@##/ /rgya gar skad du/ Ar+ya sA ga ra nA ga rA dza pa ri prits+tsha nA ma ma hA yA na sU tra/ bod skad du/ 'phags pa klu'i rgyal po rgya mtshos zhus pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgya mtsho chen po na klu'i rgyal po rgya mtsho'i gnas klu'i rgyal po rgya mtsho'i 'khor gyi khyams bkod pa na/ dge slong brgyad stong gi dge 'dun chen po dang / byang chub sems dpa' sems dpa' chen po phyogs bcu'i 'jig rten gyi khams nas 'dus pa mngon par shes pa mngon par shes pa rab tu mang po dang / brgya byin dang / tshangs pa dang / 'jig rten skyong ba dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po bye ba khrag khrig brgya stong mang po dang thabs cig tu bzhugs te/ de nas bcom ldan 'das kyis thams cad dang ldan pa'i 'khor de 'dus par mkhyen nas klu'i rgyal po rgya mtsho la bka' stsal pa/ klu'i bdag po kye ma 'jig rten gnas pa 'di ni las rnam pa sna tshogs kyis bskyod nas sems kyi dmigs pa sna tshogs kyis las rnam pa sna tshogs mngon par 'du bya ba mngon par 58-1-198b 'du byed de/ de yis 'gro ba yang sna tshogs su gyur to/ /klu'i bdag po 'khor 'di dang / rgya mtsho chen po 'di na gzugs rnam pa sna tshogs ji snyed pa dang / gzugs tha mal pa ji snyed snang ba la ltos/ klu'i bdag po 'di dag thams cad ni rang rang gi sems dang / lus dang / ngag dang / yid kyi las dge ba dang mi dge ba sna tshogs su byas pas sna tshogs su gyur pa dag go/ /sems ni gzugs med pa/ bstan du med pa/ gzung du med pa'o/ /klu'i bdag po 'di ltar thams cad ni bcos ma sgrub pas gnas pa'i mtshan nyid de bdag po med pa/ bdag gi med pa/ yongs su 'dzin pa med pa'o/ /de dag ni las ji ltar bsags pas bsgrubs pa sna tshogs su byas pa dag ste/ 'di la byed pa po gang yang med do/ /klu'i bdag po 'di ltar chos 'di dag thams cad ni bsam gyis mi khyab pa sgyu ma'i mtshan nyid kyi ngo bo nyid do/ / klu'i bdag po de la byang chub sems dpa' mkhas pas chos thams cad bsgrubs pas gnas pa'i mtshan nyid du shes nas dge ba'i las mngon par 'du bya ba dag mngon par 'du bya'o/ /de dge ba'i las mngon par 'du bya bar 'du byed na bsgrubs pas gnas pa'i mtshan nyid kyi chos rnams kyis phung po dang / khams dang / skye mched gang dag mngon par 'grub pa de dag mdzes shing blta na sdug la gzugs bzang ba dag tu mngon par 'grub bo/ /klu'i bdag po de bzhin gshegs pa'i sku bsod nams bye ba khrag khrig brgya stong las skyes pa mtshan rnams kyis ji ltar brgyan pa dang / ji ltar bsgrubs pa dang / dpal gyis lha dang mir bcas pa'i 'jig rten zil gyis mnan nas ma chags par bzhugs te/ gang na brgya stong phrag bcu la dbang sgyur ba'i tshangs pa chen po 'di dag mog mog por gyur nas de bzhin gshegs pa'i sku la lta na yang mig zi zi por gyur pa la ltos/ klu'i bdag po byang chub sems dpa' 'di dag gi gzugs dang /mtshan dang / lus dang / rgyan rnams la ltos/ klu'i bdag po de dag thams cad ni dge ba'i las mngon par 'du bya ba rnams kyis mngon par 58-1-199a 'dus byas pas brgyan par bsgrubs pa'o/ /klu'i bdag po khyod kyi bkod pa 'di yang bsod nams thams cad las byung ba'o/ /klu'i bdag po brgya byin dang / tshangs pa dang / 'jig rten skyong ba dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / mi dang mi ma yin pa 'di dag gi bkod pa gang yin pa de dag thams cad