@##/ /rgya gar skad du/ Ar+ya sarba pu N+ya samuts+tshaya sa ma d+hi na ma ma ha yA na sU tra/ bod skad du/ 'phags pa bsod nams thams cad bsdus pa'i ting nge 'dzin ces bya ba theg pa chen po'i mdo/ bam po dang po/ /sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das yangs pa na a mras bsrungs pa'i tshal chen po'i khang pa brtsegs pa'i gnas na/ dge slong khri'i dge slong gi dge 'dun chen po thams cad kyang dgra bcom pa/ zag pa zad pa/ nyon mongs pa med pa/ dbang dang ldan par gyur pa/ sems shin tu rnam par grol ba/ shes rab shin tu rnam par grol ba/ cang shes pa/ glang po chen po/ bya ba byas pa/ byed pa byas pa/ khur bor ba/ rang gi don rjes su thob pa/ srid par kun tu sbyor ba yongs su zad pa/ yang dag pa'i shes pas sems shin tu rnam par grol ba/ sems thams cad kyi dbang gi dam pa'i pha rol tu son pa sha stag dang / byang chub sems dpa' nyi khri thams cad kyang phyir mi ldog pa/ gzungs thob pa/ spobs pa thogs pa med pa/ mngon par shes pa thob pa/ ting nge 'dzin bsgrub pa la mkhas pa/ dran pa dang / blo gros dang / rtogs pa dang / brtan pa dang / shes rab dang / thabs la mkhas pa'i dam pa'i pha rol tu son pa sha stag la 'di lta ste/ byang chub sems dpa' sems dpa' chen po spyod pa'i blo gros dang / byang chub sems dpa' sems dpa' chen po seng ge'i blo gros dang / byang chub sems dpa' sems dpa' chen po blo gros bla ma dang / byang chub sems dpa' sems dpa' chen po khyad par blo gros dang / byang chub sems dpa' sems dpa' chen po 'phel ba'i blo gros 56-1-71a dang / byang chub sems dpa' sems dpa' chen po blo gros mtha' yas dang / byang chub sems dpa' sems dpa' chen po chos kyi blo gros dang / byang chub sems dpa' sems dpa' chen po byams pa dang / byang chub sems dpa' sems dpa' chen po 'jam dpal gzhon nur gyur pa dang /byang chub sems dpa' sems dpa' chen po sred med kyi bu dang / de dag la sogs pa byang chub sems dpa' nyi khri dang / lha'i bu bzhi khri thams cad kyang theg pa chen po la yang dag par zhugs pa sha stag dang / brgya byin dang / tshangs pa dang / 'jig rten skyong ba mang po dang / thabs cig tu bzhugs te/ de nas bcom ldan 'das 'khor 'bum phrag du mas yongs su bskor cing mdun gyis bltas te chos ston to/ /de'i tshe bcom ldan 'das kyi bstan pa shin tu snying por gyur te/ mu stegs byed kyi tshogs thams cad zil gyis mnan to/ /de nas byang chub sems dpa' sems dpa' chen po sred med kyi bu stan las langs te bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das bcom ldan 'das kyi bstan pa 'di shin tu snying por gyur te/ mu stegs can ngan pa spyod pa can dang / kun tu rgyu grangs ma mchis pa dang / gcer bu pa la sogs pa thams cad zil gyis mnan te mdzes par gyur lags so/ /bcom ldan 'das de'i slad du byang chub sems dpa' sems dpa' chen po rnams legs par yongs su gzung du gsol/ byang chub sems dpa' sems dpa' chen po rnams la phan gdags su gsol/ byang chub sems dpa' sems dpa' chen po rnams yongs su bskyang du gsol/ byang chub sems dpa' sems dpa' chen po rnams kyi dge ba'i rtsa ba bskyed par gsol/ byang chub sems dpa' sems dpa' chen po rnams gzengs bstod pa dang / yang dag par dga' bar mdzad pa dang / yang dag par bstan par gsol/ byang chub sems dpa' sems dpa' chen po rnams kyi sangs rgyas kyi gdung rgyun mi 'chad 56-1-71b pa'i chos kyi tshul yongs su gzung du gsol/ sems can thams cad yongs su mi gtong bar gsol/ ji lta bu'i tshul gyis chos kyi phan gdags pas mya ngan las 'das par mchi ba'i lam bstan par gsol/ de bzhin gshegs pa yongs su mya ngan las 'das pa na yang byang chub sems dpa' sems dpa' chen po rnams bla na med pa yang dag par rdzogs pa'i byang chub las nyams par mi 'gyur ba dang / yongs su nyams par mi 'gyur ba dang / sangs rgyas mthong ba dang / chos nyan pa dang / dge 'dun la bsnyen bkur bgyid pa dang / mi 'bral ba dang / bskyud ngas pa ma mchis pa'i chos can gyi slad du dran pa dang ldan par 'gyur ba dang / chos kyi dgongs pa rtogs par 'gyur ba'i slad du blo gros dang ldan par 'gyur ba dang / don rtogs pa rjes su 'thob pa'i slad du rtogs pa dang ldan par 'gyur ba dang / rang gi sems yongs su dag pa'i slad du ngo tsha dang ldan par 'gyur ba dang / sdig pa'i las thams cad spong ba'i slad du khrel yod pa phun sum tshogs par 'gyur ba dang / cho ga dang spyod pa phun sum tshogs pa'i slad du brtan pa dang ldan par 'gyur ba dang / nyon mongs pa thams cad bsal ba'i slad du dpa' bar 'gyur ba dang / 'khor thams cad kyi nang du bag tsha ba dang bral ba'i slad du sran thub par 'gyur bar mdzad du gsol/ bcom ldan 'das ji ltar na byang chub sems dpa' sems dpa' chen po rnams bsod nams yongs su mi nyams pa dang / chos yongs su mi nyams pa dang / shes ba yongs su mi nyams pa dang / ye shes yongs su mi nyams par 'gyur ba lags/ ji ltar na lhag pa'i bsam pa brtan pas byang chub kyi sems yongs su mi nyams pa dang / mya ngan las 'das pa'i mthar thug gi bar du sems can thams cad la mdza' ba brtan pa dang / ji skad smras pa de bzhin du bgyid pa dang / sangs rgyas kyi chos yongs su rdzogs par bgyi ba'i slad du gnas pas sems can rnams la mi slu ba dang / gtong ba thams cad rjes su 'jug pas ma bstan pa'i sbyin pa dang ldan pa dang / sdom pa gsum yongs su dag pa la gnas pas ma bstan pa'i tshul 56-1-72a khrims dang ldan pa dang / gnod sems med pa'i yid kyis sems can thams cad la sems snyoms pas ma bstan pa'i bzod pa dang ldan pa dang / yongs su mi skyo ba'i yid kyis don thams cad yongs su sgrub pas ma bstan pa'i brtson 'grus dang ldan pa dang / dran pa dang / shes bzhin la mkhas te/ bsam gtan dang / ting nge 'dzin dang / snyoms par 'jug pa thams cad la mi gnas pas ma bstan pa'i bsam gtan dang ldan pa dang / lta ba thams cad dang bral zhing sangs rgyas kyi chos thams cad la snang ba thob pas ma bstan pa'i shes rab dang ldan pa dang / sems can rnams bsdu ba'i dngos po bzhis bsdu ba la shin tu brtson pas bsdu ba shin tu bsdus pa dang / lha dang mi'i skye ba thams cad la mi rtag par yid la bgyid pa la brtson pas re ba ma mchis pa dang / thams cad mkhyen pa nyid kyi sems la legs par gnas shing nyan thos dang / rang sangs rgyas 'dod pa dang bral bas sgo'i them pa'i rten lta bu dang / chos kyi dbang du bgyid kyi 'dod pa'i dbang du mi bgyid pa dang / chos kyi rgyal srid don du gnyer bar bgyid kyi lha dang mi'i rgyal srid don du mi gnyer ba dang / sangs rgyas kyis gnang ba'i tshig dang ldan pa'i chos smra bar 'gyur ba dang / chos kyis 'tsho bar 'gyur gyi zang zing gis mi 'tsho ba dang / yongs su 'dzin pa thams cad la 'dod chags dang bral bar 'gyur ba dang / sems can thams cad la zhe 'gras pa ma mchis pa'i sems dang ldan pas zhe sdang dang bral bar 'gyur ba dang / chos thams cad la gti mug gi mun pa dang bral bas gti mug dang bral bar 'gyur ba dang / nye ba'i nyon mongs pa dang bral bas bdud thams cad las yang dag par 'da' bar 'gyur ba dang / sgo thams cad nas yongs su bsngo ba la mkhas pas thabs la mkhas par 'gyur ba lags/ de skad ces gsol pa dang / bcom ldan 'das kyis byang chub sems dpa' sems dpa' chen po stong gsum gyi bdag po bsred med kyi bu la 'di skad ces bka' stsal to/ /sred med kyi bu khyod legs so legs so/ /khyod kyis de bzhin gshegs pa la byang chub sems dpa' rnams kyi phyir don 'di 'dri bar sems 56-1-72b pa ni sred med kyi bu khyod legs so/ /sred med kyi bu de'i phyir legs par rab tu nyon la yid la zung shig dang / byang chub sems dpa' sems dpa' chen po rnams yon tan gyi khyad par 'di dag dang / gzhan dag kyang thob par 'gyur ba ngas bshad do/ /bcom ldan 'das legs so zhes gsol te/ byang chub sems dpa' sems dpa' chen po sred med kyi bu bcom ldan 'das kyi ltar nyan pa dang / bcom ldan 'das kyis de la 'di skad ces bka' stsal to/ /sred med kyi bu byang chub sems dpa' sems dpa' chen po rnams kyi ting nge 'dzin bsod nams thams cad bsdus pa zhes bya ba yod de/ de la brten nas byang chub sems dpa' sems dpa' chen po rnams bsod nams yongs su nyams par mi 'gyur/ chos yongs su nyams par mi 'gyur/ shes rab yongs su nyams par mi 'gyur/ ye shes yongs su nyams par mi 'gyur/ sangs rgyas mthong ba dang / chos nyan pa dang / dge 'dun la bsnyen bkur byed pa dang 'bral bar mi 'gyur/ bsdu ba'i dngos po bzhi la brtson pa dang / sems can thams cad yongs su mi gtong bar gnas pa nas/ sgo thams cad nas yongs su bsngo ba la mkhas pas/ thabs la mkhas par 'gyur ba'i bar de dag dang / yon tan gyi khyad par gzhan dag dang yang ldan par 'gyur ro/ /de nas bcom ldan 'das kyis bsod nams thams cad bsdus pa'i ting nge 'dzin 'di'i ming tsam bka' stsal nas cang mi gsung bar gyur to/ /de nas de'i tshe dri ma med pa'i gzi brjid ces bya ba tshan po che chen po stobs chen po dang ldan pa zhig yangs pa'i grong khyer chen po na gnas so/ /de nas de 'di snyam du sems te/ bdag ni tshan po che chen po stobs po che'i shugs dang ldan pa ste/ 'dzam bu'i gling 'di'i sems can la 'di lta ste/ stobs sam spro ba bdag dang mnyam pa yang med na lhag pa lta ga la yod snyam mo/ /des dge sbyong go'u ta ma stobs po che'i shugs dang ldan te/ stobs bcu'i stobs dang ldan zhing sred med kyi bu'i lus thob bo/ /zhes grag go snyam mo/ /de yang 'di snyam du sems te/ bdag dge sbyong go'u ta ma'i thad du song la/ bcom ldan 'das 56-1-73a de ci 'dra ba dang / bdag ci 'dra ba sad par bya gor ma chag snyam mo/ /de nas tshan po che chen po dri ma med pa'i gzi brjid yangs pa'i grong khyer chen po nas byung nas/ a mras bsrungs pa'i tshal chen po'i khang pa brtsegs pa'i gnas ga la ba der song ste phyin nas/ de bzhin gshegs pa dgra bcom pa yang dag par rdzogs pa'i sangs rgyas 'khor 'bum phrag du mas yongs su bskor cing mdun gyis bltas te/ sangs rgyas kyi mthu chen pos chos ston cing / ri'i rgyal po ri rab rgya mtsho'i nang nas mngon par 'phags pa dang 'dra la kun nas mdzes shing blta bas chog mi shes pa mthong ngo / /des bcom ldan 'das mthong ma thag tu dga' ba dang dang ba dang mchog tu dga' ba chen po thob bo/ /de dga' ba dang dang ba dang mchog tu dga' ba chen po thob nas/ bcom ldan 'das kyi zhabs la gtugs te/ bcom ldan 'das la bskor ba byas nas phyogs gcig tu 'dug ste/ bcom ldan 'das 'ba' zhig la phyag 'tshal zhing mgo bor thal mo sbyar nas/ bcom ldan 'das la rtog cing 'dug go/ /de nas bcom ldan 'das kyis tshan po che chen po dri ma med pa'i gzi brjid kyi lhag pa'i bsam pa thugs su chud nas/ nga rgyal dang / rgyags pa dang / dregs pa gdul ba'i phyir gnas brtan maud gal gyi bu chen po la bka' stsal pa/ maud gal gyi bu khyod song la/ nga byang chub sems dpar gyur pa na shAkya'i bu mo sa 'tsho ma'i phyir/ mda' 'phangs pa gang yin pa de 'dir long shig /de skad ces bka' stsal pa dang /bcom ldan 'das la tshe dang ldan pa maud gal gyi bus 'di skad ces gsol to/ /bcom ldan 'das gnam mda' de ga la mchis pa bdag gis ma mthong lags so/ /de nas bcom ldan 'das kyis de'i tshe phyag g.yas pa nas snang bar byed pa zhes bya ba'i 'od zer cig btang ste/ 'od zer des stong gsum gyi stong chen po'i 'jig rten gyi khams 'di snang bar byas so/ /de nas sangs rgyas kyi zhing 'di'i khor yug chen po gang yin pa de na mda' de 'dug pa snang bar gyur to/ /de nas bcom ldan 56-1-73b 'das kyis tshe dang ldan pa maud gal gyi bu chen po la bka' stsal pa/ maud gal gyi bu 'jig rten gyi khams 'di'i khor yug chen po na mda' 'dug pa de khyod kyis mthong ngam/ gsol pa bcom ldan 'das mthong lags so/ /bcom ldan 'das kyis bka' stsal pa/ maud gal gyi bu khyod song la mda' de long shig /bcom ldan 'das legs so zhes gsol nas/ tshe dang ldan pa maud gal gyi bu chen pos bcom ldan 'das kyi ltar mnyan te/ 'khor thams cad kyi nang nas mi snang bar gyur nas/ dper na skyes bu stobs dang ldan pa'i lag pa bskum pa las rkyong ba'am brkyang ba las skum pa bzhin du skad cig thang cig yud tsam de la 'jig rten gyi khams kyi khor yug chen po de nas mda' de blangs te/ bcom ldan 'das la phul nas/ bcom ldan 'das la 'di skad ces gsol to/ /bcom ldan 'das ci gnam mda' 'di byang chub sems dpas yab yum las byung ba'i stobs kyis 'phangs pa lags sam/ 'on te rdzu 'phrul gyi stobs kyis 'phangs pa lags/ bka' stsal pa/ maud gal gyi bu yab yum las byung ba'i stobs kyis mda' 'phangs pa yin gyi/ rdzu 'phrul gyi stobs kyis 'phangs pa ni ma yin no/ /maud gal gyi bu gal te rdzu 'phrul gyi stobs kyis 'phangs su zin na 'jig rten gyi khams mtha' yas mu med par 'gro bar 'gyur ro/ /gsol pa/ bcom ldan 'das byang chub sems dpa' sems dpa' chen po'i yab yum las byung ba'i stobs/ rang gi stobs bsod nams yongs su smin pa las skyes pa de ji lta bu zhig lags/ bcom ldan 'das kyis bka' stsal pa/ maud gal gyi bu mi bcu'i stobs gang yin pa de ni glang gcig gi stobs so/ /glang bcu'i stobs gang yin pa de ni glang sngon po gcig gi stobs so/ /glang sngon po bcu'i stobs gang yin pa de ni glang po che tha mal pa gcig gi stobs so/ /glang po che tha mal pa bcu'i stobs gang yin pa de ni glang po che 'jigs su rung ba gcig gi stobs so/ /glang po che 'jigs su rung ba bcu'i stobs gang yin pa de ni glang po che glang po che mo 'dra ba gcig gi stobs so/ /glang po che glang po che mo 'dra ba bcu'i stobs gang yin pa de ni dgon pa'i glang po che gcig gi stobs so/ /dgon pa'i 56-1-74a glang po che bcu'i stobs gang yin pa de ni ri 'bigs byed kyi glang po che gcig gi stobs so/ /ri 'bigs byed kyi glang po che bcu'i stobs gang yin pa de ni glang po che mtshon cha'i sder mo can gcig gi stobs so/ /glang po che mtshon cha'i sder mo can bcu'i stobs gang yin pa de ni glang po che gshol mda' 'dzin gcig gi stobs so/ /glang po che gshol mda' 'dzin bcu'i stobs gang yin pa de ni glang po che stang zil mdog gcig gi stobs so/ /glang po stang zil mdog bcu'i stobs gang yin pa de ni glang po che gel ba gcig gi stobs so/ / glang po che gel ba bcu'i stobs gang yin pa de ni/ glang po che sngon po gcig gi stobs so/ /glang po che sngon po bcu'i stobs gang yin pa de ni glang po che ser po gcig gi stobs so/ /glang po che ser po bcu'i stobs gang yin pa de ni glang po che dmar po gcig gi stobs so/ /glang po che dmar po bcu'i stobs gang yin pa de ni glang po che skya bo gcig gi stobs so/ /glang po che skya bo bcu'i stobs gang yin pa de ni glang po che ku mu da gcig gi stobs so/ /glang po che ku mu da bcu'i stobs gang yin pa de ni glang po che pad ma dkar po gcig gi stobs so/ /glang po che pad ma dkar po bcu'i stobs gang yin pa de ni glang po che pad ma gcig gi stobs so/ /glang po che pad ma bcu'i stobs gang yin pa de ni/ spos kyi glang po che gcig gi stobs so/ /spos kyi glang po che bcu'i stobs gang yin pa de ni spos kyi glang po che chen po gcig gi stobs so/ /spos kyi glang po che chen po bcu'i stobs gang yin pa de ni seng ge ral pa can thabs can gcig gi stobs so/ /seng ge ral pa can thabs can bcu'i stobs gang yin pa de ni tshan po che gcig gi stobs so/ /tshan po che bcu'i stobs gang yin pa de ni tshan po che chen po gcig gi stobs so/ / tshan po che chen po bcu'i stobs gang yin pa de ni stobs mchog gcig gi stobs so/ /stobs mchog bcu'i stobs gang yin pa de ni stobs mchog chen po gcig gi stobs so/ /stobs mchog chen po bcu'i stobs gang yin pa de ni rab gnon gcig gi stobs so/ /rab gnon bcu'i 56-1-74b stobs gang yin pa de ni rab gnon chen po gcig gi stobs so/ /rab gnon chen po bcu'i stobs gang yin pa de ni sa bla'i lha'i bu gcig gi stobs so/ /sa bla'i lha'i bu bcu'i stobs gang yin pa de ni gzhal med khang na gnas pa'i lha'i bu gcig gi stobs so/ /gzhal med khang na gnas pa'i lha'i bu bcu'i stobs gang yin pa de ni lha'i bu gshol mda' 'dzin gcig gi stobs so/ /lha'i bu gshol mda' 'dzin bcu'i stobs gang yin pa de ni lha'i bu lag na phreng thogs gcig gi stobs so/ /lha'i bu lag na phreng thogs bcu'i stobs gang yin pa de ni lha'i bu rtag tu myos gcig gi stobs so/ /lha'i bu rtag tu myos bcu'i stobs gang yin pa de ni rgyal chen bzhi'i ris kyi lha'i bu gcig gi stobs so/ /rgyal chen bzhi'i ris kyi lha'i bu thams cad kyi stobs gang yin pa de ni lus ngan gcig gi stobs so/ /lus ngan bcu'i stobs gang yin pa de ni sum cu rtsa gsum pa'i lha'i bu gcig gi stobs so/ /sum cu rtsa gsum pa'i lha'i bu thams cad kyi stobs gang yin pa de ni lha'i dbang po brgya byin gcig gi stobs so/ /lha'i dbang po brgya byin bcu'i stobs gang yin pa de ni 'thab bral gyi lha'i bu gcig gi stobs so/ / 'thab bral gyi lha'i bu thams cad kyi stobs gang yin pa de ni lha'i bu rab 'thab bral gcig gi stobs so/ /lha'i bu rab 'thab bral bcu'i stobs gang yin pa de ni dga' ldan gyi lha'i bu gcig gi stobs so/ /dga' ldan gyi lha'i bu thams cad kyi stobs gang yin pa de ni lha'i rgyal po yongs su dga' ldan gcig gi stobs so/ /lha'i rgyal po yongs su dga' ldan bcu'i stobs gang yin pa de ni 'phrul dga'i lha'i bu gcig gi stobs so/ /'phrul dga'i lha'i bu thams cad kyi stobs gang yin pa de ni lha'i rgyal po rab 'phrul gcig gi stobs so/ /lha'i rgyal po rab 'phrul bcu'i stobs gang yin pa de ni gzhan 'phrul dbang byed kyi lha'i bu gcig gi stobs so/ /gzhan 'phrul dbang byed kyi lha'i bu thams cad kyi stobs gang yin pa de ni lha'i rgyal po dbang byed gcig gi stobs so/ /lha'i rgyal po dbang byed bcu'i stobs gang yin pa de ni bdud kyi ris kyi 56-1-75a lha'i bu gcig gi stobs so/ /bdud kyi ris kyi lha'i bu thams cad kyi stobs gang yin pa de ni bdud sdig can gcig gi stobs so/ /bdud sdig can bcu'i stobs gang yin pa de ni sred med kyi bu phyed pa gcig gi stobs so/ /sred med kyi bu phyed pa bcu'i stobs gang yin pa de ni sred med kyi bu gcig gi stobs so/ /sred med kyi bu bcu'i stobs gang yin pa de ni sred med kyi bu chen po gcig gi stobs so/ /sred med kyi bu chen po bcu'i stobs gang yin pa de ni byang chub sems dpa' nges par byung nas bskal pa brgya lon pa gcig gi stobs so/ / byang chub sems dpa' nges par byung nas bskal pa brgya lon pa bcu'i stobs gang yin pa de ni byang chub sems dpa' nges par byung nas bskal pa stong lon pa gcig gi stobs so/ /byang chub sems dpa' nges par byung nas bskal pa stong lon pa bcu'i stobs gang yin pa de ni byang chub sems dpa' nges par byung nas bskal pa khri lon pa gcig gi stobs so/ /byang chub sems dpa' nges par byung nas bskal pa khri lon pa bcu'i stobs gang yin pa de ni byang chub sems dpa' nges par byung nas bskal pa 'bum lon pa gcig gi stobs so/ /byang chub sems dpa' nges par byung nas bskal pa 'bum lon pa bcu'i stobs gang yin pa de ni byang chub sems dpa' nges par byung nas bskal pa sa ya lon pa gcig gi stobs so/ /byang chub sems dpa' nges par byung nas bskal pa sa ya lon pa bcu'i stobs gang yin pa de ni byang chub sems dpa' nges par byung nas bskal pa bye ba lon pa gcig gi stobs so/ /byang chub sems dpa' nges par byung nas bskal pa bye ba lon pa bcu'i stobs gang yin pa de ni byang chub sems dpa' nges par byung nas bskal pa bye ba phrag bcu lon pa gcig gi stobs so/ /byang chub sems dpa' nges par byung nas bskal pa bye ba phrag bcu lon pa bcu'i stobs gang yin pa de ni byang chub sems dpa' nges par byung nas bskal pa bye ba phrag brgya lon pa gcig gi stobs so/ /byang chub sems dpa' nges par byung nas bskal pa bye ba phrag brgya lon pa bcu'i stobs gang yin pa de ni byang chub sems 56-1-75b dpa' nges par byung nas bskal pa bye ba phrag stong lon pa gcig gi stobs so/ /byang chub sems dpa' nges par byung nas bskal pa bye ba phrag stong lon pa bcu'i stobs gang yin pa de ni byang chub sems dpa' nges par byung nas bskal pa bye ba phrag khri lon pa gcig gi stobs so/ /byang chub sems dpa' nges par byung nas bskal pa bye ba phrag khri lon pa bcu'i stobs gang yin pa de ni byang chub sems dpa' nges par byung nas bskal pa bye ba phrag 'bum lon pa gcig gi stobs so/ /byang chub sems dpa' nges par byung nas bskal pa bye ba phrag 'bum lon pa bcu'i stobs gang yin pa de ni byang chub sems dpa' nges par byung nas bskal pa bye ba phrag sa ya lon pa gcig gi stobs so/ /byang chub sems dpa' nges par byung nas bskal pa bye ba phrag sa ya lon pa bcu'i stobs gang yin pa de ni byang chub sems dpa' mi skye ba'i chos la bzod pa thob pa gcig gi stobs so/ /byang chub sems dpa' mi skye ba'i chos la bzod pa thob pa bcu'i stobs gang yin pa de ni/ byang chub sems dpa' sa bcu la gnas pa srid pa tha ma pa gcig gi stobs yin te/ maud gal gyi bu stobs de dang ldan na byang chub sems dpa' sems dpa' chen po btsas ma thag tu sa la gom pa bdun 'gro bar 'gyur ro/ /maud gal gyi bu gal te 'jig rten gyi khams gzhan na bzhugs pa'i sangs rgyas bcom ldan 'das rnams kyis byang chub sems dpa' ga la 'dug pa'i 'jig rten gyi khams de rdo rje'i rang bzhin du byin gyis ma brlabs su zin na/ btsas ma thag tu gom pa bdun 'dor ba'i tshe/ 'jig rten gyi khams de'i sa chen po thur du dpag tshad drug khri brgyad stong zhom par 'gyur te/ de'i 'og nas chu'i phung po las chu'i rgyun shing rta'i srog shing tsam sa gzhi chen po brtol te 'byung bar 'gyur ba zhig na/ 'on kyang sangs rgyas kyi mthus sa chen po de yang zhom par mi 'gyur la/ sems can rnams la yang gnod par mi 'gyur te/ byang chub sems dpa' sems dpa' chen po srid pa tha ma pa btsas ma thag pa'i stobs dang / myur ba dang / shugs dang / mthu ni de 'dra 'o/ /maud gal gyi bu byang chub sems dpa' srid 56-1-76a pa tha ma pa btsas ma thag pa bcu'i stobs gang yin pa de ni byang chub sems dpa' lang tsho'i mchog la bab pa gcig gi stobs yin te/ stobs de dang ldan pa'i byang chub sems dpa' sems dpa' chen po ni byang chub mngon par rdzogs par 'tshang rgya bar bya ba'i phyir byang chub kyi snying por 'gro'o/ /ji lta bu'i stobs dang ldan pas byang chub sems dpa' sems dpa' chen po byang chub kyi snying por 'gro ba de bas 'bum 'gyur gyis lhag pa'i stobs kyis ni byang chub kyi snying po la 'jug go/ /de bas kyang ches grangs med dpag tu med brjod du med bsam gyis mi khyab pa'i stobs dang ldan pas ni bla na med pa yang dag par rdzogs pa'i byang chub mngon par rdzogs par 'tshang rgya'o/ /maud gal gyi bu gal te 'jig rten gyi khams thams cad kyi sems can gang yin pa de dag thams cad byang chub mngon par rdzogs par 'tshang rgya bar 'dod de/ byang chub sems dpa'i stobs dang ldan par gyur na yang / de dag ni de bzhin gshegs pa'i gnas dang gnas ma yin pa mkhyen pa'i stobs gcig gi 'bum gyi char yang mi phod pa nas dpe'i bar du yang mi bzod de/ stobs de lta bu brnyes pas stobs bcu'i stobs dang ldan pa'i de bzhin gshegs pa dgra bcom pa yang dag par rdzogs pa'i sangs rgyas su 'gyur ro/ /maud gal gyi bu byang chub sems dpa'i stobs 'di ni sngon gyi dge ba'i rtsa ba yongs su smin pas bsdus pa ste/ de las chung ba yang med/ lhag pa yang med do/ /de ni rdzu 'phrul yang ma yin/ cho 'phrul yang ma yin no/ /byang chub sems dpa' sems dpa' chen po rnams kyi rdzu 'phrul gyi stobs ni stobs gang dang ldan na byang chub sems dpas rkang pa'i mthe bo'i spu'i khung bu gcig gis 'jig rten gyi khams gang gA'i klung gi bye ma snyed bgrangs nas 'jig rten gyi khams mtha' yas mu med pa dag tu 'phangs kyang / sems can 'ga' tsam la yang gnod par mi 'gyur te/ byang chub sems dpa' sems dpa' chen po rnams kyi rdzu 'phrul dang / cho 'phrul gyi stobs ni de ltar dpag tu med bsam gyis mi khyab/ mtshungs pa med/ grangs med do/ /de bzhin gshegs pa ni mi mnyam pa dang mnyam 56-1-76b mo/ /maud gal gyi bu gal te de bzhin gshegs pa'i stobs de bstan du zin na ni khyed kyis kyang yid ches par mi nus na sems can gzhan gyis lta ci smos/ maud gal gyi bu gang gi tshe byang chub sems dpa' byang chub kyi snying por 'gro ba de'i tshe khams bzhi po sa dang / chu dang / me dang / rlung gi khams 'di dag khams gcig pu 'di lta ste/ nam mkha'i khams su byin gyis rlob ste/ des na sa chen po de zhom par mi 'gyur la/ sems can rnams la yang gnod par mi 'gyur ro/ /de nas tshan po che chen po dri ma med pa'i gzi brjid kyis de bzhin gshegs pa las byang chub sems dpa'i yab yum las byung ba'i stobs 'di thos nas dga' zhing spu zing zhes byed la ngo mtshar du gyur nas/ stan las langs te/ bla gos phrag pa gcig la gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das bcom ldan 'das las/ byang chub sems dpa'i stobs thos nas/ bdag gi nga rgyal dang dregs pa chag ste ma mchis par gyur lags so/ /bcom ldan 'das bdag sangs rgyas dang chos dang dge slong gi dge 'dun la skyabs su mchi'o/ /sems can thams cad la sman pa dang bde ba'i slad du/ bla na med pa yang dag par rdzogs pa'i byang chub tu yang sems bskyed do/ /de bzhin gshegs pa dgra bcom pa yang dag par rdzogs pa'i sangs rgyas kyi stobs bcu ci 'dra ba de lta bu yang bdag gis thob par gyur cig /tshan po che chen po dri ma med pa'i gzi brjid las lha'i bu khris tshig 'di thos nas/ bla na med pa yang dag par rdzogs pa'i byang chub tu sems bskyed de/ 'di skad du bcom ldan 'das bdag cag kyang da ltar de bzhin gshegs pa dgra