rKTs


J863

(e-text produced by ADARSHA)

see text in transliteration
107.1a
(ཡ)་༄#། !་།གསང་སྔགས་རྒྱུད་འབུམ་གྱི་སྐོར་བཞུགས་སོ། །[(黃)་秘密經第二十四部]
107.1b
༄##། ་།རྒྱ་གར་སྐད་དུ། ཨཱརྱ་མ་ཧཱ་བཛྲ་མེ་རུ་ཤི་ཁ་ར་ཀཱུ་ཊཱ་གཱ་ར་དྷཱ་ར་ཎཱི། བོད་སྐད་དུ། འཕགས་པ་རྡོ་རྗེ་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྡོ་རྗེའི་ལྷུན་པོ་ཆེན་པོའི་རྩེ་མོའི་ཁང་པ་བརྩེགས་པ་རྡོ་རྗེ་ཆེན་པོའི་ཏིང་ངེ་འཛིན་གྱི་སའི་གནས། རྡོ་རྗེ་ཆེན་པོའི་དཔག་བསམ་གྱི་ཤིང་ལྗོན་པས་ལེགས་པར་བརྒྱན་པ། རྡོ་རྗེ་ཆེན་པོའི་རྫིང་གི་རིན་པོ་ཆེའི་པད་མོའི་འོད་ཀྱིས་སྣང་བར་བྱས་པ། །ས་ཕྱོགས་རྡོ་རྗེ་ཆེན་པོའི་བྱེ་མ་བདལ་བ། རྡོ་རྗེ་ཆེན་པོར་བྱིན་གྱིས་བརླབས་པ། འཁོར་གྱི་ཁྱམས་རྡོ་རྗེ་ཆེན་པོ་ལས་བྱས་པ། ལྷའི་དབང་པོ་བརྒྱ་བྱིན་གྱི་རྡོ་རྗེ་ཆེན་པོའི་སེང་གེའི་ཁྲི་བྱེ་བ་ཁྲག་ཁྲིག་འབུམ་ཕྲག་སྟོང་གིས་རྣམ་པར་མཛེས་པ། ཆོས་བསྟན
107.2a
པ་དང་ཆོ་འཕྲུལ་ཅན། སངས་རྒྱས་ཐམས་ཅད་ཀྱི་བྱིན་གྱི་བརླབས་ཀྱིས་བྱིན་གྱིས་བརླབས་པ། ཆོས་ཐམས་ཅད་ཀྱི་མཉམ་པ་ཉིད་ལ་འཇུག་པ། ཐམས་ཅད་མཁྱེན་པ་ཉིད་ཀྱིས་ངེས་པར་འབྱུང་བ་ན། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་བརྒྱད་བཅུ་རྩ་བཞི་ཐམས་ཅད་ཀྱང་སྐྱེ་བ་གཅིག་གིས་ཐོགས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ། མཐུ་ཆེན་པོ་ཐོབ་པ། རྡོ་རྗེ་ཆེན་པོའི་རྣམ་པར་ཐར་པའི་ཏིང་ངེ་འཛིན་གྱིས་སངས་རྒྱས་ཀྱི་ཞིང་དུ་རྣམ་པར་འཕྲུལ་པ། ཆོ་འཕྲུལ་ཆེན་པོ་ཀུན་ཏུ་སྟོན་པ། སེམས་ཀྱི་སྐད་ཅིག་ཐང་ཅིག་ཡུད་ཙམ་གཅིག་ལ་སེམས་ཅན་ཐམས་ཅད་ཀྱི་སེམས་དང ། སྤྱོད་པའི་རྗེས་སུ་འཇུག་པའི་ཆོས་བསྟན་པ་སྣ་ཚོགས་མཉམ་པ་ཉིད་སྙན་ཅིང་རྒྱ་ཆེ་ལ་ཟབ་པ་དང ། སྤོབས་པ་དང ། ཆོ་འཕྲུལ་དང་ལྡན་པ། སངས་རྒྱས་ཀྱི་ཞིང་དུ་མར་དེ་བཞིན་གཤེགས་པ་ལ་མཆོད་པ་ཆེན་པོའི་སྤྲིན་གྱིས་མཆོད་པ་དང ། རྣམ་པར་ཐར་པའི་སྒོ་དང་གཟུངས་དང ། ཏིང་ངེ་འཛིན་དང་དབང་དང ། མངོན་པར་ཤེས་པ་དང་མ་འདྲེས་པ་དང ། བྱང་ཆུབ་ཀྱི་ཡན་ལག་དང ། ལམ་དང་ས་བཅུ་དང ། ཕ་རོལ་དུ་ཕྱིན་པ་དང ། ཐབས་ལ་མཁས་པ་དང ། བསྡུ་བའི་དངོས་པོ་དང ། བྱམས་པ་དང་སྙིང་རྗེ་དང ། དགའ་བ་དང་བཏང་སྙོམས་དང ། བྱམས་པའི་སྟོབས་དང་དབེན་པ་དང ། ཡོངས་སུ་བྱང་བའི་སེམས་ཀྱི་རྒྱུན་དང་ལྡན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོ་ཞེས་བྱ་བ་དང ། རྡོ་རྗེ་མིག་དང་རྡོ་རྗེའི་ལུས་དང ། རྡོ་རྗེའི་བློ་གྲོས་དང་ལག་ན་རྡོ་རྗེ་དང ། རྡོ་རྗེ་འདུས་པ་དང་རྡོ་རྗེ་མཐུ་བོ་ཆེ་དང ། རྡོ་རྗེ་རྣམ་པར་འཕྲུལ་པ་དང ། རྡོ་རྗེ་བརྩེགས་པ་དང་རྡོ་རྗེའི་ཕུང་པོ་དང ། རྡོ་རྗེའི་ང་རོ་དང་རྡོ་རྗེ་བཟང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་ཏོག་ཅེས་བྱ་བ་དང ། དེ་དག་ལ་སོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་འབུམ་ཕྲག་བརྒྱད་བཅུ་རྩ་བཞི་དང ། ཉན་ཐོས་ཆེན་པོ་རབ་ཏུ་མང་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། སྲིད་པར་ཀུན་ཏུ་སྦྱོར་བ་ཆད་པ།
107.2b
ཡང་དག་པའི་ཤེས་པས་སེམས་ཤིན་དུ་རྣམ་པར་གྲོལ་བ། རྫུ་འཕྲུལ་གྱི་སྟོབས་དང ། ཆོ་འཕྲུལ་བསམ་གྱིས་མི་ཁྱབ་པས་རྣམ་པར་འཕྲུལ་པའི་མཐུ་ཆེན་པོ་ཐོབ་པ། ལྟ་བ་ཆགས་པ་མེད་པ། ཐམས་ཅད་ཀྱང་དྲི་མ་དང་བྲལ་བ། ཀུན་ནས་ཉོན་མོངས་པའི་བག་ཆགས་ཀྱི་ས་བོན་ངེས་པར་སྲེགས་པ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་ཤ་ར་དྭ་ཏིའི་བུ་དང ། ཚེ་དང་ལྡན་པ་བྱམས་མའི་བུ་གང་པོ་དང ། ཚེ་དང་ལྡན་པ་ཀ་པི་ན་དང ། ཚེ་དང་ལྡན་པ་རབ་འབྱོར་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་དང ། ཚེ་དང་ལྡན་པ་སྐུལ་བྱེད་དང ། ཚེ་དང་ལྡན་པ་དགའ་བྱེད་དང ། ཚེ་དང་ལྡན་པ་ག་ཡ་འོད་སྲུང་དང ། ཚེ་དང་ལྡན་པ་འོད་སྲུང་ཆེན་པོ་དང ། ཚེ་དང་ལྡན་པ་ལྟེང་རྒྱས་འོད་སྲུང་དང ། དེ་དག་ལ་སོགས་པ་ཉན་ཐོས་ཆེན་པོ་རབ་ཏུ་མང་པོ་དང ། ལྷའི་བུ་དབང་ཕྱུག་ཆེན་པོ་ལ་སོགས་པ་གནས་གཙང་མའི་རིས་ཀྱི་ལྷའི་བུ་གྲངས་མེད་དཔག་ཏུ་མེད་གཞལ་དུ་མེད་པ་དག་དང ། མི་མཇེད་ཀྱི་བདག་པོ་ཚངས་པ་དང ། ལྷའི་བུ་ཚངས་པ་བཟང་པོ་ལ་སོགས་པ་ཚངས་རིས་ཀྱི་ལྷའི་བུ་རྣམས་དང ། ལྷའི་བུ་རབ་འཐབ་བྲལ་གཡོག་འཐབ་བྲལ་གྱི་ལྷའི་རིས་ཀྱི་ལྷའི་བུ་དང་བཅས་པ་དང ། ཡོངས་སུ་དགའ་ལྡན་དང ། འཕྲུལ་དགའ་དང་གཞན་འཕྲུལ་དབང་བྱེད་དང ། ལྷའི་དབང་པོ་བརྒྱ་བྱིན་ལྷའི་བུ་ཐམས་ཅད་ཀྱི་འཁོར་ཅན་དང ། ལྷ་མ་ཡིན་གྱི་དབང་པོ་ཐགས་ཟངས་རིས་དང ། སྟོབས་ཅན་དང་རབ་སིམ་དང ། སྒྲ་གཅན་དང་རྣམ་པར་སྣང་བྱེད་དང ། དེ་དག་ལ་སོགས་པ་ལྷ་མ་ཡིན་གྱི་དབང་པོ་ཚད་མེད། གྲངས་མེད་དཔག་ཏུ་མེད་པ་རྣམས་དང ། ཀླུའི་རྒྱལ་པོ་རྒྱ་མཚོ་དང ། མ་དྲོས་པ་དང ། འཇོག་པོ་དང ། ནོར་རྒྱས་ཀྱི་བུ་དང ། དུང་སྐྱོང་དང་སྟོབས་ཀྱི་རྒྱུ་དང ། པདྨ་དང་པདྨ་ཆེན་པོ་དང ། མཐའ་ཡས་དང ། དེ་དག་ལ་སོགས་པ་ཀླུའི་རྒྱལ་པོ་ཚད་མེད་གྲངས་མེད་དཔག་ཏུ་མེད་པ་དག་དང ། མི་འམ་ཅིའི་རྒྱལ་པོ་ལྗོན་པ། མི་འམ་ཅིའི་རྒྱལ་པོའི་གཡོག་དུ་མ་ཅན་དང ། དྲི་ཟའི་རྒྱལ་པོ་གཙུག་ཕུད་ལྔ་པ་དྲི་ཟའི་རྒྱལ་པོའི་གཡོག་དུ་མ་ཅན་དང ། རིག་སྔགས་འཆང་གི་རྒྱལ་པོ་དོན་ཐམས་ཅད་གྲུབ་པ
107.3a
རིག་སྔགས་འཆང་གི་རྒྱལ་པོའི་གཡོག་དུ་མ་ཅན་དང ། ནམ་མཁའ་ལྡིང་གི་རྒྱལ་པོ་གསེར་མིག་ནམཁའ་ལྡིང་གི་རྒྱལ་པོའི་གཡོག་དུ་མ་ཅན་དང ། གནོད་སྦྱིན་གྱི་རྒྱལ་པོ་ཆེན་པོ་རྣམ་ཐོས་ཀྱི་བུ་དང ། ནོར་བུ་བཟང་དང་གང་བ་བཟང་དང ། གནོད་སྦྱིན་གྱི་རྒྱལ་པོ་ལྔས་རྩེན་གནོད་སྦྱིན་གྱི་རྒྱལ་པོ་གཡོག་དུ་མ་ཅན་དང ། འཕྲོག་མ་བུ་ལྔ་བརྒྱའི་གཡོག་ཅན་དང ། འཇིག་རྟེན་གྱི་མ་བདུན་དང ། སྲིང་མོ་བདུན་དང ། དྲང་སྲོང་ཆེན་པོ་བདུན་དང ། བར་སྣང་ལ་རྒྱུ་བའི་རྒྱུ་སྐར་དང ། གཟའི་ལྷ་ཐམས་ཅད་དང ། ཕྱོགས་ཀྱི་ལྷ་རྣམས་དང ། ཕྱོགས་མཚམས་ཀྱི་ལྷ་རྣམས་དང ། སའི་ལྷ་དང་དབྱངས་ཅན་དང ། འབྱུང་པོ་རྣམས་དང ། བགེགས་རྣམས་དང་ལོག་འདྲེན་རྣམས་དང ། ཡི་དགས་རྣམས་དང ། འབྱུང་པོ་རྫུ་འཕྲུལ་ཆེན་པོ་རྣམས་དང ། རིའི་རྒྱལ་པོ་ཐམས་ཅད་དང ། འཇིག་རྟེན་སྐྱོང་བ་ཆུ་ལྷ་གཡོག་རྒྱ་མཚོའི་ལྷ་ཐམས་ཅད་དང་བཅས་པ་དང ། འཕགས་སྐྱེས་པོ་དང ། མིག་མི་བཟང་དང ། ལག་ན་བེ་ཅོན་དང ། བདེན་བྲལ་དང ། མེའི་ལྷ་དང ། རླུང་གི་ལྷ་ཆེན་པོ་བདུན་དང ། དབང་བདག་ཆུང་མ་དང་བཅས་པའི་ཚོགས་བྱེ་བ་ཁྲག་ཁྲིག་འབུམ་ཕྲག་དུ་མའི་འཁོར་ཅན་དང ། སྲེད་མེད་ཀྱི་བུ་གཡོག་དང་བཅས་པ་དང ། བྱིན་པ་པོ་དང ། ཕྲེང་བ་ཅན་དང ། ལྕགས་ཅན་དང ། ཚོགས་ཀྱི་བདག་པོ་ཆེན་པོ་དང ། སྤྲིན་ཏ་ལ་ལ་དང་ལོག་འདྲེན་གྱི་དབང་པོ་བགེགས་ལོག་འདྲེན་གྱི་གཡོག་དུ་མ་ཅན་དང ། ཤིང་གསེབ་ཀྱི་ལྷ་དྲུག་བཅུ་དང ། སྲིང་མོ་བཞི་མིང་པོ་དང་བཅས་པ་དང ། མ་བདུན་དང་རྡོ་རྗེ་ལྕགས་ཀྱུ་ཅན་དང ། རྡོ་རྗེ་ལུ་གུ་རྒྱུད་དང ། རྡོ་རྗེ་ཕོ་ཉ་མོ་དྲུག་བཅུ་རྩ་བཞི་དང ། རྡོ་རྗེའི་སྡེ་དང ། ལག་བཟངས་དང་གཙུག་གིས་འགྲོ་རྡོ་རྗེའི་རིགས་ཀྱི་འཁོར་དུ་མ་དང་བཅས་པ་དང ། དེ་མ་ཡིན་པ་གཞན་ཡང་སངས་རྒྱས་དང ། ཆོས་དང ། དགེ་འདུན་ལ་མངོན་པར་དད་པའི་ལྷ་དང་ཀླུ་དང ། གནོད་སྦྱིན་དང ། དྲི་ཟ་དང་ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང་ལྟོ་འཕྱེ་ཆེན་པོ་དང ། འབྱུང་པོ་དང་ཡི་དགས་དང ། ཤ་ཟ་དང་སྨྱོ་བྱེད་དང ། རྗེད་བྱེད་དང་སྒྲུབ་པ་དང ། སྦྲུལ་འཛིན་བཅས་དང་གནོན་པོ
107.3b
ཚད་མེད་དཔག་ཏུ་མེད་གྲངས་མེད་པ་རྣམས་དང ། ལྷའི་བུ་ཉི་མ་དང ། ལྷའི་བུ་ཟླ་བ་དང ། དུས་ཚིགས་ཀྱི་ལྷ་དང ། ནུབ་ཀའི་ལྷ་དང ། དུས་ཀྱི་ལྷ་ཐམས་ཅད་དང ། གནམ་སའི་ལྷ་རྣམས་དང་ཡང་ཐབས་གཅིག་གོ་།དེ་ལྟར་ཡང་བཅོམ་ལྡན་འདས་དེ་ཆོས་ཀྱི་འཁོར་ལོ་ནི་ཤིན་ཏུ་བསྐོར་སངས་རྒྱས་ཀྱི་མཛད་པ་ནི་ཤིན་ཏུ་ཡོངས་སུ་མཐར་ཕྱིན། བསོད་ནམས་དང་ཡེ་ཤེས་ཀྱི་ཚོགས་ནི་ཤིན་ཏུ་ཡོངས་སུ་རྫོགས་ཐམས་ཅད་མཁྱེན་པ་ཉིད་དང ། བྱང་ཆུབ་ཆེན་པོ་དང ། ཕ་རོལ་ཏུ་ཕྱིན་པ་དང ། ས་བརྙེས་པས་ནི་ཤིན་དུ་ཡོངས་སུ་གཟུངས་སྐྱེས་བུ་ཆེན་པོའི་མཚན་འབར་བ་སུམ་བཅུ་རྩ་གཉིས་ཀྱིས་ནི་སྐུ་བརྒྱན། དཔེ་བྱད་བཟང་པོ་བརྒྱད་བཅུས་ནི་ཡན་ལག་དང ། ཉིང་ལག་ཐམས་ཅད་རྣམ་པར་སྤྲས། སྤྱི་གཙུག་ནི་སེམས་ཅན་ཐམས་ཅད་ཀྱིས་བལྟར་མི་མཐོང ། བདུད་ཀྱི་ཚེར་མ་ཐམས་ཅད་ནི་དཀྲུགས། དེ་ཁོ་ན་ཉིད་མཁྱེན་པ་ཉིད་ནི་རིམ་པར་ཐུགས་སུ་ཆུད། སྤྱན་རྣམ་ལྔ་ནི་མངའ། རྣམ་པ་ཐམས་ཅད་ཀྱི་མཆོག་དང་ནི་ལྡན། ཐམས་ཅད་མཁྱེན་པའི་ཡེ་ཤེས་དང་ནི་ལྡན། སངས་རྒྱས་ཀྱི་ཆོས་ཐམས་ཅད་དང་ནི་ལྡན། བདུད་དང་ཕས་ཀྱིས་རྒོལ་བ་དང ། ངན་པའི་ཚོགས་ཅན་གྱི་ཚོགས་ཐམས་ཅད་ནི་བཅོམ། བརྗོད་པའི་སྒྲ་དང་ཚིགས་སུ་བཅད་པ་ནི་འཕགས། ཁྱུ་མཆོག་དང་སེང་གེའི་སྒྲ་ནི་སྒྲོགས། མ་རིག་པའི་མུན་པ་ནི་ཀུན་ཏུ་བསལ། བསྐལ་པ་བྱེ་བ་ཁྲག་ཁྲིག་འབུམ་ཕྲག་གྲངས་མེད་དཔག་ཏུ་མེད་པར་སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཐབས་དང་སྟོབས་དང ། སྨོན་ལམ་དང་ཡེ་ཤེས་ཀྱི་ཕ་རོལ་ཏུ་ཕྱིན་པ་དང ། དཀའ་བ་སྤྱད་པས་མངོན་པར་གྲུབ་པའི་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང ། དཔེ་བྱད་བཟང་པོ་བརྒྱད་བཅུས་སྐུ་བརྒྱན་པས་ནི་མཛེས་ཤིང་རིན་པོ་ཆེ་རྡོ་རྗེའི་པདྨའི་སྙིང་པོའི་སེང་གེའི་ཁྲི་ལ་ནི་བཞུགས་ཏེ། གདན་རིན་པོ་ཆེ་དང ། རྡོ་རྗེའི་པདྨའི་སེང་གེའི་ཁྲི་རི་རབ་ཙམ་རྡོ་རྗེ་དང ། རིན་པོ་ཆེ་དང ། མུ་ཏིག་དང་ལྡན་པའི་དྲིལ་བུ་གཡེར་ཀའི་དྲ་བ་དུ་མ་སིལ་སིལ་སྒྲ་འབྱུང་བ། རྡོ་རྗེ་དང་རིན་པོ་ཆེ་དུ་མའི་སྟེགས་བུ་ལ་རྩ་བ་ལེགས་པར་བརྟེན་པ། རྡོ་རྗེ་དང་རིན་པོ་ཆེ་དུ་མའི
107.4a
ཆུ་སྲིན་གྱི་ཁ་ནས་བྱུང་བའི་མུ་ཏིག་དམར་པོའི་ཕྲེང་བ་དང་ལྡན་པའི་སྣམ་རྟེན་དང་བཅས་པ། རིན་པོ་ཆེ་དུ་མའི་པདྨའི་སྙིང་པོ་ལ་ཆགས་པའི་རིན་པོ་ཆེ་ཀེ་ཀེ་རུ་དང ། ཀེ་ཀེ་རུ་ཆེན་པོ་དང ། ན་ད་རྙིལ་དང ། མཐོན་ཀ་ཆེན་པོ་དང ། དུན་ལས་དུ་མའི་འོད་ཟེར་འབར་བས་སྣང་བར་གྱུར་པས་ཀུན་ཏུ་མཛེས་པ། རིན་པོ་ཆེ་དང ། རྡོ་རྗེའི་ཐུར་མས་བརྒྱན་པའི་གདུགས་ཡུ་བས་བསྟོད་པ་བྱེ་བ་ཁྲག་ཁྲིག་འབུམ་ཕྲག་དུ་མས་གྲིབ་མར་བསྒྲིབས་ཤིང་བསྐྱབས་པ། དཔག་བསམ་གྱི་ཤིང་དུ་མས་མཛེས་པར་བྱས་པ་རྒྱ་ཆེ་བ་ལ་བཞུགས་ཏེ། གསེར་གྱི་རི་བོ་ལྟར་དཔལ་གྱིས་འབར་བ། ཉི་མ་སྟོང་བས་ལྷག་པའི་འོད་ཀྱི་དཀྱིལ་འཁོར་འབྱོར་པས་ས་ཕྱོགས་མཛེས་པར་གྱུར་པ། ཟླ་བ་ཉ་བ་ལྟར་འཇིག་རྟེན་ཀུན་གྱིས་མཐོང་ན་དགའ་བ། དཔག་བསམ་གྱི་ཤིང་ལྗོན་པ་ཆེན་པོ་ལྟར་སངས་རྒྱས་ཀྱི་ཆོས་རྣམས་ཀྱིས་ཡང་དག་པར་རྒྱས་པར་ཆོས་སྟོན་ཏེ། ཚངས་པར་སྤྱོད་པ་ཐོག་མར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་མ་འདྲེས་པ་ཡོངས་སུ་རྫོགས་པ་ཡོངས་སུ་དག་པ་ཡོངས་སུ་དཀར་བ་ཡང་དག་པར་སྟོན་ཏོ། །དེ་ནས་བཅོམ་ལྡན་འདས་ཀྱི་སྤྱི་གཙུག་གི་མཚམས་ཀྱི་མཛོད་སྤུ་ནས་སངས་རྒྱས་ཀྱི་ཞིང་ཐམས་ཅད་ཀུན་ཏུ་སྟོན་པ་ཞེས་བྱ་བའི་འོད་ཟེར་གྱི་དྲ་བ་ཆེན་པོ་བྱུང་སྟེ། འོད་ཟེར་གྱི་དྲ་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བས་གསལ་བར་བྱས་པར་གྱུར་ཏོ། །གང་གཱའི་ཀླུང་གི་བྱེ་མ་ཇི་སྙེད་པ་དང་མཉམ་པའི་སངས་རྒྱས་ཀྱི་ཞིང་དེ་དག་ཐམས་ཅད་ཀྱང་སྣང་བ་དེས་གསལ་བར་སྣང་བར་གྱུར་ཏོ། །སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཀྱང་སེང་གེའི་ཁྲི་དུ་མ་བཀོད་པའི་ཁང་པ་བརྩེགས་པའི་གཞལ་མེད་ཁང་རྣམས་ན་ཆོས་སྟོན་ཏོ། །ཉན་ཐོས་ཆེན་པོ་དེ་དག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དག་དང་ཐབས་གཅིག་གོ་།དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། ལྷ་དང ། ཀླུ་དང་གནོད་སྦྱིན་དང ། དྲི་ཟ་དང་ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་རྣམས་དང་ཡང་ཐབས་གཅིག་གོ་།དེ་དག་ཐམས་ཅད་ཀྱང་རྡོ་རྗེ་ལྷུན་པོ་ཆེན་པོའི་རྩེ་མོ་ཁང་པ་བརྩེགས་པའི་གཟུངས་ཡང་དག་པར་རབ་ཏུ་སྟོན་ཏོ། །དེ་དག་ཐམས་ཅད་ཀྱང་ཀུན་ཏུ་སྣང་ངོ ། །སྐད་ཅིག་དེ་ལ་སེམས་ཅན་དེ་དག་ཐམས་ཅད་བདེ་བ་ཐམས་ཅད
107.4b
ཀྱིས་ཚིམ་པར་གྱུར་ཏོ། །འོན་པ་རྣམས་ནི་སྒྲ་ཐོས་སོ། །ལོང་བ་རྣམས་ནི་མིག་ཐོབ་བོ། །སྨྱོན་པ་རྣམས་ནི་དྲན་པ་རྙེད་དོ། །ནད་པ་རྣམས་ནི་སོས་པར་གྱུར་ཏོ། །སྦྲུམ་མ་རྣམས་ནི་བདེ་བར་བཙས་སོ། །སེམས་ཅན་དམྱལ་བ་ཐམས་ཅད་ཀྱི་སྡུག་བསྔལ་རྣམས་ནི་མེད་པར་གྱུར་ཏོ། །ཡུད་ཙམ་དེ་ལ་དུད་འགྲོའི་སྐྱེ་གནས་དང ། ཡི་དགས་ཀྱི་སྐྱེ་གནས་དང ། གཤིན་རྗེའི་འཇིག་རྟེན་རྣམས་ཀྱི་མིང་ཡང་མི་གྲགས་པར་གྱུར་ཏོ། །འཇིག་རྟེན་གྱི་བར་གང་དག་མུན་པ་མུན་ནག་དང ། མུན་པ་མུན་ནག་ཆེན་པོར་འདུག་པ་དེ་དག་ཐམས་ཅད་ཀྱང་གསལ་བར་སྣང་བར་གྱུར་ཏོ། །དེར་སེམས་ཅན་གང་དག་སྐྱེས་པ་དེ་དག་ཐམས་ཅད་དང ། སེམས་ཅན་གཞན་འདིར་སྐྱེས་པ་རྣམས་ཀྱང་གཅིག་གིས་གཅིག་ཤེས་སོ། །དེ་ནས་སེམས་ཅན་དེ་དག་ཐམས་ཅད་ཀྱིས་ངོ་མཚར་རྨད་དུ་བྱུང་བའི་ཆོས་ཀྱི་དགའ་བ་ཐོབ་སྟེ། བདེ་བ་མཆོག་གིས་ཚིམ་པར་གྱུར་ནས་ཀུན་ཏུ་བལྟས་པ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་སྟེ། དེ་དག་གིས་གསེར་གྱི་མཆོད་སྡོང་ལྟར་དཔལ་གྱིས་འབར་ཞིང་རང་གི་གཟི་བརྗིད་ཀྱིས་མངོན་པར་འཕགས་པ་དེ་མཐོང་ནས་དེ་ཉིད་ལ་སྐྱབས་སུ་དོང་ངོ ། །སྐྱབས་སུ་དོང་མ་ཐག་ཏུ་དེ་དག་ཐམས་ཅད་དེ་བཞིན་གཤེགས་པའི་འཁོར་གྱི་དཀྱིལ་འཁོར་དེ་ཉིད་དུ་བདག་སོན་པ་སྙམ་དུ་ཤེས་སོ། །སྣང་བ་དེས་བདུད་ཀྱི་ཁྱིམ་ཐམས་ཅད་ཀུན་ཏུ་འབར་རབ་ཏུ་འབར་ཀུན་ཏུ་རབ་ཏུ་མཆེད་ཅིང་འབར་ཏེ། མེ་ལྕེ་གཅིག་ཏུ་གྱུར་པར་ཀུན་ཏུ་སྣང་ངོ ། །བདུད་ཀྱི་རིས་ཀྱི་ལྷ་དེ་དག་ཀྱང་སྐད་ཅིག་དེ་ལ་ཉམ་ཐག་པའི་སྒྲར་ངུ་ཞིང་སྐྲག་ནས་བྱེར་རོ། །བདུད་སྡིག་ཅན་ཡང་བཞིན་བཟང་པོ་རྙི་རྙི་པོར་གྱུར་ཅིང་ལུས་རྔུལ་ནས་བདུད་ཀྱི་རིས་ཀྱི་ལྷའི་བུ་ཐམས་ཅད་ལ་སྨྲས་པ། གྲོགས་པོ་དག་བདུད་ཀྱི་ཁྱིམ་ཐམས་ཅད་ཀུན་ཏུ་འབར། རབ་ཏུ་འབར་ཀུན་ཏུ་རབ་ཏུ་མཆེད་ཅིང་འབར་ཏེ་མེ་ལྕེ་གཅིག་ཏུ་གྱུར་པ་དང ། དགེ་སྦྱོང་གཽ་ཏ་མ་རི་རབ་ཀྱི་རྩེ་མོའི་ཁང་པ་བརྩེགས་པ་ན་ཆོས་སྟོན་པ་འདི་ལ་ལྟོས། དེས་བདག་ཅག་ཕུང་ངོ་མཐོ་བརྩམས་སོ། །ཕྱོགས་གང་དུ་གནས་གཏོལ་མེད་དོ། །ལོངས་ལ་དགེ་སྦྱོང་གཽ་ཏ་མ་དེའི་གན་དུ་སོང་སྟེ་བདུད་ཀྱི་ཡུལ་འདི་ཐལ་བར་མ་གྱུར་གྱི་བར་དུ་གཞོམ་མོ། །དེ་སྐད་ཅེས་སྨྲས་པ་དང ། བདུད་ཀྱི་རིས་ཀྱི་ལྷའི་བུ་དེ་དག་ཐམས་ཅད་ཀྱིས་རྗེ་བཀའ་བཞིན་འཚལ་ཞེས་སྨྲས་ནས། རང་རང་གི་གནས་སུ་དོང་སྟེ། ལག་ན་མཚོན་ཆ་སྣ་ཚོགས་ཅན་གོས་སྣ་ཚོགས་དགོས་པ་ཆ་བྱད་དང་རྒྱན་སྣ་ཚོགས་ཅན་མཆེ་བ་མི་བཟད་པར་འཇིགས
107.5a