kyang bsod nams las byung ba'o/ /klu'i bdag po rgya mtsho chen po 'di na gang dag lus sna tshogs gzugs mi sdug cing dbyibs ma legs pa dang / dbyibs legs pa dang / lus rags shing che ba rnams dang / gang dag lus phra zhing chung ba de dag thams cad kyang rang rang gi sems dang / lus dang / ngag dang / yid kyi las dge ba dang / mi dge bas sna tshogs su gyur pa dag go/ /klu'i bdag po de bas na las bdag gir bya ba las kyi bgo skal la spyod pa/ las kyi skye gnas pa/ las kyi rnam par smin pa la rton par bya'o zhes klu'i bdag po khyed kyis de ltar slobs shig dang / las bdag gir bya ba las kyi bgo skal la spyod pa/ las kyi rnam par smin pa la rton pa khyed dge ba'i chos mngon par 'du bya ba la blo 'jug par 'gyur ro/ /lta ba chud gson par byed par mi 'gyur ro/ /chad pa dang rtag par lta ba la gnas par mi 'gyur ro/ /khyed kyis sbyin pa'i gnas rnams mgu bar byed par 'gyur ro/ / mgu bar byas nas kyang bsti stang byed par 'gyur ro/ /bsti stang byas pa'i rgyu las byung bas lha dang bcas pa'i 'jig rten gyis bsti stang byas par 'gyur ro/ /klu'i bdag po chos gcig gis sems can thams cad kyi ngan 'gro ngan song mi khom pa'i lam thams cad yang dag par gcod do/ /chos gcig po gang zhe na/ 'di lta ste/ bdag ji ltar gyur cing nyin zhag rnams 'gro zhig gu snyam du dge ba'i chos rnams la rab tu rtog pa'o/ /de de ltar dge ba'i chos la rab tu rtog pa mang bas mi dge ba'i sems dang sems las byung ba'i chos rnams kyi go 58-1-199b skabs mi 'byed do/ /de mi dge ba'i chos spangs te dge ba'i chos dang ldan pas bsam pa dag pa'i sems can 'di lta ste/ sangs rgyas dang / byang chub sems dpa' dang / 'phags pa nyan thos dang / rang sangs rgyas rnams dang 'grogs pa rnyed par 'gyur ro/ /klu'i bdag po/ de la dge ba'i chos rnams gang zhe na/ dge ba'i chos rnams zhes bya ba ni lha dang mi'i phun sum tshogs pa'i rtsa ba dang rten to/ /nyan thos dang rang sangs rgyas kyi byang chub kyi rtsa ba dang rten to/ /bla na med pa yang dag par rdzogs pa'i byang chub kyi rtsa ba dang rten to/ /de la rtsa ba dang rten gang zhe na/ gang 'di dge ba bcu'i las kyi lam rnams so/ /dge ba bcu'i las kyi lam de dag kyang gang zhe na/ 'di lta ste/ srog gcod pa spong ba dang / ma byin par len pa dang / 'dod pa la log par g.yem pa dang / brdzun smra ba dang / phra ma dang / tshig rtsub po dang / tshig kyal pa dang / brnab sems dang / gnod sems dang / log par lta ba spong ba'o/ /'di dag ni dge ba bcu'i las kyi lam zhes bya ste/ 'jig rten pa dang / 'jig rten las 'das pa'i phun sum tshogs pa rnams kyi rtsa ba dang rten to/ /klu'i bdag po de la srog gcod pa spangs pa'i skyes bu gang zag ni rab tu zhi bar byed pa'i chos bcu 'thob bo/ /bcu gang zhe na/ 'di lta ste/ 'dis sems can thams cad la mi 'jigs pa byin pa yin no/ /de'i sems sems can thams cad la byams par dmigs pa la gnas pa yin no/ /de'i zhe sdang gi bag chags yang dag par chad pa yin no/ /des nad nyung bar 'gyur bar sgrub pa yongs su bzung ba yin no/ /des tshe ring bar 'gyur ba'i sa bon btab pa yin no/ /de la mi ma yin pa rnams kyang srung ba dang / bskyab pa dang / sbed par byed do/ /bde bar nyal zhing bde bar sad pa dang / sdig pa'i rmi lam mi mthong ba yin no/ /de nyal ba na yang lha rnams srung bar byed do/ /de la shar gnyer ba med pa yin te/ shar gnyer ba'i bag la nyal med pa yin no/ /ngan 'gro thams cad kyis mi 'jigs pa dang / 58-1-200a shi 'phos nas kyang bde 'gro mtho ris kyi 'jig rten du lha rnams kyi nang du skye bar 'gyur te/ klu'i bdag po srog gcod pa spangs pa'i skyes bu gang zag ni rab tu zhi bar byed pa'i chos bcu po de dag 'thob bo/ /srog gcod pa spangs pa'i dge ba'i rtsa ba de gal te bla na med pa yang dag par rdzogs pa'i byang chub tu yongs su sngo na/ de dge ba'i rtsa ba des byang chub thob pa na sems kyi dbang gis tshe tshad med par 'gyur ro/ /klu'i bdag po ma byin par len pa spangs pa'i skyes bu gang zag ni yid brtan pa'i chos bcu 'thob bo/ / bcu gang zhe na/ 'di lta ste/ longs spyod che zhing de'i longs spyod de dag rgyal po dang / rkun po dang / me dang / chu dang / mi mdza' ba dang / nye mtshams kyis mi 'phrogs pa yin no/ /skye bo mang po'i yid du 'ong bas skye bo mang po dga' ba yin no/ /nye ba'i nyon mongs pa med pa yin no/ /nor 'brel pa rnams la yid brtan du rung ba yin no/ /phyogs dang phyogs mtshams rnams su de'i bsngags pa rjod cing de la pha rol gyi gnod pa'i 'jigs pa thams cad med pa yin no/ /de'i dge ba brjod pa'i sgra dang tshigs su bcad pa mngon par 'phags par 'gyur ro/ /bag tsha ba med par 'khor gyi nang du 'jug ste zhum zhum po med par 'gyur ro/ /tshe dang / stobs dang / kha dog dang / bde ba dang / spobs pa dang / longs spyod dang / phyug pa phun sum tshogs pa rab tu 'dzin par 'gyur ro/ /de'i sems sbyin pa yang dag par 'ged pa la 'gro bar 'gyur ro/ /lus dang bral nas kyang bde 'gro mtho ris kyi 'jig rten du lha rnams kyi nang du skye bar 'gyur te/ klu'i bdag po de ltar ma byin par len pa spangs pa'i skyes bu gang zag ni yid brtan pa'i chos bcu po de dag 'thob bo/ /ma byin par len pa spangs pa'i dge ba'i rtsa ba de gal te bla na med pa yang dag par rdzogs pa'i byang chub tu yongs su sngo na/ de dge ba'i rtsa ba des de bzhin gshegs pa nye ba'i nyon mongs pa can ma yin pa'i ye shes can du rang gi mngon par shes 58-1-200b pas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /klu'i bdag po 'dod pa la log par g.yem pa spangs pa'i skyes bu gang zag ni mkhas pas bsngags pa'i chos bzhi 'thob bo/ /bzhi gang zhe na/ 'di lta ste/ dbang po sdom pa dang / rgod pa las yang dag par 'da' ba dang / 'jig rten thams cad kyis bsngags pa dang / chung ma mi 'phrogs pa ste/ klu'i bdag po 'dod pa la log par g.yem pa spangs pa'i skyes bu gang zag ni mkhas pas bsngags pa'i chos bzhi po de dag 'thob bo/ / 'dod pa la log par g.yem pa spangs pa'i dge ba'i rtsa ba de gal te bla na med pa yang dag par rdzogs pa'i byang chub tu yongs su sngo na/ de dge ba'i rtsa ba des skyes bu chen po'i mtshan mdoms kyi sba ba sbubs su nub pa 'thob bo/ /klu'i bdag po brdzun du smra ba spangs pa'i skyes bu gang zag ni lha dang mis bsngags pa'i chos brgyad 'thob bo/ /brgyad gang zhe na/ 'di lta ste/ ud pa la'i dri 'byung bas kha yongs su dag pa 'thob par 'gyur ba dang / 'jig rten thams cad kyi tshad mar 'gyur ba dang / lha dang mi dga' bas dbang gcig por 'gyur ba dang / dbugs 'byin pas 'byung po rnams dogs pa med par 'gyur ba dang / lhag pa'i bsam pa phun sum tshogs pas lus dang / ngag dang / sems yongs su dag