rKTs


J966

(e-text produced by ADARSHA)

see text in transliteration
107.212a
སངས་རྒྱས་ཀྱི་ཆོས་གསལ་ཞིང་ཡངས་པ་སྣང་བརྒྱད་ཅེས་བྱ་བའི་མདོ། བམ་པོ་གཅིག་གོ་།སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། རིན་པོ་ཆེ་ཁང་པ་བརྩེགས་པའི་ནང་ན་བཅོམ་ལྡན་འདས་ཤཱཀྱ་ཐུབ་པ་བཞུགས་ཏེ། ཕྱོགས་བཅུའི་བྱང་ཆུབ་སེམས་དཔའ་དང ། ལྷ་མ་སྲིན་བདེ་བརྒྱད་ལ་སོགས་པས་བཅོམ་ལྡན་འདས་ལ་མཆོད་ཅིང་བསྟོད་ནས། ཚོགས་མང་པོའི་ནང་ནས་བྱང་ཆུབ་སེམས་དཔའ་ཐོགས་པ་མེད་པས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཛམ་བུའི་གླིང་གི་སེམས་ཅན་རྣམས་སྐྱེ་ཤི་འཁོར་བ་ཐོག་མ་མེད་པ་ནས་འཁོར་ན། སེམས་ཅན་ཤེས་པ་དང་ལྡན་པ་ནི་ཉུང ། མི་ཤེས་པ་ནི་མང ། ཚུལ་ཁྲིམས་སྲུང་བ་ནི་ཉུང ། ཚུལ་ཁྲིམས་མི་སྲུང་བ་ནི་མང ། བརྩོན་འགྲུས་ཅན་ནི་ཉུང ། ཡངས་ཤིང་གཡེང་བ་ནི་མང ། ཚེ་རིང་བ་ནི་ཉུང ། ཚེ་ཐུང་བ་ནི་མང ། ལོངས་སྤྱོད་དང་ལྡན་པ་ནི་ཉུང ། ལོངས་སྤྱོད
107.212b
ཆུང་བ་ནི་མང ། བདེ་སྐྱིད་པ་ནི་ཉུང ། སྡུག་བསྔལ་བ་ནི་མང ། བླ་མའི་བཅས་བཀའ་དང་ནན་ཏུར་ནི་ཕྱིར་ཞིང་ཕྱུང ། འོག་མ་ནི་སྡུག་བསྔལ་བརྒྱད་ལས་ཐར་མི་མྱོང ། ཆོས་མ་ཡིན་པ་ལ་ནི་ཡིན་ཞེས་ཟེར་ཏེ། ལོག་པར་ལྟ་བའི་སླད་དུ་སེམས་ཅན་མང་པོ་ཚེ་ཐུང་ཞིང་ཡེ་འདྲོག་གིས་འགུམ་པ་དང ། སྡུག་བསྔལ་མང་པོ་ལས་ཐར་བར་བགྱི་ཞིང་ཕོངས་པ་རྣམས་བཟློག་པར་ཅི་གནང་ཞེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཐོགས་པ་མེད་པ་དགེའོ་དགེའོ། །བྱང་ཆུབ་སེམས་དཔའ་ཁྱོད་ཀྱིས་སེམས་ཅན་མང་པོ་ལ་ཕན་པ་དང ། སྙིང་རྗེའི་ཕྱིར་ཞུས་པ་ངས་བཤད་ཀྱིས་ཉོན་ཅིག་།སྔོན་གྱི་སངས་རྒྱས་མང་པོས་ཀྱང་བཤད་པ་ཡིན་ནོ། །ད་ལྟར་ངས་ཀྱང་བཤད་ཀྱིས་ཉོན་ཅིག་།མ་འོངས་པའི་སངས་རྒྱས་རྣམས་ཀྱིས་ཀྱང་བཤད་པའི་རིགས་སོ། །ཡང་སེམས་ཅན་གྱི་ནང་ན་མི་ལས་བཙུན་པ་མེད་དེ། མིའི་ལུས་ཐོབ་ན