rKTs


J759a

(e-text produced by ADARSHA)

see text in transliteration
104.187a
༄#། ་།རྒྱ་གར་སྐད་དུ། ་སརྦ་པཉྩ་ཨ་མྲྀ་ཏ། ས་ར་སིདྡྷི་མ་ཧཱ་དུ་ཀ་།ཧྲི་ད་ཡཱ་ན་པ་ར་བིད་ཏྭན་ཨཥྚ། བོད་སྐད་དུ། ་ཐམས་ཅད་བདུད་རྩི་ལྔའི་རང་བཞིན། དངོས་གྲུབ་ཆེན་པོ་ཉེ་བའི་སྙིང་པོ་མཆོག་།བམ་པོ་ཆེན་པོ་བརྒྱད་པ། དཔལ་ཀུན་དུ་བཟང་པོ་ལ་ཕྱག་འཚལ་ལོ། །བཅོམ་ལྡན་གསང་བ་མཆོག་གི་དཀྱིལ་འཁོར་ན། །ཤིན་དུ་རྣལ་འབྱོར་དབང་ཕྱུག་ཚོགས། །རྒྱལ་བ་རྒྱ་མཚོ་འཁོར་དང་བཅས། །སྐལ་ལྡན་རྣམས་དང་ཐབས་གཅིག་བཞུགས། །གནས་མཆོག་ཡུམ་གྱི་དཀྱིལ་འཁོར་ན། །གཉིས་མྱེད་ལྷུན་གྱིས་གནས་པའི་ཚེ། །དེ་ཚེ་ཉན་ཐོས་དགེ་འདུན་དང ། །རང་རྒྱལ་ཐེག་ཆེན་མདོ་སྡེ་དང ། །བྱང་ཆུབ་སེམས་དཔའི་དགེ་འདུན་དང ། །ཉན་ཐོས་དགེ་འདུན་ཆེན་པོ་དང ། །དགྲ་བཅོམ་མིང་ཡང་མེད་ནང་དུ། །ཀུན་བཟང་ཐུགས་ཀྱི་དཀྱིལ་འཁོར་ནས། །དགོངས་སྟེ་འདི་སྐད་བསྟན་པའི་ལུང ། །བཤད་ཅིང་འགྲོལ་བའི་དུས་གཅིག་དང ། །
104.187b
འདི་སྐད་བསྟན་པའི་དུས་གཅིག་ན། །སྲིད་གསུམ་ཡེ་ནས་བདུད་རྩི་ལྔ། །མ་བཅོས་ཡེ་ནས་རྫོགས་སངས་རྒྱས། །ཀུན་ཏུ་བཟང་པོའི་ཐུགས་དཀྱིལ་ནས། །དུས་གསུམ་སྲིད་གསུམ་སྐུ་གསུང་ཐུགས། །ཡེ་ནས་བདུད་རྩི་ཡིན་པའི་ཕྱིར། །ངེས་པའི་ཀློང་ནས་བཀའ་སྩལ་པ། །ཟབ་མོའི་ཀློང་ནས་ཕྱུང་སྟེ་བསྟན། །དེ་ནས་བདེར་གཤེགས་ཐམས་ཅད་དང ། །ཐབས་གཅིག་བཞུགས་ཏེ་དགོངས་པ་ནི། །བླ་ན་མེད་པའི་བྱང་ཆུབ་ཏུ། །ཡེ་ཤེས་མཉམ་ཉིད་ཉམས་རྙེད་ནས། །རྡོ་རྗེ་གསང་བའི་གྲལ་བཀོད་དེ། །ཀུན་གྱི་དམ་པར་འདི་གསུངས་སོ། །བཀའ་ཡི་དམ་པ་མཆོག་གི་ལུང ། །ངེས་པར་ཕྱུང་སྟེ་གསུངས་པ་འདིའོ། །སྒྲུབ་དང་སྒྲུབ་པར་བྱ་བ་དང ། །འབྲས་བུ་ཐོབ་པར་བྱ་བའི་ཕྱིར། །གསང་སྔགས་གསང་བའི་མན་ངག་འདི། །བདུད་རྩི་དམ་པ་མཆོག་གི་ལུང ། །སྙིང་པོར་བསྡུས་པའི་ངེས་པར་འདི། །བྱང་ཆུབ་འབྱུང་བ་སྙིང་པོ་མཆོག་།ལྟ་བ་དང་ནི་སྤྱོད་པ་དང ། །དམ་ཚིག་བསྒྲུབ་པ་ཕྲིན་ལས་དང ། །ངེས་པར་སྒྲུབ་དང་བསྒྲུབ་བྱའི་ཕྱིར། །ཟབ་མོ་བསྡུས་པའི་ལུང་འདི་གསུངས། །བསམ་གྱིས་མི་ཁྱབ་བསྟན་པ་དང ། །བརྒྱད་ཁྲི་བཞི་སྟོང་རྣམ་གྲངས་ཀྱང ། །ཐེག་པའི་སྒོ་ནི་གསུམ་དུ་གསུངས། །གསང་ཉིད་ཐེག་པར་བསྡུས་དང་བཞི། །ལྡེམ་པོར་དགོངས་དང་དོན་དམ་ཡང ། །བཀྲི་བའི་དོན་དེ་སངས་རྒྱས་ཡིན། །རྣ་བརྒྱུད་བསྟན་པས་ཐུགས་བརྟོལ་ཏེ། །ཐིག་ལེ་ཆོས་སྐུས་ཁྱབ་པའི་ཕྱིར། །ངེས་པའི་ལུང་ཡང་སངས་རྒྱས་སོ། །སངས་རྒྱས་མཉམ་དང་དབྱིངས་སུ་འགྲོ། །ངེས་པའི་ལུང་ཡང་རྣམ་གཅིག་ཏུ། །གསང་སྔགས་གསང་བས་སངས་རྒྱས་ཏེ། །བྱང་ཆུབ་སེམས་འདི་ཀུན་དུ་དག ། རྫོགས་པའི་ཡེ་ཤེས་བདེ་ཆེན་ཉིད། །མ་ལུས་མཐའ་དག་ཉིད་ཀྱི་རྒྱ། །ཡེ་ནས་བྱ་མེད་བྱ་མི་དགོས། །རྒྱུ་དང་འབྲས་བུ་འཁྲུལ་པའི་སྒྲ། །མི་རྟོག་སྦྱོང་བའི་ཡུལ་མིན་ནོ། །དེ་ལྟའི་ཡུལ་དུ་རྟོག་འཛིན་གྱིས། །འཁོར་བའི་རྒྱ་མཚོར་གྱུར་པ་ཡིན། །ངེས་འབྱུང་ཆོས་སྐུ་ཆེན་པོ་ལ། །བྷ་གར་ཇི་བཞིན་བཞག་པས་ན། །བྱང་ཆུབ་ཉིད་དེ་ལྟུང་གནས་མེད། །བུ་གཅིག་མ་རྩོལ་བདེ་བར་གནོས། །རྒྱུད་དང་ལུང་དང་མན་ངག་ཀྱང ། །རྨངས་དང་རྗེའུ་དང་རྒྱལ་པོའི་ཚུལ། །ཁྱད་པར་རྩལ་འཕང་ཐག་རིང་ཡང ། །གཅིག་ལ་གཅིག་རྟེན་གཅིག་གི་ངང ། །དབྱེར་མེད་ཚུལ་གཅིག་རང་བཞིན་བས། །ཅིག་སྟེ་མ་གྲངས་ཡོངས་ཀྱི་མེད། །དབྱེར་མེད
104.188a
ངང་དུ་རྟོགས་པ་ལ། །བདུད་རྩི་ཞེས་ནི་དེ་ལ་བྱའོ། །དེ་ལས་སྐུ་གསུང་ཐུགས་ཀྱི་བདག་།སྐུ་དང་རྒྱན་དང་འཁོར་ལོ་ཡང ། །ལུང་ཆེན་ཟབ་མོའི་ནང་ན་གསལ། །ལྔ་བཞི་ནང་དུ་འཁོར་བ་ཡང ། །ཡེ་ཤེས་སངས་རྒྱས་དེ་ལས་མེད། །དབྱིངས་སུ་གྱུར་པས་མཉམ་གནས་པས། །ཡེ་ནས་སངས་རྒྱས་བདེ་ཆེན་ཉིད། །བདུད་རྩི་ཞེས་ནི་དེ་ལ་བརྗོད། །སྐྱེ་ཤི་མེད་པའི་དབྱིངས་སུ་གྱུར། །དབྱིངས་འགྱུར་དག་མཉམ་ལྷུན་གྲུབ་པས། །ལྟ་བ་འདི་ལ་གནས་པ་ཡི། །རྣལ་འབྱོར་འདི་ནི་སྐལ་བ་བཟང ། །ཅི་སྤྱད་ཅི་བསྒོམས་ཅི་བསྒྲུབ་ཀྱང ། །བདུད་རྩི་ཉིད་ཏེ་སྨན་གྱི་མཆོག་།བདེར་གཤེགས་ཉིད་ཀྱི་ཐུགས་དམ་ཉིད། །བྱིན་བརླབས་ངོ་མཚར་རྒྱ་ཆེར་འབྱུང ། །རྒྱལ་བ་རྒྱ་མཚོ་རྣམས་ཀྱི་གསོས། །སངས་རྒྱས་བདེ་ཆེན་ཉིད་ལས་བྱུང ། །ཐམས་ཅད་མ་ལུས་བདུད་རྩི་འདི། །སྤྲོས་མེད་ཐིག་ལེར་གནས་པ་ལས། །མཐའ་ཡས་སེམས་ཅན་དོན་གྱི་ཕྱིར། །རང་ལ་མཆོད་ཅིང་རང་གིས་བཟའ། །བསྒྲུབ་པ་པོས་ནི་ནན་ཏན་བྱོས། །ཞེས་བཅོམ་ལྡན་འདས་དཔལ་ཀུན་ཏུ་བཟང་པོས། ཡེ་ཤེས་ཆེན་པོའི་ཐུགས་ནས་དགོངས་ཏེ་བཀའ་སྩལ་པའོ། །བདུད་རྩི་ཆེན་པོ་མཆོག་གི་ལུང་ལས་བྱང་ཆུབ་སེམས་དེ་ཁོ་ན་ཉིད་ལྟ་བར་བསྟན་པའི་མན་ངག་ཆེན་པོ་གསང་བའི་དོན་དང་པོ་སྟེ། ཐུགས་ཀྱི་རྒྱ་མཚོའི་ནང་ནས་གསང་བའི་མཛོད་ཆེན་པོ་ལས་བམ་པོ་ཆེན་པོ་བརྒྱད་པའི་དང་པོ།། །།