༄#། ་།རྒྱ་གར་སྐད་དུ། ཨཱརྱ་དྷརྨ་སཱ་ག་ར་ནཱ་མ་དྷཱ་ར་ཎཱི། བོད་སྐད་དུ། ་འཕགས་པ་ཆོས་ཀྱི་རྒྱ་མཚོ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་དགེ་སློང་ལྔ་བརྒྱ་ཐམ་པའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ་དང ། དགེ་སློང་དེ་དག་གིས་བཅོམ་ལྡན་འདས་ལ་ཉན་པ་དང ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །དགེ་སློང་དག་ངས་ནི་ཆོས་ཟབ་མོ་མཐོང་བར་དཀའ་བ། རྟོགས་པར་དཀའ་བ། ཆ་ཕྲ་བ། བརྟགས་པ་མཁས་ཤིང་ཤེས་པས་རིག་པར་བྱ་བ་རྟོགས་སོ། །ངས་ནི་སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་སྙིང་བརྩེ་བ་དང་སྐྱེ་བོ་ཕལ་པོ་ཆེའི་དོན་དང ། ལྷ་དང་མི་རྣམས་ལ་ཕན་པ་དང་བདེ་བའི་ཕྱིར་ཆོས་ཀྱི་འཁོར་ལོ་བསྐོར་ཏོ། །ངས་ཐོགས་པ་མེད་པའི་ཆོས་ཀྱི་འཁོར་ལོ་བསྐོར་བའི་ཕྱིར་ངེས་པ་ཁོ་ནར་བསྒྲུབ་པར་བྱའོ། །དགེ་སློང་དག་ཆོས་ཀྱི་རྒྱ་མཚོའི་གཟུངས་ཤེས་བྱ་བའི་ཆོས་ཀྱི་རྣམ་གྲངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲན་པའི་བློ་དང་ལྡན་པ། བློ་གྲོས་ཀྱི་བློ་དང་ལྡན་པ། རྟོགས་པའི་བློ་དང་ལྡན་པ། བརྟན་པའི་བློ་དང་ལྡན་པ། ཤེས་རབ་ཀྱི་བློ་དང་ལྡན་པ། གསུང་གི་མཆོག་དང་ལྡན་པ། སྤོབས་པ་མཆོག་དང་ལྡན་པ། མཁྱེན་ཅིང་གཟིགས་པ་དག་གིས་བསྟན་ཅིང་བཤད་པ་ཡོད་དེ། གང་དག་དེ་ཤེས་པ་དང ། གང་དག་དེ་འཛིན་པ་དེ་དག་གིས་ནི་མྱུར་བ་ཁོ་ནར་ཆོས་ལྔ་ཐོབ་པར་འགྱུར་རོ། །ལྔ་གང་ཞེ་ན། འདི་ལྟ་སྟེ། ཐོས་པ་འཛིན་པའི་དྲན་པ་དང་ལྡན་པར་འགྱུར་བ་དང་བརྗེད་ངེས 107.85b