bcom pa yang dag par rdzogs pa'i sangs rgyas ci 'dra ba de lta bu'i stobs dang ldan par gyur cig ces smras so/ /de nas bcom ldan 'das la byang chub sems dpa' sred med kyi bus 'di skad ces gsol to/ /bcom ldan 'das bcom ldan 'das kyis gang gi ming bka' stsal nas/ cang mi gsung bar gyur 56-1-77a pa'i ting nge 'dzin bsod nams thams cad bsdus pa zhes bgyi ba de gang lags/ bcom ldan 'das ci nas byang chub sems dpa' rnams kyis bsod nams thams cad bsdus pa'i ting nge 'dzin thob par 'gyur ba'i slad du/ bsod nams thams cad bsdus pa'i ting nge 'dzin de bshad du gsol/ de nas bcom ldan 'das kyis stong gsum gyi bdag po byang chub sems dpa' sred med kyi bu la bka' stsal pa/ sred med kyi bu byang chub sems dpa' sems dpa' chen po gang gis bla na med pa yang dag par rdzogs pa'i byang chub tu sems bskyed pa des bsod nams thams cad bsdus pa'i ting nge 'dzin 'di yongs su ma bzung ba de ni gang yang med do/ /de ci'i phyir zhe na/ bsod nams bya ba'i dngos po thams cad ni/ byang chub kyi sems bskyed pa de'i khongs su 'dus shing rjes su zhugs pa'i phyir ro/ /sred med kyi bu dper na chu mig thams cad dang / mtsho bran thams cad dang / mtshe'u thams cad dang / chu klung thams cad dang / chu bran thams cad dang / mtsho thams cad dang / lteng ka thams cad ni rgya mtsho chen po'i khongs su 'dus shing rjes su zhugs pa de bzhin du/ sred med kyi bu bsod nams bya ba'i dngos po ci yang rung ba sbyin pa las byung ba rnams dang / tshul khrims las byung ba rnams dang / sgom pa las byung ba rnams dang / zag pa dang bcas pa rnams dang / zag pa med pa rnams dang / 'jig rten pa rnams dang / 'jig rten las 'das pa rnams dang / lha rnams dang / mi rnams kyi bsod nams bya ba'i dngos po ji snyed pa'i bsod nams bya ba'i dngos po de dag thams cad ni byang chub kyi sems kyi khongs su 'dus shing rjes su zhugs pa dag go /sred med kyi bu de'i phyir bsod nams thams cad yongs su gzung bar 'dod pa'i rigs kyi bu 'am rigs kyi bu mos bla na med pa yang dag par rdzogs pa'i byang chub tu sems bskyed par bya'o/ /sred med kyi bu dper na/ rin po che'i ri chen po gang dag yin pa 'di lta ste/ lhun po dang / lhun po chen po dang / btang bzung dang / btang bzung chen po dang / khor yug dang / khor yug chen po dang / 56-1-77b gzhan yang ri nag po rnams dang / rtswa dang / shing gel pa dang / sman dang / nags tshal thams cad dang / grong dang / grong khyer dang / grong rdal dang / ljongs dang / yul 'khor dang / rgyal po'i pho brang dang / 'dzam bu'i gling dang / shar gyi lus 'phags dang / nub kyi ba lang spyod dang / byang gi sgra mi snyan dang / gling bzhi pa'i 'jig rten gyi khams dang / stong gi 'jig rten gyi khams dang / stong gnyis kyi 'jig rten gyi khams dang / stong gsum gyi stong chen po'i 'jig rten gyi khams dang / 'dod pa'i khams dang / gzugs kyi khams dang / gzugs med pa'i khams dang / zla ba dang / nyi ma dang / gza' dang / rgyu skar ji snyed yod pa nas/ gling chen po bzhi pa'i 'jig rten gyi khams bye ba phrag brgya'i bar 'di dag thams cad ni stong gsum gyi stong chen po'i 'jig rten gyi khams kyi khongs su 'dus shing rjes su zhugs par blta bar bya ba de bzhin du sred med kyi bu so so'i skye bo'i bsod nams rnams dang / slob pa'i bsod nams rnams dang / mi slob pa'i bsod nams rnams dang / rang sangs rgyas kyi bsod nams rnams dang / byang chub sems dpa'i bsod nams rnams ji yang rung ba ji snyed pa de dag thams cad ni byang chub sems dpa' sems dpa' chen po sems dang po bskyed pa'i khongs su 'dus shing rjes su zhugs te/ sred med kyi bu rnam grangs des kyang gang dag gis bla na med pa yang dag par rdzogs pa'i byang chub tu sems bskyed pa'i sems can de dag gis bsod nams thams cad yongs su bzung ba de ltar rig par bya'o/ /sred med kyi bu gling bzhi pa'i 'jig rten gyi khams kyi sems can las theg pa chen po la yang dag par zhugs pa ma gtogs pa ji snyed pa de dag gi nang na 'khor los sgyur ba ni bsod nams dang shes rab kyis mchog tu brjod do/ /sred med kyi bu gling bzhi pa'i 'jig rten gyi khams na sems can ji snyed yod pa de dag thams cad 'khor los sgyur ba'i bsod nams kyi phung po dang ldan par gyur te/ sems can re re yang 'khor los sgyur ba'i rgyal po'i bsod nams ci 'dra ba de lta bu'i bsod nams dang ldan par gyur na/ sred med kyi 56-1-78a bu 'di ji snyam du sems/ ci bsod nams kyi phung po de mang ngam/ byang chub sems dpa' sred med kyi bus gsol pa/ bcom ldan 'das 'khor los sgyur ba gcig gi bsod nams kyi phung po yang mang lags na sems can grangs ma mchis pa de dag gi lta smos kyang ci 'tshal/ bcom ldan 'das kyis bka' stsal pa/ sred med kyi bu gal te stong gsum gyi stong chen po'i 'jig rten gyi khams na sems can ji snyed yod pa sems can du bsdu bar bsdus pa de dag re re nas 'khor los sgyur ba'i bsod nams kyi phung po dang ldan pa'am/ stong gsum gyi stong chen po'i 'jig rten gyi khams kyi sems can rnams 'khor los sgyur ba'i bsod nams kyi phung po dang ldan pa lta zhog gi/ sred med kyi bu gal te 'jig rten gyi khams gang gA'i klung gi bye ma snyed kyi sems can gang dag yin pa de dag thams cad 'khor los sgyur ba'i bsod nams kyi phung po dang ldan par gyur na/ sred med kyi bu 'di ji snyam du sems/ ci sems can de dag gi bsod nams kyi phung po mang ngam/ byang chub sems dpa' sred med kyi bus gsol pa/bcom ldan 'das sems can gcig 'khor los sgyur ba dang mnyam par gyur pa'i bsod nams kyi phung po yang dpag tu ma mchis grangs ma mchis na sems can grangs ma mchis pa 'khor los sgyur ba'i rgyal por gyur pa de dag gi bsod nams kyi phung po lta smos kyang ci 'tshal/ bcom ldan 'das kyis bka' stsal pa/ sred med kyi bu khyod mos par bya/ khong du chud par bya ste/ de bas na sems dang po bskyed pa'i byang chub sems dpa'i bsod nams kyi phung po yongs su bzung ba ches mang la ches dpag tu med de/ 'khor los sgyur ba'i bsod nams kyi phung pos ni bsod nams kyi phung po de'i brgya'i char yang mi phod/ stong gi cha dang / 'bum gyi cha dang / bye ba phrag brgya'i cha dang / bye ba phrag stong gi cha dang / bye ba phrag 'bum gyi char yang mi phod/ grangs dang / cha dang / bgrang ba dang / dpe dang rgyur yang mi bzod do/ /sred med kyi bu 'di ni bsod nams thams cad bsdus pa'i ting nge 'dzin la 'jug pa dang po'o/ /sred med kyi bu gzhan yang stong gi bdag po tshangs pa ni stong 56-1-78b gi 'jig rten gyi khams byams pas khyab par byed do/ /sred med kyi bu 'di ji snyam du sems/ gal te mi la la zhig gis stong gi 'jig rten gyi khams rin po che sna bdun gyis gang bar byas te sbyin pa byin na/ sbyin pa las byung ba'i bsod nams kyi phung po de dang / tshangs pa'i byams pa dang ldan pa'i bsod nams kyi phung po de gnyis gang mang / byang chub sems dpa' sred med kyi bus gsol pa/ bcom ldan 'das tshangs pa'i bsod nams kyi phung po de nyid ches mang gi sbyin pa las byung ba ni de lta ma lags so/ /sred med kyi bu stong gi bdag po tshangs pa'i bsod nams kyi phung po lta zhog gi sred med kyi bu 'di ji snyam du sems/ stong gnyis kyi bdag po tshangs pas stong gnyis kyi 'jig rten gyi khams byams pas khyab par byed la/ sred med kyi bu gal te mi la la zhig gis stong gnyis kyi 'jig rten gyi khams rin po che sna bdun gyis yongs su gang bar byas te sbyin pa byin na/ sred med kyi bu sbyin pa las byung ba dang / byams pa las byung ba'i bsod nams kyi phung po de gnyis gang mang / byang chub sems dpa' sred med kyi bus gsol pa/ bcom ldan 'das stong gnyis kyi bdag po tshangs pa'i byams pa dang ldan pa'i bsod nams kyi phung po gang lags pa de nyid ches mang gi sbyin pa las byung ba ni de lta ma lags so/ /sred med kyi bu stong gnyis kyi bdag po tshangs pa'i bsod nams kyi phung po lta zhog gi /sred med kyi bu 'di ji snyam du sems/ stong gsum gyi bdag po tshangs pas stong gsum gyi stong chen po'i 'jig rten gyi khams byams pas khyab par byed la/ sred med kyi bu mi la la zhig gis stong gsum gyi stong chen po'i 'jig rten gyi khams rin po che sna bdun gyis gang bar byas te sbyin pa byin na/ sred med kyi bu sbyin pa las byung ba dang / tshangs pa chen po'i byams pa dang ldan pa'i bsod nams kyi phung po de gnyis gang mang / byang chub sems dpa' sred med kyi bus gsol pa/ bcom ldan 'das sbyin pa las byung ba'i bsod nams kyi phung po ni tshangs pa chen po'i byams pa dang ldan pa'i bsod nams kyi phung po'i brgya'i char yang mi phod pa nas rgyu'i bar du yang mi bzod lags so/ /bcom ldan 56-1-79a 'das kyis bka' stsal pa/ sred med kyi bu stong gsum gyi stong chen po'i 'jig rten gyi khams kyi tshangs pa chen po'i byams pa dang ldan pa'i bsod nams kyi phung po lta zhog gi /sred med kyi bu gal te stong gsum gyi stong chen po'i 'jig rten gyi khams kyi sems can du bsdu bar bsdus pa ji snyed pa de dag thams cad tshangs pa chen po'i byams pa bsgom pa dang ldan pa'i bsod nams kyi phung po dang ldan par gyur pa'i sems can de dag thams cad kyi bsod nams kyi phung po bas ni sems dang po bskyed pa'i byang chub sems dpa' lhag pa'i bsam pa la zhugs pa sems can thams cad yongs su dgrol ba la brtson pa/ g.yo med cing sgyu med pa'i byams pa chen po dang snying rje chen po bsgoms pa las byung ba'i bsod nams kyi phung po gang yin pa'i byang chub sems dpa'i bsod nams kyi phung po 'di nyid de bas ches mang ste/ tshangs pa'i bsod nams kyi phung po de ni byang chub sems dpa' de'i bsod nams kyi phung po'i brgya'i char yang mi phod pa nas rgyu'i bar du yang mi bzod do/ /sred med kyi bu de ltar na sems dang po bskyed pa'i byang chub sems dpa' sems dpa' chen po rnams kyi bsod nams kyi phung po ni dpag tu med pa yin te/ sred med kyi bu rnam grangs 'dis kyang rigs kyi bu'am rigs kyi bu mo gang dag gis bla na med pa yang dag par rdzogs pa'i byang chub tu sems bskyed pa dang / skyed par 'gyur ba de dag gi bsod nams thams cad yongs su bsdus pa de ltar rig par bya ste/ sred med kyi bu 'di ni bsod nams thams cad bsdus pa'i ting nge 'dzin la 'jug pa gnyis pa'o/ /sred med kyi bu 'di ji snyam du sems/ shar phyogs su 'jig rten gyi khams ji snyed cig yod/ lho dang / nub dang / byang dang / 'og dang / steng dang / phyogs bcur 'jig rten gyi khams ji snyed cig yod/ byang chub sems dpa' sred med kyi bus gsol pa/ bcom ldan 'das dpag tu ma mchis so/ /bde bar gshegs pa dpag tu ma mchis so/ /phyogs bcu'i 'jig rten gyi khams de dag ni brjod pa'am/ brda sprad par rngo mi thogs lags 56-1-79b so/ /bcom ldan 'das kyis bka' stsal pa/ sred med kyi bu gal te dper blang ba bstan pas bskal pa 'bum gyi bar du bstan du zin kyang / phyogs bcu na 'jig rten gyi khams ji snyed yod pa ni bstan par sla ba ma yin no/ /sred med kyi bu 'on kyang don 'di nyid brda sprad pa dang / bsod nams thams cad bsdus pa'i ting nge 'dzin yongs su rdzogs par bya ba dang / sems can bsod nams 'dod pa rnams phyir zhing 'bogs par bya ba dang / byang chub sems dpa'i theg pa pa'i sems can rnams kyi brtson 'grus chen po yongs su rdzogs par bya ba'i phyir ngas khyod la dpes bstan to/ /sred med kyi bu dper na mi la la zhig gis stong gsum gyi stong chen po'i 'jig rten gyi khams 'di chu'i phung po yan chad srid pa'i rtse mo man chad yungs 'brus yongs su gang bar byas la/ sred med kyi bu de las shar phyogs su yungs 'bru de dag ji snyed pa de snyed kyi 'jig rten gyi khams 'das nas yungs 'bru gcig bor te/ de lta bu'i tshul gyis yungs 'bru de dag thams cad yongs su zad par byas kyang / shar phyogs kyi 'jig rten gyi khams rnams kyi mtha' rtogs par mi nus so/ /lho dang / nub dang / byang dang / 'og dang / steng dang / phyogs bcu kun tu yang de bzhin tu sbyar ro/ /sred med kyi bu gal te 'jig rten gyi khams gang gA'i klung gi bye ma snyed yungs 'brus yongs su gang bar gyur la de las mi la la zhig gis yungs 'bru re re yang / yungs 'bru de dag ji snyed yod pa de snyed kyi char gses na/ sred med kyi bu 'di ji snyam du sems/ yungs 'bru'i cha gses pa de dag bgrang ba'i tshul gyis mtha' rtogs par nus sam/ byang chub sems dpa' sred med kyi bus gsol pa/ bcom ldan 'das yungs 'bru gcig gi cha gses pa'i phyogs gang lags pa de yang gling bzhi pa'i sems can thams cad shA ri'i bu dang 'dra bar gyur pas kyang bskal par yang rtogs par rngo mi thogs lags na/ yungs 'bru'i cha gses pa thams cad lta smos kyang ci 'tshal/ sred med kyi bu gal te mi la la zhig gis shar phyogs su yungs 'bru'i cha gses pa de dag ji snyed pa de snyed kyi 'jig rten gyi khams 'das nas yungs 56-1-80a 'bru'i cha gses pa re re bor te/ sred med kyi bu de lta bu'i tshul gyis yungs 'bru'i cha gses pa thams cad zad par byas kyang / shar phyogs kyi 'jig rten gyi khams rnams kyi mtha' rtogs par mi nus so/ /lho dang / nub dang / byang dang / 'og dang / steng dang / phyogs bcu kun tu yang de bzhin du sbyar ro/ /sred med kyi bu de ltar phyogs bcu'i 'jig rten gyi khams nam mkhas yongs su khyab pa ji snyed pa de dag thams cad mi la la zhig gis rin po che sna bdun gyis yongs su gang bar byas te sbyin pa byin na/ sred med kyi bu 'di ji snyam du sems/ mi de gzhi de las bsod nams mang du skyed dam/ byang chub sems dpa' sred med kyi bus gsol pa/ bcom ldan 'das dpag tu ma mchis so/ /bde bar gshegs pa dpag tu ma mchis so/ /bcom ldan 'das kyis bka' stsal pa/ sred med kyi bu de lta bu'i sbyin pa las byung ba'i bsod nams kyi phung po bsdus pa gang yin pa de ni sems dang po bskyed pa'i byang chub sems dpa' sems dpa' chen po'i lhag pa'i bsam pa phun sum tshogs pa g.yo med pa sgyu med pa/ sems can thams cad yongs su dgrol ba la brtson pa'i snying rje chen po dang / byams pa chen po bsgom pa dang ldan pa'i bsod nams kyi phung po bsdus pa'i brgya'i char yang mi phod pa nas rgyu'i bar du yang mi bzod do/ /sred med kyi bu dper na gzugs kyi rnam pa nam mkha'i khams kyis ma khyab pa ci yang med pa de bzhin du sred med kyi bu byang chub sems dpa' rnams kyi byang chub sems dpa'i byams pa des ni phyogs bcu'i 'jig rten na 'jig rten gyi khams ji snyed yod pa dang / sangs rgyas kyi zhing ji snyed yod pa de dag ma khyab pa gang yang med de/ 'jig rten gyi khams de dag na sems can 'khod pa de dag thams cad byang chub sems dpa'i byams pas yongs su khyab bo/ /'jig rten gyi khams de dag na/sems can gang dag sems can du bsdu bar bsdus pa de dag thams cad 'khor los sgyur ba'i bsod nams kyi phung po dang ldan par gyur tam/ de bzhin du brgya byin gyi bsod nams kyi phung po dang ldan par gyur tam/ de bzhin du tshangs pa'i 56-1-80b bsod nams kyi phung po dang ldan par gyur kyang byang chub sems dpa' lhag pa'i bsam pa la zhugs pa/ g.yo med pa/ sgyu med pa/ sems can yongs su dgrol ba la brtson pa/ snying rje chen po la zhugs pa/ byams pa chen po la gnas pa'i gom pa bdun la bsod nams kyi phung po bsdus pa gang yin pa de ni de bas ches mang ste/ sems can thams cad 'khor los sgyur ba dang / brgya byin dang / tshangs pa'i bsod nams dang ldan par gyur pa'i bsod nams kyi phung po de ni de lta ma yin no/ /sred med kyi bu 'di ni bsod nams thams cad bsdus pa'i ting nge 'dzin la 'jug pa gsum pa'o/ /sred med kyi bu gzhan yang stong gsum gyi stong chen po'i 'jig rten gyi khams su gtogs pa'i sems can ji snyed pa de dag thams cad 'khor los sgyur ba dang mnyam pa'i bsod nams kyi phung po dang ldan par gyur kyang de dag thams cad ni brgya byin gyi bsod nams kyi phung po'i brgya'i char mi phod pa nas rgyu'i bar du yang mi bzod do/ /sred med kyi bu stong gsum gyi stong chen po'i 'jig rten gyi khams kyi sems can ji snyed pa de dag thams cad brgya byin dang mnyam pa'i bsod nams kyi phung po dang ldan par gyur kyang de dag thams cad ni tshangs pa chen po'i bsod nams kyi phung po'i brgya'i char yang mi phod pa nas rgyu'i bar du yang mi bzod do/ /sred med kyi bu stong gsum gyi stong chen po'i 'jig rten gyi khams kyi sems can ji snyed pa de dag thams cad tshangs pa chen po dang mnyam pa'i bsod nams kyi phung po dang ldan par gyur kyang de dag thams cad ni dge bsnyen nag po'i mchog gi bsod nams kyi phung po'i brgya'i char yang mi phod pa nas rgyu'i bar du yang mi bzod do/ /sred med kyi bu stong gsum gyi stong chen po'i 'jig rten gyi khams kyi sems can ji snyed pa de dag thams cad dge bsnyen nag po'i mchog dang mnyam pa'i bsod nams kyi phung po dang ldan par gyur kyang de dag thams cad ni shA ri'i bu'i shes rab dang / ye shes dang bsod nams kyi phung po'i brgya'i char yang mi phod pa nas rgyu'i bar du yang mi bzod do/ /sred med kyi bu stong gsum gyi stong chen po'i 'jig rten gyi khams kyi sems can ji 56-1-81a snyed pa de dag thams cad shA ri'i bu dang mnyam pa'i shes rab dang / ye shes dang bsod nams kyi phung po dang ldan par gyur kyang / de dag thams cad ni rang sangs rgyas gcig gi shes rab dang / ye shes dang bsod nams kyi phung po'i brgya'i char yang mi phod pa nas rgyu'i bar du yang mi bzod do/ /sred med kyi bu stong gsum gyi stong chen po'i 'jig rten gyi khams kyi sems can ji snyed pa de dag thams cad rang sangs rgyas kyi shes rab dang / ye shes dang bsod nams kyi phung po dang ldan par gyur kyang de dag thams cad ni byang chub sems dpa' sems dpa' chen po nges par byung nas bskal pa lnga brgya lon pa'i shes rab dang / ye shes dang bsod nams kyi phung po'i brgya'i char yang mi phod pa nas rgyu'i bar du yang mi bzod do/ /thams cad la yang de bzhin du sbyar te/ sred med kyi bu 'di ni bsod nams thams cad bsdus pa'i ting nge 'dzin la 'jug pa bzhi pa'o/ /bstan pa 'di bshad pa na/ mi sum khri nyis stong gis bla na med pa yang dag par rdzogs pa'i byang chub tu sems bskyed do/ /stong gsum gyi stong chen po'i 'jig rten gyi khams 'di yang rnam pa drug tu g.yos so/ /lha dang mi'i sil snyan dag kyang grag go/ /lha dang mi'i me tog gi sprin dag kyang phab ste/ me tog gi sprin de dag gis sa chen po 'di pus mo nub tsam du bkram mo/ /lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / brgya byin dang / tshangs pa dang / 'jig rten skyong ba de dag thams cad kyis kyang tshig 'di skad ces gsol to/ /bcom ldan 'das rigs kyi bu'am/ rigs kyi bu mo bla na med pa yang dag par rdzogs pa'i byang chub tu sems bskyed pa dang / skyed pa dang / skyed par 'gyur ba gang dag lags pa de dag gis ni bdag cag zil gyis gnon to/ /bcom ldan 'das bdag cag ni sems can de dag gi don bgyid pa lags so/ /bcom ldan 'das kyis gsungs pa'i don bdag cag gis 'tshal ba ltar na sems can gang su dag bla na med pa yang dag par rdzogs pa'i byang chub la ma zhugs pa de dag ni bsod nams 56-1-81b thams cad bsdus pa'i ting nge 'dzin las mngon par byung ba yang ma lags/ de dag thams cad ni bsod nams thams cad bsdus pa'i ting nge 'dzin 'di la yang dag par gzhol ba yang ma lags kyi/ bcom ldan 'das gang dag gis bla na med pa yang dag par rdzogs pa'i byang chub tu sems bskyed pa de dag thams cad ni bsod nams thams cad bsdus pa'i ting nge 'dzin las mngon par byung ba yang lags/ de dag thams cad ni bsod nams thams cad bsdus pa'i ting nge 'dzin de la yang dag par gzhol ba yang lags so/ /le'u dang po'o// //bam po gnyis pa/ de nas bcom ldan 'das la tshan po che chen po dri ma med pa'i gzi brjid kyis 'di skad ces gsol to/ /bcom ldan 'das bsod nams thams cad bsdus pa'i ting nge 'dzin 'di thob par bgyid pa'i chos rnams gang lags/ de skad ces gsol pa dang / bcom ldan 'das kyis tshan po che chen po dri ma med pa'i gzi brjid la 'di skad ces bka' stsal to/ /rigs kyi bu bsod nams thams cad bsdus pa'i ting nge 'dzin 'di 'thob par byed pa'i chos gcig ste/ gcig gang zhe na/ 'di lta ste/ thams cad mkhyen pa nyid kyi sems mi gtong ba ste/ rigs kyi bu chos gcig po 'di ni bsod nams thams cad bsdus pa'i ting nge 'dzin 'di 'thob par byed pa'o/ /rigs kyi bu gzhan yang bsod nams thams cad bsdus pa'i ting nge 'dzin 'di 'thob par byed pa'i chos gnyis te/ gnyis gang zhe na/ 'di lta ste/ mnyan pa'i chos yongs su tshol bas chog mi shes pa dang / ji ltar thos pa'i chos la tshul bzhin du so sor rtog pa ste/ rigs kyi bu chos 'di gnyis ni bsod nams thams cad bsdus pa'i ting nge 'dzin 'di 'thob par byed pa'o/ /rigs kyi bu gzhan yang bsod nams thams cad bsdus pa'i ting nge 'dzin 'di 'thob par byed pa'i chos gsum ste/ gsum gang zhe na/ 'di lta ste/ sdig pa thams cad yongs su spong ba dang / dge ba'i chos rnams mngon par 'du byed pa dang / yongs su bsngo ba la mkhas pa ste/ rigs kyi bu chos gsum po de dag ni bsod nams thams cad bsdus 56-1-82a pa'i ting nge 'dzin 'di 'thob par byed pa'o/ /rigs kyi bu gzhan yang bsod nams thams cad bsdus pa'i ting nge 'dzin 'di 'thob par byed pa'i chos bzhi ste/ bzhi gang zhe na/ 'di lta ste/ tshul khrims yongs su dag pa dang / lta ba yongs su dag pa dang / sems yongs su dag pa dang / shes rab yongs su dag pa ste/ rigs kyi bu chos bzhi po de dag ni bsod nams thams cad bsdus pa'i ting nge 'dzin 'di 'thob par byed pa'o/ /rigs kyi bu gzhan yang bsod nams thams cad bsdus pa'i ting nge 'dzin 'di 'thob par byed pa'i chos lnga ste/ lnga gang zhe na/ 'di lta ste/ lhag pa'i bsam pas byang chub la zhugs pa dang / rtag tu bden pa'i tshig smra ba dang / g.yo med pa dang / phrag dog med pa dang /sems can thams cad la sems snyoms pa ste/ rigs kyi bu lnga po de dag ni bsod nams thams cad bsdus pa'i ting nge 'dzin 'di 'thob par byed pa'o/ /rigs kyi bu gzhan yang bsod nams thams cad bsdus pa'i ting nge 'dzin 'di 'thob par byed pa'i chos drug ste/ drug gang zhe na 'di lta ste/ dge ba'i bshes gnyen bsten pa dang / sdig pa'i grogs po yongs su spong ba dang / tshogs kyi kha mi 'dren pa dang / dben pa'i gnas na gnas pa dang / byams pa chen po mi gtong ba dang / sems can thams cad la snying rje chen po dang ldan pa ste/ rigs kyi bu chos drug po de dag ni bsod nams thams cad bsdus pa'i ting nge 'dzin 'di 'thob par byed pa'o/ / rigs kyi bu gzhan yang bsod nams thams cad bsdus pa'i ting nge 'dzin 'di 'thob par byed pa'i chos bdun te/ bdun gang zhe na/ 'di lta ste/ zhi gnas yongs su 'tshol ba dang / lhag mthong la mkhas pa dang / rgyu yongs su shes pa dang / rten cing 'brel bar 'byung ba la mkhas pa dang / yang dag par sgrub pa dang / lam gyi tshogs yongs su tshol ba dang / lam bsgom pa la le lo med pa ste/ rigs kyi bu bdun po de dag ni bsod nams thams cad bsdus pa'i ting nge 'dzin 'di 'thob par byed pa'o/ /rigs kyi bu gzhan yang bsod 56-1-82b nams thams cad bsdus pa'i ting nge 'dzin 'di 'thob par byed pa'i chos brgyad de/ brgyad gang zhe na 'di lta ste/ lus las su rung ba nyid dang / sems las su rung ba nyid dang / tshor ba la so sor rtog pa nyid dang / chos la rjes su lta ba nyid dang / sdig pa mi dge ba'i chos ma skyes pa rnams mi skyed pa dang / sdig pa mi dge ba'i chos skyes pa rnams spang ba dang / dge ba'i chos ma skyes pa rnams skyed pa dang / dge ba'i chos skyes pa rnams kun nas bsrung zhing yongs su sbyong ba ste/ rigs kyi bu chos brgyad po de dag ni bsod nams thams cad bsdus pa'i ting nge 'dzin 'di 'thob par byed pa'o/ /rigs kyi bu gzhan yang bsod nams thams cad bsdus pa'i ting nge 'dzin 'di 'thob par byed pa'i chos dgu ste/ dgu gang zhe na 'di lta ste/ 'das pa mi zad pa'i chos nyid dang / ma 'ongs pa mi zad pa'i chos nyid dang / da ltar byung ba mi zad pa'i chos nyid du so sor rtog pa dang / sgyu ma'i chos la so sor rtog pa dang / dus gsum mnyam pa nyid du khong du chud pa dang / chos thams cad la ji lta ba bzhin du chos kyi bzod pa dang ldan pa dang / stong pa nyid mi spong ba dang / mtshan ma med pa rnam par bsgoms pas smon pa dang bral ba dang / bsams bzhin du srid par skye ba ste/ rigs kyi bu chos dgu po de dag ni bsod nams thams cad bsdus pa'i ting nge 'dzin 'di 'thob par byed pa'o/ /rigs kyi bu gzhan yang bsod nams thams cad bsdus pa'i ting nge 'dzin 'di 'thob par byed pa'i chos bcu ste/ bcu gang zhe na 'di lta ste/ bdag med pa la mos pa dang / srog med pa la bzod pa dang / gang zag med pa la gcig tu nges pa dang / mi rtag pa la yid ches pa dang / skye ba thams cad la sems can dmyal bar 'du shes pa dang / phung po rnams la gshed mar 'du shes pa dang / khams rnams la sbrul gdug par 'du shes pa dang / skye mched rnams la grong stong par 'du shes pa dang / srid pa rnams la nges par 'byung bar 'du shes pa dang / rnam par thar pa'i sgo rnams la 'dris par 'du shes pa ste/ rigs kyi bu chos bcu po de dag ni bsod nams thams cad bsdus pa'i 56-1-83a ting nge 'dzin 'di 'thob par byed pa'o/ /de skad ces bka' stsal pa dang / bcom ldan 'das la tshan po che chen po dri ma med pa'i gzi brjid kyis 'di skad ces gsol to/ /bcom ldan 'das bsod nams kyi tshogs yang dag par bsdu bar 'tshal ba'i byang chub sems dpa' sems dpa' chen pos bsod nams thams cad bsdus pa'i ting nge 'dzin 'di mnyan par bgyi'o/ /bsod nams sogs par 'tshal ba'i byang chub sems dpa' sems dpa' chen pos bsod nams thams cad bsdus pa'i ting nge 'dzin 'di mnyan par bgyi'o/ / bsod nams bsam gyis mi khyab pa 'thob par 'tshal ba'i byang chub sems dpa' sems dpa' chen pos bsod nams thams cad bsdus pa'i ting nge 'dzin 'di mnyan par bgyi/ mos par bgyi'o/ /bsod nams mi zad pa 'thob par 'tshal ba'i byang chub sems dpa' sems dpa' chen pos ting nge 'dzin 'di la brtson par bgyi'o/ /bsod nams rgya mtsho 'thob par 'tshal ba'i byang chub sems dpa' sems dpa' chen pos ting nge 'dzin 'di gzung bar bgyi/ bcang bar bgyi/ bklag par bgyi/ bshad par bgyi'o/ /bsod nams brgya'i mtshan yongs su gzung bar 'tshal ba'i byang chub sems dpa' sems dpa' chen pos ting nge 'dzin 'di sgom pa'i rnal 'byor la brtson par bgyi'o/ /de nas yang bcom ldan 'das la tshan po che chen po dri ma med pa'i gzi brjid kyis 'di skad ces gsol to/ /bcom ldan 'das byang chub sems dpa' sems dpa' chen po mngon par brtson pas 'di lta ste/ bsod nams mi zad pa dang / bsod nams rgya mtsho dang / bsod nams bsam gyis mi khyab pa dang / bsod nams stsogs pa dang / bsod nams brgya'i mtshan gyi chos 'di dag ji ltar yongs su rdzogs par bgyid pa lags/ de skad ces gsol pa dang / bcom ldan 'das kyis tshan po che chen po dri ma med pa'i gzi brjid la 'di skad ces bka' stsal to/ /rigs kyi bu gsum po 'di dag ni bsod nams nye bar rton pa dang / bsod nams kyi tshogs dang / bsod 56-1-83b nams 'du ba dang / bsod nams rgyas pa dang / bsod nams mi zad pa dang / bsod nams bsam gyis mi khyab pa dang / bsod nams rgya mtsho yin te/ gsum gang zhe na/ 'di lta ste/ sbyin pa'i tshogs dang / tshul khrims kyi tshogs dang /thos pa'i tshogs so/ / rigs kyi bu de la byang chub sems dpa' sems dpa' chen pos sbyin pa'i tshogs la ji ltar brtson par bya zhe na/ rigs kyi bu 'di la byang chub sems dpa' sems dpa' chen pos dngos po gang la de'i gtong ba'i sems mi skye zhing gtong ba'i blo mi 'byung ba'i dngos po de blang bar mi bya'o/ / yongs su gzung ba gang la btang ba'i sems mi skye ba'i yongs su gzung ba de yongs su gzung bar mi bya'o/ /gang la slong ba rnams kyis bslangs na yongs su 'dzin pa'i blo skye ba'i g.yog 'khor de gzung bar mi bya'o/ /dngos po gang la slong ba rnams kyis bslangs na byang chub sems dpa' mi gtong ba'i blo skye bar 'gyur ba'i rgyal srid de blang bar mi bya'o/ /longs spyod de dag dang / nor de dag dang / rdzas de dag dang / rin po che de dag blang bar mi bya ba nas de lta bu'i dngos po ci yang rung ba'i bar du blang bar mi bya'o/ /rigs kyi bu gzhan yang byang chub sems dpa' sems dpa' chen pos 'di snyam du sems bskyed par bya ste/ bdag gi lus 'di yang sems can thams cad la gtang ste yongs su gtang na phyi rol kyi dngos po rnams lta ci smos snyam du sems bskyed par bya'o/ /gzhan yang sems can gang dang gang la dngos po gang dang gang gis dngos po gang dang gang byed par 'gyur ba de yod na de dang de la de dang de mi dga' ba med pa dang 'gyod pa med par sbyin par bya ste/ lag pa 'dod pa rnams la lag pa yang sbyin no/ /rkang pa 'dod pa rnams la rkang pa dang / mig 'dod pa rnams la mig kyang sbyin no/ /sha 'dod pa rnams la sha dang / khrag 'dod pa rnams la khrag dang / rkang 'dod pa rnams la rkang dang / yan lag dang nying lag 'dod pa rnams la/ yan lag dang nying lag dang / mgo bo 'dod pa rnams la mgo bo yang yongs su gtong bar bya na/ phyi rol gyi dngos po 'di lta ste/ nor dang / 56-1-84a 'bru dang / gser dang / dngul dang / rin po che dang /rgyan dang / rta dang / glang po che dang / shing rta dang / bzhon pa dang / grong dang / grong khyer dang / grong rdal dang / ljongs dang / yul 'khor dang / rgyal po'i pho brang dang / tshong 'dus dang / ri 'or ba dang / bran dang / bran mo dang / las byed pa dang / bu dang / bu mo dang / chung ma dang / 'khor rnams lta ci smos/ gzhan yang sems can gang dang gang la gang dang gang gis don byed par 'gyur ba de dang de yod na de dang de la dngos po de dang de sbyin par bya ste/ mi dga' ba med pa dang / 'gyod pa med pa dang / rnam par smin pa la mi re bar yongs su gtong bar bya'o/ /mi lta bar sbyin par bya'o/ /gzhan du na sems can la phan gdags pa dang / sems can la snying rje ba dang / sems can de la snying brtse ba dang / sems can de dag nyid bsdu ba'i phyir bya bar zad do/ /bdag gis byang chub thob pa na ci nas sems can 'di dag chos kun rtogs par gyur cig snyam du sems bskyed par bya'o/ /rigs kyi bu byang chub sems dpa' gang su dag de ltar sems skyed par byed pa de dag ni byang chub sems dpa' zhes bya'o/ /rigs kyi bu gzhan yang byang chub sems dpa' ni lus dang srog la yang mi lta ba yin te/ de ni srog gi phyir yang sdig pa'i las mngon par 'du mi byed do/ /lus rtas par bya ba'i phyir ya nga ba'i 'tsho bas 'tsho bar mi byed do/ /de ni srog gi phyir yang gzhan la slong khro mi byed do/ /longs spyod kyi phyir mi dge ba mngon par 'du mi byed do/ /g.yog 'khor gyi phyir yang rtsod pa dang 'thab mo slong bar mi byed do/ /chung ma dang / bu dang / bu mo rnams kyi phyir yang gzhan dag la 'drid par mi byed do/ /gzhan gyi longs spyod dag la yang brnab sems skyed par mi byed/ ser sna'i sems skyed par mi byed do/ /de 'dod pa nyung ste sems skyed pa gcig kyang dge ba dang mi ldan pa skyed par mi byed na mang po lta ci smos/de de ltar brtson na 'dod chen dang chags pa spong bar 'gyur ro/ /'dod chen dang chags pa spangs na btsal bar bya ba 56-1-84b tshol bar mi byed do/ /btsal bar bya ba mi tshol na yang dag pa la brtson par 'gyur ro/ /yang dag pa la brtson na yang dag par 'gro ba thob par 'gyur ro/ /yang dag par song na yang dag pa'i bsgrub pa la gnas par 'gyur ro/ /yang dag pa la zhugs na/ yang dag pa'i dge ba'i bshes gnyen rnams mnyes par byed do/ /yang dag pa'i dge ba'i bshes gnyen rnams mnyes par byas nas sten par byed/ 'grogs par byed/ bsnyen bkur byed do/ /de dge ba'i bshes gnyen rnams dang bsten cing 'grogs la bsnyen bkur byed na dge ba'i bshes gnyen rnams las yang dag par nges pa'i chos rnams thos par 'gyur ro/ /thos nas kyang sgrub par byed do/ /de yang dag pa'i chos la zhugs nas log par sgrub pa la gnas pa'i sems can rnams kyi don thams cad byed do/ /de sems can gyi don la brtson na mi rigs par ltung bar mi 'gyur ro/ /de rigs pa la zhugs na 'di lta ste/ sems can rnams kyi dbang po mchog dang mchog ma yin pa shes pa'i tshul dang tshul ma yin pa la mkhas pa 'thob par 'gyur te/ rigs kyi bu de ltar na sbyin pa'i tshogs la spyod pa'i byang chub sems dpa' rnams ni yon tan gyi khyad par de lta bu dag thob par 'gyur ro/ / rigs kyi bu gzhan yang byang chub sems dpa' sems dpa' chen pos ni nang dang phyi rol gyi chos rnams la gcig gis 'du shes bskyed par bya'i gnyis kyi 'du shes bskyed par mi bya ste/ nang gi sa'i khams gang yin pa dang / phyi rol gyi sa'i khams gang yin pa 'di la gnyis su med de gnyis su byar med do/ /de ci'i phyir zhe na/ lus 'di ni rtswa dang shing dang / rtsig pa dang / lam snang ba dang 'dra ste/ spyod pa med pa/ byed pa med pa/ sems pa med pa/ snying po med pa khams kyis bsdus pa yin pa'i phyir ro/ /gal te 'di la la la zhig gis bcad dam/ gtubs sam/ dbyug pa'am/ mtshon cha 'am/ shing ngam/ bong bas bsnun kyang rung ste/ de la bdag gis tshor ba'i rnam par rig pa bskyed par mi bya'o/ /lus la blta bar mi bya'o/ /srog la chags pa bskyed par mi bya'o/ /sems can de dag la yang tha ba dang sdang ba'i sems 56-1-85a bskyed par mi bya'o snyam pa'i steng du des sems can de dag la byams pa'i sems bskyed par bya'o/ /rigs kyi bu dper na sman gyi shing ljon pa ni rtsa ba las khyer ram/ sdong po'am/ yal ga'am/ shun lpags sam/ lo ma'am/ me tog gam/ 'bras bu'am/ snying po las khyer na/ 'di snyam du bdag gi rtsa ba khyer la sdong po ma khyer cig ce'am/ bdag gi sdong po khyer la rtsa ba ma khyer cig ce'am/ bdag gi yal ga khyer la lo ma ma khyer cig ce'am/ bdag gi lo ma khyer la yal ga ma khyer cig ce'am/ de bzhin du bdag gi yal ga phre'u dang / me tog dang / 'bras bu dang / shun lpags dang / snying po las khyer la snying po med pa las ma khyer cig ce'am/ bdag gi snying po med pa las khyer la snying po las ma khyer cig snyam du rtog par mi byed de/ de ltar na sman gyi shing ljon pa ni thams cad kyi thams cad du rnam par rtog par mi byed mod kyi/ 'on kyang sman gyi shing ljon pa ni rnam par mi rtog bzhin du nad rab dang / 'bring dang / tha ma sel bar byed pa de bzhin du rigs kyi bu byang chub sems dpa' sems dpa' chen pos 'byung ba chen po bzhi'i lus 'di la sman gyi shing ljon pa lta bu'i 'du shes bskyed par bya'o/ /sems can gang dang gang dag la ci dang ci dgos pa de dang de de bzhin du khyer cig ces byas te/ lag pa 'dod pa la ni lag pa/ rkang pa 'dod pa la ni rkang pa/ mig 'dod pa la ni mig /sha 'dod pa la ni sha//khrag 'dod pa la ni khrag /rus pa 'dod pa la ni rus pa/ rkang 'dod pa la ni rkang / mgo bo 'dod pa la ni mgo bo/ yan lag dang nying lag thams cad 'dod pa la ni bdag gi yan lag dang nying lag thams cad khyer cig snyam ste/ rigs kyi bu de ltar sems pa'i byang chub sems dpa' sems dpa' chen po ni sbyin pa'i tshogs kyis bsod nams mi zad pas mngon par 'byung ba yin te/ byang chub sems dpa' sems dpa' chen po des sbyin pa byin pa na sems can ser sna can rnams kyi gtong ba yongs su rdzogs par bya ba'i phyir yongs su bsngo bar bya'o/ /sems can dbul po rnams kyis longs spyod 56-1-85b chen po 'thob par bya ba'i phyir yongs su bsngo bar bya'o/ /des yan lag dang nying lag rnams yongs su gtong ba na sems can thams cad kyi yan lag dang nying lag thams cad yongs su rdzogs par 'gyur ba'i phyir yongs su bsngo bar bya'o/ /des sbyin pa sbyin pa na dus thams cad du chos gsum du yongs su bsngo bar mi bya ste/ gsum gang zhe na/ 'di lta ste/ 'dod pa'i dga' ba dang / rgyal srid dang / longs spyod dang / dbang phyug thob par bya ba'i phyir yongs su bsngo bar mi bya ba dang / bdag nyid bsod nams dang ldan par bya ba'i phyir yongs su bsngo bar mi bya ba dang / nyan thos dang rang sangs rgyas kyi sa 'thob par bya ba'i phyir yongs su bsngo bar mi bya ba'o/ /des sbyin pa sbyin pa na sbyin pa de yan lag bzhi yongs su dag pa yongs su rdzogs par bya ba'i phyir yongs su bsngo bar bya ste/ de la yan lag bzhi yongs su dag pa yongs su rdzogs pa gang zhe na/ sangs rgyas kyi zhing yongs su dag par bya ba'i phyir yongs su bsngo bar bya ba dang / byang chub sems dpa'i dge 'dun yongs su dag par bya ba'i phyir yongs su bsngo bar bya ba dang / sems can thams cad yongs su smin par bya ba'i phyir yongs su bsngo bar bya ba dang /thams cad mkhyen pa'i ye shes yongs su dag par bya ba'i phyir yongs su bsngo bar bya ba ste/ de ltar na yan lag bzhi yongs su dag pa yongs su rdzogs par bya ba'i phyir byang chub sems dpa' sems dpa' chen pos sbyin pa de yongs su bsngo bar bya'o/ /rigs kyi bu gzhan yang byang chub sems dpa' sems dpa' chen pos sbyin pa nye bar brtan par bya'i zad par mi bya'o/ /de la byang chub sems dpa' rnams kyi sbyin pa ji ltar zad par 'gyur zhe na/ rigs kyi bu byang chub sems dpa' chos bzhi dang ldan pa rnams kyi sbyin pa ni zad par 'gyur te/ bzhi gang zhe na/ 'di lta ste/ yongs su ma bsngos pa dang / thabs mi mkhas pa dang / dma' bar skye bar 'dod pa dang / sdig pa'i grogs po la bsten pa ste rigs kyi bu byang chub sems dpa' chos bzhi po de dag dang ldan pa rnams kyi sbyin pa ni zad par 'gyur ro/ /rigs kyi bu byang chub sems 56-1-86a dpa' sems dpa' chen po chos bzhi dang ldan pa rnams kyi sbyin pa ni yongs su zad par mi 'gyur la nye bar brtan par 'gyur ro/ /bzhi gang zhe na/ 'di lta ste/ bla na med pa yang dag par rdzogs pa'i byang chub tu yongs su bsngo ba dang / thabs la mkhas pa dang / chos kyi rgyal srid 'dod pa dang / dge ba'i bshes gnyen la bsten pa ste/ rigs kyi bu byang chub sems dpa' sems dpa' chen po chos bzhi po de dag dang ldan pa rnams kyi sbyin pa ni yongs su zad par mi 'gyur la nye bar brtan par 'gyur ro/ /rigs kyi bu gzhan yang byang chub sems dpa' sems dpa' chen pos chos bzhi mngon du byas la sbyin pa sbyin par bya ste/ bzhi gang zhe na/ 'di lta ste/ byang chub kyi sems mi gtong ba dang / sems can la snying brtse ba dang / de bzhin gshegs pa'i bka' dang mi 'gal ba dang / chos dang zang zing gi sbyin pa'i rnam par smin pa la'ang mi re ba ste/ rigs kyi bu byang chub sems dpa' sems dpa' chen pos chos bzhi po de dag mngon du byas la sbyin pa sbyin par bya'o/ /rigs kyi bu gzhan yang byang chub sems dpa' sems dpa' chen pos sems can rnams chos gsum la dgod pa'i phyir sbyin pa sbyin par bya ste/ gsum gang zhe na/ 'di lta ste/ sems can thams cad byang chub la dgod pa dang / chos bstan pa de nyid la dgod pa dang / sems can thams cad bla na med pa'i bde ba la dgod pa'i phyir te/ rigs kyi bu chos gsum po de dag la sems can rnams dgod pa'i phyir byang chub sems dpa' sems dpa' chen pos sbyin pa sbyin par bya'o/ /rigs kyi bu gzhan yang chos gnyis 'dod pa'i byang chub sems dpa' sems dpa' chen pos sbyin pa sbyin par bya ste/ gnyis gang zhe na/ 'di lta ste/ longs spyod chen po dang / gtong ba'i sems te/ chos de gnyis 'dod pa'i byang chub sems dpa' sems dpa' chen pos sbyin pa sbyin par bya'o/ /rigs kyi bu gzhan yang chos gnyis yongs su spang ba'i phyir byang chub sems dpa' sems dpa' chen pos sbyin pa sbyin par bya ste/ gnyis gang zhe na/ 'di lta ste/ chags pa dang / 56-1-86b ser sna ste/ rigs kyi bu chos de gnyis yongs su spang ba'i phyir byang chub sems dpa' sems dpa' chen pos sbyin pa sbyin par bya'o/ /rigs kyi bu gzhan yang chos gnyis yongs su rdzogs par bya ba'i phyir/ byang chub sems dpa' sems dpa' chen pos sbyin pa sbyin par bya ste/ gnyis gang zhe na/ 'di lta ste/ shes rab dang ye shes te/ rigs kyi bu chos 'di gnyis yongs su rdzogs par bya ba'i phyir byang chub sems dpa' sems dpa' chen pos sbyin pa sbyin par bya'o/ /rigs kyi bu gzhan yang chos gnyis thob par bya ba'i phyir byang chub sems dpa' sems dpa' chen pos sbyin pa sbyin par bya ste/ gnyis gang zhe na/ 'di lta ste/ zad pa shes pa dang / mi skye ba shes pa ste/ rigs kyi bu chos 'di gnyis thob par bya ba'i phyir byang chub sems dpa' sems dpa' chen pos sbyin pa sbyin par bya'o/ /rigs kyi bu gzhan yang byang chub sems dpas gang dag sbyin par bya ba'i sbyin pa dag ni rnam pa bzhi ste/ bzhi gang zhe na/ 'di lta ste/ sems snyoms pa'i sbyin pa dang / rnam par smin pa la mi re ba'i sbyin pa dang / byang chub tu yongs su bsngo ba'i sbyin pa dang / dul ba dang / zhi ba dang / nye bar zhi ba yongs su rdzogs pa'i sbyin pa ste/ rigs kyi bu sbyin pa bzhi po de dag ni byang chub sems dpa' sems dpa' chen pos sbyin par bya ba dag go/ /rigs kyi bu de lta bas na byang chub sems dpa' bsod nams mi bzad pa mngon par 'byung bar 'dod pas sbyin pa'i tshogs 'di lta bu la brtson par bya'o/ /de skad ces bka' stsal pa dang / bcom ldan 'das la tshan po che chen po dri ma med pa'i gzi brjid kyis 'di skad ces gsol to/ /bcom ldan 'das 'di ltar de bzhin gshegs pas sangs rgyas kyi chos thams cad yongs su gzung ba'i slad du sbyin pa'i tshogs 'di bka' stsal pa ngo mtshar lags so/ /bcom ldan 'das byang chub sems dpa' sems dpa' chen po gang dag sbyin pa'i tshogs 'di lta bu dang ldan pa de dag ni nams kyang bsod nams yongs su nyams pa'am/ ye shes yongs su nyams pa'am/ 56-1-87a shes rab yongs su nyams par mi 'gyur lags so/ /bcom ldan 'das kyis bka' stsal pa/ rigs kyi bu de de bzhin no/ /khyod ji skad zer ba bzhin te/ byang chub sems dpa' sems dpa' chen po gang dag sbyin pa'i tshogs 'di lta bu dang ldan pa de dag ni bsod nams mi zad pa dang / bsod nams rgya mtshos mngon par 'byung bar 'gyur ro/ /de dag ni 'phags pa'i chos dang ldan pas dbul por yang mi 'gyur ro/ /de dag ni chos kyi rgyun dang ldan pas longs spyod chen por yang 'gyur ro/ /de dag ni nor bdun dang ldan pas phyug por yang 'gyur ro/ /de dag ni bsod nams brgya'i mtshan yod pas bsod nams chen po dang ldan pa yang yin no/ /de dag ni sems can thams cad nye bar 'tsho bas bsod nams kyi zhing yang yin no/ /bcom ldan 'das kyis tshan po che chen po dri ma med pa'i gzi brjid la gzhan yang bka' stsal pa/ rigs kyi bu de la byang chub sems dpa' rnams kyi tshul khrims kyi tshogs gang zhe na/ gang tshul khrims ma nyams pa dang / bslab pa yongs su mi gtong ba dang / tshul khrims 'chal pa rnams la snying rje ba dang / tshul khrims dang ldan pa rnams la gus pa drag po dang ldan pa dang / lus kyi yan lag gsum yongs su dag pa dang / ngag gi yan lag bzhi yongs su dag pa dang / yid kyi yan lag gsum yongs su dag pa dge ba bcu'i las kyi lam yang dag par blang ba rjes su sgrub pa ste/ gzhan dag kyang de la 'dzud pa dang / de dag la 'god par byed pa dang / bdag la mi stod pa dang / gzhan dag la mi smod pa dang / tshul khrims dag la de'i ngang can du gyur pa dang / tshul khrims kyis mi rlom pa dang / brtson pa mi 'dor ba dang / sbyangs pa'i yon tan dang yo byad bsnyungs pa dag las mi g.yo ba dang / 'phags pa'i rigs gnas par byed pa dang / rang gi sems srung ba dang / gzhan gyi 'khrul pa dag la skyon du mi lta ba dang / sdig pa thams cad mi byed pa dang / srid pa mngon par 'grub pa la mngon par mi dga' ba dang / gzhan rnams dge ba'i rtsa ba dag la 'dzud pa dang / gzhan gyi 56-1-87b bya bdag la spro ba dang / bde ba dag la de'i ngang can du mi 'gyur ba dang / dgon par gnas pa mi 'dor ba dang / nad pa rnams kyi g.yog byed pa dang / byas nas kyang dga' ba dang / mchog tu dga' bar 'gyur ba dang / ji skad smras pa de bzhin byed pa dang / bkur sti mi byed pa dag la dang du len pa dang / bkur sti byed pa rnams la khengs par mi byed pa dang /rnyed pa dang ma rnyed pa dang / grags pa dang ma grags pa dang / smad pa dang bsngags pa dang / bde ba dang sdug bsngal ba dag la khengs par yang mi 'gyur/ zhum par yang mi 'gyur ba dang / rjes su chags pa dang / khong khro ba spong ba dang / khon du mi 'dzin pa dang / rtag tu rgyun mi 'chad par byams pa la gnas pa dang / mdza' bshes dang dgra rnams la sems snyoms par lta ba dang / tshul khrims kyi phung po la mchog tu mi 'dzin pa dang / theg pa gzhan du yongs su mi sngo ba dang / lha gzhan la phyag mi 'tshal ba dang / lta bar gyur pa thams cad dang bral ba dang / bag la nyal dang kun nas ldang ba rnam par gnon pa dang / 'gyod pa spong ba dang / yid la gcags pa med pa dang / dngos po thams cad yongs su gtong ba la mchog tu dga' ba dang / skye ba'i gnas thams cad la lhag par chags pa med pa dang / bsams bzhin du srid pa'i 'gro bar skye ba dang / mi dga' ba bzod pa dang / brtson 'grus rtsom pa dang / sems rab tu 'dzin pa dang / dmigs pa la rnam par g.yengs pa med pa dang / mi skye ba'i chos la bzod cing mi skrag pa ste/ rigs kyi bu de ltar na 'di ni byang chub sems dpa'i tshul khrims kyi tshogs yin te/ tshul khrims kyi tshogs de la brten nas srog gi phyir yang bslab pa nyams par mi byed de/ de ni rgyal srid kyi phyir tshul khrims srung bar mi byed do/ /mtho ris kyi phyir ma yin/ brgya byin du 'gyur ba'i phyir ma yin/ tshangs par 'gyur ba'i phyir ma yin/ longs spyod kyi phyir ma yin/ dbang phyug gi phyir ma yin/ kha dog gi phyir ma yin/ grags pa'i phyir ma yin/ snyan pa dang sgra dang tshigs su bcad pa'i 56-1-88a phyir ma yin/ rnyed pa'i phyir ma yin/ bkur sti'i phyir ma yin/ srog gi phyir ma yin/ gos kyi phyir ma yin/ zas kyi phyir ma yin/ mal cha dang stan gyi phyir ma yin te/ na ba'i gsos dang / sman zong gi phyir tshul khrims srung bar mi byed do/ /mig dang / rna ba dang / sna dang / lce dang / lus la rten te tshul khrims srung bar mi byed do/ /gzugs dang / sgra dang / dri dang / ro dang / reg bya dang / chos la rten te tshul khrims srung bar mi byed do/ /gzugs la rten te tshul khrims srung bar mi byed do/ /tshor ba dang / 'du shes dang / 'du byed dang / rnam par shes pa la rten te tshul khrims srung bar mi byed do/ /'dod pa'i khams la rten te tshul khrims srung bar mi byed do/ /gzugs kyi khams la rten te tshul khrims srung bar mi byed do/ /gzugs med pa'i khams la rten te tshul khrims srung bar mi byed do/ /sems can dmyal ba'i 'jigs pas skrag ste/ tshul khrims srung bar mi byed do/ /dud 'gro'i skye gnas kyi 'jigs pas skrag ste tshul khrims srung bar mi byed do/ /gshin rje'i 'jig rten gyi 'jigs pas skrag ste skyabs 'dod pa'i phyir tshul khrims srung bar mi byed do/ /mi dbul po'i 'jigs pas skrag ste tshul khrims srung bar mi byed do/ /lha dbul po'i 'jigs pas skrag pa dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dbul po'i 'jigs pas skrag ste/ tshul khrims srung bar mi byed de/ gzhan du na sangs rgyas kyi tshul gnas par bya ba'i phyir tshul khrims srung bar byed do/ /sangs rgyas kyi rigs gnas par bya ba dang / chos kyi rigs gnas par bya ba dang / dge 'dun gyi rigs gnas par bya ba'i phyir tshul khrims srung bar byed do/ /skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa las yang dag par 'da' bar bya ba'i phyir tshul khrims srung bar byed do/ /sems can thams cad rab tu dgrol bar 56-1-88b 'dod de tshul khrims srung bar byed do/ /sems can thams cad la phan pa dang / bde ba dang /grub pa dang / bde ba 'dod de tshul khrims srung bar byed do/ /sangs rgyas kyi chos gnas par 'dod de tshul khrims srung bar byed do/ /chos kyi 'khor lo bskor bar 'dod de tshul khrims srung bar byed do/ /'phags pa'i dge 'dun yongs su bsdu bar 'dod de tshul khrims srung bar byed do/ /sangs rgyas kyi rigs mi 'chad par 'dod pa dang / chos kyi rigs mi 'chad par 'dod pa dang / dge 'dun gyi rigs mi 'chad par 'dod de tshul khrims srung bar byed do/ /'phags pa'i rigs yongs su spyad par 'dod de tshul khrims srung bar byed do/ /lha'i mngon par shes pa 'dod pa dang / ting nge 'dzin 'dod pa dang / shes rab 'dod pa dang / rnam par grol ba 'dod pa dang / rnam par grol ba'i ye shes mthong bar 'dod de tshul khrims srung bar byed do/ /rdzu 'phrul 'dod pa dang / cho 'phrul 'dod de tshul khrims srung bar byed de/ de'i tshul khrims de yang ma nyams pa dang / ma zhig pa dang / ma 'dres pa dang / ma 'chol ba dang / rang dbang yod pa dang / legs par tshar phyin pa dang / legs par bsams pa dang / ma nogs pa dang / rma med pa dang / gtsang ba dang / dri zhim pa dang / mkhas pas bsngags pa dang / sangs rgyas thams cad kyis bstod pa dang / ma smas pa dang / chos kyi rjes su 'thun pa'i chos sgrub pa snying por byed pa yin no/ /de tshul khrims kyi phung po de lta bu dang ldan pas chos bcu las nyams par mi 'gyur te/ bcu gang zhe na/ 'di lta ste/ 'khor los sgyur ba'i rgyal srid las yongs su nyams par mi 'gyur te/ de la yang bag yod la byang chub 'dod pa dang / brgya byin las yongs su nyams par mi 'gyur te/ de la yang bag yod la byang chub 'dod cing sangs rgyas mthong ba 'ba' zhig 'dod pa dang / tshangs pa las yongs su nyams par mi 'gyur te/ de la yang bag yod la byang chub 'dod pa dang / shes nas dang ba thob pa'i phyir sangs rgyas mthong ba las yongs su nyams par mi 'gyur ba dang / ji ltar thos pa'i chos la nan tan du bsgrub pa'i phyir chos thos pa las 56-1-89a yongs su nyams par mi 'gyur ba dang / byang chub sems dpa'i dam bcas pa shes pa las yongs su nyams par mi 'gyur ba dang / dge ba'i rtsa ba'i chos thams cad shes pa 'dod pa'i phyir spobs pa mi chod pa las yongs su nyams par mi 'gyur ba dang / bsam gtan las yongs su nyams par mi 'gyur ba dang / sangs rgyas dang / rang sangs rgyas dang / nyan thos dang / byang chub sems dpa' thams cad kyis bsngags pa las yongs su nyams par mi 'gyur ba dang / mngon par shes pa myur ba dang / thams cad mkhyen pa'i ye shes yongs su rdzogs par bya ba las yongs su nyams par mi 'gyur ba ste/ tshul khrims kyi phung po de lta bu dang ldan pa'i byang chub sems dpa' sems dpa' chen po de ni chos bcu po de dag las yongs su nyams par mi 'gyur ro/ /tshul khrims kyi phung po de lta bu la gnas pa'i byang chub sems dpa' sems dpa' chen po ni lha rnams kyis rtag tu phyag byas pa yin no/ /klu rnams kyis rtag tu bsngags pa yin no/ /gnod sbyin rnams kyis rtag tu bkur sti byas pa yin no/ /dri za rnams kyis rtag tu mchod pa yin no/ /klu'i dbang po dang / lha ma yin rnams kyis rtag tu bsnyen bkur byas pa yin no/ /rgyal rigs dang / bram ze dang / tshong dpon dang / khyim bdag rnams kyis rtag tu bkur ba yin no/ /mkhas pa rnams kyis rtag tu thad du 'gro bar bya ba yin no/ /sangs rgyas rnams kyis rtag tu dgongs pa yin no/ /lha dang bcas pa'i 'jig rten gyis rtag tu ston par bkur ba yin no/ /sems can thams cad la snying brtse ba can yin no/ /de ltar tshul khrims kyi phung po yang dag par srung ba'i byang chub sems dpa' sems dpa' chen po de ni 'gro ba bzhir 'gro bar mi 'gyur te/ bzhi gang zhe na 'di lta ste/ sems can yongs su smin par bya ba'i ched ma gtogs par mi khom pa'i 'gro bar 'gro bar mi 'gyur ba dang / sangs rgyas mi bzhugs pa'i sangs rgyas kyi zhing gi 'gro bar 'gro bar mi 'gyur ba