༄#། ་།རྒྱ་གར་སྐད་དུ། ཨཱརྱ་སུ་བཱ་ཧུ་པ་རི་པྲྀཙྪཱ་ནཱ་མ་ཏནྟྲ། ་བོད་སྐད་དུ། འཕགས་པ་དཔུང་བཟང་གིས་ཞུས་པ་ཞེས་བྱ་བའི་རྒྱུད། ཐམས་ཅད་མཁྱེན་པ་ལ་ཕྱག་འཚལ་ལོ། །གནོད་སྦྱིན་བདག་པོ་ཉི་མ་སྟོང་གི་གཟི། །ཐུགས་རྗེས་རྩེ་གཅིག་ཡིད་གྱུར་བཞུགས་པ་ལ། །དཔུང་བཟང་ཚུལ་བཞིན་གུས་པས་ཕྱག་འཚལ་ནས། །རིག་དང་གསང་སྔགས་ཚོགས་ཀུན་གྲུབ་པ་ཞུས། །བདག་གིས་ས་སྟེངས་མི་རྣམས་བཟླས་བརྗོད་དང ། །སྨྱུང་དང་ཡང་དག་སྡོམ་པ་མི་བཟད་པས། །རབ་ཏུ་བསྒྲིམས་ཀྱང་གྲུབ་པ་མ་མཐོང་ན། །ཡབ་གཅིག་ཅི་སླད་དཀའ་ཐུབ་དོན་མ་མཆིས། །གཙོ་བོ་གཟི་བརྗིད་ཉི་འོད་མེ་ལྟ་བུ། །ཁྱོད་ཀྱིས་སྡིག་འཇོམས་དག་བྱེད་རྣམས་ཀྱི་མཆོག་།བདེན་པའི་གསུང་གིས་རབ་ཏུ་བཀའ་སྩལ་ན། །ཅི་ལྟར་སྔགས་རྣམས་འབྲས་བུ་མ་མཆིས་འགྱུར། །རབ་དང་འབྲིང་དང་དེ་བཞིན་ཐ་མ་རྣམས། །བསྒྲུབས་ཀྱང་གསང་སྔགས་འབྲས་བུ་མི་སྩོལ་ལ། །བསྙེན་པས་ཅི་སྟེ་ཅུང་ཟད་འགྲུབ་མེད་ན། །སྒྲུབ་པ་ཉོན་མོངས་ཁོ་ན་ཅི་རུང་ལགས། །རྒྱལ་བས་ཡེ་ཤེས་ཞི་བ་གང་ཡིན་པ། །དེ་ཡིས་འདི་དག་གསོ་བར་སྔོན་གསུངས་ན། །གང་ལ་སྔགས་དང་རིག་པ་གྲུབ་མེད་པ། །དེ་དག་རྣམས་ཀྱང་ཅི་ལྟར་གསོ་བར་བགྱི། །ཐུགས་རྗེ་ལྡན་པས་འགྲོ་ལ་སྨན་སླད་དུ། །ཁྱོད་ཀྱིས་གསང་སྔགས་སྣ་ཚོགས་བཤད་པའི་རྣམས། །དེ་དག་བཟླས་བརྗོད་སྦྱིན་སྲེག་བརྟུལ་ཞུགས་དང ། །བསྙེན་ལ་སོགས་པས་མ 101.193b གྲུབ་ཅི་ལས་གྱུར། །ཆོ་ག་ཉམས་སམ་འོན་ཏེ་མཐུ་མ་མཆིས། །དུས་ཀྱི་རང་བཞིན་ལགས་སམ་སྡིག་པས་བསྒྲིབས། །གསང་སྔགས་གཞན་དུ་གྱུར་ཏམ་འཆོལ་ལས་གྱུར། །ཐམས་ཅད་མ་ལུས་བཅོམ་ལྡན་འདས་ཀྱིས་གསུངས། །སྲས་ཀྱི་ཚིག་དེ་ངེས་པར་གསན་གྱུར་ནས། །ཡུད་ཙམ་དགོངས་ནས་དཀྱུས་རིང་སྤྱན་ཕྱེ་སྟེ། །ཕྱག་གིས་རྡོ་རྗེ་མེ་སྟག་ཟེར་འཕྲོ་བ། །གསོར་ནས་རྡོ་རྗེ་ཅན་གྱིས་འདི་སྐད་གསུངས། །ེ་མའོ་ཟླ་བའི་འོད་ལྟར་ལྷམ་མེ་བའི། །སྙིང་རྗེས་སེམས་ཅན་ཕན་ཕྱིར་ཁྱོད་འདྲི་བ། །ཤིན་ཏུ་དྲི་མ་མེད་པའི་སེམས་འདི་ཡིས། །བདེ་གཤེགས་སྲས་ནང་ཕ་རོལ་ཕྱིན་པར་གྱུར། །བྱང་ཆུབ་སེམས་དཔའ་རང་གི་བདེ་མ་ཆགས། །རང་གི་སྡུག་བསྔལ་རྣམས་ཀྱིས་མི་བརྫི་ཡང ། །གཞན་གྱི་སྡུག་བསྔལ་རྣམས་ཀྱིས་སྡུག་བསྔལ་ཏེ། །དེ་དག་བདེ་བས་དགའ་དང་ལྡན་པར་གྱུར། །བུ་ཁྱོད་རང་བཞིན་བཟང་པོ་འདི་ལྟ་བུས། །གང་ཕྱིར་སེམས་ཅན་ཕན་ཕྱིར་ཁྱོད་འདྲི་བ། །དེ་ཕྱིར་མྱུར་དུ་རྩེ་གཅིག་ཡིད་བྱོས་དང ། །གསང་སྔགས་མདོ་སྡེའི་ཚུལ་བཞིན་དུ་ངས་བཤད་དོ། །གསང་སྔགས་བཟླས་བརྗོད་གང་དག་ངས་གསུངས་པ། །དེ་ཡི་བརྟུལ་ཞུགས་དང་པོར་ངས་བཤད་དོ། །དེ་ཡིས་བདེ་བར་གཤེགས་ལ་དང་བསྐྱེད་ནས། །དེ་བཞིན་དུ་ནི་བྱང་ཆུབ་སེམས་ཀྱང་བསྐྱེད། །སེར་སྣ་དྲེགས་དང་རྒྱགས་པ་རྣམ་སྤངས་ཏེ། །དཀོན་མཆོག་གསུམ་ལ་དད་པས་བསྙེན་བཀུར་བྱ། །རྡོ་རྗེ་རིགས་ཞེས་བརྗོད་པ་རྒྱ་ཆེན་དང ། །ང་ལ་ཡང་ནི་དད་ཅིང་དགའ་བར་བྱ། །ཚིག་རྩུབ་ཕྲ་མ་འཁྱལ་པ་སྨྲ་བ་དང ། །གཞན་གྱི་བུད་མེད་བགྲོད་དང་བརྫུན་སྨྲ་དང ། །རྐུ་དང་གཞན་གྱི་སྲོག་གཅོད་གནོད་བྱེད་དང ། །ཆང་དང་བྱེད་པ་རྟག་ཏུ་སྤང་བར་བྱ། །རྨོངས་པ་གང་གིས་ལུས་དང་ངག་དང་ནི། །དེ་བཞིན་ཡིད་ཀྱིས་བསོད་ནམས་བསགས་བྱས་ཀྱང ། ། 101.194a ཐམས་ཅད་ལོག་པར་ལྟ་བས་བཅོམ་པས་ན། །དེ་ཡི་རྣམ་སྨིན་མི་འདོད་འབྲས་བུར་འགྱུར། །དཔེར་ན་ས་དང་ཆུ་དང་དུས་ལྡན་ཡང ། །ས་བོན་ཚིག་པ་མྱུ་གུ་མི་བསྐྱེད་ལྟར། །དེ་བཞིན་མི་ཤེས་ལོག་ལྟས་བཅོམ་པ་ཡི། །སེམས་ལ་དགེ་བའི་ཆོས་རྣམས་མི་སྐྱེའོ། །དེ་ཕྱིར་ལོག་པར་ལྟ་བ་རྣམ་སྤངས་ལ། །ཡང་དག་ལྟ་བ་ལ་ནི་བསྟེན་པར་གྱིས། །རྟག་ཏུ་སེམས་ནི་དགེ་བ་བཅུ་དག་གི། །ཆོས་ཀྱི་ལམ་ལ་གནས་པར་བྱས་ན་ལེགས། །ལྷ་དང་ལྷ་མིན་ཤ་ཟ་ཁྲག་མཐུང་བ། །མཚན་མོ་རྒྱུ་བ་མི་བཟད་འཇིག་རྟེན་ན། །སེམས་ཅན་རྣམས་ལ་གནོད་པ་བྱེད་ཅིང་རྒྱུ། །བཟླས་བརྗོད་བརྩོན་པའི་སེམས་ནི་གཡེང་བར་བྱེད། །དེ་དག་རྣམས་ཀྱི་གཉེན་པོར་གྱུར་པའི་ཕྱིར། །ང་ཡི་གསང་སྔགས་རིག་པའི་ཚོགས་མཐོང་ན། །སྐྲག་པར་བྱེད་དོ་སྙམ་དུ་དོགས་སྐྱེས་པ། །དེ་ཕྱིར་ཟློས་པའི་སེམས་ནི་གཡེང་བར་བྱེད། །དེ་ལྟར་གནོད་བྱེད་དེ་དག་གཞོམ་པ་དང ། །བདག་ཉིད་འབྱོར་པར་བྱ་ཕྱིར་ངས་གསུངས་པའི། །དཀྱིལ་འཁོར་ལྷ་དང་ལྷ་མིན་གནས་གྱུར་པ། །དམ་ཚིག་ཅི་བཞིན་བསོད་ནམས་དོན་དུ་བལྟ། །སྣ་ཚོགས་པ་ཡི་གདོན་རྣམས་གནས་པ་ལ། །གང་ཞིག་རྣམ་པ་སྣ་ཚོགས་ལས་བྱེད་པའི། །དཀྱིལ་འཁོར་དེར་ནི་གནོད་བྱེད་གཞོམ་པའི་ཕྱིར། །མི་ཡིས་རབ་ཏུ་བསྒྲིམས་ནས་འཇུག་པར་བྱ། །གང་ཡང་རིག་པ་མཆོག་ཏུ་གསུངས་པ་དང ། །ཁྲོ་བོའི་དཀྱིལ་འཁོར་དུ་ཡང་འཇུག་པར་བྱ། །དེར་ནི་དམ་ཚིག་སྣ་ཚོགས་ངས་བཤད་པ། །སྡིག་པ་བསལ་ཕྱིར་རྒྱུན་ཏུ་བལྟ་བར་བྱ། །རྡོ་རྗེ་རིགས་གཙོ་ཕོ་ཉ་མོ་ཡི་ཚོགས། །རིག་པ་མང་པོས་བསྟན་པའི་ལྷ་མོ་དེ། །ཟློས་པ་མཐོང་ན་བགེགས་རྣམས་ཕུང་བ་དང ། །རྔམ་པ་ཐོན་ཞིང་ཤིན་ཏུ་སྐྲག་པར་འགྱུར། །ཅི་ལྟ་ཅི་ལྟར་དཀྱིལ་འཁོར་མཐོང་བ་དང ། །དེ་ལྟ་དེ་ལྟར་རྡོ་རྗེའི་རིགས་བསྟེན་དང ། །རིག་པའི་ཚོགས་ལ་བསྟེན་པའི་བསོད་ནམས་ཀྱིས། །དེ་ཡི་ལུས་ལ་མ་ལུས་བྱིན 101.194b བརླབས་འཇུག་།མི་ཚུགས་རྡོ་རྗེའི་བདག་ཉིད་དེ་མཐོང་དང ། །ས་ཕྱོགས་རྡོ་རྗེའི་མེ་འབར་དེ་ཤེས་ནས། །ལྷ་ཀླུ་ལྷ་མིན་གནོད་སྦྱིན་གྲུབ་པའི་རྣམས། །བཟླས་བརྗོད་བྱེད་པས་སྐྲག་ནས་འབྱེར་བར་འགྱུར། །ང་ཡི་དམ་ཚིག་མཐོང་བའི་བུ་དག་གིས། །འཇིག་རྟེན་འཇིག་རྟེན་འདས་པས་བཤད་པ་ཡི། །གསང་སྔགས་དེས་ནི་མ་བསྒྲིམས་བཞིན་དུ་འགྲུབ། །བགེགས་རྣམས་ཐམས་ཅད་བརླག་པར་བྱེད་པར་འགྱུར། །རིག་དང་དམ་ཚིག་མ་ཐོབ་སྙིང་རྗེ་མེད། །དེ་བཞིན་བྱང་ཆུབ་སེམས་ནི་མ་བསྐྱེད་ཅིང ། །སངས་རྒྱས་མ་དད་ལྷ་གཞན་ལ་བརྟེན་པས། །ང་ཡི་གསང་སྔགས་བཟླས་ན་ཕུང་བར་འགྱུར། །བསམ་པ་ཞན་ཅིང་ཉམས་ཀྱིས་མི་ལྕོགས་པས། །དཀྱིལ་འཁོར་དེ་ཀུན་བལྟ་བར་མི་ནུས་ནའང ། །དེ་ལས་གང་ཡང་རུང་བའི་དཀྱིལ་འཁོར་ནི། །གཅིག་ཙམ་ཞིག་ཀྱང་དད་པས་མཐོང་གྱུར་ན། །གནོད་སྦྱིན་ཚོགས་དང་མཚན་མོ་རྒྱུ་བ་དང ། །ས་བླའི་གདོན་རྣམས་ཀུན་དང་ཀླུ་བདག་དང ། །ལྷ་ལ་སོགས་དང་བགེགས་དང་ལོག་འདྲེན་རྣམས། །བརྟུལ་ཞུགས་གནས་པ་དེ་ལ་ཀླགས་མི་ལྟ། །དཔེར་ན་ལོ་ཏོག་ཐམས་ཅད་ས་དག་ལ། །བརྟེན་ནས་སྐྱོན་མེད་པར་ནི་སྐྱེ་བ་ལྟར། །དེ་བཞིན་ཚུལ་ཁྲིམས་བརྟེན་ནས་ཆོས་དཀར་མཆོག་།སྙིང་རྗེའི་ཆུས་བརླན་པས་ནི་རྣམ་པ་སྐྱེ། །རྒྱལ་བ་ངས་གསུངས་སོ་སོ་ཐར་པ་ཡིས། །ཚུལ་ཁྲིམས་རྣམ་དག་འདུལ་བ་མ་ལུས་ལས། །སྔགས་པ་ཁྱིམ་པས་རྟགས་དང་ཆོ་ག་སྤང ། །ལྷག་མ་རྣམས་ནི་ཉམས་སུ་བླང་བར་བྱ། །དེ་ལྟར་སྡིག་པའི་ཆོས་ལས་རྣམ་གྲོལ་ནས། །བདེ་བར་གཤེགས་པས་ལེགས་པར་གསུངས་པའི་ཆོས། །དག་ཅིང་གྲོལ་བ་དང་ནི་ལྡན་འགྱུར་བའོ། །བཟླས་པས་སྐྱོ་ན་མདོ་སྡེ་བཀླག་པར་བྱ། །གཙང་ཞིང་དབེན་པ་ས་ཡི་ཕྱོགས་སུ་ནི། །འཇིམ་པ་འམ་ནི་བྱེ་མ་ལས་བྱས་པའི། །བདེ་གཤེགས་མཆོད་རྟེན་རྟེན་འབྲེལ 101.195a སྙིང་པོ་ཅན། །སྡིག་པ་སྦྱང་བའི་ཕྱིར་ནི་རྟག་ཏུ་གདབ། །རིང་བསྲེལ་ཅན་གྱི་སྐུ་གཟུགས་མཆོད་རྟེན་ལ། །བསྟོད་ཅིང་ཕྲེང་བ་དྲི་དང་མར་མེ་དབུལ། །གདུགས་དང་རྒྱལ་མཚན་བ་དན་རོལ་མོ་དང ། །མཆོག་ཏུ་དད་པ་ཡིས་ནི་མཆོད་པར་བྱ། །ནམ་ཡང་འཁོར་ལོ་གཅིག་པའི་ཤིང་རྟ་ནི། །རྟ་དང་ལྡན་ཡང་ལམ་དུ་མི་འགྲོ་ལྟར། །དེ་བཞིན་བསྒྲུབ་པ་ཡི་ནི་གྲོགས་མེད་ན། །ལུས་ཅན་དངོས་གྲུབ་ཐོབ་པར་མི་འགྱུར་རོ། །དེ་ནི་བློ་ལྡན་གཟུགས་བཟང་གཙང་སྒྲ་ཆེ། །རིགས་ནི་བཙུན་ཞིང་ཆོས་ལ་གཞོལ་བ་དང ། །སྤོབས་པ་ཆེ་ཞིང་དཔའ་ལ་དབང་པོ་དུལ། །སྙན་པར་སྨྲ་ཞིང་སྦྱིན་ཕོད་སྙིང་རྗེ་ཅན། །བཀྲེས་དང་སྐོམ་དང་ཉོན་མོངས་བཟོད་པ་དང ། །བྲམ་ཟེ་དག་དང་ལྷ་གཞན་མཆོད་མི་བྱེད། །སྒྲིན་ཞིང་བཟོ་ལ་བྱས་པ་བཟོ་བ་དང ། །དཀོན་མཆོག་གསུམ་ལ་དད་པ་གྲོགས་པོ་ཡིན། །དེ་ལྟའི་ཡོན་ཏན་མ་ལུས་ལྡན་པ་དག་།རྩོད་པའི་དུས་ན་ཤིན་ཏུ་དཀོན་པས་ན། །ཡོན་ཏན་ཕྱེད་དང་བཞི་ཆའམ་བརྒྱད་ཆ་ཅན། །དེ་ལྟ་བུ་དག་སྔགས་པའི་གྲོགས་པོར་བསྟེན། །འཕགས་པ་དཔུང་བཟང་གིས་ཞུས་པའི་ལེའུ་དང་པོའོ།། །། རང་སངས་རྒྱས་དང་བདེ་གཤེགས་ཉིད་སྐྱེས་དང ། །རྒྱལ་བ་སྔོན་ཆད་གང་ན་བཞུགས་བཞུགས་པའི། །གནས་གང་བསོད་ནམས་ལྡན་ཞིང་ཡིད་དགའ་བ། །ལྷ་དང་ལྷ་མིན་སོགས་པས་ཕྱག་འཚལ་མཆོད། །གསོ་སྦྱོང་སྡོམ་པ་དག་དང་ལྡན་པ་ཡིས། །བདག་ཉིད་དག་པར་བྱ་ཕྱིར་བསྙེན་པར་བྱ། །དེ་ལྟ་བུ་དག་མ་རྙེད་གཞན་ཡང་ནི། །ཆུ་བོ་ཆུ་ཀླུང་འབབ་ཆུ་མོད་པ་དང ། །པད་མ་ཨུད་པ་ལས་ནི་བརྒྱན་པའི་མཚོ། །སྐྱེ་བོ་རྣམས་ཀྱང་ཤིན་ཏུ་མི་རྒྱུ་བ། །དང་ཞིང་ཞིམ་པའི་ཆུ་ནི་མང་བ་དང ། །མི་བཟད་གདོན་རྣམས་ཀྱང་ནི་མི་གནས་པ། །མེ་ཏོག་འབྲས་བུ་གཙང་མ་ཡོད་པ་དང ། །སྨན་ལྗོངས་ལྗོན་ཤིང་སྣ་ཚོགས་དཀྲིགས་པ་དང ། །ས་སྟེང་གནས་མལ 101.195b ཤིན་ཏུ་གཙང་བ་དང ། །གང་ན་སྟག་གཟིག་སེང་གེ་མེད་པ་དང ། །ཡིད་འོང་མཉམ་ཞིང་ཚེར་མ་མེད་པ་དག་།མི་ཡི་དངོས་གྲུབ་གནས་སུ་བསྒྲགས་པ་ཡིན། །གྲོག་པོ་གྲོག་མཁར་ཐལ་བ་སྐྲ་ཤད་དང ། །ཉལ་ཉིལ་སོལ་བ་ཚ་སྒོའམ་རྩོག་ཅན་སྤང ། །དེར་ནི་ས་བརྐོས་སྦྱངས་ནས་གནས་བརྩིགས་པ། །དྲོ་ལ་བརྟན་ཞིང་འཇིམ་པས་ཞལ་ཞལ་བྱ། །ཤར་རམ་བྱང་ངམ་ནུབ་དུ་སྒོ་གཏོད་ཅིང ། །ལྷོ་ཕྱོགས་སུ་ནི་ནམ་ཡང་སྒོ་མི་གཏོད། །དྲི་གཙང་ཁང་པ་དེ་ཡི་ཕྱོགས་གཅིག་ཏུ། །རྒྱལ་བ་ལམ་མཆོག་རྣམ་པར་སྟོན་པ་ཡི། །རས་ཀྱི་སྐུ་གཟུགས་ལས་ཕྱིར་བརྟན་པར་གདགས། །ཡང་ན་ཤིང་གཟུགས་ལེགས་པ་མཆོད་ཕྱིར་བཞག་།ཐ་ག་པས་བཏགས་འཇམ་ལ་སྙོམས་པ་དང ། །ཐགས་བཟང་དེ་བཞིན་སྐྲ་ཤད་མེད་པ་དང ། །ཁོ་ལག་ཆེ་ཞིང་མ་ཉམས་ཁ་ཚར་བཅས། །རས་ཀྱི་གཟུགས་དེ་མི་ལ་དངོས་གྲུབ་སྟེར། །གཙང་མ་སྤོས་ཆུས་བཏབ་པ་དེ་ལ་ནི། །ཚོན་རྩི་སྤྱིན་མེད་སྣོད་གསར་བླུགས་པ་ཡིས། །ཁྲུས་བྱས་གཙང་ལ་གསོ་སྦྱོང་གཟུང་བའི་མི། །མཁས་པས་བ་ལང་སྤུ་ཡིས་བྲི་བར་བྱ། །ཕྲེང་བ་བདུག་སྤོས་མར་མེ་ལྷ་བཤོས་དང ། །བྱུག་པ་དག་གིས་སྐུ་གཟུགས་ཆེར་མཆོད་དེ། །ནུབ་ཕྱོགས་ཞལ་བསྟན་མི་གཡོ་བརྟན་པར་གདགས། །དེ་ཡི་སྤྱན་སྔར་དངོས་གྲུབ་བརྩམ་པར་བྱ། །གཙུག་ཕུད་བཞག་སྟེ་སྐྲ་ནི་བྲེགས་ནས་སུ། །འབྱུང་ཁུང་ཚོན་གྱིས་གོས་ཀྱི་ཁ་དོག་བསྒྱུར། །གོས་དཀར་དག་གམ་ཤིང་ལོའམ་གསོ་མ་འམ། །ཟར་མའམ་ཤིང་ཤུན་རྣམས་ཀྱི་གོས་བགོའོ། །ཀུ་བའམ་ལྕགས་སམ་འཇིམ་པ་ལས་བྱས་པའི། །དབྱིབས་ནི་ལེགས་ཤིང་མི་རྩུབ་འཇམ་པ་དང ། །མ་ཆགས་ཟླུམ་ཞིང་མ་གས་རྨ་མེད་པ། །ཡིད་དུ་འོང་བའི་ལྷུང་བཟེད་བཅང་བར་བྱ། །ཧ་ཅང་མི་ཉེ་ཧ་ཅང་མི་རིང་ལ། །བཟའ་བཏུང་མོད་ཅིང་རྨངས་རིགས 101.196a མང་བ་དང ། །འགྲོན་ལ་མཆོད་བྱེད་ལེགས་པར་གནས་པའི་གྲོང ། །བྲམ་ཟེ་ཕྱི་རོལ་སྐྱེ་བོ་མེད་པར་བརྟེན། །ང་རྒྱལ་གྱིས་ནི་ནོན་པའི་བྲམ་ཟེ་རྣམས། །རིགས་ཀྱིས་རློམ་ཞིང་སྙིང་རྗེར་མི་ལྡན་པ། །དེ་དག་བདེ་བར་གཤེགས་པའི་མཆོད་རྟེན་ལ། །མཆོད་པ་མཐོང་ནས་གེགས་ཀྱང་བྱེད་པར་འགྱུར། །བྲམ་ཟེ་སངས་རྒྱས་པ་ལས་ཅི་ལྟར་དམན། །སྨྲང་ལས་བྲམ་ཟེ་དག་ལ་དམངས་རིགས་རྣམས། །བསྙེན་བཀུར་དང་ནི་མཆོད་པར་འབྱུང་བས་ན། །དམངས་རིགས་ཀྱིས་ཀྱང་གསང་སྔགས་ཅི་ལྟར་བཟླས། །ལྷ་དང་འགྲོན་མཆོད་པ་དང་ལས་དྲུག་དང ། །རྒྱལ་པོ་དང་ནི་མེ་ལྷ་བསྟེན་པ་དང ། །བུ་ཡི་དོན་དུ་འགྲོ་བར་བྱ་བ་དག་།བྲམ་ཟེ་རྣམས་ཀྱི་ངེས་པར་འགྲུབ་པ་ཡིན། །རྒྱལ་རིགས་རྗེའུ་རིགས་རྣམས་ཀྱང་རང་གི་ལས། །གྲུབ་པས་འདི་ལ་ཐེ་ཚོམ་མ་བྱེད་ཅེས། །བརྫུན་དུ་སྨྲ་བ་སྣ་ཚོགས་སྐྱོན་དག་གིས། །བདག་དང་གཞན་གྱི་སེམས་ནི་བསྲེག་པར་བྱེད། །ཡན་ལག་བརྒྱད་ལམ་གནས་པས་རྟག་ཏུ་ནི། །ཉི་མ་ཕྱེད་འཚམས་ཚུན་ཆད་བསླང་བར་བྱ། །བྲམ་ཟེའི་དུས་ནི་ཕྱི་དྲོ་ཡིན་པས་ན། །དེ་ཕྱིར་བྲམ་ཟེའི་ཁྱིམ་དུ་འགྲོ་མི་བྱ། །དགེ་དང་མི་དགེ་ཤེས་པ་བཟུང་ན་ནི། །བྲམ་ཟེ་དམངས་རིགས་དག་ལ་ཁྱད་པར་མེད། །འོན་ཀྱང་འགྲོ་བའི་བློས་ནི་བྲམ་ཟེ་དང ། །འདི་ནི་དམངས་རིགས་ཡིན་ཞེས་བརྟགས་པར་ཟད། །བདེན་པའི་ལམ་དམིགས་དགེ་བའི་རྗེས་འབྲང་ན། །དམངས་རིགས་དག་ཀྱང་སྐྱེ་ཤི་མེད་པར་འགྲོ། །ལོག་པའི་ལམ་ཞུགས་ཉེས་པར་སྤྱོད་ལྡན་ན། །བྲམ་ཟེ་གང་ཡིན་མི་བཟད་དམྱལ་བར་ལྟུང ། །ལུས་ཅན་ཤིན་ཏུ་དྲི་མ་ལྡན་པ་དག་།འདི་ན་གཞན་གྱིས་དག་པར་མི་འགྱུར་ཏེ། །དེ་ནི་སྡིག་པ་རྣམ་པར་བསལ་བ་དང ། །བསོད་ནམས་མ་ལུས་ཡོངས་སུ་བཟུང་བས་འདག་།དཔེར་ན་རྨ་ནི་གསོ་དང་བསལ་བའི་ཕྱིར། །ནད་པ་དག་ལ་སྨན་ནི 