་།། ༄#། །རྒྱ་གར་སྐད་དུ། ཨ་གྲ་ཙརྱཱ་པྲ་ཎི་དྷཱ་ན། ་བོད་སྐད་དུ། མཆོག་གི་སྤྱོད་པའི་སྨོན་ལམ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སྐྱེ་དགུ་ཀུན་ལ་སྨན་དང་བདེ་སླད་དུ། །ཕྱོགས་བཅུའི་འཇིག་རྟེན་སངས་རྒྱས་རྣམས་ལ་འདུད། དེ་དག་ལ་ནི་རྗེད་ཅིང་མཆོད་པར་བགྱི། །འགྲོ་ཀུན་བྱང་ཆུབ་མཆོག་ལ་རེག་གྱུར་ཅིང ། །བྱམས་པ་དང་ནི་འཇམ་དཔལ་མངའ་བདག་ཏོག་།ཆོས་ཀྱི་བློ་གྲོས་དཔའ་བོ་བདུད་རྩི་གསུང ། །དཔའ་བོ་དེ་དག་ཕྱག་འཚལ་མཁྱེན་པ་ལྟར། །དེ་བཞིན་བདག་ཀྱང་མི་དབང་རྣམས་ལ་འདུད། །ཐུགས་རྗེ་ལྡན་ཞིང་འཇིག་རྟེན་དོན་མཛད་པའི། །རྒྱལ་བ་མི་མཁྱེན་མི་གཟིགས་མི་མངའ་བ། །མི་དབང་ཐུགས་བརྩེ་བྱམས་ལ་གནས་པ་ཡི། །རྒྱལ་བ་དེ་ཀུན་བདག་ལ་དགོངས་སུ་གསོལ། །སྔོན་གྱི་སྲིད་པ་དག་ཏུ་བདག་ཉིད་ཀྱིས། །སྡིག་པའི་ལམ་རྣམས་གང་བགྱིས་བདག་གིས་བཤགས། ། 13.326b དེ་བཞིན་ལུས་ངག་ཡིད་ཀྱིས་བགྱིས་པ་རྣམས། །དེ་དག་ཐམས་ཅད་བདག་གིས་སོ་སོར་བཤགས། །ཤཱཀྱ་ཐུབ་དང་མི་འཁྲུགས་འོད་དཔག་མེད། །དེ་དག་གིས་ནི་ཕྲིན་ལས་ཡོངས་སྦྱངས་དང ། །འཆགས་དང་བཤགས་པ་མཁྱེན་ཅིང་རྟོགས་གྱུར་ལྟར། །དེ་བཞིན་བདག་གིས་སྡིག་པ་བཤགས་པར་བགྱི། །ཐམས་ཅད་དགའ་མཛད་སྐྱེས་བུ་དམ་པ་གང ། །བྱང་ཆུབ་ཞུགས་པ་ཀུན་ལ་གསོལ་བ་དང ། །ངན་སོང་བཞི་པོ་མྱུར་དུ་ཞི་གྱུར་ཅིག་།མི་ཁོམ་འཇོམས་པར་བགྱིད་ཅིང་རྒྱུ་བར་ཤོག་།སངས་རྒྱས་བཟང་སྤྱོད་དྲི་མེད་མངའ་བདག་དང ། །དེ་བཞིན་ལྷུན་པོའི་དཔལ་དང་ཉི་མའི་སྒྲོན། །དེ་དག་བསོད་ནམས་ཡི་རང་མཁྱེན་པ་ལྟར། །དེ་བཞིན་བདག་ཀྱང་བསོད་ནམས་རྗེས་ཡི་རང ། །ཕྱོགས་བཅུ་དག་ན་སྦྱིན་པ་སྤྱོད་པ་གང ། །དེ་བཞིན་ཚུལ་ཁྲིམས་ཏིང་འཛིན་སྤྱོད་རྣམས་དང ། །ཤེས་རབ་སྒོམ་དང་བསོད་ནམས་སྟོབས་ཀུན་ལ། །བྱང་ཆུབ་ཡོན་ཏན་དོན་དུ་ཡི་རང་ངོ ། །རྒྱལ་བ་ཀུན་གྱི་ཡོན་ཏན་མཐའ་ཡས་དང ། །ཆོས་བསྟན་བྱང་ཆུབ་འཇོག་བགྱིད་ཐམས་ཅད་ལ། །བྱང་ཆུབ་ཡོན་ཏན་དོན་དུ་ཡི་རང་ངོ ། །འགྲོ་ཀུན་བྱང་ཆུབ་མཆོག་ལ་རེག་གྱུར་ཅིག་།འཇིག་རྟེན་རྒྱལ་བ་གང་བཞུགས་ཀུན་ལ་བསྐུལ། །ཕྱོགས་བཅུ་དག་ན་བྱང་ཆུབ་རྙེད་པ་གང ། །དེ་དག་ཚངས་བརྒྱས་ཇི་ལྟར་གསོལ་པ་ལྟར། །རྒྱལ་རྣམས་བཞུགས་ཤིང་ཆོས་མཆོག་སྟོན་གྱུར་ཅིག་།རྒྱལ་ཀུན་བསྐལ་པ་མང་པོར་བཞུགས་པར་ཤོག་།འགྲོ་ཀུན་བྱང་ཆུབ་མཆོག་ལ་རེག་གྱུར་ཅིག་།མི་རྣམས་ཐམས་ཅད་མཆོག་དང་བླ་མེད་པ། །འཇིག་རྟེན་སྒྲོན་མ་བདེ་གཤེགས་མྱུར་གྱུར་ཅིག་།སངས་རྒྱས་རྣམས་ལ་ཕྱག་འཚལ་མཆོད་གང་དང ། །ལས་དགེ་རྣམས་ལ་ཡིད་རང་གང་ལགས་དང ། །སྡིག་པའི་ལས་རྣམས་བཤགས་པ་གང་ལགས་དང ། ། 13.327a རྒྱལ་བ་རྐང་གཉིས་དབང་རྣམས་མཐོང་གང་དང ། །བདག་གིས་དགེ་བ་ཅུང་ཟད་ཅི་བགྱིས་པ། །ལུས་དང་ངག་དང་སེམས་ལས་བྱུང་ཡང་རུང ། །བདག་གིས་བགྱིས་དང་བགྱིད་དང་བགྱིད་འགྱུར་གང ། །ཐམས་ཅད་སྐྱེ་དགུ་སྨན་སླད་སྩལ་བར་བགྱི། །ཇི་ལྟར་ཕྱོགས་བཅུའི་སངས་རྒྱས་རྣམས་མཁྱེན་ནས། །སྩལ་པ་ལེགས་པར་སྩལ་ཅིང་ལེགས་རྒྱས་པ། །དེ་བཞིན་བདག་གིས་སྐྱེ་དགུ་སྨན་སླད་སྩལ། །འགྲོ་ཀུན་བྱང་ཆུབ་མཆོག་ལ་རེག་གྱུར་ཅིག་།བདག་གིས་འགྲོ་ལ་སྩལ་བ་གང་ལགས་པའི། །བསོད་ནམས་འབྲས་བུ་བླ་མེད་ཅི་མཆིས་པ། །ཐེག་པ་ཆེན་པོར་ཡོངས་སུ་བསྔོ་བར་བགྱི། །བདག་ལ་བྱང་ཆུབ་འབྲས་བུ་གྲུབ་པར་ཤོག་།མཚུངས་པ་མ་མཆིས་ཀུན་ནས་སྒོ་མོ་རྣམས། །འགྲོ་བའི་དོན་དུ་བདག་ལ་མངོན་སུམ་ཤོག་།འཇམ་དཔལ་གྱི་ནི་རྗེས་སུ་སློབ་བགྱིད་ཅིང ། །བྱང་ཆུབ་སྤྱོད་པའི་སྨོན་ལམ་གདབ་པར་བགྱི། །མི་གཅིག་ཙམ་གྱི་ཆེད་དུའང་མནར་མེད་པའི། །ཚོར་བ་ཐམས་ཅད་བདག་གིས་མྱོང་བར་གྱུར། །བསྐལ་པ་དུ་མར་བདག་ནི་སྤྲོ་བར་བགྱི། །འགྲོ་བ་ཐམས་ཅད་མྱ་ངན་མེད་པར་ཤོག་།སེམས་དམྱལ་གཤིན་རྗེའི་འཇིག་རྟེན་སྡུག་བསྔལ་དང ། །དུད་འགྲོའི་གནས་རྣམས་མིའི་སྡུག་བསྔལ་དང ། །འགྲོ་བའི་སྡུག་བསྔལ་ཕུང་པོ་མཐའ་ཡས་དང ། །བདག་ལ་བབ་གྱུར་འགྲོ་བ་བདེ་བར་ཤོག་།རྒྱལ་བ་རྣམས་ཀྱི་ཞིང་ནི་རྣམ་དག་དང ། །སེམས་ཅན་རྣམ་དག་ཡེ་ཤེས་རྣམ་དག་དང ། །རྒྱལ་བ་རྣམས་ཀྱི་སྨོན་ལམ་མཐའ་ཡས་གང ། །སྨོན་ལམ་དེ་ཀུན་བདག་ལ་གྲུབ་པར་ཤོག་།བདག་གི་སྨོན་ལམ་ཉམས་པར་མ་གྱུར་ཅིག་།བདག་ནི་ནམས་ཀྱང་སྐྱོ་བར་མི་འགྱུར་ཤོག་།བྱང་ཆུབ་མཆོག་ནི་བདག་གིས་ཐོབ་བར་དུ། །བསྐལ་པ་དུ་མར་བདག་ནི་སྤྲོ་བར་ཤོག་།མཆོག་གི་སྤྱོད་པའི་སྨོན་ལམ། རྫོགས་སྷོ།། །། 13.327b རྒྱ་གར་གྱི་མཁན་པོ་པྲཛྙཱ་བར་མ་དང ། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། |