par 'gyur ba dang / tshig 'khrul pa med pas mchog tu dga' ba mang bar 'gyur ba dang / tshig gzung bar 'os pas ngag nyan par 'gyur ba dang / shes rab thob pas lha dang mi rnams kyi nang du kha na ma tho ba med par 'gyur ba yin te/ klu'i bdag po brdzun du smra ba spangs pa'i skyes bu gang zag ni lha dang mis bsngags pa'i chos brgyad po de dag 'thob bo/ /brdzun du smra ba spangs pa'i dge ba'i rtsa ba de gal te bla na med pa yang dag par rdzogs pa'i byang chub tu yongs su sngo na/ de dge ba'i rtsa ba des bden pa'i rjes su 'jug pa'i tshig tu 'gyur ro/ /klu'i bdag po phra ma'i tshig spangs pa'i skyes bu gang zag ni mi phyed pa lnga 'thob bo/ /lnga gang zhe na/ 58-1-201a 'di lta ste/ gzhan gyi gnod pa'i 'jigs pa thams cad las shin tu 'da' bas lus mi phyed pa 'thob pa dang / gzhan dag gi la chags pa med pas g.yog mi phyed pa 'thob pa dang / las kyi rnam par smin pa la yid ches pas dad pa mi phyed pa 'thob pa dang / sgrub pa snying por byed pas chos las mi phyed pa 'thob pa dang / mi slu bas mdza' bo mi phyed pa 'thob pa ste/ klu'i bdag po phra ma'i tshig spangs pa'i skyes bu gang zag ni mi phyed pa lnga po de dag 'thob bo/ /phra ma'i tshig spangs pa'i dge ba'i rtsa ba de gal te bla na med pa yang dag par rdzogs pa'i byang chub tu yongs su sngo na/ de dge ba'i rtsa ba des g.yog mi phyed pa'i de bzhin gshegs par 'gyur te/ bdud dang phas kyi rgol ba thams cad kyis kyang de bzhin gshegs pa de'i 'khor dbye bar mi nus so/ /klu'i bdag po tshig rtsub po spangs pa'i skyes bu gang zag ni ngag gi las yongs su dag pa brgyad 'thob bo/ /brgyad gang zhe na/ 'di lta ste tshig ran pa dang / phan pa'i tshig dang / rigs pa'i tshig dang / 'jam pa'i tshig dang / gzung ba'i tshig dang / mnyan pa'i tshig dang / skye bo mang po dga' ba'i tshig dang / ma smad pa'i tshig yin te/ klu'i bdag po tshig rtsub po spangs pa'i skyes bu gang zag ni ngag gi las yongs su dag pa brgyad po de dag 'thob bo/ /tshig rtsub po spangs pa'i dge ba'i rtsa ba de gal te bla na med pa yang dag par rdzogs pa'i byang chub tu yongs su sngo na/ de dge ba'i rtsa ba des de bzhin gshegs pa tshangs pa'i sgra skad bsgrags pa'i dbyangs su 'gyur ro/ /klu'i bdag po tshig kyal pa spangs pa'i skyes bu gang zag ni gcig tu nges pa gsum 'thob bo/ /gsum gang zhe na/ 'di lta ste/ tshig ran pas mkhas pa rnams gcig tu nges par dga' ba dang / lan legs par lon pas gcig tu nges par de'i blo bden pa la 'gro ba dang /bcos ma ma yin par mdza' bas gcig tu nges par lha dang mi'i che ba nyid 'thob pa yin te/ klu'i bdag po tshig kyal pa spangs pa'i skyes bu gang zag ni 58-1-201b gcig tu nges pa gsum po de dag 'thob bo/ /tshig kyal pa spangs pa'i dge ba'i rtsa ba de gal te bla na med pa yang dag par rdzogs pa'i byang chub tu yongs su sngo na/ de dge ba'i rtsa ba des phyad par lung ston cing gzhan du mi gsung ba'i de bzhin gshegs par 'gyur ro/ / klu'i bdag po brnab sems spangs pa'i skyes bu gang zag ni dbang po lnga 'thob bo/ /lnga gang zhe na/ 'di lta ste/ dbang po ma tshang ba med pas lus dang / ngag dang / sems la dbang ba 'thob pa dang / dgra thams cad kyis mi rdzi bas longs spyod dang dbang phyug la dbang ba rgya chen po 'thob pa dang / bsod nams kyi dbang gis de'i sems longs