་གཞལ་མེད་ཁང་གི་པད་མོ་ཆེན་པོ་ལ་འཁོད་པ་རྣམས་དང་ཐབས་ཅིག་ཏུ་བཞུགས་ཏེ། དེ་ན་མུར་འདུག་དང ། ཉན་ཐོས་དང ། རང་སངས་རྒྱས་ཐམས་ཅད་ཀྱི་རྒྱུ་བ་མེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་བའི་ཆོས་ལ་བདེ་བར་སྤྱད་པ་བདག་གི་སོ་སོ་རང་གི་འཕགས་པའི་ཡེ་ཤེས་ཀྱིས་མཁྱེན་པའི་སྤྱོད་ཡུལ་བཙུན་པར་དབྱངས་འཕྱིན་པ་སྣ་ཚོགས་ཀྱི་གཟུགས་དུ་མ་སྟོན་པའི་ཏིང་ངེ་འཛིན་ལས
45.2b
བཞེངས་སོ། །བཞེངས་ནས་ཀྱང་ཕོ་བྲང་འཇའ་དང་གློག་གི་འོད་ཅན་རྒྱན་དང ། ལྷབ་ལྷུབ་དུ་མས་བརྒྱན་པ་ནས་མངོན་པར་བྱུང་སྟེ། ཟླ་བ་དྲི་མ་མེད་པའི་སྙིང་པོ་ཞེས་བྱ་བའི་ཁང་སྟེངས་སུ་གཤེགས་སོ། །གཤེགས་ནས་ཀྱང་སྟུག་པོའི་རིས་ཀྱི་རྒྱན་སེང་གེའི་གདན་དམ་པ་ལ་བྱང་ཆུབ་སེམས་དཔའ་དང་ཐབས་ཅིག་ཏུ་བཞུགས་སོ། །བཞུགས་ནས་ཀྱང་བཅོམ་ལྡན་འདས་ཀྱིས་ཕྱོགས་བཞིར་གཟིགས་ཏེ་གཙུག་གི་རིན་ཆེན་འོད་ཀྱི་རྒྱན་ཅེས་བྱ་བའི་འོད་ཟེར་སྟོང་ཕྲག་བརྒྱའི་འཁོར་ཅན་སྨིན་མཚམས་ནས་བྱུང་སྟེ། འོད་ཟེར་གྱི་ཚོགས་དེ་བྱུང་བས་སངས་རྒྱས་ཀྱི་ཞིང་གི་རྒྱན་ཐམས་ཅད་སངས་རྒྱས་ཀྱི་བརྒྱན་གཅིག་དང་འདྲ་བོར་ཡོངས་སྣང་བར་གྱུར་ཏོ། །མཆོག་ཏུ་ཕྲ་བའི་རྡུལ་གྱི་ཕྲ་བ་ཉིད་དུ་སངས་རྒྱས་ཀྱི་ཞིང་ཐམས་ཅད་ཀྱི་རང་བཞིན་ཕྲ་བ་ཉིད་ཀྱང་ཡོངས་སུ་སྣང་ངོ ། །སངས་རྒྱས་ཀྱི་ཞིང་སྟུག་པོ་ཡང་སངས་རྒྱས་ཀྱི་ཞིང་གཞན་གྱི་རང་བཞིན་རྡུལ་གྱི་ཕྲ་བ་ཉིད་ལས་འདས་ཏེ་གནས་སོ། །སངས་རྒྱས་ཀྱི་ཞིང་སྟུག་པོ་ནི་འོད་དང ། གཟའ་དང ། ཟླ་བ་སྤངས་པ་སྟེ། འདུས་མ་བྱས་ཀྱི་རང་བཞིན་ཉིད་ཀྱིས་ཤིན་དུ་ཕྲ་བའི་རྡུལ་གྱི་ཕྲ་བ་ཉིད་དུ་མི་སྣང་གི། གཞན་དུ་མྱ་ངན་ལས་འདས་པ་དང ། ནམ་མཁའ་དང་མ་བརྟགས་པར་འགོག་པ་ལྟ་བུར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང ། སངས་རྒྱས་བཅོམ་ལྡན་འདས་རྣམས་དང ། སངས་རྒྱས་ཀྱི་ཞིང་གཞན་དག་ན་སྤྱོད་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གཟིགས་སོ། །དེ་ནས་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་གི་རྒྱན་དང ། སངས་རྒྱས་དང་བྱང་ཆུབ་སེམས་དཔའི་མཐུ་ཕྱུང་བ་དེ་དག་གཟིགས་ནས་སངས་རྒྱས་ཀྱི་སྤྱན་གྱིས་ཕྱོགས་བཅུར་བྱང་ཆུབ་སེམས་དཔའི་འཁོར་དང་བཅས་པ་ལ་གཟིགས་ནས་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ལ་བཀའ་སྩལ་པ། རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་སྟུག་པོའི་རྒྱན་ཞེས་བྱ་བའི
45.3a
སངས་རྒྱས་ཀྱི་ཞིང་འདི་ན་འདོད་པ་དང ། གཟུགས་དང ། གཟུགས་མེད་པ་དང ། འདུ་ཤེས་མེད་པའི་སེམས་ཅན་དུ་གཏོགས་པའི་གཟུགས་སྲེད་པ་དང ། མ་རིག་པ་དང ། ཏིང་ངེ་འཛིན་གྱི་འབྲས་བུ་ཡེ་ཤེས་ཀྱི་མེས་རྣམ་པར་བསྲེགས་ཏེ་གནས་གྱུར་པའི་ཕྱིར་ཡེ་ཤེས་ཀྱི་ཏིང་ངེ་འཛིན་དང ། ཡིད་བཞིན་གྱི་ལུས་སྟོབས་དང ། མངོན་པར་ཤེས་པ་དང ། རྫུ་འཕྲུལ་གྱི་རྐང་པ་དང ། དབང་གིས་བརྒྱན་པ། གསེབ་མེད་པ། རིང་དུ་གནས་པ། ཟླ་བ་དང ། ཉི་མ་དང ། ནོར་བུ་དང ། གློག་དང ། འཇའ་དང ། བྱི་རུ་དང ། བ་བླ་དང ། ལྡོང་རོས་དང ། མཚལ་དང ། མགོ་ནག་གི་འབྲུ་དང ། ཀིང་ཤུ་ཀ་དང ། ིན་དྲ་གོ་པ་དང ། གསེར་དང ། ཙམ་པ་ཀ་དང ། པད་མོ་དང ། དུང་དང ། རྨ་བྱའི་མགུལ་དང ། མདོངས་བུ་མི་ལོང་གི་ནང་ན་འདུག་པའི་གཟུགས་བརྙན་ལྟ་བུ་ཐོབ་ནས་ས་དང་སར་ཟག་པ་མེད་པས་སྦྱངས་པའི་རྒྱུ་ཏིང་ངེ་འཛིན་ལ་དབང་སྒྱུར་བའི་ཕྱིར་སྨོན་ལམ་གྱི་མཐར་ཕྱིན་པ་བཅུའི་བསྔོ་བས་ལུས་ཐོབ་པའི་ཁྱད་པར་ཅན་དག་སངས་རྒྱས་ཀྱི་ཞིང་སྟུག་པོར་འོང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་ཐམས་ཅད་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་གཅིག་གཅིག་བཅོམ་ལྡན་འདས་ཀྱིས་བདག་ལ་ཞུ་བ་ཞུས་པ་ལུང་བསྟན་པའི་སླད་དུ་སྐབས་དབྱེ་བར་གནང་ན་བདག་གིས་ཞུའོ། །བཅོམ་ལྡན་འདས་ཀྱིས་བཀའ་སྩལ་པ། རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ཁྱོད་ཀྱིས་དེ་བཞིན་གཤེགས་པ
45.3b
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དྲིས་ཤིག་དང ། ངས་ཅི་དང་ཅི་འདོད་པ་དེ་དང་དེའི་དྲི་བ་དྲིས་པ་ལུང་བསྟན་པས་སེམས་མགུ་བར་བྱས། ཁྱོད་ཀྱིས་ཇི་ལྟར་བཟོད་པ་དེ་ལྟར་སྨྲོས་ཤིག་།དེ་ནས་སངས་རྒྱས་ཀྱི་ཆོས་ཐམས་ཅད་རྣམ་པར་དགོད་པ་ཇི་ལྟ་བ་བཞིན་དུ་སྟོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ། བཅོམ་ལྡན་འདས་ཀྱིས་སྐབས་ཕྱེ་བ་དང ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་ཀྱི་ཞིང་སྟུག་པོ་འབའ་ཤིག་འདོད་པ་དང ། གཟུགས་དང ། གཟུགས་མེད་པ་དང ། འདུ་ཤེས་མེད་པའི་སེམས་ཅན་ལས་འདས་ཏེ་གནས་སམ། སངས་རྒྱས་ཀྱི་ཞིང་གཞན་དག་ཀྱང་དེ་བཞིན་ནམ་ཅི་ལགས། རིགས་ཀྱི་བུ་སངས་རྒྱས་ཀྱི་ཞིང་སྟུག་པོ་འབའ་ཤིག་འདོད་པ་དང ། གཟུགས་དང ། གཟུགས་མེད་པ་དང ། འདུ་ཤེས་མེད་པའི་སེམས་ཅན་ལས་འདས་ཏེ་གནས་པ་མ་ཡིན་གྱི། སངས་རྒྱས་ཀྱི་ཞིང་གཞན་དག་ཀྱང་ཡོད་དོ། །རིགས་ཀྱི་བུ་འདི་ནས་ཕ་རོལ་ཤིན་དུ་འང་ཕ་རོལ་སངས་རྒྱས་ཀྱི་ཞིང་བྱེ་བ་སྟོང་ཕྲག་བརྒྱ་འདས་པའི་སྟེང་གི་ཕྱོགས་ཆ་ན་ཚངས་པའི་དབྱངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཞིང་དང ། དེ་བཞིན་དུ་ས་ལའི་དབང་པོའི་རྒྱལ་པོ་དེ་བཞིན་གཤེགས་པ་དང ། སྐར་མའི་རྒྱལ་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སངས་རྒྱས་ཀྱི་ཞིང་དང ། དེ་བཞིན་དུ་སངས་རྒྱས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཕ་རོལ་ཤིན་དུ་འང་ཕ་རོལ་དུ་འདས་པ་ན། སངས་རྒྱས་ཀྱི་ཞིང་སྟོང་ཕྲག་བརྒྱ་མང་པོ་བྱང་ཆུབ་སེམས་དཔའི་འཁོར་གྱི་ཚོགས་ཀྱིས་བརྒྱན་པ་ཤིན་དུ་ཡངས་ཤིང་ཆེ་བ་དག་ཡོད་དེ། སངས་རྒྱས་བཅོམ་ལྡན་འདས་དེ་དག་ཀྱང་འཁོར་གྱི་ཚོགས་དེ་དང་དེ་དག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བདག་གི་སོ་སོ་རང་གི་འཕགས་པའི་ཡེ་ཤེས་ཀྱི་རྟོགས་པའི་སྤྱོད་ཡུལ་གྱི་གཏམ
45.4a
དང ། མཐོང་བའི་ཆོས་ལ་བདེ་བར་གནས་པའི་ཆོས་ཚིག་དང་རྣམ་པར་རྟོག་པའི་སྤྱོད་ཡུལ་དང ། ཡི་གེ་དང་བྲལ་བ་དེ་བཞིན་ཉིད་དང ། ཡང་དག་པའི་མཐའ་དང ། མྱ་ངན་ལས་འདས་པ་ཐོབ་པར་བྱེད་པ་ཕྱི་མའི་མཐའི་མུར་བཏུགས་པར་སྟོན་ཏེ། དེ་ནི་རྣམ་པར་བཀོད་པ་ཡང་དག་པ་ཇི་ལྟ་བ་བཞིན་དུ་སྟོན་ཏེ། དེ་ནི་གང་རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ཁྱོད་ཀྱིས་འདིའི་ཕ་རོལ་ན་འཇིག་རྟེན་གཞན་དང་སངས་རྒྱས་དག་ཡོད་དམ་ཞེས་སྨྲས་པ་དེའི་ལན་དུ་ངས་འདི་སྨྲས་སོ། །རྣམ་པར་དགོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་ཁྱོད་འབའ་ཤིག་སངས་རྒྱས་ཀྱི་ཞིང་གི་རྒྱན་དང་བྱང་ཆུབ་སེམས་དཔའ་ལ་ལྟད་མོ་བལྟ་བར་འདོད་པའི་ཕྱིར་དེ་བཞིན་གཤེགས་པ་ལ་དྲི་བར་སེམས་པར་མ་ཟད་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་འཛིན་འདི་ཡང་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཞིང་གི་རྒྱན་དང ། སངས་རྒྱས་ཀྱི་སྒྲའི་དབྱངས་ཀྱི་དཀྱིལ་འཁོར་དང་སྤྱི་གཙུག་ཚད་མེད་པ་ལ་ལྟད་མོ་བལྟ་བར་འདོད་པའི་ཕྱིར་སངས་རྒྱས་ཀྱི་ཞིང་བྱེ་བ་སྟོང་ཕྲག་བརྒྱ་སོང་ནས་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་དུ་རྫུ་འཕྲུལ་གྱི་མཆོག་གིས་གྱེན་དུ་སོང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་འཛིན་འདིས་དེ་བཞིན་གཤེགས་པ་གཅིག་ཙམ་གྱི་སངས་རྒྱས་ཀྱི་ཞིང་གི་རྒྱན་ཏམ། སངས་རྒྱས་ཀྱི་གསུང་གི་དབྱངས་ཀྱི་དཀྱིལ་འཁོར་རམ། སྤྱི་གཙུག་ཚད་མེད་པ་ཡང་མ་མཐོང་སྟེ། དེས་མ་མཐོང་བ་དང ། ངོ་མཚར་དུ་གྱུར་ནས་སངས་རྒྱས་ཀྱི་གསུང་གི་དབྱངས་ཀྱི་དཀྱིལ་འཁོར་དང ། སྤྱི་གཙུག་ལྟར་ཚད་མེད་པ་བསམ་གྱིས་མི་ཁྱབ་པ་ཡང་དག་པར་རྗེས་སུ་དན་ཞིང་མི་མཇེད་ཀྱི་འཇིག་རྟེན་གྱི་ཁམས་འདི་ཉིད་དུ་ཕྱིན་ནས་མཉན་དུ་ཡོད་པར་སངས་རྒྱས་བཅོམ་ལྡན་འདས་ཀྱི་སྤྱིན་སྔར་འདུག་སྟེ། ཉེས་པ་ལ་ཉེས་པར་བཤགས་ནས་སངས་རྒྱས་རྣམས་ནམ་མཁའ་དང་མཉམ་པར་ཤེས་ཏེ་མངོན་པར་བསྟོད་ནས། བདག་གི་སོ་སོ་རང་གི་འཕགས་པའི་ཡེ་ཤེས་ཀྱིས་རྟོགས་པའི་སྤྱོད
45.4b
ཡུལ་ལ་མངོན་པར་མོས་ཤིང་སངས་རྒྱས་ཀྱི་ཞིང་སྟུག་པོ་ཉིད་དུ་སོང་སྟེ་གནས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ས་དང་སའི་མཚན་ཉིད་ལ་མཁས་པ་ཕྲ་བ་དང་དམིགས་སུ་ཕེབས་པ་དང ། རྣམས་པར་གདོན་མི་ཟ་བའི་གཏམ་ཟོས་པ་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེར་ཐལ་མོ་སྦྱར་བས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་གཅིག་ཅིག་བཅོམ་ལྡན་འདས་ཀྱིས་བདག་ལ་ཞུ་བ་ཞུས་པ་ལུང་བསྟན་པའི་སླད་དུ་སྐབས་དབྱེ་བར་གནང་ན་བདག་གིས་ཞུའོ། །བཅོམ་ལྡན་འདས་ཀྱིས་བཀའ་སྩལ་པ། རྡོ་རྗེའི་སྙིང་པོ་ཁྱོད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དྲིས་ཤིག་དང ། ངས་ཅི་དང་ཅི་འདོད་པ་དེ་དང་དེའི་དྲི་བ་དྲིས་པ་ལུང་བསྟན་པས་སེམས་མགུ་བར་བྱས་ཁྱོད་ཀྱིས་ཇི་ལྟར་བཟོད་པ་དེ་ལྟར་སྨྲོས་ཤིག་།དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་བཅོམ་ལྡན་འདས་ཀྱིས་སྐབས་ཕྱེ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་སངས་རྒྱས་ཤེས་བགྱི་བ་དང ། འཚང་རྒྱ་བར་བགྱི་བ་ཞེས་བྱ་བའི་དོན་ཅི་ལགས། བཅོམ་ལྡན་འདས་དོན་དམ་པ་འཕགས་པའི་ཡུལ་ཆོས་ཉིད་ཀྱི་སངས་རྒྱས་ཀྱི་རིགས་སྟོན་པ་འདས་པ་དང ། མ་འོངས་པ་དང ། ད་ལྟར་བྱུང་བའི་སྤྱོད་པའི་ས་ལ་སྤྱོད་པ་དང ། གཟུགས་དང ། མཚན་ཉིད་དང ། ཡང་དག་པར་བསྡུ་བའི་ལྟ་བར་ལྟུང་བ་རྣམས་དང་མུར་འདུག་བཞིན་གྱི་སྨྲ་བ་ལ་མངོན་པར་ཆགས་པའི་བློའི་སྤྱོད་ཡུལ་ལ་སྤྱོད་པ་རྣམས་དང ། རྡུལ་དང ། གཅེས་པ་དང ། དབང་པོ་དང ། ཕྱོགས་དང ། དུས་དང ། ནམ་མཁའ་དང །
45.5a
བདག་དང ། ཡིད་དང ། དབང་པོ་དང ། དོན་ཉེ་བར་འདུ་བའི་ལྟ་བར་ལྷུང་བ་རྣམས་ཀྱི་བློ་རྣམ་པར་བཟློག་པའི་སླད་དུ་བཤད་དུ་གསོལ། བདེ་བར་གཤེགས་པ་བསྟན་དུ་གསོལ། མ་རིག་པ་དང ། སྲེད་པ་དང ། ལས་དང ། མིག་དང ། གཟུགས་དང ། སྣང་བ་དང ། དེ་ལས་སྐྱེ་བའི་ཡིད་ལ་བྱེད་པ་དང ། གསུམ་འདུ་བའི་རྣམ་པར་རྟོག་པའི་ཤེས་པ་ཅན་དང ། རྒྱུ་དང ། དེ་མ་ཐག་པ་དང ། དབང་དང ། དམིགས་པའི་རྐྱེན་ལས་བྱུང་བའི་རྣམ་པར་ཤེས་པ་ལ་ཆགས་པར་སྤྱོད་པ་དང ། ཡོད་པ་དང ། མེད་པར་སྨྲ་བའི་རྟོགས་པ་ཅན་དང ། ཆོས་འདི་བའི་ཕུང་པོ་དང ། གང་ཟག་སྟོང་པ་ཉིད་དུ་ལྟ་བར་ལྷུང་བ་རྣམས་ཀྱི་ཡང་བློ་རྣམ་པར་བཟློག་པའི་སླད་དུ་བཅོམ་ལྡན་འདས་བསྟན་དུ་གསོལ། ཆོས་ཀྱི་དབང་པོ་ཐོས་པར་འགྱུར་གྱིས་བདེ་བར་གཤེགས་པ་བསྟན་དུ་གསོལ། རྣམ་ཤེས་ལྔ་ཡི་རྒྱུ་ལ་སོགས། །མངའ་བདག་དམ་པ་མ་གཏོགས་པར། །སངས་རྒྱས་བློ་དང་ཤེས་བྱ་དང ། །ཇི་ལྟར་གང་གིས་འཚང་རྒྱ་ཞིང ། །ཤེས་བྱ་རྣམ་པ་ལྔ་པོ་རྣམས། །ཐུགས་སུ་ཆུད་པ་སངས་རྒྱས་ཏེ། །ཆོས་རྣམས་ཐམས་ཅད་མཁྱེན་པས་ན། །མྱ་ངན་འདའ་དང་མཉམ་གཤེགས་པ། །བཅོམ་ལྡན་འདས་ཀྱིས་བཀའ་སྩལ་པ། དགེའོ་དགེའོ་རྡོ་རྗེའི་སྙིང་པོ་ས་བཅུ་ལ་དབང་བ། རྣམ་པར་རྟོག་པའི་སྤྱོད་ཡུལ་ལས་འདས་པ། མཁས་པ་ཆོས་ཉིད་ཀྱི་སངས་རྒྱས་ཀྱི་རིགས་གྲགས་པར་བྱེད་པ་དགེའོ། །རྣལ་འབྱོར་དམ་པ་ལ་དབང་བ། སངས་རྒྱས་དང་འཚང་རྒྱ་བར་ཡོངས་སུ་དྲི་བ་འདི་ལ་ནི་ཁྱོད་འབའ་ཤིག་ལྟད་མོ་བྱུང་བ་མ་ཡིན་གྱི། སྒྱུ་མ་བྱེད་པ་བཟང་པོ་དང ། རྒྱལ་བའི་བུ་གཞན་དག་ཀྱང་དོན་འདི་ལ་ལྟད་མོ་བྱུང་ཞིང་སངས་རྒྱས་ཀྱི་དངོས་པོ་འདྲི་སྟེ། དེ་བཞིན་གཤེགས་པ་ཞེས་བྱ་བའི་ཚིག་གི་དོན་འདི་ཅི་ཞིག་།ཅི་གཟུགས་དེ་བཞིན་གཤེགས་པའམ། འོན་ཏེ་གཟུགས་ལས་གཞན་ཞིག་དེ་བཞིན་གཤེགས་པ་འམ། དེ་བཞིན་དུ་ཕུང་པོ་དང ། ཁམས་དང །
45.5b
སྐྱེ་མཆེད་ཀྱི་འདུ་བྱེད་ལས་ཀྱང་སྟེ། ནང་དང་ཕྱིའི་མཉམ་པ་ཉིད་ཀྱང་མི་མཐོང་ཞིང་བྱས་པའི་རྒྱུ་དང་འཇིག་པའི་ཆོས་ཅན་གྱི་ཕྱིར་ཕུང་པོ་རྣམས་ལ་དེ་བཞིན་གཤེགས་པ་མེད་དེ། རྡུལ་ཕྲ་མོ་མེད་པ་ཐུགས་སུ་ཆུད་པའི་ཕྱིར་ཤེས་རབ་དང ། ཡེ་ཤེས་དང ། ཏིང་ངེ་འཛིན་གྱི་སྤྱོད་ཡུལ་ཏེ། མཉམ་པར་བཞག་པའི་ཐུགས་ཀྱིས་ཡང་དག་པར་རྗེས་སུ་མ་གཟིགས་ཤིང་ཕུང་པོ་རྣམས་སྐྱེས་པའི་ཕྱིར་དེ་བཞིན་གཤེགས་པའི་ཆོས་ཀྱི་སྐུ་ཡིན་པས་ན་རྟག་པ་ཉིད་དོ་སྙམ་མོ། །ཀྱེ་རྒྱལ་བའི་བུ་ཆོས་ཀྱི་དབྱིངས་ཀྱི་ཤིན་དུ་ཕྱེ་བ་ལ་མཁས་པ་དེ་དགེའོ། །ཀྱེ་རྒྱལ་བའི་བུ་དེ་བས་ན་དགེ་བར་ཤིན་དུ་ཉོན་དེ་ཡིད་ལ་གྱིས་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་དགེའོ་ཞེས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་བཅོམ་ལྡན་འདས་ལས་ཕྱིར་ཉན་ཏོ། །བཅོམ་ལྡན་འདས་ཀྱིས་དེ་ལ་བཀའ་སྩལ་པ། རིགས་ཀྱི་བུ་རྡོ་རྗེ་ལྟ་བུའི་སྙིང་པོ་ཏིང་ངེ་འཛིན་ལ་དབང་བ་རྡོ་རྗེའི་སྙིང་པོ་ཕུང་པོ་རྣམས་ནི་དེ་བཞིན་གཤེགས་པ་མ་ཡིན། ཕུང་པོ་ལས་གཞན་ན་ཡང་མེད་དེ། ཕུང་པོ་ལ་གནས་པ་ཡང་མ་ཡིན། ཕུང་པོ་ཡང་གནས་མ་ཡིན། སྐྱེ་བ་དང་འཇིག་པ་ཡང་གནས་མ་ཡིན། ཤེས་པར་བྱ་བ་ཡང་མ་ཡིན། ཤེས་པ་ཡང་མ་ཡིན། དོན་ཀྱང་མ་ཡིན། དབང་པོ་རྣམས་ཀྱང་མ་ཡིན་ནོ། །དེ་ཅིའི་ཕྱིར་ཞེ་ན། ཕུང་པོ་དང ། ཁམས་དང ། སྐྱེ་མཆེད་དང ། ཡུལ་རྣམས་ནི་མནོ་བསམ་མེད་པའི་ཕྱིར་ཏེ། དེ་བཞིན་གཤེགས་པ་ནི་འདི་རྣམས་ལས་ནང་ངམ་ཕྱིར་ཡང་མི་བལྟའོ། །གཟུགས་ནི་སྐྱོད་པ་མེད་ཅིང་སེམས་མེད་པ་སྟེ། འབྱུང་བ་མེད་པའི་ཆོས་ཅན། མཐར་འཇིག་པ། རྩཝ་དང་ཤིང་དང་བོང་རྡོ་དང་འདྲ་བ། ཤིན་དུ་ཕྲ་བའི་རྡུལ་གྱི་ཚོགས་དབུ་བ་དང་འདྲ་བའོ། །ཚོར་བ་ནི་གཉིས་ཚོགས་པ་ལས་ཆུའི་ཆུ་བུར་དང་འདྲ་བར་སྐྱེའོ། །འདུ་ཤེས་ནི་བུམ་པ་དང ། སྣམ་བུ་དང ། ཅོད་པན་ལ་སོགས་པའི་རྒྱུ་ལས་བྱུང་བ་སྟེ། དེ་ཡང་གཉིས་ལས་སྐྱེས་པའི་སྨིག་རྒྱུ་དང་འདྲ་བ་སྟེ། དཔེར་ན་དཔྱིད་གྱིས་མངོན་པར
45.6a
གདུངས་པའི་ས་ལ་ཉི་མའི་འོད་ཟེར་བབ་པ་གྱེན་དུ་ལངས་པ་རྣམས་ཆུའི་རླབས་ལྟ་བུར་རླབ་ཅིང་རི་དགས་དང་བྱ་སྐོམ་གྱིས་ཉེན་ཅིང་ཆུ་ཚོལ་བ་རྣམས་ལ་ཆུར་རྨོངས་པར་བྱ་བས་རྨོངས་པར་བྱེད་དོ། །དེ་བཞིན་དུ་འདུ་ཤེས་ཀྱང་དེའི་བདག་ཉིད་མ་ཡིན་པ། དེའི་བདག་ཉིད་མ་ཡིན་པའི་གཟུགས་སུ་འཇུག་པ། ཡང་དག་པ་མ་ཡིན་པར་ཡོངས་སུ་བརྟགས་པ་ལས་སྐྱེས་པ། དཔྱོད་པ་རྣམས་ཀྱིས་བརྗོད་པ་ལས་སོགས་ཤིན་ཏུ་མི་དམིགས་པ། བོང་བུའི་རཝ་དང ། མོ་ཤམ་གྱི་བུ་བརྗོད་པ་ལྟར་མིང་ཙམ་དུ་ཟད་པ་སྟེ། རྨི་ལམ་གྱིས་གཟུགས་བརྗོད་པ་ལྟར་བལྟའོ། །དཔེར་ན་རྨི་ལམ་ན་གཟུགས་ཀྱི་འདུ་ཤེས་མཐོང་བས་སད་པའི་ཚེ་གཟུགས་ལ་སོགས་པ་དང ། བུད་མེད་བཟང་མོ་ཡང་དམིགས་སུ་མེད་དོ། །དེ་བཞིན་དུ་མི་ཤེས་པས་ལོག་པ་ན་བུད་མེད་དང་སྐྱེས་པ་ལ་སོགས་པ་མཐོང་བ་ཡང་མངོན་པར་སངས་རྒྱས་ན་མི་དམིགས་སོ། །འདུ་བྱེད་རྣམས་ནི་ཆུ་ཤིང་གི་སྙིང་པོ་ལྟ་བུ་སྟེ་བཙལ་ན། ལུས་དང་ངག་དང་ཡིད་ལས་བྱུང་བ་གཟུགས་མེད་པ་རྣམས་རྣལ་འབྱོར་ཅན་གྱི་དཔྱོད་པ་པ་རྣམས་ཀྱིས་མི་རྙེད་དོ། །རྣམ་པར་ཤེས་པ་ནི་སྒྱུ་མ་ལྟ་བུ་དེའི་བདག་ཉིད་མེད་པ་སྟེ། སྒྱུ་མ་བྱེད་པའམ། དེའི་སློབ་མས་ནན་ཏན་དུ་རྩཝ་དང་ཤིང་དང་བོང་རྡོ་ཙམ་ལ་བརྟེན་ཏེ་གཟུགས་ཀྱི་ཡན་ལག་དུ་མ་ལས་མངོན་པར་བསྒྲུབས་པའི་སྒྱུ་མའི་གཟུགས་གླང་པོ་དང ། རྟ་དང ། ཤིང་རྟ་དང ། མི་དང ། རྒྱན་མ་བཏགས་པའི་གཟུགས་ཀྱི་ཕྱོགས་གཅིག་ངོ་མཚར་དུ་བསྟན་པ་ལྟ་བུ་དང ། གཞན་ཡང་མཁས་པ་རྣམས་ལ་མ་ཡིན་གྱི་བུས་པའི་འགྲོ་བ་རྣམས་ལ་འདྲིན་པ་དེ་བཞིན་དུ་རྣམ་པར་ཤེས་པ་ཡང་རྣམ་པ་གཞན་དུ་འདུག་ལ། རྣམ་པ་གཞན་དུ་ཤིན་དུ་བརྟགས་ཤིང་ཤིན་དུ་རྟོག་སྟེ་དེ་ཡང་བདག་བདག་ལ་འཛིན་པ་གཉིས་སུ་ཤེས་ནས། སྒྱུ་མས་མངོན་པར་གྲུབ་པའི་གཟུགས་གཅིག་པོའི་ངོ་མཚར་དང་འདྲ་བར་ཕྱིར་ལྡོག་གོ། །དེ་བཞིན་གཤེགས་པ་ནི་རྟག་པ་བརྟན་པ་ཐེར་ཟུག་མི་འཇིག་པ་སྟེ། སངས་རྒྱས་རྗེས་སུ་དྲན་པ་བསྒོམ་པའི་རྣལ
45.6b
འབྱོར་ཅན་རྣམས་ཀྱི་ཡུལ་ཡིན་ཏེ། དེ་བཞིན་གཤེགས་པའི་སྙིང་པོ་ཞེས་བསྒྲགས་པ་མྱ་ངན་ལས་འདས་པའི་དབྱིངས་དང ། ནམ་མཁའ་ལྟ་བུར་མི་འཇིག་པ་སྟེ། མྱ་ངན་ལས་འདས་པའི་སྒྲ་ཆོས་ཀྱི་དབྱིངས་ཀྱི་ཚིག་གིས་འདས་པ་དང ། བྱུང་བ་དང ། འབྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་བསྟན་ཏེ། འདི་ལྟར་དེ་བཞིན་གཤེགས་པ་རྣམས་བྱུང་ཡང་རུང ། མ་བྱུང་ཡང་རུང ། ཆོས་རྣམས་ཀྱི་ཆོས་ཉིད་ཆོས་ཀྱི་གནས་ཉིད་དང ། ཆོས་ཀྱི་དབྱིངས་དང ། ཆོས་སྐྱོན་མེད་པ་གཉིས་པོ་འདི་ནི་དེ་བཞིན་གནས་པའོ། །རྡོ་རྗེའི་སྙིང་པོ་སྐྱོན་མེད་པ་ཞེས་བྱ་བ་ནི་ཡང་འབྱུང་བའི་ཉེས་པ་ཐམས་ཅད་དང་བྲལ་བའོ། །རྡོ་རྗེའི་སྙིང་པོ་སྐྱོན་མེད་པ་ནི་ཉེས་པ་ཐམས་ཅད་དང་བྲལ་བར་མ་ཟད་ཀྱི་ཏིང་ངེ་འཛིན་ལ་ཡང་འཇུག་གོ། །སྐྱོན་མེད་པར་འདའ་བ་ནི་བྱང་ཆུབ་སེམས་དཔས་སྤང་བར་བྱ་སྟེ། དེ་ཅིའི་ཕྱིར་ཞེ་ན། འདི་ལྟར་ཏིང་ངེ་འཛིན་གྱི་སྒོ་དེ་ཉིད་དུ་མྱོས་ཏེ། སེམས་ཅན་ལ་ལྟ་བ་མེད་པར་གྱུར་ཅིང་ཡང་དག་པའི་མཐའ་མངོན་དུ་བྱས་ནས་ལྕགས་བསྲེགས་པའི་མེ་དང་འདྲ་བར་མྱ་ངན་ལས་འདའ་བར་གྱུར་ཏེ། དེ་སེམས་ཅན་གྱི་དགོས་པ་ལ་བརྩོན་འགྲུས་བཏང་ཞིང་སྙིང་རྗེ་ཆེན་པོ་དང ། ཕ་རོལ་དུ་ཕྱིན་པ་རྣམས་དང་བྲལ་བས་སངས་རྒྱས་ཀྱི་གདུང་རྣམ་པར་ཆད་པར་བྱེད་ཅིང་ཉན་ཐོས་དང་རང་སངས་རྒྱས་མུར་འདུག་བྱེད་པའི་ལམ་དུ་འགྲོ་སྟེ། ཏིང་ངེ་འཛིན་གྱི་འདམ་དུ་གླང་པོ་ཆེན་པོ་འདྲ་བར་རྣམ་པར་ཐོགས་ཏེ། རྣམ་པར་ཤེས་པའི་ཡུལ་རབ་ཏུ་ཞུམ་པས་སངས་རྒྱས་ཀྱི་ཆོས་ཀྱི་སྐྱེ་མཆེད་ཐམས་ཅད་ཀྱིས་ཀུན་ནས་མི་གནས་ཤིང་རྫོགས་པར་མི་བྱེད་པར་འགྱུར་བའི་ཕྱིར་མངོན་དུ་མི་བྱ་ཞིང ། མ་རེག་པ་དང ། ཉེ་བར་མི་བསྒྲུབ་པར་གནས་པར་བྱའོ། །དེ་ལྟར་སངས་རྒྱས་ཀྱི་ཆོས་ཀྱི་སྐུའི་རྗེས་སུ་ཞུགས་ཏེ་སངས་རྒྱས་ཀྱི་ཆེ་བ་ཉིད་ཤེས་པས་ཆོས་ཀྱི་འཁོར་ལོ་བསྐོར་བའི་སངས་རྒྱས་རྣམ་པ་སྣ་ཚོགས་ཀྱི་ཚུལ་གྱི་ཡུལ་ལ་ཉེ་བར་སྤྱོད་པ། སྤྲུལ་པའི་ཡུལ་ཅན། དེ་བཞིན་གཤེགས་པ་རྣམས་ཀྱིས་ཏིང་ངེ་འཛིན་ལས་བསླང་བའི་སྦྱོར་བ། ས་བརྒྱད་པ་ལས
45.7a
འདས་པ། ཆོས་ཀྱི་སྤྲིན་གྱི་ས་ལ་ཤེས་པར་རབ་ཏུ་བྱས་པ། སངས་རྒྱས་ཀྱི་ཆེ་བ་ཉིད་མྱོང་ནས་དེ་བཞིན་གཤེགས་པ་བདག་གི་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱིས་རྟོགས་པའི་སྤྱོད་ཡུལ་གྱི་སར་ཞུགས་ཏེ་ཐམས་ཅད་དུ་འགྲོ་བ་མ་གཡོས་པའི་ཏིང་ངེ་འཛིན་སྤྱོད་པ། ལྷུན་ཀྱིས་གྲུབ་པ། རྟག་པ། ཐེར་ཟུག་པ། བརྟན་པ་སངས་རྒྱས་ཀྱི་ཞིང་སྟུག་པོ་ན་གནས་པར་འགྱུར་ཏེ། རྡོ་རྗེའི་དབང་པོ་ས་ལ་དབང་བ་རྣམས་ལ་འཕྲུལ་པའི་འཇུག་པ་སྟོན་པར་འགྱུར་ཏེ། གནས་གྱུར་པ། ཡིད་བཞིན་གྱི་ཡེ་ཤེས་དང་ཏིང་ངེ་འཛིན་ཅན། སྟོབས་དང ། མངོན་པར་ཤེས་པ་དང ། རྫུ་འཕྲུལ་གྱི་རྐང་པ་དང ། དབང་ལ་སྤྱོད་པ། ངང་པའི་རྒྱལ་པོ་དང་འདྲ་བར་མ་ཞུགས་པའི་ཆུ་བོ་ཟླ་བ་ལྟ་བུར་འགྲོ་སྟེ། བལྟ་བའི་དོན་ཡོད་པ། མིའི་བདག་པོ་ཐམས་ཅད་ཀྱི་ཚོགས་ཀྱི་འཁོར་དུ་སེམས་ཅན་རྣམས་ཀྱི་བསམ་པ་ཇི་ལྟ་བར་འདོད་པའི་གཟུགས་དག་གིས་སངས་རྒྱས་ཀྱི་ཞིང་སྟུག་པོ་བསྟན་པའི་ཕྱིར་སེམས་ཅན་གྱི་བསམ་པ་བཞིན་དུ་འཇུག་པར་འགྱུར་རོ། །འདོད་པའི་ཁམས་ཀྱི་དབང་པོ་ཐམས་ཅད་དང ། དབང་སྒྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནོར་བུ་རིན་པོ་ཆེའི་སྙིང་པོ་ལ་སོགས་པའི་གནས་དག་ཏུ་བདེ་བ་རྣམས་མྱོང་བར་བྱས་ཏེ་སའི་རིམ་པ་རྣམས་བསྟན་ནས་ཞིང་ནས་ཞིང་དུ་ཕུན་སུམ་བདེ་བ་རྣམས་རབ་ཏུ་སྟོན་ཅིང་ཕྱི་མའི་མཐར་ཐུག་པར་བསྐུ་བ་གྲུབ་པའི་སྔགས་འཆང་ལྟར་མི་སྣང་ཞིང་ཁང་ཁྱིམ་གྱི་ལྷ་ལྟར་དེ་ན་གནས་བཞིན་དུ་མི་སྣང་བའི་གཟུགས་སུ་ཁྱིམ་ན་འདུག་པ་ལྟར་དེ་དག་སྤྲུལ་པའི་འོད་ཟེར་དང ། འཕྲུལ་བས་སྤྲུལ་པ་ལ་སྤྱོད་ཅིང་འགྲོའོ། །སོང་ནས་ཀྱང་དེ་བཞིན་གཤེགས་པའི་སྤྲུལ་པའི་སྐུ་ནུབ་སྟེ། དེ་བཞིན་གཤེགས་པའི་སྐུ་ལ་ཞེན་ནས་གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དབང་པོ་ཕུང་པོ་སྤྲུལ་ཡིན་ཏེ། །སྲེད་དང་མ་རིག་ལས་ཀྱང་ཡིན། །བག་ཆགས་ཀྱིས་བཅིངས་མི་བཟད་པ། །ཡུལ་དང་དབང་པོའི་རྒྱུ་ལས་བྱུང ། །རྣམས་དཔྱོད
45.7b
ཚོགས་ནི་འདོད་ཆགས་རྣམས། །ཞགས་པ་སེམས་བསྐྱོད་དེ་ཡིན་ནོ། །ཁྲོ་བ་མེ་ལྕེ་མཉམ་པ་སྟེ། །ཞེ་སྡང་དུག་གི་དངོས་པོ་ཡིན། །ཐུབ་སྤྱོད་རྣལ་འབྱོར་བཟང་ཅན་གྱིས། །འདི་དག་རྟག་ཏུ་རྣམ་གཞིགས་ཏེ། །ཕུང་པོ་རྣམས་ནི་དོར་བའི་ཕྱིར། །རྣལ་འབྱོར་ཅན་གྱིས་རྣལ་འབྱོར་སྤྱོད། །གཟུགས་ནི་འབྱུང་བའི་ཚོགས་ཡིན་ཏེ། །ཕུང་པོ་ལྷག་མ་གཟུགས་མེད་པ། །ཇི་བཞིན་བར་སྣང་རི་མོ་དང ། །གྲིབ་ལ་སྡོང་དུམ་ལ་སོགས་མེད། །མཁའ་ལ་རླུང་གཟུགས་མི་སྣང་དང ། །བྱ་ཡི་རྗེས་རྣམས་ཇི་བཞིན་ནི། །མཁས་པས་སོ་སོ་རང་རིག་པ། །ཡང་དག་ཉིད་དང་ཡང་དག་མཐའ། །ཚིག་གི་སྤྱོད་ཡུལ་འདས་པ་ནི། །སངས་རྒྱས་དངོས་པོ་མི་སྣང་སྟེ། །སངས་རྒྱས་སྒྲས་ནི་མྱ་ངན་འདས། །མྱ་ངན་འདས་ཀྱང་སངས་རྒྱས་ཏེ། །རྣམ་རྟོག་རྟོག་དང་བྲལ་བས་ན། །དེ་ནི་བསྟན་དུ་མི་ནུས་པའོ། །རྒྱུ་དང་འབྲས་བུ་མེད་པ་སྟེ། །ཡོད་དང་མེད་ཀྱིས་རྣམ་པར་སྤངས། །རྡོ་བ་ཕྱེ་མར་བཏགས་པ་ལ། །གསེར་ནི་ཡོད་པར་མི་སྣང་སྟེ། །སྦྱང་བའི་ལས་ཀྱི་ཁྱད་པར་གྱིས། །གསེར་ནི་སྣང་བར་འགྱུར་བ་ཡིན། །གཟུགས་རྣམས་རྡུལ་དུ་རྣམ་གཞིགས་ཏེ། །མཁས་པས་ཕུང་པོ་ལྷག་མ་དང ། །ཁམས་དང་སྐྱེ་མཆེད་ཚོགས་རྣམས་དང ། །རྣམ་པར་ཤེས་དང་དབང་པོ་དག་།གཅིག་དང་ཐ་དད་དངོས་པོ་ཡང ། །རྡུལ་ཕྲན་རྣམ་པར་རབ་སྦྱངས་ན། །དངོས་པོར་སངས་རྒྱས་ཡོད་པ་མིན། །སངས་རྒྱས་མེད་པའང་མ་ཡིན་ཏེ། །རྣལ་འབྱོར་ཅན་རྣམས་སངས་རྒྱས་མཐོང ། །མཚན་རབ་སུམ་བཅུ་རྩ་གཉིས་ཅན། །གང་ན་སྡུག་བསྔལ་དེ་ན་བདེ། །དེ་ཉིད་ལ་ནི་སྣང་བ་ཡིན། །སངས་རྒྱས་མེད་ཅེས་མི་བྱ་སྟེ། །སངས་རྒྱས་མཉམ་པར་བཞག་པ་ཡོད། །རྒྱུ་ཡི་སངས་རྒྱས་དགེ་བ་ཅན། །རྩ་བ་མཁས་པ་ཉིད་ཀྱང་སྟེ། །འཇིག་རྟེན་ཀུན་གྱི་རྒྱལ་བ་དང ། །ཡང་དག་རྫོགས་པའི་སངས་རྒྱས་དང ། །འདི་དག་སངས་རྒྱས་ལྔར་གསུངས་སོ། །སྤྲུལ་པའི་རྒྱལ་བ་ལྷག་མ་རྣམས། །དེ་བཞིན་གཤེགས་པའི་སྙིང་པོ་ཡོད། །མཚན་རབ་སུམ་ཅུ་རྩ
45.8a
གཉིས་ཅན། །དེ་བས་སངས་རྒྱས་ཡོད་པ་སྟེ། །རྣལ་འབྱོར་ཅན་གྱི་ཐུབ་པས་མཐོང ། །ཁམས་རྣམས་གསུམ་པོ་འདས་པ་དང ། །རྣམ་པ་དུ་མར་སངས་རྒྱས་ཞིང ། །དེ་བཞིན་གཤེགས་ཀྱི་ལྷ་རྫས་ཞིང ། །རྒྱལ་སྲས་བཟང་པོས་ཀུན་དུ་གང ། །དེ་ན་ཐུབ་ཆེན་སངས་རྒྱས་བཞུགས། །མཚན་གྱིས་ཀུན་ནས་ཡོངས་སུ་རྒྱས། །རྣལ་འབྱོར་རྣལ་ལ་མཉམ་པར་བཞག་།ཆོས་དང་བཅས་སུ་རྣམ་པར་མཛེས། །དེ་བཞིན་ཕན་ཚུན་བསམ་གཏན་མཛད། །ཤེས་རབ་མ་ཤེས་ཤེས་བྱེད་ལ། །སྟུག་པོ་དེ་ན་རྣམ་པར་སྤྱོད། །སྟུག་པོ་དེ་ཡི་སེམས་ཅན་སུ། །སངས་རྒྱས་གཟུགས་ཅན་དེ་དག་ཀུན། །སྐད་ཅིག་འཇིག་པར་ཤིན་དུ་འདས། །ཏིང་ངེ་འཛིན་ལ་རྟག་ཏུ་མོས། །དགའ་ལྡན་ནས་བབས་འཕྲུལ་པ་གང ། །རྟོག་པ་ཅན་རྣམས་ཀུན་གྱིས་མཐོང ། །སྟུག་པོ་ནས་གཤེགས་གླང་པོ་སྟེ། །སངས་རྒྱས་གཟུགས་ནི་སྟུག་ན་བཞུགས། །སྣ་ཚོགས་རྣམ་མང་གཟུགས་ཚུལ་ཏེ། །སེམས་ཅན་བསམ་བཞིན་ཞུགས་པ་ཡིས། །དེ་བཞིན་གཤེགས་པ་མཉམ་གཞག་པ། །ཆུ་ཡི་ཟླ་བ་བཞིན་དུ་སྣང ། །སྣ་ཚོགས་གཟུགས་ཀྱི་ནོར་བུ་ནི། །ཚོན་གྱི་འབྱོར་ལས་རྣམ་པར་མཛེས། །དེ་བཞིན་སངས་རྒྱས་སྟུག་ཞིང་ན། །མཉམ་པར་བཞག་པས་རྣམ་པར་མཛེས། །ཐམས་ཅད་ཆོས་ལ་གཟུགས་བརྙན་ལྟར། །གཅིག་དང་ཐ་དད་སྤངས་པར་ཏེ། །དགོས་པ་ཀུན་ལ་འཇུག་པ་ནི། །སྐྱེས་བུ་དམ་པ་ཐམས་ཅད་མཁྱེན། །རྡུལ་ལས་མ་ཡིན་དུས་ལས་མིན། །དབང་པོ་ལས་མིན་གཅེས་ལས་མིན། །རྐྱེན་གྱིས་མ་ཡིན་འཇིག་རྟེན་དང ། །སངས་རྒྱས་ལྡན་པར་རྣམ་མཛེས་པ། །རྒྱུ་ཡི་ཚུལ་དུ་སངས་རྒྱས་ནི། །འབྲས་བུ་རྣམས་ལ་རྣམ་པར་མཛེས། །འཇིག་རྟེན་སྐུ་ལ་འཁོད་བྱ་སྟེ། །རྒྱ་མཚོ་རི་དང་ཤིང་དག་དང ། །དེ་ལ་འགྲོ་བ་སྣ་ཚོགས་བཅས། །མཉམ་པར་བཞག་པས་ཤིན་ཏུ་དགྱེས། །བྱ་བ་ཐམས་ཅད་ཕྱི་ནང་དུ། །གཟའ་ཟླ་ལ་སོགས་མཛེས་པའི་རྣམས། །ཕྱིར་ཡང་ཕྱག་གི་མཐིལ་བཀོད་དེ། །ཡུངས་འབྲུར་འགྲོ་བ་ཀུན་འཇུད་པ། །སངས་རྒྱས་ཐུབ་པའི་རྣལ་འབྱོར་མངའ། །
45.8b
ཐུབ་ཆེན་ཐུབ་པའི་དམ་པའོ། །འཇིག་རྟེན་རྣམས་ལ་བྱེད་པ་མེད། །སངས་རྒྱས་འཕྲུལ་གྱིས་སྤྲུལ་པ་སྟེ། །འབྱུང་བ་གསུམ་པོ་འདི་དག་ཀུན། །སངས་རྒྱས་འོད་ཀྱིས་རྣམ་པར་སྤྲུལ། །རབ་རིབ་མི་ཤེས་མྱོས་མདོངས་པའི། །རྟོག་པ་ཅན་རྣམས་འཕྱན་པ་ཡིན། །བདག་དང་བདག་མེད་ལྟ་བའི་རྣམས། །ཡོད་དང་མེད་པའི་སྨྲ་བས་བཅོམ། །འོན་ཏམ་ཐམས་ཅད་འཇིག་པ་དང ། །ཅུང་ཟད་འཇིག་པས་སྨྲ་བ་རྣམས། །འདི་ལ་མེད་དམ་ཅུང་ཟད་དམ། །བདག་དང་བདག་མད་ག་ལ་ཡོད། །སངས་རྒྱས་སྣ་ཚོགས་འབྱུང་ཀུན་ན། །རྣལ་འབྱོར་མཁན་པོ་རྣམ་པར་མཛེས། །དྲི་ཟའི་གྲོང་ལ་བྱ་བ་རྣམས། །ཇི་ལྟར་སྣང་བ་འཇིག་རྟེན་ན། །རྨི་ལམ་རྣམ་པ་སྣ་ཚོགས་གཟུགས། །རི་དགས་རྣམས་ལ་སྨིག་རྒྱུ་བཞིན། །དེ་བཞིན་འཇིག་རྟེན་སྣ་ཚོགས་དག་།བདེག་ལ་སོགས་པའི་ལས་རྣམས་ཀྱང ། །རླུང་ལྡན་སོགས་པའི་ཐག་པ་བཞིན། །སངས་རྒྱས་རྣལ་འབྱོར་མཁྱེན་གྱི་མཆོག་།མི་ལ་འཁྲུལ་འཁོར་སྐོར་བ་སྟེ། །རྒྱ་མཚོའི་སྐྱ་བ་འཛིན་པ་འདྲ། །སྟུག་པོའི་རིས་ཀྱི་ཡེ་ཤེས་ཀྱི་རྒྱན་ལས་བྱུང་ཞེས་བྱ་བའི་ལེའུ་སྟེ་དང་པོའོ།། །། དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ན་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མཚམས་མེད་པ་ལྔ་བགྱིས་པ་རྣམས་དང ། དམ་པའི་ཆོས་སྤོང་བ་རྣམས་དང ། འཕགས་པ་སྤོང་པ་རྣམས་དང ། མནར་མེད་པ་ལ་གཞོལ་བ་རྣམས་དང ། མ་དང་ཕ་ལ་སྙིང་རིང་བ་རྣམས་དང ། ཚངས་པ་འགུམས་པ་རྣམས་དང ། བ་ལང་དང ། དགུམ་པ་འགུམས་པའི་སེམས་ཅན་རྣམས་ཇི་ལྟར་ཡོངས་སུ་འགྲོལ་བར་འགྱུར། བཅོམ་ལྡན་འདས་སེམས
45.9a
ཅན་དེ་དག་འཁོར་བའི་སྡུག་བསྔལ་ལ་ཇི་ལྟར་ཡོངས་སུ་འགྲོལ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སྦྱིན་པ་གཉིས་བྱིན་པའི་སེམས་ཅན་རྣམས་འཁོར་བའི་སྡུག་བསྔལ་ལས་ཡོངས་སུ་འགྲོལ་བར་འགྱུར་ཏེ། དེ་འདི་ལྟར་ཆོས་ཀྱི་སྦྱིན་པ་དང ། ཟང་ཟིང་གི་སྦྱིན་པའོ། །ཆོས་ཀྱི་སྦྱིན་པས་ནི་སྐྱེ་བ་དྲན་པར་འགྱུར་རོ། །ཟང་ཟིང་གི་སྦྱིན་པས་ནི་སེམས་ཅན་ཐམས་ཅད་ལ་ཕན་བཏགས་པར་འགྱུར་རོ། །ཟང་ཟིང་གི་སྦྱིན་པས་ནི་བཀྲེས་པ་དང ། སྐོམ་པའི་སྡུག་བསྔལ་ཡོངས་སུ་སྦྱོང་ངོ ། །ཆོས་ཀྱི་སྦྱིན་པས་ནི་སེམས་ཅན་དམྱལ་བ་དང ། བྱོལ་སོང་གི་སྐྱེ་གནས་དང ། གཤིན་རྗེའི་འཇིག་རྟེན་གྱི་འཁོར་བའི་སྡུག་བསྔལ་ལས་ཡོངས་སུ་འགྲེལ་ཏོ། །འཇམ་དཔལ་སྦྱིན་པ་གཉིས་པོ་འདི་བྱིན་ན་སྦྱིན་པ་ཐམས་ཅད་འདུས་པར་འགྱུར་རོ། །འཇམ་དཔལ་གཞན་ཡང་སྦྱིན་པ་ལྔས་སྦྱིན་པ་དང་ཉེ་བའི་སྦྱིན་པ་ཐམས་ཅད་འདུས་པར་འགྱུར་ཏེ། ལྔ་གང་ཞེ་ན་འདི་ལྟ་སྟེ། བཞོན་པ་སྦྱིན་པ་དང ། གདུགས་སྦྱིན་པ་དང ། དར་སྦྱིན་པ་དང ། གོས་སྦྱིན་པ་དང ། ཆོས་གོས་དང ། བསོད་སྙོམས་དང ། མལ་ཆ་དང ། སྟན་དང ། ནད་ཀྱི་རྐྱེན་སྨན་དང ། ཡོ་བྱད་སྦྱིན་པ་རྣམས་ཀྱིས་སྡུག་བསྔལ་ཐམས་ཅད་ཡོངས་སུ་སྦྱངས་པར་འགྱུར་རོ། །འཇམ་དཔལ་ཡང་སེམས་ཅན་ལ་ལ་མཚམས་མེད་པ་ལྔ་དག་གམ། དམ་པའི་ཆོས་སྤོང་བ་དག་གམ། འཕགས་པ་སྤོང་བ་དག་གམ། མནར་མེད་པ་ལ་གཞོལ་བ་དག་གམ། བསྐལ་པར་གནས་པ་དག་གམ། སེམས་ཅན་གང་ལ་ལ་དཀོན་མཆོག་གསུམ་ལ་སྙིང་རིང་བའམ། སངས་རྒྱས་དང་ཆོས་དང་དགེ་འདུན་ལ་གནོད་པར་བྱེད་པའམ། ཚོགས་ཀྱི་ནོར་ལ་འཕྲོག་པ་དག་གམ། ཆུང་ངུ་ན་ལུག་གསོད་པ་དག་ཀྱང་རུང ། ཕྱག་དར་བ་ཡང་རུང ། སྨེ་ཤ་ཅན་ཡང་རུང་སྟེ། འཇམ་དཔལ་སུས་ཤིན་དུ་རྒྱས་པ་ཆེན་པོ་རྨད་དུ་བྱུང་བའི་ཆོས་སྟུག་པོའི་རྒྱན་རིན་པོ་ཆེ་འདི་ཐོས་པ་དང ། འདྲི་བ་དང ། འདྲིར་འཇུག་པ་དང
45.9b
