rKTs


D106

(e-text produced by ADARSHA)

see text in Tibetan script
49-1-1b
@##/ /rgya gar skad du/ Ar+ya san d+hi nir mo tsa na nA ma ma hA yA na sU tra/ bod skad du/ 'phags pa dgongs pa nges par 'grel pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das gzhal med khang rin po che sna bdun mchog tu 'bar ba bkod pa/ 'jig rten gyi khams dpag tu med pa rgyas par 'gengs pa'i 'od zer chen po shin tu mnga' ba/ gnas kyi bye brag shin tu rnam par phye ba/ mtha' yas pa rnam par gzhag pa/ dkyil 'khor yongs su ma chad pa/ khams gsum pa las yang dag par 'das pa'i spyod yul/ 'jig rten las 'das pa de'i bla ma'i dge ba'i rtsa ba las byung ba/ dbang sgyur ba'i rnam par rig pa shin tu rnam par rig pa'i mtshan nyid/ de bzhin gshegs pa'i gnas/ byang chub sems dpa' dpag tu med pa'i dge 'dun rjes su dong ba/ lha dang klu
49-1-2a
dang gnod sbyin dang dri za dang lha ma yin dang nam mkha' lding dang mi'am ci dang lto 'phye chen po dang mi dang mi ma yin pa mtha' yas pa rnam par rgyu ba/ chos kyi ro'i dga' ba dang bde ba chen pos brtan pa/ sems can thams cad kyi don thams cad yang dag par thob par mdzad pas nye bar gnas pa/ nyon mongs pa'i dri ma'i gnod pa thams cad dang bral ba/ bdud thams cad yongs su spangs pa/ thams cad kyi bkod pa las lhag pa/ de bzhin gshegs pa'i byin gyi rlabs kyis bkod pa/ dran pa dang blo gros dang / rtogs pa chen pos nges par 'byung ba/ zhi gnas dang lhag mthong chen po bzhon pa yin pa/ rnam par thar pa'i sgo chen po stong pa nyid dang mtshan ma med pa dang / smon pa med pa nas 'jug pa/ rin po che'i pad ma'i rgyal po chen po yon tan gyi tshogs mtha' yas pas brgyan pa'i bkod pa la rten pa na bzhugs te/ bcom ldan 'das legs par thugs su chud pa'i blo dang ldan pa/ kun tu spyod pa/ gnyis mi mnga' ba/ mtshan nyid med pa'i chos la mchog tu gzhol bar mdzad pa/ sangs rgyas kyi gnas pas gnas pa/ sangs rgyas thams cad dang mnyam pa nyid brnyes pa/ sgrib pa med pa'i rtogs pa thugs su chud pa/ phyir mi zlog pa'i chos dang ldan pa/ spyod yul gyis mi 'phrogs pa/ bsam gyis mi khyab pa rnam par 'jog pa/ dus gsum la mnyam pa nyid tshar phyin pa/ 'jig rten gyi khams thams cad du zhugs pa'i sku lnga dang ldan pa/ chos thams cad la the tsom med pa'i mkhyen pa mnga' ba/ spyod pa thams cad dang ldan pa'i blo mnga' ba/ chos shes pa la nem nur mi mnga' ba/ rnam par ma
49-1-2b
brtags pa'i sku mnga' ba/ byang chub sems dpa' thams cad kyis ye shes yang dag par blangs pa/ sangs rgyas kyi gnas pa gnyis su med pa/ dam pa'i pha rol tu byon pa/ de bzhin gshegs pa ma 'dres pa'i rnam par thar par mdzad pa'i ye shes kyi mthar phyin pa/ mtha' dang dbung med pa'i sangs rgyas kyi sa mnyam pa nyid thugs su chud pa/ chos kyi dbyings kyis klas pa/ nam mkha'i khams kyi mthas gtugs pa de/ nyan thos kyi dge 'dun tshad med pa thams cad kyang / cang shes pa/ sangs rgyas kyi sras/ sems shin tu rnam par grol ba/ shes rab shin tu rnam par grol ba/ tshul khrims shin tu rnam par dag pa/ chos 'dod pa rnams dang bde bar phrad pa/ mang du thos pa/ thos pa 'dzin pa/ thos pa bstsags pa/ legs par bsam pa sems pa/ legs par smra ba rjod pa/ legs par bya ba'i las byed pa/ shes rab myur ba/ shes rab mgyogs pa/ shes rab rno ba/ nges par 'byung ba'i shes rab can/ nges par rtogs pa'i shes rab can/ shes rab che ba/ shes rab yangs pa/ shes rab zab pa/ shes rab mnyam pa med pa/ shes rab rin po che dang ldan pa/ rig pa gsum dang ldan pa/ tshe 'di la bde bar gnas pa'i mchog thob pa/ /yongs su sbyong ba chen po/ /spyod lam rab tu zhi ba phun sum tshogs pa/ bzod pa dang nges pa chen po dang ldan pa/ de bzhin gshegs pa'i bka' la shin tu zhugs pa sha stag dang / sangs rgyas kyi zhing tha dad pa nas 'dus pa'i byang chub sems dpa' dpag tu med pa thams cad kyang gnas chen po la gnas shing yang dag par zhugs pa/ theg pa chen po'i chos kyis nges par byung ba/ sems can thams cad la sems mnyam pa/ rtog pa dang / rnam par rtog pa dang / yongs su rtog pa thams cad bral ba/ bdud dang phyir rgol ba thams cad bcom pa/ nyan thos dang rang sangs rgyas kyi yid la byed pa thams cad las ring du gyur pa/ chos kyi ro'i dga' ba
49-1-3a
dang / bde ba chen pos brtan pa/ 'jigs pa chen po lnga las yang dag par 'das pa/ phyir mi ldog pa'i sa bgrod pa gcig par gyur pa/ sems can thams cad kyi gnod pa thams cad rab tu zhi bar byed pa'i sa mngon du gyur pa sha stag la 'di lta ste/ byang chub sems dpa' sems dpa' chen po don zab dgongs pa nges par 'grel dang / tshul bzhin kun 'dri dang / chos 'phags dang / blo gros shin tu rnam dag dang / blo gros yangs pa dang / yon tan 'byung gnas dang / don dam yang dag 'phags dang / 'phags pa spyan ras gzigs dbang phyug dang / byams pa dang / byang chub sems dpa' sems dpa' chen po 'jam dpal la sogs pa dang thabs cig go/ /de nas byang chub sems dpa' tshul bzhin kun 'dris kyis brjod du med pa dang / gnyis su med pa'i mtshan nyid don dam pa las brtsams te/ byang chub sems dpa' don zab dgongs pa nges par 'grel pa la dri ba dris pa/ kye rgyal ba'i sras chos thams cad gnyis su med pa chos thams cad gnyis su med pa zhes bya na/ chos thams cad ni gang / ji ltar na gnyis su med pa yin/ rigs kyi bu chos thams cad chos thams cad ces bya ba ni gnyis ji tsam pa ste/ 'dus byas dang / 'dus ma byas so/ /de la 'dus byas ni 'dus byas kyang ma yin/ 'dus ma byas kyang ma yin no/ /'dus ma byas ni 'dus ma byas kyang ma yin/ 'dus byas kyang ma yin no/ /smras pa/ kye rgyal ba'i sras ji ltar na 'dus byas ni 'dus byas kyang ma yin/ 'dus ma byas kyang ma yin la/ 'dus ma byas kyang 'dus ma byas kyang ma yin/ 'dus byas kyang ma yin/ rigs kyi bu 'dus byas zhes bya ba de ni ston pas btags pa'i tshig yin te/ ston pas btags pa'i tshig gang yin pa de ni/ kun tu rtog pa las byung ba tha snyad du brjod pa yin la/ kun tu rtog pa las byung ba tha snyad du brjod pa gang yin pa de ni/ kun tu rtog pa sna tshogs kyi tha snyad du brjod pa gtan yongs su ma grub pa'i phyir 'dus byas ma yin
49-1-3b
no/ /rigs kyi bu 'dus ma byas zhes bya ba de yang tha snyad kyi khongs su gtogs pa yin la/ 'dus byas dang 'dus ma byas su ma gtogs pa gang ci brjod kyang de yang de dang 'dra ba nyid du gyur/ de yang de dang 'dra ba nyid du 'gyur ro/ /brjod pa ni dngos po med pa can yang ma yin te/ dngos po de yang gang zhe na/ 'phags pa rnams kyi 'phags pa'i shes pa dang / 'phags pa'i mthong bas brjod du med par mngon par rdzogs par sangs rgyas pa gang yin pa ste/ brjod du med pa'i chos nyid de nyid mngon par rdzogs par rtogs par bya ba'i phyir 'dus byas zhes ming du btags so/ /rigs kyi bu 'dus ma byas zhes bya ba de yang ston pas btags pa'i tshig yin te/ ston pas btags pa'i tshig gang yin pa de ni kun tu rtog pa las byung ba tha snyad du brjod pa yin la/ kun tu rtog pa las byung ba tha snyad du brjod pa gang yin pa de ni kun tu rtog pa sna tshogs kyi tha snyad du brjod pa gtan yongs su ma grub pa'i phyir 'dus ma byas ma yin no/ /rigs kyi bu 'dus byas zhes bya ba de yang tha snyad kyi khongs su gtogs pa yin la/ 'dus byas dang 'dus ma byas su ma gtogs pa gang ci brjod kyang de yang de dang 'dra ba nyid du gyur/ de yang de dang 'dra ba nyid du 'gyur ro/ /brjod pa ni dngos po med pa can yang ma yin te/ dngos po de yang gang zhe na/ 'phags pa rnams kyis 'phags pa'i shes pa dang / 'phags pa'i mthong bas brjod du med par mngon par rdzogs par sangs rgyas pa gang yin pa ste/ brjod du med pa'i chos nyid de nyid mngon par rdzogs par rtogs par bya ba'i phyir 'dus ma byas zhes ming du btags so/ /kye rgyal ba'i sras ji ltar na 'phags pa rnams kyis dngos po de 'phags pa'i shes pa dang / 'phags pa'i mthong bas brjod du med par mngon par rdzogs par sangs rgyas shing brjod du med pa'i chos nyid de nyid mngon par rdzogs par rtogs par bya ba'i phyir 'dus byas dang 'dus ma byas zhes ming du
49-1-4a
btags pa yin no/ /rigs kyi bu 'di lta ste dper na/ sgyu ma mkhan nam sgyu ma mkhan gyi slob ma mkhas pa zhig lam po che'i bzhi mdor 'dug ste/ rtswa dag gam/ lo ma dag gam/ shing dag gam/ gseg ma dag gam/ gyo dum dag gcig tu bsdus nas sgyu ma'i las rnam pa sna tshogs 'di lta ste/ glang po che'i tshogs dang rta pa'i tshogs dang shing rta'i tshogs dang dpung bu chung gi tshogs dang / nor bu dang / mu tig dang / bai dUr+ya dang / dung dang / man shel dang / byi ru'i tshogs dang / nor dang 'bru dang mdzod dang bang ba'i tshogs rnam par bstan na/ de la sems can gang dag byis pa'i rang bzhin can/ rmongs pa'i rang bzhin can/ shes rab 'chal pa'i rang bzhin can/ rtswa dang lo ma dang shing dang gseg ma dang gyo dum de dag mi shes pa de dag ni de mthong ngam thos na 'di snyam du sems te/ glang po che'i tshogs snang ba gang yin pa de ni yod do/ /rta'i tshogs dang shing rta'i tshogs dang dpung bu chung gi tshogs dang nor bu dang mu tig dang bai dUr+ya dang dung dang man shel dang byi ru'i tshogs dang nor dang 'bru dang mdzod dang bang ba'i tshogs snang ba gang yin pa 'di ni yod do snyam du sems shing / de dag ji ltar mthong ba dang / ji ltar thos pa bzhin du/ de la nan gyis mchog tu bzung zhing mngon par zhen nas/ 'di ni bden gyi gzhan ni brdzun pa'o zhes rjes su tha snyad 'dogs par yang byed de/ de ni de dag gis phyis nye bar brtag par bya dgos pa yin no/ /de la sems can gang dag byis pa'i rang bzhin can ma yin pa/ rmongs pa'i rang bzhin can ma yin pa/ shes rab dang ldan pa'i rang bzhin can rtswa dang lo ma dang shing dang gseg ma dang gyo dum de dag shes pa de dag ni de mthong ngam thos na 'di snyam du sems te/ glang po che'i tshogs snang ba gang yin pa 'di ni med do/ /rta pa'i tshogs dang shing rta'i tshogs dang dpung bu chung gi tshogs dang / nor bu dang mu tig dang bai dUr+ya dang dung dang man shel dang byi ru'i tshogs dang / nor dang 'bru dang mdzod
49-1-4b
dang bang ba'i tshogs snang ba gang yin pa 'di ni med kyi/ gang la glang po che'i tshogs kyi 'du shes dang / glang po che'i tshogs kyi rnam grangs kyi 'du shes 'byung ba dang / nor dang 'bru dang mdzod dang bang ba'i tshogs kyi bar gyi 'du shes dang / de dag gi rnam grangs kyi 'du shes 'byung ba sgyu ma byas pa 'di ni yod/ mig slu bar byed pa 'di ni yod do snyam du sems shing / de dag ji ltar mthong ba dang ji ltar thos pa bzhin du de la nan gyis mchog tu bzung zhing mngon par zhen nas 'di ni bden gyi gzhan ni brdzun pa'o zhes rjes su tha snyad mi 'dogs kyi/ 'di ltar don rnam par rig par bya ba'i phyir rjes su tha snyad 'dogs par byed de/ de ni de dag gis phyis nye bar brtag par bya mi dgos pa yin no/ /de bzhin du sems can gang dag byis pa'i rang bzhin can so so'i skye bor gyur pa/ shes rab 'phags pa 'jig rten las 'das pa ma thob pa/ chos thams cad kyi brjod du med pa'i chos nyid mngon par mi shes pa de dag ni 'dus byas dang / 'dus ma byas te mthong ngam thos na/ 'di snyam du sems te/ 'dus byas dang 'dus ma byas snang ba gang yin pa 'di ni yod do snyam du sems shing / de dag ji ltar mthong ba dang / ji ltar thos pa bzhin du de la nan gyis mchog tu bzung zhing mngon par zhen nas 'di ni bden gyi gzhan ni brdzun pa'o zhes rjes su tha snyad 'dogs par yang byed de/ de ni de dag gis phyis nye bar brtag par bya dgos pa yin no/ / de la sems can gang dag byis pa'i rang bzhin can ma yin pa/ bden pa mthong ba/ shes rab 'phags pa 'jig rten las 'das pa thob pa/ chos thams cad kyi brjod du med pa'i chos nyid mngon par shes pa de dag ni/ 'dus byas dang / 'dus ma byas de mthong ngam/ thos na 'di snyam du sems te/ 'dus byas dang / 'dus ma byas snang ba gang yin pa 'di ni med kyi/ gang la 'dus byas dang / 'dus ma byas kyi 'du shes dang / 'dus byas dang / 'dus ma byas kyi rnam grangs kyi
49-1-5a
'du shes 'byung ba/ rnam par rtog pa las byung ba/ 'du byed kyi mtshan ma sgyu ma lta bu 'di ni yod/ blo rnam par rmongs par byed pa 'di ni yod do snyam du sems shing de dag ji ltar mthong ba dang / ji ltar thos pa bzhin du de la nan gyis mchog tu bzung zhing mngon par zhen nas 'di ni bden gyi gzhan ni brdzun pa'o zhes rjes su tha snyad mi 'dogs kyi/ 'di ltar don rnam par rig par bya ba'i phyir rjes su tha snyad 'dogs par byed de/ de ni de dag gis phyis nye bar brtag par bya mi dgos pa yin no/ /rigs kyi bu de ltar na 'phags pa rnams kyis dngos po de 'phags pa'i shes pa dang / 'phags pa'i mthong bas brjod du med par sangs rgyas shing brjod du med pa'i chos nyid de nyid mngon par rdzogs par rtogs par bya ba'i phyir 'dus byas dang / 'dus ma byas zhes ming du btags pa yin no/ /de nas byang chub sems dpa' don zab dgongs pa nges par 'grel gyis de'i tshe tshigs su bcad pa 'di dag smras so/ /zab mo byis pa'i spyod yul ma yin pa/ /brjod med gnyis min rgyal bas bstan mdzad kyang / /byis pa gti mug rmongs pa 'di dag ni/ /smra ba'i spros la dga' zhing gnyis la gnas/ /ma rtogs pa'am log par rtog pa dag /lug dang ba lang dag tu yang skye zhing / /de dag shes pa'i smra ba de bor nas/ /shin tu yun ring 'khor ba 'dir 'khor 'gyur/ /don zab dgongs pa nges par 'grel gyi le'u ste dang po'o// //de nas bcom ldan 'das la byang chub sems dpa' chos 'phags kyis 'di skad ces gsol to/ /bcom ldan 'das sngon gyi dus rnams kyi shin tu snga ma zhig na/ 'di nas 'jig rten gyi khams gang gA'i klung bdun cu rtsa bdun gyi bye ma snyed 'das pa na/ de bzhin gshegs pa grags pa rgya chen gyi sangs rgyas kyi zhing 'jig rten gyi khams grags pa can zhes bgyi ba der bdag mchis pa'i tshe/ de na bdag gis mu stegs can rang rang gi ston pa la sogs pa 'bum phrag bdun cu rtsa bdun 'di lta ste/ chos rnams kyi don dam pa'i mtshan nyid bsam pa
49-1-5b
las brtsams nas sa phyogs zhig na mchis shing 'dus nas de dag chos rnams kyi don dam pa'i mtshan nyid sems par bgyid/ 'jal bar bgyid/ nye bar rtog par bgyid/ yongs su tshol bar bgyid kyang ma rtogs nas blo gros tha dad pa yid gnyis can/ blo gros ngan pa/ rtsod pa dang 'gyed par gyur pa dag gcig la gcig kha stobs kyis gnon pa bgyis/ zher 'debs pa bgyis/ gab gab bgyis/ mnan pa bgyis/ tshar gcad pa bgyis te so sor mchis pa dag cig mthong nas/ bcom ldan 'das bdag 'di snyam bgyid do/ /kye ma de bzhin gshegs pa rnams 'jig rten du 'byung zhing de dag byung bas don dam pa rtog ge thams cad las yang dag par 'das pa'i mtshan nyid 'di lta bu rtogs pa dang / mngon sum du bgyi ba mchis pa ni ngo mtshar rmad du byung ba lags so snyam bgyid lags so/ /de skad ces gsol pa dang / bcom ldan 'das kyis byang chub sems dpa' chos 'phags la 'di skad ces bka' stsal to/ /chos 'phags de de bzhin no/ /de de bzhin te/ ngas ni don dam pa rtog ge thams cad las yang dag par 'das pa'i mtshan nyid mngon par rdzogs par sangs rgyas te/ mngon par rdzogs par sangs rgyas nas kyang bsnyad cing gsal bar byas/ rnam par phye/ gdags par byas/ rab tu bstan to/ /de ci'i phyir zhe na/ don dam pa ni 'phags pa rnams kyi so so rang gi rig pa yin par ngas bshad la/ so so'i skye bo rnams kyi phan tshun rig par bya ba ni/ rtog ge'i spyod yul yin pa'i phyir te/ chos 'phags de'i phyir rnam grangs des khyod kyis 'di ltar rtog ge thams cad las yang dag par 'das pa'i mtshan nyid gang yin pa ni don dam pa yin par rig par bya'o/ /chos 'phags gzhan yang don dam pa ni mtshan ma med pa'i spyod yul yin par ngas bshad la/ rtog ge ni mtshan ma'i spyod yul yin te/ chos 'phags de'i phyir rnam grangs des kyang khyod kyis 'di ltar rtog ge thams cad las yang dag par 'das pa'i mtshan
49-1-6a
nyid gang yin pa ni don dam pa yin par rig par bya'o/ /chos 'phags gzhan yang don dam pa ni brjod du med pa yin par ngas bshad la/ rtog ge ni brjod pa'i spyod yul yin te/ chos 'phags de'i phyir rnam grangs des kyang khyod kyis 'di ltar rtog ge thams cad las yang dag par 'das pa'i mtshan nyid gang yin pa ni/ don dam pa yin par rig par bya'o/ /chos 'phags gzhan yang don dam pa ni tha snyad thams cad yang dag par chad pa yin par ngas bshad la/ rtog ge ni tha snyad kyi spyod yul yin te/ chos 'phags de'i phyir rnam grangs des kyang khyod kyis 'di ltar rtog ge thams cad las yang dag par 'das pa'i mtshan nyid gang yin pa ni don dam pa yin par rig par bya'o/ /chos 'phags gzhan yang don dam pa ni rtsod pa thams cad yang dag par chad pa yin par ngas bshad la/ rtog ge ni rtsod pa'i spyod yul yin te/ chos 'phags de'i phyir rnam grangs des kyang khyod kyis 'di ltar rtog ge thams cad las yang dag par 'das pa'i mtshan nyid gang yin pa ni don dam pa yin par rig par bya'o/ /chos 'phags 'di lta ste dper na/ skyes bu gang zag ji srid 'tsho ba'i bar du tsha ba dang kha ba'i ro sten sten pas ni sbrang rtsi'i ro'am/ sha kha ra'i ro la brtag pa'am/ rjes su dpag pa'am/ mos par mi nus so/ /yun ring po nas 'dod pa'i 'dod chags la mos pa/ 'dod pa'i yongs su gdung ba dag gis yongs su gdungs pa ni nang gi rab tu dben pa'i bde ba gzugs dang / sgra dang / dri dang / ro dang / reg bya'i mtshan ma thams cad dang bral ba la brtag pa'am/ rjes su dpag pa'am/ mos par mi nus so/ /yun ring po nas kun tu smra ba la mos pa kun tu smra ba la mngon par dga' bas ni nang gi mi smra ba 'phags pa'i bde ba la brtag pa'am/ rjes su dpag pa'am/ mos par mi nus so/ /yun ring po nas mthong ba dang thos pa dang bye brag phyed pa dang / rnam par shes pa'i tha snyad la mos pa/ tha snyad la mngon par dga' bas ni tha snyad thams cad yang dag par chad pa/ 'jig tshogs
49-1-6b
'gog pa'i mya ngan las 'das pa la brtag pa'am/ rjes su dpag pa'am/ mos par mi nus so/ /chos 'phags 'di lta ste dper na/ yun ring po nas bdag gi yongs su 'dzin pa nyid kyis rtsod pa la brtson pa rtsod pa la mngon par dga' bas ni byang gi sgra mi snyan pa dag gi bdag gir yongs su 'dzin pa med pa nyid dang / rtsod pa med pa nyid la brtag pa'am/ rjes su dpag pa'am/ mos par mi nus so/ /chos 'phags de bzhin du rtog ge pa thams cad kyis kyang don dam pa rtog ge thams cad las yang dag par 'das pa'i mtshan nyid brtag pa'am/ rjes su dpag pa 'am/mos par mi nus so/ /de nas bcom ldan 'das kyis de'i tshe tshigs su bcad pa 'di dag bka' stsal to/ /so so rang rig mtshan nyid spyod yul te/ /brjod du med cing tha snyad yongs chad pa/ /rtsod dang bral ba don dam chos yin te/ /de ni rtog ge kun las 'das mtshan nyid/ /chos 'phags kyi le'u ste gnyis pa'o// //de nas bcom ldan 'das la byang chub sems dpa' blo gros shin tu rnam dag gis 'di skad ces gsol to/ /bcom ldan 'das bcom ldan 'das kyis gang gi slad du 'di skad ces don dam pa ni phra ba/ zab pa tha dad pa dang tha dad pa ma yin pa nyid las yang dag par 'das pa'i mtshan nyid rtogs par dka' ba yin no zhes bka' stsal te/ ji tsam du bcom ldan 'das kyis legs par gsungs pa de ni ngo mtshar lags so/ /bcom ldan 'das 'di la bdag gis sa phyogs shig na/ byang chub sems dpa' mos pas spyod pa'i sa la zhugs pa rab tu mang po dag cig /'di lta ste/ 'du byed rnams dang / don dam pa tha dad pa dang / tha dad pa ma lags pa nyid las brtsams te/ phan tshun nas mchis shing mchis nas 'dus te mchis nas de na byang chub sems dpa' kha cig 'di skad ces 'du byed kyi mtshan nyid dang / don dam pa'i mtshan nyid tha dad pa ma lags so zhes mchi/ kha cig ni 'di skad 'du byed kyi mtshan nyid dang / don dam pa'i mtshan nyid tha dad pa ma lags pa ma lags kyi/ 'du byed kyi mtshan nyid dang / don dam pa'i mtshan nyid tha dad pa lags so
49-1-7a
zhes mchi/ the tshom du gyur pa'i blo gros can/ yid gnyis su gyur pa kha cig ni 'di skad du gang dag de skad ces 'du byed kyi mtshan nyid dang / don dam pa'i mtshan nyid tha dad pa lags so/ /zhes mchi ba dang / gang dag de skad ces 'du byed kyi mtshan nyid dang / don dam pa'i mtshan nyid tha dad pa ma lags so zhes mchis pa'i byang chub sems dpa' de dag las gang ni med par mchi ba lags/ gang ni shob be mchis lags/ gang ni tshul bzhin du zhugs pa lags/ gang ni tshul bzhin du ma lags par zhugs pa lags zhes mchi ba dag cig mthong lags so/ /bcom ldan 'das bdag 'di snyam bgyid de/ rigs kyi bu 'di dag thams cad ni 'di ltar don dam pa 'du byed rnams dang / tha dad pa dang / tha dad pa ma lags pa nyid las yang dag par 'das pa'i mtshan nyid phra ba ma 'tshal ba/ byis pa rmongs pa mi gsal ba/ mi mkhas pa/ tshul bzhin ma lags par zhugs pa sha stag lags so snyam bgyid lags so/ /de skad ces gsol pa dang / bcom ldan 'das kyis byang chub sems dpa' blo gros shin tu rnam par dag pa la 'di skad ces bka' stsal to/ / blo gros shin tu rnam par dag pa de de bzhin no/ /de de bzhin te/ rigs kyi bu de dag thams cad ni 'di ltar don dam pa 'du byed rnams dang tha dad pa dang / tha dad pa ma yin pa nyid las yang dag par 'das pa'i mtshan nyid phra ba mi shes pa/ byis pa rmongs pa/ mi gsal ba/ mi mkhas pa/ tshul bzhin ma yin par zhugs pa sha stag yin no/ /de ci'i phyir zhe na/ blo gros shin tu rnam dag 'du byed rnams la de ltar so sor rtog pa dag ni don dam pa rtogs pa'am/ don dam pa mngon sum du byed pa ma yin pa'i phyir ro/ /de ci'i phyir zhe na/ blo gros shin tu rnam dag gal te 'du byed kyi mtshan nyid dang / don dam pa'i mtshan nyid tha dad pa ma yin par gyur na ni des na byis pa so so'i skye bo thams cad bden pa mthong ba yin par yang 'gyur/ so so'i skye bo kho nar gyur bzhin du grub pa dang /
49-1-7b
bde ba bla na med pa'i mya ngan las 'das pa 'thob par yang 'gyur/ bla na med pa yang dag par rdzogs pa'i byang chub mngon par rdzogs par 'tshang rgya bar yang 'gyur ro/ /gal te 'du byed kyi mtshan nyid dang / don dam pa'i mtshan nyid tha dad pa yin par gyur na ni/ des na bden pa mthong ba rnams kyang 'du byed kyi mtshan ma dang ma bral bar 'gyur/ 'du byed kyi mtshan ma dang ma bral ba'i phyir bden pa mthong ba/ mtshan ma'i 'ching ba las rnam par 'grol bar yang mi 'gyur/ mtshan ma'i 'ching ba las rnam par ma grol na/ gnas ngan len gyi 'ching ba las kyang rnam par ma grol bar 'gyur/ 'ching ba de gnyis las ma grol na bden pa mthong bas grub pa dang / bde ba bla na med pa'i mya ngan las 'das pa thob par yang mi 'gyur/ bla na med pa yang dag par rdzogs pa'i byang chub mngon par rdzogs par 'tshang rgya bar yang mi 'gyur ro/ /blo gros shin tu rnam dag gang gi phyir so so'i skye bo bden pa mthong ba ma yin/ so so'i skye bo kho nar gyur bzhin du grub pa dang / bde ba bla na med pa'i mya ngan las 'das pa 'thob par yang mi 'gyur/ bla na med pa yang dag par rdzogs pa'i byang chub mngon par rdzogs par 'tshang rgya bar mi 'gyur ba de'i phyir 'du byed kyi mtshan nyid dang / don dam pa'i mtshan nyid tha dad pa ma yin zhes bya bar mi rung ste/ de la gang dag de skad ces 'du byed kyi mtshan nyid dang / don dam pa'i mtshan nyid tha dad pa ma yin zhes zer ba de dag ni rnam grangs des na khyod kyis 'di ltar tshul bzhin ma yin par zhugs pa yin gyi/ tshul bzhin du zhugs pa ma yin par rig par bya'o/ /blo gros shin tu rnam dag gang gi phyir bden pa mthong ba rnams 'du byed kyi mtshan ma dang bral ba ma yin gyi/ bral ba kho na yin pa dang / bden pa mthong ba mtshan ma'i 'ching ba las rnam par grol ba ma yin gyi/ rnam par grol ba yin pa dang / bden pa mthong ba gnas ngan len gyi 'ching ba las rnam par grol ba ma yin gyi/ rnam par grol ba dang / 'ching ba de gnyi ga las rnam par grol na grub pa dang / bde ba bla na
49-1-8a
med pa'i phyir mya ngan las 'das pa 'thob par 'gyur ba dang / bla na med pa yang dag par rdzogs pa'i byang chub mngon par rdzogs par 'tshang rgya bar yang 'gyur ba de'i phyir 'du byed kyi mtshan nyid dang / don dam pa'i mtshan nyid tha dad pa zhes byar mi rung ste/ de la gang dag de skad ces 'du byed kyi mtshan nyid dang / don dam pa'i mtshan nyid tha dad pa zhes zer ba de dag ni rnam grangs des na khyod kyis 'di ltar tshul bzhin ma yin par zhugs pa yin gyi/ tshul bzhin du zhugs pa ma yin par rig par bya'o/ /blo gros shin tu rnam dag gzhan yang gal te 'du byed kyi mtshan nyid dang / don dam pa'i mtshan nyid tha dad pa ma yin par gyur na ni/ des na ji ltar 'du byed kyi mtshan nyid kun nas nyon mongs pa'i mtshan nyid du gtogs pa de bzhin du don dam pa'i mtshan nyid kyang kun nas nyon mongs pa'i mtshan nyid du gtogs par 'gyur ro/ /blo gros shin tu rnam dag gal te 'du byed kyi mtshan nyid dang / don dam pa'i mtshan nyid tha dad pa yin par gyur na yang / des na 'du byed kyi mtshan nyid thams cad la don dam pa'i mtshan nyid spyi'i mtshan nyid du gyur pa ma yin par 'gyur ro/ /blo gros shin tu rnam dag gang gi phyir don dam pa'i mtshan nyid kun nas nyon mongs pa'i mtshan nyid du gtogs pa ma yin pa dang / 'du byed kyi mtshan nyid thams cad la don dam pa'i mtshan nyid spyi'i mtshan nyid du gyur pa yin pa de'i phyir 'du byed kyi mtshan nyid dang / don dam pa'i mtshan nyid tha dad pa ma yin zhes bya bar yang mi rung la/ don dam pa'i mtshan nyid tha dad pa zhes byar yang mi rung ste/ de la gang dag de skad ces 'du byed kyi mtshan nyid dang / don dam pa'i mtshan nyid tha dad pa ma yin pa zhes zer ba dang / don dam pa'i mtshan nyid tha dad pa zhes zer ba de dag na/ rnam grangs des na khyod kyis 'di ltar tshul bzhin ma yin par zhugs pa yin gyi/ tshul bzhin du zhugs pa ma yin par rig par bya'o/ /blo gros shin tu rnam dag gzhan yang gal te 'du byed kyi mtshan nyid dang / don dam pa'i mtshan nyid tha dad pa ma yin par
49-1-8b