dang / log par lta ba'i rigs su skye ba'i 'gro bar 'gro bar mi 'gyur ba dang / 56-1-89b ngan 'gro thams cad kyi 'gro bar 'gro bar mi 'gyur ba ste/ de ltar tshul khrims kyi phung po legs par yang dag par srung ba'i byang chub sems dpa' sems dpa' chen po ni 'gro ba bzhi po de dag tu 'gro bar mi 'gyur ro/ /gzhan yang de ltar tshul khrims kyi phung po yang dag par srung ba'i byang chub sems dpa' sems dpa' chen po ni chos bzhi las yongs su nyams par mi 'gyur te/ bzhi gang zhe na/ 'di lta ste/ rdzogs pa'i byang chub kyi sems las yongs su nyams par mi 'gyur ba dang / sangs rgyas rjes su dran pa las yongs su nyams par mi 'gyur ba dang / ji ltar thos pa dang / kun chub par byed pa'i chos rnams las yongs su nyams par mi 'gyur ba dang / bskal pa grangs med pa rjes su dran pa las yongs su nyams par mi 'gyur ba ste/ de ltar tshul khrims kyi phung po yang dag par srung ba'i byang chub sems dpa' sems dpa' chen po ni chos bzhi po de dag las yongs su nyams par mi 'gyur ro/ /rigs kyi bu de ltar tshul khrims kyi phung po yang dag par srung ba'i byang chub sems dpa' sems dpa' chen po ni rnam par 'jig pa bzhi dang phrad par mi 'gyur te/ bzhi gang zhe na/ 'di lta ste/ dam pa'i chos rnam par 'jig pa dang phrad par mi 'gyur ba dang / mtshon gyi bar gyi bskal pa dang phrad par mi 'gyur ba dang / mu ge'i bar gyi bskal pa dang phrad par mi 'gyur ba dang / nad kyi bar gyi bskal pa dang phrad par mi 'gyur ba ste/ rigs kyi bu de ltar tshul khrims kyi phung po yang dag par srung ba'i byang chub sems dpa' sems dpa' chen po ni rnam par 'jig pa bzhi po de dag dang phrad par mi 'gyur ro/ /rigs kyi bu gzhan yang de ltar tshul khrims kyi phung po la gnas pa'i byang chub sems dpa' sems dpa' chen po ni mngon par mtho ba bzhi thob par 'gyur te/ bzhi gang zhe na/ 'di lta ste/ sangs rgyas bcom ldan 'das rnams la mi slu ba dang / lha la mi slu ba dang / sems can rnams la mi slu ba dang / rang gi sems la mi slu ba ste/ de ltar tshul khrims kyi phung po la gnas pa'i byang chub sems dpa' sems dpa' chen po ni mngon par mtho ba bzhi po de dag thob par 'gyur ro/ /rigs kyi 56-1-90a bu gzhan yang de ltar tshul khrims kyi phung po la gnas pa'i byang chub sems dpa' sems dpa' chen po ni 'jigs pa bcu las yang dag par 'da' bar 'gyur te/ bcu gang zhe na/ 'di lta ste/ sems can dmyal ba'i 'jigs pa las yang dag par 'da' bar 'gyur ba dang / dud 'gro'i skye gnas kyi 'jigs pa las yang dag par 'da' bar 'gyur ba dang / gshin rje'i 'jig rten gyi 'jigs pa las yang dag par 'da' bar 'gyur ba dang / dbul ba'i 'jigs pa las yang dag par 'da' bar 'gyur ba dang / bsngags pa dang / snyan pa dang / grags pa dang / sgra dang / tshigs su bcad pa ma yin pa'i 'jigs pa dang / bdud kyis kun nas dkris pa'i 'jigs pa dang / nyan thos dang / rang sangs rgyas kyi nges pa'i 'jigs pa dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / grul bum dang / srin po'i 'jigs pa dang / dug dang / mtshon dang / me dang / chu'i 'jigs pa dang / seng ge dang / stag dang / sbrul dang / dom dang / dred dang / gzig dang / khyi dang / wa dang / chu srin ma ka ra dang / chu srin byis pa gsod dang / chu srin kum b+hi ra dang / byi la dang / byi ba dang / sdig pa dang / srin gyi me dang / sbrul gdug pa dang / rgyal po dang / chom rkun gyi 'jigs pa rnams las yang dag par 'da' bar 'gyur ba ste/ de ltar tshul khrims kyi phung po la gnas pa'i byang chub sems dpa' sems dpa' chen po ni 'jigs pa bcu po de dag las yang dag par 'da' bar 'gyur ro/ /rigs kyi bu sangs rgyas kyi chos rnams kyi rten ni tshul khrims yin te/ byang chub dang sangs rgyas kyi chos rnams ni tshul khrims kyi phung po la gnas so/ /gang la tshul khrims yod pa de la ni ting nge 'dzin 'di yod do/ /gang la tshul khrims yod pa de la ni shes rab 'di yod do/ /gang la tshul khrims yod pa de la ni rnam par grol ba 'di yod do/ /gang la tshul khrims yod pa de la ni rnam par grol ba'i ye shes mthong ba 'di yod do/ /rigs kyi bu de la 56-1-90b gang nyon mongs pa rnams rab tu zhi ba'i tshul khrims ni gang yin/ ci'i phyir na nyon mongs pa rnams zhes bya zhe na/ nyon mongs par byed pas na nyon mongs pa rnams te/ 'di ltar khams gsum du sems can rnams nyon mongs par byed pas na nyon mongs pa rnams zhes bya'o/ /de dag zhi bar byed pa gang zhe na/ gang rtog pa med pa dang / rnam par rtog pa med pa dang / yongs su rtog pa med pa dang / rgyu ba med pa dang / skye ba med pa dang / kun tu rtog pa med pa dang / yid la byed pa med pa ste/ 'di ni nyon mongs pa rnams rnam par zhi ba zhes bya'o/ /rigs kyi bu byang chub sems dpa' sems dpa' chen po gang su dag nyon mongs pa rab tu zhi ba mi shes pa de dag gi tshul khrims kyi phung po ni yongs su dag pa ma yin no/ /de ci'i phyir zhe na/ de dag ni tshangs pa'i 'jig rten du song yang nyon mongs pa dang bcas par zad do/ /de dag ni srid pa'i rtse mor song yang nyon mongs pa dang bcas par zad do/ /rigs kyi bu de bas na rnam grangs 'dis kyang khyod kyis gang la khams gsum pa'i nyon mongs pa rnams med pa de'i tshul khrims kyi phung po ni yongs su dag pa yin par de ltar rig par bya'o/ /de nas bcom ldan 'das la tshan po che chen po dri ma med pa'i gzi brjid kyis 'di skad ces gsol to/ /bcom ldan 'das gal te khams gsum pa'i nyon mongs pa rnams ma mchis pa de'i tshul khrims kyi phung po yongs su dag pa lags na/ bcom ldan 'das nyon mongs pa dang bral ba'i byang chub sems dpa' de ji ltar khams gsum par smon par bgyid/ de skad ces gsol pa dang / bcom ldan 'das kyis tshan po che chen po dri ma med pa'i gzi brjid la 'di skad ces bka' stsal to/ /rigs kyi bu byang chub sems dpa' sems dpa' chen po rnams ni kun nas nyon mongs par bya ba'i phyir khams gsum par smon par mi byed de/ rigs kyi bu gang dag bdag nyid kyang nyon mongs pa med la/ sems can yongs su smin par bya ba'i phyir khams gsum du yang kun nas nyon mongs par 'gyur ba de ni byang chub sems dpa' rnams kyi thabs yin no/ /rigs kyi bu 'di lta ste 56-1-91a mi la la zhig gis nam mkha' la ri mo rnam pa sna tshogs bkra ba ston par byed na/ rigs kyi bu 'di ji snyam du sems/ ci mi de dka' ba byed pa yin nam/ gsol pa/ bcom ldan 'das de de lta lags so/ /bde bar gshegs pa de de lta lags te/ mi de ni dka' ba bgyid pa lags so/ /bcom ldan 'das kyis bka' stsal pa/ rigs kyi bu byang chub sems dpa' gang dag bdag nyid kyang nyon mongs pa med la sems can yongs su smin par bya ba'i phyir khams gsum du yang kun nas nyon mongs par 'gyur ba dang / sems can yongs su smin par byas nas kyang theg pa gsum ston par byed pa de dag ni de bas kyang ches dka' ba byed pa yin no/ /gsol pa/ bcom ldan 'das byang chub sems dpa' sems dpa' chen po gang dag thar pa'i sgo yang mthong la/ sems can rnams la snying brtse ba'i slad du khams gsum na yang gnas pa de dag ni snying rje chen po dang ldan pa lags so/ /bcom ldan 'das dper bgyi na/ dgum pa'i gnod pa las thar pa lags pa'i mi slar dgum pa'i gnod pa'i gnas su mchis te/dgum pa'i gnod pa bgyid pa rnams la 'di skad du bdag sod cig /gzhan ma gsad cig ces mchi ba de bzhin du bcom ldan 'das dgum pa'i gnod pa'i gnod pa lta bu ni khams gsum lags so/ /dgon par bgyi ba lta bu ni 'jig rten gnas pa lags so/ /dgum pa'i gnod pa bgyid pa lta bu ni 'du byed rnams lags so/ /dgum pa'i gnod pa spangs pa lta bu ni byang chub sems dpa' sems dpa' chen po khams gsum las rnam par grol ba de dag lags te/ sems can yongs su smin par bgyi ba dang / sems can yongs su dgrol bar bgyi ba'i slad du khams gsum 'ba' zhig tu rgyu lags so/ /bcom ldan 'das byang chub sems dpa' sems dpa' chen po rnams kyis ni snying rje chen po'i sems bskyed pa des nyan thos dang / rang sangs rgyas thams cad zil gyis gnon to/ /de ci'i slad du zhe na/ bcom ldan 'das nyan thos dang / rang sangs rgyas thams cad la ni de lta bu'i snying rje chen po yang ma mchis/ thabs la mkhas pa yang ma mchis pa'i slad du'o/ /de nas 56-1-91b yang bcom ldan 'das kyis tshan po che chen po dri ma med pa'i gzi brjid la bka' stsal pa/ rigs kyi bu byang chub sems dpa' sems dpa' chen pos thos pa'i tshogs la ni ji ltar brtson par bya/ des thos pa ni ji ltar btsal bar bya zhe na/ rigs kyi bu 'di la byang chub sems dpa' sems dpa' chen pos mkhan po dang / slob dpon la nga rgyal bcom pa dang / bka' blo bde bas bla ma'i sri zhu dang / gus pa dang / phangs pa dang / gces pa'i sems bskyed par bya'o/ /des chos la ni sman gyi 'du shes bskyed par bya'o/ /mkhan po dang slob dpon rnams la ni ston pa'i 'du shes bskyed par bya'o/ /des bdag la ni nad pa'i 'du shes bskyed par bya'o/ /des chos kyi gdams ngag ston pa la ni sman pa'i 'du shes bskyed par bya'o/ /des sems can thams cad la ni nad pa'i 'du shes bskyed par bya'o/ /des sangs rgyas kyi chos tshol ba ni lus la phangs par mi bya'o/ /srog la lhag par chags pa bskyed par mi bya'o/ /dngos po sna tshogs yongs su 'dzin pa rnams la yang des shin du nyon mongs pa'i 'du shes bskyed par mi bya'o/ /nor phun sum tshogs pa la yang des chags pa bskyed par mi bya'o/ /chos gtso bor byas te nor thams cad yongs su gtang bar bya'o/ /dam pa'i chos kyi don dang dam pa'i chos yongs su gzung ba'i phyir 'jig rten pa thams cad yongs su gtang bar bya'o/ /chos kyi rnyed pa 'dod pas rnyed pa dang / bkur sti dang / tshigs su bcad pa yongs su gtang bar bya'o/ / chos kyi rgyal srid 'dod pa'i phyir rgyal srid thams cad yongs su gtang bar bya'o/ /nyon mongs pa thams cad yongs su gtang bar 'dod pas dam pa'i chos yongs su btsal ba la brtson par bya'o/ /sems can thams cad yongs su bskyab par 'dod pas dam pa'i chos yongs su gzung ba la brtson par bya'o/ /dam pa'i chos yongs su 'dzin pa'i byang chub sems dpa' sems dpa' chen po rnams kyis dge ba'i rtsa ba thams cad yongs su 'dzin pa thob par 'gyur ro/ /rigs kyi bu de bas na byang chub 'dod pa dang / byang chub mngon par rdzogs par 'tshang rgya bar 'dod 56-1-92a pa dang / shes rab kyi ka ba bsgreng bar 'dod pa rnams kyis thos pa la brtson par bya'o/ /rigs kyi bu 'di lta ste/ dper na khang bzangs rnam par rgyal byed ni ka bas brtan pas sum cu rtsa gsum pa'i lha rnams 'du bar 'gyur ba de bzhin du/ rigs kyi bu shes rab kyi ka ba ni thos pa'i stobs kyis yongs su bzung bas gnas la/ byang chub sems dpa' sems dpa' chen po rnams dang / lha dang bcas pa'i 'jig rten 'du bar 'gyur ro/ /rigs kyi bu byang chub sems dpa' gang byang chub tu sems skyed nas byang chub sems dpar dam bcas te/ bdag sangs rgyas su gyur cig ces smras la de yang thos pa yongs su tshol ba la mi brtson na sems can thams cad shes rab 'chal par bya ba la zhugs pa yin no/ /rigs kyi bu gang gi tshe byang chub sems dpa' sems dpa' chen po thos pa yongs su tshol ba la brtson 'grus rtsom par byed na/ des ni sems can thams cad kyi shes rab yongs su rdzogs par bya ba'i phyir nye bar brtan pa byas pa yin no/ /lha rnams kyang de'i tshe de la mgu zhing yid bde bar gyur nas a la la skyes bu dam pa 'dis ni thos pa dang / brtson 'grus dang / shes rab sbyangs pa'i blos stobs bcu thob par nus so/ /a la la skyes bu dam pa 'dis ni shes rab kyi mtshon gyis nyon mongs pa'i dra ba'i rgyud thams cad rnam pa thams cad du gcad par nus so/ /a la la skyes bu dam pa 'dis ni sems can thams cad kyi nyon mongs pa spang ba'i phyir chos ston par nus so/ / a la la skyes bu dam pa 'dis ni sngon gyi rgyal ba bzhugs bzhugs pa'i byang chub kyi snying po la 'dug par nus so/ /a la la skyes bu dam pa 'dis ni bdud dpung dang bzhon pa dang bcas pa pham par byed nus so/ /a la la byang chub sems dpa' 'dis ni rnam pa bcu gnyis dang ldan pa'i chos kyi 'khor lo bskor bar nus so zhes ched du rjod par byed do/ /rigs kyi bu gang gi tshe byang chub sems dpa' chos nyan pa la brtson pa de'i tshe rigs kyi bu bdud kyi gnas thams cad mog mog por 'gyur ro/ /stong gsum gyi stong chen po'i 'jig rten gyi khams kyi bdud sdig 56-1-92b can rnams dang / bdud kyi ris kyi lha gang dag yin pa de dag thams cad de'i tshe sdug bsngal zhing yid mi bde bar 'gyur te/ 'di ni bdag cag gi dbang du mi 'gyur ro/ /'di la ni bdag cag dbang med do/ /'dis ni bdag cag rnam pa thams cad du bcom mo/ /'dis ni bdag cag dbang du byas so snyam mo/ /de ci'i phyir zhe na/ rigs kyi bu 'di ltar thos pa dang ldan na shes rab skye bar 'gyur ro/ /shes rab dang ldan na nyon mongs pa zhi bar 'gyur ro/ /nyon mongs pa med na bdud kyis glags mi rnyed do/ /thos pa dang ldan na rtog par 'gyur ro/ /rtog pa yod na tshul bzhin du chos yongs su tshol bar 'gyur ro/ /tshul bzhin du chos yongs su tshol ba la brtson na bdud sngig can gyis glags mi rnyed do/ /thos pa dang ldan na log par lta ba dang bral bar 'gyur la yang dag pa'i lta ba yang skyed par 'gyur ro/ /yang dag par zhugs na bdud kyis glags mi rnyed do/ /yang dag par zhugs na don la nye bar rtog pa dang gnod pa dang 'bral bar 'gyur ro/ /don 'dod na don la yang dag par 'brang bar 'gyur te/ rigs kyi bu rnam grangs des kyang thos pa mang po la brtson pa'i byang chub sems dpa' sems dpa' chen po ni bdud bzhi pham par byed nus par 'gyur ba de ltar rig par bya'o/ /bzhi gang zhe na/ 'di lta ste/ phung po'i bdud dang / nyon mongs pa'i bdud dang / 'chi bdag gi bdud dang / lha'i bu'i bdud de/ bdud bzhi po 'di dag pham par byed nus so/ /rigs kyi bu gzhan yang ji ltar sngon gyi byang chub sems dpa' chos don du gnyer ba dang / chos 'dod pa rnams kyis thos pa yongs su btsal ba de las chung zad tsam khyod la bstan par bya'o/ /rigs kyi bu sngon byung ba 'das pa'i dus bskal pa grangs med pa bas kyang ches grangs med pa/ yun ring po tshad med bsam gyis mi khyab pa/ 'das pa de'i tshe de'i dus na drang srong chen po mchog ces bya ba/ nags dang / nags 'dab dang / ri la gnas pa/ mngon par shes pa lnga dang ldan pa/ rtag tu byams pa la gnas pa dang / snying rje la gnas pa zhig byung ste/ drang srong de mchog tu 56-1-93a gyur to/ /de nags khung de dag na gnas pa na 'di snyam du sems te/ bdag byams pa la gnas pa 'di ni sems can rnams kyi dga' ba skyed par yang mi 'gyur la/ byams pa 'dis ni sems can rnams kyi 'dod chags dang / zhe sdang dang / gti mug rnams dang bskal pa mtha' yas pa nas bsags pa'i nyon mongs pa thams cad kyang nye bar zhi bar byed mi nus so/ /byams pa 'dis ni 'phags pa'i yang dag pa'i lta ba yang bskyed par mi nus so snyam mo/ /de yang 'di snyam du sems te/ 'phags pa'i yang dag pa'i lta ba gang las skye zhig gu snyam mo/ / de la rtog pa 'di lta bu zhig byung ste/ 'phags pa'i yang dag pa'i lta ba skye ba la ni rgyu gnyis dang / rkyen gnyis yod de/ gnyis gang zhe na/ 'di lta ste/ gzhan gyi sgra dang / so sor rang gi tshul bzhin yid la byed pa ste/ 'di gnyis ni 'phags pa'i yang dag pa'i lta ba skye ba'i rgyu gnyis dang rkyen gnyis po yin snyam mo/ /de de'i tshe chos yongs su tshol ba la brtson pa'i blo skyes te/ legs par gsungs pa bdag gis ga las rnyed par 'gyur snyam mo/ /de chos kyi phyir chos yongs su tshol ba la brtson nas grong dang / grong khyer dang / grong rdal dang / ljongs dang / yul 'khor dang / rgyal po'i pho brang du song nas chos btsal to/ /btsal kyang chos smra ba 'ga' yang ma rnyed do/ /de nas de'i mdun du bdud kyi ris kyi lha zhig byung ste/ de drang srong de'i thad du song nas 'di skad ces smras so/ /sangs rgyas bcom ldan 'das rnams las sangs rgyas kyis gsungs pa'i sangs rgyas kyi mtshan gyi tshigs su bcad pa gcig bzung ba nga la yod do/ /drang srong des smras pa/ smros shig /lha des smras pa/ gal te khyod kyis rang gi lus las pags pa bshus te nyi ma la skams nas shog bur byas te/ rang gi khrag dang sbyar bas snag tsha byas la rang gi rus pas smyug gu byas te/ nga las tshigs su bcad pa de 'dri na de lta na sangs rgyas kyis gsungs pa'i tshigs su bcad pa de ngas khyod la sbyin no/ /rigs kyi bu de nas drang srong chen po mchog 'di snyam du sems te/ bdag gi lus 'di 'khor ba thog ma med pa nas 56-1-93b skye ba de dang de dag dang skye ba'i gnas de dang de dag tu bskal pa 'bum phrag mang por nyes pa byas nas/ dgra dang gshed ma'i lag tu song nas chom rkun dang rgyal pos bkrabs pa la sogs pas mtshon rnon pos yan lag dang nying lag thams cad dum bu du mar bcad cing gtubs te 'dod pa'i phyir dang / nor gyi phyir dang / bcad pa dang / bcing ba dang / brdeg pa dang / bsdigs pa la sogs pa dka' ba 'bum nyams su myong mod kyi/ 'on kyang bdag gi lus de dag dang / tshor ba de dag gis sems can su la yang don ci yang byas pa med na/ da bdag gis snying po med pa'i lus 'dis chos rnyed par 'gyur ba ni bdag gis rnyed pa legs par rnyed do snyam nas/ dga' zhing mgu la yi rangs te/ lha de la yang slob dpon gyi 'du shes bskyed nas mtshon rnon pos rang gi lus las pags pa bshus te nyi ma la skams nas shog bur byas te/ rang gi lus las khrag gzags nas rang gi khrag gis snag tsha sbyar te/ rang gi rus pas smyug gu byas nas lha de la thal mo sbyar te 'di skad ces smras so/ /lha sangs rgyas kyis gsungs pa'i sangs rgyas kyi mtshan bsdus pa'i tshigs su bcad pa de bdag la gsungs shig / khyod kyis ji skad bsgo ba bzhin du bdag gis bgyis lags te/ bdag gis pags pa bshus nas skams te shog bur bgyis nas rang gi khrag gis snag tsha sbyar te/ rang gi rus pas smyug gu bgyis lags so zhes byas so/ /rigs kyi bu de nas bdud kyi ris kyi lha des drang srong chen po mchog de'i gus pa dang / don du gnyer ba de lta bu mthong nas/ gnong gnong ltar byas te/ de nyid du mi snang bar gyur to/ /rigs kyi bu de nas drang srong chen po mchog des de'i tshe lha de mi snang bar gyur par rig nas 'di snyam du sems te/ bdag gis tshigs su bcad pa de ma thos su zin kyang / gang gi phyir bdag gis chos la gus pa chen pos rang gi pags pa bshus te skams nas rang gi khrag dang sbyar ba dang / rang gi rus pa phyung ste smyug gu byas pas bdag gi chos la gus pa'i dge ba'i rtsa ba 'di chud za bar mi 'gyur ro/ /slu bar yang mi 'gyur ro/ /'on 56-1-94a kyang bdag gis lhag pa'i bsam pa dang / g.yo ba med pas sems can rnams la snying rje'i sems bskyed nas/ lus dang srog la mi lta bar pags pa shog bur byas te rang gi khrag gis sbyar nas/ rus pas smyug gu byas pa'i chos la gus pa'i bden pa dang bden pa'i tshig gang yin pa'i bden pa dang bden pa'i tshig des na 'jig rten gyi khams 'di dang 'jig rten gyi khams gzhan dag na chos gsung zhing chos ston pa bdag nyid chen po su bzhugs kyang rung ste/ de dag gis bdag la zhal bstan par gsol/ bdag la chos kyang thos par mdzad du gsol zhes byas so/ /rigs kyi bu de ltar drang srong chen po mchog gis tshig de skad ces smras ma thag tu skad cig de dang / thang cig de dang / yud tsam de nyid la 'og gi phyogs su sangs rgyas kyi zhing 'di nas sangs rgyas kyi zhing sum cu rtsa gnyis 'das pa na 'jig rten gyi khams kun nas dri ma med pa zhes bya ba zhig yod de/ de na de bzhin gshegs pa dgra bcom pa yang dag par rdzogs pa'i sangs rgyas dri ma med par grags pa'i rgyal po zhes bya ba bzhugs te 'tsho zhing gzhes la chos kyang ston to/ /des drang srong chen po mchog de'i lhag pa'i bsam pa thugs su chud de/ 'dzam bu'i gling 'di'i sems can yongs su smin pa yang gzigs nas dper na skyes bu stobs dang ldan pa'i lag pa bskum pa las rkyong pa'am/ brkyang pa las skum pa bzhin du skad cig thang cig yud tsam de la de bzhin gshegs pa dri ma med par grags pa'i rgyal po de byang chub sems dpa' lnga brgya dang thabs cig tu de nas mi snang bar gyur nas/ drang srong chen po mchog gi mdun du bzhugs te/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dri ma med par grags pa'i rgyal po de byung ma thag tu de'i mod la nags khung de snang ba chen pos khyab par gyur to/ /me tog gi char chen po yang bab bo/ /de'i tshe nags khung de na shing gi yal ga dang / lo ma dang / mgo lcogs dang /me tog dang / 'bras bu thams cad las chos ston pa'i sgra dag byung ngo / /de'i tshe lha 56-1-94b bye ba khrag khrig 'bum phrag du ma 'dus par gyur to/ /de nas drang srong chen po mchog la bcom ldan 'das de bzhin gshegs pa dri ma med par grags pa'i rgyal po de'i 'od kyis phog ma thag tu/ de nas de'i mod la kha dog dang gzugs snga mkho bzhin du gyur te/ rma dang snad pa med par gyur to/ /de nas drang srong chen po mchog gis bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de'i zhabs la mgo bos phyag 'tshal nas/ bcom ldan 'das la lan gsum bskor ba byas te sor mo bcu'i thal mo sbyar ba spyi bor bzhag nas de bzhin gshegs pa dri ma med par grags pa'i rgyal po la 'di skad ces gsol to/ /bcom ldan 'das ni bdag gi ston pa lags so/ /bde bar gshegs pa ni bdag gi ston pa lags so/ /bdag ni bcom ldan 'das dang / chos dang / dge slong gi dge 'dun la skyabs su mchi'o/ /ci nas bdag gis chos thos nas log par zhugs pa'i sems can lta bar gyur pa'i glag glag pa spyod yul ba rnams kyi log par lta ba'i mun pa bsal nas/ yang dag pa'i lta ba'i chos ston par 'gyur bar bcom ldan 'das kyis bdag la chos bstan du gsol/ bde bar gshegs pas bdag la chos bstan du gsol/ rigs kyi bu de nas de bzhin gshegs pa dri ma med par grags pa'i rgyal po des drang srong chen po mchog gtso bor mdzad nas lha'i bu de dag dang / byang chub sems dpa' de dag la bsod nams thams cad bsdus pa'i ting nge 'dzin 'di nyid las brtsams te/ ci nas lha'i bu'i 'khor de'i nang nas sngon dge ba'i rtsa ba yongs su sbyangs pa'i lha'i bu brgyad stong bla na med pa yang dag par rdzogs pa'i byang chub tu sems skyed par 'gyur ba dang / drang srong chen po mchog de yang dga' ba dang / dang ba dang / mchog tu dga' ba rgya chen po dang /spobs pa mi chod pa thob par 'gyur ba de lta bu'i chos bstan to// //bam po gsum pa/ bcom ldan 'das des rdo rje'i tshig brgyad po 'di dag kyang bstan te/ brgyad gang zhe na 'di lta ste/ 56-1-95a chos thams cad ni nyon mongs pa dang bral ba'i phyir rang bzhin gyis yongs su dag pa'o/ /chos thams cad ni zag pa thams cad yongs su chad pa'i phyir zag pa med pa'o/ /chos thams cad ni gnas thams cad las yang dag par 'das pa'i phyir gnas med pa'o/ / chos thams cad ni gnyis su med pa'i phyir sgo med pa'o/ /chos thams cad ni rnam par thar pa'i sgo kun nas ston pa'i phyir kun nas sgo'o/ /chos thams cad ni 'gro ba med pa'i tshul gyis 'pho ba med pa'o/ /chos thams cad ni 'gro ba thams cad yang dag par chad pa'i phyir 'gro ba med pa'o/ /chos thams cad ni 'das pa dang / ma 'ongs pa dang / da ltar byung ba gnyis su dbyer med pa'i phyir dus gsum mnyam pa ste/ rdo rje'i tshig brgyad po de dag ni bcom ldan 'das de bzhin gshegs pa dri ma med par grags pa'i rgyal po des/ chos thams cad nges par 'byed pa'i phyir bstan to/ /mchog gzhan yang chos kyi sgo'i tshig brgyad po 'di dag ni byang chub sems dpa' sems dpa' chen po yid rtul bar mi 'gyur ba ste/ brgyad gang zhe na/ 'di lta ste/ ming ni chos thams cad kyi sgo ste/ sgo sna tshogs rnam par gzhag pa'i phyir ro/ /sgra ni chos thams cad kyi sgo ste/ ngag tha dad par brjod pa'i phyir ro/ /brda ni chos thams cad kyi sgo ste/ chos thams cad mngon par zhen pa med pa'i phyir ro/ /rnam par rig pa ni chos thams cad kyi sgo ste/ gso ba dang / gsog dang / ya ma brla yin pa'i phyir ro/ /bdag gi ngo bo nyid ni chos thams cad kyi sgo ste/ bdag gi ngo bo nyid med pa'i phyir ro/ /zad pa ni chos thams cad kyi sgo ste/ yod pa ma yin pa'i phyir ro/ /gdags pa ni chos thams cad kyi sgo ste/ gdags pa 'byung ba med pa'i phyir ro/ /mnyam pa nyid ni chos thams cad kyi sgo ste/ ro gcig pa'i phyir ro/ /mchog chos kyi sgo'i tshig de dag ni byang chub sems dpa' sems dpa' chen po yid rtul bar mi 'gyur ba'o/ /mchog gzhan yang sa bon gyi tshig brgyad po 'di dag ni spobs pa mi zad par 'gyur ba ste/ brgyad gang zhe na/ 'di lta ste/ mchog a zhes bya ba sa bon gyi tshig ni chos thams cad gzod ma 56-1-95b nas ma skyes par ston to/ /mchog pa zhes bya ba sa bon gyi tshig ni chos thams cad don dam par ston to/ /mchog na zhes bya ba sa bon gyi tshig ni chos thams cad kyi ming dang gzugs yongs su shes par ston to/ /mchog da zhes bya ba sa bon gyi tshig ni chos thams cad dul ba dang zhi bar ston to/ /mchog sa zhes bya ba sa bon gyi tshig ni chos thams cad las yang dag par 'das par ston to/ /mchog ta zhes bya ba sa bon gyi tshig ni chos thams cad de bzhin nyid du dbyer med par ston to/ /mchog ka zhes bya ba sa bon gyi tshig ni chos thams cad zad pa nyid du ston to/ /mchog ma zhes bya ba sa bon gyi tshig ni chos thams cad dbus dang mtha' yongs su chad par ston to/ /mchog sa bon gyi tshig brgyad po de dag ni spobs pa mi zad par 'gyur ba'o/ /de lta bas na sa bon gyi tshig 'di dag dang / chos kyi sgo'i tshig 'di dag dang / rdo rje'i tshig 'di dag la dran pa dang / shes bzhin du spyod pa mnyam pa nyid la brtson par bya'o/ /rtag tu 'du 'dzi med par spyod pas tshul bzhin du so sor brtag pa la brtson par bya'o/ /rtag tu dge ba gang