101.196b སྦྱིན་པ་ལྟར། །དེ་བཞིན་འདིར་ཡང་བཀྲེས་པའི་སྡུག་བསྔལ་དག་།བསལ་ཕྱིར་རྒྱལ་བས་ཁ་ཟས་བཟའ་བར་གསུངས། །ལ་ལ་ལམ་གྱིས་དུབ་ཅིང་འགྲོ་བའི་ཚེ། །བཀྲེས་སྐོམ་གདུངས་པས་རང་གི་བུ་ཡི་ཤ་།ཟ་བ་བཞིན་དུ་རྣལ་འབྱོར་སེམས་དམན་བཞིན། །ཚེ་དང་རྒྱགས་ཕྱིར་བཟའ་བར་མི་བྱའོ། །མང་དུ་བླུགས་ན་རྩོལ་མེད་མཐོ་བ་དང ། །དེ་བཞིན་ཉུང་ངུས་སྲང་ནི་དམའ་གྱུར་ལ། །རན་པས་སྐད་ཅིག་མཉམ་པར་འགྲོ་བ་ལྟར། །ལུས་ཅན་ཁ་ཟས་དེ་ལྟར་བཟའ་བར་བྱ། །དཔེར་ན་ཁང་རྙིང་མི་ཞིག་བྱ་བའི་ཕྱིར། །མི་ཡིས་ཀ་བ་བརྟན་པོ་བཙུགས་པ་ལྟར། །དེ་བཞིན་ལུས་ཀྱི་འཁྲུལ་འཁོར་གནས་པ་དང ། །ཤིང་རྟའི་མིག་བསྐུ་བཞིན་དུ་ཁ་ཟས་བཟའ། །འདོད་པའི་ཁམས་ནི་ཁ་ཟས་ཀྱིས་གནས་ཤེས། །རྒྱལ་བས་ཆོས་གཅིག་ཏུ་ནི་བཀའ་སྩལ་པས། །ལུས་ནི་ཆུ་ཤིང་བཞིན་དུ་རིག་བྱས་ཏེ། །སེམས་ནི་བཟའ་བཏུང་ཚོགས་ལ་ཆགས་མི་བྱ། །དབང་པོ་དྲུག་པོ་ཡུལ་ལ་འཕྲོ་བ་དག་།བདེ་གཤེགས་གསུངས་པའི་ཤེས་པས་བསྲུང་བར་བྱ། །ལྷུང་བཟེད་དེ་དག་ལས་ནི་གཅིག་ཐོགས་ནས། །གཉའ་ཤིང་གང་དུ་ལྟ་ཞིང་བསོད་སྙོམས་སྤྱད། །འཛུམ་ཞིང་འགྲོ་ལ་སྨྲ་ཞིང་ཟུར་མིག་ཅན། །ཡན་ལག་ཐམས་ཅད་ཡིད་འཕྲོག་བྱེད་པའི་གཟུགས། །བུད་མེད་གཟུགས་ནི་མཚོན་ཆ་འཇེབས་འདྲ་བས། །སྐྱེས་པའི་སེམས་ནི་མངོན་དུ་འཕྲོག་པར་བྱེད། །ལྕགས་ཀྱི་ཐོང་ལྕགས་རབ་ཏུ་འབར་བ་ཡིས། །མིག་ནི་རྣམ་པར་བཀབ་པ་ཆེས་སླ་ཡི། །ཉིས་ན་དྲན་པ་ཉམས་བྱེད་བུད་མེད་ཀྱི། །དཀྱུས་རིང་མིག་ཅན་བཞིན་ནི་མ་མཐོང་སླ། །གང་དུ་དགའ་བར་འགྲོ་ཞིང་འཛིན་མེད་ལ། །སེམས་ཀྱིས་སེམས་ནི་རྣམ་པར་འདུལ་བཞིན་དུ། །རབ་དང་འབྲིང་ལ་སོགས་པ་སྤངས་ནས་སུ། །མི་སྨྲ་བར་ནི་གཞན་གྱི་ཁྱིམ་དུ་འགྲོ། །གང་ན་བ་བཞོན་བེའུ་ཕྲུག་ཆུང་བ་དང ། ། 101.197a གང་ན་སྐྱེས་བུ་ཆང་ནི་འཐུང་བ་དང ། །གང་ན་བུ་མོ་གཞོན་བསྟེན་རྩེ་བ་དང ། །དེ་བཞིན་གང་ན་གཞོན་ནུ་རྩེ་བ་དང ། །གང་ན་ཁྱི་ཟ་དགའ་སྟོན་བྱེད་པ་དང ། །གང་ན་སྐྱེ་བོ་མང་པོ་འདུས་པ་དང ། །དེ་བཞིན་གང་ན་རོལ་མོ་བྱེད་པ་རྣམས། །དེར་ནི་སྐྱེས་བུ་ནམ་ཡང་འགྲོ་མི་བྱ། །བསོད་སྙོམས་ཅི་སྙེད་ཁྱེར་ཏེ་འོངས་ནས་ཀྱང ། །དང་པོར་ཅི་ལྟར་བདེ་བར་བགོ་བར་བྱ། །རྐང་བཀྲུས་གློ་བུར་པ་ལ་བྱིན་ནས་སུ། །ལུས་བསྲུང་ཕྱིར་ནི་ཁ་ཟས་བཟའ་བར་བྱ། །དུས་སུ་ཟོས་ནས་དུས་གསུམ་ཁྲུས་བྱས་ཏེ། །ཕྲེང་བ་མར་མེ་བདུག་པ་བསྟོད་དང་དྲི། །ཤ་ཆང་མེད་པའི་ལྷ་བཤོས་ཕུལ་ནས་སུ། །ཀུ་ཤའི་ཁྲེས་ལ་འདུག་ནས་བཟླས་བརྗོད་བྱ། །བདུག་པ་བྱུག་སྤོས་ལ་སོགས་མ་རྙེད་ན། །དྲི་ཞིམ་མེ་ཏོག་སྣ་ཚོགས་དབུལ་བར་བྱ། །སྤྲ་བ་ཨརྐ་བིལ་བ་བྲི་ཧ་ཏི། །ཀུ་ཤ་དྲི་ངན་ཡིད་དུ་མི་འོང་སྤང ། །འགྲེང་ངམ་འདུག་གམ་མ་ལོག་ཉལ་བ་དང ། །འགྲོ་འཕྲེས་ཟ་ཀློག་བཟླས་བརྗོད་བྱེད་པ་ན། །རྗེས་སུ་དྲན་དྲུག་སོ་སོའི་ཡོན་ཏན་དག་།རིག་པར་བཅས་ཏེ་རྗེས་སུ་དྲན་པར་བྱ། །འཕགས་པ་དཔུང་བཟུང་གིས་ཞུས་པའི་ལེའུ་གཉིས་པའོ།། །། འདོད་ཆགས་ལ་སོགས་ཉོན་མོངས་ཚོགས་ལྡན་པའི། །སེམས་ནི་འཁོར་བ་ཡིན་པར་ཀུན་དུ་བརྗོད། །ཉོན་མོངས་རྣམ་གྲོལ་ཤེལ་དང་ཟླ་འདྲ་བའི། །སྲིད་པའི་རྒྱ་མཚོའི་མཐར་ནི་ཡོངས་སུ་བསྒྲགས། །དཔེར་ན་དྲི་མེད་ཆུ་ནི་རྡུལ་ཚོགས་ཀྱིས། །སྐད་ཅིག་དུ་ཡང་རྙོག་པར་བྱེད་པ་ལྟར། །དེ་བཞིན་རྣམ་དག་དྲི་མ་མེད་པའི་སེམས། །འདོད་ཆགས་ལ་སོགས་སྐྱོན་གྱིས་རྙོགས་པར་འགྱུར། །པུ་ཏྲ་ཛི་དང་དུང་ཤེལ་རུ་རག་ཤ ། ལུང་ཏང་པད་མའི་སྙིང་པོ་ཞ་ཉེ་ཟངས། །ཁར་བའི་བགྲང་ཕྲེང་བརྒྱ་ནི་རྩ་བརྒྱད་པ། །དེ་དག་ལས་ནི་བགྲང་ཕྲེང་གཅིག་བླངས་ཏེ། །དེ་ནི་ལག་པ་གཡས་པས་བཟུང་བ་འམ། །ལག་པ་གཡོན་པས་བསྒྲིམས་ཏེ་མི་འཁྲུལ་བཟུང ། །ཚར་རེ་ཕྱིན་ཅིང་ནོར་བུ་རེ་རེ་ནས། །སྔགས་པ་ཡིས་ནི 101.197b རིམ་བཞིན་དྲང་བར་བྱ། །འདུག་ནས་དབང་པོ་ཡང་དག་བསྡམ་པ་དང ། །ལུས་ཀྱང་དྲང་ཞིང་བརྟན་པར་བཞག་ནས་སུ། །ཕྱིས་ནི་མ་མཆུ་ཤིན་ཏུ་མཛེས་པར་ཡང ། །བསྒུལ་ཞིང་གསང་སྔགས་ཅི་དགར་བཟླས་བརྗོད་བྱ། །སེམས་ནི་གློག་དང་སྤྲིན་དང་རླུང་དང་མཚུངས། །རྒྱ་མཚོ་ཆེན་པོ་ཡི་ནི་རླབས་དང་འདྲ། །སྒྱུ་ཅན་འདོད་དགུར་ཡུལ་ལ་མངོན་དགའ་བ། །གཡོ་ཞིང་འཕྱན་པ་ངེས་པར་འདུལ་བར་བྱ། །གང་ཚེ་ཟློས་པའི་སེམས་ནི་ཞི་བ་ལ། །བསྟེན་པས་གཉིད་ཀྱིས་དྲན་པ་རྨོངས་གྱུར་ན། །ལངས་ནས་བཅག་ཅིང་ཕྱོགས་སུ་བལྟ་བ་དང ། །ཆུ་ཡིས་གདོང་ཡང་ཡོངས་སུ་བཀྲུ་བར་བྱ། །ལས་ཀྱི་དབང་གྱུར་བདག་པོ་མེད་པ་དང ། །མགོན་མེད་སྐྱབས་མེད་ཚེ་རབས་གཅིག་ནས་གཅིག་།ལུས་ཀྱི་ཁ་བརྒྱུད་རྗེས་སུ་རབ་འགྲོ་བ། །དེ་ཡི་རྗེས་སུ་དགེ་དང་མི་དགེ་འབྲང ། །ཚོལ་དང་མཛའ་བཤེས་དང་ནི་རྣམ་པར་བྲལ། །མི་སྡུག་པ་དང་ཕྲད་ཅིང་འདོད་པས་གདུངས། །ངན་པ་སྐྱེ་རྒ་ན་འཆིའི་སྡུག་བསྔལ་ཅན། །ཡུལ་རྣམས་ཀུན་དུ་སོང་ན་འང་མེད་པ་མིན། །ཤ་སྦྲང་ཚ་གྲང་བཀྲེས་དང་ངལ་ལ་སོགས། །གང་དུ་སོང་ཡང་སྡུག་བསྔལ་ཉིད་ཡིན་པས། །ཡུལ་ལ་མངོན་དགའི་སེམས་ནི་འབྱུང་བ་ན། །རྣམ་རྟོག་དེ་དག་རྣམས་ཀྱིས་བཟློག་པར་བྱ། །འདོད་ཆགས་ཤས་ཆེ་མི་གཙང་ཤ་ཚིལ་དང ། །ལྤགས་པ་ཀེང་རུས་ལྟ་བས་རྣམ་པར་བཟློག་།བྱམས་དང་སྙིང་རྗེའི་ཆུས་གདབ་ཞེ་སྡང་ལ། །གཏི་མུག་ལ་ནི་རྟེན་འབྲེལ་ལམ་གྱིས་སོ། །རེ་ཞིག་ན་ནི་དགྲ་ཡང་མཛའ་བོར་འགྱུར། །མཛའ་བོ་དག་ཀྱང་དགྲར་ནི་འགྱུར་བ་ཉིད། །དེ་བཞིན་ཁ་ཅིག་ཀྱང་ནི་བར་མར་འགྱུར། །བར་མ་དེ་ཉིད་ཀྱང་ནི་དགྲ་བོར་འགྱུར། །དེ་ལྟར་མཛའ་བཤེས་འགྱུར་བར་རིག་བྱ་སྟེ། །བློ་གྲོས་ལྡན་པས་ནམ་ཡང་ཆགས་མི་བྱ། །གཉེན་ལ་དགའ་བའི་སེམས་ཀྱི་རྟོག་པ་དག་།བཟློག་ནས་དགེ་ལ་ཅི་བདེར་བཞག་པར་བྱ། །དང་པོ་བཟླས་ནས་བཟླས་བརྗོད་ཟིན་བར་དུ། །བྲམ་ཟེ་རྒྱལ་རིགས་རྗེའུ་རིགས་ཞིང་པ་དང ། །བུད་མེད་མ་ནིང་ཁྱེའུ་བུ་མོ་དང ། །སྔགས་འཆང 101.198a ནམ་ཡང་སྨྲ་བར་མི་བྱའོ། །ཅི་སྟེ་དགོས་པ་ཡོད་ན་སྔགས་གཡོག་དང ། །བཟླས་བརྗོད་ཟིན་ནས་ཅུང་ཟད་སྨྲ་བར་བྱ། །སྨྲས་ནས་ལུད་པ་བཤང་གཅི་བོར་ནས་ཀྱང ། །ཆུ་ཡི་ནང་དུ་ཞུགས་ནས་ཁྲུས་ཀྱང་བྱ། །མེ་ཏོག་དྲི་སྣོད་མར་མེ་ཕུལ་བ་དང ། །ཚུལ་ཁྲིམས་བརྩོན་འགྲུས་དཀའ་ཐུབ་བྱས་པ་ཡི། །དགེ་བ་དེ་ཀུན་བླ་ན་མེད་པ་ཡི། །སངས་རྒྱས་བྱང་ཆུབ་བླ་མེད་མཆོག་ཏུ་བསྔོ། །དཔེར་ན་ཆུ་ཀླུང་རྒྱ་མཚོར་ཕྱིན་པ་ན། །ལན་ཚཝའི་རོར་ནི་གཅིག་ཏུ་གྱུར་པ་བཞིན། །དེ་ལྟར་བླ་མེད་བྱང་ཆུབ་བསྔོས་པ་ཡིས། །བསོད་ནམས་རྒྱལ་བའི་རོར་ནི་གཅིག་ཏུ་འགྱུར། །དཔེར་ན་སྐྱེས་བུ་ལ་ལ་འབྲས་བུའི་ཕྱིར། །སཱ་ལུ་བསྐྱེད་ཀྱིས་སོག་མའི་ཕྱིར་མིན་ཡང ། །སཱ་ལུ་རྙེད་ནས་བསྒྲིམ་པ་མེད་པར་ནི། །སོག་མའི་ཕུང་པོ་ཞར་ལ་འབྱུང་བ་བཞིན། །དེ་བཞིན་བྱང་ཆུབ་འབྲས་བུ་འདོད་པའི་ཕྱིར། །བསོད་ནམས་བསྒྲུབ་ཀྱི་ལོངས་སྤྱོད་ཕྱིར་མིན་ཡང ། །སོག་མའི་ཕུང་པོ་དག་དང་མཚུངས་པར་ནི། །མ་བསྒྲིམས་བཞིན་དུ་མི་ཡི་ལོངས་སྤྱོད་འགྲུབ། །ཚེ་རིང་བ་འདི་ལེགས་པར་འཐོབ་པ་དང ། །ཆོས་བཞིན་སྒྲུབ་པའི་ཡུལ་དག་རྙེད་པ་འམ། །སྐྱོ་བ་མེད་པར་འགྱུར་ཞིང་འགྲོ་བ་ཡི། །བསམ་པ་རྣམས་ནི་རྟག་ཏུ་རྫོགས་པར་བྱ། །གྲགས་དང་མ་གྲགས་རྙེད་དང་མ་རྙེད་དང ། །བདེ་དང་སྡུག་བསྔལ་དེ་བཞིན་བསྟོད་སྨད་དག་།སེམས་ཀྱིས་འཇིག་རྟེན་ཆོས་རྣམས་རབ་བཅོམ་སྟེ། །སྡིག་པའི་གནས་སུ་གྱུར་པ་སྤང་བར་བྱ། །དཔེར་ན་རྒྱ་མཚོ་སྐད་ཅིག་ཙམ་ཡང་ནི། །མི་ཡི་རོ་དང་ལྷན་ཅིག་མི་གནས་ལྟར། །དེ་བཞིན་རྣམ་རྟོག་སེམས་ཀྱིས་སྡིག་བྱས་པ། །སྔགས་པས་སྐད་ཅིག་ཙམ་ཡང་གནས་མི་བྱ། །དཔེར་ན་རླུང་མེད་ཁང་པའི་ནང་དུ་ནི། །མར་མེ་བཙུགས་པ་མི་གཡོ་འབར་བ་ལྟར། །རྩེ་གཅིག་སེམས་ཀྱིས་ཟློས་ལ་མངོན་དགའ་བའི། །ལུས་ལ་ཆོས་ཀྱང་དེ་བཞིན་འབར་བར་འགྱུར། །སྟངས་དང་མཆོང་བ་དང་ནི་གར་བྱེད་དང ། །གླུ་ལེན་རྔ་བརྡུང་སྐྱེ་བོས་དཔྱས་གྱུར་དང ། །ལྷག་པའི་ང་རྒྱལ་འདྲིད 101.198b དང་འདོད་ཆེན་དང ། །བརྒྱན་པོ་དང་ནི་འདུས་ལ་ལྟ་འདོད་དང ། །དུས་མིན་གཉིད་དང་མི་འགྲུབ་སྨྲ་བ་དང ། །བསྟན་བཅོས་ངན་དང་སྙན་ངག་ཀློག་འདོན་དང ། །ཆགས་དང་འཚིག་དང་དྲེགས་དང་རྒྱགས་པ་དང ། །ཞེ་ལ་འཛིན་དང་ལེ་ལོ་གཡོ་སྒྱུ་སྤང ། །ཤ་ཆང་ཀེའུ་དང་ཙོང་དང་སྒོག་རྡོག་དང ། །འབྲུ་མར་ཏིལ་དང་ལ་ཕུག་སུ་ར་ན། །འབྱུང་པོའི་ཟས་དང་ལྷ་བཤོས་གཏོར་མ་དང ། །གུ་ལང་མཆོད་བྱས་གཏོར་མ་མི་བཟའོ། །ངས་ནི་སྔགས་པ་ཁ་ཟས་དཀར་གསུམ་དང ། །རྩ་བ་སྡོང་བུ་འབྲས་བུ་ཚོད་མ་དང ། །ཞོ་དང་ནས་དང་འོ་མ་མར་དག་དང ། །འབྲུ་མར་ཚིགས་མ་ངར་བ་འོལ་ཀོན་དང ། །ཐུག་པ་རྣམས་ནི་བཟའ་བཏུང་ཡིན་པར་གསུངས། །ཤ་ཟ་སྲིན་པོ་དག་དང་གནོན་པོ་དང ། །རོ་ལངས་དང་ནི་འཇིགས་པ་སྒྲུབ་པ་དང ། །ལྷ་མིན་བུ་མོའི་འཁྲུལ་འཁོར་འཇོམས་པའི་ཚེ། །འབྲུ་མར་ཚིགས་མའི་བཟའ་བ་མཆོག་ཏུ་བསྔགས། །དེ་ལྟར་བཟླས་བརྗོད་བྱེད་པའི་བསྒྲུབ་པ་པོས། །ཉིན་གཅིག་བཞིན་དུ་བྱས་ནས་བཟླས་པ་ནི། །ཕུལ་ནས་ཆོ་ག་བཞིན་དུ་གཤེགས་སུ་གསོལ། །ནུབ་མོ་ཀུ་ཤ་བཏིང་ནས་ཉལ་བར་བྱ། །བྱམས་པ་སྙིང་རྗེ་དགའ་དང་བཏང་སྙོམས་ལྡན་པ་དང ། །བདེ་གཤེགས་ཆོས་དང་དགེ་འདུན་བཅས་པ་དྲན་བྱས་ཏེ། །ཤཱ་རིའི་བུ་དང་ང་ལ་ཐལ་སྦྱར་བཏུད་ནས་ཉལ། །དེ་ལྟར་སྔགས་པ་སྡིག་པ་མཐའ་དག་ཟད་པར་བྱ། །འཕགས་པ་དཔུང་བཟང་གིས་ཞུས་པའི་ལེའུ་གསུམ་པའོ།། །། བསྒྲུབ་པ་པོ་ཡིས་ངེས་པར་བཙང་བ་ཡི། །རྡོ་རྗེ་དེ་དག་གང་ཡིན་བཤད་པར་བྱ། །སོར་བཅུ་བཅུ་གཉིས་བཅུ་དྲུག་བཅཝ་བརྒྱད་དང ། །མཆོག་གི་ཚད་ནི་སོར་ཡང་ཉི་ཤུ་པའོ། །གསེར་གྱི་རྡོ་རྗེ་རིག་འཛིན་ཉིད་དང་ནི། །ས་རྣམས་ཐོབ་པར་བྱ་ཕྱིར་རབ་ཏུ་ཤིས། །རྒྱལ་པོའི་དོན་དུ་དངུལ་གྱིས་མཆོག་ཡིན་ཏེ། །ཟངས་ཀྱི་རིན་ཆེན་འབྱུང་བའི་ཀླུ་བསྒྲུབ་ལ། །ལྷ་མིན་དབང་པོའི་འཁྲུལ་འཁོར་གཞིག་པ་དང ། །ཕུག་དུ་འགྲོ་ལ་རྡོ་ཡི་རྡོ་རྗེའོ། །དོན་ཀུན་བསྒྲུབ་པ་ལ་ནི་ལྕགས་གསུམ་གྱི། །གསང་བའི་སྡེ་གཞོམ་པ་ལ 101.199a ལྕགས་ཀྱིའོ། །གདོན་གཞན་ལ་ནི་སེང་ལྡེང་དཔལ་དང་ཚེ། །ནད་མེད་ནོར་རྫས་ལ་ནི་བིལ་བའོ། །གནོད་སྦྱིན་མོ་བསྒྲུབ་པ་ལ་མ་དུའི་ཤིང ། །ཆོས་ཀྱི་དོན་དུ་ཨ་ཤཝད་ལས་བྱས་ཤིས། །གསལ་ཤིང་རྩེ་མོའི་དགྲ་རྣམས་གཞིག་པ་ལ། །མི་རྣམས་བསད་པ་ལ་ནི་མི་རུས་ཀྱི། །ཤེལ་ལས་བྱས་པ་མིག་འཕྲུལ་ཆེན་པོ་ལ། །དབྱེ་ཕྱིར་ནིམ་པ་ལས་བྱས་རབ་ཏུ་ཤིས། །གསད་ཅིང་བསྐམ་པ་ལ་ནི་བ་རུའི་ཤིང ། །ཤ་ཟ་བསྒྲུབ་པ་ལ་ཡང་རབ་ཏུ་ཤིས། །ལྷ་དང་གནོད་སྦྱིན་དྲི་ཟ་བསྒྲུབ་པ་ལ། །སྒྲོན་ཤིང་ལས་ནི་བྱས་པའི་རྡོ་རྗེའོ། །ཅི་སྟེ་ཀླུ་ནི་དབང་དུ་བྱེད་འདོད་ན། །དེ་ཚེ་ཀླུ་ཤིང་རྩ་བ་ལས་བྱས་པའོ། །གཟུགས་བསྒྱུར་བ་ལ་ས་ལས་བྱས་པ་སྟེ། །རོ་ལངས་བསྒྲུབ་པ་ལ་ནི་ཀ་ཏམ་པཱི། །པུན་ད་ཀ་དང་ར་ཛ་ཨརྐ་དང ། ། ཤཝད་ཤིང་གི་རྡོ་རྗེ་ནོར་གྱི་ཕྱིར། །གླ་བ་ཨ་མྲ་ཤྲི་བར་རྣ་བ་ཡི། ། རྫུ་ལ་སོགས་པ་ལས་བྱས་པ་དག་།མི་རྣམས་གཡུལ་ལས་རྒྱལ་བར་བྱ་ཕྱིར་རོ། །ཡིད་དུ་འོང་བའི་འདོད་པ་ཐོབ་བྱའི་ཕྱིར། །ཙན་དན་དཀར་པོ་དང་ནི་དམར་པོ་སྟེ། །དབྱིབས་ལེགས་འཇམ་ཞིང་མ་ཉམས་རྨ་མེད་པའི། །རྡོ་རྗེ་རྩེ་ལྔ་སྲ་བ་བཅང་བར་བྱ། །དང་པོ་ཟློས་ཚེ་དེ་ནི་ཐོགས་ནས་སུ། །བཟླས་བརྗོད་ཟིན་ནས་མྱུར་བ་ཁོ་ནར་ཡང ། །དད་པའི་སེམས་ཀྱིས་ཕྱག་བྱས་དྲི་སོགས་ཀྱིས། །མཆོད་ནས་རྡོ་རྗེ་རྒྱལ་བའི་ཞབས་དྲུང་བཞག་།ང་ཡི་རིགས་ཀྱི་གསང་སྔགས་སྒྲུབ་པ་པོས། །རྡོ་རྗེ་མེད་ན་འགྲུབ་པར་མི་འགྱུར་རོ། །དེ་ལས་གཅིག་ཀྱང་རྙེད་པར་མ་གྱུར་ན། །ཁུ་ཚུར་བཅངས་ནས་རྩེ་གཅིག་སེམས་ཀྱིས་བཟླས། །ལྡོང་རོས་གིའུ་ཝང་རལ་གྲི་ཨཉྫ་ན། །སྤངས་མ་བབ་ལ་ཞགས་པ་ལི་ཀྲི་བཙག་།མར་དང་ཤུ་དག་འཁོར་ལོ་རྡོ་རྗེ་མདུང ། །ལྤགས་པ་གོ་ཆ་མདུང་ནི་རྩེ་གསུམ་པ། །རྫས་ནི་བཅུ་བདུན་བསྒྲགས་པ་དེ་རྣམས་ཀྱིས། །གྲུབ་པ་རྣམ་པ་གསུམ་རྣམས་ཐོབ་པར་བྱེད། །རང་སྔགས་ཆོ་ག་ལྷག་པར་བཤད་པ་གང ། །དེར་ཡང་གྲུབ་པ་རྣམ་པ་གསུམ་དུ་མཐོང ། །བགེགས་དང་ལོག་འདྲེན་གྲུབ་པར་མི་དགའ་བ། །རིག་པའི་ཚོག 101.199b རྣམས་ཀྱི་ནི་མདུན་ནས་རྒྱུ། །རིགས་འཛིན་བརྩེན་པའི་བདག་ཉིད་ཅན་དག་ལ། །རྣམ་པ་སྣ་ཚོགས་གླགས་སྐབས་ཚོལ་ཞིང་རྒྱུ། །བགེགས་ཀྱི་རིགས་ནི་རྣམ་པ་བཞི་ཡོད་དེ། །ས་སྟེང་འདི་ན་འཁོད་པའི་བགེགས་རྣམས་ནི། །རྣམ་པར་འཇིག་དང་ཝ་དང་ནེའུ་ལེ་དང ། །དེ་བཞིན་སོ་གཅིག་པ་དང་རིགས་རྣམ་བཞི། །དེ་དང་དེ་ལས་འཕྲོས་པ་མཐའ་ཡས་སོ། །ས་སྟེང་འཇིག་རྟེན་སྐྱོང་བཞི་གང་ཡིན་པ། །དེ་དག་གཡོག་འཁོར་མྱ་ངན་མེད་པ་ཡིན། །དེ་ཡི་གཡོག་འཁོར་བྱེ་བ་ཕྲག་བདུན་རྣམས། །དེ་དག་གསང་སྔགས་སྒྲུབ་ལ་བགེགས་བྱེད་དོ། །ཝ་ཡི་རིགས་ནི་བྱེ་བ་བཅཝ་བརྒྱད་དག་།དབང་ཕྱུག་ཆེན་པོའི་འཁོར་ཏེ་དེ་རྣམས་ཀྱི། །སྡེ་དཔོན་གླང་ཆེན་གདོང་སྟེ་སྟོབས་པོ་ཆེ། །ས་སྟེང་མཐའ་དག་ཀུན་ཏུ་བགེགས་ཀྱང་བྱེད། །སོ་གཅིག་རིགས་ཀྱི་སྡེ་དཔོན་གཙུག་འཕྱང་སྟེ། །བྱེ་བ་དྲུག་བཅུའི་བགེགས་ལ་དབང་སྒྱུར་ཞིང ། །ཚངས་དབང་ཁྱབ་འཇུག་ཉི་མ་ཟླ་བ་རླུང ། །དེ་རྣམས་ཀྱིས་བཤད་སྔགས་ལ་བགེགས་བྱེད་དོ། །ནེའུ་ལེའི་རིགས་གང་ཡིན་པ་རྒྱ་ཆེ་སྟེ། །ཁྲི་ཕྲག་བྱེ་བ་ཐེར་འབུམ་ཕྲག་སྟོང་དང ། །དེ་དག་རྣམས་ནི་སྡེ་དཔོན་གཙུག་ནས་ཕྱུང ། །ང་ཡི་རིགས་དང་སྔགས་ལ་བགེགས་བྱེད་དོ། །དགའ་བྱེད་པད་མ་འདྲ་བར་དཀྱུས་རིང་མིག་།ལྔས་རྩེན་སྔགས་རྒྱུད་ལ་ནི་བགེགས་ཀྱང་བྱེད། །ནོར་སྤྱོད་བུ་ནི་གང་ཡིན་གང་བ་ཕ། །རང་གི་གསང་སྔགས་རྒྱུད་ལ་བགེགས་ཀྱང་བྱེད། །སྒྲུབ་པ་པོ་ནི་འབྱོར་པར་མི་དགའ་བ། །བརྩེ་མེད་རང་རང་རིགས་ལ་བགེགས་ཀྱང་བྱེད། །རང་གི་གསང་སྔགས་གཟུགས་སུ་རྣམ་སྤྲུལ་ནས། །ཕྲེང་བ་དང་ནི་གཏོར་མ་མངོན་དུ་ལེན། །ལྷ་ཡིས་ལོག་འདྲེན་ཀྱིས་བྱས་དེ་མཐོང་ནས། །ཁྲོས་ཤིང་འཁྲུགས་ནས་ཕྱིར་ཡང་ཕྱོགས་པར་འགྱུར། །སྔོན་ཆད་སེམས་ནི་འཇུངས་དང་རྨོངས་པ་ཡིས། །ལྷ་ཡིས་ལོག་འདྲེན་བགེགས་ཀྱི་ལུགས་འདི་བཏང ། །ལུགས་འདི་ལྷ་དང་ཀླུ་དང་གྲུབ་པ་དང ། །སུམ་བཅུ་རྩ་གསུམ་ལྷས་ཀྱང་བཟློག 101.200a མི་ནུས། །བགེགས་ཀྱིས་འཇིགས་སུ་རུང་བ་བྱས་པ་དག་།སྔར་བཤད་པས་ནི་དེ་དག་བཟློག་པར་བྱེད། །བཟླས་བརྗོད་ཟིན་ནས་ལེགས་པར་བསྲུང་བ་དང ། །དཀྱིལ་འཁོར་མང་བྱས་བསྒྲུབ་ལ་འཇུག་པར་བྱ། །གཞན་དུ་མཆོད་པའི་ཆོ་ག་མེད་པ་དང ། །བཟླས་བརྗོད་སྦྱིན་སྲེག་ཆོ་ག་བྲལ་བའམ། །གང་ཞིག་རྟག་ཏུ་སེམས་ནི་འདི་ལྟར་སེམས། །རིག་པ་གང་ཞིག་བདག་གིས་བཟླས་པར་བྱ། །ཡུལ་དང་རྒྱལ་སོགས་གཏམ་ལ་ཆགས་པ་དེའི། །ལུས་ལ་ཐོགས་པ་མེད་པར་རབ་ཏུ་འཇུག་།འདི་ལྟར་ཕན་ཚུན་དུ་ནི་འགྲོ་བ་ན། །རིག་པ་འདོན་པའི་སེམས་ནི་གཡེང་བར་བྱེད། །དཔེར་ན་ཆུ་ནང་གྲིབ་མ་སྣང་བ་ལྟར། །དེ་བཞིན་མི་ཡི་ལུས་ལ་འཇུག་པར་འགྱུར། །འཁྲུ་ཚེ་གཞན་ལ་ཟློས་པ་ན་ཡང་གཞན། །ཉལ་ན་གཞན་ཡིན་མེ་ཏོག་བདུག་པ་དང ། །མར་མེ་འབུལ་བའི་ཚེ་ན་གཞན་ཡིན་ལ། །སྦྱིན་སྲེག་བྱེད་པ་ན་ཡང་བགེགས་གཞན་འཇུག་།དཔེར་ན་ཉི་ཟེར་མེ་ཤེལ་བབ་པ་ཡི། །རྐྱེན་གྱིས་མ་བསྒྲིབས་མེ་ནི་འབྱུང་བ་ལྟར། །དེ་བཞིན་བགེགས་ཀྱང་ལུས་ལ་ཞུགས་གྱུར་ན། །འདོད་ཆགས་མེ་ཆེན་ཀུན་དུ་བསྐྱེད་པར་བྱེད། །གཡོ་ཞིང་འགུལ་བ་ཞེས་ནི་བྱ་བའི་བགེགས། །ཆུ་ནང་སྐྱེས་བུ་འཁྲུ་བའི་ཚེ་ནའང་འཛིན། །བཀྲེས་ཤིང་ལུས་ལ་སྙོམས་པའི་གཉིད་ཀྱང་ཆེ། །དེ་བཞིན་ལུས་ལྕི་མཆོག་དུ་ཁྲོ་བར་འགྱུར། །དེ་བཞིན་དྲི་ཟ་ཞེས་ནི་བྱ་བའི་བགེགས། །དེ་ནི་དྲི་འབུལ་བ་ན་ལུས་ལ་འཇུག་།ཡུལ་དང་རྒྱལ་པོ་གཉེན་དང་ནོར་ལ་སེམས། །སྙོམ་ཞིང་བུད་མེད་ལ་ནི་ཆགས་པར་འགྱུར། །ནག་པོ་གཟུགས་ཅན་ས་ནི་བརྟོལ་ནས་སུ། །བདུག་པ་རབ་ཏུ་འབུལ་བའི་ཚེ་ན་འཇུག་།འཇུངས་དང་གཡོ་སྒྱུ་བྱེད་ཅིང་མི་སྲུན་ལ། །འདོད་ཆེན་ཆེ་ལ་རབ་ཏུ་ཁུ་ཆུ་འཛག་།མར་མེ་གཙུག་ཕུད་གཅིག་པ་བགེགས་བྱེད་དེ། །སྙིང་ག་ཚ་ཞིང་གཟེར་ཐབས་སེམས་ཉམས་བྱེད། །འགྲེང་བའི་ཚེ་ན་གཙུག་འཕྱང་འཇུག་འགྱུར་ཏེ། །རིམས་དང་ཁྲུ 101.200b སྐྱུག་དྲག་པོས་འདེབས་པར་བྱེད། །མེ་ཏོག་འབུལ་ཚེ་མེ་ཏོག་ཆེར་བཀོད་པ། །རང་གི་གནས་སྐབས་རྙེད་ནས་ལུས་ལ་འཇུག་།རིམས་དང་ཆམ་པ་ལུས་ཚིགས་ན་བ་དང ། །གྲོགས་པོ་དག་དང་རྣམ་པར་བྲལ་བར་བྱེད། །བགེགས་ཀྱིས་བརླམས་པ་ཕྱོགས་ན་ལམ་མིན་ལམ་དུ་མཐོང ། །སྤྱོད་པ་སྣ་ཚོགས་བྱེད་ཅིང་འདོད་ཆགས་རྣམས་ཀྱིས་གདུངས། །བློ་བུར་སྨྲ་ཞིང་ཀློག་ལ་དོན་མེད་ཀུན་ཏུ་འཕྱན། །དོན་དུ་སྒྲུབ་པ་རྣམས་ལ་སེམས་ཀྱང་ཡིད་གཉིས་བྱེད། །སེམས་ནི་ལོག་པར་ལྟ་བས་ནོན་པས་ན། །གསང་སྔགས་མེད་ཅིང་མཐོ་རིས་ལྷ་ཡང་མེད། །བསོད་ནམས་མེད་ཅིང་སྡིག་པ་ཅུང་ཟད་མེད། །ཐར་བ་མེད་ཅིང་འཆིང་བའི་རྒྱུ་ཡང་མེད། །སྐྱེ་བོ་དོན་མེད་ཉོན་མོངས་དཀའ་ཐུབ་ཆེས། །སྣ་ཚོགས་འཁྱལ་པའི་ཚིག་འདི་རྟག་ཏུ་སྨྲ། །སེན་མོས་རྩ་གཅོད་བོང་རྔོ་འཇིག་པ་དང ། །མཚན་མོ་སོ་ཡང་ཀྲིག་ཀྲིག་འཆ་བ་དང ། །བུ་མོ་བདག་འདོད་ཁྱོ་ནི་མི་རྙེད་ཅིང ། །སྐྱེས་པ་བདག་འདོད་ཆུང་མ་གཞན་མི་རྙེད། །དགོས་པའི་དོན་ནི་མི་འགྲུབ་མི་དགོས་འགྲུབ། །གར་ཡང་འགྲོ་འདོད་གཉིད་མེད་མི་ཡང་བརླམ། །དེ་བཞིན་སྟག་གཟིག་སེང་གེ་ཁྱི་དང་ཕག་།བོང་བུ་རྔ་མོ་བྱི་ལ་ཤ་ཟ་ཝ། །བྱ་རྒོད་འུག་པ་སྐྱ་མོ་མཱིུ་ཐུང་ཧྲུལ། །གཅེར་བུ་ཐལ་རིས་ཅན་དང་མི་ནག་པོ། །ཁྲོན་སྐམས་ཐོད་པ་རུས་གོང་ཕུང་པོ་དང ། །ལྕགས་དང་རྡོ་ཁུང་མི་གཙང་ཁང་རུལ་དང ། །ཁ་བཞིན་གྱུར་ཅིང་རལ་གྲི་མདུང་ཐོགས་པ། །རྨི་ལམ་འདི་རྣམས་རྨིས་པའི་མི་ཡང་བརླམས། །བགེགས་དང་ལོག་འདྲེན་རྣམ་པར་གཞིག་པའི་ཕྱིར། །བདུད་རྩི་ཐབས་སྦྱོར་དྲག་ཤུལ་ཐབས་ལས་སྦྱར། །སྔགས་པ་དེ་ཡི་གསང་སྔགས་མ་ཞུགས་པ། །བགེགས་དང་ལོག་འདྲེན་རྣམས་ཀྱིས་ཡོངས་མི་ཚུགས། །ཕྱུགས་ལྷས་ཤིང་གཅིག་ལྷ་ཡི་ཁང་པ་འམ། །ལམ་གྱི་བཞི་མདོ་ཁང་སྟོང་ནགས་ཚལ་དུ། ། 101.201a དཀྱིལ་འཁོར་གྲུ་བཞི་ལྷམ་པ་ཁྲུ་བཞིའི་ཚད། །མཚོན་རྩི་རྣམ་པ་སྣ་ཚོགས་རྣམས་ཀྱིས་བྲི། །ཕྱོགས་ཀྱི་ལྷ་རྣམས་གནས་ནི་ཡོངས་སུ་བཟུང ། །སྒོ་བཞི་པ་ལ་ཀུ་ཤ་རྩཝ་ཡང་བཀྲམ། །བཟའ་དང་ཤ་ཆང་ལ་ཕུག་ལ་སོགས་བཅས། །འབྲས་ཆན་འབྲས་བུ་མང་པོའི་གཏོར་མ་སྦྱིན། །བུམ་པ་པད་མ་དམར་པོའི་མདོག་འདྲ་བ། །ནག་པོ་ར་རི་མེད་ཅིང་རིན་ཆེན་བཅས། །སྨན་དང་འབྲུ་དང་སྤོས་ཆུས་བཀང་བ་བཞི། །ལྡུམ་བུས་ཁ་བརྒྱན་རས་ཀྱིས་མགུལ་པ་དཀྲི། །ལུས་དམར་པོ་དང་ཀཱི་ལི་ཀཱི་ལ་དང ། །འགྲོ་ལྡིང་བ་ལ་སོགས་པས་བརྒྱ་བཟླས་ཏེ། །དཀྱིལ་འཁོར་འཁོར་ཡུག་དུ་ནི་བཞག་པར་བྱ། །དེ་ནས་བྱུག་སྤོས་བདུག་སྤོས་ལ་སོགས་དབུལ། །བགེགས་ཀྱིས་བརླམས་པ་ཤར་ཕྱོགས་ཁ་བསྟན་ཏེ། །དཀྱིལ་འཁོར་གྱི་དབུས་བདེ་བའི་སྟན་ལ་བཞག་།བཟླས་བརྗོད་བྱེད་ཅིང་བུམ་པ་རེ་རེས་བཀྲུ། །འོན་ཏང་ལོག་འདྲེན་རྣམས་ལས་ཐར་བར་འགྱུར། །སྒྲུབ་པ་པོ་ཡི་མི་ནི་འབའ་ཞིག་ལ། །བགེགས་རྣམས་གཞིག་ཕྱིར་ཕན་པར་མ་ཟད་ཀྱི། །རྒྱལ་པོའི་འཁོར་དང་བུད་མེད་བུ་མེད་དང ། །བུ་མོ་དག་དང་རོལ་མོ་མཁན་རྣམས་དང ། །བུད་མེད་ཕལ་དང་ཚོང་པ་རྣམས་ཀྱང་རུང ། །ཞིང་པ་རྣམས་དང་དབུལ་ཞིང་ཕོངས་པ་དང ། །གདོན་གྱིས་ཟིན་ཅིང་རིམས་ཀྱིས་བཏབ་པ་དང ། །བུས་པའི་གདོན་དང་མེ་ཏོག་འབྲས་བུ་འཕྲོག་།རྨི་ལམ་སྨྱོ་དང་སེམས་ནི་གཡེངས་པ་དང ། །དུག་ཀྱང་སེལ་ཏེ་ཁྲུས་འདིས་དག་པར་བྱེད། །འཕགས་པ་དཔུང་བཟང་གིས་ཞུས་པའི་ལེའུ་བཞི་པའོ།། །།བགེགས་ཀྱི་བསོད་ནམས་མ་ལུས་ཟད་པར་བྱེད། །དེ་བས་མི་ཡིས་གསང་སྔགས་འགྲུབ་མི་འགྱུར། །ཇི་ལྟར་ཟླ་བ་སྤྲིན་ལས་རྣམ་གྲོལ་ལྟར། །དེ་བཞིན་བགེགས་ལས་གྲོལ་བ་རྣམ་པར་གསལ། །དཔེར་ན་ས་ཆུ་དུས་དང་རྣམ་བྲལ་བའི། །སྣོད་གནས་འབྲས་བུ་མེ་ཏོག་མྱུ་གུ་མེད། །དེ་དང་མ་བྲལ་མྱུ་གུ་ལོ་མ་དང ། །སྡོང་བུ་དག་དང་མེ་ཏོག་འབྲས་བུ་སྐྱེ། །ཆོ་ག་ཉམས་ཤིང་ཡི་གེ་གུག་སྐྱེད་མེད། །མཆོད་པ་མེད་ཅིང་མི་གཙང་བཟླས་བརྗོད་བྱས། །གུག་སྐྱེད་ཡི་གེ 101.201b ལྷག་པར་གྱུར་པ་ཡི། །གསང་སྔགས་དངོས་གྲུབ་རྒྱ་ཆེན་མི་སྟེར་རོ། །དཔེར་ན་དབྱར་གྱི་དུས་ན་ཆར་སྤྲིན་དག་།སྐྱེ་བོའི་སྐལ་བཞིན་ཆར་པ་ལེགས་པར་འབེབས། །དེ་བཞིན་མི་ཡི་སྐལ་བ་གཟིགས་ནས་ནི། །འདོད་པ་བཞིན་དུ་གསང་སྔགས་དངོས་གྲུབ་སྩོལ། །ཡུལ་དང་དུས་དང་ཆོ་ག་ལས་རྣམས་དང ། །སྡིག་པ་སྦྱང་ཞིང་བསོད་ནམས་བསག་པ་དང ། །གུས་དང་བཟླས་བརྗོད་ཀུན་ལ་གཟིགས་ནས་ནི། །དེ་དག་གསང་སྔགས་འབྲས་བུ་རྣམ་པར་སྩོལ། །ཇི་ཙམ་སྡིག་པ་མང་པོས་རབ་གང་ཞིང ། །ཇི་ཙམ་ལས་དཀར་བསོད་ནམས་མ་བསགས་དང ། །ཇི་སྲིད་ཆོ་ག་མེད་པར་བཟླས་བྱས་པ། །དེ་སྲིད་སྔགས་པས་དངོས་གྲུབ་མི་ཐོབ་བོ། །ཆོ་ག་ཉམས་སམ་བར་བཅད་སྔགས་གཞན་བཟླས། །བཟླས་པ་བཏང་ངམ་གཞན་ལ་བཏང་གྱུར་ན། །དུས་གསུམ་མཆོད་པ་ལ་ནི་བརྩོན་བྱས་ནས། །སླར་ཡང་འབུམ་ཟླས་བསྒྲུབ་ལ་འཇུག་པར་བྱ། །སྟོང་ཕྲག་བཅུ་འམ་བརྒྱད་དམ་བདུན་ནམ་བཞི། །བཟླས་མཐར་དེ་ལ་མར་གྱིས་སྦྱིན་སྲེག་བྱ། །ཡང་ན་མ་གྲུགས་ནས་སམ་ཏིལ་ནག་གམ། །ཡུངས་ཀར་མར་དང་བཅས་པའི་སྦྱིན་སྲེག་བྱ། །འཛམ་བུ་མ་དུ་བླག་ཤ་པ་ལ་ཤ་།ུ་དུམ་སེང་ལྡེང་ཨ་ཤཝད་ཨ་པ་མར། །རྒ་ཨ་ཤོ་ཀ་དང་རརྫ་ཀ་།ནྱ་གྲོ་བིལ་བ་ཨ་མྲ་ཤ་མི་ཡི། །ཡམ་ཤིང་གཞོན་ནུ་སོར་ནི་བཅུ་གཉིས་པ། །བཙལ་ནས་ཞོ་མར་སྦྲང་རྩི་ལ་བཏགས་ནས། །རྟག་ཏུ་མེ་ལ་སྦྱིན་སྲེག་བྱ་བར་བྱ། །དེ་ལྟར་བྱས་ན་དངོས་གྲུབ་མྱུར་དུ་ཐོབ། །གཞན་གྱི་གསང་སྔགས་ཀྱིས་ནི་གསང་སྔགས་གང ། །གཅད་དམ་བཅིངས་སམ་མནན་པར་གྱུར་ཀྱང་རུང ། །དེ་ཡི་གཟུགས་བརྙན་ས་ལ་བྱས་ནས་སུ། །ང་ཡི་ཞབས་དྲུང་མངོན་དུ་ཕྱོགས་བཞག་སྟེ། །སྔགས་པས་ཀཱི་ལི་ཀཱི་སོགས་སྙིང་པོ་རྣམས། །མར་དང་འོ་མས་དེ་ཡི་གཟུགས་བརྙན་བཀྲུ། །དེ་ལྟར་ཞག་བདུན་བྱས་པས་གསང་སྔགས་དག་།བཅིངས་པ་དང་ནི་མནན་ལས་གྲོལ་བར་འགྱུར། །མཆོད་པ་ལ་སོགས་ཆོ་གར་ལྡན་ཡང་ནི། །ཅི་སྟེ་གསང་སྔགས་འབྲས་བུ་མི་སྟེར་ན། །དེའི་གཟུགས་དུག་དང་སྐེ་ཚེས་བྱུགས་ནས་སུ། །ཀཱི་ལི་ཀཱི་ལ་འགྲོ 101.202a ལྡིང་ལ་སོགས་པས། །སྔགས་ཀྱིས་དེ་ལ་ཡུངས་མར་ཚ་སྦྱར་བས། །ཞག་བདུན་དུས་གསུམ་སྦྱིན་སྲེག་ལས་བྱས་ན། །གསང་སྔགས་འོངས་ནས་རྨི་ལམ་དག་དུ་ནི། །ཆོ་ག་ཉམས་དང་ཡི་གེ་ལྷག་ཆད་སྟོན། །སྔོན་གྱི་སྔགས་ལུགས་འཆང་བས་བསྟན་མོད་ཀྱི། །ཇི་ལྟར་རྒྱ་མཚོ་དུས་ལས་མི་འདའ་བཞིན། །སྔགས་ཀྱིས་གཞན་གྱི་གསང་སྔགས་མི་བསྣན་ཅིང ། །བཅིང་དང་བཅད་པ་ནམ་ཡང་མི་བྱའོ། །དཔེར་ན་བྱམས་པའི་མི་ཡིས་མི་གཞན་ལ། །ཆེ་གེ་མོ་ཡི་ཁྱིམ་འདིར་ཕྱིན་ཅད་ཁྱོད། །བལྟ་བའི་ཕྱིར་ཡང་འགྲོ་བར་མི་བྱ་ཞེས། །རིགས་པའི་ཚིག་གིས་རྣམ་པར་བསྟན་པ་དང ། །དེས་ཀྱང་དེ་ཡི་ཚིག་དེ་མཉན་ནས་སུ། །ཁྱིམ་དུ་སྨྲ་དང་བལྟ་ཕྱིར་མི་འགྲོ་བ། །དེ་བཞིན་སྔགས་པས་གང་ཡང་རུང་བའི་སྔགས། །བཟླས་ནས་གཞན་གྱི་གསང་སྔགས་བསྣན་མི་བྱ། །གསང་སྔགས་གཅད་དང་བཅིང་བ་མི་བྱ་ཞིང ། །ཡི་གེ་ལྷག་ཆད་གསང་སྔགས་མི་སྦྱིན་ནོ། །ལས་རྣམས་སྤྱད་པ་གཞན་དུ་བསྒྱུར་མི་བྱ། །གནས་རྣམས་གཟིར་བར་ནམ་ཡང་མི་བྱའོ། །དབབ་དང་བཅིང་དང་བརྡེག་དང་རྨོངས་བྱ་དང ། །ཡན་ལག་མི་གཞིག་རིགས་ཀྱང་མི་བརླག་ཅིང ། །སྔགས་པས་ཀླུ་དང་གདོན་ལ་སོགས་པ་རྣམས། །གཞན་དུ་བསྐྲད་པར་ནམ་ཡང་མི་བྱའོ། །དགར་དང་བསྐྲད་པ་དང་ནི་བསད་པ་དང ། །བྱིས་པ་གདོན་ཟིན་ནམ་ཡང་མི་གསོ་ཞིང ། །རྒྱ་མོ་ས་མདའ་སྙི་དང་མཛོལ་བུ་ཡིས། །སེམས་ཅན་གནོད་པ་ནམ་ཡང་མི་བྱའོ། །དངོས་གྲུབ་ཕྱིར་ནི་རྣམ་པ་བཅུར་གསུངས་ཏེ། །སྔགས་པ་དང་ནི་རང་སྔགས་གཡོག་དང་རྫས། །བརྩོན་འགྲུས་ཕྱོགས་དང་ས་གཞི་དུས་དང་ནི། །ཡན་ལག་རྫོགས་པའི་ལྷ་དང་སེམས་སྟོབས་སོ། །གཞན་དག་ཁ་ཅིག་རིག་འཛིན་གྲོགས་ཤེས་ཟེར། །གཞན་དག་ཕྱོགས་དང་བརྩོན་འགྲུས་དུས་རྣམས་ཉིད། །གཞན་ནི་རྫས་དང་ལྷ་དང་སྔགས་ཡིན་ཟེར། །ཁ་ཅིག་སེམས་སྟོབས་ཡིན་ཞེས་རྣམ་པར་སྨྲ། །འགྲུབ་ཕྱིར 101.202b དེ་ལྟར་བཅུ་དང་བརྒྱད་དང་ལྔ། །དེ་བཞིན་བཞི་དང་གསུམ་དང་གཅིག་ཉིད་ཅེས། །སྔགས་རིག་རང་རང་བློ་ཡིས་རྣམ་པར་འཆད། །སངས་རྒྱས་རྒྱུད་ལ་ཆོ་ག་གཉིས་ཀྱིས་འགྲུབ། །སྒྲུབ་པ་གང་ཞིག་རང་གི་ཡོན་ཏན་རྫོགས། །བརྩོན་འགྲུས་མཆོག་དང་ཡང་དག་ལྡན་པ་དང ། །གཞན་གྱི་རྙེད་པ་དག་ལ་ཕྲག་དོག་མེད། །འདོད་ལ་མ་ཆགས་ལུས་ཀྱི་ཉོན་མོངས་བཟོད། །གུག་སྐྱེད་ཀླད་སྐོར་ཚེག་ཚང་ཟུར་ཕྱིན་ལ། །གསང་སྔགས་དག་ཅིང་ཤིན་ཏུ་ཆོ་གར་བཅས། །སངས་རྒྱས་བྱང་ཆུབ་སེམས་དཔའ་བསྟེན་པ་ཡི། །གནས་སུ་བཟླས་ན་ཡིད་འོང་དངོས་གྲུབ་ཐོབ། །ཅི་ལྟར་རི་དགས་རྒྱལ་པོ་བཀྲེས་པ་དག་།མཐུ་སྟོབས་ཆེན་པོས་གླང་ཆེན་གསོད་པ་དང ། །དེ་བཞིན་སྤྱང་ཀི་ཕག་དང་རི་དགས་དང ། །ཝ་རྣམས་ཀྱང་ནི་མྱུར་དུ་གསོད་པ་ལྟར། །དེ་བཞིན་སྔགས་པ་སེང་གེའི་ཚུལ་གྱིས་སུ། །རབ་དང་འབྲིང་དང་ཐ་མའི་ལས་རྣམས་ལ། །བརྩོན་འགྲུས་ཆེན་པོ་དང་ནི་ལྡན་པ་དང ། །འབད་པ་མཆོག་རྣམས་ཀྱིས་ཀྱང་བསྟེན་པར་བྱ། །རྫ་རྔའི་སྒྲ་དང་དུང་དང་རྔ་སྒྲ་དང ། །ཤིན་ཏུ་འཇིགས་བྱེད་སྐྱེ་བོའི་སྒྲ་དག་དང ། །གད་རྒྱངས་བཤུགས་གླུ་དག་དང་གླུ་གར་དང ། །གླིང་བུ་པི་ཝང་རྫ་རྔ་ཆེན་པོའི་སྒྲ། །བྱ་བྲན་སྣ་ཚོགས་སྒྲ་དང་ཆུ་སྒྲ་དང ། །བུད་མེད་རྒྱན་གྱི་སིལ་འཁྲོལ་སྒྲ་རྣམས་དང ། །ཤ་སྦྲང་ཚ་གྲང་རླུང་གི་གནོད་པ་ཡིས། །མི་ཡི་སེམས་ནི་གཡེང་ཞིང་གཡོ་བར་བྱེད། །བཟླས་བརྗོད་བྱེད་ཚེ་མི་མྱུར་མི་དལ་ཞིང ། །སྒྲ་ཆེར་མི་དབྱུང་ཧ་ཅང་ཆུང་བ་འང་མིན། །སྨྲ་བཞིན་མ་ཡིན་གཞན་དུ་གཡེངས་བཞིན་མིན། །གུག་སྐྱེད་ཀླད་སྐོར་ཚེག་རྣམས་ཉམས་པར་མིན། །ཅི་ལྟར་ཆུ་ཀླུང་ཉིན་མཚན་རྟག་ཏུ་ནི། །རྒྱུན་མི་འཆད་པར་འབབ་པར་འགྱུར་བ་ལྟར། །དེ་བཞིན་ཕྱག་བཅས་བཟླས་དང་བརྟུལ་ཞུགས་ཀྱིས། །བསོད་ནམས་ལུས་ཅན་ལ་ནི་འཕེལ་བར་འགྱུར། །ལེ་ལོ་འདོད་ཆགས་མི་དགར་ལྡན་པའི་སེམས། །གང་དག་གང་དུ་གཡོ 101.203a ཞིང་རྒྱུ་བ་དག་།དེ་དང་དེ་ནས་མྱུར་དུ་བཟློག་ནས་ནི། །གསང་སྔགས་ཡི་གེ་མཆོག་ལ་ལེགས་པར་སྦྱར། །སྣ་རྩེར་བལྟ་ཞིང་རྣམ་པར་རྟོག་པ་སྤོང ། །ནམ་ཞིག་བསྐྱོད་ཀྱང་རྣམ་པར་མི་གཡོ་བ། །དེ་ཚེ་དམིགས་ལ་གནས་པ་ཐོབ་པ་སྟེ། །སེམས་ནི་ལས་སུ་རུང་བར་འགྱུར་བར་ངེས། །རྩེ་གཅིག་སེམས་དང་ལྡན་པའི་མི་ལ་ནི། །ཡིད་ལས་བྱུང་བའི་དགའ་བ་རབ་ཏུ་སྐྱེད། །དགའ་བས་ལུས་ནི་ཤིན་ཏུ་སྦྱངས་པ་འཐོབ། །ལུས་སྦྱངས་པས་ནི་བདེ་བའི་སྐལ་ལྡན་འགྱུར། །ལུས་བདེ་རྩེ་གཅིག་སེམས་དང་ཏིང་འཛིན་གྱིས། །དེ་ཚེ་བཟླས་བརྗོད་ཐོགས་པ་མེད་པར་འགྱུར། །ཚེ་རབས་གཞན་དུ་གང་དང་གང་བྱས་པའི། །སྡིག་པ་མ་ལུས་བཟླས་བརྗོད་བྱས་པས་འབྱང ། །བཟླས་པས་སྡིག་པ་མ་ལུས་བྱང་གྱུར་ནས། །དང་བའི་ཡིད་ཀྱིས་དངོས་གྲུབ་ཐོབ་པར་འགྱུར། །དེ་ཕྱིར་བཅོམ་ལྡན་རྒྱལ་བའི་དབང་པོ་ཡིས། །ཆོས་འདི་ཀུན་གྱི་རྩ་བ་སེམས་ཞེས་གསུངས། །སེམས་ནི་དང་བས་ལྷ་མིའི་བདེ་བ་དང ། །མཐོ་རིས་དང་ནི་བྱང་གྲོལ་ཐོབ་པར་འགྱུར། །སེམས་ཀྱི་སྐྱོན་གྱིས་དུད་འགྲོར་སྐྱེ་བ་དང ། །སེམས་དམྱལ་གནས་ཤིང་མི་སྡུག་དབུལ་པོར་འགྱུར། །སེམས་ནི་རབ་ཏུ་དང་བར་གྱུར་པའི་མིས། །ས་ཆུ་མེ་རླུང་སྐྱེ་རྒ་ན་འཆི་སོགས། །བར་དང་ཐ་མ་གནོད་པ་ཀུན་བྲལ་བ། །རྣམ་གྲོལ་བདེ་ཞིང་ཞི་བ་ཐོབ་པར་འགྱུར། །གསང་སྔགས་དངོས་གྲུབ་ཀུན་དང་ཐུན་མོང་བ། །བདེ་བ་ཆུང་ཞིང་སྡུག་བསྔལ་བརྒྱ་དང་འབྲེལ། །ཉོན་མོངས་དུག་བཅས་རྣམ་པར་འཇིག་འགྱུར་པ། །དང་བའི་སེམས་ཀྱིས་ཐོབ་པར་གྱུར་པ་ཡིན། །འདོད་རྒྱལ་ལས་ལས་མ་བྱུང་དུས་ལས་མིན། །རང་བཞིན་དབང་ཕྱུག་ལས་ཀྱང་བྱུང་བ་མིན། །རྒྱུ་མེད་ཅན་མིན་སྐྱེས་བུས་མ་བྱས་ཀྱང ། །ལས་དང་ཉོན་མོངས་པ་ལས་སེམས་ཅན་བྱུང ། །གཟུགས་ནི་འབྱུང་བ་ཆེན་པོ་བཞི་དང་ལྡན། །དེ་ནི་བདག་མིན་བདག་ཀྱང་གཟུགས་མ་ཡིན། །གཟུགས་ལ་བདག་མེད་བདག་ལ་གཟུགས 101.203b མེད་དེ། །གཟུགས་ནི་སྟོང་པའོ་ཕུང་བཞིའང་རིག་པར་གྱིས། །གཟུགས་ནི་ཝུ་བ་དག་དང་འདྲ་བ་སྟེ། །ཚོར་བ་ཆུ་བུར་བཞིན་དུ་རྟག་པ་མེད། །དེ་ལྟར་མཐོང་བ་ལྟ་བ་བཟང་པོ་ཡིན། །གང་ཞིག་གཞན་གྱུར་དེ་ནི་ལྟ་ངན་གསུངས། །དེ་ལྟར་ཟློས་པའི་གསང་སྔགས་ཉེ་གྱུར་ན། །མཚན་མོ་ཉལ་ནི་རྨི་ལམ་འདི་དག་མཐོང ། །ཁང་བཟངས་ལྗོན་ཤིང་རྒྱལ་མཚན་སེང་གེ་རྟ། །རི་བོ་ཤིང་རྟ་སྒྲ་ལྡན་སྤྲིན་དང་ཀླུ། །སྟག་དང་སེང་གེ་གླང་ཆེན་ཁྱུ་མཆོག་ལ། །རྨི་ལམ་ན་ནི་དགའ་བས་ཞོན་པ་དང ། །མེ་ཏོག་ཕྲེང་བ་གོས་དང་དྲི་རྣམས་དང ། །ཤ་ཆང་ཉ་དང་འབྲས་བུ་གླེགས་བམ་དང ། །ལྷ་ཡི་གཟུགས་དང་ཨུད་པལ་དམར་པོ་དང ། །ཤིང་རྟ་གང་བའམ་བ་བཞོན་བེའུ་ཕྲུག་ཅན། །གདུགས་དཀར་རྔ་ཡབ་ལྷམ་དང་རལ་གྲི་དང ། །བསིལ་ཡབ་གསེར་གཡུ་ཅན་དང་ཕྲེང་བ་དང ། །ནོར་བུ་མུ་ཏིག་ཉ་ཕྱིས་དུང་དང་དངུལ། །བུད་མེད་གཟུགས་བཟང་ཡིད་འོང་བུ་མོ་དང ། །རིན་ཆེན་སྣ་ཚོགས་རྣམས་ཀྱིས་སྤྲས་པའི་རྒྱན། །མལ་སྟན་དཀར་པོ་བཏིང་བ་རྙེད་པ་དང ། །ཐོ་རངས་ཁར་ནི་ཆུ་བོ་ཆུ་ཀླུང་དང ། །འབབ་ཆུའམ་རྒྱ་མཚོ་དང་ནི་རྫིང་བུ་དང ། །ལུ་མ་ལ་ནི་འཐུང་ངམ་རྐྱལ་རྨི་དང ། །དེ་བཞིན་ཁྲག་གིས་ལུས་ནི་ཁྲུས་བྱེད་དང ། །ལྷ་ཁང་མཆོད་རྟེན་གདུགས་དང་རྒྱལ་བའི་གཟུགས། །བྱང་ཆུབ་སེམས་དཔའ་མཆོག་དང་རང་སངས་རྒྱས། །ཟག་མེད་དགེ་འདུན་དགེ་སློང་དགེ་སློང་མ། །དགེ་བསྙེན་རྣམས་དང་ས་བདག་ལྷ་རྣམས་དང ། །མཆོད་གནས་བྲམ་ཟེ་ཡིད་འོང་སྐྱེས་བུ་དང ། །མི་དང་མི་མཆོག་ཕྱུག་ཅིང་འབྱོར་པའི་བུ། །ཕ་མ་མཛའ་བཤེས་གཉེན་དང་གནོད་སྦྱིན་དང ། །གྲུབ་པའི་ལྷ་དང་ན་ཆུང་ཚོགས་དག་དང ། །ཅི་སྟེ་ཉི་མ་ཟླ་བ་ཟ་བ་དང ། །སའི་ནང་འགྲོ་ས་བོན་འཐུང་བ་དང ། །མེ་ལ་རྫི་ཞིང་ཤ་ནི་ཟ་བ་དང ། །ལུས་ཀྱི་ནང་དུ་མེ་ནི་ཞུགས་པ་མཐོང ། །རྨི་ལམ་བཟང་པོ་འདི་དག་མཐོང་བ་དང ། །དེ་དག་རིང་པོར་མི་ཐོགས་འགྲུབ་པར་འགྱུར། །ཟླ་བ་གཅིག་དང་ཟླ་ཕྱེད་ཉིན་ཞག་དང ། །སྐད་ཅིག་གིས་ཀྱང་ཕྱིར་ཕྱིར་ཉེ་བར་འགྱུར། །འཕགས་པ་དཔུང་བཟང་གིས་ཞུས་པའི 101.204a ལེའུ་ལྔ་པའོ།། །། དངོས་གྲུབ་ཉེ་ན་ཟློས་ལ་དགའ་བ་དང ། །སེམས་ནི་སྡིག་ལ་ནམ་ཡང་དགའ་མི་འགྱུར། །བཀྲེས་སྐོམ་ཚ་གྲང་རླུང་དང་ངལ་བ་ཡི། །སྡུག་བསྔལ་དྲག་པོས་གདུངས་ཀྱང་གཡོ་མི་འགྱུར། །སྦྲང་བུ་ཤ་སྦྲང་སྲིན་བུ་གྲོག་སྦུར་དང ། །སྡིག་སྦྲུལ་རྐང་བརྒྱ་པ་དང་སྦྲུལ་དང་དྲེད། །ཤ་ཟ་སྲུལ་པོ་རྣམས་ཀྱང་དེ་དག་གི། །ལུས་དང་གྲིབ་མ་ལ་ཡང་མི་འགོང་ངོ ། །ཚིག་ནི་གཟུང་བར་འོས་ཤིང་ཡིད་གཞུངས་ལ། །སྙན་དངགས་དང་ནི་བྲི་བ་རྣམས་ལ་མཁས། །ཆོས་ལ་མངོན་དགའ་གཏེར་རྣམས་མཐོང་བ་དང ། །ལུས་ཀྱི་ནད་དང་དྲི་མ་མེད་པར་འགྱུར། །སྐྱེས་བུས་མཐོང་ངམ་ཐོས་པར་གྱུར་ཀྱང་རུང ། །མྱུར་དུ་མངོན་དགའ་ཡིད་དུ་འོང་བར་འགྱུར། །བུད་མེད་འདོད་ལྷའི་མདས་ཕོག་པ་རྣམས་ཀྱིས། །འདོད་ལ་ལོངས་སྤྱོད་ཕྱིར་ནི་འབོད་པར་འགྱུར། །གང་ཚེ་མཁས་པས་ལྷ་དང་གནོད་སྦྱིན་དང ། །དྲི་ཟ་ལྷ་ཡི་བུ་མོའི་ལུས་དང་སྒྲ། །མིས་ནི་དགའ་བའི་ཡིད་ཀྱིས་མཐོང་ཐོས་ན། །དེ་ཚེ་ཤིན་ཏུ་ཉ་བར་གྱུར་བ་ཡིན། །ལུས་ནི་དྲི་མེད་དག་པར་རིག་པ་དང ། །གསོ་སྦྱོང་སྡོམ་པ་དང་ནི་ལྡན་པ་ཡིས། །ཉིན་ཞག་གཅིག་གམ་གཉིས་སམ་གསུམ་དུ་ནི། །ཁ་ཟས་སྤངས་ཤིང་སྨྱུང་བར་གནས་པ་ཡིས། །ཉིན་ཞག་དེ་དག་འདས་པར་བྱས་ནས་སུ། །རང་གི་འབྱོར་ཕྱིར་བསྒྲུབ་ལ་འཇུག་པར་བྱ། །གསུང་དེ་དཔུང་བཟང་གིས་ཐོས་སླར་གསོལ་པ། །ཟས་ཀྱིས་མི་འདག་ཅེས་ནི་སྔར་གསུངས་ན། །མཆོད་འོས་ཁྱོད་ཀྱིས་ལུས་དག་བགྱི་ཕྱིར་ཡང ། །ཅི་སླད་སྨྱུང་བ་མི་བཟད་བགྱི་བར་གསུངས། །སྲིད་པའི་མཐར་ཕྱིན་བདེ་བར་གཤེགས་པ་ཡིས། །ཤིང་རྟའི་མིག་བསྐུ་བཟའ་བའང་ཅི་ཕྱིར་གསུངས། །རྡོ་རྗེ་ཅན་གྱིས་དཔུང་བཟང་ཚིག་གསན་ནས། །འབྲུག་སྒྲ་ཟབ་འདྲའི་གསུང་གིས་བཀའ་སྩལ་པ། །བུ་གཅིག་ལུས་དག་བྱ་ཕྱིར་སྨྱུང་བྱ་བར། །བདེ་གཤེགས་འདི་ན་ནམ་ཡང་མི་གསུང་ཡང ། །ལུས་འདི་མི་གཙང་ལྤགས་པ་ཤ་ཁྲག་རྐང ། །ཀླད་རྒྱ་རྒྱུ་མ་མཆེར་མཆིན་མཁལ་མ་ཞག་།མཁྲིས་པ་བད་ཀན 101.204b ཁུ་བ་ཕྱི་ས་དང ། །གཅིན་སྣབས་བ་སྤུ་སྐྲ་དང་རུས་པ་དང ། །མིག་དང་རྣ་བ་སྣ་དང་ཁ་དང་ནི། །བཤང་སྒོ་མཚན་དང་བུ་ག་དགུ་པོ་ཡི། །རྨ་ནས་དྲི་མ་སྣ་ཚོགས་མི་གཙང་བ། །འཛག་པའི་རྒྱུན་ནི་རྟག་ཏུ་འབྱུང་བ་ཡིན། །དེ་ལྟར་ཡན་ལག་ཐམས་ཅད་འདུས་པ་དང ། །ས་ཆུ་མེ་རླུང་ནམ་མཁའ་རྣམས་དང་ལྡན། །ཅི་བཞིན་ལས་ཀྱི་རྗེས་འབྲང་མི་ཡི་ལུས། །ཐམས་ཅད་ལྡན་པའི་གཟུགས་ལ་གནས་པ་ཡི། །བཤང་གཅི་སྣབས་དང་མཆིལ་མ་བད་ཀན་དང ། །འདི་དག་ཟད་པར་བྱ་ཕྱིར་སྨྱུང་བར་གསུངས། །དྲི་མ་ཟད་ནས་མི་ཡི་ལུས་དག་ན། །རང་གི་འབྱོར་ཕྱིར་བསྒྲུབ་ལ་བདེ་བར་འཇུག་།འདོད་ཆགས་ཀྱིས་ནི་གདུངས་པར་གྱུར་ན་ཡང ། །ལུས་ཀྱི་ཡན་ལག་འདི་དག་ཐམས་ཅད་ལ། །དྲན་པ་རྩེ་གཅིག་མངོན་དུ་བྱས་ནས་ནི། །ཡེ་ཤེས་མིག་གིས་སོ་སོར་རྣམ་པར་བརྟག་།དེ་ལྟར་རང་གིས་ངེས་པར་བརྟགས་པ་ན། །ལུས་དང་སྲོག་ལ་རྗེས་སུ་ཆགས་པ་ཡི། །འདོད་ཆགས་རྩ་ནས་ཡོངས་ཡེ་ཞི་འགྱུར་ཏེ། །ཉི་མས་མུན་ནག་གཏན་ནས་བསལ་བ་བཞིན། །ཕན་ཡོན་དེ་ཡིས་གསང་སྔགས་ཉེ་བསྙེན་ནས། །རང་གི་ལུས་ལ་ཉེ་བར་རིག་པ་དང ། །ཡར་གྱི་ཚེས་བརྒྱད་དམ་ནི་བཅུ་བཞི་ལ། །ཡང་ན་བཅཝ་ལྔ་ལ་ནི་བཟླས་བརྗོད་བྱ། །ལྷ་ཡི་གནས་ཀྱི་ས་དག་བསྟར་བའི་ཕྱིར། །ས་དང་ལྕི་བར་བསྲེས་ལ་སོགས་པས་བྱུག་།དད་པས་བདེ་གཤེགས་ཀུན་ལ་ཕྲད་པ་དང ། །ལྷ་བཤོས་མེ་ཏོག་དྲི་དང་མར་མེས་མཆོད། །དེ་ནས་རྡོ་རྗེ་འཛིན་པ་དང་ཁོར་མཆོད། །དེ་ནས་གསང་སྔགས་ལྷ་ལ་དབུལ་བར་བྱ། །བསྟོད་འོས་སངས་རྒྱས་རྣམས་ལ་བསྟོད་ནས་སུ། །ཕྱིར་ཞིང་བྱང་ཆུབ་སེམས་ཀྱང་དྲན་བྱས་ཏེ། །སེམས་ཅན་སྐྱེ་རྒ་ན་བས་གཟིར་བ་ལ། །ཅི་ལྟར་རིགས་པར་སྙིང་རྗེའང་བསྒོམ་པར་བྱ། །འདུས་ཆེན་མདོ་སྡེ་བཀླག་པའམ་བཀྲ་ཤིས་ཀྱི། །ཚིགས་སུ་བཅད་པའམ་ཆོས་ཀྱི་འཁོར་ལོ་མཆོག་།དེ་བཞིན་གཤེགས་པའི་གསང 101.205a བའམ་སྒྲོན་མ་ཆེ། །གང་ཡང་རུང་བ་གཅིག་ནི་རིམ་བཞིན་བཀླག་།དེ་ནས་བླ་འོག་ཕྱོགས་རྣམས་བཅིངས་ནས་སུ། །ལུས་ལ་གོ་ཆ་བགོ་བར་བྱས་ནས་ནི། །གོང་དུ་སྨོས་པའི་དཀྱིལ་འཁོར་དེ་རྣམས་ལས། །གཅིག་ཅིག་ཚོན་རྩི་རྣམས་ཀྱིས་བྲི་བར་བྱ། །རྡོ་རྗེ་མེ་ཆུ་རླུང་དང་མདུང་ཐུང་དག་།རིམ་བཞིན་དཀྱིལ་འཁོར་འདིར་ནི་བྲི་བར་བྱ། །ར་བར་བྲིས་པས་ལྷ་དང་ལྷ་མིན་དང ། །སྡང་བའི་བདག་ཉིད་སེམས་ནི་མྱོས་པར་འགྱུར། །སེང་གེའི་གདན་གྱིས་མངོན་པར་བསྔགས་པའི་སྟན། །དེ་ནི་དཀྱིལ་འཁོར་དབུས་སུ་བཞག་པར་བྱ། །བདག་ཉིད་བསྲུང་བ་བྱས་ཏེ་དེར་འདུག་ནས། །རྫས་བླངས་མྱུར་དུ་བཟླས་བརྗོད་བྱས་ནས་ནི། །བདུག་པའི་སྦྱིན་སྲེག་སྟོང་ཡང་སྦྱིན་སྲེག་བྱ། །དེ་ནས་དེ་ནི་དྲི་ཆུས་བཀྲུས་ནས་སུ། །བགེགས་མང་རྣམས་ཀྱང་རབ་ཏུ་བསལ་བྱས་ནས། །བྱང་ཆུབ་ཤིང་ལོ་གསུམ་གྱི་སྟེང་དུ་བཞག་།བཞི་ཡིས་བཀབ་ནས་ཅི་སྲིད་གྲུབ་པ་ནི། །རྣམ་གསུམ་མཐོང་གི་བར་དུ་གསང་སྔགས་བཟླས། །དྲོ་དང་དུད་འཐུལ་མེ་བཞིན་འབར་བ་འམ། །རིམ་བཞིན་བཟློག་ནས་འབྱུང་ནའང་འགྲུབ་པར་གསུངས། །དྲོ་བས་འགྲོ་བ་ཐམས་ཅད་དབང་འགྱུར་ཏེ། །དུ་བ་འཐུལ་བས་ལུས་ནི་མི་སྣང་འགྱུར། །འབར་བས་མཁའ་ལ་ཤིན་ཏུ་འགྲོ་འགྱུར་ཏེ། །མི་ཡི་ལུས་ནི་ལྷ་ལྟར་གསལ་བར་འགྱུར། །ཅི་ལྟར་ལུས་ལ་གྲང་བ་འཇུག་པ་དང ། །ཅི་ལྟར་མངལ་དུ་དྲི་ཟ་འཇུག་པ་དང ། །ཉི་ཟེར་མེ་ཤེལ་ཞུགས་ནས་མེ་འབྱུང་ལྟར། །དེ་བཞིན་དངོས་གྲུབ་ལུས་ལ་འཇུག་པར་འགྱུར། །མར་མེ་མཆེད་ཅིང་ཤིན་ཏུ་འབར་བ་དག་།སྣུམ་ཞིང་དཀྱུས་རིང་གསེར་གྱི་མདོག་ལྟར་དང ། །འབྲུ་མར་ཟད་ཀྱང་འབར་བར་གྱུར་ན་ནི། །དེ་ཚེ་སྔགས་པ་དངོས་གྲུབ་ཐོབ་འགྱུར་ཏེ། །དེ་དག་རྫས་ལས་བྱུང་བའི་དངོས་གྲུབ་བོ། །མིས་ནི་རི་མོའི་སྐུ་གཟུགས་འགུལ་བ་འམ། །ཕྲེང་བ་སྨིན་མ་མིག་དང་རྔ་ཡབ་བམ། །གལ་ཏེ་རྒྱན་རྣམས་གཡོ་བར 101.205b གྱུར་པ་འམ། །མཁའ་ལས་མེ་ཏོག་ཆར་རམ་རྫི་ཆར་འབབ། །ས་ནི་མྱུར་དུ་གཡོ་བར་གྱུར་པ་འམ། །ལུས་ནི་མི་སྣང་མཁའ་ལས་ཚིག་དུ་ནི། །བུ་གཅིག་དམ་པ་ཅི་འདོད་སློངས་ཤིག་ཅེས། །ལྷ་ཡི་རྔ་སྒྲས་ལུས་ཀྱི་བ་སྤུ་ལྡང ། །རྒྱན་གྱི་ཆར་ཆེན་རབ་ཏུ་འབབ་པ་འམ། །ཅི་སྟེ་མཁའ་ལ་ལྷ་དང་ལྷ་མིན་དང ། །གསང་སྔགས་གཟུགས་ནི་མངོན་དུ་མཐོང་ན་འགྲུབ། །མ་ཉམས་མེ་ཏོག་དབྱིག་དང་ཆུར་བསྲེས་ཤིང ། །བསྟོད་དང་བཅས་པར་མཆོད་ཡོན་རྒྱུན་སྦྲིང་ནས། །རྩེ་གཅིག་སེམས་ཀྱིས་མགོ་བཏུད་ཕྱག་བྱས་ཏེ། །དད་དང་འབད་པའི་རྗེས་འཐུན་མཆོག་སླང་ངོ ། །མཆོག་ཐོབ་ནས་ནི་དགའ་བས་ཕྱག་བྱས་ཏེ། །དད་པས་བསྟོད་ཅིང་མཆོད་ཡོན་ཕུལ་ནས་སུ། །གསང་སྔགས་བརྗོད་ཅིང་སླར་ཡང་གཤེགས་སུ་གསོལ། །གསང་སྔགས་ཀུན་ལ་ཚུལ་ནི་འདི་ཡིན་ནོ། །གང་ཞིག་སེམས་སྟོབས་མཆོག་དང་ལྡན་པ་དེས། །འདིར་ནི་འཇིགས་དང་བཅས་པའི་ལས་ཀྱང་བྱ། །སེམས་སྟོབས་ཆུང་བའི་མི་ལ་ཤ་ཟ་ཡིས། །གླགས་མཐོང་ནས་ནི་ཕུང་བར་བྱེད་པར་འགྱུར། །དཔའ་བོས་གོ་བགོས་མཚོན་ཆའི་ཐབས་མཁས་པས། །ཆས་པའི་གླང་ཆེན་མཆོག་ཞོན་གཞུ་ཐོགས་ཏེ། །མདའ་འཕེན་མཐུ་དང་ལྡན་པ་གཅིག་པུས་ཀྱང ། །དགྲ་བོའི་ཚོགས་ཀུན་ལས་ནི་རྒྱལ་བར་ནུས། །དེ་བཞིན་སེམས་སྟོབས་ཆེན་པོའི་ཚུལ་ཁྲིམས་ཀྱི། །གོ་བགོས་ལེགས་བསྲུངས་གླང་ཆེན་ཞོན་ནས་སུ། །གསང་སྔགས་གཞུ་ཐོགས་བཟླས་བརྗོད་མདའ་འཕེན་པས། །འབྱུང་པོ་ལ་སོགས་མཚན་མོ་རྒྱུ་ལས་རྒྱལ། །སྒུར་པོ་ཡན་ལག་ལྷག་ཆད་ཐུང་ངུ་དང ། །དེ་བཞིན་རིང་པོ་ཡང་ན་སྦོམ་པོ་འམ། །སྨད་པའི་མངལ་ནས་སྐྱེས་པ་མ་ནིང་ངམ། །རྣམ་པ་དེ་འདྲའི་རོ་དག་སྤང་བར་བྱ། །མ་ཞུ་བ་དང་རིམས་དྲག་ཚད་པ་དང ། །འཁྲུ་སྐྱུག་བཅིངས་དང་ཆུ་དང་གསལ་ཤིང་དང ། །སྦྲུལ་གྱིས་གསད་དམ་དུག་གིས་ཤི་བ་འམ། །བད་ཀན་སྦྲུལ་སོགས་མཐོང་དམིགས་བསད་པ་ལ། ། 