gyur na ni/ des na ji ltar don dam pa'i mtshan nyid 'du byed kyi mtshan nyid thams cad la bye brag med pa de bzhin du 'du byed kyi mtshan nyid thams cad kyang bye brag med pa dang / rnal 'byor pa dag 'du byed rnams la ji ltar mthong ba dang ji ltar thos pa dang ji ltar bye brag phyed pa dang ji ltar rnam par shes pa las gong du don dam pa yongs su 'tshol bar yang mi 'gyur ro/ /gal te 'du byed kyi mtshan nyid dang / don dam pa'i mtshan nyid tha dad pa yin par gyur na ni/ des na 'du byed rnams kyi bdag med pa tsam dang / ngo bo nyid med pa tsam nyid don dam pa'i mtshan nyid yin par yang mi 'gyur/ kun nas nyon mongs pa'i mtshan nyid dang / rnam par byang ba'i mtshan nyid kyang dus gcig tu mtshan nyid tha dad du grub par 'gyur ro/ /blo gros shin tu rnam dag gang gi phyir 'du byed kyi mtshan nyid rnams ni bye brag yod pa yin te/ bye brag med pa ma yin pa dang / rnal 'byor pa dag 'du byed rnams la ji ltar mthong ba dang / thos pa dang / bye brag phyed pa dang / rnam par shes pa las gong du don dam pa yongs su tshol bar byed pa dang / don dam pa ni 'du byed rnams kyi bdag med pas rab tu phye ba yin pa dang / kun nas nyon mongs pa dang / rnam par byang ba'i mtshan nyid kyang dus gcig tu mtshan nyid tha dad du grub pa med pa de'i phyir 'du byed kyi mtshan nyid dang / don dam pa'i mtshan nyid tha dad pa ma yin pa'am/ tha dad pa zhes byar mi rung ngo / /de la gang dag de skad ces 'du byed kyi mtshan nyid dang / don dam pa'i mtshan nyid tha dad pa ma yin pa'am/ tha dad pa zhes zer ba de dag ni rnam grangs des na/ khyod kyis 'di ltar tshul bzhin ma yin par zhugs pa yin gyi/ tshul bzhin du zhugs pa ma yin par rig par bya'o/ /blo gros shin tu rnam dag 'di lta ste dper na/ dung gi dkar po nyid ni/ dung dang mtshan nyid tha dad pa ma yin pa'am/ mtshan nyid tha dad du gdags par sla ba ma yin no/ /dung gi dkar po nyid ji lta ba bzhin du gser gyi ser po nyid kyang de bzhin no/ /pi bang gi sgra'i snyan pa nyid kyang pi bang gi sgra dang mtshan nyid tha dad pa ma yin
49-1-9a
pa'am/ mtshan nyid tha dad par gdags par sla ba ma yin no/ /a ga ru nag po'i dri zhim pa nyid kyang a ga ru nag po dang mtshan nyid tha dad pa ma yin pa'am/ mtshan nyid tha dad du gdags par sla ba ma yin no/ /na le sham gyi tsha ba nyid kyang na le sham dang mtshan nyid tha dad pa ma yin pa'am/ mtshan nyid tha dad du gdags par sla ba ma yin no/ /na le sham gyi tsha ba nyid ji lta ba bzhin a ru ra'i bska ba nyid kyang de bzhin no/ /'di lta ste dper na/ shing bal gyi 'da' ba'i 'jam pa nyid kyang shing bal gyi 'da' ba dang mtshan nyid tha dad pa ma yin pa'am/ mtshan nyid tha dad du gdags par sla ba ma yin no/ /'di lta ste dper na/ mar la mar gyi snying khu yang mar dang mtshan nyid tha dad pa ma yin pa'am/ mtshan nyid tha dad du gdags par sla ba ma yin no/ /'di lta ste dper na/ 'du byed thams cad la mi rtag pa nyid dang / zag pa dang bcas pa thams cad la sdug bsngal ba nyid dang / chos thams cad la gang bdag med pa nyid kyang de dag dang mtshan nyid tha dad pa ma yin pa'am/ mtshan nyid tha dad du gdags par sla ba ma yin no/ /blo gros shin tu rnam dag 'di lta ste dper na 'dod chags kyi ma zhi ba'i mtshan nyid dang / kun nas nyon mongs pa'i mtshan nyid kyang 'dod chags dang mtshan nyid tha dad pa ma yin pa'am/ mtshan nyid tha dad du gdags par sla ba ma yin pa dang / 'dod chags kyi ji lta ba bzhin du zhe sdang dang gti mug gi yang de bzhin du rig par bya'o/ /blo gros shin tu rnam dag de bzhin du 'du byed kyi mtshan nyid dang / don dam pa'i mtshan nyid kyang mtshan nyid tha dad pa ma yin pa'am/ mtshan nyid tha dad du gdags par mi bzod do/ /blo gros shin tu rnam dag ngas ni de ltar don dam pa phra ba mchog tu phra ba/ mchog tu zad pa/ rtogs par dka' ba/ mchog tu dka' ba/ tha dad pa dang / tha dad pa ma yin pa nyid las yang dag par 'das pa'i mtshan nyid mngon par rdzogs par sangs rgyas te/ mngon par rdzogs par sangs rgyas nas kyang bsnyad cing gsal bar byas/ rnam par phye/ gdags pa byas/
49-1-9b
rab tu bstan to/ /de nas bcom ldan 'das kyis de'i tshe tshigs su bcad pa 'di dag bka' stsal to/ /'du byed khams dang don dam mtshan nyid ni/ /gcig dang tha dad bral ba'i mtshan nyid de/ /gcig dang tha dad du yang gang rtog pa/ /de dag tshul bzhin ma yin zhugs pa yin/ /skye ba po yis lhag mthong dang / /zhi gnas goms par byas nas ni/ /gnas ngan len gyi 'ching ba dang / /mtshan ma'i 'ching las rnam grol 'gyur/ /blo gros shin tu rnam dag gi le'u ste gsum pa'o// //de nas bcom ldan 'das kyis tshe dang ldan pa rab 'byor la bka' stsal pa/ rab 'byor khyod kyis sems can gyi khams na gang dag mngon pa'i nga rgyal gyis mngon du zin cing shes pa brda sprod par byed pa'i sems can ni ji tsam zhig yod par shes/ khyod kyis sems can gyi khams na gang dag mngon pa'i nga rgyal med par shes pa brda sprod par byed pa'i sems can ni ji tsam zhig yod par shes/ rab 'byor gyis gsol pa/ bcom ldan 'das bdag ni sems can gyi khams na gang dag mngon pa'i nga rgyal ma mchis par shes pa brda sprod par bgyid pa'i sems can ni nyung shas shig mchis par 'tshal lags kyi/ bcom ldan 'das bdag gis sems can gyi khams na gang dag mngon pa'i nga rgyal gyis mngon du zin cing shes pa brda sprod par bgyid pa'i sems can ni tshad ma mchis grangs ma mchis/ brjod du ma mchis par 'tshal lags te/ bcom ldan 'das bdag dus gcig cig na/ dgon pa nags khrod chen po zhig na mchis pa'i tshe/ de na bdag gi nye 'khor na dge slong rab tu mang po dag cig kyang dgon pa nags khrod chen po na rten cing gnas lags te/ bdag gis snga dro'i dus kyi tshe dge slong phan tshun nas mchis shing mjal nas/ chos rnam pa sna tshogs dmigs pa'i mngon par rtogs pa ston pas shes pa brda sprod par bgyid de/ de na kha cig ni phung po dmigs pa dang / phung po'i mtshan ma dmigs pa dang / phung po'i skye ba dmigs pa dang / phung po'i 'jig pa dmigs pa dang / phung
49-1-10a
po 'gog pa dmigs pa dang / phung po 'gog pa mngon du bgyid pa dmigs pas shes pa brda sprod par bgyid/ kha cig phung po dmigs pas ji lta ba de bzhin du kha cig ni skye mched dmigs pas/ kha cig rten cing 'brel par 'byung ba dmigs pas shes pa brda sprod par bgyid/ kha cig ni zas dmigs pa dang / zas kyi mtshan ma dmigs pa dang / zas kyi skye ba dmigs pa dang / zas kyi 'jig pa dmigs pa dang / zas 'gog pa dmigs pa dang / zas 'gog pa mngon du bgyi ba dmigs pas shes pa brda sprod par bgyid/ kha cig ni bden pa dmigs pa dang / bden pa'i mtshan nyid dmigs pa dang / bden pa yongs su shes pa dmigs pa dang / bden pa spangs pa dmigs pa dang / bden pa mngon du bgyi ba dmigs pa dang / bden pa sgom pa dmigs pas shes pa brda sprod par bgyid/ kha cig ni khams kyi dmigs pa dang / khams kyi mtshan ma dmigs pa dang / khams sna tshogs pa nyid dmigs pa dang / khams du ma dmigs pa dang / khams 'gog pa dmigs pa dang / khams 'gog pa mngon du bgyi ba dmigs pas shes pa brda sprod par bgyid/ kha cig ni dran pa nye bar gzhag pa dmigs pa dang / dran pa nye bar gzhag pa'i mtshan ma dmigs pa dang / dran pa nye bar gzhag pa'i mi 'thun pa'i phyogs dang / gnyen po dmigs pa dang / dran pa nye bar gzhag pa bsgom pa dmigs pa dang / dran pa nye bar gzhag pa ma skyes pa skye bar dmigs pa dang / dran pa nye bar gzhag pa skyes pa gnas pa dang / mi bskyud pa dang / slar zhing 'byung ba dang / 'phel zhing rgyas pa dmigs pas shes pa brda sprod par bgyid/ kha cig ni dran pa nye bar gzhag pa rnams ji lta ba de bzhin du kha cig ni yang dag par spong ba rnams dang/ rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang / kha cig ni 'phags pa'i lam yan lag brgyad pa
49-1-10b
dmigs pa dang / 'phags pa'i lam yan lag brgyad pa'i mtshan ma dmigs pa dang/ 'phags pa'i lam yan lag brgyad pa'i mi 'thun pa'i phyogs kyi gnyen por dmigs pa dang/ 'phags pa'i lam yan lag brgyad pa bsgom pa dmigs pa dang/ 'phags pa'i lam yan lag brgyad pa ma skyes pa skye ba dmigs pa dang / 'phags pa'i lam yan lag brgyad pa skyes pa gnas pa dang / mi bskyud pa dang / slar zhing 'byung ba dang / 'phel zhing rgyas par dmigs pas shes pa brda sprod par bgyid pa dag mthong lags so/ / mthong nas kyang bdag 'di snyam bgyid de/ tshe dang ldan pa 'di dag ni chos rnam pa sna tshogs pa'i mngon par rtogs pa ston pas shes pa brda sprod par bgyid cing 'di ltar don dam pa thams cad du ro gcig pa'i mtshan nyid ma 'tshal bas/ tshe dang ldan pa 'di dag ni mngon pa'i nga rgyal can mngon pa'i nga rgyal gyis mngon du zin cing shes pa brda sprod par bgyid pa sha stag lags so snyam bgyid lags so/ /bcom ldan 'das bcom ldan 'das kyi gang gi slad du 'di skad ces don dam pa ni phra ba/ zab pa rtogs par dka' ba/ mchog tu rtogs par dka' ba/ thams cad du ro gcig pa'i mtshan nyid yin no zhes bka' stsal pa ji tsam du bcom ldan 'das kyis legs par gsungs pa de ni ngo mtshar lags te/ bcom ldan 'das don dam pa thams cad du ro gcig pa'i mtshan nyid ni bcom ldan 'das kyis bstan pa 'di nyid la zhugs pa/ dge slong du gyur pa'i sems can rnams kyis kyang de ltar rtogs par dka' ba lags na/ 'di las slad rol pa'i mu stegs can rnams kyis lta smos kyang ci 'tshal/ bcom ldan 'das kyis bka' stsal pa/ rab 'byor de de bzhin no/ /de de bzhin te/ ngas ni don dam pa thams cad du ro gcig pa'i mtshan nyid phra ba/mchog tu phra ba/ zab pa mchog tu zab pa/ rtogs par dka' ba/ mchog tu rtogs par dka' ba/ mngon par rdzogs par sangs rgyas te/ mngon par rdzogs par sangs rgyas nas kyang bsnyad cing
49-1-11a
gsal bar byas/ rnam par phye gdags par byas rab tu bstan no/ /de ci'i phyir zhe na/ rab 'byor phung po rnams la rnam par dag pa'i dmigs pa gang yin pa de ni ngas don dam pa yin par yongs su bstan cing / rab 'byor skye mched rnams dang / rten cing 'brel par 'byung ba dang / zas rnams dang / bden pa rnams dang / khams rnams dang / dran pa nye bar gzhag pa rnams dang / yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang / rab 'byor 'phags pa'i lam yan lag brgyad pa la rnam par dag pa'i dmigs pa gang yin pa de ni don dam pa yin par yongs su bstan pa'i phyir ro/ /phung po rnams la rnam par dag pa'i dmigs pa de yang thams cad du ro gcig pa ste/ mtshan nyid tha dad pa ma yin no/ /phung po rnams la ji lta ba de bzhin du skye mched rnams nas/ 'phags pa'i lam yan lag brgyad pa'i bar la rnam par dag pa'i dmigs pa de yang thams cad du ro gcig pa ste/ mtshan nyid tha dad pa ma yin no/ /rab 'byor rnam grangs des na khyod kyis 'di ltar thams cad du ro gcig pa'i mtshan nyid gang yin pa de ni don dam pa yin par rig par bya'o/ /rab 'byor gzhan yang dge slong rnal 'byor spyod pa ni phung po gcig gi de bzhin nyid don dam pa'i chos bdag med pa rab tu rtogs nas yang de las gzhan pa'i phung po rnams dang / khams rnams dang / skye mched rnams dang / rten cing 'brel bar 'byung ba dang / zas rnams dang / bden pa rnams dang / dran pa nye bar gzhag pa rnams dang / yang dag par spong ba rnams dang / rdzu 'phrul gyi rkang pa rnams dang / dbang po rnams dang /stobs rnams dang / byang chub kyi yan lag rnams so so dang / 'phags pa'i lam yan lag brgyad pa so so la de bzhin nyid don dam pa bdag med pa yongs su tshol bar mi byed kyi de bzhin nyid kyi rjes su 'brang ba gnyis med pa'i shes pa la rten pa de nyid kyis don
49-1-11b
dam pa thams cad du ro gcig pa'i mtshan nyid nges par 'dzin pa dang / mngon par rtogs pa kho nar byed de/ rab 'byor rnam grangs des kyang khyod kyis 'di ltar thams cad du ro gcig pa'i mtshan nyid gang yin pa de don dam pa yin par rig par bya'o/ /rab 'byor gzhan yang ji ltar phung po dang / skye mched dang / rten cing 'brel par 'byung ba dang / zas dang / bden pa dang / khams dang / dran pa nye bar gzhag pa dang / yang dag par spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag 'di dag phan tshun mtshan nyid tha dad pa dang / ji ltar 'phags pa'i lam yan lag brgyad pa phan tshun mtshan nyid tha dad pa yin pa de bzhin du gal te chos de dag gi de bzhin nyid don dam pa chos bdag med pa yang mtshan nyid tha dad pa yin par gyur na ni/ des na de bzhin nyid don dam pa chos bdag med pa yang rgyu dang bcas pa yin zhing rgyu las byung ba yin par 'gyur ro/ /rgyu las byung ba nyid yin na ni 'dus byas yin par 'gyur ro/ /'dus byas nyid yin na ni don dam pa yin par mi 'gyur ro/ /don dam pa ma yin na ni don dam pa gzhan zhig yongs su btsal dgos par 'gyur ro/ /rab 'byor gang gi phyir don dam pa chos bdag med pa rgyu las byung ba ma yin pa dang / 'dus byas ma yin pa dang / don dam pa ma yin pa ma yin pa dang / don dam pa de'i don dam pa gzhan yongs su btsal bar bya mi dgos kyi de bzhin gshegs pa rnams byung yang rung ma byung yang rung ste/ rtag pa rtag pa'i dus dang / ther zug ther zug gi dus su chos gnas par bya ba'i phyir chos rnams kyi chos nyid dbyings de ni rnam par gnas pa kho na yin pa de'i phyir/ rab 'byor rnam grangs des kyang khyod kyis 'di ltar thams cad du ro gcig pa'i mtshan nyid gang yin pa ni don dam pa yin par rig par bya'o/ /rab 'byor 'di lta ste dper na/ nam mkha' ni gzugs kyi rnam pa sna tshogs du ma mtshan nyid tha dad pa la mtshan ma med pa
49-1-12a
rnam par rtog pa med pa 'gyur ba med pa ste/ thams cad du ro gcig pa'i mtshan nyid yin no/ /rab 'byor de bzhin du don dam pa yang mtshan nyid tha dad pa'i chos rnams la thams cad du ro gcig pa'i mtshan nyid yin par blta bar bya'o/ /de nas bcom ldan 'das kyis de'i tshe tshigs su bcad pa 'di dag bka' stsal to/ /don dam de ni tha dad ma yin te/ /kun tu ro gcig mtshan nyid sangs rgyas gsung / /de la gang dag tha dad kun rtog pa/ /de dag nga rgyal gnas pa rmongs pa yin/ /rab 'byor gyi le'u ste bzhi pa'o// //de nas bcom ldan 'das la byang chub sems dpa' blo gros yangs pas zhu ba zhus pa/ bcom ldan 'das byang chub sems dpa' sems dang yid dang rnam par shes pa'i gsang ba la mkhas pa/ byang chub sems dpa' sems dang yid dang rnam par shes pa'i gsang ba la mkhas pa zhes bgyi na/ bcom ldan 'das ji tsam gyis na byang chub sems dpa' sems dang yid dang rnam par shes pa'i gsang ba la mkhas pa lags/ de bzhin gshegs pa byang chub sems dpa' sems dang yid dang rnam par shes pa'i gsang ba la mkhas par 'dogs na yang ji tsam gyis 'dogs lags/ de skad ces gsol pa dang / bcom ldan 'das kyis byang chub sems dpa' blo gros yangs pa la 'di skad ces bka' stsal to/ /blo gros yangs pa khyod de ltar skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang mir bcas pa'i skye dgu'i don dang phan pa dang bde ba'i phyir zhugs te/ de bzhin gshegs pa la khyod don 'di nyid 'dri bar sems pa ni legs so legs so/ /blo gros yangs pa de'i phyir nyon cig dang / sems dang yid dang rnam par shes pa'i gsang ba la mkhas pa khyod la bshad par bya'o/ /blo gros yangs pa 'gro ba drug gi 'khor ba 'di na sems can gang dang gang dag sems can gyi ris gang dang gang du yang sgo nga nas skye ba'i skye gnas sam/ yang na mngal nas skye ba'am/ yang na drod gsher las skye ba'am/
49-1-12b
yang na rdzus te skye ba'i skye gnas su lus mngon par 'grub cing 'byung bar 'gyur ba der dang por 'di ltar len pa rnam pa gnyis po rten dang bcas pa'i dbang po gzugs can len pa dang / mtshan ma dang ming dang rnam par rtog pa la tha snyad 'dogs pa'i spros pa'i bag chags len pa la rten nas/ sa bon thams cad pa'i sems rnam par smin cing 'jug la rgyas shing 'phel ba dang yangs par 'gyur ro/ /de la gzugs can gyi khams na ni len pa gnyi ga yod la/ gzugs can ma yin pa'i khams na ni len pa gnyis su med do/ /blo gros yangs pa rnam par shes pa de ni len pa'i rnam par shes pa zhes kyang bya ste/ 'di ltar des lus 'di bzung zhing blangs pa'i phyir ro/ /kun gzhi rnam par shes pa zhes kyang bya ste/ 'di ltar de lus 'di la grub pa dang bde ba gcig pa'i don gyis kun tu sbyor ba dang rab tu sbyor bar byed pa'i phyir ro/ /sems zhes kyang bya ste/ 'di ltar de ni gzugs dang sgra dang dri dang ro dang reg bya dang chos kun tu bstsags pa dang nye bar bstsags pa yin pa'i phyir ro/ /blo gros yangs pa len pa'i rnam par shes pa de la rten cing gnas nas rnam par shes pa'i tshogs drug po 'di lta ste/ mig gi rnam par shes pa dang / rna ba dang sna dang lce dang lus dang yid kyi rnam par shes pa dag 'byung ngo / /de la rnam par shes pa dang bcas pa'i mig dang gzugs rnams la brten nas/ mig gi rnam par shes pa 'byung ste/ mig gi rnam par shes pa de dang lhan cig rjes su 'jug pa/ dus mtshungs pa/ spyod yul mtshungs pa/ rnam par rtog pa'i yid kyi rnam par shes pa yang 'byung ngo / /blo gros yangs pa de la rnam par shes pa dang bcas pa'i rna ba dang sna dang lce dang rnam par shes pa dang bcas pa'i lus dang reg bya rnams la brten nas lus kyi rnam par shes pa 'byung ste/ lus kyi rnam par shes pa de dang lhan cig rjes su 'jug pa/ dus mtshungs pa/ spyod yul mtshungs pa/ rnam par rtog pa'i yid kyi rnam par shes pa yang 'byung ngo / /gal te mig gi rnam par shes pa gcig lhan cig 'byung na ni mig gi rnam par shes pa dang spyod
49-1-13a
yul mtshungs pa/ rnam par rtog pa'i yid kyi rnam par shes pa gcig kho na lhan cig 'byung ngo / /gal te rnam par shes pa'i tshogs gnyis sam/ gsum mam bzhi lhan cig gam/ lnga car lhan cig 'byung na yang der rnam par shes pa'i tshogs lnga po dag dang / spyod yul mtshungs pa rnam par rtog pa'i yid kyi rnam par shes pa yang gcig kho na lhan cig 'byung ngo / /blo gros yangs pa 'di lta ste dper na/ chu'i klung chen po 'bab pa la gal te rlabs cig 'byung ba'i rkyen nye bar gnas par gyur na rlabs kyang gcig kho na 'byung ngo / /gal te rlabs gnyis sam/ gal te rab tu mang po dag 'byung ba'i rkyen nye bar gnas par gyur na rlabs rab tu mang po dag 'byung zhing chu'i klung de rang gi rgyun gyis rgyun 'chad par yang mi 'gyur la/ yongs su zad par yang mi 'gyur ro/ /me long gi dkyil 'khor shin tu yongs su dag pa la yang gal te gzugs brnyan gcig 'byung ba'i rkyen nye bar gnas par gyur na/ gzugs brnyan yang gcig kho na 'byung ngo / /gal te gzugs brnyan gnyis sam/ gal te rab tu mang po dag 'byung ba'i rkyen nye bar gnas par gyur na/ gzugs brnyan rab tu mang po dag 'byung zhing me long gi dkyil 'khor de gzugs brnyan gyi dngos por yongs su 'gyur ba yang ma yin la yongs su sbyor bar yang mi mngon no/ /blo gros yangs pa de bzhin du chu klung lta bu dang / me long lta bu'i len pa'i rnam par shes pa de la rten cing gnas nas/ gal te mig gi rnam par shes pa gcig lan cig 'byung ba'i rkyen nye bar gnas par gyur na yang mig gi rnam par shes pa gcig kho na lan cig 'byung ngo / /gal te rnam par shes pa'i tshogs lnga car gyi bar dag lan cig 'byung ba'i rkyen nye bar gnas par gyur na yang rnam par shes pa'i tshogs lnga car lan cig 'byung ngo / /blo gros yangs pa de ltar byang chub sems dpa' chos kyi lugs shes pa la brten cing chos kyi lugs shes pa la gnas nas/ sems dang yid dang rnam par shes pa'i gsang ba la mkhas pa yin yang de bzhin gshegs pa ni byang chub sems
49-1-13b
sems dpa' dang yid dang rnam par shes pa'i gsang ba la mkhas par 'dogs na de tsam gyis thams cad kyi thams cad du mi 'dogs so/ /blo gros yangs pa gang gi phyir byang chub sems dpa' nang gi so so nang gi len pa mi mthong / len pa'i rnam par shes pa yang mi mthong la/ de yang yang dag pa ji lta ba bzhin du yin pa dang / kun gzhi yang mi mthong kun gzhi rnam par shes pa yang mi mthong / bstsags pa yang mi mthong / sems kyang mi mthong / mig kyang mi mthong / gzugs kyang mi mthong / mig gi rnam par shes pa yang mi mthong / rna ba yang mi mthong / sgra yang mi mthong / rna ba'i rnam par shes pa yang mi mthong / sna yang mi mthong / dri yang mi mthong / sna'i rnam par shes pa yang mi mthong / lce yang mi mthong / ro yang mi mthong / lce'i rnam par shes pa yang mi mthong / lus kyang mi mthong / reg bya yang mi mthong / lus kyi rnam par shes pa yang mi mthong / blo gros yangs pa gang gi phyir byang chub sems dpa' nang gi so so rang gi yid kyang mi mthong / chos rnams kyang mi mthong / yid kyi rnam par shes pa yang mi mthong la/ de yang yang dag pa ji lta ba bzhin du yin pa de ni/ byang chub sems dpa' don dam pa la mkhas pa zhes bya ste/ de bzhin gshegs pa yang byang chub sems dpa' don dam pa la mkhas pa ni sems dang yid dang / rnam par shes pa'i gsang ba la mkhas pa yin par 'dogs so/ /blo gros yangs pa de tsam gyis na byang chub sems dpa' sems dang yid dang rnam par shes pa'i gsang ba la mkhas pa yin la/ de bzhin gshegs pa byang chub sems dpa' sems dang yid dang rnam par shes pa'i gsang ba la mkhas par 'dogs na yang de tsam gyis 'dogs so/ /de nas bcom ldan 'das kyis de'i tshe tshigs su bcad pa 'di dag bka' stsal to/ /len pa'i rnam par shes pa zab cing phra/ /sa bon thams cad chu bo'i klung ltar 'bab/ /bdag tu rtog par gyur na mi rung zhes/ /byis pa rnams la ngas ni de ma bstan/ /blo gros yangs pa'i le'u
49-1-14a
ste lnga pa'o// //de nas bcom ldan 'das la byang chub sems dpa' yon tan 'byung gnas kyis zhu ba zhus pa/ bcom ldan 'das byang chub sems dpa' chos rnams kyi mtshan nyid la mkhas pa/ byang chub sems dpa' chos rnams kyi mtshan nyid la mkhas pa zhes bgyi na/ bcom ldan 'das ji tsam gyis na byang chub sems dpa' chos rnams kyi mtshan nyid la mkhas pa lags/ de bzhin gshegs pa byang chub sems dpa' chos rnams kyi mtshan nyid la mkhas par 'dogs na yang ji tsam gyis 'dogs lags/ de skad ces gsol pa dang / bcom ldan 'das kyis byang chub sems dpa' yon tan 'byung gnas la 'di skad ces bka' stsal to/ /yon tan 'byung gnas khyod de ltar skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang mir bcas pa'i skye dgu'i don dang / phan pa dang bde ba'i phyir zhugs te/ de bzhin gshegs pa la khyod don 'di nyid 'dri bar sems pa ni legs so legs so/ /yon tan 'byung gnas de'i phyir nyon cig dang / chos rnams kyi mtshan nyid la mkhas pa khyod la bshad par bya'o/ /yon tan 'byung gnas chos rnams kyi mtshan nyid ni gsum po 'di dag yin te/ gsum gang zhe na/ kun brtags pa'i mtshan nyid dang / gzhan gyi dbang gi mtshan nyid dang / yongs su grub pa'i mtshan nyid do/ /yon tan 'byung gnas de la chos rnams kyi kun brtags pa'i mtshan nyid gang zhe na/ ji tsam du rjes su tha snyad gdags pa'i phyir chos rnams kyi ngo bo nyid dam bye brag tu ming dang brdar rnam par gzhag pa gang yin pa'o/ /yon tan 'byung gnas chos rnams kyi gzhan gyi dbang gi mtshan nyid gang zhe na/ chos rnams kyi rten cing 'brel par 'byung ba nyid de/ 'di lta ste 'di yod pas 'di 'byung la/ 'di skyes pa'i phyir 'di skye ba 'di lta ste/ ma rig pa'i rkyen gyis 'du byed rnams zhes bya ba nas/ de ltar na sdug bsngal gyi phung po chen po 'di 'ba' zhig po 'di 'byung bar 'gyur ro zhes bya
49-1-14b
ba'i bar gang yin pa'o/ /yon tan 'byung gnas chos rnams kyi yongs su grub pa'i mtshan nyid gang zhe na/ chos rnams kyi de bzhin nyid gang yin pa ste/ byang chub sems dpa' rnams kyis rtun pa'i rgyu dang / legs par tshul bzhin yid la byas pa'i rgyus de rtogs shing de rtogs pa goms par byas pa yang dag par grub pas kyang bla na med pa yang dag par rdzogs pa'i byang chub kyi bar du yang dag par 'grub pa gang yin pa'o/ /yon tan 'byung gnas 'di lta ste dper na/ skyes bu gang zag rab rib can gyi mig la rab rib kyi skyon chags pa de lta bur ni kun brtags pa'i mtshan nyid du blta bar bya'o/ /yon tan 'byung gnas 'di lta ste dper na/ de nyid la rab rib kyi mtshan ma skra shad 'dzings pa'am/ sbrang ma'am/ til gyi 'bru'am/ sngon po'i mtshan ma'am/ ser po'i mtshan ma'am/ dmar po'i mtshan ma'am/ dkar po'i mtshan ma snang bar gyur pa de lta bur ni gzhan gyi dbang gi mtshan nyid du blta bar bya'o/ /yon tan 'byung gnas 'di lta ste dper na/ skyes bu gang zag de nyid kyi mig yongs su dag cing mig la rab rib kyi skyon chags pa dang bral bar gyur pa na/ mig de nyid kyi rang bzhin gyi spyod yul ma nor ba'i spyod yul de lta bur ni yongs su grub pa'i mtshan nyid du blta bar bya'o/ /yon tan 'byung gnas 'di lta ste dper na/ shel shin tu gsal ba ni gang gi tshe tshon sngon po dang phrad par gyur pa de'i tshe ni nor bu rin po che an da rnyil dang / mthon ka chen po lta bur snang bar 'gyur zhing / nor bu rin po che an da rnyil dang mthon ka chen por log par 'dzin pas kyang sems can rnams rnam par rmongs par byed do/ /gang gi tshe tshon dmar po dang phrad par gyur pa de'i tshe ni nor bu rin po che pad ma rA ga lta bur snang bar 'gyur zhing / nor bu rin po che pad ma rA ga ru log par 'dzin pas sems can rnams rnam par rmongs par byed do/ /gang gi tshe na tshon ljang khu dang phrad par gyur pa de'i tshe ni nor bu rin po che margad lta bur snang bar 'gyur zhing / nor bu rin po che margad du log par 'dzin pas kyang sems
49-1-15a
can rnams rnam par rmongs par byed do/ /gang gi tshe tshon ser po dang phrad par gyur pa de'i tshe ni gser lta bur snang bar 'gyur zhing / gser du log par 'dzin pas kyang sems can rnams rnam par rmongs par byed do/ /yon tan 'byung gnas 'di lta ste dper na/ shel shin tu gsal ba tshon dang phrad pa de lta bur ni gzhan gyi dbang gi mtshan nyid la kun brtags pa'i mtshan nyid kyi tha snyad kyi bag chags su blta bar bya'o/ /'di lta ste dper na/ shel shin tu gsal ba la nor bu rin po che an da rnyil dang / mthon ka chen po dang / pad ma rA ga dang / margad dang / gser du log par 'dzin pa lta bur ni gzhan gyi dbang gi mtshan nyid la kun brtags pa'i mtshan nyid du 'dzin par blta bar bya'o/ /yon tan 'byung gnas 'di lta ste dper na/ shel shin tu gsal ba de nyid lta bur ni gzhan gyi dbang gi mtshan nyid blta bar bya'o/ /'di lta ste dper na/ shel shin tu gsal ba nyid nor bu rin po che an da rnyil dang / mthon ka chen po dang pad ma rA ga dang / margad dang / gser gyi mtshan nyid der rtag pa rtag pa'i dus dang / ther zug ther zug gi dus su yongs su ma grub cing ngo bo nyid med pa de lta bur ni gzhan gyi dbang gi mtshan nyid de/ kun brtags pa'i mtshan nyid der rtag pa rtag pa'i dus dang / ther zug ther zug gi dus su yongs su ma grub cing ngo bo nyid med pa nyid kyis yongs su grub pa'i mtshan nyid blta bar bya'o/ /yon tan 'byung gnas de la mtshan ma dang 'brel pa'i ming la brten nas ni kun brtags pa'i mtshan nyid rab tu shes so/ /gzhan gyi dbang gi mtshan nyid la kun brtags pa'i mtshan nyid du mngon par zhen pa la brten nas ni gzhan gyi dbang gi mtshan nyid rab tu shes so/ /gzhan gyi dbang gi mtshan nyid la kun brtags pa'i mtshan nyid du mngon par zhen pa med pa la brten nas ni yongs su grub pa'i mtshan nyid rab tu shes so/ /yon tan 'byung gnas de la byang chub sems dpa' chos rnams kyi gzhan gyi dbang gi mtshan nyid la kun brtags pa'i mtshan nyid
49-1-15b
