@#/ /dkon mchog gsum la phyag 'tshal lo/ /'jig rten 'di 'am gang dag 'das pa dang / /mtho ris dag na rin chen mchog yod pa/ /de bzhin gshegs pa lha yi lhar gyur ba/ /mi yi mchog dang 'dir ni mtshungs pa med/ /de bas 'di ni rin chen mchog tu gsungs/ /bden pa de yis 'dir ni dge bar shog /zad pa chags bral bdud rtsi 'dus ma byas/ /shes pas shAkya thub des rab tu phye/ /bdud rtsi zhi ba 'dus byas ma yin pa/ /chos de dang ni mtshungs pa gang yang med/ /de bas 'di ni rin chen mchog tu gsungs/ /bden pa de yis 'dir ni dge bar shog /mchog tu gang 'dod tshul bzhin rab bstan pa/ /ston pa'i rnal 'byor bla med rtag sgrub pa/ /rdo rje lta bu'i mig gnyis la mi mthong ba/ /ting 'dzin de dang mnyam pa yod ma yin/ /de bas 'di ni rin chen mchog tu gsungs/ /bden pa de yis 'dir ni dge bar shog /gang zag chen po brgyad po rab bsngags shing / / gang zag zung bzhir brjod pa de dag ni/ /drang srong chen po gang zag mtshungs med pa/ /bde bar gshegs pas sbyin pa'i gnas shes gsungs/ /de la byin na 'bras bu cher 'gyur te/ /zhing rab gshin la sa bon btab pa bzhin/ /'di ni dge 'dun rin chen mchog tu gsungs/ /bden pa de yis 'dir ni dge bar shog /gang dag brtan pa'i yid kyis rab brtson zhing / /gau nya ma'i bstan la 'jug byed pa/ /de dag thob nas bdud rtsi 'jug thob ste/ /mun pa bsal nas mya ngan 'das thob pa/ /de bas dge 'dun rin chen mchog tu gsungs/ /bden pa de yis 'dir ni dge bar shog /lta ba 'di la sbyar ma thag tu ni/ /'jig tshogs lta dang tshul khrims brtul zhugs dang / /the tshom dang ni nyon mongs gsum po dag /cig char spangs te 'phags pa'i bden 102-1-269a mthong ba/ /des na dge 'dun rin chen mchog tu gsungs/ /bden pa de yis 'dir ni dge bar shog /lus sam ngag gam 'on te yid kyis kyang / /sdig pa rnam gsum nam yang mi byed cing / /glo bur byas na'ang 'chab par mi byed la/ /de ltar de dag lta bas 'dzin mi byed/ /de bas dge 'dun rin chen mchog tu gsungs/ /bden pa de yis 'dir ni dge bar shog /ci ltar dbang po'i sdong po sar btsugs pa/ /phyogs bzhi'i rlung rnams kyis ni mi g.yo ltar/ /'phags pa'i lam gyi dam pa mthong ba yi/ / gang zag 'phags pa'i dge 'dun de bzhin no/ /des na dge 'dun rin chen mchog tu gsungs/ /bden pa de yis 'dir ni dge bar shog /shes rab zab mos shin tu bstan pa yi/ /'phags pa'i bden pa su dag rnam sgom zhing / /lus kyang sbyin par yid la byas pa ni/ /de dag 'jigs pa brgyad dang phrad mi 'gyur/ /des na dge 'dun rin chen mchog tu gsungs/ /bden pa de yis 'dir ni dge bar shog /ci ltar me ni rlung gis rab gtor ba/ /lag tu blangs te bgrang du med pa nyid/ /de ltar kun tu sbyor ba rab btang ba/ /sangs rgyas sras rnams bstan du med par 'gro/ /des na dge 'dun rin chen mchog tu gsungs/ /bden pa de yis 'dir ni dge bar shog /sems can gang dag 'gro dang mi 'gro ba/ /de dag thams cad 'dir ni bder gyur cig /ston mchog lha dang mis ni mchod 'os pa/ /sangs rgyas phyag 'tshal deng 'dir dge bar shog /sems can gang dag 'gro dang mi 'gro ba/ /de dag thams cad 'dir ni bder gyur cig /zhi ba chags bral lha mis mchod 'os pa/ /chos la phyag 'tshal deng 'dir dge bar shog /sems can gang dag 'gro dang mi 'gro ba/ /de dag thams cad 'dir ni bder gyur cig /tshogs kyi dam pa lha mis mchod 'os pa/ /dge 'dun phyag 'tshal deng 'dir dge bar shog /sems can gang dag 'gro dang mi 'gro ba/ /de dag thams 102-1-269b cad deng 'dir bder gyur cig /'byung po gang dag 'dir ni lhags gyur te/ /sa 'am 'on te bar snang 'khod pa dag /skye dgu rnams la rtag tu byams byed shog /nyin dang mtshan du chos kyang spyod par shog /'dir ni rgyal ba dgra rgyal bden gang gis/ / shin tu bden pa gsung zhing brdzun med pa/ /bden pa de yis 'dir ni dge bar shog /de kun 'jigs pa che las thar gyur cig /sangs rgyas kun gyi gzi brjid dang / /rang rgyal dag gi gzi brjid dang / /dgra bcom dag gi mthu dag dang / /gsang sngags 'dzin pa thams cad dang / /shA ri'i bu yi shes rab dang / /maud gal bu yi rdzu 'phrul dang / /ma 'gags pa yi mig dang ni/ /'od srung sbyangs pa'i yon tan dang / /kauN+Di n+ya yi sngar thob dang / /kun dga' bo yi thos pa dang / /tshangs ba yi ni byams pa dang / /brgya byin gyi ni dbang rnams dang / /'jig rten skyong ba'i yul rnams dang / /dbang phyug chen po'i stobs dag dang / /sde dpon rnams kyi mthu dag dang / /'phrog ma'i gzi brjid rdzu 'phrul dang / /de dag rnams kyi mthu dang gzis/ / bdag gi dug ni dug med shog /stong chen mo rab tu 'joms pa las gsungs pa'i smon lam rdzogs s+ho// |