འཛིན་པ་དང ། ཀློག་པ་དང ། ཀུན་ཆུབ་པར་བྱེད་པ་དང ། གཞན་ལའང་རྒྱ་ཆེར་ཡང་དག་པར་སྟོན་པ་དང ། ཆུང་ངུ་ན་ཡི་གེ་གཅིག་ཀྱང་རུང་སྟེ་རྗོད་པ་དང ། སུའང་ཆོས་དེ་སྨྲ་བ་ལ་མཆོད་ཅིང་རིམ་གྲོ་བྱེད་པ་དང ། ནང་པར་ལངས་ནས་ངོ་ཕྲད་པར་བྱེད་ཅིང་ལྟ་བར་སྔར་སྨྲ་བ་སྦྱིན་པར་བྱེད་པ་དང ། ལག་པས་རེག་པར་བྱེད་པའི་སེམས་ཅན་དེ་དག་ཐམས་ཅད་འཇམ་དཔལ་སེམས་ཅན་དམྱལ་བ་དང ། བྱོལ་སོང་གི་སྐྱེ་གནས་དང ། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་ལས་ཡོངས་སུ་འགྲོལ་བར་འགྱུར་རོ། །འཇམ་དཔལ་སའི་ཕྱོགས་གང་ན་ཆོས་སྨྲ་བ་འདུག་གམ། དེའི་དུར་རམ། རོ་འམ། རོ་བམ་པ་ཞིག་ཡོད་ལ། དེའི་ངོ་མཐོང་ན་ཡང་མཚམ་མེད་པའི་ལས་ལྔ་རྣམས་བྱང་བར་འགྱུར་རོ། །འཇམ་དཔལ་རྒྱ་མཚོ་ཆེན་པོའི་ནང་ན་ཡི་དགས་ལྟོ་དཔག་ཚད་བརྒྱ་སྟོང་དུ་མར་སྐྱེས་པ་ཡོད་དེ། ཡི་དགས་དེ་བདག་གི་ལས་ཀྱི་སྡུག་བསྔལ་མི་བཟད་པའི་ཚོར་བ་ཡོད་དོ། །འཇམ་དཔལ་དེ་བཞིན་དུ་སེམས་ཅན་སུ་མདོ་སྡེ་ཆེན་པོ་རིན་པོ་ཆེ་འདི་སྤོང་བ་དེ་དག་ཀྱང་སྡུག་བསྔལ་མྱོང་བར་འགྱུར་རོ། །འཇམ་དཔལ་སུས་མདོ་སྡེ་རིན་པོ་ཆེ་འདི་རིམ་གྲོར་བྱས་ཏེ། མེ་ཏོག་དང ། བདུག་སྤོས་དང ། མར་མེ་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། ཆོས་གོས་དང ། གདུགས་དང ། རྒྱལ་མཚན་དང ། ལྷའི་བ་དན་གྱིས་མཆོད་པ་དང ། ཆོས་སྨྲ་བ་དེ་ཡང་མཆོད་པར་བྱ་སྟེ། ཇི་སྟེ་ཆོས་སྨྲ་བ་དེ་མཚམས་མེད་པ་ལྔ་བྱེད་ན་ཡང་འོན་ཀྱང་དེའི་སེམས་འཁྲུགས་པར་མི་བྱའོ། །ཆུང་ངུ་ན་བྱོལ་སོང་གི་སྐྱེ་གནས་སུ་གཏོགས་པའི་རི་དགས་དང ། བྱ་གང་ལ་ལས་ཆོས་སྨྲ་བ་དེ་ཤི་བའི་རོ་བམ་པ་དུར་ཁྲོད་ན་འདུག་པའི་ཤ་ཟོས་ཀྱང་དེ་དག་ཐམས་ཅད་ཕྱིར་མི་ལྡོག་པར་འགྱུར་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་འཐོབ་པར་འགྱུར་རོ། །རི་དགས་དང་བྱ་གཞན་པོ་དེ་དག་ཐམས་ཅད་སངས་རྒྱས་ཀྱི་ཞིང་སྟུག་པོ་འདི་ཉིད་དུ་འཐོབ་པར་འགྱུར་ཏེ། དེ་ལ་ནེམ་ནུར་དང ། ཐེ་ཙོམ་དང་ཡིད་གཉིས
45.10a
མི་བྱའོ། །སེམས་ཅན་གང་ལ་ལ་སྔོན་དགེ་བའི་རྩ་བ་བསྐྱེད་པ། སྔོན་བྱང་ཆུབ་སེམས་དཔས་ཡོངས་སུ་བཟུང་བ། སྔོན་གྱི་བྱང་ཆུབ་སེམས་དཔའི་ས་བོན་ལས་ཡོངས་སུ་མ་ཉམས་པ་དེ་དག་ཐམས་ཅད་ཕྱི་མའི་ཚེ་ཕྱི་མའི་དུས་ན་མདོ་སྡེ་རིན་པོ་ཆེ་འདི་ཐོས་པར་འགྱུར་རོ། །ཐོས་ནས་ཀྱང་མཆོད་པ་ཆེན་པོས་མཆོད་པར་འགྱུར་རོ། །མདོ་སྡེ་ཐམས་ཅད་འདུས་པའི་རྒྱན་སྟུག་པོ་རིན་པོ་ཆེ་ལས་སྦྱིན་པའི་ལེའུ་སྟེ་གཉིས་པའོ།། །། མཐའ་ཡས་ཡུལ་ཅན་ཤིན་དུ་ཕྲ། །བསམ་གཏན་མཁྱེན་པ་སྐྱེས་བུའི་མཆོག་།དབང་པོ་འདས་པ་མངོན་སུམ་པ། །ཆགས་དང་དབང་པོ་རྣམ་པར་སྤངས། །བསམ་གཏན་བསམ་པ་བསམ་གཏན་པའི། །དེ་ནི་དགོས་པའི་ཚུལ་ཡིན་ཏེ། །ཐུབ་པ་རྣལ་འབྱོར་མཁས་པའི་རྣམས། །ཀུན་གྱི་སྙིང་ལ་གནས་པ་ཡིན། །ཡོད་དང་མེད་ཀྱི་ཕྱོགས་དང་བྲལ། །སངས་རྒྱས་ཕྱོགས་ནི་དྲི་མ་མེད། །བློ་དང་ཤེས་བྱ་བྲལ་བ་སྟེ། །ཚད་དང་དབང་པོ་སྤངས་པ་ཡིན། །སེམས་ཤེས་རྣམས་ཀྱི་ཡུལ་མ་ཡིན། །དེ་ནི་གྲོལ་བ་རྣམས་ཀྱི་ཡུལ། །མཚན་རྣམས་ཀུན་ཀྱང་སྣང་བ་སྟེ། །དེ་བཞིན་གཤེགས་ནི་མཚན་མེད་པའང ། །དྲེགས་ཅན་རྣམས་ཀྱི་དྲེགས་མེད་མཛད། །མཉམ་པར་བཞག་ཅིང་གོས་པ་མེད། །གཡོ་བ་མ་ཡིན་གཡོ་མེད་མིན། །ཆགས་མེད་ལམ་ལ་གནས་པ་སྟེ། །ལྷ་ཡུལ་བྱུང་བའི་ལྷ་རྣམས་དང ། །དྲི་ཟ་ལྷ་མིན་མི་འམ་ཅི། །ཐུབ་པ་རྣམས་དང་མུར་འདུག་གིས། །བསྟོད་ཀྱང་རྟག་ཏུ་ཡོང་མི་གཡོ། །དེ་ལ་ངོ་མཚར་སྲེད་པ་མེད། །འགྲོ་བ་གང་ནའང་གཡོ་བ་མེད། །སྔོན་ནས་དག་པའི་རྣལ་འབྱོར་གྱི། །དེ་ནི་ཕ་རོལ་ཡིན་པའི་ཕྱིར། །སངས་རྒྱས་འཕྲུལ་པའི་སྤྱོད་པ་ཡིས། །བྱ་བ་ཙམ་དུ་ལྷ་རྣམས་ཀྱིས། །མཐོང་ཡང་དེ་དང་འདི་ན་མེད། །ཇི་བཞིན་ཉི་ཟླ་དེ་དང་འདྲ། །རྣལ་འབྱོར་ཡུལ་དུ་གནས་པ་ནི། །དྲེགས་པ་མེད་མཛད་འགྲོ་བས་མཐོང ། །རྣམ་པར་ཐ་དད་མུར་འདུག་རྣམས། །གང་ལ་གང་གིས་དབང་གྱུར་པ། །དེ་ལ་དེ་ལྟའི་ཆོས་སྟོན་ཏེ། །རྣལ་འབྱོར་བསྐྱེད་པའི་འོད་ཟེར་གྱིས། །རྣལ་འབྱོར་ཆོས་ཅན་རྣམ་ཕྱེ་ཞིང ། །
45.10b
རྒྱལ་བའི་ཚུལ་དང་གསུམ་པོ་དག་།རྒྱལ་པོ་འམ་རྒྱལ་པོའི་འཁོར་རྣམས་དང ། །རྒྱལ་པོའི་ཡུལ་གྱི་བྱ་བ་དང ། །དཀའ་ཐུབ་ཚུལ་དང་ཞིང་རྣམས་ཀྱི། །ཕུན་སུམ་ཚོགས་པ་དེ་ལས་བྱུང ། །ལྷ་རྫས་རྣམས་དང་ནམ་མཁའ་དང ། རིན་ཆེན་འབྱུང་ཁུང་རྣམ་དག་པ། །ལྷ་ཡི་ལྷ་ཡི་མཐུ་ཡིས་ན། །ཕྱོགས་དང་ཡུལ་ན་འབར་བ་ཡིན། །འབྱུང་བ་གསུམ་གྱི་ཐབས་རྣམས་གང ། །རྣམ་པ་སྣ་ཚོགས་མཁས་རྣམས་ཀྱིས། །གང་རྣམས་བྱེད་གཞུག་བྱ་བ་དག་།སངས་རྒྱས་ལྷུན་གྱིས་གྲུབ་འབྲས་བུ། །དེ་ནི་མདོ་འཛིན་འགྲོ་བ་ཡི། །དགོས་དང་དཀའ་ཐུབ་ཅན་རིག་དང ། །གད་མོ་རྩེ་བའི་སྦྱོར་བ་དང ། །གར་མཁན་རྣམས་ལ་རྟག་ཏུའོ། །དགའ་ལྡན་གནས་བབས་འཇིག་རྟེན་གྱིས། །མཐོང་བ་བུད་མེད་འགྲོ་དང་བཅས། །འཕྲོག་ཅིང་སྦྱིན་དང་འབྲེལ་པ་དང ། །ཅོད་པན་ཅན་དང་ལག་ན་གཞུར། །དམ་པ་རྣམས་ཀྱིས་ཀུན་དུ་མཐོང ། །སྟུག་པོ་ནས་ནི་དེ་མ་བྲལ། །ཡུལ་འདི་ཐུབ་པ་དེ་ཡིས་ཏེ། །ཐམས་ཅད་ནའང་ཤིན་དུ་སྣང ། །རབ་རིབ་ཅན་གྱི་རབ་རིབ་བཞིན། །རི་དགས་རྣམས་ཀྱི་སྨིག་རྒྱུ་འདྲ། །འཇིག་རྟེན་རྣམས་ཀྱིས་སྒྱུ་མ་ལ། །ཇི་ལྟར་གཞན་དུ་མཐོང་བ་དང ། །རྨི་ལམ་ན་ཡང་གཞན་དུ་བའི། །རྨི་ལམ་བཞིན་དུ་བུས་པས་མཐོང ། །ཁྱད་པར་རབ་ཏུ་མཐོང་བ་ནི། རྣལ་འབྱོར་ཅན་རྣམས་ལོག་ལོང་བཞིན། །ལྷ་ཡི་ལྷ་ཡི་ཡུལ་ཡིན་ཏེ། །དེ་ཡི་སྲས་ཀྱི་དུས་ཀུན་དུ། །མི་སྦྱིན་གུ་ལང་ཚངས་པ་དང ། །ས་ནན་ཏ་དང་ས་ནན་འདའ། །ས་ནན་གཞོན་ནུ་སེར་སྐྱ་དང ། །ནེ་ཙོ་ལ་སོགས་རྣམས་བསམས་ཀྱང ། །དེ་ཡི་ཡུལ་ལ་རྣམ་པར་བསླད། །དེ་དག་རྣལ་འབྱོར་གྱིས་མི་མཐོང ། །ཐུབ་པ་གང་དག་འབྱུང་བ་དང ། །བྱུང་དང་ད་ལྟར་གང་འཁོད་པ། །དེ་དག་ཡུལ་ནི་གང་ཡང་མིན། །ལྟ་བའི་བག་ཆགས་གཡོགས་པའི་ཕྱིར། །ས་དང་སར་ནི་རྣམ་སྤྱོད་པའི། །རྡོ་རྗེའི་སྙིང་པོ་དེ་ལ་བསྟན། །ལྷ་ཡི་ལྷས་ནི་བྱས་པ་ཡི། །སྟུག་པོའི་ཞིང་ན་ཡོད་པ་ཡིས། །འདི་དག་རྡོ་རྗེའི་སྙིང་པོ་དེ། །མཉམ་པར་བཞག་ལ་ཤིན་དུ་བསྟན། །རྣལ
45.11a
འབྱོར་ཅན་གྱི་རྣལ་འབྱོར་ཡུལ། །ཇི་ལྟར་གང་གིས་འབྱོར་བ་དག་།དབྱིབས་དང་མདོག་དང་ཁྱད་པར་དག་།བཟོ་བོར་གྱུར་པས་བྱས་པ་ནི། །གཅེས་དང་རྡུལ་ཕྲན་དག་གི་སྟེ། །བརྟགས་པའི་དངོས་པོ་ཡོད་པ་མིན། །སྐྱེ་བ་དག་ནི་ཆོས་ཙམ་སྟེ། །ལྡོག་པར་འགྱུར་བའང་ཆོས་ཙམ་མོ། །ཀུན་དུ་ཕྲ་བའི་བདག་ཉིད་ཀྱི། །ཡོན་ཏན་དག་ཏུ་དངོས་ཡོད་བརྟགས། །མར་མེ་བཞིན་དུ་གསལ་བྱེད་པ། །རྒྱུ་རྣམས་དགོས་པ་གྲུབ་པ་དག་།མཚན་ཉིད་སྔ་ནས་མི་རྙེད་དེ། །འཇིག་དང་བྲལ་བས་མི་གནས་པའོ། །འདས་པ་འདས་པའི་དངོས་པོར་ཡང ། །ཡོད་པ་མ་ཡིན་འབྱུང་བ་མེད། །རྐྱེན་དུ་བྱ་རྣམས་མེད་པར་ཡང ། །བརྟགས་པའི་དངོས་པོ་གང་ཡང་མེད། །རྐྱེན་རྣམས་ཡིན་ཏེ་འདུས་པ་ལ། །དངོས་པོ་ཡོད་པ་མ་ཡིན་ཏེ། །རྐྱེན་རྣམས་གང་གི་རྐྱེན་དུ་འགྱུར། །ཡོད་དང་མེད་པའི་དངོས་མི་སྣང ། །མེད་པའང་སྣང་བ་ཡོད་མ་ཡིན། །ཕྲ་བའི་བདག་གིས་རྣམ་པར་བརྟགས། །ཕུང་པོ་རྫ་མ་རས་ལ་སོགས། །རི་དགས་སྐོམ་གདུངས་སྨིག་རྒྱུ་བཞིན། །རྨི་ལམ་དྲི་ཟ་འདྲ་བ་སྟེ། །གཙུག་ལག་ནོར་པ་དྲུག་དང་བཅས། །རབ་ཏུ་སྨྲ་བ་སུམ་བརྒྱ་ཡིས། །འཇུག་པ་དག་དང་སྣང་བ་ཡིན། །མཁས་པས་རྨི་ལམ་གང་མཐོང་བ། །སྐྱེ་བ་མེད་ཅིང་འཆི་མེད་པར། །སླར་སང་ནས་སུ་སེམས་པ་ནི། །བུ་མོ་མཁས་པ་དག་ཡིན་ནོ། །ཇི་ལྟར་རི་ངང་དེ་རྣམས་ཀྱི། །གྲིབ་མ་ཀུན་དུ་སྣང་བ་བཞིན།[་]།དེ་ལྟར་འཇིག་རྟེན་རྨི་ལམ་ཡང ། །མཁས་པ་རྣམས་ནི་དེ་བཞིན་བསམ། །ཇི་ལྟར་སྐྱེས་བུ་ཉལ་བ་ཞིག་་།བུད་མེད་ལྷན་ཅིག་རྩེ་དགའ་རྨི། །སྣ་ཚོགས་ཡིད་དུ་འོང་བ་དང ། །ལྷ་རབ་བཙུན་མོ་མཉམ་པ་དང ། །གཞན་ཡང་སྣ་ཚོགས་དངོས་པོ་དེ། །སང་ནས་རྣམ་པར་སེམས་པ་ནི། །ཅི་ཞིག་བདེན་ནམ་རྨི་འམ་ཡིན། །རྨི་ལམ་བུད་མེད་ལྷན་ཅིག་ཏུ། །རྩེས་ནས་ཕྱིར་ནི་བདག་སད་ཏེ། འདི་བརྫུན
45.11b
བུས་པ་སླུ་བ་ཡིན། །དེ་བཞིན་བདག་གི་གཉེན་པ་ཀུན ། །རྒྱལ་སྲིད་སྟོབས་ཀྱང་དེ་བཞིན་ནོ། །དམག་པ་གྱོས་པོ་བུ་དག་དང ། །མ་དང་ཕུ་ནུ་པོ་དག་ཀྱང ། །རྨི་ལམ་ལྟ་བུར་རིག་བྱ་སྟེ། །རྣལ་འབྱོར་སྦྱར་བར་ཅིས་མི་བྱ། དཀའ་ཐུབ་ཚལ་དང་ཞིང་རྣམས་དང ། །རི་དང་རིའི་སྨན་གཤོང་དང ། །འོ་མ་འབྱུང་དང་མ་ལ་ཡ། །ལྷུན་པོ་བྱིན་དང་དབང་ཆེན་དང ། །གངས་ཀྱི་རི་དང་ཀེ་ལ་ས། །ཆར་འབབ་དག་ལའང་གང་གནས་དང ། །འཛམ་བུ་འབྲས་བུའི་ཁུ་བ་དང ། །གང་དག་བདུད་རྩི་ཟ་བ་དང ། །ཕན་དུ་ཀམ་བལ་པར་ཡ་དྲ། །ཀོ་བི་དར་ན་གང་འཁོད་དང ། །རི་རབ་ནང་ན་གང་གནས་དང ། །བསམ་དཔག་ཤིང་ལ་གང་གནས་དང ། །རང་རྒྱལ་རྒྱལ་བའི་སྲས་རྣམས་དང ། །ཉན་ཐོས་རྫུ་འཕྲུལ་ཆེན་པོ་དང ། །ཐམས་ཅད་ཀྱི་ནི་རྣལ་འབྱོར་འདི། །གང་འབྱུང་འབྱུང་བ་རྣམས་ཀྱི་སྟེ། །པད་མོ་གནས་སུ་བརྟན་བཅས་ཏེ། །སྐྱིལ་མོ་ཀྲུང་དུ་མཉམ་བཞག་ཅིང ། །རྟག་ཏུ་རྣལ་འབྱོར་སྦྱར་བར་གྱིས། །འདོད་དང་བདེ་ལས་རྣམ་པར་དབེན། །དབང་པོ་དབང་པོའི་དོན་གྱིས་རྣམས། །ཐམས་ཅད་ལས་ཀྱང་ཕྱིར་ཟློག་ཅིང ། །ལྕགས་ལུས་གླང་པོ་ཇི་བཞིན་དུ། །སེམས་ནི་མཉམ་པར་བཞག་པར་གྱིས། །འཇིག་རྟེན་འཇིག་རྟེན་འདས་བསམ་གཏན ། །གང་ཡང་དེ་བཞིན་གཤེགས་པའི་དགེ། །འདོད་དང་དགའ་བ་དབེན་ལ་སོགས། །ཡང་ན་ཐམས་ཅད་བསྒྲགས་པ་དང ། །ཁྱད་པར་དུའང་གཟུགས་མེད་དང ། །འདུ་ཤེས་མེད་པའི་བསམ་གཏན་རྣམས། །ནམ་མཁའ་རྣམ་ཤེས་མཐའ་ཡས་དང ། །འདུ་ཤེས་ཡོད་མིན་མེད་མིན་རྣམས། །ཉི་མ་དང་ནི་ཟླ་བའི་དབྱིབས། །པད་མོ་དང་ནི་འོད་འདྲ་ཞིང ། །ནམ་མཁའ་རི་མོ་མེ་འདྲ་བར ། །རྣལ་འབྱོར་ཞུགས་པས་རབ་ཏུ་མཐོང ། །འདི་དག་ཐམས་ཅད་སྤངས་ནས་སུ། །སྣང་བ་མེད་པར་རབ་ཏུ་གནས། །གང་ཚེ་མཚན་མེད་རྣལ་འབྱོར་ཅན། །རྣམ་པར་མི་རྟག་ཆགས་མེད་ན། །སངས་རྒྱས
45.12a
བྱེ་བ་རྣམས་ཀྱང་མཐོང ། །ཞིང་དང་ཞིང་ན་མཉམ་བཞག་པ། །དེ་དག་ཕྱག་གི་དབང་བསྐུར་བར། །དེ་ཡི་སྤྱི་བོར་དབང་བསྐུར་ཏེ། །སངས་རྒྱས་ས་ལ་ཞུགས་པ་དང ། །སྣ་ཚོགས་གཟུགས་ནི་རབ་ཏུ་འབྱུང ། །སྣ་ཚོགས་ཚུལ་གྱི་དངོས་ཐོབ་ནས། །ཀུན་མཁྱེན་ཐམས་ཅད་རིག་པར་འགྱུར ། །སྟོབས་དང་མངོན་ཤེས་དབང་ཡང་འཐོབ། །གཟུངས་དང་ཐམས་ཅད་ཏིང་ངེ་འཛིན། །ཐམས་ཅད་ཀྱི་ནི་འབྱུང་གནས་འགྱུར ། །ཐུབ་པ་རྣལ་འབྱོར་སྐྱེད་པའི་ཡང ། །གཟུགས་ནི་རྡུལ་དུ་རྣམ་གཞིགས་ཤིང ། །མཆོག་རྡུལ་ཡན་ཅད་ཉིན་དབེན་ཕྱིར ། །ཡོད་ལས་མེད་པར་འགྱུར་བ་སྟེ། །བོང་བུས་བ་ལང་རཝ་མཐོང་ཞིང ། །ཆ་ཤས་མེད་ཅིང་ཆ་ཤས་ཅན། །ཕུང་པོ་ལས་ནི་ཕུང་ཅན་མེད། །དེ་བས་ལས་ཀྱི་འབྲས་གྱུར་པ། །འདི་ནི་སྒྱུ་མའི་འབྲས་བྱས་བཞིན། །འདི་ན་ལས་མེད་འབྲས་བུ་མེད། །ལས་ཀྱི་གྲུབ་པའང་ཡོད་པ་ཡིན། །འཇིག་རྟེན་བྱེད་པས་མ་བྱས་ཏེ། །བྱེད་པ་བྱེད་པ་མ་ཡིན་ནོ། །བྱེད་ལ་བྱེད་པ་ཡོད་ན་ནི། །འདི་རྣམས་ཐུག་པ་མེད་པར་འགྱུར། །ཐུག་མེད་བྱས་པའི་ཉེས་པ་ཡིས། །ཐུབ་པ་དྲི་མ་ཅན་དུ་འགྱུར ། །དེ་སྟེ་ལམ་རྒྱུད་སྣ་ཚོགས་རྣམས། །ཆུ་དང་ནམ་མཁའ་ས་གནས་པའི། །ལུས་ཅན་ཀུན་ལ་ཀུན་གནས་ཏེ། །སྐྱེ་བ་བཟང་པོ་གནས་སུ་སྟེ། །རིས་སུ་འགྲོ་བ་ཡོད་པས་ན། །ཇི་ལྟར་འདོད་པར་ལུས་ཅན་འགྲོ། །དབང་པོ་སོ་སོ་བྱ་བ་ཡང ། །ཇི་ལྟར་འདོད་པར་ཡུལ་འཛིན་ཏེ། །འདི་ནི་རྣམ་རྟོག་རྣམ་འགྱུར་བ། །ཞོ་མར་ཇི་ལྟར་འོ་མ་ལས། །དེ་བཞིན་སྐྱེ་དང་གནས་དང་འཇིག་།ལས་ཀྱིས་བྱས་པར་གྱུར་སེམས་ན ། །རྨི་ལམ་དྲི་ཟ་སྒྱུ་མ་སྤྲིན། །བྲག་ཆ་དང་ནི་གློག་འདྲ་བ། །སྨིག་རྒྱུ་རི་དགས་སྲེད་པ་ལྟར། །དངོས་པོ་རྣལ་འབྱོར་རྣལ་འབྱོར་ཅན། །ཐོག་མ་མེད་ནས་བསགས་པ་ཡི། །མི་ཡི་རྣམ་སྤྲོས་བག་ཆགས་ཀྱིས། །སྣ་ཚོགས་གནས་ངན་ལེན་པ་དང ། །སྣ་ཚོགས་རྟོག་པས་ལས་སུ་བརྟགས། །དབང་པོ་སྒྱུ་མ་ལྟ་བུ་ཡིན། །ཡུལ
45.12b
རྣམས་རྨི་ལམ་ཕྱིར་ལྡོག་དང ། །མྱ་ངན་འདའ་བ་གང་ཡང་མེད། །དེ་ནས་སངས་རྒྱས་ཀྱི་ཆོས་ཐམས་ཅད་རྣམ་པར་བཀོད་པ་ཡང་དག་པ་ཇི་ལྟ་བ་བཞིན་དུ་སྟོན་པ་སའི་དབང་པོ། ལག་པའི་ཕྲེང་བ་ཚད་མེད་པ། ལུས་དཔེ་མེད་པ། དཔུང་རྒྱན་དང ། ཅོད་པན་དང ། གཙུག་གི་ནོར་བུ་དང ། སེ་མོ་དོས་ཤིན་དུ་ཆས་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ། ཐེག་པ་གསུམ་དང་འཇིག་རྟེན་དང་མི་འགལ་བ། ལྟ་བའི་ཆོས་ལ་བདག་གི་སོ་སོ་རང་གི་འཕགས་པའི་ཡེ་ཤེས་ཀྱིས་རིག་པའི་སྤྱོད་ཡུལ་བདེ་བ་ལ་གནས་པ་རྡོ་རྗེ་སྙིང་པོའི་དབང་པོ་རྣལ་འབྱོར་ཆེན་པོའི་རྣལ་འབྱོར་ཅན། རྣལ་འབྱོར་གྱི་མཁན་པོ་ས་དང་སའི་མཚམས་ཐམས་ཅད་མི་འགལ་བར་སྟོན་པ་ལ་འདི་སྐད་ཅེས་སྨྲས་སོ། །རྡོ་རྗེའི་དབང་པོ་ཁྱོད་སྐྱེ་བ་ཐམས་ཅད་དང ། རྒྱལ་པོའི་འཁོར་དག་ཏུ་ཅོད་པན་ཅན་དག་ལ་ཆོས་སྟོན་པ་ཡིན་ཏེ། དེའི་ཕྱིར་རྒྱལ་བའི་སྲས་ཁྱོད་ལ་གསོལ་བ་གདབ་ཀྱིས་བདག་གི་སོ་སོ་རང་གི་འཕགས་པའི་ཡེ་ཤེས་ཀྱིས་རིག་པའི་སྤྱོད་ཡུལ་ལ་བདེ་བར་གནས་པའི་ཕྱིར་འཕགས་པ་ལྟ་བའི་ཆོས་ལ་བདེ་བར་གནས་པ་གཞན་གྱི་དྲིང་མི་འཇོག་པར་སྤྱོད་པའི་གནས་སྟོན་ཅིག་།དེས་བདག་དང་ཅོད་པན་ཅན་འདི་དག་གིས་བདག་མངོན་སུམ་དུ་གྱུར་པའི་སྤྱོད་ཡུལ་སངས་རྒྱས་ཀྱི་སའི་སྒོའི་བདེ་བ་ནན་ཏན་གྱིས་རབ་ཏུ་ཐོབ་སྟེ། ཡིད་བཞིན་གྱི་ལུས་རྣམ་པ་བཅུ་ལ་དབང་སྒྱུར་ཞིང་སྟོབས་དང ། མངོན་པར་ཤེས་པ་དང ། རྫུ་འཕྲུལ་གྱི་རྐང་པ་དང ། དབང་གི་གཞལ་མེད་ཁང་གི་གནས་གྱུར་ཏེ། ཡང་དག་པའི་མཐའ་ལ་གནས་པ་སྤངས་ཏེ། སྣ་ཚོགས་ཀྱི་ལུས་ཡིད་བཞིན་གྱི་ནོར་བུ་དང་འདྲ་བའི་རང་བཞིན་དུ་གྱུར་ཏེ། རྒྱལ་པོའི་ཚོགས་ཀྱི་འཁོར་ཐམས་ཅད་དང་སྟུག་པོར་སྟུག་པོ་ན་སྤྱོད་པ་རྣམས་ལ་ཆོས་སྣ་ཚོགས་སྟོན་པར་འགྱུར་རོ། །རྡོ་རྗེ་སྙིང་པོས་སྨྲས་པ། རྒྱལ་པོ་སྨྲོས
45.13a
ཤིག་དགེའོ་དགེའོ། །ཅོད་པན་ཅན་ལ་ཁྱད་པར་དུ། །ཆོས་ལ་འཇུག་པ་བདག་མེད་པ། །སྟུག་པོའི་རྒྱན་ནི་རབ་སྟན་པ། །སེམས་ཀྱི་རང་བཞིན་མཚན་ཉིད་དག་།རྣམ་རྟོག་སྤྱོད་ཡུལ་ཡིན་ཤེས་ན། །རྣམ་རྟོག་དོན་ལས་ཕྱིར་ལྡོག་པ། །འགྲོ་བ་རྣམ་རྟོག་མཐོང་ནས་ཏེ། །འགྲོ་བའི་རང་བཞིན་མཐོང་ནས་ཀྱང ། །ཏིང་ངེ་འཛིན་ལ་གནས་པར་འགྱུར། །ཆོས་ཀྱི་ངོ་བོ་ཉིད་བསྟན་གྱིས། །རྒྱལ་པོ་ང་ལ་དེ་ཉོན་ཅིག་།དཔྱིད་ཀྱི་སྨིག་རྒྱུ་ཇི་བཞིན་པ། །དེ་ཡི་རྣམ་པ་འགྲོ་བ་འདི། །མཚན་གཞི་མཚན་མ་རྒྱུ་རྣམས་ལས། །རྣམ་པར་རྟོག་པ་རྣམ་མི་རྟོག་།བློ་དང་རྟོགས་བྱས་བསྐྱེད་པས་ཏེ། །རྟོགས་བྱ་དེ་ཡི་ཁྱད་གྱུར་པ། །གཉེན་པོར་གྱུར་པ་གཅིག་མེད་པ། །ཉི་མ་དང་ནི་གྲིབ་ལྟར་གནས། །སེམས་མེད་ཙམ་པོའང་ཡོད་པ་མིན། །ཚད་དང་གཞལ་དང་གཉིས་ཀ་མེད། །རྣམ་པར་རྟོག་པ་སེམས་ཙམ་སྟེ། །རྣམ་པར་རྟོག་པ་རྣམ་མི་བརྟག་།ཤེས་དང་ཤེས་བྱ་རྣམ་རྟོག་པ། །སེམས་ཙམ་དེ་ལྟར་ཡིན་ན་སྟེ། །ཤེས་བྱ་སེམས་ཙམ་ཡིན་པ་ནི། །རྟག་ཏུ་ཙམ་ལ་ཤེས་ཡོད་མིན། །སེམས་ཆོས་ཀྱི་ནི་ངོ་བོ་ཉིད། །གང་ཟག་དག་དང་གཡོ་བ་རྣམས། །གང་ཚེ་སེམས་ལ་རྣམ་བརྟགས་ན། །རྟོག་དང་བརྟགས་པས་སྤངས་པ་ཡིན། །བརྒྱད་པོ་རྙེད་ནས་དག་པར་འགྱུར། །དགུ་ལ་བསམ་གཏན་སྤྱོད་ཡུལ་ཏེ། །བཅུ་ལ་སངས་རྒྱས་སངས་རྒྱས་ཀྱིས། །དབང་བསྐུར་རྒྱལ་བར་འགྱུར་བ་ཡིན། །རྒྱལ་བའི་ཡུལ་ལ་ཆོས་རྣམས་ཀྱང ། །མི་ཟད་ཆོས་ཀྱི་སྐུར་འགྱུར་རོ། །ནམ་མཁའི་ཟད་དང་འདྲ་བ་སྟེ། །སེམས་དང་རྣམ་ཤེས་དེ་བཞིན་ཏེ། །མི་འཇིགས་པ་ཡང་མ་ཡིན་ཞིང ། །རྟག་ཅིང་ཞི་བ་བདེ་ལ་བརྟན། །འདུས་མ་བྱས་པའི་ཡེ་ཤེས་ཏེ། །སྟུག་པོའི་ཞིང་ན་རྣམ་པར་མཛེས། །རྣམ་ཤེས་འབྱུང་གསུམ་འདས་པ་སྟེ། །སྣ་ཚོགས་གཟུགས་ཀྱི་རིན་ཆེན་བཞིན། །དེ་བཞིན་སངས་རྒྱས་ས་བསམ་མེད། །སྟུག་བཞིན
45.13b
རྒྱལ་བའི་གནས་གྱུར་པ། །ཇི་ལྟར་གྱོ་མོ་རྣམས་ཀྱི་རྒྱུ། །རྫ་མ་ཆག་པས་བསྟན་པ་བཞིན། །གྱོ་མོ་རྣམས་ཀྱང་རྡུལ་གྱི་སྟེ། །རྡུལ་ཡང་མཆོག་ཕྲའི་དེ་བཞིན་དུ། །དངོས་པོ་རྣམས་ཀྱི་རྐྱེན་རྣམས་ལ། །རྒྱུ་རྣམས་ཇི་ལྟར་སྣང་བ་བཞིན། །ཟག་པ་མེད་པའི་ཆོས་རྣམས་ཀྱི། །རྒྱུ་ནི་དེ་བཞིན་ཟག་བཅས་པའོ། །ཇི་ལྟར་ཤིང་ལས་མེ་འབྱུང་བ། །ཕྱིས་ཀྱང་གཞན་དུ་འབར་བར་བྱ། །དེ་བཞིན་ཡེ་ཤེས་བྱུང་བའི་མེ། །ཕྱིས་ཀྱང་གཞན་དུ་འབར་བར་བྱ། །གནས་ཀྱི་ལུས་ལས་འཕོས་གྱུར་ཅིང ། །སེམས་དང་རྟོག་པས་རྣམ་སྤངས་པ། །ཆགས་པ་མེད་པའི་ཡེ་ཤེས་རོ། །སྟུག་པོའི་དབུས་ན་རྣམ་པར་མཛེས། །བསྐྱེད་མེད་རྣམ་པ་སྣ་ཚོགས་གཟུགས། །ས་ལ་གནས་པ་མ་ཡིན་པ། །ལྟ་བ་ཐམས་ཅད་ཟད་བྱེད་པའི། །བདག་མེད་ཉིད་ལ་སྐྱབས་སུ་སོང ། །རྒྱུད་ཀྱི་རྒྱུན་རྣམས་ཆད་པའི་ཕྱིར། །འཇིག་པ་མེད་ཅིང་འབྱུང་མེད་པས། །ལྟ་བ་ཐམས་ཅད་ཟག་བྱེད་པ། །བདག་མེད་ཉིད་ལ་སྐྱབས་སུ་སོང ། །ཞིང་གྱུར་ཞི་བ་ཞིར་མ་བྱས། །ཞི་བས་ཞི་བ་བདེན་ཉིད་དུ། །ལྟ་བ་ཐམས་ཅད་རྣམ་དག་ཕྱིར། །བདག་མེད་ཉིད་ལ་སྐྱབས་སུ་སོང ། །ས་རྣམས་སྣ་ཚོགས་བྱས་པ་ནི། །བདག་མེད་པ་ལ་བདག་མེད་པས། །མི་རྟག་ཐོ་བས་བཅོམ་པ་དང ། །རྣམ་པར་སྟོན་པའི་མདས་ཀྱང་སྟེ། །བསྲེག་པ་ཚིག་པའི་མེ་བཞིན་དུ། །བདག་ཉིད་ཞིར་འགྱུར་དེ་ཉིད་དུ། །དེ་བཞིན་ལྟ་བས་རྣམ་བརྟགས་ཏེ། །བདག་མེད་བསམ་གཏན་རབ་གནས་པ། །ལྟ་བའི་ཆོས་ལ་བདེར་གནས་ཀྱི། །སོ་སོ་རང་རིག་སྤྱོད་ཡུལ་ལ། །ཐོག་མ་མེད་ནས་ཉེས་དྲི་མེད། །འཕགས་པ་རྣམས་ཀྱི་ས་ལ་གནས། །འཕགས་གནས་འཇིག་རྟེན་པས་སྤངས་ཏེ། །འཇིག་རྟེན་འདས་པའི་འཕགས་ལ་གནས། །སེམས་ཀྱི་ས་ལས་རབ་གྱུར་ཏེ། །སྟུག་པོའི་དཀྱིལ་ན་རྣམ་པར་མཛེས། །མི་བདག་མི་བདག་དབང་པོ་རྣམས། །ཐམས་ཅད་ཀྱིས་ཀྱང
45.14a
ཡང་སྨྲས་པ། །རྡོ་རྗེའི་སྙིང་པོ་སྐྱབས་དང་མགོན། །གང་ལ་སྐྱབས་སུ་མཆི་བར་བགྱི། །སངས་རྒྱས་ཡོད་མིན་མེད་པ་མིན། །ཕུང་པོའི་སྐྱེ་ཤིང་རྣམ་བསྲེགས་ཏེ། །དཔུང་དང་བཅས་པའི་བདུད་བཅོམ་ནས། སྟུག་པོ་སངས་རྒྱས་ས་ལ་གནས། །ཤེས་བྱ་དྲི་མེད་ཞི་བ་ལ། །སྐྱབས་སུ་སོང་ཤིག་གྲོགས་པོ་དག་།རྟག་དང་ཆད་ལས་བྲལ་བ་སྟེ། །བློ་དང་རྟོགས་བྱའི་གནས་མ་ཡིན། །སྟུག་པོའི་དཀྱིལ་བཞུགས་རྣལ་འབྱོར་ཅན། དེ་ཡང་གྲོགས་པོ་མགོན་སྐྱབས་སོ། །རྣལ་འབྱོར་ཅན་རྣམས་ཀུན་གྱི་ཞིང ། །ཞིང་མཆོག་བཟང་བ་སྟུག་པའོ། །རྣལ་འབྱོར་པ་ནི་མང་པོས་གང ། །སྟུག་པོ་དེ་ལ་སྐྱབས་སུ་སོང ། །སྤྲོས་པ་ཀུན་དང་བྲལ་བ་སྟེ། །ལྟ་བའི་ཉེས་པ་རྣམ་པར་སྤངས། །རི་མོའི་ཐག་ཐུག་ལྟ་བུ་དང ། །རྨི་ལམ་མོ་ཤམ་བུ་འབྱུང་དང ། །རྨི་ལམ་བུད་མེད་བཟང་མོ་ལྟར། །ཐུབ་པ་རྣམས་ཀྱིས་འགྲོ་བ་མཐོང ། །དྲི་ཟའི་གྲོང་ཁྱེར་སྤྱོད་པ་བཞིན། །སྐྲ་ཕུང་མགལ་པ་བསྐོར་བ་ལྟར། །སྨིག་རྒྱུ་རི་དགས་སྲེད་མཚུངས་སུ། །ཡོད་དང་མེད་པ་རྣམ་པར་སྤངས། །སྒྱུ་མའི་ལུས་གཟུགས་སྣ་ཚོགས་དང ། །འཕྲུལ་པའི་སྤྲུལ་པར་དེ་དག་ནི། །འཇིག་རྟེན་སྤྱོད་ཚེ་མཐོང་བ་སྟེ། །ས་དང་ས་ལ་ཐུབ་པ་རྣམས། །བསྡོར་མེད་དུ་མའི་གཟུགས་གྱུར་པ། །སྒྱུ་མའི་ཤིང་གི་འབྲས་བུ་ལྟར། །སྤྲིན་དང་དུ་བ་གློག་ལྟར་ཡང ། །ཐུབ་པས་རྣལ་འབྱོར་རྣམ་པར་མཐོང ། །རྫ་ལ་སོགས་པའི་བཟོ་བཟུང་ལྟར། །འགྲོ་བ་བདག་གི་རྣམ་རྟོག་བྱུང ། །ཡིད་དང་ཡིད་ཀྱི་རྣམ་ཤེས་དང ། །ཆོས་ལྔའི་ངོ་བོ་ཉིད་རྣམས་དང ། །འཇུག་པའི་རྣམ་ཤེས་སྤྱོད་པ་ནི། །བདག་མེད་མི་གཉིས་བརྒྱན་པ་སྟེ། །བག་ཆགས་ཐོག་མ་མེད་པའི། །སེམས་ཀྱི་གནས་ངན་ལེན་བྱུང་ཡོད། །འོད་པའི་དབའ་རླབས་འདྲ་བར་ནི། །ཀུན་གཞི་ས་ལ་གནས་པ་ཡིན། །རླུང་གིས་ཇི་ལྟར་འོད་པ་ལ། །ཕན་ཚུན་དག་ཏུ་བསྐྱོད་བྱས་ན། །དབའ་རླབས
45.14b
རྣམས་ལ་འཇིག་པ་མེད། །འོད་པའང་མེད་པར་མི་འགྱུར་ཏེ། །སྔ་མེད་བག་ཆགས་གནས་ཅན་རྣམས། །འཇུག་པའི་ཡུལ་ལ་གཞོལ་བ་དག་།སེམས་བརྒྱད་རྣམས་ཀྱི་འཇུག་པ་ནི། །རྣམ་པར་ཐ་དད་མ་ཡིན་ཏེ། །དུས་གཅིག་ཏུ་ཡང་དེ་དག་འབྱུང ། །བར་བར་དུ་ནི་རིམ་གྱིས་སོ། །ཐོག་མ་མེད་ནས་སེམས་འཇུག་པ། །སྐར་མ་གཟའ་ཡི་དཀྱིལ་འཁོར་དང ། །ལོ་མ་མེ་ཏོག་འབྲས་བུ་དང ། །རི་དང་སྡེ་དང་ཚལ་སོགས་ལ། །རྟག་ཏུ་དུས་གཅིག་འཇུག་པ་སྟེ། །རིམ་གྱིས་ཀྱང་ནི་ཤེས་པར་བྱོས། །ཡང་དག་མ་ཡིན་སྔ་མའི་ཡུལ། །མལ་ལ་གནས་བཞིན་མཐོང་བ་ཡིན། །ལུས་ཀྱི་འཇུག་པ་རིམ་གྱིས་ཀྱང ། །སྲོག་ལ་རྟེན་ཅིང་འབྱུང་བ་ཡིན། །རྫས་དང་གྲངས་དང་ཆོས་རྣམས་ལ། །ཐ་དད་རིམ་གྱིས་འབྱུང་བ་སྟེ། །མུར་ཞིང་བཅས་དང་བཟའ་རྣམས་ལ། །ཐ་དད་རིམ་གྱིས་འདའ་བ་མིན། །རོ་དང་དྲི་ཡི་རྣམ་པ་ལ། །རིམ་གྱིས་ཐ་དད་འབྱུང་བ་ཡིན། །རིམས་ཀྱིས་ཁ་དོག་ཁྱད་པར་གྱི། །སྣ་ཚོགས་ལའང་དུས་གཅིག་ཏུ། །རྒྱལ་པོ་སེམས་ནི་བསམ་མི་ཁྱབ། །རྟག་ཏུ་རང་བཞིན་འོད་ཅན་ནོ། །དེ་བཞིན་གཤེགས་པའི་སྙིང་པོ་སྟེ། །རྡོ་བ་རྣམས་ཀྱི་གསེར་བཞིན་གནས། །ཡིད་ནི་ཀུན་གྱི་གཞི་ལས་བྱུང ། །ཡིད་ཀྱི་རྣམ་ཤེས་དེ་བཞིན་ཏེ། །རྣམ་ཤེས་དྲུག་པོ་རྣམ་པ་མང ། །ས་ཡི་ཁྱད་པར་བྱེད་པའོ། །བག་ཆགས་སེམས་དང་ལྷན་ཅིག་ཏུ། །ས་བོན་ཀུན་པའི་ཀུན་གཞི་ནི། །ཀུན་ནས་ཉོན་མོངས་རྣམ་དག་པའི། །རྟག་ཏུ་རང་བཞིན་འོད་ཅན་གྱིས། །དེ་ལྟར་དེ་བཞིན་གཤེགས་ཀྱི་རིགས། །ངེས་དང་མ་ངེས་དགེ་བ་ཡིན། །རྟག་ཏུ་གནས་ལྟར་འབྱུང་བ་ནི། །རྒྱ་མཚོའི་རླབས་དག་ཇི་བཞིན་དུ། །ཐ་མ་འབྲིང་དང་རབ་རྣམས་སུ། །དེ་བཞིན་ཀུན་གཞིས་ཁྱབ་པར་བྱེད། །ས་དང་ས་ལ་རྣམ་དག་ཅིང ། །གཞན་དུ་གྱུར་ནས་རྣམ་པར་མཛེས། །ཡང་དག་ཇི་བཞིན་དོན་སྟོན་ལ། །རྡོ་རྗེ་སྙིང་པོས་ཡང
45.15a
སྨྲས་པ། །མཐོང་ཞིང་ཐོས་ཏེ་ཤེས་པས་ན། །ས་ཆེན་བདག་པོ་ཁྱོད་ཉིད་ཀྱིས། །སྤོབས་པ་ཅན་ལ་བསྟན་པར་གྱིས། །ཁྱད་པར་དུའོ་ཁྱད་པར་བདག་།ཁམས་ཕྲན་རྣམས་ཀྱི་ཁམས་རྣམས་དང ། །ས་ལ་འཁོར་ལོ་འཁོར་རྣམས་དང ། །ཀུན་གཞི་རྣམ་པར་དག་གྱུར་ན། །ས་ཡི་རྒྱལ་པོར་འགྱུར་བ་ཡིན། །འཛམ་བུའི་གླིང་ལ་དབང་བ་ཡི། །འཁོར་ལོ་འཁོར་བར་ཡང་འགྱུར་རོ། །དགའ་ལྡན་ལ་སོགས་གཞལ་མེད་དུ། །མཚེ་མ་རབ་ཀྱི་དབང་པོར་འགྱུར། །དབང་པོའི་གནས་སུ་དབང་པོར་ཏེ། །དབང་སྒྱུར་གནས་སུ་དེ་བཞིན་ནོ། །འདོད་པའི་ཁམས་ཀྱི་དབང་པོའི་བདག་།གཟུགས་ཁམས་བདག་པོའང་དེ་བཞིན་ཏེ། །གཟུགས་མེད་འདུ་ཤེས་མེད་སེམས་ཅན། །བསམ་གཏན་བདེ་བའི་འབྲས་བུར་ཡང ། །ཡང་དག་མངོན་བྱ་མ་ཆགས་པས། །ཡང་དག་མཐའ་ལ་མ་རེག་པར། །འཇིགས་མེད་སེང་གེའི་སྒྲ་སྒྲོགས་ཅིང ། །དགའ་དང་ཡེ་ཤེས་ཡང་དག་ལྡན། །བསམ་གཏན་དབང་གི་བདེ་བས་ངོམས། །དེ་ནི་སྟུག་པོར་སྨོན་པ་ཡིན། །ཁམས་གསུམ་སྤྱོད་པའི་ཉེས་པ་ཡིས། །ཆགས་མེད་མཉམ་པར་བཞག་པ་སྟེ། །མཐར་གྱིས་སྟུག་པོར་ཞུགས་ནས་སུ། །རྣམ་པར་སངས་རྒྱས་སངས་རྒྱས་སར། །ཆོས་ཀྱི་དབང་པོར་བདག་གྱུར་ཏེ། །རྟེན་ལས་གཞན་དུ་གྱུར་ཅིང་བདེ། །རྟག་པ་བརྟན་པ་ཞི་བའི་ཆོས། །སྟུག་པོའི་དཀྱིལ་ན་སྲས་དང་བཅས། །ཆོས་ཀྱི་བདག་པོ་རྣམ་པར་མཛེས། །འཇིག་པ་མེད་པ་མི་ཡི་མཆོག་།མྱ་ངན་འདས་པ་འཇིག་པ་མིན། །མུར་འདུག་རྣམས་ཀྱིས་ཇིར་རྗོད་བཞིན། །མཆོག་དང་ཐ་མ་བར་མ་ཡི། །རྒྱལ་པོ་བཅུ་པོའི་ལས་རྣམས་ཀྱིས། །ཐེག་པ་གསུམ་དུ་གྱུར་པ་སྟེ། སྟུག་པོ་ཚོལ་བའི་ཁྱད་པར་ཡང ། །རྒྱལ་པོ་ཡང་དག་སྐྱེ་བར་འགྱུར། །ས་དང་ས་ལ་གནས་པས་སོ། །འཇིག་ན་འདུས་བྱས་ཉེས་པར་འགྱུར། །འཆི་བ་རྣམས་ལའང་དེ་བཞིན་ཏེ། །རྒྱལ་པོ་འཇིག་པ་མཐར་མ་ཡིན། །
45.15b
དེ་བཞིན་གཤེགས་པ་ཡེ་ཤེས་སྐུ། །སེམས་ཅན་ཟད་ཅིང་མེད་འགྱུར་བ། །དེ་སྟེ་མྱ་ངན་འདས་འཇིག་ན། །སྔོན་གྱི་མཐའ་ཡང་འཇིག་པ་དང ། །སེམས་ཅན་འབྱུང་བ་མེད་པར་འགྱུར། །སེམས་ཅན་ཁམས་རྣམས་ཟད་གྱུར་ན། རྒྱལ་བའི་ཤེས་བྱ་དངོས་པོ་མེད། །མྱ་ངན་འདའ་མེད་ཤེས་བྱ་མེད། །སངས་རྒྱས་སངས་རྒྱས་ཉིད་ཀྱང་མེད། །མེ་མར་བསྲེགས་པའི་དཔེ་རྣམས་དང ། །ས་བོན་ཚིགས་པའི་དཔེ་དག་གི། །རྟོག་ཅན་ཐར་ལ་མཁས་པ་རྣམས། །ལུས་ཅན་རྣམས་ལ་ཐར་པ་སྟོན། །ཡོད་དང་མེད་པའི་རྣམ་ཐར་གྱིས། །ཐར་པའི་བདེ་ལས་དེ་དག་རིང ། །བསམ་གཏན་གནས་པ་ཐམས་ཅད་དེ། །ལུགས་སུ་འཇུག་དང་བཟློག་པ་དག་།གཟུགས་མེད་འདུ་ཤེས་མེད་པ་དང ། །མངོན་པས་དབང་དང་སྟོབས་རྣམས་དང ། །མ་ཉམས་ཉམ་པ་མེད་པ་དང ། །ཆོས་ཀྱི་མཚན་ལ་མཁས་པ་རྣམས། །ས་ཡི་ཁམས་ལ་མཁས་པ་དག་།མི་ཡི་དབང་པོ་སྟུག་པོར་འགྲོ། །ཡོད་དང་མེད་པ་འཇིག་པས་ནི། །དེ་དག་འཁོར་ལས་མི་འབྱུང་སྟེ། །ཕྲད་པ་གསུམ་པོ་འཇིག་མེད་ཅིང ། །རྒྱུ་དང་དམིགས་པའི་རྒྱེན་རྣམས་དང ། །དེ་མ་ཐག་དང་དབང་ཡང་སྟེ། །ས་རྣམས་བདག་མེད་ཕྱི་རོལ་དག་།མིག་དང་གཟུགས་དག་རྒྱུར་བྱས་ཏེ། །ཕྲད་པས་གང་རྣམས་འཇུག་གྱུར་པ། །གཟུགས་རྣམས་མངོན་བྱེད་ཡེ་ཤེས་དང ། །དེ་དག་ཐམས་ཅད་ཞིག་པར་འགྱུར། །ཕྱི་དང་ནང་གི་ས་རྣམས་ནི། །ཕན་ཚུན་སྟོབས་ཀྱིས་བྱུང་བ་སྟེ། །ཡོད་དང་མེད་པའི་ལྟ་བ་ལས། །དེ་སྟེ་གྲོལ་ནས་འཇིག་ན་ནི། །སེམས་དང་དམིགས་ལས་བྲལ་བའི་ཕྱིར། །རྣམ་པར་དམིགས་པས་མི་གནས་ཏེ། །མདུན་དུ་རྟོག་པ་མེད་གྱུར་ཅིང ། །དེའི་རང་བཞིན་མི་གནས་ལ། །གང་ཚེ་དམིགས་པ་སྤང་བ་ལ། །རྣམ་པར་རྟོག་པ་མི་གནས་ཤིང ། །གང་ཚེ་གཉིས་ལས་རྣམ་གྲོལ་ཏེ། །རྟོག་མེད་རྟོག་པ་སྤངས་པས་ན། །དེ་ཚེ་སེམས་ནི་མཉམ་པར་བཞག་།འགྲོ་བ་རྣམ་རྟོག་མེད་པར་མཐོང ། །གཟུང་དང་འཛིན་པ་མེད་པ་སྟེ། །བསམ་གྱིས་མི་ཁྱབ་ཤེས
45.16a
ལ་གནས། །རྟེན་པ་ལས་ནི་གྱུར་པ་སྟེ། །ཡེ་ཤེས་གནས་ངན་ལན་པ་སྤངས། །ཡིད་བཞིན་རྣམ་པ་བཅུ་པོ་ནི། །སྣ་ཚོགས་གཟུགས་ཀྱིས་བརྒྱན་པ་སྟེ། །ས་གསུམ་རྒྱལ་པོ་རབ་བྱེད་ཅིང ། །རྒྱལ་པོ་སྟུག་པོར་རབ་ཏུ་འགྲོ། །གཟུགས་དང་སེམས་དང་སེམས་ལས་བྱུང ། །མི་ལྡན་པ་དང་འདུས་མ་བྱས། །ནང་དང་ཕྱི་ཡི་ས་རྣམས་དང ། །ཐ་དད་རྣམ་པར་རབ་མཐོང་ཞིང ། །སོ་སོ་རང་གི་ཡེ་ཤེས་མཁས། །ལྟ་བའི་ཆོས་ལ་རྣམ་པར་གནས། །རྒྱལ་པོ་སྟུག་པོར་འདོད་པ་ནི། །ཡེ་ཤེས་མཁས་པ་རྣལ་འབྱོར་ཅན། །མཚན་མ་མིང་དང་དེ་བཞིན་ཉིད། །རྣམ་པར་རྟོག་དང་ཡེ་ཤེས་དང ། །ཡང་དག་མཐའ་ཡི་གནས་པ་ཡིས། །སོ་སོ་རང་རིག་སྤྱོད་ཡུལ་དུ། །རྒྱལ་པོ་དག་དང་རྒྱལ་པོའི་བུ། །རྣལ་འབྱོར་སེམས་པའི་རྣལ་འབྱོར་ཅན། །རྒྱལ་པོ་སྟུག་པོར་འདོང་བ་ན། །སངས་རྒྱས་བསྟོད་པའི་ཞིང་དུའོ། །ཕྲད་པ་གསུམ་དང་རྐྱེན་སྤངས་ཏེ། །བདག་གི་ཕྱོགས་ལས་འཕགས་གྱུར་ན། །ཕྱོགས་ལས་ཉམས་པས་འཇིག་པ་ནི། །རྟོག་པ་ཅན་དང་མཉམ་པར་འགྲོ། །མ་གྲུབ་པ་དང་ཡང་དཔེ་ཡི། །རྒྱལ་པོ་འགལ་བར་ཤིན་དུ་འགྱུར། །རྣམ་པར་རྟོག་དང་ཉེས་པའི་འཚང ། །དེ་དག་རྣམ་པ་ལྔར་འགྱུར་རོ། །ཕྲད་པ་གསུམ་པོ་སུན་འབྱིན་པ། །ཆུད་ཟོས་བུང་བ་ཇི་བཞིན་དུ། །དེ་བཞིན་འཇིན་རྟེན་སུན་འབྱིན་པ། །ཡང་དག་མ་ཡིན་རྟོག་པ་སྨྲ། །དེ་ལ་ཉེས་པ་རྣམ་ལྔ་སྟེ། །རྟོག་པ་བསླད་པའི་མིག་ཅན་ལ། །འདྲ་ཆོས་མི་འདྲའི་ཆོས་སྐྱོན་ཅན། །ནོར་དང་བཟློག་པ་མེད་པ་དང ། །བདག་གི་ཕྱོགས་ལས་ཉམས་པའི་བློ། །ཕ་རོལ་ཕྱོགས་ལ་རྟེན་པ་དང ། །ལྟ་བ་དེ་དག་འབྱུང་བ་ནི། །ཐོག་མའི་མཐའ་ནི་འཇིག་བྱེད་པའོ། །སེམས་ཅན་རྣམས་ཀྱི་སྔོན་གྱི་མཐའ། །རྒྱལ་པོ་ཡོད་པ་མ་ཡིན་ཏེ། །ཀུན་དུ་རྒྱུག་ཅིང་འཁོར་བ་དག་།འབྱུང་བ་དོག་པར་རྒྱུག་པའོ། །དེ་དང་དེ་ཡི་ལམ་རྒྱུད་དུ། །ཐུགས་རྗེ་དབང་གིས་རྒྱལ་བ་གཤེགས། །སྤྲུལ་པའི་འོད་ཟེར་ལྷ་རྫས་ཀྱིས། །ཟླ་བ་ལྟ་བུར་རྒྱུ་ཞིང
45.16b
འཁོར། །སྔ་མའི་ལས་དང་ཚུལ་འཐུན་པར། །ཕ་སྐྱབས་ཆོས་རྣམས་སྟོན་པ་མཛད། །རྒྱུད་དང་རྒྱུད་དུ་བྱིང་རྣམས་ལ། །ཆོས་ཀྱང་བསྟན་པར་མི་འགྱུར་ཏེ། །དེ་སྟེ་མྱ་ངན་འདའ་འཇིག་ན། །རྒྱལ་བས་ཡོན་ཏན་ཅི་ཞིག་བརྙེས། །དབང་སྒྱུར་གསུམ་པོ་རྣམས་དང་ཡང ། །རྣམ་པར་ཐར་དང་བདེན་པ་མཐོང ། །རྫུ་འཕྲུལ་རྐང་པ་བཞི་པོ་དང ། །དྲན་པ་མི་བཞག་སྟོང་པ་ཉིད། །ཐ་དད་ཡང་དག་ཤེས་བཞི་དང ། །འདྲི་ལ་ལུང་བསྟན་པ་རྣམས་དང ། །དམིགས་པ་དང་ནི་དེ་མ་ཐག ། །རྒྱུ་དང་དབང་ཡང་དེ་བཞིན་ཏེ། །གཟུགས་མེད་པ་དང་སྤྱོད་པ་དང ། །དབང་པོ་སྟོབས་རྣམས་བཅས་པ་ཡང ། །མངོན་པར་ཤེས་དང་དད་རྣམས་དང ། །རྣམ་པར་ཤེས་དང་དེ་རྒྱུ་དང ། །འདུས་བྱས་མ་བྱས་ཆོས་རྣམས་དང ། །བྱང་ཆུབ་ཡན་ལག་གང་ཟག་དང ། །རྣམ་པར་ཐར་དང་སྐྱེས་བུ་བརྒྱད། །ས་རྣམས་དག་དང་ཤེས་པ་དང ། །ཟིལ་གྱིས་གནོན་པའི་སྐྱེ་མཆེད་དང ། །ཡེ་ཤེས་མངོན་དུ་ཆུད་པ་བཅུ། །སྡུག་བསྔལ་ཆོས་ཉིད་ཤེས་པ་དང ། །སྡུག་བསྔལ་གྱིས་སུ་སོ་སོར་རྟོག་།སྡུག་བསྔལ་ཉིད་ཀྱི་རྗེས་སུ་ཤེས། །འདུས་པ་རྣམས་ཀྱི་ཆོས་ཤེས་དང ། །འདུས་པ་ལ་ནི་ཀུན་རྟོག་དང ། །འདུས་ལ་རྗེས་སུ་འགྲོ་ཤེས་དང ། །འགོག་པ་དག་ལ་ཆོས་ཤེས་དང ། །འགོག་པ་དག་ལ་རྟོག་པ་དང ། །འགོག་ལ་རྗེས་སུ་འགྲོ་ཤེས་དང ། །ལམ་ལ་ཆོས་ཀྱི་ཤེས་པ་དང ། །ལམ་ལ་སོ་སོར་རྟོག་པ་དང ། །ལམ་ལ་རྗེས་སུ་འགྲོ་བ་ཤེས། །ཤེས་པ་རྣམས་དང་སློབ་པ་བཅུ། །བརྒྱད་པ་མང་ན་ལན་བདུན་དང ། །རིགས་ལས་རིགས་དང་ལན་ཅིག་འོང ། །བར་ཆད་གཅིག་པོ་གང་ཟག་དང ། །བར་མར་མྱ་ངན་འདའ་བ་དང ། །གཞན་སྐྱེས་མྱ་ངན་འདའ་བ་དང ། །མངོན་པར་འདུ་བྱེད་མ་བྱས་དང ། །སྟེང་མའི་རྒྱུད་ཀྱང་དེ་བཞིན་ཏེ། །རྒྱལ་པོ་དེ་དག་ཐམས་ཅད་ཀྱང ། །ཡེ་ཤེས་སྤྱོད་ཡུལ་ཡིན་པར་གསུངས། །རྣལ་འབྱོར་ཅན་ཡུལ་སྣ་ཚོགས་ཏེ། །ཐ་མ་མཆོག་དང་བར་མའོ། །བྱང་ཆུབ་སེམས་དཔའ་ཁྱད་པར་དུ། །མཆོག་དང་བཅས་པར་དེ་ལ་སྒོམ། །རང་སངས་རྒྱས