yin zhes tshol zhing 'dod pa la brtson par bya'o/ /rigs kyi bu de ltar bcom ldan 'das de bzhin gshegs pa dri ma med par grags pa'i rgyal po des chos kyi tshig zhus pa de dag gi lan btab nas/ 'jig rten gyi khams de snang bar mdzad cing rab tu g.yos par mdzad nas/ byang chub sems dpa' de dag dang thabs cig tu mi snang bar gyur te/ skad cig thang cig yud tsam de la rang gi sangs rgyas kyi zhing du bzhugs par gyur to/ /sangs rgyas kyi zhing de nas kyang gang du yang gshegs pa'am slar gshegs par mngon pa med do/ /rigs kyi bu de nas drang srong chen po mchog de spobs pa mi chod pa dang ldan par gyur te/ brjed ngas pa med pa'i dran pa de dang yang ldan par gyur nas lhas yongs su bzung ba thob par gyur to/ /lhas yongs su bzung ba des na bdud phyir rgol ba yang choms nas grong dang / grong khyer dang / grong rdal dang / ljongs dang / yul 'khor dang / rgyal po'i pho brang du song nas sems can rnams la chos ston 56-1-96a te/ bsod nams thams cad bsdus pa'i ting nge 'dzin 'di nyid rgyas par bshad cing rab tu bstan to/ /des lo stong tham par chos bstan te/ srog chags brgyad khri bzhi stong ni nyan thos su yongs su smin par byas so/ /srog chags brgyad khri bzhi stong ni rang sangs rgyas su yongs su smin par byas so/ /srog chags brgyad khri bzhi stong ni bla na med pa yang dag par rdzogs pa'i byang chub tu yongs su smin par byas so/ /srog chags brgyad khri bzhi stong ni 'khor los sgyur bar yongs su smin par byas so/ /srog chags brgyad khri bzhi stong ni brgya byin du yongs su smin par byas so/ /srog chags brgyad khri bzhi stong ni tshangs par yongs su smin par byas so/ /srog chags brgyad khri bzhi stong ni byams pa bsgom pa la bkod do/ /srog chags brgyad khri bzhi stong ni snying rje bsgom pa la bkod do/ /srog chags brgyad khri bzhi stong ni dga' ba bsgom pa la bkod do/ /srog chags brgyad khri bzhi stong ni btang snyoms bsgom pa la bkod do/ /srog chags dpag tu med pa zhig ni mtho ris kyi 'jig rten du nye bar 'gro bar byas so/ /de'i 'og tu drang srong chen po mchog de shi nas lha'i bu brgyad khri bzhi stong dang lhan cig tu de bzhin gshegs pa dgra bcom pa yang dag par rdzogs pa'i sangs rgyas dri ma med par grags pa'i rgyal po de nyid kyi sangs rgyas kyi zhing kun nas dri ma med pa'i 'jig rten gyi khams su skyes so/ /rigs kyi bu de'i tshe de'i dus na drang srong chen po mchog de gzhan zhig yin par khyod som nyi'am yid gnyis sam/ the tsom zan rigs kyi bu khyod kyis de ltar mi blta'o/ /de ci'i phyir zhe na/ nga nyid de'i tshe de'i dus na drang srong chen po mchog tu gyur te/ ngas chos 'dod pa dang / chos la gus par gnas pa'i bden pa'i byin gyi rlabs des 'og gi phyogs nas bcom ldan 'das de bzhin gshegs pa dri ma med par grags pa'i rgyal po de spyan drangs so/ /dri ma med pa'i gzi brjid rnam grangs des kyang khyod kyis chos 'dod pa'i byang chub sems dpa' sems dpa' chen po rnams la ni nams kyang de bzhin gshegs pa mya ngan las 'da' bar 56-1-96b mi 'gyur la/ dam pa'i chos kyang nub par mi 'gyur ba de ltar rig par bya'o/ /de ci'i phyir zhe na/ dri ma med pa'i gzi brjid chos 'dod pa'i byang chub sems dpa' sems dpa' chen po bsam pa phun sum tshogs pa gus pa dang bcas pa rnams ni 'jig rten gyi khams gzhan na 'dug kyang sangs rgyas bcom ldan 'das rnams zhal ston par mdzad cing chos kyang thos par mdzad do/ /dri ma med pa'i gzi brjid chos 'dod pa'i byang chub sems dpa' sems dpa' chen po rnams kyi chos kyi gter ri dang / ri sul dang / shing dag gi nang du bcug pa dag yod de/ gzungs dang / chos kyi sgo mtha' yas pa glegs bam du byas pa dag kyang lag tu 'ong bar 'gyur ro/ /dri ma med pa'i gzi brjid chos 'dod pa'i byang chub sems dpa' sems dpa' chen po rnams la ni sngon sangs rgyas mthong ba'i lha rnams spobs pa sgrub par byed do/ /dri ma med pa'i gzi brjid chos 'dod pa'i byang chub sems dpa' sems dpa' chen po rnams ni tshe zad na yang sangs rgyas bcom ldan 'das rnams dang / lha rnams kyis tshe dang stobs sgrub par byed de/ sangs rgyas kyi byin gyi rlabs dang / lha'i byin gyi rlabs kyis de dag 'dod na lo stong du yang 'khod do/ /lo 'bum phrag gnyis sam/ gsum mam/ bzhi'am/ lnga'i bar du yang 'khod pa nas/ bskal pa'am/ bskal pa las lhag pa'am/ yang na ji srid 'dod pa'i bar du yang 'khod do/ /dri ma med pa'i gzi brjid chos la gus pa skyes pa'i byang chub sems dpa' sems dpa' chen po rnams la ni sangs rgyas bcom ldan 'das rnams rga ba yang sel bar mdzad do/ /nad kyang sel bar mdzad do/ /dran pa yang bsgrub par mdzad do/ /rtogs pa dang spobs pa yang bsgrub par mdzad do/ /chos la gus pa skyes pa'i byang chub sems dpa' sems dpa' chen po rnams la sangs rgyas bcom ldan 'das rnams lta bar gyur pa rnams ni sel bar mdzad la/ yang dag pa'i lta ba ni bsgrub par mdzad do/ /dri ma med pa'i gzi brjid chos la gus pa'i byang chub sems dpa' sems dpa' chen po rnams la gzhan gyi gnod pa 56-1-97a thams cad 'byung bar mi 'gyur ro/ /dri ma med pa'i gzi brjid de lta bas na byang chub sems dpa' sems dpa' chen pos thos pa'i tshogs la mkhas pa la brtson par bya'o/ /thos pa'i tshogs la mkhas pa la brtson pa'i byang chub sems dpa' sems dpa' chen po la yon tan gyi khyad par de lta bu dag 'byung bar 'gyur ba'am/ yang na de bas kyang gong ma'am/ de bas kyang lhag par 'gyur te/ dri ma med pa'i gzi brjid gsum po 'di dag ni bsod nams nye bar rton pa dang / bsod nams kyi tshogs dang / bsod nams 'byung ba dang / bsod nams rgyas pa dang / bsod nams kyi rgyu 'thun pa dang / bsod nams mi zad pa dang / bsod nams bsam gyis mi khyab pa dang / bsod nams rgya mtsho yin te/ de la gnas pa'i byang chub sems dpa' sems dpa' chen po dag gi bsod nams rnams kyi mtha' 'am tshad ni rtogs par mi nus so/ /dri ma med pa'i gzi brjid rgya mtsho chen po'i thigs pa rnams kyi tshad dang mtha' ni rtogs par nus kyi byang chub sems dpa' sems dpa' chen po rnams kyi sbyin pa'i tshogs dang / tshul khrims kyi tshogs dang / thos pa'i tshogs bsags pa'i bsod nams kyi phung po'i tshad dang mtha' ni rtogs par mi nus so/ /dri ma med pa'i gzi brjid stong gsum gyi stong chen po'i 'jig rten gyi khams na sa la ri dang / shing ljon pa dang /nags tshal dang / rtswa yod pa thams cad ni srang tshad kyis tshad dang mtha' rtogs pa'am shes par nus kyi byang chub sems dpa' sems dpa' chen po rnams kyi sbyin pa'i tshogs dang / tshul khrims kyi tshogs dang / thos pa'i tshogs bsags pa'i bsod nams kyi phung po ni tshad gzung bar mi nus so zhes nga smra'o/ /de nas bcom ldan 'das la tshan po che chen po dri ma med pa'i gzi brjid kyis 'di skad ces gsol to/ /bcom ldan 'das tshogs gsum po sbyin pa'i tshogs dang / tshul khrims kyi tshogs dang / thos pa'i tshogs de dag gi nang na tshogs gang ches mchog dang / ches gtso bo lags/ bcom ldan 'das kyis bka' stsal pa/ dri ma med pa'i gzi brjid 56-1-97b tshogs gsum po sbyin pa'i tshogs dang / tshul khrims kyi tshogs dang / thos pa'i tshogs de dag gi nang na thos pa'i tshogs 'ba' zhig mchog ces bya/ rab ces bya/ rab mchog ces bya/ gya nom pa zhes bya/ gtso bo zhes bya/ khyad par du 'phags pa zhes bya/ bla ma zhes bya/ bla na med pa zhes bya/ gong na med pa zhes bya/ gong ma'i yang gong ma zhes bya'o/ /rigs kyi bu 'di lta ste/ dper na ri'i rgyal po ri rab kyi mdun na yungs 'bru gcig 'dug pa bzhin du sbyin pa'i tshogs dang / tshul khrims kyi tshogs kyang de dang 'dra bar blta bar bya'o/ /ri'i rgyal po ri rab ji lta ba de bzhin du ni thos pa'i tshogs blta bar bya'o/ /rigs kyi bu 'di lta ste dper na nam mkha' la bya'i rjes ji lta ba bzhin du sbyin pa'i tshogs dang / tshul khrims kyi tshogs kyang de dang 'dra bar blta bar bya'o/ /phyogs bcu'i nam mkha' mtha' yas pa ji lta ba de bzhin du ni thos pa'i tshogs blta bar bya'o/ /rigs kyi bu sbyin pa'i tshogs ni bya ba gnyis byed de/ gnyis gang zhe na/ 'di lta ste/ dbul ba sel ba dang / longs spyod chen po bsgrub pa ste bya ba 'di gnyis byed do/ /tshul khrims kyi tshogs kyang bya ba gnyis byed de/ gnyis gang zhe na 'di lta ste/ ngan 'gro sel ba dang / bde 'gro bsgrub pa ste bya ba 'di gnyis byed do/ /shes rab kyi tshogs kyang bya ba gnyis byed de/ gnyis gang zhe na/ 'di lta ste/ lta bar gyur pa thams cad sel ba dang / shes rab bsgrub pa ste bya ba 'di gnyis byed do/ / rigs kyi bu sbyin pa'i tshogs ni zag pa dang bcas pa dang / len pa dang bcas pa dang / phung por rnam par smin pa'o/ /rigs kyi bu tshul khrims kyi tshogs ni zag pa dang bcas pa dang / len pa dang bcas pa dang / phung por rnam par smin pa'o/ /rigs kyi bu thos pa'i tshogs ni zag pa med pa dang / len pa med pa dang / phung por rnam par smin pa ma yin pa'o/ /rigs kyi bu de lta bas na byang chub sems dpa' sems dpa' chen po brtson 'grus brtsams pa rnams kyis thos pa'i tshogs la brtson par bya'o/ /sbyin pa'i tshogs dang tshul khrims kyi tshogs dang 56-1-98a thos pa'i tshogs 'di dag bstan pa na sngon dge ba'i rtsa ba bskyed pa'i srog chags sum stong gis bla na med pa yang dag par rdzogs pa'i byang chub tu sems bskyed do/ /lha'i bu lnga stong ni chos rnams la chos kyi mig rdul med cing dri ma dang bral ba rnam par dag go/ /tshan po che chen po dri ma med pa'i gzi brjid kyis kyang rjes su 'thun pa'i chos kyi bzod pa thob bo/ /de nas bcom ldan 'das la tshan po che chen po dri ma med pa'i gzi brjid kyis 'di skad ces gsol to/ /bcom ldan 'das byang chub sems dpa' sems dpa' chen po chos du dang ldan na mi skye ba'i chos rnams la bzod pa myur du thob par 'gyur lags/ bcom ldan 'das kyis bka' stsal pa/ rigs kyi bu byang chub sems dpa' sems dpa' chen po chos bzhi dang ldan na mi skye ba'i chos rnams la bzod pa myur du thob par 'gyur te/ bzhi gang zhe na/ 'di lta ste/ lus la gzugs brnyan dang 'dra bar mos pa dang / ngag la brag ca dang 'dra bar mos pa dang / sems la sgyu ma dang 'dra bar mos pa dang / chos thams cad la mi zad pa'i chos nyid du mos pa ste/ rigs kyi bu byang chub sems dpa' sems dpa' chen po chos bzhi po de dag dang ldan na mi skye ba'i chos rnams la bzod pa myur du thob par 'gyur ro/ /rigs kyi bu gzhan yang byang chub sems dpa' sems dpa' chen po chos bzhi dang ldan na mi skye ba'i chos rnams la bzod pa myur du thob par 'gyur te/ bzhi gang zhe na/ 'di lta ste/ sems can thams cad la byams pas khyab par yang byed la sems can du 'du shes pa yang med pa dang / chos thams cad la stong pa dang / mi rtag par yang mos par byed la gzhir yang mi byed pa dang / sangs rgyas thams cad kyang mthong la sha'i mig la yang mngon par zhen pa med pa dang / sems rab tu rnam par 'byed pa la yang mkhas la sems kyang sems la gtod par mi byed pa ste/ rigs kyi bu byang chub sems dpa' sems dpa' chen po chos bzhi po de dag dang ldan na mi skye ba'i chos rnams la bzod pa myur du thob par 'gyur ro/ /rigs kyi bu gzhan yang byang chub sems dpa' sems dpa' chen po 56-1-98b chos bzhi dang ldan na mi skye ba'i chos rnams la bzod pa myur du thob par 'gyur te/ bzhi gang zhe na/ 'di lta ste/ lta ba spangs pa'i phyir bdog pa thams cad yongs su gtong ba dang / nyon mongs pa thams cad rab tu zhi ba'i phyir tshul khrims yongs su dag pa dang / chos kyis lhag pa'i phyir bzod pa'i stobs dang ldan pa dang / dben pa'i chos kyis rnam par grol ba'i phyir brtson 'grus brtsams pa ste/ rigs kyi bu byang chub sems dpa' sems dpa' chen po chos bzhi po de dag dang ldan na mi skye ba'i chos rnams la bzod pa myur du thob par 'gyur ro/ /rigs kyi bu gzhan yang byang chub sems dpa' sems dpa' chen po chos bzhi dang ldan na mi skye ba'i chos rnams la bzod pa myur du thob par 'gyur te/ bzhi gang zhe na/ 'di lta ste/ bsam gtan yang thob la bsam gtan la yang mi rten pa dang / shes rab kyis kyang rnam par brtags la spros pa yang med pa dang / thabs la mkhas pa yang rab tu 'dzin la sems can yang sdud pa dang / spyod pa thams cad la yang gegs med la spyod pa yang khong du chud par byed pa ste/ rigs kyi bu byang chub sems dpa' sems dpa' chen po chos bzhi po de dag dang ldan na mi skye ba'i chos rnams la bzod pa myur du thob par 'gyur ro/ /rigs kyi bu gzhan yang byang chub sems dpa' sems dpa' chen po chos bzhi dang ldan na mi skye ba'i chos rnams la bzod pa myur du thob par 'gyur te/ bzhi gang zhe na/ 'di lta ste/ byams pa chen pos sems can thams cad yongs su skyob pa dang / snying rje chen pos 'khor ba las yongs su mi skyo ba dang / dga' ba chen pos chos la dga' zhing mchog tu dga' ba dang / btang snyoms chen pos rjes su chags pa dang khong khro ba spong ba ste/ rigs kyi bu byang chub sems dpa' sems dpa' chen po chos bzhi po de dag dang ldan na mi skye ba'i chos rnams la bzod pa myur du thob par 'gyur ro/ /rigs kyi bu gzhan yang byang chub sems dpa' sems dpa' chen po chos bzhi dang ldan na mi skye ba'i chos rnams la bzod pa myur du thob par 'gyur te/ bzhi gang zhe na/ 'di lta ste/ rnam par thar pa'i sgo gsum mngon 56-1-99a sum du byed pa dang / dus gsum yongs su shes pa dang / khams gsum las yang dag par 'da' ba dang / chos thams cad rang bzhin gyis ma skyes pa la yid ches pa ste/ rigs kyi bu byang chub sems dpa' sems dpa' chen po chos bzhi po de dag dang ldan na mi skye ba'i chos rnams la bzod pa myur du thob par 'gyur ro/ /bzhi pa bsgrub pa'i chos kyi rnam grangs 'di bshad pa na tshan po che chen po dri ma med pa'i gzi brjid kyis mi skye ba'i chos la bzod pa thob ste/ de dga' ba dang mchog tu dga' ba thob pa de kho nas ta la bdun srid tsam gyi nam mkha' la mngon par 'phags so/ /stong gsum gyi stong chen po'i 'jig rten gyi khams 'di yang rnam pa drug tu g.yos so/ /lha dang mi'i sil snyan 'bum yang 'khrol lo/ /pad ma'i sprin gyi char chen po yang mngon par bab bo/ /'jig rten 'di yang snang ba chen pos khyab par gyur to/ /de nas de'i tshe bcom ldan 'das 'dzum pa mdzad de/ 'di ni de bzhin gshegs pa rnams kyi chos nyid de/ gang gi tshe 'dzum pa mdzad pa de'i tshe bcom ldan 'das kyi zhal gyi sgo nas 'od zer sna tshogs 'di lta ste/ sngon po dang / ser po dang / dmar po dang / dkar po dang / btsod ka dang / shel dang / dngul gyi kha dog lta bu dag byung ngo / /de dag byung nas 'jig rten gyi khams mtha' yas mu med pa 'od kyis khyab par gyur nas nyi ma dang zla ba rnams kyi 'od kyang zil gyis mnan te tshangs pa'i 'jig rten du thug nas phyir log ste bcom ldan 'das kyi spyi gtsug tu nub par gyur to/ /de nas tshe dang ldan pa kun dga' bo stan las langs te/ bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das sangs rgyas bcom ldan 'das rnams ni rgyu ma mchis rkyen ma mchis par 'dzum pa mi mdzad na/ 'dzum pa mdzad pa'i rgyu ni gang lags/ rkyen ni gang lags/ de'i tshe tshigs su bcad pa 'di dag kyang smras so/ /ye 56-1-99b shes mchog brnyes yongs dag yangs pa'i spyan mnga' ba/ /dbang po zhi ba zhi gnas pha rol phyin mchog brnyes/ /sku mdog gser gyi ri bo lha yi 'od 'dra ba/ /ci yi slad du bcom ldan 'dzum pa 'di ston mdzad/ /gang gi blo gros ci 'dra dus gsum ldan pa dang / /lha dang mi rnams sems kyi spyod pa mkhyen bzhin du/ /'du shes mi mnga' rtag tu ye shes mchog brnyes pa/ /zhal ras zla 'dra 'dzum pa'i don ni bstan par gsol/ /'das pa'i sangs rgyas ji snyed gang dag ma 'ongs dus/ /gang dag gnas pa'i rgyal ba de dag mtshungs pa ste/ /sems can gang dag dkar po spyod pa sna tshogs pa/ /sbyor mkhyen lung bstan slad du thams cad yang dag gsungs/ /sangs rgyas zhing 'di dag ni sku yis thams cad khyab/ /khyod kyi gsung ni sangs rgyas zhing mang yangs par grag /'dir ni thugs kyis 'gro ba kun la byams pa bskyed/ /rgyal ba ye shes mtha' yas ldan pa gang slad gsungs/ /chos rnams ya ma brla ste chu zla 'dra ba dang / /sgyu ma lta bur 'jig pa rmi lam ngo bo nyid/ /sprin ltar mi brtan 'jig pa'i chos can mkhyen pa po/ /mi yi seng ge gang slad 'dzum don bstan par gsol/ /stong pa mtshan med smon med rtogs pas rnam par grol/ /rtag tu thugs dul chos kyi ngo bo nyid la mkhas/ /rlung srubs mkha' la 'tshub kyang spros med 'dra ba po/ /ci slad 'dzum mdzad 'di la don ni ci mchis gsungs/ /gang gi sems deng sangs rgyas ye shes mchog la btud/ /gang gis de ring shing rgyal drung du bdud kyang bcom/ /gang gis rgyal ba mchog rnams gdan ni yongs su bzung / /skyes bu khyu mchog gis ni ci phyir 'dzum pa bstan/ /'di na rgyal ba'i nyan thos de rnams sa ma mchis/ /'di la rang sangs rgyas kyi yul yang ci ma mchis/ /'di ni sangs rgyas yon tan rgya mtsho rnams kyi yul/ /'jig rten mchog gis 'dzum pa'i rgyu ni bstan par gsol/ /de nas bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' 56-1-100a bo khyod kyis tshan po che chen po dri ma med pa'i gzi brjid ta la bdun srid tsam gyi steng gi bar snang la mngon par 'phags te 'dug pa mthong ngam/ gsol pa bcom ldan 'das mthong lags so/ /bde bar gshegs pa mthong lags so/ /bcom ldan 'das kyis bka' stsal pa/ kun dga' bo tshan po che chen po dri ma med pa'i gzi brjid 'di bskal pa grangs med pa gsum pa phrag 'bum gyis bla na med pa yang dag par rdzogs pa'i byang chub mngon par rdzogs par 'tshang rgya bar 'gyur te/ shar phyogs kyi 'jig rten gyi khams rnam par dag par byed pa zhes bya bar bskal pa tshangs pas bstod pa zhes bya ba de la de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa lha dang mi rnams kyi ston pa sangs rgyas bcom ldan 'das bkod pa mang po'i rgyal po zhes bya ba 'jig rten du 'byung ngo / /kun dga' bo de bzhin gshegs pa dgra bcom pa yang dag par rdzogs pa'i sangs rgyas bkod pa mang po'i rgyal po'i sangs rgyas kyi zhing rnam par dag par byed pa'i 'jig rten gyi khams de yang 'byor pa dang / rgyas pa dang bde ba dang lo legs pa dang / nyams dga' ba dang / skye bo dang / mi mang pos gang bar 'gyur te/ kun dga' bo dper na dga' ldan gyi lha rnams kyi longs spyod dang / yongs su spyad pa ji lta ba bzhin du sangs rgyas kyi zhing rnam par dag par byed pa'i 'jig rten gyi khams kyi sems can de dag gi longs spyod dang / longs su spyad pa yang de 'dra bar 'gyur ro/ /de bzhin gshegs pa bkod pa mang po'i rgyal po de yang gtam gzhan mi gsung bar byang chub sems dpa' bsdu ba'i phyir byang chub sems dpa'i sde snod 'ba' zhig ston to/ /de na nyan thos dang / rang sangs rgyas rnams kyi ming yang med de/ byang chub sems dpa' sems dpa' chen po bzod pa thob pa'i byang chub sems dpa'i dge 'dun chen po 'ba' zhig 'byung bar 'gyur ro/ / 56-1-100b de bzhin gshegs pa de yang tshe dpag tu med par 'gyur ro/ /de'i sangs rgyas kyi zhing de na mi khom pa brgyad med de/ de bdud dang phyir rgol ba bcom pa dang / gzhan mu stegs can med pa dang / bai dUr+ya las grub la 'dzam bu'i chu bo'i gser gyi pad mas spras pa'i sangs rgyas kyi zhing du 'gyur ro/ /de nas tshan po che chen po dri ma med pa'i gzi brjid bar snang de las babs te/ bcom ldan 'das kyi zhabs la phyag 'tshal nas/ bcom ldan 'das la rab tu 'byung bar gsol te/ de bzhin gshegs pa'i bstan pa la rab tu byung ngo / /de nas bcom ldan 'das la byang chub sems dpa' sems dpa' chen po sred med kyi bus 'di skad ces gsol to/ /bcom ldan 'das kyis chos 'dul ba legs par gsungs pa ni bcom ldan 'das ngo mtshar lags so/ /bde bar gshegs pa ngo mtshar lags te/ 'di ltar de bzhin gshegs pa la skur pa 'debs pa'am/ klan ka tshol ba'am/ tho 'tshams pa'am/ bsting pa'i slad du mchis pa gang dag lhags pa de dag kyang de bzhin gshegs pa mthong ma thag tu dga' ba dang / dang ba dang / mchog tu dga' ba drag po 'thob par 'gyur la/ nga rgyal dang / rgyags pa dang / dregs pa nges par bcom nas de bzhin gshegs pa nyag gcig la 'dud cing / bcom ldan 'das nyag gcig la thal mo sbyar ba btud pa dang / bcom ldan 'das 'di ltar tshan po che chen po dri ma med pa'i gzi brjid 'di nga rgyal dang / rgyags pa dang / dregs pa drag pos mchis la/ chos 'di lta bu 'di thos nas bdag nyid chen po 'di lta bu thob ste/ sems can dpag tu ma mchis grangs ma mchis pa'i nga rgyal dang / rgyags pa dang / dregs pa spang ba'i slad du chos ston par 'gyur lags so/ /bcom ldan 'das sngon 'das pa'i dus na de bzhin gshegs pa dgra bcom pa yang dag par rdzogs pa'i sangs rgyas ji snyed cig la tshan po che chen po dri ma med pa'i gzi brjid kyis yang dag par rdzogs pa'i byang chub 'tshal ba'i slad du dge ba'i rtsa ba bskyed nas des na da ltar 'di lta bu'i mngon par shes pa myur 56-1-101a ba thob par gyur lags/ de skad ces gsol pa dang / bcom ldan 'das kyis byang chub sems dpa' sems dpa' chen po sred med kyi bu la 'di skad ces bka' stsal to/ /sred med kyi bu tshan po che chen po dri ma med pa'i gzi brjid kyis ni 'das pa'i dus na yang dag par rdzogs pa'i byang chub 'dod pa'i phyir sangs rgyas bye ba phrag drug cu rtsa gnyis la dge ba'i rtsa ba bskyed do/ /de phyin chad kyang sangs rgyas bcom ldan 'das dpag tu med/ grangs med pa la bkur stir byed/ bla mar byed/ ri mo byed/ mchod pa byed par 'gyur te/ tshangs par spyad pa spyod par 'gyur ro/ /sred med kyi bus gsol pa/ bcom ldan 'das mi dge ba'i rtsa ba gang gis na de'i byang chub kyi sems ma mchis par gyur nas/ des na 'di brtsad pa'i bsam pas de bzhin gshegs pa'i spyan sngar mchis la 'di lta bu'i nga rgyal dang / rgyags pa dang / dregs pa dang ldan par gyur lags/ de skad ces gsol pa dang / bcom ldan 'das kyis byang chub sems dpa' sems dpa' chen po sred med kyi bu la 'di skad ces bka' stsal to/ /sred med kyi bu byang chub sems dpa' chos bzhi dang ldan na byang chub kyi sems brjed par 'gyur te/ bzhi gang zhe na/ 'di lta ste/ lhag pa'i nga rgyal dang / chos la ma gus pa dang / dge ba'i bshes gnyen la khyad du gsod pa dang / log pa'i tshig smra ba ste/ sred med kyi bu byang chub sems dpa' chos bzhi po de dag dang ldan na byang chub kyi sems brjed par 'gyur ro/ /sred med kyi bu gzhan yang byang chub sems dpa' chos bzhi dang ldan na byang chub kyi sems brjed par 'gyur te/ bzhi gang zhe na/ 'di lta ste/ nyan thos dang / rang sangs rgyas kyi theg pa pa'i rnal 'byor spyod pa dag dang 'dris par byed pa dang / theg pa dman pa la mos pa rnams dang / byang chub sems dpa' la sdang zhing skur pa 'debs pa dang / chos rnams la slob dpon dpe mkhyud byed pa ste/ sred med kyi bu byang chub sems dpa' chos bzhi po de dag dang ldan na byang chub kyi sems brjed par 'gyur ro/ /sred med kyi bu gzhan 56-1-101b yang byang chub sems dpa' chos bzhi dang ldan na byang chub kyi sems brjed par 'gyur te/ bzhi gang zhe na/ 'di lta ste/ sgyu byed pa dang / sems can rnams la g.yos sten par byed pa dang / dge ba'i bshes gnyen rnams la lce gnyis byed pa dang / rnyed pa dang / bkur sti la lhag par zhen pa ste/ sred med kyi bu byang chub sems dpa' chos bzhi po de dag dang ldan na byang chub kyi sems brjed par 'gyur ro/ /sred med kyi bu gzhan yang byang chub sems dpa' chos bzhi dang ldan na byang chub kyi sems brjed par 'gyur te/ bzhi gang zhe na 'di lta ste/ bdud kyi las ma rtogs pa dang / las kyi sgrib pas bsgribs pa dang / lhag pa'i bsam pa stobs chung ba dang / shes rab dang thabs med pa ste/ sred med kyi bu byang chub sems dpa' chos bzhi po de dag dang ldan na byang chub kyi sems brjed par 'gyur ro/ /sred med kyi bu yang gang gi phyir tshan po che chen po dri ma med pa'i gzi brjid kyi byang chub kyi sems brjed par gyur pa de nyon cig /sred med kyi bu sngon byung ba 'das pa'i dus na bskal pa bzang po 'di nyid la de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa/ sangs rgyas bcom ldan 'das 'khor ba 'jig ces bya ba 'jig rten du byung ste/ de'i bstan pa gnas pa na bram ze shing sA la chen po lta bu nor bzangs zhes bya ba zhig byung ste de bdud kyis bslus nas lhag pa'i nga rgyal can du gyur te/ de bzhin gshegs pa'i thad du mi 'gro ba'i steng du nga rgyal gyis zil gyis non nas bram ze dang khyim bdag chos smra ba rnams dang / lhan cig tu 'thab pa dang / rtsod pa dang / 'gyed pa la zhugs te/ chos dang chos smra ba rnams la yang ma gus pa bskyed do/ /de'i tshe de nyid la chos lnga dang bral bar gyur te/ lnga gang zhe na/ 'di lta ste/ sangs rgyas mthong ba dang / chos thos pa dang / byang chub sems dpa' sems dpa' chen 56-1-102a po theg pa chen po la yang dag par zhugs pa dag dang / 'bel ba'i gtam sna tshogs dri bar bya ba dang / dge ba'i rtsa ba yongs su bsngo ba dang / byang chub kyi sems shin tu brtan por bya ba dang bral bar gyur nas des mi dge ba'i chos ni yongs su bzung la byang chub kyi sems ni yongs su ma bzung ste/ sred med kyi bu chos lnga po de dag dang bral bar gyur to/ /sred med kyi bu de'i tshe de'i dus na bram ze shing sA la chen po lta bu nor bzangs gang yin pa de gzhan zhig yin par khyod som nyi'am/ yid gnyis sam/ the tshom za na khyod kyis de ltar mi blta'o/ /de ci'i phyir zhe na/ tshan po che chen po dri ma med pa'i gzi brjid 'di nyid de'i tshe de'i dus na bram ze shing sA la chen po lta bu nor bzangs su gyur te/ nga rgyal des na de'i byang chub kyi sems