སུ་རུང་བ་བཞིན་མི་སྡུག་པར་བསྒྱུར་བ་མིག་དང་བཞིན་དང་སྐྲ་ཀུན་ཏུ་འབར་ཞིང་རབ་ཏུ་འབར་བ་དག་སྐད་ཅིག་དེ་ཉིད་ལ་གཅིག་ཏུ་འདུས་ནས་བདུད་སྡིག་ཅན་ག་ལ་བ་དེར་དོང་སྟེ་ཕྱིན་ནས་བདུད་སྡིག་ཅན་ལ་འདི་སྐད་ཅེས་སྨྲས་སོ། །བཞེངས་བཞེངས་ཐོག་མར་བཞུད་ལ་ཇི་ཙམ་དུ་དགེ་སྦྱོང་གཽ་ཏ་མ་ཉན་ཐོས་དང ། བྱང་ཆུབ་སེམས་དཔའི་དགེ་འདུན་དང་བཅས་པ་དེ་ཅི་ནས་ཀྱང་ཕྱིས་བདག་ཅག་གི་ཡུལ་དུ་གནོད་པ་ཅུང་ཟད་ཀྱང་མི་བསྐྱེད་པ་དང ། བདག་ཅག་གི་ཡུལ་གནོད་པར་མི་འགྱུར་བ་དེང་ཉིད་དུ་ཕྱེ་མར་བརླག་གོ་།རྣམ་པར་གཞོམ་མོ། །དེ་ནས་བདུད་སྡིག་ཅན་དགའ་ཞིང་མགུ་སྟེ། ཤིན་ཏུ་དགའ་བས་སྤུའི་ཁུང་བུ་ཁྱབ་ནས་སྐད་ཅིག་དེ་ཉིད་ལ་བདུད་ཀྱི་རིས་ཀྱི་ལྷའི་བུ་ཐམས་ཅད་དང་ལྷན་ཅིག་ཏུ་བདུད་ཀྱི་རྣམ་པར་འཕྲུལ་པ་ཆེན་པོ་དང་བདུད་ཀྱི་སྡེ་ཆེན་པོས་བར་སྣང་དཔག་ཚད་སྟོང་ཕྲག་བརྒྱད་བཅུ་རྩ་བཞིར་ཁྱབ་པར་བྱས་ཏེ་དུང་དང་རྔ་དང་རྫ་རྔ་དང་འཁར་རྔ་དང་རྒྱུད་གཅིག་པ་དང ། ལྕགས་ཀྱི་སིལ་དཀྲོལ་དང ། རྔ་བོ་ཆེ་བརྡུང་ཞིང་ཧུ་དུ་ཞེས་བྱ་བ་དང ། བི་ཙི་ཞེས་བྱ་བ་དང ། ཟུང་ཤིག་ཟུང་ཤིག་།སོད་ཅིག་སོད་ཅིག་ཅེས་བྱ་བའི་སྒྲ་འབྱིན་ཅིང་གཞོལ་དང ། གཏུན་ཤིང་དང་གཏུན་རྐེད་ཉག་དང ། ཕུར་བུ་དང ། རྡོ་རྗེ་རྩེ་གཅིག་པ་དང ། མདའ་བོ་ཆེ་དང ། མདུང་ཐུང་དང ། རྩེ་གསུམ་པ་དང ། རལ་གྲི་དང་འཁོར་ལོ་དང ། གཞུ་དང་མདའ་ལ་སོགས་པའི་མཚོན་ཆ་ལག་ན་ཐོགས་ཤིང་བཅོམ་ལྡན་འདས་ག་ལ་བ་དེར་སོང་སྟེ་སྐད་ཅིག་དེ་ཉིད་ལ་ཨ་ལ་ལ་ཞེས་བྱ་བའི་སྒྲ་ཕྱུང་ནས་བཅོམ་ལྡན་འདས་ལ་མཚོན་ཆ་ཐམས་ཅད་ཀྱི་ཆར་ཕབ་པ་དང ། སངས་རྒྱས་ཀྱི་མཐུས་མཚོན་ཆ་དེ་དག་ཐམས་ཅད་མེ་ཏོག་གི་གདུགས་ཀྱི་སྤྲིན་ཆེན་པོར་གྱུར་པར་སྣང་ངོ ། །བདུད་ཀྱི་སྒྲ་དེ་དག་ཐམས་ཅད་ཀྱང་སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང་དགེ་འདུན་གྱི་སྒྲ་དང ། ཡང་དག་པར་འགྲོ་བའི་སྒྲ་རྣམས་སུ་གྲག་གོ་།བདུད་སྡིག་ཅན་ནི་ཞགས་པ་ལྔའི་བཅིངས་པས་བདག་ཉིད་བཅིངས་པར་མཐོང་ངོ ། །དེ་ནས་བདུད་ཀྱི་རིས་ཀྱི་ལྷའི་བུ་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་ངོ་མཚར་དུ་གྱུར་ཅིང་དགའ་བ་ཐོབ་སྟེ་བཅོམ་ལྡན་འདས་དེ་ཉིད་ལ་སྐྱབས་སུ་དོང་ངོ ། །བདུད་སྡིག་ཅན་ནི་བདག་ཉིད་དགྲོལ་བར་འདོད་ན་འགྲོལ་མ་ནུས་ཏེ། དེ་བཞིན་གཤེགས་པའི་འཁོར་གྱི་ཁྱམས་སུ་བཅོམ་ལྡན་འདས་ཀྱི་སྤྱན་སྔར་ཤིང་རྩ་བ་ནས་བཅད་པ་བཞིན་དུ་རྡོ་རྗེའི་ཁམས་གྱི
107.5b
ཁྱམས་ཆེན་པོར་འགྱེལ་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་བྱམས་པ་ཆེན་པོའི་ཐུགས་དང་ཐུགས་རྗེ་ཆེན་པོས་བརླན་པའི་སྤྱན་གྱིས་དེ་བཞིན་གཤེགས་པའི་འཁོར་གྱི་ཁྱམས་ཐམས་ཅད་དུ་གཟིགས་ནས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ་བདུད་སྡིག་ཅན་འཁོར་གྱི་ཁྱམས་འདི་ནས་སློང་ལ་སྟན་ལ་ཞོག་སྟེ། རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་གྱི་རྣམ་པར་འཕྲུལ་པའི་བྱིན་གྱི་རླབས་བསམ་གྱིས་མི་ཁྱབ་པ་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་གང་གིས། བདུད་ཀྱི་རིས་ཀྱི་ལྷའི་བུ་འདི་དག་དང ། བདུད་སྡིག་ཅན་འདི་སངས་རྒྱས་ལ་སྐྱབས་སུ་འདོང་བ་དང ། གཞན་ཡང་གང་དག་སྡང་བ་བགེགས་དང ། ལོག་འདྲེན་དང་ཡི་དགས་དང ། རྗེད་བྱེད་དང་འབྱུང་པོ་དང ། གདོན་དང་མཁའ་འགྲོ་མ་དང ། སྒྲུབ་པ་དང་སྦྲུལ་འཛིན་བཅས་དང ། གནོན་པོ་དང་ཟས་སུ་བཙས་པ་ཟ་བ་ལ་སོགས་པ་སྡང་བའི་སེམས་དང་ལྡན་པ། རབ་ཏུ་སྡང་བའི་སེམས་དང་ལྡན་པ། དེ་བཞིན་གཤེགས་པའི་བསྟན་པ་ལ་མ་གུས་པ། དེ་བཞིན་གཤེགས་པའི་ཆོས་ཉིད་ཁོང་དུ་མ་ཆུད་པ། དེ་དག་ཐམས་ཅད་གང་གིས་འཛུད་པ་དང ། དཀོན་མཆོག་གསུམ་ལ་སྐྱབས་སུ་འགྲོ་བར་བྱེད་པ་ཡང་སྟོན་ཅིག་།དེ་ཅིའི་ཕྱིར་ཞེ་ན་དེས་ངན་འགྲོ་ལོག་པར་ལྟུང་བར་འགྲོ་བའི་ཕྱིར་རོ། །དེ་སྐད་ཅེས་བཀའ་སྩལ་པ་དང ། གསང་བ་པའི་བདག་པོ་ལག་ན་རྡོ་རྗེས། བཅོམ་ལྡན་འདས་ཀྱི་བཀའ་མཉན་ནས་རིན་པོ་ཆེའི་པདྨའི་རྡོ་རྗེའི་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་རིན་པོ་ཆེའི་པདྨའི་སྙིང་པོ་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སེམས་ཅན་ཀུན་གྱི་ཉོན་མོངས་པ། །གཞིག་པའི་སླད་དུ་འདྲེན་པ་བྱུང ། །ཁྱོད་ནི་བདུད་རྣམས་ཀུན་ལས་རྒྱལ། །འཇིག་རྟེན་རྩ་ལག་གཅིག་པུ་ཁྱོད། །ཐར་པའི་གྲོང་ཁྱེར་འཇུག་པའི་ལམ། །ཡེ་ཤེས་མ་ལུས་ཁྱོད་གཅིག་པུས། །ཡང་དག་བརྙེས་ནས་ཐུགས་རྗེ་ཡིས། །བརླན་པའི་ཐུགས་ཀྱིས་བསྟན་པ་མཛད། །ཁྱོད་སྔོན་སྦྱིན་དང་ཚུལ་ཁྲིམས་དང ། །བཟོད་དང་བརྩོན་འགྲུས་བསམ་གཏན་དང ། །ཤེས་རབ་ལ་སོགས་ཡོན་ཏན་གྱིས། །བདག་མཛད་སླད་ཀྱིས་སེམས་ཅན་བཙུད། །ཁྱོད་ཀྱིས་ཆོས་རྣམས་སྐྱེ
107.6a
མེད་པར། །བཤད་ཅིང་དེ་བཞིན་རྣམ་ཕྱེ་ཡང ། །འབྲས་བུར་དོགས་པ་མ་མཆིས་པ། །ཀྱེ་མ་མགོན་པོ་ཁྱོད་ཀྱིས་བཤད། །འཁོར་ལོ་ཡན་ལག་བཅུ་གཉིས་པ། །ཁྱོད་ཉིད་མཁྱེན་ནས་རབ་ཏུ་བསྐོར། །མུ་སྟེགས་ཅན་དང་བདུད་བཏུལ་ཏེ། །ཆོས་ཀྱི་སྣང་བ་གསལ་བར་མཛད། །ཉོན་མོངས་བྲག་ཆེན་རྣམ་ཀུན་ཏུ། །ཡེ་ཤེས་རྡོ་རྗེས་རབ་བཅོམ་ནས། །སུས་ཀྱང་ཐོབ་པར་མ་གྱུར་པའི། །བྱང་ཆུབ་བླ་ན་མེད་པ་བརྙེས། །གང་གི་མཚན་ཡང་རྫོགས་པ་ཡི། །བྱང་ཆུབ་ས་བོན་ཉིད་འགྱུར་བ། །ཁྱོད་ནི་འཇིག་རྟེན་མཆོག་གཅིག་པུ། །དམ་པ་རབ་སྦྱིན་བདག་པོ་ལགས། །ཁྱོད་ནི་མགོན་པོ་ཁྱོད་ནི་ཕ། །ཁྱོད་སྐྱབས་ཁྱོད་ནི་དཔུང་གཉེན་ལགས། །ཐུགས་རྗེ་ཆེན་པོ་ཡེ་ཤེས་ཉིད། །མྱ་ངན་འདས་གནས་གཅིག་པུ་ཁྱོད། །ཁྱོད་ཉིད་གཤེགས་ནས་སེམས་ཅན་རྣམས། །སེམས་ཅན་དམྱལ་ལས་རྣམ་པར་གྲོལ། །རང་གི་སྐུ་ཡང་ཡོངས་བཏང་ནས། །ཁྱོད་ཀྱིས་སྲོག་ཆགས་རྣམས་ཀྱང་བསྲུངས། །ལུས་ཅན་ཀུན་གྱིས་མ་ཐོབ་པའི། །ཡེ་ཤེས་ཁྱོད་ཀྱིས་བརྙེས་གྱུར་ནས། །གྲོལ་ཏེ་འཇིག་རྟེན་རྣམས་ཀྱང་འགྲོལ། །ཀྱེ་མ་ཁྱོད་ནི་རྩ་ལག་བཟང ། །མགོན་པོ་ཁྱོད་ཀྱི་འོད་ཟེར་གྱི། །དྲ་བས་འཇིག་རྟེན་ཁམས་རྣམས་ཁྱབ། །མྱ་ངན་འདས་ལས་ལྷག་པ་བདེ། །ལུས་ཅན་ཀུན་གྱིས་ཐོབ་པར་མཛད། །ཁྱོད་ཀྱི་འོད་ཀྱི་གཟིས་བཅོམ་པས། །གཟའ་རྣམས་ཀུན་དང་དགུང་ཟླ་དང ། །གདུགས་རྣམས་དང་ནི་ཞུགས་རྣམས་དང ། །ནོར་བུ་ལྷམ་མེར་མ་གྱུར་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས། །བཅོམ་ལྡན་འདས་ལ་མངོན་པར་བསྟོད་ནས། ཡང་རིན་པོ་ཆེའི་པདྨའི་སྙིང་པོ་ལ་འདུག་སྟེ། བཅོམ་ལྡན་འདས་ལེགས་སོ་ཞེས་གསོལ་ནས། རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་ལ་སྙོམས་པར་ཞུགས་སོ། །གསང་བ་པའི་བདག་པོ་ལག་ན་རྡོ་རྗེས་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་འདི་ལ་སྙོམས་པར་ཞུགས་མ་ཐག་ཏུ། དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས། ཀུན་ཏུ་རབ་ཏུ་གཡོས་ཏེ། ཤར་ཕྱོགས་མཐོ་ན་ནུབ་ཕྱོགས་དམའ། ནུབ་ཕྱོགས་མཐོ་ན་ཤར་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས་མཐོ་ན་ལྷོ
107.6b
ཕྱོགས་དམའ། མཐའ་མཐོ་ན་དབུས་དམའ། དབུས་མཐོ་ན་ནི་མཐའ་དམའ་བར་གྱུར་ཏོ། །ཕྱོགས་ཐམས་ཅད་དང་ཕྱོགས་མཚམས་ཐམས་ཅད་ཀྱང་དགའ་བ་དང ། ཡིད་བདེ་བ་སྐྱེས་པར་གྱུར་ནས། ལྷམ་མེ། ལྷན་ནེ། ལྷང་ངེའོ། །གསང་བ་པའི་བདག་པོ་ལག་ན་རྡོ་རྗེའི་ཡན་ལག་དང་ཉིང་ལག་གི་མཚམས་ཐམས་ཅད་ནས་རྡོ་རྗེ་ཀུན་ཏུ་འབར་བ། རབ་ཏུ་འབར་བ་ཀུན་ཏུ་རབ་ཏུ་མཆེད་ཅིང་འབར་བ་མེ་ལྕེ་གཅིག་ཏུ་གྱུར་པ་དག་བྱུང་བར་ཀུན་ཏུ་སྣང་ངོ་རྡོ་རྗེ་འབར་བའི་སྣང་བ་དེས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་དཔག་ཏུ་མེད་པ་ཇི་སྙེད་པ་དག་ན། སངས་རྒྱས་བཅོམ་ལྡན་འདས་གང་དག་ད་ལྟར་བཞུགས་ཏེ་མཚོ་ཞིང་གཞེས་ལ་ཆོས་ཀྱང་སྟོན་ཏེ། ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ། མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ་ཡོངས་སུ་བྱང་བ་ཡང་དག་པར་སྟོན་པ། ཉན་ཐོས་ཀྱི་དགེ་འདུན་དང་བཅས་པ། བྱང་ཆུབ་སེམས་དཔའི་དགེ་འདུན་དང་བཅས་པ་དེ་དག་འཁོར་གྱི་ཁྱམས་རྒྱ་ཆེ་ཞིང་རྒྱ་ཆེ་བ་དག་ཀུན་ཏུ་སྣང་ངོ ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་དེ་བཞིན་གཤེགས་པ་དེ་དག་གི་སྤྱན་སྔ་ན། རྡོ་རྗེ་འབར་བའི་སྣང་བ་རྒྱ་ཆེན་པོ་དེས་སྣང་བར་གྱུར་ནས་སངས་རྒྱས་བཅོམ་ལྡན་འདས་དེ་དག་ལ་སོ་སོར་ཞུས་པ། བཅོམ་ལྡན་འདས་སྣང་བ་རྒྱ་ཆེན་པོ་ཀུན་ཏུ་གདའ་བ་འདི་སུའི་ལགས། དེ་ནས་སངས་རྒྱས་བཅོམ་ལྡན་འདས་དེ་དག་གིས་སོ་སོའི་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་མི་མཇེད་ཀྱི་འཇིག་རྟེན་གྱི་ཁམས་ན་རི་རབ་ཀྱི་སྟེང་ན་ཆོས་སྟོན་ཏེ། བཅོམ་ལྡན་འདས་དེས་བདུད་སྡིག་ཅན་ཞགས་པའི་བཅིང་བ་ལྔས་བཅིངས་ཏེ། བཅོམ་ལྡན་འདས་ཀྱི་སྤྱན་སྔར་འགྱེལ་བ་གཟིགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བ་པའི་བདག་པོ་ལག་ན་རྡོ་རྗེ་ཞེས་བྱ་བ་ལ་འདི་སྐད་དུ། གསང་བ་པའི་བདག་པོ་ལག་ན་རྡོ་རྗེ་ཁྱོད་ཀྱིས་རང་གི་རྫུ་འཕྲུལ་གྱི་རྣམ་པར་འཕྲུལ་པའི་ཆོ་འཕྲུལ་སྟོན་ཅིག་ཅེས་བཀའ་སྩལ་ཏོ། །རིགས་ཀྱི་བུ་དག་འདི་ནི་རྡོ་རྗེས་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། དེའི་རྡོ་རྗེའི་རྣམ་པར་འཕྲུལ་པ་ཆེན་པོའི་བྱིན་གྱི་སླབས་སོ། །དེ་སྐད་ཅེས་བཀའ་སྩལ་ཏེ། དེ་བཞིན་གཤེས་པ་དགྲ་བཅོམ
107.7a
པ་ཡང་དག་པར་རྫོགས་པའི་སངས་རྒྱས་དེ་དག་གིས་གནང་ནས། རིགས་ཀྱི་བུ་དེ་དག་ཐམས་ཅད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཕྱག་འཚལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་པར་འཕྲུལ་བའི་ཆོ་འཕྲུལ་བསམ་གྱིས་མི་ཁྱབ་པས། འཇིག་རྟེན་གྱི་ཁམས་མི་མཇེད་འདིར་ལྷགས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་གསང་བ་པའི་བདག་པོ་ལག་ན་རྡོ་རྗེ་ལ་མཆོད་པའི་སྤྲིན་དང ། གདུགས་ཀྱི་སྤྲིན་དང ། རྒྱན་ཕྲེང་གི་སྤྲིན་དང ། དབུ་རྒྱན་གྱི་སྤྲིན་དང ། མེ་ཏོག་གི་སྤྲིན་དང ། ན་བཟའི་སྤྲིན་ཆེན་པོས་མཆོད་པ་ཆེན་པོ་བྱས་ནས། ནམ་མཁའི་དཀྱིལ་ན་འཁོད་བཞིན་དུ་བཅོམ་ལྡན་འདས་ཤཱཀྱ་ཐུབ་པ་ལ་ལན་བདུན་བསྐོར་བ་བྱས་ཏེ། པུས་མོ་གཡས་པའི་ལྷ་ང་རིན་པོ་ཆེའི་པདྨའི་རྡོ་རྗེའི་སྟན་ལ་བཙུགས་ནས། བཅོམ་ལྡན་འདས་ལ་ལོགས་སུ་བལྟ་ཞིང ། བཅོམ་ལྡན་འདས་ལ་ཕྱག་འཚལ་བ་དང ། དེ་བཞིན་གཤེགས་པས་གནང་ནས། རང་རང་གི་རིན་པོ་ཆེའི་པདྨའི་རྡོ་རྗེའི་སྟན་དེ་དག་ལ་འཁོད་པར་གྱུར་ཏོ། །དེའི་ཚེ་ཤར་ཕྱོགས་ལོགས་ན་འཇིག་རྟེན་གྱི་ཁམས་རྡོ་རྗེའི་ཏོག་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ཏེ། འདི་ལྟར་རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་འདི་ཉིད་ལ་བརྩམས་ཏེ་ཆོས་ཀྱང་སྟོན་ཏོ། །རྡོ་རྗེ་འབར་བའི་སྣང་བ་དེས་ཀྱང་འཇིག་རྟེན་གྱི་ཁམས་ཇི་སྙེད་པ་དེ་དག་ཐམས་ཅད་ཀུན་ནས་སྣང་བར་གྱུར་ཏོ། །དེ་ནས་འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ཞེས་བྱ་བ་དེ་བཞིན་གཤེགས་པ་དེའི་འཁོར་གྱི་ཁྱམས་སུ་འདུས་ཏེ་འདུག་པར་གྱུར་པ་དེས་ངོ་མཚར་དེ་མཐོང་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་ཞེས་བྱ་བ་དེ་ལ་ཞུས་པ། བཅོམ་ལྡན་འདས་རྡོ་རྗེ་འབར་བའི་སྣང་བ་འདི་ལྟ་བུ་གང་གིས་འཇིག་རྟེན་གྱི་ཁམས་འདི་ཐམས་ཅད་སྣང་བར་གྱུར་ཏེ། སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་རྒྱུན་ཆད་ཅིང་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང་ཡི་དགས་དང ། གཤིན་རྗེའི་འཇིག་རྟེན་གྱི
107.7b
སྡུག་བསྔལ་ཐམས་ཅད་མི་གདའ་བར་གྱུར། ལྷ་དང་ཀླུ་དང ། གནོད་སྦྱིན་དང་དྲི་ཟ་དང ། ལྷ་མ་ཡིན་དང་ནམ་མཁའ་ལྡིང་དང ། མི་འམ་ཅི་དང་ལྟོ་འཕྱེ་ཆེན་པོ་ལ་སོགས་པ་འཇིག་རྟེན་ན་རྫུ་འཕྲུལ་ཆེ་ཞིང་དབང་ཆེ་བར་གྲགས་པ་ཐམས་ཅད་ཀྱང་ཀུན་ནས་མཆོད་པའི་སྤྲིན་ཆེན་པོས་དགའ་བ་དང་ཡིད་བདེ་བ་སྐྱེས་ཏེ། ནུབ་ཕྱོགས་སུ་མཆི་བར་གདའ་བ་འདི་སུ་ཡི་ལགས། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ནུབ་ཕྱོགས་ཀྱི་ལོགས་ན་མི་མཇེད་ཀྱི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རྡོ་རྗེ་ཆེན་པོའི་རི་རབ་ཀྱི་རྩེ་མོའི་ཁང་པ་བརྩེགས་པ་ན་རྡོ་རྗེ་ཆེན་པོའི་རི་རབ་ཀྱི་རྩེ་མོའི་ཁང་པ་བརྩེགས་པའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་སྟོན་ཏོ། །བཅོམ་ལྡན་འདས་དེས་སྤྱི་གཙུག་གི་མཚམས་ཀྱི་མཛོད་སྤུ་ནས་འོད་ཟེར་གྱི་དྲ་བ་ཆེན་པོ་ཕྱུང་སྟེ། འོད་ཟེར་གྱི་དྲ་བ་ཆེན་པོ་དེས་འཇིག་རྟེན་གྱི་ཁམས་དེར་བདུད་སྡིག་ཅན་བསྐུལ་མ་ཐག་ཏུ་ཀུན་ཏུ་ཁྲོས་ནས་ལྷའི་བུ་ཐམས་ཅད་དང ། གཞན་ཡང་བདུད་ཀྱི་རིས་ཀྱི་ལྷའི་བུ་རྣམས་དང ། དཔུང་གི་ཚོགས་ཆེན་པོ་དང་ལྷན་ཅིག་ཏུ་བཅོམ་ལྡན་འདས་དེ་ལ་གཙེ་བའི་ཕྱིར་ལྷགས་པ་དང ། དེ་ཡང་སངས་རྒྱས་ཀྱི་མཐུས་དེ་བཞིན་གཤེགས་པའི་རྡོ་རྗེའི་འཁོར་གྱི་ཁྱམས་དེ་ཉིད་དུ་ཞགས་པ་ལྔའི་བཅིང་བས་བཅིངས་པས་བཅོམ་ལྡན་འདས་ཀྱི་སྤྱན་སྔར་འགྱེལ་ཏེ། དེ་ལ་ཐུགས་བརྩེ་བའི་ཕྱིར་བཅོམ་ལྡན་འདས་དེས་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བ་པའི་བདག་པོ་ལག་ན་རྡོ་རྗེ་ལ་སྟོན་ཅིག་པར་བཀའ་ལུང་བྱིན་ནས། གསང་བ་པའི་བདག་པོ་ལག་ན་རྡོ་རྗེ་དེས་རྡོ་རྗེའི་རྣམ་པར་ཐར་པའི་སྒོ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཡན་ལག་དང་ཉིང་ལག་གི་མཚམས་ཐམས་ཅད་ནས་རྡོ་རྗེ་རྣམས་བསྟན་ཏེ། འདི་ནི་རྡོ་རྗེ་དེ་དག་ཉིད་ཀྱི་རྡོ་རྗེ་འབར་བའི་སྣང་བའོ། །རིགས་ཀྱི་བུ་རྡོ་རྗེ་འབར་བའི་སྣང་བ་དེས་ཀྱང་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་དཔག་ཏུ་མེད་པ་རྣམས་སུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དང་མཉམ་པ་ཇི་སྙེད་པ་སྣང་བར་བྱས་ཏེ། འཇིག་རྟེན་གྱི་ཁམས་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཐམས་ཅད་ཀྱང་བསྐུལ།
107.8a
བྱང་ཆུབ་སེམས་དཔའ་དེ་དག་གི་འཁོར་གྱི་དཀྱིལ་འཁོར་དེ་དག་ཀྱང་བསྐུལ་བས་ངོ་མཚར་ཐོབ་པར་གྱུར་པ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཡང་སོ་སོར་ཞུས་སོ། །རིགས་ཀྱི་བུ་དེ་ཉིད་ཀྱི་མཐུས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེའི་སྤྱན་སྔ་ན་འདུག་ཅིང་བསྙེན་བཀུར་བྱེད་པ་ཡང་མཐོང་ངོ ། །དེ་སྐད་ཅེས་བཀའ་སྩལ་པ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་འཇིག་རྟེན་གྱི་ཁམས་མི་མཇེད་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་བལྟ་བ་དང ། ཕྱག་བགྱི་བ་དང་བསྙེན་བཀུར་བགྱི་བ་དང ། གསང་བ་པའི་བདག་པོ་ལག་ན་རྡོ་རྗེ་དེ་ཡང་བལྟ་བར་བགྱི་བའི་སླད་དུ་མཆིའོ། །དེ་སྐད་ཅེས་གསོལ་པ་དང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེའི་དུས་ལ་བབ་པར་ཤེས་ན་སོང་ཤིག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་བཅོམ་ལྡན་འདས་དེས་གནང་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་དེ་ལ་ལན་བདུན་བསྐོར་བ་བྱས་ཏེ་འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས། ནམ་མཁའི་དཀྱིལ་གྱི་ལམ་ནས་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་དང་ལྷན་ཅིག་ཏུ་བྱང་ཆུབ་སེམས་དཔའི་རྣམ་པར་འཕྲུལ་པ་ཆེན་པོ་དང ། བྱང་ཆུབ་སེམས་དཔའི་རྫུ་འཕྲུལ་ཆེན་པོས་འཇིག་རྟེན་གྱི་ཁམས་མི་མཇེད་འདི་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་དེ་དག་ཐམས་ཅད་དང་ལྷན་ཅིག་སྨྲ་བ་ན། བསོད་ནམས་ཀྱི་ཚོགས་བསགས་པ་ལས་གྲུབ་པས་བྱིན་པའི་རིན་པོ་ཆེ་དེ་དག་ལས་འོད་ཟེར་འདི་ལྟ་སྟེ། སྔོན་པོ་དང་སེར་པོ་དང ། དམར་པོ་དང་ལྗང་སྔོན་དང ། ལྗང་སེར་དང་བཙོད་ཀ་དང་ཤེལ་དང་དངུལ་དང ། ནོར་བུ་དང་མུ་ཏིག་དང ། གསེར་དང་པདྨ་རཱ་ག་དང ། རྡོའི་སྙིང་པོ་དང་ཀེ་ཀེ་རུ་དང ། ཀེ་ཀེ་རུ་ཆེན་པོ་དང ། ན་ད་རྙིལ
