༄#། །སངས་རྒྱས་བཅོམ་ལྡན་འདས་ཀྱི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ། ཐམས་ཅད་མཁྱེན་པ་ལ་ཕྱག་འཚལ་ལོ། །བཅོམ་ལྡན་འདས་སྙིང་རྗེའི་ཙན་དན་དྲི་ཞིམ་པོའི་སྤོས་ཀྱིས་བྱུགས་པའི་སྐུ། ཞབས་པད་མ་ལྷ་དང་ལྷ་མ་ཡིན་གྱི་ནོར་བུའི་ཅོད་པན་ཅན་གྱིས་གཏུགས་པ། རང་བྱུང་སེལ་མཛད། བླ་མ། འཇིག་རྟེན་ཐམས་ཅད་ལ་ཕན་པར་མཛད་པ། སྟོན་པ་དེ་བཞིན་གཤེགས་པ། ཐུབ་པ་ཉེས་པ་དང་བྲལ་བ། ཞི་བའི་བདག་ཉིད་ཅན། གཟུགས་མཛེས་པ། མཚན་གསལ་བའི་གཟི་བརྗིད་ཅན། སྐུ་དཔེ་བྱད་ཀྱིས་བརྒྱན་པ། ཡོན་ཏན་ཐམས་ཅད་ཡང་དག་པར་རྫོགས་པ་ལ་ཕྱག་འཚལ་ལོ། །པད་མ་རྒྱས་པ་ལྟར་ཞལ་བཞད་དེ། ཚེམས་དཀར་ཞིང་སྙོམས་ལ་ཐགས་བཟང་བས་རབ་ཏུ་རྒྱས་ཤིང་སྣང་ལ་ནོར་བུ་དྲི་མ་མེད་པ་ལྟར་འོད་གསལ་ཞིང་མཛེས་ཏེ། སྤ་ཞིང་གསལ་བ། ཉི་མ་འོད་ཟེར་སྟོང་འབར་བ་མང་པོའི་འོད་སྣང་བའི་དཀྱིལ་འཁོར་ཟིལ་གྱིས་གནོན་པ། ཐུབ་པའི་མཆོག་སྟོབས་བཅུ་དང་ལྡན་པ་ལ་ཕྱག་འཚལ་ལོ། །འདུད་དོ། །རབ་ཏུ་འདུད་དོ། །བསྟོད་དོ།[་\ུ0f00]་བྷོ་ཧཱུཾ་ཧཱུཾ། ཨཱ་ཨཱ། ཧཱི་ཧཱི། ཤི་བ་ཤི་བ། ཤཱན་ཏི་ཤཱན་ཏི། ཤ་མ་ཤ་མ། ཤ་མ་པ་ཡ། ཏ་ཐཱ་ག་ཏཱ་ཨ་ནུ་ག་ཏ། སཝ་བྷཱ་བ། ཨ་བྷཱ་བ། ས་མུད་ཏཱ་ཡ། ཨ་ས་མ་པ་ལ། ཨ་བི་ར་ལ་བ་ལ། ཨ་མི་ཏ་བ་ལ། ཨ་ཏི་བ་ལ། གྷུཾ་གྷུཾ། དྷོོ་དྷོོ། བྷྲོོ་བྷྲོོ། བྷྲེ་དུ་བྷྲེ་དུ། གྷུཾ་གྷུཾ། དྷཽ་དྷཽ། བྷྲཽ་བྷྲཽ། བྷྲེ་དུ་བྷྲེ་དུ། ཧཱི་ཧཱི། བྷ་ག་བཱན། བྷ་བཱན་ཏ་ཀ་།སུ་རཏ་བྷོ་ག་མ་ཧཱ་ཤཱན་ཏི་ཀ་ར། པཱ་པ་ཀི་ལྦི་ཥ་ཎ་ཤ་ཀ་སཝཱ་ཧཱ། དེ་ནས་དཔེ་བྱད་མཚན་གསལ་བས། །ཡན་ལག་ཐམས་ཅད་རབ་བརྒྱན་ཅིང ། །ཉི་མ་བཞིན་དུ་གསལ་བ་པོ། །འབར་བའི་དཀྱིལ་འཁོར་རྒྱན་མངའ་བ། །གྲགས་ཤིང་དྲི་མ་རབ་སྤངས་ལ། །དྲི་མེད་སྐྱོན་བྲལ་ཆོས 106.95a ཀྱི་བློ། །ཁྱབ་བདག་ཆེན་པོའི་སྟོབས་བཅུར་ལྡན། །རྡུལ་བྲལ་དཔལ་དང་ལྡན་པ་པོ། །རིན་ཆེན་ས་གཞི་ཆེན་པོ་ལ། །ཕོ་བྲང་རྩེ་མོ་རྡོ་རྗེའི་རྩེ། །རྒྱལ་བའི་སྲས་རྣམས་གནས་གྱུར་པ། །ནོར་བུ་དུ་མ་རབ་འཕྲོ་ཞིང ། །འོད་ཟེར་དྲི་མེད་གསལ་བཀོད་པའི། །རྡོ་རྗེའི་དཀྱིལ་འཁོར་ཕོ་བྲང་ན། །ཐུབ་པའི་ལོངས་སྤྱོད་ས་གཞི་ལ། །སེང་གེའི་ཁྲི་ཆེན་ཡངས་ལ་བཞུགས། །ནོར་བུ་དབྱིག་གི་ས་གཞི་དང ། །ཁྲི་ཆེན་རབ་སྤ་དེ་ཉིད་ལ། །དེ་བཞིན་གཤེགས་པ་དགྱེས་ཆེན་གྱིས། །ཕུན་སུམ་ཚོགས་པ་རྒྱན་ཀོ་ལྟ། །ཐུབ་པ་མེ་ཟླ་ནོར་བུའི་འོད། །ཉི་ཟེར་ནོན་པའི་འོད་ལྡན་པ། །བདེ་བླག་ཤིན་ཏུ་བཀྲ་ཤིས་ཚུལ། །འོད་གསལ་སྐྱིལ་མོ་དཀྲུང་བཅས་ནས། །སྐུ་འོད་འབར་བའི་དཀྱིལ་འཁོར་ཅན། །འོད་གསལ་རྒྱས་པ་ཐུབ་དབང་གི་།དྲི་མེད་འོད་ཟེར་བཀྱེ་བ་ནི། །མི་གཡོ་རྡོ་རྗེ་ཅན་ཞེས་བྱ། །དཀྱིལ་འཁོར་ཆེན་པོར་ཞུགས་པ་ཡི། །རྡོ་རྗེ་ཅན་དག་རབ་བཏུལ་བ། །གང་ཡིན་དེ་ཀུན་དག་བྱས་ནས། །དཀྱིལ་འཁོར་དྲི་མེད་སྐོར་བར་བྱེད། །ངན་སོང་དམ་ཚིག་དྲི་མ་ཀུན། །ལེགས་པར་ཤིན་ཏུ་དག་བྱས་ནས། །སྲིད་གསུམ་དཀྱིལ་འཁོར་རྒྱ་ཆེ་བ། །རྣམ་པ་དུ་མར་འོད་གསལ་བ། །འགྲོ་དང་མི་འགྲོ་མ་ལུས་པ། །བསྐོར་ནས་བདེ་ཆེན་རྡོ་རྗེ་ཅན། །རྡོ་རྗེ་རལ་གྲི་ཐོགས་པ་དེ། །ཅོད་པན་མ་གཡོས་ནང་དུ་ཞུགས། །དེ་ནས་འཇིགས་པའི་སྒྲ་སྐད་ཀྱིས། །འགེངས་ཤིང་མིག་ནི་གློག་ལྟར་འགྱུ། །རིག་སྔགས་ཧཱུཾ་ཞེས་སྒྲོགས་པ་པོ། །རྡོ་རྗེ་འཇིགས་བྱེད་འཇིགས་བྱེད་པ། །བཞིན་མཛེས་འཛུམ་གྱིས་རྣམ་པར་བརྒྱན། །སྡིག་མེད་མིག་རྩ་རྒོད་གྱུར་ཅིང ། །སྟན་ལས་ལངས་ཏེ་ཕྱག་འཚལ་ནས། །ལེགས་པར་མཆོད་བྱས་སྨྲས་པ་ནི། །ཀྱེ་མ་སྐྱེ་བའི་ཕྱོགས་འཇོམས་ཤིང ། །བསྐལ་པ་དུ་མའི་དྲི་མ་སེལ། །རིག་སྔགས་ཡོན་ཏན་སྒྲུབ་བྱེད་པ། །ཐུབ་མཆོག་རྣམས་ཀྱིས་རབ་ཏུ་གསུངས། །དེ་གཟིགས་དགེ་བ་དུ་མ་བརྙེས། །སངས་རྒྱས་བློ་གྲོས་རྒྱས་པར་གྱུར། །བྱང་ཆུབ་སེམས་དཔའ་བློ 106.95b གྲོས་ཆེ། །བསྐལ་པ་གཅིག་ཏུ་སྤྱོད་པས་ཀྱང ། །བརྒྱུད་མར་སངས་རྒྱས་ཀུན་འབྱུང་ཞིང ། །སྤྱོད་པ་དུ་མ་འབྱུང་བ་ཡི། །ཡོན་ཏན་བརྒྱའི་ཡི་སྤོས་ལྡན་འདི། །ཐོས་པ་སྤྲོ་བར་མི་ནུས་སོ། །ལོངས་སྤྱོད་རྒྱ་མཚོ་ཆེན་པོ་ཅན། །བྱང་ཆུབ་སེམས་མཆོག་དཀྱིལ་འཁོར་དུ། །རྒྱལ་མཆོག་རྣམས་ཀྱིས་དབང་བསྐུར་བའི། །ཕྱིར་མི་ལྡོག་པའི་ཆོས་ཅན་ལྡན། །འདི་ཐོས་སངས་རྒྱས་སྤྱོད་པ་ཡི། །སེམས་ཅན་ཀུན་གྱི་སྡིག་པ་རྣམས། །མ་ལུས་རབ་ཏུ་བསལ་ནས་ནི། །བློ་ཆེན་དྲི་མ་མེད་པར་འགྱུར། །ཞི་ཞིང་དག་བྱེད་བཀྲ་ཤིས་ལ། །རྡུལ་མེད་བརྒྱན་ཏེ་ཞི་བར་བྱེད། །དགེ་ཞིང་མྱ་ངན་ཐམས་ཅད་སེལ། །སྡུག་བསྔལ་ཐམས་ཅད་ངེས་པར་འཇོམས། །དབང་བྱེད་གསང་སྔགས་དམ་པ་སྟེ། །ས་སྟེངས་སྡིག་པ་ཐམས་ཅད་སེལ། །མ་སྨད་འབྲས་བུ་ངེས་པར་སྦྱིན། །བསྟན་པ་ཡིན་ཏེ་སྡང་བ་འདུལ། །ཉེས་པ་བྱས་པ་སེལ་བ་ཡིན། །གཟུངས་འདི་གང་གིས་ཐོས་གྱུར་དེ། །སངས་རྒྱས་རྙེད་པར་དཀའ་བ་ཡང ། །རིང་པོར་མི་ཐོགས་ཐོབ་པར་འགྱུར། །སྒྲིབ་པ་ཐམས་ཅད་རབ་ཞི་ཞིང ། །ཁྱབ་བདག་ཉོན་མོངས་ཀུན་སེལ་བ། །གང་ཞིག་ཉོན་མོངས་ཞི་བྱེད་པའི། །གཟུངས་འདི་འཆང་བར་བྱེད་པ་ཡིས། །ཀུན་ཏུ་བཟང་པོ་ཉིད་དང་ནི། །ལག་ན་རྡོ་རྗེ་ཉིད་ཀྱང་འཐོབ། །རིག་སྔགས་འཆང་གི་བདག་པོ་ཡང ། །འདི་ཐོས་པ་ནི་ཐོབ་པར་འགྱུར། །འཇིག་རྟེན་ཀུན་ན་ལམ་མེ་བ། །བཅོམ་ལྡན་རྣམ་པར་སྣང་མཛད་ཀྱང ། །དཀྱིལ་འཁོར་དམ་པ་གཏིང་མེད་པ། །འདི་ནི་ཇི་སྲིད་མ་གསན་པར། །རབ་ཞི་ཉོན་མོངས་འདུལ་བ་ཡི། །རང་འབྱུང་གོ་འཕང་མ་བརྙེས་ཏེ། །རྣམ་པར་དག་ཕྱིར་གསན་གྱུར་ནས། །གསན་མ་ཐག་ཏུ་རྣམ་པར་དག་།དེ་ཕྱིར་ཕུན་སུམ་ཚོགས་པ་དང ། །ལེགས་པར་འདོད་པས་བརྗོད་པར་བྱ། །གཞན་གྱིས་མི་ཐུབ་གཟུངས་གསན་ནས། །ཐུབ་པ་ཀུན་གྱིས་གང་བརྙེས་པ། །འཁོར་བ་འདིར་ནི་ནམ་དུ་ཡང ། །བདུད་ཀྱི་ལས་དང་འཁྲུག་མེད་དང ། །མྱ་ངན་མེད་ཅིང་འཐབ་མེད་པ། །གཟུངས་ལ་གནས་པས་ཐོབ 106.96a པར་འགྱུར། །གནས་ཀྱི་དམ་པ་ཐོབ་ནས་ཀྱང ། །ཐུབ་པ་དྲི་མ་མེད་པའི་བློ། །གཟིགས་པ་བཟང་རྣམས་གར་གཤེགས་པའི། །བཟང་འགྲོ་དེར་ནི་འགྲོ་བར་འགྱུར། །ལེགས་པ་འདོད་པ་རྣམས་ཀྱིས་ནི། །ཚིག་གི་མདོ་འདི་མཉན་པར་གྱིས། །ཉོན་མོངས་ཟད་པར་བྱ་བ་ལ། །རྒྱལ་བས་གསུངས་པའི་གཟུངས་འདིས་ཆོག་།སྡིག་པ་བྱེད་ཅིང་དགེ་ལ་སྡང ། །སྡིག་པའི་རང་བཞིན་རབ་འཇུངས་པ། །གང་གིས་ཐོས་ནས་དེ་སྤོང་བ། །ང་ཡི་མངོན་སུམ་འབྱོར་བར་འགྱུར། །སྡིག་པ་གཞན་ཡང་མི་བྱ་ཞིང ། །སྔ་མ་རྣམས་ཀྱང་བཤགས་པར་བྱ། །གཟུངས་མཆོག་འདི་ཡི་མཐུ་སྟོབས་ཀྱིས། །སྡིག་པ་ཐམས་ཅད་འབྱང་བར་འགྱུར། །ཚེ་རབས་གཞན་ནི་སྟོང་དག་དང ། །ཚེ་རབས་བྱེ་བ་ཕྲག་བརྒྱར་ཡང ། །སྡིག་པ་མི་དགེ་གང་བྱས་པ། །དག་འགྱུར་འདི་ལ་ཐེ་ཚོམ་མེད། །ཡར་གྱི་ངོ་ནི་ཚེས་བརྒྱད་དང ། །དེ་བཞིན་ཚེས་ནི་བཅཝ་ལྔ་ལ། །བསྙེན་གནས་ལེགས་པར་ལྷུར་བླངས་ལ། །ཆོ་ག་བཞིན་དུ་སངས་རྒྱས་མཆོད། །དེ་ནས་རྨོངས་པ་མེད་པར་ཡང ། །ཉོན་མོངས་དགྲ་ནི་རབ་འཇོམས་ཤིང ། །ཤིན་ཏུ་ཐུབ་དཀའ་དཔེ་མེད་པ། །ཉེས་པ་ཟློག་པའི་གཟུངས་བརྗོད་ན། །ཐུབ་པའི་ཞལ་གྱི་ཟླ་བའི་འོད། །འབར་བ་ངེས་པར་མཐོང་བར་འགྱུར། །དེས་ན་ཚོགས་རྣམས་རྫོགས་པ་ཡི། །རྒྱལ་བའི་སྲས་པོ་ཉིད་དུ་འགྱུར། །འོད་དཔག་མེད་ལ་མངའ་བ་ཡི། །ཡོན་ཏན་མཐའ་ཡས་རབ་རྒྱས་པ། །བསྐལ་པ་བྱེ་བ་སྟོང་དུ་ཡང ། །མཐའ་མི་རྟོགས་པ་ཐོབ་པར་འགྱུར། །དེ་ནས་རྡོ་རྗེ་འཛིན་གྱི་ཚིག་།དཀྱིལ་འཁོར་དག་ན་གནས་རྣམས་ཀྱིས། །ཐོས་ནས་རྒྱན་རྣམས་སྣ་ཚོགས་པ། །བཅོམ་ལྡན་འདས་ལ་འབུལ་བར་བྱེད། །རྡོ་རྗེ་རལ་གྲི་ལ་སོགས་པ། །ལྷ་བདག་གསལ་བ་ཐམས་ཅད་དང ། རི་བོ་ཏི་སེའི་རི་རབ་ལ། །གནས་པའི་རིག་སྔགས་འཆང་རྣམས་དང ། །དེ་བཞིན་དཀྱིལ་འཁོར་ཆེན་པོ་ན། །འཁོད་པའི་རིག་སྔགས་འཆང་རྣམས་དང ། །མ་ལ་ཡ་ཡི་རི་བོ་ལ། །གནས་ཤིང་རྒྱན་འབར་ཐོགས་རྣམས་དང ། །ཁྱབ་འཇུག་ལྷ་ཆེན་ལ་སོགས་པ། །ལྷ་ཡི་བདག་པོ་རྣམས་དང་ནི། །ལག་ན་རྡོ་རྗེ་ལ་སོགས་པ། །བྱང་ཆུབ་སེམས་དཔའ་སྟོབས་ཆེན་རྣམས། ། 106.96b ནོར་བུའི་དཔུང་རྒྱན་རྣ་ཆ་དང ། །རྒྱན་རྣམས་རབ་ཏུ་གཡོ་བའི་ལུས། །རབ་ཏུ་བསྐྱོད་དེ་ལངས་ནས་ནི། །སྡིག་བྲལ་མངའ་བདག་རྒྱལ་བ་ལ། །ཕྱག་འཚལ་ཐལ་མོ་སྦྱར་བྱས་ནས། །ཀུན་གྱིས་ས་ཡི་དབང་ཕྱུག་པོ། །ཐུབ་མཆོག་དམ་པ་དེ་ལ་ནི། །མཚན་བརྒྱ་རྩ་བརྒྱད་དག་གིས་བསྟོད། །མཉམ་ཉིད་ཆོས་ཏེ་དེ་བཞིན་ཉིད། །ཤིན་དུ་རྟོགས་པ་ལམ་མེ་བ། །དུལ་བ་བརྟན་པ་དྲི་མ་སེལ། །དྲི་མ་མེད་པ་སྐྱོན་བྲལ་བ། །ཐུབ་པ་སངས་རྒྱས་ཤིན་དུ་ཞི། །འཇིག་རྟེན་མགོན་པོ་སྐྱེ་དགུ་འི་བདག་།དེ་བཞིན་གཤེགས་པ་ཉོན་མོངས་ཐུལ། །དེ་བཞིན་རྒྱལ་བ་རྡུལ་བསལ་བ། །སྟོན་པ་སྟོན་མཛད་བརྟན་པ་སྟེ། །སྡིག་པ་མེད་པ་རྡུལ་དང་བྲལ། །འཇིག་རྟེན་མགོན་མཛད་སྣང་མཛད་པ། །དག་པ་ཞི་བ་ཟས་གཙང་སྲས། །ཉོན་མོངས་རབ་བཅོམ་ཕན་འདོགས་པ། །སྟོན་པ་པོ་སྟེ་དྲི་མ་སེལ། །སྤྱོད་ཚུལ་དྲི་མེད་ཚུལ་བཟང་བ། །ཟབ་པ་རྣམ་པར་གནོན་པ་བརྟན། །བརྩན་པོ་ཐུགས་བརྩེ་རྣམ་པར་རྒྱལ། །མགོན་པོ་དེ་བཞིན་མགོན་མཛད་པ། །ཞི་བའི་བདག་ཉིད་ཞེ་སྡང་བྲལ། །བཅིངས་པ་ལས་གྲོལ་ངེས་པར་གྲོལ། །འཇིག་རྟེན་ཀུན་མཆོག་འཁྲ་བའི་ས། །བདག་གིར་མི་འཛིན་དྲི་མ་མེད། །ངན་སོང་སེལ་བ་དཔལ་དང་ལྡན། །དཔལ་མཛད་དེ་བཞིན་ཕན་པ་མཛད། །མཉམ་པ་མེད་པ་དཔེ་མེད་པ། །ཁྱབ་བདག་ཉོན་མོངས་ལས་རྣམས་སྤོང ། །ཁེངས་པ་མེད་པ་དམན་པ་མེད། །མཉམ་པ་དེ་བཞིན་མི་མཉམ་མཉམ། །སྣང་བ་བརྙེས་པ་སྣང་བྱེད་མེད། །འཇིག་རྟེན་སྣང་མཛད་སྡིག་མེད་པ། །སྒྲིབ་པ་ཐམས་ཅད་སྤངས་པ་སྟེ། །འཇིག་རྟེན་ཀུན་ལ་ཕན་པར་བརྩོན། །དཔའ་བོ་ཞི་བ་ཞི་མཛད་པ། །ཉོན་མོངས་དགྲ་རྣམས་ཟད་པར་མཛད། །མངའ་བདག་ཐབས་མཁྱེན་ཐབས་ཆེ་བ། །སེམས་ཅན་ཀུན་གྱི་འཁྲ་ས་ལགས། །དོན་ཡོད་རྙེད་དཀའ་བློ་དང་ལྡན། །རྡོ་རྗེའི་དཀྱིལ་འཁོར་ཐུབ་པར་དཀའ། །སྐྱོབ་པ་འཇིགས་སེལ་ཚངས་པ་སྟེ། །དེ་བཞིན་སངས་རྒྱས་ཆོས་འཛིན་པ། །དཔའ་བོ་ཆེན་པོ་འཇིགས་པ་མད། །གཟུགས་བཟང་མཚན་རྣམས་གསལ་བ་སྟེ། །སུམ་བཅུ་རྩ་གཉིས 106.97a མཚན་མངའ་བ། །ཆོས་ཀྱི་ལོངས་སྤྱོད་རྒྱ་མཚོ་ལགས། །དཔེ་བྱད་བཟང་པོ་བཀོད་པ་ཡིས། །སྤྲས་པའི་བདག་ཉིད་ཡ་མཚན་སྟོན། །དཀའ་བ་མེད་པའི་སྟོན་པ་པོ། །དེ་བཞིན་དེས་པ་བདེ་སྦྱིན་པ། །མཐུ་ཅན་ཡངས་པ་རྒྱ་ཆེ་བ། །བདུད་བཞིའི་སྟོབས་རྣམས་སེལ་མཛད་པ། །བརྩོན་ཆེན་སྤྲོ་བ་ཆེ་བ་སྟེ། །དགྱེས་པ་ཆེན་པོ་སྟོབས་པོ་ཆེ། །མཐུ་བརྙེས་བརྟན་པོ་ཆེན་པོ་སྟེ། །གནས་ལྡན་དབང་གིས་དར་བ་ལགས། །གསལ་བ་གསུང་ལྡན་དཔེ་མེད་པ། །དགེ་བ་སྟོང་པ་ཉིད་ཀྱིས་རྒྱལ། །རབ་ཏུ་ཞི་བ་མུན་པ་མེད། །བློ་གྲོས་ཆེན་པོ་ཆོས་འཛིན་པ། །ཕུན་སུམ་ཚོགས་ལྡན་ས་ཆེན་བརྙེས། །འདོད་པ་རྣམས་ནི་འདུལ་མཛད་པ། །དཔལ་མཛད་དཔལ་མངའ་དཔལ་དང་ལྡན། །དཔལ་གྱིས་ལོངས་སྤྱོད་ཤིན་ཏུ་རྒྱས། །བཅོམ་ལྡན་ལེགས་བསྒོས་བསྒོ་བར་མཛད། །གསུང་ལྡན་བཀྲ་ཤིས་རྒྱལ་བའི་གནས། །མཉམ་ཉིད་མཉམ་པ་ཉིད་མཁྱེན་པ། །མཉམ་པ་ཉིད་ཀྱིས་མཚན་དཔག་མེད། །རབ་ཏུ་དགྱེས་པ་ལོངས་སྤྱོད་གསལ། །གཞི་