45.17a
ནི་དབུ་མར་ཏེ། །ཉན་ཐོས་པ་ནི་ཐ་མའོ། །བཅུ་གཅིག་པ་དང་བཅུ་གཉིས་པ། །ལྔ་གསུམ་བཅཝ་ལྔ་དག་ཏུ་ཡང ། །སེམས་ཀྱི་ཚོགས་ཀྱི་འགོག་པ་ནི། །རྣལ་འབྱོར་ཅན་རྣམས་ཤིན་ཏུ་བྱེད། །གང་འདས་དེ་ནི་འགགས་པ་ཡིན། །སེམས་ནི་རང་བཞིན་འོད་སྣང་ཅན། །ཟག་པ་གང་ཡིན་དེ་སེམས་མིན། །སེམས་དང་ལྷན་ཅིག་གནས་པའང་མེད། །མ་འོངས་པ་ནི་མ་ཕྱིན་ཏེ། །ད་ལྟར་བྱུང་བ་གནས་པ་མེད། །སེམས་ནི་རྐྱེན་དང་མི་ལྡན་པར། །འདི་དང་གཞན་དུའང་སྐྱེ་བ་མེད། །བསམ་གཏན་བཞི་ན་སེམས་མེད་དེ། །འབྱུང་བའི་རྒྱུ་ལ་གནོད་པ་མེད། །འབྱུང་བའི་རྒྱུ་ནི་རྣམ་ཤེས་ཏེ། །ཡིད་དང་རྣམ་ཤེས་ལྔ་པའོ། །རང་གི་རྣམ་རྟོག་མི་ཤེས་པས། །དབའ་རླབས་བཞིན་དུ་འབྱུང་བ་ཡིན། །བརྟག་དང་རྟོག་ལས་རྣམ་གྲོལ་བ། །ཐུབ་པ་ཀུན་གྱི་ཀུན་གཞིའོ། །ཡོད་དང་མེད་ལས་ལྷ་རྫས་སུ། །གཞིན་འགྱུར་འཇིག་པ་མ་ཡིན་ཞིང ། །སྟུག་པོ་དང་ནི་སྟུག་དཀྱིལ་དུ། །ཟླ་བ་ལྟ་བུར་རབ་ཏུ་མཛེས། །དེ་ནི་མི་འཇིག་བདེ་བར་གནས། །སྟུག་པོའི་དཀྱིལ་ན་སྲས་དང་བཅས། །ཐ་དད་མ་ཡིན་མཚན་ཉིད་མཁྱེན། །ཡེ་ཤེས་རོ་གཅིག་ཉིད་དུ་གྱུར། །བསམ་ཡས་རྣལ་འབྱོར་ཡུལ་ཅན་ཏེ། །རྒྱལ་པོ་ཟླ་བ་ལྟ་བུར་སྤྱོད། །རྒྱལ་པོ་ཕུན་སུམ་ཚོགས་པ་འདི། །རྣལ་འབྱོར་ཁྱེར་བ་ཐུབ་རྣམས་ཀྱི། །རྟག་པར་རྒྱལ་པོ་དེ་ཡི་ཕྱིར། །ཁྱོད་ཀྱི་ཡིད་ཀྱང་རྣལ་འབྱོར་ཤོག་།འདོད་གནས་རྣམ་པ་དྲུག་པོ་དང ། །ཚངས་པ་དག་གི་བཅུ་གཉིས་དང ། །གཟུགས་མེད་ཤེས་མེད་སེམས་ཅན་དུ། །རྒྱལ་པོ་ཁྱོད་ནི་དབང་པོར་གྱིས། །སྟུག་པོར་འདོད་པའང་འཐོབ་པར་ཏེ། །བཟང་པོའི་སྟུག་པོར་སྨོན་པའི་ཕྱིར། །རྒྱལ་པོའི་ཡེ་ཤེས་བཅུ་པོ་རྣམས། །བསྒོམས་ན་སྟུག་པོར་འགྲོ་བར་འགྱུར། །ཆོས་དང་རྗེས་སུ་འགྲོ་ཤེས་དང ། །ཕ་རོལ་སེམས་དང་ཀུན་རྫོབ་དང ། །སྡུག་བསྔལ་འདུས་པའི་ཤེས་པ་དང ། །འགོག་དང་ལམ་ལས་སྐྱེས་པ་དང ། །བྱང་བའི་ཤེས་དང་མི་སྐྱེ་དང ། །ཁོང་བཟོ་བསྒོམ་པ་དེ་བཞིན་ཏེ། །ཤ་ཀུན་ཏ་ལའི་རྒྱལ་རིགས་དང ། །ིག་ཤཝ་ཁུ་དང་སོ་མའི་རིགས། །ཡང་དག་དོན
45.17b
སྟོན་རྒྱལ་པོའི་མཆོག་།ཁྱོད་ཀྱི་རིགས་ནི་ཁྱད་པར་འཕགས། །དེ་ཡི་རིགས་སུ་ཁྱོད་སྐྱེས་ཤིང ། །ཞུམ་པ་མེད་པར་སྟུག་པོར་སོང ། །ལྟ་བའི་ཆོས་ལ་གནས་པ་ཡི། །རྣལ་འབྱོར་ཅན་གནས་དྲི་མེད་དུ། །སྦུད་པ་བཞིན་དུ་དབུགས་རྒྱུ་ཞིང ། །འགྲོ་རྒྱུ་ལུག་དང་འདྲ་བ་སྟེ། །རྔ་བྲུག་བཞིན་དུ་ལུས་ཕྱེད་ཀྱིས། །འགྲོ་ཞིང་འོང་བ་བྱེད་པ་ནི། །ཐམས་ཅད་ལུས་ལ་ཡིད་ཡིན་ཏེ། །སྒྱུ་མའི་རི་དགས་བཞིན་དུ་གནས། །སྒྱུ་མའི་ཤིང་ལྟར་ཤིན་དུ་སྣང ། །ཆུ་བོའི་ནང་གི་མེ་བཞིན་དུ། །སྨིན་མ་མིག་དང་ཡན་ལག་རྣམས། །སྒྱུར་བས་རྒྱལ་པོ་བཞིན་དུ་རྩེ། །སེམས་དང་སེམས་ལས་བྱུང་དང་ཡིད། །ཡིད་ཀྱི་རྣམ་པར་ཤེས་པ་དག་།ཆོས་རྣམས་འདི་དག་དངོས་པོ་མེད། །སྤྲིན་གྱི་ཚུལ་དུ་འབྱུང་བ་སྟེ། །ཀུན་གཞི་ཐམས་ཅད་ས་བོན་འདི། །བག་ཆགས་རྣམས་ཀྱིས་ཡོངས་སུ་དཀྲིས། །སྣ་ཚོགས་གཟུགས་ཀྱི་ནོར་བུ་དང ། །འཇའ་དང་གློག་རྣམས་ཇི་བཞིན་དུ། །ལུས་ཅན་རྣམས་ཀྱི་ལུས་ཀྱི་ཡུལ། །དེ་ལྟའི་གཟུགས་སུ་སྣང་བ་ཡིན། །ལུ་མའི་པད་མོ་ལྟ་བུར་དག་།དྲི་མེད་ངང་པའི་རྒྱལ་པོ་བཞིན། །གསལ་བ་གདོན་མི་ཟ་བའི་རིགས། །སངས་རྒྱས་སྤྲུལ་པ་བཞིན་དུ་གནས། །མཚན་མའི་མཐུ་ལས་མིང་འབྱུང་སྟེ། །མཚན་མ་རྐྱེན་ལས་བྱུང་བ་ཡིན། །མཚན་མ་མིང་དང་འབྲེལ་བ་ཡིན། །རྐྱེན་རྣམས་ཀྱིས་ཀྱང་རྣམ་པར་བརྟགས། །མཚན་མའི་ཚུལ་དང་དབྱིབས་དག་ལས། །རྣམ་པར་རྟོག་པ་ཤིན་དུ་འབྱུང ། །རྣམ་པར་རྟོག་པ་སྐྱེད་པ་ཡིས། །རྒྱུ་ལ་རྣམ་པ་གཉིས་སུ་གསུངས། །ཕྱི་རོལ་མཚན་མ་སེམས་རྣམས་དང ། །བག་ཆགས་ཡིད་ཀྱང་དེ་བཞིན་ཏེ། །སེམས་དང་ལྷན་ཅིག་ལྡན་པ་ནི། །ཁང་པ་ལ་ནི་གནས་པ་ཡིན། །ཡིད་དང་དབང་པོར་ལྡན་པ་ནི། །རྣམ་ཤེས་ལྔ་ཡི་རྒྱུ་ཡིན་ཏེ། །རྟག་ཏུ་ཡང་དག་ཡེ་ཤེས་ཀྱིས། །འཇིག་རྟེན་རྒྱུ་ལ་རྣམ་པར་ལྟ། །དེ་ལྟར་བྱེད་དང་བྱ་བ་མེད། །དེ་བཞིན་ཉིད་འདི་རྣམ་གཞན་མིན། །ཐམས་ཅད་ཆོས
45.18a
ཀྱི་དེ་བཞིན་ཉིད། །ཕན་ཚུན་སྟོབས་ཀྱིས་འབྱུང་བ་སྟེ། །རྣལ་འབྱོར་ཅན་རྣམས་དེ་ལྟར་ལྟ། །དེ་བཞིན་ཉིད་དུ་གསལ་བར་མཐོང ། །རང་བཞིན་ཡོངས་སུ་གྲུབ་པ་ནི། །ཆོས་རྣམས་ཆོས་ཉིད་དེ་ཡིན་ཏེ། །བརྟགས་པའི་དངོས་པོ་རང་བཞིན་དུ། །ཆོས་རྣམས་ཐམས་ཅད་མ་སྐྱེས་པ། །སྟོང་པ་ངོ་བོ་ཉིད་མེད་དེ། །ཡོད་དང་མེད་པའི་ཕྱོགས་སྤངས་པ། །སྒྱུ་མ་རྨི་ལམ་རྣམས་དང་འདྲ། །དྲི་ཟའི་གྲོང་ཁྱེར་ལྟ་བུ་སྟེ། །སྐྲ་ཚོགས་རྣམས་དང་སྨིག་རྒྱུ་བཞིན། །དུ་བ་སྤྲིན་སྟུག་ལྟ་བུ་ནི། །མཚན་མ་ཚུལ་དང་དབྱིབས་རྣམས་ཀྱིས། །ཇི་ལྟར་མིང་དུ་འཇུག་པ་ཡི། །ཚིག་དང་ཡི་གེ་མང་པོ་དང ། །མིང་རྣམས་མང་པོ་ལ་ཡང་སྟེ། །ཀུན་དུ་བརྟགས་པའི་རང་བཞིན་ཡིན། །གཞན་གྱི་དབང་ནི་དེ་ལས་གཞན། །ཡིད་དོན་དབང་པོ་འདུས་པ་ལས། །ས་བོན་ཀུན་ཅན་བག་ཆགས་དང ། །ཐ་དད་མ་ཡིན་སེམས་དང་བཅས། །རྣམ་པར་ཤེས་པ་ཀུན་དུ་འབྱུང ། །གཞན་གྱི་དབང་གི་རང་བཞིན་ཡང ། །ཕན་ཚུན་སྟོབས་ཀྱི་རྒྱུ་ལས་སོ། །སོ་སོ་རང་རིག་ཤིན་དུ་ཕྲ། །མཐོང་བའི་ཆོས་ལ་གནས་པ་སྟེ། །རང་བཞིན་ཡོངས་སུ་རྫོགས་པ་འདི། །འཕགས་པ་རྣམས་ཀྱི་སྤྱོད་ཡུལ་ལོ། །འཕགས་པའི་རང་བཞིན་ཐུགས་ཆུད་པས། །སངས་རྒྱས་རྣམས་དང་སངས་རྒྱས་སྲས། །རང་བཞིན་ཡོངས་སུ་རྫོགས་པ་ནི། །ཡང་དག་མཐའ་རུ་གཟིགས་པས་ན། །སྐྱེ་བ་ཟད་ཅེས་རྣམ་པར་གསུངས། །ཚངས་པའི་ལམ་ཡང་ནོན་ཆེས་སོ། །བྱས་ཀྱིས་བཟོད་ཡང་བྱ་བ་མེད། །ཕྱིན་ཆད་འབྱུང་བ་མེད་དོ་ཞེས། །སྡུག་བསྔལ་ཀུན་ལས་རྣམ་པར་གྲོལ། །གཡོ་བ་ཐམས་ཅད་ཤིན་དུ་བྱུང ། །བག་ཆགས་མ་ལུས་བསྲེགས་པས་ན། །རྣམ་པར་རྟོག་པ་མི་འབྱུང་ཞིང ། །བདག་མེད་ཤིན་དུ་མཐོང་བ་ནི། །ཆོས་དང་གང་ཟག་བསྒྲགས་པ་སྟེ། །ས་བོན་རྣམས་དང་བྲལ་བས་ན། །སེམས་ཀྱི་ཚོགས་རྣམས་མི་འཇུག་གོ། །
45.18b
ཐོག་མ་མེད་པའི་དུས་བསགས་པའི། །ཡིད་ཀྱི་གནས་ངན་ལེན་རྟོག་པའི། །སྤྲོས་པ་ཐམས་ཅད་མངོན་བསལ་བས། །མྱ་ངན་འདས་པ་ལྕགས་བསྲེགས་བཞིན། །ཇི་ལྟར་རབ་ཏུ་བསྲེགས་པའི་ལྕགས། བསིལ་བར་གྱུར་ཀྱང་འཇིག་པ་མེད། །དེ་བཞིན་གྲོལ་བ་ཐམས་ཅད་ཀྱང ། །མེ་ཟད་བཞིན་དུ་བསིལ་བ་ཡིན། །ཟག་པ་མེད་པའི་ཆོས་དབྱིངས་སུ། །ཞུགས་པ་སྟུག་པོའི་དཀྱིལ་འཁོར་ན། །རྒྱལ་བ་རྣམས་དང་རྒྱལ་སྲས་བཅས། །ཏིང་ངེ་འཛིན་ཀྱི་ཟས་གནས་པས། །མཉམ་པར་བཞག་ལ་མཉམ་བཞག་ཅིང ། །མཐོང་བའི་ཆོས་ལ་བདེ་བར་གནས། །རྒྱལ་པོ་རྣལ་འབྱོར་ཅན་གྱི་ཡུལ། །རྣལ་འབྱོར་འདི་ཡིན་བརྩམ་པར་གྱིས། །དེ་སྟེ་རྒྱལ་སྲས་དགེ་བའི་གནས། །སྟུག་པོར་འགྲོ་བར་འདོད་ན་སྟེ། །སངས་རྒྱས་ཐམས་ཅད་བཞུགས་པའི་གནས། །ཞིང་གི་མཆོག་ནི་སྟུག་པའོ། །དེ་ཕྱིར་རྒྱལ་པོ་དགེ་བར་རྩོམས། །རྒྱལ་པོ་རྣམས་ལའང་དགེ་བར་བགྱིས། །མིང་ནི་མཚན་མའི་མཐུ་ལས་བྱུང ། །མཚན་མ་རྐྱེན་ལས་བྱུང་བ་སྟེ། །མཚན་མ་ལས་ཀྱང་རྣམ་རྟོག་འབྱུང ། །གྲུབ་པ་རྣམས་ནི་མ་གཏོགས་པར། །རྫ་ལས་སོགས་པ་དབང་པོའི་ཡུལ། །ཕུང་པོ་ཡོན་ཏན་ལྡན་པའི་རྣམས། །རྣམ་པར་རྟོག་པའི་མཚན་མ་འདི། །སྐྱེ་བ་ལ་ནི་རྒྱུ་ཡིན་ནོ། །ཁྱད་པར་བྱེད་པ་རྣམ་རྟོག་སྟེ། །གནས་ཀྱང་རྣམ་པར་ཤེས་པར་བྱེད། །འགྲོ་དང་མི་འགྲོ་འགྲོ་བ་ཡི། གཏི་མུག་རྣམས་ཀྱང་ཤིན་དུ་སྐྱེ། །རིང་པོ་ཐུང་ངུ་ཁ་དོག་དང ། །རྩུབ་པ་དག་དང་འཇམ་པའི་རྣམས། །སྒྲ་དང་དྲི་ལ་སོགས་པའི་ཡུལ། །མངར་དང་ཁ་དང་ཚ་བ་དང ། །ཡིད་ཀྱི་རྣམ་པར་ཤེས་པའི་ཡུལ། ཇི་སྙེད་དགེ་དང་མི་དགེ་དང ། །འདུས་བྱས་ཆོས་དང་འདུས་མ་བྱས། །མྱ་ངན་འདས་པ་ཡེ་ཤེས་ཡུལ། །སྐད་ཅིག་སྐད་ཅིག་རབ་ཏུ་འབྱུང ། །བྱུང་ཞིང་ཕྱིར་ཡང་ལྡོག་པ་སྟེ། །དེ་ནི་མགྱོགས་པར་ཤིན་དུ་འགྲོ། །
45.19a
རྣམ་པར་ཤེས་པ་རྒྱུ་ལས་བྱུང ། །ཡིད་དང་ཀུན་གཞི་རབ་འབྲེལ་བས། །ཁབ་ལོང་ལྟ་བུར་ཤིན་ཏུ་འཁོར། །ཁ་གཉིས་སྦྲུལ་ནི་ཇི་བཞིན་པ། །ཡིད་ཀྱི་སྤྱོད་པ་དེ་བཞིན་ཏེ། །ཀུན་གཞི་རྣམ་ཤེས་ཡོག་པར་བྱེད། །གཅིག་ཏུ་འོན་ཀྱང་རབ་ཏུ་འབྱུང ། །ཡིད་ཀྱི་རྣམ་པར་ཤེས་དང་བཅས། །རྒྱུ་ཡི་དགོས་པ་བྱས་ནས་ལྡོག་།བདག་ཏུ་དགོས་པའང་ཤིན་དུ་བྱེད། །བདག་གིར་བྱ་བའང་འཕེལ་བར་བྱེད། །ལུས་ལ་དྲོད་ཀྱང་སྐྱེས་པ་སྟེ། །སྣ་ཚོགས་རྣམ་པར་རབ་ཏུ་སྤྱོད། །ཟས་དང་སྐོམ་དང་ལོངས་སྤྱོད་དང ། །གོས་དང་སྤོས་སོགས་རྣམ་སྤྱོད་དང ། །མཆོད་པ་དག་དང་རྒྱུག་པར་ཡང ། །མི་ཡི་ལུས་ནི་འཛིན་པ་ཡིན། །གར་དང་གད་མོ་རྩེད་མོ་དང ། །ཡིད་ཀྱང་རྟག་ཏུ་བྱེད་པ་སྟེ། །སྐྲ་ཚོགས་མགལ་བ་བསྐོར་བ་དང ། །དྲི་ཟའི་གྲོང་ཁྱེར་རྨི་ལམ་དང ། །སྨིག་རྒྱ་ལའང་དེ་བཞིན་དུ། །རྣམ་པར་རྟོག་པ་ཀུན་དུ་འཇུག་།བབ་པ་ཀུན་དུ་འཁོར་བའི་སེམས་བདག་སེམས་ཁོང་དུ་མི་ཆུད་པས། །ལུས་དང་སྣོད་ཀྱི་རྣམ་པར་ཡང ། །ཕྱང་མོ་ཉུག་ལྟར་གནས་པའོ། །ཉམ་ཆུང་སྙིང་པོ་མེད་པ་སྟེ། །རྣམ་པར་རྟོག་པ་རྒྱུ་མེད་པ། །བདག་གིས་བརྟགས་པའི་དོན་ལ་སྤྱོད། །མཐོང་ནས་གནས་པ་གཟུགས་བརྙན་བཞིན། །རྒྱལ་པོ་རྣམ་ཤེས་ས་བོན་ནི། །ལྟ་བའི་ཡུལ་དུ་གཡོ་བ་སྟེ། །བུས་པའི་ཚོགས་རྣམས་མྱོས་པར་བྱེད། །འཕགས་ལ་མ་ཡིན་ས་ཡི་བདག་།རྒྱལ་པོ་རྣམ་ཤེས་གསུམ་པོ་ཡི། །འཇུག་པ་རབ་ཏུ་བསྟན་པ་སྟེ། །འདི་རྣམས་དང་བྲལ་གྲུབ་པ་ཡི། །རང་བཞིན་ཡང་དག་ཉིད་ཡིན་ནོ། །བྱེ་བ་ཕྲག་ཞིང་ཇི་སྙེད་རྣམས། །ཤུགས་འཛིན་གྱིས་ནི་མཐོང་བ་དང ། །འཕགས་པ་མཽད་གལ་བུ་ཡིས་ཀྱང ། །ལུས་དང་ལུས་ཆེ་མཛེས་པ་རྣམས། །དེ་དག་ལས་ནི་འདི་དག་འཕགས། །སྟུག་པོའི་ཞིང་ན་འོས་ཡི་བདག་།ཐམས་ཅད་ཞིང་ན་ཅི་འཛེས་པ། །དེ་དག་དཔེ་འམ་ཆར་མི་རུང ། །བདེ་བ་ཡོད་དང་མངོན་དགའ་དང ། །འོག་གི
45.19b
ཞིང་རྣམས་བྱེ་བ་དག་།དེ་དང་དེ་ན་གང་བཞུགས་པའི། །སངས་རྒྱས་དེ་དག་སྟུག་ལ་བསྟོད། །སྟུག་ཅེས་བྱ་ཡོད་སྔོན་མཐའ་མེད། །རང་བྱུང་འཕྲུལ་པ་དེ་ཡིན་ཏེ། །ཟག་པ་མེད་པའི་སངས་རྒྱས་ས། །འབྱུང་བ་གསུམ་ལས་འདས་ཏེ་གནས། །དེ་ནི་བདེ་བ་ཉེར་ལེན་མེད། །ཁྱོད་དང་ང་ཡིར་སྤྱོད་དང་བྲལ། །ཐེར་ཟུག་མཆོག་ཏུ་རྟག་པ་སྟེ། །བརྟན་པ་སྟུག་པོར་འདུས་མ་བྱས། །ཡང་དག་སངས་རྒྱས་བྱང་ཆུབ་དུ། །འཚང་རྒྱ་འོག་མིན་གནས་མཆོག་དུ། །སངས་རྒྱས་མ་གྱུར་འདོད་ཁམས་སུ། །སངས་རྒྱས་མཛད་པ་མི་མཛད་དེ། །དེ་དག་སྟུག་པོའི་ཞིང་གཤེགས་ནས། །སངས་རྒྱས་སྤྲུལ་པ་བྱེ་བ་ཡིས། །རྟག་ཏུ་རྣལ་འབྱོར་མཉམ་པར་བཞག་།སྤྲུལ་པ་དག་དང་ཐབས་ཅིག་རོལ། །ཐམས་ཅད་ཞིང་དུ་ཟླ་བ་ལྟར། །གང་ལ་གང་གིས་དབང་འགྱུར་བ། །དེ་ལ་དེ་ལྟར་འབྱུང་བ་སྟེ། །འཕྲུལ་པའི་སྤྲུལ་པ་དག་གིས་ཀྱང ། །ས་བཅུ་པ་ཡི་མདོ་མཆོག་དང ། སྡོང་པོས་བརྒྱན་དང་དྲུ་མ་ཡི། །གང་ཡང་རྣམ་པར་སྤྲུལ་པའི་མདོ། །དཔལ་གྱི་ཕྲེང་བ་ལ་བཤད་དང ། །རྣམ་པར་སྣང་བའི་མདོ་སྡེ་དང ། །སྒྱུ་མ་དཔལ་ལས་འགྲོ་བ་སོགས། །མདོ་སྡེ་རྣམ་པ་སྣ་ཚོགས་དག་།སྟུག་པོའི་རྒྱན་གྱི་མདོ་སྡེ་འདི། །མདོ་སྡེ་ཀུན་ལས་འཕགས་པ་ཡིན། །རྒྱལ་པོ་འདི་ལ་རིམ་གྲོར་ཡང ། །རྒྱལ་པོ་རྣམས་དང་བཅས་པས་གྱིས། །གཟུགས་མེད་འདོད་དང་གཟུགས་རྣམས་དང ། །འདུ་ཤེས་མེད་པ་དེ་བཞིན་ཏེ། །གནས་ལས་འདས་ཏེ་སངས་རྒྱས་དབང ། །བཞུགས་སོ་སྟུག་པོའི་དཀྱིལ་འཁོར་ན། །པད་མོ་འདྲ་བའི་གཞལ་མེད་ཁང ། །གཟུགས་མང་རྣམ་པ་སྣ་ཚོགས་ན། །ལྷ་རྫས་སྨད་ཀྱི་ཡེ་ཤེས་ཏེ། །དེ་བཞིན་གཤེགས་པའི་རྣམ་དག་གིས། །རྣམ་གྲོལ་རྣལ་འབྱོར་ཅན་རྣམས་དང ། །དེ་ན་བཅོམ་ལྡན་ཐབས་ཅིག་བཞུགས། །སྟུག་པོའི་དཀྱིལ་བཞུགས་བསམ་གཏན་ཞུགས། །སངས་རྒྱས་ས་མཆོག་རྣམ
45.20a
བཞི་ལ། །དེ་ན་བཞུགས་ཤིང་གཟུགས་འཛིན་པ། །རྣལ་འབྱོར་མཁས་པ་ཉིད་ཚུལ་གྱིས། །དེ་ཡི་མཐའ་མ་མི་གཟིགས་པ། །གཟུགས་རྣམས་དང་ནི་ཡུལ་རྣམས་ཀྱི། །ཐུབ་པ་རྣལ་འབྱོར་མཁས་པའི་རྣམས། །གཟུགས་ཀྱི་རྣམ་པ་སྣ་ཚོགས་ཀྱང ། །སྟུག་པོའི་དཀྱིལ་ན་རྣམ་བཞུགས་ཤིང ། །ཐམས་ཅད་རྣལ་འབྱོར་ཅན་གྱིས་བསྟན། །བ་བླ་གསེར་དང་ཟླ་འོད་ཙམ་པ་ཀ་།རྨ་བྱའི་མགྲིན་པ་པད་མོ་འདྲ། །དེ་ཡི་ས་ལ་བཞུགས་པའི་ལྷ། །ལྷ་ཡི་གཟུགས་ནི་རྣམ་པར་མཛེས་པ་སྟེ། །དེ་གཟུགས་ལྷ་རྒྱལ་གོ་པ་ཀ་དག་གློག་དང་འོལ་མ་བྱུ་རུའི་འོད་བཞིན་དུ། །ལ་ལས་བལ་ཆུང་སྐུ་དང་ན་བཟའ་ལོ་མ་རྩཝ་ལ་སོགས་པའི་མལ་བཞུགས་པར། །མཐོང་ངོ་ཉི་མ་སྟོང་ལྟར་ཤིན་དུ་རྣམ་པར་འབར་བའི་སྐུ་གཟུགས་མངའ་བ་ལ། །ཐུབ་ཅན་ལ་ལས་རྣལ་འབྱོར་དབང་ལ་སྟུག་དབུས་ཆུ་སྐྱེས་རེ་རེར་བཞུགས་པར་མཐོང ། །ཐུབ་པའི་ཐོར་ཚུགས་ཚོགས་ནི་ལག་གིས་འགྲོ་ཡི་མགོ་བོ་གླད་པ་བཞིན་དུ་སྟེ། །ལ་ལར་གཟུགས་ནི་རྡོ་རྗེ་ཨནྡ་རྙིལ་གྱིས་སྤྲས་པའི་ཅོད་པན་བརྒྱན་པར་རོ། །ལ་ལས་ལ་ལར་ཐུབ་པ་དེ་ལ་འཁོར་ལོ་རི་མོ་ཉ་དུང་བཅས་པར་མཐོང ། །ལ་ལས་ཇི་ལྟར་ནམ་མཁའི་རྒྱུ་བའི་ལམ་ལ་འཇའ་ཟུག་བཞིན་དུ་ཐུབ་པ་མཐོང ། །ལྷ་རྫས་ཕྱག་སོར་ཅན་གྱི་སྣ་ཚོགས་ཡུལ་ཅན་རི་རབ་ཕྱག་ཏུ་རབ་གཞོག་ཅིང ། །ཁམས་གསུམ་ཆུ་སྲིན་གནས་དང་ཆུ་གནས་དེ་བཞིན་བ་ལང་མིག་པར་ཤོང་བར་མཛད། །སྦྱིན་པའི་ཤུགས་ཀྱིས་མི་ཡི་བདག་པོའི་གཙུག་གི་ཅོད་པན་རྣམས་ཀྱིས་རབ་མཆོད་ཅིང ། །ལ་ལ་དག་ན་རྒྱལ་དང་རྒྱལ་པོའི་འཁོར་ན་དགོས་པ་རྣམས་ན་མཁས་གྱུར་ཅིང ། །ཆད་པས་གཅོད་པར་སྣང་ངོ་སྟུག་པོའི་དབུས་ན་གཞན་དུ་རྣམ་པར་སྣང་བ་ནི། །ཐུབ་པ་རྣལ་འབྱོར་མཁས་པའི་ཡེ་ཤེས་རྣལ་འབྱོར་ཤིན་དུ་བྱེད་པ་རྣམས་ལ་སྟེ། །རང་གི་ཡུལ་རྣམས་སྔོན་གྱི་རྒྱལ
45.20b
བས་གསུངས་པ་དེ་དག་རྣལ་འབྱོར་གྱིས་སྟོན་ཅིང ། །ལ་ལས་གནས་དང་ལྟ་བ་ཡིད་དང་བློ་རྣམས་ཤིན་ཏུ་གཞན་དུ་གྱུར་པ་དང ། །དབང་དང་ཡེ་ཤེས་རྣམ་པ་སྣ་ཚོགས་ཏིང་ངེ་འཛིན་དང་ཡིད་བཞིན་སྐུ་མངའ་བར། །ལ་ལས་ཡུལ་ལ་ཆགས་མེད་སྤྱོད་ཡུལ་རིག་པའི་བློ་ཡི་བྱ་བ་གཅོད་པར་ཏེ། །འདི་དང་གཞན་མེད་སྲེག་མེད་གྱུར་པས་ཚིག་བྱ་མེད་ཕྱིར་མྱ་ངན་འདས་པར་རོ། །སྣུམ་དང་འོད་འཕྲོ་མེད་པས་ཇི་ལྟར་འཇིག་རྟེན་འདི་ན་མེ་བཞིན་ཤིན་དུ་མྱ་ངན་འདས། །ལ་ལས་ཕ་རོལ་ཕྱིན་པའི་མཆོད་སྦྱིན་མཆོད་བཅུག་མཆོད་སྦྱིན་བྱེད་པ་དག་ཏུ་སྟེ། །སྦྱིན་དང་མཆོད་དང་ཐུབ་པ་དག་ཀྱང་རྣམ་པ་ཚུལ་བཞིན་མཛད་པ་ཤིན་དུ་མཐོང ། །བདེ་བ་ཡོད་ཅེས་བྱ་བའི་ཞིང་མཆོག་དེ་ན་སྐྱེས་བུ་ཡོད་པ་དེ་དག་ནི། །མངལ་ནས་སྐྱེས་པ་མ་ཡིན་བདེ་བར་འབར་བའི་འོད་ཀྱི་དཀྱིལ་འཁོར་ཅན་དག་སྟེ། །ལྷ་རྫས་གསེར་ལྟར་འབར་བ་ཟླ་བ་ལྟ་བུའི་ལུས་འཆང་རྣལ་འབྱོར་ཅན་གྱི་བདག་།ལྷ་རྫས་འོད་བཟང་དེ་དང་གང་ཡང་མི་ནང་རྣལ་འབྱོར་ཅན་གྱི་དབང་པོའི་ཡུལ། །དེ་དག་བརྒྱ་ཆར་མི་ཕོད་རྣལ་འབྱོར་ཅན་གྱི་དབང་པོ་དག་གི་དེ་བདེ་ལ། །གཞན་དུ་བདག་ཅག་ཉིད་ཀྱིས་བཤམས་པའི་ལོངས་སྤྱོད་པ་ཡི་ཞིང་གི་མི་དེ་དག་།མཐའ་ཡས་འོད་ཀྱི་བདེ་བ་ཅན་ན་རྒྱལ་བའི་སྲས་རྣམས་ལྷ་རྫས་འོད་འཁོར་ཅན། །རྣལ་འབྱོར་ཡང་དག་ཉིད་མོས་ཐུབ་དབང་ཁྱུ་མཆོག་བསམ་གཏན་བདུད་རྩི་མྱོང་བྱེད་དང ། །རྣམ་པ་ཐ་དད་སྣ་ཚོགས་རིན་པོ་ཆེ་དག་ཡལ་ག་སྦྱངས་པའི་གནས་ཚལ་ཤིང ། །ལྷ་རྫས་གསེར་ཕྱེའི་ཁམས་ལས་བསགས་པའི་ཞིང་གི་མཆོག་དེ་ཤིན་དུ་རྣམ་པར་མཛེས། །གསེར་དང་རིན་ཆེན་སྣ་ཚོགས་མེ་ཏོག་པད་མོ་དེ་ནི་མཆོག་ཏུ་རབ་ཏུ་བརྒྱན། །འདི་ནི་སངས་རྒྱས་ཞིང་གི་གཏེར་ཡིན་དཔེ་མེད་དེ་ཀུན་མི་ཡང་པད་མོ་སྐྱེས། །ཐུབ་པ་དེ་ལ་དད་ཅིང་བསམ་གཏན་མཁས་ལ་སངས་རྒྱས་ལ་ནི་རབ་ཏུ་མོས། །བདག་གི་སྟོན་པ་ལ་ནི་བདག་བསྟན་ཡིད་ཅན་པད་མོ་དག་ལས
45.21a
སྐྱེ་བ་སྟེ། །སངས་རྒྱས་ཞིང་གི་མཆོག་ན་གནས་པའི་མི་ནི་བཟང་པོའི་མཚན་གྱིས་ཀུན་ནས་བརྒྱན། །དཔེ་བྱད་བཟང་པོ་བཅས་པས་རྨད་དུ་འབར་བའི་ལུས་ཅན་དཔལ་གྱི་བེའུ་དང་བཅས། །ཡོད་དང་མེད་པའི་རྣམ་རྟོག་རྟོག་པ་མེད་པས་དྲི་མེད་རྫུ་བ་པ་དག་གོ། །དེ་ལྟར་འདི་དག་རྣམ་པར་བསྟན་ནས་རྡོ་རྗེ་ཁྱུ་མཆོག་མཐེ་བོ་ཙམ་དུ་གྱུར། །སྲོ་མ་རྡུལ་ཕྲན་ཤིན་དུ་ཕྲ་བའི་སྐྲ་ཡི་བརྒྱ་ཆའི་གཟུགས་སུའང་དེ་བཞིན་གྱུར། །ལ་ལར་བདེ་གཤེགས་རང་རྒྱལ་ཉན་ཐོས་གཟུགས་དང་དེ་བཞིན་སྣ་ཚོགས་གཞན་དག་ཀྱང ། །གང་དང་གང་ལ་སེམས་ཀྱི་སྤྱོད་པ་ཇི་བཞིན་དེ་འདྲའི་གཟུགས་ཀྱི་ཁྱད་པར་དག་།རྣལ་འབྱོར་མཁས་པ་རྡོ་རྗེ་ཞེས་བྱས་ཚད་མེད་གཟུགས་ཀྱི་ཡུལ་དག་རྣམ་པར་སྤངས། །དེ་སྐད་བཤད་ནས་ཡང་སྨྲས་པ། །སྣ་ཚོགས་གཟུགས་ཅན་རྒྱལ་བའི་སྲས། །ས་རྣམས་དེ་བཞིན་དབང་རྣམས་དང ། །མ་ཉམས་མངོན་པར་ཤེས་པ་དང ། །སྒྱུ་མ་ལྟ་བུའི་ཏིང་འཛིན་དང ། །དེ་ལྟར་ཡིད་བཞིན་ལུས་ཀྱང་སྟེ། །གཟུངས་དང་རྫུ་འཕྲུལ་རྐང་པ་དང ། །རྣམ་ཐར་ཐ་དད་ཡང་དག་རིག ། །སྟོབས་དང་འཇིགས་པ་མེད་པ་དང ། །ཕུང་པོ་ཁམས་རྣམས་ཟག་མེད་པ། །འདི་དག་གཞན་དུ་གྱུར་ནས་འཐོབ། །རྟག་པའི་སངས་རྒྱས་ས་ཡང་ངོ ། །ཆོས་རྣམས་ལྔ་ཡི་རང་བཞིན་དང ། །རྣམ་པར་ཤེས་པ་བརྒྱད་རྣམས་དང ། །བདག་མེད་གཉིས་པོ་རབ་རྟོགས་ནས། །གཞན་དུ་འགྱུར་བ་འབྱུང་བར་འགྱུར། །ཡིད་བཞིན་ལུས་ནི་བཅུ་པོ་དག་།སྒྱུ་མ་དཔའ་བར་འགྲོ་བས་བསྐོར། །མི་ཟད་སྨོན་ལམ་བཅུ་པོ་དང ། །ལམ་གྱི་རྣམས་ཀྱིས་ཤིན་དུ་སྤྲུལ། །རྨི་ལམ་མེ་ལོང་གཟུགས་བརྙན་ནམ། །ཆུ་ཡི་ཟླ་བ་བཞིན་དུ་མཐོང ། །རྣལ་འབྱོར་ལམ་ལ་ཐུབ་པའི་རྣམས། །སངས་རྒྱས་ས་ལ་ཞུགས་པ་དང ། །རྒྱལ་བ་པད་མོའི་གདན་བཞུགས་པ། །རྒྱལ་བའི་སྲས་ཀྱིས་མདུན་དུ་བྱས། །ཡོད་དང་མེད་པ་ཕྱོགས་བྲལ་བ། །
45.21b
རྡུལ་ཕྲན་རྣམ་པར་འཇིག་རྣམས་ཀྱིས། །དྲི་ཟ་གྲུབ་པའི་རྒྱལ་པོ་དང ། །ལྷ་ཡི་གནས་ན་འཁོད་པའི་ཚོགས། །རི་རབ་ས་ལ་འདོང་རྒྱུ་ཞིང ། །ནམ་མཁའི་དཀྱིལ་ནས་འདོད་སྤྱོད་ཀྱང ། །ཇི་ལྟར་སྣང་བར་མ་གྱུར་པ། །དེ་བཞིན་རྒྱལ་སྲས་གཅེས་པའི་རྣམས། །རྣལ་འབྱོར་མེད་པས་མི་མཐོང་ངོ ། །རྣམ་པ་སྣ་ཚོགས་གཟུགས་དང་ལྡན། །ས་དང་ཞིང་རྣམས་བྱེ་བ་ན། །རྒྱལ་བ་མཆོད་ལ་མངོན་པར་མོས། །སྨོན་ལམ་དབང་ལ་གནས་པའི་རྣམས། །པད་མོའི་ཁང་པར་རབ་ཏུ་སྐྱེ། །དབང་དང་བསམ་གཏན་སེམས་པ་དག་།ཞིང་དང་ཞིང་དུ་མྱ་ངན་འདའ། །ཏིང་ངེ་འཛིན་ལས་སྐྱེས་པ་སྟོན། །ལྷུན་ཀྱིས་གྲུབ་པར་ཐམས་ཅད་དུ། །ཆུར་བྱུང་ཟླ་བ་འདྲ་བར་ཏེ། །ཉི་མ་ལྟ་བུར་ཁྱད་མེད་པ། །སྣང་བ་སེམས་ཅན་སྤྱོད་ཡུལ་དུ། །ཡང་དག་མཐའ་ལ་མི་རེག་པར། །ཏིང་ངེ་འཛིན་ལ་རབ་ཏུ་ལྡོག་།གྲུ་ལ་གནས་པའི་བུང་བ་དག་།གང་ཆེན་མཚོ་ལ་འགྲོ་བ་བཞིན། །གང་དུ་གྲུ་འགྲོ་དེར་རྒྱུག་ཏེ། དཔག་ཚད་ཤིན་དུ་མང་བར་ཡང ། །ཐུགས་རྗེས་ཉོན་མོངས་དམའ་བའི་ལུས། །སྡུག་བསྔལ་ཅན་གཟིགས་དེ་བཞིན་དུ། །དེ་དག་འབྱུང་བ་རབ་ཏུ་སྟོན། །ཕྱིར་ལྡོག་བདག་མེད་པ་ཡང་སྟེ། །འཇིག་པ་དག་ཀྱང་རྣམ་མཁྱེན་ནས། །ཟད་པའི་དུས་སུ་མི་གནས་པ། །གཟུང་དང་འཛིན་གྱིས་འཕངས་པའི་རྣམས། །གཟུང་དང་འཛིན་ལ་སྤྱོད་པའི་རྣམས། །གཟུང་དང་འཛིན་གྱིས་བསྐྱེད་པས་ན། །མཚན་མའི་གཞི་མེད་མཚན་ཉིད་མེད། །འཁོར་བའི་རྒྱུན་གྱིས་ཁྱེར་བའི་རྣམས། །ཡང་དང་ཡང་ཞིང་སྐྱེ་བ་ཡིན། །བཅགས་མེད་མཚོ་ཡི་གཏེར་གྱུར་ལ། །གཅིག་ལ་གཅིག་འཇུའི་སྤྲེའུ་ལྟར་ཡང ། །བྱེད་པ་གྲུ་ལ་གནས་ཀྱིས་མཐོང ། །འཇུ་བའི་གནས་དང་རྟེན་མེད་པར། །དེ་བཞིན་རྒྱལ་བ་རྒྱལ་སྲས་རྣམས། །སྲེད་པས་རྣམ་པར་དཀྲུགས་པ་ཡི། །རྣམ་རྟོག་སྡུག་བསྔལ་གནས་པའི་རྣམས། །ས་ཡི་གནས་ནས་ཉོན་མོངས་ཕྱིར། །རབ་ཏུ་འབྱུང་དང་ཕྱིར་ལྡོག་དང ། །
45.22a
སྦྱིན་དང་མཆོད་པ་དག་ཀྱང་འབྱུང ། །འདི་འདྲ་རྣལ་འབྱོར་ཅན་གྱི་ཆོས། །རྣམ་པ་སྣ་ཚོགས་བསྒོམ་པར་གྱིས།། །།འཕགས་པ་རྒྱན་སྟུག་པོ། བམ་པོ་གཉིས་པ། ཀུན་དུ་བཟང་པོ་མི་ཡི་བདག་།གཟི་བརྗིད་ཆེན་པོ་སྣ་ཚོགས་གཟུགས། །བྱང་ཆུབ་སེམས་དཔའ་སེམས་དཔའ་ཆེས། །རྡོ་རྗེའི་སྙིང་པོ་ལ་སྨྲས་པ། །འཐུན་པ་དག་ལ་དབང་བྱེད་དང ། །ལྷ་གནས་འཁོད་པ་གཞན་དག་དང ། །རིན་ཆེན་ཁང་པ་སྣ་ཚོགས་ན། །གང་ཡང་སྟུག་པོའི་དཀྱིལ་འཁོར་བའི། །རྒྱལ་སྲས་རྣལ་འབྱོར་ལྡན་པ་དག་།གང་གིས་སྟུག་ཅེས་བྱ་ཐོས་ཏེ། །ཐོས་ནས་ནན་ཏན་བྱེད་པའི་རྣམས། །གཞན་དུ་འགྱུར་ལ་གཞོལ་བ་དག་།གཞན་དུ་འགྱུར་བའི་ཚུལ་ཐོས་ཤིང ། །ཏིང་འཛིན་དེ་ཡི་ཚུལ་སོང་བ། །སྟུག་པོར་རིང་པོར་མི་ཐོགས་འགྲོ། །སངས་རྒྱས་ཡང་དག་འགྲོ་ལ་མོས། །འགྲོ་བ་འཛིན་དང་ཤུགས་འཛིན་དང ། །འཇམ་དཔལ་རྣམ་པར་འཕྲུལ་པ་དང ། །མཐུ་ཆེན་འཕགས་པ་འཇིག་རྟེན་དབང ། །ཟླ་བ་ལ་སོགས་གཟུངས་དབང་རྒྱལ། །བློ་གྲོས་ཤིན་དུ་ཞི་བ་དང ། །ལྟེ་བ་རྡོ་རྗེ་རྣལ་འབྱོར་རིག་།དྲུ་མ་ནམ་མཁའི་བདག་པོ་དང ། །ཕྱག་ན་རྡོ་རྗེ་བློ་ཆེན་དང ། །རྣམ་འབྱོར་ཅན་དང་རྒྱལ་སྲས་རྣམས། །གང་ཡང་བྱེ་བའི་ཞིང་དག་ནས། །ཆོས་མཉན་ཕྱིར་ནི་འོངས་པའི་རྣམས། །སྟུག་པོའི་རྒྱན་ལ་གཞོལ་བ་དག་།རྒྱལ་བ་མ་འོངས་མཐོང་ནས་ཀྱང ། །ཁོང་ནས་སྙིང་རྗེ་སྙིང་བརྩེ་སྟེ། །རྣལ་འབྱོར་ལྡན་ཅན་དབང་པོའི་གཙོ། །སྣ་ཚོགས་གཟུགས་ལ་རབ་ཏུ་སྨྲས། །རྣལ་འབྱོར་ཅན་གྱི་གཙོ་ལ་དྲིས། །འཇིགས་མེད་རྡོ་རྗེ་སྙིང་པོ་ལ། །རིན་ཆེན་ཁང་པ་སྣ་ཚོགས་དང ། །དབང་སྒྱུར་ཁང་པ་བཟང་པོར་ཡང ། །ཇི་ལྟར་གང་གིས་སྣ་ཚོགས་བྱས། །སྣ་ཚོགས་གཟུགས་ཅན་ཁྱོད་ཀྱིས་སྨྲོས། །དངོས་པོ་ཀུན་གྱི་སྣ་ཚོགས་ཉིད། །འགྲོ་བ་དག་གི་ཡང་རབ་འབྱུང ། །རྫ་ལ་སོགས་པའི་དངོས་པོ་དག་།ཇི་ལྟར་ཆུ་འཇིམ་ཐལ་སྦྱར་ལས། །ལས་སུ
45.22b
བྱ་བ་ཐམས་ཅད་བསྐྱེད། །འགྲོ་བ་འདི་དག་དེ་བཞིན་བྱས། །རྔ་དང་པི་བང་སྒྲ་ལ་སོགས། །ལས་སུ་བསྐྱེད་ལས་དབྱངས་འབྱིན་ཏེ། །དེ་བཞིན་འཇིག་རྟེན་འདི་ཡང་ཅི། །བསྐྱོད་པའི་ལས་ལས་ཀུན་འབྱུང་ངམ། །རང་བཞིན་གསུམ་པེ་ཇི་བཞིན་དུ། །དངོས་པོ་གཅིག་ལ་ཀུན་དུ་གནས། །ས་རྣམས་འདི་ལྟར་ཐམས་ཅད་དུ། །དངོས་དང་དངོས་ལ་རབ་ཏུ་གནས། །དེ་བཞིན་འདི་དག་ཀུན་ཀྱང་ཅི། །དངོས་པོ་གཅིག་ལ་རབ་གནས་སམ། །གང་ཕྱིར་འདི་ལྟར་རྒྱན་དག་སྣང ། །ཁམས་གསུམ་གཡོ་དང་མི་གཡོར་བཅས། །དགའ་ལྡན་མཚེ་མ་རབ་རྣམས་དང ། །དབང་སྒྱུར་རྣམས་ཀྱིས་བྱས་སམ་ཅི། །མི་འམ་ཅི་དང་དྲུ་མ་དང ། །གྱ་ནོམ་སྣང་བས་བྱས་སམ་ཅི། །འོག་མིན་ཐོར་ཚུགས་ཅན་གྱིས་སམ། །འོན་ཏམ་གཟུགས་མེད་རྣམས་ཀྱིས་བྱས། །ལྷ་རྣམས་བདག་པོ་ཐམས་ཅད་ཀྱིས། །གཅིག་ཏུ་འདུས་ཏེ་འདི་བྱས་སམ། །འཕྲུལ་པའི་སྤྲུལ་པ་དག་གིས་སམ། །རྒྱལ་བ་ཁྱུ་མཆོག་གིས་མཛད་དམ། །འོན་ཏམ་རྒྱལ་བ་རྒྱལ་སྲས་རྣམས། །ཞིང་གཞན་རྣམ་པར་བཞུགས་པས་སམ། །རྣལ་འབྱོར་ལ་མཁས་རྣལ་འབྱོར་ཅན། །སངས་རྒྱས་ཞིང་དུ་བཞུགས་རྣམས་ཀྱིས། །ས་རྣམས་ཐམས་ཅད་བྱས་སམ་ཅི། །གང་ལ་ནོར་པ་རབ་ཏུ་གནས། །གང་འདི་ནོར་པ་སྣང་བ་དག་།སྨིག་རྒྱུ་རྣམས་ལ་ཆུ་བཞིན་ཏེ། །རྫ་མའི་ཕྱོགས་ལ་ཡོན་ཏན་བཞིན། །འགྲོ་བ་གང་གི་ཕྱོགས་ལ་གནས། །ཡོན་ཏན་མི་འབྲལ་ཡོན་ཏན་ཅན། །ཡོན་ཏན་མེད་དང་ཡོན་ཏན་གནས། །མ་ཡིན་ཕན་ཚུན་འབྲེལ་པས་ན། །ཡོན་ཏན་ཚོགས་སུ་རྣམ་པར་གནས། །ནོར་པ་སྣ་ཚོགས་དེ་བཞིན་དུ། །ག་ལའང་དེ་བཞིན་གནས་ཡིན་ནམ། །འགྲོ་བ་རྣམ་པ་སྣ་ཚོགས་རྣམས། །ས་རྣམས་ལ་ནི་གང་སྣང་བ། །འོན་ཏམ་ཚངས་པས་ཕྱུང་བའམ། །འགྲོ་བ་མཐུ་བོ་ཆེ་ཡིས་སམ། །ཁྱུ་མཆོག་གིས་སམ་སྤུན་ཟས་སམ། །སེར་སྐྱ་ཡིས་སམ་རང་གིས་སམ། །གཅེས་པའི་རྐྱེན་ཀྱིས་བྱས་སམ་པ། །རང་བཞིན་གྱིས་སམ་དབང་པོས་སམ། །དུས་དང་ཕྱོགས་ཀྱིས་བསྐྱེད་པ་འམ། །
45.23a
འོན་ཏམ་མ་རིག་སྲེད་པས་སམ། །ལྷ་ཡི་དྲང་སྲོང་ཐེ་ཙོམ་ཟ། །ལྷ་ཡི་ཚོགས་ཀྱང་དེ་བཞིན་ཏེ། །གྲུབ་དང་དྲི་ཟའི་རྒྱལ་པོ་རྣམས། །ས་ལ་གནས་པའི་རྣལ་འབྱོར་ཅན། །འོན་ཏམ་འདི་དག་མིག་འཕྲུལ་ལམ། །འགྲོ་བ་དྲི་ཟ་འདྲ་ཞིག་གམ། །རྨི་ལམ་ཡིན་ནམ་སྨིག་རྒྱུ་འམ། །སྔོན་མེད་རྣམ་པར་རྟོག་ཡིན་ནམ། །གཟུང་དང་འཛིན་པའི་དངོས་པོར་ཡང ། །ཁ་གཉིས་སྦྲུལ་བཞིན་གནས་པ་འམ། །འོན་ཏམ་རང་བཞིན་འདི་མེད་དམ། །འཁྲུལ་འཁོར་རོ་ལངས་བཞིན་གནས་སམ། །མགལ་པ་བསྐོར་བ་འདྲ་བ་འམ། །འོན་ཏམ་སྐྲ་ཡི་ཚོགས་ལྟ་བུའམ། །བྱེད་དང་ལས་ཀྱིས་མ་བྱས་ཤིང ། །དབང་པོ་ཀུ་བེ་རས་མ་བྱས། །མཆོད་སྦྱིན་སྦྱིན་བསྲེག་མཆོད་འབྲས་སམ། །སྨྲང་གི་གཞུང་གི་ལམ་གྱིས་སམ། །རྒྱུ་རྣམས་ཤིན་དུ་ཕལ་ཆེ་བས། །ནན་ཏན་རྟག་པ་མ་ཡིན་ཏེ། །འགྲོ་བ་འཛིན་པ་མེད་པའང་མིན། །རྒྱུ་རྣམས་ཀྱི་ཡང་རྒྱུ་དག་སྟེ། །འགྲོ་བ་ངོ་བོ་ཉིད་ཀྱིས་གྲུབ། །ལས་ཀྱི་བག་ཆགས་རྣམས་ལས་བྱུང ། །རྣམ་ཤེས་བརྒྱད་པོའི་སྐྱེས་བུ་ནི། །ཀུན་གཞི་ཞེས་ཀྱང་བྱ་བ་སྟེ། །དེས་ནི་སྣ་ཚོགས་འདི་དག་ཀུན། །རྫ་མའི་འཁྲུལ་འཁོར་བཞིན་དུ་བསྐོར། །ཏིལ་བཀྲུམ་ཏིལ་མར་ཇི་བཞིན་དུ། །ལན་ཚཝའི་ཚ་བྲོ་ཇི་ལྟ་བར། །གཟུགས་ལ་མི་རྟག་ཉིད་ཇི་བཞིན། །སྐྱེས་བུ་འདི་ཡང་དེ་བཞིན་གནས། །ཇི་ལྟར་བསུང་ལ་སོགས་ལས་དྲི། །ཡོན་ཏན་རྣམས་ལ་ཡོན་ཏན་མཚན། །ཉི་ཟླ་གཉིས་ཀྱི་འོད་ཟེར་བཞིན། །དེ་ལྟར་སྐྱེས་བུ་གནས་པ་ཡིན། །དགོས་དང་བྱེད་པ་མེད་པ་སྟེ། །ཡོད་དང་མེད་ཀྱི་ཕྱོགས་ཀྱིས་སྤངས། །གཅིག་དང་ཐ་དད་མེད་པ་སྟེ། །མུར་འདུག་ཕྱོགས་ཀྱིས་རྣམ་པར་སྤངས། །རྗེས་སུ་འགྲོ་བའི་ཤེས་པ་མེད། །ནམ་ཡང་རྣམ་པར་མི་བརྟག་སྟེ། །གྲོལ་བའི་སོ་སོ་རང་རིག་པ། །སངས་རྒྱས་སར་སྐྱེས་ཐུབ་ཅན་གྱི། །གཟུང་དང་འཛིན་པ་མེད་པ་སྟེ། །སྔ་མེད་སེམས་དང་སེམས་བྱུང་གིས། །རྣམ་ཤེས་བརྒྱད་དང་བྲལ་བ་སྟེ། །
45.23b
ནམ་ཡང་རྣམ་པར་མི་བརྟག་པའོ། །དེ་ལ་གནས་པ་ཆུ་རླབས་བཞིན། །ཕན་ཚུན་མཚན་ཉིད་ཐ་མི་དད། །འབྱུང་ཞིང་ཕྱིར་ཡང་ལྡོག་པ་སྟེ། །དེ་ཡི་ལྡན་པ་རིག་པ་མིན། །ཇི་ལྟར་ཐུབ་པའི་རྣལ་འབྱོར་དང ། །རྫུ་འཕྲུལ་ཅན་གྱི་རྫུ་འཕྲུལ་བཞིན། །མཉམ་པར་བཞག་པས་རབ་ཏུ་མཐོང ། །རྣལ་འབྱོར་འགྲོ་བ་གཞན་གྱིས་མིན། །དེ་བཞིན་འཇུག་པའི་རྣམ་ཤེས་རྣམས། །དེ་དག་ཀུན་གཞི་ལྷན་ཅིག་གནས། །རྣལ་འབྱོར་ཅན་གྱིས་རྟག་ཏུ་མཐོང ། །སངས་རྒྱས་སངས་རྒྱས་སྲས་དེ་བཞིན། །དེས་ནི་འདི་དག་ཐམས་ཅད་ཀྱང ། །ཇི་ལྟར་ནོར་བུ་ཕུག་པ་རྣམས། །སྐུད་ལ་བརྒྱུས་དང་འཁོར་ལོ་བཞིན། །ལས་ཀྱི་རླུང་གིས་སྐོར་བྱེད་པ། །ཇི་ལྟར་རྫ་མཁན་འཁོར་ལོ་དང ། །ལག་དང་ཐལ་སྦྱོར་བསྐོར་བ་ཡིས། །ཀུན་དུ་བསྐོར་ཅིང་སྣོད་བྱེད་པ། །ཡོན་ཏན་སྣ་ཚོགས་རྣམ་པར་ལྡན། །དེ་བཞིན་རྣམ་ཤེས་བརྒྱན་ཀྱི་མི། །ཁམས་ཀྱི་གཟུགས་བརྙན་ལྷན་ཅིག་ཏུ། །ས་ནི་རྣམ་པར་བྱེད་པ་སྟེ། །ཕྱི་ནང་རྒྱུ་བའི་འགྲོ་བ་རྣམས། །གང་ལ་འཇིག་རྟེན་འདི་དག་ཀུན། །ནམ་མཁའི་སྐར་ཚོགས་ཇི་བཞིན་དུ། །གནས་ཤིང་རྣམ་པ་སྣ་ཚོགས་གནས། །རླུང་གི་རྟ་ཡིས་ཤིན་དུ་བསྐོར། །ཇི་ལྟར་མཁའ་ལ་བྱ་རྣམས་ཀྱི། །རྗེས་ནི་སྣང་བ་མ་ཡིན་ཏེ། །བར་སྣང་ཡོད་པ་མ་ཡིན་ནའང ། །བྱ་རྣམས་རྒྱུ་བའི་བྱེད་པ་མེད། །དེ་བཞིན་རྣམ་པར་ཤེས་པ་མི། །བདག་ཡོད་མ་ཡིན་གཞན་མེད་མིན། །རྣམ་དག་བར་སྣང་འདྲ་བ་དང ། །དབའ་རླབས་བཞིན་དུ་རབ་ཏུ་འབྱུང ། །བག་ཆགས་རྣམ་པའི་ཉེས་པ་ཡིས། །མི་ཆགས་པད་མོའི་ཟླ་བ་བཞིན། །པད་མོ་ལ་ནི་ཆུ་མེད་མིན། །ཆུ་ལ་ཟླ་གཟུགས་མེད་པ་ཡང ། །ཆུ་སོང་ཟླ་བ་ཡོད་པ་སྟེ། །པད་མོའི་མདབ་ལ་དེ་བཞིན་ཆུ། །མིག་ལ་བུད་མེད་གཞོན་ནུ་དག་།མིག་གིས་མཐོང་བ་ཇིར་མི་འགྱུར། །དེ་བཞིན་ཀུན་གཞི་རྣམ་པར་ཤེས། །ལས་རྣམས་ཅིག་ཅར་བྱེད་པ་སྟེ། །འགྲོ་བ་དག་གི་ལུས་ལ་ནི། །ཁྱབ་གནས་ས་བོན་ཀུན་ཅན་ནོ། །སྟུག་པོའི་སྤྲིན་དང་འདྲ་བར་ཡང ། །ས་རྣམས་ཡོག་པར་ཤིན་དུ་གནས། །
45.24a
ཚེ་དང་རྣམ་ཤེས་ཀུན་ནས་ཡོག་།དྲོད་ཀྱང་དེ་བཞིན་སྟོབས་ཆེན་གྱིས། །སྣ་ཚོགས་གཟུགས་ཀྱི་ལུས་ཅན་གྱི། །རྣམ་པ་སྣ་ཚོགས་གཟུགས་ཀྱང་སྟོན། །རྫ་མཁན་ཇི་ལྟར་ས་སྣོད་ལ། །སྤྱོད་པ་ཇི་བཞིན་དེ་ལྟའོ། །བ་ལང་སོགས་པའི་རུ་མཐོང་ཞིང ། །བོང་བུ་རཝ་ནི་མེད་པ་སྟེ། །མ་མཐོང་པར་ནི་མེད་པ་མེད། །བ་ལང་རཝ་ཡི་མེད་པ་ཡང ། །ཕྱིན་ཅི་ལོག་ཏུ་དམིགས་པས་མེད། །ཕྱིན་ཅི་ལོག་ཏུ་མནར་སེམས་ལ། །ཤིན་དུ་ཕྲ་བའི་རྡུལ་གཤིག་ན། །ཡོད་པ་དེ་དག་མེད་པར་འགྲོ། །མེད་པ་ཡོད་པའི་རྒྱུ་ལས་ཏེ། །མེད་པ་ཡོད་ཅེས་རྟོག་པ་ནི། །ཡོད་པ་མེད་ལས་བལྟས་པ་སྟེ། །ཕན་ཚུན་ལྟོས་པའི་རྒྱུ་ལས་སོ། །བློ་དང་རྟོགས་བྱ་མེད་པ་སྟེ། །ཁོང་དུ་ཆུད་པ་སྐྱེ་བ་མེད། །མགལ་བའི་འཁོར་ལོ་འཁོར་ལོ་མིན། །ཇི་ལྟར་སྐྲ་ཚོགས་མཐོང་བ་བཞིན། །དྲི་ཟའི་གྲོང་ཁྱེར་སྒྱུ་མ་དག་།ཅི་ཞིག་མཐོང་ནས་འབྱུང་བ་བཞིན། །བློ་ཡི་འབྱུང་བ་རྒྱུ་མེད་པར། །ཡོད་པ་མ་ཡིན་རྣམ་རྟོག་པ། །རྟོག་བྱ་རྣམ་པར་རྟོག་པས་བསྐྱེད། །ལུས་ཅན་རྣམས་ཀྱི་ཡིད་སྐྱེས་ཏེ། །མིང་དང་འདུ་ཤེས་འབྲེལ་བ་དང ། །རང་བཞིན་གཉིས་ཀྱི་བག་ཆགས་ཀྱི། །མི་ཡི་སེམས་ནི་རབ་ཏུ་འབྱུང ། །གྲུབ་པའི་དོན་ནི་མི་སྐྱེའོ། །ཐོག་མ་མེད་པའི་དུས་ན་བསགས། །གནས་ངན་ལེན་གྱི་ཡུལ་ལས་བྱུང ། །རབ་ཏུ་སྤྲོས་པས་བསྒོས་ཡིད་ལས། །སེམས་ཀྱི་ཚོགས་ནི་འབྱུང་བར་འགྱུར། །གཟུང་དང་འཛིན་པའི་དངོས་པོར་ཡང ། །ཀུན་དུ་སྐྱེ་བ་མི་ཡི་སེམས། །རྫ་ལ་སོགས་པའི་གཟུགས་ཀྱི་དབྱིབས། །སྣང་བ་གཞན་ཡོད་མ་ཡིན་ཏེ། །འདི་དག་ཐམས་ཅད་བློ་ཙམ་པས། །རྟོགས་བྱའི་དངོས་པོ་ཡོད་པ་མིན། །བློ་དང་རྟོགས་བྱའི་དངོས་པོར་ནི། །བདག་ཉིད་རབ་ཏུ་འཇུག་པ་སྟེ། །བྱིས་པ་རྣམས་ཀྱིས་མི་རིགས་པ། །བག་ཆགས་རྣམས་ཀྱིས་སེམས་མྱོས་རྣམས། །རྣམ་པ་བརྒྱད་དང་རྣམ་བདུན་དང ། །དུས་གཅིག་ཏུ་ཡང་འབྱུང་བར་འགྱུར། །སྔོན་མེད་བག་ཆགས་ལྡན་པས་ན། །ཀུན་གཞི་ས་བོན་ཐམས་ཅད་ཅན། །
