@##/ /rgya gar skad du/ Ar+ya tsa tur d+harma kaM nA ma ma hA yA na sU tra| bod skad du/ 'phags pa chos bzhi pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' rab na/ dge slong stong nyis brgya lnga bcu'i dge slong gi dge 'dun chen po dang thabs cig tu bzhugs te| byang chub sems dpa'i tshogs chen po dang yang thabs cig go/ /de nas bcom ldan 'das kyis dge slong rnams la bka' stsal pa/ dge slong dag byang chub sems dpa' sems dpa' chen pos chos bzhi po 'di dag ji srid 'tsho'i bar du srog gi phyir yang yongs su mi gtong ngo / /bzhi gang zhe na/ dge slong dag byang chub sems dpa' sems dpa' chen pos ji srid 'tsho'i bar du byang 066-170 chub kyi sems srog gi phyir yang yongs su mi gtang ba dang / dge slong dag byang chub sems dpa' sems dpa' chen pos ji srid 'tsho'i bar du dge ba'i bshes gnyen srog gi phyir yang yongs su mi gtang ba dang / dge slong dag byang chub sems dpa' sems dpa' chen pos ji srid 'tsho'i bar du bzod pa dang des pa srog gi phyir yang yongs su mi gtang ba dang / dge slong dag byang chub sems dpa' sems dpa' chen pos ji srid 'tsho'i bar du dgon pa la gnas pa srog gi phyir yang yongs su gtang bar mi bya ste/ dge slong dag byang chub sems dpa' sems dpa' chen pos ji srid 'tsho'i bar du chos bzhi po 'di dag srog gi phyir yang yongs su gtang bar mi bya'o/ /bcom ldan 'das kyis de skad ces bka' stsal te/ bde bar gshegs pas de skad gsungs nas/ ston pas gzhan yang 'di skad bka' stsal to/ /thams cad mkhyen nyid sems ni mi gtong zhing | /mkhas pas rdzogs pa'i byang chub sems skyed cig /bzod pa des pa'i stobs la rab gnas te/ /dge ba'i bshes gnyen yongs su gtang mi bya/ /ri dgas rgyal po bzhin du 'jigs spangs te/ /mkhas pas dgon gnas rtag tu bsten par bya/ /chos 'di dag la rtag tu rab gnas na / /bdud rnams bcom nas byang chub de 'tshang rgya/ /bcom ldan 'das kyis de skad ces bka' stsal nas/ dge slong de dag dang / byang chub sems dpa' de dag dang / thams cad dang ldan pa'i 'khor de dag yi rangs te / bcom ldan 'das kyis gsungs pa la mngon par bstod do// // 'phags pa chos bzhi pa zhes bya ba theg pa chen po'i mdo rdzogs so // |