༄#། ་།རྒྱ་གར་སྐད་དུ། ཨཱརྱ་མ་ཧཱ་པ་རི་ཎཱ་མ་རཱ་ཛ་ས་མན་ཏྲ་ཀ་།བོད་སྐད་དུ། ་འཕགས་པ་ཡོངས་སུ་བསྔོ་བའི་རྒྱལ་པོ་ཆེན་པོ་སྔགས་དང་བཅས་པ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཡོན་ཏན་རྒྱ་མཚོ་དཔག་མེད་པ། །སངས་རྒྱས་དམ་ཆོས་འཕགས་པ་ཡི། །དགེ་འདུན་དུས་གསུམ་བཞུགས་པ་རྣམས། །མ་ལུས་པ་ལ་སྐྱབས་སུ་མཆི། །མི་དགེ་ཐམས་ཅད་བཤགས་པར་བགྱི། །འགྲོ་བའི་དགེ་ལ་རྗེས་ཡི་རང ། །ཆོས་ཀྱི་འཁོར་ལོ་རབ་བསྐོར་བར། །རྫོགས་སངས་རྒྱས་ལ་བསྐུལ་མ་འཚལ། །ཀུན་མཁྱེན་སྤྱན་གྱིས་གཟིགས་པ་ཡི། །བདག་དགེ་ཆུང་ངུ་གང་མཆིས་པ། །དེས་ནི་གཏན་དུ་བྲལ་བ་དག་།ཐམས་ཅད་ཉེ་བར་ཞི་གྱུར་ཅིག་།རྣམ་པ་ཀུན་མཆོག་ལྡན་པ་ཡི། །སྟོང་པ་ཤེས་པའི་ཏིང་ངེ་འཛིན། །བྱང་ཆུབ་བར་གྱི་ཚེ་རབས་སུ། །རྟག་ཏུ་བདེ་དང་ལྡན་པར་ཤོག་།རྣམ་པར་མི་རྟོག་ལྷུན་གྱིས་གྲུབ། །རྟག་ཏུ་མཉམ་པར་བཞག་གྱུར་ཅིང ། །ཟླ་ཉི་ནོར་བུ་རོལ་མོ་ལྟར། །སེམས་ཅན་དོན་ལ་འཇུག་པར་ཤོག་།ཇི་ལྟར་རྒྱལ་བ་མཁས་པ་རྣམས། །ཤེས་རབ་ཕ་རོལ་ཕྱིན་ཐབས་བསྔོ། །དེ་ལྟར་བདག་གིས་དཀར་པོ་རྣམས། །བྱང་ཆུབ་ཏུ་ནི་བསྔོ་བར་བགྱི། །དཀོན་མཆོག་གསུམ་ལ་དམིགས་པ་ཡི། །བདག་གི་ལུས་ངག་ཡིད་དགེ་དང ། །སྦྱིན་པ་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ལས་བྱུང་གང ། །དེ་དག་ཀུན་གྱིས་བདག་ཉིད་ནི། །ཚངས་པར་སྤྱོད་པ་ལྡན་པ་དང ། །འཇིག་རྟེན་མགོན་གྱི་བསྟན་པ་ལ། །རབ་འབྱུང་མངོན་དགའ་དབང་ལྡན་ཞིང ། །སངས་རྒྱས་ཀུན་གྱིས་གསུང་རབ་ཀྱི། །གཞུང་དོན་ཚིག་ལ་མཁས་གྱུར་ནས། །དམ་ཆོས་ཡོངས་སུ་འཛིན་པ་དང ། །ལུས་དང་སྲོག་ལ་དགའ་མེད་ཤོག་།བདག་ནི་མགུམ་པའི་དུས་བགྱིད་ཚེ། ། 101.306b ཕྱིན་ཅི་མ་ལོག་ཡིད་ཀྱིས་སུ། །སངས་རྒྱས་ཚེ་དཔག་མེད་མཐོང་ནས། །འདི་ནས་བདེ་བ་ཅན་དུ་མཆི། །བདུད་ཀྱི་སྤྱོད་ཡུལ་མངོན་གྱུར་ཚེ། །དྲང་སྲོང་ཆེན་པོ་ཚེ་དཔག་མེད། །རྟག་ཏུ་སྟོན་པ་མཛད་གྱུར་ཅིང ། །ས་བཅུ་ཐོབ་ནས་དེ་དག་གི། །རྣམ་པར་དག་པའི་རིམ་པ་ཡིས། །བྱང་ཆུབ་དམ་པ་ཐོབ་པར་ཤོག་།སངས་རྒྱས་ཀུན་དུ་བཟང་པོ་ཉིད་ཐོབ་ནས། །བག་ཆགས་བཅས་པ་ཉེས་བསགས་རྩ་ནས་བཏོན། །ཡེ་ཤེས་སྒྲིབ་མེད་སྙིང་རྗེར་ལྡན་ནས་སུ། །འགྲོ་བ་རྣམས་ལ་སྨན་དང་བདེ་བ་བགྱི། །ཕྱོགས་བཅུ་མཐའ་ཡས་བ་ན་ཤེས་བྱའི་དོན་མ་ལུས་པར་ཁྱབ་པའི་བློ་མངའ་བ་ཕྱོགས་བཅུའི་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་རྒྱ་མཚོ་སྙེད་ལ་ཕྱག་འཚལ་ལོ། །སེམས་ཀྱི་རྙོག་པ་ཡིད་གཉིས་བསལ་ནས་དང་པོར་ནི། །ཤཱཀྱའི་རྒྱལ་པོ་ཐུབ་ལ་སྤྱི་བོས་ཕྱག་འཚལ་ལོ། །བདེ་བ་ཅན་ན་བཞུགས་པའི་རྒྱལ་བ་འོད་དཔག་མེད། །བླ་མ་ལ་ཡང་དགའ་དང་གུས་པས་གདུང་བར་བགྱི། །གང་ཞིག་ཕྱོགས་ཀུན་དག་ན་ད་ལྟར་བྱུང་བ་ཡི། །འགྲོ་ལ་བྱམས་པའི་སངས་རྒྱས་ངེས་པར་བཞུགས་རྣམས་དང ། །འདས་དང་ཕྱིས་འབྱུང་བའི་རྒྱལ་བ་ཐམས་ཅད་ལ། །བདག་ནི་དགའ་བའི་ཡིད་ཀྱིས་ཡང་དག་མཆོད་པ་བགྱི། །འདི་ལྟ་སྟེ། ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དང ། སྐུ་མཆོག་གསེར་འོད་དང ། བདེན་པའི་དབྱངས་དང ། ལྷུན་པོ་བཟང་པོ་དང ། ལྷུན་པོ་ཆེན་པོ་དང ། དབང་པོའི་འབྱུང་གནས་དང ། པད་མའི་དབྱངས་དང་ཕྱག་བཟང་དང ། འོད་ཀྱི་ཏོག་དང་མཆོག་གི་འབྱུང་གནས་དང ། རིན་ཆེན་ཟླ་འོད་དང ། དཔའ་བོའི་སྡེ་དང ། ཀུན་ནས་སྣང་བ་དང ། རྣམ་དག་ཞལ་དང ། རིན་ཆེན་ཏོག་དང ། མདོག་བཟང་འབྱུང་གནས་དང ། ས་ལའི་རྒྱལ་པོ་དང ། རྣམ་དག་འོད་དང ། བདེ་མཛད་རྒྱལ་པོ་དང ། ཀུན་ནས་སྣང་བ་དང ། ལྷུན་པོ་བཟང་པོ་གསལ་བ་དང ། འོད་ཀྱི་དཀྱིལ་འཁོར་དང ། དཀོན་མཆོག་བརྩེགས་དང ། ཀུན་ནས་འོད་དང་དཔལ་བརྩེགས་དང ། བཀོད་པ་ཆེན་པོ་དང ། སྦྱངས་གསལ་བཻ་དཱུརྱ་དང ། དབང་པོའི་རྒྱལ་མཚན་དང ། ཐོབ་པའི་སྡེ་དང ། རབ་ཏུ་ལྷན་ནེ་དང ། འོད་མཛེས་དང ། 101.307a མེ་ཏོག་ཚོམས་དང ། སྤྱན་བཟང་དང ། ཤིན་དུ་བཟང་པོ་དང ། འོད་བཟང་སྒྲོན་མ་དང ། དགོངས་པ་རྣམ་དག་དང ། ཆོས་ཀྱི་འོད་ཟེར་དང ། བརྩོན་འགྲུས་ཆེ་ལྡན་དང ། པད་མའི་སྙིང་པོ་དང ། ལྷག་པར་དགོངས་པ་བརྟན་པ་དང ། རྡོ་རྗེའི་སྡེ་དང ། ལེགས་པར་འཁྲུངས་དང ། ཚུལ་བཟང་དང ། དབྱངས་སྙན་དང ། ཡོན་ཏན་དཔལ་འོད་དང ། འཇིག་རྟེན་ཏོག་དང་མདོག་བཟང་གསལ་བ་དང ། རྟག་ཏུ་བརྩོན་དང ། ཙན་དན་ཟླ་འོད་དང་རྒྱས་པའི་དཔལ་དང ། རྒྱ་མཚོ་དང ། དབང་པོ་ཆེན་པོ་དང ། རྒྱལ་བའི་དབང་པོ་དང་འོད་བཀོད་པ་དང ། བརྩོན་འགྲུས་སྦྱངས་པ་དང ། ཀུན་དུ་སྒྲོན་མ་དང ། གསུང་བ་ཆེན་པོ་དང ། རྡོ་རྗེའི་སྙིང་པོས་རབ་ཏུ་འཇོམས་པ་དང ། དྲང་སྲོང་ལྷ་དང་མེའི་འོད་དང ། ཡིད་དུ་འོང་བ་དང ། རྣམ་འཇོམས་དང ། ཏོག་ཆེན་པོ་དང་ཤིན་དུ་མཐོར་གཤེགས་དང ། ཕན་པར་བཞེད་དང ། དྲང་སྲོང་ཆེན་པོ་དང ། རྣམ་པར་གཟིགས་དང་གཙུག་ཏོར་ཅན་དང ། ཐམས་ཅད་སྐྱོབ་དང་འོད་སྲུང་དང ། གསེར་མདོག་དང ། གཟི་བརྗིད་མཆོག་དང ། མཐོ་བ་དང་བཀྲ་ཤིས་དང ། རིན་ཆེན་གྲགས་པ་དང ། གཟི་བརྗིད་འོད་དང ། རྣམ་པར་སྣང་མཛད་དང ། དོན་ཡོད་གཟིགས་དང ། དབང་པོའི་ཏོག་དང་གྲགས་པ་དང ། སྣང་མཛད་དང ། བེ་ནུ་བློ་གྲོས་དང ། སྐར་རྒྱལ་དང་སྐག་དང ། འོད་འདབ་དང ། རིན་ཆེན་མཆོད་སྡོང་དང ། འབར་བའི་ཏོག་དང་ཐུགས་གཞུངས་དང་རབ་ཞི་དབང་པོ་དང་སྤྱན་དག་དང ། ཟླ་མཆོག་དང ། བདེན་པའི་ལྷ་དང ། དྲང་སྲོང་སྦས་པ་དང་ཐུབ་པ་དང ། ཚངས་པའི་དབྱངས་དང ། ཀུན་དུ་ཞལ་དང ། མ་སྨད་པ་དང ། བདུད་འཇོམས་དང ། ལྷའི་རྒྱལ་པོ་དང ། ལེགས་བོན་དང ། གཟི་བརྗིད་བཟང་པོ་དང་ཚོགས་ཀྱི་དབང་པོ་དང ། ཤིན་དུ་རྣམ་པར་གནོན་པས་གཤེགས་པ་དང ། བསམ་ཡས་འོད་དང ། ཟླ་བའི་རྒྱལ་པོ་དང ། བདེ་བ་ཆེ་ཐོབ་དང ། སྣང་བར་གྱུར་པ་དང ། རྒྱ་མཚོ་ཆེན་པོ་དང་མི་འཁྲུགས་པ་དང ། དབང་པོའི་མཆོག་དང་མེ་ཏོག་ཏོག་དང ། དེད་དཔོན་ཆེན་པོ་དང ། རྣམ་པར་རྒྱལ་བྱེད་དང ། མེ་ཏོག་བཟང་པོ་དང ། བཤེས་གཉེན་བཟང་པོ་དང ། རྒྱུ་སྐར་བཟང་པོ་དང ། ཉི་མའི་སྙིང་པོ་དང ། ཚོགས་ཀྱི་དཔལ་དང ། ནོར་གྱི་དཔལ་དང ། སྣང་བ་བཟང་པོ་དང ། འོད་དཔག་མེད་དང ། 101.307b དཔལ་ཆེན་པོ་དང ། སྟོབས་མཆོག་དང ། སྒྲོན་མ་སྟེ། དེ་དག་ལ་སོགས་བ་སྔོན་བྱུང་བ་དང ། ཕྱིས་འབྱུང་བའི་རྒྱལ་བ་གང་དག་ཡོན་ཏན་གྱི་ཀླུང་དཔག་ཏུ་མེད་པར་གྱུར་པ། འཁོར་བའི་ཆུ་བོའི་འདམ་རྫབ་ལས་ཡང་དག་པར་རྒལ་བ། གཏོང་བ་དང་ལྡན་ཞིང་ཚུལ་ཁྲིམས་རྣམ་པར་དག་ལ་བཟོད་པ་ཆེན་པོའི་མཆོག་དང་ལྡན་པ། བརྩོན་འགྲུས་སྦྱངས་ཤིང་སྙིང་པོ་གཡོ་བ་མི་མངའ་བའི་བསམ་གཏན་ཆེན་པོ་དང་ལྡན་པ། མཁྱེན་རབ་རྣོ་བ་ཐོགས་པ་མེད་པ་དང་ལྡན་པ། སེམས་ཅན་ལ་ཐུགས་རྗེ་དང་ཚོགས་དང ། རྫོགས་པའི་བྱང་ཆུབ་ཀྱི་ཐུགས་སྐྱེ་བ་རབ་ཏུ་འབྱུང་བ། འཇིག་རྟེན་ཐམས་ཅད་ལ་ཐུགས་བརྩེ་བ། དོན་ལ་མངོན་པར་བརྩོན་པ། སེམས་ཅན་གྱི་སྙིང་པོ། སྐྱེ་དགུ་ལ་བྱམས་བ། གཡོ་མི་མངའ་བ། དགའ་བ་མི་མངའ་བ། ཆགས་པ་མི་མངའ་བ། བྱམས་པའི་ཐུགས་ཀྱི་བདག་ཉིད་ཅན། ལྷའི་ཡང་ལྷ་དང ། མིའི་མཆོག་གིས་རྗེད་པ། ལྷའི་ཡང་ལྷ་སྟེ། རྒྱལ་བ་དེ་རྣམས་ལ་བདག་གི་ལུས་དང་ངག་དང ། སེམས་གུས་པ་རྣམ་པ་དུ་མས་ཕྱག་འཚལ་ལོ། །རྒྱལ་བ་དེ་རྣམས་ཀྱིས་བདག་སྡིག་པ་ལས་རྣམ་པ་ཐམས་ཅད་ཏུ་བསྐྱབ་ཏུ་གསོལ། སྡུག་བསྔལ་དུ་མས་གདུངས་པའི་སེམས་ཅན་ཐམས་ཅད་ཀྱང་རབ་ཏུ་བརྩོན་པས་དྲང་དུ་གསོལ། ཐུགས་རྗེ་ཆེན་པོ་དང་ལྡན་པས་བདག་ཀྱང་ངན་འགྲོ་དག་ལས་དྲང་ཞིང་དེ་བཞིན་དུ་རྫོགས་པའི་བྱང་ཆུབ་ཏུ་མྱུར་དུ་གཞག་ཏུ་གསོལ། དྲང་སྲོང་ཆེན་པོ་རྣམས་ཀྱི་མཚན་བརྗོད་པའི། །དགེ་བ་བདག་གིས་བསྒྲུབས་པ་གང་ལགས་པ། །དེ་ཡིས་བདག་ནི་ཚེ་རབས་ཐམས་ཅད་ཏུ། །ཐུབ་དབང་དེ་དང་ལྷན་ཅིག་འགྲོགས་པར་ཤོག་།ཆོས་དང་ཟང་ཟིང་མཆོད་པས་བདེ་བར་གཤེགས། །དེ་ལ་ཉོན་མོངས་མེད་པར་བདག་གིས་མཆོད། །མཆོད་པ་བགྱིས་ཤིང་ལམ་གཉིས་ལ་བརྟེན་ནས། །འགྲོ་བ་རྫོགས་པའི་སངས་རྒྱས་ཉིད་གྱུར་ཅིག་།དེ་བཞིན་གཤེགས་པ་དེ་དག་གི་མཚན་ཐོས་པ་དང ། མོས་པ་དང ། འཛིན་པ་དང ། འཆང་བ་དང ། ཡོངས་སུ་བསྒྲགས་པས་སྒྲིབ་པ་ཐམས་ཅད་ཟད་པར་འགྱུར། ངན་འགྲོའི 101.308a འཇིགས་པ་ཐམས་ཅད་ལས་ཀྱང་ཐར་བར་འགྱུར། བླ་ན་མེད་པ་ཐམས་ཅད་མཁྱེན་པ་ཉིད་དུ་ཡང་ངེས་པར་འགྱུར་རོ། །ཆོས་ཀྱི་དབྱིངས་ཀྱིས་ཀླས་པ་ནམ་མཁའི་ཁམས་ཀྱི་མཐས་གཏུགས་པའི་ཕྱོགས་ཐམས་ཅད་ན་དུས་གསུམ་ལྷག་མ་མེད་ཅིང་ལུས་པ་མེད་ལ་མ་ལུས་པའི་སངས་རྒྱས་བཅོམ་ལྡན་འདས་དེ་བཞིན་གཤེགས་པའི་སྤྱན་སྔར་ཐུགས་སུ་ཆུད་པ་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་བས་ཕྱག་འཚལ་ལོ། །སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཐུགས་རྗེ་དང་ལྡན་པ། བྱམས་པ་དང་ལྡན་པ། ཕན་པར་བཞེད་པ། ཐུགས་བརྩེ་བ་ཅན། སྐྱེ་བ་མེད་པ་དང ། འགག་པ་མེད་པའི་ཆོས་དང་ལྡན་པ་དེ་ལ་ལུས་ཐམས་ཅད་ཀྱིས་ཕྱག་འཚལ་ནས་བསམ་པ་དང ། ལྷག་པའི་བསམ་པ་རུས་པའི་ཁོང་ནས་དགའ་བ་དང ། རྐང་གི་ཁོང་ནས་དགའ་བའི་སེམས་ཐམས་ཅད་ཀྱིས་སྐྱབས་སུ་མཆིའོ། །དེ་བཞིན་དུ་བཅོམ་ལྡན་འདས་མྱ་ངན་མི་མངའ་བ་དེ་དང ། རྟག་ཏུ་མྱ་ངན་ལས་འདས་པ་དང ། བསྲེག་བླུགས་གསོལ་དང ། དེ་བཞིན་དུ་མཆོག་དགའ་དང ། མཆོག་གི་འབྱུང་གནས་དང ། དབང་པོའི་འབྱུང་གནས་དང ། མར་མེ་མཛད་དང ། སེང་གེ་སྒྲ་དང་མདོག་བཟང་འབྱུང་གནས་དང ། རིན་ཆེན་འབྱུང་གནས་དང ། རིན་ཆེན་བླ་མ་དང ། རིན་ཆེན་ཟླ་བ་དང་རིན་ཆེན་འབྱུང་དང ། རིན་ཆེན་སྣང་བ་དང ། རིན་ཆེན་ཏོག་དང ། རིན་ཆེན་གསལ་བ་དང ། རིན་ཆེན་རབ་གསལ་དང ། རིན་ཆེན་མང་དང་རིན་ཆེན་མུ་ཁྱུད་དང ། རིན་ཆེན་པད་མ་དང་རིན་ཆེན་པད་མས་རྣམ་པར་གནོན་དང་རིན་ཆེན་མེ་དང ། རིན་ཆེན་མེའི་འཁོར་དང ། རིན་ཆེན་ཀུན་གྱིས་སྐུ་བརྒྱན་ལྡན་པ་དང ། དགྲ་ལས་རྒྱལ་བ་དང ། སའི་སྟོབས་ཀྱི་ཤུགས་མངའ་བ་དང ། པད་མའི་མཆོག་དང་སྐུ་མཆོག་དང ། ཟླ་མཆོག་དང་ཆོས་མཆོག 101.308b དང་བཅོམ་ལྡན་འདས་དེ་བཞིན་གཤེགས་པ་བརྗོད་ཀྱིས་མི་ལང་བ་དང ། རྣམ་པར་རྟོག་མེད་དང ། དཔག་ཏུ་མེད་པ་དང་རིན་ཆེན་མཐའ་ཡས་དང ། རིན་ཆེན་མཐའ་ཡས་དྲི་མ་མེད་པ་དང ། ཕྱག་མཐའ་ཡས་དང་གྲགས་པ་མཐའ་ཡས་དང ། གྲགས་པ་ཆེན་པོ་དང་བདེ་བྱེད་ཆེ་ཐོབ་དང ། མཐུ་ཆེན་བརྩོན་འགྲུས་ངེས་འབྱུང་དང ། ཡོན་ཏན་ཆེར་བགྲང་དང ། དཔག་མེད་དབྱངས་དང ། བདེན་པའི་དབྱངས་དང ། རྣམ་པར་རྒྱལ་བའི་དབྱངས་དང་ཟླ་བའི་དབྱངས་དང ། པད་མའི་དབྱངས་དང ། སེང་གེའི་དབྱངས་དང ། སེང་གེའི་སྒྲ་སྒྲོགས་དང ། རྡོ་རྗེའི་སྒྲ་སྒྲོགས་དང ། རྡོ་རྗེའི་སྙིང་པོས་རབ་ཏུ་འཇོམས་པ་དང ། ཟླ་འོད་དང་ཉི་འོད་དང ། སྐར་འོད་དང་པད་མའི་འོད་དང ། བདུད་རྩིའི་འོད་དང་སྤྲུལ་པའི་འོད་དང ། རིན་ཆེན་དཔག་མེད་སྤྲུལ་པའི་འོད་དང ། གྲོལ་བའི་འོད་དང་ཡོངས་སུ་དག་པའི་འོད་དང ། རྣམ་པར་རྟོག་མེད་སྐར་འོད་དང ། སྐར་མ་སྒྲོན་མ་དང ། འཇིག་རྟེན་སྒྲོན་མ་དང ། ནམ་མཁའི་ཆོས་ཀྱི་སྒྲོན་མ་དང ། ཟླ་ཉིའི་སྒྲོན་མ་དང ། ཟླ་བའི་སྒྲོན་མ་དང་ཟླ་འོད་དང ། དྲི་མེད་བླ་མ་དང་དྲི་མེད་གསལ་བ་དང་གསེར་མདོག་གསལ་བ་དང ། གསེར་མདོག་སྣང་བ་དང་གསེར་མདོག་རིན་ཆེན་གསལ་བ་དང ། དཔག་མེད་སྤོས་སྣང་དང ། སྤོས་ཀྱི་ཞལ་དང་ཀུན་ནས་སྤོས་དང ། ཚངས་དབྱངས་རྒྱལ་པོ་དང ། ཀླུའི་དབང་ཕྱུག་རྒྱལ་པོ་དང ། དཔལ་གྱི་སྙིང་པོ་བརྩེགས་པ་སྒྲ་བསྒྲགས་རྒྱལ་པོ་དང ། གློག་གི་སྒྲོན་མ་ཏོག་གི་རྒྱལ་པོ་དང ། དགེ་བ་རབ་གནས་གཏེར་གྱི་རྒྱལ་པོ་དང ། བདུད་རྩི་དམ་པ་ལེགས་བྲལ་རྒྱལ་པོ་དང ། བཟང་པོ་ཏོག་གི་རྒྱལ་མཚན་གྱི་རྒྱལ་པོ་དང ། མེ་ཏོག་ཀུན་གྱི་དྲིའི་དབང་ཕྱུག་རྒྱལ་པོ་དང ། རྔ་སྒྲའི་རྒྱལ་པོ་དང ། ས་ལའི་རྒྱལ་པོ་དང ། དེ་བཞིན་དུ་བཅོམ་ལྡན་འདས་མི་འཁྲུགས་པ་དེ་དང་འོད་ཆེན་དང ། སྙིང་པོ་ཟིལ་གྱིས་གནོན་དང་མེ་ཏོག་ཟིལ་གྱིས་གནོན་དང་ལྷུན་པོ་དང་ལྷུན་པོ་ཆེན་པོ་དང ། ཤིན་དུ་ལྷུན་པོ་དང་ལྷུན་པོ་བཟང་པོ་ལྟ་བུ་དང ། ལྷུན་པོ་བཟང་པོས་རྣམ་པར་གནོན་པ་དང ། ནམ་མཁའ་གསལ་བ་དང་ཟླ་ཉི་གསལ་བ་དང ། མེ་གསལ་དང་དཔལ་གྱི་སྙིང་པོ་ནོར་བུ་གསལ་བ་དང ། 101.309a དང་བདུད་རྩི་སྤྲོ་གསལ་དང་ཟླ་མཆོག་དཔལ་དང ། མཐའ་ཡས་དཔལ་དང ། རིན་པོ་ཆེ་འདུས་པའི་དཔལ་དང ། རིན་པོ་ཆེ་ཕྱིར་མི་ལྡོག་པའི་དཔལ་དང་རིན་པོ་ཆེ་དག་པ་འབྱུང་བའི་དཔལ་དང ། བཻ་དཱུརྱའི་སྙིང་པོ་མཆོག་གི་དཔལ་དང ། ཁྲེལ་མེད་དཔག་མེད་གསེར་མཆོག་བཀོད་པའི་དཔལ་དང ། ཏ་ལའི་རྒྱལ་པོ་ལྟར་འཕགས་པའི་དཔལ་དང ། ལྗོན་པ་རྣམ་པར་འཕེལ་བའི་དཔལ་དང ། སྤྱོད་པ་གྲངས་མེད་པ་ལ་ཡང་དག་པར་གནས་པའི་དཔལ་དང ། དོན་ཡོད་དཔལ་དང་དོན་ཀུན་གྲུབ་པའི་དཔལ་དང་པད་མ་མཆོག་གིས་རྣམ་པར་འཕྲུལ་པའི་དཔལ་དང ། ཡེ་ཤེས་གཙང་སྦས་དཔལ་དང ། ཚེ་དཔག་མེད་དང ། དབྱངས་དཔག་མེད་དང ། པདྨ་མའི་དབྱངས་དང་པདྨ་མའི་སྡེ་དང་དཔའ་སྡེ་དང ། མཚོན་ཆ་དཔའ་བརྟན་པའི་སྡེ་དང་ཉོན་མོངས་སྤོང་དང་ཤིན་དུ་ཡོངས་དག་ཏོག་དང ། ཤིན་ཏུ་དྲི་མེད་འབར་བའི་ཏོག་དང ། ཐུགས་དམ་ཀུན་ཆུབ་ཐེ་ཙོམ་གཅོད་པ་དང ། ཀུན་དུ་རྣམ་པར་སྣང་མཛད་རྣམ་བར་བརྙེས་པ་དང ། ཀུན་དུ་ཡོན་ཏན་རྣམ་གནོན་དང་ཀུན་དུ་ཡོན་ཏན་འབྱུང་བ་དང ། དེ་བཞིན་དུ་བཅོམ་ལྡན་འདས་རིན་པོ་ཆེ་སྣང་བ་རྣམ་པར་གནོན་པ་བསམ་གྱིས་མི་ཁྱབ་པ་དང ། རིན་པོ་ཆེ་གསལ་བ་དང་རིན་པོ་ཆེ་མང་པོ་དང ། དེ་ལ་སོགས་པ་སྐྱེ་བ་མེད་པ་དང ། འགག་པ་མེད་པའི་ཆོས་དང་ལྡན་པ་འདས་པ་དང ། མ་འོངས་པ་དང ། ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་རྣམས་ལ་སེམས་ཐམས་ཅད་ཀྱིས་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་སྐྱབས་སུ་མཆིའོ། །དེ་བཞིན་དུ་བཅོམ་ལྡན་འདས་དེ་དག་གི་ཆོས་སྤྲོས་པ་མེད་པ། ཡི་གེ་མེད་པ། འཕགས་པ་རྣམས་ཀྱི་སོ་སོ་རང་རིག་པར་བྱ་བ། སེམས་ཅན་མེད་པ་དང་སེམས་ཅན་གྱི་རྡུལ་དང་བྲལ་བ། བདག་མེད་པ། འདོད་ཆགས་ཀྱི་རྡུལ་དང་བྲལ་བ། སྲོག་མེད་པ། སྐྱེ་བ་དང་འཆི་བ་དང་བྲལ་བ། གང་ཟག་མེད་པ་སྔོན་གྱི་མཐའ་དང ། ཕྱི་མའི་མཐའ་ཉེ་བར་ཞི་བའི་མཚན་ཉིད་དང་ལྡན་པ། འདོད་ཆགས་དང་བྲལ་བ། དམིགས་པ་མེད་པའི་ཚུལ་ཅན། ཡི་གེ་མ་ཡིན་པ། ངག་ཐམས་ཅད་ཆད་པ། བརྗོད་དུ་མེད་པ། དབའ་རླབས་ཐམས་ཅད་དང་བྲལ་བ། ཐམས་ཅད་ཀྱི་རྗེས་སུ་འགྲོ་བ། ནམ 101.309b མཁའ་དང་འདྲ་བ། ཁ་དོག་མེད་པ། རྟགས་དང ། དབྱིབས་དང ། རྒྱུ་བ་ཐམས་ཅད་དང་བྲལ་བ། བདག་མེད་པ། བདག་ཏུ་འཛིན་པ་དང་བྲལ་བ། རྣམ་པར་རིག་པ་མེད་པ་སེམས་དང ། ཡིད་དང་རྣམ་པར་ཤེས་པ་དང་བྲལ་བ། ཟླ་མེད་པའི་ཕྱིར་འདྲ་བ་མེད་པ། རྒྱུའི་མཚན་ཉིད་དང་བྲལ་བ། རྐྱེན་གྱིས་སྒྲོ་བཏགས་པ་མེད་པ། ཆོས་ཀྱི་དབྱིངས་དང་མཉམ་པ། ཆོས་ཐམས་ཅད་མཉམ་པར་བཞག་པ་འགྲོ་བ་མེད་པའི་ཚུལ་གྱིས་དེ་བཞིན་ཉིད་ཀྱི་རྗེས་སུ་སོང་བ། ཤིན་དུ་གཡོ་བ་མེད་པའི་ཕྱིར་ཡང་དག་པའི་མཐའ་ལ་གནས་པ། ཡུལ་དྲུག་ལ་གནས་པ་མེད་པའི་ཕྱིར་མ་གཡོས་པ། གནས་མེད་པའི་ཕྱིར་གར་ཡང་འོང་བ་དང ། འགྲོ་བ་མེད་པ། སྟོང་པ་ཉིད་ལ་མཉམ་པར་བཞག་པ། མཚན་མ་མེད་པས་རབ་ཏུ་ཕྱེ་བ། སྨོན་པ་མེད་པའི་མཚན་ཉིད་ཅན། རྟོག་པ་དང་སེལ་པ་དང་བྲལ་བ། གཞག་པ་དང་འདེག་པ་མེད་པ། སྐྱེ་བ་དང་འདིག་པ་དང་བྲལ་བ། ཀུན་གཞི་མེད་པ། མིག་དང ། རྣ་བ་དང ། སྣ་དང་ལྕེ་དང ། ལུས་དང་ཡིད་ལས་ཡང་དག་པར་འདས་པ། མཐོ་བ་མེད་ཅིང་དམའ་བ་མེད་པ། གཡོ་བ་མེད་པར་གནས་པ་བརྙེས་པ། སྤྱོད་པ་ཐམས་ཅད་དང་བྲལ་བ། མདོར་ན་ཡང་དག་པར་སྐྱེད་པ་མེད་པ། སྐྱེས་བ་མེད་པ། འགགས་པ་མེད་པ་འགག་པ་མེད་པ། འདུས་མ་བྱས་པའི་ཆོས་དེ་ལ་ལུས་ཐམས་ཅད་ཀྱིས་ཕྱག་འཚལ་ནས། བསམ་བ་དང ། ལྷག་པའི་བསམ་པ་རུས་པའི་ཁོང་ནས་དགའ་བ་དང ། རྐང་གི་ཁོང་ནས་དགའ་བའི་སེམས་ཐམས་ཅད་ཀྱིས་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་སྐྱབས་སུ་མཆིའོ། །དེ་བཞིན་དུ་ཐོགས་པ་མེད་ཅིང་ཆད་པ་མེད་པའི་སྤོབས་པ་དང་ལྡན་བ་བཅོམ་ལྡན་འདས་དྲི་མ་མེད་པར་གྲགས་པ་དེ་ལ་སྐྱབས་སུ་མཆིའོ། །དེ་བཞིན་དུ་རྡོ་རྗེའི་ལྟེ་བ་དང ། རྡོ་རྗེའི་སྡེ་དང ། ལྷའི་དབུ་རྒྱན་ལྗོན་པ་དང ། སྤོས་ཀྱི་གླང་པོ་དང ། བདེན་པ་པོ་དང་ཡེ་ཤེས་ཏོག་དང ། ཆོས་ཀྱི་ཏོག་དང ། ཟླ་བའི་ཏོག་དང་ཉི་མའི་ཏོག་དང ། མཐའ་ཡས་ཏོག་དང་ཚིག་མེད་པ་དང ། བརྗོད་ཏུ་མེད་པ་དང་དམིགས་པ་མེད་པ་དང ། རྩོམ་པ་མེད་པ་དང་བུད་མེད་འགྱུར་བ་དང་སྐར་མའི་རྒྱལ་མཚན་དང ། 101.310a རི་རབ་རྒྱལ་མཚན་དང་མེ་ཏོག་རྒྱལ་མཚན་དང་ཆགས་མེད་རྒྱལ་མཚན་དང ། དེ་དག་ལ་སོགས་པ་ཕྱིར་མི་ལྡོག་པའི་བྱང་ཆུབ་སེམས་དཔའི་ཚོགས་ཀྱི་མཆོག་ལ་ལུས་ཐམས་ཅད་ཀྱིས་ཕྱག་འཚལ་ནས་བསམ་བ་དང ། ལྷག་པའི་བསམ་པ་རུས་པའི་ཁོང་ནས་དགའ་བ་དང ། རྐང་པའི་ཁོང་ནས་དགའ་བའི་སེམས་ཐམས་ཅད་ཀྱིས་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་སྐྱབས་སུ་མཆིའོ། །དེ་བཞིན་གཤེགས་པ་ཞི་བའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ཤཱནྟེ་ཤཱནྟེ། རཱ་ག་ཀྵ་ཡཱ་ཡ། ཤཱནྟེ་ཤཱནྟེ། དྭེ་ཥ་ཀྵ་ཡཱ་ཡ། ཤཱནྟེ་ཤཱནྟེ། མོ་ཧ་ཀྵ་ཡཱ་ཡ། དེ་ལྟར་ལན་གཉིས་ལན་གསུམ་དུའོ། །ཏདྱ་ཐཱ། མུ་རུ་ལུ་མུ་རུ་ལུ། ཨ་བ་ཧ། མུ་རུ་ལུ། བི་ཛ་ཡཱ་ཡ་སཝཱ་ཧཱ། དེ་ལྟར་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་མཆིས་ནས་སེམས་ཅན་ཐམས་ཅད་ལ་སྨན་པ་དང ། བདེ་བ་དང ། མགོན་མ་མཆིས་པ་རྣམས་ཀྱི་མགོན་དང ། སྐྱབས་མ་མཆིས་པ་རྣམས་ཀྱི་སྐྱབས་དང ། དཔུང་གཉེན་མ་མཆིས་པ་རྣམས་ཀྱི་དཔུང་གཉེན་དང ། འདོད་ཆགས་དང་ཞེ་སྡང་དང ། གཏི་མུག་གི་མུན་པར་གྱུར་པ་རྣམས་ལ་སྣང་བ་བགྱི་བ་དང ། ལམ་ངན་པ་ལ་གནས་པ་རྣམས་ལ་ལམ་བསྟན་ནས་ཁམས་གསུམ་གྱི་སེམས་ཅན་གྱི་ཁམས་ཐར་བར་བགྱི་བའི་སླད་ཏུ་བསམ་བ་དང་ལྷག་པའི་བསམ་པའི་སེམ་ཅན་ཐམས་ཅད་ཀྱིས་སྙིང་རྗེ་ཆེན་པོ་མངོན་དུ་བགྱིས་ནས་བྱང་ཆུབ་ཀྱི་སེམས་བསྐྱེད་པར་བགྱིའོ། །ཇི་ལྟར་འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་རྣམས་ཀྱིས་བསྐྱེད་པ་དང་སྐྱེད་པར་འགྱུར་བ་དང ། སྐྱེད་པ་དེ་ལྟར་བདག་གིས་ཀྱང་བསྐྱེད་པར་བགྱི་སྟེ། བསམ་པ་དང ། ལྷག་པའི་བསམ་བའི་རྒྱུད་དེས་དེ་ལྟར་བསྐྱེད་པར་བགྱིའོ། །གང་འགོག་པ་མ་མཆིས་པ་དང ། བསགས་པ་མ་མཆིས་པ་དང ། བསགས་པ་མ་ལགས་པར་བསྟན་པ་དང ། བསྒྲུབ་པ་མ་མཆིས་པ་དང ། རྟོག་པ་མ་མཆིས་པ་དང་རྣམ་པར་རྟོག་པ་མ་མཆིས་པ་དེ་ལྟར་བསྐྱེད་པར་བགྱིའོ། །གང་ན་ལུས་མ་མཆིས་པ་དང་ལུས་སུ་གདགས་པ་མ་མཆིས་པ་དང ། 101.310b ངག་མ་མཆིས་པ་དང ། ངག་ཏུ་གདགས་པ་མ་མཆིས་པ་དང ། སེམས་མ་མཆིས་པ་དང་ཡིད་ཀྱི་རྣམ་པར་ཤེས་པ་མ་མཆིས་པ་དང ། རྣམ་པར་རིག་པ་མ་མཆིས་པ་དང ། དེ་བཞིན་ཉིད་ཏུ་མ་ལགས། ཆོས་ཀྱི་དབྱིངས་སུ་མ་ལགས་ཡང་དག་པའི་མཐར་མ་ལགས། སངས་རྒྱས་སུ་མ་ལགས་བྱང་ཆུབ་ཏུ་མ་ལགས་ཏེ། གང་དུ་འདི་དག་ཏུ་མངོན་པར་ཞེན་པ་མ་མཆིས་པ་དེ་ལྟར་བསྐྱེད་པར་བགྱིའོ། །ཀུན་རྫོབ་ལ་བརྟེན་ནས་སྡིག་པ་ཐམས་ཅད་བཤགས་སོ། །བསོད་ནམས་ཐམས་ཅད་ལ་རྗེས་སུ་ཡི་རང་ངོ ། །དེ་བཞིན་གཤེགས་པ་ཐམས་ཅད་ལ་བསྐུལ་མ་འདེབས་སོ། །སྡིག་པ་ཐམས་ཅད་བཤགས། བསོད་ནམས་ཐམས་ཅད་ལ་རྗེས་སུ་ཡི་རང ། དེ་བཞིན་གཤེགས་པ་ཐམས་ཅད་ལ་བསྐུལ་མ་བཏབ་ནས་གཟུངས་འདི་དག་བརྗོད་པར་བགྱིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་བཞིན་གཤེགས་པ་ཙན་དན་གྱི་བསུང་ལ་ཕྱག་འཚལ་ལོ། །ཏད་ཡ་ཐཱ། ཙི་ར་ཏེ། མ་རི་ཙི་ཀི། དུརྡ་མེ། དུ་ར་ཨ་ནུ་པྲ་བིཥྚེ་ཙན་ད་ནཱ་གནྡྷེ། བི་ཤུདྡྷ་ཤཱི་ལེ། ཙ་ར་ཏྲི་བ་ཏི་སརྦྦ་ཏ་ཐཱ་ག་ཏ་ཨ་དྷི་ཏེ་སཝཱ་ཧཱ། ཕྱོགས་བཅུའི་འཇིག་རྟེན་གྱི་ཁམས་སུ་འདུས་པ་ཡང་དག་པར་རྫོགས་པའི་སངས་རྒྱས་དང ། བྱང་ཆུབ་སེམས་དཔའ་དེ་དག་བདག་ལ་དགོངས་སུ་གསོལ། གང་བདག་མི་ཤེས་པའི་རབ་རིབ་ཀྱིས་ཁེབས་ཏེ་མུན་པར་གྱུར་ནས། ཚེ་འདིའམ། སྐྱེ་བ་གཞན་ནམ་སྐྱེ་བ་ཐོག་མ་དང་ཐ་མ་མཆིས་པའི་འཁོར་བ་ན་འཁོར་བའི་བར་དུ་སངས་རྒྱས་དང་ཆོས་དང ། དགེ་འདུན་དང ། ཕ་མ་དང་བླ་མ་དང ། ཡོན་གནས་དང་མཁན་པོ་དང་སློབ་དཔོན་དང་ཚངས་པ་མཚུངས་པར་སྤྱོད་པ་རྣམས་ལ་ལུས་དང ། ངག་དང ། ཡིད་ཀྱིས་ཉེས་པར་སྤྱད་པ་བགྱིས་པ་དང ། བགྱིད་ཏུ་སྩལ་བ་དང ། བགྱིད་པ་ལ་རྗེས་སུ་ཡི་རང་བར་གྱུར་པ་དང ། སངས་རྒྱས་ཀྱིའམ། ཆོས་ཀྱིའམ། དགེ་འདུན་གྱིའམ། ཕྱོགས་བཞིའི་དགེ་འདུན་གྱི་འདུ་བའི་སྒོ་ཆེན་པོ་ཕྲོགས་པ་དང ། འཕྲོག་ཏུ་སྩལ་པ་དང ། འཕྲོག་པ་ལ་རྗེས་སུ་ཡི་རང་བར་གྱུར་པ་དང ། སོ་སོར་ཐར་པའི་སྡོམ་པའམ། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ལས་ལྟུང་བ་ཆུང་ངུ་དང ། 101.311a འབྲིང་དང ། ཆེན་པོ་བྱུང་བར་གྱུར་པ་བཤགས་པ་དང ། བཤགས་པར་འོས་པ་དེ་དག་ཕྱོགས་བཅུའི་འཇིག་རྟེན་གྱི་ཁམས་སུ་འདུས་པ། ས་ཆེན་པོར་ཆུད་པ་ཡེ་ཤེས་ཆེན་པོ་བརྙེས་པ། ཐུགས་རྗེ་དང་ལྡན་བ། བྱམས་བ་དང་ལྡན་བ་ཕན་བར་བཞེད་པ། ཐུགས་བརྩེ་བ་ཅན། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སོགས་པ་དང ། དེ་བཞིན་དུ་རྣམ་པར་སྣང་མཛད་དང ། རྗེ་མཛད་དང ། དངོས་ཉིད་ཆོས་མཆོག་དང ། ངེས་པར་དྲི་མེད་འབྱུང་གནས་དང ། རིན་ཆེན་སྒྲོན་མ་འོད་ཟེར་དང ། ཟླ་བས་བརྒྱན་པ་དང ། གློག་གི་བརྗི་བརྗིད་དང་དབྱངས་ཀྱི་དབང་ཕྱུག་རྒྱལ་པོ་དང ། མེ་ཏོག་ཀུན་ཏུ་རྒྱས་པ་ས་ལའི་རྒྱལ་པོ་དང ། མེ་ཏོག་སྐར་འོད་དང ། མངོན་པར་མཁྱེན་པས་རྣམ་པར་རོལ་པ་དང ། ཟླ་དཀྱིལ་རྣམ་དག་དང ། ཤིན་དུ་རབ་ཞི་མཁས་པ་དང་ཟླ་དབྱངས་དབང་ཕྱུག་རྒྱལ་པོ་དང ། བརྩོན་འགྲུས་གྲངས་མེད་དང ། ཡང་དག་རབ་གནས་དཔལ་དང ། བདག་ཉིད་ཐམས་ཅད་ཡོངས་གཏོང་དང ། ཐུགས་རྗེ་ཆེ་དགོངས་དང ། ཕྱག་ན་རིན་ཆེན་ཕྱག་རྒྱ་དང ། ཕྱག་ན་རིན་པོ་ཆེ་དང་ཐུགས་བསྐྱེད་མ་ཐག་ཏུ་ཆོས་ཀྱི་འཁོར་ལོ་སྐོར་བ་དང ། ཐུབ་དཀའ་དང ། ཆུ་ལྷ་དང ། དྲི་མ་མེད་པ་དང ། ངན་སོང་སྤོང་བ་ལ་སོགས་པ་དེ་རྣམས་ཀྱི་སྤྱན་སྔར་ནོངས་པ་ནོངས་པར་མཐོལ་ལོ། །བཤགས་སོ། །རྣམ་པར་གཞིག་གོ། །རབ་ཏུ་གཞོམ་མོ་དམད་དོ། །བྱིས་པ་བླུན་པོ་ལྟ་བ་ལོག་པར་ཞུགས་པ། འཁོར་བར་བྱིང་པའི་ནོངས་པ་ནོངས་པར་གཟུང་དུ་གསོལ། དེ་བཞིན་གཤེགས་པ་བདེན་པའི་བློ་གྲོས་ཏོག་གི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་གསེར་བསགས་སྟུག་པོ་དགེ་བ་རྒྱས་པའི་སྙིང་པོའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། སཏྱེ་སཏྱེ། སཏྱ་བི་ཤོ་དྷ་ནི། སཏྱ་ཨཾ་བུ་ཛ། བི་ལོ་ཙ་ནི། སརྦ་ཨཱ་བ་ར་ཎ་ནི་བ་ར་ཎ་བི་ཤོ་དྷ་ནི་སཝཱ་ཧཱ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་ཐུགས་རྗེ་ཆེན་པོ་སྐྱེད་ནས་བདག་ལ་དགོངས་སུ་གསོལ། གང་བདག་གིས་ཚེ་འདིའམ་ཚེ་རྗེས་པ་དེ་དང་དེ་དག་ཏུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་བསྐྱེད་པ་རྣམས་དང་བྱང་ཆུབ་ཀྱི་སེམས་མ་བསྐྱེད་པ་རྣམས 101.311b དང་མངོན་པར་འདོད་པ་རྣམས་དང ། ཐེག་པ་ལ་གསར་དུ་ཞུགས་པ་རྣམས་དང ། སེམས་དང་པོ་བསྐྱེད་པ་རྣམས་དང ། སྤྱོད་པ་དང་འབྲེལ་བ་རྣམས་དང ། མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་དང ། ཕྱིར་མི་ལྡོག་པ་རྣམས་དང་སྐྱེ་བ་གཅིག་གིས་ཐོགས་པ་རྣམས་དང ། ས་བཅུར་ཞུགས་པ་རྣམས་དང ། དབང་མ་བསྐུར་བ་རྣམས་དང ། དབང་བསྐུར་བ་ཐོབ་པ་རྣམས་དང ། དབང་བསྐུར་བ་རྣམས་དང ། དགེ་བའི་ཕྱོགས་ལ་བརྩོན་པ་རྣམས་དང་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་དང ། དེ་ལས་གཞན་པའི་བྱང་ཆུབ་ཀྱི་ཕྱོགས་ཀྱི་ཆོས་ལ་བརྩོན་བ་དེ་དག་དང ། ལུས་དང་ངག་དང ། ཡིད་ཀྱིས་ཉེས་པར་སྤྱོད་པར་བགྱིས་པ་དང ། བགྱིད་དུ་སྩལ་བ་དང ། བགྱིད་པ་ལ་རྗེས་སུ་ཡི་རང་བ་དང ། དེ་བཞིན་དུ་འཕགས་པ་རང་རྒྱལ་བ་རྣམས་དང ། དེའི་ལམ་ལ་རབ་ཏུ་གནས་པ་རྣམས་དང ། འཕགས་པ་རྒྱུན་ཏུ་ཞུགས་པ་རྣམས་དང ། ལེན་ཅིག་ཕྱིར་འོང་བ་རྣམས་དང ། ཕྱིར་མི་འོང་བ་རྣམས་དང ། དགྲ་བཅོམ་བ་རྣམས་དང ། ཕྱི་རོལ་གྱི་མངོན་པར་ཤེས་པ་ལྔ་ཐོབ་པ་རྣམས་དང ། དེ་ལས་གཞན་བ་འདོད་ཆགས་དང་བྲལ་བ་རྣམས་དང ། དྲང་སྲོང་རྣམས་དང ། དེ་ལས་གཞན་བ་ལམ་ཡང་དག་པའམ། ལམ་ལོག་པ་ལ་ཞུགས་པ་ནས་དེ་བཞིན་གཤེགས་པའི་སྙིང་པོ་དང་ལྡན་པའི་བར་རྣམས་དང ། ཆོས་ཀྱི་དབྱིངས་ཀྱི་ཁོངས་སུ་གཏོགས་པ་དེ་རྣམས་ལ་ལུས་དང་ངག་དང ། ཡིད་རྣམ་པ་བཅུས་ཉེས་པར་སྤྱད་པ་བགྱིས་པ་དང ། བགྱིད་ཏུ་སྩལ་བ་དང ། བགྱིད་པ་ལ་རྗེས་སུ་ཡིད་རང་བར་གྱུར་པ་དེ་དག་ཕྱོགས་བཅུའི་འཇིག་རྟེན་གྱི་ཁམས་སུ་འདུས་པ་ས་ཆེན་པོར་ཆུད་པ། ཡེ་ཤེས་ཆེན་པོ་བརྙེས་པ། འདས་པ་དང ། མ་འོངས་པ་དང ། ད་ལྟར་བྱུང་བའི་ཉན་ཐོས་དང ། རང་སངས་རྒྱས་དང་བྱང་ཆུབ་སེམས་དཔའ་དང ། ཡང་དག་པར་རྫོགས་པའི་སངས་རྒྱས་དང་བཅས་པ་དེ་རྣམས་ཀྱི་སྤྱན་སྔར་ནོངས་པ་ནོངས་པར་འཐོལ་ལོ། །བཤགས་སོ། །རྣམ་པར་གཞིག་གོ། །རབ་ཏུ་གཞོམ་མོ། །དམད་དོ། །བྱིས་པ་བླུན་པོ་ལྟ་བ་ལོག་པར་ཞུགས་པ་འཁོར་བར་བྱིང་བའི་ནོངས་པ་ནོངས 101.312a པར་གཟུང་དུ་གསོལ། ཟླ་འོད་གཞོན་ནུར་གྱུར་པ་ལ་ཕྱག་འཚལ་ལོ། །ཏདྱ་ཐཱ། པྲ་བྷེ་པྲ་བྷ་ཨ་ཀ་རེ། བ་བྷ་བ་ཏི། དྷརྨྨ་བི་ཤུདྡྷ། ཀརྨྨ་བི་ཤུདྡྷིརྦྷ་བ་ཏུ་མེ་སཝཱ་ཧཱ། སངས་རྒྱས་དང་བྱང་ཆུབ་སེམས་དཔའ་དེ་དག་བདག་ལ་དགོངས་སུ་གསོལ། གང་བདག་གིས་ཚེ་འདིའམ། སྐྱེ་བ་གཞན་དུ་སྐྱེ་བ་བརྒྱའམ། སྐྱེ་བ་སྟོང་ངམ། སྐྱེ་བ་ཁྲིའམ། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་ཚེ་སངས་རྒྱས་འབྱུང་བ་མ་རུང་བར་བགྱིས་པའམ། དམ་པའི་ཆོས་སྤངས་པའམ། མཚམས་མ་མཆིས་པ་ལྔ་བགྱིས་པ་དང ། བགྱིད་ཏུ་སྩལ་པ་དང ། བགྱིད་པ་ལ་རྗེས་སུ་ཡི་རང་བར་གྱུར་པ་དང ། ཆོས་ཆོས་མ་ལགས་པར་བསྟན་པ་དང ། ཆོས་མ་ལགས་པ་ཆོས་སུ་བསྟན་པ་དང ། བྱང་ཆུབ་ཀྱི་སེམས་བཏང་བ་དང ། དགེ་བའི་བཤེས་གཉེན་མ་རུང་བར་བགྱིས་པ་ནས་དུད་འགྲོའི་སྐྱེ་གནས་སུ་གཏོགས་པའི་བར་གྱི་སེམས་ཅན་གྱི་ཡིད་དང་ཐང་ཅིག་ཙམ་ཡང་འགལ་བར་བགྱིས་པ་དང ། བགྱིད་ཏུ་སྩལ་བ་དང་བགྱིད་པ་ལ་རྗེས་སུ་ཡི་རང་བར་གྱུར་པ་དང ། སྒྲིབ་པ་གང་གིས་བསྒྲིབས་ནས་སའི་རྒྱུ་མི་འབྱུང་བ་དང ། ཏིང་ངེ་འཛིན་གྱི་རྒྱུ་དང ། གཟུངས་ཀྱི་རྒྱུ་དང ། མངོན་བར་ཤེས་པའི་རྒྱུ་དང ། སོ་སོ་ཡང་དག་པར་རིག་པའི་རྒྱུ་དང ། རྫུ་འཕྲུལ་གྱི་རྐང་པའི་རྒྱུ་དང ། དབང་གི་རྒྱུ་དང་ཕ་རོལ་ཏུ་ཕྱིན་པའི་རྒྱུ་དང ། དེ་ལས་གཞན་བ་བྱང་ཆུབ་ཀྱི་ཕྱོགས་ཀྱི་ཆོས་ནས་སྣང་བའི་བར་གྱི་རྒྱུ་མི་འབྱུང་བའི་ལས་ཀྱི་སྒྲིབ་པ་དང ། རྣམ་པར་སྨིན་པའི་སྒྲིབ་པ་དང་ཤེས་བྱའི་སྒྲིབ་པ་དང་ཉོན་མོངས་པའི་སྒྲིབ་པ་དེ་དག་ཐམས་ཅད་ཕྱོགས་བཅུའི་འཇིག་རྟེན་གྱི་ཁམས་སུ་འདུས་པ། ས་ཆེན་པོར་ཆུད་པ། ཡེ་ཤེས་ཆེན་པོ་བརྙེས་པ། ཐུགས་རྗེ་དང་ལྡན་བ། བྱམས་པ་དང་ལྡན་པ་ཕན་པར་བཞེད་པ། ཐུགས་བརྩེ་བ་ཅན་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་དང ། དེ་བཞིན་དུ་དྲི་མེད་སྣང་གསལ་དང ། སྤོབས་པའི་རྒྱན་དགོངས་པ་དང་དྲི་མེད་ཟླ་བ་དང་མེ་ཏོག་གྲགས་དང་མེ་ཏོག་བཀོད་པ་དང་སྣང་མཛད་དང་གསལ་བ་མཛད་དང་རིན་ཆེན་མཆོག་དང ། 101.312b འཇིགས་མེད་གཟིགས་དང ། འཇིགས་དང་བག་ཚ་བ་དང ། སྤུ་ཟིང་མི་མངའ་བ་དང ། སེང་གེ་བསྒྱིངས་པའི་སྟོབས་དང ། ཡང་དག་པར་རྫོགས་པའི་སངས་རྒྱས་གསེར་འོད་གཟི་བརྗིད་རྒྱལ་པོ་ལ་སོགས་པ་དང ། དེ་བཞིན་དུ་བྱང་ཆུབ་སེམས་དཔའ་འཕགས་པ་ཀུན་ནས་འོད་ཟེར་དང་དྲི་མེད་རྣམ་གནོན་དང ། སྒྲ་བྱིན་དང ། ཆོས་ཀྱི་འཁོར་ལོ་ཐོགས་པ་མེད་པར་བསྐོར་བ་དང ། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང ། སྒྲིབ་པ་མེད་པར་ཆོས་ཀྱི་འཁོར་ལོ་བསྐོར་བ་དང ། དྲི་མེད་གཙང་མ་དང ། མིག་ཡོངས་སུ་སྦྱོང་བ་དང ། སེམས་ཅན་ཀུན་ལ་སླུ་བ་མེད་པའི་བློ་དང ། སྒྲ་སྙན་ངེས་བསྒྲགས་དབྱངས་དང ། རྒྱལ་བའི་བློ་གྲོས་དང ། བཟང་པོ་སྔོན་འབྱུང་དང་སྤྲིན་སྒྲ་དང ། མཆོག་དགའ་རྒྱལ་པོ་དང་དགའ་སྟོན་དང ། རྟག་ཏུ་བརྩོན་དང ། ལྷུན་པོ་རྩེ་འཛིན་ལ་སོགས་པ་སྐྱེ་བ་མེད་པ་དང ། འགག་པ་མེད་པའི་ཆོས་དང་ལྡན་པ་འདས་པ་དང ། མ་འོངས་པ་དང ། ད་ལྟར་བྱུང་བ་དེ་རྣམས་ཀྱི་སྤྱན་སྔར་ནོངས་པ་ནོངས་པར་འཐོལ་ལོ། །བཤགས་སོ། །རྣམ་པར་གཞིག་གོ། །རབ་ཏུ་གཞོམ་མོ་དམོད་དོ། །བྱིས་པ་བླུན་པོ་ལྟ་བ་ལོག་པར་ཞུགས་པ་འཁོར་བར་བྱིང་བའི་ནོངས་པ་ནོངས་པར་གཟུང་དུ་གསོལ། ཏདྱ་ཐཱ། ས་མ་ཡོ་གེ། ཙིཏྟ་བི་བར་ཏེ། ཨ་ཁེ་མ་ཁེ། མ་ད་ནེ་བི་བྷ་ག་ཏེ། ས་མན་ཏ་གུ་ཎེ། ས་ཏྱ་ར་མེ་མུཀ་ཏེ་པྲ་མུཀ་ཏེ། ཧི་ལེ་ཨ་སི་ལི། ཨ་ཙ་མེ་ཙ་མེ། ཨ་ཙི་ཏེ། མ་ཙི་ཊེ་ཧ་རེ། མོ་ཙེ་མ་ཡོ་གྲཱ་ཧེ། ཧེ་མ་བ་དེ། ཙོ་པ་དེ་དྷརྨྨ་ཙིཏྟ། ཨ་བིཀྵེ་པེ་སཝཱ་ཧཱ། སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་དེ་དག་གིས་བདག་ཁམས་གསུམ་དུ་བྱིང་བ་ལས་དབྱུང་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་གིས་གཡང་ས་ཆེན་པོར་ལྷུང་བ་ལས་གདེག་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་ཁྲོན་པ་ཆེན་པོ་ན་མཆིས་པ་ལས་དྲང་དུ་གསོལ། སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་དེ་དག་གིས་བདག་འབྲོག་དགོན་པ་ཆེན་པོའི་ནང་དུ་ལྷུང་བ་ལས་བསྐྱབ་ཏུ་གསོལ། སངས་རྒྱས་བཅོམ་ལྡན་འདས་དང ། 101.313a བྱང་ཆུབ་སེམས་དཔའ་དེ་དག་གིས་བདག་ཉོན་མོངས་པའི་རྒྱ་མཚོ་ཆེན་པོས་བདས་པ་ནས་བསྒྲལ་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་འཁོར་བའི་རྒྱས་ཟིན་པ་ལས་དགྲོལ་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་སྲས་གཅིག་དང་འདྲ་བར་ཐུགས་བརྩེ་བར་དགོངས་སུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་སྲས་གཅིག་དང་འདྲ་བར་བསྟན་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་སློབ་མ་སྡུག་པ་དང་འདྲ་བར་བསླབ་དུ་གསོལ། །སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་དཀའ་བ་བརྒྱ་སྟོང་དེ་དག་མངོན་དུ་མཛད་ནས་བདག་ལ་ཐུགས་དགོངས་སུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་སྨོན་ལམ་ཆེན་པོ་བཅུ་པོ་ཁྲི་ཕྲག་གྲངས་མེད་པ་དེ་དག་མངོན་དུ་མཛད་ནས་བདག་ལ་གྲུབ་པར་མཛད་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་ཏིང་ངེ་འཛིན་མངོན་དུ་མཛད་ནས་བདག་ལ་སྐྱེད་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་མཆོག་ཏུ་ཟག་པ་མེད་པའི་ཆོས་འདུལ་བ་ལ་གཞག་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་ཐུགས་རྗེ་ཆེན་པོའི་ཆབ་ཀྱིས་བདག་བཀྲུས་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་སྟོབས་བཅུ་པོ་རྣམས་ཀྱིས་བདག་ལ་བྱུག་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་ངོ་ཚ་མཁྱེན་པའི་ན་བཟས་བདག་ལ་དགབ་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བྱང་ཆུབ་ཀྱི་ཡན་ལག་གི་མེ་ཏོག་རྣམས་ཀྱིས་བདག་ལ་གཏོར་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་རྒྱལ 101.313b ཚབ་ཏུ་དབང་བསྐུར་བས་བདག་ལ་དབང་བསྐུར་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་སེང་གེའི་སྒྲ་ཆེན་པོས་བདག་ལ་ལུང་བསྟན་དུ་གསོལ། དེ་བཞིན་གཤེགས་པ་ཟླ་མཆོག་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཇིགས་མེད་འབྱུང་གནས་ལ་ཕྱག་འཚལ་ལོ། །ཏདྱ་ཐཱ། དྷ་རེ་དྷ་རེ། དྷ་ར་ཎི། ན་དྷ་ནེ། ཨ་བྷ་ཡ། ཀལྤེ་ཀལྤེ། བིཀྵེ། ཨ་སྨྲྀ་ཏ་ཀལྤ། ཧུ་ཧ་ཤ་ནེ། ཨ་ནནྟ་ཁེ། ཙཀྵུཿ ུངྒ་ཏེ།[་\ུ0f00]་བྷྲཱུཾ་སཝཱ་ཧཱ། སངས་རྒྱས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་དང ། བྱང་ཆུབ་སེམས་དཔའ་དེ་དག་བདག་ལ་དགོངས་སུ་གསོལ། གང་བདག་གིས་ཚེ་འདིའམ། སྐྱེ་བ་གཞན་རྣམས་སུ་སྐྱེ་བ་བརྒྱའམ། སྐྱེ་བ་སྟོང་ངམ། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་ཚེ་སངས་རྒྱས་དང ། ཆོས་དང་དགེ་འདུན་དང ། ཕ་མ་དང་བླ་མ་དང ། ཡོན་གནས་དང ། མཁན་པོ་དང་སློབ་དཔོན་དང ། ཚངས་པ་མཚུངས་པར་སྤྱོད་པ་དང ། དེ་ལས་གཞན་ལ་ཡང་དག་པ་དང ། ལོག་པའི་ལམ་ལ་ཞུགས་པ་ནས། དེ་བཞིན་གཤེགས་པའི་སྙིང་པོ་དང་ལྡན་པའི་བར་དང ། ཆོས་ཀྱི་དབྱིངས་ཀྱི་ཁོངས་སུ་གཏོགས་པ་རྣམས་ལ་ཟས་ཁམ་གཅིག་ཙམ་སྩལ་པ་དང ། བྱམས་པ་བསྒོམས་པའམ། ལུས་དང་ངག་དང་ཡིད་ཀྱིས་ཕྱི་དང་ནང་གི་ལེགས་པར་སྤྱོད་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱི་སྟེ་ཇི་ལྟར་འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་རྣམས་ཀྱིས་ཆོས་ཉིད་དེ་མངོན་དུ་མཛད་ནས་ཡོངས་སུ་བསྔོས་པ་དང ། ཡོངས་སུ་བསྔོ་བར་འགྱུར་བ་དང ། ཡོངས་སུ་བསྔོ་བ་དེ་ལྟར་བདག་གིས་ཀྱང་ཡོངས་སུ་བསྔོ་བར་བགྱིའོ། །ཇི་ལྟར་ཆོས་ཉིད་དེ་དང ། ཇི་ལྟར་དེ་བཞིན་ཉིད་དེ་དང ། ཇི་ལྟར་ཡང་དག་པའི་མཐའ་དེ་དང ། ཇི་ལྟར་ཆོས་ཀྱི་དབྱིངས་དེ་དང ། ཇི་ལྟར་སྟོང་པ་ཉིད་དེ་དང ། ཇི་ལྟར་རྣམ་པ་ཐམས་ཅད་མཁྱེན་པ་ཉིད་དེ་དང་ལྡན་པ་དེ་ལྟར་ཡོངས་སུ་བསྔོ་བར་བགྱིའོ། །དེ་བཞིན་གཤེགས་པ་མེ་ཏོག་མནྡཱ་ར་བའི་བསུང 101.314a ལ་ཕྱག་འཚལ་ལོ། །ཏདྱ་ཐཱ། བི་ཛི་རི་བྷ། བི་ཛི་རི་བྷ། ཨུཏྤ་ད་བྱ་ཡ། བི་ཛི་རི་བྷ། སྟབ་ཧ་ར་སྟབ་ཧ་ར། ཨ་ནཱུ་ན། ཏ་ཐཱ་ཏ་བྷཱུ་ཏ་ཀོ་ཊི་བི་རི་ཛི་བྷ་སཝཱ་ཧཱ། འདས་པ་དང ། མ་འོངས་པ་དང ། ད་ལྟར་བྱུང་བ་ཡང་དག་པར་རྫོགས་པའི་སངས་རྒྱས་དང་བྱང་ཆུབ་སེམས་དཔའ་གང་ལགས་པ་དེ་དག་དང་པོ་བདག་གིས་ཇི་ལྟར་སེམས་ཅན་མ་རྒལ་བ་རྣམས་བསྒྲལ་བ་དང ། མ་གྲོལ་བ་རྣམས་དགྲོལ་བ་དང ། དབུགས་མ་ཕྱིན་པ་རྣམས་དབུགས་དབྱུང་བ་དང ། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླའོ་སྙམ་དུ་ཐུགས་བསྐྱེད་པ་དང ། དེ་དག་ལས་གཞན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དང་ཡང་དག་པར་ལྡན་པའི་ཐུགས་བསྐྱེད་པ་དེ་རྣམས་ལ་བདག་མཆོག་དང ། གཙོ་བོ་དང་དམ་པ་དང ། རབ་དང་ཕུལ་དང ། བླ་ན་མ་མཆིས་པ་དང ། གོང་ན་མ་མཆིས་པ་དང ། གོང་མའི་ཡང་གོང་མ་དང ། མཉམ་བ་མ་མཆིས་པ་དང ། མི་མཉམ་བ་དང་མཉམ་བ་དང ། དམིགས་པ་མ་མཆིས་པ་དང ། རྣམ་པར་རྟོག་པ་མ་མཆིས་པ་དང ། མཚན་མ་མ་མཆིས་པ་དང ། སྤྲོས་པ་མ་མཆིས་པ་དང ། ཡི་གེ་མ་མཆིས་པ་དང ། ཉོན་མོངས་པ་མ་མཆིས་པ་དང ། ཆགས་པ་མ་མཆིས་པ་དང ། ནམ་མཁའ་ལྟར་མཉམ་པ་དང ། ལུས་དང་སེམས་གྲོལ་བ་དང ། རྣམ་བ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ ། །འདས་པ་དང ། མ་འོངས་པ་དང ། ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་དང ། བློ་གྲོས་མི་ཟད་པ་དང ། རིན་ཆེན་རྒྱལ་མཚན་དང ། དྲི་མ་མེད་པའི་སྙིང་པོ་དང ། ཆུང་འབྲིང་ཆེན་པོ་དང ། མངོན་མཁྱེན་རྣམ་རོལ་དང ། རྣམ་འཕྲུལ་དང་བ་དང ། གྲགས་པ་སྤྲིན་སྤས་དང་སེང་གེ་རྣམ་པར་རོལ་པའི་རྒྱལ་པོ་དང ། ལྷུན་པོ་མངོན་འཕགས་རྒྱལ་པོ་དང ། དམ་ཆོས་ཀུན་སྲུང་ཏོག་གྱུར་རྒྱལ་པོ་ལ་སོགས་པ་གང་ལགས་པ་དེ་དག་དང་པོ་བྱང་ཆུབ་ཏུ་ཐུགས་བསྐྱེད་པ་ནས་བཟུང་སྟེ། ཇི་ཙམ་དུ་དམ་པའི་ཆོས་གནས་པའི 101.314b དེའི་བར་དུ་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང ། ཚུལ་ཁྲིམས་ལས་བྱུང་བ་དང ། བསྒོམས་པ་ལས་བྱུང་བ་དང ། སྨོན་ལམ་ཆེན་པོ་བཅུ་པོ་ཁྲི་ཕྲག་གྲངས་མེད་པ་བསྒྲུབས་པ་གང་ལགས་པ་དང ། ཕ་རོལ་ཏུ་ཕྱིན་པ་དྲུག་བསྒྲུབས་པ་གང་ལགས་པ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ཡང་དག་པར་བླངས་པ་གང་ལགས་པ་དང ། བག་ཆགས་དང་མཆམས་སྦྱོར་བའི་ཉོན་མོངས་པ་ཐམས་ཅད་སྤངས་པ་གང་ལགས་པ་དང ། ཐམས་ཅད་མཁྱེན་པའི་ཡེ་ཤེས་བསགས་པ་གང་ལགས་པ་ནས། སྐུ་དང་གསུང་དང ། ཐུགས་ཀྱིས་ཕྱི་དང་ནང་གི་ལེགས་པར་སྤྱད་པ་གང་ལགས་བ་དེ་དག་ཐམས་ཅད་ལ་མཆོག་དང ། གཙོ་བོ་དང ། དམ་པ་དང ། རབ་དང་ཕུལ་དང ། བླ་ན་མ་མཆིས་པ་དང་གོང་ན་མ་མཆིས་པ་དང ། གོང་མའི་ཡང་གོང་མ་དང ། མཉམ་བ་མ་མཆིས་བ་དང ། མི་མཉམ་བ་དང་མཉམ་བ་དང ། དམིགས་པ་མ་མཆིས་པ་དང ། རྣམ་པར་རྟོག་པ་མ་མཆིས་པ་དང ། མཚན་མ་མ་མཆིས་པ་དང ། སྤྲོས་པ་མ་མཆིས་པ་དང ། ཡི་གེ་མ་མཆིས་པ་དང་ཉོན་མོངས་པ་མ་མཆིས་པ་དང ། ཆགས་པ་མ་མཆིས་པ་དང ། ནམ་མཁའ་ལྟར་མཉམ་པ་དང ། ལུས་དང་སེམས་གྲོལ་བ་དང ། རྣམ་པ་ཐམས་ཅད་ཀྱི་མཆོག་དང་ལྡན་བའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ ། །འདས་པ་དང ། མ་འོངས་པ་དང ། ད་ལྟར་བྱུང་བའི་བྱང་ཆུབ་སེམས་དཔའ་འཕགས་པ་སེང་གེའི་རྣམ་པར་རོལ་པ་དང ། སེང་གེ་བསྒྱིངས་པ་དང ། སེང་གེ་ཏོག་དང ། རིན་པོ་ཆེ་ཏོག་དང ། སེང་གེ་རྣམ་འཕྲུལ་ཏོག་དང ། པད་མ་བཀོད་པ་དང ། བརྩོན་བ་མི་གཏོང་བ་ལ་སོགས་པ་གང་ལགས་པ་དེ་དག་དང་པོ་ཐུགས་བསྐྱེད་པ་ནས་བཟུང་ནས། ཇི་ཙམ་དུ་ས་བཅུའི་བར་དེར་སྦྱིན་བ་ལས་བྱུང་བའི་བསོད་ནམས་བྱ་བའི་དངོས་པོ་དང ། ཚུལ་ཁྲིམས་ལས་བྱུང་བ་དང ། བསྒོམས་པ་ལས་བྱུང་བ་དང་སྨོན་ལམ་ཆེན་པོ་བཅུ་པོ་ཁྲི་ཕྲག་གྲངས་མེད་པ་བསྒྲུབས་པ་གང་ལགས་པ་དང ། ཕ་རོལ་ཏུ་ཕྱིན་པ་དྲུག་བསྒྲུབས་པ་གང་ལགས་པ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ཡང་དག་པར་བླངས་བ་གང་ལགས 101.315a པ་དང་བྱང་ཆུབ་ཆེན་པོ་བསགས་པ་གང་ལགས་པ་ནས། ལུས་དང་ངག་དང ། ཡིད་ཀྱིས་ཕྱི་དང་ནང་གི་ལེགས་པར་སྤྱད་པ་གང་ལགས་པ་དེ་དག་ཐམས་ཅད་ལ་མཆོག་དང ། གཙོ་བོ་དང་དམ་པ་དང ། རབ་དང་ཕུལ་དང ། བླ་ན་མ་མཆིས་པ་དང ། གོང་ན་མ་མཆིས་པ་དང ། གོང་མའི་ཡང་གོང་མ་དང ། མཉམ་བ་མ་མཆིས་པ་དང ། མི་མཉམ་བ་དང་མཉམ་བ་དང ། དམིགས་པ་མ་མཆིས་པ་དང ། རྣམ་པར་རྟོག་པ་མ་མཆིས་པ་དང ། མཚན་མ་མ་མཆིས་པ་དང ། སྤྲོས་པ་མ་མཆིས་པ་དང ། ཡི་གེ་མ་མཆིས་པ་དང ། ཉོན་མོངས་པ་མ་མཆིས་པ་དང ། ཆགས་པ་མ་མཆིས་པ་དང ། ནམ་མཁའ་ལྟར་མཉམ་བ་དང ། ལུས་དང་སེམས་གྲོལ་བ་དང ། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ ། །འདས་པ་དང ། མ་འོངས་པ་དང ། ད་ལྟར་བྱུང་བའི་འཕགས་པ་རང་རྒྱལ་བ་ཉོན་མོངས་འདུལ་དང ། དགེ་འབེབས་དང ། རྒྱ་སྤོས་གཙུག་དང ། ས་འཛིན་ལ་སོགས་པ་གང་ལགས་པ་དེ་དག་དང་པོ་སེམས་བསྐྱེད་པ་ནས་བཟུང་ནས་ཇི་ཙམ་དུ་ཐེག་པ་ཅིག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་བར་དེར་སྦྱིན་བ་ལས་བྱུང་བའི་བསོད་ནམས་བྱ་བའི་དངོས་པོ་དང ། ཚུལ་ཁྲིམས་ལས་བྱུང་བ་དང ། བསྒོམས་པ་ལས་བྱུང་བ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དང་ཡང་དག་པར་ལྡན་བ་གང་ལགས་པ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ཡང་དག་པར་བླངས་པ་གང་ལགས་པ་དང ། རང་བྱང་ཆུབ་བསགས་པ་གང་ལགས་པ་ནས། ལུས་དང་ངག་དང་ཡིད་ཀྱིས་ཕྱི་ནང་གི་ལེགས་པར་སྤྱད་པ་གང་ལགས་པ་དེ་དག་ཐམས་ཅད་ལ་མཆོག་དང ། གཙོ་བོ་དང་དམ་པ་དང ། རབ་དང་ཕུལ་དང ། བླ་ན་མ་མཆིས་པ་དང ། གོང་ན་མ་མཆིས་པ་དང ། གོང་མའི་ཡང་གོང་མ་དང ། མཉམ་བ་མ་མཆིས་པ་དང ། མི་མཉམ་བ་དང་མཉམ་བ་དང ། དམིགས་པ་མ་མཆིས་པ་དང ། རྣམ་པར་རྟོག་པ་མ་མཆིས་པ་དང ། མཚན་མ་མ་མཆིས་པ་དང ། སྤྲོས་པ་མ་མཆིས་པ་དང ། 101.315b ཡི་གེ་མ་མཆིས་པ་དང ། ཉོན་མོངས་པ་མ་མཆིས་པ་དང ། ཆགས་པ་མ་མཆིས་པ་དང ། ནམ་མཁའ་ལྟར་མཉམ་པ་དང ། ལུས་དང་སེམས་གྲོལ་བ་དང ། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ ། །འདས་པ་དང ། མ་འོངས་པ་དང ། ད་ལྟར་བྱུང་བའི་འཕགས་པ་རྒྱུན་ཏུ་ཞུགས་པ་དང ། ལན་ཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་འཕགས་པ་ཤཱ་རིའི་བུ་དང ། མཽད་གལ་གྱི་བུ་དང ། ཀཱ་ཏྱཱའི་བུ་དང ། ཤེས་རབ་སྒྲོན་མ་དང ། རབ་འབྱོར་ལ་སོགས་པ་གང་ལགས་པ་དེ་དག་དང་པོ་སེམས་བསྐྱེད་པ་ནས་བཟུང་ནས། ཇི་ཙམ་དུ་ཐེག་པ་གཅིག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་བར་དེར་སྦྱིན་བ་ལས་བྱུང་བའི་བསོད་ནམས་བྱ་བའི་དངོས་པོ་དང ། ཚུལ་ཁྲིམས་ལས་བྱུང་བ་དང ། བསྒོམས་པ་ལས་བྱུང་བ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དང་ཡང་དག་པར་ལྡན་པའི་གང་ལགས་པ་དང ། སྟོང་པ་ཉིད་དང ། མཚན་མ་མེད་པ་དང་སྨོན་པ་མེད་པ་ཡང་དག་པར་བླངས་པ་གང་ལགས་པ་དང ། ཉན་ཐོས་ཀྱི་བྱང་ཆུབ་ཏུ་བསགས་པ་གང་ལགས་པ་ནས། ལུས་དང་ངག་དང་ཡིད་ཀྱིས་ཕྱི་དང་ནང་གི་ལེགས་པར་དཔྱད་པའི་བར་གང་ལགས་པ་དེ་དག་ཐམས་ཅད་ལ་མཆོག་དང ། གཙོ་བོ་དང་དམ་པ་དང ། རབ་དང་ཕུལ་དང ། བླ་ན་མ་མཆིས་པ་དང ། གོང་ན་མ་མཆིས་པ་དང ། གོང་མའི་ཡང་གོང་མ་དང ། མཉམ་བ་མ་མཆིས་པ་དང ། མི་མཉམ་བ་དང་མཉམ་བ་དང་དམིགས་པ་མ་མཆིས་པ་དང ། རྣམ་པར་རྟོག་པ་མ་མཆིས་བ་དང ། མཚན་མ་མ་མཆིས་པ་དང ། སྨོན་པ་མ་མཆིས་པ་དང ། ཡི་གེ་མ་མཆིས་པ་དང ། ཉོན་མོངས་པ་མ་མཆིས་པ་དང ། ཆགས་པ་མ་མཆིས་པ་དང ། ནམ་མཁའ་ལྟར་མཉམ་བ་དང ། ལུས་དང་སེམས་གྲོལ་བ་དང ། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ ། །ཁམས་གསུམ་དུ་སྐྱེས་པའི་སེམས་ཅན་གྱི་ཁམས་སུ་གཏོགས་པ་གང 101.316a ལགས་པའི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང ། ཚུལ་ཁྲིམས་ལས་བྱུང་བ་དང ། བསྒོམས་པ་ལས་བྱུང་བ་དང ། དགེ་བ་བཅུའི་ལས་ཀྱི་ལམ་ཡང་དག་པར་བླངས་པ་གང་ལགས་པ་ནས་ལུས་དང་ངག་དང་ཡིད་ཀྱིས་ཕྱི་དང་ནང་གི་ལེགས་པར་སྤྱད་པ་གང་ལགས་པ་དང ། མ་འོངས་པ་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དང་ཡང་དག་པར་ལྡན་པ་གང་ལགས་པ་དེ་དག་ཐམས་ཅད་ལ་མཆོག་དང ། གཙོ་བོ་དང ། དམ་པ་དང ། རབ་དང་ཕུལ་དང ། བླ་ན་མ་མཆིས་པ་དང ། གོང་ན་མ་མཆིས་པ་དང ། གོང་མའི་ཡང་གོང་མ་དང ། མཉམ་བ་མ་མཆིས་པ་དང ། མི་མཉམ་བ་དང་མཉམ་བ་དང ། དམིགས་པ་མ་མཆིས་པ་དང ། རྣམ་པར་རྟོག་པ་མ་མཆིས་པ་དང་མཚན་མ་མ་མཆིས་པ་དང ། སྨོན་པ་མ་མཆིས་པ་དང ། ཡི་གེ་མ་མཆིས་པ་དང ། ཉོན་མོངས་པ་མ་མཆིས་པ་དང ། ཆགས་པ་མ་མཆིས་པ་དང ། ནམ་མཁའ་ལྟར་མཉམ་པ་དང ། ལུས་དང་སེམས་གྲོལ་བ་དང ། རྣམ་པ་ཐམས་ཅད་ཀྱི་མཆོག་དང་ལྡན་བའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ ། །དེ་བཞིན་གཤེགས་པ་གསུང་མཆོག་ཞལ་ལ་ཕྱག་འཚལ་ལོ། །ཏདྱ་ཐཱ། ཙནྡ་ནེ་ཙནྡ་ནེ། ཙནྡ་ན་ཨང་གེ། ཙནྡ་ནེ་པྲ་བ་རེ། ཙནྡ་ཨ་བ་ཡེ། ཙནྡ་ན་སིདྡྷེ་ཙནྡན། ཨ་བ་ལོ་ཀི་ཏེ། ཙནྡ་ན། ཨ་ཤ་ཨུངྒ་ཏེ་སཝཱ་ཧཱ། རྗེས་སུ་ཡི་རང་བ་དང་ལྡན་བ་དང ། ཡོངས་སུ་བསྔོ་བ་དང་ལྡན་བའི་དགེ་བའི་རྩ་བ་དེ་དག་དང ། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་བསགས་པ་གང་ལགས་པ་དང ། མ་འོངས་པ་ན་མྱ་ངན་ལས་འདས་པའི་མཐའ་གང་ལགས་པ་དེ་དག་ཐམས་ཅད་ཡོངས་སུ་བསྡུས་ནས་བདག་དགེ་བ་ལ་བརྩོན་པའི་ལྷ་རྟག་ཏུ་འབྲང་བ་གང་ལགས་པ་དེ་དག་ལ་དབུལ་བར་བགྱིའོ། །དགེ་བའི་རྩ་བ་དེས་གཟི་བྱིན་དང་ལྡན་བ་དང ། སྟོབས་དང་ལྡན་བ་དང་དབང་ཆེ་བ་དང ། ཐུབ་པར་དཀའ་བར་གྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ 101.316b བསྐོར་བར་གྱུར་ཅིག་།བདུད་བཞི་ཚར་གཅོད་པར་གྱུར་ཅིག་།སེམས་ཅན་ཡོངས་སུ་སྨིན་པར་བྱེད་པར་གྱུར་ཅིག་།བདག་ཀྱང་དགེ་བའི་ཕྱོགས་ལ་མངོན་པར་བརྩོན་པའི་སྙིང་རྗེ་ཆེན་པོ་མངོན་དུ་བགྱིས་ནས། དྲན་པ་ཉེ་བར་སྒྲུབ་པར་གྱུར་ཅིག་།ལེ་ལོ་སེལ་བར་གྱུར་ཅིག་།ལམ་ཉེ་བར་སྟོན་པར་གྱུར་ཅིག་།མི་དགེ་བའི་ལས་ཟློག་པར་གྱུར་ཅིག་།དགེ་བ་ལ་སྦྱོར་བར་གྱུར་ཅིག་།ལུས་ལ་གཟི་བྱིན་འཇུག་པར་གྱུར་ཅིག་།མཐུ་དང་སྟོབས་ཡང་དག་པར་སྐྱེད་པར་གྱུར་ཅིག་།སྒྲིབ་པ་ཆེན་པོ་སྟུག་པོར་གྱུར་པ་འདི་ལས་རྣམ་པར་གྲོལ་བར་གྱུར་ཅིག་།སེམས་ཅན་གྱི་ཁམས་དང་ལས་ཀྱི་ཁམས་དང ། ཉོན་མོངས་བའི་ཁམས་དང ། ནམ་མཁའི་ཁམས་ཇི་ཙམ་པ་དེ་ཙམ་དུ་སེམས་ཅན་ལ་ཕན་པའི་ཕྱིར་གནས་པར་གྱུར་ཅིག་།དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བ་དེས་གཙུག་ལག་ཁང་འདི་ན་གནས་པའི་ལྷ་འཕགས་པ་རྣམ་ཐོས་ཀྱི་བུ་དང ། ཡུལ་འཁོར་བསྲུང་དང ། འཕགས་སྐྱེས་པོ་དང ། མིག་མི་བཟང་དང ། ལྔས་རྩེན་དང ། ལྔ་ལེན་དང ། ནོར་བུ་བཟང་པོ་དང ། གང་བ་བཟང་པོ་དང ། ལྷ་མོ་ཆེན་པོ་དཔལ་དང ། ལྗང་སྔོའི་བུ་འཁོར་དང་བཅས་པ་ལ་སོགས་པ་དང ། བྱང་ཆུབ་གོས་ལ་སོགས་པ་གཞི་བ་རྣམས་དང ། དགའ་བོ་དང་ཉེ་དགའ་ལ་སོགས་པ་ཀླུའི་བདག་པོ་རྣམས་དང ། འབྲོག་གནས་ལ་སོགས་པ་གནོད་སྦྱིན་གྱི་བདག་པོ་རྣམས་དང ། གང་གཞན་ཡང་ལྷ་དང་ཀླུ་དང ། གནོད་སྦྱིན་དང་དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་གང་ལགས་པ་དེ་དག་ལ་དགེ་བའི་རྩ་བ་དེ་འབུལ་བར་བགྱིའོ། །དགེ་བའི་རྩ་བ་དེས་གཟི་བྱིན་དང་ལྡན་བ་དང ། སྟོབས་དང་ལྡན་བ་དང ། དབང་ཆེ་བ་དང ། ཐུབ་པར་དཀའ་བར་འགྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་བར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་བསྐོར་བར་གྱུར་ཅིག་།བདུད་བཞི་ཚར་གཅོད་པར་གྱུར་ཅིག་།སེམས་ཅན་ཡོངས་སུ་སྨིན་པར་བགྱིད་པར་གྱུར་ཅིག་།བདག་ཀྱང་དགེ་བ་ལ་བརྩོན་པའི་སྙིང་རྗེ་ཆེན་པོ་མངོན་དུ་བགྱིས་ནས། 101.317a དྲན་པ་ཉེ་བར་སྒྲུབ་པར་གྱུར་ཅིག་།ལེ་ལོ་སེལ་བར་གྱུར་ཅིག་།ལམ་ཉེ་བར་སྟོན་པར་གྱུར་ཅིག་།མི་དགེ་བ་ལས་ཟློག་པར་གྱུར་ཅིག་།དགེ་བ་ལ་སྦྱོར་བར་གྱུར་ཅིག་།ལུས་ལ་གཟི་བྱིན་འཇུག་པར་གྱུར་ཅིག་།མཐུ་དང་སྟོབས་ཡང་དག་པར་སྐྱེད་པར་གྱུར་ཅིག་།སྒྲིབ་པ་ཆེན་པོ་སྟུག་པོར་གྱུར་པ་འདི་ལས་རྣམ་པར་གྲོལ་བར་གྱུར་ཅིག་།སེམས་ཅན་གྱི་ཁམས་དང་ལས་ཀྱི་ཁམས་དང ། ཉོན་མོངས་པའི་ཁམས་དང ། ནམ་མཁའི་ཁམས་ཇི་ཙམ་པ་དེ་ཙམ་དུ་སེམས་ཅན་ལ་ཕན་པའི་ཕྱིར་གནས་པར་གྱུར་ཅིག་།དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བའི་རྩ་བ་དེས་སེམས་ཅན་དམྱལ་བ་དང ། དུད་འགྲོ་དང ། ཡི་དགས་དང ། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་གང་ལགས་པ་རྣམས་དང ། མི་ཁོམ་པར་སྐྱེས་པ་གང་ལགས་པ་དང ། སངས་རྒྱས་དང་ཆོས་དང ། དགེ་འདུན་དང་བྲལ་བ་གང་ལགས་པ་དང ། བཅོམ་ལྡན་འདས་ཀྱི་བསྟན་པ་འདི་ལས་ཕྱི་རོལ་པ་དང ། དེ་ལས་གཞན་བ་མུ་སྟེགས་རྣམས་ལ་གནས་པ་ནས། ལོག་པ་ཉིད་དུ་ངེས་པའི་བར་གང་ལགས་པ་དེ་དག་ལ་དགེ་བའི་རྩ་བ་དེ་བསྔོ་བར་བགྱིའོ། །དགེ་བའི་རྩ་བ་དེས་ཕུང་པོ་འདི་དག་ཉིད་ཀྱིས་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་སྐྱེ་བར་འགྱུར་བ་ནས། བྱང་ཆུབ་མངོན་པར་རྫོགས་པར་སངས་རྒྱས་པའི་བར་དུ་གྱུར་ཏེ། ཆོས་ཀྱི་འཁོར་ལོ་རབ་ཏུ་བསྐོར་བར་གྱུར་ཅིག་།བདུད་བཞི་ཚར་གཅོད་བར་གྱུར་ཅིག་།སེམས་ཅན་ཡོངས་སུ་སྨིན་པར་བྱེད་པར་གྱུར་ཅིག་།བདག་ཀྱང་དགེ་བའི་ཕྱོགས་ལ་མངོན་བར་བརྩོན་པའི་སྙིང་རྗེ་ཆེན་པོ་མངོན་སུམ་དུ་བགྱིས་ནས་དྲན་བ་ཉེ་བར་སྒྲུབ་པར་གྱུར་ཅིག་།ལེ་ལོ་སེལ་བར་གྱུར་ཅིག་།ལམ་ཉེ་བར་སྟོན་པར་གྱུར་ཅིག་།མི་དགེ་བ་ལས་ཟློག་པར་གྱུར་ཅིག་།དགེ་བ་ལ་སྦྱོར་བར་གྱུར་ཅིག་།ལུས་ལ་གཟི་བྱིན་འཇུག་པར་གྱུར་ཅིག་།མཐུ་དང་སྟོབས་ཡང་དག་པར་བསྐྱེད་པར་གྱུར་ཅིག་།སྒྲིབ་པ་ཆེན་པོ་སྟུག་པོར་གྱུར་པ་འདི་ལས་རྣམ་པར་གྲོལ་བར་གྱུར་ཅིག་།སེམས་ཅན་གྱི་ཁམས་དང ། ལས་ཀྱི་ཁམས་དང་ཉོན་མོངས་པའི་ཁམས་དང ། ནམ་མཁའི་ཁམས་ཇི་ཙམ་པ་དེ་ཙམ 101.317b དུ་སེམས་ཅན་ལ་ཕན་པའི་ཕྱིར་གནས་པར་གྱུར་ཅིག་།དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བའི་རྩ་བ་དེས་ཉན་ཐོས་ཀྱི་ཐེག་པ་ལ་མོས་ཤིང་ཉན་ཐོས་ཀྱི་ཐེག་པས་ངེས་པར་འབྱུང་བར་འདོད་པའི་སེམས་ཅན་གང་ལགས་པ་དེ་དག་ལ་དགེ་བའི་རྩ་བ་དེ་དབུལ་པར་བགྱིའོ། །དགེ་བའི་རྩ་བ་དེས་ལམ་བཞི་ལ་དམིགས་ཤིང་འཕགས་པའི་བདེན་པ་བཞིའི་ཆོས་ཉིད་དང་ཡང་དག་པར་ལྡན་པ་མངོན་དུ་བགྱིས་ནས། ཉན་ཐོས་ཀྱི་བྱང་ཆུབ་མངོན་པར་རྫོགས་པར་སངས་རྒྱས་ཤིང་མངོན་བར་རྫོགས་པར་སངས་རྒྱས་ནས། ཐེག་པ་གཅིག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཀྱི་བར་དུ་ཡོངས་སུ་མྱ་ངན་ལས་འདའ་བར་གྱུར་ཅིག་།དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བའི་རྩ་བ་དེས་རང་སངས་རྒྱས་ཀྱི་ཐེག་པ་ལ་མོས་ཤིང་རང་སངས་རྒྱས་ཀྱི་ཐེག་པས་ངེས་པར་འབྱུང་བར་འདོད་པའི་སེམས་ཅན་གང་ལགས་པ་དེ་དག་ལ་དགེ་བའི་རྩ་བ་དེ་དབུལ་བར་བགྱིའོ། །དགེ་བའི་རྩ་བ་དེས་རྟེན་ཅིང་འབྲེལ་པར་འབྱུང་བའི་ཆོས་ཉིད་སྐྱེ་བ་དང ། འཇིག་པ་མངོན་དུ་བགྱིས་ནས། རང་བྱང་ཆུབ་མངོན་པར་རྫོགས་པར་སངས་རྒྱས་ཤིང་མངོན་པར་རྫོགས་པར་སངས་རྒྱས་པ་ནས། ཐེག་པ་གཅིག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཀྱི་བར་དུ་ཡོངས་སུ་མྱ་ངན་ལས་འདའ་བར་གྱུར་ཅིག་།དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བའི་རྩ་བ་དེས་སེམས་ཅན་ཐེག་པ་ཆེན་པོ་ལ་མོས་ཤིང་ཐེག་པ་ཆེན་པོ་ལ་ངེས་པར་འབྱུང་བར་འདོད་ལ། སེམས་ཅན་ཐམས་ཅད་བསྒྲལ་བར་འདོད་པ་གང་ལགས་པ་དེ་དག་ལ་དགེ་བའི་རྩ་བ་དེ་དབུལ་བར་བགྱིའོ། །དགེ་བའི་རྩ་བ་དེས་ཚོགས་ཤིན་དུ་བསགས་ཤིང་དགེ་བའི་རྩ་བ་ཉེ་བར་བསགས་པ། སྐྱེ་བ་མེད་པ་དང ། འགག་པ་མེད་པའི་ཆོས་ཉིད་མངོན་དུ་བགྱིས་ནས་བྱང་ཆུབ་ཆེན་པོར་མངོན་བར་རྫོགས་བར་སངས་རྒྱས་པར་གྱུར་ཅིག་།དགེ་བའི་རྩ་བ་དེ་ལས་དགེ་བའི་རྩ་བ 101.318a བྱུང་བ་གང་ལགས་པའི་དགེ་བའི་རྩ་བ་དེས་ཁམས་གསུམ་དུ་སྐྱེས་པའི་སེམས་ཅན་གྱི་ཁམས་ལ་དབུལ་བར་བགྱིའོ། །དེ་ཁམས་གསུམ་དུ་སྐྱེས་པའི་སེམས་ཅན་ཐམས་ཅད་བྱང་ཆུབ་ཆེན་པོར་མངོན་པར་རྫོགས་པར་སངས་རྒྱས་པ་ནས་ཆོས་ཀྱི་འཁོར་ལོ་རབ་ཏུ་བསྐོར་བར་གྱུར་ཅིག་།བདུད་བཞི་ཚར་གཅོད་པར་གྱུར་ཅིག་།སེམས་ཅན་ཡོངས་སུ་སྨིན་པར་བགྱིད་པར་གྱུར་ཅིག་།བདག་ཀྱང་དགེ་བའི་རྩ་བ་ལ་བརྩོན་པའི་སྙིང་རྗེ་ཆེན་པོ་མངོན་དུ་བགྱིས་ནས་དྲན་པ་ཉེ་བར་སྒྲུབ་པར་གྱུར་ཅིག་།ལེ་ལོ་སེལ་པར་གྱུར་ཅིག་།ལམ་ཉེ་བར་སྟོན་པར་གྱུར་ཅིག་།མི་དགེ་བ་ལས་ཟློག་པར་གྱུར་ཅིག་།དགེ་བ་ལ་སྦྱོར་བར་གྱུར་ཅིག་།ལུས་ལ་གཟི་བྱིན་འཇུག་པར་གྱུར་ཅིག་།མཐུ་དང་སྟོབས་ཡང་དག་པར་སྐྱེད་པར་གྱུར་ཅིག་།སྒྲིབ་པ་ཆེན་པོ་སྟུག་པོར་གྱུར་པ་འདི་ལས་རྣམ་པར་གྲོལ་བར་གྱུར་ཅིག་།སེམས་ཅན་གྱི་ཁམས་དང་ལས་ཀྱི་ཁམས་དང ། ཉོན་མོངས་པའི་ཁམས་དང ། ནམ་མཁའི་ཁམས་ཅི་ཙམ་པ་དེ་ཙམ་དུ་སེམས་ཅན་ལ་ཕན་པའི་ཕྱིར་གནས་པར་གྱུར་ཅིག་།བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཏདྱ་ཐཱ་ཨ་བ་ལོ་ཀེ་ལོ་ཀ་།བི་ལོ་ཀེ་།ལོ་ཀ་བི་ལོ་ཀི་ནི། ཨ་བ་ལོ་ཀ་ཡ་ཧྲི་མེ། སརྦྦ་ཀརྨྨ། ཨཱ་བ་ར་ཎེ་བྱ་སཝཱ་ཧཱ། གང་དག་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་ཐུགས་རྗེས་ཐུགས་ཁྱབ་པ། སྔོན་གྱི་སྨོན་ལམ་གྱི་བྱིན་གྱི་བརླབས་ཀྱིས་བཞུགས་ཤིང་འཚོ་ལ་གཞེས་པ་འདི་ལྟ་སྟེ། བཟང་པོ་དཔལ་དང ། ཙནྡན་དཔལ་དང ། ཏོག་གི་དཔལ་དང ། མྱ་ངན་མེད་པའི་དཔལ་དང ། ཏོག་དཔལ་དང་མེ་ཏོག་དཔལ་དང ། སྣང་བའི་དཔལ་དང་ནོར་དཔལ་དང ། རྒྱ་མཚོ་དཔལ་དང་རིན་ཆེན་མཆོད་སྡོང་ཀུན་ནས་སྣང་བ་དང ། དེ་ལ་སོགས་པ་ལ་བདག་གི་བསམ་བ་དང ། ལྷག་པའི་བསམ་བ་རུས་པའི་ཁོང་ནས་དགའ་བ་དང ། རྐང་གི་ཁོང་ནས་དགའ་བའི་བར་སེམས་ཐམས་ཅད་དང ། ལུས་ཐམས་ཅད་བཏུད་ནས་ཕྱག་འཚལ་ལོ། །དེ་དག 101.318b ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས་སངས་རྒྱས་བཅོམ་ལྡན་འདས་དེ་དག་རབ་ཏུ་འབྱེད་པའི་ཆོས་ཉིད་དེ་དང་དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གིས་བསམ་བ་དང ། ལྷག་པའི་བསམ་བས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་འདས་པའི་ཡང་དག་པར་རྫོགས་པའི་སངས་རྒྱས་རྣམས་དང ། དེ་དག་གི་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས་སངས་རྒྱས་བཅོམ་ལྡན་འདས་དེ་དག་རབ་ཏུ་འབྱེད་པའི་ཆོས་ཉིད་དེ་དང་དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་བ་དང ། ལྷག་པའི་བསམ་པས་སེམས་ཐམས་ཅད་དང ། ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་མ་འོངས་པའི་ཡང་དག་བར་རྫོགས་པའི་སངས་རྒྱས་རྣམས་དང ། དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས་སངས་རྒྱས་བཅོམ་ལྡན་འདས་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་བ་དང ། ལྷག་པའི་བསམ་བས་སེམས་ཐམས་ཅད་དང ། ལུས་ཐམས་ཅད་བཏུད་ནས་ཕྱག་འཚལ་ལོ། །ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་བྱང་ཆུབ་སེམས་དཔའ་རྟག་ཏུ་བརྩོན་པ་དང ། རབ་ཏུ་བརྩོན་བ་དང ། བརྩོན་པ་མི་འདོར་བ་རྣམས་ལ་འདི་ལྟ་སྟེ། ཆུ་ལྷ་བློ་གྲོས་དང ། སྣང་བའི་བློ་གྲོས་དང ། ནམ་མཁའི་བློ་གྲོས་དང ། གློག་གི་བློ་གྲོས་དང ། དོན་གྲུབ་བློ་གྲོས་དང ། རབ་ཏུ་ཞི་སྤྱོད་བློ་གྲོས་དང ། སོ་སོ་ཡང་དག 101.319a རིག་ཐོབ་དང ། རྟག་ཏུ་བརྩོན་པ་དང ། རབ་ཏུ་བརྩོན་པ་ལ་སོགས་པ་དེ་དག་ལ་བདག་གི་བསམ་པ་དང ། ལྷག་པའི་བསམ་པས་སེམས་ཐམས་ཅད་དང ། ལུས་ཐམས་ཅད་བཏུད་ནས་ཕྱག་འཚལ་ལོ། །དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས་བྱང་ཆུབ་སེམས་དཔའ་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་བ་དང ། ལྷག་པའི་བསམ་བས་སེམས་ཐམས་ཅད་དང་ལུས་ཐམས་ཅད་ཀྱང་བཏུད་ནས་ཕྱག་འཚལ་ལོ། །གང་དག་འདས་པའི་བྱང་ཆུབ་སེམས་དཔའ་རྣམས་དང ། དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས་བྱང་ཆུབ་སེམས་དཔའ་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་བ་དང ། ལྷག་པའི་བསམ་པས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་མ་འོངས་པའི་བྱང་ཆུབ་སེམས་དཔའ་རྣམས་དང ། དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས་བྱང་ཆུབ་སེམས་དཔའ་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང ། ལྷག་པའི་བསམ་པས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །བྱང་ཆུབ་སེམས་དཔའ་འདོད་ཆེན་པ་དགའ་ལྡན་གྱི་གནས་ནས་མངལ་དུ་འཇུག་པ་དང ། གནས་དང་ས་སྟོན་པ་དང ། བྱང་ཆུབ་ཀྱི་སྙིང་པོར་གཤེགས་པ་དང ། བྱང་ཆུབ་མངོན་བར་རྫོགས་པར 101.319b བྱང་ཆུབ་པ་དང ། བདུད་འདུལ་བ་དང ། ཆོས་ཀྱི་འཁོར་ལོ་བསྐོར་བ་ནས་ཡོངས་སུ་མྱ་ངན་ལས་འདས་པ་ཆེན་པོའི་བར་སྟོན་པ་གང་ལགས་བ་དེ་དག་ལ་བདག་གི་བསམ་པ་དང ། ལྷག་པའི་བསམ་པས་བདག་ཉིད་ཐམས་ཅད་ཀྱིས་བསམ་པ་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །དེ་དག་ཐབས་ཀྱིས་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་དེ་གང་ལགས་པ་དེ་དང ། ཆོས་ཉིད་གང་ལགས་པ་དེས་སངས་རྒྱས་བཅོམ་ལྡན་འདས་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་བ་དག་ལྷག་པའི་བསམ་པས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་འཕགས་པ་རང་རྒྱལ་བ་ཕུང་པོ་དང ། ཁམས་དང ། སྐྱེ་མཆེད་ལ་མཁས་པ། སྐྱེ་བ་དང་འཇིག་པ་རྟོགས་པ་རྣམས་ཀྱི་མཚན་ལ་འདི་ལྟ་སྟེ། བསེ་རུ་ལྟར་སྤྱོད་པ་དང ། ཚོགས་དང་སྤྱོད་པ་གང་ལགས་པ་དེ་དག་ལ་བདག་གི་བསམ་བ་དང ། ལྷག་པའི་བསམ་པས་སེམས་ཐམས་ཅད་དང ། ལུས་ཐམས་ཅད་བཏུད་ནས་ཕྱག་འཚལ་ལོ། །དེ་དག་གི་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས་རང་རྒྱལ་བ་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང ། ལྷག་པའི་བསམ་པས་སེམས་ཐམས་ཅད་དང ། ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་འདས་པའི་རང་རྒྱལ་བ་རྣམས་དང ། དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས 101.320a རང་རྒྱལ་བ་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་བ་དེ་དག་ལ་བདག་གི་བསམ་བ་དང ། ལྷག་པའི་བསམ་བས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་མ་འོངས་པའི་རང་རྒྱལ་བ་རྣམས་དང ། དེ་དག་ཡོངས་སུ་མྱ་ངན་ལས་འདས་པའི་སྐུ་འི་གདུང་གི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང་ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས་རང་རྒྱལ་བ་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་བ་དང ། ལྷག་པའི་བསམ་བས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་འཕགས་པ་རྒྱུན་ཏུ་ཞུགས་བ་རྣམས་དང ། ལན་གཅིག་ཕྱིར་འོང་བ་རྣམས་དང ། ཕྱིར་མི་འོང་བ་རྣམས་དང ། དགྲ་བཅོམ་བ་རྣམས་དང ། དེ་དག་ལ་འཇུག་པ་གང་ལགས་བ་དང་དེ་དག་ཡོངས་སུ་མྱ་ངན་ལས་འདས་པའི་སྐུ་གདུང་གི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས་འཕགས་པ་རྒྱུན་ཏུ་ཞུགས་པ་རྣམས་དང ། ལན་ཅིག་ཕྱིར་འོང་བ་རྣམས་དང ། ཕྱིར་མི་འོང་བ་རྣམས་དང ། དགྲ་བཅོམ་བ་རྣམས་དང ། དེ་དག་ལ་འཇུག་པ་གང་ལགས་པ་དེ་དག་གི་རབ་ཏུ་འབྱེད་པའི་ཆོས་ཉིད་གང་ལགས་བ་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་བ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་བ་དང ། ལྷག་པའི་བསམ་བས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་འདས་པའི་འཕགས་བ་ཉན་ཐོས་རྣམས་དང ། དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང་ཆོས་ཉིད་གང 101.320b ལགས་པ་དེ་དང ། ཆོས་ཉིད་གང་ལགས་པ་དེས་འཕགས་པ་ཉན་ཐོས་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་བ་དེ་དག་ལ་བདག་གི་བསམ་བ་དང ། ལྷག་པའི་བསམ་བས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་མ་འོངས་པའི་འཕགས་པ་ཉན་ཐོས་རྣམས་དང ། དེ་དག་མྱ་ངན་ལས་འདས་བའི་སྐུའི་མཆོད་རྟེན་དང ། གཞལ་མེད་ཁང་དང ། དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེས་འཕགས་པ་ཉན་ཐོས་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་བ་ཡོངས་སུ་བསྒོམས་པའི་སྐུ་གདུང་གང་ལགས་བ་དེ་དག་ལ་བདག་གི་བསམ་བ་དང ། ལྷག་པའི་བསམ་བས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་ཁམས་གསུམ་འདིའི་གླིང་བཞི་དག་ན་འཕགས་བ་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་དང ། དེ་བཞིན་གཤེགས་བའི་སྐུ་མདོར་ན་འཇིག་རྟེན་གྱི་ཁམས་འདི་འམ། འཇིག་རྟེན་གྱི་ཁམས་གཞན་དག་ན་མངོན་བར་འདུས་བྱས་པ་དང ། མངོན་བར་འདུ་བྱེད་པ་དང ། མངོན་བར་འདུ་བྱེད་བར་འགྱུར་བ་དང ། མཆོད་པ་བྱས་པ་དང ། མཆོད་པ་བྱེད་པ་དང ། མཆོད་པ་བྱེད་བར་འགྱུར་བ་དང ། འཕགས་པ་ཉན་ཐོས་དང ། རང་སངས་རྒྱས་དང་བྱང་ཆུབ་སེམས་དཔའ་དང ། དེ་བཞིན་གཤེགས་པའི་སྐུ་གདུང་གི་མཆོད་རྟེན་དང ། གཞལ་མེད་ཁང་དང་དྲི་གཙང་ཁང་དང ། ཆོས་ཉིད་གང་ལགས་པ་དེ་དང ། ཆོས་ཉིད་གང་ལགས་པ་དེ་དག་རབ་ཏུ་འབྱེད་པའི་ཆོས་ཉིད་དེ་དང ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་བ་དང ། ལྷག་པའི་བསམ་བས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། ཙནྡྲ་པྲ་བྷེ། ཙནྡན་ཙཱུརྞེ་ཀཻ 101.321a ལ་སབྟི། སརྦ་ཏ་ཐཱ་ག་ཏ་ཨ་དྷི་ཥྛ་ཏ་ཨ་ནུ་མོ་དི་ཏ་སཝཱ་ཧཱ། ཇི་ལྟར་འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་དེ་རྣམས་ཀྱིས་རྒྱ་ཆེན་པོ་དང་ཟབ་མོས་ཕ་རོལ་ཏུ་ཕྱིན་པ་དྲུག་ལས་ངེས་པར་འབྱུང་བ་སྣ་ཚོགས་ཚད་མེད་པའི་མཆོད་པ་དང ། མངོན་པར་འདུ་མཛད་པ་བསྒྲུབས་པ་དང ། སྒྲུབ་པ་དང ། སྒྲུབ་བར་འགྱུར་བ་དེ་དག་ལས་བདག་གི་སྐལ་པར་འགྱུར་བ་གང་ལགས་པ་དེ་དག་ཐམས་ཅད་ཀྱང་བདག་གི་ལགས་སོ་པར་བཟུང་ནས་བདག་གི་བསམ་པ་དང ། ལྷག་པའི་བསམ་པས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱོགས་བཅུའི་འཇིག་རྟེན་གྱི་ཁམས་ཀྱི་རྡུལ་ཕྲ་མོ་སྙེད་ཀྱི་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་དང་ཡང་དག་པར་རྫོགས་པའི་སངས་རྒྱས་དང་བཅས་པ་དེ་རྣམས་ལ་དབུལ་བར་བགྱིའོ། །དགེ་བའི་རྩ་བ་དེས་སེམས་ཅན་ཐམས་ཅད་ཀྱི་ཕ་རོལ་ཏུ་ཕྱིན་པ་ཐམས་ཅད་དང་ས་ཐམས་ཅད་དང་ཏིང་ངེ་འཛིན་ཐམས་ཅད་དང་གཟུངས་ཀྱི་སྒོ་ཐམས་ཅད་དག་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་མངོན་དུ་གྱུར་ཅིག་།དེ་བཞིན་གཤེགས་པ་རྔ་སྒྲའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ཊ་ཀེ་ཊ་ཀེ་།ཊ་ཀེ་ཊ་ཀེ་།ཊ་ཀེ་སཝཱ་ཧཱ། །བམ་པོ་གཉིས་པ། གང་དག་སྲིད་པ་གསུམ་པོ་འདི་ན་ལྷ་དང་མིའི་དྲི་དང ། བདུག་སྤོས་ཀྱི་རྣམ་པ་དང་མེ་ཏོག་དང ། འབྲས་བུ་དང ། རོ་བྲོ་བ་དང ། ལོ་ཏོག་གི་རྣམ་པ་དང་གསེར་དང ། དངུལ་དང ། ནོར་བུ་དང་མུ་ཏིག་དང ། བཻ་དཱུརྱ་དང ། རྡོའི་སྙིང་པོ་ལ་སོགས་པ་བདག་གི་བ་མེད་ཅིང་ཡོངས་སུ་བཟུང་བ་མེད་པ་གང་ལགས་པ་དེ་དག་བདག་དང་སེམས་ཅན་ཐམས་ཅད་ཐུན་མོང་དུ་བགྱིས་ནས་ཕྱོགས་བཅུའི་འཇིག་རྟེན་གྱི་ཁམས་ཀྱི་རྡུལ་ཕྲ་མོ་སྙེད་ཀྱི་འདས་པ་དང ། མ་འོངས་པ་དང་ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་དང ། བྱང་ཆུབ་སེམས་དཔའ་དང་ཉན་ཐོས་དང ། རང་རྒྱལ་བ་དང་བཅས་པ་དེ་རྣམས་ལ་དབུལ་བར་བགྱིའོ། །དགེ་བའི་རྩ་བ་དེས་སེམས་ཅན་ཐམས་ཅད་ལ་རྣམ་པ 101.321b ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་མངོན་དུ་གྱུར་ཅིག་།བཅོམ་ལྡན་འདས་དེ་བཞིན་གཤེགས་པའི་བློ་ཡངས་ཟབ་མོ་སྒྲོགས་པའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། བི་པུ་ལ་བ་རེ། བི་པུ་ལ་ཡོ་ནི་ཤེ། ཨ་ན་ལ་སེ། ཨ་ན་ལ་ས་སཾ་བྷ་བེ། ཨ་ན་ལ་ས། ག་ཏིང་ག་ཏེ་སཝཱ་ཧཱ། བདག་ཉིན་མོ་དང ། མཚན་མོ་གཉིད་ལོག་པ་དང ། སད་པ་དང ། འོང་བ་དང ། འགྲོ་བ་དང ། འདུག་པ་དང ། ལངས་པ་ནས་དབང་པོ་འགག་པར་འགྱུར་བའི་བར་དུ་ཡང་ལུང་བསྟན་པ་དང ། ལུང་མ་བསྟན་པ་དང་ལུས་དང་ངག་དང ། ཡིད་ཀྱིས་ཕྱི་དང་ནང་གི་ལེགས་པར་སྤྱད་པ་གང་ལགས་པ་དང ། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བར་བསགས་པ་གང་ལགས་པ་དང ། བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་དགེ་བའི་རྩ་བ་གང་ལགས་པ་དེ་དག་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་བགྱིས་ནས་གཉིས་སུ་མེད་པའི་ཚུལ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱི་སྟེ། ཇི་ལྟར་འདས་པ་དང ། མ་འོངས་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་དེ་རྣམས་ཀྱིས་ཡོངས་སུ་བསྔོས་བ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ། །ཡང་དག་པར་རྫོགས་པའི་སངས་རྒྱས་བདུན་པོ་རྣམས་ལ་ཕྱག་འཚལ་ལོ། །རྣམ་པར་གཟིགས་ཀྱི་གཟི་བརྗིད་དང ། །ཤཱཀྱ་སེང་གེའི་བརྩོན་འགྲུས་ཀྱིས། །འདོད་ཆགས་ཞེ་སྡང་གཏི་མུག་དག་།ནམ་ཡང་གཡོ་བར་མ་གྱུར་ཅིག་།ཏདྱ་ཐཱ། ཛ་ཡནྟི། བི་ཛ་ཡནྟི། ཨ་པ་ར་ཛི་ཏེ། མཱ་ར་སཻ་ནྱ་པྲ་མརྡྷ་ནི་ཡེ་སཝཱ་ཧཱ། དགེ་བའི་རྩ་བ་དེས་སེམས་ཅན་འགྲོ་བ་དྲུག་ལ་བརྟེན་པ་གང་ལགས་པ་དེ་དག་ཐམས་ཅད་སྦྱིན་བའི་ཕ་རོལ་ཏུ་ཕྱིན་པ་ལ་དགོད་པར་བགྱིའོ། །དེ་བཞིན་དུ་ཚུལ་ཁྲིམས་དང ། བཟོད་པ་དང ། བརྩོན་འགྲུས་དང་བསམ་གཏན་དང ། ཤེས་རབ་དང ། ཐབས་དང ། སྨོན་ལམ་དང ། སྟོབས་དང ། ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་དགོད་པར་བགྱིའོ། །དེ་བཞིན་དུ་ས་རབ་ཏུ་དགའ་བ་དང ། དེ་བཞིན་དུ་དྲི་མ་མེད་པ་དང ། འོད་བྱེད་པ་དང ། འོད་འཕྲོ་བ་ཅན་དང་ཤིན་དུ་སྦྱང 101.322a དཀའ་བ་དང་མངོན་དུ་གྱུར་པ་དང ། རིང་དུ་སོང་བ་དང་མི་གཡོ་བ་དང ། ལེགས་པའི་བློ་གྲོས་དང ། ས་ཆོས་ཀྱི་སྤྲིན་ལ་དགོད་པར་བགྱིའོ། །དེ་བཞིན་དུ་རྡོ་རྗེ་ལྟ་བུའི་ཏིང་ངེ་འཛིན་དང ། དེ་བཞིན་དུ་བསྟན་པར་གནས་པའི་ཐབས་ལ་མངོན་བར་བརྩོན་པ་མངོན་དུ་འགྲོ་བ་ཡོངས་སུ་བསགས་པའི་ཏིང་ངེ་འཛིན་དང ། ངེས་པར་འབྱུང་བའི་ཏིང་ངེ་འཛིན་དང ། ཀུན་དུ་གསལ་བའི་ཏིང་ངེ་འཛིན་དང ། ཀུན་དུ་སྣང་བའི་ཏིང་ངེ་འཛིན་དང ། རིན་ཆེན་ཏོག་གི་ཏིང་ངེ་འཛིན་དང་རིན་ཆེན་ཟླ་བའི་ཏིང་ངེ་འཛིན་དང ། རྒྱལ་མཚན་རྩེ་མོའི་ཏོག་གི་ཏིང་ངེ་འཛིན་དང ། སྙིང་རྗེ་བསགས་པའི་ཏིང་ངེ་འཛིན་དང ། ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་བསྟན་པ་ཤེས་པ་ལ་མཁས་པའི་ཏིང་ངེ་འཛིན་ལ་དགོད་པར་བགྱིའོ། །དེ་བཞིན་དུ་རྒྱ་མཚོའི་ཕྱག་རྒྱ་མི་ཟད་པར་སྒྲུབ་པའི་གཟུངས་དང ། དེ་བཞིན་དུ་སེམས་ཅན་གྱི་སྤྱོད་པ་ལ་འཇུག་པའི་གཟུངས་དང ། ཉི་མའི་ཏོག་སྣང་བ་མཐའ་ཡས་པའི་གཟུངས་དང ། ཟླ་བ་དྲི་མ་མེད་པའི་གཟི་བརྗིད་མངོན་བར་འཕགས་པའི་གཟུངས་དང ། ཀུན་ནས་དཀྲིས་པ་ཐམས་ཅད་རྣམ་པར་སེལ་བ་དང ། རྡོ་རྗེའི་སྙིང་པོ་བསྟན་པས་ཉོན་མོངས་པ་མཐའ་ཡས་པ་རྣམ་པར་འཐོར་བ་དང ། བརྗོད་དུ་མེད་པའི་དོན་སྟོན་པ་དོན་དམ་པར་ཡང་དག་པར་འདུ་བ་དང ། ལྡེམ་པོའི་ཚིག་ཏུ་སྨྲ་བའི་སྒྲ་འཇུག་པ་དང ། ནམ་མཁའི་དཀྱིལ་ལྟར་དྲི་མ་མེད་པ་སྒྲུབ་པ་དང ། ཟད་མི་ཤེས་པའི་ཕྱག་རྒྱས་བཏབ་པ་དང ། སངས་རྒྱས་ཀྱི་སྐུ་མཐའ་ཡས་པ་ཡོངས་སུ་འགྲུབ་པ་སྒྲུབ་པའི་གཟུངས་ལ་དགོད་པར་བགྱིའོ། །དེ་བཞིན་དུ་ཕ་རོལ་ཏུ་ཕྱིན་པ་བཅུ་པོ་དེ་དག་ནས་གཟུངས་ཀྱི་སྒོ་བཅུའི་བར་དག་ལ་བཀོད་ནས་དེ་རྣམས་དང་ལྷན་ཅིག་འདི་ནས་འགུམ་པའི་འོག་ཏུ་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཞིང ། གང་ན་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དེ་དང ། བཅོམ་ལྡན་འདས་འཇིག་རྟེན་དབང་ཕྱུག་དེ་དང ། བཅོམ་ལྡན་འདས་མཐུ་ཆེན་ཐོབ་པ་དེ་དང ། བྱང་ཆུབ་སེམས་དཔའ་དེ་དག་དང་འཁོར་དེ་རྣམས་མཉེས་པར་བྱེད་པར་གྱུར་ཅིག་།བཅོམ་ལྡན་འདས་འཁོར་དང་བཅས 101.322b བཅས་པ་དེ་དག་མི་ཉེས་པར་བྱེད་པར་མ་བྱེད་ཅིག་།དེ་བཞིན་གཤེགས་པ་འོད་དཔག་མེད་ལ་ཕྱག་འཚལ་ལོ། །ཏདྱ་ཐཱ། པདྨེ་པདྨེ་ནི། པདྨ་ལོ་ཙ་ནེ། པདྨ་སཾ་བྷ་བེ་སཝཱ་ཧཱ། དེ་བཞིན་གཤེགས་པ་འོད་དཔག་མེད་ལ་ཕྱག་འཚལ་ལོ། །ཏདྱ་ཐཱ། ཨ་མྲི་ཏ། ཨུད་བྷ་བེ། ཨ་མྲི་ཏ་སཾ་བྷ་བེ། ཨ་མྲི་ཏ་བི་ཀྲཱནྟེ། ག་ག་ན་ཀིརྟི་ཀ་རེ། སརྦྦ་ཀརྨྨ་ཀླེ་ཤཀྵ་ཡཾ་ཀ་རི་སཝཱ་ཧཱ། དགེ་བའི་རྩ་བ་དེས་འཕགས་པ་བྱམས་པ་མངོན་པར་རྫོགས་པར་སངས་རྒྱས་མ་ཐག་ཏུ་བདག་མངོན་དུ་ལུང་སྟོན་པས་ལུང་སྟོན་ཅིང་མངོན་སུམ་དུ་ལུང་སྟོན་པ་དང ། ཡང་དག་པའི་ལུང་སྟོན་པ་དང ། ལྐོག་མ་ཡིན་པར་ལུང་སྟོན་པ་དང ། དེ་བཞིན་ཉིད་དུ་ལུང་སྟོན་པ་དང ། ཡང་དག་པའི་མཐར་ལུང་སྟོན་པ་དང ། ཆོས་ཀྱི་དབྱིངས་སུ་ལུང་སྟོན་པ་ནས་དེ་ཁོ་ན་ཉིད་མཐོང་བའི་བར་ལུང་སྟོན་པས་ལུང་སྟོན་པར་གྱུར་ཅིག་།ལུང་བསྟན་ནས་བཅོམ་ལྡན་འདས་དེ་དང་བྱང་ཆུབ་སེམས་དཔའ་དང ། ཉན་ཐོས་ཀྱི་དགེ་འདུན་དང་བཅས་པ་མཉེས་པར་བྱེད་པར་གྱུར་ཅིག་།ན་བཟའ་དང ། ཞལ་ཟས་དང་གཟིམས་ཆ་དང ། བསྙུང་བའི་གསོས་སྨན་གྱི་རྐྱེན་ཀྱི་ཡོ་བྱད་རྣམས་དང ། དེ་ལས་གཞན་པ་དེ་བཞིན་གཤེགས་པ་དག་གི་ཟག་པ་མེད་པའི་མཆོད་པ་རྣམས་ཀྱིས་མཆོད་ནས་དེའི་དྲུང་དུ་བུས་པའི་རབ་ཏུ་འབྱུང་བ་འཐོབ་ཅིང ། གཞོན་ནུའི་རབ་ཏུ་འབྱུང་བ་དང ། ལྐོག་མ་ཡིན་པར་རབ་ཏུ་འབྱུང་བ་དང ། དེ་བཞིན་ཉིད་ཏུ་རབ་ཏུ་འབྱུང་བ་དང ། ཡང་དག་པའི་མཐར་རབ་ཏུ་འབྱུང་བ་ནས་དེ་ཁོ་ན་ཉིད་མཐོང་བའི་བར་དུ་རབ་ཏུ་འབྱུང་བ་ཐོབ་པར་གྱུར་ཅིག་།དེ་ཡང་འཇིག་རྟེན་དང་འཇིག་རྟེན་ལས་འདས་པའི་ཁྱད་པར་དུ་འཕགས་པ། སྐྱོན་མེད་པ། མ་འདྲེས་པ། རྙོག་པ་མེད་པ། ལྷ་དང་མི་དག་མངོན་པར་དགའ་བ། སངས་རྒྱས་དང་བྱང་ཆུབ་སེམས་དཔས་བསྔགས་པ། སེམས་ཅན་ལ་སྨན་པའི་སླད་དུ་བདག་རབ་ཏུ་འབྱུང་བར་གྱུར་ཅིག་།དེ་ནས་བསྐལ་པ་བཟང་པོའི་ཡང་དག་པར་རྫོགས་པའི་སངས་རྒྱས་དང ། བྱང་ཆུབ་སེམས་དཔའ་དང་ཉན་ཐོས་ཀྱི་དགེ་འདུན་ཐམས་ཅད་ལ་བྱིས་པ་ནས། ན་བཟའ་དང ། ཞལ་ཟས་དང ། གཟིམས་ཆ་དང ། བསྙུང་བའི 101.323a གསོས་སྨན་གྱི་རྐྱེན་ཀྱི་ཡོ་བྱད་རྣམས་ཀྱིས་མཉེས་པར་བགྱིས་ནས་དེ་དག་གི་དྲུང་དུ་བུས་པའི་རབ་ཏུ་འབྱུང་བ་ཐོབ་ཅིང ། གཞོན་ནུའི་རབ་ཏུ་འབྱུང་བ་དང ། མངོན་སུམ་དུ་རབ་ཏུ་འབྱུང་བ་དང ། ལྐོག་མ་ཡིན་པར་རབ་ཏུ་འབྱུང་བ་དང ། དེ་བཞིན་ཉིད་ཏུ་རབ་ཏུ་འབྱུང་བ་དང ། ཡང་དག་པའི་མཐར་རབ་ཏུ་འབྱུང་བ་ནས་དེ་བཞིན་ཉིད་མཐོང་བའི་བར་དུ་རབ་ཏུ་འབྱུང་བ་ཐོབ་པར་གྱུར་ཅིག་།དེ་ཡང་འཇིག་རྟེན་དང་འཇིག་རྟེན་ལས་འདས་པའི་ཁྱད་པར་དུ་འཕགས་པ། སྐྱོན་མེད་པ། མ་འདྲེས་པ། རྙོག་པ་མེད་པ། ལྷ་དང་མི་དག་མངོན་བར་དགའ་བ་དང ། སངས་རྒྱས་དང་བྱང་ཆུབ་སེམས་དཔས་བསྔགས་བ། སེམས་ཅན་ལ་སྨན་པའི་སླད་ཏུ་བདག་རབ་ཏུ་འབྱུང་བར་གྱུར་ཅིག་།དེ་ནས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་ཡང་དག་པར་རྫོགས་པའི་སངས་རྒྱས་དང་བྱང་ཆུབ་སེམས་དཔའ་དང ། ཉན་ཐོས་ཀྱི་དགེ་འདུན་དང་བཅས་པ་གང་ལགས་པ་དེ་དག་བདག་གིས་མཉེས་པར་བགྱིད་པར་གྱུར་ཅིག་།དེ་དག་གི་དྲུང་དུ་སྐད་ཅིག་མ་གཅིག་ལ་མིང་དང་སངས་རྒྱས་ཀྱི་ཞིང་ལུང་བསྟན་པ་ཐོབ་ཅིང་བུས་པའི་རབ་ཏུ་འབྱུང་བ་དང ། གཞོན་ནུའི་རབ་ཏུ་འབྱུང་བ་དང ། མངོན་སུམ་དུ་རབ་ཏུ་འབྱུང་བ་དང ། ལྐོག་མ་ཡིན་པར་རབ་ཏུ་འབྱུང་བ་དང ། དེ་བཞིན་ཉིད་དུ་རབ་ཏུ་འབྱུང་བ་དང ། ཡང་དག་པའི་མཐར་རབ་ཏུ་འབྱུང་བ་ནས་དེ་ཁོ་ན་ཉིད་མཐོང་བའི་བར་དུ་རབ་ཏུ་འབྱུང་བ་ཐོབ་བར་གྱུར་ཅིག་།དེ་ཡང་འཇིག་རྟེན་དང་འཇིག་རྟེན་ལས་འདས་པའི་ཁྱད་པར་དུ་འཕགས་པ། སྐྱོན་མེད་པ་མ་འདྲེས་པ། རྙོག་པ་མེད་པ། ལྷ་དང་མི་དག་མངོན་པར་དགའ་བ། སངས་རྒྱས་དང་བྱང་ཆུབ་སེམས་དཔས་བསྔགས་པ། སེམས་ཅན་ལ་སྨན་པའི་སླད་ཏུ་བདག་རབ་ཏུ་འབྱུང་བར་གྱུར་ཅིག་།བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་བ་འཕགས་པ་བྱམས་པ་ལ་ཕྱག་འཚལ་ལོ། །ཏདྱ་ཐཱ། མཻ་ཏྲི་མཻ་ཏྲི་མཻ་ཏྲི། ས་མ་ཙིཏྟེ་སཝཱ་ཧཱ། དེ་ནས་ཕ་རོལ་ཏུ་ཕྱིན་པ་དྲུག་ལ་མངོན་བར་བརྩོན་བར་གྱུར་ཅིག་།ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ལ 101.323b གནས་པ་དང་ནམ་མཁའ་མཛོད་དང ། ལག་ན་རིན་པོ་ཆེ་དང ། མངོན་བར་ཤེས་པ་ལྔ་དང་དབང་ཐོབ་པ་དང ། སོ་སོ་ཡང་དག་པར་རིག་པ་ཐོབ་པ་དང ། ནམས་ཀྱང་དབང་པོ་ཞན་ཅིང་དབང་པོ་དང་བྲལ་བར་མི་འགྱུར་བ་དང ། ལྟ་བ་ངན་པར་ལྟུང་བར་མི་འགྱུར་བ་དང ། ནམས་ཀྱང་ཡུལ་འཁོར་ངན་པ་དང ། སྐྱེ་བོ་ངན་པའི་ནང་དུ་སྐྱེ་བར་མ་གྱུར་ཅིག་།ནམས་ཀྱང་མི་ཁོམ་པར་སྐྱེ་པར་མ་གྱུར་ཅིག་།ནམས་ཀྱང་སངས་རྒྱས་དང ། ཆོས་དང ། དགེ་འདུན་མཐོང་བ་དང་ཐོས་པ་དང ། མཆོད་པ་དང་རིམ་གྲོ་བགྱིད་བ་དང་བྲལ་བར་མ་གྱུར་ཅིག་།ནམས་ཀྱང་ཚུལ་ཁྲིམས་འཆལ་པར་མི་འགྱུར་བ་ནས་རྨི་ལམ་དུ་ཡང་ཉན་ཐོས་དང ། རང་བྱང་ཆུབ་འདོད་པའི་ཕྱིར་ནམས་ཀྱང་བྱང་ཆུབ་ཀྱི་སེམས་དང་བྲལ་བར་མ་གྱུར་ཅིག་།ནམས་ཀྱང་སེམས་ཅན་ཡོངས་སུ་སྨིན་བར་བགྱིད་པ་དང་བྲལ་བར་མ་གྱུར་ཅིག་།ནམས་ཀྱང་དགེ་བའི་བཤེས་གཉེན་དང་བྲལ་བར་མ་གྱུར་ཅིག་།ནམས་ཀྱང་སྐད་ཅིག་ཏུ་ཡང་ཐབས་དང་ཤེས་རབ་དང་བྲལ་བར་མ་གྱུར་ཅིག་།ནམས་ཀྱང་རིགས་དམན་པ་དང་བརྩོན་འགྲུས་ཞེན་པ་དང ། ལེ་ལོ་ཅན་དུ་མ་གྱུར་ཅིག་།བདག་ཚེ་རབས་ཚེ་རབས་སུ་སངས་རྒྱས་ཀྱི་ཆོས་རྣམས་ལ་བརྩོན་འགྲུས་སྦྱངས་པ་སྐྱེ་བར་གྱུར་ཅིག་།སེམས་ཅན་ལ་སྨན་པའི་སླད་དུ་བདག་བརྫུས་ཏེ་སྐྱེ་བར་གྱུར་ཅིག་།ཇི་ལྟར་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་དེ་དག་འཁྲུངས་པ་དེ་ལྟར་བདག་སངས་རྒྱས་ཀྱི་རིགས་སུ་སྐྱེ་བར་གྱུར་ཅིག་།དེ་ནས་བསྟན་བཅོས་ཐམས་ཅད་དང ། བཟོ་ཐམས་ཅད་དང ། ཏིང་ངེ་འཛིན་ཐམས་ཅད་དང་གཟུངས་ཀྱི་སྒོ་ཐམས་ཅད་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་མངོན་དུ་གྱུར་ཅིག་།བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་དྲི་མ་མེད་པར་གྲགས་པ་ལ་ཕྱག་འཚལ་ལོ། །ཏདྱ་ཐཱ། ཀཱིརྟི་ཏ་སརྦ་ཛི་ནོ་བྷི། ཨ་ཧེ་ཀཱིརྟི་ཏ། སརྦ་ཛི་ན་བི། བཛྲ་ཨ་ཀ་རི་བཛྲ་སཾ་བྷཱ་བ་པི། བཛྲ་བ་ད་ཀ་རེ་སཝཱ་ཧཱ། ས་དང ། ཆུ་དང ། མེ་དང ། རླུང་དང ། ནམ་མཁས་ཉེ་བར་འཚོ་བ་ལྟར་དགེ་བ་བཅུའི་ལས་ཀྱི་ལམ་འདི་དག་གིས་ཡང་དག་པར་བསྒྲུབས 101.324a པའི་ཕུང་པོ་ལྔ་པོ་གང་ལགས་པ་དེ་དག་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་བགྱིས་ནས། སངས་རྒྱས་དང་ཆོས་དང ། དགེ་འདུན་ཡོངས་སུ་སྤྱོད་པ་དག་ལ་དབུལ་བར་བགྱིའོ། །ནམ་གུམ་ནས་ཀྱང་བྱ་རྒོད་དང ། སྤྱང་ཀི་དང ། ཁྱི་དང ། ཝ་དང་གཅན་ཟན་དང ། བྱ་རྣམས་ཀྱིས་ལྤགས་པ་དང ། ཤ་དང ། རྒྱུས་པ་དང ། རུས་པ་དང་རྐང་དང ། ཁྲག་རྣམས་ཡོངས་སུ་ཟ་བར་གྱུར་ཅིག་།དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཅིག་།དེ་ནས་ཁམས་གསུམ་ན་རྡུལ་ཕྲ་མོ་ཇི་སྙེད་པའི་སེམས་ཅན་དེ་སྙེད་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་རྣམ་པར་ཐར་པར་བགྱིད་པར་གྱུར་ཅིག་།རྣམ་པར་ཐར་བར་བགྱིས་ནས་ཕྱིར་མི་ལྡོག་པའི་ས་དག་ལ་རབ་ཏུ་འགོད་པར་གྱུར་ཅིག་།དེ་ནས་མཐོང་བས་ཀྱང་སེམས་ཅན་རྣམས་ཡོངས་སུ་སྨིན་པར་བགྱིད་པར་གྱུར་ཅིག་།ཐོས་པ་དང ། དྲན་པས་ཀྱང་སེམས་ཅན་རྣམས་ཡོངས་སུ་སྨིན་པར་བགྱིད་པར་གྱུར་ཅིག་།བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །ཏདྱ་ཐཱ། གརྦྷེ་གརྦྷེ། གརྦྷ་བི་ཤོ་དྷ་ནི་སཝཱ་ཧཱ། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བར་བཞེད་པ་གང་ལགས་པ་དེ་དག་ལ་བདག་གི་བསམ་བ་དང ། ལྷག་པའི་བསམ་པས་རུས་པའི་ཁོང་ནས་དགའ་བ་དང ། རྐང་གི་ཁོང་ནས་དགའ་བས་སེམས་ཐམས་ཅད་དང ། ལུས་ཐམས་ཅད་བཏུད་ནས་སེམས་ཅན་ལ་སྨན་པའི་སླད་དུ་སེམས་ཅན་གྱི་ཁམས་དང ། ལས་ཀྱི་ཁམས་དང ། ཉོན་མོངས་པའི་ཁམས་དང ། ནམ་མཁའི་ཁམས་ཇི་ཙམ་པ་དེ་ཙམ་དུ་མྱ་ངན་ལས་མི་འདའ་ཞིང་བཞུགས་པར་གསོལ་བར་འཚལ་ལོ། །དེ་བཞིན་གཤེགས་པ་ཡོན་ཏན་འབྱུང་གནས་ལ་ཕྱག་འཚལ་ལོ། །ཏདྱ་ཐཱ། ག་ག་ན་ཨ་ཀ་རེ། ག་ག་ན་སཾ་བྷ་བེ། ག་ག་ན་ཀཱིརྟི་ཀ་རེ་སཝཱ་ཧཱ། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་བྱང་ཆུབ་སེམས་དཔའ་ཚོགས་ཤིན་ཏུ་བསགས་པ 101.324b པ་གང་ལགས་པ་རྣམས་དང ། ཚོགས་ཆུང་ངུ་གང་ལགས་པ་རྣམས་དང ། བྱང་ཆུབ་ཏུ་སེམས་བསྐྱེད་པ་གང་ལགས་པ་རྣམས་དང ། བྱང་ཆུབ་ཏུ་སེམས་མ་བསྐྱེད་པ་གང་ལགས་པ་དེ་རྣམས་ལ་བདག་སྐུལ་མ་འདེབས་ཏེ། དེ་རྣམས་ལ་བདག་གི་ལུས་དང་ངག་དང ། ཡིད་ཀྱིས་ལེགས་པར་སྤྱད་པ་དེ་དབུལ་བར་བགྱིའོ། །དགེ་བའི་རྩ་བ་དེས་ཚོགས་རྣམས་ཤིན་དུ་བསགས་ཤིང་དགེ་བའི་རྩ་བ་རྣམས་ལེགས་པར་བསགས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཆོས་ཀྱི་འཁོར་ལོ་རབ་ཏུ་སྐོར་བར་གྱུར་ཅིག་།བདུད་བཞི་ཚར་གཅོད་པར་གྱུར་ཅིག་།སེམས་ཅན་ཡོངས་སུ་སྨིན་པར་བགྱིད་པར་གྱུར་ཅིག་།སེམས་ཅན་ལ་སྨན་པའི་སླད་དུ་སེམས་ཅན་གྱི་ཁམས་དང་ལས་ཀྱི་ཁམས་དང ། ཉོན་མོངས་པའི་ཁམས་དང ། ནམ་མཁའི་ཁམས་ཇི་ཙམ་པ་དེ་ཙམ་དུ་བཞུགས་པར་གསོལ་བར་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་བློ་གྲོས་མི་ཟད་པ་ལ་ཕྱག་འཚལ་ལོ། །ཏདྱ་ཐཱ། ཨ་ཀྵ་ཡེ་ཨ་ཀྵ་ཡེ། ཨ་ཀྵ་བི་ཤོ་དྷ་ནི་སཝཱ་ཧཱ། ཕྱོགས་བཅུའི་འཇིག་རྟེན་གྱི་ཁམས་ན་རྡུལ་ཕྲ་མོ་སྙེད་ཀྱི་འདས་པ་དང ། མ་འོངས་པ་དང ། ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་དང་བྱང་ཆུབ་སེམས་དཔའ་དེ་རྣམས་ཀྱི་སྨོན་ལམ་ཆེན་པོ་བཅུ་པོ་ཁྲི་ཕྲག་གྲངས་མེད་པ་གང་ལགས་པ་དེ་དག་མཛད་པ་རྣམས་ལ་ལྷུན་གྱི་གྲུབ་པར་འཇུག་པ་དེ་བཞིན་དུ་བདག་ཚེ་རབས་ཚེ་རབས་སུ་འཇུག་པར་གྱུར་ཅིག་།དེ་ནས་སངས་རྒྱས་ཀྱི་ཞིང་ཡོངས་སུ་དག་པར་འགྱུར་བ་ནི་ཇི་ལྟར་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དེའི་འཇིག་རྟེན་གྱི་ཁམས་བདེ་བ་ཅན་དང ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་མི་འཁྲུགས་པ་དེའི་འཇིག་རྟེན་གྱི་ཁམས་མངོན་བར་དགའ་བ་དང ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་པད་མའི་སྤྱན་དེའི་འཇིག་རྟེན་གྱི་ཁམས་པད་མ་ཅན་དང ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་ཀུན་དུ་བཟང་པོ་དེའི་འཇིག་རྟེན་གྱི 101.325a ཁམས་མིག་མི་འཛུམས་དང ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་ཏོག་དེའི་འཇིག་རྟེན་གྱི་ཁམས་རིན་ཆེན་ལྡན་བ་དང ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་སྤོས་བརྩེགས་དེའི་འཇིག་རྟེན་གྱི་ཁམས་དྲི་བསུང་ཞིམ་པ་དང ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེ་བཀོད་པ་དེའི་འཇིག་རྟེན་གྱི་ཁམས་རིན་ཆེན་བཀོད་པ་དང ། ཇི་ལྟར་མ་འོངས་པའི་བཅོམ་ལྡན་འདས་དེ་བཞིན་གཤེགས་པ་བདེན་པའི་བློ་གྲོས་ཏོག་གི་རྒྱལ་པོ་དེའི་སངས་རྒྱས་ཀྱི་ཞིང་དང ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་གསེར་གྱི་མེ་ཏོག་དེའི་སངས་རྒྱས་ཀྱི་ཞིང་དང ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་རིན་ཆེན་སྦྱིན་པ་དེའི་སངས་རྒྱས་ཀྱི་ཞིང་དང ། ཇི་ལྟར་བཅོམ་ལྡན་འདས་དེ་བཞིན་གཤེགས་བ་དྲ་བ་ཅན་གྱི་འོད་དེའི་སངས་རྒྱས་ཀྱི་ཞིང་དང ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་བ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ཤེས་རབ་ཀྱི་ཕ་རོལ་ཏུ་ཕྱིན་པར་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཞིང་ལེགས་པར་བསྟན་པ་དང ། ཇི་ལྟར་བཅོམ་ལྡན་འདས་ཀྱིས་སངས་རྒྱས་ཐམས་ཅད་ཀྱིས་ཡུལ་ལ་འཇུག་པ་ཡེ་ཤེས་སྣང་བ་རྒྱན་གྱི་གླེང་གཞིར་སངས་རྒྱས་ཀྱི་ཞིང་རིན་པོ་ཆེ་ཆེན་པོའི་པད་མའི་སྙིང་པོ་བྱུང་བ་མངོན་པར་བསྒྲུབས་པ་དེ་ལྟ་བུའི་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་དེ་རྣམས་ཀྱི་མཐུ་རབ་ཏུ་འབྱུང་ཞིང ། དེར་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཅིག་།ཇི་ལྟར་འདས་པ་དང ། མ་འོངས་བ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་དེ་རྣམས་ཀྱིས་སྨོན་ལམ་ཆེན་པོ་ཤིན་དུ་ཡོངས་སུ་དག་པས་བསྒྲུབས་པ་ན། རང་གི་བསོད་ནམས་ལས་ངེས་པར་སྐྱེས་པ། ཤེས་རབ་ཀྱི་ཕ་རོལ་ཏུ་ཕྱིན་པར་སངས་རྒྱས་ཀྱི་ཞིང་བསྟན་པ་དེ་དག་ཡོངས་སུ་གཟུང་བ་དང ། ཡོངས་སུ་འཛིན་པ་དང ། ཡོངས་སུ་འཛིན་པར་འགྱུར་བ་དེ་ལྟ་བུ་བདག་གི་སངས་རྒྱས་ཀྱི 101.325b ཞིང་གཅིག་ཏུ་འགྱུར་ཞིང་ཆུ་ཞེང་དཔག་ཏུ་མེད་པ་དང ། ཡོན་ཏན་གྱི་རྒྱན་དཔག་ཏུ་མེད་པའི་མིང་དང ། སངས་རྒྱས་ཐམས་ཅད་ཀྱི་ཞིང་ཁྱད་པར་དུ་འཕགས་པ་མངོན་པར་མཐོ་བའི་རྒྱན་བཀོད་པར་མཐོང་བ་དང ། རེག་པ་དང་ཐོས་པ་དང ། དྲན་པས་ལྷན་ཅིག་མངོན་བར་རྫོགས་པར་བྱང་ཆུབ་པར་གྱུར་ཅིག་།སངས་རྒྱས་ཀྱི་ཞིང་དེར་སེམས་ཅན་གང་དག་སངས་རྒྱས་ཐམས་ཅད་དང ། བྱང་ཆུབ་སེམས་དཔའ་ཐམས་ཅད་ཀྱིས་ཡོངས་སུ་བཏང་བ། མར་མི་འཛིན་པ། ཕར་མི་འཛིན་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། རིགས་ཀྱི་རྒན་རབས་ཀྱི་རྗེས་མི་སྙགས་པ། ངང་ཚུལ་ངན་པ། སྡིག་པའི་ཆོས་ཡང་དག་པར་སྤྱོད་པ། རྒྱུད་བསྲེགས་པ་བསམ་པ་བསྲེགས་པ། ས་བོན་བསྲེགས་པ། དགེ་བའི་རྩ་བ་ཆད་པ། ངན་སོང་ལ་མངོན་བར་ཕྱོགས་པ། མཚམས་མེད་པ་ལྔ་དང་ལྡན་བ། བྱང་ཆུབ་སེམས་དཔའ་གཏུམ་པོ་དམ་པའི་ཆོས་སྤོང་བ་དེ་རྣམས་སངས་རྒྱས་ཀྱི་ཞིང་དེར་འདས་པ་དང་པོར་འབྱུང་བར་འགྱུར་ཞིང ། བདག་གིས་དེ་དག་ཐམས་ཅད་ཞི་བའི་ལམ་བླ་ན་མེད་པའི་སངས་རྒྱས་ཉིད་ལ་འགོད་པར་གྱུར་ཅིག་།དེ་ནས་ཇི་ཙམ་དུ་ཁམས་གསུམ་དུ་སྐྱེས་པའི་སེམས་ཅན་དེ་རྣམས་ཞིང་དེར་འདུས་པ་གཉིས་པ་ལས་འབྱུང་བར་འགྱུར་ཞིང་བདག་གིས་དེ་དག་ཐམས་ཅད་བག་ཆགས་དང་མཚམས་སྦྱོར་བའི་ཉོན་མོངས་པ་ཐམས་ཅད་སྤངས་པ་ཐམས་ཅད་མཁྱེན་པའི་ཡེ་ཤེས་ལ་འགོད་པར་གྱུར་ཅིག་།དེ་བཞིན་གཤེགས་པ་དུང་གི་འོད་ཀྱི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ཤཾ་ཁེ་ཤཾ་ཁེ། ཤང་ཁ་པཎྜ་རེ་སཝཱ་ཧཱ། ཕྱོགས་བཅུའི་འཇིག་རྟེན་གྱི་ཁམས་སུ་འདུས་པའི་ཡང་དག་པར་རྫོགས་པའི་སངས་རྒྱས་དང ། བྱང་ཆུབ་སེམས་དཔའ་དེ་རྣམས་ཀྱི་སངས་རྒྱས་ཀྱི་མཛད་པ་དང ། བྱང་ཆུབ་སེམས་དཔའི་མཛད་པ་གང་ལགས་པ་དེ་དག་ཐམས་ཅད་བདག་གཅིག་པུ་གཉིས་སུ་མ་མཆིས་པས་རིམ་གྱིས་སངས་རྒྱས་ཀྱི་ཆོས་རྣམས་ལ་འཕེལ་བར་བགྱི་བར་སྤྲོས། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་སྟོང་པ་ཉིད་དང ། མཚན་མ་མེད་པ 101.326a དང་སྨོན་པ་མེད་པ་དང ། སྐྱེ་བ་མེད་པ་དང ། འགག་པ་མེད་པའི་ཆོས་ཉིད་མངོན་དུ་མཛད་ཅིང ། དེ་ལས་གཞན་པ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱང་མངོན་དུ་མཛད་ནས་བདེ་བར་བཞུགས་པ་ཚེགས་ཆུང་ངུས་བཞུགས་སུ་གསོལ། དེ་བཞིན་གཤེགས་པ་ལྷུན་པོའི་རྩེ་མོའི་འོད་ཀྱི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ཤི་ཁེ། ཤི་ཁ་བནྡྷེ་སཝཱ་ཧཱ། དེའི་འོག་ཏུ་བདག་ཚོགས་ཤིན་དུ་བསགས། གནག་པ་ཡོངས་སུ་རྫོགས། བསམ་བ་ཡོངས་སུ་རྫོགས། སངས་རྒྱས་ཀྱི་བྱ་བ་ཡོངས་སུ་རྫོགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཅིག་།མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་བསྐོར་བར་བགྱི་བ་དེ་བཞིན་ཉིད་ཀྱི་འཁོར་ལོ་དང ། ཡང་དག་པའི་མཐའི་འཁོར་ལོ་དང ། ཇི་ལྟ་བ་བཞིན་གྱི་འཁོར་ལོ་དང ། སྐྱེ་བ་མེད་པ་དང ། འགག་པ་མེད་པའི་འཁོར་ལོ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་འཁོར་ལོ་དང ། ངེས་པར་འབྱུང་བའི་འཁོར་ལོ་དང ། ངེས་པར་འབྱེད་པའི་འཁོར་ལོ་དང ། ཕུང་པོ་དང་ཁམས་དང ། སྐྱེ་མཆེད་མི་དམིགས་པའི་འཁོར་ལོ་དང ། ནམ་མཁའ་ལྟ་བུའི་འཁོར་ལོ་དང ། ཆོས་ཀྱི་དབྱིངས་དབྱེར་མེད་པའི་འཁོར་ལོ་དང ། བག་ཆགས་དང་མཚམས་སྦྱོར་བའི་ཉོན་མོངས་པ་ཐམས་ཅད་སྤང་བའི་འཁོར་ལོ་དང ། ང་དང ། བདག་དང ། རྟག་པ་དང ། ཆད་པ་དང ། བདག་དང་བདག་གིར་འཛིན་པ་ནས་ཉན་ཐོས་དང ། རང་སངས་རྒྱས་དང ། བྱང་ཆུབ་སེམས་དཔའ་དང ། ཡང་དག་པར་རྫོགས་པའི་སངས་རྒྱས་སུ་མངོན་བར་ཞེན་པའི་བར་མི་དམིགས་པའི་འཁོར་ལོ་དང ། མདོར་ན་གང་ན་འཁོར་ལོ་མེད་པ། བསྐོར་བ་མེད་པ་དེ་ལྟ་བུའི་ཆོས་ཀྱི་འཁོར་ལོ་རབ་ཏུ་སྐོར་བར་གྱུར་ཅིག་།རབ་ཏུ་བསྐོར་ནས་སེམས་ཅན་རྣམས་ཡོངས་སུ་སྨིན་པར་བགྱིད་པར་གྱུར་ཅིག་།ཡོངས་སུ་སྨིན་བར་བགྱིས་ནས་སེམས་ཅན་ལ་སྨན་པའི་སླད་དུ་སེམས་ཅན་གྱི་ཁམས་དང ། ལས་ཀྱི་ཁམས་དང ། ཉོན་མོངས་པའི་ཁམས་དང ། ནམ་མཁའི་ཁམས་ཅི་ཙམ་པ་དེ་ཙམ་དུ་གནས་པར་གྱུར་ཅིག་།འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། ། 101.326b ཏདྱ་ཐཱ། སརྦྦ་མ་ནྱ་པྲ་ཧ་སཝཱ་ཧཱ། །དགེ་བའི་རྩ་བ་དེ་དག་དང ། སངས་རྒྱས་ཀྱི་ཞིང་གི་ཡོན་ཏན་ཡོངས་སུ་སྦྱོང་བ་དང ། དེ་བཞིན་དུ་སེམས་ཅན་ཡོངས་སུ་སྨིན་པར་བགྱིས་པའི་དགེ་བའི་རྩ་བ་དང ། རབ་ཏུ་འབྱུང་བའི་དགེ་བའི་རྩ་བ་དང ། དེ་བཞིན་གཤེགས་པ་ལ་མཆོད་པ་དང ། རིམ་གྲོ་དང ། བསྙེན་བཀུར་བགྱིས་པའི་དགེ་བའི་རྩ་བ་དང ། ཕ་མ་དང་བླ་མ་དང ། ཡོན་གནས་དང ། མཁན་པོ་དང ། སློབ་དཔོན་དང ། དམན་པ་དང ། བཀྲེན་པ་དང ། སྡུག་ཕོངས་པ་ལས་བསྒྲུབས་པའི་དགེ་བའི་རྩ་བ་དང ། དམ་པའི་ཆོས་རྣམ་པར་འབྱེད་པའི་དགེ་བའི་རྩ་བ་དང་རྗེས་སུ་ཡི་རང་བ་དང ། མཐོལ་བ་དང ། བཤགས་པ་དང་ལྡན་པ་དང ། ཕྱག་འཚལ་བ་དང་མཆོད་པ་དང་ལྡན་པ་དང ། བྱིས་པ་ནས་བཟུང་ནས་ད་ལྟར་རམ། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་སྐྱེ་བ་གཞན་དག་ཏུ་བསགས་པ་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་མཐའི་བར་གང་ལགས་པ་དེ་དག་སེམས་ཅན་ཐམས་ཅད་དང་ཐུན་མོང་དུ་བགྱིས་ནས་མཆོག་དང ། གཙོ་བོ་དང ། གྱ་ནོམ་པ་དང ། རབ་དང ། ཕུལ་དང ། བླ་ན་མ་མཆིས་པ་དང ། གོང་ན་མ་མཆིས་པ་དང ། གོང་མའི་ཡང་གོང་མ་དང ། མཉམ་བ་མ་མཆིས་པ་དང ། མི་མཉམ་བ་དང་མཉམ་བ་དང ། དམིགས་པ་མ་མཆིས་པ་དང ། རྣམ་པར་རྟོག་པ་མ་མཆིས་པ་དང ། མཚན་མ་མ་མཆིས་པ་དང ། སྤྲོས་པ་མ་མཆིས་པ་དང ། ཡི་གེ་མ་མཆིས་པ་དང ། ཉོན་མོངས་པ་མ་མཆིས་པ་དང ། ཆགས་པ་མ་མཆིས་པ་དང ། ནམ་མཁའ་ལྟར་མཉམ་བ་དང ། ལུས་དང་སེམས་གྲོལ་བ་དང ། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་ཡོངས་སུ་བསྔོ་བས་ཡོངས་སུ་བསྔོ་བར་བགྱིའོ། །ཇི་ལྟར་འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་དེ་རྣམས་ཀྱིས་གཉིས་སུ་མེད་པའི་ཆོས་ཉིད་མངོན་དུ་མཛད་ནས་ཡོངས་སུ་བསྔོས་པ་དང ། ཡོངས་སུ་བསྔོ་བ་དང ། ཡོངས་སུ་བསྔོ་བར་འགྱུར་བ་དེ་ལྟར་བདག་གིས་ཀྱང་ཡོངས་སུ་བསྔོ་བར་བགྱིའོ། ། 101.327a ཇི་ལྟར་ཆོས་ཉིད་དེ་དང ། ཇི་ལྟར་དེ་བཞིན་ཉིད་དེ་དང ། ཇི་ལྟར་ཡང་དག་པའི་མཐའ་དེ་དང ། ཇི་ལྟར་ཆོས་ཀྱི་དབྱིངས་དེ་དང ། ཇི་ལྟར་སྟོང་པ་ཉིད་དེ་དང ། ཇི་ལྟར་རྣམ་པ་ཐམས་ཅད་མཁྱེན་པ་ཉིད་དེ་ནས་ཇི་ལྟར་དེ་ཁོ་ན་ཉིད་མཐོང་བའི་བར་གང་ལ་གཉིས་མེད་ཅིང་གཉིས་མ་ཡིན་པ་མེད་པ་དེ་ལྟར་ཡོངས་སུ་བསྔོ་བར་བགྱིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། བུདྡྷེ་བུདྡྷེ། སརྦ་བུདྡྷ་བི་ཤ་ཡ་བི་ཤོ་དྷ་ནི་སཝཱ་ཧཱ། འཕགས་པ་ཡོངས་སུ་བསྔོ་བའི་རྒྱལ་པོ་སྔགས་དང་བཅས་པ་ཇི་སྙེད་པ་རྫོགས་སྷོ།། །།པཎ་ཌི་ཏ་བིདྱཱ་ཀ་ར་པྲ་བྷ་དང ། ཞུ་ཆེན་གྱི་ལོཙྪ་བ་ཡེ་ཤེས་སྙིང་པོ་དང ། དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། གཉིས་ཞུསོ། །སྟག་ལུང་རྒྱུད་འབུམ་ལ་གཏུགས་ནས་ཞུས།། ་ |