45.24b
རྒྱ་མཚོའི་དབའ་རླབས་ཇི་བཞིན་དུ། །རླུང་གི་རྐྱེན་གྱིས་བསྐྱོད་པ་ལྟར། །གར་བྱེད་ཅིང་ནི་རབ་ཏུ་འབྱུང ། །རྣམ་པར་རྒྱུན་ཀྱང་མི་འཆད་དོ། །བློ་ཡི་འོད་པ་དེ་བཞིན་རྟག་།ཡུལ་དང་རེག་པས་བསྐུལ་བའི་ཕྱིར། །སྣ་ཚོགས་བདག་རྟོག་རྣམ་ཤེས་ཀྱིས། །བདག་ལ་བདག་གིར་འཛིན་པར་བྱེད། །ཇི་ལྟར་ས་ལ་རྣམ་རྟོག་མེད། །འགྱུར་མེད་རྣམ་པ་སྣ་ཚོགས་གཟུགས། །དགོས་པའི་རྣམ་པར་གྱུར་པ་ནི། །དེ་འདྲ་ཀུན་གཞི་རྣམ་ཤེས་ལའོ། །ཇི་ལྟར་མི་ཞིག་ལག་པ་ཡིས། །རང་གི་ལུས་ལ་མཉེད་པ་དང ། །ཕྱོགས་ཀྱི་གླང་པོ་བདག་ལུས་ལ། །བདག་གིས་སྣ་ཡིས་ཆུ་འཐོར་དང ། །ཇི་ལྟར་ཤེད་ཅན་ལ་ལ་དག་།བདག་གི་ལུས་ལ་སོས་འདེབས་པ། །དེ་བཞིན་བློ་ནི་བརྟགས་དོན་ལ། །དོན་གཉིས་ཚུལ་དུ་འཇུག་པའོ། །བློ་ཡི་ཡུལ་དུ་བྱ་བ་འདི། །ཁམས་གསུམ་རྣམ་པར་ཁྱབ་པར་གནས། །ཕྱི་དང་ནང་གི་བྱ་བར་ཡང ། །རྣལ་འབྱོར་མཁས་པས་མཐོང་བ་ཡིན། །སངས་རྒྱས་རྣམས་ཀྱིས་འདི་ཀུན་གཟིགས། །ས་ལ་ཇི་སྙེད་སྣང་བ་དག་།རྣམ་པ་སྣ་ཚོགས་དབྱིབས་ཀྱི་གཟུགས། །ས་ལ་རྣམ་པ་སྣ་ཚོགས་སོ། །ཆོས་འདི་ཡང་དག་བཤད་པ་དང ། །རྡོ་རྗེ་སྙིང་པོ་འཇིགས་མེད་པ། །མི་སྨྲའི་དངོས་ལ་དགར་གྱུར་ཏེ། །བསམ་གྱིས་མི་ཁྱབ་ཆོས་དབྱིངས་ཀྱི། །ལྷ་ཡི་བསམ་གཏན་མི་གཡོ་བ། །སངས་རྒྱས་སྤྱོད་ཡུལ་ཞུགས་པ་དང ། །སྟུག་པོ་ནས་ནི་འོངས་པའི་གཟུགས། །མཐོང་ནས་རྣལ་འབྱོར་ལམ་གནས་པ། །ཐུབ་པ་དེ་ཡི་ལྷ་རྫས་ལུས། །རྣལ་འབྱོར་བཏང་སྟེ་ཡང་གནས་སོ། །འདོད་དང་གཟུགས་དང་གཟུགས་མེད་དང ། །འདུ་ཤེས་མེད་པའི་གནས་རྣམས་ཀྱི། །མུན་པའི་ཚོགས་ནས་ཕྱིར་བྱུང་སྟེ། །སྟུག་པོ་དེ་ནས་འདིར་འོངས་སོ། །སངས་རྒྱས་རྣམས་ཀྱི་བཞུགས་པའི་གནས། སངས་རྒྱས་ཞིང་ནི་མཆོག་རབ་ནས། །གཟུགས་ཀྱི་རྣམ་པ་དུ་མ་ཡི། །སངས་རྒྱས་སྐུ་ཡང་རྣམ་བྱུང་ནས། །མི་ཡི་ཁམས་ན་རྣམ་པར་འཕྲུལ། །སུ་བློ་ཅི་འདོད་ཕན་པར་རོ། །སྟུག་པོ་ཡི་ནི་མིང་ཕྱུང་ནས། །རྒྱལ་བའི་སྲས་པོ་ཐམས
45.25a
ཅད་ཀྱང ། །ཕན་ཚུན་གཅིག་ལ་གཅིག་བལྟས་ཏེ། །གཅིག་ལ་གཅིག་ནི་རབ་སྨྲས་པ། །སྟུག་པོ་དྲི་མེད་བསོད་ནམས་ཏེ། །སྡིག་པ་ཐམས་ཅད་འཇིག་པར་བྱེད། །རྣལ་འབྱོར་ཅན་གྱི་གནས་ཀྱི་མཆོག་།སངས་རྒྱས་ཞིང་གི་དམ་པ་ཕུལ། །ཡུ་བུས་དེ་ཡི་སྒྲ་ཐོས་ཏེ། །ཐོས་ནས་བདག་ཅག་དགའ་བའི་ཡིད། །སྟུག་པོ་རྣལ་འབྱོར་ཅན་གནས་ཀྱི། །བརྟན་ལམ་བདག་ཅག་ཐོབ་པར་བྱ། །འོག་མིན་ཚངས་པ་ཐོར་ཚུགས་ཅན། །གཙང་མའི་གནས་ཀྱིས་རྣམ་སྤངས་པ། །ཞིང་གི་ངོ་མཚར་ལྷ་མོ་དང ། །སངས་རྒྱས་རྒྱལ་བའི་སྲས་ཀྱི་ཡང ། །ཚངས་པས་དེ་ཚེ་གསོལ་ནས་སུ། །གཙང་མའི་གནས་ཀྱི་འཇིགས་མེད་རྣམས། །དེ་དག་ཐམས་ཅད་སེམས་པ་ནི། །ཚངས་པ་སྟུག་པོར་འགྲོ་མི་འགྲོ། །ཚངས་པ་རྣལ་འབྱོར་ཆེན་པོ་ཅན། །མུན་པས་དེ་དག་བསླད་པར་གྱུར། །ཐུབ་པ་མི་ཤེས་ཐུབ་རིག་གི། །ཇི་ལྟར་གནས་ནི་ཐོབ་པར་འགྱུར། །ཚངས་པ་དེ་ན་ཀུན་དུ་སེམས། །བློ་ཡིས་ཚངས་པ་རིག་པའི་མཆོག་།འདོད་དང་གཟུགས་ཀྱི་བདག་པོ་དག་།རྒྱུ་བ་དེ་ན་མེད་པ་སྟེ། །ནམ་མཁའ་ཁང་པ་གནས་རྣམས་དང ། །འདུ་ཤེས་མེད་པ་དེ་བཞིན་ཏེ། །མུར་འདུག་གཞན་ལ་གྲགས་པ་ཡི། །རྣལ་འབྱོར་ཅན་རྣམས་དེར་མི་འགྲོ། །བདག་གིས་བྱ་བ་བྱས་སམ་ཅི། །བསམས་ཏེ་འདིར་ཡང་འོངས་པར་གྱུར། །བདག་འགྲོའམ་བརྟན་ཞིང་རྟག་པ་ཡི། །ཐེར་ཟུག་འདུས་མ་བྱས་སྟུག་ཏུ། །གལ་ཏེ་ཡང་ན་ཐུབ་པ་སྟེ། །རྣལ་འབྱོར་མངའ་བ་ལྷའི་ཡང་ལྷའི། །མཐུ་ཡིས་རྣལ་འབྱོར་མཁྱེན་རྣམས་ཀྱི། །ཕོ་བྲང་སྟུག་པོ་དེར་འགྲོ་འམ། །ཐུབ་པ་དེ་ལ་ཕྱག་འཚལ་ལོ། །དེ་སྐད་སྨྲས་ནས་ཐོར་ཚུགས་ཅན། །མཐོང་བ་ཤིན་དུ་འབར་བ་ཡི། །སངས་རྒྱས་ལམ་ན་བཞུགས་པ་རྣམས། །གསུངས་ཤིག་གསུངས་ཤིག་ཐུབ་པའི་རྣམས། །ཁྱེད་ལ་ཅི་འཚལ་ཅི་གྱིས་ཤིག་།སངས་རྒྱས་དབང་པོ་བཀའ་སྩལ་གསོལ། །སྟུག་པོ་ཇི་ལྟར་འཐོབ་པར་འགྱུར། །གཟུགས་ཡུལ་འདི
45.25b
ལས་ཕྱིར་ལོག་ཤིག་།དེར་འགྲོ་མེད་པ་གཟུགས་ཅན་རྣམས། །སྟུག་པོ་དེ་ནི་ཐུབ་ཆེན་ཡུལ། །བླ་ན་མེད་པའི་སངས་རྒྱས་ཞིང ། །འདུ་ཤེས་མེད་པས་མི་འཐོབ་སྟེ། །དེ་བཞིན་འདོད་པའི་ཁམས་དབང་གི། །མུར་འདུག་གཞན་ན་གྲགས་པས་ཀྱང ། །རྣལ་འབྱོར་རིག་ལམ་སྟུག་མི་འཐོབ། །ཚངས་པ་ཉིད་ཀྱིས་དེ་གསུང་ཐོས། །མཆོད་སྦྱིན་གསོལ་བའི་ཞལ་ན་སྟེ། །དེ་ནི་དེ་ནས་ཕྱིར་ལོག་སྟེ། །ཚངས་པའི་གནས་སུ་ཡང་སོང་ངོ ། །དེ་ཡི་ཕྱིར་ན་དེར་འགྲོ་བ། །ཚངས་པ་ཡིས་ཀྱང་མི་ཐོབ་པས། །གཟུགས་མེད་འདོད་དང་གཟུགས་ཅན་རྣམས། །དེར་འགྲོ་ཡོད་པ་ཡོང་མ་ཡིན། །ཅི་ཕྱིར་དད་པ་འདི་འདྲ་རྙེད། །སྟུག་པོའི་དཀྱིལ་འཁོར་མཐོང་བ་ཡང ། །རྣལ་འབྱོར་ཅན་གྱི་གནས་ཀྱི་མཆོག་།དེ་ཕྱིར་ངོ་མཚར་ཐོབ་པར་གྱུར། །སྒྱུ་མའི་ཏིང་ངེ་འཛིན་ཀྱི་ཡུལ། །རྣལ་འབྱོར་ཅན་གནས་སྟུག་པོ་དེ། །འདི་ནི་གཅིག་ནས་གཅིག་ཏུ་ཐོས། །དེ་ནས་བྱུང་བས་རྣམ་པར་བསྙད། །སྣ་ཚོགས་ཚིག་འདི་ཐོས་པ་ནི། །ཐུབ་ཅན་རྡོ་རྗེ་སྙིང་པོ་ཡི། །རྒྱལ་སྲས་ཁྱོད་ཀྱིས་སྨྲ་བར་གྱིས། །རྒྱལ་བའི་སྲས་རྣམས་ཉན་པར་འདོད། །དབང་སྒྱུར་རྒྱལ་པོ་དེ་བཞིན་གྱིས། །གཟི་བརྗིད་ཆེན་པོ་མ་ཐོགས་ཤིག་།མཚེ་མ་རབ་དང་དགའ་ལྡན་དང ། །གཙང་གནས་འཇིགས་པ་མེད་པའི་རྣམས། །ཐུབ་པའི་བཀའ་ནི་མ་ལུས་པར། །སྨྲ་བར་སུ་ཞིག་ནུས་པ་ཡོད། །གཞན་དུ་ཁྱོད་དང་སངས་རྒྱས་རྣམས། །ཐུབ་ཆེན་ཐུབ་པ་བསྣམས་པ་དག་།སངས་རྒྱས་ཡུལ་ནི་བསམ་མི་ཁྱབ། །མཆོག་གི་གཙོ་བོ་སངས་རྒྱས་ཀྱི། །རྣལ་འབྱོར་རྣལ་འབྱོར་མེད་པ་ལ། །སུ་ཡིས་ཇི་ལྟར་བསྟན་པར་ནུས། །མཚེ་མ་རབ་དང་ཤུགས་འཛིན་དང ། །དབང་སྒྱུར་རྒྱལ་བའི་སྲས་པོ་དག་།གཅིག་པའི་དབྱངས་སུ་ཡང་སྨྲས་ཏེ། །གསུངས་ཤིག་གསུངས་ཤིག་རྒྱལ་བའི་སྲས། །རྣམ་པར་འཕྲུལ་དང་འཇམ་དཔལ་དང ། །བྱམས་པ་མི་འམ་ཅི་ཡི་བདག་།རྣལ་འབྱོར་ཅན་གཞན་གང་དེ་ནི། །དེ་དག་སྨྲ་བ་སྨྲོས་ཤིག་སྒྲོགས། །
45.26a
ནམ་མཁའ་ལས་ཀྱང་སྒྲ་བྱུང་སྟེ། །ལྷ་དང་སྔགས་འཆང་རྣམས་ཀྱིས་ཀྱང ། །དེ་ནས་ཤིན་ཏུ་རྔ་བརྡུངས་པ། །གསུངས་ཤིག་གསུངས་ཤིག་རྒྱལ་བའི་སྲས། །དེ་དག་དེ་སྐད་སྨྲ་བ་ན། །ཐོར་ཚུགས་ཅན་གྱི་ཚངས་པ་འོངས། ས་འཁོད་ཀུན་ལས་སྨྲས་པ་ནི། །སྟན་གྱི་མཆོག་ལ་འདུག་ནས་དེ། །ངོ་མཚར་ལྷ་རྫས་འདི་ཅི་ཞིག་།ཐུབ་པ་རྣམས་ཀྱི་ཚོགས་འཁོར་ན། །རྣལ་འབྱོར་དབང་པོ་ཐམས་ཅད་དང ། །སློབ་མ་མཁས་པ་དེ་དག་ཀྱང ། །ཁྱུ་མཆོག་ཐུབ་ལ་འདྲི་བར་འདོད། །རྒྱལ་སྲས་རྡོ་རྗེ་དབང་པོ་ལ། །སྐབས་འདི་ཇི་ཞིག་སུ་ཞིག་ལ། །རྒྱལ་བའི་སྲས་ཀྱིས་གསུངས་པ་ཡིན། །ཀུ་རུའི་བུ་དང་དི་ལི་པ། །འཁོར་ལོ་འཁོར་བ་མན་མཐའ་ཏ། །ཡང་ན་ཡོ་བ་ན་ཤཝ་ལ། །ལྷ་རྫས་མི་ཡི་གཏམ་བརྗོད་དམ། །གཉི་བུ་ཨིག་ཤཝ་ཀུ་ལ་འམ། །དེ་བཞིན་གཞུ་སྟོང་བདོག་པ་ལ་འམ། །འོན་ཏམ་གནས་སྲུང་པོ་ལ་འམ། །འཁོར་ལོ་འཁོར་བ་གཞན་དག་ལའམ། །འདོད་དང་གཟུགས་དང་གཟུགས་མེད་ལའམ། །འདུ་ཤེས་མེད་གནས་གནས་པ་ལའམ། །ནམ་མཁའ་མཐའ་ཡས་རྣམ་ཤེས་སམ། །འོན་ཏེ་ཅུང་ཟད་མེད་པ་དག་།ཐུབ་ཆེན་རང་སངས་རྒྱས་དག་ལའམ། །ཉན་ཐོས་རྒྱལ་བའི་སྲས་ལ་འམ། །སངས་རྒྱས་ས་ལ་ཞུགས་པ་ཡི། །རྒྱལ་དབང་རྣམས་ལ་གཏམ་འདི་འམ། །འདི་ཅི་ལྷ་མིན་ལྷ་རྫས་སམ། །འོན་ཏེ་སྐར་མའི་དེ་བཞིན་ནམ། །ཇི་ལྟར་གྱུར་པ་ཁྱོད་ཀྱིས་གསུངས། །བདག་ཅག་སློབ་མ་ཕྱོགས་སུ་ཉན། །བླ་མའི་ཚིག་ནི་ཐོས་ནས་ཀྱང ། །རྒྱལ་བའི་སྲས་པོ་ཐམས་ཅད་དག་།ཕན་ཚུན་ཤིན་དུ་དཔྱོད་པར་བྱེད། །དེ་ཡི་ཏིང་འཛིན་འགྲོ་སོང་རྣམས། །རྒྱལ་བའི་སྲས་རྣམས་ཚིག་ཐོས་པ། །ཐོར་ཚུགས་ཅན་ལས་མངོན་དུ་སྟེ། །སློབ་མར་བཅས་པར་ཉན་འདོད་པ། །གཙང་གནས་བདག་པོ་ཉིད་ཀྱང་ཡིན། །ཐར་ཟླ་བློ་གྲོས་མི་ཟད་དང ། །ནམ་མཁའི་དབང་པོ་འགྲོ་བ་འཛིན། །མཐུ་ཆེན་སྤྱན་རས་གཟིགས་དབང་དང ། །རྣལ་འབྱོར་ཤེས་པ་གཟུངས་ཀྱི་དབང ། །ལྷ་ཡི་ཅོད་པན་རྣལ་འབྱོར་དབང ། །གཙུག་ན
45.26b
རིན་ཆེན་བློ་གྲོས་ཤིང ། །ལག་ན་རྡོ་རྗེ་ཞི་བའི་བློ། །ལག་ན་རིན་ཆེན་བློ་ཆེན་དང ། །འདི་དག་རྒྱལ་སྲས་གཞན་དག་ཀྱང ། །བྱེ་བའི་ཞིང་རྣམས་ཀུན་ནས་འོངས། །རྡོ་རྗེའི་སྙིང་པོ་བློ་ཅན་ལ། །དེ་དག་ཀུན་གྱིས་རྣམ་བལྟས་ནས། །པད་མོའི་སྟན་ལ་འཁོད་པའི་རྣམས། །རྒྱལ་བའི་སྲས་ལ་གསོལ་བ་འདེབས། །བློ་ཆེན་རབ་ཏུ་བཤད་པར་གྱིས། །རྒྱལ་བའི་སྲས་རྣམས་ཉན་པར་འདོད། །འདས་པ་དག་དང་མ་འོངས་ཚུལ། །ད་ལྟར་བྱུང་བའི་གང་ཚིག་ཀྱང ། །རྒྱུ་དང་དཔེ་ཡིས་རབ་གསལ་བར། །ཁྱོད་ཀྱི་ཞལ་ནས་བྱུང་བ་རྣམས། །གདོན་མྱི་ཟ་བའི་ཚིག་འདི་ཡང ། །ཁྱོད་ཀྱིས་རྒྱལ་བ་དེ་ཞལ་ནས། །ཐམས་ཅད་མ་ལུས་ཐོས་པ་སྟེ། །སྐྱོན་མེད་དེ་བཞིན་གཤེགས་པའི་མཁྱེན། །ཏིང་འཛིན་དབང་སྒྱུར་རྒྱལ་པོ་ཡིས། །ཐམས་ཅད་བློ་གྲོས་རྣམ་བལྟས་ནས། །རྡོ་རྗེ་སྙིང་པོ་འཇིགས་མེད་ཀྱིས། །རྣལ་འབྱོར་ཅན་ལ་ཚིག་སྨྲས་པ། །རྒྱལ་བའི་གསུང་རབ་མ་ལུས་པར། །སྨྲ་བར་སུས་ཀྱང་ནུས་པ་མེད། །དེ་ཡི་བྱིན་བརླབས་མ་གཏོགས་པར། །སངས་རྒྱས་རྣམས་དང་རྒྱལ་སྲས་ཀྱི། །སངས་རྒྱས་ཀུན་ལ་ཕྱག་འཚལ་ཏེ། །སངས་རྒྱས་བྱིན་གྱིས་བརླབས་པ་དག་།ནོར་བུ་རིན་ཆེན་སྣ་ཚོགས་ཁང ། །དབང་སྒྱུར་གནས་བཟང་འཁོད་རྣམས་ལ་འང ། །ཡེ་ཤེས་དད་པས་སྨྲ་བར་བྱ། །སངས་རྒྱས་རིགས་བྱེད་ཚུལ་ཡིན་ཏེ། །ང་ལས་འདི་དག་ཐམས་ཅད་ཉོན། །དེ་བཞིན་གཤེགས་ཀྱི་ཡེ་ཤེས་དགེ། །རྒྱལ་པོ་རྣམས་ལ་གཏམ་འདི་མིན། །མི་བདག་མཆོག་རྣམས་འདས་པ་འང ། །འདི་ནི་སངས་རྒྱས་རིགས་ཀྱི་གཏམ། །སྟུག་དཀྱིལ་ཕུན་སུམ་ཚོགས་རྣམས་ཀྱི། །རྣལ་འབྱོར་ཅན་གྱི་རྣལ་འབྱོར་ཡུལ། །སངས་རྒྱས་ཀུན་གྱི་ཕུན་སུམ་ཚོགས། །དེ་བཞིན་གཤེགས་ཀྱི་ཡེ་ཤེས་ཕྲ། །རྟོག་མེད་རྟོག་པ་སྤངས་པ་སྟེ། །སོ་སོ་རང་རིག་མཁས་པའི་ཡུལ། །བརྗོད་པ་དང་ནི་རྣམ་པར་བྲལ། །དེ་ནི་སྨྲ་བར་དད་པ་མེད། །བདག་གིས་དེ་ཡི་མཐུས་ཐོས་པ། །ལྷ་རྫས་ཀྱི་ནི་ཡེ་ཤེས་དང ། །ཏིང་ངེ
45.27a
འཛིན་གྱི་མེ་ཏོག་གིས། །རྫོགས་པའི་སངས་རྒྱས་གསུངས་པ་ནི། །སྟུག་པོའི་དཀྱིལ་དུ་མཉམ་བཞག་པས། །ཐམས་ཅད་ཕྱོགས་ལས་རྣམ་གྲོལ་ཞིང ། །ཡོད་དང་མེད་པའི་ཕྱོགས་སྤངས་པ། །ཡོད་དང་མེད་པའི་ཕྱོགས་དང་བྲལ། །དབུ་མའི་ལམ་ནི་དགེ་བ་སྟེ། །གཞན་དུ་འགྱུར་བའི་ལྷ་རྫས་ཚུལ། །སངས་རྒྱས་ས་ལ་འཇུག་པར་བྱེད། །དབུ་མའི་ལམ་པོ་དེ་ཉིད་ཀྱང ། །མཐའ་བཞི་རྣམ་པར་སྤངས་པ་སྟེ། །རྣམ་པར་རྟོག་མེད་དམྱིགས་མེད་པ། །སྟུག་ན་གནས་པས་ཤིན་དུ་མཐོང ། །ཐུབ་ཆེན་དེ་ཉིད་ལམ་ཤེས་པ། །བདག་མེད་ཡེ་ཤེས་མཁས་རྣམས་ཀྱིས། །བླ་མའི་ཚིག་འདི་ཐོས་པ་དང ། །རྣལ་འབྱོར་ཅན་རྣམས་ཐམས་ཅད་ཀྱང ། །རྐང་པ་གཉིས་ལ་མཉམ་བཏུད་ནས། །རྡོ་རྗེ་ཞེས་ལ་སྨྲས་པ་ནི། །རྣལ་འབྱོར་ཅན་རྣམས་ཉན་པར་བརྩོན། །སྐོམ་པ་རྣམས་ནི་ཆུ་ཚོལ་བཞིན། །ཁྱོད་ཀྱི་ཞལ་ནས་བཏུང་འདོད་པ། །ཚིག་གི་སྦྲང་རྩི་བུང་བ་བཞིན། །རྣལ་འབྱོར་དབང་པོ་ཡང་དག་གསུངས། །རྒྱལ་བའི་སྲས་རྣམས་ཤིན་དུ་ཉན། །རྣལ་འབྱོར་ཅན་རྣམས་རྣལ་འབྱོར་བློ། །ཡེ་ཤེས་དབང་པོ་འཕྲུལ་ཆེན་རྣམས། །ཞིང་གི་བདག་པོ་རྒྱལ་ཆེན་རྣམས། །རྣལ་འབྱོར་ལམ་ལ་རྟོག་བྱེད་པ། །བདེ་གཤེགས་བཀའ་ནི་ཉན་པར་རོ། །ཁྱོད་ཀྱི་ཞལ་ནས་རྣམ་བྱུང་བ། །རྣམ་པ་སྣ་ཚོགས་དཀའ་བའི་སྒྲ། །ཁོང་དུ་ཆུད་བྱེད་མཚན་བཟང་དང ། །ཚངས་པའི་ཡང་དག་གཤེགས་པ་དང ། །དབང་པོའི་དོན་གྲགས་ཁྱད་པར་དུའོ། །སྣ་ཚོགས་ཐུབ་པ་དེ་ཡི་གསུང ། །སྒྲ་ཡི་དོན་ལ་མཁས་པ་ཡི། །དེ་ཕྱིར་བདག་ནི་སྨྲར་མ་མོས། །བརྟག་བྱ་རྟོག་པ་རྣམ་པར་སྤངས། །བར་སྣང་རི་མོ་ཇི་བཞིན་དང ། །གྲིབ་མ་སྟོང་ལ་སོགས་པས་སྤངས། །དེ་སྟེ་སྣང་ན་རྨད་དུ་རུང ། །དེ་བཞིན་གཤེགས་པ་ཐུབ་པའི་བཀའ། །མཁའ་ལ་བྱ་རྗེས་ཇི་བཞིན་དུ། །བལྟ་བར་ཤིན་དུ་དཀོན་པ་བཞིན། །དེ་བཞིན་གཤེགས་པ་ཐུབ་པའི་བཀའ། །དེ་ནི་བསྟན་པར་མི་ནུས་སོ། །
45.27b
ས་རྣམས་གསུམ་དུ་མཁས་པ་ཡིས། །དཔེ་ཡིས་ཀུན་དུ་རབ་བསྟན་ཀྱིས། །དཔེ་དང་བྲལ་བའི་དེ་བཞིན་ཉིད། །ཐུབ་པའི་ཞལ་ནས་རྣམ་པར་འབྱུང ། །དེ་ཡི་ཚིག་ལ་དཔེ་མེད་དེ། །རྨི་ལམ་ལྟ་བུར་བདག་ལ་སྣང ། །རབ་རིབ་མགལ་པ་བསྐོར་བ་དང ། །སྐྲ་ཡི་ཚོགས་དང་དེ་བཞིན་འདྲ། །ཇི་ལྟར་སྒྱུ་མའི་གྲོང་ཁྱེར་དང ། །རླུང་ནི་ཤིན་དུ་བལྟ་དཀའ་དང ། །སྒྱུ་མ་སྨིག་རྒྱུ་འདྲ་བ་སྟེ། །རྣམ་རྟོག་གཉིས་པོ་རབ་ཏུ་སྤངས། །འོན་ཏམ་རྣལ་འབྱོར་སྣ་ཚོགས་པ། །ཐུབ་པའི་གསུང་ནི་དེ་བཞིན་ཏེ། །བདག་གིས་རྣལ་འབྱོར་ཅན་དབུས་སུ། །བཤད་པར་དེ་ཕྱིར་དད་པ་མེད། །འདི་དག་ཐམས་ཅད་མཁས་པ་སྟེ། །དེ་བཞིན་ཉིད་བློ་ཤེས་པའི་རྣམས། །སངས་རྒྱས་སྤྱོད་ཡུལ་བསམ་ཡས་པ། །དེ་ཕྱིར་སྨྲ་བར་དད་པ་མེད། །འོན་ཀྱང་བརྗོད་དོ་ཐུབ་པའི་རྣལ་འབྱོར་གྱིས། །དེ་རིང་བདག་ལས་ཉོན་ཅིག་རྒྱལ་སྲས་རྣམས། །སྣ་ཚོགས་ཚིག་གི་དོན་ལྡན་ཐུབ་པའི་བཀའ། །དཔེ་མེད་སེམས་དང་ཡིད་ལས་རྣམ་པར་འདས། །ཇི་ལྟར་བུང་བས་མེ་ཏོག་རོ་འཐུངས་ཤིང ། །ལྷག་མ་གཞན་དག་འཐུང་བར་བྱེད་པ་བཞིན། །སྙིང་ཀུ་ཐུབ་པའི་མཆོག་རྣམས་ཀྱིས་འཐུངས་ཏེ། །དེ་ཡི་འཐུངས་ལྷག་བདག་གིས་དེ་རིང་བཤད། །དེ་ནི་ཡིད་དང་ཚིག་གིས་ཀྱང ། །བསྟན་པར་ནུས་པ་མ་ཡིན་ལ། །ལྷ་ཡི་ལྷ་ཡི་ཡུལ་ཡིན་ཏེ། །མཁས་རྣམས་དགེ་བ་འཕེལ་བར་བྱེད། །མི་ཡི་གཟུགས་སུ་བྱས་ནས་སུ། །སངས་རྒྱས་ཤེས་ནི་མཚན་ལྡན་པ། །ཅོད་པན་ཅན་དང་གཞན་ལ་སྣང ། །གཞལ་མེད་ཁང་གནས་གཞན་ལ་ཡང ། །འོད་ཀྱི་དཀྱིལ་འཁོར་འཁོར་ལོ་དང ། །མཚན་བཟང་རྣམ་པ་སྣ་ཚོགས་སུ། །ས་ལ་སྣ་ཚོགས་སྣང་བ་ནི། མུར་འདུག་འདུས་པའི་དྲེགས་པ་སེལ། །དུས་རྣམས་བཞི་པོ་ཐམས་ཅད་དུ། །སངས་རྒྱས་རྣམས་ཀྱི་དུས་དུས་ལ། །སྟུག་ན་བཞུགས་པས་དུས་སྤྲུལ་ཏེ། །རྣམ་པར་ཕྱེ་བ་རབ་ཏུ་མཛད། །བཟང་དུས་དེ་བཞིན་གསུམ་པ་དང ། །
45.28a
གཉིས་ཀྱི་ཕ་རོལ་དུས་ངན་དང ། །དེ་དག་དུའང་ཅི་དགོས་པ། །ས་ལ་ལུས་ཅན་རྣམས་ཀྱིས་ཏེ། །ལྡན་པ་དེ་དག་ཐམས་ཅད་མཛད། །སྟུག་པོའི་དཀྱིལ་ན་བཞུགས་ཤིང་སྟེ། །སྟུག་པོ་དེ་ནི་དྲི་མེད་གནས། །སྦྱོར་ཆེན་རྣམས་ཀྱི་བདེ་བའི་གཞི། །ངན་དང་གཉིས་ཀྱི་ཕ་རོལ་མཚམས། །ཐུབ་པ་གཟུགས་ནི་རྣམ་བཟུང་ནས། །དྲི་མེད་སྟུག་ན་རྣལ་འབྱོར་ལྡན། །ཟླ་བ་བཞིན་དུ་འགྲོ་ལ་སྣང ། །སྣ་ཚོགས་འགྲོ་བ་གང་ཤས་ཀྱིས། །སྣ་ཚོགས་གཟུགས་སུ་མཛེས་པ་ནི། །གང་ལ་གང་སྣང་གང་གིས་ཀྱང ། །ཇི་ལྟར་གང་ལ་དེ་བདེ་བ། །དེ་དག་དེ་ལ་ཐམས་ཅད་དུ། །དེ་ཕྱིར་ཆ་ཡིས་མིག་ལ་གནས། །ཤེས་ཅན་ཡུལ་ཅན་ཐུབ་པ་ནི། །རྣལ་འབྱོར་མཁྱེན་པ་ཤེས་པས་སྣང ། །དབང་པོ་ཆེ་གཟུགས་གཞན་དག་དང ། །འཇུག་འདོད་ཀྱི་དང་དེ་བཞིན་གཞན། །སེར་སྐྱ་ཡི་ཡང་གཟུགས་སུ་སྟེ། །ཐུབ་པ་ལ་ལར་མཁའ་བཞུགས་པ། །ཤེས་བྱེད་ཤེས་ལ་ཡང་དག་སྣང ། །ས་ནད་ས་ནན་ད་ན་ལ། །ས་ནད་གཞོན་ནུ་མེ་དག་དང ། །སྒྲ་གཅན་མི་ཅི་ཏུམ་བུ་རུ། །ིག་ཤཝ་ཀུ་དང་ཟླ་བའི་རིགས། །ཐམས་ཅད་ས་ཡི་རྒྱལ་པོ་ལ། །ཐམས་ཅད་ས་ཡང་མཆོད་པ་སྟེ། །སྐུ་ནི་སུ་སུ་ཅི་འདོད་བཞིན། །ལ་ལར་མུར་འདུག་སྤྱོད་སྤྲུལ་ཏེ། །སྟོན་པ་འགྲོ་བ་རྣམས་ཀྱིས་མཐོང ། །ཚུལ་གྱི་གཙུག་ལག་སྟོན་པར་ཡང ། །ཅི་བཞིན་རིགས་པར་རབ་སྟོན་ཅིང ། །རྡོ་རྗེ་དངུལ་དང་གསེར་དག་དང ། །ཟངས་དང་ལྕགས་ཀྱི་འབྱུང་ཁུང་དང ། །རོ་ཉེ་ཞ་ཉེ་མུ་ཏིག་དང ། །པད་མ་ར་དང་ཨན་ད་རྙིལ། །བཻ་དཱུརྱ་དང་ཤེལ་དག་དང ། ། སྨ་གར་བ་མུ་ས་ར། །ཚུལ་དང་བརྟགས་པ་ཐམས་ཅད་ལྡན། །མཁན་པོ་བླ་མ་ཀུན་འགྲོ་དང ། །གང་གིས་ལུས་ཅན་སུ་སུ་ཅིར། །ས་ལ་བདེ་བ་སྐྱེ་བ་བཞིན། །དེ་ལ་དེ་བདེ་ཐམས་ཅད་དུ། །ཐུབ་པའི་རྣལ་འབྱོར་རབ་ལས་བྱུང ། །ལྷ་ཡི་བུ་མོས་མི་སྐྱོད་དོ། །དེ་བཞིན་དྲི་ཟའི་བུད་མེད་ཀྱིས། །འདོད་ཁམས་དབང་པོའི་བུད་མེད་དང ། །
45.28b
དེ་བཞིན་ཀླུ་ཡི་བུད་མེད་ཀྱིས། །མི་ཅི་ལྷ་མིན་བུ་མོ་དང ། །གནོད་སྦྱིན་བུ་མོས་དེ་བཞིན་ནོ། །དེ་ནི་འདོད་པའི་ཡུལ་ལས་རྒྱལ། །གཟུགས་ཅན་རྣམས་ཀྱི་ཡུལ་དེ་བཞིན། །ནམ་མཁའ་རྣམ་ཤེས་མཐའ་ཡས་དང ། །ཅུང་ཟད་མེད་པའང་དེ་བཞིན་ཏེ། །འདུ་ཤེས་ཡོད་མིན་མ་ཡིན་གྱི། །གནས་ན་རྣམ་པར་རྨོངས་པ་མེད། །ཀུན་ཆུ་ལ་སོགས་འདི་དག་ལམ། །རྣལ་འབྱོར་ཅན་གྱི་འཆིང་བའི་དངོས། །མ་ཞི་མི་དགེ་གཞན་དག་ཀྱང ། །སྲོག་ཆགས་རྣམས་ཀྱིས་ཡོད་པ། །ལུས་ཅན་རྣམས་ཀྱི་ལུས་ཀྱི་ཡུལ། །སྟུག་ན་གནས་ལ་སྟུག་ན་མེད། །ཞིང་དེ་དྲི་མེད་བསོད་ནམས་ཏེ། །སྟུག་པོ་སྙིང་པོ་ཤིན་དུ་མཛེས། །དེ་བཞིན་ཐར་པ་ཐར་ཤེས་ལ། །ཞིང་གི་ནང་ན་ཞིང་གི་མཆོག་།སངས་རྒྱས་རྣམས་ཀྱི་ཞིང་རབ་སྟེ། །སྟུག་པོ་དེ་ནི་ཡུན་དུ་བརྟག་།མངའ་རྣམས་བཅུ་པོ་དེ་དག་དང ། །སྟོབས་དང་མངོན་མཁྱེན་ཏིང་ངེ་འཛིན། །ཡིད་ཀྱི་རྒྱུ་ལས་བྱུང་བའི་སྐུས། །སངས་རྒྱས་དེ་ན་རྣམ་པར་མཛེས། །ས་རྣམས་བཅུ་པོ་ཀུན་བསྒོམས་ཏེ། །རྣམ་ཐར་བདེན་པ་སྟོང་པ་ཉིད། །མཚན་མེད་སྨོན་པ་མེད་པ་དང ། །ཕ་རོལ་ཕྱིན་དྲུག་དེ་བཞིན་ཏེ། །བསྒོམ་དང་སྦྱིན་དང་ཚུལ་ཁྲིམས་དང ། །ཤེས་རབ་རྣམས་ཀྱིས་དེ་སྐུ་འཐོབ། །ཡན་ལག་གཟུགས་ཀུན་མེ་ཏོག་གི། །འདུས་མ་བྱས་པ་སངས་རྒྱས་སྐུའོ། །རྟོག་མེད་རྟོག་དང་བྲལ་བ་སྟེ། །བདག་མེད་ཡིད་དང་དབང་པོ་རྣམས། །ཤེས་རབ་དབང་པོའི་སྒོར་ལྡན་ཞིང ། །མཚན་གྱིས་ཀུན་ནས་ཤིན་དུ་བསགས། །སྦྱིན་དང་ཚུལ་ཁྲིམས་ལ་སོགས་ཀྱི། །དཀར་པོའི་ལས་རྣམས་བྱས་པས་ན། །སངས་རྒྱས་སྐུ་ཡི་གནས་ཀྱི་མཆོག་།སྟུག་པོའི་རིས་སུ་འཐོབ་པར་འགྱུར། །དེ་བཞིན་གཤེགས་པའི་ལྷ་རྫས་གནས། །ཉི་ཟླ་རྣམ་པར་སྤངས་པ་སྟེ། །རྒྱུ་སྐར་སྐར་ཕྲན་སྣང་བ་དང ། །ཟླ་བ་དུས་དང་ལྟད་མོ་མེད། །རྣལ་འབྱོར་ཅན་གྱི་འོད་འཆར་དང ། །སངས་རྒྱས་རྣམས་ཀྱི་འོད་ཀྱིས་ཀྱང ། །ཀུན་ནས་བཟང་པོའི
45.29a
སྟུག་པོ་དེ། །ཉི་མ་བཞིན་དུ་ཀུན་ནས་སྣང ། །དུས་ཀྱི་འབྲི་བ་དེ་ན་མེད། །ནད་རྣམས་གང་ཡང་ཡོད་པ་མིན། །འཆི་རྒ་མེད་པའི་གནས་ཡིན་ཏེ། །སྟུག་པོ་དེ་ནི་ཞིང་གི་མཆོག་།ཐམས་ཅད་གཟུགས་ལྡན་ཞི་བའི་གནས། །དྲི་མེད་མཐོང་བའི་ཆོས་ཅན་གྱི། །སངས་རྒྱས་ཞིང་སྟུག་བསོད་ནམས་ཏེ། །ལྷ་རྣམས་ཀུན་ཀྱིས་སྨོན་པར་བྱ། །རྣལ་འབྱོར་ཅན་རྣམས་ཁྱད་པར་དུ། །ས་དང་ས་ལ་གནས་པ་དག་།སེམས་ཙམ་རང་བཞིན་དངོས་པོ་རྣམས། །གང་ཕྱིར་རབ་ཏུ་བསྟན་པས་ན། །ཡིད་དང་སེམས་དང་ཀུན་གཞིའི་ཚུལ། །རང་བཞིན་གསུམ་པོ་དེ་བཞིན་ཏེ། །ཆོས་ལ་བདག་མེད་རང་བཞིན་ཅན། །གནས་ནི་གཞན་དུ་འགྱུར་བ་སྟེ། །ལུས་ནི་ཤིན་དུ་གནས་གྱུར་པས། །ཐུབ་པ་རྣམས་ནི་དེར་འདོང་སྟེ། །རྣལ་འབྱོར་ཅན་གྱི་གནས་ཀྱི་མཆོག་།སྟུག་པོ་ཞིང་རབ་དམ་པར་རོ། །སྟུག་པོར་འཇུག་པ་ཞེས་བྱ་བ་སྟེ་ལེའུ་གསུམ་མོ།། །།ལུས་ནི་རྫས་དགུའི་རང་བཞིན་ཅན། །འདུས་བྱས་རྡུལ་ཕྲན་ཚོགས་ཡིན་ཏེ། །ཡོན་ཏན་ཚོགས་ཀྱིས་རྣམ་སྣ་ཚོགས། །འབྱུང་དང་འབྱུང་གནས་ཚོགས་ཡིན་ཏེ། །ཁུ་ཆུ་ཁྲག་ལས་ཀུན་འབྱུང་བ། །སྔོན་མེད་རྣམ་པར་འཕེལ་བ་སྟེ། །སྟེང་གཟུགས་འོག་ཏུ་འགྲོ་བ་ཡིན། །སྡུག་བསྔལ་འཁྲུལ་འཁོར་ཐོག་མ་མེད། །ལས་ཀྱི་རྣམ་པ་བརྒྱས་ཀྱང་གཡོགས། །དུག་གི་ཤིང་གི་ས་བཞིན་དུ། །དཔའ་དང་རྡུལ་གྱིས་དེ་བཞིན་དུ། །མུན་པས་ཀྱང་ནི་གསོས་པ་སྟེ། །ལམ་རྒྱུད་དོག་པར་ཤིན་དུ་འཕྱན། །དུས་ཀྱིས་བསྐུལ་ཅིང་རབ་ཏུ་སྐྱེ། །ཡོན་ཏན་ལས་ཀྱིས་འདའ་བ་ནི། །ཕྱུགས་དང་མི་ཡི་མངལ་སྐྱེས་པས། །ཀླུ་དང་ཡི་དགས་ཤ་ཟ་དང ། །འབར་བ་ལྷ་ཡི་ནང་དུ་ཡང ། །སྐྱེ་འམ་ལྷ་མིན་འཇིག་རྟེན་ནམ། །སྔགས་འཆང་རིགས་སུ་དེ་བཞིན་ཏེ། །འོན་ཏམ་རྣལ་འབྱོར་ཅན་དབུས་སུ། །བསམ་གཏན་ཞིག་ཅིང་མངོན་སྐྱེ་བ། །འཁོར་ལོ་འཁོར་རིགས་དམ་པར
45.29b
ཡང ། །བར་བར་དུ་ནི་སྐྱེ་བར་འགྱུར། །སྐྱེས་ནས་རིག་པ་འཛིན་པ་ནི། །གང་ཚེ་དབང་པོ་འཕེལ་བ་ན། །སུ་ཡི་གང་གི་གང་ཚེ་ལས། །ལྷན་ཅིག་སྐྱེས་པ་རབ་བྱུང་ཞིང ། །ལྷན་ཅིག་སྐྱེས་པའི་ལས་ཚུལ་གྱིས། །ལམ་དང་ལམ་དུ་རབ་ཏུ་འཇུག་།བརྟག་མེད་རྟོག་དང་བྲལ་བ་ཡི། །གང་ཚེ་ཆོས་ནི་མངོན་རྟོགས་ན། །ཐར་པ་རྣམས་ཀྱི་ཐར་གསུམ་སྟེ། །ཡི་གེ་ཡི་གེ་མེད་བྱས་པའོ། །འབྱུང་བ་ཐམས་ཅད་རྒྱུ་ཡི་ཚོགས། །དེ་ནི་འོད་སྣང་མཆོག་ཡིན་ཏེ། །ཡང་དག་བླ་ནས་བླར་སྦྱངས་པ། །སྟུག་པོའི་དཀྱིལ་ན་རྣམ་པར་གནས། །བྱེ་བའི་ཞིང་དང་མཉམ་ལུས་ཀྱིས། །སྤྲུལ་པས་ཁྱབ་པར་བྱས་ཤིང་གནས། །དེ་སྟེ་དེ་ཤེས་ཡོད་ན་ནི། །དོག་པའི་ལམ་ནས་འགྲོལ་བར་འགྱུར། །དེ་ལྟའི་སྐྱེས་བུ་སྐྱེས་པ་ནི། །ཁྱད་པར་ཤེས་ཤེས་རྣམ་པར་བརྗོད། །ལྷ་ཡི་ལྷ་ཡིས་ཡང་དག་གསུངས། །རྒྱལ་བའི་སྲས་ཀྱིས་མདུན་བྱས་ཤིང ། །མངལ་གྱི་སྐྱེ་བ་འབྱུང་བ་ནི། །བྱས་པ་ཡིན་ནོ་མི་རྣམས་ཀྱི། །མ་རིག་སྲེད་དང་ལས་སྐྱེས་མིན། །ཉོན་མོངས་ལས་ལས་ཤིན་དུ་བྱུང ། །མཚན་མ་མེད་པ་མངོན་གྱུར་ཅིང ། །མཚན་མ་མེད་ལས་རབ་འདས་ཏེ། །ཡི་གེ་མེད་པ་དེ་བྱུང་ནས། །སྤྲོས་པ་ཐམས་ཅད་རབ་བྲལ་ཞིང ། །སྟུག་པོའི་དཀྱིལ་དུ་རབ་ཏུ་འགྲོ། །དམིགས་ལས་སེམས་ཞིག་འགྱུར་བ་ནི། །རྣལ་འབྱོར་ཅན་གྱི་སྒྲ་རྨོངས་པས། །རྩེད་མོ་ལ་སོགས་ལྷ་རྫས་དང ། །མཐོ་རིས་བུད་མེད་བསྟེན་རྨོངས་ཀྱིས། །གང་ཚེ་ཐུབ་ཆེན་མ་འདུག་པ། །དེ་ཚེ་སེམས་ནི་འབྱུང་བ་སྟེ། །ལམ་ལས་སྐྱོད་ཅེས་བྱ་བ་ཡི། །ཏིང་འཛིན་འདོད་པའི་ཁམས་སྐྱེས་པ། །གཟུགས་དང་གཟུགས་མེད་འགྲོ་བ་ན། །ཏིང་ངེ་འཛིན་ནི་རབ་ཏུ་སྐྱེ། །སེམས་ཅན་འདུ་ཤེས་མེད་སོང་ན། །ཏིང་ངེ་འཛིན་ལས་བྲལ་བར་འགྱུར། །ནམ་མཁའ་རྣམ་ཤེས་མཐའ་ཡས་ཀྱི། །ཏིང་ངེ་འཛིན་ལ་དབང་མེད་འགྱུར། །རྒྱས་ལ་གང་ཚེ་ཐུབ་དབང་གྱུར། །གཉིས་དང་བྲལ་བས་བྱང
45.30a
བ་ཡི། །སེམས་ནི་མངོན་པར་ནི་འབྱུང་ངོ ། །དེ་བདེན་དེ་ནི་རྣལ་འབྱོར་ཏེ། །བསམ་གཏན་པ་ཡི་བསམ་གཏན་ཡིན། །བསམ་གཏན་རྟག་ཏུ་བསམ་གཏན་བྱ། །དེ་སྟེ་སྟུག་དཀྱིལ་འདོད་ནའོ། །མངལ་གྱི་སྐྱེ་བ་འབྱུང་བ་ཞེས་བྱ་བ་སྟེ་ལེའུ་བཞིའོ།། །། རྣམ་བརྒྱད་རྣམ་པ་དགུ་ཡི་སེམས། །མ་རིག་འཇིག་རྟེན་རྒྱུ་ཡིན་ཏེ། །འདི་ནི་སེམས་དང་སེམས་འབྱུང་མཐུ། །གང་གནས་རྣམ་པ་སྣ་ཚོགས་པའོ། །དེ་ཡི་མཐུས་ཀྱང་འཇུག་པ་ནི། །རྣམ་ཤེས་རྣམས་དང་དབང་པོ་རྣམས། །མ་རིག་ལ་སོགས་རྣམ་པ་འདི། །རྩ་བའི་སེམས་ནི་བརྟན་གནས་པ། །ཡན་ལག་བཅུ་གཉིས་ཐམས་ཅད་དང ། །འབྱུང་བ་རྣམས་དང་འབྱུང་གནས་དང ། །ཡུལ་དང་དབང་པོ་འཇིག་རྟེན་དང ། །སྐད་ཅིག་འཇིག་པའི་རྒྱུ་ཡིན་ནོ། །ཐུབ་པ་ལྷ་ཡི་ལྷས་གསུངས་པ། །རྒྱུ་དང་འབྲས་བུ་སྤངས་པ་སྟེ། །ཚངས་པའི་འཇིག་རྟེན་མཐར་ཐུག་གི། །འགྲོ་བ་དབང་པོར་བཅས་པ་འདི། །འཇིག་རྟེན་བཙལ་བས་མ་བསྐྱེད་དེ། །བདག་ཉིད་རྫ་མ་བཞིན་འཇིག་པ། །ནང་དང་ཕྱི་དག་རྟག་པར་ཏེ། །འགྲོ་བ་གནས་དང་གཡོ་བ་དག་།ལྷ་ཡི་ལྷ་ཡི་ཡུལ་ཡིན་ཏེ། །ས་ལ་སུས་ཀྱང་མི་མཐོང་བ། །མུར་འདུག་གྲགས་པ་གཞན་དག་སྟེ། །ཐུབ་གྲགས་མཚན་མ་ཅན་གྱིས་སོ། །ཕན་ཚུན་བཅིངས་པས་བཅིངས་པ་ནི། །སྲེད་པ་སྣ་ཚོགས་རྣམ་པས་ཏེ། །རྣམ་ཤེས་མྱུར་དུ་འགྲོ་བས་ན། །སེམས་ཀྱི་རྣམ་པར་མི་རྟོགས་སོ། །ལོ་སྟོང་མཐའ་རུ་ཐུག་པ་ཡི། །མཆོད་སྦྱིན་རྣམས་ཀྱིས་ཚངས་པའི་ཐབས། །ཐོབ་ནས་སླར་དུ་ལྡོག་པ་ནི། །ས་མ་ཡ་རུ་རིགས་སེམས་པ། །འདོད་སྦྱོར་བཀག་སྲོག་འབྲས་བུ་དང ། །གང་ཡང་ཟླ་བའི་འབྲས་བུ་དང ། །མེར་གཞུག་པ་ཡི་འབྲས་བུ་དང ། །གང་གཞན་མཆོད་སྦྱིན་འབྲས་བུ་དང ། །ཕྱུགས་བཅིང་བ་ཡི་འབྲས་བུ་ཡང ། །ཚངས་པའི་འཇིག་རྟེན་ནས་ལྡོག་གོ། །ཆོས་གསུམ་ཅན་གྱི་འགྲོ་བ་དག་།
45.30b
ཅི་ཉེས་མི་རིག་ཐོར་ཚུགས་ཅན། །ཡོན་ཏན་གསུམ་གྱི་འབྲུ་འབྲེལ་བ། །ཆུ་སྐྱེས་བཞིན་དུ་སྙིང་པོ་མེད། །འདི་ཡིས་ཐར་པ་མི་རྙེད་པ། །སྟུག་པོ་དེ་བཞིན་གཤེགས་པའི་གནས། །དེ་ནི་རྣལ་འབྱོར་གྱིས་འཐོབ་སྟེ། །སྟུག་པོ་རྣལ་འབྱོར་རིག་པའི་གནས། །དེ་བས་ཚུལ་གཅིག་ཚངས་པའི་བདག་།རྣལ་འབྱོར་ཅན་རྣམས་འཇུག་བརྩོན་པར། །འདི་ལ་བདག་གཉེན་གང་དག་ཀྱང ། །སྐྱེ་ཞིང་འཆི་བ་ཡོད་མེད་དེ། །མི་ཆོད་གཞིག་ཏུ་མེད་པ་ནི། །ལུས་ཅན་ཀུན་གྱི་རྣམ་པར་ཤེས། །བག་ཆགས་ཀྱིས་ནི་མི་གོས་པ། །སྔོན་མེད་དུས་ནས་བྱུང་བས་སོ། །ཡིད་ཀྱི་གནས་ངན་ལེན་བསགས་པའི། །སྤྲོས་པས་ཀྱང་ངོ་ཅིར་མི་འཇུག་།ཇི་ལྟར་ལྷ་རྫས་ཆུ་སྐྱེས་དང ། །ནམ་མཁའ་ལ་ཡང་ཕྱག་དར་དང ། །སྤྲིན་གྱི་དྲི་མས་ཉི་ཟླ་ལ། །དེ་བཞིན་མི་གོས་རྣལ་འབྱོར་ཅན། །མ་བཤོལ་རབ་ཏུ་བརྩོན་པར་གྱིས། །ཐམས་ཅད་སངས་རྒྱས་བྱིན་གྱིས་བརླབས། །རྣལ་འབྱོར་བདེ་གཤེགས་ལྷ་ཡི་རྫས། །རྣལ་འབྱོར་ཅན་གྱི་ཚུལ་སྐྱེད་པ། །ཚུལ་ཁྲིམས་ཅན་གྱི་ཚུལ་འཐུངས་ཏེ། །ཡེ་ཤེས་ཅན་གྱིས་ཤེས་འཐུངས་ཤིང ། །མཆོག་གི་ཡེ་ཤེས་འཐུངས་ནས་ཀྱང ། །འཁོར་བ་ལས་ནི་འདའ་བར་གྱིས། །འདི་ལ་ཁམས་རྣམས་གང་ཡང་མེད། །ཕུང་པོ་ལྔ་དང་རྣམ་ཤེས་ཀྱང ། །མིང་དང་གཟུགས་དག་རྒྱུར་བྱས་ཤིང ། །ལུས་ཅན་རྣམས་ཀྱི་ཡིད་ཀྱང་སྐྱེ། །ཇི་ལྟར་མེ་ནི་ཤིང་དབང་གིས། །འབར་ཏེ་འབར་བར་རྟོག་པ་མེད། །དེ་བཞིན་ཕུང་པོ་ཤིང་རྟ་སྟོང ། །ཅི་ཕྱིར་རྣལ་འབྱོར་འཇུག་མི་བྱ། །རི་དགས་སྲེད་དང་དྲི་ཟ་ཡི། །གནས་དང་སྒྲ་ཚོགས་སྣང་བ་རུ། །རི་དགས་བུས་པ་ལ་སོགས་མཐོང ། །ཡང་དག་མ་ཡིན་ལྟས་བསླད་པས། །དེ་བཞིན་ཡུལ་ལས་བྱུང་བའི་སེམས། །ཁབ་ལོང་ལྟ་བུར་འཁོར་བ་སྟེ། །གང་ཡང་འདི་ལ་དངོས་མེད་པ། །འབྱུང་བ་རྣམས་དང་འབྱུང་བ་ཡི། །གཡོ་བ་དྲོ་བ་བཤེར་སྲ་བར། །བུས་པ་རྣམས་ནི་རྟག་ཏུ་རྟོག་།འབྱུང་བ་སེམས་ཀྱི
45.31a
ཚོགས་ལས་ན། །ཅི་ཕྱིར་རྣལ་འབྱོར་འཇུག་མི་བྱ། །ཇི་ཙམ་མ་ཞིག་ལུས་ཡོད་དང ། །ཇི་ཙམ་དུ་ནི་བློ་འབྱུང་བ། །དེ་བར་རྣལ་འབྱོར་ཡེ་ཤེས་ལ། །མ་གཤོལ་བསམ་གཏན་རབ་ཏུ་གྱིས། །ཐམས་ཅད་སྒྱུ་མ་རྨི་ལམ་ལྟར། །འབྱུང་བ་གསུམ་ཀུན་རབ་ཏུ་ལྟོས། །སྨིག་རྒྱུ་ཆུ་ཟླ་ལྟ་བུ་ན། །ཅི་ཕྱིར་རྣལ་འབྱོར་འཇུག་མི་བྱ། །ཇི་བཞིན་དྲི་ཟའི་གྲོང་ཁྱེར་ན། །འགྲོ་བའི་སྤྱོད་པ་རྣམ་པར་སྣང ། །དེ་བཞིན་ལུས་ལ་ཕུང་པོའི་སྤྱོད། །ཅི་ཕྱིར་རྣལ་འབྱོར་འཇུག་མི་བྱ། །རྨི་ལམ་དག་ན་འགྲོ་བའི་ཚོགས། །ཇི་ལྟར་རྨི་ལམ་རྨི་བས་མཐོང ། །དེ་བཞིན་ཕུང་པོའི་གནས་ཡིན་ན། །ཅི་ཕྱིར་རྣལ་འབྱོར་འཇུག་མི་བྱ། །ས་འདི་ས་ལ་སོགས་པའི་ཚོགས། །འདུས་པ་རྡུལ་གྱི་ཕུང་པོ་ཡིན། །འདི་སེམས་སེམས་བྱུང་ཚོགས་ཡིན་པར། །རྒྱལ་བའི་སྲས་རྣམས་ཀུན་ལྟོ་ཤིག་།འབྱུང་བ་ཆེན་པོ་བཞི་པོ་རྣམས། །ཕན་ཚུན་ཀུན་ནས་འདུས་པ་སྟེ། །གདེག་པ་ལ་སོགས་ལྡན་པ་ཡིན། །ཅི་ཕྱིར་རྣལ་འབྱོར་འཇུག་མི་བྱ། །འདི་ནི་རླུང་དང་མཁྲིས་པས་མྱོས། །རོ་བསླབ་ལྟ་བུར་གནས་པ་སྟེ། །བྱེད་པ་གང་ཡང་ཡོད་པ་མིན། །ཅི་ཕྱིར་རྣལ་འབྱོར་འཇུག་མི་བྱ། །དབུ་བའི་གོང་བུ་ལྟ་བུ་ཀུན། །འགྲོ་བ་གནས་ཤིང་གཡོ་བའི་རྣམས། །སྨིག་རྒྱུ་འདྲ་བའི་འདུ་ཤེས་སུ། །རྫ་ལ་སོགས་པ་ཤིན་དུ་རྟོགས། །ཚོར་བ་ཆུ་བུར་ལྟ་བུ་སྟེ། །བདེ་དང་མི་བདེར་རྟོག་པ་ཡིན། །ཆུ་ཤིང་འདྲ་བའི་འདུ་བྱེད་རྣམས། །ཞིག་པ་གྲུགས་པ་སྙིང་པོ་མེད། །རྣམ་པར་ཤེས་པ་སྒྱུ་མ་འདྲ། །དེ་ཡི་དངོས་ལ་གནས་པ་མེད། །རྩཝ་ཤིང་གནས་པ་ཇི་བཞིན་ན། །ཅི་ཕྱིར་རྣལ་འབྱོར་འཇུག་མི་བྱ། །འདི་ནི་རྨི་ལམ་རྣམ་མྱོས་འདི། །འདི་ནི་སྒྱུ་མ་བུས་པ་འདྲིད། །འདི་དག་ཐམས་ཅད་སྨིག་རྒྱུ་སྟེ། །དེ་བཞིན་དྲི་ཟའི་གྲོང་ཁྱེར་རོ། །གང་རྒྱན་འདི་དག་སྣང་བ་ཡི། །ཁམས་གསུམ་འགྲོ་དང་མི་འགྲོ་བ། །དེ་ཀུན་བློ་ཡིས་རྟོགས་བྱ་བ། །འཇིགས་མེད་རྒྱལ་བའི་སྲས་རྣམས་ཀྱིས། །ཉེས་པའི་རྒྱུ་ནི་རྩཝ་དང་བཅས། །ཡེ་ཤེས་མེ་ཡིས་རབ་བསྲེགས་ན། །
45.31b