yang dag pa ji lta ba bzhin du rab tu shes na mtshan nyid med pa'i chos yang dag pa ji lta ba bzhin du rab tu shes so/ /yon tan 'byung gnas de la byang chub sems dpa'i gzhan gyi dbang gi mtshan nyid yang dag pa ji lta ba bzhin du rab tu shes na/ kun nas nyon mongs pa'i mtshan nyid kyi chos yang dag pa ji lta ba bzhin du rab tu shes so/ /yon tan 'byung gnas de la byang chub sems dpas yongs su grub pa'i mtshan nyid yang dag pa ji lta ba bzhin du rab tu shes na/ rnam par byang ba'i mtshan nyid kyi chos yang dag pa ji lta ba bzhin du rab tu shes so/ /yon tan 'byung gnas de la byang chub sems dpas gzhan gyi dbang gi mtshan nyid la mtshan nyid med pa'i chos yang dag pa ji lta ba bzhin du rab tu shes na/ kun nas nyon mongs pa'i mtshan nyid kyi chos rab tu spong ngo / /kun nas nyon mongs pa'i mtshan nyid kyi chos rab tu spangs na rnam par byang ba'i mtshan nyid kyi chos thob par 'gyur te/ yon tan 'byung gnas gang gi phyir byang chub sems dpas de ltar chos rnams kun brtags pa'i mtshan nyid dang gzhan gyi dbang gi mtshan nyid dang yongs su grub pa'i mtshan nyid yang dag pa ji lta ba bzhin du rab tu shes shing mtshan nyid med pa dang / kun nas nyon mongs pa'i mtshan nyid dang / rnam par byang ba'i mtshan nyid yang dag pa ji lta ba bzhin du rab tu shes la/ mtshan nyid med pa'i chos yang dag pa ji lta ba bzhin du rab tu shes nas/ kun nas nyon mongs pa'i mtshan nyid kyi chos rab tu spong zhing kun nas nyon mongs pa'i mtshan nyid kyi chos rab tu spangs na rnam par byang ba'i mtshan nyid kyi chos 'thob par 'gyur ba de tsam gyis na/ byang chub sems dpa' chos rnams kyi mtshan nyid la mkhas pa yin la/ de bzhin gshegs pa byang chub sems dpa' chos rnams kyi mtshan nyid la mkhas par 'dogs na yang de tsam gyis 'dogs so/ /de nas bcom ldan 'das kyis de'i tshe tshigs su bcad pa 'di dag bka' stsal to/ /mtshan nyid med pa'i chos ni rab shes na/ /kun nas nyon mongs mtshan nyid chos spong
49-1-16a
'gyur/ /kun nas nyon mongs chos ni rab spangs na/ /shin tu rnam dag mtshan nyid chos thob 'gyur/ /skye bo bag med nyes bcom le lo can/ /'du byed skyon la rtog par mi byed pa/ /brtan med g.yo ba yod pa'i chos rnams la/ /rab tu nyams pas snying brtser bya ba yin/ /yon tan 'byung gnas kyi le'u ste drug pa'o// //de nas bcom ldan 'das la byang chub sems dpa' don dam yang dag 'phags kyis 'di skad ces gsol to/ /bcom ldan 'das 'di na bdag gcig pu dben pa zhig na mchis pa'i tshe/ sems kyi yongs su rtog pa 'di lta bu skyes lags te/ bcom ldan 'das kyis rnam grangs du mar phung po rnams kyi rang gi mtshan nyid kyang bka' stsal/ skye ba'i mtshan nyid dang / 'jig pa'i mtshan nyid dang / spang ba dang yongs su shes pa yang bka' stsal/ phung po rnams kyi ji lta ba bzhin du skye mched rnams dang / rten cing 'brel par 'byung ba dang / zas rnams kyi yang bka' stsal/ bcom ldan 'das kyis rnam grangs du mar bden pa rnams kyi mtshan nyid kyang bka' stsal/ yongs su shes pa dang / spang ba dang / mngon du bgyi ba dang / bsgom pa yang bka' stsal/ bcom ldan 'das kyis rnam grangs du mar khams rnams kyi rang gi mtshan nyid kyang bka' stsal/ khams sna tshogs pa nyid dang / khams du ma nyid dang / spang ba dang / yongs su shes pa yang bka' stsal/ bcom ldan 'das kyis rnam grangs du mar dran pa nye bar gzhag pa rnams kyi rang gi mtshan nyid kyang bka' stsal/ mi 'thun pa'i phyogs dang / gnyen po dang / bsgom pa dang / ma skyes pa rnams skye ba dang / skyes pa rnams gnas pa dang / mi bskyud pa dang / slar zhing 'byung ba dang / 'phel zhing yangs pa nyid kyang bka' stsal/ dran pa nye bar gzhag pa rnams kyi ji lta ba bzhin du yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams kyi
49-1-16b
yang bka' stsal/ bcom ldan 'das kyis rnam grangs du mar 'phags pa'i lam yan lag brgyad pa'i rang gi mtshan nyid kyang bka' stsal/ mi 'thun pa'i phyogs dang / gnyen po dang / bsgom pa dang / ma skyes pa rnams skye ba dang / skyes pa rnams gnas pa dang / mi bskyud pa dang / slar zhing 'byung ba dang / 'phel zhing yangs pa nyid kyang bka' stsal la/ bcom ldan 'das kyis thams cad ngo bo nyid ma mchis pa/ chos thams cad ma skyes pa/ ma 'gags pa/gzod ma nas zhi ba/ rang bzhin gyis yongs su mya ngan las 'das pa zhes kyang bka' stsal lags na/ bcom ldan 'das kyis ji ltar dgongs nas chos thams cad ngo bo nyid ma mchis pa/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa zhes bka' stsal snyam bgyid lags te/ bcom ldan 'das kyis ci la dgongs nas chos thams cad ngo bo nyid ma mchis pa/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa zhes bka' stsal pa'i don de nyid bcom ldan 'das la bdag yongs su zhu lags so/ /de skad ces gsol pa dang / bcom ldan 'das kyis byang chub sems dpa' don dam yang dag 'phags la 'di skad ces bka' stsal to/ /don dam yang dag 'phags khyod kyi sems kyi yongs su rtog pa/ dge ba tshul bzhin skyes pa legs so legs so/ /don dam yang dag 'phags khyod de ltar skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang mir bcas pa'i skye dgu'i don dang / phan pa dang bde ba'i phyir zhugs te/ de bzhin gshegs pa la don 'di nyid 'dri bar sems pa ni yang khyod legs so/ /don dam yang dag 'phags de'i phyir nyon cig dang / ngas ci las dgongs nas chos thams cad ngo bo nyid med pa/ chos thams cad ma skyes pa/ ma 'gags pa/
49-1-17a
gzod ma nas zhi ba/ rang bzhin gyis yongs su mya ngan las 'das pa zhes gsungs pa khyod la bshad par bya'o/ /don dam yang dag 'phags ngas chos rnams kyi ngo bo nyid med pa nyid rnam pa gsum po 'di lta ste/ mtshan nyid ngo bo nyid med pa nyid dang / skye ba ngo bo nyid med pa nyid dang / don dam pa ngo bo nyid med pa nyid las dgongs nas chos thams cad ngo bo nyid med pa'o zhes bstan to/ /don dam yang dag 'phags de la chos rnams kyi mtshan nyid ngo bo nyid med pa nyid gang zhe na/ kun brtags pa'i mtshan nyid gang yin pa'o/ / de ci'i phyir zhe na/ 'di ltar de ni ming dang brdar rnam par gzhag pa'i mtshan nyid yin gyi/ rang gi mtshan nyid kyis rnam par gnas pa ni ma yin pas de'i phyir de ni mtshan nyid ngo bo nyid med pa nyid ces bya'o/ /don dam yang dag 'phags chos rnams kyi skye ba ngo bo nyid med pa nyid gang zhe na/ chos rnams kyi gzhan gyi dbang gi mtshan nyid gang yin pa'o/ /de ci'i phyir zhe na/ 'di ltar de ni rkyen gzhan gyi stobs kyis byung ba yin gyi/ bdag nyid kyis ni ma yin pas de'i phyir skye ba ngo bo nyid med pa nyid ces bya'o/ /don dam yang dag 'phags chos rnams kyi don dam pa ngo bo nyid med pa nyid gang zhe na/ rten cing 'brel par 'byung ba'i chos gang dag skye ba ngo bo nyid med pa nyid kyis ngo bo nyid med pa de dag ni don dam pa'i ngo bo nyid med pa nyid kyis ngo bo nyid med pa yang yin no/ /de ci'i phyir zhe na/ don dam yang dag 'phags chos rnams la rnam par dag pa'i dmigs pa gang yin pa de ni ngas don dam pa yin par yongs su bstan la/ gzhan gyi dbang gi mtshan nyid de ni rnam par dag pa'i dmigs pa ma yin pas de'i phyir don dam pa'i ngo bo nyid med pa nyid ces bya'o/ /don dam yang dag 'phags gzhan yang chos rnams kyi yongs su grub pa'i mtshan nyid gang yin pa de yang don dam pa ngo bo nyid med pa nyid ces bya'o/ /de ci'i phyir zhe na/ don dam yang dag 'phags chos rnams kyi chos bdag med pa gang yin pa de ni/ de dag gi ngo bo nyid med pa nyid ces bya ste/ de ni
49-1-17b
don dam pa yin la/ don dam pa ni chos thams cad kyi ngo bo nyid med pa nyid kyis rab tu phye ba yin pas de'i phyir don dam pa ngo bo nyid med pa nyid ces bya'o/ /don dam yang dag 'phags de la 'di lta ste dper na/ nam mkha'i me tog ji lta ba de lta bur ni mtshan nyid ngo bo nyid med pa nyid blta bar bya'o/ /don dam yang dag 'phags de la 'di lta ste dper na/ sgyu ma byas pa ji lta ba de lta bur ni skye ba ngo bo nyid med pa nyid kyang blta bar bya/ don dam pa ngo bo nyid med pa nyid de las gcig kyang blta bar bya'o/ /don dam yang dag 'phags de la 'di lta ste dper na/ nam mkha'i gzugs kyi ngo bo nyid med pa nyid tsam gyis rab tu phye ba dang / thams cad du song ba ji lta ba de lta bur ni don dam pa ngo bo nyid med pa nyid las chos bdag med pas rab tu phye ba dang thams cad du song ba gcig blta bar bya ste/ don dam yang dag 'phags ngas ngo bo nyid med pa nyid rnam pa gsum po de dag las dgongs nas chos thams cad ngo bo nyid med pa'o zhes bstan to/ /don dam yang dag 'phags de la mtshan nyid ngo bo nyid med pa nyid las dgongs nas/ ngas chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes bstan to/ /de ci'i phyir zhe na/ don dam yang dag 'phags 'di ltar rang gi mtshan nyid kyis med pa gang yin pa de ni ma skyes pa yin/ ma skyes pa gang yin pa de ni ma 'gags pa yin/ ma skyes pa dang ma 'gags pa gang yin pa de ni/ gzod ma nas zhi ba yin/ gzod ma nas zhi ba gang yin pa de ni rang bzhin gyis yongs su mya ngan las 'das pa yin/ rang bzhin gyis yongs su mya ngan las 'das pa gang yin pa de la ni/ yongs su mya ngan las bzla bar bya ba chung zad kyang med de/ de'i phyir mtshan nyid ngo bo nyid med pa nyid la dgongs nas ngas chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes bstan to/ /don dam yang dag 'phags yang don dam pa ngo bo nyid med pa
49-1-18a
nyid chos bdag med pas rab tu phye ba las dgongs nas ngas chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes bstan to/ /de ci'i phyir zhe na/ 'di ltar don dam pa ngo bo nyid med pa nyid chos bdag med pas rab tu phye ba ni rtag pa rtag pa'i dus dang / ther zug ther zug gi dus su rnam par gnas pa kho na yin la/ de ni chos rnams kyi chos nyid du 'dus ma byas pa nyon mongs pa thams cad du bral ba yin te/ rtag pa rtag pa'i dus dang / ther zug ther zug gi dus su chos nyid de nyid kyis rnam par gnas pa 'dus ma byas pa gang yin pa de ni 'dus ma byas pa'i phyir ma skyes pa dang ma 'gags pa yin la/ de ni nyon mongs pa thams cad dang bral ba'i phyir gzod ma nas zhi ba dang / rang bzhin gyis yongs su mya ngan las 'das pa yin te/ de'i phyir don dam pa ngo bo nyid med pa nyid chos bdag med pas rab tu phye ba las dgongs nas ngas chos thams cad ma skyes ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes bstan to/ /don dam yang dag 'phags ngas ni sems can gyi khams na sems can rnams kyis kun brtags pa'i ngo bo nyid ngo bo nyid kyis tha dad par mthong zhing gzhan gyi dbang gi ngo bo nyid dang / yongs su grub pa'i ngo bo nyid kyang ngo bo nyid kyis tha dad par mthong na/ de'i phyir ngo bo nyid med pa nyid rnam pa gsum mi 'dogs kyi/ sems can rnams gzhan gyi dbang dang / yongs su grub pa'i ngo bo nyid la kun brtags pa'i ngo bo nyid du sgro btags nas/ gzhan gyi dbang dang / yongs su grub pa'i ngo bo nyid la kun brtags pa'i ngo bo nyid kyi mtshan nyid rjes su tha snyad 'dogs te/ ji lta ji ltar rjes su tha snyad 'dogs pa de lta de ltar tha snyad btags pas yongs su bsgos pa'i sems tha snyad btags pa dang rjes su 'brel pa'am/ tha snyad btags pa bag la nyal gyis gzhan gyi dbang dang yongs su grub pa'i ngo bo nyid la kun brtags
49-1-18b
pa'i ngo bo nyid kyi mtshan nyid du mngon par zhen no/ /ji lta ji ltar mngon par zhen pa de lta de ltar gzhan gyi dbang gi ngo bo nyid la kun brtags pa'i ngo bo nyid du mngon par zhen pa'i rgyu de dang / rkyen des phyi ma la gzhan gyi dbang gi ngo bo nyid kun tu bskyed de/ gzhi des na/ nyon mongs pa'i kun nas nyon mongs pas kyang kun nas nyon mongs par 'gyur/ las kyi kun nas nyon mongs pa dang skye ba'i kun nas nyon mongs pas kyang kun nas nyon mongs par 'gyur zhing / yun ring por yang na sems can dmyal ba rnams dang / yang na dud 'gro rnams sam/ yang na yi dgas rnams sam/ yang na lha rnams sam/ yang na lha ma yin rnams sam/ yang na mi rnams kyi nang du kun tu rgyug cing 'khor bar 'gyur te/ 'khor ba las mi 'da' ba'i phyir ro/ /don dam yang dag 'phags de la sems can gang dag dang po nyid nas dge ba'i rtsa ba ma bskyed pa/ sgrib pa yongs su ma dag pa rgyud yongs su ma smin pa mos pa mi mang ba/ bsod nams dang ye shes kyi tshogs yang dag par ma grub pa de dag la ni nga skye ba ngo bo nyid med pa nyid las brtsams nas chos ston te/ de dag gis chos de thos nas rten cing 'brel bar 'byung ba'i 'du byed rnams la mi rtag pa nyid du shes shing mi brtan pa nyid dang / yid brtan du mi rung ba nyid dang / 'gyur ba'i chos nyid du shes nas/ 'du byed thams cad las yid sdang bar byed skyo bar byed do/ /yid sdang bar byas skyo bar byas nas sdig pa las phyir zlog ste/ de dag sdig pa gang yin pa de mi byed cing dge ba la sten par byed do/ /dge ba la bsten pa'i rgyus dge ba'i rtsa ba ma bskyed pa rnams ni skyed do/ /sgrib pa yongs su ma byang ba rnams kyang yongs su sbyong ngo / /rgyud yongs su ma smin pa yang yongs su smin par byed do/ /gzhi des mos pa mang zhing bsod nams dang ye shes kyi tshogs yang dag par grub par 'gyur ro/ /de dag de ltar dge ba'i rtsa ba bskyed pa nas bsod nams dang ye shes kyi tshogs kyi bar du yang dag par 'grub mod kyi/ 'on kyang skye ba ngo bo nyid
49-1-19a
med pa nyid de la mtshan nyid ngo bo nyid med pa nyid dang / don dam pa ngo bo nyid med pa nyid rnam pa gnyis yang dag pa ji lta ba bzhin du mi shes pas/ 'du byed thams cad las yang dag par skyo bar mi 'gyur/ yang dag par 'dod chags dang bral bar mi 'gyur/ yang dag par rnam par grol bar mi 'gyur zhing / nyon mongs pa'i kun nas nyon mongs pa las kyang yongs su grol bar mi 'gyur/ las kyi kun nas nyon mongs pa las kyang yongs su grol bar mi 'gyur/ skye ba'i kun nas nyon mongs pa las kyang yongs su grol bar mi 'gyur bas/ yang de bzhin gshegs pa de dag la 'di lta ste/ mtshan nyid ngo bo nyid med pa nyid dang / don dam pa ngo bo nyid med pa nyid las brtsams nas 'di ltar 'du byed thams cad las yang dag par skyo bar bya ba dang / 'dod chags dang bral bar bya ba dang / rnam par grol bar bya ba dang / nyon mongs pa'i kun nas nyon mongs pa las yang dag par bzla ba dang / las kyi kun nas nyon mongs pa las yang dag par bzla ba dang / skye ba'i kun nas nyon mongs pa las yang dag par bzla ba'i phyir chos ston to/ /de dag gis chos de thos nas gzhan gyi dbang gi ngo bo nyid la kun brtags pa'i ngo bo nyid kyi mtshan nyid du mngon par zhen pa med pas skye ba ngo bo nyid med pa nyid de/ de la mtshan nyid ngo bo nyid med pa nyid du don dam pa ngo bo nyid med pa nyid du mos par byed/ rab tu rnam par 'byed par byed/ ji lta ba bzhin du rtogs par byed cing 'di lta ste/ tha snyad btags pas yongs su ma bsgos pa'i shes pa tha snyad btags pa dang rjes su 'brel pa med cing tha snyad bag la nyal med pa'i shes pas gzhan gyi dbang gi mtshan nyid de/ tshe 'di la shes pa'i stobs bskyed pa dang / phyi ma la rgyud yang dag par chad pas 'gog par byed de/ gzhi des 'du byed thams cad las yang dag par skyo ba dang / yang dag par 'dod chags dang bral ba dang / yang dag par rnam par grol bar 'gyur zhing nyon mongs pa'i kun nas nyon mongs pa dang / las kyi kun nas nyon mongs pa dang / skye ba'i
49-1-19b
kun nas nyon mongs pa las kyang yongs su grol bar 'gyur ro/ /don dam yang dag 'phags de la sems can nyan thos kyi theg pa'i rigs can rnams kyis kyang lam 'di nyid dang sgrub pa 'di nyid kyis grub pa dang / bde ba bla na med pa'i mya ngan las 'das pa 'thob par 'gyur la/ sems can rang sangs rgyas kyi theg pa'i rigs can rnams dang / de bzhin gshegs pa'i rigs can rnams kyis kyang lam 'di nyid dang sgrub pa 'di nyid kyis grub pa dang bde ba bla na med pa'i mya ngan las 'das pa thob par 'gyur bas 'di ni nyan thos dang rang sangs rgyas dang byang chub sems dpa' rnams kyi rnam par dag pa'i lam gcig pa yin la/ rnam par dag pa gcig ste/ gnyis pa gang yang med pas ngas de las dgongs nas theg pa gcig pu bstan te/ sems can gyi khams na sems can rang bzhin gyis dbang po rtul po rnams dang / dbang po 'bring rnams dang / dbang po rnon po rnams kyi sems can gyi rigs sna tshogs dag kyang med pa ma yin no/ /don dam yang dag 'phags nyan thos kyi rigs can gang zag zhi ba'i bgrod pa gcig pu pa ni sangs rgyas thams cad brtson pa dang ldan par gyur kyang byang chub kyi snying po la bzhag ste/ bla na med pa yang dag par rdzogs pa'i byang chub thob par byar mi nus so/ /de ci'i phyir zhe na/ 'di ltar de ni snying rje shin tu chung ba dang / sdug bsngal gyis shin tu 'jigs pa'i phyir rang bzhin gyis rigs dman pa kho na yin pa'i phyir ro/ /de ji ltar snying rje shin tu chung ba de bzhin du sems can gyi don bya ba la shin tu mi phyogs par 'gyur ro/ /ji ltar sdug bsngal gyis shin tu 'jigs pa de bzhin du 'du byed mngon par 'du bya ba thams cad la shin tu mi phyogs par 'gyur ro/ /sems can gyi don bya ba la shin tu mi phyogs pa dang / 'du byed mngon par 'du bya ba thams cad la shin tu mi phyogs pa ni bla na med pa yang dag par rdzogs pa'i byang chub tu ngas ma bstan no/ /de'i phyir zhi ba'i bgrod pa gcig pu pa zhes bya'o/ /nyan thos byang chub tu yongs su 'gyur ba gang yin pa de ni ngas rnam
49-1-20a
grangs kyis byang chub sems dpa' yin par bstan te/ 'di ltar de ni nyon mongs pa'i sgrib pa las rnam par grol nas/ de bzhin gshegs pa rnams kyis bskul na/ shes bya'i sgrib pa las sems rnam par grol bar byed pa'i phyir ro/ /de ni dang por bdag gi don la sbyor ba'i rnam pas nyon mongs pa'i sgrib pa las rnam par grol te/ de'i phyir de bzhin gshegs pas de nyan thos kyi rigs su 'dogs so/ /don dam yang dag 'phags 'di ltar nga'i chos 'dul ba legs par gsungs pa shin tu gya nom pa bsam pa shin tu rnam par dag pa ston pa/ chos legs par bstan pa la ni sems can rnams kyi mos pa'i rim pa yang snang ste/ don dam yang dag 'phags 'di la de bzhin gshegs pa ni ngo bo nyid med pa nyid rnam pa gsum po de dag nyid las dgongs nas drang ba'i don gyi mdo brjod pa'i rnam pas 'di lta ste/ chos thams cad ngo bo nyid med pa/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes chos ston to/ /de la sems can gang dag dge ba'i rtsa ba chen po bskyed pa dang / sgrib pa yongs su dag pa/ rgyud yongs su smin pa/ mos pa mang ba/ bsod nams dang ye shes kyi tshogs chen po yang dag par grub pa de dag gis ni chos de thos na nga'i dgongs te bshad pa yang dag pa ji lta ba bzhin du rab tu shes shing / chos de la yang chos shes par 'gyur la/ don de yang shes rab kyis yang dag pa ji lta ba bzhin du rtogs par 'gyur zhing / de rtogs pa goms pas kyang myur ba myur ba kho nar shin tu mthar thug pa nyid rjes su 'thob par 'gyur te/ de la yang a la la bcom ldan 'das de ni yang dag par rdzogs pa'i sangs rgyas yin te/ des ni chos thams cad legs par mngon par rdzogs par sangs rgyas so zhes dad pa thob par 'gyur ro/ /de la sems can gang dag dge ba'i rtsa ba ma bskyed pa dang / sgrib pa yongs su ma dag pa dang / rgyud yongs su ma smin pa dang / mos pa chen po ma yin pa/ bsod
49-1-20b
nams dang ye shes kyi tshogs chen po yang dag par ma grub pa/ drang po dang drang po'i rang bzhin can/ rtog pa dang sel mi nus pa/ rang gi lta ba mchog tu 'dzin par mi gnas pa de dag gis ni chos de thos na nga'i dgongs te bshad pa yang yang dag pa ji lta ba bzhin du rab tu mi shes mod kyi/ 'on kyang chos de la mos par byed cing dad pa yang 'thob ste/ mdo sde 'di dag ni de bzhin gshegs pas gsungs pa zab pa zab par snang ba/ stong pa nyid dang ldan pa mthong bar dka' ba/ rtogs par dka' ba/ brtag mi nus pa/ rtog ge'i spyod yul ma yin pa/ zhib mo brtags pa'i mkhas pa mdzangs pas rig pa yin no zhes mos par byed do/ /mdo sde de dag gi don bstan pa dag gi don bstan pa dag la bdag mi shes so snyam nas 'dug ste/ 'di skad ces sangs rgyas kyi byang chub ni zab chos rnams kyi chos nyid kyang zab ste/ de bzhin gshegs pa nyid kyis mkhyen gyi bdag cag gis ni mi shes so/ /de bzhin gshegs pa rnams kyi chos bstan pa ni sems can rnams la mos pa sna tshogs kyis 'jug pa yin te/ de bzhin gshegs pa rnams ni mkhyen pa dang gzigs pa mtha' yas pa yin gyi/ bdag cag gi shes pa dang mthong ba ni ba lang gi rjes tsam mo snyam nas/ de dag mdo sde de rnams la gus par byas te yi ger 'dri bar yang byed/ yi ger bris nas 'chang bar yang byed/ klog par yang byed/ yang dag par 'ged par yang byed/ mchod par yang byed/ lung nod par yang byed/ 'don par yang byed/ kha ton du yang byed mod kyi/ 'di ltar nga'i dgongs te bshad pa zab mo 'di ma rtogs pa'i phyir bsgom pa'i rnam pas sbyor bar mi nus so/ /de dag gzhi des na bsod nams kyi tshogs kyis kyang 'phel bar 'gyur/ ye shes kyi tshogs kyis kyang 'phel bar 'gyur la/ gong du yang rgyud yongs su ma smin pa dag kyang yongs su smin par byed do/ /ci ste sems can de dag las sems can gang dag bsod nams dang ye shes kyi tshogs chen po'i bar du yang dag par grub pa ma yin
49-1-21a
yang drang po dang drang po'i rang bzhin can ma yin la/ rtog pa dang sel nus la/ rang gi lta ba mchog tu 'dzin par gnas pa de dag gis ni chos de thos na nga'i dgongs te bshad pa zab mo yang dag pa ji lta ba bzhin mi shes te/ chos de la mos kyang chos 'di dag thams cad ni ngo bo nyid med pa kho na yin no/ /chos 'di dag thams cad ni ma skyes pa kho na'o/ /ma 'gags pa kho na'o/ /gzod ma nas zhi ba kho na'o/ /rang bzhin gyis yongs su mya ngan las 'das pa kho na'o zhes chos kyi don la sgra ji bzhin kho nar mngon par zhen par byed de/ de dag gzhi des na chos thams cad la med par lta ba dang / mtshan nyid med par lta ba 'thob par 'gyur te/ med par lta ba dang / mtshan nyid med par lta ba thob nas kyang thams cad la mtshan nyid thams cad kyis skur pa 'debs te/ chos rnams kyi kun brtags pa'i mtshan nyid la skur pa 'debs/ chos rnams kyi gzhan gyi dbang gi mtshan nyid dang / yongs su grub pa'i mtshan nyid la yang skur pa 'debs so/ /de ci'i phyir zhe na/ don dam yang dag 'phags 'di ltar gzhan gyi dbang nyid dang / yongs su grub pa'i mtshan nyid yod na ni/ kun brtags pa'i mtshan nyid kyang rab tu shes par gyur na/ de la gang dag gzhan gyi dbang gi mtshan nyid dang / yongs su grub pa'i mtshan nyid la mtshan nyid med par mthong ba de dag gis ni kun brtags pa'i mtshan nyid la yang skur pa btab pa yin pa'i phyir te/ de lta bas na de dag ni mtshan nyid rnam pa gsum char la yang skur pa 'debs pa zhes bya'o/ /de dag ni nga'i chos la chos su 'du shes pa dang don ma yin pa la don du 'du shes pa yin te/ nga'i chos la chos su 'du shes pa dang / don ma yin pa la don du 'du shes pa de dag chos la yang chos su 'dzin/ don ma yin pa la yang don du 'dzin to/ /de dag chos la mos pas dge ba'i chos rnams kyis 'phel mod kyi/ 'on kyang don ma yin pa la mngon par zhen pas shes rab las yongs su nyams par 'gyur te/ shes rab las yongs su nyams na dge ba'i chos shin tu rgya che ba dang / shin tu
49-1-21b
dpag tu med pa rnams las kyang yongs su nyams par 'gyur ro/ /de dag las gzhan dag gis chos la chos su dang / don ma yin pa la don du thos nas gang dag lta ba la dga' bar byed pa de dag ni chos la chos su 'du shes pa dang / don ma yin pa la don du 'du shes pas chos la chos su dang / don ma yin pa la don du mngon par zhen par 'gyur te/ de dag gzhi des na de bzhin du dge ba'i chos las nyams par rig par bya'o/ /gang dag lta ba la dga' bar mi byed pa de dag ni de dag las chos rnams kyi ngo bo nyid med pa nyid thos shing chos rnams kyi skye ba med pa dang / 'gag pa med pa dang / gzod ma nas zhi ba dang / rang bzhin gyis yongs su mya ngan las 'das pa thos nas skrag cing dngang la kun tu dngang bar 'gyur zhing 'di skad ces 'di ni sangs rgyas kyi bka' ma yin gyi/ 'di ni bdud kyis smras pa yin no zhes kyang zer zhing de ltar rig nas mdo sde de dag la skur pa 'debs par byed/ spong bar byed/ mi bsngags pa rjod par byed/ ngan du rjod par byed/ gzhi des na phongs pa chen po 'thob par 'gyur zhing las kyi sgrib pa chen pos kyang reg par 'gyur ro/ /gzhi des kyang gang dag skye bo phal po che la las kyi sgrib pa chen po 'thob pas slu bar byed pa/ mtshan nyid thams cad med par lta zhing don ma yin pa don du ston par byed pa de dag ni las kyi sgrib pa chen po dang ldan par nga smra'o/ /don dam yang dag 'phags de la sems can gang dag dge ba'i rtsa ba ma bskyed/ sgrib pa yongs su ma dag /rgyud yongs su ma smin/ mos pa mi mang / bsod nams dang ye shes kyi tshogs yang dag par ma grub cing / drang po dang drang po'i rang bzhin can ma yin la rtog pa dang sel mi nus la/ rang gi lta ba mchog tu 'dzin par gnas pa de dag gis ni chos de thos na/ nga'i dgongs te bshad pa yang yang dag pa ji lta ba bzhin du rab tu mi shes shing chos de la mos par yang mi 'gyur la/ de dag chos la chos ma yin par 'du shes shing / don la don ma yin par 'du shes la/ chos la yang chos ma yin pa dang / don la yang don ma yin par mngon par zhen nas 'di skad ces 'di ni sangs rgyas kyi
49-1-22a
bka' ma yin gyi/ 'di ni bdud kyis smras pa yin no zhes kyang zer zhing de ltar rig nas mdo sde dag la skur pa 'debs par byed/ spong bar byed/ mi bsngags pa rjod par byed/ ngan du rjod par byed cing lhad kyang 'jug par byed de/ rnam grangs du mar mdo sde de dag spang ba dang / chud gzan pa dang / rnam par gzhig pa'i phyir zhugs shing de la mos pa'i gang zag rnams la yang dgrar 'du shes par 'gyur ro/ /de dag ni dang po nyid nas kyang las kyi sgrib pas bsgribs pa yin la/ gzhi des kyang yang las kyi sgrib pa de lta bus sgrib par byed de/ las kyi sgrib pa de'i dang po ni gdags par sla'i/ bskal pa bye ba khrag khrig 'bum phrag 'di snyed kyi bar gyis 'byung bar 'gyur ro zhes gdags par ni dka'o/ /don dam yang dag 'phags de ltar na nga'i chos 'dul ba legs par gsungs pa/ shin tu gya nom pa/ bsam pa shin tu rnam par dag pa ston pa chos legs par bstan pa la sems can rnams kyi mos pa'i rim pa de lta bu dag kyang snang ngo / /de nas bcom ldan 'das kyis de'i tshe tshigs su bcad pa 'di dag bka' stsal to/ /chos rnams ngo bo nyid med chos rnams ma skyes dang / /chos rnams ma 'gags chos rnams gzod nas zhi ba dang / /chos rnams thams cad rang bzhin mya ngan 'das par ni/ /dgongs pa med par mkhas pa su zhig smra bar byed/ /mtshan nyid ngo bo nyid med skye ba ngo bo med/ /don dam ngo bo nyid med do zhes ngas bshad de/ /'di la mkhas pa gang zhig dgongs pa shes pa ni/ /rab tu nyams par 'gyur ba'i lam du de mi 'gro /kun gyi rnam dag lam ni gcig pu 'di yin te/ /rnam par dag pa'ang gcig ste gnyis pa gang yang med/ /de phyir theg pa gcig pa 'di ni 'dogs byed kyang / /sems can rigs ni rnam pa sna tshogs med ma yin/ /sems can khams 'di na ni gang bdag gcig pu pa/ /mya ngan 'da' bar byed pa'i sems can dpag tu med/ /gang dag mya ngan 'das kyang sems can mi gtong ba'i/ /brtan pa snying rje ldan pa de
