༄#། ་།རྒྱ་གར་སྐད་དུ། ་སིཾ་ཧ་ནཱ་ད་ཏན་ཏྲ་ནཱ་མ། ་བོད་སྐད་དུ། སེང་གེ་སྒྲའི་རྒྱུད་ཅེས་བྱ་བ། ་བཅོམ་ལྡན་འདས་པད་མ་གསུང་གི་ལྷ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་པད་མའི་དབང་ཕྱུག་དུ་བསྒྱུར་ཏེ་རྡོ་རྗེའི་གདན་ལ་བཞུགས་སོ། །དེ་ནས་གསང་བའི་བདག་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བསོད་ནམས་དང་ཡེ་ཤེས་ཀྱི་ཚོགས་དང་ལམ་རྣམས་ཇི་ལྟར་སྦྱང ། ེ་མ་ཧོ་སེམས་ཅན་རྣམས་ལ་སྙིང་བརྩེ་བའི་མཆོག་སྤྱན་རས་གཟིགས་སེང་གེ་སྒྲ་ཞེས་བྱ་བ་ཡོད་དེ། དེ་ཡིས་སྔོན་ལམ་སྦྱང་བ་དང ། བསོད་ནམས་དང་ཡེ་ཤེས་ཀྱི་ཚོགས་བསགས་པར་ཡིད་ལ་བྱས་སོ། །དེ་ནས་བཅོམ་ལྡན་འདས་པད་མའི་དབང་ཕྱུག་ལངས་ཏེ། གསང་སྔགས་ཀྱི 100.49a ཚིག་འདི་དག་སྨྲས་སོ། །ན་མོ་རཏྣ་ཏྲ་ཡཱ་ཡ། ན་མཿ ་ཨཱརྱཱ་བ་ལོ་ཀི་ཏེ་ཤཝ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊེ། ནི་ཀ་ཊེ། ཀ་ཏཾ་ཀ་ཊེ། ཀ་རོ་ཊེ། ཀ་རོ་ཀཾ་ཊེ། བཱི་རྱཻ་སཝཱ་ཧཱ། ཨོཾ་ཨཱཿ ཧྲཱིཿ སིཾ་ཧ་ནཱ་ད་ཧཱུཾ། ་བྲུཾ་ཨཱཾ་ཛྲཱིཾ་ཁཾ་ཧཱུཾ། ཨོཾ་ཨཱཿ ཧཱུཾ། ཨོཾ་བ་ལི་ན་བྷུཉྫ་ཛི་བ་པུཥྤེ་དྷཱུ་པེ་ཧཱུཾ། སརྦ་ཨ་མྲྀ་ཏེ་ཧཱུཾ། ཨོཾ་བ་ཏ་ལི། མ་ཧཱ་བ་ཏ་ལི། ཧཱུཾ་ཧཱུཾ་ཧཱུཾ་ཛ་སཝཱ་ཧཱ། ཨོཾ་བྷཀྵ་བྷཀྵ། ས་མ་ཡ་ཏིཥྛ་ཛཾ་ཧཱུཾ་ཕཊ་སཝཱ་ཧཱ། ཨོཾ་ཨ་ཏ་པྲ་ཏི་ཧཱུཾ་ཕཊ། སྲི་ཏི་ཀ་ར་ཧཱུཾ་ཕཊ། ཨོཾ་བ་རུ་ཎ་ཨཱ་གཙྪ་ཡ་ཨཱ་གཙྪ་ཡ། མ་ཧཱ་ནཱ་ག་ཀི་ས་ཏི་སརྦེ་བྷུར་ཕུཿ ཕུཿ ཕུཿ སཝཱ་ཧཱ། ཨོཾ་བྷ་ག་བ་ཏི་ཤྲུ་ཏི་སྨྲྀ་ཏི་ས་མ་བ་ཏི། ས་ར་མ་ཏི་སིདྡྷི་སཝཱ་ཧཱ། ཨོཾ་ཨཱཿ ཧྲཱིཿ ཧཱུཾ་སཝཱ་ཧཱ། ཕུཿ ཧྲཱིཿ ་ཨོཾ་སིཾ་ཧ་ནཱ་ད་ཧཱུཾ་ཕཊ་ཕཊ། ནཱ་ག་དུ་པ་ལི་མཱ་ར་ཡ་ཕཊ། ཛྭཱ་ལ་ཛྭཱ་ལ་ཧཱུཾ་ཕཊ། ཨོཾ་ཨ་བིནྟ་ཀྲྀ་ཏ་ཧཱུཾ། ཨོཾ་ཨགྣ་ཡེ་ཨ་ཏི་བྱ། ཨ་བྷི་ས་མ་ཡ་བི་ཤ་།མ་ཧཱ་ཤྲི་ཡེ་ཧ་བྱ། ཀ་བྱ་མ་ཧཱ་ནི་ཡ་སཝཱ་ཧཱ། ་་ཨོཾ་བྷ་བ་ཀ་ཨགྣ་ཡེ། ཤཱནྟི་ཀུ་རུ་ཡེ་སཝཱ་ཧཱ། ཨཱཿ ཧྲཱིཿ སིཾ་ཧ་ནཱ་ད་བཛྲ་ཙཀྲ་བརྟ་ལོ་ཀི་ཀ་བྲུཾ་བྲུཾ་བྲུཾ། ་ལོ་ཀོཏྟ་ར་ཎི་སིཾ་ཧ་ནཱ་ད་བྲུཾ་བྲུཾ་བྲུཾ་ཧཱུཾ་ན་ཧཱུཾ་ན། སིཾ་ཧ་ནཱ་ད་བྲུཾ་བྲུཾ་བྲུཾ་ཧཱུཾ་ཧཱུཾ་ཧཱུཾ་སཝཱ་ཧཱ། གསང་བའི་བདག་པོ་འདི་ནི་མཎྜལ་གྱི་བསྒྲུབ་པ་ཞེས་བྱ་བའོ། །གསད་པ་དང ། ཕྱིར་ལྡོག་པ་དང ། དགུག་པ་དང ། བཅིང་བ་དང ། ཞི་བའི་ལས་ཡིན་ཏེ། ནང་པར་བའི་ལྕི་བ་ས་ལ་མ་ལྷུང་བས་མཎྜལ་བྱས་ཏེ། མངར་གསུམ་ལག་པའི་འཐིལ་དུ་མཉེས་པས་ཀླུའི་ཞེ་སྡང་ཞི་བར་འགྱུར་རོ། །འདི་ནི་ཀླུའི་སྡེ་དཔོན་ཞེས་བྱ་སྟེ། །སེང་གེའི་སྟེང་དུ་ཟླ་བ་ལ། །རྒྱལ་པོ་རོལ་པའི་སྟབས་ཀྱིས་བཞུགས། །གཡས་ན་མཐོ་མཚན་རྩེ་གསུམ་ལ། །དྲག་པོའི་རྒྱལ་རིགས་དབང་དུ་བསྡུས། །པད་མའི་རྩེ་ལ་ཐོད་པ་ནི། །འཕྲིན་ལས་བཞི་ལྡན་ཀུ་མུ་ཏ། །ཤེས་རབ་སྦྱོར་བའི་རལ་གྲིར་བཅས། །དཀའ་ཐུབ་ལྡན་པའི་སྐུ་དེ་ལ། །རིགས་ལྔས་རྣམ་པར་བརྒྱན་པའོ། །གསུམ་དང་ལྔ་ནི་མདུན་དུ་འཕྱང ། །རྩེ་མོར་འོད་དཔག་མེད་པས་བརྒྱན། །སེང་གེའི་ཆ་ལས་བྱུང་བ་ཡིན། ། 100.49b འདམ་སྐྱེས་དམར་པོའི་ལོ་མ་གཉིས། །པད་མ་བཞི་ལ་སྔགས་བཞི་ལྡན། །རང་ལུས་འོག་ནས་ཐལ་མོ་སྦྱོར། །སྐུ་ལ་འདུད་ཅིང་འཕྲིན་ལས་བྱེད། །རྡོ་རྗེའི་གདན་ལ་མི་བསྐྱོད་པའི། །ཐུགས་ཀ་ནས་ནི་སྔགས་འོད་འདོན། །སྤྲོ་བ་གསུམ་དུ་ལྡན་པའི་སྔགས། །ཉི་ཤུ་རྩ་གཅིག་གདོན་པར་བྱའོ། །གསང་བའི་བདག་པོ་རྒྱུད་འདི་ལ་སྨོད་པའི་སེམས་ཅན་དེ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་སྨོད་པ་ཡིན་ནོ། །གསང་བའི་བདག་པོ་རྒྱུད་འདི་ཉན་པ་དང ། སེམས་པ་དང ། མཆོད་པ་དང ། འཆང་བ་དང ། ཐ་ན་འདི་ལ་མོས་པའི་སེམས་ཅན་དེ་དག་ལ་རྒྱལ་ཆེན་བཞིའི་ལྷ་དང ། སུམ་བཅུ་རྩ་གསུམ་གྱི་ལྷ་དང ། ཚངས་པའི་བུ་དང ། ཚངས་ཆེན་རྣམས་ཀྱིས་བསྲུང་བ་དང ། བསྐྱབ་པ་དང ། སྦ་བ་དང ། ཀུན་ཏུ་རྗེས་སུ་འབྲང་བར་བྱེད་དེ། དེ་བས་ཆེས་ལྷག་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བུ་ལ་མས་སྲུང་བ་བཞིན་དུ་བསྲུང་བར་འགྱུར་རོ། །བདུད་ཀྱི་བར་དུ་གཅད་པར་མི་ནུས་སོ། །གང་ཤི་འཕོས་ནས་ནུབ་ཕྱོགས་བདེ་བ་ཅན་དུ་པད་མོ་ལས་སྐྱེ་བར་འགྱུར་རོ། །མངལ་གྱི་སྡུག་བསྔལ་ལས་ཐར་བར་འགྱུར་རོ། །ཚེ་འདིར་མེ་དང་ཆུའི་འཇིགས་པ་ལས་ཐར་བར་འགྱུར་རོ། །འདིར་ནི་མདོ་ཙམ་སྨོས་སུ་ཟད་ཀྱི། དེ་མ་ཡིན་པ་གང་འདོད་པ་ཐམས་ཅད་བསམ་པ་ཡིད་བཞིན་དུ་འགྲུབ་པར་འགྱུར་རོ། །གང་རྒྱུད་འདི་ལ་གནོད་པ་དང ། འཚེ་བ་དང ། ཚུལ་བཞིན་མ་ཡིན་པ་ཡིད་ལ་བྱེད་ན། དེ་ལ་ལྷའི་བུ་དང ། ཀླུའི་བུ་ཁྱེད་རྣམས་ཀྱིས་བསྲུང་བར་གྱིས་ཤིག་ཅེས་བཀའ་སྩལ་ཏོ། །དེ་ནས་གསང་བའི་བདག་པོ་དང ། ཚངས་རིས་ཀྱི་ལྷའི་བུ་དེ་དག་རབ་ཏུ་དགའ་ནས་ཚུལ་བཞིན་དུ་ཁས་བླང་བར་བྱས་སོ། །དེ་ནས་གཞན་བསྲུང་བའི་ཕྱིར་བདག་ས་དཀར་པོ་ལ་ལན་དུ་མར་བསྔགས་ན་བར་ཆད་ཐམས་ཅད་ཞི་བར་འགྱུར་རོ། །སེང་གེ་སྒྲའི་རྒྱུད་ཅེས་བྱ་བ་རྫོགས་སྷོ།། །།རྒྱ་གར་གྱི་མཁན་པོ་པཎྜི་ཏ་པྲཛྙཱ་ཀཱ་ར་དང ། བོད་ཀྱི་ལོཙྪ་བ་འགོས་ཁུག་པ་ལྷས་བཙས་ཀྱིས་ཞུས་ཤིང་བསྒྱུར་ཏེ་གཏན་ལ་ཕབ་པའོ།། ཞུས་དག་།ཡང་ཞུས་ཐང་རྒྱལ། སླར་ལང་སྟག་ལུང་རྒྱུད་འབུམ་ལས་ཞུས།། |