ལྷ་རྫས་བདེ་བ་ཡོད་པར་འགྲོ། །རྣལ་འབྱོར་ཅན་གནས་སྟུག་པོར་ཡང ། །འཇིགས་མེད་འདི་ནི་མཚན་མ་མེད། །མཚན་མ་བཅིངས་པའི་ངོ་བོ་ཅན། །མཚན་མ་མེད་པ་རྟག་ཏུ་བདེ། །མཚན་མ་སེམས་ཀྱི་སྤྱོད་ཡུལ་ལོ། །སེམས་ཀྱི་སྤྱོད་ཡུལ་བདེན་པ་མིན། །བདེན་པ་བློ་གྲོས་སྤྱོད་ཡུལ་ཏེ། །སེམས་ནི་ཤེས་རབ་སྤྱོད་ཡུལ་ཏེ། །མཚན་མར་གནས་པ་མེད་པའོ། །ཀྱེ་མ་མཚན་མ་འདི་ཀུན་ཡིན། །གནས་གསུམ་ཚངས་པར་བསྒྲགས་པ་སྟེ། །མཚན་མ་མིང་དང་ཡུལ་རྣམས་དང ། །སྒྲ་ལ་སོགས་པ་ཀུན་བརྗོད་པའོ། །དབང་པོ་ཀུན་གྱི་ཡུལ་རྣམས་ནི། །ལུས་ཅན་རྣམས་ཀྱི་འཆིང་བའི་རྒྱུ། །འཆིང་བར་བྱ་དང་འཆིང་དང་རྒྱུ། །གང་འགྲོལ་གང་གིས་འགྲོལ་བ་དང ། །ཐར་དང་ཐར་པའི་བདེ་བ་དང ། །མཐོང་བའི་ཆོས་ལ་གནས་པ་དང ། །བདག་མེད་པ་རུ་ཤེས་ཉིད་ཀྱང ། །འདོད་ཆགས་བཅོམ་པར་གྱུར་པ་ནའོ། །དེ་ནས་མི་བདག་རིན་ཆེན་གཙུག་།བློ་ཆེན་བྱང་ཆུབ་སེམས་དཔའ་ཡིས། །རྣལ་འབྱོར་ཅན་ཀུན་དབང་ལ་སྨྲས། །རྡོ་རྗེའི་སྙིང་པོ་འཇིགས་མེད་ལ། །བྱེ་བའི་ཞིང་རྣམས་ཐམས་ཅད་ལ། །རྒྱལ་སྲས་ཁྱོད་ནི་བརྩོན་པ་སྟེ། །རྒྱལ་བ་རྣམས་ལ་ཁྱོད་ཚད་དེ། །རྣལ་འབྱོར་ཅན་ལ་ཉེ་བར་གནས། །རྣལ་འབྱོར་ཐེ་ཚོམ་བཅོད་པ་སྟེ། །དཔེ་རྣམས་གྲུབ་པར་བྱ་བའི་ཕྱིར། །བརྟག་བྱ་ཡན་ལག་ཐམས་ཅད་དག་།ལུས་ཅན་རྣམས་ཀྱི་ལུས་སྐྱེས་པ། །ཚུལ་ནི་སྒྲ་ཡིས་བརྗོད་པར་མཛད། །ཚིགས་ཏུ་བརྗོད་པར་ཅིར་མི་བགྱི། །གནད་དང་ཟུང་གིས་རྣམ་པར་མཛོད། །མི་ཟིན་པ་ཡི་རྒྱུ་རྣམས་དང ། །བགབ་ཟུངས་དོར་གྱིས་གཞོམ་པར་གྱིས། །ཕུང་པོའི་རྒྱུ་རྣམས་བསལ་བར་མཛོད། །ཡང་དག་འགྱུར་བ་མེད་པ་དང ། །དགེ་བ་ཡིས་ཀྱང་མཁས་པས་སོ། །རིང་པོ་མི་ཐོགས་ཐར་པ་འཐོབ། །ཕུང་པོའི་རྒྱུ་རྣམས་བསྲེགས་ནས་སུ། །ཆོས་མིན་ཆོས་ཀྱི་ཚེ་འབྱུང་སྟེ། །འདི་དང་གཞན་དུའང་འཐོབ་པར་འགྱུར། །ཤེས་པས་སྡུག་བསྔལ་རྣམས་ལས་འགྲོལ། །སྲེད་པ་ཡིས་ནི་རྟག་ཏུ་བཅིངས། །མི་ཤེས
45.32a
ལས་དང་སྲེད་པ་ཡིས། །ལུས་ཅན་རྒྱ་ཆེར་ཤིན་དུ་བྱས། །གཟུགས་དང་སྣང་བ་ཡིད་བྱེད་དང ། །རྣམ་ཤེས་ཡུལ་ལ་མངོན་གྱུར་པས། །མྱུར་ཕྱིར་ཁོང་དུ་མི་ཆུད་པ། །སྤྱོད་ཡུལ་དུ་ནི་སེམས་རྒྱུ་བའོ། །ཡིད་སྔོན་འགྲོ་བ་ཆོས་རྣམས་ཏེ། །ལུས་ཅན་ཀུན་གྱི་དེ་བཞིན་ནོ། །ཡིད་འགྲོ་ཡིད་ནི་གཅེས་པ་དག་།ཡིད་དུ་འོང་བས་ཅིར་མི་བཤད། །གང་དང་གང་གི་རྫས་ཀྱིས་སུ། །མི་རྣམས་སྟུག་པོར་འགྲུབ་པ་ཡི། །དེས་ནི་དེ་ཡི་དངོས་འགྱུར་བ། །སྣ་ཚོགས་གཟུགས་ཀྱི་ནོར་བུ་བཞིན། །ཇི་ལྟར་ནོར་བུ་སྣ་ཚོགས་གཟུགས། །ཚོན་དང་འབྱོར་ན་རྣམ་པར་མཛེས། །རྣལ་འབྱོར་ཅན་དབུས་ཁྱོད་དེ་བཞིན། །དེ་བཞིན་གཤེགས་གཟུགས་སྣ་ཚོགས་ཀྱིས། །དབང་སྒྱུར་ཕོ་བྲང་དགེ་བ་ན། །ཐམས་ཅད་དག་ན་སྣང་བ་ནི། །རྒྱལ་བའི་སྲས་ཀྱི་མདུན་དུ་བྱས། །མྱ་ངན་འདའ་དང་མྱ་ངན་འདས། །སྟུག་པོ་མཐར་མཆོག་ཡེ་ཤེས་ཏེ། །ཆོས་ཀྱི་དབྱིངས་དང་རྫུ་འཕྲུལ་ཡང ། །སྟུག་དེ་རྣལ་འབྱོར་ཅན་གྱི་གནས། །དེ་ནི་མཚོན་གྱིས་མི་ཆོད་དེ། །དེ་ནི་མེས་ཀྱང་མི་ཚིག་པ། །མི་ཆོད་པ་དང་མི་ཕྱེད་པ། །དེ་ནི་ཡུལ་གནས་རྟག་པའོ། །དེ་ནི་ཆུས་ཀྱང་མི་གཤེར་ཏེ། །རླུང་གིས་ཀྱང་ནི་མི་སྐམ་མོ། །དེ་ནི་རྫ་ལྟར་འཇིག་པ་དང ། །ནན་ཏན་བྱས་ཤེས་བྱུང་བ་མིན། །རྟག་པ་བརྟན་པ་མི་འཇིག་པ། །སྐྱེ་ཅན་ཀུན་ཀྱི་རྣམ་པར་ཤེས། །རྒྱུ་ཡིས་སུན་དབྱུང་མ་ཡིན་པ། །འདྲ་དང་མི་འདྲ་རྣམས་ཀྱི་སྟེ། །དམ་བཅས་ཡན་ལག་རྣམས་ཀྱི་ཡང ། །མཐའ་མ་ཐུག་པ་མེད་པར་འགྱུར། །དམ་བཅས་པ་ཡི་དམ་བཅའ་དང ། །རྒྱུ་ཡི་ཁྱད་པར་རྒྱུ་དག་སྟེ། །དེ་བས་དེ་ལ་རྒལ་དུ་མེད། །རྟོག་པ་ཅན་གྱི་སྤྱོད་ཡུལ་མིན། །རྣམ་པར་ཤེས་པ་གཞན་གྱུར་ན། །དེ་ནི་སྟུག་པོ་སེམས་སྤངས་པའོ། །རྟོག་ཅན་རྣམས་ཀྱི་ཡུལ་མ་ཡིན། །དེ་བཞིན་གཤེགས་པའི་ཕོ་བྲང་སྟུག་།མ་སྐྱེས་སྔོན་དང་ཐ་མ་མེད། །ལྷུན་གྱིས་གྲུབ་པའི་སྟོབས་ལས་བྱུང ། །རྒྱུ་མེད་པ་དང་ལས་སྐྱེས་མིན། །དབང་པོ་ཆེན་པོས་བྱས་པའང་མིན། །གཟུགས་མེད་གཟུགས་དང་འདོད་པ་ལས། །ཡང་དག་འདས་ཏེ
45.32b
གནས་པ་ཡིན། །འདོད་པའི་ཁམས་ལས་འདས་ནས་སུ། །གཟུགས་དང་གཟུགས་མེད་འདུ་ཤེས་མེད། །མུན་པའི་རྒྱུ་ལས་རབ་འདས་ནས། །སྟུག་པོའི་ཞིང་ནི་རྣམ་པར་མཛེས། །ཕྱོགས་འདི་མཁའ་ལས་གྲུབ་པ་སྟེ། །རྒྱུ་ཅན་རྣམས་ཀྱི་སྤྱོད་ཡུལ་མིན། །ཡོད་དང་མེད་པའི་ཕྱོགས་དང་བྲལ། །གཅིག་དང་གཞན་པ་སྤངས་པའོ། །གཅེས་པ་དང་ནི་རང་བཞིན་མིན། །འདོད་རྒྱལ་དང་ཡང་དབང་པོ་མིན། །ཁྱུ་མཆོག་གི་ཡང་ཕྱོགས་མ་ཡིན། །དེ་བཞིན་རིག་ཅན་གསུམ་གྱི་ཡང ། །རྡུལ་གྱི་རྐྱེན་ལས་བྱུང་མ་ཡིན། །སྒྲ་རྣམས་ཀྱིས་ཀྱང་བརྗོད་དུ་མེད། །ངོ་བོ་ཉིད་ཀྱིས་བསྐྱེད་པ་མིན། །འདོད་རྒྱལ་གྱིས་ཀྱང་མི་རྙེད་དོ། །མ་རིག་ལས་དང་སྲེད་པས་མིན། །མི་ཤེས་ལས་ཀྱང་སྨོས་པ་མིན། །ཁུར་མེད་ཁུར་གྱི་ཡུལ་ཡིན་ཏེ། །འདི་ནི་སངས་རྒྱས་རྣམས་ཀྱི་ཡུལ། །ལྷ་རྫས་དེ་བཞིན་གཤེགས་ཀྱིས་མཁྱེན། །ས་བཅུ་དག་ཏུ་རྣམ་པར་སྦྱངས། །རྣལ་འབྱོར་ཅན་གྱི་སྣ་ཚོགས་ཡུལ། །དོན་གྱི་དམ་པ་སྟོན་པའོ། །ལས་ཅི་ལས་མིན་གང་ཞེས་ཏེ། །བྱིས་པ་རྣམས་ནི་མྱོས་པར་གྱུར། །ལས་དང་ལས་མིན་བཤད་པ་ནི། །རྣལ་འབྱོར་ཅན་རྣམས་བདེར་གྱུར་པ། །སྣ་ཚོགས་སྣང་བ་རང་སེམས་ཏེ། །ལུས་ཅན་རྣམས་ཀྱི་བདག་ཉིད་གཉིས། །ཕྱི་དང་ནང་དང་ཐམས་ཅད་དུ། །གཟུང་དང་འཛིན་པ་ལྟ་བུར་གནས། །སེམས་ཀྱིས་སེམས་ནི་མཐོང་ཡིན་ཡང ། །ཁོང་དུ་མི་ཆུད་བུས་པ་རྣམས། །ཁ་གཉིས་སེམས་དེ་ལུས་ཅན་གྱི། །ཡིན་ཀྱང་ཤེས་པར་མ་གྱུར་པ། །བདག་གི་བྱེད་པའང་དེ་བཞིན་བྱེད། །ཡུལ་ལྟ་བུར་ཡང་རབ་ཏུ་སྣང ། །རྫ་མ་ལ་སོགས་གཟུགས་སུ་གནས། །རྫ་ལ་སོགས་པའང་ཡོད་པ་མིན། །འདི་ཡི་དོན་ལ་ཐུབ་པ་དག་།རྣལ་འབྱོར་ཉམ་ཆུང་རྣམ་པར་མྱོས། །རྣལ་འབྱོར་དེ་ཡང་མི་རྟོགས་པ། །བདག་གི་རྣམ་རྟོག་ལམ་གནས་པས། །སེམས་འདི་གཉིས་ཀའི་བདག་ཉིད་དེ། །མེ་ལོང་ཟླ་བ་བཞིན་དུ་གནས། །ཇི་ལྟར་རབ་རིབ་རབ་རིབ་ཅན། །སྐྲ་ཚོགས་ལྟོས་ཤིག་ལྟོས་ཤིག་ཀྱེ། །ཕན་ཚུན
45.33a
དག་ཏུ་སྟོན་མོད་ཀྱི། །བདག་ཉེས་དབང་པོ་ཞན་བྱུང་གི། །འདི་ན་གང་ཡང་སྐྲ་ཚོགས་མེད། །རྒྱན་དང་ནོར་བུ་དག་ཀྱང་ངོ ། །ཡོད་དང་མེད་པའི་དངོས་པོ་ལྟར། །དབང་པོའི་ཉེས་པས་མཐོང་བ་ཡིན། །དེ་བཞིན་རྟོག་ཅན་དབང་གིས་འདི། །བདག་གི་བློ་ནི་རྫ་ལྟར་གནས། །ཚངས་ལ་སོགས་པའི་གནས་ཐུག་པར། །རྟོག་པ་མེད་པས་རབ་ཏུ་འཛིན། །གང་འདི་མང་པོ་སྣང་བ་དག་།སྣ་ཚོགས་ཚངས་ལ་སོགས་པའི་མཚན། །སྣ་ཚོགས་ཐམས་ཅད་བདག་གི་སེམས། །རྫ་ལས་སོགས་པའི་ཡོན་ཏན་མཚན། །ནང་དུ་གྱུར་པའི་གཟུགས་རྣམས་དང ། །མཐོ་རིས་གནས་པའི་གནས་རྣམས་དང ། །གང་འདི་ཕྱི་ནང་བྱ་བ་རྣམས། །ཐམས་ཅད་སེམས་ལས་བྱུང་བའོ། །རྒྱན་སྟུག་རྣལ་འབྱོར་གང་ཡིན་པ། །དེ་ནི་གུད་ན་ཡོད་པ་མིན། །རྣལ་འབྱོར་ཅན་གྱི་བསོད་ནམས་ཀྱིས། །ཞུགས་པ་འདི་ལ་བསླབ་པར་གྱིས། །དབང་སྒྱུར་ལྷ་རྫས་གནས་དག་དང ། །ཡང་ན་གཟུགས་ཅན་རྣམས་གནས་དང ། །འདུ་ཤེས་མེད་པའི་གནས་སུ་འམ། །འོག་མ་ཡིན་པའི་གནས་སུ་ཡང ། །ཅུང་ཟད་མེད་དང་རྣམ་ཤེས་དང ། །འདུ་ཤེས་ཡོད་པ་མ་ཡིན་དང ། །སྣ་ཚོགས་ཀྱི་ནི་གནས་དག་ཏུ། །འདོད་ཆགས་ཀྱི་ནི་ཕྱོགས་བཤིག་ན། །ཁྱོད་ནི་མྱུར་དུ་དེར་གནས་པ། །སྟུག་པོ་རྣལ་འབྱོར་ཅན་གནས་སུ། །རྒྱལ་བའི་སྲས་ཀྱིས་མདུན་བྱས་ཏེ། །སྟུག་པོ་དེར་ནི་འགྲོ་བར་གྱིས། །རྣལ་འབྱོར་དེ་ལ་སྤྱད་པར་གྱིས། །བདག་གི་གཉེན་གྱིས་ཅི་ཞིག་བྱ། །བདག་གི་གཉེན་ནི་རྟག་ཏུ་འཆིང ། །འཁོར་བའི་ལམ་རྒྱུད་རྒྱུ་ཡང་ཡིན། །དབང་པོ་རྣམས་ནི་གཡོ་བ་སྟེ། །བུད་མེད་རྣམས་ལའང་བློ་འཁྲུལ་པས། །ཁུ་ཆུ་ཁྲག་མནམ་མི་ཞིམ་པའི། །འཇི་བར་སྲིན་བུ་སྐྱེས་གྱུར་པ། །དགུ་འམ་བཅུ་ཞིག་པ་དང་ཡང ། ཁུ་ཆུ་སྨིན་ནས་མངོན་པར་སྐྱེ། །དབང་པོ་རྣམས་ཀྱིས་ཀུན་ཡོག་པ། །སྲིན་བུ་གཡོ་བ་ཇི་བཞིན་ཏེ། །རིམ་པ་དེ་ཡི་ཚུལ་གྱིས་ན། །ཇི་སྲིད་སེམས་ཅན་གནས་བར་དུའོ། །ལུས་ཅན་རྣམས་ཀྱི་སྐྱེ་ལ་ལྟོས། །ཚེ་ཚེར་དེ་དག
45.33b
བྱུང་བ་སྟེ། །ཕ་དང་མ་ནི་སྟོང་དག་དང ། །བུ་དང་ཆུང་མ་བརྒྱ་དག་ཀྱང ། །ཐམས་ཅད་གནས་སུ་རྙེད་པ་ནི། །ལུས་ཅན་སྐྱེ་ལ་གནས་པའོ། །རྨི་ལམ་དག་ན་བུ་མེད་པའི། །མོ་ཤམ་བུ་འབྱུང་ཇི་བཞིན་དུ། །བུ་རྙེད་པ་ཡི་དགའ་བ་དང ། །རྨི་ལམ་རྨི་ཚེ་དེ་ཉིད་ལྡན། །དེ་ནི་ཤིར་གྱུར་དེ་ནས་དེ། །རྨི་ལམ་ཤེས་ནས་སད་པ་དང ། །རྨི་ལམ་གྱི་ནི་བུ་ཤི་མེད། །གང་ཡང་སྐྱེ་བ་ཡོད་པ་མིན། །ཆུ་བོ་རབ་ཚལ་བུ་དང་ནི། །གྲོང་ཁྱེར་དག་དང་རི་རྣམས་དང ། །གྲོང་དང་ཚོང་འདུས་ཕྱུགས་ལྷས་དང ། །དཀའ་ཐུབ་ཚལ་བུའི་གནས་རྣམས་དང ། །འགྲོ་བ་དག་གིས་རྒྱས་པའི་ཡུལ། །ཞིང་དང་བ་ལང་ལུག་གིས་གང ། །འཇིག་རྟེན་གྱི་ནི་ལོངས་སྤྱོད་ཀྱང ། །དེ་དང་འདི་དང་གཞན་དུའང་སྣང ། །ཇི་ལྟར་འཇིག་རྟེན་འདིར་རྒྱུག་པ། །རྨི་ལམ་རྒྱུག་པ་དེ་བཞིན་ཏེ། །གདེག་དང་བསྐུམ་ལ་སོགས་པ་ཡང ། །དེ་དང་འདིར་ཡང་སྣང་བ་ཡིན། །མཁས་པས་རྨི་ལམ་གང་མཐོང་བ། །སྐྱེ་བ་མེད་ཅིང་འཆི་མེད་པར། །སླར་སད་ནས་སུ་སེམས་པ་ནི། །བུ་མོ་མཁས་པ་དག་ཡིན་ནོ། །ཇི་ལྟར་རི་དང་དེའུ་རྣམས་ཀྱི། །གྲིབ་མ་ཀུན་དུ་སྣང་བ་བཞིན། །དེ་ལྟར་འཇིག་རྟེན་རྨི་ལམ་ཡང ། །མཁས་པ་རྣམས་ནི་དེ་བཞིན་བསམ། །ཇི་ལྟར་སྐྱེས་བུ་ཉལ་བ་ཞིག་།བུད་མེད་ལྷན་ཅིག་རྩེ་དགའ་རྨི། །སྣ་ཚོགས་ཡིད་དུ་འོང་བ་དང ། །ལྷ་རབ་བཙུན་མོ་མཉམ་པ་དང ། །གཞན་ཡང་སྣ་ཚོགས་དངོས་པོས་ཏེ། །སད་ནས་རྣམ་པར་སེམ་པ་ནི། །ཅི་ཞིག་བདེན་ནམ་རྨི་ལམ་ཡིན། །རྨི་ལམ་བུད་མེད་ལྷན་ཅིག་ཏུ། །རྩེས་ནས་ཕྱིར་ནི་བདག་སད་དེ། །འདི་བརྫུན་བུས་པ་སླུ་བ་ཡིན། །དེ་བཞིན་བདག་གི་གཉེན་པ་ཀུན། །རྒྱལ་སྲིད་སྟོབས་ཀྱང་དེ་བཞིན་ནོ། །དམག་པ་གྱོས་པོ་བུ་དག་དང ། །མ་དང་ཕུ་ནུ་པོ་དག་ཀྱང ། །རྨི་ལམ་ལྟ་བུར་རིག་བྱ་སྟེ། །རྣལ་འབྱོར་སྦྱར་བར་ཇིར་མི་བྱ། །དཀའ་ཐུབ་ཚལ་དང་ཞིང་རྣམས་དང ། །རི་དང་རི་ཡི་སྨན་གཤོང་དང ། །འོ་མ་འབྱུང
45.34a
དང་མ་ལ་ཡ། །ལྷུན་པོ་བྱིན་དང་དབང་ཆེན་དང ། །གངས་ཀྱི་རི་དང་ཀེའི་ལ་ས། །ཆར་འབབ་ལ་ཡང་གང་གནས་དང ། །འཛམ་བུ་འབྲས་བུའི་ཁུ་བ་དང ། །གང་དག་བདུད་རྩི་ཟ་བ་དང ། །ཕན་དུ་ཀམ་བལ་པར་ཡ་ཏྲ། །ཀོ་བི་དར་ན་གང་འཁོད་དང ། །རི་རབ་ནང་ན་གང་གནས་དང ། །དཔག་བསམ་ཤིང་ལ་གནས་པ་དང ། །རང་རྒྱལ་རྒྱལ་བའི་སྲས་རྣམས་དང ། །ཉན་ཐོས་རྫུ་འཕྲུལ་ཆེན་པོ་དང ། །ཐམས་ཅན་ཀྱི་ནི་རྣལ་འབྱོར་འདི། །གང་འབྱུང་འབྱུང་བ་རྣམས་ཀྱི་སྟེ། །པད་མོའི་གནས་སུ་བརྟེན་བཅས་ཏེ། །སྐྱིལ་མོ་ཀྲུང་དུ་མཉམ་བཞག་ཅིང ། །རྟག་ཏུ་རྣལ་འབྱོར་སྦྱང་བར་གྱིས། །འདོད་དང་བདེ་ལས་རྣམ་པར་དབེན། །དབང་པོ་དབང་པོའི་དོན་གྱི་རྣམས། །ཐམས་ཅད་ལས་ཀྱང་ཕྱིར་བཟློག་ཅིང ། །ལྕགས་ཀྱུས་གླང་པོ་ཇི་བཞིན་དུ། །སེམས་ནི་མཉམ་པར་བཞག་པར་གྱིས། །འཇིག་རྟེན་འཇིག་རྟེན་འདས་བསམ་གཏན། །གང་ཡང་དེ་བཞིན་གཤེགས་པའི་དགེ། །འདོད་དང་དགའ་བ་དབེན་ལ་སོགས། །ཡང་ན་ཐམས་ཅད་བསྒྲགས་པ་དང ། །ཁྱད་པར་དུ་ཡང་གཟུགས་མེད་དང ། །འདུ་ཤེས་མེད་པའི་བསམ་གཏན་རྣམས། །ནམ་མཁའ་རྣམ་ཤེས་མཐའ་ཡས་དང ། །འདུ་ཤེས་ཡོད་མིན་མེད་མིན་རྣམས། །ཉི་མ་དང་ནི་ཟླ་བའི་དབྱིབས། །པད་མོ་དང་ནི་འོད་འདྲ་ཞིང ། །ནམ་མཁའ་རི་མོ་མེ་འདྲ་བར། །རྣལ་འབྱོར་ཞུགས་པས་རབ་ཏུ་མཐོང ། །འདི་དག་ཐམས་ཅད་སྤངས་ནས་སུ། །སྣང་བ་མེད་པར་རབ་ཏུ་གནས། །གང་ཚེ་མཚན་མེད་རྣལ་འབྱོར་ཅན། །རྣམ་པར་མི་རྟོག་ཆགས་མེད་ན། །སངས་རྒྱས་བྱེ་བ་རྣམས་ཀྱང་མཐོང ། །ཞིང་དང་ཞིང་ན་མཉམ་བཞག་པ། །དེ་དག་ཕྱག་གིས་དབང་བསྐུར་བར། །དེ་ཡི་སྤྱི་བོར་དབང་བསྐུར་ཏེ། །སངས་རྒྱས་ས་ལ་ཞུགས་པ་དང ། །སྣ་ཚོགས་གཟུགས་ནི་རབ་ཏུ་འབྱུང ། །སྣ་ཚོགས་ཚུལ་གྱི་དངོས་ཐོབ་ནས། །ཀུན་མཁྱེན་ཐམས་ཅད་རིག་པར་འགྱུར། །སྟོབས་དང་མངོན་ཤེས་དབང་ཡང་འཐོབ། །གཟུངས་དང་ཐམས་ཅད་ཏིང་ངེ་འཛིན། །
45.34b
ཐམས་ཅད་ཀྱི་ནི་འབྱུང་གནས་འགྱུར། །ཐུབ་པ་རྣལ་འབྱོར་སྐྱེད་པའི་ཡང ། །གཟུགས་ནི་རྡུལ་དུ་རྣམ་གཞིགས་ཤིང ། །མཆོག་རྡུལ་ཡན་ཆད་ཉིན་དབེན་ཕྱིར། །ཡོད་ལས་མེད་པར་འགྱུར་བ་སྟེ། །བོང་བུའི་བ་ལང་རཝ་མཐོང་བཞིན། །ཆ་ཤེས་མེད་ཕྱིར་ཆ་ཤས་ཅན། །ཕུང་པོ་ལས་ནི་ཕུང་ཅན་མེད། །དེ་བས་ལས་ཀྱི་འབྲས་གྱུར་པ། །འདི་ནི་སྒྱུ་མའི་བུས་བྱས་བཞིན། །འདི་ན་ལས་མེད་འབྲས་བུ་མེད། །ལས་ཀྱི་སྒྲུབ་པའང་ཡོད་པ་མིན། །འཇིག་རྟེན་བྱེད་པས་མ་བྱས་ཏེ། །བྱེད་པ་བྱེད་པ་མ་ཡིན་ནོ། །བྱེད་ལ་བྱེད་པ་ཡོད་ན་ནི། །འདི་རྣམས་ཐུག་པ་མེད་པར་འགྱུར། །ཐུག་མེད་བྱས་པའི་ཉེས་པ་ཡིས། །ཐུབ་པ་དྲི་མ་ཅན་དུ་གྱུར། །དེ་སྟེ་ལམ་རྒྱུད་སྣ་ཚོགས་རྣམས། །ཆུ་དང་ནམ་མཁའ་ས་གནས་པའི། །ལུས་ཅན་ལུས་ལ་ཀུན་གནས་ཏེ། །སྐྱེ་བ་བཟང་པོ་གནས་སུ་སྟེ། །རིས་སུ་འགྲོ་བ་ཡོད་པས་ན། །ཇི་ལྟར་འདོད་པར་ལུས་ཅན་འགྲོ། །དབང་པོ་སོ་སོ་བྱ་བ་ཡང ། །ཇི་ལྟར་འདོད་པར་ཡུལ་འཛིན་ཏེ། །འདི་ནི་རྣམ་རྟོག་རྣམ་འགྱུར་བ། །ཞོ་མར་ཇི་ལྟར་འོ་མ་ལས། །དེ་བཞིན་སྐྱེ་དང་གནས་དང་འཇིག་།ལས་ཀྱིས་བྱས་པར་འགྱུར་སེམས་ན། །རྨི་ལམ་དྲི་ཟ་སྒྱུ་མ་སྤྲིན། །བྲག་ཆ་དང་ནི་གློག་འདྲ་བ། །སྨིག་རྒྱུ་རི་དགས་སྲེད་པ་ལྟར། །དངོས་པོ་རྣམ་བསྒོམས་རྣལ་འབྱོར་ཅན། །ཐོག་མ་མེད་ནས་བསགས་པ་ཡི། །མི་ཡི་རྣམ་སྤྲོས་བག་ཆགས་ཀྱིས། །སྣ་ཚོགས་གནས་ངན་ལེན་པ་དང ། །སྣ་ཚོགས་རྟོག་པས་ལས་སུ་བརྟགས། །དབང་པོ་སྒྱུ་མ་ལྟ་བུ་ཡིན། །ཡུལ་རྣམས་རྨི་ལམ་འདྲ་བ་སྟེ། །བྱེད་དང་ལས་དང་བྱ་བ་ཡང ། །རྣལ་འབྱོར་སྒྲུབ་པས་མི་བརྟག་གོ། །རྟོག་པ་ཉམས་པའི་རྟོག་པ་ཅན། །རྣམ་མྱོས་ཤེས་པ་ཉམ་ཆུང་བས། །བྱེད་པར་རབ་ཏུ་རྟོག་པ་ནི། །བྱ་བས་འགྲོ་བར་བྱས་པར་ཏེ། །འཇིག་རྟེན་གཅེས་པས་བྱས་མ་ཡིན། །རྡུལ་གྱི་རྐྱེན་ལས་བྱུང་བའང་མིན། །རྒྱུ་མེད་པས་ཀྱང་བྱས་མ་ཡིན། །ངོ་བོ་ཉིད་ཀྱིས་བྱུང་བའང་མིན། །རྡོ་རྗེ
45.35a
ལྕགས་དང་ཁབ་ལོང་དང ། །རིན་ཆེན་ཕྲེང་བ་རྒྱན་རྣམས་ཀྱིས། །ཇི་ལྟ་བུ་ཡི་ལས་ཤིག་བྱས། །ནོར་བུ་གསེར་དུ་མིང་བཏགས་པས། །བྱ་དང་རི་དགས་ཁྲ་བོ་དང ། །ཚེར་མ་རྣམས་ཀྱི་རྣོ་དངོས་དང ། །འགྲོ་བ་སྣ་ཚོགས་ངོ་མཚར་བ། །རྣམ་རྟོག་ལས་ལས་མ་སྐྱེས་སོ། །ལས་ཅི་གང་ལས་མ་ཡིན་ཞེས། །རྟོག་ཅན་བདེན་ལ་མྱོས་པ་ནི། །བདེན་པའི་དངོས་པོར་མི་ཤེས་པ། །འདི་ནི་རྣམ་རྟོག་ལས་མིན་དུ། །འོ་མའི་ནང་ན་ཡོད་པའི་དུས་རྗེས་སུ་མི་བདེ་རྣམ་པར་འགྱུར། །རྣམ་པར་རྟོག་པའང་ཐམས་ཅད་དུ། །དེ་བཞིན་དངོས་པོ་རྣམས་ལ་འཇུག་།དངོས་པོ་སྐྱེ་བ་མ་ཡིན་ཏེ། །དངོས་པོ་རྣམ་པར་འཇིག་པའང་མེད། །རྣམ་རྟོག་སྣ་ཚོགས་དེ་དག་ནི། །རྟོག་པ་ཅན་གྱིས་མི་རིག་གོ། །འགྲོ་བའི་རིས་ཀྱི་དངོས་པོ་དག་།རྣལ་འབྱོར་སྤྱོད་པས་རྣམ་པར་གཞིག་།སྦྱར་ཞིང་རྣལ་འབྱོར་དེ་ལ་ཞུགས། །ལས་དང་ལས་མིན་མ་སེམས་པར། །རིས་སུ་འགྲོ་བའི་དངོས་པོ་ཡིས། །ཟླ་བ་ཉི་མ་རྣམ་མཛེས་པ། །རླུང་གིས་ཤིན་དུ་བསྐྱོད་ནས་ཀྱང ། །མཁའ་ལ་རྟེན་པ་མེད་པར་འགྲོ། །ཤིན་དུ་ཕྲ་ཞིང་ཤེས་དཀའི་ལས། །སྟུག་པོར་གནས་པར་རབ་ཏུ་མཐོང ། །ལས་དེ་ཅི་ཞིག་ཡོད་པར་འགྱུར། །ཞུགས་བརྩོན་རྣལ་འབྱོར་ཅན་དག་ལ། །ཇི་ལྟར་མེ་ནི་ཤིང་གི་རི། །ཐལ་བར་བྱེད་པ་སྐད་ཅིག་ཏུ། །རྣལ་འབྱོར་ཅན་གྱི་ཐམས་ཅད་ལས། །ཡེ་ཤེས་མེས་ཚིག་སྐད་ཅིག་དུ། །ལས་དང་བག་ཆགས་ལྷན་ཅིག་དུ། །མང་པོའི་དུས་ནས་བསགས་པ་དག་།རྣལ་འབྱོར་ཡེ་ཤེས་བག་ཆགས་ཀྱིས། །ཐམས་ཅད་ཞིག་བྱེད་སྐད་ཅིག་དུ། །ཇི་ལྟར་སྒྲོན་མས་མུན་པའི་ཚོགས། །སྐད་ཅིག་ཏུ་ནི་བསལ་བྱེད་པ། །ཡེ་ཤེས་སྒྲོན་མས་ཐུབ་པ་དེ། །མི་ཤེས་རྣམ་པར་སེལ་བར་བྱ། །རྒྱན་སྟུག་པོ་ཐེག་པ་ཆེན་པོའི་མདོ་ལས་བདག་གི་ལས་ཀྱི་བྱ་བ་སྤྱད་པ་ཞེས་བྱ་བ་སྟེ། ལེའུ་ལྔ་པའོ།། །། འཕགས་པ་རྒྱན་སྟུག་པོ། བམ་པོ་གསུམ་པ། འཇིམ་པ་རྩཝ་མིག་ཐག
45.35b
པ་ལས། །ཇི་ལྟར་གནས་པའི་ཁྱིམ་གྱི་རྣམས། །ཕན་ཚུན་ཀུན་ནས་འདུས་འབྱོར་ཅིང ། །ས་ཡི་དབུས་ན་སྣང་བ་ནི། །རེ་རེ་ལ་ཡང་ཁྱིམ་མེད་དེ། །རྫས་དང་དངོས་ལ་རྣམ་བརྟགས་ན། །རྫས་ཀྱི་རྣམ་པ་འདུས་པ་ལ། ཁྱིམ་ཞེས་བདགས་ཤིང་བརྗོད་པ་སྟེ། །སོར་མོ་ཕན་ཚུན་ཀུན་འདུས་ན། །ཇི་ལྟར་ལག་པའི་ཕུ་དུང་དུ། །ལག་པ་གཉིས་ནི་བསྡུས་ལས་འགྱུར། །ཐ་དད་པ་ལས་མི་འབྱུང་ངོ ། །གཡུལ་དང་ཤིང་རྟ་བསྙེམས་བྲལ་ཁང ། གྲོང་ཁྱེར་ནགས་ཚལ་དེ་བཞིན་ཏེ། །རི་དང་སྤྲིན་དང་དབའ་རླབས་ཀྱང ། །བྲག་ཆ་གློག་དང་འདྲ་བའོ། །སྨིག་སྒྱུ་ཆུ་ཟླ་སྒྱུ་འདྲ་བ། །སྣམ་བུ་རྫ་སོགས་གྲགས་པ་སྟེ། །མཁས་ལ་དངོས་པོ་ཐམས་ཅད་ཀྱང ། །རྨི་ལམ་འདྲ་བར་ཀུན་དུ་སྣང ། །དེ་བཞིན་ལུས་ཁྱིམ་སྣ་ཚོགས་པ། །བུས་པའི་ལམ་རྒྱུད་དོག་པ་ན། །ཁམས་ཀྱིས་རི་བཞིན་གྱུར་པ་སྟེ། །ཁྱིམ་ལྟར་རྟག་ཏུ་མི་བརྟན་ལ། །འབྱུང་བ་མེད་ཅིང་འཇིག་པ་མེད། །བདག་ལས་མ་ཡིན་གཞན་ལས་མིན། །རྟག་དང་ཆད་ལས་རྣམ་པར་གྲོལ། །གཟུང་དང་འཛིན་པ་ཡོངས་སུ་སྤངས། །ཇི་ལྟར་དྲི་ཟའི་གྲོང་ཁྱེར་ནི། །མདོག་ཏུ་ཟད་ཀྱང་གྲོང་ལྟར་སྣང ། །དེ་བཞིན་རང་རྟོག་རྣམ་བརྟགས་པའི། །དངོས་པོ་རྣམས་ཀྱང་རབ་ཏུ་འབྱུང ། །ཆོས་རྣམས་སྨིག་རྒྱུ་ལྟ་བུ་སྟེ། །ཡོད་མེད་རྣམ་བྲལ་དགེ་བ་ཡིན། །རྨི་ལམ་སྤྲིན་ལྟར་སྣང་བ་སྟེ། །རྩིག་ངོས་རི་མོའི་ཕུག་ལྟ་བུའོ། །ཞ་བོ་ལོང་བ་འདྲ་བ་ནི། །དངོས་ཀུན་གཅིག་གིས་གཅིག་རྒྱུ་བ། །རང་བཞིན་རྟོགས་པར་མི་རུང་སྟེ། །རྣལ་འབྱོར་ཅན་གྱིས་ཡང་དག་མཐོང ། །རྡུལ་ཕྲན་རྣམ་པར་གཞིགས་པ་དང ། །རྡུལ་གྱི་དངོས་པོ་མི་གནས་ཏེ། །རང་བཞིན་ཀུན་གྱི་མཆོག་ཡིན་པས། །རྡུལ་ཕྲན་མཆོག་ཅེས་དེ་ཕྱིར་བརྗོད། །དེ་ཕྱིར་བློ་ནི་ཕྱིར་ལྡོག་སྟེ། །སྒྲ་ལ་སོགས་པའི་ཡོན་ཏན་སྤངས། །རྣལ་འབྱོར་མཁས་པའི་རྣལ་འབྱོར་ཅན། །དེ་ཚེ་ངལ་བསོའི་ཡིད་དུ་འགྱུར། །ངལ་བསོའི་ཡིད་ལྡན་རྣལ་འབྱོར་ཅན། །བཅིངས་པ་ཀུན་ལས་གྲོལ་བས་ན། །
45.36a
འདི་དང་ཕ་བིར་མི་སྐྱེ་སྟེ། །བསམ་གཏན་ཚུལ་ལ་མོས་པ་རྣམས། །སྣ་ཚོགས་རིན་ཆེན་སྙིང་པོ་ཡི། །གནས་ན་དབང་ཅན་དེ་དག་རྩེ། །ཡོན་ཏན་དབང་བྱུང་ཉེས་པ་མེད། །རིག་འཛིན་བུད་མེད་མང་པོ་དང ། །ཐུབ་པ་རྣམས་ཀྱིས་རབ་མཆོད་ཅིང ། །རྨི་ལམ་བཞིན་དུ་གནས་པ་ཡིན། །འདི་ན་གནས་ཀྱང་ཚངས་པ་དང ། །ཐུབ་དང་ཐུབ་པའི་བུ་རྣམས་དང ། །རིག་འཛིན་ཚོགས་ཀྱིས་དེ་བཞིན་ཏེ། །སྤྱི་གཙུག་བལྟ་བར་མི་ནུས་སོ། །འདི་ནི་ཐུབ་པའི་རྣལ་འབྱོར་ཡུལ། །དེ་བས་བསམ་གཏན་བརྩོན་པར་གྱིས། །འདི་ནི་ཀུན་གྱི་ཡུལ་མ་ཡིན། །དེ་ཕྱིར་གྲོགས་པོ་བསྟན་པར་གྱིས། །བརྟན་པ་ས་རྣམས་སྣ་ཚོགས་དང ། །འོད་ཅན་རྣམས་ཀྱི་གནས་སུ་ཡང ། འདོད་ཆགས་ཕྱོགས་དང་བཅས་པ་དང ། །གཏི་མུག་ཞེ་སྡང་དེ་བཞིན་དུ། །བཅོམ་སྟེ་སྟུག་པོ་རབ་ཡངས་པ། །ཡིད་བཞིན་ཞི་བའི་གནས་སུ་འགྲོ། །དེ་ནི་འཆི་བདག་ཡུལ་མ་ཡིན། །རྣམ་ཤེས་སྤྱོད་ཡུལ་དེ་བཞིན་མིན། །མཚན་མ་མེད་པའི་གནས་ཡིན་ཏེ། །རྟོག་པས་དེ་བསྒྲུབ་མ་ཡིན་ནོ། །འདི་ནི་ལྷ་རྫས་གནས་ཡིན་ཏེ། །ཐུབ་པ་རྣལ་འབྱོར་ལྡན་པ་ཡི། །དེ་བས་ཞིང་མཆོག་དེ་འདོད་ན། །ཐུབ་པས་བསམ་གཏན་དེ་ལ་གྱིས། །འདོད་ཆགས་ཞེ་སྡང་རྣམ་བཅོམ་སྟེ། །ང་མེད་ང་ཡི་འགྲོ་མེད་དུ། །འདོད་ཆགས་ཞེ་སྡང་མི་བསམ་པར། །བསམ་གཏན་མཆོག་ལ་བསྒོམ་པར་གྱིས། །ཕན་ཚུན་ཡུལ་ལ་འཛིན་པའི་ཕྱིར། །གཉིས་ཀྱི་བློ་ནི་རབ་ཏུ་འབྱུང ། །ཡོད་མེད་རྟོག་པས་དེ་བཞིན་དུ། །རྣམ་ཤེས་རྣམས་ལ་ཀུན་གཞིའོ། །བུད་མེད་རོ་སྨད་ཤས་རྒྱས་ཤིང ། །སྐྲ་བཟང་མིག་ཀྱང་མཛེས་པ་དང ། །སྣ་ལགས་འཕྲལ་བའི་དབྱིབས་སྡུག་ལ། །སྨིན་མ་སྟུག་ཅིང་བལྟ་མཛེས་པ། །ཇི་ལྟར་ལ་ལ་དེར་ཆགས་པའི། །ཡིད་ཀྱིས་རྣམ་པར་མྱོས་པའི་སེམས། །ལྟ་ཞིང་རྣམ་པར་རྟོག་པའི་ཚེ། །མཁས་མིན་དེ་ལ་ཤིན་དུ་མྱོས། །འགྲོ་འདུག་འགྲེང་ཡང་དེ་བཞིན་ཏེ། །སྣོམ་ཟ་གཉིད་ཀྱིས་ལོག་པ་ནའང ། །འདོད་ཅན
45.36b
གཞན་དུ་མི་སེམས་ཏེ། །འདོད་པ་ཅན་མོ་ཡིད་ལ་བྱེད། །དེ་བཞིན་ཁྱོད་བློ་རྙོག་པ་ཅན། །རྣམ་པ་ཀུན་དུ་ཡིད་ལ་གནས། །རྫབ་ཡུལ་རྙོག་དང་ལྡན་པ་ཡི། །བཅིངས་པའི་དབང་དུ་མ་འགྲོ་ཤིག་།ཇི་ལྟར་ལ་ལ་རྟོག་པ་ཅན། །བློ་ཡི་སྤྱོད་ཡུལ་རྣམ་འཁྲུལ་བ། །མ་ཧེ་དག་དང་བལ་གླང་དང ། །གླང་པོ་དག་དང་བསེ་རྣམས་དང ། །རང་ག་ཀྲི་སྣ་ས་ར་དང ། །ཤ་ར་བ་དང་སུ་ར་དང ། །སྨྱན་དང་གཡག་ཀྱང་དེ་བཞིན་ཏེ། །མགོ་དཀར་རྣ་དང་ཁྱུ་མཆོག་གི། །རུ་ཆེན་རྣམ་པར་མཐོང་བ་དང ། །འདི་བདེན་གཞན་དུ་མི་འགྱུར་ཞེས། །སེང་སྟག་བོང་བུ་སོགས་པ་ཡི། །རཝ་རྣམས་ལ་ནི་མེད་ཅེས་ཏེ། །ཡོད་དང་མེད་པའི་ལྟ་བ་ཡང ། །མི་མཁས་རྣམས་ལ་རབ་ཏུ་འབྱུང ། །དེ་ལྟར་གཞན་གྱི་རཝ་མཐོང་ཞིང ། །བོང་བུའི་མེད་ཅེས་རྣམ་རྟོག་འབྱུང ། །ཇི་སྟེ་གཞན་གྱིས་མ་མཐོང་ན། །བོང་རུ་མེད་སྙམ་དེ་མི་འབྱུང ། །ལོག་པར་དམིགས་པའི་རྒྱུའི་ཕྱིར། །འདི་ན་མེད་ཅེས་རྟོག་པ་འབྱུང ། །དེ་ལ་དམིགས་པ་མེད་པས་ཀྱང ། །གདོན་མི་ཟ་བར་མེད་ལ་རྟེན། །རྙོག་ཅན་ང་རྒྱལ་རྟོག་ཡུལ་ལ། །བློ་གྲོས་སྤྱོད་ཡུལ་མ་རྟོན་ཅིག་།བ་ལང་བ་མེན་མ་ཧེ་རྣམས། །རྟོག་པས་བརྟགས་པ་ཇི་བཞིན་ཏེ། །དེ་ལྟར་ཁྱོད་ཀྱིས་སེམས་སྤྱོད་དང ། །ཕུང་པོ་སྐྱེ་མཆེད་སྤྱོད་ཡུལ་དག་།མངོན་སུམ་ཚད་མ་དག་གིས་སམ། །ཤེས་རབ་ཀྱིས་ཀྱང་རྣམ་པར་ལྟོས། །རྣམ་གྲོལ་མཐོ་རིས་འགྲོ་བ་འམ། །ཇི་ལྟར་འདོད་པ་བཞིན་དུའང་འགྱུར། །ཚངས་པའི་གནས་སུ་ཚངས་པར་རམ། །མཚེ་མ་རབ་དང་གནས་དབེན་དང ། །རིན་ཆེན་སྣ་ཚོགས་གནས་སུ་ཡང ། །དབང་སྒྱུར་རྣམ་པར་མཛེས་པར་འགྱུར། །འོད་ཅུང་རྒྱས་པ་དག་ཏུ་འམ། །འདོད་ཁམས་བདག་པོ་དབང་ཅན་ནམ། །ཉི་ཟླ་བདག་བདག་གནས་སུ་འམ། །གཞན་ཡང་འོད་འབར་གཟར་ཡང་རུང ། །སུམ་བཅུ་རྩ་གསུམ་རྒྱལ་ཆེན་དང ། །འཕྲུལ་ལ་དགའ་བའི་གནས་སུ་ཡང ། །ཚངས་གནས་བཅུ་དང་ལྡན་པ་ཡི། །རྣལ་འབྱོར་ཅན་ནི་རྣམ་པར་མཛེས། །གྱ་ནོམ་སྣང་དང་ཤིན་དུ་མཐོང ། །
45.37a
འདོད་མེད་མི་དོས་དེ་བཞིན་ཏེ། །འོག་མིན་གནས་ཀྱི་ལྷ་རྫས་ན། །འོག་མིན་ཤིན་དུ་རྣམ་པར་མཛེས། །ཅུང་ཟད་མེད་མཁའ་རྣམ་ཤེས་དང ། །འདུ་ཤེས་ཡོད་མེད་མ་ཡིན་དང ། །དེ་བཞིན་འཕྲུལ་གྱི་བདེ་ཅན་དང ། །ཞིང་བཟང་གཞན་དུ་དེ་བཞིན་ཏེ། །མཁའ་ལ་འགྲོ་དང་སྤོབས་པ་བཞིན། །འཁོར་ལོ་འཁོར་བའི་རིགས་སུ་གནས། །གྲོལ་བ་རྣམས་ཀྱི་གྲོལ་ཡུལ་ལ། །སུ་གནས་དེ་དག་རྣལ་འབྱོར་ཅན། །འདོད་ཆགས་སྟོབས་ལས་སྔོན་རྒྱལ་བ། །དེ་དག་བཟང་པོའི་ས་ལ་གནས། །འདི་ལྟའི་རྣལ་འབྱོར་ལྡན་པས་ན། །རྣལ་འབྱོར་ལ་ནི་ཐུབ་པར་རྩེ། །རྫ་མ་འཇིག་པའི་གྱོ་མོ་ཡི། །ཇི་ལྟར་རྒྱུར་ཡང་འགྱུར་བ་དང ། །སྐད་ཅིག་འཇིག་ལ་སྐད་ཅིག་སྟེ། །མི་རྟག་ཉིད་ཀྱང་རྟག་པ་ཡི། །ས་བོན་ཇི་བཞིན་མྱུ་གུ་ལ། །རྒྱུ་རྣམས་དེ་དག་འདྲ་བ་ཡིན། །མྱུ་གུ་གཞན་མིན་ས་བོན་ལས། །ས་བོན་ཉིད་ཀྱང་མྱུ་གུ་མིན། །ས་སྣར་རྣམས་ལས་རྫ་སྣར་འབྱུང ། །ཚོས་དམ་དམར་རུར་མངོན་པར་འབྱུང ། །གནག་དང་སྣར་དང་འདྲེས་པ་དང ། །གྲོ་བོ་དམར་པོ་དག་ཀྱང་སྟེ། །འདམ་བུ་ལས་ནི་སྒོག་པར་འགྱུར། །རཝ་ལས་ལན་ཚཝར་དེ་བཞིན་ཏེ། །མི་གཙང་སྦྲང་བུ་དག་ལས་ཀྱང ། །སྲིན་བུར་འགྱུར་གཞན་མི་འདྲ་མང ། །རྒྱུ་དང་འདྲ་བའི་འབྲས་བུ་ནི། །ས་རྣམས་གང་ནའང་ཡོད་པ་མིན། །གྱུར་པའི་རྒྱུ་ལས་འབྲས་བུ་འབྱུང ། །རྡུལ་ཕྲན་གང་དག་རྒྱུར་འགྱུར་ནི། །དངོས་པོ་འཇིག་པ་མེད་པར་ཏེ། །རྣམ་པར་རྟོག་ལ་མི་རྟོག་ཅིང ། །རྒྱུ་ཡི་བདག་དང་ནང་གི་བདག་།བདག་གི་མཆོག་ཀྱང་མེད་པ་སྟེ། །བདག་དང་དབང་པོ་ཡིད་དང་དོན། །འདུས་པའི་རྒྱུ་ནི་མ་ཡིན་ཏེ། །ཕྲད་ལས་འབྱུང་དང་རྣམ་ཤེས་དང ། །རྐྱེན་རྣམས་ཡོད་པ་མ་ཡིན་ནོ། །ཤེས་ཅན་ཤེས་པས་ཡུལ་རྣམས་ལ། །མཁས་པའི་སྟོབས་དང་ལྡན་པས་ནི། །སྡེ་དཔུང་སྟོབས་དང་བཞོན་བཅས་པའི། །ཉོན་མོངས་བདུད་རྣམས་གདུལ་བར་བྱ། །སྲེད་པ་འཇིག་རྟེན་དམའ་བར་བྱེད། །སྦྲང་རྩིས་བད་ཀན་མང་པོ་བཞིན། །སྲེད་པ་བཅོམ་ཞིང་ཐུབ་པའི་རྣམས། །
45.37b
རྣམ་པ་མང་ལས་རྣམ་པར་གྲོལ། །སྲེད་པས་རྣམ་པར་དཀྲུགས་པ་ན། །འཁོར་ལས་རྣམ་པར་མི་འགྲོལ་ཏེ། །སྲེད་དང་རྣམ་བྲལ་འཐར་བར་འགྱུར། །དེ་བས་རྣལ་འབྱོར་སྦྱར་བར་གྱིས། །ཡུན་རིང་ཡོད་པའི་བག་ཆགས་ནི། །སྦྲུལ་གདུག་ཁྲོས་པ་ཇི་བཞིན་ཡང ། །འདི་དང་ཕ་བིར་འདྲིད་པ་ནི། །འཁོར་བའི་ལམ་རྒྱུད་དོག་པར་རོ། །འཕགས་པ་རྒྱན་སྟུག་པོ་ལས་རྣལ་འབྱོར་རྣམ་པར་ཕྱེ་བའི་སྤྱོད་པ་ཞེས་བྱ་བའི་ལེའུ་སྟེ་དྲུག་གོ། །། སངས་རྒྱས་རྣལ་འབྱོར་རྣམ་ཕྱེ་དང ། །བདག་ལྡན་དེ་ཡི་བྱིན་གྱིས་བརླབས། །རྒྱལ་བ་དག་དང་རྒྱལ་བའི་སྲས། །བྱེ་བའི་ཞིང་ན་བཞུགས་པ་དང ། །ཁམས་གསུམ་གནས་པ་ཐམས་ཅད་དང ། །ས་གནས་རྣལ་འབྱོར་ལྡན་པ་དང ། །བདེ་ཡོད་ཞིང་དང་སྟུག་པོ་སྟེ། །རྣལ་འབྱོར་ཅན་གྱི་ཞིང་མཆོག་དང ། །སངས་རྒྱས་པད་མོའི་དབུས་བཞུགས་པ། །རྡུལ་ཕྲན་བཞིན་བཞུགས་བདག་གིས་མཐོང ། །རྣལ་འབྱོར་དེ་ལས་བདག་ལངས་ནས། །ས་ལ་རྒྱལ་བ་དེ་དག་ནི། །སྟུག་པོའི་ཞིང་ན་བདག་བཞུགས་ཤིང ། །རྒྱལ་སྲས་ཐབས་ཅིག་བཞུགས་པ་དག་།མེ་ཏོག་ཨ་ཏ་སི་འདྲ་བའི། །མཁའ་ལ་ཟླ་འདྲ་བཞིན་བཞུགས་མཐོང ། །མཐེ་བོའི་ཚིགས་དང་རབ་འདྲ་བ། །ས་རྣམས་དགེ་ལ་རབ་སྦྱོར་བའི། །རྣམ་གྲོལ་སྙིང་པོ་བདག་གིས་མཐོང ། །འདི་ན་བུ་ཁྱོད་སུ་ཞིག་ཅེས། །སྙིང་པོ་དེ་ལྟར་སེམས་གྱུར་ཏེ། །ཐུབ་པ་འདི་ནི་གཅིག་ཅིག་སྙམ། །དེ་ཚེ་སྐུ་རུ་ཞུགས་པར་གྱུར། །འགྲོ་བ་རྣམས་ཀྱང་སྐུར་ཞུགས་ནས། །ཐུབ་པ་པད་མོའི་སྙིང་པོ་ཡིས། །སངས་རྒྱས་རྣམས་ཀྱི་ལོངས་སྤྱོད་དང ། །ཁམས་གསུམ་ཀུན་ན་གནས་པར་ཡང ། །གང་ཚེ་མཐོང་བ་དེ་དུས་ན། །ཀྱེ་མ་མཚར་ཅེས་བསམ་པ་དང ། །དེ་ཚེ་ཐུབ་པ་ལྷ་ཡི་ལྷས། །རྣལ་འབྱོར་ཡུལ་ནི་རབ་བསྡུས་ཏེ། །ཐུབ་པས་སྔོན་བཞིན་བཞག་པར་གྱུར། །ཀྱེ་མ་བསམ་ཡས་ལྷ་རྫས་འདི། །རྣལ་འབྱོར་ཅན་གྱི་སྣ་ཚོགས་གཟུགས། །སངས་རྒྱས་ལྷ་ཡི་ཡུལ་ཡིན་ཏེ། །བསམ་གྱིས་མི་ཁྱབ་བདག་གིས་མཐོང ། །ཆོས་ཀྱི
45.38a
སྤྲིན་གྱི་ཏིང་འཛིན་དང ། །དགའ་དང་མི་གཡོ་དེ་བཞིན་ཏེ། །རིང་སོང་མངོན་དུ་གྱུར་པ་དང ། །འོད་བྱེད་པ་ཡི་མ་ལུས་པར། །སྒྱུ་མ་དཔའ་བར་འགྲོ་ལ་སོགས། །གཟི་བརྗིད་ཅན་ཡང་མ་ལུས་པར། །གཟུགས་རྣམས་ཀྱི་ཡང་ཡུལ་ཡིན་ཏེ། །འོག་མིན་ཐབས་ལས་བྱུང་བའོ། །དེ་ནི་ཡིད་བཞིན་འགྱུར་སྐུ་ཡིས། །དབང་གི་ཡོན་ཏན་བརྒྱད་པོ་རྣམས། །ཕྲ་ཚོགས་ཆེ་བའི་ཡོན་ཏན་དང ། །འཐོབ་དང་འདོད་འབྱོར་བསྒྲགས་པ་དང ། །བདག་པོ་དབང་དང་ལྡན་པ་དང ། །ཇི་ལྟར་འདོད་པར་རུང་བའི་རྣམས། །ཐོབ་ནས་སྟུག་པོའི་དབུས་ཡུལ་ན། །རྣམ་པར་གནས་ཤིང་རབ་ཏུ་རྩེ། །སྤྲུལ་པའི་ལྷ་རྫས་སྟུག་པོ་ནས། །ཕྱིན་པ་དགེ་བ་དེ་དག་ཀྱང ། །ལྷུན་གྱིས་གྲུབ་པ་སངས་རྒྱས་ཀྱི། །འཕྲུལ་པ་རྣམས་ནི་རབ་ཏུ་འགྱེད། །རྒྱལ་བ་རྣམས་དང་རྒྱལ་སྲས་སུ། །ཐབས་གཅིག་བཞུགས་པར་ཀུན་ན་སྣང ། །དེ་ལྟར་ས་འདི་སྣ་ཚོགས་ཏེ། །རང་གི་གཟུགས་ལྡན་རྣམས་ཀྱང་འདྲེས། །ཆ་ལས་ཕྱིར་ལྡོག་དེ་ཡི་ཚེ། །བྱ་བ་བྱས་པས་སྟུག་པོའི་གཞི། །ཤེས་པས་བཅད་ཅིང་མཁས་པའི་རྣམས། །ཐུབ་པ་དག་གིས་སྟུག་པོ་མཐོང ། །གཞལ་མེད་པད་མོ་འདྲ་བ་ན། །མེ་ལྟར་རབ་ཏུ་འབར་བ་ཡིན། །ཐུབ་པ་རྣལ་འབྱོར་བདེ་མོས་པ། །རྣལ་འབྱོར་ཅན་དང་ལྷན་ཅིག་གནས། །དཔལ་བེའུ་མཚན་དང་ཐམས་ཅད་ལྡན། །ཕྲ་བའི་ལུས་ཅན་རང་གི་འོད། །དེ་དག་དབུས་སུ་ཐུབ་པའི་དབང ། །ཁྱོད་ནི་གནས་པར་རབ་ཏུ་འགྱུར། །ལྟོས་ཤིག་ལྷ་ཡི་ཅོད་པན་དང ། །དྲུ་མ་མི་འམ་ཅི་ཡི་བདག་།གཞལ་མེད་བྱེ་བ་མང་པོ་ཡིས། །ཟླ་བ་བཞིན་དུ་རབ་ཏུ་འབར། །ཐུབ་པ་རྣམས་དང་རྒྱལ་བའི་སྲས། །དགའ་ལྡན་ལ་སོགས་ལྷ་ཡི་མཆོག་། ཏ་ས་ཡི་མེ་ཏོག་འདྲ། །ཤེས་རབ་བཟུང་ཞིང་མཚན་མང་བ། །ཕྲེང་བ་ཅོད་པན་ཐོགས་པའི་རྣམས། །གཞལ་མེད་མང་པོས་གནས་པ་སྟེ། །ལུས་ནི་རབ་ཏུ་འབར་བ་དང ། །ཀུན་མཁྱེན་ཐམས་ཅད་མངོན་གྱུར་པ། །ཐོགས་པ་མེད་པའི་སྤོབས་པ་དང ། །ཀུན་དུ་བཟང་པོ་སྟོབས་ཆེན་ཏེ། །
45.38b