107.8b
དང ། མཐོན་ཀ་ཆེན་པོ་དང ། དུན་ལས་དང ། གོ་མུ་ཏ་ར་ཀ་དང་མུ་ཏིག་དམར་པོའི་ཁ་དོག་ལྟ་བུ་རྣམས་བྱུང་སྟེ། དེ་དག་གིས་ཐམས་ཅད་དང་ལྡན་པའི་འཇིག་རྟེན་གྱི་ཁམས་ལ་ལན་འབུམ་ཕྲག་དུ་མར་བསྐོར་བ་བྱས་ཏེ་སྟེང་གི་བར་སྣང་ཁྱབ་པར་བྱས་ནས་ལྷའི་སྣང་བས་སྣང་བར་བྱས་ཏེ་འདུས་ནས་འཇའ་ལྟ་བུར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཞབས་མཚན་ཐམས་ཅད་ཕུན་སུམ་ཚོགས་པ། འཇམ་པ་མཉེན་པ། རབ་ཏུ་གཞོན་པ་ཤ་རྒྱས་པ། སྣུམ་པ། ལོང་བུ་གཉིས་ཀྱི་རྩ་མི་མངོན་པ། པད་མ་གསར་དུ་ཁ་བྱེ་བ་ལྟ་བུ་དང ། དུང་དང་ཉ་དང ། རྡོ་རྗེ་དང ། རྒྱལ་མཚན་དང ། ལྕགས་ཀྱུ་དང ། པདྨ་དང ། ཆུ་སྲིན་མ་ཀ་རའི་མཚན་དང་ལྡན་པ་གཉིས་ལ་ལན་འབུམ་ཕྲག་དུ་མ་བསྐོར་བ་བྱས་ནས་ནུབ་པར་གྱུར་ཏོ། །ནམ་མཁའི་དཀྱིལ་ན་འོད་ཟེར་རེ་རེའི་རྩེ་མོ་ལས་པདྨ་བྱེ་བ་ཁྲག་ཁྲིག་འབུམ་ཕྲག་བརྒྱད་བཅུ་ཚད་ཤིང་རྟའི་ཕང་ལོ་ཙམ་པ་རིན་པོ་ཆེ་སྣ་བདུན་གྱི་རྒྱུ་ལས་བྱུང་བ་འདི་ལྟ་སྟེ། གསེར་གྱི་རྒྱུ་ལས་བྱུང་བ་དང ། ན་ད་རྙིལ་དང ། དངུལ་དང ། བྱི་རུ་དང་ཤེལ་དང ། ཀེ་ཀེ་རུ་དང་དུང་དང ། དུན་ལས་ཀྱི་རྒྱུ་ལས་བྱུང་བ་དག་འཐོན་ཏོ། །དེ་ལ་གསེར་གྱི་རྒྱུ་ལས་བྱུང་བའི་པདྨ་རྣམས་ཀྱི་མདབ་མ་ནི་ཨན་ད་རྙིལ་གྱི་རྒྱུ་ལས་བྱུང་བ་དག་གོ་།སྙིང་པོ་ནི་དངུལ་གྱི་རྒྱུ་ལས་བྱུང་བའོ། །ཟེ་བ་ནི་བྱི་རུའི་རྒྱུ་ལས་བྱུང་བའོ། །ཆུ་བ་ནི་ཤེལ་གྱི་རྒྱུ་ལས་བྱུང་བའོ། །ཟེ་འབྲུ་ནི་ཀེ་ཀེ་རུའི་རྒྱུ་ལས་བྱུང་བའོ། །ན་ད་རྙིལ་གྱི་རྒྱུ་ལས་བྱུང་བའི་པདྨ་རྣམས་ཀྱི་མདབ་མ་ནི་དངུལ་གྱི་རྒྱུ་ལས་བྱུང་བ་དག་གོ་།སྙིང་པོ་ནི་བྱི་རུའི་རྒྱུ་ལས་བྱུང་བའོ། །ཟེ་བ་ནི་ཤེལ་གྱི་རྒྱུ་ལས་བྱུང་བའོ། །ཆུ་བ་ནི་ཀེ་ཀེ་རུའི་རྒྱུ་ལས་བྱུང་བའོ། །ཟེ་འབྲུ་ནི་དུན་ལས་ཀྱི་རྒྱུ་ལས་བྱུང་བའོ། །དངུལ་གྱི་རྒྱུ་ལས་བྱུང་བའི་པདྨ་རྣམས་ཀྱི་མདབ་མ་ནི་བྱེ་རུའི་རྒྱུ་ལས་བྱུང་བ་དག་གོ་།སྙིང་པོ་ནི་ཤེལ་གྱི་རྒྱུ་ལས་བྱུང་བའོ། །ཟེ་བ་ནི་ཀེ་ཀེ་རུའི་རྒྱུ་ལས་བྱུང་བའོ། །ཆུ་བ་ནི་དུན་ལས་ཀྱི་རྒྱུ་ལས་བྱུང་བའོ། །ཟེ་འབྲུ་ནི་གསེར་གྱི་རྒྱུ་ལས་བྱུང་བའོ། །བྱེ་རུའི་རྒྱུ་ལས་བྱུང་བའི་པདྨ་རྣམས་ཀྱི་མདབ་མ་ནི་ཤེལ་གྱི་རྒྱུ་ལས་བྱུང་བ་དག་གོ་།སྙིང་པོ་ནི་ཀེ་ཀེ་རུའི་རྒྱུ་ལས་བྱུང་བའོ། །ཟེ་བ་ནི་དུན་ལས་ཀྱི་རྒྱུ་ལས་བྱུང་བའོ། །ཆུ་བ་ནི་གསེར་གྱི་རྒྱུ་ལས་བྱུང་བའོ། །ཟེ་འབྲུ་ནི་ཨན་ད་རྙིལ་གྱི་རྒྱུ་ལས་བྱུང་བའོ། །ཤེལ་གྱི་རྒྱུ་ལས་བྱུང་བའི་པདྨ་རྣམས་ཀྱི་མདབ་མ་ནི་ཀེ་ཀེ་རུའི་རྒྱུ་ལས་བྱུང་བ་དག་གོ་།སྙིང་པོ་ནི་དུན་ལས་ཀྱི་རྒྱུ་ལས་བྱུང་བའོ། །ཟེ་བ་ནི་གསེར་གྱི་རྒྱུ་ལས་བྱུང་བའོ། །ཆུ་བ་ནི་ཨན་ད
107.9a
རྙིལ་གྱི་རྒྱུ་ལས་བྱུང་བའོ། །ཟེ་འབྲུ་ནི་དངུལ་གྱི་རྒྱུ་ལས་བྱུང་བའོ། །ཀེ་ཀེ་རུའི་རྒྱུ་ལས་བྱུང་བའི་པད་མ་རྣམས་ཀྱི་མདབ་མ་ནི་དུན་ལས་ཀྱི་རྒྱུ་ལས་བྱུང་བ་དག་གོ་།སྙིང་པོ་ནི་གསེར་གྱི་རྒྱུ་ལས་བྱུང་བའོ། །ཟེ་བ་ནི་ཨན་ད་རྙིལ་གྱི་རྒྱུ་ལས་བྱུང་བའོ། །ཆུ་བ་ནི་དངུལ་གྱི་རྒྱུ་ལས་བྱུང་བའོ། །ཟེ་འབྲུ་ནི་བྱི་རུའི་རྒྱུ་ལས་བྱུང་བའོ། །དུན་ལས་ཀྱི་རྒྱུ་ལས་བྱུང་བའི་པདྨ་རྣམས་ཀྱི་མདབ་མ་ནི་གསེར་གྱི་རྒྱུ་ལས་བྱུང་བ་དག་གོ་།སྙིང་པོ་ནི་ཨན་ད་རྙིལ་གྱི་རྒྱུ་ལས་བྱུང་བའོ། །ཟེ་བ་ནི་དངུལ་གྱི་རྒྱུ་ལས་བྱུང་བའོ། །ཆུ་བ་ནི་བྱི་རུའི་རྒྱུ་ལས་བྱུང་བའོ། །ཟེ་འབྲུ་ནི་ཤེལ་གྱི་རྒྱུ་ལས་བྱུང་བའོ། །དེ་བཞིན་དུ་སྦྱར་ཏེ། དེ་ལྟར་རིན་པོ་ཆེ་དུ་མའི་རྒྱུ་ལས་བྱུང་བའི་པད་མ་དག་གོ་།རིན་པོ་ཆེའི་པད་མ་རེ་རེ་ལ་ཡང་ས་བཅུ་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་མཛེས་པའི་སྤྱོད་ལམ་ཕུན་སུམ་ཚོགས་པ་དག་ཏིང་ངེ་འཛིན་ལ་སྙོམས་པར་ཞུགས་སོ། །བྱང་ཆུབ་སེམས་དཔའ་རེ་རེའི་ལྟེ་བ་ནས་ཀྱང་འོད་ཟེར་འབུམ་འབུམ་འབྱུང་ངོ ། །འོད་ཟེར་གྱི་རྩེ་མོ་རེ་རེ་ལས་ཀྱང་རིན་པོ་ཆེ་ཐམས་ཅད་ཀྱི་རྒྱུ་ལས་བྱུང་བའི་ཁང་པ་བརྩེགས་པ་ནོར་བུ་དང ། རིན་པོ་ཆེ་རྣམ་པ་སྣ་ཚོགས་ཀྱི་སྟེགས་བུས་བསྐོར་བ། ཤེལ་གྱི་རྒྱུ་ལས་བྱུང་བའི་ཟླ་བས་སྤྲས་པའི་ཁང་བྲན་གྱི་རྩེ་མོ་ལ་སེང་གེའི་རྣ་བའི་སྟེང་ན་རིན་པོ་ཆེའི་རྒྱལ་མཚན་དང ། བ་དན་དང ། རྣམ་པར་རྒྱལ་བའི་བ་དན་སྤྱངས་པས་ནམ་མཁའ་ཀུན་ཏུ་ཁེབས་པས་པད་མ་རཱ་ག་དང ། ན་ད་རྙིལ་དང ། མར་གད་དང ། བཻ་དཱུརྱ་དང ། རྡོའི་སྙིང་པོ་དང ། སྤུག་དང ། ཀེ་ཀེ་རུ་ལས་བྱས་པའི་ཀ་བ་ཆེན་པོའི་ཀླད་ལ་འཛམ་བུའི་ཆུ་བོའི་གསེར་གྱི་ཤིང་ས་ལ་གཅོད་པ་ལྟ་བུའི་ཚོགས་བཀོད་པས་རྣམ་པར་སྤྲས་ཏེ། མཛེས་པར་བྱས་པ་དངུལ་ལས་བྱས་པའི་ཕུག་རོན་གྱི་ཕྲེང་གི་མཐའ་མཐར་མུ་ཏིག་དམར་པོ་དང་ལྡན་པ་དྲིལ་བུ་གཡེར་ཀའི་དྲ་བ་སྤྱངས་པའི་སྒྲས་སད་པར་གྱུར་ནས་རབ་ཏུ་དགའ་ཞིང་དྲེགས་པའི་ཕུག་རོན་དང ། བྱ་བང་དང ། ནེ་ཙོ་དང་རི་སྐེགས་དང ། རྨ་བྱའི་ང་རོ་དག་གིས་ཉམས་དགའ་བ། ཁྱམས་དང་འདུན་ཁང་ཆེན་པོའི་ཉེན་འཁོར་སྟེགས་བུར་བསྐོར་བས་མཛེས་པར་བྱས་པ། རིན་པོ་ཆེ་རྣམ་པ་སྣ་ཚོགས་པ་ལས་བྱས་པའི་སྒོ་ཁང་ཅན་ཤེལ་གྱི་རྒྱུ་ལས་བྱས་པའི་སྟེགས་བུ་དང་ལྡན་པ་བཀྲ་ཤིས་ཀྱི་གསེར་གྱི་བུམ་པ་དུ་མ་ནས་སྤོས་ཆུ་དྲི་ཞིམ་པོས་ཆག་ཆག་བཏབ་པ། རྫིང
107.9b
ཆེན་པོའི་འགྲམ་གྱི་ནེའུ་གསིང་མར་གད་གྱི་རྒྱུ་ལས་བྱུང་བ། ཀ་ཙ་ལིན་དའི་གོས་ལྟར་རེག་ན་བདེ་བས་མཛེས་པའི་ཕྱོགས་ན་བདེ་བར་ཉལ་བའི་ངང་པ་དང ། ཁྲུང་ཁྲུང་དང ། ངུར་པ་དང ། ཀ་ལན་ད་ཀའི་ཁྱུ་གནས་པ། གསེར་གྱི་བྱེ་མ་བརྡལ་བའི་བཏོས་ཆེན་པོ་རིན་པོ་ཆེ་སྣ་བདུན་གྱི་ཐེམ་སྐས་ཀྱི་ཕྲེང་བས་བརྒྱན་པ། ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ། གྲངས་འབུམ་ཕྲག་དུ་མས་ཀུན་ནས་ཡོངས་སུ་བསྐོར་བ་དག་བྱུང་ངོ ། རྫིང་བུ་རེ་རེ་ནས་ཀྱང་རིན་པོ་ཆེའི་པད་མ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་རྩ་དགུ་བྱུང་ངོ ། །རིན་པོ་ཆེའི་པདྨ་རེ་རེའི་སྙིང་པོ་ལ་ཡང་སིལ་སྙན་དང ། ཕེག་རྡོབ་པ་དང ། གླུ་དབྱངས་རྣམས་ཀྱི་སྒྲ་ཕྱུང་བས་ལྷའི་བུ་མོ་དག་གླུ་ལེན་གར་བྱེད་ཅིང་ཡོངས་སུ་སྤྱོད་དོ། །སིལ་སྙན་དང་ཕེག་རྡོབ་པ་དང ། གླུ་དབྱངས་ཀྱི་སྒྲ་བྱུང་བ་དེ་དག་ལས་ཀྱང་ཚིགས་སུ་བཅད་པ་འདི་དག་བྱུང་ངོ ། །སྦྱིན་དང་ཚུལ་ཁྲིམས་ཀྱིས་ནི་གང་ཞིག་དཔག་མེད་ཅིང ། །དེ་བཞིན་བཟོད་དང་བརྩོན་འགྲུས་དག་གི་སྟོབས་ལྡན་པ། །བསམ་གཏན་གྱིས་ནི་ཞི་ཞིང་དབང་གིས་ཀུན་འབྱོར་པ། །ཡེ་ཤེས་སྒྲོན་མ་དེ་ལ་སྐྱབས་སུ་འདོང་བར་གྱིས། །བསམ་གྱིས་མི་ཁྱབ་སྟོབས་དང་སྨོན་ལམ་རྣམས་དང་ལྡན། །ཐབས་དང་བྱང་ཆུབ་ཡན་ལག་ཏིང་འཛིན་རྣམས་ཀྱིས་དག་།རྣམ་པར་གྲོལ་བའི་ལམ་དང་སྟོབས་བཅུར་ལྡན་པ་ཡི། །ཐུབ་པ་གང་ཡིན་དེ་ལ་མཆོད་ཕྱིར་འདོང་བར་གྱིས། །འདམ་རྫབ་ནས་ནི་པདྨ་རྒྱས་པ་ཇི་བཞིན་དུ། །གང་ཞིག་ཉོན་མོངས་འདམ་གྱིས་རྟག་པར་མི་གོས་པ། །འཆི་དང་སྐྱེ་བའི་སྡུག་བསྔལ་རྣམ་པར་གསལ་བ་ཡི། །རྒྱལ་བ་འཇིག་རྟེན་མགོན་པོ་དེ་ལ་ལྟ་ཕྱིར་དང ། །གཅིག་ཀྱང་མི་ལྡན་མིན་པར་གྱུར་པ་གང་ཞིག་གིས། །སྐྱེ་དགུ་རྣམས་ཀྱི་གཏི་མུག་སྒོ་གླེགས་རྣམས་བཤིག་ཅིང ། །སྐུ་དང་གསུང་དང་ཐུགས་ཀྱི་སྤྱོད་པ་རབ་ཞི་བ། །ཤཱཀྱའི་ཏོག་ལྡན་དེ་ལ་སྐྱབས་སུ་འདོང་བར་གྱིས། །དེ་ལྟར་ཁང་པ་བརྩེགས་པ་དཔག་བསམ་གྱི་ཤིང་ལྗོན་པས་ལེགས་པར་བརྒྱན་པ་རྣམ་པ་སྣ་ཚོགས་བྱེ་བ་ཁྲག་ཁྲིག
107.10a
འབུམ་ཕྲག་དུ་མ་ནམ་མཁའི་དཀྱིལ་ན་ཀུན་ཏུ་སྣང་སྟེ། ཁ་ཅིག་ཏུ་ནི་རིན་པོ་ཆེའི་སྤྲིན་གྱི་ཆར་འབབ་པར་ཀུན་ཏུ་སྣང་ངོ ། །ཁ་ཅིག་ཏུ་ནི་མེ་ཏོག་གི་གདུགས་ཀྱི་སྤྲིན་གྱི་ཆར། ཁ་ཅིག་ཏུ་ནི་གོ་ཤིར་ཤའི་ཙན་དན་དང ། སྤོས་དང་བྱུག་པ་དང ། ཕྱེ་མའི་སྤྲིན་གྱི་ཆར། ཁ་ཅིག་ཏུ་ནི་གོས་ཀྱི་ཕྲེང་བའི་སྤྲིན་གྱི་ཆར། ཁ་ཅིག་ཏུ་ནི་ཀ་ཤི་ཀའི་རས་དང་དུ་གུ་ལའི་རས་དང་ཟ་འུག་གི་སྤྲིན་གྱི་ཆར། ཁ་ཅིག་ཏུ་ནི་དཔག་བསམ་གྱི་ཤིང་ལྗོན་པའི་སྤྲིན་གྱི་ཆར། ཁ་ཅིག་ཏུ་ནི་མེ་ཏོག་པདྨ་དང ། ུཏ་པ་ལ་དང ། ཀུ་མུ་ད་དང ། པདྨ་དཀར་པོ་དང་དྲི་མཆོག་དང་ཨ་ཏི་མུག་ཏ་ཀ་དང་ཀ་ཙ་ལིན་ད་དང་མ་ཧཱ་ཀ་ཙ་ལིན་ད་དང་བཏང་གཟུང་དང ། བཏང་གཟུང་ཆེན་པོ་དང ། མཉྫུ་ཤ་ཀ་དང ། མཉྫུ་ཤ་ཀ་ཆེན་པོ་དང ། མན་དཱ་ར་བ་དང ། མན་དཱ་ར་བ་ཆེན་པོའི་སྤྲིན་གྱི་ཆར་མངོན་པར་བབ་བོ། །མེ་ཏོག་གི་ཆར་དེ་དག་ལས་དྲི་གང་བྱུང་བ་དེས་སངས་རྒྱས་ཀྱི་ཞིང་ཚད་མེད་གྲངས་མེད་པ་དག་གང་གཱའི་ཀླུང་གི་བྱེ་མའི་རྡུལ་ཕྲ་རབ་ཀྱི་རྡུལ་དང་མཉམ་པའི་སངས་རྒྱས་ཀྱི་ཞིང་རྣམས་རྒྱས་པར་ཁྱབ་བོ། །འཇིག་རྟེན་གྱི་ཁམས་དེ་དག་ན་སེམས་ཅན་གང་དག་འགྲོ་བ་དྲུག་ཏུ་སྐྱེས་པ་དེ་དག་ཐམས་ཅད་དྲི་དེས་མཆོག་ཏུ་བདེ་བས་ཚིམ་ཞིང་སེམས་དགའ་བར་གྱུར་ཏེ། སྡུག་བསྔལ་ཐམས་ཅད་དང་བྲལ་ནས་ཕན་ཚུན་འདྲི་བ་དང ། འཇིག་རྟེན་གྱི་ཁམས་མི་མཇེད་དེ་ན་བྱང་ཆུབ་སེམས་དཔའ་རྡོ་རྗེའི་སྙིང་པོ་བྱང་ཆུབ་སེམས་དཔའི་ཆོ་འཕྲུལ་སྣ་ཚོགས་སྟོན་པ་རྒྱང་རིང་པོ་ནས་མཐོང་ངོ ། །དེ་དག་གིས་དེ་མཐོང་ནས་ཀྱང་ཕྱག་འཚལ་ལོ། །སྐྱེས་བུ་དམ་པ་དེ་ལ་ཕྱག་བཙལ་མ་ཐག་ཏུ་སེམས་ཅན་གང་དག་ངན་འགྲོ་ལོག་པར་ལྟུང་བར་དོང་བ་དེ་དག་ཀྱང་མཆོག་ཏུ་བདེ་བ་དང ། དགའ་བ་དང་རངས་པ་དང ། དད་པ་ཐོབ་ནས་སྐད་ཅིག་དེ་ཉིད་ལ་ངན་འགྲོ་ལོག་པར་ལྟུང་བ་ལས་གྲོལ་ཏེ་སུམ་བཅུ་རྩ་གསུམ་གྱི་ལྷ་རྣམས་ཀྱི་ནང་དུ་སྐྱེས་ནས་བར་སྣང་ལ་འཁོད་དེ། དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང ། གསང་བ་པའི་བདག་པོ་ལགས་ན་རྡོ་རྗེ་དང་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་མཆོད་པའི་སྤྲིན་ཆེན་པོས་མཆོད་ནས་ལན་འབུམ་ཕྲག་དུ་མ་མཐའ་ཡས་མུ་མེད་པར་བསྐོར་བ་བྱས་ཏེ། དེ་བཞིན་གཤེགས་པའི་རྡོ་རྗེའི་འཁོར་གྱི་ཁྱམས་ཆེན་པོ་ཐམས་ཅད་དང་ལྡན་པའ་ལ་ལན་བདུན་བསྐོར་བ་བྱས་ནས་ལྷ་རྣམས་བར་སྣང་ལས་བབས་ཏེ། བཅོམ་ལྡན་འདས་ཀྱི་སྤྱན་སྔར་རང་རང་གི་རིན་པོ་ཆེའི་གཞལ་མེད་ཁང་གི་ཁང་པ་བརྩེགས་པ་དག་ན་ལྷའི་བུ་མོ་བྱེ་བ་ཁྲག་ཁྲིག་འབུམ་ཕྲག་དུ་མ་དང་ལྷན་ཅིག་ཏུ་སིལ་སྙན་དང ། ཕེག་རྡོབ་པ་དང་གླུ་དབྱངས་ཀྱི
107.10b
སྒྲ་འབྱིན་ཅིང་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །གང་སླད་ངན་འགྲོ་མཆོག་དུ་སྡུག་བསྔལ་འཁྲུགས་པ་ཡི། །མིང་ཡང་བདེ་གཤེགས་སྟོབས་ཀྱིས་དེང་དུ་མེད་མཛད་དང ། །བསོད་ནམས་མི་ལྡན་སེམས་ཅན་རྣམས་ལ་འང་རྒྱལ་བ་མཆོག་།བྱམས་པར་མཛད་པ་ཀྱེ་མ་ངོ་མཚར་རྨད་དུ་བྱུང ། །བདག་ཅག་རྣམས་ཀྱི་རྨོངས་པའི་སྙིང་གིས་བསྒྲུབས་པ་ཡི། །སྡིག་པའི་ལས་གང་ཤིན་ཏུ་བགྱིད་དཀའ་སྣ་ཚོགས་པ། །དེ་དག་ཐུབ་པའི་བྱ་དགས་དེ་རིང་གློ་བུར་དུ། །སྐད་ཅིག་ཏུ་ནི་ཇི་ལྟར་རྣམ་པར་ཞིག་པར་གྱུར། །ཇི་ལྟར་གདུགས་ཀྱིས་མུན་པ་མུན་ནག་ཀུན་བཅོམ་དང ། །ཇི་ལྟར་ཞུགས་འབར་བས་ནི་རས་རྣམས་སྲེག་པ་དང ། །བསེར་མས་ཤིང་བལ་ལྟར་ཡང་སྤྲིན་འཐོར་ཇི་བཞིན་དུ། །དེ་ལྟར་འགྲོ་བའི་སྡིག་པ་བདེ་བར་གཤེགས་ཀྱིས་བཅོམ། །བདེ་གཤེགས་སྲས་པོ་མཐོང་ངམ་ཐོས་སམ་དྲན་གྱུར་ན། །ལྷན་ཅིག་སྐྱེས་དབང་འོད་ཟེར་དྲ་བས་སྡིག་འཕྲོགས་པ། །འགྲོ་བ་ཡོངས་ཀྱི་སྲིད་པའི་སྤྲོས་པ་གཞིག་པ་ཡི། །ཐུགས་དང་རྟག་ཏུ་ལྡན་ཞིང་སྐྱོ་བར་འགྱུར་མི་མངའ། །མིག་དང་མགོ་དང་སྙིང་དང་ཤ་ཁྲག་ཚིལ་རྣམས་དང ། །སྲོག་དང་སྡུག་དང་བུ་རྣམས་རྩཝ་ལྟར་བོར་ནས་ནི། །མི་མཚུངས་སེམས་ཅན་དོན་ཕྱིར་ཐུགས་རྗེས་ཐུགས་བརླན་པ། །འཇིག་རྟེན་མགོན་སྲས་དེ་དག་རྣམས་ལ་ཕྱག་འཚལ་ལོ། །ཡི་དགས་ལྟོགས་ལ་ཆུ་དང་རོ་བརྒྱའི་ཟས་རྣམས་དང ། །དེ་བཞིན་སྐྱེ་བོའི་ནོར་འདོད་སྙིང་དང་ལྡན་པ་ལ། །ཐུགས་རྗེ་སྤྱོད་ཅིང་རྣམ་པ་སྣ་ཚོགས་ཚིམ་མཛད་པ། །བྱང་ཆུབ་སེམས་དཔའ་ཁྱུ་མཆོག་དེ་ལ་སྐྱབས་སུ་མཆི། །གང་དག་མནར་མེད་པ་ཡང་རབ་ཏུ་བསིལ་མཛད་པས། །མཆོག་ཏུ་ཚ་བའི་སེམས་ཅན་དམྱལ་བ་འང་བསིལ་བར་འགྱུར། །རང་བདེ་མི་གཟིགས་སེམས་ཅན་དོན་བརྩོན་ཐུགས་ལྡན་པ། །འཇིག་རྟེན་འགོན་སྲས་མཉམ་པ་མེད་དེ་དེ་ལ་ཕྱག་འཚལ་ལོ། །གང་དག་སྲིད་པར་འཁོར་བའི་སྲིད་པའི་སྐྱོན་ལས་གྲོལ། །སྟོང་པ་གསུང་ཡང་ལས་ཀྱི་འབྲས་བུ་མི་འདོར་ཞིང ། །ཡེ་ཤེས་མེ་ཡིས་རྙོག་པ་བསྲེགས་ཀྱང་ཐུགས་རྗེས་བརླན། །སྤྱོད་པ་བརྟག་མེད་དབང་ལྡན་དེ་ལ་ཕྱག་འཚལ་ལོ། །ཀྱེ་མ་དཔལ་ལྡན་རྡོ་རྗེའི་སྙིང་པོ་བདེ་གཤེགས་སྲས། །མཚན་གྱིས་མཚན་བཏབ་སྐུ་ལས་འོད་སྟོང་མང་བྱུང་བའི། །དྲི་བ་རྣམས་དང་སྣ་ཚོགས་གླུ་ཡིས་བདག་ཅག་སིམ། །སྐད་ཅིག་གིས་ནི
107.11a
དམྱལ་བས་སུམ་བཅུའི་ལྷ་དབང་གྱུར། །བདག་ཅག་རྣམས་ཀྱིས་རྒྱལ་དང་དེ་བཞིན་རྒྱལ་སྲས་དང ། །དེ་དག་རྣམས་ཀྱིས་གསུངས་པ་མཆོག་ཏུ་ཞི་ཆོས་ལ། །གུས་བསྟོད་དགེ་བ་རྒྱ་ཆེན་དེ་རིང་གང་ཐོབ་པ། །དེ་མྱུར་འཇིག་རྟེན་ཐམས་ཅད་བདེ་གཤེགས་ཐོབ་པར་ཤོག་།དེ་ལྟར་ཚུལ་དང་འདྲ་བའི་ཚིགས་སུ་བཅད་པ་རྣམས་ཀྱིས་བཅོམ་ལྡན་འདས་ལ་བསྟོད་ནས། བཅོམ་ལྡན་འདས་ཀྱིས་གནང་སྟེ། དེ་དག་རང་རང་གི་རིན་པོ་ཆེའི་གཞལ་མེད་ཁང་གི་ཁང་པ་བརྩེགས་པ་རྣམས་སུ་འཁོད་དེ་ཆོས་ཉན་པའི་ཕྱིར་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་བྱང་ཆུབ་སེམས་དཔའི་རྫུ་འཕྲུལ་གྱི་ཆོ་འཕྲུལ་ཆེན་པོ་འདི་ལྟ་བུ་འདི་བསྟན་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་གསང་བ་པའི་བདག་པོ་ལག་ན་རྡོ་རྗེ་དང ། དེ་བཞིན་གཤེགས་པའི་རྡོ་རྗེའི་འཁོར་གྱི་ཁྱམས་ཆེན་པོ་ཐམས་ཅད་དང་ལྡན་པ་ལ་མཆོད་པའི་སྤྲིན་ཆེན་པོ་རྣམས་ཀྱིས་མཆོད་ནས་ཏིང་ངེ་འཛིན་དེ་ལས་ལངས་ཏེ་བར་སྣང་ལས་བབས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་ལན་འབུམ་ཕྲག་དུ་མ་མཐའ་ཡས་མུ་མེད་པར་བསྐོར་བ་བྱས་ནས་པུས་མོ་གཡས་པའི་ལྷ་ང་རིན་པོ་ཆེའི་པད་མའི་སྙིང་པོ་ལ་བཙུགས་ཏེ། བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ལ་བལྟའོ། །རིགས་ཀྱི་བུ་དེ་དག་ཐམས་ཅད་ཀྱང་དགའ་བ་དང་མགུ་བ་སྐྱེས་ནས་དེ་བཞིན་དུ་བཅོམ་ལྡན་འདས་ལ་བལྟའོ། །བལྟས་ནས་ཀྱང་སྒྲ་སྐད་ཀྱི་ང་རོ་གཅིག་ཏུ་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །དྲན་པའི་གཞུས་འཕངས་པ་ཡི་ཤེས་རབ་མདའ་མང་གིས། །མ་འཕངས་མཐུར་ལྡན་བདུད་བཞི་ཕམ་མཛད་ཅིང ། །འཇིག་རྟེན་ཉོན་མོངས་ཉེན་པའི་མུན་པ་བསལ་མཛད་ནས། །བླ་མ་སྤྲིན་མེད་ཟླ་བ་བཞིན་དུ་ལྷང་ངེའོ། །དམ་ཆོས་འོད་མང་གཏི་མུག་བཅོམ་པ་དྲ་བ་ཡིས། །འདུལ་བའི་པད་མའི་གནས་རྣམས་ཁ་བྱེ་ནས། །ཡེ་ཤེས་ནམཁའ་ཆེ་ལ་དྲི་མེད་འབར་བའི་གཟུགས། །ཉི་མ་ཇི་བཞིན་གདུང་བར་བགྱི་བའི་བདུད་སྡེ་གདུངས། །མུ་སྟེགས་ཅན་གྱི་ང་རྒྱལ་མཐའ་དག་ཕམ་མཛད་ཅིང ། །འགྲོ་བའི་འདོད་ཆགས་རབ་གདུང་མ་ལུས་རབ་ཞི་མཛད། །དགེ་བའི་ལོ་ཏོག་རྩི་ཆེན་ཡང་དག་འཕེལ་མཛད་པ། །དགེ་བའི་ཆར་པ་ཕབ་ཅིང་འབྲུག