49-1-22b
dag shin tu dkon/ /gang grol de dag rnams kyi zag pa med pa'i dbyings/ /phra zhing bsam gyis mi khyab mnyam zhing bye brag med/ /thams cad don grub sdug bsngal nyon mongs spangs pa ste/ /gnyis su brjod pa ma yin bde zhing brtan pa yin/ /de nas de'i tshe bcom ldan 'das la byang chub sems dpa' don dam yang dag 'phags kyis 'di skad ces gsol to/ /bcom ldan 'das ji tsam du sangs rgyas bcom ldan 'das rnams kyi dgongs te gsungs pa phra ba/ mchog tu phra ba zab pa/ mchog tu zab pa/ rtogs par dka' ba/ mchog tu rtogs par dka' ba ni ngo mtshar rmad du byung ba lags so/ /bcom ldan 'das bcom ldan 'das kyis bka' stsal pa'i don bdag gis 'di ltar 'tshal te/ rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma la/ gzugs kyi phung po zhes ngo bo nyid kyi mtshan nyid dam/ bye brag gi mtshan nyid du ming dang brdar rnam par gzhag pa dang / gzugs kyi phung po skye'o zhe'am/ 'gag go zhe'am/ gzugs kyi phung po spang ba dang / yongs su shes pa zhes ngo bo nyid kyi mtshan nyid dam/ bye brag gi mtshan nyid du ming dang brdar rnam par gzhag pa gang lags pa de ni kun brtags pa'i mtshan nyid lags te/ de la brten nas bcom ldan 'das chos rnams kyi mtshan nyid ngo bo nyid ma mchis pa nyid 'dogs par mdzad lags so/ /rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma gang lags pa de ni gzhan gyi dbang gi mtshan nyid lags te/ de la brten nas bcom ldan 'das chos rnams kyi skye ba ngo bo nyid ma mchis pa nyid dang / don dam pa ngo bo nyid ma mchis pa de nyid las gcig kyang 'dogs par mdzad lags so/ /bcom ldan 'das bcom ldan 'das kyis bka' stsal pa'i don bdag gis 'di ltar 'tshal te/ rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma de nyid kun brtags pa'i mtshan nyid der yongs su ma grub cing ngo bo nyid med/ de
49-1-23a
kho nas ngo bo nyid ma mchis pa nyid chos bdag ma mchis pa de bzhin nyid rnam par dag pa'i dmigs pa gang lags pa de ni yongs su grub pa'i mtshan nyid lags te/ de la brten nas bcom ldan 'das chos rnams kyi don dam pa'i ngo bo nyid ma mchis pa de nyid las gcig 'dogs par mdzad lags so/ /gzugs kyi phung po la ji lta ba bzhin du phung po lhag ma rnams la yang de bzhin du sbyar bar bgyi lags so/ /phung po rnams la ji lta ba bzhin du skye mched bcu gnyis po dag gi skye mched re re la yang de bzhin lags so/ /srid pa'i yan lag bcu gnyis po de dag gi srid pa'i yan lag re re la yang de bzhin bgyi lags so/ /zas bzhi po dag gi zas re re la yang de bzhin lags so/ /khams drug dang khams bcwa brgyad po dag gi khams re re yang de bzhin lags so/ /bcom ldan 'das bcom ldan 'das kyis bka' stsal pa'i don bdag gis 'di ltar 'tshal te/ rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma la sdug bsngal gyi bden pa dang / sdug bsngal gyi bden pa yongs su shes pa zhes ngo bo nyid kyi mtshan nyid dam/ bye brag gi mtshan nyid du ming dang brdar rnam par gzhag pa gang lags pa de ni kun brtags pa'i mtshan nyid lags te/ de la brten nas bcom ldan 'das chos rnams kyi mtshan nyid ngo bo nyid ma mchis pa nyid 'dogs par mdzad lags so/ /rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma gang lags pa de ni gzhan gyi dbang gi mtshan nyid lags te/ de la brten nas bcom ldan 'das chos rnams kyi skye ba ngo bo nyid ma mchis pa nyid dang / don dam pa ngo bo nyid ma mchis pa de las gcig kyang 'dogs par mdzad lags so/ /bcom ldan 'das bcom ldan 'das kyis bka' stsal pa'i don bdag gis 'di ltar 'tshal te/ rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma de nyid kun brtags pa'i mtshan nyid der yongs su ma grub cing ngo bo nyid
49-1-23b
de kho nas ngo bo nyid ma mchis pa nyid chos bdag ma mchis pa de bzhin nyid rnam par dag pa'i dmigs pa gang lags pa de ni yongs su grub pa'i mtshan nyid lags te/ de la brten nas bcom ldan 'das chos rnams kyi don dam pa ngo bo nyid ma mchis pa nyid de las gcig 'dogs par mdzad lags so/ /sdug bsngal 'phags pa'i bden pa la ji lta ba de bzhin du bden pa lhag ma rnams la yang de bzhin du sbyar bar bgyi lags so/ /bden pa rnams la ji lta ba bzhin du dran pa nye bar gzhag pa rnams dang / yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang / lam gyi yan lag rnams kyi yan lag re re la yang de bzhin du sbyar bar bgyi lags so/ /bcom ldan 'das bcom ldan 'das kyis bka' stsal pa'i don bdag gis 'di ltar 'tshal te/ rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma la yang dag pa'i ting nge 'dzin zhe'am/ ting nge 'dzin gyi mi 'thun pa'i phyogs dang gnyen po zhe'am/ ting nge 'dzin bsgom pa zhe'am/ ma skyes pa skye ba zhe'am/ skyes pa gnas pa dang / mi bskyud pa dang / slar zhing 'byung ba dang / 'phel zhing rgyas pa nyid ces ngo bo nyid kyi mtshan nyid dam/ bye brag gi mtshan nyid du ming dang brdar rnam par gzhag pa gang lags pa de ni kun brtags pa'i mtshan nyid lags te/ de la brten nas bcom ldan 'das chos rnams kyi mtshan nyid ngo bo nyid ma mchis pa nyid 'dogs par mdzad lags so/ /rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma gang lags pa de ni gzhan gyi dbang gi mtshan nyid lags te/ de la brten nas bcom ldan 'das chos rnams kyi skye ba ngo bo nyid ma mchis pa nyid dang / don dam pa ngo bo nyid ma mchis pa de las gcig kyang 'dogs par mdzad lags so/ /bcom ldan 'das bcom ldan 'das kyis bka' stsal pa'i don bdag
49-1-24a
gis 'di ltar 'tshal te/ rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma de nyid kun brtags pa'i mtshan nyid der yongs su ma grub cing ngo bo nyid de kho nas ngo bo nyid ma mchis pa nyid chos bdag ma mchis pa de bzhin nyid rnam par dag pa'i dmigs pa gang lags pa de ni yongs su grub pa'i mtshan nyid lags te/ de la brten nas bcom ldan 'das chos rnams kyi don dam pa ngo bo nyid ma mchis pa de las gcig 'dogs par mdzad lags so/ /bcom ldan 'das 'di lta ste/ dper bgyi na bca' sga ni phye ma'i sman sbyar ba dang / bcud kyis len sbyar ba thams cad du stsal bar bgyi ba lags so/ /de bzhin du chos rnams kyi ngo bo nyid ma mchis pa nyid las brtsams/ skye ba ma mchis pa dang / 'gag pa ma mchis pa dang / gzod ma nas zhi ba dang / rang bzhin gyis yongs su mya ngan las 'das pa nyid las brtsams nas/ bcom ldan 'das nges pa'i don bstan pa 'di yang drang ba'i don gyi mdo sde thams cad du stsal bar bgyi ba lags so/ /bcom ldan 'das 'di lta ste dper bgyi na ri mo bri ba'i gzhi ni sngon po'am/ ser po'am/ dmar po'am/ dkar po'am/ ri mor bgyi ba thams cad la ro gcig pa lags shing ri mor bris pa de yang shin tu gsal bar bgyid pa lags so/ /de bzhin du chos rnams kyi ngo bo nyid ma mchis pa nyid dang / rang bzhin gyis yongs su mya ngan las 'das pa nyid kyi bar las brtsams nas bcom ldan 'das kyi nges pa'i don bstan pa 'di yang drang ba'i don gyi mdo sde thams cad la ro gcig pa dang drang ba'i don de dag shin tu gsal bar bgyid pa lags so/ /bcom ldan 'das 'di lta ste dper bgyi na/ chab mar ni snod du bsgral ba dang / sha g.yos dang / bag chos kyi rnam pa thams cad du stsal na shin tu bda' bar 'gyur lags so/ /de bzhin du chos rnams kyi ngo bo nyid ma mchis pa nyid dang / rang bzhin gyis yongs su mya ngan las 'das pa nyid kyi bar las brtsams nas bcom ldan
49-1-24b
'das kyi nges pa'i don bstan pa 'di yang drang ba'i don gyi mdo sde thams cad du stsal na dga' ba dang / mchog tu dga' ba chen por 'gyur lags so/ /bcom ldan 'das 'di lta ste dper bgyi na/ nam mkha' ni thams cad la ro gcig pa dang / brtsam pa thams cad la sgrib par mi 'gyur ba lags so/ /de bzhin du chos rnams kyi ngo bo nyid ma mchis pa nyid dang / rang bzhin gyis yongs su mya ngan las 'das pa nyid kyi bar las brtsams nas bcom ldan 'das kyi nges pa'i don bstan pa 'di yang drang ba'i don gyi mdo sde thams cad la ro gcig pa dang / nyan thos kyi theg pa dang / rang sangs rgyas kyi theg pa dang / theg pa chen por brtsam pa thams cad la sgrib par mi 'gyur ba lags so/ /de skad ces gsol pa dang / bcom ldan 'das kyis byang chub sems dpa' don dam yang dag 'phags la legs so zhes bya ba byin te/ don dam yang dag 'phags legs so legs so/ /don dam yang dag 'phags khyod kyis de bzhin gshegs pa'i dgongs te bshad pa shes te/ don de la 'di lta ste/ bca' sga dang / ri mo 'dri ba'i gzhi dang / mar gyis gdab pa dang / nam mkha'i dpe legs par byas pa de ni don dam yang dag 'phags de bzhin te/ gzhan du ma yin gyis de ni de bzhin du zung shig /de nas bcom ldan 'das la byang chub sems dpa' don dam yang dag 'phags kyis yang 'di skad ces gsol to/ /bcom ldan 'das kyis dang por yul bA rA Na sI drang srong smra ba ri dgas kyi nags su theg pa la yang dag par zhugs pa rnams la 'phags pa'i bden pa bzhi'i rnam par bstan pas chos kyi 'khor lo ngo mtshar rmad du byung ba/ sngon lhar gyur pa'am/ mir gyur pa sus kyang chos dang 'thun par 'jig rten du ma bskor ba gcig tu rab tu bskor te/ bcom ldan 'das kyi chos kyi 'khor lo bskor ba de yang bla na mchis pa/ skabs mchis pa/ drang ba'i don rtsod pa'i gzhi'i gnas su gyur pa lags la/ bcom ldan 'das kyis chos rnams kyi ngo bo nyid ma mchis pa nyid las brtsams/ skye ba ma mchis pa dang /
49-1-25a
'gag pa ma mchis pa dang / gzod ma nas zhi ba dang / rang bzhin gyis yongs su mya ngan las 'das pa nyid las brtsams nas theg pa chen po la yang dag par zhugs pa rnams la stong pa nyid smos pa'i rnam pas ches ngo mtshar rmad du byung ba'i chos kyi 'khor lo gnyis pa bskor te/ bcom ldan 'das kyi chos kyi 'khor lo bskor ba de yang bla na mchis pa/ skabs mchis pa/ drang ba'i don rtsod pa'i gzhi'i gnas su gyur pa lags la/ bcom ldan 'das kyis chos rnams kyi ngo bo nyid ma mchis pa nyid las brtsams/ skye ba ma mchis pa dang / 'gag pa ma mchis pa dang / gzod ma nas zhi ba dang / rang bzhin gyis yongs su mya ngan las 'das pa nyid las brtsams nas/ theg pa thams cad la yang dag par zhugs pa rnams la legs par rnam par phye ba dang ldan pa/ shin tu ngo mtshar rmad du byung ba'i chos kyi 'khor lo gsum pa bskor te/ bcom ldan 'das kyi chos kyi 'khor lo bskor ba 'di ni bla na ma mchis pa/ skabs ma mchis pa/ nges pa'i don lags te/ rtsod pa'i gzhi'i gnas su gyur pa ma lags so/ /bcom ldan 'das chos rnams kyi ngo bo nyid ma mchis pa nyid las brtsams/ rang bzhin gyis yongs su mya ngan las 'das pa nyid kyi bar las brtsams nas/ bcom ldan 'das kyis nges pa'i don bstan pa 'di rigs kyi bu'am/ rigs kyi bu mo gang gis thos nas mos par bgyid pa dang / yi ger 'drir stsol ba dang / yi ger bris nas kyang 'chang ba dang / klog pa dang / mchod pa dang / yang dag par 'gyed pa dang / lung nod pa dang / kha ton bgyid pa dang / sems pa dang / bsgom pa'i rnam pas sbyor bar bgyid pa de bsod nams ji tsam zhig skyed par 'gyur ba lags/ de skad ces gsol pa dang / bcom ldan 'das kyis byang chub sems dpa' don dam yang dag 'phags la 'di skad ces bka' stsal to/ /don dam yang dag 'phags rigs kyi bu'am/ rigs kyi bu mo de ni bsod nams dpag tu med
49-1-25b
grangs med pa bskyed de/ de'i dpe bya bar sla ba ma yin mod kyi/ 'on kyang mdor bsdus te khyod la bshad par bya'o/ /don dam yang dag 'phags 'di lta ste dper na/ sen mo'i rtse mo la gnas pa'i sa'i rdul gang dag yin pa de ni/ sa la gnas pa'i rdul rnams dang bsgrun na brgya'i char yang nye bar mi 'gro zhing stong gi cha dang / 'bum gyi cha dang / grangs dang / cha dang / bgrang ba dang / dpe dang / rgyur yang nye bar mi 'gro'o/ /ba lang gi rjes kyi chu ni mtsho chen po bzhi'i chu dang bsgrun na brgya'i char yang nye bar mi 'gro ba nas rgyu'i bar du yang nye bar mi 'gro'o/ /don dam yang dag 'phags de bzhin du ngas drang ba'i don gyi mdo sde la mos pa nas bsgom pa'i rnam par sbyor bar byed pa'i bar gyi bsod nams gang bshad pa de ni nges pa'i don bstan pa la mos pa las yang dag par grub pa nas/ bsgom pa'i rnam pas sbyor ba las yang dag par grub pa'i bar gyi bsod nams dang bsgrun na brgya'i char yang nye bar mi 'gro ba nas rgyu'i bar du yang nye bar mi 'gro'o/ /de skad ces bka' stsal pa dang / bcom ldan 'das la byang chub sems dpa' don dam yang dag 'phags kyis 'di skad ces gsol to/ /bcom ldan 'das dgongs pa nges par 'grel pa'i chos kyi rnam grangs 'dir bstan pa 'di'i ming ci lags/ 'di ji ltar gzung bar bgyi/ bcom ldan 'das kyis de la bka' stsal pa/ don dam yang dag 'phags 'di ni don dam pa'i nges pa'i don bstan pa yin te/ 'di don dam pa nges pa'i don bstan pa zhes bya bar zung shig /don dam pa nges pa'i don bstan pa 'di bshad pa na srog chags drug 'bum ni bla na med pa yang dag par rdzogs pa'i byang chub tu sems skyes so/ /nyan thos sum 'bum ni chos rnams la chos kyi mig rdul med cing dri ma dang bral ba rnam par dag go/ /nyan thos 'bum lnga khri ni len pa med par zag pa rnams las sems rnam par grol lo/ /byang chub sems dpa' bdun khri lnga stong gis ni mi skye ba'i chos la bzod pa thob par gyur to/ /
49-1-26a
don dam yang dag 'phags kyi le'u ste bdun pa'o// //de nas bcom ldan 'das la byang chub sems dpa' byams pas zhu ba zhus pa/ bcom ldan 'das byang chub sems dpa' ci la gnas/ ci la brten te theg pa chen po la zhi gnas dang lhag mthong sgom par bgyid lags/ bcom ldan 'das kyis bka' stsal pa/ byams pa chos gdags pa rnam par gzhag pa dang / bla na med pa yang dag par rdzogs pa'i byang chub tu smon lam mi gtong ba la gnas shing rten cing brten nas so/ /bcom ldan 'das kyis zhi gnas dang lhag mthong gi dmigs pa'i dngos po bzhi po 'di lta ste/ rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan dang / dngos po'i mtha' dang / dgos pa yongs su grub pa'o zhes gang dag bstan pa de la/ bcom ldan 'das du zhig zhi gnas kyi dmigs pa lags/ bka' stsal pa/ gcig ste 'di lta ste/ rnam par mi rtog pa'i gzugs brnyan no/ /du zhig lhag mthong gi dmigs pa lags/ bka' stsal pa/ gcig kho na ste/ rnam par rtog pa dang bcas pa'i gzugs brnyan no/ / du zhig de gnyi ga'i dmigs pa lags/ bka' stsal pa/ gnyis te/ 'di lta ste/ dngos po'i mtha' dang / dgos pa yongs su grub pa'o/ /bcom ldan 'das byang chub sems dpa' zhi gnas dang lhag mthong gi dmigs pa'i dngos po bzhi po de dag la brten cing gnas nas ji ltar zhi gnas yongs su tshol bar bgyid pa dang / lhag mthong la mkhas pa lags/ bka' stsal pa/ byams pa ngas chos gdags pa rnam par gzhag pa 'di lta ste/ mdo'i sde dang / dbyangs kyis bsnyad pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde dang / gleng gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa'i rabs kyi sde dang / shin tu rgyas pa'i sde dang / rmad du byung ba'i chos kyi sde dang / gtan la bab par bstan pa'i sde gang dag
49-1-26b
byang chub sems dpa' rnams la bshad pa de dag byang chub sems dpa'as legs par thos/ legs par bzung / kha ton byang bar byas/ yid kyis legs par brtags/ mthong bas shin tu rtogs par byas nas de gcig pu dben par 'dug ste/ nang du yang dag bzhag nas ji ltar legs par bsams pa'i chos de dag yid la byed cing / sems gang gis yid la byed pa'i sems de nang du rgyun chags su yid la byed pas yid la byed do/ /de ltar zhugs shing de la lan mang du gnas pa de la lus shin tu sbyangs pa dang sems shin tu sbyangs pa 'byung ba gang yin pa de ni zhi gnas zhes bya ste/ de ltar na byang chub sems dpa' zhi gnas yongs su tshol bar byed pa yin no/ /de lus shin tu sbyangs pa dang / sems shin tu sbyangs pa de thos nas de nyid la gnas te/ sems kyi rnam pa spangs nas ji ltar bsams pa'i chos de dag nyid nang du ting nge 'dzin gyi spyod yul gzugs brnyan du so sor rtog par byed mos par byed do/ /de ltar ting nge 'dzin gyi spyod yul gzugs brnyan de dag la shes bya'i don de rnam par 'byed pa dang / rab tu rnam par 'byed pa dang / yongs su rtog pa dang / yongs su dpyod pa dang / bzod pa dang / 'dod pa dang / bye brag 'byed pa dang / lta ba dang / rtog pa gang yin pa de ni lhag mthong zhes bya ste/ de ltar na byang chub sems dpa' lhag mthong la mkhas pa yin no/ /bcom ldan 'das byang chub sems dpa' de la sems la dmigs pa'i sems nang du yid la bgyid pa na/ ji srid du lus shin tu sbyangs pa dang / sems shin tu sbyangs pa ma thob pa de'i bar du yid la bgyid pa de la ci zhes bgyi/ byams pa zhi gnas ni ma yin te/ zhi gnas kyi rjes su 'thun pa'i mos pa dang mtshungs par ldan pa yin par brjod par bya'o/ /bcom ldan 'das byang chub sems dpa' de ji srid du lus dang sems shin tu sbyangs pa ma thob pa de'i bar du ji ltar legs par bsams pa'i chos de dag nang du ting nge 'dzin gyi spyod yul gzugs brnyan du yid la bgyid pa'i
49-1-27a
yid la bgyid pa de la ci zhes bgyi/ byams pa lhag mthong ni ma yin te/ lhag mthong gi rjes su 'thun pa'i mos pa dang mtshungs par ldan pa yin par brjod par bya'o/ /bcom ldan 'das zhi gnas kyi lam dang / lhag mthong gi lam tha dad ces bgyi'am/ tha dad pa ma lags zhes bgyi/ bka' stsal pa/ byams pa tha dad pa yang ma yin/ tha dad pa ma yin pa yang ma yin zhes bya'o/ /ci'i phyir tha dad pa ma yin zhe na/ lhag mthong gi dmigs pa'i sems la dmigs pa'i phyir ro/ /ci'i phyir tha dad pa ma yin zhe na/ rnam par rtog pa dang bcas pa'i gzugs brnyan la dmigs pa'i phyir ro/ /bcom ldan 'das rnam par lta bar bgyid pa'i ting nge 'dzin gyi spyod yul gzugs brnyan gang lags pa de ci lags/ sems de dang tha dad pa zhes bgyi'am/ tha dad pa ma lags zhes bgyi/ byams pa tha dad pa ma yin zhes bya'o/ /ci'i phyir tha dad pa yin zhe na/ gzugs brnyan de rnam par rig pa tsam du zad pa'i phyir te/ byams pa rnam par shes pa ni dmigs pa rnam par rig pa tsam gyis rab tu phye ba yin no/ /zhes ngas bshad do/ /bcom ldan 'das ting nge 'dzin gyi spyod yul gzugs brnyan de gal te gzugs sems de las tha dad pa ma lags na/ sems de nyid kyis sems de nyid la ji ltar rtog par bgyid lags/ bka' stsal pa/ byams pa de la chos gang yang chos gang la yang rtog par mi byed mod kyi/ 'on kyang de ltar skyes pa'i sems gang yin pa de de ltar snang ngo / /byams pa 'di lta ste dper na/ gzugs la brten nas me long gi dkyil 'khor shin tu yongs su dag pa la gzugs nyid mthong yang gzugs brnyan mthong ngo snyam du sems te/ de la gzugs de dang / gzugs brnyan snang ba de don tha dad par snang ngo / /de bzhin du de ltar skyes pa'i sems de dang / ting nge 'dzin gyi spyod yul gzugs brnyan zhes bya ba gang yin pa de yang de las don gzhan yin pa lta bur snang ngo / /bcom ldan 'das sems can rnams kyi gzugs la sogs par snang ba
49-1-27b
sems kyi gzugs brnyan rang bzhin du gnas pa gang lags pa de yang sems de dang tha dad pa ma lags zhes bgyi'am/ bka' stsal pa/ byams pa tha dad pa ma yin zhes bya ste/ byis pa phyin ci log gi blo can rnams ni gzugs brnyan de dag la rnam par rig pa tsam de nyid yang dag pa ji lta ba bzhin mi shes pas phyin ci log tu sems so/ /bcom ldan 'das byang chub sems dpa' ji tsam gyis na/ gcig tu lhag mthong sgom pa lags/ bka' stsal pa/ gang gi tshe rgyun chags su yid la byed pas sems kyi mtshan nyid la byed pa'o/ / ji tsam gyis na gcig tu zhi gnas sgom pa lags/ bka' stsal pa/ gang gi tshe rgyun chags su yid la byed pas bar chad med pa'i sems yid la byed pa'o/ /ji tsam gyis na zhi gnas dang lhag mthong gnyis 'dres par 'gyur te mnyam par zung du 'jug pa lags/ bka' stsal pa/ gang gi tshe sems rtse gcig pa nyid yid la byed pa'o/ /bcom ldan 'das sems kyi mtshan ma gang lags/ byams pa lhag mthong gi dmigs pa ting nge 'dzin gyi spyod yul rnam par rtog pa dang bcas pa'i gzugs brnyan gang yin pa'o/ /bar chad ma mchis pa'i sems gang lags/ byams pa zhi gnas kyi dmigs pa gzugs brnyan la dmigs pa'i sems gang yin pa'o/ /sems rtse gcig pa nyid gang lags/ ting nge 'dzin gyi spyod yul gzugs brnyan de la 'di ni rnam par rig pa tsam yin no/ /zhes bya bar rtogs te/ de rtogs nas de bzhin nyid du yid la byed pa gang yin pa'o/ /bcom ldan 'das lhag mthong la rnam pa du mchis/ byams pa rnam pa gsum ste/ mtshan ma las byung ba dang / yongs su tshol ba las byung ba dang / so sor rtog pa las byung ba'o/ /mtshan ma las byung ba gang zhe na/ ting nge 'dzin gyi spyod yul rnam par rtog pa dang bcas pa'i gzugs brnyan 'ba' zhig yid la byed pa'i lhag mthong gang yin pa'o/ /yongs su tshol ba las byung ba gang zhe na/ de dang der shes rab kyis shin tu legs par ma rtogs pa'i chos de dag nyid shin tu legs par rtogs par
49-1-28a
bya ba'i phyir yid la byed pa'i lhag mthong gang yin pa'o/ /so sor rtog pa las byung ba gang zhe na/ de dang der shes rab kyis shin tu legs par rtogs pa'i chos rnams la rnam par grol bas shin tu legs par bde ba la reg par bya ba'i phyir yid la byed pa'i lhag mthong gang yin pa'o/ /zhi gnas la rnam pa du mchis/ bka' stsal pa/ bar chad med pa'i sems de'i rjes su 'brang bas de yang rnam pa gsum du brjod par bya'o/ /byams pa yang zhi gnas ni rnam pa brgyad de bsam gtan dang po pa dang / gnyis pa dang / gsum pa dang / bsam gtan bzhi pa dang / nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched pa'o/ /yang rnam pa bzhi ste/ byams pa tshad med pa dang / snying rje dang / dga' ba dang / btang snyoms tshad med pa'o/ /bcom ldan 'das zhi gnas dang / lhag mthong ni chos la gnas pa zhes kyang bgyi/ chos la mi gnas pa zhes kyang bgyi na/ chos la gnas pa ni gang lags/ chos la mi gnas pa ni gang lags/ byams pa ji ltar bzung ba dang / bsams pa'i chos kyi mtshan ma'i rjes su 'brang bas don la zhi gnas dang lhag mthong gang yin pa de ni chos la gnas pa yin no/ /bzung ba dang bsams pa'i chos la mi ltos par gzhan gyi gdams ngag dang / rjes su bsten pa la brten nas don la zhi gnas dang / lhag mthong 'di lta ste/ rnam par sngos pa'am/ rnam par rnags pa'am/ de lta bu dang 'thun pa rnams sam/ 'du byed thams cad mi rtag pa zhes bya ba'am/ sdug bsngal ba zhes bya ba'am/ chos thams cad bdag med pa zhes bya ba'am/ mya ngan las 'das pa zhi ba zhes bya ba dang / de lta bu dang 'thun pa'i zhi gnas dang lhag mthong de ni chos la mi gnas pa yin par rig par bya'o/ /byams pa de la nga ni chos la gnas pa'i zhi gnas dang lhag mthong la brten nas byang chub sems dpa' chos kyi rjes su 'brang ba dbang po rnon por 'dogs so/ /chos la mi
49-1-28b
gnas pa la brten nas dad pas rjes su 'brang ba dbang po rtul por 'dogs so/ /bcom ldan 'das zhi gnas dang lhag mthong ni ma 'dres pa'i chos la dmigs pa zhes kyang bgyi/ 'dres pa'i chos la dmigs pa zhes kyang bgyi na/ ma 'dres pa'i chos la dmigs pa ni gang lags/ 'dres pa'i chos la dmigs pa ni gang lags/ byams pa gal te byang chub sems dpa' ji ltar bzung ba dang bsams pa'i chos rnams las mdo'i sde la sogs pa'i chos so so la dmigs pa'i zhi gnas dang / lhag mthong sgom par byed pa de ni ma 'dres pa'i chos la dmigs pa'i zhi gnas dang / lhag mthong yin no/ /gal te mdo sde la sogs pa'i chos de gcig tu bzlum pa dang / gcig tu bsdu ba dang / gcig tu brtul ba dang / phung po gcig tu byas te/ chos 'di dag thams cad ni de bzhin nyid la gzhol ba/ de bzhin nyid la 'bab pa/ de bzhin nyid la bab pa/ byang chub la gzhol ba/ byang chub la 'bab pa/ byang chub la bab pa/ mya ngan las 'das pa la gzhol ba/ mya ngan las 'das pa la 'bab pa/ mya ngan las 'das pa la bab pa/ gnas gyur pa la gzhol ba/ gnas gyur pa la 'bab pa/ gnas gyur pa la bab pa dag ste/ chos 'di dag thams cad ni dge ba'i chos dpag tu med pa/ grangs med pa dag mngon par rjod pas rjod pa yin no snyam du yid la byed pa de ni/ 'dres pa'i chos la dmigs pa'i zhi gnas dang lhag mthong yin no/ /bcom ldan 'das zhi gnas dang lhag mthong ni 'dres pa chung ngu'i chos la dmigs pa zhes kyang bgyi/ 'dres pa chen por gyur pa'i chos la dmigs pa zhes kyang bgyi/ 'dres pa tshad ma mchis pa'i chos la dmigs pa zhes kyang bgyi na/ 'dres pa chung ngu'i chos la dmigs pa ni gang lags/ 'dres pa chen por gyur pa'i chos la dmigs pa ni gang lags/ 'dres pa tshad ma mchis pa'i chos la dmigs pa ni gang lags/ byams pa mdo'i sde nas shin tu rgyas pa'i sde dang / rmad du byung ba'i chos kyi sde dang / gtan la bab par bstan pa'i sde'i bar dag so sor gcig tu bzlums te/
49-1-29a
yid la byed pa'i zhi gnas dang lhag mthong ni 'dres pa chung ngu'i chos la dmigs pa yin par rig par bya'o/ /mdo'i sde la sogs pa de dag nyid ji snyed bzung ba dang / bsams pa so sor gcig tu bzlums te yid la byed pa ni 'dres pa chen por gyur pa'i chos la dmigs pa yin par rig par bya'o/ /de bzhin gshegs pa rnams kyi chos bstan pa tshad med pa rnams dang / chos kyi tshig dang / yi ge tshad med pa rnams dang / gong nas gong du shes rab dang / spobs pa tshad med pa rnams gcig tu bzlums te yid la byed pa'i ni 'dres pa tshad med pa'i chos la dmigs pa yin par rig par bya'o/ /bcom ldan 'das byang chub sems dpa' ji tsam gyis na 'dres pa'i chos la dmigs pa'i zhi gnas dang lhag mthong thob par 'gyur lags/ byams pa de ni rgyu lngas thob par 'gyur bar rig par bya ste/ 'di lta ste yid la byed pa'i tshe skad cig skad cig la gnas ngan len gyi rten thams cad 'jig par byed pa dang / 'du byed sna tshogs rnam par spangs te/ chos kyi kun dga' la dga' ba 'thob pa dang / chos snang ba phyogs bcur tshad med cing rnam pa yongs su ma chad pa yang dag par shes pa dang / dgos pa yongs su grub pa dang ldan pa rnam par dag pa'i cha dang 'thun pa'i mtshan ma rnam par ma brtags pa rnams de la kun 'byung ba dang / chos kyi sku 'thob pa dang / yongs su rdzogs pa dang yongs su 'grub par bya ba'i phyir rgyu gong ma bas ches gong ma/ bzang po bas ches bzang po yang dag par yongs su 'dzin par byed pa'o/ /bcom ldan 'das 'dres pa'i chos la dmigs pa'i zhi gnas dang lhag mthong de gang la rtogs shing gang la 'thob par 'tshal bar bgyi lags/ bka' stsal pa/ byams pa sa dang po rab tu dga' ba la ni rtogs pa yin la/ sa gsum pa 'od byed pa la ni thob par rig par bya ste/ byams pa de lta mod kyi/ byang chub sems dpa' las dang po pas kyang de la rjes su bslab cing yid la bya bar mi gtang bar bya'o/ /bcom ldan 'das ji ltar na zhi gnas dang lhag mthong rtog pa dang bcas shing dpyod pa dang
