@#/ /'phags pa byams pa'i smon lam/ sangs rgyas kun la phyag 'tshal lo/ /drang srong lha mig ldan pa yi/ /byang chub sems dpa' rnams dang yang / /nyan thos rnams la phyag 'tshal lo/ /ngan 'gro thams cad zlog bgyid cing / /mtho ris lam ni rab ston la/ /rga shi med par 'dren bgyid pa/ /byang chub sems la phyag 'tshal lo/ /sems kyi dbang du gyur pas na/ /bdag gis sdig pa ci bgyis pa/ /sangs rgyas spyan sngar mchis nas su/ /bdag gis de dag bshags par bgyi/ /bdag las rnam pa gsum gang gis/ /bsod nams tshogs ni bskyed pa de/ /bdag gi kun mkhyen sa bon te/ /bdag gi byang chub mi zad shog /phyogs bcu dag gi zhing rnams su/ /sangs rgyas mchod pa gang byung ba/ /sangs rgyas mkhyen pa'i yi rang bas/ /de la bdag ni yi rang ngo / /sdig pa thams cad bshags par bgyi/ /bsod nams kun la yi rang ngo / /sangs rgyas kun la phyag 'tshal lo/ /bdag ni ye shes mchog thob shog /phyogs bcu dag gi phyogs rnams na/ /sa bcu dag 102-1-266b la gnas pa yi/ /byang chub sems dpa' byang chub mchog /'tshang rgya bgyid par skul ma 'debs/ /byang chub dam par sangs rgyas shing / /sde dang bcas pa'i bdud btul nas/ /srog chags kun la sman slad du/ /chos kyi 'khor lo skor gyur cig / chos rnga chen po'i sgra yis ni/ /sdug bsngal sems can thar bgyid shog /bskal pa bye ba bsam yas su/ /chos ston mdzad cing bzhugs gyur cig /'dod pa'i 'dam du bying gyur cing / /srid pa'i srad bus dam bcings pa/ /'ching ba kun gyis bcings bdag la/ /rkang gnyis mchog rnams gzigs su gsol/ /sems kyis dri mar bgyis pa la/ /sangs rgyas rnams ni dmod mi mdzad/ /sems can rnams la byams thugs ldan/ /srid pa'i mtsho las sgrol bar shog /rdzogs pa'i sangs rgyas gang bzhugs dang / /gang dag 'das dang ma byon pa/ /de dag rjes su bdag slob cing / /byang chub spyad pa spyod gyur cig /pha rol phyin drug rdzogs bgyis nas/ /'gro drug sems can thar bgyid shog /mngon shes drug po mngon bgyis nas/ /bla med byang chub reg gyur cig /ma skyes pa dang mi 'byung dang / /rang bzhin ma mchis gnas ma mchis/ /rnam rig ma mchis dngos ma mchis/ /stong pa'i chos ni rtogs par shog /sangs rgyas drang srong chen po ltar/ /sems can ma mchis srog ma mchis/ /gang zag ma mchis gso ma mchis/ /bdag ma mchis pa'i chos rtogs shog /bdag 'dzin bdag gir 'dzin par ni/ /dngos po kun la mi gnas par/ /sems can kun la bde slad du/ /ser sna ma mchis sbyin gtong shog /dngos po dngos po ma mchis pas/ /bdag gi longs spyod lhun grub shog /dngos po thams cad rnam 'jig pas/ /sbyin pa'i pha rol phyin rdzogs shog /khrims kyi tshul khrims skyon med cing / /tshul khrims rnam par dag dang ldan/ / 102-1-267a rlom sems med pa'i tshul khrims kyis/ /tshul khrims pha rol phyin rdzogs shog /sa 'am yang na chu 'am me/ /rlung gi khams ltar mi gnas shing / /bzod pa 'am khro ba ma mchis par/ /bzod pa'i pha rol phyin rdzogs shog / brtson 'grus brtsams pa'i brtson 'grus kyis/ /brtan spro le lo ma mchis shing / /stobs dang ldan pa'i lus sems kyis/ /brtson 'grus pha rol phyin rdzogs shog /sgyu ma lta bu'i ting 'dzin dang / /dpa' bar 'gro ba'i ting 'dzin dang / /rdo rje lta bu'i ting 'dzin gyis/ /bsam gtan pha rol phyin rdzogs shog /rnam par thar pa'i sgo gsum dang / /dus gsum mnyam pa nyid dang yang / /rig gsum mngon sum bgyis pa yis/ /shes rab pha rol phyin rdzogs shog /sangs rgyas kun gyis bsngags pa dang / /'od dang gzi brjid 'bar ba dang / /byang chub sems dpa'i brtson 'grus kyis/ /bdag gi bsam pa rdzogs gyur cig /de ltar spyad pa spyad byed cing / /byams pa grags dang ldan pa yis/ /pha rol phyin drug rdzogs byas nas/ / sa bcu po la rab tu gnas/ /'phags pa byams pa'i smon lam rdzogs s+ho// |