་ཡང་ལེགས་པའི་དཔལ་ནི་སྤྱོད་མི་ནུས། ཡང་དག་པའི་ལྟ་བ་ལས་ནི་འགལ། སྒྱུ་དང་ལྷ་མ་ཡིན་ལ་སོགས་པ་ནི་སྡིག་པའི་རྣམ་པ་མང་པོ་བྱས་པས་སྣང་བརྒྱད་འདི་ཡི་དམ་དུ་བྱས་ཏེ་བཏོན་ན། དེའི་སྡིག་པ་དང་མི་དགེ་བའི་ལས་ཐམས་ཅད་ལས་ཐར་བར་འགྱུར་རོ། །ཚེ་འཕེལ་ཞིང་ཡེ་འདྲོག་གིས་མི་ཚུགས་པར་འགྱུར་ཏེ། ཡོན་ཏན་དང་ལྡན་པར་འགྱུར་རོ། །ཚེ་ཟད་ན་ཡང་དགྲ་བཅོམ་པའི་འབྲས་བུ་ཐོབ་པར་འགྱུར་རོ། །མི་ལ་ལ་ཞིག་ལེགས་པའི་ཆོས་མི་སྤྱོད་པས་ནད་མང་པོ་དང ། ལྟས་ངན་སྣ་ཚོགས་འབྱུང་སྟེ། ཤིན་དུ་སྡུག་བསྔལ་ཆེ་བ་ལས་དགེ་བའི་བཤེས་གཉེན་དང་ཕྲད་དེ། སྣང་བརྒྱད་འདི་ལན་གསུམ་བཀླགས་ན་ནད་མང་པོ་ཡང་སོས། ལྟས་ངན་སྣ་ཚོགས་ཀྱིས་ཀྱང་མི་སྡིག་གོ་།མཚམས་མེད་པ་ལྔའི་སྡིག་པ་ཡང་འབྱང་བར་འགྱུར་རོ། །བྱམས་པ་དང་སྙིང་རྗེ་དང་དགའ་བ་དང ། བཏང་སྙོམས་དང ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་ཀྱང་ཐོབ་པར་འགྱུར་རོ། །གང་ལ་ལ་ཞིག་ཕོ་སྨོས་མཚུངས་ཏེ། མཁར་ལན་ཞིག་གཡོ་བར་སེམས་ན་སྣང་བརྒྱད་ཀྱི་ཡི་གེ་འདི་ལན་གསུམ་བཀླགས་ན་རྩིག་པ་སློང་བ་དང ། སྒོ་འདོད་པ་དང ། ཁྲོན་པ་རྐོ་བ་དང ། ཐབ་འཛུགས
107.213a
པ་དང ། གཏུན་དང་རང་ཐག་འཆའ་བ་དང ། རང་ཐག་འཆའ་བ་ཡང་རུང ། བང་མཛོད་དང་ཕྱུགས་ཀྱི་ར་བ་བརྩིག་ཀྱང་རུང ། ཤར་ནུབ་ལྷོ་བྱང་གི་ཕྱོགས་མཚམས་ཀྱི་ལྷ་དང ། གཟའ་དང ། རྒྱུ་སྐར་ངན་པ་དང ། དགྲ་དང་ཞིང་གཡང་དང ། སེར་པོ་གཟིག་གི་མཇུག་མ་འདྲ་བ་དང ། ས་གཉན་རྣམས་དང ། ས་སྣ་ལྔའི་ལྷ་དང ། འབྲུག་སྔོན་པོ་དང ། སྟག་སྐྱ་བོ་དང ། བྱ་དམར་མོ་དང ། རུ་སྦལ་ནག་པོ་དང ། གབ་རྩེ་དྲུག་གིས་བཀབ་ཅིང་བརྗོད་དུ་མི་རུང་བའི་ལས་ཐམས་ཅད་བྱེད་པ་ཡང་ཐམས་ཅད་གཅོད་པ་དང ། དྲག་པོ་དང ། ལེགས་ཉེས་བྱེད་པ་དང ། གང་བ་དང ། མཉམ་པ་དང ། རྟག་པ་དང ། གཅིག་ཏུ་འཛིན་པ་དང ། གྱེས་པ་དང ། མཉན་པ་དང ། གྲུབ་པ་དང ། སྡུད་པ་དང ། སའི་བདག་པོ་དང ། ནག་པོ་དང ། ཉེ་ནག་པོ་དང ། ལྷ་དང ། ཀླུ་དང ། འདྲེ་གདོན་ཐམས་ཅད་འབྱོལ་ཞིང་འབྲོས་སོ། །སོ་ནམ་བྱའོ་ཅོག་དང ། ལམ་ཉེ་ཞིང་གར་འགྲོ་ཡང་རུང ། སྣང་བརྒྱད་ལན་གསུམ་བཀླགས་ན་ཡུལ་བྱེས་གཉིས་སུ་ཉེས་པ་མེད་ཅིང་མྱུར་དུ་འཁོར་ཏེ། བུ་ཚ་ཕ་མ་ལ་སྲི་ཞུ་ཆེ་བ་དང ། ཕྱུག་བཙན་པ་དང ། བདེ་ལེགས་སུ་འགྱུར་རོ། །དགོན་པ་འམ་གཅན་གཟན་གྱི་ནང་དུ་སོང་ན་ཡང་ཀླུ་དང་གཅན་གཟན་རྣམས་འབྱོལ་ཞིང་རང་འབྲོས་སོ་ཁ་མཆུ་དང་བཙོན་དུ་བཟུང་ན་ཡང་མྱུར་དུ་རང་ཐར་རོ། །མེའི་ནང་དུ་སོང་ན་ཡང་མེས་མི་ཚུགས། ཆུའི་ནང་དུ་སོང་ན་ཡང་ཆུས་མི་ཚུགས་སོ། །མཚོན་དང་དགྲས་མི་ཚུགས་སོ། །དུག་རྣམས་ཀྱང་ཁ་ཟས་བདུད་རྩི་བཞིན་དུ་འགྱུར་ཏེ། དུག་གིས་མི་ཚུགས་སོ། །སྣང་བརྒྱད་ཀྱི་ཡི་གེ་འདི་བུ་ཕོ་མོ་གང་གིས་ཕ་མ་ལ་སྡིག་ཏུ་དོགས་པའི་ཕྱིར་ལན་གསུམ་བཀླགས་ན་ཕ་མ་མནར་མེད་པ་ལས་ཐར་ཏེ་མཐོ་རིས་སུ་སྐྱེའོ། །སྣང་བརྒྱད་ཀྱི་ཡི་གེ་འདི་གང་ན་གནས་པ་ན་བྱང་ཆུབ་སེམས་དཔའ་བརྒྱད་དང ། ཚངས་པ་དང ། བརྒྱ་བྱིན་དང་རྒྱལ་པོ་ཆེན་པོ་བཞི་དང་ལྷ་དང ། ཀླུ་དང ། གནོད་སྦྱིན་ལ་སོགས་པས་མཆོད་པ་སྣ་ཚོགས་ཀྱིས་བརྒྱན་ཏེ་མཆོད་དོ། །ཆོས་ཀྱི་མདོ་འདི་བཀླགས་ཤིང་རྒྱས་པར་བཤད་ན་དེ་བཞིན་གཤེགས་པའི་སྐུ་ཡིན་པར་བལྟའོ། །མིག་གིས་གཟུགས་སྣ་ཚོགས་འབྱེད་པའོ། །གཟུགས་ཉིད་སྟོང་པའོ། །སྟོང་པ་ཉིད་གཟུགས་སོ། །རྣ་བས་སྒྲ་སྣ་ཚོགས་ཐོས་པའོ། །སྒྲ་ཉིད་སྟོང་པའོ། །སྟོང་པ་ཉིད་སྒྲའོ། །སྣས་དྲི་སྣ་ཚོགས་ཚོར་བའོ། །དྲི་ཉིད་སྟོང་པའོ། །སྟོང་པ་ཉིད་དྲིའོ། །ལྕེས་རོ་སྣ་ཚོགས་འབྱེད་པའོ། །རོ་ཉིད་སྟོང་པའོ། །སྟོང་པ་ཉིད་རོའོ། །ལུས་ཀྱིས་རེག་བྱ་སྣ་ཚོགས་འབྱེད་པའོ། །རེག་བྱ་ཉིད་སྟོང་པའོ། །སྟོང་པ་ཉིད་རེག་བྱའོ། །ཡེ་ཤེས་ནི་སྟོང་པའོ། །
107.213b