བཅས་སེམས་པ་མཉམ་པ་ལགས། །བློ་དག་བློ་ལྡན་དྲི་མ་སྤངས། །གནས་ཆེན་བརྟན་པར་ལྡན་པ་སྟེ། །རྒྱས་པར་ལོངས་སྤྱོད་དྲི་མ་མེད། །ཐུབ་པ་ཐུགས་རྗེའི་རྒྱན་མངའ་བ། །སྐལ་པ་བཟང་པོ་འཇིགས་པའི་སྐྱབས། །དེ་བཞིན་འཇིགས་མེད་ཉོན་མོངས་སེལ། །དྲི་མེད་སྐྱོན་བྲལ་ལོངས་སྤྱོད་ཅན། །སྣ་ཚོགས་འོད་ལྡན་དཀྱིལ་འཁོར་མཛེས། །སྐུ་བཟང་དགེ་བའི་རིམ་པ་མཆོག་།ཐུགས་རྗེའི་འོད་ལྡན་འོད་བཟང་བ། །མི་གནས་ལོངས་སྤྱོད་དམ་པ་ལགས། །ཆོས་ཀྱི་རྒྱུ་སྟེ་ཡོན་ཏན་གནས། །རྗེད་འོས་མཆོག་གནས་ལོངས་སྤྱོད་ཆེ། །ནམ་མཁའ་མཚན་ཏེ་རྣམ་དག་བློ། །རིན་ཆེན་གཟུགས་འདྲ་བཀྲ་ཤིས་པ། །ཁྱུ་མཆོག་ཆེ་སྤྱན་བ་རྫི་མ། །རྒྱལ་བ་སྐྱོན་བསལ་ཤེས་རབ་ཅན། །ཤེས་རབ་ཐབས་དང་ལྡན་པ་སྟེ། །འཇིག་རྟེན་མི་དགེ་ཀུན་ལས་འདས། །དག་པར་ལོངས་སྤྱོད་བསྟན་པ་ཅན། །ས་དང་སྟོབས་དང་ཡེ་ཤེས་བཟོད། །ཕ་རོལ་ཕྱིན་པ་ཀུན་ལ་མངའ། །ཏིང 106.97b འཛིན་མཉམ་པར་ལོངས་སྤྱོད་པ། །རྣམ་ཐར་སྒོ་ལ་མངོན་སུམ་པ། །གཏོང་བ་སངས་རྒྱས་ཀུན་དང་མཉམ། །ཆོས་ཆེན་བདེ་བར་འཆར་བ་ལགས། །ཐམས་ཅད་མཁྱེན་པའི་ཡུལ་ལས་འདས། །སྤྱོད་ཡུལ་སྒྲིབ་པ་མི་མངའ་བ། །བྱང་ཆུབ་སེམས་དཔའི་དབང་པོ་རྒྱལ། །དམ་པའི་དོན་ཏེ་ཚུལ་ཆེ་བ། །ཤེས་བྱའི་ཡུལ་རྣམས་མཐའ་དག་ལ། །སྒྲིབ་པ་མེད་པར་འཆར་བ་བརྙེས། །རིགས་ཆེན་འཐུན་པར་སྐྱེས་པ་སྟེ། །དེ་བཞིན་གཤེགས་པའི་དགེ་བའི་གནས། །ཁྱད་པར་བརྙེས་པ་མཉམ་ཉིད་བརྙེས། །མི་མཉམ་སངས་རྒྱས་ཀུན་དང་མཉམ། །དོན་ཆེན་ཤིན་ཏུ་མཐར་ཕྱིན་པ། །ཉོན་མོངས་བྲལ་བ་ཐུབ་པར་དཀའ། །དགེ་སྦྱོང་སྡིག་པ་སྦྱོང་མཛད་པ། །གནོད་པ་མེད་པར་བདེ་བར་འབྱིན། །བློ་རྒྱ་ཆེ་བ་ཐམས་ཅད་མཁྱེན། །ཐོས་པའི་མཚོན་ཆ་མ་ལུས་གསན། །དཀོན་པ་བདེ་བར་ཐོབ་འགྱུར་བ། །མཉམ་པ་ཁྱད་པར་ཡུལ་དང་ལྡན། །འཇིག་རྟེན་ཐམས་ཅད་དར་མཛད་མགོན། །ཞི་གནས་མཚོན་ཆ་ཐུབ་པར་དཀའ། །བསམ་གྱིས་མི་ཁྱབ་བསམ་ཡས་ཡུལ། །དཔེ་མེད་པ་སྟེ་དཔེར་བྱ་བ། །འོད་བཟང་རབ་དགྱེས་དཔལ་དང་ལྡན། །ལེགས་གསུང་བློ་ཡི་སྟོབས་ཀྱིས་འབྱུང ། །མཁས་པ་ཞལ་བཟང་བདེ་སྦྱིན་པ། །རབ་དགྱེས་འདས་པའི་སྤྱོད་ཡུལ་ཅན། །གསུང་བ་ཆེན་པོ་ཡེ་ཤེས་ཆེ། །གནས་ཆེན་བཀྲ་ཤིས་ཆེན་པོ་སྟེ། །མཆོད་པར་གྱུར་པ་ཡུལ་ལས་འདས། །བྱ་བའི་མཚན་ཉིད་མེད་པ་པོ། །སངས་རྒྱས་ཡུལ་དུ་སྐྱེས་པ་སྟེ། །ཤེས་བྱའི་སྤྱོད་ཡུལ་རྒྱ་ཆེ་བ། །ཀུན་མཁྱེན་ལོངས་སྤྱོད་འབྲས་བུ་ཅན། །འཇིག་རྟེན་དབང་འདས་སྤྱོད་ཡུལ་བ། །ཀུན་མཁྱེན་ཡུལ་གྱི་སྣང་བ་སྟེ། །ཐབས་མངའ་ཕུན་སུམ་ཚོགས་ལྡན་པ། །རྫུ་འཕྲུལ་རོལ་པའི་ཐབས་དང་ལྡན། །ཆོས་ཀྱི་གར་ཐབས་སྟོན་པ་པོ། །རབ་སྟོན་ཡོན་ཏན་སྒྱུར་མཛད་པ། །སྤྱོད་པ་མ་ལུས་འདུལ་བར་མཛད། །ཡོངས་སུ་རྫོགས་པ་རྣམ་པར་དག་།སངས་རྒྱས་སྤྱོད་ཡུལ་རྣམ་སངས་རྒྱས། །བགེགས་མེད་མ་ལེགས་བྱེད་པ་བཅོམ། །བདུད་ཀྱི་དྲེགས་པ་སེལ་བར་མཛད། །གཡུལ་ངོར་རྣམ་པར་རྒྱལ 106.98a བ་བརྙེས། །དཔའ་བོ་ཆེན་པོ་ཕམ་མེད་སྟོབས། །ཐེག་པ་ཆེན་པོའི་ཤིང་རྟ་བཅིབས། །བློ་ཆེན་རྒལ་བར་དཀའ་བ་ཡི། །ཉོན་མོངས་རྒྱ་མཚོའི་ཕ་རོལ་གཤེགས། །ཐེག་པ་ཆེན་པོའི་ཚུལ་ལ་གནས། །ཐེག་པ་མཆོག་ལ་ལོངས་སྤྱོད་པ། །ཉན་ཐོས་འདས་པའི་སྤྱོད་ཡུལ་ཅན། །རང་རྒྱལ་ལས་ཀྱང་འདས་པ་སྟེ། །སངས་རྒྱས་ས་ཡི་འབྲས་བུར་གནས། །གོང་ནས་གོང་དུ་ཁྱད་པར་མཁྱེན། །ཁྱོད་ནི་ནམ་མཁའི་གནས་ན་བཞུགས། །བདེ་འབྱུང་ས་དང་ཞིང་རྣམས་ཀྱི། །མཚོ་ཆེན་དག་ལ་ལོངས་པར་སྤྱོད། །སངས་རྒྱས་དབང་པོ་རྒྱས་པ་ལ། །མཚན་བརྒྱ་རྩ་བརྒྱད་ཀྱིས་བསྟོད་ནས། །དེ་ལ་ལྷ་སོགས་ཚོགས་རྣམས་ཀྱིས། །ཕྱག་བྱས་མགོ་སྨད་ཕྱོགས་གཅིག་འཁོད། །དེ་ནས་དཀྱིལ་འཁོར་ཆེན་པོ་ན། །གནས་པ་མ་ལུས་ཆེམ་མེར་འཁོད། །ཐོད་དུ་རྡོ་རྗེའི་ཐོད་འཆིང་བ། །ལངས་ནས་ཅོད་པན་རབ་ཏུ་གཡོས། །དཀྱིལ་འཁོར་མཐོན་པོ་ཐམས་ཅད་དུ། །སྐད་བེར་ཆེན་པོས་ཡོངས་བཀང་ནས། །ནོར་བུའི་རྒྱན་ནི་རྣམ་གཡོ་ཞིང ། །ཧ་ཧ་གྲགས་པའི་སྒྲ་སྒྲོགས་ཏེ། །ཀྱེ་མ་སངས་རྒྱས་ཡོན་ཏན་ཆེ། །བསྐལ་པ་གྲངས་མེད་གསུམ་བསགས་པ། །བྱང་ཆུབ་སེམས་སོགས་མཆོག་རྣམས་ཀྱིས། །མཚན་བརྒྱ་རྩ་བརྒྱད་ལེགས་པར་བརྗོད། །ཀྱེ་མ་རྙེད་དང་བདེ་འབྱུང་བ། །མཚན་བརྒྱ་རྩ་བརྒྱད་ཐོས་ནས་ཀྱང ། །གང་ཞིག་ཀློག་ཅིང་རྒྱལ་ལ་བསྟོད། །འབྲས་བུ་ཆེན་པོ་འགྲུབ་པར་འགྱུར། །མཚན་བརྒྱ་རྩ་བརྒྱད་སྔགས་བཅས་པ། །བཅོམ་ལྡན་འདས་དྲུང་བརྗོད་ན་ནི། །སྒྲིབ་དང་ཀུན་ནས་ཉོན་མོངས་དང ། །སྡིག་པ་ཐམས་ཅད་དག་པ་འཐོབ། །མཚན་བརྒྱ་རྩ་བརྒྱད་མཆོག་བཏོན་ན། །སྒྲིབ་པ་ཀུན་ལས་ངེས་གྲོལ་ཞིང ། །ཉོན་མོངས་མཐའ་དག་རྣམ་པར་སྤོང ། །ཤེས་རབ་ཆེན་པོ་ཉིད་དུ་འགྱུར། །དེ་ནི་ལོངས་སྤྱོད་ཆེན་པོ་དང ། །བདེ་བ་ལས་ཀྱང་ཉམས་མི་འགྱུར། །དེ་ནི་ཚེ་རབས་ཐམས་ཅད་དུ། །བློ་ལྡན་ཚེ་རབས་དྲན་པར་འགྱུར། །དེ་ནས་རྡོ་རྗེའི་ཐོད་འཆིང་བ། །ཡོན་ཏན་མཐའ་ཡས་སྲས་དེ་ལ། །བཅོམ་ལྡན་བདུད་ལས་རྒྱལ་བ་ཡིས། །མངོན 106.98b སུམ་གཟིགས་ནས་བཀའ་སྩལ་པ། །རྒྱལ་བའི་ས་འདི་ཞི་བ་སྟེ། །ང་རྒྱལ་ལ་སོགས་ཉོན་མོངས་འཇོམས། །འཇིག་རྟེན་བདེ་བ་ཀུན་ལས་འདས། །དེ་བཞིན་གཤེགས་བདེ་མངོན་དུ་ཕྱོགས། །གཞན་གྱིས་མི་ཚུགས་གཟུངས་དང་ནི། །མཚན་བརྒྱ་རྩ་བརྒྱད་ཉན་བྱེད་པ། །དེ་དག་རྣམ་དག་བདག་ཉིད་དེ། །སེམས་ཅན་ཀུན་ལ་བདེ་འདོད་པ། །ལན་ཅིག་ཐོས་པ་ཙམ་གྱིས་ཀྱང ། །དེ་དག་ས་ཆེན་འབྲས་བུར་གནས། །རིང་པོར་མི་ཐོགས་དགའ་འགྱུར་ན། །འཆང་སོགས་ལྟ་ལ་ཅི་ཞིག་སྨོས། །དེ་ཕྱིར་རྟག་ཏུ་རབ་བསྒྲིམས་ལ། །གཏན་དུ་བདེ་བ་འདོད་པ་ཡིས། །ཡོན་ཏན་རྒྱ་མཚོ་ལྡན་པའི་གཟུངས། །མཉན་པར་བྱ་ཞིང་བཅང་བར་བྱ། །གང་ཞིག་ནང་པར་ལངས་ནས་བརྗོད། །བདག་ཉིད་ཀྱིས་ཀྱང་བཏོན་ན་ནི། །དེ་ཡི་དོན་ཀུན་འགྲུབ་འགྱུར་ལ། །གནོད་པ་དང་ཡང་ཕྲད་མི་འགྱུར། །འདི་ནི་ཡོན་ཏན་ཀུན་གྱི་སྤོས། །དགེ་བ་ཕུན་སུམ་ཚོགས་སྦྱིན་པ། །ཀུན་མཁྱེན་བླ་མེད་འབྲས་བུའི་མཆོག་།བདེ་འབྱུང་ཐོབ་པར་བྱེད་པ་ཡིན། །འབྲས་བུ་འབྱོར་པ་ཅི་ཡང་རུང ། །ཐོབ་པར་མི་འགྱུར་དོགས་པ་མེད། །ཀུན་མཁྱེན་གོ་འཕང་ཐོབ་གྱུར་ནས། །དཔེ་མེད་གནས་སུ་འགྲོ་བར་འགྱུར། །དེ་ནི་དགེ་ཞིང་འབྲས་བུར་ལྡན། །སངས་རྒྱས་ས་ཡི་འབྲས་བུ་སྦྱིན། །ཡིད་དུ་འོང་ཞིང་ཡོན་ཏན་ལྡན། །སྙིང་རྗེ་དྲི་མ་མེད་སྦྱིན་པ། །འདི་ནི་མཉམ་པ་ཉིད་ཀྱི་མདོ། །འཇིག་རྟེན་ཀུན་ནས་དགའ་བ་སྟེ། །འཇིག་རྟེན་ཀུན་གྱི་བདེ་འབྱུང་བ། །འདི་དང་འདྲ་བ་གང་ཡང་མེད། །སྟོན་པ་སངས་རྒྱས་བཅོམ་ལྡན་འདས་ཀྱི་མཚན་བརྒྱ་རྩ་བརྒྱད་པ་གཟུངས་སྔགས་དང་བཅས་པ། རྫོགས་སོ།། |