107.11b
ལྟར་སྒྲག་ཏུ་གསོལ། །མགོན་པོ་མུ་སྟེགས་ཅན་གྱི་ཝ་བརྒྱ་ཕམ་མཛད་ཅིང ། །བདུད་རྣམས་བཅོམ་སྟེ་བྱང་ཆུབ་དམ་པ་རབ་བརྙེས་ནས། །མ་འདྲེས་བསགས་པའི་བདེན་པའི་སྟོབས་ཀྱིས་མཐུ་མངའ་བ། །སྐྱེ་བའི་འཇིགས་ལས་རབ་གྲོལ་སེང་གེ་ཇི་བཞིན་སྒྲོགས། །སྤྱོད་པ་ཟབ་ཅིང་བརྟན་ལ་རྟག་ཏུ་མི་དཔོགས་པ། །སེམས་ཅན་གནས་གྱུར་སྟོབས་དང་ཏིང་འཛིན་ནོར་བུ་བཀྲམ། །དྲི་མེད་ཆོས་ལྷུན་འདུལ་བའི་རི་བོས་རྣམ་འཛིན་པ། །ཡེ་ཤེས་རྒྱ་མཚོ་མཆོག་ཁྱོད་སྐྱེ་དགུ་མཆོག་གཙོ་བ། །ཚུལ་ཁྲིམས་བཟང་པོའི་རྩ་བ་སྦྱིན་པའི་ཆུས་བཏབ་འཕེལ། །བྱམས་དང་བཟོད་པའི་མེ་ཏོག་ཡལ་ག་འཁྲུངས་པས་མཛེས། །བྱང་ཆུབ་ཡན་ལག་ལམ་གྱི་འབྲུ་ཆགས་འདོད་བྱས་བསྟེན། །བསོད་ནམས་དཔག་བསམ་ཤིང་ཁྱོད་དེ་རིང་ག་ལས་བྱུང ། །སུམ་བཅུ་རྩ་གཉིས་འབར་བའི་མཚན་གྱིས་ཡན་ལག་བརྒྱན། །དཔེ་བྱད་བཟང་མཆོག་རིན་ཆེན་མན་ཤེལ་གྱིས་བསྐོར་ཅིང ། །ས་དང་དབང་དང་དམ་མཆོག་ཕུར་པ་བརྟན་བཏབ་པ། །ལྷུན་པོ་བཞིན་དུ་མི་གཡོ་ཁྱོད་ནི་འགྲོ་བར་མཛེས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས། བཅོམ་ལྡན་འདས་ཀྱིས་གནང་སྟེ། རིན་པོ་ཆེའི་པད་མའི་སྙིང་པོ་ལ་ཕྱོགས་གཅིག་ཏུ་འདུག་གོ་།རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པད་མའི་སྙིང་པོ་དག་ལ་འཁོད་དོ། །དེ་བཞིན་དུ་སྦྱར་ཏེ། དེ་ལྟར་ལྷོ་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གྱི་སྙིང་པོ་བརྩེགས་པ་རྣམ་པར་བསྒྲགས་པའི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དཔལ་འབྱུང་བ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་ཏོག་ཅེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་འདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིགས་ཀྱི་བུ་དེ་དག་དང་ལྷན་ཅིག་ཏུ་རིན་པོ་ཆེའི་པད་མའི་སྙིང་པོ་ལ་ཕྱོགས་གཅིག་ཏུ་འདུག་པའི་བར་དུའོ། །དེ་བཞིན་དུ་ནུབ་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི
107.12a
སངས་རྒྱས་ཚེ་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་ཞེས་བྱ་བ་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅེས་བྱ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པད་མའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པད་མའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་བྱང་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་མཆོག་རང་བཞིན་གྱིས་རྣམ་པར་ངེས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཐམས་ཅད་འབྱུང་བ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་རྒྱལ་མཚན་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངསུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པད་མའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པད་མའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་བྱང་ཤར་གྱི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་མཐའ་ཡས་རབ་གསལ་དབང་ཕྱུག་གི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དཔལ་བརྩེགས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བརྟན་པ་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པད་མའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པད་མའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་ཤར་ལྷོའི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་ཏོག་གི་རྒྱལ་མཚན་གྱི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཐེ་ཚོམ་དང་བྲལ་བ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ
107.12b
གྲོས་བཟང་པོ་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་འདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པད་མའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པད་མའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་ལྷོ་ནུབ་ཀྱི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་རྩལ་གྱིས་རྣམ་པར་གནོན་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རིན་པོ་ཆེ་བརྩེགས་པ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེ་བློ་གྲོས་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་ཆོས་ཉན་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་རིན་པོ་ཆེའི་པད་མའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པད་མའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་འོག་གི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་པད་མ་ལ་རབ་ཏུ་གནས་པའི་རི་དབང་གི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་པད་མ་བཀོད་པ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་བློ་གྲོས་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་འདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པད་མའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པད་མའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་སྟེང་གི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཡུལ་ལས་རྣམ་པར་རྒྱལ་བའི་དཔལ་གྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདུད་ཀྱི་ཚེར་མ་དཀྲུགས་པ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བདུད་ཀྱི་སྒྲིབ་པ་ལས་རྣམ་པར་རྒྱལ་བ་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག
107.13a
འབུམ་ཕྲག་དུ་མས་ཡོངས་སུ་བསྐོར་ཏེ་འདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པད་མའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པད་མའི་སྙིང་པོ་དག་ལ་འཁོད་པའི་བར་དུའོ། །དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མི་མཇེད་འདིར་བྱང་ཆུབ་སེམས་དཔའི་རྫུ་འཕྲུལ་གྱི་རྣམ་པར་འཕྲུལ་པ་དུ་མ་བསྟན་པས་གཞལ་མེད་ཁང་དང ། མེ་ཏོག་གི་སྤྲིན་དང་རིན་པོ་ཆེའི་སྤྲིན་དང ། ཕྱེ་མའི་སྤྲིན་དང ། སྤོས་དང་བྱུག་པ་དང ། གདུགས་དང་རྒྱལ་མཚན་དང ། བ་དན་དང ། རྣམ་པར་རྒྱལ་བའི་བ་དན་གྱི་སྤྲིན་དང ། རིན་པོ་ཆེ་སྤུག་དང ། རྡོའི་སྙིང་པོ་དང ། བཻ་དཱུརྱ་དང་ཨན་ད་རྙིལ་དང ། བྱི་རུ་དང ། མར་གད་དང ། མུ་ཏིག་དམར་པོ་དང་འཛམ་བུའི་ཆུ་བོའི་གསེར་གྱི་སྤྲིན་དང ། དཔག་བསམ་གྱི་ཤིང་ལྗོན་པ་དང ། རིན་པོ་ཆེའི་པད་མ་དུ་མས་ཁེབས་པའི་རྫིང་གིས་ལེགས་པར་བརྒྱན་པར་གྱུར་ཏོ། །འཇིག་རྟེན་གྱི་ཁམས་འདི་ཇི་ལྟ་བ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་བསམ་གྱིས་མི་ཁྱབ་ཅིང་དཔག་ཏུ་མེད་པ་གཞལ་དུ་མེད་ཅིང་བརྗོད་དུ་མེད་པར་གཏོགས་པ་གང་གཱའི་ཀླུང་གི་བྱེ་མ་སྙེད་ལས་ཤིན་ཏུ་འདས་པའི་འཇིག་རྟེན་གྱི་ཁམས་དག་ན་གསང་བ་པའི་བདག་པོ་ལག་ན་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་རྣམ་པར་འཕྲུལ་བའི་བྱིན་གྱི་བརླབས་ཀྱིས་དེ་བཞིན་དུ་ལེགས་པར་བརྒྱན་པར་ཀུན་ཏུ་སྣང་ངོ ། །འཇིག་རྟེན་གྱི་ཁམས་དེ་དག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་བཞུགས་ཏེ་འཚོ་ཞིང་གཞེས་པ་དེ་དག་ཐམས་ཅད་དེ་ན་བཞུགས་བཞིན་དུ་ཕྱག་གཡས་པ་གསེར་གྱི་ཁ་དོག་ལྟ་བུ་བརྐྱང་སྟེ། འཇམ་ཞིང་མཉེན་ལ་རབ་ཏུ་གཞོན་ཞིང་པད་མ་དང་ཡལ་ག་གཞོན་ཤ་ཆགས་ཤིང་འཇམ་པའི་སོར་མོའི་ངོས་ཅན་གདུགས་དང ། རྒྱལ་མཚན་དང ། ལྕགས་ཀྱུ་དང་བུམ་པ་དང ། ཉ་དང་སྒོ་ཁང་དང ། གཞལ་མེད་ཁང་དང་དུང་དང ། རྡོ་རྗེ་དང་པད་མ་དང ། དཔལ་བེའུ་དང་འཁོར་ལོའི་མཚན་གྱིས་བརྒྱན་པ། ཚེ་རབས་བྱེ་བ་ཁྲག་ཁྲིག་འབུམ་ཕྲག་དུ་མ་ནས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་མཛད་པའི་རྒྱུ་འཐུན
107.13b
པས་མངོན་པར་གྲུབ་པའི་དཔེ་བྱད་བཟང་པོས་རྣམ་པར་སྤྲས་པ། སེན་མོ་ཟངས་འདྲ་ཞིང་རྒྱས་ལ་སྣུམ་ཞིང་སྲབ་པའི་ནོར་བུའི་མདོངས་ཀྱི་མེ་ཏོག་གི་འོད་ཟེར་གྱིས་ཁྲིག་མ་མཛེས་པར་གྱུར་པ་སེམས་ཅན་ཐམས་ཅད་ལ་མི་འཇིགས་པ་སྦྱིན་པ་དང་ཡང་དག་པར་འཐུན་པའི་ཕྱག་རྣམས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་ཡང་དག་པར་གཟེང་བསྟོད་པ་དང ། ཡང་དག་པར་དགའ་བར་བྱ་བའི་ཕྱིར་སྤྱི་བོ་ལ་བྱུགས་ནས་དུས་གཅིག་ཏུ་སྒྲ་སྐད་གྱི་ང་རོ་གཅིག་གིས་འཇིག་རྟེན་གྱི་ཁམས་ཐམས་ཅད་གོ་བར་མཛད་ཅིང་འདི་སྐད་ཅེས། ཀྱེ་རིགས་ཀྱི་བུ་གང་གི་ཕྱིར་བདུད་སྡིག་ཅན་དང་གཞན་ཡང་དེ་བཞིན་གཤེགས་པའི་བསྟན་པ་ལ་མ་དད་ཅིང་སྡང་བའི་བགེགས་དང་ལོག་འདྲེན་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སེམས་ཅན་ཐམས་ཅད་ཀྱི་དགེ་བའི་རྩ་བ་གཅོད་པའི་ཕྱིར་ཞུགས་པ་ཐམས་ཅད་ཚར་གཅད་པ་དང་རྣམ་པར་གཞིག་པ་དང ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་དང་པོ་བསྐྱེད་པ་སེམས་ཞུམ་པ་བརྩོན་འགྲུས་བརྟན་པོ་མ་ཡིན་པའི་གོ་ཆ་བགོས་པ་རྣམས་ཀྱང་ཡང་དག་པར་གཟེང་བསྟོད་པ་དང ། རབ་ཏུ་དགའ་བར་བྱ་བ་ནས་ཁམས་གསུམ་པར་གཏོགས་པའི་སེམས་ཅན་ཐམས་ཅད་ཀྱི་བར་དག་ཀྱང་མྱ་ངན་ལས་འདས་པ་ཐོབ་པར་བྱ་བ་དང ། སངས་རྒྱས་དང་ཆོས་དང ། དགེ་འདུན་གྱི་རིགས་མི་གཅད་པའི་ཕྱིར་ཁྱོད་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བསོད་ནམས་དང་ཡེ་ཤེས་ཀྱི་ཚོགས་བསམ་གྱིས་མི་ཁྱབ་པར་བསགས་པ་ཡོངས་སུ་རྫོགས་པས་གྲུབ་པའི་མཚན་དང་དཔེ་བྱད་བཟང་པོས་སྤྲས་པ། ཏིང་ངེ་འཛིན་དང་དབང་དང་གཟུངས་དང་སྟོབས་དང་བྱང་ཆུབ་ཀྱི་ཡན་ལག་དང་འཕགས་པའི་ལམ་ཡན་ལག་བརྒྱད་པའི་མཐུས་གྲུབ་པ། སེམས་ཅན་ཐམས་ཅད་ཀྱི་སྡུག་བསྔལ་དང ། ཉོན་མོངས་པའི་སྒྲིབ་པ་ཉེ་བར་ཞི་བ། སེམས་ཅན་དམྱལ་བ་དང་དུད་འགྲོའི་སྐྱེ་གནས་དང ། ཡི་དགས་དང་གཤིན་རྗེའི་འཇིག་རྟེན་དུ་ལྟུང་བའི་འཇིགས་པའི་བདུད་ཀྱི་ཚེར་མ་མ་ལུས་པར་འདོན་པར་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང ། ལྟོ་འཕྱེ་ཆེན་པོ་དང ། དགེ་སློང་དང་དགེ་སློང་མ་དང ། དགེ་བསྙེན་དང་དགེ་བསྙེན་མ་ལ་སོགས་པའི་འཁོར་མངོན་པར་དགའ་བ་ཅན་དག་ལ་ངོ་མཚར་རྨད་དུ་བྱུང་བའི་དགའ་བ་དུ་མ་ཀུན་ཏུ་བསྐྱེད་པ་ལ་སྙོམས་པར་ཞུགས་པ་ནི
107.14a
ལེགས་སོ་ལེགས་སོ་ཞེས་བཀའ་སྩལ་ཏོ། །དེ་ལྟར་སངས་རྒྱས་བཅོམ་ལྡན་འདས་དེ་དག་གིས་གསང་བ་པའི་བདག་པོ་ལག་ན་རྡོ་རྗེ་གཟེངས་བསྟོད་དོ། །རབ་ཏུ་དགའ་བར་མཛད་ནས་རང་རང་གི་ཕྱག་བསྐུམ་སྟེ། རང་རང་གི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཉན་དུ་གཟུད་པའི་ཕྱིར་འཇིག་རྟེན་གྱི་ཁམས་མི་མཇེད་འདིར་བཀྱེའོ། །དེ་དག་གིས་གནང་བས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱིས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཕྱག་འཚལ་ནས་བྱང་ཆུབ་སེམས་དཔའི་རྣམ་པར་འཕྲུལ་པའི་བྱིན་གྱི་བརླབས་ཆེན་པོ་དང ། བྱང་ཆུབ་སེམས་དཔའི་རྫུ་འཕྲུལ་ཆེན་པོས་ཇི་ཙམ་དུ་སྐྱེས་བུ་སྟོབས་དང་ལྡན་པས་ལག་པ་བསྐུམ་པ་ལས་བརྐྱང་བ་དང ། བརྐྱང་བ་ལས་བསྐུམ་པ་ཙམ་གྱི་སྐད་ཅིག་ཐང་ཅིག་ཡུད་ཙམ་དེ་ལ་འཇིག་རྟེན་གྱི་ཁམས་མི་མཇེད་དེར་ཕྱིན་ནས། བཅོམ་ལྡན་འདས་ཀྱིས་གནང་སྟེ་རིན་པོ་ཆེའི་པད་མའི་སྙིང་པོ་དག་ལ་ཕྱོགས་གཅིག་ཏུ་འཁོད་པའི་བར་དུའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེའི་ཚེ་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ་བདུད་སྡིག་ཅན་འདི་རྡོ་རྗེའི་ཞགས་པས་བཅིངས་པ་འདི་ལས་ཁྲོལ་ལ་ཇི་ནས་ཀྱང་སངས་རྒྱས་ལ་སྐྱབས་སུ་འགྲོ་བར་འགྱུར་བ་དང ། ཆོས་ལ་སྐྱབས་སུ་འགྲོ་བར་འགྱུར་བ་དང ། དགེ་འདུན་ལ་སྐྱབས་སུ་འགྲོ་བར་འགྱུར་བ་དང ། གཞན་ཡང་གང་དག་ལྷ་དང ། ཀླུ་དང་གནོད་སྦྱིན་དང་དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང་ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་གང་དག་ཇི་ཙམ་དུ་དེ་བཞིན་གཤེགས་པའི་བསྟན་པ་ལ་གནས་པར་འགྱུར་བ་དང ། དེ་བཞིན་གཤེགས་པའི་བསྟན་པ་ལ་ཞུགས་ནས་ཀྱང་ཇི་ནས་ཁོང་དུ་ཆུད་པར་འགྱུར་བ་དེ་ལྟར་གྱིས་ཤིག་།དེ་སྐད་ཅེས་བཀའ་སྩལ་པ་དང ། གསང་བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ཀྱི་ལྟར་མཉན་ནས་བཅོམ་ལྡན་འདས་ལ་ལེགས་སོ་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཡང་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས
107.14b
པར་བྱེད་པ་ཞེས་བྱ་བ་ལ་སྙོམས་པར་ཞུགས་སོ། །གསང་བ་པའི་བདག་པོ་ལག་ན་རྡོ་རྗེས་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་ལ་སྙོམས་པར་ཞུགས་མ་ཐག་ཏུ། དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་ཏེ་འགུལ་རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །གསང་བ་པའི་བདག་པོ་ལག་ན་རྡོ་རྗེ་ཡང་མེ་ལྕེ་འབར་བ་གཅིག་ཏུ་གྱུར་ཏེ། འབར་རབ་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འཇིགས་སུ་རུང་བའི་མཆེ་བ་རྣོན་པོ་དྲག་པོ་གཟངས་ཅན་འཇིགས་པ་ཆེན་པོ་སྐྱེད་པ་གཙིགས་ཏེ། མཆེ་བ་མནན་ནས་མེ་ལྕེ་ཆེན་པོ་ལྟར་སྨ་ར་སེར་ཞིང་འཇིགས་འཇིགས་ལྟར་འདུག་སྟེ། མི་བཟད་པ་རྣ་བ་ལས་འཕྱང་བའི་སྦྲུལ་དུག་འཐོར་བ་དང ། བ་ལང་རྣ་ལྟ་བུ་དང ། གཟར་བུ་ལྟ་བུ་དང ། སྦྲུལ་ཆེན་པོ་ཁ་གདངས་པའི་ཁ་ནས་བྱུང་བའི་མཆེ་བའི་རྩེ་མོ་ནས་དུག་དྲག་པོ་འབར་བ་འབྱུང་བའི་ཚོགས་ཀྱི་ཕྲེང་བས་བཞིན་དུ་མེ་འབར་བ། ལག་པ་སྟོང་ཕྲག་དུ་མ་ལ་རྡོ་རྗེ་དང་ཞགས་པ་དང ། གཏུན་ཤིང་དང་གཏུན་ཤིང་རྐེད་ཉག་དང་རལ་གྲི་དང་འཁོར་ལོ་དང་ལྕགས་སྒྲོག་ལ་སོགས་པ་ཐོགས་པའི་མཚོན་ཆའི་རྩེ་མོ་ལ་མེ་སྟག་རབ་ཏུ་འཕྲོ་བའི་སྣང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཁོངས་སུ་གཏོགས་པའི་གནོད་སྦྱིན་དང ། སྲིན་པོ་དང ། ཡི་དགས་དང ། ཤ་ཟ་དང་མ་མོ་དང ། འབྱུང་པོའི་གདོན་དང་བགེགས་དང ། ལོག་འདྲེན་ལ་སོགས་པ་སྡང་བ་རབ་ཏུ་སྡང་བའི་སེམས་ཅན་སྐྲག་པར་བྱེད་པ་རི་དགས་ཀྱི་དབང་པོའི་ལྤགས་པ་ཁྲག་དང་བཅས་པ་ཤམ་ཐབས་སུ་དགོས་པ། སྦྲུལ་ཆེན་པོའི་ལུས་ཀྱིས་རྒྱ་གྲམ་དུ་དམ་དུ་བཅིངས་པ། འཇིགས་པ་བས་ཀྱང་འཇིགས་པར་བྱེད་པ། འཆི་བདག་ཀྱང་སྐྲག་པར་བྱེད་པ། ཁམས་གསུམ་པ་ཐམས་ཅད་ཀྱིས་བསྡུས་པ་ལྟ་བུའི་ལུས་དང་ལྡན་པའི་ཁྲོ་བོར་གྱུར་ནས་ལུས་ཀྱི་ཚིགས་ཐམས་ཅད་ལས་ཀྱང་ཁྲོ་བོ་ཁ་དོག་དུ་མ་འདི་ལྟ་སྟེ། ཁ་དོག་སྔོན་པོ་དང ། སེར་པོ་དང་དམར་པོ་དང ། དཀར་པོ་དང་ནག་པོ་སྟེ། ཐམས་ཅད་ཀྱང་རྡོ་རྗེའི་རང་བཞིན་ཅན་ཁྲོ་གཉེར་མི་མཉམ་པས་རྣམ་པར་སྤྲས་པའི་གཉེར་མའི་ཁྲོ་གཉེར་ཅན་གྱི་དཔྲལ་བའི་དབྱེས་ནས་མེ་སྟག་ལྟ་བུའི་རྔུལ་གྱི་ཐིགས་པ་རྩུབ་པོ
