@#//rgya gar skad du/ Ar+ya mai tri pa ri pr-Its+tsha nA ma ma hA yA na sU tra/ bod skad du/ 'phags pa byams pas zhus pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong gi dge 'dun chen po dang thabs cig tu bzhugs te/ byang chub sems dpa'i dge 'dun chen po dang yang thabs cig go/ /de nas byang chub sems dpa' sems dpa' chen po byams pa stan las langs te/ bla gos phrag pa gcig tu gzar nas/ pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das 'di la chos sbyin pa'i rnam par smin pa gang lags/ de skad ces gsol pa dang / bcom ldan 'das kyis byang chub sems dpa' sems dpa' chen po byams pa la 'di skad ces bka' stsal to/ /byams pa sus stong gsum gyi stong chen po'i 'jig rten gyi khams gang gA'i klung gi bye ma snyed rin po che sna bdun gyis yongs su bkang ste/ de bzhin gshegs pa dgra bcom pa yang dag par rdzogs pa'i sangs rgyas rnams la dbul ba phul ba bas/ gang gis snying rje bas tshigs su bcad pa gcig gzhan gyi rgyud la bzhag na byams pa bsod nams kyi phung po 'di la bsod nams kyi phung po snga ma des brgya'i char yang nye bar mi 'gro/ stong gi cha dang / brgya stong gi cha dang / bye ba'i cha dang / bye ba khrag khrig brgya stong gi cha dang / grangs dang / cha dang / bgrang ba dang / dpe dang rgyur yang mi bzod do/ /bcom ldan 'das kyis de skad ces bka' stsal te/ bde bar gshegs pas de skad gsungs nas/ ston pas gzhan yang 'di skad ces bka' stsal to/ /gang gis gang gA'i bye snyed 'jig rten khams/ /de dag rin chen byur bur bkang byas te/ /dga' rab sems kyis rgyal la phul ba bas/ /gang gis tshigs bcad gcig cig sems can byin/ /rin chen sbyin pa shin tu rgya chen de/ /snying rje bskyed nas tshigs bcad sbyin pa la/ /gang gA'i cha dang grangs su'ang mi phod 57-1-331a na/ /lan gnyis lan gsum sems la ga la zhig /bcom ldan 'das kyis de skad ces bka' stsal nas/ byang chub sems dpa' sems dpa' chen po byams pa dang / byang chub sems dpa' de dag dang / dge slong de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa byams pas zhus pa zhes bya ba theg pa chen po'i mdo rdzogs so// |