སྟོང་པ་ཉིད་ཀྱང་ཡེ་ཤེས་སོ། །དེ་ནས་བཅོམ་ལྡན་འདས་ལ་ཐོགས་པ་མེད་པའི་བྱང་ཆུབ་སེམས་དཔས་འདི་སྐད་ཅེས་གསོལ་ཏོ། །མི་ཚེ་གཅིག་ལ་སྐྱེ་ཞིང་འཆི་བ་ལས་དཀའ་བ་མ་མཆིས་ན། སྐྱེ་བའི་ཚེ་ཡང་ཉི་མ་མ་བདམས་པར་སྐྱེ། འཆི་བའི་ཚེ་ཡང་ཉི་མ་མ་བདམས་པར་འཆི་ན་ཤི་བའི་འོག་ཏུ་ཤིད་གཏོར་བགྱིད་པའི་ཚེ་དུས་བཟང་ངན་མ་བདམས་ནས་ཤིད་བགྱིས་ན་ཉེས་པ་མང་པོ་འབྱུང་སྟེ། རབས་ཆད་པ་དང ། དབུལ་ཕོངས་པ་དང ། ཁ་མཆུ་མང་པོ་འབྱུང་ན་འདི་ཅིའི་སླད་དུ་འབྱུང་ཞེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སེམས་ཅན་ཤིད་གཏོར་བྱེད་པའི་ཕྱིར་དྲིས་པ་ཤིན་ཏུ་དགེའོ། །ཡོང་གནམ་ས་གཉིས་ནི་ཤིས། ཉི་ཟླ་གཉིས་ནི་དགེ་ཞིང་སྣང ། མིའི་རྒྱལ་པོ་བྱང་ཆུབ་སེམས་དཔའ་ནི་ཤིན་ཏུ་བྱམས་ཤིང་སྙིང་རྗེ་ཆེ་སྟེ། སེམས་ཅན་ཀུན་ལ་བུ་གཅིག་པ་བཞིན་དུ་མཉམ་པར་བལྟས་ཤིང ། ཡུལ་ཆོས་བཟང་པོ་བསྟན་ན་མི་དགེ་བའི་ལྷ་མ་སྲིན་དང ། ཡི་དགས་ཀུན་བོས་ཤིང་མཆོད་པས། འདྲེ་གདོན་གྱི་རྣམ་པ་རྣམས་མི་ཟས་བཟང་པོ་ཞིམ་པོ་བདར་བས་ཆགས་ཏེ། མི་ལ་ནི་སྡུག་བསྔལ་སྣ་ཚོགས་འབྱུང ། དམ་པའི་ཆོས་ལ་ནི་ཡིད་མ་ཆེས། འདྲེ་གདོན་གྱི་ཆོས་ལ་ནི་སྲོག་གིས་མཆོད་ནས། དམར་གསུམ་དབྲལ་དུ་ཟ་བ་ལ་ནི་ཡིད་ཆེས་ཏེ་ལོག་པར་བལྟས་ཤིང་སྤྱད་པས་རབས་ཆད་པ་དང ། དབུལ་ཕོངས་པ་དང ། ཉེས་པ་སྣ་ཚོགས་འབྱུང་ངོ ། །བུ་ཕོ་མོ་འབྱུང་བའི་ཚེ་སྣང་བརྒྱད་ལན་གསུམ་བཀླགས་ན་བུ་བཙའ་སླ། ཡིད་གཞུངས་མཚན་དང་ལྡན། མི་འམ་ཅི་ལ་སོགས་པས་མདངས་མི་འཕྲོག་ཅིང ། ཡེ་འདྲོག་གིས་འཆི་བར་མི་བྱེད་དོ། །དུས་ལ་བབ་ཏེ་ཤི་བར་གྱུར་ན་ཡང་སྣང་བརྒྱད་ལན་གསུམ་བཀླགས་ན་ཕྱི་མ་ལ་གནོད་པ་སྣ་གཅིག་ཀྱང་མི་འབྱུང་ངོ ། །ཉི་མ་ཐམས་ཅད་དགེ་བ་ཡིན། །རྒྱུ་སྐར་ཐམས་ཅད་བཟང་པོ་ཡིན། །དགྲ་བཅོམ་ཐམས་ཅད་ཟག་པ་ཟད། །སངས་རྒྱས་ཐམས་ཅད་རྫུ་འཕྲུལ་ཆེ། །ཤིད་བྱེད་པ་ཡང་ཡོ་བྱད་ཅི་འབྱོར་པ་དང ། ནམ་ནུས་པ་ན་སྣང་བརྒྱད་ལན་གསུམ་བཀླགས་ནས་ཤིད་བྱས་ན་ཤི་བ་ཡང་མཐོ་རིས་སུ་སྐྱེའོ། །བུ་ཚ་དང་གཉེན་རྣམས་ཀྱང་ཕྱུག་བཙན་པར་འོང་ངོ ། །མ་ཆད་པ་ཡང་ཤར་ལྷོ་ནུབ་བྱང་འདྲི་ཞིང་བརྟག་མི་དགོས་ཀྱིས། ས་གར་བདེ་བ་དང ། མི་གར་དགའ་བར་ལྷ་བཙུན་ཡང་དེར་དགའ་ཡིས། དྷར་མ་ལན་གསུམ་བཀླགས་ཏེ་མ་ཆད་པ་དེར་བརྩིགས་ན་ནམ་དུ་ཡང་ཉེས་པ་མེད་དེ། སྒོ་ནི་ཕྱུག