ཟླ་བ་འདྲ་བའི་གཞལ་མེད་ཀྱིས། །སྟུག་པོའི་གང་ཆེན་མཚོ་ལ་གནས། །རྣམ་པ་དུ་མར་ཐམས་ཅད་ནས། །ཐུབ་པ་རྣམས་ཀྱིས་བསྟོད་པ་སྟེ། །ཆགས་མེད་ཚངས་པའི་ཁྱུ་མཆོག་དང ། །གྲུབ་དང་དྲི་ཟ་ཚོགས་རྣམས་དང ། །མཁས་དང་ངེས་པར་ལྡན་པ་ཡི། །སྐྱེས་བུའི་ཚོགས་ཀྱི་བདག་པོ་དང ། །རྒྱལ་བའི་སྲས་ཀྱིས་མདུན་དུ་བྱས། །རྣལ་འབྱོར་སྤྱོད་པས་ཁྱད་པར་དུ། །གཟིམས་པ་ལྟ་བུར་མཐོང་བ་ནི། །དེ་དག་ལེ་ལོ་བྲལ་བས་ཏེ། །གཉིད་དང་སྙོམ་སོགས་བསྲབས་པ་ཡིས། །སངས་རྒྱས་ལྷ་ཡི་རྗེས་སུ་འབྲང ། །མུར་འདུག་ཀུན་གྱིས་མཐོང་གྱུར་ཅིང ། །དེ་བཞིན་ལྷ་དང་ཚངས་ལ་སོགས། །འཛམ་གླིང་པ་དང་འོག་མིན་དང ། །འཕྲུལ་གྱིས་སྤྲུལ་པས་ཐུབ་མཐོང་བ། །འགྲོ་བས་སྣ་ཚོགས་ཀུན་གཟུགས་སུ། །ས་ལ་ཀུན་ནས་ཞུགས་པར་ཏེ། །ཆོ་འཕྲུལ་རྣམ་པ་མང་པོ་ཡིས། །མགོན་པོ་ཤིན་དུ་རྣམ་པར་མཛེས། །ལ་ལ་ཉལ་ཞིང་རབ་ཏུ་འབར། །དེ་བཞིན་གཞན་དག་ཕན་ཚུན་འཆག་།ལ་ལ་གཡེན་སྤྱོ་བྲེལ་ཅིང་སྒོམ། །དེ་བཞིན་གཞན་ཡང་མྱ་ངན་འདའ། །ལ་ལ་མངལ་དུ་འཇུག་པ་དང ། །སྐྱེ་དང་འབྱུང་དང་དཀའ་སྤྱོད་དང ། །བྱང་ཆུབ་རྣམ་པར་འཚང་རྒྱ་ཞིང ། །ཆོས་ཀྱི་འཁོར་ལོ་སྐོར་བར་རོ། །སངས་རྒྱས་ཉིད་དང་སངས་རྒྱས་ཡུལ། །སངས་རྒྱས་ཡེ་ཤེས་བླ་ན་མེད། །རྒྱལ་བའི་སྲས་པོ་འཇིགས་མེད་པ། །དེ་དག་ཀུན་གྱིས་འཐོབ་འགྱུར་ཏེ། །ཐུབ་པ་ཤཱཀྱའི་སེང་གེ་ཡིས། །ཇི་ལྟར་བརྙེས་བཞིན་གྲོགས་པོ་རྣམས། །རྒྱལ་སྲས་འཇིགས་པ་མེད་པ་ཡིས། །འདི་དག་ཀུན་ལ་ཡིད་ཆེས་ཀྱིས། །ཡིད་ཆེས་གྱུར་ན་སངས་རྒྱས་སམ། །ཐར་བར་འགྱུར་བ་ཐེ་ཙོམ་མེད། །འཁོར་ལོ་འཁོར་བའི་རྒྱལ་པོར་འགྱུར། །སྤོབས་ཅན་ཁམས་ཀྱི་བདག་པོ་དང ། །ཚངས་ལ་སོགས་པའི་གནས་སུ་ཡང ། །གནས་འགྱུར་འཁོར་གྱི་བདག་པོར་འགྱུར། །དྲི་མེད་ཞིང་གི་པད་མོ་ལ། །ཐུབ་པའི་དབུས་སུ་སྐྱེ་བར་འགྱུར། །པད་མོའི་དབུས་སུ་སྐྱེ་བ་ཡང ། །བརྩོན་འགྲུས་ལྡན་པའི་སྲས་ཀྱིས་འཐོབ། །བརྩོན་པས་བདུད་ལས
45.39a
རྒྱལ་བར་འགྱུར། །བགས་ཆགས་འདོད་པའི་རྒྱུ་ལས་ཀྱང ། །འདོད་བདག་བདག་པོ་ཕམ་བྱས་ཤིང ། །ཐེག་པ་གཅིག་ལ་རབ་ཏུ་འཇུག་།བརྩོན་འགྲུས་ལྡན་ཞིང་ཞི་མེད་པའི། །རིགས་ཀྱང་ཐུབ་པ་རབ་ཏུ་སྟོན། །སྲས་པོ་ཡངས་པའི་རིགས་གྱུར་ཅིང ། །ཞིང་དང་ཞིང་དུ་བདག་པོར་འགྱུར། །སངས་རྒྱས་ཉིད་དུ་སྨོན་སེམས་ན། །སངས་རྒྱས་རིགས་ནི་རྣམ་པར་དག་།རྣམ་དག་རིགས་ནི་རྣམ་པར་དག་།རྣམ་དག་རིགས་ཅན་སྲས་དེ་ནི། །སངས་རྒྱས་རྣམས་ཀྱིས་ལུང་བསྟན་ཏེ། །མྱུར་དུ་སངས་རྒྱས་ཅི་འདྲ་བ། །དེ་བཞིན་ཐུབ་པ་འཚང་རྒྱའོ། །རྣམ་སངས་རྒྱས་ནས་ཉེར་འཚོ་བ། །ཚངས་ལ་སོགས་དང་རྣལ་འབྱོར་ཅན། །ས་ལྟར་རྟག་པའི་དུས་སུ་ཡང ། །ལུས་ཅན་རྣམས་ལ་ཉེ་བར་གནས། །ཐམས་ཅད་སྨན་གྱི་རྣལ་འབྱོར་ཅན། །ཇི་ལྟར་གྲོང་དང་གྲོང་གནས་པ། །ནད་རྣམས་རབ་ཏུ་སེལ་བ་ལྟར། །རབ་ཏུ་མཁས་པ་དེ་བྱེད་པ། །རྣམ་རྟོག་མེད་པའི་ཡིད་ཀྱིས་ཏེ། །བཅད་ཀྱང་གཡོ་ཞིང་འགུལ་བ་མེད། །འདི་ནི་རྣམ་པར་རིག་པ་ཙམ། །ཡིད་ནི་ནང་དང་ཕྱིར་ཡང་སྤྱོད། །བདག་དང་བདག་གི་མེད་པ་སྟེ། །ནོར་བར་མཐོང་ཞིང་མི་གཡོའོ། །ཡིད་ཀྱི་རྣམ་ཤེས་ཡུལ་ཅན་གྱི། །ཀུན་གཞི་ཀུན་ནས་གནས་པ་སྟེ། །གཅད་དང་གཅོད་པར་བྱེད་པ་དང ། །དེ་ཉིད་གཅད་བྱ་གཅོད་པའང་ཡིན། །ལུས་ཅན་ཀུན་གྱི་ཀུན་གཞི་ནི། །ལས་ཀྱི་བག་ཆགས་རྣམས་ཀྱིས་ཡོག་།ཁར་བ་ནོར་བུ་ཉི་མ་དག་།ལྡན་ལས་མེ་འབྱུང་ཇི་བཞིན་ཏེ། །གཙུབ་མ་གཙུབ་སྟན་འདུས་ལས་མིན། །མིས་ཀྱང་བྱས་པ་མ་ཡིན་ནོ། །དེ་བཞིན་སེམས་ཡིད་རྣམ་ཤེས་དང ། །དབང་པོ་དོན་དང་ཡིད་དང་ལས། །སེམས་རྣམས་རབ་ཏུ་སྐྱེར་གྱུར་པ། །རྒྱ་མཚོའི་དབའ་རླབས་ཅི་བཞིན་ནོ། །སྨིག་རྒྱུ་ནམ་མཁའ་སྒྱུ་མ་དང ། །རྨི་ལམ་མ་ཡིན་ནོར་བའང་མིན། །སྦལ་པ་རུ་སྦལ་སྤུ་དག་དང ། །རི་བོང་རཝ་དང་མཉམ་པའང་མིན། །མེ་ནི་ཤིང་ལས་སྐྱེ་བར་འགྱུར། །གློག་ནི་དེ་བཞིན་སྤྲིན་ལས་སོ། །མེད་ལ་སྐྱེད་པ་སུ་འང་མེད། །རྫ་སོགས་རྫ་མཁན་ལྟ་བུའོ། །
45.39b
ཇི་ལྟར་རྩཝ་དང་ཤིང་དག་ལ། །བརྟེན་ཅིང་ལྷན་ཅིག་སྒྱུ་འབྱུང་བ། །དེ་བཞིན་མོས་ལ་སོགས་པ་ཀུན། །སེམས་དང་སེམས་བྱུང་ལྷན་ཅིག་གནས། །སེམས་ཀྱི་ཡུལ་ནི་བསམ་དུ་མེད། །སྟུག་ན་གནས་པས་ལེགས་པར་མཐོང ། ལྷ་རྫས་སྔོན་མེད་ལྷན་ཅིག་སྐྱེས། །མྱ་ངན་འདས་དང་ནམ་མཁའ་བཞིན། །སོ་སོར་མ་བརྟགས་འགོག་པ་ལྟར། །དུས་གསུམ་རྣམ་པར་སྤངས་པ་སྟེ། །འོད་ཅན་རྟག་ཏུ་དག་པ་ནི། །ལུས་ཅན་ཀུན་གྱི་ཀུན་གཞིའོ། །དང་པོ་ཚེས་པའི་ཟླ་མདོག་ལྟར། །བྱེ་བའི་ཞིང་དུ་སྣང་བ་སྟེ། །རི་རབ་གནས་ཤིང་འཁོར་བ་ཡང ། །དངོས་པོ་འཇིག་པ་མ་ཡིན་ནོ། །དེ་བཞིན་ཡིད་སེམས་རྣམ་པར་ཤེས། །སེམས་ཅན་ཁམས་ན་འཁོར་མོད་ཀྱི། །དེ་ལ་འཕེལ་ཞིང་འབྲི་མེད་དེ། །རྟག་ཏུ་རང་བཞིན་འོད་སྣང་བའོ། །ཇི་ལྟར་ཟླ་བ་སྐྱེ་འབྲི་བར། །མི་ཤེས་འགྲོ་བ་རྣམ་རྟོག་ཀྱང ། །སྐྱེ་འབྲི་ཟླ་ལ་ཡོད་པ་མིན། །གླིང་དང་གླིང་དུའང་རབ་ཏུ་སྣང ། །དེ་བཞིན་ཀུན་གཞི་རྣམ་ཤེས་ལ། །བྱིས་པ་མི་ཤེས་འགྲོ་རྣམས་ཀྱང ། །རྟག་ཏུ་སྐྱེ་བྲིར་རྣམ་རྟོག་སྟེ། །དེ་ནི་ཟག་མེད་སངས་རྒྱས་སོ། །ཀུན་གཞི་འདི་ལ་ཇི་ལྟར་ཡང ། །འབྱུང་བས་ཐ་དད་མི་འགྱུར་ཏེ། །འཇུག་པའི་རྣམ་ཤེས་སོང་གནས་པ། །བག་ཆགས་ཀྱིས་ནི་ཟླ་བ་བཞིན། །ཆུ་ཀླུང་དབུས་ཀྱི་ཤིང་ལྟ་བུར། །ཆུ་བོའི་ཀླུང་དང་འགྲོགས་མོད་ཀྱི། །ཐ་དད་མཚན་དུའང་རབ་ཏུ་གྲུབ། །རྒྱ་མཚོ་ཆེན་པོར་དེ་བཞིན་འགྲོ། །དེ་ལྟར་ཀུན་གཞི་རྣམ་ཤེས་ཀྱང ། །རྟག་ཏུ་བག་ཆགས་ལྡན་འགྱུར་བ། །རྣམ་པར་ཤེས་པ་བདུན་པོ་དང ། །འགྲོགས་ཀྱང་འདྲེ་བ་མེད་པ་སྟེ། །ཀུན་ནས་ཉོན་མོངས་རྣམ་བྱང་དང ། །རྣམ་པར་དག་པའི་རྒྱུ་ཡང་དེ། །ཆོས་མཐོང་འཕགས་པ་རྣམས་ཀྱི་ཡང ། །དེ་ནི་རྣལ་འབྱོར་མཉམ་བཞག་པ། །བྱོལ་སོང་མི་དང་ལྷར་སྐྱེས་དང ། །ཤ་ཟ་ལྟོ་འཕྱེ་ཡི་དགས་དང ། །ལྷ་མིན་དྲི་ཟ་འབར་བ་ཡི། །ལམ་རྒྱུད་ཀུན་ཀྱང་དེ་ཡི་དབང ། །སངས་རྒྱས་ཀུན་ཀྱི་གཞི་མཛེས་ལའང ། །དེ་ཉིད་རྒྱུར་ནི་གྱུར་པ་སྟེ། །དེ་རྟོགས་ནས་ནི་སངས་རྒྱས་དང ། །
45.40a
རིགས་དང་ཐེག་པ་གཞན་མིན་འགྱུར། །ཐམས་ཅད་ལུས་ལ་རྟག་ཏུ་གནས། །སྤྱོད་འོས་ཡོད་ལ་རྣམ་པར་འདུག་།དཔལ་དང་ལྡན་ལ་ཁྱད་པར་དུ། །ཐམས་ཅད་ཀུན་ཀྱང་རབ་ཏུ་གནས། །རབ་དང་འབྲིང་དང་ཐ་མ་ལའང ། །འགྲོ་བ་དོག་པ་ཐམས་ཅད་ན། །དེ་ནི་ཀུན་དུ་གནས་པ་སྟེ། །ལུས་ཅན་རྣམས་ཀྱི་ལུས་ལ་རྟེན། །འབྲས་བུའི་བདག་དང་རྒྱུ་ཡི་བདག་།ནང་གི་བདག་ཀྱང་དེ་ཉིད་ལ། །བྱིས་པ་རྣམས་ཀྱིས་ཁོར་ཟུག་བརྟག་།དེ་ཡི་དབྱིངས་ལ་ཐོག་མ་མེད། །གནས་ངན་ལེན་དང་ལས་ཀྱིས་བསྐྱེད། །བག་ཆགས་ཐོག་མ་མེད་པས་བསགས། །འཚོ་ཞིང་གསོ་བར་བྱེད་པ་ནི། །རྣམ་པར་ཤེས་པ་བདུན་པོ་སྟེ། །ཡིད་ནི་རྟག་ཏུ་རླུང་དང་མཉམ། །གཡོ་ཞིང་མྱུར་བར་རབ་ཏུ་འཇུག་།ལུས་ཅན་རྣམས་ཀྱི་ལུས་གནས་ཤིང ། །ཁམས་ཀྱི་གོང་ལ་གནས་པའོ། །ལས་ཀྱི་རླུང་གིས་བསྐྱེད་པ་ནི། །དབང་པོ་རྣམས་ལ་ཁྱབ་པར་གནས། །རྣམ་ཤེས་བདུན་དང་ལྷན་ཅིག་ཏུ། །དབའ་རླབས་བཞིན་དུ་རྒྱུ་བ་སྟེ། །རྡུལ་ཕྲན་དུས་དང་གཙོ་བོ་དང ། །དེ་བཞིན་སྐྱེས་བུ་དབང་བཅས་སུ། །ཀུན་གཞི་གཅིག་པུ་དགེ་བ་དེ། །རྟོག་པ་ཅན་གྱིས་ཐེར་ཟུག་བརྟག་།རྟག་ཏུ་སྣ་ཚོགས་རྣམ་པའི་གཟུགས། །གཡོ་ཞིང་མྱུར་འབྱུང་བྱེད་པ་སྟེ། །ཀུན་གཞི་ས་རྣམས་ཐམས་ཅད་དུ། །ཕྱི་ནང་བཅས་པར་གནས་པ་ཡིན། །དེ་ནི་ས་ཡི་རྒྱུ་ཡིན་པར། །རྒྱུ་ཅན་རྣམས་ཀྱིས་བརྟག་པ་སྟེ། །དེ་ཡི་འགྲོ་བ་ཤིན་དུ་ཕྲ། །རྟོག་པ་ཅན་རྣམས་མྱོས་པར་བྱེད། །བདག་དོན་དབང་པོ་ཡིད་མོས་པའི། །ཡང་དག་མ་མཐོང་མྱོས་པར་འགྱུར། །སྔོན་གྱི་ལས་ཀྱིས་བསྐྱོད་པ་ཡི། །རྣམ་པར་ཤེས་པ་སྲེད་པའི་རྒྱུ། །སྣ་ཚོགས་གཟུགས་ཅན་འགྲོ་བ་དང ། །མི་རྣམས་ཀྱི་ཡང་རྒྱུ་ཡིན་ནོ། །འཇིགས་མེད་རྒྱལ་བའི་སྲས་རྣམས་ལ། །རྡོ་རྗེའི་སྙིང་པོས་ཡང་སྨྲས་པ། །ཀུན་གཞི་དང་ལུགས་དགེ་བ་ནི། །རྒྱལ་སྲས་རྣམས་ཀྱིས་མཐོང་ཐོས་ཏེ། །ཀུན་གཞིའི་མཆོག་ཏུ་དགེ་བ་ནི། །ཐམས་ཅད་ལུས་ལ་ཞེན་པ་སྟེ། །སུམ་བཅུ་རྩ
45.40b
གཉིས་མཚན་ལྡན་ཞིང ། །རྣམ་པ་སྣ་ཚོགས་གཟུགས་མངའ་བའི། །རྒྱལ་བ་འཁོར་ལོ་འཁོར་བར་ཡང ། །ས་རྣམས་ལ་ལར་འགྲོ་བས་མཐོང ། །ཇི་ལྟར་ཟླ་བ་སྐར་ཚོགས་དང ། །ལྷན་ཅིག་མཁའ་ལ་གནས་པ་ལྟར། །རྣམ་ཤེས་རྣམས་དང་ཀུན་གཞི་ཡང ། །དེ་བཞིན་ལྷན་ཅིག་ལུས་ལ་གནས། །ཇི་ལྟར་དབང་གིས་སྒྱུར་བའི་ལྷ། །ལྷ་ཡི་བུ་མོས་མདུན་བདར་ཅིང ། །རིན་ཆེན་དབུས་ན་རྣམ་མཛེས་པ། །དེ་བཞིན་ཀུན་གཞི་ས་རྣམས་ལ། །ཇི་ལྟར་ཆུ་དབང་ཆུ་ཡི་ལྷ། །ཆུ་ཀླུང་རྒྱ་མཚོ་མཆིང་རྣམས་ལ། །ཇི་བཞིན་སྐྱེ་ལྡན་ས་ཡང་སྟེ། །དེ་བཞིན་སེམས་ནི་རྣམ་པར་མཛེས། །ཇི་ལྟར་གཞལ་མེད་གནས་པའི་གཉི། །རི་རབ་ལོགས་ན་རྣམ་པར་མཛེས། །ལྷ་རྣམས་ཀྱིས་ནི་ཕྱག་ཀྱང་བྱ། །དེ་བཞིན་ཀུན་གཞི་སངས་རྒྱས་སར། །ས་བཅུ་དག་ལ་ལྷན་ཅིག་ཏུ། །སྤྱད་པ་སྤྱོད་པ་རྒྱལ་བའི་སྲས། །ཐེག་པ་ཆེན་པོས་ཕྱུང་བ་སྟེ། །ལུས་ལ་གནས་པ་རྣམ་པར་མཛེས། །རྗོད་པའི་ཞལ་གྱིས་རྟག་པར་ཡང ། །རྒྱལ་བ་རྣམས་ནི་ཀུན་ནས་བསྟོད། །ཉན་ཐོས་རྣམས་དང་རང་རྒྱལ་དང ། །རྒྱལ་བའི་སྲས་རྣམས་ཁྱད་པར་དུ། །ས་དང་ས་ལ་རྣམ་དག་པ། །རྒྱལ་བའི་སྲས་ཤེས་མངོན་བསྒྲགས་དང ། །རྒྱལ་བ་དག་དང་རྒྱལ་བའི་སྲས། །དེ་དག་ཀུན་གཞི་འདི་ལ་བརྗོད། །ལུང་སྟོན་ལུང་བསྟན་འགྱུར་བ་ཡི། །རྒྱལ་སྲས་རྒྱལ་བ་དེ་བཞིན་ཏེ། །ཀུན་གཞི་དྲི་མེད་བསོད་ནམས་ཀྱིས། །དེ་བཞིན་གཤེགས་པར་འགྱུར་བ་ཡིན། །འདི་ལྟ་བུ་ཡི་ཀུན་གཞིའི་ཡུལ། །སྟུག་ན་གནས་པའི་རྣལ་འབྱོར་ཅན། །ཐུབ་བརྩོན་རྣལ་འབྱོར་སྤྱོད་པ་ཡིས། །རབ་ཏུ་མཐོང་གིས་རྣལ་འབྱོར་གྱིས། །སངས་རྒྱས་དག་དང་རང་སངས་རྒྱས། །ཉན་ཐོས་རྣམས་དང་མུར་འདུག་གཞན། །དེ་ཉིད་རྟོགས་ནས་མཐོང་བ་ནི། །རྣལ་འབྱོར་འཇིགས་མེད་རྣལ་འབྱོར་རོ། །རྣམ་པར་ཤེས་པའི་སྤྱོད་ཡུལ་གང ། །འདི་ལྟར་སྣང་བ་ཅི་འང་རུང ། །རྣམ་པར་ཤེས་པར་གྱུར་པ་སྟེ། །རྫ་ལ་སོགས་པ་ས་མ་ཡིན། །འདི་ལྟར་ནོར་པ་གང་སྣང་བ། །
45.41a
སྣ་ཚོགས་རྫ་གྲགས་ཅི་འང་རུང ། །དེ་ནི་ཀུན་གཞི་གྱུར་པ་སྟེ། །སྣང་བ་ནོར་པའི་མཚན་ཉིད་དོ། །ཀུན་གཞི་ཆུ་ཀླུང་དེ་བཞིན་དུ། །སྣ་ཚོགས་སྣང་མངོན་འགྲོ་བས་མཐོང ། །བག་ཆགས་རྣམས་ཀྱིས་བསྒོས་པའི་སེམས། །གཟུང་དང་འཛིན་པ་རབ་ཏུ་འཁོར། །དངོས་པོ་སྒྱུ་འདྲ་མ་ཡིན་ཏེ། །སྐྲ་ཡི་ཚོགས་དང་སྨིག་རྒྱུ་མིན། །སྐྱེས་དང་མ་སྐྱེས་མ་ཡིན་ཏེ། །སྟོང་དང་མི་སྟོང་རྣམ་པར་སྤངས། །དངོས་སུ་གཅིག་མེད་མི་འགྱུར་ཏེ། །རིང་དང་ཐུང་ལ་སོགས་པ་བཞིན། །སྒྱུ་མའི་རང་བཞིན་སྐྱེས་པ་ནི། །གང་ན་ཅི་འང་ཡོད་པ་མིན། །དེ་ནི་རིག་སྔགས་སྒྱུ་མ་སྟེ། །སྐྱེས་བུ་རྣམས་ལ་རབ་ཏུ་སྣང ། །སྨིག་རྒྱུ་སྒྲ་ལ་སོགས་པའི་ཚོགས། །གཉིས་ལས་ཉེ་བར་མངོན་པ་སྟེ། །གཅིག་མེད་པར་ནི་གཉིས་པོ་ཡང ། །མ་བྱུང་འབྱུང་བར་མི་འགྱུར་ཏེ། །སྒྱུ་ལ་སོགས་པ་རྣམ་བརྟགས་པ། །འདི་ནི་རྣམ་ཤེས་གྱུར་པའོ། །སྒྱུ་མེད་སྒྱུ་ཞེས་བྱ་བ་ཡི། །དངོས་པོ་གང་དང་གང་ཡང་མེད། །ཅི་འང་རུང་སྟེ་གང་ཡོད་པ། །སྒྱུ་མས་བྱས་པའང་ཡོད་པ་ཡིན། །མྱོས་པར་བྱེད་པ་འཇིག་རྟེན་ན། །སེམས་ལ་དབང་མེད་རྣམས་ལ་ཡོད། །སྒྱུ་མ་དག་གམ་གྱོ་མོ་དག་།སྣ་ཚོགས་སྒྱུ་མས་མ་བྱས་ཏེ། །གཡོ་བ་གང་དག་ཅི་འང་རུང ། །དེ་ནི་སྣང་མིན་སུས་མི་མཐོང ། །འདི་ལ་རྣམ་རྟོག་གཡོ་བ་ནི། །ཁབ་ལེན་དག་ལ་ལྕགས་བཞིན་ཏེ། །སེམས་ཅན་མེད་ལ་མི་རྟོག་པའི། །ཤེལ་སྒོང་ནོར་བུ་ཇི་བཞིན་ནོ། །ཀུན་གཞི་ཀུན་ནས་སྣ་ཚོགས་པ། །བྱེད་པ་བཞིན་དུ་སྣང་བ་སྟེ། །སྐྱ་ཞིང་འཆི་བར་འགྱུར་མོད་ཀྱི། །འཁོར་བ་པོ་ནི་གང་ཡང་མེད། །རྨི་ལམ་འདྲ་བར་སྐྱེ་ཤི་དག་།རབ་ཏུ་མཐོང་ན་རྣམ་པར་འགྲོལ། །ཐུབ་པ་གང་ཚེ་གྱུར་པ་ན། །གྲོལ་བ་ཞེས་ནི་བརྗོད་པ་སྟེ། །རིགས་དང་གཞུང་གིས་བརྟན་པ་ནི། །སངས་རྒྱས་ཁྱུ་མཆོག་དེ་ཡིན་ནོ། །ཐམས་ཅད་ཆོས་ལ་མེ་ལོང་བཞིན། །སྲང་ཡིན་དེ་བཞིན་ཚད་མ་སྟེ། །དངོས་པོ་ཀུན་ལ་སྒྲོན་མ་བཞིན། །ཁབ་བླང་བ་ཡི་རྡོ་ལྟར་གནས། །རྣལ་འབྱོར་ལམ་གྱི་མཚན་ཉིད་དེ། །འཇིག་པ་རྣམས་ཀྱང་རྣམ་པར་བཟློག་།
45.41b
བསམ་གཏན་པ་ཡི་བསམ་གཏན་མཆོག ། རྣམ་པར་བྱང་བའི་རྒྱུ་ཡིན་ནོ། །ཀུན་ནས་ཉོན་མོངས་ཟད་པར་བྱེད། །ལམ་ཡང་རྣམ་པར་སྦྱོང་བའོ། །དམ་པའི་དོན་གྱི་སྤྱོད་ཡུལ་ཏེ། །འགྱུར་བ་རབ་ཏུ་སྟོན་པའོ། །འཕགས་པ་རྒྱན་སྟུག་པོ་ལས་ལེའུ་བདུན་ནོ།། །། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་ཕྱོགས་བཅུར་བལྟས་ཏེ། གཙུག་གི་རིན་པོ་ཆེའི་འོད་ཟེར་གྱིས་འཇིག་རྟེན་གྱི་ཁམས་ཐམས་ཅད་དང ། དབང་བྱེད་ཀྱི་གནས་དང ། ནོར་བུ་རིན་པོ་ཆེའི་སྙིང་པོའི་ཕོ་བྲང་ན་གནས་པའི་རྒྱལ་པོའི་སྲས་རྣམས་ལའང་སྣང་བར་བྱས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དག་པ་ཇི་ལྟ་བ་བཞིན་དུ་དགོད་པ་སྟོན་པ་ལ་སྨྲས་པ། ཡང་དག་པ་ཇི་ལྟ་བ་བཞིན་དུ་འགོད་པ་སྟོན་པ་ཁ་བ་ཡོད་པའི་ངོས་ལ་རི་དགས་ཐམས་ཅད་གསོད་པ་ཞེས་བྱ་བའི་རི་དགས་ཀྱི་རིགས་ཤིག་ཡོད་དེ། དེ་ནི་གཅམ་སྒྱུ་བརྒྱ་སྟོང་གིས་རི་དགས་མང་པོ་ཉེ་བར་བྲིད་ཅིང་ཐབས་ལ་བབ་པའི་རི་དགས་རྣམས་བསད་ཅིང་ཟའོ། །རི་དགས་དྲུས་མ་ཕྲུ་གུ་དང་བཅས་པ་མཐོང་ནའང་ཕྲུ་གུའི་སྐད་དུ་འབོད་དོ། །རི་དགས་རཝ་ཅན་མཐོང་ནའང་རཝ་དེ་དང་འདྲ་བར་བསྒྱུར་ཏེ་གན་དུ་འགྲོའོ། །དེ་ནས་དེ་དག་དེ་ལ་བག་རྟོན་པ་དང ། དེས་དེ་དག་བག་རྟོན་པར་རིག་ནས་བསད་ཅིང་བསད་ཅིང་ཟའོ། །རཝ་མཐོང་ནའང་རཝའི་གཟུགས་སུ་བསྟན་ཏེ། དེ་དག་བག་ཕབ་ནས་ཇི་ལྟར་འདོད་པར་བསད་ཅིང་བསད་ཅིང་ཟ་སྟེ། ཇི་ལྟར་རི་དགས་ཞེས་གཏུམ་པའི་ངང་ཚུལ་ཅན་དེ་རྣམ་པ་སྣ་ཚོགས་ཀྱིས་རི་དགས་གསོད་པ་དེ་བཞིན་དུ་ཀུན་གཞི་རྣམ་པར་ཤེས་པའང་ཕས་ཀྱི་རྒོལ་བ་མུར་འདུག་བདག་ཏུ་སྨྲ་བ་ལ་མངོན་པར་ཞེན་པ། བདག་གི་ཆོས་ཉིད་ཀྱི་རྣམ་པར་གནས་པ། འཛིན་པ་དེ་དང་དེ་དག་གིས་བཅིངས་པ་དེ་དང་དེ་དག་ལ་དེ་ལྟ་དེ་ལྟ་བུའི་རང་བཞིན་གྱི་བདག་ཉིད་ཀྱིས་བདག་ཏུ་སྨྲ་བ་ཡོངས་སུ་རྟོག་ཅིང་རྡུལ་ཕྲ་མོ་ཡན་ཆད་དུ་རབ་དུ་ཤེས་པར་བྱེད་པ་དེ་དག་ལ་དེའི་བདག་ཏུ་འཛིན་པ་ཉིད་དུ་གནས་པ་ནི་གཞན་དུ་རྣམ་པར་ཤེས་པ་ཙམ་དུ་མི་གནས་པའི་བར་དུ་སྟེ། བདག་ཡོངས་སུ་རྟོགས་པར་བྱེད་པ་རྣམས་ཀྱིས་ནི་ཡིད་དང་དབང་པོ་དང་དོན་དུ་ལྡན་པ་ལས་ཤེས་པ་སྐྱེ་བ་མཐོང་གི། བདག་དང་ཡིད་དང །
45.42a
དབང་པོ་དང ། དོན་འདུས་པའི་རྒྱུ་ལས་ནི་མ་ཡིན་ནོ། །དཔེར་ན་མེ་ཏོག་དང་གོས་སུ་ཕྲད་ན་གསུང་གི་ཁྱད་པར་དུ་འགྱུར་གྱི། མ་ཕྲད་པར་ནི་བསུང་དམིགས་པར་མི་འགྱུར་རོ། །དེ་བཞིན་དུ་སེམས་དང ། སེམས་ལས་བྱུང་བ་དང ། ཡིད་དང་རྣམ་པར་ཤེས་པ་རྣམས་མ་གཏོགས་པར་དོན་དེ་མ་ཡིན་པར་གྱུར་པ་སྣོད་དང་བདར་ལྟ་བུའམ། མེ་མར་དང་རྫ་ལྟ་བུའམ། སྨིག་ལོ་དང་ཨི་ཤི་ཀ་ལྟ་བུ་གཞན་ནི་གང་ཡང་མེད་དེ། རྒྱུ་དང་རྐྱེན་ལས་སེམས་དང་སེམས་ལས་བྱུང་བའི་ཚོགས་རབ་ཏུ་འབྱུང་ཞིང་བདག་མེད་ལ་ཕྲ་བ་དང ། བསྐྱེད་དུ་མི་རུང་བ་དང ། ཆ་མེད་པ་དང ། དག་ཅིང་ཐོག་མ་ནས་འོད་སྣང་བ་དང ། ཡུལ་རྣམ་པར་རིག་པའི་རྣལ་འབྱོར་ཅན་རྣམས་ཀྱི་འཕགས་པ་སོ་སོ་རང་གིས་རིག་པའི་སྤྱོད་ཡུལ་མ་གཏོགས་པར་རྟོགས་པར་བྱེད་པ་རྣམས་ཀྱིས་མི་དམིགས་སོ། །འདི་ཉིད་ནི་རི་དགས་ཀྱི་གཅན་ཟན་ཞེ་གཏུམ་པོ་ལྟ་བུར་འཇིག་རྟེན་རྣམས་ལ་ཡོད་པ་དང ། མེད་པ་དང ། གཅིག་པ་དང ། མང་པོ་དང ། ཐམས་ཅད་དང ། ཐམས་ཅད་མ་ཡིན་པའི་ལྟ་བ་སྐྱེད་པར་བྱེད་པ་སྟེ། ལུས་ཅན་རྣམ་པར་རིག་པ་ཙམ་དུ་ཁོང་དུ་མ་ཆུད་པའི་རྣམས་བདག་དང་བདག་གིར་སྨྲ་བ་ལ་མངོན་པར་ཞེན་པར་ཡང་ལྟུང་བར་བྱེད་དོ། །མི་ཤེས་པའི་ཕྱིར་ཆོས་ཁོང་དུ་ཆུད་པའི་བློས་འཁོར་བའི་རྒྱུད་ཀྱི་འཁོར་ལོ་ལ་ཞོན་ཞིང་འདི་དང་ཕ་བི་ནས་རབ་ཏུ་རྒྱུག་སྟེ། དགེ་བའི་བཤེས་གཉེན་སངས་རྒྱས་དང་བྱང་ཆུབ་སེམས་དཔའ་དང་བྲལ་བ། རང་གི་ཕྱོགས་ལས་རིང་བ་བས་ཀྱང་ཆེས་རིང་བར་ཉམས་པའི་བློ་ཅན། འཕགས་པའི་ལམ་གྱི་ཡན་ལག་བརྒྱད་ཐོབ་པར་མི་ནུས་པ། ཐེག་པ་གསུམ་ལས་འགའ་ཙམ་ལའང་མི་འཇུག་པའི་རྣམ་པ་འཛིན་པ་ལས་རྣམ་པར་ཕྱིར་ལྡོག་པ་མ་སྐྱེས་ཀྱི་བར་དུ་འཕགས་པའི་བདེན་པ་མི་མཐོང་བས། སྟུག་པོའི་དཀྱིལ་འཁོར་གྱི་སྐལ་བ་ཅན་རྣམས་ཀྱང་སྟུག་པོའམ་སྟུག་པོའི་སྒྲ་ཡང་མི་ཐོས་སོ། །ཡང་དག་པ་ཇི་ལྟ་བ་བཞིན་དུ་འགོད་པ་སྟོན་པ་འདི་ནི་རྣལ་འབྱོར་ཅན་རྣམས་ཀྱི་ལྟ་བ་ཡོངས་སུ་སྦྱང་བ་སྟེ། འདི་ལ་ཁྱོད་དང་བྱང་ཆུབ་སེམས་དཔའ་གཞན་གྱིས
45.42b
ཀྱང་བརྩོན་པར་གྱིས་ཤིག་།སངས་རྒྱས་ཀྱི་ཞིང་སྟུག་པོར་འཇུག་པའི་གཏམ་གྱི་ཚུལ་ཡང་རྣལ་འབྱོར་ཅན་རྣམས་ལ་སྟོན་ཅིག་།རང་གི་རྣམ་པར་རིག་པའི་ཡུལ་ཞེས་བྱ་བ་སྟེ་ལེའུ་བརྒྱད་དོ།། །། ཁབ་ལོང་རྡོ་ལ་ཇི་ལྟར་ལྕགས། །ཡོངས་ཀྱིས་ཀུན་དུ་རབ་འཁོར་བ། །དེ་བཞིན་ཕུང་པོའི་ཤིང་རྟ་སྟེ། །སྟོང་ཞིང་བགས་ཆག་བྱུང་བ་འཁོར། །རྩཝ་དང་འཇིམ་པ་ཤིང་སྨིག་དང ། །ཐག་པ་རྣམས་སུ་འདུས་ཚོགས་ལས། །ཁྱིམ་དུ་ཇི་ལྟར་སྣང་གྱུར་པ། །དེ་བཞིན་ཕུང་པོའི་གཟུགས་འདིའོ། །ལྕགས་དང་ཁབ་ལོང་རོ་ལངས་ལ། །སེམས་ཅན་ཉེ་བར་དམིགས་མེད་ཀྱང ། །ཐམས་ཅད་སེམས་ཅན་ལྟ་བུར་གཡོ། །དེ་བཞིན་ཕུང་པོ་བདག་མེད་པའོ། །རྒྱལ་སྲས་ཕྱག་ན་རིན་ཆེན་གྱིས། །གཟུགས་མང་རྒྱལ་མཆོག་ལ་སྨྲས་པ། །མཉམ་བཞག་རྡོ་རྗེའི་སྙིང་པོ་ལ། །རྒྱལ་པོ་ཁྱོད་ཀྱིས་དྲི་བར་བྱོས། །རྒྱལ་སྲས་འཇིགས་མེད་མཁས་པའི་རྣམས། །ཀུན་གྱིས་ཐོས་པར་འགྱུར་བ་ནི། །བརྟག་བྲལ་བརྟག་པར་མི་ནུས་པ། །བརྗོད་པས་རྣམ་པར་སྤངས་པ་སྟེ། །མིང་དང་མིང་ཅན་རྣམ་བྲལ་བ། །འོན་ཀྱང་འདུ་བ་དེ་བཞིན་ཏེ། །སྣ་ཚོགས་གྱུར་པའི་ས་འདི་ཡི། །རང་བཞིན་ཅི་དང་ཅིར་གནས་པ། །དེ་ནས་གཟུགས་མང་རྒྱལ་པོ་ཡིས། །རྡོ་རྗེ་སྙིང་པོ་འཇིགས་མེད་ལ། །རྗེས་སུ་འབྲེལ་བའི་སྐབས་དྲིས་པ། །དངོས་པོ་དོན་གཞན་བརྟག་པ་སྟེ། །རྡོ་རྗེའི་དབང་པོའི་དངོས་པོ་གང ། །ལ་ལ་རབ་ཏུ་བརྟག་བྱ་བ། །མིང་དང་འདུ་ཤེས་སོགས་པའི་ཡུལ། །ཡོད་དམ་རྡོ་རྗེ་སྙིང་པོས་སྨྲོས། །མིང་རྣམས་སུས་བྱས་ཇི་ལྟ་བུ། །མིང་ནི་ཅི་ལ་རབ་ཏུ་གནས། །མི་མགོན་ཚིག་ནི་ཐོས་པ་དང ། །རྡོ་རྗེའི་སྙིང་པོས་དེ་ལ་སྨྲས། །འདི་དག་ཐམས་ཅད་མིང་ཙམ་སྟེ། །འདུ་ཤེས་ཙམ་ལ་རབ་ཏུ་གནས། །བརྗོད་ལས་ཐ་དད་གྱུར་པ་ཡི། །བརྗོད་པར་བྱ་བ་ཡོད་པ་མིན། །ཕུང་པོ་བཞི་པོ་མིང་ཡིན་ཏེ། །གཟུགས་ཀྱང་ཙམ་ཞེས་རྣམ་པར་བརྟག་།
45.43a
ཙམ་ལ་མིང་དུ་བཏགས་པ་ནི། །སྐྱེས་བུ་འདི་ཞེས་བྱ་བ་སྟེ། །ཙམ་ལ་མཚན་མ་ཞེས་བྱ་བར། །རྒྱལ་བ་རྒྱལ་སྲས་དག་གིས་གསུངས། །མཚན་མ་མེད་པར་མིང་དུ་ནི། །དེ་དག་རྣམ་པར་རྟོག་མི་ནུས། །དེ་བས་མཚན་མ་རྟེན་བྱས་ཤིང ། །མིང་དུ་ཀུན་ནས་བརྟག་པ་ཡིན། །ཇི་ལྟར་ལྡིང་དང་ལྔ་བྱིད་དང ། །བར་པ་ང་ཡང་ཡོད་པ་མིན། །མཚན་མ་མེད་པར་ཅི་ཡང་རུང ། །བྱིས་པས་དེ་ལ་རྣམ་མི་བརྟག་།དེ་བཞིན་ས་འདི་ཐམས་ཅད་ཀྱང ། །མཚན་མ་མེད་པར་ཡོད་པ་མིན། །ཅི་ཡང་མཚན་མར་མི་རྟོག་པ། །མཚན་མ་ཡོད་ན་རྣམ་པར་བརྟག་།རྫ་དང་སྣམ་བུ་ཤིང་རྟ་དག་།གཟུགས་ཡོད་པ་ལ་རྣམ་པར་བརྗོད། །འཇིག་རྟེན་འདི་ནི་འདི་ཙམ་སྟེ། །གཟུགས་ཙམ་རྣམ་པ་གཞན་མི་འགྱུར། །ཙམ་ལ་མིང་དུ་བརྟགས་པ་སྟེ། །འདི་ལ་ཡང་དག་མིང་ཡོད་མིན། །མིང་མེད་རྣམ་པར་བྲལ་བར་ཡང ། །ས་རྣམས་ཐུབ་པས་མཐོང་བ་ན། །རྣམ་པར་རྟོག་པ་རབ་ཏུ་འཇུག་།རྣམ་རྟོག་མེད་པ་མི་སྐྱེའོ། །ཚེར་སྐྱེ་མེད་པ་གཞན་གྱུར་པ། །མི་ཟད་དེ་ལ་སྐྱེ་བར་འགྱུར། །རྒྱུ་མེད་ཕྱིར་ན་མིང་མེད་དེ། །འདུ་ཤེས་ཙམ་ལ་རྣམ་པར་རྟོག་།དེ་བས་རྒྱལ་པོས་རྟག་པར་ཡང ། །འདུ་ཤེས་མ་ཡིན་འདུ་ཤེས་སྒོམས། །འདི་དག་ཐམས་ཅད་འདི་ཙམ་སྟེ། །ཐམས་ཅད་ལས་ནི་གཞན་མེད་དོ། །ཙམ་ནི་གཟུགས་སུ་ཤེས་པར་བྱ། །དེ་བཞིན་ལུས་དང་གཟུགས་དང་དབྱིབས། །ཆ་ལུགས་རིང་དང་སྐུ་ཡངས་ཏེ། །མཚན་མ་དང་ནི་རྣམ་གྲངས་གཅིག་།འདུ་ཤེས་མིང་དང་རྣམ་རྟོག་དང ། །བརྗོད་དང་ཁྱད་པར་ལྷན་ཅིག་སྟེ། །ཙམ་དང་མཚན་མ་འདུ་ཤེས་སུ། །སྤྱོད་པར་རབ་ཏུ་གདགས་པ་སྟེ། །ཙམ་ལ་གནས་དེ་མིང་རྣམས་ཀྱང ། །ཀུན་རྫོབ་དོན་དུ་རྣམ་པར་བརྟགས། །བརྗོད་པ་མེད་པར་དངོས་པོ་ནི། །མ་བྱུང་འབྱུང་བར་མི་འགྱུར་ཏེ། །རྣམ་ཤེས་རྣམས་ཀྱི་འབྱུང་བ་ཡང ། །རྟོགས་བྱ་མེད་པར་ཡོད་པ་མིན། །རྟོགས་བྱ་མིང་དང་ཙམ་པོ་ནི། །ས་རྣམས་ཐམས་ཅད་དེ་ཉིད་དེ། །དངོས་པོ་གང་ལ་གང་མིང
45.43b
གིས། །བརྟག་པར་བྱ་བ་དེ་བཞིན་མེད། །འདི་ནི་ཆོས་རྣམས་ཆོས་ཉིད་དེ། །བརྟགས་ན་གནས་པ་མེད་པའོ། །འདི་དག་ཐམས་ཅད་མིང་ཙམ་སྟེ། །འདུ་ཤེས་ཅན་གྱི་དངོས་པོ་མེད། །དེ་མེད་པས་ན་མིང་མེད་དེ། །མིང་མེད་པས་ན་རྣམ་མི་བརྟག་།རྣམ་པར་མི་རྟོགས་ཞིར་འགྱུར་བ། །བསྲེག་པ་ཚིག་པའི་མེ་བཞིན་ཏེ། །ཁུར་ཙས་ཇི་ལྟར་ཁུར་བཀུར་བ། །དེ་དང་ཐ་དད་མཚན་ཅན་ཏེ། །དེ་བཞིན་ཙམ་ནི་མིང་གི་ཁུར། །དེ་དང་ཐ་དད་མཚན་ཉིད་ཁྱེར། །སེམས་ལ་ཙམ་ཞེས་རྣམ་པར་བརྟགས། །མིང་གིས་ཙམ་དུ་སེམས་ཙམ་གྱིས། །འདི་ནི་སྐྱེས་བུ་སྡོང་པོ་ཞེས། །ཅི་ཡང་རུང་སྟེ་མིང་ཙམ་བརྟག་།འབྱུང་བ་རྣམས་དང་འདུས་པ་དང ། །ཙམ་ཡང་གཟུགས་ལ་རྣམ་པར་བརྟག་།ཙམ་པོ་མེད་པར་འབྱུང་བ་ཡི། །ཙམ་ཞེས་བྱ་བ་མི་དམིགས་ཏེ། །བུམ་པའི་ངོས་ལ་ཡོན་ཏན་ལྟར། །ཙམ་ལ་མིང་ནི་རྣམ་པར་གནས། །བུམ་པ་བུམ་པའི་དངོས་པོ་ཡིས། རྣམ་པར་དབེན་ཞིང་མིང་དང་བྲལ། །བུམ་པ་བུམ་པའི་དངོས་པོར་རམ། །མིང་ཡང་མིང་དུ་གནས་པ་མེད། །རྣལ་འབྱོར་ཅན་གྱིས་གང་གི་ཚེ། །མིང་ཙམ་གཡོ་བ་མེད་པ་དང ། །རྣམ་རྟོག་གཉིས་དང་འབྲེལ་པ་ཡི། །མིང་ཙམ་ཡོད་མེད་མཐོང་བ་ན། །ཇི་ལྟར་མེ་ལྡན་ལྕགས་རྣམས་དང ། །སྤྲ་ཚིལ་དག་ཀྱང་རྒྱ་སྐྱེགས་ཀྱང ། །ཆུ་དང་མཉམ་པར་ཁུ་བར་འགྱུར། །འོན་ཀྱང་ཆུ་ཡི་ཡོན་ཏན་མེད། །དེ་བཞིན་ཀུན་གཞི་རྣམ་ཤེས་པ། །རྣམ་ཤེས་བདུན་དང་ལྷན་ཅིག་ཏུ། །རྟག་ཏུ་ལས་སུ་འཇུག་པར་བྱེད། །རྣམ་པར་ཤེས་པས་ཡུན་དུ་སྤངས། །ཁབ་ལོང་རྡོ་ལས་རྟེན་བྱས་ཤིང ། །ལྕགས་ནི་སེམས་ཅན་བཞིན་འཁོར་ཡང ། །དེ་དག་གཉིས་ཀ་བྱེད་པ་མེད། །སེམས་ཅན་གསོན་པོ་བཞིན་དུ་གཡོ། །སེམས་ནི་བདུན་ཞེས་བགྲང་བ་ཡིན། །ཀུན་གཞི་བརྒྱད་པ་དེ་བཞིན་ནོ། །བག་ཆགས་སྲད་བུས་བརྒྱུས་པས་ན། །སེམས་ཅན་བཞིན་གཡོ་སེམས་ཅན་མེད། །ལུས་ན
45.44a
ཀུན་དུ་རྒྱས་པར་འདུག་།འགྲོ་བ་དོག་པར་འཁོར་བ་སྟེ། །གཅིག་ལས་གཅིག་གིས་མི་ཤེས་པ། །བྱེད་མེད་ལྕགས་དང་ཁབ་ལོང་བཞིན། །མགོ་བོ་དུ་མ་ལྕེ་མང་པོ། །ཁ་མང་ལག་པ་དུ་མ་དང ། །ལུས་ཀྱང་དུ་མར་རབ་བསྒྱུར་ཅིང ། །དེ་བཞིན་གཤེགས་ལ་མཆོད་བྱེད་པ། །ཤིན་དུ་མང་བའི་ཞིང་གི་རྣམས། །ཚད་མེད་སྟོང་དུ་འགྲོ་བྱས་ཤིང ། །དེ་དང་དེར་ཡང་མགོན་པོའི་རྣམས། །དེ་དག་ཀུན་ལ་རྟག་མཆོད་བྱེད། །རི་རབ་རི་དང་མཉམ་པ་ཡི། །མེ་ཏོག་ན་བཟའ་ཆར་མང་པོ། །སྣ་ཚོགས་རྣམ་པ་ཐ་དད་པས། །དེ་དག་མཆོད་པ་རབ་ཏུ་བྱེད། །ཕྲེང་བ་ཕྲེང་ཕྱེད་ཅོད་པན་དང ། །རིན་ཆེན་བརྒྱན་པ་སྣ་ཚོགས་ཀྱིས། །ཐམས་ཅད་མཁྱེན་དང་རྒྱལ་སྲས་ལ། །རྟག་པར་མཆོད་པ་རབ་ཏུ་བྱེད། །སྤྲིན་ལྟ་བུ་ཡི་གཞལ་མེད་ཁང ། །སྣ་ཚོགས་མང་པོའི་གཟུགས་འགྱུར་བ། །མཐའ་མ་ནམ་མཁའི་མུ་དང་མཉམ། །གཞན་ཡང་རྡུལ་ཕྲན་རྡུལ་སྙེད་ཀྱི། །སྤྲུལ་མང་ལྷ་ཡི་བུ་མོ་ཡིས། །རོལ་མོ་སིལ་སྙན་རབ་བསྒྲགས་ཏེ། །གཞལ་མེད་དག་ལ་མངོན་གནས་ནས། །དེ་བཞིན་གཤེགས་ལ་མཆོད་པ་བྱེད། །སྟོབས་དང་མངོན་ཤེས་དབང་ཐོབ་ཅིང ། །དོག་པའི་ས་ནས་མ་ཉམས་པ། །ཆོས་ཀྱི་སྤྲིན་ལས་འཐོན་གྱུར་ནས། །སངས་རྒྱས་ས་ལ་ཞུགས་པའི་རྣམས། །སྒྱུ་མ་དཔའ་བར་འགྲོ་ལ་སོགས། །ཏིང་ངེ་འཛིན་ལ་མཉམ་བཞག་སྟེ། །གཟུངས་ལ་མཁས་པར་གྱུར་པའི་རྣམས། །དེ་བཞིན་གཤེགས་ལ་མཆོད་པ་བྱེད། །སངས་རྒྱས་ཡང་དག་བརྗོད་མོས་རྣམས། །མཐའ་ཡས་ཞིང་དུ་འགྲོ་བྱས་ཤིང ། །ཡང་དག་ཡོན་ཏན་ལྡན་པ་དག་།སངས་རྒྱས་ཡོན་ཏན་རབ་ཏུ་རྗོད། །དཔུང་དང་བཅས་པའི་བདུད་བཅོམ་སྟེ། །རྒྱལ་བ་དག་དང་ཐབས་གཅིག་ཏུ། །རྒྱལ་སྲས་སོ་སོ་རང་རིག་པའི། །རྟོགས་པར་བྱ་བའི་ཏིང་འཛིན་སྒོམ། །གནས་གཞན་གྱུར་པའི་ཡོན་ཏན་ཅན། ཆོས་ལ་བདག་མེད་སྟོན་པའི་རྣམས། །སྤྲོས་པ་ཐམས་ཅད་རྒྱུན་བཅད་ཅིང ། །
45.44b
དམ་པའི་དོན་ལ་རྣམ་སྒོམ་པ། །ཆོས་ལྔ་རྣམས་ཀྱི་རང་བཞིན་དང ། །རྣམ་ཤེས་བརྒྱད་ལའང་དེ་བཞིན་ཏེ། །མཁས་པ་བྱས་པར་རྟག་གྱུར་ཅིང ། །མཉམ་པར་བཞག་རྣམས་མཆོད་པར་བྱེད། །ཤིན་དུ་ཕྲ་བའི་རྡུལ་འདྲ་དང ། །དེ་བཞིན་ཆེན་པོའི་ལུས་ཀྱིས་ཀྱང ། །སྣ་ཚོགས་པ་ཡི་གཟུགས་གྱུར་ནས། །དེ་བཞིན་གཤེགས་ལ་མཆོད་པ་བྱེད། །ས་རྣམས་ཀུན་ཀ་བདག་ལུས་དང ། །ཡུངས་ཀར་འབྲུར་ཡང་རབ་འཛུད་བྱེད། །རྒྱ་མཚོ་བ་ལང་རྗེསུ་བྱེད། །བ་ལང་རྗེས་ཀྱང་གང་ཆེན་མཚོར། །སྤུ་གཅིག་རྩེ་མོར་བརྟན་གཡོ་བའི། །འགྲོ་བ་རབ་ཏུ་འཛུད་བྱེད་ཀྱང ། །གནོད་པར་བྱེད་པ་མ་ཡིན་ཏེ། །འགྲོ་བ་དག་ན་རྣམ་པར་སྤྱོད། །ལོངས་སྤྱོད་ཅན་གྱི་སྐྱིད་ལོངས་ཡུལ། །ཉི་ཟླ་ས་དང་མཉམ་པ་སྟེ། །འཚིག་མེད་ས་དང་འདྲ་བར་ཡང ། །རྣམ་པ་ཀུན་གྱིས་ཕན་འདོགས་ཤིང ། །མེ་དང་རླུང་དག་འདྲ་བ་སྟེ། །རྟག་ཏུ་ཆུ་དང་སྨན་འདྲ་བ། །རིན་ཆེན་ཁམས་ཀྱི་འབྱུང་ཁུངས་ལྟར། །སེམས་ཅན་ཀུན་ཀྱང་ཉེ་བར་འཚོ། །སྐྱེས་པ་མེད་ཅིང་འགགས་པ་མེད། །མ་ཆད་རྟག་པའང་མེད་པ་སྟེ། །ཐ་དད་དོན་མིན་དོན་གཅིག་མིན། །འགྲོ་མེད་འོང་བ་མེད་པའི་རྣམས། །རྣམ་པར་བརྟགས་པའི་མིང་དག་དང ། །ཀུན་དུ་བརྟགས་པའི་རང་བཞིན་གྱིས། །སེམས་ཅན་རྣམས་ཀྱི་དོན་བྱེད་པ། །མིང་དང་མིང་མེད་རྣམ་སྤངས་དག་།སྒྱུ་མ་ལྟ་བུ་རྨི་ལམ་འདྲ། །དྲི་ཟའི་གྲོང་ཁྱེར་དཔེ་བཞིན་ཏེ། །སྨིག་རྒྱུ་ཆུ་ཡི་ཟླ་བ་འདྲ། །རང་བཞིན་ཀུན་དུ་བརྟགས་པ་དག་།གློག་དང་སྤྲིན་དང་དུ་བ་དང ། །མགལ་པའི་འཁོར་ལོ་སྨིག་རྒྱུ་འདྲ། །འདི་ཚུལ་བརྟགས་པའི་ཆོས་རྣམས་ནི། །རང་བཞིན་ཀུན་དུ་བརྟགས་པ་སྟེ། །གང་དང་གང་གི་མིང་རྣམས་ཀྱིས། །ཆོས་རྣམས་གང་དང་གང་བརྗོད་པ། །དེ་ནི་དེ་ན་ཡོད་པ་མིན། །ཀུན་དུ་བརྟགས་པའི་རང་བཞིན་ནོ། །འདི་དག་ཐམས་ཅད་མིང་ཙམ་སྟེ། །འགྲོ་བ་འདི་ནི་མིང་ཙམ་མོ། །རྗོད་པ་དང་ནི་ཐ་དད་པ། །བརྗོད་པར
45.45a
བྱ་བ་གང་ཡང་མེད། །འདི་ནི་ས་ཡི་རང་བཞིན་ཏེ། །ཀུན་དུ་བརྟགས་པ་རབ་ཏུ་བསྟན། །མིག་དང་གཟུགས་ལས་བརྟེན་བྱས་ཤིང ། །གསུམ་ལས་ཡིད་དེ་འབྱུང་བ་ཡིན། །རྔ་སྒྲ་མེ་ནི་འདུ་འཕྲོད་ལས། །མྱུ་གུ་ས་བོན་ས་ལས་རིམ། །ཁང་པ་ལ་སོགས་སྣ་ཚོགས་དང ། །སྣམ་བུ་རྫ་ལ་སོགས་པ་དང ། །ལུས་ཅན་རྣམས་དང་ཆོས་རྣམས་ཀྱི། །འདི་ནི་རང་བཞིན་གཞན་དབང་ངོ ། །དོན་རྣམས་དོར་བ་མེད་པ་དང ། །གང་ཡང་ཟག་པ་མེད་པའི་ཆོས། །སོ་སོ་རང་རིག་རྒྱུད་རྣམས་དང ། །ཆོས་ལ་བདག་མེད་ཉིད་དང་ནི། །ཐམས་ཅད་ཆོས་གྱི་གྲུབ་པ་སྟེ། །རང་བཞིན་དུ་ནི་དེ་བརྟགས་སོ། །རང་བཞིན་གྱིས་ནི་ཆོས་ཀྱི་རྣམས། །ཐ་དད་མཚན་དུ་བསྒྲགས་པ་སྟེ། །ཆོས་རྣམས་ཐམས་ཅད་འདྲེས་པར་ནི། །རང་བཞིན་མེད་ན་རབ་ཏུ་འགྱུར། །གཅིག་མིན་རྫས་རྣམས་འདུས་པ་ལས། །སྒྱུ་མའི་མཁན་པོས་གཅིག་མིན་གཟུགས། །རྟོགས་པར་སླ་བ་མ་ཡིན་པའི། །སྒྱུ་མའི་རི་དགས་བྱས་པ་བཞིན། །དེ་ལྟར་དངོས་པོ་ཐམས་ཅད་ཀྱང ། །རྣམ་པར་རྟོག་པས་རྣམ་པར་བརྟགས། །རྟོགས་པར་མི་རུང་མི་གཅིག་གཟུགས། །ཀུན་དུ་བརྟགས་པའི་རང་བཞིན་ནོ། །སྣ་ཚོགས་ནོར་བུ་འདྲ་བ་ཡི། །རི་དགས་རྫས་ཀྱི་རྒྱུ་ཚོགས་ནས། །སྒྱུ་མའི་མཁན་པོས་རྣམ་བྱས་དང ། །སེམས་ཅན་ཀུན་གྱི་གཟུགས་བཞིན་ཏེ། །དེ་ལྟར་དངོས་པོ་འདི་དག་ཀུན། །རྣམ་པར་རྟོགས་པས་རྣམ་པར་བརྟགས། །རང་བཞིན་རྟོགས་པར་དཀའ་བ་སྟེ། །ཀུན་དུ་བརྟགས་པའི་རང་བཞིན་ནོ། །ཇི་ལྟར་ནོར་བུ་སྣ་ཚོགས་གཟུགས། །ཚོན་དང་ཕྲད་ན་རྣམ་པར་མཛེས། །དེ་བཞིན་ས་རྣམས་ཀུན་ཀ་སྟེ། །རྟོག་པས་རྣམ་པར་བརྟགས་བྱས་ན། །ཡོན་ཏན་དངོས་སུ་མི་གནས་ཏེ། །སྒྱུ་མ་རྨི་ལམ་སྤྲིན་དང་འདྲ། །སྨིག་རྒྱུ་ཆུ་ཟླ་ལྟ་བུ་སྟེ། །ཀུན་དུ་བརྟགས་པའི་རང་བཞིན་ནོ། །ཇི་ལྟར་དྲི་ཟའི་ཁང་པ་དག་།ཁང་པ་མ
45.45b
ཡིན་ཁང་པར་སྣང ། །རྒྱུ་མེད་པར་ཡང་མི་སྣང་སྟེ། །དེ་བཞིན་ས་རྣམས་སྣ་ཚོགས་ཉིད། །ཉི་ཟླ་གཞལ་ཡས་ཁང་རྣམས་དང ། །ཐ་མལ་རི་དང་རིན་ཆེན་རི། །དུ་བ་སྤྲིན་གྱི་གནོད་པས་ནི། །ནམས་ཀྱང་ཉེས་པར་མི་འགྱུར་ཏེ། །བདག་དང་གཞན་དང་གཉིས་ཀ་ལས། །རྟོག་པས་རྣམ་པར་བརྟག་བྱས་ན། །དངོས་ཉིད་མི་འགྲུབ་དངོས་རྣམས་ཀྱི། །རང་བཞིན་ཀུན་དུ་བརྟག་པའོ། །རྒྱུ་ལས་དངོས་པོ་མི་འབྱུང་སྟེ། །རྒྱུ་མེད་ལས་ཀྱང་མ་ཡིན་ནོ། །རང་བཞིན་ཞེས་བྱ་རྣམ་རྟོག་སྟེ། །དངོས་དང་དངོས་མེད་རྣམ་པར་བརྟགས། །མཚན་མ་ལ་ནི་མིང་རྟེན་ཏེ། །གཉིས་ལ་རྣམ་པར་རྟོག་པ་གནས། །ཡང་དག་ཤེས་དང་དེ་བཞིན་ཉིད། །རྣམ་པར་རྟོག་པ་ཟློག་པའོ། །སེམས་ནི་མཚན་མ་འདྲ་བ་སྟེ། །མཚན་མ་ཡིད་ལ་གནས་པ་ཡིན། །ཡིད་ལ་སེམས་རྣམས་ལྔ་པོ་ནི། །དབའ་རླབས་བཞིན་དུ་རབ་ཏུ་འབྱུང ། །སེམས་ནི་བག་ཆགས་རྒྱུ་བ་སྟེ། །བག་ཆགས་རྣམས་ལ་ཐོག་མ་མེད། །ཐོག་མ་མེད་པའི་བློ་ཡི་ཡུལ། །ཡུལ་ནི་སེམས་ཀྱི་ནོར་བའོ། །སེམས་ནི་ཡུལ་དང་འདྲ་བ་སྟེ། །ས་རྣམས་ཡུལ་ཞེས་བྱ་བ་ཡིན། །ཐམས་ཅད་ས་བོན་ཀུན་གཞི་ལ། །རྣམ་པར་ཤེས་པ་ཀུན་ཀྱང་གནས། །རྣམ་ཤེས་བདུན་པོ་ཀུན་གཞི་ལས། །རབ་ཏུ་འབྱུང་ངོ་ཕན་ཚུན་དང ། །སེམས་ཀྱི་རྣམས་དང་ཀུན་གཞི་ལ། །རྟག་མེད་ཆད་པའང་མེད་པ་སྟེ། །ས་རྣམས་ཐམས་ཅད་ཀུན་གཞི་ཡིན། །བར་སྣང་རྣམ་པར་གནས་པ་སྟེ། །གསུམ་པོ་འདུས་པའི་རྐྱེན་བྱུང་བ། །བདག་དང་དབང་པོ་དག་ལས་བྱུང ། །ལུས་ཅན་རྣམས་ཀྱི་རྣམ་ཤེས་ནི། །ཡུལ་རྣམས་རྙེད་ནས་འབྱུང་བ་སྟེ། །འདི་ནི་རྟོག་པ་ཅན་གྱི་ཚུལ། །རྒྱུ་དང་ལས་ཀྱི་རྒྱུས་བྱུང་བ། །དབང་པོ་ས་རྣམས་ཐམས་ཅད་དང ། །ཚངས་ལ་སོགས་པ་ཕྱི་རོལ་དང ། །དེ་དག་ལྷ་མིན་ལས་ཀྱང་མིན། །རྡུལ་ཕྲན་གྱིས་ཀྱང་ས་མ་བྱས། །ས་རྣམས་ལྟ་བུར་ཀུན་གཞི་ཉིད། །ལྟ་བའི་ཡུལ་དུ་གཡོ་བ་ཡིན། །རྐྱེན་རྣམས་ཀུན་གཞི