spyod dang yongs su spyod pa rgya chen po thams cad la 'gro ba dang / dgab pa mchog 'thob pas rgyal po dang dbang pos mchod pa dang / sngon phrag dog med pas longs spyod ji ltar smon pa rnams de las stong phrag brgya 'gyur du khyad par du 'gyur ba 'thob pa ste/ klu'i bdag po brnab sems spangs pa'i skyes bu gang zag ni dbang po lnga po de dag 'thob bo/ /brnab sems spangs pa'i dge ba'i rtsa ba de gal te bla na med pa yang dag par rdzogs pa'i byang chub tu yongs su sngo na/ de dge ba'i rtsa ba des 'jig rten gsum gyis mchod pa'i de bzhin gshegs pa ston pa gcig pur 'gyur ro/ /klu'i bdag po gnod sems spangs pa'i skyes bu gang zag ni yid bde bar byed pa'i chos brgyad 'thob bo/ /brgyad gang zhe na/ 'di lta ste/ de'i sems rnam par mi 'tshe ba la 'gro bar 'gyur ba dang / de'i sems gnod sems rab tu zhi ba la 'gro bar 'gyur ba dang / de'i sems rtsod pa med cing 'thab pa med pa la 'gro bar 'gyur ba dang / de'i sems drang zhing mnyen la des pa la 'gro bar 'gyur ba dang / 'phags pa'i skye bor grags par 'gyur ba dang / sems can thams cad la bde bar dga' zhing byams pa'i sems phan pa'i dngos po mang bar 'gyur ba dang / bde ba la mngon par dga' zhing dad pa mang la skye bo mang pos bsti stang bya bar 'gyur ba dang / sems snum zhing las su rung 58-1-202a bas tshangs pa'i 'jig rten du skye ba 'thob pa mi dkon par 'gyur ba ste/ klu'i bdag po gnod sems spangs pa'i skyes bu gang zag ni yid bde bar byed pa'i chos brgyad po de dag 'thob bo/ /gnod sems spangs pa'i dge ba'i rtsa ba de gal te bla na med pa yang dag par rdzogs pa'i byang chub tu yongs su sngo na/ de dge ba'i rtsa ba des sems thogs pa med pa'i de bzhin gshegs pa blta bas mi ngoms par 'gyur ro/ /klu'i bdag po log par lta ba spangs pa'i skyes bu gang zag ni yon tan gyi chos bcu 'thob bo/ / bcu gang zhe na/ 'di lta ste/ bsam pa dge bar 'gyur zhing grogs po dge ba rnyed par 'gyur ba yin/ las kyi rnam par smin pa la yid ches pas srog gi phyir yang sdig pa'i las mi byed pa yin/ lhar sangs rgyas 'dzin gyi gzhan lhar mi 'dzin pa yin/ ngo mtshar dang bkra shis dang bral bas lta ba drang ba yin/ grogs lha dang mi yin gyi dud 'gro'i skye gnas pa dang gshin rje'i 'jig rten pa grogs su mi 'gyur ba yin/ bsod nams sbyangs pas khyad par du 'gro ba yin/ log pa thams cad med pas 'phags pa'i lam du zhugs pa yin/ 'jig tshogs la lta ba dang bral zhing sdig pa thams cad yongs su spangs pa yin/ yang dag par song zhing yang dag par zhugs pas sgrib pa med par mthong ba yin/ lha dang mi rnams kyi nang du mi khom pa dang bral ba yin te/ klu'i bdag po log par lta ba spangs pa'i skyes bu gang zag ni yon tan gyi chos bcu po de dag 'thob bo/ /log par lta ba spangs pa'i dge ba'i rtsa ba de gal te bla na med pa yang dag par rdzogs pa'i byang chub tu yongs su sngo na/ dge ba'i rtsa ba des de la sangs rgyas kyi chos thams cad mngon du 'gyur te/ mngon par shes pa myur ba'i de bzhin gshegs par 'gyur ro/ /klu'i bdag po dge ba bcu'i las kyi lam 'di dag ni 'jig rten pa dang / 'jig rten las 'das pa'i phun sum tshogs pa nas bla na med pa yang dag par rdzogs pa'i byang chub kyi bar gyi rtsa ba dang rten to/ bzlog 58-1-202b na mi dge ba bcu'i las kyi lam rnams te/ de dag shas cher bsten cing bsgoms