49-1-29b
bcas pa'i ting nge 'dzin du 'gyur ba lags/ ji ltar rtog pa ma mchis shing dpyod pa tsam du 'gyur ba lags/ ji ltar na rtog pa ma mchis pa dang dpyod pa ma mchis par 'gyur ba lags/ byams pa ji ltar bzung zhing brtags pa dang / dpyod pa'i chos rnams la de dag gi mtshan ma gsal zhing rags pa myong ba'i rjes su dpyod pa'i zhi gnas dang lhag mthong gang yin pa de ni/ rtog pa dang bcas shing dpyod pa dang bcas pa'i ting nge 'dzin yin no/ /de dag nyid kyi mtshan ma gsal zhing rags pa myong ba'i rjes su dpyod pa ma yin mod kyi/ 'on kyang de snang ba 'ol byi dran pa tsam phra mo myong ba'i rjes su dpyod pa'i zhi gnas dang / lhag mthong gang yin pa de ni rtog pa med cing dpyod pa tsam gyi ting nge 'dzin yin no/ /de dag gi mtshan ma la thams cad kyi thams cad du lhun gyis grub par chos myong ba yid la byed pas rnam par dpyod pa'i zhi gnas dang lhag mthong gang yin pa de ni rtog pa med pa dang dpyod pa med pa'i ting nge 'dzin yin no/ /byams pa yang yongs su tshol ba las byung ba'i zhi gnas dang lhag mthong gang yin pa de ni rtog pa dang bcas shing dpyod pa dang bcas pa'i ting nge 'dzin yin no/ /so sor rtog pa las byung ba gang yin pa de ni/ rtog pa med cing dpyod pa tsam gyi ting nge 'dzin yin no/ /'dres pa'i chos la dmigs pa gang yin pa de ni rtog pa med pa dang / dpyod pa med pa'i ting nge 'dzin yin no/ /bcom ldan 'das zhi gnas kyi rgyu mtshan ni gang lags/ rab tu 'dzin pa'i rgyu mtshan ni gang lags/ btang snyoms kyi rgyu mtshan ni gang lags/ byams pa sems rgod pa'am/ rgod du dogs pa na/ kun du skyo bar 'gyur ba dang 'thun pa'i chos rnams dang / bar chad med pa'i sems de yid la byed pa gang yin pa de ni zhi gnas kyi rgyu mtshan zhes bya'o/ / byams pa sems bying ngam/ bying du dogs pa na/ mngon par dga' bar 'gyur ba dang 'thun pa'i chos rnams dang / sems kyi mtshan ma de yid la byed pa gang yin pa de ni rab tu 'dzin pa'i rgyu mtshan zhes bya'o/ /byams pa zhi gnas la gcig tu nges pa'am/ lhag mthong
49-1-30a
la gcig tu nges pa'am/ zung du 'brel ba'i lam yang rung ste/ de gnyi ga'i nye ba'i nyon mongs pas nye bar nyon mongs pa med pa la sems rang gi ngang gis 'jug pa na yid la byed pa lhun gyis grub pa gang yin pa de ni btang snyoms kyi rgyu mtshan zhes bya'o/ /bcom ldan 'das byang chub sems dpa' zhi gnas dang lhag mthong bsgom pa/ chos so sor yang dag par rig pa dang / don so sor yang dag par rig pa lags na/ ji ltar chos so sor yang dag par rig pa lags/ ji ltar don so sor yang dag par rig pa lags/ byams pa rnam pa lngas so sor yang dag par rig pa yin te/ ming dang tshig dang yi ge dang so so ba dang bsdus pas so/ /ming gang zhe na/ kun nas nyon mongs pa dang / rnam par byang ba'i chos rnams la ngo bo nyid dang / bye brag gi ming du bya bar btags pa gang yin pa'o/ /tshig gang zhe na/ kun nas nyon mongs pa dang / rnam par byang ba pa'i don rjes su tha snyad gdags pa'i phyir gnas dang rten ming de dag nyid kyi tshogs la brten pa gang yin pa'o/ /yi ge gang zhe na/ de gnyi ga'i gnas kyi yig 'bru gang yin pa'o/ /de dag so so las so so yang dag par rig pa gang zhe na/ ma 'dres pa la dmigs pa'i yid la byed pas so so yang dag par rig pa gang yin pa'o/ /bsdus pa las so so yang dag par rig pa gang zhe na/ 'dres pa la dmigs pa'i yid la byed pas so sor yang dag par rig pa gang yin pa'o/ /de dag thams cad gcig tu bsdu na chos so so yang dag par rig pa zhes bya ste/ de ltar na chos so sor yang dag par rig pa yin no/ /byang chub sems dpa' rnam pa bcus don so so yang dag par rig pa yin te/ ji snyed yod pa nyid dang / ji lta ba bzhin du yod pa nyid dang / 'dzin pa'i don dang / gzung ba'i don dang / gnas pa'i don dang / longs spyod kyi don dang / phyin ci log gi don dang / phyin ci ma log pa'i don dang / kun nas nyon mongs pa'i don dang / rnam par byang ba'i don gyis so/ /byams pa de la kun nas nyon mongs pa dang / rnam par byang
49-1-30b
ba'i chos rnams la rnam pa rab tu dbye ba thams cad kyi mthar thug pa gang yin pa de ni ji snyed yod pa nyid yin te/ 'di lta ste/ phung po rnams kyi ni grangs lngas so/ /nang gi skye mched rnams kyi ni grangs drug gis so/ /phyi rol gyi skye mched rnams kyi yang grangs drug kho nas so zhes bya ba la sogs pa'o/ /byams pa de la kun nas nyon mongs pa dang / rnam par byang ba ba'i chos de dag nyid kyi de bzhin nyid gang yin pa de ni ji lta ba bzhin du yod pa nyid yin te/ de yang rnam pa bdun te/ 'byung ba'i de bzhin nyid ni 'du byed rnams kyi thog ma dang tha ma med pa nyid gang yin pa'o/ /mtshan nyid kyi de bzhin nyid ni chos thams cad kyi gang zag bdag med pa dang / chos bdag med pa gang yin pa'o/ /rnam par rig pa'i de bzhin nyid ni 'du byed rnams rnam par rig pa nyid gang yin pa'o/ /gnas pa'i de bzhin nyid ni ngas sdug bsngal gyi bden pa bstan pa gang yin pa'o/ /log par sgrub pa'i de bzhin nyid ni ngas kun 'byung ba'i bden pa bstan pa gang yin pa'o/ /rnam par dag pa'i de bzhin nyid ni ngas 'gog pa'i bden pa bstan pa gang yin pa'o/ /yang dag par sgrub pa'i de bzhin nyid ni ngas lam gyi bden pa bstan pa gang yin pa'o/ /byams pa de la 'byung ba'i de bzhin nyid gang yin pa de dang / gnas pa'i de bzhin nyid gang yin pa de dang / log par sgrub pa'i de bzhin nyid gang yin pa des ni sems can thams cad mtshungs shing mnyam mo/ /byams pa de la mtshan nyid kyi de bzhin nyid gang yin pa de dang / rnam par rig pa'i de bzhin nyid gang yin pa des ni chos thams cad dang mtshungs shing mnyam mo/ /byams pa rnam par dag pa'i de bzhin nyid gang yin pa des ni nyan thos kyi byang chub gang yin pa dang / rang sangs rgyas kyi byang chub gang yin pa dang / bla na med pa yang dag par rdzogs pa'i byang chub gang yin pa'i byang chub thams cad mtshungs shing mnyam mo/ /byams pa de la yang dag par sgrub pa'i de bzhin nyid des ni thos pa thams cad 'dres pa'i chos la dmigs pa'i zhi gnas dang lhag mthong gi bsdus pa'i shes rab mtshungs shing mnyam mo/ /
49-1-31a
byams pa de la 'dzin pa'i don ni skye mched gzugs can lnga dang / sems dang yid dang / rnam par shes pa dang / sems las byung ba'i chos rnams so/ /byams pa de la gzung ba'i don ni phyi rol gyi skye mched drug po dag yin no/ /byams pa yang 'dzin pa'i don gang yin pa de ni gzung ba'i don kyang yin no/ /byams pa de la gnas kyi don ni 'jig rten gyi khams gang yin pa ste/ gang la gnas na sems can gyi khams snang ba'o/ /'di lta ste/ grong tshigs dang / grong tshigs brgya dang / de stong dang / de 'bum dang / rgya mtsho la thug pa'i sa dang / de brgya dang de 'bum dang / 'dzam bu'i gling dang / de brgya dang / de stong dang / de 'bum dang / gling bzhi pa dang / de brgya dang / de stong dang / de 'bum dang / stong gi 'jig rten gyi khams dang / de brgya dang / de stong dang / de 'bum dang / stong gnyis pa bar ma'i 'jig rten gyi khams dang / de brgya dang / de stong dang / de 'bum dang / stong gsum gyi stong chen po'i 'jig rten gyi khams de brgya dang / de stong dang / de 'bum dang / de bye ba dang / de bye ba phrag brgya dang / de bye ba phrag stong dang / de bye ba phrag 'bum dang / de grangs med pa dang / de grangs med pa phrag brgya dang / de grangs med pa phrag stong dang / de grangs med pa phrag 'bum dang / phyogs bcu dag gi 'jig rten gyi khams dpag tu med grangs med pa stong gsum gyi stong chen po'i 'jig rten gyi khams grangs med pa phrag 'bum gyi rdul phra rab kyi rdul snyed dag go/ /byams pa de la longs spyod kyi don ni yongs su spyad par bya ba'i phyir ngas sems can rnams kyi yongs su bzung ba dang / yo byad bstan pa gang dag yin pa rnams so/ /byams pa de la phyin ci log gi don ni 'dzin pa la sogs pa'i don de dag nyid la mi rtag pa la rtag par 'du shes pa phyin ci log dang / sems phyin ci log dang / lta ba phyin ci log dang / sdug bsngal la bde ba dang / mi gtsang ba la gtsang ba dang / bdag med pa la bdag tu 'du shes phyin ci log dang / sems phyin ci log dang / lta ba phyin ci log gang yin pa'o/ /
49-1-31b
byams pa de la phyin ci ma log pa'i don ni de las bzlog pa ste/ de'i gnyen po yin par rig par bya'o/ /byams pa de la kun nas nyon mongs pa'i don ni rnam pa gsum ste/ khams gsum pa'i nyon mongs pa'i kun nas nyon mongs pa dang / las kyi kun nas nyon mongs pa dang / skye ba'i kun nas nyon mongs pa'o/ /byams pa de la rnam par byang ba'i don ni kun nas nyon mongs pa rnam pa gsum po de dag nyid dang bral bar bya ba'i phyir byang chub kyi phyogs dang 'thun pa'i chos gang dag yin pa rnams te/ byams pa rnam pa bcu po de dag gis don thams cad bsdus par rig par bya'o/ /byams pa yang byang chub sems dpas rnam pa lngas don so so yang dag par rig pa yin te/don rnam pa lnga gang zhe na/ yongs su shes par bya ba'i dngos po dang / yongs su shes par bya ba'i don dang / yongs su shes pa dang / yongs su shes pa'i 'bras bu thob pa dang / de rab tu rig par byed pa'o/ /byams pa de la yongs su shes par bya ba'i dngos po ni shes bya thams cad yin par blta bar bya ste/ 'di lta ste/ phung po rnams zhes bya ba'am/ nang gi skye mched rnams zhes bya ba'am/ phyi rol gyi skye mched rnams zhes bya ba'am/ de lta bu la sogs pa dag go/ /byams pa de la yongs su shes par bya ba'i don ni rnam pa ji snyed kyis shes bya de ji lta ba bzhin shes par bya ba ste/ 'di lta ste/ kun rdzob dang / don dam pa dang / skyon dang / yon tan dang / rkyen dang / dus dang / skye ba dang / gnas pa dang / 'jig pa'i mtshan nyid dang / nad la sogs pa dang / sdug bsngal dang / kun 'byung ba la sogs pa dang / de bzhin nyid dang / yang dag pa'i mtha' dang / chos kyi dbyings dang / bsdu ba dang / dbye ba dang / mgo gcig tu lan gdab pa dang / rnam par dbye ba dang / dris te lan gdab pa dang / gzhag pa dang / gsang ba dang / bsgrags pa dang / de lta bu dang 'thun pa ni yongs su shes par bya ba'i don yin par rig par bya'o/ /byams pa de la yongs su shes pa ni de gnyi ga
49-1-32a
'dzin par byed pa/ byang chub kyi phyogs dang 'thun pa'i chos gang yin pa dag ste/ 'di lta ste/ dran pa nye bar gzhag pa rnams dang / yang dag par spong ba rnams dang / de la sogs pa'o/ /byams pa de la yongs su shes pa'i 'bras bu 'thob pa ni 'di lta ste/ 'dod chags dang / zhe sdang dang / gti mug 'dul ba dang / 'dod chags dang / zhe sdang dang / gti mug ma lus par spong ba dang / dge sbyong nyid kyi 'bras bu rnams dang / ngas nyan thos dang / de bzhin gshegs pa'i yon tan 'jig rten pa dang / 'jig rten pa las 'das pa thun mong dang thun mong ma yin pa gang dag bstan pa de dag mngon du bya ba gang yin pa'o/ /byams pa de la rab tu rig par byed pa ni mngon sum du byas pa'i chos de dag nyid las rnam par grol bar shes pa dang / gzhan dag la yang rgya cher ston pa dang / yang dag par ston pa gang yin pa ste/ byams pa don lnga po de dag gis kyang don thams cad bsdus par rig par bya'o/ /byams pa yang byang chub sems dpas rnam pa bzhis don so so yang dag par rig pa yin te/ don rnam pa bzhi gang zhe na/ sems kyi len pa'i don dang / myong ba'i don dang / rnam par rig pa'i don dang / kun nas nyon mongs pa dang / rnam par byang ba'i don gyis te/ byams pa don rnam pa bzhi po de dag gis kyang don thams cad bsdu bar rig par bya'o/ /byams pa yang byang chub sems dpa'i rnam pa gsum gyis don so so yang dag par rig pa yin te/ don rnam pa gsum gang zhe na/ tshig 'bru'i don dang / don gyi don dang / khams kyi don gyis so/ /byams pa de la tshig 'bru'i don ni ming gi tshogs la sogs pa yin par blta bar bya'o/ /byams pa de la don gyi don ni rnam pa bcur rig par bya ste/ de kho na'i mtshan nyid dang / yongs su shes pa'i mtshan nyid dang / spang ba'i mtshan nyid dang / mngon du bya ba'i mtshan nyid dang / bsgom pa'i mtshan nyid dang / de kho na'i mtshan nyid la sogs pa de dag nyid kyi rnam pa rab tu dbye ba'i mtshan nyid dang / gnas dang gnas par 'brel ba'i
49-1-32b
mtshan nyid dang / yongs su shes pa la sogs pa'i bar du gcod pa'i chos kyi mtshan nyid dang / rjes su 'thun pa'i chos kyi mtshan nyid dang / yongs su mi shes pa la sogs pa dang / yongs su shes pa la sogs pa'i nyes dmigs dang / phan yon gyi mtshan nyid do/ /byams pa de la khams kyi don ni khams lnga ste/ 'jig rten gyi khams dang /sems can gyi khams dang / chos kyi khams dang / 'dul ba'i khams dang / 'dul ba'i thabs kyi khams te/ byams pa don rnam pa gsum po de dag gis kyang don thams cad bsdus par rig par bya'o/ /bcom ldan 'das thos pa las byung ba'i shes rab kyis don so so yang dag par rig pa gang lags pa dang / bsams pa las byung ba'i shes rab kyis don so so yang dag par rig pa gang lags pa dang / bcom ldan 'das zhi gnas dang lhag mthong bsgoms pa las byung ba'i shes rab kyis don so so yang dag par rig pa gang lags pa de dag la tha dad du bgyi ba ci mchis lags/ bka' stsal pa/ byams pa byang chub sems dpas thos pa las byung ba'i shes rab kyis ni tshig 'bru la gnas pa/ sgra ji bzhin pa/ dgongs pa med pa/ mngon du ma gyur pa/ rnam par thar pa'i rjes su 'thun pa/ rnam par thar par byed pa ma yin pa'i don so so yang dag par rig par byed do/ /byams pa bsams pa las byung ba'i shes rab kyis ni tshig 'bru la gnas pa kho na yin la/ sgra ji bzhin ma yin pa/ dgongs pa can/ mngon du gyur pa/ rnam par thar pa'i rjes su ches 'thun pa/ rnam par thar par byed pa ma yin pa'i don so so yang dag par rig par byed do/ /byams pa byang chub sems dpas bsgoms pa las byung ba'i shes rab kyis ni tshig 'bru la gnas pa dang / tshig 'bru la gnas pa ma yin pa dang / sgra ji bzhin pa dang / dgongs pa can dang / shes bya'i dngos po dang cha 'thun pa'i ting nge 'dzin gyi spyod yul gyi gzugs brnyan gyis mngon du gyur pa/ rnam par thar pa'i rjes su ches shin tu 'thun pa/ rnam par thar par byed pa'i don kyang so sor yang dag par rig par byed do/ /byams pa de dag gi tha dad du bya ba ni de
49-1-33a
yin no zhes bcom ldan 'das kyis bka' stsal to/ /bcom ldan 'das byang chub sems dpa' zhi gnas dang / lhag mthong sgom pa chos so sor yang dag par rig pa dang / don so so yang dag par rig pa'i shes pa ni gang lags/ mthong ba ni gang lags/ byams pa nga ni shes pa dang / mthong ba rnam grangs du mas ston par byed mod kyi/ 'on kyang mdor bsdus te bshad par bya'o/ /'dres pa'i chos la dmigs pa'i zhi gnas dang / lhag mthong gi shes rab gang yin pa de ni shes pa yin no/ /ma 'dres pa'i chos la dmigs pa'i zhi gnas dang / lhag mthong gi shes rab gang yin pa de ni mthong ba yin no/ /bcom ldan 'das byang chub sems dpa' zhi gnas dang / lhag mthong sgom pas yid la bgyid pa gang gis mtshan ma gang ji ltar rnam par sel bar bgyid lags/ byams pa de bzhin nyid yid la byed pas chos kyi mtshan ma dang / don gyi mtshan ma rnam par sel bar byed la/ ming la ming gi ngo bo nyid mi dmigs shing de'i gnas mtshan ma yang dag par rjes su mi mthong bas rnam par sel lo/ /ming la ji lta ba bzhin du tshig dang / yi ge dang / don thams cad la yang de bzhin du rig par bya'o/ / byams pa khams kyi bar la khams kyi ngo bo nyid mi dmigs shing / de'i gnas kyi mtshan ma yang yang dag par rjes su mi mthong bas rnam par sel lo/ /bcom ldan 'das ci lags de bzhin nyid kyi don so sor yang dag par rig pa'i mtshan ma gang lags pa de yang rnam par sel bar bgyid lags sam/ byams pa de bzhin nyid kyi don so so yang dag par rig pa la ni mtshan ma med de mi dmigs na/ de la ci zhig rnam par sel bar 'gyur te/ byams pa de bzhin nyid kyi don so so yang dag par rig pas ni chos dang don gyi mtshan ma thams cad zil gyis gnon gyi de ni gang gis kyang zil gyis mnan par bya ba yin par nga mi smra'o/ /bcom ldan 'das bcom ldan 'das kyis chab rnyog pa can mchis pa'i snod kyi dpe dang / me long yongs su ma dag pa'i dpe dang / mtshe'u 'khrugs pa'i dpes ji ltar rang bzhin gyi mtshan ma brtag par mi nus
49-1-33b
pa de las bzlog par ni nus pa de bzhin du ma bsgoms pa'i sems kyis yang dag pa ji lta ba bzhin shes par mi nus kyi/ bsgoms pas ni nus so zhes bka' stsal pa gang lags pa de la sems kyis so sor brtag pa ni gang lags/ de bzhin nyid ni gang las dgongs te bka' stsal pa ni gang lags/ bka' stsal pa/ byams pa sems kyis so sor brtag pa rnam pa gsum gyi phyir te/ thos pa las byung ba'i sems kyis so sor brtag pa dang / bsams pa las byung ba'i sems kyis so sor brtag pa dang / bsgoms pa las byung ba'i sems kyis so sor brtag pa'o/ /rnam par rig pa'i de bzhin nyid las dgongs te yongs su bstan pa yin no/ /bcom ldan 'das byang chub sems dpa' de ltar chos dang don so sor yang dag par rig pa dang / mtshan ma rnam par sel ba la zhugs pa'i mtshan ma du zhig ni bka' stsal pa lags la/ gang gis ni de dag rnam par sel lags/ byams pa bcu ste/ de dag ni stong pa nyid kyis rnam par sel lo/ /bcu gang zhe na/ chos kyi don so sor yang dag par rig par byed pa'i tshig dang / yi ge'i mtshan ma sna tshogs gang yin pa de ni chos thams cad stong pa nyid kyis rnam par sel lo/ /gnas pa'i de bzhin nyid kyis don so sor yang dag par rig par byed pa'i skye ba dang / 'jig pa dang / gnas pa dang / gzhan du 'gyur ba nyid kyi rgyun gyi rjes su 'jug pa'i mtshan ma gang yin pa de ni mtshan nyid stong pa nyid dang / thog ma dang tha ma med pa stong pa nyid kyis rnam par sel lo/ /'dzin pa'i don so sor yang dag par rig par byed pa'i 'jig tshogs la lta ba'i mtshan ma dang / nga'o snyam pa'i mtshan ma gang yin pa de ni nang stong pa nyid dang / mi dmigs pa stong pa nyid kyis rnam par sel lo/ /gzung ba'i don so sor yang dag par rig par byed pa'i longs spyod la lta ba'i mtshan ma gang yin pa de ni phyi stong pa nyid kyis rnam par sel lo/ /yongs su longs spyod pa'i don du skyes pa dang / bud med kyi bsnyen bkur dang yo byad dang ldan pa so sor yang dag par rig par byed pa'i nang gi bde ba'i mtshan ma dang / phyi rol gyi sdug pa'i mtshan ma gang yin pa de ni phyi stong pa nyid dang / rang
49-1-34a
bzhin stong pa nyid kyis rnam par sel lo/ /gnas kyi don so sor yang dag par rig par byed pa'i tshad med pa'i mtshan ma gang yin pa de ni chen po stong pa nyid kyis rnam par sel lo/ /gzugs med pa la brten te/ nang gi zhi ba'i rnam par thar pa'i mtshan ma gang yin pa de ni 'dus byas stong pa nyid kyis rnam par sel lo/ /mtshan nyid kyi de bzhin nyid kyi don so sor yang dag par rig par byed pa'i gang zag bdag med pa'i mtshan ma dang / chos bdag med pa'i mtshan ma dang / rnam par rig pa tsam gyi mtshan ma dang / don dam pa'i mtshan ma gang yin pa de ni mtha' las 'das pa stong pa nyid dang / dngos po med pa stong pa nyid dang / dngos po med pa'i ngo bo nyid stong pa nyid dang / don dam pa stong pa nyid kyis rnam par sel lo/ /rnam par dag pa'i de bzhin nyid kyi don so so yang dag par rig par byed pa'i 'dus ma byas kyi mtshan ma dang / 'gyur ba med pa'i mtshan ma gang yin pa de ni 'dus ma byas stong pa nyid dang / dor ba med pa stong pa nyid kyis rnam par sel lo/ /mtshan ma de'i gnyen po stong pa nyid de nyid yid la byed pa'i stong pa nyid kyi mtshan ma gang yin pa de ni stong pa nyid stong pa nyid kyis rnam par sel lo/ / bcom ldan 'das mtshan ma rnam bcu rnam par sel bar bgyid na/ mtshan ma gang rnam par sel bar bgyid cing 'ching ba'i mtshan ma gang las yongs su grol bar 'gyur lags/ byams pa ting nge 'dzin gyi spyod yul gzugs brnyan gyi mtshan ma rnam par sel bar byed cing kun nas nyon mongs pa'i mtshan ma'i mtshan ma las yongs su grol bar 'gyur ba de yang rnam par sel lo/ /byams pa stong pa nyid de dag ni dngos su na mtshan ma de dag gi gnyen por gyur pa yin par rig par bya'o/ /re re yang mtshan ma thams cad kyi gnyen por mi 'gyur ba ni ma yin no/ /byams pa 'di lta ste dper na/ ma rig pa ni rga shi'i bar gyi kun nas nyon mongs pa grub par mi byed pa yin mod kyi/ nye ba dang shin tu nye ba'i rkyen nyid yin pa'i phyir/ dngos su na 'du byed 'grub par byed pa yin par bstan pa bzhin du 'di la yang tshul de bzhin du blta bar bya'o/ /bcom ldan 'das theg pa chen
49-1-34b
po la byang chub sems dpa' rnams kyis gang rtogs na stong pa nyid kyi mtshan nyid la mngon pa'i nga rgyal ma mchis pas rab tu nyams par mi 'gyur ba'i stong pa nyid kyi mtshan nyid bsdus pa gang lags/ de nas bcom ldan 'das kyis byang chub sems dpa' byams pa la legs so zhes bya ba byin te/ byams pa khyod de ltar byang chub sems dpa' rnams stong pa nyid las rab tu nyams par mi 'gyur bar bya ba'i phyir/ de bzhin gshegs pa la khyod don 'di nyid 'dri ba legs so legs so/ /de ci'i phyir zhe na/ byams pa byang chub sems dpa' stong pa nyid las rab tu nyams pa ni theg pa chen po mtha' dag las kyang rab tu nyams par 'gyur ba'i phyir ro/ /byams pa de'i phyir nyon cig dang / stong pa nyid kyi mtshan nyid bsdus pa khyod la bshad par bya'o/ /byams pa gzhan gyi dbang gi mtshan nyid dang / yongs su grub pa'i mtshan nyid rnam pa thams cad du kun nas nyon mongs pa dang / rnam par byang ba'i kun brtags pa'i mtshan nyid dang /shin tu rnam par bral ba'i mtshan nyid dang / de la de dmigs pa gang yin pa de ni theg pa chen po la stong pa nyid kyi mtshan nyid bstan pa zhes bya'o/ /bcom ldan 'das zhi gnas dang lhag mthong dag gi ting nge 'dzin du zhig bsdus lags/ bka' stsal pa/ byams pa ngas nyan thos rnams dang / byang chub sems dpa' rnams dang / de bzhin gshegs pa rnams kyi ting nge 'dzin rnam pa du ma bstan pa gang yin pa de dag thams cad bsdus par rig par bya'o/ /bcom ldan 'das zhi gnas dang / lhag mthong rgyu gang las byung ba lags/ byams pa tshul khrims rnam par dag pa'i rgyu las byung ba dang / thos pa dang bsams pa las byung ba'i lta ba rnam par dag pa'i rgyu las byung ba yin no/ /bcom ldan 'das de dag gi 'bras bu gang lags par brjod par bgyi/ byams pa sems rnam par dag pa ni 'bras bu yin/ shes rab rnam par dag pa ni 'bras bu yin no/ /byams pa yang nyan thos rnams kyi'am/ byang chub sems dpa' rnams kyi'am/ de bzhin gshegs pa rnams kyi dge ba'i chos 'jig rten pa dang / 'jig rten las 'das pa thams cad
49-1-35a
kyang zhi gnas dang lhag mthong gi 'bras bu yin par rig par bya'o/ /bcom ldan 'das zhi gnas dang lhag mthong gi las ci lags/ byams pa 'ching ba rnam pa gnyis po mtshan ma'i 'ching ba dang / gnas ngan len gyi 'ching ba las rnam par thar par byed pa yin no/ /bcom ldan 'das bcom ldan 'das kyis gegs rnam pa lnga gsungs pa gang dag lags pa de dag las du ni zhi gnas kyi gegs dag lags/ du ni lhag mthong gi gegs dag lags/ du ni gnyi ga'i gegs dag lags/ byams pa lus dang longs spyod la lta ba ni zhi gnas kyi gegs yin no/ /'phags pa'i gtam 'dod pa bzhin ma thob pa ni lhag mthong gi gegs yin no/ /'dres par gnas pa dang / cung zad tsam gyis chog par 'dzin pa ni de gnyi ga'i gegs yin te/ de la yang gcig gis kyang sbyor bar mi byed do/ /cig shos kyis ni sbyor ba mthar thug par mi 'gyur ro/ /bcom ldan 'das sgrib pa lnga po gang dag lags pa de dag las du ni zhi gnas kyi sgrib pa dag lags/ du ni lhag mthong gi sgrib pa dag lags/ du ni gnyi ga'i sgrib pa dag lags/ byams pa rgod pa dang 'gyod pa ni zhi gnas kyi sgrib pa yin no/ / rmugs pa dang gnyid dang / the tsom ni lhag mthong gi sgrib pa yin no/ /'dod pa la 'dun pa dang gnod sems ni gnyi ga'i sgrib pa yin no/ /bcom ldan 'das ci tsam gyis na zhi gnas kyi lam yongs su dag pa lags/ byams pa gang gi tshe rmugs pa dang gnyid legs par rab tu choms par gyur pa'o/ /bcom ldan 'das ji tsam gyis na lhag mthong gi lam yongs su dag pa lags/ byams pa gang gi tshe rgod pa dang 'gyod pa legs par rab tu choms par gyur pa'o/ /bcom ldan 'das byang chub sems dpa' zhi gnas dang lhag mthong la zhugs pas rnam pa du dag gis sems rnam par g.yeng bar 'tshal bar bgyi lags/ bka' stsal pa/ byams pa rnam pa lngas te/ yid la byed pa'i rnam par g.yeng ba dang / phyi rol du sems rnam par g.yeng ba dang / nang du sems rnam par g.yeng ba dang / mtshan ma'i rnam par g.yeng ba dang /
49-1-35b
gnas ngan len gyi rnam par g.yeng bas so/ /byams pa gal te byang chub sems dpa' theg pa chen po dang ldan pa'i yid la byed pa btang ste/ nyan thos dang / rang sangs rgyas dang ldan pa'i yid la byed par rab tu lhung na de ni yid la byed pa'i rnam par g.yeng ba yin no/ /gal te phyi rol gyi 'dod pa'i yon tan lnga po dag dang / 'du 'dzi dang / mtshan ma dang / rnam par rtog pa dang / nyon mongs pa dang / nye ba'i nyon mongs pa dang / phyi rol gyi dmigs pa rnams la sems rnam par 'phro bar gtong na de ni phyi rol du sems rnam par g.yeng ba yin no/ /gal te rmugs pa dang gnyid kyis bying ba'am/ snyoms par 'jug pa'i ro myang ba'am/ snyoms par 'jug pa'i nye ba'i nyon mongs pa gang yang rung bas nyon mongs par gyur na/ de ni nang du sems rnam par g.yeng ba yin no/ /gal te phyi rol gyi mtshan ma la brten nas nang gi ting nge 'dzin gyi spyod yul gyi mtshan ma yid la byed na de ni mtshan ma'i rnam par g.yeng ba yin no/ /gal te nang gi yid la byed pa la brten nas byung ba'i tshor ba la gnas ngan len gyi lus kyis nga'o snyam du rlom sems su byed na de ni gnas ngan len gyi rnam par g.yeng ba yin no/ /bcom ldan 'das zhi gnas dang lhag mthong dag byang chub sems dpa'i sa dang po nas bzung ste/ de bzhin gshegs pa'i sa'i bar la gang gi gnyen po lags/ byams pa zhi gnas dang lhag mthong sa dang po la ni ngan song ba'i nyon mongs pa dang / las dang skye ba'i kun nas nyon mongs pa'i gnyen po yin no/ /gnyis pa la ni ltung ba phra mo'i 'khrul pa kun tu 'byung ba rnams kyi'o/ /gsum pa la ni 'dod pa'i 'dod chags kyi'o/ /bzhi pa la ni snyoms par 'jug pa la sred pa dang / chos la sred pa'i 'o/ /lnga pa la ni 'khor ba dang / mya ngan las 'das pa dag la gcig tu mi phyogs pa nyid dang / mngon du phyogs pa nyid kyi'o/ /drug pa la ni mtshan ma mang po kun tu 'byung ba'i 'o/ /bdun pa la ni mtshan ma phra mo kun tu 'byung ba'i 'o/ /brgyad pa la ni mtshan ma med pa la rtsol ba dang / mtshan ma la dbang du ma gyur pa'i 'o/ /dgu pa la ni rnam pa thams cad du
