rKTs


J985

(e-text produced by ADARSHA)

see text in transliteration
107.228a
རྒྱ་གར་སྐད་དུ། ་ཤྲཱི་དེ་བི་ཀཱ་ལཱི་ནཱ་མ་ཨཥྚ་ཤ་ཏ་ཀ ། བོད་སྐད་དུ། ་དཔལ་ལྷ་མོ་ནག་མོའི་མཚན་བརྒྱ་རྩ་བརྒྱད་པ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བྱ་རྒོད་ཀྱི་ཕུང་པོའི་རི་ལ་བཞུགས་ཏེ། རྒྱུ་དང་འབྲས་བུའི་བྱང་ཆུབ་སེམས་དཔའ་ཐམས་ཅད་ལ་བདེན་པའི་མཚན་རྣམས་སྟོན་པར་མཛད་དོ། །དེའི་ཚེ་དཔལ་ལྷ་མོ་ནག་མོ་ཆེན་མོ་ཡང་བཅོམ་ལྡན་འདས་ཀྱི་ཐད་དུ་སོང་སྟེ། ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འདུག་གོ་།དེ་ནས་བྱང་ཆུབ་སེམས་དཔའ་སེང་གེ་བརྩོན་འགྲུས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སྲིན་མོའི་ཆ་ལུགས་ཀྱིས་འཇིག་རྟེན་པའི་དོན་མཛད་པའི་མཚན་གྱི་རྣམ་གྲངས་ཇི་ལྟ་བུ་ལགས་ཞེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེང་གེ་བརྩོན་འགྲུས་ལ
107.228b
དགོངས་ནས་དཔལ་ལྷ་མོ་ནག་མོ་ལ་གཟིགས་ཏེ་འདི་སྐད་ཅེས་གསུངས་སོ། །ཐོས་བསམ་བསྒོམ་ལ་ཆེར་གནས་པའི། །རྒྱུ་འབྲས་རྐྱེན་གྱི་བདག་ཉིད་ཅན། །འགྲོ་ལ་ཕན་མཛད་མཁས་པའི་མཆོག་།དཔལ་ལྡན་ལྷ་མོ་ནག་མོ་འཕགས། །བྱང་ཆུབ་སེམས་དཔའ་སྤྲུལ་པ་སྟེ། །ས་ལྟར་རྟེན་པའི་གཞིར་གྱུར་པ། །ཡོན་ཏན་སྡུད་བྱེད་ཆུ་དང་འདྲ། །བྱང་ཆུབ་སྨིན་བྱེད་མེ་ལྟ་བུ། །དགེ་བའི་འདུ་བྱེད་རླུང་ལྟར་གཡོ། །ཤེས་རབ་རྣམ་དག་ནམ་མཁའ་སྟེ། །ཁྱོད་ནི་འབྱུང་བ་ཆེན་པོ་འདྲ། །འབྱུང་པོ་ཕལ་ཆེན་རྣམས་ཀྱིས་བསྟོད། །བསོད་ནམས་ཡེ་ཤེས་རབ་བསགས་པའི། །ལས་དང་རྣམ་སྨིན་དག་ལ་མཁས། །ང་རྒྱལ་གཟུགས་ཀྱིས་འདུལ་བ་གོམས། །ཤེས་རབ་སྙིང་རྗེའི་ལམ་དུ་འགྲོ། །ཁྱོད་ནི་བུམ་པ་བཟང་ལྟ་བུ། །དཔེར་ན་ཡིད་བཞིན་ནོར་བུའི་ཆུ། །ཀུན་ལ་ཕན་པའི་དཔག་བསམ་ཤིང ། །ཉི་མ་འདྲ་བར་ཁྱོད་ལ་གསལ། །ཟླ་ལྟར་གསལ་བའི་ཐུགས་མངའ་ཞིང ། །མིང་ནི་རི་བོང་རཝ་དང་འདྲ། །རང་གི་རྒྱུད་ནི་འཁོར་ལོ་འདྲ། །ུ་དུམ་བ་ལྟར་ཁྱོད་དཀོན་ཡང ། །བདུད་རྩི་ལྟ་བུར་ཡོངས་ཚིམ་མཛད། །འགྲོ་བ་ཀུན་གྱི་བདག་མོ་ལགས། །རང་བཞིན་མེད་པའི་ཆོས་ཀྱང་སྟོན། །ཆུ་དང་ནམ་མཁའི་ཚུབ་མ་ལྟར། །གདུལ་བྱའི་སྲིད་གསུམ་ཅིས་ཀྱང་འདུལ། །དུས་གསུམ་རྒྱལ་བའི་བསྟན་པ་སྐྱོང ། །དམ་པ་རྣམས་དང་ཡང་དག་གཅིག་།དམ་པ་རྣམས་ཀྱི་ལམ་དུ་འགྲོ། །ལྷ་མོ་མ་མོ་གནོད་སྦྱིན་མོ། །སྲིན་མོ་ཀླུ་མོ་ཤ་ཟ་མོ། །གདུག་མོ་འབྱུང་མོ་གྲུལ་བུམ་མོ། །དྲག་མོ་རྔམ་ཚུལ་གློག་འགྱུ་མ། །རླུང་མོ་ནག་མོ་འཇིགས་བྱེད་མ། །མཁའ་འགྲོ་གཏུམ་མོ་ཞིང་སྒྲོལ་མ། །ཞི་རྒྱས་དབང་དང་དྲག་པོས་འདུལ། །དཀར་སེར་ལྗང་ནག་དམར་ཡང་སྟོན། །རྣམ་པ་བརྒྱད་ཀྱི་དབྱིབས་ཀྱང་འབྱུང ། །འགྲོ་བ་དྲུག་པོའི་ཚུལ་ཡང་སྟོན། །ཕུང་པོ་ལྔ་ཡང་བརྗོད་པར་ནུས། །དབང་པོ་ཚིམ་བྱེད་ཡུལ་ལྔ་འང་སྟོན། །རྟེན་ཅིང་འབྲེལ་པའི་སྤྱོད་པ་མཁས། །ཡུལ་ཅན་རྣམས་ནི་གསོད་ལ་མཁས། །དེ་བཞིན་ངག་རྣམས་གསོད་པ་དང ། །ལུས་ཅན་རྣམས་ནི་གསོད་ལ་བརྩོན། །
107.229a
སེམས་ནི་གསོད་པ་མེད་ལ་མཁས། །འཁོར་བ་ལས་ནི་རིང་དུ་སོང ། །དེ་བཞིན་གཤེགས་པས་ལུང་བསྟན་ཏེ། །བྱང་ཆུབ་སེམས་དཔའི་མཚན་རྣམས་དང ། །འཇིག་རྟེན་སྐྱོང་མཛད་དཔལ་ལྡན་མ། །དམ་ཆོས་འཛིན་པ་རྣམས་ལ་བྱམས། །ོཾ`་ཨཱཿ ཧཱུཾ། ཤྲཱི་དེ་བི་ཀཱ་ལི་ས་མ་ཡ་ཛ། ཌཱ་ཀཱི་ནཱི་ཌཱ་ཡ་ས་མ་ཡ་སཝཱ་ཧཱ། མིང་བརྒྱ་རྩ་བརྒྱད་གང་འཛིན་པ། །ཡོན་ཏན་བརྒྱ་རྩ་བརྒྱད་ཀྱང་ཐོབ། །དམྱལ་བའི་སྡུག་བསྔལ་མྱོང་མི་འགྱུར། །ཡི་དགས་གནས་སུ་མི་སྐྱེ་ཞིང ། །བྱོལ་སོང་སྐྱེ་བས་ཐོགས་མེད་འགྱུར། །ལུས་འཕགས་གནས་སུ་སྐྱེས་པ་ན། །ཐོག་ལ་སོགས་པ་མི་འབབ་ཅིང ། །སྒྲ་མི་སྙན་དུ་རླུང་གིས་མིན། །དེ་བཞིན་བན་གླང་སྤྱོད་དུ་ཡང ། །ཆུ་དང་རླབས་ཀྱིས་ཁྱེར་མི་ནུས། །འཛམ་བུའི་གླིང་དུ་གང་སྐྱེས་པ། །སྣ་ཚོགས་གནོད་པས་ཉེན་མི་འགྱུར། །འདོད་པའི་ལྷ་རྣམས་གནས་སུ་ཡང ། །སྐྱེས་ནས་ཆོས་ལ་དགའ་བར་འགྱུར། །བསམ་གཏན་བཞི་ཡི་སྐྱེ་གནས་སུ། །ཚད་མེད་བཞི་ནི་འཕེལ་བར་འགྱུར། །གཟུགས་མེད་གནས་ནི་བཞི་པོར་ཡང ། །དོན་མེད་ན་ནི་མི་སྐྱེ་སྟེ། །འདུ་ཤེས་མེད་པར་ནམ་ཡང་མིན། །འཕགས་པ་བཞུགས་པའི་གནས་རྣམས་སུ། །ཁམས་གསུམ་ཚུལ་གྱིས་བདག་དོན་སྤྱོད། །རྟག་ཏུ་ཡུལ་ལ་ཆགས་མི་འགྱུར། །སེམས་ལ་འཛིན་པར་མི་བྱེད་དེ། །ཉོན་མོངས་རྩ་བ་དྲུག་པོ་དང ། །དེ་བཞིན་ཉེ་བ་ཉི་ཤུ་དང ། །མཚམས་མེད་ལྔ་ཡང་བྱང་བར་འགྱུར། །བསྐལ་པ་གྲངས་མེད་མང་པོར་ཡང ། །མི་ཁོམ་བརྒྱད་དུ་སྐྱེ་མི་འགྱུར། །མུ་སྟེགས་རྩོད་པ་བཟློག་པ་དང ། །མཐུ་སྟོབས་ཕུན་སུམ་ཚོགས་ལྡན་ཞིང ། །ཚེ་རིང་ནད་མེད་དཔལ་དང་ལྡན། །སྡུག་མེད་བསྐལ་པ་མང་པོར་ཡང ། །ནམ་ཡང་འཁོར་བར་མི་ལྟུང་ཞིང ། །མྱ་ངན་འདས་པ་ཐོབ་བྱའི་ཕྱིར། །ཉན་ཐོས་ས་རྣམས་ནོན་པ་དང ། །རྟེན་འབྲེལ་བཅུ་གཉིས་ཤེས་པར་བྱ། །བྱང་ཆུབ་སེམས་དཔའི་ས་རྣམས་ནི། །རབ་དགའ་དྲི་མེད་འོད་ཅེས་འཕྲོ། །སྦྱང་དཀའ་མངོན་གྱུར་རིང་དུ་སོང ། །མི་གཡོ་ལེགས་པ་ཆོས་ཀྱི་སྤྲིན། །སངས་རྒྱས
107.229b
ས་ཆེན་བླ་ན་མེད། །བཅུ་གཉིས་པོ་ཡང་ཐོབ་འགྱུར་ཏེ། །ཀུན་ཏུ་འོད་དང་བདུད་རྩི་འོད། །ནམ་མཁའི་འོད་དང་རྡོ་རྗེའི་འོད། །རིན་ཆེན་འོད་དང་པད་མའི་འོད། །ལས་ཀྱི་འོད་དང་དཔེ་མེད་ས། །དཔལ་ལྡན་ས་དང་ཤེས་རབ་འོད། །ཐམས་ཅད་མཁྱེན་དང་རང་རིག་སྟེ། །བཅུ་གཉིས་སངས་རྒྱས་ས་རྣམས་ཀྱང ། །འདི་ཚེ་བྱུང་ན་མྱུར་དུ་ཐོབ། །ས་རྣམས་མ་ཐོབ་བར་དུ་ཡང ། །འགྲོ་བ་རྣམས་ལ་ཕན་པ་དང ། །ཤེས་རབ་སྙིང་རྗེ་ལྡན་གྱུར་ཅིང ། །ཆོས་ལ་དགའ་བ་རྣམས་ཀྱིས་སྲུངས། །དངོས་གྲུབ་ཐོབ་སྟེ་དེ་བཞིན་གཤེགས། །རིན་ཆེན་ལས་བྱུང་ཐོབ་པར་འགྱུར། །དཔལ་ལྡན་བྱང་ཆུབ་སེམས་དཔའ་དང ། །དཔལ་ལྡན་ལྷ་མོ་ནག་མོ་ཡི། །མིང་བརྒྱ་རྩ་བརྒྱད་གང་འཛིན་པ། །ཡོན་ཏན་བརྒྱ་རྩ་བརྒྱད་ཐོབ་སྟེ། །སྐུ་གསུང་ཐུགས་ནི་གྲུབ་ནས་ཀྱང ། །ཁམས་གསུམ་ཆོས་ཀྱི་རྒྱལ་པོར་འགྱུར་ཞེས་གསུངས་པ་དང ། བྱང་ཆུབ་སེམས་དཔའི་འཁོར་དེ་དག་དང ། དཔལ་ལྷ་མོ་ནག་མོ་ཆེན་མོ་རྣམས་ངོ་མཚར་དུ་གྱུར་ཏེ། བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རང་ཞིང་མངོན་པར་བསྟོད་དོ། །དཔལ་ལྷ་མོ་ནག་མོ་ཆེན་མོའི་མཚན་བརྒྱ་རྩ་བརྒྱད་པ་ཡོན་ཏན་དང་བཅས་པ། རྫོགས་སྷོ།། ་