te mang du byas na sems can dmyal ba'i rgyu'o/ /'bring ni dud 'gro'i skye gnas kyi rgyu'o/ /chung ngu ni gshin rje'i 'jig rten gyi rgyu'o/ /klu'i bdag po de la srog gcod pa bsten cing bsgoms te mang du byas na sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang rnam par smin pa gnyis mngon par sgrub ste/ tshe thung ba dang / nad mang bar 'gyur ba'o/ /ma byin par len pas ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang rnam par smin pa gnyis mngon par sgrub ste/ longs spyod chung ba dang / thun mong gi longs spyod du 'gyur ba'o/ / 'dod pa la log par g.yem pas ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang rnam par smin pa gnyis mngon par sgrub ste/ g.yog 'khor yid brtan du mi rung ba dang / 'gran zla dang bcas pa'i chung mar 'gyur ba'o/ /brdzun du smra bas ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang rnam par smin pa gnyis mngon par sgrub ste/ skur pa mang ba dang / gzhan gyis slu bar 'gyur ba'o/ /phra mas ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang rnam par smin pa gnyis mngon par sgrub ste/ g.yog 'khor mi 'dum pa dang / g.yog 'khor ngan par 'gyur ba'o/ /tshig rtsub pos ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang 58-1-203a rnam par smin pa gnyis mngon par sgrub ste/ yid du mi 'ong ba thos pa dang / thab mo'i tshig tu 'gyur ba'o/ /tshig kyal pas ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang rnam par smin pa gnyis mngon par sgrub ste/ gzung bar 'os pa'i tshig ma yin pa dang / ma nges pa'i spobs par 'gyur ba'o/ /brnab sems kyis ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang rnam par smin pa gnyis mngon par sgrub ste/ chog mi shes pa dang / 'dod pa che bar 'gyur ba'o/ /gnod sems kyis ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /de nas gal te mi rnams kyi nang du skyes na yang rnam par smin pa gnyis mngon par sgrub ste/ mi phan pa 'dod pa dang / gzhan gyis gnod pa bya bar 'gyur ba'o/ /log par lta bas ni sems can dmyal bar khrid do/ /dud 'gro'i skye gnas su khrid do/ / gshin rje'i 'jig rten du khrid do/ /de nas gal te mi rnams kyi nang du skyes na yang rnam par smin pa gnyis mngon par sgrub ste/ lta ba ngan par ltung ba dang / g.yo sgyu can du 'gyur ba'o/ /klu'i bdag po de ltar na mi dge ba bcu po 'di dag gis sdug bsngal gyi phung po chen po tshad med pa yang dag par sgrub par 'gyur ro/ /klu'i bdag po de la srog gcod pa spangs pa'i byang chub sems dpas sbyin pa byin na longs spyod che bar 'gyur/ longs spyod mi 'phrogs pa dang tshe ring bar 'gyur ro/ /byang chub sems dpa'i spyad pa spyod pa na yang gzhan gyis gnod pa bya ba'i 'jigs pa las yang dag par 'das par 'gyur ro/ /klu'i bdag po ma byin par len pa spangs pa'i byang chub sems dpas sbyin pa byin na longs spyod che bar 'gyur/ longs spyod mi 'phrogs pa dang dngos po thams cad la mi lta bar yongs su gtong ba can du 58-1-203b 'gyur ro/ /byang chub sems dpa'i spyad pa spyod pa na yang sangs rgyas kyi chos thams cad yang dag par bsgrubs pas bla na med pa'i chos rnyed par 'gyur ro/ /klu'i bdag po 'dod pa la log par g.yem pa spangs pa'i byang chub sems dpas sbyin pa byin na longs spyod che bar 'gyur/ longs spyod mi 'phrogs pa dang chung ma mi g.yem par 'gyur ro/ /byang chub sems dpa'i spyad pa spyod pa na yang ma dang / bu dang / chung ma la su yang sdang ba'i sems kyis lta bar mi 'gyur ro/ /klu'i bdag po brdzun du smra ba spangs pa'i byang chub sems dpas sbyin pa byin na longs spyod che bar 'gyur/ longs spyod mi 'phrogs pa dang / skur pa 'debs pa med par 'gyur ba ni nan tan srung bar 'gyur ro/ /byang chub sems dpa'i spyad pa spyod pa na yang ji skad smras pa de bzhin byed de yi dam la brtan par 'gyur ro/ /klu'i bdag po phra ma'i tshig spangs pa'i byang chub sems dpas sbyin pa byin na longs spyod che bar 'gyur/ longs spyod mi 'phrogs pa dang g.yog 'khor mi phyed par 'gyur ro/ /byang chub sems dpa'i spyad pa spyod pa na yang bsam pa 'thun pas byang chub sems dpa'i g.yog 'khor 'thob bo/ /klu'i bdag po tshig rtsub po spangs pa'i byang chub sems dpas sbyin pa byin na longs spyod che bar 'gyur/ longs spyod mi 'phrogs pa dang / gzung ba'i tshig tu 'gyur/ btsun pa'i tshig tu 'gyur ro/ /byang chub sems dpa'i spyad pa spyod pa na yang 'khor ma mgu bar su yang mi 'gro'o/ /klu'i bdag po tshig kyal pa spangs pa'i byang chub sems dpas sbyin pa byin na longs spyod che bar 'gyur/ longs spyod mi 'phrogs pa dang / mnyan par 'os pa'i tshig tu 'gyur/ yid ches pa'i tshig tu 'gyur ro/ /byang chub sems dpa'i spyad pa spyod pa na yang the tsom thams cad gcod pa la mkhas par 'gyur ro/ /klu'i bdag po brnab sems spangs pa'i byang chub sems dpas sbyin pa byin na longs spyod che bar 'gyur/ longs spyod mi 'phrogs pa dang / longs spyod dang yongs su spyod pa rgya chen po la de'i sems 'gro bar 'gyur ro/ /byang chub 58-1-204a sems dpa'i spyad pa spyod pa na yang rgya chen po la mos shing dbang che bar grags par 'gyur ro/ /klu'i bdag po gnod sems spangs pa'i byang chub sems dpas sbyin pa byin na longs spyod che bar 'gyur/ longs spyod mi 'phrogs pa dang / mdzes pa dang skye bo mang po dga' zhing yid du 'ong bar 'gyur ro/ /byang chub sems dpa'i spyad pa spyod pa na yang thogs pa med pa'i blo dang / thogs pa med pa'i sems dang / dbang po ma tshang ba med par 'gyur ro/ /klu'i bdag po log par lta ba spangs pa'i byang chub sems dpas sbyin pa byin na longs spyod che bar 'gyur/ longs spyod mi 'phrogs pa dang / sangs rgyas la dad cing yang dag par lta ba'i khyim du skye'o/ /byang chub sems dpa'i spyad pa spyod pa na yang sangs rgyas la lta ba dang / chos nyan pa dang / dge 'dun la bsnyen bkur byed pa dang / byang chub tu sems skyed pa dang mi 'bral bar 'gyur ro/ /klu'i bdag po de ltar dge ba bcu'i las kyi lam 'di dag sbyin pas brgyan na 'byor pa chen por 'gyur ro/ /dge ba bcu'i las kyi lam 'di dag nyid tshul khrims kyis brgyan na sangs rgyas kyi chos thams cad kyi don du smon pa yongs su rdzogs par 'gyur ro/ /dge ba bcu'i las kyi lam 'di dag nyid bzod pas brgyan na mtshan dang / dpe byad bzang po dang / sangs rgyas kyi dbyangs yongs su rdzogs par 'gyur ro/ /de bzhin du sbyar te brtson 'grus kyis brgyan na bdud phyir rgol ba bcom pa dang / sangs rgyas kyi chos thams cad rdzogs par 'gyur ro/ /bsam gtan gyis brgyan na dran pa dang / blo gros dang / rtogs pa dang / ngo tsha shes pa dang / dga' ba yongs su dag par 'gyur ro/ /shes rab kyis brgyan na lta ba ngan pa thams cad yang dag par 'joms par 'gyur