49-1-36a
chos ston pa la dbang du ma gyur pa'i 'o/ /bcu pa la ni chos kyi sku yongs su rdzogs pa so so yang dag par rig pa mi 'thob pa'i 'o/ /byams pa zhi gnas dang lhag mthong de bzhin gshegs pa'i sa la ni nyon mongs pa dang shes bya'i sgrib pa shin tu phra ba mchog tu ches shin tu phra ba'i gnyen po yin te/ de legs par bcom pas thams cad la chags pa med pa dang / thogs pa med pa'i shes pa dang / mthong ba thob cing dgos pa yongs su grub pa'i dmigs pa la chos kyi sku shin tu rnam par dag pa la gnas pa yin no/ /bcom ldan 'das byang chub sems dpa' zhi gnas dang lhag mthong la ji ltar sgrub na bla na med pa yang dag par rdzogs pa'i byang chub mngon par rdzogs par 'tshang rgya bar 'gyur lags/ bcom ldan 'das kyis bka' stsal pa/ byams pa 'di la byang chub sems dpa' zhi gnas dang lhag mthong thob nas de bzhin nyid rnam pa bdun las brtsams te/ ji ltar thos pa dang bsams pa'i chos rnams mnyam par bzhag pa'i sems kyis bzung ba dang / legs par bsams pa dang / legs par mnyam par bzhag pa'i de bzhin nyid nang du yid la byed de/ de ltar de bzhin nyid yid la byed pa na mtshan ma phra mo kun tu 'byung ba thams cad la yang re zhig sems lhag par btang snyoms su 'jog na rags pa dag la lta smos kyang ci dgos/ byams pa de la mtshan ma phra mo ni 'di dag yin te/ sems kyi len pa'i mtshan ma'am/ myong ba'i mtshan ma'am/ rnam par rig pa'i mtshan ma'am/ kun nas nyon mongs pa dang rnam par byang ba'i mtshan ma'am/ nang gi mtshan ma'am/ phyi rol gyi mtshan ma'am/ de gnyi ga'i mtshan ma'am/ sems can thams cad kyi don la sbyar bar bya'o snyam pa'i mtshan ma'am/ shes pa'i mtshan ma'am/ de bzhin nyid dang / sdug bsngal ba dang / kun 'byung ba dang / 'gog pa dang / lam gyi mtshan ma'am/ 'dus byas kyi mtshan ma'am/ 'dus ma byas kyi mtshan ma'am/ rtag pa'i mtshan ma'am/ mi rtag pa'i mtshan ma'am/ sdug bsngal ba dang 'gyur ba dang bcas pa'i rang bzhin gyi mtshan ma'am/ de mi
49-1-36b
'gyur ba'i rang bzhin gyi mtshan ma'am/ 'du byas kyi mtshan nyid mi 'dra ba'i mtshan ma'am/ de rang gi mtshan nyid kyi mtshan ma'am/ thams cad thams cad ces bya bar rig nas thams cad kyi mtshan ma'am/ gang zag bdag med pa'i mtshan ma'am/ chos bdag med pa'i mtshan ma gang dag yin pa ste/ de dag kun tu 'byung ba la sems lhag par btang snyoms su 'jug go/ /de ltar zhugs shing de la mang du gnas pa dus dus su gegs dang / sgrib pa dang / rnam par g.yeng ba dag las sems rnam par sbyong bar byed pa de la nang gi so so'i bdag nyid la so sor rang rig pa de bzhin nyid rnam pa bdun so sor rtog pa'i shes pa rnam pa bdun skye bar 'gyur te/ de ni de'i mthong ba'i lam yin no/ /de thob pas byang chub sems dpa' yang dag pa nyid skyon med pa la zhugs pa yin/ de bzhin gshegs pa'i rigs su skyes pa yin/ sa dang po thob pa dang / sa de'i phan yon yang nyams su myong ba yin no/ /des sngar zhi gnas dang / lhag mthong thob pas ni rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan gyi dmigs pa rnam pa gnyis thob pa yin no/ /de ltar na mthong ba'i lam thob pas dngos po'i mtha'i dmigs pa thob pa yin te/ des gong ma gong ma rnams su bsgom pa'i lam la zhugs shing / dmigs pa rnam pa gsum po de dag nyid yid la byed pa na/ 'di lta ste dper na/ la la zhig khye'u ches phra mos khye'u ches sbom po 'byin par byed pa de bzhin du de yang khye'us khye'u dbyung ba'i tshul du nang gi mtshan ma rnam par sel ba nyid kyis kun nas nyon mongs pa'i cha dang 'thun pa'i mtshan ma thams cad rnam par sel bar byed de/ mtshan ma rnams rnam par sel ba na gnas ngan len rnams kyang rnam par sel bar byed do/ /mtshan ma dang gnas ngan len thams cad legs par bcom pas rim gyis sa gong ma gong ma rnams su gser lta bur sems rnam par sbyong la/ bla na med pa yang dag par rdzogs pa'i byang chub kyi bar du mngon par rdzogs par 'tshang rgya zhing dgos pa yongs su grub pa'i dmigs pa yang 'thob ste/ byams pa byang chub sems dpa' zhi gnas
49-1-37a
dang lhag mthong la de ltar sgrub na bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /byang chub sems dpa' ji ltar sgrub par bgyid na/ byang chub sems dpa'i mthu chen po mngon par sgrub pa lags/ byams pa byang chub sems dpa' gnas drug la mkhas pa ni byang chub sems dpa'i mthu chen po mngon par sgrub pa yin te/ sems kyi skye ba la mkhas pa dang / gnas pa la mkhas pa dang / bslang ba la mkhas pa dang / 'phel ba la mkhas pa dang / 'grib pa la mkhas pa dang / thabs la mkhas pa'o/ /ji ltar na sems kyi skye ba la mkhas pa yin zhe na/ sems kyi skye ba rnam pa bcu drug shes na sems kyi skye ba la yang dag pa ji lta ba bzhin du mkhas pa yin te/ de la sems kyi skye ba rnam pa bcu drug ni brtan pa dang snod rnam par rig pa'i ni 'di lta ste/ len pa'i rnam par shes pa'i 'o/ /dmigs pa'i rnam pa sna tshogs rnam par rig pa'i ni 'di lta ste/ rnam par rtog pa'i yid kyi rnam par shes pa gzugs la sogs pa yul cig car 'dzin pa phyi rol dang / nang gi yul cig car 'dzin pa/ skad cig dang thang cig dang yud tsam cig la cig car ting nge 'dzin mang po la snyoms par 'jug pa/ sangs rgyas kyi zhing mang po mthong ba/ de bzhin gshegs pa mang po mthong ba/ rnam par rtog pa'i yid kyi rnam par shes pa kho na'i'o/ /dmigs pa'i mtshan ma chung ngu rnam par rig pa'i ni 'di lta ste/ 'dod pa dang ldan pa'i 'o/ /dmigs pa'i mtshan ma chen por gyur pa rnam par rig pa'i ni 'di lta ste/ gzugs dang ldan pa'i 'o/ /dmigs pa'i mtshan ma tshad med pa rnam par rig pa'i ni 'di lta ste/ nam mkha' mtha' yas dang / rnam shes mtha' yas skye mched kyi dang ldan pa'i 'o/ /dmigs pa'i mtshan ma phra mo rnam par rig pa'i ni 'di lta ste/ ci'ang med pa'i skye mched dang ldan pa'i 'o/ /dmigs pa'i mtshan ma mthar thug pa rnam par rig pa'i ni 'di lta ste/ 'du shes med 'du shes med min skye mched dang ldan pa'i 'o/ /mtshan ma med pa rnam par rig pa'i ni 'di lta ste/ 'jig rten las 'das pa dang 'gog
49-1-37b
pa la dmigs pa'i 'o/ /sdug bsngal dang ldan pa'i ni 'di lta ste/ sems can dmyal ba'i 'o/ /tshor ba 'dren ma dang ldan pa'i ni 'di lta ste/ 'dod pa na spyod pa'i 'o/ /dga' ba dang ldan pa'i ni 'di lta ste/ bsam gtan dang po dang / bsam gtan gnyis pa ba'i 'o/ /bde ba dang ldan pa'i ni 'di lta ste/ bsam gtan gsum pa pa'i 'o/ /sdug bsngal yang ma yin bde ba yang ma yin pa dang ldan pa'i ni 'di lta ste/ bsam gtan bzhi pa pa dang / 'du shes med 'du shes med min skye mched pa'i bar gyi'o/ /nyon mongs pa can dang ldan pa'i ni 'di lta ste/ nyon mongs pa dang nye ba'i nyon mongs pa dang ldan pa'i 'o/ /dge ba dang ldan pa'i ni 'di lta ste/ dad pa la sogs pa dang ldan pa'i 'o/ /lung du ma bstan pa dang ldan pa'i ni 'di lta ste/ de gnyi ga'i dang mi ldan pa'i 'o/ /ji ltar na gnas pa la mkhas pa yin zhe na/ gal te rnam par rig pa'i de bzhin nyid yang dag pa ji lta ba bzhin rab tu shes pa'o/ /ji ltar na bslang ba la mkhas pa yin zhe na/ gal te 'ching ba rnam pa gnyis po mtshan ma'i 'ching ba dang / gnas ngan len gyi 'ching ba yang dag pa ji lta ba bzhin rab tu shes te/ de rab tu shes nas de las sems 'di bslang bar bya'o zhes bya ba la mkhas pa yin no/ /ji ltar na 'phel ba la mkhas pa yin zhe na/ gal te mtshan ma dang gnas ngan len gyi gnyen po'i sems gang yin pa de skye ba dang 'phel ba'i tshe/ skye ba dang 'phel lo zhes 'phel ba la mkhas pa yin no/ /ji ltar na 'grib pa la mkhas pa yin zhe na/ gal te de dang mi 'thun pa'i phyogs su gyur pa mtshan ma gnas ngan len gyi kun nas nyon mongs pa can du gyur pa'i sems de 'grib cing 'bri bar gyur pa na 'grib cing 'bri'o zhes 'grib pa la mkhas pa yin no/ /ji ltar na thabs la mkhas pa yin zhe na/ gal te rnam par thar pa dang / zil gyis gnon pa'i skye mched dag dang / zad par gyi skye mched dag sgom par byed pa ste/ byams pa de ltar na byang chub sems dpa' rnams byang chub sems dpa'i mthu chen po mngon par bsgrubs pa dang / mngon par sgrub par 'gyur ba dang / mngon par sgrub par byed pa yin no/ /bcom ldan
49-1-38a
'das bcom ldan 'das kyis phung po'i lhag ma med pa'i mya ngan las 'das pa'i dbyings su tshor ba thams cad ma lus par 'gag go zhes gang gsungs pa la/ bcom ldan 'das yang dag pa'i tshor ba de dag gang lags/ byams pa mdor bsdus na tshor ba rnam pa gnyis 'gag ste/ gnas kyi gnas ngan len rig pa dang / de'i 'bras bu yul rig pa'o/ /de la gnas kyi gnas ngan len rig pa ni rnam pa bzhir rig ste/ gzugs kyi gnas ngan len rig pa dang / gzugs med pa'i gnas ngan len rig pa dang / 'bras bu grub pa'i gnas ngan len rig pa dang / 'bras bu ma grub pa'i gnas ngan len rig pa'o/ /de la 'bras bu grub pa ni da ltar gyi gang yin pa'o/ /'bras bu ma grub pa ni ma 'ongs pa'i rgyur gyur pa gang yin pa'o/ /yul rig pa yang rnam pa bzhir rig par bya ste/ gnas rig pa dang / yo byad rig pa dang / longs spyod rig pa dang / ltos pa rig pa'o/ /de yang phung po lhag ma dang bcas pa'i mya ngan las 'das pa'i dbyings na'o/ /'bras bu ma grub pa rig pa'i 'dus te rig pa las byung ba'i tshor ba myong ba de'i mi 'thun pa'i phyogs thams cad kyi thams cad du 'gag pa ma yin te/ 'dren mar myong ngo / /'bras bu grub pa myong ba'i ni tshor ba rnam pa de gnyis ka thams cad kyi thams cad du 'gags te/ rig pa'i 'dus te reg pa las byung ba'i tshor ba 'ba' zhig myong ngo / /phung po'i lhag ma med pa'i mya ngan las 'das pa'i dbyings su yongs su mya ngan las 'da' ba na de yang 'gag par 'gyur te/ de'i phyir phung po lhag ma med pa'i mya ngan las 'das pa'i dbyings su tshor ba thams cad 'gag ces bya'o/ /de skad ces bka' stsal nas/ bcom ldan 'das kyis byang chub sems dpa' byams pa la bka' stsal pa/ byams pa khyod kyis rnal 'byor gyi lam yongs su rdzogs pa dang / shin tu yongs su dag pa las brtsams nas/ 'di lta ste/ rnal 'byor la shin tu rnam par nges shing mkhas pas de bzhin gshegs pa la dri ba dris pa legs so legs so/ /ngas kyang rnal 'byor gyi lam de yongs su rdzogs
49-1-38b
pa dang / yongs su dag par bstan te/ 'das pa dang ma 'ongs pa'i yang dag par rdzogs pa'i sangs rgyas gang dag yin pa de dag thams cad kyis kyang de ltar bstan cing ston par 'gyur ro/ /rigs kyi bu rnams dang / rigs kyi bu mo dag gis 'di la shin tu brtson par bya ba'i rigs so/ /de nas bcom ldan 'das kyis de'i tshe tshigs su bcad pa 'di dag bka' stsal to/ /chos rnams gdags pa rnam gzhag gang yin pa/ /de ni rnal 'byor bag yod don chen yin/ /gang dag chos der brten nas rnal 'byor 'dir/ /yang dag brtson pa de dag byang chub 'thob/ /gang dag glags lta de skad rgol ba las/ /thar par lta ba chos kun chub byed pa/ /byams pa de dag rnal 'byor 'di las ni/ /thag ring gnam sa ring ba ji bzhin no/ /blo ldan sems can don zhes de dag las/ /lan byed rig nas sems can don brtson min/ /lan de rtog na kun gyi dam pa dang / /zang zing med pa'i dga' ba 'thob mi 'gyur/ /gang dag 'dod phyir chos kyi lung 'bogs pa/ /de dag 'dod pa spangs pa phyir len te/ /rmongs pa de dag chos kyi rin po che/ /rin thang med pa rnyed kyang spong zhing rgyu/ /de phyir rtsod dang 'du 'dzi spros ldan pa/ /rnam par spongs te brtson 'grus mchog byos te/ /lhar bcas 'jig rten bsgral bar bya ba'i phyir/ /rnal 'byor 'di la rab tu brtson par gyis/ /de nas bcom ldan 'das la byang chub sems dpa' byams pas 'di skad ces gsol to/ /bcom ldan 'das dgongs pa nges par 'grel pa'i chos kyi rnam grangs 'dir bstan pa 'di'i ming ci lags/ 'di ji ltar gzung bar bgyi/ bcom ldan 'das kyis de la bka' stsal pa/ byams pa 'di ni rnal 'byor nges pa'i don bstan pa yin te/ rnal 'byor nges pa'i don bstan pa zhes bya bar zung shig /rnal 'byor nges pa'i don bstan pa 'di bshad pa na srog chags drug 'bum ni bla na med pa yang dag par rdzogs pa'i byang chub tu sems skyes so/ /nyan thos sum 'bum ni chos rnams la chos
49-1-39a
kyi mig rdul med cing dri ma dang bral ba rnam par dag go/ /nyan thos 'bum lnga khri ni len pa med par zag pa rnams las sems rnam par grol lo/ /byang chub sems dpa' bdun khri lnga stong gis ni rnal 'byor chen po'i yid la byed pa thob par gyur to/ / byams pa'i le'u ste brgyad pa'o// //de nas bcom ldan 'das la byang chub sems dpa' spyan ras gzigs kyi dbang phyug gis zhu ba zhus pa/ bcom ldan 'das byang chub sems dpa' rnams kyi sa bcu gang lags pa de dag ni 'di lta ste/ byang chub sems dpa'i sa rab tu dga' ba zhes bgyi ba dang / dri ma med pa dang / 'od byed pa dang / 'od 'phro ba can dang / shin tu sbyang dka' dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin lags/ sangs rgyas kyi sa ni bcu gcig pa lags na/ sa de dag rnam par dag pa du dag dang / yan lag du dag gis bsdus lags/ bcom ldan 'das kyis bka' stsal pa/ spyan ras gzigs dbang phyug de dag ni rnam par dag pa bzhi dang / yan lag bcu gcig gis bsdus par rig par bya'o/ / spyan ras gzigs dbang phyug de la sa dang po ni bsam pa rnam par dag pas bsdus so/ /sa gnyis pa ni lhag pa'i tshul khrims rnam par dag pas so/ /sa gsum pa ni lhag pa'i sems rnam par dag pas so/ /sa bzhi pa nas bzung ste sangs rgyas kyi sa'i bar ni lhag pa'i shes rab rnam par dag pa gong nas gong du gya nom pa bas kyang ches gya nom pas bsdus par rig par bya ste/ sa de dag ni rnam par dag pa bzhi po dag gis bsdus pa yin no/ /yan lag bcu gcig gang zhe na/ spyan ras gzigs dbang phyug mos pas spyod pa'i sa la byang chub sems dpa' chos spyad pa rnam pa bcu po dag la mos pa shin tu bsgoms pa'i phyir bzod pas sa de las yang dag par 'das nas byang chub sems dpa'i yang dag pa nyid skyon med pa la 'jug go/ /de yan lag des yongs su rdzogs pa yin yang ltung ba phra mo'i 'khrul pa kun
49-1-39b
tu 'byung ba dag la shes bzhin du spyod par mi nus pas de yan lag des yongs su ma rdzogs pa yin te/ de yan lag de yongs su rdzogs par bya ba'i phyir 'bad pas de yang 'thob bo/ /de yan lag des yongs su rdzogs pa yin yang 'jig rten pa'i ting nge 'dzin yongs su rdzogs pa la snyoms par 'jug pa dang / thos pa'i gzungs yongs su rdzogs pa thob par mi nus pas de yan lag des yongs su ma rdzogs pa yin te/ de yan lag de yongs su rdzogs par bya ba'i phyir 'bad pas yan lag des yongs su rdzogs pa yin yang byang chub kyi phyogs dang 'thun pa'i chos ji ltar thob pa dag gis de la mang du gnas par bya ba dang / snyoms par 'jug pa la sred pa dang / chos la sred pa las sems lhag par btang snyoms su 'jug mi nus pas de yan lag des yongs su ma rdzogs pa yin te/ de yan lag de yongs su rdzogs par bya ba'i phyir 'bad pas de yang 'thob bo/ /de yan lag des yongs su rdzogs pa yin yang bden pa rnams rnam par dpyad pa dang / 'khor ba dang mya ngan las 'das pa dag la gcig tu mi phyogs pa nyid dang / mngon du phyogs pa'i yid la byed pa lhag par btang snyoms su bzhag ste/ thabs kyis yongs su zin pa'i byang chub kyi phyogs dang 'thun pa'i chos rnams bsgom par mi nus pas de yan lag des yongs su ma rdzogs pa yin te/ de yan lag de yongs su rdzogs par bya ba'i phyir 'bad pas de yang 'thob bo/ /de yan lag des yongs su rdzogs pa yin yang 'du byed kyi 'jug pa ji lta ba bzhin mngon sum du byas nas de la skyo ba mang ba dang / mtshan ma med pa yid la byed pas mang du gnas par mi nus pas de yongs su ma rdzogs pa yin te/ de yan lag de yongs su rdzogs par bya ba'i phyir 'bad pas de yang 'thob bo/ /de yan lag des yongs su rdzogs pa yin yang bar chad med pa dang / rgyun mi 'chad par mtshan ma med pa'i yid la byed pas mang du gnas par mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang thob
49-1-40a
bo/ /de yan lag des yongs su rdzogs pa yin yang mtshan ma med par gnas pa de la rtsol ba lhag par btang snyoms su bzhag pa dang / mtshan ma la dbang thob par mi nus pas de yan lag des yongs su ma rdzogs pa yin te/ de yan lag de yongs su rdzogs par bya ba'i phyir 'bad pas de yang 'thob bo/ /de yan lag des yongs su rdzogs pa yin yang rnam grangs dang / mtshan nyid dang / nges pa'i tshig dang / rab tu dbye bas rnam pa thams cad du chos ston pa la'ang dbang thob par mi nus pas de yan lag des yongs su ma rdzogs pa yin te/ de yan lag de yongs su rdzogs par bya ba'i phyir 'bad pas de yang 'thob bo/ /de yan lag des yongs su rdzogs pa yin yang chos kyi sku yongs su rdzogs pa so sor yang dag par rig pa 'thob par mi nus pas de yan lag des yongs su ma rdzogs pa yin te/ de yan lag de yongs su rdzogs par bya ba'i phyir 'bad pas de yang 'thob bo/ /de yan lag de yongs su rdzogs pa yin yang shes bya thams cad la chags pa med pa dang / thogs pa med pa'i shes pa dang / mthong ba thob par mi nus pas de yan lag des yongs su ma rdzogs pa yin te/ de yan lag de yongs su rdzogs par bya ba'i phyir 'bad pas de yang 'thob ste/ de yan lag de yongs su rdzogs pa yin no/ /de yan lag des yongs su rdzogs pa'i phyir yan lag thams cad yongs su rdzogs pa yin te/ spyan ras gzigs dbang phyug de dag ni yan lag bcu gcig po de dag gis bsdus par rig par bya'o/ /bcom ldan 'das ci'i slad du sa dang po la rab tu dga' ba zhes bgyi/ ci'i slad du sangs rgyas kyi sa'i bar la sangs rgyas kyi sa zhes bgyi lags/ sa dang po ni don che ba 'dris pa ma yin pa 'jig rten las 'das pa'i sems thob pas dga' ba dang / mchog tu dga' ba rgya che ba'i phyir rab tu dga' ba zhes bya'o/ /sa gnyis pa ni ltung ba phra mo dang 'chal pa'i tshul khrims kyi dri ma thams cad dang bral ba nyid kyi phyir dri ma med pa zhes bya'o/ /sa gsum pa ni ting nge 'dzin de dang thos pa'i gzungs de shes pa'i snang ba tshad med pa'i gnas nyid yin
49-1-40b
pa'i phyir 'od byed pa zhes bya'o/ /sa bzhi pa ni nyon mongs pa'i shing bsreg pa'i phyir byang chub kyi phyogs dang 'thun pa'i chos sgom pa de ye shes kyi me'i 'od 'phro bar gyur pa'i phyir 'od 'phro can zhes bya'o/ /sa lnga pa ni byang chub kyi phyogs dang 'thun pa'i chos de dag nyid thabs kyis sgom pa de la dbang bya bar dka' ba nyid kyi phyir shin tu sbyang dka' zhes bya'o/ /sa drug pa ni 'du byed kyi 'jug pa mngon sum du gyur pa nyid dang / mtshan ma med pa mang du yid la byed pa mngon sum du gyur pa'i phyir mngon du gyur ces bya'o/ /sa bdun pa ni mtshan ma med pa yid la byed pa bar chad med cing rgyun mi 'chad pa ring du rjes su zhugs pa dang / rnam par dag pa'i sa dang rjes su 'brel ba nyid kyi phyir ring du song ba zhes bya'o/ /sa brgyad pa ni mtshan ma med pa la lhun gyis grub pa nyid dang / mtshan ma'i nyon mongs pa kun tu byung bas mi bskyod pa nyid kyi phyir mi g.yo ba zhes bya'o/ /sa dgu pa ni rnam pa thams cad du chos ston pa'i dbang la kha na ma tho ba med pa'i blo gros shin tu yangs pa thob pa nyid kyi phyir legs pa'i blo gros zhes bya'o/ /sa bcu pa ni gnas ngan len gyi lus nam mkha' lta bu la chos kyi tshogs sprin chen lta bus khyab cing khebs pa'i phyir chos kyi sprin zhes bya'o/ /sa bcu gcig pa ni nyon mongs pa dang shes bya'i sgrib pa shin tu phra mo spangs pas chags pa med cing thogs pa med par shes bya'i rnam pa thams cad mngon par rdzogs par byang chub pa nyid kyi phyir sangs rgyas kyi sa zhes bya'o/ /bcom ldan 'das sa de dag la kun tu rmongs pa ni du mchis/ gnas ngan len mi 'thun pa'i phyogs ni du mchis lags/ bcom ldan 'das kyis bka' stsal pa/ spyan ras gzigs dbang phyug kun tu rmongs pa nyi shu rtsa gnyis dang / gnas ngan len mi 'thun pa'i phyogs bcu gcig ste/ sa dang po la ni gang zag dang chos la mngon par zhen pa kun tu rmongs pa dang / ngan song ba'i nyon mongs pas kun tu nyon mongs pa dang / de'i gnas ngan len mi 'thun pa'i phyogs so/ /gnyis pa la ni ltung ba phra mo'i 'khrul pa kun tu
49-1-41a
rmongs pa dang / las kyi rnam par smin pa rnam pa sna tshogs la kun tu rmongs pa dang / de'i gnas ngan len mi 'thun pa'i phyogs so/ /gsum pa la ni 'dod pa'i 'dod chags kyi kun tu rmongs pa dang / thos pa'i gzungs yongs su rdzogs pa la kun tu rmongs pa dang / de'i gnas ngan len mi 'thun pa'i phyogs so/ /bzhi pa la ni snyoms par 'jug pa la sred pa kun tu rmongs pa dang / chos la sred pa kun tu rmongs pa dang / de'i gnas ngan len mi 'thun pa'i phyogs so/ /lnga pa la ni 'khor ba la gcig tu mi phyogs pa nyid dang / mngon du phyogs pa nyid yid la byed pa kun tu rmongs pa dang / mya ngan las 'das pa la gcig tu mi phyogs pa nyid dang / mngon du phyogs pa nyid yid la byed pa kun tu rmongs pa dang / de'i gnas ngan len mi 'thun pa'i phyogs so/ /drug pa la ni 'du byed kyi 'jug pa mngon sum du bya ba nyid la kun tu rmongs pa dang / mtshan ma mang po kun tu 'byung ba kun tu rmongs pa dang / de'i gnas ngan len mi 'thun pa'i phyogs so/ /bdun pa la ni mtshan ma phra mo kun tu 'byung ba kun tu rmongs pa dang / mtshan ma med pa gcig tu yid la byed pas thabs la kun tu rmongs pa dang / de'i gnas ngan len mi 'thun pa'i phyogs so/ /brgyad pa la ni mtshan ma med pa la rtsol ba kun tu rmongs pa dang / mtshan ma rnams la mi dbang ba kun tu rmongs pa dang / de'i gnas ngan len mi 'thun pa'i phyogs so/ /dgu pa la ni chos bstan pa dpag tu med pa dang / chos kyi tshig dang yi ge dpag tu med pa dang / gong nas gong du shes rab dang spobs pa la gzungs kyi dbang la kun tu rmongs pa dang / spobs pa'i dbang la kun tu rmongs pa dang / de'i gnas ngan len mi 'thun pa'i phyogs so/ /bcu pa la ni mngon par shes pa chen po la kun tu rmongs pa dang / gsang ba dang phra ba la 'jug pa la kun tu rmongs pa dang / de'i gnas ngan len mi 'thun pa'i phyogs so/ /sangs rgyas kyi sa la ni shes bya thams cad la chags pa shin tu phra mo kun tu rmongs pa dang / thogs pa kun tu rmongs pa dang / de'i gnas ngan len mi
49-1-41b
'thun pa'i phyogs so/ /spyan ras gzigs dbang phyug de dag ni/ kun tu rmongs pa nyi shu rtsa gnyis dang / gnas ngan len bcu gcig po de dag gis rnam par bzhag ste/ bla na med pa yang dag par rdzogs pa'i byang chub ni/ mi ldan pa yin no/ /bcom ldan 'das gang la de ltar/ byang chub sems dpa' rnams de ltar kun tu rmongs pa'i dra ba chen po rab tu dral zhing de'i gnas ngan len thibs po chen po las yang dag par 'das te/ bla na med pa yang dag par rdzogs pa'i byang chub mngon par rdzogs par 'tshang rgya ba'i bla na med pa yang dag par rdzogs pa'i byang chub ji tsam du phan yon che zhing 'bras bu che ba ni ngo mtshar lags so/ /bcom ldan 'das de dag rnam par dag pa du dag gis rnam par bzhag pa lags/ spyan ras gzigs dbang phyug brgyad kyis te/ lhag pa'i bsam pa rnam par dag pa dang / sems rnam par dag pa dang / snying rje rnam par dag pa dang / pha rol tu phyin pa rnam par dag pa dang / sangs rgyas mthong zhing bsnyen bkur byed pa rnam par dag pa dang / sems can yongs su smin par byed pa rnam par dag pa dang / skye ba rnam par dag pa dang / mthu rnam par dag pas so/ /spyan ras gzigs dbang phyug sa dang po la lhag pa'i bsam pa rnam par dag pa nas mthu rnam par dag pa'i bar gang yin pa dang / sa gong ma gong ma rnams dang / sangs rgyas kyi sa'i bar la lhag pa'i bsam pa rnam par dag pa nas mthu rnam par dag pa'i bar gang yin pa de ni ches rnam par dag pa dang / ches shin tu rnam par dag pa yin par rig par bya'o/ /de la sangs rgyas kyi sa la skye ba rnam par dag pa ma gtogs pa sa dang po'i yon tan gang yin pa de dag gis de'i gong ma'i sa rnams de'i yon tan dang yang mnyam la/ rang gi sa'i yon tan gyis khyad par du 'phags pa yang yin par rig par bya'o/ /byang chub sems dpa'i sa bcu po thams cad ni yon tan bla na yod pa dag yin la/ sangs rgyas kyi sa ni yon tan bla na med par yang dag par rig par bya'o/ /bcom ldan 'das ci'i slad du srid par skye ba
49-1-42a
thams cad kyi nang na byang chub sems dpa'i skye ba rab tu mchog ces bgyi lags/ spyan ras gzigs dbang phyug rnam pa bzhi'i phyir te/ dge ba'i rtsa ba shin tu rnam par dag pa 'grub pa nyid kyi phyir dang / so sor brtags te len pa nyid kyi phyir dang / 'gro ba thams cad yongs su bskyab pa'i snying rje dang ldan pa nyid kyi phyir dang / bdag nyid kun nas nyon mongs pa can ma yin pa nyid dang / gzhan gyi kun nas nyon mongs pa rnam par zlog par byed pa nyid kyi phyir ro/ /bcom ldan 'das ci'i slad du byang chub sems dpa' rnams smon lam rgya chen pos mchi ba dang / smon lam gya nom pa dang ldan pa dang / smon lam gyi stobs can lags/ spyan ras gzigs dbang phyug rnam pa bzhi'i phyir te/ 'di ltar byang chub sems dpa' rnams ni mya ngan las 'das pa'i bde ba la gnas pa la mkhas pa dang / de myur du 'thob par nus pa dang / myur du thob pa de dang bde bar gnas pa de yang spangs te/ sems can gyi don rgyu ba med pa dgos pa med pa sdug bsngal mang po sna tshogs yun ring po 'byung ba la yid kyis smon par byed pas te/ de'i phyir smon lam rgya chen pos 'gro ba dang / smon lam gya nom pa dang ldan pa dang / smon lam gyi stobs can rnams zhes bya'o/ /bcom ldan 'das byang chub sems dpa' rnams kyi bslab pa'i gzhi du mchis lags/ spyan ras gzigs dbang phyug drug ste/ sbyin pa dang / tshul khrims dang / bzod pa dang / brtson 'grus dang / bsam gtan dang / shes rab bo/ /bcom ldan 'das gzhi drug po de dag las du ni lhag pa'i tshul khrims kyi bslab pa lags/ du ni lhag pa'i sems kyi bslab pa lags/ du ni lhag pa'i shes rab kyi bslab pa lags/ spyan ras gzigs dbang phyug dang po gsum ni lhag pa'i tshul khrims kyi bslab pa yin par rig par bya'o/ /bsam gtan ni lhag pa'i sems kyi bslab pa yin no/ /shes rab ni lhag pa'i shes rab kyi bslab pa yin no/ /brtson 'grus ni kun tu 'gro ba yin par nga smra'o/ /bcom ldan 'das bslab pa'i
49-1-42b