45.46a
མ་བྱས་ཏེ། །རྐྱེན་གྱིས་ཀུན་གཞི་བྱས་པ་མིན། །འདི་དག་ལ་ནི་གསུམ་འདུས་མེད། །རྣམ་ཤེས་འོན་ཀྱང་འཁོར་བ་སྟེ། །ཤེལ་འདྲ་ཟླ་བ་བཞིན་དུ་ཡང ། །རྣམ་ཤེས་རྣམས་དང་ལྷན་ཅིག་རྒྱུ། །བག་ཆགས་བྱུང་བའི་རྣམ་ཤེས་དང ། །ཀུན་གཞི་རྟག་ཏུ་འགྲོགས་པ་ནི། །ཟླ་བ་སྤྱང་གིས་ཟིན་པ་བཞིན། །རྣམ་ཤེས་རྣམས་དང་ལྷན་ཅིག་རྒྱུ། །བག་ཆགས་དེ་ལས་ལངས་པ་ཡིས། །རྒྱས་པར་བྱེད་དོ་ཡང་དང་ཡང ། །རྒྱས་པ་གཞན་ཡང་རྒྱས་བྱེད་དེ། །དེ་ལའང་གཞན་གྱིས་ཡང་དང་ཡང ། །དེ་ལྟར་རབ་ཏུ་འཇུག་པའི་སེམས། །མཐོང་ནས་སེམས་དེ་རྣམ་པར་ལྡོག་།མི་བརྟན་ཡུལ་ལ་ཀུན་ནས་འབྲེལ། །ཁབ་ལོང་རྡོ་ལ་ལྕགས་བཞིན་ཏེ། །ཀུན་གྱི་གཞི་ལ་སེམས་ཡོད་པ། །ཟག་བཅས་ཟག་པ་མེད་པ་དག་།བག་ཆགས་དག་གིས་བསྒོས་པའི་རྣམས། །འཇུག་དང་ཕྱིར་ལྡོག་བྱེད་པ་ཡིན། །ཇི་ལྟར་བསྲེག་ལས་མེ་བུས་ཤིང ། །གཞན་དུ་མེ་ཡང་རབ་ཏུ་བུད། །དེ་དང་གཞན་དུ་དེ་བཞིན་བུད། །དེ་དག་ནས་ཀྱང་སྤོ་བཞིན་དང ། །དེ་ལྟར་ཀུན་གཞི་རྣམ་ཤེས་དང ། །གཞན་ཡང་དེ་ལས་བྱུང་བ་རྣམས། །ཆོས་ལ་རབ་ཏུ་རྒྱུ་བ་ནི། །གཏོགས་དང་ཟག་པ་མེད་པ་དག་།མཐོང་བའི་ཆོས་ལ་གནས་པ་ཡི། །ཡུལ་དང་ཡུལ་ཅན་དེ་ཡིན་ཏེ། །འཕགས་པ་མཐོང་བའི་ཆོས་ཅན་གྱི། །ཏིང་ངེ་འཛིན་ཀྱང་འདི་དག་ཡིན། །འཕགས་པ་དེ་དག་དེ་ལྡན་ཞིང ། །སྒོམ་དང་མཐོང་བ་ལྡན་པས་ན། །ཆོས་ཀུན་དེ་བཞིན་ཉིད་ཤས་པ། །ཞིང་ནས་ཞིང་དུ་རབ་ཏུ་འདོང ། །ཇི་ལྟར་ཤིན་དུ་བཟང་བའི་གསེར། །གསེར་གྱི་དབྱིངས་ན་མི་སྣང་སྟེ། །བརྩལ་བས་ཤིན་ཏུ་ཞིབ་བཏགས་ནས། །ཡོངས་སུ་སྦྱངས་ན་སྣང་བར་འགྱུར། །དེ་བཞིན་ཀུན་གཞི་རྣམ་ཤེས་པ། །རྣམ་པར་ཤེས་པ་བདུན་དང་བཅས། །ཏིང་ངེ་འཛིན་གྱིས་ཡོངས་སྦྱངས་པའི། །
45.46b
རྣལ་འབྱོར་ཅན་གྱིས་རྟག་ཏུ་མཐོང ། །ཇི་ལྟར་མ་བསྲུབས་ཞོ་ལ་ཡང ། །དེ་ན་མར་ཡོད་མི་སྣང་སྟེ། །བསྲུབ་པའི་ཚུལ་གྱིས་མཐོང་བས་ན། །མཁས་པ་རྣམས་ཀྱིས་དེ་ཕྱིར་བསྲུབ། །དེ་བཞིན་ཀུན་གཞི་རྣམ་པར་ཤེས། །རྣམ་ཤེས་བདུན་དང་ལྡན་པ་ཡང ། །རྣམ་པར་བསྲུབས་ཤིང་སྟུག་སྤྱོད་པའི། །ཐུབ་པ་རྣམས་ཀྱིས་མཐོང་བ་ཡིན། །མ་རིག་པ་ནི་སྡུག་ཅེས་བྱ། །དཀྱིལ་འཁོར་ཡེ་ཤེས་རྣམ་གྲངས་ཏེ། །དཀྱིལ་འཁོར་འདི་ལ་བསླབས་པ་ཡི། །རྣལ་འབྱོར་ཅན་རྣམས་སྡུག་པོར་འདོང ། །གཟུགས་མེད་གཟུགས་ཡོད་ནམ་མཁའ་དང ། །རྣམ་ཤེས་འདུ་ཤེས་མ་ཡོད་དག་།རྣལ་འབྱོར་ཅན་གྱིས་ཡུལ་བསྒོམས་སམ། །དེ་དག་སྟུག་པོའི་ཞིང་དུ་འདོང ། །ཉི་མ་ཟླ་བའི་འོད་བཞིན་དུ། །འཇིགས་པ་མེད་པའི་རྒྱལ་བའི་སྲས། །རྣམ་འབྱོར་ཅན་གྱི་ཐུབ་སྟོན་ཅིང ། །རྣལ་འབྱོར་སྤྱོད་པའི་ལམ་གནས་པ། །སངས་རྒྱས་ཀུན་ཀྱི་དབང་བསྐུར་བས། །དེ་ནི་དབང་བསྐུར་སྟུག་པོར་སོང ། །སངས་རྒྱས་རྣལ་འབྱོར་རྗེས་སུ་མཐོང ། །གཞན་དུ་གྱུར་ནས་སྟུག་པོར་སོང ། །སྟུག་ན་གནས་ཤིང་སྤྲུལ་པ་དང ། །སྤྲུལ་པའི་སྤྲུལ་པ་དེ་དག་གིས། །གང་ན་གང་ཆོས་སུ་འདོད་པ། །དེ་ནི་མཁའ་ལ་འདུག་ཅིང་སྟོན། །སྔོན་མེད་དུས་ཀྱི་གནས་ངན་ལེན། །བག་ཆགས་རྒྱུ་ཡིས་བསགས་པ་ཡི། །ཀུན་གཞི་རྣམ་རྟོག་བྱས་པ་ཡིས། །བཅིངས་པ་ཀུན་དུ་རབ་ཏུ་འབྱུང ། །ཇི་ལྟར་རྒྱ་མཚོའི་དབའ་རླབས་རྣམས། རླུང་གིས་རབ་ཏུ་བསྐྱོད་པ་དག་།རྒྱུན་མི་འཆད་པར་རབ་ཏུ་འབྱུང ། །རྣམ་ཤེས་དེ་བཞིན་ཀུན་གཞི་ལ། །རྣམ་ཤེས་དེ་ནི་དེས་བྱས་པའི། །བག་ཆགས་རྣམས་ཀྱིས་རྒྱས་པར་འགྱུར། །འབྱུང་ཞིང་ལ་ལ་ཕྱིར་ལྡོག་སྟེ། །ཆད་མེད་རྟག་པ་མེད་པའོ། །རང་སེམས་ཁོང་དུ་མ་ཆུད་པས། །ཡུལ་ལ་གཞོལ་བའི་རྣམ་ཤེས་རྣམས། །རབ་ཏུ་ཞུགས་ཀྱང་ཕྱིར་ལྡོག་པ། །འགྲོ་བ་རང་སེམས་མཐོང་བའི་ཚེ། །དེ་བཞིན་གཞན་དུ
45.47a
གྱུར་པའི་སེམས། །མེ་དང་བསྲེག་པ་ཇི་བཞིན་ཏེ། །ཀུན་གཞི་ཡུལ་ལྟར་སྣང་བ་ཡང ། །གཞན་དུ་གྱུར་ནས་ཟག་པ་མེད། །ཟག་མེད་འགྲོས་སུ་སོང་བ་དང ། །འཕགས་པའི་རིགས་སུ་སྐྱེ་བར་འགྱུར། །ཀུན་གཞི་ཡུལ་ལྟར་སྣང་བ་ནི། །ས་རྣམས་ཁྱབ་པར་བྱས་ཤིང་གནས། །ཡིད་ནི་བདག་ལ་བདག་ཅེས་ཏེ། །ངར་སེམས་རབ་ཏུ་འཇུག་པ་ཡིན། །རྣམ་ཤེས་ཁ་དོག་ཁྱད་པར་དང ། །ཀུན་དུ་གཅོད་པ་རབ་ཏུ་བྱེད། །སེམས་ནི་ལས་རྣམས་སོགས་པ་སྟེ། །ཡིད་ནི་ཁོང་དུ་ཆུད་པར་བྱེད། །རྣམ་པར་ཤེས་པས་རྣམ་པར་རིག་།ལྔ་པོས་སྣང་བ་མཐོང་བར་འགྱུར། །རབ་རིབ་ལྡན་པ་མྱོས་པ་ཡིས། །ཇི་ལྟར་སྐྲ་ཚོགས་མཐོང་བ་བཞིན། །གཟུགས་ལ་སོགས་ལ་གཟུགས་མེད་དེ། །སེམས་ནི་གཟུགས་ལྟར་གནས་པ་ཡིན། །ཉི་མ་ཟླ་བའི་ནོར་བུ་དག་།ཡོངས་སུ་དག་པའི་མཚན་ཉིད་ཅན། །ཉི་ཟླའི་ཟེར་གྱིས་ཕོག་པ་དང ། །དེ་དག་རང་གི་ཡོན་ཏན་འབྱིན། །དེ་བཞིན་ཀུན་གཞི་རྣམ་ཤེས་པ། །དེ་བཞིན་གཤེགས་པའི་དགེ་སྙིང་པོ། །ཟག་མེད་ལེགས་དང་ལྡན་གྱུར་ཏེ། །གཞན་དུ་འགྱུར་ན་རབ་ཏུ་འབྱིན། །འདི་ལྟར་སྣང་བ་གང་ཡང་རུང ། མཚན་མ་གཟུགས་སུ་སྣང་བའི་རྣམས། །བག་ཆགས་ཡོག་པའི་ཀུན་གཞི་སྟེ། །ས་རྣམས་ཀུན་ན་གཟུགས་ལྟར་གནས། ཇི་ལྟར་འོ་མར་གྱུར་པ་དང ། །ཡོན་ཏན་ཞོ་དང་དར་བར་སྣང ། །དེ་བཞིན་ཀུན་གཞི་རྣམ་ཤེས་ཀྱང ། །རྣམ་པར་གྱུར་ནས་གཟུགས་ལྟར་གནས། །ཇི་ལྟར་རབ་རིབ་ལྡན་པས་སྐྲ། །མིག་གི་ཉེས་པས་རྣམ་མཐོང་བ། །དེ་བཞིན་བག་ཆགས་ཉེས་ལྡན་པའི། །ཀུན་གཞི་ལུས་ཅན་རྣམ་སྐྱི་སྟེ། །རྟག་ཏུ་མིག་གི་ནང་སོང་བའི། །གཟུགས་ཀྱིས་སྣང་བར་རབ་ཏུ་འཇུག་།འདི་དག་སྣང་བ་ཅི་འང་རུང ། །སྨིག་རྒྱུ་ཆུ་ཡི་དཔེ་བཞིན་ཏེ། །གཟུགས་ནི་ཡོད་དང་མེད་ཀྱིས་སྤངས། །ཀུན་གཞི་རྗེས་སུ་མཐོང་བའོ། །མིག་དང
45.47b
གཟུགས་ལས་རྟེན་བྱས་ཤིང ། །དེ་ནི་སྒྱུ་མ་བཞིན་དུ་འབྱུང ། །རྟག་ཏུ་མིག་གི་ནང་སོང་བ། །སྨིག་རྒྱུ་བཞིན་དུ་རབ་ཏུ་གཡོ། །གཟུགས་ཀྱི་ཡོན་ཏན་ལྡན་པའི་གཟུགས། །ཀུན་གཞི་གཟུགས་ལྟར་གནས་པ་སྟེ། །བྱིས་པ་ཇི་ལྟར་བརྟགས་པ་བཞིན། །གཟུགས་ནི་གུད་ན་ཡོད་པ་མིན། །བྱེད་མེད་སེམས་པའང་མེད་པ་སྟེ། །དབུ་བའི་ཕུང་པོ་བཞིན་དུ་གནས། །གཉིད་ལོག་ར་རོ་དྲེགས་པ་དང ། །འགྲོ་འདུག་རྣམ་པར་རྒྱུག་པ་ཡི། །ལུས་ཅན་རྣམས་ཀྱི་ཀུན་གཞིའོ། །ཇི་ལྟར་གདུང་བས་བསར་ས་ལས། །གྱེན་དུ་ལྡང་བའི་སྨིག་རྒྱུ་རྣམས། །དཔྱིད་ཀའི་ཆུ་ལྟར་རབ་ཏུ་གཡོ། །རི་དགས་རྣམས་ལ་སླུ་བར་བྱེད། །དེ་བཞིན་ཀུན་གཞི་རྣམ་ཤེས་ཀྱང ། །གཟུགས་མིན་ལྟ་བའི་སྤྱོད་ཡུལ་དུ། །གཟུགས་སྣང་ཇི་ལྟར་རྟོག་ཅན་གྱིས། །བརྟགས་བཞིན་གཟུགས་འདྲ་མ་ཡིན་ནོ། །ཇི་ལྟར་ཁབ་ལོང་མཐོང་བ་དང ། །ལྕགས་ནི་མྱུར་བར་ཀུན་དུ་འཁོར། །འོན་ཀྱང་དེ་ལ་སེམས་པ་མེད། །སེམས་ལྡན་བཞིན་དུའང་རབ་ཏུ་སྣང ། །དེ་བཞིན་ཀུན་གཞི་རྣམ་ཤེས་ཀྱང ། །སེམས་མེད་སེམས་ཅན་ཇི་བཞིན་དུ། །འགྲོ་དང་འོང་བར་གཡོ་བ་སྟེ། །ས་རྣམས་འབྲི་བར་རབ་ཏུ་བྱེད། །ཇི་ལྟར་རྒྱ་མཚོ་ཛ་རུ་ནི། །སྲོག་མེད་པར་ཡང་གཡོ་འགུལ་ཏེ། །དེ་བཞིན་ཀུན་གཞི་རྣམ་ཤེས་པ། །ལུས་ལ་གནས་ཤིང་གཡོ་བར་གྱུར། །གླང་པོ་གླང་པོའི་གཟུགས་བརྙན་དང ། །ཇི་ལྟར་འཐབ་ཅིང་ཆོམས་ནས་མིན། །དེ་བཞིན་ཀུན་གཞི་རྣམ་ཤེས་པ། །འཇུག་པ་ཆོམས་ནས་མི་རྒྱུའོ། །ཇི་ལྟར་པད་མོ་དྲི་མེད་པ། །འདམ་གྱི་ནང་ནས་བྱུང་བ་ནི། །མི་དང་ལྷ་དང་བཙུན་ལ་འོས། །ལྷ་ཡུལ་གནས་པ་ཀུན་ཀྱང་འདོད། །དེ་བཞིན་ཀུན་གཞི་རྣམ་པར་ཤེས། །བག་ཆགས་འདམ་ནས་བྱུང་བ་ནི། །རྣམ་དག་གཞན་དུ་གནས་གྱུར་པ། །བདག་ཉིད་ཆེ་རྣམས་འདོད་པ་ཡིན། །
45.48a
ཇི་ལྟར་རིན་ཆེན་རྣམ་པར་དག་།རི་བྲགས་མི་ཡིས་བཅགས་བརྡུངས་ཀྱང ། །རྒྱལ་པོའི་ཅོད་པན་དུ་འང་འོས། །ཅོད་པན་ལ་ཡང་གདགས་པ་ཡིན། །དེ་བཞིན་ཀུན་གཞི་རྣམ་པར་ཤེས། །བག་ཆགས་རྣམས་ཀྱིས་བཅགས་བརྡུངས་པ། །རྣམ་དག་སངས་རྒྱས་རིགས་ཡིན་ཏེ། །སངས་རྒྱས་ཉིད་དུ་དེ་གཟུང་ངོ ། །ཇི་ལྟར་ཆུ་གཏིང་རྡོ་བ་དག་།ཉ་ལྕིབས་དག་གིས་ཡོངས་དཀྲིས་པ། །དེ་བཞིན་ཀུན་གཞི་རྣམ་ཤེས་ཀྱང ། །བག་ཆགས་དྲི་མ་ཅན་དུ་བྱས། །གཟུང་དང་འཛིན་པའི་གཟུགས་སུ་ཡང ། །དངོས་པོ་གཉིས་ཀྱིས་རབ་ཏུ་འཇུག་།ཇི་ལྟར་ཁ་གཉིས་ཡོད་པའི་སྦྲུལ། །གང་དུ་འདོད་པ་དེར་འགྲོ་སྟེ། །དེ་བཞིན་ཀུན་གཞི་རྣམ་པར་ཤེས། །རིམ་དང་ཅིག་ཅར་རྒྱུ་བ་ཡིན། །རྟག་ཏུ་སྣ་ཚོགས་གཟུགས་ལྟ་བུ། །དེ་ལ་རྟོག་པས་རྣམ་པར་བརྟག་།རྟོག་ཅན་རྣམ་པར་མྱོས་འགྱུར་བ། །བདག་དང་བདག་གིར་རྣམ་རྟོག་ཅིང ། །ཡོད་དང་མེད་ཀྱི་རྒྱུ་སྡོད་པའི། །ས་རྣམས་ལ་ཡང་རྣམ་རྟོག་སྟེ། །འགྱུར་བའི་ཡོངས་སུ་གྱུར་པ་དང ། །ཀུན་གཞི་ཟབ་པ་ཉིད་དག་ཀྱང ། །བློ་ཆུང་རྣམས་ཀྱིས་མི་རིགས་པས། །སྒྱུ་མའི་རི་དགས་བཞིན་དུ་འཁོར། །རང་བཞིན་གཅིག་མིན་ཤས་པར་དཀའ། །ལུས་ཅན་ཀུན་ལ་འདྲ་བ་སྟེ། །དེ་བཞིན་ཀུན་གཞི་རྣམ་ཤེས་ཀྱང ། །རྟག་ཏུ་སྒྱུ་མའི་རི་དགས་འདྲ། །སེམས་ཅན་གཅིག་མིན་ཤེས་པར་དཀའ། །ཡོད་དང་མེད་པར་རྣམ་པར་བརྟག་།རྡུལ་དང་གཙོ་བོ་སྐྱེས་བུ་དང ། །མི་གསལ་ཚངས་པའང་དེ་ཡིན་ཏེ། །རྟོག་པས་འཁྲུལ་པའི་རྟོག་ཅན་རྣམས། །ཀུན་གཞི་ལ་ནི་རྟག་ཏུ་རྟོག་།ས་རྣམས་ལྟ་བུར་གནས་པ་ལ། །སྣ་ཚོགས་སར་ཡང་དེ་བཞིན་རྟོག་།ས་ལ་གང་གིས་རྟོགས་གྱུར་པའི། །ཡིད་ནི་ཀུན་ནས་རྟོག་ཅེས་བྱ། །ཇི་ལྟར་རི་མོ་མཐོན་མན་དང ། །རྣམ་པ་སྣ་ཚོགས་སྤྲིན་གྱི་གཟུགས། །འཇའ་དང་རི་དགས་སྲེད་བྱེད་དང ། །
45.48b
སྤྲིན་སྒྲ་འབྲུག་ཀྱང་ཇི་བཞིན་ཏེ། །རབ་རིབ་ཅན་གྱི་ཕྲེང་བ་དང ། །བཟང་མོའི་གདོང་ཡང་དེ་བཞིན་དུ། །རྨི་ལམ་དག་ནི་རྣམ་སྣ་ཚོགས། །དྲི་ཟའི་ཁང་པ་གནས་རྟེན་དང ། །རོ་ལངས་ཆུ་ཡི་ཤིང་རྣམས་དང ། །བྲག་ཆ་སྤྲིན་དང་དུ་བ་དང ། །མེ་ལོང་མིག་ལ་གཟུགས་བརྙན་དང ། །ཆུ་ལ་ཆུ་ཡི་ཟླ་བ་དང ། །རྣམ་རྟོག་འདི་དང་མང་པོར་ཡང ། །འགྲོ་བ་རྣམས་ནི་ཀུན་གཞི་རྟོག་།གང་ཚེ་ཀུན་གཞི་འདི་འདྲ་བར། །རྣམ་པར་སྣ་ཚོགས་ཀུན་མཐོང་སྟེ། །འགྲོ་བ་རང་སེམས་མཐོང་བ་དང ། །དེའི་ཚེ་སེམས་ནི་ཕྱིར་ལྡོག་གོ། །ཆོས་རྣམས་ཐམས་ཅད་ཀུན་གྱི་གཞི། །བག་ཆགས་སྙོམས་ལས་སོགས་པ་དང ། །རྟོག་པས་རྙོག་པ་ཅན་དུ་བྱས། །གཞན་དུ་གྱུར་ནས་ཟག་པ་མེད། །ཟག་མེད་རང་ལུགས་རབ་ཐོབ་ནས། །དེ་དག་རྟག་ཅིང་བརྟན་པར་འགྱུར། །ནམ་མཁའ་མྱ་ངན་འདས་དང་མཉམ། །འགོག་དང་འདྲ་བ་དེ་བཞིན་ཏེ། །མཉམ་གཞག་སེམས་དང་ལྡན་པ་ལ། །མི་ཟག་ཆོས་རྣམས་སྐྱེ་བར་འགྱུར། །རྫུ་འཕྲུལ་བསམ་གཏན་རྣམ་ཐར་དང ། །ཏིང་ངེ་འཛིན་དང་སྟོབས་རྣམས་དང ། །མཁས་དང་སྟོབས་དང་མངོན་ཤེས་དག་།འབྲི་མེད་མི་ཟད་དེ་བཞིན་ཏེ། །ནམ་མཁའ་ཟད་ཀྱི་མཐའ་སྙིགས་ཤིང ། །དབྱིངས་བློ་རྣམ་ཤེས་རྟག་པ་དང ། །མཐར་ཕྱིན་བཅུ་ཡི་གནས་ལྡན་ཞིང ། །ཡིད་བཞིན་ཤིན་དུ་བརྟན་པའི་ལུས། །རྣལ་འབྱོར་མཁས་པའི་རྣལ་འབྱོར་ཅན། །གཞན་དུ་གྱུར་ནས་རབ་ཏུ་འཐོབ། །འཇིག་པ་མྱ་ངན་འདའ་མ་ཡིན། །སེམས་ཅན་ཡོད་མིན་སྐྱེ་བ་མེད། །འབྲི་མེད་གང་བ་མེད་པར་ཡང ། །རྒྱལ་བ་རྣམས་ཀྱིས་འགྲོ་བར་བཤད། །ཞིང་གཞན་རྣམས་དང་ཞིང་འདི་ཡི། །ཆོས་ཉིད་གཅིག་ཏུ་ཟད་པ་སྟེ། །སྐྱེས་པར་གྱུར་ཏམ་མ་སྐྱེས་ཀྱང ། །ཆོས་རྣམས་ཆོས་ཉིད་དེ་བཞིན་གནས། །རྣལ་འབྱོར་ལྡན་པ་གྲོལ་བ་ལ། །རྟག་མེད་ཆད་པ་མེད་པ་སྟེ། །སེམས་ཅན་ཁམས་རྣམས་ཞིག་གྱུར་ན།
45.49a
ཐམས་ཅད་མཁྱེན་པ་མི་སྣང་ངོ ། །མ་བྱོན་པ་ཡི་རྒྱལ་བ་དང ། །འདས་དང་ད་ལྟར་བྱུང་བ་དག་།མཉམ་པ་མ་ཡིན་འཐུན་པ་མིན། །ཤེས་བྱ་ཟད་ནས་དེ་དག་འབྱུང ། །བདུད་རྣམས་ཚར་བཅད་ལོག་པ་སྟེ། །བརྗོད་དང་བཅས་དང་བརྗོད་མེད་ཀྱང ། །དེ་སྟེ་སེམས་ཅན་འཇིག་ན་ནི། །སྡུག་བསྔལ་སྤུངས་ལས་མི་འགྲོལ་ལོ། །ལྕགས་ཀྱི་གར་བུ་བསྲེགས་པ་ལས། །མེ་ལས་བྱུང་སྟེ་བསིལ་གྱུར་ཅིང ། །ལྕགས་ནི་རྟག་པར་འདུག་པ་བཞིན། །དེ་ལྟར་རྣལ་འབྱོར་ཅན་དག་འཁོད། །ཕུང་པོའི་ཁྱིམ་དང་དེས་བྱུང་བའི། །བག་ཆགས་རྣམས་ཀྱང་འགག་པ་དང ། །ཐུབ་པ་རྣལ་འབྱོར་བརྩོན་པའི་རྣམས། །དེ་དག་རྟག་ཅིང་གྲོལ་བ་ཡིན། རྣམ་ཤེས་རྣམས་ནི་དབའ་རླབས་བཞིན། །ཀུན་གཞི་མཚོ་ལས་འབྱུང་བ་སྟེ། །ཆོས་ལྔའི་རང་བཞིན་རྣམ་ཤེས་ཀྱིས། །རབ་ཏུ་བསྐྱོད་ཅིང་ཤིན་དུ་རྒྱུ། །གནས་ངན་ལེན་གྱི་སྤྲོས་པ་ཡིས། །བཅོམ་པ་གནས་མེད་དོན་གྱི་གཟུགས། །ལྟ་བའི་ཡུལ་དུ་རྣམ་པར་གཡོ། །དེ་ལྟར་ཤེས་ནས་ཕྱིར་ལོག་སྟེ། །གཞན་གྱུར་མི་བཟད་རྟག་པའི་རྣམས། །མགོན་པོ་དག་ནི་སྟུག་པོར་འདོང ། །སྟུག་ན་གནས་པ་ཟླ་བ་བཞིན། །རྟག་ཏུ་གཟུགས་བརྙན་རྣམ་པར་མཛེས། །ཕུང་པོ་སྟུག་པ་ཀུན་གཞི་སྟེ། །ཡིད་ནི་དེ་ལ་ཉེ་ཕན་ནོ། །རྣམ་པར་ཤེས་པ་རྟོགས་པར་བྱེད། །གཟུགས་དང་ལས་ལ་སོགས་པའི་རྒྱུ། །རྣམ་ཤེས་ལྔ་ཡི་ཚོགས་རྣམས་ནི། །དབང་པོར་བཅས་ཤིང་ཡུལ་གཞོལ་བས། །སྣ་ཚོགས་ཡུལ་ལ་འཛིན་པར་བྱེད། །ཀུན་གཞི་ཡུལ་ཅན་མ་ཡིན་ནོ། །ཚེ་ནི་ཀུན་གཞི་རྣམ་ཤེས་ཏེ། །ཡིད་ནི་དྲོད་དུ་རབ་ཏུ་གནས། །ཡིད་ཀྱི་རྣམ་ཤེས་དེ་ན་སྟེ། ལྷག་མ་དབང་པོ་ལྔར་ཡང་གནས། །སེམས་དང་ཡིད་དང་རྣམ་པར་ཤེས། །ཕུང་པོའི་དབུས་ན་རྣམ་པར་གནས། །བག་ཆགས་ལས་དང་འབྲེལ་བའི་རྣམས། །སྔན་ཆད་བྱས་པ་རྣམས་ཀྱིས་འབྱུང ། །འདོད
45.49b
ཆགས་སྲེད་ལས་བྱུང་བ་ཡི། །ལས་ཀྱིས་བྱ་བ་བྱེད་པ་སྟེ། །སྔོན་ཆད་དེ་དག་ལས་བྱས་པས། །རྒྱུན་དུ་ལས་རྣམས་འབྱུང་བ་ཡིན། །ལུས་ལས་ལུས་ནི་གཞན་ལ་འགྲོ། །འཕོ་བ་སྲིན་བུ་པད་མ་བཞིན། །སེམས་དང་སེམས་བྱུང་བཅས་པའི་རྣམས། །རྒྱུན་ཆགས་པར་ནི་ཤིན་དུ་འདོང ། །ཡང་ཞིང་ཕུང་པོའི་ཚོགས་རྣམས་དང ། །རྣམ་ཤེས་སྲིད་པ་དོག་པར་ཡང ། །ཚོགས་ཤིང་རབ་ཏུ་འབྱུང་བ་ནི། །ལས་རྣམས་ཤིན་དུ་འབྱུང་བའི་ཕྱིར། །ཚེ་དང་དྲོད་དང་རྣམ་ཤེས་འདིས། །གང་ཚེ་ལུས་ནི་བོར་གྱུར་པ། །དེ་ཚེ་ལུས་ནི་དོར་བ་སྟེ། །ཤིང་བཞིན་ཚོར་བ་མེད་པའོ། །སེམས་ནི་ཀུན་གཞི་རྣམ་པར་ཤེས། །ངར་སེམས་བདག་ཉིད་ཡིད་ཡིན་ནོ། །གང་ཞིག་ཡུལ་ལ་འཛིན་བྱེད་པ། །དེ་ནི་རྣམ་པར་ཤེས་ཤེས་བྱ། །སེམས་ནི་ལས་རྣམས་སོགས་པ་སྟེ། །ཡིད་ནི་ཁོང་དུ་ཆད་པར་བྱེད། །རྣམ་པར་ཤེས་པས་རྣམ་པར་རིག་།ལྔ་པོས་སྣང་བ་རྟོགས་པར་བྱེད།། །།འཕགས་པ་རྒྱན་སྟུག་པོ། བམ་པོ་བཞི་པ་སྟེ་ཐམ་པ། ལུས་ནི་སེམས་ཀྱིས་བཟུང་བ་ཡིན། །ཡིད་ནི་ལམ་རྒྱུད་འདོད་པ་སྟེ། །རྣམ་པར་ཤེས་པས་རྣམ་པར་རིག་།སྣང་བ་གཅོད་པ་ལྔ་པའོ། །རྒྱུ་ལ་དམིགས་ཤིང་རྣམ་ཤེས་རྣམས། །སྐྱེ་སྟེ་གཞན་ནི་དེ་རྗེས་འབྲང ། །ཡིད་ལ་དམིགས་ཤིང་གཞན་དག་ཀྱང ། །མཐར་ཆགས་སུ་ནི་རབ་ཏུ་འབྱུང ། །ཡིད་རྙེད་ནས་ཀྱང་གཞན་དག་ནི། །དབང་གི་ཡོན་ཏན་རྣམས་ཀྱིས་བྱས། །དབང་ནི་ལྔ་དང་ལྷན་ཅིག་ཏུ། །རྣམས་པར་ཤེས་པ་རབ་ཏུ་བྱེད། །འདུ་བྱེད་རྒྱུ་དང་ལྷན་ཅིག་ཏུ། །རོ་ལངས་འགྲོ་དང་འདྲ་བ་སྟེ། །སྨིག་རྒྱུ་དག་གིས་གཟུགས་དང་མཉམ། །ལོག་པ་མ་ཡིན་བདེན་པ་ཡིན། །འདི་ནི་བདག་མེད་སྟོང་པ་སྟེ། །སྲིད་པས་ཀུན་དུ་འདྲ་བ་ཡིན། །འབྱུང་རྣམས་ལྷན་ཅིག་འབྱུང་བ་དག་།ཐམས་ཅད་དུས་ཡོད་ལྷན་ཅིག་སྟེ། །སེམས་བྱུང་ཡིད་ཅེས་བྱ་བ་དང ། །ལྷན་ཅིག་རྣམ་པར་ཤེས་པ
45.50a
འབྱུང ། །རྣམ་ཤེས་ལྔ་པོ་དེ་དག་དང ། །ཡིད་ཀྱི་རྣམ་ཤེས་ལྡན་པ་ནི། །གནས་ངན་ལེན་དང་སྲེད་བསྒོས་པ། །རྒྱུན་མི་འཆད་པར་རབ་ཏུ་འབྱུང ། །ལུས་ཅན་ཀུན་གྱི་ཀུན་གཞི་ཡང ། །སེམས་དང་སེམས་བྱུང་ལྡན་པ་འབྱུང ། །ཀུན་གཞི་རྙེད་ནས་དེ་དག་རྒྱུ། །རྒྱུ་ནས་རྒྱས་པར་བྱེད་པ་སྟེ། །སེམས་རྣམས་ལམ་རྒྱུད་ཐམས་ཅད་དུ། །རྟག་པར་གཅིག་ལས་གཅིག་རྒྱས་འགྱུར། །ས་འདི་རྣམ་པ་སྣ་ཚོགས་པ། རྣམ་པར་ཤེས་པ་རྣམས་ལས་འབྱུང ། །ཀུན་བཞི་སྣ་ཚོགས་གཟུགས་ཅན་ནི། །རྣམ་ཤེས་རྣམས་ཀྱི་གནས་ཡིན་ནོ། །ཕན་ཚུན་རྒྱུ་ཡི་སྟོབས་ལྡན་པ། །རྣམ་ཤེས་འཁོར་ལོ་འཁོར་བ་སྟེ། །ཀུན་གཞི་མཚོ་ལ་དབའ་རླབས་བཞིན། །ས་བོན་དག་དང་མྱུ་གུའི་རྒྱུད། །ཆུ་བོའི་རྒྱུན་ཀྱང་མཚམས་མེད་ཅིང ། །རྒྱུན་མི་འཆད་པར་འབྱུང་མད་ཀྱི། །ཐ་དད་བྱེ་བྲག་དག་ཀྱང་སྣང ། །དེ་བཞིན་རྣམ་ཤེས་སྤྱོད་པ་སྟེ། །མཚམས་མེད་པ་ཡི་རྒྱུན་དུ་ཡང ། །རྒྱུན་མི་འཆད་པར་རབ་ཏུ་འབྱུང ། །གསུམ་དང་ལྡན་ཞིང་གསུམ་ལས་ཡང ། །སེམས་དང་ཡིད་དང་རྣམ་ཤེས་རྣམས། །བག་ཆགས་བདེ་བས་བསྐྱེད་པ་དང ། །རང་སེམས་རྣམ་པར་འཁྲུལ་པ་ཡིས། །དབའ་རླབས་བཞིན་དུ་རྟག་ཏུ་འབྱུང ། །ཆོས་རྣམས་ཀུན་གྱི་འབྱུང་བ་དག་།ཕྱི་དང་ནང་ཡང་རྣམ་བསྒོམས་ཏེ། །ཐུབ་པའི་རྣམས་ཀྱང་རྣམ་བསྒོམས་ནས། །མཉམ་པར་གཞག་པར་སྟུག་པོར་འགྲོ། །རྡོ་རྗེའི་སྙིང་པོ་ཁྱོད་དང་ཡང ། །རྒྱལ་སྲས་འཇིགས་མེད་གཞན་དག་ཀྱང ། །སྟུག་པོར་འཇུག་པ་བྱེད་པའི་ཆོས། །ཐམས་ཅད་ཆོས་ཀྱང་རབ་སྟོན་པ། །རྒྱལ་བ་རྣམས་དང་རྒྱལ་སྲས་རྣམས། །ཐབས་གཅིག་རབ་ཏུ་རྣམ་དགོངས་ཏ། །ཆོས་ཀྱི་མཚན་ཉིད་དཔེ་མེད་པ། །རྨད་དུ་བྱུང་བ་འདི་བསྟན་ཏོ། །རྡོ་རྗེ་སྙིང་པོ་འཇིགས་མེད་པ། །རིན་ཆེན་སྣ་ཚོགས་ཟླ་སྙིང་གི། །སེང་གེའི
45.50b
ཁྲི་ལ་རབ་འདུག་སྟེ། །ཤེས་རབ་ཆེན་པོས་རྣམ་བསྒོམས་གྱིས། །རྒྱལ་བའི་སྲས་ཀྱིས་མདུན་བདར་བ། །སྟུག་པོའི་རྒྱན་ལ་རྣམ་པར་བསྒོམས། །རྣམ་པར་བསྒོམས་ནས་རྟག་པར་འདི། །རྣལ་འབྱོར་ཅན་གྱི་རྣལ་འབྱོར་སྟོན། །ཟླ་དབང་རྒྱལ་བ་དེས་བསྟན་ལ། །བག་མེད་པར་ནི་མ་བྱེད་ཅིག་།ཟླ་བའི་དཔལ་གྱི་བཅོམ་ལྡན་འདས། །སྤྲུལ་པར་བྱེ་བ་མང་སྤྲུལ་ཅིང ། །འདོད་པའི་ཁམས་ཀྱི་བསྙེངས་བྲལ་དང ། གཟུགས་ཅན་རྣམས་ཀྱི་གནས་སུ་ཡང ། །རྒྱལ་སྲས་རྣམས་ཀྱིས་ཀུན་ནས་བསྐོར། །ལྷ་རྣམས་ཀྱིས་ཀྱང་མདུན་བདར་ཅིང ། །ཚུལ་གྱིས་དམ་པ་སྟོན་པ་ནི། །འཇིགས་མེད་སྟུག་པོའི་རྒྱན་ཡིན་ནོ། །རྣལ་འབྱོར་ཅན་གྱིས་སྤྱོད་པའི་མཆོག་།ཚུལ་བཟང་རྣལ་འབྱོར་སྤྱོད་པ་སྟེ། །སོ་སོ་རང་རིག་ཤེས་པ་ཡི། །ཏིང་ངེ་འཛིན་དང་བདེ་བའི་རྣམས། །ཡང་དག་མཐའ་ལ་མི་རིག་པར། །རྗེས་སུ་མྱོང་བར་བྱས་ནས་ཀྱང ། །རྣལ་འབྱོར་བདེ་ལས་མངོན་ལངས་ཤིང ། །གཅིག་ལ་གཅིག་ནི་ཕན་ཚུན་ལྟ། །རྣལ་འབྱོར་སྤྱོད་པའི་ཚུལ་དགེ་འདི། །གང་གིས་ཤིན་དུ་མཐོང་བར་གྱུར། །རྣམ་པ་སྣ་ཚོགས་འོས་པ་ཡི། །སྟན་གྱི་མཆོག་ལ་འཁོད་པའི་རྣམས། །ཀུན་ཀྱང་ངོ་མཚར་རབ་ཏུ་རྙེད། །བསམ་བྱེད་བསམ་གཏན་བསམ་པ་དང ། །བསམ་གཏན་རྣམས་ཀྱི་དགོངས་པ་དག་།རྒྱལ་སྲས་འཇིགས་པ་མེད་པའི་རྣམས། །ཀུན་ཀྱང་སེམས་ཤིང་རབ་ཏུ་གནས། །སྟུག་པོའི་རྒྱན་དང་རྒྱལ་པོ་ལ། །ལྟ་བ་མཉམ་པར་བཞག་པའི་རྣམས། །མགོ་ལ་ཅོད་པན་ཐོགས་པ་དག་།མཚན་རབ་སུམ་ཅུ་རྩ་གཉིས་ཀྱི། །ཡན་ལག་བྲིས་པ་དེ་དག་ཀུན། །བྱེ་བའི་ཞིང་ནས་འོངས་པ་སྟེ། །གཡོ་བ་རྣམས་དང་ཤིན་དུ་བྲལ། །ཐམས་ཅད་གོས་བཟང་ཆ་ལུགས་མཛེས། །རྣལ་འབྱོར་སྤྱོད་པ་སྟོབས་ཆེན་ཏེ། །ལྟའོ་རྡོ་རྗེ་སྙིང་པོ་ལ། །རྣམ་པར་རྟོག་དང་རྣམ་དཔྱོད་ལ། །ཆོས་ལ་མོས་པ
45.51a
ཡང་དག་ཏུ། །མཐོང་སྟེ་དེ་ནས་དེ་ཀུན་དང ། །ཕྱོགས་རྣམས་བཞི་པོར་བལྟ་བྱས་ཏེ། །འཛུམ་པ་སྔོན་དུ་རབ་བཏང་ནས། །འཇམ་ཞིང་སྙན་པའི་དབྱངས་སུ་སྨྲས། །རྒྱལ་སྲས་མཉམ་པར་བཞག་པའི་རྣམས། རྣལ་འབྱོར་ཅན་གྱི་རྣལ་འབྱོར་ཡུལ། །གང་ལ་རྟོག་ཅན་མྱོས་འགྱུར་བ། །དེ་དག་བདག་ལས་མཉན་པར་གྱིས། །གང་བསམ་གང་གིས་ཇི་ལྟ་བུར། །བསམ་གཏན་བསམ་བྱེད་དགོས་པ་དག་།འདོད་དང་སྡིག་པ་རྣམས་ཀྱིས་དབེན། །རྣམ་པར་རྟོག་བཅས་རྣམ་དཔྱོད་བཅས། །དགའ་བདེ་དབེན་ལས་སྐྱེས་པར་ཡང ། །བསམ་གཏན་དང་པོ་སྐྱེ་བ་ཡིན། །དེ་ལྟ་བུ་ཡི་རིམ་ཚུལ་དུ། །བཞི་དང་བརྒྱད་དང་དེ་བཞིན་བཅུ། །མུར་འདུག་བདག་ཏུ་སྨྲ་བ་དང ། །བསམ་གཏན་ཅན་རྣམས་བསམ་གཏན་བྱེད། །ཉན་ཐོས་ཐེག་པ་ཅན་རྣམས་དང ། །རང་རྒྱལ་ཐེག་ལྡན་དེ་བཞིན་ཏེ། །ཀུན་ཀྱང་རྟག་ཏུ་བསམ་གཏན་བྱེད། །ཆོས་རྣམས་དང་ནི་ས་དག་གི། །རང་གི་མཚན་ཉིད་རྟོགས་པ་དང ། །ཕུང་པོ་སྐྱེ་མཆེད་ཚོགས་ཀྱི་རྣམས། །འདི་དག་ཐམས་ཅད་བདག་མེད་དེ། །བྱེད་པ་མེད་ཅིང་གཡོ་བ་མེད། །གསུམ་པོ་འདུས་ལས་རབ་ཏུ་བྱུང ། །འཁྲུལ་འཁོར་རོ་ལངས་འདྲ་བ་སྟེ། །བྱེད་པ་རྣམས་ཀྱིས་རྣམ་པར་སྤངས། །ཐུབ་པ་ཕྱི་རོལ་བསམ་གཏན་བྱེད། །སྟོང་པར་ལྟ་བའི་ལྟ་བ་ཅན། །ཆོས་ཀྱི་མཚན་ལ་མོས་པ་རྣམས། །ཆུད་གསོན་མཚན་ཉིད་མ་ཡིན་ནོ། །ཕུང་པོ་བདག་མེད་མཁས་པའི་རྣམས། །བསམ་གཏན་འདི་འདྲ་བསམ་གཏན་བྱེད། །དེ་བཞིན་གཤེགས་ཀྱི་བསམ་གཏན་དག་།ལྷ་རྫས་བསོད་ནམས་ལྟ་སྦྱོང་བ། །རྣལ་འབྱོར་ཅན་དང་རྒྱལ་བའི་སྲས། །མཉམ་བཞག་རྟག་པར་བསམ་གཏན་བྱེད། །འདི་དག་ཐམས་ཅད་སེམས་ཙམ་སྟེ། །མཚན་ཅན་མཚན་ཉིད་ཡོད་པ་མིན། །ཕུང་པོ་རྣམས་མེད་ཁམས་ཡོད་མིན། །ཐམས་ཅད་ཆོས་ལ་མཚན་ཉིད་མེད། །རྡུལ་ཕྲན་རྣམ་པར་གཞིགས་པ་དང ། །དེ་དག་དེ་ལྟར་མི་གནས་སོ། །རྟོག་པ
45.51b
བསྐྱེད་པས་བརྟགས་པ་ནི། །དངོས་པོ་ས་དང་ཆུ་ལ་སོགས། །དངོས་པོའི་རང་བཞིན་མི་ཤེས་པ། །མཚན་ཉིད་དུ་ཡང་རྣམ་པར་རྟོག་།ཁ་དོག་སྡུག་དང་མི་སྡུག་དང ། །ཁ་དོག་སྣང་བཞིན་དེ་བཞིན་ཏེ། །འཇའ་དང་ཨིན་དྲ་གོ་བ་ལྟར། །ཁ་དོག་སྣང་མང་སྤྲིན་ལྟ་བུའི། །སངས་རྒྱས་སྐུ་དང་འདྲ་བ་ཡིས། །ཐམས་ཅད་འགྲོ་བ་ཀུན་བཀང་སྟེ། །རྒྱས་པའི་སྐྱེ་མཆེད་ཅེས་བྱ་བས། །འབྱུང་བ་རྣམས་ཀྱང་རྣམ་གཞིགས་ཏེ། །རྣལ་འབྱོར་ཤེས་པ་གཟུགས་ཅན་གྱིས། །ལུས་ལ་རྟག་ཏུ་གཟུགས་ཀྱང་མཐོང ། །གང་ལ་དམིགས་ཏེ་མཉམ་བཞག་པ། །དེ་ལ་དམིགས་ཤིང་རྣམ་པར་ལྡང ། །གང་དང་གང་ལ་རྣམ་རྟོག་པ། །དེ་དང་དེ་ནི་དམིགས་པ་ཡིན། །རྣལ་འབྱོར་ཅན་མེད་རྣལ་འབྱོར་མེད། །དེ་ལྟར་རྣམ་པར་རྟོག་པ་ནི། །རྣལ་འབྱོར་ཅན་གྱི་རྣལ་འབྱོར་ཉིད། །ཀུན་གཞི་ས་རྣམས་ཐམས་ཅད་དང ། །ཐུབ་པའི་རྣལ་འབྱོར་བདེ་ལ་གནས། །ཆོས་དང་ཆོས་ཀྱི་མཚན་ཉིད་ཀྱང ། །རྟག་ཏུ་རབ་ཏུ་རྟོགས་བྱས་ཤིང ། །མཉམ་པར་བཞག་པའི་ཁྱེད་པར་དག་།མཉམ་བཞག་ལྡན་པ་རབ་ཏུ་སྟོན། །ཆོས་ཀྱི་རང་བཞིན་རྣམ་ཕྱེ་བས། །རྣལ་འབྱོར་ཅན་གྱི་བློ་འཁྲུག་པ། །བློ་གྲོས་ཞེན་པས་རབ་ཏུ་སྐྱེ། །ཆོས་དང་བདག་ལ་འཛིན་པར་འགྱུར། །ཡིད་ཆེས་ལུང་དང་མི་ལྡན་པར། །ཆོས་རྣམས་སྟོན་པར་བྱེད་པ་ནི། །མཚན་ཉིད་རྣམ་པར་རྟོག་པ་ཡིས། །བདག་ཀྱང་ཆུད་ཟོས་གཞན་ཆུད་གསོན། །མཚན་ཉིད་ཅན་མེད་མཚན་ཉིད་མེད། །འདྲེས་པའི་ཕྱིར་ན་རྣམ་པར་སྣང ། །མངར་བའི་རྣམས་ནི་མཁྲིས་པ་སེལ། །བད་ཀན་ཚ་སྐྱུར་ལན་ཚཝ་སྟེ། །མ་ཞུ་ཚ་བའི་རྣམ་པ་དང ། །ལན་ཚཝ་ལ་སོགས་རྣམ་པར་སེལ། །མཁྲིས་པ་བད་ཀན་འཁྲུགས་པ་ལས། །རིམས་རྣམས་སྐྱེ་བར་འགྱུར་བ་དང ། །ལུས་ཅན་རྣམས་ཀྱི་ལུས་ཡུལ་དུ། །འདུས་པ་རླུང་ལས་བྱུང་བ་དང ། །རིམས་དག་རྣམ་པར་གཞིག་པའི་ཕྱིར། །ཐུབ་པས་བསྡུ་བ་བྱས་པ་ནི། །
45.52a
ཁ་ར་ལ་སོགས་ཡན་ལག་དྲུག་།ཤ་དང་སྐོལ་མ་ཁུ་བ་དག་།ཐ་དད་མཆན་གྱིས་འཇིག་འགྱུར་བ། །ལུས་ཅན་རྣམས་ཀྱི་རིམས་ཀུན་ཏོ། །རྣམ་ཤེས་རྣམས་ནི་ཀུན་གཞི་ལ། །ཕན་ཚུན་ཐ་དད་མི་གནས་ཏེ། །གལ་ཏེ་ཆོས་ཀྱི་རང་བཞིན་ནམ། །མཚན་ཉིད་གཅིག་ནི་ཡོད་གྱུར་ན། །དེ་ཚེ་ཆོས་དང་མཚན་ཉིད་ལ། །མཚན་ཉིད་མི་འདྲ་མེད་པ་འགྱུར། །རྫས་རྣམས་བསྡུས་པས་སེལ་མི་ནུས། །མི་ཡང་སོས་པར་མི་འགྱུར་རོ། །སོས་དང་རྣམ་པར་བསལ་བ་འདི། །མཁས་པ་རྣམས་ཀྱིས་མཐོང་བ་སྟེ། །གཞན་དུ་ཀུན་གཞི་རྣམ་ཤེས་པ། །རྣམ་པ་མང་པོར་གནས་པ་སྟེ། །སྒྱུ་མའི་རི་དགས་བཞིན་འཁོར་བ། །རྣལ་འབྱོར་བརྩོན་པས་བརྟགས་པ་ཡིན། །མཚན་མེད་མཚན་ཅན་མེད་པ་སྟེ། །ཕུང་པོ་རྣམས་ལས་ཕུང་པོ་ཅན། །གཞན་མེད་ཡན་ལག་ཉིང་ལག་ལས། །ཡན་ལག་ཅན་མེད་ཡན་ལག་ལ། །འཇིག་རྟེན་རྒྱུ་ཡིས་མ་བྱས་ཏེ། །འབྲས་བུ་རྣམས་ལ་རྒྱུ་ཡང་མེད། །འཇིག་རྟེན་རྡུལ་ཕྲན་བསགས་པ་མེན། །ཕྱོགས་དང་གནས་སུ་མི་འགྲོའོ། །དེ་དག་སོར་གཉིས་སོར་གསུམ་དུ། །ཅི་ཡང་རྩོམ་པར་མི་བྱེད་དེ། །དངོས་པོ་ཡོད་པ་ཕྲད་པའི་ཕྱིར། རྡུལ་ཕྲན་ཐམས་ཅད་འདུ་བར་འདོང ། །དེ་ཚེ་ཡོན་ཏན་ཁྱད་ཡོད་པ། །ཡོན་ཏན་རྣམས་ཀྱིས་ཡོན་ཏན་དུ། །འཇིག་རྟེན་མ་བྱས་རང་བཞིན་གྱིས། །འཇིག་རྟེན་རྐྱེན་ལས་མ་བྱུང་སྟེ། །འདོད་རྒྱལ་དངོས་ཀྱིས་དེ་བཞིན་མིན། ཆོས་གསུམ་པས་ཀྱང་མ་བྱས་ཏེ། །བག་ཆགས་རྣམས་ཀྱིས་དཀྲུགས་པའི་སེམས། །རྣམ་པར་རྟོག་པ་མང་པོའི་གནས། །སྙིང་གི་ཕྱོགས་ན་གནས་པ་ཡི། །ལུས་ཅན་ཀུན་གྱི་ཀུན་གཞི་དང ། །སེམས་དང་ཡིད་དང་རྣམ་ཤེས་རྣམས། །འགྲོ་བ་དག་གིས་སྣ་ཚོགས་བརྟགས། །འགྲོ་བ་མ་ལུས་རབ་མནན་ཏེ། །སྒྱུ་མའི་རི་དགས་བཞིན་དུ་གནས། །སེམས་ཙམ་དུ་ནི་འཇུག་པ་ལས། །གཞན་དུ་ཡོངས་སུ་གནས་འཕོ་སྟེ། །
45.52b
ས་ལ་སྟོང་ཞེས་བརྗོད་པར་བྱ། །སེམས་ནི་དངོས་པོའི་ཚུལ་དུ་གནས། །རྫ་ལ་སོགས་པའི་ཡུལ་མེད་དེ། །སེམས་ནི་རྫ་མ་ལྟ་བུའོ། །ས་ལ་གཟུགས་རྣམས་ཡོད་པ་དང ། །ལྷ་ཡུལ་གནས་པའི་ཁྱིམ་རྣམས་དང ། །རྣམ་པ་སྣ་ཚོགས་གང་སྣང་བ། །དེ་དག་ཀུན་གཞི་སྣང་བ་ཡིན། །ཀུན་གཞི་ཀུན་དུ་ལག་པ་སྟེ། །ཀུན་དུ་ཁ་མིག་མགོ་བོ་ཡང ། །ཅིག་ཆར་བ་དང་རིམ་གྱིས་ཀྱང ། །ས་རྣམས་ཡོག་པར་རབ་ཏུ་གནས། །བུས་པ་རྣམ་པར་མྱོས་བྱེད་དེ། །གང་གི་སྙིང་ལ་གང་གནས་པ། །དེ་ནི་དེ་ལ་གཉིས་ཚུལ་དུ། །ལུས་ཀུན་བཀང་སྟེ་རབ་ཏུ་གནས། །སྟོང་མིན་དངོས་པོ་གང་ཡང་མེད། །ཐོ་བས་ཇི་ལྟར་རྫ་བཞིན་དུ། །དངོས་པོ་གང་ལ་གཞོམ་བྱ་བའི། །དངོས་པོ་དངོས་སུ་ཡོད་པ་མིན། །དེ་སྟེ་སྟོང་པའི་དངོས་ཡོད་ན། །འཇིག་བྱེད་མ་ཡིན་གཞིག་པར་འགྱུར། །གཞིག་བྱ་གཞིག་པར་བྱེད་པ་གང ། །དེ་ནི་རྣམ་པར་རྟོག་པས་བརྟགས། །རི་རབ་རི་བོ་ཙམ་འགྱུར་བའི། །བདག་ཏུ་ལྟ་བ་མི་གནོད་ཀྱི། །སྟོང་ཉིད་ལྟ་བ་གནོད་པ་ནི། །ང་རྒྱལ་མི་བདེན་བརྟགས་པའོ། །རྣལ་འབྱོར་སྤྱོད་པས་སྟོང་པ་ཉིད། །གནས་མ་ཡིན་པར་སྦྱར་མི་བྱ། །གནས་མིན་གལ་ཏེ་སྦྱར་གྱུར་ན། །བདུད་རྩི་དུག་ཏུ་འགྱུར་བ་ཡིན། །ལྟ་བ་ཇི་སྙེད་གང་ཡང་རུང ། །ལུས་ཅན་རྣམས་ལ་ཡོད་པ་ཡི། །ལྟ་བ་རྣམ་པར་སྤང་བའི་ཕྱིར། །སྟོང་པ་ཉིད་ཀྱི་ཚུལ་བསྟན་ཏོ། །སྟོང་པ་ཉིད་ཀྱི་ལྟ་ཐོས་ཀྱང ། །ལ་ལའི་ལྟ་བ་མ་ཞིག་ན། །གསོར་མི་རུང་བའི་ལྟ་ཅན་ཏེ། །སྨན་པས་བཏང་བའི་ནད་པ་བཞིན། །ཇི་ལྟར་བསྲེག་པ་ཚིག་པའི་མེ། །བསྲེག་པ་མེད་པས་མི་གནས་སོ། །དེ་བཞིན་བསྲེག་བྱ་ལྟ་ཚིག་ན། །སྟོང་ཉིད་མེ་ཡང་འགག་པར་འགྱུར། །ལྟ་བས་འགོག་པའི་དུས་སུ་ཡང ། །ཡེ་ཤེས་ཡང་དག་མེད་འབྱུང་སྟེ། །ཉོན་མོངས་ཐམས་ཅད་བསྲེག་པར་བྱེད། །ཉོན་མོངས་བསྲེགས་ནས་རྣམ་པར་མཛེས། །ཐུབ
45.53a
པ་རྣལ་འབྱོར་ལྡན་པའི་རྣམས། །ཡེ་ཤེས་འདི་ལྡན་ཐུབ་སྤྱོད་དག་།དེ་བཞིན་གཤེགས་པའི་གནས་ཀྱི་མཆོག་།སྟུག་པོ་དེར་ནི་རབ་ཏུ་འདོང ། །རི་བོང་རཝ་ཡིས་རི་བོ་རྣམས། །མངོན་པར་གཞིག་བྱ་མ་མཐོང་སྟེ། །འདི་ལ་མོ་ཤམ་བུ་ཡིས་ཀྱང ། །སྲོག་ཆགས་གང་ཡང་བསད་པ་མེད། །རི་བོང་རཝ་ཡི་གཞུ་ཡིས་ཀྱང ། །སུ་ཡང་ཐབ་མོ་མི་བྱེད་དེ། །མོ་ཤམ་བུ་ལ་སུ་ཡང་རུང ། །ཁྱིམ་གྱི་ལས་སུ་མི་སྐོའོ། །སྟོང་པ་ཉིད་དང་མི་རྟག་ཉིད། །རྟག་ཏུ་དངོས་དང་གཅིག་གྱུར་ཏེ། །ཡོད་དང་མེད་པའི་རང་བཞིན་ཡང ། །དེ་བཞིན་གཅིག་པ་ཉིད་དུ་གྱུར། །མངལ་ན་གནས་དུས་ཚུན་ཆད་ཀྱང ། །གཟུགས་རྣམས་གཞིག་པར་བརྩོན་པ་སྟེ། །གང་ནའང་དེ་མེད་གཟུགས་ཡོད་མིན། །གཟུགས་མེད་པར་ཡང་དེ་མེད་དེ། །ཁྱད་པར་མེད་པར་འབྱུང་བ་ནི། །མ་བསྒྲིབས་ཟླ་དང་འོད་ཟེར་བཞིན། །དེ་བཞིན་དངོས་རྣམས་སྟོང་ཉིད་དང ། །ལྷན་ཅིག་གཅིག་ཏུ་འབྱུང་བ་སྟེ། །ཕན་ཚུན་རྣམ་པ་ཐ་དད་དུ། །དེ་དག་དགོས་པ་མི་སྒྲུབ་བོ། །རྒྱུ་དང་རྐྱེན་རྣམས་ཚོགས་པ་ལས། །རྣལ་འབྱོར་ཅན་གྱི་ལས་སྒྲུབ་བོ། །ལུས་འདི་བདག་ཡོད་མ་ཡིན་ཏེ། །རོ་ལངས་འཁྲུལ་འཁོར་རབ་ཏུ་འདྲ། །སྲེད་པའི་སྲད་བུས་བཅིངས་བྱས་ཤིང ། །ཡུལ་གྱི་རྣམས་ཀྱིས་དྲང་བ་ཡིན། །ལྷ་རྫས་སྟོང་པ་ཉིད་བཤད་པ། །ལྟ་བ་ཐམས་ཅད་སྦྱོང་བ་སྟེ། །མཐའ་དགལ་སྟོང་པ་ཉིད་ལྟ་བ། །རྒྱལ་བ་རྣམས་ཀྱིས་ལྟ་མེད་བཤད། །སྟོང་ཉིད་ལྟ་བ་སྦྱོང་བ་ནི། །ཡོད་དང་མེད་པ་གཞིག་པའི་ཕྱིར། །བློ་ལྡན་མཉམ་པར་བཞག་པ་ཡི། །རྣལ་འབྱོར་ཅན་གྱིས་རྟག་ཏུ་བསྒོམ། །རྩཝ་དང་ཤིང་དང་གྱོ་མོ་དག་།སྒྱུ་མའི་མཁན་པོས་རྒྱུར་བྱས་ཏེ། །སྔགས་ཀྱིས་ཅི་དང་ཅིར་འདོད་པར། །གཟུགས་ཀྱི་དངོས་སུ་རབ་ཏུ་བྱེད། །གཟུགས་དང་སྣང་བ་ཡིད་བྱེད་དང ། །སྲེད་དང་མིག་རྣམས་རྒྱུར་བྱས་ཤིང ། །མིག་གི་རྣམ་ཤེས་སྒྱུ་མ་བཞིན། །
45.53b