107.15a
འཛག་པ་ལས་དུག་འཆང་རྣམ་པ་སྣ་ཚོགས་ཀུན་ཏུ་བྱུང་བས་ཡན་ལག་དང་ཉིང་ལག་ཀུན་ཏུ་དཀྲིས་པའི་མངོན་རྟགས་ཅན་དུ་གྱུར་ཅིང་རྡོ་རྗེ་དྲག་ཤུལ་ཅན་དུ་སྣང་སྟེ། མཆེ་བས་མི་བཟད་པར་འདུག་པའི་ཁ་གདངས་པ་ལས་ཧ་ཧ་ཞེས་གད་མོ་རྟ་གད་འབྱུང་ཞིང ། འཇིག་པའི་དུས་ཀྱི་རླུང་གིས་ཆར་པ་དང་བཅས་པའི་སྤྲིན་དཀྲུགས་པ་ལས་ཆར་གྱི་རྒྱུན་རགས་པ་འབབ་པས་ཡོངས་སུ་གང་བས་རྒྱ་མཚོ་དཀྲུགས་ནས་རླབས་ཆེན་པོ་གཡོ་བ་དང ། རྟ་རྒོད་མའི་ཁ་ནས་མེ་འབྱུང་བ་ལྟ་བུའི་ཧཱུཾ་ཞེས་བྱ་བ་ཟབ་ཅིང་བརྟན་པས་རྒྱུ་བའི་འབྱུང་པོའི་ཚོགས་འཇིགས་སྐྲག་སྟེ་འབྱེར་ཞིང་འཐོར་ནས་དངངས་ཏེ་སྐྱབས་སུ་དོང་ཞིང་འདུད་པས་ཉི་མ་སྟོང་བས་འབར་བའི་ལུས་རྣམས་མཐོང་བ་ན། སྣ་སྒར་སྒུར་ཅན་ཞོམ་པ་ལྟ་བུའི་བུ་ག་ཟབ་མོའི་སྦུབས་ཀྱི་ནང་ནས་སྦྲུལ་སྣ་ཚོགས་འཁྱིལ་པའི་གཙུག་གི་ནོར་བུའི་འོད་ཀྱིས་འགྲམ་པ་རྣམ་པར་མཛེས་པ། གློག་སྟོང་འདུས་པ་ལྟར་སེར་ཞིང་དམར་བའི་མིག་གི་འབྲས་བུའི་འོད་ཟེར་གྱིས་སྐྲའི་ཚོགས་རྩུབ་ཅིང་བཤོར་ལ་གྱེན་དུ་འགྲེང་བའི་རྩེ་མོ་བརྒྱན་ཅིང་འདྲེས་ཏེ་གསལ་བར་གྱུར་པ། སྦྲུལ་གྱི་གདེངས་ཀ་སྟོང་གིས་གདུགས་བྱས་ཤིང་སྦྲུལ་རྣམ་པ་སྣ་ཚོགས་ཀྱི་དོ་ཤལ་དང ། སྐ་རགས་དང་དཔུང་བརྒྱན་དང ། གདུ་བུ་དང ། རྣ་ཆས་ལུས་བརྒྱན་པ། རྡོ་རྗེ་འབར་བ་དྲི་མ་མེད་ཅིང་དྲག་ཤུལ་ཅན་མི་བཟད་པ་ལག་ན་ཐོགས་པ་མཛུབ་མོ་རྣམས་ལས་ཧཱུཾ་ཞེས་བྱ་བའི་སེང་གེའི་སྒྲ་ཆེན་པོ་དག་གིས་བགེགས་དང་ལོག་འདྲེན་ཐམས་ཅད་ཀུན་ཏུ་བསྡིགས་པ་དག་འཐོན་ཏེ། གང་དེ་དག་གི་མིག་དང་ཁ་རྣམས་ནས་གནམ་གྲུམ་པ་ལྟ་བུའི་སྒྲ་ཆེན་པོའི་ཚོགས་ལས་མེ་ལྕེ་ཆེན་པོ་འབར་བའི་ཚོགས་ཀྱི་སྣང་བ་བྱུང་སྟེ། དེས་སྡང་བའི་བགེགས་དང་ལོག་འདྲེན་ལ་སོགས་པ་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སྡིག་པ་ཅན་སྡིག་པའི་སེམས་དང་ལྡན་པ། སྡང་བ་ཅན་སྡང་བའི་སེམས་དང་ལྡན་པ་རྣམས་ཚིག་པར་བྱེད། རྨོངས་པར་བྱེད་འཚོག་པར་བྱེད་དེ། མི་བཟད་པ་དྲག་པ་རྩུབ་པ་སྡུག་བསྔལ་བ་ཡིད་དུ་མི་འོང་བའི་ཚོར་བ་མྱོང་བར་བྱེད་དོ། །དེ་དག་ཚོར་བས་ཉེན་པས་དཀོན་མཆོག་གསུམ་ལ་སྐྱབས་སུ་དོང་ངོ ། །དེའི་ཚེ་བདུད་སྡིག་ཅན་གྱིས་བགེགས་དང་ལོག་འདྲེན་དེ་དག་ཚོར་བ་ཆེན་པོས་ཉེན་ཏེ་དཀོན་མཆོག་གསུམ་ལ་སྐྱབས་སུ་དོང་བ་མཐོང་ནས་འཇིགས་དངང་སྐྲག་སྟེ་སྐྱབས་མ་རྙེད་ནས་རླུང་དྲག་པོས་བསྐྱོད་པའི་ཤིང་བཞིན་དུ་འདར
107.15b
རབ་ཏུ་འདར་ཏེ། ངུ་བར་འདོད་ན་ཡང་ངུ་མ་ནུས་ནས་རི་མོ་བཞིན་དུ་ལུས་ཐམས་ཅད་གཡོ་བ་མེད་པར་གྱུར་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེ་སངས་རྒྱས་ཀྱི་མཐུས་བདུད་སྡིག་ཅན་འདུལ་བར་བྱེད་དེ། སྡང་བ་དང ། གདོན་དང ། བགེགས་དང་ལོག་འདྲེན་ཐམས་ཅད་དང ། བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ། རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ལྟ་བུའི་གཟུགས་སུ་འདུག་པའི་རྐང་པ་གཉིས་ལས་ཁྲོ་བོ་འབར་ཞིང་འཇིགས་འཇིགས་ལྟར་འདུག་པ་དྲག་ཤུལ་གྱི་གཟུགས་ཅན། སེང་གེའི་སྒྲ་ཆེན་པོ་ཧཱུཾ་ཞེས་བྱ་བ་འདི་གཉིས་ཕྱུང་སྟེ། དེ་གཉིས་སྐར་མདའ་བཞིན་དུ་ནམ་མཁའི་དཀྱིལ་དུ་རྒྱང་རིང་དུ་འཕུར་ཏེ། ནམ་མཁའ་ལ་གནས་པའི་ཤུགས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལན་འབུམ་ཕྲག་དུ་མ་མཐའ་ཡས་མུ་མེད་པར་བསྐོར་བ་བྱས་ཏེ། གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཅི་བགྱི་བཀའ་སྩོལ་ཅིག་།དེ་ནས་གསང་བ་པའི་བདག་པོ་ལག་ན་རྡོ་རྗེ་ཅང་མི་སྨྲ་བར་འདུག་སྟེ། ཡང་དཔྲལ་བའི་དཀྱིལ་ནས་རྡོ་རྗེ་ཁྲོ་བོ་འཇིགས་པ་ཆེན་པོའི་གཟུགས་ཅན་མཆེ་བ་མི་བཟད་པ་དྲག་པས་འཇིགས་སུ་རུང་བའི་ཁ་གདངས་ཏེ། མཆུ་མ་རུངས་པར་བསྒྱུར་བའི་ཁ་ནས་དུས་ཀྱི་ཐ་མ་འཇིག་པའི་ཚེ་རྣམ་པར་འཐོར་བའི་རླུང་དྲག་པོའི་ཤུགས་ཀྱིས་རབ་ཏུ་བསྐྱོད་པའི་སྤྲིན་ནག་པོའི་ཚོགས་རབ་ཏུ་སྒྲོག་པས་རྣམ་པར་དཀྲུགས་པའི་རྒྱ་མཚོ་ཆེན་པོའི་སྒྲ་དྲག་པོ་ལྟ་བུའི་ཧཱུཾ་ཞེས་བྱ་བའི་སེང་གེའི་སྒྲས་གང་བ། བགེགས་དང་ལོག་འདྲེན་ཐམས་ཅད་འཇིགས་ནས་འབྲོས་ཤིང་སྒྱིད་ལུག་ནས་ཕྱོགས་བསླད་པར་བྱེད་པ། ལག་པ་དང་རྐང་པ་དང ། སེན་མོ་དང་མིག་དང ། ག་ཚོམ་དང་སྐྲ་ཐམས་ཅད་རྡོ་རྗེ་འབར་བར་སྣང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་པ། གཟི་བརྗིད་ཐམས་ཅད་ཀྱི་གཟི་བརྗིད་རྣམས་རང་གི་གཟི་བརྗིད་ཀྱིས་ཟིལ་དུ་རླག་པར་བྱེད་ཅིང་རྒྱང་རིང་དུ་བྱེད་པའི་རྡོ་རྗེ་འབར་བའི་སྣང་བ་དེས་རྒྱུ་སྐར་དང ། གཟའ་དང་སྐར་མ་དང ། ནོར་བུ་རྣམས་ཀྱི་འོད་ལམ་མེར་མ་ཡིན། ལྷན་ནེར་མ་ཡིན། ལྷང་ངེར་མ་ཡིན་པར་བྱེད་པ། གང་ཉི་མ་དང་ཟླ་བ་རྫུ་འཕྲུལ་ཆེ་བ། དབང་ཆེ་བར་གྲགས་པ། མཐུ་ཆེ་བ་ཡང་ལྷམ་མེར་མ་ཡིན། ལྷན་ནེར་མ་ཡིན།
107.16a
ལྷང་ངེར་མ་ཡིན་པར་བྱེད་པ། དེ་བཞིན་གཤེགས་པའི་འོད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་ལ་རབ་ཏུ་གནས་པ་རྣམས་ཀྱི་འོད་མ་གཏོགས་པར་འོད་གཞན་ཐམས་ཅད་མོག་མོག་པོར་བྱེད་པ་གཞན་ཕྱུང་ངོ ། །དེ་ནས་རྡོ་རྗེ་ཁྲོ་བོ་དེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལན་འབུམ་ཕྲག་དུ་མ་མཐའ་ཡས་མུ་མེད་པར་བསྐོར་བ་བྱས་ཏེ། བཅོམ་ལྡན་འདས་ཀྱིས་གནང་ནས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཅི་བགྱི་བཀའ་སྩོལ་ཅིག་།དེ་ནས་གསང་བ་པའི་བདག་པོ་ལག་ན་རྡོ་རྗེས་ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་དམ་པ་དག་དེང་ལ་བདུད་སྡིག་ཅན་དཀོན་མཆོག་གསུམ་ལ་སྐྱབས་སུ་འཛིན་དུ་ཆུག་ཤིག་།འདི་དམ་ཚིག་ལ་གནས་པར་གྱིས་ཤིག་།གཞན་ཡང་གང་དག་སྡང་བ་གདོན་དང ། བགེགས་དང་ལོག་འདྲེན་ལ་སོགས་པ་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སྡིག་པ་ཅན་སྡིག་པའི་སེམས་དང་ལྡན་པ། སྡང་བ་ཅན་སྡང་བའི་སེམས་དང་ལྡན་པ་དག་དང ། དེ་བཞིན་གཤེགས་པའི་བསྟན་པ་ལ་མི་འཇུག་པ་དང ། མི་རྟོགས་པ་དང ། ཡིད་མི་ཆེས་པ་ཐམས་ཅད་དེ་བཞིན་གཤེགས་པའི་བསྟན་པ་ལ་གནས་པར་གྱིས་ཤིག་དང ། དེས་སེམས་ཅན་ཐམས་ཅད་ཀྱི་ཡུན་རིང་པོའི་དོན་དང ། ཕན་པ་དང་བདེ་བར་འགྱུར་རོ། །དེ་སྐད་ཅེས་སྨྲས་པ་དང ། ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་གིས་གསང་བ་པའི་བདག་པོ་ལག་ན་རྡོ་རྗེའི་ཚིག་མཉན་ནས་དེ་བཞིན་གཤེགས་པའི་བསྟན་པ་ཡང་བཟུང་སྟེ། དུས་གཅིག་ཏུ་སྒྲ་སྐད་ཀྱི་ང་རོ་གཅིག་ཏུ་སེང་གེའི་སྒྲ་ཆེན་པོ་ཧཱུཾ་ཞེས་བྱ་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་འགེངས་ཤིང་གསང་སྔགས་ཀྱི་བཞི་དག་སྨྲས་སོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་ཉན་ཐོས་དང་རང་སངས་རྒྱས་དང ། བྱང་ཆུབ་སེམས་དཔའི་དགེ་འདུན་དང་བཅས་པ་བདུན་པོ་དག་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །རིག་སྔགས་ཀྱི་རྒྱལ་པོ་ཆེན་པོ་རྡོ་རྗེའི་ལྕགས་ཀྱུ་ལ་ཕྱག་འཚལ་ལོ། །རྡོ་རྗེའི་ལུ་གུ་རྒྱུད་ལ་ཕྱག་འཚལ་ལོ། །རྡོ་རྗེའི་གནམ་ལྕགས་ལ་ཕྱག་འཚལ་ལོ། །རྡོ་རྗེའི་ཤུགས་ལ་ཕྱག་འཚལ་ལོ། །
107.16b
རྡོ་རྗེ་བེ་ཅོན་ལ་ཕྱག་འཚལ་ལོ། །རྡོ་རྗེ་ཡན་ལག་དམར་ལ་ཕྱག་འཚལ་ལོ། །སྟོབས་པོ་ཆེ་ལ་ཕྱག་འཚལ་ལོ། །རྡོ་རྗེས་རྣམ་པར་འཇོམས་པ་ལ་ཕྱག་འཚལ་ལོ། །འགྲོ་ལྡིང་བ་ལ་ཕྱག་འཚལ་ལོ། །རྡོ་རྗེ་ཕོ་ཉ་མོ་དྲུག་བཅུ་རྩ་བཞི་ལ་ཕྱག་འཚལ་ལོ། །རྡོ་རྗེའི་ཁྲོ་བོ་རྣམས་ལ་ཕྱག་འཚལ་ལོ། །ཏདྱ་ཐཱ། ཨོཾ་ཏྲ་ཊ་ཏྲ་ཊ། ཏྲོ་ཊ་ཡ་ཏྲོ་ཊ་ཡ་སྥུ་ཊ་སྥུ་ཊ། སྥུ་ཊ་ཡ་སྥུ་ཊ་ཡ། སྥོ་ཊ་ཡ་སྥོ་ཊ་ཡ་ཊ་ཡ། མོ་ཊ་མོ་ཊ། མོ་ཊ་ཡ་མོ་ཊ་ཡ། གྷཱུརྞྞ་གྷཱུརྞྞ། གྷཱུརྞྞཱ་པ་ཡ་གྷཱུརྞྞཱ་པ་ཡ། སརྦ་ས་ཏྭཱ་ནི། ཏྲ་ས་ཏྲ་ས། ཏྲཱ་ས་ཡ་ཏྲཱ་ས་ཡ། བྷྲ་མ་བྷྲ་མ། སཾ་བྷྲཱ་མ་ཡ་སཾ་བྷྲཱ་མ་ཡ། སརྦ་བྷཱུ་ཏ་ནི། ཀུ་ཊ་ཡ་ཀུ་ཊ་ཡ། སཾ་ཀུ་ཊ་ཡ་སཾ་ཀུ་ཊ་ཡ། སརྦ་ཤ་ཏྲཱུཾ་ཎཾ། གྷ་ཊ་གྷ་ཊ། སཾ་གྷ་ཊ་ཡ་སཾ་གྷ་ཊ་ཡ། སརྦ་བིདྱཱ་བཛྲ་བཛྲ། སྥོ་ཊ་ཡ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། ཨུད་ཙ་ཐཱ་ཡ་བཛྲ་བཛྲ། ཧ་ན་བཛྲ་བཛྲ། ད་ཧ་བཛྲ་བཛྲ། པ་ཙ་བཛྲ་བཛྲ། མཱ་ཐ་བཛྲ་བཛྲ། ཨུད་སཱ་དྷ་ཡ་མ་ཧཱ་བཛྲ་བཛྲ། དྷཱ་ར་བཛྲ་བཱ་ཎི་པྲེ་ཡ། ཀ་ཧ་ཀ་ཧ། ཧ་ས་ཧ་ས། མ་ཧཱ་ཊད་ཊ་ཧ་ས། ཁ་ཅིག་ཏུ་རྒྱ་མཚོའི་རླབས་འཁྲུགས་པ་ལྟ་བུར་ཟབ་ཅིང་འཇིགས་སུ་རུང་བའི་ཧཱུཾ་ཞེས་བྱ་བའི་སེང་གེའི་སྒྲས་སྡང་བ་རབ་ཏུ་སྡང་བ་བགེགས་དང་ལོག་འདྲེན་ཀུན་ཏུ་སྐྲག་པར་བྱེད་པ་དང ། སྡང་བ་ཐམས་ཅད་གཞོམ་དུ་གསོལ། འཇོམས་སུ་སྩལ་དུ་གསོལ། ཧཱུཾ་ཧཱུཾ་ཕཊ། བཛྲ་པ་ར་པྲ་ད་སྥོ་ཊ། བསྒྲུབ་པར་བྱ་བ་ལྷ་དང་ལྷ་མ་ཡིན་དང ། ལྟོ་འཕྱེ་ཆེན་པོ་དང ། གནོད་སྦྱིན་དང་སྲིན་པོ་དང ། ཡི་དགས་དང ། ཤ་ཟ་དང་མ་མོ་དང ། འབྱུང་པོ་དང ། གདོན་གྱི་ཚོགས་མཐར་འབྱིན་པ། འབྱེར་བར་མཛད་པ། ཧཱུཾ་ཧཱུཾ་ཕཊ་ཧེ་ཧེ་ཕཊ། ཨ་མོ་གྷ་ཕཊ། རྒྱལ་ཆེན་བཞིའི་རིས་ཀྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང ། ཕྱུགས་དང་རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ་འབྱེར་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། སུམ་བཅུ་རྩ་གསུམ་གྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་ཕྱུགས་དང་རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། འབྱེར་པར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། ལྷའི་དབང་པོ་བརྒྱ་བྱིན་ཁང་ཁྱིམ་དང་བཅས་པ། བུ་དང་ཆུང་མ་དང ། ཕྱུགས་དང་རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། འཐབ་བྲལ་གྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་ཕྱུགས་དང་རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། དགའ་ལྡན་གྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་ཕྱུགས་དང་རྩ་ལག་དང་བཅས་པ་གཡོ་བར་བགྱིད་དུ
107.17a
སྩལ་དུ་གསོལ། ཧཱུཾ`་ཧཱུཾ`་ཕཊ། འཕྲུལ་དགའི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་ཕྱུགས་དང ། རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། གཞན་འཕྲུལ་དབང་བྱེད་ཀྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང་ཕྱུགས་དང ། རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། དེ་བཞིན་དུ་འོད་གསལ་དང ། ཚངས་རིས་ནས་གནས་གཙང་མའི་རིས་འོག་མིན་གྱི་བར་གྱི་ལྷ་ཁང་ཁྱིམ་དང་བཅས་པ། བུ་དང་ཆུང་མ་དང ། ཕྱུགས་དང་རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། འབྱེར་བར་བགྱིད་དུ་སྩལ་དུ་གསོལ། རིག་སྔགས་འཆང་གྲུབ་པ་རྣམས་རེངས་པར་མཛད་དུ་གསོལ། རྨུགས་པར་མཛད་དུ་གསོལ། རྨོངས་པར་མཛད་དུ་གསོལ། གཅུ་བར་གསོལ་གཅད་དུ་གསོལ། གཞིག་ཏུ་གསོལ་རྣམ་པར་གཞིག་ཏུ་གསོལ། མནན་དུ་གསོལ། ཧཱུཾ་ཧཱུཾ་ཕཊ། ཨོཾ་ཁྲོ་བོ་ཁྲོ་བོ་ཆེན་པོ་རྣམ་པར་བཀྲ་བ། སེར་སྐྱ་པོ་ནག་པོ། དམར་པོ་སེར་པོ། མི་ཕམ་པ། རྟག་ཏུ་འབར་བའི་ཁྲོ་བོ། སུ་རུ་སུ་རུ། མུ་རུ་མུ་རུ་མུ་རུ། ཏུ་རུ་ཏུ་རུ་ཏུ་རུ། གྷུ་རུ་གྷུ་རུ་གྷུ་རུ། དྷུ་རུ་དྷུ་རུ་དྷུ་རུ། ཐ་ར་ཐ་ར་ཐ་ར། བྷ་ར་བྷ་ར། ཧ་ར་ཧ་ར། ཡ་ར་ཡ་ར། མ་ར་མ་ར། ཀུ་ཧུ་ཀུ་ཧུ། ཙི་ལི་ཙི་ལི། མི་ལི་མི་ལི། ལུ་ཊུ་ལུ་ཊུ། སརྦ་ཊཱ་ལཱ་མ་མ་ཧཱུཾ། པུ་ལུ་པུ་ལུ་ལེན་ཏམ། ལོ་ཧ་སི་ལེན་ཏཱམ། མུ་ལུ་ལང་ཁཱ་སེ། ཙུ་ལུ་ཙུ་ལེན་ཏམ། མ་ལུ་བུ་ལེན་ཏམ། མ་ལུ་རུ་བི། ཀུརྦི་པུརྦ། ལེ་ཎྱུ་སྤྱུ་ར་གྷ་ཎྱུ་སྤུ་བི་རི་ཙུ། སུ་རུ་སུ་རུ། མུ་རུ་མུ་རུ། སུ་མུ་སུ་མུ་རུ་ཊ་ཀ་ཊེ། བི་ག་ཊེ། ནི་ག་ཊེ་ཀ་ཊ་བི་ཀ་ཊེ་ནི་ཀ་ཊེ། ཀ་ཊ་བི་ཀ་ཊེ། ནི་ཀ་ཊེ། ཀ་ཊདི་ཀ་ཊེ་ཛ་ཡེ་བི་ཛ་ཡེ། ཛ་ཡན་ཏི། བི་ཛ་ཡན་ཏི། ཏི་མིང་གི་སི། མ་ཧཱ་ཏི་མིང་གི་སི། གྷུ་ཏང་ག་མེ། གྷུ་ཏ་བཱ་རཱ་ཡ་ནེ། སྡང་བ་རྣམས་ལ་རྗེས་སུ་འདོམས་པ། མ་དུལ་བ་རྣམས་འདུལ་བ། དྲག་ཤུལ་ཅན་རྣམས་འབྱེར་བར་མཛད་པ། དཔའ་བོ་རྣམས་ཀྱི་ནང་ན་དཔའ་བ། དེས་པ་རྣམས་ཀྱི་ནང་ན་དེས་པ། མ་གྲུབ་པ་རྣམས་གྲུབ་པར་མཛད་པ། གྲུབ་པ་རྣམས་ཆུད་མི་ཟ་བར་མཛད་པ། སེམས་ཅན་ཐམས་ཅད་ལ་ཕན་པ་མཛད་པ། དེ་བཞིན་གཤེགས་པ་ཐམས་ཅད་ཀྱིས་མནས་བསྒགས་པ། སངས་རྒྱས་ཐམས་ཅད་ལ་བསྙེན་བཀུར་མཛད་པ། རྡོ་རྗེའི་རིགས་ཀྱི་རིག་སྔགས་ཐམས་ཅད་ཀྱིས་བྱིན་གྱིས་བརླབས་པ། ཚུར་གཤེགས་ཚུར་གཤེགས། རྡོ་རྗེ་རི་རབ་ཀྱི་རྩེ་མོའི་ཁང་པ་བརྩེགས་པ་ན་བཅོམ་ལྡན་འདས
107.17b
ཀྱི་སྤྱན་སྔར་ལྷ་དང ། ཀླུ་དང་གནོད་སྦྱིན་དང ། དྲི་ཟ་དང་ལྷ་མ་ཡིན་དང ། ནམ་མཁའ་ལྡིང་དང་མི་འམ་ཅི་དང ། ལྟོ་འཕྱེ་ཆེན་པོ་ལ་སོགས་པ་ཐམས་ཅད་ཀྱི་མདུན་དུ་དམ་ཚིག་གང་བཅས་པ་དེ་རྗེས་སུ་བསྐྱང་དུ་གསོལ། རྗེས་སུ་བསྐྱང་དུ་གསོལ། གཤེགས་སུ་གསོལ། མྱུར་དུ་གཤེགས་སུ་གསོལ། བདག་གི་ལས་རྣམས་མྱུར་བ་མྱུར་བར་བསྒྲུབ་ཏུ་གསོལ། སྐྲག་པར་བྱེད་པ། རྡོ་རྗེ་འཛིན་པ་ལག་ན་རྡོ་རྗེ་ལ་ཕྱག་འཚལ་ལོ། །ཧུ་རུ་ཧུ་རུ། གྲུབ་པ་དྲག་པོ་ལག་ན་རྡོ་རྗེ་བཀའ་སྩོལ་ཅིག་སཝཱ་ཧཱ། ཤིན་དུ་གྲུབ་པར་བྱེད་པ་ལ་སཝཱ་ཧཱ། རྡོ་རྗེ་ཆེན་པོ་ལ་སཝཱ་ཧཱ། རྡོ་རྗེ་ཕུར་པ་ལ་སཝཱ་ཧཱ། རྡོ་རྗེ་འཇོམས་པ་ལ་སཝཱ་ཧཱ། རྡོ་རྗེས་བྱིན་གྱིས་བརླབས་པ་ལ་སཝཱ་ཧཱ་རྡོ་རྗེ་ཀཱི་ལི་ཀཱི་ལ་ལ་སཝཱ་ཧཱ། དྲག་པོ་ཀཱི་ལི་ཀཱི་ལ་ལ་སཝཱ་ཧཱ། དམར་པོ་ཀཱི་ལི་ཀཱི་ལ་ལ་སཝཱ་ཧཱ། བྱིས་པ་ཀཱི་ལི་ཀཱི་ལ་ལ་སཝཱ་ཧཱ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་ལ་སཝཱ་ཧཱ། བདག་གི་གནོད་པ་དང ། ནད་མགོ་བ་ཐམས་ཅད་དང ། རིམས་ཐམས་ཅད་མེད་པར་མཛོད་ཅིག་སཝཱ་ཧཱ། དེ་ནས་རྡོ་རྗེ་ཁྲོ་བོ་ཆེན་པོས་འདི་སྐད་སྨྲས་པ་དང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཏེ། ཕྱོགས་དང་ཕྱོགས་མཚམས་ཐམས་ཅད་དང་དེ་བཞིན་དུ་བར་སྣང་ལ་རྡོ་རྗེའི་སྐར་མདའ་ཆེན་པོའི་བེ་ཅོན་འབབ་པར་སྣང་ངོ ། །གནམ་གྲུམ་པའི་སྒྲ་ཆེན་པོ་ཡང་གྲག་གོ་།ཀུན་ནས་ས་ཆེན་པོ་འདི་གྲུམ་པར་ཀུན་དུ་སྣང་ངོ ། །ས་ཆེན་པོའི་སེར་ཀ་དེ་དག་ནས་ཡན་ལག་བརྒྱད་དང་ལྡན་པའི་ཆུའི་རྒྱུན་གྱེན་དུ་བྱུང་ངོ ། །ཆུའི་རྒྱུན་དེ་དག་གིས་རྣམ་པར་འཇིག་པའི་དུས་ཀྱི་ཆུ་བཞིན་དུ་ས་ཆེན་པོ་ཐམས་ཅད་ཀུན་ཏུ་གང་བར་སྣང་ངོ ། །གང་དག་སའི་འོག་ན་གནས་པའི་ཀླུ་ཆེན་པོ་དང ། ལྷ་ཆེན་པོ་དང་ལྷ་མ་ཡིན་ཆེན་པོ་དེ་དག་ཐམས་ཅད་ཀྱང་སའི་འོག་ནས་འཐོན་ཅིང་རི་རབ་ཀྱི་དྲུང་དུ་འཐོན་ཏེ་གྱེན་དུ་བྱུང་ནས་བཅོམ་ལྡན་འདས་ལ་སྐྱབས་སུ་དོང་ངོ ། །དེ་ནས་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སྡང་བ་ཅན་སྡང་བའི་སེམས་དང་ལྡན་པའི་འབྱུང་པོ་དང ། བགེགས་དང་ལོག་འདྲེན་གང་དག་འཁོད་པ་དེ་དག་ཀྱང་ཀུན་ཏུ་འབར་རབ་ཏུ་འབར་ཞིང ། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་པ་དག་གིས་རང་རང་གི་ལུས་ཀུན་ཏུ་རྣམ་པར་འཇོམས་པར་ཤེས་ཏེ། དེ་དག་སྡུག་བསྔལ་མི་བཟད་ཅིང་དྲག་ལ་རྩུབ་པས་ཉེན་ནས་ཧ་ཧ་ཞེས་བྱ་བའི་ངུ་སྐད་འཐོན་ཏེ་ཚིག་འདི་སྐད་ཅེས་ཀྱང་སྨྲས་སོ། །གསང་བ