པ་མེད་པའི་དྲན་པ་དང་ལྡན་ཞིང་ཆོས་བཟུང་བ་རྣམས་ཆུད་ཟ་བར་མི་འགྱུར་བའི་བློ་གྲོས་དང་ལྡན་པར་འགྱུར་བ་དང་རྣོན་པོ་ཐོབ་པའི་རྟོགས་པ་དང་ལྡན་པར་འགྱུར་བ་དང་ཡི་གེ་དང་དོན་དང་ཚིག་ལ་འཇུག་པའི་སྤོབས་པ་ཐོགས་པ་མེད་པ་དང་ལྡན་པར་འགྱུར་བ་དང་སེམས་ཅན་རྣམས་ཀྱི་རྒྱུའི་ལམ་མངོན་པར་ཤེས་ནས་སྔོན་གྱི་གནས་རྗེས་སུ་དྲན་པ་ལ་མཁས་པར་འགྱུར་བ་སྟེ་ཆོས་ལྔ་པོ་འདི་དག་ནི་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བཞག་གོ་།དེ་ལྟར་ང་ཡང་འཇོག་གོ་།དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཐམས་ཅད་ཀྱི་སྡོམ་གྱི་གཞི་བསྡུ་བ་ཁྱོད་ལ་བསྟན་པར་བྱ་སྟེ། དེས་ན་ཁྱོད་ཀྱིས་མ་ཐོས་པའི་ཆོས་རྣམས་ཐོས་པར་འགྱུར་རོ། །ཐོས་པའི་ཆོས་རྣམས་འཛིན་པར་འགྱུར་རོ། །བཟུང་བའི་ཆོས་རྣམས་ནི་ཉམས་སུ་ལེན་པར་འགྱུར་རོ། །ཉམས་སུ་བླངས་པའི་ཆོས་རྣམས་ནི་གཞན་དག་ལ་ཁོང་དུ་ཆུད་པར་བྱེད་དོ། །ཚིག་གི་རབ་ཏུ་དབྱེ་བ་ལྔ་ནི་འདི་ལྟ་སྟེ། འདུ་བྱེད་ཀྱི་ཚིག་གི་རབ་ཏུ་དབྱེ་བ་དང ། དེ་བཞིན་དུ་མ་ཐོས་པའི་ཆོས་ཀྱི་ཚིག་གི་རབ་ཏུ་དབྱེ་བ་དང ། བླ་ན་མེད་པའི་ཚིག་གི་རབ་ཏུ་དབྱེ་བ་དང ། ས་ནས་ས་བརྟགས་པའི་ཡི་གེའི་ཚིག་གི་རབ་ཏུ་དབྱེ་བ་དང ། ངེས་པའི་ཚིག་དང་བརྡ་སྣ་ཚོགས་ཀྱི་ཚིག་གི་རབ་ཏུ་དབྱེ་བའོ། །དེ་ལ་འདི་དག་ནི་གཟི་བྱིན་བརྟན་པར་བྱད་པའི་ཚིག་རིག་སྔགས་དང་ལྡན་པ་སྟེ། གླིང་བཞི་པའི་འཇིག་རྟེན་གྱི་ཁམས་ཀྱི་གནོད་སྦྱིན་དང་སྲིན་པོ་དང་གྲུལ་བུམ་དང་ཡི་དགས་དང་ཤ་ཟ་འཛམ་བུའི་གླིང་དུ་ལྷགས་པ་ཐམས་ཅད་ཀྱིས་གང་ཟག་དེ་ལ་ཟས་ཀྱི་སྣ་གྲངས་རྣམས་དང་སྨན་རྣམས་སྦྱིན་པར་འགྱུར་རོ། །དེ་ལ་གསང་སྔགས་ཀྱི་ཚིག་ཆོས་ལས་བྱུང་བ་གཞན་དག་ལ་མི་གནོད་པ། དེ་བཞིན་གཤེགས་པས་གསུངས་པ། ལྷ་དང་ཀླུ་དང་གནོད་སྦྱིན་དང་དྲི་ཟ་རྣམས་ཀྱིས་མནོས་པ་བསྟན་པ་ཡོངས་སུ་འཛིན་པ་ནི་འདི་དག་ཡིན་ཏེ་ཀུན་དགའ་བོ་གསང་སྔགས་ཀྱི