gzhi drug po de dag las du ni bsod nams kyi tshogs lags/ du ni ye shes kyi tshogs lags/ spyan ras gzigs dbang phyug lhag pa'i tshul khrims kyi bslab pa gang yin pa de ni bsod nams kyi tshogs yin no/ /lhag pa'i shes rab kyi bslab pa gang yin pa de ni ye shes kyi tshogs yin no/ /brtson 'grus dang bsam gtan ni kun tu 'gro ba yin par nga smra'o/ /bcom ldan 'das bslab pa'i gzhi drug po de dag la byang chub sems dpas ji ltar bslab par bgyi lags/ spyan ras gzigs dbang phyug rnam pa lngas te/ pha rol tu phyin pa dang ldan pa'i dam pa'i chos bstan pa/ byang chub sems dpa'i sde snod la thog ma kho nar shin tu mos pa dang / de'i 'og tu chos spyod pa bcu po dag gis thos pa dang / bsams pa dang bsgoms pa las byung ba'i shes rab bsgrub pa dang / byang chub kyi sems rjes su bsrung ba dang / dge ba'i bshes gnyen la bsten pa dang / rgyun mi 'chad par dge ba'i phyogs la sbyor bas bslab par bya'o/ /bcom ldan 'das ci'i slad du bslab pa'i gzhi de dag grangs drug tu gdags par rig par bgyi lags/ spyan ras gzigs dbang phyug rnam pa gnyis kyi phyir te/ sems can la phan gdags pa dang / nyon mongs pa'i gnyen po nyid kyi phyir ro/ /de la gsum ni sems can la phan gdags pa yin la/ gsum ni nyon mongs pa'i gnyen po yin par rig par bya ste/ de la byang chub sems dpa' sbyin pas ni sems can rnams la yo byad nye bar bsgrub pa'i phan 'dogs pas phan 'dogs so/ /tshul khrims kyis ni phongs pa dang gnod pa dang / rnam par tho 'tshams pa nye bar mi sgrub pa'i phan 'dogs pas phan 'dogs so/ /bzod pas ni phongs pa dang gnod pa dang rnam par tho 'tshams pa la ci mi snyam pas phan 'dogs te/ de gsum gyis ni sems can la phan 'dogs so/ /brtson 'grus kyis ni nyon mongs pa rnam par bcil ba dang / nyon mongs pa yang dag par bcom pa'i dge ba'i phyogs la sbyor bar byed de/ de ni nyon mongs pas dge ba'i phyogs la sbyor ba las bskyod par mi nus so/ /bsam
49-1-43a
gtan gyis ni nyon mongs pa rnams rnam par gnon to/ /shes rab kyis ni bag la nyal legs par 'joms par byed de/ de gsum ni nyon mongs pa'i gnyen po yin no/ /bcom ldan 'das ci'i slad du pha rol tu phyin pa gzhan dag grangs bzhir gdags par rig par bgyi lags/ spyan ras gzigs dbang phyug pha rol tu phyin pa drug po de dag nyid kyi grogs su gyur pa nyid yin pa'i phyir te/ de la pha rol tu phyin pa gsum gyis sems can rnams la phan btags nas byang chub sems dpas bsdu ba'i dngos pos zin pa'i thabs la mkhas pas dge ba la 'jog par byed de/ de'i phyir ngas thabs mkhas pa'i pha rol tu phyin pa ni gsum po dag gi grogs su gyur pa yin par yongs su bstan to/ /spyan ras gzigs dbang phyug gal te byang chub sems dpa' tshe 'di la nyon mongs pa mang bas rtag tu sgom mi nus pa dang / khams dang mos pa dma' ba'i phyir lhag pa'i bsam pa stobs chung bas sems nang du 'jog mi nus pa dang / byang chub sems dpa'i sde snod thos pa'i dmigs pa la bsam gtan yongs su ma bsgoms pas 'jig rten las 'das pa'i shes rab mngon par sgrub mi nus pa yin na/ de bsod nams kyi tshogs chung ngu yang yang dag par blangs te gnas shing phyi ma la nyon mongs pa chung ba nyid du yid kyis smon par byed pa de ni de'i smon lam gyi pha rol tu phyin pa yin te/ des nyon mongs pa chung ba dang / brtson 'grus rtsom nus par 'gyur bas/ de'i phyir smon lam gyi pha rol tu phyin pa ni brtson 'grus kyi pha rol tu phyin pa'i grogs su gyur pa yin no/ /des skyes bu dam pa yang dag par bsten pa dang dam pa'i chos mnyan pa la brten nas tshul bzhin yid la byed pa thob cing lhag pa'i bsam pa stobs chung ba nyid rnam par bzlog nas khams gya nom pa las bsam pa'i stobs thob par 'gyur ba de ni de'i stobs kyi pha rol tu phyin pa yin te/ des sems nang du 'jog nus pas de'i phyir stobs kyi pha rol tu phyin pa'i bsam gtan gyi pha rol tu phyin pa'i grogs su gyur pa yin no/ /de la byang chub sems
49-1-43b
dpa'i sde snod thos pa'i dmigs pa yongs su bsgoms pa la bsam gtan byed de/ de ni de'i phyir shes rab kyi pha rol tu phyin pa yin te/ des 'jig rten las 'das pa'i shes rab mngon par sgrub nus par 'gyur bas de'i phyir ngas ye shes kyi pha rol tu phyin pa ni shes rab kyi pha rol tu phyin pa'i grogs su gyur pa yin par yongs su bstan no/ /bcom ldan 'das ci'i slad du pha rol tu phyin pa drug po de dag gi go rims de ltar bstan par rig par bgyi lags/ spyan ras gzigs dbang phyug de dag gong nas gong du 'grub pa'i rten nyid yin pa'i phyir te/ byang chub sems dpa' lus dang longs spyod la mi lta na tshul khrims yang dag par len par byed do/ /tshul khrims rjes su srung na bzod pa dang ldan par 'gyur ro/ /bzod pa dang ldan na brtson 'grus rtsom par 'gyur ro/ /brtson 'grus brtsams na bsam gtan sgrub par 'gyur ro/ /bsam gtan grub na 'jig rten las 'das pa'i shes rab 'thob bo/ /bcom ldan 'das pha rol tu phyin pa de dag rnam pa dur rab tu dbye lags/ spyan ras gzigs dbang phyug rnam pa gsum du ste/ sbyin pa rnam pa gsum ni chos sbyin pa dang / zang zing sbyin pa dang / mi 'jigs pa sbyin pa'o/ /tshul khrims rnam pa gsum ni mi dge ba las ldog pa'i tshul khrims dang / dge ba la 'jug pa'i tshul khrims dang / sems can gyi don la 'jug pa'i tshul khrims so/ /bzod pa rnam pa gsum ni gnod pa byed pa la mi mjed pa'i bzod pa dang / sdug bsngal la ci mi snyam pa'i bzod pa dang / chos la nges par rtog pa'i bzod pa'o/ /brtson 'grus rnam pa gsum ni go cha'i brtson 'grus dang / dge ba la sbyor ba'i brtson 'grus dang / sems can gyi don la sbyor ba'i brtson 'grus so/ / bsam gtan rnam pa gsum ni rnam par mi rtog cing zhi la rab tu zhi bas nyon mongs pa dang / sdug bsngal gyi gnyen po bde bar gnas pa'i bsam gtan dang / yon tan mngon par sgrub pa'i bsam gtan dang / sems can gyi don mngon par sgrub pa'i bsam gtan no/ /
49-1-44a
shes rab rnam pa gsum ni kun rdzob kyi bden pa la dmigs pa dang / don dam pa'i bden pa la dmigs pa dang / sems can gyi don la dmigs pa'o/ /bcom ldan 'das ci'i slad du pha rol tu phyin pa de dag pha rol tu phyin pa rnams zhes bgyi lags/ spyan ras gzigs dbang phyug lnga'i phyir te/ chags pa med pa nyid dang / mi lta ba nyid dang / kha na ma tho ba med pa nyid dang / rnam par mi rtog pa nyid dang / yongs su bsngo ba nyid kyi phyir ro/ /de la chags pa med pa nyid ni pha rol tu phyin pa dang mi 'thun pa'i dngos po la lhag par chags pa med pa gang yin pa'o/ /de la mi lta ba nyid ni pha rol tu phyin pa'i 'bras bu rnam par smin pa dang / lan du phan 'dogs pa dang 'brel ba'i sems med pa gang yin pa'o/ /de la kha na ma tho ba med pa nyid ni pha rol tu phyin pa de dag kun nas nyon mongs pa can gyi chos dang ma 'dres shing thabs ma yin pa rnam par spangs pa gang yin pa'o/ /de la rnam par mi rtog pa nyid ni pha rol tu phyin pa de dag gi rang gi mtshan nyid la sgra ji bzhin du mngon par zhen pa med pa gang yin pa'o/ /de la yongs su bsngo ba nyid ni pha rol tu phyin pa de dag nyid byas shing bsags pa byang chub sems dpa'i 'bras bur smon pa gang yin pa'o/ /bcom ldan 'das pha rol tu phyin pa dang mi 'thun pa'i dngos po gang lags/spyan ras gzigs dbang phyug de dag ni dngos po drug tu rig par bya ste/ 'dod pa'i dga' ba dang longs spyod dang dbang phyug dang bdag nyid kyi bsod nyams la yon tan gyi phan yon du lta ba dang / lus dang ngag dang yid kyi 'dod dgur kun tu spyod pa dang / brnyas pa mi bzod pa dang mi brtson pas bsod nyams dang 'du 'dzi dang / 'jig rten gyi las sna tshogs dang rnam par g.yeng ba la 'jug pa dang / mthong ba dang thos pa dang / bye brag phyed pa dang / rnam par shes pa'i tha snyad kyi spros pa dag la yon tan gyi phan yon du lta ba'o/ /bcom ldan 'das pha rol tu phyin pa de dag gi rnam par smin pa'i 'bras bu gang lags/ spyan ras gzigs dbang phyug de yang
49-1-44b
rnam pa drug du rig par bya ste/ longs spyod chen po nyid dang / bde 'gror 'gro ba dang / kho na med cing dbyen med la bde ba dang yid bde ba mang ba dang / sems can gyi bdag po dang / lus la gnod pa med pa dang / dbang che bar grags pa'o/ /bcom ldan 'das pha rol tu phyin pa de dag la kun nas nyon mongs pa can gyi chos dang 'dres pa gang lags/ spyan ras gzigs dbang phyug de ni sbyor ba bzhis rig par bya ste/ snying rje med pa'i sbyor ba dang / tshul bzhin ma yin pa'i sbyor ba dang / rtag tu mi byed pa'i sbyor ba dang / gus par mi byed pa'i sbyor bas so/ /de la tshul bzhin ma yin pa'i sbyor ba ni 'di yin te/ de las gzhan pa'i pha rol tu phyin pa dag la de las gzhan pa'i pha rol tu phyin pa'i sgom pa nyams pa gang yin pa'o/ /bcom ldan 'das thabs ma lags pa gang lags/ spyan ras gzigs dbang phyug byang chub sems dpa' pha rol tu phyin pa de dag gis sems can rnams la phan 'dogs pa na/ gal te zang zing gis phan 'dogs pa nye bar sgrub pa tsam gyis chog par 'dzin cing mi dge ba'i gnas las bslang ste/ dge ba'i gnas su 'jog par mi byed na/ de ni thabs ma yin pa yin no/ /de ci'i phyir zhe na/ spyan ras gzigs dbang phyug de tsam gyis sems can la phan gdags pa ma yin pa'i phyir te/ 'di lta ste dper na/ mi gtsang ba ni che yang rung chung yang rung ste/ rnam grangs gang gis kyang dri zhim por bya bar mi nus so/ /de bzhin du 'du byed kyi sdug bsngal nyid kyi rang bzhin gyis sdug bsngal bar gyur pa'i sems can rnams kyang zang zing gis phan gdags pa nye bar sgrub pa tsam gyi rnam grangs kyis kyang bde bar byar mi nus kyi/ dge ba la 'jog pa gang yin pa de ni de dag la phan 'dogs pa'i mchog kho na yin no/ /bcom ldan 'das pha rol tu phyin pa de dag gi rnam par dag pa du mchis lags/ spyan ras gzigs dbang phyug nga ni rnam pa lnga po de dag ma gtogs par pha rol tu phyin pa rnams kyi rnam par dag pa gzhan yod par mi smra mod kyi/ 'on kyang de dag nyid la brten nas pha
49-1-45a
rol tu phyin pa rnams kyi rnam par dag pa bsdus pa dang / so so ba khyod la bshad par bya'o/ /de la pha rol tu phyin pa thams cad kyi rnam par dag pa bsdus pa ni rnam pa bdun gyis rig par bya ste/ bdun gang zhe na/ 'di lta ste/ byang chub sems dpa'i chos de dag gis gzhan las shes kyi khe yongs su mi tshol ba dang / chos de dag la lta bas mngon par zhen par mi byed pa dang / chos 'di dag byang chub tu nges par 'byin pa yin nam ma yin snyam du yid gnyis dang the tshom skyed par mi byed pa dang / bdag la mi stod gzhan la mi smod cing brnyas par mi byed pa dang / dregs par mi byed cing bag med par mi byed pa dang / cung zad tsam dang ngan ngon tsam gyis chog par mi 'dzin pa dang / chos de dag gis ser sna mi byed cing gzhan dag la phrag dog mi byed pa yin no/ /pha rol tu phyin pa'i rnam par dag pa so so tha dad pa de yang rnam pa bdun kho nar rig par bya ste/ tha dad pa'i rnam pa bdun gang zhe na/ 'di lta ste sbyin pa rnam par dag pa rnam pa bdun po sbyin par bya ba'i dngos po rnam par dag pas sbyin pa rnam par dag pa sbyin par byed pa dang / tshul khrims rnam par dag pa dang / lta ba rnam par dag pa dang / sems rnam par dag pa dang / ngag rnam par dag pa dang / shes pa rnam par dag pa dang / dri ma rnam par dag pas sbyin pa rnam par dag pa sbyin par byed do zhes ngas bstan pa gang yin pa de dag byang chub sems dpas yang dag par blangs te gnas pa de ni sbyin pa rnam par dag pa bdun yin no/ /'di lta ste/ byang chub sems dpa' sdom pa bcas pa la bslab pa'i gzhi rnam pa thams cad la mkhas pa dang / ltung ba las bslang ba la mkhas pa dang / de la nges pa'i tshul khrims can dang / brtan pa'i tshul khrims can dang / rtag tu byed pa dang / rtag tu 'jug pa dang / bslab pa'i gzhi rnams yang dag par blangs te slob par byed pa de ni tshul khrims rnam par dag pa rnam pa bdun yin no/ /'di lta ste/ thams cad las gnod pa thams cad nye bar gnas pa na/ bdag nyid kyi las kyi rnam par smin pa la rton pas mi
49-1-45b
'khrug pa dang / lan bya ba'i phyir slar spyo ba dang / gshe ba dang / brdeg pa dang / bsdigs pa dang / mtshang 'dru ba'i gnod pa dag gis sbyor bar mi byed pa dang / khon gyi bsam pa mi 'dzin pa dang / shad kyis 'chags pa na yongs su nyon mongs par mi byed pa dang / shad kyis 'chags pa la mi sdod pa dang / 'jigs pa dang zang zing gi sems kyis bzod par byed pa ma yin pa dang / phan gdags par bya ba la yal bar mi 'dor ba de ni bzod pa rnam par dag pa rnam pa bdun no/ /'di lta ste/ brtson 'grus kyi mnyam pa nyid rab tu shes pa dang / brtson 'grus brtsam pa des bdag la mi stod cing gzhan la mi smod pa dang / mthu dang ldan pa dang / brtson 'grus dang ldan pa dang / spro ba dang ldan pa dang / rtul ba brtan pa dang / dge ba'i chos rnams la brtson pa ma gtang ba de ni brtson 'grus rnam par dag pa bdun yin no/ / 'di lta ste/ mtshan ma legs par rtogs pa'i ting nge 'dzin la bsam gtan pa dang / yongs su rdzogs pa'i ting nge 'dzin la bsam gtan pa dang / gnyi ga'i cha'i ting nge 'dzin la bsam gtan pa dang / shugs kyis 'byung ba'i ting nge 'dzin la bsam gtan pa dang / mi gnas pa'i ting nge 'dzin la bsam gtan pa dang / shin tu sbyang ba byas pa'i ting nge 'dzin la bsam gtan pa dang / byang chub sems dpa'i sde snod kyi dmigs pa yongs su bsgoms pa dpag tu med pa'i ting nge 'dzin la bsam gtan pa de ni bsam gtan rnam par dag pa rnam pa bdun yin no/ / 'di lta ste/ de'i shes rab de sgro 'dogs pa'i mtha' dang skur pa 'debs pa'i mtha' rnam par spangs te dbu ma'i lam gyis nges par 'byung ba dang / shes rab des stong pa nyid dang / smon pa med pa dang / mtshan ma med pa'i rnam par thar pa'i sgo gsum po dag la rnam par thar pa'i sgo'i don kyang yang dag pa ji lta ba bzhin du rab tu shes pa dang / kun brtags pa dang / gzhan gyi dbang dang / yongs su grub pa'i ngo bo nyid gsum po dag la ngo bo nyid kyi don yang dag pa ji lta ba bzhin du rab tu shes pa dang / mtshan nyid dang / skye ba dang / don dam pa ngo bo nyid med pa
49-1-46a
gsum po dag la ngo bo nyid med pa'i don kyang yang dag pa ji lta ba bzhin du rab tu shes pa dang / rig pa'i gnas lnga po dag la kun rdzob kyi bden pa'i don kyang yang dag pa ji lta ba bzhin du rab tu shes pa dang / de bzhin nyid rnam pa bdun la don dam pa'i bden pa'i don kyang yang dag pa ji lta ba bzhin du rab tu shes pa dang / rnam par mi rtog cing spros pa med la tshul gcig tu de la mang du gnas pa dang / 'dres pa tshad med pa'i chos la dmigs pa'i lhag mthong gis chos kyi rjes su 'thun pa'i chos sgrub pa yang dag par sgrub par byed pa de ni shes rab rnam par dag pa rnam pa bdun yin par rig par bya'o/ /bcom ldan 'das rnam pa lnga po de dag gi so so'i las gang lags/ spyan ras gzigs dbang phyug de dag gi las kyang rnam pa lngar rig par bya ste/ chags pa med pa nyid kyis ni byang chub sems dpa' tshe 'di la pha rol tu phyin pa rnams la rtag tu byed pa dang / gus par byed pa'i sbyor bas bag yod par byed do/ /mi lta ba nyid kyis ni phyi mar de dag la bag yod pa'i rgyu yongs su 'dzin par byed do/ /kha na ma tho ba med pa nyid kyis ni pha rol tu phyin pa shin tu yongs su rdzogs pa dang / yongs su dag pa dang / yongs su byang ba dag sgom par byed do/ /rnam par mi rtog pa nyid kyis ni thabs la mkhas pa des myur du pha rol tu phyin pa yongs su rdzogs par byed do/ /yongs su bsngo ba nyid kyis ni bla na med pa yang dag par rdzogs pa'i byang chub kyi bar du tshe rabs thams cad du rnam par smin pa'i 'bras bu 'dod pa dang bcas pa'i pha rol tu phyin pa mi zad pa nyid 'thob par byed do/ /bcom ldan 'das pha rol tu phyin pa de dag gi rgya che ba nyid gang lags/ spyan ras gzigs dbang phyug chags pa med pa nyid dang / mi lta ba nyid dang / yongs su bsngo ba nyid gang yin pa'o/ /kun nas nyon mongs pa ma mchis pa gang lags/ kha na ma tho ba med pa nyid dang / rnam par mi rtog pa nyid gang yin pa'o/ /sbyangs pa nyid gang lags/ so sor brtag cing bya ba nyid gang yin pa'o/ /mi g.yo ba nyid gang lags/ sar chud pa rnams kyi yongs su mi nyams pa'i chos nyid gang yin pa'o/ /shin tu rnam par
49-1-46b
dag pa nyid gang lags/ spyan ras gzigs dbang phyug sa bcu par gtogs pa nyid dang / sangs rgyas kyi sar gtogs pa nyid gang yin pa'o/ /bcom ldan 'das ci'i slad du byang chub sems dpa' rtag tu pha rol tu phyin pa'i rnam par smin pa'i 'bras bu 'dod pa bas ma 'tshal ba dang / pha rol tu phyin pa bas ma 'tshal ba dang ldan pa lags/ spyan ras gzigs dbang phyug gcig la gcig brten na sar grub pa bsgom pa nyid kyi phyir ro/ /bcom ldan 'das ci'i slad du byang chub sems dpa' rnams pha rol tu phyin pa rnams la ji ltar de ltar pha rol tu phyin pa'i rnam par smin pa'i 'bras bu 'dod pa la dad pas gnas pa ma lags/ spyan ras gzigs dbang phyug rgyu lnga'i phyir te/ pha rol tu phyin pa rnams ni ches lhag par bde ba dang / yid bde ba'i rgyu yin pa'i phyir dang / bdag dang gzhan la phan 'dogs pa'i rgyu yin pa'i phyir dang / phyi ma la de'i rnam par smin pa'i 'bras bu 'dod pa'i rgyu yin pa'i phyir dang / kun nas nyon mongs pa med pa'i gzhi yin pa'i phyir dang / mi 'gyur ba'i chos nyid yin pa'i phyir ro/ /bcom ldan 'das pha rol tu phyin pa de dag gi so so'i mthu gang lags/ spyan ras gzigs dbang phyug de dag gi so so'i mthu ni rnam pa bzhir rig par bya ste/ pha rol tu phyin pa bsgom pa na mi 'thun pa'i phyogs ser sna dang / 'chal pa'i tshul khrims dang / sems 'khrug pa dang / le lo dang / rnam par g.yeng ba dang / lta ba'i rnam pa rab tu spong ba dang / bla na med pa yang dag par rdzogs pa'i byang chub tu 'gyur ba dang / tshe 'di la bdag dang sems can rnams la phan 'dogs par 'gyur ba dang / phyi ma la rnam par smin pa'i 'bras bu 'dod pa rgya chen po zad mi shes pa 'thob par 'gyur ba'o/ /bcom ldan 'das pha rol tu phyin pa de dag rgyu gang las byung ba dang / 'bras bu gang dang ldan pa dang / don gang dang ldan pa lags/ bcom ldan 'das kyis bka' stsal pa/ spyan ras gzigs dbang phyug pha rol tu phyin pa rnams ni snying rje'i rgyu las byung ba dang / rnam par smin pa'i 'bras bu 'dod pa dang / sems can la phan 'dogs pa'i
49-1-47a
'bras bu dang ldan pa dang / byang chub chen po yongs su rdzogs par byed pa'i don chen po dang ldan pa yin no/ /bcom ldan 'das gal te byang chub sems dpa' rnams longs spyod pas ma 'tshal ba dang ldan pa dang / snying rje can lags na ci'i slad du 'jig rten na dbul po gda' lags/ spyan ras gzigs dbang phyug de ni sems can rnams kyi rang gi las kyi nyes pa kho na yin no/ /de lta ma yin te sems can rnams kyi rang gi nyes byas de'i gags su gyur pa ma yin du zin na/ de dag la rtag tu bya ba nyid la zhugs pa dang / longs spyod mi zad pa nyid yod bzhin du 'jig rten sdug bsngal ba lta snang bar ga la 'gyur/ spyan ras gzigs dbang phyug 'di lta ste dper na/ yi dgas lus skom pas gdungs pa rnams kyis rgya mtsho'i chu skams par mthong ba de ni rgya mtsho dag gis nyes pa ma yin gyi/ yi dgas de dag nyid kyi rang gi las kyi 'bras bu'i nyes pa yin no/ /de bzhin du 'bras bu med par gyur pa gang yin pa de ni byang chub sems dpa'i sbyin pa dag gis rgya mtsho lta bur gyur pa rnams kyi nyes pa ma yin gyi sems can rang gi nyes pa byas pa yi dgas lta bu rnams kyi rang gi las kyi nyes pa yin no/ /bcom ldan 'das byang chub sems dpa' chos rnams kyi ngo bo nyid ma mchis pa nyid pha rol tu phyin pa gang gis 'dzin lags/ spyan ras gzigs dbang phyug shes rab kyi pha rol tu phyin pas 'dzin no/ /bcom ldan 'das gal te shes rab kyi pha rol tu phyin pas ngo bo nyid ma mchis pa nyid 'dzin na/ ngo bo nyid dang bcas pa nyid kyang ci'i slad du mi 'dzin lags/ spyan ras gzigs dbang phyug nga ni ngo bo nyid kyis ngo bo nyid med pa nyid 'dzin par mi smra mod kyi/ 'on kyang yi ges bstan pa med par ngo bo nyid med pa yi ge med pa so so rang rig pa de bstan par mi nus pas de'i phyir ngo bo nyid med pa nyid 'dzin no zhes de skad brjod do/ /bcom ldan 'das pha rol tu phyin pa zhes kyang bgyi/ nye ba'i pha rol tu phyin pa zhes kyang bgyi/ pha rol tu phyin pa chen po zhes kyang bgyi lags na/ bcom ldan 'das pha rol tu phyin pa gang lags/ nye ba'i pha rol tu phyin pa ni gang lags/ pha rol tu phyin pa chen po ni gang lags/ spyan ras
49-1-47b
gzigs dbang phyug 'di la byang chub sems dpa' dus dpag tu med pa nas yongs su bsgoms pa'i sbyin pa la sogs pa dge ba'i chos rnams dang ldan pa yang yin la/ de la nyon mongs pa yang kun 'byung zhing de zil gyis gnon par ni mi nus kyi/ des zil gyis gnon par 'gyur ba 'di lta ste/ mos pas spyod pa'i sa la mos pa chung ngu dang 'bring la zhugs pa de ni pha rol tu phyin pa zhes bya'o/ /yang dus dpag tu med pa nas ches yongs su bsgoms pa'i dge ba'i chos de dag nyid dang ldan zhing de la nyon mongs pa yang kun tu 'byung la/ de zil gyis gnon cing des zil gyis gnon par mi 'gyur ba 'di lta ste/ sa dang po nas bzung ba de ni nye ba'i pha rol tu phyin pa zhes bya'o/ /yang dus dpag tu med pa nas ches shin tu yongs su bsgoms pa'i dge ba'i chos de dag nyid dang ldan zhing de la thams cad kyi thams cad du nyon mongs pa kun tu mi 'byung ba'i chos can du gyur pa 'di lta ste/ sa brgyad pa nas bzung ba de ni pha rol tu phyin pa chen po zhes bya'o/ /bcom ldan 'das sa de dag la nyon mongs pa'i bag la nyal rnam pa du mchis lags/ spyan ras gzigs dbang phyug rnam pa gsum ste/ spyan ras gzigs dbang phyug grogs yang dag par bcom pa ni 'di lta ste/ sa lnga po dag na nyon mongs pa lhan cig skyes pa/ kun tu 'byung ba'i grogs nyon mongs pa lhan cig skyes pa ma yin pa kun tu 'byung ba de de'i tshe de la med pas de'i phyir grogs yang dag par bcom pa zhes bya'o/ /bag la nyal stobs chung ba ni 'di lta ste/ sa drug pa dang bdun pa la cha phra mo kun tu 'byung ba nyid dang / bsgoms pas mnan pas kun tu 'byung ba nyid kyi phyir ro/ /bag la nyal phra mo ni 'di lta ste/ sa brgyad pa dang de'i gong ma rnams la nyon mongs pa thams cad kyi thams cad du kun tu mi 'byung ba dang / shes bya'i sgrib pa tsam la gnas pa nyid kyi phyir ro/ /bcom ldan 'das bag la nyal de dag gnas ngan len spangs pa rnam pa dus rab tu phye ba lags/ spyan ras gzigs dbang phyug rnam pa gsum gyis te/ gnas ngan len lpags shun la yod pa lta bu spangs pas ni dang po dang gnyis pa rab tu phye ba yin no/ /bri la yod pa lta bu spangs pa ni
49-1-48a
gsum pa'o/ /gnas ngan len snying po la yod pa lta bu spangs pa gang yin pa de ni thams cad kyi thams cad du bag la nyal med pa'i gnas skabs yin te/ sangs rgyas kyi sa yin par ngas yongs su bstan no/ /bcom ldan 'das gnas ngan len de dag bskal pa grangs ma mchis pa du dag gis spong bar 'gyur lags/ spyan ras gzigs dbang phyug grangs med pa gsum gyis sam/ dus tshigs dang / zla ba dang / zla ba phyed dang / zhag dang / nyi ma dang / thun dang / thun phyed dang / skad cig dang / thang cig dang / yud tsam dang / bskal pa dpag tu med pa dag gis spong ngo / /bcom ldan 'das sa de dag la byang chub sems dpa' rnams kyi nyon mongs pa skye ba'i mtshan nyid ni gang lags/ skyon ni gang lags/ yon tan ni gang lags par rig par bgyi/ spyan ras gzigs dbang phyug byang chub sems dpa' rnams kyi nyon mongs pa skye ba ni kun nas nyon mongs pa med pa'i mtshan nyid yin no/ /de ci'i phyir zhe na/ byang chub sems dpa' sa dang po la so sor nges pa kho nar chos kyi dbyings thams cad rab tu rtogs pa'i phyir te/ des na byang chub sems dpa'i nyon mongs pa ni shes bzhin kho nar skye ba yin gyi/ mi shes par ma yin pas de'i phyir kun nas nyon mongs pa med pa'i mtshan nyid yin no/ /rang gi rgyud la sdug bsngal skyed par mi nus pa nyid kyi phyir skyon med pa yin no/ /sems can gyi khams kyi sdug bsngal rnam par bzlog pa'i rgyu nyid yin pa'i phyir yon tan dpag tu med pa yin no/ /bcom ldan 'das gang la da ltar byang chub sems dpa' rnams kyi nyon mongs skye ba dag gis kyang sems can dang / nyan thos dang / rang sangs rgyas thams cad kyi dge ba'i rtsa ba rnams de tsam du zil gyis gnon par bgyid na/ de las gzhan pa'i yon tan rnams kyis lta smos kyang ci 'tshal te/ byang chub ji tsam du don che ba ni ngo mtshar lags so/ /bcom ldan 'das bcom ldan 'das kyis nyan thos kyi theg pa gang yin pa dang / theg pa chen po gang yin pa de ni theg pa gcig go zhes bka' stsal pa de la dgongs pa
49-1-48b
gang lags/ spyan ras gzigs dbang phyug ngas nyan thos kyi theg par chos sna tshogs kyi ngo bo nyid 'di lta ste/ phung po lnga dang / nang gi skye mched drug dang / phyi rol gyi skye mched drug dang / de dag la sogs pa gang dag bstan pa de dag nyid ngas theg pa chen por chos kyi dbyings tshul gcig par bstan pas bshad de/ de'i phyir nga ni theg pa tha dad par mi smra'o/ /de la gang dag don la sgra ji bzhin kho nar rnam par rtog pa kha cig ni sgro 'dogs par byed/ kha cig ni skur pa 'debs par byed cing theg pa tha dad pa nyid du rnam par rtog par yang byed de/ de gnyis ni mi 'thun par sems shing phan tshun rtsod par zad de/ de las dgongs pa ni de yin no/ /de nas bcom ldan 'das kyis de'i tshe tshigs su bcad pa 'di dag bka' stsal to/ /theg pa che dang theg pa dman pa la/ /rang bzhin sna tshogs chos rnams gang bstan pa/ /de dag nyid ni tshul gcig yang bstan te/ /de phyir theg pa tha dad nga mi smra/ /don la smra bzhin rnam par rtog byed pa/ /sgro btags byas shing skur pa btab byas nas/ /de dag 'gal ba snyam du sems pa na/ /rnam par rmongs nas blo gros sna tshogs 'gyur/ /sa rnams bsdus dang ming dang mi 'thun phyogs/ /khyad par skye dang smon dang bslab pa rnams/ /de ni sangs rgyas rnams kyis theg chen bshad/ /'di la gang brtson de dag sangs rgyas 'gyur/ /de nas bcom ldan 'das la byang chub sems dpa' spyan ras gzigs dbang phyug gis 'di skad ces gsol to/ /bcom ldan 'das dgongs pa nges par 'grel pa'i chos kyi rnam grangs 'dir bstan pa 'di'i ming ci lags/ 'di ji ltar gzung bar bgyi/ bcom ldan 'das kyis de la bka' stsal pa/ spyan ras gzigs dbang phyug 'di ni sa dang pha rol tu phyin pa'i nges pa'i don bstan pa yin te/ 'di sa dang pha rol tu phyin pa'i nges pa'i don bstan pa zhes bya bar zung shig /sa dang pha rol tu phyin pa'i nges pa'i don bstan pa 'di bshad pa na/ byang chub sems dpa' bdun khri lnga stong gis byang chub sems dpa'i ting nge 'dzin theg pa chen po snang ba thob par gyur
49-1-49a