107.18a
པའི་བདག་པོ་བདག་ཅག་སྐད་ཅིག་གིས་སྲོག་ཀྱང་མ་མཆིས་པར་འགྱུར་དུ་བགྱིད་ན་འཇིགས་པ་ཆེན་པོར་ལྷུང་བ་འདི་ལས་ཡོངས་སུ་བསྐྱབ་ཏུ་གསོལ། བགེགས་དང་ལོག་འདྲེན་རྣམས་ཇི་ལྟ་བ་དེ་བཞིན་དུ་གཞན་འཇིག་རྟེན་གྱི་ཁམས་གཞན་ཐམས་ཅད་ན་གནས་པ་དང ། རི་དང་ཆུ་བོ་དང ། ལྟེང་ཀ་དང་རྫིང་དང ། དུར་ཁྲོད་དང་ཤིང་དང ། ཐིབས་པོ་དང་ཁྲོན་པ་རྙིང་བ་དང ། བཏུང་ཆུ་དང་ལམ་གྱི་བཞི་མདོ་དང ། སུམ་མདོ་དང ། གཙུག་ལག་ཁང་ཞིགས་པ་དང ། གནས་དང་ལྷ་ཁང་ན་གནས་པ་དག་ཐམས་ཅད་ཀྱིས་ཀྱང་གསང་བ་པའི་བདག་པོ་ལག་ན་རྡོ་རྗེ་འཇིགས་པ་ཆེན་པོར་ལྟུང་བ་འདི་ལས་ཡོངས་སུ་བསྐྱབ་ཏུ་གསོལ། ཡོངས་སུ་བསྐྱབ་ཏུ་གསོལ། ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་བཞིན་དུ་ལྷའི་ཁང་པ་ཐམས་ཅད་གཡོས། རབ་ཏུ་གཡོས་ཀུན་ཏུ་རབ་ཏུ་གཡོས་ཏེ། མོག་མོག་པོར་གྱུར་ཅིང་བོད་མེད་པར་ཀུན་ཏུ་སྣང་ངོ ། །བདུད་ཀྱི་ཁྱིམ་ཐམས་ཅད་ཀྱང་ཀུན་ཏུ་འབར། རབ་ཏུ་འབར་ཞིང ། ཀུན་ཏུ་རབ་ཏུ་མཆེད་ཅིང་འབར་ཏེ། མེ་ལྕེ་གཅིག་ཏུ་གྱུར་པར་སྣང་ངོ ། །གང་དག་བདུད་ཀྱི་རིས་ཀྱི་ལྷའི་བུ་དེ་དག་ཐམས་ཅད་ཀྱང་རྡོ་རྗེ་ཁྲོ་བོ་ཆེན་པོས་དངངས་སྐྲག་སྟེ་རང་རང་གི་མགོ་རྡོ་རྗེ་རྣམས་ཀྱིས་རྣམ་པར་འཇོམས་པ་མཐོང་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང་གསང་བ་པའི་བདག་པོ་ལག་ན་རྡོ་རྗེ་ལ་སྐྱབས་སུ་དོང་ངོ ། །བདུད་སྡིག་ཅན་ཡང་ཤིན་ཏུ་སྡུག་བསྔལ་བའི་ཚོར་བས་ཉམ་ཐག་ཅིང་སྐྲག་ལ་ཞུམ་སྟེ་གནོད་པས་དངངས་ནས་སངས་རྒྱས་ལ་སྐྱབས་སུ་སོང ། ཆོས་ལ་སྐྱབས་སུ་སོང ། དགེ་འདུན་ལ་སྐྱབས་སུ་སོང་ངོ ། །གསང་བ་པའི་བདག་པོ་ལག་ན་རྡོ་རྗེ་ལ་ཕྱག་འཚལ་ཏེ། ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཡོངས་སུ་སྐྱོབས་ཤིག་།ཡོངས་སུ་སྐྱོབས་ཤིག་།བདག་ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་སངས་རྒྱས་ལ་སྐྱབས་སུ་འགྲོའོ། །ཆོས་ལ་སྐྱབས་སུ་འགྲོའོ། །དགེ་འདུན་ལ་སྐྱབས་སུ་འགྲོའོ། །སེམས་ཅན་ཐམས་ཅད་ཀྱི་དོན་གྱི་ཕྱིར་ཕ་ལྟ་བུ་དང ། མ་ལྟ་བུ་དང་སྤུན་ལྟ་བུ་དང ། གཉེན་ལྟ་བུ་དང་སྣག་གི་གཉེན་མཚམས་ལྟ་བུར་འགྱུར་བར་བྱང་ཆུབ་ཏུ་སེམས་བསྐྱེད་དོ། །བདག་དེང་ཕྱིན་ཆད་སེམས་ཅན་ཐམས་ཅད་ཀྱི་ཕ་དང་མ་དང་སྤུན་དང་གཉེན་དང ། སྣག་གི་གཉེན་མཚམས་སུ་འགྱུར་བར་བྱའོ། །ལུས་དང་ངག་དང ། ཡིད་ཀྱི་ལས་ཅུང་ཟད
107.18b
གང་ཅི་བྱེད་པ་དེ་སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་ཡོངས་སུ་བསྔོའོ། །བདག་དབུགས་ཕྱུང་ནས་གཞན་ཡང་དབུགས་དབྱུང་ངོ ། །བདག་གྲོལ་ནས་གཞན་ཡང་དགྲོལ་ལོ། །བདག་མྱ་ངན་ལས་འདས་ནས་གཞན་ཡང་མྱ་ངན་ལས་བཟླའོ། །རུས་པ་དང་རྐང་དང ། ཁྲག་དང་ཤ་དང ། ཉམས་མཐུ་དང ། སྲོག་གིས་ཀྱང་སེམས་ཅན་ཐམས་ཅད་ལ་རིམ་གྲོར་བྱའོ། །མཆོད་པར་བྱའོ། །བརྗེད་པར་བྱའོ། །སངས་རྒྱས་དང་བྱང་ཆུབ་སེམས་དཔའ་དང ། འཕགས་པ་ཉན་ཐོས་དང་རང་སངས་རྒྱས་དང ། སློབ་དཔོན་དང ། བླ་མའི་གནས་ཐམས་ཅད་ལ་ཡང་བསྙེན་བཀུར་བྱའོ། །སྟི་སྟང་བྱའོ་རིམ་གྲོར་བྱའོ། །མཆོད་པར་བྱའོ། །དེ་ནས་བདུད་སྡིག་ཅན་གྱིས་དཀོན་མཆོག་གསུམ་ལ་སྐྱབས་སུ་འགྲོ་བ་གཟུང་སྟེ། བྱང་ཆུབ་ཀྱི་སེམས་རིན་པོ་ཆེ་བསྐྱེད་པ་དང ། ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ཏེ། དགའ་བ་ཐོབ་ནས་སྒྲ་སྐད་ཀྱི་ང་རོ་གཅིག་ཏུ་འདི་སྐད་ཅེས་སྨྲས་སོ། །གང་གི་ཕྱིར་ན་བདུད་ཁྱོད་ཀྱིས། །སེམས་ཅན་ཀུན་ལ་བདེ་བའི་ཕྱིར། །བླ་མེད་བྱང་ཆུབ་སེམས་བསྐྱེད་པ། །བདག་ཅག་རྗེས་སུ་ཡི་རང་ངོ ། །རིན་ཆེན་སེམས་འདིས་མི་རིང་བར། །རྣམ་འདྲེན་སངས་རྒྱས་གྱུར་ནས་ནི། །སེམས་ཅན་ཤིན་ཏུ་སྡུག་བསྔལ་ཀུན། །མྱ་ངན་ལས་ནི་བཟླ་བར་གྱིས། །རྒྱལ་བའི་མཆོག་འདི་ཇི་བཞིན་དུ། །སྐྱེ་དགུ་ཐམས་ཅད་གདུལ་བར་བྱོས། །སྟོབས་པོ་ཆེ་དང་ལྡན་པ་ཡི། །བདུད་བཞི་པོ་དག་གདུལ་བར་གྱིས། །དེ་སྐད་ཅེས་སྨྲས་པ་དང ། ཐམས་ཅད་དང་ལྡན་པའི་འཁོར་ཆེན་པོ་དེ་སངས་རྒྱས་ཀྱི་མཐུས་རང་རང་གི་ལག་གི་སྙིམ་པ་ན་མེ་ཏོག་གི་ཕུར་མ་ཐོགས་པར་ཤེས་ཏེ། མེ་ཏོག་གི་ཕུར་མ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང ། གསང་བ་པའི་བདག་པོ་ལག་ན་རྡོ་རྗེ་དང ། ཁྲོ་བོ་ཆེན་པོ་རྡོ་རྗེའི་ཁྲོ་བོ་དེ་དག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང ། ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་གཏོར་བ་དང་དེ་ཡང་སངས་རྒྱས་ཀྱི་མཐུས་མེ་ཏོག་གི་གཞལ་མེད་ཁང་ཆེན་པོར་གྱུར་ཏོ། །བདུད་སྡིག་ཅན་ནི་མཆོག་ཏུ་བདེ་བས་ཚིམ་པར་གྱུར་ནས་སངས་རྒྱས་རྗེས་སུ་དྲན་པ་སྒོམ་ཞིང་རང་གི་བསོད་ནམས་ཀྱི་རྣམ་པར་སྨིན་པའི་རྫུ་འཕྲུལ་གྱི་མཐུ་དང ། དེ་བཞིན་གཤེགས་པ་རྗེས་སུ་སེམས་པས་མདུན་དུ་རིན་པོ་ཆེའི་གཞལ་མེད་ཁང་ཆེན་པོ་དཔག་བསམ་གྱི་ཤིང
107.19a
ཤིང་དུ་མས་མིག་མངས་རིས་བརྒྱད་དུ་བྲེས་པ། རིན་པོ་ཆེ་དང་ནོར་བུ་དང ། མུ་ཏིག་དང་དུང་དང ། མན་ཤེལ་དང་བྱི་རུ་དང ། མར་གད་དང ། བཻ་དཱུརྱ་དང་ཨན་ད་རྙིལ་དང ། མཐོན་ཀ་ཆེན་པོ་དང་ཀེ་ཀེ་རུ་དང ། ཀེ་ཀེ་རུ་ཆེན་པོ་དང ། རྡོ་རྗེ་དང་རྡོ་རྗེ་ཆེན་པོ་དང ། དུན་ལས་དང ། དུན་ལས་ཆེན་པོ་དང ། འཛམ་བུའི་ཆུ་བོའི་གསེར་གྱི་དྲ་བས་རྣམ་པར་སྤྲས་པ། གདུགས་དང་རྒྱལ་མཚན་དང ། བ་དན་དང་རྣམ་པར་རྒྱལ་བའི་བ་དན་བསྒྲེང་བས་ལེགས་པར་བརྒྱན་པ། མེ་ཏོག་གི་ཕྲེང་བས་ཀླུབས་པ། པོག་སྣོད་དུ་མ་ནས་བདུག་པ་དྲི་ཞིམ་པོའི་ངད་ཀྱི་དྲི་ཞིམ་པར་བྱས་པ། ཕྱེ་མའི་དྲི་ཞིམ་པོའི་བསྒོ་བས་བསྒོས་པས། ལྷའི་བུ་མོ་འབུམ་ཕྲག་དུ་མ་སིལ་སྙན་དང ། ཕེག་རྡོབ་པ་དང་གླུ་ལེན་ཅིང་གར་བྱེད་པ། རྫིང་བུ་ཡན་ལག་བརྒྱད་དང་ལྡན་པའི་ཆུ་ཅན་འབུམ་ཕྲག་དུ་མའི་དབུས་ནས་རིན་པོ་ཆེ་སྣ་ཚོགས་ཀྱི་པདྨ་དང ། ཀུ་མུ་ད་དང ། པདྨ་དཀར་པོ་དང ། ུད་པ་ལ་དང ། དྲི་མཆོག་བྱུང་བས་མཛེས་པར་བྱས་པའི་ཕྱོགས་དང་ལྡན་པ་བྱུང་ནས། དེ་མཆོག་ཏུ་དགའ་བ་དང ། རངས་པ་དང ། ཡིད་བདེ་བ་སྐྱེས་ཏེ་གུས་པ་ཐམས་ཅད་ཀྱིས་དེ་བླངས་ནས་བདུད་ཀྱི་མཐུ་ཆེན་པོ་དང ། བདུད་ཀྱི་རྣམ་པར་འཕྲུལ་པ་ཆེན་པོ་དང ། བདུད་ཀྱི་རྫུ་འཕྲུལ་ཆེན་པོས་ལག་པ་གཉིས་ཀ་སྤྱི་བོ་ལ་བླངས་ཏེ། དགེ་བའི་བཤེས་གཉེན་གསང་བ་པའི་བདག་པོ་ལག་ན་རྡོ་རྗེ་ལ་དགའ་བ་དང ། མཆོད་པའི་ཕྱིར་ཕུལ་ཏེ། ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འཇིག་རྟེན་དག་ལ་དབང་བྱེད་དབང་གིས་འབྱོར་གྱུར་པ། །སྟོབས་བཅུའི་སྲས་རབ་མཆོག་ལྡན་ཁྱོད་ལ་བརྟེན་ནས་སུ། །བྱང་ཆུབ་ཕྱིར་ནི་ཆགས་བྲལ་དྲི་མེད་བྱང་ཆུབ་སེམས། །སེམས་ཅན་བདེ་སྒྲུབ་གཏེར་དང་འདྲ་བ་བདག་གིས་ཐོབ། །བདག་མིག་གཏི་མུག་མུན་པས་དྲི་ཅན་དྲི་མེད་གྱུར། །སྲིད་པའི་འདོད་ཆགས་རབ་ཏུ་ཞི་ཞིང་སྤྲོས་དང་བྲལ། །མྱ་ངན་ལས་འདས་དྲང་པོའི་ལམ་ནི་བདག་ལ་བསྟན། །སེམས་དམྱལ་མི་བཟད་ཐམས་ཅད་རབ་ཏུ་ཞི་བར་གྱུར། །སྡིག་བྲལ་འཇིག་རྟེན་མགོན་ལ་སྐྱབས་སུ་མ་སོང་བ། །ཀྱེ་མ་དམན་པ་ཡུན་རིང་ཇི་ལྟ་བསླུས་ཤིག་གུ། །དེ་རིང་ཐུབ་དབང་སྲས་པོ་རྣམས་ལ་བསོད་ནམས་དང ། །དད་དང་སྙིང་རྗེ་ཏིང་འཛིན་ཐོབ་ནས་ངོ་མཚར་གྱུར། །ས་མདོག་གཅིག་པུར་སངས་རྒྱས་མྱུར་དུ་གྲུབ་པར་ཤོག་།གཅིག་པུས་འགྲོ་བ་མ་ལུས་མྱ་ངན་བཟླ་བར་བྱ། །སྲིད་པ་གཞན་ན་ཀུན་ཏུ་རྒྱུ་རྩེ་བདག་གི་ཡིད། །རང་ཕན་འཇུག་དང་དགེ་བཤེས་བྲལ་བར་མ་གྱུར
107.19b
ཅིག་།དེ་ནས་བདུད་སྡིག་ཅན་གྱིས་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་གསང་བ་པའི་བདག་པོ་ལག་ན་རྡོ་རྗེ་ལ་མངོན་པར་བསྟོད་ནས་ཅང་མི་སྨྲ་བར་གྱུར་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་སྡང་བ་དང ། གདོན་དང་བགེགས་དང ། ལོག་འདྲེན་དེ་དག་ཐམས་ཅད་གང་གིས་སེམས་ཅན་ཐམས་ཅད་ལས་རྣམ་པར་རྩོམ་པ་ལ་རྣམ་པར་མི་འཚེ་བ་དང ། བགེགས་མི་བྱེད་པ་དང ། དཀོན་མཆོག་གསུམ་ལ་སྐྱབས་སུ་འགྲོ་བར་འགྱུར་བར་དེ་བཞིན་གཤེགས་པའི་དམ་ཚིག་འཛིན་ཏུ་ཆུག་ཤིག་།རིགས་ཀྱི་བུ་དག་འདི་དག་ལ་མི་འཇིགས་པ་ཡང་བྱིན་ཅིག་དང ། དེ་སེམས་ཅན་ཐམས་ཅད་ཀྱི་དོན་དང ། ཕན་པ་དང་བདེ་བ་དང ། མྱ་ངན་ལས་འདས་པ་བླ་ན་མེད་པ་ཡང་ཐོབ་པར་འགྱུར་རོ། །དེ་སྐད་ཅེས་སྨྲས་པ་དང ། ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་གིས་གསང་བ་པའི་བདག་པོ་ལག་ན་རྡོ་རྗེ་ལ་ལེགས་སོ། །ཞེས་ཏེ་ཚིག་ལ་མངོན་པར་དགའ་ནས་ཡང་ལྷ་དང་ཀླུ་དང ། གནོད་སྦྱིན་དང་དྲི་ཟ་དང ། ལྷ་མ་ཡིན་དང་ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་ལ་སོགས་པ་དེ་དག་ཐམས་ཅད་དང ། སྡང་བ་བགེགས་དང ། ལོག་འདྲེན་དང་མ་མོ་དང ། ཡི་དགས་དང་ཤ་ཟ་དང ། འབྱུང་པོ་དང་གདོན་དང ། རྗེད་བྱེད་དང ། སྲུལ་པོ་དང་ལུས་སྲུལ་པོ་དང ། རོ་ལངས་དང་མཁའ་འགྲོ་དང ། སྒྲུབ་པ་དང་སྦྲུལ་འཛིན་བཅས་པ་ལ་སོགས་པ་དེ་དག་ཐམས་ཅད་དང ། གདོན་གྱི་ཚོགས་དེ་དག་ཐམས་ཅད་ཀྱིས་རྡོ་རྗེ་ཆེན་པོ་མང་པོ་འབབ་པས་དཀྲུགས་པའི་འཚོ་ཆེན་པོ་ཟབ་མོ་ཀློང་འཁྱིལ་པ། འུར་འུར་སྒྲ་འབྱུང་བ་ལྟ་བུར་དྲག་ཅིང་རྒྱུན་རིང་བའི་སྐད་གསང་འཐོན་པོས་འདི་སྐད་ཅེས་སྨྲས་སོ། །སྡང་བ་འབྱུང་པོ་དང་གདོན་དང ། བགེགས་དང་ལོག་འདྲེན་ལ་སོགས་པ་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ་སྡིག་པ་ཅན་སྡིག་པའི་སེམས་དང་ལྡན་པ། སྡང་བ་ཅན་སྡང་བའི་སེམས་དང་ལྡན་པ་ཁྱེད་ཐམས་ཅད་ཉོན་ཅིག་།ཁྱེད་ཀྱིས་དེང་ཕན་ཆད་སེམས་ཅན་གང་དག་དེ་བཞིན་གཤེགས་པའི་བསྟན་པ་ལ་ཞུགས་པ་དག་དང ། དེ་ལ་སོགས་པ་གང་དག་གསང་སྔགས་སྒྲུབ་བམ། ཀློག་པ་དེ་དག་ལ་བགེགས་འབྱུང་བར་མི་བྱ་ཞིང་འཚེ་བར་མི་བྱ་སྟེ། སྒྲུབ་པ་དང་རྗེས་སུ་འཐུན་པར་སྟོབས་སྦྱིན་པར་བྱའོ། །སེམས་ཅན་གང་དག་དམ་ཚིག་ལ་མ་ཞུགས་པ་དེ་དག་ལ་བསྲུང་བར་བྱ། ཞི་བ་དང་བདེ་ལེགས་སུ་འགྱུར
107.20a
བ་དང ། ཆད་པ་སྤང་བ་དང ། དུག་གཞིལ་བ་དང ། དུག་གསད་པ་དང ། རིག་སྔགས་འགྲུབ་པ་སྦྱིན་པར་བྱའོ། །སྦྲང་རྩི་དང ། ཚིགས་མ་དང ། སྒོག་པ་དང ། ཀིའུ་དང ། གཏོར་མ་དང ། འབྱུང་པོ་དང ། མི་བསྒྲུངས་པ་རྣམས་ཀྱི་ཤ་དང་ཟས་ཟོས་ཀྱང་སྐྱོན་དུ་མི་གཟུང་ཞིང་ཉེས་པར་མི་བརྩིའོ། །དེ་ནས་སྡང་བ་འབྱུང་པོ་དང་བགེགས་དང ། ལོག་འདྲེན་ལ་སོགས་པ་ཐམས་ཅད་ཅེས་བྱ་བ་ནས་སྒྲ་སྐད་ཀྱི་ང་རོ་གཅིག་གིས་འདི་སྐད་ཅེས་སྨྲས་སོ། །ཞེས་བྱ་བའི་བར་དུ་སྦྱར་རོ། །རིགས་ཀྱི་བུ་དག་བཀའ་ལུང་ཅི་སྩལ་པ་དེ་བཞིན་དུ་སྦྱར་བར་བགྱིའོ། །དེང་སླན་ཆད་སངས་རྒྱས་བཅོམ་ལྡན་འདས་དང ། ཆོས་དང་དགེ་འདུན་ལ་སྐྱབས་སུ་མཆིའོ། །སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་དང ། སྡང་བ་བགེགས་དང་ལོག་འདྲེན་དང་འབྱུང་པོ་དང ། གདོན་གྱི་ཚོགས་དེ་དག་ཐམས་ཅད་ལ་ལེགས་སོ་ཞེས་བྱ་བ་བྱིན་ཏེ། རིག་སྔགས་ཀྱི་ལས་དང་དམ་ཚིག་དང ། ཕྱག་རྒྱ་ཐམས་ཅད་འཛིན་དུ་གཅུག་གོ་གསང་བ་པའི་བདག་པོ་ལག་ན་རྡོ་རྗེ་ཡང་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་དེ་ལས་ལངས་སོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་གང་ལ་གནས་ནས་ཁྱོད་ཀྱིས་རྫུ་འཕྲུལ་གྱི་ཆོ་འཕྲུལ་འདི་ལྟ་བུ་འདི་བསྟན་པ་དང ། བདུད་སྡིག་ཅན་ཡང་བྱང་ཆུབ་ཏུ་སེམས་བསྐྱེད་པ་དང ། གཞན་ཡང་སྡང་བ་གདོན་དང ། འབྱུང་པོ་དང་བགེགས་དང ། ལོག་འདྲེན་ཐམས་ཅད་ཀྱང་དམ་ཚིག་ལ་བཀོད་ཅིང་བྱང་ཆུབ་ཀྱི་སེམས་འཛིན་དུ་བཅུག་པའི་ཏིང་ངེ་འཛིན་འདིའི་མིང་ཅི་ཞེས་བྱ། དེ་སྐད་ཅེས་སྨྲས་པ་དང ། གསང་བ་པའི་བདག་པོ་ལག་ན་རྡོ་རྗེས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་ར་དྭ་ཏིའི་བུ་ཏིང་ངེ་འཛིན་འདི་ནི་མིང་དང་ཡི་གེ་དང་སྒྲ་སྐད་ཀྱིས་རྟོགས་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། གང་མིང་ངམ་གཟུགས་སམ། དབྱིབས་སམ་གནས་སམ། མཉམ་པར་བཞག་པ་འམ། གཡེངས་པ་ཡང་རུང་སྟེ། ཏིང་ངེ་འཛིན་ཅེས་བྱ་བའི་ཆོས་དེ་གང་ཡང་མེད་དོ། །གང་ལ་མིང་མེད་པ་དང ། གཟུགས་མེད་པ་དང ། དབྱིབས་མེད་པ་དང ། གནས་མེད་པ་དང ། མཉམ་པར་བཞག་པ་མེད་པ་དང ། གཡང་བ་མེད་པ་འདི་བཙུན་པ་ཤཱ་ར་དྭ་ཏིའི་བུ་ཏིང་ངེ་འཛིན་འདི་མིང་ཅི་ཞིག་བྱ་ཞེས་དེ་ལ་ཇི་སྙམ་དུ
107.20b
སེམས། ཡང་བཙུན་པ་ཤཱ་ར་དྭ་ཏིའི་བུ་གསལ་བར་བྱེད་པ་འདི་ནི་བདག་ལ་གསལ་བར་བྱེད་པ་མ་ཡིན་གཞན་ལ་གསལ་བར་བྱེད་པ་མ་ཡིན་གཉིས་ཀ་ལ་ཡང་གསལ་བར་བྱེད་པ་མ་ཡིན་ནོ། །འོན་ཀྱང་གསལ་བར་བྱེད་པར་བཏགས་པ་ཡོད་དོ། །དེ་ལ་གསལ་བར་བྱེད་པ་ནི་གསལ་བར་བྱེད་པའི་བདག་ཉིད་ཀྱིས་སྟོང་བདག་ནི་བདག་གིས་སྟོང ། གཞན་ཡང་གཞན་གྱི་བདག་ཉིད་ཀྱིས་སྟོང ། གཉིས་ག་ཡང་གཉིས་གའི་བདག་ཉིད་ཀྱིས་སྟོང་སྟེ། ཡང་དག་པ་མ་ཡིན་པ་ཀུན་ཏུ་བརྟགས་པའི་ཕྱིར་རོ། །འདི་ཅི་ཞེས་བྱ་བའི་ཡི་གེ་གཉིས་ཀྱི་ཚིག་དེ་ཡང་ཚིག་གི་བདག་ཉིད་ཀྱིས་སྟོང་སྟེ་ཡི་གེ་ཡང་ཡི་གེ་མ་ཡིན་ནོ། །དེ་ལྟར་ན་རྟེན་ཅིང་འབྲེལ་པར་འབྱུང་བའི་དོན་རྟོགས་པར་བྱེད་པ་ཡིན་ནོ། །དོན་དེ་བརྗོད་པ་ན་ཡང་གང་ནས་ཀྱང་མི་འོང་གང་དུ་ཡང་མི་འགྲོ་མོད་ཀྱི་གཞན་གྱི་དབང་ལ་རྟེན་པའི་ཕྱིར་ཡི་གེར་བཏགས་པ་ཡང་ཡོད་དོ། །ཡོངས་སུ་བཏགས་པ་ཡིན་པའི་ཕྱིར་བཏགས་པ་ཡང་སྟོང་པའོ། །རྟེན་ཅིང་འབྲེལ་པར་འབྱུང་བའི་ཕྱིར་གཞན་གྱི་དབང་ཉིད་སྟོང་པའོ། །རྒྱུ་དང་རྐྱེན་ལས་བྱུང་བའི་ཕྱིར་རྟེན་ཅིང་འབྲེལ་པར་འབྱུང་བ་ཡང་སྟོང་པའོ། །གློ་བུར་དུ་རྒྱུ་དང་རྐྱེན་གྱིས་བསྐྱེད་པའི་ཕྱིར་འབྱུང་བ་ཡང་འབྱུང་བའི་བདག་ཉིད་ཀྱིས་སྟོང་ངོ ། །དེ་ལ་རྟེན་ཅིང་འབྲེལ་པར་འབྱུང་བ་ནི་རང་གི་མཚན་ཉིད་ཀྱིས་སྟོང་ངོ ། །རང་གི་མཚན་ཉིད་ཀྱིས་སྟོང་པ་གང་ཡིན་པ་དེ་མཚན་ཉིད་མེད་པའོ། །མཚན་ཉིད་མེད་པ་གང་ཡིན་པ་དེ་དེ་བཞིན་ཉིད་དོ། །དེ་བཞིན་ཉིད་གང་ཡིན་པ་དེ་མ་ནོར་བ་དེ་བཞིན་ཉིད་དོ། །མ་ནོར་བ་དེ་བཞིན་ཉིད་གང་ཡིན་པ་དེ་གཞན་མ་ཡིན་པ་དེ་བཞིན་ཉིད་དོ། །གཞན་མ་ཡིན་པ་དེ་བཞིན་ཉིད་གང་ཡིན་པ་དེ་ཏིང་ངེ་འཛིན་ཏོ། །ཏིང་ངེ་འཛིན་གང་ཡིན་པ་དེ་རྟོགས་པའོ། །རྟོགས་པ་གང་ཡིན་པ་དེ་སྟོང་པ་ཉིད་དོ། །སྟོང་པ་ཉིད་གང་ཡིན་པ་དེ་ལྷག་མཐོང་ངོ ། །ལྷག་མཐོང་གང་ཡིན་པ་དེ་ཞི་གནས་སོ། །ཞི་གནས་གང་ཡིན་པ་དེ་རྣམ་པར་ཐར་པའོ། །རྣམ་པར་ཐར་པ་གང་ཡིན་པ་དེ་དབུ་མའི་ལམ་ཡིན་ནོ། །དབུ་མའི་ལམ་གང་ཡིན་པ་དེ་ལ་མཐའ་གཅིག་མེད། མཐའ་གཉིས་མེད། གཟུང་བ་མེད་འཛིན་པ་པོ་མེད། འཛིན་པ་མེད་ཆད་པ་མེད་རྟག་པ་མེད། སྐྱེ་བ་མེད། འགག་པ་མེད། རྟོག་པ་མེད། རྣམ་པར་རྟོག་པ་མེད། རང་དབང་མེད་གཞན་གྱི་དབང་མེད། འགྲོ་བ་མེད་འོང་བ་མེད་ཀུན་ནས་ཉོན་མོངས་པ་མེད་རྣམ་པར་བྱང་བ་མེད་འདུ་བ་མེད་འབྲལ་བ་མེད་དེ། དེ་ནི་ལྷག་མཐོང་ཡིན་ནོ། །ལྷག་མཐོང་གང་ཡིན་པ་དེ་ལ་ཕུང་པོ་རྣམས་མེད་ཁམས་རྣམས་མེད། དབང་པོ་རྣམས་མེད། སྐྱེ