་ཚིག་འདི་དག་ཉོན་ཅིག་།ཁྱོད་ཕྱིས་འགྱོད་ཏ་རེ། སྱཱད་ཡ་ཐེ་དན། ཀརྨ་ཀེ་ཏ་མ་ནུད་ཙེ། ར་ཏི་རུ་ཏ་གྲན་དྲ་མ། ཐུ་མ་ན། ནཻ་ལ་ཏ། ཨ་སཾ་ཀུ་ལསྠཱ། བུ་མི་ཨ་ནུསྨ་རི། ཨི་ཤཾ་ག་མ་ཨི་ཤསྠཱ། ཀླེ་ན་ཨ་ནུ་ག་ཏེ། ཡཱ་མུ་ལ་གུམ་བྷེ། པ་བྷེ་མ་གུར་བ་ཡ་བ། ཨ་སྱ་བཱ་ཀྱ་སྱ་བི་ལཾ་བ། བེ་ལ་མ 107.86a ཐ་ཤྲཱི་བ་བ་རཱི་པན་ཙ་ཀ་།པྲ་ས་ཏེ། ཨ་བ་བེ་ལ། ཨ་གྲ་བེ་ལ། ནི་ཤི་ཁུ་ཨུ་ཙེ་ཛུ་མེ། ཨུ་ཛེ་ཛུ་མེ། ཀུན་དགའ་བོ་འདི་དག་ནི་གནོད་སྦྱིན་གྱི་དབབ་པ་གྲུབ་པ་དང ། གནོད་སྦྱིན་གང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་མཐོང་བ་ལ་བསྙེན་བཀུར་ཡང་བྱེད་བྱེད། རིམ་གྲོ་ཡང་བྱེད་བྱེད་པ་རྣམས་འཆིང་བ་སྟེ། ཀུན་དགའ་བོ་ཁྱོད་ཀྱིས་གནོད་སྦྱིན་དབབ་པ་གྲུབ་པ། དེ་བཞིན་གཤེགས་པས་གསུངས་པ་རྣམས་ཟུང་ཤིག་།ཀུན་དགའ་བོ་གང་ལ་ལ་གསང་སྔགས་ཀྱི་ཚིག་སྐྱོན་མེད་པའི་ཚིག་འདི་དག་འཛིན་པ་དང ། འཆང་བ་དང ། ཀུན་ཆུབ་པར་བྱེད་པ་དེ་ལ་ནི་རྒྱལ་པོ་ཆེན་པོ་བཞི་སེམས་བཞིན་དུ་གནས་སོ། །ཀུན་དགའ་བོ་གསང་སྔགས་ཀྱི་ཚིག་འདི་དག་གཟུང་བས་ནི་དྲན་པ་དང་ལྡན་པར་འགྱུར་རོ། །སངས་རྒྱས་རྣམས་དང་བྲལ་བར་མི་འགྱུར་རོ། །ཀུན་དགའ་བོ་ཤར་གྱི་ལུས་འཕགས་ཀྱི་གླིང་ན་ནི་གནོད་སྦྱིན་སྲིད་པ་སྣང་བྱེད་ཅེས་བྱ་བ་གནས་སོ། །ཀུན་དགའ་བོ་ནུབ་ཀྱི་བ་ལང་སྤྱོད་ཀྱི་གླིང་ན་ནི་གནོད་སྦྱིན་ཆེར་སྤྱོད་ཅེས་བྱ་བ་གནས་སོ། །ཀུན་དགའ་བོ་བྱང་གི་སྒྲ་མི་སྙན་གྱི་གླིང་ན་ནི་གནོད་སྦྱིན་རྣམ་གྲགས་ཞེས་བྱ་བ་གནས་སོ། །ཀུན་དགའ་བོ་འཛམ་བུའི་གླིང་ན་ནི་གནོད་སྦྱིན་གྲགས་ཐོབ་ཅེས་བྱ་བ་གནས་ཏེ། ཀུན་དགའ་བོ་གནོད་སྦྱིན་དེ་དག་གིས་ཀྱང་རྗེས་སུ་དྲན་པར་འགྱུར་རོ། །ཀུན་དགའ་བོ་གནོད་སྦྱིན་གཞན་གཟི་བརྗིད་ཟ་བ་གང་ཡིན་པ་དེ་དག་ཀྱང་དད་པ་ཐོབ་པར་འགྱུར་རོ། །དད་པ་ཐོབ་པར་གྱུར་ནས་ཀྱང་དད་པ་མི་ཕྱེད་པར་ཐོབ་པར་བྱ་བའི་ཕྱིར་འགྲོ་བར་བྱེད་དོ། །ཀུན་དགའ་བོ་དེ་ལ་འདི་དག་ནི་ཤེས་བཞིན་གྱི་ཚིག་དྲང་སྲོང་གིས་བསྟན་པ་དག་ཡིན་ཏེ། ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་དྲང་སྲོང་གི་མཆོག་གི་ཚིག་གི་མཆོག་སྲོག་ཆགས་འབྱུང་པོ་ཐམས་ཅད་ལ་རྣམ་པར་མི་འཚེ་བའི་ཚིག་རྣམས་ཟུང་ཤིག་དང་ངས་བཤད་དོ། །ཀུན་དགའ་བོ་དེ་ལ་ངའི་ཕྱི་ན་འབྲང་བའི་གནོད་སྦྱིན་གང་ཡིན་པ་དེ་དག་གིས་ཀྱང་བར་ཆད་བྱེད་མི་ནུས་སོ། །སྱཱད་ཡ་ཐེ་དན། དན་དྷ་ར་མ་ཧཱ་ཧ་ར། ཧ་ར་མ་བ་ར་ན། རུད་དྲ་ཏྲ། ཀུ་མ་ཏི་དྲི་ཏྲ། ཨིན་དྲ་མན་དུ་ཀེ་། བ་ཏེ། ས་ཧ་རཱ། ས་དྷུ་མ་ཏི། ཨི་ལ་ལ་བ་མ་ཏི། ཨ་བ་ཏི། ཏ་ར་བ་ར། ཡི་བིཥྚ་ས་ད་བིཥྚ། ཨ་བ་ཏིཥྚ། པ་རི་བརྟ། ཨི་ཤ་ར་བརྟ། ས་ད་བརྟ། ཀྲ་མ་ཀྲ་མ་ཏི་རན། ཨ་སི 107.86b པ་ཙ་མ་ལ་བི་ན་ཧ་ཐི། ཐ་ཤ་སུ་རེ། དྷུ་དྷུ། ཨུ་གྲ་མུ་ཀྲ། ཨུ་གྲ་བ་ཏི། བི་ས་ར་གྲ་མ་ཏི། ཐམས་ཅད་དང་ལྡན་པའི་གླིང་བཞི་པ་ཆེན་པོའི་འཇིག་རྟེན་གྱི་ཁམས་ཀྱི་གནོད་སྦྱིན་དང་འབྱུང་པོ་དང་གྲུལ་བུམ་དང་ཡི་དགས་དང་སྲུལ་པོ་དང་ཀླུ་དང་དྲི་ཟ་དང་ཤ་ཟ་གནས་པ་གང་ཡང་རུང་བ་དེ་དག་གིས་ཁྱིམ་གྱི་ནང་ན་གནས་པ་དང་ལམ་དུ་ཞུགས་པ་རྣམས་ཀྱིས་དེ་བཞིན་གཤེགས་པས་གསུངས་པའི་ཚིག་འདི་དག་ཐོས་ནས་དགའ་བར་འགྱུར་རོ། །ཀུན་དགའ་བོ་ཁྱོད་ཀྱིས་གཟུངས་སྔགས་ཀྱི་ཚིག་འདི་དག་ཟུང་ཤིག་།ཕྱིས་འགྱོད་ཏ་རེ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །གནོད་སྦྱིན་གྲུབ་པ་འདི་དག་ནི། །གླིང་བཞི་དག་ན་གཙོ་ཞེས་བྱ། །གསང་སྔགས་འདི་དག་སུ་འཆང་བ། །དེ་ཡི་དྲན་པ་འཕེལ་བར་འགྱུར། །སངས་རྒྱས་རྣམས་ཀྱིས་གསུངས་པ་ཡི། །གནོད་སྦྱིན་དེ་དག་ལྷགས་ནས་ནི། །ཆོས་རྒྱལ་རྣམས་ཀྱིས་བསྟན་པ་དག་།ཉམས་པར་གྱུར་པ་དེ་ལ་སྟོན། །དཔག་ཚད་བརྒྱ་ཕྲག་མང་པོར་ཡང ། །མཐར་གྱིས་སུ་ནི་སོང་ནས་ཀྱང ། །ཟབ་ཅིང་དོན་དང་ལྡན་པ་ཡི། །ཚིག་འདི་དག་ནི་མཉན་པར་བྱ། །འདི་དག་ཆོས་ཀུན་རྩ་བ་སྟེ། །དེ་དག་མཁས་རྣམས་ཉན་པར་གྱིས། །དྲག་པོ་དག་གིས་ཐོས་ན་ཡང ། །ཕྱི་ནས་མཆོག་ཏུ་དགའ་བ་སྟེ། །གང་ལ་བདེ་དང་སྡུག་བསྔལ་མེད། །དེ་ལ་དེ་ནི་དགའ་བར་འགྱུར། །ས་འདི་ཆགས་པ་མེད་པ་སྟེ། །སངས་རྒྱས་ས་ནི་བསམ་མི་ཁྱབ། །ཆགས་པ་མེད་པར་བསྟན་པ་ཡི། །བསམ་ཡས་ས་དེ་ཐོབ་གྱུར་ནས། །ཉི་མ་སྤྲིན་ལས་བྱུང་བ་ལྟར། །དེ་ནི་ས་སྟེང་དེ་བཞིན་སྣང ། །འདི་ལ་སྐྱེ་མཆེད་ཕུང་པོ་རྣམས། །བདེན་དང་བྱང་ཆུབ་ཡན་ལག་དབང ། །དགེ་བའི་ཆོས་ནི་ཟབ་མོ་རྣམས། །སངས་རྒྱས་གསུངས་པ་ཅི་ཡང་ཡོད། །དེ་ཡི་ཐོས་པའི་ཚོགས་རྣམས་གང ། །ནམས་ཀྱང་ཆུད་ཟར་མི་འགྱུར་ཏེ། །མ་ཐོས་ཆོས་རྣམས་དེ་དག་ཐོས། །ཉེས་དང་ཉེས་མིན་རྣམས་ལ་མཁས། །རྟོགས་པར་ཁོང་དུ་ཆུད་པའི་མཆོག་།མིག་བཟངས་རྣམས་ཀྱང་དག་པར་འགྱུར། །འཆང་བ་དང་ནི་སྟོན་བྱེད་པ། །དེ་ནི་རྟག་ཏུ་སངས་རྒྱས་བསྔགས། །སངས་རྒྱས་ཀྱི་ནི་ཆོས་རྣམས་ལ། །ཐེ་ཚོམ་མི་མངའ་བདེན་པ་གང ། །བདེན་དེས་བདག་ལ་ལུང་མནོས་པ། །ཅི་ཡོད་ཐམས་ཅད་གནས་གྱུར་ཅིག་།སངས་རྒྱས་རྣམས་ནི་འབྱུང 107.87a རྣམས་ལ། །བྱམས་པས་གནས་པའི་བདེན་པ་དེས། །རང་གི་སེམས་དང་གཞན་སེམས་ལ། །སྟོན་པ་རབ་ཏུ་གནས་གྱུར་ཅིག་།གླིང་བཞིའི་གནས་ཀྱི་གནོད་སྦྱིན་དག་།མ་དད་པ་དང་དད་པར་བསྟན། །གང་ལ་རྟོགས་པ་མི་གནང་བ། །དེ་ལ་དེ་ཀུན་དོན་སྟོན་འགྱུར། །གནོད་སྦྱིན་སྐར་གདོང་གང་ཡིན་དང ། །གླང་ཆེན་སྣ་དང་ཁྱད་པར་སྟོབས། །དྲག་པོ་དགའ་བྱེད་གསོད་བྱེད་དང ། །ཟླ་བ་མགོ་མེད་ལུག་གསོད་པ། །དཔའ་སྡེ་དང་ནི་ལག་དཔའ་དང ། །སྲིན་པོ་དང་ནི་ས་འཛིན་པ། །ལྗང་ཁུ་ཁ་དང་རྣ་བཟང་དང ། །རལ་གྲིའི་སྤུ་ཅན་བོང་བུ་རྣམས། །ཐམས་ཅད་གྲུབ་པར་བྱེད་པར་ཤོག་།གསང་སྔགས་འདི་དག་སུ་འཛིན་ལ། །གནོད་སྦྱིན་སྲིན་པོ་དེ་དག་ནི། །སྤྲོ་བར་གྱུར་ནས་འཛུད་པར་བྱེད། །རྟག་ཏུ་དེ་ནི་སྤོབས་པ་དང ། །ཚིག་རྣམས་དང་ནི་ལུང་བསྟན་དང ། །ངེས་པའི་ཚིག་དང་ཆོས་ཀུན་དང ། །ཡི་གེ་རྣམས་ལ་མཁས་པར་འགྱུར། །ལུང་མནོས་པ་ཡང་ཆུད་མི་ཟ། །རྟོགས་པ་མཐའ་ཡས་འཕེལ་བར་འགྱུར། །རྟག་ཏུ་དོན་དང་ཡི་གེ་ལ། །དེ་ཡི་ཤེས་པ་འཕེལ་བར་འགྱུར། །སུམ་བཅུ་རྩ་གསུམ་ལྷ་རྣམས་དང ། །མི་མཇེད་བདག་པོ་ཚངས་པ་ཡང ། །དེ་ཡི་ལེགས་བཤད་ཉན་པ་རྣམས། །དེ་ཡི་མོད་ལ་དྲན་པར་བྱེད། །སྱཱད་ཡ་ཐེ་དན། ཧུ་ཀུ་ན། མུ་ཀུ་ན། ཧ་ར་ན། བི་ཧ་ར་ན། ཨི་ཤ་སཾ་ཀྲ་མ་ན། ཨོཾ`་སུ་མུ་ཁ། ཏ་ཀ་ཎ། ཨ་ག་ཎ། ཨ་པྲ་ཡ། ཨུསྠ་མེ། ཀོ་བ་ཧ་རེ། ཨུ་རུ་པ། པྲ་བ་ཎ་ཏན། སཾ་གྲ་མེ་བ་ཧ་ཛ་ག་རེ། པྲ་ཤི་ག་རེ། གུཌྷ་བ་ནེ། ཨུད་ཏན། བི་ཀུ་ཎ། ཨི་ཤུ་ཀུ་ན། ཨ་ཏུ་ལ་ཏུ་ལ། ཨ་ཊི་བ་ཊི། བ་རི་ཙ་མོ་ཤ་།ཧ་ར། ཛ་གར་ཏ། ཨེ་བ་སཾ་པྲ་མུ་ཁེ། ཨ་ག་བ་རེ། ཋ་ཧུ་ས་ཧུ། ཨི་ཏི་ཡ། ཐཱ་ཧུ། ཙ་ཏུར་དྭཱི་བི་ཀ་ཡན། ཋ་ཧུ་མ་ཧུ། ཨུ་གྲ་ཧུ། དྷཱ་ར་ས་ཏུ། སཾ་གྲ་ཧ། ཨ་བི་ན་གྲ་ཧ། ཨ་བི་ན་གྲ་ཧ། པྲཛྙཱ་བྲིད་དྷི་ཡེ། ཋ་ཧུ་ས་ཧུ། ཀ་ར་ཀུ་རུ། དྷ་ས་ཧུ། དེ་ལ་འདི་སྐད་ཅེས་བྱ་སྟེ། གསང་སྔགས་ཀྱི་ནི་ཚིག་འདི་དག་།གང་གི་ལག་དང་ལུས་ལ་ཡོད། །དེ་ནི་ཐོས་ལ་རྨོངས་པ་མེད། །དེ་ནི་ཤེས་རབ་མེད་མི་འགྱུར། །སྐར་མདའ་ཇི་བཞིན་ཉི་མ་བཞིན། །ཟླ་བ་ཇི་ལྟར་སྣང་བ་བཞིན། །དེ་ལྟར་ཐོས་དང་དོན་གྱིས་ཀྱང ། །མྱ་ངན་འདས་པའི་བར་ལ་རེག་།དེ་ནས་བཅོམ་ལྡན་འདས་ཀྱིས་དེའི་ཚེ་གསང་སྔགས་འདི་དག་བཀའ་སྩལ་ཏོ། ། 