to/ /spyan ras gzigs dbang phyug gi le'u ste dgu pa'o// //de nas bcom ldan 'das la byang chub sems dpa' 'jam dpal gyis zhu ba zhus pa/ bcom ldan 'das de bzhin gshegs pa rnams kyi chos sku zhes bgyi na/ bcom ldan 'das de bzhin gshegs pa rnams kyi chos kyi sku'i mtshan nyid ji lta bu lags/ bcom ldan 'das kyis bka' stsal pa/ 'jam dpal de bzhin gshegs pa rnams kyi chos kyi sku'i mtshan nyid ni sa dang pha rol tu phyin pa shin tu bsgoms pa'i nges par 'byung ba'i gnas gyur pa yang dag par grub pa yin no/ /de yang rgyu gnyis kyis bsam gyis mi khyab pa'i mtshan nyid du rig par bya ste/ de ni spros pa med cing mngon par 'du bya ba med pa nyid kyi phyir dang / sems can rnams ni spros pa dang mngon par 'du bya ba la mngon par zhen pa nyid kyi phyir ro/ /bcom ldan 'das ci lags/ nyan thos dang / rang sangs rgyas rnams kyi gnas gyur pa gang lags pa de yang chos kyi sku lags par brjod par bgyi'am/ 'jam dpal brjod par mi bya'o/ /bcom ldan 'das 'o na ci lags par brjod par bgyi/ 'jam dpal rnam par grol ba'i lus yin te/ 'jam dpal rnam par grol ba'i lus kyis ni de bzhin gshegs pa rnams dang / nyan thos dang / rang sangs rgyas rnams kyang mtshungs shing mnyam mo/ /chos kyi skus ni khyad par du 'phags te/ chos kyi sku khyad par du 'phags na yon tan gyi khyad par dpag tu med pas kyang khyad par 'phags pa yin te/ de la ni dpe bya bar yang sla ba ma yin no/ /bcom ldan 'das de bzhin gshegs pa rnams kyi skye ba 'byung ba'i mtshan nyid ji lta bur rig par bgyi lags/ 'jam dpal sprul pa'i sku'i mtshan nyid 'jig rten gyi khams 'byung ba dang 'dra'o/ / sprul pa'i sku'i mtshan nyid 'byung ba'i de bzhin gshegs pa'i yon tan bkod pa'i rgyan gyi rnam pa thams cad kyis byin gyis brlabs pa'i mtshan nyid du blta bar bya'o/ /chos kyi sku la ni skye ba 'byung ba med do/ /bcom ldan 'das sprul pa'i sku ston pa'i thabs la mkhas pa ni stong gsum gyi
49-1-49b
stong chen po'i sangs rgyas kyi zhing thams cad du bdag por grags pa'am/ sbyin gnas su grags pa'i khyim du mngal du 'jug pa dang / btsas pa dang / skye ba dang / 'dod pa la longs spyod pa dang / mngon par 'byung ba dang / dka' ba spyad pa cig car kun tu ston pa dang / de gtong ba dang / mngon par rdzogs par byang chub pa'i rim pa kun tu ston pa yin par blta bar bya'o/ /bcom ldan 'das de bzhin gshegs pa de bzhin gshegs pa'i byin gyis brlabs kyi skus gsung gang dag brjod pas 'dul ba'i khams yongs su ma smin pa ni yongs su smin par mdzad la/ yongs su smin pa ni dmigs pa de nyid kyis rnam par grol bar mdzad pa'i gsung brjod pa du zhig rjod par mdzad lags/ 'jam dpal de bzhin gshegs pa'i gsung brjod pa ni gsum po 'di dag yin te/ mdo sde rjod pa dang / 'dul ba rjod pa dang / ma mo rjod pa'o/ /bcom ldan 'das mdo sde ni gang lags/ 'dul ba ni gang lags/ ma mo ni gang lags/ 'jam dpal 'di lta ste/ dngos po bzhi'am/ dgu'am/ nyi shu rtsa dgu'i dbang du byas nas chos rnams kyi dngos po bsdus pa tsam ngas gang du bstan pa de ni mdo sde yin no/ /dngos po bzhi gang zhe na/ 'di lta ste/ thos pa'i dngos po dang / skyabs su 'gro ba'i dngos po dang / bslab pa'i dngos po dang / byang chub kyi dngos po'o/ /dngos po dgu gang zhe na/ sems can du gdags pa'i dngos po dang / de'i longs spyod kyi dngos po dang / de 'byung ba'i dngos po dang / de 'byung ba gnas pa'i dngos po dang / de'i kun nas nyon mongs pa dang / rnam par byang ba'i dngos po dang / de'i sna tshogs kyi dngos po dang / ston pa'i dngos po dang / bstan par bya ba'i dngos po dang / 'khor gyi dngos po'o/ /dngos po nyi shu rtsa dgu gang zhe na/ kun nas nyon mongs pa'i phyogs las brtsams te/ 'du byed bsdu ba'i dngos po dang / de'i go rims rjes su 'jug pa'i dngos po dang / de dag nyid la gang zag gi ming du byas nas phyi mar 'byung ba'i rgyu'i dngos po dang / chos kyi ming du byas nas phyi mar 'byung ba'i rgyu'i dngos po dang / rnam par byang ba'i
49-1-50a
phyogs las brtsams te/ dmigs pa la nye bar gtod pa'i dngos po dang / de nyid la rtsol ba'i dngos po dang / sems can gnas pa'i dngos po dang / tshe 'di la bde bar gnas pa'i dngos po dang / sdug bsngal thams cad las yang dag par 'da' ba'i thabs kyi dmigs pa'i dngos po dang / de yongs su shes pa'i dngos po ni phyin ci log gi gnas yongs su shes pa dang / sems can du 'du shes pa las brtsams te phyi rol gyi sems can rnams la log par sgrub pa'i gnas yongs su shes pa dang / nang la mngon pa'i nga rgyal med pa'i gnas yongs su shes pas de yang rnam pa gsum dang / bsgom pa'i gnas kyi dngos po dang / mngon du bya ba'i dngos po dang / bsgom pa'i dngos po dang / de snying por bya ba'i dngos po dang / de'i rnam pa'i dngos po dang / de'i dmigs pa'i dngos po dang / spangs pa dang / ma spangs pa la dpyod pa la mkhas pa'i dngos po dang / de las rnam par g.yeng ba'i dngos po dang / de las rnam par mi g.yeng ba'i dngos po dang / rnam par mi g.yeng ba gnas kyi dngos po dang / bsgom pa las yongs su skyob pa'i sbyor ba gsal ba'i dngos po dang / bsgom pa'i phan yon gyi dngos po dang / de brtan pa'i dngos po dang / 'phags pa'i dbang phyug bsdu ba'i dngos po dang / 'phags pa'i phyogs dang 'khor bsdu ba'i dngos po dang / de kho na rab tu rtogs pa'i dngos po dang / mya ngan las 'das pa yang dag par 'thob pa'i dngos po dang / legs par gsungs pa'i chos 'dul ba la 'jig rten pa'i yang dag pa'i lta ba 'di las phyi rol pa thams cad kyi yang dag pa'i lta ba las spyi bor gyur pa nyid kyi dngos po dang / de mi bsgom pas yongs su nyams pas dngos po ste/ 'jam dpal 'di ltar legs par gsungs pa'i chos 'dul ba la ni mi sgom pas yongs su nyams par 'gyur gyi/ lta ba'i nyes pas ni ma yin no/ /'jam dpal ngas gang du nyan thos rnams dang / byang chub sems dpa' rnams kyi so sor thar pa'am/ so sor thar pa dang ldan pa yongs su bstan pa gang yin pa de ni 'dul ba'i dngos
49-1-50b
po yin no/ /bcom ldan 'das byang chub sems dpa' rnams kyi so sor thar pa rnam pa dus bsdus par rig par bgyi lags/ 'jam dpal rnam pa bdun gyis te/ yang dag par blang ba'i cho ga bstan pa dang / pham pa'i gnas lta bu'i dngos po bstan pa dang / ltung ba'i gnas lta bu'i dngos po bstan pa dang / ltung ba'i ngo bo nyid bstan pa dang / ltung ba ma yin pa'i ngo bo nyid bstan pa dang / ltung ba las dbyung ba bstan pa dang / sdom pa gtong ba bstan pas so/ /'jam dpal ngas gang du mtshan nyid rnam pa bcu gcig bshad pa dang / rnam par phye ba dang / bstan pa gang yin pa de ni ma mo zhes bya'o/ /de la mtshan nyid rnam pa bcu gcig gang zhe na/ kun rdzob kyi mtshan nyid dang / don dam pa'i mtshan nyid dang / byang chub kyi phyogs dang 'thun pa'i chos rnams kyi dmigs pa'i mtshan nyid dang / rnam pa'i mtshan nyid dang / ngo bo nyid kyi mtshan nyid dang / de'i 'bras bu'i mtshan nyid dang / de myong ba rnam par bsnyad pa'i mtshan nyid dang / de'i bar du gcod pa'i chos kyi mtshan nyid dang / de dang rjes su 'thun pa'i chos kyi mtshan nyid dang / de'i nyes dmigs kyi mtshan nyid dang / de'i phan yon gyi mtshan nyid do/ /'jam dpal de la kun rdzob kyi mtshan nyid ni rnam pa gsum ste/ gang zag bstan pa dang / kun brtags pa'i ngo bo nyid bstan pa dang / chos rnams kyi byed pa dang / g.yo ba dang / las byed pa bstan par blta bar bya'o/ /de la don dam pa'i mtshan nyid ni de bzhin nyid rnam pa bdun bstan pa yin par blta bar bya'o/ /dmigs pa'i mtshan nyid ni shes bya'i dngos po rnam pa thams cad bstan pa yin par blta bar bya'o/ /rnam pa'i mtshan nyid ni brtag pa rnam pa brgyad bstan pa yin par blta bar bya ste/ brtag pa rnam pa brgyad gang zhe na/ bden pa dang / gnas pa dang / skyon dang / yon tan dang / tshul dang / 'jug pa dang / rigs pa dang / bsdus pa dang rgyas pas so/ /de la bden pa ni de bzhin nyid gang yin pa'o/ /gnas pa ni gang zag rnam par gzhag pa'am/ /
49-1-51a
kun brtags pa'i ngo bo nyid rnam par gzhag pa'am/ mgo gcig dang / rnam par dbye ba dang / dris te lan gdab pa rnam par gzhag pa'am/ gzhag pa rnam par gzhag pa'am/ gsang ba dang rnam par dbye ba la lan gdab pa rnam par gzhag pa gang yin pa'o/ / skyon rnams ni ngas kun nas nyon mongs pa'i chos rnams kyi nyes dmigs rnam grangs du mar bstan pa gang yin pa dag go/ /yon tan rnams ni ngas rnam par byang ba'i chos rnams kyi phan yon rnam grangs du mar bstan pa gang yin pa dag go/ /tshul ni rnam pa drug tu rig par bya ste/ de kho na'i don gyi tshul dang / 'thob pa'i tshul dang / bshad pa'i tshul dang / mtha' gnyis rnam par spangs pa'i tshul dang / bsam gyis mi khyab pa'i tshul dang / dgongs pa'i tshul lo/ /'jug pa ni dus gsum dang 'dus byas kyi mtshan nyid gsum dang / rkyen bzhi po dag go/ /rigs pa ni rnam pa bzhir rig par bya ste/ ltos pa'i rigs pa dang / bya ba byed pa'i rigs pa dang / 'thad pas sgrub pa'i rigs pa dang / chos nyid kyi rigs pa'o/ /de la ltos pa'i rigs pa ni 'du byed rnams 'byung ba dang / rjes su tha snyad gdags pa'i rgyu gang dag yin pa dang / rkyen gang dag yin pa ste/ de ni ltos pa'i rigs pa yin no/ /chos rnams 'thob pa'am/ 'grub pa'am/ skyes pa rnams las byed par 'gyur ba'i rgyu gang dag yin pa dang / rkyen gang dag yin pa de ni bya ba byed pa'i rigs pa yin no/ /so so'i shes pa dang / bshad pa dang / smras pa'i don sgrub pa dang / legs par khong du chud par bya ba'i rgyu gang dag yin pa dang / rkyen gang dag yin pa de ni 'thad pas sgrub pa'i rigs pa yin no/ /de yang mdor bsdu na rnam pa gnyis te/ yongs su dag pa dang / yongs su ma dag pa'o/ /de la yongs su dag pa'i mtshan nyid ni lnga'o/ /yongs su ma dag pa'i mtshan nyid ni bdun no/ /de la yongs su dag pa'i mtshan nyid lnga po dag gang zhe na/ de mngon sum du dmigs pa'i mtshan nyid dang / de la gnas pa mngon sum du dmigs pa'i mtshan nyid dang / rang gi rigs kyi dpe nye bar sbyar ba'i mtshan nyid dang / /
49-1-51b
yongs su grub pa'i mtshan nyid dang /lung shin tu rnam par dag pa gtan la phab par bstan pa'i mtshan nyid do/ /de la 'du byed thams cad mi rtag pa nyid dang / 'du byed thams cad sdug bsngal ba nyid dang / chos thams cad bdag med pa nyid 'jig rten na mngon sum du dmigs pa dang / de lta bu dang 'thun pa gang yin pa de ni mngon sum du dmigs pa'i mtshan nyid yin no/ /'du byed thams cad skad cig pa nyid dang / 'jig rten pha rol yod pa nyid dang / las dge ba dang / mi dge ba chud mi za ba de la gnas pa'i mi rtag par rigs pa nyid mngon sum du dmigs pa gang yin pa dang / sems can sna tshogs las sna tshogs la gnas pa mngon sum du dmigs pa gang yin pa dang / sems can bde ba dang sdug bsngal ba las dge ba dang mi dge ba la gnas pa mngon sum du dmigs pa gang yin pa dang / gang gis mngon sum du ma gyur pa la rjes su dpag par bya ba dang / de lta bu dang 'thun pa gang yin pa de ni de la gnas pa mngon sum du dmigs pa'i mtshan nyid yin no/ /nang dang phyi rol gyi 'du byed rnams la 'jig rten thams cad la grags pa'i 'chi 'pho dang skye ba dmigs pa nye bar sbyar ba dang / skye ba la sogs pa'i sdug bsngal dmigs pa nye bar sbyar ba dang / rang dbang med pa'i dmigs pa nye bar sbyar ba dang / pha rol dag na yang 'jig rten thams cad la grags pa'i 'byor pa dang / rgud pa dmigs pa nye bar sbyar ba dang / de lta bu dang 'thun pa gang yin pa de ni rang gi rigs kyi dpe nye bar sbyar ba'i mtshan nyid yin par rig par bya'o/ /de ltar de mngon sum du dmigs pa'i mtshan nyid dang / de la gnas pa mngon sum du dmigs pa'i mtshan nyid dang / rang gi rigs kyi dpe nye bar sbyar ba'i mtshan nyid gang yin pa de ni grub par bya ba la gcig tu nges pa'i phyir yongs su grub pa'i mtshan nyid yin par rig par bya'o/ /'jam dpal gtan la bab par bstan pa thams cad mkhyen pas gsungs pa 'di lta ste/ mya ngan las 'das pa ni zhi ba'o zhes bya ba dang / de lta bu dang 'thun pa gang yin pa de ni lung shin tu rnam par dag pa gtan la bab par bstan pa'i mtshan nyid yin par rig par
49-1-52a
bya'o/ /de lta bas na mtshan nyid rnam pa lnga po de dag gis rigs pa brtag pa yongs su dag pa ste/ yongs su dag pa'i phyir bsten par bya'o/ /bcom ldan 'das thams cad mkhyen pa'i mtshan nyid rnam pa dus rtogs par bgyi lags/ 'jam dpal lngas te/ gang su yang rung ba zhig byung na/ 'jig rten du thams cad mkhyen pa nyid du sgra rnam par grags pa dang / skyes bu chen po'i mtshan sum cu rtsa gnyis dang ldan pa dang / stobs bcus sems can thams cad kyi the tshom thams cad gcod pa dang / mi 'jigs pa bzhis chos ston pa'i de'i tshig la phas kyi rgol ba thams cad kyis brgal tu med cing brtsad du med pa gang yin pa dang / su'i chos 'dul ba la 'phags pa'i lam yan lag brgyad pa snang zhing dge sbyong bzhi snang ba yin te/ de ltar na 'byung ba dang / mtshan dang / the tsom gcod pa dang / brgal du med cing brtsad du med pa dang / dge sbyong dmigs pas thams cad mkhyen pa'i mtshan nyid lngar rig par bya'o/ /de ltar 'thad pa'i sgrub pa'i rigs pa de ni mngon sum gyi tshad ma dang / rjes su dpag pa'i tshad ma dang / yid ches pa'i lung gi tshad mas mtshan nyid lnga po dag gis yongs su dag pa yin no/ /yongs su ma dag pa'i mtshan nyid rnam pa bdun gang zhe na/ de las gzhan dang 'thun par dmigs pa'i mtshan nyid dang / de la gzhan dang mi 'thun par dmigs pa'i mtshan nyid dang / thams cad 'thun par dmigs pa'i mtshan nyid dang / thams cad mi 'thun par dmigs pa'i mtshan nyid dang / gzhan gyi rigs kyi dpe nye bar sbyar ba'i mtshan nyid dang / yongs su ma grub pa'i mtshan nyid dang /lung shin tu rnam par ma dag pa bstan pa'i mtshan nyid do/ /de la chos thams cad yid kyi rnam par shes pas rnam par shes par bya ba nyid gang yin pa de ni thams cad 'thun par dmigs pa'i mtshan nyid yin no/ /rtags dang ngo bo nyid dang / las dang chos dang rgyu dang 'bras bu mtshan nyid mi 'thun pa rnams kyi mtshan nyid mi 'thun pa gang yang rung bas phan tshun mtshan nyid mi 'thun par nges pa nyid gang yin pa de ni thams cad mi 'thun par dmigs
49-1-52b
pa'i mtshan nyid yin no/ /'jam dpal de la de las gzhan dang 'thun par dmigs pa'i mtshan nyid dpe dang bcas pa la thams cad mi 'thun par dmigs pa'i mtshan nyid yod pas des na de grub par bya ba la gcig tu ma nges pa'i phyir de ni yongs su ma grub pa'i mtshan nyid ces bya'o/ /de las gzhan dang mi 'thun par dmigs pa'i mtshan nyid dpe dang bcas pa la yang thams cad 'thun par dmigs pa'i mtshan nyid yod pas des na de grub par bya ba la gcig tu ma nges pa'i phyir de yang yongs su ma grub pa'i mtshan nyid ces bya'o/ /yongs su ma grub pa'i phyir rigs pas brtag pa yongs su ma dag pa yin te/ yongs su ma dag pa'i phyir bstan par mi bya'o/ /de lung shin tu rnam par ma dag pa bstan pa'i mtshan nyid ni rang bzhin nyid kyis yongs su ma dag pa yin par rig par bya'o/ /de la de bzhin gshegs pa rnams byung yang rung / ma byung yang rung ste/ chos gnas par bya ba'i phyir chos nyid dbyings gnas pa nyid gang yin pa de ni chos nyid kyi rigs pa yin no/ /de la bsdus pa dang rgyas pa ni mdor bsdu ste/ tshig gcig gis bstan pa'i chos tshig phyi ma phyi ma dag gis rab tu phye ste/ mthar thug par byed pa gang yin pa'o/ / ngas rnam pa dang bcas pa'i dmigs pa 'dzin pa byang chub kyi phyogs dang 'thun pa'i chos dran pa nye bar gzhag pa la sogs pa gang dag bstan pa ni de dag gi ngo bo nyid kyi mtshan nyid yin no/ /'jig rten pa dang 'jig rten las 'das par bcas pa'i nyon mongs pa spong bas de'i 'bras bu 'jig rten dang 'jig rten las 'das pa'i yon tan mngon par sgrub pa gang dag yin pa de ni de'i 'bras bu 'thob pa'i mtshan nyid yin no/ /de nyid rnam par grol ba'i shes pa'i so so yang dag par rig pa gang yin pa gzhan dag la yang rgya cher sgrogs pa dang / 'chad pa dang / yang dag par ston pa de ni de myong ba rnam par bsnyad pa'i mtshan nyid yin no/ /byang chub kyi phyogs dang 'thun pa'i chos de dag nyid sgom pa la bar chad byed pa'i gnas lta bu nyon mongs pa can gyi chos gang dag yin pa de ni de'i bar du gcod pa'i chos kyi mtshan nyid yin no/ /de dag nyid la gces
49-1-53a
spras byed pa'i chos gang dag yin pa de ni de dang rjes su 'thun pa'i chos kyi mtshan nyid yin no/ /bar du gcod pa rnams kyi skyon gang yin pa de ni de'i nyes dmigs kyi mtshan nyid yin no/ /'jam dpal rjes su 'thun pa rnams kyi yon tan gang yin pa de ni de'i phan yon gyi mtshan nyid yin par rig par bya'o/ /de nas bcom ldan 'das la byang chub sems dpa' 'jam dpal gyis yang 'di skad ces gsol to/ /bcom ldan 'das gzungs kyi don gang gis byang chub sems dpa' rnams de bzhin gshegs pas gsungs pa'i chos zab mo rnams kyi ldem por dgongs pa'i rjes su 'jug par 'gyur ba byang chub sems dpa' rnams kyi mdo sde dang / 'dul ba dang / ma mo de dag gi gzungs kyi don ma lus pa 'di las slad rol pa rnams dang / thun mong ma lags pa bshad du gsol/ 'jam dpal de'i phyir nyon cig dang / 'di ltar byang chub sems dpa' rnams nga'i ldem po ngag la 'jug par bya ba'i phyir gzungs kyi don ma lus pa khyod la bshad par bya'o/ /'jam dpal kun nas nyon mongs pa'i chos gang dag yin pa dang / rnam par byang ba'i chos gang dag yin pa de dag thams cad ni g.yo ba med pa gang zag med pa yin te/ de'i phyir ngas chos rnams rnam pa thams cad du byed pa med par bstan to/ /kun nas nyon mongs pa'i chos rnams kyang sngon kun nas nyon mongs pa can du gyur la phyis rnam par byang bar 'gyur ba ma yin/ rnam par byang ba'i chos rnams kyang phyis rnam par byang ba la sngon kun nas nyon mongs pa can du gyur pa ma yin na/ de la byis pa so so'i skye bo rnams gnas ngan len gyi lus la chos dang gang zag gi ngo bo nyid du mngon par zhen pa'i bag la nyal ba'i lta ba la brten nas bdag gam bdag gir 'dzin cing / des na mthong ngo / /thos so/ /snom mo/ /myong ngo / /reg go/ /rnam par shes so/ /za'o/ /byed do/ /kun nas nyon mongs so/ /rnam par byang ngo / /zhes log par mngon par 'du byed pa 'byung ngo / /gang la la de ltar yang
49-1-53b
dag pa ji lta ba bzhin du rab tu shes pa de ni gnas ngan len gyi lus rab tu spong zhing / nyon mongs pa thams cad kyi gnas ma yin pa/ shin tu rnam par dag pa/ spros pa med pa/ 'dus ma byas pa/ mngon par 'du bya ba med pa'i lus 'thob par 'gyur te/ 'jam dpal de ni gzungs kyi don ma lus pa yin par rig par bya'o/ /de nas bcom ldan 'das kyis de'i tshe tshigs su bcad pa 'di dag bka' stsal to/ /kun nas nyon mongs chos dang rnam par byang ba'i chos/ /thams cad byed pa med cing gang zag med pa yin/ / de phyir de dag byed pa med par ngas bshad do/ /de dag snga phyir rnam par dag dang nyon mongs min/ /gnas ngan len gyi lus la bag la nyal ba yi/ /lta la brten nas bdag dang bdag gir 'dzin byed de/ /des na mthong ngo za'o byed ces bya ba dang / /nyon mongs rnam par byang bar 'gyur ro snyam pa'ang 'byung / /gang gis da ltar yang dag ji bzhin rab shes pa/ /de ni gnas ngan len lus rab tu spong byed cing / /nyon mongs gnas min shin tu dag pa'i lus/ /spros pa med cing 'dus ma byas pa 'thob par 'gyur/ / bcom ldan 'das de bzhin gshegs pa'i sems 'byung ba'i mtshan nyid ji lta bur rig par bgyi lags/ 'jam dpal de bzhin gshegs pa rnams ni/ sems dang / yid dang / /rnam par shes pas rab tu phye ba ma yin mod kyi/ 'on kyang de bzhin gshegs pa'i sems ni/ mngon par 'du byed pa med par 'byung ste/ sprul pa lta bur rig par bya'o/ /bcom ldan 'das gal te de bzhin gshegs pa rnams kyi chos kyi sku/ /mngon par 'du bgyi ba thams cad dang bral ba lags na/ 'o na ji ltar mngon par 'du bgyi ba ma mchis par sems 'byung bar 'gyur lags/ 'jam dpal sngon thabs dang / shes rab bsgom pa mngon par 'dus byas pa'i phyir te/ 'jam dpal 'di lta ste dper na/ gnyid log pa sems med pa la phyir sad par mngon par 'du bya ba
49-1-54a
med kyang sngon mngon par 'dus byas pa'i dbang gis sad par 'gyur ba dang / 'gog pa la snyoms par zhugs pa la ldang bar mngon par 'du bya ba med kyang / sngon mngon par 'dus byas pa'i dbang kho nas ldang bar 'gyur te/ gnyid log pa dang / 'gog pa la snyoms par zhugs pa dag gi sems 'byung ba ji lta ba de bzhin du/ de bzhin gshegs pa'i sems 'byung ba yang sngon thabs dang / shes rab bsgom pa mngon par 'du byas pa las rig par bya'o/ /bcom ldan 'das ci lags/ de bzhin gshegs pas sprul pa'i sems mchis sam/ ma mchis zhes bgyi/'jam dpal sems yod pa yang ma yin/ sems med pa yang ma yin te/ sems rang dbang med pa nyid dang / sems kyi dbang nyid yin pa'i phyir ro/ /bcom ldan 'das de bzhin gshegs pa'i spyod yul gang lags pa dang / de bzhin gshegs pa'i yul gang lags pa de gnyis la tha dad du bgyi ba ci mchis lags/ 'jam dpal de bzhin gshegs pa'i spyod yul ni/ de bzhin gshegs pa thams cad thun mong ba/ yon tan bsam gyis mi khyab pa dang / tshad med pa'i rgyan bkod pa'i sangs rgyas kyi zhing yongs su dag pa gang yin pa'o/ /de bzhin gshegs pa'i yul ni khams lnga po sems can gyi khams dang / 'jig rten gyi khams dang / chos kyi khams dang / 'dul ba'i khams dang / 'dul ba'i thabs kyi khams rnam pa thams cad de/ de gnyis la tha dad du bya ba ni de yod do/ /bcom ldan 'das de bzhin gshegs pa'i mngon par rdzogs par byang chub pa gang lags pa dang / chos kyi 'khor lo bskor ba gang lags pa dang / yongs su mya ngan las 'das pa chen po gang lags pa de dag gi mtshan nyid ni/ ji lta bur rig par bgyi lags/ 'jam dpal gnyis su med pa'i mtshan nyid yin te/ mngon par rdzogs par byang chub pa yang ma yin/ mngon par rdzogs par byang
49-1-54b
ma chub pa yang ma yin/ chos kyi 'khor lo bskor ba yang ma yin/ chos kyi 'khor lo mi bskor ba yang ma yin/ yongs su mya ngan las 'das pa chen po yang ma yin/ yongs su mya ngan las 'das pa chen po med pa yang ma yin te/ chos kyi sku shin tu rnam par dag pa nyid kyi phyir dang / sprul pa'i sku kun tu ston pa nyid kyi phyir ro/ /bcom ldan 'das sprul pa'i sku la blta ba dang / nyan pa dang / bsnyen bkur bgyid pa dag gis sems can rnams bsod nams skyed pa de ci'i slad du de bzhin gshegs pa las byung bar rig par bgyi lags/ 'jam dpal de bzhin gshegs pa la lhag par dmigs pa'i bya ba nyid yin pa'i phyir dang / sprul pa'i sku yang de bzhin gshegs pa'i byin gyi rlabs nyid yin pa'i phyir ro/ /bcom ldan 'das mngon par 'du bgyi ba ma mchis par 'dra ba lags na/ ci'i slad du de bzhin gshegs pa'i chos kyi sku kho na las/ sems can rnams la ye shes kyi snang ba chen po 'di 'byung zhing / sprul pa'i gzugs brnyan dpag tu ma mchis pa dag kyang 'byung la/ nyan thos dang / rang sangs rgyas kyi rnam par grol ba'i lus las ni mi 'byung lags/ 'jam dpal 'di lta ste dper na/ mngon par 'du byed pa med par 'dra yang 'di lta ste/ sems can mthu chen po'i byin gyi rlabs nyid dang / sems can gyi las kyi dbang nyid kyi phyir zla ba dang / nyi ma'i dkyil 'khor gyi chu shel dang / me shel kho na las sems can rnams la snang ba chen po 'byung la/ de las gzhan pa'i chu shel dang / me shel dag las ni mi 'byung ba dang / nor bu rin po che rigs dang ldan pa dang / las kyi byi dor legs par byas pa las rgya'i gzugs brnyan 'byung la/ de las gzhan pa'i byi dor ma byas pa dag las ni mi 'byung ba de bzhin du de bzhin gshegs pa'i chos kyi sku yang / chos kyi dbyings dpag tu med pa la dmigs pa'i thabs dang / shes rab bsgoms pas shin tu sbyangs pa byas pa las yang dag par grub pa yin
49-1-55a
pa'i phyir/ de la sems can rnams la ye shes kyi snang ba chen po dang / sprul pa'i gzugs brnyan dpag tu med pa dag 'byung gi /rnam par grol ba'i lus 'ba' zhig dag las ni mi 'byung ngo / /bcom ldan 'das de bzhin gshegs pa dang / byang chub sems dpa'i byin gyi rlabs kyi mthus/ 'dod pa'i khams kyi mi'i lus phun sum tshogs pa rgyal rigs dang /bram ze'i rigs shing sA la chen po lta bu rnams dang / 'dod pa na spyod pa'i lus phun sum tshogs pa thams cad dang / gzugs na spyod pa'i lha'i lus phun sum tshogs pa thams cad dang / gzugs ma mchis pa na spyod pa'i lha'i lus phun sum tshogs pa thams cad gda'o zhes bgyi ba de la bcom ldan 'das dgongs pa gang lags/ 'jam dpal 'di la de bzhin gshegs pa rnams de bzhin gshegs pa'i byin gyis brlabs nas/ lam gang dang sgrub pa gang gis thams cad du lus phun sum tshogs pa thams cad 'thob par 'gyur ba'i lam de dang / sgrub pa de ji lta ba bzhin du ston te/ gang dag lam de dang / sgrub pa de sgrub par byed pa de dag ni/ thams cad du lus phun sum tshogs pa thams cad 'thob par 'gyur la/ gang dag lam de dang / sgrub pa de'i phyir spong zhing mi snyan par brjod la/ de la yang kun nas mnar sems kyi sems dang khong khro ba'i sems dang ldan zhing 'chi bas dus byed pa de dag ni thams cad du lus ngan pa thams cad thob par 'gyur te/ 'jam dpal rnam grangs des na khyod kyis 'di ltar lus phun sum tshogs pa 'ba' zhig de bzhin gshegs pa'i byin gyi rlabs kyi mthu las 'byung ba ma yin gyi/ lus ngan par skye ba yang de bzhin gshegs pa'i byin gyi rlabs kyi mthu las 'byung bar rig par bya'o/ /bcom ldan 'das 'jig rten gyi khams yongs su ma dag pa dag na gang ni mod pa lags/ gang ni dkon pa lags/ yongs su dag pa dag na gang ni mod pa lags/ gang ni dkon pa lags/ 'jam dpal 'jig rten gyi khams yongs su
49-1-55b
ma dag pa dag na dngos po brgyad ni mod la/ gnyis ni dkon te/ 'di lta ste mu stegs can gzhan dang / sems can sdug bsngal ba rnams dang / rigs dang / rus dang / cho rigs dang / 'byor pa dang / rgud pa tha dad pa rnams dang / nyes par spyad pa spyod pa rnams dang / tshul khrims ral ba rnams dang / ngan song rnams dang / theg pa dman pa rnams dang / byang chub sems dpa' bsam pa dang sbyor ba dman pa rnams ni mod pa yin la/ byang chub sems dpa' bsam pa dang sbyor ba mchog dang ldan pa rnams kyi spyod pa dang / de bzhin gshegs pa rnams 'byung ba ni dkon pa yin no/ /'jam dpal 'jig rten gyi khams yongs su dag pa dag na ni de las bzlog pas/ dngos po brgyad ni dkon la/ gnyis ni mod par rig par bya'o/ /de nas bcom ldan 'das la byang chub sems dpa' 'jam dpal gyis 'di skad ces gsol to/ /bcom ldan 'das dgongs pa nges par 'grel pa'i chos kyi rnam grangs 'dir bstan pa 'di'i ming ci lags/ 'di ji ltar gzung bar bgyi/ bcom ldan 'das kyis de la bka' stsal pa/ 'jam dpal 'di de bzhin gshegs pa'i bya ba sgrub pa nges pa'i don bstan pa 'di de bzhin gshegs pa'i bya ba sgrub pa nges pa'i don bstan pa zhes bya bar zung shig /de bzhin gshegs pa'i bya ba sgrub pa nges pa'i don bstan pa 'di bshad pa na/ byang chub sems dpa' bdun khri lnga stong gis chos kyi sku yongs su rdzogs pa so so yang dag par rig par gyur to/ /bcom ldan 'das kyis de skad ces bka' stsal nas/ 'jam dpal gzhon nur gyur pa dang / thams cad dang ldan pa'i 'khor de dang / lha dang mi dang lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// //'phags pa dgongs pa nges par 'grel pa zhes bya ba theg pa chen po'i yon tan gyi tshogs rnam par nges pa'i le'u zhes bya ba rdzogs so/ /skad gsar chad kyis kyang bcos te gtan la phab pa// //