107.214a
མི་ནི་དར་ཞིང་བཀྲ་ཤིས་སོ། །དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །བཙའ་བའི་ཉི་མ་ཤིན་ཏུ་དགེ་།བདུར་བའི་ཉི་མ་ཡོངས་སུ་བཟང ། །གསོན་གཤིན་ཆེད་དུ་འདི་བཀླགས་ན། །བསོད་ནམས་ཆེན་པོ་ཐོབ་པར་འགྱུར། །ཡི་གེ་འདི་བཀླགས་ཤིང་ཤིད་བྱས་ན་ལོ་སྟོང་གི་བར་དུ་ཕྱུག་བཙན་པར་འོང་ངོ ། །དེའི་ཚེ་སེམས་ཅན་ཕལ་མང་པོ་བདུན་ཁྲི་བདུན་སྟོང་སྙེད་སེམས་ནི་གྲོལ་ཡིད་ནི་བདེ་སྟེ། ཆོས་ཀྱི་མིག་རྡུལ་མེད་ཅེས་པ་ཐོབ་ཅིང་སྤྱད་ཅིང ། ཡང་བཅོམ་ལྡན་འདས་མི་གཉེན་བགྱིད་པ་སྔར་འཕྲོད་འཕྲོད་མི་འདྲ་ལ་ཕྱིས་ཉི་མ་བདམས་ཏེ་གདོད་གཉེན་བགྱིད་ན། གཉེན་བགྱིས་པའི་འོག་ཏུ་ཕྱུག་ཅིང་བཙན་པ་ནི་ཉུང ། དབུལ་ཞིང་ཕོངས་པ་ནི་མང ། ལོག་པར་ལྟ་བར་ནི་མཚུངས་པ། ཅིའི་ཕྱིར་ན་ཐ་དད་པར་མཆིས། བཅོམ་ལྡན་འདས་ཕལ་མང་པོ་ལ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་བཀའ་སྩལ་པ། གནམ་ནི་སྟངས། ས་ནི་འབྱལ། ཟླ་བ་ནི་ཕོ། ཉི་མ་ནི་མོ། གནམ་ས་གཉིས་ནི་འབྱོར་ན་རྩི་ཤིང་ཐམས་ཅད་སྐྱེའོ། །ཉི་ཟླ་གཉིས་ཉིན་རེས་ཀྱིས་འཁོར་ན་དུས་བཞི་ཚིགས་བརྒྱད་མངོན་པར་སྣང་ངོ ། །མེ་ཆུ་གཉིས་ཚོགས་ན་སྐྱེ་བ་ཐམས་ཅད་དུས་བཞིན་དུ་འབྱུང་ངོ ། །ཕོ་མོ་གཉིས་འདུམ་ཞིང་འབྱོར་ན་བུ་ཚ་མཛངས་སུ་སྐྱེའོ། །དགེ་བ་སྤྱོད་ཅིང་མི་ལུས་ཐོབ་པ་ནི་སེན་མོའི་སྟེང་དུ་རྡུལ་ཆགས་པ་དང་འདྲའོ། །མི་དགེ་བ་སྤྱོད་ཅིང་ཡི་དགས་དང་བྱོལ་སོང་དང ། སེམས་ཅན་དམྱལ་བ་མང་པོར་སྐྱེ་བར་འགྱུར་བ་ནི་ས་གཞི་དང་འདྲ་བར་མང་པོར་འགྱུར་རོ། །གཉེན་བྱེད་པའི་ཚེ་དང ། བུ་བཙའ་བའི་ཚེ་སྣང་བརྒྱད་ལན་གསུམ་བཀླགས་ན་དེའི་དགེ་བའི་རྩ་བ་གཅིག་གིས་གཅིག་བསྐྱེད་ནས་སྲིད་ཀྱི་སྒོ་ནི་མཐོ། མི་ནི་བཙན། བུ་ཚ་ནི་འཕན་ཞིང་མཛངས་ལ་སྲི་ཞུ་ཆེ། ལེགས་པའི་དཔལ་དང་ལྡན་པར་འགྱུར་རོ། །དེ་ནས་བྱང་ཆུབ་སེམས་དཔའ་འདི་རྣམས་བཞེངས་པའི་མཚན་ལ་བྱང་ཆུབ་སེམས་དཔའ་བླ་ན་མེད་པ་དང ། བྱང་ཆུབ་སེམས་དཔའ་དགེ་བའི་བཤེས་གཉེན་དང ། བྱང་ཆུབ་སེམས་དཔའ་སྤྱན་རྣམ་པར་དག་པ་དང ། བྱང་ཆུབ་སེམས་དཔའ་རི་བོའི་དཔལ་དང ། བྱང་ཆུབ་སེམས་དཔའ་སྐྱབས་ཆེན་དང ། བྱང་ཆུབ་སེམས་དཔའ་འཁོར་ལོའི་རྒྱལ་པོ་དང ། བྱང་ཆུབ་སེམས་དཔའ་དྲི་མ་དག་པ་དང ། བྱང་ཆུབ་སེམས་དཔའ་འཐུན
107.214b
སྦྱོར་དང་བརྒྱད་ཀྱིས་བཅོམ་ལྡན་འདས་ལ་གསོལ་པ། བདག་ཅག་གི་སྔ་མ་འདས་པའི་སངས་རྒྱས་བཅོམ་ལྡན་འདས་རྣམས་ལས་ཐོས་པའི་སྔགས་ཀྱི་སྙིང་པོ་བརྗོད་ཅིང་གསོལ་ན། བྱིན་གྱིས་བརླབ་ཏུ་གསོལ། ཨོཾ་ཨཱ་ཀ་ནི། ནི་ཀ་ནི། ཨཱ་བཱི་ལ། མན་དྷ་ལེ། མན་དྷ་ལེ་སཝཱ་ཧཱ། བཅོམ་ལྡན་འདས་ཀྱི་བཀའ་དང་གསང་སྔགས་འདི་ལས་ལོག་པ་དང ། འདའ་བ་ཞིག་མཆིས་ན་མགོ་ཚལ་པ་བདུན་དུ་འགས་ཤིང་ལུས་ཀྱི་ཡན་ལག་ཚིག་པར་འགྱུར་རོ། །ཡང་ཐོགས་པ་མེད་པའི་བྱང་ཆུབ་སེམས་དཔས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡི་གེ་འདི་ཇི་ལྟར་སྣང་བརྒྱད་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། སྣང་ཞེས་བྱ་བ་ནི་མངོན་པར་ཤེས་པ་ལ། བརྒྱད་ཅེས་བྱ་བ་ནི་བྱེ་བྲག་འབྱེད་པའོ། །ཐེག་པ་ཆེན་པོའི་མདོ་བྱ་བ་བྱེད་པའི་གཞུང་སྣང་ཞིང་ཤེས་ཏེ་རྣམ་པར་ཤེས་པའི་རྒྱུ་རྐྱེན་གཅིག་གིས་གཅིག་སྟོང་པས་ཡི་གེ་དང་ཆོས་སུ་ཡོད་དེ། མིང་སྣང་བརྒྱད་ཀྱི་ཡི་གེ་ཞེས་བྱའོ། །མིག་གཟུགས་རྣམ་པར་ཤེས་པ་ཡིན། རྣ་བ་སྒྲ་རྣམ་པར་ཤེས་པ་ཡིན། སྣ་དྲི་རྣམ་པར་ཤེས་པ་ཡིན། ལྕེ་རོ་རྣམ་པར་ཤེས་པ་ཡིན། ལུས་རེག་བྱ་རྣམ་པར་ཤེས་པ་ཡིན། ཡིད་བྱེ་བྲག་འབྱེད་པའི་རྣམ་པར་ཤེས་པ་ཡིན། སྔ་མ་དྲུག་ཤེས་ཤིང་འབྲེལ་པར་ཤེས་པ་ནི་ཐ་མི་དད་དེ་ཀུན་གཞི་རྣམ་པར་ཤེས་པ་དང་བརྒྱད་དོ། །རྣམ་པར་ཤེས་པ་བརྒྱད་ཀྱི་རྩ་བ་དང ། དངོས་པོ་སྟོང་ཞིང་ཞི་བ་ཡིན་ཏེ། དེར་དམིགས་ན་མིག་གི་རྣམ་པར་ཤེས་པ་ནི་སྣང་བའི་བྱང་ཆུབ་སེམས་དཔའོ། །རྣ་བའི་རྣམ་པར་ཤེས་པ་ནི་སྒྲ་གྲག་པའི་བྱང་ཆུབ་སེམས་དཔའོ། །སྣ་ནི་དྲི་སྣ་ཚོགས་འབྱེད་པའི་བྱང་ཆུབ་སེམས་དཔའོ། །ལྕེ་ནི་རོ་རྟོག་པའི་བྱང་ཆུབ་སེམས་དཔའོ། །ལུས་ནི་འཇམ་རྩུབ་འབྱེད་པའི་རྣམ་པར་སྣང་མཛད་དོ། །རྣམ་པར་སྣང་མཛད་ནི་མཆོག་།གཙང་རྣམ་པར་སྣང་མཛད་དང ། མེ་ལོང་ལྟ་བུའི་རྣམ་པར་སྣང་མཛད་དང ། འོད་རྣམ་པར་སྣང་མཛད་དང ། ཡིད་མི་གཡོ་བར་ཡང་དག་པར་ཤེས་པའོ། །སེམས་ནི་རྣམ་པར་དམིགས་པའི་དབྱིངས་སོ། །ཀུན་གཞི་རྣམ་པར་ཤེས་པ་ཤེས་རབ་ཀྱི་ཐར་པ་ཆེན་པོ་སྟེ། སངས་རྒྱས་ཀྱི་ཆོས་སོ། །མཚན་ནི་སྟོང་པའི་མཛོད་ཅེས་བྱའོ། །མི་ལ་ལ་ཞིག་ཁྱིམ་སར་པ་བརྩིག་གམ། ཁྱིམ་སར་པར་ཞུགས་ཏེ་བཀྲ་ཤིས་པར་འདོད་ན་སྣང་བརྒྱད་ལན་གསུམ་བཀླགས་ན་བཀྲ་ཤིས་པར་འགྱུར་རོ། །སྣང་བརྒྱད་ཡི་གེར་བྲིས་སམ།
107.215a
བཀླགས་སམ། ཁ་ཏོན་དུ་བཏོན་ན། བསོད་ནམས་ཀྱི་ཕུང་པོ་དཔག་ཏུ་མེད་པ་དང་ལྡན་པར་འགྱུར་རོ། །ཆོས་ཀྱི་མདོ་འདི་བཤད་པའི་ཚེ་དགེ་སློང་ཕ་དང ། དགེ་སློང་མ་དང ། དགེ་བསྙེན་ཕ་དང ། དགེ་བསྙེན་མ་དང ། མི་དྲུག་ཁྲི་དྲུག་སྟོང་གིས་ཆོས་ཟག་པ་མེད་པའི་གཟུངས་ཐོབ་བོ། །ས་ཡང་རྣམ་པ་དྲུག་ཏུ་གཡོས་སོ། །གྲངས་མེད་པའི་ལྷ་དང ། ཀླུ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། གནོད་སྦྱིན་དང ། མི་དང་མི་མ་ཡིན་པ་ལ་སོགས་ཏེ། ཆོས་ཀྱི་མིག་གཙང་མ་ཐོབ་བོ། །བྱང་ཆུབ་སེམས་དཔའི་ཆོས་བྱེད་དོ། །སེམས་ཅན་ཕལ་པ་བརྒྱད་ཁྲི་ཆིག་སྟོང་གིས་དགྲ་བཅོམ་པའི་འབྲས་བུ་ཐོབ་བོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་བླ་ན་མེད་པ་ལ་སོགས་པ་ཐམས་ཅད་ཀྱིས་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ཏེ་མངོན་པར་བསྟོད་དོ། །འཕགས་པ་སྣང་བརྒྱད་ཅེས་བྱ་བ་ཐེག་པ་ཆེན་པོའི་མདོ། །རྫོགས་སྷོ།།