brjed do/ /sngon gyi dge ba'i rtsa bas yongs su bsrungs pa dang / byang chub kyi sems kho nas bskyabs pa des ni ngan song dag tu ma skyes so/ /de nga rgyal gyis khengs te/ tshan po che chen po'i shugs thob kyang sangs rgyas kyi mthus sangs rgyas mthong ba dang ma bral lo/ /de de bzhin gshegs pa'i stobs kyi shugs ma bzod de 'ongs pa las de bzhin gshegs pa dang byang chub sems dpa'i stobs kyi shugs thos nas nga rgyal dang / rgyags pa dang / dregs pa thams cad yongs su chad do/ /sdig pa ma byas pa'i phyir ni de bzhin gshegs pa mthong ngo / /de'i sngon gyi rgyu las byung ba'i dge ba'i rtsa ba mngon du byung ste/ des na mngon par shes pa myur la bzod pa thob bo/ /de nas byang chub sems dpa' sred med kyi bus tshan po che chen po dri ma med pa'i gzi brjid la 'di skad ces smras so/ /rigs kyi bu khyod kyis chos gang bskyed na/ des khyod kyis bzod pa thob par gyur/ dri ma med pa'i gzi brjid kyis smras pa/ bdag gis so so'i skye bo'i chos thams cad bskyed do/ /sred med kyi bus smras pa/ khyod kyis ji ltar bskyed/ dri ma med pa'i gzi brjid kyis smras pa/ ji ltar 'byung ba med pa dang / 'jig pa med pa de ltar bskyed do/ /ji ltar mngon par zhen pa med pa 56-1-102b dang / skye ba med pa de ltar bskyed do/ /sred med kyi bus smras pa/ rigs kyi bu so so'i skye bo'i chos rnams dang / sangs rgyas kyi chos rnams la khyad par ni ci zhig yod/ tha dad du dbye ba ni ci zhig yod/ dri ma med pa'i gzi brjid kyis smras pa/ ming la ni tha dad du dbye ba yod kyi don la ni tha dad du ni dbye ba med do/ /sred med kyi bus smras pa/ dri ma med pa'i gzi brjid so so'i skye bo'i chos rnams kyi don gang yin/ dri ma med pa'i gzi brjid kyis smras pa/ de'i don ni med pa las yongs su brtags pa dang / rnam par rtog pa med pa'o/ / sred med kyi bus smras pa/ dri ma med pa'i gzi brjid don gyis ni ci zhig sel bar byed/ ci zhig ni sgrub par byed/ dri ma med pa'i gzi brjid kyis smras pa/ sred med kyi bu don gyis ni so so'i skye bo'i chos rnams sel bar byed do/ /sangs rgyas kyi chos rnams ni sgrub par byed do/ /sred med kyi bus smras pa/ dri ma med pa'i gzi brjid sangs rgyas kyi chos rnams kyi don gang yin/ dri ma med pa'i gzi brjid kyis smras pa/ sred med kyi bu sangs rgyas kyi chos rnams kyi don ni gnyis su dbyer med pa'o/ /sred med kyi bus smras pa/ rigs kyi bu don la rton par bya'i tshig 'bru la rton par mi bya'o/ /zhes de bzhin gshegs pas gsungs pa dang / yang dag pa'i lta ba skye ba la ni rgyu gnyis dang / rkyen gnyis yod de/ gnyis gang zhe na/ 'di lta ste/ gzhan gyi sgra dang / rang gi tshul bzhin yid la byed pa'o zhes gsungs na/ ji ltar tshig 'bru yang de nyid yin la/ don kyang de nyid yin/ dri ma med pa'i gzi brjid kyis smras pa/ sred med kyi bu don la rton pa'i byang chub sems dpas ni tshig 'bru phri ba yang med do/ /yang tshig 'bru dmigs su med pa de ni don yin la/ don de yang brjod du med pa'i don yin no/ /don la rton pa la ni chos kyang ci yang med do/ /don kyang ci yang med do/ /de ci'i phyir zhe na/ chos thams cad ni brjod du med pa dang / ya ma brla dang / yul na mi gnas pa dang / phyogs na mi gnas pa dang / gang kho na na gnas 56-1-103a pa de kho nar 'gags pa'i phyir ro/ /bcom ldan 'das kyis kyang don ni gtan du 'gog pa'i mtshan nyid do zhes gsungs te/ sred med kyi bu de lta bas na gang don la rton pa de ni chos gang las kyang mi 'phro rnam par mi 'phro'o/ /gang mi 'phro ba rnam par mi 'phro ba de ni don to/ /sred med kyi bus smras pa/ rigs kyi bu gang don la rton pa de chos thams cad la rton pa'i rnam grangs yod dam/ dri ma med pa'i gzi brjid kyis smras pa/ sred med kyi bu yod de/ 'di ltar chos thams cad ni stong pa/ chos thams cad ni dben pa ste/ de dag ni chos thams cad ji ltar stong pa de kho na bzhin du de la rton to/ /ji ltar dben pa de kho na bzhin du de la rton to/ /sred med kyi bu de ltar na gang don la rton pa de ni chos thams cad la rton to/ /sred med kyi bus smras pa/ dri ma med pa'i gzi brjid de lta bas na chos thams cad nyid rton pa yin no/ /dri ma med pa'i gzi brjid kyis smras pa/ sred med kyi bu de ni de bzhin no/ /khyod ji skad zer ba bzhin te/ chos thams cad ni don dam pa la rton pa yin no/ /don dam pa ni de dag gi sgo yin te/ don dam par de dag btsal bar bya ba yin no/ / ji ltar chos kyang mi bsgrub/ chos ma yin pa'ang mi bsgrub pa de ltar de dag btsal bar bya'o/ /gnyis su med pa btsal ba ni 'phags pa rnams kyi btsal ba yin no/ /btsal ba de ni byed pa med pa'o/ /btsal ba de ni bya ba ma yin/ rnam par bya ba ma yin no/ /gang gi tshe mi byed cing rnam par mi byed pa de'i tshe btsal ba byas pa yin no/ /gal te don dang 'gal bar mi byed na/ btsal bar bya ba'i 'os yin no/ /de nas tshan po che chen po dri ma med pa'i gzi brjid kyis don 'di bstan pa na dge slong lnga brgya len pa med par zag pa rnams las sems rnam par grol lo/ /lha'i bu brgyad stong ni chos rnams la chos kyi mig rdul med cing dri ma dang bral ba rnam par dag go/ /byang chub sems dpa' sems dpa' chen po sred med kyi bus byang chub sems dpa' dri ma med pa'i gzi brjid la gzhan yang 'di skad ces smras 56-1-103b so/ /dri ma med pa'i gzi brjid de bzhin gshegs pas don la rton par bya'i tshig 'bru la ma yin zhes gsungs pa de ni/ sems can 'di dag don la mi mkhas shing gnyis la spyod pa dang / tshig 'bru la'ang mi mkhas pas tshig 'bru la sgro 'dogs shing don mi shes pa'i phyir de dag la don la rton par bya'i tshig 'bru la ma yin zhes de bzhin gshegs pas gsungs te/ de dag don la rton pas tshig 'bru'i rang bzhin mnyam pa nyid du rtogs pas tshig 'bru las yang dag par 'da' bar 'gyur ro/ /rigs kyi bu de bzhin gshegs pas yang dag pa'i lta ba skye ba la ni rgyu gnyis dang / rkyen gnyis yod do zhes de skad gsungs pa de ni 'di ltar chos 'dul ba ma thos pas ting nge 'dzin tsam gyis chog par 'dzin pa de dag 'khor ba las rnam par ma grol bzhin du rang bzhin gyis mngon pa'i nga rgyal can yin te/ rang bzhin gyis mngon pa'i nga rgyal can de dag thos pa mang po la gzud pa'i phyir te/ de dag gis chos thos nas gal te tshul bzhin du bsgrub na ni de dag kyang lhag pa'i nga rgyal med par 'gyur te/ lam la gnas pa de la dgongs nas bcom ldan 'das kyis/ thos pas chos rnams shes par 'gyur/ /thos pas sdig pa byed mi 'gyur/ /thos pas gnod pa spang bar 'gyur/ /thos pas mya ngan 'da' ba 'thob/ /ces gsungs so/ /byang chub sems dpa' sred med kyi bus smras pa/ rigs kyi bu ji ltar na dge slong rnal 'byor spyod pa tshul bzhin du chos la sbyor ba yin/ dri ma med pa'i gzi brjid kyis smras pa/ gang du yang sbyor ba med la 'bral bar yang mi byed na/ de ltar na tshul bzhin du chos la sbyor ba yin no/ /sred med kyi bu tshul bzhin du sbyor ba zhes bya ba de ni sbyor ba med pa'i tshig bla dgas so/ /sred med kyi bu gzhan yang gang gi tshe dge slong sbyor bar mi byed na nyes pa kun nas slong bar mi byed/ bdag kun nas slong bar mi byed de/ de ni de'i tshul bzhin du sbyor ba'o/ /gang gi tshe sngon gyis mtha' dang phyi ma'i mtha' la so sor rtog ste/ gang la smra ba dang / gang smra bar bya ba dang / gang yongs su 56-1-104a shes par bya ba'i phyir smra ba dang / gang spang ba'i phyir smra ba dang / gang rtogs par bya ba'i phyir smra ba dang / gang bsgom pa'i phyir smra ba de dag thams cad 'das pa'i rgyus 'thob pa ma yin/ ma 'ongs pa'i rgyus 'thob pa ma yin/ da ltar byung ba'i rgyus 'thob pa ma yin pa 'di ni tshul bzhin du sbyor ba zhes bya'o/ /gang gi tshe chos thams cad ngo bo nyid kyis 'gags par mthong ba de'i tshe tshul bzhin du mthong ba yin no/ /gang gi tshe chos thams cad rang bzhin gyis rnam par zhi ba dang / rang bzhin gyis snyoms par zhugs par mthong ba de'i tshe/ tshul bzhin du mthong ba yin no/ /gang gi tshe chos thams cad gtan du ma skyes par mthong ba de'i tshe tshul bzhin du mthong ba yin no/ /gang gi tshe chos thams cad gtan du ma skyes pa dang / gtan du ma byung ba dang / gtan du yongs su mya ngan las 'das par mthong ba dang /gang gis mthong ba dang / gang mthong ba de yang mi mthong ba dang / ji ltar mi mthong ba dang / rnam par mi mthong ba de ltar mthong na tshul bzhin du mthong ba zhes bya'o/ /de nas bcom ldan 'das kyis tshan po che chen po dri ma med pa'i gzi brjid la legs so zhes bya ba byin te/ rigs kyi bu legs so legs so/ /gal te bstan nam bstan pa na de ltar bstan par bya'o/ /tshul bzhin du brtson pa ni chos gang la yang rmongs pa med do/ /tshul bzhin du brtson pa ni chos gang la yang sgrib pa med do/ /tshul bzhin du brtson pa ni gang du yang bcings pa yang med grol ba yang med do/ /de ci'i phyir zhe na/ tshul bzhin du brtson pa ni chos gang yang spang ba'am/ 'bral bar bya ba'i phyir 'bad pa med do/ /gang chos thams cad yang dag par mthong ba dang / ji lta ba bzhin du mthong ba de ni de'i yang dag par lta ba yin no/ /chos rnams la ji lta ba bzhin du mthong ba gang zhe na/ 'di lta ste/ mthong ba med pa kho na'o/ /mthong ba med pa zhes bya ba de ni ma skyes pa'i tshig bla dgas so/ /ma skyes pa zhes bya ba de ni ma byung ba'i tshig bla dgas so/ / 56-1-104b ma byung ba zhes bya ba de ni ma mthong ba'i tshig bla dgas te/ ngas de las dgongs nas tshig 'di skad du chos thams cad ma skyes ma mthong na yang dag pa nyid skyon med pa la 'jug par 'gyur ro zhes gsungs so/ /'di ni yang dag pa'i lta ba ste/ 'di lta ste/ yang dag pa nyid skyon med pa la 'jug pa'o/ /ci'i phyir yang dag pa nyid skyon med pa la 'jug pa zhes bya zhe na/ bdag mnyam pa gang yin pa de ni bdag med pa'i mnyam pa'o/ /bdag med pa'i mnyam pa gang yin pa de ni chos thams cad mnyam pa ste/ de bas na yang dag pa nyid skyon med pa la 'jug pa zhes bya'o/ /de nas bcom ldan 'das la byang chub sems dpa' sems dpa' chen po sred med kyi bus 'di skad ces gsol to/ /bcom ldan 'das 'di ltar byang chub sems dpas chos thams cad 'di lta bu'i mtshan nyid dang / rang bzhin gyis yongs su mya ngan las 'das pa'i tshul du chos kyi rnam grangs 'di yang dag par shes shing thos la yid ches shing mos su lags kyang / bar ma dor yongs su mya ngan las 'da' bar mi 'gyur ba ni bcom ldan 'das ngo mtshar lags so/ /bde bar gshegs pa ngo mtshar lags so/ /bcom ldan 'das kyis bka' stsal pa/ sred med kyi bu 'di ltar byang chub sems dpa' thabs la mkhas pa de dag ni thabs mkhas pa de dang ldan pas sems bskyed pa thams cad la chos bzhis yongs su sgo bar byed de/ bzhi gang zhe na/ 'di lta ste/ byams pa chen po dang / snying rje chen po dang / thams cad mkhyen pa'i ye shes dang / sangs rgyas 'byung bas chos kyi tshul rgyun mi 'chad par bya ba ste/ sred med kyi bu chos bzhi po de dag gis chos thams cad yongs su sgo bar byed de/ chos thams cad rang bzhin gyis yongs su mya ngan las 'das par shes shing thos la yid ches shing mos su zin kyang bar ma dor yongs su mya ngan las 'da' bar mi 'gyur ro/ /des sems can rnams kyi don gyi phyir chos 'dul ba 'di shes te/ shes shing mthong la nges pa ni mi mthong ngo / /de ci'i phyir zhe na/ des 56-1-105a sems can thams cad yongs su ma btang ba'i phyir ro/ /de nas bcom ldan 'das la tshan po che chen po dri ma med pa'i gzi brjid kyis 'di skad ces gsol to/ /bcom ldan 'das bcom ldan 'das kyis nges par ltung bar 'gyur ro zhes de skad gsungs pa'i byang chub sems dpa'i skyon de gang lags/ bcom ldan 'das kyis bka' stsal pa/ rigs kyi bu byang chub sems dpa' rnams la ni skyon gang yin pa'i lta bar gyur pa yang ci yang med la rnam par rtog pa yang ci yang med mod kyi/ 'on kyang nyan thos kyi theg pa la dmigs pa byas nas sems can thams cad la ma dmigs/ sangs rgyas kyi rigs la ma dmigs/ chos dang dge 'dun gyi rigs la ma dmigs/ theg pa chen po la ma dmigs te/ thams cad mkhyen pa yal bar bor nas mi lta ba dang / yang dag par rdzogs pa'i byang chub tu smon lam mi 'debs pa dang /'dus byas thams cad la skyo bas nyan thos kyi skyon med pa la 'jug par byed do/ /byang chub sems dpa' sems dpa' chen pos ni sems can thams cad la dmigs pa byas te/ dkon mchog gsum gyi rigs la dmigs pa byas zhing theg pa chen po la dmigs pa byas nas thams cad mkhyen pa'i ye shes la lta ste/ lus dang srog la mi lta'o/ /chos thams cad mtshan nyid gcig par shes kyang skyon med pa la 'jug par mi byed/ sems can la lta ba'i phyir bsam gtan yang 'dris par byed la/ nyan thos kyi skyon med par yang mi ltung ste/ rigs kyi bu rnam grangs des kyang khyod kyis byang chub sems dpa' rnams kyi skyon yang med la/ skyon med pa la yang 'jug par mi byed pa de ltar rig par bya'o/ /de skad ces bka' stsal pa dang / bcom ldan 'das la tshan po che chen po dri ma med pa'i gzi brjid kyis 'di skad ces gsol to/ /bcom ldan 'das byang chub sems dpa' sems dpa' chen po rnams kyi rmad du byung ba'i chos de la nyan thos dang / rang sangs rgyas thams cad kyis ma mchis pa ni ngo mtshar lags so/ /de nas 'jam dpal gzhon nur gyur pa 'khor de nyid du 'dus par 56-1-105b gyur te 'dug go/ /de nas bcom ldan 'das la byang chub sems dpa' sems dpa' chen po sred med kyi bus 'di skadu ces gsol to/ /bcom ldan 'das 'jam dpal gzhon nur gyur pa 'di bsod nams thams cad bsdus pa'i ting nge 'dzin 'di'i skabs su bka' mchid kyi rgyud ci yang mi mchi lags so/ /de nas 'jam dpal gzhon nur gyur pas byang chub sems dpa' sems dpa' chen po sred med kyi bu la 'di skad ces smras so/ /rigs kyi bu byang chub sems dpa' sems dpa' chen po ni bsod nams 'dod pa'i phyir byang chub tu spyod par mi byed do/ /rnyed pa dang / bkur sti dang / tshigs su bcad pa 'dod pa dang / mtho ris 'dod pa dang / longs spyod 'dod pa dang / 'khor 'dod pa dang /grags pa dang / snyan pa dang / bsngags pa 'dod pa'i phyir byang chub tu spyod par mi byed do/ /sred med kyi bus smras pa/ 'jam dpal 'o na ci'i phyir byang chub sems dpa' rnams byang chub tu spyod par byed/ 'jam dpal gyis smras pa/ rigs kyi bu byang chub sems dpa' rnams ni sems can thams cad la snying rje ba'i phyir byang chub tu spyod par byed do/ /byang chub sems dpa' rnams ni chos 'dod pa dang / sems can thams cad kyi sdug bsngal bsal bar 'dod pa dang / yang dag pa ma yin pa'i nyon mongs pa rab tu zhi bar 'dod pa dang / bdag gi sdug bsngal dang 'dra bar 'dod pa dang / lan du phan 'dogs pa mi 'dod pa'i phyir byang chub tu spyod par byed do/ /rigs kyi bu de'i phyir byang chub sems dpa' lus dang sems la mi lta ba dang / yongs su 'dzin pa med pa dang / mi 'phrogs pa dang / lhag par zhen pa med pa dang / mtshan ma med pa dang / yid la byed pa med pa dang / mi ldog pa dang / mi ldog pa'i chos can dang / yang dag par rtog par mi byed pa dang / bskyod du med pa dang / rjes su chags pa med pa dang / khong khro ba med pa dang / gcig tu dpa' ba dang / thub pa med pa dang / gong ba med pa dang / mi skrag pa dang / mi 'jigs pa dang / kun tu rab tu mi 'jigs pa dang / ma khengs pa dang / ma dud pa dang / brtan pa dang / mi 56-1-106a g.yo ba thob pa dang / dben pa las skyes pa dang / don gcig pa dang / tshul gcig pa dang / gcig tu chad pa dang / tshul gcig la zhugs pa dang / gcig tu nges par brtson pa dang / sems can thams cad bsgral bar 'dod pa dang / gcig tu 'dod pa dang / de nyid 'dod pa rnams ni byang chub tu spyod par byed do/ /smras pa/ 'jam dpal ji ltar na byang chub sems dpa' byang chub sems dpa'i spyad pa la spyod pa yin/ smras pa/ rigs kyi bu gang gi tshe byang chub sems dpa' byang chub de zad pa'i phyir dang / skye ba'i phyir dang / mi zad pa'i phyir dang / mi skye ba'i phyir mi spyod de/ gtan du zad pa dang / zad pa med pa'i phyir rlom sems su mi byed la/ gtan du mi skye ba yang 'khrug par mi byed de/ de ltar spyod pa'i byang chub sems dpa' ni byang chub sems dpa'i spyad pa la spyod pa yin no/ /sred med kyi bu gzhan yang byang chub sems dpa' 'das pa'i sems zad do/ /zhes spyod par mi byed/ ma 'ongs pa'i sems ma phyin to zhes spyod par mi byed/ da ltar byung ba'i sems mi gnas so zhes spyod par mi byed la/ 'das pa dang / ma 'ongs pa dang / da ltar byung ba'i sems rnams la chags par mi byed de/ de ltar spyod pa'i byang chub sems dpa' sems dpa' chen po ni byang chub sems dpa'i spyad pa la spyod pa yin no/ /sred med kyi bu gzhan yang byang chub sems dpa' ni sbyin pa dang / byang chub dang / sems can rnams dang / de bzhin gshegs pa 'di la gnyis su med par spyod do/ / tshul khrims dang / byang chub dang / sems can rnams dang / de bzhin gshegs pa 'di la gnyis su med par spyod do/ /bzod pa dang / byang chub dang / sems can rnams dang / de bzhin gshegs pa 'di la gnyis su med par spyod do/ /brtson 'grus dang / byang chub dang / sems can rnams dang / de bzhin gshegs pa 'di la gnyis su med par spyod do/ /bsam gtan dang / byang chub dang / sems can rnams dang / de bzhin gshegs pa 'di la gnyis su med par spyod do/ /shes rab dang / byang chub dang / sems can rnams dang / de bzhin 56-1-106b gshegs pa 'di la gnyis su med par spyod do/ /gang gi tshe byang chub sems dpa' rnams de ltar pha rol tu phyin pa rnams la spyod la/ spyod pa'i mtshan nyid dang / ngo bo nyid kyang 'khrug par mi byed na de tsam gyis na byang chub sems dpa' rnams byang chub kyi spyad pa la spyod pa zhes bya'o/ / sred med kyi bu gzhan yang byang chub sems dpa' gzugs stong zhes mi spyod de/ gzugs nyid stong pa dang / de bzhin du tshor ba dang / 'du shes dang / 'du byed rnams dang / rnam par shes pa stong zhes mi spyod de/ rnam par shes pa nyid stong pa'o/ /gzugs ni stong pa nyid kyis zad par mi byed de/ gzugs ni stong pa nyid kyi ngo bo nyid kyis gtan du zad pa kho na'o/ /de bzhin du stong pa nyid kyis tshor ba dang / 'du shes dang / 'du byed rnams dang / rnam par shes pa zad par mi byed de/ stong pa nyid kyi ngo bo nyid kyis rnam par shes pa gtan du zad pa kho na'o/ /chos thams cad ni ngo bo nyid kyis zad pa kho nas zad pa yin te/ gzugs zad pas chos thams cad zad pa ma yin no/ /tshor ba zad pa dang / 'du shes zad pa dang / 'du byed rnams zad pa dang / rnam par shes pa zad pas chos thams cad zad pa ma yin te/ de ltar spyod pa'i byang chub sems dpa' sems dpa' chen po ni byang chub sems dpa'i spyad pa la spyod pa yin no/ /sred med kyi bu gzhan yang byang chub sems dpa' ni so so'i skye bo'i chos rnams spang ba'i phyir yang 'bad par mi byed la/ sangs rgyas kyi chos rnams bskyed pa'i phyir yang spyod par mi byed do/ /'khor ba las yang dag par 'da' ba'i phyir dang / mya ngan las 'das pa yongs su rdzogs par bya ba'i phyir spyod par mi byed do/ /mi dge ba'i chos yongs su 'grub par yang mi mthong la/ dge ba'i chos yang dag par 'grub pa yang mi mthong ngo / /shes bya la ma gtogs par shes pa yang yang dag par mi mthong ste/ byang chub sems dpa' ni chos kyi dbyings dbyer med par spyod pa la mos pa yin te/ sred med kyi bu de ltar spyod pa'i byang chub sems dpa' ni byang chub sems dpa'i spyad pa la spyod pa yin no/ /sred med kyi bu gzhan yang byang chub sems dpa' ni sems can 56-1-107a gyi khams tshad med pa dang / chos kyi dbyings tshad med par yang mos la/ sems can gyi khams kyang zad par mi byed cing chud gzan pa'i phyir yang spyod par mi byed do/ /de ci'i phyir zhe na/ sems can gyi khams dang / chos kyi dbyings de gnyis su med de gnyis su dbyer med cing mtshan nyid med pa'i phyir ro/ /chos kyi dbyings kyang 'phel ba yang med/ yongs su 'grib pa yang med la/ sems can gyi khams kyang 'phel ba yang med/ yongs su 'grib pa yang med do/ /chos kyi dbyings kyi mtshan nyid gang yin pa de ni sems can gyis khams kyi mtshan nyid kyang de nyid yin no/ /sred med kyi bu gzhan yang byang chub sems dpas chos thams cad mtshan nyid med par shes nas/ chos kyi dbyings dang / sems can gyi khams zad pa'i phyir yang mi spyod/ 'phel ba'i phyir yang mi spyod do/ /'di la yang dag pa ma yin par yongs su brtags pa las byung ba dang / phyin ci log las byung ba dang / rnam par bsgrubs pas nye bar gnas pa'i nyon mongs pa yongs su shes par bya ba'i phyir spyod kyi/ 'khor ba'i gnod pa gzhig pa'i phyir dang / bdag dang / sems can dang / srog dang / gang zag gzhig pa'i phyir spyod par mi byed de/ sred med kyi bu de ltar spyod pa'i byang chub sems dpa' ni byang chub sems dpa'i spyad pa la spyod pa yin no// //bam po bzhi pa ste tha ma/ 'jam dpal gzhon nur gyur pas spyod pa'i le'u'i chos bstan pa 'di bshad pa na theg pa chen po la yang dag zhugs pa'i lha'i bu bcu drug gis mi skye ba'i chos la bzod pa thob bo/ /de nas tshan po che chen po dri ma med pa'i gzi brjid kyis chos kyi rnam grangs 'di la mchod pa'i las bya ba dang / yongs su gzung ba'i phyir bcom ldan 'das chos kyi rnam grangs 'di la mos pa'i sems can gang dag lags pa de dag gi don thams cad 'grub par 'gyur lags so zhes ched du brjod pa ched du brjod do/ /de nas lha'i bu bdud bral gyis 'jam dpal gzhon nur gyur pa la 'di skad ces smras so/ /'jam dpal bdag gis kyang byang chub sems dpa' 56-1-107b sems dpa' chen pos ji ltar spyod na byang chub sems dpa'i spyad pa spyod pa la spobs so/ /'jam dpal gyis smras pa/ lha'i bu khyod kyis de'i dus la dbab par shes na spobs par gyis shig /lha'i bus smras pa/ 'jam dpal chos thams cad la spyod pa gang yin pa de ni byang chub sems dpa'i spyod pa'o/ /bdud thams cad kyi spyod pa gang yin pa de ni byang chub sems dpa'i spyod pa'o/ /sems can thams cad kyi spyod pa gang yin pa de ni byang chub sems dpa'i spyod pa'o/ /slob pa dang mi slob pa thams cad kyi spyod pa gang yin pa de ni byang chub sems dpa'i spyod pa'o/ / rang sangs rgyas thams cad kyi spyod pa gang yin pa de ni byang chub sems dpa'i spyod pa'o/ /sangs rgyas thams cad kyi spyod pa gang yin pa de ni byang chub sems dpa'i spyod pa'o/ /de ci'i phyir zhe na/ byang chub sems dpa' sems dpa' chen pos thams cad la bslab dgos pa'i phyir ro/ /de nas byang chub sems dpa' sred med kyi bus lha'i bu bdud bral la 'di skad ces smras so/ /lha'i bu byang chub sems dpa' sems dpa' chen pos chos thams cad kyi spyod pa 'di la ji ltar spyad par bya/ lha'i bus smras pa/ sred med kyi bu byang chub sems dpa' sems dpa' chen pos ni sems can gyi spyod pa brgyad khri bzhi stong la bslab par bya ste/ sems can gyi spyod pa brgyad khri bzhi stong po gang zhe na/ 'di lta ste/ 'dod chags spyod pa rnams kyi nyi khri chig stong dang / zhe sdang spyod pa rnams kyi nyi khri chig stong dang / gti mug spyod pa rnams kyi nyi khri chig stong dang / cha mnyam par spyod pa rnams kyi nyi khri chig stong ngo / /byang chub sems dpa' sems dpa' chen pos sems can de dag thams cad kyi spyod pa de la yang 'jug par bya ste/ des 'dod chags spyod pa la spyad par bya zhing 'dod chags dang bral bar yang bya'o/ /zhe sdang spyod pa la spyad par bya zhing / zhe sdang dang bral bar yang bya'o/ /gti mug spyod pa la spyad par bya zhing gti mug dang bral bar yang bya'o/ /nyes pa thams cad spyod pa la spyad par bya zhing / nyes pa thams cad dang bral bar yang bya'o/ /byang chub sems dpa' gang spyad pa 56-1-108a thams cad la yang spyod la/ spyod pa thams cad kyis kyang mi gos pa dang / sems can thams cad yongs su smin par bya ba'i phyir spyod pa thams cad kyang 'grub par snang ba'i byang chub sems dpa' de ni byang chub sems dpa'i spyad pa spyod pa yin no/ /byang chub sems dpa' sred med kyi bus smras pa/ lha'i bu ji ltar na bdud thams cad kyi spyod pa gang yin pa de byang chub sems dpa'i spyod pa yin/ lha'i bus smras pa/ byang chub sems dpas ni sems kyi 'jug pa rnams las bdud thams cad kyi spyod pa blta bar bya ste/ bdud kyi las byung ngo cog gi dbang du yang 'gro bar mi bya'o/ /bdud kyi las kyi nying mtshams sbyor bar yang mi bya'o/ /spyod pa thams cad la 'jug pa la yang sbyor bar bya'o/ /bdud gcig tu nges par yang bstan par bya ste/ de'i dbang du 'gro bar yang mi bya'o/ /des bdud kyi rnam par smin pa la yang bslab par bya ste/ bdud kyi las dang 'bral bar yang bya'o/ /smras pa/ lha'i bu ji ltar na slob pa dang / mi slob pa dang / rang sangs rgyas thams cad kyi spyod pa gang yin pa de byang chub sems dpa'i spyod pa yin/ smras pa/ rigs kyi bu 'di ltar byang chub sems dpas spyod pa thams cad ngo bo nyid med pa'i spyod pa dang / rnam par smin pa med pa'i spyod pa dang / gnas pa med pa'i spyod pa dang / 'pho ba med pa'i spyod pa dang / skye ba med pa'i spyod pa la mos pa rnams la sbyor bar bya'o/ /de nas lha'i bu bdud bral gyis bstan pa 'di bshad nas 'jam dpal gzhon nur gyur pa la 'di skad ces smras so/ /'jam dpal bdag gi spobs pa ni de tsam du bas kyis/ spyod pa bshad pa 'di las brtsams te rgyas par khyod spobs par mdzod cig /de nas 'jam dpal gzhon nur gyur pas lha'i bu de la 'di skad ces smras so/ /lha'i bu byang chub sems dpa'i spyod pa ni yul thams cad las yang dag par 'das pa yin no/ /de ci'i phyir zhe na/ spyod pa de ni mig dang gzugs kyi yul du bgrang ba ma yin no/ /rna ba dang / sgra dang / sna dang / dri dang / lce dang / ro dang / lus dang / reg bya dang / yid dang chos kyi yul du bgrang ba ma yin te/ lha'i bu rnam grangs des kyang khyod kyis ci nas skyes bu 56-1-108b dam pa de dag gi spyod yul thams cad las yang dag par 'das pa yin par de ltar rig par bya'o/ /lha'i bu gzhan yang byang chub sems dpa' spyod pa gang la spyod na sangs rgyas bcom ldan 'das rnams mi mnyes par mi byed pa de ltar spyod pa'i byang chub sems dpa' ni byang chub sems dpa'i spyad pa la spyod pa yin no/ /lha'i bus smras pa/ 'jam dpal byang chub sems dpas ji ltar spyad na sangs rgyas bcom ldan 'das rnams mnyes par bgyid/ 'jam dpal gyis smras pa/ lha'i bu de bzhin gshegs pas ni chos thams cad yang dag par stong par mngon par rdzogs par sangs rgyas te/ gal te byang chub sems dpa' lta ba 'ga' zhig la mngon par zhen te/ tha na sangs rgyas kyi chos dang / mya ngan las 'das pa'i lta ba la mngon par zhen na yang de bzhin gshegs pa rnams kyi sku slu ba yin no/ /lha'i bu de bzhin gshegs pas ni chos thams cad yang dag par mtshan ma med par mngon par rdzogs par sangs rgyas te/ gal te byang chub sems dpa' chos 'ga' zhig mtshan mar byed dam/ mtshan ma dang 'grogs par byed na sangs rgyas bcom ldan 'das rnams kyi sku slu ba yin no/ /de bzhin gshegs pas ni chos thams cad yang dag par smon pa med par mngon par rdzogs par sangs rgyas so/ /de bzhin gshegs pas ni chos thams cad mngon par 'dus ma byas pa dang / yod pa ma yin pa dang / ma byung ba dang / ma skyes pa dang / ma 'thon pa dang / mtshan ma med pa dang / mtshan nyid med pa dang / ma 'ongs pa dang / ma song ba dang / mi gnas pa dang / rang bzhin gyis yongs su dag pa dang / rang bzhin gyis 'od gsal ba dang / rang bzhin gyis yongs su mya ngan las 'das pa dang / chos thams cad nam mkha' dang 'dra bar mngon par rdzogs par sangs rgyas te/ gal te byang chub sems dpa' chos sam/ chos kyi ngo bo nyid 'ga' zhig la dmigs par byed na de bzhin gshegs pa dgra bcom pa yang dag par rdzogs pa'i sangs rgyas rnams kyi sku slu ba yin no/ /lha'i bu gal te byang chub sems dpas lta bar gyur pa thams cad stong pa nyid du yang dag par 'du ba dang / lta bar gyur pa thams cad mtshan ma med par 56-1-109a yang dag par 'du ba dang / lta bar gyur pa thams cad smon pa med par yang dag par 'du ba dang / lta bar gyur pa thams cad khams gsum las yang dag par 'das par shes nas chos thams cad mngon par 'dus ma byas pa dang / yod pa ma yin pa dang / ma byung ba dang / ma skyes pa dang / ma 'thon pa dang / mtshan ma med pa dang / mtshan nyid med pa dang / ma 'ongs pa dang / ma song ba dang / mi gnas pa dang / rang bzhin gyis yongs su dag pa dang / rang bzhin gyis 'od gsal ba dang / rang bzhin gyis yongs su mya ngan las 'das pa dang / chos thams cad nam mkha' dang 'dra ba dang / rang bzhin gyis kun nas nyon mongs pa med par shes te/ de ltar na byang chub sems dpa' sangs rgyas bcom ldan 'das kyi sku mi slu ba yin no/ /de nas bcom ldan 'das kyis 'jam dpal gzhon nur gyur pa la legs so zhes bya ba byin te/ 'jam dpal legs so legs so/ /khyod kyi tshig 'di legs par smras te/ de ltar spyod pa'i byang chub sems dpa' ni byang chub sems dpa'i spyad pa la spyod pa yin te/ lung bstan pa yang myur du thob par 'gyur ro/ /'jam dpal ngas mngon par shes te/ de bzhin gshegs pa mar me mdzad kyi sngon rol du dkar po'i spyod pa gang la ngas ma spyad pa ci yang med de/ 'on kyang ngas lung bstan pa ma thob bo/ /de ci'i phyir zhe na/ 'di ltar ngas mtshan ma dang bcas par spyad pa dang / rtsol ba dang bcas par spyad pa dang / dmigs pa dang bcas par spyad pa'i phyir ro/ /gang gi tshe ngas de bzhin gshegs pa dgra bcom pa yang dag par rdzogs pa'i sangs rgyas mar me mdzad mthong ba'i tshe spyod pa thams cad las yang dag par 'das te/ mthong ma thag tu bcom ldan 'das de'i spyod pa mthong ba ngas thob par gyur cing chos thams cad rang bzhin gyis ma skyes pa yang rtogs te/ de nas gdod ma 'ongs pa'i dus na khyod de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya bar 'gyur ro zhes bcom ldan 'das de bzhin gshegs pa mar me mdzad des lung bstan to/ /de nyid kyi tshe ngas mi skye ba'i chos rnams la bzod pa yang 56-1-109b thob bo/ /'jam dpal de lta bas na byang chub sems dpa' sems dpa' chen po myur du mi skye ba'i chos rnams la bzod pa thob par 'dod pa rnams kyis spyod pa'i le'u 'di la dmigs su med pa dang / rtsol ba med pa'i chos la mos pa dang / /rnam par grol ba la sbyor bar bya'o/ / de nas bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das gang thob par bgyi ba'i slad du bzod pa brnyes lags/ bcom ldan 'das kyis bka' stsal pa/ 'jam dpal phung po dang / khams dang / skye mched thob par bya ba'i phyir bzod pa thob ste/ de yang chos thams cad thob par bya ba'i phyir bzod pa thob bo/ /'jam dpal bzod pa thob ces bya ba de ni mi zad pa'i chos nyid de thob pa'o/ /'jam dpal bzod pa thob ces bya ba de ni yang dag pa nyid kyi tshig bla dgas so/ /'jam dpal bzod pa thob pa de la ni 'jig rten gyi chos rnams kun tu spyod pa med do/ /so so'i skye bo'i chos rnams dang / slob pa'i chos rnams dang / mi slob pa'i chos rnams dang / rang sangs rgyas kyi chos rnams dang / byang chub sems dpa'i chos rnams dang / sangs rgyas kyi chos rnams kun tu spyod pa med do/ /chos thams cad kun tu mi spyod pas na de'i phyir de la bzod pa thob pa zhes bya'o/ /bzod pa de ni chos thams cad kyi mtshan ma dang / dmigs pa rnams kyi sgo nas skad cig pa ma yin te/ de bas na bzod pa zhes bya'o/ / bzod pa 'di la ni mig dang / rna ba dang / sna dang / lce dang / lus dang / yid du bgrang ba ci yang med do/ /rlom sems su bya ba yang med do/ /zad pa yang med de/ bzod pa de la ni zad pa yang med do/ /bzod pa de la ni yul yang med do/ /bzod pa de la ni yul dang bral ba yang med de/ de bas na bzod pa zhes bya'o/ /bzod pa bstan pa 'di bshad pa na/ byang chub sems dpa' lnga brgyas mi skye ba'i chos la bzod pa thob ste/ tshig 'di skad du bdag cag gis ni bsod nams thams cad bsdus pa'i ting nge 'dzin 'di gnas 56-1-110a par 'gyur ba'i bya ba byas so/ /dpe med pa'i chos thams cad kyang yongs su rdzogs par byas so/ /bcom ldan 'das byang chub sems dpa' rnams kyis ni zab mo'i gnas thams cad gus par mnyan par bya'o/ /bsgom par bya'o/ /zhes smras so/ /de nas byang chub sems dpa' sred med kyi bus 'jam dpal gzhon nur gyur pa la 'di skad ces smras so/ /'jam dpal ji ltar na byang chub sems dpa' sems dpa' chen po rnams chos zab mo 'di dag la yongs su sbyang ba byas pa yin/ 'jam dpal gyis smras pa/ sred med kyi bu gang gi tshe byang chub sems dpa' rnams kyis chos thams cad ma byas pa dang / ma bsgyur bar shes na sred med kyi bu de tsam gyis na byang chub sems dpa' rnams yongs su sbyang ba byas pa yin no/ /gang gi tshe chos thams cad mngon par 'dus ma byas par shes pa dang / byas pa la mi 'gyod pa dang / ma byas pa la yang rmongs pa med na de'i tshe byang chub sems dpa' rnams yongs su sbyang ba byas pa yin no/ /bya ba la yang sbyor ba dang / byas pa la byas pa mi gzo ba las byas pa gzo bar byed pa dang / bkur sti byas pa dang / bkur sti ma byas pas kyang sro sos pa dang / sro shi bar mi 'gyur ba dang / byed pa po dang / tshor ba po yang mi dmigs la/ yongs su sbyang ba yang byas pa dang / sbyin pa yang sbyin zhing / de yang byang chub tu yongs su sngo bar byed la yongs su sbyang ba yang byas pa dang / sbyin pa dang / byang chub dang / bdag dang / pha rol kyang mi dmigs la/ yongs su sbyang ba yang byas pa dang / tshul khrims kyang srung bar byed/ bzod pa yang sgom par byed/ brtson 'grus kyang rtsom par byed/ bsam gtan yang sten par byed/ shes rab kyang sgom par byed cing byang chub tu yang yongs su sngo bar byed la/ shes rab de yang dmigs par mi byed/ byang chub dang / bdag dang / pha rol yang dmigs par mi byed pa'i byang chub sems dpa' de dag ni yongs su sbyang ba byas 56-1-110b pa yin par rig par bya'o/ /lus dang ngag dang yid kyi dge ba rnams mi dmigs pa gang yin pa de yang byang chub sems dpa' rnams kyi yongs su sbyang ba byas pa yin no/ /lus dang ngag dang yid kyi tshogs la mkhas pa mi dmigs pa gang yin pa de yang byang chub sems dpa' rnams kyi yongs su sbyang ba byas pa yin no/ /de nas byang chub sems dpa' rtag tu brtson 'grus brtan gyis 'jam dpal gzhon nur gyur pa la 'di skad ces smras so/ /'jam dpal bdag kyang ji ltar byang chub sems dpa' yongs su sbyang ba byas pa yin pa la spobs so/ / 'jam dpal gyis smras pa/ rigs kyi bu khyod kyis de'i dus la da bab par shes na spobs par gyis shig /byang chub sems dpa' rtag tu brtson pa brtan gyis smras pa/ 'jam dpal gang gi tshe byang chub sems dpas tha na sems can gcig tsam sangs rgyas kyi bstan pa la 'jug par byed na yang byang chub sems dpa' yongs su sbyang ba byas pa yin no/ /gang gi zas za ba'am/ gang las len par byed pa'am/ gang la sbyin par byed pa de dag byang chub la 'dzud par byed na/ gnyis ka la byang chub sems dpa'i yon dag par 'gyur ro/ /chos sgrub pa la btsud na yang sbyin pa po dang / len pa po gnyis ka la byang chub sems dpa'i yon dag par 'gyur ro/ /gang gi tshe byang chub sems dpa' sems can gzhan dag la sangs rgyas kyi sgra sgrogs par byed cing / chos kyi sgra dang / dge 'dun gyi sgra sgrogs par byed la/ bdag nyid kyang / sangs rgyas dang / chos dang / dge 'dun rjes su dran bzhin du sbyin pa sbyin par byed pa dang / sbyin pa'am/ tshul khrims sam/ bzod pa'am/ brtson 'grus sam/ bsam gtan nam/ shes rab yid la byed dam/ gzhan dag la pha rol tu phyin pa drug sgrogs par byed cing / sems can rnams la sems par byed la/ dge ba'i rtsa ba de yang sems can de dag dang thun mong du byas nas/ byang chub tu yongs su sngo bar byed na byang chub sems dpa' yongs su sbyang ba byas pa 56-1-111a yin te/ de'i tshe zas longs spyod pa'i 'os yin no/ /byang chub sems dpa' gang bzod pa sgom pa na/ chom rkun pa rnams dang / rigs ngan yan chad kyis spyos shing brgyad bkag kyang 'khrug par mi 'gyur/ gnod sems mi byed de/ sems can de dag nyid kyi dga' ba bskyed pa'i phyir brtson 'grus rtsom zhing / stobs dang / brtson 'grus dang / mthu chen po skyed par byed na/ de'i tshe byang chub sems dpa' byang chub sems dpa'i spyod pa la yongs su sbyang ba byas pa yin par rig par bya'o/ /gal te byang chub sems dpa' dbyig bye ba phrag brgya'am/ gling bzhi pa'i 'jig rten gyi khams dbyig thams cad kyis yongs su bkang ba byin te/ brid na yang shes bzhin du brdzun du mi smra la/ gzhan dag gis chos dris na yang gzing gzing ba'i tshig mi smra zhing / chos la skur pa btab nas/ chos ma yin par smra bar mi byed na byang chub sems dpa' yongs su sbyang ba byas pa yin par rig par bya'o/ /gal te byang chub sems dpa' zhag bdun gyi bar du zan chad nas kha zas bstabs na yang thams cad mkhyen pa nyid kyi sems 'ba' zhig de la mngon du 'gyur zhing / sems can thams cad rab tu dgrol bar bya ba 'ba' zhig gi phyir de la byang chub kyi sems mngon du 'gyur na/ byang chub sems dpa' yongs su sbyang ba byas pa yin par rig par bya'o/ /'jam dpal gzhan yang byang chub sems dpa' chos nyan pa'i phyir sa gzhi mtshon cha gtams pa'am/ mes gang ba rgal te 'gro bar byed la/ lus phangs pa'am/ srog phangs par mi byed de/ phung po dang / khams dang / skye mched rnams ni rnyed par sla'i/ sangs rgyas bcom ldan 'das rnams ni rnyed par dka'o/ /chos ston pa ni rnyed par dka'o/ /chos la gus pa'i sems can dag kyang rnyed par dka'o/ /snyam du de ltar yang slob ste/ gal te de lta bur 'dzin pa la zhugs na byang chub sems dpa' yongs su sbyang ba byas pa yin par rig 56-1-111b par bya'o/ /'jam dpal gzhan yang gal te byang chub sems dpa' tshig bzhi pa'i tshigs su bcad pa gcig gam/ sdom pa'am/ chos kyi gdams ngag gis ni ches yi rangs par 'gyur la/ 'khor los sgyur ba'i rgyal srid kyis ni yi rangs par mi 'gyur ba dang / /sems can gcig la yang tshig bzhi pa'i tshigs su bcad pa bsgrags pas ni ches yi rangs par 'gyur la/ brgya byin du 'gyur ba thob pas ni de lta ma yin na byang chub sems dpa' yongs su sbyang ba byas pa yin no/ /'jam dpal gzhan yang byang chub sems dpa' dud 'gro'i skye gnas su gyur pa khyi la sbyin pa byed pas ni ches yi rangs par 'gyur la/ tshangs par 'gyur ba thob pas ni ma yin na byang chub sems dpa' yongs su sbyang ba byas pa yin par rig par bya'o/ /'jam dpal gzhan yang gal te byang chub sems dpa' thos pa la gnas pa'i rnyed pa gcig cig thams cad mkhyen pa nyid du yongs su bsngos pas ni ches yi rangs par 'gyur la/ nor gyi phung po dpag tu med pas ni de lta ma yin pa dang / thams cad mkhyen pa nyid kyi sems kyis ni ches yi rangs par 'gyur la/ stong gsum gyi stong chen po'i 'jig rten gyi khams rin po che sna bdun gyis yongs su bkang bas ni de lta ma yin pa dang / dge ba'i rtsa ba gcig cig sems kyis byang chub tu yongs su bsngos pas/ byang chub tu dmigs pa/ sems can thams cad la phan pa dang / bde ba'i phyir yongs su bsngos pas ni ches yi rangs par 'gyur la/ rnyed pa dang / bkur sti dang / tshigs su bcad pa thams cad kyis ni yi rangs par mi 'gyur te/ de ltar spyod na byang chub sems dpa' yongs su sbyang ba byas pa yin par rig par bya'o/ /'jam dpal gzhan yang byang chub sems dpas ni sems can yongs su smin par bya ba'i phyir rtag tu brtson par bya'o/ /byang chub sems dpas ni thos pa mang po btsal ba'i phyir mthu rtsal brtan por bya'o/ /byang chub sems dpas ni yan lag dang / 56-1-112a nying lag yongs su gtang bas mthu dang ldan par bya'o/ /byang chub sems dpas ni 'jig rten gyi chos rnams dang du len par spro bar bya'o/ /byang chub sems dpas ni srog gi phyir yang bslab pa yongs su mi gtang bas spyod pa la blo dang ldan par bya'o/ /byang chub sems dpas ni ngan du smras pa'i tshig dang du len pa'i ngang tshul can gyis bzod pa'i stobs dang ldan par bya'o/ /byang chub sems dpas ni sangs rgyas kyi zhing yongs su dag pa yongs su gzung bas le lo med par bya'o/ /byang chub sems dpas ni byang chub kyi sems dang mi 'bral bas rtse gcig tu bya'o/ /byang chub sems dpas ni pha rol tu phyin pa drug yongs su btsal bas byang chub kyi sems mi brjed par bya'o/ /byang chub sems dpas ni rang gi don la brtson pa dang ldan pa dang / sems can thams cad yongs su mi gtang ba dang / sems can thams cad kyi skabs dbye ba'i phyir mi 'phrogs par bya'o/ /byang chub sems dpas ni sangs rgyas kyi rigs mi 'chad par bya ba'i phyir dam bcas pa la brtan par bya'o/ /byang chub sems dpas ni lus dang ngag dang yid drang po yongs su dag pas g.yo thams cad yongs su spang bar bya'o/ /byang chub sems dpas ni sems can skyabs su 'ongs pa yongs su bskyab pa'i phyir shin tu dkar ba'i phyogs gcig tu nges par bya'o/ /byang chub sems dpas ni lus dang srog la ma chags pas mi blta bar bya'o/ /byang chub sems dpas ni tshur shog 'ongs pa legs so zhes smra bas 'jam por bya'o/ /byang chub sems dpas ni khro gnyer med pa'i bzhin gyis gsong por smra bar bya'o/ /byang chub sems dpas ni rjes su chags pa dang / khong khro ba med pas sa dang 'dra bar bya'o/ /byang chub sems dpas ni 'grogs na bde bas des bar bya'o/ /byang chub sems dpas ni 'thun par 'dzin pas bka' blo bde bar bya'o/ /byang chub sems dpas ni sems can thams cad la 'dud pas nga rgyal 56-1-112b gzhom par bya'o/ /byang chub sems dpas ni nga rgyal bcag pas khyi dang 'dra bar bya'o/ /byang chub sems dpas ni sngon dam bcas pa nyams su lon par byed pas slu ba med par bya'o/ /byang chub sems dpas ni sems can thams cad la sems snyoms par bya'o/ / byang chub sems dpas ni 'byung po thams cad la byams pa'i sems su bya'o/ /byang chub sems dpas ni sems can thams cad kyi don la mngon par brtson pas snying rje chen po dang ldan par bya'o/ /byang chub sems dpas ni sangs rgyas kyi chos dang dge ba'i rtsa ba thams cad yongs su btsal ba la mngon par brtson pas sems dga' bar bya'o/ /byang chub sems dpas ni 'dod pa'i yon tan gyi dga' ba dang rtse ba thams cad la mi lta bas btang snyoms su ldan par bya'o/ /byang chub sems dpas ni rang gi lus dang srog yongs su gtong bas ser sna med par bya'o/ /byang chub sems dpas ni yongs su gzung ba'i dngos po rnams la bdag gir 'dzin pa med par bya'o/ /byang chub sems dpas ni yongs su rtog pa dang lta bar gyur pa thams cad dor ba'i sems su bya'o/ /byang chub sems dpas ni nor bdun gyi nor chen pos phyug par bya'o/ /byang chub sems dpas ni sgrub pa la gnas pas brtan pa dang ldan par bya'o/ /byang chub sems dpas ni sangs rgyas kyi yon tan mtha' yas pa tshol bas chog mi shes par bya'o/ /byang chub sems dpas ni pha rol tu phyin pa rnams kyis yongs su rdzogs par bya'o/ /byang chub sems dpas ni bdud bzhi las rnam par rgyal bas dpa' bar bya'o/ /byang chub sems dpas ni sems can thams cad kyi nyon mongs pa'i nad zhi bar bya ba la mkhas pas sman pa'i rgyal por bya'o/ /byang chub sems dpas ni byang chub kyi sems dang ma bral bas yon gnas su bya'o/ /byang chub sems dpas ni sems can thams cad la lta bas bsod nams kyi zhing du bya'o/ /byang chub sems dpas ni 'jig rten gyi chos thams cad kyi 'dam gyis mi gos pas pad ma lta bur bya'o/ /byang chub 56-1-113a sems dpas ni sems can thams cad sgrol bas gru dang 'dra bar bya'o/ /byang chub sems dpas ni rab dang 'bring dang tha ma la mi brnyas pas zam pa lta bur bya'o/ /byang chub sems dpas ni dam pa'i chos kyi chu mi zad pa'i bsam pas chu mig dang / mtsho dang / mtsho bran dang / mtshe'u lta bur bya'o/ /byang chub sems dpas ni thos pa la rtse gcig pas chog mi shes pas rgya mtsho lta bur bya'o/ /byang chub sems dpas ni bskyod du med pas lhun po lta bur bya'o/ /byang chub sems dpas ni sgo'i them pa'i rten lta bus shin tu brtan par bya'o/ /byang chub sems dpas ni phun sum tshogs pa thams cad la lhag par chags pa med par bya'o/ /byang chub sems dpas ni sems yongs su sgyur ba la mkhas pas dbang dang ldan par bya'o/ /byang chub sems dpas ni rgya chen po la mos pas rgyal po lta bur bya'o/ /byang chub sems dpas ni sems can thams cad kyis bsten pa'i 'os su gyur pas brgya byin lta bur bya'o/ /byang chub sems dpas ni chos thams cad kyi bdag po byed pas tshangs pa lta bur bya'o/ /byang chub sems dpas ni gtan du bde ba'i mya ngan las 'das pa la 'god pas sems can thams cad kyi bde ba bsgrub par bya'o/ /byang chub sems dpas ni sems can thams cad la phan pa dang bde ba'i dngos po bstabs pas pha ma dang 'dra bar bya'o/ /byang chub sems dpas ni dge ba dang mi dge ba'i chos thams cad kyis ma nyams ma smas par bya'o/ /byang chub sems dpas ni mdza' bshes dang dgra rnams la sems snyoms pas zhe 'gras pa med par bya'o/ /byang chub sems dpas ni skye ba'i gnas thams cad la yid brtan par mi bya'o/ /byang chub sems dpas ni lhug par gtong bas chos kyi sbyin bdag bya'o/ /byang chub sems dpas ni bag yod pas rgyags pa dang / bag med pa thams cad dang bral bar bya'o/ /'jam dpal byang chub sems dpas ni byang chub sems dpa'i spyod pa tshol ba dang / spyod pa dang / sdom pa dang / bslab pa dang / brtson 56-1-113b 'grus rnams la bag yod pas bla na med pa yang dag par rdzogs pa'i byang chub mngon par rdzogs par 'tshang rgya bar nus so/ /de nas bcom ldan 'das kyis byang chub sems dpa' rtag tu brtson pa brtan pa la legs so zhes bya ba byin te/ rigs kyi bu legs so legs so/ / byang chub sems dpa' rnams kyi spyod pa gnas pa la mkhas pa 'di khyod kyis legs par smras so/ /rigs kyi bu byang chub sems dpa' sems dpa' chen po bsod nams thams cad bsdus pa'i ting nge 'dzin 'di thob par 'dod pas ni bsod nams ma yin pa thams cad dang bral bar bya ba dang / bsod nams thams cad yongs su gzung ba la brtson par bya'o/ /de nas bcom ldan 'das la byang chub sems dpa' sred med kyi bus 'di skad ces gsol to/ /bcom ldan 'das bsod nams thams cad bsdus pa'i ting nge 'dzin 'di thob pa'i byang chub sems dpa'i rnam pa ni gang dag lags/ rtag ni gang dag lags/ mtshan ma ni gang dag lags/ yon tan ni gang dag lags/ phan yon ni gang dag lags/ de nas bcom ldan 'das kyis byang chub sems dpa' sred med kyi bu la 'di skad ces bka' stsal to/ / rigs kyi bu bsod nams thams cad bsdus pa'i ting nge 'dzin 'di thob pa'i byang chub sems dpa' ni mi khom pa brgyad las log pas na ngan song dang bral ba yin no/ /bsams pa tsam gyis thams cad 'grub pas na dbul ba thams cad yang dag par chad pa yang yin no/ / skyes bu chen po'i mtshan sum cu rtsa gnyis kyis legs par brgyan pas na dbang po tshang ba yang yin no/ /mi zad pa'i chos nyid kyis na spobs pa thob pa yang yin no/ /brjed ngas pa med pas na gzungs thob pa yang yin no/ /chos kyi 'khor lo bskor bas na bsod nams thams cad kyis mtho ba yang yin no/ /brgya byin dang / tshangs pa dang / 'jig rten skyong gi dbang thob pas na sems can thams cad kyi mchod pa'i gnas kyi dbang bskur ba thob pa yang yin no/ /mngon par shes pa ma nyams pas na mngon par shes pa thob pa yang 56-1-114a yin no/ /skye ba'i gnas thams cad du dbang thob pa yang yin no/ /chos kyi nor thams cad rnam par 'phel bas na thabs kyis mdzod mi zad pa yang yin no/ /sdig pa'i lta ba dang bral bas na shes rab kyis kun tu lta ba yang yin no/ /nyan thos dang rang sangs rgyas kyi sa la 'dod pa med pa yang yin no/ /nyan thos dang rang sangs rgyas thams cad kyi 'dul ba po yang yin no/ /sems can thams cad yongs su smin par bya ba'i phyir dbang po la mkhas pa yang yin no/ /bsam gtan dang / ting nge 'dzin dang / snyoms par 'jug pa dang / rnam par thar pa'i sgo rnams la rnam par rtse ba yang yin no/ /gtong ba la mos pas na ma bstan pa'i sbyin pa dang ldan pa yang yin no/ /sdom pa gsum yongs su dag pas na ma bstan pa'i tshul khrims can yang yin no/ / sems kyi rgyud la byams pa mngon par bsgrubs pas na bzod pa dpag tu med pa dang ldan pa yang yin no/ /yid skyo ba med pas na sems can thams cad la brtson 'grus rtsom pa yang yin no/ /dben pa la mos pas na bsam gtan gyi pha rol tu son pa yang yin no/ / sems can thams cad yongs su smin par bya ba'i phyir 'dod pa'i khams su yang skye bar 'gyur ro/ /sgra dang sgra ma yin pa so sor brtag pa la mkhas pas na shes rab kyis rnam par grol ba rnam par dag pa dang ldan pa yang yin no/ /ya nga ba'i lam yongs su spangs pas na mig dang ldan pa yang yin no/ /chos nyid dang sangs rgyas mthong ba dang yang ma bral ba yin no/ /stong pa nyid dang / mtshan ma med pa dang / smon pa med pa dang / mngon par 'du byed pa med pa dang / ma byung ba dang / ma skyes pa dang / dngos po med pa'i sgra dang yang ma bral ba yin no/ /sangs rgyas kyis gsungs pa thams cad kyang 'dzin to/ /phyir mi ldog pa'i byang chub sems dpa'i dge 'dun mthong ba dang yang mi 'bral ba yin no/ /sangs rgyas kyi zhing gi yon tan thams cad yongs su 'dzin pas na 56-1-114b sgrib pa med par grol ba yang yin no/ /bdud bzhi spangs pas na bdud dang phyir rgol ba bcom pa yang yin no/ /phyir mi ldog pa'i chos can yin pas na zab mo bzod pa yang yin no/ /sangs rgyas kyi chos kyi cho 'phrul gyis na mngon par shes pa myur ba yang yin no/ / de ni ma thos pa'i chos kyi rgyun kyang rnam par rig par yang 'gyur ro/ /sangs rgyas kyi zhing gi yon tan yongs su dag pa rgya chen po thams cad yongs su 'dzin pas na bsam pa thams cad dang ldan pa yang yin no/ /de'i bag chags kyi nying mtshams sbyor ba thams cad kyang phyir log pa yang yin no/ /lus dang / gzugs dang / lus kyi ngo bo thams cad kun tu ston pas na yid las byung ba'i gnas dang / lus nges pa yang yin no/ /phas kyi rgol ba thams cad kyis kyang mi tshugs pa yang yin no/ /sangs rgyas bcom ldan 'das rnams kyi dam pa'i chos yongs su 'dzin pa yang yin no/ /dam pa'i chos kun tu bsrung ba'i phyir/ lus dang srog yongs su gtong ba yang yin no/ /sangs rgyas kyi yul yang ston la/ gtan du yongs su mya ngan las 'das pas yongs su mya ngan las 'da' bar yang mi byed do/ /'khor gyis bag tsha ba dang / 'jigs pa dang bral bas na mi 'jigs pa thob pa yang yin no/ /bya ba thams cad kyang shes pas byed kyi nga rgyal gyis byed pa ma yin no/ /sgyu ma lta bu'i ting nge 'dzin la rnam par 'phrul pas na bkod pa chen po dang ldan pa yang yin no/ /gnod pa thams cad dang bral bas na mi g.yo ba'i shugs thob pa yang yin no/ /sangs rgyas kyi zhing thams cad du tshig gis shin tu go bar byed pas na sgra'i tshogs yongs su dag pa yang yin no/ /bdud kyi dpung thams cad 'joms pas na sems dpa' ba yang yin no/ /sangs rgyas kyi zhing thams cad g.yo bar byed pas na/ rdzu 'phrul gyis rnam par 'phrul pa'i pha rol tu phyin pa yang yin no/ /don dang / chos dang / nges pa'i tshig dang / spobs pa phun sum tshogs pas na so so yang dag par 56-1-115a rig pa thob pa yang yin no/ /bag yod pas na thogs pa med pa'i ye shes la mos pa yang yin no/ /sems can thams cad la thams cad mkhyen pa'i ye shes yang dag par ston pas na/ sangs rgyas kyi phrin las la nye bar gnas pa yang yin no/ / sred med kyi bu de ltar na/ byang chub sems dpa' bsod nams