107.87b སྱཱད་ཡ་ཐ་དན། ཙ་ར་ཌྷེ་བི་ཙ་ར་ཌྷེ། ཨ་མཾ་ཀུ་ཏེ། ཨ་ཏི་མི་ཏི། པ་ར་ཧ་རེ། གྷ་ཎ་བྷེ། ཧི་པ་ར་མེ། མ་ཧཱ་པྲ་ཏི་བཱ་ཧཱ་ནེ། ཛ་ཡ་ཛ་ཡ། ཨ་ནུ་ཀེ་།པ་ལ་པ་ལེ། ཨུ་གྲ་བ་ཏི། སཝ་ར་སཝ་ར། ཨ་བི་ས་རེ། གུ་གུན་དེ། པྲ་བི་བརྡྷེ། ས་མེ། ཨ་ཛི་ཏ་ཛ་ཡེ། ནུ་བ་ལེ་སུ་ཁོ་མ་སུ་སན་དྷི་ནི་ཀུ་མ་ནོ། སཀྵེ། ཙཱ་པེ་ཙཱ་པེ། ཙུ་པེ་ཙུ་པེ། ཙུ་ལུ་ཙུ་ལུ། པུ་ལུ་པུ་ལུ། བྱ་བ་པྲ་ས་རེ། ཀ་ར་ཀ་བྷིན་དྷེ། བི་ཛཱ་བི་ཛེ། ཨ་པྲ་ཏི་སན་དྷི། ནཱ་ནཱ་ནུ་མ་ཏི། པྲ་ན་ནུ་མ་ཏི། ཨ་རི་ད་སི། ཛེཥྛ་ནུ་པ་ནི་དེ། ཨ་སཾ་གྲ་ཨ་བ་ཏི། རིག་སྔགས་བསྡུས་པའི་གསང་སྔགས་ཀྱི་ཚིག་འདི་དག་ལུས་ལ་ཐོགས་ཏེ་འཆང་ན་གླིང་བཞི་པ་ཆེན་པོའི་འཇིག་རྟེན་གྱི་ཁམས་ན་གནོད་སྦྱིན་དང་སྲིན་པོ་དང་གྲུལ་བུམ་དང་ཡི་དགས་དང་ཤ་ཟ་གནས་པ་དེ་དག་ཐམས་ཅད་དབང་དུ་འགྱུར་ཞིང་དབང་དུ་མ་གྱུར་པ་རྣམས་ཀྱང་དབང་དུ་འགྱུར་རོ། །དོན་ཐམས་ཅད་ཀྱང་དེ་བཞིན་གཤེགས་པས་གནང་བ་བཞིན་དུ་འཚོ་བའི་མཐར་ཐུག་གི་བར་དུ་འཆི་བར་མི་འགྱུར་མེད་པར་མི་འགྱུར་རོ། །དེ་ལ་ཆོ་ག་ནི་འདི་ཡིན་ཏེ། དགོན་པར་འདུག་ལ་གཟུངས་སྔགས་འདི་དག་ཐམས་ཅད་ཞག་བདུན་གྱི་བར་དུ་བརྗོད་དེ་ཉིན་ལན་གསུམ་མཚན་ལན་གསུམ་དུ་དྲན་པར་བྱའོ། །དེ་ནས་ཞག་བདུན་ལོན་པའི་འོག་ཏུ་བསམ་པ་ཐམས་ཅད་འགྲུབ་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་ཐམས་ཅད་དང་ལྡན་པའི་འཁོར་དེ་དང་ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཆོས་ཀྱི་རྒྱ་མཚོ་ཞེས་བྱ་བའི་གཟུངས། རྫོགས་སོ།། །།རྒྱ་གར་གྱི་མཁན་པོ་སུ་རེན་དྲ་བོ་དྷི་དང ། པྲཛྙཱ་བར་མ་དང ། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །། ་ |