107.21a
མཆེད་རྣམས་མེད། ཡུལ་རྣམས་མེད། ཡུལ་དུ་གདགས་པ་མེད། ལས་མེད་ལས་ཀྱི་འབྲས་བུ་མེད་དོ། །གང་ལ་ལས་མེད་ཅིང་ལས་ཀྱི་འབྲས་བུ་མེད་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པར་སངས་རྒྱས་སོ། །བླ་ན་མེད་པ་ཡང་དག་པར་རྫོགས་པའི་སངས་རྒྱས་གང་ཡིན་པ་དེ་ཆོས་སོ། །ཆོས་གང་ཡིན་པ་དེ་མི་སྐྱེ་མི་མཆིའོ། །མི་སྐྱེ་མི་མཆི་བ་གང་ཡིན་པ་དེ་ནམ་མཁའ་དང་མཉམ་པ་ཉིད་དུ་ཁོང་དུ་ཆུད་པར་བྱའོ། །བཙུན་པ་ཤཱ་ར་དྭ་ཏིའི་བུས་སྨྲས་པ། རིགས་ཀྱི་བུ་ཁྱོད་ཀྱིས་ཏིང་ངེ་འཛིན་བསྟན་པ་བཤད་པ་འདི་ནི་ཤིན་ཏུ་ཟབ་སྟེ། འདི་ལ་ཉན་ཐོས་དང ། རང་སངས་རྒྱས་ཐམས་ཅད་ཀྱི་འགྲོ་བ་ཡང་མེད་ན། འཇིག་རྟེན་པའི་མུ་སྟེགས་ཅན་དང ། ཕས་ཀྱི་རྒོལ་བ་ཐམས་ཅད་ལྟ་སྨོས་ཀྱང་ཅི་དགོས་ཆོས་ཀྱི་རྣམ་གྲངས་འདི་ནི་དགེ་བའི་རྩ་བ་མ་བསྐྱེད་པ་དང ། མོས་པ་ཆུང་བ་ཐམས་ཅད་ཀྱིས་ཤེས་པར་དཀའ་བ་སྟེ། གཞན་དུ་ན་འདི་དེ་བཞིན་གཤེགས་པའི་སྤྱན་གྱི་ཡུལ་དུ་གྱུར་པ་ནི་མ་གཏོགས་སོ། །དེ་ལ་དེ་བཞིན་གཤེགས་པའི་སྤྱན་ནི་དམྱིགས་པ་མེད་པ་གནས་པ་མེད་པའོ། །དེ་སྐད་ཅེས་སྨྲས་པ་དང ། གསང་བ་པའི་བདག་པོ་ལག་ན་རྡོ་རྗེས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་ར་དྭ་ཏིའི་བུ་དེ་བཞིན་གཤེགས་པ་ཞེས་བྱ་བ་དེ་ནི་དེ་བཞིན་ཉིད་ཀྱི་མཚན་ཉིད་དོ། །དེ་བཞིན་ཉིད་ཀྱི་མཚན་ཉིད་གང་ཡིན་པ་དེ་ནི་སྟོང་པ་ཉིད་དོ། །སྟོང་པ་ཉིད་གང་ཡིན་པ་དེ་ལ་དེ་བཞིན་གཤེགས་པ་མེད་དོ། །དེ་བཞིན་གཤེགས་པའི་མཚན་ཉིད་མེད་དོ། །ཤཱ་ར་དྭ་ཏིའི་བུས་སྨྲས་པ། རིགས་ཀྱི་བུ་གལ་ཏེ་དེ་བཞིན་གཤེགས་པ་མཚན་ཉིད་མེད་པ་ཡིན་ན། དེ་ལ་ཇི་ལྟར་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་ཞིང་དེ་བཞིན་གཤེགས་པ་ཞེས་བསྟན་ཅིང་དཔེ་བྱད་བཟང་པོ་བརྒྱད་བཅུས་སྐུ་ལེགས་པར་བརྒྱན། ཇི་ལྟར་དེ་བཞིན་གཤེགས་པའི་སྐུ་གསུམ་རྣམ་པར་གཞག་པར་བལྟ། ཇི་ལྟར་དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས། གསང་བ་པའི་བདག་པོ་ལག་ན་རྡོ་རྗེས་སྨྲས་པ། བཙུན་པ་ཤཱ་ར་དྭ་ཏིའི་བུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཤེས་བྱ་བ་དེ་ནི་ཀུན་རྫོབ་ཀྱི་བརྡའི་ཚིག་གོ་།བརྒྱན་ཅེས་བྱ་བ་དེ་ནི་སྤྲོས་པའི་ཡི་གེ་དང་སྒྲའོ། །དཔེ་བྱད་བཟང་པོ་ཞེས་བྱ་བ་དེ་ནི་སྒྱུ་མ
107.21b
དང ། རྨི་ལམ་གྱི་ངོ་བོ་ཉིད་ཀྱི་མཚན་ཉིད་དོ། །ཡང་དག་པར་རྫོགས་པའི་བྱང་ཆུབ་ཅེས་བྱ་བ་དེ་ནི་ནམ་མཁའི་ངོ་བོ་ཉིད་ཀྱི་མཚན་ཉིད་དོ། །སྐུ་གསུམ་རྣམ་པར་གཞག་པ་ཞེས་བྱ་བ་དེ་ནི་ཚོགས་གཉིས་ཀྱིས་སྤྲུལ་པའི་མཚན་ཉིད་དོ། །བཙུན་པ་ཤཱ་ར་དྭ་ཏིའི་བུ་ཡང་འདི་ནི་དེ་བཞིན་གཤེགས་པའི་སྐུའི་གསང་བའི་ཡུལ་ཏེ། དེ་ལ་སྐུའི་གསང་བ་ཞེས་བྱ་བ་དེ་ནི་བསོད་ནམས་ཆེན་པོའི་རྒྱུ་འཐུན་པའི་མཚན་ཉིད་དོ། །བསོད་ནམས་ཀྱི་རྒྱུ་འཐུན་པ་གང་ཡིན་པ་དེ་དེ་བཞིན་གཤེགས་པའི་རྫོགས་པར་ལོངས་སྤྱོད་པའི་སྐུ་སྟེ། འདི་ཡང་དེ་བཞིན་གཤེགས་པའི་སྐུའི་ཕྲིན་ལས་དང་སྐུའི་གསང་བའོ། །བཙུན་པ་ཤཱ་ར་དྭ་ཏིའི་བུ་གསུང་ཞེས་བྱ་བ་དེ་ནི་ཀུན་རྫོབ་དང་དོན་དམ་པ་གཉིས་ཀྱི་མཚན་ཉིད་དོ། །ཀུན་རྫོབ་དང་དོན་དམ་པ་གཉིས་ཀྱི་མཚན་ཉིད་གང་ཡིན་པ་དེ་དེ་བཞིན་གཤེགས་པའི་སྤྲུལ་པའི་སྐུའོ། །རྟེན་ཅིང་འབྲེལ་པར་འབྱུང་བ་ཆད་པ་མེད་པ་དང ། རྟག་པ་མེད་པར་འཇུག་པ་ཐུགས་སུ་ཆུད་པ། ཡིད་ཀྱི་རྣམ་པར་ཤེས་པའི་ལམ་གྱིས་འཇུག་པ། བསམ་གཏན་གོམས་པར་བྱ་བར་ཤེས་པར་བྱ་བ་སྟེ། དམིགས་པ་མེད་པ། ཀུན་ནས་ཉོན་མོངས་པ་དང་རྣམ་པར་བྱང་བས་སྟོང་པ། ལུས་ཀྱི་ཡུལ་མ་ཡིན་པ། ངག་གི་སྤྱོད་ཡུལ་མ་ཡིན་པ། ཡིད་ཀྱི་རང་གི་ངོ་བོའི་ཡུལ་མ་ཡིན་པ་གང་ཡིན་པ་དེ་ནི་དེ་བཞིན་གཤེགས་པའི་ཆོས་ཀྱི་སྐུ་ནམ་མཁའི་ཁམས་སུ་ཡང་དག་པར་འདུ་བའོ། །དེ་བཞིན་གཤེགས་པའི་སྐུ་གསུམ་རྣམ་པར་གཞག་པ་ནི་དེ་ལྟར་བལྟ་བར་བྱའོ། །བཙུན་པ་ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པའི་སྐུའི་གསང་བ་གང་ཡིན་པ་དེ་ནི་ཆོས་ཀྱི་སྐུའོ། །ཆོས་ཀྱི་སྐུ་གང་ཡིན་པ་དེ་ནི་ཆོས་རྣམས་ཀྱི་དབུ་མའི་ལམ་དུ་བལྟའོ། །དབུ་མའི་ལམ་གང་ཡིན་པ་དེ་ནི་མི་སྐྱེ་མི་འཆི་བ་སྟེ། དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་ཆོས་ཀྱི་སྐུ་འདི་ནི་གནས་པ་ཉིད་དོ། །བཙུན་པ་ཤཱ་ར་དྭ་ཏིའི་བུ་བསོད་ནམས་ཀྱི་རྒྱུ་འཐུན་པ་ཞེས་བྱ་བ་དེ་ནི་ཕ་རོལ་དུ་ཕྱིན་པ་དག་གི་རྣམ་གྲངས་སུ་གཏོགས་པའོ། །དེ་ལ་ཕ་རོལ་དུ་ཕྱིན་པ་ཞེས་བྱ་བ་དེ་ཡང་བསོད་ནམས་ཀྱི་རྒྱུ་འཐུན་པ་ཉིད་དུ་བལྟའོ། །དེ་ཅིའི་ཕྱིར་ཞེ་ན། བཙུན་པ་ཤཱ་ར་དྭ་ཏིའི་བུ་སྦྱིན་པའི་ཕ་རོལ་དུ་ཕྱིན་པ་ཞེས་བྱ་བ་དེ་ནི་ཕྱི་ནང་གི་དངོས་པོ་རྣམ་པ་གཉིས་ཡོངས་སུ་གཏང་བར་བྱ་བའོ། །དེ་ལ་ཕྱི་ཞེས་བྱ་བ་དེ་ནི་ཀུན་རྫོབ་ཀྱི་ཚིག་གོ་།ནང་ཞེས་བྱ་བ་དེ་ནི་དོན་དམ་པའི
107.22a
ཚིག་གོ་།དེ་ལ་ཕྱི་ཞེས་བྱ་བ་དེ་ནི་གང་ཟས་འདོད་པ་རྣམས་ལ་ཟས་དང ། སྐོམ་འདོད་པ་རྣམས་དང ། དེ་བཞིན་དུ་བྲན་ཕོ་དང་བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དང ། གླང་པོ་ཆེ་དང་རྟ་དང ། ཤིང་རྟ་དང་ས་དང ། མགོ་དང་ལག་པ་དང ། རྐང་པ་དང་མིག་དང ། ཤ་དང་ཁྲག་དང་རྐང་དང་ཚིལ་དང་རུས་པའི་བར་དུ་སྦྱིན་པ་སྟེ། དེ་ཡང་ཐབས་ཀྱི་ཕ་རོལ་དུ་ཕྱིན་པས་ཡོངས་སུ་ཟིན་པས་ཡོངས་སུ་བསྔོས་པ་རྣམ་པར་སྨིན་པ་ལ་མི་རེ་བ་དང ། གྱ་ནོམ་པ་དང་རྒྱ་ཆེ་བ་དང ། རང་གི་སྟི་སྟང་དུ་བྱས་ཏེ་རྣམ་པ་ཐམས་ཅད་སེམས་ཅན་ཐམས་ཅད་ལ་སྦྱིན་པ་འདི་ནི་ཕྱིའི་འོ། །ནང་གི་ནི་ཆོས་སྦྱིན་པའོ། །དེ་ཡང་རྣམ་པ་གཉིས་ཏེ། རྟེན་ཅིང་འབྲེལ་པར་འབྱུང་བ་ལ་འཇུག་པར་ཡང་དག་པར་གཞོལ་བ་དང ། སྦྱིན་པའི་གཏམ་དང ། ཚུལ་ཁྲིམས་ཀྱི་གཏམ་དང ། བཟོད་པའི་གཏམ་དང ། བརྩོན་འགྲུས་དང ། བསམ་གཏན་དང་ཤེས་རབ་དང ། ཐབས་དང་སྟོབས་དང་སྨོན་ལམ་དང ། ཡེ་ཤེས་ཀྱི་གཏམ་དང ། སྙིང་རྗེས་ཡོངས་སུ་ཟིན་པ་ཐབས་ཀྱི་ཕ་རོལ་དུ་ཕྱིན་པ་ཡང་དག་པར་འདུ་བའོ། །གཞན་ཡང་ནང་གི་སྦྱིན་པ་ནི་གང་འདི་མཐར་འཛིན་པ་དང་སྐྱེ་བ་དང་འགག་པར་ཡོངས་སུ་རྟོག་པ་དང ། རྣམ་པར་རྟོག་པ་དང ། ཤེས་པ་དང་ཤེས་བྱ་རྣམ་པར་སྤངས་པ་དགའ་བས་ཡོངས་སུ་ཟིན་པ་སྟོབས་ཀྱི་ཕ་རོལ་དུ་ཕྱིན་པ་ཡང་དག་པར་འདུ་བ་སྟེ། འདི་ནི་ཆོས་ཀྱི་སྦྱིན་པའོ། །གང་འདི་ཉིད་ལ་ལུས་དང་ངག་དང ། ཡིད་རྒོད་པ་མེད་པ་དང་ཁེངས་པ་མེད་པ་དང ། ལུས་རྣམ་པར་གཡེང་བ་མེད་པ་དང་ངག་རྣམ་པར་གཡེང་བ་མེད་པ་དང ། ཡིད་རྣམ་པར་གཡེང་བ་མེད་པར་ཤེས་རབ་ཀྱི་ཕ་རོལ་དུ་ཕྱིན་པས་ཡོངས་སུ་ཟིན་པ། གཅིག་ཏུ་ཉོན་མོངས་པ་མེད་པར་གནས་པ་བཏང་སྙོམས་ཀྱིས་ཡོངས་སུ་ཟིན་པ། ཐབས་ཀྱི་ཕ་རོལ་དུ་ཕྱིན་པ་ཡང་དག་པར་འདུ་བ་འདི་ནི་ཚུལ་ཁྲིམས་ཀྱི་ཕ་རོལ་དུ་ཕྱིན་པའོ། །གང་འདི་ཉིད་ལ་རང་གི་ལུས་དང ། སྲོག་ལ་མི་ལྟ་བར་བསོད་ནམས་དང ། བསོད་ནམས་མ་ཡིན་པ་དང་ཆོས་དང ། ཆོས་མ་ཡིན་པ་དང ། བདེན་པ་དང་བདེན་པ་མ་ཡིན་པ་དང ། གཡོ་བ་དང་མི་གཡོ་བའི་དངོས་པོ་རྣམ་པར་སྤོང་ཞིང་བྱམས་པས་ཡོངས་སུ་ཟིན་པ་ཤེས་རབ་ཀྱི་ཕ་རོལ་དུ་ཕྱིན་པ་ཡང་དག་པར་འདུ་བ་འདི་ནི་འདིར་བཟོད་པའི་ཕ་རོལ་དུ་ཕྱིན་པའོ། །གང་སྦྱིན་པ་དང ། ཚུལ་ཁྲིམས་དང་བཟོད
107.22b
པ་དང ། ཏིང་ངེ་འཛིན་ཐོབ་པར་བྱ་བའི་ཕྱིར་སེམས་སྤྲོ་ཞིང་རྩོམ་པ་དང ། ཡོངས་སུ་མི་སྐྱོ་བར་རྟག་ཏུ་གནས་པ་མེད་པ་དང ། དེ་དམིགས་པ་མེད་པ་དང ། བྱམས་པས་ཡོངས་སུ་ཟིན་པ་ཡེ་ཤེས་ཀྱི་ཕ་རོལ་དུ་ཕྱིན་པ་ཡང་དག་པར་འདུ་བ་འདི་ནི་འདིར་བརྩོན་འགྲུས་ཀྱི་ཕ་རོལ་དུ་ཕྱིན་པའོ། །བཙུན་པ་ཤཱ་ར་དྭ་ཏིའི་བུ་འདི་ནི་བསོད་ནམས་ཀྱི་ཚོགས་ཏེ། དེ་བཞིན་གཤེགས་པའི་རྫོགས་པར་ལོངས་སྤྱོད་པའི་སྐུའི་གསང་བ་གྲུབ་པར་བྱེད་པའོ། །བཙུན་པ་ཤཱ་ར་དྭ་ཏིའི་བུ་གཞན་ཡང་ཡེ་ཤེས་ཀྱི་ཚོགས་ནི་གང་ཕ་རོལ་དུ་ཕྱིན་པ་བཞི་པོ་འདི་དག་ཉིད་རྟོགས་པ་སྟེ། ཕ་རོལ་དུ་ཕྱིན་པ་རྣམས་འབྱེད་པ་དང ། འབྲེལ་པ་དང་གསལ་བར་བྱེད་པ་དང ། དེ་ལ་གཞོལ་ཞིང་མི་རྟག་པ་དང ། བདག་མེད་པ་དང་སྟོང་པ་དང ། གསོབ་དང་བསོག་དང ། དངོས་པོ་མེད་པ་དང ། དངོས་པོ་ཐམས་ཅད་དངོས་པོ་མེད་པར་ཡང་དག་པར་སྟོན་ཏོ། །མདོར་བསྡུ་ན་འདོད་ཆགས་དང ། ཞེ་སྡང་དང་གཏི་མུག་དང ། ཉོན་མོངས་པ་དང ། ཉེ་བའི་ཉོན་མོངས་པ་སེལ་ཅིང་ཆོས་ཀྱི་དབྱིངས་ནམ་མཁའ་མཐའ་ཡས་སྐྱེ་མཆེད་དང་མཉམ་པར་ཡང་དག་པར་སྟོན་ཏེ། དམིགས་པ་དང་བྲལ་བ་འདི་ནི་འདིར་བསམ་གཏན་གྱི་ཕ་རོལ་དུ་ཕྱིན་པའོ། །དེ་བཞིན་ཉིད་དང་སྟོང་པ་ཉིད་དང ། མཐའ་ལས་འདས་པ་སྟོང་པ་ཉིད་དང ། ཕྱི་མའི་མཐའ་སྟོང་པ་ཉིད་དང ། ཆོས་ཀྱི་དབྱིངས་ཀྱི་རང་གི་ངོ་བོ་ཉིད་གང་ཡིན་པ་འདི་ནི་འདིར་ཤེས་རབ་ཀྱི་ཕ་རོལ་དུ་ཕྱིན་པའོ། །བཙུན་པ་ཤཱ་ར་དྭ་ཏིའི་བུ་འདི་ནི་ཡེ་ཤེས་ཀྱི་ཚོགས་སོ། །བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་དང ། ཚོགས་འདི་གཉིས་ནི་བྱང་ཆུབ་ཀྱི་ཕྱོགས་ཀྱི་ཆོས་དང་ཤེས་པ་དང ། ཤེས་བྱ་མཐའ་དག་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་རྟོགས་པར་བྱེད་པ་སྟེ། བཙུན་པ་ཤཱ་ར་དྭ་ཏིའི་བུ་འདི་ནི་དེ་བཞིན་གཤེགས་པའི་སྐུའི་གསང་བ་མདོར་བསྡུས་ཏེ་བསྟན་པའོ། །རྒྱ་ཆེར་རྣམ་པར་དབྱེ་བ་ནི་གལ་ཏེ་དེ་བཞིན་གཤེགས་པ་ཉིད་ཀྱིས་སྐུ་ཚེའི་ཚད་བསྐལ་པར་བཞུགས་ཏེ་བསྟན་ཅིང་བཤད་ཀྱང་མཐར་ཕྱིན་པར་མི་འགྱུར་རོ། །སྐུའི་གསང་བ་ཇི་ལྟ་བ་བཞིན་དུ་གསུང་གི་གསང་བ་ཡང་དེ་བཞིན་ནོ། །ཐུགས་ཀྱི་གསང་བ་ནི་དེ་བཞིན་གཤེགས་པས་རྣམ་པ་དང ། སོ་སོའི་རྣམ་པ་དང །
107.23a
ཁ་དོག་དང་རྟགས་དང ། དབྱིབས་དང ། ངག་གི་རྣམ་པར་རྟོག་པའི་སྤྱོད་ཡུལ་དང ། བྱ་བ་ཐ་དད་པའི་སྦྱོར་བ་རྣམས་ཀྱིས་ཀྱང་བསྟན་པར་མི་སྤྱོད་མོད་ཀྱི། འོན་ཀྱང་དེ་བཞིན་གཤེགས་པའི་སོ་སོ་རང་གིས་རིག་པ་ནི་ཐུགས་ཀྱི་གསང་བ་ཡིན་པར་ཤེས་པར་བྱའོ། །བཙུན་པ་ཤཱ་ར་དྭ་ཏིའི་བུ་དེ་ནི་དེའི་ཕྱིར་རྣམ་གྲངས་འདིས་ཀྱང་དེ་ལྟར་རིག་པར་བྱ་སྟེ། བདག་ཅག་ལྟ་བུ་བྱང་ཆུབ་མངོན་པར་རྫོགས་པར་སངས་མ་རྒྱས་པ་རྣམས་ཀྱིས་བསྟན་པ་ལྟ་སྨོས་ཀྱང་ཅི་དགོས། འོན་ཀྱང་དེ་བཞིན་གཤེགས་པའི་བྱིན་གྱི་བརླབས་ཀྱིས་སེམས་ཅན་གྱི་ཁམས་མཐའ་ཡས་མུ་མེད་པའི་བསམ་པ་དང ། ལྷག་པའི་བསམ་པ་དང ། མོས་པ་དང་བློ་གྲོས་དང ། བློ་དང་རྟོགས་པ་དང ། མངོན་པར་འདོད་པ་མཐའ་ཡས་མུ་མེད་པ་དང ། སེམས་ཀྱི་རྒྱུན་རྣམ་པ་ཐ་དད་པ་སྣ་ཚོགས་ཀྱི་རྗེས་སུ་འགྲོ་བའི་སྤྱོད་ཡུལ་དང ། སྐྱེ་གནས་སྣ་ཚོགས་དང ། ལྷན་ཅིག་སྐྱེས་པའི་ལས་སྣ་ཚོགས་དང ། མི་ཤེས་པ་དང་མ་རིག་པའི་མུན་པ་དང ། མི་སྣང་བ་དང་མུན་ནག་དང ། འགྲོ་བ་ལྔ་དང་འགྲོ་བ་དྲུག་དང ། ཁམས་གསུམ་པ་ཐོག་མ་དང ། དབུས་དང ། འཇིག་པར་གནས་པ་སྔོན་གྱི་མཐའ་དང ། ཕྱི་མའི་མཐའ་ཡོངས་སུ་མ་ཆད་པར་གནས་པར་དུས་གསུམ་དང ། ཕྱོགས་ལ་མགོ་རྨོངས་པ། སྐྱེ་བ་དང་རྒ་བ་ལ་སོགས་པ་ན་བ་དང ། ནད་དང་མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང་ཡིད་མི་བདེ་བ་དང ། འཁྲུག་པ་ལ་སོགས་པས་ཉིན་གཅིག་བཞིན་དུ་བཅོམ་པའི་སེམས་ཅན་རྣམས་ཀྱི་སེམས་ཅན་གྱི་ཁམས་མ་རྒལ་བ་བསྒྲལ་བ་དང ། མ་གྲོལ་བ་དགྲོལ་བ་དང ། དབུགས་མ་ཕྱིན་པ་དབུགས་དབྱུང་བ་དང ། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་བཟླ་བ་དང ། ཆོས་ཀྱི་རྣམ་གྲངས་འདི་ལ་གཟུད་པ་དང ། གནས་པ་ཐམས་ཅད་གྱུར་པའི་ལམ་ལ་དགོད་པ་དང ། མྱ་ངན་ལས་འདས་པ་ཤིན་དུ་བདེ་བ། དོན་དམ་པ། ཞི་བ་འཁྲུག་པ་མེད་པ། དགེ་བ་ནད་མེད་པ་དང ། སངས་རྒྱས་བཅོམ་ལྡན་འདས་རྣམས་ཀྱི་སོ་སོ་རང་གི་རིག་པའི་ཡེ་ཤེས་ཀྱི་དབྱིངས་མཉམ་པ་ཉིད་ཀྱིས་མི་མཉམ་པ་དང་མཉམ་པ། རྣམ་པ་ཐམས་ཅད་ཀྱི་མཆོག
107.23b
དང་ལྡན་པའི་ཐམས་ཅད་མཁྱེན་པའི་ཡེ་ཤེས་ལ་སྦྱར་བ་དང ། ཡང་དག་པར་འཛིན་དུ་འཇུག་པ་དང ། ཡང་དག་པར་གཟེང་བསྟོད་པ་དང ། ཡང་དག་པར་རབ་ཏུ་དགའ་བར་བྱ་བ་དང ། དགའ་བ་དང་དད་པ་དང ། མགུ་བའི་ས་ལ་ཡང་དག་པར་གཟུད་པ་དང ། ཆོས་རྟོགས་པའི་ཁྱད་པར་བརྗོད་པ་དང ། རྒྱ་མཚོ་ཆེན་པོ་ལྟར་འདུལ་བའི་སེམས་ཅན་ཡོངས་སུ་སྨིན་པར་བྱ་བའི་དུས་དང ། ཚོད་ལས་མི་འདའ་བར་བྱ་བ་དང ། དེ་དག་ལ་རྒྱུ་དེའི་དབང་དུ་བྱས་ཏེ་སྐྱེ་བོའི་ཚོགས་ཆེན་པོའི་དོན་དང ། ཕན་པ་དང་བདེ་བ་དང ། ལྷ་དང་མི་རྣམས་ཀྱི་དོན་དང ། ཐེག་པ་ཆེན་པོ་བླ་ན་མེད་པའི་ཆོས་ཀྱི་ཚུལ་གཅིག་ནས་གཅིག་ཏུ་བརྒྱུད་དེ་གནས་པར་བྱ་བ་དང ། གཅིག་ནས་གཅིག་ཏུ་ལུང་བྱིན་པས་ཐོས་པ་དང ། བསམ་པ་དང་བསྒོམ་པ་ལས་བྱུང་བའི་ཤེས་རབ་དང ། ཡེ་ཤེས་གོམས་པ་རྣལ་འབྱོར་དུ་གྱུར་པའི་རྒྱུད་ཀྱི་རྒྱུན་མི་གཅད་པ་དང ། སྐལ་བ་ཡོད་ལ་ཡོངས་སུ་མ་སྨིན་པ་ཡོངས་སུ་སྨིན་པར་བྱ་བའི་འོས་སུ་གྱུར་པའི་དོན་གྱི་ཕྱིར་ཕྱོགས་ཙམ་གྱི་སྒོ་གཅིག་མདུན་དུ་བྱས་ཏེ་འཇུག་པར་བྱེད་པ་ཅུང་ཟད་ཅིག་བཤད་པར་བྱའོ། །དེ་སྐད་ཅེས་སྨྲས་པ་དང ། ཚེ་དང་ལྡན་པ་ཤཱ་ར་དྭ་ཏིའི་བུ་མཆོག་ཏུ་ངོ་མཚར་དུ་གྱུར་ཅིང་རྨད་དུ་བྱུང་བར་གྱུར་ཏེ་དགའ་བ་ཐོབ་ནས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ལེགས་སོ་ལེགས་སོ། །གང་གི་ཕྱིར་ཁོ་བོ་ཅག་ལྟ་བུ་ཉི་ཚེ་བའི་ཤེས་པ་དང་ལྡན་པ་གཞན་གྱིས་སྒྲ་སྒྲགས་པའི་རྗེས་སུ་འགྲོ་བའི་ཉན་ཐོས་རྣམས་ལ་ཆོས་ཟབ་མོའི་ཚིག་གི་དོན་འདི་ལྟ་བུ་གསལ་བར་བྱས་པ་ནི་རིགས་ཀྱི་བུ་ཁྱོད་ཡང་ལེགས་སོ། །ལག་ན་རྡོ་རྗེས་སྨྲས་པ། བཙུན་པ་ཤཱ་ར་དྭ་ཏིའི་བུ་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །བཙུན་པ་ཤཱ་ར་དྭ་ཏིའི་བུ་ཏིང་ངེ་འཛིན་འདིའི་མིང་ཅི་ཞེས་བྱ་ཞེས་དེ་སྐད་ཟེར་བ་ནི་ཏིང་ངེ་འཛིན་འདིའི་མིང་རྡོ་རྗེའི་རྣམ་པར་ཐར་པའི་སྒོ་ཆེན་པོ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཕྱག་གཡས་པ་གསེར་གྱི་ཁ་དོག་ལྟ་བུ་བརྐྱང་སྟེ། ཕྱག་གཡས་པ་འཇམ་ཞིང་མཉེན་ལ་ཤིན་དུ་གཞོན་ཤ་ཆགས་པ་གསང་བ་པའི་བདག་པོ་ལག་ན་རྡོ་རྗེའི་མགོ་ལ་གཞག་སྟེ། ཆེད་དུ་བཀའ་སྩལ་པ་འདི་དག་ཀྱང་ཆེད་དུ་བཀའ་སྩལ་ཏོ། །གསང་བ
107.24a