ro/ /byams pas brgyan na sems can thams cad la khong khro ba med pa'i sems su 'gyur ro/ /snying rjes brgyan na sems can thams cad yongs su mi gtong bar 'gyur ro/ /dga' bas brgyan na zhum pa med pa'i sems su 'gyur ro/ / 58-1-204b btang snyoms kyis brgyan na rjes su chags pa dang khong khro ba spong bar 'gyur ro/ /bsdu ba'i dngos pos brgyan na sems can thams cad yongs su smin par byed par 'gyur ro/ /dran pa nye bar gzhag pas brgyan na lus dang / tshor ba dang / sems dang / chos la mkhas par 'gyur ro/ /yang dag par spong bas brgyan na mi dge ba'i chos thams cad spong ba dang / dge ba'i chos thams cad yongs su rdzogs par 'gyur ro/ /rdzu 'phrul gyi rkang pas brgyan na lus dang / sems yang bar 'gyur ro/ /dbang po lngas brgyan na dad pa brtan pa dang / brtson 'grus 'bar ba dang / rmongs pa med pa dang / sems las su rung ba la mkhas pa dang / nyon mongs pa thams cad spong ba la mkhas par 'gyur ro/ /stobs kyis brgyan na rdzi ba med cing dbul ba dang nyes pa thams cad 'joms par 'gyur ro/ /byang chub kyi yan lag gis brgyan na chos thams cad yang dag pa ji lta ba bzhin du khong du chud par 'gyur ro/ /lam gyis brgyan na yang dag pa'i ye shes 'grub par 'gyur ro/ /zhi gnas kyis brgyan na nyon mongs pa thams cad 'joms par 'gyur ro/ /lhag mthong gis brgyan na chos thams cad yang dag pa ji lta ba bzhin du khong du chud pa'i shes rab dang ye shes su 'gyur ro/ /thabs kyis brgyan na 'dus byas dang 'dus ma byas kyi bde ba 'thob par 'gyur ro/ /klu'i bdag po mdor na dge ba bcu'i las kyi lam 'di dag gis stobs bcu yongs su rdzogs par 'gyur ro/ /mi 'jigs pa bzhi 'thob pa dang / sangs rgyas kyi chos ma 'dres pa bcwa brgyad 'thob pa nas/ sangs rgyas kyi chos thams cad kyi bar dag 'thob pa yongs su rdzogs par 'gyur ro/ /klu'i bdag po de bas na dge ba bcu'i las kyi lam 'di dag rgya cher rnam par dbye bas brgyan pa'i phyir brtson par gyis shig /klu'i bdag po 'di lta ste/ dper na sa la gnas pa'i grong dang / grong khyer dang / grong rdal dang / ljongs dang / yul 'khor dang / rgyal po'i pho brang 'khor thams cad dang / rtswa dang / 58-1-205a shing gel pa dang / sman dang / nags tshal thams cad dang / las kyi mtha' thams cad dang / sa bon gyi tshogs thams cad dang / 'byung ba'i tshogs thams cad dang / lo tog thams cad skyed pa dang / rmo ba brko ba bya ba 'byung ba de dag gi gnas ni sa yin no/ /klu'i bdag po de bzhin du dge ba bcu'i las kyi lam rnams kyang lha dang / mir skye ba'i rten to/ /slob pa dang / mi slob pa'i 'bras bu rnyed pa dang / nyan thos dang / rang sangs rgyas kyi byang chub dang / sangs rgyas dang byang chub sems dpa'i spyod pa thams cad kyi rten yin pa nas/ sangs rgyas kyi chos thams cad kyi bar gyi rten yin no/ /bcom ldan 'das kyis de skad ces bka' stsal nas/ klu'i rgyal po rgya mtsho dang / dge slong de dag dang / byang chub sems dpa' de dag dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// // 'phags pa klu'i rgyal po rgya mtshos zhus pa zhes bya ba theg pa chen po'i mdo rdzogs so// //rgya gar gyi mkhan po dzi na mi tra dang / dA na shI la dang / mu ne bar ma dang / zhu chen gyi lo ts+tsha ba ban+de ye shes sde la sogs pas bsgyur cing zhus te skad gsar chad kyis kyang bcos nas gtan la phab pa// // |