སྨིག་རྒྱུ་བཞིན་དུ་དེ་གཡོའོ། །གང་གི་ཡུལ་དུའང་འོང་བ་མེད། །ཡུལ་གཞན་དག་ཏུའང་འགྲོ་བ་མིན། །འདི་ལྟའི་རྣམ་ཤེས་འབྱུང་བ་ལ། །ཡོད་དང་མེད་པར་བརྟག་མི་བྱ། །སྐྲ་ཡི་ཚོགས་དང་བོང་བུའི་རཝ། །མོ་ཤམ་བུ་དང་སྨིག་རྒྱུ་དང ། །དྲི་ཟའི་གྲོང་ཁྱེར་རྨི་ལམ་དག་།མིང་དུ་གྲག་གི་ཡོད་པ་མིན། །སྟག་དང་གཟིག་དང་དོམ་དག་དང ། །རྔ་རྟ་བོང་བུ་ཁྱི་རྣམས་དང ། །གཡི་དང་གསའ་དང་རུ་སྦལ་ལ། །རཝ་ནི་ཡོད་པ་མ་ཡིན་ན། །ཐུབ་པ་རྩོད་པར་བརྩོན་པ་ཡིས། །དེ་དག་ཅི་ཕྱིར་མི་བརྟག་ཅིང ། །བོང་བུའི་རཝ་ལ་བརྟག་པར་བྱ། །ཅི་གོ་དེ་དག་བསྒྲུབ་ནུས་སམ། །ཤེས་རབ་ཅན་གྱིས་སར་བསྟན་པ། །དེ་དག་ཉི་ཚེ་བརྟག་པར་བྱ། །རྟོག་པ་ཅན་རྣམས་འཁོར་བ་ནི། །བླུན་པོ་ལོང་བ་འོན་པ་འདྲ། །སྒྲོལ་བའི་ཡེ་ཤེས་དེ་ལ་མེད། །སོ་སོ་རང་རིག་ཡུལ་ཡང་མེད། །གཞན་གྱིས་བྱས་པའི་ཚུལ་དག་ལ། །རྣམ་པར་རྟོག་པས་ཅི་ཞིག་ནུས། །སྟུག་པོར་གནས་པར་རྣམ་པར་རྟོགས། །དེ་ལ་བརྟགས་ཤིང་དགེ་བ་འཐོབ། །རྣལ་འབྱོར་མཉམ་བཞག་རྣལ་འབྱོར་ཅན། །དེ་ན་གནས་པ་བཞིན་དུ་སྣང ། །ལྷ་ཡུལ་གནས་པའི་བསྙིང་བྲལ་དང ། །ཟླ་བ་གཟའ་ལ་སོགས་པ་ཡང ། །རླུང་གིས་རབ་ཏུ་བསྐྱོད་པའི་རྣམས། །རི་རབ་རྟེན་ཅིང་རྒྱུ་བ་ཡིན། །དེ་བཞིན་རྣམ་པར་ཤེས་པ་བདུན། །བག་ཆགས་རྣམས་དང་ལྡན་པ་ཡི། །ཀུན་གཞི་ཀུན་གྱི་ས་བོན་ཅན། །དེ་ལ་བརྟག་ཅིང་རབ་ཏུ་རྒྱུ། །ཇི་ལྟར་ས་ལས་ཀུན་བརྟེན་ཅིང ། །ས་སྐྱེ་ཀུན་ཀྱང་འབྱུང་བ་བཞིན། །སེམས་ཅན་ཀུན་གྱི་གནས་ཡིན་ཏེ། །འབྱུང་ཁུང་ཀུན་གྱི་ཁྱད་པར་དུ། །དེ་བཞིན་ཀུན་གཞི་རྣམ་ཤེས་ཀྱང ། །རྣམ་ཤེས་རྣམས་ཀྱི་གནས་ཡིན་ཏེ། །སེམས་དང་སེམས་ལས་བྱུང་བར་ལྡན། །དབའ་རླབས་བཞིན་དུ་རབ་ཏུ་འབྱུང ། །ཇི་ལྟར་རྨ་བྱའི་འདབ་སྒྲོ་རྣམས། །འོད་དང་ཁ་དོག་རྣམ་མང་སྟེ། །གཙུག་ཕུད་ཅན་རྣམ་མདབ་བསྒྲོ
45.54a
ཡིས། །རྨ་བྱ་མོ་དང་ལོངས་རྩེ་བ། །དེ་བཞིན་ཀུན་གཞི་རྣམ་ཤེས་ཀྱང ། །ས་བོན་མང་ཅན་མཚོ་ལྟར་གནས། །ཐམས་ཅད་ཆོས་ཀྱི་གཞི་ཡིན་ཏེ། །རྣལ་འབྱོར་ཅན་གྱིས་རྟག་ཏུ་མཐོང ། །ཇི་ལྟར་རྒྱ་མཚོ་ཆུ་བོ་ཡིས། །ཉིན་གཅིག་བཞིན་དུ་དགང་བྱ་ཡང ། །ཆུ་བོ་རྣམས་ནི་རྒྱུན་མི་འཆད། །རྒྱ་མཚོ་རྟོག་པར་ཡོང་མི་བྱེད། །དེ་བཞིན་ཀུན་གཞི་རྣམ་ཤེས་ཀྱང ། །ཟབ་ཅིང་མཚོ་ལྟར་གནས་པ་སྟེ། །རྣམ་ཤེས་རྣམས་ཀྱིས་ཉིན་གཅིག་བཞིན། །བག་ཆགས་ཆུ་བོས་རབ་ཏུ་དགང ། །ཇི་ལྟར་རིན་ཆེན་ལྡན་པའི་ས། །སྣ་ཚོགས་ཀུན་དུ་ཕན་འདོགས་ཏེ། །སེམས་ཅན་རྣམས་ཀྱང་ཉེ་བར་འཚོ ། །ཡོན་ཏན་དངོས་སུ་རྟོག་པ་ཡིན། །དེ་བཞིན་ཀུན་གཞི་རྣམ་ཤེས་ཀྱང ། །རྣམ་རྟོག་རྣམས་དང་ལྷན་ཅིག་འབྱུང ། །དེ་ནི་འཁོར་བ་འཕེལ་བྱེད་དེ། །གྱུར་ན་དེ་བཞིན་གཤེགས་པ་ཡིན། །དེ་བཞིན་གཤེགས་པ་སྟོབས་བཅུ་ཅན། །སྤྱོད་པ་ལེགས་སྤྱད་གཙང་བ་སྟེ། །ས་བཅུ་པ་ལས་མངོན་བྱུང་སྟེ། །བདེ་བར་གཤེས་པའི་སར་ཞུགས་ནས། །ཡང་དག་མཐའ་ལ་རབ་གནས་པ། །སྣ་ཚོགས་སེམས་ཅན་རྣམ་སྤྲུལ་པར། །འཇིགས་པ་མེད་པར་འབྱུང་བ་ནི། །རྣམ་པར་རྟོག་མེད་ས་བཞིན་ནོ། །སོས་ཀ་མེ་ཏོག་མང་པོའི་གཟུགས། །མི་དང་བྱ་ཡི་ཡིད་དུ་འོང ། །དེ་བཞིན་སྣ་ཚོགས་ལེན་པའི་སེམས། །ཐུབ་ཤེས་ཡིད་འོང་མྱོས་པར་བྱེད། །ཇི་ལྟར་དོན་མཁས་རྒྱལ་བའི་སྲས། །འབྱུང་ལས་བྱུང་བ་མ་ཡིན་པ། །མེད་པའི་བློ་ཅན་དེ་བཞིན་ཏེ། །ལོག་པར་སྨྲ་ལ་བརྩོན་པ་དག་།ཆོས་དང་མི་འཐུན་ཕྲ་མ་ཅན། །ལྕེ་གཉིས་ལོག་པར་ལྟ་བ་དག་།རྣམ་པ་གཞན་དུ་གནས་པའི་དངོས། །རྣམ་པ་གཞན་དུ་སྟོན་པར་བྱེད། །ཇི་ལྟར་སྒྱུ་མའི་སྐྱེས་བུ་ཞིག་།འབྲས་བུ་སྣ་ཚོགས་སྟོན་བྱེད་པ། །འབྲས་བུ་མེ་ཏོག་དེ་ན་མེད། །སྔགས་དང་ཁོང
45.54b
བཟོས་ཟོ་མདོག་བདེ། །འཇིག་རྟེན་རྣམ་པ་གཞན་གནས་པ། །རྣམ་པ་གཞན་དུ་སྟོན་པར་བྱེད། །རྒྱལ་བ་རྣམས་དང་རྒྱལ་བའི་སྲས། །ཀུན་ཀྱང་ཐབས་ཀྱི་དམིགས་ལ་མཁས། །བསྟན་པ་གཞན་ལ་ཇི་སྙེད་དུ། །བསྟན་པ་བྱས་པ་དེ་དག་ཀུན། །བདེ་གཤེགས་རྣལ་འབྱོར་མཁས་པ་ཡིས། །བསྟན་པ་སྟུག་པོའི་རྒྱན་ལ་བསྟན། །ཁམས་རྣམས་དྲུག་དང་བཅཝ་བརྒྱད་བསྟན། །སྐྱེ་མཆེད་བཅུ་དང་གཉིས་ཀྱི་མི། །ཡིད་ཀྱི་སྲད་བུས་བཏགས་པ་དག་།སེམས་ཅན་ཀུན་དུ་རབ་ཏུ་འཁོར། །རྣམ་པར་ཤེས་པ་བརྒྱད་ཀྱི་ཚོགས། །ཁམས་དང་སྐྱེ་ཆེད་ཕུང་པོ་སྟེ། །ཡིད་ཀྱི་སྲད་བུས་བཅིང་བྱས་ཤིང ། །ལུས་དང་ལུས་ལ་རབ་ཏུ་རྒྱུ། །འདི་ནི་འགྲོ་བའི་སྐྱེས་བུ་སྟེ། །འགྲོ་བ་རྣམས་ཀྱི་དོན་ཏུ་བསྟན། །ལུས་ཅན་ཀུན་ཀྱི་སྐྱེས་བུ་ནི། །འགྲོ་ཡང་བྱུང་བ་མ་ཡིན་ཏེ། །ཁམས་རྣམས་དྲུག་པོ་སྐྱེས་བུ་ཡིན། །སྐྱེ་མཆེད་བཅུ་གཉིས་དེ་བཞིན་ཏེ། །བཅཝ་བརྒྱད་རྣམས་ལ་ཡིད་རྒྱུ་བ། །དབང་སྒྱུར་ཞེས་ནི་བྱ་བ་སྟེ། །དབང་སྒྱུར་ཕོ་བྲང་སྣ་ཚོགས་པ། །ནོར་བུ་རིན་ཆེན་གྲོང་རྡལ་དང ། །དགའ་ལྡན་ལ་སོགས་བསྙེམས་བྲལ་དང ། །མཚེ་མའི་གནས་སུའང་དེ་བཞིན་བཤད། །རྡོ་རྗེ་སྙིང་པོ་དབང་ཅན་ལ། །རྒྱལ་སྲས་འཇིགས་པ་མེད་པའི་རྣམས། །དགེའོ་དགེ་ཞེས་དགའ་འབོད་ཅིང ། །ཐམས་ཅད་མགོ་བོས་ཕྱག་འཚལ་ལོ། །ཐུབ་ལྡན་རྣལ་འབྱོར་སྤྱོད་པ་དང ། །རྒྱལ་བ་དག་དང་རྒྱལ་བའི་སྲས། །ཞིང་དང་ཞིང་ན་བཞུགས་པ་དང ། །ལྷ་ཡུལ་གནས་པའི་རྒྱལ་སྲས་དང ། །རྣལ་འབྱོར་བདག་པོ་རྣལ་འབྱོར་ཅན། ཡེ་ཤེས་དབང་པོ་འཕྲུལ་ཆེན་དང ། །དབང་སྒྱུར་ལྷ་མོའི་ཚོགས་རྣམས་ཀྱང ། །ཐལ་མོ་སྦྱར་ཏེ་གནས་པར་གྱུར། །ཕན་ཚུན་གཅིག་ལ་གཅིག་ལྟ་ཞིང ། །རྒྱལ་བའི་སྲས་ལ་སྨྲ་བ་ནི། །འགྲོ་བའི་ལྷ་རྫས་སྐྱེས
45.55a
བུ་ཡང ། །མུར་འདུག་བདག་སྨྲ་སྤངས་པ་སྟེ། །ཐུབ་ཅན་ཀུན་ཀྱི་སྐྱེས་བུ་ནི། །ཐུབ་པའི་ཁྱུ་མཆོག་ཁྱོད་ཀྱིས་བསྟན། །འདས་དང་ད་ལྟར་བྱུང་བ་ཡིས། །སྔོན་བྱས་མ་བྱས་ཐོས་པ་ནི། །སྔོན་གྱི་རྒྱལ་བའི་སྲས་རྣམས་ཀྱིས། །ཁམས་དྲུག་སྐྱེས་བུ་དགེ་བའོ། །ཇི་ལྟར་མཁའ་ལ་བྱ་རྗེས་རྣམས། །རྣམ་པར་བཞག་པ་དེ་བཞིན་དུ། །སེམས་ཚོགས་ལྡན་པའི་ཁམས་ཀྱི་རྣམས། །གཏན་ཚིགས་བཅས་པ་རབ་ཏུ་བསྟན། །ཇི་ལྟར་ཤིང་ལས་མེད་དག་གི། །མེ་ལྕེ་གནམ་དུ་གནས་པར་འགྱུར། །སྲེགས་པ་གཞན་པ་མ་རྙེད་ཅིང ། །རླུང་གིས་བབ་ན་གཏན་མི་འབར། །བྱ་རྗེས་རྣམ་པར་བཞག་པ་ནི། །མཁའ་ལ་གནས་པ་མི་སྣང་སྟེ། འཁོར་བའི་འཁོར་ལོར་འཁོར་བ་ཡི། །འགྲོ་བའི་སྐྱེས་བུ་སྣང་བ་ཡིན། །བྱ་རྣམས་རྐང་པས་མི་འདོང་སྟེ། །དེ་དག་སྒྲོ་ཡི་ཤུགས་ཀྱིས་འདོང ། །བྱ་ཡི་རྗེས་དང་འདྲ་བ་ནི། །སྐྱེས་བུའི་སྒོ་ནས་རབ་ཏུ་བསྟན། །ལས་ཀྱི་སྐྱེས་བུ་བསྟན་པ་ནི། །འཁོར་རྣམས་རྟག་ཏུ་འཁོར་བ་སྟེ། །བདེ་དང་སྡུག་བསྔལ་མྱོང་བྱེད་པ། །བྱས་པའི་ལས་ནི་ཆུད་མི་ཟ། །ཇི་ལྟར་ཞིང་པ་རྣམས་ཀྱི་ལས། །འབྲས་བུ་མེད་པར་མི་འགྱུར་ཏེ། །དོན་དང་ལྡན་པ་དེ་དག་ནི། །གཞན་ཡང་འོང་ཞེས་རྨོ་བ་མེད། །ལྷ་རྫས་འགྲོ་བའི་སྐྱེས་བུ་ནི། །རྣལ་འབྱོར་ཅན་ལ་རྣལ་འབྱོར་སྟོན། །ལུས་ཅན་ལུས་ཀྱི་ནང་ནས་ཞིང ། །དེ་ནི་དགེ་བའི་ལས་བྱེད་དོ། །འདི་དང་ཕྱི་མའི་བདེ་བ་དང ། །ལྷ་ཡུལ་གནས་པའི་གནས་མཐོང་ཞིང ། །འཁོར་ལོས་སངས་རྒྱས་རྒྱུར་འགྱུར་བའི། །བསོད་ནམས་རྣམས་ནི་རྟག་ཏུ་བྱེད། །ཐར་དང་ཕ་རོལ་ཕྱིན་རྣམས་དང ། །སངས་རྒྱས་བསམ་གཏན་སྤྱོད་ཡུལ་ཀུན། །འགྲོ་བའི་སྐྱེས་བུ་མེད་ན་ནི། །ཀུན་ཀྱང་འབྲས་བུ་མེད་པར་འགྱུར། །ལྷ་ཡི་བདེ་བ་ཐམས་ཅད་དང ། །དབང་སྒྱུར་རྣམས་ཀྱི་འབྲས་བུ་དང ། །དེ་བཞིན་ཉིད་མཐོང་ཐུབ་པ་ཡི། །རྣལ་འབྱོར་རྣམས་ཀྱང་མེད་པར་འགྱུར། །ལས་དང
45.55b
ལས་ཀྱི་འབྲས་བུ་མཐོང ། །ལས་རྣམས་དོན་མེད་མ་ཡིན་ཏེ། །འོ་དོད་འབོད་ལ་སོགས་པ་དང ། །མནར་མེད་མཐའ་དང་ལྷ་རྣམས་ཀྱི། །ལམ་གྱི་རྒྱུད་ཀྱང་ཡོད་པ་ཡིན། །འགྲོ་བའི་སྐྱེས་བུ་དེ་ཡོད་ན། །སྲེད་པའི་འཁོར་ལོ་འཁོར་བར་འགྱུར། །འཁོར་དང་བྲལ་ན་ཐར་པ་སྟེ། །བློ་ཞན་རྣམས་ཀྱིས་མི་ཤེས་སོ། །འཇུག་པའི་སྐྱེས་བུ་མེད་ན་ནི། །མོ་ཤམ་བུ་ཡང་འགྲོ་བར་འགྱུར། །བོང་བུའི་རཝ་ཡང་རྣོ་འགྱུར་ཏེ། །བྱེ་མ་ལས་ཀྱང་ཏིལ་མར་འབྱུང ། །ཕྱི་དང་ནང་གི་ས་རྣམས་ནི། །ཕན་ཚུན་སྟོབས་ཀྱིས་བྱུང་བ་སྟེ། །གང་དང་གང་དུ་འགྲོ་བ་དག་།དེ་དང་དེ་དག་འགྲོགས་པ་ཡིན། །ལྷ་དང་ལྷ་ཡི་བུ་མོའི་ཚོགས། །དབང་སྒྱུར་རྒྱལ་བའི་སྲས་རྣམས་དང ། །དྲི་ཟ་གྲུབ་པའི་རྒྱལ་པོ་དང ། །སྔགས་འཆང་ཆུང་མའི་ཚོགས་རྣམས་ཀྱང ། །ཐུབ་ལ་མཆོད་པར་འོས་པ་ཡི། །རྡོ་རྗེའི་སྙིང་པོ་སྲས་བཅས་ལ། །མཆོད་དེ་གསོལ་བ་འདེབས་པར་བྱེད། །ཐམས་ཅད་དགེའོ་དགེ་ཞེས་སྨྲ། །ཉམས་པ་མེད་པའི་ཆོས་ཀྱི་ཚུལ། །རྒྱུ་དང་དཔེ་ཡིས་བརྒྱན་པ་ནི། །གཞན་གྱི་རྒོལ་བ་འཇོམས་པ་སྟེ། །དཔའ་བོ་ཆེན་པོ་ཁྱོད་ཀྱིས་བསྟན། །འགབ་ཟུངས་ལྟག་ཆོད་ཚར་གཅོད་པ། །བདག་གི་ཕྱོགས་ཀྱི་ཡོན་ཏན་སྟོན། །ཤེས་རབ་ཅན་གྱིས་བསྟན་དུ་གསོལ། །འགྲོ་བ་འདི་དག་ཉན་པར་འགྱུར། །ཇི་སྙེད་རྒྱལ་བའི་སྲས་རྣམས་དང ། །ལྷ་ཡི་རྒྱལ་པོ་ཀུན་ཀྱང་ཉོན། །ཤིན་དུ་དཀའ་བའི་བསམ་ཡས་རྒྱུ། །བརྟགས་འདས་རྟོག་དང་བྲལ་བ་ཡི། །རྒྱུ་དང་དཔེ་ཡི་མེ་ཏོག་སྟེ། །རྣལ་འབྱོར་རྣམས་ཀྱི་ཐུབ་དགེ་བ། །སྟུག་པོའི་རྒྱན་ནི་བཤད་པར་བྱ། །དེ་ནི་ཐུབ་ལ་རྣལ་འབྱོར་སྟོན། །སྟུག་པོའི་རྒྱན་དེ་སྣ་ཚོགས་ཏེ། །སྟུག་ན་སྤྱོད་པའི་ཐུབ་པ་ཡི། །སངས་རྒྱས་རྣམས་ཀྱི་གནས་ཀྱི་མཆོག་།ཐུབ་པ་ཀུན་གྱི་དམ་པའོ། །ས་སྟེངས་ཐུབ་པའི་དྲུ་མ་ལ། །རྡོ་རྗེ་སྙིང་པོས་ཡང་སྨྲས་པ། །རྟག་པར་དྲུ་མར་ཁྱོད་ཀྱིས་ཀྱང ། །ཆོས་ཀྱི་དངོས་ཉིད་ཤེས་པར་གྱིས། །
45.56a
དངོས་པོ་རྣམས་ཀྱི་རང་བཞིན་ཅི། །དངོས་སུ་སྟོང་ངམ་རྟག་པ་ཞེས། །འདི་འདྲའི་ལྟ་དང་ལྡན་པ་ཡི། །ཐུབ་པ་རྣལ་འབྱོར་མི་འཁྲུལ་ལོ། །ཚོས་པ་གཅིག་པུ་རྟོགས་པ་ཡིས། །ཚོས་པར་མངོན་དུ་ཤེས་པ་སྟེ། །དངོས་པོ་ཀུན་གྱི་རང་བཞིན་ཡང ། །དངོས་པོ་གཅིག་གིས་ཤེས་པར་འགྱུར། །ཇི་ལྟར་ཇི་བཞིན་བསྲུབས་པའི་ཞོ། །སོར་མོའི་རྩེ་མོས་མངོན་ཤེས་པ། །དེ་བཞིན་དངོས་པོ་ཐམས་ཅད་ཀྱི། །རང་བཞིན་དངོས་པོས་ཤེས་པར་འགྱུར། །དངོས་པོ་ཇི་མེད་སྟོང་པ་ཉིད། །དངོས་པོ་དངོས་པོར་ཡོད་པའང་མེད། །འདི་དག་ཀུན་གཞི་རྣམ་པ་སྟེ། །སྟོང་ཉིད་ཀུན་གཞི་རྣམ་པའོ། །རྒྱལ་སྲས་དྲུ་མ་འཇིགས་མེད་པས། །རྡོ་རྗེའི་སྙིང་པོ་དེ་ལ་སྨྲས། །ལུས་ཅན་རྣམས་ཀྱི་ཁམས་ཀྱི་མི། །ཇི་ལྟ་བུར་ན་སེམས་ཙམ་འགྱུར། །འབྱུང་བ་ཆེན་པོ་རྒྱུར་བྱས་ཤིང ། །འབྱུང་ལས་འབྱུང་བའི་ཇི་ལྟ་བུ། །གཡོ་གཤེར་ཚ་དང་སྲ་བ་ཡི། །ཁམས་རྣམས་ཇི་ལྟར་འབྱུང་བར་འགྱུར། །རྒྱལ་སྲས་རྡོ་རྗེ་སྙིང་པོ་ཡིས། །དྲུ་མའི་བདག་པོའི་ཚིག་ཐོས་ནས། །མི་འམ་ཅི་བདག་ཁྱོད་དགེ་སྟེ། །ཁྱོད་ནི་དགེ་འོ་ཡང་དགེ་འོ། །རྣལ་འབྱོར་ཅན་གྱི་སྙིང་པོའི་མཆོག་།ཡིད་འོང་བྱེད་པ་གང་དྲིས་པ། །སེམས་ཀྱི་སྐྱེས་བུའི་ལུས་ཅན་ལ། །ཁམས་རྣམས་སྐྱེ་འགྱུར་ཇི་ལྟ་ཞེས། །དེ་ཕྱིར་དབང་སྒྱུར་རྒྱལ་སྲས་ལ། །དེ་ནི་དགེ་བ་བཤད་པར་བྱ། །དེ་བས་མི་འམ་ཅི་ཡི་བདག་།པི་བང་སློབ་དཔོན་བདག་ལས་ཉོན། །ཇི་ལྟར་མི་འམ་ཅི་ཡི་བདག་།ཁྱོད་དང་མི་ཅི་མང་བཅས་པ། །སྙེམས་བྲལ་མང་པོ་སྣ་ཚོགས་ཀྱིས། །ནམ་མཁའ་ལས་ནི་རང་འདོང་ཞིང ། །རྒྱལ་བ་ཉན་ཐོས་ཚོགས་འཁོར་དུ། །པི་བང་སྒྲ་དབྱངས་སྙན་བླངས་པས། །ཐུབ་པ་དྲུ་མ་ལྟོས་ཤིག་ཅེས། །ཕན་ཚུན་གཅིག་ལ་གཅིག་ཀྱང་གསུང ། །སྙེམས་བྲལ་མང་པོ་སྣ་ཚོགས་ན། །མི་འམ་ཅི་དང་འགྲོགས་རྩེ་ཞིང ། །པི་བང་བཻ་དཱུརྱས་སྤྲས་པ། །
45.56b
ལེན་ཅིང་མཁའ་ལ་འགྲོ་བའི་ཚེ། །པི་བང་ཡིད་འོང་ཤིན་དུ་སྙན། །དབྱངས་ཀྱིས་ཡོངས་སུ་སྦྱང་བ་སྟེ། །མི་འམ་ཅི་ཡི་བདག་པོ་ཡིས། །རབ་ཏུ་བླངས་པར་བྱས་པའི་ཚེ། །ཉན་ཐོས་རྣམས་ཀྱང་གར་བྱེད་དེ། །ཉན་ཐོས་དེ་དག་གྱུར་པ་དེ། །རྒྱལ་སྲས་རྣམས་ཀྱིས་མཐོང་བ་དང ། །འོད་སྲུང་རྣལ་འབྱོར་བཟང་ཅན་དང ། །ལྷ་ཡི་ཅོད་པན་ལ་སྨྲས་པ། །རྣམ་རྟོག་མེད་པའི་སྒྲ་དབྱངས་ཀྱི། །པི་བང་སྒྲ་ནི་བསྒྲགས་པ་ཡིས། །འདོད་ཆགས་བྲལ་བ་ཅི་ཕྱིར་གར། །འོད་སྲུང་ཁྱོད་ཀྱིས་ངེད་ལ་སྟོན། །རྒྱལ་སྲས་སྟོབས་ཆེན་དམུ་རླུང་བཞིན། །རི་དགས་རྣམས་དང་འདྲ་བ་ནི། །ཉན་ཐོས་གཡོ་བའི་བློ་ཅན་རྣམས། །བག་ཆགས་འདམ་གྱི་དྲི་མ་ཅན། །ཉོན་མོངས་རྣམས་རྟོག་བྱུང་བས་མནར། ཡང་དག་སངས་རྒྱས་སྐུ་རྙེད་ནས། །བག་ཆགས་དྲི་མ་ཡོངས་བསལ་ཏེ། །བདག་མེད་གཉིས་ཀྱིས་ཡོངས་དག་ཅིང ། །ཤེས་བྱ་སྒྲིབ་པའི་དྲི་མེད་ན། །སེམས་ཀྱི་ཁམས་ལས་གཞན་གྱུར་པ། །དེ་བཞིན་གཤེགས་པར་རབ་ཏུ་འགྱུར། །ཁྱོད་ནི་དབང་ཆེན་ཕྲ་ཡུལ་ལྡན། །ཤེས་རྒྱ་ཚ་ཞིང་གཙུག་ལག་མཁས། །དབང་པོ་འཇིག་རྟེན་ཕྱལ་བ་ཡི། །གཙུག་ལ་མཚན་ལ་ཁྱོད་གནས་ཏེ། །མི་འམ་ཅི་ཡི་གཙུག་ལག་ཀྱང ། །དེ་བཞིན་གཤེགས་པའི་རྣལ་འབྱོར་དགེ། །ས་ཡི་མཚན་ཉིད་མཁས་བྱ་ལ། །བསླབ་སྟེ་ཟླ་བ་བཞིན་གནས་པ། །མི་འམ་ཅི་ཡི་དབང་པོ་ཁྱོད། །ས་དང་ཞིང་རྣམས་བྱེ་བར་མཛེས། །ཁྱོད་ནི་དེ་ལྟར་རྣམ་མཛེས་ཞིང ། །ཐུབ་ཅན་དབང་སྒྱུར་ཚོགས་དབུས་སུ། །ཁམས་ཀྱི་སེམས་ལས་སྐྱེས་པའི་མི། །ཁོ་བོ་ལ་ནི་སྲས་ཀྱིས་དྲིས། །མཉམ་སེམས་མཉམ་པར་གཞག་པ་ཡིས། །ཐམས་ཅད་ལྷན་ཅིག་མཉན་པར་གྱིས། །ཁམས་རྣམས་གང་དུ་ཅི་ཚུལ་གང ། །སེམས་སུ་གྲགས་པའི་སྐྱེས་བུ་ལ། །རྒྱུ་རྣམས་གང་གིས་འབྱུང་བ་ཡི། །དེ་ཚུལ་བདག་གིས་བསྟན་པར་བྱ། །ཆུ་ནི་རླན་རྣམས་སྐྱེད་པར་བྱེད། །དྲོད་ནི་མེའོ་སྲ་བ་ས། །གདེག་ལ
45.57a
སོགས་པའི་བྱ་བ་རྣམས། །རླུང་གི་ཁམས་ཀྱིས་ཀུན་ནས་རྩོམ། །གཟུགས་ལ་སོགས་པའི་ས་མཚམས་ནི། །ནམ་མཁའ་ཀུན་ནས་རྩོམ་པར་བྱེད། །རྣམ་ཤེས་སྣ་ཚོགས་ཡུལ་ཅན་ནི། །བག་ཆགས་རྣམས་ཀྱིས་རབ་ཏུ་བསྐྱེད། །སྲིད་ཀྱི་མཚམས་དང་མིག་དག་གིས། །སྐྱེ་བའི་སྒོ་རྣམས་བྱེད་པ་ནི། །གཟུགས་ལ་སོགས་པའི་ཚོགས་ཀུན་ཏེ། །རྒྱལ་པོ་མཚན་ནི་རྣམ་པ་མང ། །ནོར་བུ་རིན་ཆེན་སྣ་ཚོགས་གནས། །དབང་སྒྱུར་ཕོ་བྲང་བཟང་པོ་ན། །རྣལ་འབྱོར་ལྡན་ཆེན་ཤུགས་འཛིན་པ། །རྒྱལ་སྲས་རྣམས་ཀྱིས་མདུན་བདར་ཅིང ། །སོ་སོའི་སྟན་ལས་ཀུན་ལངས་ཏེ། །ཡང་དང་ཡང་ཞིང་ཕྱག་འཚལ་ནས། །རིམ་གྲོར་རྡོ་རྗེའི་སྙིང་པོ་ལ། །མཆོད་པའི་དམ་པས་མཆོད་པ་བྱེད། །རིན་ཆེན་དྲ་བས་སྟེང་བཀབ་ཅིང ། །ཡང་དང་ཡང་དུ་གསོལ་བ་བྱེད། །དགེའོ་དགེའོ་ཡང་དག་སྟེ། །དགེ་བ་ལྡན་པ་རབ་གནས་ཞིང ། །ཆོས་ཀྱི་སྤྲིན་གྱི་ཚུལ་རྙེད་ནས། །སངས་རྒྱས་ས་ལ་རབ་བཞུགས་ཏེ། །དབང་སྒྱུར་རྒྱལ་བའི་སྲས་རྣམས་ལ། །སངས་རྒྱས་ཡུལ་རྣམས་རབ་ཏུ་བསྟན། །རྒྱལ་པོ་ལྷ་མོ་བཅས་པ་ཡིས། །དེ་ནས་ཡང་དུ་མཆོད་བྱས་ཏེ། །རྣལ་འབྱོར་ཆེ་ཅན་དགེའོ་དགེ། །རྡོ་རྗེའི་སྙིང་པོ་འཇིགས་མེད་པ། །ལྷ་རྫས་དེ་བཞིན་གཤེགས་པ་ཡི། །ཆོས་དེ་བདག་ལ་བསྟན་པས་ན། །ནོར་བུ་རིན་ཆེན་སྣ་ཚོགས་ནས། །བཀྲ་ཤིས་གཙང་བར་རབ་ཏུ་བྱས། །ཐུབ་ལྡན་འཕགས་པ་སྤྱན་རས་གཟིགས། །བློ་གྲོས་ཆེན་པོ་བྱམས་པ་དང ། །བློ་གྲོས་མི་ཟད་མཐུ་ཆེན་དང ། །འཇམ་དཔལ་རྣམ་པར་འཕྲུལ་པ་དང ། །ལྷ་ཡི་ཅོད་པན་རྣལ་འབྱོར་བདག་།ཤུགས་འཛིན་དྲུ་མ་བློ་གྲོས་དང ། །གཟུགས་ཀྱི་དབང་པོའི་རྒྱལ་པོ་དང ། །རིན་ཆེན་གཙུག་པུད་འཕྲུལ་ཆེན་དང ། །ཡང་དག་ཇི་བཞིན་མཐོང་བ་དང ། །མཚེ་མའི
45.57b
རབ་དང་འགྲོ་འཛིན་དང ། །རྣལ་འབྱོར་སློབ་དཔོན་རྣལ་འབྱོར་ཆེ། །རྣལ་འབྱོར་ཅན་ལ་སེམས་སྟོན་པ། །ཐུབ་པ་ཐམས་ཅད་དོན་གྲུབ་པ། །ཐུབ་སྲས་འཇིགས་པ་མེད་པའི་རྣམས། །འདི་དག་གཞན་ཡང་མང་པོ་སྟེ། །རྒྱལ་བའི་སྲས་པོ་འཕྲུལ་ཆེན་རྣམས། །སོ་སོའི་སྟན་ལས་ཀུན་ལངས་ནས། །དེ་དག་གཅིག་ལ་གཅིག་བལྟས་ཏེ། །རྡོ་རྗེའི་སྙིང་པོ་དེ་ལ་སྨྲས། །ཆོས་ཀྱི་ཚུལ་ནི་བརྟན་པར་གྱིས། །ཁྱོད་ནི་རྒྱལ་དབང་བྱིན་གྱིས་བརླབས། །རྒྱལ་སྲས་རྣམས་ཀྱིས་རབ་ཏུ་མཆོད། །ས་ཡི་མཚན་ལ་མཁས་པ་ཡང ། །ཁྱོད་ལ་ཐམས་ཅད་ཤིན་དུ་གནས། །ཁྱོད་ལ་གསོལ་བ་འདེབས་པ་ནི། །རྒྱལ་སྲས་སྟོབས་ཆེན་ཐམས་ཅད་དང ། །རྣལ་འབྱོར་ཅན་དང་རྣལ་འབྱོར་བདག་།སྔགས་འཆང་བུད་མེད་ཐམས་ཅད་དོ། །རྒྱལ་བ་རྣམས་དང་རྒྱལ་སྲས་དང ། །འཇིག་རྟེན་རྣམས་ཀྱི་ངོ་མཚར་གཞི། །མདོ་སྡེ་ཀུན་གྱིས་དྲི་མེད་ཅིང ། །བསྟན་དང་བཀླག་པ་རྣམས་སྤངས་པ། །སྟུག་པོའི་རྒྱན་འདི་བསྟན་པའི་ཕྱིར། །རྣལ་འབྱོར་བདག་ཁྱོད་སྤོབས་པར་གྱིས། །སྤྲུལ་པས་བཤད་པ་སྤངས་པ་སྟེ། །དེ་བཞིན་གཏམ་དང་སྤྲུལ་པས་ཀྱང ། །ཟག་པ་མེད་པའི་ཆོས་ཀྱི་དབྱིངས། །སོ་སོ་རང་རིག་སྤྱོད་པའི་ཡུལ། །ལྷ་རྫས་མཐོང་བའི་ཆོས་ལ་བདེ། །འཕགས་པ་རྣམས་ལ་དེ་སྟོན་ཅིག་།ཕུང་པོ་ལྷག་མ་མ་ལུས་པར། །གཏུགས་པའི་ཆོས་ཀྱི་དབྱིངས་སྟོན་ཅིག་།ཏིང་ངེ་འཛིན་དང་གཟུངས་ཀྱི་རྣམས། །རྣམ་པར་ཐར་དང་དབང་རྣམས་དང ། །ཡིད་བཞིན་རྣམ་པ་བཅུ་པོ་ཡི། །ལུས་ཀྱི་ཚོགས་ཀྱང་བསྟན་པར་གྱིས། །སངས་རྒྱས་རྣམས་ཀྱི་བསམ་ཡས་དང ། །མགོན་པོ་རྣམས་ཀྱི་ཞིང་གི་རྒྱན། །རྒྱལ་བ་རྣམས་དང་རྒྱལ་སྲས་ཀྱི། །རྡུལ་ཕྲན་བཞིན་གྱི་སྐུ་ཕྲད་དང ། །སྐྲ་རྩེ་བརྒྱ་ཆར་ཕྲ་བ་དག་།རྒྱལ་སྲས་ཁྱོད་ཀྱིས་བཤད་པར་གྱིས། །
45.58a
བསྟན་དང་བཀླག་དང་རྣམ་བྲལ་ཞིང ། །བརྗོད་པས་རྣམ་པར་སྤངས་པ་ཡི། །སྟུག་པོ་ཞིང་གི་དམ་པ་དེར། །ཅི་ནས་ཐུབ་པ་འདོང་བའི་ཕྱིར། །རྣལ་འབྱོར་མཁས་པས་སེང་གེ་ལྟར། །ཐུབ་པས་དེ་དག་ཀུན་བལྟས་ཏེ། །འགྲོ་བའི་ཚོགས་རྣམས་ཐམས་ཅད་ལ། །བརྟགས་པར་མི་ནུས་བརྟག་བྲལ་བའི། །ཆོས་ཚུལ་རབ་ཏུ་བསྟན་བྱ་བར། །བློ་ཡི་མཐུ་ཡང་ཀུན་བརྟགས་ན། །རྣལ་འབྱོར་ཅན་དག་ཆོས་ཀྱི་ཚུལ། །སྔོན་གྱི་གཞུང་ལུགས་ཉན་ནུས་པས། །ཚངས་པའི་སྒྲ་དང་དབྱངས་སུ་སྟེ། །ཀ་ལ་པིང་ཀའི་སྒྲ་སྐད་དུ། །རྒྱ་ཆེན་ལྕེ་ཡིས་རབ་སྙན་པར། །རྡོ་རྗེའི་སྙིང་པོས་ཤིན་དུ་བཤད། །སེང་གེ་རོ་སྟོད་ལུས་འཆང་བ། །མཚན་རབ་སུམ་བཅུ་རྩ་གཉིས་དང ། །དཔེ་བྱད་བཟང་པོས་བརྒྱན་པའི་ལུས། །རྡོ་རྗེའི་སྙིང་པོས་ཤིན་དུ་བསྟན། །མི་དཀའི་སྒྲ་ལ་མཁས་པས་ན། །སྒྲ་ཡི་མཚན་ཉིད་གྲགས་པ་ཡིས། །མདོར་ན་དེ་ཡི་ཉིས་གྱུར་ཏུ། །རྒྱལ་སྲས་དེ་ནི་ཤིན་དུ་སྟོན། །སང་སང་དག་པ་དབྱངས་ལ་སོགས། །མཐོང་ཞིང་རིང་བའི་སྒྲ་སྐད་དང ། །གན་ད་ར་དང་རན་ལྡན་པར། །རྒྱལ་བའི་སྲས་པོས་རབ་ཏུ་བསྟན། །རྀ་ཥ་བྷ་དང་དྷཻ་བ་ཏ། །ཥ་ཌཛ་ཀེ་ཤི་ལྔ་པོ་ཡི། །སྒྲ་སྐད་མཚན་ཉིད་ལྡན་པ་ཡི། །དབྱངས་ཀྱིས་ཐུབ་པ་རྣམ་པར་གསུང ། །རིངས་དང་ངལ་བ་མེད་པའི་ཚིག་།ཟབ་ཅིང་སྙན་པའི་སྒྲ་དབྱངས་ཏེ། །མཚན་ཉིད་མཁས་དང་དྲི་ཟ་ལ། །དེ་བཞིན་སིམ་པར་བྱེད་པ་ཡི། །ཚིག་གི་ཡོན་ཏན་ལྡན་པའི་ཚིག་།རྡོ་རྗེ་སྙིང་པོས་བརྗོད་པ་ནི། །ལྷུན་གྱིས་གྲུབ་པར་བྱས་པ་སྟེ། །སྤྲུལ་པའི་བཞིན་དུ་འབྱུང་བ་ཡིན། །ཐུབ་སྲས་རྡོ་རྗེའི་སྙིང་པོ་ནི། །ཅི་ཡང་རྗོད་པར་མི་བྱེད་པར། །ཐམས་ཅད་ཡན་ལག་མཚན་གྱི་སྒྲ། །ཡན་ལག་རྣམས་ལ་མངོན་པར་འབྱུང ། །སྨིན་མ་འཕྲལ་བ་སྤྱི་བོ་དང ། །ཕྲག་པ་སྣ་རྩེ་བྱིན་པ་ལས། །ཆོས་ཀྱི་ཚུལ་རྣམས་རབ་སྟོན་ཅིང ། །དགེ་བའི་སྒྲ་རྣམས་བྱུང་བར་གྱུར། །རྡོ་རྗེ་སྙིང་པོ
45.58b
ཐུབ་པ་ཡི། །སྨོན་ལམ་ལེགས་ལས་བྱུང་བ་སྟེ། །བྲེ་མོའི་ངང་པའི་རྒྱལ་པོ་བཞིན། །རྒྱལ་བའི་སྲས་རྣམས་ཀུན་ནས་འདུས། །དབང་སྒྱུར་ཕོ་བྲང་བཟང་པོ་ན། །ཐམས་ཅད་གཟུགས་ཀྱི་རིན་ཆེན་བཞིན། །དཔའ་ཆེན་རྡོ་རྗེའི་སྙིང་པོ་དེ། །རྣམ་པར་མཛེས་ལ་ཀུན་ལྟའོ། །སྐར་མའི་དབང་པོ་སྐར་མ་དེ། །གཟའ་ཡི་དབུས་ན་མཛེས་པ་བཞིན། །རྡོ་རྗེའི་སྙིང་པོ་རྣལ་འབྱོར་ཅན། །དམ་པའི་སྟན་ལ་རྣམ་པར་མཛེས། །ཇི་ལྟར་སྐར་མའི་དབང་པོ་དང ། ཟླ་བའི་འོད་དུ་བྱེ་བྲག་མེད། །དེ་བཞིན་རྡོ་རྗེའི་སྙིང་པོ་དང ། །རྒྱལ་བ་རྣམས་སུ་ཁྱད་པར་མེད། །ཡང་དག་ཇི་བཞིན་དོན་མཐོང་བའི། །རྒྱལ་བའི་སྲས་པོ་སྟོབས་པོ་ཆེ། །རྣལ་འབྱོར་ཅན་དང་ཐུབ་པའི་མཆོག་་།སྟན་ལས་ལེགས་པར་ལྡང་བྱས་ཤིང ། །རྒྱལ་སྲས་རྣམས་ལ་མངོན་བལྟས་ནས། །ཚིག་དགེ་རྣམ་པར་སྨྲས་པ་ནི། །ཀྱེ་མ་ཐེག་ཆེན་ཐེག་པ་ནི། །སངས་རྒྱས་སྤྱོད་ཡུལ་བསམ་མི་ཁྱབ། །དེ་ལ་གནས་ཤིང་རྒྱལ་སྲས་དང ། རྒྱལ་བ་བསམ་གྱིས་མི་ཁྱབ་སྟོན། །བྱེ་བའི་ཞིང་བཞུགས་རྒྱལ་བ་དང ། །རྒྱལ་སྲས་དེ་དག་ཐམས་ཅད་ཀྱང ། །དྲི་མེད་བསམ་གྱིས་མི་ཁྱབ་ཆོས། །དགོངས་པས་ཕྱག་བྱ་འོས་པ་ཡིན། །ཐེག་པ་ཆེན་པོའི་ཚུལ་དགེ་ནི། མཆོག་ཏུ་ཕྲ་ཞིང་དཀོན་པ་སྟེ། །གཞན་དུ་གྱུར་པའི་ཚུལ་གྱི་མཆོག་།རྟོག་པ་ཅན་གྱི་ཡུལ་མ་ཡིན། །རྣམ་པར་ཤེས་པ་བརྒྱད་ཀྱི་ཡུལ། །རང་བཞིན་རྣམས་ལ་ཁྱད་པར་བྱེད། །བདག་མེད་ཉིད་ནི་ལྔ་པོ་ཡི། །དེ་བཞིན་ཁྱད་པར་བྱེད་པས་ན། །བག་ཆགས་སྤྲོས་པས་འཕངས་པ་དེ། །ཡུན་རིང་གནས་ངན་ལེན་པ་དང ། །སེམས་དང་སེམས་ལས་བྱུང་ལྡན་ཞིང ། །རྣམ་ཤེས་རྣམས་ལས་རབ་ཏུ་བྱུང ། །ལྷ་རྫས་ཚུལ་འདི་མཐོང་བ་དང ། །གསེར་བཞིན་རྣམ་པར་བྱང་བར་འགྱུར། །རྣམ་དག་རིགས་ལ་གནས་པ་དག་།སངས་རྒྱས་རིགས་སུ་དེ་དག་འགྱུར། །དེ་བཞིན་གཤེགས་པའི་ལྷ་རྫས་རིགས། །མུར་འདུག་ཉན་ཐོས་རྣམས་སྤངས་པ། །ཐོབ་ནས་སངས་རྒྱས་ཞིང་གི
45.59a
མཆོག་།སྟུག་པོར་དེ་བཞིན་འདོང་བར་འགྱུར། །ཏིང་འཛིན་འདི་ཡི་ཡུལ་ནི་གང ། །ཏིང་འཛིན་འདི་ཡི་མིང་ཡང་ཅི། །རྡོ་རྗེའི་སྙིང་པོས་གང་ཐོབ་ཕྱིར། །ཚུལ་དགེ་འདི་ནི་སྟོན་པར་འགྱུར། །རྡོ་རྗེའི་སྙིང་པོའི་རྐང་གཉིས་ལ། །ཐུབ་པ་རྣམས་ཀྱིས་ཕྱག་བྱས་ནས། །རྡོ་རྗེའི་སྙིང་པོ་འཇིགས་མེད་ཀྱི། །རྡོ་རྗེའི་བློ་ལ་བཤད་པར་མཛོད། །ཏིང་འཛིན་ཡུལ་ནི་གང་ཞིག་ཡིན། །ཏིང་འཛིན་འདི་ཡི་མིང་ཡང་ཅི། །གང་ལ་གནས་ཤིང་ཚུལ་འདི་ཡང ། །རྒྱལ་སྲས་ཁྱོད་ནི་བཤད་པ་མཛད། །རྒྱལ་བའི་སྲས་རྣམས་ཉན་པར་འདོད། །དབང་སྒྱུར་བདག་ཀྱང་དེ་བཞིན་ནོ། །རྡོ་རྗེའི་སྙིང་པོ་འཇིགས་མེད་ཀྱིས། །འཁོར་དུ་འདུས་པ་ཐམས་ཅད་དང ། །ཚུལ་འདི་བསམ་གྱིས་མི་ཁྱབ་དང ། །རྒྱལ་བའི་སྲས་ཀྱི་མཐུ་སྟོབས་དང ། །བློ་ལ་འཛིན་པའི་མཐུ་ཀུན་དང ། །ནུས་སམ་མི་ནུས་ཞེས་བལྟས་ནས། །བློ་འཛིན་མཐུ་ལྡན་མཐོང་བ་དང ། །རྒྱལ་སྲས་ཐམས་ཅད་མཐུ་ལྡན་གྱིས། ཐམས་ཅད་མ་འགྱུར་མཉན་པར་བྱོས། །གཞན་དུ་གྱུར་པའི་ཚུལ་དགེ་བ། །དབང་སྒྱུར་ལྷ་ཡུལ་གནས་པ་དང ། །ཐུབ་པ་རྣམས་ལ་བཤད་པར་བྱ། །ཐེག་པ་ཆེན་པོ་འོད་ཅན་གྱི། །ཏིང་འཛིན་ཡུལ་ནི་འདི་ཡིན་ཏེ། །དེ་ལ་གནས་ཤིང་རྒྱལ་སྲས་རྣམས། །ཚུལ་དགེ་རབ་ཏུ་སྟོན་པར་བྱེད། །བྱེ་བའི་ཞིང་རྣམས་རབ་ཏུ་མཐོང ། །དེ་དག་མགོན་པོ་དེ་བཞིན་ནོ། །རྡུལ་གྱི་མཐའ་མར་ཐུག་པ་རྣམས། །དེ་དག་རང་གི་ཞལ་སྟོན་ཏོ། །དགེའོ་དགེ་ཞེས་རབ་ཏུ་གསུང ། །འདི་ནི་རྣལ་འབྱོར་བཟང་ལྡན་ལམ། །ལམ་འདིས་ངེད་རྣམས་ཐམས་ཅད་ཀྱང ། །ཏིང་ངེ་འཛིན་ལ་དབང་སྒྱུར་བ། །ཐོབ་ནས་སངས་རྒྱས་དྲི་མེད་གྱུར། །གང་ཡང་སངས་རྒྱས་ཏིང་འཛིན་སྐྱེས། །ཐེག་པ་ཆེན་པོ་སྣང་བ་ཡི། །ཏིང་ངེ་འཛིན་གྱི་ཕྲ་སེམས་པ། །དེ་ལ་གནས་ཤིང་རྒྱལ་སྲས་པ། །རྒྱལ་བ་བསམ་ཡས་སྤྱོད་ཡུལ་ཅན། །སྤྲུལ་པ་བྱེ་བ་མང་པོ་ཡིས། །སོ་སོ་རང་རིག་སྤྱོད་ཡུལ་གྱི། །
45.59b
ཏིང་འཛིན་སངས་རྒྱས་མཐོང་བ་ནི། །ཤིན་དུ་ཕྲ་བའི་རྡུལ་སྙེད་དོ། །སོ་སོ་རང་གིས་རིག་ཚུལ་ནི། །གང་ལ་སངས་རྒྱས་གནས་པ་ཡིན། །ཆོས་འདི་མཆན་མ་མེད་པ་སྟེ། །སྒྲ་དང་གཟུགས་ཀྱིས་རྣམ་པར་སྤངས། །མིང་ནི་མཚན་མས་བསྐྱེད་པ་ཡིན། །མཚན་མ་རྐྱེན་ལས་བྱུང་བ་སྟེ། །རྣམ་པར་རྟོག་པ་གཉིས་ལས་སྐྱེས། །ཆོས་རྣམས་ཀྱི་ནི་དེ་བཞིན་ཉིད། །དེ་ནི་ཡང་དག་སུས་མཐོང་བ། །དེ་ཡི་ཡེ་ཤེས་ཡང་དག་མཚོན། །རང་བཞིན་བརྟགས་པ་མིང་ཡིན་ཏེ། །མཚན་མ་གཞན་གྱི་དབང་ལས་བྱུང ། །མིང་དང་མཚན་མ་མེད་པ་ན། །རང་བཞིན་དོན་དམ་མ་ཡིན་ཏེ། །ཐམས་ཅད་ལུས་ལ་ཀུན་ནས་གནས། །ཀུན་གཞི་དེ་ཕྱིར་འབྱུང་བ་སྟེ། །བག་ཆགས་རྣམས་ཀྱི་རི་ཁྲོད་གནས། །ཡིད་ཀྱི་གནས་ངན་ལེན་གྱིས་གཡོགས། །ཡིད་ཀྱི་རྣམ་ཤེས་སྤྱོད་པ་ཡིས། །ཡིད་ནི་ཕྱིན་ཕྱོགས་རྒྱས་པར་བྱས། །རྣམ་ཤེས་ལྔ་པོ་ཡུལ་ཅན་དག་།འབྱུང་ཞིང་ཕྱིར་ཡང་ལྡོག་པ་ཡིན། །རྣམ་ཤེས་ལྔ་ཡི་ཡུལ་རྣམས་ནི། །སེམས་ཅན་བཞིན་གནས་ལུས་ཅན་ལ། །ཀུན་གཞིར་གྲགས་པའི་ཆུ་ཀླུང་ལས། །དབའ་རླབས་བཞིན་དུ་རབ་ཏུ་འབྱུང ། །རྣམ་ཤེས་ཀུན་གཞི་མཚོར་གནས་པ། །བག་ཆགས་རྣམས་ཀྱིས་བརྙོགས་པའི་རྣམས། །ཡུལ་གྱི་རླུང་གིས་བསྐྱོད་པ་དག་།རྣམ་པར་རྒྱུན་ཆད་མེད་པར་རྒྱུ། །ཆོས་ལ་བདག་མེད་མཁས་པ་ཡི། །སངས་རྒྱས་རྣམས་དང་སངས་རྒྱས་སྲས། །བདེ་བར་གཤེགས་པའི་གནས་འཐོབ་སྟེ། །མངོན་སངས་རྒྱས་ཤིང་ཆོས་སྟོན་ཏོ། །ཕུང་པོ་གང་ཟག་བདག་མེད་པར། །རབ་ཏུ་རྣམ་ཕྱེ་མཐོང་གྱུར་ཅིང ། །ཆོས་ཀྱི་དངོས་ཡོད་མ་བཤིག་པར། །ཉན་ཐོས་དེ་དག་མངོན་རྟོགས་འགྱུར། །བདག་མེད་གཉིས་ལ་མཁས་པ་ཉིད། །རྒྱལ་བའི་སྲས་རྣམས་སྒོམ་པར་བྱེད། །རྣམ་པར་བསྒོམས་ཤིང་སྤོང་བ་ནི། །ཚུལ་བཞིན་བཞིན་དུ་ཡང་དག་མཐའ། །ཡང་དག་མཐ་ཡི་བདེ་མྱོང་ཞིང ། །སྙིང་རྗེ
45.60a
མེད་པའི་སྲས་རྣམས་ནི། །སེམས་ཅན་དགོངས་པའི་རྒྱུད་བཅད་པས། །དེ་དག་སངས་རྒྱས་མི་འཐོབ་བོ། །བསམ་ཡས་ཀྱེ་མ་ཡེ་ཤེས་འདི། །སེམས་ཅན་རྣམས་ཀྱི་བདེ་བ་སྐྱེད། །མཁྱེན་ཅིང་རྒྱལ་བ་རྒྱལ་སྲས་རྣམས། །བློ་ཆུང་རྣམས་ལ་ཚུལ་སྟོན་ཏོ། །ཇི་ལྟར་འདམ་ལས་བྱུང་བ་ཡི། །དགེ་བའི་མཚན་ལྡན་པད་མོ་དག་།ཐུབ་པ་རྣམས་དང་ལྷ་དག་གི། །ཉེ་བའི་ལོངས་སྤྱོད་རྒྱུ་ཡིན་ནོ། །དེ་བཞིན་འཁོར་བའི་འདམ་མཚོ་ལས། །རྒྱལ་བའི་སྲས་རྣམས་འབྱུང་བ་ནི། །སངས་རྒྱས་དྲི་མེད་རབ་རྙེད་ཅིང ། །ལྷ་ལ་ཡིད་དུ་འོང་བ་ཡིན། །བྱང་ཆུབ་སེམས་དཔའ་མི་རྣམས་དང ། །ལྷ་ཡི་ཁྲོད་དུ་ཁྱད་པར་དུ། །རྒྱལ་པོའི་ཁྱུ་མཆོག་འགྱུར་བ་སྟེ། །འཁོར་ལོ་ཅན་དུ་ཁྱད་པར་དུའོ། །ལྷ་ཡུལ་གནས་པའི་བདག་པོ་དང ། །དྲི་ཟ་རྣམས་ཀྱི་དེ་བཞིན་ཏེ། །ཐེག་ཆེན་ཡོན་ཏན་ལྡན་པ་ཡི། །ལུས་ཅན་རྣམས་ཀྱིས་རྟག་ཏུ་འཐོབ། །དེ་ཕྱིར་རྒྱལ་བའི་སྲས་རྣམས་ཀྱིས། །ཐེག་པ་ཆེ་ལ་བརྩོན་པར་གྱིས། །མཐར་གྱིས་བདེ་གཤེགས་གནས་རབ་དང ། །རྒྱལ་པོ་དག་ཏུའང་འགྱུར་བར་འོང ། །ཀུན་ནས་ཉོན་མོངས་ཆོས་རྣམས་དང ། །རྣམ་པར་བྱུང་བའི་ཡོད་པ་ཀུན། །རྟག་ཏུ་ལུས་ཅན་ཐམས་ཅད་ཀྱི། །ས་ལ་ཀུན་གཞི་འབྱུང་བ་ཡིན། །སྤྱི་དང་རྒྱུ་རྣམས་ལྷན་ཅིག་གམ། །འོན་ཏམ་སྤྱི་དང་དབང་པོས་ཀྱང ། །གཙོ་བོ་རྐྱེན་དང་རྒྱུ་རྣམས་ཀྱིས། །འཇིག་རྟེན་རབ་ཏུ་བསྒྲུབ་པ་བྱས། །ཁྱད་པར་ཅན་གྱི་སྒྱུ་བརྗོད་པ། །ཅི་ནས་འབྱུང་བར་འགྱུར་བ་སྟེ། །རྒྱུ་མེད་རང་ཡང་མེད་པར་འགྱུར། །བྱ་མེད་བྱེད་པའང་མེད་པར་འགྱུར། །རྣམ་པར་བྱང་དང་ཐ་མི་དད། །ཀུན་གཞི་ཐ་དད་འགྱུར་བ་མིན། །དེ་སྟེ་རྣམ་བྱང་ཐ་དད་ན། །ཀུན་གཞི་རྟག་པ་མ་ཡིན་འགྱུར། །སྔོན་མེད་འཇིག་མེད་རྟག་པ་སྟེ། །མཐའ་བཞི་རྣམ་པར་སྤངས་པ་ཡིན། །དེ་བཞིན་གཤེགས་པའི་སྙིང་པོ་དག་།སྤྲུལ་པ་ཡེ་ཤེས་སྒྲར་ཡང་གྲག་།ཕན་ཚུན་སྙིང་པོ་ཐ
45.60b
མི་དད། །དེ་ནི་སོར་གདུབ་བཞིན་དུ་གནས། །ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞི་སྒྲས། །དེ་བཞིན་གཤེགས་པ་སྟོན་པ་མཛད། །སྙིང་པོ་ཀུན་གཞིར་བསྒྲགས་པར་ཡང ། །བློ་ཞན་རྣམས་ཀྱིས་མི་ཤེས་སོ། །གསེར་མགར་མཁས་པས་རྣམ་དག་གི། །གསེར་ལས་སོར་གདུབ་བྱས་པ་ནི། །སོར་མོ་རྣམས་ལ་རྣམ་པར་མཛེས། །ཕན་ཚུན་ཐ་དད་མཚན་ཡིན་ཏེ། །སོར་གདུབ་ཅེས་ཀྱང་བརྗོད་མོད་ཀྱི། །ལས་ཀྱི་མཁན་པོས་ཡོངས་བསྒྱུར་བས། །གསེར་ནི་གཟུགས་བཞིན་རབ་ཏུ་གནས། །ཆོས་མཐོང་རྣལ་འབྱོར་ལྡན་པ་ཡི། །སེམས་དང་རྣམ་པར་ཤེས་པའི་ཡུལ། །བདུན་པའི་ས་ནི་རྙེད་པ་དང ། །འབྱུང་བ་ལས་ཀྱང་རྣམ་པར་ལྡོག་།འཕགས་པ་མཐོང་བའི་ཆོས་ལྡན་གྱི། །སོ་སོ་རང་གིས་མཐོང་བ་དང ། །སྤྱི་དང་བདག་གི་ལེགས་འཕགས་པ། །ཐམས་ཅད་བརྗོད་པར་མི་ནུས་སོ། ཇི་སྙེད་ཡུལ་ཡོད་ཅི་ཡང་རུང ། །སེམས་དང་རྣམ་ཤེས་སྤྱོད་ཡུལ་དུ། །སྣ་ཚོགས་སྣང་བ་དེ་དག་ཀྱང ། །རྣམ་ཤེས་ཡིན་ཏེ་ཡུལ་མེད་དོ། །སེམས་ནི་རྣམ་པ་གཉིས་དངོས་སུ། །གཟུང་དང་འཛིན་པར་སྣང་བ་སྟེ། །རྫ་ཕྲུ་སྣམ་བུ་སོགས་པ་ཡི། །ཡུལ་ནི་གང་ཡང་ཡོད་པ་མིན། །ཇི་ལྟར་རི་རབ་རྟེན་བྱས་ཤིང ། །ཉི་ཟླ་གཟའ་ཡི་ཚོགས་ཀྱི་རྣམས། །བྲལ་བ་མེད་པར་རྟག་ཏུ་འཁོར། །དེ་བཞིན་རྣམ་ཤེས་ཀུན་གཞི་ལ། །རྣམ་དག་འཕགས་པའི་སྤྱོད་ཡུལ་ནི། །རྟག་པར་གསེར་བཞིན་རབ་ཏུ་འབར། །ཀུན་གཞི་སྙིང་པོར་བསྒྲགས་པ་ནི། །རྟོག་པའི་སེམས་ཀྱི་ཡུལ་མ་ཡིན ། །རང་བཞིན་རྣམ་པར་བརྟགས་པ་དག་།བརྟག་པར་ནུས་པ་མ་ཡིན་དང ། །ཡོངས་སུ་གྲུབ་པའི་རང་བཞིན་ཡང ། །རྣལ་འབྱོར་ཐུབ་ཅན་རྟག་ཏུ་མཐོང ། །ཡིད་ཀྱི་རྣམ་ཤེས་ཡུལ་ཅན་ནི། །བུས་པ་རྣམས་ལ་འཆིང་བའི་དངོས། །སྨིག་རྒྱུ་སྒྲ་ཚོགས་བྱུང་བ་སྟེ། །འཕགས
45.61a
པ་རྣམས་ཀྱིས་དྲི་མེད་གཟིགས། །སྟོང་ཕྲག་བཅུ་གཉིས་པའི་རྒྱན་སྟུག་པོ་ལས་ཇི་སྙེད་པའི་མདོ། །རྫོགས་སྷོ།།