thams cad bsdus pa'i ting nge 'dzin 'di la nges par 'gyur ba gang yin pa de dag gi rnam pa ni de dag yin no/ /rtags ni de dag yin no/ /mtshan ma ni de dag yin no/ /yon tan dang / phan yon ni de dag yin no/ /de nas bcom ldan 'das la byang chub sems dpa' sred med kyi bus 'di skad ces gsol to/ /bcom ldan 'das sems can thams cad kyis kyang bsod nams thams cad bsdus pa'i ting nge 'dzin 'di thob par gyur cig /byang chub sems dpa' rnams kyang ci nas ting nge 'dzin 'di thob nas nyan thos dang / rang sangs rgyas thams cad la ma mchis pa'i yon tan dang / phan yon gang dag lags pa 'di dag dang ldan par gyur cig /bcom ldan 'das sems can gang dag ting nge 'dzin rin po che 'di rna lam du mi thos pa dang / thos na yang mos par mi 'gyur ba de dag ni bdud kyis byin gyis brlabs pa lags so/ /bcom ldan 'das kyis bka' stsal pa/ sred med kyi bu de de bzhin te/ khyod tshig ji skad zer ba bzhin no/ /gzhan yang byang chub sems dpa' gang dag ting nge 'dzin 'dis nges par byung ba rnams dang / nges par 'byung ba rnams dang / nges par 'byung bar 'gyur ba de dag ni yon tan dpag tu med pa dang ldan pa dang / yon tan bsam gyis mi khyab pa dang ldan pa yin no/ /de nas byang chub sems dpa' sred med kyi bus 'jam dpal gzhon nur gyur pa la 'di skad ces smras so/ /'jam dpal byang chub sems dpa' sems dpa' chen po ting nge 'dzin 'di thob par 'dod pas chos gang dag la sbyor bar bya/ 'jam dpal gyis smras pa/ sred med kyi bu byang chub sems dpa' 56-1-115b sems dpa' chen po ting nge 'dzin 'di thob par 'dod pas ni so so skye bo'i chos rnams kyang chud mi gzan pa dang / sangs rgyas kyi chos rnams kyang 'thob par mi bya ba'i phyir sbyor bar bya'o/ /ci nas chos dang chos ma yin pa la sbyor bar yang mi bya/ 'bral bar yang mi bya ba de ltar des sbyor bar bya'o/ /ci nas 'khor ba'i khongs su yang gtogs la/ 'khor bar bya ba'i phyir yang slob par mi byed pa dang / 'khor ba'i nye ba'i nyon mongs pas kyang nyon mongs par mi 'gyur ba dang / mya ngan las 'da' ba'i phyir yang slob la/ nyan thos dang / rang sangs rgyas kyi yongs su mya ngan las 'das pas kyang yongs su mya ngan las 'da' bar mi byed pa de ltar des sbyor bar bya'o/ /gzhan yang sred med kyi bu byang chub sems dpa' sems dpa' chen po ting nge 'dzin 'di thob par 'dod pas ni/ bsod nams thams cad yang dag par 'byung ba la bslab par bya ste/ zag pa dang bcas pa dang / zag pa med pa'i bsod nams dag la yang rnam par rtog pa bskyed par mi bya'o/ /kha na ma tho ba dang bcas pa dang / kha na ma tho ba med pa dang / 'dus byas dang / 'dus ma byas dang / 'jig rten pa dang / 'jig rten las 'das pa'i bsod nams dang / bsod nams ma yin pa dag la yang rnam par rtog pa bskyed par mi bya'o/ /des chos kyi dbyings su yang dag par 'du ba'i bsod nams thams cad la mos par bya'o/ /des bsod nams dang / mi g.yo ba'i 'du byed rnams la mtshan nyid gcig par 'jug par bya'o/ /des sems can thams cad kyi bsod nams kyang 'di dang 'dra bar blta bar bya ste/ 'khor ba med par nyams su myong ba'i phyir ro/ /sangs rgyas gcig gi bsod nams dang / sangs rgyas thams cad kyi bsod nams kyang 'dra bar blta bar bya'o/ /'on kyang 'dra ba dang mi 'dra ba yang cung zad kyang blta bar mi bya ste/chos kyi dbyings la khyad par med pa'i phyir ro/ /so so'i skye bo'i bsod 56-1-116a nams gang dag yin pa dang / slob pa'i bsod nams gang dag yin pa dang / mi slob pa'i bsod nams gang dag yin pa dang / rang sangs rgyas kyi bsod nams gang dag yin pa dang / byang chub sems dpa'i bsod nams gang dag yin pa dang / yang dag par rdzogs pa'i sangs rgyas kyi bsod nams gang dag yin pa de dag thams cad kyang yang dag pa ma yin pa/ dngos po med pa/ yul na mi gnas pa/ phyogs na mi gnas pa yin par mos par bya'o/ /bsod nams thams cad kyang sems can thams cad dang 'brel bar mos par bya'o/ /rigs kyi bu 'di lta ste/ dper na gzugs gang ci'ang rung ba de dag thams cad ni 'byung ba chen po bzhi po dag dang / 'byung ba chen po bzhi po rgyur byas pa'i gzugs zhes bya'o/ /de bzhin du byang chub sems dpa' sems dpa' chen pos bsod nams kyang thams cad du 'brel bar mos par bya'o/ /bsod nams kyis rgyags par yang mi bya ste/ rtag tu mi zad pa'i chos nyid yin pa'i phyir ro/ /sred med kyi bu byang chub sems dpa' sems dpa' chen po ting nge 'dzin rin po che 'di 'thob par 'dod pas ni bsod nams mi zad pa dang / tshad med pa rnam pa bzhis skrag par mi bya ste/ bzhi gang zhe na/ 'di lta ste/ sems can thams cad la snying rje chen po tshad med pa dang / sangs rgyas kyi zhing tshad med pa dang / sangs rgyas kyi ye shes tshad med pa dang / sems can thams cad kyi sems kyi spyod pa la 'jug pa tshad med pa ste/ sred med kyi bu bzhi po de dag gis byang chub sems dpa' skrag par mi bya'o/ /byang chub sems dpa' sems dpa' chen pos bsam gyis mi khyab pa bzhi la mos par bya ste/ bzhi gang zhe na/ 'di lta ste/ las rnams kyi las kyi rnam par smin pa bsam gyis mi khyab pa dang / sems can rnams kyi spyod pa'i yul tha dad pa bsam gyis mi khyab pa dang / sangs rgyas bcom ldan 'das rnams kyi sangs rgyas kyi 56-1-116b rnam par thar pa bsam gyis mi khyab pa dang / byang chub sems dpa' rnams kyi 'gro bar skye ba yongs su dag pa'i yul bsam gyis mi khyab pa ste/ sred med kyi bu byang chub sems dpa' sems dpa' chen pos bsam gyis mi khyab pa bzhi po de dag la mos par bya'o/ /rigs kyi bu de ltar mos pa'i byang chub sems dpas ni mi zad pa bzhi thob par 'gyur te/ bzhi gang zhe na/ 'di lta ste/ bsod nams mi zad pa dang / smon lam yongs su rdzogs pa mi zad pa dang / thogs pa med pa'i spobs pa mi zad pa dang / bsod nams dang ye shes mi zad pa ste/ sred med kyi bu byang chub sems dpas mi zad pa bzhi po de dag thob par 'gyur ro/ /sred med kyi bu byang chub sems dpas chos bzhi la sbyor bar bya ste/ bzhi gang zhe na/ 'di lta ste/ dge ba'i rtsa ba'i tshogs kyis chog mi shes pa dang / chos ston pas chog mi shes pa dang / yongs su bsngo ba shin tu rdzogs pa la mkhas pas chog mi shes pa dang / sangs rgyas kyi zhing gi yon tan thams cad bdag gi zhing du 'jug par bya bas chog mi shes pa ste/ sred med kyi bu bzhi po de dag la sbyar bar bya'o/ /de nas byang chub sems dpa' sred med kyi bus 'jam dpal gzhon nur gyur pa la 'di skad ces smras so/ /'jam dpal bsod nams thams cad bsdus pa'i ting nge 'dzin 'di byang chub sems dpa' sems dpa' chen po khyim pa'am/ rab tu byung ba ji lta bu dag gi lag tu 'ong bar 'gyur/ glegs bam du byed pa'am/ kha ton du byed pa'am/ nges par sems pa'i bzod pa dang ldan par 'gyur/ 'jam dpal gyis smras pa/ sred med kyi bu byang chub sems dpa' sems dpa' chen po gang dag gi rna lam du tha na ting nge 'dzin 'di grag par 'gyur ba'am/ lag tu 'ong ba'am/ glegs bam du byed pa'am/ kha ton du byed la/ de yang spong bar mi byed pa de dag ni khyim na gnas pa 56-1-117a zhes nga mi smra ste/ de dag ni rab tu byung ba kho na yin par brjod par bya'o/ /de ci'i phyir zhe na/ 'di ltar byang chub sems dpa' ting nge 'dzin 'di khong du chud par bya ba'i phyir/ brtson pa rnams ni 'du shes thams cad dang bral bar 'gyur te/ gnas pa gang dang gang gis gnas pa de dang / des bsod nams dang ye shes mi zad pa thams cad mi spong ngo / /sred med kyi bu byang chub sems dpa' rnams ni sems can yongs su smin par bya ba'i phyir/ kha dog dang / gzugs sna tshogs ston to/ /sred med kyi bu gzhan yang de dag ni thams cad du yang 'brel la/ thams cad du yang ma gtogs te/ sred med kyi bu 'di lta ste/ dper na zla ba dang / nyi ma 'di gnyis ni thams cad du 'brel te/ gling bzhi po dag tu yang rgyu la thams cad du yang ma gtogs pa de bzhin du/ sred med kyi bu byang chub sems dpa' de dag ni spyod pa thams cad la yang mi rten la/ khyim gyi sa na gnas pa yang ma yin/ khyim gyi chos la yang mi rten/ rab tu byung ba yang ma yin/ rab tu byung ba la yang mi gnas/ dge sbyong gi chos la yang mi rten te/ de dag ni gnyis ka'i phyogs su brjod du med do/ /de ci'i phyir zhe na/ byang chub sems dpa' de dag ni skye ba'i gnas thams cad la mi rten par blta bar bya ba'i phyir ro/ /sred med kyi bu dper na/ nor bu rin po che chen po bai dUr+ya ni snod gang dang gang na gnas kyang rung ste/ de dang de nyid na nor bu rin po che'i rang bzhin mi 'dor ba de bzhin du/ sred med kyi bu byang chub sems dpa' ting nge 'dzin 'di la gnas pa rnams na/ khyim gyi sa na gnas pa de dag kyang / rab tu byung ba zhes brjod par bya ste/ chos kyi dbyings kyi ngo bo nyid de yang mi 'dor ro/ /de skad ces smras nas/ byang chub sems dpa' sred med kyi bus 'jam dpal gzhon nur gyur pa la 'di skad ces smras so/ /'jam dpal byang chub 56-1-117b sems dpa' sems dpa' chen po gnas pa gang gis gnas na/ bsod nams thams cad bsdus pa'i ting nge 'dzin 'di las yongs su nyams par mi 'gyur la/ bsod nams kyi tshogs dang / ye shes kyi tshogs mi zad pa yang 'thob par 'gyur ro/ / 'jam dpal gyis smras pa/ sred med kyi bu bzhi po 'di dag ni byang chub sems dpa' rnams kyi gnas pa yin te/ bzhi gang zhe na/ 'di lta ste/ byang chub sems dpa' rnams ni lus dang / srog la lhag par zhen pa med par gnas pa yin te/ de dag rnyed pa dang / bkur sti dang / tshigs su bcad pa 'dod pa ma yin pa dang / byang chub sems dpa' rnams ni stong pa nyid dang / mtshan ma med pa dang / smon pa med pa la gnas pa yin te/ nyan thos dang / rang sangs rgyas kyi nges pa la 'jug pas gnas pa ma yin pa dang / byang chub sems dpa' rnams ni sangs rgyas kyi ye shes dang / so so yang dag par rig pa 'dod pa yin te/ g.yo ba dang / rlom sems dang / kun tu rtog pa dang / rnam par rtog pa mi 'dzin par gnas pa dang / byang chub sems dpa' rnams ni sems can thams cad 'dra bar thar pa la gnas pa yin te/ bdag dang / sems can dang / srog dang / gso ba dang / skyes bu dang / gang zag la mi dmigs par gnas pa'o/ /sred med kyi bu byang chub sems dpa' rnams kyi gnas pa bzhi po de dag ni gnas pa'i mchog dang / rab dang / rab mchog yin te/ bsod nams kyi tshogs mi zad pa dang / ye shes kyi tshogs mi zad par 'gyur ba nas lta ba'i rnam pa thams cad spong bar 'gyur ba dang / sangs rgyas kyi chos thams cad kyi bar du rtogs par 'gyur ba'o/ /byang chub sems dpa' sred med kyi bus smras pa/ 'jam dpal ji ltar na byang chub sems dpa' rnams kyis gnas pa 'di dag thob par 'gyur zhing / khyim gyi gnas nas kyang mngon par 'byung bar 'gyur/ 'jam 56-1-118a dpal gyis smras pa/ sred med kyi bu bzhi po 'di dag ni byang chub sems dpa' rnams kyi gnas pa yin te/ bzhi gang zhe na/ 'di lta ste/ byams pa la gnas pa dang / snying rje la gnas pa dang / dga' ba la gnas pa dang / btang snyoms la gnas pa ste/ sred med kyi bu bzhi po de dag ni byang chub sems dpa' rnams kyi gnas pa yin no/ /sred med kyi bu byang chub sems dpa' gang yang rung ste/ grong ngam/ dgon pa na gnas kyang rung / gnas pa bzhi po de dag gis gnas pa de ni gnas pa la gnas pa zhes brjod par bya'o/ /gal te rnam par rgyal byed dang 'dra ba'i khyams dang / khang pa brtsegs pa dag na gnas suzin kyang / gnas pa na gnas pa zhes brjod par mi bya'o/ /sred med kyi bu gal te byang chub sems dpa' tshangs pa'i gnas pa bzhi dang bral bzhin du/ bdag nyid gnas pa la gnas so snyam du 'dzin na/ de ni bdag dang / lha dang / mi dang / lha ma yin du bcas pa'i 'jig rten slu ba yin te/ yul 'khor gyi bsod snyoms za ba yang don med par 'gyur ro/ /sred med kyi bu byang chub sems dpa' tshangs par spyad pa spyod pa gang dag su yang rung ba de dag thams cad ni tshangs pa'i gnas pa chen po bzhis nges par 'byung ngo / /sred med kyi bu de bas na tshangs pa'i gnas pa bzhi po rnams dang / 'phags pa'i bsam gtan 'thob pa la mi snang ba gang dag yin pa de dag ni tshangs par spyod pa la gnas pa las thag ring la/ nga rgyal ma spangs pa'i phyir 'jig rten pa'i 'jig tshogs la lta bas rlom sems su byed par 'gyur ro/ /byang chub sems dpa' sred med kyi bus smras pa/ 'jam dpal ji ltar na/ byang chub sems dpa' rnams byams pa la gnas pa yin/ ji ltar na snying rje la gnas pa yin/ ji ltar na dga' ba la gnas pa yin/ ji ltar na btang snyoms la gnas pa yin/ 'jam dpal gyis smras pa/ sred med kyi 56-1-118b bu gal te byang chub sems dpa' 'di ltar gnas par byed de/ bdag gis sems can thams cad bsgral bar bya'o snyam du sems na byams pa la gnas pa yin no/ /bdag gis sems can thams cad dgrol bar bya'o snyam du sems na snying rje la gnas pa yin no/ / bdag gis sems can thams cad sangs rgyas kyi chos rnams la dgod par bya'o snyam du sems na dga' ba la gnas pa yin no/ /bdag gis sems can thams cad 'jig rten gyi chos rnams las rnam par grol bar bya'o snyam du sems te/ gal te byang chub sems dpa' de ltar gnas na btang snyoms la gnas pa yin no/ /sred med kyi bu gzhan yang byang chub sems dpa' gang gi tshe chos kyi dbyings stong pa la mos pa de'i tshe byams pa la gnas pa yin no/ /gang gi tshe chos thams cad dben pa la mos pa de'i tshe snying rje la gnas pa yin no/ /gang gi tshe chos thams cad chags pa med pa dang / bcings pa med dang / grol ba med par mos pa de'i tshe dga' ba la gnas pa yin no/ /gang gi tshe chos thams cad song ba med pa dang / 'ong ba med pa la mos pa de'i tshe btang snyoms la gnas pa yin te/ sred med kyi bu de ltar na/ byang chub sems dpa' byams pa dang / snying rje dang / dga' ba dang / btang snyoms la gnas pa yin no/ /sred med kyi bu gzhan yang byang chub sems dpa' gang gi tshe chos bdag med pas mi skrag pa de'i tshe byams pa la gnas pa yin no/ /gang gi tshe chos thams cad dben pas mi skrag pa de'i tshe snying rje la gnas pa yin no/ /gang gi tshe sangs rgyas kyi chos thams cad mnyam pa'i chos nyid kyis mi skrag pa de'i tshe dga' ba la gnas pa yin no/ /gang gi tshe sangs rgyas kyi zhing thams cad mi zad pa'i chos nyid kyis mi skrag pa de'i tshe btang snyoms la gnas pa yin no/ /sred med kyi bu gzhan yang byams pa ni zhe 'gras pa med pa'i mtshan nyid do/ /snying rje ni kun tu spyod pa med pa'i mtshan nyid do/ / 56-1-119a dga' ba ni gnod sems med pa'i mtshan nyid do/ /btang snyoms ni ma khengs ma dud pa'i mtshan nyid do/ /sred med kyi bu gzhan yang byams pa dang snying rje yin la/ byams pa chen po yang ma yin/ snying rje chen po yang ma yin pa yang yod de/ byams pa chen po dang / snying rje chen po gang yin pa de ni nyan thos dang / rang sangs rgyas thams cad la med do/ /nyan thos dang / rang sangs rgyas la yod pa gang yin pa de ni/ byams pa dang / snying rje yin te/ sems can thams cad bde bar gyur cig ces bya ba 'di ni/ byams pa dang / snying rje yin gyi/ byams pa chen po dang / snying rje chen po ma yin no/ /'o na byams pa chen po dang / snying rje chen po gang yin zhe na/ sems can thams cad la sems snyoms pa gang yin pa de ni byams pa chen po'o/ / sems can thams cad sdug bsngal thams cad las yongs su grol bar byed pa gang yin pa de ni snying rje chen po'o/ /bdag gi bde ba spangs nas 'gro ba lngar skyes pa'i sems can rnams kyi nang du bsams bzhin du srid par 'gro ba len pa gang yin pa de ni byams pa chen po zhes bya'o/ /bdag gis sems can 'di dag 'khor ba'i lam ngan pa las bsgral te/ lam bzang por dgod par bya'o snyam pa gang yin pa de ni snying rje chen po zhes bya'o/ /sred med kyi bu de bas na rnam grangs 'dis kyang khyod kyis nyan thos dang / rang sangs rgyas rnams kyi ni byams pa dang / snying rje yin la/ byams pa chen po dang / snying rje chen po ni ma yin pa yang yod pa de ltar rig par bya'o/ /sred med kyi bu de lta bas na byang chub sems dpa' sems dpa' chen po rnams kyis byams pa chen po dang / snying rje chen po dang ldan par bya'o/ /bstan pa 'di bshad pa na/ srog chags brgyad stong gis bla na med pa yang dag par rdzogs pa'i byang chub tu sems bskyed de/ tshig 'di skad du bcom ldan 'das bdag cag kyang 'jam dpal gzhon nur gyur pa 'dis bshad pa gang 56-1-119b lags pa'i gnas pa 'di dag gis gnas par bgyi'o zhes kyang gsol to/ /byang chub sems dpa' brgyad khris ni bsod nams thams cad bsdus pa'i ting nge 'dzin 'di thob bo/ /srog chags brgyad stong ni chos rnams la chos kyi mig rdul med cing dri ma dang bral ba rnam par dag go/ /de nas bcom ldan 'das la byang chub sems dpa' sred med kyi bus 'di skad ces gsol to/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas bsod nams brgya'i mtshan dang ldan pa zhes bgyi ba de la/ bsod nams ji lta bu dag gis de bzhin gshegs pa'i bsod nams brgya'i mtshan rnams mngon par grub pa lags/ de skad ces gsol pa dang / bcom ldan 'das kyis byang chub sems dpa' sred med kyi bu la 'di skad ces bka' stsal to/ /sred med kyi bu 'jig rten gyi khams gang gA'i klung gi bye ma snyed dag na sems can ji snyed yod pa sems can du bsdu bar bsdus pa de dag thams cad 'khor los sgyur ba'i bsod nams kyi phung po dang ldan par gyur la/ sems can de dag thams cad kyi 'khor los sgyur ba'i bsod nams kyi phung po gang yin pa'i bsod nams kyi phung po de dag gcig tu bsdoms pa ni/ lha'i dbang po brgya byin gcig la yod do/ /sred med kyi bu 'jig rten gyi khams gang gA'i klung gi bye ma snyed dag na/ sems can ji snyed yod pa sems can du bsdu bar bsdus pa de dag thams cad brgya byin gyi bsod nams kyi phung po dang ldan par gyur la/ sems can de dag thams cad kyi brgya byin gyi bsod nams kyi phung po gang yin pa'i bsod nams kyi phung po de dag bsdams pa ni/ tshangs pa gcig la yod do/ /sred med kyi bu 'jig rten gyi khams gang gA'i klung gi bye ma snyed dag na/ sems can ji snyed yod pa sems can du bsdu bar bsdus pa de dag thams cad tshangs pa'i bsod nams kyi phung po dang ldan par gyur la/ sems can de dag thams 56-1-120a cad kyi tshangs pa'i bsod nams kyi phung po gang yin pa'i bsod nams kyi phung po de dag gcig tu bsdams pa ni nyan thos gcig la yod do/ /sred med kyi bu 'jig rten gyi khams gang gA'i klung gi bye ma snyed dag na sems can ji snyed yod pa sems can du bsdu bar bsdus pa de dag thams cad nyan thos kyi bsod nams kyi phung po dang ldan par gyur la/ sems can de dag thams cad kyi nyan thos kyi bsod nams kyi phung po gang yin pa'i bsod nams kyi phung po de dag gcig tu bsdams pa ni/ rang sangs rgyas gcig la yod do/ /sred med kyi bu 'jig rten gyi khams gang gA'i klung gi bye ma snyed dag na/ sems can ji snyed yod pa sems can du bsdu bar bsdus pa de dag thams cad rang sangs rgyas kyi bsod nams kyi phung po dang ldan par gyur la/ nyan thos dang / rang sangs rgyas de dag thams cad kyi bsod nams kyi phung po gang yin pa'i bsod nams kyi phung po de dag ril gyis bsdams pa de lta bu'i bsod nams kyi phung po dang ldan pa'i byang chub sems dpas ni/ bsod nams thams cad bsdus pa'i ting nge 'dzin ces bya ba 'di thob par 'gyur ro/ /sred med kyi bu 'jig rten gyi khams gang gA'i klung gi bye ma snyed dag na sems can ji snyed yod pa sems can du bsdu bar bsdus pa de dag thams cad kyis bsod nams thams cad bsdus pa'i ting nge 'dzin 'di thob par gyur la/ sems can de dag thams cad kyi bsod nams kyi phung po gang yin pa'i bsod nams kyi phung po de dag bsdams pas ni nan gyis dper bya na gtan pa med pa'i mchod sbyin gcig 'grub par 'gyur ro/ /sred med kyi bu de lta bu'i mchod sbyin dang / mchod sbyin gyi 'bras bu'i bsod nams kyi phung po de dag brgya 'gyur du bsgres pas ni de bzhin gshegs pa'i sku la skyes bu chen po'i mtshan gcig mngon par 'grub par 'gyur te/ des na de bzhin gshegs pa bsod nams brgya'i mtshan dang ldan pa zhes bya'o/ /thabs de lta 56-1-120b bu'i de bzhin gshegs pa'i sku la skyes bu chen po'i mtshan sum cu rtsa gnyis kyi bar du mngon par 'grub ste/ de dag ni sems can thams cad kyis bsam par mi nus so/ /des na de bzhin gshegs pa bsod nams bsam gyis mi khyab pa'i mtshan dang ldan pa zhes bya'o/ /bsod nams brgya'i mtshan bstan pa 'di bshad pa na/ stong gsum gyi stong chen po'i 'jig rten gyi khams 'di rnam pa drug tu g.yos te/ snang ba chen pos kyang khyab par gyur to/ /sil snyan 'bum yang ma brdungs par 'khrol bar gyur to/ / me tog gi char chen po yang mngon par bab bo/ /lha dang bcas pa'i 'jig rten yang ngo mtshar du gyur te/ ca co dang ga zha'i sgra bton nas thal mo sbyar te/ de bzhin gshegs pa la phyag 'tshal nas tshig 'di skad du sems can gang dag gis bla na med pa yang dag par rdzogs pa'i byang chub tu sems bskyed pa de dag ni rnyed pa legs par rnyed pa lags so/ /bsod nams brgya'i mtshan 'di lta bu dang ldan par 'gyur ba de dag gis ni brgya byin dang / tshangs pa dang / 'jig rten skyong ba de dag thams cad dang / nyan thos dang / rang sangs rgyas thams cad kyang zil gyis non lags so/ /ting nge 'dzin rin po che 'di sems can gang dag gi rna lam du grag pa'am/ thos nas kyang ma nor bar bsgrub pa de dag kyang rnyed pa legs par rnyed pa lags so/ /sa phyogs gang na ting nge 'dzin 'di spyod pa de dag kyang skal ba dang ldan pa lags so/ /rigs kyi bu 'am rigs kyi bu mo gang dag ting nge 'dzin rin po che 'di rgyas par yang dag par ston pa de dag ni de bzhin gshegs pas byin gyis brlabs par rig par bgyi'o/ /gang du ting nge 'dzin gyi chos kyi rnam grangs 'di rna lam du grags par 'gyur ba der ni 'jig rten gyi khams gang gA'i klung gi bye ma snyed zhugs kyis gtams pa la yang 'bogs te/ ting nge 'dzin 'di mnyan pa'i slad du mchi bar bgyi'o zhes kyang gsol to/ /bcom ldan 'das kyis bka' stsal pa/ rigs kyi bu dag de 56-1-121a ni de bzhin te/ khyed ji skad zer ba bzhin no/ /rigs kyi bu 'am rigs kyi bu mo gang dag ting nge 'dzin 'di mi nyan pa dang / mi 'chang ba dang mi klog pa dang kun chub par mi byed pa dang / gzhan dag la yang rgyas par yang dag par mi ston pa de dag ni bdud kyis byin gyis brlabs par rig par bya'o/ /rigs kyi bu byang chub sems dpa' gang dag bsod nams thams cad bsdus pa'i ting nge 'dzin 'di gzhan dag la rgyas par yang dag par mi ston pa de dag la ni mang du thos pa zhes nga mi smra'o/ /de nas lha'i bu de dag dang byang chub sems dpa' de dag gis 'thun par bcom ldan 'das la 'di skad ces gsol to/ /bsod nams thams cad bsdus pa'i ting nge 'dzin gyi chos kyi rnam grangs 'di ci nas slad ma'i dus na spyod pa dang rgyas par 'gyur bar bcom ldan 'das kyis byin gyis brlab tu gsol/ de nas bcom ldan 'das kyis de'i tshe smin mtshams kyi mdzod spu nas 'od phyung ste/ 'od des 'jig rten gyi khams mtha' yas mu med par snang bar byas so/ /'od de las de bzhin gshegs pa dgra bcom pa yang dag par rdzogs pa'i sangs rgyas kyis chos kyi rnam grangs 'di byin gyis brlabs so zhes sgra yang byung ngo / /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo de bzhin gshegs pa ni ring po mi thogs par zla ba gsum 'das pa na yongs su mya ngan las 'da' bar 'gyur te/ kun dga' bo chos kyi rnam grangs 'di gzung ba dang gzhan dag la yang rgyas par yang dag par bstan pa'i bar gyi phyir khyod la gtad do/ /kun dga' bo sems can gang dag su yang rung ste/ chos kyi rnam grangs 'di 'chang bar byed pa de dag la ni sangs rgyas bcom ldan 'das rnams yongs su mya ngan las 'da' bar mi 'gyur ro/ /chos kyang nub par mi 'gyur ro/ /de ci'i phyir zhe na/ kun dga' bo gal te chos kyi rnam grangs 'di la sgrub par byed na de ni sangs rgyas mthong ba yin la gzhan dag la brjod cing ston pa de ni dam pa'i chos yongs su 'dzin pa yin pa'i phyir ro/ /de nas tshe dang ldan pa kun dga' bo ngus te mchi ma phyis nas/ bcom ldan 56-1-121b 'das la 'di skad ces gsol to/ /skye bo mang po la sman pa dang / skye bo mang po la bde ba dang / 'jig rten la thugs brtse ba dang / skye bo'i tshogs chen po dang / lha dang mi rnams kyi don dang / sman pa dang / bde ba'i slad du bcom ldan 'das de bzhin gshegs pa dgra bcom pa yang dag par rdzogs pa'i sangs rgyas bskal pa'am/ bskal pa las lhag par bzhugs su gsol/ bcom ldan 'das kyis bka' stsal pa/kun dga' bo khyod mya ngan ma byed cig /smre sngags ma 'don cig /kun dga' bo khyod yun ji srid du chos kyi rnam grangs 'di 'chang ba dang / klog pa dang / ston par byed pa de srid du sangs rgyas mthong ba dang 'bral bar mi 'gyur ro/ /de ci'i phyir zhe na/ kun dga' bo de bzhin gshegs pa ni gzugs dang / mtshan dang / dpe byad du blta ba ma yin te/ kun dga' bo ji srid du ji skad bstan pa'i chos kyi rnam grangs 'di lta bu 'di dag mthong ba de nyid sangs rgyas mthong ba yin pa'i phyir ro/ /bcom ldan 'das kyis de skad ces bka' stsal nas/ 'jam dpal gzhon nur gyur pa dang / byang chub sems dpa' sred med kyi bu dang / tshan po che chen po dri ma med pa'i gzi brjid dang / byang chub sems dpa' sems dpa' chen po'i dge 'dun de dag dang / nyan thos chen po de dag dang / tshe dang ldan pa kun dga' bo dang / lha'i bu mang po de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// //'phags pa bsod nams thams cad bsdus pa'i ting nge 'dzin ces bya ba theg pa chen po'i mdo rdzogs so// //rgya gar gyi mkhan po pra dz+nya warma dang / shI len dra bo d+hi dang / zhu chen gyi lo tsA ba ban de ye shes sde la sogs pas bsgyur cing zhus te gtan la phab pa// // |