@#/ /rgya gar skad du/ a gra tsAr+ya pra Ni d+hA na/ bod skad du/ mchog gi spyod pa'i smon lam sangs rgyas dang byang chub sems dpa' thams cad la phyag 'tshal lo/ /skye dgu kun la sman dang bde slad du/ /phyogs bcu'i 'jig rten sangs rgyas rnams la 'dud/ /de dag la ni rjed cing mchod par bgyi/ /'gro kun byang chub mchog la reg gyur cig / byams pa dang ni 'jam dpal mnga' bdag rtog /chos kyi blo gros dpa' bo bdud rtsi gsung / /dpa' bo de dag phyag 'tshal mkhyen pa ltar/ /de bzhin bdag kyang mi dbang rnams la 'dud/ /thugs rje ldan zhing 'jig rten don mdzad pa'i/ /rgyal ba mi 102-1-267b mkhyen mi gzigs mi mnga' ba/ /mi dbang thugs brtse byams la gnas pa yi/ /rgyal ba de kun bdag la dgongs su gsol/ /sngon gyi srid pa dag tu bdag nyid kyis/ /sdig pa'i las rnams gang bgyis bdag gis bshags/ /de bzhin lus ngag yid kyis bgyis pa rnams/ /de dag thams cad bdag gis so sor bshags/ /shAkya thub dang mi 'khrugs 'od dpag med/ /de dag gis ni phrin las yongs sbyangs dang / /'chags dang bshags pa mkhyen cing rtogs gyur ltar/ /de bzhin bdag gis sdig pa bshags par bgyi/ /thams cad dga' mdzad skyes bu dam pa gang / /byang chub zhugs pa kun la gsol ba dang / /ngan song bzhi po myur du zhi gyur cig /mi khom 'joms par bgyid cing rgyu bar shog /sangs rgyas bzang spyod dri med mnga' bdag dang / /de bzhin lhun po'i dpal dang nyi ma'i sgron/ /de dag bsod nams yi rang mkhyen pa ltar/ /de bzhin bdag kyang bsod nams rjes yi rang / /phyogs bcu dag na sbyin pa spyod pa gang / /de bzhin tshul khrims ting 'dzin spyod rnams dang / /shes rab sgom dang bsod nams stobs kun la/ /byang chub yon tan don du yi rang ngo / /rgyal ba kun gyi yon tan mtha' yas dang / /chos bstan byang chub 'jog bgyid thams cad la/ /byang chub yon tan don du yi rang ngo / /'gro kun byang chub mchog la reg gyur cig /'jig rten rgyal ba gang bzhugs kun la bskul/ /phyogs bcu dag na byang chub brnyes pa gang / /de dag tshangs pas ji ltar gsol ba ltar/ /rgyal rnams bzhugs shing chos mchog ston gyur cig /rgyal kun bskal pa mang por bzhugs par shog /'gro kun byang chub mchog la reg gyur cig /mi rnams thams cad mchog dang bla med pa/ /'jig rten sgron ma bde gshegs myur gyur cig /sangs rgyas rnams la phyag 'tshal mchod gang dang / /las dge rnams la yi rang gang 102-1-268a lags dang / /sdig pa'i las rnams bshags pa gang lags dang / /rgyal ba rkang gnyis dbang rnams mthong gang dag /bdag gis dge ba cung zad ci bgyis pa/ /lus dang ngag dang sems las byung yang rung / /bdag gis bgyis dang bgyid dang bgyid 'gyur gang / /thams cad skye dgu sman slad stsal bar bgyi/ /ji ltar phyogs bcu'i sangs rgyas rnams mkhyen nas/ /stsal ba legs par stsal cing legs rgyas pa/ /de bzhin bdag gis skye dgu sman slad stsal/ /'gro kun byang chub mchog la reg gyur cig /bdag gis 'gro la stsal ba gang lags pa'i/ /bsod nams 'bras bu bla med ci mchis pa/ /theg pa chen por yongs su bsngo bar bgyi/ /bdag la byang chub 'bras bu grub par shog /mtshungs pa ma mchis kun nas sgo mo rnams/ /'gro ba'i don du bdag la mngon sum shog /'jam dpal gyi ni rjes su slob bgyid cing / /byang chub spyod pa'i smon lam gdab par bgyi/ /mi gcig tsam gyi ched du'ang mnar med pa'i/ /tshor ba thams cad bdag gis myong 'gyur bar/ /bskal pa du mar bdag ni spro bar bgyi/ /'gro ba thams cad mya ngan med par shog /sems dmyal gshin rje'i 'jig rten sdug bsngal dang / /dud 'gro rnams dang mi yi sdug bsngal dang / /'gro ba'i sdug bsngal phung po mtha' yas dag /bdag la bab gyur 'gro ba bde bar shog / rgyal ba rnams kyi zhing ni rnam dag dang / /sems can rnam dag ye shes rnam dag dang / /rgyal ba rnams kyi smon lam mtha' yas gang / /smon lam de kun bdag la grub par shog /bdag gi smon lam nyams par ma gyur cig /bdag ni nam yang skyo bar mi 'gyur shog /byang chub mchog ni bdag gis thob bar du/ /bskal pa du mar bdag ni spro bar shog /mchog gi spyod pa'i smon lam rdzogs s+ho// //rgya gar gyi mkhan po pradz+nyA war+m+ma dang / zhu chen gyi lo ts+tsha ba ban+de ye shes sde la sogs pas 102-1-268b bsgyur cing zhus te gtan la phab pa// |