པའི་བདག་པོ་ལག་ན་རྡོ་རྗེ་ཁྱོད་ཀྱིས་གང་མདོ་སྡེ་ཟབ་མོ་འདི་ལྟ་བུ་འདི་གསང་བ་པའི་ཚིག་གི་དོན་བཞིན་དུ་སེམས་ཅན་ཐམས་ཅད་ལ་ལུང་བསྟན་ཅིང་བཤད་དེ་དཀྲོལ་ཞིང་རྣམ་པར་ཕྱེ་བ་ལེགས་སོ་ལེགས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ལག་ན་རྡོ་རྗེ་ལ་ཇི་ལྟར་ལེགས་སོ་ཞེས་བྱ་བ་བྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་སུ་གཏོགས་པའི་དེ་བཞིན་གཤེགས་པ་ཐམས་ཅད་ཀྱིས་ཀྱང་གསང་བ་པའི་བདག་པོ་ལག་ན་རྡོ་རྗེའི་མགོ་ལ་ཕྱག་གཞག་སྟེ། ཆེད་དུ་བཀའ་སྩལ་པ་འདི་དག་ཀྱང་ཆེད་དུ་བཀའ་སྩལ་ཅིང་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ཆོས་ཀྱི་རྣམ་གྲངས་འདི་འཇིག་རྟེན་གྱི་ཁམས་མང་པོ་དག་ན་མིང་འཛིན་པ་ཡང་དཀོན་ན་རབ་ཏུ་གསལ་བར་བྱེད་པ་ལྟ་ཅི་སྨོས། གསང་བ་པའི་བདག་པོ་ལག་ན་རྡོ་རྗེས་ཆོས་ཀྱི་རྣམ་གྲངས་འདི་བཤད་པ་ན་ལྷའི་བུ་གང་གཱའི་ཀླུང་ཚད་མེད་གྲངས་མེད་དཔག་ཏུ་མེད་པའི་བྱེ་མའི་རྡུལ་ཕྲ་རབ་ཀྱི་རྡུལ་ལས་ཤིན་ཏུ་འདས་པ་སྙེད་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དགེ་སློང་དང་དགེ་སློང་མ་དང ། དགེ་བསྙེན་དང་དགེ་བསྙེན་མ་དང ། ལྷ་དང་ཀླུ་དང་གནོད་སྦྱིན་དང ། དྲི་ཟ་དང་ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང་ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་རབ་ཏུ་མང་པོ་དག་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་བས་ཀྱང་ཆེས་མང་བའི་སེམས་ཅན་རྣམས་ནི་ཕྱིར་མི་ལྡོག་པ་ཉིད་དུ་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དང ། དེ་མ་ཡིན་པ་སངས་རྒྱས་ཀྱི་ཞིང་གཞན་དཔག་ཏུ་མེད་ཅིང་གྲངས་མེད་ལ་བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་རྣམ་པ་དྲུག་ཏུ་གཡོས་སོ། །གསང་བ་པའི་བདག་པོ་ལག་ན་རྡོ་རྗེ་ལ་ཡང་ཆོས་ཀྱི་དགབ་པ་དང ། མཆོད་པའི་ཕྱིར་ནམ་མཁའི་དཀྱིལ་ན་རྔ་རྣམས་མ་རྡུངས་པར་ཀུན་ནས་སྒྲ་བྱུང་ངོ ། །བྱང་ཆུབ་སེམས་དཔའི་རྫུ་འཕྲུལ་གྱི་གཞལ་མེད་ཁང་གི་ཁང་པ་བརྩེགས་པ་རྣམས་སུ་ཀུན་ནས་སིལ་སྙན་དང ། ཕེག་རྡོབ་པ་དང་གླུ་དབྱངས་བླངས
107.24b
པས་ལྷའི་བུ་མོ་རྣམས་གར་བྱེད་དོ། །སྤོས་དང་བྱུག་པ་དང་བདུག་པ་དང་ཕྱེ་མ་དང་གོས་དང ། གདུགས་དང་རྒྱལ་མཚན་དང ། བ་དན་དང ། དཔག་བསམ་གྱི་ཤིང་ལྗོན་པ་དང ། རིན་པོ་ཆེ་དང་མུ་ཏིག་གི་རྒྱན་ཕྲེང་དང ། མེ་ཏོག་པད་མ་དང ། ཀུ་མུ་ད་དང ། ུཏ་པ་ལ་དང ། དྲི་མཆོག་དང་གནའ་མའི་མེ་ཏོག་དང ། པ་རི་ཤ་ཀ་དང ། པ་རི་ཤ་ཀ་ཆེན་པོ་དང ། བཏང་གཟུངས་དང་གཏང་བཟུང་ཆེན་པོ་དང ། མན་དཱ་ར་བ་དང་མན་དཱ་ར་བ་ཆེན་པོ་དང ། མཉྫུ་ཤ་ཀ་དང་མཉྫུ་ཤ་ཀ་ཆེན་པོ་དང་ཀུན་ནས་སྐྱེས་དང་ཀུན་ནས་སྐྱེས་ཆེན་པོའི་མེ་ཏོག་གི་ཆར་གྱི་སྤྲིན་ཀུན་ནས་མངོན་པར་བབ་བོ། །སྤོས་ཆུའི་ཆར་གྱི་སྤྲིན་ཡང་མངོན་པར་བབ་པོ། །དེ་ནས་ཚངས་པ་དང་ཁྱབ་འཇུག་དང ། དབང་ཕྱུག་ཆེན་པོ་དང་བརྒྱ་བྱིན་དང ། འཇིག་རྟེན་སྐྱོང་བ་དང་གནོད་སྦྱིན་དང་ནམ་མཁའ་ལྡིང་དང ། མི་འམ་ཅི་དང་ལྟོ་འཕྱེ་ཆེན་པོ་དང ། མ་མོའི་གདོན་གྱི་ཚོགས་དང་འབྱུང་པོ་དང ། རྗེད་བྱེད་དང ། སྐེམ་བྱེད་དང་སྒྲུབ་པ་དང ། སྦྲུལ་འཛིན་བཅས་དང་གནོན་པོ་དང ། མ་མོ་དང་ཡི་དགས་དང ། ཤ་ཟ་དང་བྲམ་ཟེའི་སྲིན་པོ་དང ། མཁའ་འགྲོ་མ་དང ། ཕྱོགས་དང་ཕྱོགས་མཚམས་དང ། མཁར་དང་རི་དང་སའི་ལྷ་ལ་སོགས་པ་སྡང་བ་གདོན་བགེགས་དང ། ལོག་འདྲེན་ཐམས་ཅད་དང ། དེ་མ་ཡིན་པ་གཞན་ཡང་ལྷ་དང ། མི་དང་མི་མ་ཡིན་པ་དག་བླ་གོས་རྣམས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གིས་བདག་ཅག་གཟིར་ཅིང་ཉེ་བར་གཟིར་བས་རིག་སྔགས་འཆང་ཐམས་ཅད་དངོས་གྲུབ་སྩོལ་བ་དང ། དམ་ཚིག་ཐམས་ཅད་དུ་འཇུག་པ་ལ་ཡང་དག་པར་གནང་བར་བགྱིད་པར་འགྱུར་བ་རང་གི་སྙིང་པོ་འདི་བདག་ཅག་ལ་བསྟན་དུ་གསོལ། དེ་ནས་བཅོམ་ལྡན་འདས་ཀྱིས་ཚངས་པ་ལ་སོགས་པ་ལྷའི་ཚོགས་དེ་དག་ལ་ལེགས་སོ་ཞེས་བྱ་བ་བྱིན་ཏེ། གྲོགས་པོ་དག་གང་གི་ཕྱིར་ཁྱེད་ཅག་འདི་ལྟར་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་ནི་ལེགས་སོ་ལེགས་སོ། །དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང ། ངས་ཁྱེད་རང་གི་སྙིང
107.25a
པོ་བསྟན་པར་བྱའོ། །དེ་དག་གིས་ཀྱང་བཅོམ་ལྡན་འདས་ལ་ལེགས་སོ་ལེགས་སོ་ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་ལྷའི་རྔ་བོ་ཆེ་དང ། རྒྱ་མཚོ་དང་སྤྲིན་ཆེན་པོའི་སྒྲ་ལྟ་བུའི་གསུང་ཚངས་པ་ཆེན་པོའི་སྒྲ་བས་ལྷག་པ་སྣ་ཚོགས་སྙན་ཅིང་རྒྱ་ཆེ་ལ་ཟབ་པ་ཐོག་མ་དང་བར་དང་ཐ་མར་དགེ་བ། སེམས་ཅན་ཐམས་ཅད་ཀྱི་སྙིང་དུ་འཐད་པ། གསལ་བ། འཇེབས་པ་དག་པ། མཉེན་པ་སྙན་པ། བརྗོད་པའི་ཚིག་ཁམས་གསུམ་པ་ཐམས་ཅད་ལ་གོ་བར་བྱེད་པ། དེ་བཞིན་གཤེགས་པའི་སེང་གེའི་སྒྲ་བླ་ན་མེད་པ་དེས་གྲུབ་པའི་གསང་སྔགས་ཀྱི་གཞི་འདི་དག་གསུངས་སོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། ཛ་ཡ་ཛ་ཡ། ཛ་ཡ་བ་ཧ། ཙི་ལི་ཙི་ལི། མི་ལི་མི་ལི། ལུ་ཊུ་ལུ་ཊུ། ཛ་ཡེ་བི་ཛ་ཡེ། ཛ་ཡན་ཏི། བི་ཛ་ཡན་ཏི། ཨ་ཛི་ཏེ། ཨ་པཱ་རཱ་ཛི་ཏེ། ཏདྱི་ཏེ། སརྦ་དུཥྚ་པྲ་དུཥྚ་སྟ་མ་བྷ་ནི། ཛམ་བྷ་ནི། མོ་ཧ་ནི། ཤཝེ་ཏེ་ཀ་རཱ་ལེ། ཀེ་ཡུ་རེ། སརྦ་བུད་དྷ་ཨ་དྷིཥྛི་ཏི། བན་དྷ་རཱ་པཱ་སི་ནི། པརྞ་ཤ་བ་རི། ཤྲཱི་ཡེ་མ་ཧཱ་ཤྲཱི་ཡེ་སརྦ་ཨད་བྷུ་ཏ་ཡ་ཤྲི་ཏེ། པད་མ་བི་ཧེ། པད་མ་མཱ་ལི་ནི། བཛྲ་ཨཾ་གུ་ཤི། བཛྲ་མ་ཏེ། བཛྲ་པཱ་ཏཱ་ལི། ཤཱུ་ལི་ནི། བཛྲ་དྷཱ་རེ། ཧི་ཧི་ཧི་ཧི། བཛྲ་པཱ་ཎི། ཧེ་ཧེ་ཧེ་ཧེ། བཛྲ་པཱ་ཎི། བཛྲ་ཤཱུ་ལི་ཎི། ཙཀྲ་དྷ་དེ། ཧི་ཧི་བཛྲ་པཱ་ཎི། ཧེ་ཧེ་བཛྲ་པཱ་ཎི། ཧི་ཧི་ཧི་ཧི། ཧེ་ཧེ་ཧེ་ཧེ། བཛྲ་པཱ་ཎི། ཀ་ལ་ཀ་ལ། བ་ལ་བ་ལ། ར་ལ་ར་ལ། དྷ་མ་དྷ་མ། ས་ར་ས་ར། ཧཱ་ཧཱ་ཧཱ་ཧཱ་ཧཱ། ཙི་ལི་མེ་ལེ། ཚི་ལེ། དི་ལི། དི་དི་ལ། དི་མི་ལེ། ཛྭ་ལེ། མ་ཧཱ་ཛྭ་ལེ། ཛྭ་ལི་ཏི། པྲ་ཛྭ་ལི་ཏི། ཐ་ར་ཐག་ག་ཐ་རེ། མུ་གུ་ཏི། ཀྵ་མེ། ཀྵ་མ་མེ། གྲུབ་པའི་ཚོགས་ཀྱིས་ཕྱག་བྱས་མ། ལྷ་ཐམས་ཅད་ཀྱི་སྙིང་ཀུན་དུ་འཇུག་པར་བྱེད་མ། སེམས་ཅན་ཐམས་ཅད་ཀྱི་སྙིང་འབིགས་མ། སྡང་བ་རབ་ཏུ་སྡང་བ་ཐམས་ཅད་ཀྱི་སྙིང་འཇོམས་མ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་རྗེས་སུ་སྐྱོང་མ། བྱང་ཆུབ་སེམས་དཔའ་ཐམས་ཅད་ཀྱི་སྙིང་པོ་ལ་འཇུག་མ་ཚུར་ཤོག་།དམ་ཚིག་རྗེས་སུ་སྐྱོངས་ཤིག་།སེམས་ཅན་ཐམས་ཅད་ཀྱི་སྙིང་རྣམས་ཁུག་ལ་དམ་ཚིག་ལ་ཁོད་ཅིག་།ཐམས་ཅད་མཁྱེན་པ་ལ་ཕྱག་འཚལ་ལོ་སཝཱ་ཧཱ། འཇིག་རྟེན་མཁྱེན་པ་ཐམས་ཅད་ལ་ཕྱག་འཚལ་ལོ་སཝཱ་ཧཱ། ཏྲ་ཊ་ཏྲ་ཊ། སྥོ་ཊ་ཡ་སཝཱ་ཧཱ། གྱེན་དུ་ལྟ་ལ་སཝཱ་ཧཱ། རྣམ
107.25b
པར་ལྟ་ལ་སཝཱ་ཧཱ། ཆུ་སྲིན་ལ་སཝཱ་ཧཱ། མེ་ལ་སཝཱ་ཧཱ། ཚངས་པ་ལ་སཝཱ་ཧཱ། ཁྱབ་འཇུག་ལ་སཝཱ་ཧཱ། དྲག་པོ་རྣམས་ལ་སཝཱ་ཧཱ། བརྒྱ་བྱིན་ལ་སཝཱ་ཧཱ། འཇིག་རྟེན་སྐྱོང་བ་རྣམས་ལ་སཝཱ་ཧཱ། ཐམས་ཅད་ལ་སཝཱ་ཧཱ། ལྷ་རྣམས་ལ་སཝཱ་ཧཱ། ནོར་རྣམས་ལ་སཝཱ་ཧཱ། མ་མོ་རྣམས་ལ་སཝཱ་ཧཱ། མཚུན་རྣམས་ལ་སཝཱ་ཧཱ། བགེགས་དང་ལོག་འདྲེན་ཐམས་ཅད་ལ་སཝཱ་ཧཱ། ས་ལ་སཝཱ་ཧཱ། དབྱངས་ཅན་ལ་སཝཱ་ཧཱ། ལྷ་དང་ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང་ནམ་མཁའ་ལྡིང་དང ། མི་འམ་ཅི་དང་ལྟོ་འཕྱེ་ཆེན་པོ་ཐམས་ཅད་དང ། སྲིན་པོ་ལ་སོགས་པ་ཁམས་གསུམ་ཐམས་ཅད་དུ་གཏོགས་པའི་སེམས་ཅན་ཐམས་ཅད་ལ་སཝཱ་ཧཱ། ཚུར་ཤོག་ཚུར་ཤོག་།དམ་ཚིག་རྗེས་སུ་སྐྱོངས་ཤིག་།ཀུ་རུ་ཀུ་རུ། ས་ར་ས་ར། ཏིཥྛ་ཏིཥྛ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཧཱུཾ་ཡཱཾ་པཱཾ། ཙཎ་ཌ་ལི། མ་ཏང་གི། བྲཧྨ་ནི། པུཀྐ་སི། དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བདག་ལ་གསང་སྔགས་གཞི་རྣམས་གྲུབ་པར་གྱུར་ཅིག་སཝཱ་ཧཱ། དེ་བཞིན་གཤེགས་པས་རང་གི་སྙིང་པོ་དང ། ལྷ་ཐམས་ཅད་ཀྱི་སྙིང་པོ་འདི་གསུངས་པ་ན་ཐམས་ཅད་དང་ལྡན་པའི་ལྷའི་འཁོར་དེ་འཇིགས། དངངས་སྐྲག་པར་གྱུར་ནས། ཆུ་ཤིང་གི་ཚལ་རླུང་དྲག་པོ་ཆེན་པོས་བསྐྱོད་དེ་རྩ་བ་བཅད་པ་བཞིན་དུ་གཡོ་ཞིང་འགུལ་ལ་སྙིང་ཚིག་སྟེ། རྡོ་རྗེའི་ཕུར་བུས་བཏབ་པ་བཞིན་དུ་ཟུག་ཅིང་ཞིག་ས་ལ་འགྲེ་ཞིང་སྐྱབས་བཙལ་བའི་ཕྱིར་འདུ་ཤེས་ཙམ་གྱིས་སངས་རྒྱས་བཅོམ་ལྡན་འདས་ལ་འབོད་པ་དང ། བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ལྷའི་འཁོར་འདི་སློང་ཤིག་།ངས་དམ་ཚིག་འདི་ཡོངས་སུ་འཛིན་དུ་གཞུག་གོ་།རིག་སྔགས་གྲུབ་པ་འབྱོར་བར་བྱེད་པའི་སྙིང་པོ་ལ་གཞོལ་བ་བསྒྲགས་སོ། །དེ་སྐད་ཅེས་བཀའ་སྩལ་པ་དང ། གསང་བ་པའི་བདག་པོ་ལག་ན་རྡོ་རྗེ་གསང་བ་པའི་སྙིང་པོ་འདིས་ལྷའི་འཁོར་དེ་དག་ཐམས་ཅད་བསླང་ངོ ། །དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ོཾ་ཀི་ལི་ཀི་ལ། བཱ་ལ་ཀི་ལི་ཀི་ལ་ཡ་སཝཱ་ཧཱ། བཅོམ་ལྡན་འདས་འདི་ནི་བདག་གི་སྙིང་པོ་མཆོག་ཏུ་གསང་བ་ལགས་ཏེ། རིག་སྔགས་ཐམས་ཅད་འགྲུབ་པར་བགྱིད་པ་ལགས་སོ། །
107.26a
དེས་ནི་བདག་ཀྱང་དྲངས་ནས་གཞན་གྱིས་མ་བཏང་བར་འཆིའོ། །དབང་དུ་མཆིའོ། །དངོས་གྲུབ་སྩལ་བར་བགྱིའོ། །ལུང་བཞིན་བགྱིའོ། །བསྲུང་བར་བགྱིའོ། །དཔལ་བསྐྱེད་པར་བགྱིའོ། །བགེགས་དང་ལོག་འདྲེན་ཐམས་ཅད་རྣམ་པར་བཤིག་གོ་།སེམས་ཅན་ཐམས་ཅད་གདུལ་བར་བགྱིའོ། །འབྱུང་པོ་ཐམས་ཅད་རྣམ་པར་བཤིག་པར་བགྱིའོ། །ནད་ཐམས་ཅད་བསལ་བར་བགྱིའོ། །སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ། །བཅོམ་ལྡན་འདས་བདག་གི་སྙིང་པོ་མཆོག་ཏུ་གསང་བ་འདི་ནི་འདི་ནས་བསྐལ་པ་གྲངས་མ་མཆིས་པ་གསུམ་དུ་དཀའ་བ་སྤྱོད་པ་ཆེན་པོ་བགྱིད་པ་ན་གནོད་པ་བགྱིད་པ་བགེགས་དང་ལོག་འདྲེན་ཐམས་ཅད་ཀྱིས་རྣམ་པར་གཙེས་པའི་ཚེ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཛིན་མེ་ལྟར་བློས་རྣམ་པར་བསྒྱིངས་ཤིང་རྣམ་པར་རོལ་པ་མངོན་ཤེས་དྲི་ཤིང་སྣང་དཔལ་གྱིས་བདག་ལ་བསྲུང་བའི་སླད་དུ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེས་སྙིང་པོ་མཆོག་ཏུ་གསང་བ་འདི་སྨྲས་མ་ཐག་ཏུ་འཁོར་དེ་ཐམས་ཅད་བསམ་གཏན་གྱི་དགའ་བ་དང་བདེ་བས་ཚིམ་པར་གྱུར་ཏེ། གསང་བ་པའི་བདག་པོ་ལག་ན་རྡོ་རྗེའི་དམ་ཚིག་གི་བསྟན་པ་ལ་གནས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་ཟུང་ཤིག་།ཆོངས་ཤིག་ལྷོགས་ཤིག་།འཛིན་དུ་ཆུག་ཤིག་།ཀུན་ཆུབ་པར་གྱིས་ཤིག་།གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག་དང ། དེས་སེམས་ཅན་མང་པོ་ལ་ཡུན་རིང་པོར་ཕན་པ་དང ། བདེ་བ་དང་ཐ་མར་དེ་བཞིན་གཤེགས་པའི་ཡེ་ཤེས་བླ་ན་མེད་པ། ཆགས་པ་མེད་པ། སྒྲིབ་པ་མེད་པ་ཐོབ་ཅིང་རྟོགས་པར་འགྱུར་རོ། །སུ་ཆོས་ཀྱི་རྣམ་གྲངས་འདི་འཆང་བ་དང ། ཀློག་པ་དང ། འཛིན་དུ་འཇུག་པ་དང ། ཀུན་ཆུབ་པར་བྱེད་པ་དང ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དང ། མཆོད་པ་དང་ཡི་གེར་འདྲི་བ་དང ། ཡི་གེར་འདྲིར་འཇུག་པ་དང ། ཁ་ཏོན་བྱེད་པ་དང ། ཉན་པ་དང ། སེམས་པ་དེ་རིང་པོར་མི་ཐོགས་པར་བླ་ན་མེད་པ་ཡང་དག་པར་རྫོགས་པའི
107.26b
བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །འདི་ནས་ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་ངན་འགྲོ་ལོག་པར་འགྲོ་བར་མི་འགྱུར་རོ། །རིགས་དམའ་བ་རྣམས་སུ་སྐྱེ་བར་མི་འགྱུར། དབུལ་པོའི་རིགས་རྣམས་སུ་སྐྱེ་བར་མི་འགྱུར་ཏེ། ཤེས་རབ་མེད་པར་ཡང་མ་ཡིན། མ་དུལ་བར་མ་ཡིན། ཚེ་ཐུང་བར་མ་ཡིན་ཞིང་ཚེ་རབས་ཚེ་རབས་སུ་ཚེ་རབས་དྲན་པར་འགྱུར་རོ། །བྱང་ཆུབ་ཀྱི་སེམས་བརྗེད་པར་མི་འགྱུར་རོ། །ཐོས་པ་འཛིན་པར་འགྱུར་རོ། །རབ་ཏུ་དབེན་པ་ལ་མངོན་པར་དགའ་བར་འགྱུར་རོ། །འཁོར་ངན་པ་ཅན་མ་ཡིན་པར་འགྱུར་རོ། །ཚིག་གཟུང་བར་འོས་ཤིང་སྙན་པར་འགྱུར་རོ། །སྐལ་བ་བཟང་ཞིང་གཟུགས་བཟང་བར་འགྱུར་རོ། །ཤེས་རབ་ཆེན་པོ་དང ། སྤོབས་པ་ཆེན་པོ་དང་དབང་དང་ལྡན་པར་འགྱུར་རོ། །དེ་བཞིན་གཤེགས་པ་ཐམས་ཅད་མཉེས་པར་བྱ་བ་ལ་མཁས་པར་འགྱུར་རོ། །དགེ་བའི་བཤེས་གཉེན་གྱིས་ཡོངས་སུ་ཟིན་པར་འགྱུར་རོ། །སྡིག་པའི་གྲོགས་པོ་ཡོངས་སུ་སྤོང་བར་འགྱུར་རོ། །ཕ་རོལ་དུ་ཕྱིན་པ་ཡོངས་སུ་རྫོགས་པར་བྱ་བ་ལ་མཁས་པར་འགྱུར་རོ། །སེམས་ཅན་ཐམས་ཅད་ཡོངས་སུ་རྫོགས་པར་བྱ་བ་ལ་མཁས་པར་འགྱུར་རོ། །སངས་རྒྱས་ཀྱི་ཞིང་ཆེ་ཞིང་མཐའ་ཡས་པ་ལ་རྫུ་འཕྲུལ་དང་ལྡན་པར་འགྱུར་རོ། །ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་དེ་བྱང་ཆུབ་ཀྱི་སེམས་མི་བརྗེད་པར་འགྱུར་རོ། །ཚེ་འདི་ཉིད་ལ་བགེགས་དང་ལོག་འདྲེན་དང ། རིག་སྔགས་འཆང་གྲུབ་པ་དང ། འབྱུང་པོ་དག་དང་གདོན་གྱི་ཚོགས་དང ། མ་མོ་དང་ཡི་དགས་དང ། ཤ་ཟ་དང་ལྷ་དང་ཀླུ་དང ། གནོད་སྦྱིན་དང་དྲི་ཟ་དང ། ལྷ་མ་ཡིན་དང་ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་ལ་སོགས་པ་ཐམས་ཅད་ཀྱིས་མི་ཐུལ་བར་འགྱུར་རོ། །དེའི་ལས་ཀྱི་སྒྲིབ་པ་ཐམས་ཅད་བྱང་བར་འགྱུར་རོ། །ནད་ཐམས་ཅད་དང་བྲལ་བར་འགྱུར་རོ། །སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་འཆི་བའི་དུས་བྱེད་པར་མི་འགྱུར་རོ། །དེ་ལ་རིག་སྔགས་ཐམས་ཅད་ཀྱང་འགྲུབ་པར་འགྱུར་རོ། །དེ་ལ་ལྷ་ཐམས་ཅད་ཀྱང་སྲུང་ཞིང་སྦེད་པ་དང་ཡོངས་སུ་སྐྱོབ་པར་འགྱུར་རོ། །དེའི་རྩོམ་པ་ཐམས་ཅད་ཀྱང་སླ་བར་འགྱུར་རོ། །འཇིག་རྟེན་པ་དང་འཇིག་རྟེན་ལས་འདས་པ་དང་དཀྱིལ་འཁོར་ཐམས་ཅད་ཀྱི་དམ
107.27a
ཚིག་ལ་ཞུགས་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་བསྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའ་ཐམས་ཅད་ཀྱི་མཆོད་པའི་སྤྲིན་དུ་བསྟན་པ་ཞེས་བྱ་བར་ཟུང་ཤིག་།དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་སྒྲིབ་པ་མེད་པ་བསྐོར་བ་ཞེས་བྱ་བར་ཡང་ཟུང་ཤིག་།དེ་བཞིན་གཤེགས་པའི་ཆོས་ཀྱི་དབྱིངས་ལ་མཁས་པ་ཞེས་བྱ་བར་ཡང་ཟུང་ཤིག་།བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བར་ཡང་ཟུང་ཤིག་།བདུད་ཀྱི་ཕྱོགས་འདུལ་བ་ཞེས་བྱ་བར་ཡང་ཟུང་ཤིག་།རྟེན་ཅིང་འབྲེལ་པར་འཇུག་པ་རབ་ཏུ་རྟོགས་པ་ཞེས་བྱ་བར་ཡང་ཟུང་ཤིག་།དམ་པའི་ཆོས་ཀྱི་ཕྱག་རྒྱའི་མཚན་ཉིད་ཅེས་བྱ་བར་ཡང་ཟུང་ཤིག་།རིག་སྔགས་དང་དཀྱིལ་འཁོར་དང ། ཕྱག་རྒྱ་དང་དམ་ཚིག་ཐམས་ཅད་ལ་རབ་ཏུ་འཇོག་པ་ཞེས་བྱ་བར་ཡང་ཟུང་ཤིག་།ལག་ན་རྡོ་རྗེའི་རྣམ་པར་ཐར་པའི་ཏིང་ངེ་འཛིན་གྱི་ཆོ་འཕྲུལ་ཞེས་བྱ་བར་ཡང་ཟུང་ཤིག་།རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་ཤེས་བྱ་བར་ཟུང་ཤིག་།དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱིས་གསུངས་པ་ལ་ལེགས་སོ་ཞེས་གསོལ་ཏེ་མངོན་པར་དགའ་ནས་ཅང་མི་སྨྲ་བར་གྱུར་ཏོ། །དེ་ནས་བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པ་དེ་དག་ཐམས་ཅད་དང ། ལྷ་དང་ཀླུ་དང ། གནོད་སྦྱིན་དང ། དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་དེ་དག་ཐམས་ཅད་དང ། ཐམས་ཅད་དང་ལྡན་པའི་འཁོར་དེ་བཅོམ་ལྡན་འདས་དང་ལག་ན་རྡོ་རྗེས་གསུངས་པ་ལ་མངོན་པར་བསྟོད་དོ། །འཕགས་པ་རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས། རྫོགས་སྷོ།། །།རྒྱ་གར་གྱི་མཁན་པོ་ཤཱི་ལེན་དྲ་བོ་དྷི་དང །
107.27b
ཛྙཱ་ན་སིད་དྷི་དང ། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།