101.206a ཡན་ལག་ཚང་ཞིང་ཁ་བཞིན་མ་སྨད་པ། །ལུས་ལ་རྨ་མེད་སྐྱེས་པའི་རོ་མཐོང་ན། །རལ་གྲི་བེ་ཅོན་ལག་ན་ཐོགས་པ་ཡིས། །ཉིན་པར་ཐོག་ཐག་དུ་ནི་བསྲུང་བར་བྱ། །དུར་ཁྲོད་ཁང་སྟོང་དང་ནི་ཤིང་གཅིག་དང ། །བཞི་མདོ་འབབ་ཆུ་དག་གམ་ཆུ་ཀླུང་ངམ། །མཚོ་འམ་རྒྱ་མཚོ་འམ་ནི་རི་བོ་ལ། །སྐད་ཅིག་གིས་ཀྱང་རོ་ལངས་འགྲུབ་པར་འགྱུར། །གང་ཡང་རུང་བའི་གནས་གཅིག་བརྟགས་ནས་ནི། །ས་དང་ལྕི་བ་ལ་སོགས་བྱུག་པར་བྱ། །གཙང་མ་དེར་ནི་དཀར་ནག་དམར་པོ་འམ། །ཚོན་རྩི་སྣ་ཚོགས་རྣམས་ཀྱིས་དམ་ཚིག་བྲི། །གོང་དུ་སྨོས་པའི་དཀྱིལ་འཁོར་དེ་རྣམས་ལས། །བསམས་ནས་འདོད་པ་གང་ཡང་རུང་བ་གཅིག་།དད་པ་ཆེན་པོས་རིགས་ཀྱི་ཡུམ་གྱི་མཆོག་།ཟློས་ཤིང་རབ་ཏུ་བསྒྲིམས་ཏེ་བྲི་བར་བྱ། །འཇིགས་པ་མེད་པའི་གཡོག་གིས་དེ་བླངས་ནས། །ཁྱེར་ནས་འོངས་ཏེ་ཀུ་ཤའི་སྟེང་བཞག་སྟེ། །སྐྲ་དང་ཁ་སྤུ་རྣམས་ཀྱང་བྲེགས་ནས་སུ། །དེ་ཡི་མོད་ལ་འབྲུ་མར་དག་གིས་བསྐུ། །དེ་ནས་བུམ་པ་ཞབས་མི་གནག་པ་བཞི། །གཙང་མའི་ཆུས་བཀང་ཁྲུས་རྩིས་སྦྱར་ཏེ་བཀྲུ། །དེ་ནས་གོས་དཀར་ཕྲུགས་ཅིག་བསྐོན་ནས་སུ། །དེ་ནས་དཀྱིལ་འཁོར་དབུས་སུ་རྩཝ་སྟན་དང ། །མ་ཉམས་མེ་ཏོག་སྟེང་དུ་རོ་བཞག་ཅིང ། །རོ་ཡི་མགོ་བོ་ཤར་རམ་བྱང་དུ་བསྟན། །དྲི་ཡིས་བྱུག་ཅིང་བདུག་པས་བདུག་པར་བྱ། །ཕྲེང་བས་གདགས་ཤིང་མེ་ཏོག་སིལ་མས་གཏོར། །ཤ་དང་ཉ་ཤ་མར་ཁུ་ཏིལ་བསྲེས་པའི། །ཁུར་བ་ལ་སོགས་ཅི་སྙེད་བུངས་བསྐྱེད་དེ། །འབྱུང་པོ་ཀླུ་དང་ཤ་ཟ་གནོད་སྦྱིན་དང ། །འདྲེ་ལ་བླ་འོག་ཕྱོགས་སུ་སྦྱིན་པར་བྱ། །གྲོགས་པོ་མཆོག་ལྡན་བདག་ཉིད་བསྲུང་བྱ་སྟེ། །རྩེ་གཅིག་སེམས་ཀྱིས་གསང་སྔགས་བཟླས་བརྗོད་བྱ། །རོ་ནི་ལྡང་དུ་ཉེ་བའི་ཚེ་ན་ནི། །འཇིགས་པའི་གཟུགས་ཅན་བགེགས་ནི་སྣ་ཚོགས་འབྱུང ། །གཙུག་ཏོར་རྒྱལ་པོའི་སྔགས་ཀྱིས་ཐལ་བ་འམ། །མ་གྲུགས་ཡུངས་ཀར 101.206b སོགས་ལ་བསྔགས་ནས་སུ། །གཏོར་མ་ཕྱོགས་བཞི་དག་ནས་འོང་བའི་བགེགས། །གསང་སྔགས་མཐུ་ཡིས་དེ་དག་འབྱེར་བར་འགྱུར། །དེ་དག་ཞི་བར་བྱ་ཕྱིར་ཁྲོ་བོ་ནི། །བདུད་རྩི་ཐབ་སྦྱོར་དྲག་ཤུལ་ལས་ཅན་སྦྱར། །བགེགས་རྣམས་བཅོམ་པས་དེ་ནས་རོ་དེ་ཡང ། །གསང་སྔགས་མཐུ་ཡིས་མྱུར་དུ་ལྡང་བར་འགྱུར། །གང་ཞིག་གསང་སྔགས་ཆོ་ག་ཞིབ་མོ་ལས། །མཐོང་བ་དེ་ནི་ཐོགས་མེད་ངེས་པར་འགྲུབ། །གལ་ཏེ་རོ་དེ་ལངས་པར་གྱུར་པ་ལས། །དེ་ཡི་གསང་སྔགས་ཆོ་ག་མི་ཤེས་ནའང ། །གསང་སྔགས་གཞན་དུ་བསྟན་པའི་ཆོ་ག་ཡིས། །ལངས་པ་དེ་ལ་རང་གིས་དངོས་གྲུབ་བླངས། །གཏེར་གྱི་ཕྱོགས་དང་ཕུག་དུ་འགྲོ་བ་དང ། །རལ་གྲི་ཨན་ཛ་བཞོན་པ་མངག་གཞུག་དང ། །འབྱུང་ཁུང་གསེར་འགྱུར་རྩི་དང་བཅུད་ཀྱིས་ལེན། །མཁའ་ལ་འགྲོ་བའི་དངོས་གྲུབ་རབ་ཏུ་སྟེར། །བསྲུང་བའི་སྟོབས་མེད་སྔགས་ཀྱི་སྟོབས་མེད་དང ། །དཀའ་ཐུབ་སྟོབས་མེད་སེམས་སྟོབས་མེད་པ་ཡི། །བློ་ཞན་གང་ཞིག་རོ་ལངས་དངོས་གྲུབ་ཚོལ། །དེ་ནི་མཚན་མོ་རྒྱུ་བ་རྣམས་ཀྱིས་བསད། །འཕགས་པ་དཔུང་བཟང་གིས་ཞུས་པའི་ལེའུ་དྲུག་པའོ།། །། མི་གང་མི་ཡི་ཤ་ནི་འཚོང་འདོད་དེས། །མར་གྱི་ངོ་ལ་དུར་ཁྲོད་སོང་ནས་སུ། །ཤིང་རྡོ་མཚོན་དང་དུག་དང་དབྱུག་ཏོ་སྨན། །བགེགས་ལ་སོགས་པས་ཤི་བར་གྱུར་པ་ཡི། །བྱིན་པ་བརླ་དང་སྐེ་དང་མགོ་བོ་དག་།འཇིགས་པ་མེད་པས་མཚན་མོ་བླངས་ནས་སུ། །གཏུབས་ཏེ་ཀོང་བུའམ་གྱོ་དུམ་གསར་པ་དང ། །གཙང་མ་དེར་ནི་མི་ཉུང་བཞག་བྱས་ལ། །ལུས་ལ་ཁྲག་གི་ལག་རྗེས་བྲིས་ནས་སུ། །རྒྱུ་མས་མགོ་དང་མགྲིན་པ་དཀྲི་བར་བྱ། །ལུས་ལ་མི་ལྤགས་སར་པ་བགོས་ནས་ཀྱང ། །ལག་གཡོན་ཤས་བཀང་གྱོ་མོ་ཐོགས་ནས་སུ། །ཁྲག་གིས་བསྐུས་པའི་རལ་གྲི་ལག་གཡས་ཀྱིས། །རབ་ཏུ་བསྒྲིམས་ནས་དེ་ནི་ཐོགས་ནས་ཀྱང ། །སྒྲ་ཆེར་བོད་ཅིང་ཚིག་ཏུ་ཤ་འདི་དག་།ཁྱེད་ཅག་སུ 101.207a ཞིག་ཉོ་བར་བྱེད་འདོད་ཅེས། །ཤར་དང་ནུབ་དང་ལྷོ་དང་བྱང་ཕྱོགས་སུ། །མྱུར་དུ་བསྐོར་ཅིང་ཤིན་ཏུ་བརྗོད་པར་བྱ། །ཅི་སྟེ་ལུས་ནི་སྣང་ངམ་མི་སྣང་བར། །ཚིག་གིས་ཁྱོད་ནི་ནོར་རམ་རིག་པ་འམ། །བཅུད་ཀྱིས་ལེན་པའམ་གྲོང་ངམ་རྒྱལ་སྲིད་དམ། །ཕུག་དུ་འགྲོ་བའམ་ཅི་འདོད་ཅེས་ཟེར་ན། །སྔར་ནི་གང་ཞིག་སེམས་ཀྱིས་བསམ་པའི་དོན། །དེ་ཉིད་སྨྲ་ཡི་གཞན་ནི་སྨྲ་མི་བྱ། །རིག་པ་མང་པོ་བསྟན་པའི་དུར་ཁྲོད་འདིར། །དོན་འདིའི་ཕྱིར་ནི་སྡུག་བསྔལ་དྲག་པོ་ཡིས། །བདག་ཀྱང་གདུངས་བཞིན་འོངས་ཀྱིས་འདི་ཉིད་ན། །ཡོད་ན་ཤ་འདི་ཁྱེར་ལ་བདག་ལ་བྱིན། །ཅི་སྟེ་སྲང་ལ་གཞལ་ཏེ་མ་གང་ན། །རང་གི་ཤ་ཡིས་དེ་ནི་དགང་བར་བྱ། །གལ་ཏེ་དུར་ཁྲོད་འདི་ནི་སྟོང་པ་སྟེ། །ནོར་མེད་བུ་ཁྱོད་གཞན་དུ་སོང་ཤིག་ཅེས། །མཚན་མོ་རྒྱུ་བས་དེ་སྐད་བསྒོ་ན་ནི། །དེ་ལ་བདག་ནི་གང་དུ་འགྲོ་ཞེས་དྲི། །ལན་ཐོབ་དེ་ཉིད་རང་གིས་བརྟགས་ནས་སུ། །ཤ་དེ་བོར་ནས་དེ་ནས་འགྲོ་བར་བྱ། །ཤ་ཡི་ཆོ་ག་གང་ཞིག་ངས་གསུངས་པ། །གསང་སྔགས་མ་བཟླས་པ་ཡིས་བསྟེན་མི་བྱ། །རིགས་མཆོག་གཙུག་ཏོར་སྟོབས་ཆེན་ལ་སོགས་པས། །དུར་ཁྲོད་དུ་ནི་བསྲུང་བར་ངས་གསུངས་སོ། །གསང་སྔགས་དྲག་པོ་གང་ཞིག་ཤ་ཟ་བ། །དེ་ལ་དུར་ཁྲོད་མི་ཤའི་སྦྱིན་སྲེག་བྱ། །རལ་གྲིས་སོར་གཉིས་སོར་གསུམ་ཙམ་དག་ཏུ། །གཏུབས་ནས་མེ་ལ་སྦྱིན་སྲེག་སྟོང་དུ་བྱ། །མེ་ཏོག་མ་ཉམས་འབྲས་ཡོས་ཤ་ཁྲག་ཉ། །ཆང་དང་སྦྲང་རྩི་བུ་རམ་ཆང་དང་ཏིལ། །བདུག་པ་ཕྲེང་བ་བྱུག་པ་མར་མེ་ཆན། །ལྷ་བཤོས་གཏོར་མ་དུར་ཁྲོད་གཏོར་བར་བྱ། །དབབ་དང་བསྐྲད་དང་གཉིད་ཀྱིས་མྱོས་བྱ་དང ། །དམག་གཞོམ་གྲོང་ཁྱེར་ཕུང་བར་བྱ་བ་དང ། །ཤ་ཟ་མ་མོ་དྲག་མོ་སྲིན་མོའི་ཚོགས། །གནོད་སྦྱིན་རྣམས་ལ་མི་ཤའི་སྦྱིན་སྲེག་བྱ། །མི་ཡི་ཤ་ནི་རྙེད་པར་མ་གྱུར་ན། །བ་གླང་ཤ་ཡི་སྦྱིན་སྲེག་དེ་བཞིན་ཤིས། །མ་ཧེའི་ཤ་འམ་ཁྱི་ཤ་མར་བསྲེས་ལ། །ཚེས་གྲངས་དག་ལ་སྨྱུང་བྱས་སྦྱིན་སྲེག་བྱ། །གནོད་སྦྱིན་མོ་ཡི་ཆོ་ག་ཞིབ་མོར་ནི། །གསང་སྔགས་མཉེས་བྱས 101.207b གྲུབ་པ་འདི་རྣམས་སྟེར། །མ་དང་སྒྱུག་མོ་སྲུ་མོ་གྲོགས་མོ་དང ། །བུ་མོ་ཆུང་མ་སྣ་མར་གྲུབ་པར་འགྱུར། །མ་དང་སྒྱུག་མོ་སྲུ་མོ་གང་ཡིན་དེ། །ཡིད་བཞིན་རིན་ཆེན་བཞིན་དུ་གྲུབ་པ་མཆོག་།ཡིད་འོང་གྲོགས་མོ་བུ་མོ་གྲུབ་པ་འབྲིང ། །ཆུང་མ་སྣ་མ་གྲུབ་པ་ཐ་མར་བསྒྲགས། །དུས་གསུམ་དུ་ནི་མེ་ཏོག་ཕྲེང་བ་དྲི། །མར་རམ་འབྲུ་མར་མར་མེ་ཙན་དན་དང ། ། ཀར་དྲི་ཞིམ་བདུག་པས་མཆོད་པ་དང ། །གཏོར་མ་སྣ་ཚོགས་རྟག་ཏུ་མཚན་མོ་སྦྱིན། །གནོད་སྦྱིན་མོ་ནི་དགའ་ནས་མངོན་ཕྱོགས་ནས། །རྙེད་པ་རྙེད་ཅིང་ས་བོན་འབྱུང་བར་བྱེད། །འདོད་ཆགས་ཟིལ་གྱིས་ནོན་པའི་བུད་མེད་དག་།གནོད་པ་བྱེད་པ་ངེས་པར་གནས་པར་འགྱུར། །བསམས་ན་ཕུང་བར་ཡང་ནི་འགྱུར་བ་ཉིད། །བུད་མེད་གནོད་པ་བྱེད་ཚེ་འགྲོ་མི་བྱ། །རྙེད་པ་མང་ཉུང་ལ་ཡང་འདོད་མི་བསྐྱེད། །སྔགས་པས་མཚན་མོ་ཁུ་བ་དགག་བྱས་ནས། །བརྩོན་འགྲུས་རབ་ཏུ་བསྐྱེད་དེ་བསྒྲུབ་པར་བྱ། །སེམས་རྨོངས་གང་གིས་གཞན་དུ་བརྩམ་བྱས་ན། །གནོད་སྦྱིན་མོས་ནི་མྱུར་དུ་ཕུང་བར་བྱེད། །ཤ་ཟའི་གནོད་སྦྱིན་མ་ལའང་དེ་ཉིད་དེ། །དེ་ལས་ཆོ་ག་ལྷག་པ་འདི་རྣམས་བྱ། །ཤ་ཆང་ལ་ཕུག་ཚོད་མ་ཅུང་པེང་དང ། །ནས་ཆན་མ་ཤ་ཆན་དང་འབྲས་ཆན་ཉ། །གཏོར་མ་དེ་དག་ཀུན་ཏུ་བདུག་པ་དབུལ། །གནས་ནི་ཁང་སྟོང་དག་གམ་དུར་ཁྲོད་ཤིས། །མེ་ཏོག་ཤིར་ཤ་ཀུན་དུར་ཨརྐ་དང ། །བིལ་བ་འབྲི་ཧ་ཀུ་ཤ་རརྫ་ཀ་། གས་ཨུད་པ་ལ་ཨ་ཏ་རུ་ཤ་ཀ་།སེའུ་ཅན་མྱ་ངན་ཚངས་སོགས་མེ་ཏོག་དབུལ། །ཀླུ་ལ་བུ་རམ་འོ་མ་མར་སྦྱར་བའི། །བདུག་པ་དྲི་ཞིམ་ཨ་ཀར་ཙན་དན་དྲི། །ཕྲེང་བ་མེ་ཏོག་དྲི་ཞིམ་སྣ་ཚོགས་དང ། །འབྲས་ཆན་ཞོ་དང་འབྲས་ཡོས་འབྲས་བུ་དབུལ། །བ་དན་སྔོན་པོ་བུམ་པ་སྔོན་པོ་དང ། །གོས་ཀྱང་སྔོན་པོ་ལྷ་བཤོས་གཏོར་མ་དྲི། །ཕྲེང་བ་མེ་ཏོག་བྱུག་པ་སྔོན་པོ་དག་།ཅི་སྙེད་བྲང་གིས་འགྲོ་བ་རྣམས་ལ་དབུལ། །མཐེ་བོང་མེ་ལོང་རལ་གྲི་ཆུ་དང་ཤེལ། །མར་མེ་ས་གཞི་ལྕགས་དང་ནམ་མཁའ་དང ། །ལྷུང་བཟེད་ནོར་བུ་དག་དང་མེ་འབར་བ། །འདི་ལ་གསལ་བར་སྟོན་པ་རྟག་ཏུ་འབྱུང ། ། 101.208a འདས་པ་དང་ནི་མ་འོངས་ད་ལྟར་བྱུང ། །མཐོ་རིས་ས་སྟེང་དུས་དང་མི་ལྡན་ཡང ། །ལྷ་དང་ལྷ་མིན་དགེ་དང་མི་དགེ་བའི། །ལས་རྣམས་ཐམས་ཅད་གསལ་བར་སྟོན་པར་རྟོགས། །ཆོ་ག་ཉམས་པའམ་ཡང་ན་ཕྱེད་བཟླས་པའམ། །ཡི་གེ་ཆད་དམ་ཡི་གེ་ལྷག་པ་འམ། །བཟླས་བརྗོད་མ་བྱས་དད་པ་མེད་པ་དང ། །མཆོད་པ་མེད་ཅིང་ས་གཞི་མི་གཙང་དང ། །སྤྲིན་གྱི་ཚོགས་ཀྱིས་ཉི་ཟེར་བསྒྲིབས་པ་དང ། །བྱིས་པ་ཡན་ལག་ཉམས་ཤིང་ལྷག་པ་དང ། །དེ་ལྟ་བུ་ལ་མི་ཡི་གསལ་སྟོན་པ། །འབབ་པར་མི་འགྱུར་དགོས་པ་ཡོངས་མི་སྟོན། །གསལ་སྟོན་དབབ་ཕྱིར་སྔོན་དུ་ཆོ་ག་བཞིན། །བཟླས་ཤིང་ཚེས་གྲངས་བཟང་ལ་སྔགས་པ་ཡང ། །སྨྱུང་བྱས་གོས་དཀར་ས་དང་ལྕི་བ་ཡིས། །བ་ཀོ་ཙམ་གྱིས་ས་གཞི་ལེགས་པར་བྱུག་།བྱུག་སྤོས་དང་ནི་མེ་ཏོག་བདུག་སྤོས་དང ། །ལྷ་བཤོས་མར་མེ་དག་ཀྱང་ཕུལ་ནས་སུ། །བྱིས་པ་གཞོན་ནུ་སྟ་གོན་གནས་པར་བྱ། །དེ་ནས་ནང་པར་ཆོ་ག་འདི་ཀུན་བྱ། །ཁྲུས་བྱས་ལུས་ལ་གོས་དཀར་གཙང་བགོས་ཏེ། །ཤར་ཕྱོགས་ཁ་བལྟས་ཀུ་ཤའི་སྟན་སྟེང་དུ། །འདུག་ནས་གསང་སྔགས་རྗེས་སུ་དྲན་པར་བྱ། །མེ་ལོང་ཐལ་བ་གཙང་མས་ལན་བདུན་ནམ། །བརྒྱད་དམ་ཡང་ན་བཅུར་ནི་ཕྱིས་ནས་སུ། །རྩེ་གཅིག་སེམས་ཀྱིས་གསང་སྔགས་ཟློས་བཞིན་དུ། །བུས་པ་གཞོན་ནུ་ནུབ་དུ་ཁ་བསྟན་ནས། །ལྷ་ཡི་མིག་གིས་བལྟས་ན་འདས་པ་དང ། །ད་ལྟར་དང་ནི་མ་འོངས་མཐོང་བར་འགྱུར། །མེ་ལོང་ཞེས་བྱའི་ཆོ་ག་མཐའ་དག་ནི། །རལ་གྲི་གསལ་བར་སྟོན་ལ་སྦྱར་བར་བྱ། །མཐེ་བོ་རྒྱ་སྐྱེགས་ཁུ་བས་བསྐུས་ནས་སུ། །འབྲུ་མར་དྲི་ཞིམ་དག་གིས་བསྐུ་བར་བྱ། །བུམ་པ་གཙང་མ་ཆུས་བཀང་མི་གཡོར་བཞག་།ས་བཙགས་ལྷུང་བཟེད་ནོར་བུ་ཆུ་ཡིས་དགང ། །སྐུ་གཟུགས་ལ་ནི་བྱུག་སྤོས་མེ་ཏོག་དབུལ། །དེ་ནས་བུས་པ་གཞོན་ནུས་བལྟ་བར་བྱ། །གསལ་བར་སྟོན་དང་རྨི་ལམ་ལ་སོགས་པས། །དངོས་གྲུབ་བརྟགས་ཏེ་དེ་ནས་བཟླས་བརྗོད་བྱ། །གལ་ཏེ་ཡིད 101.208b ཆེས་པར་ནི་མ་གྱུར་ན། །དེ་ནས་རིག་སྔགས་མི་གདུག་བཟླས་བརྗོད་བྱ། །ང་ཡི་གསང་སྔགས་དག་པ་གང་ཡང་རུང ། །གསོ་སྦྱོང་བྱས་ནས་ནན་ཏན་བཟུང་ནས་སུ། །རྒྱལ་བའི་རིང་བསྲེལ་མཆོད་རྟེན་དྲུང་དུ་བཟླས། །ཡང་ན་སྐུ་གཟུགས་མ་ཉམས་དྲུང་དུ་བཟླས། །ལུས་དང་ངག་ཡིད་ལག་པ་མིག་དང་ནི། །སྨིན་མཚམས་ཡན་ལག་རྣམ་པར་གཡོ་བ་དག་།རབ་ཏུ་བསྡམས་ནས་དེ་ལ་ཡིད་གཞོལ་ཞིང ། །བྱམས་ལ་གནས་ཤིང་ཀུ་ཤའི་ཁྲེས་ལ་འདུག་།ཇི་སྲིད་དུ་ནི་རྩེ་གཅིག་གནས་འགྱུར་བ། །དེ་སྲིད་བར་དུ་འབུམ་མམ་ཉིས་འབུམ་བཟླས། །ང་ཡི་གསང་སྔགས་ཧཱུཾ་ཞེས་བྱ་བ་འདིས། །ཤིང་ལའང་འབབ་ན་མི་ལ་སྨོས་ཅི་དགོས། །དེ་ནས་དབབ་པའི་སྣོད་རྣམས་བརྟག་པར་བྱ། །བུ་མོ་གཞོན་ནུ་ལོ་བཅུའམ་བཅུ་གཉིས་པ། །བཅུ་འམ་བརྒྱད་དམ་བདུན་ནམ་བཞི་འམ་གསུམ། །ཡང་ན་ཁྱེའུའང་རུང་སྟེ་གཉིས་སམ་ལྔ། །ཚིགས་རུས་རྩ་མི་མངོན་ཞིང་གཟུགས་བཟང་བ། །ཡན་ལག་རྫོགས་ཤིང་མིག་དཀྱུས་རིང་ལ་དཀར། །ཁ་བཞིན་ཟླ་འདྲ་མཆེ་བ་མཉམ་ལ་རྣོ། །སོར་མོ་ཐགས་བཟང་མཛེས་ལ་ལོང་བུ་ནུབ། །ལྟེ་བ་ཟབ་ཅིང་མཛེས་ལ་ནུ་མཇིང་ལེགས། །བ་སྤུ་རེ་རེ་སྐྲ་ཡང་གནག་ལ་སྟུག་།ལྟོ་བ་མི་རློ་གཉེར་མ་གསུམ་དང་ལྡན། །མདོག་ཀྱང་བཟང་ཞིང་མངའ་བྱད་དང་ཡང་ལྡན། །གང་ལ་ཡིད་དགའ་ལྟ་བ་བརྟན་པར་འགྱུར། །ལྟ་བས་ཀྱང་ནི་ངོམས་པར་མི་འགྱུར་དང ། །ལྷ་གཞན་དག་ལ་མི་ཕྱོགས་དབབ་པའི་གནོད། །ཚེས་གྲངས་བཟང་ལ་ཉིན་ཞག་གཅིག་ཏུ་ནི། །སྨྱུང་བ་བྱས་པས་བདུག་སྤོས་ཕྲེང་བ་དང ། །ཙན་དན་མེ་ཏོག་མར་མེ་རྣམས་ཀྱིས་མཆོད། །བཟའ་དང་འབྲས་ཆན་ལ་སོགས་གཏོར་མ་མང ། །ལྷ་དང་ལྷ་མིན་གནོད་སྦྱིན་རྣམས་ལ་སྦྱིན། །དབབ་པའི་སྣོད་རྣམས་ཁྲུས་བྱས་གོས་དཀར་བསྐོན། །ཤར་ཕྱོགས་ཁ་བལྟས་རྒྱན་ནི་རྣམ་པར་སྤངས། །བྱུག་སྤོས་མེ་ཏོག་ལ་སོགས་དེ་ལ་སྦྱིན། །བདུག་པས་བདུག་ཅིང་གསང་སྔགས 101.209a བཟླས་བརྗོད་བྱ། །ཧཱུཾ་གིས་གསང་སྔགས་ཐོག་མར་བཟླས་ནས་སུ། །གྷྲིན་ཨ་པེ་ཤ་ཞེས་བརྗོད་པར་བྱ། །མིག་ནི་གདངས་ཤིང་བཙུམས་པར་མི་བྱེད་ན། །རྫོགས་པར་གྱུར་པར་ཤེས་པར་བྱས་ནས་སུ། །འཇིགས་པ་མེད་པར་དེ་ཚེ་དྲི་བྱ་བ། །མཆོད་ཡོན་དང་ནི་བདུག་པ་ཕུལ་ནས་སུ། །རིག་པ་མཆོག་གི་གསང་སྔགས་དྲན་བྱས་ནས། །ཕྱག་འཚལ་ནས་ནི་ལྷ་ཕྱོགས་གང་ཡིན་དྲི། །དུས་གསུམ་དག་གི་བདག་གི་དགོས་པ་གང ། །དེ་ནི་ལེགས་པར་དགོངས་ལ་བཀའ་སྩོལ་ཅིག་།བདེ་དང་སྡུག་བསྔལ་དངོས་གྲུབ་ཐོབ་མི་ཐོབ། །ཤེས་ནས་དེ་ཡང་དེ་བཞིན་བཟུང་ནས་སུ། །དེ་མ་ཐག་ཏུ་སླར་ཡང་གཏང་བར་བྱ། །མི་གདུག་སྔགས་བཟླས་ཆོ་ག་འདི་རྣམས་ཀྱིས། །དབབ་པའི་སྣོད་ལ་མི་ཡིས་ཕེབས་གྱུར་གྱི། །གང་ཞིག་བླུན་པས་གཞན་དུ་བརྩམས་ན་ནི། །དེ་ནི་མི་རྣམས་ཀུན་གྱིས་དཔྱས་པར་འགྱུར། །ཞི་ཞིང་གཞུངས་ལ་རྒྱ་ཆེ་དཀྱུས་ཀྱང་རིང ། །བརྟན་ཞིང་གཟི་ཆེན་མདངས་ལྡན་དམར་བར་སྣང ། །འཛུམས་ཞིང་འབྱེད་མེད་ལྷ་ཡི་མིག་དང་འདྲ། །དབབ་པའི་སྣོད་ལ་ལྷ་བབས་དེ་ལྟར་འགྱུར། །མིག་ནི་རབ་ཏུ་དམར་ཞིང་ཟླུམ་པོར་འདུག་།དགྲད་ཅིང་རབ་ཏུ་མི་སྡུག་འཇིགས་འཇིགས་ལྟ། །འཛུམས་པ་མེད་ཅིང་འཇིགས་མེད་བལྟ་བ་ནི། །སྲིན་པོ་ལྟོ་འཕྱེ་གནོད་སྦྱིན་བབས་པའི་མིག་།གལ་ཏེ་བབས་པའི་སྣོད་ནི་མི་གཏོང་ན། །ཤིན་ཏུ་བཀྲ་ཤིས་ཚིགས་བཅད་བརྗོད་པ་འམ། །སྟོབས་པོ་ཆེའམ་དགོད་མའམ་ལྕགས་ཀྱུ་བཟླས། །ཡང་ན་རབ་ཏུ་འདུས་པའི་མདོ་སྡེ་བཀླག་།སེང་གེ་གདན་གྱི་ཨརྐའམ་པ་ལ་ཤའི། །ཡམ་ཤིང་མར་གྱིས་བསྐུས་པ་བརྒྱ་ཡང་བསྲེག་།མ་གྲུགས་ཏིལ་ནི་སྦྲུང་རྩི་འམ་མར་གྱིས་བསྐུས། །གཏུམ་པོས་སྦྱིན་སྲེག་ཉི་ཤུ་རྩ་གཅིག་བྱ། །སྔ་མ་བཞིན་དུ་གསང་སྔགས་ཆོ་ག་དག་།དམ་ཚིག་ཅི་བཞིན་མ་ལུས་སྦྱར་ན་ནི། །བདག་གི་ཡིད་དང་འཐུན་པའི་དངོས་གྲུབ་ཐོབ། ། 101.209b སྔགས་པ་ཡུན་རིང་ཉོན་མོངས་མི་འགྱུར་རོ། །འཕགས་པ་དཔུང་བཟང་གིས་ཞུས་པའི་ལེའུ་བདུན་པའོ།། །། སངས་རྒྱས་ཀྱིས་གསུངས་ཡན་ལག་བརྒྱད་ལམ་ནི། །ཡང་དག་འཚོ་དང་ལས་མཐའ་ཏིང་འཛིན་དག་།རྩོལ་དང་རྟོག་དང་དྲན་དང་ལྟ་བ་རྣམས། །སོ་སོ་སོ་སོར་ཡང་དག་བསྟེན་པར་བྱ། །ལམ་འདི་རྣམས་ཀྱིས་གསང་སྔགས་དངོས་གྲུབ་ཅིང ། །དེ་བཞིན་འདིས་ནི་ཐར་པ་མྱུར་དུ་ཐོབ། །རྒྱལ་སྲས་སྔོན་གྱི་རྒྱལ་བ་འདས་པ་དག་།འདི་ནས་གཤེགས་ཤིང་དེ་བཞིན་གཤེགས་པར་འགྱུར། །ངོམས་མེད་སེམས་ཀྱིས་ལུས་དང་ངག་ཡིད་ཀྱིས། །གུས་པར་དགེ་བའི་བསོད་ནམས་གང་བསགས་པའང ། །བདེ་གཤེགས་གསུངས་པའི་བདེན་པའི་ལམ་དམིགས་ན། །དགེ་བའི་ལམ་དེ་ཡང་དག་བསྐྱེད་པ་ཡིན། །ཡོངས་སུ་འཛིན་པ་རྣམ་པར་སྤངས་ནས་སུ། །ཆོས་གོས་དང་ནི་བསོད་སྙོམས་ངན་ངོན་དང ། །སྨན་དང་མལ་སྟན་ངན་ངོན་ཙམ་གྱིས་ཀྱང ། །ཆོག་པའི་སེམས་དང་ལྡན་པས་བསོད་ནམས་ཐོབ། །བདག་ལ་བསྟོད་པ་ནམས་ཀྱང་མི་བྱ་ཞིང ། །སེམས་ཅན་གཞན་ལ་སྨད་པར་མི་བྱའོ། །སྟག་དང་སྦྲུལ་དང་མེ་འདྲར་འཇིག་རྟེན་དག་།བསམས་ནས་སྤངས་ཏེ་དབེན་ལ་དགའ་བར་བྱ། །བུད་མེད་མཚན་ཉིད་སྐྱེས་པའི་མཚན་ཉིད་དང ། །སྨན་དང་གླང་ཆེན་བརྟག་པའམ་སྐར་མའི་དཔྱད། །མཚོན་ཆ་བརྟག་པའམ་རྟ་དཔྱད་རང་བཟོ་འམ། །བསྟན་བཅོས་ངན་པ་སློབ་ཅིང་ཀློག་པ་སྤང ། །གླང་ཆེན་རྟ་དང་བ་ལང་བྱ་གག་ཁྱི། །གོང་མོ་སྲེག་པ་འུག་པ་སྐྱེས་པ་དང ། །བུད་མེད་བུ་མོ་བྱིས་པ་ར་ལུག་སོགས། །ཐབ་མོ་འགྱེད་པ་མི་བལྟ་མི་བྱའོ། །ཡུལ་སའི་གཏམ་དང་མི་དབང་བསྟེན་པ་དང ། །དམག་དང་གྱད་དང་ན་ཆུང་གཏམ་དག་དང ། །སྒྲུང་ལྡེབས་དང་ནི་སྔོན་གྱི་ལོ་རྒྱུས་གཏམ། །འདོད་ཆགས་དང་ནི་སྨད་འཚོང་གཏམ་མི་བྱ། །སྔགས་པས་གསང 101.210a སྔགས་བཟླས་པ་མནོས་པ་ནི། །གྲོང་དང་གྲོང་ཁྱེར་ཁྱིམ་དང་གཙུག་ལག་ཁང ། །མཆོད་རྟེན་བསྟི་གནས་རི་དང་དཀའ་ཐུབ་གནས། །ཀུན་དགའ་ལུ་མའམ་རྫིང་བུར་འགྲོ་མི་བྱ། །སྔར་བཤད་པ་ཡི་གནས་རྣམས་མ་རྙེད་ན། །ལྷ་ཁང་སྟོང་པ་དག་གམ་ཤིང་དྲུང་ངམ། །རི་དང་ཆུ་བོ་ཆུ་ཀླུང་འབབ་ཆུ་དང ། །ནགས་ཚལ་སྟོང་པ་དང་ནི་ཡུལ་སྟོང་དང ། །གནས་གང་རུང་བར་སྔགས་པས་གནས་ཤིང་བཟླས། །ཡང་ན་གནས་ནི་ངེས་པར་མ་བྱས་ན། །ཟླ་བ་བརྒྱད་པོ་འདི་ཡི་དུས་དག་ཏུ། །གནས་འདི་གང་ཡང་རུང་བ་ཞིག་ཏུ་བསྟེན། །མཚོ་དང་ཤིང་དང་རི་བོའམ་དགོན་པའི་གནས། །མཚེའུ་དང་ཁང་པ་གནས་སམ་ཆུ་ངོགས་སུ། །དགུན་དཔྱིད་ཟླ་བ་རྣམས་ལ་གནས་བྱས་ནས། །སྔགས་པས་དབྱར་ནི་གཅིག་ཏུ་གནས་བྱས་ཏེ། །ཅི་ལྟར་རྒྱལ་བས་དགེ་སློང་དབྱར་ཟླ་གསུམ། །ཚུལ་ཞུགས་གནས་གཞན་མི་འགྲོར་གསུངས་པ་བཞིན། །དེ་བཞིན་བཅོམ་ལྡན་འདས་ཀྱིས་བསྔགས་པ་ཡང ། །ཟླ་བ་གསུམ་དུ་གཅིག་ཏུ་གནས་པར་གསུངས། །སྔགས་པས་དབྱར་ནི་བསྒྲུབ་ལ་མི་འཇུག་པར། །བཟླས་བརྗོད་ཀྱིས་ནི་དུས་ཀྱང་འདས་པར་བྱ། །དབྱར་འདས་དང་ནི་གསང་སྔགས་གཟི་བསྐྱེད་པས། །བདག་ཉིད་བསྲུང་བྱས་བསྒྲུབ་ལ་འཇུག་པར་བྱ། །མེ་ཐབ་ཟླུམ་པོ་གྲུ་གསུམ་གྲུ་བཞི་དང ། །པདྨ་ལྟ་བུར་བྱ་ཞིང་དབྱིབས་ལེགས་ཤིང ། །འཇམ་ཞིང་ཤིན་ཏུ་མཉམ་པར་བྱས་ནས་སུ། །དེ་དག་ས་དང་ལྕི་བས་ལེགས་པར་བྱུག་།ཟླུམ་པོ་དབང་ཐང་བསྐྱེད་དང་ནོར་དགུག་དང ། །སྤྱན་དྲང་ཞི་བའི་ཆོ་ག་བྱ་བར་ཤིས། །གྲུ་གསུམ་དུ་ནི་དགར་བསྐྲད་བསད་པ་དང ། །གཤེད་བྱེད་ལ་སོགས་དྲག་པོའི་ལས་ཀྱང་བྱ། །གྲུ་བཞི་པར་ནི་ཀླུ་དང་གསང་བ་པའི། །སྲོག་བསྐམ་པ་འམ་ཡན་ལག་གཞིག་པར་བྱ། །པདྨའི་དབྱིབས་སུ་བུད་མེད་བུ་མོའི་གྲོང ། །ཡུལ་འཁོར་འཐོབ་པའམ་དོན་ཀུན་བསྒྲུབ་པར་ཤིས། །མེ་ཐབ་ལྕི་བ་གཙང་མས་བྱུགས་ནས་ཀྱང ། །ཐ་མ་ཐོག་ཏོག་ཀུ་ཤ་དགྲམ་པར་བྱ། །དཀོན་མཆོག་གསུམ་དང་ཕྱག་ན 101.210b རྡོ་རྗེ་དང ། །ཡུམ་ལའང་དད་པས་ཕྲེང་བ་བདུག་པ་དང ། །དྲི་དང་མ་ཉམས་མེ་ཏོག་ཅི་སྙེད་པས། །ཆོ་ག་བཞིན་དུ་ལེགས་པར་མཆོད་པར་བྱ། །ཡམ་ཤིང་མང་པོ་ཐབ་ཀྱི་དྲུང་བཞག་སྟེ། །རླུང་ཡབ་ཀྱིས་ནི་མེ་ཡང་སྤར་བྱས་ནས། །སངས་རྒྱས་རྣམས་ལ་ཕྱག་བྱས་ཁྲོ་བོ་ནི། །བདུད་རྩི་འཁྱིལ་པས་མ་ཉམས་པད་མ་འམ། །མ་གྲུགས་ཏིལ་ནག་ལས་ནི་བདུན་ནམ་བརྒྱད། །བཅུ་འམ་ཉི་ཤུར་བསྲེག་ལུགས་མེ་ལ་བསྲེག་།ཀུ་ཤ་བཏིང་ངམ་ཁྲེས་སམ་རྩཝ་སྟན་ལ། །འདུག་ནས་ཤར་ཕྱོགས་ཁ་བསྟན་རྫས་རྣམས་ནི། །མར་དང་སྦྲང་རྩི་འོ་མ་ལ་བརྟགས་ནས། །རང་གི་གསང་སྔགས་བསྒྲུབ་ཕྱིར་སྦྱིན་སྲེག་བྱ། །མེ་ཡི་མཚན་མ་ཉེ་བར་བརྟག་པ་ནི། །མེ་སྟག་དུ་བ་མེ་ལྕེ་སྒྲ་རྣམས་ལས། །གྲུབ་པ་དང་ནི་མི་གྲུབ་ཐམས་ཅད་ཀྱང ། །སྔགས་ཀྱིས་བྱིན་བརླབས་མེ་ནི་སྟོན་པར་བྱེད། །དུ་བ་མེད་ཅིང་གསེར་གྱི་མདོག་ལྟར་དངས། །མེ་ལྕེ་རབ་ཏུ་ཆེ་ལ་གཡས་སུ་འཁྱིལ། །ཁ་དོག་འཇའ་འདྲ་ཡང་ན་དཀར་ཡང་རུང ། །ཡང་ན་བྱི་རུ་བཅག་པའི་ཁ་དོག་འདྲ། །ཤིན་ཏུ་སྣུམ་ལ་མེ་ལྕེ་སྒབ་ནས་འཕྲོ། །རབ་ཏུ་འབར་བ་ཉི་མའི་འོད་ཟེར་འདྲ། །དབྱིབས་ནི་བུམ་པ་རྒྱལ་མཚན་གདུགས་ཀྱང་འདྲ། །དཔལ་བེའུ་དང་ནི་པད་མ་བླུགས་བཟར་འདྲ། །མེ་ལྕེ་ཏྲི་ཤཱུལ་རྡོ་རྗེ་རལ་གྲི་འདྲ། །ཡང་ན་ཤིང་རྟ་མཆོག་དང་རྔ་ཡབ་འདྲ། །རྫ་རྔ་རྔ་ཆེན་དང་ནི་གླིང་བུའི་སྒྲ། །དུ་བ་མེ་ལྕེ་དྲི་ཞིམ་མེ་སྟག་བཟང ། །ཡང་ན་མ་སྤར་བར་ནི་འབར་འགྱུར་ན། །དེ་ཚེ་དངོས་གྲུབ་རྒྱ་ཆེན་ཐོབ་པར་འགྱུར། །དུད་པ་ཆེ་ཞིང་མེ་སྟག་རྒོད་པ་དང ། །འབར་བར་དཀའ་ཞིང་ཅུང་ཟད་ཅུང་ཟད་འབར། །མེ་ལྕེ་རྣམ་པར་ཆད་ཅིང་གཟི་མདངས་མེད། །རྩུབ་གནག་སྤྲིན་དང་པ་ལ་ཤ་ཡི་མདོག་།གསལ་ཤིང་འདྲ་ཞིང་ཞིབ་མའི་གཟུགས་ཀྱང་འདྲ། །ཕྱུགས་ཀྱི་མགོ་འདྲ་སྐྲ་ཡང་རབ་ཏུ་རྩུབ། །མེ་ལྕེ་འཕྲོ་བས་སྦྱིན་སྲེག་བྱེད་པ་ཚིག་།མི་རོའི་དྲི་ང་དངོས་གྲུབ་མེད་པ་སྟོན། །མེ་ལྕེའི་མཚན་མ་འདི་འདྲ་མཐོང་ནས་ཀྱང ། །སྟོབས་པོ་ཆེ་ཡི་མར་གྱིས་སྦྱིན་སྲེག་བྱ། །བྱིན་པ་དག་དང་མཆན་ཁུང་སྤུ་རྣམས་ནི། ། 101.211a ལག་པས་ཀྱང་ནི་བཏོག་པར་མི་བྱ་ཞིང ། །མེ་ཡིས་མི་བསྲེག་སྤུ་གྲིས་བྲག་མི་བྱ། །སྤུ་མེད་བྱ་ཕྱིར་སྨན་གྱིས་མི་བྱུག་གོ། །ཇི་ལྟར་རལ་གྲི་སོ་ལ་འཛིན་པའི་མིས། །ལེགས་པར་མ་བཟུང་ལག་པ་ཆོད་པ་ལྟར། །དེ་བཞིན་སྔགས་ཀྱང་ལེགས་པར་མ་བཟླས་ན། །འབྲས་བུ་མེད་དམ་ཡང་ན་ཕུང་བར་འགྱུར། །མི་ནི་ཚུལ་ཁྲིམས་གཙང་སྦྲ་མི་ལྡན་ཡང ། །གསང་སྔགས་ལྷ་ནི་དེ་ལ་གནོད་མི་མཛད། །ལྷ་ཡི་འཁོར་དུ་གྱུར་པ་གང་ཡིན་རྣམས། །མི་ཡི་གླགས་མཐོང་ནས་ནི་ཕུང་བར་བྱེད། །བསྒྲུབ་པ་ཀུན་ལ་དང་པོ་ཁོ་ནར་ནི། །ལྷ་བཤོས་གཏོར་མ་ཕལ་ཆེར་དབུལ་བར་བྱ། །སྔགས་པའི་ལས་གྲུབ་ནས་ཀྱང་དུས་ཀུན་ཏུ། །རང་གི་ཉམས་ཀྱིས་ཅི་སྙེད་དབུལ་བར་བྱ། །ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ནམ་མཁའ་ལྡིང་དང་འདབ་བཟང་ལུས་སྲུལ་པོ། །དྲི་ཟ་སྲིན་པོ་གདོན་གྱི་རིགས་རྣམས་དང ། །གང་དག་ས་ལ་གནས་པའི་རྫུ་འཕྲུལ་ཅན། །བུ་སྨད་གཡོག་འཁོར་ཚོགས་དང་བཅས་རྣམས་ལ། །བདག་གིས་པུས་མོ་ས་ལ་བཙུགས་ནས་སུ། །ཐལ་མོ་སྦྱར་ནས་ཁྱེད་ལ་གསོལ་འདེབས་ཀྱིས། །གནས་ནས་ཕན་གདགས་ཕྱིར་ནི་འདིར་སྤྱོན་ཅིག་།འབྱུང་པོ་གང་དག་རི་རབ་སྟེང་གནས་དང ། །དགའ་བའི་ཚལ་དང་ལྷ་ཡི་གནས་རྣམས་དང ། །ཤར་ནུབ་རི་དང་ཉི་ཟླའི་ཁྱིམ་རྣམས་དང ། །རི་བོ་ཀུན་ལ་གང་དག་གནས་པ་དང ། །ཆུ་བོ་ཀུན་དང་ཆུ་ཡི་མདོ་རྣམས་དང ། །རིན་ཆེན་གནས་ན་ལྷག་པར་གང་གནས་དང ། །མཚོ་དང་རྫིང་དང་ལྟེང་ཀ་ཆུ་ངོགས་དང ། །གཡའ་ཆུ་སིལ་མ་ཅན་ན་གང་གནས་དང ། །གྲོང་དང་ཕྱུགས་ལྷས་གྲོང་ཁྱེར་སྟོང་པ་འམ། །ཁང་སྟོང་དང་ནི་ལྷ་ཡི་ཁང་པ་དང ། །གཙུག་ལག་ཁང་དང་མཆོད་རྟེན་གནས་དག་གམ། །དཀའ་ཐུབ་གནས་སམ་གླང་ཆེན་བྲེས་དག་གམ། །རྒྱལ་པོའི་དཀོར་ཁང་དག་ན་གང་གནས་དང ། །ལམ་སྲང་མདུན་ས་དང་ནི་བཞི་མདོ་དང་དང ། །གང་དག་ལམ་པོ་ཆེ་དང་ཤིང་གཅིག་དང ། །དུར་ཁྲོད་ཆེན་པོའམ་ནགས་ཚལ 101.211b ཆེན་པོ་དང ། །སེང་གེ་དྲེད་དང་གཅན་ཟན་གནས་དག་དང ། །འབྲོག་ཆེན་འཇིགས་སུ་རུང་བར་གང་གནས་དང ། །གང་དག་གླིང་མཆོག་རྣམས་ན་གནས་པ་དང ། །ལྷུན་པོ་དུར་ཁྲོད་དག་ན་གནས་པ་རྣམས། །རབ་ཏུ་དགྱེས་ཤིང་མགུ་བར་གྱུར་ནས་སུ། །ཕྲེང་བ་མེ་ཏོག་དྲི་དང་བདུག་པ་དང ། །བསྟོད་དང་གཏོར་མ་མར་མེ་གུས་འབུལ་བ། །འདི་དག་བཞེས་ནས་བཏུང་ཞིང་བསྣམས་ནས་སུ། །ལས་འདི་རྣམས་ཀྱི་འབྲས་བུ་མཆིས་པར་མཛོད། །དེ་ལྟར་གདོན་ལ་མཆོད་པ་བྱས་ནས་སུ། །དེ་ནས་ཕྱོགས་སྐྱོང་རྣམས་ལ་མཆོད་པ་བྱ། །དབང་བདག་འབྱུང་པོའི་བདག་པོར་བཅས་པ་ཡིས། །གཏོར་མ་ཕུལ་བ་འདི་དག་བཞེས་སུ་གསོལ། །མེ་དང་གཤིན་རྗེ་སྲིན་པོ་ཆུ་བདག་དང ། །རླུང་དང་ལུས་ངན་འབྱུང་པོ་གདོན་དང་བཅས། །སྟེང་གི་ཉི་ཟླ་ཚངས་པ་ཆེན་པོ་དང ། །ལྷ་རྣམས་ཀུན་དང་ས་ཡི་ཀླུ་རྣམས་དང ། །རི་ཡི་ལྷ་དང་གནོད་སྦྱིན་ཚོགས་རྣམས་ལ། །སོ་སོ་སོ་སོར་གཏོར་མ་ཕུལ་བ་རྣམས། །རབ་ཏུ་དགྱེས་པ་ཡིས་ནི་བཞེས་ནས་ཀྱང ། །རང་རང་ཕྱོགས་སུ་ལེགས་པར་བཞུགས་ནས་སུ། །རང་གི་བུ་སྨད་མཛའ་བཤེས་གཉེན་འདུན་དང ། །ནང་མི་དཔུང་བཅས་དམག་དང་ཐབས་ཅིག་ཏུ། །མེ་ཏོག་དྲི་དང་གཏོར་མ་བྱུག་པར་བཅས། །འདི་རྣམས་བཏུང་ཞིང་ལེགས་པར་གསོལ་ནས་ཀྱང ། །བདག་གི་ལས་འདིའི་འབྲས་བུ་མཆིས་པར་མཛོད། །དེ་ལྟར་གང་ཞིག་མཚན་མོ་རྒྱུ་བ་ལ། །གཏོར་མ་གཏོང་བའི་ལས་རྣམས་བྱེད་པ་དེའི། །དངོས་གྲུབ་མྱུར་ཞིང་ཤིན་ཏུ་བགེགས་ཀྱང་མེད། །ཡིད་དུ་འོང་བའི་འདོད་པའང་ཐོབ་པར་འགྱུར། །འཕགས་པ་དཔུང་བཟང་གིས་ཞུས་པའི་ལེའུ་བརྒྱད་པའོ།། །། གང་ཞིག་དགྲ་བཅོམ་ཕ་མ་གསོད་པ་དང ། །འཐུན་པའི་དགེ་འདུན་དབྱེན་ནི་བྱེད་པ་དང ། །དེ་བཞིན་གཤེགས་ལ་སྡང་བའི་སེམས་ཀྱིས་སུ། །ནམ་ཞིག་མི་དག་སྐུ་མཚལ་འབྱིན་བྱེད་པ། །ཤིན་ཏུ་མི་བཟད་པ་ཡི་ལས་འདི་རྣམས། །རྒྱལ་བས་མཚམས་མེད་ལྔ་པོ 101.212a ཡིན་པར་བཤད། །གཏི་མུག་ཅན་གྱིས་སྡིག་པ་གཅིག་བྱས་ཀྱང ། །ཕུང་པོ་འདི་ལ་གྲུབ་པ་ཐོབ་མི་འགྱུར། །མཆོད་རྟེན་འཇིག་ཅིང་བྱང་ཆུབ་སེམས་དཔའ་གསོད། །ཉོན་མོངས་ཟད་པའི་མ་ནི་སུན་འབྱིན་དང ། །སློབ་པ་གསོད་ཅིང་དགེ་འདུན་མངའ་བ་ལ། །གང་ཞིག་འདོད་པས་མང་ཉུང་རྐུ་འཕྲོག་པ། །མཚམས་མེད་ཉེ་ལྔར་དེ་བཞིན་གཤེགས་པས་གསུངས། །ཚུལ་ཉམས་མི་ནི་གང་ཞིག་འདི་བྱེད་པ། །བསྐལ་པའི་བར་དུ་མནར་མེད་སྡུག་བསྔལ་མྱོང ། །གསང་སྔགས་དངོས་གྲུབ་བསྒྲིམས་ཀྱང་ཡོང་མི་ཐོབ། །གང་ཞིག་བདེ་གཤེགས་གསུང་གི་གླེགས་བམ་དག་།ཆུད་གསོན་པ་དང་མེས་ནི་སྲེག་པ་དང ། །བསམ་པ་ངན་པས་ཆུར་ནི་འདོར་བ་དང ། །ཡང་ན་ཆོས་ཀྱི་སྐུ་ནི་སྤོང་བ་འམ། །བསླབ་ཚིག་མ་ལུས་པས་ནི་བརྒྱན་པ་ཡི། །དགེ་སློང་དག་གམ་དགེ་སློང་མ་གསོད་དང ། །དགེ་བསྙེན་དང་ནི་དགེ་བསྙེན་མ་གསོད་དང ། །ངན་པའི་སེམས་ཀྱིས་ལྷ་ཁང་བསྲེགས་ཀྱང་རུང ། །མི་ཡི་ཡུལ་ན་སྡིག་པ་འདི་བྱས་པ། །དཀའ་བ་སྤྱོད་པར་ལྡན་ཡང་གྲུབ་མི་ཐོབ། །གང་ཞིག་དཀོན་མཆོག་གསུམ་ལ་གནོད་པ་ཡི། །བསམ་པས་གནོད་པ་ཅུང་ཟད་བྱས་ཀྱང་རུང ། །བདག་ཉིད་ངན་པས་དམྱལ་བར་བཙོས་པར་འགྱུར། །དེ་ནས་ཤི་ནས་ལས་ཀྱི་དབང་གིས་ཡང ། །རིགས་ངན་མི་ཡི་ནང་དུ་སྐྱེ་བ་འཐོབ། །འདི་དག་ངས་ནི་ཁྱོད་ལ་མདོར་བཤད་དོ། །གང་ཞིག་བྱང་ཆུབ་སེམས་ནི་བླངས་པ་ལས། །རྨོངས་པས་འཇིག་རྟེན་ལྷ་ཚོགས་ཕྱག་བྱས་ན། །དེ་དག་དེ་ལ་མི་དགར་གྱུར་ནས་སུ། །དེ་ཡི་གསང་སྔགས་དངོས་གྲུབ་ཉམས་པར་བྱེད། །གང་གི་ཚེ་ན་སེམས་ནི་དང་བ་ཡིས། །མི་ཡི་ཡུལ་ན་བྱང་ཆུབ་སེམས་བླངས་པས། །དེ་ནི་ཕྱིན་ཅད་ལྷ་དང་ལྷ་མིན་དང ། །འཇིག་རྟེན་མ་ལུས་རྣམས་ཀྱིས་ཕྱག་བྱར་འོས། །མིས་ནི་མངོན་པར་མཐོ་བ་མ་ལུས་པའི། །བསླབ་པ་མཐའ་དག་བླངས་པར་གྱུར་བ་དང ། །སེམས་ཅན་ཀུན་ལ་མི་འཇིགས་སྦྱིན་པ་དང ། །དཀོན་མཆོག་གསུམ 101.212b གྱི་རྒྱུད་དུ་སྙིང་ནས་སྐྱེས། །གང་ཞིག་མི་བཟད་ལས་བྱེད་ཐུབ་པ་གསོད། །རིག་སྔགས་གཅོད་དམ་གནོད་པར་བྱེད་པའམ། །བསམ་པ་ངན་པས་གསང་སྔགས་ཚོགས་མི་མཆོད། །དོན་མེད་བཞིན་དུ་སེན་མོས་རྩཝ་གཅོད་དང ། །རྐང་པས་རྐང་པ་ཉེད་པར་བྱེད་པ་དང ། །ཕྱུགས་ལ་སོགས་པའི་ཚོགས་ཀྱི་སྣ་འབུགས་དང ། །འབྱུང་པོར་བྱིན་པའམ་ལྷ་ཡི་གཏོར་མ་འམ། །ས་ལ་ལྷུང་བ་སྔགས་པས་བཟའ་མི་བྱ། །འདོད་ཆགས་ཟིལ་གྱིས་གནོན་པའི་དུད་འགྲོ་དང ། །བུད་མེད་བགྲོད་བྱ་མིན་པར་འགྲོ་མི་བྱ། །གླང་ཆེན་མི་གདུལ་སྦྲུལ་ཡང་མི་གཟུང་ཞིང ། །རྟ་རྒྱུག་གློ་རྡེབས་ལྕག་གིས་བཞུ་མི་བྱ། །ལས་དེ་རྣམས་དང་ལྡན་པར་གྱུར་བ་དེའི། །དངོས་གྲུབ་ནམ་ཡང་འབྱུང་བར་མི་འགྱུར་རོ། །སེམས་ཅན་ནད་ཀྱིས་གདུངས་དང་སྡུག་བསྔལ་ལ། །རྟག་ཏུ་བྱམས་པ་ཡང་ནི་ཡིད་ལ་བྱ། །དཔེར་ན་ནམ་མཁའ་མཐའ་ཐུག་མེད་པ་ལ། །འདོམ་གྱིས་གཞལ་བས་མཐའ་རྟོགས་མི་ནུས་ལྟར། །དེ་བཞིན་དཀོན་མཆོག་གསུམ་ལ་བརྟེན་ནས་ནི། །ཕན་དང་གནོད་པ་བྱས་པའི་མཐའ་མི་རྟོགས། །རྒྱ་དང་སྙི་དང་བོང་རྒྱ་མཛོལ་བུ་ཡིས། །ཁྱི་ལ་སོགས་པས་སེམས་ཅན་གསོད་པ་དང ། །བྱ་རོག་ལ་སོགས་གཟིབ་ཀྱིས་བཅིང་བྱས་ན། །འདི་དང་ཕ་རོལ་དུ་ཡང་གྲུབ་མི་ཐོབ། །བདུད་དགྲའི་མེ་ཏོག་རྙིང་པ་བོར་བ་རྣམས། །རྐང་པས་མི་རྫི་མགོ་ལ་གདགས་མི་བྱ། །བཀྲེས་པས་གདུངས་ཀྱང་དེ་དག་རྣམས་ལ་ནི། །ཕུལ་བའི་ལྷ་བཤོས་རྣམས་ཀྱང་བཟའ་མི་བྱ། །འཇིགས་ཀྱང་ཚངས་པ་བརྒྱ་བྱིན་ཁྱབ་འཇུག་དང ། །དྲག་པོ་རླུང་ལ་སོགས་ལ་ཕྱག་མི་བྱ། །དེ་ཡིས་བཤད་པའི་ཆོས་ལ་བསྟེན་མི་བྱ། །དེ་དག་དཀའ་ཐུབ་མི་སྤྱད་རྟགས་མི་མཆོད། །དེ་རྣམས་ཆོས་ལའང་ངན་སེམས་མི་བྱ་ཞིང ། །དེ་ཡི་སྤྱོད་ལ་ནམས་ཀྱང་དགའ་མི་བྱ། །དེ་དག་བསྟོད་པ་མི་གདོན་སྔགས་མི་བཟླས། །སྦྱིན་པ་བྱིན་ཚེ་སྙིང་རྗེ་བསྐྱེད་ནས་སྦྱིན། ། 101.213a བདེ་བར་གཤེགས་པ་རྣམས་ཀྱིས་བརྟེན་པ་ཡི། །གནས་དང་རྒྱལ་སྲས་རྣམས་ལ་ཕྱག་བྱའོ། །རང་སངས་རྒྱས་དང་རྒྱལ་བའི་ཉན་ཐོས་རྣམས། །དེ་དག་རྟག་ཏུ་ཕྱག་བྱའི་གནས་ཡིན་ནོ། །ཇི་ལྟར་ཟླ་བ་ཚེས་ལ་མི་རྣམས་ནི། །ཕྱག་འཚལ་ཉ་ལ་ལུས་ཅན་ཕྱག་མི་འཚལ། །དེ་བཞིན་དད་པས་རྒྱལ་བའི་ཐུགས་སྲས་ལ། །ཕྱག་བྱའི་དེ་ལྟར་བདེ་བར་གཤེགས་ལ་མིན། །འཇིག་རྟེན་ཀུན་གྱི་མངོན་མཐོང་སླབ་པ་ཅན། །སྙིང་རྗེའི་བདག་ཉིད་འགྲོ་བའི་དོན་དུ་ནི། །སྐྱེ་བ་ལེན་པ་དེ་ལ་ཅི་ཡི་ཕྱིར། །བུ་གཅིག་བདག་ཉིད་ཀུན་དེར་ཕྱག་མི་བྱ། །སྐྱེས་བུ་བསམ་ཡས་རྨད་བྱུང་རྫུ་འཕྲུལ་ཅན། །དེ་ལ་མི་ངན་གང་ཞིག་མི་འདུད་པ། །དེ་ལ་རྒྱལ་བ་ཐམས་ཅད་ཐུགས་ནུར་ནས། །དེ་ཡི་གསང་སྔགས་དངོས་གྲུབ་མི་སྩོལ་ལོ། །དཔེར་ན་ཤིང་གི་མེ་ཏོག་དང་པོར་ནི། །ཡིད་འོང་ཕྱི་ནས་འབྲས་བུར་གྱུར་པ་ལྟར། །སེམས་ཅན་མཆོག་རྣམས་མེ་ཏོག་འདྲ་བར་ལྟོས། །འབྲས་བུ་བཞིན་དུ་རྒྱལ་བ་རིག་པར་གྱིས། །གང་ཞིག་རང་བཞིན་ཆགས་དང་རྣམ་བྲལ་ཡང ། །བརྩེ་ལ་སྙིང་རྗེ་ཁྲོ་ལ་ཁྲོ་བ་དང ། །འདོད་ཆགས་ཅན་ལ་ཆགས་ཅན་ལྟར་སྟོན་པ། །བྱང་ཆུབ་ཚུལ་གནས་དེ་ལ་ཕྱག་འཚལ་ལོ། །གང་ཞིག་ལས་དང་རྣམ་སྨིན་མཁྱེན་པ་ཡིས། །འགྲོ་བ་ཀུན་དང་ཅི་ལྟར་འཐུན་པ་ཡི། །གསང་སྔགས་གཟུགས་ཀྱི་རྗེས་སུ་འཇུག་མཛད་པ། །སྔགས་ཀྱིས་རྣམ་འདྲེན་དེ་ལ་ཕྱག་འཚལ་ལོ། །འཕགས་པ་དཔུང་བཟང་གིས་ཞུས་པའི་ལེའུ་དགུ་པའོ།། །། ལྷདགུ་པའོ་དང་ལྷ་མིན་མི་ལ་ཕན་གདགས་ཕྱིར། །གསང་སྔགས་རིག་སྔགས་རྣམ་པ་སྣ་ཚོགས་དང ། །འབུམ་ཕྲག་ལྔ་དང་བྱེ་བ་ཕྲག་གསུམ་དག་།རིག་འཛིན་སྡེ་སྣོད་བཤད་པར་རྒྱལ་བས་གསུངས། །ངས་ནི་གསང་བ་པ་རྣམས་གཞོམ་པ་དང ། །དབུལ་བའི་སྡུག་བསྔལ་བསལ་བར་བྱ་བའི་ཕྱིར། །དཀྱིལ་འཁོར་བཅས་ཤིང་ཕྱག་རྒྱར་ལྡན་པ་ཡི། །གསང་སྔགས་བྱེ་བ་ཕྲག་བདུན་རབ་ཏུ་བཤད། །ཕོ་ཉ་བཅུ་དང་རིག་པའི་རྒྱལ་པོ་བདུན། ། 101.213b དེ་བཞིན་ཕྱག་བརྙན་དྲུག་བཅུ་རྩ་བཞི་དང ། །ང་ཡི་སྙིང་པོ་དམ་པ་བརྒྱད་རྣམས་དང ། །ཁྲོ་བོ་དྲག་པོ་བདུད་རྩི་ཐབས་སྦྱོར་དང ། །རིག་པ་མཆོག་ལ་སོགས་པ་མཐུ་བོ་ཆེ། །རིག་པའི་བདག་པོ་གསང་སྔགས་རྗེས་འབྲང་བཅས། །དེ་སྙེད་རྡོ་རྗེའི་རིགས་ནི་གང་ཡིན་པ། །དེར་ནི་འདི་དག་ང་ཡིས་རྒྱ་ཆེར་བཤད། །སྤྱན་རས་གཟིགས་ཀྱིས་གསང་སྔགས་བྱེ་བ་ཕྲག་།གསུམ་དང་དེ་བཞིན་འབུམ་ཕྲག་ལྔ་རྣམས་བཤད། །དེ་ཡི་རིག་སྔགས་བདག་པོ་རྟ་མགྲིན་དང ། །དེ་ཡི་མིང་ཅན་དཀྱིལ་འཁོར་དམ་པ་གསུངས། །བཅུ་གཉིས་ཕྱག་དང་ཕྱག་དྲུག་པ་དང་ནི། །ཐོར་བཙུགས་ཅོད་པན་འདོད་པ་འབྱོར་བྱེད་དང ། །ཞལ་བཞི་དོན་ཡོད་ཞགས་པར་བདུན་བསྟན་འདི། །ས་སྟེང་གསང་སྔགས་ཉི་མ་བདུན་ལྟར་འབར། །དེ་རྣམས་རྟ་མགྲིན་དཀྱིལ་འཁོར་གསང་སྔགས་ཏེ། །མི་ལ་མཆོག་སྦྱིན་འཇིག་རྟེན་གསུམ་གྱིས་འདུད། །སྒྲོལ་མ་དཀར་མོ་གོས་དཀར་སྤྱན་མ་དང ། །རྣམ་གཟིགས་རལ་པ་གཅིག་མ་དཀར་ཤམ་དང ། །གྲགས་ལྡན་ཁྲོ་གཉེར་ཅན་དང་འདི་དག་རྣམས། །པད་མོའི་རིགས་ཀྱི་རིག་སྔགས་རྒྱལ་མོ་མཆོག་།དེ་དག་དཀྱིལ་འཁོར་སྣ་ཚོགས་གཟུགས་ཅན་དང ། །ཕྱག་རྒྱ་རྣམ་པ་སྣ་ཚོགས་རྣམས་དང་ལྡན། །རྒྱས་པའི་གསང་སྔགས་རྒྱུད་དུ་འོག་པག་ཅན། །རིག་པའི་དབང་ཕྱུག་གསང་སྔགས་བདག་པོར་བསྒོམ། །དེ་ཡི་གསང་སྔགས་མི་ལ་གྲུབ་མཆོག་སྟེར། །དེ་ལ་ལྔས་རྩེན་ཡང་ནི་མངོན་པར་དགའ། །གནོད་སྦྱིན་དབང་ཕྱུག་དེ་དག་རྟག་འཐུན་པས། །དེ་ཡི་བཀའ་ཡིས་གསང་སྔགས་ཚོགས་རྣམས་བཤད། །ལྔས་རྩེན་གྱིས་ནི་སྟོང་ཕྲག་ཉི་ཤུ་སྟེ། །དེ་ཡི་ཆུང་མས་དེ་ཡི་ཕྱེད་བཤད་དོ། །ནོར་གྱི་བདག་པོས་སྟོང་ཕྲག་སུམ་བཅུ་སྟེ། །གང་པོ་ཕ་ཡིས་ཀྱང་ནི་འབུམ་བཤད་དོ། །ལྷ་དང་ལྷ་མིན་ལ་སོགས་རྒྱལ་བ་ལ། །དད་པ་རྣམས་ཀྱིས་གསང་སྔགས་མཐའ་ཡས་བཤད། །ཁ་ཅིག་ང་ཡི་རིགས་སུ་གཏོགས་པ་སྟེ། །ཁ་ཅིག་ཀྱང་ནི་པད་མོའི་རིགས་སུ་གཏོགས། །ཁ་ཅིག་ནོར་གྱི་རིགས་སུ་གཏོགས་པ་ཡིན། ། 101.214a གཞན་ཡང་ཁ་ཅིག་གནས་མེད་རྣམ་པར་འཁྱམ། །ནོར་སྤྱོད་ཅེས་བྱ་ནོར་གྱི་རིགས་སུ་གསུངས། །ང་ནི་རྡོ་རྗེའི་རིགས་ཤེས་རབ་ཏུ་བསྟན། །སྤྱན་རས་གཟིགས་དབང་པད་མའི་རིགས་ཡིན་ཏེ། །རིགས་བཞི་པ་ནི་འདིར་ཡང་ལྔས་རྩེན་ཡིན། །གསང་སྔགས་མདོ་སྡེར་ངས་བཤད་གང་ཡིན་ཏེ། །བཞི་པོ་འདིར་ནི་རྣམ་པར་སྦྱར་བར་བྱ། །གཞན་ཡང་འདི་ན་ཁ་ཅིག་གནས་མེད་པར། །བདེ་བར་གཤེགས་ལ་བརྟེན་ཅིང་ཡོངས་འཁྱམ་པ། །མདོ་སྡེ་འདིར་ནི་དེ་དག་ཐམས་ཅད་ཀྱང ། །འབྱོར་པ་འདོད་པའི་མིས་ནི་རྣམ་པར་སྦྱར། །ལམ་འདི་ཉིད་དུ་ཞུགས་པའི་སྔགས་པས་ནི། །ཡིད་དང་མཐུན་པའི་དངོས་གྲུབ་ཐོབ་པར་འགྱུར། །སྲིད་གསུམ་ནང་ན་རྒྱལ་བ་དཀོན་མཆོག་སྟེ། །དེ་ཡི་འོག་ཏུ་དེ་ལས་བྱུང་བའི་ཆོས། །དེ་ཡི་དགེ་འདུན་སྐྱེས་ཆེན་བརྒྱད་པོ་སྟེ། །སྲིད་པ་གསུམ་ན་དཀོན་མཆོག་གསུམ་པོ་གཙོ། །འདི་གསུམ་བསོད་ནམས་རྣམ་འཕེལ་རྒྱུ་ཡིན་པས། །དངོས་གྲུབ་འདོད་པས་གསང་སྔགས་མགོ་ལ་གདོན། །བསོད་ནམས་ཆེད་དང་ལོག་འདྲེན་རྨོངས་བྱའི་ཕྱིར། །ཕྱག་ན་རྡོ་རྗེ་གཏུམ་མཆོག་ཕྱག་འཚལ་ཞེས། །གསང་སྔགས་རྣམས་ཀྱི་མགོ་ལ་སྦྱར་བྱ་བར། །གནོད་སྦྱིན་མགོན་པོ་ངས་ནི་བཤད་པ་ཡིན། །ནོར་གྱི་རིགས་དང་པད་མའི་རིགས་ལ་ཡང ། །རང་གི་གསང་སྔགས་བདག་པོར་ལྡན་པར་བྱ། །བདེ་བར་གཤེགས་མིན་ཉན་ཐོས་ལམ་ཞུགས་དང ། །རང་རྒྱལ་རྣམས་ཀྱི་ལམ་ལ་གནས་པ་དང ། །དད་པ་མེད་ཅིང་ཚུལ་འཆོས་འཇུངས་པ་ཡིས། །ང་ཡི་རྡོ་རྗེ་ནམ་ཡང་བཅང་མི་བྱ། །གང་ཞིག་ཐེག་པ་མཆོག་ལ་ལྡང་བ་དང ། །བདུད་ཀྱིས་བཤད་པ་ཡིན་ཞེས་ཟེར་བ་དང ། །རྨོངས་པ་ང་ལ་གནོད་སྦྱིན་ཞེས་སྨྲ་དང ། །བྱང་ཆུབ་སེམས་དཔའ་ལ་ནི་མི་འདུད་པའི། །དགེ་སློང་དགེ་སློང་མ་དང་དགེ་བསྙེན་དང ། །དགེ་བསྙེན་མ་དང་འཇིག་རྟེན་པ་རྣམས་ཀྱིས། །ང་ཡི་རིགས་ཀྱི་གསང་སྔགས་བཟླས་བརྗོད་ན། །དེ་དག་རྣམས་ཀྱི་ལུས་ནི 101.214b མྱུར་དུ་འཇིག་།གང་ཞིག་ང་རིགས་རྗེས་སུ་འབྲང་བའི་གདོན། །འབྱུང་པོ་གནོད་སྦྱིན་ཀླུ་དང་ཤ་ཟ་ཡིས། །ང་ཡི་སྔགས་བརྗོད་རྡོ་རྗེ་ཐོགས་པ་དག་།མཐོང་ན་ཁྲོས་ནས་ཕུང་བར་བྱེད་པར་འགྱུར། །གང་ཞིག་ཐེག་མཆོག་རྒྱ་ཆེན་ཀློག་པ་དང ། །དེ་ལ་དད་ཅིང་དེ་ཉིད་འཆད་པར་སྤྲོ། །བརྩོན་འགྲུས་ཆེ་ཞིང་བྱང་ཆུབ་སེམས་བརྟན་པ། །དེ་ལ་ང་ཡི་གསང་སྔགས་མཆོག་སྦྱིན་མཛད། །ངས་ནི་འགྲོ་ལ་ཕན་ཕྱིར་སངས་རྒྱས་པའི། །གསང་སྔགས་ཡངས་ཤིང་རྒྱས་པར་བཤད་པ་ཡིན། །དེ་ནས་གཞན་ཡང་འཇིག་རྟེན་པ་བསྡུས་ནས། །ཞར་ལ་བཤད་པ་འདི་དག་ཁྱོད་ཀྱིས་ཉོན། །དྲག་པོ་ཡིས་ནི་བྱེ་བ་ཕྲག་བཅུ་བཤད། །ནོར་ལྷའི་བུས་ནི་སྟོང་ཕྲག་སུམ་བཅུ་སྟེ། །ཚངས་པ་ཡིས་ནི་སྟོང་ཕྲག་དྲུག་བཅུ་ཉིད། །ཉི་མས་ཀྱང་ནི་འབུམ་ཕྲག་གསུམ་བཤད་དོ། །ནམ་མཁའ་ལྡིང་གིས་སྟོང་ཕྲག་བཅཝ་བརྒྱད་དེ། །གཏུམ་བྱེད་མས་ནི་སྟོང་ཕྲག་བརྒྱད་བཤད་དོ། །མེ་ཡིས་ཀྱང་ནི་བརྒྱ་ཕྲག་བདུན་ཉིད་དེ། །ཕུར་བུ་གསུམ་པ་ཡིས་ནི་སྟོང་བཤད་དོ། །ཀླུ་ཡི་རྒྱལ་པོ་རྣམས་ཀྱིས་ལྔ་སྟོང་སྟེ། །མཚན་མོ་རྒྱུ་དབང་སྟོང་ཕྲག་བཅུ་གཉིས་བཤད། །འགྲོ་ལ་ཕན་ཕྱིར་འཇིག་རྟེན་བདག་པོ་བཞིས། །འབུམ་ཕྲག་བཞི་ནི་རབ་ཏུ་བཤད་པ་ཡིན། །ལྷ་མིན་དབང་པོས་འབུམ་ཕྲག་གཉིས་ཉིད་དེ། །ལྷ་ཡི་དབང་པོས་ཀྱང་ནི་འབུམ་ཕྲག་གསུམ། །གསང་སྔགས་ཕྱག་རྒྱ་སྣ་ཚོགས་ཆོ་གར་ལྡན། །སོ་སོའི་གཞུང་གི་དཀྱིལ་འཁོར་རྣམས་དང་བཅས། །རང་སྔགས་མདོ་སྡེའི་རྗེས་འབྲང་དད་བསྐྱེད་ན། །མ་བསྒྲིམས་བཞིན་དུ་ཐེ་ཚོམ་མེད་པར་འགྲུབ། །དེ་ལས་བཟློག་ན་དངོས་གྲུབ་མི་ཐོབ་ལ། །སྡུག་བསྔལ་མང་པོ་ཡང་ནི་འཐོབ་པར་འགྱུར། །འཕགས་པ་དཔུང་བཟང་གིས་ཞུས་པའི་ལེའུ་བཅུ་པའོ།། །། བཅུད་ཀྱིས་ལེན་དང་གཏེར་དང་ཕུག་འགྲོ་དང ། །ནོར་བསྒྱུར་འབྱུང་ཁུང་སྔགས་དང་གསེར་བསྒྱུར་རྩི། །རིན་ཐང་མེད་པའི་རིན་ཆེན་ནོར་སྦྱིན་ཏེ། །བརྒྱད་པོ 101.215a བརྟན་པ་ཡོངས་སུ་བསྒྲགས་པ་ཡིན། །སྔགས་དང་ཕུག་ཏུ་འགྲོ་དང་བཅུད་ཀྱིས་ལེན། །སྡིག་པ་སྤོང་བར་བྱེད་པས་མཆོག་ཏུ་བསྟན། །རིན་ཆེན་དང་ནི་གཏེར་དང་འབྱུང་ཁུང་འབྲིང ། །གསེར་བསྒྱུར་རྩི་དང་ནོར་བསྒྱུར་ཐ་མའོ། །མི་ནི་སེམས་སྟོབས་ལྡན་ཞིང་ཆོས་ལ་བརྩོན། །དཀའ་ཐུབ་ཀྱིས་ཕྱུག་དང་པོར་བསྟན་པའི་སྣོད། །རྡུལ་ཤས་ཆེ་བ་ལ་ནི་འབྲིང་པོར་གསུངས། །ཐ་མ་ལ་ནི་མུན་པ་ཅན་གྱིས་བརྟེན། །གང་ཞིག་མཆོག་ཏུ་བསྟེན་འདོད་པ། །དེས་ནི་ཐ་མར་བསྟན་པ་རྣམ་པར་སྤང ། །གལ་ཏེ་ནོར་ལ་སྲེད་ཅིང་སྡུག་བསྔལ་གྱིས། །གདུངས་ན་འབྲིང་པོ་ལ་ནི་བརྟེན་པར་བྱ། །ལྷ་ཡི་བདེ་བ་དང་ནི་འབྱོར་བ་དང ། །ཚེ་དང་སྟོབས་གཟུགས་ཕུན་སུམ་ཚོགས་པ་དང ། །ཐོས་མང་མདངས་བཟང་གཅིག་ཏུ་ཡིད་གཞུངས་དང ། །དབང་ཐང་ཆེ་ཀུན་དཀའ་ཐུབ་སྟོབས་ཀྱིས་འཐོབ། །ཆགས་ལ་རྣམ་བྲལ་དགེ་ལ་དགའ་བ་དང ། །རྟག་ཏུ་དཀོན་མཆོག་གསུམ་ལ་སེམས་གཞོལ་དང ། །སྡིག་པ་སྤངས་ཤིང་བཟླས་བརྗོད་ལྡན་པ་ཡི། །མི་ལ་ལྷ་རྫས་དངོས་གྲུབ་རིང་བ་མེད། །རྡོ་རྗེ་མཚོན་མེ་གནམ་ལྕགས་མཐུ་འདྲ་བའི། །གསང་སྔགས་མི་ཡི་འཇིག་རྟེན་མཆོག་སྦྱིན་མཛད། །འཇིག་རྟེན་འདི་དང་ཕ་རོལ་ཉིད་ན་ཡང ། །སྡུག་བསྔལ་སེལ་ཅིང་སྡིག་འཇོམས་གཞན་མེད་དོ། །གང་ཞིག་དཔག་བསམ་ལྗོན་པའི་ཤིང་ལྟ་བུར། །ལ་ལར་དངོས་གྲུབ་ལ་ལར་བསོད་ནམས་དང ། །གཞན་ལ་གཟུགས་སྟོབས་ཆེ་དང་བདེ་བ་དག་།ཡིད་མཐུན་འབྲས་བུ་འདོད་པའི་མི་ལ་སྩོལ། །གསང་སྔགས་སྣ་ཚོགས་གཟུགས་སུ་རྣམ་སྤྲུལ་ནས། །གང་ཞིག་སྡུག་བསྔལ་གང་ཞིག་འཇིགས་སྐྲག་པའམ། །རྒྱལ་པོ་ཆོམ་རྐུན་ཐོག་གིས་འཇིགས་སྐྲག་པའི། །འགྲོ་བའི་ཚོགས་ཆེན་མཐའ་དག་སྐྱོབ་པར་མཛད། །གང་ཞིག་ཡུལ་དང་ཁྱིམ་ལ་བསྟེན་ཀྱང་རུང ། །དཀའ་ཐུབ་མ་ཉམས་རྩེ་གཅིག་སེམས་ཀྱིས་ནི། ། 101.215b ཉིན་གཅིག་བཞིན་དུ་ཅུང་ཟད་སྔགས་བཟླས་ན། །དེ་ཡི་གསང་སྔགས་དུས་ཤིག་ན་ནི་འགྲུབ། །ཆོ་ག་བཞིན་དུ་དང་པོ་འབུམ་བཟླས་ནས། །དེ་ནས་སྔགས་པ་བསྒྲུབ་ལ་འཇུག་པར་བྱ། །དེས་ན་དངོས་གྲུབ་མྱུར་དུ་འཐོབ་འགྱུར་ལ། །གསང་སྔགས་ཆོ་གས་ཡུན་རིང་ཉོན་མི་མོངས། །ལུས་ལ་ས་ཡིས་དྲིལ་ཕྱི་བྱས་ནས་སུ། །ཆུ་ཆེན་རྙོག་པ་མེད་པར་ཞུགས་ནས་སུ། །ཅི་ཙམ་འདོད་པའི་བར་དུ་ཁྲུས་བྱས་ཏེ། །བྱུང་ནས་ཤར་རམ་བྱང་དུ་ཁ་བལྟས་ནས། །ཆུ་ཡིས་ལག་པ་རྐང་པ་བཀྲུས་ནས་སུ། །པུས་མོ་ཕྱི་རོལ་དུ་ནི་བསྟན་བྱས་ཏེ། །བར་དུ་ལག་བཞག་ཙོག་ཙོག་པོར་འདུག་ནས། །སྒྲ་མེད་དབུ་བ་མེད་པས་ཉེ་རེག་བྱ། །ལན་གསུམ་བར་དུ་ཆུ་ནི་འཐུངས་ནས་ཀྱང ། །མཆུ་ལ་ལན་གཉིས་ཡོངས་སུ་ཕྱི་བར་བྱ། །སོ་ལ་ཆགས་པ་ལྕེ་ཡིས་རེག་པ་དང ། །སྤྲིད་པ་བྱུང་ན་ཁ་ཡང་བཀྲུ་བར་བྱ། །རབ་བྱུང་སྐྱེས་པ་བུད་མེད་གཞོན་ནུ་དང ། །གཞོན་ནུ་མ་དང་རྒན་པོ་བྲམ་ཟེ་རྣམས། །དེ་ལ་ནམ་ཡང་སྔགས་པས་རེག་མི་བྱ། །སྔགས་པས་དེ་དག་རྣམས་ལ་མི་བསམ་མོ། །བརྒྱ་ལ་དེ་དག་རྣམས་ཀྱིས་རེག་གྱུར་ཏམ། །བསྒྲུབ་པོས་དེ་དག་རྣམས་ལ་རེག་གྱུར་ན། །སླར་ཡང་ཁྲུས་དང་འཐོར་འཐུང་བྱས་ནས་སུ། །དེ་ནས་ཕྱིར་ཡང་བཟླས་ལ་འཇུག་པར་བྱ། །གཙང་སྦྲ་ལ་དང་ཟློས་དགའ་སྙིང་རྗེ་ཅན། །རྟག་ཏུ་ལེན་པ་ལས་ནི་ལོག་པ་དང ། །སློངས་མོའི་ཟས་ཟ་ལྷ་ཡི་ལས་བརྩོན་པ། །དེ་ཡི་ལུས་ལ་གསང་སྔགས་འཇུག་པར་འགྱུར། །འགའ་ཡིས་བུད་མེད་གོས་དང་ནོར་རྣམས་དང ། །བཞོན་པ་རྒྱན་དང་བྱུག་པ་བཟའ་བཏུང་དང ། །མལ་སྟན་རྣམས་ནི་མང་ཉུང་བྱིན་གྱུར་ན། །དེ་ལ་བསྒྲུབ་ལ་གནས་པས་མི་བླང་ངོ ། །ས་ཕུང་བཤང་སྒོར་ལྔ་སྟེ་མཚན་ལ་གསུམ། །གཡོན་ལ་གསུམ་སྟེ་ལག་པ་གཉིས་ལ་བདུན། །ཡང་ན་ས་དང་ཆུ་ཡིས་ཅི་སྲིད་དུ། །དྲི་མ་དྲི་བྲལ་དེ་སྲིད་བར་དུ་བྱ། །སོས་ཀ་ནགས་མེ་མཆེད་པའི་མེ་ལྕེ་ཡིས། ། 101.216a མ་བསྒྲིམས་བཞིན་དུ་ཚང་ཚིང་ཀུན་བསྲེག་ལྟར། །བཟླས་བརྗོད་མེ་ལ་ཚུལ་ཁྲིམས་རླུང་གིས་སྦར། །བརྩོན་འགྲུས་ཆེན་པོ་མེ་ལྕེས་སྡིག་པ་སྲེག་།ཇི་ལྟར་གངས་ལ་ཉི་མའི་འོད་ཟེར་གྱིས། །གདུངས་ནས་གཟི་བརྗིད་མི་བཟོད་འཇུ་བ་བཞིན། །ཚུལ་ཁྲིམས་ཉི་མའི་འོད་ཟེར་བཟླས་བརྗོད་ཀྱིས། །གདུངས་ན་སྡིག་པའི་གངས་ཀྱང་ཟད་པར་འགྱུར། །མུན་ནག་དམག་ལ་མར་མེ་ཕྱུང་བ་ཡིས། །མུན་ནག་མ་ལུས་སེལ་བར་བྱེད་པ་ལྟར། །ཚེ་རབས་སྟོང་ནས་བསགས་པའི་སྡིག་པའི་མུན། །བཟླས་བརྗོད་མར་མེས་མྱུར་དུ་སེལ་བར་བྱེད། །ཅི་སྟེ་བཟླས་བརྗོད་པ་ནི་སྦྱིན་སྲེག་གིས། །གསང་སྔགས་བསྒྲུབས་ཀྱང་དངོས་གྲུབ་མ་ཐོབ་ན། །འཇིམ་པ་ལས་ནི་མཆོད་རྟེན་འབུམ་གདབ་པ་འམ། །ཡང་ན་ཆུ་འགྲམ་བྱེ་མ་ལ་ཡང་གདབ། །དེས་ནི་དེ་ཡི་སྡིག་པ་སྲིད་གཞན་ལ། །བྱས་པ་གང་ཡིན་དེ་ནི་ཟད་གྱུར་ན། །དེས་ནི་གསང་སྔགས་མཐུ་ཡིས་འདི་ཉིད་དུ། །མཐོང་བའི་ཆོས་ལ་གསང་སྔགས་འབྲས་བུ་འཐོབ། །སྔགས་ཀྱི་རྩ་བ་དང་པོ་ཚུལ་ཁྲིམས་ཏེ། །དེ་ནས་བརྩོན་འགྲུས་དང་ནི་བཟོད་པ་དང ། །རྒྱལ་བ་ལ་ནི་དད་དང་བྱང་ཆུབ་སེམས། །གསང་སྔགས་དང་ནི་ལེ་ལོ་མེད་པའོ། །ཅི་ལྟར་མི་དབང་ཡན་ལག་བདུན་ལྡན་པ། །སྐྱོ་བ་མེད་པར་སྐྱེ་དགུ་འདུལ་བར་བྱེད། །དེ་བཞིན་སྔགས་པའང་ཡན་ལག་འདི་བདུན་དང ། །ལྡན་ན་དངོས་གྲུབ་དམ་པའང་ཐོབ་པར་འགྱུར། །དང་པོ་བཟླས་བརྗོད་ཕལ་ཆེར་བྱས་ནས་སུ། །དེ་ཡི་འོག་ཏུ་འདིར་ནི་སྦྱིན་སྲེག་བྱ། །སྦྱིན་སྲེག་དག་གིས་གསང་སྔགས་མཆོག་མྱུར་སྩོལ། །ཡིད་དུ་འོང་བའི་འདོད་པའང་སྦྱིན་པ་མཛད། །གང་གིས་དཔག་ཚད་བརྒྱ་ཡི་ཕ་རོལ་ནས། །གསང་སྔགས་མཐུ་ཡིས་བུད་མེད་བཀུག་ཀྱང་ནི། །བུད་མེད་མ་ཡིན་གནོད་སྦྱིན་བུ་མོ་སྟེ། །དེ་གཟུགས་ཆ་བྱད་ཀྱིས་ནི་སྔགས་པ་བསྟན། །འདོད་པའི་དོན་ཕྱིར་བསྒྲུབ་པ་གང་ཡིན་དེ། །གྲུབ་ནའང་གནོད་སྦྱིན་བུ་མོས་སྦྱིན་པར་བྱེད། །དེ་ནི་བུད་མེད་དེ་ཡི་ལུས་སུ་ཡང ། ། 101.216b སྤྲུལ་ནས་མཚན་མོ་འདོད་པ་བསྟེན་པར་བྱེད། །ཅི་ལྟར་མི་དག་འདོད་ཕྱིར་བུད་མེད་ལ། །བསྟེན་ཕྱིར་མི་ཡི་ནོར་ནི་ཟད་འགྱུར་ལྟར། །དེ་བཞིན་གནོད་སྦྱིན་མོ་འམ་བྲན་མོ་དག་།གསང་སྔགས་མཐུས་བཀུག་བསྟེན་པར་བྱེད་པའོ། །གཞན་གྱིས་ཆུང་མར་ཡིད་ལ་བཞག་ནས་སུ། །གང་ཞིག་དེ་ལ་འདོད་གདུངས་བསྟེན་བྱེད་པ། །མི་ཤེས་ཡིད་ཀྱིས་གཞན་གྱི་ཆུང་མ་ལ། །འདོད་པ་སྤྱད་པས་སྡིག་པ་མང་པོ་འཐོབ། །རྒྱལ་བ་ལ་དད་གཞན་ལ་ཕན་བརྩོན་པའི། །ལྷ་ཀླུ་ལྷ་མིན་གནོད་སྦྱིན་དྲི་ཟ་དང ། །གྲུབ་པར་བཅས་པ་སྔགས་བཤད་གང་ཡིན་པ། །དེ་དག་རྒྱལ་བའི་ཉན་ཐོས་རང་སངས་རྒྱས། །དེ་བཞིན་གཤེགས་དང་བྱང་ཆུབ་སེམས་དཔའ་ཡིས། །མ་འོངས་སེམས་ཅན་མགོན་སྐྱབས་མེད་རྣམས་ལ། །རབ་ཏུ་གཟིགས་ནས་བྱིན་གྱིས་བརླབ་པ་མཛད། །དེ་དག་འབྲས་བུ་རབ་དང་འབྲིང་དང་ནི། །ཐ་མར་དབྱེ་བས་རྣམ་པ་གསུམ་དུ་བསྟེན། །མཁའ་ལ་འགྲོ་དང་དཔལ་གྱི་ཕུག་དུ་འཇུག་།འདོད་དགུའི་གཟུགས་ཅན་མི་སྣང་རྣམ་པ་དང ། །གནོད་སྦྱིན་བུ་མོའི་ཁྱོ་དང་བཅུད་ཀྱིས་ལེན། །མིག་འཕྲུལ་སྒྱུ་མ་མཚན་མོ་རྒྱུ་བ་སྟེ། །དེ་དག་མཆོག་ཡིན་འབྲིང་ནི་ས་བདག་གོ། །གྲོང་དང་ནོར་དང་དབྱེ་དང་དགུག་པ་དང ། །དགར་དང་བསྐྲད་པ་དང་ནི་བསད་པ་དང ། །ཀླུ་ཡི་གདོན་གྱིས་ཟིན་པ་གསོ་བ་དང ། །གང་ཡང་འདི་ལྟ་བུ་དང་མཐུན་པའི་ལས། །དེ་ནི་མཁས་པས་ཕྲན་ཚེགས་ཡིན་པར་བསྟེན། །བྱེ་བྲག་ཏུ་ནི་ཀླུ་དང་གནོད་སྦྱིན་དང ། །བྱིས་པ་གདོན་གྱིས་ཟིན་དང་གང་དག་ཏུ། །ལུས་ཅན་རྣམས་ལ་ངོ་མཚར་སྣ་ཚོགས་དག་།སྟོན་པར་བྱེད་པ་ཕྲ་མོའི་ཕྲན་ཚེགས་ཡིན། །བྱབ་དང་ཁུ་ཚུར་ཐལ་ལྕག་སྐྲ་དྲང་དང ། །རྣ་བར་བཟླས་དང་དབབ་དང་བསྐྲད་པ་དང ། །བསད་དང་བཅིང་ལ་སོགས་པས་ཚར་གཅད་དང ། །བོང་དང་རིག་པའི་གོས་དང་སྔགས་གོས་དང ། །རྡོག་པས་བསྣུན་དང་རྣམ་པར་བསྐྱོད་པ་དང ། །མིག་ཏུ་དུག་སོང་ལྟར་ནི་གཞུག་པ་དང ། །ཁབ་ཀྱི་གཟུགས་དང་ཁབ་ཅིང་སྐྱུག་ཏུ་གཞུག་། 101.217a ཕུ་ཞེས་བུད་དང་ཡན་ལག་གཞིག་པ་དང ། །བྲང་གིས་འགྲོ་བ་དག་ཀྱང་དགུག་པ་དང ། །ཕྱིར་ཡང་བཅིང་དང་མནན་པར་བྱ་བ་དང ། །རྨོངས་དང་བྱད་དང་དུག་ཟེར་གཞུག་པ་དང ། །དུག་ནི་གཞན་ལ་སྤོ་བར་བྱ་བ་དང ། །ལྕགས་ཀྱུར་ལྡན་པས་དྲང་བར་བྱ་བ་འམ། །ལུས་ལ་ཞེན་པའི་དུག་ནི་བསླང་བ་དང ། །ཟོས་པར་བཟའ་དང་ཟོས་པ་བཅད་པ་དང ། །ས་བཅིང་བ་དང་ཕོ་ཉ་བཏང་བ་དང ། །བསྐྲད་པ་དང་ནི་ཀླུ་ལ་བསྟན་པ་དང ། །དུང་དང་རྫ་རྔའི་སྒྲས་ནི་བསླང་བ་སྟེ། །རྣམ་པ་འདི་དག་དུག་གི་རྒྱུད་དུ་བཤད། །ས་ཡི་སྟེང་ན་སྦྲུལ་ནི་བརྒྱད་བཅུ་དག་།གཞན་ལ་གནོད་པར་བྱེད་ཅིང་རྣམ་པར་འཁྱམ། །དེ་དག་རྣམས་ལས་ཉི་ཤུ་གདེངས་ཀ་ཅན། །འཁྱིལ་པ་དྲུག་དང་དུག་མེད་བཅུ་གཉིས་དང ། །དེ་བཞིན་སྦྲུལ་ནི་ཁྲོ་བོ་བཅུ་གསུམ་སྟེ། །སུམ་བཅུ་གང་ཡིན་རིགས་དེའི་ནང་དུ་གཏོགས། །སྦལ་པའི་མགོ་དང་སྡིག་པ་ཁ་བརྒྱད་དང ། །རྣམ་པར་དབྱེ་ན་རབ་ཏུ་མང་པོ་ཡོད། །གཅིན་རྟུག་ཁ་ཆུ་རེག་དང་མཐོང་བ་དང ། །མཆེ་བ་བཙུགས་པ་ལས་ནི་དུག་ཀྱང་གཏོང ། །དེ་ལས་དུག་གི་རྒྱུད་ལ་མཁས་པ་ཡིས། །རབ་འབྲིང་ཐ་མ་གསུམ་དུ་རྣམ་པར་དབྱེ། །དུག་མོད་ཁྲོ་བའི་དབང་བསྒྱུར་སྐྲག་པ་དང ། །དེ་བཞིན་སྔངས་པའམ་བཀྲེས་པའི་ཟས་ཕྱིར་རམ། །ཤ་མཁོན་ཡོད་པའམ་གཤིན་རྗེས་བསྟན་པ་འམ། །ལུས་ལ་བརྫིས་ན་དེ་དག་ཟ་བར་བྱེད། །ཟོས་པ་དེ་ཡང་རྣམ་པ་བཞིར་འགྱུར་ཏེ། །མཆེ་བས་ཟིན་དང་སོས་བཅད་བཏབ་པའོ། །གང་དུ་མཆེ་བ་གཅིག་གིས་ཁྲག་ཕྱུང་རྗེས། །དེ་ནི་དུག་ཆུང་པས་ནི་ཟིན་པར་བཤད། །གང་དུ་མཆེ་བ་གཉིས་ཀྱིས་བཏབ་ནས་སུ། །ཁྲག་དག་བྱུང་བར་གྱུར་པ་ཟོས་པའོ། །གལ་ཏེ་མཆེ་བ་གསུམ་གྱིས་ཤ་བཅད་ན། །དེ་ནི་བཅད་པར་གྱུར་པ་ཡིན་ཞེས་བསྟན། །གང་དུ་མཆེ་བ་བཞི་ཡིས་བཏབ་ནས་སུ། །སྦྲུལ་གྱིས་ལུས་ནི་ཟོས་པར་གྱུར་པ་དེ། །བཏབ་ནས་ཟོས་པ་ཡིན་ཞེས་བཤད་པ་སྟེ། ། 101.217b དེ་ནི་སྨན་རྣམས་ཀྱིས་ཀྱང་བཟློག་པར་དཀའ། །མེ་ཡི་རང་བཞིན་གནད་རྣམས་འདྲལ་བའི་དུག་།མཚོན་དང་མེ་དང་གཟི་བརྗིད་མཚུངས་པ་དང ། །ཇི་ལྟར་སྔགས་ཀྱིས་རབ་ཏུ་ཞི་འགྱུར་བ། །དེ་ལྟར་སྨན་པས་སྦྱར་བས་མི་ནུས་སོ། །ཅི་ལྟར་མེ་ཕུང་ཆེན་པོས་བུད་ཤིང་ལ། །ངེས་པར་བསྲེག་ལ་ཆུ་འབབ་སྐད་ཅིག་གིས། །ཞི་བར་གྱུར་པ་དེ་བཞིན་དུག་དག་ནི། །མེ་ཕུང་ལྟ་བུར་སྔགས་ཀྱིས་ཞི་བར་བྱེད། །དུག་གི་མཐུ་སྟོབས་ཤེས་ནས་རབ་བསྒྲིམས་ནས། །གསང་སྔགས་ཆོ་ག་བཞིན་བཟླས་བསྒྲུབས་ན་ནི། །སྦྱོར་བ་འདིས་ནི་དུག་ཀྱང་འཕྲོག་པར་བྱེད། །བ་ལང་ཁྱུ་ན་སེང་གེ་ཅི་ལྟ་བར། །དུག་ཅན་སྦྲུལ་དང་དོགས་མེད་ལྷན་ཅིག་རྩེ། །ལྷ་ཀླུ་ལྷ་མིན་གནོད་སྦྱིན་གྲུབ་པ་དང ། །དྲི་ཟ་འབྱུང་པོ་མཚུན་དང་གསང་བ་དང ། །ཡི་དགས་ཤ་ཟ་དང་ནི་ལུས་སྲུལ་པོ། །སྨྱོ་བྱེད་མདངས་འཕྲོགས་པ་དང་གྲིབ་ནོན་དང ། །ས་ཡི་སྟེང་ན་གདོན་ནི་སྣ་ཚོགས་པ། །མི་ཡི་ཤ་ཚིལ་ཟ་ཞིང་ཁྲག་ཀྱང་འཐུང ། །མྱ་ངན་འདོད་གདུངས་ཁྲོ་བས་ཉམས་ཐག་པའི། །གླགས་སྐབས་རྙེད་ནས་ལུས་ལ་འཇུག་པར་བྱེད། །དེ་དག་རྣམས་ཀྱིས་ཟིན་པའི་མི་འཕྱན་ཅིང ། །གླུ་ལེན་གར་བྱེད་དགོད་དང་ཁྲོ་བ་དང ། །དགའ་ཞིང་རྔམ་པ་ཆེ་ལ་སྨྲ་འདོད་དང ། །འདོད་པ་སྣ་ཚོགས་བྱེད་ཅིང་ལྷ་རྣམས་དང ། །ལྷ་མིན་ལྟར་འཆོས་སྐྱེ་བོའི་བཞད་གད་བྱེད། །གཏོར་མ་འདོད་པའམ་རྩེད་མོ་བྱེད་འདོད་པས། །བསད་པའི་དོན་དུ་ལུས་ལ་འབའ་ཤིག་འཇུག་།གསང་བ་པ་རྣམས་གཞིག་ཕྱིར་རིག་པའི་མཆོག་།མཐུ་ཆེན་མཆོག་སྦྱིན་རྡོ་རྗེ་ལྕགས་ཀྱུ་འམ། །གཞན་ཡང་ང་ཡི་རིགས་བྱུང་རིག་པ་འམ། །ཁྲོ་བོ་བདུད་རྩི་ཐབས་སྦྱོར་སོགས་པས་གསོ། །ཅི་ལྟར་རིག་སྔགས་འཛིན་པའི་མི་དག་ལ། །གདོན་རྣམས་འཇིགས་པར་གྱུར་པ་དེ་ལྟར་ནི། །མེ་མིན་རླུང་མིན་གྲོང་ཁྱེར་སུམ་བརྩེག་དག་།འཇོམས་བྱེད་གཟི་ཆེན་ཉི་མ་མེས་པོ་དང ། །ཆུ་བདག་མ་ཡིན་ལྷ་མིན་རྣམས་ཀྱིས་མིན། །ནོར་བདག་མ 101.218a ཡིན་གནོད་སྦྱིན་རྒྱལ་པོས་མིན། །ལྷག་མ་མཁའ་ལྡིང་བྱ་ཡི་རྒྱལ་པོ་དང ། །ས་བསྲུང་བུ་ཞོན་ཁྱེར་འཇིགས་རྣམས་ཀྱིས་མིན། །འབྱུང་པོའི་རིགས་སྔགས་འདིར་ནི་ཀུན་མཐོང་དང ། །གདོན་གྱིས་སྤྱོད་པ་མ་ལུས་ཤེས་ནས་སུ། །ཕྱི་ནས་གདོན་རྣམས་དོགས་མེད་བཏུལ་ནས་ནི། །གདོན་གྱིས་མི་འཇིགས་སླར་ཡང་ཚུགས་མི་འགྱུར། །རིགས་གསུམ་འཕེལ་དང་སྲིད་གསུམ་མཐར་ཕྱིན་དང ། །ཉེས་པ་གསུམ་སྤངས་ལམ་གསུམ་ཐུགས་ཆུད་དང ། །དེ་ཡི་སྲས་དང་དེ་ཡི་རྗེས་འགྲོ་བའི། །ལྷ་དང་ལྷ་མིན་སོགས་པས་བཤད་པའི་སྔགས། །བདག་ཉིད་ཆེན་པོའི་མུན་པ་སེལ་བ་ཡི། །གསང་སྔགས་ཀྱིས་ནི་བྱིན་གྱིས་བརླབས་དེ་ལ། །འཇིག་རྟེན་ལྷ་ཚོགས་རྣམས་ཀྱིས་བསྔགས་པ་ཡི། །གསང་སྔགས་མཐུ་ཡིས་དེ་ལ་བསྐྱོད་ཏུ་མེད། །རྡོ་རྗེ་འཆང་གི་གསུང་ཐོས་ལྷ་རྣམས་དང ། །ཚངས་སོགས་ལྷ་མིན་གནོད་སྦྱིན་གྲུབ་པ་དང ། །རིག་འཛིན་ཀླུ་དང་གནོད་སྦྱིན་དྲི་ཟ་དང ། །གསང་བ་པ་དང་མཚུན་དང་འབྱུང་པོ་རྣམས། །དད་པས་ཞབས་ལ་སྤྱི་བོས་ཕྱག་འཚལ་ཏེ། །གུས་པས་ཐལ་མོ་སྦྱར་ནས་ཚིག་གསོལ་པ། །ཀྱེ་མའོ་སྲོག་ཆགས་རྣམས་ལ་ཐུགས་རྗེར་ལྡན། །ཀྱེ་མའོ་ཁྱོད་ཀྱི་སྤྱོད་པ་སྣ་ཚོགས་པས། །ཁ་ཅིག་གིས་ནི་རྡོ་རྗེ་འབར་བར་མཐོང ། །གཞན་གྱིས་དབྱིག་ཏོ་གཞན་གྱིས་འཁོར་ལོ་ཅན། །དེ་བཞིན་གཞན་གྱིས་རྩེ་གསུམ་ཞགས་པ་ཅན། །གཞན་གྱིས་རལ་གྲི་གཞུ་དང་བེ་ཅོན་དང ། །འཇིགས་པའི་གཟུགས་ཅན་མཚོན་ཆ་ཀུན་ཐོགས་དང ། །གཞན་དག་གིས་ནི་ཞི་བ་ཉིད་དུ་མཐོང ། །དུ་མའི་སྐུ་མངའ་དམིགས་མེད་སྐུ་མངའ་བར། །ལྷ་དང་གནོད་སྦྱིན་གྱིས་མཆོད་དེ་ལ་འདུད། །ལྷ་མིན་ལྷ་ཡིས་ཞབས་ལ་ཕྱག་བགྱིས་པ། །བྱང་ཆུབ་སེམས་དཔའ་མཆོག་ལ་ཕྱག་འཚལ་འདུད། །རིག་པའི་དབང་ཕྱུག་གཞུ་འགེངས་ཁྱོད་ལ་འདུད། །ཁྱོད་ལ་བདག་ཅག་ཐམས་ཅད་ཕྱག་འཚལ་འདུད། །ཁྱོད་ལ་བདག་ཅག་དེང་ནི 101.218b སྐྱབས་སུ་མཆི། །ཁྱོད་ཀྱིས་ཅི་སྐད་གསུངས་པ་དེ་བཞིན་དུ། །མི་ཡིས་ལེགས་པར་སྤྱད་པ་བགྱིས་ན་ནི། །དེ་དག་མྱུར་དུ་དབུལ་བའི་མུན་བསལ་ནས། །ཉི་མ་བཞིན་དུ་ཤིན་ཏུ་འབར་བར་འགྱུར། །ཡན་ལག་མི་ཉམས་སེམས་ཀྱང་མི་ཉམས་ཤིང ། །ནད་དང་སྡུག་བསྔལ་ལུས་ཉམས་མི་འགྱུར་བ། །ཁྱོད་ལ་དང་བའི་མིས་ནི་ཐོབ་པར་འགྱུར། །དེ་སྐད་ཀུན་གྱིས་ཚིག་ཏུ་སྨྲས་ནས་ཀྱང ། །རྡོ་རྗེ་འཛིན་ལ་ཡང་ཡང་ཕྱག་འཚལ་ཏེ། །གཞལ་མེད་ཐེག་པར་མངོན་དུ་ཞུགས་ནས་ཀྱང ། །ཅི་ལྟར་འོངས་པའི་ནམ་མཁའི་ལམ་ལ་དོང ། །ལྷ་རྣམས་དོང་ནས་ཕྱག་ན་རྡོ་རྗེ་ཡིས། །དཔུང་བཟང་ལ་ནི་ཚིག་ཏུ་ཡང་གསུངས་པ། །ལྷ་རྣམས་ཀུན་གྱིས་མདོ་འདི་ཤེས་ཟིན་གྱིས། །ཁྱོད་ཀྱིས་འཇིག་རྟེན་འདིར་ནི་གྲགས་པར་གྱིས། །དེ་སྐད་གསུངས་ནས་དཔུང་བཟང་དེ་ཡིས་ནི། །ལངས་ཏེ་གུས་པར་རབ་ཏུ་ཕྱག་འཚལ་ནས། །གཙང་བྱེད་སྡིག་འཇོམས་དཔལ་ཡོན་ལྡན་པ་འདི། །མི་ཡི་འཇིག་རྟེན་ཁམས་འདིར་གྲགས་པར་བགྱི། །འཕགས་པ་དཔུང་བཟང་གིས་ཞུས་པའི་ལེའུ་བཅུ་གཅིག་པའོ། །འཕགས་པ་དཔུང་བཟང་གིས་ཞུས་པའི་རྒྱུད། རྫོགས་སྷོ།། །།ཞུས་ཏེ་དག་གོ། །སྟག་ལུང་རྒྱུད་འབུམ་ལ་གཏུགས་ལན་ཅིག་ཞུས། ། |